Inde ad orientem passus mille quingentos est uilla, quae appellatur bethania; est ibi cripta, ubi lazarus positus fuit, quem dominus suscitauit. Item ad hierusalem in hiericho milia xviii. Descendentibus montem in parte dextra retro monumentum est arbor sicomori, in qua zachaeus ascendit, ut christum uideret. A ciuitate, passus mille quingentos est ibi fons helisei prophetae. Antea si qua mulier ex ipsa aqua bibebat, non faciebat natos. Adlatum est uas fictile heliseo, misit in eo sales et uenit et stetit super fontem et dixit: haec dicit dominus: sanauit aquas has. Ex eo si qua mulier inde biberit, filios faciet. Supra eundem uero fontem [597] est domus rachab fornicariae, ad quam exploratores introierunt et occultauit eos, quando hiericho euersa est, et sola euasit. Ibi fuit ciuitas hiericho, cuius muros gyrauerunt cum arca testamenti filii israel et ceciderunt muri. Ex eo non paret nisi locus, ubi fuit arca testamenti et lapides xii, quos filii israel de iordane leuauerunt. Ibidem iesus filius naue circumcidit filios israel. Et circumcisiones eorum sepeliuit. Item ad hiericho ad mare mortuum milia nouem. Est aqua ipsius ualde amarissima, ubi in totum nullius generis piscis est nec aliqua nauis, et si qui hominum miserit se, ut natet, ipsa aqua eum uersat. [598] Inde ad iordane, ubi dominus a iohanne baptizatus est, milia quinque. Ibi est locus super flumen, monticulus in illa ripa, ubi raptus est helias in caelum.