[1a]
[1b]
[1b.1]༄༅༅། །མུ་སྟེགས་བྱེད་ཀྱི་ལོག་པར་རྟོག་པས་ཐེ་ཚོམ་སྐྱེད་པ་དག །ཡང་སེམས་ཅན་དང་ཞེས་བྱ་བ་རྒྱས་པར་འདྲི་བར་བྱེད་དེ། དེ་ལ་སེམས་ཅན་སྣ་ཚོགས་པ་ནི་ཁམས་དང་འགྲོ་བ་དང་། སྐྱེ་
[1b.2]གནས་ལ་སོགས་པའི་བྱེ་བྲག་གིས་སོ། །སྣོད་སྣ་ཚོགས་པ་ནི་རི་རབ་དང་། གླིང་ལ་སོགས་པའི་བྱེ་བྲག་གིས་སོ། །འདྲེན་མར་བྱེད་པ་རྣམས་ཞེས་བྱ་བ་ནི་དགེ་བ་དང་མི་དགེ་བ་བྱེད་པ་རྣམས་སོ། །ཡང་
[1b.3]ཅིའི་ཕྱིར་དེ་དག་གི་ལུས་ནི་དགའ་དགའ་ལྟར་འདུག་པ་མ་ཡིན་ལ། ལོངས་སྤྱོད་རྣམས་ནི་དགའ་དགའ་ལྟར་འདུག་ཅེ་ན། དེ་ལྟར་ན་ཡུལ་ལ་ཉེ་བར་ལོངས་སྤྱོད་པ། སྲིད་དེ་ལུས་དགའ་དགའ་ལྟར་འདུག་པ་
[1b.4]ཉིད་དུ་བྱ་བའི་ཕྱིར་འགའ་ཞིག་གཉེན་པོར་ཡུལ་ལ་ཉེ་བར་སྤྱོད་པར་འགྱུར་རོ། །འདྲེན་མར་བྱེད་པ་མ་ཡིན་པ་རྣམས་ཞེས་བྱ་བ་ནི་གཟུགས་ལ་སྤྱོད་པ་རྣམས་སོ། །འདོད་པ་ན་སྤྱོད་པའི་ལྷ་དག་ཀྱང་འདྲེན་མར་
[1b.5]བྱེད་པ་མ་ཡིན་པ་དང་འདྲ་སྟེ། ལུས་དང་ཡུལ་དགའ་དགའ་ལྟར་འདུག་པ་སྟེ། དགའ་དགའ་ལྟར་འདུག་པ་ཉིད་ཀྱི་རྒྱུ་ལས་གཉིས་བྱས་པའི་ཕྱིར་རོ། །བསམ་པ་ཞེས་བྱ་བ་ནི་འདི་ནི་འདི་ལྟ་བུ་ཞིག་ཏུ་བྱའོ་
[2a]
[2a.1]སྙམ་དུའོ། །གལ་ཏེ་ངོ་བོ་ཉིད་ལས་ཡིན་ན་ནི་ངག་གི་ལས་གཅིག་པུར་འགྱུར་རོ་ཞེས་བྱ་བ་ནི་ངག་ཉིད་ལས་ཡིན་པས་ན་ངག་གི་ལས་སོ་ཞེས་བྱ་བའི་ཕྱིར་རོ། །གཞན་གཉིས་ལས་ཉིད་མ་ཡིན་ཏེ། ལུས་ཀྱི་ལས་སམ་ལུས་
[2a.2]ཀྱི་ལས་ཡིན་པས་ན། ལུས་ཀྱི་ལས་ཏེ་ཡིད་ཀྱི་ལས་ཀྱང་དེ་དང་འདྲ་བས། ངོ་བོ་ཉིད་ཀྱིས་ནི་ལས་མ་ཡིན་ནོ། །རྒྱུ་གསུམ་གྱིས་ཞེས་བྱ་བ་ནི་རྟེན་དང་ངོ་བོ་ཉིད་དང་ཀུན་ནས་སློང་བས་སོ། །གསུམ་ཞེས་བྱ་བ་ནི། ལུས་དང་། ངག་དང་།
[2a.3]ཡིད་ཀྱི་ལས་རྣམས་སོ། །རྟེན་ལས་ནི་ལུས་ཀྱི་ལས་ཏེ། ལུས་ལ་རྟེན་པའི་ལས་ནི་ལུས་ཀྱི་ལས་ཞེས་བྱའོ། །ངོ་བོ་ཉིད་ཀྱི་ལས་ནི་ངག་གི་ལས་ཏེ། ངག་ཉིད་ངག་གི་ལས་ཞེས་བྱའོ། །ཀུན་ནས་སློང་བ་ལས་ནི་ཡིད་ཀྱི་ལས་ཏེ།
[2a.4]ཡིད་ཀྱིས་ཀུན་ནས་བསླང་བའི་ཕྱིར་རོ། །གཞན་དག་ན་རེ་འགྲོ་བ་ཡིན་ཏེ་ཞེས་བྱ་བ་ནི་གནས་མའི་བུའི་སྡེ་པ་དག་གོ། །བདག་ཉིད་དུ་རེད་མ་ཐག་ཏུ་འཇིག་པ་ཞེས་བྱ་བ་ནི། སྐད་ཅིག་མ་དེ་མ་ཐག་ཏུ་འཇིག་པ་ནི་སྐད་ཅིག་མ་ཡིན་ནོ་
[2a.5]ཞེས་བྱ་བའི་ངེས་པའི་ཚིག་གི་ཚུལ་གྱིས་ན་བདག་ཉིད་དུ་རེད་མ་ཐག་ཏུ་འཇིག་པ་ནི་སྐད་ཅིག་མ་ཞེས་བྱ་བའི་སྒྲར་བརྗོད་དོ། །རྣམ་པ་གཅིག་ཏུ་ན་སྐད་ཅིག་མ་ནི་དུས་ཀྱི་མཐའ་ཡིན་ཏེ། རང་གི་གནས་སྐབས་ན་འདུག་པ་དེ་འདི་ལ་ཡོད་
[2b]
[2b.1]པས་ན་སྐད་ཅིག་པའོ། །འདུས་བྱས་ནི་གདོན་མི་ཟ་བར་འཇིག་པའི་ཕྱིར་རོ་ཞེས་བྱ་བ་ནི་སྐྱེས་མ་ཐག་ཏུ་འཇིག་པའི་ངོ་བོ་ཡིན་ཏེ། འདུས་བྱས་ཡིན་པའི་ཕྱིར། སེམས་དང་སེམས་ལས་བྱུང་བ་བཞིན་ནོ། །དངོས་པོ་རྣམས་འཇིག་པ་ནི་རྒྱུ་མེད་པ་ལས་བྱུང་བ་ཡིན་ནོ་ཞེས་བྱ་བ་ནི་རྒྱུ་མེད་པ་ལས་འབྱུང་
[2b.2]བས་ན་རྒྱུ་མེད་པ་ལས་བྱུང་བ་སྟེ། རྒྱུ་མེད་པ་ཅན་ཞེས་བྱ་བའི་ཐ་ཚིག་གོ། །འདི་ལ་བསྒྲུབ་པ་ནི་འཇིག་པ་ནི་རྒྱུ་མེད་པ་ཅན་ཡིན་ཏེ། དངོས་པོ་མེད་པའི་ངོ་བོ་ཉིད་ཡིན་པའི་ཕྱིར། གཏན་མེད་པ་བཞིན་ནོ། །ཤིང་ལ་སོགས་པ་དག་མེ་དང་འབྲེལ་པ་ལས་འཇིག་པའང་མཐོང་ཞེས་བྱ་
[2b.3]བ་ལ་སོགས་པ་ཞེས་བྱ་བའི་སྒྲས་ནི་གཟུགས་ལ་སོགས་པ་བསྡུའོ། །མེ་དང་འབྲེལ་པ་ལས་འཇིག་ཅེས་བྱ་བ་ནི། ཆོས་ཀྱི་རང་གི་ངོ་བོ་ལས་བཟློག་པ་མངོན་སུམ་གྱི་སྒོ་ནས་འོངས་སོ་ཞེས་དམ་བཅས་པའི་སྐྱོན་སྟོན་པར་བྱེད་པ་ཡིན་ནོ། །དེ་ཉིད་ཀྱི་ཕྱིར། མཐོང་བ་ལས་བརླིང་བའི་ཚད་མ་ཡང་མེད་ཅེས་བྱ་བ་སྨོས་ཏེ། མངོན་སུམ་
[2b.4]པས་བརླིང་བའི་ཚད་མ་ནི་མེད་དོ་ཞེས་བྱ་བའི་ཐ་ཚིག་གོ། །སློབ་དཔོན་གྱིས་ཕ་རོལ་པོ་དག་མངོན་སུམ་ཡིན་པར་མངོན་པའི་ང་རྒྱལ་བྱེད་པར་བསྟན་པའི་ཕྱིར་རེ་ཞིག་ཁྱོད་ཅེས་བྱ་བ་ནས་ཇི་ལྟ་བུར་སེམས་ཞེས་བྱ་བའི་བར་སྨོས་ཏེ། ཤིང་ལ་སོགས་པ་འཇིག་པ་ནི་གཟུགས་ལ་སོགས་པ་བཞིན་དུ་མངོན་སུམ་
[2b.5]དུ་མི་དམིགས་སོ། །སྐད་ཅིག་མ་མ་ཡིན་པར་སྨྲ་བ་རྣམས་ཀྱིས་དེ་དག་ཡང་མི་སྣང་བའི་ཕྱིར་རོ་ཞེས་བྱ་བ་སྨྲས་ཏེ། ཤིང་ལ་སོགས་པ་དེ་དག་མི་སྣང་བའི་ཕྱིར་རོ། །དེ་ལྟར་ན་རྗེས་སུ་དཔག་པའི་སྒོ་ནས་གྲུབ་པར་སྟོན་པར་བྱེད་དེ། ཤིང་ལ་སོགས་པ་འཇིག་པ་ནི་མེ་དང་འབྲེལ་པའི་རྒྱུ་ཅན་ཡིན་ཏེ། དེ་ཡོད་ན་
[2b.6]འབྱུང་བའི་ཕྱིར་རོ། །གང་ཞིག་གང་ཡོད་ན་འབྱུང་བ་དེ་ནི་དེའི་རྒྱུ་ཅན་ཡིན་ཏེ། དཔེར་ན་ས་བོན་ཡོད་ན་འབྱུང་བའི་མྱུ་གུ་ལྟ་བུའོ། །རེ་ཞིག་འདི་དཔྱད་པར་བྱ་སྟེ་ཞེས་བྱ་བ་ནི་མ་ངེས་པ་ཉིད་རྗོད་པར་བྱེད་དོ། །གང་ཞིག་ཡོད་ན་འཇིག་པ་འབྱུང་བ་དེ་ནི་དེའི་རྒྱུ་ཅན་མ་ཡིན་ཏེ། རླུང་དང་འབྲེལ་པ་ཡོད་ན་མར་མེ་འཇིག་
[2b.7]མོད་ཀྱི། འཇིག་པ་དེ་ནི་རླུང་དང་འབྲེལ་པས་བྱས་པ་ཡང་མ་ཡིན་ནོ། །མར་མེ་ནི་སྐད་ཅིག་ཉིད་དུ་ཁས་བླངས་པའི་ཕྱིར། འཇིག་པ་རྒྱུ་མེད་པ་ཅན་དུ་འདོད་པ་ཡིན་པས་མར་མེ་དེ་ནི་སྐྱེས་ནས་འཇིག་པའི་ཕྱིར་རང་ཞིག་པ་ཡིན་ལ། རླུང་དང་འབྲེལ་བའི་ཕྱིར་གཞན་མ་སྐྱེས་ན་མི་སྣང་བ་ཡིན་གྱི། དེས་བཤིག་པའི་ཕྱིར་
[3a]
[3a.1]ནི་མ་ཡིན་ནོ། །དེ་བཞིན་དུ་དྲིལ་བུའི་སྒྲ་སྐད་ཅིག་མར་འདོད་པ་ཡང་ལག་པ་དང་འབྲེལ་པ་ཡོད་ན་དྲིལ་བུའི་སྒྲ་འཇིག་མོད་ཀྱི། དེ་ནི་དེས་བྱས་པ་མ་ཡིན་གྱི། སྐད་ཅིག་མ་ཡིན་པའི་ཕྱིར་དྲིལ་བུའི་སྒྲ་ནི་རང་ཞིག་ལ་དེས་གེགས་བྱས་པའི་ཕྱིར། གཞན་མ་སྐྱེས་ན་མི་སྣང་བ་ཡིན་གྱི་དེས་བཤིག་
[3a.2]པའི་ཕྱིར་ནི་མ་ཡིན་ནོ། །དེ་ལྟ་བས་ན་དོན་འདི་ནི་རྗེས་སུ་དཔག་པས་བསྒྲུབ་པར་བྱ་བ་ཡིན་ཏེ། མངོན་སུམ་དུ་མ་གྲུབ་པོ་སྙམ་དུ་བསམས་པ་ཡིན་ནོ། །དེ་ལྟ་བས་ན་གང་ཞིག་ཡོད་ན་འགའ་ཞིག་འཇིག་པ་གང་ཡིན་པ་དེ་ནི་དེས་བྱས་པ་ཡིན་ནོ་ཞེས་བྱ་བ་དེ་མ་ངེས་པ་ཡིན་ནོ། །འདི་ལ་རྗེས་སུ་དཔག་པ་
[3a.3]གང་ཞེ་ན་ཞེས་བྱ་བ་ནི་འཇིག་པ་ནི་རྒྱུ་མེད་པ་ཅན་ཡིན་ནོ་ཞེས་བྱ་བའི་དོན་འདི་ལ་རྗེས་སུ་དཔག་པ་གང་ཞེ་ན་ཞེས་བྱ་བ་ཡིན་ནོ། །རེ་ཞིག་མེད་པ་ནི་བྱ་བ་མ་ཡིན་པའི་ཕྱིར་ཞེས་ནི་བཤད་ཟིན་ཏོ་ཞེས་བྱ་བ་ནི་འཇིག་པ་ནི་རྒྱུ་མེད་པ་ཅན་ཡིན་ཏེ། བྱ་བ་མ་ཡིན་པའི་ཕྱིར་ནམ་མཁའ་བཞིན་ནོ། །འདི་ཡང་བྱ་བ་
[3a.4]མ་ཡིན་ཏེ། དངོས་པོ་མེད་པའི་ངོ་བོ་ཉིད་ཡིན་པའི་ཕྱིར་གཏན་མེད་པ་བཞིན་ནོ། །འགའ་ཞིག་རྒྱུ་མེད་པ་ལས་མི་འགྱུར་ཞེས་བྱ་བ་ནི་འགའ་ཡང་རྒྱུ་མེད་པ་ལས་འབྱུང་བར་མི་འགྱུར་ཞེས་བྱ་བའི་ཐ་ཚིག་གོ། །སྐྱེ་བ་བཞིན་དུ་ཞེས་བྱ་བ་ནི་ཟློག་པའི་དཔེ་ཡིན་ཏེ། ཇི་ལྟར་སྐྱེ་བ་སྟེ་བདག་ཉིད་དུ་རེད་པའི་མཚན་
[3a.5]ཉིད་རྒྱུ་དང་བཅས་པ་ཁོ་ན་ཡིན་གྱི། རྒྱུ་མེད་པ་ཅན་ནི་མ་ཡིན་པ་ལྟར་འཇིག་པ་ཡང་དེ་དང་འདྲ་བར་འགྱུར་བ་ཞིག་ན་དེ་ལྟ་ཡང་མ་ཡིན་ནོ། །ཇི་ལྟ་ཞེ་ན། སྐད་ཅིག་མ་བློ་དང་། སྒྲ་དང་། མེ་ལྕེ་དག་འཇིག་པ་རྒྱུ་མེད་པ་ལས་བྱུང་བ་ཡང་མཐོང་ཞེས་བྱ་བ་སྨོས་ཏེ། དེ་ལྟར་ན་ཆོས་ཀྱི་རང་གི་ངོ་བོ་ལས་ཟློག་
[3a.6]པ་རྗེས་སུ་དཔག་པའི་སྒོ་ནས་འོངས་པ་ཡིན་ནོ། །ཤིང་ལ་སོགས་པ་འཇིག་པ་ནི་རྒྱུ་མེད་པ་ལས་བྱུང་བ་ཡིན་ཏེ། འཇིག་པའི་ངོ་བོ་ཉིད་ཡིན་པའི་ཕྱིར། བློ་ལ་སོགས་པ་འཇིག་པ་བཞིན་ནོ། །གང་ཞིག་ཅེས་བྱ་བ་ནི་བྱེ་བྲག་པའོ། །བློ་སྔར་བྱུང་བ་ནི་བློ་ཕྱིས་འབྱུང་བས་འཇིག་ལ། བློ་ཅིག་ཤོས་ནི་བློ་སྔར་
[3a.7]བྱུང་བས་འཇིག་སྟེ། སྒྲ་ཡང་དེ་དང་འདྲ་བར་བརྗོད་པར་བྱའོ། །སྨྲས་པ། དེ་ནི་རིགས་པ་མ་ཡིན་ནོ། །ཅིའི་ཕྱིར་ཞེ་ན། བློ་གཉིས་ཕྲད་པ་མེད་པའི་ཕྱིར་རོ་ཞེས་བྱ་བ་ནི་ཅིག་ཅར་འབྱུང་བ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །གཞིག་པར་བྱ་བ་མེད་པ་ནི་རྒྱུས་འཇིག་པར་མི་བྱེད་དོ། །བློ་དག་
[3b]
[3b.1]ཕྲད་པ་མེད་དོ་ཞེས་བྱ་བ་ཇི་ལྟར་ཤེས་ཤེ་ན། དེའི་ཕྱིར་ཐེ་ཚོམ་ཅན་དང་། ངེས་པའི་ཤེས་པ་དག་ཕྲད་པར་ནི་རིགས་པ་མ་ཡིན་ནོ་ཞེས་བྱ་བ་རྒྱས་པར་སྨོས་ཏེ། གང་གི་ཚེ་ཐེ་ཚོམ་ཅན་གྱི་ཤེས་པ་ཡོད་པ་དེའི་ཚེ། ངེས་པའི་ཤེས་པ་མེད་ལ། གང་གི་ཚེ་ངེས་པའི་ཤེས་པ་ཡོད་པ་དེའི་ཚེ། ཐེ་ཚོམ་ཅན་
[3b.2]གྱི་ཤེས་པ་མེད་དོ་ཞེས་བྱ་བ་འདི་ནི་རང་གི་ཉམས་ལ་ཡོད་པ་ཡིན་ནོ། །དེ་བཞིན་དུ་བདེ་བ་དང་སྡུག་བསྔལ་དག་དང་། འདོད་ཆགས་དང་ཞེ་སྡང་དག་ཕྲད་པ་མེད་པ་ཡང་སྦྱར་བར་བྱའོ། །ཇི་ལྟར་འགལ་བ་དག་མི་ཕྲད་པ་དེ་བཞིན་དུ་ཤེས་པ་མི་འགལ་བ་དག་ཀྱང་ཕྲད་པ་མེད་པ་ཁོ་ན་ཡིན་ནོ། །གང་གི་ཚེ་ཞེས་
[3b.3]བྱ་བ་རྒྱས་པར་འབྱུང་བ་ནི་ཇི་སྟེ་ཕྲད་པར་འགྱུར་དུ་ཟིན་ཀྱང་འོན་ཀྱང་བློ་དང་སྒྲ་མི་གསལ་བ་དག་གིས་གསལ་བ་དག་འཇིག་པར་ནི་མི་འགྱུར་ཏེ། ཉམ་ཆུང་བ་རིགས་མཐུན་པ་ཡིན་པའི་ཕྱིར་རོ། །ཉམ་ཆུང་བ་རིགས་མཐུན་པས་སྟོབས་དང་ལྡན་པས་འཇིག་པ་ནི་མ་མཐོང་གི་མི་མཐུན་པ་ནི། ཉམ་ཆུང་ངུས་
[3b.4]ཀྱང་འཇིག་པར་འགྱུར་ཏེ། དཔེར་ན་ཆུས་མེ་ལྟ་བུའོ། །གང་ཡང་གནས་པའི་རྒྱུ་མེད་པ་འམ་ཞེས་བྱ་བའི་གཏན་ཚིགས་འདི་ནི་གནས་བརྟན་དབྱིག་བཤེས་ལ་སོགས་པས་གནས་པའི་རྒྱུ་མེད་པའི་ཕྱིར་དངོས་པོ་རྣམས་འཇིག་པ་ཡིན་ནོ་ཞེས་སྨྲས་པ་ཡིན་ན། །དེ་ཡང་རིགས་པ་མ་ཡིན་ཏེ། མེད་པ་ནི་རྒྱུ་ཡིན་
[3b.5]པར་འོས་པ་མ་ཡིན་པས་སོ། །ཆོས་དང་ཆོས་མ་ཡིན་པའི་དབང་གིས་ཞེས་ཟེར་བ་ནི་བྱེ་བྲག་པའོ། །དེ་ལ་སྐྱེ་བ་དང་འཇིག་པའི་རྒྱུ་ཆོས་དང་ཆོས་མ་ཡིན་པ་དག་ཀྱང་སྐད་ཅིག་སྐད་ཅིག་ཉིད་ལ་འཇུག་པ་ཐོབ་པ་དང་། གེགས་བྱེད་པར་འོས་པ་མ་ཡིན་ནོ་ཞེས་བྱ་བ་སྨོས་ཏེ། སྐྱེ་བ་དང་འཇིག་པའི་རྒྱུ་ཆོས་དང་།
[3b.6]སྐྱེ་བ་དང་འཇིག་པའི་རྒྱུ་ཆོས་མ་ཡིན་པའོ། །སྐད་ཅིག་སྐད་ཅིག་ཉིད་ལ་ཞེས་བྱ་བ་ནི་སྐད་ཅིག་མ་དངོས་ལ་སྟེ། ཉེ་བར་བཏགས་པའི་སྐད་ཅིག་མ་ལ་མ་ཡིན་ནོ་ཞེས་བྱ་བའི་ཐ་ཚིག་གོ། །ཡང་ན་སྐད་ཅིག་སྐད་ཅིག་ཉིད་ལ་ཞེས་བྱ་བ་ནི་སྐད་ཅིག་སྐད་ཅིག་ཁོ་ན་ལ་ཞེས་བྱ་བའི་ཐ་ཚིག་གོ། །འཇུག་པ་ཐོབ་པ་དང་།
[3b.7]གེགས་བྱེད་པ་ནི་འཇུག་པ་ཐོབ་པ་དང་། འཇུག་པ་ལ་གེགས་བྱེད་པ་སྟེ། སྐད་ཅིག་སྐད་ཅིག་ལ་འགྱུར་བར་འོས་པ་མ་ཡིན་ནོ། །ཇི་ལྟ་ཞེ་ན། མེ་ལྕེ་གང་ཞིག་བྱུང་ན་ནག་པའམ། བྱམས་པ་ལ་ཕན་འདོགས་པར་འགྱུར་བ་དེའི་ཆོས་འཇུག་པ་རྙེད་པ་ནི་བདེ་བ་སྐྱེད་པར་བྱེད་པས་དེ་ལྟར་ན་བསྐྱེད་པའི་རྒྱུ་ཡང་
[4a]
[4a.1]ཡིན་ནོ། །གལ་ཏེ་དེ་ཞིག་པས་མུན་པའི་གནས་སྐབས་ན་དེ་ལ་ཕན་འདོགས་པར་བྱེད་ན་འཇིག་པའི་རྒྱུ་ཡང་ཡིན་ནོ། །དེ་བཞིན་དུ་ཆོས་མ་ཡིན་པ་ཡང་མེ་ལྕེ་གང་ཞིག་བྱུང་ན་འགའ་ལ་གནོད་པར་འགྱུར་ན་དེའི་ཆོས་མ་ཡིན་པ་འཇུག་པ་རྙེད་པ་ནི་དེ་སྐྱེད་པར་བྱེད་ལ། གལ་ཏེ་དེས་
[4a.2]མུན་པའི་གནས་སྐབས་ན་དེ་ཞིག་པས་གནོད་པར་བྱེད་ན་འཇིག་པའི་རྒྱུ་ཡང་ཡིན་པས་དེ་གཉིས་ཀྱི་འཇུག་པ་རྙེད་པ་ལས་མེ་ལྕེ་འབྱུང་བར་འགྱུར་རོ་ཞེའོ། །དེ་དག་ཁོ་ནས་དེ་དག་གི་འཇུག་པ་འགགས་ཏེ་སྐད་ཅིག་དེ་ཉིད་ལ་དེ་རྣམས་འཇིག་པར་ནི་རིགས་པ་མ་ཡིན་པས། སྐད་ཅིག་སྐད་ཅིག་ལ་གཉིས་
[4a.3]པོ་འཇུག་པ་རྙེད་པ་དང་། གགས་བྱེད་པ་ནི་རུང་བ་མ་ཡིན་ནོ། །རྒྱུ་ཡོངས་སུ་བརྟགས་པ་འདི་ཡང་འདུས་བྱས་ཐམས་ཅད་ལ་བྱ་བར་ནུས་ཞེས་བྱ་བ་རྒྱས་པར་འབྱུང་བ་ནི་ཆོས་དང་ཆོས་མ་ཡིན་པས་འཇིག་གོ་ཞེས་རྒྱུ་ཡོངས་སུ་བརྟག་པ་ནི་འདུས་བྱས་མི་རྟག་པ་རྡུལ་ཕྲན་གཉིས་ལ་སོགས་པའི་གཟུགས་
[4a.4]ལ་སོགས་པ་དང་ལས་ཐམས་ཅད་ལ་ཡང་བྱ་བར་ནུས་པས་དེའི་ཕྱིར། མེ་དང་འབྲེལ་བ་ལས་ཤིང་ལ་སོགས་པ་འཇིག་གོ་ཞེས་བྱ་བ་དེ་ལྟ་བུ་ལ་སོགས་པ་འདི་བརྗོད་པར་མི་བྱའོ། །དེའི་ཕྱིར་ཆོས་དང་ཆོས་མ་ཡིན་པ་དག་ནི་དེ་རྣམས་འཇིག་པའི་རྒྱུ་གཞན་ལ་མི་ལྟོས་པའི་ཕྱིར་འདུས་བྱས་ཐམས་ཅད་
[4a.5]སྐད་ཅིག་མ་ཉིད་དུ་གྲུབ་པས་བརྩད་མི་དགོས་སོ། །དེ་ཉིད་དམ་དེ་དང་འདྲ་བ་ལས་ཞེས་བྱ་བ་ནི་གལ་ཏེ་མེ་དང་འབྲེལ་བས་བུམ་པའི་སྔོན་པོ་ཉིད་བཟློག་ནས་དམར་པོ་ཉིད་སྐྱེད་པར་བྱེད་པ་དེ་ཁོ་ནས་དམར་པོ་ཉིད་བཟློག་ནས་ཆེས་དམར་བ་སྐྱེད་པར་བྱེད་དོ་ཞེས་བྱ་བར་རྟོག་ན་རྒྱུ་ཉིད་འཇིག་པར་བྱེད་པ་ཡིན་པར་
[4a.6]འགྱུར་རོ། །འོན་ཏེ་མེ་རྣམས་ནི་སྐད་ཅིག་མ་ཡིན་པའི་ཕྱིར་དེ་དང་འབྲེལ་པ་སྐྱེད་པར་བྱེད་པ་ཡང་གཞན་ཡིན་ལ། འཇིག་པར་བྱེད་པ་ཡང་གཞན་ཡིན་ནོ་ཞེས་བྱ་བར་རྟོག་ན། སྐྱེད་པར་བྱེད་པའི་རྒྱུ་བྱེ་བྲག་མེད་པར་འགྱུར་ཏེ་རིགས་པས་མ་ཡིན་ནོ་ཞེས་བྱ་བ་ཐམས་ཅད་བརྗོད་དོ། །རེ་ཞིག་མེ་
[4a.7]རྣམས་སྐད་ཅིག་མ་ཡིན་པའི་ཕྱིར། བྱེ་བྲག་ཏུ་སྨྲ་བ་རྣམས་ཀྱིས་མེ་ལྕེ་དག་ལ་སྐྱེད་པར་བྱེད་པ་ཡང་གཞན་ཡིན་ལ། འཇིག་པར་བྱེད་པ་ཡང་གཞན་ཡིན་ནོ་ཞེས་རྒྱུ་ཐ་དད་པར་ཡོངས་སུ་བརྟག་པར་ནི་བྱ་བ་ལ་རག་ན་ཐལ་བ་ནས་ས་དང་འབྲེལ་པའི་བར་ལས་སྨིན་བྱེད་ལས་སྐྱེས་པའི་བྱེ་བྲག་བྱུང་བ་ལ་
[4b]
[4b.1]གང་ལ་བརྟག་པར་བྱ་སྟེ། དེ་དག་གི་ལྟར་ན་ཐལ་བ་ལ་སོགས་པ་སྐད་ཅིག་མ་མ་ཡིན་པས་དེར་རྒྱུ་ཉིད་འཇིག་པར་བྱེད་པ་ཡིན་པར་འགྱུར་རོ། །འོ་ན་གང་ཆུ་བསྐོལ་བ་ཞེས་བྱ་བ་ནི། གལ་ཏེ་མེ་དང་འབྲེལ་པ་དག་གིས་ཆུ་འཇིག་པར་མི་བྱེད་ན་འོ་ན་ཇི་ལྟར་ཆུ་བསྐོལ་བ་རྣམས་ཟད་པར་འགྱུར་སྙམ་དུ་
[4b.2]བསམ་པ་ཡིན་ནོ། །མེའི་ཁམས་ཞེས་བྱ་བ་ནི་དེ་དང་ཐ་མི་དད་པར་འདུག་པ་འཕེལ་བར་བྱེད་དོ། །དེའི་མཐུས་ན་ཆུའི་ཚོགས་ཉམ་ཆུང་ཞིང་ཉམ་ཆུང་བར་འགྱུར་ཏེ་ཞེས་བྱ་བ་ནི་རྒྱུའི་ཁྱད་པར་ལས་འབྲས་བུའི་ཁྱད་པར་དུ་འགྱུར་བས་ཉམ་ཆུང་བ་དང་ཆེས་ཉམ་ཆུང་བར་འགྱུར་ཞིང་། ཤིན་ཏུ་ཉམ་ཆུང་བའི་བར་དུ་གྱུར་པ་དང་མཇུག་
[4b.3]ཏུ་རྒྱུན་ཡང་རྒྱུན་ཆགས་པར་མི་བྱེད་དེ་འབྲས་བུ་མི་སྐྱེད་ཀྱི་དངོས་པོ་མེད་པར་བྱེད་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །འཇིག་པའི་ངང་ཚུལ་ཅན་ཡིན་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི་འཇིག་པའི་ངང་ཚུལ་ཅན་ཡིན་པའི་ཕྱིར། རང་འཇིག་པ་ནི་གཞན་གྱིས་འཇིག་པ་སྐྱེད་པ་མ་ཡིན་པས། བྱུང་བ་
[4b.4]ཙམ་སྟེ་སྐད་ཅིག་མ་གཅིག་རང་གི་བདག་ཉིད་དུ་རེད་ནས་འཇིག་གོ། །རྩྭའི་མེ་བཞིན་ནོ་ཞེས་བྱ་བ་ནི་དཔེར་ན་རྩྭའི་མེ་སྐད་ཅིག་མ་ཡིན་ཡང་རྩྭ་ཡུལ་གཞན་དུ་བར་ཆད་མེད་པར་བྱུང་བ་ལ་རྩྭ་སྲེག་པར་བྱེད་པའི་མེ་འགྲོའོ་ཞེས་མངོན་པའི་ང་རྒྱལ་བྱེད་པ་དེ་དང་འདྲའོ། །འདིར་བསྒྲུབ་པ་ནི་གཟུགས་ལ་སོགས་པ་
[4b.5]ཡུལ་གཞན་དུ་བར་ཆད་མེད་པར་འབྱུང་བའི་དངོས་པོ་དག་ནི་འགྲོ་བ་མེད་པ་ཡིན་ཏེ། སྐད་ཅིག་མ་ཡིན་པའི་ཕྱིར་རྩྭའི་མེ་བཞིན་ནོ། །ལུས་ཀྱི་རྣམ་པར་རིག་བྱེད་དབྱིབས་ཡིན་ནོ་ཞེས་ཟེར་བ་ནི་བྱེ་བྲག་ཏུ་སྨྲ་བ་ཡིན་ནོ། །ཕྱོགས་གཅིག་གི་སྒོ་ཞེས་བྱ་བ་ནི་འདི་ལ་ཕྱོགས་གཅིག་གི་སྒོ་ཡོད་པས་ན་
[4b.6]ཕྱོགས་གཅིག་གི་སྒོ་སྟེ་དེར་རོ། །མང་པོ་ནི་ཕལ་མོ་ཆེའོ། །ཐམས་ཅད་ཀྱང་དེ་དང་འདྲའོ་ཞེས་བྱ་བ་ནི་ཕྱོགས་ཀྱི་སྒོ་གྱེན་དུ་ཕལ་ཆེ་བ་ལ་ནི་མཐོན་པོ་ཞེས་འདོགས་ལ། ཐུར་དུ་ཕལ་ཆེ་བ་ལ་ནི་དམའ་བ་ཞེས་བྱ་སྟེ། འདི་ནི་ཕྱོགས་ཡིན་ནོ། །དཔེར་ན་མགལ་མེ་ཞེས་བྱ་བ་ནི་དབྱིབས་ནི་རྫས་སུ་མེད་དེ་དེ་
[4b.7]འཛིན་པ་ཁ་དོག་འཛིན་པ་ལ་ལྟོས་པའི་ཕྱིར་ན་མགལ་མེའི་འཁོར་ལོ་བཞིན་ནོ། །ཡང་ན་དབྱིབས་ནི་རྫས་སུ་མེད་དེ། གཟུགས་འཛིན་པ་ལ་ལྟོས་པའི་ཕྱིར་འབྲུའི་ཕུང་པོ་བཞིན་ནོ་ཞེས་བྱ་བ་ཡིན་ནོ། །འདི་དབང་པོ་གཉིས་ཀྱིས་གཟུང་བར་འགྱུར་ཞེས་བཤད་པ་དང་། བྱེ་བྲག་ཏུ་སྨྲ་བ་རིང་པོ་ཉིད་ལ་སོགས་པ་
[5a]
[5a.1]ནི་ལུས་ཀྱི་དབང་པོས་འཛིན་པ་མ་ཡིན་ནོ། །འོ་ན་ཅི་ཞེ་ན་རེག་བྱའི་ཡན་ལག་དག་ཁོ་ན་དེ་ལྟར་གནས་པ་ལ་རིང་པོ་ལ་སོགས་པར་འཛིན་པར་འགྱུར་ཏེ། དེ་བས་ན་འདི་ནི་གཉིས་ཀྱིས་འཛིན་པར་མི་འགྱུར་རོ་ཞེས་སྨྲ་བར་འགྱུར་བས་དེའི་ཕྱིར་ཡང་ན་ཇི་ལྟར་རེག་བྱ་ལ་ཞེས་བྱ་བ་འདི་རྒྱས་པར་
[5a.2]སྨོས་སོ། །དོན་ཅི་ཞེ་ན། ཇི་ལྟར་རེག་བྱ་ལ་རིང་པོ་དང་ཐུང་ངུ་ལ་སོགས་པ་འཛིན་མོད་ཀྱི། དབྱིབས་ནི་རེག་བྱའི་སྐྱེ་མཆེད་ཀྱིས་བསྡུས་པ་ཡང་མ་ཡིན་པ་ལྟར། ཁ་དོག་ལ་རིང་པོ་ལ་སོགས་པ་འཛིན་པ་ཡང་དེ་དང་འདྲ་བར་ཡིད་ཆེས་པར་བྱ་སྟེ། གཟུགས་ཀྱི་སྐྱེ་མཆེད་ཀྱིས་བསྡུས་པའི་དབྱིབས་དོན་
[5a.3]གཞན་དུ་གྱུར་པ་ནི་མེད་དོ་ཞེས་བྱ་བའི་ཐ་ཚིག་གོ། །ཡང་ན་བྱེ་བྲག་ཏུ་སྨྲ་བས་དེ་ལ་ནི་རེག་བྱ་དང་ལྷན་ཅིག་སྤྱོད་པའི་ཕྱིར་དྲན་པ་ཙམ་ཡིན་གྱི་ཞེས་བྱ་བར་རྒྱས་པར་སྨྲས་ཏེ། དབྱིབས་དེ་ལ་ནི་རེག་བྱ་དང་ལྷན་ཅིག་སྤྱོད་པའི་ཕྱིར་ཏེ་འཇམ་པ་ཉིད་ལ་སོགས་པའི་རེག་བྱ་དང་ལྷན་ཅིག་སྤྱོད་པར་འགྱུར་
[5a.4]བའི་ཕྱིར། དྲན་པ་ཙམ་ཡིན་གྱི་རིང་པོ་ལ་སོགས་པའི་དབྱིབས་མངོན་སུམ་དུ་འཛིན་པ་ནི་མ་ཡིན་ཏེ་དཔེར་ན་ལྷན་ཅིག་སྤྱོད་པའི་ཕྱིར་མེའི་གཟུགས་མཐོང་ནས་མེ་དེའི་ཚ་བའི་དྲན་པ་འབྱུང་བ་དང་ལྷན་ཅིག་སྤྱོད་པའི་ཕྱིར་མེ་ཏོག་ཙམ་པ་ཀའི་དྲི་བསྣམས་ནས་དེའི་ཁ་དོག་གི་དྲན་པ་འབྱུང་བ་བཞིན་ནོ། །
[5a.5]སློབ་དཔོན་གྱིས་འདི་ལ་ནི་འཁྲུལ་པ་མེད་པའི་ཕྱིར་གཞན་གྱིས་གཞན་དྲན་པར་རིགས་ཀྱི་ཞེས་བྱ་བ་རྒྱས་པར་སྨོས་ཏེ། མེ་ལ་སོགས་པ་འདི་ལ་ནི་ཚ་བ་ཉིད་དང་། ཁ་དོག་འཁྲུལ་པ་མེད་པའི་ཕྱིར་གཞན་གྱིས་གཞན་ཏེ། མེའི་གཟུགས་ཀྱིས་ཚ་བ་ཉིད་དང་མེ་ཏོག་གི་དྲིས་དེའི་ཁ་དོག་དྲན་པར་རིགས་
[5a.6]སོ། །རེག་བྱ་ནི་ཅུང་ཟད་ཀྱང་ངེས་པ་མེད་དོ་ཞེས་བྱ་བ་རྒྱས་པར་འབྱུང་བ་ནི་གང་ལས་རེག་བྱ་ལ་རེག་ནས་རིང་པོ་ལ་སོགས་པའི་དབྱིབས་འདི་ངེས་པར་དྲན་པར་འགྱུར་བ་འཇམ་པ་ཉིད་ལ་སོགས་པའི་རེག་བྱ་ནི་ཆུང་ཟད་ཀྱང་རིང་པོ་ལ་སོགས་པའི་དབྱིབས་གང་ལ་ཡང་ངེས་པ་མེད་དོ། །གང་ན་མེའི་གཟུགས་ཡོད་པ་དེ་ནི་
[5a.7]དེའི་ཚ་བ་ཉིད་ཡོད་ལ། གང་ན་མེ་ཏོག་ཙམ་པ་ཀའི་དྲི་ཡོད་པ་དེ་ནའང་འདིའི་གཟུགས་ཡོད་ཀྱི། གང་ན་འཇམ་པ་ཉིད་དང་རྩུབ་པ་ཉིད་ཡོད་པ་དེ་ན་རིང་བ་ཉིད་དང་ཐུང་བ་ཉིད་ཡོད་པ་ནི་མ་ཡིན་ནོ། །དེ་ལྟ་བས་ན་དེའི་ཚ་བ་ཉིད་དང་། དེའི་གཟུགས་དག་ནི་གདོན་མི་ཟ་བར་དྲན་པར་རུང་གི་དབྱིབས་ནི་གདོན་མི་ཟ་བར་དྲན་
[5b]
[5b.1]པར་མི་འགྱུར་རོ། །འོན་ཏེ་རེག་བྱ་དང་དབྱིབས་དག་ལྷན་ཅིག་སྤྱོད་པར་ངེས་པ་མེད་ཀྱང་ངེས་པར་དབྱིབས་དྲན་པར་གྱུར་ན་ནི་ཁ་དོག་ཀྱང་འགྱུར་ཏེ། ངེས་པར་དྲན་པར་ཞེས་བྱ་བར་སྦྱར་ཏེ། རེག་བྱ་དེ་ཁོ་ན་རེག་ནས་དྲན་པར་འགྱུར་རོ་ཞེས་བྱ་བའི་ཐ་ཚིག་གོ། །ཇི་སྟེ་ཡང་ངེས་པར་ཁ་དོག་དྲན་པར་མི་
[5b.2]འགྱུར་ན། ཡང་ན་ནི་ཁ་དོག་བཞིན་དུ་དབྱིབས་ཀྱང་ངེས་པར་མི་འགྱུར་ཏེ། རིང་པོ་ལའང་ཐུང་ངུར་ཤེས་ལ། ཐུང་ངུ་ལ་ཡང་རིང་པོར་ཤེས་པར་འགྱུར་རོ། །ཅིའི་ཕྱིར་ཞེ་ན། རེག་བྱ་ལས་ཁ་དོག་ནི་ངེས་པར་དྲན་པར་མི་འགྱུར་ཏེ། རེས་འགའ་དམར་པོ་ལ་ཡང་སེར་པོར་ཤེས་ལ། སེར་པོ་ལ་ཡང་
[5b.3]དམར་པོར་ཤེས་སོ། །དེ་ལྟ་ཡང་མ་ཡིན་ཞེས་བྱ་བ་ཇི་ལྟར་དེ་ལྟར་མ་ཡིན་ཞེ་ན། ཇི་ལྟར་ཁ་དོག་ངེས་པར་དྲན་པར་མི་འགྱུར་བ་དེ་ལྟར་དབྱིབས་ཀྱང་ངེས་པར་དྲན་པར་མི་འགྱུར་བ་ཞེས་བྱའོ། །འོ་ན་ཅི་ཞེ་ན། ཁ་དོག་ངེས་པར་མི་འགྱུར་གྱི་དབྱིབས་ནི་ངེས་པར་དྲན་པར་འགྱུར་རོ། །དེ་བས་ན་རེག་བྱ་
[5b.4]ལས་དབྱིབས་འདི་དྲན་པར་ནི་རིགས་པ་མ་ཡིན་ནོ། །འོ་ན་ཇི་ལྟར་རིང་པོའི་བློའམ་ཐུང་ངུའི་བློ་འབྱུང་ཞེ་ན། འདི་ནི་ཕྱོགས་གཅིག་གི་སྒོར་ཁ་དོག་གམ། རེག་བྱ་ཕལ་མོ་ཆེ་འཛིན་པ་ལ་རིང་པོའི་རྣམ་པར་རྟོག་པའི་བློ་འབྱུང་ངོ་། །ཞེས་བཤད་ཟིན་ཏེ། དེ་ལྟ་བུ་ལ་སོགས་པ་ཡིན་པར་ཁོང་དུ་ཆུད་
[5b.5]པར་བྱའོ། །རི་མོ་བཀྲམ་པ་ལ་ཞེས་བྱ་བ་རྒྱས་པར་འབྱུང་བ་ནི་རི་མོ་བཀྲམ་པ་ཁ་དོག་དང་དབྱིབས་དུ་མ་རྣམ་པ་མང་པོར་སྣང་བ་ནི་རིང་པོ་ལ་སོགས་པར་དབྱིབས་གཅིག་ཏུ་སྣང་སྟེ། དེ་བས་ན་ཁ་དོག་དང་དབྱིབས་དུ་མ་སྣང་བའི་ཕྱིར་དབྱིབས་མང་པོ་ཡང་ཕྱོགས་གཅིག་ཏུ་འགྱུར་ཏེ། གང་ན་རིང་པོ་ཉིད་
[5b.6]ཡོད་པ་དེ་ཉིད་དུ་ཐུང་ངུ་ལ་སོགས་པ་འཛིན་པའི་ཕྱིར་རོ། །དེ་ཡང་རིགས་པ་མ་ཡིན་ཏེ་ཁ་དོག་བཞིན་ནོ། །ཇི་ལྟར་ཁ་དོག་ཐོགས་པ་དང་བཅས་པ་ཡིན་པའི་ཕྱིར་ཕྱོགས་གཅིག་པར་མི་འགྱུར་བ་ལྟར་དབྱིབས་ཀྱང་དེ་དང་འདྲའོ། །དེ་ལྟ་ཡིན་ན་ཆོས་ཅན་གྱི་ཁྱད་པར་ལས་བཟློག་པའི་ཕྱིར་
[5b.7]དབྱིབས་རྫས་སུ་ཡོད་དོ་ཞེས་བྱ་བའི་ཕྱོགས་སྐྱོན་དང་བཅས་པར་འགྱུར་རོ། །དེ་རྡུལ་ལ་མེད་ཅེས་བྱ་བ་ནི་ཇི་ལྟར་སྔོན་པོ་ལ་སོགས་པའི་གཟུགས་རྡུལ་ཕྲན་གྱི་རྫས་བརྒྱད་ལ་སོགས་པ་ཡོད་པ་དེ་ལྟར་རིང་པོ་ལ་སོགས་པའི་དབྱིབས་ནི་རྡུལ་ཕྲ་རབ་ལ་མེད་དོ། །དབྱིབས་རྡུལ་ཕྲ་རབ་ལ་མེད་དོ་
[6a]
[6a.1]ཞེས་བྱ་བ་ཇི་ལྟར་ཤེས་ཤེ་ན། དབྱིབས་རིང་པོ་འགྲིབ་ན་རིང་པོའི་བློ་མེད་པའི་ཕྱིར་ཏེ། དབྱུག་པ་རིང་པོ་དམིགས་ནས་དེ་ཉིད་འགྲིབ་ན་རིང་པོའི་བློ་ལྡོག་གོ། །སྔོན་པོ་ལ་སོགས་པའི་རྫས་དམིགས་ནས་འགྲིབ་ན་དེ་ལ་སེར་པོའི་བློ་ནི་མི་འབྱུང་གི །རིང་པོའི་རྫས་འགྲིབ་ན་ནི་ཐུང་
[6a.2]ངུའི་བློ་མི་འབྱུང་གི་དེའི་བློ་མི་འབྱུང་ངོ་། །དབྱིབས་དེ་ཉིད་རིང་པོ་ལ་སོགས་པ་དང་ཐུང་ངུ་ལ་སོགས་པའི་བློ་བསྐྱེད་དོ་ཞེས་བརྗོད་པར་ཡང་མི་རིགས་པ་མ་ཡིན་ཏེ། དེ་ལྟ་བས་ན་མང་པོ་དེ་ལྟར་གནས་པ་དག་ཁོ་ན་ཞེས་བྱ་བ་ཐམས་ཅད་བརྗོད་པར་བྱའོ། །འོན་ཏེ་དབྱིབས་ཀྱི་རྡུལ་ཕྲ་རབ་ཅེས་བྱ་
[6a.3]བ་རྒྱས་པར་འབྱུང་བ་ནི་དབྱིབས་ཀྱི་རྡུལ་ཕྲ་རབ་དག་ཁོ་ན་ཕྱོགས་གཅིག་གི་སྒོ་ལ་སོགས་པའི་རིམ་པས་དེ་ལྟར་གནས་པ་ལ་རིང་པོ་ལ་སོགས་པའི་མིང་འདོགས་ཏེ། དེའི་ངོ་བོ་ཉིད་མ་ཡིན་པ་དག་དེ་ལྟར་གནས་པ་ལ་ནི་དེའི་མིང་འཐོབ་པར་འོས་པ་མ་ཡིན་ནོ་སྙམ་དུ་བསམས་པ་ཡིན་ནོ། །དབྱིབས་
[6a.4]ཀྱི་ཡན་ལག་རྣམས་ནི་ཁ་དོག་ལ་སོགས་པ་བཞིན་དུ་རང་གི་ངོ་བོར་གྲུབ་པ་ཡང་མེད་ཅེས་བྱ་བ་ནི་ཁ་དོག་གི་ཡན་ལག་རྣམས་ནི་ཡན་ལག་རེ་རེ་ལ་སྔོན་པོ་ལ་སོགས་པ་ཉིད་དུ་འཛིན་པའི་ཕྱིར་རང་གི་ངོ་བོར་རབ་ཏུ་གྲུབ་པ་ཡིན་ནོ། །དབྱིབས་ཀྱི་རྡུལ་ཕྲ་རབ་རྣམས་ནི་དེ་ལྟར་ཡན་ལག་རེ་རེ་ལ་རིང་པོ་ལ་སོགས་
[6a.5]པ་ཉིད་དུ་ཡང་མི་འཛིན་ཏེ། དེ་ལྟ་བས་ན་རང་གི་ངོ་བོ་རབ་ཏུ་མ་གྲུབ་པ་ཡིན་ནོ། །གལ་ཏེ་དེ་དག་རིང་པོ་ལ་སོགས་པའི་ངོ་བོ་ཉིད་ནི་མ་ཡིན་པ་ཉིད་ཀྱི་གནས་པའི་ཁྱད་པར་ལས་རིང་པོ་ལ་སོགས་པའི་བློའི་རྒྱུ་དག་ཏུ་འགྱུར་ན་གོ། །ཁ་དོག་ལ་སོགས་པའི་རྡུལ་ཕྲ་རབ་དག་ཁོ་ན་གནས་པའི་ཁྱད་པར་
[6a.6]ལས་རིང་པོ་ལ་སོགས་པའི་བློའི་རྒྱུ་དག་ཏུ་འགྱུར་རོ་ཞེས་བྱ་བར་ཡང་ཅི་སྟེ་མི་འདོད། འོ་ན་གང་ཁམ་པའི་སྣོད་རྣམས་ཁ་དོག་ཀྱང་ཐ་མི་དད་ཅེས་བྱ་བ་ནི་གལ་ཏེ་དབྱིབས་ཁ་དོག་གནས་པ་ཙམ་ཞིག་ཡིན་པར་གྱུར་ན། དོན་ཐ་དད་པ་མེད་པའི་ཕྱིར་རྫ་མཁན་ལ་སོགས་པའི་རྫ་མ་རྣམས་ཁ་དོག་ཐ་མི་དད་ན་
[6a.7]དབྱིབས་ཀྱང་ཐ་དད་པ་མ་ཡིན་པར་འགྱུར་རོ། །མ་བཤད་དམ་ཞེས་བྱ་བ་རྒྱས་པར་འབྱུང་བ་ནི་ཇི་ལྟར་གནས་པར་འགྱུར་བའི་ཁ་དོག་ལ་རིང་པོ་ལ་སོགས་པར་མིང་འདོགས་པ་སྟེ། ཕྱོགས་གཅིག་གི་སྒོར་ཁ་དོག་ཕལ་ཆེར་ཞེས་བྱ་བ་ལ་སོགས་པ་རྒྱས་པར་བཤད་པ་ཡིན་ནོ། །དཔེར་ན་
[6b]
[6b.1]གྲོག་མ་ལ་སོགས་པ་ཞེས་བྱ་བ་རྒྱས་པར་འབྱུང་བ་ནི། ཇི་ལྟར་གྲོག་མ་ལ་སོགས་པ་ཁ་དོག་དང་དབྱིབས་གཅིག་པ་ཡིན་ལ། དེ་དག་གི་ཕྲེང་བ་ནི་ཡུལ་ལ་ལར་ནི་གཞན་དུ་སྣང་ལ། ལ་ལར་ནི་གཞན་དུ་སྣང་བ་དང་། ཟླུམ་པོ་ལ་སོགས་པ་ཐ་དད་པ་ཞེས་བྱ་བ་ལ་སོགས་པ་ཡང་དེ་དང་འདྲ་སྟེ།
[6b.2]དེ་བཞིན་དུ་ཁ་དོག་ཐ་མི་དད་ཀྱང་དབྱིབས་ཐ་དད་པར་འགྱུར་རོ། །འོ་ན་གང་མུན་ཁུང་དང་ཞེས་བྱ་བ་རྒྱས་པར་འབྱུང་བ་ནི་འོ་ན་གང་མུན་ཁུང་ན་སྡོང་དུམ་དང་མི་དང་གླང་པོ་ཆེ་ལ་སོགས་པའི་ཁ་དོག་མ་མཐོང་བར་རིང་པོ་དང་། ཐུང་ངུ་དང་ཟླུམ་པོ་ལ་སོགས་པ་མཐོང་བར་འགྱུར་བ་དེ་ཇི་ལྟ་བུ་ཞེས་བྱ་
[6b.3]བའི་ཚིག་ལྷག་མ་ཡིན་ནོ། །གལ་ཏེ་དབྱིབས་ཁ་དོག་ལས་རིགས་གཞན་ཞིག་ཡིན་པར་མ་གྱུར་ན་ཇི་ལྟར་སྔོན་པོ་འམ། སེར་པོ་ཞེས་བྱ་བར་མི་མཐོང་བ་དེ་བཞིན་དུ་དབྱིབས་ཀྱང་རིང་པོ་ཉིད་དམ་ཐུང་ངུའོ་ཞེས་བྱ་བར་མཐོང་བར་ཡང་མི་འགྱུར་བ་ཞིག་ན་རེས་འགའ་འང་མཐོང་སྟེ། དེའི་ཕྱིར་དབྱིབས་ནི་
[6b.4]རིགས་གཞན་ཡིན་ནོ། །ཕྲེང་བ་དང་དམག་ལ་ཡོངས་སུ་རྟོག་པ་བཞིན་ནོ་ཞེས་བྱ་བ་ནི། ཇི་ལྟར་མུན་ཁུང་ན་བྱ་འམ་གྲོག་མ་མི་གསལ་བ་མཐོང་ནས་ཕྲེང་རིང་པོ་ཞིག་གོ་ཞེས་རྟོག་པར་བྱེད་པ་འམ་ཇི་ལྟར་མུན་ཁུང་ན་གླང་པོ་ཆེ་ལ་སོགས་པ་མི་གསལ་བ་མཐོང་ནས་དམག་འདི་ནི་བསྐྱིལ་ཏེ་རྣམ་པར་
[6b.5]གནས་སོ་ཞེས་ཡོངས་སུ་རྟོག་པར་བྱེད་པ་ལྟར་འདི་ཡང་དེ་དང་འདྲའོ། །དེ་ནི་གདོན་མི་ཟ་བར་དེ་ལྟར་ཤེས་པར་བྱ་སྟེ་ཞེས་བྱ་བ་ནི་ད་གཟོད་ཇི་སྐད་དུ་དབྱིབས་རིགས་གཞན་མེད་ཀྱང་། དེ་དག་གིས་དེ་ན་ཁ་དོག་ཁོ་ན་མི་གསལ་བ་མཐོང་བས་རིང་པོ་ལ་སོགས་པར་ཡོངས་སུ་རྟོག་པར་
[6b.6]བྱེད་དོ་ཞེས་བཤད་པ་ལྟ་བུའོ། །གང་རེས་འགའ་ཞེས་བྱ་བ་རྒྱས་པར་འབྱུང་བ་ལ། ཡོངས་སུ་ཆད་པ་ངེས་པར་མི་ཟིན་པ་ཞེས་བྱ་བར་ནི་དབྱིབས་ངེས་པར་མི་ཟིན་པའོ། །ཚོགས་པ་ཙམ་དང་མི་གསལ་བ་སྟེ་སྔོན་པོ་ལ་སོགས་པ་ཉིད་དུ་མི་མངོན་པར་སྣང་བ་ཡིན་ནོ། །ཇི་ལྟར་ཁ་དོག་དང་
[6b.7]དབྱིབས་ལས་མ་གཏོགས་པའི་གཟུགས་ཀྱི་སྐྱེ་མཆེད་ཀྱང་ཡོད་པ་མ་ཡིན་པས་རྫས་གཞན་ཅུང་ཟད་ཀྱང་མི་རྟག་པ་དེ་བཞིན་དུ་དབྱིབས་ཀྱང་ཁ་དོག་ལས་མ་གཏོགས་པར་བརྟག་པར་མི་བྱའོ། །མདོ་སྡེ་པ་ཁྱེད་ཅེས་བྱ་བ་ནི་མདོ་སྡེ་པ་ཁྱེད་ཅག་ཅེས་བྱ་བའི་ཐ་ཚིག་གོ། །ཇི་ལྟར་ལུས་ཀྱི་ལས་སུ་འདོགས་
[7a]
[7a.1]པར་བྱེད་ཅེས་བྱ་བ་ནི་བཏགས་པ་ཡོད་པའི་ཕྱིར་ལུས་ཀྱི་ལས་སུ་མི་རུང་ངོ་སྙམ་དུ་བསམས་ནས་འདྲི་བ་ཡིན་ནོ། །ལུས་ལ་བརྟེན་པ་ཞེས་བྱ་བ་ནི་ལུས་ལ་དམིགས་པ་ཞེས་བྱ་བའི་དོན་ཏོ། །གང་ཞིག་གི་ལུས་འཇུག་པར་འགྱུར་བ་དེ་ནི་ལུས་ལ་བརྟེན་པའི་ལས་ཡིན་
[7a.2]ཏེ། དེའི་ཕྱིར་དེ་དང་དེར་ལུས་འཇུག་པར་བྱེད་པའི་སེམས་པ་གང་ཡིན་པའོ་ཞེས་བྱ་བ་སྨོས་སོ། །ཅི་རིགས་པར་རིག་པར་བྱའོ་ཞེས་བྱ་བ་ནི་ངག་ལ་བརྟེན་པའི་ལས་ནི་ངག་གི་ལས་སོ། །ཡིད་ཀྱི་ལས་ནི་ཡིད་ཀྱི་ལས་སམ་ཡིད་དང་མཚུངས་པར་ལྡན་པའི་ལས་ནི་ཡིད་ཀྱི་ལས་ཡིན་ཏེ།
[7a.3]དེས་ན་ཅི་རིགས་པར་ཞེས་བཤད་དོ། །རྣམ་པར་རིག་བྱེད་མེད་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི་གལ་ཏེ་རྣམ་པར་རིག་བྱེད་མེད་པར་གྱུར་ན། འདོད་པ་ན་སྤྱོད་པའི་རྣམ་པར་རིག་བྱེད་མ་ཡིན་པ་ཡང་མེད་པར་འགྱུར་ཏེ། འདོད་པ་ན་སྤྱོད་པའི་རྣམ་པར་རིག་བྱེད་མ་ཡིན་པ་ནི་རྣམ་པར་
[7a.4]རིག་བྱེད་ལ་རག་ལས་པ་ཡིན་གྱི་སེམས་ཀྱི་རྗེས་སུ་འཇུག་པ་ནི་མ་ཡིན་ནོ།། །།བམ་པོ་སུམ་ཅུ་པ། དེ་ཡང་དེ་ལྟར་མེད་པས་ཉེས་པ་ཆེན་པོར་ཐལ་བར་འགྱུར་ཏེ། སྡོམ་པ་དང་སྡོམ་པ་མ་ཡིན་པ་མེད་པའི་ཉེས་པ་དང་རྫས་ལས་བྱུང་བའི་བསོད་ནམས་བྱ་བའི་དངོས་པོས་བསོད་ནམས་
[7a.5]འཕེལ་བ་མེད་པའི་ཉེས་པ་ཞེས་བྱ་བ་དེ་ལྟ་བུ་ལ་སོགས་པར་ཐལ་བར་འགྱུར་རོ། །ཐལ་བ་རྣམས་ལ་ཡང་ཐལ་བའི་གཉེན་པོ་དེ་དག་ཡོད་དེ་ཞེས་བྱ་བ་ནི་དེའི་ལན་ཡོད་དོ་ཞེས་བྱ་བའི་ཐ་ཚིག་གོ། །ལུས་ཀྱི་ལས་ཞེས་བྱ་བ་ནི་ལུས་ལ་བརྟེན་པ་ཞེས་བྱ་བའི་ཐ་ཚིག་གོ། །མཉམ་པར་གཞག་པའི་
[7a.6]རྣམ་པར་རིག་བྱེད་མ་ཡིན་པ་བཞིན་དུ་ཞེས་བྱ་བ་ནི་ཇི་ལྟར་མཉམ་པར་གཞག་པའི་རྣམ་པར་རིག་བྱེད་མ་ཡིན་པ་སེམས་ཀྱི་རྗེས་སུ་འཇུག་པ་ཡིན་པ་ལྟར་སོ་སོར་ཐར་པའི་སྡོམ་པ་ལ་སོགས་པའི་མཚན་ཉིད་ཀྱི་རྣམ་པར་རིག་བྱེད་མ་ཡིན་པ་ཡང་དེ་དང་འདྲ་བར་ཡང་འགྱུར་རོ། །མདོ་སྡེ་པ་རྣམས་ཀྱིས་
[7a.7]དེ་ལྟར་མི་འགྱུར་ཏེ་ཞེས་བྱ་བ་སྨོས་ཏེ། མཉམ་པར་གཞག་པ་མ་ཡིན་པའི་སེམས་པའི་ཁྱད་པར་གྱིས་དེའི་འཕེན་པ་ཁྱད་པར་ཡོད་པའི་ཕྱིར་སེམས་ཀྱི་རྗེས་སུ་འཇུག་པར་མི་འགྱུར་ཏེ། མཉམ་པར་གཞག་པ་མ་ཡིན་པའི་རྣམ་པར་རིག་བྱེད་མ་ཡིན་པ་འཕངས་པའི་ཕྱིར་རོ་ཞེས་བྱ་བའི་ཐ་ཚིག་
[7b]
[7b.1]གོ། །ཁྱེད་ཀྱི་རྣམ་པར་རིག་བྱེད་དེ་ཡོད་ཅིང་མེད་པ་མ་ཡིན་ན་ཡང་རྣམ་པར་རིག་བྱེད་མ་ཡིན་པ་འཕང་པར་བྱ་བ་ནི་སེམས་པའི་སྟོབས་དང་མཐུ་ལ་རག་ལས་པ་ཡིན་ཏེ་ལྟོས་པ་ཡིན་ནོ། །ཅིའི་ཕྱིར་ཞེ་ན། བླུན་པའི་ཕྱིར་ཏེ་མི་གསལ་བའི་ཕྱིར་རོ། །སེམས་པའི་སྟོབས་མེད་པ་ནི་རྣམ་པར་རིག་
[7b.2]བྱེད་མ་ཡིན་པ་དེ་བསྐྱེད་པར་མི་ནུས་ཏེ། ཡང་དག་པར་ལེན་པའི་སེམས་པ་མེད་ན་རྣམ་པར་རིག་བྱེད་གྱི་ན་བྱུང་བས་ནི་རྣམ་པར་རིག་བྱེད་མ་ཡིན་པ་སྐྱེད་པར་མི་བྱེད་དོ། །ངག་རྣམ་པར་རིག་བྱེད་ནི་ཞེས་བྱ་བ་ལ་ནི་ཞེས་བྱ་བའི་སྒྲ་ནི་ཁྱད་པར་དུ་བྱ་བ་ཡིན་ཏེ། ཇི་ལྟར་ལུས་ཀྱི་རྣམ་པར་རིག་བྱེད་
[7b.3]དབྱིབས་ཀྱི་བདག་ཉིད་ཡིན་པ་ལྟར་ངག་གི་རྣམ་པར་རིག་བྱེད་ནི་མ་ཡིན་ནོ། །འོ་ན་ཅི་ཞེ་ན། ངག་གི་བདག་ཉིད་ཀྱི་སྒྲ་སྟེ་ཡི་གེའི་བདག་ཉིད་ཀྱི་སྒྲའོ་ཞེས་བྱ་བའི་ཐ་ཚིག་གོ། །རྣམ་པར་རིག་བྱེད་མ་ཡིན་པ་ནི་སྔར་བཤད་པ་ཁོ་ན་ཡིན་ནོ་ཞེས་བྱ་བ་ནི། དེ་དག་རྣམ་རིག་རྣམ་རིག་མིན། །ཞེས་བཤད་
[7b.4]པ་དེ་ལ་རྣམ་པར་རིག་བྱེད་ནི་བཤད་ཟིན་པ་ཡིན་ནོ། །རྣམ་པར་རིག་བྱེད་མ་ཡིན་པ་བརྗོད་པར་བྱ་དགོས་ན། དེ་ཡང་གོང་དུ་བཤད་ཟིན་པ་ཉིད་དེ། རྣམ་པར་གཡེང་སེམས་མེད་པའི་ཡང་། །ཞེས་འབྱུང་བའི་ཕྱིར་རོ། །དེ་ཡང་རྫས་སུ་མེད་དེ་ཞེས་བྱ་བ་ནི་རྣམ་པར་རིག་བྱེད་མ་ཡིན་པ་དེ་ཡང་
[7b.5]རྫས་སུ་མེད་དོ། །ཡང་ཞེས་བྱ་བའི་སྒྲ་ནི་རྣམ་པར་རིག་བྱེད་འབའ་ཞིག་ཏུ་མ་ཟད་ཀྱི་ཞེས་བྱ་བ་ཡིན་ནོ། །ཁས་བླངས་ནས་མི་ཕྱེད་པ་ཙམ་ཡིན་པའི་ཕྱིར་ཞེས་བྱ་བ་ནི་མདོ་སྡེ་པ་རྣམས་ན་རེ་དུས་འདི་ནས་བཟུང་སྟེ། སྲོག་གཅོད་པ་ལ་སོགས་པ་སྤོང་ངོ་ཞེས་ཁས་བླངས་ནས་དེ་ཕྱིན་ཅད་དེ་དག་མི་བྱེད་
[7b.6]པ་ཙམ་ལ་རྣམ་པར་རིག་བྱེད་མ་ཡིན་པ་ཞེས་བྱ་བར་ཟད་པས་དེ་ལྟར་ན་རྫས་སུ་མེད་དོ་ཞེས་ཟེར་རོ། །དེ་དག་ཀྱང་རང་གི་ངོ་བོ་མེད་པའི་ཕྱིར་ཞེས་བྱ་བ་ནི་འདས་པའི་འབྱུང་བ་ཆེན་པོ་དེ་དག་ཀྱང་ད་ལྟར་བྱུང་བ་ལྟ་བུར་རང་གི་ངོ་བོར་མེད་དེ། འདི་ནི་མཛོད་ཀྱི་གནས་ལྔ་པ་ནས་ཀྱང་སྟོན་པར་འགྱུར་རོ། །མེད་པ་
[7b.7]དག་ནི་ཇི་ལྟར་ན་འདིའི་རྟེན་ཡིན་ཏེ། དེ་བས་ན་རྫས་སུ་མེད་དོ། །གཟུགས་ཀྱི་མཚན་ཉིད་མེད་པའི་ཕྱིར། །ཞེས་བྱ་བ་ནི། གཟུགས་ཀྱི་མཚན་ཉིད་ནི་གཟུགས་སུ་རུང་བ་ཞེས་བྱ་བ་ཡིན་ན། ཐོགས་པ་མེད་པའི་ཕྱིར་དེ་ཡང་འདི་ལ་མེད་དེ་དེ་ལྟ་བས་ན་རྫས་སུ་མེད་དོ། །རྣམ་པ་གསུམ་ཞེས་བྱ་
[8a]
[8a.1]བ་རྒྱས་པར་འབྱུང་བ་ནི། དེ་ནི་རྣམ་པ་གསུམ་དང་དྲི་མ་མེད་པ་ཡིན་པས་ན། རྣམ་གསུམ་དྲི་མེད་གཟུགས་ཏེ་དེ་གསུངས་པའོ། །མ་བྱས་ལམ་ཞེས་བྱ་བ་ནི་མ་བྱས་པའི་ལམ་སྟེ་གཞན་ལ་བྱེད་དུ་བཅུག་གི་བདག་ཉིད་ཀྱིས་མ་བྱས་པའི་ལས་ཀྱི་ལམ་ཞེས་བྱ་བའི་ཐ་ཚིག་གོ། །
[8a.2]འདི་དག་ལ་གཟུགས་རྣམ་པ་གསུམ་དང་། དྲི་མ་མེད་པ་གསུངས་པ་དང་། འཕེལ་བ་དང་། མ་བྱས་པའི་ལམ་ལ་སོགས་པ་ཡོད་པས་ན་རྒྱུ་འདི་དག་ནི། རྣམ་གསུམ་དྲི་མེད་གཟུགས་གསུངས་དང་། །འཕེལ་དང་མ་བྱས་ལམ་སྩོགས་ཡིན་ཏེ། སོགས་པ་ཞེས་བྱ་བའི་སྒྲས་ནི་དགེ་སློང་
[8a.3]ཆོས་ནི་ཞེས་བྱ་བ་འདིར་གཟུགས་ཅན་མ་ཡིན་པའོ་ཞེས་མ་གསུངས་པ་དང་འཕགས་པའི་ལམ་ཡན་ལག་བརྒྱད་པར་གསུངས་པ་དང་། སོ་སོར་ཐར་པའི་སྡོམ་པ་དང་། ཆུ་ལོན་དུ་གསུངས་པ་བསྡུ་བའོ། །གཟུགས་ཀྱིས་གཟུགས་བསྡུས་པ་ཞེས་བྱ་བ་ནི། གཟུགས་ཁོ་ནས་
[8a.4]གཟུགས་བསྡུས་པ་ཡིན་གྱི་ཚོར་བ་ལ་སོགས་པ་གཞན་དག་གིས་ནི་མ་ཡིན་པའོ། །བསྟན་དུ་ཡོད་ལ་ཐོགས་པ་དང་བཅས་པའི་གཟུགས་ཀྱང་ཡོད་ཅེས་བྱ་བ་ནི་མིག་གི་རྣམ་པར་ཤེས་པས་རྣམ་པར་ཤེས་པར་བྱ་བའི་གཟུགས་གང་ཡིན་པའོ། །བསྟན་དུ་མེད་ལ་ཐོགས་པ་དང་བཅས་པའི་
[8a.5]གཟུགས་ཀྱང་ཡོད་ཅེས་བྱ་བ་ནི་མིག་ལ་སོགས་པ་གཟུགས་ཅན་གྱི་སྐྱེ་མཆེད་གང་དག་ཡིན་པའོ། །བསྟན་དུ་ཡང་མེད་ལ་ཐོགས་པ་ཡང་མེད་པ་ནི་ཡིད་ཀྱི་རྣམ་པར་ཤེས་པས་རྣམ་པར་ཤེས་པར་བྱ་བ་ཆོས་ཀྱི་སྐྱེ་མཆེད་ཀྱིས་བསྡུས་པ་རྣམ་པར་རིག་བྱེད་མ་ཡིན་པ་གང་ཡིན་པའོ། །རྣམ་པར་
[8a.6]རིག་བྱེད་མ་ཡིན་པ་མ་གཏོགས་པར་ཞེས་བྱ་བ་རྒྱས་པར་འབྱུང་བ་ནི་རྣམ་པར་རིག་བྱེད་མ་ཡིན་པ་མ་གཏོགས་པ་བསྟན་དུ་མེད་ལ་ཐོགས་པ་མེད་པའི་གཟུགས་བསྡུ་བའི་མདོ་ལས་བཤད་པ་གང་ཡིན་པ་མེད་དོ། །ཟག་པ་མེད་པའི་གཟུགས་ཀྱང་མེད་དེ་དེ་རྣམ་པར་རིག་བྱེད་མ་ཡིན་པ་མ་གཏོགས་
[8a.7]པ་ཞེས་བྱ་བར་སྦྱར་ཏེ། ལམ་གྱི་བདེན་པ་ལ་སྙོམས་པར་ཞུགས་པའི་ལུས་དང་ངག་གི་རྣམ་པར་རིག་བྱེད་ཀྱི་གཟུགས་ཡིན་པར་ནི་རིགས་པ་མ་ཡིན་ནོ། །རྫས་ལས་བྱུང་བའི་བསོད་ནམས་བྱ་བའི་དངོས་པོ་བདུན་ཞེས་བྱ་བ་ལ། རྫས་ནི་ཀུན་དགའ་ར་བ་དང་། །གཙུག་ལག་ཁང་ལ་སོགས་
[8b]
[8b.1]པའོ། །དེ་ལས་བྱུང་བས་ན་རྫས་ལས་བྱུང་བའོ། །རྫས་དེ་མེད་པ་ནི་རྫས་ལས་བྱུང་བ་མ་ཡིན་པའོ། །རྟག་ཏུ་ཞེས་བྱ་བ་ནི་ཡང་དང་ཡང་དུའོ། །རྒྱུན་མི་འཆད་པ་ནི་བར་ཆད་མེད་པའོ། །འདིར་མདོ་ནི་བཅོམ་ལྡན་འདས་ཡུལ་ཀཽ་ཤཱམྦཱི་ན་དབྱངས་ལེན་གྱི་ཀུན་དགའ་ར་བ་ན་བཞུགས་སོ། །དེ་
[8b.2]ནས་ཚེ་དང་ལྡན་པ་སྐུལ་བྱེད་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་སྟེ། བཅོམ་ལྡན་འདས་ལ་ཚེ་དང་ལྡན་པ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཙུན་པ་རྫས་ལས་བྱུང་བའི་བསོད་ནམས་བགྱི་
[8b.3]བའི་དངོས་པོ་འབྲས་བུ་ཆེ་བ་ཕན་ཡོན་ཆེ་བ། གཟི་བརྗིད་ཆེ་བརྒྱ་ཆེ་བ་གདགས་པ་མཆིས་ལགས་སམ། བཅོམ་ལྡན་འདས་ཀྱིས་དེ་ལ་སྐུལ་བྱེད་ཡོད་དོ་ཞེས་བཀའ་སྩལ་ཏོ། །སྐུལ་བྱེད་བདུན་པོ་འདི་དག་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་ནས་རྒྱ་ཆེ་བའི་བར་དག་ཡིན་
[8b.4]ཏེ། དེ་དག་དང་ལྡན་པའི་དད་པའི་རིགས་ཀྱི་བུའམ་རིགས་ཀྱི་བུ་མོ་ནི་རྒྱུ་ཡང་རུང་འདུག་ཀྱང་རུང་ཉལ་ཡང་རུང་མི་ཉལ་ཡང་རུང་སྟེ་རྟག་ཏུ་རྒྱུན་མི་འཆད་པར་བསོད་ནམས་མངོན་པར་འཕེལ་བར་འགྱུར་ཞིང་བསོད་ནམས་ཉེ་བར་སྐྱེ་བ་ཁོ་ནར་འགྱུར་རོ། །བདུན་གང་ཞེ་ན། སྐུལ་བྱེད་འདི་ནི་དད་པའི་
[8b.5]རིགས་ཀྱི་བུ་འམ་རིགས་ཀྱི་བུ་མོ་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའ་ར་བ་འབུལ་བར་བྱེད་དེ་སྐུལ་བྱེད་འདི་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་ནས་རྒྱ་ཆེ་བའི་བར་དང་པོ་ཡིན་ཏེ། དེ་དང་ལྡན་པའི་དད་པའི་རིགས་ཀྱི་བུ་འམ་རིགས་ཀྱི་བུ་མོ་ཞེས་
[8b.6]བྱ་བ་རྒྱས་པར་བསོད་ནམས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་ཡིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུའམ་རིགས་ཀྱི་བུ་མོ་ཀུན་དགའ་ར་བ་དེ་ཉིད་དུ་གཙུག་ལག་ཁང་རྩིག་པར་བྱེད་དེ། འདི་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་གཉིས་པ་ཡིན་པ་
[8b.7]ཞེས་བྱ་བ་ནས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་ཡིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུ་འམ་རིགས་ཀྱི་བུ་མོ་གཙུག་ལག་ཁང་དེ་ཉིད་དུ་མལ་ཆ་དང་སྟན་འདི་ལྟ་སྟེ། ཁྲི་དང་ཁྲིའུ་དང་སྟན་ནང་ཚངས་ཅན་དང་ལ་བ་དང་སྔས་དང་སྟན་གོར་བུ་དག་འབུལ་བར་བྱེད་དེ། སྐུལ་
[9a]
[9a.1]བྱེད་འདི་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་གསུམ་པ་ཡིན་ཞེས་བྱ་བ་སྔ་མ་བཞིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུའམ་རིགས་ཀྱི་བུ་མོ་གཙུག་ལག་ཁང་དེ་ཉིད་དུ་མཆོད་སྦྱིན་རྗེས་སུ་མཐུན་པའི་འཚོ་བ་ནར་མར་འབུལ་བར་བྱེད་དེ། སྐུལ་
[9a.2]བྱེད་འདི་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་བཞི་པ་ཡིན་ནོ་ཞེས་བྱ་བ་སྔ་མ་བཞིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུའམ་རིགས་ཀྱི་བུ་མོ་གློ་བུར་དུ་འོངས་པ་དང་འགྲོ་བ་ལ་སྦྱིན་པ་སྦྱིན་པར་བྱེད་དེ། སྐུལ་བྱེད་འདི་ནི་རྫས་ལས་བྱུང་བའི་བསོད་ནམས་བྱ་
[9a.3]བའི་དངོས་པོ་ལྔ་པ་ཡིན་ནོ་ཞེས་བྱ་བ་སྔ་མ་བཞིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུ་འམ་རིགས་ཀྱི་བུ་མོ་ནད་པ་དང་ནད་གཡོག་ལ་སྦྱིན་པ་སྦྱིན་པར་བྱེད་དེ། འདི་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་དྲུག་པ་ཡིན་ཞེས་བྱ་བ་སྔ་མ་བཞིན་ནོ། །སྐུལ་བྱེད་གཞན་ཡང་
[9a.4]དད་པའི་རིགས་ཀྱི་བུ་འམ་རིགས་ཀྱི་བུ་མོ་ལྷགས་པ་འམ་ཡུལ་ངན་ནམ་རླུང་མོ་ཆེ་འམ་ཆར་འབབ་པ་གང་དག་བྱུང་ན་ལྷགས་པ་ནས་ཆར་འབབ་པའི་བར་དེ་ལྟ་བུ་དག་གི་ཚེ་སྐྱོབ་པ་འམ་ཐུག་པ་རྣམ་པ་སྣ་ཚོགས་རྣམ་པ་མང་པོ་དག་བྱས་ནས་འཕགས་པ་དག་བདག་གི་འདི་གསོལ་ལ་སྐུ་མ་གཤེར་
[9a.5]བ་དང་ཆོས་གོས་ལ་ཆར་གྱིས་མ་ཕོག་པར་བདེ་བ་ལ་རེག་པར་བཞུགས་ཤིག་ཅེས་དགེ་འདུན་དག་ལ་འབུལ་བར་བྱེད་དེ། སྐུལ་བྱེད་འདི་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་བདུན་པ་ཡིན་ཞེས་བྱ་བ་ནས་བསོད་ནམས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་སྔ་མ་
[9a.6]བཞིན་ནོ། །རྫས་ལས་བྱུང་བའི་བསོད་ནམས་བྱ་བའི་དངོས་པོ་བདུན་པོ་འདི་དག་དང་ལྡན་པའི་དད་པའི་རིགས་ཀྱི་བུ་འམ་རིགས་ཀྱི་བུ་མོའི་བསོད་ནམས་ནི་བསོད་ནམས་འདི་ཙམ་ཞིག་གོ་ཞེ་འམ་འབྲས་བུ་རྣམ་པར་སྨིན་པ་འདི་ཙམ་ཞེས་ཚད་གཟུང་དུ་མེད་ཀྱི་འོན་ཀྱང་བསོད་ནམས་ཆེ་བའི་ཕྱིར་
[9a.7]བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ་ཞེས་བྱ་བ་དེ་ལྟ་བུ་ལ་སོགས་པ་ཡིན་ནོ། །ལན་གཉིས་ཀྱི་བར་དུ་ཡང་བཅོམ་ལྡན་འདས་ལ་ཚེ་དང་ལྡན་པ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཙུན་པ་རྫས་ལས་བྱུང་བ་མ་ལགས་པའི་བསོད་ནམས་བགྱི་བའི་དངོས་པོ་འབྲས་བུ་
[9b]
[9b.1]ཆེ་བ་ནས་རྒྱ་ཆེ་བའི་བར་གདགས་སུ་མཆིས་ལགས་སམ། བཅོམ་ལྡན་འདས་ཀྱིས་དེ་ལ་སྐུལ་བྱེད་གདགས་སུ་ཡོད་དོ་ཞེས་བཀའ་སྩལ་ཏོ། །སྐུལ་བྱེད་བདུན་པོ་འདི་དག་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་དངོས་པོ་ཡིན་ཏེ། དེ་དག་དང་ལྡན་པའི་དད་པའི་རིགས་ཀྱི་བུ་འམ་
[9b.2]རིགས་ཀྱི་བུ་མོ་ནི་རྒྱུ་ཡང་རུང་འདུག་ཀྱང་རུང་ཞེས་བྱ་བ་རྒྱས་པར་བསོད་ནམས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་གསུངས་སོ། །བདུན་གང་ཞེ་ན། སྐུལ་བྱེད་འདི་ལ་དད་པའི་རིགས་ཀྱི་བུ་འམ་རིགས་ཀྱི་བུ་མོ་དེ་བཞིན་གཤེགས་པ་འམ་དེ་བཞིན་གཤེགས་པའི་ཉན་ཐོས་གྲོང་ངམ་ཞིང་
[9b.3]ཆེ་གེ་མོ་ཞིག་ན་རྟེན་ཅིང་བཞུགས་སོ་ཞེས་ཐོས་ཤིང་ཐོས་ནས་ཀྱང་ཡང་དགའ་བ་དང་རབ་ཏུ་དགའ་བ་རྒྱ་ཆེ་བ་དགེ་བ་ངེས་པར་འབྱུང་བ་དང་ལྡན་པ་འཐོབ་སྟེ་སྐུལ་བྱེད་འདི་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་དངོས་པོ་དང་པོ་ཡིན་ནོ་ཞེས་བྱ་བ་ནས་བསོད་ནམས་ཉེ་བར་སྐྱེ་བ་ཁོ་ནར་འགྱུར་རོ་
[9b.4]ཞེས་བྱ་བའི་བར་སྔ་མ་བཞིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུ་དང་རིགས་ཀྱི་བུ་མོ་དེ་བཞིན་གཤེགས་པ་འམ་དེ་བཞིན་གཤེགས་པའི་ཉན་ཐོས་ཚུར་གཤེགས་པར་རྩོམ་པ་ཐོས་ཤིང་ཐོས་ནས་ཀྱང་ཡང་དགའ་བ་དང་རབ་ཏུ་དགའ་བ་ཐོབ་སྟེ་ཞེས་བྱ་བའི་བར་སྔ་མ་བཞིན་ནོ། །སྐུལ་
[9b.5]བྱེད་འདི་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་དངོས་པོ་གཉིས་པ་ཡིན་ཞེས་བྱ་བ་ནས་བསོད་ནམས་ཉེ་བར་སྐྱེ་བ་ཁོ་ནར་འགྱུར་རོ་ཞེས་བྱ་བའི་བར་སྔ་མ་བཞིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུ་འམ་རིགས་ཀྱི་བུ་མོ་དེ་བཞིན་གཤེགས་པ་འམ་དེ་བཞིན་གཤེགས་པའི་
[9b.6]ཉན་ཐོས་དེ་ཉིད་གྲོང་ངམ་ཞིང་དེ་ཁོ་ནའི་ལམ་དུ་ཞུགས་སོ་ཞེས་ཐོས་ཤིང་ཐོས་ནས་ཀྱང་ཡང་དགའ་བ་ཐོབ་པོ་ཞེས་བྱ་བ་ནས་བསོད་ནམས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་སྔ་མ་བཞིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུ་འམ་རིགས་ཀྱི་བུ་མོ་དེ་བཞིན་གཤེགས་པ་འམ་
[9b.7]དེ་བཞིན་གཤེགས་པའི་ཉན་ཐོས་གྲོང་ངམ་ཞིང་དེ་ཉིད་དུ་ཕྱིན་པར་ཐོས་ཤིང་ཐོས་ནས་ཀྱང་ཡང་དགའ་བ་ཐོབ་ཅེས་བྱ་བ་སྔ་མ་བཞིན་ནོ། །འདི་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་དངོས་པོ་བཞི་པ་ཡིན་ཞེས་བྱ་བ་ནས་བསོད་ནམས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་སྔ་
[10a]
[10a.1]མ་བཞིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུ་འམ་རིགས་ཀྱི་བུ་མོ་དེ་བཞིན་གཤེགས་པ་འམ་དེ་བཞིན་གཤེགས་པའི་ཉན་ཐོས་ཉིད་ལྟ་བའི་ཕྱིར་འགྲོ་ཞིང་མཐོང་ནས་ཀྱང་ཡང་དགའ་བ་ཐོབ་ཅེས་བྱ་བ་སྔ་མ་བཞིན་ནོ། །སྐུལ་བྱེད་འདི་ནི་རྫས་ལས་བྱུང་བ་མ་ཡིན་པ་
[10a.2]བསོད་ནམས་བྱ་བའི་དངོས་པོ་སྔ་མ་བཞིན་ཞེས་བྱ་བ་ནས་བསོད་ནམས་ཉེ་བར་སྐྱེ་བར་འགྱུར་ཞེས་བྱ་བའི་བར་སྔ་མ་བཞིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུ་འམ་རིགས་ཀྱི་བུ་མོ་དེ་བཞིན་གཤེགས་པ་འམ་དེ་བཞིན་གཤེགས་པའི་ཉན་ཐོས་དེ་ཉིད་ལས་ཆོས་ཐོས་ཤིང་ཐོས་ནས་ཀྱང་
[10a.3]ཡང་དགའ་བ་ཐོབ་ཅེས་བྱ་བ་སྔ་མ་བཞིན་ནོ། །སྐུལ་བྱེད་འདི་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་དངོས་པོ་དྲུག་པོ་ཡིན་ཞེས་བྱ་བ་ནས་བསོད་ནམས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་སྔ་མ་བཞིན་ནོ། །སྐུལ་བྱེད་གཞན་ཡང་དད་པའི་རིགས་ཀྱི་བུ་འམ་རིགས་ཀྱི་བུ་
[10a.4]མོ་དེ་བཞིན་གཤེགས་པ་འམ་དེ་བཞིན་གཤེགས་པའི་ཉན་ཐོས་དེ་ཉིད་ལས་ཆོས་ཐོས་ཤིང་ཆོས་ཐོས་ནས་ཀྱང་སངས་རྒྱས་ལ་སྐྱབས་སུ་འགྲོ། ཆོས་ལ་སྐྱབས་སུ་འགྲོ། དགེ་འདུན་ལ་སྐྱབས་སུ་འགྲོ་ལ། བསླབ་པའི་གནས་དག་ཀྱང་འཛིན་པར་བྱེད་དེ། སྐུལ་བྱེད་འདི་ནི་རྫས་ལས་བྱུང་བ་མ་
[10a.5]ཡིན་པའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་བདུན་པ་ཡིན་ཞེས་བྱ་བ་སྔ་མ་བཞིན་ཏེ། གཞུང་མང་དུ་དོགས་པས་ཐམས་ཅད་ནི་མ་བྲིས་སོ། །ལུང་བསྒོ་བ་ཙམ་ནི་ལས་ཀྱི་ལམ་དུ་མི་རུང་སྟེ། སྲོག་གཅོད་པ་ལ་སོགས་པའི་ལས་དེ་མ་བྱས་པའི་ཕྱིར་རོ། །གལ་ཏེ་ལས་དེ་བྱས་ན་དེ་ལ་ལུང་བསྒོ་
[10a.6]བ་ལས་ཀྱི་ལམ་དུ་འགྱུར་རོ་སྙམ་དུ་སེམས་ན། དེའི་ཕྱིར་བྱས་སུ་ཟིན་ཀྱང་དེའི་རང་གི་ངོ་བོ་ལ་ཁྱད་པར་མེད་པའི་ཕྱིར་ཞེས་བྱ་བ་སྨོས་ཏེ། གཞན་གྱི་ལས་དེ་བྱས་སུ་ཟིན་ཀྱང་ལུང་བསྒོ་བ་དེ་ལ་ནི་གང་གིས་ན་དེའི་ཚེ་ལས་ཀྱི་ལམ་དུ་འགྱུར་བ་རང་གི་ངོ་བོ་ལ་ཁྱད་པར་ཅུང་ཟད་ཀྱང་མེད་དོ། །དེ་ལྟ་བས་ན་སྔ་
[10a.7]མ་བཞིན་དུ་དེའི་རང་གི་ངོ་བོ་ལ་ཁྱད་པར་མེད་པའི་ཕྱིར་ཇི་ལྟར་སྔར་གྱི་ལས་ཀྱི་ལམ་དུ་རྣམ་པར་མི་གཞག་པ་ལྟར་ཕྱིས་ཀྱང་དེ་ཁོ་ན་དང་འདྲའོ། །དེ་བས་ན་དེའི་ཚེ་ལས་ཀྱི་ལམ་གྱིས་བསྡུས་པ་སྐྱེ་བ་གང་ཡིན་པ་དེ་ཡོད་དོ་ཞེས་བྱ་བར་ཁས་བླང་བར་བྱ་དགོས་སོ། །སྐྱེ་མཆེད་གཅིག་གིས་མ་བསྡུས་པ་ཞེས་བྱ་
[10b]
[10b.1]བ་ནི་ཆོས་ཀྱི་སྐྱེ་མཆེད་མ་གཏོགས་པ་དག་གིས་སོ། །ངག་དང་ལས་ཀྱི་མཐའ་དང་། འཚོ་བ་རྣམས་མ་རུངས་པའི་ཕྱིར་རོ་ཞེས་བྱ་བ་ནི་འདི་དག་རྣམ་པར་རིག་བྱེད་ཀྱི་ངོ་བོ་ཉིད་ནི་མི་སྲིད་པའི་ཕྱིར་རོ་ཞེས་བྱ་བའི་ཐ་ཚིག་གོ། །འོ་ན་འདི་སྐད་དུ་གང་གསུངས་སོ་ཞེས་བྱ་བ་རྒྱས་པར་འབྱུང་བ་ལ་
[10b.2]འདིའི་འབྲེལ་པ་གང་ཞེ་ན། ཇི་སྟེ་ཁྱེད་གལ་ཏེ་རྣམ་པར་རིག་བྱེད་མ་ཡིན་པ་མེད་པར་གྱུར་ན་དེ་ན་རྣམ་པར་རིག་བྱེད་ནི་མེད་པའི་ཕྱིར་འཕགས་པའི་ལམ་ཡན་ལག་བརྒྱད་པར་ཡང་མི་འགྱུར་ཏེ། དེ་ལྟ་བས་ན་རྣམ་པར་རིག་བྱེད་མ་ཡིན་པ་ནི་ཡོད་དོ་ཞེས་བྱ་བར་འདོད་ན། འོ་ན་ཅིའི་ཕྱིར་འདི་སྐད་
[10b.3]དུ་གང་གསུངས་སོ་ཞེས་བྱ་བ་ནས་རྒྱས་པར་ཡང་དག་པའི་ཏིང་ངེ་འཛིན་ཞེས་བྱ་བའི་བར་རྒྱས་པར་བརྗོད་ནས་འདི་སྐད་དུ་འདིའི་སྔོན་ཡོངས་སུ་དག་ཅེས་བྱ་བ་ཐམས་ཅད་བརྗོད་དོ། །ལམ་ལ་སྙོམས་པར་འཇུག་པའི་དུས་ཀྱི་སྔོན་རོལ་དུ་ཞེས་བྱ་བའི་ཐ་ཚིག་སྟེ། དེ་དག་ནི་རྣམ་པར་རིག་བྱེད་ཀྱི་གཟུགས་
[10b.4]ཡིན་པར་གསུངས་སོ་སྙམ་དུ་བསམས་པ་ཡིན་ནོ། །བྱེ་བྲག་ཏུ་སྨྲ་བ་རྣམས་དེ་ནི་སྔོན་འཇིག་རྟེན་པའི་ལམ་གྱིས་འདོད་ཆགས་དང་བྲལ་བར་བྱས་པ་ལ་དགོངས་ཏེ་གསུངས་པ་ཡིན་ནོ་ཞེས་ལན་འདེབས་པར་བྱེད་དེ། དེ་ནི་འཇིག་རྟེན་པའི་ལམ་གྱིས་འདོད་ཆགས་དང་བྲལ་བའི་གནས་སྐབས་ཀྱི་
[10b.5]ངག་ལ་སོགས་པའི་ངོ་བོ་ཉིད་ཀྱིས་རྣམ་པར་རིག་བྱེད་ཀྱི་གཟུགས་ལས་དགོངས་ནས་གསུངས་པ་ཡིན་གྱི་ལམ་གྱི་ཚེ་དེས་བསྡུས་པའི་ངག་ལ་སོགས་པའི་རྣམ་པར་རིག་བྱེད་མ་ཡིན་པའི་གཟུགས་མེད་པའི་ཕྱིར་ནི་མ་ཡིན་ནོ། །ཏིང་ངེ་འཛིན་གྱི་ཡུལ་གྱི་གཟུགས་ཞེས་བྱ་བ་ནི་ཏིང་ངེ་འཛིན་གྱི་དམིགས་པ་
[10b.6]སྟེ་རུས་པའི་རུས་གོང་ལ་སོགས་པའོ། །ཡུལ་ལ་མི་སྒྲིབ་པའི་ཕྱིར་ནི་ཐོགས་པ་མེད་པ་ཡིན་ནོ་ཞེས་བྱ་བ་ནི་གཟུགས་གང་ཞིག་ཡུལ་ལ་སྒྲིབ་པར་བྱེད་པ་དེ་ནི་ཐོགས་པ་དང་བཅས་པ་ཡིན་ལ་བཟློག་པ་ནི་ཐོགས་པ་མེད་པ་ཡིན་ནོ་ཞེས་བྱ་བར་གྲུབ་པོ། །ད་ནི་དེ་ཇི་ལྟར་གཟུགས་ཡིན་སྙམ་དུ་
[10b.7]སེམས་ན་ཞེས་བྱ་བ་ནི་གལ་ཏེ་གཟུགས་སུ་བྱ་བར་མི་ནུས་ན་སྙམ་དུ་བསམས་པ་ཡིན་ནོ། །དེ་ནི་རྣམ་པར་རིག་བྱེད་མ་ཡིན་པ་ལའང་མཚུངས་ཏེ། ཁྱེད་ཀྱི་རྣམ་པར་རིག་བྱེད་མ་ཡིན་པ་ཡང་ཡུལ་ལ་མི་སྒྲིབ་པས་འདྲའོ། །ཟག་པ་མེད་པའི་ཏིང་ངེ་འཛིན་ལ་ཟག་པ་མེད་པ་ཡིན་ནོ་ཞེས་བྱ་བ་ནི་རྣལ་
[11a]
[11a.1]འབྱོར་སྤྱོད་པ་ལམ་མངོན་དུ་བྱེད་པས་དེ་ལྟ་བུའི་བསམ་པ་དང་རྟེན་འཐོབ་སྟེ། གང་ཞིག་ཡོད་ན་རང་བཞིན་གྱི་ཚུལ་ཁྲིམས་ལ་གནས་པར་འགྱུར་བ་ཡང་དག་པའི་ལྟ་བ་ལྟ་བུའི་ཟག་པ་མེད་པའི་ཚུལ་ཁྲིམས་འཐོབ་པོ། །ཡང་ན་འཕགས་པ་དེ་དག་ཟག་པ་མེད་
[11a.2]པའི་ཏིང་ངེ་འཛིན་གྱི་ཚེ་གཟུགས་དེ་ལྟ་བུ་དེ་བཞེད་པ་ཡིན་ནོ། །གཞན་དག་ན་རེ་དགྲ་བཅོམ་པའི་གཟུགས་དང་ཕྱི་རོལ་གང་ཡིན་པའོ་ཞེས་ཟེར་རོ་ཞེས་བྱ་བ་ནི་སློབ་དཔོན་གཞན་དག་ན་རེ་དགྲ་བཅོམ་པའི་གཟུགས་མིག་གི་སྐྱེ་མཆེད་ལ་སོགས་པ་དང་། ཕྱི་རོལ་གྱི་རྩིག་པ་ལ་སོགས་པ་གང་ཡིན་
[11a.3]པ་དེ་ནི་ཟག་པ་མེད་པའི་གཟུགས་ཡིན་ནོ་ཞེས་ཟེར་རོ། །ཅིའི་ཕྱིར་ཞེ་ན། ཟག་པ་རྣམས་ཀྱི་རྟེན་མ་ཡིན་པའི་ཕྱིར་ཏེ། དགྲ་བཅོམ་པའི་རྒྱུད་ལ་ཡོད་པ་འམ་ཕྱིའི་གཟུགས་ནི་ཟག་པ་ཉོན་མོངས་པ་རྣམས་ཀྱི་རྟེན་མ་ཡིན་ནོ། །གལ་ཏེ་དེ་ལྟར་ཡིན་ན་འོ་ན་གང་མདོ་ལས་ཁྱད་པར་མེད་
[11a.4]པར་ཟག་པ་དང་བཅས་པའི་ཆོས་རྣམས་གང་ཞེ་ན་མིག་ཇི་སྙེད་པ་དང་གཟུགས་ཇི་སྙེད་པ་དག་ཡིན་ནོ་ཞེས་རྒྱས་པར་གསུངས་སོ་ཞེ་ན། དེ་ནི་ཟག་པ་རྣམས་ཀྱི་གཉེན་པོ་མ་ཡིན་པའི་ཕྱིར་ཟག་པ་དང་བཅས་པར་གསུངས་པ་ཡིན་ཏེ་ཟག་པའི་གཉེན་པོ་ནི་སེམས་དང་སེམས་ལས་བྱུང་བའི་
[11a.5]ཁྱད་པར་དག་ཡིན་ནོ། །འོ་ན་ནི་རྣམ་གྲངས་ཀྱིས་ཞེས་བྱ་བ་རྒྱས་པར་འབྱུང་བ་ནི་དགྲ་བཅོམ་པ་འམ་ཕྱིའི་གཟུགས་དེ་ཉིད་ཟག་པ་རྣམས་ཀྱི་གཉེན་པོ་མ་ཡིན་པའི་ཕྱིར་ཟག་པ་དང་བཅས་པ་ཡང་ཡིན་ལ་ཟག་པ་རྣམས་ཀྱི་རྟེན་མ་ཡིན་པའི་ཕྱིར་ཟག་པ་མེད་པ་ཡང་ཡིན་ནོ་ཞེས་བྱ་བ་ཡིན་ཏེ། དེ་ལྟར་ན་ནི་
[11a.6]མཚན་ཉིད་འཆོལ་བར་འགྱུར་བས་ཉེས་པ་ཡིན་ནོ། །གཟུགས་ཟག་པ་དང་བཅས་པ་ཉེ་བར་ལེན་པར་འགྱུར་བ་གང་དག་ཡིན་པ་ཞེས་བྱ་བ་ནི་གཟུགས་ཀྱི་སྐྱེ་མཆེད་ཅེས་བྱ་བའི་ཐ་ཚིག་སྟེ། རྒྱས་པར་ཆོས་ཟག་པ་དང་བཅས་པ་ཉེ་བར་ལེན་པར་འགྱུར་བ་གང་དག་ཡིན་པ་དེ་དག་ནི་སེམས་ཀྱི་ཐ་བ་དང་
[11a.7]སྦགས་པའི་གཞི་ཡིན་ནོ་ཞེས་བྱ་བའི་བར་གསུངས་པའི་ཕྱིར་གཟུགས་ཀྱི་སྐྱེ་མཆེད་ཟག་པ་མེད་པ་དེ་དག་ནི་ཡོད་དོ། །ཟག་པ་དང་བཅས་པ་ཉེ་བར་ལེན་པར་གྱུར་པ་དེ་དག་ཀྱང་གང་ཞེ་ན། སོ་སོའི་སྐྱེ་བོའི་གཟུགས་གང་དག་ཡིན་པ་སྟེ། ཟག་པ་རྣམས་ཀྱི་རྟེན་ཡིན་པའི་ཕྱིར་དང་། དེའི་གཉེན་པོ་
[11b]
[11b.1]མ་ཡིན་པའི་ཕྱིར་རོ། །ཟག་པ་མེད་པ་དག་གང་ཞེ་ན། དགྲ་བཅོམ་པའི་དང་། ཕྱིའི་གཟུགས་རྣམས་ཏེ། ཟག་པ་རྣམས་ཀྱི་རྟེན་མ་ཡིན་པའི་ཕྱིར་རོ། །ཡོན་ཏན་གྱི་ཁྱད་པར་ཞེས་བྱ་བ་ནི་བསམ་གཏན་དང་ཚད་མེད་པ་ལ་སོགས་པའི་ཡོན་ཏན་གྱི་ཁྱད་པར་རོ། །ཕན་བཏགས་པའི་ཁྱད་པར་ཞེས་
[11b.2]བྱ་བ་ནི་ལུས་ཀྱི་ཁ་དོག་དང་སྟོབས་ལ་སོགས་པའི་ཁྱད་པར་རོ། །དེ་ལ་དམིགས་པ་ཞེས་བྱ་བ་རྒྱས་པར་འབྱུང་བ་ནི་འདི་ལ་དམིགས་པ་ལེན་པ་པོ་དེ་ཡོད་པས་ན་འདི་ནི་དེ་ལ་དམིགས་པའི་སྦྱིན་པའི་སེམས་པ་སྟེ། དེ་ཡོངས་སུ་བསྒོམ་པའི་རྒྱུད་ཡོངས་སུ་འགྱུར་བའི་ཁྱད་པར་ཕྲ་མོ་འཐོབ་པར་འགྱུར་
[11b.3]རོ། །འདི་ནི་ཆོས་ཉིད་ཡིན་ཏེ་ཞེས་བྱ་བ་ནི་ཆོས་རྣམས་ཀྱི་ནུས་པ་ཐོག་མ་མེད་པ་ཡིན་ནོ། །ཇི་ལྟར་འགྱུར་ཞེས་བྱ་བ་ནི་རྒྱུད་ཇི་ལྟར་འབྲས་བུ་ཤིན་ཏུ་མང་པོ་མངོན་པར་བསྒྲུབ་པར་འགྱུར་སྙམ་དུ་བསམས་པ་ཡིན་ཏེ། འདི་ལ་ནི་གང་ཞིག་ཡོངས་སུ་སྤྱད་ནས་ཟ་བ་པོ་རྣམས་ཀྱི་ཡོན་ཏན་གྱི་
[11b.4]ཁྱད་པར་དང་། ཕན་བཏགས་པའི་ཁྱད་པར་གྱིས་ཡིད་གཞན་དང་ལྡན་པའི་སྦྱིན་པ་པོ་རྣམས་ལ་ཡང་ཞེས་བྱ་བ་ནས་རྒྱས་པར་འགྱུར་བ་ཞེས་བྱ་བའི་བར་རམ། བསོད་ནམས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་དུ་འགྱུར་བ་ལྟ་བུ་སྦྱིན་པ་པོ་རྣམས་ཀྱིས་སྦྱིན་པར་བྱ་བ་དག་ཡོངས་སུ་སྤྱོད་པ་མེད་
[11b.5]དོ། །དེ་ལ་དམིགས་པའི་སེམས་པ་ལ་གོམས་པས་ཞེས་བྱ་བ་ནི་དེ་བཞིན་གཤེགས་པ་དང་དེའི་ཉན་ཐོས་ལ་དམིགས་པའི་སེམས་པ་ལ་གོམས་པས་གང་གིས་ན་ཚེ་ཕྱི་མ་ལ་འབྲས་བུ་ཆེས་མང་པོ་མངོན་པར་བསྒྲུབ་ནུས་པར་འགྱུར་བ་རྒྱུད་ཡོངས་སུ་འགྱུར་བའི་ཁྱད་པར་ཕྲ་མོ་ཐོབ་པར་འགྱུར་རོ། །རྒྱུ་
[11b.6]བ་དང་འདུག་པ་དང་མི་ཉལ་བ་ལ་ནི་དེ་ལྟ་བུར་ཡང་རིགས་ན་ཉལ་བ་ལ་གོ་ཇི་ལྟར་ཞེ་ན། དེའི་ཕྱིར་རྨི་ལམ་དག་ན་ཡང་དེ་དག་རྗེས་སུ་འབྲང་བར་འགྱུར་རོ་ཞེས་བྱ་བ་སྨོས་སོ། །བྱེ་བྲག་ཏུ་སྨྲ་བ་རྣམ་པར་རིག་བྱེད་མ་ཡིན་པར་སྨྲ་བ་ལྟར་ན་རྫས་ལས་བྱུང་བ་མ་ཡིན་པ་གང་ལ་རྣམ་པར་རིག་བྱེད་མེད་ཀྱི་ཐོས་
[11b.7]ན་དགའ་བ་དང་རབ་ཏུ་དགའ་བ་དགེ་བ་ཐོབ་པ་འབའ་ཞིག་ཏུ་ཟད་པས་དེ་ལ་ཇི་ལྟར་རྣམ་པར་རིག་བྱེད་མ་ཡིན་པར་འགྱུར་ཏེ་ཉན་པ་པོ་དེ་ལ་ནི་རྣམ་པར་རིག་བྱེད་དང་ཏིང་ངེ་འཛིན་དག་མེད་པའི་ཕྱིར་ལ་རྣམ་པར་རིག་བྱེད་མ་ཡིན་པ་ན་རྣམ་པར་རིག་བྱེད་དམ་ཏིང་ངེ་འཛིན་ལས་སྐྱེ་བར་འགྱུར་བས་སོ། །རྫས་
[12a]
[12a.1]ལས་བྱུང་བ་དག་ལ་ཡང་ཞེས་བྱ་བ་རྒྱས་པར་འབྱུང་བ་ནི་ཀུན་དགའ་ར་བ་འབུལ་བ་སོགས་པ་ལ་ཡང་དེ་ལ་དམིགས་པའི་སེམས་པ་ལ་གོམས་པར་འགྱུར་ཏེ། སེམས་པ་འདི་ལ་དམིགས་པ་ལེན་པ་པོ་ཡོད་པས་ཞེས་བྱ་བ་སྔ་མ་བཞིན་ནོ། །སྨྲས་པ། གལ་ཏེ་རྫས་ལས་བྱུང་བ་དག་
[12a.2]ལ་ཡང་དེ་ལྟར་ཡང་དང་ཡང་དུ་དེ་ལ་དམིགས་པའི་སེམས་པ་ལ་སོགས་པས་འགྱུར་ན་འོ་ན་མདོ་ལས་གང་གསུངས་པ་ཞེས་བྱ་བ་རྒྱས་པར་སྨོས་ཏེ། སེམས་ཀྱི་ཏིང་ངེ་འཛིན་ཞེས་བྱ་བ་ནི་བྱམས་པ་ལ་སོགས་པ་དང་མཚུངས་པར་ལྡན་པའོ། །སེམས་པའི་ཁྱད་པར་གང་ཞིག་ཡིན་ཞེས་བྱ་བ་ནི་དེ་ལ་
[12a.3]དམིགས་པའི་སེམས་པ་མེད་པ་ཡང་སྦྱིན་པ་པོ་ལ་ཡང་བསོད་ནམས་ཀྱི་རྒྱུ་མཐུན་པ་ཡོད་དོ་ཞེས་སྟོན་པར་བྱེད་དོ། །བྱ་བའི་འབྲས་བུ་ཡོངས་སུ་རྫོགས་ན་ཞེས་བྱ་བ་ལ་བྱ་བ་ནི་ལས་ཀྱི་ལམ་དངོས་ལ་སྦྱོར་བ་ཡིན་ནོ། །འབྲས་བུ་ནི་ལས་ཀྱི་ལམ་དངོས་ཏེ་དེ་ཡོངས་སུ་རྫོགས་ནའོ། །ཚུལ་འདི་ཉིད་
[12a.4]ཡིན་ཞེས་བྱ་བ་ནི་བདག་ཉིད་ཀྱི་སྦྱོར་བས་གཞན་དག་ལ་གནོད་པར་བྱས་པའི་ཁྱད་པར་ལས་བྱེད་པ་པོ་ལ་རྒྱུད་ཡོངས་སུ་འགྱུར་བའི་ཁྱད་པར་སྐྱེའོ་ཞེས་བྱ་བ་ཐམས་ཅད་སྦྱར་རོ། །འབྲས་བུ་ལ་རྒྱུ་བཏགས་པའི་ཕྱིར་རོ་ཞེས་བྱ་བ་ནི་རྒྱུད་ཡོངས་སུ་འགྱུར་བའི་ཁྱད་པར་ལས་ཀྱི་ལམ་ཡིན་ནོ་ཞེས་བྱ་
[12a.5]བ་ལ་རྒྱུད་ཡོངས་སུ་འགྱུར་བའི་ཁྱད་པར་ནི་འབྲས་བུ་ཡིན་ལ་ལས་ཀྱི་ལམ་དུ་ནི་རྒྱུ་ཡིན་ནོ། །ལུས་དང་ངག་གི་སྦྱོར་བ་གང་ཡིན་པ་དེའང་སེམས་པའི་མཚན་ཉིད་ཀྱི་ལས་ཀྱི་ལམ་ཡིན་པས་འབྲས་བུ་དེ་ལས་ཀྱི་ལམ་མོ་ཞེས་རྒྱུ་ཉེ་བར་བཏགས་པ་ཡིན་ནོ། །ལུས་དང་ངག་གི་ནི་རྒྱུད་ཡོངས་
[12a.6]སུ་འགྱུར་བའི་བྱེ་བྲག་དེ་དག་གི་བྱ་བའི་འབྲས་བུ་ཡིན་པའི་ཕྱིར་ཏེ་ལུས་དང་ངག་གི་བྱ་བའི་འབྲས་བུ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །དཔེར་ན་རྣམ་པར་རིག་བྱེད་མ་ཡིན་པར་སྨྲ་བ་རྣམས་ཀྱི་རྣམ་པར་རིག་བྱེད་མ་ཡིན་པ་ལྟ་བུའོ་ཞེས་བྱ་བ་ནི་དཔེར་ན་བྱེ་བྲག་ཏུ་སྨྲ་བ་རྣམ་པར་རིག་བྱེད་མ་ཡིན་
[12a.7]པར་སྨྲ་བ་རྣམས་ཀྱི་ལྟར་ན་རྣམ་པར་རིག་བྱེད་མ་ཡིན་པ་ནི་ལས་ཀྱི་ལམ་ཞེས་བྱ་སྟེ། འབྲས་བུ་ལ་རྒྱུར་བཏགས་པའི་ཕྱིར་རོ། །ལུས་ཀྱི་དང་ངག་གི་ནི་དེ་དག་གི་བྱ་བའི་འབྲས་བུ་ཡིན་པའི་ཕྱིར་རོ་ཞེས་བྱ་བ་ལྟ་བུ་ཡིན་ནོ། །བཙུན་པས་རྣམ་པར་རིག་བྱེད་མ་ཡིན་པ་རྫས་མ་ཡིན་ནོ་ཞེས་བྱ་བ་
[12b]
[12b.1]རྣམ་པ་གཞན་གྱིས་བསྟན་པའི་ཕྱིར། ཟིན་པའི་ཕུང་པོ་དག་ལ་ཞེས་བྱ་བ་རྒྱས་པར་སྨོས་ཏེ་ད་ལྟར་གྱི་ཕུང་པོ་སེམས་ཅན་དུ་བགྲང་བ་དག་ལ་དུས་གསུམ་པའི་སེམས་པས་སྲོག་གཅོད་པའི་ཁ་ན་མ་ཐོ་བས་གསོད་པ་པོ་ལ་རེག་པར་འགྱུར་རོ། །ཇི་ལྟར་དུས་གསུམ་པས་རེག་ཅེ་ན། འདི་གང་གི་
[12b.2]ཚེ་གསད་པར་བྱའོ། །གསོད་དོ་བསད་དོ་སྙམ་དུ་སེམས་པ་ན་ཞེས་བྱ་བ་སྨོས་ཏེ་དེ་ལྟར་ན་འདིར་ནི་སེམས་པ་ཁོ་ན་ལས་ཡིན་པར་བཤད་དོ། །སློབ་དཔོན་གྱིས་བཙུན་པའི་གཞུང་ལུགས་ལ་ལ་ནི་འདོད་ལ་ལ་ནི་མི་འདོད་པར་བསྟན་པའི་ཕྱིར། དེ་ཙམ་གྱིས་ལས་ཀྱི་ལམ་ཡོངས་སུ་རྫོགས་པ་མ་
[12b.3]ཡིན་གྱི་ཞེས་རྒྱས་པར་སྨོས་ཏེ། གལ་ཏེ་འགའ་ཞིག་འདི་སྐད་དུ་ངའི་མ་འདི་སོད་ཅིག་ཅེས་སྦྱོར་བར་བྱེད་ཅིང་གཤེད་མ་སོང་བ་དང་། དེ་འདི་སྙམ་དུ་ཀྱེ་མ་འདིས་བདག་གི་མ་བསད་དོ་སྙམ་དུ་སེམས་པར་གྱུར་ན་བསད་པར་མངོན་པའི་ང་རྒྱལ་བྱེད་པ་དེ་ལ་མཚམས་མེད་པའི་ལས་སུ་གྱུར་པ་ཞིག་ན་དེ་
[12b.4]ལྟར་ཡང་མི་འདོད་དོ། །དེ་ལྟ་བས་ན་བཙུན་པས་བདག་ཉིད་ཀྱིས་གསོད་ན་ཞེས་ཁྱད་པར་དུ་བྱས་ནས་བརྗོད་དགོས་སོ། །དེ་ཉིད་ཀྱི་ཕྱིར། བདག་ཉིད་ཀྱིས་གསོད་པ་ན་ཞེས་བྱ་བ་རྒྱས་པར་སྨོས་ཏེ། སེམས་པ་དེ་སྙེད་ཅིག་ཏུ་ཀུན་འབྱུང་ངོ་ཞེས་བྱ་བ་ནི་གསད་པར་བྱའོ། །གསོད་དོ། །བསད་དོ་སྙམ་པ་
[12b.5]ཡིན་ནོ། །རིགས་པའི་ངོ་བོ་ཉིད་ཡིན་ནོ་ཞེས་བྱ་བ་ནི་ཁ་ཅིག་ན་རེ་རེག་པ་ཉིད་རིགས་པའི་ངོ་བོ་ཡིན་པས་མིང་དུ་གདགས་པ་དང་འདྲ་བར་རང་གི་དོན་ལ་ངོ་བོའི་རྐྱེན་ཡིན་ཏེ། དཔེར་ན་མིང་ཉིད་ལ་མིང་དུ་གདགས་པ་ཞེས་བྱ་བ་ལྟ་བུ་ཡིན་ནོ་ཞེས་ཟེར་རོ། །ཡང་ན་རིགས་པ་ཤེས་པ་ནི་རིགས་པའི་ངོ་བོ་ཡིན་
[12b.6]པའམ་འདི་ལ་རིགས་པའི་ངོ་བོར་ཏེ། ངོ་བོ་ཉིད་ཡོད་པས་ན་རིགས་པའི་ངོ་བོའོ། །དེ་ཁོ་ན་དང་འདྲ་བར་མི་མངོན་པ་ཞེས་བྱ་བ་ནི་ཇི་ལྟར་རྣམ་པར་རིག་བྱེད་མ་ཡིན་པ་རྟོགས་པར་དཀའ་བ་ལྟར་རྒྱུད་ཡོངས་སུ་གྱུར་པའི་ཁྱད་པར་ཡང་དེ་ཁོ་ན་དང་འདྲའོ་ཞེས་བྱ་བ་ཡིན་ནོ། །སེམས་ཀྱི་རྒྱུ་ལས་བྱུང་བའི་
[12b.7]ལུས་ཀྱི་སྦྱོར་བས་ཞེས་བྱ་བ་ནི་སེམས་སྔོན་དུ་འགྲོ་བ་ཅན་གྱི་ལུས་ཀྱི་སྦྱོར་བས་ཞེས་བྱ་བའི་ཐ་ཚིག་གོ། །དེ་དག་དང་ཐ་དད་པར་གྱུར་པ་ཞེས་བྱ་བ་ནི་ལུས་དང་སེམས་དག་དང་ཐ་དད་པར་གྱུར་པའོ། །གང་གིས་བྱས་པའི་སྦྱོར་བ་ལས་བྱུང་བ་ཞེས་པ་ནི་གང་ཞིག་གིས་བྱས་པ་ནི་གང་གིས་བྱས་པའོ། །སྦྱོར་
[13a]
[13a.1]བ་ལས་བྱུང་བའི་བྱ་བ་ཡོངས་སུ་རྫོགས་པ་ནི་ལས་ཀྱི་ལམ་ཡོངས་སུ་རྫོགས་པ་སྟེ། སྦྱོར་བར་བྱེད་པ་སེམས་དང་སེམས་ལས་བྱུང་བ་དེ་ཁོ་ན་དེའི་རྒྱུ་ཅན་ཏེ། སྦྱོར་བ་དེའི་རྒྱུ་ཅན་གྱི་རྒྱུད་ཡོངས་སུ་འགྱུར་བ་འབྱུང་ངོ་ཞེས་བྱ་བ་ནི་ཡོངས་སུ་དགའ་བར་འགྱུར་ཏེ། ཁོ་བོ་ཅག་ཅེས་བྱ་བ་
[13a.2]ཚིག་ལྷག་མ་ཡིན་ནོ་སེམས་དང་སེམས་ལས་བྱུང་བའི་རྒྱུད་ལས་ཚེ་ཕྱི་མ་ལ་འབྲས་བུ་འབྱུང་བའི་ཡང་ཕྱིར་གྱི་རྣམ་པར་རིག་བྱེད་མ་ཡིན་པ་ལས་བྱུང་བའི་ཕྱིར་ནི་མ་ཡིན་ཏེ་ཅིས་ན་ཡོངས་སུ་དགའ་བར་འགྱུར་ཞེས་བྱ་བར་སྦྱར་རོ། །རྣམ་པར་རིག་བྱེད་མེད་པའི་ཕྱིར་རོ་ཞེས་བྱ་བ་དེ་ལྟ་བུ་ལ་སོགས་
[13a.3]པའོ་ཞེས་བྱ་བ་ནི་ཀུན་ནས་སློང་བར་བྱེད་པའི་ཆོས་མེད་པའི་ཕྱིར་ཀུན་ནས་བསླང་བར་བྱ་བའི་ཆོས་མེད་དོ་ཞེས་བྱ་བའི་ཐ་ཚིག་གོ། །རྣམ་པར་རིག་བྱེད་རྫས་སུ་མེད་དོ་ཞེས་བྱ་བ་དེ་ནི་བསྒྲུབས་ཟིན་ཏོ། །སྩོགས་པ་ཞེས་བྱ་བའི་སྒྲས་ནི་ཁས་བླངས་ནས་མི་བྱེད་པའི་ཕྱིར་དང་། འདས་པའི་འབྱུང་བ་
[13a.4]ཆེན་པོ་རྣམས་ལ་ཡང་བརྟེན་ནས་འདོགས་པའི་ཕྱིར་ལ་དེ་དག་ཀྱང་རང་གི་ངོ་བོ་མེད་པའི་ཕྱིར་དང་ཞེས་བྱ་བ་དེ་ལྟ་བུ་ལ་སོགས་པ་བསྡུའོ། །དེ་ཉིད་ཆོས་ཀྱི་སྐྱེ་མཆེད་དུ་གཏོགས་པ་མ་ཡིན་ནོ་ཞེས་བྱ་བ་ནི་བསམ་གཏན་པ་རྣམས་ཀྱི་ཏིང་ངེ་འཛིན་གྱི་མཐུས་ཏིང་ངེ་འཛིན་གྱི་གཟུགས་འབྱུང་བ་གང་ཡིན་པ་
[13a.5]སྟེ། དེ་ནི་བསྟན་དུ་མེད་པ་འང་ཡིན་ལ་ཐོགས་པ་མེད་པ་ཡང་ཡིན་ནོ། །རེ་ཞིག་ཁྱོད་སྨྲོས་ཤིག་ཅེས་བྱ་བ་ནི་ཁྱོད་ཅེས་བྱ་བ་ནི་མི་མཐུན་པ་ཡིན་ནོ་ཞེས་འདོན་ཏེ་མ་ལ་ཁྱོད་ཇེ་སྨྲོས་ཤིག་ཅེས་བྱ་བ་ཡིན་ནོ། །གཞན་དག་ན་རེ་ཚུར་ཤོག་ཇེ་སྨྲོས་ཤིག་ཅེས་བྱ་བའི་ཐ་ཚིག་གོ་ཞེས་ཟེར་རོ། །དེའི་ཕྱིར་
[13a.6]རྒྱུ་མཚན་ལ་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་དེ་ལྟ་ཡིན་པ་དེའི་ཕྱིར་རྒྱུ་མཚན་རྣམ་པར་རིག་བྱེད་མ་ཡིན་པ་ལ་རྒྱུ་མཚན་ཅན་ཡང་དག་པའི་ངག་ལ་སོགས་པ་ཉེ་བར་བཏགས་ནས་རྣམ་པར་རིག་བྱེད་མ་ཡིན་པ་ལ་དེར་བཤད་དེ་དེ་ཡང་དག་པའི་ངག་དང་ལས་ཀྱི་མཐའ་དང་འཚོ་བ་ཞེས་བྱ་བར་བཤད་
[13a.7]དོ་ཞེས་བྱ་བའི་ཐ་ཚིག་གོ། །དེ་ལྟ་བུའི་བསམ་པ་དང་ལུས་ཞེས་བྱ་བ་ལ་བསམ་པ་ནི་སྲོག་གཅོད་པ་ལ་སོགས་པ་མི་བྱེད་པའི་བསམ་པ་འམ་དད་པ་ལ་སོགས་པའི་བསམ་པའོ། །ལུས་ནི་རྟེན་ཡོངས་སུ་གྱུར་པའོ། །དེའི་ཕྱིར་རྒྱུ་མཚན་བསམ་པ་འམ་ལུས་ལ་རྒྱུ་མཚན་ཅན་ཡང་དག་པའི་ངག་ལ་སོགས་པ་ཉེ་
[13b]
[13b.1]བར་བཏགས་པ་བྱས་ནས་ལམ་གྱི་ཡན་ལག་བརྒྱད་རྣམ་པར་གཞག་གོ། །དེ་དག་མི་བྱེད་པ་ཙམ་ཞེས་བྱ་བ་ནི་ལོག་པའི་ངག་ལ་སོགས་པ་མི་བྱེད་པ་ཙམ་མོ། །དེ་གང་ཞེ་ན། འདིས་འཕགས་པའི་ལམ་ཞེས་བྱ་བ་རྒྱས་པར་སྨོས་སོ། །གལ་ཏེ་མི་བྱེད་པ་ཙམ་ཡན་ལག་ཡིན་ན་དེ་ཇི་ལྟར་
[13b.2]ཟག་པ་མེད་པ་ཉིད་ཡིན་ཞེ་ན། དེ་ཡང་ཟག་པ་མེད་པའི་ལམ་ལ་བརྟེན་ནས་འཐོབ་པའི་ཕྱིར་ཟག་པ་མེད་པ་ཡིན་ནོ་ཞེས་བྱ་བ་སྨོས་སོ། །གལ་ཏེ་མི་བྱེད་པ་ཙམ་ཡན་ལག་ཡིན་ན་རྫས་སུ་ཡོད་པ་མ་ཡིན་པས་ཇི་ལྟར་ཡན་ལག་བརྒྱད་ཡིན་ཞེ་ན། དེའི་ཕྱིར་ཐམས་ཅད་དུ་རྫས་སུ་ཡོད་
[13b.3]པའི་ཆོས་ཡོངས་སུ་བགྲང་བ་ཡང་མ་ཡིན་ཞེས་བྱ་བ་རྒྱས་པར་སྨོས་སོ། །ཆོ་ག་སྔོན་དུ་བཏང་བ་ཞེས་བྱ་བ་ནི་ཚུལ་ཁྲིམས་མནོད་པའི་ཆོ་ག་སྔོན་དུ་བཏང་བའོ། །གལ་ཏེ་སེམས་གཞན་དང་ལྡན་ན་མ་བསྡམས་པར་འགྱུར་རོ་ཞེས་བྱ་བ་ནི་གལ་ཏེ་སེམས་པ་སྡོམ་པ་ཡིན་ན་སེམས་པའི་
[13b.4]སེམས་དེ་ལས་གཞན་པའི་སེམས་དང་ལྡན་ན་མ་བསྡམས་པར་འགྱུར་ཏེ། དེའི་ཚེ་སེམས་པ་གང་གིས་ལུས་དང་ངག་དག་སྡོམ་པར་བྱེད་པ་དེ་ནི་མེད་དོ། །མ་ཡིན་ཏེ་དེ་ལ་གོམས་པས་ཞེས་བྱ་བ་རྒྱས་པར་འབྱུང་བ་ནི་དེ་ནི་དེ་ལྟ་མ་ཡིན་ཏེ་དེ་ལ་གོམས་ཤིང་སེམས་དང་སེམས་ལས་བྱུང་བའི་
[13b.5]རྒྱུན་གོམས་པས་བྱ་བའི་དུས་ཏེ་སེམས་པ་ལ་སོགས་པའི་སེམས་ཉེ་བར་གནས་པ་ན་དྲན་པ་ལ་སྟེ། བདག་ནི་སྲོག་གཅོད་པ་ལ་སོགས་པ་སྤངས་པ་ཡིན་ནོ་སྙམ་པའི་དྲན་པ་ཉེ་བར་གནས་པའི་ཕྱིར་ཏེ་སེམས་གང་གིས་ལུས་དང་ངག་དག་སྡོམ་པར་བྱེད་དེ་མངོན་དུ་འགྱུར་བའི་ཕྱིར་རོ། །དེ་ལྟ་བུ་ཁོ་
[13b.6]ནའི་དོན་དུ་དེ་ཡང་དག་པར་ལེན་ཏོ་ཞེས་བྱ་བ་ནི་ཅི་ནས་ཀྱང་མི་བྱ་བར་དམ་བཅས་པ་འདི་རྗེས་སུ་དྲན་ནས་འཆལ་བའི་ཚུལ་ཁྲིམས་མི་བྱའོ་ཞེས་བྱ་བ་ཡིན་ནོ། །བརྗེད་ངས་པ་འགས་ཀྱང་ཚུལ་ཁྲིམས་འདྲལ་བར་མི་འགྱུར་རོ་ཞེས་བྱ་བ་ནི་དེའི་ཚེ་རྣམ་པར་རིག་བྱེད་མ་ཡིན་པ་ཆུ་ལོན་ལྟ་བུ་འཆལ་
[13b.7]བའི་ཚུལ་ཁྲིམས་ཀྱི་གགས་བྱེད་པ་དེ་ཡོད་པས་སོ། །ཚོགས་པ་དེ་ཉིད་འབྲས་བུ་ཕྲ་མོ་ཅན་ཡང་ཡིན་ལ་འབྲས་བུ་རགས་པ་ཅན་ཡང་ཡིན་པར་ནི་མི་རུང་ངོ་ཞེས་བྱ་བ་ན་རྣམ་པར་རིག་བྱེད་ཀྱི་རྟེན་པའི་སའི་ཁམས་ལ་སོགས་པ་འབྱུང་བ་ཆེན་པོ་རྣམས་ཀྱི་ཚོགས་པ་དེ་ཉིད་འབྲས་བུ་རྣམ་པར་རིག་བྱེད་མ་
[14a]
[14a.1]ཡིན་པ་བསྟན་དུ་མེད་ཅིང་ཐོགས་པ་མེད་པ་ཅན་ཡིན་པའི་ཕྱིར་འབྲས་བུ་ཕྲ་མོ་ཅན་ཡང་ཡིན་ལ་འབྲས་བུ་རྣམ་པར་རིག་བྱེད་བསྟན་དུ་ཡོད་ཅིང་ཐོགས་པ་དང་བཅས་པ་ཡིན་པའི་ཕྱིར་འབྲས་བུ་རགས་པ་ཅན་ཡང་ཡིན་པར་མི་རུང་ངོ་། །དེ་ལྟ་བས་ན་རྣམ་པར་རིག་བྱེད་མ་
[14a.2]ཡིན་པ་ནི་འབྱུང་བ་ཆེན་པོ་གཞན་དང་གཞན་དག་ཁོ་ན་རྒྱུར་བྱས་ནས་སྐྱེའོ། །གང་གི་ཚེ་རྣམ་པར་རིག་བྱེད་ཡོད་པ་ཞེས་བྱ་བ་རྒྱས་པར་འབྱུང་བ་གང་གི་ཚེ་རྣམ་པར་རིག་བྱེད་འབྱུང་བ་ནི་གང་གི་ཚེ་རྣམ་པར་རིག་བྱེད་མ་ཡིན་པ་ཡོད་པའོ། །དེ་ལྟར་དེའི་ཚེ་ཡོད་པ་ནི་འབྱུང་བ་ཆེན་པོ་སྟེ་ཅི་རྣམ་པར་
[14a.3]རིག་བྱེད་མ་ཡིན་པ་དེ་གང་གི་ཚེ་རྣམ་པར་རིག་བྱེད་བྱུང་བ་དེའི་ཚེ་བྱུང་བ་ཁོ་ན་ན་འབྱུང་བ་ཆེན་པོ་དག་རྒྱུར་བྱས་ནས་སྐྱེ་འམ་ཞེ་ན་ཐམས་ཅད་ཅེས་བྱ་བ་ནི་རྒྱུར་བྱས་པའི་གཟུགས་རྣམ་པར་རིག་བྱེད་དང་། རྣམ་པར་རིག་བྱེད་མ་ཡིན་པ་དང་། བསམ་གཏན་དང་ཟག་པ་མེད་པས་བསྡུས་པ་དང་། མིག་དང་རྣ་
[14a.4]བ་དང་གཟུགས་དང་སྒྲ་ལ་སོགས་པ་ཐམས་ཅད་ནི་དེ་ལྟར་དུས་མཉམ་པའི་འབྱུང་བ་ཆེན་པོ་དག་ཁོ་ན་རྒྱུར་བྱས་ནས་འབྱུང་ངོ་། །ཕལ་ཆེར་ཞེས་བྱ་བ་སྨོས་པ་ནི་འདོད་པ་ན་སྤྱོད་པའི་རྣམ་པར་རིག་བྱེད་མ་ཡིན་པ་ཅུང་ཟད་ཅིག་གསལ་བའི་ཕྱིར་རོ། །དེ་ཉིད་ཀྱི་ཕྱིར། ད་ལྟར་དང་མ་འོངས་པ་ཅུང་
[14a.5]ཟད་ཅིག་ནི་འདས་པའི་འབྱུང་བ་ཆེན་པོ་དག་རྒྱུར་བྱས་ནས་འབྱུང་ཞེས་བྱ་བ་སྨོས་ཏེ། རྒྱུར་བྱས་པའི་གཟུགས་ད་ལྟར་གྱི་ཅུང་ཟད་ཅིག་ནི་འདས་པའི་འབྱུང་བ་ཆེན་པོ་དག་རྒྱུར་བྱས་ནས་འབྱུང་ལ། རྒྱུར་བྱས་པའི་གཟུགས་མ་འོངས་པ་ཅུང་ཟད་ཅིག་ནི་འདས་པའི་འབྱུང་བ་ཆེན་པོ་དག་རྒྱུར་བྱས་
[14a.6]ནས་འབྱུང་ངོ་། །རྒྱུར་བྱས་པའི་གཟུགས་དེ་ལྟ་བུ་དེ་ཡང་གང་ཞེ་ན་བསྟན་པའི་ཕྱིར། འདོད་རྟོག་རྣམ་རིག་མིན་སྐད་ཅིག །ཕྱིན་ཆད་འདས་པའི་འབྱུང་ལས་སྐྱེ། །ཞེས་བྱ་བ་སྨོས་ཏེ། འདོད་པ་ན་སྤྱོད་པའི་རྣམ་པར་རིག་བྱེད་མ་ཡིན་པ་ནི་སྡོམ་པ་ལ་སོགས་པ་མནོད་པའི་ཚེ་ལྷན་ཅིག་སྐྱེ་
[14a.7]བའི་འབྱུང་བ་ཆེན་པོ་དག་རྒྱུར་བྱས་ནས་འབྱུང་ལ། དེ་བཞིན་དུ་རྣམ་པར་རིག་བྱེད་མ་ཡིན་པ་གཞན་ཡང་དེ་དག་ཁོ་ན་རྒྱུར་བྱས་ནས་འབྱུང་ངོ་། །འདི་ལྟར་དེ་དག་ནི་འདིའི་གཞིའི་དོན་དུ་འགྱུར་ཏེ། ཇི་ལྟར་རྒྱུར་བྱས་པའི་གཟུགས་གཞན་དག་གི་གཞི་ད་ལྟར་བྱུང་བའི་འབྱུང་བ་ཆེན་པོ་རྣམས་ཡིན་
[14b]
[14b.1]པ་དེ་བཞིན་དུ་དེའི་རྟེན་ནི་འདས་པ་རྣམས་ཡིན་ནོ། །འཇུག་པ་དང་རྗེས་སུ་འཇུག་པའི་རྒྱུ་ཡིན་པའི་ཕྱིར་གོ་རིམས་བཞིན་ཞེས་བྱ་བ་ནི་འདས་པའི་འབྱུང་བ་ཆེན་པོ་དག་ནི་འཇུག་པའི་རྒྱུ་ཡིན་ཞིང་འཕེན་པའི་རྒྱུ་ཡིན་པའི་ཕྱིར་གཞིའི་དོན་དུ་འགྱུར་རོ། །ད་ལྟར་བྱུང་བའི་ལུས་ཀྱི་འབྱུང་བ་
[14b.2]ཆེན་པོ་དག་ནི་རྗེས་སུ་འཇུག་པའི་རྒྱུ་ཡིན་ཞིང་རྟེན་པར་བྱེད་པའི་རྒྱུ་ཡིན་པའི་ཕྱིར་རྟེན་གྱི་དོན་དུ་འགྱུར་རོ། །འཁོར་ལོ་བཞིན་ཞེས་བྱ་བ་ནི་ཇི་ལྟར་འཁོར་ལོ་ལག་པས་འདྲིལ་བ་དེ་ལྟ་བུ་ནི་འདིའི་འཇུག་པའི་རྒྱུ་ཡིན་ནོ། །ཇི་ལྟར་སའི་ཕྱོགས་དེ་ལྟ་བུ་ནི་རྗེས་སུ་འཇུག་པའི་རྒྱུ་ཡིན་ནོ། །དུས་
[14b.3]ངེས་པ་དྲིས་ནས་ཡང་གང་ལ་ཡོད་པའི་ཞེས་བྱ་བ་རྒྱས་པར་ས་ངེས་པར་འདྲི་སྟེ། བསམ་གཏན་བཞི་པའི་སའི་བར་དུ་ཞེས་བྱ་བ་ནི་གཟུགས་མེད་པ་དག་ན་འབྱུང་བ་དང་འབྱུང་བ་ལས་གྱུར་པ་མེད་པའི་ཕྱིར་རོ། །ཁམས་སུ་མ་གཏོགས་པའི་ཕྱིར་ཞེས་པ་ནི་ཟག་པ་མེད་པའི་ལུས་
[14b.4]དང་ངག་གི་ལས་ནི་ཁམས་དང་ལྡན་པ་མ་ཡིན་པའི་ཕྱིར་ངེས་པ་མེད་དོ་སྙམ་དུ་བསམས་པ་ཡིན་ནོ། །འོ་ན་ཅིའི་ཕྱིར་ཟག་པ་མེད་པའི་འབྱུང་བ་ཆེན་པོ་རྣམས་རྒྱུར་བྱས་ནས་མི་འབྱུང་ཞེ་ན། དེའི་ཕྱིར། ཟག་པ་མེད་པ་རྣམས་ལས་འབྱུང་བ་དག་མེད་པའི་ཕྱིར་ཞེས་བྱ་བ་སྨོས་སོ། །
[14b.5]ཡང་འདི་ལ་འབྱུང་བ་ཆེན་པོ་དག་གིས་བྱར་ཅི་ཡོད་སྙམ་ན། དེའི་ཕྱིར་དེའི་སྟོབས་ཀྱིས་སྐྱེ་བའི་ཕྱིར་རོ་ཞེས་བྱ་བ་སྨོས་ཏེ་འབྱུང་བའི་སྟོབས་ཀྱིས་བསྐྱེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཇི་སྟེ་དེ་སྐྱེ་བ་ཅིའི་ཕྱིར་སེམས་ཀྱི་སྟོབས་ཁོ་ནས་མི་འགྱུར་ཞེ་ན། རྒྱུར་བྱས་པའི་གཟུགས་མ་ཡིན་
[14b.6]པ་ཉིད་དུ་ཐལ་བར་འགྱུར་བའི་ཕྱིར་རོ། །རྣམ་རིག་བྱེད་མིན་མ་ཟིན་དང་། །ཞེས་བྱ་བ་ནི་ལུས་ཅན་མ་ཡིན་པས་སེམས་དང་སེམས་ལས་བྱུང་བའི་རྟེན་གྱི་དངོས་པོར་མི་རུང་བའི་ཕྱིར་རོ། །རྒྱུ་མཐུན་ལས་བྱུང་ཞེས་བྱ་བ་ནི་དགེ་བ་དང་མི་དགེ་བ་ཡིན་པའི་ཕྱིར་རྣམ་པར་སྨིན་པ་ལས་སྐྱེས་པ་ནི་མ་
[14b.7]ཡིན་ཏེ། རྣམ་རིག་མིན་ལུང་བསྟན་མན་མེད། །ཅེས་འབྱུང་བའི་ཕྱིར་རོ། །རྣམ་པར་སྨིན་པས་ཡང་། རྣམ་སྨིན་ལུང་དུ་མ་བསྟན་ཆོས། །ཞེས་འབྱུང་བས་ལུང་དུ་མ་བསྟན་པ་ཡིན་པའི་ཕྱིར་རོ། །བསགས་པ་མེད་པའི་ཕྱིར་དང་རྒྱས་པ་ལས་བྱུང་བ་ཡང་མ་ཡིན་པས་ཤུགས་ཀྱིས་ན་
[15a]
[15a.1]རྒྱུ་མཐུན་པ་ལས་བྱུང་བ་ཡིན་ནོ། །སེམས་ཅན་གྱི་རྒྱུད་དུ་གཏོགས་པའི་ཕྱིར་སེམས་ཅན་དུ་སྟོན་པ་ཡིན་ནོ། །རྒྱུ་མཐུན་ཟིན་པའི་འབྱུང་ལས་སྐྱེ། །ཞེས་བྱ་བ་ནི་རྒྱུ་མཐུན་པ་དང་ཟིན་པའི་འབྱུང་བ་ཆེན་པོ་ལས་སྐྱེ་བ་ཡིན་ཏེ། ཀུན་ནས་སློང་བར་བྱེད་པའི་སེམས་
[15a.2]ལ་ལྟོས་པའི་ཕྱིར་དང་། མཉམ་པར་མ་བཞག་པའི་སེམས་ཀྱི་རྣམ་པར་རིག་བྱེད་ཀྱི་སྐབས་ཡིན་པའི་ཕྱིར་ཉིད་དང་ཏིང་ངེ་འཛིན་གྱིས་རྒྱས་པར་བྱས་པའི་འབྱུང་བ་ཆེན་པོ་ལས་སྐྱེས་པ་མ་ཡིན་ནོ། །དེ་ཉིད་ཀྱི་ཕྱིར་རྣམ་པར་སྨིན་པའི་འབྱུང་བ་ཆེན་པོ་ལས་སྐྱེས་པ་ཡང་ཡིན་ནོ། །ཏིང་ངེ་
[15a.3]འཛིན་སྐྱེས་ཞེས་བྱ་བ་རྒྱས་པར་འབྱུང་བ་ནི་བསམ་གཏན་དང་ཟག་པ་མེད་པའི་སྡོམ་པའི་རྣམ་པར་རིག་བྱེད་མ་ཡིན་པ་ཟག་པ་དང་བཅས་པ་དང་ཟག་པ་མེད་པའི་ཏིང་ངེ་འཛིན་ལས་སྐྱེས་པའི་ཕྱིར་ཏིང་ངེ་འཛིན་ལས་སྐྱེས་པ་ཞེས་བྱའོ། །མ་ཟིན་པའི་འབྱུང་བ་ཆེན་པོ་དག་རྒྱུར་བྱས་ནས་
[15a.4]ཞེས་བྱ་བ་ནི་མཉམ་པར་གཞག་པའི་སེམས་ཀྱི་དབང་གིས་ལུས་དེ་ལ་སེམས་ཀྱི་རྗེས་སུ་འཇུག་པ་འབྱུང་བའི་ཕྱིར་ཏེ་ཟིན་པའི་འབྱུང་བ་ཆེན་པོ་རྣམས་ནི་འགོག་པའི་སྙོམས་པར་འཇུག་པ་ལ་སོགས་པའི་གནས་སྐབས་དག་ན་སེམས་མེད་པར་ཡང་འབྱུང་ངོ་། །ཚིག་ཀྱལ་པ་སྤོང་བའི་བར་དུ་ཞེས་བྱ་
[15a.5]བ་ལ། བར་དུ་ཞེས་བྱ་བའི་སྒྲས་ནི་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་ཚིག་ཀྱལ་པ་སྤོང་བ་བསྡུའོ། །སེམས་བཞིན་དུ་འབྱུང་བ་ཐ་མི་དད་པའི་ཕྱིར་རོ་ཞེས་བྱ་བ་ནི་ཇི་ལྟར་དེ་སྐྱེད་པར་བྱེད་པའི་སེམས་ཐ་དད་པ་མ་ཡིན་
[15a.6]པ་དེ་བཞིན་དུ་དེ་སྐྱེད་པར་བྱེད་པའི་འབྱུང་བ་རྣམས་ཀྱང་ཐ་མི་དད་པ་ཁོ་ན་ཡིན་ནོ། །འབྱུང་བ་ཆེན་པོ་དག་ནི་རྟེན་གྱི་དོན་གྱིས་རྣམ་པར་རིག་བྱེད་མ་ཡིན་པའི་གཞིར་གྱུར་པ་མ་ཡིན་ནོ། །འོ་ན་ཅི་ཞེ་ན། དེ་འཇུག་པར་བྱེད་པའི་དོན་གྱིས་ཏེ། དེ་ལྟ་བས་ན་འབྱུང་བ་ཐ་མི་དད་པ་ལས་སྐྱེའོ་ཞེས་སྨོས་པ་
[15a.7]འགལ་བ་མེད་དོ། །སོ་སོར་ཐར་པའི་སྡོམ་པ་ནི་འབྱུང་བ་གཞན་དང་གཞན་དག་ཅེས་བྱ་བ་ནི་སེམས་ཀྱི་རྗེས་སུ་འཇུག་པ་མ་ཡིན་པའི་ཕྱིར་རོ། །རྣམ་པར་རིག་བྱེད་ནི་རྒྱུ་མཐུན་པ་ལས་བྱུང་བ་སྟེ་ཞེས་བྱ་བ་ནི་འཕེན་པའི་དབང་གིས་རྗེས་སུ་འཇུག་པའི་ཕྱིར་རོ། །ལུས་ཀྱི་ནི་ཟིན་པ་ཡིན་ནོ་ཞེས་བྱ་བ་ནི་
[15b]
[15b.1]ངག་གི་ནི་མ་ཡིན་ནོ་ཞེས་བྱ་བའི་ཐ་ཚིག་སྟེ། ལུས་ཀྱི་ནི་ལུས་ཀྱི་འབྱུང་བ་ཆེན་པོ་དང་ཐ་མི་དད་པར་འཇུག་པའི་ཕྱིར་ལ་དེའི་རྟེན་འབྱུང་བ་ཆེན་པོ་རྣམས་ཀྱང་ཟིན་པ་ཡིན་པས་སོ། །ངག་གི་མ་ཡིན་ཏེ། དེ་དག་དང་ཐ་དད་པར་འཇུག་པའི་ཕྱིར་རོ། །འདིར་འདི་ནི་བསྟན་བཅོས་དང་འགལ་བ་ཡིན་
[15b.2]ཏེ། འདི་སྐད་དུ། དགེ་བསྙེན་གྱི་བསླབ་པའི་གཞི་གང་དག་ཡིན་པ་དེ་དག་ལས་ཟིན་པ་ནི་དུ། མ་ཟིན་པ་ནི་དུ་ཞེ་ན། སྨྲས་པ། ཐམས་ཅད་མ་ཟིན་པ་ཡིན་ནོ་ཞེས་བཤད་དོ་ཞེས་རྒོལ་བར་བྱེད་ན། དེ་སྐད་དུ་བསྟན་པ་ནི་རྣམ་པར་རིག་བྱེད་མ་ཡིན་པའི་མཚན་ཉིད་ཀྱི་བསླབ་པའི་གཞི་ལས་
[15b.3]དགོངས་ཏེ། གསུངས་པའི་ཕྱིར་རམ། ཕལ་ཆེ་བ་བསྟན་པ་ཡིན་པའི་ཕྱིར་ཉེས་པ་མེད་དོ། །ཡང་རྒྱུན་ཆགས་པའི་ཕྱིར་འདི་བྱེ་བྲག་ཏུ་སྨྲ་བ་མ་ཡིན་པར་འགྱུར་རོ་ཞེས་བྱ་བ་ནི་དབྱིབས་གཅིག་སྐྱེས་ན་དབྱིབས་ཅིག་ཤོས་ལྡོག་པ་མེད་པའི་ཕྱིར་རོ། །ཇི་ལྟར་ཞེས་བྱ་བ་རྒྱས་པར་དབྱིབས་གཉིས་
[15b.4]འགྲུབ་པར་འགྱུར་ཞེས་བྱ་བའི་བར་འབྱུང་བ་ནི་ཕན་ཚུན་གོ་སྐབས་མི་འབྱེད་པའི་ཕྱིར་རོ། །དེའི་འབྱུང་བ་ཆེན་པོ་དག་གིས་མངོན་པར་ཁྱབ་པའི་ཕྱིར་ཞེས་བྱ་བ་ནི་རྣམ་པར་རིག་བྱེད་ཀྱི་རྟེན་གྱི་འབྱུང་བ་ཆེན་པོ་དག་གིས་ལུས་མངོན་པར་ཁྱབ་པའི་ཕྱིར་རོ། །རྣམ་པར་རིག་བྱེད་ཀྱི་འབྱུང་བ་ཆེན་པོ་དག་གིས་
[15b.5]མ་ཁྱབ་པར་འདུག་གོ་ཞེས་བརྗོད་པར་ནི་ནུས་པ་མ་ཡིན་ནོ། །མངོན་པར་མ་ཁྱབ་ན་ནི་ཇི་ལྟར་ན་ཡན་ལག་ཟད་པར་གྱི་རྣམ་པར་རིག་པར་བྱེད་པར་འགྱུར། འདི་ལུས་ཀྱི་ཕྱོགས་གཅིག་གིས་རྣམ་པར་རིག་བྱེད་ཀྱི་ལུས་ཐམས་ཅད་ཀྱིས་ནི་མ་ཡིན་པས་ལུས་དེ་རྣམ་པར་རིག་བྱེད་ཀྱི་
[15b.6]རྟེན་གྱི་འབྱུང་བ་ཆེན་པོ་དག་གིས་མ་ཁྱབ་པར་འདུག་གོ་ཞེས་བརྗོད་པར་ནི་ནུས་པ་མ་ཡིན་ནོ། །ལུས་ལ་གསེབ་ཡོད་པའི་ཕྱིར་དེ་དག་གི་གོ་སྐབས་ཡོད་དོ་ཞེས་བྱ་བ་ནི་མངོན་པར་ཁྱབ་ཏུ་ཟིན་ཀྱང་ཡན་ལག་ཆེན་པོར་མི་འགྱུར་ཏེ། ལུས་ལ་གསེབ་ཡོད་པ་ཉིད་ཀྱིས་གསེབ་ཏུ་ཞུགས་པའི་
[15b.7]ཕྱིར་རོ། །འོ་ན་ནི་ཡན་ལག་དེ་མཁྲེགས་པ་འམ་ལྕི་བར་འགྱུར་རོ་ཞེ་ན་མི་འགྱུར་ཏེ། ཕྲ་བའི་ཕྱིར་རོ། །རྣམ་པ་གཉིས་དང་རྣམ་པ་གསུམ་དང་རྣམ་པ་ལྔར་བཤད་ཅེས་བྱ་བ་ནི་དེ་ནི་སེམས་པ་དང་དེས་བྱས་ཞེས་འབྱུང་བའི་ཕྱིར་རྣམ་པ་གཉིས་སུ་བཤད་པ་ཡིན་ནོ། །སེམས་པ་ཡིད་ཀྱི་ལས་
[16a]
[16a.1]ཡིན་ནོ། །དེས་སྐྱེད་ལུས་དང་ངག་གི་ལས། །ཞེས་འབྱུང་བའི་ཕྱིར་རྣམ་པ་གསུམ་དུ་བཤད་པ་ཡིན་ནོ་ལོ། །དེ་དག་རྣམ་རིག་རྣམ་རིག་མིན། །ཞེས་འབྱུང་བས་ལུས་དང་ངག་གི་ལས་རྣམ་པར་རིག་བྱེད་དང་། རྣམ་པར་རིག་བྱེད་མ་ཡིན་པ་ཐ་དད་པའི་ཕྱིར་དང་། ལྔ་
[16a.2]པ་ཡིད་ཀྱི་ལས་ཡིན་པའི་ཕྱིར་རྣམ་པ་ལྔར་བཤད་པ་ཡིན་ནོ། །རྣམ་རིག་མིན་ལུང་བསྟན་མིན་མེད། །ཅེས་བྱ་བ་ནི་དོན་གྱིས་ན་རྣམ་པར་རིག་བྱེད་མ་ཡིན་པ་ནི་དགེ་བ་དང་མི་དགེ་བ་ཁོ་ན་ཡིན་ནོ་ཞེས་བཤད་པར་འགྱུར་རོ། །ལས་སྟོབས་དང་ལྡན་པ་ཞེས་བྱ་བ་ནི། རྣམ་པར་རིག་བྱེད་མ་ཡིན་
[16a.3]པའི་མཚན་ཉིད་དོ། །ཡང་གི་སྒྲས་ནི་འདོད་པ་ན་ཡང་ཡོད་དོ་ཞེས་བྱ་བ་ནི་ཡང་ཞེས་བྱ་བའི་སྒྲའང་ཞེས་བྱ་བའི་སྒྲའི་དོན་ཡིན་པས་ནི་འདོད་པའི་ཁམས་ན་ཡོད་པ་འདྲེན་པར་བྱེད་དོ། །ཟག་པ་མེད་པའི་རྣམ་པར་རིག་བྱེད་མ་ཡིན་པ་བཞིན་ནོ་ཞེས་བྱ་བ་ནི་དཔེར་ན་རེ་ཞིག་ཟག་པ་མེད་པའི་
[16a.4]རྣམ་པར་རིག་བྱེད་མ་ཡིན་པ་ལ་ཟག་པ་མེད་པའི་འབྱུང་བ་དག་མེད་མོད་ཀྱི་འོན་ཀྱང་དེ་ནི་ས་གང་དུ་སྐྱེས་ཏེ་དེ་སྐྱེད་པར་བྱེད་པ་དེའི་ས་པའི་འབྱུང་བ་ཆེན་པོ་རྣམས་རྒྱུར་བྱས་ནས་སྐྱེ་བ་དེ་བཞིན་དུ་རེ་ཞིག་གཟུགས་མེད་པ་ན་སྤྱོད་པའི་འབྱུང་བ་ཆེན་པོ་དག་ཀྱང་མེད་མོད་ཀྱི་འོན་ཀྱང་ས་གང་དུ་སྐྱེས་ཏེ་
[16a.5]གཟུགས་མེད་པ་སྐྱེད་པར་བྱེད་པ་དེའི་ས་པའི་འབྱུང་བ་རྣམས་རྒྱུར་བྱས་ནས་གཟུགས་མེད་པ་ན་སྤྱོད་པའི་རྣམ་པར་རིག་བྱེད་མ་ཡིན་པ་སྐྱེ་བར་འགྱུར་རོ་ཞེ་ན་མ་ཡིན་ཏེ། ཁམས་སུ་མ་གཏོགས་པའི་ཕྱིར་རོ་ཞེས་བྱ་བ་ནི་དེ་དང་མི་འདྲ་བའི་ཕྱིར་མ་ཡིན་ཏེ། འདི་ལྟར་ཟག་པ་མེད་པའི་རྣམ་
[16a.6]པར་རིག་བྱེད་མ་ཡིན་པ་ནི་འདོད་པ་དང་། གཟུགས་དང་། གཟུགས་མེད་པ་ན་སྤྱོད་པའི་སྲེད་པ་དག་གིས་བདག་གིར་མ་བྱས་པའི་ཕྱིར་ཁམས་སུ་མ་གཏོགས་པ་ཡིན་ནོ། །དེ་ལ་ནི་ཁམས་སམ་སའི་སྒོ་ནས་ཀྱང་རུང་སྟེ། འབྱུང་བ་ཆེན་པོ་སྐལ་བ་མཉམ་པ་འང་མེད་ལ་སྐལ་བ་མི་
[16a.7]མཉམ་པ་དག་ཀྱང་མེད་པ་ཉིད་དེ་དེའི་ཕྱིར་གང་དུ་སྐྱེས་པ་དེ་ན་ཡོད་པའི་འབྱུང་བ་ཆེན་པོ་རྣམས་རྒྱུར་བྱས་ནས་སྐྱེའོ། །གཟུགས་མེད་པ་ན་སྤྱོད་པའི་རྣམ་པར་རིག་བྱེད་མ་ཡིན་པ་ནི་སྐལ་བ་མི་མཉམ་པ་འདོད་པ་དང་གཟུགས་ན་སྤྱོད་པའི་འབྱུང་བ་རྒྱུར་བྱས་ནས་སྐྱེ་བར་འོངས་པ་མ་ཡིན་ཏེ། ཁམས་
[16b]
[16b.1]གསུམ་པའི་ཕྱིར་སྙམ་དུ་བསམས་པ་ཡིན་ནོ། །གཞན་ཡང་གཟུགས་ཐམས་ཅད་ལ་རྒྱབ་ཀྱིས་ཕྱོགས་པའི་ཕྱིར་ཡང་གཟུགས་མེད་པའི་སྙོམས་པར་འཇུག་པའི་གཟུགས་བསྐྱེད་པར་མི་ནུས་ཀྱི་གཟུགས་ཀྱི་ས་པའི་ཟག་པ་མེད་པའི་སྙོམས་པར་འཇུག་པས་ནི་གཟུགས་བསྐྱེད་པར་ནུས་
[16b.2]ཏེ། རྣམ་པར་རིག་བྱེད་མ་ཡིན་པ་བསྐྱེད་པ་ཞེས་བྱ་བའི་ཐ་ཚིག་གོ། །ཅིའི་ཕྱིར་ཞེ་ན། གཟུགས་ཐམས་ཅད་ལ་རྒྱབ་ཀྱིས་ཕྱོགས་པའི་ཕྱིར་རོ་སྙམ་དུ་བསམས་པ་ཡིན་ནོ། །ཡང་ཇི་ལྟར་གཟུགས་མེད་པའི་སྙོམས་པར་འཇུག་པ་གཟུགས་ཐམས་ཅད་ལ་རྒྱབ་ཀྱིས་ཕྱོགས་པ་ཡིན་
[16b.3]ཞེ་ན། དེའི་ཕྱིར་གཟུགས་ཀྱི་འདུ་ཤེས་དང་བྲལ་བའི་ཕྱིར་རོ་ཞེས་བྱ་བ་སྨོས་ཏེ། གཟུགས་ཀྱི་འདུ་ཤེས་དང་བྲལ་བར་འགྱུར་བའི་ཕྱིར་རོ་ཞེས་བྱ་བའི་ཐ་ཚིག་གོ། །ཚུལ་ཁྲིམས་ནི་འཆལ་པའི་ཚུལ་ཁྲིམས་ཀྱི་གཉེན་པོ་ཡིན་ལ་ཞེས་བྱ་བ་རྒྱས་པར་འབྱུང་བ་ནི་འདོད་པ་ན་སྤྱོད་པའི་འཆལ་བའི་
[16b.4]ཚུལ་ཁྲིམས་ནི་མི་དགེ་བས་ཀུན་ནས་སློང་བའི་ཕྱིར་དེའི་གཉེན་པོ་གཟུགས་ཀྱིས་པའི་ཚུལ་ཁྲིམས་རྣམ་པར་རིག་བྱེད་མ་ཡིན་པའི་མཚན་ཉིད་ཡིན་ནོ་ཞེས་བྱ་བ་ནི་རུང་ངོ་། །གལ་ཏེ་གཟུགས་མེད་པ་ན་སྤྱོད་པ་ཡང་དེ་དང་འདྲ་བར་འགྱུར་རོ་ཞེ་ན། དེའི་ཕྱིར་གཟུགས་མེད་པ་རྣམས་ནི་འདོད་པའི་
[16b.5]ཁམས་ནས་ཞེས་བྱ་བ་རྒྱས་པར་སྨོས་ཏེ། གཟུགས་མེད་པའི་ཁམས་དག་ནི་འདོད་པའི་ཁམས་ནས་རིང་བ་ཉིད་བཞིས་རིང་བ་བཞིན་ནོ། །རིང་བའི་ཕྱིར་གཟུགས་མེད་པས་བསྡུས་པའི་ཚུལ་ཁྲིམས་ནི་འདོད་པའི་ཁམས་ཀྱི་གཉེན་པོ་ཡིན་པར་མི་རུང་སྟེ། རིང་བ་ཉིད་བཞི་ནི་གོང་
[16b.6]དུ་བཤད་ཟིན་པས་ཡང་མི་བཤད་དོ། །འདིར་དཔེར་བརྗོད་པ་ནི་གཉེན་པོ་རིང་བ་ཉིད་ཡིན་ནོ། །རྣམ་རིག་དཔྱོད་དང་བཅས་པ་དག་ན་ཞེས་བྱ་བ་ནི་དཔྱོད་པ་དང་བཅས་པའི་ས་ཁོ་ན་དག་ན་ཡོད་དོ་ཞེས་ངེས་པར་གཟུང་བའི་ཕྱིར་བརྩམས་པ་ཡིན་ཏེ། བརྟགས་ཤིང་དཔྱད་ནས་ཚིག་ཏུ་སྨྲ་བས་
[16b.7]ལུས་དང་ངག་གི་ལས་དག་ནི་རྟོག་པ་དང་དཔྱོད་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །འདོད་པ་ན་ཡང་བསྒྲིབས་པ་མེད། །ཅེས་བྱ་བ་ནི་དཔྱོད་པ་མེད་པའི་ས་དག་ན་མེད་པ་འབའ་ཞིག་ཏུ་མ་ཟད་ཀྱི་ཞེས་བྱ་བར་སྟོན་ཏེ། ཚངས་པའི་འཇིག་རྟེན་ཁོ་ན་ན་ཡོད་དོ་ཞེས་བཤད་པ་ཡིན་ནོ། །དེ་ཡན་
[17a]
[17a.1]ཆད་ཅེས་བྱ་བ་ནི་ཚངས་པའི་འཇིག་རྟེན་ཡན་ཆད་དོ། །ཕྱིའི་འབྱུང་བ་ཆེན་པོ་རྒྱུར་བྱས་པ་ཞེས་བྱ་བ་ནི་རླུང་ལ་སོགས་པའི་སྒྲའི་སྐྱེ་མཆེད་དོ། །འདི་ནི་རྣམ་པར་རིག་བྱེད་ཀྱི་སྒྲ་དགག་པ་ལྷུར་བྱ་བར་སྨོས་པ་ཡིན་གྱི་ཕྱིའི་འབྱུང་བ་ཆེན་པོ་རྒྱུར་བྱས་པ་ཁོ་ན་ཡོད་པ་ནི་མ་ཡིན་
[17a.2]ཏེ་བསམ་གཏན་གཉིས་པ་ལ་སོགས་པ་ན་ནི་ལག་པ་ལ་སོགས་པའི་སྒྲ་ཡང་སྲིད་དོ། །དེ་ལྟ་མ་ཡིན་ན་བསྟན་བཅོས་དང་འགལ་བར་འགྱུར་ཏེ། འདི་ལྟར་བསྟན་བཅོས་ལས་ནི། གང་ཞིག་སྒྲའི་ཁམས་དང་ལྡན་ཞེ་ན། སྨྲས་པ། འདོད་པ་དང་གཟུགས་ན་སྤྱོད་པའོ། །གང་
[17a.3]ཞིག་མི་ལྡན་ཞེ་ན་སྨྲས་པ། གཟུགས་མེད་པ་ན་སྤྱོད་པའོ་ཞེས་བཤད་དེ། ཐོབ་དང་མ་ཐོབ་རང་རྒྱུད་དུ། །གཏོགས་པ་རྣམས་ཀྱི་ཞེས་འབྱུང་བའི་ཕྱིར་སེམས་ཅན་དུ་མི་བགྲང་བའི་ཕྱི་རོལ་གྱི་དང་ནི་ལྡན་པར་རུང་བ་མ་ཡིན་ནོ། །ཉེས་པ་འདི་ཉིད་སྤང་བའི་ཕྱིར་གཞན་དག་ན་རེ་ཞེས་བྱ་བ་
[17a.4]སྨོས་ཏེ། བསམ་གཏན་གཉིས་པ་ལ་སོགས་པ་ན་ཡང་རྣམ་པར་རིག་བྱེད་ཡོད་དོ་ཞེས་བྱ་བ་ཡིན་ནོ། །གང་གི་ས་པ་ཞིག་ཡིན་ཞེ་ན། བསམ་གཏན་དང་པོའི་ས་པའི་འོ། །འདི་ནི་བྱེ་བྲག་སྨྲ་བ་ཁོ་ནའི་ཕྱོགས་ཡིན་པར་ཟད་ཀྱི་ཕྱོགས་གཞན་ནི་མ་ཡིན་ཏེ། གྲུབ་པའི་མཐའ་ལས།
[17a.5]གཉིས་པ་སོགས་ན་ལུས་མིག་དང་། །རྣ་བའི་རྣམ་ཤེས་རྣམ་རིག་སློང་། །གང་ཡིན་དེ་ནི་དང་པོར་གཏོགས། །དེ་ལུང་མ་བསྟན་ཉོན་མོངས་མིན། །ཞེས་འབྱུང་བའི་ཕྱིར་རོ། །ཕྱོགས་གཞན་དེ་བསམ་གཏན་གཉིས་པ་ལ་སོགས་པའི་ས་པ་ཡིན་ནོ། །དེ་ཡང་ཅི་ལུང་དུ་མ་བསྟན་པ་
[17a.6]ཞིག་གམ་ལུང་དུ་བསྟན་པ་ཞིག་ཅེ་ན། དེའི་ཕྱིར་མ་བསྒྲིབས་ལ་ལུང་དུ་མ་བསྟན་པའི་རྣམ་པར་རིག་བྱེད་ནི་ཡོད་ཀྱི་དགེ་བའང་མེད་ལ་ཉོན་མོངས་པ་ཅན་ཡང་མེད་དོ་ཞེས་བྱ་བ་སྨོས་ཏེ། དེ་ན་གནས་པ་རྣམས་ཕན་ཚུན་ཀུན་དུ་སྨྲ་བ་ལ་སོགས་པ་བྱེད་པ་ན་མ་བསྒྲིབས་ལ་ལུང་དུ་མ་བསྟན་པའི་རྣམ་པར་རིག་
[17a.7]བྱེད་འབྱུང་ངོ་།། །།བམ་པོ་སུམ་ཅུ་རྩ་གཅིག་པ། ཅིའི་ཕྱིར་དགེ་བ་ཡང་མེད་ལ་ཉོན་མོངས་པ་ཅན་ཡང་མེད་ཅེ་ན། དེ་དག་ཏུ་སྐྱེས་པ་ནི་ཞེས་བྱ་བ་རྒྱས་པར་སྨོས་ཏེ། བསམ་གཏན་གཉིས་པ་ལ་སོགས་པར་སྐྱེས་པ་ནི་ས་འོག་མ་པའི་སེམས་ཏེ་སེམས་གང་གིས་དགེ་བའམ་ཉོན་མོངས་པ་ཅན་
[17b]
[17b.1]གྱི་རྣམ་པར་རིག་བྱེད་ཀུན་ནས་སློང་བར་འགྱུར་བ་དེ་ལྟ་བུ་སྟེ། དགེ་བ་དང་ཉོན་མོངས་པ་ཅན་ལྟ་བུ་མངོན་སུམ་དུ་མི་བྱེད་དོ། །ཅིའི་ཕྱིར་ཞེ་ན། དམན་པ་དང་སྤངས་ཟིན་པའི་ཕྱིར་རོ་ཞེས་བྱ་བ་སྨོས་ཏེ། ས་འོག་མ་པའི་དགེ་བ་ནི་དམན་པའི་ཕྱིར་དང་སྤང་བའི་ཕྱིར་མངོན་དུ་མི་བྱེད་ལ། ཉོན་མོངས་པ་
[17b.2]ཅན་ཡང་མ་ཡིན་པས་ཤུགས་ཀྱིས་ན་འདི་སྐད་དུ་ས་འོག་མ་པའི་སེམས་ལུང་དུ་མ་བསྟན་པ་གང་གིས་ན་དེ་ཀུན་ནས་སློང་བར་བྱེད་པ་སྟེ་མངོན་སུམ་དུ་བྱེད་དེ་ཞེས་བཤད་པ་ཡིན་ནོ། །དེ་བས་ན་འདི་སྐད་དུ་ས་འོག་མ་པའི་རྣམ་པར་རིག་བྱེད་ནི་ས་འོག་མ་པའི་སེམས་ཀྱིས་སློང་བར་བྱེད་དོ་ཞེས་
[17b.3]བཤད་པ་ཡིན་ནོ། །བྱེ་བྲག་ཏུ་སྨྲ་བ་རྣམས་ནི་དེ་དེ་ལྟར་མི་འདོད་དེ་རྣམ་པར་རིག་བྱེད་དེ་བསམ་གཏན་དང་པོའི་ས་པའི་སེམས་ཀྱིས་ཀུན་ནས་བསླང་བའི་ཕྱིར་བསམ་གཏན་དང་པོའི་ས་པ་ཁོ་ན་ཡིན་ནོ་ཞེའོ། །དེ་ལྟ་བས་ན་སྔ་མ་ཁོ་ན་བརྗོད་དོ་ཞེས་བྱ་བ་སྨོས་སོ། །དེ་ཡང་འདོད་པའི་ཁམས་ན་
[17b.4]མེད་དོ་ཞེས་བྱ་བ་ནི་བསྒྲིབས་ལ་ལུང་དུ་མ་བསྟན་པའི་སེམས་བསྒོམ་པས་སྤང་བར་བྱ་བ་དེ་ཡང་འདོད་པའི་ཁམས་ན་མེད་དེ་འདོད་པའི་ཁམས་ན་ནི་བསྒྲིབས་ལ་ལུང་དུ་མ་བསྟན་པ་འཇིག་ཚོགས་དང་། མཐར་འཛིན་པར་ལྟ་བ་དང་མཚུངས་པར་ལྡན་པ་ཁོ་ན་ཡོད་པར་འདོད་ལ། ཁ་ནང་དུ་བལྟས་པ་
[17b.5]ཡིན་པའི་ཕྱིར་དེས་ཀྱང་རྣམ་པར་རིག་བྱེད་ནི་ཀུན་ནས་སློང་བར་མི་བྱེད་དོ། །ངོ་བོ་ཉིད་ཅེས་བྱ་བ་ནི་བདག་ཉིད་ཀྱིས་སོ། །མཆོག་ཏུ་བདེ་བའི་ཕྱིར་ཞེས་བྱ་བ་ནི་མི་བདེ་བ་དང་རྗེས་སུ་འབྲེལ་བ་དག་ཀྱང་མེད་པའི་ཕྱིར་ཏེ། ངོ་བོ་ཉིད་དང་མཚུངས་པར་ལྡན་པ་དང་ཀུན་ནས་སློང་བས་དགེ་བ་གང་ཡིན་པ་
[17b.6]དེ་ནི་མཆོག་ཏུ་བདེ་བ་ཡིན་ནོ་ཞེས་བཤད་པ་ཡིན་ནོ། །དེ་དག་དང་མཚུངས་པར་མི་ལྡན་པ་རྣམས་ལ་དགེ་བ་ཉིད་མེད་པའི་ཕྱིར་ཞེས་བྱ་བ་ནི་དགེ་བའི་རྩ་བ་ལ་སོགས་པ་དང་མཚུངས་པར་མི་ལྡན་པའི་སེམས་ལ་སོགས་པ་ལ་དགེ་བ་ཉིད་མེད་པའི་ཕྱིར་དེ་དག་དང་མཚུངས་པར་ལྡན་པ་ནི་དགེ་བ་ཉིད་
[17b.7]ཡིན་པར་གྲུབ་པོ། །དགེ་བའི་རྩ་བ་ལ་སོགས་པ་དང་མཚུངས་པར་མི་ལྡན་པའི་ཆོས་དེ་དག་ཁོ་ན་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་ངོ་ཚ་ཤེས་པ་དང་ཁྲེལ་ཡོད་པ་དག་བསྡུའོ། །སྨན་དང་སྦྱར་བའི་བཏུང་བ་ལས་བྱུང་བའི་འོ་མ་བཞིན་ནོ་ཞེས་བྱ་བ་ནི་སྨན་དང་སྦྱར་བའི་བཏུང་བ་
[18a]
[18a.1]འཐུངས་པའི་བ་ལས་བྱུང་བའི་འོ་མ་གང་ཡིན་པ་དེ་ནི་སྨན་དང་སྦྱར་བའི་བཏུང་བ་ལས་བྱུང་བའི་འོ་མའོ། །སྐལ་བ་མི་མཉམ་པའི་སེམས་ཀྱིས་ཀུན་ནས་བསླང་བའི་ཐོབ་པ་རྣམས་ཞེས་བྱ་བ་རྒྱས་པར་འབྱུང་བ་ནི་དགེ་བའི་ཐོབ་པ་སྐལ་བ་མི་མཉམ་པའི་སེམས་ཀྱིས་
[18a.2]ཀུན་ནས་བསླང་བ་རྣམས་སོ། །སྐལ་བ་མི་མཉམ་པའི་སེམས་ནི་དགེ་བ་ལས་གཞན་པ་ཡིན་ཏེ། ཐེ་ཚོམ་གྱིས་དགེ་བའི་རྩ་བའི་མཚམས་སྦྱོར་བར་བྱེད་པ་ན་དགེ་བ་རྣམས་ཀྱི་ཐོབ་པ་གང་ཡིན་པ་དེ་དག་རེ་ཞིག་ཡོངས་སུ་མྱ་ངན་ལས་འདས་པ་བཞིན་དུ་དགེ་བ་ཉིད་མ་ཡིན་ཏེ། མཆོག་
[18a.3]ཏུ་བདེ་བ་མ་ཡིན་པའི་ཕྱིར་རོ། །མ་ཆགས་པ་ལ་སོགས་པ་བཞིན་དུ་ངོ་བོ་ཉིད་ཀྱིས་དགེ་བ་ཡང་མ་ཡིན་ཏེ། དེའི་ངོ་བོ་ཉིད་མ་ཡིན་པའི་ཕྱིར་རོ། །ཚོར་བ་ལ་སོགས་པ་བཞིན་དུ་མཚུངས་པར་ལྡན་པས་ཀྱང་མ་ཡིན་ཏེ། ལྡན་པ་མ་ཡིན་པ་ཡིན་པའི་ཕྱིར་རོ། །ཀུན་ནས་སློང་བ་
[18a.4]ལས་ཀྱང་མ་ཡིན་ཏེ། དེ་ཀུན་ནས་སློང་བར་བྱེད་པའི་སེམས་ཉོན་མོངས་པ་ཅན་ཡིན་པའི་ཕྱིར་རོ། །དེ་བཞིན་དུ་ཡང་སྲིད་པར་ཉིང་མཚམས་སྦྱོར་བའི་ཚེ་སྐྱེས་ནས་འཐོབ་པ་དག་ཇི་ལྟར་དགེ་བ་ཉིད་ཡིན་པ་ཡང་བརྗོད་པར་བྱའོ། །ཇི་ལྟར་དགེ་བ་ཉིད་ཡིན་པ་ནི་བརྗོད་དགོས་སོ་ཞེས་བྱ་བ་འདི་ནི་འདི་
[18a.5]ལ་འབད་པར་བྱ་དགོས་སོ་སྙམ་དུ་བསམས་པ་ཡིན་ནོ། །འདི་ལ་ལན་ནི་དགེ་བའི་རྩ་བས་ཀུན་ནས་བསླང་བར་བྱ་བ་ཡིན་པའི་ཕྱིར་དེ་དག་ནི་མ་འོངས་པའི་གནས་སྐབས་ཉིད་ན་དགེ་བ་ཡིན་ལ་ཉོན་མོངས་པ་ཅན་གྱི་སེམས་ཀྱིས་ནི་དེ་དག་གི་ཐོབ་པའི་གགས་སེལ་བར་བྱེད་ཀྱི་དགེ་བ་ཉིད་དུ་བྱེད་པ་
[18a.6]ནི་མེད་དོ་ཞེས་ལན་འདེབས་པར་བྱེད་དོ། །སྡུག་བསྔལ་ཐམས་ཅད་འཇུག་པའི་བདག་ཉིད་ཀྱིས་ཞེས་བྱ་བ་ནི་འདི་ལ་སྡུག་བསྔལ་ཐམས་ཅད་འཇུག་པའི་བདག་ཉིད་དེ་ངོ་བོ་ཉིད་ཡོད་པས་སྡུག་བསྔལ་ཐམས་ཅད་འཇུག་པའི་བདག་ཉིད་དོ། །དེས་ན་འཁོར་བ་ནི་དོན་དམ་པར་མི་དགེ་བ་ཡིན་
[18a.7]ནོ། །ལུས་དང་ངག་གི་ལས་དང་སྐྱེ་བ་ལ་སོགས་པ་ཞེས་བྱ་བ་ནི་ལུས་དང་ངག་གི་ལས་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པའི་ངོ་བོ་ཉིད་སྡོམ་པ་མ་ཡིན་པ་དང་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པས་བསྡུས་པ་དང་སྐྱེ་བ་ལ་སོགས་པ་སྟེ། སྐྱེ་བ་དང་།
[18b]
[18b.1]རྒ་བ་དང་། གནས་པ་དང་། མི་རྟག་པ་ཉིད་ཀྱི་མཚན་ཉིད་དང་། རྗེས་མཚན་ཉིད་ཀྱི་ངོ་བོ་ཉིད་རྣམས་དང་། མི་དགེ་བ་དག་གིས་ཐོབ་པ་རྣམས་སོ། །ནད་དང་མི་འཕྲོད་པའི་སྨན་ལ་སོགས་པས་དཔེར་བྱའོ་ཞེས་བྱ་བ་ནི་འཁོར་བའི་དཔེ་ནི་ནད་ཀྱིས་བྱ་སྟེ། འཁོར་བ་ནི་ནད་དང་
[18b.2]འདྲའོ་ཞེས་བྱ་བའི་ཐ་ཚིག་གོ། །ཆགས་པ་ལ་སོགས་པའི་དཔེ་ནི་མི་འཕྲོད་པའི་སྨན་གྱིས་བྱ་སྟེ། གཞན་དང་མཚུངས་པར་ལྡན་པ་དང་ཀུན་ནས་བསླང་བ་ལ་མི་ལྟོས་པའི་ཕྱིར་རོ། །དེ་དག་དང་མཚུངས་པར་ལྡན་པའི་དཔེ་ནི་མི་འཕྲོད་པའི་སྨན་དང་སྦྱར་བའི་བཏུང་བས་བྱའོ། །
[18b.3]ལུས་དང་ངག་གི་ལས་དང་སྐྱེ་བ་ལ་སོགས་པ་དང་ཐོབ་པ་རྣམས་ཀྱི་དཔེ་ནི་མི་འཕྲོད་པའི་སྨན་དང་སྦྱར་བའི་བཏུང་བ་ལས་བྱུང་བའི་འོ་མས་བྱའོ། །དེ་ལྟ་ན་འོ་ན་ནི་ཞེས་བྱ་བ་ནི་གལ་ཏེ་འཁོར་བ་དོན་དམ་པར་མི་དགེ་བ་ཡིན་ན་ཟག་པ་དང་བཅས་པ་ནི་འཁོར་བའི་ཁོངས་སུ་གཏོགས་པའི་ཕྱིར་
[18b.4]ཟག་པ་དང་བཅས་པ་ཅུང་ཟད་ཀྱང་ལུང་དུ་མ་བསྟན་པའམ་དགེ་བར་མི་འགྱུར་རོ་ཞེ་ན། དོན་དམ་པར་དེ་སྐད་དུ་བཤད་ཀྱི་ཞེས་བྱ་བ་ནི་འཁོར་བའི་ཁོངས་སུ་གཏོགས་པ་ཐམས་ཅད་མི་དགེ་བ་ཡིན་ནོ་ཞེས་བྱ་བ་འདི་ནི་ཁས་ལེན་ཏོ། །རྣམ་པར་སྨིན་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི་གང་
[18b.5]ཞིག་འདི་ནི་རྣམ་པར་སྨིན་པ་དང་བཅས་པ་ཡིན་ནོ་ཞེས་བྱ་བར་རྣམ་པར་སྨིན་པའི་ཕྱིར་ལུང་དུ་མ་བསྟན་པ་དེ་ནི་ལུང་དུ་མ་བསྟན་པ་ཞེས་བྱའོ། །འདི་སྐད་དུ་ཟག་པ་དང་བཅས་པ་གང་ཡིན་པ་དེ་ནི་དོན་དམ་པར་མི་བདེ་བའི་ཕྱིར་མི་དགེ་བ་ཡང་ཡིན་ལ། རྣམ་པར་སྨིན་པའི་ཕྱིར་ལུང་དུ་མ་བསྟན་
[18b.6]པ་ཡང་མ་ཡིན་ནོ་ཞེས་བཤད་པར་འགྱུར་རོ། །དགེ་བ་ཡང་དེ་ཁོ་ན་བཞིན་དུ་མི་དགེ་བ་ཡང་ཡིན་ལ་རྣམ་པར་སྨིན་པ་ཡིད་དུ་འོང་བ་ཅན་ཡིན་པའི་ཕྱིར་དགེ་བའང་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །གལ་ཏེ་ཀུན་ནས་སློང་བའི་དབང་གིས་ཞེས་བྱ་བ་རྒྱས་པར་འབྱུང་བ་ནི་སེམས་པ་ཁོ་ན་
[18b.7]དགེ་བ་དང་མི་དགེ་བ་ཉིད་ཡིན་ནོ་སྙམ་པའི་བསམ་པ་འདིས་ལུས་དང་ངག་གི་ལས་ཀྱི་དགེ་བ་དང་མི་དགེ་བ་ཉིད་སྤྱོད་པ་ཡིན་ནོ། །ཅི་སྟེ་འབྱུང་བ་ཆེན་པོ་རྣམས་མ་ཡིན་ཞེས་བྱ་བ་ནི་དགེ་བ་དང་མི་དགེ་བ་ཉིད་དེ། དགེ་བ་དང་མི་དགེ་བའི་སེམས་ཀྱིས་ནི་ལུས་དང་ངག་གི་ལས་དང་། དེ་དག་གི་འབྱུང་བ་
[19a]
[19a.1]ཆེན་པོ་རྣམས་ཀྱང་ཀུན་ནས་སློང་བར་བྱེད་དོ། །བྱེ་བྲག་ཏུ་སྨྲ་བས་སྨྲས་པ། བྱེད་པ་པོ་ནི་ལས་ལ་སེམས་པ་ཡིན་གྱི། འབྱུང་བ་ཆེན་པོ་དག་བྱའོ་སྙམ་དུ་འབྱུང་བ་རྣམས་ལ་ནི་མ་ཡིན་ནོ། །འོ་ན་ཅི་ཞེ་ན་ལས་འདི་བྱའོ་སྙམ་དུ་སེམས་པ་ཡིན་པས་འབྱུང་བ་ཆེན་པོ་རྣམས་
[19a.2]ནི་ལས་བཞིན་དུ་དགེ་བ་དང་མི་དགེ་བ་ཉིད་མ་ཡིན་ནོ། །སློབ་དཔོན་གྱིས་བཤད་པ་མཉམ་པར་གཞག་པའི་རྣམ་པར་རིག་བྱེད་མ་ཡིན་པ་ལ་ནི། བྱེད་པ་པོ་ལ་རྣམ་པར་རིག་བྱེད་མ་ཡིན་པ་བྱའོ་སྙམ་དུ་བསམ་པ་མེད་དོ། །མཉམ་པར་མ་བཞག་པའི་སེམས་ནི་སའི་སྒོ་ནས་མཉམ་པར་
[19a.3]གཞག་པ་མ་ཡིན་པས་སྐལ་བ་མི་མཉམ་ཞིང་མི་འདྲ་བའི་ཕྱིར་དེ་ཀུན་ནས་སློང་བར་བྱེད་པ་དེ་ལྟ་བུར་སེམས་པར་བྱེད་པ་གང་ཡིན་པ་ཡོད་པ་མ་ཡིན་ན་ཇི་ལྟར་མཉམ་པར་གཞག་པའི་རྣམ་པར་རིག་བྱེད་མ་ཡིན་པ་དེ་དགེ་བ་ཉིད་ཡིན་ཏེ། དེ་ནི་འབྱུང་བ་ཆེན་པོ་བཞིན་དུ་དགེ་བ་ཉིད་ཡིན་པར་མི་འགྱུར་རོ་
[19a.4]སྙམ་དུ་བསམས་པ་ཡིན་ནོ། །ཡང་ན་ལྷའི་མིག་ལ་སོགས་པ་དང་རྣ་བ་དག་ཀྱང་དགེ་བ་ཉིད་དུ་ཐལ་བར་འགྱུར་ཞེས་བྱ་བ་ནི་གལ་ཏེ་སེམས་པ་མེད་དུ་ཟིན་ཀྱང་རྣམ་པར་རིག་བྱེད་མ་ཡིན་པ་དགེ་བ་ཉིད་ཡིན་ན་ཞེས་བྱ་བ་ཡིན་ནོ། །ཡང་ན་འདིའི་འབྲེལ་པ་ནི་འདི་ཡིན་ཏེ། གལ་ཏེ་སྐལ་བ་
[19a.5]མི་མཉམ་པ་དང་མཉམ་པར་གཞག་པ་མ་ཡིན་པའི་སེམས་ཀྱི་དབང་གིས་དེ་དགེ་བ་ཉིད་ཡིན་ན། ལྷའི་མིག་དང་རྣ་བ་དག་ཀྱང་སྦྱོར་བའི་ཚེ་དེ་དག་ལ་སེམས་པ་ཡོད་པའི་ཕྱིར་དགེ་བ་ཉིད་ཡིན་པར་ཐལ་བར་འགྱུར་བ་ཞིག་ན། རྣ་མིག་མངོན་ཤེས་ལུང་མ་བསྟན། །ཞེས་འབྱུང་བའི་ཕྱིར་
[19a.6]དེ་གཉིས་ལ་ནི་དགེ་བ་ཉིད་ཀྱང་མེད་དོ། །མཐོང་བས་ན་སྤང་བར་བྱ་བ་ནི་ཁ་ནང་དུ་བལྟས་པར་འཇུག་པ་ཡིན་པའི་ཕྱིར་དེ་སྐད་དུ་སྨྲ་བས་མཐོང་བས་སྤང་བར་བྱ་བའི་སེམས་ནི་རྣམ་པར་རིག་བྱེད་ཀུན་ནས་སློང་བར་བྱེད་པ་མ་ཡིན་ནོ་ཞེས་གང་བཤད་པ། འོ་ན་ཅིའི་ཕྱིར་བཅོམ་ལྡན་འདས་ཀྱིས་
[19a.7]གསུངས་ཤེ་ན་ཞེས་བྱ་བའི་ཚིག་གི་དོན་ནི། དེ་ནི་བཅོམ་ལྡན་འདས་ཀྱིས་གསུངས་པ་དང་འགལ་ལོ་ཞེས་བྱ་བ་ཡིན་ནོ། །དེ་ཡང་གང་ཞེ་ན་ལོག་པར་ལྟ་བ་དེ་ལས་ནི་ཞེས་བྱ་བ་རྒྱས་པར་སྨོས་ཏེ། ཇི་ལྟར་ལོག་པར་ལྟ་བ་མཐོང་བས་སྤང་བར་བྱ་བ་ལས་ལོག་པའི་ངག་རྣམ་པར་རིག་བྱེད་ཀྱི་
[19b]
[19b.1]ངོ་བོ་ཉིད་དང་། ལོག་པའི་ལས་ཀྱི་མཐའ་དེའི་ངོ་བོ་ཉིད་ཁོ་ན་འབྱུང་བར་འགྱུར་རོ་ཞེས་གསུངས་རྒྱུ་དང་ནི། དེ་ཡི་དུས་ཀྱི་སློང་ཞེས་བྱ། །ཞེས་བྱ་བ་ནི་རྒྱུའི་སློང་བ་དང་དེའི་དུས་ཀྱི་སློང་བ་ནི་རྒྱུ་དང་དུས་ཀྱི་སློང་བའོ། །རྒྱུ་དང་དེའི་དུས་ཀྱི་སློང་བ་ཞེས་མིང་བཏགས་པ་ནི་རྒྱུ་དང་དེའི་དུས་ཀྱི་སློང་
[19b.2]བ་ཞེས་བྱ་བ་སྟེ་ཞེས་བྱ་བ་ནི་མིང་དུ་བཏགས་པའོ། །ཡང་འདི་ལ་རྒྱུ་དང་དེའི་དུས་ཀྱི་སློང་བ་ཞེས་བྱ་བ་ཡོད་པས་ན། རྒྱུ་དང་དེའི་དུས་ཀྱི་སློང་བ་ཞེས་བྱ་བ་ཅན་ཡིན་ཏེ། རྒྱུ་དང་དེའི་དུས་ཀྱི་སློང་བ་ཞེས་བྱ་སྟེ། རྒྱུ་དང་དུས་ཀྱི་སློང་བ་ཞེས་བྱ་བར་མིང་དུ་བཏགས་པ་ཡིན་ནོ། །རྒྱུའི་ཀུན་
[19b.3]ནས་སློང་བ་ཞེས་བྱ་བ་ནི་འདིས་ཀུན་ནས་སློང་བས་ན་ཀུན་ནས་སློང་བའོ། །དེ་ནི་རྒྱུ་ཡང་ཡིན་ལ་དེ་ནི་ཀུན་ནས་སློང་བ་ཡང་ཡིན་པས་རྒྱུའི་ཀུན་ནས་སློང་བའོ། །དེའི་དུས་ཀྱི་ཀུན་ནས་སློང་བ་ཞེས་བྱ་བ་ནི་དུས་དེ་སྟེ་བྱ་བའི་དུས་སོ། །དུས་དེར་ཀུན་ནས་སློང་བ་ནི་དེའི་དུས་ཀྱི་ཀུན་ནས་སློང་བའོ། །
[19b.4]དེའི་དུས་ཁོ་ན་ན་དེ་ཡོད་པའི་ཕྱིར་རོ་ཞེས་བྱ་བ་ནི་བྱ་བའི་དུས་ཁོ་ན་ན་དེའི་དུས་ཀྱི་ཀུན་ནས་སློང་བ་ཡོད་པའི་ཕྱིར་རོ་ཞེས་བྱ་བའི་ཐ་ཚིག་གོ། །འཕེན་པར་བྱེད་པ་ཡིན་པའི་ཕྱིར་ཞེས་བྱ་བ་ནི་སྐྱེད་པར་བྱེད་པ་ཡིན་པའི་ཕྱིར་རོ། །ད་ནི་བྱ་བ་དེ་ལ་དེའི་ནུས་པ་ཅི་ཞིག་ཡོད་ཅེས་བྱ་བ་ནི་ད་ནི་རྣམ་པར་རིག་བྱེད་
[19b.5]ཀྱི་བྱ་བ་དེ་ལ་དེའི་དུས་ཀྱི་ཀུན་ནས་སློང་བར་བྱེད་པ་དེའི་ནུས་པ་ཇི་ཞིག་ཡོད་ན་གང་གིས་ན་དེའི་ཚེ་དེའི་རྗེས་སུ་འཇུག་པར་བྱེད་པ་ཡིན་ནོ་ཞེས་བྱ་བར་བརྗོད་དོ། །དེ་མེད་ན་ཞེས་བྱ་བ་རྒྱས་པར་འབྱུང་བ་ནི་རྒྱུའི་ཀུན་ནས་སློང་བས་འཕངས་སུ་ཟིན་ཅིང་བསྐྱེད་དུ་ཟིན་ཀྱང་དེའི་དུས་ཀྱི་ཀུན་ནས་སློང་བ་དེ་མེད་ན་
[19b.6]ཤི་བ་བཞིན་དུ་རྣམ་པར་རིག་བྱེད་ཡོད་པར་མི་འགྱུར་ཏེ། དཔེར་ན་འགའ་ཞིག་གྲོང་དུ་འགྲོ་བར་བྱའོ་ཞེས་བྱ་བ་འཕངས་ནས་བར་མ་དོར་ཤི་ན་དེ་ལ་རྗེས་སུ་འཇུག་པར་བྱེད་པར་སེམས་མེད་པའི་ཕྱིར་འགྲོ་བར་མི་འགྱུར་བ་དེ་དེ་དང་འདྲའོ། །འོ་ན་སེམས་མེད་པའི་སྡོམ་པ་སྐྱེ་བ་ལ་ཞེས་བྱ་བ་རྒྱས་
[19b.7]པར་འབྱུང་བ་ནི། གལ་ཏེ་དེའི་དུས་ཀྱི་ཀུན་ནས་སློང་བ་མེད་པ་ན་ཤི་བ་བཞིན་དུ་དེ་ཡོད་པར་མི་འགྱུར་ན་འགོག་པའི་སྙོམས་པར་འཇུག་པ་ཐོབ་པས་བསྙེན་པར་རྫོགས་པར་བྱ་བ་ལ་ལུས་ཀྱི་རྣམ་པར་རིག་བྱེད་བྱས་པ་འགའ་ཞིག་དེའི་ཚེ་འགོག་པའི་སྙོམས་པར་འཇུག་པ་ཉེ་བར་གནས་པའི་ཕྱིར་སེམས་
[20a]
[20a.1]མེད་པའི་སྡོམ་པ་སྐྱེ་བ་ལ་དེའི་སྡོམ་པར་གཏོགས་པ་ལུས་ཀྱི་རྣམ་པར་རིག་བྱེད་ལས་བརྗོད་པའི་འཇུག་པ་འབྱུང་བ་ཇི་ལྟར་ཡོད་དེ། དེའི་དུས་ཀྱི་ཀུན་ནས་སློང་བ་མེད་ན། ཇི་ལྟར་འབྱུང་བར་འགྱུར་ཞེས་བྱ་བའི་ཐ་ཚིག་གོ། །དེ་ལྟར་འགལ་བར་བཤད་པ་དང་། འོ་ན་ནི་
[20a.2]སེམས་དང་བཅས་པ་ལ་ཆེས་གསལ་བ་ཡིན་ཞེས་བྱ་བ་ལན་གཞན་ལ་རྟེན་པར་བྱེད་དེ། དེའི་དུས་ཀྱི་ཀུན་ནས་སློང་བས་ནི་སེམས་དང་བཅས་པ་ལ་རྣམ་པར་རིག་བྱེད་ཅེས་གསལ་བར་འབྱུང་བས་དེའི་ནུས་པ་ནི་དེ་ཡིན་ནོ། །མཐོང་བས་སྤང་བྱའི་རྣམ་ཤེས་ནི། །རབ་ཏུ་འཇུག་བྱེད་ཡིན་ཞེས་བྱ་བ་
[20a.3]ནི་མཐོང་བས་སྤང་བར་བྱ་བ་ནི་རབ་ཏུ་འཇུག་པར་བྱེད་པ་ཁོ་ན་ཡིན་ནོ་ཞེས་ངེས་པར་གཟུང་བ་ཡིན་ནོ། །ཇི་ལྟར་དེ་རབ་ཏུ་འཇུག་པར་བྱེད་པ་ཡིན་ཞེ་ན་ཀུན་ནས་སློང་བར་བྱེད་པ་རྟོག་པ་དང་དཔྱོད་པ་དག་གི་གཞིར་གྱུར་ཅིང་རྒྱུར་གྱུར་པའི་ཕྱིར་རྣམ་པར་རིག་བྱེད་རབ་ཏུ་འཇུག་པར་བྱེད་པ་ཡིན་ནོ། །
[20a.4]རྗེས་སུ་འཇུག་པར་བྱེད་པ་ནི་མ་ཡིན་ནོ་ཞེས་བྱ་བ་རྒྱས་པར་འབྱུང་བ་ནི་སེམས་ཁ་ཕྱིར་བལྟས་ལ་རྗེས་སུ་འཇུག་པར་བྱེད་པ་གང་ཡིན་པ་དེའི་རྣམ་པར་རིག་བྱེད་ཀྱི་བྱ་བའི་དུས་གང་ཡིན་པ་དེ་ན་དེ་མེད་པའི་ཕྱིར་རོ། །རབ་ཏུ་འཇུག་པར་བྱེད་པ་མཐོང་བས་སྤང་བར་བྱ་བ་མེད་པའི་ཕྱིར་ཞེས་བྱ་
[20a.5]བའི་ཐ་ཚིག་སྟེ། དེའི་ཕྱིར་དེ་ནི་རྗེས་སུ་འཇུག་པར་བྱེད་པ་མ་ཡིན་ནོ། །ཉེས་པ་གཞན་དེས་ཀུན་ནས་བསླང་བའི་གཟུགས་ཞེས་བྱ་བ་རྒྱས་པར་འབྱུང་བ་འདི་ཡང་ཡོད་དེ། གལ་ཏེ་མཐོང་བས་སྤང་བར་བྱ་བ་དེ་ཡང་། དེ་རྗེས་སུ་འཇུག་པར་བྱེད་པ་ཡིན་ན་ཇི་ལྟར་བསྒོམ་པས་སྤང་
[20a.6]བར་བྱ་བའི་སེམས་ཀྱིས་ཀུན་ནས་བསླང་བའི་ལུས་དང་ངག་གི་ལས་བསྒོམ་པས་སྤང་བར་བྱ་བ་ཡིན་པ་ལྟར་མཐོང་བས་སྤང་བར་བྱ་བ་དེའི་སེམས་དེས་ཀུན་ནས་བསླང་བའི་ལུས་དང་ངག་གི་རྣམ་པར་རིག་བྱེད་ཀྱི་གཟུགས་ཀྱང་མཐོང་བས་སྤང་བར་བྱ་བ་ཡིན་པར་འགྱུར་རོ། །ཅིར་འགྱུར་
[20a.7]ཞེས་ཟེར་བ་ནི་རྒོལ་བར་བྱེད་པའོ། །བྱེ་བྲག་ཏུ་སྨྲ་བས་ཆོས་མངོན་པ་ལ་གནོད་པར་འགྱུར་རོ་ཞེས་བྱ་བ་སྨོས་ཏེ། ཉོན་མོངས་ཅན་མིན་མཐོང་སྤངས་མིན། །གཟུགས་མིན་ཞེས་འབྱུང་བའི་ཕྱིར་རོ། །གཞན་ཡང་རིག་པ་དང་མ་རིག་པ་དག་དང་མི་འགལ་བའི་ཕྱིར་ཏེ། གཟུགས་དེ་ནི་
[20b]
[20b.1]འཇིག་ཚོགས་ལ་ལྟ་བ་ལ་སོགས་པ་བཞིན་དུ་རིག་པ་མཐོང་བའི་ལམ་དང་མི་འགལ་བའི་ཕྱིར་ཏེ། མ་སྤངས་པའི་ཕྱིར་ཞེས་བྱ་བའི་ཐ་ཚིག་གོ། །དེའི་ཕྱིར་དེ་ནི་བདེན་པ་མཐོང་བ་རྣམས་ཀྱང་དེ་དང་ལྡན་པས་གཟུགས་ནི་མཐོང་བས་སྤང་བར་བྱ་བ་མེད་དོ། །མ་རིག་པ་དང་འགལ་བ་
[20b.2]ཡང་མེད་པའི་ཕྱིར་ཏེ། ཇི་ལྟར་ཟག་པ་མེད་པའི་ལམ་སོ་སོའི་སྐྱེ་བོའི་གནས་སྐབས་ན་དེ་ནི་སྐྱེ་བའི་ཕྱིར་ལ་དེ་སྐྱེས་ཏེ་འཕགས་པའི་གནས་སྐབས་ན་ནི་མ་རིག་པ་ཁ་ཅིག་སྤངས་པའི་ཕྱིར་མ་རིག་པ་དང་འགལ་བ་ལྟར་གཟུགས་ནི་མ་རིག་པ་དང་འགལ་བ་མེད་དེ། ཉོན་མོངས་པ་ཅན་དང་།
[20b.3]ཉོན་མོངས་པ་ཅན་མ་ཡིན་པའི་གཟུགས་ཀུན་དུ་འབྱུང་བའི་གནས་སྐབས་སམ། དེའི་ཐོབ་པའི་རྒྱུན་ཆགས་པའི་ཚེ་ཡང་མ་རིག་པ་མི་འབྱུང་བ་མ་ཡིན་ལ་མ་རིག་པ་ཡོད་ན་ཡང་དེ་མི་འབྱུང་བ་མ་ཡིན་པས་སོ། །དེ་ལྟ་བུ་ཡིན་ལ་ཟག་པ་མེད་པ་བཞིན་དུ་སྤང་བར་བྱ་བ་མ་ཡིན་པ་ཡང་མ་ཡིན་ནོ། །གལ་
[20b.4]ཏེ་སྤང་བར་བྱ་བ་མ་ཡིན་པ་ཡང་མ་ཡིན་ལ་མཐོང་བས་སྤང་བར་བྱ་བ་ཡང་མ་ཡིན་ན་ཤུགས་ཀྱིས་བསྒོམ་པས་སྤང་བར་བྱ་བ་ཡིན་ནོ་ཞེས་བྱ་བ་གྲུབ་བོ། ཅིག་ཤོས་ཀྱིས་གཟུགས་རིག་པ་དང་མི་འགལ་ལོ་ཞེས་བྱ་བའི་ཕྱོགས་འདི་ནི་བསྒྲུབ་པར་བྱ་བ་ཡིན་ནོ་ཞེས་བྱ་བ་སྨྲས་ཏེ། གང་ཞིག་གཟུགས་
[20b.5]མཐོང་བས་སྤང་བར་བྱ་བ་ཡིན་པར་འདོད་དེ་ཇི་ལྟར་གཟུགས་རིག་པ་དང་མི་འགལ་བར་འཛིན་པར་འགྱུར། བྱེ་བྲག་ཏུ་སྨྲ་བས་འོ་ན་ནི་སེམས་མཚུངས་པས་བསླང་བའི་ཕྱིར་འབྱུང་བ་རྣམས་ཀྱང་ཞེས་བྱ་བ་རྒྱས་པར་སྨོས་ཏེ། གལ་ཏེ་མཐོང་བས་སྤང་བར་བྱ་བའི་སེམས་ཀྱིས་ཀུན་ནས་བསླང་བའི་གཟུགས་
[20b.6]དེ་མཐོང་བས་སྤང་བར་བྱ་བ་ཡིན་པར་གྱུར་ན་འོ་ན་ནི་དེའི་རྟེན་འབྱུང་བ་རྣམས་ཀྱང་མཐོང་བས་སྤང་བར་བྱ་བ་ཡིན་པར་འགྱུར་རོ། །ཅིའི་ཕྱིར་ཞེ་ན། སེམས་མཚུངས་པས་བསླང་བའི་ཕྱིར་ཏེ། མཐོང་བས་སྤང་བར་བྱ་བའི་སེམས་གང་གིས་གཟུགས་དེ་ཀུན་ནས་བསླང་བ་དེ་ཉིད་ཀྱིས་དེའི་རྟེན་གྱི་འབྱུང་བ་རྣམས་ཀྱང་
[20b.7]བསླང་བས་སོ། །དེ་དག་ནི་དེ་ལྟ་བུ་ཡིན་པར་ཡང་མི་འོས་ཏེ། ཉོན་མོངས་པ་ཅན་མ་ཡིན་པའི་ལུང་དུ་མ་བསྟན་པ་ཡིན་པའི་ཕྱིར་ལམ་མཐོང་བས་སྤང་བར་བྱ་བ་རྣམས་ནི་ཉོན་མོངས་པ་ཅན་ཡིན་པའི་ཕྱིར་རོ། །ཅིག་ཤོས་ཀྱིས་དེ་ལྟར་ནི་མི་འགྱུར་ཏེ་ཞེས་བྱ་བ་སྨས་ཏེ། མཐོང་བས་སྤང་བར་བྱ་བ་དག་ཏུ་ནི་མི་
[21a]
[21a.1]འགྱུར་རོ། །ཇི་ལྟ་ཞེ་ན། སྨྲས་པ། ཇི་ལྟར་དགེ་བ་དང་མི་དགེ་བ་དག་ཏུ་མི་འགྱུར་བ་བཞིན་ཏེ། ཇི་ལྟར་དགེ་བ་དང་མི་དགེ་བའི་སེམས་གང་གིས་དགེ་བ་དང་མི་དགེ་བའི་གཟུགས་ཀུན་ནས་བསླང་བ་དེ་ཉིད་ཀྱིས་དེའི་རྟེན་གྱིས་འབྱུང་བ་རྣམས་ཀྱང་ཀུན་ནས་བསླང་བ་ཡིན་ན། ལུས་དང་ངག་
[21a.2]གི་ལས་ཀྱི་ངོ་བོ་ཉིད་ཀྱི་གཟུགས་དེ་ནི་དགེ་བ་དང་མི་དགེ་བ་ཡིན་གྱི་དེའི་རྟེན་གྱི་འབྱུང་བ་རྣམས་ནི་མ་ཡིན་པ་དེ་དང་འདྲའོ། །ཡང་དེ་ཉིད་ཀྱིས་བཟློག་སྟེ། ཡང་ན་མཐོང་བས་སྤང་བར་བྱ་བ་ཡིན་པར་གྱུར་དུ་ཟད་མོད་ཅེས་བྱ་བ་སྨྲས་སོ། །བྱེ་བྲག་ཏུ་སྨྲས་པས་དེ་སྐད་བརྗོད་པར་ནི་
[21a.3]མི་ནུས་ཏེ་ཞེས་བྱ་བ་སྨོས་ཏེ། མཐོང་བས་སྤང་བར་བྱ་བ་དག་ཡིན་པར་ཞེས་བྱ་བ་ཚིག་ལྷག་མ་ཡིན་ནོ། །ཅིའི་ཕྱིར་ཞེ་ན། ཉོན་མོངས་པ་ཅན་མ་ཡིན་པའི་ཆོས་ནི་རིག་པ་དང་མ་རིག་པ་དག་དང་མི་འགལ་བའི་ཕྱིར་ཏེ། ཉོན་མོངས་པ་ཅན་མ་ཡིན་པའི་ཆོས་མ་བསྒྲིབས་ལ་ལུང་དུ་མ་
[21a.4]བསྟན་པ་དང་དགེ་བ་ཟག་པ་དང་བཅས་པ་རྣམས་ནི་ཇི་ལྟར་ཉོན་མོངས་པ་ཅན་གྱི་ཆོས་དག་ཐོབ་པ་འཆད་པས་འགལ་བ་ལྟར་རིག་པ་ཟག་པ་མེད་པའི་ལམ་དང་འགལ་བ་མེད་དོ། །དེ་ལ་དམིགས་པའི་ཉོན་མོངས་པ་ཐོབ་པ་འཆད་པའི་ཕྱིར་འགལ་བ་ནི་མི་འགོག་གོ། །འཐོབ་པ་
[21a.5]འཆད་པ་དང་། དེ་ལ་དམིགས་པའི་ཉོན་མོངས་པ་སྤོང་བའི་ཚུལ་གྱིས་མ་རིག་པ་དང་མི་འགལ་བ་འབྱུང་བ་དག་ཀྱང་ཉོན་མོངས་པ་ཅན་མ་ཡིན་པ་ཡིན་ནོ། །དེ་ལ་ཡང་ན་གྱུར་དུ་ཟད་མོད་ཅེས་སྨྲས་པ་དེ་ཡང་རིག་པ་མ་ཡིན་ཏེ། དེ་ལྟར་ན་འདིར་བསྒྲུབ་པ་འབྱུང་སྟེ། ཉོན་མོངས་པ་
[21a.6]ཅན་གྱི་གཟུགས་ཀྱི་རྟེན་འབྱུང་བ་རྣམས་ནི་མཐོང་བས་སྤང་བར་བྱ་བ་མ་ཡིན་ཏེ། ཉོན་མོངས་པ་ཅན་མ་ཡིན་པའི་ཕྱིར་ཉོན་མོངས་པ་ཅན་མ་ཡིན་པའི་སེམས་དང་སེམས་ལས་བྱུང་བའི་ཆོས་བཞིན་ནོ། །བྱེ་བྲག་ཏུ་སྨྲ་བས་དེ་ལྟར་མཐོང་བས་སྤང་བར་བྱ་བའི་རྣམ་པར་ཤེས་པ་ནི་རབ་ཏུ་འཇུག་
[21a.7]པར་བྱེད་པ་ཡིན་ནོ་ཞེས་ཀླན་ཀ་དང་བཅས་པའི་ལན་སོ་སོར་བཀོད་ནས་མཇུག་བསྡུ་བའི་ཕྱིར་དེ་ལྟ་བས་ན་མདོ་ལས་རྒྱུའི་ཀུན་ནས་སློང་བ་ཞེས་བྱ་བ་རྒྱས་པར་སྨོས་ཏེ། ལོག་པར་ལྟ་བ་ལས་ལོག་པར་རྟོག་པ་ནས་ལོག་པའི་ལས་ཀྱི་མཐའི་བར་འབྱུང་ངོ་ཞེས་བཤད་པའི་མདོ་གང་ཡིན་
[21b]
[21b.1]པ་དེ་འགལ་བ་མེད་དོ་ཞེས་བྱ་བ་ཡིན་ནོ། །རབ་ཏུ་འཇུག་པར་བྱེད་པ་ཡང་ཡིན་ལ་རྗེས་སུ་འཇུག་པར་བྱེད་པ་ཡང་ཡིན་ནོ་ཞེས་བྱ་བ་ནི་ཁ་ནང་དང་ཕྱི་རོལ་དུ་བལྟས་ཏེ་འཇུག་པའི་ཕྱིར་རོ། །ལྔ་ནི་རྗེས་སུ་འཇུག་བྱེད་ཡིན། །ཞེས་བྱ་བ་ནི་ལྔ་ནི་རྗེས་སུ་འཇུག་པར་བྱེད་པ་ཁོ་ན་ཡིན་ནོ་ཞེས་ངེས་པར་
[21b.2]གཟུང་བ་ཡིན་ཏེ་རྣམ་པར་མི་རྟོག་པའི་ཕྱིར་རོ། །ཟག་པ་མེད་པ་ནི་གཉི་ག་མ་ཡིན་ནོ་ཞེས་བྱ་བ་ནི་རབ་ཏུ་འཇུག་པར་བྱེད་པ་ཡང་མ་ཡིན་ལ་རྗེས་སུ་འཇུག་པར་བྱེད་པ་ཡང་མ་ཡིན་པ་སྟེ། མཉམ་པར་གཞག་པ་ནི་ཁ་ནང་དུ་བལྟས་ཏེ་འཇུག་པའི་ཕྱིར་རོ། །དམན་པར་འགྱུར་བ་མ་ཡིན་ཞེས་
[21b.3]བྱ་བ་ནི་ལྡང་བར་འགྱུར་བ་མ་ཡིན་པའོ། །དགེ་བར་རྒྱུད་གཅིག་པ་ཡིན་ནོ་ཞེས་བྱ་བ་ནི་དགེ་བར་རྒྱུད་གཅིག་པ་ཡིན་ནོ་ཞེས་བྱ་བའི་ཐ་ཚིག་གོ། །སངས་རྒྱས་བཅོམ་ལྡན་འདས་ནི་མདོ་ལས་གླང་པོ་ཆེ་ཡིན་པར་གསུངས་སོ། །ཇི་ལྟ་ཞེ་ན། འཆར་བྱེད་དེ་བཞིན་གཤེགས་པ་ནི་ལྷ་དང་བཅས་ཤིང་
[21b.4]བདུད་དང་བཅས་པའི་འཇིག་རྟེན་ན་ཞེས་བྱ་བ་རྒྱས་པར་གསུངས་ནས་སྐུ་དང་གསུང་དང་ཐུགས་ཀྱིས་ངན་པ་མི་མཛད་དེ་དེ་ལྟ་བས་ན་གླང་པོ་ཆེན་པོ་ཞེས་བྱའོ་ཞེས་གསུངས་ཏེ། ངན་པ་མི་མཛད་ཅེས་བྱ་བ་ནི་ཉེས་པ་མི་མཛད་ཅེས་བྱ་བའི་ཐ་ཚིག་གོ། །འདིའི་ཐུགས་མི་བཞེད་པས་ཞེས་བྱ་བ་ནི་སངས་
[21b.5]རྒྱས་འདིའི་ཐུགས་མི་བཞེད་པས་མི་འགྲོ་བའི་ཕྱིར་ཏེ། ཡུལ་དག་ལ་མི་འགྲོ་བའི་ཕྱིར་དེ་སྐད་དུ་གཤེགས་ནའང་མཉམ་པར་གཞག་ཅེས་བྱ་བ་ལ་སོགས་པ་རྒྱས་པར་གསུངས་པར་ཟད་དེ། དེ་ནི་སྤྱོད་ལམ་བཞི་ཆར་དུ་བཞུད་ན་ཡང་བཞུད་དོ་སྙམ་པ་ནས། བཞུགས་ནའང་བཞུགས་
[21b.6]སོ་སྙམ་པའི་བར་གྱི་དགོངས་པ་ཉེ་བར་གནས་པའི་ཕྱིར་རྟག་ཏུ་མཉམ་པར་གཞག་པ་ཞེས་བྱའོ། །མངོན་པར་འདུ་བྱ་བ་མེད་པར་འཇུག་པ་ཉིད་ཀྱི་ཕྱིར་ཞེས་བྱ་བ་ནི་མངོན་པར་འདུ་བྱ་ཞིང་འབད་པ་མེད་པ་སྟེ། མངོན་པར་འདུ་བྱ་བ་མེད་པར་འཇུག་པས་ན་མངོན་པར་འདུ་བྱ་བ་མེད་པར་འཇུག་པའོ། །
[21b.7]དེའི་ངོ་བོ་ནི་ཉིད་དེ་དེའི་ཕྱིར་རོ། །ཡང་ན་མཐོང་བས་སྤང་བར་བྱ་བ་ཐམས་ཅད་ནི་རབ་ཏུ་འཇུག་པར་བྱེད་པ་མ་ཡིན་ཞེས་བྱ་བ་ནི་གལ་ཏེ་མཐོང་བས་སྤང་བར་བྱ་བ་ཐམས་ཅད་རབ་ཏུ་འཇུག་པར་བྱེད་པ་ཡིན་པར་འདོད་ན་ནི་དེ་དེ་ལྟ་བུར་ཡང་འགྱུར་བ་ཞིག་ན་ཐམས་ཅད་ནི་མ་ཡིན་ནོ། །འོ་ན་ཅི་
[22a]
[22a.1]ཞེ་ན། ལོག་པར་ལྟ་བ་ལ་སོགས་པ་ཁོ་ནས་རྣམ་པར་རིག་བྱེད་རབ་ཏུ་འཇུག་པར་བྱེད་པ་ཡིན་གྱི་འཇིག་ཚོགས་ལ་ལྟ་བ་ནི་མ་ཡིན་ནོ། །དེའི་ཕྱིར་ཐམས་ཅད་ནི་རབ་ཏུ་འཇུག་པར་བྱེད་པ་མ་ཡིན་ནོ་ཞེས་བྱ་བ་སྨོས་ཏེ། འདི་ལྟ་བུ་ནི་རབ་ཏུ་འཇུག་པར་བྱེད་པ་ཡིན་ནོ། །འདི་
[22a.2]ལྟ་བུ་ནི་མ་ཡིན་ནོ་ཞེས་ཁྱད་པར་དུ་བརྗོད་དགོས་སོ། །སེམས་མི་དགེ་བ་དང་ལུང་དུ་མ་བསྟན་པ་ཅན་གྱི་ཞེས་བྱ་བ་ནི་བསྙེན་པར་རྫོགས་པར་བྱ་སྟེ། ཇི་ཞིག་དང་ལྡན་པས་སེམས་མི་དགེ་བ་དང་ལུང་དུ་མ་བསྟན་པ་ཅན་གྱི་སོ་སོར་ཐར་པའི་སྡོམ་པ་ཐལ་མོ་སྦྱར་བ་ལ་སོགས་པའི་རྣམ་པར་རིག་བྱེད་དགེ་
[22a.3]བ་ཡིན་པར་མི་འགྱུར་ཏེ། དེའི་རྗེས་སུ་འཇུག་པར་བྱེད་པ་མི་དགེ་བ་དང་ལུང་དུ་མ་བསྟན་པ་ཡིན་པའི་ཕྱིར་རོ། །རབ་ཏུ་འཇུག་པར་བྱེད་པ་ཇི་ལྟ་བར་ཞེས་བྱ་བ་རྒྱས་པར་འབྱུང་བ་ནི་རབ་ཏུ་འཇུག་པར་བྱེད་པའི་སེམས་བསྒོམ་པས་སྤང་བར་བྱ་བ་ཇི་ལྟ་བར་རྣམ་པར་རིག་བྱེད་ཀྱང་དེ་དང་འདྲ་
[22a.4]བར་རྣམ་པར་གཞག་མོད་ཀྱི་རབ་ཏུ་འཇུག་པར་བྱེད་པ་མཐོང་བས་སྤང་བར་བྱ་བ་ཡིན་པ་ཇི་ལྟ་བ་དེ་ལྟ་བུར་རྣམ་པར་གཞག་པ་ནི་མ་ཡིན་ནོ། །ཅིའི་ཕྱིར་ཞེ་ན། བསྒོམ་པས་སྤང་བར་བྱ་བས་བར་དུ་ཆོད་པའི་ཕྱིར་ཏེ། འདི་ལྟར་རབ་ཏུ་འཇུག་པར་བྱེད་པ་མཐོང་བས་སྤང་བར་བྱ་བ་དེ་ནི་རབ་ཏུ་
[22a.5]འཇུག་པར་བྱེད་པ་བསྒོམ་པས་སྤང་བར་བྱ་བས་བར་དུ་ཆོད་པ་ཡིན་ནོ། །ཇི་ལྟ་བུ་ཞེ་ན། དཔེར་ན་སྔར་སེམས་ལ་བདག་གིས་གཞན་དག་ལ་བདག་ཡོད་དོ་ཞེས་བསྟན་པར་བྱའོ་སྙམ་དུ་དེ་ལྟར་ངེས་པར་བཟུང་ནས་དེའི་འོག་ཏུ་ངག་སྐྱེད་པར་བྱེད་པའི་སེམས་ཁ་ཕྱིར་བལྟས་པ་ལ་འཇུག་
[22a.6]པ་བསྒོམ་པས་སྤང་བར་བྱ་བའི་འོག་ཏུ་ངག་སྐྱེད་པར་རྟོག་པ་དང་བཅས་ཤིང་དཔྱོད་པ་དང་བཅས་པས་བདག་ཡོད་དོ་ཞེས་ཚིག་ཏུ་སྨྲ་བར་བྱེད་པ་དེ་ལྟ་བུ་ལ་སོགས་པ་ཡིན་ནོ། །དེའི་ཕྱིར་རབ་ཏུ་འཇུག་པར་བྱེད་པ་ཇི་ལྟ་བར་ཞེས་བྱ་བ་རྒྱས་པར་སྨོས་པ་ཡིན་ཏེ། དེ་ལྟར་ན་རབ་ཏུ་འཇུག་པར་
[22a.7]བྱེད་པ་མཐོང་བས་སྤང་བར་བྱ་བའི་འོག་ཏུ་གདོན་མི་ཟ་བར་རབ་ཏུ་འཇུག་པར་བྱེད་པ་བསྒོམ་པས་སྤང་བར་བྱ་བ་དགེ་བ་འམ་མི་དགེ་བ་འམ་ལུང་དུ་མ་བསྟན་པ་ཁོ་ན་འབྱུང་ལ། དེའི་དབང་གིས་ན་རྣམ་པར་རིག་བྱེད་དགེ་བ་ལ་སོགས་པ་ཉིད་ཡིན་ནོ། །འདི་སྐད་དུ་བརྗོད་པར་བྱའོ་ཞེས་བྱ་བ་རྒྱས་པར་འབྱུང་བ་ནི་
[22b]
[22b.1]འདི་སྐད་དུ་གཞན་གྱིས་ཆོད་པ་སྟེ། བསྒོམ་པས་སྤང་བར་བྱ་བས་ཆོད་པའི་རྒྱུའི་ཀུན་ནས་སློང་བ་ལས་དགོངས་ནས་གསུངས་སོ་ཞེས་བརྗོད་པར་བྱ་དགོས་ཏེ། རྒྱུའི་ཀུན་ནས་སློང་བ་བརྒྱུད་པ་ལས་དགོངས་ནས་ཞེས་བྱ་བའི་ཐ་ཚིག་གོ། །རྣམ་རིག་མིན་རྣམ་གསུམ་ཞེས་བྱ་བ་རྒྱས་
[22b.2]པར་འབྱུང་བ་ནི་རྣམ་གསུམ་ཞེས་མདོར་བསྟན་ནས། སྡོམ་དང་སྡོམ་པ་མིན་དང་གཞན། །ཞེས་བྱ་བར་འགྲེལ་པར་བྱེད་པ་ཡིན་ཏེ། དེ་ནི་སྡོམ་པ་དང་དེ་ནི་སྡོམ་པ་མ་ཡིན་པ་ཡིན་པས་སྡོམ་པ་དང་སྡོམ་པ་མ་ཡིན་པའོ། །དེ་ནི་སྡོམ་པ་དང་སྡོམ་པ་མ་ཡིན་པ་དང་དེ་ནི་གཞན་པས་
[22b.3]སྡོམ་དང་སྡོམ་པ་མིན་པས་གཞན་ནོ་ཞེས་བྱ་བར་ཚིག་བསྡུའོ། །མཚན་ཉིད་སོ་སོར་ངེས་པའི་ཕྱིར། །ཞེས་བྱ་བ་ནི་དགེ་སློང་གི་སྡོམ་པའི་མཚན་ཉིད་ཀྱང་གཞན་ཡིན་པ་ནས་དེ་བཞིན་དུ་བསྙེན་གནས་པའི་སྡོམ་པའི་མཚན་ཉིད་ཀྱི་བར་དུ་ཡང་གཞན་ཡིན་ཏེ། འདི་སྐད་དུ། སྤང་བྱ་ལྔ་
[22b.4]བརྒྱད་བཅུ་དང་ནི། །ཐམས་ཅད་སྤོང་བར་མནོས་པ་ལས། །དགེ་བསྙེན་དང་ནི་བསྙེན་གནས་དང་། །དགེ་ཚུལ་ཕྱེད་དང་དགེ་སློང་ཉིད། །ཅེས་འཆད་པར་འགྱུར་རོ། །རྣམ་པ་བརྒྱད་ཉིད་ཡིན་ན་ནི། དགེ་སློང་གི་སྡོམ་པ་གང་ཡིན་པ་དེ་ཉིད་དགེ་སློང་མའི་སྡོམ་པ་ཡིན་ནོ་ཞེས་བྱ་བ་ལ་
[22b.5]སོགས་པ་འཆོལ་བར་འགྱུར་རོ། །དགེ་ཚུལ་མ་དང་དགེ་སློང་མ་ཡང་ཞེས་བྱ་བ་ནི་དགེ་ཚུལ་མ་ཡང་མཚན་གྱུར་ན་དགེ་ཚུལ་ཡིན་ལ་དགེ་སློང་མ་ཡང་མཚན་གྱུར་ན་དགེ་ཚུལ་ཁོ་ན་ཡིན་ནོ། །ཇི་སྟེ་འདི་ལྟར་དགེ་སློང་མཚན་གྱུར་ན་དགེ་སློང་གི་སྡོམ་པ་ནི་འདོར་ལ་དགེ་སློང་མའི་སྡོམ་པ་ནི་འཐོབ་པོ་
[22b.6]ཞེས་བྱ་བར་མི་འདོད་ཅེ་ན་དེའི་ཕྱིར་མཚན་གྱུར་པ་ལ་སྔོན་གྱི་སྡོམ་པ་གཏོང་བའི་རྒྱུ་ཡང་ཡོད་པ་མ་ཡིན་ཞེས་བྱ་བ་སྨོས་ཏེ། དགེ་སློང་ལ་དགེ་སློང་མའི་མཚན་བྱུང་ན་གཏོང་བའི་རྒྱུ། བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་བྱུང་བ་དང་། །རྩ་བ་ཆད་དང་མཚན་འདས་ལས། །
[22b.7]སོ་སོར་ཐར་པའི་འདུལ་བ་གཏོང་། །ཞེས་རྒྱུ་བཤད་པ་གང་ཡིན་པ་དེ་ལས་མི་འབྱུང་ངོ་། །སྔོན་མེད་པའི་སྡོམ་པ་འཐོབ་པའི་ཡང་མ་ཡིན་ནོ་ཞེས་བྱ་བ་ནི་རྒྱུ་ཡོད་པ་ཞེས་བྱ་བར་སྦྱར་རོ། །འདི་ལྟར་སོ་སོར་ཐར་ཅེས་པ། །གཞན་གྱི་རྣམ་རིག་བྱེད་སྩོགས་ཀྱིས། །ཞེས་བཤད་པས། དེའི་ཕྱིར་དགེ་
[23a]
[23a.1]སློང་གི་སྡོམ་པ་ལས་དགེ་སློང་མའི་སྡོམ་པ་གཞན་མ་ཡིན་ནོ་ཞེས་བྱ་བར་ཤེས་པར་འགྱུར་ཏེ་དེ་བཞིན་དུ་དགེ་ཚུལ་ལ་སོགས་པའི་ཡང་ཤེས་པར་བྱའོ། །དེ་ལྟ་བས་ན་དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་བསྙེན་མའི་སྡོམ་པ་བཞི་པོ་དེ་དག་
[23a.2]ནི་དགེ་སློང་དང་དགེ་ཚུལ་དང་། དགེ་བསྙེན་གྱི་སྡོམ་པ་གསུམ་པོ་ལས་རང་བཞིན་ཐ་མི་དད་དོ། །ཅི་སྤོང་བའི་འཕེལ་བ་དང་ལྡན་པའི་ཕྱིར་སྡོམ་པ་དེ་དག་ཅེས་བྱ་བ་རྒྱས་པར་འབྱུང་བ་ནི། དཔེར་ན་གྲངས་ལྔ་ལ་གཞན་ལྔས་བསྣན་ན་ལྔ་འཕེལ་བ་དང་ལྡན་པའི་ཕྱིར་བཅུར་འགྱུར་ལ་གྲངས་བཅོ་ལྔ་ལས་
[23a.3]གཞན་ལྔས་བསྣན་ན་ཉི་ཤུར་འགྱུར་བ་ལྟ་བུ་དང་། དོང་ཚེ་གཅིག་དང་གཉིས་ཞེས་བྱ་བ་བཞིན་དུ་སྟེ། དཔེར་ན་དོང་ཚེ་སྔ་མ་གཅིག་གཉིས་པ་དང་བཅས་ན་གཉིས་སུ་འགྱུར་བ་ལྟ་བུ་སྟེ། འདི་ལྟར་འཇིག་རྟེན་ན་སྨྲ་བ་པོ་ལ་ལ་དོང་ཚེ་གཅིག་གི་རིན་གྱིས་དོང་ཚེ་གཉིས་པའམ་དོང་ཚེ་གཉིས་པའི་རིན་
[23a.4]ཁུགས་ན་དོང་ཚེའི་རིན་སྔ་མ་དེས་ཁེ་ཕྱིན་པར་མཐོང་ནས་བདག་གིས་དོང་ཚེ་གཉིས་རྙེད་དོ་ཞེས་སྨྲ་བར་འགྱུར་ཏེ། བདག་གིས་དོང་ཚེ་གཉིས་རྙེད་དོ་ཞེས་བྱ་བའི་དོན་ཏོ། །ཅི་དེ་བཞིན་དུ་དགེ་བསྙེན་དང་དགེ་ཚུལ་དང་དགེ་སློང་གི་སྡོམ་པ་འདི་དག་ཀྱང་སྤོང་བའི་འཕེལ་བ་དང་ལྡན་པའི་ཕྱིར་སྲོག་གཅོད་
[23a.5]པ་ལ་སོགས་པའི་དེ་ཁོ་ན་བཞིན་དུ་སོ་ན་གནས་ལ། གར་དང་གླུ་དང་རོལ་མོ་སྤོང་བ་ལ་སོགས་པའི་སྡོམ་པ་སྔོན་མེད་པ་དག་འཕེལ་བ་དང་ལྡན་པའི་ཕྱིར་དགེ་བསྙེན་གྱི་སྡོམ་པ་ལས་ཀྱང་དགེ་ཚུལ་གྱི་སྡོམ་པ་གཞན་ཡིན་ལ། དགེ་ཚུལ་གྱི་སྡོམ་པ་ལས་ཀྱང་དགེ་སློང་གི་སྡོམ་པ་གཞན་ཡིན་
[23a.6]ནོ་ཞེས་གཞན་དང་གཞན་ཞེས་བྱ་བ་འམ། ཕྱོགས་གཅིག་ཁྱད་པར་དུ་གྱུར་པ་དང་ལྡན་པའི་ཕྱིར་གནས་གཞན་དང་གཞན་ཉིད་དུ་རྣམ་པར་འཇོག་གམ་ཞེས་བྱ་བའི་ཐ་ཚིག་གོ། །འོན་ཏེ་དགེ་བསྙེན་གྱི་སྲོག་གཅོད་པ་སྤོང་བ་ལ་སོགས་པ་ཡང་གཞན་ཡིན་ལ། དགེ་ཚུལ་གྱི་ཡང་དེ་ལས་གཞན་
[23a.7]ཡིན། དགེ་སློང་གི་ཡང་དེ་ལས་གཞན་ནོ་ཞེས་བྱ་བ་ལྟ་བུར་དེ་དག་ཐམས་ཅད་ཐ་དད་པ་ཉིད་གཅིག་ཏུ་སྐྱེ་སྟེ། དགེ་སློང་གི་རྒྱུད་གཅིག་ལ་སྲོག་གཅོད་པ་སྤོང་བ་གསུམ་ཡོད་ལ། མ་བྱིན་པར་ལེན་པ་སྤོང་བ་ཡང་དེ་དང་འདྲའོ་ཞེས་བྱ་བ་དེ་ལྟ་བུ་ལ་སོགས་པ་ཞིག་ཡིན་ནམ། ལྷག་མ་རྣམས་
[23b]
[23b.1]ཀྱང་དེ་དང་འདྲའོ་ཞེས་བྱ་བ་ནི་གར་དང་གླུ་དང་རོལ་མོ་སྤོང་བ་ལ་སོགས་པའོ། །སྲོག་གཅོད་པ་ལ་སོགས་པའི་གཞི་ཆེས་མང་པོ་དག་ལས་ལྡོག་པར་འགྱུར་ཞེས་བྱ་བ་ནི་དགེ་བསྙེན་པས་དགེ་ཚུལ་སྲོག་གཅོད་པ་ལ་སོགས་པའི་གཞི་ཆེས་མང་པོ་དག་ལས་ལྡོག་པ་ཡིན་ཏེ། དཔེར་ན་དུས་མ་
[23b.2]ཡིན་པའི་ཟས་སྲོག་གཅོད་པའི་གཞིར་འགྱུར་ལ་དེ་ལས་ནི་དགེ་ཚུལ་ལྡོག་གི་དགེ་བསྙེན་ནི་མ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པ་སྦྱར་བར་བྱའོ། །དེ་ལྟར་མ་ཡིན་ན་ཞེས་བྱ་བ་ནི་གལ་ཏེ་དེ་ལྟ་བུ་ཞིག་ཡིན་པར་མ་གྱུར་ན་ཞེས་བྱ་བའི་ཐ་ཚིག་སྟེ། དགེ་བསྙེན་དང་དགེ་ཚུལ་གྱི་སྡོམ་པ་གཉི་ག་
[23b.3]ཡང་དགེ་སློང་གི་སྡོམ་པ་དེར་འདུས་པའི་ཕྱིར་དགེ་སློང་གི་སྡོམ་པ་གཏང་ཞིང་བོར་བས་དགེ་བསྙེན་གྱི་སྡོམ་པ་ལ་སོགས་པ་གསུམ་ཆར་ཡང་གཏང་བར་འགྱུར་རོ། །སྤོང་བ་ཡང་དག་པར་བླང་བས་ཞེས་བྱ་བ་ནི་སྤོང་བ་ནི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་ནོ་ཞེས་འཆད་པར་འགྱུར་རོ། །ཡང་དག་པར་འཇོག་
[23b.4]པར་བྱེད་པས་ཞེས་བྱ་བ་ནི་སོ་སོར་ཡང་དག་པར་འགོད་པར་བྱེད་པ་ཞེས་བྱ་བའི་ཐ་ཚིག་སྟེ། སྡིག་པའི་ལམ་རྣམས་ནི་སེམས་ཅན་དག་ལ་མི་མཉམ་པར་འཇུག་པར་བྱེད་དོ། །དེ་ཡང་རྣམ་པར་རིག་བྱེད་དང་སེམས་དག་གིས་བྱེད་པས་ན་ཞེས་བྱ་བ་ནི་སོ་སོར་ཐར་པའི་སྡོམ་པས་བསྡུས་པའི་རྣམ་པར་
[23b.5]རིག་བྱེད་མ་ཡིན་པ་ནི་རྣམ་པར་རིག་བྱེད་ཀྱིས་བྱེད་ལ། བསམ་གཏན་དང་། ཟག་པ་མེད་པའི་སྡོམ་པས་བསྡུས་པའི་རྣམ་པར་རིག་བྱེད་མ་ཡིན་པ་དེ་ནི་སེམས་ཀྱིས་བྱེད་དེ་ཏིང་ངེ་འཛིན་གྱིས་བྱེད་དོ་ཞེས་བྱ་བའི་ཐ་ཚིག་གོ། །དེ་ལྟར་ན་བྱ་བ་ཡིན་ཞེས་བྱ་བ་ནི་ལས་སུ་སྒྲུབ་པ་ཡིན་ནོ། །བྱ་བའི་རྒྱུ་ཡིན་
[23b.6]ཞེས་བྱ་བ་ནི་བྱ་བའི་རྒྱུ་ཡིན་པའི་ཕྱིར་ཏེ་སྡོམ་པ་ལ་གནས་པ་ན་སྡོམ་པ་ཀུན་དུ་བསྲུང་བའི་ཕྱིར་རྣམ་པར་རིག་བྱེད་ཀྱི་མཚན་ཉིད་ཀྱི་བྱ་བ་རྩོམ་མོ། །བྱ་བའི་འབྲས་བུ་ཡིན་པའི་ཕྱིར་ཞེས་བྱ་བ་ནི་རྣམ་པར་རིག་བྱེད་ཀྱི་མཚན་ཉིད་ཀྱི་འབྲས་བུ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཏིང་
[23b.7]ངེ་འཛིན་ལས་བྱུང་བ་ཇི་ལྟར་བྱ་བ་ཡིན་ན་དེ་ཡང་ཏིང་ངེ་འཛིན་ལས་སྐྱེས་པའི་སེམས་པའི་འབྲས་བུ་ཡིན་པའི་ཕྱིར་བྱ་བ་ཡིན་ནོ། །ཡང་ན་སོ་སོར་ཐར་པའི་སྡོམ་པའི་སྐབས་ཡིན་པའི་ཕྱིར་རོ། །དེ་ལྟར་རེ་ཞིག་བྱེ་བྲག་མེད་པར་སོ་སོར་ཐར་པའི་སྡོམ་པ་ཡང་དག་པར་བསྟན་ཏོ་ཞེས་བྱ་བ་ནི་སྐད་
[24a]
[24a.1]ཅིག་མ་དང་པོ་དང་སྐད་ཅིག་མ་གཉིས་པ་ལ་སོགས་པ་ཡང་སོ་སོར་ཐར་པའི་སྡོམ་པ་ཡིན་ནོ་ཞེས་བརྗོད་པ་ཡིན་ནོ། །སོ་སོར་ཐར་པ་ནི་སྐད་ཅིག་མ་དང་པོ་ཁོ་ན་ཡིན་པས་དེའི་ཕྱིར་ཡང་། དང་པོའི་རྣམ་རིག་རྣམ་རིག་མིན། །སོ་སོར་ཐར་ཞེས་བྱའོ་ཞེས་བྱ་བ་སྨོས་སོ། །
[24a.2]དེས་སྡིག་པ་ལས་སོ་སོར་ཐར་པའི་ཕྱིར་ཞེས་བྱ་བ་ནི་སྐད་ཅིག་མ་དང་པོ་ཁོ་ནས་སྡིག་པ་ལས་སོ་སོར་ཐར་པར་འགྱུར་རོ། །སྤང་བའི་ཕྱིར་ཞེས་བྱ་བ་ནི་བོར་བའི་ཕྱིར་ཞེས་བྱ་བའི་ཐ་ཚིག་གོ། །སོ་སོར་ཐར་པའི་སྡོམ་པ་ཞེས་ཀྱང་བྱ་ཞེས་བྱ་བ་ནི་འདི་ནི་སོ་སོར་ཐར་པ་ཡང་ཡིན་ལ་ལུས་དང་
[24a.3]ངག་དག་སྡོམ་པའི་ཕྱིར་སྡོམ་པ་ཡང་ཡིན་ནོ་ཞེས་བྱ་བའི་ཐ་ཚིག་གོ། །ལས་ཀྱི་ལམ་ཞེས་བྱའོ་ཞེས་བྱ་བ་ནི་ལས་ཀྱི་ལམ་དངོས་ཞེས་བྱ་བའི་ཐ་ཚིག་གོ། །སྐད་ཅིག་མ་གཉིས་པ་ལ་སོགས་པ་ལ་ནི་སོ་སོར་ཐར་པའི་སྡོམ་པའི་སྡོམ་པ་ཁོ་ན་ཡིན་ཏེ། སོ་སོར་ཐར་པ་དང་འདྲ་བའམ་སོ་སོར་
[24a.4]ཐར་པ་ལས་སྐྱེས་པའི་སྡོམ་པ་ནི་སོ་སོར་ཐར་པའི་སྡོམ་པའོ། །སོ་སོར་ཐར་པ་ནི་མ་ཡིན་ཏེ། འདི་ལྟར་སྐད་ཅིག་མ་དང་པོ་ཁོ་ནས་ཐར་པར་བྱས་ཟིན་པའི་ཕྱིར་དེས་སྡིག་པ་ལས་སོ་སོར་ཐར་པར་མི་བྱེད་པས་སོ། །རིས་བརྒྱད་ཁོ་ནར་ཟད་དོ་ཞེས་ངེས་པར་གཟུང་བ་དང་ཡང་ཕྱི་རོལ་པ་རྣམས་ལ་
[24a.5]ཞེས་བྱ་བ་རྒྱས་པར་འདྲི་བར་བྱེད་དེ། ཡང་དག་པར་བླངས་པའི་ཚུལ་ཁྲིམས་ཞེས་ཁྱད་པར་དུ་བྱས་པ་ནི་ཚུལ་ཁྲིམས་རྣམ་པ་གཉིས་ཡོད་པའི་ཕྱིར་རོ། །ཚུལ་ཁྲིམས་ནི་རྣམ་པ་གཉིས་ཏེ། ཡང་དག་པར་བླངས་པའི་ཚུལ་ཁྲིམས་དང་ཆོས་ཉིད་ཀྱིས་ཐོབ་པའོ། །དེ་ལ་ཡང་དག་པར་བླངས་པའི་ཚུལ་ཁྲིམས་
[24a.6]ནི་འདི་དང་འདི་མི་བྱའོ་ཞེས་མནོས་པ་གང་ཡིན་པའོ། །ཆོས་ཉིད་ཀྱིས་ཐོབ་པ་ནི་བསམ་གཏན་གྱི་སྡོམ་པ་དང་ཟག་པ་མེད་པའི་སྡོམ་པའོ། །སྲིད་པ་ལ་བརྟེན་པའི་ཕྱིར་ཞེས་བྱ་བ་ནི་དེ་དག་ཐར་པ་དོན་དུ་གཉེར་དུ་ཟིན་ཀྱང་ལོག་པར་ལྟ་བ་ལ་སོགས་པས་ཉམས་པའི་ཕྱིར་དང་། དེ་དག་ཁ་ཅིག་སྲིད་པའི་ཁྱད་པར་
[24a.7]ཁོ་ན་ལ་ཐར་པ་ཡིན་པར་སེམས་པས་སྲིད་པ་ལ་བརྟེན་པའི་ཚུལ་ཁྲིམས་ཁོ་ན་ཡིན་ནོ། །དེའི་ཕྱིར་དེ་དག་ལ་ཡང་དག་པར་བླངས་པའི་ཚུལ་ཁྲིམས་ཡོད་ཀྱི། སོ་སོར་ཐར་པའི་སྡོམ་པ་ནི་མ་ཡིན་ནོ། །འདིར་ནི་ཉེར་བསྡོགས་ཀྱང་བསམ་གཏན་དུ་བརྗོད་ནས་བསྟན་ཏེ་ཞེས་བྱ་བ་ནི་གང་ཞིག་ཕྱིར་ཉེར་བསྡོགས་
[24b]
[24b.1]ན་ཡང་བསམ་གཏན་གྱི་སྡོམ་པ་དང་ཟག་པ་མེད་པའི་སྡོམ་པ་ཡོད་པར་འདོད་པ་དེའི་ཕྱིར་འདིར་ནི་བསམ་གཏན་གྱི་ཉེར་བསྡོགས་ཀྱང་བསམ་གཏན་ཞེས་བྱ་བའི་སྒྲར་བརྗོད་པ་ཡིན་ནོ། །ཀྱང་ཞེས་བྱ་བའི་སྒྲས་ནི་དངོས་གཞི་ཡང་བསྡུ་བར་བྱ་བ་དེ་ཁོ་ན་ཡིན་ནོ། །ལྷན་ཅིག་འབྱུང་བའི་རྐྱེན་བཤད་
[24b.2]པར་ཞེས་བྱ་བ་ནི། སེམས་པ་དང་ནི་སྡོམ་གཉིས་དང་། །དེ་དག་གི་ནི་ཞེས་བྱ་བ་དོར་རོ། །གསུམ་པོ་འདི་དག་ལས་ཞེས་བྱ་བ་ནི་སོ་སོར་ཐར་པའི་སྡོམ་པ་དང་། བསམ་གཏན་གྱི་སྡོམ་པ་དང་། ཟག་པ་མེད་པའི་སྡོམ་པ་རྣམས་ལས་སོ། །སེམས་གཞན་དང་ལྡན་པ་དང་སེམས་མེད་པའང་
[24b.3]རྗེས་སུ་འཇུག་པའི་ཕྱིར་རོ་ཞེས་བྱ་བ་ནི། རྣམ་པར་གཡེང་སེམས་མེད་པའི་ཡང་། །ཞེས་འབྱུང་བའི་ཕྱིར་རོ། །མི་ལྕོགས་པ་མེད་ལ་ཞེས་བྱ་བ་སྨོས་པ་ནི་འདོད་པ་ན་སྤྱོད་པའི་འཆལ་བའི་ཚུལ་ཁྲིམས་ཁོ་ན་ལས་སོ་སོར་ཐར་པའི་ཕྱིར་རོ། །བར་ཆད་མེད་པའི་ལམ་དགུ་དག་ཏུ་ཞེས་བྱ་བ་ནི་དེ་དག་སྤོང་བའི་
[24b.4]ལམ་ཡིན་པའི་ཕྱིར་རོ། །དེ་ཀུན་ནས་སློང་བར་བྱེད་པ་ཞེས་བྱ་བ་ནི་འཆལ་བའི་ཚུལ་ཁྲིམས་ཀུན་ནས་སློང་བར་བྱེད་པའོ། །དེ་ཉིད་ཀྱི་ཕྱིར་ཞེས་བྱ་བ་ནི་གང་གི་ཕྱིར་མི་ལྕོགས་པ་མེད་པའི་བར་ཆད་མེད་པའི་ལམ་དག་ལ་དེ་རྣམ་པར་གཞག་པ་དེའི་ཕྱིར་མུ་བཞིར་བྱ་སྟེ། མུ་དང་པོ་ནི་མི་ལྕོགས་པ་
[24b.5]མེད་པའི་བར་ཆད་མེད་པའི་ལམ་མ་གཏོགས་པ་ཟག་པ་དང་བཅས་པའི་བསམ་གཏན་གྱི་སྡོམ་པ་སྟེ་མི་ལྕོགས་པ་མེད་པའི་ས་པའི་རྣམ་པར་གྲོལ་བ་དང་། སྦྱོར་བ་དང་ཁྱད་པར་གྱི་ལམ་དག་ལ་ཡོད་པ་དང་བསམ་གཏན་དང་པོ་ལ་སོགས་པ་བསམ་གཏན་བཞི་པའི་བར་དངོས་གཞིའི་བར་ཆད་མེད་
[24b.6]པ་དང་། རྣམ་པར་གྲོལ་བ་དང་སྦྱོར་བ་དང་ཁྱད་པར་གྱི་ལམ་དག་ལ་བསམ་གཏན་གྱི་སྡོམ་པ་ཡོད་པ་གང་ཡིན་པ་ནི་བསམ་གཏན་གྱི་སྡོམ་པ་ཡིན་གྱི་སྤོང་བའི་སྡོམ་པ་ནི་མ་ཡིན་ཏེ་དེས་འཆལ་བའི་ཚུལ་ཁྲིམས་དང་། དེ་ཀུན་ནས་སློང་བར་བྱེད་པའི་ཉོན་མོངས་པ་རྣམས་ནི་མི་སྤོང་བའི་ཕྱིར་རོ། །གཉིས་པ་ནི་
[24b.7]མི་ལྕོགས་པ་མེད་པའི་བར་ཆད་མེད་པའི་ལམ་དགུ་དག་ཏུ་ཟག་པ་མེད་པ་སྟེ། འདི་ནི་དེ་ལྟ་བུ་ཁོ་ནས་འཆལ་བའི་ཚུལ་ཁྲིམས་ལ་སོགས་པ་སྤོང་བའི་ཕྱིར་སྤོང་བའི་སྡོམ་པ་ཡིན་གྱི་བསམ་གཏན་གྱི་སྡོམ་པ་ནི་མ་ཡིན་ཏེ་ཟག་པ་མེད་པ་ཡིན་པའི་ཕྱིར་རོ། །གསུམ་པ་ནི་མི་ལྕོགས་པ་མེད་པའི་བར་ཆད་
[25a]
[25a.1]མེད་པའི་ལམ་དག་ཏུ་ཟག་པ་དང་བཅས་པ་སྟེ། འདི་ནི་དེས་འཆལ་བའི་ཚུལ་ཁྲིམས་ལ་སོགས་པ་སྤོང་བའི་ཕྱིར་སྤོང་བའི་སྡོམ་པ་ཡང་ཡིན་ལ། བསམ་གཏན་གྱི་སྡོམ་པ་ཡང་ཡིན་ཏེ། ཟག་པ་དང་བཅས་པའི་ཏིང་ངེ་འཛིན་ལས་སྐྱེས་པའི་ཕྱིར་རོ། །བཞི་པ་ནི་མི་
[25a.2]ལྕོགས་པ་མེད་པའི་བར་ཆད་མེད་པའི་ལམ་མ་གཏོགས་པར་ཟག་པ་མེད་པའི་སྡོམ་པ་སྟེ། འདི་ནི་ཟག་པ་མེད་པ་ཡིན་པའི་ཕྱིར་བསམ་གཏན་གྱི་སྡོམ་པ་ཡང་མ་ཡིན་ལ་སྤོང་བའི་སྡོམ་པ་ཡང་མ་ཡིན་ཏེ། དེས་འཆལ་པའི་ཚུལ་ཁྲིམས་ལ་སོགས་པ་མི་སྤོང་བའི་ཕྱིར་རོ། །དེ་ཡང་དེ་ཁོ་ན་
[25a.3]བཞིན་དུ་མི་ལྕོགས་པ་མེད་པའི་ས་པའི་རྣམ་པར་གྲོལ་བ་དང་། སྦྱོར་བ་དང་། ཁྱད་པར་གྱི་ལམ་དག་ལ་ཡོད་པ་ནས་རྒྱས་པར་ཟག་པ་མེད་པའི་སྡོམ་པ་གང་ཡིན་པའོ། །སྡོམ་པ་ངེས་པར་བྱ་བའི་ཕྱིར་དེ་སྐད་དུ་བཤད་དོ། །དེ་ལྟ་མ་ཡིན་ན་ཆོས་གཞན་དག་ཀྱང་བརྗོད་དགོས་པར་འགྱུར་
[25a.4]རོ། །དེ་བཞིན་དུ་ཟག་པ་མེད་པའི་སྡོམ་པ་ཡིན་ལ་སྤོང་བའི་སྡོམ་པ་མ་ཡིན་པ་ཡང་ཡོད་ཅེས་བྱ་བ་མུ་བཞི་སྟེ། མུ་དང་པོ་ནི་མི་ལྕོགས་པ་མེད་པའི་བར་ཆད་མེད་པའི་ལམ་མ་གཏོགས་པ་ཟག་པ་མེད་པའི་སྡོམ་པའོ། །ཡིད་ཀྱི་སྡོམ་པ་ཡང་དྲན་པ་དང་ཤེས་བཞིན་གྱི་ངོ་བོ་ཉིད་ཡིན་
[25a.5]ལ། དབང་པོའི་སྡོམ་པ་ཡང་དྲན་པ་དང་ཤེས་བཞིན་གྱི་ངོ་བོ་ཉིད་ཡིན་པས་གཉིས་ཀྱི་ངོ་བོ་ཉིད་ཡིན་པར་བསྟན་པའི་ཕྱིར་རོ། །ཡང་གཉིས་ཞེས་བྱ་བ་སྨོས་ཏེ། གཉིས་ཀྱི་ཚིག་ཏུ་བསྟན་པ་ཁོ་ནས་གཉིས་ཉིད་འགྲུབ་པས་སོ། །འདི་དག་དེ་ལྟ་བུའི་ངོ་བོ་ཉིད་ཡིན་ནོ་ཞེས་བྱ་བ་ཇི་ལྟར་ཤེས་ཤེ་
[25a.6]ན། ལུང་ལས་ཏེ། ལྷ་ཞིག་གིས་དགེ་སློང་དབང་པོ་ཡུལ་དག་ལ་རྒྱུ་བ་ཞིག་ལ་འདི་སྐད་ཅེས་སྨྲས་སོ། །དགེ་སློང་རྨ་འབྱིན་པར་མ་བྱེད་ཅིག །དགེ་སློང་གིས་སྨྲས་པ། ལྷ་དགག་པར་བྱའོ། །ལྷས་སྨྲས་པ། དགེ་སློང་རྨ་རྫ་མ་ཙམ་བྱུང་ནས་ཇི་ཞིག་གིས་དགག་པར་བྱེད། དགེ་སློང་གིས་
[25a.7]སྨྲས་པ། ལྷ་དྲན་པ་དང་ཤེས་བཞིན་གྱིས་དགག་པར་བྱའོ་ཞེས་སྨྲས་སོ་ཞེས་གྲག་གོ། །དེ་ནི་ཇི་སྲིད་དུ་རྣམ་པར་རིག་བྱེད་མ་ཡིན་པ་དེ་མི་གཏོང་བ་ཞེས་བྱ་བ་ནི་བསླབ་པ་ཕུལ་བ་ལ་སོགས་པས་སོ། །སྐད་ཅིག་མ་དང་པོ་ཕྱིན་ཆད་འདས་པ་དང་ཞེས་བྱ་བ་ནི་སྐད་ཅིག་མ་དང་པོ་ལ་ནི་ད་ལྟར་གྱི་ཁོ་ན་དང་
[25b]
[25b.1]ལྡན་པ་ཡིན་ནོ་ཞེས་བཤད་པར་འགྱུར་རོ། །བསམ་གཏན་སྡོམ་དང་ལྡན་པ་ནི། །རྟག་ཏུ་འདས་དང་མ་འོངས་དང་། །ཞེས་བྱ་བ་བསམ་གཏན་གྱི་སྡོམ་པ་དང་ལྡན་པ་ཅི་སོ་སོའི་སྐྱེ་བོ་འམ། འོན་ཏེ་འཕགས་པ་ཞིག་ཡིན་ཞེ་ན་སྨྲས་པ། ཁྱད་པར་དུ་མ་བྱས་པའི་ཕྱིར་གཉི་ག་ཡིན་ཏེ། དེ་
[25b.2]ནི་འདས་པ་དང་མ་འོངས་པའི་རྣམ་པར་རིག་བྱེད་མ་ཡིན་པ་དང་ལྡན་ནོ། །མཚན་ཉིད་ཇི་ལྟ་བུ་ཞིག་དང་ཞེ་ན། བསམ་གཏན་གྱི་སྐབས་ཡིན་པའི་ཕྱིར་བསམ་གཏན་གྱི་སྡོམ་པའི་མཚན་ཉིད་དང་ཞེས་བྱ་བར་མངོན་ནོ། །དེས་ནི་སྐད་ཅིག་མ་དང་པོ་ལ་ཡང་ཚེ་རབས་གཞན་དག་ཏུ་གཏོང་བ་
[25b.3]ཞེས་བྱ་བ་འདི་ནི་དཔེར་བརྗོད་པས་རབ་ཏུ་བསྟན་པ་ཡིན་པས་ཚེ་འདི་ལ་གཏོང་བ་ཡང་བསྡུའོ། །འཕགས་ནི་དང་པོ་འདས་དང་མིན། །ཞེས་བྱ་བ་ནི། འཕགས་པ་ནི་རྟག་ཏུ་འདས་པ་དང་མ་འོངས་པའི་རྣམ་པར་རིག་བྱེད་མ་ཡིན་པ་དང་ལྡན་ནོ། །མཚན་ཉིད་ཇི་ལྟ་བུ་ཞིག་དང་ཞེ་ན།
[25b.4]འཕགས་པའི་སྐབས་ཡིན་པའི་ཕྱིར་ཟག་པ་མེད་པ་དང་ཞེས་བྱ་བར་མངོན་ནོ། །དེ་ཉིད་ཀྱི་ཕྱིར་འཕགས་པའི་གང་ཟག་ཀྱང་ཟག་པ་མེད་པ་དང་དེ་བཞིན་དུ་ལྡན་ནོ་ཞེས་བྱ་བ་སྨོས་སོ། །འདི་ནི་ཁྱད་པར་ཡིན་ཏེ་ཞེས་བྱ་བ་ནི་འདི་ཞེས་བྱ་བའི་སྒྲའི་དོན་སྟོན་ཏོ། །དེ་ཡང་གཞན་དུ་བསྟན་པ་
[25b.5]ཡིན་ཏེ། སྐད་ཅིག་མ་དང་པོ་སྡུག་བསྔལ་ལ་ཆོས་ཤེས་པའི་བཟོད་པའི་སྐད་ཅིག་མ་དང་པོ་ལ་ནི་འདས་པའི་རྣམ་པར་རིག་བྱེད་མ་ཡིན་པ་དང་མི་ལྡན་ནོ་ཞེས་བྱ་བའི་ཐ་ཚིག་གོ། །ཅིའི་ཕྱིར་ཞེ་ན། ཐོག་མ་མེད་པ་ཅན་གྱི་འཁོར་བ་ན། ལམ་སྔོན་མ་བསྐྱེད་པའི་ཕྱིར་རོ། །འབྲས་བུ་ཐོབ་
[25b.6]པའི་དུས་སམ་དབང་པོ་འཕོ་བའི་དུས་ན་ཡང་ལམ་སྔ་མ་བཏང་ན་འདས་པའི་རྣམ་པར་རིག་བྱེད་མ་ཡིན་པ་དང་མི་ལྡན་པ་ཁོ་ནར་འདོད་པ་མ་ཡིན་ནམ་ཞེ་ན། དེ་ལྟ་ན་འོ་ན་ནི་འབྲས་བུའི་ལམ་དེ་ཡང་སྐད་ཅིག་མ་དང་པོ་ཡིན་ལ། འབྲས་བུའི་ལམ་སྔོན་མ་བསྐྱེད་པའི་ཕྱིར་དེ་ལ་འདས་པའི་རྣམ་
[25b.7]པར་རིག་བྱེད་མ་ཡིན་པ་དང་མི་ལྡན་ནོ་ཞེས་བཤད་པར་བྱ་བ་ཡིན་ནོ། །སློབ་དཔོན་དབྱིག་བཤེས་ནི་ཀླན་ཀ་འདིའི་ལན་གདབ་པའི་ཕྱིར་འདི་སྐད་ཅེས་འཆད་དེ་འདིར་ནི་ཟག་པ་མེད་པའི་སྡོམ་པའི་སྐབས་ཡིན་ལ། དེ་ཡང་སྡུག་བསྔལ་ལ་ཆོས་ཤེས་པའི་དུས་ཉིད་ན་ཐོབ་པས་དེའི་ཕྱིར་
[26a]
[26a.1]སྐད་ཅིག་མ་དང་པོ་ལ་འདས་པ་དེ་དང་མི་ལྡན་ནོ། །གཉིས་པ་ལ་སོགས་པ་ལ་ནི་འདས་པ་དང་མ་འོངས་པ་དང་ཡང་ལྡན་ནོ། །གོང་དུ་འམ་ལམ་གཞན་ཐོབ་པ་གང་ཡིན་པ་དེ་ལ་ནི་ཟག་པ་མེད་པའི་སྡོམ་པ་འདྲ་བ་ཉིད་ཡོད་པས་དེ་ནི་མི་བརྗོད་དོ་ཞེས་ཟེར་རོ། །འདི་ལ་འདྲ་བ་
[26a.2]དེ་ཡོད་དོ་སྙམ་ནི་མི་མཛད་དེ། ཅི་ཟག་པ་དང་བཅས་པའི་སྡོམ་པ་ཡོད་དོ་ཞེས་བྱ་བ་ལ་ལྟོས་ནས་འདི་བརྗོད་དམ། འོན་ཏེ་ཟག་པ་མེད་པ་ཡོད་དོ་ཞེས་བྱ་བ་ལ་ལྟོས་ནས་ཡིན། གལ་ཏེ་ཟག་པ་དང་བཅས་པ་ཡོད་དོ་ཞེས་བྱ་བ་ལ་ལྟོས་པ་ཡིན་པར་འདོད་ན་ནི་དེ་སྡུག་བསྔལ་ལ་ཆོས་ཤེས་པའི་
[26a.3]བཟོད་པའི་དུས་ན་ཡང་ཡོད་པས་འདས་པ་དང་མི་ལྡན་ནོ་ཞེས་དགག་པ་འཐད་པ་མ་ཡིན་ནོ། །འོན་ཏེ་འབྲས་བུ་ཐོབ་པའི་ཚེ་ཟག་པ་མེད་པའི་སྡོམ་པ་ཡོད་དོ་ཞེས་བྱ་བ་ལྟོས་པ་ཡིན་པར་འདོད་ན་ནི་ཉམས་པ་དེ་ཇི་ལྟར་ཡོད་དོ་ཞེས་བརྗོད་པར་ནུས་ཏེ། དེ་བས་ན་འདིའི་འདོད་པ་བསམ་
[26a.4]པར་བྱ་བ་ཡིན་ནོ། །མཉམ་གཞག་འཕགས་ལམ་གནས་དེ་གཉིས། །ཞེས་བྱ་བ་ནི་མཉམ་པར་གཞག་པའི་ལམ་ལ་གནས་པ་སྟེ། འཇིག་རྟེན་པའི་མཉམ་པར་གཞག་པའི་ལམ་ལ་གནས་པ་དང་འཕགས་པའི་ལམ་ལ་གནས་པ་ནི་མཉམ་གཞག་འཕགས་ལ་མ་གནས་པ་
[26a.5]དག་སྟེ། བསམ་གཏན་དང་ཟག་པ་མེད་པའི་སྡོམ་པ་དང་ལྡན་པ་དག་ཅེས་བྱ་བའི་ཐ་ཚིག་གོ། །འདིར་འཕགས་པའི་ལམ་ལ་གནས་པ་ནི་གྲུར་ཞུགས་པའི་ཚུལ་དུ་འཕགས་པའི་ལམ་ལ་ཞུགས་པ་ཡིན་ཏེ། དཔེར་ན་གང་ཞིག་གྲུར་ཞུགས་པ་སྟེ་གྲུ་ལ་གནས་པ་ཡིན་པ་དེ་བཞིན་དུ་
[26a.6]གང་ཞིག་འཕགས་པའི་ལམ་ལ་ཞུགས་ཤིང་སྙོམས་པར་ཞུགས་པ་དེ་ནི་འཕགས་པའི་ལམ་ལ་གནས་པ་ཡིན་ནོ། །དེ་ལྟ་མ་ཡིན་ན་འཕགས་པའི་ལམ་དང་ལྡན་པ་ཡང་འཕགས་པའི་ལམ་ལ་གནས་པ་ཡིན་པས་ཐ་མལ་པར་འདུག་པའི་འཕགས་པ་ཡང་ད་ལྟར་གྱི་ཟག་པ་མེད་པའི་སྡོམ་པ་དང་ལྡན་པར་
[26a.7]འགྱུར་རོ། །ཡང་གཞན་ནི་དེ་ལྟ་བུའི་ཉེས་པ་སྤང་བའི་ཕྱིར་འདི་སྐད་དུ་འཆད་པར་བྱེད་དེ། འདིར་ནི་གཅིག་ལྷག་མར་བྱས་ཏེ་མཉམ་པར་གཞག་པ་དང་མཉམ་པར་གཞག་པའི་འཕགས་པ་ནི་མཉམ་པར་གཞག་པ་དང་འཕགས་པ་དག་གོ། །དེ་གཉིས་ཀྱི་ལམ་དག་སྟེ། དེ་དག་ལ་གནས་པ་ནི། མཉམ་
[26b]
[26b.1]གཞག་འཕགས་ལམ་གནས་དེ་གཉིས་ཡིན་ཏེ། གོ་རིམས་བཞིན་དུ་ད་ལྟར་གྱི་བསམ་གཏན་གྱི་སྡོམ་པའི་རྣམ་པར་རིག་བྱེད་མ་ཡིན་པ་དང་ཟག་པ་མེད་པའི་སྡོམ་པའི་རྣམ་པར་རིག་བྱེད་མ་ཡིན་པ་དང་ལྡན་ནོ། །ལངས་པ་དག་ནི་མ་ཡིན་ནོ་ཞེས་བྱ་བ་ནི་ལམ་དེ་ལས་ལངས་པ་དག་ནི་ད་ལྟར་གྱི་
[26b.2]དེ་དང་ལྡན་པ་མ་ཡིན་ཏེ། དེ་ནི་སེམས་ཀྱི་རྗེས་སུ་འཇུག་པ་ཡིན་པའི་ཕྱིར་རོ། །དེ་ལྟར་རྣམ་པར་བཤད་ན་སློབ་དཔོན་འདུས་བཟངས་ཀྱིས་གླེངས་པ་འཕགས་པའི་ལམ་ལ་གནས་པ་ཞེས་སྨོས་པ་ཁོ་ནས་ད་ལྟར་བྱུང་བའི་རྣམ་པར་རིག་བྱེད་མ་ཡིན་པ་དེ་ནི་དེ་ལ་སྙོམས་པར་ཞུགས་པ་འདི་ཁོ་
[26b.3]ནའི་ཡིན་པར་ཇི་ལྟར་འགྱུར་ཏེ། དེ་དང་ལྡན་པ་སྨོས་པར་ཐལ་བར་མི་འགྱུར་བ་ཡང་མ་ཡིན་ནོ་ཞེ་ན། མ་ཡིན་ཏེ། བསམ་གཏན་གྱི་སྐབས་ཡིན་པའི་ཕྱིར་དང་། དེ་ལ་རྣམ་པར་རིག་བྱེད་མ་ཡིན་པ་མེད་པའི་ཡང་ཕྱིར་རོ། །གང་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པ་ལ་
[26b.4]གནས་པ་དེ་ནི་བར་མ་ལ་གནས་པ་སྟེ་ཞེས་བྱ་བ་ནི་དགེ་སློང་ལ་སོགས་པ་ཡང་མ་ཡིན་ལ། ཉ་པ་ལ་སོགས་པ་ཡང་མ་ཡིན་པ་དེ་ནི་བར་མ་ལ་གནས་པའོ། །འཆལ་བའི་ཚུལ་ཁྲིམས་དང་ཚུལ་ཁྲིམས་ཀྱི་ཡན་ལག་ལ་སོགས་པས་བསྡུས་པ་ཞེས་བྱ་བ་ལ་འཆལ་བའི་ཚུལ་ཁྲིམས་
[26b.5]ནི་སྲོག་གཅོད་པ་ལ་སོགས་པའོ། །ཚུལ་ཁྲིམས་ཀྱི་ཡན་ལག་ནི་སྲོག་གཅོད་པ་སྤོང་བ་ལ་སོགས་པའོ། །སྡོམ་པ་དང་སྡོམ་པ་མ་ཡིན་པས་མ་བསྡུས་པ་གང་ཡིན་པ་སྟེ། སྩོགས་པ་ཞེས་བྱ་བའི་སྒྲས་ནི་མཆོད་རྟེན་ལ་ཕྱག་འཚལ་བ་དང་། ལྕག་དབྱུག་དང་ཐལ་ལྕག་ལ་
[26b.6]སོགས་པ་བསྡུའོ། །སྡོམ་པ་མ་ཡིན་པ་དང་སྡོམ་པ་ལ་གནས་པའི་གང་ཟག་ནི་མི་དགེ་བ་དང་དགེ་བ་ལ་གནས་པ་དག་ཡིན་པས་འདི་གཉིས་ལ་བཟློག་པ་མི་སྲིད་དོ་སྙམ་ནས་ཅི་རེས་འགའ་སྡོམ་པ་མ་ཡིན་པ་ལ་གནས་པ་ཞེས་བྱ་བ་རྒྱས་པར་འདྲི་སྟེ། དེ་ཉིད་ཇི་སྲིད་དུ་རྗེས་སུ་འབྲང་བ་ཞེས་བྱ་
[26b.7]བ་ནི་རབ་ཏུ་དང་བ་དང་ཉོན་མོངས་པ་དག་གི་ཤུགས་དག་གོ། །གཞན་དག་ཏུ་ནི་འདས་པ་དང་ཡང་ལྡན་ནོ་ཞེས་བྱ་བ་ནི་སྐད་ཅིག་མ་གཉིས་ལ་སོགས་པའོ། །མ་བཏང་བར་དུ་སྐད་ཅིག་མ། །ཕྱིན་ཆད་འདས་ལྡན་ཞེས་བྱ་བ་ནི་གང་ཞིག་ཇི་སྲིད་དུ་མ་བཏང་བ་གང་ཡིན་པ་དེ་སྲིད་དུ་འདས་
[27a]
[27a.1]པའི་རྣམ་པར་རིག་བྱེད་དང་ལྡན་ནོ། །ཇི་ལྟ་ཞེ་ན་རེ་ཞིག་སྡོམ་པའི་མཚན་ཉིད་ཀྱི་རྣམ་པར་རིག་བྱེད་ནི་ཇི་སྲིད་དུ་བསླབ་པ་ཕུལ་བ་ལ་སོགས་པས་མ་བཏང་བ་དེ་སྲིད་དུ་འདས་པའི་རྣམ་པར་རིག་བྱེད་དང་ལྡན་ནོ། །སྡོམ་པ་མ་ཡིན་པའི་མཚན་ཉིད་ནི་ཇི་སྲིད་དུ་ཡང་དག་
[27a.2]པར་ལེན་པ་ལ་སོགས་པས་མ་བཏང་བ་དེ་སྲིད་དུ་འདས་པ་དང་ལྡན་ནོ། །སྡོམ་པ་ཡང་མ་ཡིན། སྡོམ་པ་མ་ཡིན་པ་ཡང་མ་ཡིན་པའི་མཚན་ཉིད་ནི་ཇི་སྲིད་དུ་རབ་ཏུ་དང་བ་དང་། ཉོན་མོངས་པའི་ཤུགས་ཆད་པས་མ་བཏང་བ་དེ་སྲིད་དུ་འདས་པ་དང་ལྡན་ཏེ། གང་ཞིག་སྡོམ་པ་ལ་
[27a.3]སོགས་པའི་རྣམ་པར་རིག་བྱེད་དང་ལྡན་པ་དེ་ནི། གདོན་མི་ཟ་བར་སྐད་ཅིག་མ་དང་པོ་ཕྱིན་ཆད་འདས་པའི་རྣམ་པར་རིག་བྱེད་ལས་ཀྱི་ལམ་དངོས་ཏེ་ངོ་བོ་ཉིད་དང་ལྡན་ནོ། །མ་འོངས་པའི་རྣམ་པར་རིག་བྱེད་དང་ནི་སུ་ཡང་མི་ལྡན་ནོ་ཞེས་བྱ་བ་ནི་སེམས་ཀྱི་རྗེས་སུ་འཇུག་པ་མ་ཡིན་པའི་ཕྱིར་
[27a.4]རོ། །སེམས་ཀྱི་དང་ཡང་ཞེས་བྱ་བ་ནི་འོ་ན་ནི་བསྒྲིབས་ལ་ལུང་དུ་མ་བསྟན་པའི་སེམས་ཀྱི་ཐོབ་པ་ཡང་རྗེས་སུ་མི་འབྲེལ་བར་འགྱུར་རོ། །དེ་ནི་དེ་ལྟ་མ་ཡིན་ཏེ་ཞེས་བྱ་བ་ནི། སེམས་ཀྱི་ཐོབ་པ་ཡང་རྗེས་སུ་མ་འབྲེལ་པར་འགྱུར་རོ་ཞེས་གང་སྨྲ་བའོ། །ཅིའི་ཕྱིར་ཞེ་ན་སྨྲས་པ། རྣམ་པར་
[27a.5]རིག་བྱེད་ནི་དམིགས་པ་མེད་པའི་ཕྱིར་བླུན་པ་ཡང་ཡིན་ལ་སེམས་ལ་རག་ལས་པའི་ཕྱིར་གཞན་གྱི་དབང་ཡང་ཡིན་ནོ། །སེམས་ནི་དེ་ལྟ་མ་ཡིན་ཞེས་བྱ་བ་ནི་བླུན་པ་ཡང་མ་ཡིན་ལ་གཞན་གྱི་དབང་ཡང་མ་ཡིན་ནོ་ཞེས་བྱ་བའི་ཐ་ཚིག་གོ། །ཅིའི་ཕྱིར་ཞེ་ན། དེ་ལས་བཟློག་པ་ཡིན་
[27a.6]པའི་ཕྱིར་རོ། །བསྒྲིབས་ལ་ལུང་དུ་མ་བསྟན་པའི་སེམས་ཉམ་ཆུང་ངུས་བསླང་བ་དེ་ནི་ཆེས་ཉམ་ཆུང་བར་འགྱུར་བ་ཡིན་ནོ།། །།བམ་པོ་སུམ་ཅུ་རྩ་གཉིས་པ། དངོས་ཀྱིས་བསྡུས་པའི་ཕྱིར་ལས་ཀྱི་ལམ་ཡིན་ནོ་ཞེས་བྱ་བ་ནི་སེམས་ནི་དེའི་ཆེད་ཡིན་པའི་ཕྱིར་རོ། །བར་
[27a.7]མ་དོར་གནས་སེམས་ཞན་པས། །བྱེད་པ་རྣམ་རིག་ཉིད་དང་ལྡན། །ཞེས་བྱ་བ་ལ། བར་མ་དོར་གནས་ཞེས་བྱ་བ་སྨོས་པ་ནི་སྡོམ་པ་དང་སྡོམ་པ་མ་ཡིན་པ་ལ་གནས་པ་བསལ་བའི་ཕྱིར་ཏེ། སྡོམ་པ་དང་སྡོམ་པ་མ་ཡིན་པ་ལ་གནས་པ་ནི་གདོན་མི་ཟ་བར་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་
[27b]
[27b.1]དག་དང་ལྡན་ནོ། །སེམས་ཞན་པ་ཞེས་བྱ་བ་སྨོས་པ་ནི་སེམས་དྲག་པོ་སྩལ་བའི་ཕྱིར་ཏེ། སེམས་དྲག་པོས་ནི་རྣམ་པར་རིག་བྱེད་བྱེད་པ་ན་རྣམ་པར་རིག་བྱེད་མ་ཡིན་པ་ཀུན་ནས་སློང་བར་བྱེད་དོ། །ལུང་དུ་མ་བསྟན་པ་ལྟ་སྨོས་ཀྱང་ཅི་དགོས་ཞེས་བྱ་བ་སྨོས་པ་ནི་སེམས་ཞན་པས་ལུང་དུ་མ་བསྟན་པ་བྱེད་པ་
[27b.2]ན་ལྟ་སྨོས་ཀྱང་ཅི་དགོས་ཏེ། གོང་དུ་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པ་ལ་གནས་པ་སེམས་ཞན་པས་དགེ་བའམ་མི་དགེ་བ་བྱེད་ན་ཡང་རྣམ་པར་རིག་བྱེད་མ་ཡིན་པ་མི་སྐྱེད་པའི་ཕྱིར་རྣམ་པར་རིག་བྱེད་ཁོ་ན་དང་ལྡན་པར་འགྱུར་ན་ལུང་དུ་མ་བསྟན་པ་བྱེད་ན་ལྟ་ཅི་ཞིག་སྨོས་ཏེ། འདི་
[27b.3]རྣམ་པར་རིག་བྱེད་མ་ཡིན་པ་བསྐྱེད་པར་དོགས་པ་མེད་པའི་ཕྱིར་ཤིན་ཏུ་ཡང་རྣམ་པར་རིག་བྱེད་ཁོ་ན་དང་ལྡན་གྱི། རྣམ་པར་རིག་བྱེད་མ་ཡིན་པ་དང་ནི་མ་ཡིན་ནོ། །མ་གཏོགས་སོ་ཞེས་བྱ་བ་རྒྱས་པར་སྨོས་པ་ནི། རྫས་ལས་བྱུང་བའི་བསོད་ནམས་བྱ་བའི་དངོས་པོ་བདུན་དང་སྲོག་གཅོད་པ་ལ་སོགས་པའི་
[27b.4]ལས་ཀྱི་ལམ་ནི་མ་གཏོགས་ཏེ། དེ་ལ་ནི་ལུང་དུ་མ་བསྟན་པ་བྱེད་ན་ཡང་རིག་བྱེད་མ་ཡིན་པ་དང་ལྡན་པར་འགྱུར་ཏེ་མདོ་ལས་རྒྱུ་ཡང་རུང་འདུག་ཀྱང་རུང་ཞེས་བྱ་བ་རྟག་ཏུ་རྒྱུན་མི་འཆད་པར་ཞེས་བྱ་བ་ནས་བསོད་ནམས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་འབྱུང་བའི་ཕྱིར་རོ། །སྲོག་གཅོད་པ་ལ་
[27b.5]སོགས་པའི་ལས་ཀྱི་ལམ་ཡང་སེམས་ཞན་པས་བྱེད་པ་ན་ཡང་རྣམ་པར་རིག་བྱེད་མ་ཡིན་པ་དང་ལྡན་པར་འགྱུར་རོ། །འཕགས་པའི་གང་ཟག་གང་ཞིག་ཅེས་བྱ་བ་རྒྱས་པར་འབྱུང་བ་ནི་གང་གི་ཚེ་འཕགས་པའི་གང་ཟག་ཚེ་བརྗེས་པ་ནུར་ནུར་པོ་ལ་སོགས་པའི་གནས་སྐབས་དང་གཟུགས་མེད་པའི་
[27b.6]ཁམས་སུ་སྐྱེས་པ་ན། ད་དུང་རྣམ་པར་རིག་བྱེད་མ་བྱུང་བ་འམ། རྣམ་པར་རིག་བྱེད་རྣམ་པར་ཉམས་ན་སྟེ། ལུང་དུ་མ་བསྟན་པའི་སེམས་ཀྱིས་བསླང་བའི་རྣམ་པར་རིག་བྱེད་རྣམ་པར་ཉམས་ན་ཡང་དེའི་ཐོབ་པ་རྗེས་སུ་འབྲེལ་པར་མི་འགྱུར་རོ། །ཡང་ན་མཆོད་རྟེན་ལ་སོགས་པ་བྱས་པའི་དངོས་
[27b.7]པོ་དེ་ཆད་པས་དེའི་ཚེ་དེས་རྣམ་པར་རིག་བྱེད་མ་ཡིན་པ་ཡང་ཡོངས་སུ་འཆོར་ན་རྣམ་པར་རིག་བྱེད་ལྟ་སྨོས་ཀྱང་ཅི་དགོས། དེ་བས་ན་འཕགས་པའི་གང་ཟག་ཚེ་གཞན་དུ་བརྗེས་པ་ནི་གནས་སྐབས་དེ་དག་ཏུ་ཚེ་རབས་གཞན་ན་ཐོབ་པའི་ཟག་པ་མེད་པའི་རྣམ་པར་རིག་བྱེད་མ་ཡིན་པ་ཁོ་ན་ལྡན་གྱི་རྣམ་
[28a]
[28a.1]པར་རིག་བྱེད་དང་ནི་མ་ཡིན་ནོ། །སོ་སོའི་སྐྱེ་བོ་ལ་ཡང་ཚུལ་འདི་སྲིད་པ་མ་ཡིན་ནམ་ཞེ་ན། སྲིད་པ་ཁོ་ན་ཡིན་ཏེ། སོ་སོའི་སྐྱེ་བོ་ནི་གདོན་མི་ཟ་བ་མ་ཡིན་པའི་ཕྱིར་མི་བཤད་དེ། བསམ་གཏན་ཐོབ་པ་ཚེ་བརྗེས་པ་གང་ཞིག་གཟུགས་ཀྱི་ཁམས་སུ་རྣམ་པར་རིག་བྱེད་
[28a.2]མ་བྱས་པ་འམ། རྣམ་པར་རིག་བྱེད་བྱས་ནས་རྣམ་པར་རིག་བྱེད་མེད་པར་གྱུར་པ་དེ་ཁོ་ན་ལྟ་བུར་འགྱུར་གྱི་གཞན་ནི་མ་ཡིན་ནོ། །ཡང་ན་འདོད་པ་ན་སྤྱོད་པའི་སེམས་ཅན་ལས་བསམས་ནས་སྨྲས་པ་ཡིན་ནོ། །ཡང་ན་འཕགས་པའི་གང་ཟག་ནི་དཔེར་བརྗོད་པའི་ཚུལ་དུ་བཤད་པ་ཡིན་པས་དེས་ན་
[28a.3]སོ་སོའི་སྐྱེ་བོ་ཡང་དེ་དང་འདྲ་བར་གཟུང་བར་བྱའོ། །དེ་ཉིད་ཀྱི་ཕྱིར། བར་མ་དོར་གནས་སེམས་ཞན་པས། །བྱེད་ན་རྣམ་རིག་ཉིད་དང་ལྡན། །ཞེས་བྱ་བ་འདིར་རྫས་ལས་བྱུང་བའི་བསོད་ནམས་བྱ་བའི་དངོས་པོ་དང་ལས་ཀྱི་ལམ་དག་ནི་མ་གཏོགས་སོ་ཞེས་བཤད་དེ། ཚིག་འདི་ནི་ལྷག་མ་དང་བཅས་
[28a.4]པ་ཡིན་པའི་ཕྱིར་རོ། །དེ་ལྟར་ན་མུ་དང་པོ་དང་གཉིས་པ་ནི་མདོར་བྱས་པ་ཡིན་ནོ། །གསུམ་པ་དང་བཞི་པ་ནི་སྦྱར་བར་བྱ་བ་ཡིན་ཏེ། གསུམ་པ་ནི་སྡོམ་པ་དང་སྡོམ་པ་མ་ཡིན་པ་ལ་གནས་པ་དང་། བར་མ་དོར་གནས་པ་སེམས་དྲག་པོས་དགེ་བའམ་མི་དགེ་བ་བྱེད་པ་དག་གོ། །བཞི་པ་ནི་སོ་
[28a.5]སོའི་སྐྱེ་བོ་གང་ཞིག་ཚེ་གཞན་དུ་བརྗེས་ནས་ད་དུང་དུ་རྣམ་པར་རིག་བྱེད་མ་བྱུང་བའམ་རྣམ་པར་རིག་བྱེད་ཉམས་པའོ། །ལྷན་ཅིག་འབྱུང་བ་ཡིན་པའི་ཕྱིར་རོ་ཞེས་བྱ་བ་ནི་འདི་ལྟར་བསམ་གཏན་གྱི་སྡོམ་པ་ནི་བསམ་གཏན་གྱི་སེམས་དང་ལྷན་ཅིག་འབྱུང་ངོ་། །གཞན་གྱི་རྣམ་པར་རིག་བྱེད་ཅེས་བྱ་བ་ནི་གོ་
[28a.6]བར་བྱེད་པའོ། །གཞན་དག་ནི་གང་ཟག་ལས་སོ་ཞེས་བྱ་བ་ནི་དགེ་ཚུལ་དང་། དགེ་ཚུལ་མ་དང་། དགེ་བསྙེན་དང་། དགེ་བསྙེན་མ་དང་། བསྙེན་གནས་པའི་སྡོམ་པ་དག་གོ། །ངེས་པར་འཇུག་པས་ཞེས་བྱ་བ་ནི་འཕགས་པའི་ལམ་ལ་འཇུག་པས་སོ། །རྟེན་ལྔ་པོ་ནི་ཀུན་ཤེས་ཀཽཎྜི་ནྱ་ལ་
[28a.7]སོགས་པའོ། །དགེ་སློང་ཚུར་ཤོག་ཅེས་བྱས་པས་ཞེས་བྱ་བ་ནི་བཅོམ་ལྡན་འདས་ཀྱིས་དགེ་སློང་ཚུར་ཤོག །ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པས་ཏེ། བདེར་གཤེགས་སྐྱོབ་པས་ཚུར་ཤོག་ཅེས་གསུངས་པས། །མགོ་ཡང་བྱི་ཞིང་ཆོས་གོས་གྱོན་པར་གྱུར། །ཅེས་འབྱུང་བ་ལྟ་
[28b]
[28b.1]བུ་ཡིན་ནོ། །སྟོན་པར་ཁས་བླངས་པ་ནི་འོད་སྲུངས་ཆེན་པོའོ་ཞེས་བྱ་བ་ནི་འོད་སྲུངས་ཆེན་པོ་དེ་ནི་མཐུ་ཆེ་བའི་ཕྱིར་ལྷའི་གཟུགས་གང་དང་གང་ལ་ཕྱག་བྱས་པ་དེ་དང་དེ་གས་སོ། །དེ་བཅོམ་ལྡན་འདས་ཀྱི་ཐད་དུ་སོང་ནས་འདིའི་གཟུགས་ཞིག་པར་གྱུར་ན་མི་རུང་ངོ་སྙམ་ནས་ཕྱག་མ་བྱས་པ་དང་།
[28b.2]བཅོམ་ལྡན་འདས་ཀྱིས་དེའི་བསམ་པ་ཐུགས་སུ་ཆུད་ནས། འོད་སྲུངས་ཁྱོད་དེ་བཞིན་གཤེགས་པ་ལ་ཕྱག་འཚོལ་ཅིག་ཅེས་གླེངས་སོ། །དེ་ནས་བཅོམ་ལྡན་འདས་ལ་ཕྱག་བྱས་པ་དང་། དེ་ནས་བཅོམ་ལྡན་འདས་ཀྱིས་གཟུགས་སུ་མ་གྱུར་པར་མཐོང་བས། བཅོམ་ལྡན་འདས་འདི་ནི་བདག་
[28b.3]གི་སྟོན་པ་ཡིན་ནོ་ཞེས་ཁས་བླངས་ཏེ། དེ་ཁས་བླངས་པས་འདི་བསྙེན་པར་རྫོགས་པར་གྱུར་ཏོ་ཞེས་གྲག་གོ། །དྲིས་པས་མཉེས་པ་ནི་ལེགས་སྦྱིན་ནོ་ཞེས་བྱ་བ་ནི་ལེགས་སྦྱིན་གྱིས་སྨྲས་པའི་ལན་བཏབ་པས་བཅོམ་ལྡན་འདས་མཉེས་པར་གྱུར་ཏེ། མཉེས་པ་དེས་ན་འདི་བསྙེན་པར་རྫོགས་པར་གྱུར་
[28b.4]ཏོ། །བླ་མའི་ཆོས་ཁས་བླངས་པས་ཞེས་བྱ་བ་ནི་བླ་མའི་ཆོས་བརྒྱད་པོ་དགེ་སློང་མ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་དགེ་སློང་བསྙེན་པར་རྫོགས་མ་ཐག་པ་ལ་ཕྱག་བྱ་བ་དང་། དགེ་སློང་མས་གང་དུ་ཡང་དགེ་སློང་གི་སྐྱོན་གླེང་བར་མི་བྱ་ཞེས་བྱ་བ་དེ་ལྟ་བུ་ལ་སོགས་པ་སྟེ། དེ་དག་ཁས་
[28b.5]བླངས་པས་དེ་བསྙེན་པར་རྫོགས་པར་གྱུར་ཏོ། །འདི་སྐད་དུ་དགེ་སློང་ལས་བསྙེན་པར་རྫོགས་ཤིང་དགེ་སློང་མའི་དངོས་པོར་བྱ་བ་དང་། ཟླ་བ་ཕྱེད་ཅིང་དགེ་སློང་མ་ལ་གདམས་ངག་མནོད་པར་བྱ་བ་དང་། དབྱར་དགེ་སློང་མེད་པའི་གནས་སུ་འགྲོ་བར་མི་བྱ་བ་དང་། དགག་དབྱེའི་ཚེ་གཉི་གའི་དགེ་འདུན་
[28b.6]ལ་གནས་གསུམ་གྱིས་དགག་དབྱེ་བྱ་བ་དང་། དགེ་སློང་གི་ལྟུང་བ་གླེང་བར་མི་བྱ་བ་དང་། ལྟུང་བ་བྱུང་བ་ལ་ཁྲོ་བར་མི་བྱ་བ་དང་། བླ་མའི་ཆོས་ཀྱི་ལྟུང་བ་བྱུང་ན་ཟླ་བ་ཕྱེད་དུ་མཉེས་པར་བྱ་སྤྱད་པར་བྱ་བ་དང་། བསྙེན་པར་རྫོགས་ནས་ལོ་བརྒྱ་ལོན་པས་དགེ་སློང་གསར་བུ་ལ་ཕྱག་བྱ་བ་ཞེས་བྱ་བ་བརྒྱད་ཡིན་ནོ་
[28b.7]ཞེས་འཆད་དོ། །ཕོ་ཉས་ནི་ཆོས་སྦྱིན་ནོ་ཞེས་བྱ་བས་ནི་དེས་བཙུན་མོའི་འཁོར་གྱི་ནང་ན་འདུག་བཞིན་དུ་རབ་ཏུ་འབྱུང་བའི་ཕྱིར་བཅོམ་ལྡན་འདས་ཀྱི་སྤྱན་སྔར་ཕོ་ཉ་བཏང་ངོ་ཞེས་གྲག་གོ། །འདུལ་བ་འཛིན་པར་གཏོགས་པ་ལྔས། །ཞེས་བྱ་བ་ནི་དགེ་སློང་གི་དགེ་འདུན་བཞི་སྟེ། དེ་ལ་ཡུལ་མཐའ་འཁོབ་
[29a]
[29a.1]དག་ཏུ་ནི་གསོལ་བ་བརྗོད་པར་གཏོགས་པ་ལྔས་བསྙེན་པར་རྫོགས་པར་འགྱུར་རོ། །ཡུལ་དབུས་དག་ཏུ་ནི་གསོལ་བ་བརྗོད་པར་གཏོགས་པ་བཅུས་བསྙེན་པར་རྫོགས་པར་འགྱུར་རོ། །སྡེ་བཟང་དྲུག་ཅུའི་ཚོགས་ཀྱིས་བསྙེན་པར་རྫོགས་པར་བྱས་པ་རྣམས་ཞེས་བྱ་བ་ནི་འདི་དག་ལ་
[29a.2]སྡེ་བཟང་པོ་ཡོད་པས་ན་རིགས་ཀྱི་བུ་སྡེ་བཟང་པོ་དྲུག་ཅུ་ཞེས་བྱ་བ་ཡིན་ཏེ། དེ་དག་གི་ཚོགས་ཏེ་ཚན་གྱིས་བསྙེན་པར་རྫོགས་པར་བྱས་པ་རྣམས་སོ། །སྐྱབས་སུ་འགྲོ་བ་ལན་གསུམ་བཟླས་པ་སྟེ་སངས་རྒྱས་ལ་སྐྱབས་སུ་འགྲོའོ་ཞེས་བྱ་བ་ནི་ལན་གསུམ་བརྗོད་པས་བསྙེན་པར་རྫོགས་པར་གྱུར་
[29a.3]ཏོ། །དེ་དག་གི་སོ་སོར་ཐར་པའི་སྡོམ་པ་ནི་གདོན་མི་ཟ་བར་རྣམ་པར་རིག་བྱེད་ལ་རག་ལས་པ་མ་ཡིན་ནོ་ཞེས་བྱ་བ་ནི་འདུལ་བ་འཛིན་པ་དེ་དག་གི་འདོད་པ་འདི་ལྟར་ན་སོ་སོར་ཐར་པའི་སྡོམ་པ་ཐོབ་པ་རྣམ་པར་རིག་བྱེད་ལ་རག་ལས་པར་ངེས་པ་མེད་དེ། སངས་རྒྱས་ལ་སོགས་པ་རྣམ་པར་རིག་བྱེད་
[29a.4]ལ་རག་མ་ལས་པའི་ཕྱིར་རོ། །ཡང་ན་དེ་དག་གི་ཞེས་བྱ་བ་ནི་གང་དག་གི་ལྟར་ན་བསྙེན་པར་རྫོགས་པར་བྱ་བ་ལ་རྣམ་པར་རིག་བྱེད་མེད་པའི་ལྟར་ནའོ། །སྡོམ་པ་ཞེས་བྱ་བ་ནི་བསྡམ་པར་བྱ་བའོ། །ཁ་ཅིག་དུས་ཞེས་བྱ་བ་རྟག་པའི་དངོས་པོ་ཞིག་ཡོད་དོ་ཞེས་ཟེར་བས་དེ་ལས་བསམས་ནས་དུས་ཞེས་བྱ་བའི་
[29a.5]དུས་དེ་ཇི་ཞིག་ཡིན་ཞེས་དྲི་བར་བྱེད་དེ་དུས་ཞེས་རྗོད་པའི་བརྗོད་པར་བྱ་བ་ཇི་ཞིག་ཡིན་ཞེས་བྱ་བའི་ཐ་ཚིག་གོ། །དེ་ནི་འདུ་བྱེད་ཡོངས་སུ་སྟོན་པའི་ཚིག་བླ་དགས་ཡིན་ཞེས་བྱ་བ་ནི་འདས་པ་དང་མ་འོངས་པ་དང་ད་ལྟར་བྱུང་བའི་འདུ་བྱེད་རྣམས་སྟོན་པར་བྱེད་པའི་མིང་ཡིན་ནོ་ཞེས་བྱ་བ་སྟེ། འདི་ལྟ་སྟེ་འདས་པའི་
[29a.6]དུས་ནས་ད་ལྟར་བྱུང་བ་ཞེས་བྱ་བའི་བར་ལྟ་བུ་འདུ་བྱེད་དུས་གསུམ་པ་ཁོ་ན་ཡིན་པར་གོ་བར་བྱེད་དོ། །དེས་ཀྱང་དེར་སྦྱོར་བ་མ་བྱས་པའི་ཕྱིར་ཞེས་བྱ་བ་ནི་སྐལ་བ་མི་འདྲ་བའི་ལུས་དེས་ཡང་དག་པར་བླངས་པ་དེར་སྦྱོར་བ་མ་བྱས་པའི་ཕྱིར་རོ། །མི་དྲན་པའི་ཕྱིར་ཞེས་བྱ་བ་ནི། འདི་ལྟར་ལུས་དེ་ཡང་
[29a.7]དག་པར་བླངས་པ་དེ་མི་དྲན་ནོ། །བྱེ་བྲག་ཏུ་སྨྲ་བས་སྨྲས་པ། དེ་ཇི་སྐད་བཤད་མ་ཐག་པས་དེ་ལྟ་ག་ལ་ནུས་སློབ་དཔོན་གྱིས་ཕྱིན་ཆད་སྡོམ་པ་སྐྱེ་བ་ལ་ཡང་རིགས་པ་དང་འགལ་བ་ནི་མེད་པའི་ཕྱིར་ཞེས་བྱ་བ་སྨོས་ཏེ་འདི་ལ་ནི་ཇི་ལྟར་ཡང་དག་པར་བླངས་པ་ཡོད་ཀྱང་ཤི་བའི་འོག་ཏུ་ལུས་སྐལ་བ་མི་འདྲ་
[29b]
[29b.1]བའི་ཕྱིར་སྡོམ་པ་སྐྱེ་བར་རིགས་པ་དང་འགལ་ལོ་ཞེས་བྱ་བ་ལ་སོགས་པ་ལྟ་བུ་དང་རིགས་པར་འགལ་བ་མེད་དོ། །སྡོམ་པ་མ་ཡིན་པ་ཡང་རྣམ་པར་རིག་བྱེད་མ་ཡིན་པ་བཞིན་དུ་རྫས་སུ་ནི་མེད་ཅེས་བྱ་བ་ནི་ཇི་ལྟར་རྣམ་པར་རིག་བྱེད་མ་ཡིན་པ་རྫས་སུ་མེད་དོ་ཞེས་བསྒྲུབ་པ་དེ་བཞིན་དུ་སྡོམ་པ་མ་
[29b.2]ཡིན་པ་ཡང་སེམས་ལས་མ་གཏོགས་པ་རྫས་སུ་མེད་དོ་སྙམ་དུ་བསམས་པ་ཡིན་ནོ། །སྡིག་པ་བྱས་པའི་བསམ་པ་ཞེས་བྱ་བ་ནི་སྡིག་པ་བྱ་བར་འདོད་པ་ཞེས་བྱ་བའི་ཐ་ཚིག་གོ། །རྗེས་སུ་འབྲེལ་པ་དང་བཅས་པ་ཞེས་བྱ་བ་ནི་བག་ཆགས་དང་བཅས་པ་ཞེས་བྱ་བའི་དོན་ཏེ། སྡོམ་པ་མ་
[29b.3]ཡིན་པ་ནི་བག་ཆགས་དང་བཅས་པའི་སེམས་པའི་ཁྱད་པར་ཡིན་ནོ་ཞེས་བྱ་བའི་ཐ་ཚིག་གོ། །རྗེས་སུ་འབྲེལ་པ་དེས་ན་དེ་མ་སྤངས་པའི་ཕྱིར་རོ་ཞེས་བྱ་བ་ནི་བསམ་པ་རྗེས་སུ་འབྲེལ་པ་དང་བཅས་པ་མ་སྤངས་པའི་ཕྱིར་ཏེ། དེ་དང་འགལ་བའི་སེམས་པས་མ་བཅོས་པའི་ཕྱིར་ཞེས་བྱ་བའི་ཐ་ཚིག་
[29b.4]གོ། །ཐལ་མོ་བསྣོལ་བ་ཞེས་བྱ་བ་ནི་མཐེ་བོ་མ་གཏོགས་པའི་སོར་མོ་བཞི་ལག་པ་ཅིག་ཤོས་ཀྱི་མཐེ་བོ་དང་མཛུབ་མོའི་བར་དུ་བཀོད་པའི་ཕྱིར་ཐལ་མོ་བསྣོལ་བ་ཡིན་ནོ། །དེ་དང་ལྡན་ཞིང་སྡོམ་པ་མ་ཡིན་པ་དང་ལྡན་པ་ཞེས་བྱ་སྟེ་སྡོམ་པ་མ་ཡིན་པ་ཅན་ཞེས་བྱ་བའི་ཐ་ཚིག་གོ། །དེས་ནི་ཟན་ཟོས་
[29b.5]ཀྱང་མནོས་པར་བྱའོ་ཞེས་བྱ་བ་ནི་སྡོམ་པ་ནི་སློང་བར་བྱེད་པ་ཡང་དག་པར་ལེན་པར་ངེས་པའི་སེམས་ཡིན་པའི་ཕྱིར་ཉི་མ་འཆར་བའི་ཚེ་ཁོ་ན་སྐྱེའོ། །ཟན་ཟོས་ནས་མནོད་པ་ནི་བསལ་བར་བྱ་བའི་ཕྱིར་རོ། །ཚུལ་ཁྲིམས་ནི་ཕས་ཕམ་པ་མེད་པ་དང་། དགེ་འདུན་གྱི་ལྷག་མ་ལ་སོགས་པ་མེད་པའོ། །
[29b.6]བརྟུལ་ཞུགས་ཞེས་བྱ་བ་ནི་ངེས་པའོ། །དེ་མེད་ན་ཞེས་བྱ་བ་ནི་དུས་སུ་ཟ་བ་མེད་ནའོ། །གཉི་ག་ཡང་མེད་དོ་ཞེས་བྱ་བ་ནི་དྲན་པ་དང་སྐྱོ་བའོ། །དེ་དག་ཉིད་ཡང་དག་པའི་ལྟ་བ་ལ་སོགས་པ་དེ་དག་ཉིད་ཀྱི་ཡན་ལག་ཏུ་རུང་བ་ནི་མ་ཡིན་ནོ་ཞེས་བྱ་བ་རྒྱས་པར་འབྱུང་བ་ནི་སློབ་དཔོན་བྱེ་བྲག་ཏུ་སྨྲ་བའི་གཞུང་
[29b.7]ལུགས་རིགས་པ་དང་འགལ་བར་སྟོན་པ་ཡིན་ཏེ། ཡང་དག་པའི་ལྟ་བ་ལ་སོགས་པ་དེ་དག་ཉིད་ཡང་དག་པ་ལ་སོགས་པ་སྟེ། ཡང་དག་པའི་ལྟ་བ་དང་། ཆོས་རྣམ་པར་འབྱེད་པ་ཡང་དག་པར་བྱང་ཆུབ་ཀྱི་ཡན་ལག་དང་། ཏིང་ངེ་འཛིན་རྣམས་ཀྱི་ཡན་ལག་ཉིད་དུ་རུང་བ་ནི་མ་ཡིན་ཏེ། མི་རུང་ངོ་
[30a]
[30a.1]ཞེས་བྱ་བའི་ཐ་ཚིག་གོ། །ཅིའི་ཕྱིར་ཞེ་ན། རིགས་པ་དང་འགལ་བའི་ཕྱིར་ཏེ་གལ་ཏེ་ཡང་དག་པའི་ལྟ་བ་ལ་སོགས་པ་སྔ་མ་རྣམས་ཕྱི་མ་རྣམས་ཀྱི་ཡན་ལག་ཏུ་འགྱུར་རོ་ཞེས་བྱ་བར་རྣམ་པར་འཇོག་ན་ནི་དེ་ལྟ་ན་ཡང་རྟོག་པ་འདི་ལ་སྐད་ཅིག་མ་དང་པོ་ལ་སྐྱེས་པའི་འཕགས་པའི་ལམ་ཡན་
[30a.2]ལག་བརྒྱད་པར་མི་འགྱུར་ཏེ། དེ་ལ་ཡང་དག་པའི་ལྟ་བའི་ཡན་ལག་སྔར་སྐྱེས་པ་མེད་པས་ཡན་ལག་བདུན་པར་འགྱུར་རོ། །བྱང་ཆུབ་ཀྱི་ཡན་ལག་དག་ལ་ཡང་སྐད་ཅིག་མ་ཕྱི་མ་བྱང་ཆུབ་ཀྱི་ཡན་ལག་མ་ཡིན་པར་འགྱུར་ཏེ། འོག་རོལ་དུ་གང་ཞིག་དེའི་ཡན་ལག་ཏུ་འགྱུར་བ་བྱང་ཆུབ་ཀྱི་ཡན་ལག་
[30a.3]གཞན་ནི་ཡོད་པ་མ་ཡིན་ནོ། །འོན་ཏེ་མ་འོངས་པའི་བྱང་ཆུབ་དེའི་ཡན་ལག་ཡིན་ནོ་ཞེས་བྱ་བར་འདོད་ན་ནི་མ་འོངས་པ་བྱང་ཆུབ་ཀྱི་ཡན་ལག་མ་ཡིན་པར་འགྱུར་ཏེ། དེ་བཞིན་དུ་ཏིང་ངེ་འཛིན་ལ་ཡང་སྦྱར་བར་བྱའོ། །མི་ཤེས་པ་ནི་མ་གཏོགས་སོ་ཞེས་བྱ་བ་ནི་འབོགས་པར་བྱེད་པའམ་མནོད་པར་བྱེད་པ་
[30a.4]བརྗེད་པ་དང་མ་བྱང་བ་སྟེ་ཐེ་ཚོམ་ཟ་བ་དང་ལོག་པར་ཞུགས་པའི་བསམ་པ་ཅན་མ་གུས་པ་སྔོན་དུ་འགྲོ་བས་སྐྱབས་སུ་མི་འགྲོ་བ་ལ་ནི་སྡོམ་པ་མི་སྐྱེའོ། །ཁྱིམ་པ་ཞེས་བྱ་བ་ནི་བསྟན་པའི་ཚིག་ཡིན་ནོ། །གོས་དཀར་པོ་བགོས་ཞེས་བྱ་བ་ནི་བཤད་པའི་ཚིག་ཡིན་ནོ། །སྐྱེས་པ་ཞེས་བྱ་བ་ནི་བསྟན་པ་
[30a.5]ཡིན་ནོ། །ཕོའི་དབང་པོ་དང་ལྡན་པ་ཞེས་བྱ་བ་ནི་བཤད་པའི་ཚིག་ཡིན་ཏེ། གལ་ཏེ་སྡོམ་པ་མེད་པར་དགེ་བསྙེན་མ་ཡིན་ན་འོ་ན་མདོ་ལས་བཤད་པ་འདི་ཙམ་གྱིས་དགེ་བསྙེན་དུ་འགྱུར་རོ་ཞེས་གསུངས་པ་གང་ཡིན་པ་དེ་ཇི་ལྟ་བུ་ཞེས་བྱ་བ་ཚིག་ལྷག་མ་ཡིན་ནོ། །འདི་ལ་འགལ་བ་མེད་དོ་ཞེས་བྱ་བ་
[30a.6]སྨོས་པ་འདི་ནི་མིང་ཆེན་གྱི་མདོའོ། །བསྟན་པ་དགེ་སློང་བཞིན་ཞེས་བྱ་བ་ནི་དགེ་བསྙེན་གྱི་བསླབ་པའི་གཞི་བསྟན་པ་ནི་དགེ་སློང་གི་དང་འདྲ་སྟེ། ཇི་ལྟར་དགེ་སློང་གསོལ་བ་དང་བཞིའི་ལས་ཀྱིས་སྡོམ་པ་ཐོབ་ཟིན་ཀྱང་ཁྱོད་ཀྱིས་ཀྱང་ཕས་ཕམ་པ་ལ་སོགས་པ་འདི་དང་འདི་ལྟ་བུ་བསྡམ་མོ་ཞེས་བསླབ་པའི་གཞི་
[30a.7]རྣམས་ཆེ་ལོང་དུ་འཛིན་དུ་འཇུག་ཅིང་ཤེས་པར་བྱེད་ལ་ཚངས་པར་སྤྱོད་པ་གཞན་དག་ཀྱང་ཁྱོད་ལ་སྟོན་པར་འགྱུར་རོ་ཞེས་བརྗོད་པ་ལྟ་བུ་ཡིན་ནོ། །དགེ་སྦྱོང་ཅི་ཞེ་ན། བསླབ་པའི་གཞི་དག་འཛིན་དུ་འཇུག་པ་ལྟ་བུ་སྟེ། སྔར་གང་གི་ཚེ་དེས་བདག་མིང་འདི་ཞེས་བགྱི་བ་བཅོམ་ལྡན་འདས་དེ་བཞིན་གཤེགས་
[30b]
[30b.1]པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་སེང་གེ །ཤཱཀྱའི་རྒྱལ་པོ་ཆེན་པོ་དེ་རབ་ཏུ་བྱུང་བའི་རྗེས་སུ་རབ་ཏུ་འབྱུང་སྟེ། ཁྱིམ་པའི་རྟགས་ནི་རབ་ཏུ་སྤང་ངོ་། །རབ་ཏུ་བྱུང་བའི་རྟགས་ནི་ཡང་དག་པར་ལེན་ཏོ། །བདག་དགེ་སྦྱོང་ལགས་པར་གཟུང་དུ་གསོལ། དེ་སྐད་དུ་ལན་
[30b.2]གསུམ་གྱི་བར་དུ་ཡང་བརྗོད་དོ་ཞེས་ཁས་བླངས་པ་ཉིད་ན་སྡོམ་པ་ཐོབ་ཟིན་མོད་ཀྱི། བསླབ་པའི་གཞི་རྣམས་འཛིན་དུ་འཇུག་གོ། །དེ་བཞིན་དུ་དགེ་བསྙེན་ཡང་སངས་རྒྱས་ལ་སྐྱབས་སུ་མཆིའོ་ཞེས་བྱ་བ་ནས་དགེ་འདུན་ལ་སྐྱབས་སུ་མཆིའོ་ཞེས་བྱ་བ་ལན་གཉིས་ལན་གསུམ་དུ་ཡང་ཞེས་བྱ་
[30b.3]བའི་བར་འདིས་སྡོམ་པ་ཐོབ་ཟིན་མོད་ཀྱི། ཡང་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་གོ་ཞེས་བྱ་བ་ལ་སོགས་པ་རྒྱས་པར་བསླབ་པའི་གཞི་རྣམས་འཛིན་དུ་འཇུག་པ་ཡིན་ནོ། །སྣ་གཅིག་སྤྱོད་པ་ནི་གང་ཞིག་བསླབ་པའི་གཞི་གཅིག་བསྲུང་བའོ། །ཕྱོགས་གཅིག་སྤྱོད་པ་ནི་གང་
[30b.4]ཞིག་གཉིས་བསྲུང་བའོ། །ཕལ་ཆེར་སྤྱོད་པ་ནི་གང་ཞིག་གསུམ་མམ་བཞི་བསྲུང་བའོ། །ཡོངས་སུ་རྫོགས་པར་སྤྱོད་པ་ནི་གང་ཞིག་ལྔ་ཆར་བསྲུང་བའོ། །དེ་ནི་སྤྱོད་པ་ཞེས་གསུངས་པར་ཟད་ཀྱི་ཞེས་བྱ་བ་ནི་སྣ་གཅིག་སྤྱོད་པ་ནས་ཡོངས་སུ་རྫོགས་པར་སྤྱོད་པའི་བར་ཞེས་བྱ་བའི་ཐ་ཚིག་གོ། །མདོའི་ཚིག་ནི་
[30b.5]དེ་ལྟ་མ་ཡིན་ནོ་ཞེས་བྱ་བ་ནི་མིང་ཆེན་གྱི་མདོ་ལས་ནི་འདི་སྐད་དུ་ཇི་སྲིད་འཚོའི་བར་དུ་སྲོག་གཅོད་སྤོང་ངོ་ཞེས་མི་འབྱུང་ངོ་ཞེས་བྱ་བ་ཡིན་ནོ། །ཇི་ལྟར་མིང་ཆེན་གྱི་མདོ་ལས་གསུངས་པ་ལས་བྱུང་བ་བཞིན་ཏེ་ཞེས་བྱ་བ་ནི་བཙུན་པ་ཇི་ཙམ་གྱིས་ན་དགེ་བསྙེན་དུ་འགྱུར་ལགས། མིང་ཆེན་འདི་ལྟར་ཁྱིམ་པ་
[30b.6]ཞེས་བྱ་བ་རྒྱས་པར་བདག་ལ་དགེ་བསྙེན་དུ་གཟུང་དུ་གསོལ་ཞེས་ཚིག་ཏུ་སྨྲ་ན་འདི་ཙམ་གྱིས་དགེ་བསྙེན་དུ་འགྱུར་རོ་ཞེས་བྱ་བའི་བར་འབྱུང་བ་ཡིན་ནོ། །གང་ལས་འདི་སྐད་དུ་འབྱུང་བ་ཞེས་བྱ་བ་ནི་མདོའི་ཁྱད་པར་གང་ལས་འདི་སྐད་དུ་ནམ་འཚོའི་བར་དུ་སྲོག་དང་སྡོམ་པ་སྐྱབས་སུ་སོང་བ་མངོན་པར་རབ་
[30b.7]ཏུ་དང་བ་ཞེས་འབྱུང་བ་དེར་ནི་བདེན་པ་མཐོང་བའི་གང་ཟག་དེ་དག་བདག་ཅག་གིས་ནི་ཆོས་འདི་གཏོང་དུ་མི་རུང་ངོ་ཞེས་ཤེས་ནས་དད་པའི་རྒྱུས་ཏེ་ཤེས་ནས་དད་པའི་རྒྱུ་ལས་བྱུང་བས་སྲོག་གི་ཕྱིར་ཡང་སྲོག་ལ་བབ་ཀྱང་དམ་པའི་ཆོས་ལ་ཁས་འཆེ་བར་སྟོན་པ་ཡིན་ནོ། །དེ་སྡོམ་པའི་མཚན་ཉིད་སྟོན་པ་
[31a]
[31a.1]ནི་མ་ཡིན་ནོ་ཞེས་བྱ་བ་ནི་མདོ་འདིས་སྡོམ་པའི་མཚན་ཉིད་སྟོན་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །སྲོག་གཅོད་སྤོང་བ་ཞེས་བྱ་བ་ནི་གང་ནས་ཀྱང་མི་འབྱུང་ཞེས་བྱ་བ་ནི་མིང་ཆེན་གྱི་མདོ་ལས་ཀྱང་མི་འབྱུང་ལ་བདེན་པ་མཐོང་བའི་མདོ་ལས་ཀྱང་མི་འབྱུང་ངོ་། །སུ་
[31a.2]ཞིག་ཡོངས་སུ་མི་གསལ་བའི་དོན་འདི་འདོན་པར་བྱེད་ཅེས་བྱ་བ་ནི་བར་གྱི་ཚིག་མི་མངོན་པར་བྱས་པ་ཡིན་པར་རྟོག་པའི་ཕྱིར་ཅི་སྲོག་སྤོང་བ་སྲོག་དག་གིས་བོར་བ་ཞིག་གམ་སྲོག་ལས་སྤང་བ་ཞིག་ཡིན་ནམ་འོན་ཏེ་སྲོག་སྤོང་བ་སྲོག་གཅོད་པ་ལ་སོགས་པ་སྤོང་བ་ཞིག་ཡིན་ཞེས་བྱ་བ་མི་
[31a.3]ཤེས་པར་འགྱུར་རོ། །ཞུ་བ་ཉིད་ཀྱང་མི་འཐད་ན་ཞེས་བྱ་བ་ནི་བཙུན་པ་ཇི་ཙམ་གྱིས་ན་དགེ་བསྙེན་སྣ་གཅིག་སྤྱོད་པར་འགྱུར་བ་ལགས་ཞེས་བྱ་བ་ནས་ཡོངས་སུ་རྫོགས་པར་སྤྱོད་པ་ལགས་ཞེས་བྱ་བའི་བར་གྱིས་ཞུ་བ་གང་ཡིན་པའི་ཞུ་བ་དེ་མི་འཐད་དོ། །ལན་ལྟ་སྨོས་ཀྱང་ཅི་དགོས་མིང་ཆེན་
[31a.4]འདི་ན་དགེ་བསྙེན་སྲོག་གཅོད་པ་སྤངས་ནས་སྲོག་གཅོད་པ་ལས་སླར་ལོག་པ་ཡིན་ཏེ། མིང་ཆེན་འདི་ཙམ་གྱིས་ན་དགེ་བསྙེན་བསླབ་པ་ལས་སྣ་གཅིག་སྤྱོད་པ་ཡིན་ནོ་ཞེས་བྱ་བ་རྒྱས་པར་བསླབ་པའི་གཞི་གཉིས་ཀྱིས་སྤངས་པ་ནི་ཕྱོགས་གཅིག་སྤྱོད་པ་ཡིན་ནོ། །གསུམ་མམ་བཞིས་སྤངས་
[31a.5]པ་ནི་ཕལ་ཆེར་སྤྱོད་པ་ཡིན་ནོ། །ལྔས་སྤངས་པ་ནི་ཡོངས་སུ་རྫོགས་པར་སྤྱོད་པ་ཡིན་ནོ་ཞེས་བྱ་བའི་ལན་འདི་ལྟར་ཤིན་ཏུ་ཡང་མི་རུང་ངོ་། །དེ་ཙམ་དུ་བཟོད་པ་ལ་ནི་ཞུ་བ་འདི་རུང་ངོ་ཞེས་བྱ་བ་ནི་བསླབ་པའི་གཞི་གཅིག་གམ་གཉིས་སམ་དེ་ཡན་ཆད་བཟོད་པ་ལའོ། །དགེ་བསྙེན་ནི་སྡོམ་པ་མེད་པར་
[31a.6]ཡང་བཏགས་ཀྱི་ཞེས་བྱ་བ་ནི་མིང་ཆེན་གྱི་མདོ་ལས་མིང་ཆེན་འདི་ལྟར་ཁྱིམ་པ་གོས་དཀར་པོ་བགོས་པ་ཞེས་བྱ་བ་དེ་ལྟ་བུ་ལ་སོགས་པའོ། །དགྲ་བཅོམ་པ་ལ་ཡང་སོ་སོར་ཐར་པའི་སྡོམ་པ་ཆུང་ངུ་ཡོད་ལ་ཞེས་བྱ་བ་ནི་གལ་ཏེ་འདིའི་ཀུན་ནས་སློང་བར་བྱེད་པའི་སེམས་ཆུང་ངུ་ཞིག་ཡིན་པར་གྱུར་ནའོ། །སོ་
[31a.7]སོའི་སྐྱེ་བོ་ལ་ཡང་ཆེན་པོ་ཡོད་པར་འགྱུར་རོ་ཞེས་བྱ་བ་ནི་གལ་ཏེ་འདིའི་སེམས་ཆེན་པོ་ཡིན་ནའོ། །མི་ཤེས་པ་ནི་མ་གཏོགས་སོ་ཞེས་བྱ་བ་ནི་འབོགས་པར་བྱེད་པ་དང་ནོད་པར་བྱེད་པའོ། །མ་གུས་པ་ནི་སྐྱབས་སུ་འགྲོ་བ་མེད་པར་དགེ་བསྙེན་དུ་མི་འགྱུར་རོ། །སངས་རྒྱས་སུ་བྱེད་པ་ཞེས་བྱ་བ་ནི་སངས་རྒྱས་
[31b]
[31b.1]སུ་གདགས་པའི་རྒྱུ་དག་གོ། །དེ་ཉིད་ཀྱི་ཕྱིར་གང་དག་གཙོ་བོར་གྱུར་པས་སྐུ་དེ་སངས་རྒྱས་ཞེས་བརྗོད་ཅེས་བྱ་བ་སྨོས་ཏེ། ཡོན་ཏན་གཞན་དག་ཀྱང་གཙོ་བོ་མ་ཡིན་པར་བརྟེན་པ་ནི་ཡོད་དེ། གང་དག་བརྙེས་པས་ཞེས་བྱ་བ་དང་ཟད་པ་ཤེས་པ་ལ་སོགས་པ་འཁོར་དང་བཅས་པ་ལ་སོགས་པ་ཞེས་བྱ་
[31b.2]བའི་སྒྲས་ནི་མི་སྐྱེ་བ་ཤེས་པ་དང་། མི་སློབ་པའི་ཡང་དག་པའི་ལྟ་བ་བསྡུའོ། །འཁོར་དང་བཅས་པ་ཞེས་བྱ་བ་སྨོས་པས་ནི་ཟག་པ་མེད་པའི་ཕུང་པོ་ལྔ་བསྡུ་བའོ། །གཟུགས་ཀྱི་སྐུ་ནི་སྔ་མ་དང་ཕྱི་མར་ཡང་བྱེ་བྲག་མེད་པའི་ཕྱིར་ཞེས་བྱ་བ་ཅི་ཞེ་ན་གཟུགས་ཀྱི་སྐུ་ལ་སྐྱབས་སུ་མི་འགྲོའོ་ཞེས་བྱ་བར་སྦྱར་ཏེ།
[31b.3]གཟུགས་ཀྱི་སྐུ་ནི་བྱང་ཆུབ་སེམས་དཔའི་གནས་སྐབས་ན་ཅི་འདྲ་བ་ཕྱིས་ཀྱང་དེ་དང་འདྲ་བས་སོ། །མཚན་ཉིད་ཀྱི་སྒོ་ནས་ནི་སངས་རྒྱས་ཐམས་ཅད་ལ་སྟེ་ཞེས་བྱ་བ་ནི་ཞལ་ནས་གསུངས་པའི་སྒོ་ནས་ནི་མ་ཡིན་ནོ་སྙམ་དུ་བསམས་པ་ཡིན་ནོ། །ལམ་མཚན་ཉིད་མི་འདྲ་བ་མེད་པའི་ཕྱིར་རོ་ཞེས་བྱ་བ་ནི་འཇིག་
[31b.4]རྟེན་པའི་ལམ་བསོད་ནམས་དང་ཡེ་ཤེས་ཀྱི་ཚོགས་ཀྱི་མཚན་ཉིད་དང་འཇིག་རྟེན་ལས་འདས་པ་ཟད་པ་མཁྱེན་པ་ལ་སོགས་པའི་མཚན་ཉིད་མི་འདྲ་བ་མེད་ཅིང་འདྲ་བའི་ཕྱིར་སངས་རྒྱས་ཐམས་ཅད་མཚན་ཉིད་འདྲའོ་ཞེས་བྱ་བའོ། །སྐུ་ཚེ་དང་རིགས་ལ་སོགས་པ་མཚན་ཉིད་མི་འདྲ་བ་མེད་པའི་ཕྱིར་ནི་མ་
[31b.5]ཡིན་ནོ། །མི་ཕྱེད་པའི་ཕྱིར་དགེ་འདུན་དུ་འགྱུར་བ་ཞེས་བྱ་བ་ནི་ལྷ་དང་བཅས་པའི་འཇིག་རྟེན་གྱིས་ཀྱང་ལམ་ལས་མི་ཕྱེད་པའི་ཕྱིར་དགེ་འདུན་དུ་འགྱུར་བ་སྟེ། ཚོགས་པའི་ངོ་བོར་འགྱུར་བ་ཞེས་བྱ་བའི་ཐ་ཚིག་གོ། །མཚན་ཉིད་ཀྱི་སྒོ་ནས་ནི་ཞེས་བྱ་བ་ནི་སྔ་མ་བཞིན་དུ་རྣམ་པར་བཤད་པར་བྱའོ། །གང་ཡང་
[31b.6]མ་འོངས་པའི་དུས་ན་དགེ་འདུན་ཞེས་བྱ་བ་རྒྱས་པར་འབྱུང་བ་ནི་དེ་ན་བཅོམ་ལྡན་འདས་ཀྱིས་ཚོང་པ་ཏྲ་སུ་ས་དང་། བ་ལི་ཀ་ལ་བཀའ་སྩལ་པ། ཁྱེད་གཉིས་ཚུར་གཤེགས་སངས་རྒྱས་དང་ཆོས་ལ་སྐྱབས་སུ་སོང་ཤིག །གང་ཡང་མ་འོངས་པའི་དུས་ན་དགེ་འདུན་ཞེས་བྱ་བ་འབྱུང་བར་འགྱུར་བ་དེ་ལ་ཡང་སྐྱབས་
[31b.7]སུ་སོང་ཤིག་ཅེས་གསུངས་པ་ཡིན་ཏེ། གང་གི་ཚེ་དགེ་འདུན་མེད་པ་དེའི་ཚེ་མ་འོངས་པའི་དགེ་འདུན་ཁོ་ནའི་དབང་དུ་མཛད་ནས་དེ་སྐད་དུ་བཀའ་སྩལ་ན། དེ་ཇི་ལྟར་དགེ་འདུན་ཐམས་ཅད་ལ་སྐྱབས་སུ་འགྲོ་ཞེས་བྱ་བ་འདི་དང་འགལ་བར་མི་འགྱུར་ཏེ། དེ་དག་གི་མངོན་སུམ་དུ་གྱུར་པ་ཞེས་བྱ་བ་ནི་དགེ་
[32a]
[32a.1]འདུན་གང་ཞིག་ཆོས་ཀྱི་འཁོར་ལོ་བསྐོར་བའི་འོག་ཏུ་ཏྲ་པུ་ས་དང་བ་ལི་ཀ་དེ་གཉིས་ཀྱི་མངོན་སུམ་དུ་འགྱུར་བ་དེ་བརྗོད་པའི་ཕྱིར་ཏེ། དེ་ལྟ་ན་དེས་ཡོན་ཏན་གྱི་སྒོ་ནས་ཁས་བླངས་པར་འགྱུར་རོ་ཞེས་རབ་ཏུ་བསྟན་པའི་ཕྱིར་རོ། །སྡུག་བསྔལ་ཞི་བར་མཚན་ཉིད་གཅིག་པའི་
[32a.2]ཕྱིར། །ཞེས་བྱ་བ་ནི་འདི་ལ་བདག་དང་གཞན་གྱི་རྒྱུད་ཀྱི་ཉོན་མོངས་པ་རྣམས་དང་། སྡུག་བསྔལ་ཞི་བ་གང་ཡིན་པ་དེ་ཡོད་པས་ན་དེ་ཞི་བར་མཚན་ཉིད་གཅིག་པ་སྟེ། མྱ་ངན་ལས་འདས་པ་ཡིན་ནོ། །དེའི་ངོ་བོ་ཉིད་དེ་དེའི་ཕྱིར་འདི་མྱ་ངན་ལས་འདས་པ་ཐམས་ཅད་ལ་སྐྱབས་སུ་འགྲོའོ། །
[32a.3]རྟེན་ལ་གནོད་པ་བྱས་པ་ཞེས་བྱ་བ་ནི་མི་སློབ་པ་དེ་དག་གི་རྟེན་གཟུགས་ཀྱི་ཕུང་པོ་གང་ཡིན་པ་དེ་ལ་གནོད་པ་བྱས་ཤིང་ཉམས་པར་བྱས་པས་དེ་དག་གི་རྟེན་ཅན་སངས་རྒྱས་བྱེད་པའི་ཆོས་དེ་དག་ལ་ཡང་གནོད་པ་བྱས་པ་ཡིན་ནོ། །བསྟན་བཅོས་ལས་ནི་དེ་སྐད་དུ་མི་འབྱུང་ངོ་ཞེས་བྱ་བ་རྒྱས་པར་
[32a.4]འབྱུང་བ་ནི་ཆོས་མངོན་པའི་བསྟན་བཅོས་ལས་དེ་སྐད་དུ་མི་འབྱུང་བ་སྟེ། འདི་སྐད་དུ་མི་སློབ་པའི་ཆོས་དག་ཁོ་ན་སངས་རྒྱས་ཡིན་ནོ་ཞེས་ནི་མི་སྟོན་ཏེ། འོ་ན་ཇི་སྐད་དུ་འབྱུང་ཞེ་ན། སངས་རྒྱས་སུ་བྱེད་པའི་ཆོས་ཞེས་འབྱུང་སྟེ། དོན་ཅི་ཞེ་ན་སངས་རྒྱས་སུ་བྱེད་པ་གང་དག་ཡིན་པ་སྟེ།
[32a.5]སངས་རྒྱས་ཉིད་དང་སངས་རྒྱས་སུ་གདགས་པའི་རྒྱུ་འཇིག་རྟེན་པ་དང་། འཇིག་རྟེན་ལས་འདས་པའི་ཆོས་གང་དག་ཡིན་པ་དེ་དག་ནི་སངས་རྒྱས་ཡིན་ནོ་ཞེས་བྱ་བ་ཡིན་ནོ། །དེའི་ཕྱིར་དེ་དག་གི་རྟེན་འཇིག་རྟེན་པའི་ཕུང་པོ་ལྔའི་མཚན་ཉིད་སངས་རྒྱས་ཉིད་དུ་མ་བཀག་པས་གལ་ཏེ་མི་སློབ་པའི་
[32a.6]ཆོས་དག་ཁོ་ན་སངས་རྒྱས་ཡིན་ན། ཇི་ལྟར་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བས་མཚམས་མེད་པར་འགྱུར་ཞེས་གང་སྨྲས་པ་དེ་ནི་ཀླན་ཀ་མི་རུང་བ་ཉིད་དོ། །དེ་ལྟ་མ་ཡིན་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་སངས་རྒྱས་ཀྱང་མི་སློབ་པའི་ཆོས་དག་ཁོ་ན་ཡིན་ལ་དགེ་འདུན་
[32a.7]ཡང་སློབ་པ་དང་མི་སློབ་པའི་ཆོས་དག་ཁོ་ན་ཡིན་ན་འཇིག་རྟེན་པའི་སེམས་ལ་གནས་པ་སངས་རྒྱས་ཀྱང་མ་ཡིན་པར་འགྱུར། དགྲ་བཅོམ་པ་ཡང་མ་ཡིན་པར་འགྱུར། དེ་ཅིའི་ཕྱིར་ཞེ་ན། འཇིག་རྟེན་པའི་སེམས་ལ་ནི་མི་སློབ་པའི་ཆོས་དག་དང་། སློབ་པ་དང་མི་སློབ་པའི་ཆོས་དག་མེད་དོ་གལ་ཏེ་
[32b]
[32b.1]ཡང་སངས་རྒྱས་སུ་བྱེད་པའི་ཆོས་མི་སློབ་པ་ཁོ་ན་སངས་རྒྱས་ཡིན་གྱི་རྟེན་ནི་མ་ཡིན་ན་སྡོམ་པ་ཞེས་བྱ་བ་དགེ་སློང་དུ་བྱེད་པའི་ཚུལ་ཁྲིམས་ཁོ་ན་ཡང་དགེ་སློང་དུ་འགྱུར་གྱི་རྟེན་ནི་མ་ཡིན་པར་འགྱུར་རོ། །སྨྲས་པ་གལ་ཏེ་རྟེན་སངས་རྒྱས་ཉིད་ཡིན་ན་ཅིའི་ཕྱིར་བསྟན་བཅོས་ལས་འདི་སྐད་དུ། གང་ཞིག་
[32b.2]སངས་རྒྱས་ལ་སྐྱབས་སུ་འགྲོ་བ་དེ་ནི་མི་སློབ་པ་སངས་རྒྱས་སུ་བྱེད་པའི་ཆོས་དག་ལ་སྐྱབས་སུ་འགྲོའོ་ཞེས་མི་སློབ་པའི་ཆོས་དེ་དག་ཁོ་ན་ལ་ངེས་པར་བཟུང་། བྱེ་བྲག་ཏུ་སྨྲ་བས་དེ་སྐད་ཅེས་སྨྲས་པ་དང་སློབ་དཔོན་གྱིས་དཔེས་ལན་ཇི་ལྟར་གང་ཞིག་དགེ་སློང་མཆོད་པར་བྱེད་པ་ཞེས་བྱ་བ་རྒྱས་པར་
[32b.3]སྨོས་ཏེ། ཇི་ལྟར་གང་ཞིག་དགེ་སློང་མཆོད་པར་བྱེད་པ་དེ་ནི་ཚུལ་ཁྲིམས་ཀྱི་སྒོ་ནས་དགེ་སློང་དུ་བྱེད་པའི་ཚུལ་ཁྲིམས་མཆོད་པར་བྱེད་པ་ཡིན་ནོ་ཞེས་བྱ་བ་དགེ་སློང་གི་ཚུལ་ཁྲིམས་ཁོ་ན་ཡིན་པར་ཡང་མ་ཟད་པ་དེ་བཞིན་དུ་གང་ཞིག་སངས་རྒྱས་ལ་སྐྱབས་སུ་འགྲོ་བ་དེ་ཡང་མི་སློབ་པའི་སྒོ་ནས་མི་སློབ་པ་
[32b.4]སངས་རྒྱས་སུ་བྱེད་པའི་ཆོས་དག་ལ་སྐྱབས་སུ་འགྲོ་བ་ཡིན་གྱི་སངས་རྒྱས་ནི་རང་གི་རྒྱུད་ཀྱི་མི་སློབ་པའི་ཆོས་དག་ཁོ་ན་ཡིན་པར་ནི་མ་ཟད་དོ། །དེ་ལྟ་བས་ན་གང་ཞིག་སངས་རྒྱས་ལ་སྐྱབས་སུ་འགྲོ་བ་དེ་ནི་མི་སློབ་པ་སངས་རྒྱས་སུ་བྱེད་པའི་ཆོས་དག་ལ་སྐྱབས་སུ་འགྲོ་བ་ཡིན་ནོ་ཞེས་བྱ་བ་དེ་ཉེས་པ་མེད་དོ། །
[32b.5]དེ་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་ཞེས་བྱ་བ་ནི་དེ་དག་གི་ཐུན་མོང་མ་ཡིན་པའི་ཕྱིར་རོ་སྙམ་དུ་བསམས་པ་ཡིན་ནོ། །ངག་གི་རྣམ་པར་རིག་བྱེད་ཀྱི་ངོ་བོ་ཉིད་དག་ཡིན་ནོ་ཞེས་བྱ་བ་ནི་ནོད་པའི་དུས་ཀྱི་དབང་དུ་བྱས་པ་ཡིན་ནོ། །མཆོད་གནས་ཀྱི་ལྗོན་ཤིང་ཞེས་བྱ་བ་ནི། མཆོད་གནས་སུ་བྱས་
[32b.6]པའི་ཤིང་ནི་མཆོད་གནས་ཀྱི་ལྗོན་ཤིང་སྟེ། དེ་དག་ལའོ། །དེ་ཉིད་ཀྱི་ཕྱིར་ཞེས་བྱ་བ་ནི་གང་གི་ཕྱིར། སྐྱབས་དེ་ལ་ནི་བརྟེན་ནས་ཀྱང་། །སྡུག་བསྔལ་ཀུན་ལས་གྲོལ་བར་འགྱུར་བ་དེའི་ཕྱིར་སྡོམ་པ་ཡང་དག་པར་བླང་བ་ཐམས་ཅད་ལ་སྟེ། དགེ་བསྙེན་ལ་སོགས་པའི་སྡོམ་པ་ཡང་དག་པར་བླང་བ་དག་ལ་སྒོར་
[32b.7]གྱུར་པ་ཡིན་ནོ་ཞེས་བྱ་བའི་ཐ་ཚིག་གོ། །ངན་སོང་བའི་རྒྱུ་ཡིན་པའི་ཕྱིར་ཞེས་བྱ་བ་ནི་འདི་ལྟར་འདོད་པས་ལོག་པར་གཡེམ་པ་ནི་གཅིག་ཏུ་ངན་སོང་བའི་རྒྱུ་ཡིན་ཏེ། ངན་སོང་དུ་འགྱུར་བ་ཡིན་གྱི་མི་ཚངས་པར་སྤྱོད་པ་ནི་དེ་ལྟ་མ་ཡིན་ནོ། །མི་བྱེད་པར་ངེས་པ་ནི་མི་བྱེད་པའི་སྡོམ་པའོ་ཞེས་བྱ་བ་ནི་མི་བྱེད་པ་མ་
[33a]
[33a.1]ཡིན་པའོ། །ངེས་པ་ནི་གཅིག་ཏུ་ངེས་པའོ། །མི་བྱེད་པར་ངེས་པ་ནི་མི་བྱེད་པར་ངེས་པ་སྟེ། དེ་ནི་མི་བྱེད་པར་སྡོམ་པའོ། །མི་བྱེད་པའི་མཚན་ཉིད་ཀྱི་སྡོམ་པ་ནི་མི་བྱེད་པའི་སྡོམ་པ་སྟེ། ཡང་དག་པར་བླངས་པ་ལས་བྱུང་བའི་སྡོམ་པ་མ་ཡིན་པ་ཞེས་བྱ་བའི་ཐ་ཚིག་གོ། །དེ་
[33a.2]ཡང་མདོ་སྡེ་པའི་ལུགས་ཀྱིས་ནི་གནས་སྐབས་ཀྱི་ཁྱད་པར་ཁོ་ན་ཡིན་ནོ། །བྱེ་བྲག་ཏུ་སྨྲ་བའི་ལུགས་ཀྱིས་ནི་ཚུལ་ཁྲིམས་ཀྱི་ཡན་ལག་རྣམ་པར་རིག་བྱེད་མ་ཡིན་ནོ་ཞེའོ། །གང་དག་དགེ་བསྙེན་ཡིན་བཞིན་དུ་ཞེས་བྱ་བ་རྒྱས་པར་འབྱུང་བ་ནི་གང་དག་བསླབ་པའི་གནས་ལྔ་མནོས་པ་ཡིན་
[33a.3]བཞིན་དུ། ཆུང་མ་ལེན་པར་བྱེད་ཅིང་བག་མ་ལེན་པར་བྱེད་ན། ཅི་དགེ་བསྙེན་དེ་དག་གིས་བུད་མེད་དེ་དག་ལས་ཀྱང་སྡོམ་པ་ཐོབ་པའམ་ཞེས་བྱ་བ་ནི་སྔོན་ཐོབ་པའམ་ཞེས་བྱ་བའི་ཐ་ཚིག་གོ། །འོན་ཏེ་མ་ཡིན་ཞེས་བྱ་བ་ནི་ཐོབ་པ་ཞེས་བྱ་བར་སྐབས་དང་སྦྱར་རོ། །བྱེ་བྲག་ཏུ་སྨྲ་བས་ཐོབ་པོ་ཞེས་
[33a.4]བྱ་བ་སྨོས་ཏེ། ཉི་ཚེ་བའི་སྡོམ་པ་ཐོབ་པར་འགྱུར་དུ་འོངས་པས་ཞེས་བྱ་བ་ནི་བགྲོད་པར་བྱ་བ་མ་ཡིན་པ་ཐམས་ཅད་སྤངས་པའི་ཕྱིར་རོ། །འདོད་པས་ལོག་པར་གཡེམ་པ་སྤོང་ངོ་ཞེས་བྱ་བ་ནི་བགྲོད་པར་བྱ་བ་མ་ཡིན་པ་ཉིད་སྤྱོད་པ་སྤོང་ངོ་ཞེས་བྱ་བ་ཡིན་གྱི་འདི་ལ་རྒྱུད་ལ་བགྲོད་པར་བྱ་བ་ཉིད་
[33a.5]སྤྱོད་པ་སྤོང་ངོ་ཞེས་བྱ་བ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་ཉིད་ཀྱི་ཕྱིར་རྒྱུད་འདི་ལ་ཞེས་བྱ་བ་རྒྱས་པར་སྨོས་སོ། །བཅས་པའི་ཁ་ན་མ་ཐོ་བ་ཞེས་བྱ་བ་ནི་བཀག་པའི་ཁ་ན་མ་ཐོ་བའོ། །བཅོམ་ལྡན་འདས་ཀྱིས་བཀག་པའི་ལས་སྤྱོད་པ་ནི་སྡིག་པར་འགྱུར་ཏེ། བཅོམ་ལྡན་འདས་ཀྱིས་
[33a.6]བསྟན་པ་ལ་མ་གུས་པའི་ཕྱིར་རོ། །ཆོས་མངོན་པ་བས་གང་མྱོས་པར་མི་འགྱུར་བའི་དྲོད་རིག་ནས་འཐུང་བ་དེ་ནི་ཉོན་མོངས་པ་ཅན་མ་ཡིན་ནོ་ཞེས་བཤད་པ་དང་། འདུལ་བ་འཛིན་པ་རྣམས་མྱོས་པར་འགྱུར་བ་འཐུང་བ་ནི། རང་བཞིན་གྱིས་ཁ་ན་མ་ཐོ་བ་ཡིན་ཞེས་བྱ་བ་སྒྲུབ་པར་བྱེད་དོ། །ཉེ་བ་
[33a.7]འཁོར་རང་བཞིན་གྱིས་ཁ་ན་མ་ཐོ་བ་མ་གཏོགས་པ་ཞེས་བྱ་བ་ནི་རང་བཞིན་གྱིས་ཁ་ན་མ་ཐོ་བའི་ལས་ཀྱིས་གསོ་བར་མི་བྱའི་བཅས་པའི་ཁ་ན་མ་ཐོ་བས་ནི་གསོ་བར་བྱའོ་སྙམ་དུ་དགོངས་པ་ཡིན་ནོ། །ཤཱཀྱ་ནད་པ་རྣམས་ལ་ཡང་མྱོས་པར་འགྱུར་བ་འཐུང་བར་མ་གནང་སྟེ། དེའི་ཕྱིར་དེ་ནི་རང་བཞིན་
[33b]
[33b.1]གྱིས་ཁ་ན་མ་ཐོ་བ་ཡིན་པར་མངོན་ནོ། །གལ་ཏེ་དེ་བཅས་པའི་ཁ་ན་མ་ཐོ་བ་ཞིག་ཡིན་པར་གྱུར་ན། དེ་ཤཱཀྱ་ནད་པའི་གསོས་སུ་ཡང་གནང་བར་འགྱུར་བ་ཞིག་ན་གནང་བ་ཡང་མ་ཡིན་ཏེ། དེའི་ཕྱིར་དེ་ནི་རང་བཞིན་གྱིས་ཁ་ན་མ་ཐོ་བ་ཡིན་ནོ། །དེ་ལས་འདི་སྐད་དུ་ང་སྟོན་པ་ཡིན་པར་སྨྲ་བ་སྟེ།
[33b.2]ཤཱཀྱ་ཐུབ་པ་ནི་བདག་གི་སྟོན་པ་ཡིན་ནོ་ཞེས་སྨྲ་བ་རྣམས་ཀྱིས་མྱོས་པར་འགྱུར་བ་རྩྭའི་རྩེ་མོས་ཀྱང་བཏུང་བར་མི་བྱའོ་ཞེས་ཀྱང་གསུངས་ཏེ་དེ་བས་ན་དེ་ནི་རང་བཞིན་གྱིས་ཁ་ན་མ་ཐོ་བ་ཡིན་པས་བཅོམ་ལྡན་འདས་ཀྱིས་བཀག་གི་མྱོས་པར་འགྱུར་རོ་སྙམ་དུ་དགོངས་ནས་ནི་མ་ཡིན་ཏེ། རྩྭ་མཆོག་
[33b.3]ཙམ་གྱིས་བླངས་པའི་ཆང་གིས་ནི་མྱོས་པར་མི་འགྱུར་བའི་ཕྱིར་རོ། །འཕགས་པ་རྣམས་ཞེས་བྱ་བ་རྒྱས་པར་འབྱུང་བ་ནི་ཆང་འཐུང་བ་ནི་རང་བཞིན་གྱིས་ཁ་ན་མ་ཐོ་བ་ཡིན་ཏེ། འཕགས་པ་རྣམས་ཚེ་འཕོས་ཀྱང་མི་སྤྱོད་པའི་ཕྱིར་སྲོག་གཅོད་པ་ལ་སོགས་པ་བཞིན་ནོ་ཞེས་བྱ་བ་ནི་སྒྲུབ་པ་
[33b.4]ཡིན་ནོ། །ལུས་ཀྱི་ཉེས་པར་སྤྱོད་པ་ཞེས་ཀྱང་འབྱུང་བའི་ཕྱིར་ཞེས་པ་ནི་སྒྲུབ་པ་གཞན་ཡིན་ཏེ། ཆང་འཐུང་བ་ནི་རང་བཞིན་གྱིས་ཁ་ན་མ་ཐོ་བ་ཡིན་ཏེ། ལུས་ཀྱི་ཉེས་པར་སྤྱོད་པ་ཡིན་པར་འབྱུང་བའི་ཕྱིར་སྲོག་གཅོད་པ་ལ་སོགས་པ་བཞིན་ནོ། །དགའ་བྱེད་ལ་སོགས་པའི་མདོ་ལས།
[33b.5]ལུས་ཀྱི་ཉེས་པར་སྤྱོད་པ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། འབྲུའི་ཆང་དང་། སྦྱར་བའི་ཆང་མྱོས་པར་གྱུར་པ། བག་མེད་པའི་གནས་འཐུང་བ་རྣམ་པ་བཞི་བཤད་དོ། །སྤྱིར་བསྟན་མོད་ཀྱི་ཞེས་བྱ་བ་རྒྱས་པར་འབྱུང་བས་འདིས་ནི་
[33b.6]བཅོམ་ལྡན་འདས་ཀྱི་བཀའ་ལ་སྔ་ཕྱི་འགལ་བ་སྤོང་བར་བྱེད་དོ། །ཇི་ལྟ་ཞེ་ན། བཙུན་པ་ཇི་ལྟར་ཞེས་བྱ་བ་རྒྱས་པར་ཆང་འཐུང་བ་སྤྱིར་སྨོས་པ་ནི་སྤྱིར་བསྟན་པ་ཡིན་ནོ། །ཤཱཀྱ་ནད་པ་རྣམས་ལ་ཆང་འཐུང་དུ་མ་གནང་བ་ཞེས་བྱ་བ་ནི་དམིགས་ཀྱིས་བསྟན་པ་ཡིན་པས། ན་བའི་གནས་སྐབས་ན་
[33b.7]ཡང་ཆང་འཐུང་དུ་མ་གནང་ངོ་ཞེས་བྱ་བར་མངོན་ནོ། །དམིགས་ཀྱིས་བསྟན་པ་ཡང་ཐལ་བར་འགྱུར་བ་ཡོངས་སུ་སྤང་བའི་ཕྱིར་ཏེ། ཆང་ནི་ལན་ཅིག་འཐུངས་པས་ཀྱང་ཆགས་པར་འགྱུར་རོ། །བཅོམ་ལྡན་འདས་ཀྱིས་ཀྱང་གནས་གསུམ་པོ་ཆང་དང་མི་ཚངས་པར་སྤྱོད་པ་དང་རྨུགས་པ་དང་
[34a]
[34a.1]གཉིད་བསྟན་པ་ནི་ངོམས་པ་འམ་ཆོག་པ་འམ་ཚིམ་པ་མེད་དོ་ཞེས་གསུངས་སོ། །ཅིའི་ཕྱིར་ཐལ་བར་འགྱུར་བ་འདི་སྤང་ཞེ་ན་མྱོས་པར་འགྱུར་བའི་དྲོད་མ་ངེས་པས་ཞེས་བྱ་བ་སྨོས་ཏེ། དེ་ཙམ་ཁོ་ན་རྫས་དང་དུས་དང་རང་བཞིན་དང་ལུས་ཀྱི་གནས་སྐབས་ལ་ལྟོས་ནས་མྱོས་
[34a.2]པར་འགྱུར་བ་ཡང་ཡིན་ལ་མྱོས་པར་མི་འགྱུར་བ་ཡང་ཡིན་ནོ། །དེ་ཉིད་ཀྱི་ཕྱིར་རྩྭའི་རྩེ་མོས་འཐུང་བ་ཡང་བཀག་པ་ཡིན་ནོ་ཞེས་བྱ་བ་འདོར་བའི་ཚིག་ཡིན་ནོ། །དེ་ལྟར་ན་བཅོམ་ལྡན་འདས་ཀྱིས་ཐུགས་ལ་རང་བཞིན་གྱིས་སྡིག་ཡིན་ནོ་སྙམ་དུ་དགོངས་ནས་དེ་ཡོངས་སུ་སྤང་བར་བྱ་བར་གསུངས་པ་ནི་མ་ཡིན་
[34a.3]ནོ། །འོ་ན་ཅི་ཞེ་ན་ཐལ་བའི་ཉེས་པར་འགྱུར་བའི་ཕྱིར་ཞེས་བསྟན་པ་ཡིན་ནོ། །འཕགས་པ་རྣམས་མི་སྤྱོད་པ་ནི་ངོ་ཚ་དང་ལྡན་པའི་ཕྱིར་ཞེས་བྱ་བ་ནི་མདོ་ལས་སློབ་པའི་སྟོབས་ལྔ་འབྱུང་སྟེ། ལྔ་གང་ཞེ་ན། དད་པའི་སྟོབས་དང་། བརྩོན་འགྲུས་ཀྱི་སྟོབས་དང་། ངོ་ཚ་ཤེས་པའི་སྟོབས་དང་། ཁྲེལ་
[34a.4]ཡོད་པའི་སྟོབས་དང་། ཤེས་རབ་ཀྱི་སྟོབས་ཞེས་བྱ་བ་ཡིན་ནོ། །དེ་བས་ན་ངོ་ཚ་དང་ལྡན་པའི་ཕྱིར་མི་འཐུང་བར་ཟད་ཀྱི་རང་བཞིན་གྱིས་ཁ་ན་མ་ཐོ་བ་ཡིན་པའི་ཕྱིར་ནི་མ་ཡིན་ནོ། །གལ་ཏེ་ངོ་ཚ་དང་ལྡན་པའི་ཕྱིར་དེ་མི་སྤྱོད་ན་ཅིའི་ཕྱིར་ཆུ་ལ་སོགས་པ་བཞིན་དུ་མ་ཤེས་ཏེ་དེ་ཡང་མི་འཐུང་ཞེ་ན་དེའི་ཕྱིར་དེས་ཀྱང་
[34a.5]དྲན་པ་ཉམས་པར་བྱེད་པའི་ཕྱིར་ཞེས་བྱ་བ་སྨོས་ཏེ། ཆང་འཐུངས་ན་བྱ་བ་དང་བྱ་བ་མ་ཡིན་པའི་དྲན་པ་ཉམས་པར་འགྱུར་རོ། །གལ་ཏེ་དེ་ལྟ་ན་ཇི་ཙམ་གྱིས་དྲན་པ་ཉམས་པར་མི་འགྱུར་བ་ཅུང་ཟད་ཅིག་འཐུངས་ལ་རག་མོད་ཅེ་ན། དེའི་ཕྱིར་ཅུང་ཟད་ཀྱང་མི་གསོལ་ཏེ་ཞེས་བྱ་བ་སྨོས་ཏེ། དུག་བཞིན་དུ་མ་ངེས་པའི་
[34a.6]ཕྱིར་རོ་ཞེས་བྱ་བ་ནི་དཔེར་ན་དུག་ཆུང་ངུ་ཡང་དུས་དང་རང་བཞིན་དང་མཐུ་དང་ལྡན་པས་རེས་འགའ་འཆི་བར་བྱེད་པ་དེ་བཞིན་དུ་ཆང་ཡང་མྱོས་པར་བྱེད་དོ། །ཉེས་པར་སྤྱོད་པ་ཞེས་འགྱུར་བ་ནི་བག་མེད་པའི་གནས་ཡིན་པའི་ཕྱིར་ཞེས་བྱ་བ་ནི་མྱོས་པས་མི་དགེ་བ་མི་སྤོང་བའི་ཕྱིར་དང་དགེ་བ་མི་བྱེད་པའི་ཕྱིར་རོ། །
[34a.7]འདི་ལ་བག་མེད་པའི་གནས་ཞེས་སྨོས་ཀྱི་གཞན་དག་ལ་ནི་མ་ཡིན་ཏེ་ཞེས་བྱ་བ་ནི་འབྲུའི་ཆང་དང་སྦྱར་བའི་ཆང་བག་མེད་པའི་གནས་སྤངས་ཏེ། འབྲུའི་ཆང་དང་སྦྱར་བའི་ཆང་བག་མེད་པའི་གནས་ལས་སླར་ལྡོག་གོ་ཞེས་འབྱུང་བས་བསླབ་པའི་གཞི་འདི་ཁོ་ན་ལ་བག་མེད་པའི་གནས་ཞེས་སྨོས་ཀྱི།
[34b]
[34b.1]བསླབ་པའི་གཞི་གཞན་སྲོག་གཅོད་པ་སྤོང་བ་ལ་སོགས་པ་ལ་ནི་བག་མེད་པའི་གནས་མ་སྨོས་ཏེ། སྲོག་གཅོད་པ་བག་མེད་པའི་གནས་སྤངས་ནས་སྲོག་གཅོད་པ་བག་མེད་པའི་གནས་ལས་སླར་ལྡོག་གོ་ཞེས་བྱ་བར་བག་མེད་པའི་གནས་མི་འབྱུང་ངོ་། །འོ་ན་ཅི་ལྟ་ཞེ་ན། སྲོག་གཅོད་པ་
[34b.2]སྤངས་ནས་སྲོག་གཅོད་པ་ལས་སླར་ལྡོག་གོ་ཞེས་འབྱུང་སྟེ། དེ་བཞིན་དུ་མ་བྱིན་པར་ལེན་པ་ལ་སོགས་པ་ལ་ཡང་སྦྱར་བར་བྱའོ། །ཅིའི་ཕྱིར་ཞེ་ན། དེ་དག་ནི་རང་བཞིན་གྱིས་ཁ་ན་མ་ཐོ་བ་ཡིན་པའི་ཕྱིར་རོ་ཞེས་བྱ་བ་སྨོས་ཏེ། སྲོག་གཅོད་པ་སྤོང་བ་ལ་སོགས་པའི་བསླབ་པའི་གཞི་དེ་
[34b.3]དག་ནི་རང་བཞིན་གྱིས་ཁ་ན་མ་ཐོ་བ་ཡིན་པའི་ཕྱིར་རོ། །འདི་སྐད་དུ་འདི་ནི་བག་མེད་པའི་གནས་ཡིན་པས་ཆང་འཐུང་བ་ལས་ལྡོག་པར་བྱའི་འདི་རང་བཞིན་གྱིས་ཁ་ན་མ་ཐོ་བ་ཡིན་པའི་ཕྱིར་ནི་མ་ཡིན་ནོ་ཞེས་བཤད་པ་ཡིན་ནོ། །ཧ་ཅང་ཀུན་དུ་བསྟེན་པས་ཞེས་བྱ་བ་རྒྱས་པར་འབྱུང་བ་ནི་དགའ་བྱེད་
[34b.4]ཀྱི་མདོ་ལས་འབྲུའི་ཆང་དང་སྦྱར་བའི་ཆང་བག་མེད་པའི་གནས་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལུས་ཞིག་ནས་དམྱལ་བ་དག་ཏུ་སྐྱེའོ་ཞེས་འབྱུང་བའི་ཕྱིར་ཆང་འཐུང་བ་ཧ་ཅང་ཀུན་དུ་བསྟེན་པས་ངན་འགྲོར་འགྲོ་བར་གསུངས་པ་ནི་དེའི་ཞར་ལ་སྟེ། ཆང་འཐུང་བའི་ཞར་
[34b.5]ལ་མི་དགེ་བའི་རྒྱུན་ཡང་དང་ཡང་དུ་རྟག་ཏུ་འཇུག་པ་སྟེ། མི་དགེ་བ་རྣམས་ཀྱི་རྒྱུན་དེ་འཇུག་པས་ངན་སོང་བའི་ལས་ངན་སོང་བའི་འབྲས་བུ་ཅན་གྱི་ལས་སྔོན་མེད་པ་ནི་འཕེན་ཅིང་ཀུན་དུ་འཕེན་པ་འམ་འཇུག་པ་ཐོབ་པ་སྟེ། འཆི་བའི་གནས་སྐབས་ནི་སྔོན་བསྩགས་པའི་ལས་འབྲས་བུ་འབྱིན་
[34b.6]པར་བྱ་བ་ལ་འཇུག་པ་ཐོབ་པའོ། །འཕེན་པ་འམ་འཇུག་པ་ཐོབ་པ་དེའི་ཕྱིར་ངན་སོང་དུ་འགྲོ་བར་གསུངས་པར་ཟད་དོ་ཞེས་བྱ་བར་སྦྱར་རོ། །ཟས་ལས་བྱུང་བའི་བཏུང་བའོ་ཞེས་བྱ་བ་ནི་འབྲས་ཐུག་པོ་ཆེ་ལས་བྱས་པའོ། །རྫས་ལས་སྦྱར་བའི་བཏུང་བའོ་ཞེས་བྱ་བ་ནི་བུ་རམ་ཤིང་གི་ཁུ་བ་ལ་
[34b.7]སོགས་པ་ལས་བྱས་པའོ། །དེ་དག་ཀྱང་ཞེས་བྱ་བ་རྒྱས་པར་འབྱུང་བ་ནི་འབྲུའི་ཆང་དང་སྦྱར་བའི་ཆང་དེ་དག་ཀྱང་རེས་འགའ་མྱོས་པར་འགྱུར་བའི་དངོས་པོར་མ་རེད་པ་སྟེ་གང་གི་ཚེ་གཞོན་ནུར་འདུག་པ་ནའོ། །རེས་འགའ་ནི་མྱོས་པར་འགྱུར་བའི་དངོས་པོ་ལས་ཐལ་བར་འགྱུར་ཏེ་གང་གི་ཚེ་ཧ་
[35a]
[35a.1]ཅང་རྙིངས་པར་གྱུར་པ་ནའོ། །དེའི་ཕྱིར་མྱོས་པར་འགྱུར་བ་ཞེས་སྨོས་ཏེ། གལ་ཏེ་མྱོས་པར་གྱུར་ན་དེའི་ཕྱིར་ཉེས་པ་ཡིན་ནོ་སྙམ་དུ་དགོངས་པ་ཡིན་ནོ། །གླ་གོར་ཞོ་ཤ་དང་ཁྲེ་རྒོད་ལ་སོགས་པ་ཡང་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་འབྲུ་ནི་སྤ་བ་ལ་སོགས་
[35a.2]པ་ཡང་བསྡུ་སྟེ། འབྲུའི་ཆང་དང་སྦྱར་བའི་ཆང་མ་ཡིན་པས་མྱོས་པ་ཉིད་དུ་གྱུར་དུ་ཟིན་ཀྱང་ཉེས་པ་མེད་ཀྱི་འབྲུའི་ཆང་དང་སྦྱར་བའི་ཆང་གི་ངོ་བོ་ཉིད་ཀྱི་ཆང་འཐུང་ན་དེའི་ཕྱིར་ཉེས་པ་ཡིན་ནོ་ཞེས་བྱ་བའི་ཐ་ཚིག་གོ། །བག་མེད་པ་ཐམས་ཅད་ཀྱི་གནས་སུ་གྱུར་པས་ཞེས་བྱ་བ་ཆང་འཐུང་བ་
[35a.3]ནི་བག་མེད་པ་ཐམས་ཅད་དེ། སྲོག་གཅོད་པ་ལ་སོགས་པ་མི་དགེ་བ་རྣམས་ཀྱི་རྒྱུར་གྱུར་པ་དྲན་པ་ཉམས་པ་ཐམས་ཅད་ཀྱི་གནས་དང་གཞི་དང་རྟེན་ཡིན་པས་བག་མེད་པའི་གནས་ཡིན་ནོ། །གང་ལས་གཅིག་ཐོབ་པ་ཞེས་བྱ་བ་ནི་དངོས་གཞི་ལ་སོགས་པ་དང་སེམས་ཅན་དང་སེམས་
[35a.4]ཅན་མ་ཡིན་པར་སྟོན་པ་ལ་གང་ལས་སོ་སོར་ཐར་པའི་སྡོམ་པ་འཐོབ་པ་དེ་ལས་ལྷག་མ་བསམ་གཏན་དང་ཟག་པ་མེད་པའི་སྡོམ་པ་དག་ཐོབ་བམ་ཞེས་བྱ་བ་ཡིན་ནོ། །སྦྱོར་བ་དང་དངོས་དང་མཇུག་ལས་སོ་ཞེས་བྱ་བ་ནི་མི་དགེ་བའི་ལས་ཀྱི་སྦྱོར་བ་དང་། དངོས་དང་། མཇུག་དག་ལས་གོ་
[35a.5]རིམས་བཞིན་དུ་གཉེན་པོར་གྱུར་པ་སོ་སོར་ཐར་པའི་སྡོམ་པ་ཞེས་བྱ་བ་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་སྦྱོར་བ་དང་། དངོས་དང་། མཇུག་གི་ངོ་བོ་ཉིད་གསུམ་ཐོབ་པར་འགྱུར་རོ། །སེམས་ཅན་དང་སེམས་ཅན་མ་ཡིན་པར་སྟོན་པའི་གཞི་སྲོག་ཆགས་དང་ནགས་ཚལ་གྱི་མཚན་ཉིད་དང་རང་
[35a.6]བཞིན་དང་བཅས་པའི་ཁ་ན་མ་ཐོ་བ་སྲོག་གཅོད་པ་དང་ནགས་ཚལ་འཇོམས་པ་ལ་སོགས་པའི་མཚན་ཉིད་ཀྱི་ལས་དག་ལས་སོ། །དེ་ལྟར་ན་འདི་གཉིས་ནི་གཉི་གའི་རྟེན་ཅན་ཡིན་ཏེ། རང་བཞིན་གྱིས་ཁ་ན་མ་ཐོ་བ་ཡང་སེམས་ཅན་གྱི་རྟེན་ཅན་དང་། སེམས་ཅན་མ་ཡིན་པའི་རྟེན་ཅན་ཡིན་ལ། བཅས་
[35a.7]པའི་ཁ་ན་མ་ཐོ་བ་ཡང་སེམས་ཅན་གྱི་རྟེན་ཅན་དང་སེམས་ཅན་མ་ཡིན་པའི་རྟེན་ཅན་ཡིན་གྱི་འདི་ལྟར་རང་བཞིན་གྱིས་ཁ་ན་མ་ཐོ་བ་ནི་སེམས་ཅན་གྱི་རྟེན་ཅན་ཡིན་ལ། བཅས་པའི་ཁ་ན་མ་ཐོ་བ་ནི་སེམས་ཅན་མ་ཡིན་པའི་རྟེན་ཅན་ཡིན་ནོ་ཞེས་བྱ་བར་ནི་མི་བཟུང་ངོ་། །དེ་ལ་རེ་ཞིག་རང་བཞིན་གྱིས་ཁ་ན་
[35b]
[35b.1]མ་ཐོ་བ་སེམས་ཅན་གྱི་རྟེན་ཅན་ནི་སྲོག་ཆགས་གསོད་པ་ལ་སོགས་པའོ། །བཅས་པའི་ཁ་ན་མ་ཐོ་བ་སེམས་ཅན་གྱི་རྟེན་ཅན་ཡང་དགེ་སློང་བུད་མེེད་ཀྱི་ལག་པ་ལ་སོགས་པ་ནས་འཛིན་པ་དང་། ཁྱིམ་ན་ལྷན་ཅིག་ཉལ་བ་ལ་སོགས་པའོ། །རང་བཞིན་གྱིས་ཁ་ན་མ་ཐོ་བ་སེམས་ཅན་མ་ཡིན་
[35b.2]པའི་རྟེན་ཅན་ནི་གསེར་ལ་སོགས་པ་རྐུ་བའོ། །བཅས་པའི་ཁ་ན་མ་ཐོ་བ་སེམས་ཅན་མ་ཡིན་པའི་རྟེན་ཅན་ནི་དགེ་སློང་ཤིང་གི་ལོ་མ་གཅོད་པ་དང་འདུལ་བ་ལ་ཟས་ལ་སོགས་པའི་ལྟུང་བ་བཤད་པ་ལྟ་བུའོ། །སེམས་ཅན་གྱི་རྟེན་ལ་འཇུག་པའི་ཕྱིར་ཞེས་བྱ་བ་ནི་སེམས་ཅན་དུ་གདགས་
[35b.3]པའི་རྟེན་ལ་འཇུག་པའི་ཕྱིར་རོ་སྙམ་དུ་བསམས་པ་ཡིན་ནོ། །ད་ལྟར་གྱི་ཆོས་རྣམས་ཁོ་ན་སེམས་ཅན་དུ་གདགས་པའི་རྟེན་ཡིན་གྱི་འདས་པ་དང་མ་འོངས་པ་རྣམས་ནི་མ་ཡིན་ཏེ། དེ་དག་ནི་མེད་པ་དང་འདྲ་བའི་ཕྱིར་རོ། །དེ་ཉིད་ཀྱི་ཕྱིར་འདས་པ་དང་མ་འོངས་པ་དག་ལས་ནི་མ་ཡིན་ཏེ།
[35b.4]དེ་དག་ནི་སེམས་ཅན་དུ་མི་བགྲང་བའི་ཕྱིར་རོ་ཞེས་བྱ་བ་སྨོས་སོ། །སེམས་ཅན་དང་སེམས་ཅན་མ་ཡིན་པར་སྟོན་པ་དག་ལས་ཐོབ་བོ་ཞེས་བྱ་བ་འབྱུང་བའི་ཕྱིར་སེམས་ཅན་མ་ཡིན་པར་གདགས་པའི་རྟེན་ལ་ཞུགས་པ་ཡང་སོ་སོར་ཐར་པའི་སྡོམ་པ་ཡིན་པར་འགྱུར་བ་མ་ཡིན་ནམ་ཞེ་ན། དེ་ནི་དེ་ལྟ་
[35b.5]བུ་འགོག་པར་བྱེད་པ་མ་ཡིན་ནོ། །ཇི་ལྟར་ད་ལྟར་གྱི་སེམས་ཅན་དུ་སྟོན་པ་ཁོ་ན་ལས་ཐོབ་པར་འགྱུར་ཞེས་བཤད་པ་དེ་བཞིན་དུ་ད་ལྟར་གྱི་སེམས་ཅན་མ་ཡིན་པར་སྟོན་པ་ཁོ་ན་ལས་ཀྱང་འཐོབ་པར་འགྱུར་རོ་ཞེས་བརྗོད་པར་བྱ་དགོས་ཏེ། ཚིག་འདིས་ནི་ད་ལྟར་གྱི་རྟེན་ཅན་ཁོ་ན་ཡིན་པར་འདོད་པ་ཡིན་
[35b.6]ནོ། །དེ་ཉིད་ཀྱི་ཕྱིར་ཞེས་བྱ་བ་ནི་གང་གི་ཕྱིར་སྡོམ་པ་འདི་དག་ཇི་སྐད་རྒྱས་པར་བཤད་པ་དེ་ལྟར་ཐོབ་པར་གྱུར་པ་དེའི་ཕྱིར་མུ་བཞིར་བྱའོ། །རྒྱས་པར་ཞེས་བྱ་བ་ལ་རྒྱས་པར་ཞེས་བྱ་བའི་དོན་ནི་གང་དག་ལས་བསམ་གཏན་དང་ཟག་པ་མེད་པའི་སྡོམ་པ་དག་ཐོབ་ལ། སོ་སོར་ཐར་པའི་སྡོམ་པ་མ་
[35b.7]ཡིན་པའི་ཕུང་པོ་དང་། ཁམས་དང་སྐྱེ་མཆེད་དེ་དག་ཀྱང་ཡོད། གང་དག་ལས་སོ་སོར་ཐར་པའི་སྡོམ་པ་འཐོབ་ལ་བསམ་གཏན་དང་ཟག་པ་མེད་པའི་སྡོམ་པ་མ་ཡིན་པ་དེ་དག་ཀྱང་ཡོད། གང་དག་ལས་གཉི་ག་འཐོབ་པ་དེ་དག་ཀྱང་ཡོད། གང་དག་ལས་གཉི་ག་མི་འཐོབ་པ་དེ་དག་ཀྱང་ཡོད་
[36a]
[36a.1]ཅེས་བྱ་བ་ཡིན་ནོ། །མུ་དང་པོ་ནི་ད་ལྟར་གྱི་སྲོག་གཅོད་པ་ལ་སོགས་པའི་ལས་ཀྱི་ལམ་གྱི་སྦྱོར་བ་དང་མཇུག་དག་དང་ཤིང་གཅོད་པ་ལ་སོགས་པའི་བཅས་པའི་ཁ་ན་མ་ཐོ་བ་ལས་འཐོབ་པའི་སྡོམ་པ་གང་ཡིན་པའི་སོ་སོར་ཐར་པའི་སྡོམ་པ་དེ་ཡིན་ཏེ། འདོད་
[36a.2]རྟོགས་ཐམས་ཅད་གཉི་ག་དང་ཞེས་འབྱུང་བའི་ཕྱིར་རོ། །གཉིས་པ་ནི་འདས་པ་དང་མ་འོངས་པའི་ལས་ཀྱི་ལམ་དངོས་སུ་སྲོག་གཅོད་པ་སྤོང་བ་ལ་སོགས་པ་ལུས་དང་ངག་གི་བདུན་ལས་འཐོབ་པའི་སྡོམ་པ་གང་ཡིན་པ་སྟེ། དེ་ནི་དངོས་དང་དུས་ནི་ཐམས་ཅད་ལས་འབྱུང་བའི་ཕྱིར་བསམ་
[36a.3]གཏན་དང་ཟག་པ་མེད་པའི་སྡོམ་པ་དག་ཡིན་ལ་སོ་སོར་ཐར་པའི་སྡོམ་པ་ནི་མ་ཡིན་ཏེ། འདས་པ་དང་མ་འོངས་པ་ཡིན་པའི་ཕྱིར་རོ། །གསུམ་པ་ནི་ད་ལྟར་བྱུང་བའི་ལས་ཀྱི་ལམ་དངོས་དག་ལས་སོ་ཞེས་བྱ་བ་ནི་ད་ལྟར་བྱུང་བའི་ལས་ཀྱི་ལམ་ཡིན་པའི་ཕྱིར་སོ་སོར་ཐར་པའི་སྡོམ་པ་
[36a.4]ཡང་ཡིན་ལ་ལས་ཀྱི་ལམ་གྱི་དངོས་ཡིན་པའི་ཕྱིར་བསམ་གཏན་དང་ཟག་པ་མེད་པའི་སྡོམ་པ་དག་ཀྱང་ཡིན་ནོ། །བཞི་པ་ནི་འདས་པ་དང་མ་འོངས་པའི་ཉེར་བསྡོགས་དང་མཇུག་དག་ལས་སོ་ཞེས་བྱ་བ་ནི་འདས་པ་དང་མ་འོངས་པ་ཡིན་པའི་ཕྱིར་སོ་སོར་ཐར་པའི་སྡོམ་པ་ཡང་མ་ཡིན་ལ་ཉེར་
[36a.5]བསྡོགས་དང་མཇུག་ཡིན་པའི་ཕྱིར་བསམ་གཏན་དང་ཟག་པ་མེད་པའི་སྡོམ་པ་དག་ཀྱང་མ་ཡིན་ནོ། །སློབ་དཔོན་གྱི་རང་གི་རྒྱུད་ལ་ད་ལྟར་གྱི་ལས་ཀྱི་ལམ་དག་ལས་སྡོམ་པ་རུང་བ་མ་ཡིན་པར་མཐོང་ནས་སྡོམ་པ་ཐོབ་པའི་ཚེ་ན་ད་ལྟར་གྱི་ལས་ཀྱི་ལམ་རྣམས་མེད་པས་ད་ལྟར་གྱི་གཞི་ཅན་
[36a.6]གྱིས་ལས་ཀྱི་ལམ་དག་ལས་ཞེས་བརྗོད་པར་བྱའོ་ཞེས་བྱ་བ་སྨོས་ནས་སློབ་པར་བྱེད་པ་ཡིན་ཏེ། དངོས་པོ་གང་ཞིག་ལས་ལྡོག་པ་དེ་ནི་ད་ལྟར་གྱི་ཉིན་ཡིན་པར་མི་སྲིད་པའི་ཕྱིར་རོ། །འདས་པ་དང་ད་ལྟར་གྱི་རྣམས་ལ་ནི་མ་ཡིན་ནོ་ཞེས་བྱ་བ་ལ། སློབ་དཔོན་གྱིས་བསམ་པ་ནི་འདི་དག་ནི་བྱུང་
[36a.7]ཟིན་པའི་ཕྱིར་བསྡམ་པར་ཡང་རུང་བ་མ་ཡིན་ལ། ད་ལྟར་བྱུང་བ་རྣམས་ནི་མི་སྐྱེ་བར་བྱ་བར་ཡང་མི་ནུས་ཀྱི་མ་འོངས་པ་རྣམས་ལ་ནུས་པས་དེ་དག་ཁོ་ན་སྡོམ་པར་རུང་ངོ་སྙམ་པ་ཡིན་ནོ། །དེ་སྐད་དུ་སྨོས་པ་ལ་བྱེ་བྲག་ཏུ་སྨྲ་བ་རྣམས་ཀྱིས་བསམ་པ་ནི་འདི་ཡིན་པར་མངོན་ཏེ། སོ་སོར་ཐར་པའི་སྡོམ་
[36b]
[36b.1]པའི་སྦྱོར་བ་དང་། དངོས་དང་མཇུག་དག་ནི་གོ་རིམས་བཞིན་དུ་སྲོག་གཅོད་པ་ལ་སོགས་པའི་སྦྱོར་བ་དང་། དངོས་དང་མཇུག་འདི་དག་འཇུག་པར་མ་གྱུར་ཅིག་ཅེས་སྡོམ་པར་བྱེད་པ་ཡིན་ཏེ། ཤུགས་ཉིད་ཀྱིས་ནི་གཉེན་པོར་གྱུར་པ་དེ་དག་ནི་མི་མཐུན་པར་གྱུར་པ་དེ་དག་ལ་གགས་བྱེད་པ་
[36b.2]ལྟ་བུར་སྐྱེ་སྟེ། སྦྱོར་བ་ཡང་སྦྱོར་བ་ལ་འདི་སྐད་དུ་ཁྱོད་ངས་བསྡམས་ཀྱི་ཁྱོད་མ་འབྱུང་ཤིག་ཅེས་སྨྲས་ལ། དེ་བཞིན་དུ་འཇུག་ཀྱང་འཇུག་ལ་དེ་སྐད་དུ་སྨྲའོ་ཞེས་བྱ་བའི་བར་དུ་སྦྱར་བར་བྱའོ། །དེ་བཞིན་དུ་ད་ལྟར་གྱི་ཕུང་པོ་དང་ཁམས་དང་སྐྱེ་མཆེད་ལས་ཀྱི་ལམ་གྱི་སྦྱོར་བ་དང་།
[36b.3]དངོས་དང་མཇུག་གི་ངོ་བོ་ཉིད་དག་འགག་པ་ན་ད་ལྟར་གྱི་དེ་དག་ལས་སོ་སོར་ཐར་པའི་སྡོམ་པ་འཐོབ་བོ་ཞེས་བཤད་པ་ཡིན་པས་དེ་ལྟ་བས་ན་དེ་སྐད་དུ་ནི་བརྗོད་པར་མི་བྱའོ་ཞེས་བྱ་བ་ཡིན་ནོ། །ལ་ལ་ནི་ཐམས་ཅད་ལས་འཐོབ་པ་སྟེ་ཞེས་བྱ་བ་རྒྱས་པར་འབྱུང་བ་ནི་དགེ་སློང་གི་སྡོམ་
[36b.4]པ་ནི་ལས་ཀྱི་ལམ་ཐམས་ཅད་ལས་ཐོབ་སྟེ། ལས་ཀྱི་ལམ་ཐམས་ཅད་སྤོང་བར་བྱེད་པ་ཡིན་ནོ་ཞེས་བྱ་བའི་ཐ་ཚིག་གོ། །ལ་ལ་ནི་བཞི་ལས་ཏེ། དེ་དག་ལས་གཞན་པའོ་ཞེས་བྱ་བ་ནི་དགེ་སློང་གི་སྡོམ་པ་དེ་ལས་གཞན་པའི་སྡོམ་པ་དགེ་ཚུལ་ལ་སོགས་པའི་སྡོམ་པ་ནི་ཡན་ལག་
[36b.5]བཞི་ཁོ་ན་ལས་འཐོབ་སྟེ། ལུས་ཀྱི་སྲོག་གཅོད་པ་ལ་སོགས་པ་གསུམ་དང་། ངག་གི་བརྫུན་དུ་སྨྲ་བ་ལས་སོ། །གལ་ཏེ་མ་ཆགས་པ་དང་ཞེ་སྡང་མེད་པ་དང་གཏི་མུག་མེད་པ་དེའི་རྒྱུར་འདོད་ནའོ་ཞེས་བྱ་བ་ནི་སྡོམ་པའི་རྒྱུ་ནི་རྣམ་པ་གཉིས་སུ་འདོད་དེ་མ་ཆགས་པ་དང་ཞེ་སྡང་མེད་པ་དང་གཏི་
[36b.6]མུག་མེད་པ་དག་དང་སེམས་ཆུང་ངུ་དང་འབྲིང་དང་ཆེན་པོ་དག་ཅེས་བྱ་བ་ཡིན་ནོ། །གལ་ཏེ་རྣམ་གྲངས་དང་པོ་ཡིན་པར་འདོད་ན་ནི་སྡོམ་པ་མ་ཆགས་པ་ལ་སོགས་པའི་ངོ་བོ་ཉིད་ཀྱི་ལས་ཀྱི་ལམ་ཐམས་ཅད་ཀྱིས་འཐོབ་སྟེ། ཀུན་ནས་སློང་བར་བྱེད་པའི་སེམས་དགེ་བ་ལ་དེ་རྣམས་ཅིག་ཅར་
[36b.7]འབྱུང་བའི་ཕྱིར་རོ། །གལ་ཏེ་སེམས་ཆུང་ངུ་དང་འབྲིང་དང་ཆེན་པོ་དག་རྒྱུར་འདོད་ན་ནི་རྒྱུ་གཅིག་གིས་འཐོབ་སྟེ། དེ་དག་ཅིག་ཅར་འབྱུང་བ་མེད་པའི་ཕྱིར་རོ། །རྣམ་གྲངས་ཐ་མ་ཞེས་བྱ་བ་ནི་ཆུང་ངུ་ལ་སོགས་པ་རྒྱུ་ཡིན་པའི་ཕྱོགས་སོ། །སྡོམ་པ་ལ་གནས་པ་སེམས་ཅན་ཐམས་ཅད་ལ་བསྡམས་
[37a]
[37a.1]ལ། ཡན་ལག་ཐམས་ཅད་རྒྱུ་ཐམས་ཅད་ཀྱི་མ་ཡིན་པ་ཡང་ཡོད་ཅེས་བྱ་བ་རྒྱས་པར་འབྱུང་བ་ནི་སེམས་ཅན་ཐམས་ཅད་ཀྱི་རྗེས་སུ་སོང་བའི་བསམ་པ་དགེ་བ་ཅན་ལ་སྡོམ་པ་སྐྱེ་བའི་ཕྱིར་སེམས་ཅན་ཐམས་ཅད་ལ་བསྡམས་པ་ཡིན་ལ་དགེ་བསྙེན་ལ་སོགས་པའི་སྡོམ་
[37a.2]པ་ནི་ཡན་ལག་ཐམས་ཅད་སྤངས་པ་མ་ཡིན་པའི་ཕྱིར་ཡན་ལག་ཐམས་ཅད་ཀྱིས་ཀྱང་མ་ཡིན་ལ། རྒྱུ་ཐམས་ཅད་ཀྱིས་ཀྱང་མ་ཡིན་ཏེ་ཆུང་ངུ་ལ་སོགས་པ་རྒྱུ་ཉིད་དུ་ཅིག་ཅར་འབྱུང་བ་མི་སྲིད་པའི་ཕྱིར་རོ། །དགེ་སློང་གི་སྡོམ་པ་ནི་ཡན་ལག་ཐམས་ཅད་ཀྱིས་ཀྱང་ཡིན་ཏེ། ཡན་ལག་
[37a.3]ཐམས་ཅད་སྤངས་པའི་ཕྱིར་རོ། །གང་ཞིག་སེམས་རྣམ་པ་གསུམ་གྱིས་སྡོམ་པ་རྣམ་པ་གསུམ་ཡང་དག་པར་ལེན་པའོ་ཞེས་བྱ་བ་ནི་འདི་ལྟ་སྟེ། སེམས་ཆུང་ངུས་ནི་དགེ་བསྙེན་གྱི་སྡོམ་པ་ཡང་དག་པར་ལེན་ལ། འབྲིང་གིས་ནི་དགེ་ཚུལ་གྱི་སྡོམ་པ་ལེན། ཆེན་པོས་ནི་དགེ་སློང་གི་སྡོམ་པ་
[37a.4]ལེན་ཅེས་བྱ་བ་ཡིན་ནོ། །རྒྱུ་ཐམས་ཅད་ཀྱིས་བསྡམས་ལ་ཡན་ལག་ཐམས་ཅད་ཀྱིས་ཀྱང་མ་ཡིན་པ་ཡང་ཡོད་ཅེས་བྱ་བ་ནི་དགེ་བསྙེན་ལ་སོགས་པའི་སྡོམ་པ་རྣམས་རེ་རེའི་རྒྱུ་ཆུང་ངུ་ལ་སོགས་པ་རེ་རེ་ཞིག་ཡིན་པའི་ཕྱིར་རོ།། །།བམ་པོ་སུམ་ཅུ་རྩ་གསུམ་པ། དེ་ལྟར་མནོས་ན་ཞེས་
[37a.5]བྱ་བ་ནི་ངེས་པ་ལྔ་བྱེད་པས་མནོས་ནའོ། །ཇི་ལྟར་ན་མི་ནུས་པ་དག་ལས་སྡོམ་པ་ཐོབ་ཅེས་བྱ་བ་ནི་གང་དག་གསད་པར་མི་ནུས་པའི་སེམས་ཅན་མི་ནུས་པ་དེ་དག་ལས་སྡོམ་པ་ཇི་ལྟར་འཐོབ་ཅེ་ན་འདི་ལ་སློབ་དཔོན་གྱིས་ལེན་དུ་སེམས་ཅན་ཐམས་ཅད་ཀྱི་སྲོག་ལ་མི་གནོད་པའི་བསམ་པས་བླངས་པའི་ཕྱིར་
[37a.6]རོ་ཞེས་བྱ་བ་སྨོས་ཏེ། སེམས་ཅན་ཐམས་ཅད་ཀྱི་སྲོག་དེ་ལ་གནོད་པ་མི་བྱ་བའི་ལྷག་པའི་བསམ་པས་སྡོམ་པ་ཁས་ལེན་པའི་ཕྱིར་རོ། །བྱེ་བྲག་ཏུ་སྨྲ་བས་ཀྱང་དྲི་བ་འདི་ཉིད་ཀྱི་ལན་དུ་གལ་ཏེ་ནུས་པ་དག་ཁོ་ན་ལས་ཞེས་བྱ་བ་རྒྱས་པར་སྨོས་ཏེ། ལྷ་ལ་སོགས་པ་ཡང་མི་ལ་སོགས་པར་འཕོ་ལ་མི་
[37a.7]ལ་སོགས་པ་ཡང་ལྷ་ལ་སོགས་པར་འཕོ་བས། ནུས་པ་དང་མི་ནུས་པ་མི་ལ་སོགས་པ་དང་ལྷ་ལ་སོགས་པ་ནི། ཕན་ཚུན་འཕོ་བས་འཕེལ་བ་དང་འགྲིབ་པ་དང་ལྡན་པར་འགྱུར་ཏེ་སེམས་ཅན་ནུས་པ་དག་ཏུ་གྱུར་ན་ནི་སྡོམ་པ་འཕེལ་བར་འགྱུར་ལ། མི་ནུས་པ་དག་ཏུ་གྱུར་ན་ནི་འགྲིབ་པར་འགྱུར་
[37b]
[37b.1]རོ། །སློབ་དཔོན་གྱིས་བྱེ་བྲག་ཏུ་སྨྲ་བའི་ལན་འདི་གླགས་དང་བཅས་པར་མཐོང་ནས་དེ་ལྟར་ནི་མི་འགྱུར་ཏེ་ཞེས་བྱ་བ་སྨོས་ཏེ། དེ་ལྟར་སྡོམ་པ་འཕེལ་བ་དང་འགྲིབ་པ་དང་ལྡན་པར་ནི་མི་འགྱུར་རོ། །ཇི་ལྟ་ཞེ་ན། ཇི་ལྟར་སྔོན་མེད་པའི་རྩྭ་ལ་སོགས་པ་སྐྱེས་སམ། རྩྭ་ལ་སོགས་པ་
[37b.2]སྐམས་ན་རྩྭ་ལ་སོགས་པ་དེ་དག་ལས་སྡོམ་པ་འཐོབ་པར་འགྱུར་མོད་ཀྱི་འོན་ཀྱང་སྡོམ་པ་འཕེལ་བ་དང་འགྲིབ་པར་མི་འགྱུར་བ་དེ་བཞིན་དུ་ནུས་པ་དང་། མི་ནུས་པ་འཕོས་སུ་ཟིན་ཀྱང་འཕེལ་ཞིང་འགྲིབ་པ་དག་ཏུ་མི་འགྱུར་ཏེ། རྒྱས་པ་དང་འགྲིབ་པ་དག་ཏུ་ཞེས་བྱ་བའི་ཐ་ཚིག་གོ། །དེ་ལྟ་
[37b.3]བས་ན་ནུས་པ་དག་ཁོ་ན་ལས་ཀྱང་སྡོམ་པ་འཐོབ་ལ་ཉེས་པ་དེར་ཡང་མི་འགྱུར་རོ་ཞེས་བྱ་བ་ཡིན་ནོ། །བྱེ་བྲག་ཏུ་སྨྲ་བས་མ་ཡིན་ཏེ། སེམས་ཅན་རྣམས་ནི་ཞེས་བྱ་བ་རྒྱས་པར་སྨོས་ཏེ། ཇི་ལྟར་སྔོན་མེད་པའི་རྩྭ་ལ་སོགས་པ་སྐྱེས་སམ་ཞེས་བྱ་བ་རྒྱས་པར་གང་སྨྲས་པ་དེ་ནི་དེ་ལྟ་
[37b.4]མ་ཡིན་ནོ། །ཅིའི་ཕྱིར་ཞེ་ན། སེམས་ཅན་རྣམས་ནི་འཕོ་བའི་སྔོན་རོལ་དང་ཕྱིས་ཀྱང་ཡོད་པའི་ཕྱིར་རྩྭ་ལ་སོགས་པ་ནི་མེད་པའི་ཕྱིར་ཏེ། རྩྭ་དང་གེལ་པ་དང་ལྕུག་མ་ལ་སོགས་པ་ནི་སྔོན་རོལ་དང་ཕྱིས་ཀྱང་མེད་པའི་ཕྱིར་རོ། །དེའི་ཕྱིར་རྩྭ་ལ་སོགས་པའི་དཔེས་འཕེལ་བ་དང་
[37b.5]འགྲིབ་པའི་ཉེས་པ་མི་ཟློགས་སོ། །དེ་ལྟར་ཆོས་མི་མཐུན་པ་ཙམ་ཞིག་སྨྲས་ཀྱི་བསྒྲུབ་པར་བྱ་བ་དང་། སྒྲུབ་པའི་དོན་ནི་མ་ཡིན་པས་སློབ་དཔོན་གྱིས་ཡང་ཡོངས་སུ་མྱ་ངན་ལས་འདས་ནས་ཞེས་བྱ་བ་རྒྱས་པར་སྨོས་སོ། །དེ་ལྟ་བས་ན་གཏན་ཚིགས་སྔ་མ་ཉིད་བཟང་ངོ་ཞེས་བྱ་བ་ནི་སེམས་
[37b.6]ཅན་ཐམས་ཅད་ཀྱི་སྲོག་ལ་མི་གནོད་པའི་བསམ་པས་ཁས་བླངས་པའི་ཕྱིར་རོ་ཞེས་བྱ་བ་ཡིན་ཏེ། དེའི་ཕྱིར་ནུས་པ་དང་མི་ནུས་པ་དག་ལས་སྡོམ་པ་འཐོབ་བོ་ཞེས་བྱ་བར་གྲུབ་བོ། །གལ་ཏེ་དེ་ལྟར་སེམས་ཅན་ཐམས་ཅད་ལས་སོ་སོར་ཐར་པའི་སྡོམ་པ་འཐོབ་ན། འོ་ན་ནི་སྔོན་གྱི་སེམས་ཅན་སངས་
[37b.7]རྒྱས་སུ་འགྱུར་ནས་ཡོངས་སུ་མྱ་ངན་ལས་འདས་པ་རྣམས་ལས་དེ་མ་ཐོབ་པའི་ཕྱིར་ཚུལ་ཁྲིམས་ཉུང་བར་འགྱུར་རོ་ཞེ་ན། སློབ་དཔོན་གྱིས་བཤད་པ། སངས་རྒྱས་ཐམས་ཅད་ཀྱིས་ཏེ་ཕྱིས་འབྱུང་བ་རྣམས་ཀྱིས་ཀྱང་ཁྱད་པར་མེད་པར་སེམས་ཅན་ཐམས་ཅད་ལས་ཐོབ་པའི་ཕྱིར་ཏེ། གལ་ཏེ་
[38a]
[38a.1]དེ་དག་ཀྱང་ཡོངས་སུ་མྱ་ངན་ལས་འདས་པར་མ་གྱུར་ན་དེའི་ཚེ། དེ་རྣམས་ཀྱིས་དེ་དག་ལས་ཀྱང་འཐོབ་པར་འགྱུར་རོ། །ལས་ཀྱི་ལམ་ཐམས་ཅད་ལས་ཞེས་བྱ་བ་དག་ནི་ལུས་དང་ངག་གི་ལས་སོ། །སྡོམ་པ་མ་ཡིན་པ་མི་ཚངས་པའི་སྡོམ་པ་ཅན་ནི་མེད་དོ་
[38a.2]ཞེས་བྱ་བ་ནི་སྲོག་གཅོད་པ་ཁོ་ན་ཡིན་གྱི་མ་བྱིན་པར་ལེན་པས་ནི་མ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པ་ཡིན་ནོ། །སྡོམ་པ་མ་ཡིན་པ་ནི་ཞན་པ་ཁོ་ན་དང་ལྡན་པ་ཞེས་བྱ་བ་ནི་སྔར་ཐོབ་ཟིན་པའི་ཕྱིར་རོ། །སྲོག་གཅོད་པའི་རྣམ་པར་རིག་བྱེད་ཆེན་པོ་དང་ཞེས་བྱ་བ་ཅི་ཞེ་ན་ལྡན་ནོ་ཞེས་བྱ་
[38a.3]བར་སྦྱར་ཏེ། རྣམ་པར་སྨིན་པའི་འབྲས་བུ་ལ་ནི་ཁྱད་པར་མེད་དོ། །དེ་བཞིན་དུ་འབྲིང་དང་དྲག་པོ་ལ་ཡང་སྦྱར་བར་བྱའོ་ཞེས་བྱ་བ་ནི་གང་ཞིག་སེམས་འབྲིང་གིས་སྡོམ་པ་མ་ཡིན་པ་ཐོབ་པ་དེ་སེམས་དྲག་པོས་སྲོག་ཆགས་ཀྱི་སྲོག་གཅོད་པར་བྱེད་ན་ཡང་སྡོམ་པ་མ་ཡིན་པ་ནི་འབྲིང་ཁོ་ན་དང་ལྡན་པ་
[38a.4]ཞེས་བྱ་བ་དང་། དེ་བཞིན་དུ་གང་ཞིག་སེམས་དྲག་པོས་ཞེས་བྱ་བ་ནས་སྡོམ་པ་མ་ཡིན་པ་ཡང་ཆེན་པོ་ཁོ་ན་དང་ལྡན་ལ་སྲོག་གཅོད་པའི་རྣམ་པར་རིག་བྱེད་ཀྱང་ཆེན་པོ་དང་ལྡན་ནོ་ཞེས་བྱ་བ་དང་། གང་ཞིག་སེམས་ཆེན་པོས་སྡོམ་པ་མ་ཡིན་པ་ཐོབ་པ་དེ་སེམས་ཆུང་ངུས་སྲོག་ཆགས་ཀྱི་སྲོག་གཅོད་
[38a.5]པར་བྱེད་ན་ཡང་སྡོམ་པ་མ་ཡིན་པ་ནི་ཆེན་པོ་ཁོ་ན་དང་ལྡན་ལ། སྲོག་གཅོད་པའི་རྣམ་པར་རིག་བྱེད་ནི་ཆུང་ངུ་དང་ལྡན་ནོ་ཞེས་བྱ་བའི་བར་སྦྱར་བ་མ་ཡིན་ནོ། །བ་གུ་རི་འཆོར་བ་རྣམས་ཞེས་བྱ་བ་ནི། སྲོག་ཆགས་ཀྱི་རིགས་པ་གུ་རི་ཞེས་གྲགས་པ་ཞིག་ཡོད་དེ། དེ་དག་གསོད་པས་ན་བ་གུ་
[38a.6]རི་འཆོར་བ་རྣམས་སོ། །དོན་གྱིས་ན་སྡོམ་པ་མ་ཡིན་པ་ཅན་ཡིན་ནོ་ཞེས་བྱ་བ་ནི་རྒྱལ་པོ་དང་བློན་པོ་རྣམས་ཀྱང་ཆད་པས་གཅོད་པར་བྱེད་པ་ཡིན་པའི་ཕྱིར་དེ་ལས་མི་འབྱུང་ཡང་སྡོམ་པ་མ་ཡིན་པ་ཅན་ཁོ་ནར་བལྟའོ། །གཞན་དག་ལ་ཡང་དེ་བཞིན་དུ་སྦྱར་རོ་ཞེས་བྱ་བ་ནི་བྱ་གག་རྣམས་གསོད་པས་ན་བྱ་
[38a.7]གག་གསོད་པ་རྣམས་སོ་ཞེས་བྱ་བ་དེ་ལྟ་བུ་ལ་སོགས་པའོ། །རེ་ཞིག་རིགས་ན་ཞེས་བྱ་བ་རྒྱས་པར་བརྗོད་ནས། ཇི་ལྟར་སེམས་ཅན་ཐམས་ཅད་ལས་སྡོམ་པ་མ་ཡིན་པ་འཐོབ་པར་རུང་ཞེས་བྱ་བའི་བར་དྲིས་པ་དང་བྱེ་བྲག་ཏུ་སྨྲ་བས་ལན་དུ་དེ་དག་ནི་མ་ལ་སོགས་པ་ཞེས་བྱ་བ་རྒྱས་པར་སྨྲས་སོ། །སློབ་
[38b]
[38b.1]དཔོན་གྱིས་རེ་ཞིག་དེ་དག་ཉིད་དེ་དག་ཡིན་པར་ཤེས་ནས་མི་གསོད་དོ་ཞེས་བྱ་བ་སྨོས་ཏེ། མ་ལ་སོགས་པ་དེ་དག་ཡིན་ནོ་ཞེས་བྱ་བར་ཤེས་པ་རྣམས་ནི་མི་གསོད་པས་ཇི་ལྟར་གསད་པར་བྱ་བ་མ་ཡིན་པ་དེ་དག་ལས་ཀྱང་། སྡོམ་པ་མ་ཡིན་པ་ཐོབ་པར་རུང་གཞན་ཡང་འཕགས་པར་གྱུར་པ་དེ་དག་
[38b.2]ལུག་ལ་སོགས་པར་སྐྱེ་མི་སྲིད་པའི་ཕྱིར་ཡང་ཕྱུགས་སུ་འགྱུར་བའི་གོ་སྐབས་མེད་ན་ཇི་ལྟར་དེ་དག་ལས་སྡོམ་པ་མ་ཡིན་པ་ཐོབ་པར་འགྱུར། གལ་ཏེ་ལུག་ལ་སོགས་པར་འགྱུར་རོ་ཞེས་མ་འོངས་པའི་ལུས་ལ་ལྟོས་ཏེ་ད་ལྟར་གྱི་མ་ལ་སོགས་པའི་སྡོམ་པ་མ་ཡིན་པ་ཞིག་ཏུ་གྱུར་ན་ནི་ཤན་པ་དེ་དག་ཚེ་
[38b.3]ཕྱི་མ་ལ་ལུག་བུར་གྱུར་པ་རྣམས་ཀྱང་གཏན་མི་གསོད་པས་ལུག་དེ་དག་ལས་སྡོམ་པ་མ་ཡིན་པར་མི་འགྱུར་རོ། །བྱེ་བྲག་ཏུ་སྨྲ་བས་ཇི་ལྟར་ན་གསོད་པར་འདོད་བཞིན་དུ་ཞེས་བྱ་བ་རྒྱས་པར་སྨྲས་པ་དང་། སློབ་དཔོན་གྱིས་དེ་ནི་མ་ལ་སོགས་པ་ལ་ཡང་མཚུངས་ཏེ་ཞེས་བྱ་བ་རྒྱ་ཆེར་སྨོས་ཏེ། ཇི་ལྟར་ན་
[38b.4]ཤན་པ་ལ་སོགས་པ་མ་ལ་སོགས་པར་གྱུར་པ་གསོད་པར་མི་འདོད་བཞིན་དུ་མ་ལ་སོགས་པ་དེ་དག་ལ་སྡོམ་པ་མ་ཡིན་པར་འགྱུར། མ་ཚང་བ་ནི་ལས་ཀྱི་ཡན་ལག་གི་སྒོ་ནས་སོ། །ཉི་ཚེ་བ་ཡང་ཡོད་དེ་སེམས་ཅན་དང་ཡུལ་དང་དུས་དང་ཚེ་ངེས་པར་བྱེད་པ་དང་ལྡན་པས་ཕྱོགས་གཅིག་མ་
[38b.5]སྤངས་པའི་ཕྱིར་རོ། །སྔར་བཤད་པ་སོ་སོར་ཐར་པའི་སྡོམ་པ་རྣམ་པ་བརྒྱད་མ་གཏོགས་པ་ཡང་དེ་བཞིན་དུ་མ་ཚང་བ་ཡང་ཡོད་ལ་ཉི་ཚེ་བ་ཡང་ཡོད་དོ། །ཅིའི་ཕྱིར་ཞེ་ན་ཚུལ་ཁྲིམས་དང་འཆལ་པའི་ཚུལ་ཁྲིམས་དེ་ཙམ་གྱི་གེགས་བྱེད་པའི་ཕྱིར་རོ་ཞེས་བྱ་བ་སྨོས་ཏེ། སྡོམ་པ་མ་ཡིན་པ་ཡང་
[38b.6]ཚུལ་ཁྲིམས་དེ་ཙམ་གྱི་གེགས་བྱེད་ལ་སྡོམ་པ་ཡང་འཆལ་བའི་ཚུལ་ཁྲིམས་དེ་ཙམ་གྱི་གེགས་བྱེད་དོ་ཞེས་བྱ་བ་ཡིན་ནོ། །དེའི་རིགས་སུ་སྐྱེས་པ་རྣམས་ཞེས་བྱ་བ་ནི་སྡོམ་པ་མ་ཡིན་པའི་རིགས་སུ་སྐྱེས་པ་རྣམས་སོ། །ཞིང་དང་། ལེན་པ་དང་། གུས་པར་བྱེད་པས་འཐོབ་ཅེས་བྱ་བ་ལ། གུས་
[38b.7]པར་བྱེད་པ་ནི་བྱ་བ་རྩོམ་པའོ། །ཞིང་དང་ལེན་པ་དང་གུས་པར་བྱེད་པ་ཞེས་བྱ་བར་ཚིག་བསྡུ་སྟེ། དེ་ལས་རྣམ་པར་རིག་བྱེད་མ་ཡིན་པ་སྐྱེ་བའོ། །ཚེས་སམ་ཞེས་བྱ་བ་རྒྱས་པར་འབྱུང་བ་ནི་ཚེས་ལ་ཟས་སྦྱིན་པ་ནས་ཟླ་བ་ཕྱེད་ཀྱི་བར་དུ་ཟས་སྦྱིན་པར་བྱའོ་ཞེས་བྱ་བ་ནི་དོན་ཡིན་པར་ཤེས་སོ། །སོགས་
[39a]
[39a.1]པ་ཞེས་བྱ་བའི་སྒྲས་ནི་དཀྱིལ་འཁོར་བྱེད་པ་ལ་སོགས་པ་བསྡུའོ། །དེ་ལྟ་བུའི་གུས་པས་ཞེས་བྱ་བ་ནི་ཉོན་མོངས་པ་དྲག་པོ་དང་རབ་ཏུ་དང་བ་དྲག་པོས་ཞེས་བྱ་བའི་ཐ་ཚིག་གོ། །ཡང་དག་པར་བླངས་པ་དང་འགལ་བའི་རྣམ་པར་རིག་བྱེད་བསྐྱེད་པ་དང་ཞེས་བྱ་བ་ནི་
[39a.2]ཇི་སྲིད་འཚོའི་བར་དུ་སྲོག་གཅོད་པ་ལ་སོགས་པ་སྤོང་ངོ་ཞེས་ཡང་དག་པར་བླངས་པ་གང་ཡིན་པ་དང་འགལ་བའི་རྣམ་པར་རིག་བྱེད་བསྐྱེད་པའི་ཕྱིར་ཏེ། དེ་ལྟར་ན་རྒྱུ་དང་པོས་སོ་སོར་ཐར་པའི་སྡོམ་པ་གཏོང་བ་ཡིན་ནོ། །རྟེན་བོར་བ་དང་ཞེས་བྱ་བ་ནི་རྟེན་གང་གི་སྡོམ་པ་བླངས་པ་དེ་བོར་ཞིང་ཤི་
[39a.3]བའི་ཕྱིར་ཏེ། དེ་ལྟར་ན་རྒྱུ་གཉིས་པས་དེ་གཏོང་བ་ཡིན་ནོ། །རྟེན་ཉམས་ཞེས་བྱ་བ་རྟེན་ཇི་ལྟ་བུས་སྡོམ་པ་བླངས་པ་དེ་ལྟ་བུ་ཡིན་པར་ཉམས་པའི་ཕྱིར་ཏེ། དེ་ལྟར་རྒྱུ་གསུམ་པས་དེ་གཏོང་བ་ཡིན་ནོ། །གཞི་ཆད་པ་དང་ཞེས་བྱ་བ་ལ་གཞི་ནི་དགེ་བའི་རྩ་བ་རྣམས་ཏེ་དེ་ཆད་པའི་ཕྱིར་རྒྱུ་
[39a.4]བཞི་པས་དེ་གཏོང་བ་ཡིན་ནོ། །དེ་སྲིད་དུ་འཕངས་པའི་ཕྱིར་རོ་ཞེས་བྱ་བ་ནི་བསྙེན་གནས་པའི་སྡོམ་པ་ནི་ཉིན་མཚན་གཅིག་ཏུ་འཕངས་པ་ཡིན་པས་བསྙེན་གནས་པའི་སྡོམ་པ་དེ་ནི་སྔར་བཤད་པའི་རྒྱུ་བཞི་དང་རྒྱུ་ལྔ་པས་གཏོང་བ་ཡིན་ནོ། །ལྟུང་བར་འགྱུར་ལས་ཞེས་བྱ་བ་ནི་ཇི་སྐད་བཤད་པའི་རྒྱུ་
[39a.5]ལྔ་པོ་དེ་དག་དང་ལྟུང་བར་འགྱུར་བ་ཡིན་ནོ་ཞེས་ཟེར་རོ། །འདིས་ལྟུང་བར་འགྱུར་བས་ན་ལྟུང་བར་འགྱུར་བའོ། །དེ་ཡང་རྣམ་པ་བཞི་སྟེ། མི་ཚངས་པར་སྤྱོད་པ་དང་། ཇི་སྐད་བཤད་པའི་ཚད་མ་བྱིན་པར་ལེན་པ་དང་། མི་གསོད་པ་དང་། མིའི་ཆོས་བླ་མ་བརྫུན་དུ་སྨྲ་བ་ཞེས་བྱའོ། །
[39a.6]ཁ་ཆེ་རྣམས་ནི་འབྱུང་བ་ལ། །བུ་ལོན་ནོར་བཞིན་གཉིས་སུ་འདོད། །ཅེས་བྱ་བ་ནི་ལུང་དང་རིགས་པས་ཏེ། དེ་ལ་ལུང་ནི་འདུལ་བ་ལས། གལ་ཏེ་དགེ་སློང་ཚུལ་ཁྲིམས་འཆལ་བ་ཞིག་དགེ་སློང་མ་ལ་རྗེས་སུ་སྟོན་ན་དགེ་འདུན་གྱི་ལྷག་མར་འགྱུར་རོ་ཞེས་གསུངས་པ་འདི་ཡིན་ཏེ། དགེ་
[39a.7]སློང་ཚུལ་ཁྲིམས་འཆལ་པ་ནི་ཕས་ཕམ་པ་བྱུང་བ་ཡིན་པར་བཞེད་ཀྱི་ཕས་ཕམ་པ་མ་བྱུང་ན་ནི་མ་ཡིན་ཏེ། རང་བཞིན་དུ་གནས་པའི་ཚུལ་ཁྲིམས་དང་ལྡན་པ་ཞེས་བཟློག་སྟེ་འབྱུང་བའི་ཕྱིར་རོ། །དེའི་ཕྱིར་ཚུལ་ཁྲིམས་འཆལ་པ་དེ་ལ་ཡང་དགེ་སློང་གི་དངོས་པོ་ཡོད་པར་མངོན་ཏེ། འདི་ལྟར་
[39b]
[39b.1]དགེ་འདུན་གྱི་ལྷག་མར་འགྱུར་རོ་ཞེས་བཤད་པའི་ཕྱིར་རོ། །རིགས་པ་ཡང་ཕྱོགས་གཅིག་ཉམས་པར་སྡོམ་པ་ཟད་པར་གཏོང་བར་ནི་མི་རིགས་སོ་ཞེས་བྱ་བ་ཡིན་ནོ། །རྩ་བའི་ལྟུང་བ་ལ་ཡང་ཞེས་བྱ་བ་ནི་ལྟུང་བར་འགྱུར་བའི་ལྟུང་བ་བྱུང་བ་ལ་ཡང་ཞེས་བྱ་བའི་ཐ་ཚིག་གོ། །ལྟུང་བ་གཞན་བྱུང་
[39b.2]བ་ལ་ཡང་ཚུལ་ཁྲིམས་འཆལ་པ་མེད་དོ་ཞེས་བྱ་བ་ནི་དགེ་འདུན་གྱི་ལྷག་མ་ལ་སོགས་པའོ། །བཤགས་ན་ཞེས་བྱ་བ་ནི་བཤགས་པ་བྱས་ནས་སོ། །འོ་ན་བཅོམ་ལྡན་འདས་ཀྱིས་ཞེས་བྱ་བ་རྒྱས་པར་ཕམ་པར་འགྱུར་ཞེས་གང་གསུངས་པ་ཞེས་བྱ་བའི་བར་འབྱུང་བ་ནི་དེ་ཇི་ལྟ་བུ་ཡིན་ཞེས་བྱ་བའི་
[39b.3]ཚིག་ཁོང་ནས་དབྱུང་ངོ་། །དེ་ནི་དོན་དམ་པའི་དགེ་སློང་ཉིད་ལས་དགོངས་ཏེ་གསུངས་པ་ཡིན་ནོ་ཞེས་བྱ་བ་ནི་ལྟུང་བར་འགྱུར་བ་བྱུང་བ་དེ་ནི་བདེན་པ་མཐོང་བའི་སྐལ་བ་མེད་ཀྱི་དོན་དམ་པའི་དགེ་སློང་ཉིད་དུ་མ་གྱུར་པའི་ཕྱིར་རོ། །ཉོན་མོངས་པ་མང་པོ་རྣམས་ལ་ཞེས་བྱ་བ་ནི་དགའ་བོ་ལ་སོགས་པ་
[39b.4]ལ་སྟེ། ཚིག་གི་དོན་ནི་རྩ་བའི་ལྟུང་བས་ཀྱང་དགེ་སློང་ཉིད་ཉམས་པར་མི་འགྱུར་རོ་སྙམ་དུ་རིག་ནས་དེ་དག་ཡང་བྱེད་པར་འགྱུར་རོ་ཞེས་བྱ་བ་ཡིན་ནོ། །མིང་གི་དགེ་སློང་ཞེས་བྱ་བ་ནི་བསྙེན་པར་མ་རྫོགས་པ་གང་ཞིག་ལ་དགེ་སློང་ཞེས་མིང་དུ་བཏགས་པའོ། །ཁས་འཆེ་བའི་དགེ་སློང་ཞེས་བྱ་བ་ནི་
[39b.5]ཚུལ་ཁྲིམས་འཆལ་པ་མི་ཚངས་པར་སྤྱོད་པ་ལ་སོགས་པ་ལ་ཞུགས་པ་ཡིན་ནོ། །སློང་བས་ན་དགེ་སློང་ཞེས་བྱ་བ་ནི་སློང་བར་བྱེད་པའོ། །ཉོན་མོངས་པ་བཅོམ་པས་ན་དགེ་སློང་ཞེས་བྱ་བ་ནི་དགྲ་བཅོམ་པའོ། །དོན་འདི་ལ་ནི་ཞེས་བྱ་བ་ནི་བཅོམ་ལྡན་འདས་ཀྱིས་དགེ་སློང་མ་ཡིན་དགེ་སྦྱོང་མ་
[39b.6]ཡིན་ཞེས་བྱ་བ་རྒྱས་པར་བཤད་པའི་དོན་གང་ཡིན་པ་འདི་ལ་ནི་ཇི་སྐད་བཤད་པའི་དགེ་སློང་གཞི་ལས་གཞན་པ་ལྔ་པ། གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་འདི་ཁོ་ན་ཡིན་ནོ། །གང་ཡང་དེ་ནི་དོན་དམ་པའི་དགེ་སློང་ཉིད་ལས་དགོངས་ཏེ་གསུངས་པ་ཡིན་ནོ་ཞེས་སྨྲས་པ་
[39b.7]དེ་ལ་བཤད་པ། དེ་ལ་སྔོན་དོན་དམ་པའི་དགེ་སློང་དུ་གྱུར་ལ། དགེ་སློང་མ་ཡིན། དགེ་སྦྱོང་མ་ཡིན་ཞེས་འབྱུང་བ་གང་གིས་ན་ཕྱིས་དགེ་སློང་མ་ཡིན་པར་འགྱུར་བ་ནི་མ་ཡིན་ནོ་ཞེས་བྱ་བ་དཔེར་མཛད་ནས་ཞེས་བྱ་བ་ནི་སྟོན་པ་ཉིད་ཀྱིས་ཤིང་ཏ་ལའི་མགོ་བཅད་པ་དཔེར་མཛད་པས་ལན་བཏབ་པ་ཡིན་
[40a]
[40a.1]ནོ་ཞེས་བྱ་བར་སྦྱར་ཏེ། འདྲི་བའི་ལན་བཏབ་པ་ཡིན་ནོ་ཞེས་བྱ་བའི་ཐ་ཚིག་གོ། །ཞལ་ཟས་ལ་ཁམ་གཅིག་ལོངས་སྤྱོད་པ་དང་། གཙུག་ལག་ཁང་ལ་གོམ་པ་གཅིག་འདོར་བའི་ཕྱོགས་ལོངས་སྤྱད་པ་ཞེས་བྱ་བར་སྦྱར་རོ། །སྟོན་པས་དགེ་སློང་གི་ལོངས་སྤྱོད་
[40a.2]ཐམས་ཅད་ལས་ཀྱང་བཀར་ཏོ་ཞེས་བྱ་བ་ནི་བཅོམ་ལྡན་འདས་ཀྱིས་དགེ་སློང་རྣམས་དང་ལྷན་ཅིག་ལོངས་སྤྱོད་པ་གྲལ་གཅིག་ཏུ་ཟས་ཟ་བ་ལ་སོགས་པ་ཐམས་ཅད་ལས་བསྐྲད་པ་ཡིན་ནོ། །སྲེ་ད་བསལ་བར་གྱིས་ཞེས་བྱ་བ་ལ་སྲེ་ད་ནི་ནས་འདྲ་བ་ཞིག་སྟེ། དེ་དང་འདྲ་བ་གཞན་རྩྭའི་ཁྱད་
[40a.3]པར་གང་ཞིག་ནས་མ་རུང་བར་བྱེད་པ་ལ་བྱ་བ་ལྟར་དགེ་སློང་མ་ཡིན་པ་ལ་དགེ་སྦྱོང་གི་ཤ་ཚུགས་ཅན་ཞེས་བྱ་བ་འདི་ཡང་དེ་ཁོ་ན་དང་འདྲའོ། །ཤིང་རུལ་ཞེས་བྱ་བ་ནི་ཤིང་རུལ་བ་སྟེ། དགེ་སློང་རུལ་པར་གྱུར་པ་འདི་ཡང་དེ་དང་འདྲའོ། །དེ་ནི་བཅོམ་ལྡན་འདས་ཀྱིས་དགེ་སློང་རྣམས་ལ་ཁྱེད་ཀྱིས་
[40a.4]ཚུལ་ཁྲིམས་དང་ལྡན་པའི་དགེ་འདུན་གྱི་ནང་ནས་སྐྲོད་ཅིག་ཅེས་བཀའ་སྩལ་ཏོ། །སྙིང་པོ་མེད་པ་དོར་བར་གྱིས་ཞེས་བྱ་བ་ལ་སྙིང་པོ་མེད་པ་ཞེས་བྱ་བ་ནི་འབྲུའི་ནང་ནས་འབྲུ་ཁོང་ན་སྙིང་པོ་མེད་པ་ཁོ་ན་ཡིན་ཏེ། དགེ་སློང་གི་ཤ་ཚུགས་ཚུལ་ཁྲིམས་ཀྱི་སྙིང་པོ་མེད་པ་འདི་ཡང་དེ་དང་འདྲ་
[40a.5]སྟེ། དེ་དོར་བར་བྱ་ཞིང་དབྱུང་བར་གྱིས་ཤིག་ཅེས་བྱ་བའི་ཐ་ཚིག་གོ། །ལམ་གྱིས་རྒྱལ་ཞེས་བྱ་བ་ནི་སློབ་པ་དང་མི་སློབ་པའོ། །ལམ་སྟོན་པ་ནི་སངས་རྒྱས་སོ། །ལམ་ཕྱིར་འཚོལ་བ་ནི་དགེ་སློང་ཚུལ་ཁྲིམས་དང་ལྡན་པས་ཏེ་ལམ་གྱི་ཆེད་དུ་འཚོ་བའོ། །ལམ་སུན་འབྱིན་པ་ནི་
[40a.6]ཚུལ་ཁྲིམས་འཆལ་བ་སྟེ། འདིར་དཔེར་བརྗོད་པ་ནི་འདི་ཡིན་ནོ། །ཤིང་ཚིག་པ་ཞེས་བྱ་བ་རྒྱས་པར་འབྱུང་བ་ནི་དཔེར་ན་ཤིང་ཚིག་པ་དེ་ནི་ཤིང་མ་ཡིན་ན་ལྷག་མ་སྔོན་གྱི་ཤིང་གི་དབྱིབས་ཙམ་ཞིག་འདྲ་བའི་ཕྱིར་དེ་ལ་ཤིང་ཚིག་པ་ཞེས་བྱ་བ་དང་། མཚེའུ་སྐམས་པ་ལ་ཡང་མཚེའུ་
[40a.7]ཞེས་བྱ་བ་དང་ནེ་ཙོའི་མཆུ་ནི་གཟུགས་མཁན་གྱི་ཁྱིམ་ལ་སོགས་པའི་ནང་དུ་བྱས་པ་སྟེ། ནེ་ཙོའི་སྣ་དང་དབྱིབས་འདྲ་བའི་ཕྱིར་ནེ་ཙོའི་སྣ་ཞེས་བྱ་བ་དེ་བཞིན་དུ་འདི་ཡང་དགེ་སློང་གི་དབྱིབས་སྤྱི་ཙམ་ཞིག་ལུས་པའི་ཕྱིར་དགེ་སྦྱོང་ཞེས་གསུངས་པར་ཟད་དོ། །ས་བོན་རུལ་པ་ནི་མྱུ་གུ་སྐྱེད་པར་བྱེད་
[40b]
[40b.1]པ་མ་ཡིན་པའི་ཕྱིར་ས་བོན་མ་ཡིན་མོད་ཀྱི་དེའི་དབྱིབས་ཙམ་ཞིག་ལུས་པའི་ཕྱིར་ས་བོན་ཞེས་བྱའོ། །མགལ་མེའི་འཁོར་ལོ་ཡང་འཁོར་ལོ་དང་འདྲ་བའི་ཕྱིར་འཁོར་ལོ་ཞེས་བྱའོ། །སེམས་ཅན་ཤི་བ་ཡང་སེམས་ཅན་གྱི་ཤ་ཚུགས་ཙམ་ཞིག་ལུས་པའི་ཕྱིར་སེམས་ཅན་ཞེས་བྱ་བ་ལྟར་
[40b.2]ཡིན་ཡང་དེ་དང་འདྲ་བར་བལྟ་བར་བྱའོ། །བསླབ་པ་སྦྱིན་པ་ཞེས་བྱ་བ་ནི་དགེ་སློང་གི་འདོད་ཆགས་ཆེན་པོས་བུད་མེད་དང་མི་ཚངས་པར་སྤྱད་ནས་དེའི་མཇུག་ཐོགས་ཁོ་ནར་བདག་གིས་ཕུད་པ་བྱས་སོ་ཞེས་སྐྱོ་བ་ཤེས་ཤིང་བཅབ་པའི་སེམས་གཅིག་ཀྱང་མ་སྐྱེས་པར་དགེ་སློང་གི་དགེ་འདུན་
[40b.3]གྱི་ཐད་དུ་སོང་ནས་བདག་གིས་སྡིག་པ་བྱས་སོ་ཞེས་འཆགས་པར་བྱེད་ལ། འཕགས་པའི་དགེ་འདུན་གྱི་བཀས་དགེ་སློང་ཐམས་ཅད་པས་གཞོན་རབས་ཉིད་ཡིན་པར་བྱ་བ་ལ་སོགས་པ་ཆད་པའི་ལས་བྱེད་དུ་བཅུག་པ་དེ་ནི་བསླབ་པ་སྦྱིན་པ་ཞེས་བྱའོ། །དེ་ལ་གལ་ཏེ་འཆལ་པའི་ཚུལ་
[40b.4]ཁྲིམས་ཀྱིས་དགེ་སློང་མ་ཡིན་པ་ཁོ་ནར་འགྱུར་ན་ནི་དེ་ཡང་མེད་པར་འགྱུར་ཏེ། དེ་ནི་ཡང་བསྙེན་པར་རྫོགས་པར་མི་བྱེད་ལ། དགེ་སློང་དུ་ཡང་རྣམ་པར་འཇོག་གོ། །དེ་ལྟ་བས་ན་འཆལ་པའི་ཚུལ་ཁྲིམས་ལས་ནི་དགེ་སློང་ཉིད་མ་ཡིན་པ་མ་ཡིན་ནོ་མི་ཟེར་གྱི་ཞེས་བྱ་བ་རྒྱས་པར་འབྱུང་
[40b.5]བ་ནི་ཁོ་བོ་ཅག་ནི་ཐམས་ཅད་དང་མི་ཚངས་པར་སྤྱོད་པའི་ལྟུང་བ་འབྱུང་བའི་མདོ་ཁོ་ན་ལས་ཕས་ཕམ་པ་ཡིན་ནོ་མི་ཟེར་གྱི་འོ་ན་ཅི་ཞེ་ན། འཆལ་པའི་སེམས་ཀྱིས་ཡིན་ནོ། །ཅི་སྟེ་ཡང་རབ་ཏུ་མི་འབྱུང་ཞེས་བྱ་བ་ནི་བསླབ་པ་བཏང་ན་ཞེས་བྱ་བ་ཁོ་ནས་དབྱུང་ངོ་། །རྒྱུད་ཁྲེལ་མེད་པ་ཤས་
[40b.6]ཆེན་པོས་ཉམས་པར་བྱས་པས་ཞེས་བྱ་བ་ནི་འདིའི་རྒྱུད་ཁྲེལ་མེད་པ་ཤས་ཆེན་པོས་ཉམས་པར་བྱས་པ་ཡིན་ཏེ། རྒྱུད་དེ་ཉམས་པར་བྱས་པས་སྡོམ་པའི་སྐལ་བ་མེད་པ་ཉིད་དེའི་ཕྱིར་ཡང་རབ་ཏུ་མི་དབྱུང་ངོ་ཞེས་བྱ་བར་སྐབས་དང་སྦྱར་རོ། །དགེ་སློང་གི་དངོས་པོ་ལ་ལྟོས་ཏེ་དེ་ནི་མ་ཡིན་ནོ་ཞེས་བྱ་
[40b.7]བ་ནི་དེ་ལ་དགེ་སློང་གི་དངོས་པོ་ཡོད་དོ་ཞེས་བྱ་བ་ལ་ལྟོས་ཏེ་རབ་ཏུ་མི་དབྱུང་བ་ནི་མ་ཡིན་ནོ། །འདི་ལྟར་ཕས་ཕམ་པ་ཅན་དེ་ནི་བསླབ་པ་བཏང་ཡང་རབ་ཏུ་མི་དབྱུང་སྟེ། རྒྱུད་ཁྲེལ་མེད་པ་ཤས་ཆེན་པོས་ཉམས་པར་བྱས་པའི་ཕྱིར་རོ། །བསམ་གཏན་གཏོགས་པ་ཞེས་བྱ་བ་ནི་གཟུགས་ཅན་གྱི་ངོ་བོ་ཉིད་དང་
[41a]
[41a.1]གཟུགས་ཅན་མ་ཡིན་པའི་ངོ་བོ་ཉིད་ཀྱི་དགེ་བ་ཡིན་པར་བསམས་པ་སྟེ། དེ་ཉིད་ཀྱི་ཕྱིར་དགེ་བ་ཐམས་ཅད་ནི་ཞེས་བྱ་བ་སྨོས་པ་ཡིན་ནོ། །རྒྱུ་གཉིས་ཀྱིས་ཞེས་བྱ་བ་ནི་སྐྱེ་བ་ལས་སམ། ཉམས་པ་ལས་ཏེ་དེའི་ཕྱིར། སྐྱེ་བ་སྟེ་ཞེས་བྱ་བ་རྒྱས་པར་སྨོས་
[41a.2]སོ། །གོང་དུ་སྐྱེས་ན་ནི་འོག་མ་གཏོང་ལ་འོག་ཏུ་སྐྱེས་ན་ནི་ས་གོང་མ་པ་གཏོང་ངོ་ཞེས་བྱ་བ་ཡིན་ནོ། །སྙོམས་པར་འཇུག་པ་ལས་ཡོངས་སུ་ཉམས་པ་ལས་ནི་སྙོམས་པར་འཇུག་པ་དེས་བསྡུས་པའི་དགེ་བ་འཆོར་རོ། །རིས་མཐུན་པར་བཏང་བ་ལས་ཀྱང་ཆུང་ཟད་གཏོང་བར་འགྱུར་
[41a.3]རོ་ཞེས་བྱ་བ་ནི་སོ་སོའི་སྐྱེ་བོའི་གནས་སྐབས་ན་ངེས་པར་འབྱེད་པའི་ཆ་དང་མཐུན་པ་བཟོད་པའི་བར་སྐྱེད་པ་གང་ཡིན་པ་དེ་ནི་ས་འཕོ་བ་མེད་ཀྱང་གང་གི་ཚེ་འདོད་པའི་ཁམས་སུ་ཤི་ནས་དེ་ཉིད་དུ་སྐྱེ་བ་ནི་རིས་མཐུན་པར་བཏང་བས་གཏོང་བར་འགྱུར་ཏེ། དེ་ཇི་སྐད་དུ། འཕགས་པས་
[41a.4]དེ་དག་ས་བོར་བས། །གཏོང་འགྱུར་འཕགས་མིན་འཆི་འཕོ་བས། །ཞེས་འབྱུང་བ་ལྟ་བུའོ། །ལམ་སྔ་མ་ཞེས་བྱ་བ་ནི་རྒྱུན་དུ་ཞུགས་པའི་ལམ་སྦྱོར་བ་དང་། བར་ཆད་མེད་པ་དང་རྣམ་པར་གྲོལ་བའི་ལམ་གྱི་རང་བཞིན་ནོ། །འབྲས་བུའམ་འབྲས་བུ་ཁྱད་པར་ཅན་ཞེས་བྱ་བ་ནི་
[41a.5]ལམ་གོང་མ་ཞེས་བྱ་བར་སྦྱར་ཏེ། འདི་ལྟ་སྟེ་ཕྱིར་མི་འོང་བ་ལ་གལ་ཏེ་ཕྱིར་མི་འོང་བའི་འབྲས་བུ་ལས་ཡོངས་སུ་ཉམས་ན་ལམ་གོང་མ་ཕྱིར་མི་འོང་བའི་འབྲས་བུ་གཏོང་ངོ་། །གལ་ཏེ་ཕྱིར་མི་འོང་བ་བསམ་གཏན་གཉིས་པ་ཐོབ་ལ། དེ་ལས་ཀྱང་ཡོངས་སུ་ཉམས་ན་དེའི་ལམ་འབྲས་
[41a.6]བུ་ཁྱད་པར་ཅན་བསམ་གཏན་གཉིས་པའི་ས་པ་དེ་གཏོང་ངོ་། །རྒྱུ་དང་རྐྱེན་གྱི་སྟོབས་ཀྱིས་ཞེས་བྱ་བ་ནི་སྐལ་བ་མཉམ་པའི་རྒྱུའི་སྟོབས་དང་། གཞན་གྱི་སྨྲ་བའི་སྟོབས་ཀྱིས་ཞེས་བྱ་བའི་ཐ་ཚིག་གོ། །བསམ་གཏན་གྱི་སྡོམ་པ་ཐོབ་ན་ཞེས་བྱ་བ་ནི་ཟག་པ་མེད་པའི་སྡོམ་པ་ཐོབ་ན་ཞེས་ནི་
[41a.7]མི་བརྗོད་དོ། །བསམ་གཏན་གྱི་སྡོམ་པ་སྔར་བསྐྱེད་པ་ཁོ་ནས་དེ་བོར་ཟིན་པའི་ཕྱིར་རོ། །མི་བྱ་བའི་བསམ་པ་ཐག་པ་ནས་ཞེས་བྱ་བ་ནི་མཚོན་དང་རྒྱའི་ལས་འདི་མི་བྱའོ་སྙམ་པའི་བསམ་པ་ཐག་པས་བོར་དུ་ཟིན་ཀྱང་སྡོམ་པ་མནོད་པ་མེད་པར་སྡོམ་པ་མ་ཡིན་པ་འཆད་པར་མི་འགྱུར་རོ། །
[41b]
[41b.1]དཔེར་ན་ནད་ཀྱི་གཞི་ཡོངས་སུ་སྤངས་ཀྱང་ནད་རྙིང་དེ་སྨན་མེད་པར་མི་ཟློགས་པ་དེ་དང་འདྲ་སྟེ། འདི་སྐད་དུ་སྡོམ་པ་མ་ཡིན་པ་འདོར་བར་འདོད་ན་སྡོམ་པ་མནོད་པར་བྱའི་གཞན་དུ་ནི་མ་ཡིན་ནོ་ཞེས་བཤད་པ་ཡིན་ནོ། །དེ་འཐོབ་པ་ནི་ཞེས་བྱ་བ་ནི་སྡོམ་པ་མ་ཡིན་པ་འཐོབ་པའོ། །རྣམ་པར་རིག་
[41b.2]བྱེད་མ་ཡིན་པ་ཇི་ལྟར་གཏོང་ཞེས་བྱ་བ་ནི་རྣམ་པར་རིག་བྱེད་ཀྱང་ཞེས་བརྗོད་དགོས་ཏེ། དེ་ཉིད་ཀྱི་ཚེ་ན་རང་ཀུན་ནས་སློང་བའི་རྣམ་པར་རིག་བྱེད་འདས་པའི་འཐོབ་པ་འཆད་པའི་ཕྱིར་རོ། །བར་མ་ཤུགས་བླངས་བྱ་བ་དང་། །དོན་ཆེ་རྩ་བ་ཆད་པ་ལས། །ཞེས་ནི་ཕོའི་རྟགས་སུ་བརྗོད་པར་བྱ་
[41b.3]དགོས་ཏེ། སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་ཞེས་བྱ་བའི་ཐ་ཚིག་གོ། །འོན་ཏེ་ཡང་རྣམ་པར་རིག་བྱེད་མ་ཡིན་པ་འབའ་ཞིག་བརྗོད་པར་བྱ་བ་ཁོ་ན་ཡིན་ནོ་ཞེ་ན། རྣམ་པར་རིག་བྱེད་མ་སྨོས་པ་དེ་ལ་གཏན་ཚིགས་བརྗོད་དགོས་སོ་ཞེ་ན། བཤད་པ་རྣམ་པར་རིག་བྱེད་ཀྱི་གོ་སྐབས་
[41b.4]མེད་པའི་ཕྱིར་ཏེ། འདི་སྐད་དུ། མི་དགེ་དྲུག་ནི་རྣམ་རིག་མིན། །གཅིག་ནི་རྣམ་པ་གཉིས་ཞེས་འཆད་པར་འགྱུར་བས་རྣམ་པར་རིག་བྱེད་མ་ཡིན་པ་སྨོས་པས་རྣམ་པར་རིག་བྱེད་སྨོས་པ་འགྲུབ་པའི་ཕྱིར་དེ་མ་སྨོས་པ་ཡིན་ནོ། །གཞན་དག་ན་རེ་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་
[41b.5]ཡིན་པས་བསྡུས་པའི་རྣམ་པར་རིག་བྱེད་འགགས་པའི་ཐོབ་པ་ནི་རྗེས་སུ་འབྲེལ་བ་མེད་དེ། དེ་ཉིད་ཀྱི་ཕྱིར་རྣམ་པར་རིག་བྱེད་མ་ཡིན་པ་ཁོ་ནའི་གཏོང་བའི་རྒྱུ་བརྗོད་དོ་ཞེས་ཟེར་རོ། །རྫ་མཁན་གྱི་འཁོར་ལོ་དང་མདའི་འགྲོས་བཞིན་ནོ་ཞེས་བྱ་བ་ནི་རྫ་མཁན་གྱི་འཁོར་ལོ་དང་མདའི་འགྲོས་
[41b.6]འདུ་བྱེད་ཀྱི་ཁྱད་པར་རྒྱུ་གང་གིས་འཕངས་པ་ཡིན་པར་དེ་ཆད་པ་ཡང་འཆད་པ་དེ་དང་འདྲའོ། །ཡང་དག་པར་བླངས་པ་འདིས་ཆོག་གོ་ཞེས་བྱ་བ་ནི་འདོར་བའི་ཚིག་གིས་སོ། །ཇི་ལྟར་བླངས་པ་བཞིན་མ་བྱས་པའི་ཞེས་བྱ་བ་ནི་འདི་ལྟ་སྟེ། སངས་རྒྱས་ལ་ཕྱག་མ་བྱས་ཤིང་དཀྱིལ་འཁོར་
[41b.7]མ་བྱས་པར་ཟས་མི་ཟའོ་ཞེས་བྱ་བ་དེ་དག་མ་བྱས་པར་ཟས་ཟ་བའི་བར་མའི་རྣམ་པར་རིག་བྱེད་མ་ཡིན་པ་དེ་འཆད་དོ། །གདོས་དང་རྒྱ་ལ་སོགས་པ་ཞེས་བྱ་བའི་སྒྲས་ནི་མཚོན་དང་དུག་ལ་སོགས་པ་བསྡུའོ། །དགེ་བའི་རྩ་བ་རྣམས་ཀུན་དུ་གཅོད་པར་རྩོམ་པ་ནའོ་ཞེས་བྱ་བ་ནི་དགེ་བའི་རྩ་བ་ཀུན་
[42a]
[42a.1]དུ་གཅོད་པར་རྩོམ་པའི་གནས་སྐབས་ཁོ་ན་ནི་འཆད་ཀྱི་ཀུན་དུ་ཆད་པའི་གནས་སྐབས་ན་ནི་མ་ཡིན་ནོ་ཞེས་སྟོན་པར་བྱེད་དོ། །དགེ་བའི་གཟུགས་མིན་ཞེས་བྱ་བ་ལ་གཟུགས་མིན་ཞེས་བྱ་བ་སྨོས་པ་ནི་གཟུགས་ཅན་གྱི་འཆད་པ་ནི་བཤད་ཟིན་པའི་ཕྱིར་རོ། །རྩ་
[42a.2]ཆད་གོང་དུ་སྐྱེས་པ་ལས། །ཞེས་བྱ་བ་འདིར་ནི་འདོད་ཆགས་དང་བྲལ་བ་ལས་ཀྱང་ཆུང་ཟད་ཅིག་གཏོང་ངོ་ཞེས་བརྗོད་དགོས་ཏེ། དཔེར་ན་ཡིད་མི་བདེ་བའི་དབང་པོ་དགེ་བ་ལྟ་བུའོ། །ཐམས་ཅད་ཅེས་བྱ་བ་ནི་འདོད་པ་དང་གཟུགས་དང་གཟུགས་མེད་པ་ན་སྤྱོད་པའོ། །སྤོང་བའི་
[42a.3]ལམ་གང་ཡིན་པ་ཞེས་བྱ་བ་ནི་ཅི་རིགས་པར་མཐོང་བའི་ལམ་དང་བསྒོམ་པའི་ལམ་མམ། འཇིག་རྟེན་པ་དང་འཇིག་རྟེན་ལས་འདས་པའི་ལམ་མོ། །འདི་འཁོར་དང་བཅས་པ་ཞེས་བྱ་བ་ནི་ཉེ་བའི་ཉོན་མོངས་པའི་རྣམ་པ་འདི་དེ་དང་ལྷན་ཅིག་འབྱུང་བ་འཐོབ་པ་ལ་སོགས་པ་
[42a.4]རྗེས་སུ་འབྲང་བ་དང་བཅས་པའོ། །ཉེ་བའི་ཉོན་མོངས་པའི་རྣམ་པ་ཞེས་སྨོས་པ་ནི་ཉོན་མོངས་པ་ཡང་ཉེ་བའི་ཉོན་མོངས་པ་ཉིད་ཡིན་པས་ཐམས་ཅད་བསྡུ་བའི་ཕྱིར་ཏེ། འདི་ལྟར་བསྟན་བཅོས་ལས་རེ་ཞིག་ཉོན་མོངས་པ་གང་དག་ཡིན་པ་དེ་དག་ནི་ཉེ་བའི་ཉོན་མོངས་པ་ཡང་ཡིན་
[42a.5]ཏེ། ཉེ་བའི་ཉོན་མོངས་པ་ཡིན་ལ་ཉོན་མོངས་པ་མ་ཡིན་པ་ཡང་ཡོད་དོ་ཞེས་བཤད་དོ། །རྟེན་གཉི་གའི་ཉོན་མོངས་པ་ཞེས་བྱ་བ་རྒྱས་པར་འབྱུང་བ་ནི་སྐྱེས་པ་དང་བུད་མེད་ཀྱི་རྟེན་ཅན་གྱི་ཉོན་མོངས་པ་ཤས་ཆེ་བའི་ཕྱིར་དང་། དེའི་གཉེན་པོ་བསྒོམ་པའི་མཚན་ཉིད་ཀྱི་སོ་སོར་རྟོག་པ་མི་བཟོད་
[42a.6]པའི་ཕྱིར་དང་ངོ་ཚ་ཤེས་པ་དང་། ཁྲེལ་ཡོད་པ་ཤས་ཆེན་པོ་མེད་པའི་ཕྱིར་དེ་དག་ལ་སྡོམ་པ་མེད་དོ། །གཉེན་པོར་གྱུར་པའི་ཕྱིར་ཞེས་བྱ་བ་ནི་གང་གི་ཕྱིར། སྡོམ་པ་ནི་སྡོམ་པ་མ་ཡིན་པའི་གཉེན་པོར་གྱུར་པ་དེའི་ཕྱིར་གང་ལ་སྡོམ་པ་ཡོད་པ་དེ་ཁོ་ན་ལ་སྡོམ་པ་མ་ཡིན་པ་མེད་དེ། འདི་ནི་ཟ་མ་
[42a.7]ལ་སོགས་པ་ལ་སྡོམ་པ་མ་ཡིན་པ་མེད་པའི་གཏན་ཚིགས་གཉིས་པ་ཡིན་ནོ། །ཡང་དག་པར་ལེན་པ་དང་ཏིང་ངེ་འཛིན་མེད་པའི་ཕྱིར་ཞེས་བྱ་བ་ནི་ཡང་དག་པར་ལེན་པ་མེད་པའི་ཕྱིར་སོ་སོར་ཐར་པའི་སྡོམ་པ་མེད་ལ། ཏིང་ངེ་འཛིན་མེད་པའི་ཕྱིར་བསམ་གཏན་དང་ཟག་པ་མེད་པའི་སྡོམ་པ་དག་མེད་དོ། །
[42b]
[42b.1]དེ་མེད་པ་ནི་དགེ་བ་དག་ལ་ཞེན་པས་མི་སྐྱེ་བའི་ཕྱིར་རོ། །སྡིག་པ་བྱ་བའི་བསམ་པ་མེད་པའི་ཕྱིར་སྡོམ་པ་མ་ཡིན་པ་མེད་དོ། །གང་དང་ལྡན་པ་དང་གང་མེད་པས་ཞེས་བྱ་བ་ནི་ངན་སོང་བ་རྣམས་ལ་ངོ་ཚ་ཤེས་པ་དང་། ཁྲེལ་ཡོད་པ་གང་དང་ལྡན་པ་དང་། ངོ་ཚ་ཤེས་པ་དང་ཁྲེལ་ཡོད་པ་
[42b.2]གང་མེད་པས་གོ་རིམས་བཞིན་དུ་སྡོམ་པ་དང་སྡོམ་པ་མ་ཡིན་པ་དག་ཏུ་འགྱུར་བའི་ངོ་ཚ་ཤེས་པ་དང་ཁྲེལ་ཡོད་པ་ཤས་ཆེན་པོ་དེ་མེད་པས་སོ། །གལ་ཏེ་ངན་སོང་བ་རྣམས་ལ་སྡོམ་པ་དང་སྡོམ་པ་མ་ཡིན་པ་དག་མེད་ན། འོ་ན་མདོ་ལས་གང་གསུངས་པ་ཞེས་བྱ་བ་དེ་ཇི་ལྟ་བུ་ཞེ་ན་ཞེས་བྱ་བ་
[42b.3]ལ་སོགས་པའོ། །དུས་རེ་ཞིག་དང་གཏན་དུ་ཞེས་བྱ་བ་ནི་འབྲས་བུ་ཡིད་དུ་འོང་བ་ཅན་གང་ཞིག་ཡིན་པ་དེ་ནི་དུས་རེ་ཞིག་སྡུག་བསྔལ་ལས་ཡོངས་སུ་སྐྱོབ་པའི་ཕྱིར་བདེ་བ་ཡིན་ལ། མྱ་ངན་ལས་འདས་པ་ཐོབ་པ་གང་ཡིན་པ་དེ་ནི་གཏན་དུ་སྡུག་བསྔལ་ལས་ཡོངས་སུ་སྐྱོབ་པའི་ཕྱིར་བདེ་བ་
[42b.4]ཡིན་ཏེ། ཡོངས་སུ་མྱ་ངན་ལས་འདས་པ་ལ་ནི་རྟག་ཏུ་སྡུག་བསྔལ་མེད་དོ། །བཅོམ་ལྡན་འདས་ཀྱིས་འདི་ལ་རྣམ་པར་བརྟགས་པ་དང་རྣམ་པར་དཔྱད་པ་གང་ཡིན་པ་དེ་ནི་འདིར་འཕགས་པ་རྣམས་ཀྱི་གཡོ་བའོ་ཞེས་གསུངས་སོ་ཞེས་བྱ་བ་དེ་ལྟ་བུ་ལ་སོགས་པ་བསམ་གཏན་གསུམ་པོ་གཡོ་བ་དང་
[42b.5]བཅས་པར་གསུངས་པ་མ་ཡིན་ནམ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་བསམ་གཏན་གཉིས་པ་ལ་འདི་ལ་དགའ་བ་དང་མ་བྲལ་བ་གང་ཡིན་པ་འདི་ནི་འདིར་འཕགས་པ་རྣམས་ཀྱི་གཡོ་བའོ་ཞེས་གསུངས་སོ་ཞེས་བཤད་པ་དང་གསུམ་པ་ལ་ཡང་འདི་ལ་བདེའོ་བདེའོ་སྙམ་དུ་སེམས་ཀྱི་གཏོང་བ་གང་ཡིན་
[42b.6]པ་འདི་ནི་དེར་འཕགས་པ་རྣམས་ཀྱི་གཡོ་བའོ་ཞེས་གསུངས་སོ་ཞེས་བཤད་པ་བསྡུའོ། །ཡང་ཅིའི་ཕྱིར་འདིར་གཟུགས་དང་གཟུགས་མེད་པ་ན་སྤྱོད་པའི་ལས་དགེ་བ་ཐམས་ཅད་མི་གཡོ་བ་ཉིད་ཅེས་བྱ་ཞེ་ན། མི་གཡོ་བ་དང་མཐུན་པར་འགྲོ་བའི་ལམ་ཞེས་བྱ་བ་སྨོས་ཏེ། མི་གཡོ་བ་དང་རྗེས་སུ་
[42b.7]མཐུན་པར་འགྲོ་བའི་ལམ་ལས་བརྩམས་ཏེ་ཞེས་བྱ་བའི་ཐ་ཚིག་གོ། །ཡང་ཅིའི་ཕྱིར་ཏིང་ངེ་འཛིན་གྱི་སྐྱོན་དང་བཅས་པ་ཉིད་ཀྱི་གཡོ་བ་དང་བཅས་པ་ཁོ་ན་གཞན་དུ་མི་གཡོ་བར་གསུངས་ཤེ་ན། གང་ཕྱིར་ས་ནི་དེ་དག་ཏུ། །ལས་རྣམས་སྨིན་ཕྱིར་མི་གཡོའི་ཕྱིར། །ཞེས་བྱ་བ་སྨོས་སོ། །ལོངས་སྤྱོད་
[43a]
[43a.1]ལ་སོགས་པར་འགྱུར་ཞེས་བྱ་བ་ལོངས་སྤྱོད་པ་ནི་ནོར་ཕུན་སུམ་ཚོགས་པའོ། །སོགས་པ་ཞེས་བྱ་བའི་སྒྲས་ནི་གཟུགས་བཟང་བ་དང་སྐད་སྙན་པ་ལ་སོགས་པ་བསྡུའོ། །དེ་ཉིད་ཅེས་བྱ་བ་རྒྱས་པར་འབྱུང་བ་ནི་ལྷ་དག་གི་ནང་དུ་རྣམ་པར་སྨིན་པར་གྱུར་པ་གང་
[43a.2]ཡིན་པ་དེ་ཉིད་རེས་འགའ་རྐྱེན་གཞན་གྱི་དབང་གིས་ཏེ། ཉོན་མོངས་པ་ལ་སོགས་པའི་རྐྱེན་གཞན་ཚོགས་པ་དེའི་དབང་གིས་མི་དང་དུད་འགྲོ་དང་ཡི་དགས་དག་གི་ནང་དུ་རྣམ་པར་སྨིན་པར་འགྱུར་ཏེ། འདི་ལྟ་སྟེ། འདི་ནི་ལ་ལ་སྦྱིན་པ་པོ་ཡིན་ཞིང་སྦྱིན་བདག་ཡིན་ལ་དེ་ཡང་ཤིན་ཏུ་སྲོག་
[43a.3]གཅོད་པ་ཡིན་ཞེས་བྱ་བ་རྒྱས་པར་དེ་གླང་པོ་ཆེར་གྱུར་ན་གླང་པོ་ཆེའི་རྒྱན་རྣམ་པ་སྣ་ཚོགས་དག་ཐོབ་པར་འགྱུར་རོ་ཞེས་བྱ་བ་ལ་སོགས་པའི་བར་གསུངས་པ་དང་། ཡང་འདི་ལྟ་སྟེ། འདི་ནི་ལ་ལས་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང་། དེ་བཞིན་དུ་ཚུལ་ཁྲིམས་ལས་
[43a.4]བྱུང་བ་དང་། བསྒོམ་པ་ལས་བྱུང་བ་ཆུང་ངུ་ཀུན་དུ་བརྟེན་ཞིང་བསྒོམ་པ་དང་ལན་མང་དུ་བྱས་པ་ཡིན་ལ། དེ་འདི་སྙམ་དུ་བདག་ལྷ་བཟང་པོ་རྣམས་སམ། མི་བཟང་པོ་རྣམས་དང་སྐལ་བ་མཉམ་པར་སྐྱེ་བར་གྱུར་ན་ཅི་མ་རུང་སྙམ་དུ་སེམས་ན་ཞེས་བྱ་བ་ནས་དེ་ནི་དེར་སྐྱེའོ་ཞེས་བྱ་བའི་བར་
[43a.5]གསུངས་སོ། །འདོད་པའི་ཁམས་དང་བསམ་གཏན་གསུམ་མོ་ཞེས་བྱ་བ་ནི་འདོད་པའི་ཁམས་དང་བསམ་གཏན་དང་པོ་དག་ན་ནི་བདེ་བའི་ཚོར་བ་ལུས་ཀྱི་བདེ་བ་དང་སེམས་ཀྱི་ཡིད་བདེ་བ་ཡིན་ནོ། །བསམ་གཏན་གཉིས་པ་ན་ནི་བདེ་བའི་ཚོར་བ་ཡིད་བདེ་བ་ཡིན་ནོ། །གསུམ་པ་ན་ནི་
[43a.6]སེམས་ཀྱི་བདེ་བ་ཡིན་ནོ། །དེ་ཡོད་པར་བསྟན་པའི་ཕྱིར་རོ་ཞེས་བྱ་བ་ལ། དེ་ཞེས་བྱ་བའི་སྒྲ་ནི་སྡུག་བསྔལ་དང་སྦྱར་ཏེ། སྡུག་བསྔལ་དེ་འདོད་པའི་ཁམས་ཁོ་ན་ན་ཡོད་པ་ཉིད་དུ་ཤེས་པར་བྱ་བའི་ཕྱིར་འདིའི་ཞེས་བྱ་བ་སྨོས་སོ། །ཚོགས་དང་བཅས་པ་ཡིན་ནོ་ཞེས་བྱ་བ་ནི་འདིས་
[43a.7]ཚོགས་པར་བྱེད་ཅིང་སྐྱེད་པར་བྱེད་པས་ན་ཚོགས་དེ་དབང་པོ་དང་ཡུལ་དང་རྟེན་གྱི་མཚན་ཉིད་དོ། །དེའི་ཕྱིར་འབྲས་བུ་ནི་ཚོར་བ་ཚོགས་པ་དང་བཅས་པ་ཡིན་ནོ། །བསམ་གཏན་ཁྱད་པར་རྣམ་སྨིན་ལས། །ཞེས་བྱ་བ་ནི་བསམ་གཏན་ཁྱད་པར་ཅན་གྱི་ལས་ཀྱི་རྣམ་པར་སྨིན་པའི་ཚོར་བ་ནི་བསམ་
[43b]
[43b.1]གཏན་ཁྱད་པར་ཅན་དུ་སྐྱེས་པ་ན་ཚོར་བ་ཡོད་པར་བྱ་དགོས་ལ། དེ་ན་ཡང་བདེ་བ་འམ་སྡུག་བསྔལ་གྱི་ཚོར་བ་མེད་དེ། དེ་ལྟ་བས་ན་འདིའི་རྣམ་པར་སྨིན་པ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་ཡིན་པས་བསམ་གཏན་བཞི་པ་མན་ཆད་ན་ཡང་བདེ་བ་ཡང་མ་ཡིན་
[43b.2]སྡུག་བསྔལ་ཡང་མ་ཡིན་པ་མྱོང་བར་འགྱུར་བའི་ལས་ཡོད་དོ་ཞེས་བྱ་བར་མངོན་ནོ། །ལས་གཞན་གང་གིས་ཀྱང་བསམ་གཏན་ཁྱད་པར་ཅན་དུ་ཚོར་བ་རྣམ་པར་སྨིན་པར་མི་འགྱུར་ཞིང་མི་སྲིད་དེ། བསམ་གཏན་ཁྱད་པར་ཅན་ལ་ཡོད་པ་དེ་ནི་དངོས་གཞི་བསམ་གཏན་དང་པོའི་ས་པའི་
[43b.3]ལས་བདེ་བ་མྱོང་བར་འགྱུར་བའི་རྣམ་པར་སྨིན་པར་འགྱུར་བ་ཡིན་ཞེས་བརྗོད་པར་རུང་བ་མ་ཡིན་ཏེ། དངོས་གཞི་ནི་རྟོག་པ་དང་བཅས་པ་ཉིད་ཀྱིས་བསམ་གཏན་ཁྱད་པར་ཅན་པས་དམན་པའི་ཕྱིར་རོ། །འདོད་པ་ན་སྤྱོད་པའི་ལས་སྡུག་བསྔལ་མྱོང་བར་འགྱུར་བ་ཡང་མ་ཡིན་ཏེ། ས་ཐ་དད་པའི་ཕྱིར་
[43b.4]རོ། །དེ་ཉིད་ཀྱི་ཕྱིར་དང་དེ་ལས་འདོད་ཆགས་དང་བྲལ་བའི་ཕྱིར་བསམ་གཏན་བཞི་པ་ལ་སོགས་པའི་ཡང་མ་ཡིན་ནོ། །ཉེས་པ་འདི་ཡོངས་སུ་སྤང་བར་འདོད་ནས། ཁ་ཅིག་ན་རེ་བསམ་གཏན་ཁྱད་པར་ཅན་གྱི་ལས་ཀྱི་རྣམ་པར་སྨིན་པ་ནི་བསམ་གཏན་གྱི་བདེ་བའི་དབང་པོ་ཁོ་ན་ཡིན་ནོ་ཞེས་ཟེར་
[43b.5]ཞིང་སྨྲའོ། །གཞན་དག་ན་རེ་དེའི་རྣམ་པར་སྨིན་པའི་ཚོར་བ་མེད་པ་ཉིད་དོ། །འོ་ན་ཅི་ཞེ་ན་གཟུགས་ལ་སོགས་པ་ཡིན་ནོ་ཞེས་ཟེར་རོ། །ཅི་དེ་དག་གི་ལྟར་ན་བསམ་གཏན་ཁྱད་པར་ཅན་དུ་སྐྱེས་པ་ལ་ཚོར་བ་མེད་དམ་ཞེ་ན། ཡོད་མོད་ཀྱི་དེ་རྣམ་པར་སྨིན་པའི་ངོ་བོ་ཉིད་ནི་མ་ཡིན་ནོ། །འོ་
[43b.6]ན་ཅི་ཞེ་ན། རྒྱུ་མཐུན་པ་ལས་བྱུང་བ་ཡིན་ནོ་ཞེས་ཟེར་རོ། །སློབ་དཔོན་གྱིས་འདི་ནི་བསྟན་བཅོས་དང་འགལ་བ་ཡིན་ནོ་ཞེས་བྱ་བ་སྨོས་ཏེ། བསམ་གཏན་ཁྱད་པར་ཅན་གྱི་ལས་ཀྱི་རྣམ་པར་སྨིན་པ་བསམ་གཏན་གྱི་བདེ་བའི་དབང་པོ་ཁོ་ན་ཡིན་ནོ་ཞེས་སྨྲས་པ་གང་ཡིན་པ་དང་། དེའི་
[43b.7]རྣམ་པར་སྨིན་པ་ཚོར་བ་མེད་པ་ཉིད་དོ་ཞེས་སྨྲས་པ་གང་ཡིན་པ་དེ་གཉི་ག་ཡང་བསྟན་བཅོས་དང་འགལ་བ་ཡིན་ཏེ་དེ་བསྟན་པའི་ཕྱིར་བསྟན་བཅོས་ལས་འབྱུང་ངོ་ཞེས་བྱ་བ་རྒྱས་པར་སྨོས་ཏེ། རྟོག་པ་མེད་པའི་ལས་ཞེས་བྱ་བ་ནི་བསམ་གཏན་ཁྱད་པར་ཅན་གྱི་ལས་ཞེས་བྱ་བའི་ཐ་ཚིག་གོ། །
[44a]
[44a.1]དེའི་ཕྱིར་རྟོག་པ་མེད་པའི་ལས་དགེ་བའི་རྣམ་པར་སྨིན་པ་ནི་སེམས་ཀྱི་ཚོར་བ་ཁོ་ན་རྣམ་པར་སྨིན་པར་འགྱུར་རོ་ཞེས་ངེས་པར་གཟུང་བའི་ཕྱིར་ལས་དེའི་རྣམ་པར་སྨིན་པ་ནི་བསམ་གཏན་གྱི་བདེ་བའི་དབང་པོ་ཁོ་ན་ཡང་མ་ཡིན་ལ་ཚོར་བ་ལས་གཞན་ཡང་མ་ཡིན་
[44a.2]ནོ་ཞེས་བྱ་བར་མངོན་ཏེ། རྣམ་པར་རྟོག་པ་མེད་པའི་ལས་ནི་བསམ་གཏན་ཁྱད་པར་ཅན་ནས་བཟུང་བ་ཡན་ཆད་ན་ཡོད་དོ། །སྔ་ཕྱི་མེད་ཅེས་བྱ་བ་ནི་སྔར་ཡང་མ་ཡིན་ལ་ཕྱིས་ཀྱང་མ་ཡིན་ལ་ཅིག་ཅར་ཞེས་བྱ་བའི་ཐ་ཚིག་གོ། །བདེ་བ་མྱོང་བར་འགྱུར་བ་ནི་གཟུགས་སོ་ཞེས་བྱ་བ་ནི་
[44a.3]མིག་ལ་སོགས་པའོ། །སྡུག་བསྔལ་མྱོང་བར་འགྱུར་བ་ནི་སེམས་དང་སེམས་ལས་བྱུང་བའི་ཆོས་རྣམས་སོ་ཞེས་བྱ་བ་ནི་རྣམ་པར་ཤེས་པའི་ཚོགས་ལྔ་སྟེ། ཡིད་མི་བདེ་བ་ནི་རྣམ་པར་སྨིན་པ་མ་ཡིན་པའི་ཕྱིར་རོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་མྱོང་བར་
[44a.4]འགྱུར་བ་ནི་ལྡན་པ་ཙམ་ཡིན་པ་སྟེ་ཞེས་བྱ་བ་ནི་སྲོག་གི་དབང་པོ་ལ་སོགས་པའོ། །འདོད་པའི་ཁམས་ལས་གཞན་ན་ནི་མེད་དོ་ཞེས་བྱ་བ་ནི་གཞན་ན་སྡུག་བསྔལ་མྱོང་བར་འགྱུར་བའི་ལས་མེད་པའི་ཕྱིར་རོ། །ད་ནི་ཅི་ལས་དེ་ཞེས་བྱ་བ་ནི་བདེ་བ་ཡང་མ་ཡིན་སྡུག་བསྔལ་བ་ཡང་
[44a.5]མ་ཡིན་པ་མྱོང་བར་འགྱུར་བའོ། །དེ་ལྟ་ན་ནི་འོ་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་བསམ་གཏན་བཞི་པ་མན་ཆད་ན་ཡང་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་མྱོང་བར་འགྱུར་བ་ལས་དགེ་བ་ཡོད་ན། བསམ་གཏན་གསུམ་པའི་བར་དགེ་བ། བདེ་བ་མྱོང་འགྱུར་
[44a.6]ཞེས་བྱ་བ་འདི་དང་འགལ་ཏེ་བསམ་གཏན་གསུམ་པའི་བར་ན་བདེ་བ་མྱོང་བར་གྱུར་པའི་ལས་དགེ་བ་ཡོད་པ་འབའ་ཞིག་ཏུ་ནི་མ་ཟད་དོ། །འོ་ན་ཅི་ཞེ་ན། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་མྱོང་བར་འགྱུར་བའང་ཡོད་དོ། །རྣམ་པར་སྨིན་པ་ཡིད་དུ་འོང་བ་ནི་དགེ་བ་ཡིན་
[44a.7]ནོ་ཞེས་བྱ་བ་འདི་དང་ཡང་འགལ་ཏེ། རྣམ་པར་སྨིན་པ་ཡིད་དུ་འོང་བ་ཅན་འབའ་ཞིག་དགེ་བ་ཡིན་པར་མ་ཟད་ཀྱི་རྣམ་པར་སྨིན་པ་ཡིད་དུ་འོང་བ་དང་ཡིད་དུ་མི་འོང་བ་ལས་བཟློག་པ་ཅན་གྱི་དགེ་བ་ཡང་ཡོད་པས་སོ། །དེ་ནི་ཕལ་ཆེ་བ་བསྟན་པ་ཡིན་ཞེས་བྱ་བ་ནི་བསམ་གཏན་
[44b]
[44b.1]གསུམ་པའི་བར་དགེ་བ། བདེ་བ་མྱོང་འགྱུར་བ་ཞེས་བྱ་བ་དང་རྣམ་པར་སྨིན་པ་ཡིད་དུ་འོང་བ་ནི་དགེ་བ་ཡིན་ནོ་ཞེས་བྱ་བ་ནི་ཕལ་ཆེ་བས་དེ་སྐད་དུ་བསྟན་པར་ཟད་དོ་ཞེས་བྱ་བའི་ཐ་ཚིག་གོ། །ཇི་ལྟར་ན་ཚོར་བའི་རང་བཞིན་མ་ཡིན་པའི་ལས་ཞེས་བྱ་བ་ནི་བདེ་བ་ཉམས་སུ་མྱོང་བར་
[44b.2]འགྱུར་གྱི་ལས་ནི་མ་ཡིན་པའི་དོན་འདི་ཡིན་པར་བརྟགས་ནས་འདྲི་བ་ཡིན་ནོ། །བདེ་བ་མྱོང་བར་འགྱུར་བ་དང་མཐུན་པ་ཞེས་བྱ་བ་ནི་བདེ་བའི་ཚོར་བ་སྐྱེ་བ་དང་མཐུན་པ་ཞེས་བྱ་བའི་ཐ་ཚིག་གོ། །འདིའི་བདེ་བ་མྱོང་བར་བྱ་བ་ཡིན་པས་ཞེས་བྱ་བ་ནི་འདིའི་རྣམ་པར་སྨིན་པ་བདེ་བ་ཉམས་སུ་མྱོང་
[44b.3]བར་བྱ་བ་ཡིན་པས་ཞེས་བྱ་བའི་དོན་ཏོ། །འཁྲུ་བར་བྱེད་པའི་འདག་པའི་ཆལ་བཞིན་ནོ་ཞེས་བྱ་བ་ནི་དཔེར་ན་གང་གིས་འཁྲུ་བར་བྱེད་པའི་འདག་པའི་ཆལ་ཡིན་པ་དེ་བཞིན་དུ་གང་གིས་བདེ་བའི་རྣམ་པར་སྨིན་པ་མྱོང་བར་བྱེད་པའི་ལས་དེ་ནི་བདེ་བ་མྱོང་བར་འགྱུར་བ་སྟེ། བདེ་བའི་རྣམ་པར་
[44b.4]སྨིན་པ་མྱོང་བར་འགྱུར་བའི་ལས་ནི་བདེ་བ་མྱོང་བར་འགྱུར་བའོ། །སྡུག་བསྔལ་མྱོང་བར་འགྱུར་བ་ཡང་དེ་བཞིན་དུ་བལྟ་བར་བྱའོ་ཞེས་བྱ་བ་ནི་སྡུག་བསྔལ་མྱོང་བར་གྱུར་པ་དང་མཐུན་པ་ནི་སྡུག་བསྔལ་མྱོང་བར་འགྱུར་བའོ་ཞེས་བྱ་བ་རྒྱས་པར་སྔ་མ་བཞིན་དུ་སྦྱར་ཏེ། བདེ་བ་ཡང་མ་ཡིན་སྡུག་
[44b.5]བསྔལ་བ་ཡང་མ་ཡིན་པ་མྱོང་བར་འགྱུར་བ་ཡང་དེ་དང་འདྲའོ། །ངོ་བོ་ཉིད་ཀྱིས་མྱོང་བར་འགྱུར་བ་ཞེས་བྱ་བ་ནི་ཉམས་སུ་མྱོང་བའི་མཚན་ཉིད་ཀྱི་ངོ་བོ་ཉིད་ཀྱིས་མྱོང་བར་འགྱུར་བ་ནི་ངོ་བོ་ཉིད་ཀྱིས་མྱོང་བར་འགྱུར་བ་སྟེ། དེ་བཞིན་དུ་མངོན་སུམ་དུ་གྱུར་པས་མྱོང་བར་འགྱུར་བ་ནི་ཞེས་བྱ་བའི་བར་དུ་སྦྱར་
[44b.6]རོ། །བདེ་བ་མྱོང་བར་འགྱུར་བའི་རེག་པ་ཞེས་བྱ་བ་ནི་བདེ་བའི་ཚོར་བ་དང་མཐུན་པ་འམ་འདི་ལ་བདེ་བ་མྱོང་བར་འགྱུར་བ་ཡོད་པས་ན་བདེ་བ་མྱོང་བར་འགྱུར་བའི་རེག་པའོ། །དམིགས་པ་མྱོང་བར་འགྱུར་བ་ཞེས་བྱ་བ་ནི་མྱོང་བར་བྱ་བའི་ཡུལ་ཏེ་དམིགས་པར་བྱ་བ་ཞེས་བྱ་བའི་ཐ་ཚིག་གོ། །
[44b.7]གཟུགས་སོ་སོར་ཡང་དག་པར་མྱོང་བར་འགྱུར་གྱི་གཟུགས་ལ་འདོད་ཆགས་སོ་སོར་ཡང་དག་པར་མྱོང་བ་ནི་མ་ཡིན་ནོ་ཞེས་བྱ་བ་ནི་གཟུགས་སོ་སོར་ཉམས་སུ་མྱོང་བར་འགྱུར་གྱི་གཟུགས་ཀྱི་འདོད་ཆགས་སོ་སོར་ཉམས་སུ་མྱོང་བ་ནི་མ་ཡིན་ནོ་ཞེས་བྱ་བའི་དོན་ཏོ། །ཡང་ན་འདོད་ཆགས་ཀྱི་
[45a]
[45a.1]གཟུགས་སོ་སོར་ཉམས་སུ་མྱོང་ཞིང་དམིགས་པ་ནི་མ་ཡིན་ནོ་ཞེས་བྱ་བ་ཡིན་ནོ། །མཐོང་བའི་ཆོས་ལ་མྱོང་བར་འགྱུར་བ་ཞེས་བྱ་བ་ནི་འདི་ལ་མཐོང་བའི་ཚེ་ལ་མྱོང་བར་འགྱུར་བའི་རྣམ་པར་སྨིན་པའི་མཚན་ཉིད་ཡོད་པས་ན་མཐོང་བའི་ཆོས་ལ་མྱོང་བར་འགྱུར་བའི་
[45a.2]ལས་ཞེས་བྱ་བ་རྒྱས་པར་འབྱུང་བ་ཡིན་ནོ། །གང་གི་ཚེ་ཞེས་བྱ་བ་རྒྱས་པར་འབྱུང་བ་ནི་གང་གི་ཚེ་བདེ་བའི་ཚོར་བ་མྱོང་བར་བྱེད་ཅིང་ཉམས་སུ་མྱོང་བར་བྱེད་པ་དེའི་ཚེ་དེའི་ཚོར་བ་གཉིས་པོ་སྡུག་བསྔལ་བ་དང་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་འགག་པར་འགྱུར་རོ། །
[45a.3]རྩོམ་པའི་དབང་གིས་ཞེས་བྱ་བ་ནི་མཐོང་བའི་ཆོས་ཁོ་ན་ལ་རྣམ་པར་སྨིན་པའི་མགོ་ཟུག་ཅེས་བྱ་བའི་ཐ་ཚིག་གོ། །མིང་དེ་རྣམ་པར་གཞག་གོ་ཞེས་བྱ་བ་ནི་མཐོང་བའི་ཆོས་ལ་མྱོང་བར་འགྱུར་བ་ཞེས་དེ་སྐད་དུ་མིང་རྣམ་པར་གཞག་གོ་ཞེས་བྱ་བའི་དོན་ཏོ། །ལས་ཀྱང་ཡོད་ཅེས་བྱ་བ་རྒྱས་
[45a.4]པར་འབྱུང་བ་ལ་ལས་འབྲས་བུ་ཉེ་བ་ཅན་གྱི་དཔེ་ནི་ལྕམ་པ་ལ་སོགས་པའོ། །འབྲས་བུ་རིང་བ་ཅན་གྱི་ནི་ནས་དང་གྲོ་ལ་སོགས་པའོ། །དཔེས་སྟོན་པ་རྣམས་ནི་མདོ་སྡེ་པ་རྣམས་ཏེ། དེ་ལྟར་མུ་དང་པོ་དང་གཉིས་པ་དག་རྗོད་པར་བྱེད་པ་དེ་དག་གི་ལྟར་ན་ལས་རྣམ་པ་བརྒྱད་དེ། རྣམ་
[45a.5]པར་སྨིན་པའི་ཕྱིར་མཐོང་བའི་ཆོས་ལ་མྱོང་བར་འགྱུར་བར་ངེས་པ་དང་མ་ངེས་པའོ། །མྱོང་བར་འགྱུར་བར་མ་ངེས་པའི་བར་དུ་ཡང་དེ་དང་འདྲའོ་ཞེས་བྱ་བ་ནི་རྣམ་པར་སྨིན་པའི་ཕྱིར་སྐྱེས་ནས་མྱོང་བར་འགྱུར་བར་ངེས་པ་དང་མ་ངེས་པ་དང་། ལན་གྲངས་གཞན་ལ་མྱོང་བར་འགྱུར་བར་ངེས་པ་
[45a.6]དང་མ་ངེས་པ་དང་། མྱོང་བར་འགྱུར་བར་མ་ངེས་པ་མཐོང་བའི་ཆོས་ལ་སོགས་པ་ལ་མྱོང་བར་འགྱུར་བར་མ་ངེས་པ་གང་ཡིན་པ་དེ་ཡང་ངེས་པ་དང་མ་ངེས་པ་སྟེ། རྣམ་པ་བརྒྱད་ཡིན་ནོ། །ལས་རྣམ་པ་བཞི་འཕེན་པར་འགྱུར་བ་ཞེས་བྱ་བ་ནི་མཐོང་བའི་ཆོས་ལ་མྱོང་བར་འགྱུར་བ་ལ་སོགས་པའི་
[45a.7]ལས་རྣམ་པ་བཞི་འཕེན་པར་འགྱུར་བ་ཞེས་བྱ་བའི་ཐ་ཚིག་གོ། །ཇི་ལྟ་ཞེ་ན་སྨྲས་པ་ཡོད་དེ། ཕ་རོལ་པོ་སྲོག་གཅོད་པ་དང་མ་བྱིན་པར་ལེན་པ་དང་། བརྫུན་དུ་སྨྲ་བ་གསུམ་ལ་སྦྱར་ནས་བདག་ཉིད་རང་འདོད་པས་ལོག་པར་གཡེམ་པ་ལ་ཞུགས་ཏེ། ལས་དེ་དག་ཅིག་ཅར་མཐར་ཕྱིན་
[45b]
[45b.1]པར་གྱུར་ན་སྟེ། གཅིག་ནི་མཐོང་བའི་ཆོས་ལ་མྱོང་བར་འགྱུར་བ་ཡིན་ལ། གཅིག་ནི་སྐྱེས་ནས་མྱོང་བར་འགྱུར་བ་ཡིན། གཅིག་ནི་ལན་གྲངས་གཞན་ལ་མྱོང་བར་འགྱུར་བ་ཡིན། གཅིག་གིས་ནི་མྱོང་བར་འགྱུར་བ་མ་ངེས་པ་ཡིན་ནའོ། །དགེ་བ་དང་མི་དགེ་བ་རྣམས་ཅི་རིགས་
[45b.2]པར་ཞེས་བྱ་བ་ནི་གང་ན་མི་དགེ་བ་སྲིད་པ་སྟེ། འདོད་པའི་ཁམས་ཁོ་ན་ན་ཡོད་ཀྱི་གཞན་ན་ནི་མེད་དོ། །འགྲོ་བ་ཐམས་ཅད་ན་ཞེས་བྱ་བ་སྤྱིར་བསྟན་པ་འདི་དམིགས་ཀྱིས་བསྟན་པ་ནི་འདི་ཡིན་ཏེ། དམྱལ་བ་ན་ནི་དགེ་བ་གསུམ། །ཞེས་བྱ་བ་སྟེ་རྣམ་པ་གསུམ་མོ་ཞེས་ངེས་པར་
[45b.3]གཟུང་བ་ཡིན་ནོ། །དམྱལ་བ་དག་ན་ནི་ལས་དགེ་བ་རྣམ་པ་གསུམ་ཁོ་ནའི་འཕེན་པ་ཡོད་ཀྱི་རྣམ་པ་བཞི་ནི་མ་ཡིན་ཏེ། དམྱལ་བ་དེ་ན་རྣམ་པར་སྨིན་པ་ཡིད་དུ་འོང་བ་མེད་པའི་ཕྱིར་མཐོང་བའི་ཆོས་ལ་མྱོང་བར་འགྱུར་བ་ནི་མ་གཏོགས་སོ། །དགེ་བ་ཞེས་བྱ་བ་སྨོས་པ་ནི་མི་དགེ་བ་བསལ་བའི་
[45b.4]ཕྱིར་ཏེ་དམྱལ་བ་དག་ན་མི་དགེ་བ་ནི་རྣམ་པ་བཞི་ཆར་ནི་འཕེན་པ་ཡང་སྲིད་དོ། །གང་ལས་འདོད་ཆགས་བྲལ་བརྟན་པའི། །ཞེས་བྱ་བ་ནི་གང་ཞིག་ལས་འདོད་ཆགས་དང་བྲལ་བ་ནི་གང་ལས་འདོད་ཆགས་དང་བྲལ་བའོ་ཞེས་བྱ་བར་ཚིག་བསྡུའོ། །བརྟན་པ་ཞེས་བྱ་བ་སྨོས་པ་ནི་ཡོངས་སུ་
[45b.5]ཉམས་པའི་ཆོས་ཅན་བསལ་བའི་ཕྱིར་ཏེ། དེ་ལ་ནི་ས་དེར་སྐྱེས་ནས་མྱོང་བར་འགྱུར་བའི་ལས་སྲིད་དོ། །བྱིས་པ་ཞེས་བྱ་བ་སྨོས་པ་ནི་འཕགས་པ་བསལ་བའི་ཕྱིར་ཏེ། འཕགས་པ་ལ་ནི་དེར་སྐྱེས་ནས་མྱོང་བར་འགྱུར་བ་མི་སྲིད་དེ། ཕྱིར་མི་འོང་བ་ཡིན་པའི་ཕྱིར་རོ། །གཞན་དུ་འང་
[45b.6]མྱོང་བ་མི་བྱེད་ཅེས་བྱ་བ་ནི་ལན་གྲངས་གཞན་ལ་མྱོང་བར་འགྱུར་བ་ཡང་མི་བྱེད་ལ། སྐྱེས་ནས་མྱོང་བར་འགྱུར་བ་ཡང་མི་བྱེད་དོ་ཞེས་བྱ་བའི་ཐ་ཚིག་གོ། །དེ་ལ་རིམ་པ་བསྟན་པའི་ཕྱིར། འདི་ནི་ཡང་ས་འོག་མར་འོང་བར་རུང་བ་མ་ཡིན་ནོ་ཞེས་བྱ་བ་སྨོས་ཏེ། འཕགས་པ་ཡོངས་སུ་མི་ཉམས་
[45b.7]པའི་ཆོས་ཅན་འདི་ནི་གང་ལས་འདོད་ཆགས་དང་བྲལ་བ་དེའི་འོག་ན་ཡོད་པའི་སར་འོང་བར་རུང་བ་མ་ཡིན་ནོ། །ཡོངས་སུ་ཉམས་པའི་ཆོས་ཅན་ནི་རུང་སྟེ། འདི་ལྟ་སྟེ་འཕགས་པ་སྲིད་པའི་རྩེ་མོ་ཐོབ་པ་ཡོངས་སུ་ཉམས་པའི་ཆོས་ཅན་དེ་ལས་ཡོངས་སུ་ཉམས་ནས་གཟུགས་ཀྱི་ཁམས་སུ་སྐྱེ་
[46a]
[46a.1]བར་འགྱུར་བ་གང་ཡིན་པ་དེ་ལ་ནི་སྐྱེས་ནས་མྱོང་བར་འགྱུར་བ་དང་ལན་གྲངས་གཞན་ལ་མྱོང་བར་འགྱུར་བ་ཡང་སྲིད་དེ་འཆར་བྱེད་ཀྱི་མདོ་ལས་ཇི་སྐད་བྱུང་བ་ལྟ་བུའོ། །མ་ངེས་པ་ནི་བྱེད་དོ་ཞེས་བྱ་བ་ནི་འཕགས་པ་ཡོངས་སུ་མི་ཉམས་པའི་ཆོས་ཅན་ནི་གང་དུ་སྐྱེས་པ་དེར་མྱོང་
[46a.2]བར་འགྱུར་བར་མ་ངེས་པ་དང་མཐོང་བའི་ཆོས་ལ་མྱོང་བར་བྱེད་དོ། །འདོད་པའི་ཁམས་སམ་སྲིད་པའི་རྩེ་མོ་ལས་འདོད་ཆགས་དང་བྲལ་བ་ཞེས་བྱ་བ་ལ། འདོད་པའི་ཁམས་ལས་འདོད་ཆགས་དང་བྲལ་བའི་ཕྱིར་མི་འོང་བའོ། །སྲིད་པའི་རྩེ་མོ་ལས་འདོད་ཆགས་དང་བྲལ་བ་ནི་
[46a.3]དགྲ་བཅོམ་པའོ། །དེ་དག་ཏུ་ཞེས་བྱ་བ་ནི་འདོད་པའི་ཁམས་དང་སྲིད་པའི་རྩེ་མོ་དག་ཏུའོ། །འོག་ནས་བཤད་པར་བྱའོ་ཞེས་བྱ་བ་ནི། འབྲས་བུ་ལས་ཉམས་འཆི་བ་མེད། །ཅེས་བྱ་བ་དེར་རོ། །སྲིད་པ་བར་མ་མྱོང་བར་འགྱུར་བའི་བར་དུ་ཞེས་བྱ་བ་ཅི་ཞེ་ན། ངེས་པ་དང་མ་ངེས་པ་ཞེས་བྱ་བ་
[46a.4]ཡིན་ནོ། །ངེས་པ་རྣམ་པ་བཅུ་གཅིག་ཅེས་བྱ་བ་ནི་མཐོང་བའི་ཆོས་ལ་མྱོང་བར་འགྱུར་བར་ངེས་པ་ནས་སྲིད་པ་བར་མ་མྱོང་བར་ངེས་པའི་བར་རོ། །དེའི་རྒྱུ་ལས་བྱུང་བ་གནས་སྐབས་བཅུའོ་ཞེས་བྱ་བ་ནི་སྲིད་པ་བར་མ་སྔོན་དུ་འགྲོ་བ་ཅན་ཞེས་བྱ་བའི་ཐ་ཚིག་གོ། །དེ་ཉིད་ཀྱི་ཕྱིར་སྲིད་པ་བར་མ་མྱོང་
[46a.5]བར་འགྱུར་བའི་ལས་གཞན་མ་བཤད་དེ་ཞེས་བྱ་བ་ནི་ལས་རྣམ་པ་བཞི་སྟེ། མཐོང་བའི་ཆོས་ལ་མྱོང་བར་འགྱུར་བ་དང་། སྐྱེས་ནས་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་འགྱུར་བ་དང་། མྱོང་བར་འགྱུར་བར་མ་ངེས་པའོ་ཞེས་བྱ་བ་དེར་མ་བཤད་དེ་སྲིད་པ་བར་མ་དེར་ནི་སྐྱེས་
[46a.6]ནས་མྱོང་བར་འགྱུར་བ་ཁོ་ནས་འཕངས་པའི་ཕྱིར་རོ། །ལས་ངེས་པ་དང་མ་ངེས་པ་ཞེས་བཤད་པས་དེའི་ཕྱིར་ཡང་ངེས་པའི་ལས་ཅི་འདྲ་བ་ཞེས་བྱ་བ་རྒྱས་པར་སྨོས་ཏེ། འབྲས་བུ་ཁྱད་པར་ཅན་ཐོབ་པ་ཞེས་བྱ་བ་ལ། འབྲས་བུ་ཁྱད་པར་ཅན་ཐོབ་པ་ནི་མཐོང་བའི་ལམ་གྱི་འབྲས་བུ་ཐོབ་པ་དང་། དགྲ་
[46a.7]བཅོམ་པ་ཉིད་ཀྱི་འབྲས་བུ་ཐོབ་པ་ཡིན་པར་འདོད་དོ། །ཁྱད་པར་ཞེས་བྱ་བ་སྨོས་པ་ནི་ཟག་པ་མེད་པའི་ལམ་གྱིས་ཐོབ་པའི་འབྲས་བུ་ཡིན་པར་བཟུང་བའི་ཕྱིར་རོ། །སྙོམས་པར་འཇུག་པ་ཁྱད་པར་ཅན་ཐོབ་པ་ཞེས་བྱ་བ་ནི་འགོག་པ་དང་། ཉོན་མོངས་པ་མེད་པ་དང་། བྱམས་པའི་སྙོམས་པར་
[46b]
[46b.1]འཇུག་པ་ཐོབ་པའོ། །འདིར་ཡང་ཁྱད་པར་ཞེས་བྱ་བ་སྨོས་པ་ནི་འཇིག་རྟེན་པའི་སྙོམས་པར་འཇུག་པ་གཞན་ལས་ཁྱད་པར་དུ་བྱ་བའི་ཕྱིར་རོ། །ཅི་འདྲ་ཡང་རུང་སྟེ་ཞེས་བྱ་བ་ནི་གལ་ཏེ་བསོད་ནམས་ཡིན་པའི་བློས་སམ། གལ་ཏེ་ཞེ་སྡང་གིས་ཀྱང་རུང་སྟེ། པར་སིག་གང་ཞིག་བསོད་
[46b.2]ནམས་ཡིན་པའི་བློས་ཕ་འམ་མ་བསད་པའི་ལས་མི་དགེ་བ་དེ་ནི་མཚམས་མེད་པར་ངེས་པར་འགྱུར་རོ། །གཞན་ནི་མ་ཡིན་ནོ་ཞེས་བྱ་བ་ནི་འདི་ལས་བཟློག་པའི་ཉོན་མོངས་པ་དང་རབ་ཏུ་དང་བ་ཆུང་ངུས་བྱས་པ་ཞེས་བྱ་བ་ལ་སོགས་པ་གང་ཡིན་པའོ། །དགེ་འདུན་ལ་བུད་མེད་དོ་ཞེས་ཐབ་མོ་རྒལ་
[46b.3]བ་ལས་ཞེས་བྱ་བ་ནི་དགེ་སློང་ཤགས་ཀྱིས་ཕམ་པ་གཅིག་ཅིག་གིས་དགེ་འདུན་ལ་ཁྱེད་ནི་བུད་མེད་དུ་ཟད་དོ་ཞེས་ཁ་བྱས་པ་དང་། དེ་མཐོང་བའི་ཆོས་ཁོ་ན་ལ་སྐྱེས་པའི་མཚན་མི་སྣང་བར་གྱུར་ནས། བུད་མེད་ཀྱི་མཚན་བྱུང་ངོ་ཞེས་གྲག་སྟེ། འདི་ནི་ཞིང་གི་ཁྱད་པར་ལས་མཐོང་བའི་ཆོས་
[46b.4]ལ་མྱོང་བར་འགྱུར་བ་ཁོ་ན་ཡིན་ནོ། །བསམ་པའི་ཁྱད་པར་ལས་ནི་ཞེས་བྱ་བ་ནི་ཉུང་རུམ་ཞིག་གིས་གླང་དག་ཅིག་རླིག་པ་འབྱིན་པ་མཐོང་ནས་བདག་ཀྱང་འདི་འདྲ་བར་རླིག་པ་ཕྱུང་བས་སྡུག་བསྔལ་བར་གྱུར་ཏོ་སྙམ་ནས་བསམ་པ་དྲག་པོས་གླང་དེ་དག་རླིག་པ་དབྱུང་བ་ལས་བཏང་བ་དང་།
[46b.5]དེ་མཐོང་བའི་ཆོས་ཁོ་ན་ལ་སྐྱེས་པའི་དབང་པོ་བྱུང་ངོ་ཞེས་གྲག་སྟེ། འདི་ནི་བསམ་པའི་ཁྱད་པར་ལས་མཐོང་བའི་ཆོས་ལ་མྱོང་བར་འགྱུར་བའི་ལས་སུ་གྱུར་པ་ཡིན་ནོ། །དེ་ལས་གཏན་དུ་འདོད་ཆགས་དང་བྲལ་བ་ཡིན་པའི་ཕྱིར་རོ་ཞེས་བྱ་བ་ནི་དེ་ལས་གཏན་དུ་འདོད་ཆགས་དང་བྲལ་
[46b.6]བའི་ཕྱིར་མཐོང་བའི་ཆོས་ལ་མྱོང་བར་འགྱུར་བ་མ་ཡིན་པའི་ལས་ཀྱང་མཐོང་བའི་ཆོས་ལ་མྱོང་བར་འགྱུར་རོ། །གནས་སྐབས་སུ་ཡང་མ་ཡིན་ཞེས་བྱ་བ་ནི་མཐོང་བའི་ཆོས་ལ་སོགས་པའི་གནས་སྐབས་སུ་མ་ངེས་པ་གང་ཡིན་པ་དང་རྣམ་པར་སྨིན་པར་ངེས་པའི་ཕྱིར་མ་ངེས་པ་ཡང་མ་ཡིན་པ་
[46b.7]དེ་ཁོ་ན་མཐོང་བའི་ཆོས་ལ་མྱོང་བར་འགྱུར་རོ། །དེ་ཉིད་ཀྱི་ཕྱིར་བཤད་པ་མཐོང་བའི་ཆོས་ལ་སོགས་པའི་གནས་སྐབས་གཞན་དུ་ངེས་པ་གང་ཡིན་པ་དེ་ནི་དེ་ཉིད་དུ་རྣམ་པར་སྨིན་པར་འགྱུར་རོ། །དེ་དང་ལྡན་བཞིན་དུ་གཏན་དུ་འདོད་ཆགས་དང་བྲལ་བ་མི་སྲིད་པས་ཞེས་བྱ་བ་ནི་དེ་ལྟར་གནས་
[47a]
[47a.1]སྐབས་ངེས་པའི་རྣམ་པར་སྨིན་པ་ཅན་གྱི་ལས་དེ་དང་ལྡན་པའི་གང་ཟག་ནི་ས་དེ་ལས་གཏན་དུ་འདོད་ཆགས་དང་བྲལ་མི་སྲིད་པའི་ཕྱིར་ཞེས་བྱ་བའི་ཐ་ཚིག་གོ། །ཞིང་གི་ཁྱད་པར་ཞེས་བཤད་པས། དེའི་ཕྱིར་ཞིང་དེ་དག་ནི་ཇི་ལྟ་བུ་ཞིག་ཅེས་འདྲི་བར་བྱེད་དེ་ཉོན་མོངས་པ་
[47a.2]མེད་པ་ལས་ལངས་པའི་ཞེས་བྱ་བ་རྒྱས་པར་འབྱུང་བ་ནི་རྒྱུད་སེམས་ཅན་ཚད་མེད་པ་ལ་ཉོན་མོངས་པ་མེད་པ་དང་ལྡན་པའི་ལྷག་པའི་བསམ་པ་སྟེ། བསམ་པ་དེ་དང་རྗེས་སུ་འབྲེལ་པ་དང་ཤིན་ཏུ་གསལ་ཤིང་རྣོ་བའི་བསོད་ནམས་ཚད་མེད་པས་ཡོངས་སུ་བསྒོས་པ་དང་རྗེས་སུ་འབྲེལ་པ་ཡིན་ནོ། །
[47a.3]ཉོན་མོངས་པ་མེད་པ་ནི་འོག་ནས། ཉོན་མོངས་མེད་དང་སྨོན་ནས་ཤེས། །ཞེས་བྱ་བ་དེར་བཤད་པར་བྱའོ། །བྱམས་པ་ལས་ལངས་པའི་ཞེས་བྱ་བ་རྒྱས་པར་འབྱུང་བ་ནི་སེམས་ཅན་ཚད་མེད་པ་དག་ལ་བདེ་བ་སྐྱེ་བར་གྱུར་ཅིག་སྙམ་པའི་ལྷག་པའི་བསམ་པ་དེ་དང་རྗེས་སུ་འབྲེལ་པ་ཡིན་ནོ། །ཤིན་
[47a.4]ཏུ་གསལ་བ་ཞེས་བྱ་བ་ཐམས་ཅད་ནི་སྔ་མ་བཞིན་ནོ། །གནས་ཡོངས་སུ་གྱུར་པ་སར་པ་ཡིན་པས་དྲི་མ་མེད་པ་ཡིན་ཞེས་བྱ་བ་ནི་ལངས་ནས་རིང་བོར་མ་ལོན་པའི་ཕྱིར་རྒྱུད་གནས་ལུགས་ཡོངས་སུ་གྱུར་པ་གསར་པ་ཡིན་ཞིང་གསར་པ་ཡིན་པས་ན་དྲི་མ་མེད་པ་ཡིན་ནོ།། །།བམ་པོ་
[47a.5]སུམ་ཅུ་རྩ་བཞི་པ། གང་ཟག་དེ་དག་ལ་ཕན་པ་དང་གནོད་པ་བྱས་པ་རྣམས་ཏེ། ཕན་བཏགས་པ་དང་གནོད་པ་བྱས་པས་དགེ་བ་དང་མི་དགེ་བ་རྣམས་ཀྱི་འབྲས་བུ་མཐོང་བའི་ཆོས་ཁོ་ན་ལ་ཐོབ་པར་འགྱུར་རོ་ཞེས་འཕྲལ་གྱི་དོན་སྟོན་པར་བྱེད་དེ་འཕྲལ་དང་འདྲ་བའི་ཕྱིར་རོ། །ལྷག་མ་བསྒོམ་པའི་ལམ་
[47a.6]ཞེས་བྱ་བ་རྒྱས་པར་འབྱུང་བ་ནི་ལྷག་མ་བསྒོམ་པའི་ལམ་ལན་ཅིག་ཕྱིར་འོང་བ་དང་ཕྱིར་མི་འོང་བའི་འབྲས་བུ་ཐོབ་པར་བྱེད་པ་སྟེ། འདི་ལ་རང་བཞིན་དང་འབྲས་བུ་ཡོངས་སུ་རྫོགས་པ་ཡོད་པས་ན་རང་བཞིན་དང་འབྲས་བུ་ཡོངས་སུ་རྫོགས་པ་ཅན་ནོ། །དེའི་ངོ་བོ་ནི་ཉིད་དེ། རང་བཞིན་དང་འབྲས་
[47a.7]བུ་ཡོངས་སུ་རྫོགས་པ་ཅན་ཉིད་དེའི་ཕྱིར་རོ། །ཡང་དེའི་རང་བཞིན་ཡོངས་སུ་མ་རྫོགས་པ་ཉིད་དང་། འབྲས་བུ་ཡོངས་སུ་མ་རྫོགས་པ་ཉིད་གང་ཡིན་ཞེ་ན། རང་བཞིན་ཡོངས་སུ་མ་རྫོགས་པ་ནི་དགྲ་བཅོམ་པ་ཉིད་ཡིན་ན་ལམ་དེ་ནི་གང་གིས་དགྲ་བཅོམ་པ་ཉིད་ཐོབ་པར་འགྱུར་བ་སྟེ། སློབ་པའི་
[47b]
[47b.1]རང་བཞིན་ནོ། །འབྲས་བུ་ཡོངས་སུ་རྫོགས་པ་ཡང་དགྲ་བཅོམ་པ་ཉིད་ཐོབ་པ་ཡིན་ན་ལམ་དེ་ནི་འབྲས་བུ་གསུམ་གྱིས་འབྲས་བུ་དང་ལྡན་པ་ཡིན་ནོ། །ཡང་ན་རང་བཞིན་དང་འབྲས་བུ་ཡོངས་སུ་རྫོགས་པ་ནི་ཟད་པ་ཤེས་པས་བསྡུས་པའི་ལམ་ཡིན་ཏེ། འདི་ལྟར་རང་བཞིན་ཡོངས་སུ་རྫོགས་
[47b.2]པ་ནི་མི་སློབ་པའི་ལམ་ཡིན་པས་སོ། །འབྲས་བུ་ཡོངས་སུ་རྫོགས་པ་ནི་ལུས་ལ་མེད་པའི་འབྲས་བུ་ཡིན་པའི་ཕྱིར་རོ། །དེ་ལས་ལངས་པ་རྣམས་ཞེས་བྱ་བ་ནི་ལྷག་མ་བསྒོམ་པའི་ལམ་ལས་ལངས་པ་རྣམས་ཏེ་དེ་ལས་ལངས་པ་དེ་དག་ནི་ཇི་ལྟར་དགྲ་བཅོམ་པ་ལས་ལངས་པ་དེ་ལྟར་བསོད་
[47b.3]ནམས་ཀྱི་ཞིང་མ་ཡིན་ན། འཇིག་རྟེན་པའི་ལམ་ལས་ལངས་པ་རྣམས་ལྟ་སྨོས་ཀྱང་ཅི་དགོས་ཏེ། ཁྱད་པར་འདི་ནི་བསྒོམ་པས་སྤང་བར་བྱ་བའི་ཉོན་མོངས་པ་རྣམས་ལྷག་མ་དང་བཅས་པ་དང་། ལྷག་མ་མ་ལུས་པར་སྤངས་པའི་སྒོ་ནས་བཤད་དོ་ཞེས་བྱ་བར་ཁོང་དུ་ཆུད་པར་བྱའོ། །དེ་ནི་གདོན་མི་
[47b.4]ཟ་བར་རྟོག་པ་དང་དཔྱོད་པ་དང་བཅས་པ་ཡིན་པའི་ཕྱིར་རོ་ཞེས་བྱ་བ་ནི་རྣམ་པར་ཤེས་པའི་ཁམས་ལྔ་ནི། རྟོག་པ་དང་དཔྱོད་པ་དང་བཅས་པ་ཡིན་ཞེས་བྱ་བར་ངེས་པའི་ཕྱིར་རོ། །རྟོག་པ་དང་དཔྱོད་པ་དག་ཀྱང་བསམ་གཏན་ཁྱད་པར་ཅན་ལ་སོགས་པ་ལ་མེད་པའི་ཕྱིར་ཏེ། རྟོག་པ་མེད་
[47b.5]པའི་ལས་ཀྱི་རྣམ་པར་སྨིན་པ་ས་འོག་མ་པ་རྟོག་པ་དང་དཔྱོད་པ་དང་བཅས་པ་ཡིན་པར་ཡང་རུང་བ་མ་ཡིན་ནོ། །རྣམ་པར་སྨིན་པ་ནི་སྡུག་བསྔལ་གྱི་ཚོར་བ་ཡིན་ལ་ཞེས་བྱ་བ་རྒྱས་པར་འབྱུང་བ་ནི་མི་དགེ་བ་དེའི་རྣམ་པར་སྨིན་པ་ནི་སྡུག་བསྔལ་གྱི་ཚོར་བ་ཡིན་པར་འདོད་དེ། དེའི་འབྲས་བུ་ནི་
[47b.6]ཡིད་དུ་མི་འོང་བ་མ་ཡིན་པའི་ཕྱིར་རོ། །སེམས་ཀྱི་སྡུག་བསྔལ་གྱི་ཚོར་བ་ནི་ཡིད་མི་བདེ་བ་ཡིན་ཏེ་གཞན་ནི་མེད་ན་ཡིད་མི་བདེ་བ་ནི་རྣམ་པར་སྨིན་པ་མ་ཡིན་ནོ་ཞེས་དེ་ནི་དབང་པོ་བསྟན་པར་སྲོག་གི་རྣམ་སྨིན་བཅུ་གཉིས་གཉིས། ཐ་མ་བརྒྱད་དང་ཡིད་མི་བདེ་བ་མ་གཏོགས་ཞེས་བཤད་
[47b.7]ཟིན་ཏོ། །ཡིད་མི་བདེ་བ་རྣམ་པར་སྨིན་པ་མ་ཡིན་ནོ་ཞེས་བྱ་བ་འདི་མི་བཟོད་པས་འོ་ན་སེམས་ཅན་རྣམས་ཀྱི་ཞེས་བྱ་བ་རྒྱས་པར་སྨྲས་ཏེ། གལ་ཏེ་ཡིད་མི་བདེ་བ་རྣམ་པར་སྨིན་པ་མ་ཡིན་ན། འོ་ན་སེམས་ཅན་རྣམས་ཀྱི་སེམས་གཡེངས་པར་འགྱུར་བ་གང་ཡིན་པ་དེ་སེམས་ནི་གང་ཞིག་
[48a]
[48a.1]ལ་གནས་པ་ཡིན། རྒྱུ་ནི་ཇི་ཞིག་གིས་འགྱུར། དེའི་བསམ་པ་ནི་སེམས་གཡེངས་པ་ནི་རྣམ་པར་ཤེས་པའི་ཚོགས་ལྔ་ལ་གནས་པ་ནི་མ་ཡིན་ཏེ། དེ་དག་ནི་རྣམ་པར་རྟོག་པ་མེད་པའི་ཕྱིར་ལ། དེ་ཡང་མི་དགེ་བའི་རྒྱུ་ཅན་གྱི་ཡིད་དུ་མི་འོང་བ་ཡིན་པའི་ཕྱིར་
[48a.2]ཏེ། དེ་བས་ན་ཡིད་མི་བདེ་བ་ནི་རྣམ་པར་སྨིན་པ་ཡིན་པར་འགྱུར་རོ་སྙམ་པ་ཡིན་ནོ། །རྣམ་པར་མི་རྟོག་པ་ཡིན་པའི་ཕྱིར་རོ་ཞེས་བྱ་བ་ནི་རྣམ་པར་ཤེས་པའི་ཚོགས་ལྔ་ནི་ངེས་པར་རྟོག་པ་དང་རྗེས་སུ་དྲན་པའི་རྣམ་པར་རྟོག་པ་དག་གིས་རྣམ་པར་མི་རྟོག་པ་ཡིན་པའི་ཕྱིར་ལ་སེམས་གཡེངས་པ་ནི་
[48a.3]རྣམ་པར་རྟོག་པ་ངན་པའི་མཚན་ཉིད་ཡིན་པའི་ཕྱིར་རོ། །ནགས་མེས་གཏོང་བ་འམ་ཞེས་བྱ་བ་ལ། ནགས་ནི་རྩྭ་ལ་སོགས་པ་ཚང་ཚིང་དང་ལྡན་པའི་ཕྱོགས་ཀྱི་ཁྱད་པར་རོ། །གཞན་གང་ཡང་རུང་བས་ཞེས་བྱ་བ་ནི་མི་འདོད་པའི་ན་ཚར་འགྱུར་བས་སོ། །གནས་བྱེད་ཀྱི་བུ་ལ་སོགས་པ་ཞེས་བྱ་བ་ནི་
[48a.4]བཅོམ་ལྡན་འདས་མི་ཐིལ་ན་མི་ཐི་ལའི་ཨ་མྲའི་ཚལ་ན་བཞུགས་སོ། །ཡང་དེའི་ཚེ་གནས་བྱེད་དང་རུས་མཐུན་པའི་བྲམ་ཟེ་མོ་ཞིག་གི་བུ་དྲུག་ཤི་བ་དང་། དེ་དེ་དག་ཤི་བས་སེམས་གཡེངས་ཤིང་སྨྱོས་ནས་གཅེར་བུར་བྱུང་སྟེ། དེ་དང་དེར་རྒྱུ་ཞིང་མི་ཐི་ལའི་ཨ་མྲའི་ཚལ་ག་ལ་བ་དེར་སོང་ངོ་། །དེའི་ཚེ་བཅོམ་ལྡན་
[48a.5]འདས་དགེ་སློང་གི་འཁོར་བརྒྱ་ཕྲག་དུ་མའི་གུང་ལ་བཞུགས་ཤིང་ཆོས་སྟོན་ཏོ། །གནས་བྱེད་དང་རུས་མཐུན་པའི་བྲམ་ཟེ་མོས་བཅོམ་ལྡན་འདས་རྒྱང་ནས་མཐོང་སྟེ། མཐོང་ནས་ཀྱང་ངོ་ཚ་ནས་སྒུམ་སྒུམ་པོར་འདུག་སྟེ། དྲན་པ་ཡང་རྙེད་པར་གྱུར་ཏོ། །བཅོམ་ལྡན་འདས་ཀྱིས་གནས་བྱེད་ཀྱི་བུ་དང་རུས་
[48a.6]མཐུན་པའི་བྲམ་ཟེ་མོ་ཐག་རིང་པོ་ནས་གཟིགས་ཏེ། གཟིགས་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། གནས་བྱེད་ཀྱི་བུ་དང་རུས་མཐུན་པའི་བྲམ་ཟེ་མོ་ལ་བླ་གོས་བྱིན་ཅིག་དང་དེ་ལ་ཆོས་བཤད་པར་བྱའོ། །ཚེ་དང་ལྡན་པ་ཀུན་དགའ་བོས་གནས་བྱེད་ཀྱི་བུ་དང་རུས་མཐུན་པའི་བྲམ་ཟེ་མོ་ལ་བླ་
[48a.7]གོས་བྱིན་པ་དང་དེ་གནས་བྱེད་ཀྱི་བུ་དང་རུས་མཐུན་པའི་བྲམ་ཟེ་མོས་བླ་གོས་བགོས་ནས་བཅོམ་ལྡན་འདས་ག་བ་ལ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་གནས་བྱེད་ཀྱི་བུ་དང་རུས་མཐུན་པའི་བྲམ་ཟེ་མོ་ལ་ཆོས་ཀྱི་
[48b]
[48b.1]གཏམ་གྱིས་ཀུན་དུ་སྟོན་པར་མཛད། ཡང་དག་པར་ལེན་དུ་བཅུག། །ཡང་དག་པར་གཟེངས་བསྟོད་ནས། ཡང་དག་པར་རབ་ཏུ་དགའ་བར་མཛད་ཅེས་བྱ་བ་དེ་ལྟ་བུ་ལ་སོགས་པ་ཡིན་ཏེ། གཞུང་མངས་ཀྱིས་དོགས་ནས་ཐམས་ཅད་ནི་མ་བྲིས་སོ། །འདི་ལ་དོན་ནི་འདི་ཡིན་ཏེ། བཅོམ་ལྡན་འདས་ཀྱིས་
[48b.2]དེ་ལ་སྦྱིན་པ་ལ་སོགས་པའི་གཏམ་མཛད་ནས་འཕགས་པའི་བདེན་པ་བཞི་བསྟན་པ་ནས་དེས་རྒྱུན་དུ་ཞུགས་པའི་འབྲས་བུའི་བར་དུ་ཐོབ་སྟེ། ཐོབ་ནས་ཀྱང་བཅོམ་ལྡན་འདས་ཀྱི་ཐད་ནས་སོང་ངོ་། །དུས་གཞན་ཞིག་ན་དེའི་བུ་བདུན་པ་ཤི་བ་དང་དེ་དེ་ཤི་བས་མྱ་ངན་མི་བྱེད་པར་གྱུར་ཏོ། །དེ་མྱ་ངན་མི་བྱེད་པ་དང་རང་
[48b.3]གི་ཁྱོས་སྨྲས་པ་ཁྱོད་སྔོན་བུ་ཤི་བས་ཡོངས་སུ་གདུང་བར་བྱེད་ལ་ད་ནི་ཡོངས་སུ་གདུང་བ་མེད་པ་དང་སྦྱར་ན་བུ་དེ་ཁྱོད་ཀྱིས་ཟོས་གོར་མ་ཆག་སྟེ། དེས་ན་ཡོངས་སུ་གདུང་བར་མི་བྱེད་དོ། །དེས་དེ་ལ་ཕྱིར་སྨྲས་པ། བྲམ་ཟེ་ངས་ནི་ཡུན་རིངས་ནས། །བུ་དང་ཚ་བོ་སྟོང་ཕྲག་དང་། །གཉེན་མང་བརྒྱ་
[48b.4]ཕྲག་དག་ཟོས་ཏེ། །ཁྱོད་ཀྱིས་ཀྱང་ནི་དེ་དང་འདྲ། །སྐྱེ་བ་དེ་དང་དེ་དག་ཏུ། །བུ་དང་ཚ་བོ་སྟོང་ཕྲག་དག །གཅིག་ལ་གཅིག་ནི་ཟ་རྣམས་ཀྱི། །ཚད་ནི་ཡོད་པ་མ་ཡིན་ནོ། །འཇིག་རྟེན་ན་ནི་སྐྱེ་བ་དང་། །འཆི་ལས་ངེས་འབྱུང་ཤེས་ནས་ནི། །སུ་ཞིག་མྱ་ངན་ཡོངས་གདུང་བ་འམ། །སྨྲེ་སྔགས་འདོན་པར་བྱེད་པར་
[48b.5]འགྱུར། །བདག་གིས་སངས་རྒྱས་བསྟེན་བྱས་ཏེ། །སྐྱེ་བ་དང་ནི་འཆི་བ་ལས། །ངེས་པར་འབྱུང་བའང་ཤེས་པས་ན། །མྱ་ངན་མི་བྱེད་གདུང་བ་མེད། །ཅེས་བྱ་བ་དེ་ལྟ་བུ་ལ་སོགས་པ་ཡིན་ནོ། །ཇི་ལྟར་སེམས་ཀྱི་ཚོར་བ་རྣམ་པར་སྨིན་པ་མ་ཡིན་པར་འགྱུར་ཞེས་བྱ་བ་ནི། ལས་མི་དགེ་བ་དེ་ཡི་འབྲས། །
[48b.6]ཞེས་བྱ་བ་ཚིག་ལྷག་མ་ཡིན་ནོ། །འབྱུང་བ་ཆེན་པོ་རྣམས་འཁྲུག་པ་གང་ཡིན་པ་དེ་རྣམ་པར་སྨིན་པ་ཡིན་ལ་ཞེས་བྱ་བ་ནི་རྣམ་པར་སྨིན་པ་ནི་རྣམ་པར་སྨིན་པའོ། །སེམས་ནི་དེ་ལས་སྐྱེས་པས་དེའི་ཕྱིར་རྣམ་པར་སྨིན་པ་ལས་སྐྱེས་པ་ཡིན་ཏེ། དེ་ཉིད་ཀྱི་ཕྱིར་དེ་ནི་ལས་ཀྱི་རྣམ་པར་སྨིན་པ་ལས་སྐྱེས་པ་ཞེས་
[48b.7]བཤད་ཀྱི། དེ་ནི་ལས་ལས་སྐྱེས་པ་ཞེས་ནི་མ་བཤད་དོ། །དེ་ལྟར་ན་འདི་ནི་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་ལས་ལས་སྐྱེས་པ་ཞེས་བྱ་བ་ནས་དྲན་པ་ཉམས་པར་འགྱུར་བས་ཞེས་བྱ་བའི་བར་ཡིན་པ་དེའི་ཕྱིར་མུ་བཞི་པ་འདི་རུང་སྟེ། འདིར་དཔེར་བརྗོད་པ་ནི་གཉི་ག་ནི་སེམས་གཡེངས་པའི་ཉོན་མོངས་
[49a]
[49a.1]པ་ཡིན་ནོ་ཞེས་བྱ་བ་འདི་ཡིན་ནོ། །སེམས་ཉོན་མོངས་པ་ཅན་ནི་རྣམ་པར་སྨིན་པ་ཡིན་པར་མི་རུང་སྟེ། རྣམ་སྨིན་ལུང་དུ་མ་བསྟན་ཆོས། །ཞེས་འབྱུང་བའི་ཕྱིར་རོ། །མངོན་པར་ཉེན་པ་ཞེས་བྱ་བ་ནི་མངོན་པར་གནོད་པར་གྱུར་པའོ། །དམྱལ་བ་རྣམས་སེམས་གཡེངས་པ་
[49a.2]ཡིན་ནོ་ཞེས་བྱ་བ་ཡིན་ནོ་ཞེས་བྱ་བ་འདིར་ཀྱི་ཧུད་སེམས་ཞེས་སྨྲེ་སྔགས་འདོན་པའི་དམྱལ་བ་དཔེར་བྱའོ། །སངས་རྒྱས་མ་གཏོགས་པ་ཞེས་བྱ་བ་ནི་སངས་རྒྱས་ནི་བསོད་ནམས་ཀྱི་ཚོགས་ཆེ་བའི་ཕྱིར་འབྱུང་བ་ཉམས་པས་ཀྱང་ཐུགས་གཡེངས་པ་མི་མངའོ། །ལས་ཀྱི་ནི་མ་ཡིན་ཏེ་ཞེས་བྱ་བ་ཅི་
[49a.3]ཞེ་ན། འཕགས་པ་རྣམས་སེམས་གཡེངས་པ་སྟེ། འབྱུང་བ་མ་ཉམས་པས་ནི་མ་གཏོགས་པ་ཉིད་དོ། །ཅིའི་ཕྱིར་ཞེ་ན། ངེས་པ་ནི་སྔོན་སོ་སོའི་སྐྱེ་བོའི་གནས་སྐབས་ཁོ་ན་ན་རྣམ་པར་སྨིན་པ་ཟིན་པའི་ཕྱིར་རོ། །མ་ངེས་པ་ནི་འཕགས་པའི་གནས་སྐབས་ན་རྣམ་པར་མི་སྨིན་པའི་ཕྱིར་
[49a.4]ཏེ། དེ་ཉིད་ཀྱི་ཕྱིར་འདི་ནི་མ་ངེས་པ་ཞེས་བྱ་བའོ། །འཇིགས་པ་ལྔ་ལས་ཡང་དག་པར་འདས་པའི་ཕྱིར་རོ་ཞེས་བྱ་བ་ལ་འཇིགས་པ་ལྔ་ནི་ཀུན་དུ་འཚོ་བ་མེད་པའི་འཇིགས་པ་དང་། ཚིགས་སུ་བཅད་པ་མེད་པའི་འཇིགས་པ་དང་། འཁོར་གྱི་ནང་དུ་སྐྲག་པའི་འཇིགས་པ་དང་། འཆི་བའི་འཇིགས་པ་དང་།
[49a.5]ངན་འགྲོའི་འཇིགས་པའོ། །དེ་ལ་ཚིགས་སུ་བཅད་པ་མེད་པའི་འཇིགས་པ་ནི་གྲགས་པ་མེད་པའི་འཇིགས་པའོ། །འཁོར་གྱི་ནང་དུ་སྐྲག་པའི་འཇིགས་པ་ནི་ཚོགས་པའི་ནང་དུ་བག་འཁུམས་པའོ། །མི་མཛེས་པ་ཞེས་བྱ་བ་ནི་མི་མཛེས་པར་འགྱུར་བའི་ལས་སོ། །ཆོས་ཉིད་མངོན་པར་ཤེས་
[49a.6]པའི་ཕྱིར་རོ་ཞེས་བྱ་བ་ནི་ཟག་པ་དང་བཅས་པ་ཐམས་ཅད་ནི་སྡུག་བསྔལ་བའོ། །འདུ་བྱེད་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་བདག་མེེད་པའོ་ཞེས་བྱ་བར་ཆོས་ཀྱི་ངོ་བོ་ཉིད་མངོན་པར་ཤེས་པའི་ཕྱིར་རོ། །གྱ་གྱུའི་རྒྱུ་ལས་བྱུང་བའི་ཕྱིར་ཞེས་བྱ་བ་ནི་གྱ་གྱུའི་རྒྱུ་ཅན་ཡིན་པའི་ཕྱིར་ཏེ། གྱ་གྱུ་ནི་རྒྱུ་
[49a.7]ཡིན་ནོ། །ཆགས་པའི་རྒྱུ་ལས་བྱུང་བ་ཡིན་པའི་ཕྱིར་ཞེས་བྱ་བ་ནི་དཔེར་ན་ཚོན་རྩི་ནི་འཇེན་པའི་རྒྱུ་ཡིན་པ་ལྟར་འདོད་ཆགས་ཀྱང་དེ་དང་འདྲ་སྟེ། དེའི་ཕྱིར་དེ་དང་ཆོས་མཐུན་པས་དེ་སྐད་དུ་བཤད་དོ། །འདོད་གཏོགས་ཞེས་བྱ་བ་འདིས་ནི་དགེ་བ་ཁྱད་པར་དུ་བྱེད་ཀྱི་མི་དགེ་བ་ནི་མ་ཡིན་ཏེ། དེ་ནི་
[49b]
[49b.1]གདོན་མི་ཟ་བར་ཡོད་པ་ཅན་ཡིན་པའི་ཕྱིར་རོ། །ཅིའི་ཕྱིར་གཟུགས་མེད་པར་གཏོགས་པ་མ་བཤད་ཅེ་ན་ཞེས་བྱ་བ་ནི་དེ་ཡང་མི་དགེ་བ་དང་མ་འདྲེས་ཤིང་འདྲེན་མར་མི་འཇུག་གོ་ཞེས་བྱ་བའི་ཐ་ཚིག་གོ། །གང་ན་ཞེས་བྱ་བ་རྒྱས་པར་འབྱུང་བ་ནི་གང་ན་སྲིད་པ་བར་མ་བ་སྟེ་སྲིད་པ་བར་མ་ན་ཡོད་པའི་རྣམ་
[49b.2]པར་སྨིན་པ་དང་སྐྱེ་བའི་སྲིད་པ་པ་ཡང་དེ་དང་འདྲའོ། །ལུས་དང་ངག་དང་ཡིད་ཀྱི་ལས་རྣམ་པ་གསུམ་ཆར་གྱི་རྣམ་པར་སྨིན་པ་ཡོད་པ་སྟེ། བསམ་གཏན་གྱི་སྡོམ་པས་བསྡུས་པའི་ལུས་དང་ངག་གི་ལས་དག་བསམ་གཏན་གཉིས་པ་ལ་སོགས་པ་ན་ཡང་ཡོད་པའི་ཕྱིར་དེ་ཁོ་ནར་དཀར་ལ་རྣམ་
[49b.3]པར་སྨིན་པ་དཀར་བ་ཞེས་བཤད་དོ་ཞེས་གྲག་སྟེ། གྲག་ཅེས་བྱ་བའི་སྒྲ་ནི་གཞན་གྱི་གཞུང་ལུགས་ཡིན་ནོ། །མདོ་གཞན་ལས་དེ་ཡང་བཤད་དོ་ཞེས་བྱ་བ་ནི་གཟུགས་མེད་པར་གཏོགས་པ་དེ་ཡང་ལས་དཀར་ལ་རྣམ་པར་སྨིན་པ་དཀར་བ་ཡང་ཡོད་དེ། འདི་ལྟ་སྟེ་བསམ་གཏན་དང་པོ་དང་དེ་བཞིན་དུ་
[49b.4]སྲིད་པའི་རྩེ་མོའི་བར་ཡིན་ནོ་ཞེས་བཤད་དེ། འདིས་ནི་རང་གི་བསམ་པ་གང་གིས་ན་གྲག་ཅེས་བྱ་བའི་སྒྲ་རབ་ཏུ་སྦྱར་བ་སྟོན་པར་བྱེད་དོ། །འདི་ནི་རྒྱུད་ཀྱི་སྒོ་ནས་རྣམ་པར་གཞག་གོ་ཞེས་བྱ་བ་ནི་རྒྱུད་གཅིག་ལ་དགེ་བ་དང་མི་དགེ་བ་ཀུན་དུ་འབྱུང་བས་དགེ་བ་དང་མི་འདྲེ་བར་འགྱུར་རོ། །ཕན་ཚུན་འགལ་
[49b.5]བའི་ཕྱིར་རོ་ཞེས་བྱ་བ་ནི་དགེ་བ་ཡང་མི་དགེ་བ་དང་འགལ་ལ་མི་དགེ་བ་ཡང་དགེ་བ་དང་འགལ་བ་གཉིས་ཀྱི་ངོ་བོ་ཉིད་དུ་རུང་བ་མ་ཡིན་ནོ། །མི་དགེ་བ་གདོན་མི་ཟ་བར་དགེ་བ་དང་འདྲེ་བ་ནི་མ་ཡིན་ཏེ་ཞེས་བྱ་བ་རྒྱས་པར་འབྱུང་བ་ནི་འདྲེ་མོད་ཀྱི་གདོན་མི་ཟ་བ་ནི་མ་ཡིན་ནོ། །ཅིའི་ཕྱིར་ཞེ་ན། འདོད་པའི་ཁམས་ན་གཉེན་པོར་
[49b.6]གྱུར་པ་ཏིང་ངེ་འཛིན་མེད་པའི་ཕྱིར་མི་དགེ་བ་སྟོབས་དང་ལྡན་པ་ཉིད་ཡིན་ནོ། །དེ་ཉིད་ཀྱི་ཕྱིར་དགེ་བ་སྟོབས་ཆུང་བའི་ཕྱིར་ཏེ། འདི་ལྟར་འདོད་པའི་ཁམས་ན་ནི་ལོག་པར་ལྟ་བས་དགེ་བའི་རྩ་བ་ཀུན་དུ་འཆད་པར་འགྱུར་གྱི་ཡང་དག་པའི་ལྟ་བས་ནི་ལོག་པར་ལྟ་བ་ཀུན་དུ་འཆད་པར་མི་འགྱུར་རོ། །མི་དཀར་
[49b.7]ཞེས་བྱ་བའི་སྒྲ་འདི་ནི་དགོངས་པ་ཅན་ཡིན་ཏེ་ཞེས་བྱ་བ་ནི་རྣམ་པར་སྨིན་པ་དཀར་བ་ཉིད་མེད་པའི་ཕྱིར་མི་དཀར་བ་ཡིན་གྱི། དཀར་པོ་མ་ཡིན་པ་ཉིད་ནི་མ་ཡིན་པའོ་ཞེས་བྱ་བའི་ཐ་ཚིག་གོ། །འོན་ཀྱང་དཀར་པོ་ཉིད་དུ་བཤད་པ་གང་ཡིན་པ་དེ་མ་ཡིན་པས་ན་མི་དཀར་བའོ། །སྟོང་པ་ཆེན་པོའི་མདོ་ལས་ཞེས་བྱ་
[50a]
[50a.1]བ་ནི་སྟོང་པ་ཆེན་པོའི་དོན་གྱི་མདོ་ལས་སོ། །མ་བསྒྲིབས་པ་ལུང་དུ་མ་བསྟན་པ་རྣམས་ཀྱང་ཉོན་མོངས་པ་ཅན་མ་ཡིན་པའི་ཕྱིར་དཀར་པོ་ཡིན་ནོ། །ཁམས་སུ་གཏོགས་པའི་ཕྱིར་རྣམ་པར་སྨིན་པ་མེད་པ་ཡིན་ནོ་ཞེས་བྱ་བ་ནི་ཟག་པ་མེེད་པའི་ཆོས་རྣམས་ནི་ཁམས་སུ་གཏོགས་
[50a.2]པ་ཡིན་ལ། རྣམ་པར་སྨིན་པ་ནི་ཁམས་སུ་གཏོགས་པ་ཡིན་པས་དེའི་ཕྱིར་ཟག་པ་མེད་པའི་ཆོས་རྣམས་ནི་རྣམ་པར་སྨིན་པ་མེད་པ་ཡིན་ནོ། །ཅིའི་ཕྱིར་ཞེ་ན། འཇུག་པ་དང་འགལ་བས་ཞེས་བྱ་བ་སྨོས་སོ། །ཟག་པ་མེད་པའི་ལས་ནི་ཁམས་སུ་གཏོགས་པའི་ཆོས་རྣམས་ཀྱི་འཇུག་པ་འགོག་
[50a.3]པར་བྱེད་པ་ཡིན་གྱི་སྐྱེད་པར་བྱེད་པ་ནི་མ་ཡིན་པས་རྣམ་པར་སྨིན་པ་མེད་པ་ཡིན་ནོ། །ལས་དང་ལས་ཟད་པར་བྱེད་པ་ཡིན་ཞེས་བྱ་བ་ལ་ལས་གཉིས་སྨོས་པ་ནི་ལས་དེ་ཡོད་དོ་ཞེས་བསྟན་པ་གང་ཡིན་པ་དེ་ཡོད་ཅིང་མེད་པ་མ་ཡིན་ལ་མ་ཉམས་པའི་ངོ་བོ་ཉིད་ནི་ལས་ཟད་པར་བྱེད་པ་ཡིན་ནོ་ཞེས་ལས་བཞི་པ་
[50a.4]འདི་ནི་བསྟན་པའི་ཆེད་ཡིན་ནོ། །ཡང་ན་འདི་ནི་ཟློས་པའི་སྦྱོར་བ་ཡིན་ཏེ། ལས་དང་ལས་ཟད་པར་བྱེད་པ་ཡིན་ནོ་ཞེས་བྱ་བའི་ཐ་ཚིག་གོ། །བཟོད་པ་ཞི་བ་དང་ཞེས་བྱ་བ་རྒྱས་པར་འབྱུང་བ་ལ། ཆོས་ཤེས་པའི་བཟོད་པ་ཞེས་སྨོས་པ་དང་། འདོད་པ་ལས་འདོད་ཆགས་དང་བྲལ་བ་ལ་བར་ཆད་
[50a.5]མེད་པའི་ལམ་ཞེས་སྨོས་པ་ནི་འདོད་པ་ན་སྤྱོད་པའི་ལས་ནག་པོ་སྤོང་བའི་ལམ་ཡིན་པའི་ཕྱིར་རོ། །འདིར་ནི་ཟག་པ་མེད་པའི་ལམ་གྱི་སྐབས་ཡིན་པའི་ཕྱིར་འཇིག་རྟེན་པའི་བར་ཆད་མེད་པའི་ལམ་དག་ནི་དེ་སྤོང་བར་འགྱུར་བ་ཡིན་ཡང་མི་གཟུང་ངོ་། །དཀར་པོ་བསམ་གཏན་ཆགས་བྲལ་ལ། །
[50a.6]ཞེས་བྱ་བ་ནི་དེ་ནག་པོ་མེད་པའི་ཕྱིར་དགེ་བ་ཁོ་ན་ཞེས་བྱ་བ་ངེས་པར་གཟུང་སྟེ། ཉོན་མོངས་པ་ཅན་གྱི་འདུ་བྱེད་ནི་བརྒྱད་ཀྱིས་སྤོང་ལ་དགུ་པས་ནི་དགེ་བ་ཡང་སྤོང་ངོ་། །དེའི་རང་གི་ངོ་བོ་ནི་སྤོང་བ་མ་ཡིན་ཏེ་ཞེས་བྱ་བ་ནི་ཐོབ་པ་ནི་ཐོབ་པ་ཆད་པའི་སྤོང་བ་སྟེ། དགེ་བ་ནི་སྤངས་ཀྱང་མངོན་སུམ་དུ་བྱེད་
[50a.7]པའི་ཕྱིར་རོ། །དེ་ལ་དམིགས་པའི་ཉོན་མོངས་པ་སྤངས་པའི་ཕྱིར་ཏེ་ཞེས་བྱ་བ་ནི་དེ་ལ་དམིགས་པའི་ཉོན་མོངས་པ་སྤངས་པས་དགེ་བ་དེ་སྤངས་པ་ཡིན་ནོ། །དེ་ལ་དམིགས་པའི་ཉོན་མོངས་པ་སྤོང་བ་ཡང་དེ་ལ་དེ་དམིགས་པའི་ཉོན་མོངས་པའི་རྣམ་པ་དགུ་སྤང་ན་སྤངས་པ་ཡིན་པས་བར་ཆད་མེད་
[50b]
[50b.1]པའི་ལམ་དགུ་པའི་སེམས་པ་ཁོ་ན་ལས་ནག་པོ་དང་དཀར་པོ་ཟད་པར་བྱེད་པ་ཡིན་ཏེ། དེའི་ཚེ་ཉོན་མོངས་པའི་རྣམ་པ་དགུ་པའི་ཐོབ་པ་ཆད་ན་བྲལ་བའི་ཐོབ་པ་སྐྱེ་ཞིང་ལས་ནག་པོ་དང་དཀར་པོ་དེ་དང་ཟག་པ་དང་བཅས་པའི་ལས་གཞན་མ་བསྒྲིབས་ལ་ལུང་དུ་མ་བསྟན་པའི་བྲལ་བ་ཐོབ་པ་ཡང་སྐྱེའོ་
[50b.2]ཞེས་བརྗོད་དོ། །དེ་བཞིན་དུ་བསམ་གཏན་བཞི་ལས་འདོད་ཆགས་དང་བྲལ་བ་དག་ལ་ཡང་རིག་པར་བྱའོ། །དེའི་ཕྱིར་དེ་མྱོང་བར་འགྱུར་བ་ཞེས་བྱ་བ་ནི་འགྲོ་བ་ངེས་པའི་རྒྱུ་དེའི་ཕྱིར་དེ་མྱོང་བར་འགྱུར་བ་སྟེ། དམྱལ་བ་མྱོང་བར་འགྱུར་བ་ཞེས་བྱ་བའི་ཐ་ཚིག་གོ །དེ་ལས་གཞན་པའི་ཞེས་བྱ་བ་རྒྱས་
[50b.3]པར་འབྱུང་བ་ནི་དམྱལ་བའི་འགྲོ་བ་དེ་ལས་གཞན་པའི་འདོད་པའི་ཁམས་མི་ལ་སོགས་པའི་འགྲོ་བ་ན་ནི་དགེ་བ་དང་མི་དགེ་བའི་རྣམ་པར་སྨིན་པ་ཡོད་པས་འགྲོ་བ་ངེས་པའི་རྒྱུ་དེའི་ཕྱིར་དེ་མྱོང་བར་འགྱུར་བ་སྟེ། དེ་ལས་གཞན་པའི་འདོད་པའི་ཁམས་མྱོང་བར་འགྱུར་བ་ནི་གཉི་ག་ཡང་བྱེ་བྲག་མ་
[50b.4]ཕྱེ་བར་བསྲེས་ནས་དཀར་ནག་ཅེས་བྱ་བར་བཤད་ཀྱི་འདི་ལྟར་དགེ་བ་ཡང་དཀར་ནག་ཡིན་ལ་དེ་བཞིན་དུ་མི་དགེ་བ་ཡང་དཀར་ནག་ཡིན་ནོ་ཞེས་བྱ་བར་གཟུང་བར་བྱ་བ་མ་ཡིན་ནོ། །དགེ་བ་དང་མ་འདྲེས་པའི་ཕྱིར། །ཞེས་བྱ་བ་ནི། ཉོན་མོངས་ཅན་མིན་མཐོང་སྤོང་མིན་ཞེས་བྱ་བར་ངེས་པའི་ཕྱིར་
[50b.5]མཐོང་བས་སྤང་བར་བྱ་བའི་དགེ་བ་ནི་མེད་དོ། །འདིར་རྣམ་པ་མཐོང་བས་སྤང་བར་བྱ་བ་འདོད་པ་ན་སྤྱོད་པ་ནག་པོ་ཡིན་ནོ་ཞེས་ཁྱད་པར་བྱས་ནས་བརྗོད་དགོས་སོ། །དེ་ལྟ་མ་ཡིན་ན་མཐོང་བས་སྤང་བར་བྱ་བ་གཟུགས་དང་གཟུགས་མེད་པ་ན་སྤྱོད་པ་ཡང་གནག་ལ་རྣམ་པར་སྨིན་པ་གནག་པ་ཡིན་པར་
[50b.6]བཤད་པར་ཐལ་བར་འགྱུར་བ་ཡིན་ནོ་ཞེ་ན། བརྗོད་པར་བྱ་མི་དགོས་ཏེ། འདོད་པ་ལས་སྐྱེས་གཞན་དཀར་གནག །ཅེས་བྱ་བའི་འདོད་པ་ལས་སྐྱེས་པ་ཞེས་བྱ་བ་འདིས་མཐོང་བས་སྤང་བར་བྱ་བ་འདོད་པ་ནས་སྐྱེས་པ་ནི་ནག་པོ་ཡིན་ལ་འདོད་པ་ནས་སྐྱེས་པ་གཞན་ནི་དཀར་གནག་ཡིན་ནོ་ཞེས་གཉི་ག་ཁྱད་
[50b.7]པར་དུ་བྱས་པའི་ཕྱིར་རོ། །དེ་ནི་ཞེས་བྱ་བ་རྒྱས་པར་འབྱུང་བ་ནི་བསྒོམ་པས་སྤང་བར་བྱ་བར་འདོད་པ་ན་སྤྱོད་པ་དེ་ནི་དགེ་བ་ཡང་སྲིད་ལ་མི་དགེ་བ་ཡང་སྲིད་པས་བསྲེས་ཏེ། གཉི་ག་ཡང་དཀར་གནག་ཡིན་ནོ་ཞེས་བཤད་ཀྱི་སོ་སོར་ནི་མ་ཡིན་ནོ། །ཐུབ་པའི་གསུམ་ཞེས་བྱ་བ་ནི་ཐུབ་པའི་དངོས་པོའམ་ཐུབ་པའི་
[51a]
[51a.1]ལས་ནི་ཐུབ་པ་ཡིན་ཏེ། སྤྲིའུའི་ཞེས་བྱ་བ་ལྟ་བུའོ། །ཐུབ་པའི་གསུམ་ཞེས་བྱ་བ་ནི་ཐུབ་པའི་ཡིན་པས་ན་ཐུབ་པའིའོ། །མི་སློབ་པའི་ཞེས་བྱ་བ་རྒྱས་པར་འབྱུང་བ་ནི་མི་སློབ་པའི་ལུས་ཀྱི་ལས་རྣམ་པར་རིག་བྱེད་མ་ཡིན་པའི་ངོ་བོ་ཉིད་ནི་ལུས་ཀྱི་ཐུབ་པའི་ཡིན་ཏེ་ངག་དང་ཡིད་ཀྱི་ཐུབ་
[51a.2]པའི་དག་ཀྱང་དེ་དང་འདྲའོ། །ཡང་ཅིའི་ཕྱིར་རྣམ་པར་རིག་བྱེད་མ་ཡིན་པ་ཁོ་ན་ཡིན་པར་གཟུང་གི །རྣམ་པར་རིག་བྱེད་ཀྱང་ནི་མ་ཡིན་ཞེ་ན། རྣམ་པར་རིག་བྱེད་ནི་ཟག་པ་དང་བཅས་པ་ཉིད་ཀྱིས་མི་སློབ་པ་ཉིད་ཡིན་པར་མི་སྲིད་པའི་ཕྱིར་རོ། །ཡིད་ཁོ་ན་ཡིད་ཀྱི་ཐུབ་པ་ཡིན་ཏེ་ཞེས་བྱ་བ་ནི་རང་གི་དོན་དུ་རྒྱས་
[51a.3]པར་བྱས་པ་ཡིན་པའི་ཕྱིར་རོ། །སེམས་ནི་དོན་དམ་པར་ཐུབ་པ་ཡིན་ལ་ཞེས་བྱ་བར་ནི་ཉོན་མོངས་པའི་བརྗོད་པ་ཐམས་ཅད་མེད་པ་ཞེས་གཏན་ཚིགས་འཆད་པར་འགྱུར་རོ། །དེ་ནི་མི་སློབ་པ་ཡིན་ནོ་ཞེས་བྱ་བར་ལུས་དང་ངག་གི་ལས་དག་གི་སྒོ་ནས་རྗེས་སུ་དཔག་པར་བྱ་བ་ཡིན་ནོ་ཞེས་གྲག་གོ། །ཇི་ལྟར་
[51a.4]དེ་བཞིན་གཤེགས་པ་རྗེས་སུ་དཔག་པར་བྱ་ཞེ་ན། མདོ་ལས། སྐུའི་ཕྲིན་ལས་རབ་ཏུ་ཞི་བ་དང་། གསུང་གི་ཕྲིན་ལས་རབ་ཏུ་ཞི་བས་ཞེས་འབྱུང་བའི་ཕྱིར་རོ། གྲག་ཅེས་བྱ་བའི་སྒྲ་ཁོ་ནས་བྱེ་བྲག་ཏུ་སྨྲ་བའི་གཞུང་ལུགས་བསྟན་ནས་སློབ་དཔོན་བདག་ཉིད་ཀྱི་གཞུང་ལུགས་གཞན་ཡང་ཞེས་བྱ་བ་རྒྱས་པར་
[51a.5]སྨོས་ཏེ། སེམས་ལ་རྣམ་པར་རིག་བྱེད་མ་ཡིན་པ་མེད་པའི་ཕྱིར་ཞེས་བྱ་བ་ནི་གང་གི་ཕྱིར་སེམས་ལ་རྣམ་པར་རིག་བྱེད་མ་ཡིན་པ་མེད་པ་དེའི་ཕྱིར་ཡིད་ཀྱི་ལས་ནི་སྤོང་བའི་རང་བཞིན་མ་ཡིན་ནོ། །ཐུབ་པའི་ཡང་སྤོང་བའི་དོན་གྱིས་ཡིན་ཏེ་ཞེས་བྱ་བ་ལ་སྤོང་བ་ནི་སྤོང་བར་བྱེད་པ་སྟེ། མི་དགེ་བ་ཐམས་ཅད་སྤོང་
[51a.6]བའི་དོན་གྱིས་ན་ཐུབ་པ་ཡིན་ནོ་སྙམ་དུ་བསམས་པ་ཡིན་ནོ། །དེའི་ཕྱིར་ཡིད་ཉིད་མི་དགེ་བ་ཐམས་ཅད་སྤོང་བ་ལ་ཐུབ་པ་ཞེས་བྱའོ། །ཉོན་མོངས་པའི་བརྗོད་པ་ཐམས་ཅད་མེད་པས་ཏེ། ཉོན་མོངས་པ་རྣམས་ནི་ལོག་པའི་དམིགས་པ་ལ་བརྗོད་པའི་ཕྱིར་བརྗོད་པའོ་ཞེས་བྱ་བའོ། །དེ་དག་ཀྱང་དགྲ་བཅོམ་པ་ལ་
[51a.7]མེད་པས་དགྲ་བཅོམ་པ་དེ་ནི་དོན་དམ་པར་ཐུབ་པ་ཡིན་ནོ། །གཙང་བྱེད་ཅེས་བྱ་བ་ནི་གཙང་བའི་དངོས་པོ་ནི་གཙང་བྱེད་དེ། གཙང་སྦྲ་ཞེས་བྱ་བའི་ཐ་ཚིག་གོ། །ཐམས་ཅད་ཅེས་བྱ་བ་སྨོས་པ་ནི་ལེགས་པར་སྤྱད་པ་ཟག་པ་དང་བཅས་པ་དང་ཟག་པ་མེད་པ་ཐམས་ཅད་བསྡུ་བའི་ཕྱིར་རོ། །དུས་རེ་ཞིག་དང་གཏན་དུ་ཞེས་
[51b]
[51b.1]བྱ་བ་ནི་ལེགས་པར་སྤྱོད་པ་ཟག་པ་དང་བཅས་པས་ནི་དུས་རེ་ཞིག་ཉེས་པར་སྤྱོད་པའི་དྲི་མ་སྤོང་ལ་ཟག་པ་མེད་པས་ནི་གཏན་དུ་སྟེ། མདོ་ལས་དགེ་སློང་དག་འཕགས་པའི་ཤེས་རབ་ཀྱིས་སྤངས་པ་གང་ཡིན་པ་དེ་ནི་སྤངས་པ་ཡིན་ནོ་ཞེས་འབྱུང་བའི་ཕྱིར་རོ། །ལོག་པའི་ཐུབ་པ་དང་གཙང་སྦྲ་ལ་མོས་པ་
[51b.2]རྣམས་དགར་བའི་ཕྱིར་རོ་ཞེས་བྱ་བ་ལ་ལོག་པའི་ཐུབ་པ་ལ་མོས་པ་ནི་མི་སྨྲ་བར་འདུག་པ་ཙམ་གྱིས་འདུག་པར་ལྟ་བ་རྣམས་སོ། །ལོག་པའི་གཙང་སྦྲ་ལ་མོས་པ་ནི་ལུས་ཀྱི་དྲི་མ་མེད་པར་བྱེད་པ་ཙམ་གྱིས་འདག་པར་ལྟ་བ་རྣམས་སོ། །དེ་རྣམས་དགར་བ་ནི་ལྟ་བ་དེ་དང་བྲལ་བ་སྟེ་འདི་དག་ནི་དེའི་ཆེད་ཡིན་
[51b.3]ནོ། །ཆེད་དུ་བསམ་པར་བྱ་བའི་མདོ་ལས་གསུངས་པའི་ཕྱིར་ཞེས་བྱ་བ་ནི་དགེ་སློང་དག་ཆེད་དུ་བསམ་པར་བྱ་བའི་ལས་བྱས་ཤིང་བསགས་པས་དམྱལ་བ་དག་གི་ནང་དུ་སྐྱེ་བར་འགྱུར་རོ། །ཇི་ལྟར་ཆེད་དུ་བསམ་པར་བྱ་བའི་ལས་བྱས་ཤིང་བསགས་པ་ཡིན་ཞེ་ན། དགེ་སློང་དག་འདི་ན་ལ་ལ་ཆེད་དུ་བསམས་
[51b.4]ནས་ལུས་ཀྱི་ལས་རྣམ་པ་གསུམ་བྱེད་ཅིང་སོགས་པ་ཡིན་ལ། ངག་གི་རྣམ་པ་བཞི་དང་། ཡིད་ཀྱི་རྣམ་པ་གསུམ་ཞེས་བྱ་བ་རྒྱས་པར་གསུངས་ནས་བཀའ་སྩལ་པ། དགེ་སློང་དག་ཇི་ལྟར་ཡིད་ཀྱི་ཆེད་དུ་བསམ་པར་བྱ་བའི་ལས་རྣམ་པ་གསུམ་བྱས་ཤིང་བསགས་པ་ཡིན་ཞེ་ན།
[51b.5]འདི་ལྟ་སྟེ། འདི་ན་དགེ་སློང་ལ་ལ་བརྣབ་སེམས་དང་ལྡན་པ་ཡིན། གནོད་སེམས་ཅན་གྱི་སེམས་སུ་གྱུར་པ་ཡིན། ལོག་པར་ལྟ་བ་ཡིན་ཞེས་བྱ་བ་ནས་དགེ་སློང་དག་ཡང་འདི་ན་ལ་ལ་ཕྱིན་ཅི་ལོག་ཏུ་ལྟ་བ་ཡིན་ཞེས་བྱ་བའི་བར་རྒྱས་པར་འབྱུང་བ་ཡིན་ཏེ། དཔེས་སྟོན་པ་རྣམས་ན་རེ་དེ་ལས་བརྣབ་
[51b.6]སེམས་ལ་སོགས་པ་ལས་མ་གཏོགས་པ་ཡིད་ཀྱི་ལས་གཞན་མ་བཤད་པས་བརྣབ་སེམས་ལ་སོགས་པ་ཡིད་ཀྱི་ལས་ཡིན་ནོ་ཞེས་བཤད་དེ། མདོ་སྡེ་པའི་ཁྱད་པར་རྣམས་ན་རེ་ཞེས་བྱ་བའི་ཐ་ཚིག་གོ། །དེ་ལྟ་ན་ནི་ལས་དང་ཉོན་མོངས་པ་དག་གཅིག་ཏུ་འགྱུར་རོ་ཞེས་བྱ་བ་ནི་ཉོན་མོངས་པ་
[51b.7]བརྣབ་སེམས་དང་གནོད་སེམས་དང་། ལོག་པར་ལྟ་བ་དེ་རྣམས་ལས་ཡིན་པས་དེ་དག་གཅིག་པ་ཉིད་དུ་འགྱུར་རོ། །ཉོན་མོངས་པ་འགའ་ཞིག་ལས་སུ་གྱུར་ན་ཡང་ཞེས་བྱ་བ་དེ་ནི་མེད་དེ། སེམས་པའི་ལས་དང་། བསམ་པའི་ལས་ཞེས་འབྱུང་བའི་ཕྱིར་རོ། གལ་ཏེ་དེ་ལྟ་ན་ཆེད་དུ་བསམ་
[52a]
[52a.1]པར་བྱ་བའི་མདོ་ཇི་ལྟར་དྲང་ཞེ་ན། མདོ་ལས་ནི་ཞེས་བྱ་བ་རྒྱས་པར་སྨོས་ཏེ། མདོ་ལས་ནི་བརྣབ་སེམས་ལ་སོགས་པ་དེའི་སྒོ་ནས་སེམས་པ་ཞུགས་པའི་ཕྱིར་བརྣབ་སེམས་ལ་སོགས་པ་དེ་དག་གིས་དགེ་སློང་དག་བརྣབ་སེམས་དང་ལྡན་པ་ཡིན་ཞེས་བྱ་བ་རྒྱས་པར་
[52a.2]སེམས་པ་དེ་སྟོན་པར་བྱེད་དོ། །དེ་ལྟ་མ་ཡིན་ཏེ། ལས་དང་ཉོན་མོངས་པ་དག་གཅིག་པ་ཉིད་ཡིན་ན་ནི་དགེ་སློང་དག་ང་ནི་སེམས་པ་དང་བསམ་པའི་ལས་ཞེས་སྨྲའོ་ཞེས་གསུངས་པ་དེ་དང་ཡང་འགལ་བར་འགྱུར་ལ། ཆོས་མངོན་པ་དང་ཡང་འགལ་བར་འགྱུར་རོ། །ཕ་རོལ་ལ་ཕན་
[52a.3]འདོགས་པ་དང་གནོད་པ་བྱས་པའི་བསམ་པ་མེད་པར་ཞེས་བྱ་བ་རྒྱས་པར་འབྱུང་བ་ནི་གཞན་དག་ལ་ཕན་གདགས་པ་དང་གནོད་པ་བྱ་བ་དག་གིས་བསམ་པ་མེད་པར་ཇི་ལྟར་ན་གོ་རིམས་བཞིན་དུ་ཡང་དག་པའི་ལྟ་བ་དང་ལོག་པའི་ལྟ་བ་དག་དགེ་བ་དང་མི་དགེ་བ་དག་ཉིད་ཡིན་ཞེ་ན། དེའི་ཕྱིར་དེའི་
[52a.4]རྩ་བ་ཡིན་པའི་ཕྱིར་རོ་ཞེས་བྱ་བ་སྨོས་ཏེ། ཡང་དག་པའི་ལྟ་བ་དང་ལོག་པའི་ལྟ་བ་དག་ནི་ཕན་གདགས་པའི་བསམ་པ་དང་གནོད་པར་བྱ་བའི་བསམ་པའི་རྩ་བ་ཡིན་ཏེ། རྒྱུ་ཡིན་ནོ་ཞེས་བྱ་བའི་ཐ་ཚིག་གོ། །དེའི་ཕྱིར་དེ་གཉིས་དགེ་བ་དང་མི་དགེ་བ་ཉིད་ཡིན་ནོ། །ཅི་རིགས་པར་ཞེས་བྱ་བ་ནི་ཇི་ལྟར་སྲིད་
[52a.5]པར་རོ། །ཇི་ལྟ་ཞེ་ན་དགེ་བ་རྣམས་ནི་ལེགས་པར་སྤྱད་པ་དག་ལས་སོ། །མི་དགེ་བ་རྣམས་ནི་ཉེས་པར་སྤྱད་པ་དག་ལས་སོ་ཞེས་བྱ་བ་སྨོས་སོ། །ཉོན་མོངས་པ་ཅན་གཞན་ཡང་ཞེས་བྱ་བ་ནི་བརྡེག་པ་དང་འཆིང་བ་ལ་སོགས་པའོ། །ཤིན་ཏུ་རགས་པ་མ་ཡིན་པའི་ཕྱིར་རོ་ཞེས་བྱ་བ་ནི་སྦྱོར་བ་དང་མཇུག་ཏུ་གྱུར་པ་
[52a.6]དང་། གཞན་དེ་ཡང་ཤིན་ཏུ་རགས་པ་མ་ཡིན་པའི་ཕྱིར་རོ། །ཡིད་ཀྱི་ཉེས་པར་སྤྱོད་པའི་ཕྱོགས་སེམས་པ་ཡང་མ་བསྡུས་སོ་ཞེས་བྱ་བར་སྦྱར་རོ། །མྱོས་པར་གྱུར་པ་ལ་སོགས་པ་སྤང་བ་དང་སྦྱིན་པ་དང་། མཆོད་སྦྱིན་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲ་སྔ་མས་ནི་བརྡེག་པ་དང་འཆིང་བ་
[52a.7]ལ་སོགས་པ་བསྡུ་བའོ། །གཉིས་པས་ཀྱང་ཁྲུས་བྱེད་པ་དང་ལུས་སྐུད་པ་དང་ཉམ་ང་བ་ནས་འདྲེན་པ་ལ་སོགས་པ་བསྡུའོ། །སྙེན་པར་སྨྲ་བ་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲ་ནི་ཆོས་སྟོན་པ་དང་ལམ་སྟོན་པ་ལ་སོགས་པ་བསྡུའོ། །ཡིད་ཀྱི་ལེགས་པར་སྤྱད་པ་ཡང་སེམས་པ་མ་བསྡུས་སོ་
[52b]
[52b.1]ཞེས་བྱ་བར་སྦྱར་རོ། །དྲུག་ནི་རྣམ་རིག་མིན་ཞེས་བྱ་བ་ནི་དྲུག་ནི་གདོན་མི་ཟ་བར་རྣམ་པར་རིག་བྱེད་མ་ཡིན་པ་ཡིན་གྱི་རྣམ་པར་རིག་བྱེད་མ་ཡིན་པ་ཁོ་ན་དྲུག་གོ་ཞེས་བྱ་བར་ངེས་པར་གཟུང་བ་ནི་མ་ཡིན་ནོ། །དངོས་ཀྱི་རྣམ་པར་རིག་བྱེད་མེད་པའི་ཕྱིར་རོ་ཞེས་བྱ་བ་ནི་འདི་ལྟར་བྱེ་བྲག་ཏུ་སྨྲ་བའི་གྲུབ་པའི་མཐའ་
[52b.2]ནི་དངོས་ཀྱི་ལས་ཀྱི་ལམ་གྱིས་བསྡུས་པའི་རྣམ་པར་རིག་བྱེད་ནི་མེད་ཀྱི་སྒོ་བར་བྱེད་པའི་རྣམ་པར་རིག་བྱེད་སྦྱོར་བས་བསྡུས་པ་ནི་ཡོད་དོ་ཞེས་བྱ་བ་ཡིན་ནོ། །གཅིག་རྣམ་གཉིས་སོ་ཞེས་བྱ་བ་ནི་གཅིག་ནི་རྣམ་པ་གཉིས་ཁོ་ན་ཡིན་ནོ་ཞེས་ངེས་པར་གཟུང་བའི་ཕྱིར་བརྩམས་པ་ཡིན་ནོ། །དུས་དེའི་ཚེ་ཤི་ན་ཞེས་
[52b.3]བྱ་བ་ནི་རྣམ་པར་རིག་བྱེད་ཀྱི་ཚེ་ཤི་ན་སྟེ། དུས་གཞན་ཞིག་ན་ཤི་ན་ནི་རྣམ་པར་རིག་བྱེད་མ་ཡིན་པ་ཁོ་ན་ཡིན་ནོ། །དགེ་འདུན་རྣམ་གཉིས་ཞེས་བྱ་བ་ནི་རྣམ་པ་གཉིས་ཁོ་ནའོ་ཞེས་ངེས་པར་གཟུང་བ་ཡིན་ནོ། །ཡང་དག་པར་བླངས་པའི་ཚུལ་ཁྲིམས་ནི་རྣམ་པར་རིག་བྱེད་ལ་རག་ལུས་པའི་ཕྱིར་ཞེས་བྱ་བ་ནི་ཚུལ་
[52b.4]ཁྲིམས་ནི་རྣམ་པ་གཉིས་ཏེ། ཡང་དག་པར་བླངས་པའི་ཚུལ་ཁྲིམས་ནི་སོ་སོར་ཐར་པའི་སྡོམ་པའོ། །ཆོས་ཉིད་ཀྱི་ཚུལ་ཁྲིམས་ནི་བསམ་གཏན་དང་ཟག་པ་མེད་པའི་སྡོམ་པ་དག་གོ། །དེ་ལ་ཡང་དག་པར་བླངས་པའི་ཚུལ་ཁྲིམས་ནི་རྣམ་པར་རིག་བྱེད་ལ་རག་ལས་པ་ཡིན་ཏེ། དེ་ནི་གཞན་ལས་ནོད་པར་བྱེད་པ་
[52b.5]ཡིན་ནོ། །ཆོས་ཉིད་ཀྱི་ཚུལ་ཁྲིམས་ནི་རྣམ་པར་རིག་བྱེད་ལ་རག་ལས་པ་མ་ཡིན་ཏེ། སེམས་ཙམ་ལ་རག་ལས་པའི་ཕྱིར་ཏེ། ཏིང་འཛིན་ལས་སྐྱེས་རྣམ་རིག་མིན། །ཞེས་བྱ་བ་སྨོས་སོ། །ཉེར་བསྡོགས་རྣམས་ནི་རྣམ་རིག་བྱེད། །ཅེས་བྱ་བ་ནི་འདོད་པ་ན་སྤྱོད་པའི་ལས་ཀྱི་ལམ་གྱི་སྦྱོར་བ་ནི་གདོན་
[52b.6]མི་ཟ་བར་རྣམ་པར་རིག་བྱེད་ཡིན་གྱི། རྣམ་པར་རིག་བྱེད་མ་ཡིན་པ་ཡིན་པར་ནི་མ་ངེས་ཏེ། དེ་ཉིད་ཀྱི་ཕྱིར། རྣམ་པར་རིག་བྱེད་མི་འགྱུར་བའམ། །མ་ཡིན་པ་ཞེས་བྱ་བ་སྨོས་སོ། །ཀུན་ནས་དཀྲིས་པ་ཞེས་བྱ་བ་ནི་ངོ་ཚ་མེད་པ་ལ་སོགས་པའོ། །ལྷུར་ལེན་པ་ཆེན་པོ་ཞེས་བྱ་བ་ནི་ཤུགས་དྲག་པོས་
[52b.7]སོ། །དེའི་རྗེས་སུ་མཐུན་པའི་ཆོས་སྤྱོད་ན་ནི་ཞེས་བྱ་བ་ནི་ལས་ཀྱི་ལམ་དེ་དང་རྗེས་སུ་མཐུན་པའི་ཆོས་ནི་འདྲ་བའི་ལས་ཏེ། དཔེར་ན་སྲོག་ཆགས་ཤི་ནས་ཀྱང་ངན་སོང་སྣུན་པར་བྱེད་པ་དང་། ངན་བྱེད་པ་དང་ཤ་གཅོད་པ། །ཞེས་བྱ་བ་དེ་ལྟ་བུ་ལ་སོགས་པ་ལྟ་བུའོ། །ངན་བྱེད་པ་ཞེས་བྱ་བའི་སྒྲ་ནི་གཉིས་ཏེ་འོག་
[53a]
[53a.1]མ་ཤོས་ནི་པགས་པ་འཆུ་བ་ཞེས་བྱ་བའི་ཐ་ཚིག་གོ། །གོང་མ་ནི་དོན་གཞན་ཞིག་ཡིན་པར་བལྟ་བར་བྱའོ། །འབྲས་བུ་ཡོངས་སུ་རྫོགས་པས་སོ། །ཞེས་བྱ་བ་ནི་སྦྱོར་བའི་འབྲས་བུ་ལས་ཀྱི་ལམ་དངོས་ཡོངས་སུ་རྫོགས་པ་སྟེ། གང་ཞིག་སྦྱོར་བར་བྱེད་ཀྱི་ལས་ཀྱི་ལམ་
[53a.2]དངོས་སྐྱེད་པར་མི་བྱེད་པ་དེ་ལ་ནི་སྦྱོར་བ་ཁོ་ན་ཡོད་ཀྱི་འབྲས་བུ་ཡོངས་སུ་རྫོགས་པ་ནི་མེད་དོ། །དེ་བཞིན་དུ་གཞན་དྲུག་ལ་ཡང་ཅི་རིགས་པར་སྦྱར་བར་བྱའོ་ཞེས་བྱ་བ་ནི་འདི་ལྟར་འདི་ན་ཁ་ཅིག་གཞན་གྱི་ནོར་རྐུ་བར་འདོད་ལ་ཁྲི་ལས་ལྡང་བར་བྱེད་མཚོན་ཆ་ལེན་པར་བྱེད་གཞན་གྱི་ཁྱིམ་དུ་འགྲོ་བར་བྱེད་པ་
[53a.3]གཉིད་ལོག་གམ་འོན་ཏེ་མ་ལོག་ཅེས་ཉན་པར་བྱེད་གཞན་གྱི་ནོར་ལ་ནོམ་པར་བྱེད་པ་ནས་ཇི་སྲིད་གནས་ནས་མ་སྤགས་པ་དེ་སྲིད་དུ་ནི་སྦྱོར་བ་ཡིན་ནོ། །སྐད་ཅིག་མ་གང་ལ་གནས་ནས་སྤོག་པར་བྱེད་པ་དེའི་ཚེའི་རྣམ་པར་རིག་བྱེད་དང་། དེའི་སྐད་ཅིག་གི་རྣམ་པར་རིག་བྱེད་མ་ཡིན་པ་གང་ཡིན་པ་དེ་ནི་
[53a.4]ལས་ཀྱི་ལམ་དངོས་ཡིན་ནོ། །རྒྱུ་གཉིས་ཀྱིས་ན་མ་བྱིན་པར་ལེན་པའི་ཁ་ན་མ་ཐོ་བས་རེག་པར་འགྱུར་ཏེ། སྦྱོར་བ་དང་། འབྲས་བུ་ཡོངས་སུ་རྫོགས་པས་སོ། །དེ་ཕྱིན་ཆད་ཀྱི་རྣམ་པར་རིག་བྱེད་མ་ཡིན་པའི་སྐད་ཅིག་མ་རྣམས་ཀྱང་མཇུག་ཡིན་ནོ། །ཇི་སྲིད་དུ་གཞན་གྱི་ནོར་དེ་འགེད་པ་འམ།
[53a.5]འཚོང་བ་འམ། སྦེད་པ་འམ། རྗེས་སུ་སྒྲོགས་པ་དེ་སྲིད་དུ་ནི་དེའི་རྣམ་པར་རིག་བྱེད་ཀྱི་སྐད་ཅིག་མ་དག་ཀྱང་མཇུག་ཡིན་ནོ། །དེ་བཞིན་དུ་གཞན་ལྔ་ལ་ཡང་ཅི་རིགས་པར་སྦྱར་བར་བྱའོ། །གྲུབ་པའི་མཐའ་ལས་ནི་དེ་སྐད་དུ་མི་འབྱུང་ངོ་ཞེས་བྱ་བ་ནི་གྲུབ་པའི་མཐའ་ལས། སྔ་དང་མཉམ་དུ་ཤི་བ་ལ། །
[53a.6]དངོས་མེད་ལུས་གཞན་སྐྱེས་ཕྱིར་རོ། །ཞེས་འབྱུང་བའི་ཕྱིར་རོ། །དེ་བརྗོད་པར་མི་བྱའོ་ཞེས་བྱ་བ་ནི་སྲོག་གཅོད་པར་བྱེད་པ་ཞེས་བྱ་བ་སྟེ། སྐབས་སུ་བབ་པའི་གནས་སྐབས་དང་མི་འབྱོར་བའི་ཕྱིར་རོ། །འདི་སྐད་དུ་སྲོག་ཆགས་ཤི་བའི་ཚེའི་རྣམ་པར་རིག་བྱེད་དང་། དེའི་སྐད་ཅིག་གི་རྣམ་པར་རིག་བྱེད་
[53a.7]མ་ཡིན་པ་གང་ཡིན་པ་དེ་ནི་ལས་ཀྱི་ལམ་ཡིན་ནོ་ཞེས་བརྗོད་དགོས་པར་འགྱུར་རོ། །གང་ཡང་བསྟན་བཅོས་ལས་འདི་སྐད་དུ་ཞེས་བྱ་བ་རྒྱས་པར་འབྱུང་བ་ནི་བྱེ་བྲག་ཏུ་སྨྲ་བ་རྣམས་ཀྱི་ནི་བསྟན་བཅོས་ཀྱི་ཚིག་འདིའི་དོན་འདི་སྐད་དུ་བསྟན་བཅོས་ཀྱི་ཕྱོགས་འདིར་ནི་མཇུག་སྦྱོར་བའི་སྒྲར་གསུངས་སོ་ཞེས་རྣམ་
[53b]
[53b.1]པར་བཤད་དེ། སྦྱོར་བ་དང་འདྲ་བ་ནས་སྦྱོར་བ་སྟེ། སྦྱོར་བ་དང་། མཚུངས་པའི་ལས་ཞེས་བྱ་བའི་ཐ་ཚིག་གོ། །དོན་འདི་ནི་འགལ་ལོ། །ཅིའི་ཕྱིར་ཞེ་ན། དེའི་ཚེ་དངོས་ཁོ་ན་མ་འགགས་པའི་ཕྱིར་ཏེ། ཅིའི་ཕྱིར་ཞེ་ན། སྲོག་ཆགས་ཤི་ནས་ལས་ཀྱི་ལམ་དངོས་སུ་རྣམ་པར་འཇོག་པའི་ཕྱིར་རོ་སྙམ་དུ་བསམས་
[53b.2]པ་ཡིན་ནོ། །བྱེ་བྲག་ཏུ་སྨྲ་བས་ཇི་ལྟར་ཉེས་པ་མེད་པ་དེ་ལྟ་བུ་ཡིན་ནོ་ཞེས་བྱ་བ་སྨོས་སོ། །སློབ་དཔོན་གྱིས་ཇི་ལྟར་ན་ཉེས་པ་མེད་ཅེས་བརྗོད་པ་དང་། ཡང་བྱེ་བྲག་ཏུ་སྨྲ་བས་དེར་དངོས་ཁོ་ན་སྦྱོར་བའི་སྒྲར་གསུངས་ཞེས་བྱའོ་ཞེས་བྱ་བ་སྨྲས་ཏེ། གང་དུ་གསུངས་ཤེ་ན། སྲོག་ཆགས་བསད་ལ་
[53b.3]སྲོག་གཅོད་པ་མ་འགགས་པ་ཡོད་དམ་ཞེས་འདྲི་བ་གང་ཡིན་པ་དེར་རོ། །ཅི་མཇུག་སྦྱོར་བའི་སྒྲར་གསུངས་སོ་ཞེས་བྱ་བའི་ཕྱོགས་འདི་བོར་རམ་ཞེ་ན། དེ་ཡང་མ་བོར་བ་ཉིད་དོ། །གཉི་ག་ཡང་སྲིད་དེ། གལ་ཏེ་འཆི་བ་སྲིད་པའི་མཇུག་ཐོགས་ཀྱི་སྐད་ཅིག་མ་ལ་སྲོག་ཆགས་ཤི་བར་གྱུར་ན་ནི་དེར་
[53b.4]དངོས་པོ་སྦྱོར་བའི་སྒྲར་གསུངས་སོ་ཞེས་བྱ་བར་འདོད་ལ། དེ་ཕན་ཆད་གཅིག་ཏུ་ཤི་ན་ནི་མཇུག་ཡིན་ནོ་ཞེས་བྱ་བར་འདོད་དོ། །སློབ་དཔོན་གྱིས་འོ་ན་དེའི་ཚེ་རྣམ་པར་རིག་བྱེད་ཇི་ལྟར་ལས་ཀྱི་ལམ་དངོས་སུ་འགྱུར་ཞེས་བྱ་བ་སྨོས་ཏེ་སྲོག་ཆགས་ཤི་ཟིན་པ་ལ་རྣམ་པར་རིག་བྱེད་དུ་ཅུང་ཟད་ཀྱང་མི་བྱེད་དེ། བསྣུན་
[53b.5]པའི་རྣམ་པར་རིག་བྱེད་དེས་ཤི་ཟིན་པ་ལ་ཡང་གསོད་པ་ནི་མེད་དོ་སྙམ་དུ་བསམས་ནས་འདི་འདྲི་བར་བྱེད་པ་ཡིན་ནོ། །ཅིའི་ཕྱིར་རྣམ་པར་རིག་བྱེད་མ་ཡིན་པ་མི་འདྲི་ཞེ་ན། འདི་ལྟར་འདི་ནི་བསྟན་དུ་མེད་པའི་ཕྱིར་དང་ཐོགས་པ་མེད་པའི་ཕྱིར་བསྣུན་པ་ཞེས་བྱ་བ་མ་ཡིན་ནོ། །བྱེ་བྲག་ཏུ་སྨྲ་བས་ཇི་ལྟར་ན་མི་
[53b.6]འགྱུར་ཞེས་བྱ་བ་སྨྲས་པ་དང་། སློབ་དཔོན་གྱིས་རང་གི་བསམ་པ་དགྲོལ་བའི་ཕྱིར་མི་ནུས་པའི་ཕྱིར་རོ་ཞེས་བྱ་བ་སྨོས་ཏེ། སྲོག་ཆགས་ཤི་ཟིན་པ་ལ་ནི་དེའི་ནུས་པ་མ་མཐོང་ངོ་། །བྱེ་བྲག་ཏུ་སྨྲ་བས་སྨྲས་པ། དེ་ནི་ནུས་པ་མེད་ན་རྣམ་པར་རིག་བྱེད་མ་ཡིན་པ་ཇི་ལྟར་ལས་ཀྱི་ལམ་དངོས་ཞེས་བྱ་བར་འགྱུར་
[53b.7]གང་གི་ཕྱིར་དེ་ལྟར་རྣམ་པར་རིག་བྱེད་མ་ཡིན་པ་ནུས་པ་མེད་དུ་ཟིན་ཀྱང་ལས་ཀྱི་ལམ་དངོས་ཡིན་པའི་ཕྱིར་སྦྱོར་བའི་འབྲས་བུ་ཡོངས་སུ་རྫོགས་པའི་ཚེ་སྟེ། ལས་ཀྱི་ལམ་དངོས་ཡོངས་སུ་རྫོགས་ཤིང་སྲོག་ཆགས་ཤི་བའི་གནས་སྐབས་ན་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ཞེས་
[54a]
[54a.1]བྱ་བ་དེ་གཉི་ག་ལས་ཀྱི་ལམ་ཡིན་ཏེ། རུང་ངོ་ཞེས་བྱ་བའི་ཐ་ཚིག་གོ། །དེ་བཞིན་དུ་གཞན་དག་ལ་ཡང་ཅི་རིགས་པར་སྦྱར་བར་བྱའོ་ཞེས་བྱ་བ་ནི་དཔེར་ན་གཞན་གྱི་ནོར་བརྐུ་བར་འདོད་པ་ནའོ། །དོན་གྲུབ་པར་བྱ་བའི་ཕྱིར་གཞན་གྱི་ནོར་ཕྲོགས་ནས་ཕྱུགས་དེས་གཏོར་
[54a.2]མ་བྱེད་པ་དང་དེ་ཉིད་ཀྱིས་དེ་ཕྲོག་ཏུ་གཞུག་པའི་ཕྱིར་དེའི་ཆུང་མ་ལ་ཉལ་པོ་བྱེད་པ་དང་དེ་ལ་གང་དག་ཡོངས་སུ་སྐྱོབ་པར་འགྱུར་བ་དེའི་མཛའ་བོ་ལ་བརྫུན་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དག་གིས་དབྱེན་བྱེད་པ་དང་། དེའི་ནོར་ལ་བརྣབ་སེམས་བྱེད་པ་དང་། ནོར་དེའི་བདག་པོ་ལ་གནོད་
[54a.3]སེམས་བྱེད་པ་དང་། ལོག་པར་ལྟ་བ་འཕེལ་བར་བྱེད་པ་ལྟ་བུའོ། །དེ་བཞིན་དུ་འདོད་པས་ལོག་པར་གཡེམ་པ་ལ་སོགས་པ་ལ་ཡང་ཅི་རིགས་པར་སྦྱར་བར་བྱ་སྟེ། འདི་ནི་ཕྱོགས་ཡིན་ནོ། །འདི་ལ་ལས་ཀྱི་ལམ་ཐམས་ཅད་ཆགས་པ་ལ་སོགས་པས་མཐར་ཕྱིན་པར་བྱེད་པ་ནི་མ་ཡིན་ཏེ་ཞེས་བྱ་བ་ནི་
[54a.4]ཐམས་ཅད་ཆགས་པས་མཐར་ཕྱིན་པར་བྱེད་པ་ཡང་མ་ཡིན་ནོ། །འོ་ན་ཅི་ཞེ་ན། འདོད་པས་ལོག་པར་གཡེམ་པ་ལ་སོགས་པ་ཁ་ཅིག་ཁོ་ནའོ། །ཐམས་ཅད་གནོད་སེམས་ཀྱིས་ཀྱང་མ་ཡིན་ནོ། །འོ་ན་ཅི་ཞེ་ན། སྲོག་གཅོད་པ་ལ་སོགས་པ་ཁ་ཅིག་ཁོ་ནའོ། །དེ་བཞིན་དུ་ཐམས་ཅད་གཏི་
[54a.5]མུག་གིས་ཀྱང་མ་ཡིན་ནོ། །འོ་ན་ཅི་ཞེ་ན། ལོག་པར་ལྟ་བ་ལ་སོགས་པ་ཁོ་ནའོ་ཞེས་བྱ་བ་ཡིན་ནོ། །སྦྲང་བུ་ཏྲེ་མ་བུ་ཀ་ནི་སྦྲང་བུ་བར་ཏ་རྣམས་སོ། །སོགས་པ་ཞེས་བྱ་བའི་སྒྲས་ནི་སྟག་ལ་སོག་པ་བསྡུའོ། །གང་ཡང་ལོག་པར་ལྟ་བས་རབ་ཏུ་བཅུག་པ་ཞེས་བྱ་བ་ནི་འཇིག་རྟེན་ཕ་རོལ་མེད་དོ་སྙམ་
[54a.6]ནས་འཛེམ་པ་མེད་པར་གསོད་པ་སྟེ། དེ་ཡང་གཏི་མུག་ལས་སྐྱེས་པ་ཡིན་ནོ། །གཞན་གྱིས་རྙེད་པ་འམ་བཀུར་སྟི་འམ་གྲགས་པའི་ཕྱིར་ཞེས་བྱ་བ་ནི་གཞན་གྱི་རྙེད་པའི་ཕྱིར། ཕ་རོལ་པོའི་ནོར་བརྐུ་བ་སྟེ། དཔེར་ན་རྐུན་ལག་བཀྱེ་བ་ལྟ་བུའོ། །བཀུར་སྟི་འམ་གྲགས་པའི་ཕྱིར་བརྐུ་བའི་མ་བྱིན་ལེན་
[54a.7]པ་དེ་ཡང་ཆགས་པ་ལས་སྐྱེས་པ་ཡིན་ནོ། །གང་ཡང་ལོག་པར་ལྟ་བས་རབ་ཏུ་བཅུག་པའི་མ་བྱིན་པར་ལེན་པ་དེ་ཡང་གཏི་མུག་ལས་སྐྱེས་པ་ཡིན་ཏེ། དེ་ལ་གཏི་མུག་གཙོ་བོ་ཡིན་པའི་ཕྱིར་རོ། །ཆོ་ག་ཅན་ཞེས་བྱ་བ་ནི་མཆོད་སྦྱིན་བྱེད་པའོ། །མའི་གན་དུ་ཉལ་པོ་ལ་འགྲོ་བ་ནི་མི་ཚངས་པར་སྤྱོད་
[54b]
[54b.1]པའི་དོན་དུའོ། །སྲིང་མོའི་གན་དུ་ཞེས་བྱ་བ་ནི་འགྲོ་བའོ་ཞེས་བྱ་བར་སྦྱར་ཏེ། སྲིང་མོ་སྟེ་བུ་སྲིང་གན་དུ་འགྲོའོ་ཞེས་བྱ་བའི་ཐ་ཚིག་གོ། །རུས་པ་གཅིག་པའི་གན་དུ་འགྲོའོ་ཞེས་བྱ་བ་ནི་རུས་མཐུན་པའི་གན་དུ་འགྲོའོ་ཞེས་བྱ་བའི་ཐ་ཚིག་གོ། །གང་དག་ཟེར་བ་ལྟ་བུའོ་ཞེས་བྱ་བ་རྒྱས་པར་འབྱུང་བ་བུད་མེད་
[54b.2]ནི་གཏུན་ལ་སོགས་པ་དང་འདྲ་སྟེ་ཇི་ལྟར་གཏུན་ལ་སོགས་པ་ལོངས་སྤྱད་པའི་སྒོ་ནས་ཐུན་མོང་ཡིན་པ་ལྟར་བུད་མེད་ཀྱང་དེ་དང་འདྲ་སྟེ། དེ་ལྟ་བས་ན་ཉལ་པོ་ལ་འགྲོ་བ་རྣམས་ལ་ཉེས་པ་མེད་དོ་ཞེས་བྱ་བ་ཡིན་ནོ། །བརྫུན་དུ་སྨྲ་བ་ལ་སོགས་པ་ཆགས་པ་ལས་སྐྱེས་པ་དང་ཞེ་སྡང་ལས་སྐྱེས་པ་ལ་སོགས་པ་ནི་སྔ་
[54b.3]མ་བཞིན་ནོ་ཞེས་བྱ་བ་ནི་བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་ལ་ཆགས་པ་སྐྱེས་པ་ནི་གཞན་གྱི་རྙེད་པ་འམ་བཀུར་སྟི་འམ་གྲགས་པའི་ཕྱིར་རམ། བདག་གམ་མཛའ་བོས་ཡོངས་སུ་བསྐྱབ་པའི་ཕྱིར་རོ། །ཞེ་སྡང་ལས་སྐྱེས་པ་ནི་ཁོ་ན་ཚར་ཕྱིན་པར་བྱ་བའི་ཕྱིར་རོ། །བཞད་གད་
[54b.4]ལྡན་ཞེས་བྱ་བ་ནི་ཀུ་རེ་དང་ལྡན་པའོ། །ལོག་པར་ལྟ་བས་རབ་ཏུ་བཅུག་པ་ཞེས་བྱ་བ་ནི་འཇིག་རྟེན་ཕ་རོལ་མེད་དོ་ཞེས་མཚམས་གཟུང་དུ་མེད་པའི་བརྫུན་དུ་སྨྲ་བ་གང་ཡིན་པ་དེ་ཡང་གཏི་མུག་ལས་སྐྱེས་པ་ཡིན་ནོ། །ཕྲ་མ་ལ་སོགས་པ་སྟེ། ཕྲ་མ་དང་། ཚིག་རྩུབ་པོ་དང་། མ་ཀླས་པའི་ཚིག་ཀྱལ་
[54b.5]པ་ནི་བརྫུན་དུ་སྨྲ་བ་བཞིན་དུ་གཏི་མུག་ལས་སྐྱེས་པ་ཡིན་ནོ། །གང་ཡང་ཞེས་བྱ་བ་རྒྱས་པར་འབྱུང་བ་ནི་རིག་བྱེད་དང་གྲངས་ཅན་གྱི་དང་། བྱེ་བྲག་པའི་ལས་ལ་སོགས་པའི་བསྟན་བཅོས་ངན་པ་བརྡོལ་བའི་ཚིག་ཀྱལ་པ་དེ་ཡང་གཏི་མུག་ལས་སྐྱེས་པ་ཡིན་ནོ། །དེ་ཡང་ཞེས་བྱ་བ་ནི་དགེ་བའི་སེམས་དེའོ། །
[54b.6]གནས་སྣ་ཚོགས་པར་འཇུག་པར་བྱེད་ཅེས་བྱ་བ་ནི་དཀྱིལ་འཁོར་དུ་འཇུག་པར་བྱེད་ཅེས་བྱ་བའི་ཐ་ཚིག་སྟེ། མཚམས་ཆེན་པོའི་དཀྱིལ་འཁོར་དེ་ན་ནི་གནས་སྣ་ཚོགས་པ་ཡོད་དོ། །ལས་གསུམ་པ་བརྗོད་པ་ན་ཞེས་བྱ་བ་ནི་དགེ་ཚུལ་ནི་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པར་བྱེད་
[54b.7]དོ། །དེ་ལ་གསོལ་བས་ནི་མིང་འདི་ཞེས་བགྱི་བ་དགེ་འདུན་གྱིས་བསྙེན་པར་རྫོགས་པར་མཛད་དུ་གསོལ་ཞེས་གསོལ་བ་འདེབས་པའི་དོན་བརྗོད་པ་ཡིན་ནོ། །ལས་བརྗོད་པས་ནི་འདི་དགེ་འདུན་གྱིས་བསྙེན་པར་རྫོགས་པར་མཛད་ན་ཞེས་བྱ་བའི་དོན་བརྗོད་པ་ཡིན་ནོ། །ལས་བརྗོད་པ་དེ་ཡང་ལན་གསུམ་
[55a]
[55a.1]དུ་བརྗོད་དེ། ལས་བརྗོད་པ་གསུམ་པ་ཡོངས་སུ་མ་རྫོགས་པའི་བར་ནི་ལས་ཀྱི་ལམ་གྱི་སྦྱོར་བ་ཡིན་པར་ཁོང་དུ་ཆུད་པར་བྱའོ། །འདི་ནི་མཇུག་གི་རྣམ་པར་རིག་བྱེད་དང་དེའི་སྐད་ཅིག་གི་རྣམ་པར་རིག་བྱེད་མ་ཡིན་པ་གང་ཡིན་པ་དེ་ནི་ལས་ཀྱི་ལམ་དངོས་ཡིན་ནོ། །དེའི་འོག་ཏུ་ཇི་
[55a.2]སྲིད་དུ་གནས་བསྒོ་བ་དང་ཞེས་བྱ་བ་ནི་གནས་ནི་བཞི་པོ་ཆོས་གོས་དང་། བསོད་སྙོམས་དང་། གནས་མལ་དང་། ན་བའི་རྐྱེན་སྨན་གྱི་ཡོ་བྱད་ཀྱི་མཚན་ཉིད་ཇི་སྐད་བཤད་པའི་ཆོ་གས་བསྙེན་པར་རྫོགས་པ་དེ་ལ་བསྒོ་བ་དང་། དེའི་རྟེན་རྣམ་པར་རིག་པར་བྱེད་པ་དང་སྟེ། གནས་ཀྱི་རྟེན་རྣམ་པར་རིག་
[55a.3]པར་བྱེད་པ་ཞེས་བྱ་བའི་ཐ་ཚིག་གོ། །ཇི་སྲིད་དུ་རྣམ་པར་རིག་བྱེད་མ་ཡིན་པ་རྗེས་སུ་འབྲང་བ་ཞེས་བྱ་བ་ནི་ཇི་སྲིད་དུ་སྡོམ་པ་མ་བཏང་བ་ཞེས་བྱ་བའི་ཐ་ཚིག་གོ། །འདི་ནི་མཇུག་ཡིན་ནོ། །སྲོག་གཅོད་པ་དང་། གནོད་སེམས་དང་། ཚིག་རྩུབ་པོ་དང་། འདི་དག་ནི་ཞེ་སྡང་གི་མཐར་ཕྱིན་པར་བྱེད་དེ་ཞེས་བྱ་
[55a.4]བ་ནི་ཞེ་སྡང་ཁོ་ནས་ཞེས་བྱ་བར་ངེས་པར་གཟུང་བ་ཡིན་ནོ། །ཡོངས་སུ་འདོར་བ་དང་། རྩུབ་པའི་སེམས་མངོན་དུ་གྱུར་པའི་ཕྱིར་རོ་ཞེས་བྱ་བ་ནི་ཡོངས་སུ་འདོར་བའི་སེམས་མངོན་དུ་གྱུར་པའི་ཕྱིར་ཞེ་སྡང་གིས་སྲོག་གཅོད་པ་མཐར་ཕྱིན་པར་བྱེད་ལ་རྩུབ་པའི་སེམས་མངོན་དུ་གྱུར་པའི་ཕྱིར་གནོད་སེམས་དང་།
[55a.5]ཚིག་རྩུབ་པོ་དག་མཐར་ཕྱིན་པར་བྱེད་དེ་ཞེས་བྱ་བ་ནི་ཞེ་སྡང་ཁོ་ནས་ཞེས་བྱ་བར་ངེས་པར་གཟུང་བ་ཡིན་ནོ། །ཡོངས་སུ་འདོར་བ་དང་། རྩུབ་པའི་སེམས་མངོན་དུ་གྱུར་པའི་ཕྱིར་རོ་ཞེས་བྱ་བ་ནི་ཡོངས་སུ་འདོར་བ་མེད་པའི་སེམས་མངོན་དུ་གྱུར་པའི་ཕྱིར་ཞེ་སྡང་གིས་སྲོག་གཅོད་པ་མཐར་ཕྱིན་པར་བྱེད་ལ་རྩུབ་པའི་
[55a.6]སེམས་མངོན་དུ་གྱུར་པའི་ཕྱིར་གནོད་སེམས་དང་། ཚིག་རྩུབ་པོ་དག་མཐར་ཕྱིན་པར་བྱེད་དོ། །ཆ་བཞིར་བཤད་པ་ཞེས་བྱ་བ་ནི་མཚན་བཞིར་བཤད་པ་སྟེ། སྲོག་གཅོད་པ་དང་། གནོད་སེམས་དང་། ཚིག་རྩུབ་པོ་ནི་ཞེ་སྡང་གིས་མཐར་ཕྱིན་པར་བྱེད་ཅེས་བྱ་བ་ནི་ཆ་དང་པོ་ཡིན་ནོ། །འདོད་པས་ལོག་པར་གཡེམ་པ་
[55a.7]དང་། བརྣབ་སེམས་དང་། མ་བྱིན་པར་ལེན་པ་རྣམས་ནི་ཆགས་པས་རྫོགས་པར་བྱེད་ཅེས་བྱ་བ་ནི་གཉིས་པའོ། །ལོག་པར་ལྟ་བ་གཏི་མུག་གིས་ཞེས་བྱ་བ་ནི་གསུམ་པའོ། །ལྷག་མ་གསུམ་གྱིས་རྫོགས་པར་འདོད། །ཅེས་བྱ་བ་ནི་ཆ་བཞི་པ་ཡིན་ནོ། །གཞི་ནི་ལོངས་སྤྱོད་ཡིན་ནོ་ཞེས་བྱ་བ་ནི་གཞི་
[55b]
[55b.1]ཡུལ་ཡིན་པའོ། །གཞི་ནི་མིང་དང་གཟུགས་ཡིན་ནོ་ཞེས་བྱ་བ་ནི་གཞི་ཕུང་པོ་ལྔ་ཡིན་ནོ་ཞེས་བྱ་བའི་ཐ་ཚིག་གོ། །མིང་ནི་ཚོར་བ་ལ་སོགས་པའི་ཕུང་པོའོ། །གཟུགས་ནི་གཟུགས་ཀྱི་ཕུང་པོའོ། །གཞི་དང་རྟེན་དང་ཡུལ་ཞེས་བྱ་བ་ནི་དོན་ཐ་མི་དད་དོ། །བརྫུན་དུ་སྨྲ་བ་ལ་སོགས་
[55b.2]པའི་གཞི་ནི་མིང་གི་ཚོགས་ཡིན་ནོ་ཞེས་བྱ་བ་ནི་ངག་ནི་མིང་ལ་འཇུག་གོ་ཞེས་བྱ་བའི་ཕྱིར་རོ། །དངོས་མེད་ཅེས་བཀག་པའི་ཕྱིར་མཇུག་ཀྱང་མེད་དོ་ཞེས་བྱ་བར་མངོན་ཏེ་མཇུག་ནི་དངོས་སྔོན་དུ་འགྲོ་བ་ཅན་ཡིན་པའི་ཕྱིར་རོ། །སྲོག་གཅོད་པའི་ཁ་ན་མ་ཐོ་བས་རེག་པར་མི་འགྱུར་བ་ཞེས་བྱ་བ་ནི་དངོས་
[55b.3]ཀྱིས་རེག་པར་མི་འགྱུར་བ་ཞེས་བྱ་བར་བསམས་པ་ཡིན་ནོ། །ལུས་གཞན་སྐྱེས་པའི་ཕྱིར་ཞེས་བྱ་བ་ནི་སྐལ་བ་མི་མཉམ་པའི་ལུས་སྐྱེས་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་དག་ནི་དོན་གྱིས་ན་ཕན་ཚུན་སྦྱོར་བར་བྱེད་པ་ཡིན་ནོ་ཞེས་བྱ་བ་ནི་དངོས་སུ་ཚིག་གིས་ཕན་ཚུན་སྦྱོར་བར་བྱེད་པ་ནི་མ་ཡིན་ནོ། །འོ་
[55b.4]ན་ཅི་ཞེ་ན། སྲོག་གཅོད་པར་བྱ་བར་ཁས་བླངས་པའི་ཤུགས་ཀྱིས་སོ་ཞེས་བྱ་བར་སྟོན་པར་བྱེད་དེ་དོན་གཅིག་པའི་ཕྱིར་རོ། །བསམས་ནས་ཞེས་བྱ་བ་ནི་ཡོངས་སུ་བསམས་ནས་ཞེས་བྱ་བའི་དོན་ཏོ། །གཞན་དང་མ་ནོར་བར་ཞེས་བྱ་བ་ནི་ནོར་ཏེ་གཞན་གསོད་པར་མི་བྱེད་ན་ཞེས་བྱ་བའི་ཐ་ཚིག་གོ། །
[55b.5]ཕུང་པོ་སྐད་ཅིག་མ་རྣམས་ལ་ཞེས་བྱ་བ་ནི་རང་གི་དང་ཁོ་ནས་འཇིག་པའི་ཕུང་པོ་འདི་དག་ཇི་ལྟར་གཞན་གྱིས་འགག་པར་བྱེད་སྙམ་དུ་བསམས་པ་ཡིན་ནོ། །སྲོག་ཅེས་བྱ་བ་ནི་ལུས་དང་སེམས་ལ་བརྟེན་ནས་འཇུག་པའི་རླུང་ཡིན་ཞེས་བྱ་བ་ཇི་ལྟར་སེམས་ལ་བརྟེན་ནས་འཇུག་ཅེ་ན་སེམས་ལ་རག་ལས་ཤིང་
[55b.6]འཇུག་པའི་ཕྱིར་ཏེ། འདི་ལྟར་འགོག་པ་དང་། འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་པ་དང་ཤི་བ་ལ་མི་འབྱུང་བའི་ཕྱིར་རོ། །བསྟན་བཅོས་ལས་ཀྱང་དབུགས་རྔུབ་པ་དང་དབུགས་དབྱུང་བ་གང་ཡིན་པ་དེ་དག་ཅི་ལུས་ལ་བརྟེན་ནས་འཇུག་པ་ཞེས་བརྗོད་པར་བྱའམ། སེམས་ལ་བརྟེན་
[55b.7]ནས་འཇུག་པ་ཞེས་བྱའམ། ལུས་དང་སེམས་ལ་མི་བརྟེན་པ་ཁོ་ནར་འཇུག་པ་ཞེས་བརྗོད་པར་བྱ། སྨྲས་པ། ལུས་དང་སེམས་ལ་བརྟེན་ནས་འཇུག་པ་ཞེས་བརྗོད་པར་བྱའོ་ཞེས་བྱ་བ་རྒྱས་པར་བཤད་དོ། །དེ་གཅོད་པར་བྱེད་དོ་ཞེས་བྱ་བ་ནི་སྲོག་གཅོད་པར་བྱེད་དོ་ཞེས་བྱ་བའི་ཐ་ཚིག་གོ། །སྐྱེས་པ་ནི་རང་གི་
[56a]
[56a.1]ངང་གིས་འགག་པའི་ཕྱིར་མ་འོངས་པ་སྐྱེ་བ་ལ་གགས་བྱེད་པ་ནི་འགག་པར་བྱེད་པ་ཡིན་ནོ་ཞེས་བརྗོད་པར་བྱ་སྟེ། དཔེར་ན་སྐད་ཅིག་མ་ཡིན་ཡང་མར་མེའམ་དྲིལ་བུའི་སྐད་འགག་པར་བྱེད་པ་དང་འདྲའོ། །ཇི་ལྟར་འགག་པར་བྱེད་ཅེ་ན། མ་འོངས་པ་སྐྱེ་བ་ལ་གགས་
[56a.2]བྱེད་པའི་ཕྱིར་རོ། །ཡང་ན། སྲོག་གི་དབང་པོ་སྲོག་ཡིན་ཏེ། །ཞེས་བྱ་བ་ནི་འདི་ནི་སེམས་དང་ལྡན་པ་མ་ཡིན་པའི་འདུ་བྱེད་ཡིན་པར་སྟོན་ཏོ། །དེ་མེད་པས་གང་ཞིག་འཆི་བར་འགྱུར་བའི་སྲོག་དེ་གང་གི་ཡིན་ཞེས་བྱ་བ་སངས་རྒྱས་པ་རྣམས་ཀྱི་ལྟར་ན་བདག་མེད་པར་སྨྲ་བའི་ཕྱིར་སྲོག་མེད་པས་
[56a.3]སྲོག་ཆགས་གང་ཞིག་འཆི་བར་འགྱུར་བ་དེ་མེད་དེ་དེའི་ཕྱིར་དེ་སྐད་དུ་འདྲི་བ་ཡིན་ནོ། །གང་གི་ཞེས་བྱ་བ་དྲུག་པ་ནི་གང་ཟག་ཏུ་སྨྲ་བ་དགག་པའི་རབ་ཏུ་བྱེད་པར་བདག་མེད་ན་དྲན་པ་འདི་གང་གི་ཡིན་ཅིའི་ཕྱིར་ན་འདི་དྲུག་པ་ཡིན་ཞེས་བྱ་བའི་ཕྱོགས་འདིར་བསམ་པར་བྱ་སྟེ། གཏང་པ་འདི་ནི་རེ་
[56a.4]ཞིག་གཞག་གོ་སྙམ་དུ་བསམས་པ་ཡིན་ནོ། །དེ་ལྟ་བས་ན་དབང་པོ་དང་བཅས་པའི་ལུས་ནི་གསོན་པོ་ཞེས་བྱ་བ་ནི་སྲོག་དེ་ནི་དབང་པོ་དང་བཅས་པའི་ལུས་ཁོ་ནའི་ཡིན་གྱི་བདག་གི་ནི་མ་ཡིན་ནོ་ཞེས་སྟོན་པར་བྱེད་དེ་དེ་ཉིད་དབང་པོ་མེད་པ་ནི་ཤི་བ་ཞེས་བྱའོ། །བློ་སྔར་མ་བཏང་བའི་ཞེས་བྱ་བ་རྒྱས་པར་འབྱུང་
[56a.5]བ་ནི་གཅེར་བུ་པ་སྒྲེན་མོར་རྒྱུ་བ་རྣམས་ན་རེ་ཆེད་དུ་མ་བསམས་པར་བྱས་པའི་སྲོག་གཅོད་པས་ཀྱང་བྱེད་པ་པོ་ཆོས་མ་ཡིན་པ་དང་ལྡན་པར་འགྱུར་ཏེ། དཔེར་ན་བློ་སྔོན་དུ་མ་བཏང་ཞིང་ཆེད་དུ་བསམས་ནས་མ་བྱས་པའི་མེ་དང་རེག་པ་ལས་ཚིག་པར་འགྱུར་བ་བཞིན་ནོ་ཞེས་ཟེར་རོ། །གཅེར་བུ་པ་དེ་སྐད་སྨྲ་
[56a.6]བ་དེ་དག་གི་ལྟར་ན་བློ་སྔོན་དུ་མ་བཏང་བར་གཞན་གྱི་ཆུང་མ་མཐོང་བ་དང་རེག་པ་ལ་ཡང་དེ་ལྟར་ཐལ་བར་འགྱུར། དཔེ་མེ་ཡིན་པའི་ཕྱིར་སྡིག་པར་ཐལ་བར་འགྱུར་ཞེས་བྱ་བའི་ཐ་ཚིག་གོ། །གཅེར་བུ་པ་སྐྲ་འབལ་བ་སྟེ། གཅེར་བུ་པ་མགོའི་སྐྲ་འཐོག་པ་ན་ཡང་སྡུག་བསྔལ་སྐྱེད་པ་ཆོས་མ་
[56a.7]ཡིན་པར་འགྱུར་བའི་ཕྱིར་རོ། །དེ་དག་གསུད་དེ་ཤི་ན་ཡང་སྟེ། གཅེར་བུ་པ་རྣམས་གསུད་དེ་མ་ཞུ་བས་ཤི་ན་ཡང་ཟས་སྦྱིན་སྦྱིན་པའི་སྦྱིན་པ་པོ་ལ་ཆོས་མ་ཡིན་པ་ཐལ་བར་འགྱུར་ཏེ། བློ་སྔོན་དུ་མ་བཏང་བའི་སྲོག་གཅད་པ་ཡང་ཆོས་མ་ཡིན་པའི་རྒྱུར་འགྱུར་ལ་ཟས་སྦྱིན་པས་ཀྱང་འཆི་བའི་
[56b]
[56b.1]རྒྱུར་གྱུར་པའི་ཕྱིར་རོ། །མ་དང་བུ་ལྟོ་ན་ཡོད་པ་དག་སྟེ་མ་དང་བུ་ལྟོ་ན་ཡོད་པ་ཕན་ཚུན་སྡུག་བསྔལ་གྱི་རྒྱུ་མཚན་དུ་གྱུར་པའི་ཕྱིར་ཆོས་མ་ཡིན་པར་ཐལ་བར་འགྱུར་ཏེ། མེའི་དཔེ་དེ་ཉིད་ཀྱི་ཕྱིར་རོ། །གསད་པར་བྱ་བ་ཡང་དེའི་བྱ་བ་དང་འབྲེལ་བའི་ཕྱིར་ཏེ། སྲོག་གཅོད་པའི་བྱ་བ་དང་འབྲེལ་བའི་
[56b.2]ཕྱིར་ཆོས་མ་ཡིན་པ་དང་ལྡན་པར་ཐལ་བར་འགྱུར་ཏེ། གསད་པར་བྱ་བ་ཡོད་ན་གསོད་པར་བྱེད་པའི་སྲོག་གཅོད་པའི་བྱ་བ་འབྱུང་ངོ་། །མེས་རང་གི་རྟེན་སྲེག་པ་བཞིན་ནོ་ཞེས་བྱ་བ་ནི་མེས་ནི་གཞན་དུ་བུད་ཤིང་སྲེག་པར་བྱེད་པ་འབའ་ཞིག་ཏུ་མ་ཟད་དོ། །འོ་ན་ཅི་ཞེ་ན། རང་གི་བདག་ཉིད་ཀྱི་རྟེན་ཡང་སྲེག་
[56b.3]པར་བྱེད་དོ་ཞེས་བྱ་བ་དེ་དང་འདྲ་སྟེ། དེ་དག་གི་ལྟར་ན་སེམས་པའི་ཁྱད་པར་ལ་ལྟོས་པ་ནི་མེད་དོ། །གཞན་ལ་སྲོག་གཅོད་པ་ལ་སོགས་པ་བྱེད་དུ་འཇུག་པ་ལ་ཡང་ཆོས་མ་ཡིན་པར་ཐལ་བར་མི་འགྱུར་ཏེ། གཞན་མེ་ལ་རེག་ཏུ་འཇུག་པ་མེ་དེས་མི་འཚིག་པ་བཞིན་ཏེ། མེའི་ཆོས་ཁས་བླངས་པའི་
[56b.4]ཕྱིར་རོ། །ཁྱིམ་རྡིབ་ན་དེའི་ནང་ན་འདུག་པའི་སྲོག་ཆགས་དག་འཆི་བའི་ཕྱིར་ཤིང་ལ་སོགས་པ་སེམས་མེད་པའི་སྟེ། ཤིང་དང་སོ་ཕག་དང་སྨྱིག་མ་ལ་སོགས་པ་ཡང་སྡིག་པ་དང་ལྡན་པར་ཐལ་བར་འགྱུར་ཏེ། དེ་དག་གི་བློའི་ཁྱད་པར་ནི་ཚད་མར་མི་བྱེད་པས་སོ། །ཡང་དཔེ་གཏན་ཚིགས་མེད་པ་ཙམ་
[56b.5]གྱིས་ནི་དོན་འགྲུབ་པར་མི་འགྱུར་རོ་ཞེས་བྱ་བ་ཡིན་ནོ། །གཞན་དུ་འདུ་ཤེས་ཀྱང་མ་འཁྲུལ་ན་ཞེས་བྱ་བ་ནི་གལ་ཏེ་ལྷ་སྦྱིན་གྱི་ནོར་རྐུའོ་སྙམ་དུ་བསམས་པ་ལས་མཆོད་སྦྱིན་གྱི་ནོར་བརྐུས་པར་མ་གྱུར་ན་མ་བྱིན་པར་ལེན་པར་མི་འགྱུར་རོ་སྙམ་དུ་བསམས་པ་ཡིན་ནོ། །ཡོངས་སུ་མྱ་ངན་ལས་འདའ་བའི་ཚེ་དེ་དག་
[56b.6]ཐམས་ཅད་ཡོངས་སུ་གཟུང་བའི་ཕྱིར་རོ་ཞེས་བྱ་བ་ནི་སྦྱིན་པ་པོའི་སྐྱེ་བོ་ལ་བསོད་ནམས་ཀྱིས་ཕན་གདགས་པའི་ཕྱིར་ཏེ། ཡོངས་སུ་མ་བཟུང་ན་ནི་ལེན་པ་མེད་པའི་ཕྱིར་མཆོད་རྟེན་ལ་ཕུལ་བས་འབྲས་བུ་མེད་པར་འགྱུར་རོ། །ཤི་བའི་ནོར་ནི་དགེ་སློང་ཤི་བའི་ཆོས་གོས་ལ་སོགས་པའོ། །ལས་བྱས་པ་ཞིག་ཡིན་ན་
[56b.7]ནི་ཞེས་བྱ་བ་ནི་གསོལ་བའི་ལས་སོ། །སྦྲུམ་མ་ལ་ཉལ་པོ་བྱས་ན་ལྟོ་ན་བུ་འདུག་པ་ལ་གནོད་པར་འགྱུར་རོ། །ནུ་ཞོ་འཐུང་བ་ནི་བུ་ནུ་ཞོ་འཐུང་བའི་གནས་སྐབས་བུ་ཡོད་པའི་བུད་མེད་ལ་མི་ཚངས་པར་སྤྱད་ན་དེའི་ནུ་ཞོ་སྐམ་པ་འམ། དེའི་ནུ་ཞོ་བུ་ལ་མི་བསོད་པར་འགྱུར་བས་སོ། །སྲོག་གཅོད་པ་བཞིན་ནོ་
[57a]
[57a.1]ཞེས་བྱ་བ་ནི་གཞན་དག་ན་རེ་དཔེར་ན་ལྷ་སྦྱིན་གསད་དོ་སྙམ་དུ་བསམས་པ་ལས་མཆོད་སྦྱིན་གསད་པ་ན་སྲོག་གཅོད་པ་མ་ཡིན་པ་དེ་བཞིན་དུ་འདིར་ཡང་དངོས་པོ་གཞན་ལ་བུད་མེད་བཞིན་ལ་སྦྱོར་བ་བྱ་བར་འདོད་པ་ལས་དངོས་པོ་གཞན་ཡོངས་སུ་སྤྱད་པས་འདོད་པས་ལོག་
[57a.2]པར་གཡེམ་པར་མི་འགྱུར་རོ་ཞེས་ཟེར་རོ། །ཐ་ན་རྒྱལ་པོ་ལས་སོ་ཞེས་བྱ་བ་ནི་གལ་ཏེ་སྲུང་མ་གཞན་འགའ་ཡང་མེད་ན་ཐ་ན་ཆུང་ངུ་རྒྱལ་པོ་ལས་ཀྱང་འདོད་པས་ལོག་པར་གཡེམ་པར་འགྱུར་ཏེ། དེས་ནི་དེ་མི་བཟོད་པར་བྱ་བ་མ་ཡིན་ནོ། །འོན་ཏེ་མངོན་པར་གོ་བར་ནུས་པ་ཞིག་ཡིན་ཞེས་བྱ་བ་ནི་གང་
[57a.3]ཞིག་དོན་མངོན་པར་གོ་བར་ནུས་པ་དེ་ཡང་དོན་མངོན་པར་གོ་བར་ནུས་པ་ཞེས་བརྗོད་པར་ནུས་ཏེ། དོན་མངོན་པར་གོ་བར་འགྱུར་ཞེས་བྱ་བ་སྐབས་སུ་བབ་པའི་གནས་སྐབས་ཡིན་པར་འདོད་པའི་ཕྱིར་རོ།། །།བམ་པོ་སུམ་ཅུ་རྩ་ལྔ་པ། ཚིག་གི་དོན་ཡིད་ཀྱི་རྣམ་པར་ཤེས་པའི་ཡུལ་ཡིན་པའི་
[57a.4]ཕྱིར་རོ་ཞེས་བྱ་བ་ནི་འདི་ན་ལྷ་སྦྱིན་མེད་དོ་ཞེས་སྨྲས་ན། སྒྲའི་རྣ་བའི་རྣམ་པར་ཤེས་པས་འགྱུར་ལ་ཚིག་གི་དོན་མིང་ལ་སོགས་པའི་ཚོགས་ལྷ་སྦྱིན་ནི་དེའི་རྗེས་ལ་རྣམ་པར་རྟོག་པར་བྱེད་པའི་ཡིད་ཀྱི་རྣམ་པར་ཤེས་པས་རྣམ་པར་ཤེས་པར་འགྱུར་ཏེ། དེའི་ཕྱིར་ངག་གི་རྣམ་པར་རིག་བྱེད་ནི་རྣ་བའི་རྣམ་
[57a.5]པར་ཤེས་པ་དང་ལྷན་ཅིག་འགགས་པས་རྣམ་པར་རིག་བྱེད་མ་ཡིན་པ་ཁོ་ན་ལས་ཀྱི་ལམ་དུ་འགྱུར་བ་ཞིག་ན་ལས་ཀྱི་ལམ་དངོས་ནི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ངོ་བོ་ཉིད་དག་ཡིན་པར་ཡང་འདོད་དོ། །ཤི་བ་དང་འདྲ་སྟེ། དེའི་ཕྱིར་དེ་དག་ལ་ནི་རྟོགས་པ་ཞེས་བྱའོ་ཞེས་བྱ་བ་ནི་བྱེ་བྲག་
[57a.6]ཏུ་སྨྲ་བས་ངེས་པའི་ཚིག་གི་ཚུལ་ལ་འཇུས་ནས་སྨྲས་པ་ཡིན་ཏེ། སློབ་དཔོན་འདུས་བཟང་ན་རེ་རང་གི་དབང་པོ་དག་དང་ནི་ཕྲད་ན་རྟོགས་པ་ཡིན་ནོ་ཞེས་ཟེར་རོ། །རྒྱས་པར་ཡིད་ཀྱིས་ཆོས་རྣམས་རྣམ་པར་མ་ཤེས་ཏེ་ཞེས་བྱ་བ་ནས་ཞེས་བྱ་བ་ནི་དྲི་གང་དག་ཁྱོད་ཀྱི་སྣས་མ་བསྣམས་ཏེ་ཞེས་བྱ་བ་དང་རོ་གང་
[57a.7]དག་ལྕེས་མ་མྱངས་ཏེ་ཞེས་བྱ་བ་དང་རེག་བྱ་གང་དག་ལུས་ཀྱིས་མ་རེག་སྟེ་ཞེས་བྱ་བ་ནས་ཆོས་གང་དག་ཁྱོད་ཀྱི་ཡིད་ཀྱིས་རྣམ་པར་མ་ཤེས་ཏེ་ཞེས་བྱ་བའི་བར་ཡིན་ནོ། །ཡུལ་གསུམ་པོ་གཟུགས་དང་སྒྲ་དང་ཆོས་དག་ལ་གོ་རིམས་བཞིན་དུ་མཐོང་བ་དང་ཐོས་པ་དང་རྣམ་པར་ཤེས་པའི་སྒྲ་བསྟན་པའི་ཕྱིར་དྲི་
[57b]
[57b.1]ལ་སོགས་པ་གང་དག་ལ་རྟོགས་པ་ཞེས་བྱ་བའི་སྒྲར་བརྗོད་པ་སྟེ། དྲི་དང་། རོ་དང་། རེག་བྱ་དག་ལ་རྟོགས་པ་ཞེས་བྱ་བར་གོའོ། །དེ་ལྟར་མི་འདོད་ན་སྟེ། དྲི་ལ་སོགས་པ་ལ་རྟོགས་པ་ཞེས་བྱ་བར་མི་འདོད་ན་དྲི་ལ་སོགས་པ་མཐོང་བ་ལ་སོགས་པ་དངོས་པོའི་ནང་དུ་མ་གཏོགས་པའི་ཕྱིར་ཏེ།
[57b.2]གཟུགས་ཀྱི་མཚན་ཉིད་མ་ཡིན་པ་ཉིད་ཀྱིས་མཐོང་བའི་དངོས་པོའི་ནང་དུ་མ་གཏོགས་པའི་ཕྱིར་དང་། སྒྲ་དང་ཆོས་ཀྱི་སྐྱེ་མཆེད་ཀྱི་མཚན་ཉིད་མ་ཡིན་པ་ཉིད་ཀྱི་ཐོས་པ་དང་རྣམ་པར་ཤེས་པའི་དངོས་པོའི་ནང་དུ་མ་གཏོགས་པའི་ཕྱིར་དྲི་ལ་སོགས་པ་ལ་མཐོང་བ་ཞེས་བྱ་བ་འམ་རྣམ་པར་ཤེས་པ་
[57b.3]ཞེས་བྱ་བའི་བར་གྱིས་ཐ་སྙད་འདོགས་པར་ཡང་མི་འགྱུར་ཏེ། འདི་ནི་དེ་དག་ལ་རྟོགས་པ་ཞེས་བྱའོ་ཞེས་བྱ་བའི་རིགས་པ་ཡིན་ནོ། །སློབ་དཔོན་གྱིས་རེ་ཞིག་མདོ་འདི་ནི་ཞེས་བྱ་བ་རྒྱས་པར་སྨོས་ཏེ། དོན་གཞན་ཡིན་པའི་ཕྱིར་ཞེས་བྱ་བ་ནི་འདི་ལྟར་མདོའི་དོན་ནི་གཞན་ཁོ་ན་ཡིན་ནོ། །མདོའི་དོན་
[57b.4]བཤད་པ། ཁྱོད་གཟུགས་ལ་སོགས་པའི་ཡུལ་རྣམ་པ་དྲུག་པོ་འདི་ལ་ནི་མཐོང་བ་ལ་སོགས་པའི་ཐ་སྙད་བཞི་སྟེ། མཐོང་བ་དང་ཐོས་པ་དང་། རྟོགས་པ་དང་། རྣམ་པར་ཤེས་པའི་ཐ་སྙད་དག་ལ་མཐོང་བ་ལ་སོགས་པའི་ཐ་སྙད་ཙམ་དུ་གྱུར་ཏེ་གཟུགས་མཐོང་ན་མཐོང་ཞེས་བྱ་བ་ནས་
[57b.5]རྣམ་པར་ཤེས་སོ་ཞེས་བྱ་བའི་བར་དུ་ཐ་སྙད་འདོགས་པར་འགྱུར་ཞིང་སྒྲ་ལ་སོགས་པ་ལ་ཡང་དེ་དང་འདྲའོ། །མདོའི་ཚིག་དེ་ནི་མཆོད་བྱེད་ཀྱི་མ་ཅན་ཁྱོད་ཀྱི་ཡུལ་དྲུག་མཐོང་ན་ཡང་མཐོང་བ་ཙམ་དུ་འགྱུར་ལ་ཡུལ་དྲུག་ཐོས་པ་དང་། ཡུལ་དྲུག་རྟོགས་པ་དང་། རྣམ་པར་ཤེས་པ་ཡང་རྣམ་པར་ཤེས་
[57b.6]པ་ཙམ་དུ་འགྱུར་རོ་ཞེས་བྱ་བ་ཡིན་ནོ་ཞེས་དེ་སྐད་དུ་རྣམ་པར་བཤད་པར་བྱའོ་སྙམ་དུ་བསམས་པ་ཡིན་ཏེ་མདོའི་དོན་ནི་ཁྱོད་སྡུག་པ་དང་མི་སྡུག་པའི་མཚན་མར་སྒྲོ་འདོགས་པ་མ་ཡིན་ནོ་ཞེས་བྱ་བ་ཡིན་ནོ། །གཟུགས་གང་དག་ཁྱོད་ཀྱི་མིག་གིས་མ་མཐོང་སྟེ་ཞེས་བྱ་བ་ཁོ་ན་གསུངས་ཀྱི་མ་ཐོས་ཏེ་
[57b.7]ཞེས་བྱ་བ་ཡང་མ་ཡིན་པ་ནས། རྣམ་པར་མ་ཤེས་ཏེ་ཞེས་བྱ་བའི་བར་དུ་ཡང་མ་གསུངས་ཤིང་དེ་བཞིན་དུ་སྒྲ་གང་དག་མ་ཐོས་ཏེ་ཞེས་བྱ་བ་ཁོ་ན་གསུངས་ཀྱི་མ་མཐོང་སྟེ་ཞེས་བྱ་བ་ཡང་མ་ཡིན་པ་ནས་རྣམ་པར་མ་ཤེས་ཏེ་ཞེས་བྱ་བའི་བར་དུ་ཡང་མ་གསུངས་ལ། དེ་བཞིན་དུ་ཆོས་གང་དག་རྣམ་པར་མ་
[58a]
[58a.1]ཤེས་ཏེ་ཞེས་བྱ་བ་ཁོ་ན་གསུངས་ཀྱི་མ་མཐོང་སྟེ་ཞེས་བྱ་བ་ཡང་མ་ཡིན་པ་ནས་མ་རེག་སྟེ་ཞེས་བྱ་བའི་བར་དུ་ཡང་མ་གསུངས་པ་མ་ཡིན་ནམ་ཞེ་ན། དེ་ཉིད་ནི་ཉེས་པ་མེད་དེ། འདི་ནི་བཅོམ་ལྡན་འདས་ཀྱིས་དཔེར་བརྗོད་པའི་ངོ་བོར་བཤད་པ་ཡིན་པས་ཇི་ལྟར་གཟུགས་གང་
[58a.2]དག་མ་མཐོང་སྟེ་ཞེས་བྱ་བ་བཤད་པ་དེ་བཞིན་དུ་མ་ཐོས་ཏེ་ཞེས་བྱ་བ་ནས་རྣམ་པར་མ་ཤེས་ཏེ་ཞེས་བྱ་བའི་བར་དུ་བརྗོད་དགོས་སོ། །དེ་བཞིན་དུ་སྒྲ་ལ་སོགས་པ་ལ་ཡང་བརྗོད་པར་བྱ་སྟེ། དེས་ན་མཚན་ཉིད་ནི་དེ་སྐད་དུ་བརྗོད་དོ། །དབང་པོ་ལྔས་མངོན་སུམ་དུ་བྱས་པ་གང་ཡིན་པ་ཞེས་བྱ་བ་རྒྱས་པར་
[58a.3]འབྱུང་བ་ནི། དབང་པོ་ལྔས་གཟུགས་ལ་སོགས་པ་མངོན་སུམ་དུ་བྱས་པ་གང་ཡིན་པ་དེ་ནི་མཐོང་བའོ། །ཡུལ་དྲུག་ཅར་ཡང་ཕ་རོལ་ལས་འོངས་པ་གང་ཡིན་པ་དེ་ནི་ཐོས་པའོ། །བདག་ཉིད་ཀྱི་རིགས་པས་རྗེས་སུ་དཔག་པའི་སྒོ་ནས་འདོད་ཅིང་བསམས་པ་གང་ཡིན་པ་དེ་ནི་རྟོགས་པའོ། །རིག་
[58a.4]པས་རྗེས་སུ་དཔག་པ་ཞེས་བྱ་བ་ནི་མི་འཁྲུལ་པའི་རྗེས་སུ་དཔག་པ་སྟེ་དེ་སྤྱོད་ཡུལ་ཡང་ཡུལ་དྲུག་ཡིན་ནོ། །དྲུག་པ་ལ་ནི་མཐོང་བ་མ་གཏོགས་ཏེ་ཞེས་བྱ་བ་ནི་ཡུལ་དྲུག་པ་ནི་ཆོས་རྣམས་ཡིན་ཏེ། དེ་ནི་མཐོང་བའི་ཐ་སྙད་མ་གཏོགས་པ་ཐོས་པ་ལ་སོགས་པའི་ཐ་སྙད་གསུམ་གྱིས་ཐ་སྙད་འདོགས་
[58a.5]པར་བྱེད་དོ། །དེའི་ཕྱིར་དྲི་ལ་སོགས་པ་ལ་ཐ་སྙད་འདོགས་པ་མེད་པར་ཐལ་བར་འགྱུར་བ་ཡང་མེད་དེ་དེ་ལྟ་བས་ན་བྱེ་བྲག་ཏུ་སྨྲ་བ་རྣམས་ཀྱིས་དེ་ལྟར་མི་འདོད་ན་ཞེས་བྱ་བ་དེ་ལྟ་བུ་ལ་སོགས་པ་སྨྲས་པ་གང་ཡིན་པའི་རིགས་པ་དེ་ཡང་རིག་པ་མ་ཡིན་ཏེ། འདི་ལྟར་གཞན་དུ་དྲི་ལ་སོགས་པ་ལ་ཐ་སྙད་འདོགས་
[58a.6]པར་འགྱུར་བས་སོ། །མིག་གིས་མངོན་སུམ་དུ་བྱས་པ་གང་ཡིན་པ་ཞེས་བྱ་བ་ནི་དབང་པོ་ལྔས་མ་ཡིན་པའོ། །རྣ་བས་ཐོས་པ་དང་ཕ་རོལ་ལས་འོངས་པ་གང་ཡིན་པ་ཞེས་བྱ་བ་ནི་གཉི་ག་ཡང་ཡིན་པར་འདོད་པའོ། །བདག་ཉིད་ཀྱིས་སོ་སོ་ཡང་དག་པར་རིག་པ་ནི་མཉམ་པར་གཞག་པ་མ་ཡིན་པའི་སེམས་
[58a.7]ཀྱི་བདེ་བ་ལ་སོགས་པའོ། །རྟོགས་པ་ཞེས་བྱ་བ་ནི་འཇིག་རྟེན་པའི་མཉམ་པར་གཞག་པ་ཁོ་ན་ཡིན་གྱི། འཇིག་རྟེན་ལས་འདས་པས་ནི་མ་ཡིན་ཏེ། འཇིག་རྟེན་པའི་ཐ་སྙད་ཀྱི་སྐབས་ཡིན་པའི་ཕྱིར་རོ། །དེ་ལྟར་ན་རྣལ་འབྱོར་སྤྱོད་པ་པའི་ལུགས་ཀྱིས་ཀྱང་ཡུལ་དྲུག་ཅར་ཡང་སོ་སོར་ཅི་རིགས་པར་མཐོང་བ་ཞེས་བྱ་
[58b]
[58b.1]བའམ། ཐོས་པ་འམ་རྟོགས་པ་འམ་རྣམ་པར་ཤེས་པ་ཞེས་བྱ་བར་ཐ་སྙད་འདོགས་ཏེ། དེའི་ཕྱིར་དྲི་ལ་སོགས་པ་ལ་ཐ་སྙད་འདོགས་པ་མེད་པར་ཐལ་བར་འགྱུར་བ་མེད་དོ། །གང་ཞིག་ལུས་ཀྱི་དོན་གཞན་གོ་བར་བྱེད་ན་ཞེས་བྱ་བ་ནི་གང་ཞིག་ལུས་ཀྱི་བརྡས་དོན་གོ་བར་བྱེད་པ་དེའི་ཡང་བརྫུན་དུ་
[58b.2]སྨྲ་བ་ཡིན་ནམ་ཞེས་བྱ་བའོ། །མི་བྱེད་ན་ཞེས་བྱ་བ་ནི་མི་རྩོལ་ནའོ། །ངག་གིས་བྱེད་པར་འགྱུར་ནའོ་ཞེས་བྱ་བ་ནི་ཚིག་གིས་གཞན་གསོད་པར་བྱེད་ནའོ་ཞེས་བྱ་བའི་ཐ་ཚིག་གོ། །འདི་ལ་ནི་སྲོག་གཅོད་པ་ལུས་ཀྱི་ཡིན་པའི་ཕྱིར་དངོས་ཀྱིས་བསྡུས་པའི་རྣམ་པར་རིག་བྱེད་མ་ཡིན་པ་ལུས་ཁོ་ན་
[58b.3]ཡིན་གྱི་ངག་གིས་ནི་མ་ཡིན་ནོ། །འདི་ལ་ལུས་ཀྱི་རྣམ་པར་རིག་བྱེད་ཀྱང་ནི་མེད་དོ། །ཡོད་དེ་ལུས་ཀྱིས་བྱེད་པར་འགྱུར་ནའོ་ཞེས་བྱ་བ་འདིར་ཡང་བརྫུན་དུ་སྨྲ་བ་ནི་ངག་གི་ཡིན་པའི་ཕྱིར་དངོས་ཀྱིས་བསྡུས་པའི་རྣམ་པར་རིག་བྱེད་མ་ཡིན་པ་ངག་གི་ཁོ་ནའི་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །
[58b.4]ཁ་ན་མ་ཐོ་བ་གཉི་གས་ཞེས་བྱ་བ་ནི་ལུས་དང་ངག་གི་ཁ་ན་མ་ཐོ་བས་སོ། །འདིར་དྲང་སྲོང་རྣམས་ཡིད་རབ་ཏུ་ཁྲོས་པས་ནི་ལུས་ཀྱི་ཁ་ན་མ་ཐོ་བ་དང་ལྡན་པར་འགྱུར་རོ། །གསོ་སྦྱོང་དཔེར་བྱའོ་ཞེས་བྱ་བ་ནི་ངག་གི་ཁ་ན་མ་ཐོ་བ་དང་ལྡན་པར་འགྱུར་བ་སྟེ། དགེ་སློང་གི་གསོ་སྦྱོང་ལ་འདུལ་བ་འཛིན་
[58b.5]པས་ཅི་ཡོངས་སུ་དག་གམ་ཞེས་བསྒྲགས་པ་ལས་གལ་ཏེ་དགེ་སློང་འགའ་ཞིག་ལྟུང་བ་བྱུང་བ་ཡིན་བཞིན་དུ་འཆགས་པར་མི་བྱེད་ཀྱི་ཅང་མི་ཟེར་བར་འདུག་པར་བྱེད་ན་བརྫུན་དུ་སྨྲ་བར་འགྱུར་རོ། །ཇི་ལྟར་ན་དེ་གཉིས་ཀྱི་ལས་ཀྱི་ལམ་དུ་འགྲུབ་ཅེས་བྱ་བ་ནི་ཇི་ལྟར་ན་དྲང་སྲོང་དང་དགེ་སློང་ལུས་དང་ངག་
[58b.6]དག་གིས་མི་བྱེད་པ་དེ་གཉིས་ཀྱི་སྲོག་གཅོད་པ་དང་བརྫུན་དུ་སྨྲ་བ་གོ་རིམས་བཞིན་དུ་ལས་ཀྱི་ལམ་དུ་འགྲུབ་སྟེ། བྱེ་བྲག་ཏུ་སྨྲ་བ་རྣམས་ཀྱིས་འདི་ལ་འབད་པར་བྱ་སྟེ་ལན་གདབ་དགོས་སོ་ཞེས་བྱ་བའི་ཐ་ཚིག་གོ། །འདི་ལ་སློབ་དཔོན་འདུས་བཟང་གིས་ལན་སྨྲས་པ། དྲང་སྲོང་དག་ནི་དོན་གྱིས་ན་
[58b.7]རྣམ་པར་རིག་བྱེད་བྱེད་པ་ཡིན་ཏེ། མི་མ་ཡིན་པ་རྣམས་ཀྱི་དེ་དག་གིས་སྡིག་པའི་བསམ་པ་སེམས་ཅན་ཡོངས་སུ་འདོར་བར་ཞུགས་པ་ཡིན་པར་རྟོགས་ནས་དེ་དག་ལ་དད་པ་རྣམས་གང་གིས་ན་དྲང་སྲོང་དེ་དག་ལ་ལས་ཀྱི་ལམ་སྐྱེ་བར་འགྱུར་བ་ལུས་ཀྱིས་བྱེད་དོ། །ཇི་ལྟར་ན་གཞན་གྱི་རྣམ་པར་རིག་བྱེད་
[59a]
[59a.1]ཀྱིས་འགྱུར་ཞེ་ན། དེ་ལྟ་བུ་ལ་ནི་གདོན་མི་ཟ་བར་ལུས་དང་ངག་འགྱུར་བ་ཡང་འབྱུང་ངོ་། །གཞན་ཡང་དེ་དག་ནི་དེ་ལྟར་དམོད་པ་ཡང་འདོར་ལ་དེ་ལ་ཡང་གདོན་མི་ཟ་བར་ལུས་དང་ངག་གི་གཡོ་བ་ཡོད་པར་འགྱུར་རོ་ཞེས་ཟེར་རོ། །འདོད་པའི་ཁམས་ཀྱི་རྣམ་པར་རིག་བྱེད་མ་ཡིན་པ་ནི་
[59a.2]ཐམས་ཅད་རྣམ་པར་རིག་བྱེད་ལ་རག་ལས་པར་ངེས་པ་ཡང་མ་ཡིན་ཏེ། རྟེན་ལྔ་པོ་ལ་སོགས་པ་འབྲས་བུ་ཐོབ་པའི་མོད་ལ་སོ་སོར་ཐར་པའི་སྡོམ་པ་སྐྱེ་བ་སྲིད་པའི་ཕྱིར་རོ། །དེ་ལྟ་བས་ན་མི་དགེ་བ་ཡང་དེ་ལྟ་བུ་འགའ་ཞིག་རྣམ་པར་རིག་བྱེད་མེད་པར་ཡང་འགྱུར་རོ། །དེ་དག་གི་སྔོན་རྣམ་པར་རིག་བྱེད་བྱས་
[59a.3]སོ་ཞེ་ན། ཅིག་ཤོས་ལ་ཡང་གདོན་མི་ཟ་བར་འབྱུང་བར་ནི་འགྱུར་རོ་ཞེའོ། །རེ་ཞིག་དྲང་སྲོང་རྣམས་ཀྱི་ནི་བཤད་ཟིན་ཏོ། །གསོ་སྦྱོང་གི་བརྫུན་སྨྲ་བ་ལ་ཡང་གལ་ཏེ་ཡོངས་སུ་མ་དག་པ་ཞིག་དགེ་འདུན་གྱི་ནང་ན་འཇུག་པར་བྱེད་ཅིང་འདུག་པར་བྱེད་རང་གི་སྤྱོད་ལམ་སྟོན་པར་བྱེད་ལ་དེ་དང་འབྲེལ་བ་ཅུང་
[59a.4]ཟད་ཅིག་ཀྱང་སྨྲ་བར་བྱེད་ན་དེ་ནི་འདིའི་སྔོན་གྱི་རྣམ་པར་རིག་བྱེད་ཡིན་ནོ་ཞེས་ཟེར་རོ། །ཉོན་མོངས་པ་ཅན་གྱི་ཚིག་ཐམས་ཅད་ནི་ཚིག་ཀྱལ་པ་ཡིན་ནོ་ཞེས་བྱ་བ་ནི་ཉོན་མོངས་པ་ཅན་གཞན་ཡིན་པ་འབའ་ཞིག་ཏུ་མ་ཟད་ཀྱི། བརྫུན་དུ་སྨྲ་བ་ལ་སོགས་པ་གསུམ་ཡང་ཡིན་པའོ། །དེ་དང་ལྡན་པ་སྟེ། ཚིག་ཀྱལ་
[59a.5]པ་དང་ལྡན་པའི་གང་ཟག་དེ་ནི་ཚིག་ཀྱལ་པ་ཅན་ཡིན་ནོ། །བརྫུན་དུ་སྨྲ་བ་ལ་སོགས་པ་གསུམ་ལས་གཞན་པའི་ཉོན་མོངས་པ་ཅན་གྱི་ཚིག་གང་ཡིན་པ་ནི་ཚིག་ཀྱལ་པ་ཡིན་ནོ་ཞེས་བཤད་པའི་དཔེར་བརྗོད་པར་བསྟན་པའི་ཕྱིར། ཁ་གསག་གླུ་དང་ཟློས་གར་བཞིན། །བསྟན་བཅོས་ངན་བཞིན་ཅེས་བྱ་བ་སྨོས་
[59a.6]ཏེ། ཁ་གསག་བྱེད་པ་ཞེས་བྱ་བ་ནི་རྙེད་པ་དང་གྲགས་པ་དང་བཀུར་སྟི་འདོད་པ་ཉིད་ཀྱིས་དེ་དག་རྗོད་པར་བྱེད་པའི་ཚིག་འདོན་པར་བྱེད་པ་ཞེས་བྱ་བའི་ཐ་ཚིག་གོ། །སྨྲེ་སྔགས་འདོན་པ་དང་། འདུ་འཛིའི་གཏམ་ལ་སོགས་པ་ཞེས་བྱ་བའི་སྒྲས་ནི་སྨྲེ་སྔགས་འདོན་པ་དང་འདུ་འཛི་དག་ལས་གཞན་པ་ཉོན་
[59a.7]མོངས་པ་ཅན་གྱི་སེམས་དང་ལྡན་པའི་གང་ཅུང་ཟད་སྨྲ་བའོ། །བག་མ་ལེན་པ་དང་། བག་མར་གཏོང་བ་ལ་སོགས་པའི་མངོན་པར་བརྗོད་པ་ཡོད་པས་ཞེས་བྱ་བ་ལ། བག་མ་ལེན་པ་ནི་བུ་མོ་ཁྱེའུའི་ཁྱིམ་དུ་འགྲོ་བའོ། །བག་མར་གཏོང་བ་ནི་ཁྱེའུ་བུ་མོའི་ཁྱིམ་དུ་འགྲོ་བའོ། །གཞན་དག་ན་རེ་བག་མ་
[59b]
[59b.1]ལེན་པ་ནི་ཁ་འདུས་པའོ། །བག་མ་གཏོང་བ་ནི་ཆོ་ག་བྱས་ཏེ་ལེན་པའོ་ཞེས་ཟེར་རོ། །སོགས་པ་ཞེས་བྱ་བའི་སྒྲས་ནི་སེམས་ཆགས་པ་དང་ལྡན་པ་རྣམས་ཀྱིས་ཀུན་དུ་བརྗོད་པ་བསྡུའོ། །ལོག་པ་མི་རིགས་པས་ཞེས་བྱ་བ་ནི་བསྟན་པ་དང་བཤད་པའི་ངོ་བོའི་རྣམ་གྲངས་དག་ཡིན་ནོ། །འདི་
[59b.2]ལྟར་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་སྒྲིབ་པ་ལྔའི་སྐབས་སུ་འདོད་པ་ལ་འདུན་པ་སྟེ། འདོད་པའི་སྲེད་པའི་ངོ་བོ་ཉིད་ཀྱི་དབང་དུ་མཛད་ནས། དེའི་འཇིག་རྟེན་ན་བརྣབ་སེམས་སྤངས་ཏེ་བརྣབ་སེམས་དང་བྲལ་བའི་སེམས་ཀྱིས་ལན་མང་དུ་གནས་ཤིང་འཇིག་རྟེན་ན་གནོད་སེམས་
[59b.3]དང་རྨུགས་པ་དང་གཉིད་དང་རྒོད་པ་དང་འགྱོད་པ་དང་ཐེ་ཚོམ་སྤངས་ཏེ་དོགས་པ་ལས་རྒལ་ཞིང་ཐེ་ཚོམ་ལས་རྒལ་ནས་ཆོས་དགེ་བ་རྣམས་ལ་ནེམ་ནུར་མེད་པར་གྱུར་པ་ཡིན་ནོ། །དེ་སྒྲིབ་པ་ལྔ་སྤངས་ནས་ཞེས་བྱ་བ་དེ་ལྟ་བུ་ལ་སོགས་པ་གསུངས་པ་དེའི་ཕྱིར་འདོད་པ་ན་སྤྱོད་པའི་སྲིད་པ་ཐམས་
[59b.4]ཅད་བརྣབ་སེམས་ཡིན་ནོ་ཞེས་བྱ་བར་ཤེས་སོ། །འཁོར་ལོས་སྒྱུར་བ་རྣམས་དང་། བྱང་གི་སྒྲ་མི་སྙན་པ་རྣམས་ལ་ཡང་བརྣབ་སེམས་ཀྱི་ལས་ཀྱི་ལམ་ཡོད་པར་འགྱུར་དུ་འོང་བས་ཞེས་བྱ་བ་དེ་ནི་འདོད་པ་སྤྱོད་པའི་སྲེད་པ་མེད་པ་ཡང་མ་ཡིན་ལ། དེ་ནི་མི་དགེ་བའི་ལམ་ཡོད་པར་ཡང་མི་འདོད་
[59b.5]དོ། །ཉེས་པར་སྤྱོད་པ་ཆེ་ལོང་བསྡུས་པའི་ཕྱིར། །ཞེས་བྱ་བ་ལ། གཞན་དག་གི་བསམ་པ་ནི་མི་དགེ་བའི་ལས་ཀྱི་ལམ་བཅུ་དག་ཏུ་ཉེས་པར་སྤྱོད་པ་ཆེ་ལོང་གང་དག་ཡིན་པ་དེ་བསྡུས་ཀྱི་ཐམས་ཅད་ནི་མ་ཡིན་ནོ། །དགེ་བ་དག་ལ་ཡང་དེ་དང་འདྲ་སྟེ། དེའི་ཕྱིར་བརྣབ་སེམས་ཐམས་ཅད་ནི་ལས་ཀྱི་
[59b.6]ལམ་མ་ཡིན་ནོ། །འོ་ན་ཅི་ཞེ་ན། གཞན་གྱི་ནོར་ལ་ལོག་པས་ཆགས་པ་གང་ཡིན་པ་དེ་ནི་ལས་ཀྱི་ལམ་ཡིན་ནོ་སྙམ་པ་ཡིན་ནོ། །ལས་དང་འབྲས་བུ་དང་འཕགས་པ་ལ་སྐུར་པ་འདེབས་པ་འདི་ནི་རིལ་གྱིས་ལོག་པར་ལྟ་བ་ཡིན་ནོ་ཞེས་བྱ་བ་ནི་འདི་སྐད་དུ་སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་
[59b.7]སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་པར་སྤྱད་པ་དང་ཉེས་པར་སྤྱད་པའི་ལམ་རྣམས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །སེམས་ཅན་རྫུས་ཏེ་སྐྱེ་བ་མེད་དོ། །འཇིག་
[60a]
[60a.1]རྟེན་ན་དགྲ་བཅོམ་པ་དག་མེད་དོ་ཞེས་བྱ་བ་ཡིན་ནོ་ཞེས་འབྱུང་སྟེ། དེ་ལ་སྦྱིན་པ་མེད་དོ་ཞེས་བྱ་བ་ནས་ཉེས་པར་སྤྱད་པ་མེད་དོ་ཞེས་བྱ་བའི་བར་ནི་ལས་ལ་སྐུར་པ་འདེབས་པ་ཡིན་ནོ། །དེ་བཞིན་དུ་མ་མེད་དོ་ཕ་མེད་དོ་ཞེས་བྱ་བ་ཡང་ལས་ལ་སྐུར་པ་འདེབས་པ་ཁོ་ན་ཡིན་
[60a.2]ནོ། །ལེགས་པར་སྤྱད་པ་དང་ཉེས་པར་སྤྱད་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ་ཞེས་བྱ་བ་དང་། དེ་བཞིན་དུ་སེམས་ཅན་རྫུས་ཏེ་སྐྱེ་བ་མེད་དོ་ཞེས་བྱ་བ་ནི་འབྲས་བུ་ལ་སྐུར་པ་འདེབས་པ་ཡིན་ནོ། །འཇིག་རྟེན་ན་དགྲ་བཅོམ་
[60a.3]པ་དག་མེད་དོ་ཞེས་བྱ་བ་ནི་འཕགས་པ་ལ་སྐུར་པ་འདེབས་པ་ཡིན་ནོ། །ཚིགས་སུ་བཅད་པར་ནི་དང་པོ་ཙམ་ཞིག་བསྟན་པར་ཟད་དོ་ཞེས་བྱ་བ་ནི། དགེ་དང་མི་དགེ་མེད་ལྟ་བ། །ཞེས་བྱ་བ་ནི། དཔེར་བརྗོད་པ་ཙམ་དུ་ཟད་པའི་ཕྱིར་རོ། །ལས་ཀྱི་ལམ་ཡིན་པས་ཞེས་བྱ་བ་ནི་སེམས་པ་ཞེས་བྱ་བའི་ལས་ཀྱི་
[60a.4]ལམ་ཡིན་པས་སོ། །ཇི་ལྟ་ཞེ་ན། སྨྲས་པ་དེ་དག་དང་མཚུངས་པར་ལྡན་པ་ཅན་གྱི་སེམས་པ་སྟེ། བརྣབ་སེམས་ལ་སོགས་པ་དང་མཚུངས་པར་ལྡན་པ་ཅན་ནི་བརྣབ་སེམས་ལ་སོགས་པ་དེ་དག་གི་རྒྱུ་བས་ཏེ་འགྲོས་ཀྱི་རྒྱུ་སྟེ་འགྲོའོ་ཞེས་བྱ་བའི་ཐ་ཚིག་གོ། །དེ་དག་གི་དབང་གིས་དེ་བཞིན་དུ་མངོན་པར་འདུ་བྱེད་
[60a.5]པའི་ཕྱིར་ཏེ། འདི་ལྟར་རྒྱུ་བརྣབ་སེམས་ལ་སོགས་པ་གོ་རིམས་བཞིན་དུ་འཆག་པ་དང་མི་མཐུན་པ་དང་ལོག་པར་ལྟ་བ་རྣམས་ཀྱི་དབང་གིས་དེ་དག་དང་མཐུན་པར་མངོན་པར་འདུ་བྱེད་ཅིང་སེམས་པར་བྱེད་དོ་ཞེས་བྱ་བའི་ཐ་ཚིག་སྟེ། དེའི་ཕྱིར་དེ་དག་གི་རྒྱུ་བས་རྒྱུ་བ་ཡིན་ནོ། །ལུས་དང་ངག་གི་ལས་ཡིན་པའི་
[60a.6]ཕྱིར་ལས་ཀྱང་ཡིན་ལ་སེམས་པ་ཞེས་བྱ་བའི་ལས་ཀྱི་ལམ་ཡིན་པ་ལས་ཀྱི་ལམ་ཡང་ཡིན་ནོ། །དེ་དག་ཀུན་ནས་སློང་བའི་སེམས་པ་སྟེ། ལུས་དང་ངག་གི་ལས་ཀྱི་སེམས་པ་ནི་དེ་དག་ལ་བརྟེན་ནས་ཏེ། སྲོག་གཅོད་པ་ལ་སོགས་པ་དེ་དག་ལ་བརྟེན་ནས་འཇུག་པའི་ཕྱིར་རོ། །དེའི་ཕྱིར་དེ་དག་གི་མི་འདྲ་བ་རྣམས་
[60a.7]ལ་ཡང་གཅིག་ལུས་པར་གྲུབ་པའི་ཕྱིར་རོ་ཞེས་བྱ་བ་ནི་སྒྲ་འདྲ་བ་རྣམས་སམ་དོན་འདྲ་བ་རྣམས་ལ་ནི་གཅིག་བསྡུས་པར་འདོད་དེ། འདི་ལྟར་ཤིང་དང་ཤིང་ནི་ཤིང་དག་གོ་ཞེས་བྱ་བ་དང་། ཡོན་པོ་དང་ཁྱོར་པོ་ནི་ཡོན་པོ་དང་ཁྱོར་པོ་དག་གོ་ཞེས་བྱ་བ་ལྟ་བུ་ཡིན་ན་འདི་ལ་ནི་ལས་དང་ལས་ཀྱི་ལམ་ནི་ཞེས་བྱ་བ་ལས་ཤེས་བྱ་བའི་སྒྲ་
[60b]
[60b.1]དང་ལས་ཀྱི་ལམ་ཞེས་བྱ་བའི་སྒྲའི་སྒོ་ནས་ཀྱང་འདྲ་བ་མ་ཡིན་ལ་ལས་ཀྱི་དོན་དང་ལས་ཀྱི་ལམ་གྱི་དོན་ཐ་དད་པའི་ཕྱིར་དོན་གྱི་སྒོ་ནས་ཀྱང་འདྲ་བ་མ་ཡིན་པས་གཅིག་བསྡུས་པར་མི་འགྱུར་རོ་ཞེ་ན་འདི་ལྟར་རིལ་གྱིས་མི་འདྲ་ཞིང་ཕྱོགས་གཅིག་གིས་འདྲ་བ་རྣམས་ལ་ཡང་གཅིག་བསྡུས་པར་འགྲུབ་སྟེ། འདོད་
[60b.2]ཅེས་བྱ་བའི་ཐ་ཚིག་གོ། །འདི་ལྟ་སྟེ་གང་དང་གང་མི་མངོན་པ་དག་ནི་ཡོན་ཏན་ཡིན་ནོ་ཞེས་བྱ་བ་ལྟ་བུ་གང་དང་གང་མི་མངོན་པ་ནི་གང་མི་མངོན་པ་དག་སྟེ། དེ་གཉིས་ནི་ཞེས་བྱ་བ་ཡིན་ནོ། །གང་དང་མི་མངོན་པ་ནི་གང་མི་མངོན་པ་དག་གོ་ཞེས་བརྗོད་པར་ཡང་མི་ནུས་ཏེ། འདི་ནི་མི་མངོན་པ་མི་འདོད་
[60b.3]པའི་ཕྱིར་རོ། །ཕྱོགས་གཅིག་འདྲ་བའི་ཕྱིར་ཏེ། གང་ཞེས་བྱ་བ་དང་། གང་མི་མངོན་པ་ཞེས་བྱ་བའི་ཕྱོགས་གཅིག་པོ་གང་ཞེས་བྱ་བ་འདྲ་བའི་ཕྱིར་ནི་གང་མི་མངོན་པ་དག་ཅེས་གཅིག་བསྡུས་པར་འགྲུབ་པོ། །ཁུངས་འདི་ན་ལས་དང་ལས་ཀྱི་ལམ་དག་ནི་ལས་ཀྱི་ལམ་མོ་ཞེས་བྱ་བ་འདི་ཡང་འགྲུབ་
[60b.4]པར་འགྱུར་རོ། །ཕྱིས་ནི་བརྣབ་སེམས་ལ་སོགས་པ་ཡང་ལས་ཀྱི་ལམ་ཡིན་ལ་སྲོག་གཅོད་པ་ལ་སོགས་པ་ལ་ཡང་ལས་ཀྱི་ལམ་ཡིན་པས་ལས་ཀྱི་ལམ་མོ་ཞེས་གཅིག་བསྡུས་པ་ཡིན་ནོ། །ཡང་ན་འདི་ལྟར་སྦྱར་ཏེ། ལས་ཀྱི་ལམ་ནི་ལས་ཀྱི་ལམ་མོ། །དེ་དག་ནི་ལས་ཀྱང་ཡིན་ལ་ལས་ཀྱི་
[60b.5]ལམ་དག་ཀྱང་ཡིན་པས་ལས་དང་ལས་ཀྱི་ལམ་དག་སྟེ། བརྣབ་སེམས་ལ་སོགས་པ་ཡང་ལས་ཀྱི་ལམ་ཡིན་ལ་སྲོག་གཅོད་པ་ལ་སོགས་པ་ཡང་ལས་དང་ལས་ཀྱི་ལམ་དག་ཡིན་པས་ལས་དང་ལས་ཀྱི་ལམ་དག་ཅེས་བྱའོ། །བརྣབ་སེམས་མེད་པ་ལ་སོགས་པ་དང་སྲོག་གཅོད་པ་སྤོང་བ་ལ་
[60b.6]སོགས་པ་ཡང་དེ་བཞིན་དུ་ཞེས་བྱ་བ་རྒྱས་པར་འབྱུང་བ་ནི་དགེ་བའི་ལས་ཀྱི་ལམ་དག་ཀྱང་དེ་བཞིན་དུ་སྦྱར་བར་བྱ་བ་ཡིན་ཏེ། བརྣབ་སེམས་མེད་པ་ལ་སོགས་པ་ནི་ལས་ཀྱི་ལམ་ཁོ་ན་ཡིན་ལ། སྲོག་གཅོད་པ་སྤོང་བ་ལ་སོགས་པ་ནི་ལས་ཀྱང་ཡིན་ལ་ལས་ཀྱི་ལམ་ཡང་ཡིན་པས་ཞེས་བྱ་བ་ཡིན་
[60b.7]ནོ། །འདི་ལྟར་དེ་དག་ནི་དེའི་དོན་དང་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་དེའི་ཕྱིར་དེའི་སྦྱོར་བ་དེ་དག་ལས་ཀྱི་ལམ་དངོས་ཀྱི་དོན་དུ་འཇུག་པ་ཡིན་པ་དང་། གང་གི་ཕྱིར་དེའི་མཇུག་དེ་དག་ལས་ལས་ཀྱི་ལམ་དངོས་ཀྱི་རྩ་བ་ཅན་དུ་འཇུག་པ་ཡིན་པའི་ཕྱིར་དེ་དག་ནི་ལས་ཀྱི་ལམ་ཡིན་ནོ། །ལས་
[61a]
[61a.1]ཀྱི་ལམ་ཡང་ལས་ཀྱི་ལམ་གྱི་སྦྱོར་བ་ཡིན་པར་ནི་བཤད་མོད་ཀྱི། དེ་ནི་དངོས་ཡིན་པའི་ཕྱིར་ལས་ཀྱི་ལམ་གྱི་སྦྱོར་བ་དང་མཇུག་ཏུ་གྱུར་པའི་ཕྱིར་ནི་མ་ཡིན་ནོ། །སྔར་ཡང་ཆེ་ལོང་བསྡུས་པའི་ཕྱིར་ཞེས་བཤད་པ་ཡིན་ནོ་ཞེས་བྱ་བ་ནི་དེ་ལས་ཆེ་ལོང་བསྡུས་ནས་ནི། དགེ་དང་
[61a.2]མི་དགེ་ཅི་རིགས་པར། །ལས་ཀྱི་ལམ་ནི་བཅུར་གསུངས་སོ། །ཞེས་འབྱུང་བའི་ཕྱིར་སྦྱོར་བ་དང་མཇུག་གང་དག་ཡིན་པ་དེ་དག་མ་བསྡུས་སོ། །འཇིག་རྟེན་ན་གང་དག་ཅེས་བྱ་བ་རྒྱས་པར་འབྱུང་བ་ནི་འཇིག་རྟེན་ན་དངོས་གང་དག་འཕེལ་བ་དང་འགྲིབ་པས་ཕྱི་ནང་གི་དངོས་པོ་རྣམས་འཕེལ་བ་དང་འགྲིབ་
[61a.3]པ་ཡིན་གྱི་སྦྱོར་བ་དང་མཇུག་དག་ནི་མ་ཡིན་པས་དེ་དག་ཁོ་ན་ལས་ཀྱི་ལམ་ཡིན་ཏེ། ཐམས་ཅད་བདག་པོ་རྒྱུ་མཐུན་དང་། །རྣམ་སྨིན་འབྲས་སུ་འབྱིན་པར་འདོད། །ཅེས་བྱ་བ་འདིར་དེ་དག་འཕེལ་བ་དང་འགྲིབ་པས་དེ་རྣམས་འཕེལ་བ་དང་འགྲིབ་པར་འཆད་པར་འགྱུར་རོ། །དེའི་ཕྱིར་སྦྱོར་བ་དང་
[61a.4]མཇུག་དེ་དག་ནི་ལས་ཀྱི་ལམ་མ་ཡིན་ནོ། །དེ་དག་གི་ལྟར་ན་དེ་དག་ཇི་ལྟར་ལས་ཀྱི་ལམ་ཡིན་ཞེས་བྱ་བ་ནི་དེ་དག་གི་ལྟར་ན་བརྣབ་སེམས་ལ་སོགས་པ་དེ་དག་ལས་གང་ཞིག་གི་ལམ་ཡིན་པས་ན་ལས་ཀྱི་ལམ་དུ་འགྱུར་བ་བརྣབ་སེམས་ལ་སོགས་པ་ལས་མ་གཏོགས་པ་ཡིད་ཀྱི་ལས་སེམས་པ་ནི་མེད་
[61a.5]དོ། །དེ་དག་ཉིད་ལ་དྲིས་ཤིག་ཅེས་བྱ་བ་ནི་གང་དག་དེ་ལྟར་སེམས་པ་དེ་དག་ཁོ་ནས་ལན་གདབ་དགོས་སོ། །དེ་ལྟ་མོད་ཀྱི་བརྗོད་པར་ནི་ནུས་ཏེ་ཞེས་བྱ་བ་རྒྱས་པར་འབྱུང་བ་ནི་རང་གི་གཞུང་ལུགས་ཀྱིས་ཕྱོགས་དེ་གཞུང་འཛུགས་པར་བྱེད་པ་ཡིན་ནོ། །ཡང་ན་གཅིག་གིས་གཅིག་འདྲེན་པས་ན་ཞེས་བྱ་བ་ཅི་
[61a.6]ཞེ་ན་བརྣབ་སེམས་ལ་སོགས་པ་དེ་དག་ལས་ཀྱི་ལམ་ཡིན་ནོ་ཞེས་བྱ་བར་སྐབས་དང་སྦྱར་ཏེ། བརྣབ་སེམས་ཀྱིས་ཀྱང་གནོད་སེམས་དང་ལོག་པར་ལྟ་བ་དག་འདྲེན་པར་བྱེད་ལ་དེ་དག་གིས་ཀྱང་དེ་དག་འདྲེན་པར་བྱེད་དོ། །དེ་དག་ནི་ལས་ཀྱང་ཡིན་ལ་དེ་དག་གི་ནང་ནས་ལས་གང་ཡང་རུང་བ་ཞིག་གི་ལམ་
[61a.7]ཡང་ཡིན་པས་ལས་ཀྱི་ལམ་མོ། །དགེ་བའི་རྩ་བ་ནི་ལོག་པར་ལྟ་བས་ཀུན་དུ་གཅོད་དོ་ཞེས་བྱ་བའི་དོན་འདི་བརྗོད་པར་འདོད་ནས། དེ་དག་ཐམས་ཅད་ཀྱང་དགེ་བའི་ཆོས་རྣམས་ཞེས་བྱ་བ་རྒྱས་པར་གླེང་སློང་བར་བྱེད་དོ། །ཆེན་པོ་ཡོངས་སུ་རྫོགས་པའི་ཞེས་བྱ་བ་ནི་ཆེན་པོའི་ཆེན་པོ་ཞེས་བྱ་བའི་ཐ་ཚིག་
[61b]
[61b.1]གོ། །འོ་ན་ཅིའི་ཕྱིར་བསྟན་བཅོས་ལས་བཤད་ཅེས་བྱ་བ་ནི་གལ་ཏེ་ལོག་པར་ལྟ་བས་དགེ་བའི་རྩ་བ་ཀུན་དུ་གཅོད་ཀྱི་མི་དགེ་བའི་རྩ་བ་རྣམས་ཀྱིས་ནི་མ་ཡིན་ན་བསྟན་བཅོས་ལས་མི་དགེ་བའི་རྩ་བ་གང་དག་གིས་དགེ་བའི་རྩ་བ་གཅོད་པར་བྱེད་པ་ཞེས་བཤད་པ་གང་ཡིན་པ་དེ་ཇི་ལྟར་དྲང་སྟེ། དེ་
[61b.2]དག་ནི་ཆགས་པ་ལ་སོགས་པའི་ངོ་བོ་ཉིད་ཡིན་གྱི་ལོག་པར་ལྟ་བའི་ངོ་བོ་ཉིད་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །མི་དགེ་བའི་རྩ་བས་དྲངས་པའི་ཕྱིར་ཞེས་བྱ་བ་ནི་མི་དགེ་བའི་རྩ་བ་ཆགས་པ་ལ་སོགས་པ་ཆེན་པོས་ལོག་པར་ལྟ་བ་དྲངས་ཤིང་བསྐྱེད་པ་ཡིན་ཏེ། དེ་ལྟ་བས་ན་མི་དགེ་བའི་རྩ་བས་ལོག་
[61b.3]པར་ལྟ་བ་དྲངས་པའི་ཕྱིར་དེ་དག་ཁོ་ན་ལ་ལས་ཀྱི་ལམ་དེ་བསྟན་པར་མཛད་དེ། མི་དགེ་བའི་རྩ་བ་དེ་དག་ཁོ་ན་ལ་ལོག་པར་ལྟ་བའི་དགེ་བའི་རྩ་བ་ཀུན་དུ་གཅོད་པར་བྱེད་པའི་ལས་གང་ཡིན་པ་དེ་བསྟན་ཏོ། །གལ་ཏེ་འདོད་པ་ན་སྤྱོད་པའི་དགེ་བའི་རྩ་བ་རྣམས་ཀུན་དུ་འཆད་པར་འགྱུར་ཏེ། གཟུགས་དང་
[61b.4]གཟུགས་མེད་པ་དག་ན་སྤྱོད་པ་དག་དང་མི་ལྡན་པའི་ཕྱིར་རོ་ཞེས་བརྗོད་ན། འོ་ན་བཏགས་པ་ལས་བཤད་པ་ཇི་ལྟར་དྲང་། དེ་ནི་དེའི་ཐོབ་པ་ཐག་སྲིང་བར་བྱེད་པ་ཞེས་བྱ་བ་ནི་གང་ཟག་དེའི་གཟུགས་དང་གཟུགས་མེད་པ་ན་སྤྱོད་པའི་ཐོབ་པ་ཐག་སྲིང་བར་བྱེད་པ་ལས་དགོངས་ནས་འདི་སྐད་དུ། ཁམས་
[61b.5]གསུམ་པའི་དགེ་བའི་རྩ་བ་རྣམས་ཀུན་དུ་གཅོད་པ་ཡིན་ནོ་ཞེས་བཤད་པ་ཡིན་ནོ། །ཡང་ཇི་ལྟར་དེས་ཐོབ་པ་ཐག་སྲིང་བར་བྱེད་ཅེ་ན། རྒྱུད་དེའི་སྣོད་མ་ཡིན་པ་ཉིད་ཀྱི་ཕྱིར་ཏེ། གང་གི་ཕྱིར་དེའི་རྒྱུད་སྔོན་དེ་དག་གི་ཐོབ་པ་རྣམས་ཀྱི་སྣོད་དུ་གྱུར་པ་ལས་དགེ་བའི་རྩ་བ་ཀུན་དུ་ཆད་ནས་དེའི་ཚེ་དེ་དག་གི་
[61b.6]ཐོབ་པ་རྣམས་ཀྱི་སྣོད་མ་ཡིན་པ་ཉིད་དུ་བྱས་པ་དེའི་ཕྱིར་དེའི་ཐོབ་པ་ཐག་སྲིང་བར་བྱས་པ་ཡིན་ནོ། །སྦྱོར་བ་ལས་བྱུང་བ་དག་ལས་ནི་སྔར་ཡོངས་སུ་ཉམས་ཟིན་པའི་ཕྱིར་རོ་ཞེས་བྱ་བ་ནི་སྦྱོར་བ་ལས་བྱུང་བ་ཐོས་པ་དང་བསམས་པ་དང་བསྒོམས་པ་ལས་བྱུང་བ་དེ་དག་ལས་ནི་སྔར་ཆུང་ངུའི་ཆུང་ངུའི་གནས་སྐབས་
[61b.7]ཉིད་ན་ཡོངས་སུ་མ་ཉམས་ཏེ། དེའི་ཚེ་ཉིད་ན་དེའི་ཐོབ་པ་ཆད་ཟིན་ཏོ་ཞེས་བྱ་བའི་ཐ་ཚིག་གོ། །བར་ཆད་མེད་པའི་ལམ་དང་རྣམ་པར་གྲོལ་བའི་ལམ་ལྟ་བུ་ཡིན་ནོ་ཞེས་བྱ་བ་ནི་ཁ་ཅིག་གི་ཕྱོགས་ནི་རྒྱུ་ལ་སྐུར་པ་འདེབས་པ་ནི་བར་ཆད་མེད་པའི་ལམ་ལྟ་བུ་ཡིན་ལ། འབྲས་བུ་ལ་སྐུར་པ་འདེབས་
[62a]
[62a.1]པ་ནི་རྣམ་པར་གྲོལ་བའི་ལམ་ལྟ་བུ་ཡིན་ཏེ། འདི་སྐད་དུ་དགེ་བའི་རྩ་བ་ཀུན་དུ་གཅད་པར་བྱ་བ་ལ་ལོག་པར་ལྟ་བ་རྒྱུ་དང་འབྲས་བུ་ལ་སྐུར་པ་འདེབས་པ་འདི་གཉི་ག་ཡང་ལས་བྱེད་ཀྱི་གཅིག་ཁོ་ན་ནི་མ་ཡིན་ནོ་ཞེས་བཤད་པ་ཡིན་ནོ། །ཟག་པ་དང་བཅས་པ་ལ་དམིགས་
[62a.2]པ་ཁོ་ནས་ཡིན་གྱི་ཞེས་བྱ་བ་ནི་སྡུག་བསྔལ་དང་ཀུན་འབྱུང་བ་ལ་དམིགས་པས་ཡིན་གྱི་ཟག་པ་མེད་པ་ལ་དམིགས་པས་ནི་མ་ཡིན་ཏེ། འགོག་པ་དང་ལམ་ལ་དམིགས་པས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །སྐལ་བ་མཉམ་པའི་ཁམས་ལ་དམིགས་པ་ཁོ་ནས་ཡིན་གྱི་ཞེས་བྱ་བ་ནི་འདོད་
[62a.3]པའི་ཁམས་ལ་དམིགས་པ་ཁོ་ནས་དགེ་བའི་རྩ་བ་རྣམས་ཀུན་དུ་གཅོད་པ་ཡིན་གྱི་སྐལ་བ་མི་མཉམ་པའི་ཁམས་ལ་མི་དམིགས་པས་ནི་མ་ཡིན་ཏེ། གང་གཟུགས་དང་གཟུགས་མེད་པའི་ཁམས་ལ་དམིགས་པས་ནི་མ་ཡིན་ནོ་ཞེས་བྱ་བར་སྐབས་དང་སྦྱར་རོ། །ཅིའི་ཕྱིར་ཞེ་ན། མཚུངས་
[62a.4]པར་ལྡན་པ་ཙམ་གྱི་སྒོ་ནས་རྒྱས་པར་ཉམ་ཆུང་བའི་ཕྱིར་རོ་ཞེས་བྱ་བ་སྨྲས་ཏེ་ལོག་པར་ལྟ་བ་ཟག་པ་མེད་པ་ལ་དམིགས་པ་དང་སྐལ་བ་མི་མཉམ་པའི་ཁམས་ལ་དམིགས་པ་གང་ཡིན་པ་དེ་ནི་མཚུངས་པར་ལྡན་པ་ཙམ་གྱི་སྒོ་ནས་མཚུངས་པར་ལྡན་པའི་ཆོས་རྣམས་ལ་རྒྱས་པར་འགྱུར་གྱི་
[62a.5]དམིགས་པའི་སྒོ་ནས་ནི་མ་ཡིན་ཏེ། དེ་ལྟ་བས་ན་འདི་ནི་སྟོབས་ཆུང་བ་ཡིན་ནོ། །དེའི་ཕྱིར་དེས་ཀུན་དུ་གཅོད་པར་མི་འགྱུར་རོ། །བྱེ་བྲག་ཏུ་སྨྲ་བ་རྣམས་ནི་འདི་སྐད་དུ་བརྗོད་དོ། །ཀུན་གྱིས་ཞེས་བྱ་བ་ནི་རྒྱུ་ལ་སྐུར་པ་འདེབས་པ་གང་ཡིན་པ་དང་། འབྲས་བུ་ལ་སྐུར་པ་འདེབས་པ་གང་ཡིན་པ་དང་
[62a.6]སྐལ་བ་མཉམ་པའི་ཁམས་ལ་དམིགས་པ་གང་ཡིན་པ་དང་སྐལ་བ་མི་མཉམ་པའི་ཁམས་ལ་དམིགས་པ་གང་ཡིན་པ་དང་། ཟག་པ་དང་བཅས་པ་ལ་དམིགས་པ་གང་ཡིན་པ་དང་། ཟག་པ་མེད་པ་ལ་དམིགས་པ་གང་ཡིན་པ་དེ་ཐམས་ཅད་ཀྱིས་ཀུན་དུ་གཅོད་པར་འགྱུར་ཏེ། ཉོན་མོངས་པ་
[62a.7]བཞིན་ནོ། །མཐོང་བས་སྤང་བར་བྱ་བ་དག་བཞིན་ནོ་ཞེས་བྱ་བ་ནི་ཁ་ཅིག་ན་རེ་ཇི་ལྟར་སྡུག་བསྔལ་ལ་སོགས་པ་མཐོང་བས་སྤང་བར་བྱ་བའི་ཉོན་མོངས་པ་རྣམ་པ་དགུ་ཆར་ཡང་སྡུག་བསྔལ་གྱི་བདེན་པ་ལ་སོགས་པ་མཐོང་བས་ཅིག་ཅར་སྤོང་བར་འགྱུར། དེ་བཞིན་དུ་དགེ་བའི་རྩ་བ་
[62b]
[62b.1]རྣམ་པ་དགུ་ཆར་ཡང་ཅིག་ཅར་ཀུན་དུ་འཆད་དོ་ཞེས་ཟེར་རོ། །བསྒོམ་པས་སྤང་བར་བྱ་བའི་ཉོན་མོངས་པ་བཞིན་ཞེས་བྱ་བ་ནི་ཇི་ལྟར་ལམ་ཆུང་ངུའི་ཆུང་ངུས་ཉོན་མོངས་པའི་རྣམ་པ་ཆེན་པོའི་ཆེན་པོ་སྤོང་བ་ནས་ཆེན་པོའི་ཆེན་པོས་ཆུང་ངུའི་ཆུང་ངུ་སྤོང་བའི་བར་ལམ་རྣམ་པ་དགུས་ཉོན་
[62b.2]མོངས་པ་རྣམ་པ་དགུ་སྤོང་བ་དེ་བཞིན་དུ་ལོག་པར་ལྟ་བ་ཆུང་ངུའི་ཆུང་ངུས་དགེ་བའི་རྩ་བའི་རྣམ་པ་ཆེན་པོའི་ཆེན་པོ་ཀུན་དུ་གཅོད་པ་ནས་ཆེན་པོའི་ཆེན་པོས་དགེ་བའི་རྩ་བའི་རྣམ་པ་ཆུང་ངུའི་ཆུང་ངུ་ཀུན་དུ་གཅོད་པའི་བར་ལོག་པར་ལྟ་བ་རྣམ་པ་དགུས་ཀྱང་དགེ་བའི་རྩ་བ་རྣམ་པ་དགུ་ཀུན་དུ་གཅོད་
[62b.3]པར་འགྱུར་རོ། །དེ་ལྟར་ན་གཞུང་འདི་བསྐྱབས་པ་ཡིན་ནོ་ཞེས་བྱ་བ་ནི་གལ་ཏེ་དེ་དག་ཇི་སྐད་བཤད་པ་ལྟར་བསྒོམ་པས་སྤང་བར་བྱ་བའི་ཉོན་མོངས་པ་བཞིན་དུ་ཀུན་དུ་འཆད་ནའོ། །ཕྲ་མོ་དང་ལྷན་ཅིག་ཏུ་གྱུར་པ་ཞེས་བྱ་བ་ནི་ཆུང་ངུའི་ཆུང་ངུའོ། །མི་དགེ་བའི་རྩ་བ་གང་གིས་དགེ་བའི་རྩ་
[62b.4]བ་རྣམས་ཀུན་དུ་གཅོད་པར་བྱེད་པའོ་ཞེས་བྱ་བ་ནི་མི་དགེ་བའི་རྩ་བ་ཆེན་པོའི་ཆེན་པོ་དག་གིས་དགེ་བའི་རྩ་བ་ཀུན་དུ་གཅོད་པར་བཤད་ཀྱི་ཆུང་ངུའི་ཆུང་ངུ་ལ་སོགས་པས་ནི་མ་ཡིན་ནོ་སྙམ་དུ་དགོངས་པ་ཡིན་ནོ། །དེ་ནི་རྫོགས་པ་ལས་དགོངས་ཏེ་གསུངས་པ་ཡིན་ཞེས་བྱ་བ་ནི་དགེ་བའི་རྩ་བ་
[62b.5]ཀུན་དུ་འཆད་པ་རྫོགས་པ་ལས་དགོངས་ཏེ་འདི་སྐད་དུ། མི་དགེ་བའི་རྩ་བ་ཆེན་པོ་གང་དག་ཡིན་ཞེ་ན་ཞེས་བྱ་བ་རྒྱས་པར་བཤད་པ་ཡིན་ཏེ་ཆུང་ངུའི་ཆུང་ངུ་ལ་སོགས་པ་ཀུན་དུ་འཆད་པ་ནི་མི་སྨོས་ཀྱང་གཟུང་བར་བྱའོ། །དེ་ལྟ་བས་ན་དེ་དག་གིས་མ་ལུས་པ་གཅོད་པའི་ཕྱིར་དེ་ནི་རྫོགས་པ་ཁོ་ན་ལ་
[62b.6]དགོངས་ནས་བཤད་པ་ཡིན་ཏེ། འདི་ལྟར་ལོག་ཡིན་པར་ལྟ་བ་རྣམ་པ་དགུས་དགེ་བའི་རྩ་བ་རྣམས་མ་ལུས་པར་གཅོད་པར་འགྱུར་རོ། །དེ་དག་ལས་ལས་རྣམ་པ་གཅིག་སྟེ། རྣམ་པ་དགུ་པ་ཆུང་ངུའི་ཆུང་ངུ་མ་ཆད་ན་ཡང་རྣམ་པ་དགུ་པོ་ཐམས་ཅད་ཡང་སྐྱེ་བའི་རྒྱུར་འགྱུར་རོ། །དེའི་ཕྱིར་
[62b.7]འདི་ནི་རྫོགས་པ་ལས་དགོངས་ཏེ་གསུངས་པ་ཡིན་ནོ། །གཉི་གར་གཅོད་པར་བྱེད་དོ་ཞེས་བྱ་བ་འདི་ནི་ལངས་ན་ཡང་གཅོད་པར་བྱེད་མ་ལངས་ན་ཡང་གཅོད་པར་བྱེད་དོ། །དེ་བཏང་བས་དེ་ཡང་གཏོང་ངོ་ཞེས་བྱ་བ་ནི་སེམས་ཆུང་ངུའི་ཆུང་ངུས་སྡོམ་པ་དེ་ཡང་དག་པར་བླངས་པར་གྱུར་པའི་སེམས་ཆུང་
[63a]
[63a.1]ངུའི་ཆུང་ངུ་དགེ་བའི་རྩ་བ་ཆུང་ངུའི་ཆུང་ངུ་དང་མཚུངས་པར་ལྡན་པ་བཏང་ཞིང་ཀུན་དུ་ཆད་ན་སྡོམ་པ་དེ་ཡང་བཏང་བར་འགྱུར་བ་ནས། དེ་བཞིན་དུ་གང་ཞིག་རྒྱུ་མཚན་ཆེན་པོའི་ཆེན་པོས་སྡོམ་པ་ཡང་དག་པར་བླངས་པ་དེ་བཏང་བས་དེ་ཡང་གཏོང་བའི་བར་དུ་འགྱུར་
[63a.2]རོ། །ལས་ཀྱི་འབྲས་བུ་མངོན་སུམ་དུ་གྱུར་པའི་ཕྱིར་རོ་ཞེས་བྱ་བ་ནི་ལྷའི་བུ་སྐྱེས་ནས་རིང་པོ་མ་ལོན་པ་ལ་བདག་གང་ནས་འཆི་འཕོས་ཏེ། གང་དུ་ནི་སྐྱེས་གང་ཞིག་གིས་སྐྱེས་སྙམ་པའི་སེམས་གསུམ་ཀུན་དུ་འབྱུང་སྟེ། དེ་ལྟར་ལས་དང་འབྲས་བུ་མངོན་སུམ་དུ་གྱུར་པའི་ཕྱིར་ལྷ་དག་གི་
[63a.3]ནང་ན་དགེ་བའི་རྩ་བ་ཀུན་དུ་འཆད་པ་མེད་དོ། །འཛམ་བུའི་གླིང་ཁོ་ན་ཡོད་དོ་ཞེས་བྱ་བ་ནི་དེ་ན་ཁྱད་པར་དུ་རྟོག་གེ་བ་ཉིད་ཡོད་པའི་ཕྱིར་རོ་སྙམ་དུ་བསམ་པ་ཡིན་ནོ། །ཐམས་ཅད་པས་ཉུང་ན་དབང་པོ་བརྒྱད་དང་ལྡན་པ་ཡིན་ཏེ། དགེ་བའི་རྩ་བ་ཀུན་དུ་ཆད་པ་ཁོ་ན་ཚོར་བའི་དབང་པོ་ལྔ་དང་ལུས་དང་
[63a.4]སྲོག་དང་ཡིད་ཀྱི་དབང་པོ་དང་ལྡན་ནོ། །དེའི་དད་པ་ལ་སོགས་པའི་དབང་པོ་ནི་ཀུན་དུ་འཆད་དོ། །སོ་སོའི་སྐྱེ་བོ་ཡིན་པའི་ཕྱིར་མི་ཤེས་པ་ཀུན་ཤེས་པར་བྱེད་པའི་དབང་པོ་ལ་སོགས་པ་ལ་ཡང་མེད་དོ། །མིག་དག་ལ་སོགས་པའི་དབང་པོ་ཡང་མ་ཚང་བའི་ཚུལ་ལམ་རིམ་གྱིས་
[63a.5]འཆི་བའི་གནས་སྐབས་ན་མེད་དོ། །ཤར་གྱི་ལུས་འཕགས་པོ་དང་ནུབ་ཀྱི་བ་ལང་སྤྱོད་པ་ཡང་དེ་དང་འདྲའོ་ཞེས་མཐུན་པར་བསྒྲེས་པའི་ཕྱིར་དེ་དག་ན་ཡང་དགེ་བའི་རྩ་བ་ཀུན་དུ་འཆད་པ་ཡོད་དོ་ཞེས་བྱ་བར་སྟོན་པར་བྱེད་དོ། །སྐྱེས་པ་བུད་མེད་ཀྱིས་གཅོད་དོ་ཞེས་བྱ་བ་ནི་སྐྱེད་པ་དང་བུད་
[63a.6]མེད་ཀྱིས་ཞེས་བྱ་བ་ཡིན་ཏེ། དང་ཞེས་བྱ་བའི་སྒྲ་མི་མངོན་པར་བསྟན་པ་ཡིན་ནོ། །གང་མོའི་དབང་པོ་དང་ལྡན་པ་དེ་གདོན་མི་ཟ་བར་དབང་པོ་བརྒྱད་དང་ལྡན་ཏེ། ཚོར་བའི་དབང་པོ་བཞི་དང་ལུས་དང་སྲོག་དང་ཡིད་ཀྱི་གསུམ་དང་བརྒྱད་པ་མོའི་དབང་པོ་དང་ལྡན་ནོ། །དད་པ་ལ་སོགས་
[63a.7]པ་ནི་མ་ཡིན་ཏེ། དགེ་བའི་རྩ་བ་ཀུན་དུ་ཆད་པའི་གནས་སྐབས་ན་འཁྲུལ་ལོ་སྙམ་དུ་བསམ་པ་ཡིན་ནོ། །མིག་ལ་སོགས་པ་ཡང་སྔ་མ་བཞིན་དུ་འཁྲུལ་པར་འགྱུར་ཏེ། འདིར་ནི་དོན་འདི་ཁོ་ན་དང་འགལ་བར་འགྱུར་རོ། །དེ་དག་ལས་ཀྱང་ཞེས་བྱ་བ་ནི་ཀུན་དུ་གཅོད་པར་བྱེད་པ་ཇི་སྐད་བཤད་པ་དེ་
[63b]
[63b.1]དག་ལས་ཀྱང་སྲེད་པ་སྤྱད་པ་ནི་ཀུན་དུ་གཅོད་པར་བྱེད་དོ། །སྡིག་པའི་བསམ་པ་བརྟན་པ་དང་མཁྱུད་པ་ཅན་ཡིན་པའི་ཕྱིར་རོ་ཞེས་བྱ་བ་ནི་འདི་ལ་སྡིག་པ་ལ་བསམ་པ་སེམས་པ་བརྟན་པ་ཡོད་པས་ཞེས་བྱ་བར་ཚིག་བསྡུ་བ་སྟེ། བརྟན་པ་ནི་སྲན་ལ་སྒྲེ་བའོ། །སྡིག་པ་མི་དགེ་བ་མཁྱུད་པ་ནི་འཆབ་
[63b.2]པའོ། །སྲེད་པ་སྤྱད་པ་སྤྱོད་པའི་ཕྱོགས་དང་མཐུན་པའི་ཕྱིར་ཞེས་བྱ་བ་ནི་སྲེད་པ་སྤྱད་པ་དང་འདྲ་བའི་ཕྱིར་ཞེས་བྱ་བའི་ཐ་ཚིག་སྟེ། ཇི་ལྟར་སྲེད་པ་སྤྱད་པ་བསམ་པ་གཡོ་བ་ཡིན་པ་ལྟར་མ་ནིང་ལ་སོགས་པ་ལ་ཡང་དེ་དང་འདྲའོ། །ངན་སོང་བ་བཞིན་ནོ་ཞེས་བྱ་བ་ནི་ཇི་ལྟར་ངན་སོང་བ་རྣམས་ཤེས་རབ་ཉོན་མོངས་
[63b.3]པ་ཅན་དང་ཉོན་མོངས་པ་མ་ཡིན་པ་དག་མི་བརྟན་པའི་ཕྱིར་དགེ་བའི་རྩ་བ་རྣམས་ཀུན་དུ་མི་གཅོད་པ་ལྟར་མ་ནིང་ལ་སོགས་པ་ཡང་དེ་དང་འདྲའོ། །ཉིང་མཚམས་སྦྱར་ཞེས་བྱ་བ་ནི་ཉིང་མཚམས་སྦྱར་བར་བྱས་པའོ། །ནད་མེད་ནས་སྟོབས་རྙེད་པ་བཞིན་ནོ་ཞེས་བྱ་བ་ནི་ཇི་ལྟར་སྔར་ནད་མེད་པར་འགྱུར་
[63b.4]ལ་རིམ་གྱིས་སྟོབས་རྙེད་པར་འགྱུར་བ་དེ་དང་འདྲའོ། །མཚམས་མེད་བྱེད་པའི་འདི་ལ་མིན། །ཞེས་བྱ་བ་ནི་མཚམས་མེད་པ་བྱེད་པ་ཁོ་ནའི་འདི་ལ་ཉིང་མཚམས་སྦྱོར་བར་མི་འགྱུར་རོ་ཞེས་བཤད་པས་དོན་གྱིས་ན་འདི་སྐད་དུ་མཚམས་མེད་པ་མི་བྱེད་པ་ནི་འདི་ལ་ཉིང་མཚམས་སྦྱོར་བར་འགྱུར་རོ་ཞེས་
[63b.5]བཤད་པ་ཡིན་ནོ། །སྲིད་པ་བར་མ་ལ་གནས་པ་ཞེས་བྱ་བ་ནི་དམྱལ་བར་འགྲོ་བར་འགྱུར་བའི་སྲིད་པ་བར་མ་ལ་གནས་པའོ། །འཆི་འཕོ་བ་ལ་མངོན་དུ་ཕྱོགས་པ་ཞེས་བྱ་བ་ནི་དམྱལ་བ་ནས་འཆི་འཕོ་བ་མངོན་དུ་ཕྱོགས་པའོ། །རྒྱུའི་སྟོབས་ཀྱིས་ཞེས་བྱ་བ་ནི་འདི་ལྟར་གང་དག་སྐལ་བ་མཉམ་པའི་སྟོབས་
[63b.6]ཀྱིས་བདག་ཉིད་ལོག་པར་ལྟ་བར་འདོད་པའོ། །རྐྱེན་གྱི་སྟོབས་ཀྱིས་ཞེས་བྱ་བ་ནི་འདི་ལྟར་གང་དག་གཞན་གྱི་སྒྲའི་སྟོབས་ཀྱིས་ལོག་པར་ལྟ་བར་འདོད་པ་སྟེ། རྒྱུའི་སྟོབས་ནི་སྙིང་པོ་དང་ལྡན་པའི་ཕྱིར་རོ། །རང་གི་སྟོབས་ཀྱིས་གཅོད་པ་གང་ཡིན་པ་དང་། གཞན་གྱི་སྟོབས་ཀྱིས་གཅོད་པ་གང་
[63b.7]ཡིན་པ་ཡང་དེ་དང་འདྲའོ་ཞེས་བྱ་བ་ནི་གང་ཞིག་རང་གི་རྟོག་གེའི་སྟོབས་ཀྱིས་གཅོད་པ་དེ་ནི་འཆི་འཕོ་བ་ན་ཉིང་མཚམས་སྦྱོར་བར་འགྱུར་ལ་གང་ཞིག་གཞན་གྱི་སྟོབས་ཀྱིས་ཏེ། གཞན་ལས་ཐོས་པ་ཙམ་གྱི་སྟོབས་ཀྱིས་གཅོད་པ་དེ་ནི་སྐྱེ་བ་ནའོ། །བསམ་པ་ཉམས་པ་ཞེས་བྱ་བ་ནི་ལོག་པར་ལྟ་
[64a]
[64a.1]བ་མངོན་དུ་གྱུར་པས་ཉམས་ཤིང་མ་རུང་བ་སྟེ། དེ་ནི་མཐོང་བའི་ཆོས་ཁོ་ན་ཉིང་མཚམས་སྦྱོར་བར་འགྱུར་རོ། །གང་ཞིག་བསམ་པ་དང་སྦྱོར་བ་ཉམས་པ་ཞེས་བྱ་བ་ནི་གང་ཞིག་ལོག་པར་ལྟ་བ་མངོན་དུ་གྱུར་པ་དང་མཚམས་མེད་པ་ལ་སོགས་པའི་ལས་ཀྱིས་ཉམས་པ་
[64a.2]སྟེ། དེ་ནི་ལུས་ཞིག་ནས་ཉིང་མཚམས་སྦྱོར་བར་འགྱུར་རོ། །འདིར་རང་གི་སྟོབས་ཀྱིས་གཅོད་པ་གང་ཡིན་པ་དང་གཞན་གྱི་སྟོབས་ཀྱིས་གཅོད་པ་གང་ཡིན་པ་འདི་ཡང་གོང་དུ་བཤད་པ་ཁོ་ནའི་རྣམ་གྲངས་ཡིན་ལ། དེ་བཞིན་དུ་ལྟ་བ་ཉམས་པ་གང་ཡིན་པ་དང་ལྟ་བ་དང་ཚུལ་ཁྲིམས་ཉམས་པ་
[64a.3]གང་ཡིན་པ་ཞེས་བྱ་བ་འདི་ཡང་བཤད་མ་ཐག་པ་ཁོ་ནའི་རྣམ་གྲངས་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །རྫོགས་བྱེད་ལ་སོགས་པའོ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་སྟོན་པ་དྲུག་པོ་འདི་ལྟ་སྟེ། འོད་སྲུངས་རྫོགས་བྱེད་དང་ཀུན་དུ་རྒྱུ་གནག་ལྷས་ཀྱི་བུ་དང་། སྨྲ་འདོད་ཀྱི་བུ་
[64a.4]མོའི་བུ་ཡང་དག་རྒྱལ་བ་ཅན་དང་། མི་ཕམ་པ་སྐྲའི་ལ་བ་ཅན་དང་། ཀ་ཏྱའི་བུ་ནོག་ཅན་དང་། གཅེར་བུ་པ་གཉེན་གྱི་བུ་ཞེས་བྱ་བ་བསྡུ་སྟེ། དེ་དག་ནི་མེད་པར་ལྟ་བ་ཡིན་པའི་ཕྱིར་དགེ་བའི་རྩ་བ་ཀུན་དུ་ཆད་པ་ནི་ཡིད་ལ་མཚམས་མེད་པ་བྱེད་པ་མ་ཡིན་པའི་ཕྱིར་ལོག་པ་ཉིད་དུ་ངེས་པ་ནི་མ་ཡིན་
[64a.5]ཏེ། མཚམས་མེད་པ་བྱེད་པ་ནི་ལོག་པ་ཉིད་དུ་ངེས་པས་སོ། །མ་སྐྱེས་དགྲ་ནི་མཚམས་མེད་པ་བྱེད་པ་ཡིན་པའི་ཕྱིར་ལོག་པ་ཉིད་དུ་ངེས་པ་ཡིན་ལ་ཡང་དག་པའི་ལྟ་བ་ཅན་ཡིན་པའི་ཕྱིར་དགེ་བའི་རྩ་བ་ཀུན་དུ་འཆད་པ་ནི་མ་ཡིན་ནོ། །ལྷས་སྦྱིན་ནི་དགེ་འདུན་གྱི་དབྱེན་བྱེད་པ་ཡིན་པའི་ཕྱིར་དང་།
[64a.6]དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པར་བྱེད་པ་ཡིན་པའི་ཕྱིར། དགེ་བའི་རྩ་བ་ཀུན་དུ་ཆད་པ་ཡང་ཡིན་ལ་ལོག་པ་ཉིད་དུ་ངེས་པ་ཡང་ཡིན་ནོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ནི་བདག་ཅག་ལ་སོགས་པའོ། །གཞན་མེད་པར་བརྣབ་སེམས་ལ་སོགས་པ་
[64a.7]མངོན་དུ་གྱུར་པ་ཞེས་བྱ་བ་ནི་སྲོག་གཅོད་པ་ལ་སོགས་པ་ལས་ཀྱི་ལམ་གཞན་མེད་པར་བརྣབ་སེམས་ལ་སོགས་པའི་ནང་ནས་གང་ཡང་རུང་བ་ཞིག་མངོན་དུ་གྱུར་ན་སེམས་པ་ལས་ཀྱི་ལམ་བརྣབ་སེམས་སམ་གནོད་སེམས་སམ་ལོག་པར་ལྟ་བ་གཅིག་དང་ལྷན་ཅིག་འབྱུང་ངོ་། །སེམས་པ་ཉོན་
[64b]
[64b.1]མོངས་པ་ཅན་མ་ཡིན་པ་ཅན་ཞེས་བྱ་བ་དགེ་བ་དང་ལུང་དུ་མ་བསྟན་པའི་སེམས་དང་ལྡན་པ་སྦྱོར་བ་པོ་དེའི་སྦྱོར་བས་སྲོག་གཅོད་པ་ལ་སོགས་པ་འདོད་པས་ལོག་པར་གཡེམ་པ་མ་གཏོགས་པ་གཟུགས་ཅན་རྣམས་ལས་གང་ཡང་རུང་བ་ཅིག་མཐར་ཕྱིན་པར་བྱེད་ན་སེམས་པ་གཅིག་པུ་དེ་དང་ལྷན་ཅིག་
[64b.2]འབྱུང་ངོ་། །བརྣབ་སེམས་ལ་སོགས་པ་ལ་མ་གཏོགས་པའི་ཉོན་མོངས་པ་ཅན་གྱི་སེམས་དང་ལྡན་པ་ཞེས་ཀྱང་རྗོད་པར་བྱེད་དེ། ཚུལ་འདི་ནི་དེ་ལ་ཡང་སྲིད་དོ། །གནོད་སེམས་སུ་གྱུར་པ་སྲོག་གཅོད་པ་ཞེས་བྱ་བ་རྒྱས་པར་འབྱུང་བ་ནི་གནོད་སེམས་དང་སྲོག་གཅོད་པ་དང་གཉིས་དང་ལྷན་ཅིག་
[64b.3]འབྱུང་ངོ་། །འདོད་པས་ལོག་པར་གཡེམ་པའམ་ཚིག་ཀྱལ་པ་སྨྲ་ན་གཉིས་དང་ལྷན་ཅིག་འབྱུང་བ་སྟེ། བརྣབ་སེམས་དང་འདོད་པས་ལོག་པར་གཡེམ་པ་གཉིས་དང་། ཚིག་ཀྱལ་པ་དང་། བརྣབ་སེམས་ལ་སོགས་པའི་ནང་ནས་གང་ཡང་རུང་བ་ཞིག་དང་གཉིས་ཁོ་ན་དང་ལྷན་ཅིག་འབྱུང་
[64b.4]ངོ་། །འདི་གླེང་བར་བྱ་སྟེ། གནོད་སེམས་སུ་གྱུར་པ་སྲོག་གཅོད་པ་ཞེས་བྱ་བ་དང་། བརྣབ་སེམས་དང་ལྡན་པ་མ་བྱིན་པར་ལེན་པ་ཞེས་བྱ་བ་འདི་ཅི་རང་བྱེད་པ་ལ་བྱའམ་འོན་ཏེ་གཞན་བྱེད་དུ་བཅུག་པ་ཞིག་ཡིན། གལ་ཏེ་རང་བྱེད་པ་ཡིན་ན་ནི་སྲོག་གཅོད་པ་ལ་གནོད་སེམས་གདོན་མི་ཟ་
[64b.5]བར་ཡོད་པའི་ཕྱིར་ལ། མ་བྱིན་པར་ལེན་པ་ཡང་བརྣབ་སེམས་གདོན་མི་ཟ་བར་ཡོད་པའི་ཕྱིར་གནོད་སེམས་སུ་གྱུར་པ་ཞེས་བྱ་བ་དང་བརྣབ་སེམས་དང་ལྡན་པ་ཞེས་བྱ་བའི་ཁྱད་པར་དུ་བྱ་བ་རུང་བ་མ་ཡིན་ཏེ། འཁྲུལ་པ་ལ་ནི་ཁྱད་པར་དུ་བྱ་བར་འདོད་དོ། །འོན་ཏེ་གཞན་བྱེད་དུ་བཅུག་པ་
[64b.6]ཞིག་ཡིན་ན་ནི་བརྣབ་སེམས་དང་གནོད་སེམས་དང་ལོག་པར་ལྟ་བ་རྣམས་ལས་གང་ཡང་རུང་བ་ཞིག་དང་ལྡན་པ་སྲོག་གཅོད་པ་དང་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་དང་། ཚིག་ཀྱལ་པ་སྨྲ་ནའོ་ཞེས་བརྗོད་དགོས་སོ་ཞེ་ན་སྨྲས་པ་རང་བྱེད་པ་ཡིན་ནོ། །ཁྱད་པར་དུ་བྱ་བ་
[64b.7]མི་རུང་ངོ་ཞེས་བཤད་པས་མ་ཡིན་ནམ་ཞེ་ན་དེ་ནི་ཉེས་པ་མེད་དེ། འདི་ནི་ཁྱད་པར་དུ་བྱ་བ་བརྗོད་པ་མ་ཡིན་ནོ། །འོ་ན་ཅི་ཞེ་ན་འདི་ནི་དེ་ལ་གཉིས་པར་གྱུར་པ་གནོད་སེམས་དང་བརྣབ་སེམས་དག་ཡོད་པ་ཉིད་དུ་བསྟན་ཏོ་ཞེས་རང་གི་ངོ་བོ་དེ་ལ་བསྙད་པར་ཟད་དོ། །དེ་ལྟ་ན་ཡང་བརྣབ་སེམས་
[65a]
[65a.1]ལ་སོགས་པའི་ནང་ནས་སེམས་གང་ཡང་རུང་བ་ཞིག་དང་ལྡན་པ་སྲོག་གཅོད་པ་ལ་སོགས་པ་དེ་དག་བྱེད་དུ་བཅུག་པའི་སེམས་པ་གཉིས་དང་ལྷན་ཅིག་འབྱུང་བ་སྲིད་པས་དེ་ཡང་བརྗོད་དགོས་པར་འགྱུར་རོ་ཞེ་ན་བརྗོད་དགོས་པ་ནི་བདེན་ན་དེ་སྐད་དུ་བཤད་པ་དེ་ནི་
[65a.2]དཔེར་བརྗོད་པ་ཙམ་དུ་ཟད་པས་ཉེས་པ་མེད་དོ། །གནོད་སེམས་དང་ལྡན་པ་ཅིག་ཅར་དུ་གཞན་གྱི་སྲོག་ཆགས་བསད་པས་འཕྲོག་ནའོ་ཞེས་བྱ་བ་ནི་ཡང་བསད་པ་ཁོ་ནས་དབྲོག་པ་གྲུབ་པ་གང་ཡིན་པ་སྟེ། གང་ལ་གནོད་སེམས་དང་སྲོག་ཆགས་གསོད་པ་དང་མ་བྱིན་པར་ལེན་པའི་ལས་ཀྱི་
[65a.3]ལམ་ཅིག་ཅར་འབྱུང་བའོ། །འོ་ན་ནི་མི་འགྲུབ་པ་མ་ཡིན་ནམ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་གཞན་གྱི་ནོར་འཕྲོག་པའི་ཚེ་གནོད་སེམས་ཡོད་ན་འོ་ན་དེ་མ་བྱིན་པར་ལེན་པ་ནི་ཆགས་པ་ཁོ་ནས་མཐར་ཕྱིན་པར་བྱེད་དོ་ཞེས་བྱ་བ་གྲུབ་པར་མི་འགྱུར་ཏེ། ཆགས་པ་དང་ཞེ་སྡང་དག་ཅིག་
[65a.4]ཅར་མི་འབྱུང་བའི་ཕྱིར་རོ། །སེམས་གཞན་དང་མི་ལྡན་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི། ལོག་གཡེམ་བརྣབ་སེམས་མ་བྱིན་ལེན། །ཆགས་པ་ཡིས་ནི་རྫོགས་པར་བྱེད། །ཅེས་བྱ་བའི་ངེས་པ་དེ་ནི་འཕྲོག་པའི་སེམས་དང་ལྡན་པ་ཁོ་ནའི་དེ་རྫོགས་པ་ལ་སྟེ། མ་བྱིན་པར་ལེན་པ་རྫོགས་
[65a.5]པ་ལ་ཤེས་པར་བྱའི་ངེས་པ་འདི་སེམས་གཞན་དང་ལྡན་པ་སྟེ། གསོད་པའི་སེམས་དང་ལྡན་པ་ནི་མ་ཡིན་ནོ། །དབྱེན་བྱ་བའི་བསམ་པ་དང་ལྡན་པ་བརྫུན་གྱི་ཚིག་ཅེས་བྱ་བ་ནི་དབྱེན་བྱ་བའི་བསམ་པ་ལྡན་པའི་ཕྱིར་བརྫུན་དེ་ཉིད་ཕྲ་མ་ཡང་ཡིན་ལ་གྲུབ་པའི་མཐའ་ལས། ཉོན་མོངས་པ་ཅན་
[65a.6]ཀུན་ཀྱལ་པ་ཉིད་ཅེས་འབྱུང་བའི་ཕྱིར་དེ་ཉིད་ཚིག་ཀྱལ་པ་ཡང་ཡིན་ནོ། །དེ་བཞིན་དུ་དབྱེན་བྱ་བའི་བསམ་པ་དང་ལྡན་པའི་ཕྱིར་ཚིག་རྩུབ་པོ་དེ་ཉིད་ཀྱང་ཕྲ་མ་ཡང་ཡིན་ལ་དེ་བཞིན་དུ་ཚིག་ཀྱལ་པ་ཡང་ཡིན་པས་བཞི་དང་ལྷན་ཅིག་འབྱུང་ངོ་། །ཇི་ལྟར་ཞེ་ན་དེ་ལ་ནི་ཡིད་ཀྱི་གཅིག་ཡིན་ལ་ངག་གི་
[65a.7]གསུམ་ཡིན་ནོ་ཞེས་བྱ་བ་སྨོས་ཏེ། བརྫུན་དུ་སྨྲ་ན་ཡང་བརྣབ་སེམས་སམ་གནོད་སེམས་གཅིག་དང་ངག་གི་གསུམ་སྟེ། བརྫུན་དུ་སྨྲ་བ་དང་ཕྲ་མ་དང་ཚིག་ཀྱལ་པ་དག་གོ། །ཚིག་རྩུབ་པོ་སྨྲ་ན་ཡང་ཡིད་ཀྱི་གཅིག་སྟེ་གནོད་སེམས་དང་། ངག་གི་གསུམ་སྟེ། ཚིག་རྩུབ་པོ་དང་ཕྲ་མ་དང་ཚིག་ཀྱལ་པ་
[65b]
[65b.1]དག་གོ། །མིང་གི་སྒོ་ནས་དེ་ལྟར་གསུམ་ཡིན་གྱི་ངོ་བོ་ཉིད་ཀྱི་སྒོ་ནས་ནི་མ་ཡིན་ཏེ། བརྫུན་དུ་སྨྲ་བ་དེ་ཉིད་ལ་ཕྲ་མ་དང་། ཚིག་ཀྱལ་པ་ཞེས་ཀྱང་བྱའི་ངོ་བོ་ཉིད་གསུམ་ཡོད་པ་ནི་མ་ཡིན་ནོ། །དེ་བཞིན་དུ་ཚིག་རྩུབ་པོ་ལ་ཡང་མིང་གསུམ་ཡིན་ནོ་ཞེས་བྱ་བར་སྦྱར་བར་བྱའོ། །གཞན་དག་ན་
[65b.2]རེ་ངོ་བོ་ཉིད་ཀྱི་ཁྱད་པར་ཡང་ཡོད་དེ་བརྫུན་དུ་སྨྲ་བ་དང་ཕྲ་མ་དང་ཚིག་ཀྱལ་པའི་རྣམ་པར་རིག་བྱེད་མ་ཡིན་པས་བདག་ཀྱང་ཐ་དད་ལ་དེ་བཞིན་དུ་ཚིག་རྩུབ་པོ་དང་ཕྲ་མ་དང་ཚིག་ཀྱལ་པ་རྣམ་པར་རིག་བྱེད་མ་ཡིན་པ་དག་ཀྱང་ཐ་དད་དོ་ཞེས་ཟེར་རོ། །ཡང་ན་བརྣབ་སེམས་ལ་སོགས་པར་གྱུར་པ་ཞེས་བྱ་བ་
[65b.3]རྒྱས་པར་འབྱུང་བ་ནི་ཡང་ན་བརྣབ་སེམས་ལ་སོགས་པ་དང་ལྡན་པ་བཞི་དང་ལྷན་ཅིག་འབྱུང་སྟེ་དེ་ལ་ནི་ཡིད་ཀྱི་གཅིག་སྟེ། བརྣབ་སེམས་ལ་སོགས་པའི་ནང་ནས་གང་ཡང་རུང་བ་ཞིག་ཡོད་པ་དང་། དེའི་སྦྱོར་བས་ཏེ་བརྣབ་སེམས་ལ་སོགས་པ་དང་ལྡན་པའི་སྦྱོར་བས་སྲོག་གཅོད་པ་ལ་སོགས་
[65b.4]པ་ལས་ཀྱི་ལམ་གང་ཡང་རུང་བ་གསུམ་མཐར་ཕྱིན་པར་བྱེད་ཅིང་རྫོགས་པའི་ཚེའོ། །སེམས་པ་ལྔ་པ་དང་དྲུག་པ་བདུན་དང་ཡང་དེ་བཞིན་དུ་སྦྱར་བར་བྱའོ། །ཇི་ལྟར་ཞེ་ན་རེ་ཞིག་ལྔ་དང་ལྷན་ཅིག་གཅིག་འབྱུང་བ་ནི་བརྣབ་སེམས་ལ་སོགས་པ་དང་ལྡན་པ་དེའི་སྦྱོར་བས་གཞན་བཞི་མཐར་ཕྱིན་པར་
[65b.5]བྱེད་ནའོ། །དེ་བཞིན་དུ་བརྣབ་སེམས་ལ་སོགས་པ་དང་ལྡན་པ་གཞན་ལྔ་དང་དྲུག་མཐར་ཕྱིན་པར་བྱེད་ན་ཡང་དྲུག་དང་བདུན་དང་ལྷན་ཅིག་འབྱུང་ངོ་། །བརྒྱད་དང་ལྷན་ཅིག་འབྱུང་བ་ནི་བརྣབ་སེམས་ལ་སོགས་པ་དང་ལྡན་པ་སྲོག་གཅོད་པ་ལ་སོགས་པ་དྲུག་ལ་སྦྱོར་བ་བྱས་ནས་འདོད་པས་ལོག་པར་
[65b.6]གཡེམ་པ་བདག་ཉིད་ཀྱིས་བྱེད་ལ་མཉམ་དུ་མཐར་ཕྱིན་པར་འགྱུར་ནའོ། །དགུ་དང་བཅུ་དང་ལྷན་ཅིག་འབྱུང་ངོ་ཞེས་བྱ་བ་འདི་ནི་མེད་དེ། ཡིད་ཀྱི་ལས་ཀྱི་ལམ་རྣམས་ཅིག་ཅར་འབྱུང་བ་མེད་པའི་ཕྱིར་རོ། །གཅིག་དང་བརྒྱད་དང་ལྔ་དང་མིན། །ཞེས་བྱ་བ་ནི་ཡིད་ཀྱི་གཅིག་ཁོ་ན་དང་ནི་མ་
[65b.7]ཡིན་ཏེ། སེམས་པ་དགེ་བ་ལ་བརྣབ་སེམས་མེད་པ་དང་གནོད་སེམས་མེད་པ་དག་གདོན་མི་ཟ་བར་ཡོད་པའི་ཕྱིར་རོ། །སེམས་པ་ལས་ཀྱི་ལམ་གཟུགས་ཅན་སྡོམ་པས་བསྡུས་པ་གཅིག་དང་ལྷན་ཅིག་འབྱུང་བ་ཡང་མ་ཡིན་ཏེ། དགེ་བསྙེན་གྱི་སྡོམ་པ་ལ་སོགས་པ་ལ་ཉོན་མོངས་པ་ཅན་དང་ལུང་དུ་
[66a]
[66a.1]མ་བསྟན་པའི་སེམས་ཀྱི་གནས་སྐབས་ན་ཡང་སྲོག་གཅོད་པ་དང་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་དང་བརྫུན་དུ་སྨྲ་བ་སྤོང་བ་དག་གདོན་མི་ཟ་བར་ལྷན་ཅིག་འབྱུང་བའི་ཕྱིར་རོ། །ལྔ་ཁོ་ན་ལ་ཡང་མ་ཡིན་ཏེ། སེམས་པ་དགེ་བ་ལ་ནི་
[66a.2]བརྣབ་སེམས་མེད་པ་དང་། གནོད་སེམས་མེད་པ་དག་ཀྱང་གདོན་མི་ཟ་བར་ལྷན་ཅིག་འབྱུང་བའི་ཕྱིར་ལ། སྲོག་གཅོད་པ་སྤོང་བ་ལ་སོགས་པ་སྡོམ་པས་བསྡུས་པ་བཞི་པོ་འདི་དག་ཀྱང་གདོན་མི་ཟ་བར་ལྷན་ཅིག་འབྱུང་བའི་ཕྱིར་རོ། །བརྒྱད་པ་ཁོ་ན་དང་ཡང་མ་ཡིན་ཏེ། དགེ་སློང་གི་
[66a.3]སྡོམ་པས་བསྡུས་པའི་ལུས་དང་ངག་གི་ལས་ཀྱི་ལམ་རྣམས་ནི་ཉོན་མོངས་པ་ཅན་དང་ལུང་དུ་མ་བསྟན་པའི་སེམས་ཀྱི་གནས་སྐབས་ན་ཡང་བདུན་ཆར་ཡོད་པའི་ཕྱིར་ལ། དགེ་བའི་སེམས་ཀྱི་གནས་སྐབས་ན་ནི་དགུའམ་བཅུ་ཡོད་པའི་ཕྱིར་ཏེ། ཤུགས་ཀྱིས་ན་གཉིས་ལ་སོགས་པ་དང་ལྷན་
[66a.4]ཅིག་འབྱུང་ངོ་ཞེས་བཤད་པ་ཡིན་ནོ། །དེ་ལ་གཉིས་དང་ལྷན་ཅིག་འབྱུང་བ་ཞེས་བྱ་བ་རྒྱས་པར་འབྱུང་བ་ནི་དེ་ལ་གཉིས་དང་ལྷན་ཅིག་འབྱུང་བ་དགེ་བའི་རྣམ་པར་ཤེས་པ་ལྔ་ལ་གནས་པ་ལ་ནི་བརྣབ་སེམས་མེད་པ་དང་གནོད་སེམས་མེད་པ་དག་ཡོད་ཀྱི་གྲུབ་པའི་མཐའ་ལས། རྣམ་ཤེས་
[66a.5]ལྔ་དང་མཚུངས་སྐྱེས་བློ། །ངེས་རྟོག་མེད་ཕྱིར་ལྟ་བ་ཡིན། །ཞེས་འབྱུང་བའི་ཕྱིར་ཡང་དག་པའི་ལྟ་བ་ནི་མེད་དོ། །དེའི་ཕྱིར་འདི་ལ་ནི་བརྣབ་སེམས་མེད་པ་དང་། གནོད་སེམས་མེད་པ་དག་ཁོ་ན་དང་ལྷན་ཅིག་འབྱུང་ངོ་། །གཟུགས་མེད་པའི་སྙོམས་པར་འཇུག་པའི་ཟད་པ་དང་མི་སྐྱེ་བའི་ཤེས་
[66a.6]པ་ལ་གནས་པའོ་ཞེས་བྱ་བ་ནི་གཟུགས་མེད་པའི་སྙོམས་པར་འཇུག་པས་བསྡུས་པའི་ཟད་པ་དང་མི་སྐྱེ་བ་ཤེས་པ་དག་ལ་གནས་པའི་ཡང་འདི་གཉིས་ཁོ་ན་དང་ལྷན་ཅིག་འབྱུང་སྟེ། ཟད་དང་མི་སྐྱེ་བློ་ལྟ་མིན། །ཞེས་འབྱུང་བས་དེ་ནི་ཡང་དག་པའི་ལྟ་བ་མེད་པའི་ཕྱིར་རོ། །གཟུགས་མེད་པའི་སྙོམས་པར་
[66a.7]འཇུག་པ་སྨོས་པ་ནི་བསམ་གཏན་གྱི་སྙོམས་པར་འཇུག་པས་བསྡུས་པའི་ཟད་པ་དང་མི་སྐྱེ་བ་ཤེས་པ་དག་ལ་གནས་པ་ལ་ལུས་དང་ངག་གི་ལས་ཀྱི་ལམ་ཟག་པ་མེད་པའི་སྡོམ་པའི་རང་བཞིན་ནི་རྣམ་པ་བདུན་ཡོད་པ་ཟློག་པའི་ཕྱིར་རོ། །ཟད་པ་དང་མི་སྐྱེ་བ་ཤེས་པ་སྨོས་པ་ནི་ཡང་དག་པའི་ལྟ་བ་བསལ་བའི་ཕྱིར་ཏེ་ཟད་པ་
[66b]
[66b.1]དང་མི་སྐྱེ་བ་ཤེས་པ་དག་ནི་ཡང་དག་པའི་ལྟ་བའི་ངོ་བོ་ཉིད་མ་ཡིན་པའི་ཕྱིར་རོ། །གསུམ་དང་ལྷན་ཅིག་འབྱུང་བ་ནི་ཡང་དག་པའི་ལྟ་བ་དང་མཚུངས་པར་ལྡན་པའི་ཡིད་ཀྱི་རྣམ་པར་ཤེས་པ་ལ་གནས་པའོ་ཞེས་བྱ་བ་ནི་ལས་ཀྱི་ལམ་གཟུགས་ཅན་མེད་པ་ལ་ཞེས་བྱ་བའི་ཚིག་ལྷག་མ་ཡིན་ཏེ། དེ་ལ་ནི་
[66b.2]ལས་ཀྱི་ལམ་བརྣབ་སེམས་མེད་པ་དང་། གནོད་སེམས་མེད་པ་དང་ཡང་དག་པའི་ལྟ་བ་གསུམ་ཁོ་ན་ཡིན་ནོ། །བཞི་དང་ལྷན་ཅིག་འབྱུང་བ་ཞེས་བྱ་བ་རྒྱས་པར་འབྱུང་བ་ལ། མི་དགེ་བའམ་ལུང་དུ་མ་བསྟན་པའི་སེམས་དང་ལྡན་པ་ཞེས་ཁྱད་པར་དུ་བྱས་པའི་ཕྱིར། ཡིད་ཀྱི་ནི་མེད་དོ་ཞེས་བསྟན་པ་ཡིན་
[66b.3]ནོ། །དགེ་བསྙེན་དང་དགེ་ཚུལ་གྱི་སྡོམ་པ་ཡང་དག་པར་ལེན་པ་ན་ཡང་ལས་ཀྱི་ལམ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་སྤོང་བའི་མཚན་ཉིད་བཞི་ཁོ་ན་ཡོད་དེ། མྱོས་པར་འགྱུར་བ་འཐུང་བ་སྤོང་བ་ལ་སོགས་པ་ནི་ལས་ཀྱི་
[66b.4]ལམ་བཅུའི་ནང་དུ་མ་གཏོགས་པའི་ཕྱིར་ཏེ། ཚིག་རྩུབ་པོ་སྤོང་བ་ལ་སོགས་པ་ཡང་དགེ་བསྙེན་དང་དགེ་ཚུལ་གྱི་སྡོམ་པས་མ་བསྡུས་པའི་ཕྱིར་རོ། །དགེ་ཚུལ་གྱི་སྡོམ་པ་ཡང་དག་པར་ལེན་པ་སྨོས་པས་ནི་དགེ་བསྙེན་གྱི་སྡོམ་པ་ཡང་དག་པར་ལེན་པ་ཡང་བཤད་པའི་ངོ་བོར་ཁོང་དུ་ཆུད་པར་བྱ་
[66b.5]སྟེ། དགེ་ཚུལ་གྱི་སྡོམ་པ་ཡང་དག་པར་ལེན་པ་ན་ནི། ལས་ཀྱི་ལམ་བཞི་མི་ཚངས་པར་སྤྱོད་པ་སྤོང་བ་ཡིན་ལ། འདོད་པས་ལོག་པར་གཡེམ་པ་སྤོང་བ་ཡང་དེའི་ནང་དུ་འདུས་པ་ཁོ་ན་ཡིན་ནོ། །དྲུག་པ་དང་ལྷན་ཅིག་འབྱུང་བ་ནི་དགེ་བའི་རྣམ་པར་ཤེས་པ་ལྔ་ལ་གནས་པ་དེ་ཡང་དག་པར་
[66b.6]ལེན་པ་ནའོ་ཞེས་བྱ་བ་ནི་ཇི་སྐད་བཤད་པ་བཞི་པོ་དེ་དག་དང་། བརྣབ་སེམས་མེད་པ་དང་། གནོད་སེམས་མེད་པ་དག་དང་དྲུག་དང་ལྷན་ཅིག་འབྱུང་སྟེ། རྣམ་པར་ཤེས་པ་ལྔ་ལ་ཡང་དག་པའི་ལྟ་བ་མེད་པའི་ཕྱིར་རོ། །བདུན་པ་དང་ལྷན་ཅིག་འབྱུང་བ་ནི་དགེ་བའི་ཡིད་ཀྱི་རྣམ་པར་ཤེས་པ་ལ་གནས་ཏེ་
[66b.7]དེ་ཁོ་ན་ཡང་དག་པར་ལེན་པ་སྟེ། དགེ་བསྙེན་དང་དགེ་ཚུལ་གྱི་སྡོམ་པ་ཁོ་ན་ཡང་དག་པར་ལེན་པ་ན་ཇི་སྐད་བཤད་པ་དེ་དག་ཁོ་ན་དང་ལས་ཀྱི་ལམ་བདུན་པ་ནི་ཡང་དག་པའི་ལྟ་བ་དང་ལྷན་ཅིག་འབྱུང་སྟེ། དགེ་བའི་ཡིད་ཀྱི་རྣམ་པར་ཤེས་པ་ལ་ནི་ཡང་དག་པའི་ལྟ་བ་ཡོད་པས་སོ།། །།
[67a]
[67a.1]བམ་པོ་སུམ་ཅུ་རྩ་དྲུག་པ། མི་དགེ་བ་དང་ལུང་དུ་མ་བསྟན་པའི་སེམས་དང་ལྡན་པ་ཁོ་ན་དགེ་སློང་གི་སྡོམ་པ་ཡང་དག་པར་ལེན་པ་ན་གཟུགས་ཅན་བདུན་ཁོ་ན་དང་ལྷན་ཅིག་འབྱུང་སྟེ་མི་དགེ་བ་དང་ལུང་དུ་མ་བསྟན་པའི་སེམས་དང་ལྡན་པའི་ཕྱིར་ཡིད་ཀྱི་དག་དང་ནི་མ་ཡིན་
[67a.2]ནོ། །དགུ་དང་ལྷན་ཅིག་འབྱུང་བ་ནི་དགེ་བའི་རྣམ་པར་ཤེས་པ་ལྔ་ལ་གནས་པ་དེ་ཡང་དག་པར་ལེན་པ་སྟེ། དགེ་སློང་གི་སྡོམ་པ་ཡང་དག་པར་ལེན་པ་ན་སྟེ། ཡང་དག་པའི་ལྟ་བ་ཁོ་ན་མེད་པའི་ཕྱིར་རོ། །ཟད་པ་དང་། མི་སྐྱེ་བ་ཤེས་པ་དང་། མཚུངས་པར་ལྡན་པའི་ཡིད་ཀྱི་རྣམ་པར་
[67a.3]ཤེས་པ་ལ་གནས་པའི་ཡང་དགུ་པོ་དེ་དག་ཁོ་ན་དང་ལྷན་ཅིག་འབྱུང་སྟེ། དེ་ལ་ཡང་དག་པའི་ལྟ་བ་མེད་པའི་ཕྱིར་རོ། །དེ་དག་ཉིད་བསམ་གཏན་གྱིས་བསྡུས་པ་ལ་གནས་པའོ་ཞེས་བྱ་བ་ནི་ཟད་པ་དང་། མི་སྐྱེ་བ་ཤེས་པ་དང་། མཚུངས་པར་ལྡན་པའི་རྣམ་པར་ཤེས་པ་དེ་ཉིད་བསམ་གཏན་
[67a.4]གྱིས་བསྡུས་པ་ལ་གནས་པའི་ཡང་གཟུགས་ཅན་བསམ་གཏན་གྱི་སྡོམ་པས་བསྡུས་པ་བདུན་དང་། བརྣབ་སེམས་མེད་པ་དང་། གནོད་སེམས་མེད་པ་དང་། དགུ་དང་ལྷན་ཅིག་འབྱུང་ངོ་། །བཅུ་དང་ལྷན་ཅིག་འབྱུང་བས་ནི་དེ་ལས་གཞན་པའི་ཞེས་བྱ་བ་ནི་ཟད་པ་དང་། མི་སྐྱེ་བ་ཤེས་པ་ལས་གཞན་
[67a.5]པའི་ཡིད་ཀྱི་རྣམ་པར་ཤེས་པ་ལ་གནས་པ་དགེ་སློང་གི་སྡོམ་པ་ཡང་དག་པར་ལེན་པ་ཁོ་ནའོ། །ཐམས་ཅད་ཡིན་ནོ་ཞེས་བྱ་བ་རྒྱས་པར་འབྱུང་བ་ནི་བསམ་གཏན་དང་། ཟག་པ་མེད་པའི་སྡོམ་པ་དང་ལྷན་ཅིག་འབྱུང་བའི་སེམས་པ་ཟད་པ་དང་། མི་སྐྱེ་བ་ཤེས་པ་དང་མཚུངས་པར་ལྡན་པ་མ་ཡིན་
[67a.6]པ་ཐམས་ཅད་ཀྱང་ལུས་དང་ངག་གི་བསམ་གཏན་དང་། ཟག་པ་མེད་པས་བསྡུས་པ་བདུན་དང་། ཡིད་ཀྱི་གསུམ་དང་། བཅུ་དང་ལྷན་ཅིག་འབྱུང་ངོ་། །སེམས་པ་སྡོམ་པས་བསྡུས་པའི་ལས་ཀྱི་ལམ་རྣམས་དང་ནི་དེ་ལྟར་ལྷན་ཅིག་འབྱུང་ངོ་ཞེས་བསྟན་པ་ཡིན་ནོ། །སྡོམ་པ་མ་གཏོགས་པར་
[67a.7]ཏེ། སྡོམ་པ་རྣམ་པ་བརྒྱད་མ་གཏོགས་པར་ནི་གཅིག་དང་ལྷན་ཅིག་འབྱུང་བ་ཡོད་དོ། །ཇི་ལྟར་ཞེ་ན། སེམས་གཞན་དང་ལྡན་པ་ཞེས་བྱ་བ་སྨོས་ཏེ། དེ་དག་གི་སྡོམ་པ་ལས་མ་གཏོགས་པའི་དགེ་བའི་ལས་ཀྱི་ལམ་ཀུན་ནས་སློང་བར་བྱེད་པའི་སེམས་ལས་གཞན་པའི་སེམས་དང་ལྡན་པ་སྟེ། ཉོན་
[67b]
[67b.1]མོངས་པ་ཅན་དང་། ལུང་དུ་མ་བསྟན་པའི་སེམས་དང་ལྡན་པ་ཞེས་བྱ་བའི་ཐ་ཚིག་གོ། །སྤོང་བའི་ཡན་ལག་གཅིག་ཡང་དག་པར་ལེན་པ་ནའོ་ཞེས་བྱ་བ་ནི་སྲོག་གཅོད་པའི་ཡན་ལག་སྤོང་བའམ། མ་བྱིན་པར་ལེན་པ་སྤོང་བ་ཡང་དག་པར་ལེན་པ་ན་ལས་ཀྱི་ལམ་དེ་གཅིག་དང་ལྷན་ཅིག་
[67b.2]འབྱུང་ངོ་། །ལྔ་དང་བརྒྱད་དང་ལྷན་ཅིག་འབྱུང་བ་ཡང་ཡོད་དེ་ཞེས་བྱ་བ་ནི་དགེ་བའི་ཡིད་ཀྱི་རྣམ་པར་ཤེས་པ་དང་ལྷན་ཅིག་གང་ཟག་ཅིག་ཅར་དུ་ཡན་ལག་གཉིས་ཡང་དག་པར་ལེན་པ་ན་ཡིད་ཀྱི་གསུམ་དང་། གཟུགས་ཅན་གཉིས་དང་། ལྔ་དང་ལྷན་ཅིག་འབྱུང་ངོ་། །ཅིག་ཅར་ཡན་ལག་
[67b.3]ལྔ་ཡང་དག་པར་ལེན་པ་ན་གཟུགས་ཅན་ལྔ་པོ་དེ་དག་དང་། ཡིད་ཀྱི་གསུམ་དང་། བརྒྱད་དང་ལྷན་ཅིག་འབྱུང་ངོ་། །འདི་ནི་དཔེར་བརྗོད་པའི་ངོ་བོར་བཤད་པ་ཡིན་པས་དེ་ལས་གཞན་དུ་ཡང་བརྗོད་པར་ནུས་ཏེ། ཉོན་མོངས་པ་ཅན་དང་། ལུང་དུ་མ་བསྟན་པའི་སེམས་དང་ལྡན་པ་སྡོམ་པས་
[67b.4]བསྡུས་པའི་ཡན་ལག་ལྔ་ཡང་དག་པར་ལེན་པ་ན་ཡང་ལྔ་དང་ལྷན་ཅིག་འབྱུང་ངོ་། །ཆགས་པར་བྱ་བའི་དངོས་པོ་མེད་པའི་ཕྱིར་ཞེས་བྱ་བ་ནི་དམྱལ་བ་ན་ཆགས་པར་བྱ་བའི་དངོས་པོ་མེད་པའི་ཕྱིར་བརྣབ་སེམས་མངོན་སུམ་དུ་གྱུར་པའི་སྒོ་ནས་མེད་དོ། །ལས་ཀྱི་འབྲས་བུ་མངོན་སུམ་དུ་
[67b.5]གྱུར་པའི་ཕྱིར་ལོག་པར་ལྟ་བ་མེད་དོ། །དེ་ཉིད་ཀྱི་ཕྱིར་དང་ཞེས་བྱ་བ་ནི་དགོས་པ་མེད་པའི་ཕྱིར་དང་། ཕན་ཚུན་སྙིང་དུ་སྡུག་པ་ལ་སོགས་པ་མེད་པས་རྟག་ཏུ་བྱེ་ཟིན་པའི་ཕྱིར་ཕྲ་མ་མེད་དོ། །ང་ཡིར་འཛིན་པ་མེད་པའི་ཕྱིར་སྒྲ་མི་སྙན་ན་བརྣབ་སེམས་ཀྱི་ལས་ཀྱི་ལམ་མངོན་སུམ་དུ་གྱུར་པའི་སྒོ་
[67b.6]ནས་མེད་དོ། །རྒྱུད་འཇམ་པའི་ཕྱིར་དང་། ཀུན་ནས་མནར་སེམས་ཀྱི་དངོས་པོ་མེད་པའི་ཕྱིར་གནོད་སེམས་མེད་དོ། །སྡིག་པ་ཅན་གྱི་བསམ་པ་མ་ཡིན་པའི་ཕྱིར་ལོག་པར་ལྟ་བ་མེད་ཅིང་། བརྣབ་སེམས་ལ་སོགས་པ་དེ་གསུམ་ཆར་ཡང་མེད་དོ། །དངོས་སུ་ཡང་ཞེས་བྱ་བ་ནི་མངོན་སུམ་དུ་གྱུར་
[67b.7]པས་ཞེས་བཤད་པ་ཡིན་ནོ། །སྡིག་པ་ཅན་གྱི་བསམ་པ་མ་ཡིན་པའི་ཕྱིར་སྲོག་གཅོད་པ་ལ་སོགས་པ་དྲུག་ཅར་ཡང་མངོན་སུམ་དུ་གྱུར་པའི་སྒོ་ནས་མེད་དོ། །ཚེ་ངེས་པའི་ཕྱིར་སྲོག་གཅོད་པ་མེད་དོ། །རྫས་དང་བུད་མེད་ཡོངས་སུ་བཟུང་བ་མེད་པའི་ཕྱིར་གོ་རིམས་བཞིན་དུ་མ་བྱིན་པར་ལེན་པ་དང་། འདོད་
[68a]
[68a.1]པས་ལོག་པར་གཡེམ་པ་མེད་དོ། །དགོས་པ་མེད་པའི་ཕྱིར་བརྫུན་དུ་སྨྲ་བ་དང་། ཕྲ་མ་དང་ཚིག་རྩུབ་པོ་དག་མེད་དོ། །གལ་ཏེ་ཡོངས་སུ་བཟུང་བ་མེད་ན་ནི་ཇི་ལྟར་འདི་དག་མི་ཚངས་པར་སྤྱོད་པ་ཡིན་ཞེ་ན་ཞེས་འདྲི་བར་བྱེད་དོ། །སྡོམ་པ་མ་ཡིན་པ་མ་གཏོགས་
[68a.2]སོ་ཞེས་བྱ་བ་ནི་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པས་བསྡུས་པ་ཞེས་བྱ་བའི་ཐ་ཚིག་གོ། །འགྲོ་བ་གཞན་དག་ན་གནས་པ་ནི་གསོད་པར་བྱེད་དོ་ཞེས་བྱ་བ་ནི་ཡི་དགས་ལ་སོགས་པའི་འགྲོ་བ་ན་གནས་པའོ། །མགོ་དང་རྐེད་པ་བཅད་ན་འཆིའོ་ཞེས་བྱ་བ་ནི་ལྷ་དག་ཀྱང་མགོ་བཅད་
[68a.3]པ་དང་། རྐེད་པ་བཅད་ན་འཆི་བར་འགྱུར་རོ། །ལྷས་ལྷ་མི་གསོད་ཅེས་བཤད་པ་ནི་ལྷ་དག་མི་གསོད་དོ་ཞེས་བྱ་བར་འདོད་པ་ཡིན་ནོ། །ལྷ་རྣམས་ཀྱི་ཡན་ལག་དང་ཉིང་ལག་བཅད་ཅིང་བཅད་ཀྱང་ཕྱིར་སྐྱེ་བར་འགྱུར་ཏེ། དེ་ལྟ་ཡིན་མོད་ཀྱི། འོན་ཀྱང་མགོ་དང་རྐེད་པ་བཅད་ན་སྟེ། མགོ་
[68a.4]བཅད་པ་དང་། རྐེད་པ་བཅད་ན་ཡང་སླར་འབྱོར་པ་མེད་པས་ལྷ་རྣམས་ཀྱང་གསོད་དོ་སྙམ་དུ་བསམ་པ་ཡིན་ནོ། །ས་གང་ལ་བརྟེན་པ་ཅན་གྱི་ཞེས་བྱ་བ་རྒྱས་པར་འབྱུང་བ་ལ། ས་ནི་བསམ་གཏན་བཞི་པའི་བར་ལྔའོ། །འདི་ལ་ས་གང་ལ་བརྟེན་པ་ཡོད་པས་ན་ས་གང་ལ་བརྟེན་པ་ཅན་
[68a.5]ནོ། །འཕགས་པས་ཟག་པ་མེད་པའི་ཚུལ་ཁྲིམས་བསྐྱེད་དེ། འགགས་པས་ཞེས་བྱ་བ་ལ། བསྐྱེད་པ་ནི་ད་ལྟར་གྱི་དུས་སུ་ཕྱིན་པར་བྱས་པའོ། །འགགས་པ་ནི་འདས་པའི་དུས་སུ་ཕྱིན་པར་བྱས་པ་སྟེ། གཟུགས་མེད་པ་དག་ན་ས་གཅིག་ལ་བརྟེན་པ་ཅན་ནས་ས་བཞི་པ་ལ་བརྟེན་
[68a.6]པ་ཅན་གྱི་བར་གྱི་འདས་པ་དེ་དང་ལྡན་ནོ། །འདོད་པ་ལ་སྤྱོད་པ་ལ་བརྟེན་པ་ཅན་ནས་བསམ་གཏན་བཞི་པའི་བར་ལ་བརྟེན་པ་ཅན་གྱི་བར་ས་ལྔ་ཆར་ལ་བརྟེན་པ་ཅན་དང་ནི་མ་འོངས་པ་དང་ལྡན་ཏེ། དེར་སྐྱེས་ཀྱང་རུང་དེར་མ་སྐྱེས་ཀྱང་རུང་སྟེ། དེ་ལ་བརྟེན་པ་ཅན་དང་ལྡན་ནོ། །དམྱལ་བ་དང་།
[68a.7]བྱང་གི་སྒྲ་མི་སྙན་པ་དག་མ་གཏོགས་པ་ཞེས་བྱ་བ་ནི་དེ་ན་ཡང་དག་པར་བླངས་པའི་ཚུལ་ཁྲིམས་མེད་པའི་ཕྱིར་རོ། །གཞན་དག་ན་ནི་གཉི་ག་ཡོད་དོ་ཞེས་བྱ་བ་ནི་ལྷ་དང་། དམྱལ་བ་དང་། བྱང་གི་སྒྲ་མི་སྙན་པ་མ་གཏོགས་པ་དག་ན་ནི་སྡོམ་པར་མ་གཏོགས་པ་དང་། སྡོམ་པས་བསྡུས་པ་གཉི་ག་ཡོད་
[68b]
[68b.1]དོ། །སྡོམ་པ་རྣམ་པ་གསུམ་པོ་སོ་སོར་ཐར་པའི་སྡོམ་པ་དང་། བསམ་གཏན་གྱི་སྡོམ་པ་དང་། ཟག་པ་མེད་པའི་སྡོམ་པ་ཅི་རིགས་པར་གཟུང་བར་བྱའོ། །ཀུན་དུ་བརྟེན་པ་དང་། གོམས་པར་བྱས་པ་དང་། ལན་མང་དུ་བྱས་པ་ཞེས་བྱ་བ་ནི་སྦྱོར་བ་དང་། དངོས་དང་། མཇུག་གི་
[68b.2]གནས་སྐབས་དག་ཏུའོ། །འོ་ན་ཅི་ཞེ་ན། ཚེ་ཐུང་ངུར་འགྱུར་བ་ཞེས་བྱ་བ་ནི་ཚེ་ཐུང་བ་ཉིད་རྒྱུ་མཐུན་པའི་འབྲས་བུ་ཡིན་ནོ་ཞེས་བྱ་བར་སྟོན་ཏོ། །ཕྱིའི་དངོས་པོ་རྣམས་ནི་སྨན་དང་། ས་ལ་སོགས་པའོ། །གཟི་མཐུ་ཆུང་བ་ནི་མཐུ་ཆུང་བའོ། །སེར་བ་དང་། ཆར་པ་མང་བ་ཞེས་བྱ་བ་ལ། སེར་བ་
[68b.3]ནི་སེར་དྲག་གོ། །ཆར་པ་ནི་རྡུལ་འབབ་པའམ་བཙའ་འབྱུང་བ་སྟེ། གང་གིས་ན་འབྲུ་ལ་སོགས་པ་མ་རུངས་པར་འགྱུར་བའོ། །རྡུལ་གྱིས་འཁྲིགས་པར་འགྱུར་ཞེས་བྱ་བ་ནི་རྡུལ་གྱིས་ཁེབས་པར་འགྱུར་བའོ། །མཐོ་དམན་ཅན་དུ་འགྱུར་རོ་ཞེས་བྱ་བ་ནི་ཐག་ཐུག་ཅན་དུ་འགྱུར་བའོ། །ཚ་སྒོ་
[68b.4]ཅན་དང་དགོན་དུང་ནི་ཚ་སྒོ་ཅན་དང་དགོན་དུང་ངོ་། །དེ་དག་ཀྱང་གང་ཞེ་ན། ཕྱིའི་དངོས་པོ་ཞེས་བྱ་བར་སྐབས་དང་སྦྱར་ཏེ། དེ་ལྟ་བུའི་སར་འགྱུར་རོ་སྙམ་དུ་བསམ་པ་ཡིན་ནོ། །ཐ་ཆད་ནི་སྨད་པ་ཡིན་ནོ། །དུས་ལོག་པ་ཅན་ཞེས་བྱ་བ་ནི་འདི་དག་ལ་དུས་ལོག་པ་ཡོད་པས་ན་དུས་ལོག་པ་ཅན་
[68b.5]ཏེ། འབྲུ་ལ་སོགས་པའི་སྨན་དག་ཡིན་ཏེ། གང་དུ་ཆར་པ་འབབ་པའི་རྒྱུ་དེར་ནི་ཆར་པ་མི་འབབ་ཅིང་། གང་དུ་གྲང་བའི་རྒྱུ་དེར་ནི་མི་གྲང་ལ། གང་དུ་དྲོ་བའི་རྒྱུ་དེར་ནི་མི་དྲོ་ཞེས་བྱ་བར་སྦྱར་རོ། །དེ་ནི་རྣམ་པར་སྨིན་པའི་འབྲས་བུ་ཡིན་ལ་ཞེས་བྱ་བ་ནི་སེམས་ཅན་གྱི་རྒྱུད་ལ་ཡོད་པའོ། །འདི་
[68b.6]ནི་རྒྱུ་མཐུན་པའི་འབྲས་བུ་ཡིན་ནོ་ཞེས་བྱ་བ་ནི་ཕྱིའི་དངོས་པོ་ཡིན་པས་དེ་རྣམ་པར་སྨིན་པའི་འབྲས་བུ་ནི་མ་ཡིན་ནོ། །དེར་ནི་སྦྱོར་བས་ཡིན་ལ་ཞེས་བྱ་བ་རྒྱས་པར་འབྱུང་བ་ནི་སྲོག་གཅོད་པའི་སྦྱོར་བ་ནི་དམྱལ་བར་སྡུག་བསྔལ་མི་བཟད་པ་ཉམས་སུ་མྱོང་བར་འགྱུར་ཏེ། སྲོག་གཅོད་པའི་སྦྱོར་བ་བྱེད་
[68b.7]པ་ན་གསད་པར་བྱ་བའི་སྲོག་ཆགས་ཤིན་ཏུ་སྡུག་བསྔལ་བར་འགྱུར་རོ། །འདིར་ནི་དངོས་ཀྱིས་ཚེ་ཐུང་བར་འགྱུར་ཏེ། ཇི་ལྟར་གསད་པར་བྱ་བའི་སྲོག་ཆགས་དེའི་སྲོག་གཅད་པ་ལྟར་འདིར་ཡང་དེ་དང་འདྲ་བ་ཁོ་ན་ཡིན་ནོ། །ལས་ཀྱི་ལམ་དངོས་ནི་སྐད་ཅིག་མ་གཅིག་ཁོ་ན་ཡིན་ནོ། །དེ་ན་ཡང་
[69a]
[69a.1]སྡུག་བསྔལ་གྱི་ཚོར་བ་མེད་པས་འདིར་ནི་དངོས་ཀྱི་ཡིན་ཏེ་ཞེས་བརྗོད་པར་རིགས་སོ། །སྨྲས་པ་གལ་ཏེ་དེར་ནི་སྦྱོར་བས་ཡིན་ལ། འདིར་ནི་དངོས་ཀྱིས་ཡིན་ན་ཅིའི་ཕྱིར་འདི་སྐད་དུ་སྲོག་གཅོད་པ་ཀུན་དུ་བསྟེན་པ་དང་། གོམས་པར་བྱས་པ་དང་། ལན་མང་དུ་བྱས་པས་
[69a.2]དམྱལ་བ་དག་གི་ནང་དུ་སྐྱེ་བར་འགྱུར་རོ་ཞེས་གསུངས་ཏེ། མདོའི་དོན་ནི་སྲོག་གཅོད་པ་དངོས་ཀྱིས་ཞེས་བྱ་བ་ཡིན་ནོ་ཞེས་བྱ་བར་མཐོང་ནས་དེ་སྐད་དུ་འདྲི་བ་ཡིན་ནོ། །འཁོར་དང་བཅས་པ་སྨོས་པའི་ཕྱིར་ཞེས་བྱ་བ་ནི་སྲོག་གཅོད་པ་ནི་དངོས་ཁོ་ན་ཡིན་ནོ། །དེའི་འཁོར་ནི་སྦྱོར་བ་ཡིན་ཏེ།
[69a.3]སྦྱོར་བ་དེ་ལ་སྲོག་གཅོད་པ་ཉེ་བར་གདགས་པ་མཛད་ནས་འདི་སྐད་དུ། སྲོག་གཅོད་པས་ཞེས་བྱ་བ་རྒྱས་པར་བཤད་པ་ཡིན་ནོ། །གཉིས་པོ་འདི་ལས་མི་འདའི་ཞེས་བྱ་བ་ནི་རྣམ་པར་སྨིན་པའི་འབྲས་བུ་དང་། བདག་པོའི་འབྲས་བུ་ཞེས་བྱ་བ་སྟེ། རང་གི་རྒྱུད་ལ་ཡོད་པ་ནི་རྣམ་པར་སྨིན་པའི་
[69a.4]འབྲས་བུ་ཡིན་ལ། གཞན་ལ་ཡོད་པ་ནི་བདག་པོའི་འབྲས་བུ་ཡིན་པའི་ཕྱིར་རོ། །འདྲ་བའི་ཁྱད་པར་ལས་དེ་སྐད་དུ་བཤད་པར་ཟད་དོ་ཞེས་བྱ་བ་ནི་སྲོག་ཡིད་དུ་འོང་བ་འཆད་པ་དང་། ལོངས་སྤྱོད་ཀྱིས་ཕོངས་པ་ལ་སོགས་པའི་ཁྱད་པར་ལས་དེ་སྐད་དུ། བརྒྱ་ལ་འདི་ལྟ་བུར་མི་རྣམས་དང་སྐལ་
[69a.5]བ་མཉམ་པར་འོང་ན་ཡང་སྲོག་གཅོད་པས་ནི་ཚེ་ཐུང་བར་འགྱུར་ལ། མ་བྱིན་པར་ལེན་པས་ནི་ལོངས་སྤྱོད་ཀྱིས་ཕོངས་པར་འགྱུར་རོ་ཞེས་རྒྱས་པར་བཤད་པར་ཟད་དེ། འདི་ལ་ནི་རྒྱུ་དང་འབྲས་བུ་དག་འདྲ་བ་ཉིད་ཡིན་ནོ། །དེ་བཞིན་དུ་དགེ་བ་དག་ལ་ཡང་རྒྱུ་མཐུན་པའི་འབྲས་བུ་ནི་རྣམ་པར་སྨིན་པའི་
[69a.6]འབྲས་བུ་དང་། བདག་པོའི་འབྲས་བུ་ལས་མི་འདའི་འདྲ་བའི་ཁྱད་པར་ལས་དེ་སྐད་དུ། བརྒྱ་ལ་འདི་ལྟ་བུར་མི་རྣམས་དང་སྐལ་བ་མཉམ་པར་འོང་ན་ཡང་སྲོག་གཅོད་པ་སྤོང་བས་ནི་ཚེ་རིང་པོར་འགྱུར་རོ་ཞེས་བཤད་པར་ཟད་དོ་ཞེས་བྱ་བར་རྒྱས་པར་བརྗོད་པར་བྱའོ། །གཞན་དག་ལ་ཡང་དེ་བཞིན་
[69a.7]དུ་སྦྱར་བར་བྱའོ་ཞེས་བྱ་བ་ནི་མ་བྱིན་པར་ལེན་པས་ནི་རྫས་ཀྱི་བདག་པོ་སྡུག་བསྔལ་བསྐྱེད་པ་དང་། ལོངས་སྤྱོད་ཀྱིས་ཕོངས་པར་བྱས་པ་དང་། གཟི་བྱིན་མེད་པར་བྱས་པ་ཡིན་ཏེ། དེའི་ཕྱིར་འདི་སྡུག་བསྔལ་བར་བྱས་པ་དང་། ལོངས་སྤྱོད་བོར་བར་བྱས་པ་དང་། གཟི་བྱིན་མེད་པར་བྱས་པའི་ཕྱིར་འབྲས་བུ་རྣམ་
[69b]
[69b.1]པ་གསུམ་དུ་འགྱུར་རོ། །ཇི་ལྟར་གཟི་བྱིན་མེད་པར་བྱས་ཤེ་ན། དེའི་རྒྱུ་མེད་པར་བྱས་པས་ལོངས་སྤྱོད་ཀྱིས་ཕོངས་པར་བྱས་པས་དེ་ལ་གནོད་པའི་ཕྱིར་རོ། །དེ་ཉིད་ཀྱི་ཕྱིར་མ་བྱིན་པར་ལེན་པས་ནི་སེར་བ་དང་། ཆར་པ་མངས་པར་འགྱུར་རོ་ཞེས་བྱ་སྟེ། དེས་དེའི་གཟི་བྱིན་ལ་གནོད་པ་དང་བཅས་པར་
[69b.2]འགྱུར་བས་སོ། །དེ་བཞིན་དུ་གཞན་གྱི་བུད་མེད་ལ་ཉལ་པོ་བྱེད་པས་ནི་གཞན་སྡུག་བསྔལ་བསྐྱེད་པ་དང་། ཆུང་མ་དགྲ་དང་བཅས་པར་བྱས་པས་ནི་འཇིག་རྟེན་ན་གཟི་བྱིན་གང་གིས་གཟི་དང་བཅས་པའོ་ཞེས་ངེས་པར་བརྗོད་པའི་གཟི་བྱིན་མེད་པར་བྱས་པ་ཡིན་ཏེ། དེ་ཉིད་ཀྱི་ཕྱིར་འདོད་པས་ལོག་པར་
[69b.3]གཡེམ་པས་ནི་རྡུལ་གྱིས་འཁྲིགས་པར་འགྱུར་རོ་ཞེས་བཤད་དོ། །དེ་བཞིན་དུ་གཞན་དག་ལ་ཡང་སྦྱར་བར་བྱ་སྟེ། འདི་ནི་ཕྱོགས་ཡིན་ནོ། །ཐམས་ཅད་མི་དགེ་བ་ལས་བཟློག་སྟེ་སྦྱར་བར་བྱའོ་ཞེས་བྱ་བ་ཇི་ལྟ་ཞེ་ན། མ་བྱིན་པར་ལེན་པ་སྤོང་པ་ཀུན་དུ་བསྟེན་པ་དང་། གོམས་པར་བྱས་པ་དག་
[69b.4]ལན་མང་དུ་བྱས་པས་ལྷ་དག་གི་ནང་དུ་སྐྱེ་བར་འགྱུར་རོ། །བརྒྱ་ལ་འདི་ལྟ་བུར་མི་རྣམས་དང་སྐལ་བ་མཉམ་པར་འོང་ན་ཡང་ལོངས་སྤྱོད་ཀྱིས་མི་ཕོངས་པར་འགྱུར་རོ། །དེ་བཞིན་དུ་འདོད་པས་ལོག་པར་གཡེམ་པ་སྤོང་བ་ཀུན་དུ་བརྟེན་པ་དང་། གོམས་པར་བྱས་པ་དང་ཞེས་བྱ་བ་རྒྱས་
[69b.5]པར་བརྗོད་ནས། མི་རྣམས་དང་སྐལ་བ་མཉམ་པར་འོང་ན་ཡང་སྐུར་པ་ཉུང་བར་འགྱུར་རོ་ཞེས་བྱ་བའི་བར་བརྗོད་དོ། །ཕྱོགས་འདིས་ཐམས་ཅད་སྦྱར་བར་བྱའོ། །ལྟ་བ་སྣ་ཚོགས་པའི་ཞེས་བྱ་བ་ནི་ངོ་མཚར་དང་། བཀྲ་ཤིས་དང་། ཚེས་གྲངས་དང་། ཡུད་ཙམ་དང་། རྒྱུ་སྐར་ལ་སོགས་པའི་
[69b.6]ལྟ་བ་ཅན་གྱིའོ། །གཞན་ལ་འཚོ་བ་རག་ལུས་པའི་ཞེས་བྱ་བ་ནི་བསོད་སྙོམས་ལ་བརྟེན་ནས་ཞེས་འབྱུང་བའི་ཕྱིར་ཏེ། གཞན་ལ་འཚོ་བ་རག་ལས་པའི་དགེ་སློང་དེའི་འཚོ་བ་ནི་ཚུལ་འཆོས་པ་དང་། ཁ་གསག་དང་། གཞོགས་སློང་དང་། ཐོབ་ཀྱིས་འཇལ་བ་དང་། རྙེད་པས་རྙེད་པར་
[69b.7]བྱེད་འདོད་པས་ལོག་པར་འགྱུར་ཏེ། འཚོ་བའི་ཚུལ་དེ་དག་ནི་སྦྱང་དཀའ་བ་ཡིན་ནོ། །ཚུལ་ཁྲིམས་ཀྱི་ཕུང་པོའི་མདོ་ལས་ཞེས་བྱ་བ་ནི་ཚུལ་ཁྲིམས་ཀྱི་ཕུང་པོ་ཞེས་བྱ་བའི་ལེའུ་སྟེ། དེ་ལས་དབྱུ་གུ་གསུམ་པ་དེ་ལ་འདི་ལྟ་སྟེ། དགེ་སྦྱོང་ངམ། བྲམ་ཟེ་ཁ་ཅིག་དད་པས་བྱིན་པ་ཡོངས་སུ་
[70a]
[70a.1]ལོངས་སྤྱད་ནས་ལྟད་མོ་སྣ་ཚོགས་འདི་ལྟ་སྟེ། གླང་པོ་འཐབ་པ་དང་། རྟ་འཐབ་པ་དང་། ཤིང་རྟ་འཐབ་པ་དང་། རྐང་ཐང་འཐབ་པ་དང་། དབྱུག་པས་འཐབ་པ་དང་། ཁུ་ཚུར་གྱིས་འཐབ་པ་དང་། སྟོབས་འགྱེད་པ་དང་། ཁྱུ་མཆོག་འཐབ་པ་དང་། མ་ཧེ་འཐབ་
[70a.2]པ་དང་། ར་འཐབ་པ་དང་། ལུག་འཐབ་པ་དང་། ཁྱིམ་བྱ་འཐབ་པ་དང་། བྱེའུ་བར་ཏ་ཀ་འཐབ་པ་དང་། ཕག་འཐབ་པ་དང་། བུད་མེད་འཐབ་པ་དང་། སྐྱེས་པ་འཐབ་པ་དང་། གཞོན་ནུ་འཐབ་པ་དང་། གཞོན་ནུ་མ་འཐབ་པ་དང་། དགྲ་ནང་ནས་འཐབ་པ་དང་། པང་སྟོབས་བྱེད་
[70a.3]པ་དང་། རྒྱལ་མཚན་གྱི་རྩེ་མོ་དང་། དཔུང་དང་། དམག་གི་ཚོགས་དང་། དམག་བྱིན་པོ་སྟོན་པ་ལ་ལྟ་བར་རྩོམ་པའི་བརྩོན་པ་དང་ལྡན་པར་གནས་པའམ། འདུས་པ་ཆེན་པོ་ཉམས་སུ་མྱོང་བར་བྱེད་དེ། དགེ་སློང་ནི་དེ་ལྟ་བུའི་ལྟད་མོ་སྣ་ཚོགས་ལྟ་བར་རྩོམ་པར་བརྩོན་པ་སྤོང་
[70a.4]བ་ཡིན་ནོ། །དབྱུ་གུ་གསུམ་པ་དེ་ལ་འདི་ལྟ་སྟེ། དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་ཡོངས་སུ་ལོངས་སྤྱད་ནས། སྒྲ་སྣ་ཚོགས་འདི་ལྟ་སྟེ། གླང་པོ་ཆེའི་སྒྲ་དང་། ཤིང་རྟའི་སྒྲ་དང་། རྐང་ཐང་གི་སྒྲ་དང་། དུང་གི་སྒྲ་དང་། རྔ་བོ་ཆེའི་སྒྲ་དང་། རྔ་ཨ་རཾ་བྷ་རའི་སྒྲ་དང་།
[70a.5]གར་གྱི་སྒྲ་དང་། གླུའི་སྒྲ་དང་། སེ་གོལ་གྱི་སྒྲ་དང་། ལག་པའི་སྒྲ་དང་། རྫ་མའི་སྒྲ་མཉན་པར་རྩོམ་པ་ལ་བརྩོན་པ་དང་ལྡན་པར་གནས་ཤིང་། ཁ་ཅིག་ནི་སྙན་དངགས་ཡི་གེ་སྣ་ཚོགས་པ་དང་། འཇིག་རྟེན་རྒྱང་པན་པ་དང་ལྡན་པའི་ཚིག་དང་། ཡི་གེ་སྣ་ཚོགས་བསྙད་པར་ཉན་
[70a.6]པར་འདོད་དེ། དགེ་སྦྱོང་གི་སྒྲ་སྣ་ཚོགས་པ་དེ་ལྟ་བུ་མཉན་པར་རྩོམ་པའི་བརྩོན་པ་སྤོང་བ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པ་བཤད་པ་ཡིན་ནོ། །ལོག་པའི་ཡུལ་ལ་ཡོངས་སུ་ལོངས་སྤྱོད་པའི་ཕྱིར་རོ་ཞེས་བྱ་བ་ནི་ཡང་དག་པ་མ་ཡིན་པའི་ཡུལ་ལ་ཡོངས་སུ་ལོངས་སྤྱོད་པའི་ཕྱིར་རོ། །
[70a.7]གོང་དུ་འབྲས་བུ་ལྔ་བཤད་པ་གང་དག་ཡིན་པ་ཞེས་བྱ་བ་ནི་བདག་པོའི་འབྲས་བུ་དང་། སྐྱས་(སྐྱེས་)བུ་བྱེད་པའི་འབྲས་བུ་དང་། རྒྱུ་མཐུན་པའི་འབྲས་བུ་དང་། རྣམ་པར་སྨིན་པའི་འབྲས་བུ་དང་བྲལ་བའི་འབྲས་བུའོ། །སྤོང་བའི་ཕྱིར་ལམ་ཡིན་པ་ཞེས་བྱ་བ་ནི་ངོ་བོར་བསྒྲུབ་པ་ཡིན་ཏེ། སྤོང་
[70b]
[70b.1]བའི་ཆེད་ཀྱི་ལམ་ནི་སྤོང་བའི་ལམ་ཞེས་བྱའོ། །འདིས་ཉོན་མོངས་པ་སྤོང་བར་བྱེད་པས་ཞེས་བྱ་བ་ནི་བྱེད་པར་བསྒྲུབ་པ་ཡིན་ཏེ། སྤོང་བ་ཡང་ཡིན་ལ་ལམ་ཞེས་བྱ་བ་ཡང་ཡིན་པས་ཞེས་བྱ་བར་ཚིག་རྣམ་པར་སྦྱར་རོ། །ཏིང་ངེ་འཛིན་ལས་སྐྱེས་པའི་ཆོས་འདྲ་བ་ཕྱི་མ་རྣམས་སོ་ཞེས་བྱ་
[70b.2]བ་ལ། ཏིང་ངེ་འཛིན་ལས་སྐྱེས་པ་ཞེས་བྱ་བ་སྨོས་པ་ནི་མཉམ་པར་གཞག་པ་མ་ཡིན་པ་བསལ་བའི་ཕྱིར་རོ། །འདྲ་བ་སྨོས་པ་ནི་ཟག་པ་མེད་པ་དང་། ལུང་དུ་མ་བསྟན་པ་བསལ་བའི་ཕྱིར་རོ། །ལྷན་ཅིག་འབྱུང་བ་ཞེས་བྱ་བ་ནི་དེ་ལ་ཡོད་པ་མཚུངས་པར་ལྡན་པ་ཚོར་བ་ལ་སོགས་པ་དང་ལྡན་
[70b.3]པ་མ་ཡིན་པ་སྐྱེ་བ་ལ་སོགས་པའོ། །གང་ཡང་མ་འོངས་པ་ཐོབ་པ་ཞེས་བྱ་བ་ནི་དེའི་སྟོབས་ཀྱིས་ཆོས་མ་འོངས་པ་འཐོབ་པ་གང་ཡིན་པ་དེ་ཡང་སྐྱེས་བུ་བྱེད་པའི་འབྲས་བུ་ཡིན་ནོ། །དེ་ཉིད་ཀྱི་ཕྱིར་སྤངས་པ་དེ་ཡང་སྐྱེས་བུ་བྱེད་པའི་འབྲས་བུར་རྣམ་པར་གཞག་གི །བྲལ་བའི་འབྲས་བུ་འབའ་
[70b.4]ཞིག་ཏུ་ནི་མ་ཡིན་ནོ། །སྔར་བྱུང་བ་རྣམས་མ་གཏོགས་ཞེས་བྱ་བ་ནི་སྔར་བྱུང་བ་ནི་འབྲས་བུར་མི་རུང་བའི་ཕྱིར་ཏེ། འདི་ལྟར། སྔར་བྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་བདག་པོའི་འབྲས། །ཞེས་འབྱུང་བས་སོ། །རྣམ་པར་སྨིན་པའི་འབྲས་བུ་མ་གཏོགས་སོ་ཞེས་བྱ་བ་ནི་
[70b.5]ཟག་པ་མེད་པ་ལ་རྣམ་པར་སྨིན་པ་མེད་པའི་ཕྱིར་རོ། །དེའི་རྒྱུ་མཐུན་པའི་འབྲས་བུ་ནི་ཏིང་ངེ་འཛིན་ལས་སྐྱེས་པའི་ཆོས་འདྲ་བ་ཕྱི་མ་རྣམས་སོ། །བྲལ་བའི་འབྲས་བུ་ནི་བྲལ་བ་ཁོ་ན་ཡིན་ཏེ། སྤངས་པ་གང་ཡིན་པ་དེ་ཡིན་ནོ། །སྐྱེས་བུ་བྱེད་པའི་འབྲས་བུ་ནི་དེས་དྲངས་པའི་ཆོས་འདི་ལྟ་སྟེ། རྣམ་
[70b.6]པར་གྲོལ་བའི་ལམ་དང་། དེ་དང་ལྷན་ཅིག་འབྱུང་བ་དང་། གང་ཡང་མ་འོངས་པ་འཐོབ་པ་དང་། སྤངས་པ་དེ་ཡང་ཡིན་ནོ། །བདག་པོའི་འབྲས་བུ་ནི་སྔར་འབྱུང་བ་མ་གཏོགས་པར་རང་གི་ངོ་བོ་ལས་གཞན་པའི་འདུ་བྱེད་ཐམས་ཅད་དོ། །དགེ་དང་མི་དགེ་གང་ཡིན་པའང་། །ཞེས་བྱ་བའི་སྤོང་
[70b.7]བའི་ལམ་ལས་གཞན་པ་ཟག་པ་དང་བཅས་པའི་ལས་མཉམ་པར་བཞག་པ་དང་། མཉམ་པར་མ་བཞག་པ་གང་ཡིན་པ་དེ་ཡང་བྲལ་བའི་འབྲས་བུ་མ་གཏོགས་པ་འབྲས་བུ་བཞིས་འབྲས་བུ་དང་བཅས་པ་ཡིན་ཏེ། སྤོང་བའི་ལམ་མ་ཡིན་པའི་ཕྱིར་བྲལ་བའི་འབྲས་བུ་ནི་མེད་དོ། །དེའི་རྣམ་པར་
[71a]
[71a.1]སྨིན་པའི་འབྲས་བུ་ནི་རང་གི་སར་གཏོགས་པའི་རྣམ་པར་སྨིན་པ་ཡིད་དུ་འོང་བ་འམ། ཡིད་དུ་མི་འོང་བ་ཡིན་ནོ། །རྒྱུ་མཐུན་པའི་འབྲས་བུ་ནི་ཏིང་ངེ་འཛིན་ལས་སྐྱེས་པའི་ཆོས་འདྲ་བ་ཕྱི་མ་རྣམས་སོ། །སྐྱེས་བུ་བྱེད་པའི་འབྲས་བུ་ནི་དེས་དྲངས་པའི་ཆོས་ལྷན་ཅིག་འབྱུང་
[71a.2]བ་འམ། མཇུག་ཐོགས་སུ་འབྱུང་བ་རྣམས་སོ། །ལྷག་མ་བདག་པོའི་འབྲས་བུ་ནི་སྔ་མ་བཞིན་ནོ། །ཟག་པ་མེད་པ་ལྷག་མ་དང་། །ཞེས་བྱ་བ་ལ། ལྷག་མ་ཞེས་སྨོས་པ་ནི་སྤོང་བའི་ལམ་བསལ་བའི་ཕྱིར་རོ། །དེ་ཡང་སྦྱོར་བ་དང་། རྣམ་པར་གྲོལ་བ་དང་། ཁྱད་པར་གྱི་ལམ་དག་ལ་
[71a.3]ཡོད་པ་གང་ཡིན་པ་སྟེ། དེ་ནི་སྤོང་བའི་ལམ་མ་ཡིན་པའི་ཕྱིར་བྲལ་བའི་འབྲས་བུ་ཡང་མེད་ལ། ཟག་པ་མེད་པ་ཡིན་པའི་ཕྱིར་རྣམ་པར་སྨིན་པའི་འབྲས་བུ་ཡང་མེད་དོ། །ལྷག་མ་ནི་སྔ་མ་བཞིན་དུ་ཡོད་དོ། །ལུང་དུ་མ་བསྟན་པའི་ལས་གང་ཡིན་པ་སྟེ། བསྒྲིབས་ལ་ལུང་དུ་མ་བསྟན་པ་དང་། མ་བསྒྲིབས་
[71a.4]ལ་ལུང་དུ་མ་བསྟན་པ་དེ་ཡང་གསུམ་གྱིས་འབྲས་བུ་དང་བཅས་པ་ཡིན་ཏེ། སྤོང་བའི་ལམ་མ་ཡིན་པའི་ཕྱིར་དེ་ལ་བྲལ་བའི་འབྲས་བུ་ཡང་མེད་ལ། ལུང་དུ་མ་བསྟན་པ་ཡིན་པའི་ཕྱིར་རྣམ་པར་སྨིན་པའི་འབྲས་བུ་ཡང་མེད་དོ། །ལྷག་མ་ནི་སྔ་མ་བཞིན་དུ་ཡོད་པ་ཁོ་ནའོ། །དགེ་བའི་
[71a.5]དགེ་བ་ལ་སོགས་པ་ནི། བཞི་དང་གཉིས་དང་དེ་བཞིན་གསུམ། །ཞེས་བྱ་བ་འདི་ནི་གོ་རིམས་ཇི་ལྟ་བ་བཞིན་ཏེ། ཇི་ལྟ་ཞེ་ན། དགེ་བའི་འབྲས་བུ་ཆོས་དགེ་བ་ནི་བཞིའོ། །དེ་ཉིད་ཀྱི་འབྲས་བུ་མི་དགེ་བ་ནི་གཉིས་སོ། །དེ་ཉིད་ཀྱི་འབྲས་བུ་ལུང་དུ་མ་བསྟན་པ་ནི་གསུམ་མོ་ཞེས་བྱ་བ་ཡིན་ནོ། །རྣམ་པར་
[71a.6]སྨིན་པའི་འབྲས་བུ་མ་གཏོགས་སོ་ཞེས་བྱ་བ་ནི་རྣམ་པར་སྨིན་པ་ནི་ལུང་དུ་མ་བསྟན་པ་ཡིན་པའི་ཕྱིར་རོ། །མི་དགེ་བ་གཉིས་ཏེ་ཞེས་བྱ་བ་ནི་སྐྱེས་བུ་བྱེད་པ་དང་། བདག་པོའི་འབྲས་བུ་དག་གོ། །རྒྱུ་མཐུན་པའི་འབྲས་བུ་ནི་མེད་དེ། འདི་ལྟར་དགེ་བ་རྣམས་ཀྱི་སྐལ་བ་མཉམ་པའི་རྒྱུ་ནི་ཆོས་དགེ་བ་རྣམས་
[71a.7]ཡིན་པས་སོ། །རྣམ་པར་སྨིན་པའི་འབྲས་བུ་ཡང་མེད་དེ། འདི་ལྟར་རྣམ་པར་སྨིན་པ་ནི་ལུང་དུ་མ་བསྟན་པ་ཡིན་པའི་ཕྱིར་ལ། མི་དགེ་བ་དག་ནི་རྣམ་པར་སྨིན་པའི་ཕྱིར་ལུང་དུ་མ་བསྟན་པ་ཡིན་པས་སོ། །བྲལ་བའི་འབྲས་བུ་ཡང་མེད་དེ། མི་དགེ་བ་ཡིན་པའི་ཕྱིར་རོ། །ཤུགས་ཀྱིས་ན་སྐྱེས་བུ་
[71b]
[71b.1]བྱེད་པ་དང་། བདག་པོའི་འབྲས་བུ་དག་ཡིན་ཏེ། དེ་དག་ནི་སྔ་མ་བཞིན་དུ་བཤད་པར་བྱའོ། །ལུང་དུ་མ་བསྟན་པ་ནི་བཞི་སྟེ་ཞེས་བྱ་བ་ཇི་ལྟར་མི་དགེ་བའི་རྒྱུ་མཐུན་པའི་འབྲས་བུ་ལུང་དུ་མ་བསྟན་པའི་ཆོས་དག་ཡིན་ཞེ་ན། ཇི་ལྟར་ཡིན་པར་མི་འགྱུར། མི་འདྲ་བའི་ཕྱིར་ཏེ། རྣམ་པར་སྨིན་
[71b.2]པ་དང་བཅས་པ་དང་། རྣམ་པར་སྨིན་པ་མེད་པ་ཡིན་པའི་ཕྱིར་ཏེ། མི་དགེ་བ་ནི་ལུང་དུ་མ་བསྟན་པའི་ཆོས་དག་དང་མི་འདྲའོ་ཞེ་ན་དེ་ནི་ཉེས་པ་མེད་དེ། མི་དགེ་བ་དང་ལུང་དུ་མ་བསྟན་པའི་ཆོས་རྣམས་ནི་ཉོན་མོངས་པ་ཅན་དུ་འདྲ་བ་ཉིད་ཀྱིས་འདྲ་བ་ཡོད་དོ། །དེ་ལྟ་བས་ན་བསྒྲིབས་ལ་ལུང་དུ་
[71b.3]མ་བསྟན་པ་རྣམས་ཀྱང་མི་དགེ་བ་དག་གི་རྒྱུ་མཐུན་པའི་འབྲས་བུར་རུང་ལ། མི་དགེ་བ་རྣམས་ཀྱང་བསྒྲིབས་ལ་ལུང་དུ་མ་བསྟན་པ་དག་གི་རྒྱུ་མཐུན་པའི་འབྲས་བུར་རུང་ངོ་། །དེའི་ཕྱིར། ལུང་དུ་མ་བསྟན་པ་ཞེས་བྱ་བ་རྒྱས་པར་སྨོས་ཏེ། འཇིག་ཚོགས་དང་། མཐར་འཛིན་པར་ལྟ་བ་དག་
[71b.4]ནི་མི་དགེ་བ་ཀུན་དུ་འགྲོ་བ་སྡུག་བསྔལ་དང་། ཀུན་འབྱུང་བ་མཐོང་བས་སྤང་བར་བྱ་བ་རྣམས་དང་། སྡུག་བསྔལ་མཐོང་བས་སྤང་བར་བྱ་བ་འདོད་ཆགས་ལ་སོགས་པའི་རྒྱུ་མཐུན་པའི་འབྲས་བུ་ཡིན་ཏེ། སྐལ་མཉམ་ཀུན་དུ་འགྲོ་བ་ཡི། །འབྲས་བུ་རྒྱུ་མཐུན་ཞེས་འབྱུང་བའི་ཕྱིར་རོ། །མི་དགེ་
[71b.5]བ་རྣམས་ནི་ཞེས་བྱ་བ་རྒྱས་པར་འབྱུང་བ་ནི། སྡུག་བསྔལ་ལ་སོགས་པ་མཐོང་བས་སྤང་བར་བྱ་བའི་མི་དགེ་བ་རིས་ལྔ་པ་རྣམས་ནི་ལུང་དུ་མ་བསྟན་པའི་འཇིག་ཚོགས་དང་། མཐར་འཛིན་པར་ལྟ་བ་གཉིས་ཀྱི་འབྲས་བུ་ཡིན་ནོ། །དེ་དག་ཁོ་ན་ཡིན་ནོ་ཞེས་བྱ་བ་ནི་རྣམ་པར་སྨིན་པ་དང་བྲལ་བའི་
[71b.6]འབྲས་བུ་མ་གཏོགས་པ་གསུམ་མོ། །འདས་པའི་ལས་ཀྱི་འབྲས་བུ་དུས་གསུམ་པ་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་ནི་བཞིའོ། །བྲལ་བའི་འབྲས་བུ་ནི་མ་གཏོགས་སོ་ཞེས་བྱ་བ་ནི་དེ་ནི་ཁམས་སུ་མ་གཏོགས་པའི་ཕྱིར་རོ། །ཇི་ལྟར་བྱས་པས་ཤེ་ན། འདས་པའི་
[71b.7]ལས་ཀྱི་རྣམ་པར་སྨིན་པའི་འབྲས་བུ་ནི་དེའི་རྣམ་པར་སྨིན་པ་འདས་པ་ཕྱི་མ་ཡིན་ནོ། །སྐྱེས་བུ་བྱེད་པའི་འབྲས་བུ་ནི་དེས་དྲངས་པ་འདས་པ་ལྷན་ཅིག་སྐྱེས་པའམ། ཕྱིས་མཇུག་ཐོགས་སུ་འདས་པ་ཡིན་ནོ། །བདག་པོའི་འབྲས་བུ་ནི་འདས་པ་དེ་དང་ལྷན་ཅིག་འབྱུང་བ་རང་གི་ངོ་བོ་མ་གཏོགས་པ་
[72a]
[72a.1]རྣམས་དང་། ཕྱིས་འབྱུང་བའི་ཆོས་རྣམས་ཡིན་ནོ། །རྒྱུ་མཐུན་པའི་འབྲས་བུ་ནི་ཕྱིས་འབྱུང་བའི་ཆོས་འདྲ་བ་རྣམས་ཡིན་ནོ། །འདས་པའི་རྣམ་པར་སྨིན་པའི་འབྲས་བུ་མ་འོངས་པ་ནི་དེའི་རྣམ་པར་སྨིན་པ་ཡིན་ནོ། །སྐྱེས་བུ་བྱེད་པའི་འབྲས་བུ་ནི་གང་གི་སྟོབས་ཀྱིས་ཆོས་
[72a.2]མ་འོངས་པ་འཐོབ་པ་དེ་ཡིན་ནོ། །བདག་པོའི་འབྲས་བུ་ནི་དེའི་འབྲས་བུ་མ་འོངས་པ་གང་ཡིན་པའོ། །རྒྱུ་མཐུན་པའི་འབྲས་བུ་ནི་དེ་དང་འདྲ་བ་མ་འོངས་པ་ཡིན་ནོ། །ད་ལྟར་བྱུང་བ་དག་ཀྱང་དེ་དང་འདྲ་སྟེ། འདས་པ་དེའི་འབྲས་བུ་བཞི་སྦྱར་བར་བྱའོ། །བར་མ་ཡི་ནི་མ་འོངས་པའང་། །ཞེས་བྱ་བ་ནི་ད་
[72a.3]ལྟར་བྱུང་བའི་འབྲས་བུ་ཆོས་མ་འོངས་པ་ཡང་བཞིའོ། །དེ་དག་ཉིད་དོ་ཞེས་བྱ་བ་ནི་བྲལ་བའི་འབྲས་བུ་མ་གཏོགས་པ་ཞེས་བྱ་བའི་ཐ་ཚིག་སྟེ། དེ་དག་ཀྱང་དེ་ཁོ་ན་བཞིན་དུ་སྦྱར་བར་བྱའོ། །ད་ལྟར་བྱུང་བའི་འབྲས་བུ་དེ་ལྟར་བྱུང་བའི་ཆོས་ནི་གཉིས་ཏེ་ཞེས་བྱ་བ་ནི་དེ་དང་ལྷན་ཅིག་བྱུང་བ་ནི་དེའི་སྟོབས་
[72a.4]ལས་སྐྱེས་པ་ཡིན་པས་སྐྱེས་བུ་བྱེད་པའི་འབྲས་བུ་དང་། བདག་པོའི་འབྲས་བུ་ཁོ་ན་ཡིན་གྱི། བྲལ་བའི་རང་བཞིན་མ་ཡིན་པའི་ཕྱིར་བྲལ་བའི་འབྲས་བུ་ཡང་མེད་ཅིང་། སྔ་ཕྱི་ཉིད་མེད་པའི་ཕྱིར་རྒྱུ་མཐུན་པའི་འབྲས་བུ་ཡང་མེད་ལ། རྣམ་པར་སྨིན་པ་ནི་རྒྱུ་ལ་ལྟོས་པའི་ཕྱིར་ད་ལྟར་གྱི་རྣམ་པར་
[72a.5]སྨིན་པའི་འབྲས་བུ་ད་ལྟར་བྱུང་བ་ཡང་མེད་དོ། །རྒྱུ་མཐུན་པ་དང་། བྲལ་བའི་འབྲས་བུ་དག་མ་གཏོགས་སོ་ཞེས་བྱ་བ་ནི་མ་འོངས་པའི་རྒྱུ་མཐུན་པའི་འབྲས་བུ་མ་འོངས་པ་ནི་མེད་དེ། འདི་ལྟར་མ་འོངས་པའི་སྐལ་བ་མཉམ་པ་དང་། ཀུན་དུ་འགྲོ་བའི་རྒྱུ་དག་མེད་དེ། དེ་ན་འཚོལ་བར་འདུག་པའི་
[72a.6]ཕྱིར་དང་། འདྲ་བ་ཉིད་ཀྱི་ཕྱིར་འདིའི་འབྲས་བུ་འདིའོ་ཞེས་ཡོངས་སུ་གཅད་པར་མི་ནུས་པའི་ཕྱིར་རོ། །བྲལ་བའི་འབྲས་བུ་ཡང་མེད་དེ། འདི་ལྟར་བྲལ་བ་ནི་མ་འོངས་པ་ཡང་མ་ཡིན་ནོ། །རྣམ་པར་སྨིན་པའི་འབྲས་བུར་ནི་འབྱུང་སྟེ། མི་དགེ་བའམ་དགེ་བ་ཟག་པ་དང་བཅས་པ་མ་འོངས་པའི་རྣམ་པར་
[72a.7]སྨིན་པའི་འབྲས་བུ་མ་འོངས་པ་ནི་ཕྱིས་སྐྱེ་བར་འགྱུར་བ་ཡིན་ནོ། །སྐྱེས་བུ་བྱེད་པའི་འབྲས་བུ་ནི་མ་འོངས་པ་ལྷན་ཅིག་སྐྱེས་པ་དང་། མ་འོངས་པ་མཇུག་ཐོགས་སུ་འབྱུང་བ་ཡིན་ནོ། །བདག་པོའི་འབྲས་བུ་ནི་རྟོགས་པར་སླ་བས་ཡང་མི་བརྗོད་དོ། །བྲལ་བ་ནི་སའི་རང་བཞིན་མ་ཡིན་པའི་ཕྱིར་བྲལ་བའི་
[72b]
[72b.1]འབྲས་བུ་རང་གི་ས་པའི་ཆོས་ནི་མེད་དོ། །གལ་ཏེ་གཞན་གྱི་ས་པའི་ཆོས་ཟག་པ་མེད་པ་ཞིག་ཡིན་ན་ནི་འབྲས་བུ་གསུམ་སྟེ་ཞེས་བྱ་བ་ནི་གྲུབ་པའི་མཐའ་ལས། ས་དགུའི་ལམ་ནི་ཕན་ཚུན་དུ། །ཞེས་འབྱུང་བས་གསུམ་པ་རྒྱུ་མཐུན་པའི་འབྲས་བུ་སྲིད་པའི་ཕྱིར་རོ། །སློབ་པ་ནི་
[72b.2]ལས་ཀྱི་འབྲས་བུ་སློབ་པའི་ཆོས་གསུམ་སྟེ། འདི་ལྟར་རྣམ་པར་སྨིན་པ་ཡང་སློབ་པ་མ་ཡིན་པ་ལ། བྲལ་བ་ཡང་སློབ་པ་མ་ཡིན་པས་སོ། །སློབ་པ་ཡང་མ་ཡིན་མི་སློབ་པ་ཡང་མ་ཡིན་པ་ཡང་གསུམ་སྟེ་ཞེས་བྱ་བ་ནི་སློབ་པ་ལ་རྣམ་པར་སྨིན་པ་མེད་པའི་ཕྱིར་རྣམ་པར་སྨིན་པའི་འབྲས་
[72b.3]བུ་ཡང་མེད་ལ། སློབ་པ་ནི་སློབ་པ་ཡང་མ་ཡིན་མི་སློབ་པ་ཡང་མ་ཡིན་པ་དང་མི་འདྲ་བའི་ཕྱིར་རྒྱུ་མཐུན་པའི་འབྲས་བུ་ཡང་མེད་དོ། །བྲལ་བའི་འབྲས་བུ་ནི་འགྱུར་ཏེ། བྲལ་བ་ནི་སློབ་པ་ཡང་མ་ཡིན་མི་སློབ་པ་ཡང་མ་ཡིན་པའི་རང་བཞིན་ཡིན་པའི་ཕྱིར་རོ། །སྐྱེས་བུ་བྱེད་པའི་འབྲས་
[72b.4]བུ་ཡང་ཡོད་དེ། སློབ་པས་སློབ་པ་ཡང་མ་ཡིན། མི་སློབ་པ་ཡང་མ་ཡིན་པ་འཐོབ་པར་སྲིད་པའི་ཕྱིར་རོ། །བདག་པོའི་འབྲས་བུ་ཡང་ཡོད་པ་དེ་ཁོ་ན་ཡིན་ཏེ། དེ་ལྟར་ན་གསུམ་སྲིད་དོ། །མི་སློབ་ལས་ཀྱི་འབྲས་བུ་ནི། །ཞེས་བྱ་བ་རྒྱས་པར་འབྱུང་བ་ནི་མི་སློབ་པའི་ལས་ཀྱི་འབྲས་བུ་
[72b.5]སློབ་པའི་ཆོས་ནི་གཅིག་སྟེ། བདག་པོའི་འབྲས་བུའོ། །དམན་པ་ཡིན་པའི་ཕྱིར་རྒྱུ་མཐུན་པའི་འབྲས་བུ་ནི་མེད་དེ། མཉམ་དང་ཁྱད་པར་ཅན་གྱི་ཡིན། །ཞེས་འབྱུང་བའི་ཕྱིར་རོ། །ལྷན་ཅིག་དང་མཇུག་ཐོགས་སུ་སྐྱེ་བ་མེད་པའི་ཕྱིར་སྐྱེས་བུ་བྱེད་པའི་འབྲས་བུ་ཡང་མེད་དོ། །མི་སློབ་
[72b.6]པའི་མཇུག་ཐོགས་སུ་སློབ་པ་ནི་མི་འབྱུང་སྟེ། ཡོངས་སུ་ཉམས་པའི་ཚེ་ན་ཡང་ཉོན་མོངས་པ་ཀུན་དུ་འབྱུང་བས་བར་དུ་ཆོད་པའི་ཕྱིར་རོ། །རྣམ་པར་སྨིན་པའི་འབྲས་བུ་དང་། བྲལ་བའི་འབྲས་བུ་ཡང་སློབ་པ་ཡང་མ་ཡིན་མི་སློབ་པ་ཡང་མ་ཡིན་པའི་ཕྱིར་ལ། མི་སློབ་པ་ལ་ཡང་རྣམ་
[72b.7]པར་སྨིན་པ་མེད་པས་དེའི་ཕྱིར་རྣམ་པར་སྨིན་པའི་འབྲས་བུ་ཡང་མེད་དོ། །མི་སློབ་པ་ནི་གསུམ་སྟེ་ཞེས་བྱ་བ་ནི་སྐྱེས་བུ་བྱེད་པ་དང་། བདག་པོ་དང་། རྒྱུ་མཐུན་པའི་འབྲས་བུ་རྣམས་སོ། །རྣམ་པར་སྨིན་པའི་འབྲས་བུ་དང་། བྲལ་བ་དག་ནི་མེད་དེ། དེ་གཉིས་ནི་སློབ་པ་ཡང་མ་ཡིན་
[73a]
[73a.1]མི་སློབ་པ་ཡང་མ་ཡིན་པའི་རང་བཞིན་ཡིན་པའི་ཕྱིར་ལ། འདིར་ནི་མི་སློབ་པའི་ངོ་བོ་ཉིད་གང་ཡིན་པ་དེ་བསམ་པར་བྱ་བ་ཡིན་པས་སོ། །སློབ་པ་ཡང་མ་ཡིན་མི་སློབ་པ་ཡང་མ་ཡིན་པ་ནི་གཉིས་ཏེ། སྐྱེས་བུ་བྱེད་པ་དང་། བདག་པོའི་འབྲས་བུ་དག་གོ་ཞེས་བྱ་
[73a.2]བ་ལ། སྐྱེས་བུ་བྱེད་པའི་འབྲས་བུ་ནི་འདི་ལྟ་སྟེ། དེས་དྲངས་པའི་ཆོས་མཇུག་ཐོགས་སུ་འབྱུང་བ་རྣམས་ཡིན་ནོ། །བདག་པོའི་འབྲས་བུ་ནི་སྔ་མ་བཞིན་ནོ། །ཇི་སྐད་བཤད་པའི་གཏན་ཚིགས་ཀྱིས་ན་འབྲས་བུ་གསུམ་ནི་མེད་དོ། །མི་སློབ་པ་ཡང་དེ་དང་འདྲའོ་ཞེས་བྱ་བ་ནི་གཉིས་ཏེ།
[73a.3]སྐྱེས་བུ་བྱེད་པ་དང་། བདག་པོའི་འབྲས་བུ་དག་གོ་ཞེས་བྱ་བའི་ཐ་ཚིག་གོ། །དེ་ལ་སོགས་པ་ཞེས་བྱ་བ་ནི་མཐོང་བས་སྤང་བར་བྱ་བ་ལ་སོགས་པའོ། །དེ་དག་ཅེས་བྱ་བ་ནི་མཐོང་བས་སྤང་བར་བྱ་བ་ལ་སོགས་པའོ། །བསྒོམ་པས་སྤང་བར་བྱ་བ་ནི་གཉིས་ཏེ་ཞེས་བྱ་བ་ལ། སྐྱེས་བུ་བྱེད་པའི་
[73a.4]འབྲས་བུ་ནི་ཟག་པ་མེད་པའི་ལམ་ལས་ལངས་པའི་ཚེ་དགེ་བ་བསྒོམ་པས་སྤང་བར་བྱ་བ་རྣམས་ཡིན་ནོ། །ཐོག་མ་དང་ཐ་མ་བཞིན་ཞེས་བྱ་བ་རྒྱས་པར་འབྱུང་བ་ནི་ཐོག་མ་དང་ཐ་མ་དག་ལྟ་བུར་ཏེ། ཡང་གོ་རིམས་བཞིན་ཞེས་སྨོས་པ་ནི་དབུས་སུ་ཡང་ཐོག་མ་དང་ཐ་མ་བཞིན་ཤེས་
[73a.5]པར་བྱ་བའི་ཕྱིར་རོ། །ཇི་ལྟ་ཞེ་ན། ཐོག་མར་ནི་གོ་རིམས་བཞིན་གྱི་དོན་རིམ་པ་བཞིན་ཞེས་བྱ་བའི་སྒྲར་སྦྱར་བ་ཡིན་ཏེ། མི་དགེའི་དགེ་སོགས་གཉིས་དང་ནི། །གསུམ་དང་བཞི་སྟེ་གོ་རིམས་བཞིན། །ཞེས་འབྱུང་བའི་ཕྱིར་རོ། །ཐ་མར་ཡང་། སྤང་བྱ་མིན་པའི་དེ་དག་གཅིག །གཉིས་
[73a.6]དང་བཞི་སྟེ་གོ་རིམས་བཞིན། །ཞེས་སྦྱར་བ་ཡིན་ཏེ། ཇི་ལྟར་དེ་ལྟར་ཐོག་མ་དང་ཐ་མ་དག་ཏུ་གོ་རིམས་བཞིན་གྱི་དོན་བཤད་པ་ལྟར་དབུས་སུ་ཡང་དེ་དང་འདྲ་བར་ཁོང་དུ་ཆུད་པར་བྱའོ། །དེ་ནི་མཐུན་པར་སྦྱར་བའི་ཆོས་ཡིན་ནོ་ཞེས་བྱ་བ་དེ་ནི་མདོར་བསྡུ་བའི་ཚུལ་ཡིན་ནོ། །དེ་ལྟ་
[73a.7]མ་ཡིན་ན། ལུང་བསྟན་མིན་གྱི་དགེ་ལ་སོགས། །དེ་དག་གཉིས་དང་གསུམ་དང་གསུམ། །ཞེས་བྱ་བ་དེ་ལྟ་བུ་ལ་སོགས་པ་ཐམས་ཅད་གོ་རིམས་བཞིན་ནོ་ཞེས་བྱ་བ་བརྗོད་དགོས་སོ། །ཚུལ་བཞིན་མ་ཡིན་པ་ཡིད་ལ་བྱེད་པ་ལས་བྱུང་བ་ཉིད་ཀྱི་ཕྱིར་རོ་ཞེས་བྱ་བ་ནི་ཡིད་ལ་བྱེད་པ་
[73b]
[73b.1]གང་ཞིག་ཚུལ་བཞིན་མ་ཡིན་ཞིང་རིགས་པ་མ་ཡིན་ལ། ཉོན་མོངས་པ་དང་ལྡན་པར་ཞུགས་པ་གང་ཡིན་པ་དེ་དེ་ལས་བྱུང་བའོ། །དེའི་ངོ་བོ་ཉིད་དེ་དེའི་ཕྱིར་རོ། །གང་གིས་ཇི་ལྟར་འགྲོ་བར་བྱ་བ་སྟེ། གང་ཟག་གང་ཞིག་གིས་ཇི་ལྟར་འགྲོ་བར་བྱ་བ་དེ་ལྟར་མི་འགྲོ་བས་འདིའི་ལས་ནི་རིགས་
[73b.2]པ་མ་ཡིན་པས་སྐྱེས་པ་ཡིན་ནོ། །ཆོ་ག་ཉམས་པ་ཡང་ཡིན་ནོ་ཞེས་བྱ་བ་ལ། ཡང་ཞེས་བྱ་བའི་སྒྲས་ནི་ཉོན་མོངས་པ་ཅན་ཡང་ཡིན་ནོ་ཞེས་བྱ་བར་བསྡུ་བ་ཡིན་ནོ། །དེ་གཉིས་ལས་གཞན་པ་ནི་གཉི་ག་མ་ཡིན་པའོ་ཞེས་བྱ་བ་ནི་རིགས་པས་བསྐྱེད་པ་ཡང་མ་ཡིན་ལ། རིགས་པ་མ་ཡིན་པས་
[73b.3]བསྐྱེད་པ་ཡང་མ་ཡིན་པའོ། །གཞན་དེ་ཡང་གང་ཞིག་ཡིན་ཞེ་ན། ལུང་དུ་མ་བསྟན་པའི་ལས་དང་། ཆོ་ག་ཉམས་པ་དང་ཆོ་ག་ཉམས་པ་མ་ཡིན་པ་དག་ལས་གཞན་པའི་ལུང་དུ་མ་བསྟན་པའོ། །སྐྱེ་བ་ཞེས་བྱ་བ་ནི་རིས་མཐུན་པ་ལ་བྱ་སྟེ་ཞེས་བྱ་བ་ནི་སེམས་དང་ལྡན་པ་མ་ཡིན་པའི་འདུ་བྱེད་
[73b.4]ཡིན་གྱི། མཚན་ཉིད་ཀྱི་སྐྱེ་བ་ནི་མ་ཡིན་ནོ་སྙམ་དུ་བསམ་པ་ཡིན་ནོ། །འོ་ན་གནས་བརྟན་མ་འགགས་པས་ཞེས་བྱ་བ་ལ། ཚིག་གི་དོན་ནི་གལ་ཏེ་ལས་གཅིག་ཁོ་ནས་སྐྱེ་བ་གཅིག་ཁོ་ན་འཕེན་ན་གནས་བརྟན་མ་འགགས་པས་བདག་ནི་བསོད་སྙོམས་གཅིག་པོ་དེའི་ཞེས་བྱ་བ་རྒྱས་པར་སྨྲས་
[73b.5]པ་གང་ཡིན་པ་དེ་ཇི་ལྟར་མི་འགལ་ཞེས་བྱ་བ་ཡིན་ཏེ། དེས་ནི་ཚེ་རབས་གཞན་ན་རང་སངས་རྒྱས་སྤྱི་གཙུག་མེ་ཏོག་ཏ་ག་ར་ལྟ་བུ་ལ་བསོད་སྙོམས་ཕུལ་ཏེ། དེས་ན་འདི་སྐད་དུ་བདག་ནི་བསོད་སྙོམས་གཅིག་པོ་དེའི་ཞེས་བྱ་བ་རྒྱས་པར་སྨྲས་སོ། །བསྒྱུར་ཏེ་ཞེས་བྱ་བ་ནི་བསྒྲུབས་ཏེ་ཞེས་བྱ་བའི་ཐ་
[73b.6]ཚིག་གོ། །མིར་འདྲ་བ་ལ་ལ་ལ་ནི་དབང་པོ་ཚང་བ་ཡིན་ལ། ལ་ལ་ནི་དབང་པོ་མ་ཚང་བ་རྫོགས་པར་བྱེད་པའི་ལས་ཐ་དད་པ་ལས་གྱུར་ཏོ་ཞེས་བྱ་བར་མི་འཐད་དོ། །དབང་པོ་དྲུག་འཕེན་པར་བྱེད་པས་མིག་ལ་སོགས་པ་ནི་འཕེན་པར་བྱེད་པའི་ལས་ཀྱི་འབྲས་བུ་ཡིན་པའི་ཕྱིར་རོ། །ཁ་དོག་ལ་སོགས་
[73b.7]པ་ནི་རྫོགས་པར་བྱེད་པའི་ལས་ཀྱི་འབྲས་བུ་ཡིན་པས། མིར་འདྲ་བ་ལ་ལ་ལ་ནི་ཁ་དོག་བཟང་ལ། ལ་ལ་ནི་མ་ཡིན་ནོ་ཞེས་བརྗོད་པར་ནི་མི་རིགས་སོ་ཞེ་ན། དེ་དག་འབྱུང་བ་དང་འགལ་བའི་རྐྱེན་སྤང་བར་བྱ་བ་ལ་རྫོགས་པར་བྱེད་པའི་ལས་ཀྱི་ནུས་པ་ཡོད་པས་འགལ་བ་མེད་དོ། །དེ་ལྟ་མ་ཡིན་ན་སྐྱེ་
[74a]
[74a.1]བ་འཕེན་པ་ཡོད་ཕན་ཆད་འགའ་ཡང་དབང་པོ་མ་ཚང་བར་མི་འགྱུར་རོ། །རྣམ་པར་སྨིན་པ་དང་བཅས་པ་གཞན་ཡང་ཡིན་ནོ་ཞེས་བྱ་བ་ནི་ཚོར་བ་ལ་སོགས་པའོ། །ལས་དང་ལྷན་ཅིག་མི་འབྱུང་བའི་ཕྱིར་རོ་ཞེས་བྱ་བ་ནི་འདི་ལྟར་སྙོམས་པར་འཇུག་པ་དེ་དག་ནི་སེམས་པ་ཞེས་
[74a.2]བྱ་བའི་ལས་དང་ལྷན་ཅིག་མི་འབྱུང་ལ། སེམས་མེད་པ་ཡིན་པའི་ཕྱིར་ལུས་དང་ངག་གི་ལས་དག་དང་ཡང་ལྷན་ཅིག་མི་འབྱུང་ངོ་། །རྣམ་པར་སྨིན་པ་དང་བཅས་པ་ཐོབ་པ་རྣམས་ཀྱིས་ཀྱང་འཕེན་པ་མ་ཡིན་ཏེ། ལས་དང་འབྲས་བུ་མི་གཅིག་པའི་ཕྱིར་རོ། །ཐོབ་པ་རྣམས་ནི་དེ་འཕེན་པར་
[74a.3]བྱེད་པའི་ལས་དང་ལྷན་ཅིག་པ་ཡིན་མོད་ཀྱི། དེ་དང་འབྲས་བུ་གཅིག་པ་ནི་མ་ཡིན་ཏེ། ཐོབ་པ་རྣམས་ནི་ཤིང་གི་ཕྱི་ཤུན་ལྟ་བུར་ཕྱི་རོལ་ན་གནས་པ་ཡིན་པས་སོ། །ལས་ཀྱི་སྒྲིབ་པས་ཞེས་བྱ་བ་ནི་ལས་ཉིད་སྒྲིབ་པ་ཡིན་ཞིང་། ཉོན་མོངས་པ་ཉིད་སྒྲིབ་པ་ཡིན་ལ། རྣམ་པར་སྨིན་པ་ཉིད་
[74a.4]སྒྲིབ་པ་ཡིན་པས་སོ། །འཕགས་པའི་ལམ་ལ་སྦྱོར་བར་བྱེད་པའི་དགེ་བའི་རྩ་བ་རྣམས་ཞེས་བྱ་བ་ནི་དྲོ་བར་གྱུར་པ་ལ་སོགས་པའོ། །ངན་སོང་ལ་སོགས་པར་ངེས་པར་འགྱུར་བ་ཞེས་བྱ་བ་ནི་དམྱལ་བ་དང་། དུད་འགྲོ་དང་ཡི་དགས་སུ་ངེས་པར་འགྱུར་བ་དག་གོ། །སོགས་པ་ཞེས་བྱ་བའི་
[74a.5]སྒྲས་ནི་འདུ་ཤེས་མེད་པའི་སྙོམས་པར་འཇུག་པ་དང་ཚངས་པ་ཆེན་པོར་འགྱུར་བར་ངེས་པའི་ལས་ཀྱང་བསྡུ་ལ། ཟ་མ་དང་། མ་ནིང་དང་། མཚན་གཉིས་པར་འགྱུར་བ་ཡང་བརྗོད་པར་བྱའོ། །དེ་བཞིན་དུ་སྒོ་ང་ལས་སྐྱེ་བར་འགྱུར་བ་དང་། དྲོད་གཤེར་ལས་སྐྱེ་བར་འགྱུར་བ་དང་། བུད་
[74a.6]མེད་ཉིད་དུ་འགྱུར་བ་དང་། སྲིད་པ་བརྒྱད་པར་ངེས་པར་འགྱུར་བའི་ལས་དག་ཀྱང་བརྗོད་པར་བྱ་སྟེ། འཕགས་པ་ནི་དམྱལ་བ་ལ་སོགས་པར་ཡང་མི་སྐྱེ་ཞིང་། སྒོ་ང་ལས་སྐྱེ་བ་དང་། དྲོད་གཤེར་ལས་སྐྱེ་བའི་སྐྱེ་གནས་སུ་ཡང་མི་སྐྱེ་ལ། བུད་མེད་ཉིད་དང་། སྲིད་པ་བརྒྱད་པ་ཡང་
[74a.7]འགྲུབ་པར་མི་བྱེད་དེ། རེ་ལྟར་ཐོགས་ན་སྲིད་པ་ལན་བདུན་པ་ཡིན་པའི་ཕྱིར་རོ། །བསྟན་པར་སླ་ཞིང་ཞེས་བྱ་བ་ནི་གཞན་དག་ལ་བསྟན་སླ་བས་ན་བསྟན་པར་སླ་བ་སྟེ། བསྟན་པ་སླ་བ་ཉིད་བསྟན་པར་སླ་བ་དག་ཡིན་ནོ། །དེ་བཞིན་དུ་བདག་ཉིད་ཀྱིས་གདགས་སླ་བས་ན་གདགས་སླ་
[74b]
[74b.1]བའོ། །གདགས་སླ་བ་ཉིད་གདགས་པར་སླ་བ་དག་ཡིན་ནོ། །བསྟན་པར་སླ་བ་དང་། གདགས་པར་སླ་བ་ཞེས་བྱ་བ་འདི་གཉིས་ནི་རྣམ་གྲངས་ཀྱང་ཡིན་ནོ། །གཞི་ཞེས་བྱ་བ་ནི་ལས་ཀྱི་ལམ་གྱི་གཞི་སྟེ། མཚམས་མེད་པ་གསུམ་གྱི་གཞི་ནི་སྲོག་གཅོད་པའི་ལས་ཀྱི་ལམ་ཡིན་
[74b.2]ནོ། །གཅིག་གི་གཞི་ནི་བརྫུན་དུ་སྨྲ་བའི་ལས་ཀྱི་ལམ་ཡིན་ནོ། །ལྔ་པའི་གཞི་ནི་སྲོག་གཅོད་པར་སྦྱོར་བ་ཡིན་ཏེ། དེ་ལྟར་ན་གཞི་ལས་བསྟན་པར་སླ་ཞིང་གདགས་པར་སླ་བ་དག་ཡིན་ནོ། །འབྲས་བུ་ནི་ཐམས་ཅད་ཀྱི་འབྲས་བུ་ཡིད་དུ་མི་འོང་བ་ཡིན་པའི་ཕྱིར་རོ། །འགྲོ་བ་ནི་དམྱལ་
[74b.3]བའི་འགྲོ་བ་ཐོབ་པར་བྱེད་པ་ཡིན་ནོ། །སྐྱེ་བ་ནི་སྐྱེས་ནས་མྱོང་བར་འགྱུར་བ་ཡིན་པའི་ཕྱིར་རོ། །གང་ཟག་ནི་ཉོན་མོངས་པ་ཆེན་པོ་ཀུན་དུ་སྤྱོད་པའི་ཕྱིར་གང་ཟག་འདི་ནི་ཕ་གསོད་པར་བྱེད་པ་ཡིན་ནོ་ཞེས་བྱ་བ་ནས། འདི་ནི་དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པར་
[74b.4]བྱེད་པ་ཡིན་ནོ་ཞེས་བྱ་བའི་བར་ཡིན་ནོ། །གཞན་དག་ན་རེ་གཞི་ནི་སྔ་མ་བཞིན་ནོ། །འབྲས་བུ་ནི་འབྲས་བུ་དམྱལ་བ་ཅན་ཡིན་པའི་ཕྱིར་རོ། །འགྲོ་བ་ནི་མིའི་འགྲོ་བ་ཅན་བྱེད་པའི་ཕྱིར་ཏེ། མཚམས་མེད་གླིང་གསུམ་དག་ན་ཡོད། །ཅེས་འབྱུང་བས་སོ། །སྐྱེ་བ་ནི་དེ་ཁོ་ན་དང་འདྲ་བར་
[74b.5]སྐྱེས་ནས་མྱོང་བར་འགྱུར་བ་ཡིན་པས་སོ། །གང་ཟག་ནི་སྐྱེས་པ་དང་བུད་མེད་དག་ཡིན་གྱི། ཟ་མ་དང་། མ་ནིང་དག་ནི་མ་ཡིན་ཏེ། དེ་ལྟར་ན་རྒྱུ་ལྔས་བསྟན་པར་སླ་ཞིང་གདགས་པར་སླ་བ་དག་ཡིན་གྱི། ངན་སོང་ལ་སོགས་པར་ངེས་པར་འགྱུར་བའི་ལས་དེ་དག་ནི་རྒྱུ་ལྔས་བསྟན་པར་སླ་
[74b.6]ཞིང་། གདགས་པར་སླ་བ་མ་ཡིན་པས་དེ་དག་མ་བཤད་དོ་ཞེས་ཟེར་ནའོ། །ཕྱི་མ་ཕྱི་མ་འདྲེན་པའི་ཕྱིར་རོ་ཞེས་བྱ་བ་ནི་འདི་ལྟར་ཉོན་མོངས་པའི་སྒྲིབ་པས་ནི་ལས་ཀྱི་སྒྲིབ་པ་འདྲེན་པར་བྱེད་ལ། ལས་ཀྱི་སྒྲིབ་པས་ཀྱང་ངན་སོང་དུ་རྣམ་པར་སྨིན་པ་མི་འདོད་པ་འདྲེན་པར་བྱེད་པས་ཉོན་མོངས་
[74b.7]པའི་སྒྲིབ་པ་ནི་ཐམས་ཅད་པས་སྡིག་ཅན་ནོ། །ལས་ཀྱི་སྒྲིབ་པ་ནི་དེ་བས་ཡང་ངོ་། །དེ་བས་ནི་རྣམ་པར་སྨིན་པའི་སྒྲིབ་པ་སྟེ། རྣམ་པར་སྨིན་པའི་སྒྲིབ་པ་ནི་མཐོང་བའི་ཆོས་ཁོ་ན་ལ་བྱ་བ་བྱེད་ཀྱི། གཉིས་པ་ལ་ནི་མ་ཡིན་ནོ། །ཕ་གསོད་པ་ལ་སོགས་པའི་ཆོས་གང་དང་ལྡན་པའི་ཕྱིར་དེ་བར་
[75a]
[75a.1]ཆད་མེད་པ་ཡིན་པ་དེ་བརྗོད་པར་བྱ་བ་ལ། མཚམས་མེད་པ་ཉིད་དོ་ཞེས་ངོ་བོའི་རྐྱེན་ཡིན་ཏེ། དགེ་སྦྱོང་ཉིད་བཞིན་ནོ། །དཔེར་ན་ཟག་པ་མེད་པའི་ལམ་གང་དང་ལྡན་པས་དགེ་སྦྱོང་ཡིན་པ་དེ་བརྗོད་པར་བྱ་བ་ལ། དགེ་སྦྱོང་ཉིད་ནི་དྲི་མེད་ལམ། །ཞེས་ངོ་བོའི་རྐྱེན་ཡིན་པ་དེ་དང་
[75a.2]འདྲའོ། །བྱང་གི་སྒྲ་མི་སྙན་ན་མེད། །ཅེས་བྱ་བ་ནི་རང་བཞིན་གྱི་ཚུལ་ཁྲིམས་དང་ལྡན་པའི་ཕྱིར་དང་། དེ་ན་བསྟན་པ་མེད་པའི་ཕྱིར་རོ། །སྡོམ་པ་མེད་པའི་གཏན་ཚིགས་གང་ཡིན་པ་དེ་ཉིད་ཀྱི་ཕྱིར་རོ་ཞེས་བྱ་བ་ནི་སྡིག་པ་དག་ལ་ཡང་བསམ་པ་མི་བརྟན་པའི་ཕྱིར་དང་། གང་ལ་སྡོམ་པ་ཡོད་པ་དེ་
[75a.3]ལ་སྡོམ་པ་མ་ཡིན་པ་ཡང་ཡོད་དེ། གཉེན་པོར་གྱུར་པའི་ཕྱིར་རོ། །དེ་ལྟ་བས་ན་ཟ་མ་ལ་སོགས་པ་ལ་སྡོམ་པ་མ་ཡིན་པ་མེད་དོ་ཞེས་བཤད་པ་གང་ཡིན་པའོ། །གང་དག་མེད་པར་བྱས་པས་ཞེས་བྱ་བ་ནི་དེ་དག་ཀྱང་ཕ་མ་ལ་ངོ་ཚ་དང་། ཁྲེལ་གང་ཞིག་མེད་པར་བྱས་ཤིང་ཉམས་པར་བྱས་པས་ཟ་
[75a.4]མ་ལ་སོགས་པ་མཚམས་མེད་པའི་ཁ་ན་མ་ཐོ་བས་རེག་པར་འགྱུར་བ་ཤས་ཆེན་པོར་མི་འགྱུར་ཏེ། དེའི་ཕྱིར་དེ་དག་གིས་མཚམས་མེད་པ་ཡིན་པར་མི་འདོད་དོ། །གལ་ཏེ་ལུས་མ་ཚང་བའི་རྒྱུ་ཡིན་པའི་ཕྱིར་ཕན་པ་ཆུང་བ་ཉིད་ཡིན་ཏེ། དེའི་ཕྱིར་དེ་དག་གི་མཚམས་མེད་པ་ཡིན་པར་མི་འདོད་
[75a.5]ན། སྐྱེས་པ་དང་བུད་མེད་ལོང་བ་ལ་སོགས་པ་ཡང་། མ་ལ་སོགས་པ་བསད་པས་མཚམས་མེད་པར་མི་འགྱུར་རོ་ཞེ་ན་མ་ཡིན་ཏེ། རྟོགས་པའི་ཆོས་དང་འགལ་བའི་ལུས་མ་ཚང་བ་བརྗོད་པར་འདོད་པའི་ཕྱིར་རོ། །མ་ཚང་བ་རྟོགས་པའི་ཆོས་དང་འགལ་བ་གང་ཡིན་པ་དེའི་དབང་དུ་བྱས་པ་
[75a.6]ཡིན་ཏེ། དེས་ནི་དེ་ཁོ་ནས་བྱམས་པ་ཆུང་བ་ཉིད་ཀྱང་ཡིན་གྱི། ལོང་བ་ལ་སོགས་པའི་མ་ཚང་བ་ལ་ནི་མ་ཡིན་ནོ། །དེ་ཉིད་ཀྱི་ཕྱིར་ཡི་དགས་དང་། དུད་འགྲོ་རྣམས་ལ་ཡང་མི་འདོད་དེ། ཕན་པ་དང་ངོ་ཚ་ཆུང་བ་ཉིད་ཀྱི་ཕྱིར་རོ། །རྟ་ཅང་ཤེས་བཞིན་ནོ་ཞེས་བྱ་བ་ནི་ཡི་དགས་དང་། དུད་འགྲོ་
[75a.7]རྣམས་ཀྱང་བློ་གསལ་བ་རྣམས་ཀྱིས་མཚམས་མེད་པར་འགྱུར་རོ་ཞེས་བྱ་བར་སྐབས་དང་སྦྱར་ཏེ། རྟ་ཅང་ཤེས་ཞེས་བྱ་བ་ནི་དཔེར་ན་རྟ་ཅང་ཤེས་ཤིག་མ་ལ་མི་རྒལ་བ་ལས་གདོང་གོས་ཀྱིས་གཡོགས་ཏེ། མ་ལ་རྒལ་དུ་བཅུག་པ་དང་། དེས་ཕྱིས་ཤེས་ནས་རང་གི་ཕོ་མཚན་བཅད་དོ་ཞེས་གྲག་སྟེ། དེ་
[75b]
[75b.1]ལྟར་ན་རྟ་ཅང་ཤེས་དེ་བློ་གསལ་བ་ཡིན་ཏེ། དེ་ལ་མཚམས་མེད་པར་འགྱུར་རོ་སྙམ་དུ་བསམ་པ་ཡིན་ནོ། །མིའི་ཡང་ཕ་མ་མི་མ་ཡིན་པ་བསད་ན་མཚམས་མེད་པར་མི་འགྱུར་རོ་ཞེས་བྱ་བ་ནི་མཚམས་མེད་པར་མི་འགྱུར་བ་ཁོ་ནའོ་ཞེས་བྱ་བའི་ཐ་ཚིག་གོ། །ཇི་ལྟ་ཞེ་ན། ཕན་པ་དང་ངོ་ཚ་ཆུང་བ་
[75b.2]ཁོ་ནའི་ཕྱིར་ཏེ། མི་མ་ཡིན་པས་ཀྱང་མི་དང་འཚམ་པའི་ཕམ་པར་བྱ་བར་མི་ནུས་ལ། མི་དེ་ཡང་ཕ་མ་མི་མ་ཡིན་པ་དག་ལ་ངོ་ཚ་དང་། ཁྲེལ་ཤས་ཆེན་པོ་ཡང་དག་པར་མི་གནས་ཏེ། འགྲོ་བ་མི་མཐུན་པ་ཉིད་ཀྱི་བྱམས་པ་ཆུང་བའི་ཕྱིར་རོ། །བཞི་ནི་ལུས་ཀྱི་ལས་ཡིན་ལ་ཞེས་བྱ་བ་ནི་མ་གསོད་པ་ལ་
[75b.3]སོགས་པའོ། །གཅིག་ངག་གི་ལས་ཡིན་ཏེ་ཞེས་བྱ་བ་ནི་དགེ་འདུན་གྱི་དབྱེན་ནོ། །གསུམ་ནི་སྲོག་གཅོད་པ་ཡིན་ནོ་ཞེས་བྱ་བ་ནི་མ་བསད་པ་ལ་སོགས་པའོ། །གཅིག་ནི་བརྫུན་དུ་སྨྲ་བ་ཡིན་ཞེས་བྱ་བ་ནི་དགེ་འདུན་གྱི་དབྱེན་ནོ། །གཅིག་ནི་སྲོག་གཅོད་པའི་སྦྱོར་བ་སྟེ་ཞེས་བྱ་བ་ནི་དེ་བཞིན་གཤེགས་
[75b.4]པའི་སྐུ་ལ་ངན་སེམས་ཀྱིས་ཁྲག་འབྱིན་པའོ། །ཅིའི་ཕྱིར་སྲོག་གཅོད་པ་མ་ཡིན་ཞེ་ན། དེ་བཞིན་གཤེགས་པ་རྣམས་ནི་ཉེ་བར་མི་བརྫི་བའི་ཆོས་ཅན་ཡིན་ནོ་ཞེས་བྱ་བ་ནི་གྲངས་སུ་མེད་པའི་ཆོས་ཅན་ཡིན་ནོ་ཞེས་བྱ་བའི་ཐ་ཚིག་གོ། །རྒྱུ་ལ་འབྲས་བུ་བཏགས་པའམ་ཞེས་བྱ་བ་ནི་དགེ་འདུན་གྱི་དབྱེན་སེམས་
[75b.5]དང་ལྡན་པ་མ་ཡིན་པའི་མཚན་ཉིད་ཀྱི་རྒྱུ་ནི་བརྫུན་དུ་སྨྲ་བ་ཡིན་ནོ། །རྒྱུ་དེ་ལ་འབྲས་བུ་ཉེ་བར་བཏགས་པ་སྟེ། དགེ་འདུན་གྱི་དབྱེན་ཞེས་བྱ་བར་འབྲས་བུ་སེམས་དང་ལྡན་པ་མ་ཡིན་པའི་ཆོས་ཉེ་བར་འདོགས་པ་ཡིན་ནོ། །འདིས་འབྱེད་པར་བྱེད་པས་ན་ཞེས་བྱ་བ་ནི་བྱེད་པར་སྒྲུབ་པ་ཡོངས་སུ་བཟུང་ནས་
[75b.6]བརྫུན་དུ་སྨྲ་བ་ལ་དགེ་འདུན་གྱི་དབྱེན་ཞེས་བརྗོད་དེ། བརྫུན་དུ་སྨྲ་བས་ནི་དགེ་འདུན་འབྱེད་པར་འགྱུར་རོ། །དགེ་འདུན་གྱི་དབྱེན་ནི་དགེ་འདུན་བྱེ་བ་ཡིན་ནོ་ཞེས་ངོ་བོ་བསྒྲུབ་པར་ཡོངས་སུ་བཟུང་བ་ནི་མ་ཡིན་ནོ། །དགེ་འདུན་དབྱེན་ནི་མི་འཕྲོད་པའོ་ཞེས་བྱ་བ་ནི་བྱེ་བྲག་ཏུ་སྨྲ་བ་རྣམས་ཀྱི་ལྟར་ན་དངོས་ཀྱི་ཚུལ་དུ་རྫས་
[75b.7]སུ་ཡོད་པ་ཡིན་ནོ། །དེའི་ཕྱིར། རང་བཞིན་ལྡན་པ་མ་ཡིན་ཆོས། །ཉོན་མོངས་ཅན་མིན་ལུང་བསྟན་མིན། །ཞེས་བྱ་བ་སྨོས་སོ། །དེ་ཇི་ལྟར་མཚམས་མེད་པར་འགྱུར་ཞེས་བྱ་བ་ནི་དེ་ལྟ་བུའི་མཚན་ཉིད་ཅན་དེ་ནི་མཚམས་མེད་པར་མི་འགྱུར་བ་ཁོ་ནའོ་ཞེས་བྱ་བའི་ཐ་ཚིག་གོ། །ལྡན་པ་མ་ཡིན་པའི་ཆོས་དེ་
[76a]
[76a.1]དང་འབྱེད་པ་པོར་ཡང་མི་ལྡན་པ་ཁོ་ན་ཡིན་ཏེ། དེས་ན་འདི་མཚམས་མེད་པ་མ་ཡིན་ནོ་སྙམ་དུ་བསམ་པ་ཡིན་ནོ། །དགེ་འདུན་གྱི་དབྱེན་དང་ལྷན་ཅིག་སྐྱེས་པ་ནི་ལྡན་པ་མ་ཡིན་པའི་ཆོས་དང་ལྷན་ཅིག་སྐྱེས་པ་སྟེ། ངག་གི་རྣམ་པར་རིག་བྱེད་དང་། རྣམ་པར་རིག་བྱེད་མ་
[76a.2]ཡིན་པའི་ངོ་བོ་ཉིད་དག་གོ་ཞེས་བྱ་བའི་ཐ་ཚིག་གོ། །དགེ་སློང་གིས་འབྱེད་ཀྱི་ཞེས་བྱ་བ་ནི་སངས་རྒྱས་ནི་དགེ་སློང་ཡིན་པའི་ཕྱིར་ལ། འབྱེད་པ་པོ་ཡང་དེ་ལ་སྡོམ་པ་ཡིན་པའི་ཕྱིར་རོ། །དེ་ཡང་ལྟ་བ་སྤྱད་པ་ཁོ་ནས་འབྱེད་ཀྱི་ཞེས་བྱ་བ་ནི། འཇིག་ཚོགས་ལ་ལྟ་བ་ལ་སོགས་པ་ལྔ་ལ་སྤྱད་
[76a.3]ཅིང་ཞུགས་པས་ན་ལྟ་བ་སྤྱད་པའོ། །ཡང་ན་འདི་ལ་ལྟ་བ་སྤྱད་པ་ཡོད་པས་ན་ལྟ་བ་སྤྱད་པ་སྟེ་དེས་ནི་བརྟག་ཅིང་སེལ་ནུས་པའི་ཕྱིར་སྟོན་པའི་ཁྱད་པར་དང་། ལམ་གྱི་ཁྱད་པར་གཞན་བཟུང་བར་ནུས་ཀྱི། སྲེད་པ་སྤྱད་པས་ནི་མ་ཡིན་ནོ། །བཟོད་པར་དཀའ་བའི་ཕྱིར་ཞེས་བྱ་བ་ནི་ཟིལ་
[76a.4]གྱིས་མནན་པར་དཀའ་བའི་ཕྱིར་རོ། །ཆོས་མངོན་སུམ་དུ་གྱུར་པའི་ཕྱིར་རོ་ཞེས་བྱ་བ་ནི་ལུང་དང་། རྟོགས་པའི་ཆོས་དག་མངོན་སུམ་དུ་གྱུར་པའི་ཕྱིར་རོ་ཞེས་བྱ་བའི་ཐ་ཚིག་གོ། །བཟོད་པ་ཐོབ་པ་རྣམས་ནི་མ་ཡིན་ནོ་ཞེས་བྱ་བ་ནི་ངེས་པར་འབྱེད་པའི་ཆ་དང་མཐུན་པ་བཟོད་པ་ཐོབ་པ་རྣམས་
[76a.5]ནི་མ་ཡིན་ནོ་ཞེས་བྱ་བའི་ཐ་ཚིག་སྟེ། བདེན་པ་མཐོང་བ་དང་འདྲ་བའི་ཕྱིར་རོ། །དེ་ནི་མི་གནས་སོ་ཞེས་བྱ་བ་ནི་དེའི་མཚན་མོ་རངས་པར་མི་གནས་སོ་ཞེས་བྱ་བའི་ཐ་ཚིག་གོ། །ཕྱེ་བ་ཡིན་ཏེ་ཞེས་བྱ་བ་ནི་ཇི་ལྟར་ཕྱེ་བ་ཡིན་ཞེ་ན། ལམ་འཇུག་པའི་གགས་སུ་གྱུར་པའི་ཕྱིར་ཞེས་བྱ་བ་སྨོས་
[76a.6]ཏེ། ལམ་འཇུག་པའི་གགས་བྱས་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཇི་སྲིད་དུ་དགེ་འདུན་འདུམ་པར་མ་གྱུར་པ་དེ་སྲིད་དུ་ལམ་འཇུག་པ་འགགས་པ་ཡིན་ཏེ། འགའི་རྒྱུད་ལ་ཡང་འཕགས་པའི་ལམ་མངོན་དུ་མི་འགྱུར་རོ་ཞེས་བྱ་བའི་ཐ་ཚིག་གོ། །དགེ་འདུན་གྱི་དབྱེན་ནི་འཁོར་
[76a.7]ལོའི་དབྱེན་གྱི་རྒྱུ་མཚན་དུ་གྱུར་པའི་ཕྱིར་འཁོར་ལོའི་དབྱེན་ཞེས་ཀྱང་བྱའོ། །གདོན་མི་ཟ་བར་དགེ་འདུན་ཕྱོགས་གཉིས་སུ་གནས་པར་འགྱུར་བ་ཞེས་བྱ་བ་ནི་སངས་རྒྱས་ཀྱི་ཕྱོགས་དང་། འབྱེད་པ་པོའི་ཕྱོགས་ལ་གནས་པར་འགྱུར་རོ་ཞེས་བྱ་བའི་ཐ་ཚིག་གོ། །དགེ་འདུན་ནི་དགེ་སློང་
[76b]
[76b.1]བཞི་ཡིན་ལ། དགེ་འདུན་གཉིས་པ་ལ་ཡང་ཡོད་པར་འགྱུར་བས་དེ་ལྟར་ན་དབྱེ་བར་བྱ་བའི་དགེ་སློང་བརྒྱ་དང་། དགུ་པ་འབྱེད་པ་པོ་ཡོད་པར་འགྱུར་རོ། །དགེ་འདུན་གྱི་དབྱེན་གཞན་ཞེས་བྱ་བ་ནི་འཁོར་ལོའི་དབྱེན་ལས་གཞན་པ་ནི་འདིར་མཚམས་མེད་པ་མ་ཡིན་ནོ་སྙམ་དུ་བསམ་པ་ཡིན་ཏེ།
[76b.2]འདི་ལྟར་དེ་ནི་ལས་ཀྱི་དབྱེན་ལས་འགྱུར་རོ། །མི་མཐུན་པས་ཞེས་བྱ་བ་ནི་བློ་གྲོས་ཐ་དད་པས་སོ། །ལས་དག་ཅེས་བྱ་བ་ནི་དགེ་འདུན་གྱི་ལས་གསོ་སྦྱོང་ལ་སོགས་པའོ། །དེ་ནི་བརྒྱད་དག་ཡན་ཆད་ཀྱིས། །ཞེས་བྱ་བ་ནི་འདི་ལ་ཡང་དགེ་འདུན་གཉིས་ཡོད་པར་འགྱུར་ཏེ། འབྱེད་པ་པོ་
[76b.3]སྟོན་པར་མངོན་པའི་ང་རྒྱལ་བྱེད་པ་ནི་མེད་པས་དགེ་སློང་བརྒྱད་ཁོ་ན་ཡོད་པར་འགྱུར་གྱི། དགུ་ལ་སོགས་པ་ནི་མ་ཡིན་ནོ། །ཤ་གཅིག་པ་ཡིན་ནོ་ཞེས་བྱ་བ་ནི་མི་མཐུན་པ་མེད་དེ། བློ་གྲོས་གཅིག་པ་ཡིན་ནོ་ཞེས་བྱ་བའི་ཐ་ཚིག་གོ། །གནས་སྐབས་སྔ་མར་ནི་དགའ་བ་དང་རབ་ཏུ་དགའ་བ་སྐྱེས་པ་
[76b.4]ཡིན་ལ། ཕྱི་མར་ནི་མི་རྟག་པ་ཡིད་ལ་བྱེད་པས་སེམས་ལ་སྐྱོ་བ་ཀུན་དུ་སྐྱེས་པ་ཡིན་ནོ། །སྐྱོན་མ་བྱུང་བའི་སྔོན་རོལ་དུ་ཞེས་བྱ་བ་ལ། སྐྱོན་ནི་ཉེས་པ་སྟེ། ལྟ་བའི་སྐྱོན་ནམ། ཚུལ་ཁྲིམས་ཀྱི་སྐྱོན་ནོ། །དེ་ལ་ལྟ་བའི་སྐྱོན་ནི་ཇི་སྐད་དུ། བདག་གིས་བཅོམ་ལྡན་འདས་ཀྱིས་བཤད་པའི་དོན་
[76b.5]འཚལ་བ་ལྟར་ན། བཅོམ་ལྡན་འདས་ཀྱིས་འདོད་པ་གང་དག་བར་དུ་བཅོད་(གཅོད་)པར་བགྱིད་པར་བཀའ་སྩལ་པ་དེ་དག་ནི་བསྟེན་ན་བར་དུ་གཅོད་པར་བགྱིད་པར་མི་འགྱུར་ལགས་སོ་ཞེས་བྱ་བ་དང་། དེ་བཞིན་དུ་སེམས་དེ་ཉིད་ཀུན་དུ་རྒྱུག་ཅིང་འཁོར་བར་འགྱུར་ལགས་སོ་ཞེས་བྱ་བ་ལ་སོགས་པ་
[76b.6]བཤད་པ་ལྟ་བུའོ། །ཚུལ་ཁྲིམས་ཀྱི་སྐྱོན་ནི་འཆལ་པའི་ཚུལ་ཁྲིམས་སོ། །དེས་ཕྱིར་བསྡུམ་པར་འགྱུར་བའི་ཕྱིར་རོ་ཞེས་བྱ་བ་ནི་འདི་ལྟར་ཉན་ཐོས་ཟུང་དེས་ཕྱིར་བསྡུམ་དགོས་པས་ཞེས་བྱ་བའི་ཐ་ཚིག་གོ། །སངས་རྒྱས་ཐམས་ཅད་ལ་ཉན་ཐོས་ཟུང་གདོན་མི་ཟ་བར་ཡོད་དེ། གཅིག་ནི་
[76b.7]ཤེས་རབ་དང་ལྡན་པ་རྣམས་ཀྱི་མཆོག་གོ། །གཉིས་པ་ནི་རྫུ་འཕྲུལ་དང་ལྡན་པ་རྣམས་ཀྱི་མཆོག་གོ། །བཅོམ་ལྡན་འདས་ཤཱཀྱ་ཐུབ་པ་འདིའི་ཤེས་རབ་དང་ལྡན་པ་རྣམས་ཀྱི་མཆོག་ནི་འཕགས་པ་ཤཱ་རིའི་བུའོ། །རྫུ་འཕྲུལ་དང་ལྡན་པ་རྣམས་ཀྱི་མཆོག་ནི་འཕགས་པ་མཽད་གལ་གྱི་བུའོ། །འགྲན་ཟླ་མེད་
[77a]
[77a.1]པའི་ཕྱིར་རོ་ཞེས་བྱ་བ་ནི་འདི་ལྟར་བཅོམ་ལྡན་འདས་ཡོངས་སུ་མྱ་ངན་ལས་འདས་ན། འབྱེད་པ་པོ་དེའི་འགྲན་ཟླར་གྱུར་པ་མེད་དོ།། །།བམ་པོ་སུམ་ཅུ་རྩ་བདུན་པ། མཚམས་མ་བཅད་པ་དག་ཏུ་ཡང་ཞེས་བྱ་བ་ནི་དཀྱིལ་འཁོར་གྱི་མཚམས་དེ་
[77a.2]མཚམས་གཅིག་གི་ནང་དུ་ལས་ཐ་དད་པར་བྱེད་པས་ནི་དགེ་འདུན་དེ་རྣམ་པ་གཉིས་སུ་འགྱུར་རོ། །རང་བཞིན་གྱི་མཚམས་གྲོང་དང་གྲོང་ཁྱེར་ཡོད་པ་མ་ཡིན་ནམ་ཞེ་ན། བདེན་མོད་ཀྱི། བཅད་པའི་མཚམས་ཡོད་ན་རང་བཞིན་གྱི་མཚམས་དེར་རྣམ་པར་གཞག་པས་དེ་ཡང་བཅད་པར་རྣམ་པར་གཞག་
[77a.3]པ་ཁོ་ན་ཡིན་ནོ་ཞེས་བྱ་བར་རིག་པར་བྱའོ། །ལས་ལ་རག་ལུས་པའི་ཕྱིར་ཞེས་བྱ་བ་ནི་གང་གིས་སློབ་མ་དགེ་འདུན་འབྱེ་བར་འགྱུར་བའི་ལས་བྱས་པ་དེ་ཁོ་ནའི་དེ་འབྱེ་བར་འགྱུར་གྱི། གཞན་གྱི་ནི་མ་ཡིན་ནོ། །བཅོམ་ལྡན་འདས་ཤཱཀྱ་ཐུབ་པས་ཀྱང་བྱང་ཆུབ་སེམས་དཔའི་གནས་སྐབས་ན་དྲང་སྲོང་
[77a.4]མངོན་པར་ཤེས་པ་ལྔ་དང་ལྡན་པ་ཞིག་གི་འཁོར་གྱི་དབྱེན་བྱས་པར་གྱུར་ཏེ། དེས་ན་འདིའི་དགེ་འདུན་ལྷས་བྱིན་གྱིས་ཕྱེའོ་ཞེས་གྲག་གོ། །གཞན་ནི་མ་ཡིན་ཞེ་ན་ཞེས་བྱ་བ་ནི་བུད་མེད་ཕལ་པ་བསད་པ་ལ་སོགས་པའོ། །ཕན་འདོགས་པ་དང་ཡོན་ཏན་ཞིང་། །སྤངས་དང་མེད་པར་
[77a.5]བྱས་ཕྱིར་རོ། །ཞེས་བྱ་བ་ནི་པ་བསད་པ་ལ་སོགས་པ་ནི་ཕན་འདོགས་པའི་ཞིང་ངམ། ཡོན་ཏན་གྱི་ཞིང་སྤངས་ཤིང་ཡོངས་སུ་བོར་བའི་ཕྱིར་ཡང་མཚམས་མེད་པ་ཡིན་ལ། དེ་མེད་པར་བྱས་ཤིང་ཉམས་པར་བྱས་པའི་ཕྱིར་ཡང་མཚམས་མེད་པ་ཡིན་ནོ། །དེ་བཞིན་གཤེགས་པའི་སྐུ་
[77a.6]ལ་ངན་སེམས་ཀྱིས་ཁྲག་ཕྱུང་བ་དང་། དགེ་འདུན་གྱི་དབྱེན་བྱེད་པ་གང་ཡིན་པ་དེ་ཡང་དེ་ཉམས་པར་བྱས་པ་ཡིན་ནོ། །འདི་སྐད་དུ་ཕན་འདོགས་པའི་ཞིང་ཡིན་པའི་ཕྱིར་དང་། ཡོན་ཏན་གྱི་ཞིང་ཡིན་པའི་ཕྱིར་དེ་སྤངས་པ་དང་། མེད་པར་བྱས་པས་མ་གསོད་པ་ལ་སོགས་པ་ཁོ་ན་མཚམས་
[77a.7]མེད་པ་ཡིན་གྱི། གཞན་གྱི་ནི་མ་ཡིན་ནོ་ཞེས་བཤད་པ་ཡིན་ནོ། །ཡོན་ཏན་གྱི་ཞིང་ཡིན་པའི་ཕྱིར་ཞེས་བྱ་བ་ནི་ཡོན་ཏན་རྣམས་ཀྱི་རྟེན་ཡིན་པའི་ཕྱིར་ཞེས་བྱ་བའི་ཐ་ཚིག་གོ། །ཡང་ན་ཡོན་ཏན་རྣམས་ཀྱི་ཞིང་ཡིན་པ་ནི་ཡོན་ཏན་གྱི་ཞིང་སྟེ། ཡོན་ཏན་དང་ལྡན་པས་བསོད་ནམས་ཀྱི་ཞིང་ཡིན་
[77b]
[77b.1]ནོ། །དཔེར་ན་ཞིང་ལ་ས་བོན་བཏབ་ན་འབྲས་བུ་མང་པོར་འགྱུར་བ་དེ་བཞིན་དུ་བསོད་ནམས་ཀྱི་ཞིང་ལ་ས་བོན་བཏབ་ན་འབྲས་བུ་མང་པོར་འགྱུར་རོ། །གལ་ཏེ་ཕའམ་མ་མཚན་གྱུར་ན་ཞེས་བྱ་བ་ནི་མཚན་གྱུར་པས་དེ་མ་ཉིད་ཡིན་པ་དང་། དེ་ཕ་ཉིད་ཡིན་པར་ཡང་མི་འདོད་པས་
[77b.2]མ་བསད་པ་མེད་པའི་ཕྱིར་རམ། ཕ་བསད་པ་མེད་པའི་ཕྱིར་མཚམས་མེད་པར་མི་འགྱུར་རོ་སྙམ་ནས་དེ་མེད་པར་དོགས་པས་འདྲི་བ་ཡིན་ནོ། །གང་གི་ཟླ་མཚན་ལས་བྱུང་བ། །ཞེས་བྱ་བ་ནི་འདི་ལ་གང་གི་ཟླ་མཚན་ལས་བྱུང་བ་ཡོད་པས་ན་གང་གི་ཟླ་མཚན་ལས་བྱུང་བའོ། །བྱ་བ་
[77b.3]ཐམས་ཅད་ཞུ་བར་བྱ་བ་ཡིན། །ཞེས་བྱ་བ་ནི་མ་ལ་ཞུ་དགོས་པའི་བྱ་བ་ཐམས་ཅད་དྲི་བར་བྱ་བ་ཡིན་ནོ་སྙམ་དུ་བསམ་པ་ཡིན་ཏེ། མ་དང་འདྲ་བའི་ཕྱིར་རོ། །ནུ་ཞོ་ལྡུད་པ་ནི་པང་ན་འཚོ་བར་བྱེད་པའོ། །གསོ་བར་བྱེད་པ་ནི་ནུ་ཞོ་ལྡུད་པར་བྱེད་པའོ། །སྐྱེད་པར་བྱེད་པ་ནི་ཟས་རགས་པ་
[77b.4]ལ་སོགས་པ་སྙོད་པར་བྱེད་པའོ། །གཞན་དག་ན་རེ་ནུ་ཞོ་ལྡུད་པ་ནི་ནུ་ཞོ་སྣུན་པར་བྱེད་པ་ཞེས་བྱ་བའི་ཐ་ཚིག་གོ། །གསོ་བར་བྱེད་པ་ནི་ཟས་རགས་པ་གོམས་པར་བྱེད་པའོ། །སྐྱེད་པར་བྱེད་པ་ནི་ཁྲུས་དང་། ལུས་མཉེ་བ་དང་། ཡ་ང་བ་ཡོངས་སུ་སྤོང་བར་བྱེད་པ་ཞེས་བྱ་བའི་ཐ་ཚིག་གོ། །མ་
[77b.5]ཁྲིའུའི་འོག་ན་འདུག་པ་ཞེས་བྱ་བ་ནི་བུས་ཁྲིའུའི་སྟེང་ན་གོས་ཡོད་པ་དང་སྦྱར་ན་འདི་ན་མི་ཞིག་ཉལ་ལོ་སྙམ་དུ་བསམས་ནས་དེར་མཚོན་གྱིས་བཏབ་པ་དང་། མཚོན་བཏབ་པ་དེས་མ་ཁྲིའུའི་འོག་ན་འདུག་པ་བསད་དོ་ཞེས་བྱ་བ་དང་། ཁྲུས་པ་བཙོ་བླག་མཁན་གྱི་བུས་སྦྲང་བུ་བསད་དོ་སྙམ་པའི་སྦྱོར་
[77b.6]བས་ཕ་བསད་པ་ཞེས་བྱ་བ་བརྗོད་པར་བྱའོ། །རྣམ་པར་རིག་བྱེད་མ་ཡིན་པ་གཉིས་ཡིན་ལ་ཞེས་བྱ་བ་ནི་མཚམས་མེད་པའི་རྣམ་པར་རིག་བྱེད་མ་ཡིན་པ་དང་། སྲོག་གཅོད་པ་འབའ་ཞིག་གི་རྣམ་པར་རིག་བྱེད་མ་ཡིན་པའོ། །རྣམ་པར་རིག་བྱེད་ནི་མཚམས་མེད་པ་ཁོ་ན་ཡིན་ཏེ། དེ་ནི་དེས་བསྡུས་
[77b.7]པ་ཁོ་ན་ཡིན་གྱི་གཞན་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལ་མཚམས་མེད་པ་ནི་གཅིག་ཁོ་ནར་འགྱུར་ཏེ་ཞེས་བྱ་བ་ནི་དགྲ་བཅོམ་པ་བསད་པ་ཞེས་བྱ་བའོ། །སོང་ལ་སྐྲ་ཅན་ལ་ཁྱོད་ཀྱིས་ནི་མཚམས་མེད་པ་གཉིས་བྱས་ཏེ། ཕ་བསད་པ་གང་ཡིན་པ་དང་། གང་ཡང་དགྲ་བཅོམ་པ་གསོད་པའོ་
[78a]
[78a.1]ཞེས་སྨྲོས་ཤིག་ཅེས་བྱ་བ་ནི་གྲོང་ཁྱེར་རོ་རུ་ཀ་ཞེས་བྱ་བ་ན་རྒྱལ་པོ་ཨུ་ཏྲ་ཡ་ན་ཞེས་བྱ་བས་བུ་སྐྲ་ཅན་ཞེས་བྱ་བ་དབང་བསྐུར་ནས་རབ་ཏུ་བྱུང་ངོ་། །རབ་ཏུ་བྱུང་ནས་ཀྱང་དགྲ་བཅོམ་པ་ཉིད་ཐོབ་པར་གྱུར་ཏེ། དེ་རོ་རུ་ཀ་དང་ཉེ་བ་ཞིག་ཏུ་འོངས་པ་དང་། ཡང་རྒྱལ་སྲིད་འདོད་དོ་
[78a.2]སྙམ་ནས་བློན་པོས་སྦྲན་པ་དང་། རྒྱལ་པོ་སྐྲ་ཅན་དེས་རང་གི་ཕ་དེ་བསད་དོ། །དེས་བསད་པར་བྱ་བའི་གནས་སྐབས་ན་གཤེད་མའི་མི་དེ་ལ་སོང་ལ། སྐྲ་ཅན་ལ་སྨྲོས་ཤིག་ཅེས་བྱ་བ་དེ་ལྟ་བུ་ལ་སོགས་པ་རྒྱས་པར་སྨྲས་སོ། །རྒྱུ་གཉིས་ཀྱིས་ཞེས་བརྗོད་པར་བྱའོ་ཞེས་བྱ་བ་ནི་དེས་སོང་
[78a.3]ལ། སྐྲ་ཅན་ལ་ཁྱོད་ཀྱིས་ནི་མཚམས་མེད་པའི་རྒྱུ་གཉིས་ཀྱིས་མཚམས་མེད་པ་བྱས་སོ་ཞེས་སྨྲོས་ཤིག་ཅེས་བརྗོད་པར་བྱ་བ་ཡིན་ནོ། །སྒོ་གཉིས་ནས་སྤྱོད་པ་ཡིན་ནོ་ཞེས་བྱ་བ་ནི་མཚམས་མེད་པ་སྒོ་གཉིས་དང་ལྡན་པའི་ཕྱིར་གཉིས་ཉིད་དུ་ཉེ་བར་བཏགས་སོ་སྙམ་དུ་བསམ་པ་ཡིན་ཏེ།
[78a.4]མཚམས་མེད་པ་དེ་ནི་རྒྱུ་གཉིས་དང་ལྡན་པའི་ཕྱིར་ཤིན་ཏུ་ལྕི་བ་ཡིན་ནོ། །རྟེན་དེ་དང་ཤིན་ཏུ་འགལ་བའི་ཕྱིར་རོ་ཞེས་བྱ་བ་ནི་འཕགས་པའི་ལམ་སྐྱེས་པའི་རྟེན་ནི་ལས་ཀྱི་ལམ་དེ་དག་དང་ཤིན་ཏུ་འགལ་བའི་ཕྱིར་རོ། །འདིར་གཙེན་མའི་རྟོགས་པ་བརྗོད་པ་དཔེར་བརྗོད་དེ། ཤཱཀྱའི་མི་གཙེན་
[78a.5]མ་ཞེས་བྱ་བ་ཞིག་འཕགས་སྐྱེས་པོས་སྐྲག་ནས་གངས་ཁྲོད་ཀྱི་ནགས་ཚལ་གྱི་ཕྱོགས་ཤིག་ན་འཁྲས་ཤིང་འཚོ་བ་རྔོན་གྱིས་ཚོལ་ཚོལ་བ་ལས། བཅོམ་ལྡན་འདས་སུམ་ཅུ་རྩ་གསུམ་པའི་ནང་དུ་ཟླ་བ་གསུམ་ལོན་ནས་དེ་ནས་བབས་ཏེ། གཙེན་མ་འཁོར་དང་བཅས་པ་ཁོ་ན་ལ་ཆོས་
[78a.6]བསྟན་པ་དང་། དེ་དང་དེའི་བུ་རྣམས་ཀྱིས་རྒྱུན་དུ་ཞུགས་པའི་འབྲས་བུ་ཐོབ་བོ་ཞེས་གྲག་སྟེ། དེ་དག་ནི་འབྲས་བུ་ཐོབ་པའི་སྔོན་རོལ་དུ་རི་དགས་དག་གི་གདོས་དང་། རྒྱ་ལ་སོགས་པ་བཤམས་ལ། དེ་དག་གི་སྦྱོར་བས་ཀྱང་རི་དྭགས་དག་གསད་པར་བྱས་མོད་ཀྱི། འབྲས་
[78a.7]བུ་ཐོབ་པས་མི་དགེ་བའི་ལས་ཀྱི་ལམ་དེ་དག་གིས་མ་རིག་གོ། །ལྔ་པ་དང་། གསུམ་པ་དང་། དང་པོ་རྣམས་ཆེས་ལྕི་བ་ཡིན་ཞེས་བྱ་བ་ལ། མཚམས་མེད་པ་འདོན་པའི་གོ་རིམས་ནི་མ་གསོད་པ་དང་། ཕ་གསོད་པ་དང་། དགྲ་བཅོམ་པ་གསོད་པ་དང་། དགེ་འདུན་གྱི་དབྱེན་བྱེད་པ་དང་།
[78b]
[78b.1]དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་ཞེས་བྱ་བ་འདི་ཡིན་ནོ། །དེ་ལ་ལྔ་པ་ངན་སེམས་ཀྱིས་ཁྲག་འབྱིན་པ་དེ་ནི་དགེ་འདུན་དབྱེན་བྱེད་པ་ལས་གཞན་པ་ལྷག་མ་བཞིའི་ནང་ནས་ཆེས་ལྕི་བ་ཡིན་ནོ། །གསུམ་པ་དགྲ་བཅོམ་པ་གསོད་པ་དེ་ནི་མ་དང་ཕ་གསོད་པ་
[78b.2]དག་པས་ཆེས་ལྕི་བ་ཡིན་ནོ། །དང་པོ་མ་གསོད་པ་ནི་ཕ་གསོད་པ་བས་ཆེས་ལྕི་བ་ཡིན་ཏེ། དེའི་ཕྱིར་ཕ་གསོད་པ་ནི་ཐམས་ཅད་ཀྱི་ནང་ན་ཡང་བ་ཡིན་ནོ་ཞེས་བྱ་བ་སྨོས་སོ། །ངེས་པར་མཛད་ནས་ཞེས་བྱ་བ་ནི་དེ་ཁོ་ན་ངེས་པར་བཟུང་ནས་ཞེས་བྱ་བའི་ཐ་ཚིག་གོ། །རྣམ་པར་སྨིན་པ་རྒྱ་ཆེ་
[78b.3]བའི་དབང་དུ་མཛད་ནས་ནི་དགེ་འདུན་གྱི་དབྱེན་བྱེད་པ་ཁ་ན་མ་ཐོ་བ་ཆེ་བར་གསུངས་ཏེ། རྣམ་པར་སྨིན་པ་བར་གྱི་བསྐལ་པར་འབྱིན་པའི་ཕྱིར་རོ། །སྐྱེ་བོ་ཕལ་པོ་ཆེ་འཆི་བའི་དབང་དུ་མཛད་ནས་ནི་ཡིད་ཀྱི་ཉེས་པ་སྟེ། དན་ད་ཀའི་དགོན་པ་ལ་སོགས་པ་སྟོངས་པའི་རྒྱུ་ཡིན་པའི་
[78b.4]ཕྱིར་རོ། །གཞན་ལུས་ཀྱི་ལས་སམ་ངག་གི་ལས་ཀྱིས་ནི་སྐྱེ་བོ་ཕལ་པོ་ཆེ་དེ་སྙེད་འཆི་མི་སྲིད་དོ། །དགེ་བའི་རྩ་བ་ཀུན་དུ་གཅོད་པའི་དབང་དུ་མཛད་ནས་ནི་ལོག་པར་ལྟ་བ་ཁ་ན་མ་ཐོ་བ་ཆེན་པོར་གསུངས་ཏེ། གཞན་མི་དགེ་བའི་རྩ་བ་ནི་ཀུན་དུ་འབྱུང་བ་ཙམ་དང་འགལ་བའི་ཕྱིར་དགེ་
[78b.5]བའི་རྩ་བ་རྣམས་ཀུན་དུ་གཅོད་པ་མ་ཡིན་ནོ། །བར་ཆད་མེད་པ་ཁོ་ནར་ནི་མ་ཡིན་ནོ་ཞེས་བྱ་བ་ལ། གཞན་དག་གི་བསམ་པ་ནི་དེ་དག་ནི་གདོན་མི་ཟ་བར་དམྱལ་བར་སྐྱེ་བས་དེ་དང་འདྲ་བའི་ཕྱིར་དེ་དང་ཆ་འདྲ་བ་དག་ཅེས་བྱ་བའོ། །དེར་བར་ཆད་མེད་པར་སྐྱེ་བས་ནི་མ་ཡིན་ནོ། །དེ་ལྟ་མ་ཡིན་
[78b.6]ན་མཚམས་མེད་པ་དག་ཁོ་ན་ཡིན་པར་འགྱུར་རོ་སྙམ་པ་ཡིན་ནོ། །ཕྱོགས་སྔ་མ་དག་གི་ལན་ནི་དེ་དག་བར་ཆད་མེད་པར་འབྱུང་བ་ཉིད་ཅན་ཡིན་ཡང་མཚམས་མེད་པ་ཁོ་ན་ནི་མ་ཡིན་ཏེ། དུས་དང་རྣམ་པར་སྨིན་པ་མི་འདྲ་བ་ཡིན་ནོ་ཞེས་བྱ་བ་ཡིན་ནོ། །མ་དགྲ་བཅོམ་མ་སུན་བྱས་དང་། །ཞེས་བྱ་བ་
[78b.7]ནི་མ་བསད་པའི་མཚམས་མེད་པ་དང་ཆ་འདྲ་བ་ཡིན་ནོ། །ངེས་པར་གཏོགས་པའི་བྱང་ཆུབ་སེམས་དཔའ་བསད་པ་ནི་ཕ་བསད་པའི་མཚམས་མེད་པ་དང་ཆ་འདྲ་བ་ཡིན་ནོ། །སློབ་པ་བསད་པ་ནི་དགྲ་བཅོམ་པ་བསད་པའི་མཚམས་མེད་པ་དང་ཆ་འདྲ་བ་ཡིན་ནོ། །དགེ་འདུན་གྱི་འདུ་བའི་སྒོ་འཕྲོག་པ་ནི་དགེ་
[79a]
[79a.1]འདུན་གྱི་དབྱེན་བྱེད་པའི་མཚམས་མེད་པ་དང་ཆ་འདྲ་བ་ཡིན་ནོ། །མཆོད་རྟེན་འཇིག་པ་ནི་དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པའི་མཚམས་མེད་པ་དང་ཆ་འདྲ་བ་ཡིན་ནོ། །སློབ་དཔོན་དབྱིག་བཤེས་ན་རེ་དགེ་འདུན་གྱི་འདུ་བའི་སྒོ་འཕྲོག་པ་ནི་ནར་
[79a.2]མར་འདུ་བ་འཕྲོག་པ་ཡིན་ནོ་ཞེས་ཟེར་རོ། །འདི་སྐད་དུ། དགེ་འདུན་གྱི་ཞལ་དུ་འདུ་བའི་སྒོ་འཕྲོག་པའོ་ཞེས་བརྗོད་དེ། གང་ཞིག་གིས་དགེ་འདུན་འཚོ་བར་བྱེད་པ་ཞལ་དུ་གསོལ་བ་གང་ཡིན་པ་དེ་འཕྲོག་པ་ཡིན་ནོ། །དེའི་རྣམ་པར་སྨིན་པའི་ས་ལས་འདས་པའི་ཕྱིར་ཞེས་བྱ་བ་ནི། བཟོད་ཐོབ་
[79a.3]ངན་སོང་མི་འགྲོའོ། །ཞེས་འབྱུང་བས་ངན་སོང་གི་ས་ལས་འདའ་བའི་ཕྱིར་རོ། །དེ་བཞིན་དུ་ཞེས་བྱ་བ་ནི་དེའི་རྣམ་པར་སྨིན་པའི་ས་ལས་འདའ་བའི་ཕྱིར་འདོད་པ་ན་སྤྱོད་པའི་ལས་རྣམས་བགེགས་བྱ་བའི་ཕྱིར་ཉེ་བར་གནས་ཏེ། དཔེར་ན་མི་ཞིག་ཡུལ་འདོར་བར་བྱེད་པ་ལ་བུ་ལོན་པ་དག་ལྡང་བ་
[79a.4]བཞིན་ནོ་ཞེས་བྱ་བ་དེ་ཁོ་ན་བཞིན་དུ་ཞེས་བྱ་བའི་ཐ་ཚིག་གོ། །རིགས་ཤིང་སཱ་ལ་ཆེན་པོ་ལྟ་བུར་སྐྱེ་བ་ཞེས་བྱ་བ་ནི་རིགས་ཆེན་པོ་དང་ལྡན་པར་སྐྱེ་བ་ཞེས་བྱ་བའི་ཐ་ཚིག་གོ། །རྒྱལ་རིགས་ཤིང་སཱ་ལྟ་ཆེན་པོ་ལ་བུར་སྐྱེ་བ་ཡིན་ནོ་ཞེས་བྱ་བ་ནས། ཁྱིམ་བདག་གི་རིགས་སཱ་ལ་ཆེན་པོ་ལྟ་བུར་
[79a.5]སྐྱེ་བ་ཡིན་ནོ་ཞེས་བྱ་བའི་བར་ནི་ཁྱིམ་བདག་གི་རིགས་ཆེན་པོར་སྐྱེ་བ་ཡིན་ནོ་ཞེས་བྱ་བའི་ཐ་ཚིག་གོ། །བརྙས་གནོད་ནི་བརྙས་པའི་གནས་སྐབས་སྔོན་དུ་བཏང་བའི་རྣམ་པར་ཐོ་འཚམས་པའོ། །ལུས་དང་ངག་གི་འཇུག་པས་གཞན་ལ་སྡུག་བསྔལ་དང་ཡིད་མི་བདེ་བ་དག་འབྱུང་བ་དེ་ལ་
[79a.6]ལྟོས་ནས་དེ་སྡོམ་པ་ནི་བརྣགས་པ་ཞེས་བྱའོ། །བསྐལ་པ་དགུ་བཅུ་རྩ་གཅིག་གི་བར་དུ་ཞེས་བྱ་བ་ནི་དགུ་བཅུ་རྩ་གཅིག་ཏུ་ཚང་བའི་བསྐལ་པ་ནི་དགུ་བཅུ་རྩ་གཅིག་གོ། །དེའི་བར་དུ་སྟེ། གྲོང་དཔོན་དགེ་སྦྱོང་གཅེར་བུ་པ་རལ་གྲི་ཐོགས་པ་ཞིག་གིས། བཅོམ་ལྡན་འདས་ལ་ཀྱེ་དགེ་སློང་གཽ་
[79a.7]ཏམ་གང་ཁྱོད་ལོ་ཉེས་པ་འདི་ལྟ་བུའི་ནང་ན་དགེ་སློང་གི་དགེ་འདུན་འདི་སྙེད་ཅིག་དང་ཐབས་ཅིག་སེར་བ་བཞིན་དུ་མ་རུངས་པར་བྱེད་ཅིང་སློང་མོ་ལ་རྒྱུ་བ་ཇི་སྟེ་ཁྱིམ་རྣམས་ཕུང་བར་བྱ་བའི་ཕྱིར་ཞུགས་ཞེས་སྨྲས་པ་དང་། བཅོམ་ལྡན་འདས་ཀྱིས་དེ་ལ་གྲོང་དཔོན་ངས་འདི་ནས་བཟུང་སྟེ།
[79b]
[79b.1]བསྐལ་པ་དགུ་བཅུ་རྩ་གཅིག་གི་བར་དུ་ཞེས་བྱ་བ་རྒྱས་པར་བཀའ་སྩལ་ཏོ། །སྐྱོན་བཞི་པོ་འདི་དག་ནི་ཟློག་པར་བྱེད་ལ་ཞེས་བྱ་བ་ནི་ངན་འགྲོའི་སྐྱོན་དང་། རིགས་དམའ་བ་ཉིད་ཀྱི་སྐྱོན་དང་། དབང་པོ་མ་ཚང་བ་ཉིད་ཀྱི་སྐྱོན་དང་། བུད་མེད་ཀྱི་དངོས་པོའི་སྐྱོན་ནོ། །ཡོན་ཏན་གཉིས་ནི་
[79b.2]འཐོབ་པོ་ཞེས་བྱ་བ་ནི་ཚེ་རབས་དྲན་པ་ཉིད་ཀྱི་ཡོན་ཏན་དང་། ཕྱིར་མི་ལྡོག་པ་ཉིད་ཀྱི་ཡོན་ཏན་ནོ། །བྱང་ཆུབ་སེམས་དཔའ་ཉེ་བ་མ་གཏོགས་པ་ཞེས་བྱ་བ་ནི་མཚན་གྱི་རྣམ་པར་སྨིན་པ་ཅན་གྱི་ལས་བྱེད་པ་གང་ཡིན་པའོ། །སྟོང་གསུམ་འཆག་པ་ཞེས་བྱ་བ་ནི་སེམས་ཅན་གྱི་ལས་ཀྱི་
[79b.3]དབང་གང་གིས་སྟོང་གསུམ་གྱི་སྟོང་ཆེན་པོའི་འབྱུང་བ་དེའི་ཚད་གང་ཡིན་པ་སྟེ། ཚད་དེ་ལྟར་བཅས་པ་དེ་དག་བརྒྱས་སྐྱེས་བུ་ཆེན་པོའི་མཚན་གཅིག་འགྲུབ་པ་ནས་སུམ་ཅུ་རྩ་གཉིས་པའི་བར་དུ་ཡང་དེ་དང་འདྲའོ། །ཁ་ཅིག་ན་རེ་སངས་རྒྱས་རྣམས་ཀྱི་སྐུ་རྣམ་པ་གཉིས་ཏེ། སྐྱེ་བའི་སྐུ་དང་།
[79b.4]ཆོས་ཀྱི་སྐུའོ། །དེ་ལ་སྐྱེ་བའི་སྐུ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱི་མཚན་ཉིད་དོ། །ཆོས་ཀྱི་སྐུ་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དོ། །དེ་ལ་སངས་རྒྱས་ལ་དམིགས་པའི་ཡིད་ལ་བྱེད་པ་མངོན་སུམ་དུ་གྱུར་པ་ལས་སེམས་པ་ལྔ་བཅུ་འབྱུང་ལ། བདག་ཀྱང་འདི་
[79b.5]འདྲ་བར་གྱུར་ཅིག་སྙམ་པའི་ལས་ཀྱང་གཞན་ལྔ་བཅུ་འབྱུང་སྟེ། དེ་ལྟར་ན་བསོད་ནམས་བརྒྱ་ཡིན་ནོ་ཞེས་ཟེར་རོ། །གཞན་དག་ན་རེ་འདོད་པའི་ཁམས་གནས་ཉི་ཤུ་དང་། གཟུགས་ཀྱི་ཁམས་བཅུ་དྲུག་དང་། གཟུགས་མེད་པ་བཞི་དང་། གྲང་བའི་དམྱལ་བ་བརྒྱད་དེ། དེ་
[79b.6]ལྟར་ན་ཁམས་གསུམ་པ་ནི་ཁྱད་པར་བཞི་བཅུ་རྩ་བརྒྱད་ཡིན་ལ། དེ་ལ་དམིགས་པའི་བྱང་ཆུབ་སེམས་དཔའ་ལ་སྙིང་རྗེའི་སེམས་སྐྱེ་སྟེ། དེའི་ཕྱིར་དེ་དང་མཚུངས་པར་ལྡན་པའི་སེམས་པ་བཞི་བཅུ་རྩ་བརྒྱད་འབྱུང་ངོ་། །དེའི་རྗེས་ལ་ཇི་ལྟར་འདིས་ཁམས་གསུམ་པ་འདི་ལས་སེམས་ཅན་དག་
[79b.7]བཀྲོལ་བ་ལྟ་སྙམ་པ་དེ་ལྟ་བུའི་སེམས་པ་སངས་རྒྱས་ལ་དམིགས་པའི་སེམས་པ་འབྱུང་ངོ་། །དེའི་རྗེས་ལ་བདག་ཀྱང་དེ་དང་འདྲ་བར་འགྲོལ་བར་བྱེད་པར་གྱུར་ཅིག་སྙམ་པ་བདག་ལ་དམིགས་པའི་སེམས་པ་གཉིས་པ་འབྱུང་བས་སེམས་པ་ལྔ་བཅུ་འབྱུང་ངོ་། །ཡང་དེ་དག་ལན་
[80a]
[80a.1]གཉིས་སུ་མངོན་དུ་གྱུར་པས་སེམས་པ་བརྒྱར་འགྱུར་བ་ཡིན་ནོ་ཞེས་ཟེར་རོ། །གཞན་དག་ན་རེ་སངས་རྒྱས་བཅོམ་ལྡན་འདས་ནི་རྒྱུ་ལྔས་སྲོག་གཅོད་པ་སྤོང་བ་དང་ལྡན་པ་ཡིན་ཏེ། རྒྱུ་ལྔ་ནི་ལས་ཀྱི་ལམ་དངོས་ཡོངས་སུ་དག་པ་དང་། ཉེར་བསྡོགས་ཡོངས་སུ་
[80a.2]དག་པ་དང་། རྣམ་པར་རྟོག་པས་མ་སྨས་པ་དང་། དྲན་པས་ཡོངས་སུ་ཟིན་པ་ཉིད་དང་། མྱ་ངན་ལས་འདས་པར་བསྔོས་པ་ཉིད་དེ། དེ་ལ་དམིགས་པའི་སེམས་པ་ཡང་ལྔ་འབྱུང་ངོ་། །ལས་ཀྱི་ལམ་བཅུ་ཆར་ལ་དམིགས་པ་དེ་དང་འདྲ་སྟེ། སེམས་པ་ལྔ་ཕྲག་བཅུ་ནི་སེམས་པ་ལྔ་བཅུ་ཡིན་
[80a.3]ནོ། །ཡང་ཇི་ལྟར་བཅོམ་ལྡན་འདས་དེ་དགེ་བའི་ལས་ཀྱི་ལམ་མ་འདྲེས་པ་བཅུ་ལས་ངེས་པར་སྐྱེས་པ་ལྟར་བདག་ཀྱང་དེ་དང་འདྲ་བར་ཤོག་ཤིག་སྙམ་དུ་དེ་དག་ལན་གཉིས་སུ་མངོན་དུ་གྱུར་པས་སེམས་པ་བརྒྱར་འགྱུར་བ་ཡིན་ནོ་ཞེས་ཟེར་རོ། །དེ་ལྟར་ན་རེ་རེ་ཡང་བསོད་ནམས་བརྒྱ་ལས་སྐྱེས་སོ་
[80a.4]ཞེས་བྱ་བ་འདི་འགྲུབ་པོ། །བསྙེན་བཀུར་བྱས་སོ་ཞེས་བྱ་བ་ནི་བསྙེན་བཀུར་བྱས་པར་གྱུར་ཏོ་ཞེས་བྱ་བའི་ཐ་ཚིག་གོ། །གང་ལ་བཅོམ་ལྡན་འདས་ཞེས་བྱ་བ་རྒྱས་པར་འབྱུང་བ་ནི་རྫ་མཁན་སྣང་བྱེད་ཅེས་བྱ་བར་གྱུར་པས་དང་པོར་སྨོན་ལམ་བཏབ་པའོ། །དེའི་ཚེ་འདིའི་ཚུལ་ཁྲིམས་དང་བཟོད་པའི་ཕ་རོལ་
[80a.5]ཏུ་ཕྱིན་པ་དག་ཡོངས་སུ་རྫོགས་པ་ཡིན་ནོ་ཞེས་བྱ་བ་ནི་རེ་ཞིག་སེམས་མ་འཁྲུགས་པའི་ཕྱིར་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་སོ། །ལུས་དང་ངག་གིས་ཉེས་པར་སྤྱོད་པ་མི་བྱེད་པའི་ཕྱིར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་སོ། །ལྷ་ཡུལ་ས་ན་མེད་ཅེས་བྱ་བ་རྒྱས་པར་འབྱུང་བ་
[80a.6]ལ། ལྷ་ཡུལ་ས་ཞེས་བྱ་བ་ནི་བསྟན་པའི་ཚིག་གི་ཚུལ་དུ་བཤད་པ་ཡིན་ནོ། །འཇིག་རྟེན་འདི་ནའང་ཡོད་པ་མ་ཡིན་ལ། །རྣམ་ཐོས་བུ་ཡི་གནས་ནའང་ཡོད་མ་ཡིན། །ལྷ་ཡི་ཕོ་བྲང་གནས་མཆོག་ན་ཡང་ཡོད་མ་ཡིན། །ཞེས་བྱ་བ་ནི་དེ་གསལ་བར་བྱ་བའི་ཕྱིར་བསྟན་པའི་ཚིག་དག་ཡིན་ཏེ། འཇིག་
[80a.7]རྟེན་འདི་ན་ཞེས་བྱ་བ་ནི་མིའི་འཇིག་རྟེན་ནའོ། །རྣམ་ཐོས་བུའི་གནས་ན་ཞེས་བྱ་བ་ནི་རྒྱལ་པོ་ཆེན་པོ་བཞིའི་གནས་ནའོ། །ལྷའི་ཕོ་བྲང་ཞེས་བྱ་བ་ནི་ལྷའི་གནས་ཏེ། སུམ་ཅུ་རྩ་གསུམ་པའི་གནས་ན་ཞེས་བྱ་བའི་ཐ་ཚིག་གོ། །གནས་མཆོག་དག་ན་ཞེས་བྱ་བ་ནི་འཐབ་བྲལ་ལ་སོགས་པའི་གནས་དག་
[80b]
[80b.1]ནའོ། །འཇིག་རྟེན་གྱི་ཁམས་གཞན་དག་ན་ཡང་ཁྱོད་འདྲ་བ། མེད་པར་ཤེས་པར་བྱ་བའི་ཕྱིར། །ཕྱོགས་དང་ཕྱོགས་མཚམས་དག་ནའང་མེད། །ཅེས་བྱ་བ་སྨོས་སོ། །འོན་ཏེ་ཡིད་མི་ཆེས་ན་འགའ་ཞིག་གིས་རི་རྣམས་དང་ནགས་དག་ཏུ་བཅས་པའི་རི་དང་ནགས་སུ་བཅས་པའི་ས་སྟེངས་རྒྱས་པ་
[80b.2]སེམས་ཅན་མང་པོ་གནས་པ་འདི་ཀུན་དུ་ཡུལ་གཅིག །བདག་ཉིད་ཚོལ་ཅིག་ཅེས་བྱ་བར་བསམ་པ་ཡིན་ནོ། །བསྐལ་པ་དགུ་ཡང་བསྡུམས་སོ་ཞེས་བྱ་བ་ནི་བརྩོན་འགྲུས་བརྩམས་པ་དེས་བསྐལ་པ་དགུ་བཅུ་རྩ་གཅིག་གིས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ཕྱིར་རོ། །
[80b.3]དེ་ཉིད་ཀྱི་ཕྱིར་བསྐལ་པ་དགུ་བཅུ་རྩ་གཅིག་ལུས་པའི་ཚེ་འཕངས་སོ་ཞེས་བཤད་དོ། །བྱང་ཆུབ་པའི་སྔོན་རོལ་གྱི་དེ་མ་ཐག་ཅེས་བྱ་བ་ནི་ཟད་པ་དང་མི་སྐྱེ་བ་ཤེས་པའི་མཚན་ཉིད་ཀྱི་བྱང་ཆུབ་ཀྱི་སྔོན་རོལ་གྱི་དེ་མ་ཐག་གོ། །དེ་ཅིའི་ཕྱིར་ཞེ་ན། ཕ་རོལ་ཏུ་ཕྱིན་པ་ཡོངས་སུ་རྫོགས་པས་བྱང་ཆུབ་
[80b.4]འཐོབ་ཀྱི། ཕ་རོལ་ཏུ་ཕྱིན་པ་ཡོངས་སུ་མ་རྫོགས་པས་ནི་མ་ཡིན་ནོ། །ཅི་རིགས་པར་ཞེས་བྱ་བ་ནི་ལ་ལ་ནི་བསོད་ནམས་ཀྱང་ཡིན། བྱ་བ་ཡང་ཡིན། གཞི་ཡང་ཡིན། ལ་ལ་ནི་བསོད་ནམས་ཁོ་ན་ཡིན་པས་སོ། །ཇི་ལྟ་ཞེ་ན། དཔེར་ན་ཞེས་བྱ་བ་ལ་སོགས་པ་སྨོས་ཏེ། སྲོག་གཅོད་
[80b.5]པ་ལ་སོགས་པ་ལས་ཀྱི་ལམ་བདུན་པོ་དེ་དག་ནི་ལས་ཀྱི་རང་བཞིན་ཡིན་པའི་ཕྱིར་དང་། སེམས་པའི་ལམ་ཡིན་པའི་ཕྱིར་ལས་ཀྱང་ཡིན། ལམ་ཡང་ཡིན་ལ། བརྣབ་སེམས་ལ་སོགས་པ་གསུམ་ནི་སེམས་པ་ཞེས་བྱ་བའི་ལས་ཀྱི་ལམ་ཁོ་ན་ཡིན་པས་ལས་ཀྱི་ལམ་མོ། །ལུས་དང་ངག་
[80b.6]གི་ལས་ནི་རྣམ་པ་གསུམ་ཆར་ཡིན་ནོ་ཞེས་བྱ་བ་ནི་རེ་ཞིག་རྣམ་པར་སྨིན་པ་ཡིད་དུ་འོང་བའི་ཕྱིར་བསོད་ནམས་ཀྱང་ཡིན་ལ། ལས་ཀྱི་ངོ་བོ་ཉིད་ཡིན་པའི་ཕྱིར་བྱ་བ་ཡང་ཡིན་ནོ། །དེ་དག་ཀུན་ནས་སློང་བར་བྱེད་པའི་སེམས་པ་ནི་དེ་དག་ལ་བརྟེན་ནས་འཇུག་པའི་ཕྱིར་གཞི་ཡང་ཡིན་ནོ། །དེ་ཀུན་ནས་སློང་
[80b.7]བར་བྱེད་པའི་སེམས་པ་ནི་ལུས་དང་ངག་གི་ལས་ཀུན་ནས་སློང་བར་བྱེད་པ་ཡིན་ཏེ། རྣམ་པར་སྨིན་པ་ཡིད་དུ་འོང་བའི་ཕྱིར་བསོད་ནམས་ཀྱང་ཡིན་ལ། ཡིད་ཀྱི་ལས་ཡིན་པའི་ཕྱིར་བྱ་བ་ཡང་ཡིན་ནོ། །གཞི་ནི་མ་ཡིན་ཏེ། བྱ་བའི་རྟེན་མ་ཡིན་པའི་ཕྱིར་རོ། །དེ་དང་ལྷན་ཅིག་འབྱུང་བ་ཚོར་
[81a]
[81a.1]བ་ལ་སོགས་པ་ནི་རྣམ་པར་སྨིན་པ་ཡིད་དུ་འོང་བའི་ཕྱིར་བསོད་ནམས་ཁོ་ན་ཡིན་གྱི། བྱ་བ་འམ་གཞི་ནི་མ་ཡིན་ཏེ། དེ་དག་གི་མཚན་ཉིད་མེད་པའི་ཕྱིར་རོ། །ཚུལ་ཁྲིམས་ལས་བྱུང་བ་ཞེས་བྱ་བ་ནི་རྣམ་པ་གསུམ་སྔ་མ་བཞིན་དུ་སྦྱར་བར་བྱའོ། །བྱམས་
[81a.2]པ་ནི་བསོད་ནམས་ཀྱང་ཡིན་ཞེས་བྱ་བ་ཡང་སྔ་མ་བཞིན་དུ་སྦྱར་བར་བྱའོ། །བྱ་བའི་གཞི་ཡང་ཡིན་ཏེ། བྱམས་པའི་སྒོ་ནས་བྱམས་པའི་དབང་གིས་དེ་དང་མཚུངས་པར་ལྡན་པ་སྟེ། བྱམས་པ་དང་མཚུངས་པར་ལྡན་པའི་སེམས་པ་མངོན་པར་འདུ་བྱེད་ཅིང་། སེམས་པར་བྱེད་པའི་ཕྱིར་རོ། །
[81a.3]དེ་དང་ལྷན་ཅིག་འབྱུང་བ་སྟེ། བྱམས་པ་དང་ལྷན་ཅིག་འབྱུང་བའི་སེམས་པ་དང་། ཚུལ་ཁྲིམས་ནི་བསོད་ནམས་ཀྱང་ཡིན་ལ། བྱ་བ་ཡང་ཡིན་ཏེ། སྔ་མ་བཞིན་ནོ། །སེམས་པ་ནི་བསམ་གཏན་གྱི་སྡོམ་པ་འཇུག་པར་བྱའོ་སྙམ་དུ་བརྟེན་ནས་འཇུག་པ་མ་ཡིན་ཏེ། དེའི་ཕྱིར་དེ་བྱ་བའི་གཞི་ནི་མ་
[81a.4]ཡིན་ནོ། །དེ་དང་ལྷན་ཅིག་འབྱུང་བ་ཚོར་བ་ལ་སོགས་པ་གཞན་ནི་བསོད་ནམས་ཁོ་ན་ཡིན་ཏེ། སྔ་མ་བཞིན་ནོ། །དེ་ལྟར་ན་སྦྱིན་པ་ལས་བྱུང་བའི་བསོད་ནམས་ཀྱང་ཡིན། བྱ་བ་ཡང་ཡིན། གཞི་ཡང་ཡིན་པ་དང་། བསོད་ནམས་ཀྱང་ཡིན། བྱ་བ་ཡང་ཡིན་པ་དང་། བསོད་ནམས་ཡིན་པས་
[81a.5]བསོད་ནམས་བྱ་བའི་གཞིའོ། །ཚུལ་ཁྲིམས་ལ་སོགས་པ་ནི་བསོད་ནམས་ཀྱང་ཡིན། བྱ་བ་ཡང་ཡིན། གཞི་ཡང་ཡིན་པས་བསོད་ནམས་བྱ་བའི་གཞིའོ། །བསྒོམས་པ་ལས་བྱུང་བ་ནི་བསོད་ནམས་ཀྱང་ཡིན། བྱ་བའི་གཞི་ཡང་ཡིན་པ་དང་། བསོད་ནམས་ཀྱང་ཡིན། བྱ་བ་ཡང་ཡིན་པ་
[81a.6]དང་། བསོད་ནམས་ཡིན་པས་བསོད་ནམས་བྱ་བའི་གཞིའོ། །མི་མཐུན་པ་རྣམས་ལ་ཡང་གཅིག་བསྡུས་པར་འདོད་དེ། དཔེར་ན་གང་མི་མངོན་པ་དག་ནི་ཡོན་ཏན་ནོ་ཞེས་བྱ་བ་དེ་ལྟ་བུའོ། །གང་སྦྱིན་པར་བྱ་བ་དེ་ཡང་སྦྱིན་པ་ཡིན་མོད་ཀྱི་ཞེས་བྱ་བ་ནི་སྦྱིན་པར་བྱ་བའི་དངོས་པོ་སྟེ། ལས་སུ་
[81a.7]སྒྲུབ་པ་ཡིན་ནོ། །གང་གིས་སྦྱིན་བྱེད་དེ་སྦྱིན་པ། །ཞེས་བྱ་བ་ནི་འདིར་སྦྱིན་པ་དགེ་བ་ཡིན་པར་འདོད་དེ། སྦྱིན་པར་བྱ་བ་གོས་ལ་སོགས་པ་ནི་ལུང་དུ་མ་བསྟན་པ་ཉིད་ཡིན་ནོ། །འདོད་ཆགས་ལ་སོགས་པས་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་ཁྲོ་བ་དང་། ཕྲག་དོག་ལ་སོགས་པ་
[81b]
[81b.1]བསྡུའོ། །ཚོགས་གང་གིས་ཞེས་བྱ་བ་ནི་སེམས་དང་སེམས་ལས་བྱུང་བའི་ཚོགས་སོ། །ཕུང་པོ་རྣམས་ཞེས་བྱ་བ་ནི་ཕུང་པོ་ལྔའོ། །ཡང་ན་ལུས་དང་ངག་གི་རྣམ་པར་རིག་བྱེད་ཀྱང་གཟུགས་ཀྱི་ཕུང་པོ་ཡིན་པར་བལྟའོ། །བྱུང་བ་ཞེས་བྱ་བ་འདི་ནི་རང་བཞིན་ཡིན་ཞེས་བྱ་བ་ནི་གྱུར་པ་ལ་
[81b.2]སོགས་པ་མ་ཡིན་པའོ། །དཔེར་ན་རྩྭ་ལས་བྱུང་བའི་ཁྱིམ་ཞེས་བྱ་བ་ནི་རྩྭ་ལས་གྱུར་པ་མེད་ཀྱི། དེ་དག་མ་གྱུར་པ་ཁོ་ནས་དེ་བྱས་པ་ཡིན་པས་དེའི་ཕྱིར་རྩྭ་ལས་བྱུང་བ་དེ་ནི་རྩྭའི་ངོ་བོ་ཉིད་ཡིན་ནོ་ཞེས་བྱ་བར་ཤེས་ཏེ། དེ་གྱུར་པ་ཉིད་ཡིན་པར་ཡོངས་སུ་བརྟགས་ནས་བྱུང་བ་ཞེས་བྱའོ་སྙམ་དུ་
[81b.3]བསམ་པ་ཡིན་ནོ། །ཡང་ན་དེའི་རང་བཞིན་ཡིན་པར་བརྗོད་པར་བྱ་བའི་ཕྱིར་བྱུང་བ་ཞེས་བྱ་བའི་མཚན་ཉིད་འདིས་བྱུང་བ་ཞེས་བརྗོད་དོ། །དེ་བཞིན་དུ་ལོ་མ་ལས་བྱུང་བའི་སྣོད་ཅེས་བྱ་བ་འདི་ཡང་བརྗོད་པར་བྱའོ། །མཐོང་བའི་ཆོས་ལ་མྱོང་བར་འགྱུར་བ་མ་གཏོགས་ཞེས་བྱ་བ་ནི་དེ་གཉི་གའི་དོན་ཡིན་པའི་ཕྱིར་མ་
[81b.4]གཏོགས་སོ། །དེའི་རྣམ་པར་སྨིན་པའི་ས་ལས་ཡང་དག་པར་འདས་པའི་ཕྱིར་ཞེས་བྱ་བ་འདོད་པའི་ཁམས་ལས་ཤིན་ཏུ་ཡང་དག་པར་འདས་པའི་ཕྱིར་ཞེས་བྱ་བའི་ཐ་ཚིག་སྟེ། འདོད་པའི་ཁམས་ནི་སྦྱིན་པའི་རྣམ་པར་སྨིན་པའི་ས་ཡིན་པས་སོ། །ཐོས་པ་ལ་སོགས་པའི་ཡོན་ཏན་
[81b.5]དང་ལྡན་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་གཏོང་བ་དང་། ཤེས་རབ་དང་། འདོད་ཆེན་ཆུང་བ་ལ་སོགས་པའི་ཡོན་ཏན་དང་ལྡན་པ་བསྡུའོ། །གུས་ལ་སོགས་པས་སྦྱིན་པར་བྱེད། །ཅེས་བྱ་བ་ནི་འདི་ལ་གུས་པ་ལ་སོགས་པ་ཡོད་པས་ན་གུས་ལ་སོགས་ཏེ། འདི་ནི་བྱ་བའི་
[81b.6]ཁྱད་པར་ཡིན་ནོ། །གོ་རིམས་བཞིན་དུ་ཁྱད་པར་བཞིར་འགྱུར་རོ་ཞེས་བྱ་བ་ནི་གུས་པར་སྦྱིན་པས་ནི་བཀུར་སྟི་རྙེད་པར་འགྱུར་རོ། །རང་གི་ལག་ནས་སྦྱིན་པས་ནི་ལོངས་སྤྱོད་རྒྱ་ཆེན་པོ་ལ་དད་པ་རྙེད་པར་འགྱུར་རོ། །དུས་སུ་བྱིན་པས་ནི་གང་གི་ཚེ་ལོངས་སྤྱོད་ལོངས་སྤྱད་པར་ནུས་པའི་
[81b.7]དུས་ལས་མི་ཡོལ་བར་དུས་སུ་རྙེད་པར་འགྱུར་རོ། །གཞན་ལ་མི་གནོད་པར་བྱིན་པས་ནི་ལོངས་སྤྱོད་བར་ཆད་མེད་པར་རྙེད་པར་འགྱུར་རོ། །འདིའི་དུས་སུ་རེག་ན་བདེ་བའི་ལུས་སུ་འགྱུར་རོ་ཞེས་བྱ་བ་ནི་གྲང་བའི་ཚེ་ནི་དྲོ་བ་ལ། དྲོ་བའི་ཚེ་ནི་གྲང་ཞིང་། ཐལ་མལ་པའི་ཚེ་ནི་ཐ་མལ་པར་འདུག་
[82a]
[82a.1]པའོ། །གྲང་བ་ལ་སོགས་པར་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་ཡུལ་ངན་དང་། ཆར་འབབ་པ་ལ་སོགས་པ་བསྡུ་སྟེ། དེ་ནི་མདོ་ལས་ཇི་སྐད་འབྱུང་བ་བཞིན་ནོ། །འདི་ལྟ་སྟེ་ཕ་མ་ཞེས་བྱ་བ་ནི་ཕན་འདོགས་པའི་ཁྱད་པར་ལས་ཏེ། དེ་གཉིས་ལ་ཕན་པ་
[82a.2]དང་གནོད་པ་བྱས་པས་འབྲས་བུ་ཆེན་པོ་དག་ཏུ་འགྱུར་རོ་ཞེས་བྱ་བའི་དོན་དུ་ཁོང་དུ་ཆུད་པར་བྱའོ། །དོམ་དང་རི་དགས་ལ་སོགས་པའི་སྐྱེས་པའི་རབས་དཔེར་བྱའོ་ཞེས་བྱ་བ་ནི་དོམ་དང་རི་དགས་ཀྱི་ཕུག་ཏུ་བཅུག་ནས་ལུས་ཀྱི་དྲོད་ཀྱིས་བསྲོས་པ་དང་། ཆུས་ཁྱེར་བ་ལས་བསྒྲལ་བ་ལས་
[82a.3]ཕན་འདོགས་འདོགས་པ་དག་ལ་གནོད་པ་བྱས་པས་འཕྲལ་ལ་ལག་པ་ཆད་པ་ལྟ་བུའོ། །སོགས་པ་ཞེས་བྱ་བའི་སྒྲས་ནི་སྤྲེའུའི་སྐྱེས་པའི་རབས་ལ་སོགས་པ་དཔེར་བརྗོད་པར་བྱའོ། །ཚུལ་ཁྲིམས་དང་ལྡན་པ་ལ་བྱིན་ན་རྣམ་པར་སྨིན་པ་འབུམ་འགྱུར་ཞེས་བྱ་བ་དེ་ལྟ་བུ་ལ་སོགས་
[82a.4]པའོ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་རྒྱུན་དུ་ཞུགས་པའི་འབྲས་བུ་ལ་འཇུག་པ་ལ་བྱིན་ན་རྣམ་པར་སྨིན་པ་ཚད་མེད་དོ། །དེ་བས་ཀྱང་རྒྱུན་དུ་ཞུགས་པ་ལ་བྱིན་ན་ཆེས་ཚད་མེད་དོ་ཞེས་བྱ་བ་ལ་སོགས་པ་བསྡུའོ། །དེ་མ་གཏོགས་པ་ཞེས་བྱ་བ་ནི་བྱང་ཆུབ་སེམས་དཔའི་སྦྱིན་
[82a.5]པ་བཤད་མ་ཐག་པ་སྟེ། དེ་ནི་ཡང་དག་པར་རྫོགས་པའི་བྱང་ཆུབ་ཀྱི་དོན་དང་། སེམས་ཅན་ཐམས་ཅད་ཀྱི་དོན་དུ་བྱིན་པ་ཡིན་ནོ། །ལྷག་མ་ནི་གོ་སླ་བས་རྣམ་པར་མ་ཕྱེའོ་ཞེས་བྱ་བ་ནི་བདག་ལ་བྱིན་པས་སྦྱིན་པ་ཞེས་བྱ་བ་དེ་ལྟ་བུ་ལ་སོགས་པའོ། །བདག་ལ་བྱིན་པས་སྦྱིན་པ་
[82a.6]ཞེས་བྱ་བ་ནི་འདིས་སྔོན་བདག་ལ་བྱིན་ནོ་སྙམ་ནས་སྦྱིན་པ་སྟེ། གསུམ་པ་ཡིན་ནོ། །བདག་ལ་སྦྱིན་པར་འགྱུར་བས་སྦྱིན་པ་ཞེས་བྱ་བ་ནི་བཞི་པ་ཡིན་ནོ། །སྔོན་བདག་གི་ཕ་དང་མེས་པོ་དག་གིས་སྦྱིན་པ་བྱིན་པས། སྦྱིན་པ་བྱིན་པ་ཞེས་བྱ་བ་ནི་ལྔ་པ་ཡིན་ནོ། །མཐོ་རིས་ཀྱི་དོན་དུ་སྦྱིན་པ་
[82a.7]ནི་དྲུག་པ་ཡིན་ནོ། །གྲགས་པའི་དོན་དུ་སྦྱིན་པ་ཞེས་བྱ་བ་ནི་བདུན་པ་ཡིན་ནོ། །སེམས་ཀྱི་རྒྱན་གྱི་དོན་ཞེས་བྱ་བ་ནས་དོན་གྱི་མཆོག་ཐོབ་པར་བྱ་བའི་ཕྱིར་སྦྱིན་པ་ཞེས་བྱ་བའི་བར་ནི་བརྒྱད་པ་ཡིན་ནོ། །སེམས་ཀྱི་རྒྱན་གྱི་དོན་ནི་རྫུ་འཕྲུལ་གྱི་དོན་ནོ། །སེམས་ཀྱི་ཡོ་བྱད་ཀྱི་དོན་ནི་སེམས་
[82b]
[82b.1]ཀྱི་ཡོ་བྱད་བརྒྱད་དེ། འཕགས་པའི་ལམ་ཡན་ལག་བརྒྱད་པའོ། །རྣལ་འབྱོར་གྱི་ཚོགས་ཀྱི་དོན་ནི་རྣལ་འབྱོར་གྱི་རྒྱུའི་དོན་ནོ། །དོན་གྱི་མཆོག་ཐོབ་པ་ནི་དགྲ་བཅོམ་པ་ཉིད་དམ། མྱ་ངན་ལས་འདས་པ་ཐོབ་པ་སྟེ། དེའི་ཕྱིར་སྦྱིན་པའོ། །བརྒྱད་པ་ནི་ཁྱད་པར་བཞི་ཡིན་ཡང་དེ་
[82b.2]དག་ནི་མྱ་ངན་ལས་འདས་པ་ཐོབ་པར་བྱེད་པ་ཁོ་ན་ཡིན་པའི་ཕྱིར། གཅིག་ཡིན་པས་སློབ་དཔོན་གྱིས་གོ་སླའོ་ཞེས་བཤད་དོ། །ཞིང་གི་ཁྱད་པར་རྣམ་པ་བཞི་ཞེས་བྱ་བ་ནི་འགྲོལ་བ་དང་། སྡུག་བསྔལ་དང་། ཕན་འདོགས་པ་དང་། ཡོན་ཏན་གྱི་ཞིང་ངོ་། །ཕྱོགས་གང་དུ་གཏོགས་
[82b.3]པར་བྱ་ཞེས་བྱ་བ་ནི་གང་གི་ཕྱིར་དེ་འགྲོ་བའི་ཞིང་ཉིད་དང་། ཡོན་ཏན་གྱི་ཞིང་ཉིད་དུ་ཡང་མི་རུང་བ་དེའི་ཕྱིར་འདྲི་བ་ཡིན་ནོ། །མཐུན་པ་དང་མི་མཐུན་པ་རབ་ཏུ་སྟོན་པར་བྱེད་པ་ནི་ཞེས་བྱ་བ་ནི་ཆོས་དང་ཆོས་མ་ཡིན་པའོ། །རྣམ་པར་སྨིན་པ་ངེས་པར་གནས་པའི་ཕྱིར་ཞེས་བྱ་བ་ནི་རྣམ་པར་སྨིན་
[82b.4]པ་འབྱིན་པར་ངེས་པར་གནས་པའི་ཕྱིར་ཞེས་བྱ་བའི་ཐ་ཚིག་གོ། །ལ་ལ་ནི་ཞིང་གི་དབང་པོ་ཁོ་ནས་སོ་ཞེས་བྱ་བ་ནི་དཔེར་ན་མི་ཕལ་པ་བསད་པ་བས་ཕ་བསད་པ་ལྟ་བུའོ། །དེ་ཉིད་ལ་གཞིའི་དབང་གིས་ཞེས་བྱ་བ་ནི་ལས་ཀྱི་ལམ་གྱི་དབང་གིས་སོ། །ཇི་ལྟར་ཞེ་ན། སྨྲས་པ་ཕ་དང་མ་ལ་
[82b.5]སྲོག་གཅོད་པས་ལས་ལྕི་བ་ལྟར་མ་བྱིན་པར་བླངས་པ་ལ་སོགས་པས་ནི་དེ་ལྟར་ལྕི་བ་མ་ཡིན་ནོ། །ཕ་དང་མ་དག་གི་ནོར་རྐུ་བའི་ལས་ནི་དེ་དང་འདྲ་བར་ལྕི་བ་མ་ཡིན་ཏེ། དེ་དག་བསད་པ་ནི་མཚམས་མེད་པའི་ངོ་བོ་ཉིད་ཡིན་པའི་ཕྱིར་རོ། །སོགས་པ་ཞེས་བྱ་བའི་སྒྲས་ནི་བརྫུན་
[82b.6]དུ་སྨྲ་བ་དང་། ཕྲ་མ་ལ་སོགས་པ་བསྡུའོ། །དེ་བཞིན་དུ་གཞན་ལ་ཡང་སྦྱར་བར་བྱའོ་ཞེས་བྱ་བ་ནི་ལ་ལ་ནི་སྦྱོར་བའི་ཁྱད་པར་གྱིས་ལྕི་བར་འགྱུར་ཏེ། རྣམ་པར་སྨིན་པ་ངེས་པར་གནས་པའི་ཕྱིར་རོ། །ལ་ལ་ནི་སེམས་པའི་ཁྱད་པར་གྱིས་སོ། །ལ་ལ་ནི་བསམ་པའི་ཁྱད་པར་གྱིས་
[82b.7]སོ། །བློ་སྔོན་དུ་མ་བཏང་བ་ཡང་མ་ཡིན་ལ། བབ་ཅོལ་དུ་བྱས་པ་ཡང་མ་ཡིན་ནོ་ཞེས་བྱ་བ་ལ། རྣམ་པ་གཅིག་ཏུ་ན་བློ་སྔོན་དུ་མ་བཏང་བར་བྱས་པ་ནི་འདི་བྱའོ་སྙམ་དུ་ཆེད་དུ་བསམས་ནས་བྱས་པ་མ་ཡིན་པའོ། །དེ་ནི་བསགས་པ་མ་ཡིན་གྱི། ལས་དེ་ནི་ལུང་དུ་མ་བསྟན་པ་ཡིན་
[83a]
[83a.1]ནོ། །བབ་ཅོལ་དུ་བྱས་པ་མ་ཡིན་པ་ཞེས་བྱ་བ་ནི་བློ་སྔོན་དུ་བཏང་ཟིན་ཀྱང་བྱུང་རྒྱལ་དུ་བྱས་པ་མ་ཡིན་པ་སྟེ། གོམས་ཏེ་ཁ་ལང་དུ་རེད་པས་བརྫུན་དུ་སྨྲ་བ་ལ་སོགས་པ་མི་དགེ་བ་གང་ཡིན་པ་དེ་ནི་བྱས་པ་ཡིན་གྱི། བསགས་པ་ནི་མ་ཡིན་ནོ། །གསུམ་གྱི་བར་གྱི་
[83a.2]ཞེས་བྱ་བ་ནི་ལུས་དང་། ངག་དང་། ཡིད་ཀྱིས་ཉེས་པར་སྤྱད་པ་དག་གིས་སོ། །གཉེན་པོ་མེད་པ་ཡིན་ནོ་ཞེས་བྱ་བ་ནི་ཕྱིར་འཆགས་པ་ལ་སོགས་པའི་གཉེན་པོ་མེད་པའི་ཕྱིར་རོ། །མི་དགེ་བ་ལ་འཁོར་ཡང་མི་དགེ་བ་ཡིན་ཞེས་བྱ་བ་ནི་གང་ཞིག་བྱས་ནས་ཀྱང་རྗེས་སུ་ཡི་རང་བར་བྱེད་པའོ། །
[83a.3]རྣམ་པར་སྨིན་པ་འབྱིན་པར་ངེས་པ་ཡིན་ནོ་ཞེས་བྱ་བ་ནི་མི་དགེ་བའི་མཚན་ཉིད་རྒྱས་པར་བསྐྱེད་པའི་ཕྱིར་རོ། །དེ་བཞིན་དུ་དགེ་བ་ལ་ཡང་སྦྱར་བར་བྱའོ་ཞེས་བྱ་བ་ནི་བསམས་བཞིན་ལས་ཇི་ལྟ་བུ་ཞེ་ན། ཆེད་དུ་བསམས་ནས་བྱས་པ་ཡིན་གྱི། བློ་སྔོན་དུ་མ་བཏང་བར་བྱས་པ་མ་ཡིན་
[83a.4]པ་སྟེ། དཔེར་ན་ལུང་དུ་མ་བསྟན་པའི་སེམས་ཀྱིས་རྡོ་སྦྱིན་ནོ་སྙམ་པ་ལས་གསེར་གྱི་གོང་བུ་བྱིན་པར་གྱུར་པ་ལྟ་བུའོ། །དེ་ནི་བྱས་པ་ཡིན་གྱི། བསགས་པ་ནི་མ་ཡིན་ཏེ། ལས་དེ་ནི་ལུང་དུ་མ་བསྟན་པ་ཡིན་ནོ། །བབ་ཅོལ་དུ་བྱས་པ་མ་ཡིན་པ་ནི་དཔེར་ན་ཁ་གོམས་པས་བདེན་པ་
[83a.5]སྨྲ་བ་ལྟ་བུ་སྟེ། དེ་ནི་བྱས་པ་ཡིན་གྱི་མི་དགེ་བ་ཡང་མ་ཡིན་ལ། བསགས་པ་ཡང་མ་ཡིན་ནོ། །རྫོགས་པས་ཇི་ལྟ་བུ་ཞེ་ན། ཁ་ཅིག་ནི་ལེགས་པར་སྤྱད་པ་གཅིག་གིས་མཐོ་རིས་སུ་འགྲོ་ལ། ཁ་ཅིག་ནི་གསུམ་གྱི་བར་གྱིས་འགྲོ་བ་དང་། ཁ་ཅིག་ནི་ལས་ཀྱི་ལམ་གཅིག་གིས་
[83a.6]མཐོ་རིས་སུ་འགྲོ་ལ། ཁ་ཅིག་ནི་བཅུའི་བར་གྱིས་འགྲོ་བ་དེ་ལ་གང་ཞིག་གིས་ཇི་ཙམ་གྱིས་དེར་འགྲོ་བར་འགྱུར་བ་རྫོགས་པར་མ་བྱས་ན་ལས་དེ་བྱས་པ་ཡིན་གྱི། བསགས་པ་མ་ཡིན་ནོ། །རྫོགས་ན་ནི་བསགས་པ་ཡིན་ནོ། །དེ་བཞིན་དུ་རྣམ་པར་སྨིན་པ་འབྱིན་པར་བྱེད་པ་ཞེས་བྱ་བའི་བར་
[83a.7]ཅི་རིགས་པར་སྦྱར་བར་བྱའོ། །འདོད་ཆགས་དང་བཅས་པས་མཆོད་རྟེན་ལ་སྦྱིན་པ་བྱིན་པ་ནི་བདག་གི་དོན་དུའོ་ཞེས་བཤད་པ་ཞེས་བྱ་བ་ནི། བདག་གཞན་དོན་ཕྱིར་གཉིས་དོན་ཕྱིར། །ཞེས་བྱ་བ་དེར་རོ། །གཏོང་བའི་རྒྱུ་ལས་བྱུང་བ་ཁོ་ན་བསོད་ནམས་ཡིན་ནོ་ཞེས་བྱ་བར་མི་བཟོད་
[83b]
[83b.1]ནས། སུ་ལའང་ཕན་བཏགས་པ་མེད་པའི་ཕྱིར་རོ་ཞེས་བྱ་བ་སྨོས་སོ། །ལེན་པར་བྱེད་པར་ཡོད་ན་ནི་གཏོང་བའི་རྒྱུ་ལས་བྱུང་བའི་བསོད་ནམས་རུང་སྟེ། དེ་ལ་ནི་དགའ་བ་དང་ཕན་བཏགས་པ་ཡིན་པས་བླངས་སོ་ཞེས་བྱ་བར་རུང་ངོ་། །ལེན་མེད་བྱམས་སོགས་བཞིན་ཞེས་བྱ་
[83b.2]བ་ནི་བྱམས་པ་ལ་སོགས་པ་དང་འདྲ་བས་ན་བྱམས་སོགས་བཞིན་ཏེ། ལེན་པར་བྱས་པས་ལེན་པ་མེད་ཀྱང་རུང་ངོ་། །ཕ་རོལ་པོ་ལ་ཕན་བཏགས་པ་མེད་ཀྱང་རུང་། དགེ་བའི་རྩ་བ་ལ་སོགས་པའི་སྟོབས་བསྐྱེད་པས་བསོད་ནམས་སུ་འགྱུར་བ་དེ་བཞིན་དུ་དེ་བཞིན་གཤེགས་པ་
[83b.3]ལ་སོགས་པ་ཡོན་ཏན་དང་ལྡན་པ་འདས་ཀྱང་དེ་ལ་དད་པས་བྱས་པ་སྟེ། མཆོད་རྟེན་ལ་ཕུལ་བ་བསོད་ནམས་སུ་འགྱུར་རོ། །འོ་ན་ནི་སྦྱིན་པ་དང་མཆོད་པ་བྱ་བ་དོན་མེད་པར་འགྱུར་རོ་ཞེས་བྱ་བ་ནི། གལ་ཏེ་རང་གི་སེམས་ཁོ་ན་ལས་བསོད་ནམས་སུ་འགྱུར་ན། སེམས་འབའ་ཞིག་གི་སྦྱིན་
[83b.4]པ་དང་མཆོད་པ་དག་བྱ་དགོས་ཏེ། དེ་ཁོ་ན་ལས་བསོད་ནམས་འཐོབ་པའི་ཕྱིར་རོ། །མ་ཡིན་ཏེ། ལས་དེ་ཀུན་ནས་སློང་བར་བྱེད་པའི་དད་པ་ནི་ཆེས་མཆོག་ཡིན་པའི་ཕྱིར་ཞེས་བྱ་བ་ནི་དེ་ལྟ་མ་ཡིན་ནོ། །ཅིའི་ཕྱིར་ཞེ་ན། འདི་ལྟར་བཅོམ་ལྡན་འདས་ལ་སེམས་ཙམ་གྱིས་སྦྱིན་པ་དང་། མཆོད་
[83b.5]པ་དག་སེམས་པར་བྱེད་པའི་དད་པ་གང་ཡིན་པ་དེ་བས་ནི་སྦྱིན་པ་དང་། མཆོད་པ་དག་དངོས་སུ་བྱེད་པའི་དད་པ་འདི་ཆེས་མཆོག་ཡིན་ཏེ། ལུས་དང་ངག་གི་ལས་དག་ཀྱང་འཇུག་པར་བྱེད་པའི་ཕྱིར་རོ། །སེམས་ཙམ་གྱི་སེམས་པར་བྱེད་པའི་དད་པ་ནི་ལུས་དང་ངག་གི་ལས་དག་འཇུག་པར་མི་བྱེད་དོ། །
[83b.6]ཇི་ལྟར་ཞེས་བྱ་བ་རྒྱས་པར་འབྱུང་བ་ནི་ཇི་ལྟར་དགྲ་བསད་དོ་སྙམ་དུ་བསམ་པའི་བསམ་པ་ཅན་འགའ་ཞིག་དེས་ཀུན་ནས་བསླང་བའི་ལུས་དང་། ངག་གི་ལས་དེ་ཤི་བཞིན་དུ་དགྲའི་འདུ་ཤེས་ཀྱིས་ཏེ། དགྲ་འདི་ད་དུང་མ་ཤིའོ་སྙམ་པའི་འདུ་ཤེས་འདིས་བྱེད་ན། སེམས་པའི་རྒྱུན་ཆགས་
[83b.7]ཕྱིར་བསོད་ནམས་མ་ཡིན་པ་ཆེས་མང་དུ་སྐྱེ་བར་འགྱུར་གྱི། བསམ་པ་ཙམ་བྱ་བས་སྟོང་པ་ནི་མ་ཡིན་པ་དེ་བཞིན་དུ་བཅོམ་ལྡན་འདས་ཡོངས་སུ་མྱ་ངན་ལས་འདས་པས་འདས་ཀྱང་དེ་ལ་དད་པས་ཀུན་ནས་བསླང་བ་སྟེ། སྟོན་པ་ལ་དད་པས་ཀུན་ནས་བསླང་བའི་སྦྱིན་པ་དང་། མཆོད་པ་བྱ་བ་
[84a]
[84a.1]མཇུག་ཏུ་གྱུར་པ་ཇི་ལྟ་བུ་བྱེད་ན་བསོད་ནམས་ཆེས་མང་དུ་འགྱུར་གྱི། དད་པ་ཙམ་བྱ་བས་སྟོང་པས་ནི་མ་ཡིན་ནོ། །འོ་ན་ནི་ཞིང་ངན་པ་ལ་བྱིན་པ་འབྲས་བུ་ཡིད་དུ་མི་འོང་བར་འགྱུར་རོ་ཞེས་བྱ་བ་ནི་གཅེར་བུ་པ་དག་ཆོམ་རྐུན་པ་ལ་སོགས་པ་ལ་བྱིན་ན་འབྲས་བུ་ཡིད་དུ་མི་
[84a.2]འོང་བར་འགྱུར་རོ་ཟེར་བ་ལྟར་ན། ཞིང་བཟང་པོ་ལ་ནི་འབྲས་བུ་ཡིད་དུ་འོང་བར་འགྱུར་ལ། །ཞིང་ངན་པ་ལ་ནི་ཟློག་པ་ཡིན་པས་དེའི་ཕྱིར་སྨྲ་བར་བྱེད་དོ། །རྒྱུ་ལས་འབྲས་བུ་མི་འཁྲུལ་ཕྱིར། །ངན་པའི་ཞིང་ལའང་འབྲས་ཡིད་འོང་། །ཞེས་བྱ་བ་ནི། ཞིང་གི་ཁྱད་པར་ལས་འབྲས་བུ་ཡིད་དུ་འོང་
[84a.3]བར་འགྱུར་རོ་ཞེས་ནི་མི་ཟེར་རོ། །འོ་ན་ཅི་ཞེ་ན། ཁྱད་པར་དུ་འཕགས་པར་འགྱུར་རོ་ཞེས་ཟེར་ཏེ། ཞིང་བཟང་པོ་ལ་སྲོག་གཅོད་པ་ལ་སོགས་པའི་ས་བོན་གྱི་འབྲས་བུ་ནི་ཡིད་དུ་འོང་བར་མི་འགྱུར་རོ། །ཞིང་ངན་པ་ལ་ཡང་ས་བོན་ལས་ཏེ། རྒྱུན་གྱི་ས་བོན་ལས་འབྲས་བུ་རྒྱུན་གྱི་འབྲས་
[84a.4]བུ་མི་འཁྲུལ་པ་མཐོང་སྟེ། རྒྱུན་གྱི་འབྲས་བུ་ཁོ་ན་མངར་བར་མཐོང་གི་ནིམ་པའི་འབྲས་བུ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་བཞིན་དུ་ནིམ་པའི་ས་བོན་ལས་ནི་ནིམ་པའི་འབྲས་བུ་ཁ་བ་ཁོ་ན་སྐྱེ་སྟེ། རྒྱུན་གྱི་ས་བོན་ནི་དགེ་བའི་དཔེར་བརྗོད་པ་ཡིན་ནོ། །ནིམ་པའི་ས་བོན་ནི་མི་དགེ་བའི་
[84a.5]དཔེར་བརྗོད་པ་ཡིན་ནོ། །འཆལ་བའི་ཚུལ་ཁྲིམས་ནི་མི་དགེའི་གཟུགས་ཞེས་བྱ་བ་ནི། འཆལ་བའི་ཚུལ་ཁྲིམས་ནི་སྲོག་གཅོད་པ་ལ་སོགས་པའི་མཚན་ཉིད་རང་བཞིན་གྱི་ཁ་ན་མ་ཐོ་བའི་གཟུགས་ཡིན་ནོ། །སངས་རྒྱས་ཀྱིས་ནི་བཅས་པ་ཡང་། །ཞེས་
[84a.6]བྱ་བ་ནི། བཅས་པའི་ཁ་ན་མ་ཐོ་བའོ། །བསླབ་པ་མནོས་པས་དེ་དག་སྤྱད་ན་འཆལ་བའི་ཚུལ་ཁྲིམས་སུ་འགྱུར་རོ་ཞེས་བྱ་བ་ནི། དེ་དག་སྤོང་བ་མནོས་པ་བཅོམ་ལྡན་འདས་ཀྱི་བཀའ་ལ་མ་གུས་པའི་ཕྱིར་འཆལ་བའི་ཚུལ་ཁྲིམས་སུ་འགྱུར་ཏེ། ཤུགས་ཀྱིས་ན་
[84a.7]ཚུལ་ཁྲིམས་མ་ནོས་པའི་ནི་འཆལ་བའི་ཚུལ་ཁྲིམས་མ་ཡིན་ནོ་ཞེས་བཤད་པ་ཡིན་ནོ། །རྣམ་དག་ཡོན་ཏན་བཞི་ལྡན་ནོ། །ཞེས་བྱ་བ་ནི་འདི་ལ་ཡོན་ཏན་བཞི་ཡོད་པས་ན་ཡོན་ཏན་བཞི་ལྡན་ནོ། །འཆལ་བའི་ཚུལ་ཁྲིམས་ཀྱིས་འཕན་མ་བྱུང་བ་ནི་ཇི་སྐད་བཤད་པས་ཞེས་བྱ་བ་ནི། འཆལ་
[84b]
[84b.1]བའི་ཚུལ་ཁྲིམས་མི་དགེའི་གཟུགས། །ཞེས་བྱ་བ་འདི་ལྟ་བུས་སོ། །འཆགས་པ་ལ་སོགས་པ་ཞེས་བྱ་བ་ནི་འཆལ་བའི་ཚུལ་ཁྲིམས་ཀྱི་རྒྱུ་དེ་དག་ཀུན་དུ་སྤྱོད་པ་དང་ལྡན་པས་ནི་འཕན་འབྱུང་བར་འགྱུར་རོ། །འཆལ་བའི་ཚུལ་ཁྲིམས་ཀྱི་གཉེན་པོ་ལ་བརྟེན་པ་ཞེས་བྱ་བ་བསྟན་པའི་
[84b.2]ཕྱིར། དྲན་པ་ཉེ་བར་གཞག་པ་ལ་བརྟེན་པའི་ཕྱིར་རོ་ཞེས་བྱ་བ་སྨོས་ཏེ། ལས་ཀྱི་ལམ་དངོས་ཀྱི་རྣམ་པར་དག་པ་ཞེས་བྱ་བ་ནི་སྲོག་གཅོད་པ་ལ་སོགས་པ་དངོས་ཀྱིས་ཉམས་པར་མ་བྱས་པ་ཞེས་བྱ་བའི་ཐ་ཚིག་གོ། །ཉེར་བསྡོགས་དག་གིས་རྣམ་པར་དག་པ་ཞེས་བྱ་བ་ནི་སྲོག་གཅོད་
[84b.3]པ་ལ་སོགས་པའི་སྦྱོར་བ་དག་གི་ས་སུན་མ་ཕྱུང་བ་ཞེས་བྱ་བའི་དོན་ཏོ། །རྣམ་པར་རྟོག་པ་རྣམས་ཀྱིས་ཞེས་བྱ་བ་ནི་འདོད་པའི་རྣམ་པར་རྟོག་པ་ལ་སོགས་པས་སོ། །དྲན་པས་ཡོངས་སུ་བཟུང་བ་ཞེས་བྱ་བ་ནི་ལུས་དྲན་པ་ཉེ་བར་གཞག་པ་དག་གིས་བརྟན་པོར་བྱས་པའམ། ཚུལ་
[84b.4]ཁྲིམས་དྲན་པས་ཡོངས་སུ་བཟུང་བའོ། །ལེགས་སུ་སྨོན་པའི་ཚུལ་ཁྲིམས་ཞེས་བྱ་བ་ལ། ལེགས་སུ་སྨོན་པ་ནི་དོན་དུ་གཉེར་བའོ། །སྲིད་པ་དང་། །ལོངས་སྤྱོད་དང་། བཀུར་སྟི་ལ་ཆགས་ནས་བསྲུང་བ་གང་ཡིན་པའོ་ཞེས་བྱ་བ་ནི་སྲིད་པ་དང་། ལོངས་སྤྱོད་དང་། བཀུར་
[84b.5]སྟི་ལ་སྲེད་པ་དེས་མནོས་པ་ཞེས་བྱ་བའི་ཐ་ཚིག་གོ། །ཡང་དག་པའི་ལྟ་བ་ཅན་རྣམས་ཞེས་བྱ་བ་ནི་སངས་རྒྱས་ཀྱི་བསྟན་པ་ལ་ཞུགས་པ་རྣམས་ཏེ། གཞན་མུ་སྟེགས་ཅན་རྣམས་ཀྱི་ནི་ཡང་དག་པའི་ལྟ་བ་ཅན་མ་ཡིན་པའི་ཕྱིར་རོ། །བྱང་ཆུབ་ཀྱི་ཡན་ལག་གི་རྗེས་སུ་འཇུག་པ་
[84b.6]མ་ཡིན་ནོ། །མཉམ་པར་གཞག་པའི་དགེ་བ་ནི་ཞེས་བྱ་བ་ལ། མཉམ་པར་གཞག་པ་ཞེས་བྱ་བ་སྨོས་པ་ནི་མཉམ་པར་གཞག་པ་མ་ཡིན་པ་བཟློག་པའི་ཕྱིར་རོ། །དགེ་བ་ཞེས་བྱ་བ་སྨོས་པ་ནི་སྙོམས་པར་འཇུག་པའི་རོ་མྱང་བ་དང་མཚུངས་པར་ལྡན་པའི་བསམ་གཏན་ཉོན་མོངས་
[84b.7]པ་ཅན་བསལ་བའི་ཕྱིར་ཏེ། དེ་ཡང་མཉམ་པར་གཞག་པའི་དགེ་བ་དང་འདྲ་བ་ནི་འབྱུང་ངོ་། །ཏིང་ངེ་འཛིན་གྱི་རང་བཞིན་དང་། དེ་དང་ལྷན་ཅིག་འབྱུང་བ་གང་ཡིན་པའོ་ཞེས་བྱ་བ་ནི་ཏིང་ངེ་འཛིན་གྱི་ངོ་བོ་ཉིད་དང་། དེ་དང་ལྷན་ཅིག་འབྱུང་བ་གང་ཡིན་པའོ་ཞེས་བྱ་བའི་ཐ་ཚིག་གོ། །མཉམ་
[85a]
[85a.1]པར་གཞག་པའི་དགེ་བ་དེ་ནི་ཞེས་བྱ་བ་རྒྱས་པར་འབྱུང་བ་ནི་མཉམ་པར་གཞག་པའི་དགེ་བ་དེ་ནི་སེམས་ལ་ཤིན་ཏུ་བསྒོ་བར་བྱེད་ཅིང་། གོམས་པར་བྱེད་དེ། མཉམ་པར་གཞག་པ་མ་ཡིན་པ་ཡང་བསྒོ་བར་བྱེད་མོད་ཀྱི་དེ་ལྟར་ཤིན་ཏུ་ནི་མ་ཡིན་ནོ་ཞེས་སྟོན་པར་
[85a.2]བྱེད་དོ། །ཇི་ལྟ་ཞེ་ན། རྒྱུད་ཡོན་ཏན་རྣམས་ཀྱིས་དེའི་བདག་ཉིད་དུ་བྱེད་པའི་ཕྱིར་ཞེས་བྱ་བ་སྨོས་ཏེ། འདི་ལྟར་རྒྱུད་ཏིང་ངེ་འཛིན་གྱི་ཡོན་ཏན་རྣམས་ཀྱིས་དེའི་བདག་ཉིད་དུ་བྱེད་པས་སོ། །འདིར་དཔེ་མེ་ཏོག་རྣམས་ཀྱིས་ཏིལ་ལ་བསྒོས་པ་བཞིན་ནོ་ཞེས་བྱ་བ་སྨོས་ཏེ། དཔེར་ན་མེ་ཏོག་
[85a.3]རྣམས་ཀྱིས་མེ་ཏོག་གི་དྲིའི་བདག་ཉིད་དུ་བྱེད་པའི་ཕྱིར་ཏིལ་ལ་བསྒོ་བར་བྱེད་པ་དེ་དང་འདྲ་སྟེ་འདི་སྐད་དུ། བསྒོམས་པ་ལས་བྱུང་བ་ནི་བསྒོམ་པའི་བག་ཆགས་དེའི་ངོ་བོ་ཉིད་ཀྱི་བསོད་ནམས་ཡིན་ནོ་ཞེས་བཤད་པར་འགྱུར་རོ། །ཡང་ཚུལ་ཁྲིམས་དང་བསྒོམ་པས་ཅིར་འགྱུར་ཞེས་བྱ་བའི་
[85a.4]ཚིག་ལྷག་མའི་སྒོ་ནས་དོན་འདྲི་བ་ཡིན་ནོ། །མཐོ་རིས་དོན་དུ་ཚུལ་ཁྲིམས་གཙོ་ཕྱིར་ཞེས་བྱ་བ་ནི་མཐོ་རིས་ཀྱི་དོན་དུ་ཚུལ་ཁྲིམས་གཙོ་བོ་ཡིན་གྱི། གཞན་ནི་མཐོ་རིས་ཀྱི་དོན་དུ་མ་ཡིན་ནོ། །གཞན་ཡང་གང་ཞིག་ཅེ་ན་སྦྱིན་པའོ། །སྦྱིན་པ་ཡང་མཐོ་རིས་ཀྱི་དོན་དུ་འགྱུར་ལ། ཞི་
[85a.5]གནས་དང་། ལྷག་མཐོང་དག་ནི་ཚུལ་ཁྲིམས་ལ་བརྟེན་པའི་ཕྱིར་ཚུལ་ཁྲིམས་ཀྱིས་ཀྱང་འབྲལ་བར་ནི་འགྱུར་མོད་ཀྱི། དངོས་སུ་བྲལ་བ་ཐོབ་པར་བྱེད་པའི་ཕྱིར་རམ། སྤོང་བའི་ལས་ཀྱིས་བསྡུས་པ་ཡིན་པའི་ཕྱིར་འབྲལ་བར་བྱ་བ་ལ་བསྒོམ་པ་ནི་གཙོ་བོ་ཡིན་པའི་ཕྱིར་རོ། །བསོད་
[85a.6]ནམས་བྱ་བའི་གཞིའི་ཞར་ལ། མདོ་ལས་ཞེས་བྱ་བ་ནི་འདི་རྒྱས་པར་འགོད་དེ། མདོ་ལས་གང་ཟག་བཞི་ནི་ཚངས་པའི་བསོད་ནམས་བསྐྱེད་དེ། མ་བྱས་པའི་ས་ཕྱོགས་སུ་དེ་བཞིན་གཤེགས་པའི་སྐུ་གདུང་གི་མཆོད་རྟེན་བྱེད་པ་འདི་ནི་གང་ཟག་ཚངས་པའི་བསོད་ནམས་བསྐྱེད་པ་དང་པོ་
[85a.7]ཡིན་ནོ། །ཕྱོགས་བཞིའི་དགེ་འདུན་ལ་ཀུན་དགའི་ར་བ་འབུལ་ཞིང་། ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་པར་བྱེད་པ་འདི་ནི། གང་ཟག་ཚངས་པའི་བསོད་ནམས་བསྐྱེད་པ་གཉིས་པ་ཡིན་ནོ། །དེ་བཞིན་གཤེགས་པའི་ཉན་ཐོས་བྱེ་བ་སྡུམས་བྱེད་པ་འདི་ནི་གང་ཟག་ཚངས་
[85b]
[85b.1]པའི་བསོད་ནམས་བསྐྱེད་པ་གསུམ་པ་ཡིན་ནོ། །བྱམས་པའི་སེམས་ཁོ་ན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་ཆེན་པོར་གྱུར་པ། མི་གཉིས་པ། ཚད་མེད་པ། ཤིན་ཏུ་བསྒོམས་པས་ཕྱོགས་གཅིག་ཏུ་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་
[85b.2]སོ། །དེ་བཞིན་དུ་གཉིས་པ་དང་། དེ་བཞིན་དུ་གསུམ་པ་དང་། དེ་བཞིན་དུ་བཞི་པ་དང་། བླ་དང་། འོག་དང་། ཐད་ཀར་རྣམ་པ་ཐམས་ཅད་དུ་ཐམས་ཅད་དང་ལྡན་པའི་འཇིག་རྟེན་འདི་ཁྱབ་པར་བྱས་ནས་རྫོགས་པར་བྱས་ཏེ། གནས་པ་འདི་ནི་གང་ཟག་ཚངས་པའི་བསོད་ནམས་
[85b.3]བསྐྱེད་པ་བཞི་པ་ཡིན་ནོ་ཞེས་བཤད་དོ། །མཚན་རྣམ་པར་སྨིན་པ་ཅན་གྱི་ལས་ཀྱི་ཚད་ཤེས་པར་བྱ་བའི་ཕྱིར་བཤད་པ་གང་ཡིན་པའོ་ཞེས་བྱ་བ་ནི་བྱང་ཆུབ་སེམས་དཔའ་ཉེ་བ་མ་གཏོགས་པ་སེམས་ཅན་ཐམས་ཅད་ཀྱི་ལོངས་སྤྱོད་ཀྱི་འབྲས་བུ་ཅན་ཞེས་བྱ་བ་དེ་ལྟ་བུ་ལ་སོགས་པ་བཤད་
[85b.4]པ་གང་ཡིན་པའོ། །ཚངས་པའི་བསོད་ནམས་ཞེས་བྱ་བ་ནི་ཚངས་པ་རྣམས་ཀྱི་ཡིན་པས་ན་ཚངས་པའི་འོ། །འདིར་ནི་ཚངས་པའི་མདུན་ན་འདོན་པ་རྣམས་ཀྱང་ཚངས་པའི་ཞེས་བྱ་བའི་སྒྲར་འདོད་དེ། འདི་ལྟར་ཚངས་པའི་མདུན་ན་འདོན་པ་རྣམས་ཀྱི་ཚེ་བསྐལ་པར་ཐུབ་པའི་ཕྱིར་ཏེ།
[85b.5]ཚངས་པའི་མདུན་ན་འདོན་རྣམས་ཀྱི་ཚེ་ཡང་བསྐལ་པར་ཐུབ་པར་བཤད་ལ། ལས་འདིས་ཀྱང་མཐོ་རིས་དག་ཏུ་བསྐལ་པར་དགའ་བར་འགྱུར་བས་སོ། །སྡེ་པ་གཞན་གྱི་གཞུང་ལས། ཚངས་པའི་བསོད་ནམས་སྐྱེད་པ་ནི། །བསྐལ་པར་མཐོ་རིས་དགའ་བར་གནས། །ཞེས་འབྱུང་
[85b.6]བས་དེ་དང་ཆོས་མཐུན་པའི་ཕྱིར་འདི་ཚངས་པའི་བསོད་ནམས་ཞེས་བྱའོ། །འདོད་པའི་ཁམས་ན་ལས་དགེ་བའི་རྣམ་པར་སྨིན་པ་བསྐལ་པར་ཐུབ་པ་མེད་པ་མ་ཡིན་ནམ་ཞེ་ན། གཅིག་གི་ནི་མེད་པ་བདེན་ན་ཤི་འཕོས་ནས་ཡང་དེ་ཉིད་དུ་སྐྱེ་བའི་ཉིང་མཚམས་སྦྱོར་བའི་ཕྱིར་གང་
[85b.7]དག་གི་མཐོ་རིས་ཀྱི་འབྲས་བུ་རིམ་གྱིས་བསྐལ་པའི་ཚད་ཙམ་དུ་ཐུབ་པ་མངོན་པར་འགྲུབ་པར་འགྱུར་བའི་སེམས་པ། རྟེན་གཅིག་པ་དག་ནི་མང་པོ་ཞིག་འབྱུང་ངོ་། །ཁ་ཅིག་ན་རེ་ཚངས་པའི་བསོད་ནམས་ནི་བསོད་ནམས་ཆེན་པོ་ཡིན་ནོ་ཞེས་ཟེར་རོ། །མདོ་སོགས་ཞེས་བྱ་བ་ལ་
[86a]
[86a.1]སོགས་པ་ཞེས་བྱ་བའི་སྒྲས་ནི་བསྟན་པའི་ཡན་ལག་བཅུ་གཉིས་བསྡུ་སྟེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་
[86a.2]བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་སྡེ་དང་། གཏན་ལ་བབ་པར་བསྟན་པའི་སྡེ་ཞེས་བྱ་བའི་ཡན་ལག་རྣམས་སོ། །ཉོན་མོངས་པ་ཅན་མ་ཡིན་པས་ཞེས་བྱ་བ་ནི་ཉོན་མོངས་པ་ཅན་གྱི་
[86a.3]སེམས་ཀྱིས་ཀུན་ནས་མ་བསླངས་པ་ཞེས་བྱ་བའི་ཐ་ཚིག་གོ། །བསོད་ནམས་ཆེན་པོ་ཉམས་པར་བྱེད་པ་ཞེས་བྱ་བ་ནི་བསོད་ནམས་མ་རུང་བར་བྱེད་པའོ། །བསོད་ནམས་ཀྱི་ཆ་དང་མཐུན་པ་ཞེས་བྱ་བ་ནི་བསོད་ནམས་ཀྱི་ཆ་ཐོབ་པ་ཡིན་པས་ན་བསོད་ནམས་ཀྱི་ཆ་སྟེ། བསོད་ནམས་ཀྱི་
[86a.4]འབྲས་བུ་ཐོབ་པ་ཞེས་བྱ་བའི་ཐ་ཚིག་གོ། །དེ་དང་མཐུན་པར་ནི་བསོད་ནམས་ཀྱི་ཆ་དང་མཐུན་པའོ། །དེ་ཉིད་ཀྱི་ཕྱིར། རྣམ་པར་སྨིན་པ་ཡིད་དུ་འོང་བ་ཅན་གང་ཡིན་པའོ་ཞེས་བྱ་བ་སྨོས་སོ། །རྣམ་པ་གཅིག་ཏུ་ན་ཆ་ནི་གསུམ་སྟེ། བསོད་ནམས་ཀྱི་ཆ་དང་། བསོད་ནམས་
[86a.5]མ་ཡིན་པའི་ཆ་དང་། མི་གཡོ་བའི་ཆའོ། །དེ་ལས་དེ་དང་མཐུན་པའི་ཆ་ནི་བསོད་ནམས་ཀྱི་ཆ་དང་མཐུན་པའོ། །ཡང་ན་བསོད་ནམས་ལ་བརྟེན་པས་ན་བསོད་ནམས་ཀྱི་ཆའོ། །བསོད་ནམས་ཉིད་བསོད་ནམས་ཀྱི་ཆ་དང་མཐུན་པ་ཡིན་ཏེ། རང་གི་དོན་གྱི་རྐྱེན་གྱི་དབང་དུ་བྱས་པ་ཡིན་
[86a.6]ནོ། །ཐར་པའི་ཆ་དང་མཐུན་པ་ཡང་དེ་དང་འདྲའོ། །ཡང་ན་ཆ་ནི་གཉིས་ཏེ། འཁོར་བའི་ཆ་དང་། ཐར་པའི་ཆའོ། །དེ་ལས་ཐར་པའི་ཆ་དང་མཐུན་པ་གང་ཡིན་པ་དེ་ནི་ཐར་པའི་ཆ་དང་མཐུན་པའོ། །ཡང་ན་ཐར་པའི་ཆ་ནི་ཐར་པ་ཐོབ་པའོ། །དེའི་ཕྱིར་དེ་དང་མཐུན་པ་དེ་ནི་དེའི་
[86a.7]ཐོབ་པ་དང་མཐུན་པ་ཡིན་པས་ཐར་པའི་ཆ་དང་མཐུན་པ་སྟེ། དེའི་མཚན་ཉིད་ནི་འོག་ནས་འཆད་དོ། །ངེས་པར་འབྱེད་པའི་ཆ་དང་མཐུན་པ་ཡང་དེ་བཞིན་དུ་སྦྱར་བར་བྱའོ། །འོག་ནས་བཤད་པར་བྱའོ་ཞེས་བྱ་བ་ནི། དེ་ལས་དྲོ་བར་གྱུར་པ་སྐྱེ། །ཞེས་བྱ་བ་དེར་རོ། །ལས་ཀྱི་སྐབས་སུ་
[86b]
[86b.1]ལས་ཀྱི་རང་བཞིན་གྱི་མཚན་ཉིད་འཇིག་རྟེན་ན་ཡིག་འབྲུ་ཞེས་བྱ་བ་ལ་སོགས་པ་འདི་བརྗོད་དེ། ཀུན་ནས་སློང་བ་དང་བཅས་པ་ཞེས་བྱ་བ་ནི་སེམས་དང་སེམས་ལས་བྱུང་བའི་ཚོགས་དང་བཅས་པ་སྟེ། གང་གིས་ལུས་ཀྱི་ལས་སློང་བར་བྱེད་པའོ། །ལུས་ཀྱི་ལས་ཀུན་ནས་སློང་བ་
[86b.2]དང་བཅས་པ་རིགས་པས་རབ་ཏུ་བཅུག་པ་དེ་ནི་ཡིག་འབྲུ་དང་རྒྱ་ཡིན་ནོ།། །།བམ་པོ་སུམ་ཅུ་རྩ་བརྒྱད་པ། རྒྱུ་ལ་འབྲས་བུ་བཏགས་པའི་ཕྱིར་ཏེ། བསྟན་བཅོས་ལས་ནི་ལུས་ཀྱི་ལས་གང་གིས་ཡིག་འབྲུ་འབྲི་ཞིང་རྒྱ་རྐོ་བར་བྱེད་པ་སྟེ། ཡིག་འབྲུ་དང་རྒྱ་ཡིན་པར་བཞེད་ཀྱི།
[86b.3]འཇིག་རྟེན་ན་ཇི་སྐད་གྲགས་པ་ལྟ་བུ་ནི་མ་ཡིན་ཏེ། འཇིག་རྟེན་ན་ནི་ཡིག་འབྲུ་ནི་གླེགས་བམ་ལ་སོགས་པ་ན་ཡོད་པའི་ཡི་གེའི་མཚན་མ་ཡིན་ནོ། །རྒྱ་ནི་ཡི་གེ་དང་ཡི་གེ་མ་ཡིན་པའི་མཚན་མ་ཡིན་ནོ་ཞེས་བྱ་བར་འདོད་དོ། །བགྲང་བ་དང་སྙན་དངགས་ནི་ངག་གི་ལས་རིགས་པས་རབ་ཏུ་བཅུག་པ་
[86b.4]ཀུན་ནས་སློང་བ་དང་བཅས་པ་ཡིན་ནོ་ཞེས་བྱ་བར་སྦྱར་རོ། །ཕུང་པོ་ལྔའི་རང་བཞིན་ནོ་ཞེས་བྱ་བ་ནི་ཡིག་འབྲུ་དང་རྒྱ་དག་གི་གཟུགས་ཀྱི་ཕུང་པོ་ནི་ལུས་ཀྱི་ལས་སོ། །བགྲང་བ་དང་སྙན་དངགས་དག་གིས་གཟུགས་ཀྱི་ཕུང་པོ་ནི་ངག་གི་ལས་སོ། །གཉིས་ཀ་ལ་ཡང་ཀུན་ནས་སློང་བར་གྱུར་པ་ཚོར་བ་ལ་
[86b.5]སོགས་པ་ཕུང་པོ་བཞི་ཡོད་པས་དེ་དག་ནི་ཕུང་པོ་ལྔའི་རང་བཞིན་ནོ། །ཡིད་ཀྱི་ཆོས་རྣམས་སྡོམ་པར་བྱེད་པ་གང་ཡིན་པའོ་ཞེས་བྱ་བ་ནི་གཅིག་གཉིས། གསུམ་ཞེས་བྱ་བ་ལ་སོགས་པའི་གྲངས་སོ། །ཆོས་མངོན་པ་པ་རྣམས་ན་རེ་ཡང་ན་གང་ལ་ཡིད་ཀྱིས་བགྲང་བར་བྱེད་པ་ཡིན་ནོ་ཞེས་ཟེར་རོ། །
[86b.6]གྲངས་འདི་ཡང་འཁོར་དང་བཅས་པས་གཟུང་བའི་ཕྱིར་ཕུང་པོ་བཞིའི་རང་བཞིན་ནོ། །ཡིག་འབྲུ་ལ་སོགས་པའི་མཚན་ཉིད་བསྟན་པའི་ཞར་ལ་ཁ་ན་མ་ཐོ་བ་དང་བཅས་པ་ལ་སོགས་པའི་ཆོས་རྣམས་ཀྱི་མཚན་ཉིད་བསྟན་པ་ཡང་ཉེ་བར་འགོད་པར་བྱེད་དོ། །འབྲེལ་པ་གཞན་ཡང་རྣམ་གྲངས་
[86b.7]འདི་དག་ནི་ཆོས་ཀྱི་ཕུང་པོའི་རྣམ་པར་བཤད་པ་ལས་བསྟན་ལ། འདི་ཡང་དེ་མདོར་བསྡུས་པ་ཡིན་པས་རྣམ་གྲངས་འདི་དག་ཉེ་བར་འགོད་དོ་ཞེས་བྱ་བ་ཡིན་ནོ། །ཉོན་མོངས་པའི་མཚན་ཉིད་ཀྱི་ཁ་ན་མ་ཐོ་བ་དང་ལྷན་ཅིག་འཇུག་པས་ན་ཁ་ན་མ་ཐོ་བ་དང་བཅས་པའོ། །ཉོན་མོངས་པས་བཀབ་
[87a]
[87a.1]པའི་ཕྱིར་བསྒྲིབས་པ་སྟེ། ཉོན་མོངས་པ་རྣམས་ཀྱང་མཚུངས་པར་ལྡན་པའི་ཉོན་མོངས་པ་གཞན་གྱིས་བསྒྲིབས་པ་ཡིན་ནོ། །གནག་པའི་ཕྱིར་རམ། འཕགས་པ་རྣམས་ཀྱིས་བོར་བའི་ཕྱིར་ངན་པ་སྟེ། གནག་པ་ནི་ཉོན་མོངས་པ་དང་ལྡན་པའི་སྒོ་ནས་ཁོང་
[87a.2]དུ་ཆུད་པར་བྱའོ། །དྲི་མེད་དགེ་ཞེས་བྱ་བ་ནི་དགེ་བ་ཟག་པ་མེད་པ་དེ་དག་ནི་དག་པའི་རབ་ཀྱི་མཐར་ཕྱིན་པའི་ཕྱིར་གྱ་ནོམ་པ་ཡིན་ནོ། །ངན་པ་དང་གྱ་ནོམ་པ་དག་ལས་གཞན་པ་ནི་བར་མ་ཞེས་བྱ་བར་གྲུབ་པ་ཡིན་ནོ་ཞེས་བྱ་བ་ནི་ཉོན་མོངས་པ་དག་ཁོ་ན་ངན་པ་ཡིན་ལ། དགེ་བ་དྲི་མ་མེད་པ་
[87a.3]དག་ཁོ་ན་ངེས་པར་གྱ་ནོམ་པ་ཡིན་ནོ་ཞེས་བྱ་བར་ངེས་པར་གཟུང་བའི་ཕྱིར་རོ། །དེ་ལས་གཞན་པ་དག་ནི་ངན་པ་ཡང་མ་ཡིན་ལ། གྱ་ནོམ་པ་ཡང་མ་ཡིན་པས་བར་མ་ཡིན་པར་གྲུབ་པོ། །འདུས་བྱས་དགེ་བསྟན་བྱ་ཞེས་བྱ་བ་ནི་ཟག་པ་དང་བཅས་པའང་རུང་ཟག་པ་མེད་པ་ཡང་རུང་
[87a.4]སྟེ། ཁྱད་པར་མེད་པར་བསྟེན་པར་བྱ་ཞིང་རྒྱུད་ལ་བསྐྱེད་པའི་སྒོ་ནས་གུས་པར་བྱ་བ་ཡིན་ནོ། །ལྷག་མ་ནི་བསྟེན་པར་བྱ་བ་མ་ཡིན་པ་ཞེས་བྱ་བ་ལྷག་མ་གང་ཞེ་ན། འདུས་མ་བྱས་དང་། མི་དགེ་བ་དང་། ཉོན་མོངས་པ་ཅན་གང་དག་ཡིན་པ་སྟེ། བསྒྲིབས་ལ་ལུང་དུ་མ་
[87a.5]བསྟན་པ་ཞེས་བྱ་བའི་ཐ་ཚིག་གོ། །གོམས་པར་བྱར་མི་རུང་བའི་ཕྱིར་རོ་ཞེས་བྱ་བ་ནི་ཡང་དང་ཡང་དུ་བྱར་མི་རུང་བའི་ཕྱིར་རོ་ཞེས་བྱ་བའི་ཐ་ཚིག་གོ། །གཞན་དག་ན་རེ་བསྐྱེད་དུ་མི་རུང་བའི་ཕྱིར་རོ་ཞེས་ཟེར་རོ། །འབྲས་བུ་ཡང་མེད་པའི་ཕྱིར་རོ་ཞེས་བྱ་བ་ནི། འདུས་བྱས་ལ་ནི་རྒྱུ་
[87a.6]འབྲས་དག །འདུས་མ་བྱས་ལ་དེ་དག་མེད། །ཅེས་འབྱུང་བས་སོ། །བླ་མ་དང་བཅས་པ་ཞེས་བྱ་བ་ནི་ཕུལ་དུ་ཕྱིན་པ་དང་བཅས་པ་སྟེ། མི་དགེ་བ་རྣམས་ནི་བསྒྲིབས་ལ་ལུང་དུ་མ་བསྟན་པ་རྣམས་ཀྱིས་བླ་མ་དང་བཅས་པ་ཡིན་ཏེ། བསྒྲིབས་ལ་ལུང་དུ་མ་བསྟན་པ་རྣམས་ལ་
[87a.7]རྣམ་པར་སྨིན་པ་ཡིད་དུ་མི་འོང་བ་མེད་པའི་ཕྱིར་རོ། །བསྒྲིབས་ལ་ལུང་དུ་མ་བསྟན་པ་རྣམས་ནི་འདུས་བྱས་མ་བསྒྲིབས་ལ་ལུང་དུ་མ་བསྟན་པ་རྣམས་ཀྱིས་བླ་མ་དང་བཅས་པ་ཡིན་ཏེ། དེ་དག་ཉོན་མོངས་པ་ཅན་མ་ཡིན་པའི་ཕྱིར་རོ། །དེ་རྣམས་ཀྱང་དགེ་བ་ཟག་པ་དང་བཅས་པ་
[87b]
[87b.1]རྣམས་ཀྱིས་བླ་མ་དང་བཅས་པ་ཡིན་ཏེ། དགེ་བ་ཟག་པ་དང་བཅས་པའི་འབྲས་བུ་ནི་ཡིད་དུ་འོང་བ་ཡིན་པའི་ཕྱིར་རོ། །དེ་རྣམས་ཀྱང་ཟག་པ་མེད་པ་རྣམས་ཀྱིས་བླ་མ་དང་བཅས་པ་ཡིན་ཏེ། ཉོན་མོངས་པ་མེད་པའི་ཕྱིར་རོ། །ཟག་པ་མེད་པའི་འདུས་བྱས་རྣམས་ཀྱང་
[87b.2]འདུས་མ་བྱས་རྣམས་ཀྱིས་བླ་མ་དང་བཅས་པ་ཡིན་ཏེ། འདུས་མ་བྱས་རྣམས་ནི་རྟག་པའི་ཕྱིར་རོ། །འདུས་མ་བྱས་ནམ་མཁའ་དང་། སོ་སོར་བརྟགས་པ་ཡིན་པས་འགོག་པ་དག་ཀྱང་སོ་སོར་བརྟགས་པས་འགོག་པས་བླ་མ་དང་བཅས་པ་ཡིན་ཏེ། སོ་སོར་བརྟགས་པས་
[87b.3]འགོག་པ་ནི་དགེ་བ་རྟག་པ་ཡིན་པའི་ཕྱིར་རོ། །ཐར་པ་བླ་ན་མེད་པ་ཡིན། །མྱ་ངན་ལས་འདས་པ་ལས་ལྷག་པར་ཁྱད་པར་དུ་འཕགས་པ་ནི་མེད་དེ། འདི་ལྟར་དགེ་སློང་དག་ཆོས་འདུས་བྱས་སམ་འདུས་མ་བྱས་ཇི་སྙེད་པ་དེ་དག་གི་ནང་ན་མཆོག་ནི་འདོད་ཆགས་དང་བྲལ་བ་ཡིན་
[87b.4]པར་བརྗོད་དོ་ཞེས་བརྗོད་དོ། །སོ་སོར་བརྟགས་པས་འགོག་པ་ནི་རྟག་པའི་ཕྱིར་དང་། དགེ་བའི་ཕྱིར་འདུས་བྱས་ཐམས་ཅད་དང་། འདུས་མ་བྱས་ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་དག་པས་ཀྱང་ཆེས་མཆོག་ཡིན་ནོ། །ཆོས་མངོན་པའི་མཛོད་ཀྱི་
[87b.5]འགྲེལ་བཤད་དོན་གསལ་བ་ཞེས་བྱ་བ་སློབ་དཔོན་རྒྱལ་པོའི་སྲས་གྲགས་པའི་བཤེས་གཉེན་གྱིས་མཛད་པ་ལས། ལས་བསྟན་པ་ཞེས་བྱ་བ་སྟེ་མཛོད་ཀྱི་གནས་བཞི་པ་རྫོགས་སོ།། །།ལས་ལས་འཇིག་རྟེན་སྣ་ཚོགས་སྐྱེས། །ཞེས་བཤད་པ་ཞེས་བྱ་བ་ནི་བཞི་པའི་
[87b.6]དང་པོར་བཤད་པ་ཡིན་ཏེ། དེའི་ཕྱིར་འབྲེལ་པ་འདིས་ན་ཕྲ་རྒྱས་ཉེ་བར་འགོད་དོ་ཞེས་འབྲེལ་པ་སྟོན་པར་བྱེད་དོ། །ཇི་སྐད་དུ་བཤད་པའི་མཚན་ཉིད་ཀྱི་ལས་རབ་ཏུ་དབྱེ་བ་དེ་དག་ཀྱང་ཕྲ་རྒྱས་ཀྱི་དབང་གིས་བསགས་པར་འགྱུར་ཞིང་རྣམ་པར་སྨིན་པར་ངེས་པར་གནས་ཏེ། རྣམ་
[87b.7]པར་སྨིན་པ་འབྱིན་པར་ངེས་པར་འགྱུར་རོ་ཞེས་བྱ་བའི་ཐ་ཚིག་གོ། །ཕྲ་རྒྱས་མེད་པར་ཏེ། ཕྲ་རྒྱས་དག་མེད་པར་ནི་ལས་དགེ་བའམ་མི་དགེ་བ་དག་སྲིད་པ་སྟེ། སྐྱེ་བ་མངོན་པར་འགྲུབ་ཅིང་བསྐྱེད་པར་མི་ནུས་ཏེ། དགྲ་བཅོམ་པ་ལ་ཡང་སྲིད་པའི་ལས་མ་ངེས་པ་དག་ནི་མེད་པ་
[88a]
[88a.1]མ་ཡིན་མོད་ཀྱི། ཕྲ་རྒྱས་མེད་པའི་ཕྱིར་ཡང་སྲིད་པ་མངོན་པར་འགྲུབ་པར་མི་ནུས་སོ། །དེ་ཉིད་ཀྱི་ཕྱིར་དེ་དག་མ་ངེས་པ་ཉིད་དུ་འགྲུབ་བོ། །ནི་ཞེས་བྱ་བ་འདི་ནི་གང་གི་ཕྱིར་ཞེས་བྱ་བའི་དོན་དུ་སྟོན་པ་ཡིན་ཏེ། གང་གི་ཕྱིར་ཕྲ་རྒྱས་དག་མེད་པར་སྲིད་
[88a.2]པ་མངོན་པར་འགྲུབ་པར་མི་ནུས་པ་དེའི་ཕྱིར། ཕྲ་རྒྱས་ཀྱི་དབང་གིས་བསགས་པར་འགྱུར་རོ་ཞེས་བྱ་བར་བསམས་པ་ཡིན་ནོ། །གཞན་དག་ནི་ཚིག་འདི་གཉིས་ལ་འདི་སྐད་དུ་འཆད་དེ། ལས་དེ་དག་ཀྱང་ཕྲ་རྒྱས་ཀྱི་དབང་གིས་བསགས་པར་འགྱུར་ཞེས་བྱ་བ་ནི་ལས་མ་བྱས་པ་
[88a.3]གང་དག་ཡིན་པ་དེ་དག་ཕྲ་རྒྱས་ཀྱི་དབང་གིས་ཡང་སྲིད་པ་མངོན་པར་འགྲུབ་པར་སོགས་པར་འགྱུར་རོ་ཞེས་བྱ་བའི་ཐ་ཚིག་སྟེ། དགྲ་བཅོམ་པ་དག་ནི་ཡང་སྲིད་པ་མངོན་པར་འགྲུབ་པར་བྱ་བའི་ཕྱིར་ལས་རྣམས་སོགས་པར་མི་བྱེད་དོ། །ཕྲ་རྒྱས་མེད་པར་ནི་སྲིད་པ་མངོན་པར་འགྲུབ་པར་
[88a.4]མི་ནུས་ཞེས་བྱ་བ་ནི་བྱས་པ་གང་དག་ཡིན་པ་དེ་དག་ཀྱང་ཕྲ་རྒྱས་རྣམས་མེད་པར་སྲིད་པ་མངོན་པར་འགྲུབ་པར་མི་ནུས་ཏེ། དགྲ་བཅོམ་པ་དག་ལ་སོ་སོའི་སྐྱེ་བོའི་གནས་སྐབས་ན་བྱས་པ་ཡང་སྲིད་པ་པའི་ལས་དགེ་བའམ། མི་དགེ་བ་མ་ངེས་པ་དག་ནི་མེད་པ་མ་ཡིན་མོད་ཀྱི། ཕྲ་རྒྱས་མེད་པའི་
[88a.5]ཕྱིར་དེ་དག་གིས་སྲིད་པ་མངོན་པར་འགྲུབ་པར་མི་ནུས་སོ། །དེ་ལྟ་བས་ན་དེ་ལྟར་དོན་ཐ་དད་པར་བརྗོད་པས་ནི་ཞེས་བྱ་བ་ནི་བསྡུ་བའི་དོན་ཡིན་ནོ་ཞེའོ། །སྲིད་པའི་རྩ་བ་ཕྲ་རྒྱས་ཞེས་བྱ་བ་ནི་ཡང་སྲིད་པའམ། ལས་ཀྱི་སྲིད་པའི་རྩ་བ་ནི་ཕྲ་རྒྱས་རྣམས་ཡིན་ཏེ། དེ་སོགས་པ་དང་། ཀུན་ནས་
[88a.6]སློང་བའི་རྒྱུ་ཡིན་པའི་ཕྱིར་རོ་སྙམ་དུ་བསམས་པ་ཡིན་ནོ། །རྩ་བ་བརྟེན་པར་བྱེད་དོ་ཞེས་བྱ་བ་ལ་རྩ་བ་ནི་འདིར་ཐོབ་པ་ཡིན་ཏེ། དེ་རྒྱུན་མི་འཆད་པའི་དོན་གྱིས་བརྟན་པོར་བྱེད་དོ་ཞེས་བྱ་བའི་ཐ་ཚིག་གོ། །རྒྱུད་གནས་པར་བྱེད་དོ་ཞེས་བྱ་བ་ནི་ཉོན་མོངས་པའི་རྒྱུན་བརྒྱུད་པས་གནས་པར་བྱེད་དོ་ཞེས་
[88a.7]བྱ་བའི་དོན་ཏོ། །ཞིང་དུ་སྒྲུབ་པར་བྱེད་དོ་ཞེས་བྱ་བ་ནི་ལས་བདག་ཉིད་སྐྱེ་བ་དང་མཐུན་པར་བྱེད་དོ་ཞེས་བྱ་བའི་ཐ་ཚིག་གོ། །རྒྱུ་མཐུན་པ་སྒྲུབ་པར་བྱེད་དོ་ཞེས་བྱ་བ་ནི་རང་གི་རྒྱུ་མཐུན་པ་ཉེ་བའི་ཉོན་མོངས་པ་སྐྱེད་པར་བྱེད་པ་སྟེ། དཔེར་ན་འདོད་ཆགས་ཀྱིས་ནི་ངོ་ཚ་མེད་པ་དང་། རྒོད་པ་
[88b]
[88b.1]དང་། སེར་སྣ་དག་སྐྱེད་པར་བྱེད་ལ། ཞེ་སྡང་གིས་ནི་ཁྲོ་བ་དང་། ཕྲག་དོག་སྐྱེད་པར་བྱེད་དོ་ཞེས་བྱ་བ་ལ་སོགས་པ་ལྟ་བུའོ། །ལས་ཀྱི་སྲིད་པ་མངོན་པར་སྒྲུབ་པར་བྱེད་དོ་ཞེས་བྱ་བ་ནི་ལས་ཉིད་སྲིད་པ་ཡིན་པས་ལས་ཀྱི་སྲིད་པའོ། །དེ་ཡང་སྲིད་པ་མངོན་པར་འགྲུབ་པར་བྱ་བའི་ཕྱིར་སྐྱེད་པར་
[88b.2]བྱེད་དོ་ཞེས་བྱ་བའི་དོན་ཏེ། འདི་ནི་སྲིད་པའི་རྩ་བ་ཕྲ་རྒྱས་ཞེས་བྱ་བ་འདིས་དོན་བསྟན་པ་ཡིན་ནོ། །རང་གི་ཚོགས་ཡོངས་སུ་འཛིན་པར་བྱེད་དོ་ཞེས་བྱ་བ་ལ། རང་གི་ཚོགས་ནི་ཉོན་མོངས་པའི་ཚུལ་བཞིན་མ་ཡིན་པ་ཡིད་ལ་བྱེད་པའོ། །དེ་ཡོངས་སུ་འཛིན་པ་སྟེ། དེ་མ་འོངས་པའི་རྒྱུའི་
[88b.3]ངོ་བོར་གནས་པར་བྱེད་དོ་ཞེས་བྱ་བའི་ཐ་ཚིག་གོ། །དམིགས་པ་ལ་ཀུན་དུ་རྨོངས་པར་བྱེད་དོ་ཞེས་བྱ་བ་ནི་ཡང་དག་པ་ཇི་ལྟ་བ་བཞིན་མི་འཛིན་པའི་ཕྱིར་རམ། བློ་ཉམས་པར་བྱེད་པའི་ཕྱིར་ཀུན་དུ་རྨོངས་པར་བྱེད་པ་ཡིན་ནོ། །རྣམ་པར་ཤེས་པའི་རྒྱུན་འཁྲིད་པར་བྱེད་དོ་ཞེས་བྱ་བ་ནི་རྣམ་པར་
[88b.4]ཤེས་པའི་རྒྱུན་དམིགས་པའམ། ཡང་སྲིད་པར་འཁྲིད་པར་བྱེད་པ་སྟེ། གལ་ཏེ་སྲིད་པའི་རྩ་བ་ཕྲ་རྒྱས་ཞེས་བྱ་བ་ཡང་སྲིད་པ་ཡིན་པར་བཟུང་ན་ནི་འདི་དེའི་དཔེར་བརྗོད་པ་ཡིན་ནོ། །དགེ་བའི་ཕྱོགས་ལས་གཡོ་བར་བྱེད་དོ་ཞེས་བྱ་བ་ནི་དགེ་བའི་ཕྱོགས་ལས་ཡོངས་སུ་ཉམས་པར་བྱེད་
[88b.5]པའོ། །འཆིང་བའི་དོན་དུ་ཁྱབ་པར་བྱེད་དོ་ཞེས་བྱ་བ་ནི་འཆིང་བའི་ཆེད་དུ་ཁྱབ་པར་བྱེད་ཅིང་མཆེད་པར་བྱེད་དོ་ཞེས་བྱ་བའི་ཐ་ཚིག་གོ། །ཇི་ལྟ་ཞེ་ན། ཁམས་ལས་མི་འདའ་བའི་ཚུལ་གྱིས་ཞེས་བྱ་བ་སྨོས་ཏེ། ཁམས་ལས་མི་འདའ་བའི་རྣམ་པས་ཞེས་བྱ་བའི་དོན་ཏོ། །དེ་ནི་འདི་སྐད་
[88b.6]ཉོན་མོངས་པ་གང་ཞིག་ཁམས་གང་དུ་གཏོགས་པ་དེས་ནི་ཁམས་དེ་ལས་མི་འདའ་བར་བྱེད་དོ་ཞེས་བཤད་པ་ཡིན་ནོ། །འདོད་ཆགས་ཀྱི་དབང་གིས་གཞན་དག་ཅེས་བྱ་བ་ནི་དམིགས་པ་གང་ལ་འདོད་ཆགས་ཡོད་པ་དེ་ལ་ནི་ཁོང་ཁྲོ་བ་ལ་སོགས་པ་གཞན་དག་ཀྱང་རྒྱས་པར་འགྱུར་ཏེ། དེ་ཉིད་ཀྱི་
[88b.7]ཕྱིར་འདོད་ཆགས་ཀྱི་ཕྲ་རྒྱས་མེད་པས་ཟག་པ་མེད་པ་དང་། སྐལ་བ་མི་མཉམ་པའི་ཁམས་དག་ལ་ཉོན་མོངས་པ་རྒྱས་པར་མི་འགྱུར་རོ། །དེ་ནི་འོག་ནས་བཤད་པར་བྱའོ་ཞེས་བྱ་བ་ནི་དངོས་པོ་གང་ཞིག་བདག་ཏུ་ལྟ་བ་དང་སྲེད་པ་དག་གིས་བདག་གིར་བྱས་པ་ལ་
[89a]
[89a.1]ནི་ཕྲ་རྒྱས་གཞན་དག་ཀྱང་རྒྱས་པར་འགྱུར་ཏེ། རས་ཡུག་གཤེར་བ་ལ་རྡུལ་དག་འཆགས་པར་ནུས་པ་ལྟ་བུའོ་ཞེས་དེ་སྐད་དུ་བསྟན་པར་བྱའོ། །འོན་ཏེ་འདོད་པའི་འདོད་ཆགས་ཀྱི་ཕྲ་རྒྱས་ཡིན་པས་ཞེས་བྱ་བ་ལ་བྱེ་བྲག་ཏུ་སྨྲ་བའི་ལུགས་ཀྱིས་ནི་ཕྲ་
[89a.2]རྒྱས་ཀུན་ནས་དཀྲིས་པ་ཡིན་ནོ། །གནས་མའི་བུའི་སྡེ་པ་རྣམས་ཀྱི་ལྟར་ན་ནི་ཕྲ་རྒྱས་ཐོབ་པ་ཡིན་ནོ། །མདོ་སྡེ་པའི་ལུགས་ཀྱིས་ནི་ས་བོན་ཡིན་ནོ། །ཕྱིས་ངེས་པར་འབྱུང་བ་ཞེས་བྱ་བ་ནི་མཇུག་ཏུ་ངེས་པར་འབྱུང་བ་ཞེས་བྱ་བའི་ཐ་ཚིག་གོ། །མཐུས་ཡང་དག་པར་ཤིན་ཏུ་ཀུན་
[89a.3]ནས་འཇོམས་པ་ནི་མཚན་གྱིས་ཡང་དག་པར་ལེགས་པར་འཇོམས་ཞེས་བྱ་བའི་དོན་ཏོ། །འདིར་དཔེར་བརྗོད་པ་ནི། ཕྲ་རྒྱས་དང་བཅས་པར་སྤོང་བར་བྱེད་དོ་ཞེས་བྱ་བ་འདི་ཡིན་ནོ། །འདི་ལ་འགལ་བ་ནི་འདི་ཡིན་ཏེ། བཅས་པ་དང་ལྡན་པའི་ཚིག་བསྡུ་བ་ལ་ནི་གཞན་ཉིད་དུ་མཐོང་
[89a.4]སྟེ། དཔེར་ན་ལྷ་སྦྱིན་བུ་དང་བཅས་པ་ཞེས་བྱ་བ་ལྟ་བུའོ། །དེ་ལྟ་ཡིན་ན་ནི་མདོ་དང་འགལ་ལོ། །ཆོས་མངོན་པ་དང་འགལ་ལོ་ཞེས་བྱ་བ་ནི་འདོད་པའི་འདོད་ཆགས་ཀྱི་ཕྲ་རྒྱས་ནི་དབང་པོ་གསུམ་དང་མཚུངས་པར་ལྡན་པ་ཡིན་ནོ། །གསུམ་གང་ཞེ་ན། བདེ་བ་དང་། ཡིད་བདེ་བ་
[89a.5]དང་། བཏང་སྙོམས་ཀྱི་དབང་པོ་དག་དང་མཚུངས་པར་ལྡན་ནོ་ཞེས་འབྱུང་བ་འདི་ལ་ལྡན་པ་མ་ཡིན་པ་ཐོབ་པའི་མཚན་ཉིད། དབང་པོ་གསུམ་པོ་དེ་དག་དང་མཚུངས་པར་ལྡན་པར་ཐལ་བར་འགྱུར་བས་བསྟན་བཅོས་དང་འགལ་བ་ཡིན་ནོ། །ཕྲ་རྒྱས་དང་བཅས་པ་ནི་རྗེས་སུ་འབྲེལ་པ་
[89a.6]དང་བཅས་པ་ཞེས་བྱ་བའི་དོན་ཡིན་པའི་ཕྱིར་རོ་ཞེས་བྱ་བ་ནི་འདོད་པའི་འདོད་ཆགས་ཀྱི་རྗེས་སུ་འབྲེལ་པ་ནི་ཕྲ་རྒྱས་ཀྱི་སྒྲར་གསུངས་ཏེ། རྗེས་སུ་འབྲེལ་པ་ཡང་ཉོན་མོངས་པ་གཞན་སྐྱེ་བ་དང་མཐུན་པར་གནས་པ་ཡིན་ནོ། །ཡང་ན་ཕྲ་རྒྱས་རང་རྗེས་སུ་འཇུག་པ་ཡིན་ཏེ། ཕྲ་རྒྱས་
[89a.7]དང་བཅས་པར་སྤོང་བར་བྱེད་པ་ནི་ཉོན་མོངས་པ་དེ་ཡང་རྗེས་སུ་མི་འཇུག་པར་བྱེད་ཅེས་བྱ་བའི་དོན་ཏོ། །ཡང་ན་མདོ་ལས་ཕྲ་རྒྱས་ཞེས་བྱ་བའི་སྒྲ་འབྱུང་བ་ནི་ཐོབ་པ་ལ་ཉེ་བར་བཏགས་པ་ཡིན་ཏེ་ཞེས་བྱ་བ་ནི་ཉེ་བར་བཏགས་པ་ལ་ཡོད་པ་ནི་ཉེ་བར་བཏགས་པ་པའོ། །གང་ལ་ཉེ་བར་
[89b]
[89b.1]བཏགས་པ་ཡིན་ཞེ་ན། དེའི་ཕྱིར་ཐོབ་པ་ལ་ཞེས་བྱ་བ་སྨོས་སོ། །ཕྲ་རྒྱས་ཞེས་བྱ་བའི་སྒྲ་དངོས་སུ་ནི་ཀུན་ནས་དཀྲིས་པ་ལ་འཇུག་གོ། །ཉེ་བར་གདགས་པས་ནི་ཐོབ་པ་ལ་འཇུག་སྟེ། དེ་ནི་ཕྲ་རྒྱས་ཀྱི་རྒྱུར་གྱུར་པའི་ཕྱིར་རོ། དཔེར་ན་སྡུག་བསྔལ་གྱི་ཚོར་བའི་རྒྱུ་ཡིན་པའི་ཕྱིར་མེ་
[89b.2]སྡུག་བསྔལ་ཞེས་བྱ་བ་དེ་དང་འདྲའོ། །ཆོས་མངོན་པ་ལས་ཕྲ་རྒྱས་ཞེས་བྱ་བའི་སྒྲ་འབྱུང་བ་ནི་ཉོན་མོངས་པ་ཁོ་ན་མཚན་ཉིད་པ་ཡིན་ཏེ་ཞེས་བྱ་བ་ནི་མཚན་ཉིད་ལ་ཡོད་པའམ། མཚན་ཉིད་ཀྱིས་རྩེན་པ་ནི་མཚན་ཉིད་པའོ། །མཚན་ཉིད་པ་གང་ལ་ཡིན་ཞེ་ན། དེའི་ཕྱིར། ཉོན་
[89b.3]མོངས་པ་ཁོ་ན་ལ་ཞེས་བྱ་བ་སྨོས་སོ། །དམིགས་པ་དང་མཚུངས་པར་ལྡན་པའི་སྒོ་ནས་རྒྱས་པར་འགྱུར་བས་དེ་ལྟ་བས་ན་ཕྲ་རྒྱས་རྣམས་ནི་མཚུངས་པར་ལྡན་པ་ཁོ་ན་ཡིན་ནོ། །དོན་འདི་ལ་ནི། སེམས་ནི་ཉོན་མོངས་མེད་ཕྱིར་དང་། །སྒྲིབ་ཕྱིར་དགེ་དང་འགལ་ཕྱིར་དང་། །དགེ་བའང་
[89b.4]དམིགས་པའི་ཕྱིར་ན་འདིར། །ཕྲ་རྒྱས་ལྡན་པ་མ་ཡིན་མིན། །ཞེས་བྱ་བའི་ཚིགས་སུ་བཅད་པ་དཔེར་རྗོད་པར་བྱེད་དེ། སེམས་ནི་ཉོན་མོངས་བྱེད་ཕྱིར་ཞེས་བྱ་བ་འདིའི་འགྲེལ་པ་ནི། གང་གི་ཕྱིར་ཕྲ་རྒྱས་རྣམས་ཀྱིས་སེམས་ཉོན་མོངས་པ་ཅན་དུ་འགྱུར་ཞེས་བྱ་བ་འདི་ཡིན་ཏེ། ལྡན་པ་
[89b.5]མ་ཡིན་པ་རྣམས་ཀྱིས་ནི་སེམས་ནི་ཉོན་མོངས་པ་ཅན་དུ་འགྱུར་མི་སྲིད་དོ། །སྒྲིབ་ཕྱིར་ཞེས་བྱ་བའི་ཚིག་འདིའི་འགྲེལ་པ་ནི། སྔོན་མེད་པའི་དགེ་བ་མི་སྐྱེ་བ་ཞེས་བྱ་བ་ཡིན་ཏེ། ཕྲ་རྒྱས་དང་བཅས་པའི་སེམས་ལ་ནི་སྔོན་མེད་པའི་དགེ་བ་མི་སྐྱེའོ། །དགེ་དང་འགལ་ཕྱིར་ཞེས་བྱ་བའི་ཚིག་
[89b.6]འདིའི་འགྲེལ་པ་ནི། སྐྱེས་པ་ལས་ཀྱང་ཡོངས་སུ་ཉམས་པར་འགྱུར་ཞེས་བྱ་བ་ཡིན་ནོ། །ཕྲ་རྒྱས་རྣམས་ནི་དགེ་བ་དག་དང་འགལ་ཏེ། གང་གི་ཕྱིར་དགེ་བ་སྐྱེས་པ་ལས་ཡོངས་སུ་ཉམས་པར་འགྱུར་བ་དེའི་ཕྱིར་ཕྲ་རྒྱས་རྣམས་ནི་དགེ་བ་དག་དང་འགལ་ལོ། །དེའི་ཕྱིར་ལྡན་པ་མ་ཡིན་པ་མ་
[89b.7]ཡིན་ནོ་ཞེས་བྱ་བ་ནི་གང་གི་ཕྱིར་སེམས་ལ་དེ་དག་མེད་པར་ནི་ཇི་སྐད་བཤད་པའི་ཉོན་མོངས་པ་ཅན་ལ་སོགས་པ་མི་སྲིད་ལ། མཚུངས་པར་ལྡན་པ་དག་གིས་ནི་དེ་ཐམས་ཅད་རུང་བར་འགྱུར་བས་སོ། །འོན་ཏེ་ལྡན་པ་མ་ཡིན་པ་རྣམས་ཀྱིས་ཀྱང་དེ་ལྟར་འགྱུར་ན་ནི་ཞེས་བྱ་བ་ནི་ལྡན་པ་མ་ཡིན་པ་རྣམས་
[90a]
[90a.1]ཀྱིས་ཀྱང་སེམས་ཉོན་མོངས་པ་ཅན་དུ་འགྱུར་བ་དང་སྔོན་མེད་པའི་དགེ་བ་མི་སྐྱེ་བ་དང་། སྐྱེས་པ་ལས་ཀྱང་ཡོངས་སུ་ཉམས་པར་འགྱུར་ནའོ། །གལ་ཏེ་དེ་ལྟ་ན་ནི་ལྡན་པ་མ་ཡིན་པ་དེ་དག་རྟག་ཏུ་ཉེ་བའི་ཕྱིར་དགེ་བ་རྣམས་ཀྱང་དམིགས་པར་མི་འགྱུར་བ་ཞིག་སྟེ། འདི་
[90a.2]ལྟར་ལྡན་པ་མ་ཡིན་པ་དེ་དག་ནི་ཉོན་མོངས་པ་ཅན་གྱི་གནས་སྐབས་དང་། གཞན་གྱི་གནས་སྐབས་ན་ཡང་ཡོད་དོ། །དགེ་བ་ནི་དམིགས་ཀྱང་དམིགས་ཏེ། དེ་བས་ན། དགེ་བའང་དམིགས་པའི་ཕྱིར་ན་འདིར། །ཕྲ་རྒྱས་ལྡན་པ་མ་ཡིན་མིན། །ཞེས་བྱ་བ་ནི་གནས་པ་ཡིན་ནོ། །སློབ་
[90a.3]དཔོན་གྱིས་བྱེ་བྲག་ཏུ་སྨྲ་བ་རྣམས་ཀྱིས། སེམས་ནི་ཉོན་མོངས་བྱེད་ཕྱིར་དང་། །ཞེས་བྱ་བ་ལ་སོགས་པ་སྨོས་པ་གང་ཡིན་པ་འདི་གཏན་ཚིགས་སུ་མི་རུང་སྟེ་ཞེས་བྱ་བ་སྨྲས་སོ། །གང་ཞིག་ཕྲ་རྒྱས་ལྡན་པ་མ་ཡིན་པར་འདོད་པ་ཞེས་བྱ་བ་ནི་གནས་མའི་བུའི་སྡེ་པའོ། །འདི་ཐམས་ཅད་ཅེས་བྱ་
[90a.4]བ་ནི་སེམས་ཉོན་མོངས་པ་ཅན་ལ་སོགས་པའོ། །ཉོན་མོངས་པས་བྱས་པ་ཁོ་ནར་འདོད་དོ་ཞེས་བྱ་བ་ནི་ཀུན་ནས་དཀྲིས་པས་བྱས་པ་ཁོ་ནར་ཞེས་བྱ་བའི་ཐ་ཚིག་སྟེ། ཀུན་ནས་དཀྲིས་པ་ནི་རྟག་ཏུ་ཉེ་བ་མ་ཡིན་པས་དགེ་བ་དམིགས་པ་འགྲུབ་པོ། །འདོད་པའི་འདོད་ཆགས་ཀྱི་ཕྲ་རྒྱས་ནི་
[90a.5]ཞེས་བྱ་བའི་ཕྱོགས་ཡོངས་སུ་བཟུང་ན་ཕྲ་རྒྱས་དང་བཅས་པར་སྤོང་བར་བྱེད་དོ་ཞེས་བྱ་བའི་མདོ་དང་ནི་འགལ་བ་མེད་མོད་ཀྱི། འོན་ཀྱང་ཕྲ་རྒྱས་ལྡན་པ་མ་ཡིན་པ་ཡིན་ནོ་ཞེས་བྱ་བར་འགྱུར་བས་དེའི་ཕྱིར་ཕྲ་རྒྱས་ནི་མཚུངས་པར་ལྡན་པ་ཡང་མ་ཡིན་ལ། ལྡན་པ་མ་ཡིན་པ་ཡང་མ་
[90a.6]ཡིན་ནོ་ཞེས་བྱ་བ་སྨོས་སོ། །ཇི་ལྟར་ཞེ་ན། དེ་རྫས་གཞན་མ་ཡིན་པའི་ཕྱིར་ཞེས་བྱ་བ་སྨོས་ཏེ། ནུས་པའི་ངོ་བོའི་ས་བོན་ནི་འདོད་ཆགས་ལ་སོགས་པ་ལས་དོན་གཞན་མ་ཡིན་པའི་ཕྱིར་རོ། །ལུས་དེ་རྟེན་གྱི་ཉོན་མོངས་པ་ལས་སྐྱེས་པ་ཉོན་མོངས་པ་སྔར་བྱུང་བས་བསྐྱེད་པ་ཉོན་མོངས་
[90a.7]པ་བསྐྱེད་པའི་མཐུ་ཡིན་ཏེ། ཉོན་མོངས་པ་སྐྱེད་པར་བྱེད་པའི་མཐུ་ཡིན་ནོ། །དཔེར་ན་ཉམས་སུ་མྱོང་བའི་ཤེས་པ་ལས་སྐྱེས་པ་དྲན་པ་སྐྱེས་པའི་མཐུ་རྫས་གཞན་དུ་གྱུར་པ་མ་ཡིན་པ་དེ་དང་འདྲའོ། །ལ་ལ་དྲན་པ་སྐྱེད་པའི་རྒྱུ་ལྡན་པ་མ་ཡིན་པ་རྫས་གཞན་ཞིག་ཡིན་པར་འདོད་པར་
[90b]
[90b.1]དོགས་ནས། ཡང་དཔེར་ན་མྱུ་གུ་ལ་སོགས་པའི་ཞེས་བྱ་བ་རྒྱས་པ་དཔེ་གཞན་ཉེ་བར་འགོད་དེ། དཔེར་ན་མྱུ་གུ་ལ་སོགས་པའི་སཱ་ལུའི་འབྲས་བུ་སྔར་བྱུང་བ་ལས་སྐྱེས་པ་སཱ་ལུའི་འབྲས་བུ་གཞན་སྐྱེད་པར་བྱེད་པའི་མཐུ་རྫས་གཞན་དུ་གྱུར་པ་མ་ཡིན་པ་དེ་དང་འདྲའོ། །གང་ཞིག་
[90b.2]ཅེས་བྱ་བ་ནི་གནས་མའི་བུའི་སྡེ་པའོ། །གལ་ཏེ་ཉོན་མོངས་པའི་ཕྲ་རྒྱས་ཞེས་བྱ་བར་འདོད་ན་འོ་ན་མདོ་ལས་ཉོན་མོངས་པ་ཉིད་ཕྲ་རྒྱས་སུ་གང་གསུངས་པ་དེ་ཇི་ལྟ་བུ་སྟེ། དྲུག་ཚན་དྲུག་པའི་མདོ་ལས། གང་ཟག་འདིའི་འདོད་ཆགས་དེ་བདེ་བའི་ཚོར་བ་ལ་རྒྱས་པར་འགྱུར་རོ་ཞེས་
[90b.3]གསུངས་སོ། །འདོད་ཆགས་ཁོ་ན་ཕྲ་རྒྱས་ཡིན་ཏེ། བདེ་བའི་ཚོར་བའི་གནས་སྐབས་ན་འདོད་ཆགས་ཀུན་དུ་འབྱུང་བ་ལ་དེ་སྐད་དུ་གསུངས་ཀྱི། དེའི་ས་བོན་ནི་མ་ཡིན་ནོ་སྙམ་དུ་བསམས་པ་ཡིན་ནོ། །འགྱུར་རོ་ཞེས་གསུངས་པའི་ཕྱིར་དེ་ཁོ་ན་ན་ནི་ཕྲ་རྒྱས་མ་ཡིན་ནོ་ཞེས་བྱ་བ་ནི་འགྱུར་
[90b.4]རོ་ཞེས་འབྱུང་བས་དེ་ནི་འདོད་ཆགས་ཀྱི་ཕྲ་རྒྱས་ཁོ་ན་ཡིན་གྱི། འདོད་ཆགས་ནི་མ་ཡིན་ནོ། །གནས་སྐབས་དེ་ན་འདོད་ཆགས་དེའི་ཕྲ་རྒྱས་སྐྱེ་བར་འགྱུར་བས་ས་བོན་སྐྱེ་བར་འགྱུར་བ་ཡིན་གྱི། སྐྱེས་པ་ནི་མ་ཡིན་པས་དེར་ནི་ས་བོན་འབྱུང་བར་འགྱུར་བའི་གནས་སྐབས་བརྗོད་པ་
[90b.5]ཡིན་ནོ་སྙམ་དུ་བསམ་པའོ། །འོ་ན་ནམ་འགྱུར་ཞེ་ན་ཞེས་བྱ་བ་ནི་ནམ་ཞིག་ཕྲ་རྒྱས་ཡོད་ཅེས་བྱ་བའི་ཐ་ཚིག་གོ། །གང་གི་ཚེ་ཉལ་བ་ན་འགྱུར་རོ་ཞེས་བྱ་བ་ནི་གང་གི་ཚེ་ཞིག་པ་ན་འགྱུར་རོ་ཞེས་བྱ་བའི་དོན་ཏོ། །ཡང་ན་འདི་ནི་རྒྱུ་ལ་ཉེ་བར་བཏགས་པ་ཡིན་ཞེས་བྱ་བ་ནི་རྒྱུ་འདོད་ཆགས་ལ་ཕྲ་རྒྱས་ཉེ་བར་
[90b.6]བཏགས་པ་ཡིན་ནོ། །འདོད་ཆགས་ནི་འདོད་ཆགས་ཀྱི་ཕྲ་རྒྱས་ཀྱི་རྒྱུ་ཡིན་ཏེ། འདི་ལྟར་འདོད་ཆགས་སྐྱེད་པའི་ནུས་པ་འདོད་ཆགས་ལས་སྐྱེས་པ་ལ་འདོད་ཆགས་ཀྱི་ཕྲ་རྒྱས་ཞེས་བཤད་དོ། །དེ་ནི་འདི་སྐད་དུ་ཕྲ་རྒྱས་ཞེས་བྱ་བའི་སྒྲ་ཁ་ཅིག་ཏུ་ནི་ས་བོན་ལ་བྱ་ལ། ཁ་ཅིག་ཏུ་ནི་ཀུན་ནས་དཀྲིས་
[90b.7]པ་ལ་བྱའོ་ཞེས་བཤད་པ་ཡིན་ནོ། །དེ་དག་ནི་ཕལ་ཆེར་སྙོམས་པར་འཇུག་པ་ལ་འདོད་ཆགས་པ་ཡིན་ལ་ཞེས་བྱ་བ་ནི་དེ་དག་ཕལ་ཆེར་རོ་མྱང་བ་དང་མཚུངས་པར་ལྡན་པའི་བསམ་གཏན་ལ་འདོད་ཆགས་པ་ཡིན་ནོ། །གཞལ་མེད་ཁང་ལ་སོགས་པ་ལ་འདོད་ཆགས་པ་ཡང་ཡོད་པས་དེའི་ཕྱིར་ཕལ་
[91a]
[91a.1]ཆེར་ཞེས་བྱ་བ་སྨོས་སོ། །དེ་ཡང་ཁ་ནང་དུ་བལྟས་པ་ཡིན་ཏེ། མཉམ་པར་གཞག་པའི་ངོ་བོ་ཡིན་པའི་ཕྱིར་རོ། །དེ་ལྟར་ཡིན་ན་ཐར་པའི་འདུ་ཤེས་ཉེ་བར་གནས་པར་འགྱུར་བ། བཅོམ་ལྡན་འདས་ཀྱིས་དེ་ལ་འདུན་པ་བཟློག་པའི་ཕྱིར་འདོད་པའི་འདོད་ཆགས་དང་།
[91a.2]སྲིད་པའི་འདོད་ཆགས་ཞེས་བྱ་བ་དེ་ལྟ་བུ་ལ་སོགས་པ་བསྟན་ཏོ། །དེ་ནི་སྲིད་པ་ལ་འདོད་ཆགས་པ་ཡིན་གྱི། དེ་ཐར་པ་ལ་ནི་མ་ཡིན་ཏེ། ཐར་པ་ལ་ནི་དགེ་བའི་ཆོས་ལ་འདུན་པ་ཡིན་ནོ། །ལུས་ཁོ་ན་སྲིད་པ་ཡིན་ཞེས་བྱ་བ་ནི་སློབ་དཔོན་གྱི་གཞུང་ལུགས་ཡིན་ནོ་སྙོམས་པར་འཇུག་པ་རྟེན་
[91a.3]དང་བཅས་པ་ཞེས་བྱ་བ་ནི་སྙོམས་པར་འཇུག་པ་ལུས་དང་བཅས་པའོ། །རོ་མྱོང་བར་བྱེད་པ་ནི་འདོད་པའི་འདོད་ཆགས་དང་བྲལ་བའི་ཕྱིར་ལུས་ཁོ་ན་རོ་མྱོང་བར་བྱེད་པ་ཡིན་གྱི། འདོད་པའི་ཡོན་ཏན་དག་ནི་མ་ཡིན་ནོ། །དེའི་ཕྱིར་འདོད་ཆགས་དེ་ནི་སྲིད་པའི་འདོད་ཆགས་ཞེས་བཤད་ཀྱི་འདོད་
[91a.4]པའི་འདོད་ཆགས་ཞེས་ནི་མ་ཡིན་ནོ་ཞེས་སྟོན་པར་བྱེད་དོ། །ཆོས་མངོན་པ་ལས་ཞེས་བྱ་བ་ནི་མདོ་ལས་ནི་མ་ཡིན་ནོ་སྙམ་དུ་བསམ་པ་ཡིན་ནོ། །ཀུན་འབྱུང་བ་མཐོང་བས་སྤང་བར་བྱ་བ་བདུན་ཞེས་བྱ་བ་ནི་འཇིག་ཚོགས་ལ་ལྟ་བ་ནི་འབྲས་བུར་གྱུར་པ་ཉེ་བར་ལེན་པའི་ཕུང་པོ་ལྔ་ལ་དམིགས་
[91a.5]པར་བྱེད་པ་ཡིན་པས་སྡུག་བསྔལ་མཐོང་བས་སྤང་བར་བྱ་བ་ཁོ་ན་ཡིན་ནོ། །དེ་བཞིན་དུ་མཐར་འཛིན་པར་ལྟ་བ་ཡང་ཕུང་པོ་དེ་དག་ཉིད་ལ་རྟག་པ་དང་ཆད་པའི་མཐར་འཛིན་པའི་ཕྱིར་ལ། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཡང་ཕུང་པོ་དེ་དག་ཉིད་ལ་འདག་པ་དང་གྲོལ་
[91a.6]བ་དང་ངེས་པར་འབྱུང་བར་དམིགས་པར་བྱེད་པ་ཡིན་པས་ན་ཀུན་འབྱུང་བ་མཐོང་བས་སྤང་བར་བྱ་བ་མ་ཡིན་ཏེ། དེ་བཞིན་དུ་འགོག་པ་མཐོང་བས་སྤང་བར་བྱ་བ་ལ་ཡང་སྦྱར་བར་བྱའོ། །ལམ་མཐོང་བས་སྤང་བར་བྱ་བ་ནི་བརྒྱད་དེ་ཞེས་བྱ་བ་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་
[91a.7]འཛིན་པས་བསྣན་ཏེ། ལམ་གྱིས་འདག་པར་འགྱུར་བ་དེ་བོར་ནས་གཞན་ཚུལ་ཁྲིམས་དང་བརྟུལ་ཞུགས་ཀྱིས་འདག་འདག་པར་ཡིད་ཆེས་པས་ལོག་པར་ཞུགས་པའི་ཕྱིར་ལམ་མཐོང་བས་སྤང་བར་བྱ་བ་ཡིན་ནོ། །ཉོན་མོངས་པ་གང་ཞིག་བདེན་པ་གང་ལ་སྐུར་པ་འདེབས་པར་
[91b]
[91b.1]ཞུགས་པ་དེ་ནི་དེ་མཐོང་ན་སྤོང་བར་འགྱུར་ཏེ། ཐག་པར་མཐོང་བས་སྦྲུལ་དུ་འཁྲུལ་པ་བཞིན་ནོ། །བདེན་པ་རྣམས་མཐོང་བ་ཙམ་གྱིས་སྤོང་བའི་ཕྱིར་རོ་ཞེས་བྱ་བ་ནི་གོམས་པས་སྤོང་བ་མ་ཡིན་པའི་ཕྱིར་རོ་སྙམ་དུ་བསམ་པ་ཡིན་ནོ། །བདེན་པ་མཐོང་བ་ཕྱིས་ལམ་གོམས་
[91b.2]པར་བྱས་པས་སྤོང་བའི་ཕྱིར་ཅི་ཞེ་ན། དེ་དག་ནི་བསྒོམ་པས་སྤང་བར་བྱ་བ་ཡིན་ནོ་ཞེས་བྱ་བར་སྐབས་དང་སྦྱར་རོ། །དེ་ལྟར་ན་སྒོམ་པ་ནི་གོམས་པ་ཡིན་ཏེ། ཡང་དང་ཡང་དུ་སྐྱེད་པར་བྱེད་པ་ཞེས་བྱ་བའི་ཐ་ཚིག་གོ། །དེ་དག་ནི་ཇི་ལྟ་བུ་ཡིན་ཞེས་བྱ་བ་ནི་འདོད་ཆགས་ལ་
[91b.3]སོགས་པ་ཉོན་མོངས་པ་བཞི་ལ་རྟག་པ་ཡིན་ཏེ། འདོད་ཆགས་དང་། ཁོང་ཁྲོ་བ་དང་། ང་རྒྱལ་དང་། མ་རིག་པ་དེ་དག་ནི་བཤད་མ་ཐག་པ་ཡིན་ལ། དེ་དག་ཀྱང་འདི་དག་ནི་མཐོང་བས་སྤང་བར་བྱའོ། །འདི་དག་ནི་བསྒོམ་པས་སྤང་བར་བྱའོ་ཞེས་བྱ་བར་ཡོངས་སུ་གཅད་པར་
[91b.4]དཀའ་བས་སོ། །འཇིག་ཚོགས་ལ་སོགས་པ་ལ་སེམས་པར་བྱེད་པས་ནི་མ་ཡིན་ཏེ། གང་དག་སྡུག་བསྔལ་གྱི་བདེན་པ་ལ་ལོག་པར་ཞུགས་པ་དེ་དག་ནི་སྡུག་བསྔལ་གྱི་བདེན་པ་མཐོང་བས་སྤང་བར་བྱ་བ་ཡིན་ལ། དེ་བཞིན་དུ་གང་དག་ལམ་ལ་ལོག་པར་ཞུགས་པ་དེ་དག་ནི་ལམ་མཐོང་
[91b.5]བས་སྤང་བར་བྱ་བ་ཡིན་ནོ་ཞེས་བྱ་བའི་བར་དུ་དེ་ལྟ་བུར་ཡོངས་སུ་བཅད་སླ་བའི་ཕྱིར་རོ། །དེ་ལ་གང་དག་ཅེས་བྱ་བ་ནི་འདོད་ཆགས་ལ་སོགས་པའོ། །གང་ཞིག་མཐོང་བ་ནི་བདེན་པ་གང་ཞིག་མཐོང་བ་སྟེ། འདི་དག་ལ་གང་ཞིག་མཐོང་བས་སྤང་བར་བྱ་བའི་དམིགས་པ་ཡོད་པས་དེ་དག་ནི་གང་ཞིག་
[91b.6]མཐོང་བས་སྤང་བར་བྱ་བའི་དམིགས་པ་ཅན་ཡིན་ནོ། །དེ་དག་ནི་དེ་མཐོང་བས་སྤང་བར་བྱ་བའི་ཡིན་ཞེས་བྱ་བ་ནི་འདོད་ཆགས་ལ་སོགས་པ་དེ་དག་གོ། །དེ་མཐོང་བ་ནི་བདེན་པ་དེ་མཐོང་བའོ། །དེ་མཐོང་བས་སྤང་བར་བྱ་བ་ནི་དེ་མཐོང་བས་སྤང་བར་བྱ་བ་ཡིན་ཏེ། འདི་སྐད་དུ་འདོད་ཆགས་ལ་
[91b.7]སོགས་པ་གང་དག་སྡུག་བསྔལ་མཐོང་བས་སྤང་བར་བྱ་བ་ནས་ལམ་མཐོང་བས་སྤང་བར་བྱ་བའི་བར་གྱི་ཉོན་མོངས་པ་ལ་དམིགས་པར་བྱེད་པ་དེ་དག་ནི་དེ་མཐོང་བས་སྤང་བར་བྱ་བ་ཡིན་ནོ་ཞེས་བཤད་པ་ཡིན་ནོ། །མ་རིག་པའི་ཕྲ་རྒྱས་ནི་འཕགས་པའི་བདེན་པ་བཞི་ཆར་ལ་ཡང་དམིགས་པ་ཅན་ཡང་
[92a]
[92a.1]ཡིན་པས་གང་ཞིག་གི་དམིགས་པ་ཅན་དང་། གང་ཞིག་མཐོང་བས་སྤང་བར་བྱ་བའི་དམིགས་པ་ཅན་ཞེས་བརྗོད་དགོས་སོ་ཞེ་ན། གཅིག་བསྡུས་པའི་ཚུལ་གྱིས་འགྲུབ་པའི་ཕྱིར་བརྗོད་པར་བྱ་མི་དགོས་ཏེ། འདི་དག་ལ་བདེན་པ་གང་ཞིག་དང་གང་ཞིག་མཐོང་བས་
[92a.2]སྤང་བར་བྱ་བའི་ཉོན་མོངས་པ་ལ་དམིགས་པ་ཡོད་པས་འདི་དག་ནི་གང་ཞིག་མཐོང་བས་སྤང་བར་བྱ་བའི་དམིགས་པ་ཅན་ཏེ། དེ་དག་ནི་དེ་མཐོང་བས་སྤང་བར་བྱ་བ་ཡིན་ནོ། །མ་རིག་པའི་ཕྲ་རྒྱས་ཀུན་དུ་འགྲོ་བ་ཀུན་འབྱུང་བ་མཐོང་བས་སྤང་བར་བྱ་བ་ཡང་རིས་ལྔ་ཆར་ལ་དམིགས་པ་ཡིན་
[92a.3]པའི་ཕྱིར་སྡུག་བསྔལ་དང་འགོག་པ་ལ་སོགས་པའི་བདེན་པ་མཐོང་བས་སྤང་བར་བྱ་བ་ལ་སོགས་པ་ལ་ཡང་དམིགས་པ་མ་ཡིན་ནམ། དེའི་ཕྱིར་འདི་སྡུག་བསྔལ་དང་འགོག་པ་ལ་སོགས་པའི་བདེན་པ་མཐོང་བས་སྤང་བར་བྱ་བ་ཉིད་དུ་ཐལ་བར་འགྱུར་རོ་ཞེ་ན། དེ་ནི་ཉེས་པ་མེེད་དེ།
[92a.4]རིས་ལྔ་ཆར་ལ་དམིགས་པ་ཡིན་མོད་ཀྱི། རིས་དེ་རྣམས་ལ་ཀུན་འབྱུང་བའི་ངོ་བོའི་རྣམ་པར་དམིགས་པར་བྱེད་པས། དེས་ན་དེ་ལྟར་དམིགས་པའི་ཕྱིར་དེ་ནི་ཀུན་འབྱུང་བ་མཐོང་བས་སྤང་བར་བྱ་བ་ཁོ་ན་ཡིན་ནོ། །དེ་བཞིན་དུ་སྡུག་བསྔལ་མཐོང་བས་སྤང་བར་བྱ་བ་ལ་ཡང་སྦྱར་བར་བྱའོ། །དེ་
[92a.5]ལྟ་ཡིན་ན་གང་དག །གང་དག་གང་ཞིག་མཐོང་བས་སྤང་བར་བྱ་བའི་དམིགས་པ་ཅན་ཞེས་བྱ་བ་ནི་མཐོང་བས་སྤང་བར་བྱ་བ་ཐམས་ཅད་ཀྱི་དབང་དུ་བྱས་པ་ཡིན་གྱི། འདོད་ཆགས་ལ་སོགས་པ་འབའ་ཞིག་ཏུ་མ་ཟད་དོ་ཞེས་འཆད་པར་བྱེད་པ་དེ་དག་གི་རྣམ་པར་བཤད་པ་ལ་ཡང་བརྒལ་བའི་
[92a.6]ལན་ནི་དེ་གཉིས་ཁོ་ན་བརྗོད་དགོས་སོ། །དེ་ལྟར་ན་ཆོས་མངོན་པ་དག་ནི་ཕྲ་རྒྱས་དྲུག་པོ་དེ་དག་ཅེས་བྱ་བ་རྒྱས་པར་འབྱུང་བ་ལ། རྣམ་པ་དང་བྱེ་བྲག་དང་ཁམས་ཀྱི་དབྱེ་བས་ཞེས་བྱ་བ་ནི་ཕྲ་རྒྱས་བཅུ་ལ། རྣམ་པའི་དབྱེ་བ་ནི། བདག་དང་བདག་གི་རྟག་ཆད་དང་། །མེ་དང་དམན་ལ་མཆོག་
[92a.7]ལྟ་དང་། །ཞེས་བྱ་བ་དེ་ལྟ་བུ་ལ་སོགས་པའོ། །བྱེ་བྲག་གི་དབྱེ་བ་ནི་སྡུག་བསྔལ་མཐོང་བས་སྤང་བར་བྱ་བའི་རིས་ནས་བསྒོམ་པས་སྤང་བར་བྱ་བའི་བར་ཡིན་ནོ། །ཁམས་ཀྱི་དབྱེ་བ་ནི་འདོད་པ་ན་སྤྱོད་པ་དང་། གཟུགས་ན་སྤྱོད་པ་དང་། གཟུགས་མེད་པ་ན་སྤྱོད་པའོ། །དེ་ལ་འདོད་ཆགས་ཀྱི་
[92b]
[92b.1]ཕྲ་རྒྱས་ནི་བྱེ་བྲག་དང་། ཁམས་ཀྱི་དབྱེ་བ་དག་གིས་རྣམ་པ་བཅོ་ལྔ་ཡིན་ནོ། །དེ་ལ་ཕན་ཚུན་རྣམ་པ་ཐ་དད་པ་ནི་མེད་དོ། །འདོད་ཆགས་ནི་ཐམས་ཅད་ཆགས་པའི་རྣམ་པ་ཡིན་པས་སོ། །དེ་ལྟ་བས་ན་རྣམ་པའི་དབྱེ་བས་ནི་རྣམ་པར་མི་གཞོག་གོ། །ཁོང་ཁྲོ་བའི་ཕྲ་རྒྱས་ནི་བྱེ་བྲག་
[92b.2]གི་དབྱེ་བས་རྣམ་པ་ལྔ་ཡིན་ནོ། །ཕན་ཚུན་རྣམ་པ་ཐ་དད་པ་ནི་མེད་དེ། ཐམས་ཅད་ཁོང་ཁྲོ་བའི་རྣམ་པ་ཡིན་པའི་ཕྱིར་རོ། །ཁམས་ཀྱི་དབྱེ་བ་ཡང་མེད་དེ། གཟུགས་དང་གཟུགས་མེད་པའི་ཁམས་དག་ན་དེ་མེད་པའི་ཕྱིར་རོ། །ང་རྒྱལ་གྱི་ཕྲ་རྒྱས་ནི་བྱེ་བྲག་དང་ཁམས་ཀྱི་དབྱེ་བ་དག་
[92b.3]གིས་རྣམ་པ་བཅོ་ལྔ་ཡིན་ནོ། །རྣམ་པའི་དབྱེ་བ་ནི་མེད་དེ། ཐམས་ཅད་ཁེངས་པའི་རྣམ་པ་ཡིན་པའི་ཕྱིར་རོ། །དེ་བཞིན་དུ་མ་རིག་པའི་ཕྲ་རྒྱས་དག་ཀྱང་དེ་དག་ཁོ་ནས་རྣམ་པ་བཅོ་ལྔ་ཡིན་ནོ། །རྣམ་པའི་དབྱེ་བ་ནི་མེད་དེ། ཐམས་ཅད་མི་གསལ་བའི་རྣམ་པ་ཡིན་པའི་ཕྱིར་རོ། །དེ་
[92b.4]དག་ཉིད་ཀྱི་ཐེ་ཚོམ་རྣམ་པ་བཅུ་གཉིས་ཡིན་ནོ། །རྣམ་པའི་དབྱེ་བ་ནི་མེད་དེ། ཐམས་ཅད་ཐེ་ཚོམ་ཟ་བའི་རྣམ་པ་ཡིན་པའི་ཕྱིར་རོ། །ལྟ་བའི་ཕྲ་རྒྱས་ནི་རྣམ་པ་དང་། བྱེ་བྲག་དང་། ཁམས་ཀྱི་དབྱེ་བས་རྣམ་པ་སུམ་ཅུ་རྩ་དྲུག་ཡིན་ནོ། །སྲིད་རྩེ་ལས་སྐྱེས་བཟོད་པ་ཡིས། །གཞོམ་
[92b.5]བྱ་ཞེས་བྱ་བ་ལ། བཟོད་པ་ཡིས་གཞོམ་བྱ་ཞེས་བྱ་བ་སྨོས་པ་ནི་བསྒོམ་པས་སྤང་བར་བྱ་བ་བཟློག་པའི་ཕྱིར་རོ། །སྲིད་རྩེ་ལས་སྐྱེས་ཞེས་སྨོས་པ་ནི་སྲིད་རྩེའི་ཉོན་མོངས་པས་མཐོང་བས་སྤང་བར་བྱ་བའི་ནི་མཐོང་བའི་ལམ་འབའ་ཞིག་ཀྱང་གཞན་གྱི་ས་པ་ལས་ཁྱད་པར་བྱ་བའི་ཕྱིར་ཏེ།
[92b.6]འཇིག་རྟེན་པའི་བསྒོམ་པའི་ལམ་སྲིད་པའི་རྩེ་མོའི་གཉེན་པོར་གྱུར་པ་ནི་མེད་དོ། །ས་ལྷག་མ་དག་ན་ཞེས་བྱ་བ་ནི་འདོད་པའི་ཁམས་ནས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ས་དག་ནའོ། །ཅི་རིགས་པར་ཞེས་བྱ་བ་ནི་འདོད་པའི་ཁམས་ན་ནི་ཆོས་ཤེས་པའི་བཟོད་པས་སྤང་བར་བྱ་
[92b.7]བ་ཡིན་ལ། དེ་ཡན་ཆད་ས་ལྷག་མ་དག་ན་ནི་རྗེས་སུ་ཤེས་པའི་བཟོད་པས་སྤང་བར་བྱ་བ་ཡིན་ཏེ། དེ་དག་འཕགས་པ་རྣམས་ཀྱི་ནི་མཐོང་བས་སྤང་བར་བྱ་བ་ཡིན་ལ། དེ་དག་ཉིད་སོ་སོའི་སྐྱེ་བོ་རྣམས་ཀྱི་ནི་བསྒོམ་པས་སྤང་བར་བྱ་བ་དག་ཡིན་ནོ། །བསྒོམ་པའི་ལམ་ནི་འཇིག་རྟེན་
[93a]
[93a.1]པ་དང་། འཇིག་རྟེན་ལས་འདས་པ་དང་རྣམ་པ་གཉིས་ཏེ། འདི་ལྟར་བསྟན་བཅོས་ལས། བཅོམ་ལྡན་འདས་ཀྱི་ཉན་ཐོས་ནི་མཐོང་བའི་ལམ་གྱིས་སྤོང་ལ། སོ་སོའི་སྐྱེ་བོ་ནི་བསྒོམ་པའི་ལམ་གྱིས་སྤོང་ངོ་ཞེས་གསུངས་སོ། །བཟོད་པས་གཞོམ་མིན་
[93a.2]བསྒོམ་ཁོ་ནས། །ཞེས་བྱ་བ་ལ། བཟོད་པས་གཞོམ་མིན་ཞེས་བྱ་བ་སྨོས་པ་ནི་བསྒོམ་པས་སྤང་བར་བྱ་བ་ཉེ་བར་གཟུང་བའི་ཕྱིར་ཏེ། འདོད་པའི་ཁམས་ནས་སྲིད་པའི་རྩེ་མོའི་བར་གྱི་ས་ཐམས་ཅད་ན་ཅི་རིགས་པར་འདོད་ཆགས་དང་། ཁོང་ཁྲོ་དང་། ང་རྒྱལ་དང་། མ་རིག་པའི་ཕྲ་
[93a.3]རྒྱས་གང་དག་བཟོད་པས་གཞོམ་པར་བྱ་བ་མ་ཡིན་གྱི། ཤེས་པས་གཞོམ་པར་བྱ་བ་ཡོད་པ་དེ་དག་ནི་འཕགས་པ་དང་། སོ་སོའི་སྐྱེ་བོ་གཉི་གའི་ཡང་རྟག་ཏུ་བསྒོམ་པའི་ལམ་འཇིག་རྟེན་པ་འམ་འཇིག་རྟེན་ལས་འདས་པས་བསྒོམ་པས་སྤང་བར་བྱ་བ་ཁོ་ན་ཡིན་ནོ། །སྲིད་པའི་རྩེ་མོའི་ནི་འཇིག་
[93a.4]རྟེན་ལས་འདས་པ་ཁོ་ནས་ཡིན་ཏེ། འཇིག་རྟེན་པའི་ལམ་ས་གོང་མ་མེད་པའི་ཕྱིར་རོ། །ཕྱི་རོལ་པ་རྣམས་ཀྱི་མཐོང་བས་སྤང་བར་བྱ་བ་རྣམས་མི་སྤོང་བ་ཁོ་ན་སྟེ་ཞེས་བྱ་བ་ནི་དེ་དག་གི་བསྒོམ་པས་སྤང་བར་བྱ་བ་ཁོ་ན་རྣམ་པར་གནོན་པར་བྱེད་ཀྱི། མཐོང་བས་སྤང་བར་བྱ་བ་རྣམས་ནི་ས་ཐམས་
[93a.5]ཅད་ན་འཇིག་རྟེན་ལས་འདས་པའི་ལམ་གྱིས་གཞོམ་པར་བྱ་བ་ཁོ་ན་ཡིན་ནོ། །འདི་ལྟར་ལས་རྣམ་པར་འབྱེད་པ་ཆེན་པོའི་མདོ་ལས། འདོད་ཆགས་དང་བྲལ་བ་རྣམས་ལ་འདོད་པའི་ཁམས་ལ་དམིགས་པའི་ལྟ་བ་ཀུན་དུ་འབྱུང་བར་གསུངས་ཏེ། ཀུན་དགའ་བོ་འདི་ན་ལ་ལ་སྲོག་གཅོད་པ་སྤོང་
[93a.6]བ་ནས་ལོག་པར་ལྟ་བ་སྤོང་བའི་བར་དུ་ཡིན་ལ། འདི་ལ་ཡང་མི་དགའ་ཞིང་སོ་སོར་མི་དགའ་ལ། ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་དམྱལ་བ་དག་གི་ནང་དུ་སྐྱེ་བར་འགྱུར་རོ། །དེ་ཕྱི་རོལ་གྱི་མུ་སྟེགས་པ་དགེ་སྦྱོང་ངམ་བྲམ་ཟེ་ཡང་རུང་། རྫུ་འཕྲུལ་དང་ལྡན་
[93a.7]པ། ལྷའི་མིག་དང་ལྡན་པ། གཞན་གྱི་སེམས་ཤེས་པ་གང་ཞིག་གིས་མཐོང་ན་དེ་འདི་སྙམ་དུ་ལུས་ཀྱིས་ལེགས་པར་སྤྱད་པ་ཡང་མེད་ལ། ལུས་ཀྱིས་ལེགས་པར་སྤྱད་པའི་རྣམ་པར་སྨིན་པ་ཡང་མེད་དོ། །ངག་དང་ཡིད་ཀྱིས་ལེགས་པར་སྤྱད་པ་ཡང་མེད་ལ། ངག་དང་ཡིད་ཀྱིས་ལེགས་
[93b]
[93b.1]པར་སྤྱད་པའི་འབྲས་བུ་རྣམ་པར་སྨིན་པ་ཡང་མེད་དོ་སྙམ་སེམས་སོ་ཞེས་བྱ་བ་རྒྱས་པར་འབྱུང་ངོ་། །ལོག་པར་ལྟ་བ་འདི་ནི་འདོད་པའི་ཁམས་ལ་དམིགས་པ་ཅན་ཡིན་ཏེ། ལས་དེ་འདོད་པ་ན་སྤྱོད་པ་ཡིན་པའི་ཕྱིར་དང་། དམྱལ་བ་ཡང་དེ་ཁོ་ན་ན་སྲིད་པའི་ཕྱིར་རོ། །སྔོན་གྱི་མཐའ་ལ་རྟོག་
[93b.2]པ་རྣམས་ལས་རྟག་པར་སྨྲ་བ་རྣམས་ཞེས་བྱ་བ་ནི་ཚངས་པའི་དྲ་བའི་མདོ་ལས་འདོད་ཆགས་དང་བྲལ་བ་རྣམས་ལ་འདོད་པའི་ཁམས་ལ་དམིགས་པའི་ལྟ་བ་ཀུན་དུ་འབྱུང་བར་གསུངས་པ་ཡིན་ཏེ། གང་དག་ཚེ་སྔ་མ་མཐོང་བའི་རྗེས་སུ་འབྲངས་ཏེ་དེ་ལྟ་བུའི་ལྟ་བ་སྐྱེས་པ་དེ་དག་ནི་སྔོན་གྱི་མཐའ་
[93b.3]ལ་རྟོག་པ་ཡིན་ནོ། །དེ་ལས་རྟག་པར་སྨྲ་བ་མང་པོ་ཞིག་གསུངས་པ་དེ་དག་གི་ནང་ནས་དཔེར་བརྗོད་པ་གཅིག་ཅིག་བསྟན་པར་བྱ་སྟེ། འདི་ན་དགེ་སྦྱོང་ངམ་བྲམ་ཟེ་ལ་ལ་དགོན་པ་ན་འདུག་ཀྱང་རུང་། ཤིང་དྲུང་ན་འདུག་ཀྱང་རུང་། ཁང་སྟོང་ན་འདུག་ཀྱང་རུང་སྟེ། ཀུན་དུ་སྦྱངས་པའི་རྒྱུ་
[93b.4]དང་། སྤོང་བའི་རྒྱུ་དང་། བསྒོམ་པའི་རྒྱུ་དང་། ལན་མང་དུ་བྱས་པའི་རྒྱུ་དང་། ལེགས་པར་ཡིད་ལ་བྱས་པའི་རྒྱུས་སེམས་མཉམ་པར་གཞག་པ་ཇི་ལྟ་བུས་འཇིག་པ་དང་འཆགས་པའི་བསྐལ་པ་ཉི་ཤུ་ཡང་དག་པར་རྗེས་སུ་དྲན་པར་འགྱུར་བ་དེ་ལྟ་བུའི་སེམས་ཀྱི་ཏིང་ངེ་འཛིན་ཞི་བ་ལ་རེག་པར་
[93b.5]འགྱུར་ཞིང་། དེ་འདི་སྙམ་དུ་བདག་དང་འཇིག་རྟེན་འདི་ནི་རྟག་པ་ཡིན་ནོ་སྙམ་དུ་སེམས་པར་འགྱུར་རོ་ཞེས་འབྱུང་ངོ་། །དེ་ལྟར་སྔོན་གྱི་མཐའ་ལ་རྟོག་པ་རྟག་པར་ལྟ་བ་དེ་དག་ནི་རྟག་པར་སྨྲ་བ་དེས་བདག་དང་འཇིག་རྟེན་ལ་དམིགས་པ་ན་འདོད་པའི་ཁམས་ལ་དམིགས་པར་བྱེད་པ་ཡིན་ཏེ།
[93b.6]དེ་ལྟར་ན་འདོད་པའི་ཁམས་ལ་དམིགས་པའི་ལྟ་བ་དག་ཀུན་དུ་འབྱུང་བ་གསུངས་པ་ཡིན་ནོ། །དེ་བཞིན་དུ་ཚངས་པའི་དྲ་བའི་མདོ་དེ་ཉིད་ལས་སྔོན་གྱི་མཐའ་ལ་རྟོག་པ་རྣམས་ལས་ལ་ལ་རྟག་པར་སྨྲ་བ་འདོད་ཆགས་དང་བྲལ་བ་རྣམས་ལ་འདོད་པའི་ཁམས་ལ་དམིགས་པའི་ལྟ་བ་ཀུན་དུ་
[93b.7]འབྱུང་བ་གསུངས་པ་ཡིན་ནོ། །ཇི་ལྟ་ཞེ་ན། དགེ་སློང་དག་འཇིག་རྟེན་འཇིག་ཅིང་འཇིག་རྟེན་ཞིག་ན་སེམས་ཅན་ཕལ་ཆེར་འོད་གསལ་གྱི་ལྷའི་རིས་སུ་སྐྱེ་བར་འགྱུར་ཞིང་དེར་གཟུགས་བཟང་བ་ཡིད་ལས་བྱུང་བ་དབང་པོ་མ་ཚང་བ་མེད་ཅིང་དམན་པ་མ་ཡིན་པ། ཡན་ལག་དང་ཉིང་ལག་
[94a]
[94a.1]ཐམས་ཅད་དང་ལྡན་པ། ཁ་དོག་བཟང་པོ་ལ་གནས་པ། རང་གི་འོད་དང་ལྡན་པ། ནམ་མཁའ་ལ་འགྲོ་བ། དགའ་བ་ཟ་ཞིང་ཟས་སུ་དགའ་བ་ཟ་བ། ཚེ་རིང་བ། དུས་རིང་པོར་གནས་པར་འགྱུར་བ། གང་ཡིན་པའི་དུས་དེ་ལྟ་བུ་ཡང་ཡོད་དོ། །དགེ་
[94a.2]སློང་དག་འཇིག་རྟེན་འཆགས་ཤིང་འཇིག་རྟེན་འཆགས་ན་ནམ་མཁའ་ལ་ཚངས་པའི་གཞལ་མེད་ཁང་སྟོང་པ་མངོན་པར་འགྲུབ་པར་འགྱུར་ལ། དེ་ནས་སེམས་ཅན་གང་ཡང་རུང་བ་ཞིག་ཚེ་ཟད་ཅིང་བསོད་ནམས་ཟད་ལ་ལས་ཟད་པས་འོད་གསལ་གྱི་ལྷའི་རིས་ནས་ཤི་འཕོས་ནས་
[94a.3]ཚངས་པའི་གཞལ་མེད་ཁང་སྟོང་པར་སྐྱེ་བར་འགྱུར་ཞིང་། དེ་དེ་ན་གཅིག་པུ་ཟླ་མེད་ཅིང་གཡོག་མེད་པར་ཚེ་རིང་པོ་དུས་རིང་པོར་གནས་སོ། །དེ་ནས་སེམས་ཅན་དེ་དུས་རིང་མོ་ཞིག་འདས་པ་དང་མི་དགའ་བར་གྱུར་ནས་སེམས་ཅན་གཞན་དག་ཀྱང་འདིར་བདག་དང་སྐལ་བ་མཉམ་
[94a.4]པར་སྐྱེས་ཀྱང་ཅི་མ་རུང་སྙམ་དུ་སྲེད་པ་སྐྱེས་སོ། །སེམས་ཅན་དེ་ཡང་སེམས་ལ་དེ་ལྟར་སྨོན་ལ། སེམས་ཅན་གཞན་དག་ཀྱང་ཚེ་ཟད་ཅིང་བསོད་ནམས་ཟད་ལ་ལས་ཟད་པས་འོད་གསལ་གྱི་ལྷའི་རིས་ནས་ཤི་འཕོས་ནས་སེམས་ཅན་དེ་དང་སྐལ་བ་མཉམ་པར་སྐྱེས་སོ། །དེ་ནས་
[94a.5]སེམས་ཅན་དེ་འདི་སྙམ་དུ་བདག་གཅིག་པུ་ཟླ་མེད་ཅིང་། གཡོག་མེད་པར་ཚེ་རིང་པོ་ཞེས་བྱ་བ་ནས་སེམས་ཅན་གཞན་དག་ཀྱང་འདིར་བདག་དང་སྐལ་བ་མཉམ་པར་སྐྱེས་ཀྱང་ཅི་མ་རུང་སྙམ་དུ་སྲེད་པ་སྐྱེས་ལ་ཞེས་བྱ་བའི་བར་དུ་སྟེ། སེམས་ལ་ཡང་དེ་ལྟར་སྨོན་ལ། སེམས་
[94a.6]ཅན་འདི་དག་ཀྱང་འདིར་བདག་དང་སྐལ་བ་མཉམ་པར་སྐྱེས་པས་སེམས་ཅན་འདི་དག་ནི་བདག་གིས་སྤྲུལ་ཏེ། བདག་ནི་སེམས་ཅན་འདི་དག་གི་དབང་ཕྱུག་དང་། བྱེད་པ་པོ་དང་། སྤྲུལ་པ་པོ་དང་། འབྱིན་པ་པོ་དང་། འབྱིན་བྱེད་དང་། དངོས་པོ་རྣམས་ཀྱི་ཕར་གྱུར་པ་
[94a.7]ཡིན་ནོ་སྙམ་དུ་སེམས་པར་འགྱུར་རོ། །སེམས་ཅན་དེ་དག་ཀྱང་འདི་སྙམ་དུ་བདག་ཅག་གིས་སེམས་ཅན་འདི་གཅིག་པུ་ཟླ་མེད་ཅིང་གཡོག་མེད་པར་ཚེ་རིང་པོ་དུས་རིང་པོར་གནས་པ་མཐོང་སྟེ། སེམས་ཅན་དེ་དུས་རིང་མོ་ཞིག་འདས་པ་དང་། མི་དགའ་བར་གྱུར་ནས་སེམས་ཅན་
[94b]
[94b.1]གཞན་དག་ཀྱང་འདིར་བདག་དང་སྐལ་བ་མཉམ་པར་སྐྱེས་ཀྱང་ཅི་མ་རུང་སྙམ་དུ་སྲེད་པ་སྐྱེས་སོ། །སེམས་ཅན་འདིའི་སེམས་ལ་ཡང་དེ་ལྟར་སྨོན་ལ། བདག་ཅག་ཀྱང་འདིར་སེམས་ཅན་འདི་དང་སྐལ་བ་མཉམ་པར་སྐྱེས་པས་བདག་ཅག་ནི་སེམས་ཅན་འདིས་སྤྲུལ་པ་སྟེ།
[94b.2]སེམས་ཅན་འདི་ནི་བདག་ཅག་གི་དབང་ཕྱུག་ནས་དངོས་པོ་རྣམས་ཀྱི་ཕར་གྱུར་པའི་བར་ཡིན་ནོ་སྙམ་དུ་སེམས་པར་འགྱུར་རོ། །དེ་ནས་དེ་དག་གི་ནང་ནས་སེམས་ཅན་གང་ཡང་རུང་བ་ཞིག་ཚེ་ཟད་ཅིང་བསོད་ནམས་ཟད་ལ་ལས་ཟད་པས་གནས་དེ་ནས་ཤི་འཕོས་ཏེ། དེ་ལྟ་བུར་མི་
[94b.3]རྣམས་དང་སྐལ་བ་མཉམ་པར་སྐྱེ་བར་འགྱུར་ཏེ། དེ་རིམ་གྱིས་ནར་སོན་ཏེ། དབང་པོ་རྣམས་ཡོངས་སུ་སྨིན་ནས་སྐྲ་དང་ཁ་སྤུ་དག་བྲེགས་ཏེ། གོས་ཁ་དོག་བསྒྱུར་བ་གྱོན་ནས་དད་པས་ཡང་དག་པར་ཁྱིམ་ནས་ཁྱིམ་མེད་པར་རབ་ཏུ་འབྱུང་ཞིང་། དེ་དགོན་པ་ན་འདུག་ཀྱང་རུང་ཤིང་
[94b.4]དྲུང་ན་འདུག་ཀྱང་རུང་ཞེས་བྱ་བ་ནས་རྒྱས་པར་སེམས་མཉམ་པར་གཞག་པ་ཇི་ལྟ་བུས་སྔོན་གྱི་ལུས་རྗེས་སུ་དྲན་པར་འགྱུར་བ་དེ་ལྟ་བུའི་སེམས་ཀྱི་ཏིང་ངེ་འཛིན་ཞི་བ་ལ་རེག་པར་འགྱུར་ཞེས་བྱ་བའི་བར་དུ་སྟེ། དེ་འདི་སྙམ་དུ་གང་གིས་བདག་ཅག་སྤྲུལ་པའི་ཚངས་པ་གང་ཡིན་པ་འདི་ནི་
[94b.5]རྟག་པ་བརྟན་པ་ཐེར་ཟུག་པ་མི་འགྱུར་བའི་ཆོས་ཅན་ཡིན་ནོ། །བདག་ཅག་གང་དག་ཚངས་པ་དེས་སྤྲུལ་པ་དེ་དག་ནི་མི་རྟག་མི་བརྟན་པ་ཐེར་ཟུག་མ་ཡིན་པར་འགྱུར་བའི་ཆོས་ཅན་ཡིན་ནོ་སྙམ་དུ་སེམས་པར་འགྱུར་བ་གང་ཡིན་པ་དེ་ལྟ་བུའི་དུས་ཀྱང་ཡོད་དོ་ཞེས་གསུངས་སོ། །དེ་ལྟར་ན་
[94b.6]མཐར་འཛིན་པར་ལྟ་བ་དེས་འདོད་པའི་ཁམས་ལ་ཡང་དམིགས་པ་ཡིན་ཏེ། དེའི་ཕྱིར་འདོད་པའི་ཁམས་ལ་དམིགས་པའི་ལྟ་བ་དག་ཀུན་དུ་འབྱུང་བར་གསུངས་པ་ཡིན་ནོ། །དེ་བཞིན་དུ་ཚངས་པའི་དྲ་བའི་མདོ་དེ་ཉིད་ལས། རྒྱུ་མེད་པ་ལས་ཀུན་དུ་འབྱུང་བར་སྨྲ་བ་སྟེ། སྔོན་གྱི་མཐའ་ལ་རྟོག་
[94b.7]པ་རྣམས་ལས་ཞེས་བྱ་བ་སྐབས་དང་སྦྱར་རོ། །འདོད་ཆགས་དང་བྲལ་བ་རྣམས་ལ་འདོད་པའི་ཁམས་ལ་དམིགས་པའི་ལྟ་བ་ཀུན་དུ་འབྱུང་བར་གསུངས་ཏེ། ཇི་ལྟ་ཞེ་ན། གཟུགས་ཀྱི་ཁམས་ན་འདུ་ཤེས་མེད་པ་ཞེས་བྱ་བའི་ལྷ་དག་ཡོད་དེ། སེམས་ཅན་དེ་དག་འདུ་ཤེས་བསྐྱེད་པས་གནས་
[95a]
[95a.1]དེ་ནས་ཤི་བར་འགྱུར་རོ། །དེ་ནས་སེམས་ཅན་གང་ཡང་རུང་བ་ཞིག་གནས་དེ་ནས་ཤི་འཕོས་ནས་འདི་ལྟ་བུར་མི་རྣམས་དང་སྐལ་བ་མཉམ་པར་འོང་བར་འགྱུར་ཞེས་བྱ་བ་ནས་སྔོན་གྱི་ལུས་རྗེས་སུ་དྲན་པར་འགྱུར་ཞེས་བྱ་བའི་བར་སྔ་མ་བཞིན་ནོ། །འདི་སྙམ་དུ་
[95a.2]བདག་དང་འཇིག་རྟེན་འདི་ནི་རྒྱུ་མེད་པ་ལས་ཀུན་དུ་འབྱུང་བ་ཡིན་ནོ་སྙམ་དུ་སེམས་པར་འགྱུར་རོ་ཞེས་གསུངས་སོ། །དེ་བས་ན་བདག་དང་འཇིག་རྟེན་ནི་རྒྱུ་མེད་པ་ལས་ཀུན་དུ་འབྱུང་བ་ཡིན་ནོ་ཞེས་བྱ་བ་འདིས་ནི་འདི་སྙམ་དུ་བདག་སྔོན་མ་བྱུང་བ་ལས་ད་བདག་བྱུང་བ་ལས་ན་བདག་དང་འཇིག་
[95a.3]རྟེན་ནི་རྒྱུ་མེད་པ་ལས་བྱུང་བ་ཡིན་ནོ་སྙམ་དུ་སེམས་པ་ཡིན་ནོ། །དེ་ལྟར་ན་བདག་དང་འཇིག་རྟེན་ལ་དམིགས་པ་ན་ལོག་པར་ལྟ་བ་དེས་འདོད་པའི་ཁམས་ལ་ཡང་དམིགས་པ་ཡིན་པས་དེ་རྣམས་ལ་འདོད་པའི་ཁམས་ལ་དམིགས་པའི་ལྟ་བ་དག་ཀུན་དུ་འབྱུང་བར་གསུངས་པ་ཡིན་ནོ། །
[95a.4]ཡང་ཇི་ལྟར་ན་དེ་རྣམས་བདག་དང་འཇིག་རྟེན་རྒྱུ་མེད་པ་ལས་ཀུན་དུ་འབྱུང་བ་ཡིན་ནོ་སྙམ་དུ་སེམས་པ་དེ་ལོག་པར་ལྟ་བ་ཡིན་ཞེ་ན། བདག་དང་འཇིག་རྟེན་གྱི་རྒྱུ་སྔོན་བྱས་པ་དགེ་བ་ཟག་པ་དང་བཅས་པའམ། མི་དགེ་བ་མ་ཡིན་ནོ་སྙམ་དུ་དེ་ལྟར་ཡིད་ཀྱིས་སྐུར་པ་འདེབས་པར་བྱེད་པའི་
[95a.5]ཕྱིར་རོ། །འདོད་པའི་ཁམས་ལས་འདོད་ཆགས་དང་བྲལ་བ་དེ་རྣམས་ལ་གཟུགས་ན་སྤྱོད་པའི་ལྟ་བ་དེ་དག་འབྱུང་བར་འགྱུར་རོ་ཞེས་བྱ་བའི་ཐ་ཚིག་གི་སྐབས་ལས་བསམས་ནས་གཟུགས་ན་སྤྱོད་པའི་ཉོན་མོངས་པ་རྣམས་འདོད་པའི་ཁམས་ལ་མི་དམིགས་པ་ནི་མ་ཡིན་ཏེ། འདོད་
[95a.6]ཆགས་དང་བྲལ་བའི་ཕྱིར་རོ་ཞེས་བྱ་བ་སྨོས་སོ། །ཁ་ཅིག་ནི་དེ་དག་འདོད་པ་ན་སྤྱོད་པའི་ལྟ་བ་མ་ཡིན་གྱི། དེ་དག་ནི་ལོག་པའི་ཤེས་པ་ཡིན་ནོ་ཞེས་ལན་འདེབས་པར་བྱེད་དེ། དེ་དག་ནི་ལྟ་བའི་ངོ་བོ་ཉིད་ཡིན་པའི་ཕྱིར་དེ་དག་གི་ལྟར་ནི་རིགས་པ་མ་ཡིན་ནོ། །བྱེ་བྲག་ཏུ་སྨྲ་བ་ན་རེ་ཡོངས་
[95a.7]སུ་ཉམས་པའི་ཕྱིར་ཏེ། ལྷ་སྦྱིན་བཞིན་ནོ་ཞེས་ཟེར་རོ། །དཔེར་ན་ལྷ་སྦྱིན་གྱིས་དགེ་སློང་གི་དགེ་འདུན་འཁོར་དུ་བྱ་བའི་ཕྱིར་བཅོམ་ལྡན་འདས་ཐུགས་ལས་ཆུང་ངུར་བཞུགས་པར་གསོལ་ནས་སྡིག་པའི་བསམ་པ་སྐྱེད་པས་རྫུ་འཕྲུལ་ལས་ཡོངས་སུ་ཉམས་པ་ལྟ་བུ་སྟེ་མདོ་ལས་
[95b]
[95b.1]འབྱུང་བའི་ཕྱིར་རོ། །མདོ་ལས་ནི་འདི་སྐད་དུ་དེ་ནས་ལྷ་སྦྱིན་རྙེད་པ་དང་བཀུར་སྟིས་ཟིལ་གྱིས་ནོན་ཏེ། ཀྱེ་མ་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་བྱིན་ཀྱང་ཅི་མ་རུང་། དགེ་སློང་གི་དགེ་འདུན་ནི་བདག་གི་འཁོར་དུ་བྱས་ལ། བཅོམ་ལྡན་འདས་ནི་མཐོང་བའི་ཆོས་
[95b.2]ལ་བདེ་བར་གནས་པ་དང་ལྡན་ཞིང་ཐུགས་ལས་ཆུང་ངུར་གནས་པར་གསོལ་ལོ་སྙམ་པ་དེ་ལྟ་བུའི་སྡིག་པའི་བསམ་པའི་རྣམ་པ་དེ་སྐྱེས་སོ། །ལྷ་སྦྱིན་གྱིས་སེམས་དེ་སྐྱེས་མ་ཐག་རྫུ་འཕྲུལ་དེ་ལས་ཡོངས་སུ་ཉམས་སོ་ཞེས་བྱ་བ་རྒྱས་པར་འབྱུང་སྟེ། དེ་བཞིན་དུ་དེ་དག་ཀྱང་ལྟ་བ་
[95b.3]བསྐྱེད་པ་དང་དུས་མཉམ་དུ་ཡོངས་སུ་ཉམས་པ་ཡིན་ནོ་ཞེའོ། །དེ་དག་ལ་བདག་ཏུ་འཛིན་པ་ནི་དེ་དག་སྔོན་དུ་འགྲོ་བ་ཅན་ཡིན་ནོ་ཞེས་བྱ་བ་ནི་རྟག་པ་དང་། རིལ་པོར་འདུ་ཤེས་པ་སྔོན་དུ་འགྲོ་བ་ཅན་ནོ། །འཇིག་ཚོགས་ལ་ལྟ་བ་ལ་སོགས་པ་ལོག་པར་ཞུགས་པའི་ལྟ་བ་ཐམས་
[95b.4]ཅད་ལོག་པར་ལྟ་བ་ཡིན་ཏེ། ལོག་པར་རྟོག་པའི་ཕྱིར་རོ། །གཞན་དག་ནི་སྒྲོ་འདོགས་པར་བྱེད་པ་ཡིན་ནོ་ཞེས་བྱ་བ་ཇི་ལྟར་ཆད་པར་ལྟ་བ་སྒྲོ་འདོགས་པར་བྱེད་པ་ཡིན་ཞེ་ན། བསྟན་པ་འདི་ནི་མིང་བརྩན་པར་བྱས་པ་ཡིན་ནོ། །འཕགས་པ་རྣམས་ཀྱིས་སྤང་བའི་ཕྱིར་རོ་ཞེས་བྱ་བ་ནི་
[95b.5]བོར་བའི་ཕྱིར་རོ། །སོགས་པའི་སྒྲ་མི་མངོན་པར་བྱས་སོ་ཞེས་བྱ་བ་ནི་ལྟ་བ་ལ་སོགས་པ་ཉེ་བར་ལེན་པའི་ཕུང་པོ་རྣམས་ལ་མཆོག་དང་། གཙོ་བོར་འཛིན་པ་ནི་ལྟ་བ་མཆོག་ཏུ་འཛིན་པ་ཞེས་བྱའོ། །སློབ་དཔོན་འདུས་བཟང་ན་རེ་མཆོག་ཏུ་ཞེས་བྱ་བའི་སྒྲ་སྦྱར་བས་ཀྱང་ཁྱད་པར་གྱི་དོན་འདིར་
[95b.6]འགྱུར་རོ་ཞེས་ཟེར་རོ། །རྒྱུ་མ་ཡིན་ལ་རྒྱུར་ལྟ་བའི་ཕྱིར་སྡུག་བསྔལ་མཐོང་བས་སྤང་བར་བྱ་བ་ཞེས་བྱའོ། །ལམ་མ་ཡིན་པ་ལ་ལམ་དུ་ལྟ་བའི་ཕྱིར་ལམ་མཐོང་བས་སྤང་བར་བྱ་བ་ཡིན་ནོ། །ཚུལ་ཁྲིམས་དང་བརྟུལ་ཞུགས་ཙམ་ཞེས་བྱ་བ་ནི་ཚུལ་ཁྲིམས་དང་བརྟུལ་ཞུགས་ནི་སངས་རྒྱས་
[95b.7]པ་རྣམས་ཀྱི་ལྟར་ན་ཡང་ཐར་པ་ཐོབ་པར་བྱེད་པ་ཡིན་མོད་ཀྱི། དེ་དེ་ཙམ་དུ་ནི་མ་ཟད་པས་དེའི་ཕྱིར་དེ་ལས་གཞན་པ་དག་གི་ལྟ་བ་ཡིན་ནོ། །འདིར་ཡང་སོགས་པའི་སྒྲ་མི་མངོན་པར་བྱས་སོ་ཞེས་གྲག་གོ་ཞེས་བྱ་བ་ནི་ཚུལ་ཁྲིམས་དང་བརྟུལ་ཞུགས་ལ་སོགས་པ་མཆོག་ཏུ་འཛིན་པ་ནི་
[96a]
[96a.1]ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཡིན་ནོ། །ཅིའི་ཕྱིར་ཞེ་ན། ཚུལ་ཁྲིམས་དང་བརྟུལ་ཞུགས་ནི་གཟུགས་ཀྱི་ཕུང་པོས་བསྡུས་པ་ཡིན་ནོ། །དེའི་ཕྱིར་ཕུང་པོ་གཞན་བསྡུ་བའི་དོན་དུ་སོགས་པ་ཞེས་བྱ་བའི་སྒྲ་སྨོས་དགོས་སོ། །ཅིའི་ཕྱིར་ཀུན་
[96a.2]འབྱུང་མཐོང་བས་སྤང་བར་བྱ་བ་མ་ཡིན་ཞེ་ན་ཞེས་བྱ་བ་ནི་རྒྱུ་ལ་ལོག་པར་ཞུགས་པའི་ཕྱིར་རོ་སྙམ་དུ་བསམས་པ་ཡིན་ནོ། །དེ་བྱས་པའི་རྒྱུར་མངོན་པར་ཞེན་པ་ཡང་ཞེས་བྱ་བ་ནི་བདག་རྟག་པ་བྱེད་པ་པོ། །གཅིག་པུས་བྱས་པ་ཡང་ཞེས་བྱ་བའི་ཐ་ཚིག་གོ། །དེ་ཉིད་ཀྱིས་སྤོང་བར་
[96a.3]འགྱུར་རོ་ཞེས་བྱ་བ་ནི་སྡུག་བསྔལ་མཐོང་བ་ཁོ་ནས་སྤོང་བར་འགྱུར་རོ། །འོ་ན་གང་མེ་དང་ཆུར་འཇུག་པ་ལ་སོགས་པས་མཐོ་རིས་སུ་སྐྱེ་བའམ། ཚུལ་ཁྲིམས་དང་བརྟུལ་ཞུགས་ཀྱིས་འདག་པར་ལྟ་བ་ཇི་ལྟ་བུ་ཡིན་ཞེས་བྱ་བ་ནི་རྒྱུར་མངོན་པར་ཞེན་པ་འདི་ནི་དེས་བྱས་པ་མ་ཡིན་ན། ཇི་ལྟར་
[96a.4]སྡུག་བསྔལ་མཐོང་བས་སྤང་བར་འགྱུར། དེ་ལྟ་བས་ན་འདི་ནི་ཀུན་འབྱུང་མཐོང་བས་སྤང་བར་བྱ་བ་ཁོ་ན་ཡིན་པར་འགྱུར་རོ་སྙམ་དུ་བསམས་པ་ཡིན་ནོ། །བྱེ་བྲག་ཏུ་སྨྲ་བས། དེ་ཡང་སྡུག་བསྔལ་མཐོང་བས་སྤང་བར་བྱ་བ་ཡིན་ཏེ་ཞེས་བྱ་བ་རྒྱས་པར་སྨོས་སོ། །སྡུག་བསྔལ་ལ་ལོག་
[96a.5]པར་ཞུགས་པའི་ཕྱིར་རོ་ཞེས་ཟེར་བ་ནི་བྱེ་བྲག་ཏུ་སྨྲ་བ་རྣམས་ཏེ། ཇི་ལྟར་སྡུག་བསྔལ་ལ་ལོག་པར་ཞུགས་པ་ཡིན་ཞེ་ན་དེས་མཐོ་རིས་སུ་འགྲོ་བའམ་འདག་པར་ལྟ་བའི་ཕྱིར་རོ། །སློབ་དཔོན་གྱིས་ཧ་ཅང་ཐལ་བར་འགྱུར་རོ་ཞེས་བྱ་བ་རྒྱས་པར་སྨོས་ཏེ། ཟག་པ་དང་བཅས་པའི་དངོས་པོ་
[96a.6]ཐམས་ཅད་སྡུག་བསྔལ་ཡིན་པས། ཟག་པ་དང་བཅས་པ་སྡུག་བསྔལ་ལ་སོགས་པ་མཐོང་བས་སྤང་བར་བྱ་བ་ལྟ་བའི་ངོ་བོ་ཉིད་དམ། ལྟ་བའི་ངོ་བོ་ཉིད་མ་ཡིན་ཡང་། ཐམས་ཅད་སྡུག་བསྔལ་ལ་ལོག་པར་ཞུགས་པ་ཡིན་པའི་ཕྱིར་སྡུག་བསྔལ་མཐོང་བས་སྤང་བར་བྱ་བར་ཐལ་བར་འགྱུར་རོ། །
[96a.7]དེ་ལྟ་ཡིན་ན་ནི་ཀུན་འབྱུང་བ་ལ་སོགས་པ་མཐོང་བས་སྤང་བར་བྱ་བ་ཅུང་ཟད་ཀྱང་མེད་པར་འགྱུར་རོ། །གཞན་འདི་ཡང་བརྗོད་དགོས་ཏེ། ཡང་ན་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པས་ལམ་མཐོང་བས་སྤང་བར་བྱ་བ་གཞན་ཇི་ལྟ་བུ་ཞིག་ཡོད་པས་དེ་བརྗོད་དགོས་ཏེ། གང་
[96b]
[96b.1]ཞིག་བ་ལང་གི་ཚུལ་ཁྲིམས་ལ་སོགས་པས་འདག་པ་ནས་བདེ་བ་དང་། སྡུག་བསྔལ་ལས་རྣམ་པར་འདས་པ་ཡང་རྗེས་སུ་འཐོབ་པར་འགྱུར་རོ་ཞེས་བྱ་བའི་བར་དུ་ལྟ་བ་དེའི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་འདི་ཡང་རྒྱུ་མ་ཡིན་པ་ལ་རྒྱུར་ཡིད་ཆེས་པ་ཡིན་པས་སྡུག་
[96b.2]བསྔལ་མཐོང་བས་སྤང་བར་བྱ་བའོ་ཞེས་འདོན་པས་སོ།། །།བམ་པོ་སུམ་ཅུ་རྩ་དགུ་པ། བྱེ་བྲག་ཏུ་སྨྲ་བས་ལམ་མཐོང་བས་སྤང་བར་བྱ་བ་ལ་དམིགས་པ་གང་ཡིན་པའོ་ཞེས་བྱ་བ་སྨྲས་ཏེ། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་གང་ཞིག་ལམ་
[96b.3]མཐོང་བས་སྤང་བར་བྱ་བ་ལོག་པར་ལྟ་བ་ལ་སོགས་པ་བརྒྱད་ལ་དམིགས་པར་བྱེད་པ་འདི་ནི་ལམ་མཐོང་བས་སྤང་བར་བྱ་བ་ཡིན་ནོ། །སློབ་དཔོན་གྱིས་དེ་ཡང་སྡུག་བསྔལ་ལ་ལོག་པར་ཞུགས་པ་ཡིན་ནོ་ཞེས་བྱ་བ་སྨོས་ཏེ། ལམ་མཐོང་བས་སྤང་བར་བྱ་བ་ལོག་པར་ལྟ་བ་ལ་སོགས་
[96b.4]པ་ཕྲ་རྒྱས་བརྒྱད་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་དམིགས་པ་ཡིན་ཞིང་། དེ་དག་ཀྱང་ཟག་པ་དང་བཅས་པ་ཡིན་པའི་ཕྱིར། སྡུག་བསྔལ་གྱི་བདེན་པས་བསྡུས་པ་ཡིན་ལ། དེ་ཡང་དེ་ལ་ལོག་པར་རྟོག་པ་ཡིན་པས་སྡུག་བསྔལ་མཐོང་བས་སྤང་བར་བྱ་བ་ཁོ་
[96b.5]ནར་འགྱུར་རོ་སྙམ་དུ་བསམས་པ་ཡིན་ནོ། །ཡང་གང་ལ་ཞེས་བྱ་བ་རྒྱས་པར་འབྱུང་བ་ནི་གང་ཟག་གང་ཞིག་ལ་ལམ་མེད་དོ་སྙམ་དུ་ལམ་ལ་དམིགས་པ་ལ་ལོག་པར་ལྟ་བའམ། ཐེ་ཚོམ་ཡོད་པའི་གང་ཟག་དེ་ཐར་པའི་ལམ་མེད་དོ་ཞེས་ལྟ་བའམ། ཐེ་ཚོམ་ཟ་བ་ན་སྟེ། ཅི་ལམ་
[96b.6]འདི་ཡོད་དམ་མེད་སྙམ་དུ་ཐེ་ཚོམ་ཟ་བ་ན་ཇི་ལྟར་ལོག་པར་ལྟ་བ་དེས་ལོག་པར་ལྟ་བ་འདིས་སམ། ཐེ་ཚོམ་འདིས་འདག་གོ་སྙམ་དུ་ཡིད་ཆེས་པར་འགྱུར་ཞིང་རྟོག་པར་འགྱུར་ཏེ། ལོག་པར་ལྟ་བ་དང་། ཐེ་ཚོམ་ཁོ་ནས་དེ་ལ་འདག་པར་ཡིད་ཆེས་པ་མེད་དོ། །འོན་ཏེ་ཐར་པའི་
[96b.7]ལམ་གཞན་ཞེས་བྱ་བ་རྒྱས་པར་འབྱུང་བ་ནི། འོན་ཏེ་གྲངས་ཅན་ལ་སོགས་པས་བརྟགས་པའི་ཐར་པའི་ལམ་གཞན་མཆོག་ཏུ་བཟུང་ཞིང་བླངས་ནས། འདི་ནི་ཐར་པའི་ལམ་ཡིན་གྱི། སངས་རྒྱས་པའི་ནི་མེད་དོ་ཞེས་སྨྲའོ་ཞེ་ན། དེ་ཡང་གྲངས་ཅན་པས་བརྟགས་པ་དེ་ཁོ་ནས་དག་
[97a]
[97a.1]པར་ཡིད་ཆེས་ཀྱི། ལོག་པར་ལྟ་བ་དེས་ན་མ་ཡིན་པའི་ཕྱིར། དེའི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དེ་ཡང་ལམ་མཐོང་བས་སྤང་བར་བྱ་བ་ལ་དམིགས་པར་མི་འགྲུབ་བོ། །འོ་ན་ཅི་ཞེ་ན། གྲངས་ཅན་པ་ལ་སོགས་པས་ཀུན་བརྟགས་
[97a.2]པའི་ལམ་ཁོ་ན་ལ་དམིགས་པ་ཡིན་ནོ། །ཉེས་པ་གཞན་འདི་ཡང་ཡོད་པས། ཡང་གང་ཞིག་ཅེས་བྱ་བ་རྒྱས་པར་སྨོས་ཏེ། ལོག་པར་ལྟ་བ་གང་ཞིག་ཀུན་འབྱུང་བ་དང་། འགོག་པ་མཐོང་བས་སྤང་བར་བྱ་བ་ལ་དམིགས་པའི་ལོག་པར་ལྟ་བས་དག་པར་ཡིད་ཆེས་པར་འགྱུར་
[97a.3]བ་དེ་ཡང་། ཅིའི་ཕྱིར་དེ་དག་མཐོང་བས་སྤང་བར་བྱ་བ་མ་ཡིན། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དེ་ཅིའི་ཕྱིར་ཀུན་འབྱུང་བ་དང་། འགོག་པ་མཐོང་བས་སྤང་བར་བྱ་བ་མ་ཡིན་ཞེས་བྱ་བའི་ཐ་ཚིག་གོ། །དེ་ལྟ་བས་ན་དོན་འདི་ནི་བརྟག་པར་བྱ་བ་ཡིན་ནོ་ཞེས་བྱ་བ་ནི། གང་གི་
[97a.4]ཕྱིར་དེ་ལྟར་ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པ། སྡུག་བསྔལ་མཐོང་བས་སྤང་བར་བྱ་བ་ཡིན་པར་ཡང་མི་སྲིད་ལ། ལམ་མཐོང་བས་སྤང་བར་བྱ་བ་ཡིན་དུ་ཡང་ཧ་ཅང་ཐལ་བ་ལ་སོགས་པའི་ཉེས་པ་ཡོད་པ་དེའི་ཕྱིར། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་
[97a.5]པ། སྡུག་བསྔལ་མཐོང་བས་སྤང་བར་བྱ་བ་ཡིན་པ་དང་། ལམ་མཐོང་བས་སྤང་བར་བྱ་བ་ཡིན་ནོ་ཞེས་བྱ་བའི་དོན་འདི་ནི་བརྟག་པར་བྱ་བ་ཡིན་ནོ། །སློབ་དཔོན་གྱིས་ཐེ་ཚོམ་བསྐུར་བ་འདི་བྱས་ཀྱིས། རང་གི་གཞུང་ལུགས་ནི་མ་བསྟན་ཏོ། །གཞན་དག་ན་རེ་རྣལ་འབྱོར་སྤྱོད་
[97a.6]པའི་གཞུང་ལུགས་ལ་ལྟོས་ནས་དེ་ལྟར་བྱས་སོ་ཞེས་ཟེར་རོ། །རྣལ་འབྱོར་སྤྱོད་པ་རྣམས་ཀྱང་ཉོན་མོངས་པ་བརྒྱ་ཉི་ཤུ་རྩ་བརྒྱད་དུ་བརྗོད་དེ། ཇི་ལྟར་སྡུག་བསྔལ་མཐོང་བས་སྤང་བར་བྱ་བའི་ཕྲ་རྒྱས་འདི་དག་འཇིག་ཚོགས་ལ་ལྟ་བ་དང་མཐར་འཛིན་པར་ལྟ་བ་དང་། ལོག་པར་ལྟ་བ་
[97a.7]དང་། ལྟ་བ་མཆོག་ཏུ་འཛིན་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། ཐེ་ཚོམ་དང་། འདོད་ཆགས་དང་། ཁོང་ཁྲོ་བ་དང་། ང་རྒྱལ་དང་། མ་རིག་པ་ཞེས་བྱ་བ་བཅུ་ཡིན་པ་དེ་བཞིན་དུ་ཀུན་འབྱུང་བ་མཐོང་བས་སྤང་བར་བྱ་བ་བཅུ་དང་། འགོག་པ་མཐོང་བས་
[97b]
[97b.1]སྤང་བར་བྱ་བ་བཅུ་དང་། ལམ་མཐོང་བས་སྤང་བར་བྱ་བ་བཅུ་སྟེ། འདོད་པ་ན་སྤྱོད་པ་མཐོང་བས་སྤང་བར་བྱ་བ་བཞི་བཅུ་ཡིན་ནོ། །བསྒོམ་པས་སྤང་བར་བྱ་བ་ནི་འཇིག་ཚོགས་ལ་ལྟ་བ་བརྟགས་པ་མ་ཡིན་པ་དང་། ཆད་པར་ལྟ་བ་ལྷན་ཅིག་སྐྱེས་པ་དང་། འདོད་ཆགས་
[97b.2]དང་། ཁོང་ཁྲོ་བ་དང་། ང་རྒྱལ་དང་། མ་རིག་པ་ཞེས་བྱ་བ་དྲུག་སྟེ། འདོད་པ་ན་སྤྱོད་པའི་ཕྲ་རྒྱས་བཞི་བཅུ་རྩ་དྲུག་ཏུ་འགྱུར་རོ། །གཟུགས་ན་སྤྱོད་པ་བཞི་བཅུ་རྩ་གཅིག་སྟེ། ཁོང་ཁྲོ་བ་མ་གཏོགས་པ་དེ་དག་ཉིད་ཡིན་ནོ། །གཟུགས་ན་སྤྱོད་པ་དག་ཇི་ལྟ་བར་གཟུགས་
[97b.3]མེད་པ་ན་སྤྱོད་པ་རྣམས་ཀྱང་དེ་དང་འདྲའོ། །དེ་ལ་ཁ་ཅིག་ལན་འདེབས་པར་བྱེད་པ་ནི་ཟག་པ་དང་བཅས་པ་ལ་དམིགས་པ་ཐམས་ཅད་སྡུག་བསྔལ་ལ་ལོག་པར་ཞུགས་པའི་ཕྱིར། ཧ་ཅང་ཐལ་བར་འགྱུར་རོ་ཞེས་བཤད་པ་གང་ཡིན་པ་འདི་ལ་སྨྲ་བར་བྱ་སྟེ། སྡུག་བསྔལ་
[97b.4]ལ་སོགས་པའི་སྒོ་ནས་ལོག་པར་ཞུགས་པའི་ཕྱིར། ཧ་ཅང་ཐལ་བར་མི་འགྱུར་རོ། །ཟག་པ་དང་བཅས་པ་ལ་དམིགས་པ་རྣམས་སྡུག་བསྔལ་ལ་ལོག་པར་ཞུགས་པ་ཡིན་མོད་ཀྱི། འོན་ཀྱང་ཁ་ཅིག་ནི་སྡུག་བསྔལ་གྱི་སྒོ་ནས་ལོག་པར་ཞུགས་པ་ཡིན་ལ། ཁ་ཅིག་ནི་ཀུན་
[97b.5]འབྱུང་བའི་སྒོ་ནས་ལོག་པར་ཞུགས་པ་ཡིན་ནོ། །ཁ་ཅིག་ནི་འགོག་པའི་སྒོ་ནས་ལོག་པར་ཞུགས་པས་ལོག་པར་ཞུགས་པ་ཡིན་ལ། ཁ་ཅིག་ནི་ལམ་གྱི་སྒོ་ནས་ལོག་པར་ཞུགས་པ་ལ་ལོག་པར་ཞུགས་པ་ཡིན་ནོ། །དེ་ལ་གང་དག་སྡུག་བསྔལ་གྱི་སྒོ་ནས་སྡུག་བསྔལ་ལ་
[97b.6]ལོག་པར་ཞུགས་པ་དེ་དག་ནི་སྡུག་བསྔལ་མཐོང་བས་སྤང་བར་བྱ་བ་ཡིན་ནོ། །ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཡང་རྟག་པ་དང་བདག་ཏུ་འཛིན་པས་སྡུག་བསྔལ་གྱི་སྒོ་ནས་སྡུག་བསྔལ་ལ་ལོག་པར་ཞུགས་པ་ཡིན་ཏེ། དེ་ལྟ་བས་ན་སྡུག་བསྔལ་མཐོང་བས་
[97b.7]སྤང་བར་བྱ་བ་ཡིན་ནོ། །ལམ་ལ་ལོག་པར་ཞུགས་པ་གང་ཞིག་གིས་འདི་ལྟ་སྟེ། གྲངས་ཅན་པ་དང་། གཅེར་བུ་པ་ལ་སོགས་པས་རང་གི་ཀུན་བརྟགས་པའི་ལམ་བཟུང་ནས། སངས་རྒྱས་པ་རྣམས་ལ་ཐར་པའི་ལམ་མེད་དོ་ཞེས་ལོག་པར་ལྟ་བ་སྐྱེད་པར་བྱེད་པའི་ལོག་པར་ལྟ་
[98a]
[98a.1]བ་དེ་ལ་ཡང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པས་མཆོག་ཏུ་ལྟ་བར་བྱེད་དེ། དེ་དག་གི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་འདི་ནི། ལམ་ལ་ལོག་པར་ཞུགས་པ་ལ་ལོག་པར་ཞུགས་པ་ཡིན་པའི་ཕྱིར་ལམ་
[98a.2]མཐོང་བས་སྤང་བར་བྱ་བ་ཡིན་ནོ། །ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་གང་ཞིག་ཀུན་འབྱུང་བའི་སྒོ་ནས་ལོག་པར་འཇུག་པར་འགྱུར་བ་ཡང་མེད་ལ། གང་ཞིག་འགོག་པའི་སྒོ་ནས་ལོག་པར་ཞུགས་པ་ལ་ལོག་པར་ཞུགས་པ་ཡང་མེད་དེ། དེ་ལྟ་བས་ན་
[98a.3]ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་སྡུག་བསྔལ་དང་། ལམ་མཐོང་བས་སྤང་བར་བྱ་བ་དག་ཁོ་ན་ཡིན་ནོ། །ཡང་ཇི་ལྟར་ཀུན་འབྱུང་བ་དང་། འགོག་པའི་སྒོ་ནས་ལོག་པར་མི་འཇུག་ཅེ་ན། འདི་ལ་སློབ་དཔོན་འདུས་བཟང་ན་རེ། ཚུལ་ཁྲིམས་དང་བརྟུལ་ཞུགས་
[98a.4]མཆོག་ཏུ་འཛིན་པ་ནི་ཀུན་འབྱུང་བ་དང་འགོག་པ་མཐོང་བས་སྤང་བར་བྱ་བ་མ་ཡིན་ཏེ། དེའི་ལུས་སུ་མི་འཐད་པའི་ཕྱིར་རོ། །ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལུས་ནི་རྒྱུ་མ་ཡིན་པ་ལ་རྒྱུར་མངོན་པར་ཞེན་པ་དང་། ལམ་མ་ཡིན་པ་ལ་ལམ་དུ་མངོན་པར་ཞེན་པ་ཡིན་
[98a.5]ན། ཀུན་འབྱུང་བ་ལ་སྐུར་པ་འདེབས་པའི་ལོག་པར་ལྟ་བ་ལ་འདག་པར་མངོན་པར་ཞེན་པས་ནི་འདི་རྒྱུ་མེད་པ་ལས་སྐྱེ་བར་ལྟ་བར་འགྱུར་ཏེ། གང་ལ་རྒྱུའི་བློ་མེད་པའི་ཕྱིར་རོ། །སྡུག་བསྔལ་དང་། ཀུན་འབྱུང་བ་དག་ནི་རྗེས་སུ་ཐ་དད་པ་མ་ཡིན་པའི་ཕྱིར། དེས་དབང་ཕྱུག་ལ་སོགས་
[98a.6]པའི་ཕུང་པོ་ཡང་སྤང་བར་འགྱུར་རོ། །འགོག་པ་ལ་སྐུར་པ་འདེབས་པའི་ལོག་པར་ལྟ་བ་ལ་འདག་པར་ཡིད་ཆེས་པས་ན་འགོག་པའི་ཐབས་ལ་རྟོག་པ་མི་སྲིད་པ་ཁོ་ན་ཡིན་ནོ། །ཇི་ལྟ་ཞེ་ན། འགོག་པ་མེད་དོ་སྙམ་དུ་ལྟ་བའི་རྗེས་ལ། དེའི་ཐབས་ལ་རྟོག་པ་ནི་དན་(དོན་)མེད་པར་འགྱུར་
[98a.7]རོ། །དེ་ལྟར་ན་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལུས་སུ་མི་འཐད་དོ། །དེ་ལྟ་ན་ལམ་མེད་དོ་སྙམ་དུ་ལྟ་བའི་རྗེས་ལ་ལམ་དུ་ཡོངས་སུ་རྟོག་པ་མི་འཐད་པའི་ཕྱིར། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ལམ་མཐོང་བས་སྤང་བར་བྱ་བ་ཡང་མི་འགྱུར་རོ། །གང་ལ་
[98b]
[98b.1]ལམ་ལ་དམིགས་པ་ལོག་པར་ལྟ་བ་འམ། ཐེ་ཚོམ་ཐར་པའི་ལམ་མེད་དོ་སྙམ་པའི་ལྟ་བ་འམ། ཐེ་ཚོམ་ཟ་བ་ཡོད་པ་དེ་ཇི་ལྟར་དེས་འདག་པར་ཡིད་ཆེས་པར་འགྱུར་ཞེ་ན། འཕགས་པའི་ལམ་ལ་སྐུར་པ་འདེབས་པའི་ལོག་པར་ལྟ་བ་ལ་འདག་པར་མངོན་པར་ཞེན་པ་ནི་འཐད་པ་ཁོ་
[98b.2]ན་སྟེ། དེ་ལ་རིགས་པར་འཛིན་པའི་ཕྱིར་རོ། །དེས་ནི་གང་གིས་ན་དེ་ཡང་དག་པའི་ལམ་ལ་སྐུར་པ་འདེབས་པའི་ལོག་པར་ལྟ་བ་ལ་རིགས་པའི་བློ་སྐྱེ་བར་འགྱུར་བ་ཐར་པའི་ལམ་གཞན་ཞིག་སྙིང་ལ་གཞག་པ་ཡིན་ཏེ། ཐར་པའི་ལམ་གཞན་མེད་དོ་ཞེས་བྱ་བ་གང་ཡིན་པ་དང་།
[98b.3]ཐར་པའི་ལམ་གཞན་ཡོད་དམ། འོན་ཏེ་མེད་སྙམ་དུ་ཐེ་ཚོམ་ཟ་བ་གང་ཡིན་པ་འདི་ནི་རིགས་པ་ཡིན་ནོ་སྙམ་དུ་སེམས་པས་སོ། །རིགས་པའི་སྒོ་ནས་ནི་འདག་པའི་ཐབས་ལེན་པར་འཐད་དོ། །དེས་ཐར་པའི་ལམ་གཞན་ལ་དམིགས་པ་སྙིང་ལ་གཞག་པ་གང་ཡིན་པ་འདི་ཉིད་ཚུལ་
[98b.4]ཁྲིམས་དང་བརྟུལ་ཞུགས་མཆོག་ཏུ་འཛིན་པ་ལམ་མཐོང་བས་སྤང་བར་བྱ་བ་དེའི་ཡུལ་ཡིན་ཏེ། རང་གི་རིས་ཙམ་ལ་དམིགས་པའི་ཕྱིར་རོ། །འོན་ཏེ་དེ་དང་མཚུངས་པར་རྟག་ཏུ་རུང་བའི་ཕྱིར་འགོག་པ་མཐོང་བས་སྤང་བར་བྱ་བར་ཡང་ཐལ་བར་འགྱུར་ཏེ། དེ་ནི་གང་གིས་ན་དེ་ཡང་
[98b.5]དག་པའི་ཐར་པ་ལ་སྐུར་པ་འདེབས་པའི་ལོག་པར་ལྟ་བ་ལ་རིགས་པར་འཛིན་པར་འགྱུར་བ་ཐར་པའི་གནས་གཞན་ཞིག་སྙིང་ལ་གཞག་པ་ཡིན་ནོ། །དེའི་ཕྱིར་དེ་ནི་འདྲའོ་ཞེ་ན། དེ་ནི་མ་ཡིན་ཏེ། རྟག་པ་དང་ཞི་བར་འཛིན་པར་མཚུངས་ན་དེ་ལ་སྐུར་པ་འདེབས་པ་ལ་འདག་པར་
[98b.6]མངོན་པར་ཞེན་པ་མི་འཐད་པའི་ཕྱིར་རོ། །རྫས་དང་རྫས་མ་ཡིན་པར་རྟོག་པ་ཐ་དད་པ་ཡོད་ན་འགའ་ཞིག་ཐར་པའི་ཐབས་ཚོལ་བར་བྱེད་ལ། དེ་ལ་ནི་གདོན་མི་ཟ་བར་ཐར་པ་ཡོད་དོ་སྙམ་པའི་ངེས་པ་ཡོད་དོ། གང་གདོན་མི་ཟ་བར་ཐར་པ་ཡོད་དོ་སྙམ་པའི་ངེས་པ་ཡོད་པ་དེ་ནི་དེ་ལ་རྟག་པ་
[98b.7]དང་ཞི་བར་ཡང་འཛིན་ཏོ། །དེ་ལྟ་མ་ཡིན་ན་དེ་དོན་དུ་གཉེར་བ་མི་འཐད་པའི་ཕྱིར་རོ། །དེ་ལ་དཔེར་ན་ཆོས་འདི་པ་རྣམས་ལ་མྱ་ངན་ལས་འདས་པ་རྫས་དང་རྫས་མ་ཡིན་པར་རྟོག་པ་ཐ་དད་ཀྱང་རྟག་པ་དང་། ཞི་བར་འཛིན་པར་མཚུངས་པའི་ཕྱིར་དེ་ལ་སྐུར་པ་འདེབས་པའི་ལྟ་བ་ནི་སྐྱོན་
[99a]
[99a.1]ཁོ་ན་ཡིན་པ་ལྟར། གང་གིས་ཐར་པའི་གནས་ཅུང་ཟད་ཅིག་སེམས་ལ་བཞག་པ་དེ་ཡང་རྟག་པ་དང་ཞི་བར་འཛིན་པར་མཚུངས་པའི་ཕྱིར་ཐར་པ་ལ་སྐུར་པ་འདེབས་པ་ལ་རིགས་པར་འཛིན་པ་མི་འཐད་དོ། །ཚུལ་ཁྲིམས་དང་བརྟུལ་ཞུགས་ལ་སོགས་པ་
[99a.2]ནི་འཕགས་པའི་ལམ་ལས་ངོ་བོ་ཉིད་དང་། རྣམ་པའི་སྒོ་ནས་ཐ་དད་པ་ཡིན་གྱི། རྟག་པ་དང་ཞི་བར་འཛིན་པ་ལ་ནི་ཐ་དད་པ་མེད་པས་མཚུངས་པར་རྟག་ཏུ་རུང་བ་མེད་དོ། །དེའི་ཕྱིར་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་ལམ་མཐོང་བས་སྤང་བར་བྱ་བ་ཁོ་ན་ཡིན་
[99a.3]པ་སྲིད་ཀྱི། འགོག་པ་མཐོང་བས་སྤང་བར་བྱ་བ་ནི་མ་ཡིན་ནོ་ཞེས་ཟེར་རོ། །འདིར་ཆོས་མངོན་པ་པ་རྣམས་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་རྣམ་པ་གཉིས་སུ་འདོད་ན་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཇི་ལྟ་བུ་ཞིག་ནི་སྡུག་བསྔལ་མཐོང་
[99a.4]བས་སྤང་བར་བྱ་བར་རྣམ་པར་འཇོག །ཇི་ལྟ་བུ་ཞིག་ལམ་མཐོང་བས་སྤང་བར་བྱ་བར་རྣམ་པར་འཇོག་སྟེ། གང་ཞིག་བ་ལང་གི་ཚུལ་ཁྲིམས་ལ་སོགས་པས་འདག་པར་ཡིད་ཆེས་པ་དེ་དག་ཀྱང་ལམ་མ་ཡིན་པ་ལ་ལམ་དུ་ནི་ལྟའོ་ཞེ་ན། ཚུལ་ཁྲིམས་དང་བརྟུལ་ཞུགས་
[99a.5]མཆོག་ཏུ་འཛིན་པ་གང་ཞིག་ཚུལ་ཁྲིམས་དང་བརྟུལ་ཞུགས་ལ་སོགས་པ་སྡུག་བསྔལ་དམིགས་པ་དེ་ནི་སྡུག་བསྔལ་མཐོང་བས་སྤང་བར་བྱ་བ་ཡིན་ལ། གང་ཞིག་ལམ་ལ་ལོག་པར་ཞུགས་པ་ལ་དམིགས་པ་དེ་ནི་ལམ་མཐོང་བས་སྤང་བར་བྱ་བ་ཡིན་ནོ། །ཚུལ་ཁྲིམས་
[99a.6]དང་བརྟུལ་ཞུགས་ལ་སོགས་པ་ལ་དམིགས་པ་གང་ཡིན་པ་དེ་ནི་ལམ་ལ་ལོག་པར་ཞུགས་པ་མ་ཡིན་ཞིང་། ལམ་ལ་ལོག་པར་ཞུགས་པ་ལ་དམིགས་པ་ཇི་ལྟ་བ་དེ་ལྟར་གནོད་པར་བྱེད་པ་ཡང་མ་ཡིན་ཏེ། འདི་ལྟར་ཚུལ་ཁྲིམས་དང་བརྟུལ་ཞུགས་ལ་སོགས་པ་ལ་དམིགས་པ་ནི་རགས་
[99a.7]པ་དང་། རིང་དུ་སོང་བ་མ་ཡིན་པ་དང་། བསམ་པ་བརྟན་པོ་མ་ཡིན་པ་དང་། འབད་པ་ཆུང་ངུས་གཞོམ་པར་བྱ་བ་ཡིན་ལ། ལམ་ལ་ལོག་པར་ཞུགས་པ་ལ་དམིགས་པ་ནི་དེ་ལས་བཟློག་པ་མ་ཡིན་པས་སོ། །ལྟ་བ་གསུམ་ལས་ཕྱིན་ཅི་ལོག་བཞི་ཚན་ཞེས་བྱ་བ་ནི་ཕྱིན་ཅི་ལོག་
[99b]
[99b.1]དག་ནི་ལྟ་བ་གསུམ་གྱི་ངོ་བོ་ཉིད་ཡིན་ནོ་ཞེས་སྟོན་པར་བྱེད་དོ། །འཇིག་ཚོགས་ལ་ལྟ་བ་ལས་ནི་བདག་ཏུ་ལྟ་བ་ཕྱིན་ཅི་ལོག་གོ་ཞེས་བྱ་བ་ནི་བདག་གིར་ལྟ་བ་མ་ཡིན་ནོ་སྙམ་དུ་བསམས་པ་ཡིན་ནོ། །གཞན་དག་ན་རེ་ཐམས་ཅད་ཡིན་ནོ་ཞེས་ཟེར་རོ་ཞེས་བྱ་བ་ནི་འཇིག་ཚོགས་ལ་ལྟ་
[99b.2]བ་བདག་ཏུ་ལྟ་བ་དང་། བདག་གིར་ལྟ་བ་ཐམས་ཅད་བདག་ཏུ་ཕྱིན་ཅི་ལོག་པ་ཡིན་ནོ་ཞེས་བྱ་བའི་ཐ་ཚིག་གོ། །བྱེ་བྲག་ཏུ་སྨྲ་བས་ཇི་ལྟར་ན་བདག་གིར་ལྟ་བ་ཕྱིན་ཅི་ལོག་ཡིན་ཞེས་བྱ་བ་སྨོས་ཏེ། བདག་གིར་ལྟ་བ་ལ་ཕྱིན་ཅི་ལོག་ཅེས་མི་བྱའོ། །ཕ་རོལ་པོས་ཇི་ལྟར་ན་ཕྱིན་ཅི་ལོག་མ་ཡིན་ཞེས་
[99b.3]བྱ་བ་སྨྲས་པ་དང་། བྱེ་བྲག་ཏུ་སྨྲ་བས་ཕྱིན་ཅི་ལོག་གི་མདོ་ལས་མི་འབྱུང་བའི་ཕྱིར་རོ་ཞེས་བྱ་བ་སྨོས་ཏེ། མདོ་ལས་བདག་མེད་པ་ལ་བདག་གོ་སྙམ་དུ་ཕྱིན་ཅི་ལོག་པ་ཞེས་འབྱུང་གི །བདག་གི་སྙམ་དུ་ཞེས་བྱ་བར་མི་འབྱུང་བའི་ཕྱིར་རོ། །མདོ་ལས་དེ་སྐད་དུ་བསྟན་པ་ནི་ཡོད་མོད་ཀྱི།
[99b.4]དེ་ཡང་བདག་ཏུ་ལྟ་བ་ལས་དོན་གཞན་དུ་འགྱུར་བ་ནི་མ་ཡིན་ནོ། །ཇི་ལྟ་ཞེ་ན། དེ་ལས་ནི་བདག་ཁོ་ན་ཉེ་བར་ལེན་པའི་ཕུང་པོ་ལྔ་ལ་དབང་བྱེད་པར་ལྟ་བ་ནི་བདག་གིར་ལྟ་བར་འགྱུར་བར་བཤད་དེ། བདག་ལ་ལྟ་བ་འབའ་ཞིག་ཏུ་མ་ཟད་ཀྱི། བདག་གིར་ཡང་ལྟའོ་ཞེས་བྱ་བའི་ཐ་ཚིག་
[99b.5]གོ། །བདག་ཏུ་ལྟ་བ་འདི་ཉིད་སྒོ་གཉིས་ཅན་ཡིན་ནོ་ཞེས་བྱ་བ་ནི་བདག་དང་བདག་གི་སྒོ་ཅན་ཏེ། རྫས་སུ་ནི་གཅིག་ཡིན་ནོ། །ངར་འཛིན་པ་དང་། ང་ཡིར་འཛིན་པའི་སྒོ་གཉིས་དང་ལྡན་པ་ཡིན་ནོ་ཞེས་བྱ་བའི་ཐ་ཚིག་གོ། །འོན་ཏེ་བདག་ཅེས་བྱ་བ་དང་པོར་བསྟན་པ་འདི་ལས་
[99b.6]བདག་གི་ཞེས་བྱ་བ་དྲུག་པར་བསྟན་པ་ལྟ་བ་གཞན་ཞིག་ཡིན་ན་ནི་བདག་གི་ཞེས་བྱ་བ་དང་། བདག་གི་ཕྱིར་ཞེས་བྱ་བ་འདི་ཡང་འགྱུར་རོ། །ལྟ་བ་ཐ་དད་པ་ཞེས་བྱ་བ་སྐབས་དང་སྦྱར་ཏེ། བདག་གི་ཞེས་བྱ་བ་ནི་གསུམ་པར་བསྟན་པའི་ཕྱིར་ལ། བདག་གི་ཕྱིར་ཞེས་བྱ་བ་ནི་བཞི་པར་
[99b.7]བསྟན་པའི་ཕྱིར་རོ། །དེ་ཡང་འདོད་པ་མ་ཡིན་ཏེ། དེ་ལྟ་བས་ན་ཐམས་ཅད་ཡིན་ནོ་ཞེས་བྱ་བར་གྲུབ་པོ། །ཅིའི་ཕྱིར་ཉོན་མོངས་པ་གཞན་དག་ཕྱིན་ཅི་ལོག་མ་ཡིན་ཞེ་ན་ཞེས་བྱ་བ་ནི་འཇིག་ཚོགས་ལ་ལྟ་བ་དང་། མཐར་འཛིན་པར་ལྟ་བ་དང་། ལྟ་བ་མཆོག་ཏུ་འཛིན་པ་དག་
[100a]
[100a.1]ལས་གཞན་ཆད་པར་ལྟ་བ་དང་། ལོག་པར་ལྟ་བ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པར་ལྟ་བ་དང་། འདོད་ཆགས་ལ་སོགས་པའོ། །རྒྱུ་གསུམ་གྱིས་ཞེས་བྱ་བ་ནི་ཕྱིན་ཅི་ལོག་པ་དང་། ངེས་པར་རྟོག་པ་དང་། སྒྲོ་འདོགས་
[100a.2]པ་དག་གིས་ཕྱིན་ཅི་ལོག་རྣམས་རྣམ་པར་གཞག་སྟེ། གང་ལ་རྒྱུ་འདི་དག་རིལ་གྱིས་ཡོད་པ་དེ་དག་ནི་ཕྱིན་ཅི་ལོག་ཏུ་རྣམ་པར་གཞག་གོ། །གང་ལ་རིལ་གྱིས་མེད་པ་དེ་དག་ནི་ཕྱིན་ཅི་ལོག་མ་ཡིན་ནོ་ཞེས་བཤད་པ་ཡིན་ནོ། །དེ་ཙམ་ཞིག་གིས་འདག་པར་དམིགས་པའི་ཕྱིར་རོ་
[100a.3]ཞེས་བྱ་བ་ནི་གང་གི་ཕྱིར་ཚུལ་ཁྲིམས་དང་བརྟུལ་ཞུགས་ཙམ་གྱིས་འདག་གོ་སྙམ་དུ་དམིགས་པ་ལ་ངེས་པར་རྟོག་པར་བྱེད་དོ། །འདི་ལྟར་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་གཅིག་ཏུ་ཕྱིན་ཅི་ལོག་པ་མ་ཡིན་ཏེ། ཚུལ་ཁྲིམས་དང་བརྟུལ་ཞུགས་འདག་པའི་རྒྱུར་མི་
[100a.4]འགྱུར་བ་ནི་མ་ཡིན་གྱི། འབའ་ཞིག་གིས་མི་འགྱུར་བར་ཟད་དོ། །འདིའི་སྒྲོ་འདོགས་པའི་རྣམ་པ་ཉིད་ཇི་ལྟ་བུ་ཞེ་ན། དེ་ཙམ་གྱིས་འདག་པའི་རྒྱུའི་དངོས་པོར་སྒྲོ་འདོགས་པའི་ཕྱིར་རོ། །གལ་ཏེ་ངེས་པར་རྟོག་པར་མི་བྱེད་པ་ཕྱིན་ཅི་ལོག་མ་ཡིན་ན་འོ་ན་མདོ་ལས་གསུངས་པ་
[100a.5]གང་ཡིན་པ་དེ་ཇི་ལྟ་བུ་སྟེ། འདུ་ཤེས་ཀྱང་ངེས་པར་རྟོག་པར་བྱེད་པ་མ་ཡིན་ལ། སེམས་ཀྱང་ངེས་པར་རྟོག་པར་བྱེད་པ་ནི་མ་ཡིན་ནོ། །ཕྱིན་ཅི་ལོག་བཅུ་གཉིས་ཡིན་ནོ་ཞེས་བྱ་བ་ནི་ཕྱིན་ཅི་ལོག་བཞི་པོ་རེ་རེ་ལ་འདུ་ཤེས་དང་སེམས་དང་ལྟ་བ་ཕྱིན་ཅི་ལོག་དག་ཡོད་པས་སོ། །ཇི་ལྟ་ཞེ་ན།
[100a.6]མི་རྟག་པ་ལ་རྟག་གོ་སྙམ་དུ་ཞེས་བྱ་བ་ནས་རྒྱས་པར་དེ་བཞིན་དུ་བདག་མེད་ལ་བདག་གོ་སྙམ་པའི་བར་ཞེས་བྱ་བ་སྨོས་ཏེ། སྡུག་བསྔལ་ལ་བདེའོ་སྙམ་དུ་འདུ་ཤེས་དང་སེམས་དང་ལྟ་བ་ཕྱིན་ཅི་ལོག་གསུམ་དང་། མི་གཙང་བ་ལ་གཙང་ངོ་སྙམ་དུ་དེ་ཉིད་གསུམ་ནས་བདག་མེད་པ་ལ་
[100a.7]བདག་གོ་སྙམ་དུ་དེ་ཉིད་གསུམ་གྱི་བར་ཡིན་ནོ། །དེ་ལ་བརྒྱད་ནི་མཐོང་བས་སྤང་བར་བྱ་བ་ཡིན་ནོ་ཞེས་བྱ་བ་ནི་མི་རྟག་པ་ལ་རྟག་གོ་སྙམ་དུ་འདུ་ཤེས་དང་སེམས་དང་ལྟ་བ་ཕྱིན་ཅི་ལོག་གསུམ་དང་། བདག་མེད་པ་ལ་བདག་གོ་སྙམ་པ་ཡང་གསུམ་དང་། སྡུག་བསྔལ་ལ་བདེའོ་སྙམ་དུ་ལྟ་བ་
[100b]
[100b.1]ཕྱིན་ཅི་ལོག་དང་། མི་གཙང་བ་ལ་གཙང་ངོ་སྙམ་དུ་ལྟ་བ་ཕྱིན་ཅི་ལོག་གོ། །བཞི་ནི་བསྒོམ་པས་སྤང་བར་བྱ་བ་དག་ཡིན་ནོ། །གང་དག་ཅེ་ན། གང་དག་སྡུག་བསྔལ་དང་མི་གཙང་བ་ལ་འདུ་ཤེས་དང་ཕྱིན་ཅི་ལོག་པ་ཞེས་བྱ་བ་སྨོས་ཏེ། སྡུག་བསྔལ་ལ་བདེའོ་སྙམ་དུ་
[100b.2]འདུ་ཤེས་དང་སེམས་ཕྱིན་ཅི་ལོག་གཉིས་དང་། མི་གཙང་བ་ལ་གཙང་ངོ་སྙམ་དུ་འདུ་ཤེས་དང་སེམས་ཕྱིན་ཅི་ལོག་ཀྱང་གཉིས་ཏེ་བཞིའོ། །འཕགས་པ་འདོད་ཆགས་དང་མ་བྲལ་བ་ལ་ཞེས་བྱ་བ་ནི་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་ལའོ། །དེ་དག་ནི་ཕྱིན་ཅི་ལོག་དག་ཏུ་
[100b.3]ཡང་ཅིའི་ཕྱིར་མི་འདོད་ཅེས་བྱ་བ་ནི་སེམས་ཅན་གྱི་འདུ་ཤེས་ཀུན་དུ་འབྱུང་བའི་ཕྱིར་དང་། སེམས་ཅན་ནོ་སྙམ་པའི་སེམས་ཀུན་དུ་འབྱུང་བའི་ཕྱིར་དེ་དག་གི་འདུ་ཤེས་སུ་ཡང་ཅིའི་ཕྱིར་མི་འདོད། སེམས་ཅན་ལ་དམིགས་པའི་འདུ་ཤེས་དང་། སེམས་ཕྱིན་ཅི་ལོག་དག་ཀྱང་ཡོད་པར་ཅིའི་ཕྱིར་མི་
[100b.4]འདོད་དེ། བདག་ཏུ་ཕྱིན་ཅི་ལོག་པ་དག་ཀྱང་ཅི་སྟེ་ཡོད་པར་འདོད་པར་མི་བྱེད་སྙམ་དུ་བསམས་པ་ཡིན་ནོ། །ཅིའི་ཕྱིར་ཞེ་ན། བུད་མེད་དང་བདག་ལ་སེམས་ཅན་དུ་འདུ་ཤེས་པ་མེད་པར་ནི་འདོད་པའི་འདོད་ཆགས་སྐྱེ་བར་རིགས་པ་མ་ཡིན་ནོ་ཞེས་བྱ་བ་སྨོས་ཏེ། དེ་ལྟ་བས་ན་བདག་མེད་པ་
[100b.5]ལ་བདག་གོ་སྙམ་དུ་འདུ་ཤེས་དང་སེམས་ཕྱིན་ཅི་ལོག་འདི་དག་ཀྱང་བསྒོམ་པས་སྤང་བར་བྱ་བ་ཡིན་ནོ་ཞེས་བྱ་བར་གྱུར་ཏོ། །རྒྱས་པར་ཞེས་འབྱུང་བའི་ཕྱིར་འདི་ལྟར་སྦྱར་བར་བྱ་སྟེ། སྡུག་བསྔལ་ལ་བདེའོ་སྙམ་པ་དང་། མི་གཙང་བ་ལ་གཙང་ངོ་སྙམ་པ་ནས་བདག་མེད་པ་ལ་བདག་གོ་སྙམ་དུ་འདུ་ཤེས་
[100b.6]ཕྱིན་ཅི་ལོག་དང་། སེམས་ཕྱིན་ཅི་ལོག་དང་། ལྟ་བ་ཕྱིན་ཅི་ལོག་དེ་སྤོང་བར་བྱེད་དོ་ཞེས་བྱ་བ་ཡིན་ནོ། །དེ་ལྟ་བས་ན་ལྟ་བས་ཀུན་ནས་བསླང་བ་ཁོ་ན་སྟེ། ལྟ་བ་དང་མཚུངས་པར་ལྡན་པའི་འདུ་ཤེས་དང་སེམས་ཁོ་ན་ཕྱིན་ཅི་ལོག་ཡིན་གྱི་གཞན་ནི་མ་ཡིན་ཏེ། ལྟ་བ་དང་མཚུངས་པར་མི་ལྡན་པ་
[100b.7]དག་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །འདི་སྐད་དུ་འདུ་ཤེས་དང་སེམས་འཁྲུལ་པ་འདི་ཡང་ཡོད་མོད་ཀྱི། འདི་ལྟར་དེ་ནི་ལྟ་བས་ཀུན་ནས་བསླང་བ་མ་ཡིན་པས་ཕྱིན་ཅི་ལོག་མ་ཡིན་ནོ་ཞེས་བཤད་པ་ཡིན་ནོ། །ཅིའི་ཕྱིར་ཞེ་ན། དེའི་དུས་སུ་འཁྲུལ་པ་ཙམ་ཡིན་པའི་ཕྱིར་ཞེས་བྱ་བ་
[101a]
[101a.1]སྨོས་ཏེ། བུད་མེད་མཐོང་བའི་ཚེ་འཁྲུལ་པ་ཙམ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་ལྟ་བས་ན་འཕགས་པ་རྣམས་ཀྱིས་ནི་དེའི་དུས་སུ་དེ་ལྟར་མཐོང་བའི་འཁྲུལ་པ་ཁོ་ནས་ལོག་པའི་ཤེས་པ་ཡིན་ཏེ། མགལ་མེའི་འཁོར་ལོ་དང་། རི་མོའི་གནོད་སྦྱིན་ལ་
[101a.2]འཁྲུལ་པ་བཞིན་ནོ། །དཔེར་ན་མགལ་མེའི་འཁོར་ལོ་མྱུར་དུ་བསྐོར་ན་དེའི་དུས་ཙམ་དུ་འཁོར་ལོའོ་སྙམ་དུ་འཁྲུལ་པ་སྐྱེའི་ཕྱིས་ནི་མ་ཡིན་པ་དང་། རི་མོར་བྲིས་པའི་གནོད་སྦྱིན་མཐོང་ནས་དེའི་དུས་སུ་གནོད་སྦྱིན་ནོ་སྙམ་དུ་འཁྲུལ་པ་སྐྱེའི་ཕྱིས་ནི་མ་ཡིན་པ་དེ་དང་འདྲའོ། །འཕགས་པ་
[101a.3]ནི་འདི་ལ་ངེས་པར་རྟོག་པ་ཡིན་པའི་ཕྱིར་བདེ་བ་འམ་གཙང་བར་འཁྲུལ་པའམ། སེམས་ཅན་དུ་འཁྲུལ་པའང་རུང་། ཡུད་ཙམ་པར་ཟད་ཀྱི། འདི་ཕྱིན་ཅི་ལོག་ནི་མ་ཡིན་ཏེ། བཅོམ་ལྡན་འདས་ཀྱིས་དགེ་སློང་དག་འཕགས་པ་ཉན་ཐོས་ཐོས་པ་དང་ལྡན་པ་ལ་དྲན་པ་ཉམས་པ་
[101a.4]ཅུང་ཟད་འབྱུང་མོད་ཀྱི། འོན་ཀྱང་མྱུར་བ་ཁོ་ནས་མི་སྣང་བ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་འགྱུར་རོ་ཞེས་གསུངས་པས་སོ། །གལ་ཏེ་འདུ་ཤེས་དང་སེམས་འཁྲུལ་པ་དེ་ཕྱིན་ཅི་ལོག་མ་ཡིན་ན་ཕྱོགས་གསུམ་པ་འཛིན་པ་གཞན་ཁ་ཅིག་གིས། འོ་ན་གནས་
[101a.5]བརྟན་ཀུན་དགའ་བོས་ཞེས་བྱ་བ་རྒྱས་པར་སྨོས་ཏེ། འཕགས་པ་ངག་གི་དབང་ཕྱུག་གིས་གནས་བརྟན་ཀུན་དགའ་བོ་ལ། འདོད་པའི་ཆགས་པས་ཟིལ་ནོན་ཕྱིར། །བདག་གི་སེམས་ནི་གདུང་བར་འགྱུར། །གཽ་ཏམ་ཁྱོད་ཀྱི་ཐུགས་བརྩེའི་ཕྱིར། །ཞི་བ་མཆོག་ནི་བཤད་དུ་
[101a.6]གསོལ། །ཞེས་སྨྲས་པ་དང་། འཕགས་པ་ཀུན་དགའ་བོ་ཡི་ཕྱིར། །འདུ་ཤེས་ཕྱིན་ཅི་ལོག་པ་ཡིས། །ཁྱོད་ཀྱི་སེམས་ནི་ཡོངས་སུ་གདུངས། །དེ་ཕྱིར་འདོད་ཆགས་ལྡན་པ་ཡི། །རྒྱུ་མཚན་སྡུག་པ་སྤང་བར་གྱིས། །ཞེས་སྨྲས་ཏེ། དེ་ནི་རྒྱུན་དུ་ཞུགས་པ་ཡིན་ལ་ཚིགས་སུ་བཅད་
[101a.7]པ་འདིས་ནི་དེ་ལ་ཡང་ཕྱིན་ཅི་ལོག་ཡོད་པ་ཉིད་དུ་ཡོངས་སུ་བསྟན་པས་སོ། །དེ་ལྟ་བས་ན་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་སྡེ་པ་གཞན་གྱི་གཞུང་ལུགས་ཀྱང་བྱེ་བྲག་ཏུ་སྨྲ་བ་རྣམས་ཀྱི་ལུང་དང་འགལ་བར་བྱས་ལ། བྱེ་བྲག་ཏུ་སྨྲ་བའི་གཞུང་ལུགས་ཀྱང་སྡེ་པ་གཞན་
[101b]
[101b.1]དག་གི་ལུང་དང་འགལ་བར་བྱས་པ། དེའི་ཕྱིར་སློབ་པས་འདུ་ཤེས་དང་སེམས་ཕྱིན་ཅི་ལོག་བརྒྱད་པོ་ཐམས་ཅད་མ་སྤངས་པ་ཁོ་ནའོ་ཞེས་ཟེར་རོ། །མདོ་དང་འགལ་བ་ཡང་སྤོང་བར་བྱེད་དོ། །མདོ་གང་ཞིག་ཅེ་ན། བྱེ་བྲག་ཏུ་སྨྲ་བ་རྣམས་ཀྱིས་ཁུངས་སུ་ཁྱེར་ཏེ། འོང་བ་འདི་ལྟར་
[101b.2]འཕགས་པ་ཉན་ཐོས་ཐོས་པ་དང་ལྡན་པ་ཞེས་བྱ་བ་རྒྱས་པར་དེ་སྤོང་བར་བྱེད་དོ་ཞེས་བྱ་བའི་བར་གང་ཡིན་པ་འདི་ལྟ་སྟེ། དེ་དག་ཀྱང་འཕགས་པའི་བདེན་པ་རྣམས་ཞེས་བྱ་བ་རྒྱས་པར་སྨོས་ཏེ། འདུ་ཤེས་དང་སེམས་ཕྱིན་ཅི་ལོག་བརྒྱད་པོ་དེ་དག་ཀྱང་སྡུག་བསྔལ་ལ་སོགས་པ་འཕགས་
[101b.3]པའི་བདེན་པ་རྣམས་ཡང་དག་པ་ཇི་ལྟ་བ་བཞིན་ཤེས་པས་སྤོང་བར་འགྱུར་གྱི། ཡང་དག་པ་ཇི་ལྟ་བ་བཞིན་ཤེས་པ་དེ་མེད་པར་ནི་མ་ཡིན་ནོ་ཞེས་ཐབས་ཡང་དག་པར་བསྟན་པའི་ཕྱིར་ཏེ། ཐབས་ལེགས་པར་བརྗོད་པའི་ཕྱིར་མདོ་སྡེ་དང་འགལ་བ་མེད་དོ་ཞེས་ཟེར་རོ། །འདི་ནི་སྡུག་
[101b.4]བསྔལ་འཕགས་པའི་བདེན་པའོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཡིན་ནོ་ཞེས་བཤད་པ་གང་ཡིན་པ་དེ་ཡང་མཐོང་བའི་ལམ་ཁོ་ནའི་དབང་དུ་མཛད་པ་ནི་མ་ཡིན་ནོ། །
[101b.5]འོ་ན་ཅི་ཞེ་ན། བསྒོམ་པའི་ལམ་གྱི་དབང་དུ་མཛད་པ་ཡང་ཡིན་ཏེ། བསྒོམ་པའི་ལམ་ཟག་པ་མེད་པའི་འཕགས་པའི་བདེན་པ་ལ་དམིགས་པའི་ཁོ་ནས་སོ། །འཇུག་པའི་བྱེ་བྲག་ལས་ནི་ཞེས་བྱ་བ་ནི་རྣམ་པའི་བྱེ་བྲག་ལས་ཞེས་བྱ་བའི་ཐ་ཚིག་གོ། །ཁྱད་པར་ཐོབ་པར་བྱ་བ་མ་ཐོབ་
[101b.6]པར་ཞེས་བྱ་བ་ལ། ཁྱད་པར་ནི་ཏིང་ངེ་འཛིན་དེ་ལ་བརྟེན་པའི་ཆོས་ཟག་པ་དང་བཅས་པ་དང་། ཟག་པ་མེད་པ་དག་གོ། །དེ་ཐོབ་པར་བྱ་བ་ནི་མངོན་སུམ་དུ་བྱ་བའོ། །ཁྱད་པར་ཐོབ་པར་བྱ་བ་དེ་མ་ཐོབ་ཅིང་མངོན་དུ་མ་བྱས་པར་བདག་གིས་ཁྱད་པར་ཐོབ་པར་བྱ་བ་དེ་ཐོབ་པོ་སྙམ་
[101b.7]པ་ནི་མངོན་པའི་ང་རྒྱལ་ཡིན་ནོ། །ཡོན་ཏན་མ་ཡིན་པ་དང་ལྡན་པ་ལ་བདག་ཡོན་ཏན་དང་ལྡན་ནོ་སྙམ་པ་ཞེས་བྱ་བ་ནི་ཡོན་ཏན་དང་མི་ལྡན་པ་ལ་བདག་ཡོན་ཏན་དང་ལྡན་ནོ་སྙམ་པའི་ང་རྒྱལ་ལོག་པའི་ཡུལ་ཅན་ནི་ལོག་པའི་ང་རྒྱལ་ལོ། །ལོག་པའི་ང་རྒྱལ་དང་མངོན་པའི་ང་རྒྱལ་
[102a]
[102a.1]དག་ལ་ཁྱད་པར་ཅི་ཡོད་ཅེ་ན། མངོན་པའི་ང་རྒྱལ་ནི་ཁྱད་པར་ཐོབ་པར་བྱ་བ་དང་འདྲ་བའི་ཡོན་ཏན་ཐོབ་པའི་བསམ་པ་ཡིན་པས་གཞི་དང་བཅས་པ་ཡིན་ནོ། །ལོག་པའི་ང་རྒྱལ་ནི་ཡོན་ཏན་མེད་པ་ལས་བདག་ནི་ཡོན་ཏན་དང་ལྡན་པ་ཡིན་ནོ་སྙམ་པ་ཡིན་པས་གཞི་མེད་པ་ཡིན་
[102a.2]ནོ། །ང་རྒྱལ་གྱི་རྣམ་པ་ཞེས་བྱ་བ་ནི་ང་རྒྱལ་གྱི་རྣམ་པ་སྟེ། བདག་དང་འདྲའོ་སྙམ་པ་དང་། བདག་དམན་ནོ་སྙམ་པ་ཞེས་བྱ་བ་ལ་ཡང་ང་རྒྱལ་གྱི་རྣམ་པ་ཞེས་བརྗོད་པར་བྱའོ། །ལྟ་བ་ལ་བརྟེན་པའི་ང་རྒྱལ་གསུམ་སྟེ་ཞེས་བྱ་བ་ནི། སོ་སོའི་སྐྱེ་བོའི་དབང་
[102a.3]དུ་བྱས་ནས་ལྟ་བ་ལ་བརྟེན་པ་ཞེས་བརྗོད་དེ། སྔར་ནི་ངའོ་སྙམ་དུ་བདག་ཏུ་ལྟ་བ་འབྱུང་ལ། ཕྱིས་ནི་མཇུག་ཐོགས་སུ་ང་རྒྱལ། །ལྷག་པའི་ང་རྒྱལ་དང་། ང་རྒྱལ་དང་། ཅུང་ཟད་སྙམ་པའི་ང་རྒྱལ་འདི་དག་འབྱུང་ངོ་། །འདི་དག་ཀྱང་གོ་རིམས་བཞིན་ཡིན་ཏེ། ཇི་ལྟ་ཞེ་ན། བདག་
[102a.4]མཆོག་ཡིན་ནོ་སྙམ་པའི་ང་རྒྱལ་གྱི་རྣམ་པ་ནི་ལྟ་བ་ལ་བརྟེན་པའི་ལྷག་པའི་ང་རྒྱལ་ཡིན་ནོ། །བདག་དང་འདྲའོ་སྙམ་པ་ང་རྒྱལ་གྱི་རྣམ་པ་ནི་ལྟ་བ་ལ་བརྟེན་པའི་ང་རྒྱལ་ཡིན་ནོ། །བདག་དམན་ནོ་སྙམ་པའི་ང་རྒྱལ་གྱི་རྣམ་པ་ནི་འཇིག་ཚོགས་ལ་ལྟ་བ་ལ་བརྟེན་པའི་ཅུང་ཟད་སྙམ་པའི་ང་རྒྱལ་ཡིན་
[102a.5]ནོ། །གཉིས་པའི་ནི་འདི་ལས་བཟློག་སྟེ། གོ་རིམས་བཞིན་དུ་སྦྱར་ཏེ། བདག་པས་མཆོག་ཡོད་དོ། །བདག་དང་མཉམ་པ་ཡོད་དོ། །བདག་པས་དམན་པ་ཡོད་དོ་ཞེས་བྱ་བ་ནི་ལྟ་བ་ལ་བརྟེན་པའི་ཅུང་ཟད་སྙམ་པའི་ང་རྒྱལ་དང་། ང་རྒྱལ་དང་། ལྷག་པའི་ང་རྒྱལ་རྣམས་སོ། །གསུམ་
[102a.6]པ་ནི་བདག་པས་མཆོག་མེད་དོ། །བདག་དང་མཉམ་པ་མེད་དོ། །བདག་པས་དམན་པ་མེད་དོ་ཞེས་བྱ་བ་ནི་གོ་རིམས་བཞིན་དུ་ལྟ་བ་ལ་བརྟེན་པའི་ང་རྒྱལ་དང་། ལྷག་པའི་ང་རྒྱལ་དང་། ཅུང་ཟད་སྙམ་པའི་ང་རྒྱལ་རྣམས་ཡིན་ནོ། །རབ་ཏུ་བྱེད་པ་ལས་བསྟན་པ་ཡོངས་སུ་བཟུང་སྟེ་ཞེས་བྱ་བ་ནི་
[102a.7]རབ་ཏུ་བྱེད་པའི་རྐང་པ་ལས་བསྟན་པ་ཡིན་ནོ། །དེ་ཡང་གང་ཞིག་ཅེ་ན། སྔར་བཤད་པ་སྟེ་ཆུང་ངུ་བས་བདག་ཁྱད་པར་དུ་འཕགས་པ་འམ། མཉམ་པ་དང་མཉམ་མོ་སྙམ་པ་ལ་སོགས་པ་བསྟན་པ་ཡིན་ནོ། །བདག་མཆོག་ཡིན་ནོ་སྙམ་པའི་ང་རྒྱལ་གྱི་རྣམ་པ་ནི་དམན་པ་ལས་ལྟོས་ན་ང་
[102b]
[102b.1]རྒྱལ་ཡང་ཡིན་ཏེ། ང་རྒྱལ་གྱི་མཚན་ཉིད་ནི་ཆུང་ངུ་བས་བདག་ཁྱད་པར་དུ་འཕགས་པའམ་མཉམ་པ་དང་ཞེས་བསྟན་པའི་ཕྱིར་རོ། །འདི་མཉམ་པ་ལ་ལྟོས་ན་ནི་ལྷག་པའི་ང་རྒྱལ་ཡང་ཡིན་ཏེ། ལྷག་པའི་ང་རྒྱལ་གྱི་མཚན་ཉིད་ནི་མཉམ་པ་བས་བདག་ཁྱད་པར་དུ་འཕགས་སོ་སྙམ་པ་ཞེས་
[102b.2]བསྟན་པའི་ཕྱིར་རོ། །འདི་ཁྱད་པར་དུ་འཕགས་པ་ལ་ལྟོས་ན་ནི་ང་རྒྱལ་ལས་ཀྱང་ང་རྒྱལ་ཡང་ཡིན་ཏེ། ང་རྒྱལ་ལས་ཀྱང་ང་རྒྱལ་གྱི་མཚན་ཉིད་ནི་ཁྱད་པར་དུ་འཕགས་པ་བས་ཀྱང་བདག་ཁྱད་པར་དུ་འཕགས་སོ་སྙམ་པ་ཞེས་བསྟན་པའི་ཕྱིར་རོ། །ཐམས་ཅད་ཅེས་བྱ་བ་སྨོས་པ་ནི་ངའོ་
[102b.3]སྙམ་པའི་ང་རྒྱལ་ཡང་བསྒོམ་པས་སྤང་བར་བྱ་བ་ཡིན་གྱི། ལྷག་མ་དག་མ་ཡིན་པ་འབའ་ཞིག་ཏུ་ནི་མ་ཟད་དོ་ཞེས་བྱ་བ་དང་། ལྷག་མ་དག་ཀྱང་མཐོང་བས་སྤང་བར་བྱ་བ་མ་ཡིན་གྱི། ངའོ་སྙམ་པའི་ང་རྒྱལ་ཡིན་པ་འབའ་ཞིག་ཏུ་ནི་མ་ཟད་དོ་ཞེས་རབ་ཏུ་བསྟན་པའི་ཕྱིར་རོ། །གསོད་སོགས་
[102b.4]ཀུན་ནས་དཀྲིས་པའོ། །ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་ལ་སོགས་པ་བསྡུའོ། །དེ་ནི་བསྒོམ་པས་སྤང་བར་བྱ་བ་ཡིན་ཏེ། བསྒོམ་པས་སྤང་བར་བྱ་བའི་ཆོས་ལ་དམིགས་པའི་ཕྱིར་རོ་ཞེས་བྱ་བ་ནི་
[102b.5]འདིའི་དམིགས་པ་ནི་བསྒོམ་པས་སྤང་བར་བྱ་བའི་ཆོས་རྣམས་ཁོ་ན་ཡིན་པས་སོ། །འཇིག་ཚོགས་ལ་ལྟ་བ་ལ་སོགས་པ་ནི་བསྒོམ་པས་སྤང་བར་བྱ་བའི་ཆོས་ལ་དམིགས་པར་ནི་བྱེད་མོད་ཀྱི། བསྒོམ་པས་སྤང་བར་བྱ་བ་འབའ་ཞིག་ལ་ནི་མ་ཡིན་པས་དེའི་ཕྱིར་དེ་དག་ནི་བསྒོམ་པས་
[102b.6]སྤང་བར་བྱ་བ་མ་ཡིན་ནོ། །དེ་ལ་དོན་དུ་གཉེར་བ་ཞེས་བྱ་བ་ནི་ཁམས་གསུམ་པའི་མི་རྟག་པ་ཉིད་ལ་དོན་དུ་གཉེར་བའོ། །ཅི་དེ་ལ་ཡང་དོན་དུ་གཉེར་བ་ཡོད་དམ་ཞེ་ན། སྨྲས་པ་ཡོད་དེ། མདོ་ལས་ཇི་སྐད་དུ། བདག་ཇི་སྲིད་གསོན་ཞིང་འདུག་ལ་སྡོད་ཅིང་འཚོ་བ་དེ་སྲིད་དུ་ནད་དང་བཅས་
[102b.7]པ། འབྲས་དང་བཅས་པ། ཟུག་རྔུ་དང་བཅས་པ། རིམས་ནད་དང་བཅས་པ། ཡོངས་སུ་གདུང་བ་དང་བཅས་པ་སྟེ། འདི་ལྟར་བདག་འདི་ཆད་པར་གྱུར་ཅིང་ཞིག་པར་གྱུར་ལ་འབྱུང་བར་མི་འགྱུར་ན་དེ་ཙམ་གྱིས་བདག་ཉིད་འདི་ཡང་དག་པར་ཀུན་ནས་འཆད་པ་ཡིན་ནོ་སྙམ་དུ་སེམས་
[103a]
[103a.1]སོ་ཞེས་འབྱུང་བ་ལྟ་བུའོ། །སྐྱེ་བའི་སྲེད་པའི་ཕྱོགས་གཟུང་ངོ་ཞེས་བྱ་བ་ནི་བདག་ནི་གླང་པོ་ཆེའི་རྒྱལ་པོ་ས་སྲུང་གི་བུར་གྱུར་ཀྱང་ཅི་མ་རུང་ཞེས་བྱ་བ་དེ་ལྟ་བུ་ལ་སོགས་པ་སྐྱེ་བའི་སྲེད་པ་ཀུན་དུ་མི་འབྱུང་བའོ། །ཕྱོགས་སྨོས་པས་ནི་དབང་པོར་གྱུར་ཅིག་སྙམ་པ་དེ་ལྟ་
[103a.2]བུ་ལ་སོགས་པ་དེ་ལྟ་བུ་ནི་ཀུན་དུ་འབྱུང་ངོ་ཞེས་བསྟན་པ་ཡིན་ནོ། །སོགས་པ་ཞེས་བྱ་བའི་སྒྲས་ནི་ལུས་ངན་པོར་གྱུར་ཅིག །བུད་མེད་དུ་གྱུར་ཅིག་སྙམ་པ་དེ་ལྟ་བུ་ལ་སོགས་པ་བསྡུའོ། །བསྒོམ་པས་སྤང་བར་བྱ་བ་ནི་ང་རྒྱལ་གྱི་རྣམ་པ་རྣམས་ཀྱང་ཡོད་དོ་ཞེས་བཤད་ལ་ཞེས་བྱ་
[103a.3]བ་ནི། མཐོང་དང་བསྒོམ་པས་ཟད་བྱ་བ། །ཞེས་འབྱུང་བའི་ཕྱིར་རོ། །འཕགས་པ་ལ། རྣམ་སོགས་ངའོ་སྙམ་མི་འབྱུང་། །ཞེས་བྱ་བ་ནི་གང་དུ། མཐོང་དང་བསྒོམ་པས་ཟད་བྱ་བ། །བསྒོམ་པས་སྤང་བར་བྱ་བ་ནི། །གསོད་སོགས་ཀུན་ནས་དཀྲིས་པའོ། །དེ་བཞིན་འཇིག་
[103a.4]སྲེད་ཅེས་བྱ་བའི་གཞུང་འདིས་བསྒོམ་པས་སྤང་བར་བྱ་བའི་ཚད་ཡོངས་སུ་བཅད་པ་ཡིན་ནོ། ད་ནི་འཕགས་པ་ལ་རྣམ་པ་ལ་སོགས་པ་དེ་དག་ཀུན་དུ་མི་འབྱུང་བར་བསྟན་པའི་ཕྱིར། འཕགས་པ་ལ། རྣམ་སོགས་ངའོ་སྙམ་མི་འབྱུང་། །ཞེས་བྱ་བ་སྨོས་སོ། །སོགས་པ་སྨོས་
[103a.5]པས་ནི་འཇིག་པའི་སྲེད་པའི་བར་བཟུང་ངོ་ཞེས་བྱ་བ་ནི་གསོད་པ་ལ་སོགས་པའི་ཀུན་ནས་དཀྲིས་པ་དང་། འཇིག་པའི་སྲེད་པ་དང་། སྐྱེ་བའི་སྲེད་པའི་ཕྱོགས་བསྡུའོ་ཞེས་བྱ་བའི་ཐ་ཚིག་གོ། །མི་འབྱུང་བ་ནི་ཀུན་དུ་མི་འབྱུང་བའོ། །ལྟ་བས་རྒྱས་པར་འགྱུར་ཕྱིར་རོ་ཞེས་བྱ་བ་
[103a.6]ནི་དེ་དག་ནི་དེ་སྔོན་དུ་འགྲོ་བ་ཉིད་ཀྱིས་རྒྱས་པར་བྱས་པའི་ཕྱིར་རོ། །རྐེད་པ་བཅག་པའི་ཕྱིར་རོ་ཞེས་བྱ་བ་ནི་དེ་རྒྱས་པར་བྱེད་པ་མེད་པས་རྐེད་པ་བཅག་པའི་ཕྱིར་ཞེས་བྱ་བའི་ཐ་ཚིག་གོ། །གསོད་པ་ལ་སོགས་པ་ཀུན་ནས་དཀྲིས་པ་ནི་ལོག་པར་ལྟ་བས་རྒྱས་པར་འགྱུར་ཏེ།
[103a.7]དེ་ལ་གོམས་པས་ལས་དང་འབྲས་བུ་ལ་སྐུར་པ་འདེབས་པར་བྱེད་པའི་ཕྱིར་རོ། །འགྱོད་པ་ནི་བསྒོམ་པས་སྤང་བར་བྱ་བ་ཡིན་ཏེ། བསྒོམ་པས་སྤང་བར་བྱ་བའི་ཆོས་ལ་དམིགས་པ་ཡིན་པའི་ཕྱིར་རོ། །ཀུན་དུ་འགྲོ་བ་དག་ཅེས་བྱ་བ་ནི་ཐམས་ཅད་དུ་འགྲོ་བས་ཀུན་དུ་འགྲོ་བ་སྟེ། རིགས་
[103b]
[103b.1]ལྔ་ཆར་ལ་ཡང་དམིགས་པར་བྱེད་པ་ཞེས་བྱ་བའི་ཐ་ཚིག་གོ། །གཞན་དག་ན་རེ་འདི་དག་གི་མཐུས་རིས་གཞན་པའི་ཉོན་མོངས་པ་དག་ཀྱང་སྐྱེའོ་ཞེས་འཆད་པར་འགྱུར་བས་རིས་ལྔ་ཆར་གྱི་རྒྱུའི་དངོས་པོར་གནས་པ་ཡིན་ནོ་ཞེས་ཟེར་རོ། །ཕྲ་རྒྱས་བཅུ་གཅིག་པོ་ཞེས་བྱ་བ་རྒྱས་པར་
[103b.2]འབྱུང་བ་ལ། ལྟ་བ་བདུན་ནི་སྡུག་བསྔལ་མཐོང་བས་སྤང་བར་བྱ་བ་འཇིག་ཚོགས་ལ་ལྟ་བ་ལ་སོགས་པ་ལྔ་དང་། ཀུན་འབྱུང་མཐོང་བས་སྤང་བར་བྱ་བ་ལྟ་བ་གཉིས་པོ་ལོག་པར་ལྟ་བ་དང་། ལྟ་བ་མཆོག་ཏུ་འཛིན་པ་དང་བདུན་ནོ། །ཐེ་ཚོམ་གཉིས་ནི་སྡུག་བསྔལ་དང་། ཀུན་འབྱུང་མཐོང་བས་
[103b.3]སྤང་བར་བྱ་བ་དག་གོ། །མ་རིག་པ་གཉིས་ནི་སྡུག་བསྔལ་དང་། ཀུན་འབྱུང་མཐོང་བས་སྤང་བར་བྱ་བ་དག་ཁོ་ན་སྟེ། ཕྱོགས་གཅིག་གི་སྒོ་ནས་ཡིན་གྱི། མཐའ་དག་གི་སྒོ་ནས་ནི་མ་ཡིན་ནོ། །མ་རིག་པ་གང་དག་ཀུན་དུ་འགྲོ་བ་དེ་དག་དང་མཚུངས་པར་ལྡན་པ་དང་། མ་འདྲེས་པ་དེ་དག་
[103b.4]ཁོ་ན་ཀུན་དུ་འགྲོ་བ་ཡིན་གྱི། འདོད་ཆགས་ལ་སོགས་པ་དང་མཚུངས་པར་ལྡན་པ་ནི་མ་ཡིན་ནོ། །དེ་ལྟར་ན་ཕྲ་རྒྱས་བཅུ་གཅིག་ནི་ཀུན་དུ་འགྲོ་བ་ཡིན་ཏེ། ཕྲ་རྒྱས་དགུ་ནི་མཐའ་དག་གི་སྒོ་ནས་ཡིན་ལ། གཉིས་ནི་ཕྱོགས་གཅིག་གི་སྒོ་ནས་ཡིན་པས་སོ། །མ་འདྲེས་པ་ཞེས་བྱ་བའི་དོན་ཅི་
[103b.5]ཞེ་ན། འདི་སྐད་དུ་འཆད་དེ། འགྲོགས་པ་ནི་འདྲེས་པ་ཞེས་བྱའོ། །འདྲེས་པ་མེད་པས་ན་མ་འདྲེས་ཏེ། ལོགས་ཤིག་ཏུ་གྱུར་པ་ཞེས་བྱ་བའི་ཐ་ཚིག་གོ། །འདི་སྐད་དུ་བཅོམ་ལྡན་འདས་མ་འདྲེས་ལ། དགེ་སློང་གི་དགེ་འདུན་མ་འདྲེས་ཞེས་གསུངས་ཏེ། བཅོམ་ལྡན་འདས་ཀྱང་ལོགས་
[103b.6]ཤིག་ལ། དགེ་སློང་གི་དགེ་འདུན་ཡང་ལོགས་ཤིག་གོ་སྙམ་དུ་དགོངས་པ་ཡིན་ནོ། །འདྲེས་པ་མེད་པར་སྤྱོད་པས་ན་མ་འདྲེས་པ་སྟེ། ཕྲ་རྒྱས་གཞན་དང་ལྷན་ཅིག་མི་འབྱུང་བ་ཞེས་བྱ་བའི་ཐ་ཚིག་གོ། །རང་གི་ཁམས་མཐའ་དག་ལ་དམིགས་པའི་ཕྱིར་ཞེས་བྱ་བ་ནི་གང་གི་ཕྱིར་འདི་དག་རང་གི་
[103b.7]ཁམས་མཐའ་དག་ལ་དམིགས་པར་བྱེད་པ་དེའི་ཕྱིར་ཀུན་དུ་འགྲོ་བ་ཞེས་བྱའོ། །སུ་ཞིག་འདོད་པའི་ཁམས་མཐའ་དག་གིས་ཞེས་བྱ་བ་རྒྱས་པར་འབྱུང་བ་ནི་སུ་ཞིག་འདོད་པའི་ཁམས་མཐའ་དག་གིས་འདག་པར་ཡིད་ཆེས་པར་འགྱུར་བ་འམ། འདོད་པའི་ཁམས་མཐའ་དག་རྒྱུ་མ་ཡིན་པ་ལ་
[104a]
[104a.1]རྒྱུར་ཡིད་ཆེས་པར་འགྱུར་ཞེས་བྱ་བར་སྐབས་དང་སྦྱར་ཏེ། དེ་ལྟ་བས་ན་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་ཀུན་དུ་འགྲོ་བ་མ་ཡིན་ནོ་སྙམ་བསམ་པ་ཡིན་ནོ། །བྱེ་བྲག་ཏུ་སྨྲ་བ་རྣམས་ཀྱི་ལན་ནི་རང་གི་ཁམས་བྱེ་བྲག་དུ་མས་ཐ་དད་པས་མ་ལུས་
[104a.2]པ་མཐའ་དག་ཅིག་ཅར་དུ་དམིགས་སོ་ཞེས་ནི་མི་ཟེར་རོ། །འོན་ཀྱང་སྡུག་བསྔལ་མཐོང་བས་སྤང་བར་བྱ་བ་ནས་བསྒོམ་པས་སྤང་བར་བྱ་བ་ཞེས་བྱ་བའི་བར་རྣམ་པ་ལྔ་པོ་ཐམས་ཅད་ཀྱང་ཅིག་ཅར་དུ་དམིགས་ཏེ། ཀུན་དུ་འགྲོ་བ་ཉིད་ཡིན་ལ། ཀུན་ཞེས་བྱ་བའི་སྒྲ་ནི་རྣམ་པ་ཡིན་པར་ལྟའོ་
[104a.3]ཞེས་བྱ་བ་འདི་ཡིན་ནོ། །གང་ལ་བདག་ཏུ་ལྟ་བ་ཡོད་པ་ཞེས་བྱ་བ་ནི་ཉེ་བར་ལེན་པའི་ཕུང་པོ་ལྔ་དག་ལའོ། །དེ་ལ་བདག་ལ་སྲེད་པ་ཡོད་དེ། དེ་དག་ནི་བདག་ཏུ་མངོན་པར་ཞེན་པའི་གཞི་ཡིན་པའི་ཕྱིར་རོ། །གང་ལ་མཆོག་དང་དག་པར་ལྟ་བ་ཡོད་པ་སྟེ། ཉེ་བར་ལེན་པའི་
[104a.4]ཕུང་པོ་ལྔའི་མཚན་ཉིད་ཀྱི་དངོས་པོ་གང་ལའོ། །མཆོག་ཏུ་ལྟ་བ་ནི་ལྟ་བ་མཆོག་ཏུ་འཛིན་པའོ། །དག་པར་ལྟ་བ་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའོ། །དེ་ལ་དོན་དུ་གཉེར་བ་ནི་སྲེད་པའི་མཚན་ཉིད་དོ། །ཁ་ཅིག་དེ་ལ་དེའི་དོན་དུ་གཉེར་བ་ཡོད་ཅེས་བྱ་བ་འདོན་
[104a.5]ཏེ། དངོས་པོ་དེ་ལ་གང་ཟག་དེའི་དོན་དུ་གཉེར་བ་ཡོད་པ་ནི་དེ་ལ་དེའི་དོན་དུ་གཉེར་བ་ཡོད་ཅེས་བྱ་བའི་ཐ་ཚིག་གོ། །དེས་ཀྱང་ང་རྒྱལ་དུ་འགྱུར་ཞེས་བྱ་བ་ནི་དེའི་སྒོ་ནས་ཁེངས་པར་འགྱུར་ཞེས་བྱ་བའི་ཐ་ཚིག་གོ། །དེ་ལྟ་ཡིན་ན་ཞེས་བྱ་བ་ནི་སྲེད་པ་དང་། ང་རྒྱལ་དག་ཀུན་དུ་འགྲོ་བ་
[104a.6]ཉིད་ཡིན་ནའོ། །སྲེད་པ་དང་ང་རྒྱལ་གྱི་མཚན་ཉིད་འདི་གཉི་ག་མཐོང་བས་སྤང་བར་བྱ་བ་འཇིག་ཚོགས་ལ་ལྟ་བ་ལ་སོགས་པ་དང་། བསྒོམ་པས་སྤང་བར་བྱ་བ་ལ་དམིགས་པའི་ཕྱིར་ཅི་ཞིག་གིས་སྤང་བར་བྱ་བ་ཡིན། གང་གིས་སྤང་བར་བྱ་བ་ནི་ཅི་ཞིག་གིས་སྤང་བར་བྱ་སྟེ། ཅི་མཐོང་
[104a.7]བས་སྤང་བར་བྱ་བ་ཡིན་ནམ། འོན་ཏེ་བསྒོམ་པས་སྤང་བར་བྱ་བ་ཡིན་ཞེས་བྱ་བའོ། །གང་དག་གང་ཞིག་མཐོང་བས་སྤང་བར་བྱ་བའི་དམིགས་པ་ཅན་དེ་དག་ནི་དེ་མཐོང་བས་སྤང་བར་བྱ་བ་ཡིན་ལ་ཞེས་བྱ་བ་ངེས་པ་འདི་ཡིན་ལ་བཞག་ནས་འདྲི་བར་བྱེད་པ་ཡིན་ནོ། །དེ་ལྟ་མ་ཡིན་ན་
[104b]
[104b.1]འཇིག་ཚོགས་ལ་ལྟ་བ་ལ་སོགས་པ་ཁོ་ན་བཞིན་དུ་འདི་གཉི་ག་མཐོང་བས་སྤང་བར་བྱ་བ་ཉིད་དུ་འགྱུར་བས་འདིར་དྲི་ཅི་དགོས་ཏེ། འཇིག་ཚོགས་ལ་ལྟ་བ་ལ་སོགས་པ་ནི་མཐོང་བ་དང་བསྒོམ་པས་སྤང་བར་བྱ་བའི་དམིགས་པ་ཅན་མ་ཡིན་པ་ཡང་མ་ཡིན་ལ། དེ་དག་མཐོང་
[104b.2]བས་སྤང་བར་བྱ་བ་མ་ཡིན་པ་ཡང་མ་ཡིན་ནོ། །འདི་ལ་སློབ་དཔོན་གྱིས་ལན་དུ། འདྲེས་པ་ལ་དམིགས་པའི་ཕྱིར་བསྒོམ་པས་སྤང་བར་བྱ་བ་ཡིན་ནོ་ཞེས་བྱ་བ་སྨོས་ཏེ། གལ་ཏེ་སྲེད་པ་དང་ང་རྒྱལ་དག་མཐོང་བས་སྤང་བར་བྱ་བ་ལ་དམིགས་པ་ཅན་ཁོ་ན་ཞིག་ཡིན་པར་
[104b.3]གྱུར་ན་ནི་དེ་དག་མཐོང་བས་སྤང་བར་བྱ་བ་ཡིན་པར་འགྱུར་ན་དེ་ལྟ་ནི་མ་ཡིན་ནོ། །དེ་བས་ན་འདྲེན་མ་ལ་དམིགས་པའི་ཕྱིར་བསྒོམ་པས་སྤང་བར་བྱ་བ་དག་ཡིན་ཏེ། ལྷག་མ་བསྒོམ་པས་སྤང་བྱ་ཡིན། །ཞེས་བྱ་བར་མཚན་ཉིད་ངེས་པའི་ཕྱིར་རོ། །ཡང་ཞེས་བྱ་བ་ནི་ཡང་སློབ་དཔོན་
[104b.4]འདི་ཉིད་ཀྱིས་བཟློག་སྟེ་བཤད་པ་ཡིན་ནོ། །མཐོང་བས་སྤང་བར་བྱ་བ་ཡིན་ནོ་ཞེས་བྱ་བ་ནི་ཅི་ཞེ་ན། དེ་གཉི་ག་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། ལྟ་བའི་སྟོབས་བསྐྱེད་པས་བཅུག་པ་ཅན་ཉིད་ཡིན་པའི་ཕྱིར་ཞེས་བྱ་བ་སྨོས་ཏེ། ལྟ་བའི་སྟོབས་བསྐྱེད་པ་ནི་མཐུའོ། །དེ་
[104b.5]ལ་ལྟ་བའི་སྟོབས་བསྐྱེད་པས་བཅུག་པའི་ངང་ཚུལ་ཅན་ཡོད་པས་ན་དེ་གཉིས་ནི་ལྟ་བའི་སྟོབས་བསྐྱེད་པས་བཅུག་པ་ཅན་ནོ། །དེའི་ངོ་བོ་ཉིད་དེ། དེའི་ཕྱིར་དེ་གཉིས་ནི་མཐོང་བས་སྤང་བར་བྱ་བ་ཡིན་ནོ། །ད་ནི་བྱེ་བྲག་ཏུ་སྨྲ་བ་ཉོན་མོངས་པ་འདི་གཉིས་རང་གི་མཚན་ཉིད་པ་ཡིན་
[104b.6]གྱི། སྤྱི་པ་ཡིན་པ་ནི་མ་ཡིན་ཏེ་ཞེས་རང་གི་ཕྱོགས་འཇོག་པར་བྱེད་དོ། །གང་ལ་བདག་ཏུ་ལྟ་བ་ཡོད་པ་དེ་ལ་སྲེད་པ་དང་ང་རྒྱལ་དག་ཡོད་མོད་ཀྱི། རང་གི་མཚན་ཉིད་པའི་ཉོན་མོངས་པ་ཡིན་པའི་ཕྱིར་ཐམས་ཅད་ལ་ཅིག་ཅར་ཡོད་པ་ནི་མ་ཡིན་ཏེ། དེ་དག་ནི་ཕྱོགས་གཅིག་པ་
[104b.7]ལ་དམིགས་པ་ཅན་ཡིན་ནོ། །དེ་ལྟ་བས་ན་ཀུན་དུ་འགྲོ་བ་དག་མ་ཡིན་ནོ། །དེས་ན་གང་དག་མཐོང་བས་སྤང་བར་བྱ་བ་ལ་དམིགས་པ་དེ་དག་ནི་མཐོང་བས་སྤང་བར་བྱ་བ་ཡིན་ལ། ལྷག་མ་དག་ནི་བསྒོམ་པས་སྤང་བར་བྱ་བ་ཡིན་ནོ་ཞེས་བྱ་བར་གྲུབ་པོ། །རེས་འགའ་ནི་སྐལ་བ་མི་
[105a]
[105a.1]མཉམ་པའི་ཁམས་གཅིག་ལ་དམིགས་སོ། །རེས་འགའ་ནི་གཉི་ག་ལ་དམིགས་ཞེས་བྱའི། རེས་འགའ་ནི་ཁམས་གསུམ་ལ་དམིགས་སོ་ཞེས་དེ་སྐད་དུ་ནི་མ་བཤད་དེ། འདོད་པའི་ཁམས་ན་གནས་པ་རེས་འགའ་ནི་སྐལ་བ་མི་མཉམ་པ་
[105a.2]གཟུགས་ཀྱི་ཁམས་སམ། གཟུགས་མེད་པའི་ཁམས་གཅིག་ན་དམིགས་སོ། །རེས་འགའ་ནི་གཟུགས་དང་གཟུགས་མེད་པའི་ཁམས་གཉིས་ལ་དམིགས་སོ། །བདག་དང་བདག་གིར་མི་འཛིན་པའི་ཕྱིར་ཞེས་བྱ་བ་ནི་གང་གི་ཕྱིར་ཚངས་པ་དེ་ལ་བདག་ཉིད་དམ་བདག་གི་ཉིད་དུ་མི་
[105a.3]འཛིན་པ་དེའི་ཕྱིར། ཚངས་པ་ལ་སེམས་ཅན་དུ་ལྟ་བ་ནི་འཇིག་ཚོགས་ལ་ལྟ་བ་མ་ཡིན་ནོ། །གང་གི་ཕྱིར་མཐར་འཛིན་པར་ལྟ་བ་ཡང་དེས་ཀུན་ནས་བསླང་བ་དེའི་ཕྱིར་ཚངས་པ་དེ་ལ་རྟག་པར་ལྟ་བ་ཡང་མཐར་འཛིན་པར་ལྟ་བ་མ་ཡིན་ནོ། །འོ་ན་འདིའི་ལྟ་བ་གང་ཞིག་ཡིན་ཞེས་བྱ་བ་ནི་
[105a.4]ཚངས་པ་ལ་སེམས་ཅན་དུ་ལྟ་བ་དང་། བདག་ཏུ་ལྟ་བའོ། །འདི་ནི་ལྟ་བ་མ་ཡིན་གྱི་འདི་ནི་ལོག་པའི་ཤེས་པ་ཡིན་ནོ་ཞེས་བྱ་བ་ནི་འདི་ནི་ལོག་པར་དམིགས་པའི་ཕྱིར་ལོག་པའི་ཤེས་པ་ཡིན་ནོ། །ལོག་པར་དམིགས་པའི་ཤེས་རབ་ཐམས་ཅད་ལྟ་བ་ཡིན་པར་ནི་མི་འདོད་དེ། རང་གི་ལུས་
[105a.5]ཁོ་ན་ལ་བདག་གོ་སྙམ་དུ་ཕྱིན་ཅི་ལོག་གི་ཤེས་རབ་ནི་འཇིག་ཚོགས་ལ་ལྟ་བ་ཡིན་ལ། དེས་ཀུན་ནས་བསླང་བའི་རྟག་པར་ལྟ་བ་ནི་མཐར་འཛིན་པར་ལྟ་བ་ཡིན་པར་འདོད་ཀྱི། གཞན་དག་ནི་མ་ཡིན་ནོ། །གང་ཞིག་ངའོ་སྙམ་དུ་ངར་འཛིན་པའི་རྟེན་དུ་གྱུར་པའི་དེ་ཁོ་ན་འཇིག་ཚོགས་ལ་ལྟ་བ་ཡིན་ན།
[105a.6]ཚངས་པ་ཆེན་པོ་ལ་སེམས་ཅན་དུ་ལྟ་བ་ནི་ངའོ་སྙམ་དུ་ངར་འཛིན་པའི་རྟེན་དུ་ཡང་མི་འགྱུར་ཏེ། དེའི་ཕྱིར། བདག་དང་བདག་གིར་མི་འཛིན་པའི་ཕྱིར་ཞེས་བཤད་དོ། །དེ་དག་དང་ནི་ལྷན་ཅིག་གང་། །འབྱུང་དེའང་ཀུན་འགྲོ་ཐོབ་མ་གཏོགས། །ཞེས་བྱ་བ་ནི་ཚོར་བ་ལ་སོགས་པའོ། །ཐོབ་
[105a.7]པ་རྣམས་ནི་འབྲས་བུ་མི་གཅིག་པའི་ཕྱིར་དེ་ལྟ་མ་ཡིན་ནོ་ཞེས་བྱ་བ་ནི་ཐོབ་པ་རྣམས་དང་། ཐོབ་པ་དེ་དང་ལྡན་པ་ནི་འབྲས་བུ་རྣམ་པར་སྨིན་པ་དང་། རྒྱུ་མཐུན་པ་གཅིག་པ་མ་ཡིན་ནོ་ཞེས་བཤད་ཟིན་ཏོ། །དེའི་ཕྱིར་ཀུན་དུ་འགྲོ་བའི་ཆོས་ཀྱི་ཐོབ་པ་དག་ནི་ཀུན་དུ་འགྲོ་བ་མ་ཡིན་པར་རྣམ་པར་གཞག་གོ། །
[105b]
[105b.1]དེ་ཉིད་ཀྱི་ཕྱིར་ཞེས་བྱ་བ་ནི་གང་གི་ཕྱིར་ལྷན་ཅིག་འབྱུང་བ་དག་ཀྱང་ཀུན་དུ་འགྲོ་བ་ཡིན་པར་རྣམ་པར་གཞག་པ་དེའི་ཕྱིར་མུ་བཞིར་བྱའོ། །མུ་དང་པོ་ནི་མ་འོངས་པའི་ཕྲ་རྒྱས་ཀུན་དུ་འགྲོ་བ་རྣམས་སོ་ཞེས་བྱ་བ་ནི་འདི་དག་ནི་ཀུན་དུ་འགྲོ་བའི་ངོ་བོ་ཉིད་ཡིན་པའི་ཕྱིར་རོ། །ཀུན་དུ་འགྲོ་བའི་རྒྱུས་ཀུན་དུ་
[105b.2]འགྲོ་བ་ནི་མ་ཡིན་ཏེ། མ་འོངས་པའི་གནས་སྐབས་སུ་ཀུན་དུ་འགྲོ་བའི་རྒྱུ་རྣམ་པར་མི་གཞག་པའི་ཕྱིར་རོ། །གཉིས་པ་ནི་འདས་པ་དང་ད་ལྟར་བྱུང་བའི་ལྷན་ཅིག་འབྱུང་བ་རྣམས་སོ་ཞེས་བྱ་བ་ནི་ཀུན་དུ་འགྲོ་བ་དང་ལྷན་ཅིག་འབྱུང་བ་དག་འདས་པ་དང་ད་ལྟར་བྱུང་བ་ཡིན་པའི་ཕྱིར་ཀུན་དུ་འགྲོ་
[105b.3]བའི་རྒྱུ་ཡིན་ནོ། །ཀུན་དུ་འགྲོ་བའི་ཕྲ་རྒྱས་ནི་མ་ཡིན་ཏེ། ཕྲ་རྒྱས་ཀྱི་ངོ་བོ་ཉིད་མ་ཡིན་པའི་ཕྱིར་རོ། །གསུམ་པ་དང་། བཞི་པ་དག་ནི་སྦྱར་བར་བྱ་སྟེ། གསུམ་པ་ནི་འདས་པ་དང་ད་ལྟར་བྱུང་བའི་ཕྲ་རྒྱས་ཀུན་དུ་འགྲོ་བ་རྣམས་སོ། །བཞི་པ་ནི་རྣམ་པ་དེ་དག་མ་གཏོགས་པ་སྟེ། དེ་དག་དང་
[105b.4]ལྷན་ཅིག་འབྱུང་བ་མ་འོངས་པ་རྣམས་དང་ཐོབ་པ་ལ་སོགས་པའོ། །དྲུག་ནི་ཟག་མེད་སྤྱོད་ཡུལ་ཅན། །ཞེས་བྱ་བ་ནི་དྲུག་ཁོ་ན་ཞེས་ངེས་པར་གཟུང་བ་ཡིན་ཏེ། འདི་ལྟར། འདོད་ཆགས་མིན་ཏེ་སྤང་བྱའི་ཕྱིར། །གནོད་མི་བྱེད་ཕྱིར་ཞེ་སྡང་མིན། །ཞེས་བྱ་བ་ལ་སོགས་པ་འབྱུང་བའི་
[105b.5]ཕྱིར་འདོད་ཆགས་ལ་སོགས་པ་ནི་ཟག་པ་མེད་པ་ལ་དམིགས་པ་མི་རུང་བས་སོ། །དེ་དག་དང་མཚུངས་པར་ལྡན་པའི་མ་རིག་པ་ཞེས་བྱ་བ་ནི་ལོག་པར་ལྟ་བ་དང་། ཐེ་ཚོམ་དག་དང་མཚུངས་པར་ལྡན་པ་གང་ཡིན་པ་དང་། མ་འདྲེས་པའི་མ་རིག་པ་གང་ཡིན་པ་དེ་ནི་མ་རིག་པའི་ཕྲ་རྒྱས་
[105b.6]ཏེ་གཅིག་གོ། །འགོག་པ་མཐོང་བས་སྤང་བར་བྱ་བ་ཟག་པ་མེད་པ་ལ་དམིགས་པ་གསུམ་དང་། དེ་བཞིན་དུ་ལམ་མཐོང་བས་སྤང་བར་བྱ་བ་ཡང་གསུམ་པོ་དེ་དག་ཉིད་དེ་དྲུག་པ་དང་ས་ན་ཡོད་དོ། །དེའི་སྤྱོད་ཡུལ་ཅན་གྱི་ཡུལ་ཡིན་ནོ་ཞེས་བྱ་བ་ནི་འདི་རྣམས་ལ་སྤྱོད་ཡུལ་འགོག་པ་དང་ལམ་
[105b.7]དེ་དག་ཡོད་པས་དེའི་སྤྱོད་ཡུལ་ཅན་དག་སྟེ། དེ་རྣམས་ལ་གོ་རིམས་བཞིན་དུ་གསུམ་གྱི་སྤྱོད་ཡུལ་ཏེ། དམིགས་པ་ནི་རང་གིས་པའི་འགོག་པ་སྟེ། བདག་ཉིད་ཀྱི་སའི་འགོག་པ་ཡིན་ནོ། །ལམ་ལ་ཆོས་ཤེས་པའི་ཕྱོགས་དང་མཐུན་པ་ས་དྲུག་པ་དང་། རྗེས་སུ་ཤེས་
[106a]
[106a.1]པའི་ཕྱོགས་དང་མཐུན་པ་ས་དགུ་པ་ནི་ལམ་སྤྱོད་ཡུལ་ཅན་གྱི་ཕྲ་རྒྱས་གཞན་གསུམ་གྱི་དམིགས་པ་ཡིན་ནོ། །ཇི་ལྟ་ཞེ་ན། འགོག་པ་ལ་དམིགས་པའི་ཕྲ་རྒྱས་དེ་དག་ནི་འདོད་པ་ན་སྤྱོད་པ་ནས་སྲིད་པའི་རྩེ་མོའི་བར་ས་དགུ་པ་ཡིན་ལ། དེ་རྣམས་ལ་འདོད་པ་ན་
[106a.2]སྤྱོད་པ་རྣམས་ཀྱི་དམིགས་པ་ནི། འདོད་པ་ན་སྤྱོད་པའི་ཆོས་ཀྱི་འགོག་པ་ཁོ་ན་ཡིན་ཞིང་། བསམ་གཏན་དང་པོའི་ས་པ་རྣམས་ཀྱི་དམིགས་པ་ཡང་བསམ་གཏན་དང་པོའི་ས་པའི་ཆོས་ཀྱི་འགོག་པ་ཁོ་ན་ཡིན་པ་དེ་བཞིན་དུ་སྲིད་པའི་རྩེ་མོ་པ་རྣམས་ཀྱི་དམིགས་པ་ཡང་སྲིད་པའི་རྩེ་
[106a.3]མོ་པའི་ཆོས་ཀྱི་འགོག་པ་ཁོ་ནའི་བར་དུ་ཡིན་ནོ། །ལམ་ནི་ཆོས་ཤེས་པའི་ཕྱོགས་དང་མཐུན་པ་མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་གྱི་ས་པ་དང་། བསམ་གཏན་དང་པོ་ནས་བསམ་གཏན་བཞི་པའི་ས་པའི་བར་དུ་ས་དྲུག་པ་དེ་ཐམས་ཅད་ནི་འདོད་པ་ན་སྤྱོད་པའི་ཕྲ་རྒྱས་
[106a.4]གསུམ་པོ་དེ་དག་གི་དམིགས་པ་ཁོ་ན་ཡིན་ནོ། །རྗེས་སུ་ཤེས་པའི་ཕྱོགས་དང་མཐུན་པ་མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་དང་། བསམ་གཏན་བཞི་དང་། ནམ་མཁའ་དང་། རྣམ་ཤེས་དང་། ཅི་ཡང་མེད་པའི་སྐྱེ་མཆེད་ཀྱི་ས་པ་སྟེ། ས་དགུ་པོ་དེ་
[106a.5]ཐམས་ཅད་ནི་བསམ་གཏན་དང་པོའི་ས་པའི་ཕྲ་རྒྱས་རྣམས་ཀྱི་དམིགས་པ་ཁོ་ན་ཡིན་པ་ནས་དེ་བཞིན་དུ་སྲིད་པའི་རྩེ་མོའི་ས་པ་རྣམས་ཀྱི་དམིགས་པའི་བར་ཡིན་ནོ། །ཡང་ཅིའི་ཕྱིར་དེ་དག་གི་སྤྱོད་ཡུལ་ཅན་རྣམས་ཀྱི་དམིགས་པ་འགོག་པ་ནི་རང་གི་ས་པ་ཁོ་ན་ཡིན་ལ། ལམ་
[106a.6]ནི་ས་དྲུག་པ་འམ་ས་དགུ་པ་ཡང་དེ་རྣམས་ཀྱི་དམིགས་པ་ཡིན་ཞེ་ན། འདི་ལ་གཏན་ཚིགས་བསྟན་པའི་ཕྱིར། །ལམ་ནི་ཕན་ཚུན་རྒྱུ་ཡིན་པས། །ཞེས་བྱ་བ་སྨོས་སོ། །ཇི་ལྟར་ཕན་ཚུན་གྱི་རྒྱུ་ཡིན་ཞེ་ན། ཆོས་ཤེས་པའི་ཕྱོགས་དང་མཐུན་པའི་ལམ་ས་དྲུག་པ་ནི་ཆོས་ཤེས་པའི་
[106a.7]ཕྱོགས་དང་མཐུན་པ་གཞན་དང་། འོག་མ་པ་འམ། གོང་མ་པ་འམ། མཉམ་པ་འམ། ཁྱད་པར་ཅན་གྱི་ལམ་རྗེས་སུ་ཤེས་པའི་ཕྱོགས་ཀྱི་ཡང་རྒྱུར་འགྱུར་ལ་རྗེས་སུ་ཤེས་པའི་ཕྱོགས་དང་མཐུན་པའི་ས་དགུ་པ་དེ་ཡང་དེའི་རྒྱུ་ཁོ་ན་ཡིན་པར་སྦྱར་བར་བྱ་སྟེ། འདི་རྒྱས་པར་ནི་
[106b]
[106b.1]ས་དགུའི་ལམ་ནི་ཕན་ཚུན་དུ། མཉམ་དང་ཁྱད་པར་ཅན་གྱི་ཡིན། །ཞེས་བྱ་བ་དེར་བཤད་ཟིན་ཏོ། །དེ་ལྟར་ན་ལམ་ལ་དམིགས་པ་འདོད་པ་ན་སྤྱོད་པ་རྣམས་ཀྱི་དམིགས་པ་ནི་ཆོས་ཤེས་པའི་ཕྱོགས་དང་མཐུན་པ་མི་ལྕོགས་པ་མེད་པའི་ས་པ་ནས་བསམ་གཏན་བཞི་པའི་ས་
[106b.2]པའི་བར་ཡིན་ལ། རྗེས་སུ་ཤེས་པའི་ཕྱོགས་དང་མཐུན་པའི་ལམ་མི་ལྕོགས་པ་མེད་པའི་ས་པ་ནས་ཅི་ཡང་མེད་པའི་སྐྱེ་མཆེད་ཀྱི་ས་པའི་བར་ཡང་ལམ་ལ་དམིགས་པ་བསམ་གཏན་དང་པོའི་ས་པ་དེ་རྣམས་ཀྱི་དམིགས་པ་ཉིད་ཡིན་པ་ནས་དེ་བཞིན་དུ་སྲིད་པའི་རྩེ་མོའི་ས་པ་རྣམས་
[106b.3]ཀྱི་བར་གྱི་དམིགས་པ་ཡིན་ནོ།། །།བམ་པོ་བཞི་བཅུ་པ། གལ་ཏེ་ཆོས་ཤེས་པའི་ཕྱོགས་དང་མཐུན་པ་ཐམས་ཅད་ཀྱང་ཕན་ཚུན་གྱི་རྒྱུ་ཅན་ཡིན་པས་ལམ་ལ་དམིགས་པ་འདོད་པ་ན་སྤྱོད་པ་ལོག་པའི་ལྟ་བ་ལ་སོགས་པས་གཟུགས་དང་གཟུགས་མེད་པའི་གཉེན་པོ་
[106b.4]འགོག་པ་དང་ལམ་ཞེས་བྱ་བ་ལ། ཆོས་ཤེས་པ་ལ་ཡང་དམིགས་པར་བྱེད་ན་གོ་ཅིའི་ཕྱིར་ལོག་པར་ལྟ་བ་ལ་སོགས་པ་དེ་དག་ཉིད་རྗེས་སུ་ཤེས་པའི་ཕྱོགས་དང་མཐུན་པའི་ལམ་ལ་ཡང་དམིགས་པར་མི་བྱེད་དེ། ཆོས་ཤེས་པ་དང་རྗེས་སུ་ཤེས་པ་དག་ནི་ཕན་ཚུན་གྱི་རྒྱུ་ཅན་ཡིན་པའི་ཕྱིར་རོ་ཞེ་ན།
[106b.5]གལ་ཏེ་ཆོས་ཤེས་པ་དང་རྗེས་སུ་ཤེས་པ་དག་ཀྱང་ཞེས་བྱ་བ་རྒྱས་པར་སྨོས་ཏེ། རྗེས་སུ་ཤེས་པ་ནི་འདོད་པའི་ཁམས་ཀྱི་གཉེན་པོ་མ་ཡིན་པས་དེ་རྣམས་དེ་ལ་དམིགས་པར་མི་བྱེད་དོ། །ཆོས་ཤེས་པ་ནི་འདོད་པའི་ཁམས་ཀྱི་གཉེན་པོ་ཡིན་པས་གཟུགས་དང་གཟུགས་མེད་པའི་གཉེན་པོ་
[106b.6]ཡིན་ཡང་དམིགས་པར་བྱེད་དོ། །འོ་ན་ནི་ཆོས་ཤེས་པ་ཞེས་བྱ་བ་རྒྱས་པར་འབྱུང་བ་ནི་གྲུབ་པའི་མཐའ་ལས། བསྒོམ་པའི་ལམ་ལ་འགོག་པ་དང་། །ལམ་ལ་ཆོས་ཤེས་གང་ཡིན་ཏེ། །ཁམས་གསུམ་གྱི་ནི་གཉེན་པོ་ཡིན། །ཞེས་འབྱུང་བའི་ཕྱིར་རོ། །ཆོས་ཤེས་པ་ནི་གཟུགས་དང་
[106b.7]གཟུགས་མེད་པའི་གཉེན་པོ་ཡིན་ནོ། །དེའི་ངོ་བོ་ཉིད་དེ། དེའི་ཕྱིར་གཟུགས་དང་གཟུགས་མེད་པའི་ས་པའི་ལོག་པར་ལྟ་བ་ལ་སོགས་པ་ས་དགུ་པའི་དམིགས་པ་ཡིན་པར་འགྱུར་རོ། །དེ་མཐའ་དག་ཀྱང་གཉེན་པོ་མ་ཡིན་ལ་ཞེས་བྱ་བ་རྒྱས་པར་འབྱུང་བ་ནི་ཆོས་ཤེས་པ་དེ་མཐའ་དག་ནི་
[107a]
[107a.1]གཟུགས་དང་གཟུགས་མེད་པའི་ཁམས་དག་གི་གཉེན་པོ་མ་ཡིན་ནོ། །འོ་ན་ཅི་ཞེ་ན། ཅུང་ཟད་ཅིག་ཡིན་ནོ། །ཅིའི་ཕྱིར་ཞེ་ན། སྡུག་བསྔལ་དང་ཀུན་འབྱུང་ལ་སོགས་པ་ཆོས་ཤེས་པའི་བསྒོམ་པའི་ལམ་གྱིས་བསྡུས་པ་དག་དེ་དག་གི་གཉེན་པོ་མ་ཡིན་པའི་ཕྱིར་
[107a.2]ཏེ། གཟུགས་དང་གཟུགས་མེད་པའི་ཁམས་དག་གི་གཉེན་པོ་མ་ཡིན་ནོ་ཞེས་བྱ་བའི་ཐ་ཚིག་གོ། །དེའི་ཕྱིར་ཆོས་ཤེས་པ་དེ་ནི་གཟུགས་དང་གཟུགས་མེད་པ་ན་སྤྱོད་པའི་ལོག་པར་ལྟ་བ་ལ་སོགས་པའི་དམིགས་པ་མ་ཡིན་ནོ། །གཞན་ཡང་མཐའ་དག་གི་ཡང་མ་ཡིན་ཏེ་ཞེས་བྱ་བ་རྒྱས་
[107a.3]པར་སྨོས་ཏེ། ཆོས་ཤེས་པ་དེ་ནི་གཟུགས་དང་གཟུགས་མེད་པའི་ཁམས་མཐའ་དག་གི་གཉེན་པོ་མ་ཡིན་ནོ། །ཅིའི་ཕྱིར་ཞེ་ན། བསྒོམ་པའི་ལམ་ལ་འགོག་པ་དང་། །ལམ་ལ་ཆོས་ཤེས་གང་ཡིན་དེ། །ཞེས་འབྱུང་བས་མཐོང་བས་སྤང་བར་བྱ་བ་རྣམས་ཀྱི་གཉེན་པོ་མ་ཡིན་པའི་ཕྱིར་
[107a.4]རོ། །འདིར་དང་པོ་མེད་པའི་ཕྱིར་དང་། དང་པོ་རྣམས་ཀྱི་མ་ཡིན་པའི་ཕྱིར་དམིགས་པ་མ་ཡིན་ནོ་ཞེས་བྱ་བ་ནི་མཇུག་སྡུད་པར་བྱེད་པ་ཡིན་ཏེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་ལ་ཆོས་ཤེས་པ་རྣམས་ནི་དང་པོ་སྡུག་བསྔལ་དང་། ཀུན་འབྱུང་བ་
[107a.5]ལ་ཆོས་ཤེས་པ་དག་གཟུགས་དང་གཟུགས་མེད་པ་ཇི་སྐད་བཤད་པའི་གཉེན་པོ་དེ་ཉིད་དུ་མེད་པའི་ཕྱིར་དང་། ཆོས་ཤེས་པ་དེ་མཐོང་བ་དང་བསྒོམ་པས་སྤང་བར་བྱ་བ་གཟུགས་དང་གཟུགས་མེད་པ་ན་སྤྱོད་པ་རྣམས་ཀྱི་དང་པོ་མཐོང་བས་སྤང་བར་བྱ་བ་དག་གི་གཉེན་པོ་ཉིད་མ་ཡིན་པའི་ཕྱིར་
[107a.6]ཆོས་ཤེས་པ་ནི་དེའི་ས་པ་སྟེ། གཟུགས་དང་གཟུགས་མེད་པའི་ས་པའི་ལོག་པར་ལྟ་བ་ལ་སོགས་པའི་དམིགས་པ་མ་ཡིན་ནོ། །དེ་ལྟར་ན་ཟག་པ་མེད་པ་ལ་དམིགས་པ་ཁམས་གསུམ་པ། བཅོ་བརྒྱད་མ་གཏོགས་པ་ཕྲ་རྒྱས་ལྷག་མ་བརྒྱད་ཅུ་ནི་ཟག་པ་དང་བཅས་པ་ལ་དམིགས་པ་
[107a.7]ཡིན་ནོ་ཞེས་བྱ་བར་གཞག་པ་ཡིན་ནོ། །སྤང་བར་བྱ་བ་མ་ཡིན་པར་འགྱུར་ཏེ་ཞེས་བྱ་བ་ནི་ཐོབ་པ་བཅད་པས་སྤང་བར་བྱ་བ་མ་ཡིན་ནོ་ཞེས་བྱ་བའི་ཐ་ཚིག་གོ། །དཔེར་ན་དགེ་བའི་ཆོས་ལ་འདུན་པ་མངོན་པར་དད་པའི་ངོ་བོ་ནི་ཡང་དག་པའི་ལྟ་བ་ཡིན་པས། ཐོབ་པ་བཅད་པས་སྤང་བར་བྱ་བ་
[107b]
[107b.1]མ་ཡིན་པ་ལྟར་འདི་ཡང་དེ་དང་འདྲ་བར་འགྱུར་བས་དེའི་ཕྱིར་ཟག་པ་མེད་པ་ལ་དམིགས་པ་མ་ཡིན་ནོ། །གནོད་མི་བྱེད་ཕྱིར་ཞེ་སྡང་མིན། །ཞེས་བྱ་བ་ནི་འགོག་པ་དང་། ལམ་དག་ནི་ཀུན་ནས་མནར་སེམས་ཀྱི་དངོས་པོ་དགུའི་མཚན་ཉིད་ལས་འདས་པའི་ཕྱིར་རོ། །དེ་ལ་ཞེ་སྡང་མེད་དོ། །
[107b.2]ཡང་དག་པའི་དོན་དུ་དག་པའི་ཕྱིར་ཞེས་བྱ་བ་ནི་འགོག་པ་ནི་ཉོན་མོངས་པའི་དྲི་མ་སྤངས་པའི་ཕྱིར་ཡང་དག་པའི་དོན་དུ་དག་པ་ཡིན་ལ། ལམ་ཡང་འདིས་དོན་དམ་པར་དག་པར་འགྱུར་བའི་ཕྱིར་དོན་དམ་པར་དག་པ་ཡིན་པས། གང་ཞིག་དེ་ཉིད་ལ་དག་པའོ་སྙམ་དུ་འཛིན་པ་ནི་ཚུལ་ཁྲིམས་
[107b.3]དང་བརྟུལ་ཞུགས་མཆོག་ཏུ་འཛིན་པའོ་ཞེས་བྱ་བ་རྣམ་པར་གཞག་ཏུ་མི་རུང་བའི་ཕྱིར་རོ། །དེ་གཉིས་ནི་མཆོག་ཀྱང་ཡིན་ཏེ་ཞེས་བྱ་བ་ནི་ཡང་དག་པའི་དོན་དུ་དག་པའི་ཕྱིར་འགོག་པ་དང་། ལམ་དེ་དག་ནི་མཆོག་ཡིན་ནོ། །དངོས་པོ་དམན་པ་ལ་མཆོག་ཏུ་འཛིན་པ་ནི་ལྟ་བ་མཆོག་ཏུ་
[107b.4]འཛིན་པ་ཡིན་པར་རུང་ན་འགོག་པ་དང་། ལམ་དེ་དག་ནི་དེ་ལྟ་བུ་ཡང་མ་ཡིན་པས་དེ་གཉིས་ལ་མཆོག་ཏུ་འཛིན་པ་ནི་ལྟ་བ་མཆོག་ཏུ་འཛིན་པ་མ་ཡིན་ནོ། །དུ་ནི་དམིགས་པའི་སྒོ་ནས་རྒྱས་པར་འགྱུར། དུ་ནི་མཚུངས་པར་ལྡན་པ་ཁོ་ནའི་སྒོ་ནས་རྒྱས་པར་འགྱུར་ཞེས་བྱ་བ་ནི། དུ་ནི་
[107b.5]དམིགས་པ་ཁོ་ནའི་སྒོ་ནས་ཞེས་ངེས་པར་བཟུང་ནས་དྲི་བར་མི་བྱེད་པ་ནི་འདི་ལྟར་གང་དག་དམིགས་པའི་སྒོ་ནས་རྒྱས་པར་འགྱུར་བ་དེ་དག་ནི་གདོན་མི་ཟ་བར་མཚུངས་པར་ལྡན་པའི་སྒོ་ནས་ཀྱང་རྒྱས་པར་འགྱུར་རོ། །གང་དག་མཚུངས་པར་ལྡན་པ་ཁོ་ནའི་སྒོ་ནས་རྒྱས་པར་འགྱུར་བ་དེ་དག་
[107b.6]ནི་དམིགས་པའི་སྒོ་ནས་མ་ཡིན་ཏེ། ཟག་པ་མེད་པ་དང་སྐལ་བ་མི་མཉམ་པའི་ས་ལ་དམིགས་པའི་ཕྲ་རྒྱས་དག་ཡིན་ནོ། །ཕྲ་རྒྱས་ཀྱི་དོན་ནི་རྗེས་སུ་མཐུན་པའི་དོན་ཡིན་ན་ས་དེ་དག་པའི་རྐྱེན་རྣམས་ནི་དེ་དག་བསྐྱེད་པར་བྱ་བ་ལ་མཐུན་པར་མི་འགྱུར་རོ། །དེ་དག་ནི་དེ་རྣམས་ཀྱི་རྗེས་སུ་མཐུན་
[107b.7]པ་མ་ཡིན་ཏེ་ཞེས་བྱ་བ་ནི་འགོག་པ་ལ་སོགས་པ་དེ་དག་ནི་ལོག་པར་ལྟ་བ་ལ་སོགས་པ་དེ་རྣམས་ཀྱི་རྗེས་སུ་མཐུན་པ་མ་ཡིན་ནོ། །རླུང་ནད་ཅན་ལ་ཁ་ཟས་རྩུབ་པོ་རྒྱས་པར་མི་འགྱུར་བ་བཞིན་ནོ་ཞེས་བྱ་བ་ནི་དཔེར་ན་རླུང་ནད་ཅན་ལ་ཁ་ཟས་རྩུབ་བག་རྒྱས་པར་མི་འགྱུར་རོ་ཞེས་བྱས་ན་ལུས་དང་མཐུན་
[108a]
[108a.1]པར་མི་འགྱུར་ཞེས་བྱ་བར་གོ་བ་དང་འདྲའོ། །ཕྱོགས་སྔ་མ་ལྟར་ན་ནི་ཕྲ་རྒྱས་ཀྱི་དོན་གནས་ཐོད་པའི་དོན་ཡིན་ཏེ། དེ་དག་ཏུ་གནས་མི་ཐོད་དོ་ཞེས་འབྱུང་བའི་ཕྱིར་རོ། །ཆོས་གང་དང་ཞེས་བྱ་བ་ནི་ཚོར་བ་ལ་སོགས་པ་དང་ངོ་། །དེ་ཡང་དེ་གཉིས་ན་མེད་ཅེས་བྱ་
[108a.2]བ་ནི་སྡུག་བསྔལ་དེ་ཡང་གཟུགས་དང་གཟུགས་མེད་པའི་ཁམས་དེ་གཉིས་ན་མེད་དོ། །ཅིའི་ཕྱིར་ཞེ་ན། ཕ་རོལ་པོ་ལ་གནོད་པའི་རྒྱུ་མེད་པའི་ཕྱིར། ཕ་རོལ་པོ་ལ་གནོད་པའི་རྒྱུ་ནི་གནོད་སེམས་ལ་སོགས་པ་ཡིན་ཏེ། དེ་མེད་པའི་ཕྱིར་རོ། །ལྟ་བར་གྱུར་པ་རྣམས་ཀྱི་ནང་ན་འདི་
[108a.3]མཆོག་ཡིན་ནོ་ཞེས་བྱ་བ་ནི་ལྟ་བའི་རྣམ་པའི་ནང་ན་འདི་ཁྱད་པར་དུ་འཕགས་པ་ཡིན་ཏེ། ཧ་ཅང་ཁ་ན་མ་ཐོ་བ་དང་བཅས་པ་མ་ཡིན་ནོ་ཞེས་བྱ་བའི་ཐ་ཚིག་གོ། །ཐར་པའི་རྒྱུ་ནི་ལམ་ཡིན་ལ་ཆད་པ་ནི་རྒྱུ་མེད་པ་ཅན་དུ་འདོད་པས་འཁྲུལ་པའི་ཕྱིར་ཆད་པར་ལྟ་བ་ཁ་ན་མ་ཐོ་བ་དང་
[108a.4]བཅས་པ་ཡིན་པས་ཁྱད་པར་ཡོད་དོ། །རང་གི་རྫས་ལ་ཀུན་དུ་རྨོངས་པའི་ཕྱིར་ཞེས་བྱ་བ་ནི་འཇིག་ཚོགས་ལ་ལྟ་བ་ནི་རང་གི་རྒྱུད་དུ་གཏོགས་པའི་ཉེ་བར་ལེན་པའི་ཕུང་པོ་རྣམས་ལ་བདག་དང་བདག་གི་ཉིད་དུ་འཛིན་པའི་ཕྱིར་རང་གི་རྫས་ལ་ཀུན་དུ་རྨོངས་པ་ཡིན་ལ། མཐར་འཛིན་
[108a.5]པར་ལྟ་བ་ཡང་དེ་དག་ཉིད་ལ་རྟག་པ་དང་ཆད་པའི་མཐར་འཛིན་པའི་ཕྱིར་དེ་ཁོ་ན་དང་འདྲའོ། །ལྟ་བ་དེ་དག་ཇི་ལྟ་བར་དེ་དག་དང་མཚུངས་པར་ལྡན་པའི་མ་རིག་པ་ཡང་དེ་དང་འདྲའོ། །ཕ་རོལ་པོ་ལ་གནོད་པའི་རྣམ་པར་ཞུགས་པ་མ་ཡིན་པའི་ཕྱིར། ཅི་ཞེ་ན། འཇིག་ཚོགས་དང་མཐར་
[108a.6]འཛིན་པར་ལྟ་བ་དག་ལུང་དུ་མ་བསྟན་པ་ཡིན་ནོ་ཞེས་བྱ་བ་སྐབས་དང་སྦྱར་ཏེ་དེ་དག་ནི་ཕ་རོལ་པོ་ལ་གནོད་པ་ཅུང་ཟད་ཀྱང་མི་བྱེད་དོ། །མཐོ་རིས་ལ་སྲེད་པ་དང་། ངའོ་སྙམ་པའི་ང་རྒྱལ་དག་ཀྱང་དེ་ལྟར་ཐལ་བར་འགྱུར་རོ་ཞེས་བྱ་བ་ནི་མཐོ་རིས་ལ་སྲེད་པ་དང་། ངའོ་སྙམ་པའི་ང་རྒྱལ་ཡང་
[108a.7]སྦྱིན་པ་ལ་སོགས་པ་དང་མི་འགལ་བའི་ཕྱིར་དང་། རང་གི་རྫས་ལ་ཀུན་དུ་རྨོངས་པའི་ཕྱིར་དང་། ཕ་རོལ་པོ་ལ་གནོད་པའི་རྣམ་པར་ཞུགས་པ་མ་ཡིན་པའི་ཕྱིར་ལུང་དུ་མ་བསྟན་པ་ཉིད་དུ་ཐལ་བར་འགྱུར་རོ། །དེ་ལྟར་ཡང་མི་འདོད་དེ། དེ་ལྟ་བས་ན་རྒྱུ་དེ་དག་གིས་འདི་གཉིས་ལུང་དུ་མ་
[108b]
[108b.1]བསྟན་པ་ཉིད་མ་ཡིན་ནོ། །བསམ་པ་འདིས་སྔོན་གྱི་སློབ་དཔོན་གྱི་གཞུང་ལུགས་ལྷན་ཅིག་སྐྱེས་པའི་འཇིག་ཚོགས་ལ་ལྟ་བ་ཞེས་བྱ་བ་ལ་སོགས་པ་ཉེ་བར་འགོད་པར་བྱེད་དོ། །རྣམ་པར་བརྟགས་པ་ནི་མི་དགེ་བ་ཡིན་ནོ་ཞེས་བྱ་བ་ནི་སེར་སྐྱ་དང་འུག་པ་བ་ལ་སོགས་པ་བདག་ཏུ་སྨྲ་བ་རྣམས་
[108b.2]ཀྱིས་རྣམ་པར་བརྟགས་པ་གང་ཡིན་པ་དེ་ནི་ལུང་དུ་མ་བསྟན་པ་ནི་མ་ཡིན་ནོ། །འོ་ན་ཅི་ཞེ་ན། ལུང་དུ་བསྟན་པ་ཡིན་ནོ། །དེ་དག་གི་རྣམ་པར་བརྟགས་པའི་མཐར་འཛིན་པར་ལྟ་བ་གང་ཡིན་པ་དེ་ཡང་མི་དགེ་བ་ཡིན་ཏེ། མ་བཤད་ཀྱང་དེ་སྔོན་དུ་འགྲོ་བ་ཅན་ཡིན་པའི་ཕྱིར་དེ་དང་ཚུལ་མཚུངས་
[108b.3]པར་རྟོགས་པ་ཉིད་དོ། །ལྷག་མ་རྣམས་འདིར་མི་དགེ་བ། །ཞེས་བྱ་བ་ལ། འདིར་ཞེས་བྱ་བ་ནི་འདོད་པ་ན་སྤྱོད་པའི་ལྷག་མ་ཉེ་བར་བཟུང་བའི་ཕྱིར་ཏེ། འདོད་པའི་ཁམས་ན་འཇིག་ཚོགས་ལ་ལྟ་བ་ལ་སོགས་པའི་ལྷག་མ་ཉོན་མོངས་པ་ཅན་རྣམས་ནི་མི་དགེ་བ་ཁོ་ན་ཡིན་ནོ་ཞེས་བྱ་བར་ངེས་པར་འཛིན་
[108b.4]པར་བྱེད་དོ། །དུ་ནི་མི་དགེ་བའི་རྩ་བ་དག་ཡིན། དུ་ནི་མ་ཡིན་ཞེས་བྱ་བ་ནི་ཕྲ་རྒྱས་དགུ་བཅུ་རྩ་བརྒྱད་པོ་འདི་དག་ལས་ཞེས་བྱ་བར་སྐབས་དང་སྦྱར་རོ། །དེས་ན་འདི་སྐད་དུ། འདོད་ན་འདོད་ཆགས་ཁོང་ཁྲོ་དང་། །རྨོངས་རྣམས་མི་དགེའི་རྩ་བ་ཡིན། །ཞེས་ལན་འདེབས་པར་བྱེད་དེ། འདོད་
[108b.5]པའི་ཁམས་ན་འདོད་ཆགས་དང་ཁོང་ཁྲོ་བ་དང་། གཏི་མུག་གང་དག་ཡིན་པ་དེ་དག་ནི་རྣམ་པ་ལྔ་པོ་ཐམས་ཅད་ཀྱང་མི་དགེ་བའི་རྩ་བ་ཁོ་ན་ཡིན་གྱི་ཕྲ་རྒྱས་གཞན་དག་ནི་མ་ཡིན་ནོ། །རྨོངས་ཞེས་བྱ་བ་ནི་གཏི་མུག་གི་རྣམ་གྲངས་ཏེ། འཇིག་ཚོགས་ལ་ལྟ་བ་དང་། མཐར་འཛིན་པར་ལྟ་བ་དང་མཚུངས་
[108b.6]པར་ལྡན་པ་གཏི་མུག་མ་གཏོགས་པའི་རྨོངས་པ་ཐམས་ཅད་དོ། །འདི་མདོ་ལས་མ་སྨོས་པར་ཇི་ལྟར་དེ་སྐད་ཅེས་བྱ་ཞེ་ན། མི་དགེ་བ་ཞེས་བྱ་བའི་སྐབས་ཡིན་པའི་ཕྱིར་དང་། ཕྱོགས་གཅིག་བསྟན་པའི་ཕྱིར་རོ། །དེ་ཉིད་ཀྱི་ཕྱིར་གང་ཞིག་མི་དགེ་བ་ཡང་ཡིན་ལ་མི་དགེ་བའི་རྩ་བ་ཡང་ཡིན་
[108b.7]པ་དེ་ཁོ་ན་མི་དགེ་བའི་རྩ་བ་ཡིན་པར་འདོད་དོ་ཞེས་བྱ་བ་སྨོས་སོ། །དེ་ཁོ་ན་ཞེས་ངེས་པར་བཟུང་བའི་ཕྱིར་ལོག་པར་ལྟ་བ་ལ་སོགས་པ་ཕྲ་རྒྱས་ལྷག་མ་རྣམས་ནི་མི་དགེ་བའི་རྩ་བ་དག་མ་ཡིན་ནོ་ཞེས་བྱ་བར་འགྲུབ་པོ། །ལུང་མ་བསྟན་པའི་རྩ་བ་གསུམ། །ཞེས་བྱ་བ་ནི་ཕྲ་རྒྱས་དགུ་བཅུ་རྩ་
[109a]
[109a.1]བརྒྱད་པོ་འདི་དག་ལས་ལུང་དུ་མ་བསྟན་པའི་རྩ་བ་ནི་གསུམ་ཡིན་ནོ་ཞེས་བྱའོ། །གསུམ་ཞེས་བྱ་བ་སྨོས་པ་ནི་ཉི་འོག་པའི་གཞུང་ལུགས་ལས་ཁྱད་པར་དུ་བྱ་བའི་ཕྱིར་ཏེ། གསུམ་ཁོ་ན་ཡིན་གྱི་བཞི་ནི་མ་ཡིན་ནོ་ཞེས་བསྟན་པ་ཡིན་ནོ། །གསུམ་གང་ཞེ་ན། དེ་
[109a.2]ནི་སྲེད་དང་མ་རིག་བློ། །ཞེས་བྱ་བ་སྨོས་སོ། །དེ་ཞེས་བྱ་བ་ནི་ལུང་དུ་མ་བསྟན་པ་ཡིན་པར་སྟོན་ཏོ་ཞེས་བྱ་བ་ནི། ལུང་མ་བསྟན་པའི་རྩ་བ་གསུམ། །ཞེས་བྱ་བའི་ལུང་དུ་མ་བསྟན་ཞེས་བྱ་བའི་སྒྲ་འདི་ཁོ་ནས་སྲེད་པ་དང་མ་རིག་པ་དང་བློ་དག་ཁྱད་པར་དུ་བྱས་སོ་ཞེས་སྟོན་པར་བྱེད་དོ། །འདིར་
[109a.3]ནི་བློ་ནི་ཉོན་མོངས་པའི་ངོ་བོ་ཉིད་མ་ཡིན་ཡང་བྱེ་བྲག་ཏུ་སྨྲ་བ་རྣམས་ལུང་དུ་མ་བསྟན་པའི་རྩ་བ་ཡིན་ནོ་ཞེས་བྱ་བར་འདོད་དོ། །སྲེད་པ་གང་ཅུང་ཟད་ལུང་དུ་མ་བསྟན་པ་ཞེས་བྱ་བ་ནི་རོ་མྱང་བ་དང་མཚུངས་པར་ལྡན་པའི་བསམ་གཏན་དང་གཟུགས་མེད་པ་དག་སྐྱེས་པའི་ཚེ་གཞལ་མེད་ཁང་ལ་
[109a.4]སོགས་པ་ལ་སྟེ་འོས་འོས་སུ་སྦྱར་རོ། །མ་རིག་པ་གང་ཅུང་ཟད་གཟུགས་དང་གཟུགས་མེད་པའི་ཁམས་དག་ན་ཡོད་པ་དང་། འདོད་པའི་ཁམས་ན་ཡོད་པའི་འཇིག་ཚོགས་དང་མཐར་འཛིན་པར་ལྟ་བ་དང་། མཚུངས་པར་ལྡན་པ་དེ་དང་། དེ་བཞིན་དུ་ཤེས་རབ་གང་ཅུང་ཟད་ལུང་དུ་མ་
[109a.5]བསྟན་པ་ཐ་ན་རྣམ་པར་སྨིན་པ་ལས་སྐྱེས་པ་ཡང་རུང་སྟེ། འདོད་པའི་ཁམས་ན་ཡོད་པ་རྣམ་པར་སྨིན་པ་ལས་སྐྱེས་པ་དང་། སྤྱོད་ལམ་པ་དང་། བཟོའི་གནས་པ་དང་། སྤྲུལ་པའི་སེམས་དང་མཚུངས་པར་ལྡན་པ་དང་། འཇིག་ཚོགས་དང་མཐར་འཛིན་པར་ལྟ་བ་དང་མཚུངས་པར་
[109a.6]ལྡན་པ་དང་། གཟུགས་དང་གཟུགས་མེད་པའི་ཁམས་དག་ན་ཡོད་པའོ། །ཉོན་མོངས་པ་དང་མཚུངས་པར་ལྡན་པའི་ཤེས་རབ་ཐམས་ཅད་དང་། རྣམ་པར་སྨིན་པ་ལ་སོགས་པ་དང་མཚུངས་པར་ལྡན་པའི་ཤེས་རབ་དག་ནི་ལུང་དུ་མ་བསྟན་པ་ཡིན་ནོ། །རྣམ་པ་གཉིས་ཉིད་དུ་
[109a.7]འཇུག་པའི་ཕྱིར་ཞེས་བྱ་བ་ལ། རྣམ་པ་གཉིས་ཀྱི་ངོ་བོ་ནི་རྣམ་པ་གཉིས་ཉིད་དོ། །རྣམ་པ་གཉིས་སུ་འཇུག་པས་ན་རྣམ་པ་གཉིས་སུ་འཇུག་པའོ། །དེའི་ཕྱིར་ཐེ་ཚོམ་ནི་རྩ་བ་ཡིན་པར་འོས་པ་མ་ཡིན་ཏེ། རྣམ་པ་གཉིས་སུ་འཇུག་པའི་སྒོ་ནས་གཡོ་བའི་ཕྱིར་རོ། །ཁེངས་པའི་མཚན་
[109b]
[109b.1]ཉིད་ཀྱིས་ཞེས་བྱ་བ་ནི་ཁེངས་པའི་མཚན་ཉིད་དེས་མཐོན་པོར་འཇུག་སྟེ། དེའི་ཕྱིར་ང་རྒྱལ་ནི་རྩ་བ་ཡིན་པར་འོས་པ་མ་ཡིན་ནོ། །རྩ་བ་རྣམས་ནི་བརྟན་པ་དང་འོག་ནས་གནས་པ་དག་ཡིན་ཞེས་བྱ་བ་ནི་རྩ་བ་དང་ཆོས་མི་མཐུན་པའི་ཕྱིར་ཏེ། ཐེ་ཚོམ་ནི་མི་བརྟན་པའི་ཕྱིར་རྩ་བ་མ་ཡིན་
[109b.2]ལ། ང་རྒྱལ་ནི་མཐོན་པོར་འཇུག་པའི་ཕྱིར་རྩ་བ་མ་ཡིན་ནོ་ཞེས་བརྗོད་པར་བྱའོ། །ལུང་དུ་མ་བསྟན་པའི་སྲེད་པ་ཞེས་བྱ་བ་ནི་གཟུགས་དང་གཟུགས་མེད་པའི་ཁམས་དག་ན་ཡོད་པའོ། །ལྟ་བ་ཡང་དེ་དག་ན་ཡོད་པ་དང་འདོད་པའི་ཁམས་ན་ཡོད་པ་འཇིག་ཚོགས་དང་མཐར་འཛིན་
[109b.3]པར་ལྟ་བའི་ངོ་བོ་ཉིད་དག་གོ། །མ་རིག་པ་ཡང་འདོད་པའི་ཁམས་ན་ཡོད་པ་དེ་དག་དང་མཚུངས་པར་ལྡན་པ་ཁོ་ན་དང་། གཟུགས་དང་གཟུགས་མེད་པའི་ཁམས་དག་ན་ཡོད་པ་ཐམས་ཅད་དོ། །སྲེད་པ་དང་ལྟ་བ་དང་། ང་རྒྱལ་ཤས་ཆེ་བའི་བསམ་གཏན་པ་དག་ཡིན་ཞེས་བྱ་བ་ནི་གང་ཞིག་རོ་
[109b.4]མྱོང་བ་དང་མཚུངས་པར་ལྡན་པའི་བསམ་གཏན་སྒོམ་པ་དེ་ནི་སྲེད་པ་ཤས་ཆེ་བའི་བསམ་གཏན་པ་ཡིན་ནོ། །གང་ཞིག་བསམ་གཏན་ལ་བརྟེན་ནས་རྟག་པ་ལ་སོགས་པར་ལྟ་བ་སྐྱེད་པར་བྱེད་པ་དེ་ནི་ལྟ་བ་ཤས་ཆེ་བའི་བསམ་གཏན་པ་ཡིན་ནོ། །ང་རྒྱལ་ཤས་ཆེ་བའི་བསམ་གཏན་པ་ནི་
[109b.5]གང་ཞིག་དེས་བདག་ནི་བསམ་གཏན་བཞི་ཐོབ་པ་ཡིན་གྱི་གཞན་དག་ནི་དེ་ལྟ་མ་ཡིན་ནོ་སྙམ་དུ་རློམ་པ་སྟེ། དེ་ནི་ང་རྒྱལ་ཤས་ཆེ་བའི་བསམ་གཏན་པ་ཡིན་ནོ། །དེ་ལ་འདི་ལ་སྲེད་པ་ཤས་ཆེ་ཞིང་སྲེད་པ་ལྷག་པ་སྒོམ་པའི་ངང་ཚུལ་ཡོད་པས་ན་སྲེད་པ་ཤས་ཆེ་བའི་བསམ་གཏན་པའོ། །ཡང་
[109b.6]ན་སྲེད་པ་ཤས་ཆེ་བ་ཡང་ཡིད་ལ་བསམ་གཏན་པ་ཡང་ཡིན་པས་སྲེད་པ་ཤས་ཆེ་བའི་བསམ་གཏན་པ་སྟེ། སྲེད་པ་ལྷག་པ་ཞེས་བྱ་བའི་ཐ་ཚིག་གོ། །ལྟ་བ་ཤས་ཆེ་བའི་བསམ་གཏན་པ་དང་། ང་རྒྱལ་ཤས་ཆེ་བའི་བསམ་གཏན་པ་ཡང་དེ་དང་འདྲའོ། །དེ་དག་ཀྱང་མ་རིག་པའི་དབང་གིས་
[109b.7]འགྱུར་རོ་ཞེས་བྱ་བ་ནི་བསམ་གཏན་གསུམ་པོ་དེ་དག་ཀྱང་མ་རིག་པའི་དབང་གིས་ཏེ། མ་རིག་པ་དང་ལྡན་པས་དེ་ལྟར་འགྱུར་རོ། །དེའི་ཕྱིར་མ་རིག་པ་ཡང་ལུང་དུ་མ་བསྟན་པའི་རྩ་བ་ཡིན་ནོ་སྙོམས་པར་འཇུག་པ་ལ་སྙོམས་པར་ཞུགས་པ་རྣམས་ལ་ཉོན་མོངས་པའི་རྣམ་པ་འདི་དག་ཀུན་དུ་
[110a]
[110a.1]འབྱུང་བའི་སྐབས་ནི་ལུང་དུ་མ་བསྟན་པའི་ཆོས་རྣམས་ཀྱི་རྩ་བ་སྟེ་རྒྱུ་ཡིན་ནོ། །ལུང་དུ་མ་བསྟན་པའི་སྐབས་ཀྱིས་གླེངས་པ་དང་། མདོ་ལས་ལུང་དུ་མ་བསྟན་པའི་དངོས་པོ་བཅུ་བཞི་གསུངས་པ་ཞེས་བྱ་བ་རྒྱས་པར་སྨོས་ཏེ། འཇིག་རྟེན་རྟག་པ་ཞིག་གམ།
[110a.2]འཇིག་རྟེན་མི་རྟག་པ་ཞིག་ཅེས་བྱ་བ་དེ་ལྟ་བུ་ལ་སོགས་པ་ཡིན་ནོ། །ཅི་དེ་དག་ལུང་དུ་མ་བསྟན་པའི་ཕྱིར་ཡིན་ནམ་ཞེས་བྱ་བ་ནི་ཅི་དེ་དག་དགེ་བ་ཡང་མ་ཡིན་ལ་མི་དགེ་བ་ཡང་མ་ཡིན་པས་ལུང་དུ་མ་བསྟན་པ་ཡིན་པའི་ཕྱིར་ལུང་དུ་མ་བསྟན་པའི་དངོས་པོ་དག་ཏུ་སྟོན་ཏམ་ཞེས་བྱ་བ་ཡིན་
[110a.3]ནོ། །གཞག་པར་བྱ་བའི་འདྲི་བ་ལ་ལུང་དུ་མ་བསྟན་པ་ཞེས་བཤད་དོ་ཞེས་བྱ་བ་ནི་གང་ཞིག་གཞག་པར་བྱ་བ་ཉིད་ཀྱིས་ལུང་བསྟན་ཅིང་མ་བཤད་པའི་འདྲི་བ་དེ་ནི་ལུང་དུ་མ་བསྟན་པ་ཡིན་ལ། དེའི་དངོས་པོ་ནི་གཞི་ཡིན་པས་ལུང་དུ་མ་བསྟན་པའི་དངོས་པོའོ། །དེའི་ཞར་ལ་འདྲི་བ་ནི་རྣམ་
[110a.4]པ་བཞི་སྟེ་ཞེས་བྱ་བ་འདི་རྒྱས་པར་ཉེ་བར་འགོད་དེ། འཆི་དང་སྐྱེ་དང་ཁྱད་པར་འཕགས། །བདག་གཞན་ལ་སོགས་ལྟ་བུ་ཡིན། །ཞེས་བྱ་བ་ནི་འཆི་བ་ལྟ་བུ་དང་། སྐྱེ་བ་ལྟ་བུ་དང་། ཁྱད་པར་དུ་འཕགས་པ་ཉིད་ལྟ་བུ་དང་། བདག་གཞན་ཉིད་ལ་སོགས་པ་ལྟ་བུའོ་ཞེས་གྲངས་
[110a.5]བཞིན་དུ་མགོ་གཅིག་ཏུ་ལུང་བསྟན་པ་ལ་སོགས་པའི་དཔེར་བརྗོད་པ་ཡིན་ནོ། །འཆི་བར་འགྱུར་རོ་ཞེས་བྱ་བ་ནི་མགོ་གཅིག་ཏུ་ལུང་བསྟན་པར་བྱ་བ་ལ་འཆི་བ་དཔེར་བརྗོད་པ་ཡིན་ནོ། །ཉོན་མོངས་པ་ཅན་དང་བཅས་པ་རྣམས་ནི་སྐྱེ་བར་འགྱུར་གྱི། ཉོན་མོངས་པ་མེད་པ་རྣམས་ནི་མ་
[110a.6]ཡིན་ནོ་ཞེས་བྱ་བ་ནི་རྣམ་པར་ཕྱེ་སྟེ་ལུང་བསྟན་པར་བྱ་བ་ལ་སྐྱེ་བ་དཔེར་བརྗོད་པ་ཡིན་ནོ། །གང་ལ་ལྟོས་ཏེ་འདྲི་ཞེས་བྱ་བ་ནི་དྲིས་ནས་ལུང་བསྟན་པར་བྱ་བ་ལ་ཁྱད་པར་དུ་འཕགས་པ་ཉིད་དཔེར་བརྗོད་པ་ཡིན་ནོ། །ཅི་ཕུང་པོ་རྣམས་ལས་སེམས་ཅན་གཞན་ནམ་ཞེས་བྱ་བ་ནི་གཞག་པར་ལུང་བསྟན་པར་བྱ་བ་
[110a.7]ལ་བདག་གཞན་ཉིད་དཔེར་བརྗོད་པ་ཡིན་ནོ། །ཅི་སེམས་ཅན་ཐམས་ཅད་འཆི་བར་འགྱུར་རམ་ཞེས་འདྲི་ན་འཆི་བར་འགྱུར་རོ་ཞེས་མགོ་གཅིག་ཏུ་ལུང་བསྟན་པར་བྱའོ་ཞེས་བྱ་བ་ནི་ཇི་སྐད་དུ་བཅོམ་ལྡན་འདས་ཀྱིས་དགེ་སློང་དག་མི་རྣམས་ནི་ཚེ་ཐུང་བ་ཚེ་ཕྱི་མར་འགྲོ་དགོས་པ་ཡིན་པས་དགེ་བ་སྤྱད་པར་བྱ་
[110b]
[110b.1]སྟེ། སྐྱེས་པ་ལ་ནི་མི་འཆི་བ་མེད་དོ་ཞེས་གསུངས་པ་ལྟ་བུའོ། །ཅི་ཕུང་པོ་རྣམས་ལས་སེམས་ཅན་གཞན་ནམ་གཞན་མ་ཡིན་ཞེས་འདྲི་ན་གཞག་པར་བྱ་སྟེ་ཞེས་བྱ་བ་ནི། ཇི་སྐད་དུ། བཅོམ་ལྡན་འདས་ཀྱིས། ཀྱེ་གཽ་ཏ་མ་ཅི་ལགས། དེས་བྱས་ཤིང་དེས་མྱོང་ངམ་བྲམ་ཟེ་འདི་ནི་ལུང་དུ་མ་བསྟན་པ་ཡིན་ནོ། །
[110b.2]གཞན་གྱིས་བྱས་ཤིང་གཞན་གྱིས་མྱོང་ངམ་བྲམ་ཟེ་འདི་ནི་ལུང་དུ་མ་བསྟན་པ་ཡིན་ནོ། །དེས་བྱས་ཤིང་དེས་མྱོང་ངམ་ཞེས་ཞུས་ན་ཡང་འདི་ནི་ལུང་དུ་མི་བསྟན་པ་ཡིན་ནོ་ཞེས་གསུངས་ལ། གཞན་གྱིས་བྱས་ཤིང་གཞན་གྱིས་མྱོང་ངམ་ཞེས་ཞུས་ན་ཡང་འདི་ནི་ལུང་དུ་མི་བསྟན་པ་ཡིན་ནོ་ཞེས་གསུངས་ན། གཽ་
[110b.3]ཏ་མ་ཁྱོད་ཀྱིས་བཤད་པ་འདིའི་དོན་ཇི་ལྟ་བུ་ཞིག་ལགས། བྲམ་ཟེ་དེས་བྱས་ཤིང་དེས་མྱོང་ངོ་ཞེས་བྱ་བ་ནི་རྟག་པར་འགྱུར་རོ། །གཞན་གྱིས་བྱས་ཤིང་གཞན་གྱིས་མྱོང་ངོ་ཞེས་བྱ་བ་ནི་ཆད་པར་འགྱུར་རོ། །དེ་བཞིན་གཤེགས་པ་ནི་འདི་གཉིས་ཐུགས་སུ་ཆུད་ནས་དབུ་མའི་ལམ་གྱི་ཆོས་སྟོན་པར་མཛད་དོ་ཞེས་
[110b.4]གསུངས་པ་ལྟ་བུའོ། །གཞན་དག་ན་རེ་ཞེས་བྱ་བ་ནི་བཙུན་པར་མའོ། །ཐམས་ཅད་སྐྱེ་བར་མི་འགྱུར་རོ་ཞེས་བྱ་བ་འདི་ཡང་མགོ་གཅིག་ཏུ་ལུང་སྟོན་པ་ཡིན་ནོ་ཞེས་བྱ་བ་ནི་སེམས་ཅན་ཐམས་ཅད་འཆི་བར་འགྱུར་རོ་ཞེས་བྱ་བ་འདི་འབའ་ཞིག་མགོ་གཅིག་ཏུ་ལུང་བསྟན་པར་བྱ་བ་ཡིན་པ་འབའ་ཞིག་ཏུ་ནི་
[110b.5]མ་ཟད་དོ། །སློབ་དཔོན་གྱིས་གང་ཞིག་འདྲི་བ་ཞེས་བྱ་བ་རྒྱས་པར་སྨོས་ཏེ། ཅི་གང་དག་འཆི་བར་འགྱུར་བ་དེ་དག་སྐྱེ་བར་འགྱུར་རམ་ཞེས་རྣམ་པ་དེ་ལྟ་བུར་འདྲི་བ་དེ་ལ་ཐམས་ཅད་ནི་སྐྱེ་བར་མི་འགྱུར་རོ། །འོ་ན་ཅི་ཞེ་ན། ཉོན་མོངས་པ་དང་བཅས་པ་རྣམས་ནི་སྐྱེ་བར་འགྱུར་གྱི་ཉོན་མོངས་པ་མེད་པ་རྣམས་ནི་མ་ཡིན་
[110b.6]ནོ་ཞེས་བྱ་བ་རྣམ་པར་ཕྱེ་སྟེ། ལུང་བསྟན་དགོས་པར་འགྱུར་རོ། །དེ་ལྟ་བས་ན་ཐམས་ཅད་སྐྱེ་བར་འགྱུར་རོ་ཞེས་བྱ་བ་འདི་ཡང་མགོ་གཅིག་ཏུ་ལུང་བསྟན་པར་བྱ་བ་ཡིན་ནོ་ཞེས་སྨྲས་པ་གང་ཡིན་པ་ནི་མི་འཐད་ཀྱི་བྱེ་བྲག་ཏུ་སྨྲ་བས་དཔེར་བརྗོད་པ་ཉིད་དུ་རུང་ངོ་སྙམ་དུ་བསམས་པ་ཡིན་ནོ། །བཙུན་པར་མ་དེ་ཉིད་
[110b.7]ཀྱིས་མི་ལ་ཡང་གཉི་ག་ཡོད་དེ་ཞེས་བྱ་བ་སྨྲས་ཏེ། དམན་པ་ཉིད་དང་ཁྱད་པར་དུ་འཕགས་པ་ཉིད་དོ། །འདི་གཉིས་ནི་ལྟོས་པ་ཅན་དུ་ཡོད་པས་གཉི་གར་མགོ་གཅིག་ཏུ་ལུང་བསྟན་པར་བྱ་བ་ཡིན་ཏེ། དཔེར་ན་རྣམ་པར་ཤེས་པ་རྒྱུ་ཡིན་ནམ་འབྲས་བུ་ཡིན་ཞེས་འདྲི་ན་རྒྱུ་དང་འབྲས་བུ་ལ་ལྟོས་ནས་
[111a]
[111a.1]རྒྱུ་ཡང་ཡིན་ལ་འབྲས་བུ་ཡང་ཡིན་ཞེས་མགོ་གཅིག་ཏུ་ལུང་བསྟན་ཞེས་བྱ་བ་དང་འདྲའོ། །དེ་ལ་ཅི་མི་འདི་ཁྱད་པར་དུ་འཕགས་པ་ཡིན་ནམ་དམན་པ་ཡིན་ཞེས་འདྲི་ན་གང་ལས་ལྟོས་ཏེ་འདྲི་ཞེས་དྲིས་ནས་ལུང་བསྟན་པར་བྱ་སྟེ་ཞེས་སྨྲས་པ་གང་ཡིན་པ་དེ་རིགས་པ་མ་ཡིན་ཏེ། འདི་
[111a.2]ལྟར་འདྲི་བ་འདི་མགོ་གཅིག་ཏུ་ལུང་བསྟན་པར་བྱ་བས་སོ། །སློབ་དཔོན་གྱིས་གཅིག་ཏུ་འདྲི་བ་ལ་ཞེས་བྱ་བ་ལ་སོགས་པས་བྱེ་བྲག་ཏུ་སྨྲ་བའི་ཕྱོགས་གཞུང་འཛུགས་པར་བྱེད་དེ། ཅི་མི་འདི་ཁྱད་པར་དུ་འཕགས་པ་ཁོ་ན་ཞིག་གམ་དམན་པ་ཁོ་ན་ཞིག་ཡིན་ཞེས་གཅིག་ཏུ་འདྲི་བ་ལ་ནི་དམན་པའོ་ཞེའམ་ཁྱད་
[111a.3]པར་དུ་འཕགས་པའོ་ཞེས་གཅིག་ཏུ་ལུང་བསྟན་དུ་མི་རུང་བས་གང་ལ་ལྟོས་ཏེ་འདྲི་ཞེས་རྣམ་པར་ཕྱེ་སྟེ། ལུང་བསྟན་པར་རིགས་སོ། །དེ་ལ་མི་ལ་ཡང་གཉི་ག་ཡོད་དེ་ཞེས་བྱ་བ་རྒྱས་པར་སྨྲས་པ་གང་ཡིན་པ་དེ་རིགས་པ་མ་ཡིན་ནོ། །དེ་ཉིད་ཀྱིས། ཕུང་པོ་དག་ལས་སེམས་ཅན་གཞན་ན་མ་ཞེས་བྱ་བ་
[111a.4]ཐམས་ཅད་སྨྲས་སོ། །སློབ་དཔོན་གྱིས་གཞག་པར་བྱ་བའི་འདྲི་བ་གང་ཡིན་པ་ཞེས་བྱ་བ་སྨོས་སོ། །བྱེ་བྲག་ཏུ་སྨྲ་བའི་ལུགས་ཀྱིས་རྣམ་པ་བཞིའི་དཔེར་བརྗོད་པ་འདི་ནི་བཤད་ཟིན་ཏོ། །ཆོས་མངོན་པ་པ་རྣམས་ན་རེ་ཞེས་བྱ་བ་ནི་ཆོས་མངོན་པ་ཚན་དྲུག་པ་ཙམ་འདོད་པ་རྣམས་སོ། །སྡུག་བསྔལ་
[111a.5]གདགས་པ་ནས་ལམ་གདགས་པའི་བར་ཞེས་བྱ་བ་ནི་འཕགས་པའི་བདེན་པ་བཞི་གདགས་པ་སྟེ། མདོ་ལས་ཇི་སྐད་འབྱུང་བ་ལྟ་བུའོ། །དོན་དང་ལྡན་པ་ཡིན་པའི་ཕྱིར་ཞེས་བྱ་བ་ནི་དོན་དང་ཡང་དག་པར་ལྡན་པའི་ཕྱིར་རོ་ཞེས་བྱ་བའི་ཐ་ཚིག་གོ། །གཡོན་ཅན་གྱི་ཞེས་བྱ་བ་ནི་འདྲི་བ་པོ་གཡོན་ཅན་རྣམ་པར་
[111a.6]ཐོ་འཚམས་པའི་བསམ་པ་ཅན་གྱི་འདྲི་བ་ལུང་བསྟན་པ་ཡང་རྣམ་པར་ཕྱེ་སྟེ་ལུང་བསྟན་པར་བྱ་བའི་དྲི་བའི་ཚིག་དེ་ཉིད་ཡིན་པར་རིག་པར་བྱའོ། །བཙུན་པར་མས་གང་གི་ཚེ་ཞེས་བྱ་བ་རྒྱས་པར་སྨྲས་ཏེ། གང་གི་ཚེ་གཡོན་ཅན་དང་གཡོ་མེད་པ་དེ་གཉིས་ཅུང་ཟད་ཀྱང་མི་འདྲིའི་ཆོས་བཤད་དུ་གསོལ་
[111a.7]ཞེས་གསོལ་བ་འདེབས་པ་འབའ་ཞིག་ཏུ་ཟད་ལ། གཡོན་ཅན་དང་གཡོ་མེད་པ་དེ་གཉིས་ལ་ཡང་ཆོས་ནི་གཟུགས་ལ་སོགས་པ་རབ་ཏུ་དབྱེ་བ་དང་བཅས་པ་རྒྱས་པ་འདི་དག་ཡིན་ནོ་ཞེས་བྱ་བར་ཅུང་ཟད་ཀྱང་ལུང་མི་སྟོན་གྱི། གང་དག་བཤད་པར་བྱ་བ་ཞེས་འདྲི་བ་འབའ་ཞིག་ཏུ་ཟད་ན་དེ་ཇི་ལྟར་ན་
[111b]
[111b.1]གཡོན་ཅན་གཡོ་མེད་པ་དེ་གཉིས་ཀྱི་འདྲི་བ་ཡིན། ཇི་ལྟར་ན་ཆོས་མངོན་པའི་ལུང་སྟོན་པ་ཡིན། སློབ་དཔོན་གྱིས་གང་ཞིག་ཅེས་བྱ་བ་རྒྱས་པར་སྨྲས་ཏེ། གང་ཞིག་དེ་མི་ཤེས་ན་ལམ་སྨྲོས་ཤིག་ཅེས་ཟེར་ན་ཅི་དེས་ལམ་མ་འདྲེས་པ་ཡིན་ནམ། དེས་གསོལ་བ་འདེབས་པའི་སྒོ་ནས་དྲིས་སོ་སྙམ་དུ་
[111b.2]བསམས་པ་ཡིན་ནོ། །ཇི་ལྟར་ལམ་སྨྲོས་ཤིག་ཅེས་སྨྲ་བས་ལམ་གང་ཞིག་ཡིན་ཞེས་སྨྲ་བར་འགྱུར་བ་དེ་བཞིན་དུ་ཆོས་བཤད་དུ་གསོལ་ཞེས་སྨྲ་བས་ཆོས་གང་དག་ཡིན་ཞེས་སྨྲས་པར་འགྱུར་རོ། །དྲི་བ་ཉིད་ཀྱིས་དེ་ལུང་བསྟན་པའི་ཕྱིར་ཞེས་བྱ་བ་ནི་ཆོས་མང་མོ་ཞིག་ཡོད་ན་གང་དག་སྨྲ་བར་བྱ་ཞེས་དྲི་བ་
[111b.3]ཁོ་ནས་དྲིས་པ་དེའམ་ཆོས་དེ་རྣམས་ལུང་བསྟན་པའི་ཕྱིར་ཏེ། ཆོས་མང་བ་ཉིད་དུ་ལུང་བསྟན་པས་སོ། །ཇི་ལྟར་ན་དྲིས་ནས་ལུང་བསྟན་པ་མ་ཡིན་ཞེས་བྱ་བ་ནི་དྲིས་པས་ལུང་བསྟན་པ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལ་དེ་གཉིས་ཀྱང་ཅུང་ཟད་ཀྱང་མི་འདྲིའི་གསོལ་བ་འདེབས་པ་འབའ་ཞིག་ཏུ་
[111b.4]ཟད་ལ་ཞེས་བྱ་བ་ནས། ཇི་ལྟར་ལུང་སྟོན་པ་ཡིན་ཞེས་སྨྲས་པ་གང་ཡིན་པ་དེ་རིགས་པ་མ་ཡིན་ནོ། །སློབ་དཔོན་གྱིས་མདོ་ཁོ་ན་ལས་ཞེས་བྱ་བ་རྒྱས་པར་སྨོས་ཏེ། མདོ་འདི་ནི་ཚིག་ཕལ་པ་ཡིན་པ་ལས་ལེགས་པར་སྦྱར་བར་རྣམ་པར་གཞག་ནས་འདོན་པར་བྱེད་དོ། །ཆེད་དུ་བསམ་པར་བྱ་བའི་
[111b.5]ལས་བྱས་ནས་ཅི་ཞིག་སོ་སོར་ཡང་དག་པར་མྱོང་བར་འགྱུར། ཅི་བདེ་བའམ་སྡུག་བསྔལ་བའམ། བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཞིག་ཅེས་དེ་སྐད་དུ་དྲིས་ན། ཆེད་དུ་བསམ་པར་བྱ་བ་ནི་དགེ་བ་ལ་སོགས་པ་ཐ་དད་པའི་ཕྱིར་ཆེད་དུ་བསམ་པར་བྱ་བ་དགེ་བ་ཟག་པ་དང་བཅས་པ་བྱས་པས་
[111b.6]ནི་བདེ་བའམ་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་སོ་སོར་ཡང་དག་པར་མྱོང་བར་འགྱུར་རོ། །ཆེད་དུ་བསམ་པར་བྱ་བའི་ལས་མི་དགེ་བ་བྱས་པས་ནི་སྡུག་བསྔལ་སོ་སོར་ཡང་དག་པར་མྱོང་བར་འགྱུར་རོ་ཞེས་རྣམ་པར་ཕྱེ་སྟེ་ལུང་དུ་བསྟན་པར་བྱ་བ་ཡིན་ནོ། །གལ་ཏེ་འདི་སྐད་དུ་བདག་
[111b.7]རགས་པ་ཡིན་པར་ཤེས་སོ་ཞེས་བྱ་བ་ནི་གཟུགས་སོ། །སྲོག་ཀྱང་གཞན་ལ་ལུས་ཀྱང་གཞན་ཞིག་གམ་ཞེས་བྱ་བའི་བར་ཞེས་བྱ་བ་རབ་ཏུ་དབྱེ་བ་རྒྱས་པར་འབྱུང་བའི་བར་དུ་ཞེས་བྱ་བའི་སྒྲས་ནི་དེ་བཞིན་འོངས་པ་ཤི་ནས་མེད་པ་ཞིག་གམ། དེ་བཞིན་འོངས་པ་ཤི་ནས་ཡོད་ཀྱང་ཡོད་ལ་མེད་ཀྱང་མེད་
[112a]
[112a.1]པ་ཞིག་གམ། དེ་བཞིན་འོངས་པ་ཤི་ནས་ཡོད་པ་ཡང་མ་ཡིན་མེད་པ་ཡང་མ་ཡིན་པ་ཞིག་གམ། ལུས་དེ་ཉིད་སྲོག་ཡིན་ནམ། ལུས་ཀྱང་གཞན་ལ་སྲོག་ཀྱང་གཞན་ཞིག་གམ་ཞེས་བྱ་བ་ཐམས་ཅད་བརྗོད་པར་བྱའོ། །དེ་ནི་དེས་དེ་དང་ལྡན་པ་ཡིན་ནོ་ཞེས་བྱ་བ་ནི་གང་ཟག་དེ་ནི་ཕྲ་རྒྱས་
[112a.2]དེས་བཅིངས་སོ་ཞེས་བྱ་བར་ཤེས་པར་འགྱུར་བ་ཁོ་ནའོ་ཞེས་བྱ་བའི་ཐ་ཚིག་གོ། །རང་གི་མཚན་ཉིད་པའི་ཉོན་མོངས་པ་ཞེས་བྱ་བ་ལ་རང་གི་མཚན་ཉིད་ནི་བདེ་བ་མྱོང་བར་འགྱུར་བ་ལ་སོགས་པའི་དངོས་པོ་དེ་ལ་འདོད་ཆགས་པ་ནི་བདེ་བ་མྱོང་བར་འགྱུར་བའི་དངོས་པོ་ཁོ་ན་ལ་དམིགས་ཏེ་སྐྱེ་བས་རང་
[112a.3]གི་མཚན་ཉིད་པའི་ཉོན་མོངས་པ་ཞེས་བྱའོ། །བདེ་བ་མྱོང་བར་འགྱུར་བའི་དངོས་པོ་དམིགས་པར་བྱ་བ་དེས་ཁེངས་པར་འགྱུར་བས་ང་རྒྱལ་ཡང་རང་གི་མཚན་ཉིད་དག་གི་ཉོན་མོངས་པ་ཡིན་ནོ། །དེ་བཞིན་དུ་སྡུག་བསྔལ་མྱོང་བར་འགྱུར་བའི་དངོས་པོ་དམིགས་ཏེ་ཁོང་ཁྲོ་བ་འབྱུང་བས། ཁོང་
[112a.4]ཁྲོ་བ་ཡང་རང་གི་མཚན་ཉིད་དག་གི་ཉོན་མོངས་པ་ཞེས་བྱའོ། །ཉོན་མོངས་པ་སྤྱི་པ་ནི་ལྟ་བ་དང་ཐེ་ཚོམ་ལ་སོགས་པ་སྟེ། སྤྱི་པའིའམ་སྤྱིར་ཉོན་མོངས་པ་ཡིན་པས་ནི་ཉོན་མོངས་པ་སྤྱི་པ་དག་གོ། །དེ་དག་ནི་ཁྱད་པར་མེད་པར་བདེ་བ་མྱོང་བར་འགྱུར་བ་ལ་སོགས་པའི་དངོས་པོ་ལ་སྐྱེ་བར་
[112a.5]འགྱུར་ཏེ། དེའི་ཕྱིར་དེ་དག་ལ་དམིགས་ཏེ་སྐྱེས་པའི་ཉོན་མོངས་པ་རྣམས་ནི་ཉོན་མོངས་པ་སྤྱི་པ་ཞེས་བྱའོ། །འདས་དང་ཉེར་གནས་ཞེས་བྱ་བ་ནི་འདས་པ་དང་ད་ལྟར་བྱུང་བའོ། །དངོས་པོ་གང་ལ་འདོད་ཆགས་དང་ཁོང་ཁྲོ་བ་དང་ང་རྒྱལ་རྣམས་སྐྱེས་ལ་ཞེས་བྱ་བ་རྒྱས་པར་འབྱུང་བ་ནི་ཁྱད་པར་
[112a.6]མེད་པར་བརྗོད་པའི་ཕྱིར་འདོད་ཆགས་ལ་སོགས་པ་འདི་དག་ནི་རྣམ་པར་ཤེས་པའི་ཚོགས་དྲུག་པ་ཡང་རུང་སྟེ། ཅི་རིགས་པར་སྡུག་བསྔལ་མཐོང་བས་སྤང་བར་བྱ་བ་ནས་བསྒོམ་པས་སྤང་བར་བྱ་བའི་བར་དུས་གསུམ་པའི་དངོས་པོ་གང་ལ་སྐྱེས་པ་མ་སྤངས་པའི་འདོད་ཆགས་ལ་སོགས་པ་དེ་
[112a.7]དག་གི་དངོས་པོ་དེ་དང་ལྡན་ཏེ། ཐག་པས་གླང་བུ་ཕུར་པ་ལ་བཏགས་པ་དང་འདྲའོ། །དེ་དག་ནི་རང་གི་མཚན་ཉིད་པའི་ཉོན་མོངས་པ་ཡིན་པའི་ཕྱིར་གདོན་མི་ཟ་བར་གང་ཟག་ཐམས་ཅད་ལ་ཐམས་ཅད་འབྱུང་བ་མ་ཡིན་ཞེས་བྱ་བ་ནི་འགའ་ཞིག་ཁ་ཅིག་ལ་འབྱུང་ངོ་ཞེས་བྱ་བའི་ཐ་ཚིག་གོ། །
[112b]
[112b.1]དེའི་ཕྱིར། གང་ལ་དེ་སྐྱེས་མ་སྤངས་པའི་ཞེས་དེ་དག་ཀྱང་ཁྱད་པར་དུ་བྱས་པ་ཡིན་ཏེ། མ་སྤངས་པ་ཞེས་བྱ་བའི་ཁྱད་པར་སྨོས་པ་འདི་ལྟར་འདོད་ཆགས་ལ་སོགས་པ་གང་དག་གིས་སྔོན་དངོས་པོ་དེ་དང་ལྡན་པར་གྱུར་པ་དེ་དག་གལ་ཏེ་སྤངས་པར་གྱུར་ནས་དེ་དག་གིས་དེ་དང་ལྡན་པ་མ་ཡིན་ཏེ།
[112b.2]སྤངས་པས་ཡུལ་ལ་རྒྱས་པར་མི་འགྱུར་བའི་ཕྱིར་རོ། །ཡིད་ཀྱི་དེ་དག་མ་འོངས་པས་ཀུན་དང་ཞེས་བྱ་བ་ལ། ཡིད་ཀྱི་ཞེས་བྱ་བ་སྨོས་པ་ནི་རྣམ་པར་ཤེས་པའི་ཚོགས་ལྔ་པ་རྣམས་ནི། གཞན་གྱི་རང་དུ་ས་པ་ཞེས་གཞན་དུ་རྣམ་པར་གཞག་པར་བྱ་བ་ཡིན་པའི་ཕྱིར་རོ། །འདི་ནི་འདོད་ཆགས་དང་
[112b.3]ཁོང་ཁྲོ་བ་ཁྱད་པར་དུ་བྱ་བ་ཡིན་ཏེ། ང་རྒྱལ་ནི་གདོན་མི་ཟ་བར་ཡིད་ཀྱི་ཡིན་པའི་ཕྱིར་རོ། །མ་འོངས་པའི་དེ་དག་གིས་ནི་རིས་ལྔ་པ་དུས་གསུམ་པ་ཐམས་ཅད་དང་ཡང་བདག་ཉིད་ཇི་ལྟ་བ་བཞིན་ལྡན་པ་ཡིན་ནོ། །ཟག་པ་དང་བཅས་པའི་དངོས་པོ་གང་ཞིག་རང་གི་མཚན་ཉིད་པའི་ཉོན་མོངས་པས་
[112b.4]ཀྱང་འདོད་ཆགས་དང་བཅས་པ་མ་ཡིན་པ་དང་། ཞེ་སྡང་གིས་ཞེ་སྡང་དང་བཅས་པ་མ་ཡིན་པ་དང་། ང་རྒྱལ་གྱིས་ང་རྒྱལ་དང་བཅས་པ་མ་ཡིན་པ་དེ་ནི་མེད་དེ། འདོད་ཆགས་ལ་སོགས་པ་མ་འོངས་པ་ཟག་པ་དང་བཅས་པའི་དངོས་པོ་ཐམས་ཅད་ལ་བདག་ཉིད་ཇི་ལྟ་བ་བཞིན་དུ་དམིགས་པ་དག་
[112b.5]ནི་དཔག་ཏུ་མེད་པ་ཞིག་ཡོད་དོ། །འདོད་ཆགས་དང་ཁོང་ཁྲོ་བ་མ་འོངས་པ་གཞན་དག་གིས་ནི་མ་འོངས་པའི་དངོས་པོ་ཁོ་ན་དང་ལྡན་ནོ་ཞེས་བྱ་བ་ནི་སེམས་དང་སེམས་ལས་བྱུང་བ་ཐམས་ཅད་ནི་དམིགས་པ་ལ་ངེས་པ་ཡིན་པས་ཆོས་སྐྱེ་བར་འགྱུར་བའི་ཆོས་དེ་དག་གིས་མ་འོངས་པའི་དངོས་པོ་ཁོ་
[112b.6]ན་དང་ལྡན་ཏེ། རྣམ་པར་ཤེས་པའི་ཚོགས་ལྔ་རྣམས་ཀྱི་ཡུལ་ནི་ད་ལྟར་ཡིན་པའི་ཕྱིར་རོ། །འདོད་ཆགས་དང་ཁོང་ཁྲོ་བ་གཞན་དག་གིས་ཞེས་སྨོས་ཀྱི་ང་རྒྱལ་མ་སྨོས་པ་ནི། མཐོང་སྤང་བྱ་ཉིད་ང་རྒྱལ་བཅས། །ཡིད་རྣམ་ཤེས་ཀྱི་ས་པ་ཡིན། །ཞེས་འབྱུང་བས་ང་རྒྱལ་རྣམས་ཡིད་ཀྱི་ས་ཡིན་པའི་
[112b.7]ཕྱིར་རོ། །རྣམ་པར་ཤེས་པའི་ཚོགས་ལྔ་པ་དག་གིས་ཀྱང་ཞེས་བྱ་བ་ལ། ཀྱང་ཞེས་བྱ་བའི་སྒྲས་ནི་ཡིད་ཀྱི་ས་པ་དག་འབའ་ཞིག་ཏུ་ནི་མ་ཟད་ཀྱི་ཞེས་སྟོན་པར་བྱེད་དོ། །མི་སྐྱེ་བའི་ཆོས་ཅན་དེ་དག་གིས་ནི་དུས་གསུམ་པའི་དངོས་པོ་ཐམས་ཅད་དང་ལྡན་ཏེ་མི་སྐྱེ་བའི་ཆོས་ཅན་དེ་དག་ནི་མ་འོངས་པའི་
[113a]
[113a.1]དུས་ཁོ་ན་ན་རྣམ་པར་གནས་ལ། དེ་དག་གི་དམིགས་པ་དག་ནི་འཕོ་བར་འགྱུར་རོ། །ཉོན་མོངས་པ་དང་ལྡན་པ་མི་སྐྱེ་བའི་ཆོས་ཅན་རྣམས་ནི་ལྕམ་པ་བཞིན་དུ་ཡུལ་ལ་མངོན་པར་ཕྱོགས་པ་ཁོ་ནར་གནས་ཏེ། འདི་ལྟར་མི་སྐྱེ་བའི་ཆོས་རྣམས་ནི་དམིགས་པ་ལ་དམིགས་ནས་
[113a.2]སྐྱེ་བར་འགྱུར་བ་མ་ཡིན་པ་ཉིད་དོ། །དེའི་ཕྱིར་ཁ་ཅིག་གི་དམིགས་པ་ནི་འདས་པ་ཡིན་ནོ། །ཁ་ཅིག་ནི་ད་ལྟར་ཡིན་ནོ། །ཁ་ཅིག་ནི་མ་འོངས་པ་ཡིན་ནོ། །དེ་དག་ནི་དམིགས་པ་མི་སྐྱེ་བ་ཁོ་ནས་མི་སྐྱེ་བ་མ་ཡིན་ནོ། །འོ་ན་ཅི་ཞེ་ན། རྐྱེན་མ་ཚང་བའི་ཕྱིར་ཏེ། གྲུབ་པའི་མཐའ་ནི་ཚོགས་པ་ནི་གནས་
[113a.3]སྐབས་ཀྱི་འབྲས་བུ་ཅན་ཡིན་གྱི་རྫས་ཀྱི་འབྲས་བུ་ཅན་ནི་མ་ཡིན་ནོ་ཞེས་བྱ་བ་ཡིན་ནོ། །ལྷག་མ་ཀུན་གྱིས་ཀུན་དང་ལྡན། །ཞེས་བྱ་བ་ནི་ལྟ་བ་ལ་སོགས་པའི་རིས་དུ་མ་དུས་གསུམ་པ་དག་གིས་ཀྱང་དུས་གསུམ་པའི་དངོས་པོ་རྣམ་པ་ལྔ་ཆར་དང་ལྡན་ཏེ་ཡང་དག་པར་ལྡན་ནོ་ཞེས་བྱ་བའི་ཐ་ཚིག་གོ། །
[113a.4]ཅིའི་ཕྱིར་ཞེ་ན། ཉོན་མོངས་པའི་སྤྱི་པ་ཡིན་པའི་ཕྱིར་ཞེས་བྱ་བ་སྨོས་ཏེ། འདི་དག་ནི་ཉེ་བར་ལེན་པའི་ཕུང་པོ་ལྔ་ཆར་ལ་དམིགས་པ་ཡིན་པའི་ཕྱིར་ཐམས་ཅད་ཀུན་ལ་འབྱུང་ངོ་། །ཇི་ལྟར་ན་འདས་པ་དང་མ་འོངས་པའི་དངོས་པོ་དེ་དང་ངམ། འདས་པ་དང་མ་འོངས་པའི་ཕྲ་རྒྱས་དེས་ལྡན་པའམ་
[113a.5]བྲལ་བ་ཡིན་ཏེ། ཇི་ལྟར་ན་མ་སྤངས་པ་དང་སྤངས་པའི་གནས་སྐབས་སུ་རྣམ་པར་གཞག །འདུས་བྱས་ཀྱི་མཚན་ཉིད་དང་ལྡན་པའི་ཕྱིར་ཞེས་བྱ་བ་ནི་འདི་ལྟར་འདུས་བྱས་ཀྱི་མཚན་ཉིད་སྐྱེ་བ་ལ་སོགས་པ་འདུ་བྱེད་རྣམས་དུས་སུ་འཕོ་བར་བྱ་བའི་ཕྱིར་འཇུག་སྟེ། དེའི་ཕྱིར་དེ་དག་རྟག་པ་ཉིད་མ་
[113a.6]ཡིན་པར་དམ་འཆའོ། །དགེ་སློང་དག་གལ་ཏེ་འདས་པའི་གཟུགས་ཞེས་བྱ་བའི་མདོ་འདིའི་མགོ་ནི་འདི་སྐད་ཅེས་འབྱུང་བ་ཡིན་ཏེ། གཟུགས་འདས་པ་དང་མ་འོངས་པ་ཡང་མི་རྟག་ན་ད་ལྟར་བྱུང་བ་ལྟ་ཅི་སྨོས། འཕགས་པ་ཉན་ཐོས་ཐོས་པ་དང་ལྡན་པ་དེ་ལྟར་ལྟ་བ་ནི་འདས་པའི་གཟུགས་
[113a.7]ལ་ལྟ་བར་མི་འགྱུར། མ་འོངས་པའི་གཟུགས་ལ་མངོན་པར་དགའ་བར་མི་འགྱུར་གྱི། ད་ལྟར་བྱུང་བའི་གཟུགས་ལ་ཡིད་བྱུང་བར་བྱ་བ་དང་། འདོད་ཆགས་དང་བྲལ་བར་བྱ་བ་དང་འགོག་པར་བྱ་བའི་ཕྱིར་ཞུགས་པ་ཡིན་ནོ། །གལ་ཏེ་འདས་པའི་གཟུགས་ཤིག་ཡོད་པར་མ་གྱུར་ན།
[113b]
[113b.1]འཕགས་པ་ཉན་ཐོས་ཐོས་པ་དང་ལྡན་པ་འདས་པའི་གཟུགས་ལ་མི་ལྟ་བར་ཡང་མི་འགྱུར་བ་ཞིག་ན་གང་གི་ཕྱིར་འདས་པའི་གཟུགས་ཡོད་པ་དེའི་ཕྱིར་འཕགས་པ་ཉན་ཐོས་ཐོས་པ་དང་ལྡན་པ་འདས་པའི་གཟུགས་ལ་མི་ལྟ་བ་ཡིན་ནོ། །གལ་ཏེ་མ་འོངས་པའི་གཟུགས་ཤིག་ཡོད་པར་མ
[113b.2]གྱུར་ན། འཕགས་པ་ཉན་ཐོས་ཐོས་པ་དང་ལྡན་པ་མ་འོངས་པའི་གཟུགས་ལ་མངོན་པར་དགའ་བ་མེད་པར་ཡང་མི་འགྱུར་བ་ཞིག་ན། གང་གི་ཕྱིར་མ་འོངས་པའི་གཟུགས་ཡོད་པ་དེའི་ཕྱིར་འཕགས་པ་ཉན་ཐོས་ཐོས་པ་དང་ལྡན་པ་མ་འོངས་པའི་གཟུགས་ལ་མངོན་པར་དགའ་བ་མེད་པ་ཡིན་
[113b.3]ནོ། །དགེ་སློང་དག་གལ་ཏེ་ད་ལྟར་བྱུང་བའི་གཟུགས་ཤིག་ཡོད་པར་མ་གྱུར་ན་ཞེས་བྱ་བ་རྒྱས་པར་གསུངས་པ་ཡིན་ནོ། །འཕགས་པ་ཉན་ཐོས་ཐོས་པ་དང་ལྡན་པ་འདས་པའི་གཟུགས་ལ་མི་ལྟ་བར་ཡང་མི་འགྱུར་བ་ཞིག་ན་ཞེས་བྱ་བ་ནི་ཡུལ་མེད་པའི་ཕྱིར་འཕགས་པ་ཉན་ཐོས་ལ་འདོད་
[113b.4]ཆགས་དང་བྲལ་བ་དེའི་ཚེ་འདས་པའི་ཡུལ་ལ་མི་ལྟ་བའི་བློ་འབྱུང་བར་མི་འགྱུར་རོ་ཞེས་བྱ་བའི་ཐ་ཚིག་སྟེ། གང་གི་ཚེ་འདས་པའི་གཟུགས་ལ་ལྟ་བ་དེའི་ཚེ་དེ་ལ་ཆགས་པ་ཡིན་ནོ། །མངོན་པར་དགའ་བ་ཞེས་བྱ་བ་ནི་མངོན་པར་འདོད་པའོ། །དགེ་སློང་དག་གལ་ཏེ་ད་ལྟར་བྱུང་བའི་གཟུགས་
[113b.5]ཤིག་ཡོད་པར་མ་གྱུར་ན། འཕགས་པ་ཉན་ཐོས་ཐོས་པ་དང་ལྡན་པ་ད་ལྟར་བྱུང་བའི་གཟུགས་ལ་ཡིད་བྱུང་བར་བྱ་བ་དང་། འདོད་ཆགས་དང་བྲལ་བར་བྱ་བ་དང་། འགོག་པར་བྱ་བའི་ཕྱིར་ཞུགས་པར་ཡང་མི་འགྱུར་བ་ཞིག་ན་ཞེས་བྱ་བ་འདི་ནི་མ་སྨོས་ཏེ། གཉི་ག་ལ་རབ་ཏུ་གྲུབ་པའི་
[113b.6]ཕྱིར་རོ། །གཉིས་ཕྱིར་ཞེས་བྱ་བ་ནི་སྔ་མ་ནི་ཞལ་ནས་གསུངས་པ་ཡིན་ནོ་ཞེས་རབ་ཏུ་བསྟན་པ་ཡིན་ནོ། །ད་ནི་རྣམ་གྲངས་ཀྱི་སྒོ་ནས་ཡིན་གྱི་ཞལ་ནས་ནི་མ་ཡིན་པས་ཁྱད་པར་ཡོད་དོ། །ཡིད་ཀྱི་རྣམ་པར་ཤེས་པ་འདས་པ་དང་མ་འོངས་པ་ལ་དམིགས་པ་གང་ཡིན་པ་གཉིས་ལ་བརྟེན་པར་མི་
[113b.7]འགྱུར་རོ། །དེ་བས་ན་དམིགས་པ་མེད་པའི་ཕྱིར་རྣམ་པར་ཤེས་པ་ཉིད་དུ་ཡང་མི་འགྱུར་རོ་ཞེས་བྱ་བ་ནི་རྣམ་པར་ཤེས་པར་བྱ་བ་ཡོད་ན་རྣམ་པར་ཤེས་པ་ཡིན་པས་སོ། །འདི་ལ་སྒྲུབ་པ་ནི་ཡིད་ཀྱི་རྣམ་པར་ཤེས་པ་ནི་ཡོད་པ་ལ་དམིགས་པ་ཁོ་ན་ཡིན་ཏེ། དམིགས་པའི་ངོ་བོ་ཉིད་ཡིན་པའི་
[114a]
[114a.1]ཕྱིར་མིག་གི་རྣམ་པར་ཤེས་པ་བཞིན་ནོ། །འབྲས་ཕྱིར་ཞེས་བྱ་བ་ནི། དགེ་བ་དང་མི་དགེ་བའི་ལས་འདས་པ་ནི་རང་གི་ངོ་བོར་ཡོད་པ་ཡིན་ཏེ། སྨིན་པའི་ཚེ་འབྲས་བུ་འབྱུང་བར་འགྱུར་བ་ཡིན་པའི་ཕྱིར་ད་ལྟར་གྱི་བཞིན་ནོ། །དངོས་པོ་གཞན་དུ་འགྱུར་གྱི་ཞེས་བྱ་བ་ནི་འདས་
[114a.2]པ་དང་མ་འོངས་པ་དང་ད་ལྟར་བྱུང་བའི་དངོས་པོ་གཞན་དུ་འགྱུར་བ་ཡིན་ཞེས་བྱ་བའི་ཐ་ཚིག་གོ། །རྫས་གཞན་དུ་འགྱུར་བ་ནི་མ་ཡིན་ཞེས་བྱ་བ་ནི་གཟུགས་ལ་སོགས་པ་རང་གི་མཚན་ཉིད་གཞན་དུ་འགྱུར་བ་ནི་མ་ཡིན་ནོ་ཞེས་བྱ་བའི་དོན་ཏེ། མ་འོངས་པ་ད་ལྟར་བྱུང་བའི་དུས་སུ་འགྱུར་བ་ན་མ་འོངས་
[114a.3]པའི་དངོས་པོ་འདོར་ཞིང་ད་ལྟར་བྱུང་བའི་དངོས་པོ་ནི་འཐོབ་པོ། །ད་ལྟར་བྱུང་བ་ཡང་འདས་པའི་དུས་སུ་འགྱུར་བ་ན་ད་ལྟར་བྱུང་བའི་དངོས་པོ་འདོར་ཞིང་འདས་པའི་དངོས་པོ་འཐོབ་པོ། །གསེར་ཞེས་བྱ་བ་དང་། འོ་མ་ཞེས་བྱ་བའི་དཔེ་གཉིས་ནི་གོ་རིམས་བཞིན་དུ་དབྱིབས་དང་ཡོན་ཏན་གཞན་ཉིད་
[114a.4]དུ་འགྱུར་བར་ཤེས་པར་བྱ་བའི་ཕྱིར་རོ། །མཚན་ཉིད་གཞན་དུ་གྱུར་པ་ནི་མཚན་ཉིད་འཇུག་པ་ཐོབ་པ་ལ་ལྟོས་ནས་ཐ་སྙད་རྗོད་པར་བྱེད་དོ། །དེ་ཉིད་ཀྱི་ཕྱིར་ཆོས་དུས་རྣམས་སུ་འཇུག་པ་ན་འདས་པའི་མཚན་ཉིད་དང་ལྡན་ལ། མ་འོངས་པ་དང་ད་ལྟར་བྱུང་བའི་མཚན་ཉིད་དང་ནི་མི་ལྡན་པ་མ་ཡིན་ནོ་
[114a.5]ཞེས་བྱ་བ་རྒྱས་པར་སྨྲས་ཏེ། མཚན་ཉིད་འཇུག་པ་ཐོབ་པ་ནི་མཚན་ཉིད་དང་ལྡན་པར་རྣམ་པར་གཞག་པ་དེ་ལས་གཞན་དང་མི་ལྡན་པ་མ་ཡིན་པ་ནི་བྲལ་བ་མ་ཡིན་ཞེས་བྱ་བའི་ཐ་ཚིག་གོ། །དེ་ཉིད་ཀྱི་ཕྱིར། དཔེར་ན་སྐྱེས་བུ་བུད་མེད་ཅིག་ལ་ཆགས་པ་ལྷག་མ་རྣམས་ལ་འདོད་ཆགས་དང་བྲལ་
[114a.6]བ་མ་ཡིན་པ་བཞིན་ནོ་ཞེས་བྱ་བ་དཔེར་རྗོད་པར་བྱེད་དོ། །དེ་བུད་མེད་ཅིག་ལ་ལྷག་པར་ཞེན་པར་གྱུར་ན། བུད་མེད་ལྷག་མ་རྣམས་ལ་འདོད་ཆགས་ཀྱི་ཐོབ་པ་ཁོ་ན་ཡོད་ཀྱི་ཀུན་དུ་འབྱུང་བ་ནི་མ་ཡིན་པ་ལྟ་བུའོ། །གནས་སྐབས་གཞན་དུ་འགྱུར་བ་པ་ནི་གནས་སྐབས་ལ་ལྟོས་ནས་ཐ་སྙད་རྗོད་པར་བྱེད་
[114a.7]དེ། ཆོས་དེ་གནས་སྐབས་གང་ན་བྱ་བ་མི་བྱེད་པའི་གནས་སྐབས་དེ་ན་ནི་མ་འོངས་པ་ཞེས་བྱ་ལ། གང་ན་བྱེད་པ་དེ་ན་ནི་ད་ལྟར་ཞེས་བྱའོ། །གང་ན་བྱས་ནས་འགགས་པ་དེ་ན་ནི་འདས་པ་ཞེས་བྱའོ། །དེའི་ཕྱིར་གནས་སྐབས་དང་གནས་སྐབས་སུ་ཕྱིན་ནས་གནས་སྐབས་གཞན་གྱི་སྒོ་ནས་མ་འོངས་
[114b]
[114b.1]པའི་གནས་སྐབས་སུ་ཕྱིན་ནས་མ་འོངས་པ་ཞེས་བྱ་བ་ནས་འདས་པའི་གནས་སྐབས་སུ་ཕྱིན་ནས། འདས་པའི་ཞེས་བྱ་བའི་བར་གཞན་དང་གཞན་ཞེས་སྟོན་གྱི་རྫས་གཞན་གྱི་སྒོ་ནས་མ་ཡིན་ཏེ། མ་འོངས་པ་ལ་སོགས་པའི་གནས་སྐབས་སུ་ཕྱིན་པ་ལ་མཚན་ཉིད་ཐ་དད་པ་ནི་མེད་ཀྱི། མ་འོངས་
[114b.2]པ་ལ་སོགས་པ་ཞེས་བྱ་བའི་སྒྲར་སྟོན་པ་འབའ་ཞིག་ཏུ་ཟད་དོ་ཞེས་བྱ་བའི་ཐ་ཚིག་གོ། །དེ་ཉིད་ཀྱི་ཕྱིར་དཔེར་ན་རི་ལུ་གཅིག་ཅེས་བྱ་བ་རྒྱས་པར་དཔེར་རྗོད་པར་བྱེད་དོ། །དཔེར་ན་རི་ལུ་གཅིག་གི་ཤོ་མིག་ཏུ་བཞག་ཅིང་གནས་གཅིག་ཏུ་བཞག་ན་གཅིག་ཅེས་བྱ་ལ། དེ་བཞིན་དུ་བརྒྱའི་ཤོ་
[114b.3]མིག་ཏུ་བཞག་ན་བརྒྱ། སྟོང་གི་ཤོ་མིག་ཏུ་བཞག་ན་སྟོང་ཞེས་བྱ་བ་བཞིན་ཏེ། གནས་སྐབས་ཐ་དད་ལ་ལྟོས་ནས་ཡིན་གྱི། དེའི་ངོ་བོ་ཉིད་གཞན་དུ་འགྱུར་བ་ནི་མ་ཡིན་ནོ། །འོ་ན་ཅི་ཞེ་ན། གནས་སྐབས་ཐ་དད་པའི་བྱེ་བྲག་ལས་གྲངས་རྗོད་པར་བྱེད་པའི་མིང་གཞན་འབྱུང་བར་ཟད་དོ། །སྔ་མ་
[114b.4]དང་ཕྱི་མ་ལ་ལྟོས་ནས་གཞན་དང་གཞན་ཞེས་བརྗོད་ཅེས་བྱ་བ་ནི། སྔ་མ་དང་ཕྱི་མ་ལ་ལྟོས་ནས་འདས་པ་དང་། མ་འོངས་པ་དང་ད་ལྟར་ཞེས་བྱའོ་ཞེས་བྱ་བའི་ཐ་ཚིག་སྟེ། སྔ་མ་འདས་པ་དང་ད་ལྟར་ཁོ་ན་ལ་ལྟོས་ནས་མ་འོངས་པ་ཞེས་བྱའོ། །སྔ་མ་འདས་པ་དང་། ཕྱི་མ་མ་འོངས་པ་ལ་ལྟོས་ནས་
[114b.5]ད་ལྟར་ཞེས་བྱའོ། །ཕྱི་མ་ད་ལྟར་དང་མ་འོངས་པ་ཁོ་ན་ལ་ལྟོས་ནས་འདས་པ་ཞེས་བྱའོ། །དེ་བས་ན་གཞན་དང་གཞན་དུ་འགྱུར་བ་པ་ནི་སྔ་མ་དང་ཕྱི་མ་ལ་ལྟོས་ནས་ཐ་སྙད་རྗོད་པར་བྱེད་དོ། །དེ་ཉིད་ཀྱི་ཕྱིར་དཔེར་ན་བུད་མེད་གཅིག་ལ་མ་ཞེས་བྱ་ལ། བུ་མོ་ཞེས་ཀྱང་བྱ་བ་བཞིན་ནོ་ཞེས་བྱ་བ་དཔེར་རྗོད་
[114b.6]པར་བྱེད་དེ། དཔེར་ན་བུད་མེད་གཅིག་ཅིག་ལ་བུ་མོ་ལ་ལྟོས་ནས་ནི་མ་ཞེས་ཀྱང་བྱ་ལ། མ་ལ་ལྟོས་ནས་ནི་བུ་མོ་ཞེས་ཀྱང་བྱ་བ་ལྟར་སྔ་མ་དང་ཕྱི་མ་ལ་ལྟོས་པ་ཡིན་གྱི་རྫས་གཞན་གྱི་སྒོ་ནས་ནི་མ་ཡིན་ནོ། །གྲངས་ཅན་གྱི་ཕྱོགས་ལ་བརླན་པར་བྱའོ་ཞེས་བྱ་བ་ནི་གྲངས་ཅན་གྱི་ཕྱོགས་དགག་པ་གང་ཡིན་
[114b.7]པ་དེ་ཉིད་དེའི་ཕྱོགས་དགག་པ་ཡིན་ཏེ། གྲངས་ཅན་གྱི་ཕྱོགས་ནི་སྔར་བཀག་ཟིན་ཏོ་སྙམ་དུ་བསམས་པ་ཡིན་ནོ། །གཉིས་པ་བཙུན་པ་དབྱངས་སྒྲོགས་ཀྱིའང་དུས་འཆོལ་བར་འགྱུར་ཏེ། འདས་པའི་དུས་སུ་འདོད་པ་གང་ཡིན་པ་དེ་ད་ལྟར་དང་མ་འོངས་པར་ཡང་འགྱུར་རོ། །ཇི་ལྟ་ཞེ་ན་འདས་པ་ནི་འདས་
[115a]
[115a.1]པའི་མཚན་ཉིད་དང་ལྡན་པ་ཡིན་ལ། མ་འོངས་པ་དང་ད་ལྟར་གྱི་མཚན་ཉིད་དག་ནི་མི་ལྡན་པ་མ་ཡིན་ཏེ། ལྡན་པ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ། །མ་འོངས་པ་ཡང་མ་འོངས་པའི་མཚན་ཉིད་དང་ལྡན་ལ། འདས་པ་དང་ད་ལྟར་གྱི་མཚན་ཉིད་དག་ནི་མི་ལྡན་པ་མ་ཡིན་ནོ། །ད་
[115a.2]ལྟར་ཡང་ད་ལྟར་གྱི་མཚན་ཉིད་དང་ལྡན་ལ། འདས་པ་དང་མ་འོངས་པའི་མཚན་ཉིད་དག་ནི་མི་ལྡན་པ་མ་ཡིན་ནོ། །དེ་ལྟ་བས་ན་རེ་རེ་ཞིང་མཚན་ཉིད་གསུམ་ཆར་དང་ལྡན་པའི་ཕྱིར། འདས་པ་དང་མ་འོངས་པ་དང་ད་ལྟར་དུ་འགྱུར་ཏེ། དེ་བཞིན་དུ་མ་འོངས་པ་དང་ད་ལྟར་དག་ལ་ཡང་སྦྱར་བར་
[115a.3]བྱའོ། །འདིར་ཅི་ཞིག་མཚུངས་ཞེས་བྱ་བ་ནི། སྐྱེས་བུ་གཅིག་འབའ་ཞིག་དང་ལྡན་པ་དེ་བཞིན་དུ། ཆོས་ལ་མཚན་ཉིད་གཅིག་ཡོད་ཀྱི་མཚན་ཉིད་གཞན་གཉིས་མེད་དམ་ཅི་ན། གང་གི་ཕྱིར་དེ་སྐད་དུ་དཔེར་རྗོད་པར་བྱེད། དེ་ལྟ་བས་ན་མཚུངས་པ་མེད་དོ། །བཞི་པའི་ཡང་ཞེས་བྱ་བ་ནི་བཙུན་པ་
[115a.4]སངས་རྒྱས་ལྷའི་ཡང་ངོ་། །དུས་གཅིག་ལ་དུས་གསུམ་ཆར་དུ་འགྱུར་ཏེ་ཞེས་བྱ་བ་ནི་འདས་པའི་དུས་གཅིག་ཁོ་ན་ལ་སྔ་མ་དང་ཕྱི་མའི་སྐད་ཅིག་རྣམ་པར་གཞག་པ་ཡོད་པས་སོ། །དེ་ལ་སྔ་མ་དང་ཕྱི་མའི་སྐད་ཅིག་པ་དག་ནི་འདས་པ་དང་མ་འོངས་པ་ཡིན་ཏེ། སྐད་ཅིག་མ་སྔ་མ་ནི་འདས་པ་
[115a.5]ཡིན་ལ་དབུས་ཀྱི་སྐད་ཅིག་མ་ནི་ད་ལྟར་བྱུང་བ་ཡིན། ཕྱི་མ་ནི་མ་འོངས་པ་ཡིན་པས་འདས་པའི་དུས་ལ་དུས་གསུམ་ཆར་དུ་འགྱུར་རོ། །བྱེ་བྲག་ཏུ་སྨྲ་བས། དེ་ལྟ་བས་ན་དེ་དག་ཐམས་ཅད་ཀྱི་ནང་ན་གསུམ་པ་བཟང་སྟེ་ཞེས་བྱ་བ་སྨོས་སོ། །ཇི་ལྟར་བཟང་ཞེ་ན་སྨྲས་པ། འདི་ལྟར་དེའི་ནི་བྱ་བ་ཡི། །
[115a.6]དུས་རྣམས་རྣམ་གཞག །བྱ་བ་ཡང་མིག་ལ་སོགས་པའི་བྱ་བ་ནི་ལྟ་བ་ལ་སོགས་པ་ཡིན་ནོ། །གཟུགས་ལ་སོགས་པའི་ཡང་རང་གི་དབང་པོའི་སྤྱོད་ཡུལ་ཉིད་ཡིན་ནོ། །གལ་ཏེ་དེ་ལྟ་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་བྱ་བས་རྣམ་པར་གཞག་ན་མིག་དེ་དང་འདྲ་བའི་བྱ་བ་གང་ཞིག་
[115a.7]ཡིན་ཏེ། གང་ཞིག་བྱ་བའི་མཚན་ཉིད་རང་གི་ལས་མི་བྱེད་པ་དེ་ནི་དེ་དང་འདྲ་བ་ཡིན་ལ། དེ་ལ་ཡང་ལྟ་བའི་མཚན་ཉིད་ཀྱི་བྱ་བ་མེད་ན་དེ་ཇི་ལྟར་ད་ལྟར་བྱུང་བ་ཡིན་སྙམ་དུ་བསམས་པ་ཡིན་ནོ། །འབྲས་བུ་འབྱིན་པ་དང་འཛིན་པ་ཡིན་ནོ་ཞེས་བྱ་བ་ནི་མིག་དེ་ནི་རང་གི་རྒྱུ་མཐུན་པའི་འབྲས་བུ་འཛིན་
[115b]
[115b.1]ཅིང་འཕེན་པ་ཡང་ཡིན་ལ། འབྲས་བུ་འབྱིན་པ་ཡང་ཡིན་ཏེ། མཇུག་ཐོགས་སུ་རྒྱུ་མཐུན་པའམ་སྐྱེས་བུ་བྱེད་པའི་འབྲས་བུ་འབྱིན་ཏོ། །ལྟ་བའི་བྱ་བ་མི་བྱེད་ཀྱང་འབྲས་བུ་གཞན་བྱེད་དེ། དེ་ལ་འབྲས་བུ་འབྱིན་པ་དང་། འཛིན་པ་ཡོད་པའི་ཕྱིར་དེ་ནི་ད་ལྟར་བྱུང་བ་ཞེས་བྱ་བར་རྣམ་པར་གཞག་
[115b.2]གོ།། །།བམ་པོ་བཞི་བཅུ་རྩ་གཅིག་པ། སྐལ་བ་མཉམ་པའི་རྒྱུ་ལ་སོགས་པ་འདས་པ་རྣམས་ཀྱང་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་རྣམ་པར་སྨིན་པའི་རྒྱུ་ལ་སོགས་པ་ཡང་བསྡུ་སྟེ། དེ་དག་ནི། ད་ལྟར་གྱི་དང་འདས་པ་དག །གཅིག་ནི་འདས་པས་འབྱིན་པར་འགྱུར། །ཞེས་འབྱུང་བས།
[115b.3]འབྲས་བུ་འབྱིན་པའི་སྒོ་ནས་བྱེད་པ་ཡོད་པའི་ཕྱིར། བྱེད་པ་ཡོད་པར་ཐལ་བར་འགྱུར་རོ། །དེའི་ཕྱིར་སྐལ་བ་མཉམ་པའི་རྒྱུ་ལ་སོགས་པ་དེ་དག་ཀྱང་ད་ལྟར་བཞིན་དུ་བྱ་བ་ཡོད་པའི་ཕྱིར་ད་ལྟ་ཉིད་དུ་ཐལ་བར་འགྱུར་བས། མཚན་ཉིད་འཆོལ་བར་འགྱུར་རོ། །གལ་ཏེ་ཁྱོད་གང་དག་ལ་འབྲས་བུ་འཛིན་པ་
[115b.4]དང་འབྱིན་པ་གཉི་ག་ཡོད་པ་དེ་དག་ནི་ད་ལྟར་ཡིན་གྱི། གང་དག་ལ་གཅིག་ཡོད་པ་དེ་དག་ནི་མ་ཡིན་ནོ་ཞེས་སྨྲ་ན། དེའི་ཕྱིར་བྱ་བ་ཕྱེད་དུ་ཞེས་བྱ་བ་སྨོས་ཏེ། ཐལ་བར་འགྱུར་རོ་ཞེས་བྱ་བར་སྐབས་དང་སྦྱར་རོ། །བྱ་བ་ཕྱེད་ཡོད་པར་ཐལ་བར་འགྱུར་བ་སྟེ། འདས་པ་དེ་དག་ཕྱེད་ད་ལྟར་ཡིན་ནོ་
[115b.5]ཞེས་བྱ་བར་ཐལ་བར་འགྱུར་རོ། །འདས་པ་དེ་དག་འབྲས་བུ་འཛིན་པའི་མཚན་ཉིད་ཀྱི་བྱ་བ་ཞིག་པའི་ཕྱིར་འདས་པའི་མཚན་ཉིད་དང་ཡང་ལྡན་ལ། ད་ལྟར་གྱི་འབྲས་བུ་འབྱིན་པའི་ཕྱིར་ད་ལྟར་གྱི་མཚན་ཉིད་དང་ཡང་ལྡན་ཏེ་དེ་ཉིད་མཚན་ཉིད་འཆོལ་བའི་ཉེས་པ་ཡིན་ནོ། །འདས་པ་ལ་སོགས་
[115b.6]པའི་མཚན་ཉིད་དུ་འདོད་པ་ནི། བྱ་བ་ཞིག་པ་ནི་འདས་པ་ཡིན་ལ་བྱ་བ་མ་ཐོབ་པ་ནི་མ་འོངས་པ་ཡིན། བྱ་བ་ཐོབ་ལ་མ་ཞིག་པ་ནི་ད་ལྟར་ཡིན་ནོ་ཞེས་བྱ་བ་ཡིན་པས་སོ། །བགེགས་སུ་བྱེད་ཅེས་བྱ་བ་ནི་བགེགས་བྱེད་པ་སུ་ཡོད་ཅེས་བྱ་བའི་ཐ་ཚིག་གོ། །གཞན་དག་ན་རེ་བགེགས་སུ་བྱེད་ཅེས་
[115b.7]བྱ་བ་ནི། འདི་ལ་བགེགས་བྱེད་པ་སུ་ཡོད་ཅེས་བྱ་བ་སྟེ། བྱ་བའི་ཡིན་ནོ་ཞེས་ཟེར་རོ། །གལ་ཏེ་རྐྱེན་རྣམས་མ་ཚོགས་པ་ཡིན་ནོ་ཞེ་ན་ཞེས་བྱ་བ་ནི་དེ་ལ་འདི་སྙམ་དུ་རྒྱུ་དང་མཚུངས་པ་དེ་མ་ཐག་པ་ལ་སོགས་པ་རྐྱེན་རྣམས་མ་ཚོགས་པ་ཡིན་ཏེ། དེའི་ཕྱིར་དུས་ཐམས་ཅད་དུ་ནི་བྱ་བ་མི་བྱེད་དོ་སྙམ་
[116a]
[116a.1]དུ་སེམས་ན་མི་རུང་སྟེ། རྟག་ཏུ་ཡོད་པ་ཉིད་དུ་ཁས་བླངས་པའི་ཕྱིར་རོ། །རྐྱེན་རྣམས་མ་ཚོགས་པར་རྟག་ཏུ་ནི་མི་རུང་སྟེ། འདི་ལྟར་ཁྱེད་ནི་རྐྱེན་རྣམས་ཡོད་པ་ཉིད་དུ་ཁས་ལེན་ལ་ཡོད་པ་རྣམས་ནི་ཞིག་པ་མ་ཡིན་པའི་ཕྱིར་རོ། །བྱ་བ་འདས་པ་དང་ཞེས་བྱ་བ་རྒྱས་པར་
[116a.2]འབྱུང་བ་ནི་གྲུབ་པའི་མཐའ་ལས་བྱ་བ་ཞིག་པ་ནི་འདས་པ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པ་འབྱུང་བས་བྱ་བ་འདས་པ་ཞེས་བྱ་བ་དང་མ་འོངས་པ་དང་ད་ལྟར་བྱུང་བ་ཞེས་བྱ་བ་ལ། ཡང་བྱ་བ་གཞན་ཞིག་ཡོད་དམ་ཅི་ན་གང་གི་ཕྱིར་འདས་པ་ལ་སོགས་པ་ཉིད་དུ་བརྗོད། གལ་ཏེ་ཡོད་ན་ནི་ཐུག་
[116a.3]པ་མེད་པར་ཐལ་བར་འགྱུར་རོ། །ཇི་སྟེ་མེད་ན་ནི་ཇི་ལྟར་འདས་པ་ལ་སོགས་པ་ཞེས་བྱའོ། །འོན་ཏེ་འདས་པ་ཡང་མ་ཡིན་ཞེས་བྱ་བ་རྒྱས་པར་འབྱུང་བ་ནི་གང་ཞིག་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་པ་དེ་ནི་འདུས་མ་བྱས་པ་ཡིན་པའི་ཕྱིར་འདུས་
[116a.4]མ་བྱས་ཡིན་པས་རྟག་ཏུ་ཡོད་དོ་ཞེས་བྱ་བར་འགྱུར་ཏེ་བྱ་བ་ཞེས་བྱ་བར་སྐབས་དང་སྦྱར་རོ། །དེས་ན་ནི་ཅི་ཞེ་ན། དེའི་ཕྱིར་གང་གི་ཚེ་ཆོས་བྱ་བ་མི་བྱེད་པ་དེའི་ཚེ་མ་འོངས་པ་ཡིན་ནོ་ཞེས་བརྗོད་པར་མི་བྱ་སྟེ། བྱ་བ་བྱེད་པར་མི་ནུས་པ་ཉིད་དུ་གྱུར་པའི་ཕྱིར་རོ། །གལ་ཏེ་ཆོས་ལས་བྱ་བ་གཞན་ཞིག་ཡིན་ན་
[116a.5]ནི་སྐྱོན་དེར་ཡང་འགྱུར་བ་ཞིག་ན་ཞེས་བྱ་བ་ནི་གལ་ཏེ་ཆོས་ལས་བྱ་བ་གཞན་ཞིག་ཡིན་ན་ནི་བྱ་བ་ལ་ཡང་བྱ་བ་གཞན་ཡོད་ཅེས་བྱ་བའི་ཐལ་བའམ། འདུས་མ་བྱས་སུ་ཐལ་བའི་ཉེས་པ་དེར་ཡང་འགྱུར་བ་ཞིག་ན། དེ་ནི་གཞན་ཡང་མ་ཡིན་པས་འདི་ནི་ཉེས་པ་མེད་དོ་ཞེས་བྱ་བ་ཡིན་ནོ། །དེའི་
[116a.6]བདག་ཉིད་ཁོ་ནར་ཞེས་བྱ་བ་ནི་ད་ལྟར་བྱུང་བའི་ངོ་བོ་ཉིད་གང་ཡིན་པ་དེ་ཁོ་ན་བཞིན་དུ་ཞེས་བྱ་བའི་ཐ་ཚིག་གོ། །འདི་སྔོན་ཅི་ཞིག་མ་བྱུང་བར་གྱུར་ཅེས་བྱ་བར་ནི་མ་འོངས་པའི་གནས་སྐབས་ན་སྟེ། གལ་ཏེ་བྱ་བ་ཡིན་ནོ་ཞེ་ན་ནི་གཞན་མ་ཡིན་པའི་ཕྱིར་ཆོས་ཉིད་མེད་དོ་ཞེས་སྨྲས་པར་
[116a.7]འགྱུར་རོ། །ཕྱིས་ཅི་ཞིག་མེད་ཅེས་བྱ་བ་ནི་འདས་པའི་གནས་སྐབས་ན་སྟེ། གལ་ཏེ་བྱ་བ་ཡིན་ནོ་ཞེ་ན་ནི་ཆོས་དང་བྱ་བ་དག་ནི་གཞན་མ་ཡིན་པའི་ཕྱིར་ཆོས་ཉིད་མེད་དོ་ཞེས་སྨྲས་པར་འགྱུར་རོ། །གལ་ཏེ་མ་བྱུང་བ་ལས་བྱུང་བར་མི་འདོད་ན་ད་ལྟར་བྱུང་བ་འགྲུབ་པར་མི་འགྱུར་རོ། །
[116b]
[116b.1]གལ་ཏེ་བྱུང་ནས་ཀྱང་ཡང་མི་འབྱུང་བར་མི་འདོད་ན་འདས་པའི་དུས་འགྲུབ་པར་མི་འགྱུར་རོ། །མ་འོངས་པ་ནི་གང་ཞིག་མ་བྱུང་བ་ལས་རེ་ཞིག་མི་འབྱུང་བ་ཡིན་ནོ་ཞེས་བྱ་བར་ཤུགས་ཀྱིས་གོ་བར་འགྱུར་རོ། །ཚིག་གི་དོན་ནི་དེ་ལྟར་ན་དུས་གསུམ་འགྲུབ་ཀྱི་དེ་ལྟ་མ་ཡིན་ན་ནི་འགྲུབ་པར་མི་
[116b.2]འགྱུར་རོ་ཞེས་བྱ་བ་ཡིན་ནོ། །སྐྱེ་བ་དང་འཇིག་པ་དག་མི་རུང་བའི་ཕྱིར་ཞེས་བྱ་བ་ནི་དུས་ཐམས་ཅད་དུ་ཡོད་པའི་ཕྱིར་སྐྱེ་བ་དང་འཇིག་པ་དག་མི་རུང་ངོ་། །དེ་ལྟ་བས་ན་འདུས་བྱས་ཀྱི་མཚན་ཉིད་དང་ལྡན་པའི་ཕྱིར། རྟག་པ་ཉིད་དུ་ཐལ་བར་མི་འགྱུར་རོ་ཞེས་བྱ་བ་འདི་ནི་ཚིག་ཙམ་དུ་ཟད་དོ། །
[116b.3]ཚིག་གི་ལུགས་འདི་ནི་སྔོན་མ་བྱུང་བ་ཡིན་ནོ་ཞེས་བྱ་བ་ནི་དུས་ཐམས་ཅད་དུ་ཡང་ཡོད་ལ་སྐྱེ་བ་དང་འཇིག་པ་དག་དང་ལྡན་ནོ་ཞེས་བྱ་བའི་ཚིག་གི་ལུགས་ནི་སྔོན་མ་ཐོས་པ་ཡིན་ནོ་ཞེས་བྱ་བའི་དོན་ཏམ་ཚིག་གི་ལུགས་འདི་ནི་སྔ་ཕྱི་འགལ་བ་ཡིན་ནོ་ཞེས་བྱ་བ་ཡིན་ནོ། །རང་བཞིན་ཡང་ནི་རྟག་ཏུ་
[116b.4]ཡོད། །ཅེས་བྱ་བ་ནི་གཟུགས་ལ་སོགས་པའི་རང་གི་མཚན་ཉིད་དེ་དུས་ཐམས་ཅད་ན་ཡོད་དོ་ཞེས་བྱ་བར་འདོད་དོ། །གལ་ཏེ་གཟུགས་ལ་སོགས་པའི་ངོ་བོ་ཉིད་དུས་ཐམས་ཅད་དུ་ཡང་ཡོད་ན་དེས་ན་གཟུགས་ལ་སོགས་པའི་དངོས་པོ་རྟག་པར་ཐལ་བར་འགྱུར་རོ་ཞེ་ན། དེའི་ཕྱིར་སྨྲས་པ།
[116b.5]དངོས་པོ་ཡང་ནི་རྟག་མི་འདོད། །དེ་ལྟ་ཡིན་ན་གདོན་མི་ཟ་བར་རང་བཞིན་དེ་ལས་དངོས་པོ་གཞན་ཡིན་ནོ་ཞེ་ན། དེའི་ཕྱིར། རང་བཞིན་ལས་ཀྱང་དངོས་མི་གཞན། །ཞེས་སྨྲས་སོ། །དེ་ལྟ་བས་ན་འདི་ནི་འདོད་རྒྱལ་ཙམ་དུ་ཟད་པའི་ཕྱིར། དབང་ཕྱུག་ཐ་སྙད་ཡིན་པར་གསལ་ཏེ་རིགས་པ་ནི་མེད་དོ། །
[116b.6]སྔོན་བྱུང་བ་གང་ཡིན་པ་ནི་འདས་པ་ཡིན་ལ་ཞེས་བྱ་བ་ནི་རང་གི་མཚན་ཉིད་དུ་མེད་དོ་ཞེས་སྟོན་པར་བྱེད་དོ། །རྐྱེན་ཡོད་ན་འབྱུང་བར་འགྱུར་བ་གང་ཡིན་པ་དེ་ནི་མ་འོངས་པ་ཡིན་ནོ་ཞེས་བྱ་བ་ནི་མེད་ཀྱང་རྒྱུ་ཡོད་པའི་སྒོ་ནས་རྣམ་པར་འཇོག་གོ་ཞེས་སྟོན་པར་བྱེད་དོ། །དེ་ལྟར་བྱས་ནས་ཞེས་བྱ་བ་ནི་སྔོན་
[116b.7]བྱུང་བ་དང་འབྱུང་བར་འགྱུར་རོ་ཞེས་བྱས་ནས་ཡིན་གྱི་རྫས་སུ་ཡོད་པ་ནི་མ་ཡིན་པ་ཉིད་དོ། །རྒྱུ་ལ་སྐུར་པ་འདེབས་པར་ལྟ་བ་དགག་པའི་ཕྱིར་འདས་པ་ཡོད་དོ་ཞེས་གསུངས་སོ། །འབྲས་བུ་ལ་སྐུར་པ་འདེབས་པར་ལྟ་བ་པ་དགག་པའི་ཕྱིར། མ་འོངས་པ་ཡོད་དོ་ཞེས་གསུངས་སོ། །འདས་
[117a]
[117a.1]པ་བྱུང་བར་གྱུར་ཏེ། མ་འོངས་པ་འབྱུང་བར་འགྱུར་རོ་ཞེས་གསུངས་སོ་ཞེས་བརྗོད་པར་བྱ་བ་ལས་ཡོད་དོ་ཞེས་གསུངས་སོ་ཞེས་སྨོས་པ་ནི་ཡོད་ཅེས་བྱ་བའི་སྒྲ་ཚིག་གི་ཕྲད་ཡིན་པའི་ཕྱིར་རོ། །ཚིག་གི་ཕྲད་ནི་དུས་གསུམ་པའི་ཡུལ་ཅན་ཡིན་པས་བྱུང་བར་གྱུར་
[117a.2]ཏོ། །འབྱུང་བར་འགྱུར་རོ་ཞེས་བྱ་བའི་དོན་ལ་ཡང་ཡོད་དོ། །དཔེར་ན་སྨྲ་བ་པོ་མར་མེ་ཞེས་བྱ་བ་རྒྱས་པར་འབྱུང་བ་ནི། དཔེར་ན་སྨྲ་བ་པོ་མར་མེ་སྔ་ན་མེད་པ་ཡོད་དོ། །ཕྱིས་མེད་པ་ཡོད་དོ་ཞེས་སྨྲ་ཡང་རྫས་སུ་ཡོད་པ་མ་ཡིན་པ་ལྟ་བུ་དང་། ཡང་དཔེར་ན་སྨྲ་བ་པོ་མར་མེ་དེ་ཤི་བ་ནི་ཡོད་མོད་
[117a.3]ཀྱི། ཁོ་བོས་ནི་མ་བསད་དོ་ཞེས་ཟེར་ཡང་ཡོད་ཅེས་བྱ་བའི་སྒྲ་སྦྱར་བས་ཤི་བ་དེ་ཡོད་པ་ནི་མ་ཡིན་པ་ལྟ་བུའོ། །བྱེ་བྲག་ཏུ་སྨྲ་བ་ལྟར་ན་འགགས་པ་ཡང་ཡོད་པ་མ་ཡིན་ནམ་ཞེ་ན། ཡོད་པ་བདེན་མོད་ཀྱི་དེ་ནི་མར་མེའི་ངོ་བོ་ཉིད་འཛིན་པ་ཁོ་ནར་ཡོད་པ་ནི་མ་ཡིན་ནོ། །དེ་བཞིན་དུ་རྫས་
[117a.4]སུ་ཡོད་པ་ཉིད་མ་ཡིན་པ་ཡང་འདས་པ་དང་མ་འོངས་པ་ཡང་ཡོད་དོ་ཞེས་གསུངས་ཀྱི། དེ་ལྟ་མ་ཡིན་ན་འདས་པ་དང་མ་འོངས་པ་མི་འགྲུབ་པ་ཁོ་ནར་འགྱུར་ཏེ། གལ་ཏེ་མཚན་ཉིད་དེ་ཁོ་ན་བཞིན་དུ་ཡོད་པར་གྱུར་ན་འདས་པ་དང་མ་འོངས་པ་ཉིད་འགྲུབ་པར་མི་འགྱུར་རོ་ཞེས་བྱ་བའི་ཐ་
[117a.5]ཚིག་གོ། །གལ་ཏེ་འདས་པ་སྔོན་བྱུང་བ་ཞིག་ཡིན་ན། འོ་ན་བཅོམ་ལྡན་འདས་ཀྱིས་ཀུན་དུ་རྒྱུ་དབྱུག་ཐོགས་ཐོར་གཙུག་ཅན་རྣམས་ལ་ཞེས་བྱ་བ་རྒྱ་ཆེར་སྨོས་ཏེ། འཕགས་པའི་གླེང་གཞི་ཡུལ་ན་ལན་དར་སངས་རྒྱས་ཀྱིས་གསུངས་པའི་མདོ་ཡང་དག་པར་ལྡན་པའི་ལུང་ལས་
[117a.6]འཕགས་པ་མཽད་གལ་གྱི་བུ་བསད་དོ་ཞེས་གླེང་བ་དང་ཀུན་དུ་རྒྱུ་དབྱུག་ཐོགས་ཐོར་གཙུག་ཅན་རྣམས་ཀྱིས་འདི་ལྟར་བསད་པ་མེད་དོ་ཞེས་སྨྲས་པ་ཡོད་དོ། །དེའི་ཕྱིར་མདོ་ལས་འདི་སྐད་དུ་ཀུན་དུ་རྒྱུ་དབྱུག་ཐོགས་ཐོར་གཙུག་ཅན་མཚམས་མེད་པ་བྱེད་པ་རྣམས་ལས་འདས་པ་དེ་ནི་མེད་དོ་ཞེས་དེ་སྐད་
[117a.7]དུ་སྨྲའོ་ཞེས་བྱ་བ་རྒྱས་པར་འབྱུང་ངོ་། །ཅི་ཀུན་དུ་རྒྱུ་དབྱུག་ཐོགས་ཐོར་གཙུག་ཅན་དེ་དག་མཚམས་མེད་པའི་ལས་དེ་སྔོན་བྱུང་བ་ཉིད་དུ་མི་འདོད་པར་གྱུར་ཏམ། འདི་སྐད་དུ་བཤད་པ་ཡིན་ཏེ། དེ་དག་ལས་དེ་སྔོན་བྱུང་བ་ཉིད་དུ་ནི་འདོད་པར་གྱུར་མོད་ཀྱི་འོན་ཀྱང་དེ་དག་ལས་འདས་པ་དེ་ནི་མེད་
[117b]
[117b.1]དོ་ཞེས་ལས་དེ་ལ་རྫས་སུ་མེད་པར་ལོག་པར་རྟོག་པ་ཡིན་ནོ། །དེ་ལྟར་བཅོམ་ལྡན་འདས་ཀྱིས་ནི་ངོ་བོ་ཉིད་གང་ལ་དེ་དག་ལོག་པར་རྟོག་པའི་ལས་འདས་པ་དེ་ནི་ཡོད་དོ་ཞེས་རྒྱས་པར་གསུངས་ཏེ། དེ་ལྟ་བས་ན་འདས་པ་ནི་རང་གི་ངོ་བོ་ཡོད་དོ་ཞེས་ཞིབ་ཏུ་བཤད་པ་ཡིན་ནོ། །མདོ་དེ་ལས་ནི་འདས་པ་ནི་སྔོན་
[117b.2]བྱུང་བའི་ལས་གང་ཡིན་པ་དེ་ཁོ་ནར་ཟད་དོ་ཞེས་བྱ་བར་དགོངས་ནས་ལས་དེ་ཡོད་དོ་ཞེས་གསུངས་པ་ནི་མ་ཡིན་ནོ། །འོ་ན་ཅི་ཞེ་ན། རྒྱུད་དེ་ལ་དེས་ཀུན་དུ་དྲངས་པ་སྟེ། སྔོན་བྱུང་བའི་ལས་ཀྱིས་ཀུན་དུ་དྲངས་ཤིང་བཞག་པ་འབྲས་བུ་སྐྱེད་པའི་མཐུ་ཡོད་པ་ལས་དགོངས་ཏེ་གསུངས་པ་ཡིན་ནོ། །
[117b.3]དགོངས་པ་འདིས་གསུངས་སོ་ཞེས་བྱ་བར་ཅི་མངོན་ཞེ་ན། དེ་ལྟ་མ་ཡིན་ཏེ་རང་གི་ངོ་བོ་ཉིད་ཁོ་ནར་ཡོད་ན་འདས་པ་འགྲུབ་པར་མི་འགྱུར་རོ་ཞེས་བྱ་བ་སྨོས་ཏེ། ལས་དེ་རང་གི་མཚན་ཉིད་དུ་ཡོད་ཅིང་ད་ལྟར་བྱུང་བའི་མཚན་ཉིད་དུ་ཡོད་ན། འདས་པ་ཞེས་བྱ་བ་འགྲུབ་པར་མི་འགྱུར་གྱི། ད་ལྟར་
[117b.4]བྱུང་བ་ཁོ་ནར་འགྲུབ་པར་འགྱུར་རོ་སྙམ་དུ་བསམས་པ་ཡིན་ནོ། །རྒྱུད་དེ་ལ་དེས་ཀུན་དུ་དྲངས་པ་ཞེས་བྱ་བ་རྒྱས་པར་དེ་སྐད་དུ་བཤད་ན་ནི་ལས་འདས་པ་དེ་ཡོད་དོ་ཞེས་བྱ་བར་འགྲུབ་པར་འགྱུར་རོ། །དེ་ནི་གདོན་མི་ཟ་བར་དེ་ལྟ་བུ་ཡིན་པར་ཤེས་པར་བྱ་སྟེ་ཞེས་བྱ་བ་ནི་ཇི་ལྟར་འདས་པ་དང་མ་
[117b.5]འོངས་པ་རྫས་སུ་མེད་དོ་ཞེས་བྱ་བ་དེ་ལྟ་བུར་རོ། །གལ་ཏེ་ད་ལྟར་གྱི་དུས་སུ་ཞེས་བྱ་བ་རྒྱས་པར་འབྱུང་བ་ནི་ད་ལྟར་གྱི་ངོ་བོར་མ་བྱུང་བ་ལས་བྱུང་བ་ཞེས་བྱ་བའི་ཐ་ཚིག་གོ། །མི་རུང་སྟེ་དུས་ནི་དངོས་པོ་ལས་དོན་གཞན་མ་ཡིན་པའི་ཕྱིར་རོ་ཞེས་བྱ་བ་ནི་དེ་ནི་དེ་ལྟ་མ་ཡིན་ཏེ། ད་ལྟར་བྱུང་བའི་
[117b.6]དུས་ནི་མིག་ཅེས་བྱ་བའི་དངོས་པོ་ལས་དོན་གཞན་མ་ཡིན་པའི་ཕྱིར་རོ། །རྫས་གཞན་མ་ཡིན་པའི་ཕྱིར་རོ་ཞེས་བྱ་བའི་དོན་ཏེ། ད་ལྟར་གྱི་དུས་གང་ཡིན་པ་དེ་ཉིད་དངོས་པོ་ཡིན་ན་དེ་ཇི་ལྟར་ན་ད་ལྟར་དེ་ཉིད་རང་གི་བདག་ཉིད་དུ་མ་བྱུང་བ་ལས་འབྱུང་བར་འགྱུར་ཏེ་འདི་ལྟར། དེ་ཉིད་
[117b.7]དུས་དང་གཏམ་གཞི་དང་ཞེས་བཤད་དོ། །འོན་ཏེ་མིག་གི་བདག་ཉིད་དུ་མ་བྱུང་བ་ལས་འབྱུང་ངོ་ཞེ་ན་ནི་མ་འོངས་པའི་མིག་མེད་དོ་ཞེས་བྱ་བ་འདི་གྲུབ་པ་ཡིན་ནོ། །དམིགས་པ་ཙམ་ཞིག་ཡིན་ཞེས་བྱ་བ་ལ། ཙམ་ཞེས་བྱ་བའི་སྒྲ་ནི་སྐྱེད་པར་བྱེད་པ་ཉིད་བཟློག་པའི་ཕྱིར་ཏེ། ཆོས་
[118a]
[118a.1]རྣམས་དེའི་རྣམ་པར་སྐྱེ་བའི་དམིགས་པ་ནི་ཡིན་ནོ་སྙམ་དུ་བསམས་པ་ཡིན་ནོ། །མ་འོངས་པ་བསྐལ་པ་སྟོང་ན་འབྱུང་བར་ཞེས་བྱ་བ་ནི་མ་འོངས་པ་ཉེ་བ་ཡང་སྐྱེད་པར་བྱེད་པ་ཡིན་པར་མི་རུང་ན་དུས་ཤིན་ཏུ་རིང་མོ་ཞིག་ན་འབྱུང་བར་འགྱུར་བ་གང་ཡིན་པ་ལྟ་བུ་སྨོས་ཀྱང་ཅི་
[118a.2]དགོས་ཏེ། འབྲས་བུ་ནི་དུས་སྔ་ལ་རྒྱུ་ནི་དུས་ཕྱི་བ་ཡིན་ནོ་ཞེས་བྱ་བར་ནི་རུང་བ་མ་ཡིན་ནོ། །མྱ་ངན་ལས་འདས་པ་ཡང་ཞེས་བྱ་བ་ནི་མྱ་ངན་ལས་འདས་པ་ནི་རྣམ་པར་ཤེས་པ་འགག་པར་བྱེད་ཀྱི་འཁོར་བའི་འཇུག་པ་དང་འགལ་བའི་ཕྱིར་སྐྱེད་པར་བྱེད་པ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །
[118a.3]བྱུང་བར་གྱུར་པ་དང་འབྱུང་བར་འགྱུར་རོ་ཞེས་བྱ་བ་ནི་ད་ལྟར་གྱི་གནས་སྐབས་སུ་གཟུགས་བྱུང་བར་གྱུར་པ་དང་འབྱུང་བར་འགྱུར་བ་དེ་ལྟར་དམིགས་པ་ནི་ཡིན་ནོ་ཞེས་བྱ་བའི་ཐ་ཚིག་གོ། །ཇི་ལྟར་ན་དེ་ལ་དེ་ལྟར་དམིགས་ཀྱི་ཡོད་དོ་ཞེས་བྱ་བར་ནི་མ་ཡིན་ནོ་ཞེས་བྱ་བར་ཤེས་ཤེ་ན། དེའི་ཕྱིར་
[118a.4]འདས་པའི་གཟུགས་སམ་ཚོར་བ་དྲན་པ་ན་ཡོད་དོ་ཞེས་བྱ་བར་ནི་སུ་ཡང་མི་ལྟའོ། །འོ་ན་ཅི་ཞེ་ན། གཟུགས་དེ་ཚོར་བ་དང་མིག་གི་རྣམ་པར་ཤེས་པས་མྱོང་བའི་སྟོབས་ཀྱིས་ཇི་ལྟར་མཐོང་བ་དང་། ཇི་ལྟར་ཉམས་སུ་མྱོང་བ་བཞིན་འབྱུང་བར་གྱུར་ཏོ་ཞེས་བྱ་བར་དྲན་ནོ། །སློབ་དཔོན་ཉིད་ཀྱིས་ཀྱང་
[118a.5]ཇི་ལྟར་ཞེས་བྱ་བ་རྒྱས་པར་གཏན་ཚིགས་སུ་བསྡུ་བ་བཤད་དེ་ད་ལྟར་གྱི་གཟུགས་ཁོ་ན་བཞིན་དུ་བྱུང་བར་གྱུར་པ་དང་། འབྱུང་བར་འགྱུར་བ་ཡང་འཛིན་ཏོ་སྙམ་དུ་བསམས་པ་ཡིན་ནོ། །གལ་ཏེ་ཡང་དེ་དེ་བཞིན་དུ་ཡོད་དོ་ཞེ་ན་ནི་ཞེས་བྱ་བ་ནི་ད་ལྟར་ཇི་ལྟ་བ་བཞིན་ཡིན་ན་ནི་དེ་ད་ལྟར་དུ་འགྱུར་རོ། །
[118a.6]འོན་ཏེ་དེ་ཁོ་ན་བཞིན་དུ་མེད་དོ་ཞེ་ན་ནི་མེད་པར་ཡང་དམིགས་པ་ཡིན་ནོ་ཞེས་བྱ་བར་འགྲུབ་པོ། །ད་ལྟར་གྱི་གཟུགས་སུ་མེད་པའི་ཕྱིར་དང་དེ་ཡང་དྲན་པའི་ཕྱིར་རོ། །མ་ཡིན་ཏེ་སིལ་བུ་ལ་མི་འཛིན་པའི་ཕྱིར་རོ་ཞེས་བྱ་བ་ནི་སིལ་བུ་ལ་མི་འཛིན་པའི་ཕྱིར་དེ་ནི་རིགས་པ་མ་ཡིན་ཏེ། གཟུགས་
[118a.7]འདི་སྔོན་ནི་སིལ་བུ་མ་ཡིན་ལ། ད་ནི་སིལ་བུ་ཡིན་ནོ་ཞེས་བྱ་བ་དེ་ལྟ་བུ་དེ་ལ་མི་འཛིན་པའི་ཕྱིར་རོ། །གལ་ཏེ་ཡང་གཟུགས་དེ་ཁོ་ན་ཡིན་ཏེ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་ཡང་ད་ལྟར་གྱི་གནས་སྐབས་ཀྱི་གཟུགས་གོང་བུར་གྱུར་པ་དེ་འདས་པ་དང་མ་འོངས་པའི་གནས་སྐབས་ན་རྡུལ་ཕྲ་
[118b]
[118b.1]རབ་ཏུ་གྱེས་པ་ཡིན་ཏེ། དེའི་ཕྱིར་ད་ལྟར་བཞིན་དུ་མི་འཛིན་ཏོ་ཞེ་ན། དེ་ལྟ་ན་ནི་རྡུལ་ཕྲ་རབ་རྣམས་དེའི་སོན་འདུག་པས་རྟག་པར་འགྱུར་ཏེ། མ་འོངས་པ་དང་ད་ལྟར་བྱུང་བ་དང་འདས་པ་དག་ཀྱང་དེ་དག་ཉིད་དེ་དག་ཡིན་ནོ། །དེ་ལྟ་ཡིན་ན་ནི་རྡུལ་ཕྲ་རབ་རྣམས་བསགས་པ་དང་གྱེས་པ་ཙམ་ཁོ་
[118b.2]ནར་འགྱུར་གྱི་ཅུང་ཟད་སྐྱེ་བ་ཡང་མེད་ལ་འགག་པ་ཡང་མེད་པས་ཡ་མཚན་ཅན་འཚོ་བྱེད་རྣམས་ཀྱིས་རྩོད་པ་བསླངས་པ་ཡིན་ནོ། །ཡང་དེ་ལྟར་འདོད་ན་དགེ་སློང་དག་མིག་ནི་སྐྱེ་བ་ན་ཡང་གང་ནས་ཀྱང་མི་འོང་ལ་འགགས་པ་ན་ཡང་གང་དུ་ཡང་བསགས་པར་མི་འགྱུར་རོ། །དགེ་སློང་
[118b.3]དག་དེ་ལྟ་བས་ན་མིག་ནི་མ་བྱུང་བ་ལས་འབྱུང་ཞིང་བྱུང་ནས་མེད་པར་འགྱུར་བ་ཡིན་ནོ་ཞེས་གསུངས་པའི་མདོ་ཡང་བོར་བར་འགྱུར་རོ། །ཡང་ཅི་ལྟར་ན་མདོ་འདི་བོར་ཞིང་འགལ་བར་བྱས་པ་ཡིན་ཞེ་ན། འདི་ལྟར་མིག་རང་གི་ངོ་བོར་སྐྱེ་བ་ན་གང་ནས་ཀྱང་མི་འོང་ལ་ཞེས་གསུངས་པའི་
[118b.4]བཀའ་འདི་ལ་ཡང་གནོད་པ་བྱས་པ་ཡིན་ལ། འགགས་པ་ན་ཡང་གང་དུ་ཡང་བསགས་པར་མི་འགྱུར་རོ་ཞེས་གསུངས་པའི་བཀའ་འདི་ལ་ཡང་གནོད་པ་བྱས་པ་ཡིན་ཏེ། འདས་པའི་དུས་ན་དེའི་རྡུལ་ཕྲ་རབ་རྣམས་སིལ་བུའི་བསགས་པ་ཉིད་དུ་ཁས་བླངས་པའི་ཕྱིར་རོ། །
[118b.5]རྡུལ་ཕྲ་རབ་བསགས་པ་མ་ཡིན་པ་རྣམས་ཀྱང་ཞེས་བྱ་བ་ནི་ཚོར་བ་ལ་སོགས་པ་རྡུལ་ཕྲ་རབ་ཀྱི་བདག་ཉིད་མ་ཡིན་པ་རྣམས་ཀྱང་ཇི་ལྟར་ན་སིལ་བུ་ཉིད་ཡིན། བསགས་པ་ཉིད་དམ་སིལ་བུ་ཉིད་གཅིག་ཏུ་འགྱུར་ན། ལུས་ཅན་རྣམས་ལ་འགྱུར་གྱི་ལུས་ཅན་མ་ཡིན་པ་རྣམས་ལ་ནི་མ་
[118b.6]ཡིན་ནོ། །དེ་དག་ཀྱང་ཇི་ལྟར་བྱུང་ཞིང་ཉམས་སུ་མྱོང་བ་དྲན་ཏེ་ཞེས་བྱ་བ་ནི་ད་ལྟར་གྱི་ངོ་བོ་དག་ཁོ་ན་དྲན་ནོ། །གལ་ཏེ་ཡང་དེ་དག་ད་ལྟར་གྱི་དག་ཇི་ལྟ་བ་དེ་བཞིན་དུ་ཡོད་དོ་ཞེ་ན་ནི་རྟག་པར་འགྱུར་རོ། །འོན་ཏེ་དེའི་ངོ་བོར་མེད་དོ་ཞེ་ན་ནི་མེད་པ་ཡང་དམིགས་པ་ཡིན་ནོ་ཞེས་བྱ་བ་གྲུབ་པ་ཡིན་
[118b.7]ནོ། །སྐྱེ་མཆེད་བཅུ་གསུམ་པ་ཡང་དམིགས་པ་ཡིན་པར་འགྱུར་རོ་ཞེས་བྱ་བ་ནི་སྐྱེ་མཆེད་བཅུ་གསུམ་དུ་སྐོང་བ་ནི་སྐྱེ་མཆེད་བཅུ་གསུམ་པའོ། །དེ་ཡང་རྣམ་པར་ཤེས་པའི་དམིགས་པར་འགྱུར་ཏེ། མེད་པར་དམིགས་པ་ཉིད་དུ་འདོད་ན་ནི་དེ་ལ་དམིགས་པའི་རྣམ་པར་ཤེས་པར་
[119a]
[119a.1]ཡང་འགྱུར་རོ། །བྱེ་བྲག་ཏུ་སྨྲ་བས་དེ་སྐད་དུ་སྨྲས་པ་དང་། སློབ་དཔོན་གྱིས་འོ་ན་སྐྱེ་མཆེད་བཅུ་གསུམ་པ་ཞེས་བྱ་བ་རྒྱས་པར་སྨོས་སོ། །བྱེ་བྲག་ཏུ་སྨྲ་བས་མིང་དེ་ཉིད་དམིགས་པ་ཡིན་ནོ་ཞེས་བྱ་བ་སྨྲས་ཏེ། སྐྱེ་མཆེད་བཅུ་གསུམ་པ་ཞེས་བྱ་བའི་མིང་གང་ཡིན་པ་དེ་དམིགས་པ་
[119a.2]ཡིན་ནོ། །དེ་ལྟ་ན་ནི་འོ་ན་མིང་ཉིད་མེད་དོ་ཞེས་བྱ་བར་རྟོགས་པར་འགྱུར་གྱི་བརྗོད་པར་བྱ་བ་སྐྱེ་མཆེད་བཅུ་གསུམ་པ་མེད་པའི་མཚན་ཉིད་ནི་མ་ཡིན་ནོ། །གཞན་ཡང་གང་ཞིག་སྒྲའི་སྔ་ན་མེད་པ་ལ་དམིགས་པ་དེའི་དམིགས་པ་ཡང་ཅི་ཞིག་ཡིན་ཞེས་བྱ་བའི་ཚིག་གི་ལྷག་མ་ཡིན་ནོ། །དེ་ལྟ་བུའི་
[119a.3]གནས་སུ་བྱེ་བྲག་ཏུ་སྨྲ་བས་སྒྲ་ཁོ་ན་ཡིན་ནོ་ཞེས་བྱ་བ་སྨྲས་ཏེ། དམིགས་པ་ཞེས་བྱ་བར་སྐབས་དང་སྦྱར་རོ། །སློབ་དཔོན་གྱིས་དེ་ལྟ་ན་ནི་འོ་ན་ཞེས་བྱ་བ་རྒྱས་པར་སྨོས་ཏེ་གལ་ཏེ་གང་ཞིག་གང་སྒྲའི་སྔ་ན་མེད་པ་ལ་དམིགས་པ་དེས་སྒྲ་ཁོ་ན་ལ་དམིགས་པ་ཡིན་གྱི་སྔ་ན་མེད་པ་ལ་ནི་མ་ཡིན་
[119a.4]ན་གང་ཞིག་སྒྲ་མེད་པ་དོན་དུ་གཉེར་བ་དེ་ལ་སྒྲ་དབྱུང་དགོས་པ་ཁོ་ནར་འགྱུར་རོ་ཞེས་བྱ་བ་འདིར་ཡང་འགྱུར་བ་ཡིན་ནོ། །གལ་ཏེ་མ་འོངས་པའི་གནས་སྐབས་ཡིན་ནོ་ཞེ་ན་ནི་ཞེས་བྱ་བ་ནི་ཇི་སྟེ་དེས་སྔ་ན་མེད་པ་ནི་འདི་གང་གི་ཡིན་པ་མ་འོངས་པའི་གནས་སྐབས་དེ་ལ་དམིགས་ཏེ། དེ་
[119a.5]ལྟ་བས་ན་གང་ཞིག་སྒྲ་སྔ་ན་མེད་པ་དོན་དུ་གཉེར་བར་བྱེད་པ་དེ་ལ་སྒྲ་དབྱུང་དགོས་པ་ཁོ་ནར་མི་འགྱུར་རོ་སྙམ་དུ་སེམས་ན་དེའི་ཕྱིར་ཡོད་ན་ཇི་ལྟར་མེད་པའི་བློར་འགྱུར་ཞེས་བྱ་བ་སྨོས་ཏེ། སྔ་ན་མེད་པ་འདི་གང་གི་ཡིན་པའི་སྒྲ་དེ་ཡོད་ན་ཇི་ལྟར་གང་ཞིག་སྔ་ན་མེད་པ་ལ་དམིགས་པ་དེ་ལ་
[119a.6]མེད་པའི་བློར་འགྱུར། གལ་ཏེ་ད་ལྟར་མེད་པ་ཡིན་ནོ་ཞེ་ན་ཞེས་བྱ་བ་ནི་དེ་ལ་འདི་སྙམ་དུ་ད་ལྟར་མེད་དོ་སྙམ་པ་དེ་ལྟ་བུར་དེ་ལ་དམིགས་པ་མེད་པའི་བློ་འབྱུང་ངོ་སྙམ་དུ་སེམས་ན། དེ་ནི་མ་ཡིན་ཏེ་གཅིག་པའི་ཕྱིར་རོ། །མ་འོངས་པ་གང་ཡིན་པ་དེ་ཉིད་ད་ལྟར་ཡིན་གྱི་དེ་ལས་གཞན་པ་ནི་མ་
[119a.7]ཡིན་པས་ཇི་ལྟར་ན་ད་ལྟར་གྱི་དེ་ཁོ་ན་ལ་མེད་པའི་བློ་འབྱུང་བར་འགྱུར། ཡང་ན་དེའི་བྱེ་བྲག་གང་ཡིན་པ་ཞེས་བྱ་བ་ནི་ཡང་ན་མ་འོངས་པ་དེའི་ཁྱད་པར་ཕྱིས་ད་ལྟར་གྱི་གནས་སྐབས་དག་ན་འབྱུང་བ་གང་ཡིན་པ་ཁྱད་པར་དེ་མེད་ན་མེད་དོ་སྙམ་པའི་བློ་འབྱུང་བ་ཡིན་ན་ནི། དེ་མ་བྱུང་བ་ལས་
[119b]
[119b.1]འབྱུང་བར་འགྲུབ་སྟེ། ཁྱད་པར་དེ་སྔོན་མ་བྱུང་བ་ལས་ཕྱིས་འབྱུང་བ་དེས་འགྲུབ་ཅེས་བྱ་བ་ཡིན་ནོ། །ཡོད་པ་དང་མེད་པ་གཉི་ག་ཡིན་ནོ་ཞེས་བྱ་བ་ནི་ད་ལྟར་གྱི་གནས་སྐབས་ན་ནི་ཡོད་པ་ཡིན་ལ་འདས་པ་དང་མ་འོངས་པའི་གནས་སྐབས་དག་ན་ནི་མེད་པ་ཡིན་པས་གཉི་ག་རྣམ་པར་
[119b.2]ཤེས་པའི་དམིགས་པ་ཡིན་ནོ། །གལ་ཏེ་མེད་པ་རྣམ་པར་ཤེས་པའི་དམིགས་པ་ཡིན་ན། འོ་ན་བྱང་ཆུབ་སེམས་དཔའ་ཞེས་བྱ་བ་རྒྱས་པར་སྨོས་ཏེ། བྱང་ཆུབ་སེམས་དཔའི་སྲིད་པ་ཐ་མ་པས་འདི་སྐད་དུ་འཇིག་རྟེན་ན་མེད་པ་གང་ཡིན་པ་དེ་བདག་གིས་ཤེས་སོ་ཞེས་བྱ་བ་དེ་ནི་མི་སྲིད་དོ་
[119b.3]ཞེས་གསུངས་སོ་ཞེས་འབྱུང་བའི་ཕྱིར་མེད་པ་ལ་དམིགས་པའི་རྣམ་པར་ཤེས་པ་མེད་དོ་ཞེས་བསྟན་པ་ཡིན་ནོ། །སློབ་དཔོན་གྱིས་མདོ་འདི་དགོངས་པ་གཞན་ཡིན་པར་བསྟན་པའི་ཕྱིར་མངོན་པའི་ང་རྒྱལ་ཅན་གཞན་དག་ཅེས་བྱ་བ་རྒྱས་པར་སྨོས་ཏེ། མདོ་འདི་ལ་དགོངས་པ་ནི་ཏིང་ངེ་
[119b.4]འཛིན་ཡོངས་སུ་མ་དག་པ་ང་རྒྱལ་ཅན་གཞན་དག་སྦྱོར་བའི་གནས་སྐབས་ན་སྣང་བས་ཏེ་ལྷའི་མིག་གི་སྣང་བ་མེད་བཞིན་དུ་ཡོད་པར་ལྟའི་བདག་ནི་ལྷའི་མིག་གི་སྔ་ལྟས་སྣང་བ་ཡོད་པ་ཁོ་ན་ལ་ཡོད་དོ་ཞེས་བྱ་བར་ལྟའོ་ཞེས་བྱ་བ་འདི་ཡིན་ནོ། །འདིའི་རྟོག་པར་ཡང་ག་ལ་འགྱུར་ཞེས་བྱ་བ་ནི་བློ་
[119b.5]ཐམས་ཅད་ཀྱི་ཡུལ་ཡོད་པ་ཉིད་དུ་རྣམ་པར་གཞག་ན་འདི་འཇིག་རྟེན་ན་མེད་པ་གང་ཡིན་པ་དེ་ཞེས་རྒྱས་པར་གསུངས་པ་གང་ཡིན་པ་དེ་ལྟ་བུར་བརྟག་པ་སྟེ་དཔྱོད་པ་དང་ཐེ་ཚོམ་དུ་ཡང་ག་ལ་འགྱུར་བློ་རྣམས་ཀྱི་དམིགས་པ་ཡོད་པ་དང་། མེད་པ་ཉིད་གཅིག་ཡིན་ན་ནི་རྟོག་པ་འདི་སྲིད་ཀྱི་
[119b.6]གཞན་དུ་ནི་མ་ཡིན་ནོ། །ཡང་ན་ཁྱད་པར་ཅི་ཞིག་ཡོད་ཅེས་བྱ་བ་ནི་གལ་ཏེ་དེ་དག་ཀྱང་ཡོད་པ་ཁོ་ན་ལ་ཡོད་པར་མཐོང་གི་མེད་པ་ལ་ནི་མ་ཡིན་ལ་གཞན་དག་ལས་ཀྱང་བྱང་ཆུབ་སེམས་དཔའ་ཁྱད་པར་ཅི་ཞིག་ཡོད་དེ། བློ་རྣམས་ཀྱི་དམིགས་པ་ཡོད་པ་དང་མེད་པ་ཉིད་གཅིག་ཡིན་ན་ནི་འདི་
[119b.7]ཁྱད་པར་ཡོད་དོ། །དེ་ནི་གདོན་མི་ཟ་བར་དེ་ལྟ་བུ་ཡིན་པར་ཤེས་པར་བྱ་སྟེ་ཞེས་བྱ་བ་ནི་བློ་དག་མེད་པ་ལ་དམིགས་པ་ཡིན་པ་ཞེས་བྱ་བར་རོ། །འདིར་དཔེར་བརྗོད་པ་ནི་ཡོད་པ་ལ་ཡང་ཡོད་པར་ཤེས་ལ་མེད་པ་ལ་ཡང་མེད་པར་ཤེས་སོ་ཞེས་བྱ་བ་འདི་ཡིན་ཏེ། དངོས་པོ་ཡོད་པ་ལ་ཡང་ཡོད་
[120a]
[120a.1]པ་ཉིད་དུ་ཤེས་སོ། །ཁྱད་པར་དུ་འགྲོའོ་ཞེས་བྱ་བ་ནི་བྱེ་བྲག་ཏུ་ཤེས་པར་འགྱུར་བའོ། །མེད་པ་ལ་ཡང་མེད་པ་ཉིད་དུ་ཤེས་པས་བློ་དག་མེད་པ་ལ་དམིགས་པ་ཡིན་ནོ་ཞེས་བྱ་བར་གྲུབ་བོ། །དེ་ལྟ་བས་ན་དེ་ཡང་གཏན་ཚིགས་སུ་མི་རུང་ངོ་ཞེས་བྱ་བ་ནི་བྱང་ཆུབ་སེམས་དཔས་
[120a.2]སྨྲས་པ་ཞེས་སྨྲས་པ་གང་ཡིན་པའོ། །དེ་སྔོན་དུ་འགྲོའོ་ཞེས་བྱ་བ་ནི་ལས་སྔོན་དུ་འགྲོ་བའི་སེམས་ཀྱི་ཁྱད་པར་ལས་སོ། །བདག་ཏུ་སྨྲ་བ་དགག་པ་ནས་ཞེས་བྱ་བ་ནི་བསྟན་བཅོས་ཀྱི་མཇུག་ནས་གནས་མའི་བུའི་གཞུང་ལུགས་དགག་པ་ནས་སོ། །འོ་ན་ནི་སྐྱེ་བ་མ་བྱུང་བ་ལས་འབྱུང་བ་
[120a.3]ཞེས་བྱ་བར་འགྲུབ་པ་ཡིན་ནོ་ཞེས་བྱ་བ་ནི་སྐྱེ་བ་སྔོན་མེད་པ་ལས་ད་འབྱུང་བས་སྔོན་མེད་པ་ལས་འབྱུང་བར་གྲུབ་པ་ཡིན་ནོ། །སྐྱེ་བ་ནི་སྐྱེ་བ་དང་ལྡན་པ་དང་ལྷན་ཅིག་ཚུལ་འདྲ་བའི་ཕྱིར་ཡང་ཐམས་ཅད་ཡོད་པ་ཁོ་ན་ཡིན་ན་ཞེས་བྱ་བ་སྨོས་ཏེ། གལ་ཏེ་རྒྱུ་དང་འབྲས་བུ་མ་འོངས་པ་ན་ཡོད་པ་འབའ་ཞིག་
[120a.4]ཏུ་མ་ཟད་ཀྱི་སྐྱེ་བ་ཡང་ཡོད་དོ་སྙམ་དུ་བསམས་པ་ཡིན་ནོ། །དེ་ནི་གང་ལ་གང་ཞིག་ནུས། །ཞེས་བྱ་བ་ནི་འབྲས་བུ་གང་ལ་རྒྱུ་གང་ཞིག་ནུས་ཏེ། རྒྱུ་དང་ཇི་སྐད་བཤད་པའི་སྐྱེ་བ་དང་འབྲས་བུ་མ་འོངས་པ་ཡང་ཡོད་པས་སོ། །བྱེ་བྲག་ཏུ་སྨྲ་བས་ད་ལྟར་དུ་བྱེད་པ་ནུས་པ་ཡིན་ནོ་ཞེས་སྨྲས་
[120a.5]པ་དང་སློབ་དཔོན་གྱིས་ད་ལྟར་དུ་བྱེད་པ་ཞེས་བྱ་བ་འདི་ཅི་ཡིན་ཞེས་བྱ་བ་རྒྱས་པར་སྨྲས་ཏེ། སྐྱེ་བ་ནི་ད་ལྟར་དུ་བྱེད་པ་མ་ཡིན་ཏེ་དེ་ནི་ཡོད་པའི་ཕྱིར་དེ་སྐད་དུ་འདྲི་བ་ཡིན་ནོ། །གལ་ཏེ་ཡུལ་གཞན་དུ་འདྲེན་པ་ཡིན་ནོ་ཞེ་ན་ཞེས་བྱ་བ་ནི་གལ་ཏེ་ད་ལྟར་དུ་བྱེད་པ་རྒྱུས་འབྲས་བུ་ཡུལ་གཞན་དུ་འདྲེན་པ་ཡིན་ནོ་
[120a.6]སྙམ་དུ་སེམས་ནི་འདི་ལ་རྟག་པར་ཐལ་བར་འགྱུར་རོ་ཞེས་སྨྲས་ཏེ། འབྲས་བུ་ཞེས་བྱ་བ་ཚིག་ལྷག་མ་ཡིན་ནོ། །ཡུལ་ནས་ཡུལ་གཞན་དུ་འདྲེན་པ་འབའ་ཞིག་ཏུ་ཟད་ཀྱི་སྐྱེ་བ་ནི་ཅུང་ཟད་ཀྱང་མེད་པས་རྟག་པར་ཐལ་བར་འགྱུར་རོ། །གཟུགས་ཅན་མ་ཡིན་པ་ཚོར་བ་ལ་སོགས་པ་ལ་ཡང་ཡུལ་
[120a.7]གཞན་དུ་འདྲེན་པ་ཇི་ལྟ་བུ་སྟེ། ལུས་ཅན་མ་ཡིན་པ་ཉིད་ཀྱི་ཡུལ་ན་མི་གནས་པའི་ཕྱིར་དེ་མི་རུང་ངོ་སྙམ་དུ་བསམས་པ་ཡིན་ནོ། །དེ་འདྲེན་པ་ཞེས་བྱ་བ་གང་ཡིན་པ་དེ་ཡང་མ་བྱུང་བ་ལས་བྱུང་བ་ཡིན་ནོ་ཞེས་བྱ་བ་ནི་མ་བྱུང་བ་ལས་བྱུང་བར་འགྲུབ་པོ་སྙམ་དུ་བསམས་པ་ཡིན་ནོ། །གལ་ཏེ་རང་གི་ངོ་བོའི་ཁྱད་
[120b]
[120b.1]པར་ཞིག་ཡིན་ནོ་ཞེ་ན་ཞེས་བྱ་བ་ནི་གལ་ཏེ་རྒྱུས་འབྲས་བུ་འདིའི་རང་གི་ངོ་བོ་ཁྱད་པར་དུ་བྱེད་དེ་དེས་ན་འབྲས་བུའི་ཁྱད་པར་ཡིན་ནོ་སྙམ་དུ་སེམས་ན་འདིར་མ་བྱུང་བ་ལས་འབྱུང་བ་གྲུབ་པ་ཡིན་ནོ་ཞེས་སྨྲས་ཏེ་ཁྱད་པར་མ་བྱུང་བ་ལས་འབྱུང་ཞིང་སྐྱེའོ་ཞེས་བྱ་བར་གྲུབ་པ་ཡིན་ནོ། །ཡུལ་ན་དུས་གསུམ་སྟེ་ཅི་ཞེ་ན་
[120b.2]ཐམས་ཅད་ཡོད་ཅེས་བྱ་བར་སྐབས་དང་སྦྱར་རོ། །ཇི་ལྟར་ཡོད་པ་དེ་བཞིན་དུ་བཤད་ཟིན་ཏོ་ཞེས་བྱ་བ་ནི་སྔོན་བྱུང་བ་གང་ཡིན་པ་དེ་ནི་འདས་པ་ཡིན་ནོ། །རྒྱུ་ཡོད་ན་འབྱུང་བར་འགྱུར་བ་གང་ཡིན་པ་དེ་ནི་མ་འོངས་པ་ཡིན་ནོ། །བྱུང་ནས་མ་ཞིག་པ་གང་ཡིན་པ་དེ་ནི་ད་ལྟར་ཡིན་ནོ་ཞེས་བྱ་བ་སྟེ། དེ་སྐད་
[120b.3]དུ་ཐམས་ཅད་ཡོད་པར་སྨྲ་བ་ནི་བསྟན་པ་ལ་ལེགས་པ་ཡིན་ནོ། །ཇི་ལྟར་ན་དེས་སམ་དེར་ལྡན་པ་ཡིན་ཞེ་ན་ཞེས་བྱ་བ་ནི་ཇི་ལྟར་ན་འདས་པ་དང་མ་འོངས་པའི་ཉོན་མོངས་པ་དེས་སམ། ཇི་ལྟར་ན་འདས་པ་དང་མ་འོངས་པའི་དངོས་པོ་དེར་ལྡན་པ་ཡིན་ཞེས་བྱ་བ་ཡིན་ནོ། །དེ་ལས་སྐྱེས་པ་དེའི་རྒྱུའི་
[120b.4]ཕྲ་རྒྱས་ཡོད་པའི་ཕྱིར་ཉོན་མོངས་པ་དེས་ལྡན་ལ་ཞེས་བྱ་བ་ནི་འདས་པ་དེ་ལས་སྐྱེས་པ་ནི། དེ་ལས་སྐྱེས་པའོ། །མ་འོངས་པ་དེའི་རྒྱུ་ནི་དེའི་རྒྱུའོ། །དེ་ནི་དེ་ལས་སྐྱེས་པ་ཡང་ཡིན་ལ་དེའི་རྒྱུ་ཡང་ཡིན་པས་དེ་ལས་སྐྱེས་པ་དེའི་རྒྱུའོ། །ཕྲ་རྒྱས་ནི་ས་བོན་ནོ། །དེ་ལས་སྐྱེས་པ་དེའི་རྒྱུའི་ཕྲ་རྒྱས་
[120b.5]ཡོད་པའི་ཕྱིར་གོ་རིམས་བཞིན་དུ་འདས་པ་དང་མ་འོངས་པའི་ཉོན་མོངས་པ་དེས་ལྡན་ནོ། །འདི་ལས་འདས་པ་དང་མ་འོངས་པའི་དངོས་པོ་དེ་ལ་དམིགས་པ་ཡོད་པས་ན་དེ་ལ་དམིགས་པའི་ཉོན་མོངས་པའོ། །དེའི་ཕྲ་རྒྱས་ཏེ། དེ་ཡོད་པས་གོ་རིམས་བཞིན་དུ་འདས་པ་དང་མ་འོངས་པའི་
[120b.6]དངོས་པོ་དང་ལྡན་པ་ཡིན་ནོ། །ཆོས་ཉིད་ཅེས་བྱ་བ་ནི་ཆོས་རྣམས་ཀྱི་ངོ་བོ་ཉིད་དོ། །འདས་པ་ལ་སོགས་པའི་དུས་རྣམས་རྣམ་པར་གཞག་པ་ལ་དེ་དག་གི་ཐ་སྙད་བྱེ་བྲག་ཏུ་ཤེས་པར་བྱ་བའི་ཕྱིར་རྣམ་གྲངས་ཀྱང་ཡོད་ཅེས་བྱ་བ་ལ་སོགས་པ་སྨོས་ཏེ། གོ་རིམས་ཀྱི་ཚད་ཡོད་དོ། །གང་སྐྱེས་
[120b.7]པ་དེ་འགགས་ཞེས་སྨྲས་ནས་དཔེ་བསྟན་པའི་ཕྱིར་གཟུགས་སྐྱེ་ལ་གཟུགས་འགག་གོ་ཞེས་བྱ་བ་སྨོས་ཏེ། རྫས་གཞན་ནི་མ་ཡིན་པའི་ཕྱིར་རོ། །གཞན་སྐྱེ་ལ་གཞན་འགག་སྟེ་སྐྱེ་བ་ལ་མངོན་དུ་ཕྱོགས་པའི་ཕྱིར་གཞན་མ་འོངས་པ་སྐྱེ་ལ་འགག་པ་ལ་མངོན་དུ་ཕྱོགས་པའི་ཕྱིར་
[121a]
[121a.1]གཞན་ད་ལྟར་གྱི་འགག་གོ། །དུས་ཀྱང་སྐྱེ་སྟེ། ཆོས་སྐྱེ་བ་དུས་ཀྱིས་བསྡུས་པའི་ཕྱིར་རོ། །དུས་ཀྱི་ངོ་བོ་ཉིད་ཡིན་པའི་ཕྱིར་རོ་ཞེས་བྱ་བའི་ཐ་ཚིག་སྟེ། དེ་དག་ཉིད་དུས་གཏན་གཞི་དང་། །ཞེས་མཚན་ཉིད་འབྱུང་བའི་ཕྱིར་རོ། །དུས་ལས་ཀྱང་ཆོས་སྐྱེའོ། །ཅིའི་ཕྱིར་ཞེ་
[121a.2]ན། མ་འོངས་པའི་དུས་སྐད་ཅིག་མ་དུ་མ་ཡིན་པའི་ཕྱིར་རོ་ཞེས་བྱ་བ་སྨོས་ཏེ། གང་གི་ཕྱིར་མ་འོངས་པའི་སྐད་ཅིག་མའི་ཚོགས་ཀྱི་དུ་མ་ཞིག་ལས་སྐད་ཅིག་མ་འགའ་ཞིག་སྐྱེ་བ་དེའི་ཕྱིར་དུས་ལས་ཀྱང་སྐྱེའོ་ཞེས་བྱའོ། །ཞར་ལ་འོངས་པ་ཞེས་བྱ་བ་ནི་འདས་པ་དང་མ་འོངས་པ་དཔྱད་པ་ནི།
[121a.3]ལྷག་མ་ཀུན་གྱིས་ཀུན་དང་ལྡན། །ཞེས་བྱ་བའི་ཞར་ལ་འོངས་པ་ཡིན་ནོ། །ཀུན་འགྲོ་ལྷག་མ་རྣམས་ཀྱིས་ལྡན། །ཞེས་བྱ་བ་ནི་ཀུན་འབྱུང་བ་མཐོང་བས་སྤང་བར་བྱ་བའི་ཀུན་དུ་འགྲོ་བ་རྣམས་ཀྱིས་སོ། །དེ་ཡི་ཡུལ་ཅན་དྲི་མ་ལྷག་རྣམས་ཀྱིས། །ཞེས་བྱ་བ་ནི། སྤངས་པའི་རྣམ་པའི་ཡུལ་
[121a.4]ཅན་གྱི་ཕྲ་རྒྱས་རྣམས་ཀྱིས་ཞེས་བྱ་བའི་ཐ་ཚིག་སྟེ། དཔེར་ན་ཆེན་པོའི་ཆེན་པོའི་རྣམ་པ་སྤངས་ཀྱང་ཆེན་པོའི་འབྲིང་པོ་ལ་སོགས་པ་ཕྲ་རྒྱས་ལྷག་མ་མ་སྤངས་པ་རྣམས་ཀྱིས་ལྡན་པ་ཡིན་ནོ། །འདི་ལྟར་འདི་ཆེན་པོའི་ཆེན་པོའི་རྣམ་པ་སྤངས་པས་བྲལ་བ་ཡིན་ཡང་ལྷག་མ་དེ་དག་གིས་ལྡན་
[121a.5]པ་ཁོ་ན་ཡིན་ནོ། །བསྡུས་ཏེ་རྣམ་པར་འཆད་པར་བྱེད་དེ་ཞེས་བྱ་བ་ནི་མདོར་བསྡུས་ནས་རྣམ་པར་འཆད་པར་བྱེད་དོ། །སུ་དག་གཅིག་ཅེ་ན་བྱེ་བྲག་ཏུ་སྨྲ་བ་རྣམས་སོ། །བཅུ་དྲུག་པོ་ཞེས་བྱ་བ་ནི་འདོད་པ་ན་སྤྱོད་པ་རྣམ་པ་ལྔ་སྟེ། སྡུག་བསྔལ་དང་ཀུན་འབྱུང་བ་དང་། འགོག་པ་དང་། ལམ་
[121a.6]མཐོང་བས་སྤང་བར་བྱ་བ་བཞི་དང་། ལྔ་པ་བསྒོམ་པས་སྤང་བར་བྱ་བ་དང་། དེ་བཞིན་དུ་གཟུགས་མེད་པ་ན་སྤྱོད་པའི་བར་དུ་རྣམ་པ་ལྔ་སྟེ། བཅོ་ལྔ་དང་བཅུ་དྲུག་པ་ཟག་པ་མེད་པ་སྟེ། ཆོས་ནི་བཅུ་དྲུག་གོ། །ཆོས་འདི་དག་ཀྱང་གང་དག་མཐོང་བས་སྤང་བར་བྱ་བ་དེ་དག་ནི་ཕུང་པོ་བཞིའི་
[121a.7]ངོ་བོ་ཉིད་ཡིན་ནོ། །གང་དག་བསྒོམ་པས་སྤང་བར་བྱ་བ་དེ་དག་ནི་ཕུང་པོ་ལྔའི་ངོ་བོ་ཉིད་ཡིན་ནོ། །ཇི་ལྟ་ཞེ་ན་མཐོང་བས་སྤང་བར་བྱ་བའི་ཕྲ་རྒྱས་དེ་དག་དང་མཚུངས་པར་ལྡན་པའི་ཚོར་བ་གང་ཡིན་པ་དེ་ནི་ཚོར་བའི་ཕུང་པོ་ཡིན་ནོ། །འདུ་ཤེས་གང་ཡིན་པ་དེ་ནི་འདུ་ཤེས་ཀྱི་ཕུང་པོ་ཡིན་ནོ། །
[121b]
[121b.1]ཕྲ་རྒྱས་གང་དག་ཡིན་པ་དང་དེ་དག་དང་མཚུངས་པར་ལྡན་པ་སེམས་ལས་བྱུང་བ་སེམས་པ་ལ་སོགས་པ་གང་དག་ཡིན་པ་དང་། ཚོར་བ་ལ་སོགས་པ་དེ་དག་ཐམས་ཅད་ཀྱི་ལྡན་པ་མ་ཡིན་པ་ཐོབ་པ་དང་སྐྱེ་བ་དང་རྒ་བ་དང་གནས་པ་དང་མི་རྟག་པ་ཉིད་གང་དག་ཡིན་པ་དེ་ནི་འདུ་བྱེད་ཀྱི་ཕུང་
[121b.2]པོ་ཡིན་ནོ། །དེ་དག་དང་མཚུངས་པར་ལྡན་པ་ཡིད་ཀྱི་རྣམ་པར་ཤེས་པ་གང་ཡིན་པ་དེ་ནི་རྣམ་པར་ཤེས་པའི་ཕུང་པོ་ཡིན་ཏེ། དེ་ལྟར་ན་མཐོང་བས་སྤང་བར་བྱ་བ་ནི་ཕུང་པོ་བཞིའི་ངོ་བོ་ཉིད་ཡིན་ནོ། །བསྒོམ་པས་སྤང་བར་བྱ་བ་ནི་དེ་ལས་གཞན་པའི་ཟག་པ་དང་བཅས་པའི་ཆོས་རྣམས་
[121b.3]ཡིན་ནོ། །ཇི་ལྟར་ཞེ་ན་ཕྱི་དང་ནང་གི་གཟུགས་ཟག་པ་དང་བཅས་པ་ཐམས་ཅད་ནི་གཟུགས་ཀྱི་ཕུང་པོ་ཡིན་ནོ། །ཟག་པ་མེད་པ་དང་མཐོང་བས་སྤང་བར་བྱ་བ་མ་གཏོགས་པའི་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་དག་ནི་ཕུང་པོ་བཞི་སྟེ། དེ་ལྟར་ན་བསྒོམ་
[121b.4]པས་སྤང་བར་བྱ་བ་ནི་ཕུང་པོ་ལྔའི་ངོ་བོ་ཉིད་ཡིན་པར་ཤེས་པར་བྱའོ། །སེམས་ཀྱང་བཅུ་དྲུག་སྟེ་དེ་དག་ཉིད་དོ་ཞེས་བྱ་བ་ནི་འདོད་པ་ན་སྤྱོད་པའི་སེམས་སྡུག་བསྔལ་མཐོང་བས་སྤང་བར་བྱ་བ་ནས་བསྒོམ་པས་སྤང་བར་བྱ་བ་ཞེས་བྱ་བའི་བར་ལྔ་དང་། དེ་བཞིན་དུ་གཟུགས་ན་སྤྱོད་པ་དང་
[121b.5]གཟུགས་མེད་པ་ན་སྤྱོད་པ་ལྔ་ལྔ་དང་ཟག་པ་མེད་པའི་སེམས་ཏེ་སེམས་བཅུ་དྲུག་གོ། །དེ་དག་ནི་ཆོས་བཅུ་དྲུག་ལ་དམིགས་པ་ཡིན་པར་བརྗོད་དོ། །འདི་ལ་ནི་ཕྲ་རྒྱས་འདི་སྙེད་ཅིག་ཅེས་བྱ་བ་ནི་ཆོས་འདི་ལ་ནི་ཕྲ་རྒྱས་སེམས་དེ་དང་མཚུངས་པར་ལྡན་པ་གང་དག་ཡིན་པ་འདི་
[121b.6]སྙེད་ཅིག་དམིགས་པའམ་མཚུངས་པར་ལྡན་པའི་སྒོ་ནས་རྒྱས་པར་འགྱུར་རོ་ཞེས་བྱ་བ་འདི་ནི་བརྟག་པར་བྱའོ། །སྡུག་བསྔལ་རྒྱུ་མཐོང་གོམས་པ་ཡིས། །སྤང་བྱ་འདོད་ཁམས་ལས་སྐྱེས་པ། །ཞེས་བྱ་བ་ནི་སྡུག་བསྔལ་དང་ཀུན་འབྱུང་བ་མཐོང་བ་དང་། བསྒོམ་པས་སྤང་བར་བྱ་བ་
[121b.7]འདོད་པ་ན་སྤྱོད་པ་དག་ཅེས་བྱ་བའི་ཐ་ཚིག་གོ། །དེ་ནི་ཚིག་རྣམ་པར་སྦྱར་བའི་རྣམ་པ་ཡིན་ནོ་ཞེས་བྱ་བ་ནི་རང་གི་གསུམ་དང་གཟུགས་སུ་གཏོགས་པ་གཅིག་དང་དྲི་མ་མེད་པ་ནི། རང་གི་གསུམ་དང་གཟུགས་གཏོགས་གཅིག །དྲི་མེད་ཅེས་བྱ་བ་ཡིན་ནོ། །དེ་དག་ནི་རང་གི་གསུམ་
[122a]
[122a.1]དང་གཟུགས་སུ་གཏོགས་པ་གཅིག་དང་དྲི་མ་མེད་པ་ཡང་ཡིན་ལ་རྣམ་པར་ཤེས་པ་ཡང་ཡིན་པས། རང་གི་གསུམ་དང་གཟུགས་གཏོགས་གཅིག །དྲི་མེད་རྣམ་ཤེས་ཞེས་བྱ་བས་ཏེ། དེ་དག་གི་སྤྱོད་ཡུལ་ལོ། །རེ་ཞིག་སྡུག་བསྔལ་དང་ཀུན་འབྱུང་ཞེས་བྱ་བ་རྒྱས་
[122a.2]པར་འབྱུང་བ་ནི་འདོད་པ་ན་སྤྱོད་པའི་སྡུག་བསྔལ་དང་། ཀུན་འབྱུང་བ་མཐོང་བས་སྤང་བར་བྱ་བའི་ཕྲ་རྒྱས་གོ་རིམས་བཞིན་དུ་བཅུ་དང་བདུན་དང་དེ་དག་དང་ལྷན་ཅིག་འབྱུང་བ་དང་། དེ་རྣམས་ཀྱིས་ཐོབ་པ་རྗེས་སུ་འབྲང་བ་དང་བཅས་པ་དག་དང་བསྒོམ་པས་སྤང་བར་བྱ་བའི་ཕྲ་རྒྱས་བཞི་
[122a.3]དང་དེ་དག་དང་ལྷན་ཅིག་འབྱུང་བ་དང་དེ་རྣམས་ཀྱིས་ཐོབ་པ་རྗེས་སུ་འབྲང་བ་དང་བཅས་པ་དག་དང་། ཟག་པ་དང་བཅས་པའི་གཟུགས་ཐམས་ཅད་དང་། ཉོན་མོངས་པ་ཅན་མ་ཡིན་པའི་ཆོས་གཞན་དག་སྟེ། ཆོས་འདི་དག་ནི་སེམས་ལྔའི་དམིགས་པ་ཡིན་ནོ། །གང་དག་གི་ཡིན་ཞེ་ན།
[122a.4]རང་གི་ཁམས་པ་གསུམ་སྟེ། དེ་དག་ཉིད་ཅེས་བྱ་བ་སྨོས་ཏེ། འདོད་པ་ན་སྤྱོད་པ་སྡུག་བསྔལ་དང་། ཀུན་འབྱུང་བ་མཐོང་བ་དང་། བསྒོམ་པས་སྤང་བར་བྱ་བ་རྣམས་ཀྱིའོ། །ཇི་ལྟ་ཞེ་ན་རེ་ཞིག་སྡུག་བསྔལ་མཐོང་བས་སྤང་བར་བྱ་བ་ནི། སྡུག་བསྔལ་མཐོང་བས་སྤང་བར་བྱ་བ་ཀུན་
[122a.5]དུ་འགྲོ་བ་དང་ཀུན་དུ་འགྲོ་བ་མ་ཡིན་པ་དང་མཚུངས་པར་ལྡན་པ་དང་ཀུན་འབྱུང་བ་མཐོང་བས་སྤང་བར་བྱ་བ་ཀུན་དུ་འགྲོ་བ་དང་མཚུངས་པར་ལྡན་པ་དང་། བསྒོམ་པས་སྤང་བར་བྱ་བ་དགེ་བ་དང་འདོད་པའི་ཁམས་སུ་སྐྱེས་པ་འཇིག་རྟེན་པའི་ལམ་གྱི་འདོད་པ་ན་སྤྱོད་པའི་ཆོས་ལ་
[122a.6]དམིགས་པའི་གནས་སྐབས་སམ། གཟུགས་ཀྱི་ཁམས་སུ་སྐྱེས་པ་འདོད་པའི་ཁམས་ལ་ལྟ་བའི་གནས་སྐབས་ན་གཟུགས་ན་སྤྱོད་པ་བསྒོམ་པས་སྤང་བར་བྱ་བ་གཅིག་ཁོ་ན་དང་། ཟག་པ་མེད་པ་ཆོས་ཤེས་པའི་ཕྱོགས་དང་མཐུན་པ་སྟེ། སེམས་ལྔའི་དམིགས་པ་ཡིན་ནོ། །
[122a.7]འདོད་པ་ན་སྤྱོད་པའི་འགོག་པ་དང་ལམ་མཐོང་བས་སྤང་བར་བྱ་བའི་སེམས་དག་གིས་དམིགས་པ་ནི་མ་ཡིན་ཏེ། ཟག་པ་མེད་པ་ལ་དམིགས་པའི་སེམས་དག་ནི་འགོག་པ་དང་ལམ་དག་ལ་དམིགས་པའི་ཕྱིར་ཟག་པ་དང་བཅས་པ་ལ་དམིགས་པ་དག་ཀྱང་འགོག་པ་དང་ལམ་མཐོང་
[122b]
[122b.1]བས་སྤང་བར་བྱ་བ་ཙམ་ལ་དམིགས་པའི་ཕྱིར་རོ། །ས་གོང་མའི་ཉོན་མོངས་པ་ཅན་རྣམས་ཀྱི་ཡང་མ་ཡིན་ཏེ། ས་འོག་མ་ལ་དམིགས་པ་མ་ཡིན་པའི་ཕྱིར་རོ། །གཟུགས་མེད་པ་ན་སྤྱོད་པ་ནི་དགེ་བའི་ཡང་མ་ཡིན་ཏེ། རིང་བ་ཉིད་བཞིས་རིང་བའི་ཕྱིར་རོ། །དེ་བཞིན་དུ་ཀུན་འབྱུང་
[122b.2]བ་མཐོང་བས་སྤང་བར་བྱ་བ་ཡང་ཀུན་འབྱུང་བ་མཐོང་བས་སྤང་བར་བྱ་བ་རྣམ་པ་གཉིས་དང་། སྡུག་བསྔལ་མཐོང་བས་སྤང་བར་བྱ་བ་ཀུན་དུ་འགྲོ་བ་དང་མཚུངས་པར་ལྡན་པ་དང་། བསྒོམ་པས་སྤང་བར་བྱ་བ་དགེ་བ་དང་། གཟུགས་ན་སྤྱོད་པ་བསྒོམ་པས་སྤང་བར་བྱ་བ་གཅིག་ཁོ་ན་དང་
[122b.3]ཟག་པ་མེད་པ་སྟེ། ལྔ་ཁོ་ནའི་དམིགས་པ་ཡིན་ནོ། །འདིར་ཡང་བཤད་པ་ནི་སྔ་མ་བཞིན་དུ་བྱའོ། །བསྒོམ་པས་སྤང་བར་བྱ་བ་དག་ཀྱང་སྡུག་བསྔལ་དང་། ཀུན་འབྱུང་བ་མཐོང་བས་སྤང་བར་བྱ་བའི་སེམས་ཀུན་དུ་འགྲོ་བ་དང་མཚུངས་པར་ལྡན་པ་དག་དང་། བསྒོམ་པས་སྤང་
[122b.4]བར་བྱ་བ་ཅི་རིགས་པར་དགེ་བ་དང་མི་དགེ་བ་དང་ལུང་དུ་མ་བསྟན་པ་དང་། གཟུགས་ན་སྤྱོད་པ་བསྒོམ་པས་སྤང་བར་བྱ་བ་གཅིག་ཁོ་ན་དང་། ཟག་པ་མེད་པ་དང་ལྔ་ཁོ་ནའི་དམིགས་པ་ཁོ་ན་ཡིན་ཏེ། སྔ་མ་བཞིན་དུ་བརྗོད་པར་བྱའོ། །གཟུགས་ཁམས་ལས་སྐྱེས་རང་གི་དང་། །
[122b.5]འོག་གསུམ་གོང་གཅིག་དྲི་མེད་ཀྱི། །ཞེས་བྱ་བ་ནི། རང་གི་གསུམ་དང་འོག་མའི་གསུམ་ནི་རང་གི་དང་འོག་གསུམ་སྟེ། རང་གི་དང་འོག་མ་གསུམ་དང་གོང་མ་གཅིག་དང་། དྲི་མ་མེད་པ་ཞེས་ཚིག་རྣམ་པར་སྦྱར་རོ། །ཆོས་རྣམ་པ་གསུམ་པོ་དེ་དག་ཉིད་གཟུགས་ན་སྤྱོད་པ་
[122b.6]ཞེས་བྱ་བ་ནི་སྡུག་བསྔལ་དང་། ཀུན་འབྱུང་བ་མཐོང་བ་དང་བསྒོམ་པས་སྤང་བར་བྱ་བ་སྟེ། དེ་དག་གི་སྐབས་ཡིན་པའི་ཕྱིར་རོ། །དེ་དག་ནི་སེམས་བརྒྱད་ཀྱི་དམིགས་པ་ཡིན་ཏེ་རང་གི་ཁམས་པ་གསུམ་སྟེ། དེ་དག་ཉིད་དང་ཞེས་བྱ་བ་ནི་སྡུག་བསྔལ་དང་ཀུན་འབྱུང་བ་མཐོང་བ་དང་།
[122b.7]བསྒོམ་པས་སྤང་བར་བྱ་བ་སྟེ། སྔ་མ་བཞིན་དུ་བཤད་པར་བྱའོ། །ཁམས་འོག་མ་པ་གསུམ་སྟེ། དེ་དག་ཉིད་དང་ཞེས་བྱ་བ་ནི་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བའི་སེམས་སྐལ་བ་མི་མཉམ་པའི་ཁམས་ཀུན་ཏུ་འགྲོ་བ་དང་མཚུངས་པར་ལྡན་པ་དག་དང་།
[123a]
[123a.1]བསྒོམ་པས་སྤང་བར་བྱ་བ་ཐོས་པ་ལས་བྱུང་བའམ་བསམས་པ་ལས་བྱུང་བ་དང་། གཟུགས་མེད་པའི་གཅིག་སྟེ། བསྒོམ་པས་སྤང་བར་བྱ་བ་ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་ཀྱིས་བསྡུས་པའི་ཁོ་ན་དང་། ཟག་པ་མེེད་པ་རྗེས་སུ་ཤེས་པའི་ཕྱོགས་དང་
[123a.2]མཐུན་པའི་དམིགས་པ་ཡིན་ནོ། །གཟུགས་མེད་ལས་སྐྱེས་ཁམས་གསུམ་གཏོགས། །གསུམ་དང་ཟག་མེད་སྤྱོད་ཡུལ་ལོ། །ཞེས་བྱ་བ་ནི་ཁམས་གསུམ་དུ་གཏོགས་པ་གསུམ་གསུམ་དང་། ཟག་པ་མེད་པའི་སྤྱོད་ཡུལ་ཡིན་ཏེ། དེ་དག་ཉིད་ཅེས་བྱ་བ་ནི་སྡུག་བསྔལ་དང་། ཀུན་འབྱུང་
[123a.3]བ་མཐོང་བ་དང་བསྒོམ་པས་སྤང་བར་བྱ་བ་དེ་དག་ཁོ་ནའི་དབང་དུ་བྱས་པ་ཡིན་ནོ། །རྣམ་པ་གསུམ་གསུམ་སྟེ་དེ་དག་ཉིད་དང་ཞེས་བྱ་བ་ནི་འདོད་པ་དང་གཟུགས་ན་སྤྱོད་པ་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བ་སྐལ་བ་མི་མཉམ་པའི་ཁམས་སུ་ཀུན་དུ་འགྲོ་བ་དང་མཚུངས་པར་
[123a.4]ལྡན་པ་བཞི་དང་། བསྒོམ་པས་སྤང་བར་བྱ་བ་ཅི་རིགས་པར་གཉིས་དང་། རང་གི་ཁམས་པ་གསུམ་སྟེ། གསུམ་གང་ཞེ་ན། ཅི་རིགས་པར་ཀུན་དུ་འགྲོ་བ་དང་། ཀུན་དུ་འགྲོ་བ་མ་ཡིན་པ་དང་མཚུངས་པར་ལྡན་པ་གཉིས་དང་། བསྒོམ་པས་སྤང་བར་བྱ་བ་དང་ཟག་པ་མེད་པ་སྟེ། སེམས་
[123a.5]བཅུའི་དམིགས་པ་ཡིན་ནོ། །འགོག་དང་ལམ་མཐོང་སྤང་བྱ་ཀུན། །རང་གིས་ཀླགས་པའི་སྤྱོད་ཡུལ་ལོ། །ཞེས་བྱ་བ་ལ་ཀུན་ཞེས་བྱ་བ་སྨོས་པ་ནི་ཁམས་གསུམ་པ་ཉེ་བར་བསྡུ་བའི་ཕྱིར་རོ། །རང་གིས་ཀླགས་པའི་སྤྱོད་ཡུལ་ཡིན་ནོ་ཞེས་འབྱུང་བས་ཤུགས་ཀྱིས་ན་སྔར་བཤད་པ་
[123a.6]རྣམས་ཀྱི་སྤྱོད་ཡུལ་ཡང་ཡིན་ནོ་ཞེས་བཤད་པ་ཡིན་ནོ། །རྣམ་པ་གཅིག་ཏུ་ན་རང་གིས་བསྣན་པ་ནི། རང་གིས་ཀླགས་པ་སྟེ། རང་གིས་ཀླགས་པ་རྣམས་ཀྱི་སྤྱོད་ཡུལ་ནི་རང་གིས་ཀླགས་པའི་སྤྱོད་ཡུལ་ལོ་ཞེས་བྱའོ། །དེས་ཀླགས་པའི་ཞེས་བྱ་བ་ནི་འདོད་ཆགས་ལ་སོགས་
[123a.7]པ་དང་མཚུངས་པར་ལྡན་པའི་ཡིན་གྱི་ལོག་པར་ལྟ་བ་ལ་སོགས་པ་དང་མཚུངས་པར་ལྡན་པ་ནི་མ་ཡིན་ཏེ། དེ་ནི་རྟག་ཏུ་འགོག་པ་དང་ལམ་ལ་དམིགས་པའི་ཕྱིར་རོ། །སྔར་བཤད་པ་ལྔ་ཞེས་བྱ་བ་ནི་འདོད་པ་ན་སྤྱོད་པ་གསུམ་པོ་རིས་གཉིས་ཀྱིས་ཀུན་དུ་འགྲོ་བ་དང་མཚུངས་
[123b]
[123b.1]པར་ལྡན་པ་དང་། བསྒོམ་པས་སྤང་བར་བྱ་བ་རྣམས་དང་། གཟུགས་ན་སྤྱོད་པ་བསྒོམ་པས་སྤང་བར་བྱ་བ་དང་། ཟག་པ་མེད་པ་ཞེས་བྱ་བའོ། །ལམ་མཐོང་བས་སྤང་བར་བྱ་བ་རྣམས་ཀྱང་དེ་དང་འདྲ་སྟེ་ཞེས་བྱ་བ་ལ་ཅི་ཞིག་དེ་དང་འདྲ་ཞེ་ན་སེམས་དྲུག་གི་དམིགས་པ་ཡིན་ཞེས་བྱ་བའོ། །
[123b.2]སེམས་དགུ་དང་བཅུ་གཅིག་གི་དམིགས་པ་ཡིན་ནོ་ཞེས་བྱ་བ་ནི་གཟུགས་ན་སྤྱོད་པ་འགོག་པ་དང་ལམ་མཐོང་བས་སྤང་བར་བྱ་བའི་ཆོས་དག་ནི་སེམས་དགུའི་དམིགས་པ་ཡིན་ནོ། །གཟུགས་མེད་པ་ན་སྤྱོད་པ་དག་ནི་བཅུ་གཅིག་གི་དམིགས་པ་ཡིན་ནོ། །ཇི་ལྟར་ཞེ་ན་གཟུགས་ན་སྤྱོད་
[123b.3]པ་འགོག་པ་དང་ལམ་མཐོང་བས་སྤང་བར་བྱ་བ་དག་ནི་འདོད་པའི་ཁམས་ན་སྤྱོད་པ་གསུམ་པོ་སྐལ་བ་མི་མཉམ་པའི་ཁམས་ཀུན་དུ་འགྲོ་བ་དང་མཚུངས་པར་ལྡན་པ་དང་། བསྒོམ་པས་སྤང་བར་བྱ་བ་རྣམས་དང་། རང་གི་ཁམས་པ་གསུམ་སྟེ། རིགས་གཉིས་ཀྱིས་ཀུན་དུ་འགྲོ་བ་དང་
[123b.4]མཚུངས་པར་ལྡན་པ་དང་། བསྒོམ་པས་སྤང་བར་བྱ་བ་རྣམས་དང་། གཟུགས་མེད་པ་ན་སྤྱོད་པ་བསྒོམ་པས་སྤང་བར་བྱ་བ་ནམ་མཁའ་མཐའ་ཡས་སྐྱེ་མཆེད་ཀྱིས་བསྡུས་པ་དང་། ཟག་པ་མེད་པ་རྗེས་སུ་ཤེས་པའི་ཕྱོགས་དང་མཐུན་པ་དང་འགོག་པ་མཐོང་བས་སྤང་བར་བྱ་བའམ།
[123b.5]ལམ་མཐོང་བས་སྤང་བར་བྱ་བའི་སེམས་ཀླགས་པ་དེ་ཉིད་དེ་སོ་སོར་སེམས་དགུའི་དམིགས་པ་ཡིན་ནོ། །གཟུགས་མེད་པ་ན་སྤྱོད་པ་ནི་འགོག་པ་དང་ལམ་མཐོང་བས་སྤང་བར་བྱ་བའི་ཆོས་དག་ཀྱང་སོ་སོར་སེམས་བཅུ་གཅིག་གི་དམིགས་པ་ཡིན་ཏེ། འདོད་པ་དང་གཟུགས་ན་སྤྱོད་པ་
[123b.6]དྲུག་སྟེ། སྐལ་བ་མི་མཉམ་པའི་ཁམས་སུ་ཀུན་དུ་འགྲོ་བ་དང་མཚུངས་པར་ལྡན་པ་དང་། བསྒོམ་པས་སྤང་བར་བྱ་བ་རྣམས་དང་། རང་གི་ཁམས་པ་གསུམ་སྟེ། ཀུན་དུ་འགྲོ་བ་དང་མཚུངས་པར་ལྡན་པ་དང་། བསྒོམ་པས་སྤང་བར་བྱ་བ་རྣམས་དང་། སོ་སོར་འགོག་པ་དང་། ལམ་
[123b.7]མཐོང་བས་སྤང་བར་བྱ་བས་རང་གིས་ཀླགས་པ་དང་། ཟག་པ་མེད་པ་རྗེས་སུ་ཤེས་པའི་ཕྱོགས་དང་མཐུན་པ་སྟེ། དེ་ལྟར་ན་བཅུ་གཅིག་གི་དམིགས་པ་ཡིན་ནོ། །ཟག་མེད་ཁམས་གསུམ་མཐར་གསུམ་དང་། །ཟག་པ་མེད་པའི་སྤྱོད་ཡུལ་ལོ། །ཞེས་བྱ་བ་ལ་ཟག་པ་མེད་པ་འགོག་
[124a]
[124a.1]པ་ལ་སོགས་པ་ནི་ཅི་རིགས་པར་ཁམས་གསུམ་པ་དག་ན་ཐ་མ་གསུམ་པོ་འགོག་པ་དང་ལམ་མཐོང་བ་དང་། བསྒོམ་པས་སྤང་བར་བྱ་བའི་མཚན་ཉིད་གང་དག་ཡིན་པ་དེ་དག་དང་། ཟག་པ་མེད་པའི་སྤྱོད་ཡུལ་ཡིན་ནོ། །ཇི་ལྟ་ཞེ་ན་སོ་སོར་བརྟགས་པས་འགོག་པ་དང་།
[124a.2]འཕགས་པའི་ལམ་དག་ནི་དེ་དག་ལ་དམིགས་པའི་ལོག་པར་ལྟ་བ་དང་། ཐེ་ཚོམ་དང་མ་རིག་པ་དང་མཚུངས་པར་ལྡན་པ་རྣམས་དང་། བསྒོམ་པས་སྤང་བར་བྱ་བ་དགེ་བ་རྣམས་དང་། ཟག་པ་མེད་པར་ཅི་རིགས་པར་ཆོས་ཤེས་པ་དང་རྗེས་སུ་ཤེས་པའི་ཕྱོགས་དང་མཐུན་པའི་དམིགས་
[124a.3]པ་ཡིན་ནོ། །ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་དག་ནི་བསྒོམ་པས་སྤང་བར་བྱ་བའི་སེམས་ཉོན་མོངས་པ་ཅན་མ་ཡིན་པ་ཁོ་ནའི་དམིགས་པ་ཡིན་ནོ་ཞེས་བྱ་བར་རིག་པར་བྱའོ། །སློབ་དཔོན་ཡོན་ཏན་བློ་གྲོས་དང་དབྱིག་གཉེན་དག་ན་རེ་ནམ་མཁའ་དང་
[124a.4]སོ་སོར་བརྟགས་པ་མ་ཡིན་པས་འགོག་པ་དག་བསྒོམ་པས་སྤང་བར་བྱ་བ་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པའི་དམིགས་པ་ཡིན་ནོ་ཞེས་ཟེར་རོ། །དེ་ནི་རིགས་པ་མ་ཡིན་ཏེ། འགོག་དང་ལམ་མཐོང་སྤང་བྱ་བ། །ལོག་ལྟ་ཐེ་ཚོམ་དེ་དག་དང་། །ལྡན་དང་འབའ་ཞིག་
[124a.5]མ་རིག་དང་། །དྲུག་ནི་ཟག་མེད་སྤྱོད་ཡུལ་ཅན། །ཞེས་བྱ་བར་ངེས་པའི་ཕྱིར་རོ། །དེ་བས་ན་བསྒོམ་པས་སྤང་བར་བྱ་བ་ཉོན་མོངས་པ་ཅན་གྱི་དམིགས་པ་ཡིན་ནོ་ཞེས་བྱ་བ་ནི་གྲུབ་པའི་མཐའ་མ་ཡིན་ནོ། །རྣམ་ཤེས་ལྔ་བརྒྱད་བཅུ་དང་ནི། །རྣམ་ཤེས་བཅུ་ཡི་སྤྱོད་ཡུལ་ཏེ། །
[124a.6]ཞེས་བྱ་བ་ནི་སྡུག་བསྔལ་དང་། ཀུན་འབྱུང་བ་མཐོང་བ་དང་བསྒོམ་པས་སྤང་བར་བྱ་བ་འདོད་པ་ན་སྤྱོད་པ་དག་ནི་ལྔའི་སྤྱོད་ཡུལ་ཡིན་ནོ། །གཟུགས་ན་སྤྱོད་པ་དག་ནི་བརྒྱད་ཀྱི་ཡིན་ནོ། །གཟུགས་མེད་པ་ན་སྤྱོད་པ་དག་ནི་བཅུའི་ཡིན་ནོ། །དྲི་མ་མེད་པ་དག་ཀྱང་བཅུ་ཁོ་ནའི་ཡིན་ནོ་ཞེས་གོང་
[124a.7]དུ་བཤད་པའི་རྗེས་སུ་འབྲང་སྟེ་སྦྱར་བར་བྱའོ། །འདོད་པ་ན་སྤྱོད་པས་བསྒོམ་པས་སྤང་བ་ཞེས་བྱ་བ་ནི་རྣམ་པར་ཤེས་པའི་ཚོགས་ལྔའི་བདེ་བའི་དབང་པོའོ། །གཟུགས་ན་སྤྱོད་པ་རྣམ་པ་ལྔ་དང་ཞེས་བྱ་བ་ནི་བསམ་གཏན་དང་པོའི་ས་པ་རྣམ་པར་ཤེས་པའི་ཚོགས་གསུམ་དང་། བསམ་
[124b]
[124b.1]གཏན་གསུམ་པའི་ས་པ་ཡིད་ཀྱི་ས་པ་ཡིན་ཏེ། མདོར་བསྡུས་ནས་ཅི་རིགས་པར་སྡུག་བསྔལ་མཐོང་བས་སྤང་བར་བྱ་བ་ནས་བསྒོམ་པས་སྤང་བར་བྱ་བའི་བར་རྣམ་པ་ལྔའོ། །ཟག་པ་མེད་པ་ནི་བསམ་གཏན་གསུམ་པའི་ས་པ་ཁོ་ནའོ། །འདོད་པ་ན་སྤྱོད་པ་རྣམ་པ་བཞི་དང་ཞེས་བྱ་བ་ནི་སྡུག་
[124b.2]བསྔལ་དང་། ཀུན་འབྱུང་བ་དང་ལམ་མཐོང་བ་དང་། བསྒོམ་པས་སྤང་བར་བྱ་བའོ། །བདེ་བའི་དབང་པོ་ནི་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བ་དག་གི་དམིགས་པ་ཡིན་ཏེ། འདི་ལྟར་རང་གི་ས་པའམ། ས་གོང་མ་པའི་བདེ་བའི་དབང་པོ་ནི་འཇིག་ཚོགས་དང་ལོག་
[124b.3]པར་ལྟ་བ་ལ་སོགས་པའི་དམིགས་པ་ཡིན་ནོ། །ལམ་གྱིས་བསྡུས་པའི་བདེ་བའི་དབང་པོ་ནི་ལམ་མཐོང་བས་སྤང་བར་བྱ་བ་ལོག་པར་ལྟ་བ་ལ་སོགས་པ་དང་ལྡན་པའི་དམིགས་པ་ཡིན་ནོ། །རྣམ་པར་ཤེས་པའི་ཚོགས་ལྔ་པའི་བདེ་བའི་དབང་པོ་དེ་ནི་བསྒོམ་པས་སྤང་བར་བྱ་བ་
[124b.4]འདོད་ཆགས་ལ་སོགས་པ་དང་མཚུངས་པར་ལྡན་པའི་དམིགས་པ་ཡིན་ཏེ། དེ་ལྟར་ན་དེ་ནི་རྣམ་པ་བཞིའི་དམིགས་པ་ཡིན་ནོ། །འགོག་པ་མཐོང་བས་སྤང་བར་བྱ་བའི་སེམས་ཀྱི་དམིགས་པ་ནི་མ་ཡིན་ཏེ། དེ་ལ་ལོག་པར་ལྟ་བ་ལ་སོགས་པ་ནི་འགོག་པ་ལ་དམིགས་པའི་ཕྱིར་
[124b.5]རོ། །ལྟ་བ་མཆོག་ཏུ་འཛིན་པ་ལ་སོགས་པ་ཡང་རང་གི་རིགས་ལ་དམིགས་པའི་ཕྱིར་དེ་ལ་ཡང་བདེ་བའི་དབང་པོ་མེད་པའི་ཕྱིར་རོ། །གཟུགས་ན་སྤྱོད་པ་རྣམ་པ་ལྔ་དང་ཞེས་བྱ་བ་ནི་འདི་ལྟར་བསམ་གཏན་གསུམ་པས་བསྡུས་པའི་བདེ་བའི་དབང་པོ་རྣམ་པ་ལྔ་ཡིན་ནོ། །ལམ་
[124b.6]མཐོང་བ་དང་བསྒོམ་པས་སྤང་བར་བྱ་བ་དང་ཞེས་བྱ་བ་ནི་ལམ་གྱིས་བསྡུས་པའི་བདེ་བའི་དབང་པོ་ནི་གཟུགས་མེད་པ་ན་སྤྱོད་པའི་སེམས་ལམ་མཐོང་བས་སྤང་བར་བྱ་བ་ལོག་པར་ལྟ་བ་ལ་སོགས་པ་དང་མཚུངས་པར་ལྡན་པའི་དམིགས་པ་ཡིན་ནོ། །དེ་ཉིད་བསྒོམ་པས་སྤང་བར་བྱ་བའི་
[124b.7]སེམས་དགེ་བའི་དམིགས་པ་ཡང་ཡིན་ནོ། །ཐམས་ཅད་ཀྱང་ཟག་པ་མེད་པའི་དམིགས་པ་ཡིན་པར་ནི་སྲིད་དོ། །དེ་ལ་ཅི་རིགས་པར་ཞེས་བྱ་བ་ནི་གང་གི་ཕྱིར་ཟག་པ་མེད་པ་ལ་ཕྲ་རྒྱས་དག་རྒྱས་པར་མི་འགྱུར་བ་དང་། གང་གི་ཕྱིར་ཁ་ཅིག་ཁོ་ན་ལ་ཁ་ཅིག་རྒྱས་པར་འགྱུར་བ་དེའི་
[125a]
[125a.1]ཕྱིར་ཅི་རིགས་པ་ཞེས་བརྗོད་དོ། །དེ་ལ་ཞེས་བྱ་བ་ནི་རྣམ་པར་ཤེས་པ་ལའོ། །ཕྲ་རྒྱས་འདོད་པ་ན་སྤྱོད་པ་ན་རིགས་བཞི་དང་ཞེས་བྱ་བ་ནི་འདི་ལྟ་སྟེ་བདེ་བའི་དབང་པོ་ལ་དམིགས་པ། ལོག་པར་ལྟ་བ་དང་མཚུངས་པར་ལྡན་པ་ལ་ནི་སྡུག་བསྔལ་མཐོང་བས་སྤང་བར་
[125a.2]བྱ་བའི་ཕྲ་རྒྱས་བཅུ་ཆར་ཡང་ཅི་རིགས་པར་དམིགས་པའམ། མཚུངས་པར་ལྡན་པའི་སྒོ་ནས་རྒྱས་པར་འགྱུར་ཏེ། ཀུན་འབྱུང་མཐོང་བས་སྤང་བར་བྱ་བ་དག་ཀྱང་དེ་དང་འདྲའོ། །ལམ་མཐོང་བས་སྤང་བར་བྱ་བ་དག་ཀྱང་བདེ་བའི་དབང་པོ་ལ་དམིགས་པའི་རྣམ་པར་ཤེས་པ་དེ་ལ་
[125a.3]རྒྱས་པར་འགྱུར་ཏེ། ལམ་གྱི་བདེ་བའི་དངོས་པོ་ལ་དམིགས་པའི་རྣམ་པར་ཤེས་པ་ལ་ལོག་པར་ལྟ་བ་ལ་སོགས་པ་དང་མཚུངས་པར་ལྡན་པ་ལ། ལོག་པར་ལྟ་བ་ལ་སོགས་པ་ནི་མཚུངས་པར་ལྡན་པའི་སྒོ་ནས་རྒྱས་པར་འགྱུར་རོ། །ལྟ་བ་མཆོག་ཏུ་འཛིན་པ་ལ་སོགས་པ་ཡང་དམིགས་
[125a.4]པའི་སྒོ་ནས་རྒྱས་པར་འགྱུར་ཏེ། དེ་ལྟ་བས་ན་རིགས་དེ་ཡང་དེ་ལ་རྒྱས་པར་འགྱུར་རོ། །བསྒོམ་པས་སྤང་བར་བྱ་བའི་རིགས་ཀྱང་དེ་ལ་རྒྱས་པར་འགྱུར་ཏེ། འདོད་ཆགས་ལ་སོགས་པ་ནི་བདེ་བའི་དབང་པོ་ལས་དམིགས་པའི་རྣམ་པར་ཤེས་པ་ལ་དམིགས་པ་དང་མཚུངས་པར་ལྡན་
[125a.5]པའི་ཕྱིར་རོ། །འགོག་པ་མཐོང་བས་སྤང་བར་བྱ་བའི་རིགས་ནི་དེ་ལ་རྒྱས་པར་མི་འགྱུར་ཏེ། བདེ་བའི་དབང་པོ་ལ་དམིགས་པའི་རྣམ་པར་ཤེས་པ་མེད་པའི་ཕྱིར་རོ། །གཟུགས་ན་སྤྱོད་པ་འདུས་བྱས་ལ་དམིགས་པ་རྣམས་དང་ཞེས་བྱ་བ་ནི་གཟུགས་ན་སྤྱོད་པའི་བདེ་བའི་དབང་པོ་ལ་
[125a.6]དམིགས་པ་ནི་རྣམ་པ་ལྔ་ཡོད་དོ། །དེ་ལ་རིགས་བཞི་རྒྱས་པར་འགྱུར་བ་དེ་ནི་གོ་སླའོ།། །།བམ་པོ་བཞི་བཅུ་རྩ་གཉིས་པ། འགོག་པ་མཐོང་བས་སྤང་བར་བྱ་བ་འདུས་བྱས་ལ་དམིགས་པ་རྣམས་ཇི་ལྟར་རྒྱས་པར་འགྱུར་ཞེ་ན། བསམ་གཏན་གསུམ་པ་ན་ལྟ་བ་མཆོག་ཏུ་
[125a.7]འཛིན་པ་ལ་སོགས་པ་བདེ་བའི་དབང་པོ་དང་མཚུངས་པར་ལྡན་ལ་དེ་རྣམས་ཀྱང་ཕན་ཚུན་དམིགས་པ་ཡིན་ཏེ། དེ་དག་ནི་བདེ་བའི་དབང་པོ་ལ་དམིགས་པའི་རྣམ་པར་ཤེས་པ་ལ་མཚུངས་པར་ལྡན་པའམ། དམིགས་པའི་སྒོ་ནས་རྒྱས་པར་འགྱུར་རོ། །གཟུགས་མེད་པ་ན་སྤྱོད་པའི་
[125b]
[125b.1]རིགས་གཉིས་དང་ཞེས་བྱ་བ་ནི་ལམ་མཐོང་བ་དང་བསྒོམ་པས་སྤང་བར་བྱ་བའི་རིགས་དག་སྟེ། ལོག་པར་ལྟ་བ་ལ་སོགས་པ་ནི་ལམ་གྱི་བདེ་བའི་དབང་པོ་ལ་དམིགས་པའི་རྣམ་པར་ཤེས་པ་ལོག་པར་ལྟ་བ་ལ་སོགས་པ་དང་མཚུངས་པར་ལྡན་པའི་སྒོ་ནས་རྒྱས་པར་འགྱུར་རོ། །ལྟ་བ་མཆོག་ཏུ་
[125b.2]འཛིན་པ་ལ་སོགས་པ་ནི་དེ་ལ་དམིགས་པའི་སྒོ་ནས་རྒྱས་པར་འགྱུར་རོ། །བསྒོམ་པས་སྤང་བར་བྱ་བའི་རིགས་ཀྱང་རྒྱས་པར་འགྱུར་ཏེ། བསྒོམ་པས་སྤང་བར་བྱ་བའི་སེམས་དགེ་བ་ལམ་ལ་དམིགས་པ་ཡིན་ལ། དེ་ལ་ནི་འདོད་ཆགས་ལ་སོགས་པའི་རིགས་རྒྱས་པར་འགྱུར་རོ། །གཟུགས་
[125b.3]མེད་པ་ན་སྤྱོད་པའི་ཕྲ་རྒྱས་ཀུན་དུ་འགྲོ་བ་རྣམས་ཀྱང་རྣམ་པར་ཤེས་པ་དེ་ཉིད་ལམ་ལ་དམིགས་པའི་རྣམ་པར་ཤེས་པ་ལོག་པར་ལྟ་བ་ལ་སོགས་པ་དང་མཚུངས་པར་ལྡན་པ་ལ་རྒྱས་པར་འགྱུར་བ་ཤེས་པར་བྱའོ། །རྣམ་པ་བཅུ་གཉིས་པོ་དེ་ཉིད་དང་ཞེས་བྱ་བ་ནི་འགོག་པ་མཐོང་བས་སྤང་
[125b.4]བར་བྱ་བ་མ་གཏོགས་པ་འདོད་པ་ན་སྤྱོད་པ་རྣམ་པ་བཞི་དང་། གཟུགས་ན་སྤྱོད་པ་རྣམ་པ་ལྔ་དང་། གཟུགས་མེད་པ་ན་སྤྱོད་པ་རྣམ་པ་གཉིས་ཏེ། ལམ་མཐོང་བ་དང་། བསྒོམ་པས་སྤང་བར་བྱ་བ་དང་། ཟག་པ་མེད་པ་སྟེ་དེ་ལྟར་ན་དེ་དག་ནི་ཕན་ཚུན་དམིགས་པའི་ཚུལ་གྱིས་བདེ་
[125b.5]བའི་དབང་པོ་ལ་དམིགས་པའི་རྣམ་པར་ཤེས་པ་ལ་དམིགས་པ་ཡིན་ནོ། །བདེ་བའི་དབང་པོ་ལ་དམིགས་པའི་རྣམ་པར་ཤེས་པ་ནི་ཡང་གཟུགས་མེད་པ་ན་སྤྱོད་པ་རྣམ་པ་གཉིས་ཀྱིས་ཀླགས་པ་དེ་ནི་བདེན་པའི་དབང་པོ་ལ་དམིགས་པའི་རྣམ་པར་ཤེས་པ་ལ་དམིགས་པ་ཡིན་ནོ། །གང་
[125b.6]གི་ཞེ་ན་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བའི་ཞེས་བྱ་བ་སྨོས་ཏེ། གཟུགས་མེད་པ་ན་སྤྱོད་པ་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བའི་བྱེ་བྲག་གིས་རྣམ་པ་གཉིས་ཡོད་པའི་དམིགས་པ་ནི་ལམ་ལ་དམིགས་པའི་རྣམ་པར་ཤེས་པ་གཟུགས་མེད་པ་
[125b.7]ན་སྤྱོད་པ་ན་ལམ་མཐོང་བས་སྤང་བར་བྱ་བ་ལོག་པར་ལྟ་བ་ལ་སོགས་པ་དང་མཚུངས་པར་ལྡན་པ་དང་། གཟུགས་མེད་པ་ན་སྤྱོད་པ་བསྒོམ་པས་སྤང་བར་བྱ་བ་དགེ་བ་ཡིན་ཏེ། དེ་ལྟར་ན་རྣམ་པ་བཅུ་བཞི་པོ་འདི་ནི་བདེ་བའི་དབང་པོ་ལ་དམིགས་པ་ལ་དམིགས་པའི་རྣམ་པར་ཤེས་པ་
[126a]
[126a.1]ཡིན་ནོ། །དེ་ལ་གཟུགས་མེད་པ་ན་སྤྱོད་པ་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བ་དག་བསྐྱེད་ནས་ཞེས་བྱ་བ་ནི་སྔར་ནི་གཟུགས་མེད་པ་ན་སྤྱོད་པ་ཀུན་དུ་འགྲོ་བ་དག་ཁོ་ན་བདེན་པའི་དབང་པོ་ལ་དམིགས་པའི་རྣམ་པར་ཤེས་པ་ལ་རྒྱས་པར་འབྱུང་བ་
[126a.2]ཡིན་ནོ། །བདེ་བའི་དབང་པོ་ལ་དམིགས་པ་ལ་དམིགས་པའི་རྣམ་པར་ཤེས་པ་ལ་ནི་གཟུགས་མེད་པ་ན་སྤྱོད་པ་སྡུག་བསྔལ་དང་ཀུན་འབྱུང་བ་མཐོང་བས་སྤོང་བར་བྱ་བའི་རིགས་ཐམས་ཅད་རྒྱས་པར་འགྱུར་ཏེ། འདི་ལྟར་ཀུན་དུ་འགྲོ་བ་དང་མཚུངས་པར་ལྡན་པའི་སེམས་དེ་ལ་སྡུག་བསྔལ་
[126a.3]དང་ཀུན་འབྱུང་བ་མཐོང་བས་སྤང་བར་བྱ་བའི་ཕྲ་རྒྱས་རྣམས་ཅི་རིགས་པར་མཚུངས་པར་ལྡན་པའམ། དམིགས་པའི་སྒོ་ནས་རྒྱས་པར་འགྱུར་རོ། །ལྷག་མ་རྣམས་ནི་སྔ་མ་བཞིན་དུ་སྦྱར་བར་བྱའོ། །ལམ་འདིས་གཞན་ཡང་ཁོང་དུ་ཆུད་པར་བྱའོ་ཞེས་བྱ་བ་ནི་སྲོལ་འདིས་གཞན་ཡང་
[126a.4]ཁོང་དུ་ཆུད་པར་བྱའོ། །ཇི་ལྟ་ཞེ་ན་སྡུག་བསྔལ་གྱི་དབང་པོ་ལ་དམིགས་པའི་རྣམ་པར་ཤེས་པ་ལ་ཕྲ་རྒྱས་དུ་ཞིག་རྒྱས་པར་འགྱུར་ཞེས་བྱ་བའི་དྲི་བ་འོངས་པ་ལ་དཔྱད་པར་བྱ་སྟོ(སྟེ།) སྡུག་བསྔལ་གྱི་དབང་པོ་ནི་འདོད་པ་ན་སྤྱོད་པ་རྣམ་པ་གཅིག་སྟེ། རྣམ་པར་ཤེས་པའི་ཚོགས་ལྔ་པ་ཡིན་
[126a.5]པའི་ཕྱིར་བསྒོམ་པས་སྤང་བར་བྱ་བ་ཡིན་ནོ། །དེ་དག་ཀྱང་མདོར་བསྡུ་ན་རྣམ་པར་ཤེས་པ་ལྔའི་དམིགས་པ་ཡིན་ཏེ། འདོད་པ་ན་སྤྱོད་པ་རྣམ་པ་གསུམ་པོ་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བ་ཀུན་དུ་འགྲོ་བ་དང་། མཚུངས་པར་ལྡན་པ་དག་དང་བསྒོམ་པས་སྤང་བར་
[126a.6]བྱ་བ་དང་། གཟུགས་ན་སྤྱོད་པ་བསྒོམ་པས་སྤང་བར་བྱ་བ་དང་། ཟག་པ་མེད་པའི་དམིགས་པ་ཡིན་ཏེ། རྣམ་པ་ལྔ་པོ་འདི་ནི་སྡུག་བསྔལ་ལ་དམིགས་པའི་རྣམ་པར་ཤེས་པ་ཡིན་ནོ། །དེ་ལ་ཅི་རིགས་པར་འདོད་པ་ན་སྤྱོད་པའི་རིས་གསུམ་པོ་སྡུག་བསྔལ་དང་། ཀུན་འབྱུང་བ་མཐོང་བ་དང་།
[126a.7]བསྒོམ་པས་སྤང་བར་བྱ་བ་རྣམས་ལ་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བའི་རིགས་དག་ནི་ཀུན་དུ་འགྲོ་བ་དང་མཚུངས་པར་ལྡན་པའི་སེམས་དེ་དང་། བསྒོམ་པས་སྤང་བར་བྱ་བའི་སེམས་ལ་ཅི་རིགས་པར་མཚུངས་པར་ལྡན་པའམ། དམིགས་པའི་སྒོ་ནས་རྒྱས་པར་འགྱུར་
[126b]
[126b.1]རོ། །བསྒོམ་པས་སྤང་བར་བྱ་བའི་རིགས་ནི་བསྒོམ་པས་སྤང་བར་བྱ་བ་ལ་རྒྱས་པར་འགྱུར་རོ། །གཟུགས་ན་སྤྱོད་པ་ནི་བསྒོམ་པས་སྤང་བར་བྱ་བ་གཅིག་སྟེ། བསྒོམ་པས་སྤང་བར་བྱ་བའི་སེམས་ལ་རྒྱས་པར་འགྱུར་རོ། །གཟུགས་ན་སྤྱོད་པ་ཀུན་དུ་འགྲོ་བ་རྣམས་ཀྱང་དེ་ཁོ་ན་ལ་རྒྱས་པར་འགྱུར་རོ་
[126b.2]ཞེས་བྱ་བར་ཁོང་དུ་ཆུད་པར་བྱའོ། །སྡུག་བསྔལ་གྱི་དབང་པོ་ལ་དམིགས་པ་ལ་དམིགས་པའི་རྣམ་པར་ཤེས་པ་ལ་ཕྲ་རྒྱས་དུ་ཞིག་རྒྱས་པར་འགྱུར་ཞེ་ན། སྡུག་བསྔལ་གྱི་དབང་པོ་ལ་དམིགས་པའི་རྣམ་པར་ཤེས་པ་ལྔ་པོ་དེ་རྣམ་པར་ཤེས་པ་གང་གི་དམིགས་པ་ཡིན་ཞེ་ན། ཕན་ཚུན་
[126b.3]དམིགས་པའི་ཚུལ་གྱིས་རྣམ་པ་ལྔ་པོ་དེ་ཉིད་ཀྱི་དམིགས་པ་ཡིན་ནོ། །ཡང་འདོད་པ་ན་སྤྱོད་པ་ལམ་མཐོང་བས་སྤང་བར་བྱ་བ་ཟག་པ་མེད་པ་ལ་དམིགས་པ་དང་། གཟུགས་ན་སྤྱོད་པ་ཀུན་དུ་འགྲོ་བ་དང་མཚུངས་པར་ལྡན་པའི་དམིགས་པ་ཡང་ཡིན་ཏེ། དེས་ནི་གཟུགས་ན་སྤྱོད་པ་
[126b.4]བསྒོམ་པས་སྤང་བར་བྱ་བ་དགེ་བ་སྡུག་བསྔལ་གྱི་དབང་པོ་དམིགས་པ་ལ་དམིགས་པར་བྱེད་དོ། །གཟུགས་མེད་པ་ན་སྤྱོད་པ་ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་ཀྱིས་བསྡུས་པ་ཡང་རགས་པ་ལ་སོགས་པའི་རྣམ་པར་སྡུག་བསྔལ་གྱི་དབང་པོ་ལ་དམིགས་པ་དེ་ལ་དམིགས་
[126b.5]ཏེ། དེ་ལྟ་བས་ན་རྣམ་པ་བརྒྱད་པོ་འདི་ནི་སྡུག་བསྔལ་གྱི་དབང་པོ་ལ་དམིགས་པ་ལ་དམིགས་པའི་རྣམ་པར་ཤེས་པ་ཡིན་ནོ། །དེ་ལ་འདོད་པ་ན་སྤྱོད་པའི་ཕྲ་རྒྱས་རིགས་བཞི་སྟེ། སྡུག་བསྔལ་དང་ཀུན་འབྱུང་བ་དང་། ལམ་མཐོང་བ་དང་། བསྒོམ་པས་སྤོང་བར་བྱ་བ་རྣམས་དང་། གཟུགས་
[126b.6]ན་སྤྱོད་པ་རིགས་གསུམ་སྟེ། སྡུག་བསྔལ་དང་། ཀུན་འབྱུང་བ་མཐོང་བ་དང་། བསྒོམ་པས་སྤང་བར་བྱ་བ་རྣམས་དང་། གཟུགས་མེད་པ་ན་སྤྱོད་པ་གཅིག་སྟེ། བསྒོམ་པས་སྤང་བར་བྱ་བ་རྣམས་དང་། ཀུན་དུ་འགྲོ་བ་རྣམས་རྒྱས་པར་འགྱུར་རོ་ཞེས་བྱ་བར་ཤེས་པར་བྱའོ། །ཡང་ཡིད་བདེ་
[126b.7]བའི་དབང་པོ་དམིགས་པའི་རྣམ་པར་ཤེས་པ་ཕྲ་རྒྱས་དུ་ཞིག་རྒྱས་པར་འགྱུར་ཞེས་བྱ་བའི་དྲི་བ་འོངས་པ་ལ་དཔྱད་པར་བྱ་སྟེ། ཡིད་བདེ་བའི་དབང་པོ་ནི་རྣམ་པ་བཅུ་གཅིག་སྟེ། འདོད་པ་དང་གཟུགས་ན་སྤྱོད་པ་རྣམ་པ་ལྔ་ལྔ་དང་། ཟག་པ་མེད་པའོ། །དེ་དག་ཀྱང་མདོར་བསྡུ་ན་རྣམ་
[127a]
[127a.1]པར་ཤེས་པ་རྣམ་པ་བཅུ་གསུམ་གྱི་དམིགས་པ་ཡིན་ཏེ། དེ་ནི་འདུས་བྱས་ཡིན་པའི་ཕྱིར་འདོད་པ་ན་སྤྱོད་པ་འདུས་བྱས་ལ་དམིགས་པ་རྣམ་པ་ལྔའི་དམིགས་པ་ཡིན་ཏེ། གཟུགས་ན་སྤྱོད་པ་ཡང་དེ་དང་འདྲའོ། །གཟུགས་མེད་པ་ན་སྤྱོད་པ་གཉིས་ཀྱི་སྟེ། ལམ་མཐོང་
[127a.2]བ་དང་། བསྒོམ་པས་སྤང་བར་བྱ་བ་དང་། ཟག་པ་མེད་པའི་དམིགས་པ་ཡིན་ཏེ། རྣམ་པ་བཅུ་གསུམ་པོ་འདི་ནི་ཡིད་བདེ་བའི་དབང་པོ་ལ་དམིགས་པའི་རྣམ་པར་ཤེས་པ་ཡིན་ནོ། །དེ་ལ་ཅི་རིགས་པར་ཕྲ་རྒྱས་འདོད་པ་ན་སྤྱོད་པ་དང་། གཟུགས་ན་སྤྱོད་པ་ལ་འདུས་བྱས་ལ་དམིགས་
[127a.3]པ་རིགས་ལྔ་དང་། གཟུགས་མེད་པ་ན་སྤྱོད་པའི་རིགས་གཉིས་དང་། ཀུན་དུ་འགྲོ་བ་དང་རྒྱས་པར་འགྱུར་རོ་ཞེས་བྱ་བར་ཤེས་པར་བྱའོ། །ཡིད་བདེ་བའི་དབང་པོ་ལ་དམིགས་པ་ལ་དམིགས་པའི་རྣམ་པར་ཤེས་པ་ལ་ཕྲ་རྒྱས་དུ་ཞིག་རྒྱས་པར་འགྱུར་ཞེ་ན། ཡིད་བདེ་བའི་དབང་
[127a.4]པོ་ལ་དམིགས་པའི་རྣམ་པར་ཤེས་པ་རྣམ་པ་བཅུ་གསུམ་པོ་དེ་རྣམ་པར་ཤེས་པ་གང་གི་དམིགས་པ་ཡིན་ཞེ་ན། རྣམ་པ་བཅུ་གསུམ་པོ་དེ་ཉིད་དང་ཡང་གཟུགས་མེད་པ་ན་སྤྱོད་པ་རྣམ་པ་གཉིས་ཏེ། སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བའི་དམིགས་པ་ཡིན་ཏེ།
[127a.5]རྣམ་པ་བཅོ་ལྔ་པོ་འདི་ནི་ཡིད་བདེ་བའི་དབང་པོ་ལ་དམིགས་པ་ལ་དམིགས་པའི་རྣམ་པར་ཤེས་པ་ཡིན་ནོ། །དེ་ལ་ཕྲ་རྒྱས་གཟུགས་མེད་པ་ན་སྤྱོད་པ་སྡུག་བསྔལ་དང་། ཀུན་འབྱུང་བ་མཐོང་བས་སྤང་བར་བྱ་བ་དག་བསྐྱེད་ནས་འདོད་པ་ན་སྤྱོད་པ་དང་། གཟུགས་ན་སྤྱོད་པ་འདུས་བྱས་ལ་དམིགས་
[127a.6]པ་རྣམས་དང་། འགོག་པ་མཐོང་བས་སྤང་བར་བྱ་བ་མ་གཏོགས་པ་གཟུགས་མེད་པ་ན་སྤྱོད་པ་རིགས་བཞི་རྒྱས་པར་འགྱུར་རོ་ཞེས་བྱ་བར་ཤེས་པར་བྱ་སྟེ། ཕྱོགས་འདིས་གཞན་ཡང་ཁོང་དུ་ཆུད་པར་བྱའོ། །ཉོན་མོངས་ཕྲ་རྒྱས་བཅས་རྣམ་གཉིས། །ཞེས་བྱ་བ་ནི་ཉོན་མོངས་པ་ཅན་ནི་
[127a.7]ཕྲ་རྒྱས་པར་འགྱུར་བ་དང་། རྒྱས་པར་མི་འགྱུར་བ་དག་གི་ཕྲ་རྒྱས་དང་བཅས་པ་ཡིན་ནོ་ཞེས་བྱ་བའི་ཐ་ཚིག་གོ། །དེ་དག་ལྷན་ཅིག་འདུག་པའི་ཕྱིར་རོ་ཞེས་བྱ་བ་ནི་ལྷན་ཅིག་འདུག་པའི་ཕྱིར་རོ། །ཉོན་མོངས་པ་ཅན་མ་ཡིན་པ་ནི་དབྲལ་བར་ནུས་པའི་ཕྱིར་རྒྱས་པར་འགྱུར་བ་དག་ཁོ་ནས་ཕྲ་རྒྱས་
[127b]
[127b.1]དང་བཅས་པ་ཡིན་ཏེ། འདི་ལྟར་ཉོན་མོངས་པ་ནི་དམིགས་པ་ལས། སྤང་བར་བྱ་བར་འདོད་པ་ཡིན་ཞེས་འཆད་པར་འགྱུར་རོ། །མ་སྤངས་ཤིང་ཡོངས་སུ་མ་ཤེས་པ་ཡིན་ཞེས་བྱ་བ་ལ་མ་སྤངས་པ་ནི་དེའི་ཐོབ་པ་མ་བཅད་པའི་ཕྱིར་རོ། །ཡོངས་སུ་མ་ཤེས་པ་ནི་དེའི་གཉེན་པོ་མ་སྐྱེས་པའི་ཕྱིར་རོ། །
[127b.2]འདོད་པའི་འདོད་ཆགས་ཀྱི་ཀུན་ནས་དཀྲིས་པ་དང་མཐུན་པ་ཞེས་བྱ་བ་ནི་འདི་དག་གིས་ཀུན་ནས་འཁྲི་བར་བྱེད་པས་ན་ཀུན་ནས་དཀྲིས་པ་དང་མཐུན་པ་སྟེ། ཁྲུས་དང་མཐུན་པ་ལྟ་བུའོ། །འདོད་པའི་འདོད་ཆགས་ཀྱི་ཀུན་ནས་དཀྲིས་པ་དང་། མཐུན་པས་འདོད་པའི་འདོད་ཆགས་ཀྱི་ཀུན་ནས་
[127b.3]དཀྲིས་པ་དང་མཐུན་པའོ། །ཡང་ན་འདོད་པའི་འདོད་ཆགས་ཉིད་ཀུན་ནས་དཀྲིས་པ་ཡིན་པས་འདོད་པའི་འདོད་ཆགས་ཀྱི་ཀུན་ནས་དཀྲིས་པ་སྟེ། དེ་དང་མཐུན་པ་ནི་འདོད་པའི་འདོད་ཆགས་ཀྱི་ཀུན་ནས་དཀྲིས་པ་དང་མཐུན་པ་དག་གོ། །དེ་དག་ཀྱང་གཟུགས་ལ་སོགས་པ་ཡུལ་རྣམས་ཡིན་
[127b.4]ནོ། །སྣང་བར་གྱུར་པ་ཡིན་ཞེས་བྱ་བ་ནི་ཡུལ་གྱི་ངོ་བོ་ཉིད་དུ་གྱུར་པ་ཡིན་ཞེས་བྱ་བའི་ཐ་ཚིག་གོ། །དེ་ལ་ཡང་ཚུལ་བཞིན་མ་ཡིན་པ་ཡིད་ལ་བྱེད་པ་ཡིན་ཞེས་བྱ་བ་ནི་ཡུལ་སྣང་བར་གྱུར་པ་དེ་ལ་ཡང་ཕྱིན་ཅི་ལོག་གི་མཚུངས་པ་དེ་མ་ཐག་པའི་རྐྱེན་དང་ལྡན་པ་ཡིན་ཞེས་བྱ་བའི་དོན་ཏོ། །རྒྱུ་
[127b.5]དང་ཡུལ་དང་སྦྱོར་བའི་སྟོབས་དག་ཡིན་ཏེ་ཞེས་བྱ་བ་ལ་རྒྱུའི་སྟོབས་ནི་འདོད་པའི་འདོད་ཆགས་སྐྱེད་པར་བྱེད་པའི་འདོད་པའི་འདོད་ཆགས་ཀྱི་ཕྲ་རྒྱས་མ་སྤངས་ཤིང་ཡོངས་སུ་མ་ཤེས་པ་ཡིན་ནོ། །ཡུལ་གྱི་སྟོབས་ནི་འདོད་པའི་འདོད་ཆགས་ཀྱི་ཀུན་ནས་དཀྲིས་པ་དང་མཐུན་པའི་ཡུལ་ཡིན་ནོ། །
[127b.6]སྦྱོར་བའི་སྟོབས་ནི་དེ་ལ་ཡང་ཚུལ་བཞིན་མ་ཡིན་པ་ཡིད་ལ་བྱེད་པ་ཡིན་ནོ། །ཉོན་མོངས་པ་གཞན་ཡང་དེ་བཞིན་དུ་སྐྱེ་བར་རིག་པར་བྱའོ་ཞེས་བྱ་བ་ནི་ཁོང་ཁྲོ་བའི་ཕྲ་རྒྱས་མ་སྤངས་ཤིང་ཡོངས་སུ་མ་ཤེས་པ་ཡིན། ཁོང་ཁྲོ་བའི་ཀུན་ནས་དཀྲིས་པ་དང་མཐུན་པའི་ཆོས་རྣམས་ཀྱང་སྣང་བར་གྱུར་
[127b.7]པ་ཡིན། དེ་ལ་ཡང་ཚུལ་བཞིན་མ་ཡིན་པ་ཡིད་ལ་བྱེད་པ་ཡིན་ཞེས་བྱ་བ་སྟེ་ཚུལ་ནི་དེ་ལྟ་བུའོ། །སྦྱོར་བ་བཞི་སྟེ། དེ་དག་ཉིད་དང་ཞེས་བྱ་བ་ནི་འདོད་པའི་སྦྱོར་བ་དང་སྲིད་པའི་སྦྱོར་བ་དང་ལྟ་བའི་སྦྱོར་བ་དང་མ་རིག་པའི་སྦྱོར་བའོ། །གཏི་མུག་མ་གཏོགས་པའི་ཞེས་བྱ་བ་ནི་མ་རིག་
[128a]
[128a.1]པའི་ཟག་པ་ནི་ལོགས་ཤིག་ཏུ་བཤད་པའི་ཕྱིར་རོ། །ཀུན་ནས་དཀྲིས་བྱས་ཞེས་བྱ་བ་ནི་ངོ་ཚ་མེད་པ་ལ་སོགས་པ་འཆད་པར་འགྱུར་བ་རྣམས་དང་བཅས་པའོ། །རྫས་བཞི་བཅུ་རྩ་གཅིག་སྟེ། ཕྲ་རྒྱས་སུམ་ཅུ་གཅིག་དང་ཞེས་བྱ་བ་ནི་ལྟ་བ་བཅུ་གཉིས་ཏེ། སྡུག་བསྔལ་
[128a.2]མཐོང་བས་སྤང་བར་བྱ་བ་ལྔ་དང་། ཀུན་འབྱུང་བ་མཐོང་བས་སྤང་བར་བྱ་བ་གཉིས་དང་འགོག་པ་མཐོང་བས་སྤང་བར་བྱ་བ་ཡང་གཉིས་ཁོ་ན་དང་ལམ་མཐོང་བས་སྤང་བར་བྱ་བ་གསུམ་དང་ཐེ་ཚོམ་བཞི་དང་འདོད་ཆགས་ལྔ་དང་། དེ་བཞིན་དུ་ཁོང་ཁྲོ་བ་དང་ང་རྒྱལ་ལྔ་དང་། ཀུན་ནས་དཀྲིས་པ་བཅུ་
[128a.3]སྟེ། དེ་ལྟར་ན་བཞི་བཅུ་རྩ་གཅིག་ཡིན་ནོ། །ཕྲ་རྒྱས་ཁོ་ན་ཞེས་བྱ་བ་ལ་ཁོ་ན་ཞེས་བྱ་བ་སྨོས་པ་ནི་ཀུན་ནས་དཀྲིས་པ་བསལ་བའི་ཕྱིར་རོ། །ཕྲ་རྒྱས་ཉི་ཤུ་རྩ་དྲུག་ཅེས་བྱ་བ་ནི་ལྟ་བ་བཅུ་གཉིས་དང་ཐེ་ཚོམ་བཞི་དང་འདོད་ཆགས་ལྔ་དང་ང་རྒྱལ་ལྔའོ། །དེ་ན་ཡང་རྨུགས་པ་དང་རྒོད་པ་ཀུན་ནས་དཀྲིས་
[128a.4]པ་གཉིས་ཡོད་པ་ཡིན་ནམ་ཞེས་བྱ་བ་ནི་གཟུགས་དང་གཟུགས་མེད་པའི་ཁམས་དེ་ཁོ་ན་སྟེ། རྨུགས་རྒོད་རྒྱགས་པ་ཁམས་གསུམ་ན། །ཞེས་འབྱུང་བའི་ཕྱིར་རོ། །ཅིའི་ཕྱིར་འདིར་དེ་མ་སྨོས་ཤེ་ན་ཞེས་བྱ་བ་ནི་ཀུན་ནས་དཀྲིས་པ་དེ་གཉིས་སོ། །རང་དབང་ཅན་མ་ཡིན་པའི་ཕྱིར་རོ་ཞེས་བྱ་བ་ཇི་ལྟར་
[128a.5]རང་དབང་ཅན་མ་ཡིན་ཞེ་ན། འདོད་ཆགས་ལ་སོགས་པ་དང་མཚུངས་པར་ལྡན་པའི་ཕྱིར་དང་། ཕྲག་དོག་ལ་སོགས་པ་དེ་བཞིན་དུ་མ་རིག་པ་ཙམ་དང་། མཚུངས་པར་ལྡན་པ་མ་ཡིན་པའི་ཕྱིར་ཏེ། འདི་གཉིས་ནི་འདོད་ཆགས་ལ་སོགས་པ་དང་མཚུངས་པར་ལྡན་པར་འགྱུར་གྱི། ཇི་ལྟར་ཕྲག་
[128a.6]དོག་དང་སེར་སྣ་དང་འགྱོད་པ་དང་ཁྲོ་བ་དང་འཆབ་པ་རྣམས་མ་རིག་པ་ཙམ་དང་མཚུངས་པར་ལྡན་པའི་ཕྱིར་རང་དབང་ཅན་ཡིན་པ་ལྟ་བུ་ནི་མ་ཡིན་ནོ། །དེ་གཉི་ག་ཡང་ཞེས་བྱ་བ་ནི་གཟུགས་དང་གཟུགས་མེད་པ་ལ་སོགས་པ་ན་སྤྱོད་པ་གཉི་ག་ཡང་ཞེས་བྱ་བའི་ཐ་ཚིག་གོ། །ཁ་ནང་དུ་བལྟས་ཏེ་འཇུག་
[128a.7]ཅེས་བྱ་བ་ནི་ཡུལ་གཙོར་བྱེད་པ་མ་ཡིན་པ་ཞེས་བྱ་བའི་དོན་ཏོ། །རྒྱུ་གང་གིས་སྲིད་པའི་འདོད་ཆགས་ཞེས་བཤད་པ་ཞེས་བྱ་བ་ནི། ཁ་ནི་ནང་དུ་བལྟས་ཕྱིར་དེར། །ཐར་པའི་འདུ་ཤེས་བཟློག་ཕྱིར་བཤད། །ཅེས་བྱ་བ་ཡིན་ཏེ། དེས་ན་སྲིད་པའི་ཟག་པ་ཞེས་བྱའོ། །རྫས་བཅོ་ལྔ་ཞེས་བྱ་བ་ནི་ཁམས་
[128b]
[128b.1]གསུམ་ཆར་ན་ཡང་རྣམ་པ་ལྔ་ལྔ་ཡོད་པའི་ཕྱིར་རོ། །ཟག་པ་ཞེས་བྱ་བར་གྲུབ་བོ་ཞེས་བྱ་བ་ནི་མ་རིག་པ་གོང་དུ་བཤད་པའི་ཟག་པ་གཉིས་ལས་བཀར་བ་ཡིན་ཏེ། དེ་ལྟ་བས་ན་ཁམས་གསུམ་ཆར་བ་ཡང་མ་རིག་པའི་ཟག་པ་ཞེས་བྱ་བ་དེ་གྲུབ་བོ། །ཆུ་བོ་སྦྱོར་བའང་དེ་བཞིན་དུ། །ཞེས་བྱ་བ་ནི་ཟག་པ་
[128b.2]དག་ཁོ་ན་ཆུ་བོ་དང་སྦྱོར་བ་ཡིན་ཏེ། ལྟ་བ་ལོགས་ཤིག་ཏུ་གཞག་པར་བྱ་བ་འབའ་ཞིག་ཏུ་ཟད་དོ། །ཇི་ལྟ་ཞེ་ན། བཤད་པར་བྱ་སྟེ། འདོད་པའི་ཟག་པ་ཁོ་ན་འདོད་པའི་ཆུ་བོ་དང་། འདོད་པའི་སྦྱོར་བ་ཡིན་ལ་དེ་བཞིན་དུ་སྲིད་པའི་ཟག་པ་ཁོ་ན་སྲིད་པའི་ཆུ་བོ་དང་སྲིད་པའི་སྦྱོར་བ་ཡིན་ནོ། །མ་རིག་པའི་
[128b.3]སྦྱོར་བ་ནི་སྔ་མ་ཁོ་ན་བཞིན་དུ་ཁོང་དུ་ཆུད་པར་བྱའོ། །འདིར་ལྟ་བའི་སྦྱོར་བ་ནི་བཞི་པ་ཡིན་པར་བཤད་དེ་དེའི་ཕྱིར་ལྟ་བ་རྣམས་མ་གཏོགས་པ་ཞེས་བྱ་བ་སྨོས་སོ། །ལོགས་ཤིག་ཏུ་རྣམ་པར་གཞག་གོ་ཞེས་གྲག་གོ་ཞེས་བྱ་བ་ལ་གྲག་ཅེས་བྱ་བའི་སྒྲ་ནི་གཞན་གྱི་གཞུང་ལུགས་སྟོན་པར་བྱེད་པ་ཡིན་
[128b.4]ཏེ། དགོངས་པ་ནི་འདུལ་བའི་སྐྱེ་བོའི་དབང་གིས་ལྟ་བའི་སྦྱོར་བ་ལོགས་ཤིག་ཏུ་བཤད་དོ་ཞེས་བྱ་བར་རུང་ངོ་། །ཅིའི་ཕྱིར་ཟག་པ་དག་གི་ནང་དུ་ལྟ་བ་རྣམས་ལོགས་ཤིག་ཏུ་མ་བཞག་ཅེ་ན། ཟག་པར་མ་ཡིན་གྲོགས་མེད་རྣམས། །ཞེས་བྱ་བ་ལ་སོགས་པ་སྨོས་ཏེ། ལྟ་བ་གྲོགས་མེད་པ་རྣམས་
[128b.5]ནི་འཇོག་པའི་རྗེས་སུ་མཐུན་པ་ཉིད་མ་ཡིན་ཏེ། འཇོག་པའི་རྗེས་སུ་མི་མཐུན་པ་ཉིད་ཅེས་བྱ་བའི་ཐ་ཚིག་གོ། །དེ་ནི་འདི་སྐད་དུ། གང་གི་ཕྱིར་ལྟ་བ་འདི་དག་ཡན་གར་བ་ནི་འཇོག་པའི་རྗེས་སུ་མཐུན་པ་མ་ཡིན་གྱི་གྲོགས་དང་བཅས་ནས་འཇོག་པའི་རྗེས་སུ་མཐུན་པ་དེའི་ཕྱིར་འདི་དག་གྲོགས་དང་བཅས་
[128b.6]པ་ཁོ་ན་ཟག་པ་རྣམས་ཀྱི་ནང་དུ་ཟག་པ་དག་ཏུ་བཤད་དེ། བསྲེས་ཏེ་བཤད་པ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། ཟག་པ་རྣམས་ཀྱི་ངེས་པའི་ཚིག་ནི་འཇོག་པར་བྱེད་པས་ན་ཞེས་འོག་ནས་འཆད་ཅེས་བྱ་བ་སྨོས་ཏེ། དེའི་ཕྱིར་ཟག་པ་དག་གི་ནང་དུ་འཇོག་པའི་དོན་དགོས་སོ་སྙམ་དུ་
[128b.7]བསམས་པ་ཡིན་ནོ། །དེ་ལྟར་ན་འདོད་པའི་ཆུ་བོ་ནི་རྫས་ཉི་ཤུ་དགུ་སྟེ་ཞེས་བྱ་བ་ནི་ལྟ་བ་བཅུ་གཉིས་ཀྱིས་བཏོན་པས་ཟག་པ་བཞིན་དུ་རྫས་བཞི་བཅུ་རྩ་གཅིག་ནི་མ་ཡིན་ནོ། །འོ་ན་ཅི་ཞེ་ན་རྫས་ཉི་ཤུ་དགུ་ཡིན་ནོ། །ཇི་ལྟ་ཞེ་ན་འདོད་ཆགས་དང་ཁོང་ཁྲོ་བ་དང་ང་རྒྱལ་ཞེས་བྱ་བ་ཐམས་ཅད་བརྗོད་དོ། །
[129a]
[129a.1]སྲིད་པའི་ཆུ་བོ་ནི་རྫས་ཉི་ཤུ་རྩ་བརྒྱད་དེ་ཞེས་བྱ་བ་ནི་སྲིད་པའི་ཟག་པ་རྫས་ལྔ་བཅུ་རྩ་གཉིས་བཤད་པ་དེ་ལས་ལྟ་བ་ཉི་ཤུ་རྩ་བཞི་སྟོན་ན། རྫས་ཉི་ཤུ་རྩ་བརྒྱད་དུ་འགྱུར་རོ། །འདོད་ཆགས་དང་ང་རྒྱལ་ཉི་ཤུ་དང་ཞེས་བྱ་བ་ནི་ཁམས་གཉིས་པའི་འདོད་ཆགས་བཅུ་ཡིན་ལ་ང་རྒྱལ་ཡང་
[129a.2]བཅུ་ཡིན་པས་ཉི་ཤུའོ། །ལྟ་བའི་ཆུ་བོ་ནི་རྫས་སུམ་ཅུ་རྩ་དྲུག་གོ་ཞེས་བྱ་བ་ནི་ཁམས་གསུམ་ན་ལྟ་བ་བཅུ་གཉིས་བཅུ་གཉིས་ཡོད་པས་སོ། །མ་རིག་པའི་ཆུ་བོ་ནི་རྫས་བཅོ་ལྔ་སྟེ་སྔ་མ་བཞིན་ནོ། །སྦྱོར་བ་ཡང་ཆུ་བོ་བཞིན་དུ་རིག་པར་བྱའོ་ཞེས་བྱ་བ་ནི་འདོད་པའི་སྦྱོར་བ་ནི་རྫས་ཉི་ཤུ་རྩ་དགུ་སྟེ། འདོད་ཆགས་དང་
[129a.3]ཁོང་ཁྲོ་བ་དང་། ང་རྒྱལ་བཅོ་ལྔ་དང་ཐེ་ཚོམ་བཞི་དང་། ཀུན་ནས་དཀྲིས་པ་བཅུའོ། །སྲིད་པའི་སྦྱོར་བ་ཉི་ཤུ་རྩ་བརྒྱད་དེ། འདོད་ཆགས་དང་ང་རྒྱལ་ཉི་ཤུ་དང་ཐེ་ཚོམ་བརྒྱད་དོ། །ལྟ་བའི་སྦྱོར་བ་ནི་རྫས་སུམ་ཅུ་རྩ་དྲུག་གོ། །མ་རིག་པའི་སྦྱོར་བ་ནི་རྫས་བཅོ་ལྔའོ། །ཇི་སྐད་བཤད་གཉིས་མ་རིག་
[129a.4]བཅས། །ཞེས་བྱ་བ་རྒྱས་པར་འབྱུང་བ་ཇི་སྐད་བཤད་པ་གང་དག་ཡིན་ཞེ་ན། སྦྱོར་བ་ཞེས་བྱ་བའི་དབང་དུ་བྱས་པ་ཡིན་ནོ། །དེའི་ཕྱིར་འདོད་པའི་སྦྱོར་བ་མ་རིག་པ་དང་བཅས་པ་རྫས་སུམ་ཅུ་རྩ་བཞི་ཁོ་ན་འདོད་པའི་ཉེ་བར་ལེན་པ་ཡིན་ནོ་ཞེས་བཤད་དོ། །མ་རིག་པ་ནི་འདོད་པ་ཉེ་བར་ལེན་པ་དང་བདག་
[129a.5]ཏུ་སྨྲ་བ་ཉེ་བར་ལེན་པ་དག་གི་ནང་དུ་བདག་ཉིད་ཇི་ལྟ་བ་བཞིན་དུ་བསྡུ་བར་བྱའོ། །ལྟ་བ་རྣམ་པ་གཉིས་སུ་ཐ་དད་པར་བྱ་བའི་ཕྱིར་བཞི་ཡིན་ཏེ། འདོད་པ་ཉེ་བར་ལེན་པ་དང་། ལྟ་བ་ཉེ་བར་ལེན་པ་དང་། ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ་དང་། བདག་ཏུ་སྨྲ་བ་ཉེ་བར་ལེན་པ་ཞེས་བྱ་བའོ། །ལྟ་
[129a.6]བའི་སྦྱོར་བ་ལས་ཚུལ་ཁྲིམས་དང་བརྟུལ་ཞུགས་ཕྱུང་སྟེ་ཞེས་བྱ་བ་ནི་ལྟ་བའི་སྦྱོར་བ་ཁམས་ཀྱི་བྱེ་བྲག་གིས་རྫས་སུམ་ཅུ་རྩ་དྲུག་ཡོད་པ་ལས་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དྲུག་བཏོན་ན། ལྟ་བའི་ཉེ་བར་ལེན་པ་རྫས་སུམ་ཅུ་ཡིན་ནོ། །ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ་ནི་རྫས་
[129a.7]དྲུག་སྟེ། འདོད་པའི་ཁམས་ན་གཉིས་དང་དེ་བཞིན་དུ་གཟུགས་དང་གཟུགས་མེད་པའི་ཁམས་ན་གཉིས་གཉིས་ཡོད་པས་སོ། །ལམ་གྱི་དགྲར་གྱུར་པ་ཞེས་བྱ་བ་ནི་གྲངས་ཅན་པའི་རྣལ་འབྱོར་དང་ཤེས་པ་ལ་སོགས་པས་ཐར་པ་ཐོབ་པར་ལྟ་བའི་ཕྱིར་ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ་ནི་
[129b]
[129b.1]ལམ་གྱི་དགྲར་གྱུར་པ་ཡིན་ནོ། །ཕྱོགས་གཉི་ག་སླུ་བའི་ཕྱིར་ཞེས་བྱ་བ་རྒྱས་པར་འབྱུང་བ་ནི་ཁྱིམ་པ་དང་རབ་ཏུ་འབྱུང་བའི་ཕྱོགས་སླུ་བར་བྱེད་པའི་ཕྱིར་ཞེས་བྱ་བའི་ཐ་ཚིག་གོ། །ཟས་མི་ཟ་བ་ལ་སོགས་པས་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་ཆུ་དང་མེར་འཇུག་པ་དང་། མི་སྨྲ་བ་དང་།
[129b.2]དཔའ་བོ་བྱེད་པ་ལ་སོགས་པ་བསྡུ་བའོ། །ཟས་མི་ཟ་བ་ལ་སོགས་པ་དང་། ཡུལ་ཡིད་དུ་འོང་བ་ཡོངས་སུ་སྤངས་པ་ནི་ཚུལ་ཁྲིམས་དང་བརྟུལ་ཞུགས་ཀྱིས་བསྡུས་པ་ཡིན་ནོ། །མ་རིག་པ། འཛིན་པར་བྱེད་པ་མིན་ཕྱིར་བསྲེས། །ཞེས་བྱ་བ་ནི་མ་རིག་པ་འབའ་ཞིག་གིས་སྲིད་པ་ཉེ་བར་ལེན་
[129b.3]པར་མི་བྱེད་དོ། །ཅིའི་ཕྱིར་ཞེ་ན། མི་ཤེས་པའི་མཚན་ཉིད་ཀྱིས་མི་གསལ་བའི་ཕྱིར་རོ་ཞེས་བྱ་བ་སྨོས་ཏེ། འདྲེས་པ་ནི་ཉོན་མོངས་པ་གཞན་དང་འབྲེལ་པའི་སྟོབས་ཀྱིས་ཉེ་བར་ལེན་པར་བྱེད་པ་ཡིན་ནོ་སྙམ་དུ་བསམས་པ་ཡིན་ནོ། །གྲག་གོ་ཞེས་བྱ་བ་ལ་གྲག་ཅེས་བྱ་བའི་སྒྲ་ནི་གཞན་གྱི་
[129b.4]གཞུང་ལུགས་སྟོན་པར་བྱེད་པ་ཡིན་ནོ། །དེའི་ཕྱིར་རང་གི་གཞུང་ལུགས་བཅོམ་ལྡན་འདས་ཀྱིས་མདོ་ལས་ནི་ཞེས་བྱ་བ་རྒྱས་པར་སྨོས་སོ། །ལྟ་བའི་སྦྱོར་བ་ཡང་དེ་དང་འདྲ་བའི་བར་དུ་གསུངས་སོ་ཞེས་བྱ་བ་ནི་ཇི་ལྟར་ཞེ་ན། ལྟ་བའི་སྦྱོར་བ་གང་ཞེ་ན་ཞེས་བྱ་བ་ནས་རྒྱས་པར་འདིའི་ལྟ་བ་རྣམས་
[129b.5]ལ་ལྟ་བ་ལ་འདོད་ཆགས་པ་དང་ལྟ་བ་ལ་འདུན་པ་དང་ལྟ་བ་ལ་སྲེད་པ་དང་ཞེས་བྱ་བ་སྟེ་སྔ་མ་བཞིན་ནོ། །མདོ་གཞན་དག་ལས་འདུན་པའི་འདོད་ཆགས་ཀྱང་ཉེ་བར་ལེན་པར་གསུངས་ཏེ། ཇི་སྐད་དུ་ཞེ་ན། ཉེ་བར་ལེན་པ་གང་ཞེ་ན། འདི་ལ་འདུན་པའི་འདོད་ཆགས་གང་ཡིན་པའོ་ཞེས་གསུངས་སོ། །
[129b.6]འདི་ནི་སློབ་དཔོན་གྱི་གཞུང་ལུགས་ཡིན་ཏེ། འདི་སྐད་དུ་འདིར་འདོད་ཆགས་ཁོ་ན་སྦྱོར་བ་དང་། ཉེ་བར་ལེན་པ་ཡིན་གྱི་ཉོན་མོངས་པ་གཞན་དག་ནི་མ་ཡིན་ནོ་ཞེས་བཤད་པ་ཡིན་ནོ། །དེའི་ཕྱིར་འདོད་པ་ལ་སོགས་པ་ལ་འདུན་པའི་འདོད་ཆགས་པ་གང་ཡིན་པ་དེ་ནི་ཞེས་བྱ་བ་སྨོས་སོ། །གང་གི་ཕྱིར་
[129b.7]དེ་དག་ཕྲ་བ་དང་ཞེས་བྱ་བ་རྒྱས་པར་འབྱུང་བ་ནི། ཕྲ་མོ་དག་རྒྱས་པར་འགྱུར་བས་ན་ཕྲ་རྒྱས་སོ་ཞེས་བྱ་བ་འདི་ནི་ངེས་པའི་ཚིག་གི་ཚུལ་གྱིས་གྲུབ་པོ། །རྒྱུ་བ་ཕྲ་བའི་ཕྱིར་ཞེས་བྱ་བ་ནི་འཇུག་པ་ཕྲ་བའི་ཕྱིར་ཞེས་བྱ་བའི་ཐ་ཚིག་གོ། །ཇི་ལྟར་འཇུག་པ་ཕྲ་ཞེ་ན། གཟུགས་ཅན་མ་ཡིན་པ་རྣམས་ཤེས་པར་
[130a]
[130a.1]དཀའ་བའི་ཕྱིར་རོ། །སྦྱོར་བ་མེད་པར་ཏེ་བསྒྲིམ་མི་དགོས་པར་བཟློག་བཞིན་དུ་ཡང་སྟེ་བཀག་བཞིན་དུ་ཡང་གང་ཟག་ལ་ཡང་དང་ཡང་མངོན་དུ་འགྱུར་བའི་ཕྱིར་ཕྲ་རྒྱས་ཞེས་བྱའོ། །འཁོར་བར་འཇོག་པར་བྱེད་པས་ན་ཟག་པ་ཡིན་པའམ་འཇོག་པའི་དོན་དུ་འཛག་པས་ན་ཟག་པ་ཡིན་ནོ་
[130a.2]ཞེས་བྱ་བ་ནི་ངེས་པའི་ཚིག་གི་ཚུལ་ཡིན་ནོ། །སྲིད་པའི་རྩེ་མོ་ནས་མནར་མེད་པའི་བར་དུ་སྐྱེ་མཆེད་དྲུག་གི་རྨ་ནས་འཛག་པས་ན་ཞེས་བྱ་བ་ནི་སྲིད་པའི་རྩེ་མོ་ནས་མནར་མེད་པའི་བར་དུ་སྐྱེ་མཆེད་དྲུག་གི་རྨ་སྟེ། མིག་ལ་སོགས་པ་སྐྱེ་མཆེད་རྨ་ལྟ་བུའི་སྒོ་ནས་འཛག་ཅིང་འབོ་ལ་འགྲོ་བས་ན་ཟག་པ་རྣམས་
[130a.3]ཡིན་ནོ། །འཁྱེར་བར་བྱེད་པས་ན་ཆུ་བོ་དག་ཡིན་ནོ། །འབྱར་བར་བྱེད་པས་ན་སྦྱོར་བ་ཡིན་ནོ། །ཉེ་བར་འཛིན་པས་ན་ཉེ་བར་ལེན་པ་དག་ཡིན་ནོ་ཞེས་བྱ་བ་འདི་ནི་བྱེ་བྲག་ཏུ་སྨྲ་བ་རྣམས་ཀྱིས་རབ་ཏུ་བསྟན་པ་ཡིན་ནོ། །ཆུ་བོ་ཞེས་བྱ་བའི་སྒྲ་འདི་ནི་འཁྱེར་བའི་ཚུལ་ཡིན་ཏེ། འགྲོ་བ་གཞན་ནམ་ཡུལ་
[130a.4]གཞན་དུ་འཁྱེར་བར་བྱེད་ཅིང་འཁྲིད་པར་བྱེད་པས་ན་ཆུ་བོ་དག་ཡིན་ནོ། །འགྲོ་བ་གཞན་ནམ་ཡུལ་གཞན་དུ་སྦྱོར་བར་བྱེད་ཅིང་འབྱར་བར་བྱེད་པས་ན་སྦྱོར་བ་དག་ཡིན་ནོ། །ཡང་སྲིད་པའམ་འདོད་པ་ལ་སོགས་པར་རྣམ་པར་ཤེས་པ་ཉེ་བར་འཛིན་པར་བྱེད་ཅིང་ལེན་པར་བྱེད་པས་ན་ཉེ་བར་ལེན་པ་དག་
[130a.5]ཡིན་ནོ། །འདི་སྐད་དུ་ཆེས་ལེགས་པ་ཡིན་ནོ་ཞེས་བྱ་བ་ནི་སློབ་དཔོན་གྱི་ལྟར་ན་ཆེས་ལེགས་པ་ཡིན་ནོ་ཞེས་འཆད་དོ། །ཇི་ལྟ་ཞེ་ན་སྨྲས་པ། ཕྲ་རྒྱས་འདི་དག་གི་རྒྱུད་དེ་རྣམ་པར་ཤེས་པའི་རྒྱུད་ཡུལ་རྣམས་ལ་འཛག་པར་བྱེད་ཅིང་འགྲོ་བར་བྱེད་པས་ན་ཟག་པ་རྣམས་ཏེ། བྱེད་པས་སྒྲུབ་པ་ཡིན་ནོ། །མངོན་
[130a.6]པར་འདུ་བྱ་བ་སྟེ་དེ་དག་ཉིད་མེད་པར་ཞེས་བྱ་བ་བསྩལ་བ་དེ་དག་ཉིད་མེད་པར་ཞེས་བྱ་བའི་དོན་ཏོ། །ཤུགས་ཆེན་པོ་དང་ལྡན་པའི་ཕྱིར་ཆུ་བོ་དག་ཅེས་བྱ་བ་ནི་ཆུ་བོ་དང་ཆོས་མཐུན་པ་ཉིད་དུ་སྟོན་པར་བྱེད་པས་ཏེ། ཆུ་བོ་དང་འདྲ་བས་ནི་ཆུ་བོ་དག་ཅེས་བྱ་བའི་ཕྱིར་རོ། །དེའི་རྗེས་སུ་བྱེད་པའི་ཕྱིར་ཞེས་བྱ་བ་ནི་འདོད་
[130a.7]ཆགས་ལ་སོགས་པའི་རྗེས་སུ་བྱེད་པའི་ཕྱིར་རོ། །ཆེ་ཐང་དུ་ཀུན་དུ་མི་འབྱུང་བ་རྣམས་ནི་སྦྱོར་བ་དག་ཅེས་བྱ་བ་ནི་ཆུ་བོ་དང་སྦྱོར་བ་རྣམས་ཐ་དད་དུ་བྱ་བར་སྟོན་པ་ཡིན་ཏེ། ཆེ་ཐང་དུ་ཀུན་དུ་འབྱུང་བ་གང་དག་ཡིན་པ་དེ་དག་ནི་སྦྱོར་བ་ཡིན་ལ། ཆེ་ཐང་དུ་ཀུན་དུ་མི་འབྱུང་བ་གང་དག་ཡིན་པ་ཁོ་ན་ནི་ཆུ་བོ་ཡིན་ནོ་
[130b]
[130b.1]ཞེས་བྱའོ། །དེ་དག་ཇི་ལྟར་སྦྱོར་བ་ཡིན་ཞེ་ན། སྡུག་བསྔལ་སྣ་ཚོགས་དང་སྦྱོར་བའི་ཕྱིར་ཞེས་བྱ་བ་སྨོས་ཏེ། སྐྱེ་བ་ལ་སོགས་པའི་སྡུག་བསྔལ་སྣ་ཚོགས་དང་སྦྱོར་བའི་ཕྱིར་ཞེས་བྱ་བའི་ཐ་ཚིག་གོ། །ཡང་ན་ཡང་དང་ཡང་དུ་རྗེས་སུ་འབྲེལ་པའི་སྒོ་ནས་ཏེ། གང་གི་ཕྱིར་རྒྱུད་ལ་ཡང་དང་ཡང་དུ་སྦྱོར་བར་
[130b.2]བྱེད་པ་དེའི་ཕྱིར་སྦྱོར་བ་དག་ཅེས་བྱའོ། །འདོད་པ་ལ་སོགས་པ་ཉེ་བར་ལེན་པའི་ཕྱིར་ཉེ་བར་ལེན་པ་རྣམས་ཡིན་ནོ་ཞེས་བྱ་བ་ནི་གང་དག་གིས་འདོད་པ་ལ་སོགས་པ་ཉེ་བར་ལེན་པར་བྱེད་པ་དེ་དག་ནི་འདོད་པ་ལ་སོགས་པ་དེ་ཉེ་བར་ལེན་པ་སྟེ་འདུན་པའི་འདོད་ཆགས་ཀྱི་བདག་ཉིད་དག་ཡིན་ནོ། །ཕྲ་རྒྱས་དེ་དག་
[130b.3]ཉིད་ཀུན་ནས་དཀྲིས་པའི་བར་གྱི་དབྱེ་བས་ཡང་རྣམ་པ་ལྔར་ཕྱེ་ནས་བཤད་དེ་ཞེས་བྱ་བ་ནི་གང་དུ་ཟག་པ་ལ་སོགས་པའི་དབྱེ་བས་ཕྲ་རྒྱས་རྣམ་པ་བཞིར་བཤད་པ་དེ་དག་མདོ་དང་ཆོས་མངོན་པ་ལས་ཀུན་དུ་སྦྱོར་བ་དང་འཆིང་བ་དང་ཕྲ་རྒྱས་དང་ཉེ་བའི་ཉོན་མོངས་པ་དང་། ཀུན་ནས་དཀྲིས་པའི་དབྱེ་བས་ཡང་
[130b.4]རྣམ་པ་ལྔར་ཕྱེ་ནས་བཤད་དོ། །ཕྲ་རྒྱས་ལས་མ་གཏོགས་པ་ངོ་ཚ་མེད་པ་ལ་སོགས་པ་ཀུན་ནས་དཀྲིས་པ་གཞན་དག་ཀྱང་ཡོད་པ་མ་ཡིན་ནམ། ཇི་ལྟར་ན་ཕྲ་རྒྱས་དག་ཉིད་ཀུན་ནས་དཀྲིས་པ་ཡིན་ནོ་ཞེས་དེ་སྐད་དུ་བརྗོད་ཅེ་ན། དེ་ལས་མ་གཏོགས་པ་དག་ཡོད་པ་བདེན་མོད་ཀྱི་ཐ་དད་པ་མ་ཡིན་
[130b.5]པ་དག་ཀྱང་ཡོད་པར་ནི་འདོད་དེ་འདིར་ཉོན་མོངས་པ་ཡང་ཀུན་ནས་དཀྲིས་པ་ཡིན་ཏེ། མདོ་ལས་ཀྱང་འདོད་ཆགས་པའི་འདོད་ཆགས་ཀྱི་ཀུན་ནས་དཀྲིས་པ་སྡུག་བསྔལ་གྱི་རྐྱེན་ཞེས་འབྱུང་བའི་ཕྱིར་རོ་ཞེས་བྱ་བ་འཆད་པར་འགྱུར་རོ། །དེ་བཞིན་དུ་གཞན་དང་གཞན་དག་ཀྱང་ཅི་རིགས་པར་སྦྱར་བར་བྱའོ་
[130b.6]ཞེས་བྱ་བ་ནི་ཁོང་ཁྲོ་བ་དང་ཕྲག་དོག་དང་སེར་སྣའི་ཀུན་དུ་སྦྱོར་བ་རྣམས་ནི་འདོད་པ་ན་སྤྱོད་པ་ཡིན་ནོ། །ང་རྒྱལ་དང་མ་རིག་པ་དང་ལྟ་བ་དང་། མཆོག་ཏུ་འཛིན་པ་དང་། ཐེ་ཚོམ་གྱི་ཀུན་དུ་སྦྱོར་བ་རྣམས་ནི་ཁམས་གསུམ་པ་ཡིན་ནོ། །ལྟ་བའི་ཀུན་དུ་སྦྱོར་བ་ནི་ལྟ་བ་གསུམ་མོ་ཞེས་བྱ་བ་ནི་འཇིག་
[130b.7]ཚོགས་དང་མཐར་འཛིན་པ་དང་ལོག་པར་ལྟ་བ་དག་གོ། །མཆོག་ཏུ་འཛིན་པའི་ཀུན་དུ་སྦྱོར་བ་ནི་གཉིས་སོ་ཞེས་བྱ་བ་ནི་ལྟ་བ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དག་གོ། །དེ་ཉིད་ཀྱི་ཕྱིར་ཞེས་བྱ་བ་ནི་གང་གི་ཕྱིར་དེ་ལྟར་ལྟ་བ་གསུམ་ནི་ལྟ་བའི་ཀུན་དུ་སྦྱོར་བ་ཡིན་ལ།
[131a]
[131a.1]ལྟ་བ་གཉིས་ནི་མཆོག་ཏུ་འཛིན་པའི་ཀུན་དུ་སྦྱོར་བ་ཡིན་པ་དེ་ཉིད་ཀྱི་ཕྱིར་རོ། །ལྟ་བ་དང་མཚུངས་པར་ལྡན་པའི་ཆོས་རྣམས་ལ་ཞེས་བྱ་བ་རྒྱས་པར་འབྱུང་བ་ནི་དྲི་བ་ཡིན་ཏེ། ལྟ་བ་དང་མཚུངས་པར་ལྡན་པ་ཞེས་བྱ་བ་ནི་མཆོག་ཏུ་འཛིན་པའི་ལྟ་བ་དང་མཚུངས་པར་ལྡན་པའི་ཆོས་
[131a.2]དེ་ལ་ཚོར་བ་ལ་སོགས་པའོ། །རྗེས་སུ་ཆགས་པའི་ཀུན་དུ་སྦྱོར་བས་ཏེ། འདོད་ཆགས་ཀྱིས་ལྡན་ཞིང་ལྟ་བའི་ཀུན་དུ་སྦྱོར་བ་སྟེ། འཇིག་ཚོགས་ལ་ལྟ་བ་ལ་སོགས་པའི་མཚན་ཉིད་ཀྱིས་མ་ཡིན་ལ། དེ་ལ་ལྟ་བའི་ཕྲ་རྒྱས་རྒྱས་པར་མི་འགྱུར་བ་ཡང་མ་ཡིན་ཞིང་ལྟ་བ་དང་མཚུངས་པར་ལྡན་པའི་ཆོས་དེ་
[131a.3]ལ་ལྟ་བའི་ཕྲ་རྒྱས་རྒྱས་པར་མི་འགྱུར་བ་ཡང་མ་ཡིན་པ་སྟེ། འོ་ན་ཅི་ཞེ་ན། རྒྱས་པར་འགྱུར་བ་ལྟ་བ་ཡོད་དམ། དགག་པ་གཉིས་ཀྱིས་རྣལ་མ་ཁོང་དུ་ཆུད་པར་བྱེད་དོ། །སྨྲས་པ་ཡོད་དེ་ཞེས་བྱ་བ་རྒྱས་པར་འབྱུང་བ་ནི་དྲིས་པའི་ལན་འདེབས་པར་བྱེད་དོ། །ཀུན་འབྱུང་ཤེས་པ་སྐྱེས་ལ་ཞེས་བྱ་
[131a.4]བའི་ཁྱད་པར་སྨོས་པ་ནི། ལྟ་བའི་ཀུན་དུ་སྦྱོར་བ་ཀུན་དུ་འགྲོ་བ་སྤངས་པར་བསྟན་པའི་ཕྱིར་རོ། །འགོག་པ་ཤེས་པ་མ་སྐྱེས་པའི་ཕྱིར་ཞེས་བྱ་བ་ནི་མཆོག་ཏུ་འཛིན་པའི་ལྟ་བ་གཉིས་མ་སྤངས་ན་དེ་དང་མཚུངས་པར་ལྡན་པ་ཡོད་པར་རབ་ཏུ་བསྟན་པའི་ཕྱིར་རོ། །འགོག་པ་དང་ལམ་མཐོང་བས་སྤང་
[131a.5]བར་བྱ་བ་ཞེས་བྱ་བ་ནས་ཆོས་རྣམས་དང་སྟེ་ཞེས་བྱ་བའི་བར་ནི་ཚོར་བ་ལ་སོགས་པ་རྣམས་དང་ངོ་། །དེ་དག་དང་ནི་རྗེས་སུ་ཆགས་པའི་ཀུན་དུ་སྦྱོར་བ་འགོག་པ་མཐོང་བས་སྤང་བར་བྱ་བའམ་ལམ་མཐོང་བས་སྤང་བར་བྱ་བ་ལྡན་ནོ། །ཇི་ལྟ་བུ་ཞིག་གིས་ཤེ་ན། དེ་ལ་དམིགས་པས་ཏེ། གང་གི་ཕྱིར་
[131a.6]འགོག་པ་དང་ལམ་མཐོང་བས་སྤང་བར་བྱ་བ་ལྟ་བ་མཆོག་ཏུ་འཛིན་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་མཚུངས་པར་ལྡན་པའི་ཆོས་ཚོར་བ་ལ་སོགས་པ་དེ་དག་ལ་དམིགས་ཏེ། འདོད་ཆགས་སྐྱེ་བ་དེའི་ཕྱིར་དམིགས་པའི་སྒོ་ནས་དེས་ལྡན་པ་ཡིན་ནོ། །ལྟ་བའི་ཀུན་
[131a.7]དུ་སྦྱོར་བས་ནི་མི་ལྡན་ཏེ། ཅིའི་ཕྱིར་ཞེ་ན་སྨྲས་པ་ཀུན་དུ་འགྲོ་བ་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བའི་ངོ་བོ་ཉིད་ནི་ཀུན་འབྱུང་བ་ཤེས་པ་སྐྱེས་པས་སྤང་བའི་ཕྱིར་ལ། ཀུན་དུ་འགྲོ་བ་མ་ཡིན་པ་དེ་ལ་དམིགས་པ་དང་མཚུངས་པར་ལྡན་པ་ཅན་ལྟ་བའི་ཀུན་དུ་སྦྱོར་བ་ནི་མེད་པའི་ཕྱིར་
[131b]
[131b.1]རོ། །འགོག་པ་དང་ལམ་མཐོང་བས་སྤང་བར་བྱ་བ་ལྟ་བའི་ཀུན་དུ་སྦྱོར་བ་ཀུན་དུ་འགྲོ་བ་མ་ཡིན་པ་ལོག་པར་ལྟ་བའི་ངོ་བོ་ཉིད་ནི་ཡོད་མོད་ཀྱི་དེ་ནི་ཟག་པ་མེད་པ་ལ་དམིགས་པའི་ཕྱིར་མཆོག་ཏུ་འཛིན་པ་དང་མཚུངས་པར་ལྡན་པའི་ཆོས་ཚོར་བ་ལ་སོགས་པ་ལ་དམིགས་པ་ནི་མ་ཡིན་ནོ། །དེ་ལྟ་བས་ན་
[131b.2]དམིགས་པའི་སྒོ་ནས་ལྟ་བའི་ཀུན་དུ་སྦྱོར་བས་ལྡན་པ་མ་ཡིན་ནོ། །ཚོགས་པ་ཐ་དད་པའི་ཕྱིར་དེ་ཚོར་བ་ལ་སོགས་པ་དེ་དག་དང་མཚུངས་པར་ལྡན་པ་ཅན་ཡང་མ་ཡིན་ཏེ། དེ་ལྟ་བས་ན་མཚུངས་པར་ལྡན་པའི་སྒོ་ནས་ཀྱང་དེས་ལྡན་པ་མ་ཡིན་ནོ། །དེ་དག་ལྟ་བའི་ཕྲ་རྒྱས་དག་ནི་རྒྱས་པར་འགྱུར་རོ། །
[131b.3]དེ་དག་ཀྱང་ཇི་ལྟ་བུ་ཞིག་ཅེ་ན། མཆོག་ཏུ་འཛིན་པའི་ལྟ་བ་དེ་དག་ཁ་ནས་མཚུངས་པར་ལྡན་པའི་སྒོ་ནས་ཞེས་བྱ་བ་སྨོས་ཏེ། ཚོར་བ་ལ་སོགས་པའི་ཆོས་དེ་དག་ལ་ལྟ་བ་མཆོག་ཏུ་འཛིན་པའམ་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་མཚུངས་པར་ལྡན་པའི་སྒོ་ནས་རྒྱས་པར་
[131b.4]འགྱུར་ཏེ། རང་གི་ཚོགས་སུ་བྱུང་བ་ཡིན་པའི་ཕྱིར་རོ། །དེ་ལ་ལྟ་བའི་ཀུན་དུ་སྦྱོར་བ་ནི་རྒྱས་པར་མི་འགྱུར་རོ། །ཅིའི་ཕྱིར་ཞེ་ན། ལྟ་བའི་ཀུན་དུ་སྦྱོར་བ་ཞེས་མིང་དུ་མ་བཏགས་པའི་ཕྱིར་ཏེ། ལྟ་བའི་ཕྲ་རྒྱས་ཞེས་སྨོས་ན་ནི་ལྟ་བ་ལྔ་ཆར་བསྡུ་བ་ཡིན་ནོ། །ལྟ་བའི་ཀུན་དུ་སྦྱོར་བ་ཞེས་སྨོས་ན་
[131b.5]ནི་འཇིག་ཚོགས་དང་མཐར་འཛིན་པ་དང་ལོག་པར་ལྟ་བ་དག་གཟུང་གི་མཆོག་ཏུ་འཛིན་པའི་ལྟ་བ་དག་ནི་མ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །ལྟ་གཉིས་ཀུན་དུ་སྦྱོར་གཞན་ནོ། །ཞེས་བྱ་བ་ནི་མཆོག་ཏུ་འཛིན་པའི་ལྟ་བ་དག་གོ། །ལྟ་བ་གསུམ་ཡང་རྫས་བཅོ་བརྒྱད། །ཅེས་བྱ་བ་
[131b.6]ནི་ཡིན་ཞེས་བྱ་བའི་ཚིག་ལྷག་མ་ཡིན་ཏེ། ཚིག་གི་དོན་ནི་འཇིག་ཚོགས་དང་། མཐར་འཛིན་པ་དང་ལོག་པར་ལྟ་བ་རྣམས་ལ་ནི་རྫས་ཀྱི་གྲངས་བཅོ་བརྒྱད་དོ་ཞེས་བྱ་བའི་ཐ་ཚིག་གོ། །མཆོག་ཏུ་འཛིན་པའི་ལྟ་བ་གཉིས་ཀྱང་བཅོ་བརྒྱད་ཁོ་ན་ཡིན་ཏེ་ཞེས་བྱ་བ་ནི་རྫས་ཞེས་བྱ་བར་སྐབས་དང་
[131b.7]སྦྱར་རོ། །ཇི་ལྟ་ཞེ་ན་འདོད་པའི་ཁམས་ན་འཇིག་ཚོགས་དང་མཐར་འཛིན་པའི་ལྟ་བ་གཉིས་ཡོད་ལ། དེ་དག་ཀྱང་ལོག་པར་ལྟ་བ་རྣམས་སྡུག་བསྔལ་མཐོང་བས་སྤང་བར་བྱ་བ་ཁོ་ན་ཡིན་པར་འདོད་དོ། །ལོག་པར་ལྟ་བ་ནི་སྡུག་བསྔལ་མཐོང་བས་སྤང་བར་བྱ་བ་ནས་ལམ་མཐོང་བས་སྤང་
[132a]
[132a.1]བར་བྱ་བའི་བར་རྣམ་པ་བཞི་ཡོད་དེ། དེ་ལྟར་ན་འདོད་པའི་ཁམས་ན་དྲུག་ཡོད་དོ། །འདོད་པའི་ཁམས་ཇི་ལྟ་བར་གཟུགས་དང་གཟུགས་མེད་པའི་ཁམས་ན་ཡང་དེ་དང་འདྲ་བས་བཅོ་བརྒྱད་ཡིན་ནོ། །མཆོག་ཏུ་འཛིན་པའི་ལྟ་བ་གཉིས་ཀྱང་རྫས་བཅོ་བརྒྱད་ཡིན་ཏེ།
[132a.2]ཇི་ལྟ་ཞེ་ན་འདོད་པའི་ཁམས་ན་ལྟ་བ་མཆོག་ཏུ་འཛིན་པ་སྡུག་བསྔལ་མཐོང་བས་སྤང་བར་བྱ་བ་ནས་ལམ་མཐོང་བས་སྤང་བར་བྱ་བ་ཞེས་བྱ་བའི་བར་རྣམ་པ་བཞི་ཡོད་དོ། །ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཡང་སྡུག་བསྔལ་མཐོང་བས་སྤང་བར་བྱ་བ་དང་ལམ་མཐོང་བས་སྤང་བར་བྱ་བ་ཞེས་
[132a.3]བྱ་བ་རྣམ་པ་གཉིས་ཏེ། དེ་ལྟར་འདོད་པའི་ཁམས་ན་དྲུག་ཡོད་དོ། །འདོད་པའི་ཁམས་ཇི་ལྟ་བར་གཟུགས་དང་གཟུགས་མེད་པའི་ཁམས་ན་ཡང་དེ་དང་འདྲ་སྟེ། དེ་ལྟར་ན་རྫས་བཅོ་བརྒྱད་ཡིན་ནོ། །ལྷག་མ་རྣམས་ནི་མ་ཡིན་པས་ཞེས་བྱ་བ་ནི་ལྟ་བ་རྣམས་སོ། །གཟུང་བ་དང་འཛིན་པ་ཐ་
[132a.4]དད་པའི་ཕྱིར་རོ་ཞེས་བྱ་བ་ལ་གཟུང་བ་ནི་ལྟ་བའི་ཀུན་དུ་སྦྱོར་བའོ། །འཛིན་པ་ནི་མཆོག་ཏུ་འཛིན་པའི་ཀུན་དུ་སྦྱོར་བའོ། །རྒྱུ་དེའི་ཕྱིར་ཏེ་གཅིག་ཏུ་མི་དགེ་བའི་ཕྱིར་དང་རང་དབང་ཅན་ཡིན་པའི་མཚན་ཉིད་ཀྱི་ཕྱིར་རོ། །དེ་དག་ལ་བཤད་ཅེས་བྱ་བ་ནི་ཕྲག་དོག་དང་། སེར་སྣ་གཉིས་ངོ་ཚ་མེད་
[132a.5]པ་ལ་སོགས་པ་ཀུན་ནས་དཀྲིས་པ་དེ་དག་གི་ནང་ནས་ཕྱུང་ནས་བཤད་པའོ། །གང་ལ་གཅིག་ཏུ་མི་དགེ་བ་དང་རང་དབང་ཅན་འདི་གཉིས་ཡོད་པ་ཞེས་བྱ་བ་ནི་གང་ལ་གཅིག་ཏུ་མི་དགེ་བ་ཉིད་དང་། རང་དབང་ཅན་ཉིད་ཅེས་བྱ་བ་འདི་གཉི་ག་ཡོད་པ་དེ་ལྟ་བུ་ཀུན་ནས་དཀྲིས་པ་གཞན་ནི་མེད་དོ་ཞེས་བྱ་
[132a.6]བར་སྦྱར་རོ། །དེ་ལྟ་བུའི་ཀུན་ནས་དཀྲིས་པ་གཞན་ནི་མེད་དོ་ཞེས་བྱ་བ་ནི་ངོ་ཚ་མེད་པ་དང་། ཁྲེལ་མེད་པ་དག་ཀྱང་གཅིག་ཏུ་མི་དགེ་བ་ཡིན་མོད་ཀྱི་འདོད་ཆགས་ལ་སོགས་པ་དང་མཚུངས་པར་ལྡན་པའི་ཕྱིར་རང་དབང་ཅན་ནི་མ་ཡིན་ནོ། །འགྱོད་པ་ཡང་མ་རིག་པ་ཙམ་དང་མཚུངས་པར་
[132a.7]ལྡན་པའི་ཕྱིར་རང་དབང་ཅན་ནི་ཡིན་མོད་ཀྱི་གཅིག་ཏུ་མི་དགེ་བ་ནི་མ་ཡིན་ཏེ། དེ་ནི་དགེ་བ་ཡང་ཡིན་ནོ། །རྨོངས་པ་དང་རྒོད་པ་དང་། གཉིད་དག་ནི་འདོད་ཆགས་ལ་སོགས་པ་དང་མཚུངས་པར་ལྡན་པའི་ཕྱིར་རང་དབང་ཅན་ཡང་མ་ཡིན་ལ། གཅིག་ཏུ་མི་དགེ་བ་ཡང་མ་ཡིན་ཏེ། དེ་
[132b]
[132b.1]དག་ནི་དགེ་བ་དང་ལུང་དུ་མ་བསྟན་པ་ཡང་ཡིན་ནོ། །གང་གི་བཅུ་ཡིན་པ་ཞེས་བྱ་བ་ནི་བྱེ་བྲག་ཏུ་སྨྲ་བ་དག་གི་ལྟར་ན་ཀུན་ནས་དཀྲིས་པ་བཅུ་ཡིན་པ་དེའི་ལྟར་ན་ཁྲོ་བ་དང་འཆབ་པ་དག་ཀྱང་གཅིག་ཏུ་མི་དགེ་བ་དང་རང་དབང་ཅན་ཞེས་བྱ་བ་རྣམ་པ་གཉི་ག་ཡིན་པས་དེའི་ཕྱིར་འདི་ལན་མ་ཡིན་ནོ་
[132b.2]ཞེས་ཟེར་རོ། །འོ་ན་དེའི་ལན་གང་ཡིན་ཞེ་ན། འདི་ལ་སློབ་དཔོན་འདུས་བཟང་ན་རེ་ཕྲག་དོག་དང་སེར་སྣ་དག་ནི་ཡང་དང་ཡང་དུ་ཀུན་དུ་འབྱུང་བའི་ཕྱིར་ལོགས་ཤིག་ཀུན་དུ་སྦྱོར་བ་ཉིད་དུ་བཤད་དོ། །དེ་ཉིད་ཀྱི་ཕྱིར་འདོད་པའི་ཁམས་སུ་སྐྱེས་པ་རྣམས་ལ་ཀུན་དུ་སྦྱོར་བ་སུམ་ཅུ་རྩ་དྲུག་ཡོད་ཀྱང་།
[132b.3]ཀཽ་ཤི་ཀ་ལྷ་དང་མི་རྣམས་ནི་ཕྲག་དོག་དང་སེར་སྣའི་ཀུན་དུ་སྦྱོར་བ་ཅན་ཡིན་ནོ་ཞེས་གསུངས་ཏེ། ཉོན་མོངས་པ་འདི་གཉིས་ནི་བདོ་ན་ལྷག་པར་འཆིང་བ་ཡིན་ནོ་ཞེས་ཟེར་རོ། །ཡང་ན་ཕྲག་དོག་དང་སེར་སྣ་དག་ནི་དབང་ཆུང་བར་གྲགས་པ་དང་། ལོངས་སྤྱོད་ཆུང་བ་ཉིད་ཀྱི་རྒྱུ་ཡིན་པའི་ཕྱིར་
[132b.4]དང་། ཐམས་ཅད་སྟོན་པའི་ཕྱིར་དང་། ཕྱོགས་གཉིས་ཉོན་མོངས་པར་བྱེད་པ་ཡིན་པའི་ཕྱིར་ལོགས་ཤིག་ཏུ་བཤད་དོ། །བདེ་འགྲོར་སྐྱེས་པ་འདི་ཤིན་དུ་བརྙས་པར་འགྱུར་བ་གང་ཡིན་པ་དེ་ལ་རྒྱུ་ནི་ཕྲག་དོག་དང་སེར་སྣ་དག་ཡིན་ཏེ། འདི་ལྟར་དབང་ཆུང་བར་གྲགས་པ་དང་ལོངས་
[132b.5]སྤྱོད་ཆུང་བ་ནི་བཙོན་ལ་སོགས་པ་དང་འདྲ་བས་སོ། །ཉོན་མོངས་པ་ནི་རྣམ་པ་གཉིས་ཏེ། ཀུན་དུ་གདུང་བ་དང་ལྡན་པ་དང་། ཀུན་དུ་དགའ་བ་དང་ལྡན་པ་ཡིན་ལ། དེ་དག་ཐམས་ཅད་ཀྱང་འདི་གཉིས་ཀྱིས་བསྟན་པ་ཡིན་ནོ། །ཁྱིམ་པའི་ཕྱོགས་ཀྱང་ལོངས་སྤྱོད་ཀྱི་རྟེན་ཅན་འདི་
[132b.6]གཉིས་ཀྱིས་ཤིན་ཏུ་ཉོན་མོངས་པར་འགྱུར་ལ། རབ་ཏུ་བྱུང་བའི་ཕྱོགས་ཀྱང་ཆོས་ཀྱི་རྟེན་ཅན་འདི་གཉིས་ཀྱིས་ཤིན་ཏུ་ཉོན་མོངས་པར་འགྱུར་རོ། །ཡང་ན་ལྷ་དང་ལྷ་མ་ཡིན་གྱི་ཕྱོགས་བདུད་རྩི་དང་བུད་མེད་ཀྱི་ཕྱིར་ཤིན་ཏུ་ཉོན་མོངས་པར་བྱེད་དོ། །དེ་ཉིད་ཀྱི་ཕྱིར་བཅོམ་ལྡན་འདས་
[132b.7]ཀྱིས། ཀཽ་ཤི་ཀ་ལྷ་དང་མི་རྣམས་ནི་ཕྲག་དོག་དང་སེར་སྣའི་ཀུན་དུ་སྦྱོར་བ་ཡིན་ནོ་ཞེས་གསུངས་ཏེ། དེ་བས་ན་ཀུན་ནས་དཀྲིས་པ་བཅུ་དག་ལས་འདི་གཉིས་ཁོ་ན་ཀུན་དུ་སྦྱོར་བར་བཤད་དོ། །ཐ་མའི་ཆ་ནི་འདོད་པའི་ཁམས་ཡིན་ལ་ཞེས་བྱ་བ་ལ། འདོད་པའི་ཁམས་ནི་ཁམས་
[133a]
[133a.1]གསུམ་རིལ་ལ་ལྟོས་ན་གཅིག་ཏུ་མཉམ་པར་མ་བཞག་པ་ཡིན་པའི་ཕྱིར་ཐ་མ་སྟེ། དམན་པ་ཡིན་ནོ། །གཉིས་ཀྱིས་འདོད་པས་མི་འདའ་ལ། །ཞེས་བྱ་བ་ནི་དེ་དག་མ་སྤངས་ན་འདོད་པའི་ཁམས་ལས་མི་འདའ་བའི་ཕྱིར་རོ། །སྒོ་བ་དང་རྗེས་སུ་འབྲང་བ་དང་ཆོས་
[133a.2]མཐུན་པའི་ཕྱིར་རོ་ཞེས་བྱ་བ་ལ། སྒོ་བ་དང་ཆོས་མཐུན་པ་ནི་འདོད་པ་ལ་འདུན་པ་དང་གནོད་སེམས་དག་ཡིན་ཏེ། དེ་གཉིས་ཀྱིས་འདོད་པའི་ཁམས་ཀྱི་བཙོན་ར་ནས་འབྱུང་དུ་མི་སྟེར་བས་སྒོ་བ་ལྟ་བུ་ཡིན་ནོ། །རྗེས་སུ་འབྲང་བ་དང་ཆོས་མཐུན་པ་ནི་འཇིག་ཚོགས་ལ་ལྟ་བ་ལ་སོགས་པ་ཡིན་
[133a.3]ཏེ། དཔེར་ན་སྒོ་བ་བག་མེད་པར་གྱུར་ཏེ་བཙོན་ར་ནས་བཙོན་ཤོར་ཀྱང་སྒོ་བའི་རྗེས་སུ་འབྲང་བ་རྣམས་ཀྱིས་ཕྱིར་ཟློག་པར་བྱེད་པ་ལྟར་གསུམ་པོ་འདི་དག་གིས་དེ་དང་འདྲའོ། །སེམས་ཅན་གྱི་ཐ་མ་ཞེས་བྱ་བ་ནི་གཞན་རྣལ་འབྱོར་སྤྱོད་པ་རྣམས་ན་རེ་འཇིག་ཚོགས་ལ་ལྟ་བ་དང་། ཚུལ་ཁྲིམས་
[133a.4]དང་བརྟུལ་ཞུགས་མཆོག་ཏུ་འཛིན་པ་དང་། ཐེ་ཚོམ་གྱི་ཀུན་དུ་སྦྱོར་བ་རྣམས་ཀྱིས་ནི་སེམས་ཅན་གྱི་ཐ་མ་སོ་སོའི་སྐྱེ་བོ་ཉིད་ལས་མི་འདའོ། །འདོད་པ་ལ་འདུན་པ་དང་། གནོད་སེམས་གཉིས་ཀྱིས་ནི་ཁམས་ཀྱི་ཐ་མ་འདོད་པའི་ཁམས་ཀྱི་མཚན་ཉིད་ལས་མི་འདའོ་ཞེས་བྱ་བར་སྦྱར་བར་
[133a.5]བྱའོ། །སེམས་ཅན་གྱི་ནང་ན་ཐ་མ་སོ་སོའི་སྐྱེ་བོ་དག་ཡིན་ལ། ཁམས་ཀྱི་ནང་ན་ཐ་མ་ཡང་འདོད་པའི་ཁམས་ཡིན་ཏེ། དེའི་ཕྱིར་དེ་དག་ཐ་མའི་ཆ་དང་མཐུན་པ་རྣམས་ཞེས་བྱའོ་ཞེས་ཟེར་རོ། །ཀུན་དུ་སྦྱོར་བ་གསུམ་ཡོངས་སུ་གཏུགས་ཏེ་སྤང་བའི་ཕྱིར་ཞེས་བྱ་བ་ནི་འཇིག་ཚོགས་ལ་
[133a.6]ལྟ་བ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། ཐེ་ཚོམ་གྱི་ཀུན་དུ་སྦྱོར་བ་མ་ལུས་པར་སྤངས་པའི་ཕྱིར་ཞེས་བྱ་བའི་ཐ་ཚིག་གོ། །ཉོན་མོངས་པ་དྲུག་སྤངས་པ་ཡིན་ན་ཞེས་བྱ་བ་ནི་ལྟ་བ་ལྔ་དང་། ཐེ་ཚོམ་མོ། །འདོད་ཆགས་ལ་སོགས་པ་ནི་མ་བཤད་དེ། ལྷག་མ་དང་
[133a.7]བཅས་པའི་ཕྱིར་རོ། །ལྟ་བ་གསུམ་བོར་ལ་ཞེས་བྱ་བ་ནི་མཐར་འཛིན་པར་ལྟ་བ་དང་། ལོག་པར་ལྟ་བ་དང་། ལྟ་བ་མཆོག་ཏུ་འཛིན་པའི་ལྟ་བའོ། །གསུམ་ཁོ་ན་གསུངས་ཞེས་བྱ་བ་ནི་འཇིག་ཚོགས་ལ་ལྟ་བ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། ཐེ་ཚོམ་དང་
[133b]
[133b.1]གསུམ་ཁོ་ན་གསུངས་པའོ། །སུས་གསུངས་ཤེ་ན། བཅོམ་ལྡན་འདས་ཀྱིས་ཏེ། འདི་ལྟར་མདོ་ལས། བཙུན་པ་ཇི་ཙམ་གྱིས་ན། རྒྱུན་དུ་ཞུགས་པ་ལགས། མིང་ཆེན་འདི་ལྟར་འཕགས་པ་ཉན་ཐོས་ནི་འདི་ནི་སྡུག་བསྔལ་འཕགས་པའི་བདེན་པའོ་ཞེས་བྱ་བར་ཡང་དག་པ་ཇི་ལྟ་བ་
[133b.2]བཞིན་དུ་རབ་ཏུ་ཤེས་སོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདི་ནི་ཀུན་དུ་སྦྱོར་བ་གསུམ་པོ་འདི་ལྟ་སྟེ་འཇིག་
[133b.3]ཚོགས་ལ་ལྟ་བ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། ཐེ་ཚོམ་ཡང་ཡོངས་སུ་སྤངས་ཤིང་ཡོངས་སུ་ཤེས་པ་ཡིན་ནོ། །དེས་ཀུན་དུ་སྦྱོར་བ་གསུམ་པོ་དེ་དག་སྤངས་པས་རྒྱུན་དུ་ཞུགས་པ་ཡིན། རྣམ་པར་མི་ལྟུང་བའི་ཆོས་ཅན་ཡིན། རྫོགས་པའི་བྱང་ཆུབ་ཏུ་འགྲོ་
[133b.4]བ་ཡིན། རེ་ལྟར་ཐོགས་ན་སྲིད་པ་ལན་བདུན་པ་ཡིན་ཏེ། ལྷ་དང་མི་དག་གི་ནང་དུ་ལན་བདུན་དུ་འཁོར་ཞིང་སོང་ནས་སྡུག་བསྔལ་གྱི་མཐར་བྱེད་པར་འགྱུར་རོ་ཞེས་གསུངས་ཏེ། འདི་ཐམས་ཅད་བརྗོད་པར་བྱ་དགོས་སོ་ཞེས་བྱ་བའི་ཐ་ཚིག་གོ། །ཉོན་མོངས་པ་རྣམས་ནི་རྣམ་པ་གསུམ་
[133b.5]སྟེ་ཞེས་བྱ་བ་ནི་འདིར་མཐོང་བས་སྤང་བར་བྱ་བའི་དབང་དུ་བྱས་པ་ཡིན་ནོ། །འཇིག་ཚོགས་དང་མཐར་འཛིན་པར་ལྟ་བ་དེ་དག་ནི་རྣམ་པ་གཅིག་སྟེ། སྡུག་བསྔལ་མཐོང་བ་ཙམ་གྱིས་སྤང་བར་བྱ་བ་ཡིན་པའི་ཕྱིར་རོ། །ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་རྣམ་པ་གཉིས་སོ། །
[133b.6]ཐེ་ཚོམ་དང་ལོག་པར་ལྟ་བ་དང་ལྟ་བ་མཆོག་ཏུ་འཛིན་པ་རྣམ་པ་བཞིའོ། །དེ་ལ་རྣམ་པ་གཅིག་པ་རྣམས་ཀྱི་སྒོ་ནི་འཇིག་ཚོགས་ལ་ལྟ་བ་ཡིན་ཏེ། དེའི་ཕྱིར་འཇིག་ཚོགས་ལ་ལྟ་བ་སྨོས་པས་མཐར་འཛིན་པར་ལྟ་བ་ཡང་སྨོས་པ་ཡིན་ནོ། །རྣམ་པ་བཞི་པ་རྣམས་ཀྱི་སྒོ་ནི་ཐེ་ཚོམ་ཡིན་ཏེ།
[133b.7]དེ་སྨོས་པས་ལོག་པར་ལྟ་བ་དང་། ལྟ་བ་མཆོག་ཏུ་འཛིན་པ་རྣམས་ཀྱང་སྨོས་པ་ཡིན་ནོ། །ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་དངོས་སུ་སྨོས་པ་ཁོ་ནར་ཟད་དོ། །མཐོང་བས་སྤང་བར་བྱ་བ་འདོད་ཆགས་ལ་སོགས་པ་གང་དག་ཡིན་པ་དེ་དག་ཀྱང་དེ་དག་ལ་དམིགས་པ་
[134a]
[134a.1]ཡིན་པའི་ཕྱིར་བསྡུས་པ་ཁོ་ན་ཡིན་ནོ་ཞེས་བརྗོད་པར་ནུས་སོ། །མཐར་འཛིན་པར་ལྟ་བ་ནི་འཇིག་ཚོགས་ལ་ལྟ་བས་རབ་ཏུ་བཅུག་ཅེས་བྱ་བ་ནི་བདག་ལ་རྟག་པ་དང་ཆད་པའི་མཐར་འཛིན་པའི་ཕྱིར་རོ། །ལྟ་བ་མཆོག་ཏུ་འཛིན་པ་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་
[134a.2]འཛིན་པས་རབ་ཏུ་བཅུག་ཅེས་བྱ་བ་ནི་གང་གིས་འདག་པར་ཡིད་ཆེས་པ་དེ་ལ་མཆོག་ཏུ་འཛིན་པའི་ཕྱིར་རོ། །ལོག་པར་ལྟ་བ་ནི་ཐེ་ཚོམ་གྱིས་རབ་ཏུ་བཅུག་སྟེ་ཞེས་བྱ་བ་ནི་ཐེ་ཚོམ་ཟ་བ་ལོག་པར་ལྟ་བ་ནི་མཉན་པ་དང་བསམས་པའི་སྒོ་ནས་ལོག་པར་ངེས་པ་སྐྱེ་བའི་ཕྱིར་རོ། །དེའི་ཕྱིར་རྩ་བ་བསྡུས་
[134a.3]པས་གྲུབ་པའི་ཕྱིར་མཐར་འཛིན་པ་ལ་སོགས་པ་ཡང་བཤད་པའི་ངོ་བོ་ཡིན་པར་རིག་པར་བྱའོ། །གཞན་དག་ན་རེ་ཞེས་བྱ་བ་ནི་སློབ་དཔོན་འདི་ཉིད་དོ། །ལམ་ནོར་བ་ཞེས་བྱ་བ་ནི་ཇི་ལྟ་ཞེ་ན། ལམ་གཞན་ལ་བརྟེན་པའི་ཕྱིར་ཞེས་བྱ་བ་སྨོས་སོ། །ཀུན་དུ་སྦྱོར་བ་ཐ་མའི་ཆ་དང་མཐུན་
[134a.4]པ་ཞེས་སྨོས་པའི་ཕྱིར་ཤུགས་ཀྱིས་ན་གཞན་གྱི་ཆ་དང་མཐུན་པ་ཡང་ཡོད་དོ་ཞེས་བཤད་པ་ཡིན་པས་དེའི་ཕྱིར། གོང་མའི་ཆ་དང་མཐུན་ལྔ་ཉིད། །ཅེས་བྱ་བ་འདི་སྨོས་ཏེ། ཀུན་དུ་སྦྱོར་བའི་སྤྲོས་པ་ཡིན་ནོ། །དེ་དག་ཀུན་དུ་སྦྱོར་སོགས་ཀྱི། །དབྱེ་བས་རྣམ་པ་ལྔར་བཤད་དོ། །ཞེས་བྱ་
[134a.5]བའི་འབྲེལ་པ་འདིས་ན་ཀུན་དུ་སྦྱོར་བ་བསྟན་པའི་འོག་ཏུ་འཆིང་བ་བསྟན་པའི་སྐབས་ལ་བབས་ཏེ། འཆིང་བ་འདོད་ཆགས་ཐམས་ཅད་ཅེས་བྱ་བ་ནི་རྣམ་པ་དང་ཁམས་ཀྱི་སྒོ་ནས་ཐམས་ཅད་དོ། །ཞེ་སྡང་ཅི་ཞེ་ན་ཐམས་ཅད་དེ་རྣམ་པ་ཁོ་ནའི་སྒོ་ནས་སོ། །གཏི་མུག་ནི་རྣམ་པ་དང་ཁམས་ཀྱི་སྒོ་ནས་
[134a.6]ཐམས་ཅད་དོ། །དམིགས་པ་དང་མཚུངས་པར་ལྡན་པའི་སྒོ་ནས་ཞེས་བྱ་བ་ནི་ཅི་རིགས་པར་རང་དང་གཞན་གྱི་རྒྱུད་ལ་ཡོད་པའི་བདེ་བའི་ཚོར་བ་ལ་ནི་འདོད་ཆགས་རྒྱས་པར་འགྱུར་རོ། །དམིགས་པ་དང་མཚུངས་པར་ལྡན་པ་ཉིད་ཀྱི་སྒོ་ནས་སྡུག་བསྔལ་གྱི་ཚོར་བ་ལ་ནི་ཞེ་སྡང་རྒྱས་པར་འགྱུར་རོ། །
[134a.7]དེ་བདག་ཉིད་ཀྱི་སྒོ་ནས་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལ་ནི་གཏི་མུག་རྒྱས་པར་འགྱུར་རོ། །འདོད་ཆགས་དང་ཞེ་སྡང་དག་ཀྱང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལ་དེ་ཁོ་ན་བཞིན་རྒྱས་པར་འགྱུར་བ་མ་ཡིན་ནམ། ཅིའི་ཕྱིར་གཏི་མུག་ཁོ་ན་བརྗོད་ཅེ་ན། དེའི་
[134b]
[134b.1]ཕྱིར་འདོད་ཆགས་དང་ཞེ་སྡང་དག་ནི་དེ་ལྟ་མ་ཡིན་ནོ་ཞེས་བྱ་བ་སྨོས་ཏེ། འདོད་ཆགས་དང་ཞེ་སྡང་དག་ཀྱང་དེ་ལ་རྒྱས་པར་ནི་འགྱུར་མོད་ཀྱི་གཏི་མུག་ཇི་ལྟ་བ་དེ་ལྟར་ནི་མ་ཡིན་ནོ། །གཏི་མུག་ནི་མི་གསལ་བས་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་མི་གསལ་བ་དང་རྗེས་སུ་
[134b.2]མཐུན་པའི་ཕྱིར་ཤིན་ཏུ་རྒྱས་པར་འགྱུར་རོ། །ཡང་ན་རང་གི་རྒྱུད་ལ་ཡོད་པའི་དམིགས་པའི་སྒོ་ནས་ངེས་པ་ཡིན་ནོ་ཞེས་བྱ་བ་ནི་རང་གི་རྒྱུད་ལ་ཡོད་པའི་བདེ་བ་ལ་སོགས་པ་ཉམས་སུ་མྱོང་བའི་མཐུས་དེ་ལྟར་ངེས་པ་ཡིན་ཏེ། མཚུངས་པར་ལྡན་པའི་སྒོ་ནས་རང་གི་རྒྱུད་ལ་ཡོད་པའི་ཚོར་བ་བདེ་བ་
[134b.3]ལ་ནི་འདོད་ཆགས་རྒྱས་པར་འགྱུར་ལ། སྡུག་བསྔལ་ལ་ནི་ཞེ་སྡང་ངོ་། །སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་ལ་ནི་གཏི་མུག་གོ།། །།བམ་པོ་བཞི་བཅུ་རྩ་གསུམ་པ། གཞན་དག་ན་རེ་འདོད་ཆགས་དང་ཞེ་སྡང་དག་ནི་དེ་ལྟ་མ་ཡིན་ནོ་ཞེས་བྱ་བ་ནི་ཇི་ལྟར་བདེ་བ་
[134b.4]ལ་འདོད་ཆགས་རྒྱས་པར་འགྱུར་བ་ལྟར་ཞེ་སྡང་ནི་དེ་ལྟ་མ་ཡིན་ནོ། །ཡང་ཅི་བདེ་བ་ལ་ཡང་ཞེ་སྡང་རྒྱས་པར་འགྱུར་རམ་ཞེ་ན། དགྲ་བོའི་བདེ་བ་ལ་དམིགས་པའི་སྒོ་ནས་རྒྱས་པར་འགྱུར་རོ། །ཇི་ལྟར་སྡུག་བསྔལ་ལ་ཞེ་སྡང་རྒྱས་པར་འགྱུར་བ་ལྟར་འདོད་ཆགས་ནི་དེ་ལྟ་མ་ཡིན་ནོ། །
[134b.5]ཡང་ཅི་སྡུག་བསྔལ་ལ་ཡང་འདོད་ཆགས་རྒྱས་པར་འགྱུར་རམ་ཞེ་ན། དགྲ་བོའི་སྡུག་བསྔལ་ལ་དམིགས་པའི་སྒོ་ནས་རྒྱས་པར་འགྱུར་རོ། །ཡང་ན་རང་གི་རྒྱུད་ལ་ཡོད་པའི་དམིགས་པའི་སྒོ་ནས་ངེས་པ་ཡིན་ནོ་ཞེས་བྱ་བ་ནི་རྣམ་པ་གཅིག་ཏུ་ན་རང་གི་རྒྱུད་ལ་ཡོད་པའི་བདེ་བ་ལ་
[134b.6]དམིགས་པའམ། མཚུངས་པར་ལྡན་པའི་སྒོ་ནས་འདོད་ཆགས་རྒྱས་པར་འགྱུར་གྱི་གཞན་གྱི་རྒྱུད་ལ་ཡོད་པའི་དགྲ་བོའི་བདེ་བ་ལ་ནི་མ་ཡིན་ནོ། །དེ་བཞིན་དུ་རང་གི་རྒྱུད་ལ་ཡོད་པའི་སྡུག་བསྔལ་ལ་དམིགས་པའམ། མཚུངས་པར་ལྡན་པའི་སྒོ་ནས་ཁོང་ཁྲོ་བ་རྒྱས་པར་འགྱུར་གྱི།
[134b.7]གཞན་གྱི་རྒྱུད་ལ་ཡོད་པ་དགྲ་བོའི་སྡུག་བསྔལ་ལ་ནི་མ་ཡིན་ནོ། །དེ་ལྟར་ན་རང་གི་རྒྱུད་ལ་ཡོད་པའི་དམིགས་པའི་སྒོ་ནས་ངེས་པ་ཡིན་ཏེ། ཚོར་བ་བདེ་བ་ལ་ནི་དམིགས་པ་དང་མཚུངས་པར་ལྡན་པ་དག་གི་སྒོ་ནས་འདོད་ཆགས་རྒྱས་པར་འགྱུར་ལ། སྡུག་བསྔལ་ལ་ནི་ཞེ་སྡང་
[135a]
[135a.1]རྒྱས་པར་འགྱུར་རོ། །སེམས་ཉེ་བར་ཉོན་མོངས་པར་བྱེད་པའི་ཕྱིར་རོ་ཞེས་བྱ་བ་ནི་སེམས་ཉོན་མོངས་པ་ཅན་དུ་བྱེད་པའི་ཕྱིར་རོ། །ཉོན་མོངས་ལས་གཞན་ཉོན་མོངས་ཅན། །སེམས་བྱུང་ཞེས་བྱ་བ་ནི་ཉོན་མོངས་པ་དག་ལས་གཞན་པ་ཞེས་བྱ་བའི་ཐ་ཚིག་
[135a.2]གོ། །ཉེ་བའི་ཉོན་མོངས་པ་ཁོ་ན་ཡིན་ཞེས་བྱ་བ་ནི་འདི་དག་ལ་ཉོན་མོངས་པ་དང་ཉེ་བའི་ངོ་བོའམ། ཉོན་མོངས་པ་ཉེ་བར་འདུག་པ་ཡོད་པས་ཉེ་བའི་ཉོན་མོངས་པ་སྟེ། དེ་དག་ཀྱང་སེམས་ལས་བྱུང་བ་ཁོ་ན་ཡིན་གྱི་སེམས་དང་མི་ལྡན་པ་ནི་མ་ཡིན་ནོ། །དེ་དག་ཀྱང་གཞི་ཕྲན་
[135a.3]ཚེགས་ལས་འབྱུང་བ་གང་དག་ཡིན་པའོ་ཞེས་བྱ་བ་ནི་གསུང་རབ་ཀྱི་ཆ་གཞི་ཕྲན་ཚེགས་ལས་འབྱུང་བ་གང་དག་ཡིན་པ་ཡིན་གྱིས། སེམས་པ་ལ་སོགས་པ་ཁོ་ན་ནི་མ་ཡིན་ནོ་སྙམ་དུ་བསམས་པ་ཡིན་ཏེ། འདི་ལྟ་སྟེ་མི་དགའ་བ་དང་། གླལ་བྱེད་པ་དང་། སེམས་ཞུམ་པ་ཉིད་དང་།
[135a.4]རྨྱ་བ་དང་། ཟས་ཀྱི་དྲོད་མི་ཟིན་པ་ཉིད་དང་། ཐ་དད་པ་ཉིད་ཀྱི་འདུ་ཤེས་དང་། ཡིད་ལ་མི་བྱེད་པ་དང་། ལུས་ཀྱི་གནས་ངན་ལེན་དང་། རུ་གདུག་དང་། འཕྱ་སྨོད་དང་། གནམ་པ་ཉིད་དང་། མི་གནམ་པ་ཉིད་དང་། རང་བཞིན་དུ་མི་འདུག་པ་ཉིད་དང་། འདོད་པའི་རྣམ་པར་
[135a.5]རྟོག་པ་དང་། འཚེ་བའི་རྣམ་པར་རྟོག་པ་དང་། ཉེ་བའི་རྣམ་པར་རྟོག་པ་དང་། ཡུལ་གྱི་རྣམ་པར་རྟོག་པ་དང་། མི་འཆི་བའི་རྣམ་པར་རྟོག་པ་དང་། བརྙས་པ་དང་ལྡན་པའི་རྣམ་པར་རྟོག་པ་དང་། རིགས་སྙེམས་པ་དང་ལྡན་པའི་རྣམ་པར་རྟོག་པ་དང་། མྱ་ངན་དང་། སྡུག་
[135a.6]བསྔལ་དང་། ཡིད་མི་བདེ་བ་དང་། འཁྲུག་པ་ཞེས་བྱ་བ་དག་ཡིན་ནོ། །དེ་ལ་ངོ་ཚ་མེད་པ་དང་ཁྲེལ་མེད་པ་དག་ནི་བཤད་ཟིན་ཏོ་ཞེས་བྱ་བ་ནི། མ་གུས་ངོ་ཚ་མེད་ཁྲེལ་མེད། །ཁ་ན་མ་ཐོ་འཇིགས་མི་ལྟ། །ཞེས་བྱ་བ་ཡིན་ནོ། །ཆོས་དང་ཟང་ཟིང་དང་ཞེས་བྱ་བ་རྒྱས་པར་འབྱུང་བ་ནི་
[135a.7]སེར་སྣ་ནི་ཆོས་དང་ཟང་ཟིང་དང་མཁས་པ་རབ་ཏུ་སྦྱིན་པ་དང་། འགལ་བ་ཅན་སེམས་ཀྱི་ཀུན་དུ་འཛིན་པ་སྟེ། བདག་ལས་གཞན་དུ་མ་འགྲོ་ཤིག་སྙམ་པའི་རྣམ་པ་ནི་སེར་སྣ་ཡིན་ནོ། །སེར་སྣ་ཉིད་སེར་སྣ་ཡིན་པའམ། སེར་སྣ་ཅན་གྱི་ངོ་བོ་ནི་སེར་སྣའོ། །འགྱོད་པ་དང་རྨུགས་པ་ནི་
[135b]
[135b.1]བཤད་ཟིན་ཏེ་ཞེས་བྱ་བ་ནི་ངན་པ་བྱས་པའི་དངོས་པོ་ནི་འགྱོད་པའོ། །འདིར་ནི་འགྱོད་པ་དེ་ལ་དམིགས་པའི་ཆོས་ཡིན་ཞེས་པ་དང་། རྨུགས་པ་ནི་ལུས་དང་སེམས་ལས་སུ་མི་རུང་བ་ཉིད་དོ་ཞེས་བྱ་བ་ཡིན་ནོ། །གཉིད་ནི་སེམས་མངོན་པར་སྡུད་པའོ་ཞེས་བྱ་བ་དེ་ཙམ་ཞིག་བརྗོད་ན་
[135b.2]ནི་སྙོམས་པར་འཇུག་པ་ལ་ཡང་ཐལ་བར་འགྱུར་བས་དེའི་ཕྱིར་ལུས་ཡང་དག་པར་འཛིན་མི་ནུས་པ་ཞེས་བྱ་བས་ཁྱད་པར་དུ་བྱེད་དེ། དེ་ནི་ཉོན་མོངས་པ་ཅན་ཁོ་ན་ཡིན་ནོ། །དེ་དང་འགྱོད་པ་ནི་ཉོན་མོངས་པ་ཅན་ཁོ་ན་ཀུན་ནས་དཀྲིས་པ་ཡིན་ནོ་ཞེས་བྱ་བ་ནི་གཉིད་ནི་ཉོན་མོངས་པ་ཅན་གང་
[135b.3]ཡིན་པ་དེ་ཀུན་ནས་དཀྲིས་པ་ཡིན་གྱི། དགེ་བའམ་ལུང་དུ་མ་བསྟན་པ་གང་ཡིན་པ་དེ་ནི་ཀུན་ནས་དཀྲིས་པ་མ་ཡིན་ཏེ། གཉིད་ནི་རྣམ་པ་གསུམ་དུ་འདོད་དོ། །འགྱོད་པ་ཡང་ཉོན་མོངས་པ་ཅན་གང་ཡིན་པ་དེ་ཀུན་ནས་དཀྲིས་པ་ཡིན་གྱི་དགེ་བ་ནི་མ་ཡིན་ཏེ། དེ་ནི་དགེ་བ་དང་མི་དགེ་བ་
[135b.4]ཡིན་པར་འདོད་དོ། །ཁྲོ་བ་ནི་གནོད་སེམས་དང་རྣམ་པར་འཚེ་བ་མ་གཏོགས་པ་སེམས་ཅན་དང་སེམས་ཅན་མ་ཡིན་པ་ལ་ཀུན་ནས་མནར་སེམས་པ་གང་ཡིན་པའོ་ཞེས་བྱ་བ་ནི་གནོད་སེམས་ནི་ཀུན་ནས་མནར་སེམས་ཀྱི་ཁྱད་པར་སེམས་ཅན་ལ་ཞེ་སྡང་བ་ཡིན་ཏེ། སེམས་ཅན་འདི་རྣམས་
[135b.5]བསད་དམ་བཅིངས་སམ་བརླག་གམ་འདིས་ཕོངས་པར་གྱུར་ཀྱང་ཅི་མ་རུང་སྙམ་པའི་རྣམ་པར་ཞུགས་པ་ནི་གནོད་སེམས་ཡིན་ནོ། །རྣམ་པར་འཚེ་བ་ནི་སེམས་ཅན་ལ་སྙོགས་པ་དང་། རྡེག་པ་དང་། སྐྲག་པར་བྱེད་པ་དང་། བསྡིགས་པ་ལ་སོགས་པའི་ལས་ལ་ཞུགས་པ་ཡིན་ནོ། །
[135b.6]ཁྲོ་བ་ནི་དེ་གཉིས་ལས་གཞན་པ་སེམས་ཅན་དང་སེམས་ཅན་མ་ཡིན་པ་དག་ལ་ཀུན་ནས་མནར་སེམས་པ་ཡིན་ཏེ། འདི་ལྟ་སྟེ། དགེ་སློང་བསླབ་པ་འདོད་པའི་སེམས་འཁྲུགས་པའམ་ཚེར་མ་ལ་སོགས་པ་ལ་འཁྲུགས་པ་ལྟ་བུའོ། །གོ་རིམས་བཞིན་དུ་ཤེས་པ་དང་མི་ཤེས་པ་རྣམས་
[135b.7]ཀྱི་ཡིན་ནོ་ཞེས་ཟེར་རོ་ཞེས་བྱ་བ་ནི། །གཞན་དག་ན་རེ་རྒྱལ་པོ་ལ་སོགས་པས་ཤེས་པས་གང་ཟག་འཆབ་པ་དང་ལྡན་པ་རྣམས་ཀྱི་འཆབ་པ་ནི་སྲིད་པའི་རྒྱུ་མཐུན་པ་ཡིན་ཏེ། བདག་ལ་རྙེད་པ་དང་། བཀུར་སྟི་མེད་པར་གྱུར་ན་མི་རུང་ངོ་སྙམ་པའི་ཕྱིར་རོ། །མི་ཤེས་པ་རྣམས་
[136a]
[136a.1]ཀྱི་ནི་མི་རིག་པའི་རྒྱུ་མཐུན་པ་ཡིན་ཏེ། ལས་བདག་གིར་བྱ་བ་ཉིད་དུ་མ་དད་པ་ནི་ཁ་ན་མ་ཐོ་བ་དེ་འཆབ་ཅིང་གཙང་མར་བྱ་བའི་ཕྱིར་གཞན་ལ་འཆགས་པར་མི་བྱེད་དོ། །དེ་ལྟ་བས་ན་འཆབ་པ་ནི་གཉི་གའི་རྒྱུ་མཐུན་པ་ཡིན་ནོ་ཞེས་ཟེར་རོ། །ཇི་ལྟར་ན་ཁྲེལ་མེད་པ་མ་
[136a.2]རིག་པའི་རྒྱུ་མཐུན་པ་ཡིན་ཞེ་ན། འདི་ལྟར་ཁྲེལ་མེད། ཁ་ན་མ་ཐོ་འཇིགས་མི་ལྟ། །ཞེས་འབྱུང་བའི་ཕྱིར་རོ། །ཐེ་ཚོམ་ལས་འགྱོད་ཅེས་བྱ་བ་ནི་ཉོན་མོངས་པ་ཅན་གང་ཡིན་པ་དེ་ཁོ་ན་སྟེ། ཀུན་ནས་དཀྲིས་པའི་སྐབས་ཡིན་པའི་ཕྱིར་རོ། །གཞན་ཡང་ཉོན་མོངས་དྲི་མ་དྲུག །ཅེས་བྱ་
[136a.3]བ་ནི། དཔེར་ན་ལུས་ལ་དྲི་མ་དག་འབྱུང་བ་དེ་བཞིན་དུ་ཉོན་མོངས་པ་དག་ལས་ཀྱང་སྒྱུ་ལ་སོགས་པའི་དྲི་མ་ལྟ་བུ་འདི་རྣམས་འབྱུང་ངོ་། །གཏམ་རླུང་བསྐུར་བ་ནི་གཞན་དུ་སྒྱུར་བའོ། །རྒྱགས་པ་ནི་སྔར་བཤད་ཟིན་ཏེ། རྒྱགས་པ་ནི། རང་གི་ཆོས་ལ་ཆགས་པ་ཡི། །སེམས་ནི་ཡོངས་
[136a.4]སུ་གཏུགས་པའོ། །ཞེས་བྱ་བ་ཡིན་ནོ། །གང་ཞིག་གང་མཐོང་བས་སྤང་བར་བྱ་བ་དང་མཚུངས་པར་ལྡན་པ་ཞེས་བྱ་བ་ནི་བདེན་པ་གང་ཞིག་མཐོང་བ་ནི་གང་མཐོང་བའོ། །དེ་མཐོང་བས་སྤང་བར་བྱ་བ་ནི་གང་མཐོང་བས་སྤང་བར་བྱ་བའོ། །དེ་དང་མཚུངས་པར་ལྡན་པ་ནི་གང་མཐོང་བས་
[136a.5]སྤང་བར་བྱ་བ་དང་། མཚུངས་པར་ལྡན་པ་སྟེ། དེ་ནི་དེ་མཐོང་བས་སྤང་བར་བྱ་བ་ཡིན་ནོ། །གང་དག་ཅིག་ཡིན་ཞེ་ན། ངོ་ཚ་མེད་པ་ལ་སོགས་པའོ། །དེ་ལས་གཞན་ནི་བསྒོམ་སྤང་བྱ། །དེ་ལས་གཞན་པ་ཞེས་བྱ་བ་ནི་ངོ་ཚ་མེད་པ་ལ་སོགས་པ་ལས་གཞན་པ་ཕྲག་དོག་ལ་སོགས་པ་ནི་
[136a.6]བསྒོམ་པས་སྤང་བར་བྱ་བ་ཁོ་ན་ཡིན་གྱི། མཐོང་བས་སྤང་བར་བྱ་བ་ནི་མ་ཡིན་ནོ། །ཉེ་བའི་ཉོན་མོངས་པ་ལྔ་པོ་དག་ནི་རང་དབང་ཡིན་ཏེ། འདོད་ཆགས་ལ་སོགས་པ་གཞན་གྱི་དབང་དུ་གྱུར་པ་མ་ཡིན་ནོ་ཞེས་བྱ་བའི་ཐ་ཚིག་གོ། །རྨུགས་པ་དང་རྒོད་པ་དང་གཉིད་རྣམས་ནི་མི་དགེ་བ་
[136a.7]དང་ལུང་དུ་མ་བསྟན་པ་དག་ཡིན་ནོ་ཞེས་བྱ་བ་ནི་ཀུན་ནས་དཀྲིས་པའི་སྐབས་ཡིན་པའི་ཕྱིར་གྲུབ་པས་དགེ་བ་ཡང་ཡིན་ནོ་ཞེས་མི་བརྗོད་དོ། །དེ་ཡན་ཆད་ནི་ལུང་དུ་མ་བསྟན་ཞེས་བྱ་བ་ལ་ཅི་རིགས་པར་ཞེས་བྱ་བ་ནི། འདོད་པའི་ཁམས་ཀྱི་གོང་ན་ཇི་སྙེད་སྲེད་པ་སྟེ། དེ་དག་ཀྱང་གཡོ་
[136b]
[136b.1]དང་སྒྱུ་ལ་སོགས་པ་ཡིན་ནོ། །བདག་ཉིད་ལོག་པར་ཀུན་དུ་སྟོན་པས་ཞེས་བྱ་བ་ནི་ཚངས་པ་ཆེན་པོ་དེས་བདག་ཉིད་ལོག་པར་ཀུན་དུ་སྟོན་པས་ཚེ་དང་ལྡན་པ་རྟ་ཐུལ་ལ་འདྲིད་པར་ཞུགས་ཏེ། ཚངས་པ་ཆེན་པོ་འབྱུང་བ་ཆེན་པོ་འདི་དག་མ་ལུས་པར་གང་དུའང་འགག་པར་འགྱུར་ཞེས་
[136b.2]དྲིས་པ་དང་མ་ཤེས་ནས་གཏམ་རླུང་བསྐུར་ཏེ། བདག་ནི་ཚངས་པའོ། །ཚངས་པ་ཆེན་པོའོ། །དབང་ཕྱུག་གོ། །བྱེད་པ་པོའོ། །སྤྲུལ་པ་པོའོ། །འབྱིན་པ་པོའོ། །འབྱིན་བྱེད་དོ། །དངོས་པོ་རྣམས་ཀྱི་ཕར་གྱུར་པ་ཡིན་ནོ་ཞེས་སྒྱུས་འདྲིད་པར་བརྩམས་སོ། །དེའི་འོག་ཏུ་ཚངས་པ་
[136b.3]ཆེན་པོ་དེས་ཚེ་དང་ལྡན་པ་རྟ་ཐུལ་གྱི་ལག་ནས་བཟུང་སྟེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་འདི་སྐད་ཅེས། དེ་བཞིན་གཤེགས་པ་བཞུགས་བཞིན་དུ་བདག་ལ་འདྲི་བར་སེམས་སམ་ཞེས་སྨྲས་སོ། །དེ་ལྟ་བས་ན་དེའི་འདི་ནི་སྒྱུ་ཡིན་པར་སྣང་སྟེ། རང་གི་
[136b.4]འཁོར་གྱིས་བརྙས་པའི་ངོ་ཚ་བས་བདག་ཉིད་ཀྱིས་མི་ཤེས་པ་སྦེད་པ་ན་དེས་དེ་སྐད་དུ་སྨྲས་པ་ཡིན་ནོ། །གཡོ་ནི་བཤད་ཟིན་མོད་ཀྱི་ཞེས་བྱ་བ་ནི་གཡོ་ནི། དེ་ལས་འགྱོད་གཉིད་མི་དགེ་རྣམས། །བསམ་གཏན་དང་པོ་དག་ན་མེད། །ཅེས་བྱ་བ་དེར་ནི་བཤད་མོད་ཀྱི་ཞར་ལ་འོངས་པས་ཡང་
[136b.5]སྨོས་སོ། །ལྔ་བོར་ཏེ་ཞེས་བྱ་བ་ནི་གཡོ་དང་སྒྱུ་དང་རྨུགས་པ་དང་རྒོད་པ་དང་རྒྱགས་པ་རྣམས་སོ། །དེ་དག་ནི་ཐམས་ཅད་ཡིད་ཀྱི་ས་པ་དག་ཡིན་ནོ་ཞེས་བྱ་བ་ནི་གཉིད་དང་ང་རྒྱལ་དག་གོ། །ཉེ་བའི་ཉོན་མོངས་རང་དབང་ཡང་། །ཞེས་བྱ་བ་ནི་ཕྲག་དོག་དང་སེར་སྣ་ལ་སོགས་པའོ། །ཉོན་
[136b.6]མོངས་པའི་ས་མང་པོ་དག་གི་ནང་དུ་བཤད་པ་གང་དག་ཡིན་པའོ་ཞེས་པ་ནི་མ་དད་པ་དང་ལེ་ལོ་དང་བག་མེད་པ་དག་ཁོ་ན་ཡིན་ནོ། །གཞན་དག་ནི་མ་ཡིན་ཏེ། རྨུགས་པ་དང་རྒོད་པ་དག་ནི་འདི་ཉིད་དུ་སྔར་སྨོས་ཟིན་པའི་ཕྱིར་རོ། །གཏི་མུག་ནི་ཉོན་མོངས་པ་ཞེས་སྨོས་པས་བསྡུས་པའི་
[136b.7]ཕྱིར་རོ། །བདེ་བ་དག་དང་ཞེས་བྱ་བ་ནི་བདེ་བའི་ཚོར་བའི་ངོ་བོ་ཉིད་ཀྱི་དབང་པོ་དག་དང་ཞེས་བྱ་བའི་ཐ་ཚིག་གོ། །དགའ་བ་དང་སྐྱོ་བའི་རྣམ་པར་འཇུག་པའི་ཕྱིར་ཞེས་བྱ་བ་ནི་འདོད་ཆགས་ནི་དགའ་བའི་རྣམ་པར་འཇུག་པ་ཡིན་ལ། ཞེ་སྡང་ནི་སྐྱོ་བའི་རྣམ་པར་འཇུག་པ་ཡིན་པའི་ཕྱིར་ཏེ་
[137a]
[137a.1]གོ་རིམས་བཞིན་ནོ། །རྣམ་པར་ཤེས་པ་དྲུག་གི་ས་པ་ཡིན་པའི་ཕྱིར་རོ་ཞེས་བྱ་བ་ནི་རྣམ་པར་ཤེས་པ་ལྔ་པའི་ས་པ་ཡིན་པའི་ཕྱིར་འདོད་ཆགས་ནི་བདེ་བའི་དབང་པོ་དང་མཚུངས་པར་ལྡན་ནོ། །ཞེ་སྡང་ནི་སྡུག་བསྔལ་གྱི་དབང་པོ་དང་མཚུངས་པར་ལྡན་ནོ། །ཡིད་
[137a.2]ཀྱི་རྣམ་པར་ཤེས་པའི་ས་པ་ཡིན་པའི་ཕྱིར་འདོད་ཆགས་ནི་ཡིད་བདེ་བའི་དབང་པོ་དང་མཚུངས་པར་ལྡན་ནོ། །ཞེ་སྡང་ནི་ཡིད་མི་བདེ་བའི་དབང་པོ་དང་མཚུངས་པར་ལྡན་ནོ། །བསོད་ནམས་ཀྱི་ལས་ཅན་རྣམས་དང་སྡིག་པའི་ལས་ཅན་རྣམས་ཀྱི་དང་གོ་རིམས་བཞིན་ནོ་ཞེས་བྱ་བ་ནི་བསོད་ནམས་
[137a.3]ཀྱི་ལས་ཅན་རྣམས་ཀྱི་ལོག་པར་ལྟ་བ་ནི་ཡིད་མི་བདེ་བ་དང་མཚུངས་པར་ལྡན་པ་ཡིན་ཏེ། བསོད་ནམས་བྱེད་པའི་འབད་པ་དོན་མེད་པར་མཐོང་བའི་ཕྱིར་རོ། །སྡིག་པའི་ལས་ཅན་རྣམས་ཀྱི་ལོག་པར་ལྟ་བ་ནི་ཡིད་བདེ་བ་དང་མཚུངས་པར་ལྡན་པ་ཡིན་ཏེ། རང་གིས་བྱས་པའི་སྡིག་པ་འབྲས་བུ་མེད་
[137a.4]པར་མཐོང་བའི་ཕྱིར་རོ། །ལྟ་བ་བཞི་དང་ཞེས་བྱ་བ་ནི་འཇིག་ཚོགས་ལ་ལྟ་བ་དང་། མཐར་འཛིན་པར་ལྟ་བ་དང་། ལྟ་བ་མཆོག་ཏུ་འཛིན་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའོ། །ཇི་ལྟར་ཆད་པར་ལྟ་བ་ཡིད་བདེ་བ་དང་མཚུངས་པར་ལྡན་པ་ཡིན་ཞེ་ན། དེ་མངོན་
[137a.5]པར་འདོད་པའི་ཕྱིར་རོ། །བཏང་སྙོམས་ཀུན་དུ་གནས་སོ་ཞེས་བྱ་བ་ནི་འཇིག་པའི་གནས་སྐབས་ན་གཞན་པའི་ཕྱིར་རོ། །ས་གང་ན་དབང་པོ་ཇི་སྙེད་ཅིག་ཡོད་པ་ཞེས་བྱ་བ་ནི། སྐྱེ་བའི་བསམ་གཏན་དག་ན་ནི། །ཡིད་བདེ་བདེ་དང་བཏང་སྙོམས་དང་། །བཏང་སྙོམས་ཡིད་བདེ་བདེ་བ་དང་། །
[137a.6]བཏང་སྙོམས་བཏང་སྙོམས་ཚོར་བ་ཡོད། །ཅེས་བྱ་བ་ལྟ་བུ་ཁོང་དུ་ཆུད་པར་བྱའོ། །ས་གོང་མ་དེ་ན་ཡང་མིག་དང་རྣ་བ་དང་ལུས་དང་ཡིད་ཀྱི་རྣམ་པར་ཤེས་པའི་ས་པ་རྣམ་པར་ཤེས་པའི་ཚོགས་བཞི་པོ་རྣམས་ནི། བསམ་གཏན་དང་པོ་ཁོ་ན་ན་ཡོད་དེ་བསམ་གཏན་དང་པོ་ན་ནི་བདེ་བའི་དབང་པོ་རྣམ་པར་ཤེས་པའི་
[137a.7]ཚོགས་གསུམ་པ་དང་། ཡིད་བདེ་བའི་དབང་པོ་ཡིད་ཀྱི་རྣམ་པར་ཤེས་པའི་ཚོགས་པ་དང་། བཏང་སྙོམས་ཀྱི་དབང་པོ་རྣམ་པར་ཤེས་པའི་ཚོགས་བཞི་པ་ཡོད་དོ། །དེ་ཡན་ཆད་ཀྱི་ས་པ་ཁོ་ན་ན་ཡོད་དེ། བསམ་གཏན་གཉིས་པ་ན་ནི་ཡིད་བདེ་བ་དང་བཏང་སྙོམས་ཀྱི་དབང་པོ་དག་ཡོད་དོ། །
[137b]
[137b.1]གསུམ་པ་ན་ནི་བདེ་བ་དང་བཏང་སྙོམས་ཀྱི་དབང་པོ་དག་ཡོད་དོ། །བསམ་གཏན་བཞི་པ་དང་གཟུགས་མེད་པ་དག་ན་ནི་བཏང་སྙོམས་ཀྱི་དབང་པོ་ཁོ་ན་ཡོད་དོ། །དེ་ལ་ཕྲ་རྒྱས་ཐམས་ཅད་ཀྱང་ཇི་ལྟར་འོས་འོས་སུ་ཚོར་བའི་དབང་པོ་དང་མཚུངས་པར་ལྡན་པ་ཡིན་ཏེ། དེ་ནི་ཞི་གནས་ཀྱིས་རྒྱུད་
[137b.2]བརླན་པའི་ཕྱིར་དགའ་བ་དང་སྐྱོ་བ་རྣམ་པར་གཞག་པ་ནི་མེད་དོ། །འགྱོད་པ་ལ་སོགས་པ་འདི་དག་ནི་སྐྱོ་བའི་རྣམ་པར་འཇུག་པའི་ཕྱིར། ཡིད་བདེ་བ་དང་མཚུངས་པར་མི་ལྡན་ལ། ཡིད་ཀྱི་ས་པ་ཡིན་པའི་ཕྱིར་སྡུག་བསྔལ་གྱི་དབང་པོ་དང་ཡང་མཚུངས་པར་མི་ལྡན་ནོ། །ཆགས་པའི་
[137b.3]རྒྱུད་ལས་བྱུང་བས་ཞེས་བྱ་བ་ནི་ཆགས་པའི་རྒྱུ་ཅན་ཉིད་ཀྱིས་ཏེ། ཆགས་པས་ཀུན་ནས་བསླང་བ་ཉིད་ཀྱིས་ཞེས་བྱ་བའི་ཐ་ཚིག་གོ། །དེ་དག་དང་རྒྱགས་པ་ཞེས་བྱ་བ་ནི་བདེ་བ་དང་། ཡིད་བདེ་བ་དག་དང་ངོ་། །བསམ་གཏན་གསུམ་པ་ན་ནི་བདེ་བ་དང་མཚུངས་པར་ལྡན་ནོ་ཞེས་བྱ་བ་ནི་རྒྱགས་
[137b.4]པ་ནི་ཡིད་ཀྱི་ས་པ་ཡིན་པའི་ཕྱིར་རོ། །མ་རིག་པ་བཞིན་དུ་ཞེས་བྱ་བ་ནི་ཇི་ལྟར་མ་རིག་པ་ཉོན་མོངས་པ་དང་ཉེ་བའི་ཉོན་མོངས་པ་གང་ལ་ཡང་མཚུངས་པར་ལྡན་པ་དགག་པ་མེད་པ་ལྟར་བཏང་སྙོམས་ཀྱང་དེ་དང་འདྲའོ། །ངོ་ཚ་མེད་པ་དང་ཁྲེལ་མེད་པ་དག་ནི་མི་དགེ་བའི་ས་མང་པོ་པ་ཡིན་
[137b.5]པའི་ཕྱིར་ཏེ། མི་དགེ་ལ་ནི་ཁྲེལ་མེད་དང་། །ངོ་ཚ་མེད་པའོ་ཞེས་འབྱུང་བས་སོ། །རྨུགས་པ་དང་རྒོད་པ་ནི་ཉོན་མོངས་པའི་ས་མང་པོ་པ་ཡིན་པའི་ཕྱིར། རྣམ་པར་ཤེས་པའི་ཚོགས་དྲུག་ལ་ནི་མི་དགེ་བ་དང་ཉོན་མོངས་པ་ཅན་དག་སྲིད་པས་དེའི་ཕྱིར་དེ་དག་ནི་དབང་པོ་ལྔ་ཆར་དང་ཡང་
[137b.6]མཚུངས་པར་ལྡན་པ་སྲིད་དོ། །ཅི་རྨུགས་པ་དང་རྒོད་པ་དང་ཐེ་ཚོམ་ཁམས་གསུམ་པ་དག་གཟུང་ངམ་ཞེས་བྱ་བ་ནི་འདི་རྣམས་ནི་ཁམས་གསུམ་པ་ཡིན་པའི་ཕྱིར་དེ་དག་ཁོ་ན་བཀར་ཏེ་འདྲི་བར་བྱེད་དོ། །མི་དགེ་བའི་ཕུང་པོ་འདི་ནི་མ་འདྲེས་པ་ཞེས་བྱ་བ་རྒྱས་པར་འབྱུང་བ་ནི་དགེ་
[137b.7]སློང་དག་སྒྲིབ་པ་ལྔ་ནི་མི་དགེ་བའི་ཕུང་པོ་ཡིན་ནོ་ཞེས་སྨྲ་བ་དེ་དག་ནི་ཡང་དག་པར་སྨྲ་བ་སྨྲ་བར་འགྱུར་རོ། །ཅིའི་ཕྱིར་ཞེ་ན། དགེ་སློང་དག་འདི་ནི་མི་དགེ་བའི་ཕུང་པོ་མ་འདྲེས་པ་ཡོངས་སུ་རྫོགས་པ་ཡིན་ཏེ། འདི་ལྟ་སྟེ་སྒྲིབ་པ་ལྔའོ་ཞེས་བྱ་བ་རྒྱས་པར་གཅིག་ཏུ་མི་དགེ་བར་
[138a]
[138a.1]གསུངས་པའི་ཕྱིར་རོ། །འདོད་ན་སྒྲིབ་རྣམས་ཡོད་ཀྱི་ཁམས་གཞན་ན་མེད་དོ་ཞེས་བྱ་བ་ནི་འགྲེལ་པ་དང་མདོའི་ཚིག་གཅིག་པ་ཉིད་དུ་སྦྱོར་བ་ཡིན་ནོ། །སྒྲིབ་རྣམས་ཞེས་བྱ་བ་ནི་བསམ་གཏན་དང་སྙོམས་པར་འཇུག་པ་དག་གི་སྒྲིབ་པ་རྣམས་ཞེས་བྱ་བའི་ཐ་ཚིག་གོ། །
[138a.2]མི་མཐུན་དང་། ཟས་དང་བྱ་བ་གཅིག་པའི་ཕྱིར་ཞེས་བྱ་བ་ནི་མི་མཐུན་པ་དང་། ཟས་དང་བྱ་བ་གཅིག་པ་ཅན་ཉིད་ཀྱི་ཕྱིར་ཞེས་བྱ་བའི་ཐ་ཚིག་སྟེ། ངོ་བོའི་རྐྱེན་མེད་ཀྱང་ངོ་བོ་གཙོར་བསྟན་པ་ཡིན་ནོ། །ཡང་ན་མི་མཐུན་པ་དང་ཟས་དང་བྱ་བ་གཅིག་པས་ན་མི་མཐུན་པ་དང་། ཟས་དང་
[138a.3]བྱ་བ་གཅིག་པའི་ཕྱིར་ཞེས་བྱ་བའོ། །མི་མཐུན་པ་དང་གཉེན་པོ་དང་། །ཞེས་བྱ་བ་ནི། འདིར་ཚིག་ལེའུར་བྱས་པ་དང་མཐུན་པར་མི་མཐུན་པ་ནི་གཉེན་པོ་ཡིན་པར་འདོད་དེ། ཉོན་མོངས་པ་དང་འགལ་བའི་ཕྱོགས་ནི་མི་མཐུན་པའི་ཕྱིར་རོ། །ཆོས་མངོན་པ་ལས་ནི་ནག་པོའི་ཕྱོགས་ནི་མི་
[138a.4]མཐུན་པ་ཡིན་ལ་དཀར་པོའི་ཕྱོགས་ནི་གཉེན་པོ་ཡིན་ནོ་ཞེས་བྱ་བར་གྲགས་སོ། །ཁ་ཟས་ཀྱི་དྲོད་མི་ཟིན་པ་ཞེས་བྱ་བ་ནི་མ་འོས་པར་མང་དུ་ཟོས་པའི་ལུས་ཤིག་ཤིག་པོར་འགྱུར་བ་གང་ཡིན་པའོ། །ཟས་མ་ཡིན་པ་ཞེས་བྱ་བ་ནི་གཉེན་པོའོ། རྨུགས་པ་དང་གཉིད་ཀྱིས་ནི་ཤེས་རབ་ཀྱི་
[138a.5]ཕུང་པོ་ལ་ཇི་ཞེ་ན། གནོད་པར་བྱེད་དོ་ཞེས་བྱ་བར་སྐབས་དང་སྦྱར་རོ། །རྟོག་པ་འདི་ལ་ཞེས་བྱ་བ་རྒྱས་པར་འབྱུང་བ་ནི་གོ་རིམས་གང་གི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་ཞེས་ཕུང་པོ་རྣམས་རྣམ་པར་འཇོག་པའི་གོ་རིམས་དེ་ཉིད་ཀྱིས་
[138a.6]དེ་དག་གི་མི་མཐུན་པར་གྱུར་པའི་སྒྲིབ་པ་འདོད་པ་ལ་འདུན་པ་དང་། གནོད་སེམས་དང་། རྒོད་པ་དང་འགྱོད་པ་དང་། རྨུགས་པ་དང་གཉིད་དང་། ཐེ་ཚོམ་ཞེས་འདོན་པར་འགྱུར་ཏེ། ཤེས་རབ་ཀྱི་ཕུང་པོ་བས་ཏིང་ངེ་འཛིན་གྱི་ཕུང་པོ་གོང་ནས་འབྱུང་བའི་ཕྱིར་རྒོད་པ་དང་འགྱོད་པའི་སྒྲིབ་པ་
[138a.7]ལྔར་སྨོས་པར་འགྱུར་བ་ཞིག་ན་དེ་ལྟ་ཡང་ཡིན་ཏེ། དེའི་ཕྱིར་འདི་ནི་གཏན་ཚིགས་སུ་མི་རུང་ངོ་སྙམ་དུ་བསམས་པ་ཡིན་ནོ། །འདི་ལ་ནི་གཏན་ཚིགས་གང་ཡིན་སྙམ་ནས་སྨྲས་པ་དེའི་ཕྱིར་གྲངས་བཞིན་དུ་རྨུགས་པ་དང་གཉིད་དང་རྒོད་པ་དང་འགྱོད་པའི་སྒྲིབ་པ་འདི་གཉིས་ཀྱིས་ཏིང་ངེ་
[138b]
[138b.1]འཛིན་དང་། ཤེས་རབ་ཀྱི་ཕུང་པོ་ལ་གནོད་པར་བྱེད་པ་ཡིན་ནོ། །ཇི་ལྟར་ཞེ་ན་སྨྲས་པ་ཏིང་ངེ་འཛིན་ལ་བརྩོན་པ་ནི་རྨུགས་པ་དང་གཉིད་ཀྱིས་འཇིགས་ཏེ་ངོ་བོ་འདྲ་བ་ལྟ་བུ་ཡིན་པའི་ཕྱིར་རོ། །ཆོས་རབ་ཏུ་རྣམ་པར་འབྱེད་པ་ལ་བརྩོན་པ་ཡང་དེ་དང་འདྲའོ། །ཐེ་ཚོམ་ནི་དེ་ལ་ལངས་ན་ཡང་ཆོས་ལ་
[138b.2]ངེས་པར་རྟོག་པའི་ཚེ་བར་ཆད་བྱེད་དོ། །གཞན་དག་ནི་ཚིག་འདི་སྐད་དུ་རྨུགས་པ་དང་། གཉིད་དང་རྒོད་པ་དང་། འགྱོད་པ་དང་། ཐེ་ཚོམ་ཞེས་བྱ་བར་འདོན་ཅིང་འདི་སྐད་དུ་ཡང་འཆད་དེ། རྨུགས་པ་དང་གཉིད་ནི་ཞི་གནས་ཀྱི་བར་དུ་གཅོད་པར་བྱེད་པ་ཡིན་ལ། རྒོད་པ་དང་འགྱོད་པ་
[138b.3]ནི་ལྷག་མཐོང་གི་བར་དུ་གཅོད་པར་བྱེད་པ་ཡིན། ཐེ་ཚོམ་ནི་ལངས་པ་ལ་ཆོས་ངེས་པར་རྟོག་པའི་ཚེ་བར་ཆད་བྱེད་པ་ཡིན་པས་རྒོད་པ་དང་འགྱོད་པས་འཇིགས་སོ་ཞེས་བྱའོ་ཞེའོ། །གཞན་དག་ནི་གཞན་དུ་བརྗོད་དོ་ཞེས་བྱ་བ་ནི་སྔོན་གྱི་སློབ་དཔོན་དག་གོ། །རྒྱུ་བར་གྱུར་པས་ཞེས་བྱ་བ་ནི་
[138b.4]བསོད་སྙོམས་ཀྱི་ཕྱིར་འབྱམས་པས་སོ། །མཚན་མར་གཟུང་བའི་ཕྱིར་ཞེས་བྱ་བ་ནི། བུད་མེད་ཀྱི་གཟུགས་ཞེས་བྱ་བའམ། བུད་མེད་ཀྱི་སྒྲ་ཞེས་བྱ་བར་གཟུང་བའི་ཕྱིར་རོ། །གནས་པར་གྱུར་པ་ནང་དུ་ཡང་དག་འཇོག་པ་འགྲེང་བའམ། འདུག་པའམ། འཆག་པའམ་དེ་སྔོན་
[138b.5]དུ་འགྲོ་བས་ཏེ། ཡུལ་སྡུག་པ་དང་མི་སྡུག་པ་ལ་མཚན་མར་འཛིན་པ་སྔོན་དུ་འགྲོ་བའམ། ཡུལ་སྡུག་པ་དང་མི་སྡུག་པ་སྔོན་དུ་འགྲོ་བ་དག་གོ། །གོ་རིམས་བཞིན་དུ་རྨུགས་པ་དང་གཉིད་དང་། རྒོད་པ་དང་འགྱོད་པ་དང་། ཐེ་ཚོམ་ནི་ཞི་གནས་དང་ལྷག་མཐོང་དག་ལ་བར་ཆད་བྱེད་ལ་
[138b.6]ཞེས་བྱ་བ་ནི། རྨུགས་པ་དང་གཉིད་ནི་ཞི་གནས་ཀྱི་བར་ཆད་བྱེད་དེ། རྨུགས་པ་དང་གཉིད་དག་ཉེ་བའི་ངོ་བོ་ཉིད་དུ་གནས་པའི་ཕྱིར་རོ། །རྒོད་པ་དང་འགྱོད་པ་དང་ཚོམ་དག་ནི་ལྷག་མཐོང་གི་བར་ཆད་བྱེད་དོ། །རྒོད་པ་དང་། འགྱོད་པ་ཟླས་དབྱེ་བ་གཅིག་པ་ལྟ་བུའི་ངོ་བོར་བྱས་པ་ཐེ་ཚོམ་དང་།
[138b.7]ལྷན་ཅིག་ཡང་ཟླས་དབྱེ་བ་བྱས་ཏེ། རྒོད་པ་དང་འགྱོད་པ་དང་ཐེ་ཚོམ་ནི་རྒོད་པ་དང་འགྱོད་པ་དག་དང་ཐེ་ཚོམ་དག་ཅེས་བྱ་བ་ཡིན་ནོ། །སྐལ་བ་མི་མཉམ་པའི་ཁམས་ཀུན་དུ་འགྲོ་བ་ལོག་པར་ལྟ་བ་ལ་སོགས་པ་སྡུག་བསྔལ་དང་། ཀུན་འབྱུང་མཐོང་བས་སྤང་བར་བྱ་བ་ཉིད་ཀྱིས་ཐ་དད་པ་
[139a]
[139a.1]གཉིས་སུ་གྱུར་པ་རྣམས་གང་གི་ཚེ་གཟུགས་དང་གཟུགས་མེད་པའི་ཁམས་ལ་དམིགས་པའི་གནས་སྐབས་ན་སྡུག་བསྔལ་དང་ཀུན་འབྱུང་བ་ལ་རྗེས་སུ་ཤེས་པ་དང་མཐུན་པའི་ལམ་གྱིས་དམིགས་པ་ཡོངས་སུ་ཤེས་པ་དེའི་ཚེ་ནི་སྔར་སྡུག་བསྔལ་ལ་ཆོས་ཤེས་པ་དང་། ཀུན་
[139a.2]འབྱུང་བ་ལ་ཆོས་ཤེས་པས་ཅི་རིགས་པར་སྤངས་ཟིན་པ་ཉིད་ཀྱི་ཕྱིར་སྤང་བར་མི་འགྱུར་ཏེ། དེ་དག་ནི་འདོད་པ་ན་སྤྱོད་པ་ཡིན་པའི་ཕྱིར་ཆོས་ཤེས་པས་གཞོམ་པར་བྱ་བ་ཡིན་པས་སོ། །འགོག་པ་དང་ལམ་མཐོང་བས་སྤང་བར་བྱ་བ་ཟག་པ་དང་བཅས་པ་ལ་དམིགས་པ་ལྟ་བ་མཆོག་ཏུ་འཛིན་པ་ལ་
[139a.3]སོགས་པ་ཡང་གང་གི་ཚེ་དམིགས་པ་སྡུག་བསྔལ་དང་ཀུན་འབྱུང་བའི་བདེན་པའི་ངོ་བོ་ཉིད་སྡུག་བསྔལ་ལ་ཆོས་ཤེས་པའི་ཕྱོགས་དང་མཐུན་པའམ། རྗེས་སུ་ཤེས་པའི་ཕྱོགས་དང་མཐུན་པས་ཁམས་ཇི་ལྟ་བ་བཞིན་ཡོངས་སུ་ཤེས་པ་དེའི་ཚེ་ན་དེ་དག་སྤོང་བར་མི་འགྱུར་ཏེ། འགོག་པ་དང་ལམ་མཐོང་
[139a.4]བས་སྤང་བར་བྱ་བ་ཡིན་པའི་ཕྱིར་རོ། །ཇི་ལྟར་དེ་དག་སྤང་ཞེ་ན་ཞེས་བྱ་བ་ནི་དམིགས་པ་ཡོངས་སུ་ཤེས་པས་ནི་དེ་དག་སྤོང་བར་མི་རུང་ངོ་སྙམ་དུ་བསམས་པ་ཡིན་ནོ། །རང་གི་ས་པ་ལ་དམིགས་པ་རྣམས་ཞེས་བྱ་བ་ཁྱད་པར་སྨོས་པ་ནི་སྐལ་བ་མི་མཉམ་པའི་ཁམས་སུ་ཀུན་དུ་འགྲོ་བ་བསལ་བའི་ཕྱིར་
[139a.5]རོ། །དེ་ལ་དམིགས་པ་ཡང་དག་པར་ཟད་པས་ཞེས་བྱ་བ་ནི་འདི་དག་ལ་དམིགས་པ་སྐལ་བ་མི་མཉམ་པའི་ཁམས་སུ་ཀུན་དུ་འགྲོ་བ་དེ་དག་ཡོད་པས་ན་དེ་ལ་དམིགས་པ་སྟེ། སྐལ་བ་མི་མཉམ་པའི་ཁམས་སུ་འགྲོ་བ་རྣམས་སོ། །དེ་དག་ཟད་ཅིང་སྤངས་པས་སྐལ་བ་མི་མཉམ་པའི་ཁམས་སུ་
[139a.6]འགྲོ་བ་དེ་དག་ཀུན་དུ་སྤངས་པར་འགྱུར་རོ། །དམིགས་པ་སྤངས་པས་ཞེས་བྱ་བ་ནི་ལྟ་བ་མཆོག་ཏུ་འཛིན་པ་ལ་སོགས་པའི་དམིགས་པ་འགོག་པ་དང་ལམ་མཐོང་བས་སྤང་བར་བྱ་བ་ལོག་པར་ལྟ་བ་ལ་སོགས་པ་སྤངས་པས་ལྟ་བ་མཆོག་ཏུ་འཛིན་པ་ལ་སོགས་པ་ཟག་པ་དང་བཅས་པ་ལ་དམིགས་
[139a.7]པ་དེ་དག་སྤང་བར་འགྱུར་རོ། །གཉེན་པོ་སྐྱེས་པས་ཟད་པར་འགྱུར། །ཞེས་བྱ་བ་ནི་བསྒོམ་པས་སྤང་བར་བྱ་བ་རྣམས་ནི་གཉེན་པོ་སྐྱེས་པ་ཁོ་ནས་ཟད་པར་འགྱུར་གྱི་དམིགས་པ་ཡོངས་སུ་ཤེས་པས་ནི་མ་ཡིན་ནོ་ཞེས་སྟོན་པར་བྱེད་དོ། །འོག་ནས་བཤད་པར་བྱའོ་ཞེས་བྱ་བ་ནི། ས་དང་ས་ན་
[139b]
[139b.1]ཉེས་རྣམས་དགུ། །དེ་བཞིན་དུ་ནི་ཡོན་ཏན་རྣམས། །ཞེས་བྱ་བ་འདི་ནས་འཆད་པར་འགྱུར་རོ། །སྤོང་བ་གཉེན་པོ་ནི་བར་ཆད་མེད་པའི་ལམ་མོ་ཞེས་བྱ་བ་ནི་མི་མཐུན་པའི་དགྲ་བོའི་ཕྱོགས་ནི་གཉེན་པོ་ཡིན་པས་སྤོང་བ་གཉེན་པོའོ། །རྣམ་པར་གྲོལ་བའི་ལམ་ཡང་གཉེན་པོ་ཡིན་མོད་ཀྱི་སྤོང་བའི་
[139b.2]ཆེད་དུ་ནི་མ་ཡིན་པས་དེའི་ཕྱིར་དེ་སྐད་དུ་ཁྱད་པར་སྨོས་སོ། །ཡང་ན་འདིས་སྤོང་བར་བྱེད་པས་སྤང་བ་ཡིན་ལ། འདི་ནི་སྤོང་བ་ཡང་ཡིན་གཉེན་པོ་ཡང་ཡིན་པས་སྤོང་བ་གཉེན་པོ་སྟེ། འདི་ལྟ་སྟེ། སྡུག་བསྔལ་ལ་ཆོས་ཤེས་པའི་བཟོད་པའོ། །གཞི་གཉེན་པོ་ནི་དེ་ཡན་ཆད་ཀྱི་ལམ་གང་ཡིན་
[139b.3]པ་ཞེས་བྱ་བ་ནི་བར་ཆད་མེད་པའི་ལམ་དེ་ཡན་ཆད་ཀྱི་ལམ་གང་ཡིན་པ་དེ། དེ་ནི་དེའི་ཐོབ་པ་ཀུན་དུ་འཛིན་པའི་ཕྱིར་སྤངས་པའི་གཞི་གཉེན་པོ་ཡིན་ཏེ། འདིས་ཀུན་དུ་འཛིན་པས་ན་གཞིའོ། །དེ་ཉིད་གཉེན་པོ་ཡིན་པས་ན་གཞི་གཉེན་པོ་སྟེ་འདི་ལྟ་སྟེ་སྡུག་བསྔལ་ལ་ཆོས་ཤེས་པའི་བཟོད་
[139b.4]པའི་གོང་མ་སྡུག་བསྔལ་ལ་ཆོས་ཤེས་པའོ། །དེའི་ཕྱིར་རྒྱུ་གང་གིས་དེ་སྤངས་པའི་ཐོབ་པ་ཞེས་བྱ་བ་རྒྱས་པར་སྨོས་ཏེ། ལམ་གང་གིས་དེའི་ཐོབ་པ་ཀུན་དུ་འཛིན་པར་བྱེད་པ་ཡིན་ནོ། །ཁྱད་པར་གྱི་ལམ་དང་བར་ཆད་མེད་པའི་ལམ་གྱིས་ཀྱང་དེའི་ཐོབ་པ་རྒྱུན་མི་འཆད་པའི་ཕྱིར་བར་ཆད་མེད་
[139b.5]པའི་ལམ་གྱིས་སྤང་བའི་ཐོབ་པ་དེའི་ཀུན་དུ་འཛིན་པས་དེ་ཡང་གཞི་གཉེན་པོ་ཡིན་ནོ། །ཐག་བསྲིང་བའི་ངོ་བོའི་གཉེན་པོ་ནི་ཞེས་བྱ་བ་རྒྱས་པར་འབྱུང་བ་ནི་གང་གི་ཉོན་མོངས་པའི་ཐོབ་པ་སྲིང་བར་བྱེད་པ་ནི་ཐག་བསྲིང་བའི་ངོ་བོའོ། །དེ་ཉིད་གཉེན་པོ་ཡིན་པས་ན་ཐག་བསྲིང་བའི་ངོ་བོའི་གཉེན་པོའོ། །
[139b.6]ཡང་ན་ཐག་བསྲིང་བའི་ངོ་བོ་ནི་ཐག་བསྲིང་བར་འགྱུར་བའོ། །དེའི་གཉེན་པོ་ནི་ཐག་བསྲིང་བའི་ངོ་བོ་གཉེན་པོའོ། །རྣམ་པར་གྲོལ་བ་ཡན་ཆད་ཀྱི་ལམ་གང་ཡིན་པ་སྟེ་ཞེས་བྱ་བ་ནི་རྣམ་པར་གྲོལ་བའི་ལམ་སྡུག་བསྔལ་ལ་ཆོས་ཤེས་པ་གང་ཡིན་པ་དེ་ཡན་ཆད་ཀྱི་ལམ་སྡུག་བསྔལ་ལ་རྗེས་སུ་
[139b.7]ཤེས་པའི་བཟོད་པ་ལ་སོགས་པ་གང་ཡིན་པ་དེ་ནི་ཐག་བསྲིང་བའི་ངོ་བོ་གཉེན་པོ་ཡིན་ནོ་ཞེས་སྟོན་པར་བྱེད་དོ། །གཞན་དག་ན་རེ་རྣམ་པར་གྲོལ་བའི་ལམ་ཡང་ཡིན་ཞེས་བྱ་བ་ནི་རྣམ་པར་གྲོལ་བའི་ལམ་དང་པོ་དེ་ཡང་ཐག་བསྲིང་བའི་ངོ་བོ་གཉེན་པོ་ཞེས་བྱ་སྟེ། དེས་ཀྱང་ཉོན་མོངས་
[140a]
[140a.1]པའི་ཐོབ་པ་དེ་ཐག་སྲིང་བར་བྱེད་དོ་ཞེས་ཟེར་རོ། །དེ་ལྟ་ན་རྣམ་པར་གྲོལ་བའི་ལམ་ནི་གཞི་གཉེན་པོ་དང་ཐག་བསྲིང་བའི་ངོ་བོ་གཉེན་པོ་ཞེས་བྱ་བ་མིང་གཉིས་ཐོབ་བོ་ཞེས་བཤད་པ་ཡིན་ནོ། །ཁམས་དེ་ལ་སྐྱོན་དུ་མཐོང་ནས་རྣམ་པར་སུན་འབྱིན་པར་བྱེད་པའོ་ཞེས་བྱ་བ་
[140a.2]ནི་གང་གིས་ཁམས་དེ་མི་རྟག་པ་ལ་སོགས་པའི་རྣམ་པར་སུན་འབྱིན་པའོ་ཞེས་བྱ་བའི་ཐ་ཚིག་གོ། །དེ་ལྟ་ན་སྤོང་བའི་གཉེན་པོ་ལ་སོགས་པ་སྡུག་བསྔལ་ཀུན་འབྱུང་ལ་དམིགས་པ་གང་ཡིན་པ་དེ་ཡང་རྣམ་པར་སུན་འབྱིན་པ་གཉེན་པོ་ཡིན་ནོ་ཞེས་བསྟན་པར་འགྱུར་རོ། །ཡང་འདི་དག་
[140a.3]གི་གོ་རིམས་འདི་ནི་ཆོས་ལེགས་པར་འགྱུར་རོ་ཞེས་ཟེར་བ་ནི་སློབ་དཔོན་ཡིན་ཏེ། ཐེམ་སྐས་ཀྱི་ཚུལ་ལ་བརྟེན་པའི་ཕྱིར་དང་མཚན་ཉིད་མ་འཆོལ་བའི་ཕྱིར་གོ་རིམས་ཆེས་ལེགས་པ་ཡིན་ནོ་ཞེས་སྟོན་པར་བྱེད་དོ། །སྡུག་བསྔལ་དང་ཀུན་འབྱུང་ལ་དམིགས་པ་སྦྱོར་བའི་ལམ་མོ་
[140a.4]ཞེས་བྱ་བ་ནི་དྲོ་བར་གྱུར་པ་ལ་སོགས་པའི་ལམ་ཁོ་ན་ཡིན་པར་གཟུང་གི་བར་ཆད་མེད་པའི་ལམ་ལ་སོགས་པ་ནི་མ་ཡིན་ཏེ། དེ་ནི་སྤོང་བ་གཉེན་པོའི་ཆེད་དུ་རྣམ་པར་གཞག་པའི་ཕྱིར་རོ། །བར་ཆད་མེད་པའི་ལམ་ཐམས་ཅད་དོ་ཞེས་བྱ་བ་ནི་དུས་ཕྱིས་འབྱུང་བ་གང་ཡིན་པ་གཞན་ཡང་ཡིན་
[140a.5]ནོ། །རྣམ་པར་གྲོལ་བའི་ལམ་མོ་ཞེས་བྱ་བ་ནི་ཐམས་ཅད་དོ་ཞེས་བྱ་བ་ཉིད་དུ་ཡང་སྐབས་དང་སྦྱར་རོ། །ཁྱད་པར་གྱི་ལམ་ནི་འདིར་འདི་གསུམ་ལས་མ་གཏོགས་པ་གང་ཡིན་པ་དེ་ཡིན་པར་ཡོངས་སུ་གཟུང་ངོ་། །མཚུངས་པར་ལྡན་པ་ལས་ནི་ཉོན་མོངས་པ་རྣམ་པར་དབྱེ་བར་མི་
[140a.6]ནུས་སོ་ཞེས་བྱ་བ་ནི་རང་གི་ཚོགས་ལས་དགའ་བར་མི་ནུས་པའི་ཕྱིར་རོ། །རེ་ཞིག་མ་འོངས་པ་ནི་རྣམ་པར་ཕྱེ་ཟིན་པ་ཡང་དངོས་པོ་དེ་ལ་དམིགས་ནས་མི་སྐྱེའོ་ཞེས་བྱ་བ་ནི་གཏན་ཚིགས་དེས་ན་དམིགས་པ་ལས་རྣམ་པར་དབྱེ་བར་ཡང་ནུས་གྲང་ན། དངོས་པོ་གང་ཞིག་ལ་དམིགས་
[140a.7]ནས་སྐྱེས་པའི་འདས་པ་གོ་ཇི་ལྟར་ནུས་ཏེ། དམིགས་པར་བྱས་པའི་དངོས་པོ་དམིགས་པ་མ་ཡིན་པར་བྱས་པར་ནི་མི་ནུས་སོ། །དེ་ཡང་མ་ངེས་ཏེ་ཞེས་བྱ་བ་ནི་དམིགས་པ་ཡོངས་སུ་ཤེས་པ་དང་། དེ་ལ་དམིགས་པ་ཡང་དག་པར། །ཟད་དང་དམིགས་པ་སྤངས་པས་སོ། །
[140b]
[140b.1]གཉེན་པོ་སྐྱེས་པས་ཟད་པར་འགྱུར། །ཞེས་རྣམ་པ་བཞིས་ཉོན་མོངས་པ་ཟད་པར་འདོད་དེ། དེའི་ཕྱིར་དམིགས་པ་ཡོངས་སུ་ཤེས་པས་ཞེས་བྱ་བ་ནི་མ་ངེས་པ་ཡིན་ནོ། །དེ་ལྟ་བས་ན་འདི་བརྗོད་པར་བྱ་དགོས་སོ་ཞེས་བྱ་བ་ནི་འདི་ལ་ལན་གདབ་དགོས་སོ་ཞེས་བྱ་བའི་ཐ་ཚིག་གོ། །འདི་
[140b.2]ལ་སློབ་དཔོན་འདུས་བཟང་ལན་འདེབས་པ་ནི་ཉོན་མོངས་པ་རྣམས་ནི་དམིགས་པ་ལས་སྤང་བར་བྱ་བ་ཡིན་ཏེ། དམིགས་པ་ཡོངས་སུ་ཤེས་པའི་སྟོབས་ཀྱིས་ཉོན་མོངས་པ་རྣམས་སྤང་བར་འགྱུར་བས་སོ། །ཕྲ་རྒྱས་ཀྱི་དམིགས་པ་ནི་རྣམ་པ་གཉིས་ཏེ། ལྡན་པར་འགྱུར་བའི་དངོས་པོ་དང་
[140b.3]ལྡན་པར་མི་འགྱུར་བའི་དངོས་པོའོ། །དེ་ལ་གང་ཟག་གི་རྒྱུད་ལ་ལྡན་པར་འགྱུར་བའི་དངོས་པོའི་ཡུལ་ཅན་རྣམས་དང་། དེའི་ཡུལ་ཅན་མ་ཡིན་པའི་ཕྲ་རྒྱས་དེ་དག་གི་སྟོབས་ཀྱིས་བསྐྱེད་པ་རྣམས་ཀྱི་ཐོབ་པ་ཉོན་མོངས་པ་མ་འོངས་པ་དང་འདས་པའི་རྒྱུ་དང་འབྲས་བུར་གྱུར་པ་ནི་གང་ཟག་
[140b.4]གི་རྒྱུད་ཉོན་མོངས་པ་ཅན་མ་ཡིན་པའི་སེམས་ལ་ཡང་རྒྱུན་མི་འཆད་པར་རབ་ཏུ་འབྱུང་ལ། ལྡན་པར་མི་འགྱུར་བའི་དངོས་པོའི་ཡུལ་ཅན་རྣམས་དང་། དེའི་ཡུལ་ཅན་མ་ཡིན་པ་དེའི་ཡུལ་ཅན་གྱི་ཉོན་མོངས་པ་དག་གི་རྗེས་ལ་ཀུན་དུ་འབྱུང་བའི་ཉོན་མོངས་པ་རྣམས་ཀྱི་ཐོབ་པ་ཡང་དེ་དང་
[140b.5]འདྲ་བར་རིག་པར་བྱའོ། །དེ་ནི་མ་འོངས་པ་རྣམས་སྐྱེ་བའི་རྐྱེན་དུ་འགྱུར་བའི་ཕྱིར་རྒྱུར་གྱུར་པ་ཡང་ཡིན་ལ་འདས་པ་རྣམས་ཀྱི་རྒྱུ་མཐུན་པར་འགྱུར་བའི་ཕྱིར་འབྲས་བུར་གྱུར་པ་ཡང་ཡིན་ནོ། །ཉོན་མོངས་པ་རྣམས་ནི་དེས་ཀུན་དུ་གཟུང་བའི་ཕྱིར་དེ་ཡང་སྤོང་བ་གཉེན་པོ་རྒྱུ་མཐུན་པ་ཐོབ་པ་
[140b.6]དང་། ཕྲད་པར་འགལ་ལོ། །དེའི་ཕྱིར་དམིགས་པ་གང་ཞིག་གིས་སྐྱེས་པའི་ཉོན་མོངས་པ་རྣམས་ནི་གཞན་ལ་དམིགས་པའི་ཉོན་མོངས་པ་དག་ཀྱང་རབ་ཏུ་འབྱུང་བར་བྱེད་ལ་དེ་ལ་དམིགས་པ་སྤོང་བ་གཉེན་པོའི་རྒྱུ་མཐུན་པ་སྐྱེས་ན་ཉོན་མོངས་པ་དེ་དག་དེ་ལ་དམིགས་པ་ཡིན་ཡང་རྒྱུ་དང་འབྲས་
[140b.7]བུ་དང་བྲལ་ན་དེ་དག་གི་ཐོབ་པ་བཅོམ་པ་ལ་སྤངས་པ་ཞེས་བྱའོ། །དེ་བས་ན་གང་གི་ཕྱིར་ཉོན་མོངས་པའི་ཡུལ་འགའ་ཞིག་གི་དངོས་པོ་ཇི་ལྟ་བ་བཞིན་ཡོངས་སུ་མ་ཤེས་ན་རྒྱུད་ལ་དེའི་ཡུལ་ཅན་གྱི་ཉོན་མོངས་པའི་སྟོབས་ཀྱིས་དེའི་ཡུལ་ཅན་མ་ཡིན་པའི་ཉོན་མོངས་པ་རྣམས་ཀྱི་ཐོབ་པ་
[141a]
[141a.1]མ་འོངས་པ་དང་། འདས་པའི་རྒྱུ་དང་འབྲས་བུར་གྱུར་པ་དངོས་པོ་ཇི་ལྟ་བ་བཞིན་མ་ཡིན་པར་རབ་ཏུ་འབྱུང་བ་དེའི་ཕྱིར་དམིགས་པ་ལས་ཉོན་མོངས་པ་སྤང་བར་བྱ་བ་ཡིན་ནོ་ཞེས་བྱ་བར་འདོད་དོ་ཞེས་ཟེར་རོ། །དེ་ལ་དམིགས་པ་སྤངས་པ་ལ་སོགས་པས་ཀྱང་ཉོན་མོངས་པ་སྤང་བར་
[141a.2]འགྱུར་རོ་ཞེས་བྱ་བར་འདོད་པ་མ་ཡིན་ནམ་ཅི་སྟེ་དམིགས་པ་ཡོངས་སུ་ཤེས་པའི་སྟོབས་ཀྱིས་ཉོན་མོངས་པ་རྣམས་སྤང་བར་འགྱུར་ཞེས་བྱ་བ་འདི་སྨྲས་ཤེ་ན། བསམ་པ་ནི་དེ་དག་ཀྱང་སྡུག་བསྔལ་ལ་སོགས་པ་ཡོངས་སུ་ཤེས་པའི་སྟོབས་ཁོ་ནས་སྤང་བར་འགྱུར་ཏེ། །དེ་ཡོད་པའི་ངོ་བོ་དང་ལྡན་
[141a.3]པས་དེ་ཡོད་པའི་ངོ་བོ་དང་ལྡན་པའི་ཕྱིར་རོ། །གང་དག་གཉེན་པོ་སྐྱེས་པས་སྤོང་བར་བརྗོད་པ་བསྒོམ་པས་སྤང་བར་བྱ་བའི་ཉོན་མོངས་པ་དེ་དག་ཀྱང་དམིགས་པ་སྡུག་བསྔལ་གྱི་བདེན་པ་ལ་སོགས་པ་ཡོངས་སུ་ཤེས་པ་ཁོ་ནས་སྤང་བར་འགྱུར་རོ་ཞེས་བྱ་བར་ཁོང་དུ་ཆུད་པར་བྱའོ། །དེ་ལ་དམིགས་
[141a.4]པས་སྤངས་པ་ལ་སོགས་པས་ཀྱང་ཉོན་མོངས་པ་རྣམས་སྤང་བར་འགྱུར་རོ་ཞེས་བྱ་བ་གང་ཡིན་པ་དེ་ནི་རྣམ་པར་གཞག་པ་ཙམ་དུ་ཟད་དོ་ཞེས་བྱ་བ་ཡིན་པར་མངོན་ནོ། །རང་གི་རྒྱུད་ལ་ཡོད་པ་ནི་ཐོབ་པ་ཆད་པས་སོ་ཞེས་བྱ་བ་རྒྱས་པར་འབྱུང་བ་ནི་རང་གི་རྒྱུད་ཀྱི་ཉོན་མོངས་པ་ནི་ཐོབ་པ་དང་བྲལ་བས་
[141a.5]སྤངས་པར་བརྗོད་པར་བྱའོ། །གཞན་གྱི་རྒྱུད་ཀྱི་ཉོན་མོངས་པ་ནི་ཐོབ་པ་ཆད་པས་མ་ཡིན་ཏེ། རང་གི་རྒྱུད་ལ་དེའི་ཐོབ་པ་མེད་པའི་ཕྱིར་རོ། །འོ་ན་ཅི་ཞེ་ན། དེ་ལ་དམིགས་པའི་ཉོན་མོངས་པ་རང་གི་རྒྱུད་ལ་ཡོད་པ་སྤངས་པས་ཏེ་གཞན་གྱི་རྒྱུད་ཀྱི་ཉོན་མོངས་པ་ལ་དམིགས་པ་དང་རང་གི་རྒྱུད་ལ་
[141a.6]ཡོད་པའི་ཐོབ་པ་ཆད་པས་སོ་ཞེས་བྱ་བའི་དོན་ཏོ། །གཟུགས་དགེ་བ་དང་མི་དགེ་བ་དང་ལུང་དུ་མ་བསྟན་པ་ཐམས་ཅད་དང་ཉོན་མོངས་པ་ཅན་མ་ཡིན་པ་ཞེས་བྱ་བ་དགེ་བ་ཟག་པ་དང་བཅས་པ་དང་མ་བསྒྲིབས་ལ་ལུང་དུ་མ་བསྟན་པ་གཟུགས་ཅན་མ་ཡིན་པ་ཡང་དེ་ཁོ་ན་བཞིན་དུ་དེ་དག་ལ་
[141a.7]དམིགས་པའི་ཉོན་མོངས་པ་དག་རང་གི་རྒྱུད་ལ་ཡོད་པ་སྤངས་པས་སྤངས་པར་བརྗོད་པར་བྱའོ། །འབྱུང་དང་ཚུལ་ཁྲིམས་ཕྱོགས་དང་ནི། །དུས་གཉིས་རིང་བ་ཉིད་ལྟ་བུའོ། །ཞེས་བྱ་བ་ལ་ལྟ་བུའོ་ཞེས་བྱ་བ་ནི་དཔེར་བརྗོད་པ་སྟེ། དཔེར་ན་ཞེས་བྱ་བའི་དོན་དུ་བལྟ་བར་བྱའོ། །མཚན་ཉིད་
[141b]
[141b.1]ཀྱིས་ནི་མཚན་ཉིད་ཀྱིས་རིང་བ་ཉིད་དེ། དཔེར་ན་འབྱུང་བ་རྣམས་ལྟ་བུ་སྟེ། ཆུའི་ཁམས་ཀྱང་སའི་ཁམས་ལས་མཚན་ཉིད་ཐ་དད་ལ་སའི་ཁམས་ཀྱང་དེ་ལས་མཚན་ཉིད་ཐ་དད་པ་ནི་རིང་བ་ཡིན་ནོ། །མི་མཐུན་པ་ཉིད་ཀྱིས་ནི་གཉེན་པོས་རིང་བ་ཉིད་དེ། དཔེར་ན་འཆལ་བའི་ཚུལ་ཁྲིམས་ལས་
[141b.2]ཚུལ་ཁྲིམས་ལྟ་བུའོ། །ཡུལ་རྣམ་པར་འཆད་པས་ནི་ཡུལ་གྱིས་རིང་བ་ཉིད་དེ། དཔེར་ན་ཤར་གྱི་རྒྱ་མཚོ་ལས་ནུབ་ཀྱི་རྒྱ་མཚོ་ལྟ་བུའོ་དུས་ཀྱི་ནི་དུས་ཀྱིས་རིང་བ་ཉིད་དེ། དཔེར་ན་འདས་པ་དང་མ་འོངས་པའི་དུས་གཉིས་ལྟ་བུའོ། །འདས་པ་དང་མ་འོངས་པ་དེ་ནི་རིང་བ་ཞེས་བཤད་དེ། གང་
[141b.3]ནས་བཤད་ཅེ་ན། ཆོས་མངོན་པ་ལས་ཏེ། འདི་སྐད་དུ་ཆོས་རིང་བ་དག་གང་ཞེ་ན། འདས་པ་དང་མ་འོངས་པའི་ཆོས་རྣམས་སོ། །ཆོས་ཉེ་བ་དག་གང་ཞེ་ན། ད་ལྟར་བྱུང་བའི་ཆོས་རྣམས་དང་། འདུས་མ་བྱས་སོ་ཞེས་འབྱུང་ངོ་། །དེ་ནི་དུས་ཐ་དད་པ་ཉིད་ཀྱིས་རིང་བ་ཡིན་གྱི་ཞེས་བྱ་བ་ནི་འདས་
[141b.4]མ་ཐག་པ་དང་སྐྱེ་བར་འགྱུར་བ་ཞེས་བྱ་བ་སྐྱེ་བ་ལ་མངོན་དུ་ཕྱོགས་པའི་མ་འོངས་པ་གང་ཡིན་པ་ཞེས་བྱ་བའི་ཐ་ཚིག་གོ། །ཡུན་རིང་མོ་ཞིག་ནི་བྱུང་བ་དང་འབྱུང་བ་ཉིད་ཀྱིས་ནི་མ་ཡིན་ནོ་ཞེས་བྱ་བ་ནི་ཡུན་རིང་མོ་ཞིག་ན་བྱུང་བར་གྱུར་པ་ཉིད་ཀྱིས་འདས་པ་ཡང་མ་ཡིན་ལ། འབྱུང་བ་ཉིད་ཀྱིས་མ་
[141b.5]འོངས་པ་ཡང་མ་ཡིན་ནོ་ཞེས་བྱ་བའི་ཐ་ཚིག་གོ། །ད་ལྟར་ཡང་དེ་བཞིན་དུ་རིང་བར་འགྱུར་རོ་ཞེས་བྱ་བ་ནི་དུས་ཐ་དད་པ་ཉིད་ཀྱིས་ན་ད་ལྟར་བྱུང་བའི་དུས་ཉིད་ཀྱིས་ད་ལྟར་ཡང་རིང་བར་འགྱུར་ཏེ། དཔེར་ན་འདས་པ་དང་མ་འོངས་པའི་དུས་ཉིད་ཀྱིས་འདས་པ་དང་མ་འོངས་པ་ལྟ་བུའོ། །འོ་ན་ནི་བྱེད་
[141b.6]པས་རིང་བ་ཡིན་ནོ་ཞེས་བྱ་བ་ནི་བྱེད་པ་ཞིག་པ་ནི་འདས་པ་ཡིན་ལ། བྱེད་པ་མ་ཐོབ་པ་ནི་མ་འོངས་པ་ཡིན་པས་འདས་པ་དང་མ་འོངས་པ་དེ་རིང་བ་ཞེས་བྱའོ། །འདུས་མ་བྱས་ཇི་ལྟར་ཉེ་བ་ཉིད་དུ་འགྲུབ་ཅེས་བྱ་བ་ནི་དེ་ལ་བྱེད་པ་མེད་པའི་ཕྱིར་ཉེ་བ་ཉིད་དུ་མི་འགྱུར་བ་ཞིག་ན་བསྟན་བཅོས་ལས་ཆོས་ཉེ་
[141b.7]བ་དག་གང་ཞེ་ན། ད་ལྟར་བྱུང་བའི་ཆོས་རྣམས་དང་། འདུས་མ་བྱས་སོ་ཞེས་འབྱུང་བའི་ཕྱིར་དེར་ཡང་འདོད་དོ། །དེ་ཐམས་ཅད་ཐོབ་པའི་ཕྱིར་རོ་ཞེས་བྱ་བ་ནི་འདུས་མ་བྱས་སོ་སོར་བརྟགས་པས་འགོག་པ་དང་སོ་སོར་བརྟགས་པ་མ་ཡིན་པས་འགོག་པ་དེའི་ཐོབ་པ་ཡུལ་ཐམས་ཅད་དུ་སྐྱེ་
[142a]
[142a.1]བའི་ཕྱིར་རོ། །འདས་པ་དང་མ་འོངས་པ་དག་ལ་ཡང་ཐལ་བར་འགྱུར་རོ་ཞེས་བྱ་བ་ནི་དགེ་བ་ལ་སོགས་པ་འདས་པ་དང་མ་འོངས་པའི་ཐོབ་པ་ཡུལ་ཐམས་ཅད་དུ་འབྱུང་བས་འདས་པ་དང་མ་འོངས་པ་ཉེ་བ་ཉིད་དུ་ཐལ་བར་འགྱུར་རོ། །ནམ་མཁའ་ཡང་ཇི་ལྟར་ཉེ་བ་ཡིན་ཞེས་བྱ་
[142a.2]བ་ནི་ནམ་མཁའ་ཡང་ཇི་ལྟར་ཉེ་བ་ཡིན་ཏེ། དེ་ལ་ནི་ཐོབ་པ་མེད་དོ། །འདས་པ་དང་མ་འོངས་པའི་ཕན་ཚུན་རིང་བ་ཡིན་ཞེས་བྱ་བ་ནི་མ་འོངས་པ་ཡང་འདས་པ་ལས་རིང་ལ་འདས་པ་ཡང་མ་འོངས་པ་ལས་རིང་ངོ་ཞེས་བྱ་བའི་ཐ་ཚིག་གོ། །འདུས་མ་བྱས་ཀྱང་ཆོད་པ་མེད་པའི་ཕྱིར་ཞེས་བྱ་བ་ནི་ཇི་ལྟར་
[142a.3]ད་ལྟར་གྱི་འདས་པ་དང་མ་འོངས་པ་ལྟར་གང་གིས་ཀྱང་བར་དུ་ཆོད་པ་མེད་དེ་དེ་ལྟར་ན་ཉེ་བ་ཉིད་ཡིན་ནོ། །དེ་ལྟ་ན་ཡང་ཞེས་བྱ་བ་ནི་རྟོག་པ་དེ་ལ་ཡང་འདས་པ་དང་མ་འོངས་པ་གང་ཡིན་པ་དེ་ད་ལྟར་དང་ཉེ་བའི་ཕྱིར་རིང་བ་དང་ཉེ་བ་ཞེས་བྱ་བ་རྒྱས་པར་གཉི་གར་འགྱུར་ཏེ། འདས་པ་དེ་ད་ལྟར་གྱིས་
[142a.4]བར་དུ་ཆོད་པའི་ཕྱིར་མ་འོངས་པ་ལས་རིང་བ་ཡང་ཡིན་ལ། ད་ལྟར་དང་བར་དུ་མ་ཆོད་པའི་ཕྱིར་ཉེ་བ་ཡང་ཡིན་ཞེས་བྱ་བར་ཡང་འགྱུར་ཏེ། མ་འོངས་པ་ཡང་དེ་བཞིན་དུ་སྦྱོར་བར་བྱའོ། །འདི་སྐད་དུ་རིགས་པར་འགྱུར་རོ་ཞེས་བྱ་བ་ནི་སློབ་དཔོན་རང་གི་གཞུང་ལུགས་ཡིན་ཏེ། མ་འོངས་པ་ནི་
[142a.5]ཆོས་ཀྱི་རང་གི་མཚན་ཉིད་ལས་རིང་བ་ཡིན་ནོ། །ཅིའི་ཕྱིར་ཞེ་ན། མ་ཐོབ་པའི་ཕྱིར་ཏེ། འདི་ལྟར་མ་འོངས་པས་ནི་རང་གི་མཚན་ཉིད་མ་ཐོབ་པོ། །ཡང་ན་འདི་ལྟར་དེ་ནི་རང་གི་མཚན་ཉིད་མ་ཐོབ་ཅིང་ཉེ་བར་མི་གནས་པ་ཡིན་ནོ། །འདས་པ་ནི་ཅི་ཞེ་ན་ཞིག་པའི་ཕྱིར་ཆོས་ཀྱི་རང་གི་མཚན་
[142a.6]ཉིད་ལས་རིང་བ་ཡིན་ཏེ། འདི་ལྟར་ཆོས་ཀྱི་རང་གི་མཚན་ཉིད་དེ་འདས་པས་ཞིག་པའམ། འདས་པ་དེ་ཆོས་ཀྱི་རང་གི་མཚན་ཉིད་ལས་ཞིག་པས་སོ། །གཉེན་པོ་སྐྱེས་པས་ཟད་པར་འགྱུར། །ཞེས་བཤད་པས་དེའི་ཕྱིར་ཅི་ལམ་ཁྱད་པར་དུ་འགྲོ་བའི་ཕྱིར་ཞེས་བྱ་བ་འདྲི་བར་བྱེད་དེ། སྤངས་
[142a.7]པས་ཡང་ཁྱད་པར་དུ་འགྱུར་རམ་ཞེས་བྱ་བ་ནི་སྤངས་པ་ཁྱད་པར་དུ་འགྱུར་རམ་ཞེས་བྱ་བའི་ཐ་ཚིག་གོ། །འདིར་ནི་གཉེན་པོ་རྣམ་པར་གྲོལ་བའི་ལམ་ཡིན་པར་བསམས་སོ་ཞེས་བྱ་བ་ནི་དེ་ནི་བྲལ་བའི་ཐོབ་པ་དང་ལྷན་ཅིག་སྐྱེས་པའི་ཕྱིར་རོ། །བར་ཆད་མེད་པའི་ལམ་ལ་ནི་རེ་ཞིག་བྲལ་
[142b]
[142b.1]བའི་ཐོབ་པ་མེད་དོ། སྐྱེ་བ་ལ་མངོན་དུ་ཕྱོགས་པ་ཡིན་པའི་ཕྱིར་རོ། །རྣམ་པར་གྲོལ་བའི་ལམ་ཡང་བར་ཆད་མེད་པའི་ལམ་གཉེན་པོ་དངོས་དང་ལྷན་ཅིག་འབྲས་བུ་གཅིག་པའི་ཕྱིར་གཉེན་པོ་ཡིན་ནོ་ཞེས་བྱ་བར་རྣམ་པར་གཞག་པར་མི་ནུས་ཏེ། འདི་ལྟར་བྲལ་བའི་ཐོབ་པ་འདྲེན་པར་བྱེད་པ་
[142b.2]དང་། རྟེན་དུ་གྱུར་པའི་ཕྱིར་གཉི་གས་དེ་འཐོབ་པོ་ཞེས་བཤད་དོ། །འབྲས་བུ་དག་ནི་དགེ་སྦྱོང་གི་ཚུལ་གྱི་འབྲས་བུ་བཞིའོ་ཞེས་བྱ་བ་ལ་འབྲས་བུ་བཞི་ཞེས་སྨོས་པ་ནི་འབྲས་བུ་བརྒྱད་ཅུ་རྩ་དགུ་ཡིན་པར་གོ་བར་འགྱུར་བ་བསྩལ་བའི་ཕྱིར་རམ། སྐྱེས་བུ་བྱེད་པའི་འབྲས་བུ་ལ་སོགས་པ་ལྔ་ཡིན་
[142b.3]པར་གོ་བར་འགྱུར་བ་བསལ་བའི་ཕྱིར་རོ། །འབྲས་བུ་ཐོབ་པ་ཡང་རྣམ་པར་གྲོལ་བའི་ལམ་ལ་རྣམ་པར་གཞག་པ་ཁོ་ནར་གཟུང་བར་བྱ་སྟེ། བྲལ་བའི་རྙེད་པ་ཡོད་པ་ཉིད་དང་ལྡན་པའི་ཕྱིར་རོ། །དབང་པོ་རྣམ་པར་འཕེལ་བ་ནི་དབང་པོ་འཕོ་བའོ་ཞེས་བྱ་བ་ནི་དབང་པོ་ལྷག་པ་ཡིན་པར་གོ་བར་
[142b.4]འགྱུར་བ་བསལ་བའི་ཕྱིར་དོན་འདི་རབ་ཏུ་བསྟན་པ་ཡིན་ཏེ། སློབ་དཔོན་འདུས་བཟང་ན་རེ་དབང་པོ་རྣམ་པར་འཕེལ་བ་ཞེས་བྱ་བ་ནི་འབྲས་བུ་ཐོབ་པ་ཞེས་སྨོས་པ་ཁོ་ནས་གྲུབ་པའི་ཕྱིར་རོ་ཞེས་ཟེར་རོ། །འདི་ལ་སྨྲ་བར་བྱ་སྟེ། འབྲས་བུ་ཐོབ་པ་ཁོ་ན་དབང་པོ་རྣམ་པར་འཕེལ་བ་ཡིན་པ་བདེན་མོད་
[142b.5]ཀྱི་གང་ལ་བྲལ་བ་རྙེད་པར་འགྱུར་བའི་འབྲས་བུ་ཐོབ་པ་ཁྱད་པར་ཅན་ནི་རབ་ཏུ་བསྟན་དགོས་སོ། །དེ་ལྟ་མ་ཡིན་ན་གཉེན་པོ་སྐྱེས་པ་སྨོས་པ་ཁོ་ནས་དེ་གྲུབ་པའི་ཕྱིར་འབྲས་བུ་ཐོབ་པ་ཡང་སྨོས་པར་བྱ་མི་དགོས་པར་འགྱུར་ཏེ་ཟུག་ཟུག་ཏུ་བརྒལ་མི་དགོས་སོ། །ཁ་ཅིག་གི་ནི་དུས་གཉིས་ཀྱི་བར་དུ་འཐོབ་པར་
[142b.6]བལྟ་བར་བྱའོ་ཞེས་བྱ་བ་ནི་ཉོན་མོངས་པ་ཁ་ཅིག་གི་བྲལ་བ་ནི་དུས་དྲུག་ཏུ་འཐོབ་པོ། །བར་དུ་ཞེས་བྱ་བའི་སྒྲས་ནི་ཁ་ཅིག་གི་ནི་དུས་ལྔར་རོ། །ཁ་ཅིག་གི་ནི་བཞིར་རོ། །ཁ་ཅིག་གི་ནི་གསུམ་དུའོ། །ཁ་ཅིག་གི་ནི་གཉིས་སུའོ་ཞེས་བསྟན་པ་ཡིན་ནོ། །ཡང་ཐོབ་པའི་བྲལ་བའི་དབང་དུ་བྱས་པ་
[142b.7]ཡིན་པའི་ཕྱིར། ཁ་ཅིག་གི་ནི་དུས་གཅིག་ཏུ་འཐོབ་པོ་ཞེས་ནི་མ་བཤད་དེ་དབང་པོ་རྣོན་པོས་སྲིད་པའི་རྩེ་མོའི་རྣམ་པ་དགུ་པའི་བྲལ་བ་དུས་གཅིག་ཁོ་ནར་འཐོབ་པ་སྲིད་མོད་ཀྱི་དེ་ནི་ཡང་འཐོབ་པ་མ་ཡིན་པས་མི་བརྗོད་དོ། །དེ་ལ་རེ་ཞིག་དབང་པོ་རྟུལ་པོས་བྲལ་བ་དུས་དྲུག་ཏུ་འཐོབ་སྟེ།
[143a]
[143a.1]སྡུག་བསྔལ་དང་ཀུན་འབྱུང་དང་འགོག་པ་མཐོང་བས་སྤང་བར་བྱ་བ་ཁམས་གསུམ་པ་རྣམས་དང་། ལམ་མཐོང་བས་སྤང་བར་བྱ་བ་འདོད་པ་ན་སྤྱོད་པ་རྣམས་ཀྱི་བྲལ་བ་ནི་གཉེན་པོ་སྐྱེས་པའི་དུས་དང་རྒྱུན་དུ་ཞུགས་པའི་འབྲས་བུའི་དུས་དང་། ལན་ཅིག་ཕྱིར་འོང་བའི་འབྲས་བུའི་དུས་དང་།
[143a.2]ཕྱིར་མི་འོང་བའི་འབྲས་བུའི་དུས་དང་། དགྲ་བཅོམ་པ་ཉིད་ཀྱི་འབྲས་བུའི་དུས་དང་། དབང་པོ་འཕོ་བའི་དུས་ཞེས་བྱ་བ་དུས་དྲུག་ཏུ་འཐོབ་པོ། །སྲིད་པའི་ཕྱིར་དེ་སྐད་དུ་བཤད་པར་ཟད་ཀྱི་དབང་པོ་རྟུལ་པོ་གདོན་མི་ཟ་བར་དབང་པོ་དག་འཕོ་བ་མ་ཡིན་ནོ། །དབང་པོ་རྟུལ་པོ་དེ་ཉིད་ཀྱིས་ལམ་མཐོང་
[143a.3]བས་སྤང་བར་བྱ་བ་གཟུགས་དང་གཟུགས་མེད་པ་ན་སྤྱོད་པ་རྣམས་ཀྱི་བྲལ་བ་གཉེན་པོ་སྐྱེས་པའི་དུས་ཞེས་བྱ་བའམ་འབྲས་བུ་ཐོབ་པའི་དུས་ཞེས་བྱ་བར་གཟུང་ཡང་རུང་སྟེ། ལམ་ལ་རྗེས་སུ་ཤེས་པའི་དུས་ན་དང་པོ་ཉིད་དུ་འཐོབ་པ་དང་། ཡང་ལན་ཅིག་ཕྱིར་འོང་བའི་དུས་ནས་དབང་པོ་འཕོ་བའི་
[143a.4]དུས་ཞེས་བྱ་བའི་བར་ཏེ་དུས་ལྔར་འཐོབ་པོ། །དེ་ཉིད་ཀྱིས་བསྒོམ་པས་སྤང་བར་བྱ་བ་འདོད་པ་ན་སྤྱོད་པ་ཆེན་པོ་ནས་འབྲིང་པོའི་འབྲིང་པོའི་བར་རྣམ་པ་ལྔའི་བྲལ་བ་ཡང་རྒྱུན་དུ་ཞུགས་པའི་འབྲས་བུ་མ་གཏོགས་པ་དུས་ལྔ་པོ་དེ་དག་ཉིད་དུ་འཐོབ་པོ། །དེ་ཉིད་ཀྱི་རྣམ་པ་དྲུག་པ་འབྲིང་པོའི་ཆུང་
[143a.5]ངུའི་བྲལ་བ་ནི་གཉིས་པོ་སྐྱེས་པ་དང་འབྲས་བུ་ཐོབ་པའི་དུས་དག་གཅིག་པའི་ཕྱིར་དེའི་གང་ཡང་རུང་བ་ཞིག་དང་ཕྱིར་མི་འོང་བའི་འབྲས་བུའི་དུས་ནས་དབང་པོ་འཕོ་བའི་དུས་ཞེས་བྱ་བའི་བར་དུས་བཞིར་འཐོབ་པོ། །དེ་ཉིད་ཀྱི་རྣམ་པ་བདུན་པ་དང་བརྒྱད་པ་ཆུང་ངུའི་ཆེན་པོ་དང་ཆུང་ངུའི་འབྲིང་པོ་
[143a.6]ཐོབ་པ་ནི་གཉེན་པོ་སྐྱེས་པའི་དུས་དང་ཕྱིར་མི་འོང་བའི་འབྲས་བུའི་དུས་ནས་དབང་པོ་འཕོ་བའི་དུས་ཀྱི་བར་དུས་བཞི་ཁོ་ནར་འཐོབ་པོ། །དེ་ཉིད་ཀྱིས་རྣམ་པ་ཐ་མའི་ཆུང་ངུའི་ཆུང་ངུ་བྲལ་བ་ནི་གཉེན་པོ་སྐྱེས་པའི་དུས་ཞེས་བྱ་བར་ཡང་རུང་། འབྲས་བུ་ཐོབ་པའི་དུས་ཞེས་བྱ་བར་ཡང་རུང་སྟེ།
[143a.7]གང་ཡང་རུང་བ་ཞིག་དང་། དགྲ་བཅོམ་པ་ཉིད་ཀྱི་འབྲས་བུ་ཐོབ་པའི་དུས་དང་དབང་པོ་འཕོ་བའི་དུས་ཞེས་བྱ་བ་དུས་གསུམ་དུ་འཐོབ་པོ། །དེ་བཞིན་དུ་དགྲ་བཅོམ་པ་ཉིད་ཀྱི་འབྲས་བུ་ཐོབ་པར་བྱེད་པ་དེས་གཟུགས་དང་གཟུགས་མེད་པའི་ཉོན་མོངས་པ་བསྒོམ་པས་སྤང་བར་བྱ་བ་ཆེན་པོའི་ཆེན་པོ་
[143b]
[143b.1]ནས་ཆུང་ངུའི་ཆུང་ངུའི་བར་རྣམ་པ་དགུ་སྤངས་པ་གང་དག་ཡིན་པ་དེ་དག་ལས་སྲིད་པའི་རྩེ་མོ་པའི་རྣམ་པ་ཐ་མ་ཆུང་ངུའི་ཆུང་ངུ་མ་གཏོགས་པ་ཐམས་ཅད་ཀྱི་བྲལ་བ་ཡང་གཉེན་པོ་སྐྱེས་པའི་དུས་དང་། དགྲ་བཅོམ་པ་ཉིད་ཀྱི་འབྲས་བུའི་དུས་དང་དབང་པོ་འཕོ་བའི་དུས་ཞེས་བྱ་བ་དུས་གསུམ་ཁོ་
[143b.2]ནར་འཐོབ་བོ། །གཟུགས་མེད་པ་ན་སྤྱོད་པའི་རྣམ་པ་ཆུང་ངུའི་ཆུང་ངུ་གང་ཡིན་པ་དེའི་བྲལ་བ་ནི་གཉེན་པོ་སྐྱེས་པ་དང་བྲལ་བ་ཉིད་ཀྱི་འབྲས་བུ་ཐོབ་པ་དུས་གཅིག་པའི་ཕྱིར་གཉེན་པོ་སྐྱེས་པའི་དུས་ཞེས་བྱ་བར་ཡང་རུང་དགྲ་བཅོམ་པ་ཉིད་ཀྱི་འབྲས་བུ་ཐོབ་པའི་དུས་ཞེས་བྱ་བར་ཡང་རུང་སྟེ། གང་
[143b.3]ཡང་རུང་བ་ཞིག་དང་དབང་པོ་འཕོ་བ་ཞེས་བྱ་བ་དུས་གཉིས་སུ་འཐོབ་སྟེ་རེ་ཞིག་དེ་ལྟ་བུ་ནི་དབང་པོ་རྟུལ་པོས་འཐོབ་པ་བཤད་པ་ཡིན་ནོ། །དབང་པོ་རྣོན་པོས་ནི་དབང་པོ་འཕོ་བའི་དུས་གཅིག་ཏུ་བོར་ནས་ཉོན་མོངས་པ་ཁ་ཅིག་གི་ནི་དུས་ལྔར་འཐོབ་པས་ན་དུས་གཉིས་ཀྱི་བར་དུ་འཐོབ་པོ་ཞེས་བྱ་བར་
[143b.4]བརྗོད་པར་བྱ་སྟེ། དེ་ལ་ནི་ཐམས་ཅད་དུ་དབང་པོ་འཕོ་བ་མེད་དོ། །དེས་ནི་ཉོན་མོངས་པ་རྣམས་ཀྱི་བྲལ་བ་དུས་གཅིག་ཏུ་འཐོབ་པ་ཡོད་དེ། བསྒོམ་པས་སྤང་བར་བྱ་བ་སྲིད་པའི་རྩེ་མོ་པའི་རྣམ་པ་ཆུང་ངུའི་ཆུང་ངུ་བྲལ་བ་ལྟ་བུ་ཡིན་ན་དེ་ནི་ཡང་འཐོབ་པར་མི་འགྱུར་བས་མི་བརྗོད་དོ་ཞེས་བྱ་བར་
[143b.5]ལྟའོ། །འབྲས་བུ་ལ་རྒྱུ་བཏགས་པའི་ཕྱིར་རོ་ཞེས་བྱ་བ་ནི་སྤངས་པའོ། །རྒྱུ་ནི་ཡོངས་སུ་ཤེས་པ་སྟེ། །ཡེ་ཤེས་ཀྱི་ངོ་བོ་ཉིད་ཡིན་ནོ། །འབྲས་བུ་སྤངས་པ་དེ་ལ་ཡོངས་སུ་ཤེས་པའོ་ཞེས་རྒྱུ་ཉེ་བར་བཏགས་པ་ཡིན་ཏེ། དཔེར་ན་རེག་པའི་སྐྱེ་མཆེད་དྲུག་པོ་སྔོན་མངོན་པར་འདུས་
[143b.6]བྱས་ཤིང་ཆེད་དུ་བསྩགས་པ་འདི་དག་ནི་སྔོན་གྱི་ལས་ཡིན་པར་རིག་པར་བྱའོ་ཞེས་འབྱུང་བ་ལྟ་བུའོ། །ཡང་གང་ནས་སྤང་བ་ལ་ཡོངས་སུ་ཤེས་པའི་སྒྲར་བསྟན་ཞེ་ན་མདོ་ལས་ཏེ། འདི་སྐད་དུ་དགེ་སློང་དག་ཡོངས་སུ་ཤེས་པར་བྱ་བའི་ཆོས་རྣམས་དང་། ཡོངས་སུ་ཤེས་པ་དག་དང་།
[143b.7]ཡོངས་སུ་ཤེས་པ་དང་ལྡན་པའི་གང་ཟག་ཀྱང་བཤད་པར་བྱ་སྟེ། ཡོངས་སུ་ཤེས་པར་བྱ་བའི་ཆོས་རྣམས་གང་ཞེ་ན། ཉེ་བར་ལེན་པའི་ཕུང་པོ་ལྔའོ། །ཡོངས་སུ་ཤེས་པ་གང་ཞེ་ན། འདི་ལ་འདུན་པའི་འདོད་ཆགས་སྤངས་པ་དང་། འདུན་པའི་འདོད་ཆགས་ལས་ཡང་དག་པར་
[144a]
[144a.1]འདས་པ་སྟེ། འདི་ནི་ཡོངས་སུ་ཤེས་པ་ཞེས་བྱ་བའོ་ཞེས་བྱ་བ་རྒྱས་པར་གསུངས་སོ། །འདོད་པ་ན་དང་པོའི་རྣམ་གཉིས་ཟད་ལ་གཅིག་ཅེས་བྱ་བ་ནི་ཡོངས་སུ་ཤེས་པར་རྣམ་པར་གཞག་པའི་གཏན་ཚིགས་བྲལ་བའི་ཐོབ་པ་ཟད་མེད་དང་། སྲིད་རྩེ་ཉམས་པར་བྱས་པ་དང་།
[144a.2]རྒྱུ་གཉིས་ཀུན་དུ་བཅོམ་པའི་ཕྱིར། །ཡོངས་ཤེས་ཞེས་བྱ་བ་འདི་ནས་འཆད་པར་འགྱུར་རོ། །ཐ་མའི་ཆ་དང་མཐུན་པ་སྤངས་པ་ཞེས་བྱ་བ་ནི་འདོད་པའི་ཁམས་ཀྱི་ཟག་པ་སྤངས་པ་ཞེས་བྱ་བའི་ཐ་ཚིག་སྟེ་འདི་ཉིད་དེའི་མིང་ཡིན་ནོ། །གཟུགས་ཀྱི་ཟག་པ་སྤངས་པ་ཞེས་བྱ་བ་ནི་གཟུགས་ཀྱི་ཁམས་ཀྱི་ཟག་པ་སྤངས་པ་ཞེས་བྱ་
[144a.3]བའི་དོན་ཏེ། དེའི་མིང་ནས་གཟུགས་ཀྱི་ཁམས་ཀྱི་འདོད་ཆགས་ཟད་པའི་ཡོངས་སུ་ཤེས་པ་ཞེས་བྱའོ། །ང་རྒྱལ་ལ་སོགས་པའི་ཉོན་མོངས་པ་དང་ཉེ་བའི་ཉོན་མོངས་པ་གཟུགས་ན་སྤྱོད་པ་གཞན་དག་ཀྱང་ཡོད་མོད་ཀྱི་འདིའི་ཡོངས་སུ་ཤེས་པ་རྣམ་པར་གཞག་པ་ནི་དེ་ན་འདོད་ཆགས་གཙོ་བོ་ཡིན་
[144a.4]པའི་ཕྱིར་གོང་མའི་ཆ་དང་མཐུན་པའི་ཀུན་དུ་སྦྱོར་བའི་ནི་གཟུགས་ཀྱི་འདོད་ཆགས་ཟད་པའི་ཡོངས་སུ་ཤེས་པ་ཞེས་བཤད་དོ། །ཀུན་དུ་སྦྱོར་བ་ཐམས་ཅད་ཡོངས་སུ་གཏུགས་པའི་ཡོངས་སུ་ཤེས་པའོ་ཞེས་བྱ་བ་འདི་ནི་ཟག་པ་ཐམས་ཅད་སྤངས་པའི་མིང་ཡིན་ནོ། །ཡོངས་སུ་ཤེས་པ་ནི་ཐ་དད་
[144a.5]པར་བསྟན་ལ་ཞེས་བྱ་བ་ནི་བསྒོམ་པས་སྤང་བར་བྱ་བ་གཟུགས་ན་སྤྱོད་པ་རྣམས་སྤངས་པ་ནི་གཟུགས་ཀྱི་འདོད་ཆགས་ཟད་པའི་ཡོངས་སུ་ཤེས་པ་ཡིན་ནོ། །གཟུགས་མེད་པ་རྣམས་ཀྱིས་ནི་ཀུན་དུ་སྦྱོར་བ་ཐམས་ཅད་ཡོངས་སུ་གཏུགས་པའི་ཡོངས་སུ་ཤེས་པ་ཡིན་ནོ་ཞེས་འབྱུང་བའི་ཕྱིར་རོ། །
[144a.6]མཐོང་བས་སྤང་བར་བྱ་བ་རྣམས་ཀྱི་ནི་མ་ཡིན་ཏེ་ཞེས་བྱ་བ་ནི་ཅིའི་ཕྱིར་གཟུགས་དང་གཟུགས་མེད་པ་ན་སྤྱོད་པའི་མཐོང་བས་སྤང་བར་བྱ་བ་རྣམས་ཀྱི་ཡོངས་སུ་ཤེས་པ་སོ་སོར་མི་བསྟན་ཏེ། དེ་བཞིན་དུ་གཟུགས་དང་གཟུགས་མེད་པ་ན་སྤྱོད་པ་མཐོང་བས་སྤང་བར་བྱ་བ་རྣམས་སྤངས་པ་ཡང་ཡོངས་
[144a.7]སུ་ཤེས་པ་གསུམ་ཡིན་ཏེ་ཞེས་འབྱུང་བའི་ཕྱིར་རོ། །བསྒོམ་པས་སྤང་བར་བྱ་བ་རྣམས་ཀྱི་གཉེན་པོ་མི་འདྲ་བའི་ཕྱིར་རོ་ཞེས་བྱ་བ་ནི་འདི་ལྟར་ས་དང་ས་ན་གཟུགས་ན་སྤྱོད་པའི་བསྒོམ་པས་སྤང་བར་བྱ་བ་རྣམ་པ་དགུའི་གཉེན་པོ་བར་ཆད་མེད་པ་དང་རྣམ་པར་གྲོལ་བའི་ལམ་ཟག་པ་མེད་པ་མི་
[144b]
[144b.1]ལྕོགས་པ་མེད་པ་ལ་སོགས་པའི་ས་དང་། ཟག་པ་དང་བཅས་པ་བསམ་གཏན་གཉིས་པའི་ཉེར་བསྡོགས་ཀྱིས་བསྡུས་པ་ནས་ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་ཀྱིས་བསྡུས་པའི་བར་རྣམ་པ་དགུ་ཡོད་ལ་གཟུགས་མེད་པ་ན་སྤྱོད་པ་རྣམས་ཀྱི་གཉེན་པོ་བར་ཆད་མེད་པའི་ལམ་དང་། རྣམ་
[144b.2]པར་གྲོལ་བའི་ལམ་ནི་ཅི་རིགས་པར་ཟག་པ་མེད་པའི་ས་འོག་མ་པའམ། ཅི་རིགས་པར་ཟག་པ་དང་བཅས་པ་གོང་མའི་ཉེར་བསྡོགས་ཀྱིས་བསྡུས་པ་དག་ཡོད་དེ། གཞན་ཁོ་ན་ཡིན་པས་གཉེན་པོ་མི་འདྲ་བའི་ཕྱིར་འདི་དག་གིས་ཡོངས་སུ་ཤེས་པ་ཐ་དད་པར་བསྟན་ཏོ། །མཐོང་བས་སྤང་བར་བྱ་བ་
[144b.3]རྣམས་ཀྱི་གཉེན་པོ་འདྲ་སྟེ། རྗེས་སུ་ཤེས་པའི་བཟོད་པ་ལ་སོགས་པ་གཟུགས་ན་སྤྱོད་པ་རྣམས་ཀྱི་གཉེན་པོ་དེ་དག་ཉིད་གཟུགས་མེད་པ་རྣམས་ཀྱི་ཡང་ཡིན་པས་ཡོངས་སུ་ཤེས་པ་ཐ་དད་དུ་རྣམ་པར་མི་གཞག་གོ། །ཐ་མའི་ཆ་དང་མཐུན་པ་སྤངས་པ་ལ་སོགས་པ་ཡོངས་སུ་ཤེས་པ་སྟེ་ཞེས་
[144b.4]བྱ་བ་ནི་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་དང་། གཟུགས་ཀྱི་འདོད་ཆགས་ཟད་པའི་ཡོངས་སུ་ཤེས་པ་དང་། ཀུན་དུ་སྦྱོར་བ་ཐམས་ཅད་ཡོངས་སུ་གཏུགས་པའི་ཡོངས་སུ་ཤེས་པའོ། །འདི་དག་ནི་བསྒོམ་པའི་ལམ་གྱི་འབྲས་བུ་ཡིན་པའི་ཕྱིར་ཤེས་པའི་འབྲས་བུ་
[144b.5]ཡིན་ཏེ། བསྒོམ་པའི་ལམ་ལ་བཟོད་པ་དག་ནི་མེད་དོ། །ཇི་ལྟར་ཡོངས་སུ་ཤེས་པ་བཟོད་པའི་འབྲས་བུ་ཡིན་ཞེས་བྱ་བ་ནི་ཡོངས་སུ་ཤེས་པ་དང་ཤེས་པ་ཞེས་བྱ་བ་ནི་དོན་གཅིག་སྟེ། ཤེས་པ་དང་ཡོངས་སུ་ཤེས་པ་ནི་ཟག་པ་མེད་པའི་ཡེ་ཤེས་ཡིན་ནོ་ཞེས་འབྱུང་བའི་ཕྱིར་རོ།། །།
[144b.6]བམ་པོ་བཞི་བཅུ་རྩ་བཞི་པ། དྲི་མེད་བཟོད་རྣམས་ཤེས་པ་མིན། །ཞེས་འབྱུང་བས་བཟོད་པ་ནི་ཤེས་པའི་ངོ་བོ་ཉིད་ཡིན་པར་ཡང་མི་རུང་ན། དེ་ཇི་ལྟར་ཡོངས་སུ་ཤེས་པ་བཟོད་པའི་འབྲས་བུ་ཡིན་ཏེ། འབྲས་བུ་ལ་རྒྱུ་བཏགས་པ་བྱས་ན་ཡང་མི་རུང་ངོ་སྙམ་དུ་བསམས་པ་ཡིན་ནོ། །འདིར་
[144b.7]བཟོད་པ་རྣམས་ནི་ཤེས་པའི་འཁོར་ཅན་ཡིན་པའི་ཕྱིར་ཞེས་བྱ་བ་སྨོས་ཏེ། འདི་དག་ལ་འཁོར་ཤེས་པ་ཡོད་པས་ན་ཤེས་པའི་འཁོར་ཅན་ཏེ། བཟོད་པ་རྣམས་སོ། །དེའི་ཕྱིར་ཤེས་པའི་འབྲས་བུ་ཡང་བཟོད་པ་རྣམས་ཀྱི་འབྲས་བུ་ཞེས་བྱའོ། །རྒྱལ་པོའི་འཁོར་ལ་རྒྱལ་པོ་ཉེ་བར་
[145a]
[145a.1]བཏགས་པ་བཞིན་ཏེ། དཔེར་ན་རྒྱལ་པོའི་འཁོར་ལ་རྒྱལ་པོ་ཉེ་བར་བཏགས་པའི་ཕྱིར་འཁོར་གྱིས་བྱས་པ་ལ་ཡང་རྒྱལ་པོས་བྱས་པ་ཞེས་བྱ་བ་དང་འདྲའོ། །ཤེས་པ་དང་འབྲས་བུ་གཅིག་པའི་ཕྱིར་རོ་ཞེས་བྱ་བ་ནི་བཟོད་པ་དག་ནི་ཤེས་པ་དང་ལྷན་ཅིག་འབྲས་བུ་
[145a.2]གཅིག་པ་ཡིན་ཏེ། བཟོད་པ་དག་གི་འབྲས་བུ་གང་ཡིན་པ་དེ་ཉིད་ཤེས་པ་རྣམས་ཀྱི་ཡིན་པས་བཟོད་པའི་འབྲས་བུ་ཡང་ཡོངས་སུ་ཤེས་པར་རུང་ངོ་། །མི་ལྕོགས་མེད་འབྲས་ཐམས་ཅད་དོ། །ཞེས་བྱ་བ་ནི་འདི་ལྟར་མི་ལྕོགས་པའི་ས་པའི་ལམ་གྱིས་ཁམས་གསུམ་པའི་མཐོང་བ་དང་།
[145a.3]བསྒོམ་པས་སྤང་བར་བྱ་བའི་ཟག་པ་རྣམས་སྤོང་བ་སྲིད་དེ། ཟག་མེད་མི་ལྕོགས་མེད་པ་ཡིས། །ཐམས་ཅད་ལས་ནི་འདོད་ཆགས་བྲལ། །ཞེས་འབྱུང་བའི་ཕྱིར་རོ། །གཟུགས་དང་གཟུགས་མེད་པ་ན་ཉོན་མོངས་པ་སྤངས་པའི་རང་བཞིན་གང་དག་ཡིན་པའོ་ཞེས་བྱ་བ་ནི་བྱེ་བྲག་ཏུ་སྨྲ་
[145a.4]བ་རྣམས་ན་རེ་གཟུགས་དང་གཟུགས་མེད་པ་ན་སྤྱོད་པའི་མཐོང་བས་སྤོང་བར་བྱ་བ་རྣམས་སྤངས་པ་ཇི་སྐད་བཤད་པའི་ཡོངས་སུ་ཤེས་པ་གསུམ་དང་བསྒོམ་པས་སྤང་བར་བྱ་བ་གཟུགས་ན་སྤྱོད་པ་རྣམས་སྤངས་པ་གཟུགས་ཀྱི་འདོད་ཆགས་ཟད་པའི་ཡོངས་སུ་ཤེས་པ་དང་། གཟུགས་མེད་
[145a.5]པ་ན་སྤྱོད་པ་རྣམས་སྤངས་པ་ཀུན་དུ་སྦྱོར་བ་ཐམས་ཅད་ཡོངས་སུ་གཏུགས་པའི་ཡོངས་སུ་ཤེས་པ་ཞེས་བྱ་བ་ལྔ་སྟེ། བསམ་གཏན་གྱི་དངོས་གཞི་ལ་བརྟེན་ནས་གཟུགས་དང་གཟུགས་མེད་པ་ན་སྤྱོད་པའི་ཉོན་མོངས་པ་སྤོང་བ་སྲིད་པའི་ཕྱིར་རོ། །འདོད་པ་ན་སྤྱོད་པའི་ཉོན་མོངས་པ་སྤངས་
[145a.6]པ་ནི་བསམ་གཏན་གྱི་དངོས་གཞིའི་འབྲས་བུ་མ་ཡིན་ཏེ། བསམ་གཏན་གྱི་དངོས་གཞི་རྣམས་ནི་འདོད་པའི་ཁམས་ཀྱི་གཉེན་པོ་མ་ཡིན་པའི་ཕྱིར་རོ། །དེ་ལྟ་བས་ན་འདོད་ཆགས་དང་བྲལ་བ་རྣམས་ལ་བྲལ་བའི་ཐོབ་པ་ཟག་པ་མེད་པ་ཡོད་དུ་ཟིན་ཀྱང་ཐ་མའི་ཆ་དང་མཐུན་པ་སྤངས་པའི་
[145a.7]ཡོངས་སུ་ཤེས་པ་བཞིན་དུ་འདོད་པ་ན་སྤྱོད་པ་མཐོང་བས་སྤང་བར་བྱ་བ་སྤངས་པ་ནི་བསམ་གཏན་གྱི་དངོས་གཞིའི་འབྲས་བུ་མ་ཡིན་ནོ་ཞེས་ཟེར་རོ། །བཙུན་པ་དབྱངས་སྒྲོགས་ཀྱི་ལུགས་ཀྱིས་ནི་བརྒྱད་དེ་ཞེས་བྱ་བ་ནི་བཙུན་པ་དབྱངས་སྒྲོགས་དེ་ནི་འདོད་པའི་འདོད་ཆགས་དང་བྲལ་བའི་གང་
[145b]
[145b.1]ཟག་གི་ཡང་འདོད་པ་ན་སྤྱོད་པ་མཐོང་བས་སྤང་བར་བྱ་བ་རྣམས་སྤངས་པ་ཡོངས་སུ་ཤེས་པ་གསུམ་གྱི་ངོ་བོ་ཉིད་འཕགས་པའི་ལམ་གྱི་འབྲས་བུ་ཡིན་པར་འདོད་དོ། །ཅིའི་ཕྱིར་ཞེ་ན། བྲལ་བའི་ཐོབ་པ་ཟག་པ་མེད་པ་རྙེད་པའི་ཕྱིར་ཏེ། བསམ་གཏན་གྱི་དངོས་གཞི་ལ་བརྟེན་ནས་ངེས་པ་ལ་འཇུག་པ་ན་
[145b.2]ཡང་མཐོང་བས་སྤང་བར་བྱ་བའི་ཟག་པ་སྔོན་འཇིག་རྟེན་པའི་ལམ་གྱིས་སྤངས་པ་རྣམས་ཀྱིས་བྲལ་བའི་ཐོབ་པ་ཟག་པ་མེད་པ་ཡང་འཐོབ་ལ་དེ་ལ་ནི་མཐོང་བའི་ལམ་གྱི་ནུས་པ་ཡོད་པས་གཟུགས་དང་གཟུགས་མེད་པ་ན་སྤྱོད་པའི་མཐོང་བས་སྤང་བར་བྱ་བ་སྤངས་པ་བཞིན་དུ། འདོད་པ་ན་སྤྱོད་པའི་
[145b.3]མཐོང་བས་སྤང་བར་བྱ་བ་སྔོན་སྤངས་པའི་ཡོངས་སུ་ཤེས་པ་ཡང་དངོས་གཞི་བསམ་གཏན་གྱི་འབྲས་བུའོ་ཞེས་བྱ་བར་རྣམ་པར་གཞག་གོ། །དེ་ལྟ་བས་ན་འདོད་པ་ན་སྤྱོད་པའི་མཐོང་བས་སྤང་བར་བྱ་བ་སྤངས་པའི་ཡོངས་སུ་ཤེས་པ་གསུམ་པོ་འདི་དག་དང་སྔར་བཤད་པ་གཟུག་(གཟུགས་)དང་གཟུགས་མེད་
[145b.4]པའི་ཡོངས་སུ་ཤེས་པ་དང་བཅས་པ་ཡོངས་སུ་ཤེས་པ་བརྒྱད་བསམ་གཏན་གྱི་འབྲས་བུ་ཡིན་ནོ་ཞེས་བྱ་བ་ནི་བཙུན་པ་དབྱངས་སྒྲོགས་ཀྱི་གཞུང་ལུགས་ཡིན་ནོ། །ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་ནི་མི་ལྕོགས་པ་མེད་པའི་འབྲས་བུ་ཁོ་ན་ཡིན་ནོ་ཞེས་བྱ་བ་ནི་འདོད་པ་ལས་འདོད་
[145b.5]ཆགས་དང་མ་བྲལ་བ་ནི་མི་ལྕོགས་པ་མེད་པ་ཁོ་ནས་ཐ་མའི་ཆ་དང་མཐུན་པ་སྤོང་བར་བྱེད་ཀྱི་དངོས་གཞིས་ནི་མ་ཡིན་ཏེ། དེ་མ་ཐོབ་པའི་ཕྱིར་རོ། །འདོད་ཆགས་དང་བྲལ་བ་སྔོན་དུ་འགྲོ་བ་ཡང་གང་གི་ཚེ་བསམ་གཏན་ལ་བརྟེན་ནས་ངེས་པ་ལ་འཇུག་པ་དེས་ཀྱང་སོ་སོའི་སྐྱེ་བོའི་གནས་སྐབས་ན་
[145b.6]འཇིག་རྟེན་པའི་ལམ་གྱིས་འདོད་པ་ན་སྤྱོད་པའི་ཉོན་མོངས་པ་ཐམས་ཅད་སྤངས་པས་དེ་བསམ་གཏན་གྱི་དངོས་གཞིའི་འབྲས་བུ་མ་ཡིན་ནོ། །སེམས་ཀྱི་སྐད་ཅིག་མ་བཅུ་དྲུག་ལ་དེའི་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་བསམ་གཏན་གྱི་དངོས་གཞི་ལ་བརྟེན་པར་ཡང་རྣམ་པར་
[145b.7]གཞག་མོད་ཀྱི་དེའི་འབྲས་བུ་ཞེས་བྱ་བར་རྣམ་པར་གཞག་པ་ནི་མ་ཡིན་ནོ། །འོ་ན་ཅི་ཞེ་ན། གནས་སྐབས་དེ་ན་ཐ་མའི་ཆ་དང་མཐུན་པ་སྤངས་པ་འཇིག་རྟེན་པའི་ལམ་གྱིས་ཐོབ་པའི་བྲལ་བའི་ཐོབ་པ་ཟག་པ་མེད་པ་ཡང་འཐོབ་པས་དེ་སྤངས་པའི་ཡོངས་སུ་ཤེས་པར་རྣམ་པར་གཞག་སྟེ།
[146a]
[146a.1]དེའི་ཚེ་ནི་མཐོང་བས་སྤང་བར་བྱ་བ་སྔ་མ་སྤངས་པས་སྔར་མཐོང་བའི་ལམ་གྱིས་སྤང་བར་བྱ་བ་སྤངས་པ་གང་ཡིན་པ་དང་། སྔར་སྤངས་པ་ཐ་མའི་ཆ་དང་མཐུན་པ་སྤངས་པ་བསྡོམས་ནས་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་གཅིག་ཏུ་རྣམ་པར་གཞག་
[146a.2]སྟེ། ཁམས་ལས་འདོད་ཆགས་བྲལ་བ་དང་། །འབྲས་བུ་ཐོབ་ཕྱིར་དེ་དག་བསྡོམས། །ཞེས་ཐམས་ཅད་བསྡོམས་པའི་གཏན་ཚིགས་ཡོད་པའི་ཕྱིར་རོ། །དེ་ལྟ་བས་ན་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་དེ་ནི་མི་ལྕོགས་པ་མེད་པའི་འབྲས་བུ་ཁོ་ནར་རྣམ་པར་གཞག་གི །
[146a.3]དངོས་གཞིའི་འབྲས་བུ་ནི་མ་ཡིན་ཏེ། འདི་ལ་ནི་བྱེ་བྲག་ཏུ་སྨྲ་བ་དང་། བཙུན་པ་དབྱངས་སྒྲོགས་ཀྱི་གཞུང་ལུགས་མཐུན་ནོ། །བསམ་གཏན་ཁྱད་པར་ཅན་ཡང་བསམ་གཏན་བཞིན་དུ་བལྟ་བར་བྱའོ་ཞེས་བྱ་བ་ནི་བསམ་གཏན་ཁྱད་པར་ཅན་གྱི་ཟག་པ་མེད་པས་ཀྱང་ཉོན་མོངས་པ་སྤོང་བར་
[146a.4]འགྱུར་ཏེ། དེ་ལྟ་བས་ན་མི་ལྕོགས་པ་མེད་པ་དང་། དངོས་གཞིའི་བསམ་གཏན་རྣམས་ཁོ་ནའི་འབྲས་བུ་ཁོ་ན་བཤད་ཀྱི། བསམ་གཏན་ཁྱད་པར་ཅན་གྱིས་ནི་མ་ཡིན་ནོ། །དེའི་ཕྱིར་བསམ་གཏན་ཁྱད་པར་ཅན་ཡང་བསམ་གཏན་བཞིན་དུ་བལྟ་བར་བྱའོ་ཞེས་བྱ་བ་སྨོས་ཏེ། བསམ་
[146a.5]གཏན་ཁྱད་པར་ཅན་ནི་བསམ་གཏན་དང་པོ་ཁོ་ན་རྟོག་པ་དང་བྲལ་བས་ཁྱད་པར་དུ་འཕགས་པ་ཡིན་པའི་ཕྱིར་རོ། །ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་ཀྱི་ཞེས་བྱ་བ་ནི་དེ་ནི་འཇིག་རྟེན་ཡིན་ཡང་འཕགས་པ་ཁོ་ན་ལ་འབྲས་བུ་ཡོངས་སུ་ཤེས་པར་རྣམ་པར་གཞག་སྟེ། བྲལ་བའི་ཐོབ་
[146a.6]པ་ཟག་པ་མེད་པ་སྲིད་པའི་ཕྱིར་རོ། །གཟུགས་མེད་དངོས་གཞི་གསུམ་གྱི་ཡང་། །ཞེས་བྱ་བ་ནི་ཟག་པ་མེད་པའིའོ། །འཇིག་རྟེན་པའི་ལམ་གྱི་འབྲས་བུ་ནི་གཉིས་ཏེ་ཞེས་བྱ་བ་ནི་འཕགས་པ་འཇིག་རྟེན་པའི་ལམ་གྱིས་འདོད་པའི་ཁམས་ལས་འདོད་ཆགས་དང་བྲལ་བར་བྱེད་པ་ནའོ། །
[146a.7]རྗེས་སུ་ཤེས་པའི་འབྲས་བུ་ཡང་ཡོངས་སུ་ཤེས་པ་གཉིས་ཏེ་ཞེས་བྱ་བ་ནི་བསྒོམ་པའི་ལམ་གྱིས་བསྡུས་པའི་སྟེ། ཐ་མ་གཟུགས་ཀྱི་འདོད་ཆགས་ཟད་པ་དང་། ཀུན་དུ་སྦྱོར་བ་ཐམས་ཅད་ཡོངས་སུ་གཏུགས་པའི་ཡོངས་སུ་ཤེས་པ་དག་གོ། །ཆོས་ཤེས་པ་ནི་གསུམ་ཡིན་ནོ་ཞེས་བྱ་བ་ནི་
[146b]
[146b.1]བསྒོམ་པའི་ལམ་གྱིས་བསྡུས་པའི་སྟེ། བསྒོམ་པའི་ལམ་ལ་འགོག་པའམ། །ལམ་ལ་ཆོས་ཤེས་གང་ཡིན་ཏེ། །ཁམས་གསུམ་གྱི་ནི་གཉེན་པོ་ཡིན། །ཞེས་འབྱུང་བས་སོ། །དེའི་འབྲས་བུ་ནི་ཐ་མ་གསུམ་པོ་ཐ་མའི་ཆ་དང་མཐུན་པ་སྤངས་པ་དང་གཟུགས་ཀྱི་འདོད་ཆགས་ཟད་པ་དང་ཀུན་དུ་
[146b.2]སྦྱོར་བ་ཐམས་ཅད་ཡོངས་སུ་གཏུགས་པའི་ཡོངས་སུ་ཤེས་པ་ཡིན་ནོ། །ཅིའི་ཕྱིར་ཞེ་ན། ཁམས་གསུམ་པའི་བསྒོམ་པས་སྤང་བར་བྱ་བའི་གཉེན་པོ་ཡིན་པའི་ཕྱིར་རོ་ཞེས་བྱ་བ་སྨོས་སོ། །དེ་ཕྱོགས་མཐུན་གྱི་དྲུག་དང་ལྔ། །ཞེས་བྱ་བ་ནི་ཆོས་ཤེས་པ་དང་རྗེས་སུ་ཤེས་པ་དག་གི་ཕྱོགས་
[146b.3]དང་མཐུན་པའི་ནི་ཅི་རིགས་པར་དྲུག་དང་ལྔ་ཡིན་ནོ། །ཕྱོགས་དང་མཐུན་པ་ཞེས་སྨོས་པ་ནི་བཟོད་པ་དང་ཤེས་པ་དག་བསྡུ་བ་ཡིན་ནོ། །ཆོས་ཀྱི་བཟོད་པ་དང་ཤེས་པ་རྣམས་ཀྱི་འབྲས་བུ་གང་དག་ཡིན་པ་ཁོ་ནའོ་ཞེས་བྱ་བ་ནི་ཆོས་ཀྱི་བཟོད་པ་རྣམས་དང་ཆོས་ཤེས་པ་རྣམས་ཀྱི་ཞེས་བྱ་བར་ཚིག་
[146b.4]བསྡུ་སྟེ། ཆོས་ཤེས་པའི་བཟོད་པ་རྣམས་ཀྱི་འབྲས་བུ་ནི་མ་ཡིན། འདོད་པ་ན་སྤྱོད་པ་མཐོང་བས་སྤང་བར་བྱ་བ་སྤངས་པའི་ངོ་བོ་ཉིད་ཀྱིས་ཡོངས་སུ་ཤེས་པ་ཇི་སྐད་བཤད་པ་གསུམ་ཡིན་ནོ། །ཆོས་ཤེས་པ་རྣམས་ཀྱི་ཡང་བསྒོམ་པའི་ལམ་ལ་སྡུག་བསྔལ་དང་ཀུན་འབྱུང་བ་ཤེས་པས་
[146b.5]བསྡུས་པ་རྣམས་ཀྱི་ནི་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་གཅིག་གོ། །འགོག་པ་དང་ལམ་ཤེས་པས་བསྡུས་པ་རྣམས་ཀྱི་ནི་ཐ་མའི་ཆ་དང་མཐུན་པར་སྤངས་པ་དང་གཟུགས་ཀྱི་འདོད་ཆགས་ཟད་པ་དང་། ཀུན་དུ་སྦྱོར་བ་ཐམས་ཅད་ཡོངས་སུ་གཏུགས་པའི་ཡོངས་སུ་
[146b.6]ཤེས་པ་གསུམ་ཆར་ཡང་ཡིན་ནོ། །རྗེས་ཀྱི་བཟོད་པ་དང་ཤེས་པ་རྣམས་ཀྱི་འབྲས་བུ་གང་དག་ཡིན་པ་ཁོ་ནའོ་ཞེས་བྱ་བ་ནི་རྗེས་ཀྱི་བཟོད་པ་རྣམས་དང་རྗེས་ཀྱི་ཤེས་པ་རྣམས་ཀྱི་སྟེ། དེ་དག་ཀྱང་གཟུགས་དང་གཟུགས་མེད་པ་ན་སྤྱོད་པའི་མཐོང་བས་སྤང་བར་བྱ་བ་སྤངས་པའི་ངོ་བོ་ཉིད་ཀྱིས་ཡོངས་སུ་
[146b.7]ཤེས་པ་ཇི་སྐད་བཤད་པ་གསུམ་དང་། ཡོངས་སུ་ཤེས་པ་ཐ་མ་གཉིས་སོ། །ཅིའི་ཕྱིར་སྤངས་པ་རེ་རེ་ཡོངས་སུ་ཤེས་པར་རྣམ་པར་མི་གཞག་ཅེས་བྱ་བ་ནི་ཅིའི་ཕྱིར་སྡུག་བསྔལ་མཐོང་བས་སྤང་བར་བྱ་བ་སྤངས་པ་དང་། ཀུན་དུ་འབྱུང་བ་མཐོང་བས་སྤང་བར་བྱ་བ་སྤངས་པ་ནས་རྒྱས་པར་སྲིད་པའི་
[147a]
[147a.1]རྩེ་མོའི་རྣམ་པ་ཆུང་ངུའི་ཆུང་ངུ་སྤངས་པ་ཞེས་བྱ་བའི་བར་དུ་མི་གཟུང་། བྲལ་བའི་ཐོབ་པ་ཟག་མེད་དང་། །ཞེས་བྱ་བ་ནི་བྲལ་བའི་ཐོབ་པ་ཟག་པ་མེད་པ་རྙེད་པའི་ཕྱིར་ཞེས་བྱ་བའི་ཐ་ཚིག་གོ། །སྲིད་རྩེ་ཉམས་པར་བྱས་པ་དང་། །ཞེས་བྱ་བ་ནི་སྲིད་པའི་རྩེ་མོའི་ཕྱོགས་སྤངས་
[147a.2]པའི་ཕྱིར་ཞེས་བྱ་བའི་དོན་ཏོ། །རྒྱུ་གཉིས་ཀུན་དུ་བཅོམ་པའི་ཕྱིར། །ཞེས་བྱ་བ་ནི་སྡུག་བསྔལ་དང་ཀུན་འབྱུང་མཐོང་བས་སྤང་བར་བྱ་བའི་ཀུན་དུ་འགྲོ་བ་གཉིས་སྤངས་པའི་ཕྱིར་ཞེས་བྱ་བའི་ཐ་ཚིག་གོ། །དེ་སྤངས་པའི་ཡོངས་སུ་ཤེས་པ་ཞེས་བྱ་བ་ནི་རྒྱུ་དེ་དག་གིས་ཁྱད་པར་དུ་འཕགས་པ་ནི་
[147a.3]སྤངས་པ་ཡིན་ཏེ། དེའི་ཕྱིར་ཡོངས་སུ་ཤེས་པ་ཞེས་བྱ་བར་རྣམ་པར་གཞག་གོ། །ཆོས་དང་རྗེས་སུ་ཤེས་པ་གཞན་དག་ལ་ཞེས་བྱ་བ་ནི་ཆོས་ཤེས་པ་དང་རྗེས་སུ་ཤེས་པ་ཀུན་འབྱུང་ལ་ཆོས་ཤེས་པ་ནས་བཟུང་སྟེ་ཟད་པ་ཤེས་པ་ཞེས་བྱ་བའི་བར་དེ་དག་ལའོ། །ཤེས་པའི་འབྲས་བུ་སྤངས་
[147a.4]པ་ནི་ཞེས་བྱ་བ་ནི་བསྒོམ་པའི་ལམ་ལ་སྟེ། དེ་ནི་བཟོད་པའི་འབྲས་བུ་མ་ཡིན་པས་སོ། །ཁམས་ལས་འདས་པ་ལས་ཀྱང་ཞེས་བྱ་བ་ནི་ཁམས་ལས་འདས་པ་ལས་ཀྱང་ཞེས་བྱ་བ་སྟེ། འདིར་ཀྱང་ཞེས་བྱ་བའི་སྒྲ་མི་མངོན་པར་བྱས་པ་ཡིན་པས་སོ། །དེའི་ཕྱིར་འདི་སྐད་དུ་བཞི་པ་ཞེས་
[147a.5]འབྲེལ་པར་བྱེད་དོ། །གང་གི་ཚེ་ཁམས་ལས་ཡང་དག་པར་འདའ་བ་ནའོ་ཞེས་བྱ་བ་ནི་འདོད་པའི་ཁམས་གཟུགས་ཀྱི་ཁམས་དང་གཟུགས་མེད་པའི་ཁམས་ལས་ཡང་དག་པར་འདའ་བ་སྟེ། དེའི་ཚེ་ཡོངས་སུ་ཤེས་པའི་མིང་འཐོབ་བོ་ཞེས་བྱ་བའི་ཚིག་ལྷག་མ་ཡིན་ནོ། །ཅིའི་ཕྱིར་ཞེ་ན། ཁམས་
[147a.6]མཐའ་དག་ལས་འདོད་ཆགས་དང་བྲལ་བའི་ཕྱིར་ཞེས་བྱ་བ་སྨོས་ཏེ། ཁམས་རིལ་ལས་འདོད་ཆགས་དང་བྲལ་བའི་ཕྱིར་ཡིན་གྱི་ཉམས་པར་བྱས་པ་ཙམ་གྱི་ཕྱིར་ནི་མ་ཡིན་ཏེ། དེའི་ཚེ་ནི་ཤིན་ཏུ་སྤངས་པ་ཡིན་ནོ་སྙམ་དུ་བསམས་པ་ཡིན་ནོ། །གཉིས་ཀུན་དུ་སྦྱོར་བ་དང་བྲལ་བ་ཞེས་བྱ་བ་
[147a.7]ནི་དམིགས་པར་བྱ་བ་དང་དམིགས་པར་བྱེད་པའི་ཉོན་མོངས་པའི་སྐད་ཅིག་ཀུན་དུ་སྦྱོར་བ་ནི་གཉིས་ཀུན་དུ་སྦྱོར་བའོ། །དེ་དང་བྲལ་བ་ནི་གཉིས་ཀུན་དུ་སྦྱོར་བ་དང་བྲལ་བ་སྟེ། ཆོས་མངོན་པ་པ་རྣམས་ཀྱིས་རྒྱུ་ལྔ་པ་དེ་སྨྲས་ཏེ། རྒྱུ་འདིས་ན་སྤངས་པ་ལ་ཡོངས་སུ་ཤེས་པ་ཞེས་བྱའོ། །རྣམ་པ་
[147b]
[147b.1]གང་ཞིག་སྤངས་ལ་ཞེས་བྱ་བ་ནི་སྡུག་བསྔལ་མཐོང་བས་སྤང་བར་བྱ་བ་ནས་ལམ་མཐོང་བས་སྤང་བར་བྱ་བའི་བར་དང་བསྒོམ་པས་སྤང་བར་བྱ་བའོ། །གལ་ཏེ་སྤངས་པའི་རྣམ་པ་དེ་ལ་དམིགས་པའི་ཉོན་མོངས་པ་མཐོང་བས་སྤང་བར་བྱ་བའམ་བསྒོམ་པས་སྤང་བར་བྱ་བ་གཞན་དང་བྲལ་བར་གྱུར་
[147b.2]ནའོ་ཞེས་བྱ་བ་ཡིན་ཏེ། དེ་གཞན་དག་ན་རེ་འདི་ཡང་སྤངས་པ་ལ་ཡོངས་སུ་ཤེས་པ་ཞེས་བྱ་བའི་རྒྱུ་ལྔ་པ་ཡིན་ནོ་ཞེས་ཟེར་རོ། །དེ་ནི་གཞན་མ་ཡིན་ཞེས་བྱ་བ་རྒྱས་པར་འབྱུང་བ་ནི་གཉིས་ཀུན་དུ་སྦྱོར་བ་དང་བྲལ་བ་དེ་ནི་རྒྱུ་གཉི་ག་ཡང་དག་པར་བཅོམ་པ་སྟེ། སྡུག་བསྔལ་མཐོང་བས་སྤང་བར་བྱ་
[147b.3]བ་དང་། ཀུན་འབྱུང་མཐོང་བས་སྤང་བར་བྱ་བའི་ཀུན་དུ་འགྲོ་བའི་རྒྱུ་ཡང་དག་པར་བཅོམ་པ་དང་། ཁམས་ལས་ཡང་དག་པར་འདས་པ་ལས་གཞན་མ་ཡིན་ནོ། །འདི་ལྟར་སྡུག་བསྔལ་མཐོང་བས་སྤང་བར་བྱ་བ་དག་སྤངས་ཀྱང་ཇི་སྲིད་དུ་དེ་ལ་དམིགས་པ་ཀུན་དུ་འབྱུང་བ་མཐོང་བས་སྤང་བར་བྱ་
[147b.4]བའི་ཀུན་དུ་འགྲོ་བའི་རྒྱུ་སྤངས་པར་མ་གྱུར་པ་དེ་སྲིད་དུ་རྒྱུ་གཉི་ག་ཡང་དག་པར་བཅོམ་པ་མེད་ལ་བསྒོམ་པས་སྤང་བར་བྱ་བ་དག་ཀྱང་རྣམ་པ་བརྒྱད་ཀྱི་བར་སྤངས་ཀྱང་ཇི་སྲིད་དུ་རྣམ་པ་དགུ་པ་མ་སྤངས་པ། དེ་སྲིད་དུ་ཁམས་ལས་ཡང་དག་པར་འདའ་བ་མེད་པས་མི་བརྗོད་དོ། །གཅིག་མིན་
[147b.5]ཞེས་བྱ་བ་རྒྱས་པར་འབྱུང་བ་ལ་རེ་ཞིག་སོ་སོའི་སྐྱེ་བོ་ནི་མི་ལྡན་པ་ཁོ་ན་སྟེ། བྲལ་བའི་ཐོབ་པ་ཟག་པ་མེད་པ་མེད་པའི་ཕྱིར་རོ། །འཕགས་པ་མཐོང་བའི་ལམ་ལ་གནས་པ་ཡང་ཀུན་འབྱུང་ལ་ཆོས་ཤེས་པའི་བཟོད་པ་ལ་གནས་པའི་བར་དུ་ཞེས་བྱ་བ་ནི་བར་དུ་ཞེས་བྱ་བའི་སྒྲས་ནི་སྡུག་བསྔལ་ལ་ཆོས་
[147b.6]ཤེས་པ་དང་རྗེས་སུ་ཤེས་པའི་བཟོད་པ་དང་། ཀུན་འབྱུང་བ་ལ་ཆོས་པའི་བཟོད་པ་ལ་གནས་པ་ཡང་མི་ལྡན་པ་ཁོ་ན་སྟེ། རྒྱུ་གཉི་ག་མ་སྤངས་པའི་ཕྱིར་རོ། །ཀུན་འབྱུང་ལ་ཆོས་ཤེས་པ་ནི་གཅིག་དང་ལྡན་ལ་ཀུན་འབྱུང་ལ་རྗེས་སུ་ཤེས་པའི་བཟོད་པ་ལ་གནས་པ་ཡང་གཅིག་ཁོ་ན་དང་ལྡན་ནོ་
[147b.7]ཞེས་བྱ་བར་ཁོང་དུ་ཆུད་པར་བྱའོ། །ཀུན་འབྱུང་ལ་རྗེས་སུ་ཤེས་པ་ནི་གཉིས་དང་ལྡན་ཏེ། དེའི་ཚེ་སྔར་བཤད་པའི་འདོད་པ་ན་སྤྱོད་པའི་སྡུག་བསྔལ་དང་ཀུན་འབྱུང་བ་མཐོང་བས་སྤང་བར་བྱ་བ་སྤངས་པའི་ཡོངས་སུ་ཤེས་པ་དང་། གཟུགས་དང་གཟུགས་མེད་པ་ན་སྤྱོད་པའི་སྡུག་བསྔལ་དང་ཀུན་
[148a]
[148a.1]འབྱུང་བ་མཐོང་བས་སྤང་བར་བྱ་བ་སྤངས་པའི་ཡོངས་སུ་ཤེས་པ་དང་ལྡན་ལ། འགོག་པ་ལ་ཆོས་ཤེས་པའི་བཟོད་པ་ལ་གནས་པ་ཡང་གཉིས་ཁོ་ན་དང་ལྡན་ནོ། །འགོག་པ་ལ་ཆོས་ཤེས་པ་ནི་གསུམ་དང་ལྡན་ནོ་ཞེས་བྱ་བ་ལ་སོགས་པ་ནི་སྦྱར་བར་བྱ་སྟེ། མཐོང་བའི་ལམ་
[148a.2]ལ་གནས་པ་ལྔའི་བར་དང་ལྡན་གྱི་དྲུག་དང་ནི་མ་ཡིན་ཏེ། སྐད་ཅིག་མ་བཅུ་དྲུག་པ་ནི་བསྒོམ་པའི་ལམ་གྱིས་བསྡུས་པའི་ཕྱིར་རོ། །ལམ་ལ་རྗེས་སུ་ཤེས་པ་ལ་གནས་པ་ཡོངས་སུ་ཤེས་པ་དྲུག་དང་ལྡན་ནོ་ཞེས་བྱ་བ་ནི་སྔར་བཤད་པ་རྣམས་དང་། གཟུགས་དང་གཟུགས་མེད་པ་ན་སྤྱོད་པ་ལམ་
[148a.3]མཐོང་བས་སྤང་བར་བྱ་བ་སྤངས་པའི་ཡོངས་སུ་ཤེས་པ་དང་ལྡན་ནོ། །འབྲས་བུ་བཞི་རྣམས་གཞག་པ་ནི། །རྒྱུ་ལྔ་དག་ནི་སྲིད་ཕྱིར་རོ། །འབྲས་ལ་སྔོན་ལམ་བཏང་བ་དང་། །གཞན་ཐོབ་པ་དང་ཟད་བསྡོམས་དང་། །ཤེས་པ་བརྒྱད་མཚན་ཐོབ་པ་དང་། །རྣམ་པ་བཅུ་དྲུག་ཐོབ་པའོ། །
[148a.4]ཞེས་འཆད་པར་འགྱུར་བ་མ་ཡིན་ནམ་ཞེ་ན། སྤངས་པ་སྡོམ་པ་ཡིན་མོད་ཀྱི། ཡོངས་སུ་ཤེས་པ་སྡོམ་པ་ནི་མ་ཡིན་པས་འགལ་བ་མེད་དོ། །ཇི་སྲིད་དུ་འདོད་པ་ལ་འདོད་ཆགས་དང་བྲལ་བ་མ་ཐོབ་པ་ཞེས་བྱ་བ་ལ། ཇི་སྲིད་དུ་ཞེས་བྱ་བའི་སྒྲས་ནི་བསྒོམ་པས་སྤང་བར་བྱ་བའི་ཉོན་མོངས་
[148a.5]པའི་རྣམ་པ་དང་པོ་སྤངས་པ་ནས་རྣམ་པ་བརྒྱད་སྤངས་པའི་བར་ལ་གནས་པ་ཡང་དྲུག་ཁོ་ན་དང་ལྡན་ནོ་ཞེས་བསྟན་པ་ཡིན་ནོ། །དེ་ལས་ཡོངས་སུ་ཉམས་པ་ཞེས་བྱ་བ་ནི་འདོད་པ་ལས་འདོད་ཆགས་དང་བྲལ་བ་ནི་ཡོངས་སུ་ཉམས་པས་བསྡོམས་པ་དེ་དང་འདྲ་བས་སོ། །སྔོན་ནམ་ཕྱིས་འདོད་
[148a.6]པ་ལ་འདོད་ཆགས་དང་བྲལ་བ་ཐོབ་པ་ཞེས་བྱ་བ་ནི་མངོན་པར་རྟོགས་པའི་སྔོན་རོལ་ལམ་འོག་ཏུའམ་ཇི་ལྟ་ཞེ་ན་འཇིག་རྟེན་པའི་ལམ་གྱིས་འདོད་པ་ལ་འདོད་ཆགས་དང་བྲལ་བར་བྱས་ནས་ངེས་པ་ལ་ཞུགས་པ་ནི་ལམ་ལ་རྗེས་སུ་ཤེས་པའི་ཚེ་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་
[148a.7]གཅིག་དང་ལྡན་ཏེ། འདི་ལྟར་འཕགས་པ་དེ་ནི་སེམས་ཀྱི་སྐད་ཅིག་བཅུ་དྲུག་ལ་ཐོབ་ན་ཕྱིར་མི་འོང་བ་ཡིན་གྱི་རྒྱུན་དུ་ཞུགས་པའམ་ཕྱིར་འོང་བ་ནི་མ་ཡིན་ནོ། །ཐ་མའི་ཆ་དང་མཐུན་པ་ལྔ་སྤངས་པས་ཕྱིར་མི་འོང་བ་ཡིན་ནོ་ཞེས་ཀྱང་འབྱུང་སྟེ། དེ་ལྟ་བས་ན་མཐོང་བས་སྤང་བར་བྱ་བ་སྤངས་པ་
[148b]
[148b.1]རྣམས་དང་། ཐ་མའི་ཆ་དང་མཐུན་པ་ལྔ་སྤངས་པ་བསྡོམས་པའི་ཕྱིར་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་གཅིག་ཁོ་ན་དང་ལྡན་ལ། མངོན་པར་རྟོགས་པའི་འོག་ཏུ་རིམ་གྱིས་འདོད་པ་ལས་འདོད་ཆགས་དང་བྲལ་བ་ཐོབ་པ་ཡང་ཐ་མའི་ཆ་དང་མཐུན་པ་སྤངས་པའི་ཡོངས་སུ་
[148b.2]ཤེས་པ་གཅིག་ཁོ་ན་དང་ལྡན་ནོ། །དགྲ་བཅོམ་པ་ཉིད་ཐོབ་པ་ནི་གཅིག་ཁོ་ན་དང་ལྡན་ཏེ། དེའི་ཚེ་ཡོངས་སུ་ཤེས་པ་བསྡོམས་པའི་ཕྱིར་རོ། །གཟུགས་ན་སྤྱོད་པའི་ཀུན་ནས་དཀྲིས་པས་ཡོངས་སུ་ཉམས་ན་ཡང་ཞེས་བྱ་བའི་ཁྱད་པར་སྨོས་པ་ནི་འདོད་པ་ན་སྤྱོད་པས་ཡོངས་སུ་ཉམས་པ་
[148b.3]ཡོངས་སུ་ཤེས་པ་དྲུག་དང་ལྡན་པ་སྤངས་པའི་ཕྱིར་དང་གཟུགས་མེད་པ་ན་སྤྱོད་པས་ཡོངས་སུ་ཉམས་པ་ཡོངས་སུ་ཤེས་པ་གཉིས་དང་ལྡན་པ་སྤངས་པའི་ཕྱིར་རོ། །གཟུགས་ཀྱི་འདོད་ཆགས་དང་བྲལ་བ་ཐོབ་པ་ནི་ཡོངས་སུ་ཤེས་པ་གཉིས་དང་ལྡན་ནོ་ཞེས་བྱ་བ་ནི་ཕྱིར་མི་འོང་བ་གཟུགས་ཀྱི་
[148b.4]འདོད་ཆགས་དང་བྲལ་བ་ཞེས་བྱ་བའི་དོན་ཏོ། །ཁམས་ལས་འདོད་ཆགས་དང་བྲལ་བ་ཡིན་ན་ཅིའི་ཕྱིར་མི་སྡོམ་ཞེ་ན། འབྲས་བུ་ཐོབ་པ་མེད་པའི་ཕྱིར་ཏེ། ཁམས་ལས་འདོད་ཆགས་དང་བྲལ་བ་དང་འབྲས་བུ་ཐོབ་པ་རྒྱུ་མཐའ་དག་གིས་ཡོངས་སུ་ཤེས་པ་སྡོམ་པར་འདོད་ཀྱི་གཅིག་
[148b.5]ཁོ་ནས་ནི་མ་ཡིན་ནོ། །གཟུགས་མེད་པ་ན་སྤྱོད་པའི་ཀུན་ནས་དཀྲིས་པས་ཡོངས་སུ་ཉམས་པ་ཡང་ཞེས་བྱ་བ་ནི་དགྲ་བཅོམ་པ་ཉིད་ཐོབ་པས་བསྡོམས་པ་ཐ་མའི་ཆ་དང་མཐུན་པ་སྤངས་པ་དང་། གཟུགས་ཀྱི་འདོད་ཆགས་ཟད་པའི་ཡོངས་སུ་ཤེས་པ་དག་གཟུགས་མེད་པ་ན་སྤྱོད་པའི་ཉོན་མོངས་
[148b.6]པས་དགྲ་བཅོམ་པ་ཉིད་ལས་ཡོངས་སུ་ཉམས་ན་ཕྱིར་འཐོབ་པའི་ཕྱིར་རོ། །གཟུགས་ན་སྤྱོད་པས་ཡོངས་སུ་ཉམས་པ་ནི་གཅིག་དང་ལྡན་པར་འགྱུར་ལ། འདོད་པ་ན་སྤྱོད་པས་ཡོངས་སུ་ཉམས་ན་ནི་དྲུག་དང་ལྡན་པར་འགྱུར་བས་དེའི་ཕྱིར་གཟུགས་མེད་པ་ན་སྤྱོད་པའི་ཀུན་ནས་དཀྲིས་པ་
[148b.7]ཞེས་སྨོས་སོ། །ཕྱིར་མི་འོང་བ་དང་དགྲ་བཅོམ་པ་དག་གི་ཞེས་བྱ་བ་ནི་གཟུགས་ཀྱི་འདོད་ཆགས་དང་མ་བྲལ་བའི་ཕྱིར་ཕྱིར་མི་འོང་བ་དང་དགྲ་བཅོམ་པ་དག་གི་ཞེས་བྱ་བར་བརྗོད་པར་འདོད་པ་ཡིན་ཏེ། གཟུགས་ཀྱི་འདོད་ཆགས་དང་བྲལ་བའི་ཕྱིར་མི་འོང་བ་ནི་ཡོངས་སུ་ཤེས་པ་གཉིས་དང་
[149a]
[149a.1]ལྡན་པར་འབྱུང་བའི་ཕྱིར་རོ། །མང་དུ་ནི་མ་ཡིན་ཞེས་བྱ་བ་ནི་རིམ་གྱིས་རྒྱུན་དུ་ཞུགས་པ་བཞིན་དུ་ཆེས་མང་བ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །སྡོམ་ཞེས་བྱ་བ་ནི་དོན་ཅི་ཞེ་ན། གཅིག་ཏུ་རྣམ་པར་འཇོག་པ་ཞེས་བྱ་བའི་ཐ་ཚིག་གོ། །རྒྱུ་གཉིས་ཀྱིས་ཞེས་
[149a.2]བྱ་བ་ནི་རྣམ་པར་བཤད་པ་ཡིན་ནོ། །དེ་གཉིས་ཡང་ཞེས་བྱ་བ་ནི་ཁམས་ལས་འདོད་ཆགས་དང་བྲལ་བ་དང་འབྲས་བུ་ཐོབ་པའོ། །གནས་སྐབས་དེ་གཉིས་ན་ཞེས་བྱ་བ་ནི་གཟུགས་ཀྱི་འདོད་ཆགས་དང་མ་བྲལ་བའི་ཕྱིར་མི་འོང་བ་དང་། དགྲ་བཅོམ་པ་དག་ཉིད་ཀྱི་གནས་སྐབས་དག་ནའོ། །
[149a.3]ཡོངས་སུ་ཤེས་པ་གཅིག་ཅེས་བྱའོ་ཞེས་བྱ་བ་ནི་གཟུགས་ཀྱི་འདོད་ཆགས་དང་མ་བྲལ་བའི་ཕྱིར་མི་འོང་བ་ནི་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་གཅིག་ཡིན་ལ། དགྲ་བཅོམ་པའི་ཡང་ཀུན་དུ་སྦྱོར་བ་ཐམས་ཅད་ཡོངས་སུ་གཏུགས་པའི་ཡོངས་སུ་ཤེས་པ་གཅིག་ཡིན་ནོ། །
[149a.4]ལ་ལ་གཅིག་གཉིས་ལྔ་དང་དྲུག །ཅེས་བྱ་བ་རྒྱས་པར་འབྱུང་བ་ནི་ལ་ལས་གཅིག་འདོར། ལ་ལས་གཉིས། ལ་ལས་ལྔ། ལ་ལས་ནི་དྲུག་འདོར་རོ་ཞེས་བྱ་བའི་ཐ་ཚིག་གོ། །འཐོབ་པ་ཡང་ལ་ལས་ནི་གཅིག །ལ་ལས་ནི་གཉིས། ལ་ལས་ནི་དྲུག་གོ། །ལ་ལས་ལྔ་འཐོབ་པོ་
[149a.5]ཞེས་བྱ་བ་འདི་མེད་དོ། །དེའི་ཕྱིར་ལྔ་མིན་ནོ་ཞེས་བྱ་བ་སྨོས་ཏེ། མདོའི་དོན་གྱི་ཚུལ་ནི་འགས་ཀྱང་མི་འཐོབ་པ་ཁོ་ནའོ་ཞེས་བྱ་བ་ཡིན་ནོ། །འགྲེལ་པ་བཤད་པར་བྱ་སྟེ། སེམས་གང་ཡང་རུང་བ་ཞིག་གིས་དགྲ་བཅོམ་པ་ཉིད་ལས་ཡོངས་སུ་ཉམས་ན་ཀུན་དུ་སྦྱོར་བ་ཐམས་ཅད་ཡོངས་
[149a.6]སུ་གཏུགས་པའི་ཤེས་པ་གཅིག་འདོར་ཏེ། དགྲ་བཅོམ་པ་ཉིད་ཀྱི་གནས་སྐབས་ན་བསྡོམས་པས། དེ་གཅིག་པུ་ཁོ་ན་ཡོད་པའི་ཕྱིར་རོ། །དེ་བཞིན་དུ་གཟུགས་ཀྱི་འདོད་ཆགས་དང་བྲལ་བའི་ཕྱིར་མི་འོང་བ་འདོད་པ་ལ་འདོད་ཆགས་དང་བྲལ་བ་ལས་ཡོངས་སུ་ཉམས་པའི་ཡང་ཐ་མའི་
[149a.7]ཆ་དང་མཐུན་པ་སྤངས་པའི་ཡོངས་སུ་ཤེས་པ་གཅིག་ཁོ་ན་གཏོང་ངོ་། །ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་དང་། གཟུགས་ཀྱི་འདོད་ཆགས་སྤངས་པའི་ཡོངས་སུ་ཤེས་པ་གཏོང་ངོ་། །དེ་སུ་ཞིག་ཡིན་ཞེ་ན། ཕྱིར་མི་འོང་བ་གཟུགས་ཀྱི་འདོད་ཆགས་དང་བྲལ་བ་ཞིག་
[149b]
[149b.1]འདོད་པ་ལ་འདོད་ཆགས་དང་བྲལ་བ་ལས་ཡོངས་སུ་ཉམས་ན་ཞེས་བྱ་བ་སྨོས་སོ། །འདོད་ཆགས་དང་བྲལ་བ་སྔོན་དུ་འགྲོ་བ་ལམ་ལ་རྗེས་སུ་ཤེས་པ་ལ་གནས་པ་ནི་ལྔ་གཏོང་ཞེས་བྱ་བ་ནི་མངོན་པར་རྟོགས་པའི་སེམས་ཀྱི་སྐད་ཅིག་བཅུ་དྲུག་པ་ལ་གནས་ཏེ། དེ་ནི་ཐ་མའི་ཆ་དང་མཐུན་པ་སྤངས་པའི་
[149b.2]ཡོངས་སུ་ཤེས་པ་ཐོབ་ན་འཇིག་རྟེན་པའི་ལམ་གྱིས་ཐོབ་པ་དེའི་བྲལ་བ་ཟག་པ་མེད་པ་ཐོབ་པ་ཡོངས་སུ་ཤེས་པ་སྔ་མ་སྐད་ཅིག་མ་བཅོ་ལྔ་ཐོབ་པ་ལྔ་གཏོང་ངོ་། །དྲུག་པ་གཟུགས་དང་གཟུགས་མེད་པ་ན་སྤྱོད་པ་ལམ་མཐོང་བས་སྤང་བར་བྱ་བ་སྤངས་པའི་ཡོངས་སུ་ཤེས་པ་ནི་མི་གཏོང་མོད་ཀྱི།
[149b.3]འོན་ཀྱང་ཁམས་ལས་འདོད་ཆགས་དང་བྲལ་བ་དང་འབྲས་བུ་ཐོབ་པའི་སྒོ་ནས་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པའི་ནང་དུ་བསྡོམས་པའི་ཕྱིར་མེད་པའི་ངོ་བོ་ཉིད་དང་འདྲ་བས་དེ་ཉེ་བར་མི་འགོད་དོ། །མཐར་གྱིས་པ་འདོད་ཆགས་དང་བྲལ་བ་སྔོན་དུ་འགྲོ་བ་མ་ཡིན་པ་གང་ཡིན་པ་
[149b.4]ནི་འདོད་པ་ལ་འདོད་ཆགས་དང་བྲལ་བར་བྱེད་པའི་རྒྱུས་དྲུག་གཏོང་སྟེ། ཁམས་གསུམ་པའི་མཐོང་བས་སྤང་བར་བྱ་བ་རྣམས་སྤངས་པའི་ཡོངས་སུ་ཤེས་པ་གང་དག་ཡིན་པའོ། །དེ་བཞིན་དུ་ཐོབ་པ་ཡང་ཞེས་བྱ་བ་ནི་ལྔ་ཞེས་བྱ་བ་མ་གཏོགས་པ་ལ་ལས་ནི་གཅིག་འཐོབ་པ་ནས་དྲུག་གི་བར་
[149b.5]དུ་འཐོབ་པ་ཡིན་ནོ། །གང་ལ་ལ་ཞིག་གིས་སྔོན་མེད་པ་ཐོབ་པའོ་ཞེས་བྱ་བ་ནི་མཐོང་བའི་ལམ་ལ་གནས་པ་གང་ཞིག་གིས་ཡོངས་སུ་ཤེས་པ་དགུ་ལས་སྔོན་མ་ཐོབ་པ་ཞིག་དང་པོར་ཐོབ་པ་དེས་ནི་གཅིག་འཐོབ་བོ། །བསྒོམ་པའི་ལམ་ཡང་འདོད་ཆགས་དང་བྲལ་བ་སྔོན་དུ་འགྲོ་བས་མཐོང་
[149b.6]བའི་ལམ་གྱི་ཐ་མར་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་གཅིག་འཐོབ་བོ། །མཐར་གྱིས་པས་ཀྱང་འདོད་པ་ལས་འདོད་ཆགས་དང་བྲལ་བའི་ལམ་རྣམ་པར་གྲོལ་བའི་ལམ་དགུ་པ་ལ་གཅིག་ཁོ་ན་འཐོབ་བོ། །དགྲ་བཅོམ་པས་ཀྱང་ཐ་མ་གཅིག་ཐོབ་བོ། །གཟུགས་མེད་
[149b.7]པའི་ཁམས་ལས་ཀྱང་འདོད་ཆགས་དང་བྲལ་བ་འགའ་ཞིག་ལས་ཡོངས་སུ་ཉམས་པའོ་ཞེས་བྱ་བ་ནི་གཟུགས་ཀྱི་འདོད་ཆགས་དང་བྲལ་བ་ལས་ཡོངས་སུ་ཉམས་པ་མ་ཡིན་ཞེས་བྱ་བར་སྟོན་ཏེ། དེས་ནི་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་དང་། གཟུགས་ཀྱི་འདོད་ཆགས་ཟད་
[150a]
[150a.1]པའི་ཡོངས་སུ་ཤེས་པ་འཐོབ་པོ། །ཁ་ཅིག་གིས་ནི་དྲུག་སྟེ། གང་ཞིག་ཕྱིར་མི་འོང་བའི་འབྲས་བུ་ལས་ཡོངས་སུ་ཉམས་ཞེས་བྱ་བ་ནི་མཐར་གྱིས་རྒྱུན་དུ་ཞུགས་པའོ། །འདོད་ཆགས་དང་བྲལ་བ་སྔོན་དུ་འགྲོ་བ་ལ་ནི་ཡོངས་སུ་ཉམས་པ་མེད་དེ། དེའི་འདོད་ཆགས་དང་བྲལ་
[150a.2]བ་ནི་ལམ་གཉིས་ཐོབ་པའི་ཕྱིར་རོ། །དེ་ཉིད་ཀྱི་ཕྱིར་ལྔ་འཐོབ་པ་ནི་འགའ་ཡང་མེད་པ་ཉིད་དེ། གལ་ཏེ་འདོད་ཆགས་དང་བྲལ་བ་སྔོན་དུ་འགྲོ་བ་ཞིག་ཡོངས་སུ་ཉམས་པར་གྱུར་ན། དེ་ཁོ་ནས་ཅིག་ཅར་ཡོངས་སུ་ཤེས་པ་ལྔ་འཐོབ་པར་འགྱུར་རོ། །ཆོས་མངོན་པའི་མཛོད་ཀྱི་འགྲེལ་བཤད་དོན་
[150a.3]གསལ་བ་ཞེས་བྱ་བ་སློབ་དཔོན་རྒྱལ་པོའི་སྲས་གྲགས་པའི་བཤེས་གཉེན་གྱིས་མཛད་པ་ལས་ཕྲ་རྒྱས་བསྟན་པ་ཞེས་བྱ་བ་མཛོད་ཀྱི་གནས་ལྔ་པའོ།། །།མཛོད་ཀྱི་གནས་ལྔ་པ་དང་དྲུག་པ་དག་གི་འབྲེལ་པ་ཉེ་བར་བསྟན་པའི་ཕྱིར། ཇི་སྐད་དུ་སྤངས་པ་ནི་ཞེས་བྱ་བ་ལ་སོགས་པ་
[150a.4]འདི་ཉེ་བར་འགོད་དེ། ཇི་སྐད་དུ་སྤངས་པ་ནི་ཡོངས་སུ་ཤེས་པའི་མིང་འཐོབ་བོ་ཞེས་བཤད་པ་ཞེས་བྱ་བ་ནི་འབྲས་བུ་ལ་རྒྱུ་ཉེ་བར་བཏགས་པའི་ཕྱིར་ཞེས་འབྱུང་བའི་ཕྱིར་རོ། །སྤངས་པ་དེ་ཡང་བཤད་དོ་ཞེས་བྱ་བ་ནི་བསྟན་པའོ། །ཇི་སྐད་དུ་ཞེ་ན། བདེན་པ་མཐོང་དང་བསྒོམས་པ་ལས། །
[150a.5]ཞེས་བྱ་བ་སྨོས་སོ། །ཟླས་དབྱེ་བ་གཅིག་དང་ལྡན་པའི་ངོ་བོར་བསྟན་པ་ཡིན་ཏེ། བདེན་པ་རྣམས་མཐོང་བའི་ཕྱིར་དང་། བསྒོམ་པའི་ཕྱིར་ན་བདེན་པ་མཐོང་བ་དང་བསྒོམས་པ་ལས་ཏེ་རྒྱུ་དེ་ལས་སོ། །དེ་དག་བཅུ་དང་བདུན་བདུན་བརྒྱད། །ལྟ་བ་གསུམ་གཉིས་མ་གཏོགས་པ། །འདོད་ན་སྡུག་
[150a.6]བསྔལ་ལ་སོགས་པ། །མཐོང་བས་རིམ་བཞིན་སྤོང་བར་བྱེད། །ཅེས་བྱ་བ་དང་། བཞི་ནི་བསྒོམ་པས་སྤང་བྱ་ཡིན། །ཞེས་བྱ་བ་ལ་སོགས་པས་ཉོན་མོངས་པ་རྣམས་མཐོང་བས་སྤང་བར་བྱ་བ་དང་། བསྒོམ་པས་སྤང་བར་བྱ་བ་ཡིན་ནོ་ཞེས་རྒྱས་པར་བཤད་པ་བདེན་པ་མཐོང་བ་ནི་མཐོང་བའི་
[150a.7]ལམ་གྱིས་ཡིན་ལ། བདེན་པ་བསྒོམ་པ་ནི་བསྒོམ་པའི་ལམ་གྱིས་ཡིན་པས་དེའི་ཕྱིར་ད་ནི་མཐོང་བ་དང་བསྒོམ་པའི་ལམ་དེ་དག་ཅི་ཟག་པ་མེད་པའམ་ཞེས་བྱ་བ་ལ་སོགས་པ་འདི་བརྗོད་དོ། དེ་ལམ་བསྟན་པ་ཉེ་བར་དགོད་པ་ལ་ཞེས་བྱ་བར་སྦྱར་རོ། །ཁམས་གསུམ་པའི་གཉེན་པོ་ཡིན་
[150b]
[150b.1]པའི་ཕྱིར་ཞེས་བྱ་བ་ནི་མཐོང་བའི་ལམ་འཇིག་རྟེན་པ་ཉིད་ཅིག་ཡིན་ན་སྲིད་པའི་རྩེ་མོའི་གཉེན་པོར་མི་འགྱུར་རོ་ཞེས་བྱ་བ་ཡིན་ནོ། །གཞན་ཡང་མཐོང་བས་སྤང་བར་བྱ་བ་རྣམ་པ་དགུ་ཅིག་ཅར་དུ་སྤོང་བའི་ཕྱིར་བསྒོམ་པའི་ལམ་བཞིན་དུ་འཇིག་རྟེན་པ་ནི་མ་ཡིན་ནོ། །འཇིག་རྟེན་པ་ལ་ནི་ཁམས་
[150b.2]གསུམ་པ་སྤོང་བ་དང་རྣམ་པ་དགུ་ཅིག་ཅར་དུ་སྤོང་བ་དེ་འདྲ་བའི་མཐུ་མེད་དོ། །གལ་ཏེ་འཇིག་རྟེན་ལས་འདས་པ་རྣམ་པ་དགུ་ཅིག་ཅར་དུ་སྤོང་བའི་མཐུ་ཞིག་ཡོད་ན་བསྒོམ་པས་སྤང་བར་བྱ་བ་རྣམས་ཀྱང་འཇིག་རྟེན་ལས་འདས་པས་ཅིག་ཅར་སྤོང་བར་ཐལ་བར་འགྱུར་རོ་ཞེ་ན། འཇིག་རྟེན་ལས་
[150b.3]འདས་པ་ཁོ་ནས་ཅིག་ཅར་སྤོང་ངོ་ཞེས་བྱ་བར་ངེས་པར་གཟུང་གི །འཇིག་རྟེན་ལས་འདས་པས་ཅིག་ཅར་དུ་སྤོང་བ་ཁོ་ན་ཡིན་ནོ་ཞེས་བྱ་བར་ནི་མ་ཡིན་པས་དེར་ཐལ་བར་ནི་མི་འགྱུར་རོ། །བསྒོམ་པས་སྤང་བར་བྱ་བའི་ཉོན་མོངས་པ་རྣམས་ནི་གཞི་དང་བཅས་པ་ཡིན་པའི་ཕྱིར་བསྟན་པ་ཡིན་ཏེ། དེའི་ཕྱིར་དེ་
[150b.4]དག་ནི་འཇིག་རྟེན་ལས་འདས་པས་ཀྱང་ཅིག་ཅར་དུ་མི་སྤོང་ངོ་། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་ཇི་ལྟར་མངོན་པར་རྟོགས་པ་བཞིན་བསྟན་པར་བཞེད་པ་མ་ཡིན་པ་ཞིག་ཏུ་གྱུར་ན། འཇིག་རྟེན་ན་རྒྱུ་རྣམས་སྔ་བར་མཐོང་བའི་ཕྱིར་རྒྱུ་ནི་སྔར་བསྟན་ཏེ། ཀུན་འབྱུང་བའི་བདེན་པ་སྔར་བསྟན་པར་འགྱུར་
[150b.5]རོ། །དཔེར་ན་དྲན་པ་ཉེ་བར་གཞག་པ་དང་། བསམ་གཏན་ལ་སོགས་པ་ལྟ་བུའོ་ཞེས་བྱ་བ་ནི་དྲན་པ་ཉེ་བར་གཞག་པ་ལ་སོགས་པ་སྐྱེ་བ་དང་མཐུན་པར་བསྟན་པ་ལྟ་བུ་སྟེ། ལུས་དྲན་པ་ཉེ་བར་གཞག་པ་ནི་ཇི་ལྟར་རགས་པ་བཞིན་དམིགས་པའི་སྒོ་ནས་ཏེ། རྒྱུ་བ་ཕྲ་བ་དང་རགས་པའི་སྒོ་
[150b.6]ནས་སམ། སྔ་མ་དང་ཕྱི་མ་རྒྱུ་དང་འབྲས་བུར་གྱུར་པའི་སྒོ་ནས་སྔར་སྐྱེས་ལ་དེའི་འོག་ཏུ་ཚོར་བ་དྲན་པ་ཉེ་བར་གཞག་པའོ། །དེའི་འོག་ཏུ་སེམས་དྲན་པ་ཉེ་བར་གཞག་པའོ། །དེའི་འོག་ཏུ་ཆོས་དྲན་པ་ཉེ་བར་གཞག་པའོ། །དེ་ལྟར་ན་འདི་དག་ནི་སྐྱེ་བ་དང་མཐུན་པར་བསྟན་པ་ཡིན་ཏེ། བསམ་
[150b.7]གཏན་ལ་སོགས་པ་ཡང་དེ་དང་འདྲའོ། །སྩོགས་པ་ཞེས་བྱ་བའི་སྒྲས་ནི་རྣམ་པར་ཐར་པ་དང་། ཟིལ་གྱིས་གནོན་པའི་སྐྱེ་མཆེད་དང་། ཟད་པར་གྱི་སྐྱེ་མཆེད་ལ་སོགས་པ་ཡང་སྐྱེ་བ་དང་མཐུན་པར་བསྟན་པ་ཡིན་ནོ། །ཁ་ཅིག་ནི་རབ་ཏུ་བརྟགས་པ་དང་མཐུན་པར་བསྟན་ཞེས་བྱ་བ་ནི་རབ་ཏུ་
[151a]
[151a.1]བརྟགས་པ་དང་མཐུན་པར་ཏེ། རྟོགས་སླ་བར་བསྟན་ཞེས་བྱ་བའི་ཐ་ཚིག་གོ། །དཔེར་ན་ཡང་དག་པར་སྤོང་བ་རྣམས་ལྟ་བུ་སྟེ་ཞེས་བྱ་བ་ནི་དཀར་པོ་དང་ནག་པོའི་ཕྱོགས་དག་ལ་སོ་སོར་སྐྱེས་པ་དང་མ་སྐྱེས་པའི་བྱེ་བྲག་གི་སྒོ་ནས་བསྟན་པ་ལྟ་བུ་སྟེ། སྐྱེས་པ་ནི་འདུལ་
[151a.2]བའི་སྐྱེ་བོས་སྐྱེས་པ་རྟོགས་པར་སླའི་མ་སྐྱེས་པ་ནི་མ་ཡིན་པའམ། ནག་པོའི་ཕྱོགས་རྟོགས་པར་སླ་བས་སོ། །ཇི་ལྟ་ཞེ་ན། སྡིག་པ་མི་དགེ་བའི་ཆོས་སྐྱེས་པ་རྣམས་སྤངས་པའི་ཕྱིར་འདུན་པ་བསྐྱེད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །ཡང་དག་པར་རབ་ཏུ་འཇོག་གོ། །
[151a.3]མ་སྐྱེས་པ་རྣམས་མི་སྐྱེད་པའི་ཕྱིར་འདུན་པ་བསྐྱེད་དོ་ཞེས་བྱ་བ་སྔ་མ་བཞིན་ནོ། །དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་འདུན་པ་བསྐྱེད་དོ་ཞེས་བྱ་བ་སྔ་མ་བཞིན་ནོ། །སྐྱེས་པ་རྣམས་གནས་པར་བྱ་བ་དང་། མི་བརྗེད་པར་བྱ་བ་དང་གོམས་པར་བྱ་བའི་ཕྱིར་འདུན་པ་བསྐྱེད་དོ་ཞེས་
[151a.4]བྱ་བ་སྔ་མ་བཞིན་ནོ། །གང་སྔར་ནི་སྐྱེས་པ་རྣམས་སྤང་བར་བྱ་བའི་ཕྱིར་འདུན་པ་བསྐྱེད་ལ། ཕྱིས་ནི་མ་སྐྱེས་པ་རྣམས་མི་སྐྱེ་བར་བྱ་བའི་ཕྱིར་འདུན་པ་བསྐྱེད་པའི་ངེས་པ་འདི་ནི་མེད་དོ། །འོ་ན་ཅི་ཞེ་ན། སྔར་ཡང་མ་སྐྱེས་པ་རྣམས་མི་སྐྱེད་པའི་ཕྱིར། འདུན་པ་བསྐྱེད་ལ་ཕྱིས་ཀྱང་སྐྱེས་པ་
[151a.5]རྣམས་སྤང་བའི་ཕྱིར་འདུན་པ་བསྐྱེད་དེ། དཔེར་བརྗོད་པ་ནི་འདི་ཡིན་ནོ། །དགེ་བའི་ཕྱོགས་ལ་ཡང་དེ་བཞིན་དུ་སྦྱར་བར་བྱའོ། །བདེན་པ་རྣམས་ནི་མངོན་པར་རྟོགས་པ་དང་མཐུན་པར་བསྟན་པ་ཡིན་ནོ་ཞེས་བྱ་བ་ནི་གཞན་དུ་ན་རྒྱུ་དང་འབྲས་བུ་སྡུག་བསྔལ་དང་ཀུན་འབྱུང་བའི་བདེན་པ་
[151a.6]སྔར་དང་ཕྱིས་བསྟན་པ་དག་ཕྱིས་དང་སྔར་བསྟན་པར་ཐལ་བར་འགྱུར་རོ་ཞེས་སྟོན་པར་བྱེད་དོ། །གང་ལ་ཆགས་པ་ཞེས་བྱ་བ་ནི་སྡུག་བསྔལ་གྱི་བདེན་པ་ལའོ། །གང་གིས་གནོད་པ་བྱེད་པ་ཞེས་བྱ་བ་ནི་དེ་ཉིད་ཀྱིས་སོ། །གང་ལས་ཐར་པ་ཞེས་བྱ་བ་ནི་སྡུག་བསྔལ་གྱི་བདེན་པ་དེ་ཁོ་ན་ལས་ཏེ།
[151a.7]དེ་ཉིད་ལ་དང་པོར་ཏེ་སྦྱོར་བའི་གནས་སྐབས་སུའོ། །གང་དུ་ཞེ་ན། རྣམ་པར་དཔྱོད་པའི་གནས་སྐབས་ན་ཞེས་བྱ་བ་སྨོས་སོ། །ཡོངས་སུ་རྟོགས་པའི་གནས་སྐབས་ན་སྟེ། ངེས་པར་འབྱེད་པའི་ཆ་དང་མཐུན་པའི་གནས་སྐབས་ན་ཞེས་བྱ་བའི་ཐ་ཚིག་གོ། །ནད་མཐོང་ནས་ཞེས་བྱ་བ་ལ་སོགས་
[151b]
[151b.1]པ་འབྱུང་བ་ལ་ནད་ནི་སྡུག་བསྔལ་གྱི་བདེན་པའི་དཔེ་ཡིན་ནོ། །དེའི་གཞི་ནི་ཀུན་འབྱུང་གི་བདེན་པ་ཡིན་ནོ། །དེ་ཟད་པ་ནི་འགོག་པའི་བདེན་པ་ཡིན་ནོ། །དེའི་སྨན་ནི་ལམ་གྱི་བདེན་པའི་དཔེ་ཡིན་ནོ། །བདེན་པ་རྣམས་ཀྱི་དཔེ་འདི་ནི་མདོ་ལས་ཀྱང་བསྟན་ཏོ་ཞེས་བྱ་བ་ནི་ནད་ལ་སོགས་པའི་
[151b.2]མདོ་ལས་སོ། །ཇི་སྐད་དུ་ཞེ་ན། ཡན་ལག་བཞི་དང་ལྡན་པའི་སྨན་པ་ཟུག་རྔུ་འབྱིན་པ་ནི་རྒྱལ་པོའི་འོས་ཡིན་ཞིང་རྒྱལ་པོའི་སྤུ་ལ་འབབ་པ་ཡིན་ལ་རྒྱལ་པོའི་ཡན་ལག་ཉིད་ཀྱི་གྲངས་སུ་ཡང་འགྲོའོ། །བཞི་པོ་གང་དག་ཅེ་ན། ནད་ལ་མཁས་པ་ཡིན། ནད་ཀྱི་གཞི་ལ་མཁས་པ་ཡིན། ནད་སྤོང་བ་ལ་
[151b.3]མཁས་པ་ཡིན་ནད་སྤངས་ནས་ཕྱིར་མི་སྐྱེ་བ་ལ་མཁས་པ་ཡིན་ནོ། །དེ་བཞིན་དུ་ཡན་ལག་བཞི་དང་ལྡན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྨན་པ་ཟུག་རྔུ་འབྱིན་པ་བླ་ན་མེད་པ་ཞེས་བྱ་བའོ། །བཞི་པོ་གང་དག་ཅེ་ན། དགེ་སློང་དག་འདི་ན་དེ་བཞིན་གཤེགས་པ་དགྲ་
[151b.4]བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ནི་འདི་ནི་སྡུག་བསྔལ་འཕགས་པའི་བདེན་པའོ་ཞེས་བྱ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་
[151b.5]འཕགས་པའི་བདེན་པའོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་མཁྱེན་ཏོ་ཞེས་འབྱུང་བ་ཡིན་ནོ། །སྔར་འཕངས་པའི་ཕྱིར་ཞེས་བྱ་བ་ནི་སྔོན་གྱི་ཤུགས་ཀྱིས་སོ། །དཀྱུས་བསྟན་པའི་རྟ་ཐགས་ཐོགས་མེད་པར་རྒྱུག་པ་བཞིན་ནོ་ཞེས་བྱ་བ་ནི། རྟ་ཇི་ལྟར་དཀྱུས་ཀྱིས་བསྟན་པ་ལ་འགྱུར་བ་
[151b.6]མེད་པར་རྒྱུག་པ་དེ་དང་འདྲའོ། །ཁ་ཅིག་ནི་ཐགས་ཐོགས་མེད་པར་དཀྱུས་སྙོལ་བ་བཞིན་ནོ་ཞེས་འདོན་ཏོ། །རྫས་སུ་ཡང་བྱེ་བྲག་ཡོད་དེ་ཞེས་བྱ་བ་ལ་ཡང་ཞེས་བྱ་བའི་སྒྲས་ནི་མིང་གི་སྒོ་ནས་ཀྱང་ཞེས་བསྟན་པ་ཡིན་ནོ། །ཕྱིན་ཅི་མ་ལོག་པའི་ཕྱིར་ཞེས་བྱ་བ་ནི་འདི་ལྟར་དེ་ནི་འཕགས་པ་
[151b.7]རྣམས་དང་། གཞན་དག་ལ་ཡང་ཕྱིན་ཅི་མ་ལོག་པ་སྟེ། སྡུག་བསྔལ་ལ་སོགས་པ་ཁོ་ན་ཡིན་གྱི་གཞན་ནི་མ་ཡིན་ནོ། །འཕགས་པ་རྣམས་ཀྱིས་ནི་བདེན་པ་འདི་དག་ཇི་ལྟ་བ་དེ་ཁོ་ན་བཞིན་དུ་གཟིགས་ཏེ། སྡུག་བསྔལ་གྱི་བདེན་པ་ལ་ཡང་སྡུག་བསྔལ་དང་། མི་རྟག་པ་དང་། སྟོང་
[152a]
[152a.1]པ་དང་། བདག་མེད་པར་གཟིགས་ལ། དེ་བཞིན་དུ་ལམ་གྱི་བདེན་པ་ལ་ཡང་ལམ་དང་རིགས་པ་དང་། སྒྲུབ་པ་དང་། ངེས་པར་འབྱིན་པའི་བར་དུ་གཟིགས་ཀྱི་འཕགས་པ་མ་ཡིན་པ་གཞན་དག་གིས་ནི་དེ་ལྟར་མཐོང་བ་མ་ཡིན་པས་དེའི་ཕྱིར་འདི་དག་ནི་འཕགས་པ་
[152a.2]རྣམས་ཀྱི་བདེན་པ་ཞེས་བྱའི། འཕགས་པ་མ་ཡིན་པ་རྣམས་ཀྱི་བདེན་པ་ཞེས་བྱ་བ་ནི་མ་ཡིན་ནོ། །ཅིའི་ཕྱིར་ཞེ་ན། ཕྱིན་ཅི་ལོག་ཏུ་མཐོང་བའི་ཕྱིར་རོ། །དེ་དག་གིས་ནི་སྡུག་བསྔལ་གྱི་བདེན་པ་ལ་ནི་བདེའོ་ཞེས་བྱ་བ་ལ་སོགས་པའི་རྣམ་པར་མཐོང་ལ། ཀུན་འབྱུང་བ་ལ་ནི་ཀུན་འབྱུང་བ་མ་
[152a.3]ཡིན་པའོ་ཞེས་བྱ་བ་ལ་སོགས་པར་མཐོང་ངོ་། །འགོག་པ་ལ་ནི་འགོག་པ་མ་ཡིན་ནོ་ཞེས་བྱ་བ་ལ་སོགས་པར་རོ། །ལམ་ལ་ནི་ལམ་མ་ཡིན་ནོ་ཞེས་བྱ་བ་ལ་སོགས་པར་མཐོང་ངོ་། །དེ་ནི་གཞན་གྱི་སྡུག་བསྔལ་རིག །ཅེས་བྱ་བ་ནི་འདི་ལྟ་སྟེ། འགོག་པའི་བདེན་པ་ནི་ཡང་སྲིད་པ་མེད་
[152a.4]པའི་ཕྱིར། གཡང་ས་བཞིན་དུ་བྱིས་པ་རྣམས་འཇིགས་པར་བྱེད་པ་ཡིན་པས་སོ། །འཕགས་པས་སྡུག་བསྔལ་རིག་ཅེས་བྱ་བ་ནི་ཉེ་བར་ལེན་པའི་ཕུང་པོ་ལྔའོ། །གཉིས་ནི་འཕགས་པ་རྣམས་ཀྱི་བདེན་པ་ཡིན་ལ་ཞེས་བྱ་བ་སྡུག་བསྔལ་དང་། ཀུན་འབྱུང་བའི་བདེན་པ་དག་སྟེ། ཕྱིན་ཅི་
[152a.5]མ་ལོག་པར་གཟིགས་པའི་ཕྱིར་རོ། །གཉིས་ནི་འཕགས་པ་ཡང་ཡིན་ཏེ། དགེ་བའི་ཕྱིར་དང་ཟག་པ་མེད་པའི་ཕྱིར་རོ། །འཕགས་པ་རྣམས་ཀྱི་བདེན་པ་ཡང་ཡིན་ཏེ། ཕྱིན་ཅི་མ་ལོག་པར་གཟིགས་པའི་ཕྱིར་རོ། །དེ་ལྟར་ན་གཅིག་ལུས་པར་བསྟན་པའི་ཕྱིར། འཕགས་པའི་བདེན་པ་
[152a.6]དག་ཅེས་བྱ་བར་འགྱུར་རོ། །གང་གི་ཚེ་ཚོར་བའི་ཕྱོགས་གཅིག་སྡུག་བསྔལ་གྱི་རང་བཞིན་ཡིན་པ་ཞེས་བྱ་བ་ནི་ཚོར་བའི་ཕུང་པོའི་ཕྱོགས་གཅིག་པོ་སྡུག་བསྔལ་དང་། ཡིད་མི་བདེ་བའི་ངོ་བོ་ཉིད་དོ། །ཅི་རིགས་མ་ལུས་སྡུག་བསྔལ་ལོ། །ཞེས་བྱ་བ་ལ། ཅི་རིགས་པའི་དོན་ནི་ཡིད་དུ་འོང་
[152a.7]བ་རྣམས་ནི་འགྱུར་བའི་སྡུག་བསྔལ་ཉིད་དང་། འདུ་བྱེད་ཀྱི་སྡུག་བསྔལ་ཉིད་ཀྱིས་སྡུག་བསྔལ་བ་ཡིན་ནོ། །ཡིད་དུ་མི་འོང་བ་རྣམས་ནི་སྡུག་བསྔལ་གྱི་སྡུག་བསྔལ་ཉིད་དང་། འདུ་བྱེད་ཀྱི་སྡུག་བསྔལ་ཉིད་ཀྱིས་སོ། །དེ་དག་ལས་གཞན་པ་རྣམས་ནི་འདུ་བྱེད་ཀྱི་སྡུག་བསྔལ་ཁོ་ནས་སོ་
[152b]
[152b.1]ཞེས་བྱ་བ་ཡིན་ནོ། །ཡིད་དུ་འཐད་པས་ན་ཡིད་དུ་འོང་བ་རྣམས་སོ། །དེ་དག་ལས་གཞན་པ་རྣམས་ཞེས་བྱ་བ་ནི་ཡིད་དུ་འོང་བ་དང་། ཡིད་དུ་མི་འོང་བ་དག་ལས་གཞན་པ་རྣམས་སོ། །ཚོར་བ་གསུམ་དང་གོ་རིམས་བཞིན་ཏེ་ཞེས་བྱ་བ་ནི་ཚོར་བ་བདེ་བ་ནི་ཡིད་དུ་འོང་བ་དག་ཡིན་ནོ། །སྡུག་
[152b.2]བསྔལ་བ་ནི་ཡིད་དུ་མི་འོང་བ་དག་ཡིན་ནོ། །བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་ནི་ཡིད་དུ་འོང་བ་ཡང་མ་ཡིན། ཡིད་དུ་མི་འོང་བ་དག་ཀྱང་མ་ཡིན་པ་དག་ཡིན་ནོ་ཞེས་བྱ་བའི་ཐ་ཚིག་གོ། །དེའི་དབང་གིས་ཞེས་བྱ་བ་ནི་ཚོར་བའི་དབང་གིས་ཏེ་གཟུགས་དང་སྒྲ་ལ་སོགས་པའི་
[152b.3]ཚོར་བའི་རང་བཞིན་མ་ཡིན་པ་རྣམས་ཀྱང་དེ་དང་མཐུན་པའི་ཕྱིར། ཡིད་དུ་འོང་བ་ལ་སོགས་པའི་མིང་འཐོབ་བོ། །འགྱུར་བས་སྡུག་བསྔལ་བ་ཉིད་ཅེས་བྱ་བ་ནི་མི་རྟག་པ་ཉིད་ཀྱིས་འགྱུར་བས་ཞེས་བྱ་བའི་དོན་ཏོ། །ཇི་སྐད་དུ། ཀྱི་ཧུད་ཤིང་རྟ་སྣ་ཚོགས་ཚལ། །ཀྱི་ཧུད་མཚེའུ་དང་དལ་
[152b.4]གྱིས་འབབ། །ཀྱི་ཧུད་སྡུག་པ་རྣམ་ཤེས་ལྷ། །སྨྲེ་སྔགས་འདོན་བཞིན་ས་ལ་ལྷུང་། །ཞེས་འབྱུང་བ་ལྟ་བུའོ། །སྡུག་བསྔལ་གྱི་ངོ་བོ་ཁོ་ནས་ཞེས་བྱ་བ་ནི་གནོད་པའི་ངོ་བོ་ཉིད་ཁོ་ནས་ཞེས་བྱ་བའི་ཐ་ཚིག་གོ། །སྡུག་བསྔལ་གྱི་ཚོར་བ་ནི་སྐྱེ་བ་ན་ཡང་སྡུག་བསྔལ་ལ་གནས་པ་ན་
[152b.5]ཡང་སྡུག་བསྔལ་ལོ་ཞེས་བྱ་བ་ཤུགས་ཀྱིས་ན་འདི་འགྱུར་བའི་བདེ་བར་འགྱུར་བ་མ་ཡིན་ནམ། དེ་ལྟ་ཡིན་ན་ནི་མཚན་ཉིད་འཆོལ་བར་འགྱུར་རོ་ཞེ་ན། འདི་ནི་འདིའི་མཚན་ཉིད་མ་ཡིན་ནོ། །འོ་ན་ཅི་ཞེ་ན། སུན་དབྱུང་བའི་ཕྱིར་ཉེ་བར་བསྟན་པར་ཟད་དོ། །ཡང་ན་དེ་ལྟ་ཡིན་དུ་ཟད་དེ་དེ་ནི་ངོ་བོ་
[152b.6]གང་གིས་རྣམ་པར་སུན་འབྱིན་པ་དེ་ཉིད་ལ་ལྟོས་ནས་སྡུག་བསྔལ་ཁོ་ན་ཡིན་ཏེ། དཔེར་ན་བདེ་བའི་ཚོར་བ་སྐྱེ་བ་དང་། གནས་པ་ན་བདེ་བའི་ཕྱིར་བདེ་བ་ཡིན་དུ་ཟིན་ཀྱང་རྣམ་པར་སུན་དབྱུང་བར་བྱ་བ་ཉིད་དུ་བཞེད་པའི་ཕྱིར། འགྱུར་བའི་སྡུག་བསྔལ་ཉིད་ཀྱིས་སྡུག་བསྔལ་བ་ཡིན་ནོ་ཞེས་དེ་ལྟར་
[152b.7]རྣམ་པར་སུན་འབྱིན་པར་བྱེད་པ་དང་འདྲའོ། །འདུ་བྱེད་ཁོ་ནས་སྡུག་བསྔལ་བ་ཉིད་ཅེས་བྱ་བ་ནི་འདུ་བྱེད་ཁོ་ནས་ཏེ། སྐྱེ་བ་ཁོ་ནས་ཞེས་བྱ་བའི་ཐ་ཚིག་གོ། །གང་མི་རྟག་པ་དེ་ནི་སྡུག་བསྔལ་བ་ཡིན་ནོ་ཞེས་བྱ་བ་ནི་གང་ཞིག་ངེས་པར་མི་གནས་པ་དེ་ནི་སྡུག་བསྔལ་བ་སྟེ། གང་ཞིག་སྐྱེས་ཤིང་
[153a]
[153a.1]འཇིག་པ་དེ་སྡུག་བསྔལ་བའོ་ཞེས་བྱ་བའི་དོན་ཏོ། །དེའི་ཕྱིར་རྐྱེན་གྱིས་མངོན་པར་འདུ་བྱེད་པའི་ཕྱིར་ཞེས་བྱ་བ་སྨོས་ཏེ། གང་གི་ཕྱིར་རྐྱེན་གྱིས་མངོན་པར་འདུ་བྱེད་པ་དེའི་ཕྱིར་སྡུག་བསྔལ་བ་ཞེས་བྱའོ། །དེ་མྱོང་བར་འགྱུར་བའི་འདུ་བྱེད་རྣམས་ཀྱང་ཚོར་བ་དང་འདྲ་བར་
[153a.2]བརྗོད་དོ་ཞེས་བྱ་བ་ནི་བདེ་བའི་ཚོར་བ་མྱོང་བར་འགྱུར་བའི་འདུ་བྱེད་རྣམས་ནི་འགྱུར་བས་སྡུག་བསྔལ་བ་ཉིད་དེ། བདེ་བའི་ཚོར་བ་མྱོང་བར་འགྱུར་བའི་འདུ་བྱེད་རྣམས་ནི་སྐྱེ་བ་ན་ཡང་བདེ། གནས་པ་ན་ཡང་བདེ་ལ། འགྱུར་བ་ན་སྡུག་བསྔལ་ལོ་ཞེས་བྱ་བ་དང་། སྡུག་བསྔལ་གྱི་ཚོར་བ་མྱོང་
[153a.3]བར་འགྱུར་བའི་འདུ་བྱེད་རྣམས་ནི་སྡུག་བསྔལ་གྱི་རང་གི་ངོ་བོ་ཁོ་ནས་སྡུག་བསྔལ་བ་ཉིད་དེ། སྡུག་བསྔལ་གྱི་ཚོར་བ་མྱོང་བར་འགྱུར་བའི་འདུ་བྱེད་རྣམས་ནི་སྐྱེ་བ་ཡང་སྡུག་བསྔལ་ལ། གནས་པ་ཡང་སྡུག་བསྔལ་ལོ་ཞེས་བྱ་བ་དང་། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་
[153a.4]ཚོར་བ་མྱོང་བར་འགྱུར་བའི་འདུ་བྱེད་རྣམས་ནི་རྐྱེན་གྱིས་མངོན་པར་འདུ་བྱེད་པའི་ཕྱིར་འདུ་བྱེད་ཁོ་ནས་སྡུག་བསྔལ་བ་ཉིད་དེ་ཞེས་བྱ་བ་ཡིན་ནོ། །སྡུག་བསྔལ་ཉིད་སྡུག་བསྔལ་ཉིད་ཡིན་པས་ཞེས་བྱ་བ་ལ་ཡིན་པའི་བར་ཞེས་འབྱུང་བའི་ཕྱིར་འགྱུར་བ་ཉིད་སྡུག་བསྔལ་བ་ཉིད་ཡིན་པས་འགྱུར་བའི་
[153a.5]སྡུག་བསྔལ་ཉིད་ཡིན་ལ། འདུ་བྱེད་ཉིད་སྡུག་བསྔལ་ཉིད་ཡིན་པས་འདུ་བྱེད་ཀྱི་སྡུག་བསྔལ་ཉིད་དོ་ཞེས་བརྗོད་པར་བྱའོ། །རྣམ་གྲངས་འདི་ནི་ཚིག་རྣམ་པར་སྦྱར་བ་ཁོ་ནས་ཁྱད་པར་དུ་གྱུར་པར་ཟད་ཀྱི་དོན་གྱིས་ནི་མ་ཡིན་པས་འདིར་དོན་ནི་དེ་ཁོ་ན་གཟུང་བར་བྱའོ། །ཐུན་མོང་མ་ཡིན་པའི་
[153a.6]ཕྱིར་ཞེས་བྱ་བ་རྒྱས་པར་འབྱུང་བ་ནི་འདུ་བྱེད་ཡིད་དུ་འོང་བ་རྣམས་ནི་སྡུག་བསྔལ་གྱི་སྡུག་བསྔལ་ཉིད་དང་ཐུན་མོང་མ་ཡིན་ཏེ། དེའི་ཕྱིར་དེ་དག་ནི་ཐུན་མོང་མ་ཡིན་པས་འགྱུར་བའི་སྡུག་བསྔལ་ཉིད་དུ་བཤད་དོ། །ཡིད་དུ་མི་འོང་བ་རྣམས་ནི་འགྱུར་བའི་སྡུག་བསྔལ་ཉིད་དང་ཐུན་མོང་མ་ཡིན་ཏེ།
[153a.7]དེའི་ཕྱིར་དེ་དག་ནི་ཐུན་མོང་མ་ཡིན་པས་སྡུག་བསྔལ་གྱི་སྡུག་བསྔལ་ཉིད་དུ་བཤད་དོ་ཞེས་བྱ་བ་ཡིན་ནོ། །ཡིད་དུ་འོང་བ་ལ་སོགས་པ་འདུ་བྱེད་ཐམས་ཅད་ནི་འདུ་བྱེད་ཀྱི་སྡུག་བསྔལ་ཉིད་ཀྱིས་སྡུག་བསྔལ་བ་ཉིད་དེ། དེ་ནི་ཁྱབ་པ་ཡིན་པའི་ཕྱིར་རོ། །གལ་ཏེ་ཐམས་ཅད་ཀྱང་དེ་ལྟར་སྡུག་བསྔལ་བ་
[153b]
[153b.1]ཡིན་ན། ཅིའི་ཕྱིར་ཀུན་གྱིས་མི་མཐོང་ཞེ་ན། དེའི་ཕྱིར་སྨྲས་པ། དེ་དག་ཀྱང་འཕགས་པ་རྣམས་ཁོ་ནས་གཟིགས་ཀྱི་གཞན་དག་གིས་ནི་མ་ཡིན་ནོ། །ཇི་ལྟ་ཞེ་ན། འདིར་སྨྲས་པ་ཞེས་པ་འདི་ཐམས་ཅད་ཉེ་བར་འགོད་པར་བྱེད་དོ། །དེ་ལྟ་ན་འོ་ན་ནི་ཞེས་བྱ་བ་ནི་གལ་ཏེ་འདུ་བྱེད་ཀྱི་སྡུག་བསྔལ་
[153b.2]ཉིད་ཀྱིས་འདུ་བྱེད་ཐམས་ཅད་ཀྱང་སྡུག་བསྔལ་བ་ཡིན་ན་ནི། ལམ་ཡང་འདུས་བྱས་ཡིན་པའི་ཕྱིར་འདུ་བྱེད་ཀྱི་སྡུག་བསྔལ་ཉིད་དུ་ཐལ་བར་འགྱུར་ཏེ། རྐྱེན་གྱིས་བསྐྱེད་པ་ཡིན་པའི་ཕྱིར་ཞེས་བྱ་བའི་ཐ་ཚིག་གོ། །སྡུག་བསྔལ་ཞེས་བྱ་བའི་མཚན་ཉིད་ནི་མི་མཐུན་པ་ཡིན་པའི་ཕྱིར་ཞེས་བྱ་བ་ནི་
[153b.3]གཞན་ཁོ་ན་ཞིག་ཅི་སྟེ་བརྗོད། སྔར་རྐྱེན་གྱིས་མངོན་པར་འདུས་བྱས་པའི་ཕྱིར་འདུ་བྱེད་ཐམས་ཅད་མི་རྟག་པ་ཡིན་ལ། གང་མི་རྟག་པ་དེ་ནི་སྡུག་བསྔལ་བ་ཡིན་ནོ་ཞེས་བཤད་པས་ལམ་ཡང་རྐྱེན་གྱིས་མངོན་པར་འདུས་བྱས་པའི་ཕྱིར། མི་རྟག་པ་ཡིན་ཏེ། དེ་ལྟ་བས་ན་སྡུག་
[153b.4]བསྔལ་བ་ཡིན་ནོ་ཞེས་བྱ་བར་ཐལ་བར་འགྱུར་རོ། །གལ་ཏེ་སྡུག་བསྔལ་གྱི་མཚན་ཉིད་མི་མཐུན་པ་ཁོ་ན་ཡིན་པར་འདོད་ན་ནི་སྔར་བཤད་པ་དེ་མཚན་ཉིད་མ་ཡིན་པར་འགྱུར་རོ། །ཇི་སྟེ་དེ་སྡུག་བསྔལ་གྱི་མཚན་ཉིད་ཡིན་ན་ནི། འདི་མཚན་ཉིད་མ་ཡིན་ནོ་ཞེ་ན་དེ་ནི་ཉེས་པ་མེད་དོ། །ཇི་ལྟ་ཞེ་ན་
[153b.5]འདིར་དགོངས་པའི་དོན་ནི་མི་རྟག་པ་གང་ཞིག་འཕགས་པ་རྣམས་དང་མི་མཐུན་པ་དེ་སྡུག་བསྔལ་བ་ཡིན་ནོ་ཞེས་བྱ་བ་འདི་ཡིན་ནོ། །འཕགས་པ་རྣམས་དང་མི་མཐུན་པ་ཡང་གང་ཞིག་ཡིན་ཞེ་ན། ཟག་པ་དང་བཅས་པའི་དངོས་པོ་གང་ཡིན་པའོ། །ཡང་ཅིའི་ཕྱིར་ཟག་པ་མེད་པའི་ལམ་ཡང་དེ་ཁོ་ན་དང་འདྲ་
[153b.6]བར་མི་རྟག་པ་ཡིན་བཞིན་དུ་ཡང་འཕགས་པ་རྣམས་དང་མི་མཐུན་པ་མ་ཡིན་ཞེ་ན། དེའི་ཕྱིར་དེ་སྐྱེ་བ་ནི་སྡུག་བསྔལ་ཐམས་ཅད་ཟད་པ་འདྲེན་པའི་ཕྱིར་འཕགས་པ་རྣམས་དང་མི་མཐུན་པ་མེད་དོ་ཞེས་བྱ་བ་སྨོས་སོ། །འཇིག་རྟེན་ན་ཁྱད་པར་མེད་པར་བརྗོད་ཀྱང་ཁྱད་པར་རྟོག་པ་མཐོང་སྟེ། དཔེར་ན་
[153b.7]འགྲོ་བས་ན་བ་ལང་ངོ་ཞེས་བྱ་བར་འགྲོ་བས་ན་མ་ཧེ་ཡང་བ་ལང་དུ་འགྱུར་བ་ནི་མ་ཡིན་ནོ་ཞེས་བྱ་བ་ལྟ་བུའོ། །དོན་དེ་ལྟར་ངེས་པ་ཡིན་དང་ཅིའི་ཕྱིར་བ་ལང་ཡིན་ཞེ་ན། གང་གི་ཕྱིར་འགྲོ་བས་སོ་ཞེས་བྱ་བ་དེ་བཞིན་དུ་འདིར་ཡང་ཟག་པ་དང་བཅས་པའི་དངོས་པོ་གང་ཡིན་པ་དེ་ནི་འཕགས་པ་རྣམས་དང་མི་མཐུན་པ་
[154a]
[154a.1]ཡིན་ནོ། །ཅིའི་ཕྱིར་ཞེ་ན། མི་རྟག་པའི་ཕྱིར་རོ་ཞེས་བྱ་བ་ཡིན་ནོ། །སྡུག་བསྔལ་དུ་མཐོང་བས་གང་ཡིན་པ་དེ་ཁོ་ན་ཞེས་བྱ་བ་ནི་ཟག་པ་དང་བཅས་པའི་དངོས་པོ་དེའི་འགོག་པ་ལ་དེ་ལྟར་ལྟའི་ལམ་གྱི་ལ་ནི་མ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །མོན་སྲན་སྡེའུ་ལ་སོགས་
[154a.2]པ་ཡོད་བཞིན་དུ་མོན་སྲན་གྲེའུའི་ཕུང་པོ་ཞེས་སྟོན་པ་བཞིན་ཞེས་བྱ་བ་ནི་འཇིག་རྟེན་ན་མོན་སྲན་གྲེའུའི་ཕུང་པོའི་ནང་ན་མོན་སྲན་སྡེའུ་དང་། སྲན་ཆུང་དང་། སྲན་མ་ལ་སོགས་པ་ཡོད་བཞིན་དུ་ཡང་ཉུང་བའི་ཕྱིར་མོན་སྲན་སྡེའུ་ལ་སོགས་པ་ལ་མོན་སྲན་གྲེའུའི་ཕུང་པོ་ཞེས་ཐ་སྙད་འདོགས་པ་སྣང་བ་དེ་
[154a.3]དང་འདྲའོ། །ཆུས་གདབ་པའི་བདེ་བ་ཆུང་ངུས་ཞེས་བྱ་བ་ནི། དེ་ནི་བདེ་བ་ཡང་ཡིན་ལ་ཆུང་ངུ་ཡང་ཡིན་པས་བདེ་བ་ཆུང་ངུའོ། །ཆུས་གདབ་པའི་བདེ་བ་ཆུང་ངུ་ནི་ཆུས་གདབ་པའི་བདེ་བ་ཆུང་ངུ་སྟེ་དེས་སོ། །ཡང་སྨྲས་པ་ཞེས་བྱ་བ་ནི་བཙུན་པ་གཞོན་ནུ་ལེན་གྱིས་ཏེ། སྡུག་བསྔལ་བདུན་ཅུ་པ་ལས་སོ། །
[154a.4]སྡུག་བསྔལ་གྱི་ནི་རྒྱུ་ཕྱིར་དང་། །ཞེས་བྱ་བ་ནི་བདེ་བ་ནི་སྡུག་བསྔལ་གྱི་རྒྱུ་ཡིན་ཏེ། སྡུག་བསྔལ་མྱོང་བར་འགྱུར་བའི་ལས་དང་མཚུངས་པར་ལྡན་པའི་ཕྱིར་རོ། །སྡུག་བསྔལ་མང་པོས་སྐྱེད་ཕྱིར་དང་། །ཞེས་བྱ་བ་ནི་འདི་ལྟར་བདེ་བ་ནི་གཞན་ལ་བརྟེན་པ་དང་། ཞིང་ལ་སོགས་པས་བྱས་པའི་སྡུག་བསྔལ་
[154a.5]ཤིན་ཏུ་མང་པོས་བསྐྱེད་དེ་འབྱུང་བར་བྱེད་པ་ཡིན་པས་སོ། །སྡུག་བསྔལ་ཡོད་ན་བདེ་འདོད་ཕྱིར། །ཞེས་བྱ་བ་ནི་འདི་ལྟར་བཀྲེས་པ་དང་སྐོམ་པ་ལ་སོགས་པས་བྱས་པའི་སྡུག་བསྔལ་ཡོད་ན་ཟས་དང་སྐོམ་ལ་སོགས་པས་བྱས་པའི་བདེ་བ་འདོད་ཀྱི་གཞན་དུ་ནི་མ་ཡིན་ནོ། །དེའི་ཕྱིར་རྒྱུ་དེ་དག་གིས་ན།
[154a.6]བདེ་བ་སྡུག་བསྔལ་ཞེས་རྟོགས་སོ། །ཞེས་བྱའོ་སྲིད་པ་ཐམས་ཅད་ནི་བདེ་བ་དང་བཅས་ཏེ་ཞེས་བྱ་བ་ལ་ནི་ཞེས་བྱ་བའི་སྒྲ་ཕྱོགས་སྔ་མ་བཟློག་པའི་ཕྱིར་རོ། །འདུ་བྱེད་ཀྱི་སྡུག་བསྔལ་དུ་རོ་གཅིག་པས་ཞེས་བྱ་བ་ནི་འདུ་བྱེད་ཀྱི་སྡུག་བསྔལ་དུ་རྣམ་པ་གཅིག་པས་སོ། །ད་ནི་ཇི་ལྟར་བདེ་བའི་རང་བཞིན་གྱི་ཞེས་བྱ་བ་ནི་
[154a.7]ཇི་ལྟར་སྡུག་བསྔལ་གྱི་རང་བཞིན་མ་ཡིན་པའི་ཚོར་བ་རྣམས་ལ་སྡུག་བསྔལ་ཞེས་བྱ་བ་ཡིན་ནོ། །མི་རྟག་པའི་མཚན་ཉིད་ཀྱིས་མི་མཐུན་པའི་ཕྱིར་རོ་ཞེས་བྱ་བ་ནི་མི་རྟག་པའི་ཕྱིར་མི་མཐུན་ལ་མི་མཐུན་པའི་ཕྱིར་སྡུག་བསྔལ་དུ་ལྟའོ་ཞེས་བྱ་བའི་ཐ་ཚིག་གོ། །དཔེར་ན་གཟུགས་དང་འདུ་ཤེས་ལ་སོགས་པ་ཡང་
[154b]
[154b.1]ཞེས་བྱ་བ་ནི། དཔེར་ན་གཟུགས་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་དག་ལ་ཡང་སྡུག་བསྔལ་ཉིད་དུ་ལྟ་མོད་ཀྱི་དེ་དག་ཇི་ལྟར་སྡུག་བསྔལ་གྱི་ཚོར་བ་བཞིན་དུ་སྡུག་བསྔལ་བ་ནི་མ་ཡིན་པ་བཞིན་ཏེ། དེ་ནི་གནོད་པར་བྱེད་པའི་ངོ་བོ་ཉིད་ཡིན་པའི་ཕྱིར་ལ། དེ་དག་གི་མཚན་ཉིད་ནི་དེ་མ་ཡིན་པའི་ཕྱིར་རོ། །
[154b.2]གང་ཞིག་ཅེས་བྱ་བ་ནི་བཙུན་པ་གཞོན་ནུ་ལེན་ཏོ། །བཙུན་པ་གཞོན་ནུ་ལེན་དེའི་དེ་ནི་ཀུན་འབྱུང་གི་རྣམ་པ་ཡིན་གྱི། སྡུག་བསྔལ་གྱི་རྣམ་པ་ནི་མ་ཡིན་ཏེ། སྡུག་བསྔལ་ལ་རྒྱུར་ལྟ་བའི་ཕྱིར་རོ། །གཞན་ཡང་གཟུགས་དང་གཟུགས་མེད་པར་སྐྱེས་པའི་འཕགས་པ་རྣམས་ལ་ཡང་སྡུག་བསྔལ་གྱི་འདུ་
[154b.3]ཤེས་འཇུག་པར་འགྱུར་ཏེ། འཇུག་པར་མི་འགྱུར་བ་ཞིག་ན་ཞེས་བྱ་བའི་ཐ་ཚིག་གོ། །ཕྱིར་མི་འོང་བ་དེ་དག་གི་སྡུག་བསྔལ་གྱི་ཚོར་བའི་རྒྱུ་སྟེ། ཚོར་བ་སྡུག་བསྔལ་བའི་རྒྱུ་ནི་མ་ཡིན་ནོ། །གང་དག་ཅིག་ཅེ་ན། གཟུགས་དང་གཟུགས་མེད་པ་ན་སྤྱོད་པའི་ཕུང་པོ་རྣམས་སོ། །ཅིའི་ཕྱིར་རྒྱུ་མ་ཡིན་ཞེ་ན།
[154b.4]ཡང་སྡུག་བསྔལ་བའི་གནས་སུ་མི་འོང་བའི་ཕྱིར་རོ། །འདུ་བྱེད་ཀྱི་སྡུག་བསྔལ་ཉིད་ཀྱང་ཅིའི་ཕྱིར་གསུངས་པར་གྱུར་ཅེས་བྱ་བ་ནི་གལ་ཏེ་སྡུག་བསྔལ་གྱི་རྒྱུ་ཡིན་པའི་ཕྱིར་བདེ་བ་ཡང་སྡུག་བསྔལ་ཉིད་དུ་ལྟ་ན་གང་མི་རྟག་པ་དེ་ནི་སྡུག་བསྔལ་བ་ཡིན་ནོ་ཞེས་འདུ་བྱེད་ཀྱི་སྡུག་བསྔལ་དུ་བཤད་པ་གང་ཡིན་པ་དེ་ཅི་
[154b.5]དགོས་ཏེ། སྡུག་བསྔལ་གྱི་རྒྱུ་ཡིན་པ་ཁོ་ནས་དགོས་པ་དེ་གྲུབ་པའི་ཕྱིར་རོ། །སྡུག་བསྔལ་གྱི་རྒྱུ་ཡིན་པར་སྨྲ་བས་གལ་ཏེ་ཞེས་བྱ་བ་ལ་སོགས་པ་སྨྲས་ཏེ། གལ་ཏེ་གང་མི་རྟག་པ་དེ་ནི་སྡུག་བསྔལ་བ་ཡིན་པས་མི་རྟག་པའི་ཕྱིར་སྡུག་བསྔལ་ཉིད་དུ་ལྟའི་སྡུག་བསྔལ་གྱི་རྒྱུ་ཡིན་པའི་ཕྱིར་ནི་མ་ཡིན་ནོ། །
[154b.6]འོ་ན་མི་རྟག་པ་དང་སྡུག་བསྔལ་གྱི་རྣམ་པ་དག་ལ་ཁྱད་པར་ཅི་ཞིག་ཡོད། སློབ་དཔོན་གྱིས། སྐྱེ་ཞིང་འཇིག་པའི་ཆོས་ཅན་ཡིན་པའི་ཕྱིར། །ཞེས་བྱ་བ་ལ་སོགས་པས་རྒྱས་པར་སྨོས་སོ། །ཇི་ལྟར་ན་མི་མཐུན་པའི་ཕྱིར་སྡུག་བསྔལ་ཡིན་པ་དེ་བཞིན་དུ་བསྟན་པའི་ཕྱིར་མི་རྟག་པར་མཐོང་ན་མི་མཐུན་
[154b.7]པར་འགྱུར་བས་མི་རྟག་པའི་རྣམ་པས་སྡུག་བསྔལ་གྱི་རྣམ་པ་འདྲེན་པར་བྱེད་དོ་ཞེས་བྱ་བ་སྨོས་སོ། །དེ་ནི་འདི་སྐད་དུ་གང་མི་རྟག་པ་དེ་ནི་སྡུག་བསྔལ་བ་ཡིན་ནོ་ཞེས་བཤད་པ་གང་ཡིན་པ་དེ་ནི་རྣམ་པ་གཅིག་པའི་ཕྱིར་དེ་སྐད་བཤད་པ་ནི་མ་ཡིན་གྱི། འོན་ཀྱང་བདེ་བ་དེ་མི་རྟག་པར་མཐོང་ན་ནི་མི་
[155a]
[155a.1]མཐུན་པར་འགྱུར་ལ། མི་མཐུན་པའི་ཕྱིར་སྡུག་བསྔལ་ཉིད་དུ་ལྟའོ་ཞེས་བཤད་པ་ཡིན་ནོ། །ཁ་ཅིག་ན་རེ་ཞེས་བྱ་བ་ནི་བཙུན་པ་དཔལ་ལེན་ལ་སོགས་པའོ། །དེ་ནི་འདི་ལྟར་སྡུག་བསྔལ་ལོ་ཞེས་བྱ་བ་ནི་འདིར་སྡུག་བསྔལ་གྱི་མཚན་ཉིད་ཡིན་ནོ་ཞེས་བྱ་བའི་ཐ་ཚིག་གོ། །
[155a.2]བདེ་བའི་ཚོར་བ་ནི་སྡུག་བསྔལ་དུ་བལྟ་བར་བྱའོ་ཞེས་བྱ་བ་ནི་མདོའི་ཚིག་གཞན་ཡིན་ནོ། །གྲང་བ་དང་དྲོ་བ་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲ་ནི་སྐྱུར་བ་དང་མངར་བ་ལ་སོགས་པ་བསྡུའོ།། །།བམ་པོ་བཞི་བཅུ་རྩ་ལྔ་པ། ཧ་ཅང་སྤྱད་པ་ནི་ཧ་ཅང་ཡོངས་སུ་སྤྱད་པའོ། །
[155a.3]དུས་མ་ཡིན་པར་སྤྱད་པ་ནི་དཔེར་ན་དགུན་གྲང་བ་སྤྱད་པ་དང་སོ་ག་དྲོ་བ་སྤྱད་པ་ལྟ་བུའོ། །མཉམ་པས་ཞེས་བྱ་བ་ནི་བདེ་བའི་རྒྱུས་སོ། །སྤྱོད་ལམ་གྱི་བྱེ་བྲག་ལ་ཡང་དེ་བཞིན་དུ་བརྗོད་པར་བྱའོ་ཞེས་བྱ་བ་ནི་བདེ་བའི་རྒྱུ་ཉལ་བ་ལ་སོགས་པར་འདོད་པ་གང་དག་ཡིན་པ་དེ་དག་ཁོ་ན་ཞེས་བྱ་བ་ནས་
[155a.4]གསལ་བར་འགྱུར་བར་ཟད་དེ་ཞེས་བྱ་བའི་བར་ཐམས་ཅད་བརྗོད་པར་བྱའོ། །སྡུག་བསྔལ་གྱི་གཉེན་པོ་ལ་བདེ་བའི་བློ་སྐྱེ་བའི་ཡང་ཕྱིར་ཅི་ཞེ་ན། བདེ་བའི་ཚོར་བ་མེད་དོ་ཞེས་བྱ་བའི་སྐབས་དང་སྦྱར་རོ། །སྡུག་བསྔལ་གྱི་བྱེ་བྲག་ལ་ཅི་ཞེ་ན། བདེ་བའི་བློ་སྐྱེ་བའི་ཕྱིར་དེ་བཞིན་དུ་བདེ་བའི་ཚོར་བ་མེད་
[155a.5]དོ་ཞེས་བྱ་བར་སྦྱར་རོ། །སྡུག་བསྔལ་གྱི་གཉེན་པོ་ལ་བདེ་བའི་བློ་སྐྱེ་བ་བསྟན་པའི་ཕྱིར། ཇི་སྐད་དུ་བཀྲེས་པ་དང་ཞེས་བྱ་བ་ལ་སོགས་པ་རྒྱས་པར་སྨོས་སོ། །སྡུག་བསྔལ་གྱི་བྱེ་བྲག་ལ་བདེ་བའི་བློ་སྐྱེས་པ་བསྟན་པའི་ཕྱིར་བྱིས་པ་རྣམས་ནི་སྡུག་བསྔལ་གྱི་བྱེ་བྲག་ལ་ཡང་ཞེས་བྱ་བ་ལ་སོགས་པ་རྒྱ་ཆེར་
[155a.6]སྨོས་སོ། །ཕྲག་པ་ནས་ཕྲག་པར་ཁུར་སྦེད་པ་ཁུར་ཙ་བ་རྣམས་ཁུར་གྱིས་ནོན་ཏེ། སྡུག་བསྔལ་བ་ཁོ་ནར་གནས་བཞིན་དུ་བདེའོ་སྙམ་དུ་བློ་སྐྱེད་པར་བྱེད་དོ། །འདི་ཉིད་རིགས་པ་ཡིན་ནོ་ཞེས་ཟེར་བ་ནི་སློབ་དཔོན་ནོ། །འཕགས་པ་རྣམས་མི་བཞེད་པ་ཡིན་ཏེ་ཞེས་བྱ་བ་ནི་འདོད་པའི་བདེ་བའོ། །མི་
[155a.7]འདོད་པ་ནི་གཞན་དུ་ཡིན་པའི་ཕྱིར་རོ་ཞེས་བྱ་བ་ནི་བག་མེད་པའི་གནས་ཉིད་ལ་སོགས་པའི་རྣམ་པ་གཞན་གྱིས་སོ། །དོན་དེ་བསྟན་པར་བྱ་བའི་ཕྱིར་ཚོར་བ་གང་ཞིག་ཅེས་བྱ་བ་ལ་སོགས་པ་རྒྱས་པར་སྨོས་ཏེ། བག་མེད་པའི་གནས་ཞེས་བྱ་བ་ནི་བདེ་བ་ལས་ཉམས་པའི་རྒྱུ་ཡིན་པའི་ཕྱིར་རོ། །མངོན་
[155b]
[155b.1]པར་འདུ་བྱ་བ་ཆེན་པོས་བསྒྲུབ་པར་བྱ་བ་དང་། རྣམ་པར་འགྱུར་བ་ཅན་ནི་མཇུག་ཐོགས་སུ་སྡུག་བསྔལ་སྐྱེ་བ་ཅན་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་སྐྱེ་བ་ཅན་ཞེས་བྱ་བའི་དོན་ནམ། ཡང་ན་ངོ་བོ་ཉམས་པར་གྱུར་པ་ཞེས་བྱ་བ་ཡིན་ནོ། །མི་རྟག་པར་ཞེས་བྱ་བ་ནི་རྣམ་པར་འཇིག་པར་
[155b.2]ཞེས་བྱ་བའི་ཐ་ཚིག་གོ། །རང་གི་མཚན་ཉིད་ཀྱི་རྣམ་པས་ནི་མ་ཡིན་ནོ་ཞེས་བྱ་བ་ནི་ཕན་འདོགས་པར་བྱེད་པའི་རང་གི་མཚན་ཉིད་ཀྱི་རྣམ་པ་སྟེ། བདེ་བའི་ཚོར་བ་ནི་འཕགས་པ་རྣམས་ལ་ཡང་ཕན་འདོགས་པར་བྱེད་པས་མི་སླུ་བ་ཡིན་ནོ། །གལ་ཏེ་བདེ་བའི་ཚོར་བ་འདི་རང་གི་མཚན་ཉིད་ཀྱིས་ཏེ། ཕན་
[155b.3]འདོགས་པར་བྱེད་པའི་བདག་ཉིད་ཀྱིས་མི་འདོད་པ་ཞིག་ཡིན་པར་གྱུར་ན་ནི་བདེ་བའི་ཚོར་བ་དེ་ལ་སུ་ཡང་འདོད་ཆགས་སྐྱེ་བར་མི་འགྱུར་བ་ཞིག་སྟེ། སྡུག་བསྔལ་གྱི་ཚོར་བ་བཞིན་ནོ་སྙམ་དུ་བསམས་པ་ཡིན་ནོ། །གང་གི་ཕྱིར་འདོད་ཆགས་དང་འབྲལ་བའི་ཆེད་དུ་ཞེས་བྱ་བ་ནི་རྒྱུ་གང་གི་ཕྱིར་འདོད་ཆགས་
[155b.4]དང་འབྲལ་བར་བྱ་བའི་ཆེད་དུ་རྣམ་པ་གཞན་གྱིས་ཀྱང་སྐྱོན་ཅན་དུ་ལྟ་བར་འགྱུར་ཏེ། གཞན་དུ་ན་ཚེགས་མེད་པ་ཁོ་ནར་འདོད་ཆགས་མེད་པ་འགྲུབ་པས་འདོད་ཆགས་དང་བྲལ་བར་བྱ་བའི་ཆེད་དུ་འབད་པ་དོན་མེད་པར་འགྱུར་རོ། །བཅོམ་ལྡན་འདས་ཀྱིས་གང་ཅི་ཚོར་ཡང་རུང་དེ་ནི་འདིར་སྡུག་བསྔལ་
[155b.5]ལོ་ཞེས་ཀྱང་གསུངས་ན་ཞེས་བྱ་བའི་མདོའི་ཚིག་འདི་ནི་གནས་བརྟན་ཀུན་དགའ་བོས་བཟླས་པ་ཡིན་ནོ། །དེས་ཀྱང་འདི་སྐད་དུ་ཞུས་པར་འགྱུར་ལ་ཞེས་བྱ་བ་ནི་གནས་བརྟན་ཀུན་དགའ་བོས་གང་ཅི་ཚོར་ཡང་རུང་དེ་ནི་འདིར་སྡུག་བསྔལ་ལོ་ཞེས་བྱ་བའི་ཚིག་འདི་རིགས་པ་མ་ཡིན་པའི་ངོ་བོར་མཐོང་ན་ནི་
[155b.6]དེ་ཁོ་ན་ཞུས་པར་འགྱུར་ཏེ། གང་ཅི་ཚོར་ཡང་རུང་དེ་ནི་འདིར་སྡུག་བསྔལ་ལོ་ཞེས་བྱ་བ་འགལ་བའི་ཕྱིར་རོ། །གལ་ཏེ་ཚོར་བ་གསུམ་ཞེས་བྱ་བ་འདི་རིགས་པ་མ་ཡིན་པའི་ངོ་བོར་མཐོང་ན་ནི་བཅོམ་ལྡན་འདས་ཀྱིས་ཅི་ལས་དགོངས་ནས་ཚོར་བ་གསུམ་ཞེས་བཀའ་སྩལ་ཞེས་ཞུས་པར་འགྱུར་ཏེ་དེ་འགལ་
[155b.7]བའི་ཕྱིར་རོ། །བཅོམ་ལྡན་འདས་ཀྱིས་ཀྱང་འདི་སྐད་དུ་ཚོར་བ་གསུམ་ཞེས་བྱ་བ་འདི་ནི་ངས་དགོངས་ནས་བཤད་པ་ཡིན་ནོ་ཞེས་ལུང་བསྟན་པར་འགྱུར་གྱི། འདི་སྐད་དུ་གང་ཅི་ཚོར་ཡང་རུང་དེ་ནི་འདིར་སྡུག་བསྔལ་ལོ་ཞེས་བྱ་བ་ནི་ངས་འདུ་བྱེད་མི་རྟག་པ་ཉིད་དང་། འདུ་བྱེད་རྣམ་པར་འགྱུར་བ་ཉིད་ལས་
[156a]
[156a.1]དགོངས་ནས་གསུངས་སོ་ཞེས་ལུང་བསྟན་པར་ཡང་མི་འགྱུར་བ་ཞིག་ན་ཡང་ཚོར་བ་གསུམ་སྨོས་པའི་ཕྱིར་དེ་སྐད་ཀྱང་བཀའ་མ་སྩལ་ཏེ། དེ་ལྟ་བས་ན་ཚོར་བ་གསུམ་ནི་རང་གི་ངོ་བོས་ཡོད་ལ། གང་ཅི་ཚོར་ཡང་རུང་དེ་ནི་འདིར་སྡུག་བསྔལ་ལོ་ཞེས་བྱ་བ་འདི་ནི་ངས་དགོངས་ནས་བཤད་
[156a.2]པ་ཡིན་ནོ་ཞེས་གསུངས་པའི་ཕྱིར་གང་ཅི་ཚོར་ཡང་རུང་དེ་ནི་འདིར་སྡུག་བསྔལ་ལོ་ཞེས་བྱ་བའི་ཚིག་འདི་ནི་བཅོམ་ལྡན་འདས་ཀྱིས་དགོངས་པ་ཅན་དུ་སྟོན་པར་མཛད་པ་ཡིན་ཏེ། འདུ་བྱེད་འགྱུར་བ་ཉིད་ལས་དགོངས་པའི་ཕྱིར་རོ། །རྣམ་པར་འགྱུར་བ་དང་། མི་རྟག་པའི་ཆོས་ཅན་ཡིན་པའི་ཕྱིར་ཞེས་
[156a.3]བྱ་བ་ནི་རྣམ་པར་འགྱུར་བའི་ཆོས་ཅན་ཡིན་པའི་ཕྱིར་དང་། མི་རྟག་པའི་ཆོས་ཅན་ཡིན་པའི་ཕྱིར་ཏེ། རྣམ་པར་འགྱུར་བ་ནི་གཞན་དུ་འགྱུར་བ་ཉིད་དོ། །འདོད་པའི་ཡོན་ཏན་ཞེས་བྱ་བ་འདི་ནི་གཟུགས་དང་སྒྲ་དང་། དྲི་དང་རོ་དང་རེག་བྱ་ཡིད་དུ་འོང་བ་རྣམས་ཀྱི་མིང་ཡིན་ནོ། །སྐྱེ་བ་ཡང་སྐྱེ་བ་ཡིད་དུ་འོང་བའི་
[156a.4]མིང་ཡིན་ཏེ། སྐྱེ་བ་ཡང་དེ་འདྲ་བར་བདེ་བ་ནི་ཆུང་ལ་སྡུག་བསྔལ་ནི་མང་བ་ཡིན་ན་གཅིག་ཏུ་བདེ་བར་ལྟ་བ་ནི་ཕྱིན་ཅི་ལོག་པ་ཡིན་ནོ། །གལ་ཏེ་འཇིག་རྟེན་དང་མཐུན་པར་གསུངས་པ་ཡིན་ནོ་ཞེ་ན་ཞེས་བྱ་བ་ནི་ཇི་སྟེ་འཇིག་རྟེན་གྱི་ཚོར་བ་རྟོགས་པ་དང་མཐུན་པར་ཚོར་བ་གསུམ་མོ་ཞེས་གསུངས་སོ་ཞེ་ན།
[156a.5]དེ་ནི་མ་ཡིན་ཏེ། ཚོར་བ་ཐམས་ཅད་སྡུག་བསྔལ་བ་ཉིད་ནི་དགོངས་ནས་གསུངས་སོ་ཞེས་བཀའ་སྩལ་པའི་ཕྱིར་ཏེ། བཅོམ་ལྡན་འདས་ཀྱིས་ཀུན་དགའ་བོ་གང་ཅི་ཚོར་ཡང་རུང་སྟེ་འདི་ནི་སྡུག་བསྔལ་ལོ་ཞེས་བྱ་བ་ནི། ངས་འདུ་བྱེད་མི་རྟག་པ་ཉིད་དང་། འདུ་བྱེད་རྣམ་པར་འགྱུར་བ་ཉིད་ལས་དགོངས་
[156a.6]ནས་གསུངས་སོ་ཞེས་དགོངས་ཏེ། བཤད་པ་ཡིན་པར་བཀའ་སྩལ་པའི་ཕྱིར་རོ། །དེའི་ཕྱིར་འཇིག་རྟེན་དང་མཐུན་པར་ཚོར་བ་གསུམ་ཞེས་གསུངས་པ་ནི་མ་ཡིན་ནོ། །འོ་ན་ཅི་ཞེ་ན། རང་གི་མཚན་ཉིད་ཀྱི་སྒོ་ནས་ངེས་པར་འཛིན་པར་མཛད་དོ་ཞེས་བྱ་བར་བསམས་པ་ཡིན་ནོ། །ཡང་དག་པ་ཇི་ལྟ་
[156a.7]བ་བཞིན་ཞེས་གསུངས་པའི་ཡང་ཕྱིར་འཇིག་རྟེན་དང་མཐུན་པར་ཚོར་བ་གསུམ་མོ་ཞེས་གསུངས་པ་ནི་མ་ཡིན་ནོ། །ཇི་ལྟ་ཞེ་ན། བདེ་བའི་དབང་པོ་གང་ཡིན་པ་དང་། ཡིད་བདེ་བའི་དབང་པོ་གང་ཡིན་པ་འདི་ནི་བདེ་བའི་ཚོར་བ་ཡིན་པར་བལྟ་བར་བྱའོ་ཞེས་རྒྱས་པར་གསུངས་ནས་ཞེས་བྱ་བ་སྨོས་ཏེ། སྡུག་
[156b]
[156b.1]བསྔལ་གྱི་དབང་པོ་གང་ཡིན་པ་འདི་ནི་བདེ་བའི་ཚོར་བ་ཡིན་པར་བལྟ་བར་བྱའོ། །ཡིད་མི་བདེ་བའི་དབང་པོ་གང་ཡིན་པ་འདི་ནི་སྡུག་བསྔལ་གྱི་ཚོར་བ་ཡིན་ནོ། །བཏང་སྙོམས་ཀྱི་དབང་པོ་གང་ཡིན་པ་འདི་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་
[156b.2]པ་རྒྱས་པར་གསུངས་ནས་སོ། །འདིར་ཚོར་བ་གསུམ་ཡོད་པའི་ཁུངས་ནི་གང་གིས་དབང་པོ་ལྔ་པོ་འདི་དག་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་ཞེས་བྱ་བ་འདི་ཡིན་ཏེ། ཡང་དག་པ་ཇི་ལྟ་བ་བཞིན་ཞེས་བྱ་བ་ནི་སྒྲོ་འདོགས་པ་མེད་པ་དང་། སྐུར་པ་འདེབས་
[156b.3]པ་མེད་པའི་ཕྱིར་རོ། །འཇིག་རྟེན་ཡང་ཇི་ལྟར་ན་སྡུག་བསྔལ་གྱི་ཚོར་བ་ལ་བདེ་བ་དང་སྡུག་བསྔལ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་རྣམ་པ་གསུམ་དུ་རྟོགས་པར་འགྱུར་ཏེ། སྡུག་བསྔལ་གྱི་ངོ་བོ་ཉིད་ཀྱིས་སྡུག་བསྔལ་དུ་རྟོགས་པ་ཁོ་ནར་འགྱུར་བའི་ཕྱིར་རོ། །གལ་ཏེ་ཆུང་ངུ་
[156b.4]དང་འབྲིང་དང་ཆེན་པོ་དག་ལ་ཞེས་བྱ་བ་རྒྱས་པར་འབྱུང་བ་ནི་ཇི་སྟེ་སྡུག་བསྔལ་ཆུང་ངུ་ལ་ནི་བདེ་བའི་བློ་འབྱུང་ལ། ཆེན་པོ་ལ་ནི་སྡུག་བསྔལ་གྱི་བློ་འབྱུང་། འབྲིང་ལ་ནི་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་བློ་འབྱུང་ངོ་ཞེ་ན། འདི་ལ་བདེ་བ་ལ་ཡང་རྣམ་པ་གསུམ་ཡོད་པས་ཞེས་བྱ་བ་
[156b.5]རྒྱས་པར་སྨོས་ཏེ། ཆུང་ངུ་དང་འབྲིང་དང་ཆེན་པོ་ཐ་དད་པས་སོ། །སྡུག་བསྔལ་ཆུང་ངུ་ལ་སོགས་པ་ལ་ཞེས་བྱ་བ་ནི་ཆུང་ངུ་དང་འབྲིང་དང་ཆེན་པོ་དག་ལའོ། །བདེ་བ་ཆེན་པོ་ལ་སོགས་པའི་བློ་སྐྱེ་བར་འགྱུར་རོ་ཞེས་བྱ་བ་ནི་བདེ་བ་ཆེན་པོ་དང་འབྲིང་དང་ཆུང་ངུའི་བློ་སྐྱེ་བར་འགྱུར་རོ་ཞེས་བྱ་བའི་ཐ་ཚིག་གོ། །ཇི་ལྟ་
[156b.6]ཞེ་ན་སྡུག་བསྔལ་ཆུང་ངུ་ལ་ནི་བདེ་བ་ཆེན་པོའི་བློ་སྐྱེ་བར་འགྱུར་ལ། འབྲིང་ལ་ནི་བདེ་བ་འབྲིང་གི་བློ་སྐྱེ་བར་འགྱུར་ཞིང་། ཆེན་པོ་ལ་ནི་བདེ་བ་ཆུང་ངུའི་བློ་སྐྱེ་བར་འགྱུར་རོ། །སྡུག་བསྔལ་ཆེན་པོ་ལ་བདེ་བ་ཆུང་ངུའི་བློ་སྐྱེ་བར་ནི་རིགས་པ་མ་ཡིན་ནོ། །ཅིའི་ཕྱིར་ཞེ་ན། གལ་ཏེ་དེ་ལ་བདེ་བ་ཆུང་ངུའི་བློ་སྐྱེ་
[156b.7]བར་གྱུར་ན་སྡུག་བསྔལ་དེ་ཆེན་པོ་ཉིད་དུ་ཡང་མི་འགྱུར་རོ། །གལ་ཏེ་སྡུག་བསྔལ་ཆུང་ངུ་ལ་བདེ་བ་ཆེན་པོའི་བློ་སྐྱེ་བར་གྱུར་ན་ཡང་སྡུག་བསྔལ་དེ་ཇི་ལྟར་ཆུང་ངུ་ཉིད་ཡིན་ཏེ། དེ་ལྟར་གསལ་བར་ཉམས་སུ་མྱོང་བ་ལ་ནི་ཆུང་ངུ་ཉིད་དུ་རིགས་པ་མ་ཡིན་ནོ། །སྡུག་བསྔལ་ཡང་མ་ཡིན་བདེ་བ་ཡང་མ་ཡིན་
[157a]
[157a.1]པའི་མཇུག་ཐོགས་སུ་བདེ་བ་ཉམས་སུ་མྱོང་བ་མཐོང་བས། གང་གི་ཚེ་དྲི་དང་རོ་དང་རེག་བྱའི་ཁྱད་པར་ལས་སྐྱེས་པའི་ཞེས་བྱ་བ་སྨོས་ཏེ། ཁྱེད་ཀྱི་ལྟར་ན་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ནི་འབྲིང་ཡིན་གྱི་ཆུང་ངུའི་རྣམ་པ་མ་ཡིན་པས་དེའི་ཕྱིར་དེའི་ཚེ་གང་ལ་འདི་བདེ་བའི་བློར་
[157a.2]འགྱུར་བ་སྡུག་བསྔལ་ཆུང་ངུར་གྱུར་པ་ཡང་གང་ཞིག་ཡིན་པ་བརྗོད་དགོས་སོ། །དེ་ལྟ་བས་ན་བདེ་བ་ནི་ཡུལ་གྱི་སྟོབས་ཁོ་ནས་སྐྱེའི་མཚུངས་པ་དེ་མ་ཐག་པའི་རྐྱེན་སྡུག་བསྔལ་ཆུང་ངུའི་སྟོབས་སམ་མཚུངས་པ་དེ་མ་ཐག་པའི་རྐྱེན་སྡུག་བསྔལ་ཆེན་པོའི་སྟོབས་ཀྱིས་ནི་མ་ཡིན་ནོ། །གཞན་ཡང་གལ་ཏེ་
[157a.3]སྡུག་བསྔལ་ཆུང་ངུ་ལ་བདེ་བའི་བློ་སྐྱེ་བར་སེམས་ན། སྡུག་བསྔལ་ཆུང་ངུ་དེ་མ་སྐྱེས་པ་དང་འགགས་ན་སྟེ། མ་སྐྱེས་པ་དང་འགགས་པར་གྱུར་ན། སྡུག་བསྔལ་མ་ལུས་པ་དང་བྲལ་བའི་ཕྱིར་བདེ་བའི་བློ་ཤིན་ཏུ་ཆེས་སྐྱེ་བར་ཡང་འགྱུར་རོ། །འདི་ལྟར་སྡུག་བསྔལ་མ་ལུས་པ་དང་བྲལ་བ། སྡུག་བསྔལ་
[157a.4]ལྷག་མ་དང་བཅས་པར་བྲལ་ན་ཡང་བདེ་བའི་བློ་སྐྱེ་བར་འདོད་ན་མ་ལུས་པར་བྲལ་ན་ལྟ་སྨོས་ཀྱང་ཅི་དགོས་སྙམ་དུ་བསམས་པ་ཡིན་ནོ། །འདོད་པའི་བདེ་བ་མངོན་སུམ་དུ་གྱུར་པ་ཡང་དེ་བཞིན་དུ་བརྗོད་པར་བྱའོ་ཞེས་བྱ་བ་ནི་དྲི་དང་རོ་དང་རེག་བྱའི་ཁྱད་པར་ལས་སྐྱེས་པའི་བདེ་བ་བཤད་པ་ལྟར་འདོད་པའི་བདེ་
[157a.5]བ་མངོན་སུམ་དུ་གྱུར་པ་ཡང་དེ་བཞིན་དུ་བརྗོད་པར་བྱ་སྟེ། ཇི་ལྟ་ཞེ་ན། འདོད་ཆགས་ཀྱི་སྡུག་བསྔལ་ཆུང་ངུ་ལ་འདོད་པའི་བདེ་བའི་བློ་སྐྱེ་བར་འགྱུར་ན། འདོད་ཆགས་ཀྱི་སྡུག་བསྔལ་ཆུང་ངུ་དེ་མ་སྐྱེས་པ་དང་འགགས་ན་འདོད་པའི་བདེ་བ་སྐྱེ་བའི་བློ་ཤིན་ཏུ་ཆེས་སྐྱེ་བར་ཡང་འགྱུར་བ་ཞིག་ན་དེ་ལྟ་བུ་
[157a.6]ཡང་མ་མཐོང་ངོ་། །ཚོར་བ་ཆུང་ངུ་ལ་ནི་ཞེས་བྱ་བ་ལ་སོགས་པ་རྒྱས་པར་འབྱུང་བ་ནི་ཚོར་བ་ཆུང་ངུ་ལ་ཞེས་བྱ་བ་ནི་སྡུག་བསྔལ་གྱི་ལ་ཞེས་བྱ་བའི་ཐ་ཚིག་གོ། །ཉམས་སུ་མྱོང་བ་ཤས་ཆེན་པོར་འཛིན་ཞེས་བྱ་བ་ནི་མངོན་པར་འཛིན་པའོ། །འབྲིང་ལ་ནི་མི་གསལ་བར་འཛིན་ཞེས་བྱ་བ་ནི་སྡུག་བསྔལ་འབྲིང་
[157a.7]ལ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བར་འཛིན་ཞེས་བྱ་བ་གང་ཡིན་པ་འདི་ཡང་ཇི་ལྟར་རུང་ཞེས་བྱ་བའི་ཐ་ཚིག་སྟེ། སྡུག་བསྔལ་ཆུང་ངུ་ལ་དེ་ཡང་མི་གསལ་བར་འགྱུར་རོ་སྙམ་དུ་བསམས་པ་ཡིན་ནོ། །བསམ་གཏན་གསུམ་ན་ཞེས་བྱ་བ་རྒྱས་པར་འབྱུང་བ་ནི་མདོ་ལས་
[157b]
[157b.1]དེ་ན་བདེ་བའི་ཚོར་བ་ཡོད་དོ་ཞེས་གསུངས་པའི་ཕྱིར། བསམ་གཏན་གསུམ་པོ་དང་པོ་དང་གཉིས་པ་དང་གསུམ་པ་ན་བདེ་བ་ཡོད་དོ་ཞེས་འབྱུང་བས་སྡུག་བསྔལ་ཆུང་ངུར་ཡང་འགྱུར་ཏེ། ཅིའི་ཕྱིར་ཞེ་ན། ཁྱེད་སྡུག་བསྔལ་ཆུང་ངུ་ལ་བདེ་བའི་བློ་སྐྱེ་བར་འདོད་པའི་ཕྱིར་རོ། །མདོ་ལས། གོང་ན་སྟེ་
[157b.2]བསམ་གཏན་བཞི་པ་དང་གཟུགས་མེད་པ་དག་ན་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་ཡོད་དོ་ཞེས་འབྱུང་བས་སྡུག་བསྔལ་འབྲིང་དུའང་འགྱུར་ཏེ། ཅིའི་ཕྱིར་ཞེ་ན། དེ་བཞིན་དུ་སྡུག་བསྔལ་འབྲིང་ལ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་བློ་སྐྱེ་བར་ཡང་འདོད་པའི་ཕྱིར་རོ། །དེའི་
[157b.3]ཕྱིར་སྡུག་བསྔལ་ཆུང་ངུ་ལ་སོགས་པ་ལ་བདེ་བ་ལ་སོགས་པའི་ཚོར་བ་རྣམ་པར་གཞག་ཏུ་མི་རུང་སྟེ། བསམ་གཏན་འོག་མ་དག་ན་ནི་སྡུག་བསྔལ་ཆུང་ངུ་ཡོད་ལ། གོང་ན་ནི་འབྲིང་ཡོད་དོ་ཞེས་བྱ་བར་ཇི་ལྟར་རུང་བར་འགྱུར། མིང་ཆེན་གལ་ཏེ་གཟུགས་ཞེས་བྱ་བ་ནི་མིང་ཆེན་གལ་ཏེ་གཟུགས་གཅིག་ཏུ་
[157b.4]སྡུག་བསྔལ་བ་ཞིག་ཡིན་པར་གྱུར་ན་ནི་བདེ་བ་ཡང་མེད། བདེ་བ་དང་རྗེས་སུ་འབྲེལ་པ་ཡང་མེད། ཡིད་བདེ་བ་ཡང་མེད། ཡིད་བདེ་བ་དང་རྗེས་སུ་འབྲེལ་པ་ཡང་མེད་ལ། བདེ་བའི་ཚོར་བ་ཡང་གཟུགས་ལ་ཀུན་དུ་འདོད་ཆགས་པའི་རྒྱུར་ཡང་མི་འགྱུར་བ་ཞིག་ན། གང་གི་ཕྱིར་གཟུགས་བདེ་བ་
[157b.5]ཡང་ཡོད། བདེ་བ་དང་རྗེས་སུ་འབྲེལ་པ་ཡང་ཡོད་ཅེས་བྱ་བ་སྔ་མ་བཞིན་ཏེ། དེའི་ཕྱིར་གཟུགས་ཀྱང་འདི་ལྟ་སྟེ། ཀུན་དུ་འདོད་ཆགས་པའི་རྒྱུར་འགྱུར་རོ་ཞེས་འབྱུང་བ་ཡིན་ནོ། །བདེ་བའི་རྒྱུ་རྣམ་པར་མི་གནས་པའི་ཕྱིར་རོ་ཞེས་བྱ་བ་འདི་ལ་བརྗོད་པར་བྱ་སྟེ། གལ་ཏེ་བདེ་བའི་རྒྱུ་རྣམ་པར་མི་
[157b.6]གནས་པའི་ཕྱིར་བདེ་བ་མེད་ན་སྡུག་བསྔལ་གྱི་ཡང་རྣམ་པར་མི་གནས་པའི་ཕྱིར་སྡུག་བསྔལ་ཡང་མེད་པ་ཡིན་ནོ། །གཞན་ཡང་བདེ་བའི་རྒྱུ་ནི་རྣམ་པར་གནས་པ་ཁོ་ན་ཡིན་ནོ། །ཇི་ལྟ་ཞེ་ན། རྟེན་གྱི་ཁྱད་པར་ལ་ལྟོས་པའི་ཞེས་བྱ་བ་རྒྱས་པར་སྨོས་ཏེ། གལ་ཏེ་ཡུལ་འབའ་ཞིག་རྒྱུ་ཡིན་ན་ནི་རྒྱུ་རྣམ་
[157b.7]པར་མི་གནས་པ་ཁོ་ནར་ཡང་འགྱུར་བ་ཞིག་ན་ཡང་། ཡུལ་འབའ་ཞིག་ནི་རྒྱུ་མ་ཡིན་གྱི་འདི་ལྟར་རྒྱུ་ནི་རྟེན་གྱི་ཁྱད་པར་ལ་ལྟོས་པ་ཡིན་ནོ། །མེ་དེ་ཉིད་ཅེས་བྱ་བ་ལ་དོན་གྱི་ལུགས་ཏེ། དཔེར་ན་མེ་དེ་ཉིད་མངོན་པར་འདོད་པའི་འབྲས་ཆན་ཚོས་པའི་རྒྱུ་ཡིན་པའི་ཕྱིར་བཙོ་བར་བྱ་བའི་འབྱུང་བའི་
[158a]
[158a.1]ཁྱད་པར་འབྲས་ཀྱི་ཚོགས་ཤས་ཀྱིས་ཚོས་པ་ལ་ནི་ཞིམ་པར་ཚོས་པའི་རྒྱུ་ཡང་ཡིན་ཞིང་། དེ་ཉིད་དེ་ཚིག་པའི་རྒྱུ་ཡིན་པའི་ཕྱིར་མི་ཞིམ་པར་ཚོས་པའི་རྒྱུ་ཡང་ཡིན་ལ། བཙོ་བར་བྱ་བའི་འབྱུང་བའི་གནས་སྐབས་གང་དང་ཕྲད་ནས་ཞིམ་པར་ཚོས་པའི་རྒྱུ་ཡིན་པར་གྱུར་པ་དེ་དང་ཕྲད་ནས་
[158a.2]ཕྱིས་རྒྱུ་མ་ཡིན་པ་ནི་མ་ཡིན་ཏེ། ཞིམ་པར་ཚོས་པ་དེ་ལྟ་བུའི་ཞེས་བྱ་བའི་ཐ་ཚིག་གོ། །འདི་ནི་དངོས་ཀྱི་དོན་སྔར་བཤད་པ་དེའི་དཔེ་ཡིན་ནོ། །བསམ་གཏན་དག་ན་ཡང་བདེ་བའི་རྒྱུ་ཇི་ལྟར་མི་གནས་པ་ཡིན་ཞེས་བྱ་བ་ནི་བསམ་གཏན་དང་པོ་ནས་གསུམ་པའི་བར་དེ་ཉིད་ནི་དུས་རིང་མོ་ཞིག་ཏུ་
[158a.3]ཡང་སྙོམས་པར་ཞུགས་པ་རྣམས་ཀྱི་སྡུག་བསྔལ་གྱི་རྒྱུར་མི་འགྱུར་བས་སོ། །བསམ་གཏན་ལས་སྐྱེས་པའི་བདེ་བ་ལ་ཡང་གང་གི་གཉེན་པོ་ཡིན་ཞེས་བྱ་བ་ནི། བསམ་གཏན་དག་ན་སྡུག་བསྔལ་མེད་པས་སོ། །སྩོགས་པ་ཞེས་བྱ་བའི་སྒྲས་ནི་གལ་ཏེ་སྡུག་བསྔལ་གྱི་གཉེན་པོ་ལ་བདེ་བའི་བློ་
[158a.4]སྐྱེ་བར་འགྱུར་ན། མིང་ཆེན་གལ་ཏེ་གཟུགས་གཅིག་ཏུ་སྡུག་བསྔལ་བ་ཞིག་ཡིན་པར་གྱུར་ན་ནི། བདེ་བ་ཡང་མེད་བདེ་བ་དང་རྗེས་སུ་འབྲེལ་པ་ཡང་མེད་ཅེས་བྱ་བ་དེ་ལྟ་བུ་ལ་སོགས་པ་གསུངས་པར་ཡང་མི་འགྱུར་རོ་ཞེས་བྱ་བ་འདི་ཡང་བརྗོད་པར་བྱ་བ་ཡིན་ནོ། །ཇི་སྲིད་དུ་ལུས་ཀྱི་གནས་
[158a.5]སྐབས་དེ་ལྟ་བུ་དེ་ཞེས་བྱ་བ་ནི་བདེ་བ་སྐྱེ་བ་དང་མཐུན་པའོ། །བདེ་བ་ཁོ་ན་སྐྱེ་བར་འགྱུར་རོ་ཞེས་བྱ་བ་ནི་དེ་ནི་བདེ་བའི་ཚོར་བ་ཁོ་ན་སྐྱེ་བར་འགྱུར་བ་ཡིན་གྱི། དེ་སྡུག་བསྔལ་གྱི་ཚོར་བ་ལ་བདེ་བ་ཉིད་དུ་བཏགས་པ་ནི་མ་ཡིན་ནོ། །དེ་ལྟ་མ་ཡིན་ཏེ། ཇི་སྲིད་དུ་ལུས་ཀྱི་གནས་སྐབས་དེ་ལྟ་བུ་དེ་མེད་པར་
[158a.6]མ་གྱུར་གྱི་བར་དུ་གནས་སྐབས་གཞན་ལས་སྐྱེས་པའི་བདེ་བ་ཁོ་ན་སྐྱེ་བར་མི་འགྱུར་ན་ནི། དེ་ལྟ་མ་ཡིན་ན་ཕྱིས་བདེ་བའི་བློ་ཇེ་མང་དུ་སྐྱེ་བར་འགྱུར་རོ། །གལ་ཏེ་དང་པོ་ནས་ཞེས་བྱ་བ་རྒྱས་པར་འབྱུང་བ་ནི་ཇི་སྟེ། གལ་ཏེ་དང་པོ་ནས་དེའི་རྩོམ་པ་ཞིག་མེད་ན་ཟས་དང་སྐོམ་ལ་སོགས་པའི་མཇུག་ཏུ་
[158a.7]སྡུག་བསྔལ་གྱི་རྒྱུར་ག་ལ་འགྱུར་ཞེ་ན། འདི་ལ་ལུས་ཡོངས་སུ་འགྱུར་བའི་ཁྱད་པར་ལས་ཏེ་ཞེས་སྨོས་ཏེ། སྐོམ་པ་ལ་སོགས་པ་ལ་ཆང་བསྟེན་པས་གང་གིས་ན་བདེ་བ་སྐྱེ་བའི་གནས་སྐབས་ན་སྡུག་བསྔལ་མི་སྐྱེའི་མཇུག་ཏུ་ནི་སྐྱེ་བར་འགྱུར་བ་དེ་ལྟ་བུའི་ལུས་ཡོངས་སུ་འགྱུར་བའི་ཁྱད་པར་ཕྱིས་སྐྱེ་བ་
[158b]
[158b.1]འབྱུང་བར་འགྱུར་རོ། །ཅི་དང་འདྲ་ཞེ་ན། །ཆང་ལ་སོགས་པ་མངར་བ་མཇུག་ཏུ་སྐྱུར་པོར་འགྱུར་བ་བཞིན་ནོ་ཞེས་བྱ་བ་སྨོས་ཏེ། དཔེར་ན་ཆང་དང་འོ་མ་ལ་སོགས་པ་སྔར་མངར་བའི་གནས་སྐབས་ཡིན་པ་ལས་མཇུག་ཏུ་མངར་བ་མེད་པ་སྐྱུར་པོ་སྟེ། སྐྱུར་བ་ཉིད་འབྱུང་བར་འགྱུར་བ་གང་ཡིན་པ་དེ་འདྲ་བའི་
[158b.2]ཡོངས་སུ་འགྱུར་བའི་ཁྱད་པར་ཕྱིས་སྐྱེ་བར་འགྱུར་བ་ལྟ་བུའོ། །ཡང་ན་དཔེར་ན་ཆང་ལ་སོགས་པ་ཡོངས་སུ་འགྱུར་བའི་ཁྱད་པར་ལས་དང་པོར་མངར་བ་ཁོ་ནར་འགྱུར་བའམ། སྐྱུར་བ་དེ་ལས་དེ་བཅོས་པའི་ཕན་པ་ལས་སྨན་བྱས་པའི་འགྱུར་བའི་ཁྱད་པར་ལས་མངར་པོར་འགྱུར་ཞིང་ཡོངས་སུ་འགྱུར་བའི་
[158b.3]ཁྱད་པར་ཁོ་ན་ལས། ཡང་ཕྱིས་སྐྱུར་བ་ཉིད་དུ་འགྱུར་བ་ལྟ་བུ་སྟེ། འདིར་མངར་བ་ནི་བདེ་བའི་དཔེར་བརྗོད་པ་ཡིན་ནོ། །སྐྱུར་བ་ནི་སྡུག་བསྔལ་གྱི་དཔེར་བརྗོད་པ་ཡིན་ནོ། །ཀུན་འབྱུང་གི་བདེན་པ་གང་ཡིན་པ་དེ་ཉིད་སྡུག་བསྔལ་གྱི་བདེན་པ་ཡིན་ནོ་ཞེས་བྱ་བ་དེ་ཞེས་བྱ་བ་ནི་རྒྱུར་གྱུར་པ་རྣམས་ནི་ཀུན་འབྱུང་
[158b.4]གི་བདེན་པ་ཡིན་ཏེ་ཞེས་འབྱུང་བའི་ཕྱིར་དང་། མཛོད་ཀྱི་གནས་དང་པོ་ནས། སྡུག་བསྔལ་ཀུན་འབྱུང་འཇིག་རྟེན་དང་། །ཞེས་འབྱུང་བའི་ཕྱིར་རོ། །མདོ་ལས་ནི་སྲེད་པ་ཁོ་ན་ཡིན་པར་བཤད་དོ་ཞེས་བྱ་བ་ནི་ཀུན་འབྱུང་གི་བདེན་པ་གང་ཞེ་ན། གང་འདི་དགའ་བའི་འདོད་ཆགས་དང་ལྷན་ཅིག་
[158b.5]པའི་སྲེད་པ་སྟེ། དེ་དང་དེ་ལ་མངོན་པར་དགའ་བ་ཅན་ཡིན་ནོ་ཞེས་འབྱུང་ངོ་། །བྱེ་བྲག་ཏུ་སྨྲ་བས་དེ་ནི་གཙོ་བོ་ཡིན་པའི་ཕྱིར་ཞེས་བྱ་བ་སྨོས་ཏེ། གཞན་ལས་གཞན་ཡང་ཡིན་པར་གསུངས་པའི་ཕྱིར་ཞེས་བྱ་བ་ནི་མདོ་གཞན་ལས་ལས་དང་མ་རིག་པ་ལ་སོགས་པ་གཞན་ཡང་ཡིན་པར་གསུངས་པའི་ཕྱིར་
[158b.6]གཞན་དག་ཀྱང་ཀུན་འབྱུང་བ་ཡིན་ནོ། །ཕྱི་མའི་ཚེ་ལ་ཞེས་བྱ་བ་ནི་ཚེ་ཕྱི་མ་ལ་སྟེ། འཇིག་རྟེན་ཕ་རོལ་ཞེས་བྱ་བའི་ཐ་ཚིག་གོ། །ཡང་མདོ་གཞན་ལས་དགེ་སློང་དག་ས་བོན་གྱི་རྣམ་པ་ལྔ་མ་གྲུགས། མ་སྨས། མ་རུལ་ལ། རླུང་དང་ཉི་མས་མ་ཉམས་ཤིང་གྲུང་པོར་གནས་ལ། སའི་ཁམས་དང་
[158b.7]ཆུའི་ཁམས་ཀྱང་ཡོད་ན་དེ་ལྟ་ན་ས་བོན་དེ་དག་འཕེལ་ཞིང་རྒྱས་པ་དང་མཆེད་པར་འགྱུར་རོ། །དགེ་སློང་དག་དེ་ལྟར་ན་ཅི་ནས་ཀྱང་དོན་འདི་ཁོང་དུ་ཆུད་པར་བྱ་བའི་ཕྱིར་དཔེ་འདི་བསྟན་པ་ཡིན་ཏེ་ཞེས་གསུངས་སོ། །དཔེ་འདི་ཉེ་བར་བཀོད་ནས་ཡང་དགེ་སློང་དག་ས་བོན་གྱི་རྣམ་པ་ལྔ་ཞེས་བྱ་བ་འདི་ནི་ཉེ་
[159a]
[159a.1]བར་ལེན་པ་དང་བཅས་པའི་རྣམ་པར་ཤེས་པའི་ཚིག་བླ་དགས་ཡིན་ནོ། །སའི་ཁམས་ཞེས་བྱ་བ་འདི་ནི་རྣམ་པར་ཤེས་པ་གནས་པ་བཞིའི་ཚིག་བླ་དགས་ཡིན་ནོ་ཞེས་གསུངས་ཏེ་ས་བོན་གྱི་རྒྱུ་ཡིན་ནོ། །རྒྱུ་གང་ཡིན་པ་དེ་ནི་ཀུན་འབྱུང་བ་ཡིན་ནོ། །རྣམ་པར་ཤེས་པ་
[159a.2]གནས་པ་ཡང་རྟེན་གྱི་རྒྱུ་ཡིན་ནོ། །དེ་ལྟ་བས་ན་ཞེས་བྱ་བ་ནི་གང་གི་ཕྱིར་ལས་ལ་སོགས་པ་ཡང་རྒྱུ་ཡིན་པ་ཉིད་དུ་གསུངས་པས་ཀུན་འབྱུང་བའི་བདེན་པ་ཉིད་དུ་གྲུབ་པའི་ཕྱིར་མདོ་ལས་བསྟན་པ་ནི་དགོངས་པ་ཅན་ཡིན་ནོ། །དགོངས་པ་ལས་བྱུང་བའམ། དགོངས་པས་རྩེན་པ་ནི་དགོངས་པ་
[159a.3]ཅན་ཏེ། སྲེད་པ་ལྷག་པའི་གང་ཟག་གི་དབང་དུ་མཛད་ནས་བསྟན་ཏོ་སྙམ་དུ་བསམས་པ་ཡིན་ནོ། །ཆོས་མངོན་པ་ལས་བསྟན་པ་ནི་མཚན་ཉིད་པ་ཡིན་ནོ་ཞེས་བྱ་བ་ནི་མཚན་ཉིད་ལས་བྱུང་བ་ནི་མཚན་ཉིད་པ་སྟེ། ཟག་པ་དང་བཅས་པའི་ཕུང་པོ་ལྔ་ཆར་ཀུན་འབྱུང་བའི་བདེན་པ་ཉིད་ཀྱི་མཚན་
[159a.4]ཉིད་དང་ལྡན་པའི་ཕྱིར་ཆོས་མངོན་པ་ལས་ཟག་པ་དང་བཅས་པའི་དངོས་པོ་ཐམས་ཅད་ཀུན་འབྱུང་བའོ་ཞེས་བསྟན་པ་ནི་མཚན་ཉིད་པ་ཡིན་ནོ་ཞེས་པས་སོ། །བྱེ་བྲག་ཏུ་སྨྲ་བ་དེ་ཉིད་ཀྱིས་སྲེད་པ་ལ་སོགས་པ་ཀུན་འབྱུང་བ་ཉིད་ཡིན་པ་དགོངས་པ་ཅན་ཡིན་པར་བརྗོད་པར་འདོད་ནས་སོ། །གཞན་
[159a.5]ཡང་ཞེས་བྱ་བ་རྒྱས་པར་སྨྲས་ཏེ། མངོན་པར་འགྲུབ་པའི་རྒྱུ་བཀའ་སྩལ་པ་ན་ནི་མདོ་ལས་ཀུན་འབྱུང་གི་བདེན་པ་སྲེད་པ་ཁོ་ན་ཡིན་པར་གསུངས་ལ་སྐྱེ་བ་དང་མངོན་པར་འགྲུབ་པའི་རྒྱུ་རྒྱུ་དང་བཅས་པར་བཀའ་སྩལ་པ་ན་ནི་ལས་དང་སྲེད་པ་དང་མ་རིག་པའི་བར་ཡིན་པར་གསུངས་ཏེ་སྐྱེ་བའི་རྒྱུ་ནི་ལས་
[159a.6]ཡིན་ནོ། །མངོན་པར་འགྲུབ་པའི་རྒྱུ་ནི་སྲིད་པ་དག་ལ་སྲེད་པ་ཡིན་ནོ། །དེ་དག་གི་རྒྱུ་ལས་དང་སྲེད་པ་ཁོ་ན་ཡིན་པར་གསུངས་ལ་སྐྱེ་བ་དང་སྲེད་པ་དེ་གཉིས་ཀྱི་རྒྱུ་ནི་མ་རིག་པ་ཡིན་ནོ། །སྨྲས་པ། ཚིགས་སུ་བཅད་པ་ལས་སྐྱེས་པའི་རྒྱུ་ནི་ལས་ཡིན་ལ། མངོན་པར་འགྲུབ་པའི་རྒྱུ་ནི་སྲེད་
[159a.7]པ་ཡིན་པར་འབྱུང་ངོ་ཞེས་བྱ་བ་ཇི་ལྟར་ཤེས་ཤེ་ན། མདོ་ལས། ལས་ནི་སྐྱེ་བའི་རྒྱུ་ཡིན་ལ་སྲེད་པ་ནི་མངོན་པར་འགྲུབ་པའི་རྒྱུ་ཡིན་ཞེས་འབྱུང་བའི་ཕྱིར་ཏེ། མདོ་གཞན་ལས་འབྱུང་བའི་ཕྱིར་རོ། །ཡང་ན་མདོ་ལས་རྒྱུ་དང་བཅས་རྐྱེན་དང་བཅས་ཞེས་བྱ་བ་རྒྱས་པར་འབྱུང་བ་ནི། ཡང་ན་ཚིགས་སུ་
[159b]
[159b.1]བཅད་པ་ལས། ལས་དང་སྲེད་པ་དང་མ་རིག་པ་དག་ཚེ་ཕྱི་མ་ལ་མིག་ལ་སོགས་པའི་འདུ་བྱེད་རྣམས་ཀྱི་རྒྱུ་ཡིན་པར་བསྟན་པ་འདི་ནི་མདོ་འདི་ལས་འབྱུང་བའི་རིམ་པར་ཏེ་རྒྱུ་བརྒྱུད་པའི་རིམ་པ་དང་མཐུན་པར་བསྟན་པ་ཡིན་ནོ། །དེ་ནི་འདི་སྐད་དུ་ཚིགས་སུ་བཅད་པ་ལས་བྱུང་བ་འདི་ནི་ལས་ནི་སྐྱེ་བའི་རྒྱུ་
[159b.2]ཡིན་ལ་ཞེས་འབྱུང་བའི་མདོ་འདི་དང་། རྒྱུ་དང་བཅས། རྐྱེན་དང་བཅས། གཞི་དང་བཅས་པའི་རིམ་པ་འབྱུང་བའི་མདོ་དང་སྦྱར་ན་འདི་ལྟ་བུ་ཡིན་ནོ་ཞེས་བཤད་པར་འགྱུར་རོ། །ཇི་ལྟ་ཞེ་ན། དགེ་སློང་དག་མིག་ནི་རྒྱུ་དང་བཅས། རྐྱེན་དང་བཅས། གཞི་དང་བཅས་པ་ཡིན་ནོ། །དགེ་སློང་དག་
[159b.3]མིག་གི་རྒྱུ་ནི་གང་ཡིན། རྐྱེན་ནི་གང་ཡིན། གཞི་ནི་གང་ཡིན་ཞེ་ན། དགེ་སློང་དག་མིག་གི་རྒྱུ་ནི་ལས་ཡིན་ནོ། །རྐྱེན་ནི་ལས་ཡིན་ནོ། །གཞི་ནི་ལས་ཡིན་ནོ། །དགེ་སློང་དག་ལས་ཀྱང་རྒྱུ་དང་བཅས། རྐྱེན་དང་བཅས། གཞི་དང་བཅས་པ་ཡིན་ནོ། །དགེ་སློང་དག་ལས་ཀྱི་རྒྱུ་ནི་གང་
[159b.4]ཡིན། རྐྱེན་ནི་གང་ཡིན། གཞི་ནི་གང་ཡིན་ཞེ་ན། དགེ་སློང་དག་ལས་ཀྱི་རྒྱུ་ནི་སྲེད་པ་ཡིན་ནོ། །རྐྱེན་ནི་སྲེད་པ་ཡིན་ནོ། །གཞི་ནི་སྲིད་པ་ཡིན་ནོ། །དགེ་སློང་དག་སྲེད་པ་ཡང་རྒྱུ་དང་བཅས། རྐྱེན་དང་བཅས། གཞི་དང་བཅས་པ་ཡིན་ནོ། །དགེ་སློང་དག་སྲེད་པའི་རྒྱུ་ནི་གང་ཡིན། རྐྱེན་ནི་
[159b.5]གང་ཡིན། གཞི་ནི་གང་ཡིན་ཞེ་ན། དགེ་སློང་དག་སྲེད་པའི་རྒྱུ་ནི་མ་རིག་པ་ཡིན་ནོ། །རྐྱེན་ནི་མ་རིག་པ་ཡིན་ནོ། །གཞི་ནི་མ་རིག་པ་ཡིན་ནོ། །དགེ་སློང་དག་མ་རིག་པ་ཡང་རྒྱུ་དང་བཅས། རྐྱེན་དང་བཅས། གཞི་དང་བཅས་པ་ཡིན་ནོ། །དགེ་སློང་དག་མ་རིག་པའི་རྒྱུ་ནི་གང་ཡིན། རྐྱེན་ནི་
[159b.6]གང་ཡིན། གཞི་ནི་གང་ཡིན་ཞེ་ན། དགེ་སློང་དག་མ་རིག་པའི་རྒྱུ་ནི་ཚུལ་བཞིན་མ་ཡིན་པ་ཡིད་ལ་བྱེད་པའོ། །རྐྱེན་ནི་ཚུལ་བཞིན་མ་ཡིན་པ་ཡིད་ལ་བྱེད་པའོ། །གཞི་ནི་ཚུལ་བཞིན་མ་ཡིན་པ་ཡིད་ལ་བྱེད་པའོ་ཞེས་འབྱུང་ངོ་། །ས་བོན་དང་ཞིང་གི་དངོས་པོར་སྟོན་པར་མཛད་པས་
[159b.7]རྣམ་པར་ཤེས་པ་ལ་སོགས་པ་ཡང་ཀུན་འབྱུང་གི་བདེན་པར་གསུངས་ཀྱི་སྲེད་པ་ལ་སོགས་པ་འབའ་ཞིག་ཏུ་ནི་མ་ཟད་པས་མདོ་ལས་བསྟན་པ་ནི་དགོངས་པ་ཅན་ཡིན་ཏེ། དེ་ལྟར་ན་སྡུག་བསྔལ་ཐམས་ཅད་ཀྱང་ཀུན་འབྱུང་བའི་དངོས་པོ་མཚན་ཉིད་པ་ཡིན་པར་བསྒྲུབས་པ་ཡིན་ནོ། །སྐྱེ་
[160a]
[160a.1]གནས་ལ་སོགས་པའི་རྣམ་པའི་བྱེ་བྲག་གིས་ཞེས་བྱ་བ་ལ་སོགས་པ་ལ་ཞེས་བྱ་བའི་སྒྲས་ནི། རིགས་དང་ཕོ་དང་མོ་ལ་སོགས་པའི་རྣམ་པའི་བྱེ་བྲག་ཅེས་བྱ་བ་བསྡུའོ། །བྱེ་བྲག་མེད་པར་ཞེས་བྱ་བ་ནི། ཁམས་དང་འགྲོ་བ་དང་སྐྱེ་གནས་ལ་སོགས་པའོ། །དེ་ཉིད་ཀྱི་རྒྱུ་ནི་གོ་
[160a.2]རིམས་བཞིན་དུ་ཞེས་བྱ་བ་ནི་སྐྱེ་བའི་རྒྱུ་ནི་ལས་ཡིན་ནོ། །མངོན་པར་འགྲུབ་པའི་རྒྱུ་ནི་སྲེད་པ་ཡིན་ནོ། །དཔེར་ན་ས་བོན་ནི་ཞེས་བྱ་བ་རྒྱས་པར་འབྱུང་བ་ནི་སཱ་ལུའི་ས་བོན་ནི་སཱ་ལུའི་མྱུ་གུ་སྐྱེ་བའི་རྒྱུ་ཡིན་ནོ་ཞེས་བྱ་བ་ལ་སོགས་པ་ལྟ་བུའོ། །ཆུ་ནི་བྱེ་བྲག་མེད་པར་ཇི་ལྟར་སཱ་ལུའི་མྱུ་གུ་སྐྱེ་བའི་རྒྱུ་ཡིན་པ་དེ་བཞིན་དུ་
[160a.3]ནས་ཀྱི་ཡང་ཡིན་པས་དེའི་ཕྱིར་དེ་ནི་མྱུ་གུ་ཐམས་ཅད་སྐྱེ་བ་ཙམ་གྱི་རྒྱུ་ཡིན་པ་ལྟ་བུའོ། །སྲེད་པ་མེད་ན་སྐྱེ་བ་མེད་པའི་ཕྱིར་ཞེས་བྱ་བ་འདི་ལ་སྒྲུབ་པ་ནི་སྐྱེ་བའི་རྒྱུ་ནི་སྲིད་པ་ཡིན་ཏེ། དེ་ཡོད་དམ་མེད་ན་དེ་ཡོད་པ་དང་མེད་པའི་ཕྱིར་དཔེར་ན་མྱུ་གུའི་ས་བོན་ལྟ་བུའོ། །རྒྱུད་གཞོལ་བའི་ཡང་ཕྱིར་ཏེ་ཞེས་བྱ་བ་འདིའི་
[160a.4]དོན་རྣམ་པར་དགྲོལ་བའི་ཕྱིར་གང་ལ་སྲེད་པ་དང་བཅས་པ་ཞེས་བྱ་བ་རྒྱས་པར་སྨོས་ཏེ། གཟུགས་ལ་སོགས་པའི་ཡུལ་གང་ལ་སེམས་ཀྱི་རྒྱུད་སྲེད་པ་དང་བཅས་པ་དེར་སེམས་ཀྱི་རྒྱུད་ཡང་དང་ཡང་དུ་གཞོལ་བར་མཐོང་བས། དེ་ལྟ་བས་ན་ཡང་སྲིད་པ་ལ་ཡང་སེམས་ཀྱི་རྒྱུད་སྲེད་པ་དང་བཅས་པ་དེ་དང་
[160a.5]འདྲའོ། །ཅིའི་ཕྱིར་ཞེ་ན། དེ་ལ་གཞོལ་བས་ཏེ། གང་ལ་གཞོལ་བ་དེ་ལ་ནི་འཇུག་པར་ཤེས་སོ། །འདི་ལ་གྲུབ་པ་ནི་ཡང་སྲེད་པ་ལ་སེམས་ཀྱི་རྒྱུད་སྲེད་པ་དང་བཅས་པ་འཇུག་པར་འགྱུར་ཏེ། གཞོལ་བའི་ཕྱིར་གཟུགས་ལ་སོགས་པའི་ཡུལ་ལ་གཞོལ་བ་བཞིན་ནོ། །འདག་པའི་ཆལ་སྲན་ཆུང་གི་
[160a.6]ཕྱེ་མའི་ལྡེ་གུ་སྐམས་པས་ལུས་བཟུང་བ་བཞིན་དུ་ཞེས་བྱ་བ་ལ། འདག་པའི་ཆལ་སྲན་ཆུང་གི་ཕྱེ་ནི་ཁྲུས་ཀྱི་ཆལ་སྲན་ཆུང་གི་ཕྱེའོ། །དེའི་ལྡེ་གུ་ནི་འདི་ལ་འདག་པའི་ཆལ་སྲན་ཆུང་གི་ཕྱེ་མའི་ལྡེ་གུ་སྐམ་པོ་ཡོད་པས་ན་འདག་པའི་ཆལ་སྲན་ཆུང་གི་ཕྱེ་མའི་ལྡེ་གུ་སྐམས་པས་ལུས་བཟུང་བའོ། །དེ་དང་
[160a.7]འདྲ་བར་ཏེ། དཔེར་ན་འདག་པའི་ཆལ་སྲན་ཆུང་གི་ཕྱེ་མའི་ལྡེ་གུ་སྐམས་པས་ལུས་བཟུང་བ་དེ་བཞིན་དུ་སྲེད་པས་ལུས་བཟུང་ངོ་ཞེས་བསྟན་པ་ཡིན་ནོ། །འདི་ནི་རིགས་པ་ཡིན་ནོ་ཞེས་བྱ་བ་ནི་མངོན་པར་འགྲུབ་པའི་རྒྱུ་སྲེད་པ་ཡིན་ནོ་ཞེས་བྱ་བའི་དོན་འདི་ལའོ། །བདེན་པ་གཉིས་ཞེས་ཀྱང་
[160b]
[160b.1]གསུངས་ཞེས་བྱ་བ་འདི་ནི་བདེན་པ་བཞིའི་ཞར་ལ་སྨོས་པ་ཡིན་ནོ། །བུམ་ཆུ་བཞིན་ཞེས་བྱ་བ་ནི་འཇིག་པ་གཉིས་ཉེ་བར་བསྟན་པའི་ཕྱིར་དཔེ་གཉིས་ཉེ་བར་བཀོད་པ་ཡིན་ཏེ། འཇོམས་པས་འཇིག་པ་ནི་བུམ་པ་ལ་སོགས་པའོ། །བློས་འཇིག་པ་ནི་ཆུ་ལ་སོགས་པ་སྟེ། ཆུ་ལ་སོགས་པ་ལ་ནི་བཅོམ་པས་
[160b.2]རོ་ལ་སོགས་པ་བསལ་བར་མི་འཐད་པའི་ཕྱིར་རོ། །རྣམ་པ་གཅིག་ཏུ་ན་ཀུན་རྫོབ་ནི་རྣམ་པ་གཉིས་ཏེ། ཀུན་རྫོབ་གཞན་ལ་བརྟེན་པ་དང་། རྫས་གཞན་ལ་བརྟེན་པའོ། །དེ་ལ་ཀུན་རྫོབ་གཞན་ལ་བརྟེན་པ་གང་ཡིན་པ་དེ་ལ་ནི་འཇིག་པ་ཡང་སྲིད་ལ་གཞན་སེལ་བ་ཡང་སྲིད་དོ། །རྫས་གཞན་ལ་བརྟེན་
[160b.3]པ་གང་ཡིན་པ་དེ་ལ་ནི་གཞན་སེལ་བ་ཁོ་ན་སྲིད་ཀྱི་འཇིག་པ་མ་ཡིན་ཏེ། རྡུལ་ཕྲ་རབ་རྫས་བརྒྱད་ལ་ཆ་ཤས་སུ་དབྲལ་བར་ནི་མི་ནུས་སོ། །ཀུན་རྫོབ་ཏུ་ཡོད་དེ་ཞེས་བྱ་བ་ནི་ཐ་སྙད་དུ་ཡོད་པའོ། །དོན་དམ་ཡོད་ཅེས་བྱ་བ་ནི་དོན་དམ་པར་ཡོད་པ་སྟེ། རང་གི་མཚན་ཉིད་དུ་ཡོད་པ་ཞེས་བྱ་བའི་ཐ་ཚིག་གོ། །
[160b.4]ཚོར་བ་ཡོད་པ་ལ་སོགས་པ་ཡང་དེ་བཞིན་དུ་བལྟ་བར་བྱའོ་ཞེས་བྱ་བ་ནི་ཚོར་བ་དང་། འདུ་ཤེས་དང་། སེམས་པ་ལ་སོགས་པ་ཡང་རྫས་སུ་ཡོད་པ་ཁོ་ནར་ལྟའོ། །ཇི་ལྟ་ཞེ་ན། ཚོར་བ་ལ་སོགས་པའི་ཆོས་རྣམས་ནི་བློས་བསལ་ན་ཚོར་བའི་ངོ་བོ་ཉིད་ཀྱི་བློ་འབྱུང་བས་ཚོར་བ་ནི་རྫས་སུ་ཡོད་པ་ཡིན་ཏེ།
[160b.5]འདུ་ཤེས་དང་སེམས་པ་ལ་སོགས་པ་ལ་ཡང་དེ་བཞིན་དུ་སྦྱར་བར་བྱའོ། །བུམ་པ་དང་ཆུ་ཡོད་དོ་ཞེས་བརྗོད་པ་ན་བདེན་པ་ཁོ་ནར་སྨྲས་པ་ཡིན་གྱི་བརྫུན་པ་ནི་མ་ཡིན་པས་ཞེས་བྱ་བ་ནི་ཀུན་རྫོབ་ཀྱི་བདེན་པ་སྨོས་པའི་དགོངས་པ་སྟོན་པར་བྱེད་དེ། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་
[160b.6]གཉིས་ལ་བརྟེན་ནས་ཏེ། །འཇིག་རྟེན་ཀུན་རྫོབ་བདེན་པ་དང་། དམ་པའི་དོན་གྱི་བདེན་པའོ། །ཞེས་བཤད་དོ། །དེ་བཞིན་དུ་དོན་དམ་པའི་བདེན་པ་ཞེས་བྱ་བ་ནི་ཡེ་ཤེས་དམ་པའི་དོན་ཡིན་པས་དོན་དམ་པའོ། །དེ་ནི་དོན་དམ་པ་ཡང་ཡིན་ལ་དེ་ནི་བདེན་པ་ཡང་ཡིན་པས་དོན་དམ་པའི་བདེན་
[160b.7]པའོ། །ཇི་ལྟར་གཞན་འཇིག་རྟེན་པས་འཛིན་པ་དེ་ལྟར་ནི་ཀུན་རྫོབ་ཀྱི་བདེན་པ་ཡིན་ཏེ། ཀུན་རྫོབ་ཀྱི་ཐ་སྙད་དམ་ཤེས་པ་ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་པས་འཛིན་པས་ན་ཀུན་རྫོབ་ཀྱི་བདེན་པའོ། །རྣལ་འབྱོར་སྤྱོད་པ་རྣམས་ཀྱི་ལྟར་ན་ཡོད་པ་ནི་རྣམ་པ་གསུམ་སྟེ།
[161a]
[161a.1]ཀུན་རྫོབ་ཏུ་ཡོད་པ་དང་། དོན་དམ་པར་ཡོད་པ་དང་། རྫས་སུ་ཡོད་པའོ། །དེ་ལ་རྫས་སུ་སྟེ། རང་གི་མཚན་ཉིད་དུ་ཡོད་པ་ནི་རྫས་སུ་ཡོད་པ་ཞེས་བྱ་བའོ། །ཚུལ་གནས་ཞེས་བྱ་བ་རྒྱས་པར་འབྱུང་བ་ལ་ཚུལ་ནི་ཚུལ་ཁྲིམས་ཏེ། དེ་ནི་འདུ་འཛི་མེད་པའི་རྒྱུ་དང་། རྣམ་
[161a.2]པར་མི་གཡེང་བའི་རྒྱུ་དང་། ཆོ་ག་ཕུན་སུམ་ཚོགས་པའི་རྒྱུ་ཡིན་ནོ། །བདེན་པ་མཐོང་བ་དང་མཐུན་པའི་ཞེས་བྱ་བ་ནི་ཐོས་པ་གང་ཞིག་བདེན་པ་མཐོང་བ་ལ་ཕན་འདོགས་པའི་ཐོས་པ་དེ་འཛིན་ཞིང་འདོན་པར་བྱེད་དོ། །དོན་ཉན་པར་བྱེད་དོ་ཞེས་བྱ་བ་ནི་དེའི་དོན་མཉན་པའི་སྒོ་ནས་རྣམ་པར་ཤེས་པར་བྱེད་
[161a.3]དོ། །བསམས་པ་ལས་བྱུང་བ་ཇི་ལྟར་གཉི་ག་ལ་དམིགས་པ་ཡིན་པ་བསྟན་པའི་ཕྱིར་སྨྲས་པ། རེས་འགའ་ནི་ཡི་གེས་དོན་འདྲེན་པར་བྱེད་དེ། མིང་འདིའི་དོན་ནི་འདི་ཡིན་ནོ་ཞེས་ཡི་གེས་བསྒྲུབ་པའི་མིང་གིས་དོན་འདྲེན་པར་བྱེད་དོ། །རེས་འགའ་ནི་བརྗོད་པར་བྱ་བའི་དོན་འདིའི་ཡི་གེ་ནི་འདིའོ་ཞེས་
[161a.4]དོན་གྱིས་ཡི་གེ་འདྲེན་པར་བྱེད་དེ། མིང་ནི་འདིའི་ཞེས་བྱ་བའི་ཐ་ཚིག་གོ། །ཡི་གེ་ཞེས་བྱ་བའི་སྒྲ་འདི་ནི་མིང་ཡིན་པར་རབ་ཏུ་སྦྱར་བ་ཡིན་ཏེ། མདོ་ལས་ཀྱང་། དོན་བཟང་པོ། ཡི་གེ་བཟང་པོ་ཞེས་འབྱུང་བས་སོ། །སློབ་དཔོན་གྱིས་རྟོག་པ་འདི་ལ་ནི་ཞེས་བྱ་བ་རྒྱས་པར་སྨོས་ཏེ། བསམས་པ་
[161a.5]ལས་བྱུང་བའི་ཤེས་རབ་འགྲུབ་པར་མི་འགྱུར་གྱི་ཞེས་བྱ་བ་ནི་མཚན་ཉིད་ཐོས་པ་དང་བསྒོམས་པ་ལས་བྱུང་བའི་མཚན་ཉིད་དང་འཆོལ་བར་བཤད་ཀྱི། མ་འཆོལ་བར་ནི་མ་ཡིན་པས་འགྲུབ་པར་མི་འགྱུར་རོ། །རིགས་པས་ངེས་པར་བརྟགས་པ་ལས་སྐྱེས་པ་ཡིན་ནོ་ཞེས་བྱ་བ་ནི་རིགས་པས་ངེས་པར་བརྟགས་
[161a.6]ཤིང་ངེས་པར་དཔྱད་པ་དེ་ལས་སྐྱེས་པ་ཡིན་ནོ། །འདུ་འཛི་དང་མི་དགེ་བའི་རྣམ་པར་རྟོག་པ་ཐག་བསྲིངས་པའི་ཕྱིར་ཞེས་བྱ་བ་ལ་འདུ་འཛི་ཐག་བསྲིངས་པ་ནི་གང་གཅིག་ཏུ་གནས་པ་ཉིད་དེ། དེ་ལྟ་བས་ན་ལུས་ཀྱིས་བསྲིངས་པ་ཡིན་ནོ། །མི་དགེ་བའི་རྣམ་པར་རྟོག་པ་ཐག་བསྲིངས་པ་ནི་གང་ཉོན་
[161a.7]མོངས་པ་ཅན་གྱི་རྣམ་པར་རྟོག་པ་སྤངས་པས་ཏེ། དེ་ལྟ་བས་ན་སེམས་ཀྱིས་བསྲིངས་པ་ཡིན་ནོ། །གྱ་ནོམ་པ་མ་ཡིན་པ་དང་། མང་པོ་མ་ཡིན་པ་རྙེད་པས་ཡིད་མི་བདེ་བ་ནི་ཞེས་བྱ་བ་ནི་སློབ་དཔོན་གྱི་གཞུང་ལུགས་ཡིན་ཏེ། ཡིད་མི་བདེ་བ་ནི་ཡིད་མི་བདེ་བ་ཉིད་དོ། །དེས་མ་མགུ་ཞིང་མ་རངས་པ་ཞེས་
[161b]
[161b.1]བྱ་བའི་ཐ་ཚིག་སྟེ། གྱ་ནོམ་པ་མ་ཡིན་པའམ་མང་པོ་མ་ཡིན་པའི་ཕྱིར་རྙེད་པ་དེས་ཡིད་མི་བདེ་བ་ནི་ཆོག་མི་ཤེས་པ་ཡིན་ནོ། །གྱ་ནོམ་པའང་རུང་། མང་པོ་འང་རུང་བ་རྙེད་པ་ལས་འདོད་པ་ནི་འདོད་ཆེན་ཅན་ཡིན་ནོ། །འདོད་པ་ན་སྤྱོད་པ་དག་ཁོ་ན་ཡིན་ནོ་ཞེས་བྱ་བ་ནི་ཆགས་པ་ནི་མི་དགེ་བའི་རང་
[161b.2]བཞིན་ཡིན་པའི་ཕྱིར་རོ། །སྤོང་བ་དང་བསྒོམ་པ་ལ་དགའ་བ་ཉིད་ནི་འགོག་པ་དང་། ལམ་ལ་དགའ་བ་ཉིད་དོ། །དེ་ནི་ཆོག་ཤེས་པའི་ངོ་བོ་ཉིད་མ་ཡིན་པས། ཇི་ལྟར་ན་འཕགས་པའི་རིགས་བཞི་པ་འདི་ཡང་མ་ཆགས་པའི་རང་བཞིན་ཡིན་ཞེ་ན། དེའི་ཕྱིར་སྲིད་པ་དང་། འདོད་པའི་འདོད་
[161b.3]ཆགས་ལ་རྒྱབ་ཀྱིས་ཕྱོགས་པའི་ཕྱིར་རོ་ཞེས་བྱ་བ་སྨོས་སོ། །སྲིད་པ་ལ་རྒྱབ་ཀྱིས་ཕྱོགས་པའི་ཕྱིར་དང་། འདོད་པའི་འདོད་ཆགས་ལ་རྒྱབ་ཀྱིས་ཕྱོགས་པའི་ཕྱིར་ཏེ། རྒྱབ་ཀྱིས་ཕྱོགས་པ་ནི་མ་ཆགས་པ་ཡིན་ནོ། །རང་གི་ཚུལ་དང་། ལས་ཀྱི་མཐའ་ཡོངས་སུ་སྤངས་པ་ཞེས་བྱ་བ་ནི་རང་གི་ཚུལ་
[161b.4]ཡོངས་སུ་སྤངས་པ་དང་། རང་གི་ལས་ཀྱི་མཐའ་ཡོངས་སུ་སྤངས་པ་སྟེ། དེ་ལ་ཚུལ་ནི་གང་གིས་འཚོ་བར་བྱེད་པའི་འཚོ་བ་འམ། ཟས་དང་སྐོམ་ལ་སོགས་པའོ། །ལས་ཀྱི་མཐའ་ནི་ཞིང་དང་བཟོ་ལ་སོགས་པའོ། །འབྱུང་བ་དང་འཇིག་པ་དེ་ལྟ་བུའི་ཕྱིར་ཞེས་བྱ་བ་ལ་དེ་ལྟ་བུ་ཞེས་བྱ་བའི་སྒྲ་
[161b.5]ནི་འབྱུང་བ་དང་འཇིག་པའི་རྣམ་པར་སྟོན་པར་བྱེད་པ་ཡིན་ཏེ། དེ་ལ་འབྱུང་བའི་རྣམ་པ་ལ་སྲེད་པ་ནི་ཀྱེ་མ་བདག་དབང་པོར་གྱུར་ཀྱང་ཅི་མ་རུང་། འཁོར་ལོས་སྒྱུར་བར་གྱུར་ཀྱང་ཅི་མ་རུང་སྙམ་པ་དེ་ལྟ་བུ་ལ་སོགས་པ་ཡིན་ནོ། །འཇིག་པ་ལ་སྲེད་པ་ནི་རྣམ་པར་འཇིག་པ་ལ་སྲེད་པ་སྟེ། ཀྱེ་མ་བདག་ཤི་
[161b.6]ཡང་ཅི་མ་རུང་། མེད་ཀྱང་ཅི་མ་རུང་། མ་བྱུང་ཡང་ཅི་མ་རུང་སྙམ་པ་ལ་སོགས་པ་ཡིན་ནོ། །འཇུག་པ་ནི་གང་ནས་འཇུག་པའི་མཐའ་ཡིན་ནོ། །འདོད་ཆགས་ཉེ་བ་དང་། ཤིན་ཏུ་སྤྱད་པ་ཞེས་བྱ་བ་ནི་གང་གི་འདོད་ཆགས་གཞི་ཆུང་ངུས་མྱུར་དུ་སྐྱེ་བ་དེ་ནི་འདོད་ཆགས་ཉེ་བར་སྤྱད་པ་ཡིན་ནོ། །གང་གི་
[161b.7]འདོད་ཆགས་ཆེ་བ་དེ་ནི་འདོད་ཆགས་ཤིན་ཏུ་སྤྱད་པ་ཡིན་ནོ། །སྣ་ཚོགས་ལ་མི་དམིགས་པའི་ཕྱིར་ཞེས་བྱ་བ་ནི་རླུང་ལ་ཁ་དོག་དང་དབྱིབས་སྣ་ཚོགས་མེད་པའི་ཕྱིར་རོ། །ཁ་ཕྱིར་མ་བལྟས་པའི་ཕྱིར་ཏེ། ཁ་ནང་དུ་བལྟས་པའི་ཕྱིར་འདི་ནི་རྣམ་པར་རྟོག་པ་གཅོད་པར་བྱེད་པ་ཡིན་ནོ་ཞེས་བྱ་བ་སྐབས་དང་
[162a]
[162a.1]སྦྱར་རོ། །དེའི་ཡུལ་ལ་ཉེ་བར་རྟོག་པའི་ཕྱིར་རོ་ཞེས་བྱ་བ་ནི་མིག་གི་ཡུལ་ལ་ཉེ་བར་རྟོག་པའི་ཕྱིར་རོ་ཞེས་བྱ་བའི་ཐ་ཚིག་གོ། །རྣམ་པར་བསྔོས་པ་ལ་སོགས་པ་དམིགས་པ་ཞེས་བྱ་བ་ལ། སོགས་པ་ཞེས་བྱ་བ་སྨོས་པ་ནི་རྣམ་པར་རྣགས་པ་ལ་སོགས་པ་བསྡུའོ། །རྣམ་པར་འབུས་
[162a.2]གཞིགས་པ་ཞེས་བྱ་བ་ནི་འབུ་ཞུགས་པ་གང་ཡིན་པའོ། །ཆགས་པའི་གཞི་རྣམ་པ་བཞི་པོ་འདི་ཐམས་ཅད་མེད་དོ་ཞེས་བྱ་བ་ནི་ཁ་དོག་དང་། དབྱིབས་དང་། རེག་པ་དང་། བསྙེན་བཀུར་གྱི་བདག་ཉིད་དོ། །མོས་པ་དང་། ཉི་ཚེ་ཡིད་ལ་བྱེད་པ་ཡིན་པའི་ཕྱིར་ཞེས་བྱ་བ་ནི་མོས་པ་ཡིད་ལ་བྱེད་པ་ཡིན་པའི་ཕྱིར་དང་། ཉི་
[162a.3]ཚེ་ཡིད་ལ་བྱེད་པའི་ཕྱིར་ཞེས་བྱ་བའི་ཐ་ཚིག་གོ། །འདི་ནི་གཙོར་མོས་པ་ཡིད་ལ་བྱེད་པ་ཡང་ཡིན་ལ། འདི་ནི་ཉི་ཚེ་བ་ཡང་ཡིན་ཏེ། ཁྱབ་པ་མ་ཡིན་ནོ་ཞེས་བྱ་བའི་ཐ་ཚིག་གོ། །མི་སྡུག་པ་ནི་ཕུང་པོ་ལྔ་ཆར་ལ་དམིགས་པའམ། ས་ཐམས་ཅད་ལ་དམིགས་པ་མ་ཡིན་ནོ། །འོ་ན་ཅི་ཞེ་ན། ཕུང་པོའི་ཕྱོགས་
[162a.4]གཅིག་ལ་དམིགས་པ་ཡིན་ཏེ། དེའི་ཕྱིར་མི་སྡུག་པས་ཉོན་མོངས་པ་སྤོང་བ་ནི་མ་ཡིན་གྱི་རྣམ་པར་གནོན་པའི་སྤོང་བ་ནི་ཡིན་ནོ་ཞེས་བྱ་བའི་དོན་ཏོ། །རང་གི་ལུས་ཀྱི་ཡན་ལག་ལ་སེམས་གཏོད་པར་བྱེད་ཅེས་བྱ་བ་ནི་འདོད་ཆགས་དང་བཅས་པའི་རྒྱུ་ཡོངས་སུ་སྤོང་བའི་ཕྱིར་རེ་ཞིག་སྦྱོར་བའི་གནས་
[162a.5]སྐབས་ཉིད་ན་བུད་མེད་ཀྱི་ཡན་ལག་ནི་མ་ཡིན་ནོ། །རུས་པ་རྣམ་པར་སྦྱོང་བར་བྱེད་པ་ན་ཞེས་བྱ་བ་ནི་རུས་པ་ལས་ཤ་བསལ་ནས་ཐམས་ཅད་རུས་པའི་ཀེང་རུས་སུ་ལྟ་བ་ན་སྟེ། ཇི་སྐད་དུ། དགེ་སློང་སློབ་པ་གཞོན་པའི་རབས། །སེམས་མ་བྱུང་བ་གང་ཞིག་ནི། །གལ་ཏེ་འདོད་ཆགས་འཇོམས་འདོད་ན། །
[162a.6]དེས་ནི་དུར་ཁྲོད་འགྲོ་བར་གྱིས། །དེ་ནས་རྣམ་པར་བསྔོས་ལ་ལྟོས། །དེ་ནས་རྣམ་པར་རྣགས་ལ་ལྟོས། །དེ་ནས་རྣམ་པར་བམ་རུས་པའི། །རུས་གོང་ལ་སོགས་བལྟ་བར་གྱིས། །ཞེས་གསུངས་པ་ལྟ་བུའོ། །འདི་ལ་མི་སྡུག་པ་ལ་གནས་པའི་རྣལ་འབྱོར་སྤྱོད་པ་ནི་མདོར་བསྡུ་ན་རྣམ་པ་གསུམ་སྟེ།
[162a.7]ལས་དང་པོ་པ་དང་། ཡོངས་སུ་སྦྱང་བ་བྱས་པ་དང་། ཡིད་ལ་བྱེད་པ་རྫོགས་པའོ། །དེ་ལ་སེམས་སྡུད་པའི་རྣལ་འབྱོར་སྤྱོད་པའི་ལས་དང་པོ་པ་ནི་རྐང་པའི་མཐེ་བོ་གཅིག་ཅིག་ལ་སེམས་གཏད་ནས་རྐང་པའི་མཐེ་བོ་མྱུགས་པར་ལྟ་བ་ནས་དེ་བཞིན་དུ་བདག་གི་ལུས་ཐམས་ཅད་ཀྱི་བར་དུ་རུས་པའི་
[162b]
[162b.1]ཀེང་རུས་སུ་མོས་པར་བྱེད་པ་ཡིན་ནོ། །ཡོངས་སུ་སྦྱང་བ་བྱས་པ་ནི་དེ་བཞིན་དུ་ཐོད་པ་ཕྱེད་ཀྱི་བར་དུ་མོས་པར་བྱེད་པ་ཡིན་ནོ། །ཡིད་ལ་བྱེད་པ་རྫོགས་པ་ནི་སྨིན་མ་གཉིས་ཀྱི་བར་དུ་སེམས་འཛིན་པར་བྱེད་པའི་བར་ཡིན་ནོ། །རྒྱས་པར་ནི། རུས་པ་རྒྱ་མཚོའི་བར་དུ་ནི། །སྤྲོ་ཞིང་སྡུད་པ་ལས་དང་པོ། །ཞེས་བྱ་
[162b.2]བ་ལ་སོགས་པ་རྣམ་པ་གསུམ་འབྱུང་བ་ཡིན་ནོ། །དེ་ལྟར་བྱས་ན་མུ་བཞི་པའི་འདྲི་བ་འབྱུང་བས་ཡིད་ལ་བྱེད་པ་སྦྱང་བ་བྱས་པ་དང་། སྦྱང་བ་མ་བྱས་པ་དག་དང་ཞེས་བྱ་བ་རྒྱས་པར་སྨོས་སོ། །མུ་དང་པོ་ནི་ཡིད་ལ་བྱེད་པ་སྦྱང་བ་བྱས་པའི་མི་སྡུག་པ་རང་གི་ལུས་ལ་དམིགས་པ་ཡིན་ཏེ། ལུས་ཆུང་བའི་
[162b.3]ཕྱིར་དམིགས་པ་ཡང་ཆུང་བས་ཆུང་བ་ཡིན་གྱི་ཡིད་ལ་བྱེད་པ་སྦྱང་བ་བྱས་པའི་ཕྱིར་དབང་ཆུང་བས་ནི་མ་ཡིན་ཏེ། ཡིད་ལ་བྱེད་པ་རྫོགས་པའི་ཕྱིར་རོ་ཞེས་བྱ་བའི་ཐ་ཚིག་གོ། མུ་གཉིས་པ་ནི་ཡིད་ལ་བྱེད་པ་སྦྱང་བ་མ་བྱས་པའི་མི་སྡུག་པ་རྒྱ་མཚོའི་མཐས་ཀླས་པ་ལ་དམིགས་པ་ཡིན་ཏེ། དབང་ཆུང་
[162b.4]བས་ཆུང་བ་ཡིན་གྱི་དམིགས་པ་ཆུང་བས་ནི་མ་ཡིན་ནོ། །ཉེར་བསྡོགས་དང་། བསམ་གཏན་ཁྱད་པར་ཅན་དང་བཅས་པ་དང་ཞེས་བྱ་བ་ནི་བསམ་གཏན་བཞི་ཉེར་བསྡོགས་དང་བསམ་གཏན་ཁྱད་པར་ཅན་དང་བཅས་པ་དང་། འདོད་པའི་ཁམས་ན་ཡོད་དེ། དེ་ལྟར་ན་བསམ་གཏན་གྱི་ཉེར་བསྡོགས་བཞི་ཡོད་
[162b.5]པས་ས་བཅུ་པ་ཡིན་ནོ། །དེ་ཉིད་ཀྱི་ཕྱིར་དོན་ལ་དམིགས་པ་ཞེས་བྱ་བ་ནི་ཁ་དོག་དང་དབྱིབས་ལ་དམིགས་པའི་ཕྱིར་དོན་ལ་དམིགས་པ་ཡིན་གྱི། མིང་ལ་དམིགས་པ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །མིང་ཉིད་ཀྱི་མི་སྡུག་པའི་རྣམ་པ་ཞེས་བྱ་བ་གྲུབ་པོ་ཞེས་བྱ་བ་ནི་རྣམ་པའི་དོན་ནི་བཤད་མི་དགོས་སོ་
[162b.6]སྙམ་དུ་བསམས་པ་ཡིན་ནོ། །དུས་གང་ཡིན་པ་དེའི་དུས་ལ་དམིགས་སོ་ཞེས་བྱ་བ་ནི་མིག་གི་རྣམ་པར་ཤེས་པ་བཞིན་དུ་འདས་པའི་དམིགས་པ་ཡང་འདས་པ་ཡིན་པ་ནས་ད་ལྟར་བྱུང་བའི་དམིགས་པ་ཡང་ད་ལྟར་བྱུང་བའི་བར་དུ་ཡིན་ནོ། །རང་གི་དམིགས་པ་ངེས་པའི་ཕྱིར་དང་། མོས་པ་ཡིད་ལ་བྱེད་པ་ཡིན་
[162b.7]པའི་ཕྱིར་མདོར་ནི་མ་བྱས་སོ། །འདྲིས་པ་དང་མ་འདྲིས་པ་ཡིན་པའི་ཕྱིར་ཞེས་བྱ་བ་ནི་ཐོག་མ་མེད་པ་ཅན་གྱིས་འཁོར་བ་ན་འདྲིས་པའི་ཕྱིར་འདོད་ཆགས་དང་བྲལ་བས་ཐོབ་པ་ཡིན་ནོ། །མ་འདྲིས་པའི་ཕྱིར་སྦྱོར་བ་ལས་བྱུང་བ་ཡིན་ནོ། །ཤེས་རབ་ཀྱི་རང་བཞིན་ཡིན་པ་ལས་དེའི་སྟོབས་བསྐྱེད་པས་འཇུག་པའི་
[163a]
[163a.1]ཕྱིར་ཏེ། དེ་དག་ལས་དྲན་པ་དེ་སྟོབས་བསྐྱེད་པས་འཇུག་པ་ཡོད་པའོ། །ལུས་དྲན་པ་ཉེ་བར་གཞག་པ་ལ་སོགས་པ་དྲན་པའི་སྟོབས་བསྐྱེད་པས་འཇུག་པའི་ཕྱིར་ལུས་ལ་སོགས་པའི་ཤེས་རབ་ལ་དྲན་པ་ཉེ་བར་གཞག་པ་ཞེས་བྱ་བ་དེ་བཞིན་དུ་དྲན་པའི་སྟོབས་བསྐྱེད་པས་
[163a.2]འཇུག་པའི་ཕྱིར་དབུགས་རྔུབ་པ་དང་དབུགས་འབྱུང་བའི་ཤེས་རབ་ལ་དབུགས་རྔུབ་པ་དང་དབུགས་འབྱུང་བའི་དྲན་པ་ཞེས་བྱའོ། །ས་ལྔ་པོ་ཞེས་བྱ་བ་ནི་བསམ་གཏན་བཞི་པའི་ཉེར་བསྡོགས་མ་གཏོགས་པའི་ཉེར་བསྡོགས་གསུམ་དང་། བསམ་གཏན་ཁྱད་པར་ཅན་དང་། འདོད་པའི་ཁམས་ན་སྤྱོད་པས་
[163a.3]ས་ལྔ་ན་ཡོད་དོ། །ཅིའི་ཕྱིར་ཞེ་ན། བཏང་སྙོམས་དང་མཚུངས་པར་ལྡན་པའི་ཕྱིར་ཏེ། འདི་ལྟར་བསམ་གཏན་དང་པོ་ལ་སོགས་པའི་ཉེར་བསྡོགས་ན་བཏང་སྙོམས་ཀྱི་ཚོར་བ་ཡོད་པས་སོ། །བསམ་གཏན་བཞི་པའི་ཉེར་བསྡོགས་ན་ཡང་བཏང་སྙོམས་ཡོད་མོད་ཀྱི་དེ་ནི་དབུགས་རྔུབ་པ་དང་དབུགས་འབྱུང་བ་དག་
[163a.4]གིས་མ་ཡིན་ནོ། །ཡང་ཅིའི་ཕྱིར་བཏང་སྙོམས་ཀྱི་དབང་པོ་དང་མཚུངས་པར་ལྡན་པ་ཁོ་ནར་ངེས་པར་བཟུང་ཞེ་ན། དེའི་ཕྱིར་རྣམ་པར་རྟོག་པ་དང་མཐུན་པའི་ཕྱིར་ཞེས་བྱ་བ་སྨོས་སོ། །དེའི་གཉེན་པོ་སྟེ། རྣམ་པར་རྟོག་པའི་གཉེན་པོ་དབུགས་རྔུབ་པ་དང་དབུགས་འབྱུང་བ་དྲན་པ་ནི་བདེ་བ་དང་སྡུག་
[163a.5]བསྔལ་དེ་དག་དང་མཚུངས་པར་མི་ལྡན་ནོ། །བདེ་བ་དང་ཡིད་བདེ་བ་དག་ཀྱང་གཏོད་པ་ལ་བར་ཆད་བྱེད་པའི་ཕྱིར་ཏེ། གཏོད་པར་བྱེད་པའི་དགྲར་གྱུར་ལ། དབུགས་རྔུབ་པ་དང་དབུགས་འབྱུང་བ་དེ་ཡང་གཏད་པས་བསྒྲུབ་པར་བྱ་བ་ཡིན་པའི་ཕྱིར་དེ་དག་དང་མཚུངས་པར་མི་ལྡན་ནོ། །རྣམ་པར་རྟོག་པ་
[163a.6]དང་མཐུན་པའི་ཕྱིར་ཞེས་བྱ་བ་ལ་སོགས་པ་ཞེས་གྲག་གོ་ཞེས་བྱ་བ་ལ་གྲག་ཅེས་བྱ་བའི་སྒྲ་ནི་གཞན་གྱི་གཞུང་ལུགས་སྟོན་པར་བྱེད་པ་ཡིན་ནོ། །དེའི་ཕྱིར་ཕྱོགས་གཞན་གང་དག་བསམ་གཏན་དངོས་གཞི་དེ་དག་ན་ཞེས་བྱ་བ་འདི་རྒྱས་པར་འགོད་དོ། །ཡན་ཆད་ཅེས་བྱ་བ་ནི་བསམ་གཏན་བཞི་པ་
[163a.7]ནས་བཟུང་སྟེའོ། །འདོད་པའི་ཁམས་ཀྱི་རྟེན་ཅན་ཡིན་ཞེས་བྱ་བ་ནི་དེ་ན་རྣམ་པར་རྟོག་པ་མང་བའི་ཕྱིར་རོ། །སྦྱོར་བ་ལས་བྱུང་བ་ནི་མ་འདྲིས་པའི་ཕྱིར་རོ། །འདོད་ཆགས་དང་བྲལ་བས་ཐོབ་པ་ནི་འདྲིས་པའི་ཕྱིར་རོ། །ཆོས་འདི་པ་རྣམས་ཞེས་བྱ་བ་ནི་འདི་དག་ལ་སངས་རྒྱས་ཀྱི་ཆོས་འདི་ཡོད་པས་ན་
[163b]
[163b.1]ཆོས་འདི་པ་རྣམས་ཏེ། སངས་རྒྱས་པ་འདི་དག་ཁོ་ནའི་ཡིན་གྱི་ཞེས་བྱ་བའི་ཐ་ཚིག་གོ། །ལུང་མེད་པའི་ཕྱིར་ཞེས་བྱ་བ་ནི་ཕྱི་རོལ་པ་རྣམས་ལ་སྲོག་འཛིན་པའི་ལུང་ཡོད་ཀྱི་དབུགས་རྔུབ་པ་དང་དབུགས་འབྱུང་བ་དྲན་པའི་ལུང་ནི་མེད་དོ། །བདག་ཉིད་ཀྱིས་ཆོས་ཟབ་མོ་མངོན་པར་མི་རྟོགས་པའི་ཕྱིར་རོ་ཞེས་བྱ་བ་ནི་
[163b.2]ལུང་མེད་པར་རོ། །འདི་ལྟར་ཕྱི་རོལ་པ་རྣམས་ལ་ནི་བདག་ཉིད་ཀྱིས་ཆོས་ཟབ་མོ་མངོན་པར་རྟོགས་པ་མེད་དེ། འདིའི་ཟག་པ་ཉིད་ནི་རྒྱུ་དྲུག་དང་ལྡན་པའི་ཕྱིར་རོ། །ལུས་དང་སེམས་རྣལ་དུ་གཞག་སྟེ་ཞེས་བྱ་བ་ནི་མ་ཆགས་པར་བྱས་ཏེ་ཞེས་བྱ་བའི་ཐ་ཚིག་གོ། །མཐོ་གང་དང་འདོམ་གང་གི་བར་དུ་ཞེས་བྱ་བ་ནི་སྲོག་
[163b.3]ཆགས་སྟོབས་དང་ལྡན་པ་དང་། ཉམ་ཆུང་བ་དང་འབྲེལ་བའི་ཕྱིར་རོ། །རླུང་གི་དཀྱིལ་འཁོར་ཞེས་བྱ་བ་ནི་འོག་ཏུ་འགྲོ་བའོ། །རྣམ་པར་འཐོར་བྱེད་ཀྱི་རླུང་ཞེས་བྱ་བ་ནི་གྱེན་དུའོ། །རླུང་གི་དཀྱིལ་འཁོར་དང་རྣམ་པར་འཐོར་བྱེད་ཀྱི་རླུང་གི་བར་དུའོ་ཞེས་བྱ་བ་འདི་ནི་དེ་ཁོ་ན་ཡིད་ལ་བྱེད་པ་ཡིན་པའི་ཕྱིར་རིགས་པ་མ་ཡིན་གྱི།
[163b.4]རྟོག་པ་འདི་ནི་མོས་པ་ཡིད་ལ་བྱེད་པ་ལ་རུང་བར་འགྱུར་རོ། །ཅི་འདི་དག་ཕན་འདོགས་པར་བྱེད་པ་ཞིག་གམ་ཞེས་བྱ་བ་ནས་དྲོ་བ་དག་ཅིག་ཅེས་བྱ་བའི་བར་འདི་ནི་འཇོག་པ་ཁོ་ན་ཡིན་པར་བལྟ་བར་བྱ་སྟེ། ལུས་ཀྱི་ཕྱོགས་ལ་ཕན་འདོགས་པ་ལ་སོགས་པའི་ཁྱད་དུ་འཇོག་པའི་སྒོ་ནས་སོ། །དེ་དག་ལ་བརྟེན་པ་
[163b.5]སེམས་དང་སེམས་ལས་བྱུང་བ་རྣམས་ཞེས་བྱ་བ་ནི་དེ་དག་ལ་རག་ལས་ཏེ། འབྱུང་བ་རྣམས་ཞེས་བྱ་བའི་ཐ་ཚིག་གོ། །གོང་ནས་གོང་དུ་དགེ་བའི་རྩ་བ་རྣམས་ལ་ཞེས་བྱ་བ་ནི་དྲན་པ་ཉེ་བར་གཞག་པ་དང་དྲོ་བར་གྱུར་པ་ལ་སོགས་པའོ། །མཐོང་བའི་ལམ་ལ་སོགས་པ་ལ། །ཞེས་བྱ་བ་ལ། སོགས་པ་ཞེས་བྱ་
[163b.6]བའི་སྒྲས་ནི་བསྒོམ་པའི་ལམ་བསྡུའོ། །རྣམ་པར་དག་པ་ནི་ཟད་པ་ཤེས་པ་ལ་སོགས་པའོ་ཞེས་བྱ་བ་ལ། སོགས་པ་ཞེས་བྱ་བའི་སྒྲས་ནི་མི་སྐྱེ་བ་ཤེས་པ་དང་མི་སློབ་པའི་ཡང་དག་པའི་ལྟ་བ་བསྡུ་བའོ། །དབུགས་རྔུབ་དབུགས་འབྱུང་གང་ལས་ལུས། །ཞེས་བྱ་བ་ནི་དབུགས་རྔུབ་པ་དང་དབུགས་འབྱུང་བ་
[163b.7]དྲན་པ་དང་འབྲེལ་པས་དབུགས་རྔུབ་པ་དང་དབུགས་འབྱུང་བའི་ས་ཐམས་ཅད་སྟོན་པར་བྱེད་དོ། །ལུས་ས་གང་ཡིན་པ་ཞེས་བྱ་བ་ནི་འདོད་པ་ན་སྤྱོད་པ་ནས་བསམ་གཏན་གསུམ་པའི་ས་པའི་བར་ཏེ། འདི་དག་ནི་དེའི་ས་པ་ཡིན་གྱི་གཞན་གྱི་ས་པ་ནི་མ་ཡིན་ནོ། །ལུས་དང་སེམས་ཁྱད་པར་ཅན་ལ་བརྟེན་ནས་ཞེས་བྱ་བ་ནི་
[164a]
[164a.1]དབུགས་རྔུབ་པ་དང་། དབུགས་འབྱུང་བ་དག་ནི་ལུས་ཁྱད་པར་ཅན་ལ་བརྟེན་པ་དང་། སེམས་ཁྱད་པར་ཅན་ལ་བརྟེན་ནས་འཇུག་པ་ཡིན་ནོ། །ཅིའི་ཕྱིར་ཞེ་ན། གཟུགས་མེད་པ་དང་ནུར་ནུར་པོར་གྱུར་པ་ལ་སོགས་པ་རྣམས་ལ་མེད་པའི་ཕྱིར་ཞེས་བྱ་བ་སྨོས་ཏེ། གཟུགས་མེད་པར་གྱུར་པ་རྣམས་
[164a.2]ལ་ནི་ལུས་མེད་པའི་ཕྱིར་མེད་དོ། །ནུར་ནུར་པོ་ལ་སོགས་པར་གྱུར་པ་སྟེ། ནུར་ནུར་པོ་དང་། མེར་མེར་པོ་དང་། ནར་ནར་པོ་ལ་སོགས་པར་གྱུར་པ་རྣམས་ལ་ཡང་ལུས་ཁྱད་པར་ཅན་མེད་པའི་ཕྱིར་མེད་དོ། སྦུབས་ཅན་མེད་པའི་ཕྱིར་རོ་ཞེས་བྱ་བའི་དོན་ཏོ། །སེམས་མེད་པ་རྣམས་ལ་ཡང་སེམས་མེད་པའི་ཕྱིར་
[164a.3]མེད་དོ། །བསམ་གཏན་བཞི་པ་ལ་སྙོམས་པར་ཞུགས་པ་རྣམས་ལ་ཡང་དབུགས་རྔུབ་པ་དང་དབུགས་འབྱུང་བའི་ས་པའི་སེམས་མེད་པའི་ཕྱིར་མེད་དོ། །དེ་ཉིད་ཀྱི་ཕྱིར་གལ་ཏེ་ལུས་ཀྱང་སྦུབས་ཡོད་པ་ཡིན་ལ་ཞེས་བྱ་བ་རྒྱས་པར་སྨོས་སོ། །དབང་པོ་དང་ཐ་དད་པའི་ཕྱིར་རོ་ཞེས་བྱ་བ་ནི་དབང་པོ་དང་ཐ་དད་
[164a.4]པར་འཇུག་པའི་ཕྱིར་རོ་ཞེས་བྱ་བའི་ཐ་ཚིག་གོ། །ལུས་རྒྱས་པས་འགྲིབ་པར་འགྱུར་བའི་ཕྱིར་རྒྱས་པ་ལས་བྱུང་བ་མ་ཡིན་ནོ། །དབུགས་རྔུབ་པ་དང་དབུགས་འབྱུང་བ་རྣམས་ཆད་ནས་ཡང་ཉིང་མཚམས་སྦྱོར་བའི་ཕྱིར་རྣམ་པར་སྨིན་པ་ལས་སྐྱེས་པ་མ་ཡིན་ནོ། །རྣམ་པར་སྨིན་པའི་གཟུགས་ལ་ནི་དེ་ལྟ་བུ་མེད་དོ་
[164a.5]ཞེས་བྱ་བ་ནི་རྣམ་པར་སྨིན་པའི་བདག་ཉིད་ཀྱི་གཟུགས་མིག་ལ་སོགས་པ་ལ་ནི་ཡང་ཉིང་མཚམས་སྦྱོར་བ་འདི་མེད་ཀྱི། སེམས་དང་སེམས་ལས་བྱུང་བ་ནི་ཡང་ཉིང་མཚམས་སྦྱོར་བ་མི་ཟློགས་སོ། །འོག་མ་པ་སྤྱོད་ལམ་པ་དང་སྤྲུལ་པའི་སེམས་ཀྱིས་མི་རྟོགས་སོ་ཞེས་བྱ་བ་ནི་བསམ་གཏན་བཞི་པར་སྐྱེས་པའི་བར་ཡང་
[164a.6]ས་འོག་མ་པའི་སྤྱོད་ལམ་དང་སྤྲུལ་པའི་སེམས་མངོན་དུ་བྱེད་དེ། དེའི་ཕྱིར་དོགས་ནས་ས་འོག་མ་པ་དེ་དག་གིས་མི་རྟོགས་སོ་ཞེས་བརྗོད་དོ། །ལྷག་མཐོང་བསྒྲུབ་པར་བྱ་བའི་ཕྱིར་ཞེས་བྱ་བ་ནི་ཤེས་རབ་བསྒྲུབ་པར་བྱ་བའི་ཕྱིར་ཞེས་བྱ་བའི་དོན་ཏོ། ཉོན་མོངས་པ་རྣམས་ནི་ཡེ་ཤེས་ཀྱིས་གཞོམ་པར་བྱ་བ་ཡིན་ནོ་ཞེས་
[164a.7]འབྱུང་བའི་ཕྱིར་ཏིང་ངེ་འཛིན་གྲུབ་ཏུ་ཟིན་ཀྱང་ཤེས་རབ་མེད་པར་ཉོན་མོངས་པ་རྣམས་སྤོང་བར་མི་འགྱུར་རོ། །ཡང་དྲན་པ་ཉེ་བར་གཞག་པ་བསྒོམས་པས་ལྷག་མཐོང་འགྲུབ་པར་འགྱུར་རོ་ཞེས་བྱ་བ་འདི་ག་ལས་ཤེ་ན། མདོ་ལས་ཏེ། དགེ་སློང་དག་བགྲོད་པ་གཅིག་པའི་ལམ་ནི་འདི་ཡིན་ཏེ། འདི་ལྟ་སྟེ་དྲན་
[164b]
[164b.1]པ་ཉེ་བར་གཞག་པ་རྣམས་སོ། །དགེ་བའི་ཕུང་པོ་མ་འདྲེས་པ་ནི་འདི་ཡིན་ཏེ། འདི་ལྟ་སྟེ། དྲན་པ་ཉེ་བར་གཞག་པ་བཞིའོ་ཞེས་འབྱུང་བའི་ཕྱིར་རོ། །ལུས་ཚོར་ཞེས་བྱ་བ་ལ། ཚོར་ཞེས་བྱ་བ་འདི་ནི་ཚོར་བའོ། །དེ་དག་གི་རང་གི་མཚན་ཉིད་ནི་རང་གི་ངོ་བོའོ་ཞེས་བྱ་བ་ནི་ལུས་རང་གི་ངོ་བོ་ནི་འབྱུང་བ་དང་འབྱུང་བ་
[164b.2]ལས་གྱུར་པ་ཉིད་དོ། །ཚོར་བ་ནི་མྱོང་བ་ཉིད་དོ། །སེམས་ཀྱི་ནི་དམིགས་པ་ཉིད་དོ། །གསུམ་པོ་དེ་དག་ལས་གཞན་པ་རྣམས་ཀྱི་རང་གི་ངོ་བོ་ནི་བདག་ཉིད་ཇི་ལྟ་བ་བཞིན་ནོ། །ཟག་པ་དང་བཅས་པ་རྣམས་སྡུག་བསྔལ་བ་ཉིད་ཅེས་བྱ་བ་ལ། སྡུག་བསྔལ་གྱི་མཚན་ཉིད་ནི་འཕགས་པ་དང་མི་མཐུན་པའོ་ཞེས་དེ་ནི་
[164b.3]བཤད་ཟིན་ཏོ། །གསུམ་ལས་གཞན་པ་དག་ཅེས་བྱ་བ་འདི་མ་འདྲེས་པར་རྣམ་པར་གཞག་པ་ལས་བསམས་ནས་དེ་སྐད་དུ་བརྗོད་པ་ཡིན་ཏེ། འདྲེས་པར་རྣམ་པར་བཞག་ན་ནི་ལུས་ལ་སོགས་པ་ཡང་གཟུང་ངོ་། །དེ་དག་ཀྱང་འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་ཡིན་པར་ལྟའོ། །རང་བཞིན་གྱི་
[164b.4]དྲན་པ་ཉེ་བར་གཞག་པ་ནི་ཤེས་རབ་པོ་ཞེས་བྱ་བ་ནི་གང་གི་ཕྱིར་འབྲེལ་པ་དང་དམིགས་པ་ལ་ལྟོས་ནས་ཤེས་རབ་ཉིད་ཉེ་བར་གནས་པ་དེའི་ཕྱིར་དྲན་པ་ཉེ་བར་གཞག་པ་ཞེས་བྱའོ། །ཐོས་པ་ལ་སོགས་པས་བྱུང་བའོ་ཞེས་བྱ་བའི་ཁྱད་པར་སྨོས་པ་ནི་འདི་ལྟར་དྲན་པ་ཉེ་བར་གཞག་པ་རྣམས་སྦྱོར་བ་ལས་བྱུང་བ་
[164b.5]ཡིན་གྱི་སྐྱེ་བས་འཐོབ་པ་ནི་མ་ཡིན་པས་སོ། །ཅིའི་ཕྱིར་ཤེས་རབ་ཀྱི་རང་བཞིན་ཞེས་བྱ། ཅི་དེ་ལྟ་མ་ཡིན་པའི་དྲན་པ་ཉེ་བར་གཞག་པ་ཡང་ཡོད་དམ་ཞེ་ན། གཞན་ནི་འབྲེལ་དང་དམིགས་པ་ལས། །ཞེས་བྱ་བ་སྨོས་ཏེ། གཞན་དེ་དང་ལྷན་ཅིག་འབྱུང་བ་ནི་ཚོར་བ་ལ་སོགས་པའོ། །འབྲེལ་པས་དྲན་པ་ཉེ་བར་
[164b.6]གཞག་པ་ནི་འབྲེལ་པའི་དྲན་པ་ཉེ་བར་གཞག་པ་ཡིན་ཏེ། རང་བཞིན་གྱི་དྲན་པ་ཉེ་བར་གཞག་པ་དང་འབྲེལ་པའི་ཕྱིར་རོ། །དེ་དག་གི་དམིགས་པ་ཡིན་པའི་ཕྱིར་ཞེས་བྱ་བ་ནི་རང་བཞིན་དང་འབྲེལ་པའི་དྲན་པ་ཉེ་བར་གཞག་པའི་དམིགས་པ་ཡིན་པའི་ཕྱིར་དམིགས་པའི་དྲན་པ་ཉེ་བར་གཞག་པའོ། །ཁ་
[164b.7]ཅིག་ནི་དེ་དག་གི་དམིགས་པ་ནི་དམིགས་པའི་དྲན་པ་ཉེ་བར་གཞག་པའོ་ཞེས་འདོན་ཏེ། དམིགས་པར་བྱ་བ་ཡིན་པས་ན་དམིགས་པ་སྟེ། དེ་དག་ཀྱང་ལུས་དང་། ཚོར་བ་དང་། སེམས་དང་། ཆོས་རྣམས་སོ། །དེ་ལྟ་ཡིན་ན་དམིགས་པའི་དྲན་པ་ཉེ་བར་གཞག་པ་དེ་ནི་ཆོས་ཐམས་ཅད་ཀྱི་ངོ་བོ་ཉིད་ཡིན་
[165a]
[165a.1]ཏེ། བཅོམ་ལྡན་འདས་ཀྱིས་ཀྱང་དགེ་སློང་དག་ཆོས་ཐམས་ཅད་ཅེས་བྱ་བ་འདི་ནི་དྲན་པ་ཉེ་བར་གཞག་པ་བཞིའི་ཚིག་བླ་དགས་ཡིན་ནོ་ཞེས་གསུངས་སོ། །ཤེས་རབ་དེས་དེ་དང་ལྡན་པ་སྟེ། ཤེས་རབ་དང་ལྡན་པ་རྗེས་སུ་ལྟ་བར་བྱེད་དོ་ཞེས་བྱ་བ་ནི་རྗེས་སུ་ལྟ་བར་བྱེད་པས་ན་རྗེས་སུ་
[165a.2]ལྟ་བར་བྱེད་པའོ། །ཤེས་རབ་ཀྱི་ངོ་བོ་ཉིད་ཡིན་ན་ནི་འདི་ལྟར་ཚིག་རྣམ་པར་སྦྱར་ཏེ། རྗེས་སུ་ལྟ་བའི་གང་ཟག་ཏུ་བྱེད་པས་ན་རྗེས་སུ་ལྟ་བར་བྱེད་པ་སྟེ་རྗེས་སུ་ལྟ་བར་བྱེད་པ་ནི་རྗེས་སུ་ལྟ་བ་ཡིན་ནོ། །ཤེས་རབ་དེས་དེ་དང་ལྡན་པ་སྟེ། ཤེས་རབ་དང་ལྡན་པ་རྗེས་སུ་ལྟ་བར་བྱེད་དེ། དཔེར་ན་ཤེས་རབ་
[165a.3]དང་ལྡན་པའི་ཕྱིར་གང་ཟག་ཤེས་རབ་ཅན་ཞེས་བྱ་བ་དེ་བཞིན་དུ་རྗེས་སུ་ལྟ་བ་དང་ལྡན་པའི་ཕྱིར་རྗེས་སུ་ལྟ་བ་ཅན་ཡིན་ནོ། །དེ་ལྟར་ཤེས་རབ་ནི་རྗེས་སུ་ལྟ་བ་ཞེས་བྱ་བར་གྲུབ་པོ། །དེ་ལྟར་བཅོམ་ལྡན་འདས་ཀྱིས་ནང་གི་ལུས་དང་། སོ་སོའི་ནང་གི་ལུས་ལ་ལུས་ཀྱི་རྗེས་སུ་ལྟ་བ་དང་། ལུས་དང་མཐུན་
[165a.4]པར་ལྟ་ཞིང་གནས་སོ་ཞེས་ཀྱང་གསུངས་ཏེ། དེའི་ཕྱིར་ཡང་རྗེས་སུ་ལྟ་བ་ཤེས་རབ་ཡིན་ནོ་ཞེས་བྱ་བ་མང་ངོ་། །ཇི་ལྟ་ཞེ་ན། སྒྲུབ་པར་བྱེད་དེ་འདི་ལ་རྗེས་སུ་ལྟ་བ་སྟེ། ཇི་ལྟ་ཞེ་ན། ལྟ་བ་ཡོད་པས་སོ། །རྗེས་སུ་ལྟ་བ་ནི་ལྟ་བའི་མཚན་ཉིད་དོ། །དེའི་ཕྱིར་རྗེས་སུ་ལྟ་བ་པ་ནི་གང་ཟག་ཡིན་ཏེ་དབྱུག་
[165a.5]པ་ཅན་ཞེས་བྱ་བ་ལྟ་བུའོ། །དེ་བས་ན་ལུས་ལ་རྗེས་སུ་ལྟ་བ་ནི་ལུས་ཀྱི་རྗེས་སུ་ལྟ་བའོ་ཞེས་བདུན་པར་ཚིག་བསྡུ་བ་ཡིན་ནོ། །གལ་ཏེ་འདི་ལ་ལུས་ལ་རྗེས་སུ་ལྟ་བའི་ངང་ཚུལ་ཡོད་པས་ལུས་ལ་རྗེས་སུ་ལྟ་བའོ་ཞེས་བྱ་བར་བརྗོད་ན། དེ་ལྟ་ན་ཡང་ངོ་བོ་འདི་འགྲུབ་པོ་ཞེས་བྱ་བར་ལྟའོ། །དྲན་པ་ཤས་ཆེས་པའི་
[165a.6]ཕྱིར་ཞེས་བྱ་བ་ནི་དྲན་པ་ལྷག་པའི་ཕྱིར་ཞེས་བྱ་བའི་ཐ་ཚིག་གོ། །ཤིང་གཤེགས་པ་ཁྱེའུས་འཛིན་པ་ལྟར་ཞེས་བྱ་བ་ནི་དཔེར་ན་ཤིང་འཆེག་པ་ཤིང་མཁན་གྱིས་ཤིང་གཤེགས་པ་ཁྱེའུས་འཛིན་པ་དེ་བཞིན་དུ་ཤེས་རབ་འདི་ཡང་དྲན་པའི་སྟོབས་བསྐྱེད་པས་དམིགས་པ་ལ་འཇུག་གོ། །དྲན་པའི་སྟོབས་
[165a.7]བསྐྱེད་པས་འཇུག་པ་ཉིད་ཀྱི་ཕྱིར་ཞེས་བྱ་བ་ལ་སྟོབས་བསྐྱེད་པ་ནི་སྟོབས་སྤེལ་བ་སྟེ། དྲན་པའི་སྟོབས་བསྐྱེད་པ་ཡིན་ནོ། །འདི་ལ་དྲན་པའི་སྟོབས་བསྐྱེད་པས་འཇུག་པ་ཡོད་པས་ན་དྲན་པའི་སྟོབས་བསྐྱེད་པས་འཇུག་པའི་ཤེས་རབ་སྟེ་དེའི་ངོ་བོ་ཉིད་དོ། །དེའི་ཕྱིར་ཏེ། གལ་ཏེ་དྲན་པས་དམིགས་
[165b]
[165b.1]པ་འཛིན་ན་དེ་ལྟ་ན་ཤེས་རབ་ཀྱིས་རབ་ཏུ་ཤེས་པར་འགྱུར་རོ། །དེ་ལྟར་ན་བྱེ་བྲག་ཏུ་སྨྲ་བའི་དོན་ནི་དྲན་པས་ཉེ་བར་གཞག་པ་ནི་དྲན་པ་ཉེ་བར་གཞག་པའོ་ཞེས་བྱ་བ་ཡིན་ནོ། །འདི་ལྟར་ན་རུང་སྟེ་ཞེས་བརྗོད་པ་ནི་སློབ་དཔོན་ཏེ། འདི་ནི་བྱེད་པར་སྒྲུབ་པ་ཡིན་ནོ། །འདིས་དྲན་པ་ཉེ་བར་གནས་པས་ན་ཞེས་བྱ་བ་འདི་ནི་
[165b.2]དོན་རབ་ཏུ་བསྟན་པ་ཙམ་དུ་ཟད་དོ། །ཚིག་རྣམ་པར་སྦྱར་བ་ནི་འདི་ལྟར་བྱ་སྟེ། འདིས་ཉེ་བར་འཇོག་པས་ན་ཉེ་བར་གཞག་པའོ། །དྲན་པ་ཉེ་བར་འཇོག་པས་ན་དྲན་པ་ཉེ་བར་གཞག་པའོ་ཞེས་བྱའོ། །ཇི་ལྟར་ན་འདིས་དྲན་པ་ཉེ་བར་འཇོག་ཅེ་ན། ཇི་ལྟར་མཐོང་བས་མངོན་པར་བརྗོད་པའི་ཕྱིར་རོ་ཞེས་བྱ་བ་
[165b.3]སྨོས་སོ། །འདི་ལྟར་ཤེས་རབ་ཀྱིས་དོན་ཇི་ལྟར་མཐོང་བ་དེ་ཁོ་ན་བཞིན་དུ་དྲན་པས་མངོན་པར་རྗོད་པར་བྱེད་དེ་འཛིན་པར་བྱེད་དོ་ཞེས་བྱ་བའི་དོན་ཏོ། །གང་ལ་ཉེ་བར་འཇོག་ཅེ་ན། ལུས་ནས་ཆོས་རྣམས་ཀྱི་བར་ལ་སྟེ། ལུས་ལ་དྲན་པ་ཉེ་བར་འཇོག་པ་ནི་ལུས་དྲན་པ་ཉེ་བར་གཞག་པ་ཡིན་པ་ནས་དེ་བཞིན་
[165b.4]དུ་ཆོས་རྣམས་ལ་དྲན་པ་ཉེ་བར་འཇོག་པ་ནི་ཆོས་དྲན་པ་ཉེ་བར་གཞག་པའི་བར་དུ་ཡིན་ནོ། །རང་བཞིན་གྱི་དྲན་པ་ཉེ་བར་གཞག་པ་ཇི་ལྟ་བར་འབྲེལ་པའི་དྲན་པ་ཉེ་བར་གཞག་པ་ཡང་དེ་དང་འདྲ་སྟེ། ཇི་ལྟར་ཤེས་རབ་ཀྱིས་ལུས་ལ་སོགས་པ་ལ་དྲན་པ་ཉེ་བར་འཇོག་པ་དེ་བཞིན་དུ་དེ་དང་མཚུངས་པར་ལྡན་
[165b.5]པ་དག་གིས་ཀྱང་ཉེ་བར་འཇོག་པར་བྱེད་དོ། །ད་ནི་མདོ་གཞན་ལས་གསུངས་པའི་དྲན་པ་ཉེ་བར་གཞག་པ་རྣམས་བྱེད་པར་བསྒྲུབ་པ་ཉིད་དུ་མི་འཐད་པར་མཐོང་སྟེ། བྱེད་པ་གཞན་དུ་དོན་བརྗོད་པར་འདོད་ནས་གང་ལས་དགེ་སློང་དག་ཅེས་བྱ་བ་རྒྱ་ཆེར་སྨོས་སོ། །ཇི་ལྟར་ལུས་ཀུན་འབྱུང་བ་དང་ནུབ་པ་དག་བཤད་པ་ལྟར་ཚོར་བ་ལ་སོགས་པ་ལ་ཡང་དེ་
[165b.6]བཞིན་དུ་བརྗོད་པར་བྱའོ། །ཇི་ལྟར་ཞེ་ན། རེག་པ་ཀུན་འབྱུང་བས་ནི་ཚོར་བ་ཀུན་འབྱུང་བ་ཡིན་ལ། རེག་པ་འགགས་པས་ནི་ཚོར་བ་ནུབ་པ་ཡིན་ནོ། །མིང་དང་གཟུགས་ཀུན་འབྱུང་བས་ནི་སེམས་ཀུན་འབྱུང་བ་ཡིན་ལ་མིང་དང་གཟུགས་འགགས་པས་ནི་སེམས་ནུབ་པ་ཡིན་ནོ། །ཡིད་ལ་བྱེད་པ་ཀུན་འབྱུང་བས་ནི་ཆོས་རྣམས་
[165b.7]ཀུན་འབྱུང་བ་ཡིན་ལ། ཡིད་ལ་བྱེད་པ་འགགས་པས་ནི་ཆོས་རྣམས་ནུབ་པ་ཡིན་ནོ་ཞེས་བྱ་བའོ། །མདོ་དེ་ལས་ནི་དམིགས་པ་ལུས་དང་ཚོར་བ་དང་སེམས་དང་། ཆོས་རྣམས་ཁོ་ན་དྲན་པ་ཉེ་བར་གཞག་པར་གསུངས་པ་ཡིན་ཏེ། ལུས་ལ་སོགས་པ་འདི་ལ་དྲན་པ་ཉེ་བར་གནས་པའི་ཕྱིར་རོ། །དེ་ལྟར་
[166a]
[166a.1]ན་བཞིར་བསྒྲུབ་པར་བསྟན་པ་ཡིན་ཏེ། འདི་ལ་དྲན་པ་ཉེ་བར་འཇོག་པས་ན་དྲན་པ་ཉེ་བར་གཞག་པའོ་ལུས་ཉིད་དྲན་པ་ཉེ་བར་གཞག་པ་ཡིན་པ་ནས་ཆོས་རྣམས་ཉིད་དྲན་པ་ཉེ་བར་གཞག་པའི་བར་ཡིན་པས་ན་ཆོས་དྲན་པ་ཉེ་བར་གཞག་པའོ་ཞེས་བྱ་བར་ཚིག་རྣམ་པར་སྦྱར་རོ། །
[166a.2]གལ་ཏེ་དེ་ལས་དམིགས་པའི་དྲན་པ་ཉེ་བར་གཞག་པ་ཡིན་པར་བཞེད་པར་མ་གྱུར་ན་ནི་བཅོམ་ལྡན་འདས་ཀྱིས་འདི་སྐད་དུ། དགེ་སློང་དག་ཇི་ལྟར་དྲན་པ་ཉེ་བར་གཞག་པ་རྣམས་ཀུན་དུ་འབྱུང་བ་དང་ནུབ་པ་ཡིན་ཞེ་ན། ཟས་ཀུན་འབྱུང་བས་ནི་ལུས་ཀུན་འབྱུང་བ་ཡིན་ལ་ཟས་འགགས་ན་ནི་ལུས་ནུབ་
[166a.3]པ་ཡིན་ནོ་ཞེས་རྒྱས་པར་གསུངས་པར་ཡང་མི་འགྱུར་ཏེ། ལུས་ལ་སོགས་པ་དྲན་པ་ཉེ་བར་གཞག་པ་ཉིད་ཡིན་ན་ནི་དེ་སྐད་དུ་བརྗོད་པར་རུང་བར་འགྱུར་རོ། །དེ་ལྟ་བས་ན་ལུས་ལ་སོགས་པ་ནི་དམིགས་པའི་དྲན་པ་ཉེ་བར་གཞག་པ་ཡིན་ནོ་ཞེས་བྱ་བར་གྲུབ་པོ། །འདི་དག་གི་མིང་ནི་དམིགས་པ་ཇི་ལྟ་བ་
[166a.4]བཞིན་ནོ་ཞེས་བྱ་བ་ནི་ལུས་དྲན་པ་ཉེ་བར་གཞག་པ་ལ་སོགས་པའི་མིང་ནི་དམིགས་པ་ལ་ལྟོས་ནས་ལུས་དྲན་པ་ཉེ་བར་གཞག་པ་ནས་ཆོས་དྲན་པ་ཉེ་བར་གཞག་པ་ཞེས་བྱ་བའི་བར་དུ་རྣམ་པར་གཞག་གོ། །།བམ་པོ་བཞི་བཅུ་རྩ་དྲུག་པ། རང་དང་གཞན་དང་གཉི་གའི་རྒྱུད་ལ་
[166a.5]དམིགས་པའི་ཕྱིར་ཞེས་བྱ་བ་ནི་ལུས་དྲན་པ་ཉེ་བར་གཞག་པ་ལ་སོགས་པ་འདི་དག་རང་གི་རྒྱུད་ལ་དམིགས་པའི་ཕྱིར་དང་། གཞན་གྱི་རྒྱུད་ལ་དམིགས་པའི་ཕྱིར་དང་། གཉི་གའི་རྒྱུད་ལ་དམིགས་པའི་ཕྱིར་སོ་སོ་རེ་རེ་ཞིང་རྣམ་པ་གསུམ་གསུམ་ཡིན་ནོ་ཞེས་བྱ་བ་ནི། མདོ་ལས་བྱུང་བའི་
[166a.6]ཕྱིར་ཏེ་ཇི་སྐད་དུ་ཞེ་ན། བརྟུན་པ་དང་ཤེས་བཞིན་དང་དྲན་པ་དང་ལྡན་པར་གྱུར་ན་འཇིག་རྟེན་ལ་བརྣབ་སེམས་དང་ཡིད་མི་བདེ་བ་རྣམ་པར་སྤངས་ཏེ། ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ་ཞེས་བྱ་བ་དང་། ཕྱིའི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ་ཞེས་བྱ་བ་སྔ་མ་བཞིན་ནོ། །
[166a.7]ནང་དང་ཕྱིའི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ་ཞེས་བྱ་བ་སྔ་མ་བཞིན་ཏེ། དེ་ལྟར་ན་རེ་ཞིག་ལུས་དྲན་པ་ཉེ་བར་གཞག་པ་རྣམ་པ་གསུམ་ཡིན་ནོ། །ཚོར་བ་དྲན་པ་ཉེ་བར་གཞག་པ་ལ་སོགས་པ་ལ་ཡང་ནང་གི་ཚོར་བ་ལ་ཚོར་བའི་རྗེས་སུ་ལྟ་ཞིང་གནས་སོ་ཞེས་བྱ་བ་རྒྱས་པར་རྣམ་པ་
[166b]
[166b.1]གསུམ་གསུམ་སྦྱར་བར་བྱའོ། །སྔར་རགས་པ་མཐོང་བའི་ཕྱིར་རོ་ཞེས་བྱ་བ་ནི་ལུས་ནི་རྣམ་པར་ཤེས་པ་དྲུག་གིས་རྣམ་པར་ཤེས་པར་བྱ་བ་ཡིན་པའི་ཕྱིར་གསུམ་པས་དེ་སྔར་མཐོང་ངོ་། །ཚོར་བ་ནི་གཉིས་པས་རྒྱུ་བ་རགས་པའི་ཕྱིར་དེའི་འོག་ཏུ་དེ་མཐོང་ངོ་། །ཆོས་རྣམས་ནི་རྒྱུ་བ་ཕྲ་བའི་ཕྱིར་
[166b.2]རྣམ་པར་ཤེས་པར་དཀའ་བས་ཕྲ་བ་ཡིན་ཏེ། དེའི་ཕྱིར་དེའི་རྣམ་པས་ནི་སེམས་སྔར་མཐོང་ལ་ཐ་མར་ནི་ཆོས་རྣམས་མཐོང་ངོ་། །དེ་ཡང་ཞེས་བྱ་བ་ནི་འདོད་པ་ལ་འདོད་ཆགས་པའོ། །དེ་ཡང་སེམས་ཞེས་བྱ་བ་ནི་ཚོར་བ་མངོན་པར་འདོད་པ་དེའོ། །དེ་ཡང་ཉོན་མོངས་པ་མ་སྤངས་པའི་ཕྱིར་ཞེས་བྱ་བ་
[166b.3]ནི་མ་ཞི་བ་དེ་ཡང་ངོ་། །གོ་རིམས་བཞིན་དུ་བསྟན་ཏེ་ཞེས་བྱ་བ་ནི་ལུས་དྲན་པ་ཉེ་བར་གཞག་པ་ནི་གཙང་བར་ཕྱིན་ཅི་ལོག་པའི་གཉེན་པོར་བསྟན་ཏོ། །ཚོར་བ་དྲན་པ་ཉེ་བར་གཞག་པ་ནི་བདེ་བར་ཕྱིན་ཅི་ལོག་པའི་གཉེན་པོར་ཏེ། གང་ཅི་ཚོར་ཡང་དེ་ནི་འདིར་སྡུག་བསྔལ་བའོ་ཞེས་འབྱུང་བས་སོ། །སེམས་
[166b.4]དྲན་པ་ཉེ་བར་གཞག་པ་ནི་རྟག་པར་ཕྱིན་ཅི་ལོག་པའི་གཉེན་པོར་ཏེ། སེམས་ནི་མྱུར་དུ་འགྱུར་བའི་ཕྱིར་རོ། །ཆོས་དྲན་པ་ཉེ་བར་གཞག་པ་ནི་བདག་ཏུ་ཕྱིན་ཅི་ལོག་པའི་གཉེན་པོར་བསྟན་ཏོ། །ཆོས་རྣམས་ནི་རིལ་པོ་རྣམ་པར་དབྱེ་བའི་སྒོ་ནས་རང་དབང་མེད་པའི་ཕྱིར་ཏེ། ཆོས་རྣམས་ཞེས་བྱའི་
[166b.5]ཚིག་ནི་ཁམས་ཙམ་དུ་ཟད་དེ། བདག་དང་བྲལ་བའོ་ཞེས་བྱ་བ་ཡིན་པས་སོ། །ཡང་ན་དེ་ནི་ཆོས་འདི་དག་ནི་སོ་སོ་ལོགས་ཤིག་ན་གནས་པ་ཡིན་གྱི་འདི་ལ་བདག་ནི་འགའ་ཡང་མེད་དོ་ཞེས་བསྟན་པའི་ཕྱིར་རོ། །བཞི་པ་ནི་གཉི་ག་ཡིན་ཞེས་བྱ་བ་ནི་ཆོས་དྲན་པ་ཉེ་བར་གཞག་པ་ནི་ལུས་དང་ཚོར་བ་
[166b.6]དང་སེམས་ལ་མ་གཏོགས་པའི་ཆོས་ལ་དམིགས་པ་ཉིད་སྲིད་པས་མ་འདྲེས་ཤིང་འདྲེས་པ་མ་ཡིན་པ་ལ་དམིགས་པ་ཡང་སྲིད་ལ་འདྲེས་པ་ལ་དམིགས་པ་ཡང་སྲིད་དོ། །ལུས་ལ་སོགས་པ་གཉིས་སམ་གསུམ་མམ་བཞི་པོ་སྤྱི་ལ་ལྟ་ན་ཞེས་བྱ་བ་ནི་གལ་ཏེ་འདྲེས་པ་ལ་དམིགས་པ་དེ་ལུས་དང་ཚོར་
[166b.7]བ་གཉིས་ལ་ལྟ་ན་ཡང་ཆོས་དྲན་པ་ཉེ་བར་གཞག་པ་ཡིན་ལ། ཅི་སྟེ་ལུས་ནས་སེམས་ཀྱི་བར་ལ་ལྟ་ན་དེ་ཡང་ཁོ་ན་དང་འདྲའོ། །འོན་ཏེ་ལུས་དང་ཚོར་བ་དང་སེམས་པར་ཆོས་རྣམས་སྤྱི་ལ་ལྟ་ན་དེ་ཡང་ཆོས་དྲན་པ་ཉེ་བར་གཞག་པ་ཞེས་བྱའོ། །སྤྱི་ལ་དམིགས་པ་ལ་གནས་ཏེ་ཞེས་བྱ་བ་ནི་ལུས་
[167a]
[167a.1]དང་ཚོར་བ་དང་སེམས་དང་ཆོས་རྣམས་སྤྱིར་བསྡུས་ཏེའོ། །དྲོ་བར་གྱུར་པ་ཞེས་བྱ་བ་ནི་དྲོ་བའི་རྣམ་པའི་དགེ་བའི་རྩ་བའོ། །སྔ་ལྟས་ཡིན་པའི་ཕྱིར་རོ་ཞེས་བྱ་བ་ནི་དང་པོའི་མཚན་མ་ཡིན་པའི་ཕྱིར་རམ་དང་པོའི་ངོ་བོ་ཉིད་ཡིན་པའི་ཕྱིར་རོ། །རྒྱུན་ཆགས་པ་ཡིན་པའི་ཕྱིར་རོ་ཞེས་བྱ་བ་ནི་རྒྱུན་
[167a.2]འབྲེལ་པ་ཡིན་པའི་ཕྱིར་ཞེས་བྱ་བའི་ཐ་ཚིག་གོ། །འདི་དག་གི་བྱེ་བྲག་ནི་འོག་ནས་བཤད་པར་བྱའོ་ཞེས་བྱ་བ་ནི་མཛོད་ཀྱི་གནས་བདུན་པ་ནས། རྫས་སུ་རྣམ་པ་བཅུ་དྲུག་གོ་ཞེས་བྱ་བ་འདི་ནས་སོ། །གལ་ཏེ་དེ་ཡང་དེ་དང་འདྲ་ན་གོ་འོ་ན་ཅིའི་ཕྱིར་བསྟན་ཞེ་ན་དེའི་ཕྱིར་ཆེས་མཆོག་ཏུ་གྱུར་པའི་ཕྱིར་མིང་
[167a.3]གཞན་དུ་བཏགས་སོ་ཞེས་བྱ་བ་སྨོས་སོ། །ཡང་ཅིའི་ཕྱིར་རྩེ་མོ་ཞེས་བྱ་ཞེ་ན། དགེ་བའི་རྩ་བ་གཡོ་བའི་རྩེ་མོ་ཡིན་པའི་ཕྱིར་ཞེས་བྱ་བ་སྨོས་སོ། །རྩེ་མོ་ཞེས་བྱ་བའི་སྒྲ་འདི་ནི་རབ་ཀྱི་མཐའ་སྟོན་པ་ཡིན་ཏེ། འདི་ལྟར་འཇིག་རྟེན་ན་ཡང་འདི་དཔལ་གྱི་རྩེ་མོར་ཕྱིན་ཏོ་ཞེས་ཟེར་རོ། །དྲོ་བར་གྱུར་པ་དང་རྩེ་
[167a.4]མོའི་མཚན་ཉིད་ཀྱི་དགེ་བའི་རྩ་བ་གཉིས་ནི་གཡོ་བ་ཡིན་ཏེ། ཡོངས་སུ་ཉམས་པ་སྲིད་པའི་ཕྱིར་རོ། །བཟོད་པ་དང་འཇིག་རྟེན་པའི་ཆོས་ཀྱི་མཆོག་གི་མཚན་ཉིད་གཉིས་ནི་མི་གཡོ་བ་སྟེ། བཟློག་པ་ཡིན་པའི་ཕྱིར་རོ། །དེ་ལ་གཡོ་བ་དག་ལས་ཆུང་ངུ་གང་ཡིན་པ་དེ་ནི་དྲོ་བར་གྱུར་པ་ཡིན་ནོ། །
[167a.5]ཆེན་པོ་གང་ཡིན་པ་དེ་དག་ནི་རྩེ་མོ་ཡིན་ནོ། །མི་གཡོ་བ་དག་ལས་ཀྱང་ཆུང་ངུ་གང་ཡིན་པ་དེ་ནི་བཟོད་པ་ཡིན་ནོ། །ཆེན་པོ་གང་ཡིན་པ་དེ་དག་ནི་འཇིག་རྟེན་པའི་ཆོས་ཀྱི་མཆོག་ཡིན་ནོ། །དེ་དག་ལས་ལྟུང་བའམ་འདའ་བར་འགྱུར་བའི་ཕྱིར་རོ་ཞེས་བྱ་བ་ལ་རྩེ་མོ་དག་ལས་ལྟུང་བ་ནི་ཡོངས་སུ་ཉམས་
[167a.6]པའོ། །འདའ་བ་ནི་བཟོད་པ་མངོན་དུ་འགྱུར་བ་སྟེ། རྩེ་མོ་དག་ནི་གཡོ་བ་ཡིན་པའི་ཕྱིར་རོ། །འཇིག་རྟེན་ན་ཡང་ཤིང་གི་རྩེ་མོ་ནས་ལྟུང་བའམ་འདའ་བ་སྟེ། གོང་དུ་ཕྱིན་པར་འགྱུར་བ་མཐོང་བས་རྩེ་མོ་དང་ཆོས་མཐུན་ནོ། །དང་པོ་ཉིད་དུ་བདེན་པ་རྣམས་ལ་རྣམ་པ་དག་འགོད་པའོ་ཞེས་བྱ་བ་
[167a.7]ནི་ཐོག་མར་བདེན་པ་རྣམས་ལ་མི་རྟག་པ་ལ་སོགས་པའི་རྣམ་པ་དག་གཏོད་པར་བྱེད་པ་སྟེ། དེ་དག་ལ་དམིགས་པ་རྣམས་འཇུག་པར་བྱེད་པའོ་ཞེས་བྱ་བའི་ཐ་ཚིག་གོ། །གཞན་དག་གིས་ཀྱང་ཞེས་བྱ་བ་ནི་ཆོས་དྲན་པ་ཉེ་བར་གཞག་པ་མ་ཡིན་པ་དག་གིས་ཀྱང་ཞེས་བྱ་བའི་ཐ་ཚིག་གོ། །
[167b]
[167b.1]འཕེལ་བར་བྱེད་པ་ནི་གོམས་པར་བྱང་བར་བྱེད་པའོ། །རྣམ་པར་འཕེལ་བར་བྱེད་པ་ན་ཞེས་བྱ་བ་རྒྱས་པར་འབྱུང་བ་ནི་རྣམ་པར་འཕེལ་བར་བྱེད་པའི་རྣལ་འབྱོར་པ་ནི་འཕེལ་བས་ཁྱད་པར་ཅན་དུ་གྱུར་པ་རྣམས་མངོན་སུམ་དུ་བྱེད་དོ། །སྔོན་ཐོབ་པ་རྣམས་ཞེས་བྱ་བ་ནི་ཁྱད་པར་ཅན་མ་ཡིན་པ་དག་ནི་
[167b.2]མངོན་སུམ་དུ་མི་བྱེད་དོ། །ཅིའི་ཕྱིར་ཞེ་ན། དགའ་བ་ཆེན་པོ་མེད་པའི་ཕྱིར་ཏེ། དམན་པ་ཉིད་ཀྱིས་དགའ་བ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །བདེན་པ་ལ་ཆེར་བཟོད་པའི་ཕྱིར་རོ་ཞེས་བྱ་བ་ནི་དྲོ་བར་གྱུར་པའི་གནས་སྐབས་ན་ནི་བདེན་པ་ལ་ཆུང་ངུ་བཟོད་ཅིང་འདོད་དོ། །རྩེ་མོའི་གནས་སྐབས་
[167b.3]ན་ནི་འབྲིང་དུའོ། །དེའི་རྗེས་ལ་ནི་བདེན་པ་ལ་ཆེར་བཟོད་པའི་ཕྱིར་བཟོད་པ་སྐྱེའོ། །ཇི་ལྟར་ཤེས་ཤེ་ན། དེའི་ཕྱིར་ཡོངས་སུ་མི་ཉམས་པའི་སྒོ་ནས་ཞེས་བྱ་བ་སྨོས་ཏེ། འདི་ལྟར་བཟོད་པ་ལས་ཡོངས་སུ་ཉམས་པར་མི་འགྱུར་གྱི། རྩེ་མོ་དག་ལས་ནི་ཡོངས་སུ་ཉམས་པ་ཞེས་བྱ་བ་སྲིད་པ་ཡོད་དོ། །
[167b.4]རྣམ་པ་གཉིས་དེ་བཞིན་ཞེས་བྱ་བ་ནི་རྩེ་མོ་རྣམས་ཇི་སྐད་བཤད་པ་ལྟར་བཟོད་པ་ཆུང་ངུ་དང་འབྲིང་དག་ཀྱང་དེ་དང་འདྲའོ། །དེ་ཁོ་ན་བཞིན་དུ་རྣམ་པ་གཏོད་པའི་ཕྱིར་རོ་ཞེས་བྱ་བ་ནི་ཆོས་དྲན་པ་ཉེ་བར་གཞག་པའི་བདེན་པ་རྣམས་ལ་རྣམ་པ་དག་གཏོད་པའི་ཕྱིར་རོ་ཞེས་བྱ་བའི་དོན་ཏོ། །བཟོད་པ་ནི་
[167b.5]ཐམས་ཅད་ཅེས་བྱ་བ་ནི་བཟོད་པ་ནི་ཆུང་ངུ་དང་འབྲིང་དང་། ཆེན་པོའི་བྱེ་བྲག་གིས་ཐ་དད་པ་ཐམས་ཅད་ཆོས་དྲན་པ་ཉེ་བར་གཞག་པ་ཁོ་ནས་འཕེལ་བར་བྱེད་ཀྱི་ལུས་དྲན་པ་ཉེ་བར་གཞག་པ་ལ་སོགས་པ་གཞན་གྱིས་ནི་མ་ཡིན་ནོ། །ཅིའི་ཕྱིར་ཞེ་ན། ཆོས་ཀྱི་མཆོག་དང་ཉེ་བའི་ཕྱིར་ཏེ། ཆོས་ཀྱི་མཆོག་ནི་མཐོང་
[167b.6]བའི་ལམ་དང་ཉེ་བས་ཆོས་དྲན་པ་ཉེ་བར་གཞག་པའི་བདག་ཉིད་ཁོ་ན་ཡིན་ནོ། །ཆོས་ཀྱི་མཆོག་དང་ཉེ་བའི་ཕྱིར། །ཞེས་བྱ་བ་ནི་བཟོད་པ་ནི་རྩེ་མོའི་མཇུག་ཐོགས་སུ་སྐྱེ་བའི་ཕྱིར་ཆོས་ཀྱི་མཆོག་འདོད་པ་ན་སྤྱོད་པའི་སྡུག་བསྔལ་གྱི་བདེན་པ་ལ་དམིགས་པ་རྣམས་དང་ཉེ་བས་འདོད་པ་ན་སྤྱོད་པའི་སྡུག་བསྔལ་
[167b.7]གྱི་བདེན་པ་ལ་དམིགས་པ་ཉིད་ཡིན་ཏེ། ཆོས་ཀྱི་མཆོག་དང་ཉེ་བའི་ཕྱིར་དེ་དང་འདྲའོ། །ངེས་པ་མ་སྨོས་པའི་ཕྱིར་ཞེས་བྱ་བ་ནི་དྲོ་བར་གྱུར་པ་ལ་སོགས་པའི་དམིགས་པ་ནི་བཟོད་པ་ཆེན་པོ་བཞིན་དུ་སོ་སོར་ངེས་པ་མ་སྨོས་པའི་ཕྱིར་བཟོད་པ་ཆེན་པོ་བཞིན་ངེས་པར་གཟུང་བ་ཁོ་ནས་དྲོ་བར་གྱུར་པ་ལ་སོགས་
[168a]
[168a.1]པ་དེ་དག་ནི་ཁམས་གསུམ་པའི་སྡུག་བསྔལ་ལ་སོགས་པ་ལ་དམིགས་པ་ཉིད་དུ་གྲུབ་པོ། །ཇི་ལྟ་ཞེ་ན། འདི་ལ་ཡུལ་འདོད་པར་གཏོགས་པ་ཁོ་ནའི་སྡུག་བསྔལ་ཡོད་པས་དེ་ནི་འདོད་པར་གཏོགས་པའི་སྡུག་བསྔལ་གྱི་ཡུལ་ཅན་ཡིན་ཏེ། བཟོད་པ་ཆེན་པོ་ཡིན་ནོ། །བཟོད་
[168a.2]པ་ཆེན་པོ་ཁོ་ནའོ་ཞེས་ངེས་པར་གཟུང་བའི་ཕྱིར་དྲོ་བར་གྱུར་པ་ལ་སོགས་པ་གཞན་ནི་ཁམས་གསུམ་པའི་སྡུག་བསྔལ་གྱི་བདེན་པ་ལ་དམིགས་པ་ཡིན་ནོ་ཞེས་བྱ་བར་གྲུབ་པོ། །གང་གི་ཚེ་ཞེས་བྱ་བ་རྒྱས་པར་འབྱུང་བ་ནི་གང་གི་ཚེ་གཟུགས་དང་གཟུགས་མེད་པའི་གཉེན་པོ་ལ་སོགས་པ་ཞེས་བྱ་བ་ལ་
[168a.3]སོགས་པ་ཞེས་བྱ་བའི་སྒྲས་ནི་གཟུགས་དང་གཟུགས་མེད་པའི་འགོག་པ་དང་། ཀུན་འབྱུང་བ་དང་། སྡུག་བསྔལ་རྣམས་དང་འདོད་པ་ན་སྤྱོད་པའི་གཉེན་པོ་ལ་སོགས་པ་བསྡུའོ། །བདེན་པའི་རྣམ་པ་དམིགས་པ་རེ་རེ་ནས་ཕྲི་ནས་ཞེས་བྱ་བ་ནི་བདེན་པའི་རྣམ་པ་རེ་རེ་དང་བདེན་པའི་དམིགས་
[168a.4]པ་རེ་རེ་ནས་ཕྲི་ནས་གཟུགས་དང་གཟུགས་མེད་པའི་རྣམ་པ་འབྲི་བ་ནས་བཟུང་སྟེ། འདོད་པ་ན་སྤྱོད་པའི་སྡུག་བསྔལ་ཁོ་ན་ལ་སྐད་ཅིག་མ་གཉིས་སུ་ཡིད་ལ་བྱེད་པའི་བར་དེ་ཐམས་ཅད་ནི་བཟོད་པ་འབྲིང་ཡིན་ནོ། །ཇི་ལྟ་ཞེ་ན། རེ་ཞིག་རྗེས་སུ་ཤེས་པའི་ཕྱོགས་དང་མཐུན་པའི་ལམ་ལ་ལམ་དང་།
[168a.5]རིགས་པ་དང་། སྒྲུབ་པ་དང་། ངེས་པར་འབྱིན་པ་སྟེ། རྣམ་པ་བཞི་པོ་འདི་དག་གིས་རྣམ་པ་གཏོད་པར་བྱེད་དོ། །དེའི་འོག་ཏུ་གཅིག་བོར་ནས་གསུམ་གྱིས་སོ། །དེའི་འོག་ཏུ་གཉིས་བོར་ནས་གཉིས་ཀྱིས་སོ། །དེའི་འོག་ཏུ་གཅིག་གིས་སོ། །དེ་ནས་ལམ་བོར་ནས་གཟུགས་དང་གཟུགས་
[168a.6]མེད་པའི་འགོག་པ་ལ་རང་གི་རྣམ་པ་བཞིས་རྣམ་པ་གཏོད་པར་བྱེད་དེ། དེའི་འོག་ཏུ་གསུམ་དང་གཉིས་དང་གཅིག་ཁོ་ནས་རྣམ་པ་གཏད་ནས་འགོག་པའི་བདེན་པ་དེ་ཡང་བོར་ཏེ་ཀུན་འབྱུང་བའི་བདེན་པ་ལ་རང་གི་རྣམ་པ་བཞི་དང་གསུམ་དང་གཉིས་དང་གཅིག་གིས་རྣམ་པ་གཏད་ནས་དེ་ཁོ་ན་བཞིན་
[168a.7]དུ་དེ་ཡང་བོར་ཏེ་སྡུག་བསྔལ་གྱི་བདེན་པ་ལ་རང་གི་རྣམ་པ་བཞི་ནས་གཅིག་གི་བར་གྱིས་རྣམ་པ་གཏད་ནས་བདེན་པ་དེ་ཡང་བོར་ཏེ། འདོད་པ་ན་སྤྱོད་པའི་གཉེན་པོ་ལ་རང་གི་རྣམ་པ་བཞི་དང་གསུམ་དང་གཉིས་དང་གཅིག་གིས་རྣམ་པ་གཏོད་པར་བྱེད་དོ། །དེ་ཡང་བོར་ཏེ་འདོད་པ་ན་སྤྱོད་པའི་
[168b]
[168b.1]འགོག་པ་དང་། ཀུན་འབྱུང་བའི་བདེན་པ་དག་ལ་དེ་ཁོ་ན་བཞིན་དུ་རང་གི་རྣམ་པ་འབྲི་བའི་རིམ་པས་རྣམ་པ་གཏོད་པ་དང་དོར་བར་བྱས་ནས་འདོད་པ་ན་སྤྱོད་པའི་སྡུག་བསྔལ་གྱི་བདེན་པ་ལ་རྣམ་པ་བཞིས་རྣམ་པར་གཏོད་པར་བྱེད་དོ། །དེའི་འོག་ཏུ་གསུམ་གྱིས་སོ། །དེའི་འོག་ཏུ་གཉིས་ཀྱིས་
[168b.2]རྣམ་པ་གཏོད་པར་བྱེད་དོ། དེ་ལྟར་ན་དང་པོ་འབྲི་བ་ནས་བཟུང་སྟེ། སྐད་ཅིག་མ་དེ་ཐམས་ཅད་བཟོད་པ་འབྲིང་ཡིན་ནོ་ཞེས་བཤད་པ་ཡིན་ནོ། །དེ་ལ་དམིགས་པ་ཉིད་སྐད་ཅིག་མ་གསུམ་པ་ལ་ནི་བཟོད་པ་ཆེན་པོ་ཡིན་ནོ། །དེ་ལ་དམིགས་པ་ཉིད་བཞི་པ་ལ་ནི་ཆོས་ཀྱི་མཆོག་ཡིན་ནོ། །བཟོད་པ་
[168b.3]ཆུང་ངུ་ནི་གང་སྔར་རྩེ་མོ་དག་གི་མཇུག་ཐོགས་སུ་འདོད་པ་ན་སྤྱོད་པའི་སྡུག་བསྔལ་གྱི་བདེན་པ་ནས་ལམ་གྱི་བདེན་པའི་བར་དང་། གཟུགས་དང་གཟུགས་མེད་པ་ན་སྤྱོད་པ་ལ་རང་རང་གི་རྣམ་པ་ཐམས་ཅད་ཀྱིས་མི་དབྲི་བར་ཡིད་ལ་བྱེད་པ་ཡིན་པར་ཁོང་དུ་ཆུད་པར་བྱའོ། །དེ་ལྟར་རེ་ཞིག་ཁ་ཅིག་ནི་
[168b.4]དམིགས་པ་དབྲི་བ་རྣམ་པ་དབྲི་བ་སྔོན་དུ་འགྲོ་བ་ཅན་ཡིན་ནོ་ཞེས་ཟེར་རོ། །གཞན་དག་ན་རེ་དམིགས་པ་རྣམ་པ་རེ་རེ་ནས་ཕྲི་ནས་ཞེས་བྱ་བ་ནི་དེ་ལྟར་བདེན་པའི་རྣམ་པ་རེ་རེ་ནས་ཕྲི་བ་དང་དམིགས་པ་རེ་རེ་ནས་ཕྲི་ནས་ཞེས་བྱ་བ་ནི་གཟུང་བར་མི་བྱའོ། །འོ་ན་ཅི་ཞེ་ན། གཟུགས་དང་གཟུགས་མེད་པའི་
[168b.5]གཉེན་པོ་ལ་སོགས་པ་བདེན་པ་རེ་རེའི་རྣམ་པ་གང་དག་ཡིན་པ་དེ་དག་དམིགས་པ་ཕྲི་ནས་ཞེས་བྱ་བར་བཤད་པར་བྱའོ། །བཟོད་པ་འབྲིང་ནི་སྐད་ཅིག་མ་བརྒྱ་རྩ་བཅུ་དགུ་ཡིན་པར་བརྗོད་ན་དམིགས་པ་འབྲི་བ་རྣམ་པ་འབྲི་བ་སྔོན་དུ་འགྲོ་བ་ཅན་ཡིན་ན་ནི་སེམས་ཀྱི་སྐད་ཅིག་མ་མང་པོར་འཕྲོ་བར་འགྱུར་རོ། །
[168b.6]དེ་ཡང་རིགས་པ་མ་ཡིན་ཏེ། བདེན་པ་དག་ཡོད་བཞིན་དུ་རྣམ་པ་འདོར་བར་ནི་རུང་བ་མ་ཡིན་ནོ། །གང་གི་ཚེ་བདེན་པ་དག་བོར་བར་གྱུར་པ་དེའི་ཚེ་ནི་རྣམ་པ་འདོར་རོ་ཞེས་བྱ་བར་རིགས་སོ། །དེ་ལྟ་ཡིན་ན་སྔར་ནི་བདེན་པའི་དམིགས་པ་འབྲི་བར་བྱེད་ལ་ཕྱིས་ནི་རྣམ་པ་འབྲི་བར་བྱེད་དེ། ཡུལ་གྱི་གཞི་ནི་
[168b.7]བོར་ན་དེ་ལ་དམིགས་པ་འདོར་བར་རིགས་སོ། །སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་དག་ནི་མཉམ་པར་བཞག་པ་དང་མཉམ་པར་མ་བཞག་པ་སྟེ། བརྒྱད་དུ་རྣམ་པར་གཞག་ལ། དེ་དག་གི་རྣམ་པ་སུམ་ཅུ་རྩ་གཉིས་ཡིན་ནོ་ཞེས་ཟེར་རོ། །ད་ནི་རིགས་པ་གཞན་འདི་ཉེ་བར་བསྟན་
[169a]
[169a.1]པར་བྱ་སྟེ། ཇི་ལྟར་བྱས་པས་ཤེ་ན། གང་གི་ཚེ་འདོད་པ་ན་སྤྱོད་པའི་སྡུག་བསྔལ་ལ་རྣམ་པ་བཞིས་ཡིད་ལ་བྱེད་པ་ནས་དེ་བཞིན་དུ་གཟུགས་དང་གཟུགས་མེད་པ་ན་སྤྱོད་པ་རྣམས་ཀྱི་གཉེན་པོ་ལ་རྣམ་པ་བཞིས་ཡིད་ལ་བྱེད་པའི་བར་འདི་ནི་བཟོད་པ་ཆུང་ངུ་ཡིན་ནོ། །གང་གི་ཚེ་གཟུགས་
[169a.2]དང་གཟུགས་མེད་པ་ན་སྤྱོད་པ་རྣམས་ཀྱི་གཉེན་པོ་བོར་ཏེ། འདོད་པ་ན་སྤྱོད་པའི་སྡུག་བསྔལ་ལ་རྣམ་པ་བཞིས་ཡིད་ལ་བྱེད་པ་ནས་དེ་བཞིན་དུ་འདོད་པ་ན་སྤྱོད་པའི་འདུ་བྱེད་རྣམས་ཀྱི་གཉེན་པོའི་བར་ལ་རྣམ་པ་བཞིས་ཡིད་ལ་བྱེད་པ་དེ་ནས་བཟུང་སྟེ། བཟོད་པ་འབྲིང་བརྩམས་པ་ཡིན་ནོ། །དེ་ལ་
[169a.3]གཟུགས་དང་གཟུགས་མེད་པ་ན་སྤྱོད་པའི་གཉེན་པོ་བོར་ནས་སེམས་ཀྱི་སྐད་ཅིག་མ་ཉི་ཤུ་རྩ་བརྒྱད་ཡིན་ནོ། །འདོད་པ་ན་སྤྱོད་པའི་འདུ་བྱེད་ཀྱི་གཉེན་པོ་བོར་ན་ཉི་ཤུ་རྩ་བཞིའོ། །གཟུགས་དང་གཟུགས་མེད་པ་ན་སྤྱོད་པའི་འདུ་བྱེད་ཀྱི་འགོག་པ་བོར་ན་ཉི་ཤུའོ། །འདོད་པ་ན་སྤྱོད་པའི་འགོག་
[169a.4]པ་བོར་ན་བཅུ་དྲུག་གོ། །གཟུགས་དང་གཟུགས་མེད་པ་ན་སྤྱོད་པའི་ཀུན་འབྱུང་བ་བོར་ན་བཅུ་གཉིས་སོ། །འདོད་པ་ན་སྤྱོད་པའི་ཀུན་འབྱུང་བ་བོར་ན་བརྒྱད་དོ། །གཟུགས་དང་གཟུགས་མེད་པ་ན་སྤྱོད་པའི་སྡུག་བསྔལ་བོར་ན་བཞི་སྟེ། འདོད་པ་ན་སྤྱོད་པའི་སྡུག་བསྔལ་རྣམ་པ་བཞིས་ཡིད་ལ་
[169a.5]བྱེད་པས་དེ་དག་ནི་འདིའི་རྣམ་པ་བཞི་ཡིན་ནོ། །རྣལ་འབྱོར་སྤྱོད་པ་དེ་ཡང་རྣམ་པ་གཉིས་ཏེ། ལྟ་བ་སྤྱད་པ་དང་། སྲེད་པ་སྤྱད་པའོ། །ལྟ་བ་སྤྱད་པ་ཡང་རྣམ་པ་གཉིས་ཏེ། བདག་ཏུ་ལྟ་བ་སྤྱད་པ་དང་། བདག་གིར་ལྟ་བ་སྤྱད་པའོ། །དེ་ལ་བདག་ཏུ་ལྟ་བ་སྤྱད་པ་གང་ཡིན་པ་དེ་ནི་བདག་མེད་པའི་རྣམ་
[169a.6]པས་ངེས་པ་ལ་འཇུག་གོ། །བདག་གིར་ལྟ་བ་སྤྱད་པ་གང་ཡིན་པ་དེ་ནི་སྟོང་པའི་རྣམ་པས་སོ། །སྲེད་པ་སྤྱད་པ་ཡང་རྣམ་པ་གཉིས་ཏེ་ངའོ་སྙམ་པའི་ང་རྒྱལ་གྱིས་ཉམས་པ་དང་། ལེ་ལོ་ལྷག་པ་ཅན་ནོ། །དེ་ལ་ངའོ་སྙམ་པའི་ང་རྒྱལ་གྱིས་ཉམས་པ་གང་ཡིན་པ་དེ་ནི་མི་རྟག་པའི་རྣམ་པས་ངེས་པ་ལ་འཇུག་
[169a.7]གོ། །ལེ་ལོ་ལྷག་པ་ཅན་གང་ཡིན་པ་དེ་ནི་སྡུག་བསྔལ་གྱི་རྣམ་པས་སོ། །དེ་ལ་རྣལ་འབྱོར་སྤྱོད་པ་བདག་ཏུ་ལྟ་བ་སྤྱད་པ་ནི་འདོད་པ་ན་སྤྱོད་པའི་སྡུག་བསྔལ་ལ་རྣམ་པ་གཅིག་བོར་ནས་རྣམ་པ་གསུམ་གྱིས་ཡིད་ལ་བྱེད་དོ། །དེའི་འོག་ཏུ་སྟོང་པ་དང་བདག་མེད་པའི་རྣམ་པ་གཉིས་ཀྱིས་སོ། །དེའི་འོག་ཏུ་
[169b]
[169b.1]སྡུག་བསྔལ་ལ་ཆོས་ཤེས་པའི་བཟོད་པ་དང་སྡུག་བསྔལ་ལ་ཆོས་ཤེས་པ་དང་འདྲ་བས་བདག་མེད་པའི་རྣམ་པ་གཅིག་པུ་ལ་ལན་གཉིས་སུ་མངོན་སུམ་དུ་བྱེད་དེ། དེ་ལྟར་ན་བཟོད་པ་འབྲིང་དེ་ནི་སེམས་ཀྱི་སྐད་ཅིག་མ་བརྒྱ་རྩ་བཅུ་དགུ་ཡིན་པར་འགྱུར་རོ། །བདག་གིར་མོས་པ་ཡང་དེ་དང་འདྲ་སྟེ། དེ་ནི་སྟོང་
[169b.2]པ་དང་། བདག་མེད་པའི་རྣམ་པ་དག་གིས་རྣམ་པ་གཏད་ནས་སྟོང་པ་ཉིད་ཀྱི་རྣམ་པ་ལན་གཉིས་སུ་མངོན་དུ་བྱེད་དེ། དེ་ལྟར་ན་བཟོད་པ་འབྲིང་དེ་ནི་སྐད་ཅིག་མ་བརྒྱ་རྩ་བཅུ་དགུ་ཡིན་ནོ། །དེ་བཞིན་དུ་སྲེད་པ་སྤྱད་པ་རྣམ་པ་གཉིས་པོ་ངའོ་སྙམ་པའི་ང་རྒྱལ་གྱིས་ཉམས་པ་དང་། ལེ་ལོ་ལྷག་པ་ཅན་ཡང་
[169b.3]བརྗོད་པར་བྱའོ། །བཟོད་པ་ཆེན་པོ་ནི་སྐད་ཅིག་མ་གཅིག་ཁོ་ན་ཡིན་ཏེ། དེ་ནི་གང་ཟག་གིས་ཇི་ལྟར་སྤྱད་པ་བཞིན་དུ་མི་རྟག་པའི་རྣམ་པའམ། སྡུག་བསྔལ་གྱི་རྣམ་པའམ། སྟོང་པའི་རྣམ་པའམ། བདག་མེད་པའི་རྣམ་པ་དང་མཚུངས་པར་ལྡན་པ་ཡིན་ནོ། །ཡང་ཅིའི་ཕྱིར་བདེན་པའི་
[169b.4]རྣམ་པ་དམིགས་པ་རེ་རེ་ནས་འབྲི་བར་བྱེད་ཅེ་ན། ཁམས་གསུམ་པ་ལ་སུན་འབྱིན་པར་བྱེད་པ་དེས་དང་པོར་ནི་གཉེན་པོ་མཐའ་དག་ལ་དམིགས་སོ། །ཕྱིས་ནི་འདོད་པའི་ཁམས་དང་པོར་སྤང་བར་བྱ་བ་དང་། ཡོངས་སུ་ཤེས་པར་བྱ་བ་ཡིན་པའི་ཕྱིར་འདོད་པ་ན་སྤྱོད་པའི་སྡུག་བསྔལ་ཁོ་ན་ལ་
[169b.5]དམིགས་པ་ཡིན་ནོ། །དེའི་རྩལ་གྱིས་ལམ་འདྲེན་པར་བྱེད་པའི་ཕྱིར་རོ་ཞེས་བྱ་བ་ནི་སྔོན་ཟག་པ་མེད་པའི་ཕྱིར་སྐལ་བ་མཉམ་པའི་རྒྱུ་མེད་པར་ཆོས་ཀྱི་མཆོག་གི་རྩལ་གྱིས་ལམ་གྱི་བདེན་པ་འདྲེན་པར་བྱེད་པའི་ཕྱིར་ཆོས་ཀྱི་མཆོག་རྣམས་ནི་འཇིག་རྟེན་པ་ཀུན་གྱི་ནང་ན་མཆོག་ཉིད་ཡིན་པར་ཤེས་
[169b.6]སོ། །ཐམས་ཅད་ཕུང་པོ་ལྔ། འཁོར་དང་བཅས་ཏེ་སྨོས་པའི་ཕྱིར་རོ་ཞེས་བྱ་བ་ནི་དྲོ་བར་གྱུར་པ་ལ་སོགས་པ་མཉམ་པར་གཞག་པའི་ས་པ་ཡིན་པའི་ཕྱིར་རྣམ་པར་རིག་བྱེད་མ་ཡིན་པའི་མཚན་ཉིད་ཀྱི་གཟུགས་ཀྱི་ཕུང་པོ་ཡོད་པས་འཁོར་དང་བཅས་ཏེ་སྨོས་པའི་ཕྱིར་དྲོ་བར་གྱུར་པ་ལ་སོགས་པ་
[169b.7]ནི་ཕུང་པོ་ལྔ་ཡིན་ཏེ། འཁོར་དང་བཅས་པ་ཡིན་པར་གཟུང་ངོ་། །འཕགས་པ་ལ་ཞེས་བྱ་བ་རྒྱས་པར་འབྱུང་བ་ནི་འཕགས་པ་ལ་ཐོབ་པ་མངོན་སུམ་དུ་གྱུར་པས་འབྲས་བུ་ཐོབ་པ་ན། དྲོ་བར་གྱུར་པ་ལ་སོགས་པ་སྦྱོར་བར་གྱུར་པ་རྣམས་མངོན་སུམ་དུ་འགྱུར་དུ་འོང་བས་ཐོབ་པ་རྣམས་ནི་དྲོ་བར་
[170a]
[170a.1]གྱུར་པ་ལ་སོགས་པས་མ་བསྡུས་ཏེ། སྦྱོར་བའི་འབྲས་བུ་ཐོབ་ཟིན་པའི་འཕགས་པ་མངོན་དུ་བྱེད་པར་ནི་རིགས་པ་མ་ཡིན་ནོ། །བདེན་པ་གསུམ་ལ་དམིགས་པའི་དྲོ་བར་གྱུར་པ་རྣམ་པ་གཏོད་པ་ལ་ཞེས་བྱ་བ་ནི་སྡུག་བསྔལ་དང་། ཀུན་འབྱུང་བ་དང་། ལམ་ལ་དམིགས་
[170a.2]པའི་དྲོ་བར་གྱུར་པ་རྣམ་པ་གཏོད་པ་ལ།ཆོས་དྲན་པ་ཉེ་བར་གཞག་པ་ད་ལྟར་བྱུང་བ་ཡིན་ཏེ། དང་པོ་འབད་པས་བསྐྱེད་པར་བྱ་བའི་རྣམ་པ་གཏོད་པ་ལ་ནི་སྤྱི་ལ་དམིགས་པ་ཉིད་ཀྱིས་ཆོས་དྲན་པ་ཉེ་བར་གཞག་པ་ཁོ་ནས་གཏོད་པར་ནུས་པའི་ཕྱིར་རོ། །སོ་སོར་ངེས་པ་ལ་དམིགས་པའི་ཕྱིར་ལུས་
[170a.3]དྲན་པ་ཉེ་བར་གཞག་པ་ལ་སོགས་པས་ནི་མི་ནུས་སོ། །མ་འོངས་པ་ནི་བཞི་ཆར་འཐོབ་པོ་ཞེས་བྱ་བ་ནི་གང་གི་ཕྱིར་དྲན་པ་ཉེ་བར་གཞག་པས་ནི་ལུས་དང་ཚོར་བ་ལ་སོགས་པ་སྡུག་བསྔལ་གྱི་བདེན་པ་ལ་སོགས་པས་བསྡུས་པ་ཡང་བསྡུས་ལ། ལུས་དྲན་པ་ཉེ་བར་གཞག་པ་ལ་སོགས་པ་ཡང་སྔར་ཐོབ་
[170a.4]པ་ཡིན་པ་དེའི་ཕྱིར་བཞི་ཆར་ཡང་འཐོབ་སྟེ། ཐོབ་པ་སྐྱེ་བའི་ཕྱིར་རོ། །འགོག་པའི་བདེན་པ་ལ་དམིགས་པ་ལ་ནི་དེ་ཁོ་ན་གཉི་ག་ཡིན་ནོ་ཞེས་བྱ་བ་ནི་འགོག་པའི་བདེན་པ་ལ་དམིགས་པའི་དྲོ་བར་འགྱུར་བ་རྣམ་པ་གཏོད་པ་ལ་ནི་ཆོས་དྲན་པ་ཉེ་བར་གཞག་པ་ད་ལྟར་བྱུང་བ་ཡིན་ཞིང་དེ་ཁོ་ན་མ་
[170a.5]འོངས་པ་འཐོབ་ཀྱི། ལུས་དྲན་པ་ཉེ་བར་གཞག་པ་ལ་སོགས་པ་ནི་མ་ཡིན་ཏེ། འགོག་པའི་བདེན་པ་ལ་ལུས་ལ་སོགས་པ་མེད་པའི་ཕྱིར་རོ། །རྣམ་པ་དག་ནི་ཐམས་ཅད་དུ་འདྲ་བ་ཡིན་ནོ་ཞེས་བྱ་བ་ནི་བདེན་པ་གསུམ་ལ་དམིགས་པ་དང་། འགོག་པ་ལ་དམིགས་པའི་དྲོ་བར་གྱུར་པའི་རྣམ་པ་གཏོད་
[170a.6]པ་ལ་ཡང་རྣམ་པ་དག་ནི་འདྲ་བ་ཁོ་ན་འཐོབ་སྟེ། སྡུག་བསྔལ་གྱི་བདེན་པ་ལ་དམིགས་པ་ལ་ཡང་སྡུག་བསྔལ་གྱི་བདེན་པའི་རྣམ་པ་བཞི་ཁོ་ན་འཐོབ་ཀྱི་ཀུན་འབྱུང་བའི་བདེན་པ་ལ་སོགས་པའི་རྣམ་པ་ནི་མ་ཡིན་ནོ། །ཀུན་འབྱུང་བའི་བདེན་པ་ལ་དམིགས་པ་ལ་ཡང་ཀུན་འབྱུང་བའི་བདེན་པའི་
[170a.7]རྣམ་པ་བཞི་ཁོ་ན་འཐོབ་ཀྱི་གཞན་དག་ནི་མ་ཡིན་ནོ་ཞེས་བྱ་བ་ལ་སོགས་པ་ཡིན་ནོ། །བདེན་པ་གསུམ་ལ་དམིགས་པ་རྣམ་པར་འཕེལ་བ་ལ་ནི་ལུས་དྲན་པ་ཉེ་བར་གཞག་པ་ལ་སོགས་པ་བཞི་ལས་གང་ཡང་རུང་བ་ཞིག་ད་ལྟར་བྱུང་བ་ཡིན་ནོ། །འགོག་པ་ལ་དམིགས་པ་དེ་ཁོ་ན་ལ་ནི་ཐ་མ་ད་
[170b]
[170b.1]ལྟར་བྱུང་བ་ཡིན་ནོ། །གཉི་ག་ལ་ཡང་མ་འོངས་པ་ནི་བཞི་ཆར་རོ། །རྣམ་པ་ནི་བཅུ་དྲུག་པོ་ཐམས་ཅད་ཀྱང་འཐོབ་བོ། །ཅིའི་ཕྱིར་ཞེ་ན། རིགས་རྣམས་ཐོབ་ཟིན་པའི་ཕྱིར་ཏེ། ཅི་རིགས་པར་བདེན་པ་བཞི་ལ་དམིགས་པ་ལུས་དྲན་པ་ཉེ་བར་གཞག་པ་ལ་སོགས་པའི་རིགས་རྣམས་ཐོབ་ཟིན་པའི་
[170b.2]ཕྱིར་རོ་ཞེས་བྱ་བའི་ཐ་ཚིག་གོ། །རྩེ་མོ་བདེན་པ་བཞི་ལ་དམིགས་པ་ཞེས་བྱ་བ་རྒྱས་པར་འབྱུང་བ་ནི། རྩེ་མོ་རྣམ་པ་གཏོད་པར་བྱེད་པ་ལ་ནི་ཐམས་ཅད་ལ་ཡང་ཆོས་དྲན་པ་ཉེ་བར་གཞག་པ་ཁོ་ན་ད་ལྟར་བྱུང་བ་ཡིན་ཏེ། ལུས་དྲན་པ་ཉེ་བར་གཞག་པ་ལ་སོགས་པས་ནི་རྣམ་པ་གཏོད་པ་མི་
[170b.3]ནུས་པའི་ཕྱིར་རོ། །འགོག་པ་ལ་དམིགས་པ་འཕེལ་བ་ཡང་ཐ་མ་ཆོས་དྲན་པ་ཉེ་བར་གཞག་པ་ད་ལྟར་བྱུང་བ་ཡིན་ཏེ། གཞན་དག་ནི་མ་ཡིན་པའི་ཕྱིར་རོ། །བདེན་པ་གསུམ་ལ་དམིགས་པ་རྣམ་པར་འཕེལ་བ་ལ་ནི་བཞི་ལས་གང་ཡང་རུང་བ་ཞིག་ད་ལྟར་བྱུང་བ་ཡིན་ནོ། །ཐམས་ཅད་དུ་ཡང་
[170b.4]མ་འོངས་པ་ནི་བཞི་ཆར་རོ། །དེ་དག་གི་རིགས་ཐོབ་ཟིན་པའི་ཕྱིར་རྣམ་པ་ཡང་ཐམས་ཅད་དོ་ཞེས་བྱ་བར་ཁོང་དུ་ཆུད་པར་བྱའོ། །བཟོད་པ་རྣམས་ནི་ཐམས་ཅད་དུ་ཐ་མ་ཡིན་ལ་ཞེས་བྱ་བ་ནི་རྣམ་པ་གཏོད་པ་དང་རྣམ་པར་འཕེལ་བ་ཡང་ཐ་མ་ཆོས་དྲན་པ་ཉེ་བར་གཞག་པ་ད་ལྟར་བྱུང་བ་ཡིན་ཏེ།
[170b.5]འདི་ལྟར་བཟོད་པ་ནི་ཐམས་ཅད་ཆོས་ཀྱིས་འཕེལ་བར་བྱེད་ཅེས་བཤད་དོ། །ཆོས་ཀྱི་མཆོག་དག་ནི་ཐ་མ་ཡིན་ཞེས་བྱ་བ་ནི་ཆོས་ཀྱི་མཆོག་དག་མངོན་སུམ་དུ་བྱེད་པ་ལ་ནི་ཐ་མ་ཆོས་དྲན་པ་ཉེ་བར་གཞག་པ་ད་ལྟར་བྱུང་བ་ཡིན་ནོ། །མ་འོངས་པ་ནི་མི་སྐྱེ་བའི་ཆོས་ཅན་ཁོ་ན་བཞི་ཆར་འཐོབ་པོ། །
[170b.6]རྣམ་པ་བཞི་ཁོ་ན་སྟེ་ཞེས་བྱ་བ་ནི་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའི་བདག་ཉིད་ཀྱི་རྣམ་པ་དག་གོ། །གཞན་མེད་པའི་ཕྱིར་ཞེས་བྱ་བ་ནི་འདི་ལྟར་ཆོས་ཀྱི་མཆོག་ལ་ཀུན་འབྱུང་བ་ལ་སོགས་པའི་རྣམ་པ་གཞན་ནི་མེད་དེ། སྡུག་བསྔལ་ཙམ་ལ་
[170b.7]དམིགས་པའི་ཕྱིར་རོ། །འོ་ན་ཇི་ལྟར་ཆོས་ཀྱི་མཆོག་གི་ངོ་བོ་ཉིད་མ་ཡིན་པ་ལུས་དྲན་པ་ཉེ་བར་གཞག་པ་ལ་སོགས་པ་མངོན་དུ་མ་གྱུར་ཀྱང་ཆོས་ཀྱི་མཆོག་ཀུན་དུ་འབྱུང་བའི་གནས་སྐབས་ན། ལུས་དྲན་པ་ཉེ་བར་གཞག་པ་ལ་སོགས་པ་མ་འོངས་པ་ཐོབ་པ་དེ་བཞིན་དུ་ཆོས་ཀྱི་མཆོག་གི་
[171a]
[171a.1]ངོ་བོ་ཉིད་མ་ཡིན་པ་ཀུན་འབྱུང་བ་ལ་སོགས་པའི་རྣམ་པ་ཀུན་དུ་མི་འབྱུང་ཡང་ཀུན་འབྱུང་བ་ལ་སོགས་པའི་རྣམ་པ་མ་འོངས་པ་ཐོབ་པར་གོ་ཅི་སྟེ་མི་འདོད་ཅེ་ན། དེའི་ཕྱིར་མཐོང་བའི་ལམ་དང་འདྲ་བའི་ཕྱིར་ཞེས་བྱ་བ་སྨོས་ཏེ། སྡུག་བསྔལ་གྱི་རྣམ་པ་བཞི་ཁོ་ན་འཐོབ་བོ། །ཅིའི་
[171a.2]ཕྱིར་ཞེ་ན། མཐོང་བའི་ལམ་དང་འདྲ་བའི་ཕྱིར་ཏེ། མཐོང་བའི་ལམ་ལ་ནི་བདེན་པ་གང་ཞིག་མཐོང་བར་འགྱུར་བ་དེའི་རྣམ་པ་དག་ཁོ་ན་འཐོབ་ལ། ཆོས་ཀྱི་མཆོག་རྣམས་ཀྱང་མཐོང་བའི་ལམ་དང་འདྲ་བས་སོ། །ཡང་ཉེ་བའི་ཕྱིར་འདི་དག་མཐོང་བའི་ལམ་དང་འདྲ་བ་ཅི་ཞིག་ཡོད་ཅེ་ན། དེ་
[171a.3]ཁོ་ན་བཞིན་དུ་དང་པོར་འདོད་པ་ན་སྤྱོད་པའི་སྡུག་བསྔལ་ལ་དམིགས་པ་ཉིད་ཡིན་ནོ། །ཡང་ན་ས་མཚུངས་པ་ཉིད་ཡིན་ཏེ། འདི་ལྟར་མཐོང་བའི་ལམ་གྱི་དབང་དུ་བྱས་ནས། དེ་ནི་ཆོས་མཆོག་དང་ས་གཅིག་ཅེས་འཆད་པར་འགྱུར་རོ། །ཡང་ན་ཆོས་ཀྱི་མཆོག་རྣམས་ནི་སོ་སོའི་སྐྱེ་བོ་ཉིད་
[171a.4]འཇོམས་པར་བྱེད་པ་སྡུག་བསྔལ་ལ་ཆོས་ཤེས་པའི་བཟོད་པའི་བར་ཆད་མེད་པའི་ལམ་ལྟ་བུར་གྱུར་པ་ཡིན་ནོ། །དེ་ལྟར་ན་འདི་དག་ནི་མཐོང་བའི་ལམ་དང་འདྲ་བ་ཡིན་ཏེ། བར་ཆད་མེད་པའི་ལམ་རྣམས་ནི་རྣམ་པར་གྲོལ་བའི་ལམ་དག་དང་འདྲ་བས་སོ། །ངེས་པར་འབྱེད་པས་ན་ཞེས་བྱ་བ་རྒྱས་
[171a.5]པར་འབྱུང་བ་ལ། ཇི་ལྟར་ངེས་པར་འབྱེད་པ་ཡིན་ཞེ་ན། སྨྲས་པ། དེས་ཐེ་ཚོམ་སྤང་བའི་ཕྱིར་ཏེ། བདེན་པ་རྣམས་ལ་འདི་ནི་སྡུག་བསྔལ་ལོ་ཞེས་བྱ་བ་ནས་འདི་ནི་ལམ་མོ་ཞེས་བྱ་བའི་བར་དུ་གཏན་ལ་ཕབ་ནས་རྣམ་པར་འབྱེད་པའི་ཕྱིར་ངེས་པར་འབྱེད་པ་སྟེ། འཕགས་པའི་ལམ་ཡིན་ནོ། །དེའི་
[171a.6]ཆ་ནི་མཐོང་བའི་ལམ་གྱི་ཕྱོགས་གཅིག་ཡིན་ཏེ། དེ་འདྲེན་པར་བྱེད་པ་ཉིད་ཀྱིས་ཏེ། སྐྱེད་པར་བྱེད་པ་ཉིད་ཀྱིས་ཕན་འདོགས་པའི་ཕྱིར་རོ། །དེས་ན་ངེས་པར་འབྱེད་པའི་ཆ་དང་མཐུན་པ་ཞེས་བྱ་བ་ཡིན་ནོ། །མི་ལྕོགས་མེད་པ་དང་། ཁྱད་པར་བསམ་གཏན་ས་པའོ། །ཞེས་བྱ་བ་ནི་འདི་ལ་མི་
[171a.7]ལྕོགས་པ་མེད་པ་དང་ཁྱད་པར་ཅན་དང་བསམ་གཏན་གྱི་ས་དག་ཡོད་པས་ན། མི་ལྕོགས་པ་མེད་པ་དང་། ཁྱད་པར་བསམ་གཏན་ས་པའོ། །གོང་ན་ནི་མེད་དོ་ཞེས་བྱ་བ་ནི་མཐོང་བའི་ལམ་གྱི་འཁོར་ཡིན་པའི་ཕྱིར་གཟུགས་མེད་པ་དག་ན་ནི་ངེས་པར་འབྱེད་པའི་ཆ་དང་མཐུན་པ་མེད་དེ།
[171b]
[171b.1]མཐོང་བའི་ལམ་གྱི་སྦྱོར་བ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་མེད་པ་ནི་འདོད་པའི་ཁམས་ལ་དམིགས་པ་ཡིན་པའི་ཕྱིར་རོ་ཞེས་བྱ་བ་ལ། དེ་མེད་པ་ཞེས་བྱ་བ་ནི་མཐོང་བའི་ལམ་དེ་མེད་པའོ། །གང་ཞེ་ན། གོང་ན་ཞེས་བྱ་བར་སྦྱར་ཏེ། གཟུགས་མེད་པ་ན་ཞེས་བྱ་བའི་ཐ་ཚིག་གོ། །
[171b.2]ཅིའི་ཕྱིར་ཞེ་ན། འདོད་པའི་ཁམས་ལ་དམིགས་པ་ཡིན་པའི་ཕྱིར་ཏེ། འདི་ལྟར་གཟུགས་མེད་པ་དག་ནི་འདོད་པའི་ཁམས་ལ་མི་དམིགས་པ་ཡིན་ནོ། །སྨྲས་པ། མཐོང་བའི་ལམ་འདོད་པའི་ཁམས་ལ་དམིགས་པ་ཅིར་དགོས་ཤེ་ན། དེའི་ཕྱིར། དེ་ཡང་སྔར་ཡོངས་སུ་ཤེས་པར་བྱ་ཞིང་སྤང་བར་བྱ་བ་ཡིན་
[171b.3]པའི་ཕྱིར་རོ་ཞེས་བྱ་བ་སྨོས་ཏེ། འདོད་པའི་ཁམས་དེའི་སྡུག་བསྔལ་གྱི་ངོ་བོ་ནི་སྔར་ཡོངས་སུ་ཤེས་པར་བྱ་བ་ཡིན་པའི་ཕྱིར་རོ། །ཀུན་འབྱུང་བའི་ངོ་བོ་ནི་སྤང་བར་བྱ་བ་ཡིན་པའི་ཕྱིར་རོ། །འདི་ལ་གཏན་ཚིགས་ནི་ཚིག་འདི་ལྟར་རྣལ་འབྱོར་པ་དེ་ནི་འདོད་པ་ན་སྤྱོད་པའི་སྡུག་བསྔལ་གྱིས་རྣམ་པར་
[171b.4]གནོད་པར་བྱས་པས་དེས་ན་དེ་དང་པོར་དེ་ལས་ཐར་པ་ཚོལ་བར་བྱེད་དོ། །དེ་དག་གི་རྣམ་པར་སྨིན་པ་ནི་གཟུགས་ཀྱི་ཁམས་ཀྱི་ཕུང་པོ་ལྔ་ཡིན་ནོ་ཞེས་བྱ་བ་ནི་ངེས་པར་འབྱེད་པའི་ཆ་དང་མཐུན་པ་དེ་དག་ནི་གཟུགས་ན་སྤྱོད་པ་ཡིན་པའི་ཕྱིར་གལ་ཏེ་རྣལ་འབྱོར་པ་དེ་གཟུགས་ཀྱི་ཁམས་སུ་སྐྱེ་ན། དེའི་རྣམ་
[171b.5]པར་སྨིན་པ་དེར་ཕུང་པོ་ལྔ་མངོན་པར་འགྲུབ་པར་འགྱུར་རོ། །དེ་དག་ཀྱང་ཡིད་དུ་འོང་བ་མྱོང་བར་འགྱུར་བ་སྐྱེད་པའི་ཕྱིར་ཡོངས་སུ་རྫོགས་པར་བྱེད་པ་དག་ཁོ་ན་ཡིན་གྱི་རིས་མཐུན་པ་འཕེལ་བར་བྱེད་པ་དག་ནི་མ་ཡིན་ཏེ། སྲིད་པའི་གཉེན་པོ་ཡིན་པའི་ཕྱིར་ཏེ། མི་རྟག་པ་ལ་སོགས་པའི་རྣམ་
[171b.6]པས་སུན་འབྱིན་པས་སོ། །གཉིས་ནི་ཞེས་བྱ་བས་ནི་དྲོ་བར་གྱུར་པ་དང་། རྩེ་མོའི་ངོ་བོ་ཉིད་དག་གོ། །འདོད་རྟེན་ཞེས་བྱ་བ་ནི་འདི་ལྟར་འདི་ཁོ་ནར་བདེན་པ་མངོན་པར་རྟོགས་ཀྱི་ཁམས་གཞན་དུ་ནི་མ་ཡིན་པ་དང་། གོང་ན་མཐོང་ལམ་མེད། །མི་སྐྱོ་ལུང་ལས་འདི་རྩོམ་ཞིང་། །དེར་མཐར་ཕྱིན་
[171b.7]ཅེས་འབྱུང་ཕྱིར་རོ། །ཞེས་བྱ་བའི་ཕྱིར་རོ། །གླིང་གསུམ་དུ་ཞེས་བྱ་བ་ནི་བྱང་གི་སྒྲ་མི་སྙན་མ་གཏོགས་པར་ཞེས་བྱ་བར་རྣམ་པར་བཤད་པར་བྱ་སྟེ། བྱང་གི་སྒྲ་མི་སྙན་པ་རྣམས་ནི་དབང་པོ་རྟུལ་བའི་ཕྱིར་རོ། །ལྷ་དག་གི་ནང་དུ་མངོན་སུམ་དུ་བྱེད་དོ་ཞེས་བྱ་བ་ནི་འདོད་པ་ན་སྤྱོད་པ་གང་དག་
[172a]
[172a.1]གི་ནང་དུའོ། །ངེས་པར་འབྱེད་པའི་ཆ་དང་མཐུན་པ་བཞི་པ་ནི་ལྷ་དག་གི་ནང་དུ་སྐྱེད་པར་ཡང་བྱེད་དོ་ཞེས་བྱ་བ་ནི་དེ་དག་ཁོ་ནའི་ནང་དུ་སྟེ། གཞན་དུ་ནི་མ་ཡིན་ནོ། །ངེས་པར་འབྱེད་པའི་ཆ་དང་མཐུན་པ་གསུམ་ནི་ཆོས་ཀྱི་མཆོག་དག་མ་གཏོགས་པའོ། །ཚེ་འདི་ཉིད་ལ་སྐྱེས་པ་
[172a.2]དང་བུད་མེད་ཀྱི་དབང་པོ་གྱུར་ན། སྐྱེས་པ་དང་བུད་མེད་རྣམས་ཀྱིས་གཉི་གའི་རྟེན་ཅན་ཏེ། སྐྱེས་པ་དང་བུད་མེད་ཀྱི་རྟེན་ཅན་དག་འཐོབ་པོ། །བུད་མེད་རྣམས་ཀྱིས་འདི་དག་བསྐྱེད་ནས་ཚེ་གཞན་དུ་བུད་མེད་ཀྱི་ལུས་སུ་སྐྱེས་ན་བུད་མེད་ཀྱི་རྟེན་ཅན་དག་མངོན་དུ་བྱེད་དོ། །ཚེ་གཞན་དུ་སྐྱེས་པར་སྐྱེས་ན་ནི་
[172a.3]སྐྱེས་པའི་རྟེན་ཅན་དག་མངོན་དུ་བྱེད་དེ། དེ་དག་ཐོབ་པའི་བུད་མེད་རྣམས་ཚེ་གཞན་དུ་མོའི་ལུས་སུ་མི་སྐྱེ་བ་ནི་མ་ཡིན་ནོ། །སྐྱེས་པ་རྣམས་ཀྱང་དེ་བཞིན་དུ་ཚེ་གཞན་དུ་མོའི་ལུས་སུ་གྱུར་ན་ནི་མོའི་རྟེན་ཅན་དག་མངོན་དུ་བྱེད་ལ། ཕོའི་ལུས་སུ་གྱུར་ན་ནི་ཕོའི་རྟེན་ཅན་དག་མངོན་དུ་བྱེད་དོ། །ཆོས་ཀྱི་མཆོག་
[172a.4]རྣམས་ཀྱི་དབང་དུ་བྱས་ནས། ཆོས་མཆོག་བུད་མེད་ཀྱིས། གཉི་གའི་རྟེན་ཅན་ཐོབ་པར་འགྱུར། །ཞེས་བྱ་བ་སྨོས་ཏེ། བུད་མེད་ཁོ་ནས་ཆོས་ཀྱི་མཆོག་གཉི་གའི་རྟེན་ཅན་ཐོབ་ཀྱི། སྐྱེས་པས་ནི་མ་ཡིན་ནོ། །འདི་ལྟར་དེ་དག་ཐོབ་ནས་བུད་མེད་ཀྱི་རྟེན་ཅན་དེའི་ཚེ་ན་ཡོད་པ་དེ་དག་དང་ལྡན་པ་ཡིན་
[172a.5]གྱི། ཚེ་གཞན་དུ་བརྗེས་ན་ནི་འདོད་པའི་ཁམས་སུ་སྐྱེས་པའི་ལུས་སུ་སྐྱེས་ན་ཡང་སྐྱེས་པ་དེ་སྐྱེས་པའི་རྟེན་ཅན་དག་དང་ལྡན་ནོ། །སྐྱེས་པས་ནི་སྐྱེས་པའི་རྟེན་ཅན་འབའ་ཞིག་ཐོབ་བོ། །ཅིའི་ཕྱིར་ཞེ་ན། བུད་མེད་ཉིད་ནི་སོ་སོར་བརྟགས་པ་མ་ཡིན་པས་འགོག་པ་ཐོབ་པའི་ཕྱིར་རོ་ཞེས་བྱ་བ་སྨོས་ཏེ།
[172a.6]ཚེ་དེ་ཉིད་ལ་ཚེ་རབས་གཞན་དུ་ཡང་བུད་མེད་ཉིད་དུ་འགྱུར་བ་མེད་པ་ཞེས་བྱ་བ་དེའི་སོ་སོར་བརྟགས་པ་མ་ཡིན་པས་འགོག་པ་འཐོབ་པོ། །གང་ཞིག་ཆོས་ཀྱི་མཆོག་དག་སྐྱེད་པར་བྱེད་པ་དེས་ན་གདོན་མི་ཟ་བར་མཇུག་ཐོགས་སུ་མཐོང་བའི་ལམ་སྐྱེད་པར་བྱེད་ལ། བདེན་པ་མཐོང་བ་ཡང་བུད་མེད་ཉིད་དུ་
[172a.7]སྐྱེ་བ་མེད་དོ་ཞེས་བྱ་བ་ནི་གྲུབ་མཐའ་ཡིན་ནོ། །ས་བོར་ནས་ཞེས་བྱ་བ་རྒྱས་པར་འབྱུང་བ་ནི་འཕགས་པ་ནི་ངེས་པར་འབྱེད་པའི་ཆ་དང་མཐུན་པ་བསམ་གཏན་དང་པོའི་ས་པ་ནས་བསམ་གཏན་བཞི་པའི་ས་པའི་བར་ས་གང་དག་ཐོབ་པར་གྱུར་པའི་བསམ་གཏན་དང་པོ་ནས་བསམ་གཏན་བཞི་
[172b]
[172b.1]པའི་བར་གྱིས་དེ་དག་འདོར་བ་ན་བདག་ཉིད་ཇི་ལྟ་བ་བཞིན་བསམ་གཏན་དང་པོའི་ས་པ་ནས་བསམ་གཏན་བཞི་པའི་ས་པའི་བར་དེ་དག་ཀྱང་སྟོང་གི་གཞན་དུ་ནི་མ་ཡིན་ཏེ། སོ་སོའི་སྐྱེ་བོ་ལྟར་འཆི་བའམ་ཉམས་པས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །ས་འདོར་བ་ནི་ས་འཕོས་པའི་ཕྱིར་རོ་ཞེས་བྱ་
[172b.2]བ་ནི་འདོད་ཆགས་དང་བྲལ་བའི་སྒོ་ནས་ནི་མ་ཡིན་ནོ་ཞེས་བྱ་བར་སྟོན་ཏོ། །སོ་སོའི་སྐྱེ་བོ་ནི་ཞེས་བྱ་བ་ནི་སོ་སོའི་སྐྱེ་བོ་ནི་ས་འཕོ་ཡང་རུང་མི་འཕོ་ཡང་རུང་སྟེ། ངེས་པར་འབྱེད་པའི་ཆ་དང་མཐུན་པ་རྣམས་རིས་མཐུན་པ་བཏང་བ་ཁོ་ནས་གཏོང་ངོ་། །འདི་ལྟར་སོ་སོའི་སྐྱེ་བོ་ནི་ས་གང་བའི་ངེས་པར་འབྱེད་པའི་
[172b.3]ཆ་དང་མཐུན་པ་དག་ཐོབ་པ་དེའི་གོང་དུ་སྐྱེ་བ་ནི་དེ་དག་གི་ས་འཕོ་བ་ན་འཆི་བས་འདོར་རོ། །འདོད་ཆགས་དང་མ་བྲལ་བ་ནི་ས་འཕོ་བ་མེད་པར་འཆི་བར་གཏོང་སྟེ་འདོད་པའི་ཁམས་ཉིད་དུ་སྐྱེའོ། །འཕགས་པའི་གང་ཟག་ནི་དེ་ལྟ་མ་ཡིན་ཏེ། དེའི་དགེ་བའི་རྩ་བའི་རྒྱུད་ནི་མཐོང་བའི་ལམ་གྱིས་ཉེ་
[172b.4]བར་སྤེལ་བའི་ཕྱིར་རོ། །སོ་སོའི་སྐྱེ་བོ་ཁོ་ན་དེ་ལྟར་གཏོང་ངོ་ཞེས་བྱ་བར་ཇི་ལྟར་ཤེས་ཤེ་ན། བསྟན་བཅོས་ལས་སྒོ་ང་དང་། ནུར་ནུར་པོ་ལ་སོགས་པར་གྱུར་པའི་སོ་སོའི་སྐྱེ་བོ་ནི་ལུས་དང་ལྡན་གྱི་ལུས་ཀྱི་ལས་དང་ནི་མ་ཡིན་ནོ་ཞེས་འབྱུང་བའི་ཕྱིར་རོ། །སློབ་དཔོན་དབྱིག་བཤེས་ན་རེ་ནི་སོ་སོའི་སྐྱེ་བོ་
[172b.5]ནི་ས་འཕོ་བ་ཡང་རུང་མི་འཕོ་བ་ཡང་རུང་སྟེ་རིས་མཐུན་པ་ཁོ་ནས་གཏོང་ངོ་ཞེས་བྱ་བ་འདིར་ས་སྨོས་པར་བསམ་གཏན་མཐའ་དག་གཟུང་སྟེ། དེ་ལ་གང་གི་ཚེ་སོ་སོའི་སྐྱེ་བོ་ཚངས་རིས་པ་དག་ནས་ཤི་འཕོས་ཏེ། ཚངས་པའི་མདུན་ན་འདོན་དག་གི་ནང་དུ་སྐྱེ་བ་དེའི་ཚེ་རིས་མཐུན་པ་བཏང་བས་གཏོང་ངོ་། །
[172b.6]གང་གི་ཚེ་བསམ་གཏན་དང་པོ་ནས་ཤི་འཕོས་ནས་བསམ་གཏན་གཉིས་པར་སྐྱེས་པ་དེའི་ཚེ་ནི་ས་བོར་བ་དང་རིས་མཐུན་པ་བཏང་བ་དག་གིས་གཏོང་ངོ་ཞེས་ཟེར་རོ། །དེ་ནི་ཚངས་པའི་འཇིག་རྟེན་དུ་སྐྱེས་པའི་སོ་སོའི་སྐྱེ་བོ་རྣམས་ལ་ངེས་པར་འབྱེད་པའི་ཆ་དང་མཐུན་པ་མེད་པའི་ཕྱིར་རིགས་པ་མ་ཡིན་ཏེ། ངེས་
[172b.7]པར་འབྱེད་པའི་ཆ་དང་མཐུན་པ་དག་ནི་འདོད་པའི་ཁམས་སུ་སྐྱེད་པར་བྱེད་ལ། འདོད་པའི་ཁམས་ནས་འཆི་འཕོ་བ་ཉིད་ཀྱིས་དེ་དག་གི་ངེས་པར་འབྱེད་པའི་ཆ་དང་མཐུན་པ་གཏོང་བས་སོ། །འདི་ནི་སློབ་དཔོན་འདུས་བཟང་གིས་ཀྱང་བསྟན་ཏེ། སོ་སོའི་སྐྱེ་བོ་ཡང་ས་གང་བའི་ངེས་པར་འབྱེད་པའི་ཆ་དང་
[173a]
[173a.1]མཐུན་པ་ཐོབ་པ་དེ་ནས་གོང་དུ་སྐྱེ་བའི་ཚེ་ངེས་པར་འབྱེད་པའི་ཆ་དང་མཐུན་པ་དག་འདོར་བ་མ་ཡིན་ནམ་ཞེ་ན། དེ་ནི་མེད་དེ། རིས་མཐུན་པ་བཏང་བ་ཁོ་ནས་བོར་བའི་ཕྱིར་རོ། །འཆི་བའི་སྲིད་པ་ལ་གནས་པས་དེ་དག་འདོར་བས་སྲིད་པ་བར་མ་ལ་གནས་པས་བོར་ཟིན་ཏེ། དེའི་གོང་དུ་
[173a.2]སྐྱེ་བ་ན་འདོར་བར་གྱུར་པ་གང་ཡིན་པ་དེ་ནི་མེད་པས་འཆི་བ་ཁོ་ནས་ཞེས་བཤད་དོ་ཞེས་བྱ་བ་ཡིན་ནོ། །སོ་སོར་ཐར་པའི་སྡོམ་པ་བཞིན་དུ་ཞེས་བྱ་བ་ནི་དཔེར་ན་སོ་སོར་ཐར་པའི་སྡོམ་པ་བཏང་བ་ཕྱིས་ལེན་པ་ན་སྔོན་གྱི་མ་ཡིན་པ་ཐོབ་པ་དང་འདྲའོ། །ཅིའི་ཕྱིར་ཞེ་ན། མ་འདྲིས་པ་དང་འབད་དེ་བསྒྲུབ་པར་བྱ་བ་ཡིན་
[173a.3]པའི་ཕྱིར་རོ་ཞེས་བྱ་བ་སྨོས་ཏེ། མ་འདྲིས་པའི་ཕྱིར་དང་། འབད་དེ་བསྒྲུབ་པར་བྱ་བ་ཡིན་པའི་ཕྱིར་རོ། །གོང་གི་ཕྱིར་ཐོག་མ་མེད་པ་ཅན་གྱི་འཁོར་བ་ན་འདྲིས་པ་མ་ཡིན་པའི་ཕྱིར་འདོད་ཆགས་དང་བྲལ་བས་འཐོབ་པ་མ་ཡིན་ནོ། །གང་གི་ཕྱིར་འབད་པས་བསྒྲུབ་པར་བྱ་བ་ཡིན་པ་དེའི་ཕྱིར་སྔུན་
[173a.4]བཏང་བ་དག་མི་འཐོབ་པོ། །མཚམས་སྟོན་པར་བྱེད་པ་ཞིག་ཡོད་ན་ནི་ཞེས་བྱ་བ་ལ། མཚམས་ནི་བར་མཚམས་སོ། །སྟོན་པར་བྱེད་པ་ནི་སྟོན་པ་པོ་སྟེ། སྨོན་ནས་ཤེས་པ་འཐོབ་པའོ། །དེ་ཡོད་ན་ཐོབ་སྟེ་ཉམས་པའི་གོང་མ་སྐྱེད་པར་བྱེད་དེ་མ་བསྐྱེད་པ་གང་ཡིན་པ་སྐྱེད་པར་བྱེད་དོ་ཞེས་བྱ་བའི་
[173a.5]དོན་ཏོ། །མཚམས་སྟོན་པར་བྱེད་པ་མེད་ན་ནི་བཞི་ཁོ་ནས་སྐྱེད་པར་བྱེད་དེ་དྲོ་བར་གྱུར་པ་ནས་བརྩམས་ཏེ་ཞེས་བྱ་བའི་ཐ་ཚིག་གོ། །རྣམ་པར་ཉམས་པ་དང་ཡོངས་སུ་ཉམས་པ་འདི་དག་གི་ཞེས་བྱ་བ་ནི། འཕགས་པས་དེ་དག་ས་བོར་ནས། །གཏོང་ངོ་ཞེས་འབྱུང་བས་རྣམ་པར་ཉམས་པ་ཡང་བཤད་
[173a.6]ལ། དང་པོ་གཉིས་ཡོངས་ཉམས་པས་ཀྱང་། །ཞེས་འབྱུང་བས་ཡོངས་སུ་ཉམས་པ་ཡང་བཤད་དེ། དེའི་ཕྱིར་འདི་དག་གི་ཞེས་བྱ་བ་སྟོན་ཏོ། །ཉམས་པ་གཉིས་ཞེས་བྱ་བ་ནི་རྣམ་པར་ཉམས་པ་དང་ཡོངས་སུ་ཉམས་པ་དག་གི་སྤྱིའི་ངོ་བོ་ཡོངས་སུ་བཟུང་བས་གཉི་ག་སྨོས་པ་ཡིན་ནོ། །ཡོངས་སུ་
[173a.7]ཉམས་པ་ནི་ཉེས་པས་བྱས་པ་ཡིན་གྱི་ཞེས་བྱ་བ་ནི་ཉོན་མོངས་པས་བྱས་པ་ཡིན་གྱི་ཞེས་བྱ་བའི་ཐ་ཚིག་གོ། །རྣམ་པར་ཉམས་པ་ནི་གདོན་མི་ཟ་བ་མ་ཡིན་ནོ་ཞེས་བྱ་བ་དེ་ནི་ཉེས་པས་བྱས་པ་འབའ་ཞིག་ཏུ་མ་ཟད་ཀྱི་ཡོན་ཏན་གྱིས་བྱས་པ་ཡང་ཡིན་ནོ། །དེ་ལ་ཡོན་ཏན་གྱིས་བྱས་པ་ནི་འདི་ལྟ་སྟེ་མཐོང་བའི་
[173b]
[173b.1]ལམ་སྐྱེས་ན་སོ་སོའི་སྐྱེ་བོ་ཉིད་རྣམ་པར་ཉམས་པ་ལྟ་བུའོ། །ཉེས་པས་བྱས་པ་ནི་འདི་ལྟ་སྟེ། ལོག་པར་ལྟ་བས་དགེ་བའི་རྩ་བ་རྣམ་པར་ཉམས་པ་ལྟ་བུའོ། །ཡང་ན་ཉིང་མཚམས་སྦྱོར་བའི་སེམས་ཀྱིས་ཆོས་ཁ་ཅིག་རྣམ་པར་ཉམས་པ་ལྟ་བུའོ། །དེ་ལྟ་ན་ཡོངས་སུ་ཉམས་པ་གང་ཡིན་པ་དེ་ནི་
[173b.2]རྣམ་པར་ཉམས་པ་ཡང་ཡིན་ནོ། །རྣམ་པར་ཉམས་པ་གང་ཡིན་པ་དེ་ནི་གདོན་མི་ཟ་བར་ཡོངས་སུ་ཉམས་པ་མ་ཡིན་ཏེ། ཡོངས་སུ་ཉམས་པ་ནི་ཡོན་ཏན་གྱི་ཁྱད་པར་དག་ཁོ་ན་ལས་ཡོངས་སུ་ཉམས་པས་སོ། །མི་སྐྱེ་བའི་ཆོས་ཉིད་འཐོབ་སྟེ་ཞེས་བྱ་བ་ནི་འགྲོ་བ་ལ་སོགས་པ་དེ་དག་གི་སོ་སོར་
[173b.3]བརྟགས་པ་མ་ཡིན་པས་འགོག་པ་འཐོབ་སྟེ་ཞེས་བྱ་བའི་དོན་ཏོ། །དེ་དག་ཅི་རིགས་པར་ཏེ་ཞེས་བྱ་བ་ནི་མི་སྐྱེ་བའི་ཆོས་ཉིད་དེ་དེ་དག་ནི་ཇི་ལྟར་འོས་འོས་སུ་བཟོད་པ་ཆུང་ངུ་དང་ཆེན་པོའི་ཚེ་འཐོབ་པོ་ཞེས་བྱ་བར་སྦྱར་རོ། །ཇི་ལྟར་བྱས་པས་ཤེ་ན། བཟོད་པ་ཆུང་ངུའི་ཚེ་ནི་ངན་སོང་གི་འགྲོ་བ་
[173b.4]རྣམས་ཀྱི་མི་སྐྱེ་བའི་ཆོས་ཉིད་འཐོབ་པོ། །ཆེན་པོའི་ཚེ་ནི་སྒོ་ང་ལས་སྐྱེ་བ་དང་། དྲོད་གཤེར་ལས་སྐྱེ་བའི་སྐྱེ་གནས་དག་གིའོ། །ཆུང་ངུའི་ཚེ་ནི་འདུ་ཤེས་མེད་པའི་སེམས་ཅན་དང་། བྱང་གི་སྒྲ་མི་སྙན་དང་། ཚངས་པ་ཆེན་པོར་སྐྱེ་བ་རྣམས་ཀྱིའོ། །ཆེན་པོའི་ཚེ་ནི་ཟ་མ་དང་མ་ནིང་དང་མཚན་གཉིས་
[173b.5]པའི་ལུས་རྣམས་ཀྱིའོ། །ཆེན་པོ་ཉིད་ཀྱི་ཚེ་ནི་སྲིད་པ་བརྒྱད་པ་ལ་སོགས་པ་སྟེ། སྲིད་པ་བརྒྱད་པ་ལ་སོགས་པ་དང་། དགུ་པ་ལ་སོགས་པ་དང་། མཐོང་བས་སྤང་བར་བྱ་བའི་མི་སྐྱེ་བའི་ཆོས་ཉིད་འཐོབ་པོ། །རིགས་དེ་ཉིད་ཅེས་བྱ་བ་ནི་སློབ་དཔོན་གྱི་གཞུང་ལུགས་ཡིན་ཏེ། བཟོད་པས་
[173b.6]ཡོངས་སུ་བསྒོས་པའི་ཉན་ཐོས་ཀྱི་རིགས་ཏེ། དེ་ནི་བཟོད་པས་ཡོངས་སུ་བསྒོས་པ་ཉིད་ཀྱིས་བཟློག་ཏུ་མི་རུང་བའི་ཕྱིར་རོ་སྙམ་དུ་བསམས་པའོ། །གཞན་གསུམ་ཡང་ཞེས་བྱ་བ་ནི་རང་སངས་རྒྱས་སུ་ནི་ཉན་ཐོས་ཀྱི་རིགས་ལས་བཟོད་པ་ཡང་བཟློག་ནས་འགྱུར་ཏེ། དེ་དག་ནི་གཞན་གྱི་དོན་དུ་
[173b.7]ངན་སོང་དུ་མི་འགྲོ་བའི་ཕྱིར་རོ་སྙམ་དུ་བསམས་པ་ཡིན་ནོ། །ཏིང་ངེ་འཛིན་མི་གཡོ་བ་དང་། གསལ་བའི་ཕྱིར་ཞེས་བྱ་བ་ནི་སྐྱོན་བརྒྱད་ལས་གྲོལ་བའི་ཕྱིར་ཏིང་ངེ་འཛིན་མི་གཡོ་བ་ཡིན་ནོ། །དེ་ཉིད་ཀྱི་ཕྱིར་རམ་དབང་པོ་རྣོན་པོའི་ཕྱིར་གསལ་ཞིང་སྦྱངས་པ་ཡིན་ནོ། །གང་དག་གི་ལྟར་ན་
[174a]
[174a.1]བསེ་རུ་ལྟ་བུ་ལས་གཞན་པའི་རང་སངས་རྒྱས་ཡོད་པར་འདོད་པ་ཞེས་བྱ་བ་ནི་ཆོས་མངོན་པ་པ་གང་དག་གི་གཞུང་ལུགས་ཀྱིས་བསེ་རུ་ལྟ་བུ་ལས་གཞན་པའི་རང་སངས་རྒྱས་ཀྱང་ཡོད་པར་འདོད་པ་སྟེ། ངེས་པར་འབྱེད་པའི་ཆ་དང་མཐུན་པ་ཙམ་བསྐྱེད་པ་ཚོགས་ཤིང་སྤྱོད་པའི་
[174a.2]རང་སངས་རྒྱས་སོ་སྙམ་དུ་བསམས་པ་ཡིན་ནོ། །དེ་དག་གི་ལྟར་ན་དེའི་རིགས་དྲོ་བར་གྱུར་པ་དང་། རྩེ་མོ་རྣམས་ནི་ཟློག་པར་དགག་པ་མེད་དེ། བསེ་རུ་ལྟ་བུ་ཁོ་ན་དམིགས་ཀྱིས་བཀར་བའི་ཕྱིར་རོ། །མྱུར་བ་སྲིད་པ་གསུམ་གྱིས་ཐར། །ཞེས་བྱ་བ་ནི་གང་ཞིག་ཐར་པ་མྱུར་བར་ཐོབ་པ་དེ་ཚེ་གཅིག་ལ་ནི་ཐར་
[174a.3]པའི་ཆ་དང་མཐུན་པའི་དགེ་བའི་རྩ་བ་སྐྱེད་པར་བྱེད་དོ། །གཉིས་པ་ལ་ནི་ངེས་པར་འབྱེད་པའི་ཆ་དང་མཐུན་པ་རྣམས་སོ། །གསུམ་པ་ལ་ནི་འཕགས་པའི་ལམ་མོ། །གང་ཞིག་ཚེ་སྔ་མ་ལ་ཐར་པའི་ཆ་དང་མཐུན་པའི་ཚོགས་བསགས་པ་དེ་ནི་ཚེ་གཅིག་ཁོ་ན་ལ་ཡང་ངེས་པར་འབྱེད་པའི་ཆ་དང་མཐུན་པ་
[174a.4]རྣམས་དང་། འཕགས་པའི་ལམ་སྐྱེད་པར་བྱེད་དོ་ཞེས་བྱ་བར་ཁོང་དུ་ཆུད་པར་བྱའོ། །ས་བོན་འདེབས་པ་དང་ཞེས་བྱ་བ་ལ་སོགས་པ་འབྱུང་བ་ནི་ས་བོན་འདེབས་པ་ལྟ་བུའི་ཐར་པའི་ཆ་དང་མཐུན་པ་སྐྱེ་བ་ཡིན་ནོ། །འབྲུ་སྐྱེ་བ་ལྟ་བུ་ནི་ངེས་པར་འབྱེད་པའི་ཆ་དང་མཐུན་པ་སྐྱེ་བ་ཡིན་ནོ། །འབྲས་
[174a.5]བུ་ཆགས་པ་ལྟ་བུ་ནི་འཕགས་པའི་ལམ་ཡིན་ནོ། །ཆོས་ཉིད་འདི་ལ་ཞེས་བྱ་བ་ནི་གསུང་རབ་ཀྱི་ཆོས་ཉིད་ལའོ། །འཇུག་པ་དང་ཡོངས་སུ་སྨིན་པ་དང་རྣམ་པར་གྲོལ་བར་འགྱུར་ཞེས་བྱ་བ་ནི་དོན་གྱི་དངོས་ཡིན་ཏེ། འཇུག་པ་ནི་ཐར་པའི་ཆ་དང་མཐུན་པས་སོ། །ཡོངས་སུ་སྨིན་པ་ནི་ངེས་པར་འབྱེད་པའི་
[174a.6]ཆ་དང་མཐུན་པ་རྣམས་ཀྱིས་སོ། །རྣམ་པར་གྲོལ་བ་ནི་འཕགས་པའི་ལམ་གྱིས་སོ། །དེའི་སྨོན་ལམ་གྱིས་ཡོངས་སུ་བཟུང་བའི་ཕྱིར་ཞེས་བྱ་བ་ནི་ཡིད་ཀྱི་སྨོན་ལམ་གྱིས་ཡོངས་སུ་བཟུང་བའི་ཕྱིར་ཏེ། སྨོན་ལམ་ནི་སེམས་པའི་ཁྱད་པར་ཡིན་ནོ། །ཟས་འགའ་ཙམ་བྱིན་ནས་ཞེས་བྱ་བ་ནི་ལུས་ཀྱི་ལས་ཡིན་ནོ། །
[174a.7]བསླབ་པ་འགའ་ཙམ་ཡང་མནོས་ནས་ཞེས་བྱ་བ་ནི་ངག་གི་ལས་ཡིན་ཏེ། དེ་དག་ཀྱང་ཡིད་ཀྱི་ལས་ཀྱི་ཀུན་ནས་བསླང་བས་ལས་གསུམ་གྱི་རང་བཞིན་ཡིན་ནོ། །འདི་ནི་ཆུང་ངུ་ཟིན་ཀྱང་ཐར་པ་འདོད་པའི་སྟོབས་སྐྱེད་པ་ལས་ཐར་པའི་ཆ་དང་མཐུན་པའི་འཕེན་པར་འགྱུར་རོ། །ཐར་པའི་ཆ་ནི་ཐར་པའི་ཆ་སྟེ་
[174b]
[174b.1]ཐར་པ་འཐོབ་པ་ཡིན་ནོ། །དེ་ལ་ཕན་པ་ནི་ཐར་པའི་ཆ་དང་མཐུན་པ་ཞེས་བྱའོ། །གཞན་ནས་ནི་མ་ཡིན་ཏེ། ཅི་རིགས་པར་ཤེས་རབ་དང་། སྐྱོ་བ་མེད་པའི་ཕྱིར་རོ་ཞེས་བྱ་བ་ནི་རེ་ཞིག་སྒྲ་མི་སྙན་དག་ན་ནི་གཉི་ག་མེད་དོ། །ངན་སོང་དག་ན་ནི་སྐྱོ་བ་ཡོད་ལ་ཤེས་རབ་མེད་དོ། །ལྷ་དག་གི་ནང་ན་ནི་སྐྱོ་བ་
[174b.2]མེད་ལ་ཤེས་རབ་ཡོད་དེ། དེའི་ཕྱིར་མི་རྣམས་ཀྱི་ནང་ཁོ་ན་དང་གླིང་གསུམ་ནས་འཕེན་གྱི་གཞན་ནས་ནི་མ་ཡིན་ནོ། །མངོན་པར་རྟོགས་པའི་རིམ་པར་བཤད་པར་བརྩམས་པ་ཞེས་བྱ་བ་ནི། ཚུལ་གནས་ཐོས་དང་བསམ་ལྡན་པ། །བསྒོམ་པ་ལ་ནི་རབ་ཏུ་སྦྱོར། །ཞེས་བྱ་བ་ནས་བརྩམས་ཏེ། ངེས་པར་
[174b.3]འབྱེད་པའི་ཆ་དང་མཐུན་པའི་གོ་རིམས་དང་། དེའི་ཞར་ལ་ཐར་པའི་ཆ་དང་མཐུན་པ་ཉེ་བར་བཀོད་པ་ཡིན་ནོ། །ཆོས་ཀྱི་བཟོད་པ་ཟག་པ་མེད། །ཅེས་བྱ་བ་ནི་ངེས་པར་འབྱེད་པའི་ཆ་དང་མཐུན་པ་རྣམས་ཀྱིས་ཀྱང་ཆོས་ལ་བཟོད་པས་དེའི་ཕྱིར་རྒྱུ་མཐུན་པས་ཁྱད་པར་དུ་བྱ་སྟེ། གང་གི་རྒྱུ་མཐུན་པ་ཆོས་
[174b.4]ཤེས་པ་ཡིན་པ་དེ་ནི་ཆོས་ཤེས་པའི་བཟོད་པ་ཡིན་ནོ། །ཆོས་ཤེས་པའི་ཕྱིར་བཟོད་པ་ནི་ཆོས་ཤེས་པའི་བཟོད་པ་སྟེ། མེ་ཏོག་དང་འབྲས་བུའི་ཤིང་བཞིན་ནོ་ཞེས་བྱ་བ་ནི་དཔེར་ན་མེ་ཏོག་གི་ཆེད་ཀྱི་ཤིང་ལ་མེ་ཏོག་གི་ཤིང་ཞེས་བྱ་བ་དང་། འབྲས་བུའི་ཆེད་ཀྱི་ཤིང་ལ་འབྲས་བུའི་ཤིང་ཞེས་བྱ་བ་
[174b.5]དང་འདྲའོ། །ཚིག་ལེའུར་བྱས་པ་ལས་ཆོས་ཀྱི་བཟོད་པ་ཞེས་སྨོས་པ་ནི་ཕྱོགས་གཅིག་སྨོས་པའི་ཕྱིར་ཏེ། དཔེར་ན་ལྷས་བྱིན་ལ་ལྷས་བྱིན་ཞེས་བྱ་བ་དང་འདྲའོ། །ཡང་དག་པ་ཉིད་ནི་མདོ་ལས་མྱ་ངན་ལས་འདས་པ་ཡིན་པར་བཤད་དོ་ཞེས་བྱ་བ་ནི་ཡང་དག་པ་ཉིད་གང་ཞེ་ན། གང་ཞིག་འདོད་
[174b.6]ཆགས་ཡོངས་སུ་གཏུགས་ཏེ། སྤངས་པ་དེ་ཡིན་ནོ་ཞེས་བྱ་བ་རྒྱས་པར་འབྱུང་ངོ་། །དེ་ངེས་པ་ནི་ངེས་པ་སྟེ་ཞེས་བྱ་བ་ནི་ཡང་དག་པ་ཉིད་དེར་ངེས་ཤིང་གཅིག་ཏུ་གྱུར་པ་ནི་ངེས་པ་ཞེས་བྱའོ། །དེར་འཇུག་པ་ནི་མངོན་པར་འགྲོ་བ་སྟེ་ཞེས་བྱ་བ་ནི་གཅིག་ཏུ་གྱུར་པ་དེར་འཇུག་པ་ནི་ཕྱིན་པ་སྟེ། དེ་ལྟར་
[174b.7]ན་ཕྱིན་ཅི་མ་ལོག་པར་འཇུག་པའི་ཕྱིར་ངེས་པར་འཇུག་པ་ཞེས་བྱའོ། །དེ་སྐྱེས་ན་ཞེས་བྱ་བ་ནི་ཆོས་ཤེས་པ་ལ་བཟོད་པའོ། །མར་མེ་དང་སྐྱེ་བ་བཞིན་ནོ་ཞེས་བྱ་བ་ནི་མར་མེ་བཞིན་དང་། སྐྱེ་བ་བཞིན་ནོ་ཞེས་བྱ་བའི་ཐ་ཚིག་སྟེ། དཔེར་ན་མར་མེ་མ་འོངས་པ་མུན་པ་བསལ་བར་ནུས་པ་དང་། སྐྱེ་བ་
[175a]
[175a.1]མ་འོངས་པ་བསྐྱེད་པར་བྱ་བ་སྐྱེད་པར་ནུས་པ་དེ་བཞིན་དུ་སྡུག་བསྔལ་ལ་ཆོས་ཤེས་པའི་བཟོད་པ་མ་འོངས་པས་ཀྱང་སོ་སོའི་སྐྱེ་བོ་ཉིད་བཟློག་པར་ནུས་པར་ཁས་ལེན་གྱི་བྱེད་པ་གཞན་ཉོན་མོངས་པ་སྤོང་བ་ནི་མ་ཡིན་ནོ། །གཞན་དག་ན་རེ་འཇིག་རྟེན་པའི་ཆོས་ཀྱི་མཆོག་རྣམས་ཀྱིས་བཟློག་གོ་
[175a.2]ཞེས་ཟེར་རོ་ཞེས་བྱ་བ་ནི་སོ་སོའི་སྐྱེ་བོ་ཉིད་ཟློག་པར་བྱེད་དོ་ཞེས་བྱ་བར་སྐབས་དང་སྦྱར་རོ། །མ་ཡིན་ཏེ་དེའི་ཆོས་ཡིན་པའི་ཕྱིར་རོ་ཞེས་བྱ་བ་ནི་འཇིག་རྟེན་པའི་ཆོས་ཀྱི་མཆོག་རྣམས་ཀྱིས་དེ་ཟློག་པར་བྱེད་དོ་ཞེས་བྱ་བ་དེ་ནི་རིགས་པ་མ་ཡིན་ནོ། །ཅིའི་ཕྱིར་ཞེ་ན་དེ་དག་སོ་སོའི་སྐྱེ་བོའི་ཆོས་ཡིན་ནོ་སོ་སོའི་སྐྱེ་བོའི་
[175a.3]ཆོས་ཀྱིས་སོ་སོའི་སྐྱེ་བོ་ཆོས་ཇི་ལྟར་བཟློག་པར་འགྱུར། དེ་དང་འགལ་བའི་ཕྱིར་ཉེས་པ་མེད་དོ་ཞེས་བྱ་བ་ནི་ཆོས་ཀྱི་མཆོག་རྣམས་ནི་སོ་སོའི་སྐྱེ་བ་ཉིད་དང་འགལ་བའི་ཕྱིར་དེ་ནི་ཉེས་པ་མེད་དོ། །དཔེར་ན་ཅི་དང་འདྲ་ཞེ་ན། དགྲ་བོའི་ཕྲག་པ་ལ་ཞོན་ནས་དེ་ལ་འཚོག་པ་བཞིན་ནོ་ཞེས་བྱ་བ་སྨོས་ཏེ།
[175a.4]དཔེར་ན་འགའ་ཞིག་གིས་དགྲ་བོའི་ཕྲག་པ་ལ་ཞོན་ལ་དགྲ་བོ་ཉིད་ལ་འཚོག་པར་བྱེད་པ་དེ་བཞིན་དུ་ཆོས་ཀྱི་མཆོག་རྣམས་ཀྱིས་ཀྱང་དགྲ་བོ་སོ་སོའི་སྐྱེ་བོ་ཉིད་ཀྱི་ཕྲག་པ་ལ་ཞོན་ཏེ། སོ་སོའི་སྐྱེ་བོ་ཉིད་དེ་ཁོ་ན་ལ་འཇོམས་པར་བྱེད་དོ་ཞེས་གྲག་གོ། །གཞན་དག་ན་རེ་གཉི་གས་ཟློག་སྟེ་ཞེས་བྱ་བ་ནི་སོ་སོའི་སྐྱེ་བོ་
[175a.5]ཉིད་འཇིག་རྟེན་པའི་ཆོས་ཀྱི་མཆོག་རྣམས་དང་། བཟོད་པས་ཀྱང་ཟློག་གོ་ཞེའོ། །ཇི་ལྟ་ཞེ་ན། བར་ཆད་མེད་པ་དང་རྣམ་པར་གྲོལ་བའི་ལམ་དང་ཆོས་མཐུན་པའི་ཕྱིར་རོ་ཞེས་བྱ་བ་སྨོས་ཏེ། འཇིག་རྟེན་པའི་ཆོས་ཀྱི་མཆོག་རྣམས་ནི་བར་ཆད་མེད་པའི་ལམ་དང་ཆོས་མཐུན་པ་ཡིན་ནོ། །བཟོད་པ་ནི་
[175a.6]རྣམ་པར་གྲོལ་བའི་ལམ་དང་ཆོས་མཐུན་པ་ཡིན་ཏེ། དཔེར་ན་བར་ཆད་མེད་པའི་ལམ་གྱིས་ཉོན་མོངས་པ་སྤོང་བར་བྱེད་ལ་རྣམ་པར་གྲོལ་བའི་ལམ་གྱིས་སྤངས་པ་དེ་བཞིན་དུ་འཇིག་རྟེན་པའི་ཆོས་ཀྱི་མཆོག་རྣམས་ཀྱིས་སོ་སོའི་སྐྱེ་བོ་ཉིད་རྣམ་པར་ཉམས་པར་བྱེད་ལ་བཟོད་པས་རྣམ་པར་ཉམས་པ་
[175a.7]ཡིན་ནོ། །དེ་ནི་སྡུག་བསྔལ་ལ་ཆོས་ཤེས་པ་ཞེས་བྱའོ་ཞེས་བྱ་བ་ནི་བསྟན་བཅོས་ལས་མིང་དེས་ཐ་སྙད་འདོགས་སོ་ཞེས་བྱ་བར་སྟོན་ཏེ། ཐམས་ཅད་དུ་ཡང་ཟག་པ་མེད་པའི་སྐབས་ཡིན་ཞེས་བྱ་བ་ནི་དེའི་ཕྱིར། དེ་ནས་ནི་དེ་ཉིད་ལ་ཆོས་ཤེས་ཞེས་བྱ་བ་ཟག་པ་མེད་པར་ཞེས་བྱ་བར་མངོན་ནོ། །
[175b]
[175b.1]སྤྱི་ལ་དམིགས་པ་ཞེས་བྱ་བ་ནི་གཟུགས་དང་གཟུགས་མེད་པ་ན་སྤྱོད་པའི་སྡུག་བསྔལ་ལ་དམིགས་པའི་ཕྱིར་རོ། །དང་པོ་ཉིད་དུ་ཆོས་ཀྱི་དེ་ཁོ་ན་ཉིད་ཤེས་པའི་ཕྱིར་ཞེས་བྱ་བ་ནི་དང་པོ་སྡུག་བསྔལ་ལ་སོགས་པའི་ཆོས་ཀྱི་དེ་ཁོ་ན་ཉིད་ཤེས་པའི་ཕྱིར་ཞེས་བྱ་བའི་ཐ་ཚིག་གོ། །དེའི་རྒྱུ་ལས་བྱུང་བའི་ཕྱིར་
[175b.2]ཞེས་བྱ་བ་ནི་དེའི་རྒྱུ་ཅན་ཡིན་པའི་ཕྱིར་ཞེས་བྱ་བའི་དོན་ཏོ། །དེ་བཞིན་དུ་རྟོགས་པའི་ཕྱིར་རོ་ཞེས་བྱ་བ་ནི་ཇི་ལྟར་ཆོས་ཤེས་པས་སྡུག་བསྔལ་ལ་སོགས་པའི་བདེན་པ་ལ་སྡུག་བསྔལ་ལ་སོགས་པའི་རྣམ་པར་རྟོགས་ཤིང་ཡོངས་སུ་ཤེས་པ་ཁོ་ན་བཞིན་དུ་གཟུགས་དང་གཟུགས་མེད་པ་ན་སྤྱོད་པའི་སྡུག་བསྔལ་ལ་སོགས་
[175b.3]པ་ཡང་རྟོགས་པའི་ཕྱིར་རྗེས་སུ་ཤེས་པ་ཡིན་ནོ། །དེ་བཞིན་དུ་ཞེས་བྱ་བ་རྒྱས་པར་འབྱུང་བ་ནི་དེ་བཞིན་དུ་མཇུག་ཐོགས་སུ་སྐྱེ་བའི་རིམ་གྱིས་གཟུགས་དང་གཟུགས་མེད་པ་ན་སྤྱོད་པའི་ཀུན་འབྱུང་ལྷག་མ་ལ་རྗེས་སུ་ཤེས་པའི་བཟོད་པ་དང་ཞེས་བྱ་བ་རྒྱས་པར་སྦྱར་བར་བྱའོ། །སྡེ་པ་གཞན་ཞེས་བྱ་བ་ནི་
[175b.4]འཕགས་པ་ཆོས་སྲུང་བའི་སྡེ་པ་ལ་སོགས་པའོ། །བྱེ་བྲག་མེད་པར་ནི་མངོན་པར་རྟོགས་པ་ཞེས་བྱའོ་ཞེས་བྱ་བ་ནི། དེ་ལྟར་བདེན་པ་མངོན་རྟོགས་འདི། །སེམས་བཅུ་དྲུག་གོ་ཞེས་བྱ་བ་མཐོང་བའི་མངོན་པར་རྟོགས་པ་དང་། དམིགས་པའི་མངོན་པར་རྟོགས་པ་དང་། བྱ་བའི་མངོན་པར་རྟོགས་
[175b.5]པ་ཡིན་ཏེ། དེ་ལྟར་ན་སེམས་བཅུ་དྲུག་ཅེས་བྱ་བ་ནི་བྱེ་བྲག་མེད་པ་ཡིན་ནོ། །མཐོང་བའི་མངོན་པར་རྟོགས་པ་ཞེས་བྱ་བ་ནི་མཐོང་བ་ཉིད་མངོན་པར་རྟོགས་པ་ཡིན་ཏེ་དམིགས་པའི་མངོན་པར་རྟོགས་པ་དང་། བྱ་བའི་མངོན་པར་རྟོགས་པ་ཡང་དེ་དང་འདྲའོ། །མཐོང་བའི་མངོན་པར་རྟོགས་པ་ནི་ཟག་
[175b.6]པ་མེད་པའི་ཤེས་རབ་ཀྱིས་ཞེས་བྱ་བ་ནི། དགེ་སློང་དག་ཟག་པ་མེད་པའི་ཤེས་རབ་ཀྱིས་མཐོང་བ་གང་ཡིན་པ་དེ་ནི་མཐོང་བའོ་ཞེས་འབྱུང་བས་ཤེས་རབ་ཉིད་མཐོང་བ་ཡིན་ནོ་ཞེས་བྱ་བར་རྣམ་པར་གཞག་གོ། །དམིགས་པ་ཞེས་བྱ་བ་སྨོས་པ་ནི་དེ་དང་མཚུངས་པར་ལྡན་པ་ཚོར་བ་ལ་སོགས་པས་ཀྱང་
[175b.7]མངོན་པར་རྟོགས་པ་ཡིན་ནོ། །ཀྱང་ཞེས་བྱ་བའི་སྒྲས་ནི་ཤེས་རབ་ཀྱིས་ཀྱང་ཡིན་ཏེ། འདི་ལྟར་སེམས་དང་སེམས་ལས་བྱུང་བ་རྣམས་ཀྱིས་བདེན་པ་དག་ལ་དམིགས་པར་བྱེད་དོ། །བྱ་བ་ནི་བདེན་པ་གང་ཞིག་ལ་བྱ་བ་གང་ཡིན་པ་སྟེ། འདི་ལྟ་སྟེ་སྡུག་བསྔལ་ལ་ཡོངས་སུ་ཤེས་པ་དང་། ཀུན་འབྱུང་
[176a]
[176a.1]བ་ལ་སྤང་བ་དང་། འགོག་པ་ལ་མངོན་སུམ་དུ་བྱ་བ་དང་། ལམ་ལ་བསྒོམ་པའོ། །དེ་དང་ལྡན་པ་མ་ཡིན་པ་ཚུལ་ཁྲིམས་དང་། སྐྱེ་བ་ལ་སོགས་པས་ཀྱང་མངོན་པར་རྟོགས་པའོ་ཞེས་བྱ་བ་ལ། ཀྱང་ཞེས་བྱ་བའི་སྒྲས་ནི་ཤེས་རབ་དང་མཚུངས་པར་ལྡན་པ་དག་གིས་ཀྱང་
[176a.2]ཡིན་ཏེ། བྱ་བ་བཞི་པོ་ནི་ཤེས་རབ་དང་མཚུངས་པར་ལྡན་པ་དང་། ལྡན་པ་མ་ཡིན་པ་རྣམས་ཀྱིས་བྱེད་པས་སོ། །སྐྱེ་བ་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་མཚན་ཉིད་གཞན་དང་ཐོབ་པ་རྣམས་ཀྱང་བསྡུའོ། །སྡུག་བསྔལ་མཐོང་ན་ཞེས་བྱ་བ་རྒྱས་པར་འབྱུང་བ་ནི་ཤེས་རབ་
[176a.3]ཀྱིས་སྡུག་བསྔལ་མཐོང་ན་མངོན་པར་རྟོགས་པ་པོའམ། སྡུག་བསྔལ་དེའི་མངོན་པར་རྟོགས་པ་ནི་ཇི་སྐད་བཤད་པ་གསུམ་མོ། །ཀུན་འབྱུང་ཞེས་བྱ་བ་ལ་སོགས་པ་འབྱུང་བ་ནི་ཀུན་འབྱུང་བ་དང་། འགོག་པ་དང་། ལམ་རྣམས་ཀྱི་ནི་བྱ་བའི་མངོན་པར་རྟོགས་པ་ཡིན་ཏེ། སྤོང་བ་དང་
[176a.4]མངོན་སུམ་དུ་བྱེད་པ་དང་། བསྒོམ་པའི་ཕྱིར་རོ། །གོ་རིམས་བཞིན་དུ་ཀུན་འབྱུང་བ་ནི་སྤོང་བ་སྟེ། ཉོན་མོངས་པའི་ཐོབ་པ་ཆད་པའི་ཕྱིར་རོ། །འགོག་པ་ནི་མངོན་སུམ་དུ་བྱེད་དེ། ཐོབ་པ་སྐྱེད་པའི་ཕྱིར་རོ། །ལམ་ནི་བསྒོམ་སྟེ། མངོན་སུམ་དུ་བྱེད་པའི་ཕྱིར་རོ། །རྣམ་པ་ཐ་དད་པའི་
[176a.5]ཕྱིར་ཞེས་བྱ་བ་ནི་སྡུག་བསྔལ་ལ་སོགས་པ་འདི་དག་གི་རྣམ་པ་ནི་རེ་རེ་ཞིང་ཐ་དད་པའི་ཕྱིར་ཏེ། དེ་དག་གི་རྣམ་པའི་ཐ་དད་པས་ཀུན་འབྱུང་བ་ལ་སོགས་པ་སྡུག་བསྔལ་གྱི་རྣམ་པར་མཐོང་བ་ནི་རུང་བ་མ་ཡིན་ནོ། །འོན་ཏེ་སྡེ་པ་གཞན་དག་ཆོས་ཐམས་ཅད་ཀྱི་སྤྱིའི་མཚན་ཉིད་སྟོང་པ་ཉིད་དང་བདག་
[176a.6]མེད་པ་དག་ཉིད་ཡིན་ཞེས་ཏེ། བདེན་པ་ཐམས་ཅད་བདག་མེད་པའི་རྣམ་པར་མཐོང་ངོ་ཞེས་ཟེར་ན་ནི་འོ་ན་ནི་བདེན་པ་རྣམས། སྡུག་བསྔལ་བ་དང་ཀུན་འབྱུང་བ་དང་། འགོག་པ་དང་ལམ་ཞེས་བྱ་བ་ལྟ་བུར་སྡུག་བསྔལ་ལ་སོགས་པར་མཐོང་བར་མི་འགྱུར་རོ། །དེ་ལྟ་ཡིན་ན་ནི་ཐམས་ཅད་བདག་
[176a.7]མེད་པའི་རྣམ་པར་མཐོང་ངོ་ཞེས་སྨྲ་བ་མདོ་དང་འགལ་ཏེ། འདི་ལྟར་མདོ་ལས་ནི་འདི་སྐད་དུ། འཕགས་པ་ཉན་ཐོས་ཞེས་བྱ་བ་རྒྱས་པར་འབྱུང་ངོ་། །འོན་ཏེ་མདོ་དང་འགལ་བ་མེད་དེ། འདི་ལྟར་འཕགས་པ་ཉན་ཐོས་སྡུག་བསྔལ་ལ་སྡུག་བསྔལ་དུ་ཡིད་ལ་བྱེད་པའམ་ཞེས་བྱ་བ་ལ་སོགས་
[176b]
[176b.1]པ་འབྱུང་བ་ནི་མངོན་པར་རྟོགས་པའི་གནས་སྐབས་ཀྱི་སྔོན་རོལ་སྦྱོར་བའི་གནས་སྐབས་ན་ཡིན་ནོ། །དེའི་ཕྱིར་ཐམས་ཅད་བདག་མེད་པའི་རྣམ་པར་མཐོང་བའི་ཕྱིར་མངོན་པར་རྟོགས་པ་ནི་གཅིག་ཁོ་ན་ཡིན་ནོ་སྙམ་དུ་སེམས་ན། ཟག་པ་མེད་པའི་ཡིད་ལ་བྱེད་པ་དང་མཚུངས་པར་ལྡན་པའི་
[176b.2]ཆོས་རྣམས་རྣམ་པར་འབྱེད་པ་གང་ཡིན་པ་ཞེས་འབྱུང་བའི་ཕྱིར་དེ་ཡང་རུང་བ་མ་ཡིན་ཏེ། སྦྱོར་བའི་གནས་སྐབས་ན་ནི་ཟག་པ་མེད་པའི་ཡིད་ལ་བྱེད་པ་མི་སྲིད་དོ། །གལ་ཏེ་འཕགས་པ་ཉན་ཐོས་སྡུག་བསྔལ་ལ་སྡུག་བསྔལ་དུ་ཡིད་ལ་བྱེད་པ་འམ་ཞེས་བྱ་བ་རྒྱས་པར་འབྱུང་བ་གང་ཡིན་པ་དེ་ལྟ་བུ་
[176b.3]ནི་བསྒོམ་པའི་ལམ་ལ་ཡིན་ནོ་ཞེ་ན་མ་ཡིན་ཏེ། ཇི་ལྟར་མཐོང་བ་བཞིན་བསྒོམ་པའི་ཕྱིར་རོ་ཞེས་བྱ་བ་ནི་དེ་ནི་དེ་ལྟ་མ་ཡིན་ཏེ། ཇི་ལྟར་བདེན་པ་རྣམས་སྔར་མཐོང་བ་ཁོ་ན་བཞིན་དུ་ཕྱིས་དེ་དག་བསྒོམ་སྟེ། བསྒོམ་པའི་ལམ་ཡིན་ནོ་ཞེས་བྱ་བའི་ཐ་ཚིག་གོ། །ལྷག་མ་རྣམས་ལ་དབང་ཐོབ་པའི་
[176b.4]ཕྱིར་ཞེས་བྱ་བ་ལ། དབང་ཐོབ་པ་ནི་སྦྱོར་བ་མེད་པར་ཀུན་འབྱུང་བ་ལ་སོགས་པར་མཐོང་བ་མངོན་སུམ་དུ་འགྱུར་བའི་མཐུ་འཐོབ་པ་སྟེ་དེའི་ཕྱིར་རོ། །བར་སྐབས་སུ་ལྡང་བ་ཡོད་དམ་མེད་ཅེས་དཔྱད་པར་བྱ་བ་ཡིན་ནོ་ཞེས་བྱ་བ་ནི་ལྷག་མ་རྣམས་ལ་དབང་ཐོབ་པའི་ཕྱིར་བར་སྐབས་སུ་ལྡང་བར་འགྱུར་བས་
[176b.5]ཉེས་པར་འགྱུར་རོ་སྙམ་དུ་བསམས་པ་ཡིན་ནོ། །གཉི་ག་ལྟར་རྣམ་པར་དཔྱད་ན་ཡང་མདོ་སྡེ་མང་པོ་དང་འགལ་ཏེ། དེ་དག་དང་ཇི་ལྟར་འགལ་བ་དེ་ལྟ་བུ་ནི་ལུང་ལས་མཉན་པར་བྱའོ། །གཅིག་མཐོང་ན་ལྷག་མ་རྣམས་བྱ་བའི་མངོན་པར་རྟོགས་པ་ཡིན་ནོ་ཞེས་འབྱུང་བའི་ཕྱིར་རོ་ཞེས་བྱ་བ་ནི་གང་གི་ཕྱིར་
[176b.6]འདི་སྐད་དུ་སྡུག་བསྔལ་མཐོང་ན་དེའི་མངོན་པར་རྟོགས་པ་ནི་གསུམ་མོ། །ཀུན་འབྱུང་བ་ལ་སོགས་པ་ནི་བྱ་བའི་མངོན་པར་རྟོགས་པ་ཡིན་ཏེ། སྤོང་བ་དང་མངོན་སུམ་དུ་བྱེད་པ་དང་བསྒོམ་པའི་ཕྱིར་རོ་ཞེས་འབྱུང་བ་དེ་ཡོད་པའི་ཕྱིར་ཁོ་བོ་ཅག་ཀྱང་དེ་ལྟར་ཁས་ལེན་པས་ཉེས་པ་མེད་དོ། །སྨྲས་
[176b.7]པ། གལ་ཏེ་ཁས་ལེན་པས་དེ་ལྟར་མངོན་པར་རྟོགས་པ་ཡིན་ན་མདོ་ལས་བདེན་པ་རྣམས་རིམ་གྱིས་མངོན་པར་རྟོགས་པར་འབྱུང་བ་དང་འགལ་ལོ་ཞེ་ན། དེའི་ཕྱིར་མདོ་ལས་མཐོང་བའི་མངོན་པར་རྟོགས་པའི་ཕྱིར་ཞེས་བྱ་བ་རྒྱས་པར་སྨོས་སོ། །དཔེ་དང་བཅས་པའི་མདོ་གསུམ་ཁུངས་སུ་ཡོད་
[177a]
[177a.1]དོ་ཞེས་བྱ་བ་ནི་ཡང་དག་པར་ལྡན་པའི་མདོ་ལས་འབྱུང་བ་ཡིན་ནོ། །ཇི་སྐད་དུ་ཞེ་ན། མགོན་མེད་ཟས་སྦྱིན་གྱིས་གསོལ་བ། བཙུན་པ་ཅི་ལགས། འཕགས་པའི་བདེན་པ་བཞི་པོ་མཐར་གྱིས་མངོན་པར་རྟོགས་སམ། འོན་ཏེ་མངོན་པར་རྟོགས་པ་གཅིག་ལགས། ཁྱིམ་བདག་
[177a.2]འཕགས་པའི་བདེན་པ་བཞི་ནི་མཐར་གྱིས་མངོན་པར་རྟོགས་ཀྱི་མངོན་པར་རྟོགས་པ་གཅིག་པ་ནི་མེད་དོ། །ཁྱིམ་བདག་གང་ཞིག་འདི་སྐད་དུ་བདག་གིས་སྡུག་བསྔལ་འཕགས་པའི་བདེན་པ་མངོན་པར་མ་རྟོགས་པར་ཀུན་འབྱུང་བ་འཕགས་པའི་བདེན་པ་མངོན་པར་རྟོགས་པར་བྱའོ་ཞེས་བྱ་བ་ནས། རྒྱས་
[177a.3]པར་སྡུག་བསྔལ་འགོག་པ་འཕགས་པའི་བདེན་པ་མ་རྟོགས་པར་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་མངོན་པར་རྟོགས་པར་བྱའོ་ཞེས་བྱ་བའི་བར་དུ་སྨྲ་ན། དེ་སྐད་དུ་ནི་མ་སྨྲ་ཤིག་ཅེས་བརྗོད་པར་བྱའོ། །དེ་ཅིའི་ཕྱིར་ཞེ་ན། སྡུག་བསྔལ་འཕགས་པའི་བདེན་པ་
[177a.4]མངོན་པར་མ་རྟོགས་པར་ཀུན་འབྱུང་བ་འཕགས་པའི་བདེན་པ་མངོན་པར་རྟོགས་པར་འགྱུར་བ་གང་ཡིན་པ་དེ་ནི་གནས་མེད་ཅིང་གོ་སྐབས་མེད་དོ་ཞེས་བྱ་བ་ནས་འདི་ནི་གནས་མེད་ཅིང་ཞེས་བྱ་བའི་བར་སྔ་མ་བཞིན་ནོ། །འདི་ནི་གནས་ཡོད་དོ་ཞེས་བྱ་བའི་བར་ཡང་སྔ་མ་བཞིན་ནོ། །ཁྱིམ་བདག་དཔེར་
[177a.5]ན་གང་ཞིག་འདི་སྐད་དུ་བདག་གིས་ཁང་པ་བརྩེགས་མ་འམ། ཁང་པ་བརྩེགས་མ་ཆེན་པོའི་རྨང་ལ་རྐང་པ་མ་བཞག་པར་རྩིག་པ་ལ་གཞག་པར་བྱའོ། །རྩིག་པ་ལ་མ་བཞག་པར་ཕྱམ་སོ་ལ་གཞག་པར་བྱའོ། །ཕྱམ་སོ་ལ་མ་བཞག་པར་གཡོགས་མ་ལ་གཞག་པར་བྱའོ་ཞེས་སྨྲ་ན་དེ་སྐད་
[177a.6]དུ་མ་སྨྲ་ཤིག་ཅེས་བརྗོད་པར་བྱའོ།། །།བམ་པོ་བཞི་བཅུ་རྩ་བདུན་པ། དེ་ཅིའི་ཕྱིར་ཞེ་ན། ཁང་པ་བརྩེགས་མ་འམ་ཞེས་བྱ་བ་ནས་གནས་མེད་ཅིང་གོ་སྐབས་མེད་དོ་ཞེས་བྱ་བའི་བར་སྔ་མ་བཞིན་ནོ། །རྨང་ལ་རྐང་པ་བཞག་ནས་རྩིག་པ་ལ་རྐང་པ་གཞག་གོ་ཞེས་བྱ་བ་ནས་ཕྱམ་སོ་ལ་
[177a.7]རྐང་པ་བཞག་ནས་གཡོགས་མ་ལ་གཞག་གོ་ཞེས་བྱ་བ་གང་ཡིན་པ་དེ་ནི་གནས་ཡོད་དོ་ཞེས་བྱ་བའི་བར་སྔ་མ་བཞིན་ནོ། །ཁྱིམ་བདག་དེ་བཞིན་དུ་སྡུག་བསྔལ་གྱི་བདེན་པ་མ་མཐོང་བར་ཀུན་འབྱུང་བའི་བདེན་པ་མཐོང་བར་འགྱུར་བ་གང་ཡིན་པ་དེ་ནི་གནས་མེད་ཅིང་ཞེས་བྱ་བ་རྒྱས་པར་འབྱུང་བའི་བར་
[177b]
[177b.1]སྔ་མ་བཞིན་ནོ། །དེ་ནས་དགེ་སློང་གཅིག་ཅིག་གིས་གསོལ་པ། བཙུན་པ་ཅི་ལགས། འཕགས་པའི་བདེན་པ་བཞི་པོ་མཐར་གྱིས་མངོན་པར་རྟོགས་སམ། འོན་ཏེ་མངོན་པར་རྟོགས་པ་གཅིག་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་བདེན་པ་བཞི་ནི་ཞེས་བྱ་
[177b.2]བ་ལ་སོགས་པ་སྔ་མ་བཞིན་ནོ། །དགེ་སློང་དཔེར་ན་གང་ཞིག་འདི་སྐད་དུ་བདག་གིས་བང་རིམ་བཞི་ཡོད་པའི་ཐེམ་སྐས་ཐ་མ་ལ་མ་གཟེགས་པར་གཉིས་པ་ལ་འཛེག་པར་བྱའོ། །གཉིས་པ་ལ་མ་གཟེགས་པར་གསུམ་པ་ལ། གསུམ་པ་ལ་མ་གཟེགས་པར་བཞི་པ་ལ་འཛེག་པར་བྱའོ་ཞེས་
[177b.3]སྨྲ་ན་དེ་སྐད་དུ་མ་སྨྲ་ཤིག་ཅེས་བརྗོད་པར་བྱའོ། །དེ་ཅིའི་ཕྱིར་ཞེ་ན། བང་རིམ་བཞི་པའི་ཐེམ་སྐས་ལ་བང་རིམ་ཐ་མ་ལ་མ་གཟེགས་པར་བང་རིམ་གཉིས་པ་ལ་འཛེག་པ་ནས། དེ་བཞིན་དུ་གསུམ་པ་ལ་མ་གཟེགས་པར་བཞི་པ་ལ་འཛེག་པའི་བར་འདི་ནི་གནས་མེད་ཅིང་གོ་སྐབས་མེད་དོ། །དེ་བཞིན་དུ་
[177b.4]འདི་ལ་ཡང་སྡུག་བསྔལ་གྱི་བདེན་པ་མ་མཐོང་བར་ཀུན་འབྱུང་བའི་བདེན་པ་མཐོང་བར་འགྱུར་བ་གང་ཡིན་པ་འདི་ནི་གནས་མེད་དོ་ཞེས་བྱ་བ་ལ་སོགས་པ་འབྱུང་ངོ་། །དེ་བཞིན་དུ་འཕགས་པ་ཀུན་དགའ་བོས་གསོལ་པ། བཙུན་པ་ཅི་ལགས། འཕགས་པའི་བདེན་པ་བཞི་པོ་མཐར་གྱིས་མངོན་
[177b.5]པར་རྟོགས་སམ། འོན་ཏེ་མངོན་པར་རྟོགས་པ་གཅིག་པ་ལགས་ཞེས་བྱ་བ་ལ་སོགས་པ་མདོ་སྔ་མ་བཞིན་ནོ། །ཀུན་དགའ་བོ་དཔེར་ན་གང་ཞིག་འདི་སྐད་དུ་བདག་གིས་གདང་བུ་བཞི་པའི་སྐས་ལ། གདང་བུ་ཐ་མ་ལ་རྐང་པས་མ་གཟེགས་པར་གདང་བུ་གཉིས་པ་ལ་འཛེག་གོ་ཞེས་བྱ་བ་
[177b.6]ནས་དེ་བཞིན་དུ་གདང་བུ་བཞི་པ་ལ་རྐང་པས་མ་གཟེགས་པར་ཁང་བཟངས་ཀྱི་ཐོག་ཏུ་འཛེག་གོ་ཞེས་སྨྲ་ན་དེ་སྐད་དུ་མ་སྨྲ་ཞིག་ཅེས་བརྗོད་པར་བྱའོ་ཞེས་བྱ་བ་ལ་སོགས་པ་རྒྱས་པར་སྔ་མ་བཞིན་ནོ། །ཀུན་དགའ་བོ་གང་ཞིག་འདི་སྐད་དུ་བདག་གིས་སྡུག་བསྔལ་འཕགས་པའི་བདེན་པ་མངོན་
[177b.7]པར་མ་རྟོགས་པར་ཀུན་འབྱུང་བའི་བདེན་པ་མངོན་པར་རྟོགས་པར་བྱའོ་ཞེས་བྱ་བ་ནས་རྒྱས་པར་འདི་ནི་གནས་མེད་དེ་ཞེས་བྱ་བའི་བར་སྔ་མ་བཞིན་ཏེ། མདོ་གསུམ་ནི་འདི་དག་ཡིན་ནོ། །གང་ཞིག་སྡུག་བསྔལ་ལ་ཞེས་བྱ་བ་རྒྱས་པར་འབྱུང་བ་ནི་ཅི་སྟེ་མདོ་ལས། གང་ཞིག་སྡུག་བསྔལ་ལ་
[178a]
[178a.1]ནེམ་ནུར་མེད་ཅིང་ཐེ་ཚོམ་མེད་པ་དེ་ནི་སངས་རྒྱས་ལ་ཡང་ཞེས་གསུངས་པས་མངོན་པར་རྟོགས་པ་གཅིག་གོ་ཞེས་བྱ་བར་འདོད་ནའོ། །ཇི་ལྟ་ཞེ་ན། སངས་རྒྱས་ནི་མི་སློབ་པའི་ཆོས་རྣམས་ཡིན་ལ། མི་སློབ་པའི་ཆོས་དེ་དག་ཀྱང་ལམ་ཡིན་ནོ། །དེ་ལྟ་བས་ན་སྡུག་བསྔལ་མངོན་
[178a.2]པར་རྟོགས་པའི་ཕྱིར་དེས་ལམ་ཡང་མངོན་པར་རྟོགས་པ་ཡིན་ཏེ། །འདི་ལྟར་སྡུག་བསྔལ་བཞིན་དུ་སངས་རྒྱས་ལ་ཡང་ནེམ་ནུར་མེད་ཅིང་ཐེ་ཚོམ་མེད་པས་སོ། །ནེམ་ནུར་དང་། ཐེ་ཚོམ་ཞེས་བྱ་བ་ནི་དོན་ཐ་དད་པ་མ་ཡིན་ནོ། །ཡང་ན་ནེམ་ནུར་ནི་ངེས་པར་མི་འདོད་པ་ཡིན་ནོ། །ཐེ་ཚོམ་ནི་ཇི་སྐད་བཤད་
[178a.3]པའི་མཚན་ཉིད་ཀྱི་ཡིད་གཉིས་ཡིན་ནོ། །མ་ཡིན་ཏེ། ཀུན་དུ་མི་འབྱུང་བ་དང་། གདོན་མི་ཟ་བར་སྤོང་བ་ལས་དགོངས་ཏེ། གསུངས་པའི་ཕྱིར་རོ་ཞེས་བྱ་བ་ནི་ཀུན་དུ་མི་འབྱུང་བ་དང་། གདོན་མི་ཟ་བར་སྤོང་བ་ལས་དགོངས་ཏེ། གསུངས་པའི་ཕྱིར་མདོ་ལས་མངོན་པར་རྟོགས་པ་གཅིག་པའོ་
[178a.4]ཞེས་འབྱུང་ངོ་ཞེས་ཟེར་བ་དེ་ནི་དེ་ལྟ་མ་ཡིན་ཏེ། སྡུག་བསྔལ་མངོན་པར་རྟོགས་ན་ཡང་སངས་རྒྱས་ཀྱི་ཡུལ་ལ་ཐེ་ཚོམ་ཟ་བ་ཀུན་དུ་མི་འབྱུང་བ་དང་གདོན་མི་ཟ་བར་སྤོང་བར་འགྱུར་རོ། །དེའི་ཕྱིར་གང་ཞིག་སྡུག་བསྔལ་ལ་ནེམ་ནུར་མེད་ཅིང་ཐེ་ཚོམ་མེད་པ་དེ་ནི་སངས་རྒྱས་ལ་ཡང་ཞེས་གསུངས་པར་
[178a.5]དགོངས་པ་ཡིན་ནོ། །དེ་དག་ནི་ས་དྲུག་པའོ་ཞེས་སྔར་བཤད་ཟིན་ཏོ་ཞེས་བྱ་བ་ནི། མི་ལྕོགས་པ་མེད་པ་དང་ཁྱད་པར་བསམ་གཏན་ས་པའོ་ཞེས་འབྱུང་བའི་ཕྱིར་རོ། །བར་ཆད་བྱ་བར་མི་ནུས་པའི་ཕྱིར་ཞེས་བྱ་བ་ལ་བར་ཆད་བྱ་བར་ནུས་པ་ནི་བར་ཆད་དོ། །བར་ཆད་མེད་པས་ན་བར་ཆད་མེད་
[178a.6]པའོ། །དེ་དག་གིས་ཉོན་མོངས་པའི་ཐོབ་པ་རྣམ་པར་གཅོད་དེ་དེ་དག་གི་གནས་སྐབས་དེ་ནི་རིང་བ་ཡིན་པར་འདོད་དོ། །བར་ཆད་མེད་པའི་ལམ་ཞེས་བྱ་བ་ལ། བར་ཆད་མེད་པ་ནི་བར་ཆད་མེད་པའི་ངོ་བོ་འམ་བར་ཆད་མེད་པའི་ལམ་མོ། །དེའི་ལམ་ནི་བར་ཆད་མེད་པའི་ལམ་མོ། །རྣམ་པར་
[178a.7]གྲོལ་བའི་ལམ་ཞེས་བྱ་བ་ནི་རྣམ་པར་གྲོལ་བའི་ལམ་ནི་རྣམ་པར་གྲོལ་བའི་ལམ་སྟེ། ཉོན་མོངས་པ་ལས་རྣམ་པར་གྲོལ་བའི་གནས་སྐབས་ཀྱི་ལམ་མོ་ཞེས་བྱ་བའི་ཐ་ཚིག་གོ། །གཉིས་ཀྱིས་རྐུན་པོ་འབྱིན་པ་དང་། སྒོ་གཅོད་པ་བཞིན་ནོ་ཞེས་བྱ་བ་ནི་དཔེར་ན་གཉིས་ལས་གཅིག་གིས་ནི་རྐུན་པོ་
[178b]
[178b.1]ཕྱིར་འབྱིན་པར་བྱེད་ལ། གཉིས་པས་ནི་དེ་ནང་དུ་མི་ཤོར་བར་བྱ་བའི་ཕྱིར་སྒོ་གཅོད་པ་དེ་བཞིན་དུ། བར་ཆད་མེད་པའི་ལམ་གྱིས་ནི་ཉོན་མོངས་པའི་ཆོམ་རྐུན་དེའི་ཐོབ་པ་གཅོད་པའི་སྒོ་ནས་འབྱིན་པར་བྱེད་ལ། རྣམ་པར་གྲོལ་བའི་ལམ་གྱིས་ནི་བྲལ་བའི་ཐོབ་པ་ད་ལྟར་དུ་བྱེད་པའི་སྒོ་ནས་སྒོ་
[178b.2]གཅོད་པར་བྱེད་དོ། །གལ་ཏེ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་བར་ཆད་མེད་པའི་ལམ་གཉིས་པ་སྡུག་བསྔལ་བ་ལ་རྗེས་སུ་ཤེས་པའི་བཟོད་པ་ཁོ་ན་བྲལ་བའི་ཐོབ་པ་ལྷན་ཅིག་སྤྱིའི་སྡུག་བསྔལ་ལ་ཆོས་ཤེས་པ་ནི་མི་སྐྱེ་བ་ཁོ་ན་སྟེ། འདིས་བྱ་དགོས་པ་གང་ཡིན་པ་དེ་ནི་སྡུག་བསྔལ་ལ་རྗེས་སུ་ཤེས་
[178b.3]པའི་བཟོད་པ་ཁོ་ནས་བྱེད་པར་འགྱུར་ན་ཞེས་བསམས་པ་ཡིན་ནོ། །དམིགས་པ་དེ་ཁོ་ན་ལ་ཐེ་ཚོམ་སྤངས་པའི་ཤེས་པ་ཞེས་བྱ་བ་ནི་དམིགས་པ་འདོད་པ་ན་སྤྱོད་པའི་སྡུག་བསྔལ་དེ་ཁོ་ན་ལ་ཐེ་ཚོམ་སྤངས་པའི་ཤེས་པ་སྐྱེ་བར་མི་འགྱུར་རོ། །སྡུག་བསྔལ་དེ་ལ་ཆོས་ཤེས་པའི་བཟོད་པ་ནི་ཐེ་ཚོམ་དང་
[178b.4]བཅས་པ་ཁོ་ནར་འཇུག་སྟེ། ཐེ་ཚོམ་མ་སྤངས་པའི་ཕྱིར་རོ། །སྡུག་བསྔལ་དེ་ལ་རྗེས་སུ་ཤེས་པའི་བཟོད་པ་ཐེ་ཚོམ་སྤངས་པ་ཡིན་ནོ་ཞེས་བྱ་བར་རྣམ་པར་གཞག་པར་ཡང་མི་ནུས་ཏེ་དེའི་ཡུལ་མ་ཡིན་པའི་ཕྱིར་རོ། །གལ་ཏེ་བཟོད་པ་རྣམས་ཀྱིས་ཞེས་བྱ་བ་རྒྱས་པར་འབྱུང་བ་ནི་གལ་ཏེ་བཟོད་པ་རྣམས་
[178b.5]ཀྱིས་ཉོན་མོངས་པ་སྤོང་བའི་ཕྱིར་བསྟན་བཅོས་ལ་ཀུན་དུ་སྦྱོར་བའི་རིས་དགུ་སྟེ། སྡུག་བསྔལ་ལ་ཆོས་ཤེས་པས་སྤང་བར་བྱ་བའི་ཀུན་དུ་སྦྱོར་བའི་རིས་དང་། ཀུན་འབྱུང་བ་ལ་ཆོས་ཤེས་པས་སྤང་བར་བྱ་བ་དང་། འགོག་པ་ལ་ཆོས་ཤེས་པས་སྤང་བར་བྱ་བ་དང་། ལམ་ལ་ཆོས་ཤེས་པས་སྤང་བར་བྱ་བ་དང་
[178b.6]སྡུག་བསྔལ་ལ་རྗེས་སུ་ཤེས་པས་སྤང་བར་བྱ་བ་དང་། ཀུན་འབྱུང་བ་ལ་རྗེས་སུ་ཤེས་པས་སྤང་བར་བྱ་བ་དང་། འགོག་པ་ལ་རྗེས་སུ་ཤེས་པས་སྤང་བར་བྱ་བ་དང་། ལམ་ལ་རྗེས་སུ་ཤེས་པས་སྤང་བར་བྱ་བ་དང་། བསྒོམ་པས་སྤང་བར་བྱ་བའི་ཀུན་དུ་སྦྱོར་བའི་རིས་སོ་ཞེས་འབྱུང་བ་དང་། མདོ་ལས།
[178b.7]དགེ་སློང་དག་དེ་ལྟ་ན་ཉོན་མོངས་པ་རྣམས་ནི་ཤེས་པས་གཞོམ་པར་བྱ་བ་ཡིན་ནོ། །སེམས་ནི་གློག་ལྟ་བུའོ་ཞེས་འབྱུང་བ་གང་ཡིན་པ་དེ་དང་ཡང་འགལ་ཏེ། དེ་ལས་ནི་བཟོད་པས་སྤང་བར་བྱ་བའི་ཀུན་དུ་སྦྱོར་བའི་རིས་མ་བཤད་དོ་ཞེ་ན་མ་ཡིན་ཏེ། བཟོད་པ་རྣམས་ནི་ཞེས་བྱ་བ་རྒྱས་པར་སྨོས་ཏེ།
[179a]
[179a.1]དེ་ནི་དེ་ལྟ་མ་ཡིན་ནོ། །ཅིའི་ཕྱིར་ཞེ་ན། བཟོད་པ་རྣམས་ནི་ཤེས་པའི་འཁོར་ཡིན་པའི་ཕྱིར་ཏེ། བཟོད་པ་རྣམས་ནི་ཤེས་པའི་འཁོར་ཡིན་ནོ། །དེའི་ཕྱིར་བཟོད་པས་སྤང་བར་བྱ་བའི་ཀུན་དུ་སྦྱོར་བའི་རིས་ལ་ཤེས་པས་སྤང་བར་བྱ་བ་ཞེས་བརྗོད་དེ། རྒྱལ་པོས་བྱས་སོ་ཞེས་ཐ་སྙད་
[179a.2]འདོགས་པ་བཞིན་ནོ་དཔེར་ན་རྒྱལ་པོའི་འཁོར་གྱིས་བྱས་པའི་དོན་འགའ་ཞིག་ལ་རྒྱས་པོས་བྱས་སོ་ཞེས་ཐ་སྙད་འདོགས་པ་དེ་དང་འདྲའོ། །བསྒོམ་པས་སྤང་བར་བྱ་བའི་ཀུན་དུ་སྦྱོར་བའི་རིས་ནི་ཤེས་པས་སྤང་བར་བྱ་བ་ཁོ་ན་ཡིན་ཏེ། དེ་ལ་ནི་བར་ཆད་མེད་པའི་ལམ་ཡང་ཤེས་པའི་ངོ་བོ་ཉིད་ཡིན་པས་སོ། །
[179a.3]ཉོན་མོངས་པ་སྤང་བར་བྱ་བ་ལ་ནི་བར་ཆད་མེད་པའི་ལམ་ཁོ་ན་ཁྱད་པར་དུ་གཏོགས་པ་ཡིན་ནོ། །བདེན་པ་མ་མཐོང་བ་མཐོང་བའི་ཕྱིར་རོ་ཞེས་བྱ་བ་ཤེས་པའི་ཚེ་ཇི་ལྟར་བདེན་པ་མ་མཐོང་བ་མཐོང་བ་ཡིན་ཞེ་ན། དེ་ཡང་བདེན་པ་གཞན་མ་མཐོང་བའི་ཚེ་ན་ཡོད་པས་མཐོང་བའི་ལམ་གྱི་བར་ན་ཡོད་པའི་
[179a.4]ཤེས་པ་མཐོང་བའི་ལམ་ཡིན་ཏེ། བརྒྱུད་པ་ལ་བསམས་ནས་དེས་ཀྱང་མཐོང་བ་མཐོང་བ་ཡིན་ནོ། །ཡང་ན་མ་མཐོང་བས་མ་མཐོང་བ་མཐོང་བའི་ཕྱིར་སྐད་ཅིག་མ་བཅོ་ལྔ་ནི་མཐོང་བའི་ལམ་ཡིན་ཏེ། ཇི་སྲིད་དུ་གང་ཟག་འདིའི་མ་མཐོང་བ་མཐོང་བ་འཇུག་པ་དེ་སྲིད་དུ་འདིའི་སྐད་ཅིག་མ་
[179a.5]རྣམས་མཐོང་བའི་ལམ་ཡིན་ནོ། །འདིས་སྡུག་བསྔལ་མཐོང་ཡང་འདི་ལ་ཀུན་འབྱུང་བ་ལ་མ་མཐོང་བ་མཐོང་བ་འཇུག་པ་ཁོ་ནའོ་ཞེས་བྱ་བ་ལ་སོགས་པ་ཡིན་ནོ། །སྐད་ཅིག་མ་བཅུ་དྲུག་པ་ནི་བསྒོམ་པའི་ལམ་ཁོ་ན་ཡིན་ནོ་ཞེས་བྱ་བར་ཚིག་ཁོང་ནས་དྲང་ངོ་། །དེས་ཀྱང་མ་མཐོང་བ་
[179a.6]མཐོང་བ་མ་ཡིན་ནམ་ཞེས་བྱ་བ་ནི་ཅི་ཞིག་མ་མཐོང་ཞེ་ན། ལམ་ལ་རྗེས་སུ་ཤེས་པའི་བཟོད་པ་ཞེས་བྱ་བ་སྨོས་ཏེ། ལམ་ལ་རྗེས་སུ་ཤེས་པའི་བཟོད་པ་ནི་བདག་ཉིད་མ་གཏོགས་པ་ལྷག་མ་རྗེས་སུ་ཤེས་པའི་ཕྱོགས་དང་མཐུན་པའི་ལམ་ལ་དམིགས་པར་བྱེད་དེ། རང་ལ་བདག་ཉིད་བྱེད་པ་ནི་འགལ་བའི་
[179a.7]ཕྱིར་རོ། །དེའི་ཕྱིར་ལམ་ལ་རྗེས་སུ་ཤེས་པའི་བཟོད་པ་མ་མཐོང་བ་མཐོང་ཞེས་བྱའོ། །བདེན་པའི་ཕྱིར་བསམ་གྱི་ཞེས་བྱ་བ་རྒྱས་པར་འབྱུང་བ་ནི་བདེན་པ་ལ་མཐོང་ངམ་མ་མཐོང་ཞེས་བསམ་གྱི་སྐད་ཅིག་མ་མཐོང་ངམ་འོན་ཏེ་མ་མཐོང་ཞེས་བྱ་བ་ནི་མ་ཡིན་ནོ། །ཅིའི་ཕྱིར་ཞེ་ན། སྐད་
[179b]
[179b.1]ཅིག་མ་བཅོ་ལྔ་པས་རྗེས་སུ་ཤེས་པའི་ཕྱོགས་དང་མཐུན་པའི་མཚན་ཉིད་ཀྱིས་བདེན་པ་མཐོང་བ་གང་ཡིན་པ་དེ་ཁོ་ན་བཅུ་དྲུག་པས་ཀྱང་མཐོང་བས་བདེན་པ་སྔོན་མ་མཐོང་བ་མཐོང་བ་མེད་པའི་ཕྱིར་སྐད་ཅིག་མ་བཅུ་དྲུག་པ་མཐོང་བའི་ལམ་ཞེས་བྱ་བ་རྣམ་པར་མི་གཞག་གོ། །ལམ་ལ་རྗེས་སུ་ཤེས་
[179b.2]པའི་བཟོད་པའི་མཚན་ཉིད་ཀྱི་སྐད་ཅིག་མ་གཅིག་མ་མཐོང་བས་ནི་ལམ་གྱི་བདེན་པ་སྟེ་མ་མཐོང་བ་མ་ཡིན་ནོ། །འཇིག་རྟེན་པའི་དཔེ་བསྟན་པར་སྨྲས་པ། དཔེར་ན་ཉག་མ་གཅིག་མ་བརྔས་པས་ཏེ། ཟོར་བས་འབྲུའི་ཉག་མ་གཅིག་མ་བརྔས་ཤིང་མ་བཅད་པ་ཞིང་མ་བརྔས་པ་མ་ཡིན་པ་བཞིན་ནོ། །
[179b.3]འོ་ན་ཅི་ཞེ་ན། བརྔས་པ་ཁོ་ན་ཡིན་ནོ་ཞེས་བྱ་བའི་ཐ་ཚིག་སྟེ། འདི་ལྟར་བག་མེད་པར་གྱུར་པས་ཞིང་ལ་ཉག་མ་གཅིག་ཅིག་མ་བརྔས་ཀྱང་འདི་སྐད་དུ་བདག་ཅག་གིས་ཞིང་བརྔས་སོ་ཞེས་ཟེར་བ་ལྟ་བུའོ། །འབྲས་བུ་ཡིན་པའི་ཕྱིར་དང་ཞེས་བྱ་བ་རྒྱས་པར་འབྱུང་བ་ནི། འབྲས་བུ་ཡིན་པའི་ཕྱིར་
[179b.4]ཞེས་བྱ་བ་ལ་སོགས་པའི་གཏན་ཚིགས་ཀྱིས་སྐད་ཅིག་མ་བཅུ་དྲུག་པ་བསྒོམ་པའི་ལམ་ཁོ་ན་ཡིན་པར་སྒྲུབ་པར་བྱེད་དོ། །སྐད་ཅིག་མ་བཅུ་དྲུག་པ་ནི་བསྒོམ་པའི་ལམ་ཡིན་ཏེ། འདུས་བྱས་ཀྱི་དགེ་སྦྱོང་གི་ཚུལ་གྱི་འབྲས་བུ་ཡིན་པའི་ཕྱིར་ལན་ཅིག་ཕྱིར་འོང་བའི་འབྲས་བུའམ། དགྲ་བཅོམ་
[179b.5]པ་ཉིད་ཀྱི་འབྲས་བུའི་བར་ལྟ་བུའོ། །དེ་བཞིན་དུ་ཤེས་པ་བརྒྱད་དང་རྣམ་པ་བཅུ་དྲུག་ཐོབ་པའི་ཕྱིར་དང་། ཞུགས་པའི་ལམ་རྣམ་པར་ཉམས་པའི་ཕྱིར་དང་། རྒྱུན་ཆགས་པ་ཡིན་པའི་ཕྱིར་བསྒོམ་པའི་ལམ་ཁོ་ན་ཡིན་ཏེ། འབྲས་བུ་གཞན་བཞིན་ནོ། །སྐད་ཅིག་མ་བཅུ་དྲུག་པ་ལ་ནི་སྡུག་བསྔལ་
[179b.6]ལ་ཆོས་ཤེས་པ་ནས་ལམ་ལ་རྗེས་སུ་ཤེས་པའི་བར་ཤེས་པ་བརྒྱད་ཀྱང་འཐོབ་ལ། མི་རྟག་པ་ལ་སོགས་པའི་རྣམ་པ་བཅུ་དྲུག་ཀྱང་འཐོབ་བོ། །མཐོང་བའི་ལམ་ལ་ནི་དེ་ཁོ་ན་བཞིན་དུ་ཤེས་པ་བརྒྱད་དང་། རྣམ་པ་བཅུ་དྲུག་འཐོབ་པ་མེད་དེ། མཐོང་བ་ལ་ནི་བཟོད་པ་དང་། །ཤེས་པ་ཇི་ལྟར་
[179b.7]སྐྱེས་པ་རྣམས། །མ་འོངས་པ་ཐོབ་ཅེས་འབྱུང་བའི་ཕྱིར་དེ་ལ་ནི་ཤེས་པ་དང་རྣམ་པ་སྐལ་བ་མཉམ་པ་ཁོ་ན་འཐོབ་བོ། །ལམ་ལ་རྗེས་སུ་ཤེས་པ་ལ་ནི་ལམ་སྔ་མ་སྟེ། ཞུགས་པའི་ལམ་རྣམ་པར་ཉམས་པ་ཡིན་གྱི་མཐོང་བའི་ལམ་གྱིས་ནི་ལམ་སྔ་མ་རྣམ་པར་ཉམས་པ་མ་ཡིན་ནོ། །ལམ་
[180a]
[180a.1]ལ་རྗེས་སུ་ཤེས་པ་འདི་ནི་རྒྱུན་ཆགས་པ་ཡིན་གྱི། མཐོང་བའི་ལམ་ལ་ནི་བཟོད་པའམ་ཤེས་པའང་རུང་རྒྱུན་ཆགས་པ་ཆུང་ཟད་ཀྱང་མེད་དེ་དེའི་ཕྱིར་ལམ་ལ་རྗེས་སུ་ཤེས་པ་ནི་བསྒོམ་པའི་ལམ་ཡིན་ནོ། །འདོད་ཆགས་དང་བྲལ་བ་ཕྱིར་རྒོལ་བར་བྱེད་དེ། སྐད་ཅིག་
[180a.2]མ་བཅུ་དྲུག་པ་ནི་མཐོང་བའི་ལམ་ཡིན་ཏེ། གདོན་མི་ཟ་བར་ཡོངས་སུ་མི་ཉམས་པའི་ཕྱིར་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་བཞིན་ནོ། །ཡང་ན་ཕྱོགས་སྔ་མ་སུན་འབྱིན་པར་བྱེད་དེ། ཕྱོགས་འདི་ནི་རྗེས་སུ་དཔག་པས་འོངས་པའི་ཆོས་ཀྱི་རང་གི་ངོ་བོ་ལས་བཟློག་
[180a.3]པས་སྐྱོན་ཆགས་པ་ཡིན་ཏེ། བསྒོམ་པའི་ལམ་ཉིད་དུ་བསྒྲུབ་པར་བྱ་བ་ཡིན་ནོ། །ཡང་དེའི་ཡོངས་སུ་མི་ཉམས་པ་ཉིད་ཀྱི་རྗེས་སུ་དཔག་པས་བསལ་བ་ཡིན་ནོ་ཞེ་ན། དེ་ལྟ་བས་ན་རྒོལ་བ་འདིའི་དོགས་པ་བསུ་བར་ཡོངས་སུ་མི་ཉམས་པ་ནི་ཞེས་བྱ་བ་རྒྱས་པར་སྨོས་ཏེ། འདི་ལྟར་མཐོང་བས་སྤང་
[180a.4]བར་བྱ་བའི་ཉོན་མོངས་པ་རྣམས་ཀྱིས་སྤངས་པ་ལམ་ལ་རྗེས་སུ་ཤེས་པ་རྟེན་གྱི་གཉེན་པོས་ཡང་དག་པར་འཛིན་ཏོ། །གལ་ཏེ་ཡང་འབྲས་བུའི་ལམ་སྐད་ཅིག་མ་བཅུ་དྲུག་པ་དེ་ལས་ཡོངས་སུ་ཉམས་པར་འགྱུར་ན་ནི། རྒྱུན་དུ་ཞུགས་པའི་འབྲས་བུ་ལས་ཡོངས་སུ་ཉམས་པར་འགྱུར་བ་
[180a.5]ཞིག་ན། རྒྱུན་དུ་ཞུགས་པའི་འབྲས་བུ་ལས་ནི་ཡོངས་སུ་ཉམས་པ་ཡང་མེད་དེ། དེའི་ཕྱིར་དེ་ལས་ཡོངས་སུ་ཉམས་པར་མི་འགྱུར་རོ། །ཕ་རོལ་པོས་དེ་ཉིད་ཀྱི་ཕྱིར་ཞེས་བྱ་བ་སྨོས་སོ། །དེ་ཅི་ཞིག་ཅེ་ན། ཡོངས་སུ་མི་ཉམས་པའི་གཏན་ཚིགས་ཁོ་ན་སྨྲ་བ་ཡིན། ཁོ་བོ་ཅག་ཀྱང་དོན་འདི་སྨྲ་ན་
[180a.6]དམིགས་པར་འདྲ་བ་ལས་ཅི་སྟེ་འདི་ལན་དུ་རྗོད་པར་བྱེད་ཅེ་ན། སློབ་དཔོན་གྱིས་གལ་ཏེ་དེ་ཉིད་ཀྱི་ཕྱིར་མཐོང་བའི་ལམ་ཡིན་ནོ་ཞེ་ན་ཞེས་བྱ་བ་སྨོས་ཏེ། གལ་ཏེ་གང་གི་ཕྱིར་མཐོང་བས་སྤང་བར་བྱ་བའི་སྤངས་པ་ལམ་ལ་རྗེས་སུ་ཤེས་པས་འཛིན་པ་དེ་ཉིད་ཀྱི་ཕྱིར་མཐོང་བའི་ལམ་ཡིན་ནོ་སྙམ་དུ་
[180a.7]སེམས་ན་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །གལ་ཏེ་ལམ་ལ་རྗེས་སུ་ཤེས་པས་མཐོང་བས་སྤང་བར་བྱ་བའི་སྤངས་པ་ཡང་དག་པར་འཛིན་པས་དེའི་ཕྱིར་མཐོང་བའི་ལམ་དུ་གྱུར་ན། དེ་ལྟ་ཡིན་ན་ནི་ཧ་ཅང་ཐལ་བར་འགྱུར་ཏེ། འདི་ལྟར་ལམ་ལ་རྗེས་སུ་ཤེས་པ་ཕན་
[180b]
[180b.1]ཆད་ཀྱི་བསྒོམ་པའི་ལམ་ཐམས་ཅད་ཀྱིས་མཐོང་བས་སྤང་བར་བྱ་བའི་སྤངས་པ་ཡང་དག་པར་འཛིན་པས་ཐམས་ཅད་མཐོང་བའི་ལམ་ཁོ་ནར་འགྱུར་བ་ཞིག་ན། དེ་ཡང་འདོད་པ་མ་ཡིན་ཏེ། ཁྱེད་ནི་སྐད་ཅིག་མ་བཅུ་དྲུག་ཁོ་ན་མཐོང་བའི་ལམ་ཡིན་པར་འདོད་ཀྱི། རྒྱུན་ཆགས་པའི་ཚུལ་གྱིས་
[180b.2]འབྱུང་བ་སྐད་ཅིག་མ་བཅུ་བདུན་པ་དང་བཅོ་བརྒྱད་པ་ཞེས་བྱ་བ་ལ་སོགས་པ་འམ། ཉི་མ་གཉིས་པ་འམ། གསུམ་པ་ལ་དེ་དང་རིགས་མཐུན་པ་ཁྱད་པར་གྱི་ལམ་གྱིས་བསྡུས་པ་གང་ཡིན་པ་དེ་ནི་མ་ཡིན་ཏེ། དེའི་ཕྱིར་ཡང་ཡོངས་སུ་ཉམས་པ་མེད་དོ། །དེ་ལྟ་མ་ཡིན་ན་གཏན་ཚིགས་
[180b.3]གདོན་མི་ཟ་བར་ཡོངས་སུ་མི་ཉམས་པ་ཉིད་གང་ཡིན་པ་དེ་མ་ངེས་པ་ཡིན་ནོ་ཞེས་བསྟན་པར་འགྱུར་རོ། །དེ་མ་ངེས་པ་ཡིན་པའི་ཕྱིར་དེ་ནི་ཕྱིར་སྒྲུབ་པ་ཡང་མ་ཡིན་ལ། ཕྱོགས་སྔ་མ་སུན་འབྱིན་པ་ཡང་མ་ཡིན་ནོ་ཞེས་བསྟན་ཏོ། །སྨྲས་པ། ཅིའི་ཕྱིར་སྡུག་བསྔལ་ལ་ཆོས་ཤེས་
[180b.4]པ་ནས་ལམ་ལ་ཆོས་ཤེས་པའི་བར་ཤེས་པ་བདུན་མཐོང་བའི་ལམ་ཡིན་ཞེ་ན་ཞེས་བྱ་བ་ནི་བརྒྱད་པ་ལམ་ལ་རྗེས་སུ་ཤེས་པ་ནི་མ་ཡིན་ནོ་སྙམ་དུ་སེམས་པ་ཡིན་ནོ། །མཐོང་བ་མ་རྫོགས་པའི་ཕྱིར་ཞེས་བྱ་བ་ནི་ལམ་ལ་རྗེས་སུ་ཤེས་པའི་བཟོད་པ་ལ་མཐོང་བ་རྫོགས་པ་ཡིན་ཏེ། དེའི་ཚེ་
[180b.5]བདེན་པ་ཐམས་ཅད་མཐོང་བའི་ཕྱིར་རོ། །སྡུག་བསྔལ་ལ་ཆོས་ཤེས་པ་སྐྱེས་པའི་ཚེ་ན་འདོད་པ་ན་སྤྱོད་པའི་སྡུག་བསྔལ་མཐོང་མོད་ཀྱི་རེ་ཞིག་གཟུགས་དང་གཟུགས་མེད་པ་ན་སྤྱོད་པའི་སྡུག་བསྔལ་ལ་སོགས་པ་ནི་མ་མཐོང་ངོ་། །དེ་བཞིན་དུ་ལམ་ལ་ཆོས་ཤེས་པ་སྐྱེས་པའི་བར་དུ་རེ་ཞིག་
[180b.6]གཟུགས་དང་གཟུགས་མེད་པའི་གཉེན་པོ་མ་མཐོང་བས་མཐོང་བ་དེ་ལྷག་མ་དང་བཅས་པ་ཡིན་ཏེ། མ་རྫོགས་པས་དེའི་བར་མར་གྱུར་པའི་ཕྱིར་ཏེ། མཐོང་བའི་ལམ་གྱི་བར་མར་གྱུར་པའི་ཕྱིར་རམ་བཟོད་པ་དེ་གཉིས་ཀྱི་བར་མར་གྱུར་པའི་ཕྱིར་དེ་དག་ཀྱང་མཐོང་བའི་ལམ་ཡིན་ནོ། །རྣལ་
[180b.7]འབྱོར་པ་དེ་བལྟ་བར་བྱ་བ་ལྷག་མ་ལ་འདོད་པ་དང་བཅས་པའི་ཕྱིར་རོ་སྙམ་དུ་བསམས་པ་ཡིན་ནོ། །སྔོན་གཞན་གྱི་དྲིང་གིས་ཏེ་གཞན་གྱི་ལུང་གིས་དོན་གྱི་རྗེས་སུ་འབྲང་བའི་ཕྱིར་ཏེ། སྡུག་བསྔལ་ལ་སོགས་པའི་བདེན་པ་རྟོགས་པའི་ཕྱིར་རོ་ཞེས་བྱ་བའི་ཐ་ཚིག་གོ། །སྔོན་ཞེས་བྱ་བའི་
[181a]
[181a.1]ཁྱད་པར་སྨོས་པ་ནི་བསྒོམ་པའི་ཚེ་ནི་གཞན་གྱི་ལུང་ལ་མི་ལྟོས་པས་དོན་གྱི་རྗེས་སུ་འབྲང་ངོ་ཞེས་བསྟན་པ་ཡིན་ནོ། །ཆོས་ཀྱི་རྗེས་སུ་འབྲང་བ་ཡང་དེ་དང་འདྲ་སྟེ་ཞེས་བྱ་བ་ནི་ཆོས་དག་གི་རྗེས་སུ་འབྲང་བས་ན་ཆོས་ཀྱི་རྗེས་སུ་འབྲང་བའོ། །དེ་འདི་ལ་ཡོད་པས་སམ་འདི་ཆོས་
[181a.2]ཀྱི་རྗེས་སུ་འབྲང་བའི་ངང་ཚུལ་ཅན་ཡིན་པས་ན་ཆོས་ཀྱི་རྗེས་སུ་འབྲང་བའོ། །སྔོན་བདག་ཉིད་ཁོ་ནས་མདོ་ལ་སོགས་པ་གསུང་རབ་ཀྱི་ཡན་ལག་བཅུ་གཉིས་ཀྱི་ཆོས་ཀྱི་དོན་གྱི་རྗེས་སུ་འབྲང་བའི་ཕྱིར་ཏེ། སྔ་མ་བཞིན་དུ་རྣམ་པར་བཤད་དོ། །རྣམ་པ་ལྔའི་བར་དུ་སྤངས་པ་ཞིག་ཡིན་ན་ཡང་ཞེས་བྱ་
[181a.3]བ་ལ། བར་དུ་ཞེས་བྱ་བའི་སྒྲས་ནི་གལ་ཏེ་རྣམ་པ་གཅིག་གམ། གཉིས་སམ། གསུམ་མམ། བཞིའམ། ལྔ་སྤངས་པ་ཞིག་ཡིན་ན་ཡང་ཇི་ལྟར་འཆིང་བ་མཐའ་དག་དང་ལྡན་པ་དེ་ཁོ་ན་བཞིན་དུ་དང་པོའི་འབྲས་བུ་ལ་ཞུགས་པ་དག་ཅེས་བྱའོ། །གཉིས་པ་ལ་དགུ་པ་ཚུན་ཆད་ཟད་པ་
[181a.4]ཡིན་ཞེས་བྱ་བ་ལ། གཉིས་པ་ལ་ཞེས་བྱ་བ་ནི་གཉིས་པའི་ཕྱིར་ཞེས་བྱ་བའི་ཐ་ཚིག་སྟེ། དཔེར་ན་པགས་པའི་ཕྱིར་གུང་གསོད་དོ་ཞེས་བྱ་བ་ལྟ་བུའོ། །དགུ་པ་ཚུན་ཆད་ཟད་པ་ཡིན་ཞེས་བྱ་བ་ནི་རྣམ་པ་དགུ་སྤངས་པ་མན་ཆད་དེ་དོན་གྱིས་ན་རྣམ་པ་དགུ་སྤངས་པ་མ་གཏོགས་པ་ཞེས་བཤད་དོ། །གལ་ཏེ་
[181a.5]གང་ཟག་དེ་གཉིས་ཀྱིས་རྣམ་པ་ལྔ་པ་སྤངས་པ་དེ་ཡན་ཆད་རྣམ་པ་དྲུག་གམ་བདུན་ནམ་བརྒྱད་ཅིག་སྔོན་འཇིག་རྟེན་པའི་ལམ་གྱིས་སྤངས་པ་ཡིན་ན་ནི་དེ་གཉིས་འབྲས་བུ་གཉིས་པ་ལ་ཞུགས་པ་ཞེས་བྱ་སྟེ། གཉིས་པ་ལ་ཞེས་འབྱུང་བའི་ཕྱིར་དང་། ཞུགས་པ་དག་ཅེས་བྱ་བའི་སྐབས་ཀྱང་ཡིན་
[181a.6]པའི་ཕྱིར་ཚིག་གི་དོན་དེ་ལྟར་རྣམ་པར་གཞག་པར་འགྱུར་རོ། །ཡང་ན་གོང་མ་ལས་ཞེས་བྱ་བ་ནི་བསམ་གཏན་དང་པོ་ལས་འདོད་ཆགས་དང་བྲལ་བ་ནས་ཅི་ཡང་མེད་པའི་སྐྱེ་མཆེད་ཀྱི་བར་ལས་འདོད་ཆགས་དང་བྲལ་བ་དག་གོ། །དགྲ་བཅོམ་པ་ཉིད་ནི་དང་པོ་ཉིད་དུ་ཐོབ་པར་མི་ནུས་ཞེས་བྱ་བ་
[181a.7]ནི་ཕྱིར་མི་འོང་བའི་འབྲས་བུ་མ་ཐོབ་པར་དང་པོ་ཁོ་ནར་དགྲ་བཅོམ་པ་ཉིད་ཐོབ་པར་ནི་མི་ནུས་སོ། །ཅིའི་ཕྱིར་ཞེ་ན། མཐོང་བའི་ལམ་གྱིས་བསྒོམ་པས་སྤང་བར་བྱ་བ་མི་སྤོང་བའི་ཕྱིར་ཞེས་བྱ་བ་སྨོས་ཏེ། གང་གིས་ན་མཐོང་བའི་ལམ་གྱི་ངོ་བོ་ཉིད་ཀྱིས་སྐད་ཅིག་མ་བཅོ་ལྔ་ལ་གནས་པ་འབྲས་
[181b]
[181b.1]བུ་གསུམ་པ་ལ་ཞུགས་པའི་སྔོན་རོལ་དུ་དགྲ་བཅོམ་པ་ཉིད་ཀྱི་འབྲས་བུ་མངོན་དུ་བྱ་བའི་ཕྱིར་ཞུགས་པར་འགྱུར་ཞིང་སེམས་བཅུ་དྲུག་པ་སྐྱེས་ན་ཕྱིར་མི་འོང་བའི་སྔོན་རོལ་དུ་དགྲ་བཅོམ་པར་འགྱུར་བ། སྲིད་པའི་རྩེ་མོ་པའི་བསྒོམ་པས་སྤང་བར་བྱ་བ་སྤངས་པ་ནི་མེད་དོ། །དགྲ་བཅོམ་པ་ཉིད་ནི་
[181b.2]སྲིད་པའི་རྩེ་མོ་བསྒོམ་པས་སྤང་བར་བྱ་བ་སྤངས་པ་ལ་རྣམ་པར་གཞག་གོ། །སྨྲས་པ། གལ་ཏེ་མཐོང་བའི་ལམ་གྱིས་སྲིད་པའི་རྩེ་མོ་པའི་བསྒོམ་པས་སྤང་བར་བྱ་བ་རྣམས་སྤོང་བ་མེད་པས་དེའི་ཕྱིར་དགྲ་བཅོམ་པ་ཉིད་ཐོབ་པར་མི་ནུས་ན། འོ་ན་ནི་དང་པོ་སོ་སོའི་སྐྱེ་བོ་གནས་སྐབས་ཁོ་ན་ན་
[181b.3]བསྒོམ་པའི་ལམ་གྱིས་སྲིད་པའི་རྩེ་མོ་ལས་འདོད་ཆགས་དང་བྲལ་བའི་ཕྱིར་དེ་དག་ལ་གནས་པ་དགྲ་བཅོམ་པ་ཉིད་ཀྱི་འབྲས་བུ་མངོན་དུ་བྱ་བའི་ཕྱིར་ཞུགས་པ་ཡིན་པར་འགྱུར་ལ། སེམས་ཀྱི་སྐད་ཅིག་མ་བཅུ་དྲུག་པ་ལ་ནི་དང་པོ་དགྲ་བཅོམ་པ་ཉིད་ཡིན་ནོ་ཞེ་ན་དེའི་ཕྱིར་སྔར་ཡང་སྲིད་པའི་
[181b.4]རྩེ་མོ་ལས་འདོད་ཆགས་དང་བྲལ་བ་མི་སྲིད་པའི་ཕྱིར་རོ་ཞེས་བྱ་བ་སྨོས་ཏེ། སྔོན་སོ་སོའི་སྐྱེ་བོའི་གནས་སྐབས་ན་ནི་འཇིག་རྟེན་པའི་ལམ་གྱིས་སྲིད་པའི་རྩེ་མོ་ལས་འདོད་ཆགས་དང་འབྲལ་བ་མི་སྲིད་དེ། གོང་ན་ས་མེད་པའི་ཕྱིར་རོ། །དེ་ལྟ་བས་ན་དང་པོ་ཉིད་དུ་དགྲ་བཅོམ་པ་ཉིད་
[181b.5]ལ་ཞུགས་པ་དང་དགྲ་བཅོམ་པར་རྣམ་པར་མ་བཞག་གོ། །དད་པ་དང་ཤེས་རབ་ལྷག་པས་མོས་པ་དང་མཐོང་བས་རབ་ཏུ་ཕྱེ་བའི་ཕྱིར་རོ་ཞེས་བྱ་བ་ནི་དད་པ་ལྷག་པས་མོས་པས་རབ་ཏུ་ཕྱེ་བའི་ཕྱིར་དད་པས་མོས་པ་སྟེ། དད་པ་ལྷག་པས་མོས་པའི་ཕྱིར་རོ། །དེ་ལ་ཤེས་རབ་མེད་པ་ནི་མ་ཡིན་
[181b.6]མོད་ཀྱི་དེས་རབ་ཏུ་མ་ཕྱེ་བས་དེའི་མིང་མི་འགྲུབ་བོ། །ཤེས་རབ་ལྷག་པས་ལྟ་བས་རབ་ཏུ་ཕྱེ་བའི་ཕྱིར་མཐོང་བས་ཐོབ་པ་སྟེ། དེ་ལ་དད་པ་མེད་པ་ནི་མ་ཡིན་མོད་ཀྱི་ཞེས་བྱ་བ་སྔ་མ་བཞིན་དུ་བརྗོད་པར་བྱའོ། །གཞན་དག་ནི་ངེས་པའི་ཚིག་གི་ཚུལ་ལ་དམིགས་ནས་རྣམ་པར་འཆད་པར་
[181b.7]བྱེད་དེ། དད་པའི་དབང་གིས་མཐོང་བས་སྤང་བར་བྱ་བ་དག་ལས་གྲོལ་བས་ན་དད་པའི་དབང་གིས་གྲོལ་བ་ཡིན་ནོ། །ལྟ་བའི་དབང་གིས་འབྲས་བུ་ཐོབ་པས་ན་མཐོང་བས་ཐོབ་པ་ཡིན་ནོ་ཞེའོ། །རྣམ་ལྔའི་བར་བཅོམ་ཞེས་བཤད་པ་དེའི་ཕྱིར། ཅིའི་ཕྱིར་ཞེས་བྱ་བ་རྒྱས་པར་
[182a]
[182a.1]འདྲི་བར་བྱེད་དོ། །འབྲས་བུ་ཁྱད་པར་ཅན་གྱི་ལམ་མི་ཐོབ་པོ་ཞེས་བྱ་བ་ནི་བསྒོམ་པས་སྤང་བར་བྱ་བའི་རྣམ་པ་དང་པོ་ལ་སོགས་པའི་གཉེན་པོའི་ལམ་མི་བསྒོམ་མོ་ཞེས་བྱ་བའི་ཐ་ཚིག་གོ། །ཇི་སྲིད་ཁྱད་པར་དུ་བྱ་བའི་ཕྱིར་འབྲས་བུ་གཞན་ཐོབ་པར་བྱ་བ་ལ་མི་བརྩོན་པ་ཞེས་བྱ་བ་ནི་ཇི་སྲིད་དུ་
[182a.2]ཉོན་མོངས་པ་མ་སྤངས་པ་སྤང་བའི་ཕྱིར་འབྲས་བུ་གཞན་ཐོབ་པར་བྱ་བའི་ཆེད་དུ་སྦྱོར་བ་གཞན་མི་བྱེད་པ་དེ་སྲིད་དུ་ཞུགས་པ་ཞེས་མི་བྱའོ། །ཤུགས་ཀྱིས་ན་གང་གི་ཚེ་རབ་ཏུ་སྦྱོར་བ་དེའི་ཚེ་ནི་ཞུགས་པ་ཡིན་ནོ་ཞེས་བཤད་པར་འགྱུར་ཏེ། གྲུབ་པའི་མཐའ་ལས་དེ་སྔོན་ཉོན་མོངས་པ་སྤངས་པའི་གཉེན་པོ་སྔར་མ་ཐོབ་
[182a.3]པ་དང་། དེའི་སྤངས་པའི་ཟག་པ་མེད་པ་ཡང་སྐྱེའོ་ཞེས་འབྱུང་བས་སོ། །དེ་བཞིན་དུ་འབྲས་བུ་གཞན་ལ་ཡང་སྦྱར་བར་བྱའོ་ཞེས་བྱ་བ་ནི་སེམས་ཀྱི་སྐད་ཅིག་མ་བཅུ་དྲུག་པ་ལ་རྒྱུན་དུ་ཞུགས་པ་ཁོ་ན་ཡིན་ནོ་ཞེས་འབྱུང་བས་རྒྱུན་དུ་ཞུགས་པ་བཤད་ཟིན་ཏོ། །དེའི་ཕྱིར་གཞན་ལན་ཅིག་ཕྱིར་
[182a.4]འོང་བའི་འབྲས་བུ་དང་ཕྱིར་མི་འོང་བའི་འབྲས་བུ་ལ་ཡང་རིག་པར་བྱ་སྟེ། འཇིག་རྟེན་པའི་ལམ་གྱིས་རྣམ་པ་དྲུག་སྤངས་ཀྱང་སེམས་བཅུ་དྲུག་པ་ལ་ལན་ཅིག་ཕྱིར་འོང་བ་ཁོ་ནའོ་ཞེས་བྱའི། ཕྱིར་མི་འོང་བའི་འབྲས་བུ་ལ་ཞུགས་པ་ནི་མ་ཡིན་ཏེ། གང་གི་ཕྱིར། འབྲས་ཐོབ་འབྲས་བུ་ཁྱད་
[182a.5]པར་གྱི། །ལམ་ཐོབ་མེད་པས་ཞེས་འབྱུང་བའི་ཕྱིར་རོ། །དེ་བཞིན་དུ་འདོད་པའམ་ཡང་ན་གོང་མ་ལས་འདོད་ཆགས་དང་བྲལ་བ་ཡང་སེམས་བཅུ་དྲུག་པ་ལ་དགྲ་བཅོམ་པ་ཉིད་ཀྱི་འབྲས་བུ་ལ་ཞུགས་པ་ཞེས་མི་བྱ་སྟེ། གང་གི་ཕྱིར། འབྲས་ཐོབ་འབྲས་བུ་ཁྱད་པར་གྱི། །ཞེས་བྱ་བ་
[182a.6]སྔ་མ་བཞིན་ནོ། །གང་ཞིག་བསམ་གཏན་གསུམ་པ་ལས་འདོད་ཆགས་དང་བྲལ་ལ་ཞེས་བྱ་བ་རྒྱས་པར་འབྱུང་བ་ནི་བསམ་གཏན་གསུམ་པ་ལས་འདོད་ཆགས་དང་བྲལ་བ་ཞིག་ས་འོག་མ་ལ་བརྟེན་ཏེ། མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་ནམ། བསམ་གཏན་
[182a.7]དང་པོའམ། གཉིས་པ་ལ་བརྟེན་ཏེ་ངེས་པར་འཇུག་པ་ཞེས་བྱ་བ་ནི་སྲིད་པ་ཡོད་དེ། དེ་ནི་གདོན་མི་ཟ་བར་གང་ལས་བསམ་གཏན་གསུམ་པས་བསྡུས་པའི་ཟག་པ་མེད་པའི་བདེ་བའི་དབང་པོ་ཐོབ་པར་འགྱུར་བ་འབྲས་བུ་ཁྱད་པར་ཅན་གྱི་ལམ་བསམ་གཏན་གསུམ་པས་བསྡུས་པ་མངོན་
[182b]
[182b.1]དུ་བྱེད་དོ། །འདིས་འབྲས་བུ་ཁྱད་པར་ཅན་གྱི་ལམ་མངོན་དུ་བྱེད་པར་འགྱུར་བ་གང་ཡིན་པ་དེ་ནི་སྲིད་པ་ཡོད་དེ། འདི་ལྟར་ན་འདིས་བསམ་གཏན་གསུམ་པའི་ས་པའི་ཉོན་མོངས་པ་སྤངས་པས་སོ། །དེའི་ཕྱིར་གདོན་མི་ཟ་བར་འབྲས་བུ་ཁྱད་པར་ཅན་གྱི་ལམ་མངོན་དུ་བྱེད་དོ་ཞེས་བྱ་བར་ངེས་པར་
[182b.2]བྱེད་པ་ཡིན་ནོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་མངོན་དུ་མི་བྱེད་ན་ཞེས་བྱ་བའི་ཐ་ཚིག་གོ། །དེའི་གོང་དུ་སྐྱེས་པ་དེ་ཞེས་བྱ་བ་ནི་འཕགས་པ་སྟེ། བསམ་གཏན་གསུམ་པ་དེའི་གོང་བསམ་གཏན་བཞི་པའམ། གཟུགས་མེད་པ་དག་ཏུ་སྐྱེས་པ་བདེ་བའི་དབང་པོ་དང་མི་ལྡན་པར་འགྱུར་རོ། །
[182b.3]ཟག་པ་དང་བཅས་པའི་བདེ་བའི་དབང་པོ་གང་ཡིན་པ་དེ་ནི་ས་འཕོས་ནས་གཏོང་ངོ་། །ཟག་པ་མེད་པ་གང་ཡིན་པ་དེ་ཡང་གལ་ཏེ་མངོན་སུམ་དུ་མ་བྱས་པར་གྱུར་ན་བདེ་བའི་དབང་པོ་གཉི་ག་དང་ཡང་མི་ལྡན་པར་འགྱུར་བ་ཞིག་ན་བདེ་བའི་དབང་པོ་དང་ནི་བསམ་གཏན་བཞི་པ་དང་། གཟུགས་མེད་པར་སྐྱེས་པའི་
[182b.4]སོ་སོའི་སྐྱེ་བོ་མི་ལྡན་གྱི་འཕགས་པ་ནི་ལྡན་ནོ་ཞེས་འབྱུང་བའི་ཕྱིར་དང་གང་ཞིག་ཡིད་བདེ་བའི་དབང་པོ་དང་ལྡན་པ་དེ་ནི་གདོན་མི་ཟ་བར་བཏང་སྙོམས་དང་། སྲོག་དང་། ཡིད་དང་། བདེ་བ་དང་། ཡིད་བདེ་བ་ཞེས་བྱ་བ་ལྔ་དང་ལྡན་ནོ་ཞེས་བྱ་བ་ལ་སོགས་པ་འབྱུང་བའི་ཕྱིར་གོང་དུ་སྐྱེས་པའི་འཕགས་
[182b.5]པ་ཡང་གདོན་མི་ཟ་བར་བདེ་བའི་དབང་པོ་དང་ཡང་ལྡན་པར་བཤད་དོ། །འདིར་སྨྲས་པ། ཕྱོགས་འདི་ནི་རྣམ་པར་བཤད་པའི་ནང་དུ་བྲིས་པ་ཡོད་མོད་ཀྱི། དེ་ནི་གཞག་པའི་ཕྱོགས་མ་ཡིན་པར་མངོན་ཏེ། གཞན་དག་ན་རེ་ནི་ཞེས་འབྱུང་བའི་ཕྱིར་རོ། །བསམ་གཏན་བཞི་པ་ཐོབ་པ་གང་ཞིག་ས་དྲུག་
[182b.6]ལས་གང་ཡང་རུང་བ་ཞིག་ལ་བརྟེན་ཏེ་ངེས་པར་འཇུག་པ་དེ་ནི་སེམས་བཅུ་དྲུག་པ་ལ་ཕྱིར་མི་འོང་བའི་འབྲས་བུ་མི་ལྕོགས་པ་མེད་པའི་ས་པ་ནས་བསམ་གཏན་བཞི་པའི་ས་པའི་བར་ས་དྲུག་པ་དང་ལྡན་པ་ཡིན་ཏེ། དེ་ལྟར་འདོད་ཆགས་དང་བྲལ་བའི་ཕྱིར་རོ། །གང་ཞིག་བསམ་གཏན་གསུམ་
[182b.7]པ་ཐོབ་པ་དེ་ནི་བསམ་གཏན་བཞི་པའི་ས་པ་མ་གཏོགས་པ་ས་ལྔ་པ་དང་ལྡན་ནོ། །བསམ་གཏན་གཉིས་པ་ཐོབ་ལ་གསུམ་པ་མ་ཐོབ་པ་དེ་ནི་གསུམ་པ་དང་། བཞི་པའི་ས་པ་མ་གཏོགས་པ་བཞི་པ་དང་ལྡན་ནོ། །འདོད་ཆགས་དང་བྲལ་བ་བསམ་གཏན་དང་པོ་ཐོབ་ལ་གཉིས་པ་མ་ཐོབ་
[183a]
[183a.1]པ་གང་ཡིན་པ་དེ་ནི་གལ་ཏེ་ཕྱིར་མི་འོང་བའི་འབྲས་བུ་ཐོབ་ན་དེ་ཕྱིར་མི་འོང་བའི་འབྲས་བུ་མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་དང་། བསམ་གཏན་དང་པོའི་ས་པ་སྟེ། ས་གསུམ་དང་ལྡན་ནོ། །ཕྱིར་མི་འོང་བ་ཐམས་ཅད་ཀྱི་ཐ་ཤལ་བ་
[183a.2]ཡང་གདོན་མི་ཟ་བར་དེ་ལྟར་ཕྱིར་མི་འོང་བའི་འབྲས་བུ་ས་གསུམ་པ་དང་ལྡན་ནོ་ཞེས་བརྗོད་དོ། །དེ་ལྟ་བས་ན་སློབ་དཔོན་གྱིས་གཞན་གྱི་ཕྱོགས་ལ་ལྟོས་པས་དེ་སྐད་དུ་བཤད་པས་རིགས་པ་ཡིན་ནོ། །རེ་ཞིག་ཕལ་ཆེར་ལས་དང་འདོད་པ་ལས་འདོད་ཆགས་དང་བྲལ་བ་རྣམས་ཀྱི་ཞེས་
[183a.3]བྱ་བ་ནི་ཕལ་ཆེར་ལས་འདོད་ཆགས་དང་བྲལ་བ་རྣམས་དང་། འདོད་པ་ལས་འདོད་ཆགས་བྲལ་བ་རྣམས་ཀྱི་སྟེ། དེ་ལ་ཕལ་ཆེར་ལས་འདོད་ཆགས་དང་བྲལ་བ་ནི་གང་གིས་སྔར་རྣམ་པ་བདུན་ནམ་བརྒྱད་སྤངས་པ་ཡིན་ནོ། །གང་གི་ས་སྔར་རྣམ་པ་དགུ་སྤངས་པ་དེ་ནི་འདོད་པ་ལས་
[183a.4]འདོད་ཆགས་དང་བྲལ་བ་ཡིན་ནོ། །ཕལ་ཆེར་ལས་འདོད་ཆགས་དང་བྲལ་བ་རྣམས་ཀྱི་གང་ཟག་རྣམ་པར་གཞག་པ་ནི་གཉིས་པ་ལ། དགུ་པ་ཚུན་ཆད་ཟད་པ་ཡིན། །ཞེས་འབྱུང་བའི་ཕྱིར་རོ། །འདོད་པ་ལས་འདོད་ཆགས་དང་བྲལ་བ་རྣམས་ཀྱི་ནི། འདོད་པའམ་ཡང་ན་གོང་མ་ལས།
[183a.5]ཆགས་བྲལ་ཞེས་འབྱུང་བའི་ཕྱིར་རོ། །ཇི་ལྟར་འདོད་པའི་ཁམས་ཀྱི་ཞེས་བྱ་བ་ནི། རྣམ་ལྔའི་བར་བཅོམ་གཉིས་པ་ལ། །དགུ་པ་ཚུན་ཆད་ཟད་པ་ཡིན། །འདོད་པའམ་ཡང་ན་གོང་མ་ལས། །ཆགས་བྲལ་ཞེས་འབྱུང་བའི་འདོད་པའི་ཁམས་ཀྱི་ཉོན་མོངས་པ་རྣམ་པ་དགུ་པ་བསྟན་
[183a.6]པ་ལྟར་རོ། །གོས་ལས་ཞེས་བྱ་བ་ནི་བགོ་བ་ལས་སོ། །འདི་ནི་དཔེའི་རྣམ་པ་ཡིན་ནོ་ཞེས་བྱ་བ་ནི་དཔེའི་ཚུལ་ཡིན་ནོ། །གཞན་དག་ན་རེ་དཔེའི་རྣམ་པ་ཞེས་བྱ་བ་ནི་དཔེའི་རྣམ་པ་ཡིན་ནོ་ཞེས་ཟེར་ཏེ། དེ་ལྟར་ཚུལ་འདིས་སམ་རྣམ་པ་འདིས་དཔེ་གཞན་ཡང་བརྗོད་པར་བྱའོ་ཞེས་སྟོན་པར་
[183a.7]བྱེད་དོ། །དེ་ལྟ་མ་ཡིན་ན་འདི་ནི་དཔེ་ཡིན་ནོ་ཞེས་དེ་སྐད་དུ་བརྗོད་པར་འགྱུར་རོ། །འཁོར་བ་ཐོག་མ་མེད་པ་ཞེས་བྱ་བ་ནི་འཁོར་བ་ཐོག་མ་མེད་པ་ན་སྟེ། བརྒྱུད་པས་སྤེལ་བ་ནི་མངོན་པར་སྤེལ་བའོ། །དེ་དག་ལ་བདག་ཉིད་ཀྱིས་ཚད་ཆེན་པོ་ཡོད་པས་ན་ཆེན་པོའོ། །ཉོན་མོངས་པ་དེ་རྣམས་
[183b]
[183b.1]ཐོབ་པ་གཅོད་པའི་སྒོ་ནས་རྩ་བ་ནས་མེད་པར་བྱེད་པའི་ཕྱིར་རོ། །ཐོབ་པ་རྣམས་ནི་རྩ་བ་དང་ཆོས་མཐུན་པ་ཡིན་ཏེ། དེ་ལས་ཉོན་མོངས་པ་རྣམས་རྒྱུན་ཆགས་པའི་ཕྱིར་རོ། །སྨན་ཏྲི་བྲིད་ཐུན་གཅིག་གིས་འབྱིན་པ་ལྟ་བུ་ཞེས་བྱ་བ་ནི། དཔེར་ན། སྨན་ཏྲི་བྲིད་སྲང་ལ་བཅལ་བའི་ཞོ་གཅིག་གིས་
[183b.2]རླུང་ལས་གྱུར་པ་དང་། མཁྲིས་པ་ལས་གྱུར་པ་ལ་སོགས་པ་ཡུན་རིང་མོ་ནས་བསགས་པའི་སྐྱོན་རྣམས་སེལ་བ་དེ་བཞིན་དུ་འཕགས་པའི་ལམ་ཆུང་ངུས་ཀྱང་ཉོན་མོངས་པ་རྣམས་དེ་དང་འདྲའོ། །ཡང་དཔེར་ན་མར་མེ་སྐད་ཅིག་མ་ཆུང་ངུས་མུན་པ་ཆེན་པོ་འཇོམས་པ་ལྟར་ཉོན་མོངས་པ་རྣམས་
[183b.3]ཀྱང་དེ་དང་འདྲའོ། །དེ་མཆོག་ཏུ་ཐོགས་ན་སྲིད་པ་ལན་བདུན་ཞེས་བྱ་བ་ནི་དེ་རབ་ཏུ་ཐོགས་ན་སྲིད་པ་ལན་བདུན་དུ་ཟད་ཀྱི་ཕན་ཆད་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་ནས་དེར་འགྲོ་བའི་ཕྱིར་རོ་ཞེས་བྱ་བ་ནི་ལམ་དེ་ལས་མྱ་ངན་ལས་འདས་པར་འགྲོ་བའི་ཕྱིར་རོ་ཞེས་བྱ་བའི་དོན་ཏེ།
[183b.4]འཇིག་རྟེན་ན་ཡང་རྒྱུན་གྱི་ནང་ནས་འགྲོ་བའི་ཕྱིར་རོ། །གལ་ཏེ་ལམ་དང་པོ་ཐོབ་པའི་ཕྱིར་རོ་ཞེ་ན་ཞེས་བྱ་བ་ལ། ཟག་པ་མེད་པའི་ལམ་དང་པོ་ནི་མཐོང་བའི་ལམ་ཡིན་ཏེ། གལ་ཏེ་དེ་ཐོབ་པའི་ཕྱིར་རོ་ཞེ་ན། བརྒྱད་པ་ཡང་རྒྱུན་དུ་ཞུགས་པ་ཡིན་པར་འགྱུར་ཏེ། རྒྱུན་དུ་ཞུགས་པའི་
[183b.5]འབྲས་བུ་ལ་ཞུགས་པ་ཡང་ཡིན་པར་འགྱུར་རོ་ཞེས་བྱ་བའི་ཐ་ཚིག་གོ། །འདི་ལྟར་དགྲ་བཅོམ་པ་ནས་བཟུང་སྟེ་ལུགས་ལས་བཟློག་པའི་རིམ་གྱིས་བགྲང་ན་དགྲ་བཅོམ་པ་དང་། དགྲ་བཅོམ་པ་ལ་ཞུགས་པ་ལ་སོགས་པ་སྐྱེས་བུ་གང་ཟག་བརྒྱད་ཀྱི་ནང་ན་རྒྱུན་དུ་ཞུགས་པའི་འབྲས་
[183b.6]བུ་ལ་འཇུག་པ་དད་པས་རྗེས་སུ་འབྲང་བ་དང་། ཆོས་ཀྱིས་རྗེས་སུ་འབྲང་བ་བརྒྱད་པ་ཡིན་ཏེ། དེས་ཀྱང་ལམ་དང་པོ་ཐོབ་པའི་ཕྱིར་དེ་ཡང་རྒྱུན་དུ་ཞུགས་པ་ཡིན་པར་འགྱུར་རོ། །གལ་ཏེ་འབྲས་བུ་དང་པོ་ཐོབ་པའི་ཕྱིར་རོ་ཞེ་ན་ཞེས་བྱ་བ་ནི། འོན་ཏེ་འབྲས་བུ་དང་པོ་ཐོབ་
[183b.7]པའི་ཕྱིར་རྒྱུན་དུ་ཞུགས་པའོ་ཞེས་བྱ་བར་འདོད་ན་ནི་ཕལ་ཆེར་ལས་འདོད་ཆགས་དང་བྲལ་བ་ཡང་ཡིན་པར་འགྱུར་ཏེ། ཉོན་མོངས་པ་རྣམ་པ་དྲུག་སྤངས་པ་ལ་གནས་པ་གང་ཞིག་སྐད་ཅིག་མ་བཅུ་དྲུག་པ་ལ་ལན་ཅིག་ཕྱིར་འོང་བ་ཡིན་པ་དེ་ཡང་རྒྱུན་དུ་ཞུགས་པ་ཡིན་པར་འགྱུར་ཏེ། དེས་
[184a]
[184a.1]ཀྱང་སྔོན་མ་ཐོབ་པའི་འབྲས་བུ་ཐོབ་པའི་ཕྱིར་རོ། །དེ་བཞིན་དུ་འདོད་པ་ལས་འདོད་ཆགས་དང་བྲལ་བ་ཡང་ཡིན་པར་འགྱུར་ཏེ། དེའི་འབྲས་བུ་དེ་ནི་དང་པོ་ཡིན་པས་སོ། །ད་ནི་ལན་བརྗོད་པར་བྱ་སྟེ། འབྲས་བུ་ཐམས་ཅད་འཐོབ་པའི་དབང་དུ་བྱས་ནས་འབྲས་བུ་དང་པོ་འཐོབ་
[184a.2]པའི་ཕྱིར་རོ་ཞེས་བྱ་བ་སྨོས་སོ། །འབྲས་བུ་ཐམས་ཅད་ཅེས་བྱ་བ་ནི་རྒྱུན་དུ་ཞུགས་པའི་འབྲས་བུ་ལ་སོགས་པ་བཞིའོ། །འདི་ནི་དེ་དག་འཐོབ་པའི་ངང་ཚུལ་ཅན་ཡིན་པས་འབྲས་བུ་འཐོབ་པའམ། འདི་ལ་འབྲས་བུ་ཐམས་ཅད་འཐོབ་པ་ཡོད་པས་ན་འབྲས་བུ་ཐམས་ཅད་འཐོབ་པའོ། །དེའི་དབང་དུ་བྱས་
[184a.3]ནས་དེ་ལས་བསམས་ནས་འབྲས་བུ་དང་པོ་འཐོབ་པའི་ཕྱིར་ཏེ། སྔོན་མ་ཐོབ་པའི་འབྲས་བུ་འཐོབ་པའི་ཕྱིར་རྒྱུན་དུ་ཞུགས་པ་ཞེས་བྱའོ། །ཅིའི་ཕྱིར་ཞེས་བྱ་བ་རྒྱས་པར་འབྱུང་བ་ནི། ཅིའི་ཕྱིར་དེ་ཁོ་ན་ལ་རྒྱུན་དུ་ཞུགས་པ་ཞེས་བྱའི། བརྒྱད་པ་ནི་མ་ཡིན་ཏེ། དེ་ཡང་འཕགས་པའི་ལམ་གྱི་རྒྱུན་ལ་ནི་ཞུགས་
[184a.4]སོ་ཞེ་ན། ཞུགས་པ་དང་འབྲས་བུའི་ལམ་ཐོབ་པའི་ཕྱིར་རོ་ཞེས་བྱ་བ་རྒྱས་པར་སྨོས་ཏེ། འདི་ལྟར་འབྲས་བུ་ཐམས་ཅད་འཐོབ་པ་དེས་ནི་ཞུགས་པའི་ལམ་སྐད་ཅིག་མ་བཅོ་ལྔའི་ངོ་བོ་ཉིད་ཀྱང་ཐོབ་ལ། བསྒོམ་པའི་ལམ་སྐད་ཅིག་མ་བཅུ་དྲུག་གི་མཚན་ཉིད་ཀྱང་ཐོབ་ཀྱི། བརྒྱད་པས་ནི་ཞུགས་པའི་
[184a.5]ལམ་ཁོ་ན་ཐོབ་པར་ཟད་པས་སོ། །མཐོང་བ་དང་བསྒོམ་པའི་ལམ་ཐོབ་པ་འདིའི་ཕྱིར་ཡང་སྟེ། འདི་ལྟར་དེས་ནི་མཐོང་བའི་ལམ་དེ་ཁོ་ན་དང་། བསྒོམ་པའི་ལམ་དེ་ཁོ་ན་ཡང་ཐོབ་ཀྱི་བརྒྱད་པས་ནི་མཐོང་བའི་ལམ་ཁོ་ན་ཐོབ་པས་སོ། །ལམ་ལ་རྗེས་སུ་ཤེས་པས་རྒྱུན་ཐམས་ཅད་མངོན་པར་རྟོགས་
[184a.6]པའི་ཡང་ཕྱིར་ཏེ། འདི་ལྟར་འདིས་ནི་ལམ་ལ་རྗེས་སུ་ཤེས་པའི་བཟོད་པའི་མཚན་ཉིད་ཀྱང་མཐོང་བས་རྒྱུན་ཐམས་ཅད་མངོན་པར་རྟོགས་པ་ཡིན་གྱི་བརྒྱད་པས་ནི་མ་ཡིན་ནོ། །དེ་ལྟ་བས་ན་རྒྱུ་དེ་དག་གིས་ན་འབྲས་བུ་ཐམས་ཅད་འཐོབ་པ་ཁོ་ན་ལ་རྒྱུན་དུ་ཞུགས་པ་ཞེས་བྱའི། བརྒྱད་པ་ལ་ནི་མ་
[184a.7]ཡིན་ནོ། །མཆོག་ཏུ་གྱུར་པའི་ཕྱིར་དེ་སྐད་ཅེས་བརྗོད་དེ། དཔེར་ན་འཇིག་རྟེན་ན་ཡང་གང་ཞིག་མཆོག་ཏུ་གསལ་བར་བྱེད་པ་དེ་ལ་ཉི་མ་ཞེས་བྱའི། སྲིན་བུ་མེ་ཁྱེར་ལ་ནི་མ་ཡིན་པ་དེ་དང་འདྲའོ། །དེ་ལས་གཞན་པ་ཞེས་བྱ་བ་ནི་དེའི་ཚེ་སྲིད་པ་དེ་ལས་གཞན་པའོ། །གནས་བདུན་ལ་མཁས་པ་ཞེས་
[184b]
[184b.1]བྱ་བ་དང་། འདབ་མ་བདུན་པ་ཞེས་བྱ་བ་བཞིན་ནོ་ཞེས་བྱ་བ་ནི་དཔེར་ན་བདུན་ཚན་དུ་མཐུན་པའི་ཕྱིར་མདོ་ལས་དགེ་སློང་གནས་བདུན་ལ་མཁས་པ་ཞེས་བཤད་པ་ལྟ་བུའོ། །ཇི་ལྟ་ཞེ་ན་རྒྱས་པར་བཤད་ནས་བཀའ་སྩལ་པ། དགེ་སློང་དག་ཇི་ལྟར་ན་དགེ་སློང་གནས་བདུན་ལ་མཁས་པ་
[184b.2]ཡིན་ཞེ་ན། གཟུགས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །གཟུགས་ཀུན་འབྱུང་བ་དང་། གཟུགས་འགོག་པ་དང་། གཟུགས་འགོག་པར་འགྲོ་བའི་ལམ་དང་། གཟུགས་ཀྱི་རོ་མྱང་བ་དང་། གཟུགས་ཀྱི་ཉེས་དམིགས་དང་། ངེས་པར་འབྱུང་བ་ཡང་དག་པ་ཇི་ལྟ་བ་
[184b.3]བཞིན་རབ་ཏུ་ཤེས་སོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ་ཞེས་བྱ་བ་ནས་རྣམ་པར་ཤེས་པ་ཀུན་འབྱུང་བ་ཞེས་བྱ་བ་རྒྱས་པར་ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་
[184b.4]སོ་ཞེས་བྱ་བའི་བར་དུ་འབྱུང་ངོ་། །དེ་ལྟར་ན་ཚུལ་འདིས་བདུན་ཚན་ལྔ་ནི་སུམ་ཅུ་རྩ་ལྔ་ཡིན་པས་སུམ་ཅུ་རྩ་ལྔ་ལ་མཁས་པ་ཡིན་ནོ། །ལོ་མ་བདུན་པ་ཞེས་བྱ་བ་དང་ཡང་འདྲ་སྟེ། དཔེར་ན་ལོ་མ་རེ་རེ་ལ་འདབ་མ་བདུན་ཡོད་པར་འདྲ་བའི་ཕྱིར། འདབ་མ་བརྒྱ་ཕྲག་དུ་མ་ཞིག་ཡོད་ཀྱང་
[184b.5]ཤིང་དེ་ལ་ལོ་མ་བདུན་པ་ཞེས་བྱ་བ་དེ་དང་འདྲའོ། །དཔེ་གཉིས་ཉེ་བར་བཀོད་པའི་དགོས་པ་ནི་དཔེ་དང་པོ་ནི་གསུང་རབ་ལ་གྲུབ་པ་ཡིན་ལ། གཉིས་པ་ནི་འཇིག་རྟེན་ན་གྲགས་པས་སོ། །གལ་ཏེ་བདུན་ཚན་དུ་མཐུན་པའི་ཕྱིར་རེ་ལྟར་ཐོགས་ན་སྲིད་པ་ལན་བདུན་པ་ཡིན་ནོ་ཞེས་
[184b.6]འཆད་ན། འོ་ན་གང་མདོ་ལས་གསུངས་པ་དེ་དང་འགལ་ཏེ། དེའི་ཕྱིར་བཤད་པ་འདི་ནི་ངན་ཏོ་སྙམ་དུ་བསམས་པ་ཡིན་ནོ། །འགྲོ་བ་གཅིག་ཏུ་སྲིད་པ་བརྒྱད་པ་མངོན་པར་མི་འགྲུབ་ཀྱི། འགྲོ་བ་གཞན་དུ་ནི་མངོན་པར་འགྲུབ་པར་འགྱུར་བས་འགལ་བ་མེད་དོ། །འོན་ཏེ་ལྷ་
[184b.7]རྣམས་དང་མིའི་ནང་དུ་ལན་བདུན་འཁོར་ཞིང་སོང་ནས་སྡུག་བསྔལ་གྱི་མཐར་བྱེད་དོ་ཞེས་འབྱུང་བ་སྒྲ་ཇི་བཞིན་དུ་བརྟགས་ན་ནི་ལྷ་དང་མི་ཞེས་འབྱུང་བའི་ཕྱིར་སྲིད་པ་བར་མ་ཡང་ཡོད་པར་མི་འགྱུར་བ་ཞིག་ན། ལྷ་དང་མིའི་འགྲོ་བ་དག་ཏུ་སྲིད་པ་བདུན་མངོན་པར་འགྲུབ་ཀྱི། སྲིད་པ་
[185a]
[185a.1]བར་མ་རྣམས་ནི་མ་བགྲངས་སོ་ཞེས་བྱ་བར་ཡང་འདོད་དོ། །གལ་ཏེ་སྲིད་པ་བར་མ་རྣམས་དང་བཅས་ཏེ་སྲིད་པ་བདུན་དུ་བགྲང་བར་གྱུར་ན་ནི་དེའི་སྐྱེ་བ་བཞི་ཁོ་ནར་འགྱུར་རོ། །དེ་ལྟར་ན་མི་འདོད་པར་འགྱུར་བའི་ཚིག་འདིས་ནི་བདག་ཉིད་ཀྱི་རྣམ་པར་བཤད་པ་
[185a.2]འགྲོ་བ་གཅིག་ཏུ་དགོངས་པ་ཡིན་ནོ་ཞེས་བྱ་བ་དེ་གཞུང་འཛུགས་པར་བྱེད་དོ། །ཅིག་ཤོས་ཀྱིས་དེ་ལྟར་ཡང་སྲིད་པའི་རྩེ་མོའི་བར་དུ་གོང་དུ་འཕོ་བ་ཞེས་བྱ་བ་རྒྱས་པར་སྨྲས་ཏེ། གལ་ཏེ་འགྲོ་བ་གཅིག་ཏུ་སྲིད་པ་བརྒྱད་པ་མངོན་པར་མི་འགྲུབ་པའི་ཕྱིར་རོ་ཞེས་རྣམ་པར་འཆད་པར་
[185a.3]བྱེད་ན། འོ་ན་ཇི་ལྟར་གོང་དུ་འཕོ་བ་འགྲོ་བ་གཅིག་ཏུ་སྲིད་པ་བརྒྱད་པ་མངོན་པར་འགྲུབ་པར་འགྱུར། དེ་འཕར་ཕྱེད་འཕར་ཐམས་ཅད་དུ། །འཆི་འཕོ་གཞན་སྲིད་རྩེ་མོར་འགྲོ། །ཞེས་འབྱུང་བའི་ཕྱིར་འོག་མིན་གྱི་བར་དུ་གོང་དུ་འཕོ་བ་ལ་ཡང་སྲིད་པ་བརྒྱད་པ་མངོན་པར་འགྲུབ་
[185a.4]པ་སྲིད་ན། ཅིའི་ཕྱིར་སྲིད་པའི་རྩེ་མོའི་བར་དུ་ཞེས་བྱ་བ་ཁྱད་པར་དུ་སྨོས་ཤེ་ན། དེ་ཡང་བརྗོད་པར་བྱ་བ་ནི་ཡིན་མོད་ཀྱི་བསམ་པ་ནི་སྲིད་པའི་མཆོག་བརྗོད་པར་འདོད་ནས་སྲིད་པའི་རྩེ་མོའི་བར་དུ་གོང་དུ་འཕོ་བ་སྨོས་པ་ཡིན་ནོ་ཞེས་བྱ་བར་མངོན་ནོ། །འདོད་པའི་ཁམས་ལས་དགོངས་
[185a.5]ཏེ་གསུངས་པའི་ཕྱིར་ཉེས་པ་མེད་དོ་ཞེས་བྱ་བ་ནི་འགྲོ་བ་གཅིག་པོ་མིའི་འགྲོ་བའམ་ལྷའི་འགྲོ་བ་གང་ཡིན་པ་དེར་སྲིད་པ་བརྒྱད་པ་མངོན་པར་མི་འགྲུབ་ཀྱི་གཟུགས་དང་གཟུགས་མེད་པའི་ཁམས་དག་ཏུ་ནི་མ་ཡིན་ནོ། །དེ་ནི་འདོད་པའི་ཁམས་ལས་དགོངས་ཏེ་གསུངས་སོ་ཞེས་
[185a.6]བྱ་བ་ནི་འདི་ལ་ཤེས་པར་བྱེད་པ་མདོའམ་རིགས་པ་ཅི་ཞིག་ཡོད་ཅེས་བྱ་བ་ལ་མདོ་ནི་ལུང་ངོ་། །རིགས་པ་ནི་དོན་རྗེས་སུ་དཔོག་པའོ། །གང་གིས་འདི་ལ་ཤེས་པར་བྱེད་པ་མདོའམ་རིགས་པ་ཅི་ཞིག་ཡོད་ཅེས་གླེངས་པ་དེ་ཉིད་ཀྱིས་ཡང་ལྷ་དང་མི་དག་གི་ནང་དུ་སོ་སོར་ཞེས་བྱ་བ་རྒྱས་
[185a.7]པར་སྨོས་ཏེ། ལྷ་དང་མི་དག་གི་ནང་སོ་སོར་ལན་བདུན་དུ་འཁོར་གྱི་ལྷ་དང་མི་གཉི་གའི་ནང་དུ་ནི་མ་ཡིན་ནོ་ཞེས་བྱ་བ་ལ་ཡང་ཤེས་པར་བྱེད་པ་ཅི་ཞིག་ཡོད། འདི་སྐད་དུ་གང་ཞིག་མི་རྣམས་ཀྱི་ནང་དུ་བདེན་པ་མཐོང་བ་དེ་ནི་ལྷ་རྣམས་ཀྱི་ནང་དུ་ལན་གསུམ་དུ་འཁོར་ལ་མི་རྣམས་ཀྱི་ནང་དུ་ཡང་
[185b]
[185b.1]ལན་གསུམ་ཁོ་ན་འཁོར་ནས་དེ་ནས་ལྷ་རྣམས་ཀྱི་ནང་དུ་འོངས་ཏེ་ཡོངས་སུ་མྱ་ངན་ལས་འདའོ། །གང་ཞིག་ལྷ་རྣམས་ཀྱི་ནང་དུ་བདེན་པ་མཐོང་བ་དེ་ཡང་དེ་ཁོ་ན་བཞིན་དུ་མི་རྣམས་ཀྱི་ནང་དུ་ལན་གསུམ་འཁོར་ལ། ལྷ་རྣམས་ཀྱི་ནང་དུ་ཡང་ལན་གསུམ་ཁོ་ན་འཁོར་ནས་དེ་ནས་མི་རྣམས་ཀྱི་ནང་དུ་
[185b.2]འོངས་ཏེ། ཡོངས་སུ་མྱ་ངན་ལས་འདའོ་ཞེས་སྨྲས་པ་ཡིན་ནོ། །འདི་སྐད་དུ་ལྷ་དང་མི་རྣམས་ཀྱི་ནང་དུ་ལན་བདུན་ཞེས་འབྱུང་ངོ་ཞེས་བྱ་བ་ནི་སྤྱིའི་ངོ་བོར་འབྱུང་གི་ཁྱད་པར་དུ་བྱས་ནས་སོ་སོར་ཞེས་ནི་མི་འབྱུང་ངོ་ཞེས་བྱ་བའི་ཐ་ཚིག་གོ། །དེ་ལྟར་བྱེ་བྲག་ཏུ་སྨྲ་བའི་ཕྱོགས་ཐེ་ཚོམ་དང་བཅས་པའི་གནས་
[185b.3]སྐབས་སུ་བྱས་པ་དང་། སློབ་དཔོན་གྱིས་གཞུང་གཟུགས་པའི་ཕྱིར་འོད་སྲུངས་པ་རྣམས་ཞེས་བྱ་བ་རྒྱས་པར་སྨོས་ཏེ། འོད་སྲུངས་པ་རྣམས་ཞེས་བྱ་བ་ནི་སྡེ་པ་གཞན་དག་གོ། །དེ་དག་ནི་འདི་སྐད་དུ། ལྷ་རྣམས་སུ་ལན་བདུན་མི་རྣམས་སུ་ལན་བདུན་ཞེས་འདོན་ཏེ། དེ་ལྟར་ན་སོ་སོ་ཞེས་བྱ་
[185b.4]བའི་དོན་དུ་འགྱུར་རོ། །དེ་ལྟ་བས་ན་འདིས་ནི་འདོད་པའི་ཁམས་ལས་དགོངས་ཏེ་གསུངས་སོ་ཞེས་བྱ་བ་འདི་ལ་ཤེས་པར་བྱེད་པ་མདོའམ་རིགས་པ་ཅི་ཞིག་ཡོད་ཅེས་གང་སྨྲས་པ་དང་། ལྷ་དང་མི་དག་གི་ནང་དུ་སོ་སོར་ལན་བདུན་སྐྱེའི་གཉི་གའི་ནང་དུ་ལན་བདུན་མ་ཡིན་པ་ཉིད་དོ་ཞེས་བྱ་བ་
[185b.5]འདི་ལ་ཡང་ཤེས་པར་བྱེད་པ་ཅི་ཞིག་ཡོད་ཅེས་སྨྲས་པ་གཉི་གའི་ལན་ཡང་བཏབ་པ་ཡིན་ཏེ། སོ་སོར་ཡིན་པའི་དོན་སྨོས་པ་ཁོ་ནས་འདོད་པའི་ཁམས་ལ་དགོངས་པར་ཡང་བསྟན་པ་ཡིན་ཏེ། གཟུགས་དང་གཟུགས་མེད་པའི་ཁམས་དག་ཏུ་ལྷ་དང་མི་རྣམས་ཀྱི་ནང་དུ་ལན་བདུན་
[185b.6]འཁོར་བར་རུང་བ་མ་ཡིན་ཏེ། དེར་སྐྱེས་པའི་ཕྱིར་མི་འོང་བ་རྣམས་མིའི་ནང་དུ་མི་འོང་བའི་ཕྱིར་རོ། །རིགས་པ་ཡང་དེ་ཉིད་ཀྱི་ཕྱིར་ཁོང་དུ་ཆུད་པར་བྱེད་དེ། གང་དུ་རེ་ལྟར་ཐོགས་ན་སྲིད་པ་ལན་བདུན་པར་བཤད་པའི་ས་དེ་ཁོ་ནར་སྲིད་པ་བརྒྱད་པ་བཀག་པར་ཟད་ཀྱི་གཞན་དུ་ནི་མ་
[185b.7]ཡིན་ནོ། །དེ་བས་ན་འདི་ལ་ཡང་ཤེས་པར་བྱེད་པ་ཅི་ཞིག་ཡོད་ཅེས་འདི་ལ་མངོན་པར་ཞེན་པར་མི་བྱའོ། །དེ་འདྲ་སྟེ་ཞེས་བྱ་བ་ནི་གང་གིས་ན་དུས་དེ་སྲིད་ཀྱིས་གདོན་མི་ཟ་བར་རྒྱུད་ཡོངས་སུ་སྨིན་པའི་ཕྱིར་སྲིད་པ་བརྒྱད་མངོན་པར་མི་འགྲུབ་པ་དེ་ལྟ་བུ་ཡིན་ནོ། །སྦྲུལ་གོམ་པ་བདུན་
[186a]
[186a.1]པས་ཟིན་པ་ལྟ་བུ་ཞེས་བྱ་བ་ནི་དཔེར་ན་སྦྲུལ་གོམ་པ་བདུན་པ་ཞེས་བྱ་བ་དེས་ཟིན་ན་གོམ་པ་བདུན་བོར་ནས་འཆིའི་ཕན་ཆད་དུ་ཡང་མ་ཡིན་ལ་ཚུན་ཆད་དུ་ཡང་མ་ཡིན་ཏེ། དུག་གི་རིགས་དེ་དེ་ལྟ་བུ་ཡིན་པ་དང་། རིམས་ཉིན་བཞི་པ་བཞིན་ཏེ། དཔེར་ན་རིམས་ཉིན་བཞི་
[186a.2]པ་ནི་ཉི་མ་བཞི་ཞིང་འདེབས་ཀྱི་ཕན་ཆད་ཀྱང་མ་ཡིན་ལ་ཚུན་ཆད་ཀྱང་མ་ཡིན་ཏེ། ནད་ཀྱི་རིགས་དེ་དེ་ལྟ་བུ་ཡིན་པ་དེ་དང་འདྲའོ། །ཐ་མའི་ཆ་དང་མཐུན་པ་གཉིས། །ཞེས་བྱ་བ་ནི་འདོད་པ་ལ་འདུན་པ་དང་། གནོད་སེམས་དག་སྟེ། འདོད་པ་ལས་འདོད་ཆགས་དང་མ་བྲལ་བའི་ཕྱིར་དེ་
[186a.3]གཉིས་ཡོད་དོ། །གོང་མའི་ཆ་དང་མཐུན་པ་ལྔ། །ཞེས་བྱ་བ་ན་གཟུགས་དང་གཟུགས་མེད་པ་ལས་སྐྱེས་པའི་འདོད་ཆགས་གཉིས་དང་། རྒོད་པ་དང་། ང་རྒྱལ་དང་། གཏི་མུག་གོ། །དེའི་ཕྱིར་ཚུན་ཆད་དུ་ཡང་མྱ་ངན་ལས་འདས་པ་མི་འཐོབ་ལ་སྲིད་པ་བརྒྱད་པ་ཡང་མངོན་པར་
[186a.4]འགྲུབ་པར་མི་འགྱུར་རོ། །སློབ་དཔོན་འདུས་བཟངས་ན་རེ། ཀུན་དུ་སྦྱོར་བ་བདུན་ལུས་པའི་ཕྱིར་རོ་ཞེས་བྱ་བ་དེ་ནི་གཏན་ཚིགས་སུ་མི་རུང་སྟེ། གོང་མའི་ཆ་དང་མཐུན་པ་རྣམས་ནི་ས་གོང་མ་པ་ཡིན་པའི་ཕྱིར་འདོད་པའི་ཁམས་སུ་སྐྱེ་བ་འགྲུབ་པར་བྱེད་མི་ནུས་སོ་ཞེས་ཟེར་རོ། །གཏན་ཚིགས་
[186a.5]དེ་སྨྲ་བ་ན་རེ་ཡང་དེ་དགས་གོང་མ་ཡིན་མོད་ཀྱི་དེ་དག་གི་ཐོབ་པའི་མཐུས་སྲིད་པ་དེ་སྙེད་ཅིག་མངོན་པར་འགྲུབ་པར་འགྱུར་ཏེ། དེ་དག་ནི་ལུང་དུ་མ་བསྟན་པའི་ཕྱིར་གོང་མར་ཡང་རྣམ་པར་སྨིན་པའི་རྒྱུ་ཉིད་དུ་ནི་རྣམ་པར་མི་གཞག་གོ་ཞེས་ཟེར་རོ། །བར་སྐབས་སུ་ཞེས་བྱ་བ་ནི་བར་དུ་སྟེ་ཚུན་ཆད་དུ་ཞེས་བྱ་བའི་
[186a.6]ཐ་ཚིག་གོ། །ཆོས་ཉིད་ཀྱིས་ཐོབ་པ་ཞེས་བྱ་བ་ནི་མི་སློབ་པའི་ལམ་གྱི་མཐུས་ཐོབ་པ་ཞེས་བྱ་བའི་དོན་ཏེ། ཡང་དགེ་སློང་གི་རྟགས་དང་སྦྱོར་བར་བྱེད་པ་དེ་ནི་དེའི་རང་བཞིན་ནོ། །ལོག་པར་ལྟུང་བའི་ཆོས་ཅན་མ་ཡིན་པ་ཞེས་བྱ་བ་ནི་མདོ་ལས་རྒྱུན་དུ་ཞུགས་པ་ཡིན་ཏེ། ལོག་པར་ལྟུང་བའི་ཆོས་ཅན་
[186a.7]མ་ཡིན་པ་དང་། རྫོགས་པའི་བྱང་ཆུབ་ཏུ་ངེས་པར་གཞོལ་བ་ཡིན། རེ་ལྟར་ཐོགས་ན་སྲིད་པ་ལན་བདུན་པ་ཡིན་ཏེ། ལྷ་རྣམས་དང་མི་རྣམས་ཀྱི་ནང་དུ་ལན་བདུན་འཁོར་ཞིང་སོང་ནས་སྡུག་བསྔལ་གྱི་མཐར་བྱེད་དོ་ཞེས་འབྱུང་ངོ་། །ཅིའི་ཕྱིར་དེ་ལྟ་བུ་ཡིན་ཞེ་ན། དེར་འགྲོ་བའི་ལས་མི་སོགས་
[186b]
[186b.1]པའི་ཕྱིར་ཞེས་བྱ་བ་སྨོས་ཏེ། ལོག་པར་ལྟུང་བ་ནི་ངན་སོང་སྟེ། དམྱལ་བ་ལ་སོགས་པའོ། །དེར་འགྲོ་བར་འགྱུར་བས་ན་དེར་འགྲོ་བ་སྟེ། དེར་འགྲོ་བ་ཉིད་དེར་འགྲོ་བ་ཡིན་ནོ། །ཅིའི་ཕྱིར་ཞེ་ན་ལས་ཏེ། འཕགས་པའི་གནས་སྐབས་ན་དེ་མི་སོགས་པའི་ཕྱིར་དང་བསགས་པ་ཡང་རྒྱུད་རྣམ་
[186b.2]པར་སྨིན་པ་དང་མི་མཐུན་པར་བྱས་པའི་ཕྱིར་ཏེ། སོ་སོའི་སྐྱེ་བོའི་གནས་སྐབས་ན་དེར་འགྲོ་བའི་ལས་མྱོང་བར་འགྱུར་བ་མ་ངེས་པ་བསགས་པ་ཡང་རྒྱུད་རྣམ་པར་སྨིན་པ་དང་མི་མཐུན་པར་བྱས་པའི་ཕྱིར་ལོག་པར་ལྟུང་བའི་ཆོས་ཅན་མ་ཡིན་ནོ་ཞེས་བྱའོ། །དེའི་ཕུང་པོའི་རྒྱུད་དེ་དེར་འགྲོ་བའི་ལས་
[186b.3]བསགས་པ་རྣམ་པར་སྨིན་པ་དང་མི་མཐུན་པར་གནས་པ་དེ་ལྟ་བུར་ཡོངས་སུ་གྱུར་པ་ཡིན་ནོ། །ཡང་ཅིའི་ཕྱིར་ཕུང་པོའི་རྒྱུད་དེ་དེར་འགྲོ་བའི་ལས་བསགས་པ་རྣམ་པར་སྨིན་པ་དང་མི་མཐུན་པར་གནས་པ་ཡིན་ཞེ་ན། དེའི་ཕྱིར་དགེ་བའི་རྩ་བ་སྟོབས་དང་ལྡན་པས་བསྒོས་པའི་ཕྱིར་ཞེས་བྱ་བ་སྨོས་
[186b.4]ཏེ། འདི་ལྟར་ཕུང་པོའི་རྒྱུད་དེ་ནི་དགེ་བའི་རྩ་བ་སྟོབས་དང་ལྡན་པ་རྣམས་ཀྱིས་བསྒོས་ཤིང་བསྒོས་པ་ཡིན་ནོ། །དགེ་བའི་རྩ་བ་སྟོབས་དང་ལྡན་པས་ཀྱང་ཇི་ལྟར་བསྒོས་ཤེ་ན། སྦྱོར་བ་དང་བསམ་པ་དག་པའི་སྒོ་ནས་ཞེས་བྱ་བ་སྨོས་ཏེ། སྦྱོར་བ་དག་པ་དང་། བསམ་པ་དག་པའི་སྒོ་ནས་སོ། །
[186b.5]དེ་ལ་སྦྱོར་བ་དག་པ་ནི་འཕགས་པ་དགྱེས་པའི་ཚུལ་ཁྲིམས་སོ། །བསམ་པ་དག་པ་ནི་སངས་རྒྱས་ལ་སོགས་པ་ལ་དད་པ་མི་ཕྱེད་པའོ། །སྐད་ཅིག་ཀྱང་བསྐྱེད་པར་མི་འགྱུར་རོ་ཞེས་བྱ་བ་ནི་སྐད་ཅིག་ཀྱང་སེམས་བསྐྱེད་པར་མི་འགྱུར་ན་སྦྱོར་བ་ལྟ་ཅི་སྨོས་སྙམ་དུ་བསམས་པ་ཡིན་ནོ། །
[186b.6]ཡང་ན་ངན་སོང་དུ་ངེས་པའི་ལས་ཡོད་ན་ནི་གང་ཟག་དེས་ངེས་པར་འབྱེད་པའི་ཆ་དང་མཐུན་པའི་མཚན་ཉིད་ཀྱི་བཟོད་པ་ཡང་བསྐྱེད་པར་མི་འགྱུར་ན་ཟག་པ་མེད་པའི་ལམ་ལྟ་ཅི་ཞིག་སྨོས་ཞེས་བྱ་བ་ཡིན་ནོ། །ཇི་ལྟར་དགེ་བའི་རྩ་བ་སྟོབས་དང་ལྡན་པས་བསྒོས་པའི་མི་དགེ་བ་བསགས་པ་
[186b.7]རྣམ་པར་སྨིན་པ་དང་མི་མཐུན་པར་འགྱུར་བ་དེ་ཚིགས་སུ་བཅད་པས་སྟོན་པའི་ཕྱིར། མི་མཁས་པས་ནི་སྡིག་པ་ཆུང་ངུ་བྱས་ཀྱང་ཞེས་བྱ་བ་ཐམས་ཅད་སྨོས་སོ། །མི་མཁས་པས་ནི་སྡིག་པ་ཆུང་ངུ་བྱས་ཀྱང་འོག་ཏུ་སྟེ་ངན་སོང་དུ་འགྲོའོ། །མཁས་པས་ནི་སྡིག་པ་ཆེན་པོ་བྱས་ཀྱང་
[187a]
[187a.1]གནོད་པ་སྟེ། ངན་སོང་རབ་ཏུ་སྤོང་བར་འགྱུར་རོ། །དོན་འདི་གཉིས་གོ་རིམས་བཞིན་དུ་དཔེ་གཉིས་ཀྱིས་སྒྲུབ་པར་བྱེད་དེ། ལྕགས་ཀྱི་གོང་བུ་སྟེ་ཐུ་ལུམ་གྱི་ངོ་བོ་ཆུང་ངུ་ཡང་བཅོས་ལེགས་མ་བྱས་པའི་ཕྱིར་ཆུའི་གཏིང་དུ་འབྱིང་བར་འགྱུར་ལ། ལྕགས་དེ་ཉིད་
[187a.2]སྣོད་དུ་བྱས་ན་ཆེར་ཡང་བཅོས་ལེགས་བྱས་པའི་ཡོན་ཏན་གྱིས་ཆུའི་སྟེང་དུ་འཕྱོ་ཞིང་འབྱིང་བར་མི་འགྱུར་རོ། །དེ་བཞིན་དུ་མི་མཁས་པ་ནི་ཡོན་ཏན་རྣམས་ཀྱི་སྣོད་དུ་མ་བྱས་པའི་ཕྱིར་འབྱིང་བར་འགྱུར་གྱི། མཁས་པས་ནི་མ་ཡིན་ཏེ། ཡོན་ཏན་དག་གི་སྣོད་དུ་བྱས་པའི་ཕྱིར་རོ། །གང་
[187a.3]ཕན་ཆད་སྡུག་བསྔལ་མེད་པ་ཞེས་བྱ་བ་ནི་སྲིད་པ་གཞན་གྱིས་བསྡུས་པའོ། །སྡུག་བསྔལ་གྱི་མཐའ་ནི་སྡུག་བསྔལ་གྱི་མཇུག་ཅེས་བྱ་བའི་ཐ་ཚིག་གོ། །གཞན་ཡང་འཆི་བའི་ཚེ་སྡུག་བསྔལ་གྱི་མཐའ་ཡོད་མོད་ཀྱི་སྡུག་བསྔལ་དེ་ནི་ཉིང་མཚམས་སྦྱོར་བ་དང་བཅས་པ་ཡིན་པས་དེའི་ཕྱིར་སྡུག་བསྔལ་
[187a.4]གྱི་ཉིང་མཚམས་མི་སྦྱོར་བར་བྱེད་ཅེས་བྱ་བའི་ཐ་ཚིག་གོ་ཞེས་བྱ་བ་སྨོས་སོ། །མྱ་ངན་ལས་འདས་པ་ཅི་ལྟར་བྱེད་ཅེས་བྱ་བ་ནི་རྟག་པའི་ཕྱིར་བྱ་བར་མི་རུང་ངོ་སྙམ་དུ་བསམས་པ་ཡིན་ནོ། །དེ་འཐོབ་པའི་གགས་བསལ་བའི་ཕྱིར་ཞེས་བྱ་བ་ནི་མྱ་ངན་ལས་འདས་པ་འཐོབ་པའི་གགས་བསལ་
[187a.5]བའི་ཕྱིར་རོ། །དེ་འཐོབ་པའི་གགས་ནི་ཉོན་མོངས་པའམ་ཕུང་པོ་ཡིན་ནོ། །དེ་བསལ་བའི་ཕྱིར་མྱ་ངན་ལས་འདས་པ་བྱེད་དེ། དཔེར་ན་ནམ་མཁའ་ནི་ཁང་པའི་གནས་ན་མི་མངོན་ཏེ། དེ་ནི་དེའི་གགས་ཡིན་པས་སོ། །དེ་བསལ་བའི་ཕྱིར་རྟག་ཀྱང་ནམ་མཁའ་བྱེད་དོ་ཞེས་བྱ་བ་ཡིན་ནོ། །
[187a.6]དེའི་ཕྱིར་དཔེར་ན་སྨྲ་བ་པོ་འདུན་ཁང་རྟིབ་ལ་ནམ་མཁའ་གྱིས་ཞེས་འཛེར་བ་ལྟ་བུ་ཡིན་ནོ་ཞེས་བྱ་བ་སྨོས་སོ། །གཞན་ཡང་ཞེས་བྱ་བ་ནི་སོ་སོའི་སྐྱེ་བོའི་རྒྱུད་ཡོངས་སུ་སྨིན་པའོ། །མ་ངེས་པས་ཞེས་བྱ་བ་ནི་གལ་ཏེ་ན་འདི་ཉིད་དམ་སྲིད་པ་བར་མ་ལ་སོགས་པར་ཡོངས་སུ་མྱ་ངན་ལས་
[187a.7]འདས་པར་འགྱུར་བས་དེའི་ཕྱིར་མི་བརྗོད་དོ། །ཚེ་གཉིས་གསུམ་ཞེས་བྱ་བ་ནི་འདི་ལ་ཚེ་གཉིས་སམ་གསུམ་ཡོད་པས་ན་ཚེ་གཉིས་གསུམ་མོ། །ཚིགས་སུ་བཅད་པའི་ནང་དུ་ནི་གཉིས་ཤིག་སྨོས་ཞེས་བྱ་བ་ནི་ཉོན་མོངས་པ་སྤངས་པ་དང་ཚེ་དག་གོ། །ཅིའི་ཕྱིར་ཞེ་ན། མཐར་གྱིས་པའི་རྒྱུན་དུ་
[187b]
[187b.1]ཞུགས་པ་མཐོང་བས་སྤང་བར་བྱ་བ་རྣམས་སྤངས་ནས་ཕྱིས་བསྒོམ་པས་སྤང་བར་བྱ་བའི་ཉོན་མོངས་པ་རྣམས་ལས་རྣམ་པ་གཅིག་ནས་བཞིའི་བར་སྤོང་བར་བྱེད་ན་དེའི་གཉེན་པོ་སྟེ། རྣམ་པ་གཅིག་དང་གཉིས་དང་གསུམ་ལ་སོགས་པའི་གཉེན་པོའོ། །ཟག་པ་མེད་པའི་དབང་པོ་འཐོབ་པ་ནི་མ་
[187b.2]སྨོས་ཀྱང་འགྲུབ་པའི་ཕྱིར་དེ་ཚིགས་སུ་བཅད་པ་ལས་མ་སྨོས་སོ། །གཉེན་པོ་མེད་པར་ནི་ཉོན་མོངས་པའི་རྣམ་པ་སྤོང་བ་མེད་དེ། འཕགས་པ་དེ་ནི་འཇིག་རྟེན་པའི་ལམ་གྱིས་ཉོན་མོངས་པའི་རྣམ་པ་སྤངས་ན་ཡང་དེའི་གཉེན་པོ་ཟག་པ་མེད་པའི་དབང་པོ་འཐོབ་པར་འགྱུར་རོ། །སྐྱེ་བ་ནི་གལ་ཏེ་
[187b.3]ན་ཆེས་ཉུང་བར་ཡང་འགྱུར་བས་ཞེས་བྱ་བ་ནི་གལ་ཏེ་འདི་ཉིད་དུའམ་སྲིད་པ་བར་མའམ་སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་ནའོ། །གོང་མའི་སྐལ་བ་དང་ལྡན་པའི་ཕྱིར་ཏེ། རྒྱུན་དུ་ཞུགས་པའི་འབྲས་བུའི་གོང་མ་ལན་ཅིག་ཕྱིར་འོང་བ་ཉིད་ནས་དགྲ་བཅོམ་པ་ཉིད་ཀྱི་བར་གྱི་སྐལ་
[187b.4]བ་དང་ལྡན་པའི་ཕྱིར་རོ། །དེའི་ཕྱིར་འདིའི་ཚེ་ནི། ཚེ་གཉིས་གསུམ་དུ་རིགས་ནས་རིགས་ཞེས་ངེས་པར་བྱ་བའི་ཕྱིར་སྨོས་པ་ཡིན་ནོ། །འདིར་འདི་དཔྱད་པར་བྱ་སྟེ། གང་ཞིག་རྣམ་པ་གཅིག་གམ་གཉིས་ལས་གྲོལ་བ་དེ་ཅི་ཞིག་ཡིན་ཞེ་ན། ཁ་ཅིག་ན་རེ་རིགས་ནས་རིགས་སུ་སྐྱེ་བ་ཡིན་ཏེ། རྣམ་པ་
[187b.5]གསུམ་དང་བཞི་ལས་གྲོལ་བ་སྨོས་པ་ནི། དཔེར་ན་བརྗོད་པའི་ཕྱིར་རམ། དེ་ཕན་ཆད་དུ་ནི་མ་ཡིན་ནོ་ཞེས་ཚད་དུ་བྱ་བའི་ཕྱིར་རོ་ཞེས་ཟེར་རོ།། །།བམ་པོ་བཞི་བཅུ་རྩ་བརྒྱད་པ། གཞན་དག་ན་རེ་རྣམ་པ་གཅིག་གམ་གཉིས་ལས་གྲོལ་བ་ནི་ཚོ་ལྔའམ་དྲུག་པ་ཡིན་ཏེ། རྣམ་པ་
[187b.6]གསུམ་མམ་བཞི་ལས་གྲོལ་བ་ཞེས་ཁྱད་པར་སྨོས་པའི་ཕྱིར་རོ་ཞེས་ཟེར་ཏེ། འདི་ནི་བཤད་པ་བྱེད་པ་རྣམས་ཀྱིས་མ་དཔྱད་པས་འདི་དཔྱད་དགོས་པ་ཡིན་ནོ། །ཅིའི་ཕྱིར་རྣམ་པ་ལྔ་སྤངས་པའི་ཕྱིར་མ་ཡིན་ཞེ་ན་ཞེས་བྱ་བ་ནི་ཅི་ཡིན་ཞེ་ན། རིགས་ནས་རིགས་སུ་སྐྱེ་བར་འགྱུར་བ་ཞེས་བྱ་
[187b.7]བའི་སྐབས་ཡིན་ནོ། །དེ་སྤངས་ན་ཞེས་བྱ་བ་རྒྱས་པར་འབྱུང་བ་ནི་རྣམ་པ་ལྔ་སྤངས་ན་རྣམ་པ་དྲུག་པ་ཡང་གདོན་མི་ཟ་བར་སྤོང་བའི་ཕྱིར་རོ། །ཅིའི་ཕྱིར་ཞེ་ན། སྨྲས་པ། དེའི་རྣམ་པ་དྲུག་པ་གཅིག་གིས་ནི་ལན་ཅིག་ཕྱིར་འོང་བའི་འབྲས་བུ་ལ་བགེགས་བྱ་བར་མི་ནུས་སོ། །བར་
[188a]
[188a.1]ཆད་གཅིག་པའི་བཞིན་དུ་ཞེས་བྱ་བ་འདི་ནི་བཟློག་པའི་དཔེ་ཡིན་ཏེ། ཇི་ལྟར་བར་ཆད་གཅིག་པའི་རྣམ་པ་དགུ་པ་གཅིག་གིས་ཕྱིར་མི་འོང་བའི་འབྲས་བུ་ལ་བགེགས་བྱ་བར་ནུས་པ་དེ་ལྟར་རྒྱུན་དུ་ཞུགས་པ་འདིའི་རྣམ་པ་དྲུག་པས་ནི་ལན་ཅིག་ཕྱིར་འོང་བའི་འབྲས་བུ་ལ་
[188a.2]བགེགས་བྱ་བར་མི་ནུས་སོ། །ཅིའི་ཕྱིར་ཞེ་ན། ཁམས་ལས་མི་འདའ་བའི་ཕྱིར་རོ་ཞེས་བྱ་བ་སྨོས་སོ། །བར་ཆད་གཅིག་པ་ནི་འདོད་པའི་ཁམས་ལས་འདའ་བས་དེའི་ཕྱིར་འདི་རྣམ་པ་དགུ་པ་གཅིག་གིས་ཀྱང་འབྲས་བུ་ལ་བགེགས་བྱ་བར་ནུས་ཏེ། ཁམས་ལས་འདའ་བ་ནི་དཀའ་བའི་ཕྱིར་
[188a.3]རོ། ལན་ཅིག་ཕྱིར་འོང་བ་ནི་ཁམས་ལས་མི་འདའ་བས་དེའི་ཉོན་མོངས་པའི་རྣམ་པ་དྲུག་པ་གཅིག་གིས་འབྲས་བུ་ལ་བགེགས་བྱ་བར་མི་ནུས་སོ། །ལྷའི་རིས་དེའམ་གཞན་དུ་ཞེས་བྱ་བ་ནི་འདི་ལྟ་སྟེ། སུམ་ཅུ་རྩ་གསུམ་པ་དག་གི་ནང་དུ་བདེན་པ་རྣམས་མཐོང་ནས་རིགས་གཉིས་
[188a.4]སམ་གསུམ་དུ་འཁོར་ཏེ། སུམ་ཅུ་རྩ་གསུམ་པ་དེ་ཉིད་ཀྱི་ནང་དུ་ཡོངས་སུ་མྱ་ངན་ལས་འདའ་བའམ་གཞན་རྒྱལ་ཆེན་རིགས་བཞི་པའམ། འཐབ་བྲལ་བ་རྣམས་ཀྱི་ནང་དུ་ཡོངས་སུ་མྱ་ངན་ལས་འདའ་བ་ལྟ་བུ་སྟེ། དེ་བཞིན་དུ་གཞན་དག་ལ་ཡང་སྦྱར་བར་བྱའོ། །འདོད་ཆགས་དང་ཞེ་
[188a.5]སྡང་དང་གཏི་མུག་རྣམས་བསྲབས་པའི་ཕྱིར་ཞེས་འབྱུང་བ་ཞེས་བྱ་བ་ནི་མདོ་སྡེ་ལས་སོ། །ཇི་སྐད་དུ་ཞེ་ན། ཀུན་དུ་སྦྱོར་བ་གསུམ་སྤངས་པའི་ཕྱིར་དང་། འདོད་ཆགས་དང་ཞེ་སྡང་དང་གཏི་མུག་རྣམས་བསྲབས་པའི་ཕྱིར་ལན་ཅིག་ཕྱིར་འོང་བ་ཞེས་འབྱུང་བའི་ཕྱིར་རོ། །ཆུང་ངུའི་རྣམ་པ་
[188a.6]ལུས་པའི་ཕྱིར་རོ་ཞེས་བྱ་བ་ནི་ཆུང་ངུའི་ཆེན་པོ་དང་། ཆུང་ངུའི་འབྲིང་དང་། ཆུང་ངུའི་ཆུང་ངུ་ཞེས་བྱ་བ་དེ་ཙམ་ཞིག་ལུས་པའི་ཕྱིར་རོ། །ཉེས་ཆ་བདུན་དང་བརྒྱད་ཟད་པ། །ཞེས་བྱ་བ་ལ། ཉེས་ཆ་ནི་ཉེས་པའི་ཆ་ཤས་ཏེ། རྣམ་པ་བདུན་དང་བརྒྱད་ཀྱི་མཚན་ཉིད་ཡིན་ནོ། །འདིར་ཡང་དབང་
[188a.7]པོ་ལས་ནི་ཞེས་བྱ་བ་རྒྱུ་གསུམ་པ་མདོར་མ་བྱས་པས་དེ་ཁོ་ན་བཞིན་དུ་བཤད་པར་བྱའོ། །ཇི་ལྟར་ན་འདིའི་ཞེས་བྱ་བ་རྒྱས་པར་འབྱུང་བ་ནི་ཇི་ལྟར་ན་འདིའི་རྣམ་པ་དགུ་པ་གཅིག་གིས་འབྲས་བུ་ལ་བགེགས་བྱ་བར་ནུས་ཀྱི། རིགས་ནས་རིགས་སུ་སྐྱེ་བའི་རྣམ་པ་གཅིག་གིས་ནི་འབྲས་བུ་ལ་
[188b]
[188b.1]བགེགས་བྱ་བར་མི་ནུས་ཤེ་ན། སྨྲས་པ། ཁམས་ལས་འདའ་བའི་ཕྱིར་རོ། །འདི་ལྟར་འདི་ནི་རྣམ་པ་དགུ་པ་སྤངས་ན་འདོད་པའི་ཁམས་ལས་ཡང་དག་པས་འདའ་བར་འགྱུར་བས་དེར་ཡང་མི་སྐྱེ་ལ། རྣམ་པ་དགུ་པ་དེ་ཡང་ལས་དང་ལྷན་ཅིག་ཏུ་དེར་སྐྱེས་ནས་མྱོང་བར་འགྱུར་བ་ཡིན་ཏེ།
[188b.2]དེའི་ཕྱིར་དེའི་རྣམ་པར་སྨིན་པ་དང་རྒྱུ་མཐུན་པའི་འབྲས་བུའི་ས་ལས་འདའ་བས་འབྲས་བུ་ལ་བགེགས་བྱེད་པར་ནུས་པ་ཡིན་ནོ། །གོང་དུ་ལས་རྣམས་ནི་གནས་སྐབས་གསུམ་དུ་བགེགས་བྱ་བའི་ཕྱིར་ཉེ་བར་གནས་སོ་ཞེས་བཤད་ཟིན་ཏོ་ཞེས་བྱ་བ་ནི། བཟོད་དང་ཕྱིར་མི་འོང་དགྲ་བཅོམ། །
[188b.3]འཐོབ་ལ་ལས་བགེགས་ཤིན་ཏུ་བྱེད། །ཅེས་བྱ་བ་ཡིན་ནོ། །འདིར་ཉོན་མོངས་པ་དག་དང་སྦྱོར་བ་ཡིན་ཏེ། དེ་ཉིད་ཀྱི་ཕྱིར། ལས་རྣམས་ཇི་ལྟ་བར་ཉོན་མོངས་པ་རྣམས་ཀྱང་དེ་དང་འདྲའོ་ཞེས་བྱ་བ་ལ་སོགས་པ་སྨོས་སོ། །དེའི་མྱ་ངན་ལས་འདས་པ་ལ་ཚེ་གཅིག་གིས་ཆོད་པའི་
[188b.4]ཕྱིར་རམ་ཞེས་བྱ་བ་ནི་རྣམ་པ་བདུན་དང་བརྒྱད་ཟད་པའི་ལན་ཅིག་ཕྱིར་འོང་བ་དེའི་མྱ་ངན་ལས་འདས་པ་ལ་ཚེ་གཅིག་གིས་ཆོད་པའི་ཕྱིར་རམ། འདིའི་ཕྱིར་མི་འོང་བའི་འབྲས་བུ་ལ་ཉོན་མོངས་པའི་རྣམ་པ་གཅིག་གིས་ཆོད་པས་ན་བར་ཆད་གཅིག་པ་ཡིན་ནོ། །དེ་སྲིད་དུ་རིགས་ནས་
[188b.5]རིགས་སུ་སྐྱེ་བའམ་བར་ཆད་གཅིག་པ་མ་ཡིན་ཞེས་བྱ་བ་ནི་སྔོན་འཇིག་རྟེན་པའི་ལམ་གྱིས་རྣམ་པ་གསུམ་དང་བཞི་ལས་གྲོལ་ཡང་། རེ་ཞིག་རིགས་ནས་རིགས་སུ་སྐྱེ་བ་མ་ཡིན་ལ། རྣམ་པ་བདུན་དང་བརྒྱད་ཟད་ཀྱང་རེ་ཞིག་བར་ཆད་གཅིག་པ་མ་ཡིན་ཏེ། དེ་དག་གི་གཉེན་པོ་ཟག་
[188b.6]པ་མེད་པའི་དབང་པོ་ཐོབ་པ་མེད་པའི་ཕྱིར་རོ། །དེ་ཉིད་ཀྱི་ཕྱིར། ཇི་སྲིད་དུ་འབྲས་བུ་ཁྱད་པར་ཅན་གྱི་ལམ་མངོན་དུ་མ་བྱས་པ་ཞེས་བྱ་བ་སྨོས་ཏེ། དེ་དག་གི་གཉེན་པོའམ་དེ་དག་གི་གོང་མའི་གཉེན་པོ་འབྲས་བུ་ཁྱད་པར་ཅན་མངོན་དུ་བྱས་ན། དེའི་ཚེ་ཟག་པ་མེད་པའི་དབང་པོ་
[188b.7]འཐོབ་པའི་ཕྱིར་རིགས་ནས་རིགས་སུ་སྐྱེ་བའམ། བར་ཆད་གཅིག་པ་ཡིན་ནོ་ཞེས་ཤུགས་ཀྱིས་བཤད་པར་འགྱུར་རོ། །ཀུན་དུ་སྦྱོར་བ། ཐ་མའི་ཆ་དང་མཐུན་པ་ལྔ། །ཞེས་བྱ་བ་རྒྱས་པར་འབྱུང་བ་ནི་མདོ་སྡེ་ལས། ཀུན་དུ་སྦྱོར་བ་ཐ་མའི་ཆ་དང་མཐུན་པ་ལྔ་སྤངས་པའི་ཕྱིར་
[189a]
[189a.1]ཕྱིར་མི་འོང་བ་ཞེས་བྱའོ་ཞེས་འབྱུང་བ་ནི་སྤངས་པ་བསྡོམས་པའི་ཕྱིར་ཏེ། འཇིག་ཚོགས་ལ་ལྟ་བ་ལ་སོགས་པ་སྤངས་པ་གཅིག་ཉིད་དུ་རྣམ་པར་གཞག་པའི་ཕྱིར་རོ། །སྔོན་གཉིས་སམ་གསུམ་སྤངས་པ་ཡིན་ནོ་ཞེས་བྱ་བ་ནི་གལ་ཏེ་རེ་ཞིག་འདོད་པ་ལས་འདོད་
[189a.2]ཆགས་དང་བྲལ་བ་ཞིག་ངེས་པ་ལ་འཇུག་ན་སྔོན་འཇིག་རྟེན་པའི་ལམ་གྱིས་འདོད་པའི་འདུན་པ་དང་། གནོད་སེམས་དང་གཉིས་སྤངས་པ་ཡིན་ཏེ། འཇིག་ཚོགས་ལ་ལྟ་བ་ལ་སོགས་པ་ཡོངས་སུ་གཏུགས་ཏེ་མ་སྤངས་པའི་ཕྱིར་རོ། །འོན་ཏེ་མཐར་གྱིས་པ་ཞིག་ཡིན་ན་ནི་མངོན་
[189a.3]སུམ་སྤངས་པ་ཡིན་ནོ། །གང་གིས་ཤེ་ན། མཐོང་བའི་ལམ་གྱིས་ཏེ། འཇིག་ཚོགས་ལ་ལྟ་བ་དང་། ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པ་དང་། ཐེ་ཚོམ་མོ། །དེ་ལྟ་བས་ན། བསྡོམས་པ་ལྔ་སྤངས་པ་ཡི་ཕྱིར། །ཞེས་བྱ་བ་ཡིན་ནོ། །དེ་ནི་བར་སྐྱེས་འདུ་བྱེད་
[189a.4]དང་། །འདུ་བྱེད་མེད་ཡོངས་མྱ་ངན་འདའ། །ཞེས་བྱ་བ་ལ། དེ་ནི་ཞེས་བྱ་བ་ནི་ཕྱིར་མི་འོང་བའོ། །འདི་ལ་བར་མ་དོ་དང་། སྐྱེས་ནས་དང་། འདུ་བྱེད་པ་དང་། འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ཡོད་པས་ན། བར་སྐྱེས་འདུ་བྱེད་དང་། འདུ་བྱེད་མེད་
[189a.5]ཡོངས་མྱ་ངན་འདའ། །ཞེས་བྱ་བ་ཡིན་ནོ། །ཕྱིར་མི་འོང་བ་དེ་ཉིད་རྣམ་པ་ལྔ་ཡིན་ཏེ་ཞེས་བྱ་བ་ནི་བར་མ་དོར་ཡོངས་སུ་མྱ་ངན་ལས་འདའ་བ་དང་། སྐྱེས་ནས་ཡོངས་སུ་མྱ་ངན་ལས་འདའ་བ་དང་། མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་དང་།
[189a.6]མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བའོ་ཞེས་སྟོན་པར་བྱེད་པ་ཡིན་ནོ། །ཕུང་པོའི་ལྷག་མ་དང་བཅས་པའི་ཡོངས་སུ་མྱ་ངན་ལས་འདའ་བས་ཞེས་བྱ་བ་ནི་མྱ་ངན་ལས་འདའ་བ་རྣམ་པ་གཉིས་ཡོད་པས་ཕུང་པོའི་ལྷག་མ་དང་བཅས་
[189a.7]པའི་མྱ་ངན་ལས་འདའ་བས་ཡོངས་སུ་མྱ་ངན་ལས་འདའོ་ཞེས་ཁྱད་པར་དུ་བྱེད་པ་ཡིན་ཏེ་ཟག་པ་ཐམས་ཅད་ཟད་པར་བྱེད་དོ་ཞེས་བྱ་བའི་ཐ་ཚིག་གོ། །མངོན་པར་བརྩོན་པ་དང་། ལམ་ངང་གིས་འབྱུང་བ་ཉིད་ཀྱི་ཕྱིར་རོ་ཞེས་བྱ་བ་ལ་མངོན་པར་བརྩོན་པ་ནི་བརྩོན་འགྲུས་དང་
[189b]
[189b.1]ལྡན་པ་སྟེ། བརྩོན་འགྲུས་བརྩམས་པ་ཞེས་བྱ་བའི་ཐ་ཚིག་གོ། འདི་ལ་ལམ་ངང་གིས་འབྱུང་བ་ཡོད་པས་ན་ལམ་ངང་གིས་འབྱུང་བའོ། །ཇི་ལྟར་ལམ་ངང་གིས་འབྱུང་བ་ཡིན་ཞེ་ན། མངོན་པར་འདུ་བྱེད་པ་མེད་པར་མངོན་དུ་འགྱུར་བའི་ཕྱིར་རོ། །འདི་ནི་མངོན་པར་བརྩོན་པ་ཡང་ཡིན་
[189b.2]ལ་ལམ་ངང་གིས་འབྱུང་བ་ཡང་ཡིན་པས་མངོན་པར་བརྩོན་པ་དང་ལམ་ངང་གིས་འབྱུང་བའོ། །དེའི་ངོ་བོ་སྟེ། དེའི་ཕྱིར་སྐྱེས་པ་ཙམ་ལས་མི་འཆི་བར་ཡོངས་སུ་མྱ་ངན་ལས་འདའོ། །དེ་ཡང་ཕུང་པོའི་ལྷག་མ་མེད་པས་སོ་ཞེས་བྱ་བ་ནི་གཞན་དག་ན་རེ་བར་མ་དོར་ཡོངས་སུ་མྱ་ངན་
[189b.3]ལས་འདའ་བ་འབའ་ཞིག་དགྲ་བཅོམ་པ་ཉིད་ཐོབ་ནས་ཚེ་ཡོངས་སུ་མ་རྫོགས་པར་ཕུང་པོའི་ལྷག་མ་མེད་པའི་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་མ་ཟད་ཀྱི། སྐྱེས་ནས་ཡོངས་སུ་མྱ་ངན་ལས་འདའ་བ་ཡང་དེ་དང་འདྲའོ་ཞེས་ཟེར་རོ། །མ་ཡིན་ཏེ། ཚེ་འདོར་བ་
[189b.4]ལ་དབང་མེད་པའི་ཕྱིར་རོ་ཞེས་བྱ་བ་ནི་དེ་ཡང་ཕུང་པོའི་ལྷག་མ་མེད་པས་སོ་ཞེས་བྱ་བ་དེ་ནི་དེ་ལྟ་མ་ཡིན་ནོ། །ཅིའི་ཕྱིར་ཞེ་ན། ཚེ་འདོར་བ་ལ་དབང་མེད་པའི་ཕྱིར་ཏེ། དེ་ནི་ཚེ་དོར་བར་བྱ་བ་ལ་དབང་མེད་པའི་ཕྱིར་རོ། །ཡང་ཅིའི་ཕྱིར་འདི་དེ་ལ་དབང་མེད་ཅེ་ན། འདི་ལྟར་རབ་ཀྱི་མཐའ་
[189b.5]བའི་བསམ་གཏན་བཞི་པ་ཐོབ་པ་ནི་ཚེ་འདོར་བ་ལ་དབང་ལ་རབ་ཀྱི་མཐའ་པའི་བསམ་གཏན་དེ་ཡང་གླིང་གསུམ་དག་ཏུ་མི་རྣམས་ཀྱི་ནང་དུ་སྐྱེད་པར་བྱེད་ན་དེ་ནི་གཟུགས་ཀྱི་ནང་དུ་སྐྱེས་པས་སོ། །བར་མ་དོར་ཡོངས་སུ་མྱ་ངན་ལས་འདའ་བ་ཚེ་འདོར་བ་ལ་དབང་ངམ་ཞེ་ན། གང་གི་ཕྱིར་
[189b.6]འདི་གོ་འདི་ལྟར་ཕུང་པོའི་ལྷག་མ་མེད་པའི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་ཞེ་ན། དེ་ལ་ཡང་དབང་མེད་མོད་ཀྱི་སྲིད་པ་བར་མར་གནས་པར་བྱེད་པ་ལ་ནི་སྐྱེས་ནས་ཡོངས་སུ་མྱ་ངན་ལས་འདའ་བའི་ཅི་འདྲ་བ་དེ་ལྟ་བུའི་ལས་ནི་མེད་དོ། །དེའི་ཕྱིར་བར་
[189b.7]མ་དོར་ཡོངས་སུ་མྱ་ངན་ལས་འདའ་བ་ནི་མྱུར་དུ་ཡོངས་སུ་མྱ་ངན་ལས་འདའ་ལ། སྐྱེས་ནས་ཡོངས་སུ་མྱ་ངན་ལས་འདའ་བ་ནི་ཚེ་ཇི་སྲིད་པར་གནས་ནས་ཡོངས་སུ་མྱ་ངན་ལས་འདའ་བས་སྐྱེས་ནས་ཡོངས་སུ་མྱ་ངན་ལས་འདའ་བ་ཁོ་ན་ཕུང་པོའི་ལྷག་མ་དང་བཅས་པའི་ཡོངས་སུ་
[190a]
[190a.1]མྱ་ངན་ལས་འདའ་བས་ཡོངས་སུ་མྱ་ངན་ལས་འདའོ་ཞེས་བྱའོ། །མངོན་པར་འདུ་བྱེད་པ་དང་བཅས་པས་ཞེས་བྱ་བ་ལ་སོགས་པ་ལ། གྲག་གོ་ཞེས་བྱ་བའི་སྒྲ་ནི་བྱེ་བྲག་ཏུ་སྨྲ་བའི་གཞུང་ལུགས་རྗོད་པར་བྱེད་པ་ཡིན་ཏེ། རང་གི་གཞུང་ལུགས་ནི་མདོ་སྡེ་
[190a.2]དང་མཐུན་པར་ཕྱིས་འཆད་དོ། །སྦྱོར་བ་མ་བཏང་ཞེས་བྱ་བ་ནི་སྔོན་གྱི་སྦྱོར་བའི་འཕེན་པས་སྦྱོར་བ་མ་བོར་བར་ཞེས་བྱ་བའི་ཐ་ཚིག་སྟེ། མངོན་པར་འདུ་བྱེད་པ་དང་བཅས་ཤིང་འབད་པ་དང་བཅས་པའོ། །མངོན་པར་བརྩོན་པ་དང་ལམ་ངང་གིས་འབྱུང་བ་མ་ཡིན་པའི་ཕྱིར་རོ་ཞེས་བྱ་བ་ནི་
[190a.3]རྣལ་འབྱོར་པ་དེ་མངོན་པར་བརྩོན་པའི་ཕྱིར་དང་། ལམ་ངང་གིས་འབྱུང་བ་མ་ཡིན་པའི་ཕྱིར་ཏེ། དེ་ཉིད་ཀྱི་ཕྱིར་འདི་མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བར་འགྲུབ་པོ། །མངོན་པར་འདུ་བྱེད་པ་མེད་པར་ཞེས་བྱ་བ་ནི་སྔ་མ་ལས་བཟློག་པ་སྟེ་སྦྱོར་བ་བཏང་བའི་ཕྱིར་
[190a.4]རོ། །མངོན་པར་བརྩོན་པ་དང་། ལམ་ངང་གིས་འབྱུང་བ་མེད་པའི་ཕྱིར་རོ་ཞེས་བྱ་བ་ནི་མངོན་པར་བརྩོན་པ་སྟེ། བརྩོན་འགྲུས་མེད་པའི་ཕྱིར་དང་། ལམ་ངང་གིས་འབྱུང་བ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་ལྟ་བས་ན་དེ་ལྟར་མངོན་པར་བརྩོན་པ་ལ་སོགས་པ་དེ་དག་ཐ་དད་
[190a.5]པའི་ཕྱིར་ཡོངས་སུ་མྱ་ངན་ལས་འདའ་བའི་ཁྱད་པར་བཤད་པ་ཡིན་ཏེ། སྐྱེས་ནས་ཡོངས་སུ་མྱ་ངན་ལས་འདའ་བ་ལ་ནི་མངོན་པར་བརྩོན་པ་དང་ལམ་ངང་གིས་འབྱུང་བ་གཉི་ག་ཡང་ཡོད་དོ། །མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་ལ་ནི་མངོན་པར་བརྩོན་
[190a.6]པ་ཡོད་ཀྱི་འདི་ལ་ལམ་ངང་གིས་འབྱུང་བ་ནི་མེད་དོ། །མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ལ་ནི་གཉི་ག་ཡང་མེད་དེ། མངོན་པར་བརྩོན་པ་ཡང་མེད་ལ། ལམ་ངང་གིས་འབྱུང་བ་ཡང་མེད་དོ། །འདུས་བྱས་དང་འདུས་མ་བྱས་ལ་དམིགས་པའི་ལམ་གྱིས་
[190a.7]ཡོངས་སུ་མྱ་ངན་ལས་འདའ་བའི་ཕྱིར་རོ་ཞེས་བྱ་བ་ལ། འདུས་བྱས་དང་འདུ་བྱེད་ཅེས་བྱ་བ་ནི་དོན་གཅིག་སྟེ། འདུས་མ་བྱས་དང་འདུ་བྱེད་མ་ཡིན་པ་ཡང་དེ་དང་འདྲའོ། །གང་ཞིག་འདུ་བྱེད་ལ་དམིགས་པ་སྟེ། སྡུག་བསྔལ་དང་ཀུན་འབྱུང་དང་། ལམ་ལ་དམིགས་པའི་ལམ་
[190b]
[190b.1]གྱིས་ཉོན་མོངས་པ་རྣམས་སྤོང་བར་བྱེད་པ་དེ་ནི་མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་ཡིན་ལ། གང་ཞིག་འདུ་བྱེད་མ་ཡིན་པ་ལ་དམིགས་པ་སྟེ། འགོག་པ་ལ་དམིགས་པས་སྤོང་བ་དེ་ནི་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ཡིན་ནོ་ཞེའོ། །
[190b.2]དེ་ནི་མི་རུང་སྟེ། ཧ་ཅང་ཐལ་བར་འགྱུར་བའི་ཕྱིར་རོ་ཞེས་བྱ་བ་ནི་དེ་ནི་དེ་ལྟ་མ་ཡིན་ནོ། །ཅིའི་ཕྱིར་ཞེ་ན། ཧ་ཅང་ཐལ་བར་འགྱུར་བའི་ཕྱིར་ཏེ། བར་མ་དོ་དང་། སྐྱེས་ནས་ཡོངས་སུ་མྱ་ངན་ལས་འདའ་བ་དག་ཀྱང་འདུས་བྱས་དང་། འདུས་མ་བྱས་ལ་དམིགས་པའི་ལམ་གྱིས་ཡོངས་སུ་མྱ་
[190b.3]ངན་ལས་འདའ་བས། སོ་སོར་མངོན་པར་འདུ་བྱེད་པ་དང་བཅས་པ་དང་། མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ཉིད་དུ་ཐལ་བར་འགྱུར་རོ། །དེའི་ཕྱིར་གང་ཟག་གཉིས་ཁོ་ནར་ཐལ་བར་འགྱུར་གྱི་ལྔ་ནི་མ་ཡིན་ནོ། །མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་
[190b.4]འདའ་བ་སྔར་འབྱུང་བས་ཞེས་བྱ་བ་ནི་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་འདི་མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་བས་སྔར་འབྱུང་ངོ་། །དེ་ཁོ་ན་བཞིན་དུ་རུང་སྟེ་ཞེས་བྱ་བ་རྒྱས་པར་འབྱུང་བ་ནི། གང་ཟག་མངོན་པར་འདུ་བྱེད་པ་
[190b.5]མེད་པ་དང་། མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་ལམ་ངང་གིས་འབྱུང་བ་དང་། ངང་གིས་འབྱུང་བ་མ་ཡིན་པ་དག་གིས་ཡོངས་སུ་མྱ་ངན་ལས་འདའ་བ་དག་ནི་གོ་རིམས་བཞིན་དུ་སྔ་མ་ནི་མངོན་པར་འདུ་བྱེད་པ་མེད་པས་བསྒྲུབ་པར་བྱ་བ་ཡིན་པའི་ཕྱིར་ལ།
[190b.6]ཅིག་ཤོས་ནི་མངོན་པར་འདུ་བྱེད་པས་མངོན་པར་བསྒྲུབ་པར་བྱ་བ་ཡིན་པའི་ཕྱིར་རོ། །ཇི་ལྟར་ན་དེ་ལྟར་བསྒྲུབ་པར་བྱ་བ་ཉིད་ཡིན་ཞེ་ན། སྨྲས་པ། དེ་དག་གི་ཡོངས་སུ་མྱ་ངན་ལས་འདའ་བ་དག་ནི་གོ་རིམས་བཞིན་དུ་འབད་པ་མེད་པ་དང་། འབད་པས་འཐོབ་པའི་སྒོ་ནས་སོ། །ཡང་
[190b.7]ན་ལམ་ངང་གིས་འབྱུང་བ་དང་ངང་གིས་འབྱུང་བ་མ་ཡིན་པ་དག་ཁོ་ན་མོས་པས་གང་ཟག་དང་མི་སྦྱར་གྱི་འབད་པ་མེད་པ་དང་འབད་པས་འཐོབ་པའི་སྒོ་ནས་ཏེ། ལམ་སྔ་མ་འབད་པ་མེད་པར་མངོན་དུ་འགྱུར་བ་དང་། ཅིག་ཤོས་འབད་པས་འཐོབ་པའི་སྒོ་ནས་ལམ་ངང་གིས་འབྱུང་བ་ནི་
[191a]
[191a.1]མངོན་པར་འདུ་བྱེད་པ་མེད་པས་བསྒྲུབ་པར་བྱ་བ་ཡིན་པའི་ཕྱིར་ལ། ངང་གིས་འབྱུང་བ་མ་ཡིན་པ་ནི་མངོན་པར་འདུ་བྱེད་པས་བསྒྲུབ་པར་བྱ་བ་ཡིན་པའི་ཕྱིར་རོ། །དེ་ལྟར་ན་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་སྔ་བར་རུང་ངོ་། །སྨྲས་པ།
[191a.2]གལ་ཏེ་མངོན་པར་འདུ་བྱེད་པ་མེད་པས་བསྒྲུབ་པར་བྱ་བ་ཡིན་པའི་ཕྱིར་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བའི་ལམ་ངང་གིས་འབྱུང་བ་ཡིན་ན། སྐྱེས་ནས་ཡོངས་སུ་མྱ་ངན་ལས་འདའ་བའི་ལམ་ཡང་ངང་གིས་འབྱུང་བ་ཡིན་པས་དེ་གཉིས་ལ་ཁྱད་པར་ཅི་ཞིག་ཡོད་ཅེ་ན།
[191a.3]དེའི་ཕྱིར་སྨྲས་པ། སྐྱེས་ནས་ཡོངས་སུ་མྱ་ངན་ལས་འདའ་བ་ནི་ལམ་ཆེས་ངང་གིས་འབྱུང་བ་དང་ཆེས་ཆེ་བ་ཡིན་གྱི་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ནི་དེ་ལྟར་རྒྱུ་བསགས་པའི་སྒོ་ནས་ཆེས་ཆེ་བ་མ་ཡིན་ནོ། །ལམ་ཆེས་ཆེ་བ་ཉིད་ཀྱིས་ཟད་པར་བྱས་པའི་
[191a.4]ཕྱིར་ཕྲ་རྒྱས་ཆེས་ཆུང་བ་ཡིན་ནོ། །གོང་དུ་འཕོ་བ་ཞེས་བྱ་བ་ནི་འདི་ལ་གོང་དུ་འཕོ་ཞིང་འགྲོ་བ་ཡོད་པས་ན་གོང་དུ་འཕོ་བ་དག་གོ། །བསམ་གཏན་སྤེལ་བ་དང་། སྤེལ་བ་མ་ཡིན་པའི་ཕྱིར་རོ་ཞེས་བྱ་བ་ནི་བསམ་གཏན་བསྲེས་པ་དང་། བསྲེས་པ་མ་ཡིན་པའི་ཕྱིར་རོ་ཞེས་བྱ་བའི་
[191a.5]ཐ་ཚིག་སྟེ། བསམ་གཏན་ཟག་པ་དང་བཅས་པ་དང་ཟག་པ་མེད་པ་དང་བསྲེས་པའི་ཕྱིར་རོ། །འདིར་བསམ་གཏན་རྣམས་སྤེལ་ནས་བསམ་གཏན་གསུམ་ལས་ཡོངས་སུ་ཉམས་པ་ཞེས་བྱ་བ་ནི། དང་པོར་བཞི་པ་སྤེལ་བར་བྱེད། །ཅེས་འབྱུང་བས་བསམ་གཏན་སྤེལ་བ་ནི་
[191a.6]བསམ་གཏན་བཞི་པ་སྤེལ་བ་སྔོན་དུ་འགྲོ་བ་ཅན་ཡིན་ཏེ། བསམ་གཏན་བཞི་པ་ཁོ་ནས་དང་པོར་སྤེལ་བར་ནུས་ཀྱི་གཞན་གྱིས་ནི་མ་ཡིན་ནོ། །བསམ་གཏན་བཞི་པ་ལས་ཡོངས་སུ་མ་ཉམས་པར་བསམ་གཏན་དང་པོ་ལ་སོགས་པར་སྐྱེ་བ་མེད་པས་དེའི་ཕྱིར་བསམ་གཏན་
[191a.7]གསུམ་པ་ལས་ཡོངས་སུ་ཉམས་པ་ཞེས་སྨོས་སོ། །ཇི་ལྟར་ཡོངས་སུ་ཉམས་ཤེ་ན། བསམ་གཏན་དང་པོའི་རོ་མྱངས་ཏེ་ཞེས་བྱ་བ་སྨོས་སོ། །བར་དུ་མི་འགྲོ་བས་ན་ཞེས་བྱ་བ་ནི་བར་མར་མི་འགྲོ་བས་སོ། །ཕྱེད་དུ་འཕར་བས་ཞེས་བྱ་བ་རྒྱས་པར་འབྱུང་བ་ནི་གནས་གཙང་མ་རྣམས་སུ་སྐྱེས་
[191b]
[191b.1]ནས། གནས་གཞན་འགའ་ཙམ་ཡང་རྒལ་ཏེ་འོག་མིན་དུ་འཇུག་པ་གང་ཡིན་པའོ་ཞེས་ཚིག་དེ་ལྟར་སྦྱར་བར་བྱའོ། །ལྟ་བའི་གནས་ཡིན་པའི་ཕྱིར་ཞེས་བྱ་བ་ནི་ཚངས་པ་ཆེན་པོ་དང་། དང་པོར་སྐྱེས་པ་རྣམས་ཀྱང་ཚངས་པ་ཆེན་པོ་ལ་སྤྲུལ་པ་པོ་ཡིན་པར་མངོན་པའི་ང་རྒྱལ་བྱེད་པའི་ཕྱིར་
[191b.2]རོ། །གཙོ་བོ་གཅིག་ཏུ་ཟད་པའི་ཕྱིར་ཞེས་བྱ་བ་ཅི་ཞེ་ན། འཕགས་པ་ནི་ཚངས་ཆེན་པ་དག་གི་ནང་དུ་མི་སྐྱེ་སྟེ། འཕགས་པ་དེར་སྐྱེ་ན་མཐུའི་སྒོ་ནས་གཉི་ག་གཙོ་བོ་ཉིད་དུ་འགྱུར་བ་ཞིག་ན། དེའི་བདག་པོ་ནི་འགྲན་ཟླ་མེད་པའི་ལས་ཀྱིས་འགྱུར་བས་དེའི་ཕྱིར་འགྲན་ཟླ་དང་བཅས་པར་མི་
[191b.3]འགྱུར་རོ། །གནས་གཞན་ཐམས་ཅད་དུ་ཞེས་བྱ་བ་ནི་ཚངས་རིས་པ་དག་གི་ནང་ནས་ཤི་འཕོས་ཏེ་ཚངས་པའི་མདུན་ན་འདོན་ལ་སོགས་པ་གྱ་ནོམ་སྣང་བ་ལ་ཐུག་པའི་བར་གནས་གཞན་བཅུ་བཞིར་འཕོས་ནས་འོག་མིན་དུ་འཇུག་པ་ཡིན་ནོ། །གོང་དུ་སྐྱེས་པ་དེའི་འོག་དང་དེར་གཏན་དུ་མི་
[191b.4]འོང་བའི་ཕྱིར་ཞེས་བྱ་བ་ནི་གང་དུ་སྐྱེས་པ་འདི་ལྟ་སྟེ། བསམ་གཏན་དང་པོར་སྐྱེས་ནས་དེའི་འོག་འདོད་པའི་ཁམས་སུ་གཏན་མི་འོང་བའི་ཕྱིར་དང་། དེ་བཞིན་དུ་གོང་དུ་སྐྱེས་པ་དེར་ཡང་གཏན་མི་འོང་བའི་ཕྱིར་ཏེ། བསམ་གཏན་དང་པོ་དེར་ཡང་གཏན་མི་འོང་བའི་ཕྱིར་ལན་གཉིས་སུ་ཕྱིར་དེར་
[191b.5]མི་སྐྱེ་བས་ཕྱིར་མི་འོང་བ་ཉིད་ཡོངས་སུ་རྫོགས་པ་ཡིན་ནོ། །འདི་ནི་ཞི་གནས་སྤྱད་པ་ཡིན་ནོ་ཞེས་བྱ་བ་ནི་སྲིད་པའི་རྩེ་མོར་ཐུག་པ་གང་ཡིན་པ་དེ་ནི་ཏིང་ངེ་འཛིན་ལ་དགའ་བ་ཡིན་ཏེ། གཟུགས་མེད་པ་དག་གི་ཏིང་ངེ་འཛིན་ནི་རབ་ཏུ་ཞི་བ་ཡིན་པས་དེའི་ཕྱིར་འདི་གཟུགས་མེད་པ་དག་ཏུ་འཇུག་གོ། །
[191b.6]སྔ་མ་ནི་ལྷག་མཐོང་སྤྱད་པ་ཡིན་ནོ་ཞེས་བྱ་བ་ནི་འོག་མིན་གྱི་མཐར་ཐུག་པར་བཤད་པ་གང་ཡིན་པ་དེ་ནི་ཤེས་རབ་ལ་དགའ་བ་ཡིན་ཏེ། གནས་གཙང་མ་རྣམས་སུ་འཇུག་གོ། །བར་སྐབས་སུ་ཡང་ཡོངས་སུ་མྱ་ངན་ལས་འདའ་བར་ཞེས་བྱ་བ་རྒྱས་པར་འབྱུང་བ་ནི་འདི་ནི་བསྟན་བཅོས་
[191b.7]བྱེད་པ་རྣམས་ཀྱིས་བྲིས་པ་ཡང་མེད་ལ་བཀག་པ་ཡང་མེད་དོ། །དེའི་ཕྱིར་མ་བཀག་པས་གོང་དུ་འཕོ་བ་འོག་མིན་གྱི་མཐར་ཐུག་པ་དང་། སྲིད་པའི་རྩེ་མོའི་མཐར་ཐུག་པ་ཡང་འོག་མིན་དང་སྲིད་པའི་རྩེ་མོར་མ་ཞུགས་པར་བར་སྐབས་སུ་མྱ་ངན་ལས་འདའ་བར་རུང་བར་ལྟ་སྟེ་སྲིད་པར་
[192a]
[192a.1]ལྟའོ་ཞེས་བྱ་བའི་ཐ་ཚིག་གོ། །འོག་མིན་གྱི་མཐར་ཐུག་པ་དང་། སྲིད་པའི་རྩེ་མོའི་མཐར་ཐུག་པ་ཞེས་བཤད་པ་མ་ཡིན་ནམ་ཞེ་ན། སྨྲས་པ། འོག་མིན་དང་སྲིད་པའི་རྩེ་མོའི་མཐར་ཐུག་པ་ཉིད་ནི་ཕན་ཆད་དུ་འགྲོ་བ་མེད་པའི་ཕྱིར་ཏེ། འོག་མིན་དང་། སྲིད་
[192a.2]པའི་རྩེ་མོ་ལས་གོང་དུ་འགྲོར་མེད་པའི་ཕྱིར་རོ། །དཔེར་ན་རྒྱུན་དུ་ཞུགས་པ་མཆོག་ཏུ་ཐོགས་ན་ལན་བདུན་པ་ཉིད་བཞིན་ཏེ། དེ་ལ་སྲིད་པ་གཉིས་སམ་གསུམ་མངོན་པར་གྲུབ་ནས་ཡོངས་སུ་མྱ་ངན་ལས་འདའ་བ་མི་སྲིད་པ་མ་ཡིན་མོད་ཀྱི། དེ་ཕན་ཆད་སྲིད་པ་བརྒྱད་པ་མངོན་པར་འགྲུབ་པར་
[192a.3]མི་བྱེད་པས་མཆོག་ཏུ་ཐོགས་ན་ལན་བདུན་པ་ཞེས་བཤད་དོ། །དེ་ཡང་རྣམ་པ་བཞི་སྟེ་ཞེས་བྱ་བ་ནི་བར་མ་དོར་ཡོངས་སུ་མྱ་ངན་ལས་འདའ་བ་མེད་པའི་ཕྱིར་རྣམ་པ་ལྔ་ནི་མེད་དོ། །དེ་དག་ནི་ཕྱིར་མི་འོང་བ་དྲུག་ཡིན་ནོ་ཞེས་བྱ་བ་ནི་བར་མ་དོར་ཡོངས་སུ་མྱ་ངན་ལས་འདའ་བ་དང་། སྐྱེས་ནས་
[192a.4]ཡོངས་སུ་མྱ་ངན་ལས་འདའ་བ་དང་། མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་དང་། མངོན་པར་འདུ་བྱེད་པ་མེད་པས་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བ་དང་དྲུག་པ་གཟུགས་མེད་པར་ཉེ་བར་འགྲོ་བ་སྟེ་དབྱེ་བ་རྣམ་པ་བཞི་པ་བགྲངས་སོ། །མཐོང་བའི་ཆོས་
[192a.5]ལ་ཡོངས་སུ་མྱ་ངན་ལས་འདའ་བ་ནི་ཚེ་འདི་ལ་ཡོངས་སུ་མྱ་ངན་ལས་འདའ་བ་ཞེས་བྱ་བའི་ཐ་ཚིག་གོ། །གསུམ་པོ་གང་དག་ཅེ་ན་ཞེས་བྱ་བ་རྒྱས་པར་འབྱུང་བ་ནི་ཕ་རོལ་པོ་ཕྱིར་མི་འོང་བ་གསུམ་ཞེས་ངེས་པར་ཕྱེ་སྟེ། མ་བཤད་པས་ཁོང་དུ་མ་ཆུད་དེ་འདྲི་བ་ཡིན་ནོ། །སློབ་དཔོན་གྱིས་ཀྱང་དེ་དག་ནི་
[192a.6]དོན་གྱི་ཤུགས་གྱིས་བཤད་པ་ཡིན་ནོ་ཞེས་བྱ་བར་གཟིགས་ནས་རྣམ་པར་འགྲེལ་པར་མཛད་དེ། བར་མ་དོ་དང་སྐྱེས་ནས་ཡོངས་སུ་མྱ་ངན་ལས་འདའ་བ་དག་ནི་བར་མ་དོར་ཡོངས་སུ་མྱ་ངན་ལས་འདའ་བ་དང་། སྐྱེས་ནས་ཡོངས་སུ་མྱ་ངན་ལས་འདའ་བ་ཞེས་བྱ་བའི་ཐ་ཚིག་གོ། །གོང་དུ་
[192a.7]འཕོ་བ་ནི་གསུམ་པ་ཡིན་ནོ། །དཔེ་གསུམ་གྱིས་མྱུར་བ་དང་། མྱུར་བ་མ་ཡིན་པ་དང་། ཡུན་རིང་མོ་ཞིག་ན་ཡོངས་སུ་མྱ་ངན་ལས་འདའ་བའི་ཕྱིར་རོ་ཞེས་བྱ་བ་ནི་མྱུར་བར་ཡོངས་སུ་མྱ་ངན་ལས་འདའ་བ་དང་། མྱུར་བ་མ་ཡིན་པར་ཡོངས་སུ་མྱ་ངན་ལས་འདའ་བ་དང་། ཡུན་རིང་
[192b]
[192b.1]མོ་ཞིག་ན་ཡོངས་སུ་མྱ་ངན་ལས་འདའ་བ་དཔེ་གསུམ་དང་སྦྱར་བར་བྱ་བ་ཡིན་ཏེ། དཔེར་ན་ཞོག་མ་ཆུང་ངུའི་མེ་མངོན་པར་འགྲུབ་བཞིན་དུ་འཆི་བར་འགྱུར་བ་ལྟར་དང་པོ་དེ། མྱུར་བར་ཡོངས་སུ་མྱ་ངན་ལས་འདའ་བ་གང་ཡིན་པ་དེ་དང་འདྲའོ། །དཔེར་ན་ལྕགས་ཀྱི་ཐུ་ལུམ་མམ། ཐོང་ལྕགས་མེ་
[192b.2]ཀུན་དུ་འབར་བ་རབ་ཏུ་བསྲེགས་པ་ལྕགས་ཀྱི་ཐོ་བས་བརྒྱབ་པ་རྣམས་ཀྱི་ཚ་ཚ་གྱེན་དུ་ཡར་བཞིན་དུ་འཆི་བར་འགྱུར་བ་ལྟར་གཉིས་པ་མྱུར་བ་མ་ཡིན་པ་ཡོངས་སུ་མྱ་ངན་ལས་འདའ་བ་གང་ཡིན་པ་ཡང་དེ་དང་འདྲའོ། །དཔེར་ན་ལྕགས་ཀྱི་ཐུ་ལུམ་མམ་ཞེས་བྱ་བ་ལ་སོགས་པ་སྔ་མ་བཞིན་ཏེ། ཚ་
[192b.3]ཚ་གྱེན་དུ་ཡར་ནས་ས་ལ་མ་ལྷུང་བ་ཁོ་ནར་འཆི་བར་འགྱུར་བ་ལྟར་གསུམ་པ་ཡུན་རིང་མོ་ཞིག་ན་ཡོངས་སུ་མྱ་ངན་ལས་འདའ་བ་གང་ཡིན་པ་ཡང་དེ་དང་འདྲ་སྟེ། མདོ་འདི་ནི་གོང་དུ་བྲིས་ཟིན་པས་ཡང་མི་འདྲིའོ། །སྐྱེས་ནས་དང་། མངོན་པར་འདུ་བྱེད་པ་དང་། མངོན་པར་འདུ་བྱེད་པ་མེད་པར་
[192b.4]ཡོངས་སུ་མྱ་ངན་ལས་འདའ་བའི་ཕྱིར་རོ་ཞེས་བྱ་བ་ནི་སྐྱེས་ནས་ཡོངས་སུ་མྱ་ངན་ལས་འདའ་བའི་ཕྱིར་དང་། མངོན་པར་འདུ་བྱེད་པ་དང་བཅས་པ་དང་། མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བའི་ཕྱིར་རྣམ་པ་གསུམ་དུ་ཕྱེ་བས་ཕྱིར་མི་འོང་བ་དགུ་ཡིན་ནོ་ཞེས་བྱ་བར་
[192b.5]སྦྱར་རོ། །སྐྱེས་ནས་ཡོངས་སུ་མྱ་ངན་ལས་འདའ་བ་ནི་སྐྱེས་པ་ཙམ་གྱིས་ཡོངས་སུ་མྱ་ངན་ལས་འདའ་བ་གང་ཡིན་པ་སྟེ། མངོན་པར་འདུ་བྱེད་པའམ། མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ནི་མ་ཡིན་ནོ། །མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་
[192b.6]ལས་འདའ་བ་ནི་སྐྱེས་པ་ཙམ་ཁོ་ནས་ཡོངས་སུ་མྱ་ངན་ལས་འདའ་བ་མ་ཡིན་ནོ། །འོ་ན་ཅི་ཞེ་ན། མངོན་པར་འདུ་བྱེད་པ་དང་། སྔོན་མངོན་པར་འདུ་བྱེད་པ་མ་བཏང་བའི་མཐུས་ཡོངས་སུ་མྱ་ངན་ལས་འདའ་བ་ཡིན་ནོ། །འདི་ལ་ནི་ལམ་ངང་གིས་འབྱུང་བ་ནི་ཡོད་མོད་ཀྱི། མངོན་པར་
[192b.7]བརྩོན་པས་ཡོངས་སུ་མྱ་ངན་ལས་འདའ་ལ་སྐྱེས་ནས་ཡོངས་སུ་མྱ་ངན་ལས་འདའ་བ་ནི་མངོན་པར་བརྩོན་པ་མེད་པས་ཁྱད་པར་ཡོད་དོ། །མངོན་པར་འདུ་བྱེད་པ་མེད་པས་ཡོངས་སུ་མྱ་ངན་ལས་འདའ་བ་ནི་སྔོན་གྱི་མངོན་པར་འདུ་བྱེད་པ་བཏང་བ་སྟེ། མངོན་པར་འདུ་བྱེད་པ་
[193a]
[193a.1]མེད་པར་ཡོངས་སུ་མྱ་ངན་ལས་འདའ་བ་ཡིན་ནོ། །དེ་ལྟར་ན་དེ་དག་གི་ཁྱད་པར་ནི་དེ་ཡིན་པར་ཁོང་དུ་ཆུད་པར་བྱའོ། །ཇི་ལྟར་ན་མངོན་པར་འདུ་བྱེད་པ་དང་བཅས་པ་དང་། མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་དག་ཀྱང་སྐྱེས་ནས་
[193a.2]ཡོངས་སུ་མྱ་ངན་ལས་འདའ་བའི་མིང་ཐོབ་པར་འགྱུར་བ་དེ་བཞིན་དུ་བསྟན་པའི་ཕྱིར་དེ་དག་ཐམས་ཅད་ཀྱང་སྐྱེས་ནས་ཡོངས་སུ་མྱ་ངན་ལས་འདའ་བའི་ཕྱིར་སྐྱེས་ནས་ཡོངས་སུ་མྱ་ངན་ལས་འདའ་བ་དག་ཡིན་ནོ་ཞེས་བྱ་བ་སྨོས་སོ། །འཕར་བ་ལ་སོགས་པའི་བྱེ་བྲག་གིས་སོ་ཞེས་བྱ་བ་ནི་
[193a.3]འཕར་བ་དང་། ཕྱེད་དུ་འཕར་བ་དང་། ཐམས་ཅད་དུ་འཆི་འཕོ་བའི་བྱེ་བྲག་གིས་སོ་ཞེས་བྱ་བའི་ཐ་ཚིག་གོ། །ཡང་ན་གསུམ་པོ་ཐམས་ཅད་ཅེས་བྱ་བ་ནི་བར་མ་དོ་དང་། སྐྱེས་ནས་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བ་རྣམས་མྱུར་བ་དང་། མྱུར་བ་མ་ཡིན་པ་དང་།
[193a.4]ཡུན་རིང་མོ་ཞིག་ན་ཡོངས་སུ་མྱ་ངན་ལས་འདའ་བའི་ཕྱིར་རྣམ་པ་གསུམ་དུ་དབྱེ་སྟེ། བར་མ་དོར་ཡོངས་སུ་མྱ་ངན་ལས་འདའ་བ་ཡང་ལ་ལ་ནི་མྱུར་བར་ཡོངས་སུ་མྱ་ངན་ལས་འདའོ། །ལ་ལ་ནི་མྱུར་བ་མ་ཡིན་པར་ཡོངས་སུ་མྱ་ངན་ལས་འདའོ། །ལ་ལ་ནི་ཡུན་རིང་མོ་ཞིག་ནས་ཡོངས་
[193a.5]སུ་མྱ་ངན་ལས་འདའོ། །སྐྱེས་ནས་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བ་ཡང་དེ་དང་འདྲ་སྟེ། །རྣམ་པ་གསུམ་དུ་དབྱེ་བའི་ཕྱིར་ཡང་ཕྱིར་མི་འོང་བ་དགུ་ཡིན་ནོ་ཞེས་སྦྱར་བ་དེ་ཉིད་བརྗོད་པར་བྱའོ། །དེ་དག་གིས་ནི་ཁྱད་པར་རྣམས་ཞེས་བྱ་བ་རྒྱས་པར་འབྱུང་བ་ནི་
[193a.6]གསུམ་པོ་བར་མ་དོ་དང་། སྐྱེས་ནས་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བ་དང་དེ་དག་ཉིད་སོ་སོར་རྣམ་པ་གསུམ་དུ་ཕྱེ་བས་དགུ་པོ་དེ་དག་གི་ཁྱད་པར་ཇི་སྐད་དུ་བརྗོད་པ་ནི་ལས་དང་། ཉོན་མོངས་པ་དང་། དབང་པོའི་བྱེ་བྲག་ལས་ཏེ། ལས་དང་། ཉོན་མོངས་པ་དང་།
[193a.7]དབང་པོའི་བྱེ་བྲག་ལས་འགྱུར་རོ། །ཇི་ལྟ་ཞེ་ན། རེ་ཞིག་གསུམ་པོ་ནི་ཞེས་བྱ་བ་རྒྱས་པར་སྨོས་སོ། །མངོན་པར་འགྲུབ་པ་ནི་སྲིད་པ་བར་མ་སྟེ། མངོན་པར་འགྲུབ་པ་མྱོང་བར་འགྱུར་བའི་ལས་བསགས་པའི་ཕྱིར་བར་མ་དོར་ཡོངས་སུ་མྱ་ངན་ལས་འདའ་བ་ཡིན་ནོ། །སྐྱེས་ནས་
[193b]
[193b.1]མྱོང་བར་འགྱུར་བའི་ལས་བསགས་པའི་ཕྱིར་སྐྱེས་ནས་ཡོངས་སུ་མྱ་ངན་ལས་འདའ་བ་ཡིན་ནོ། །ལན་གྲངས་གཞན་ལ་མྱོང་བར་འགྱུར་བའི་ལས་བསགས་པའི་ཕྱིར་གོང་དུ་འཕོ་བ་ཡིན་ཏེ། རེ་ཞིག་གསུམ་པོ་དེ་དག་གི་ཁྱད་པར་ལས་ཀྱི་བྱེ་བྲག་ལས་གྱུར་པ་ནི་དེ་ལྟ་བུ་ཡིན་ནོ། །
[193b.2]ཉོན་མོངས་པ་ཀུན་དུ་སྤྱོད་པ་ཆུང་བ་དང་། འབྲིང་དང་། ཆེན་པོའི་ཕྱིར་གོ་རིམས་བཞིན་དུ་དེ་དག་ཉིད་ཀྱི་ཁྱད་པར་ཉོན་མོངས་པའི་བྱེ་བྲག་ལས་གྱུར་པ་ཡིན་ནོ། །དབང་པོ་ཆེན་པོའི་དང་། འབྲིང་དང་། ཆུང་ངུའི་ཕྱིར་གོ་རིམས་བཞིན་དུ་དེ་དག་ཉིད་ཀྱི་ཁྱད་པར་དབང་པོའི་བྱེ་བྲག་ལས་
[193b.3]གྱུར་པ་ཡིན་ནོ། །དེ་ཉིད་ཀྱི་ཕྱིར་དེ་དག་སོ་སོའི་བྱེ་བྲག་ཀྱང་ཅི་རིགས་པར་ཞེས་བྱ་བ་ནི་ལས་ལ་སོགས་པའི་བྱེ་བྲག་དེ་ཉིད་ཀྱི་ཕྱིར་ཏེ། སོ་སོ་ཐ་དད་པ་དགུ་པོ་དེ་དག་གི་ཁྱད་པར་ཡང་ཞེས་བྱ་བའི་ཐ་ཚིག་གོ། །ཅི་རིགས་པར་ཡིན་གྱི་གོ་རིམས་བཞིན་དུ་ཁོང་དུ་ཆུད་པར་བྱ་བ་ནི་མ་ཡིན་ནོ། །
[193b.4]ཇི་ལྟ་ཞེ་ན། གསུམ་ཚན་དང་པོ་གཉིས་ནི་ཞེས་བྱ་བ་རྒྱས་པར་སྨོས་ཏེ། གསུམ་ཚན་བར་མ་དོར་ཡོངས་སུ་མྱ་ངན་ལས་འདའ་བ་རྣམས་གང་ཡིན་པ་དེས། སྐྱེས་ནས་ཡོངས་སུ་མྱ་ངན་ལས་འདའ་བ་རྣམས་གང་ཡིན་པའོ། །གསུམ་ཚན་དེ་གཉིས་ཀྱི་ཁྱད་པར་ནི་ཉོན་མོངས་པ་དང་དབང་
[193b.5]པོའི་བྱེ་བྲག་ལས་འགྱུར་ཏེ། ཉོན་མོངས་པ་ཀུན་དུ་སྤྱོད་པ་ཆུང་བ་དང་། འབྲིང་དང་། ཆེན་པོའི་ཕྱིར་དང་། དབང་པོ་ཆེན་པོ་དང་། འབྲིང་དང་། ཆུང་ངུའི་ཕྱིར་གོ་རིམས་བཞིན་དུ་ཁྱད་པར་དུ་འགྱུར་རོ། །ལས་ཀྱི་བྱེ་བྲག་ལས་ནི་མ་ཡིན་ཏེ། འདི་ལྟར་གསུམ་ཚན་དང་པོའི་ལས་
[193b.6]མངོན་པར་འགྲུབ་པ་མྱོང་བར་འགྱུར་བ་ཡང་མཚུངས་ལ། གཉིས་པའི་ལས་སྐྱེས་ནས་མྱོང་བར་འགྱུར་བ་ཡང་མཚུངས་པས་སོ། །གསུམ་ཚན་ཐ་མ་ནི་ལན་གྲངས་གཞན་ལ་མྱོང་བར་འགྱུར་བའི་ལས་ཀྱི་བྱེ་བྲག་ལས་ཀྱང་ཁྱད་པར་དུ་བལྟ་སྟེ། འབར་བ་ལ་སོགས་པའི་ལས་ལན་གྲངས་
[193b.7]གཞན་ལ་མྱོང་བར་འགྱུར་བ་ནི་ཐ་དད་པས་དེའི་ཕྱིར། ལན་གྲངས་གཞན་ལ་མྱོང་བར་འགྱུར་བའི་ལས་ཀྱི་བྱེ་བྲག་དག་ཀྱང་ཞེས་བྱ་བས་དྲངས་པ་ཉོན་མོངས་པ་དང་། དབང་པོའི་བྱེ་བྲག་ལས་ཁྱད་པར་དུ་འགྱུར་ཏེ། ཉོན་མོངས་པ་ཀུན་དུ་སྤྱོད་པ་ཆུང་ངུ་དང་། འབྲིང་དང་། ཆེན་པོའི་ཕྱིར་དང་། དབང་
[194a]
[194a.1]པོ་ཆེན་པོ་དང་། འབྲིང་དང་། ཆུང་ངུའི་ཕྱིར་གོ་རིམས་བཞིན་ནོ་ཞེས་བྱ་བའི་ཐ་ཚིག་གོ། །དེ་དག་ནི་ཉོན་མོངས་པ་དང་དབང་པོའི་རྣམ་པ་དགུའི་ཕྱིར་ཞེས་བྱ་བ་ནི་ཕྱིར་མི་འོང་བ་དེ་དག་ནི་ཉོན་མོངས་པའི་རྣམ་པ་དགུའི་ཕྱིར་དང་། དབང་པོའི་རྣམ་པ་དགུའི་ཕྱིར་ཕྱིར་མི་འོང་བ་
[194a.2]དགུ་ཡིན་ནོ། །ལས་མ་སྨོས་པ་ནི་ཁྱབ་པ་ཡིན་པའི་ཕྱིར་ཏེ། གསུམ་ཚན་དང་པོ་གཉིས་ནི་ལས་ཀྱི་བྱེ་བྲག་ལས་ཁྱད་པར་དུ་གྱུར་པ་མེད་དོ། །ཡང་ཇི་ལྟར་ན་ཉོན་མོངས་པ་དེ་དག་རྣམ་པ་དགུ་ཡིན་ཞེ་ན། འདི་ལ་ཉོན་མོངས་པ་ནི་ཆུང་ངུ་དང་། འབྲིང་དང་། ཆེན་པོ་དང་རྣམ་པ་གསུམ་སྟེ། བར་
[194a.3]མ་དོར་ཡོངས་སུ་མྱ་ངན་ལས་འདའ་བ་རྣམས་ཀྱི་ནི་ཆུང་ངུ་ཡིན་ནོ། །སྐྱེས་ནས་ཡོངས་སུ་མྱ་ངན་ལས་འདའ་བ་རྣམས་ཀྱི་ནི་འབྲིང་ཡིན་ནོ། །གོང་དུ་འཕོ་བ་རྣམས་ཀྱི་ནི་ཆེན་པོ་ཡིན་ནོ། །དེ་ཡང་བར་མ་དོར་ཡོངས་སུ་མྱ་ངན་ལས་འདའ་བ་དང་པོ་ནི་ཉོན་མོངས་པ་ཆུང་ངུའི་ཆུང་ངུ་ཅན་ཡིན་ནོ། །གཉིས་
[194a.4]པ་ནི་ཉོན་མོངས་པ་ཆུང་ངུའི་འབྲིང་པོ་ཅན་ཡིན་ནོ། །གསུམ་པ་ནི་ཉོན་མོངས་པ་ཆུང་ངུའི་ཆེན་པོ་ཅན་ཡིན་ནོ། །སྐྱེས་ནས་ཡོངས་སུ་མྱ་ངན་ལས་འདའ་བ་རྣམས་ལ་ཡང་དང་པོ་སྟེ། སྐྱེས་ནས་ཡོངས་སུ་མྱ་ངན་ལས་འདའ་བ་ནི་ཉོན་མོངས་པ་འབྲིང་པོའི་ཆུང་ངུ་ཅན་ཡིན་ནོ། །གཉིས་
[194a.5]པ་མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་ནི་ཉོན་མོངས་པ་འབྲིང་པོའི་འབྲིང་པོ་ཡིན་ནོ། །གསུམ་པ་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ནི་ཉོན་མོངས་པ་འབྲིང་པོའི་ཆེན་པོ་ཅན་ཡིན་ནོ། །གོང་དུ་འཕོ་བ་རྣམས་ལ་ཡང་འཕར་བ་ནི་ཉོན་
[194a.6]མོངས་པ་ཆེན་པོའི་ཆུང་ངུ་ཅན་ཡིན་ནོ། །ཕྱེད་དུ་འཕར་བ་ནི་ཉོན་མོངས་པ་ཆེན་པོའི་འབྲིང་པོ་ཅན་ཡིན་ནོ། །གནས་ཐམས་ཅད་དུ་འཆི་འཕོ་བ་ནི་ཉོན་མོངས་པ་ཆེན་པོའི་ཆེན་པོ་ཅན་ཡིན་ནོ། །ཇི་ལྟར་ན་དབང་པོའི་རྣམ་པ་དགུ་ཡིན་ཞེ་ན། དེ་བཞིན་དུ་དབང་པོ་ཡང་ཆེན་པོ་དང་འབྲིང་
[194a.7]པོ་དང་ཆུང་ངུ་རྣམས་ཏེ། བར་མ་དོར་ཡོངས་སུ་མྱ་ངན་ལས་འདའ་བ་རྣམས་ཀྱི་ནི་ཆེན་པོ་ཡིན་ནོ། །སྐྱེས་ནས་ཡོངས་སུ་མྱ་ངན་ལས་འདའ་བ་རྣམས་ཀྱི་ནི་འབྲིང་ཡིན་ནོ། །གོང་དུ་འཕོ་བ་རྣམས་ཀྱི་ནི་ཆུང་ངུ་ཡིན་ནོ། །དེ་ལ་ཡང་བར་མ་དོར་ཡོངས་སུ་མྱ་ངན་ལས་འདའ་བ་དང་པོ་ནི་དབང་
[194b]
[194b.1]པོ་ཆེན་པོའི་ཆེན་པོ་ཅན་ཡིན་ནོ། །གཉིས་པ་ནི་དབང་པོ་ཆེན་པོའི་འབྲིང་པོ་ཅན་ཡིན་ནོ། །གསུམ་པ་ནི་དབང་པོ་ཆེན་པོའི་ཆུང་ངུ་ཅན་ཡིན་ནོ། །སྐྱེས་ནས་ཡོངས་སུ་མྱ་ངན་ལས་འདའ་བ་རྣམས་ལ་ཡང་དང་པོ་སྟེ། སྐྱེས་ནས་ཡོངས་སུ་མྱ་ངན་ལས་འདའ་བ་ནི་དབང་པོ་འབྲིང་པོའི་ཆེན་པོ་
[194b.2]ཅན་ཡིན་ནོ། །མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་ནི་དབང་པོ་འབྲིང་པོའི་འབྲིང་པོ་ཅན་ཡིན་ནོ། །མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ནི་དབང་པོ་འབྲིང་པོའི་ཆུང་ངུ་ཅན་ཡིན་ནོ། །གོང་དུ་འཕོ་བ་རྣམས་ལ་ཡང་འཕར་བ་
[194b.3]ནི་དབང་པོ་ཆུང་ངུའི་ཆེན་པོ་ཅན་ནོ། ཕྱེད་དུ་འཕར་བ་ནི་དབང་པོ་ཆུང་ངུའི་འབྲིང་པོ་ཅན་ཡིན་ནོ། །གནས་ཐམས་ཅད་དུ་འཆི་འཕོ་བ་ནི་དབང་པོ་ཆུང་ངུའི་ཆུང་ངུ་ཅན་ཡིན་ནོ། །འོ་ན་མདོ་ལས་སྐྱེས་བུ་དམ་པའི་འགྲོ་བ་བདུན་བསྟན་པ་ཇི་ལྟ་བུ་ཞེ་ན་ཞེས་བྱ་བ་ནི་དགེ་སློང་དག་ངས་སྐྱེས་བུ་དམ་པའི་
[194b.4]འགྲོ་བ་བདུན་དང་། ཉེ་བར་ལེན་པ་མེད་པར་ཡོངས་སུ་མྱ་ངན་ལས་འདའ་བ་ཡང་བསྟན་པར་བྱའོ་ཞེས་འབྱུང་བ་ཡིན་ནོ། །མདོ་དེ་ཐམས་ཅད་ནི་འགྲོ་མདོ་ལས་ཞེས་བྱ་བའི་ཕྱོགས་དེར་བྲིས་ཟིན་པས་ཡང་མི་བྲིའོ། །མདོ་དེ་ལས་ནི་སྐྱེས་བུ་དམ་པའི་འགྲོ་བ་བདུན་བསྟན་ཏེ། བར་མ་དོར་ཡོངས་
[194b.5]སུ་མྱ་ངན་ལས་འདའ་བ་གསུམ་དང་། སྐྱེས་ནས་ཡོངས་སུ་མྱ་ངན་ལས་འདའ་བ་གསུམ་སྟེ། འགྲོ་བ་དྲུག་གོ། །བདུན་པ་ནི་གོང་དུ་འཕོ་བའི་འགྲོ་བ་ཡིན་ནོ། །དེ་མ་ཕྱེ་བར་བསྟན་པའི་ཕྱིར་ཞེས་བྱ་བ་ནི་གོང་དུ་འཕོ་བ་དེ་འཕར་བ་ལ་སོགས་པ་ཕྱེ་སྟེ་མ་བསྟན་པའི་ཕྱིར་ཞེས་བྱ་བའི་ཐ་ཚིག་
[194b.6]སྟེ། མདོ་ལས་བསྟན་པ་ནི་གདུལ་བའི་བསམ་པ་ལ་ལྟོས་པ་ཡིན་ནོ། །སློབ་པའི་འགྲོ་བ་གཞན་དག་ནི་མ་ཡིན་ཞེས་བྱ་བ་ནི་རྒྱུན་དུ་ཞུགས་པ་དང་ལན་ཅིག་ཕྱིར་འོང་བའི་འགྲོ་བ་དག་མ་ཡིན་ཞེས་བྱ་བའི་ཐ་ཚིག་སྟེ། འགྲོ་བ་དང་། སྐྱེ་བ་དང་། ཚེ་ཕྱི་མ་ཞེས་བྱ་བ་འདི་དག་ནི་མདོ་ལས་རྣམ་
[194b.7]གྲངས་སུ་བཤད་དོ། །དེ་དག་ཅེས་བྱ་བ་ནི་ཕྱིར་མི་འོང་བ་དག་སྟེ། སྲོག་གཅོད་པ་ལ་སོགས་པ་མི་བྱེད་པའི་ཕྱིར་ལས་དམ་པ་ལ་འཇུག་ཅིང་མི་ཚངས་པར་སྤྱོད་པ་ལ་སོགས་པ་མི་བྱེད་པའི་ཕྱིར་དམ་པ་མ་ཡིན་པ་ལ་མི་འཇུག་སྟེ། མི་ཚངས་པར་སྤྱོད་པ་ལ་སོགས་པ་ནི་མི་དགེ་བའི་བསམ་
[195a]
[195a.1]པའི་སེམས་ཀྱིས་བྱེད་ན། འདོད་ཆགས་དང་བྲལ་བ་དེ་དག་ནི་མི་དགེ་བ་སྤངས་པའི་ཕྱིར་དམ་པ་ཁོ་ན་ལ་འཇུག་གི་དམ་པ་མ་ཡིན་པ་ལ་མི་འཇུག་གོ། །ཡང་ཕྱིར་འོང་བ་མེད་ཅེས་བྱ་བ་ནི་འགྲོ་བ་གང་དག་ཏུ་སྐྱེས་པ་དེའི་འོག་གམ་དེར་གཏན་མི་འོང་ཞེས་བྱ་བའི་ཐ་
[195a.2]ཚིག་གོ། །ཇི་སྐད་དུ་བཤད་པ་འདི་གཞན་ལ་ནི་མེད་པས་ཞེས་བྱ་བ་ནི་དམ་པ་ཁོ་ན་ལ་འཇུག་ཅིང་དམ་པ་མ་ཡིན་པ་ལ་མི་འཇུག་པ་དང་། ཡང་ཕྱིར་འོང་བ་མེད་པ་གང་ཡིན་པ་དེ་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་ལ་མེད་པས་སོ། །གཞན་དག་ལ་ཡང་ཞེས་བྱ་བ་ནི་རྒྱུན་དུ་
[195a.3]ཞུགས་པ་དང་། ལན་ཅིག་ཕྱིར་འོང་བ་དག་ལ་ཡང་ཞེས་བྱ་བའི་དོན་ཏོ། །རྣམ་གྲངས་པ་ཞེས་བྱ་བ་ནི་རྣམ་གྲངས་ལས་བྱུང་བས་ན་རྣམ་གྲངས་པ་སྟེ། རྣམ་པ་འགའ་ཞིག་གིས་ཡིན་ཞེས་བྱ་བའི་ཐ་ཚིག་གོ། །ཇི་ལྟར་ཞེ་ན་སྡིག་པ་རྣམ་པ་ལྔ་གཏན་མི་བྱེད་པའི་སྡོམ་པ་ཐོབ་པའི་ཕྱིར་ཞེས་བྱ་
[195a.4]བ་སྨོས་ཏེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཆང་འཐུང་བའི་མཚན་ཉིད་ཀྱི་སྡིག་པ་རྣམ་པ་ལྔ་མི་བྱེད་པས་མི་བྱེད་པར་སྡོམ་པ་ནི་སྡོམ་པར་བྱེད་པ་སྟེ། དེ་ཐོབ་པའི་ཕྱིར་རོ། །འཕགས་པ་ནི་ཚེ་
[195a.5]རབས་གཞན་ན་ཡང་སྡིག་པ་རྣམ་པ་ལྔ་པོ་འདི་མི་སྤྱོད་དོ། །མི་བྱེད་པའི་སྡོམ་པ་ཞེས་སྨོས་པ་ནི་ཡང་དག་པར་ལེན་པའི་སྡོམ་པ་ནི་གདོན་མི་ཟ་བ་མ་ཡིན་པའི་ཕྱིར་རོ། །ཕལ་ཆེར་ཞེས་བྱ་བ་ནི་མཐོང་བས་སྤང་བར་བྱ་བ་ནི་མི་དགེ་བ་ཐམས་ཅད་གཏན་སྤངས་པའི་ཕྱིར་དང་། ཅི་རིགས་
[195a.6]པར་བསྒོམས་པས་སྤང་བར་བྱ་བ་འདོད་པ་ན་སྤྱོད་པ་ཁ་ཅིག་སྤངས་པའི་ཕྱིར་རོ། །གང་དག་ལ་ཞེས་བྱ་བ་རྒྱས་པར་འབྱུང་བ་ནི་གང་དག་ལ་རྣམ་གྲངས་མེད་པར་ཡོད་པ་སྟེ། རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་ལྟར་རྣམ་པ་གཞན་གྱིས་སྐྱེས་བུ་དམ་པ་ཉིད་ཡིན་པ་ལྟ་བུ་ནི་མ་
[195a.7]ཡིན་ནོ། །འོ་ན་ཅི་ཞེ་ན། སྡིག་པ་ཐམས་ཅད་གཏན་མི་བྱེད་པའི་སྡོམ་པ་ཐོབ་པའི་ཕྱིར་དང་། མཐོང་བས་སྤོང་བར་བྱ་བ་མི་དགེ་བ་ཐམས་ཅད་སྤངས་པའི་ཕྱིར་དང་། བསྒོམ་པས་སྤང་བར་བྱ་བ་འདོད་པ་ན་སྤྱོད་པ་རྣམ་པ་དགུ་པོ་ཐམས་ཅད་སྤངས་པའི་ཕྱིར་མདོ་འདིར་སྐྱེས་བུ་དམ་པའི་འགྲོ་
[195b]
[195b.1]བ་བདུན་ཞེས་གསུངས་པ་ནི་སྐྱེས་བུ་དམ་པ་ཕྱིར་མི་འོང་བ་དེ་དག་གི་སྐབས་ཡིན་ནོ། །དེའི་ཕྱིར་གཞན་དག་ཀྱང་རྣམ་གྲངས་པའི་སྐྱེས་བུ་དམ་པ་ཉིད་ཡིན་པ་ནི་མི་དག་གོ། །ཅི་ཕྱིར་མི་འོང་བ་ཚེ་ཡོངས་སུ་གྱུར་པ་ལ་ཡང་བར་མ་དོར་ཡོངས་སུ་མྱ་ངན་ལས་འདའ་བ་ཞེས་བྱ་བ་དེ་ལྟ་བུ་ལ་
[195b.2]སོགས་པའི་དབྱེ་བ་འདི་ཡོད་དམ་ཞེས་བྱ་བ་ཕྱིར་མི་འོང་བ་ཚེ་ཡོངས་སུ་གྱུར་པ་ནི་གང་ཞིག་ཚེ་དང་པོ་ལ་རྒྱུན་དུ་ཞུགས་པའི་འབྲས་བུ་འམ། ལན་ཅིག་ཕྱིར་འོང་བའི་འབྲས་བུ་ཐོབ་ནས་ཚེ་གཉིས་པ་ལ་ཕྱིར་མི་འོང་བར་གྱུར་པ་ཡིན་ནོ། །འདོད་པར་ཞེས་བྱ་བ་ཁྱད་པར་སྨོས་པ་ནི་འདི་ལྟར་གཟུགས་
[195b.3]ཀྱི་ཁམས་སུ་ཚེ་ཡོངས་སུ་གྱུར་པ་ནི་རེས་འགའ་གཟུགས་མེད་པ་དག་ཏུ་འཇུག་པས་སོ། །ཚེ་དེ་ཉིད་ལ་ཡོངས་སུ་མྱ་ངན་ལས་འདའ་བའི་ཕྱིར་རོ་ཞེས་བྱ་བ་ནི་འདི་འདོད་པའི་ཁམས་ལ་སྡུག་བསྔལ་མང་བ་ཉིད་ཀྱིས་ཤིན་ཏུ་སྐྱོ་བའི་ཕྱིར་རོ། །འོ་ན་བརྒྱ་བྱིན་གྱིས་ཞེས་བྱ་བ་རྒྱས་པར་འབྱུང་བ་ནི་
[195b.4]བརྒྱ་བྱིན་གྱིས་བདག་འདི་ནས་ཤི་འཕོས་ཏེ་མིའི་ནང་དུ་སྐྱེས་ནས་གལ་ཏེ་དགྲ་བཅོམ་པ་ཉིད་ཐོབ་སྟེ། ཡོངས་སུ་མྱ་ངན་ལས་མི་འདའི། བདག་ནི་ཐ་མར་ཉམས་ན་ལྷ་གང་འོག་མིན་ཞེས། རྣམ་པར་གྲགས་པ་དེར་ནི་སྐྱེ་བར་འགྱུར་བར་ཤོག །ཅེས་སྨྲས་ཏེ་དེ་ནི་ལྷ་དག་གི་ནང་ཁོ་ནར་རྒྱུན་དུ་
[195b.5]ཞུགས་པར་གྱུར་ནས་མི་དག་གི་ནང་དུ་འོངས་ཏེ། ཡོངས་སུ་མྱ་ངན་ལས་འདའོ་ཞེས་སྨྲས་པའི་ཕྱིར་ཚེ་ཡོངས་སུ་གྱུར་པ་ཡིན་པར་འགྱུར་རོ། །ཐ་མར་རིས་མཐུན་པའི་མཇུག་ཏུ་ཉམས་ན་སྟེ། དགྲ་བཅོམ་པ་ཉིད་མ་ཐོབ་པར་མ་ཐོབ་པའི་ཡོངས་སུ་ཉམས་པས་ཉམས་ན། འོག་མིན་དེར་ནི་
[195b.6]སྐྱེ་བར་འགྱུར་བར་ཤོག །ཅེས་དོན་དུ་གཉེར་བར་སྨྲས་པའི་ཕྱིར་ཁམས་གཞན་དུ་འགྲོ་བ་ཡོད་དོ་ཞེས་བསྟན་པ་ཡིན་ནོ་ཞེས་བྱ་བར་མངོན་ན་དེ་ཇི་ལྟར་མདོའི་དོན་འདོད་པའི་ཁམས་སུ་ཚེ་གཞན་དུ་ཡོངས་སུ་གྱུར་པའི་འཕགས་པ་ཁམས་གཞན་དུ་མི་འགྲོའོ་ཞེས་བཤད་དོ་ཞེས་བྱ་བར་སྣང་།
[195b.7]ཁྱོད་བརྒྱ་བྱིན་གྱིས་ཆོས་ཀྱི་མཚན་ཉིད་མངོན་པར་མི་ཤེས་པའི་ཕྱིར་དེ་སྐད་དུ་སྨྲས་པར་ཟད་དེ། དེ་ལྟ་བས་ན་ཞེས་པ་མེད་དོ་ཞེས་ཟེར་ན། བཅོམ་ལྡན་འདས་དེ་སྐད་དུ་གསན་པས་ཀྱང་ཅིའི་ཕྱིར་ཁྱོད་དེ་སྐད་དུ་མ་སྨྲ་ཤིག་ཅེས་དེ་མ་བཟློག་ཅེ་ན། དེའི་ཕྱིར་ཡང་དག་པར་དགའ་བར་བྱ་བ་ཡིན་པའི་
[196a]
[196a.1]ཕྱིར་བཅོམ་ལྡན་འདས་ཀྱིས་ཀྱང་མ་བཀག་གོ་ཞེས་བྱ་བ་སྨོས་ཏེ། འདོད་པའི་སྡུག་བསྔལ་ཡོངས་སུ་སྤང་བར་འདོད་པས་ཡང་དག་པར་དགའ་བར་བྱ་བ་ཡིན་ནོ་སྙམ་དུ་བསམས་པའོ། །སློབ་དཔོན་འདུས་བཟངས་ན་རེ་ཤི་འཕོ་བའི་རྒྱུ་མཚན་ཅན་གྱི་སྐྱེ་བའི་
[196a.2]སྡུག་བསྔལ་གྱིས་ཡིད་བྱུང་བ་ནི་ཡང་དག་པར་དགའ་བར་བྱ་བ་ཡིན་པའི་ཕྱིར་རོ་ཞེས་ཟེར་རོ། །དབང་པོ་རྣམས་ཆེས་ཡོངས་སུ་སྨིན་པའི་ཕྱིར་ཞེས་བྱ་བ་ནི་ཤེས་རབ་ལ་སོགས་པའི་དབང་པོ་རྣམས་ཀྱི་རྒྱུ་མཐུན་པའི་འབྲས་བུ་ཁྱད་པར་དུ་གྱུར་པའི་ཕྱིར་ཞེས་བྱ་བའི་ཐ་ཚིག་གོ །རྟེན་ཁྱད་པར་
[196a.3]ཅན་ཐོབ་པའི་ཕྱིར་རོ་ཞེས་བྱ་བ་ནི་འདི་ལྟར་རྟེན་ཁྱད་པར་ཅན་མ་ཉམས་པ་ལམ་མངོན་དུ་འགྱུར་བ་དང་མཐུན་པ་ཐོབ་པ་སྟེ། དབང་པོ་རྣོན་པོ་དག་ཡིན་ཡང་རྟེན་མི་མཐུན་པས་ཡོན་ཏན་དག་ལས་ཉམས་པ་སྣང་ངོ་། །དེ་ལྟ་བས་ན་ཚེ་རབས་གཞན་ནས་ཡོངས་སུ་འདྲིས་པས་དབང་པོ་རྣམས་
[196a.4]ཆེས་ཡོངས་སུ་སྨིན་པའི་ཕྱིར་དབང་པོ་འཕོ་བ་མེད་ལ། རྟེན་ཁྱད་པར་ཅན་ཐོབ་པའི་ཕྱིར་ཡོངས་སུ་ཉམས་པ་མེད་དེ། ཚེ་རབས་གཞན་ནས་ཡོངས་སུ་འདྲིས་པ་དེ་ཉིད་ཀྱིས་ཁམས་གཞན་དུ་འགྲོ་བར་ཡང་མི་འགྱུར་རོ། །ལམ་མ་འདྲིས་པས་མངོན་སུམ་དུ་མི་འགྱུར་བའི་ཕྱིར་
[196a.5]ཞེས་བྱ་བ་ནི་གང་གི་ཕྱིར་ལམ་མ་འདྲིས་པས་མངོན་སུམ་དུ་མི་འགྱུར་བ་རྒྱུ་དེའི་ཕྱིར་སློབ་པ་འདོད་ཆགས་དང་མ་བྲལ་བ་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་བར་མ་དོར་ཡོངས་སུ་མྱ་ངན་ལས་འདའ་བར་མི་འགྱུར་རོ། །ཕྲ་རྒྱས་རྣམས་ཤིན་དུ་ཆུང་བ་མ་ཡིན་པའི་ཕྱིར་རོ་ཞེས་
[196a.6]བྱ་བ་ནི་གང་གི་ཕྱིར་དེའི་ཕྲ་རྒྱས་རྣམས་ཤིན་དུ་ཆུང་བ་མ་ཡིན་པ་དེའི་ཕྱིར་བར་མ་དོར་ཡོངས་སུ་མྱ་ངན་ལས་འདའ་བར་མི་འགྱུར་རོ་ཞེས་བྱ་བ་ཡིན་ཏེ་འདི་ནི་སློབ་དཔོན་གྱི་ལན་ཡིན་ནོ། །བྱེ་བྲག་ཏུ་སྨྲ་བ་རྣམས་ཀྱི་ལན་གང་ཡིན་ཞེ་ན། བྱེ་བྲག་ཏུ་སྨྲ་བ་རྣམས་ན་རེ་འདོད་པའི་ཁམས་ལས་
[196a.7]འདའ་བར་དཀའ་བའི་ཕྱིར་ཞེས་བྱ་བ་སྨོས་སོ། །ཇི་ལྟ་ཞེ་ན། སྨྲས་པ། འདིས་ཉོན་མོངས་པ་མི་དགེ་བ་དང་ལུང་མ་བསྟན་པ་སྤང་པ་སྟེ། འདིས་མི་དགེ་བ་འདོད་པ་ན་སྤྱོད་པ་རྣམས་དང་། ལུང་དུ་མ་བསྟན་པ་གཟུགས་དང་གཟུགས་མེད་པ་ན་སྤྱོད་པ་རྣམས་སྤང་བར་བྱ་དགོས་སོ། །
[196b]
[196b.1]སློབ་པ་འདོད་ཆགས་དང་བྲལ་བས་ནི་ལུང་དུ་མ་བསྟན་པ་ཁོ་ན་སྤང་བར་ཟད་དོ། །དགེ་སྦྱོང་གི་ཚུལ་གྱི་འབྲས་བུ་གཉིས་སམ་གསུམ་ཐོབ་པ་ཞེས་བྱ་བ་ནི་དགེ་སྦྱོང་གི་ཚུལ་གྱི་འབྲས་བུ་གཉིས་སམ་གསུམ་ཐོབ་པར་བྱ་དགོས་ཏེ། ལན་ཅིག་ཕྱིར་འོང་བས་ནི་ཕྱིར་མི་འོང་བའི་འབྲས་བུ་དང་། དགྲ་
[196b.2]བཅོམ་པ་ཉིད་ཀྱི་འབྲས་བུ་དང་། དགེ་སྦྱོང་གི་ཚུལ་གྱི་འབྲས་བུ་གཉིས་ཐོབ་པར་བྱ་དགོས་ལ། རྒྱུན་དུ་ཞུགས་པས་ནི་གསུམ་སྟེ། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་ཀྱི་འབྲས་བུའོ། །འདོད་ཆགས་དང་བྲལ་བས་ནི་དགྲ་བཅོམ་
[196b.3]པ་ཉིད་ཀྱི་འབྲས་བུ་གཅིག་ཁོ་ན་ཐོབ་པར་བྱ་བར་ཟད་དོ། །འདོད་ཆགས་དང་མ་བྲལ་བས་ཁམས་གསུམ་ལས་ཡང་དག་པར་འདའ་བར་ཡང་བྱ་དགོས་ལ། འདོད་ཆགས་དང་བྲལ་བ་གཟུགས་ཀྱི་འདོད་ཆགས་དང་མ་བྲལ་བ་བར་མ་དོར་ཡོངས་སུ་མྱ་ངན་ལས་འདའ་བར་འགྱུར་བས་
[196b.4]ནི་ཁམས་གཉིས་ལས་ཡང་དག་པར་འདའ་བར་བྱ་བར་ཟད་དོ། །སྤེལ་བར་བྱེད་ཅེས་བྱ་བ་ནི་སྲེ་བར་ཡང་བྱེད་ཅིང་འདྲེན་མར་བྱེད་པས་ཏེ། ཟག་པ་དང་བཅས་པའི་བསམ་གཏན་བཞི་པ་ཟག་པ་མེད་པ་དག་དང་སྤེལ་བར་བྱེད་ཅེས་བྱ་བའི་ཐ་ཚིག་གོ། །ལམ་སླ་བ་རྣམས་ཀྱི་ནང་ན་མཆོག་
[196b.5]ཡིན་པའི་ཕྱིར་རོ་ཞེས་བྱ་བ་ལ། ལམ་སླ་བ་ནི་དངོས་གཞིའི་བསམ་གཏན་བཞི་ཡིན་ཏེ། བསམ་གཏན་དག་གི་ལམ་རྣམས་སླ། །ཞེས་འབྱུང་བའི་ཕྱིར་རོ། །བསམ་གཏན་བཞི་པ་ནི་སྐྱོན་བརྒྱད་ལས་གྲོལ་བའི་ཕྱིར་དེ་དག་གི་ནང་ན་མཆོག་ཡིན་ནོ། །གང་གི་ཚེ་ཞེས་བྱ་བ་ལ། གྲག་
[196b.6]ཅེས་བྱ་བ་ནི། བྱེ་བྲག་ཏུ་སྨྲ་བའི་གཞུང་ལུགས་སྟོན་པར་བྱེད་པ་ཡིན་ཏེ། རང་གི་གཞུང་ལུགས་ནི་འོག་ནས་སྐད་ཅིག་མ་སྤེལ་བར་ནི་མི་ནུས་ཏེ་ཞེས་བྱ་བ་རྒྱས་པར་འབྱུང་བས་སྟོན་ཏོ། །སྐད་ཅིག་མ་གཉིས་ནི་བར་ཆད་མེད་པའི་ལམ་ལྟ་བུ་ཡིན་ཞེས་བྱ་བ་ནི་ཟག་པ་མེད་པ་དང་།
[196b.7]ཟག་པ་དང་བཅས་པ་དག་གོ། །གསུམ་པ་ནི་རྣམ་པར་གྲོལ་བའི་ལམ་ལྟ་བུ་ཡིན་ནོ་ཞེས་བྱ་བ་ནི་ཟག་པ་མེད་པའོ། །དབང་པོ་རྟུལ་པོ་རྣམས་ནི་ཉོན་མོངས་པས་ཀྱང་འཇིགས་པའི་ཕྱིར་སྤེལ་བར་བྱེད་དེ། ཡང་ཞེས་བྱ་བའི་སྒྲས་ནི་གནས་གཙང་མར་སྐྱེ་བར་བྱ་བའི་ཕྱིར་དང་། མཐོང་བའི་
[197a]
[197a.1]ཆོས་ལ་བདེ་བར་གནས་པར་བྱ་བའི་ཕྱིར་ཡང་སྤེལ་བར་བྱེད་དོ། །དབང་པོ་རྣོན་པོ་རྣམས་ནི་གནས་གཙང་མར་སྐྱེ་བར་བྱ་བའི་ཕྱིར་དང་། མཐོང་བའི་ཆོས་ལ་བདེ་བར་གནས་པར་བྱ་བ་ཁོ་ནའི་ཕྱིར་སྤེལ་བར་བྱེད་ཀྱི་དེ་དག་ལ་ཡང་ཡོངས་སུ་ཉམས་པ་མི་སྲིད་པའི་ཕྱིར་ཉོན་
[197a.2]མོངས་པས་འཇིགས་པའི་ཕྱིར་ནི་མ་ཡིན་ནོ། །ཡང་ཇི་ལྟར་ན་ཉོན་མོངས་པས་འཇིགས་པས་ཡོངས་སུ་མི་ཉམས་པར་བྱ་བའི་ཕྱིར་སྤེལ་བར་བྱེད་ཅེ་ན། རོ་མྱོང་བ་དང་མཚུངས་པར་ལྡན་པའི་ཏིང་ངེ་འཛིན་ཐག་བསྲིང་བའི་སྒོ་ནས་ཡོངས་སུ་མི་ཉམས་པར་བྱ་བའི་ཕྱིར་རོ་ཞེས་བྱ་བ་སྨོས་ཏེ་
[197a.3]འབྲས་བུ་ལས་ཡོངས་སུ་མི་ཉམས་པར་བྱ་བའི་ཕྱིར་རོ། །རྣམ་པ་ལྔ་ཡིན་ཏེ་ཞེས་བྱ་བ་ནི་ཆུང་ངུ་དང་། འབྲིང་དང་། ཆེན་པོ་དང་། ཤིན་ཏུ་ཆེ་བ་དང་། ཤིན་ཏུ་ཆེས་ཆེ་བའོ། །དང་པོ་ལ་ནི་སེམས་གསུམ་ཞེས་བྱ་བ་ནི་གང་ཟག་དེ་ལ་ནུས་པ་དེ་ཙམ་ཞིག་ཡོད་པས་ཏེ། དེ་བཞིན་དུ་འོག་མ་རྣམས་ལ་
[197a.4]ཡང་བརྗོད་པར་བྱའོ། །གཉིས་པ་ལ་ནི་དྲུག་གོ་ཞེས་བྱ་བ་ནི་ཟག་པ་མེད་པ་དང་། ཟག་པ་དང་བཅས་པ་དང་། ཟག་པ་མེད་པ་ཞེས་བྱ་བ་གསུམ་དང་། ཡང་ཟག་པ་མེད་པ་དང་། ཟག་པ་དང་བཅས་པ་དང་། ཟག་པ་མེད་པ་ཞེས་བྱ་བ་གསུམ་སྟེ་དྲུག་ཡིན་ནོ། །གསུམ་པ་ལ་ནི་
[197a.5]དགུའོ། །བཞི་པ་ལ་ནི་བཅུ་གཉིས་སོ། །ལྔ་པ་ལ་ནི་བཅོ་ལྔ་སྟེ་ཞེས་བྱ་བ་ལ། ཡང་དེ་ཁོ་ན་བཞིན་དུ་སྦྱར་བར་བྱའོ། །དེ་དག་གི་འབྲས་བུ་ནི་གྲངས་བཞིན་དུ་ཞེས་བྱ་བ་ནི་སྤེལ་མར་བསྒོམ་པ་དེ་དག་གི་འབྲས་བུ་ནི་གྲངས་བཞིན་དུ་གནས་གཙང་མ་ལྔ་ཡིན་ཏེ། བསྒོམ་པ་ཆུང་ངུའི་
[197a.6]འབྲས་བུ་མི་ཆེ་བ་ཡིན་པ་ནས་བསྒོམ་པ་ཤིན་ཏུ་ཆེས་ཆེ་བའི་འབྲས་བུ་འོག་མིན་ཡིན་པའི་བར་དུའོ། །དད་པའི་དབང་པོ་ལ་སོགས་པ་ལྷག་པའི་ཕྱིར་ཞེས་བྱ་བ་ནི་བཙུན་པ་དཔལ་ལེན་གྱི་གཞུང་ལུགས་ཡིན་ཏེ། བསྒོམ་པ་དང་དད་པ་ཤས་ཆེ་བའི་འབྲས་བུ་མི་ཆེ་བ་ཡིན་པ་ནས་དེ་
[197a.7]བཞིན་དུ་བསྒོམ་པ་ཤེས་རབ་ཤས་ཆེ་བའི་འབྲས་བུ་འོག་མིན་ཡིན་པའི་བར་དུའོ། །ཕྱིར་མི་འོང་བ་གང་ལ་ལ་ཞེས་བྱ་བ་ནི་དད་པས་མོས་པའམ་མཐོང་བས་ཐོབ་པའོ། །ལུས་ཀྱི་མངོན་སུམ་དུ་བྱེད་པའི་ཕྱིར་ཞེས་བྱ་བ་ནི་སེམས་མེད་པའི་ཕྱིར་ལུས་ཁོ་ནས་མངོན་སུམ་དུ་བྱེད་དོ། །
[197b]
[197b.1]ཇི་ལྟར་ལུས་ཁོ་ནས་ཡིན་ཞེ་ན། སྨྲས་པ། ལུས་ལ་བརྟེན་ཏེ་སྐྱེ་བའི་ཕྱིར་རོ། །འདི་ལྟ་བུ་ཡིན་པར་འགྱུར་ཏེ་ཞེས་བྱ་བ་ནི་སློབ་དཔོན་རང་གི་གཞུང་ལུགས་ཡིན་ནོ། །ཐོབ་པ་དང་ཞེས་པས་མངོན་སུམ་དུ་བྱེད་པ་དག་གིས་ཞེས་བྱ་བ་ནི་ཏིང་ངེ་འཛིན་གྱི་དུས་ན་དེ་དང་མཐུན་པའི་རྟེན་གྱིས་ཐོབ་
[197b.2]པ་མངོན་སུམ་དུ་བྱེད་པའི་ཕྱིར་དང་ལངས་པའི་དུས་ན་དེ་ཡང་སོ་སོར་ཡང་དག་པར་མྱོང་བའི་ཤེས་པས་མངོན་སུམ་དུ་བྱེད་པའི་ཕྱིར་རོ། །མངོན་སུམ་དུ་གྱུར་པ་ནི་མངོན་དུ་བྱེད་པ་ཡིན་ནོ་ཞེས་བྱ་བ་ནི་རྣམ་པར་ཤེས་པ་དང་བཅས་པའི་ལུས་ཞི་བ་ཐོབ་པའི་གནས་སྐབས་ན་མངོན་དུ་བྱེད་པར་རུང་ངོ་སྙམ་
[197b.3]དུ་བསམས་པ་ཡིན་ནོ། །རྣམ་པར་ཤེས་པ་དང་བཅས་པའི་ལུས་ཞི་བ་ཐོབ་པས་རྣམ་པར་ཤེས་པ་མེད་པའི་ལུས་ཞི་བའི་གནས་སྐབས་ན་ཡང་དེ་ཐོབ་པར་མངོན་ནོ། །མདོ་ལས་སློབ་པ་བཅོ་བརྒྱད་ཅེས་གསུངས་པ་དེར་ཞེས་བྱ་བ་ནི་བཅོམ་ལྡན་འདས་ལ་ཁྱིམ་བདག་མགོན་མེད་ཟས་སྦྱིན་གྱིས་ཞུས་
[197b.4]པ། བཙུན་པ་ཡོན་གནས་དུ་ཞིག་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་སློབ་པ་བཅོ་བརྒྱད་དང་། མི་སློབ་པ་དགུ་ནི་ཡོན་གནས་ཡིན་ཏེ། སློབ་པ་བཅོ་བརྒྱད་གང་ཞེ་ན། རྒྱུན་དུ་ཞུགས་པའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། རྒྱུན་དུ་ཞུགས་པ་
[197b.5]དང་། ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། ཕྱིར་མི་འོང་བ་དང་དགྲ་བཅོམ་པ་ཉིད་ཀྱི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། དད་པས་རྗེས་སུ་འབྲང་བ་དང་། ཆོས་
[197b.6]ཀྱི་རྗེས་སུ་འབྲང་བ་དང་། དད་པས་མོས་པ་དང་། མཐོང་བས་ཐོབ་པ་དང་། རིགས་ནས་རིགས་སུ་སྐྱེ་བ་དང་། བར་ཆད་གཅིག་པ་དང་། བར་མ་དོར་ཡོངས་སུ་མྱ་ངན་ལས་འདའ་བ་དང་། སྐྱེས་ནས་ཡོངས་སུ་མྱ་ངན་ལས་འདའ་བ་དང་། མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་དང་། མངོན་
[197b.7]པར་འདུ་བྱེད་པ་མེད་པས་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བ་སྟེ། ཁྱིམ་བདག་དེ་དག་ནི་སློབ་པ་བཅོ་བརྒྱད་ཡིན་ནོ། །མི་སློབ་པ་དགུ་གང་ཡིན་ཞེ་ན། ཡོངས་སུ་ཉམས་པའི་ཆོས་ཅན་དང་། འཆི་བར་སེམས་པའི་ཆོས་ཅན་དང་། རྗེས་སུ་སྲུང་བའི་ཆོས་ཅན་དང་། གནས་
[198a]
[198a.1]པ་ལས་མི་གཡོ་བ་དང་། རྟོགས་པའི་སྐལ་བ་ཅན་དང་། མི་གཡོ་བའི་ཆོས་ཅན་དང་། ཡོངས་སུ་མི་ཉམས་པའི་ཆོས་ཅན་དང་། ཤེས་རབ་ཀྱིས་རྣམ་པར་གྲོལ་བ་དང་། གཉི་གའི་ཆ་ལས་རྣམ་པར་གྲོལ་བ་སྟེ། ཁྱིམ་བདག་དེ་དག་ནི་མི་སློབ་པ་དགུ་ཡིན་ནོ་ཞེས་
[198a.2]འབྱུང་བ་ཡིན་ནོ། །བསླབ་པ་གསུམ་དང་དེའི་འབྲས་བུ་ཞེས་བྱ་བ་ལ། བསླབ་པ་གསུམ་ནི་འཕགས་པའི་ལམ་གྱི་རང་བཞིན་ཡིན་ཏེ། ལྷག་པའི་ཚུལ་ཁྲིམས་དང་། ལྷག་པའི་ཤེས་རབ་བོ། །དེ་དག་གི་འབྲས་བུ་ནི་བྲལ་བའོ། །དེའི་ཁྱད་པར་གྱིས་སློབ་པ་རྣམས་རྣམ་པར་གཞག་
[198a.3]གོ་ཞེས་བྱ་བ་ནི་བསླབ་པའི་ཁྱད་པར་དང་། དེའི་འབྲས་བུའི་ཁྱད་པར་གྱིས་ཞེས་བྱ་བའི་ཐ་ཚིག་གོ། །དེའི་ཁྱད་པར་ཡང་ཇི་ལྟ་བུ་ཞིག་ཡིན་ཞེ་ན། །སློབ་པ་བཅོ་བརྒྱད་ཀྱི་བསླབ་པ་དང་། འབྲས་བུ་བྲལ་བ་གཞན་དང་གཞན་མི་འདྲ་བ་ཡིན་ནོ། །འགོག་པའི་སྙོམས་པར་འཇུག་པ་ནི་སྤོང་བའི་ལམ་གྱི་རང་
[198a.4]བཞིན་མ་ཡིན་པའི་ཕྱིར་བསླབ་པ་ཡང་མ་ཡིན་ལ། བྲལ་བའི་རང་བཞིན་མ་ཡིན་པའི་ཕྱིར་སློབ་པའི་འབྲས་བུ་ཡང་མ་ཡིན་ཏེ། དེའི་ཕྱིར་དེ་དང་ལྡན་པས་ཏེ། འགོག་པའི་སྙོམས་པར་འཇུག་པ་དང་ལྡན་པས་སློབ་པ་བཅོ་བརྒྱད་པོ་དེ་དག་ཇི་ལྟ་བར་སློབ་པའི་བྱེ་བྲག་ཏུ་མ་གསུངས་ཀྱི།
[198a.5]འདི་སློབ་པ་མ་ཡིན་པ་ནི་མ་ཡིན་ནོ། །དེ་ལ་མདོ་ལས། སློབ་པ་བཅོ་བརྒྱད་ཅེས་གསུངས་པ་དེར་ལུས་ཀྱིས་མངོན་སུམ་དུ་བྱེད་པ་ཅིའི་ཕྱིར་མ་གསུངས་ཞེས་གང་ཟེར་བ་དེ་ནི་དེ་ལྟ་བུའི་སློབ་པར་མ་གསུངས་པར་ཟད་དོ། །དབྱེ་བ་ཆེ་ལོང་ཡིན་ནོ་ཞེས་བྱ་བ་ནི་གཟུགས་སུ་ཉེ་བར་འགྲོ་བའི་ཕྱིར་
[198a.6]མི་འོང་བ་ལྔ་ཞེས་བྱ་བ་དང་། གཞན་ནི་གཟུགས་མེད་འགྲོ་རྣམ་བཞི། །ཞེས་བྱ་བ་དང་། གཞན་ནི་འདི་ལ་མྱ་ངན་འདའ། །ཞེས་བྱ་བ་དེ་ལྟ་བུ་ལ་སོགས་པའོ།། །།བམ་པོ་བཞི་བཅུ་རྩ་དགུ་པ། ཞིབ་ཏུ་དབྱེ་བ་ནི་ཞེས་བྱ་བ་རྒྱས་པར་འབྱུང་བ་ནི་འདིར་སློབ་དཔོན་གྱིས་
[198a.7]བརྩེ་བའི་ཐབས་རབ་ཏུ་བསྟན་པའི་ཕྱིར་དང་པོའི་བར་མ་དོར་ཡོངས་སུ་མྱ་ངན་ལས་འདའ་བའི་དབང་པོ་དང་། ས་དང་རིགས་ལ་སོགས་པའི་ཁྱད་པར་བྱེ་བྲག་ཏུ་སྟོན་པར་མཛད་དོ། །ཅིའི་ཕྱིར་ཞེ་ན། དེའི་བྱེ་བྲག་བགྲངས་ན་ཇི་ལྟར་བར་མ་དོར་ཡོངས་སུ་མྱ་ངན་ལས་འདའ་བ་དབང་པོ་
[198b]
[198b.1]ལ་སོགས་པའི་བྱེ་བྲག་གིས་ཐ་དད་པ་ལྟར་གོང་དུ་འཕོ་བའི་བར་དུ་ཡང་དེ་དང་འདྲའོ་ཞེས་བསྒྲེ་སླ་བར་བྱ་བའི་ཕྱིར་རོ། །དེ་དག་ཉིད་སའི་བྱེ་བྲག་གིས་བཞིའོ་ཞེས་བྱ་བ་ལ། དེ་དག་ཉིད་ནི་བར་མ་དོར་ཡོངས་སུ་མྱ་ངན་ལས་འདའ་བ་རྣམས་སོ། །ས་དག་ནི་བསམ་གཏན་བཞི་ཡིན་ཏེ།
[198b.2]གཟུགས་སུ་ཉེ་བར་འགྲོ་བའི་ཕྱིར་མི་འོང་བ་རྣམས་བརྗོད་པར་བཞེད་པའི་ཕྱིར་རོ། །དེ་ལ་བསམ་གཏན་དང་པོར་བར་མ་དོར་ཡོངས་སུ་མྱ་ངན་ལས་འདའ་བ་ནས་བསམ་གཏན་བཞི་པའི་བར་ཏེ་བཞིའོ། །ཡོངས་སུ་ཉམས་པའི་ཆོས་ཅན་ལ་སོགས་པའི་རིགས་ཀྱི་བྱེ་བྲག་གིས་དྲུག་གོ་
[198b.3]ཞེས་བྱ་བ་ནི་དེ་ཉིད་ཡོངས་སུ་ཉམས་པའི་ཆོས་ཅན་དང་། འཆི་བར་སེམས་པའི་ཆོས་ཅན་དང་། རྗེས་སུ་སྲུང་བའི་ཆོས་ཅན་དང་། གནས་པ་ལས་མི་གཡོ་བ་དང་། རྟོགས་པའི་སྐལ་བ་ཅན་དང་། མི་གཡོ་བའི་ཆོས་ཅན་ཞེས་བྱ་བ་ཡིན་ནོ། །གནས་གཞན་གྱི་བྱེ་བྲག་གིས་བཅུ་དྲུག་གོ་
[198b.4]ཞེས་བྱ་བ་ནི་ཚངས་རིས་ལ་སོགས་པ་འོག་མིན་ལ་ཐུག་པ་དག་གོ། །ཚངས་ཆེན་ནི་བྱེ་བྲག་ཏུ་སྨྲ་བའི་ལུགས་ཀྱིས་ཀྱང་གནས་གཞན་མ་ཡིན་ལ། ཉི་འོག་པའི་ལུགས་ཀྱིས་ནི་གནས་གཞན་ཉིད་ཡིན་མོད་ཀྱི་དེར་འཕགས་པ་མི་སྐྱེ་བས་མི་བགྲང་སྟེ། དེ་ལྟར་ན་གནས་གཞན་གྱི་བྱེ་བྲག་
[198b.5]གིས་བར་མ་དོར་ཡོངས་སུ་མྱ་ངན་ལས་འདའ་བ་བཅུ་དྲུག་ཡིན་ནོ། །ས་དང་འདོད་ཆགས་དང་བྲལ་བའི་བྱེ་བྲག་གིས་སུམ་ཅུ་རྩ་དྲུག་སྟེ་ཞེས་བྱ་བ་ནི་སའི་བྱེ་བྲག་དང་དེ་ལ་འདོད་ཆགས་དང་བྲལ་བའི་བྱེ་བྲག་གིས་བར་མ་དོར་ཡོངས་སུ་མྱ་ངན་ལས་འདའ་བ་སུམ་ཅུ་རྩ་དྲུག་གོ། །ཇི་ལྟ་ཞེ་ན།
[198b.6]གཟུགས་ཀྱི་ཁམས་ཀྱི་འཆིང་བ་མཐའ་དག་དང་ལྡན་པ་ཞེས་བྱ་བ་རྒྱས་པར་འབྱུང་བས་སྟོན་པར་བྱེད་དེ། གཟུགས་ཀྱི་ཁམས་ཀྱི་བསམ་གཏན་དང་པོའི་འཆིང་བ་མཐའ་དག་དང་ལྡན་པ་དང་རྣམ་པ་གཅིག་ལས་འདོད་ཆགས་དང་བྲལ་བ་ནས་རྣམ་པ་བརྒྱད་ལས་འདོད་ཆགས་དང་བྲལ་བའི་
[198b.7]བར་དགུའོ། །གཉིས་པའི་ཡང་འཆིང་བ་མཐའ་དག་དང་ལྡན་པ་ནས་རྣམ་པ་བརྒྱད་ལས་འདོད་ཆགས་དང་བྲལ་བའི་བར་དགུའོ། །དེ་བཞིན་དུ་གསུམ་པའི་དགུ་དང་། དེ་བཞིན་དུ་བཞི་པའི་དགུ་སྟེ། དགུ་བཞི་སུམ་ཅུ་རྩ་དྲུག་ཡིན་ནོ། །བསམ་གཏན་བཞི་པའི་རྣམ་པ་བརྒྱད་ལས་
[199a]
[199a.1]འདོད་ཆགས་དང་བྲལ་བའི་བར་རོ་ཞེས་བྱ་བ་ལ། བར་ཞེས་བྱ་བའི་སྒྲས་ནི་བསྒྲེས་པའི་དོན་འདི་འཐོབ་པོ། །བསམ་གཏན་བཞི་པའི་དགུ་པའི་རྣམ་པ་ལས་འདོད་ཆགས་དང་བྲལ་བ་ཞེས་ནི་མི་བརྗོད་དེ། འདི་ནི་གཟུགས་མེད་པའི་འཆིང་བ་མཐའ་དག་དང་ལྡན་པ་ཡིན་ནོ། །
[199a.2]འདིར་ནི་གཟུགས་མེད་པར་འགྲོ་བའི་དབང་དུ་བྱེད་པ་མ་ཡིན་གྱི། སྲིད་པ་བར་མ་དང་སྦྱར་བས་འདིར་གཟུགས་སུ་ཉེ་བར་འགྲོ་བ་རྣམས་བརྗོད་པར་འདོད་པའི་ཕྱིར་རོ། །དེ་ལྟ་ཡིན་པས་གནས་གཞན་དང་རིགས་དང་འདོད་ཆགས་དང་བྲལ་བ་དང་དབང་པོའི་བྱེ་བྲག་གིས་ཞེས་བྱ་བ་རྒྱས་པར་སྨོས་ཏེ།
[199a.3]གནས་གཞན་རྣམས་དང་། རིགས་རྣམས་དང་། འདོད་ཆགས་དང་བྲལ་བ་རྣམས་དང་། དབང་པོ་རྣམས་ཀྱི་བྱེ་བྲག་གིས་བར་མ་དོར་ཡོངས་སུ་མྱ་ངན་ལས་འདའ་བ་དེ་དག་ཉིས་སྟོང་ལྔ་བརྒྱ་དགུ་བཅུ་རྩ་གཉིས་ཡིན་ཏེ། རྩ་དགུ་བཅུ་རྩ་གཉིས་སོ། །ཇི་ལྟར་བྱས་པས་དེ་ལྟར་འགྱུར་ཞེ་ན།
[199a.4]སྨྲས་པ། གནས་གཅིག་ན་སྟེ། དཔེར་ན་ཚངས་རིས་ལྟ་བུ་ན་ཡོངས་སུ་ཉམས་པའི་ཆོས་ཅན་ལ་སོགས་པའི་བྱེ་བྲག་གིས་རིགས་དྲུག་གོ། །རིགས་རེ་རེ་ལ་ཞེས་བྱ་བ་ནི་ཟློག་པ་ཡིན་ནོ། །འཆིང་བ་མཐའ་དག་དང་ལྡན་པ་ནས་རང་གི་གནས་དཔེར་ན་ཚངས་རིས་ལྟ་བུའི་རྣམ་པ་བརྒྱད་
[199a.5]ལས་འདོད་ཆགས་དང་བྲལ་བའི་བར་གང་ཟག་དགུ་དགུའོ། །རིགས་དང་ལྡན་པའི་གང་ཟག་དགུ་དགུ་སྨོས་པའི་ཕྱིར་དགུ་དྲུག་ནི་ལྔ་བཅུ་བཞིའོ། །གནས་གཞན་བཅུ་དྲུག་སྨོས་པའི་ཕྱིར་ལྔ་བཅུ་རྩ་བཞི་ཕྲག་བཅུ་དྲུག་ན་བརྒྱད་བརྒྱ་དྲུག་ཅུ་རྩ་བཞི་སྟེ། རྩ་དྲུག་ཅུ་རྩ་བཞིའོ། །ཡང་
[199a.6]དབང་པོ་བྱེ་བྲག་གིས་གསུམ་དུ་འགྱུར་ཏེ། ཆུང་ངུ་དང་འབྲིང་དང་། ཆེན་པོའི་བྱེ་བྲག་གིས་སོ། །དེ་ལྟར་བྱས་པས་སོ། །ཅི་ཞེ་ན། ཉིས་སྟོང་ལྔ་བརྒྱ་དགུ་བཅུ་རྩ་གཉིས་ཡིན་ནོ། །ཚུལ་གང་གིས་འཆིང་བ་མཐའ་དག་དང་ལྡན་པ་ནས་རྣམ་པ་བརྒྱད་ལས་འདོད་ཆགས་དང་བྲལ་བའི་
[199a.7]བར་གང་ཟག་དགུ་དགུར་རྣམ་པར་གཞག་པའི་ཚུལ་དེ་བསྟན་པའི་ཕྱིར། བསམ་གཏན་འོག་མའི་ཞེས་བྱ་བ་རྒྱས་པར་སྨོས་ཏེ། བསམ་གཏན་འོག་མ་སྟེ། དང་པོ་ནས་གསུམ་པའི་བར་གྱི་རྣམ་པ་དགུ་ལས་འདོད་ཆགས་དང་བྲལ་བ་གང་ཡིན་པ་དེ་ནི་བསམ་གཏན་གོང་མ་སྟེ།
[199b]
[199b.1]གཉིས་པ་ནས་བཞི་པའི་བར་གྱི་འཆིང་བ་མཐའ་དག་དང་ལྡན་པ་ཡིན་ནོ་ཞེས་བཤད་དོ། །ཅིའི་ཕྱིར་ཞེ་ན། འདྲ་བར་བརྩི་བའི་ཕྱིར་ཞེས་བྱ་བ་རྒྱས་པར་སྨོས་ཏེ། ཅི་ནས་ཀྱང་བསམ་གཏན་བཞི་པ་ན་དགུ་དགུར་འགྱུར་བར་བྱ་བའི་ཕྱིར་རོ། །གཞན་དུ་ན་མི་འདྲ་བར་བརྩིས་པར་འགྱུར་ཏེ།
[199b.2]བསམ་གཏན་དང་པོ་ན་འཆིང་བ་མཐའ་དག་དང་ལྡན་པ་ནས་རྣམ་པ་དགུ་ལས་འདོད་ཆགས་དང་བྲལ་བའི་བར་བཅུར་འགྱུར་རོ། །གཉིས་པ་ནི་རྣམ་པ་གཅིག་ལས་འདོད་ཆགས་དང་བྲལ་བ་ནས་རྣམ་པ་དགུ་ལས་འདོད་ཆགས་དང་བྲལ་བའི་བར་དགུར་འགྱུར་ཏེ། གསུམ་པ་ན་ཡང་དེ་དང་
[199b.3]འདྲའོ། །བཞི་པ་ན་ནི་རྣམ་པ་གཅིག་ལས་འདོད་ཆགས་དང་བྲལ་བ་ནས་རྣམ་པ་བརྒྱད་ལས་འདོད་ཆགས་ལས་བྲལ་བའི་བར་བརྒྱད་དུ་འགྱུར་ཏེ། རྣམ་པ་དགུ་ལས་འདོད་ཆགས་དང་བྲལ་བ་ནི་གཟུགས་མེད་པའི་འཆིང་བ་མཐའ་དག་དང་ལྡན་པ་ཡིན་པའི་ཕྱིར་རོ་ཞེས་བཤད་ཟིན་ཏོ། །གོང་
[199b.4]དུ་འཕོ་བའི་བར་དུ་ཡང་དེ་དང་འདྲ་བས་ཞེས་བྱ་བ་ནི་སྐྱེས་ནས་དང་། མངོན་པར་འདུ་བྱེད་པ་དང་བཅས་པ་དང་མངོན་པར་འདུ་བྱེད་པ་མེད་པ་དང་། གོང་དུ་འཕོ་བ་རྣམས་ཀྱང་གནས་གཞན་དང་། རིགས་དང་། འདོད་ཆགས་དང་བྲལ་བ་དང་། དབང་པོའི་བྱེ་བྲག་གིས་དེ་བཞིན་དུ་སོ་སོར་ཉིས་
[199b.5]སྟོང་ལྔ་བརྒྱ་དགུ་བཅུ་རྩ་གཉིས་ཡིན་ཏེ། ཐམས་ཅད་བསྡུས་ན་ཕྱིར་མི་འོང་བའི་ཁྱད་པར་ལྔ་པོ་དག་ཁྲི་ཉིས་སྟོང་དགུ་བརྒྱ་རྩ་དྲུག་ཅུ་ཡིན་ནོ། །གཟུགས་མེད་པར་འགྲོ་བ་སྐྱེས་ནས་ཞེས་བྱ་བ་ལ་སོགས་པ་རྣམ་པ་བཞིའི་ཁྱད་པར་དག་དང་བཅས་ན་ནི་དེའི་ཚེ་དེ་དག་མང་མོ་ཞིག་ཏུ་འགྱུར་བ་
[199b.6]ལམ་འདིས་ཁོང་དུ་ཆུད་པར་འགྱུར་བ་ཉིད་པས་མ་བྲིས་སོ། །སྲིད་རྩེའི་བར་ཆ་བརྒྱད་ཟད་པ། །ཞེས་བྱ་བ་ནི་སྲིད་པའི་རྩེ་མོའི་རྣམ་པ་བརྒྱད་ཀྱི་བར་ཟད་པར་བྱེད་པ་ནས་སྲིད་རྩེའི་བར་ཆ་བརྒྱད་ཟད་པ་སྟེ། སྲིད་པའི་རྩེ་མོའི་རྣམ་པ་བརྒྱད་ཀྱི་བར་ཟད་པར་ཡང་བྱེད་པ་ཞེས་བྱ་བའི་ཐ་ཚིག་
[199b.7]གོ། །ཕྱིར་མི་འོང་བ་དེ་བསམ་གཏན་དང་པོའི་རྣམ་པ་གཅིག་ལས་འདོད་ཆགས་དང་བྲལ་བ་ནས་བཟུང་སྟེ་ཞེས་བྱ་བ་ནི་གང་གི་ཕྱིར་འདོད་པ་ལས་འདོད་ཆགས་དང་བྲལ་བས་ཕྱིར་མི་འོང་བ་རྣམ་པར་གཞག་པ་དེའི་ཕྱིར་དེ་ཡན་ཆད་ནི་དགྲ་བཅོམ་པ་ཉིད་ཀྱི་འབྲས་བུ་ལ་ཞུགས་པ་ཡིན་ནོ། །
[200a]
[200a.1]ཇི་ལྟར་རྡོ་རྗེས་ཐམས་ཅད་འཇོམས་པ་དེ་བཞིན་དུ་ཏིང་ངེ་འཛིན་འདིས་ཀྱང་ཕྲ་རྒྱས་ཐམས་ཅད་འཇོམས་པས་མཐུའི་སྒོ་ནས་འདི་རྡོ་རྗེ་དང་འདྲ་བས་ན་རྡོ་རྗེ་ལྟ་བུ་ཡིན་ནོ། །བཅོམ་ཟིན་པའི་ཕྱིར་འདིས་ཐམས་ཅད་འཇོམས་པ་ནི་མ་ཡིན་ཞེས་བྱ་བ་ནི་ཁམས་གསུམ་པའི་མཐོང་
[200a.2]བས་སྤང་བར་བྱ་བ་དང་། བསྒོམ་པས་སྤང་བར་བྱ་བ་འདོད་པ་ན་སྤྱོད་པ་ནས་སྲིད་པའི་རྩེ་མོ་པའི་རྣམ་པ་བརྒྱད་ཀྱི་བར་དག་གོ། །གལ་ཏེ་ཐམས་ཅད་མི་འཇོམས་ན་ཅིའི་ཕྱིར་ཕྲ་རྒྱས་ཐམས་ཅད་འཇོམས་པ་ཡིན་ཞེས་བྱ་ཞེ་ན། དེའི་ཕྱིར་ཐམས་ཅད་འཇོམས་པར་ནུས་པ་ཡིན་ནོ་ཞེས་བྱ་བ་སྨོས་ཏེ།
[200a.3]སྲིད་པའི་དབང་དུ་བྱས་ནས་བཤད་དོ་སྙམ་དུ་དགོངས་པ་ཡིན་ནོ། །མི་ལྕོགས་པ་མེད་པས་བསྡུས་པ་ཞེས་བྱ་བ་རྒྱས་པར་འབྱུང་བ་ནི་དགྲ་བཅོམ་པ་ཉིད་ནི་ས་དགུ་པོ་མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་དང་། བསམ་གཏན་བཞི་དང་། སྲིད་པའི་རྩེ་མོ་མ་གཏོགས་
[200a.4]པ་གཟུགས་མེད་པ་གསུམ་ལ་བརྟེན་ནས་འཐོབ་སྟེ། དེའི་ཕྱིར་འདི་ལྟར་སྤྲོས་སོ། །སྡུག་བསྔལ་དང་ཀུན་འབྱུང་བ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བརྒྱད་ཅེས་བྱ་བ་ནི་སྲིད་པའི་རྩེ་མོ་པའི་སྡུག་བསྔལ་ལ་དམིགས་པ་རྗེས་སུ་ཤེས་པའི་རྣམ་པ་བཞི་དང་
[200a.5]མཚུངས་པར་ལྡན་པ་བཞི་དང་། སྲིད་པའི་རྩེ་མོ་པའི་ཀུན་འབྱུང་བ་ལ་དམིགས་པ་རྗེས་སུ་ཤེས་པའི་རྣམ་པ་གཞན་བཞི་དང་མཚུངས་པར་ལྡན་པ་བཞི་སྟེ་བརྒྱད་དོ། །འགོག་པ་དང་ལམ་ལ་ཆོས་ཤེས་པའི་རྣམ་པ་དག་དང་མཚུངས་པར་ལྡན་པ་བརྒྱད་ཅེས་བྱ་བ་ལའང་དེ་ཁོ་ན་
[200a.6]བཞིན་དུ་བརྗོད་པར་བྱ་སྟེ། བསྒོམ་པའི་ལམ་ལ་འགོག་པའམ། །ལམ་ལ་ཆོས་ཤེས་གང་ཡིན་ཏེ། །ཁམས་གསུམ་གྱི་ནི་གཉེན་པོ་ཡིན། །ཞེས་འབྱུང་བས་འདིར་དེ་གཉིས་ཁོ་ན་ཉེ་བར་དགོད་ཀྱི་སྡུག་བསྔལ་དང་ཀུན་འབྱུང་བ་ལ་ཆོས་ཤེས་པ་དག་ནི་མི་གཟུང་ངོ་། །དེ་
[200a.7]བཞིན་དུ་སྲིད་པའི་རྩེ་མོའི་འགོག་པ་ལ་དམིགས་པའི་བར་དུ་ཞེས་བྱ་བ་ལ། བར་དུ་ཞེས་བྱ་བའི་སྒྲས་ནི་ཇི་ལྟར་བསམ་གཏན་དང་པོའི་འགོག་པ་ལ་དམིགས་པའི་རྣམ་པ་དག་དང་མཚུངས་པར་ལྡན་པ་བཞི་ཡིན་པ་དེ་བཞིན་དུ་བསམ་གཏན་གཉིས་པ་དང་། གསུམ་པ་དང་།
[200b]
[200b.1]བཞི་པ་དང་། ནམ་མཁའ་དང་། རྣམ་ཤེས་དང་། ཅི་ཡང་མེད་པའི་སྐྱེ་མཆེད་དང་། སྲིད་པའི་རྩེ་མོའི་འགོག་པ་ལ་དམིགས་པ་དག་ཀྱང་སོ་སོར་བཞི་བཞི་ཡིན་པར་བརྗོད་པར་བྱའོ། །ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞི་སྟེ་ཞེས་བྱ་བ་འདི་ནི་སོ་སོའི་
[200b.2]ལམ་ལ་དམིགས་པ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞི་བཞི་ཞེས་མི་བརྗོད་དོ། །ཅིའི་ཕྱིར་ལམ་ལ་ཞེ་ན། རྗེས་སུ་ཤེས་པའི་ཕྱོགས་དང་མཐུན་པར་ཟད་པ་ལ་དམིགས་པའི་ཕྱིར་རོ་ཞེས་བྱ་བ་སྨོས་སོ། །རྗེས་སུ་ཤེས་པའི་ཕྱོགས་དང་མཐུན་པའི་ལམ་ནི་གཉེན་
[200b.3]པོའི་ངོ་བོར་ཡང་ཁྱད་པར་མེད་ལ་ལམ་ནི་ཕན་ཚུན་གྱི་རྒྱུ་ཡང་ཡིན་པས་རིལ་ཁོ་ན་ལ་དམིགས་ཀྱི་འགོག་པ་ནི་མ་ཡིན་ནོ། །དེའི་ཕྱིར་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་ནི་བཞི་ཁོ་ནར་ཟད་དོ། །དེ་དག་ནི་ཤེས་པའི་རྣམ་པ་དག་དང་དམིགས་པའི་བྱེ་བྲག་གིས་
[200b.4]ཐ་དད་པའི་ཕྱིར་ཞེས་བྱ་བ་ནི་ཤེས་པའི་རྣམ་པའི་བྱེ་བྲག་དང་། དམིགས་པའི་བྱེ་བྲག་གིས་ཐ་དད་པའོ། །ཡང་ན་ཤེས་པ་རྣམས་དང་རྣམ་པ་རྣམས་དང་། དམིགས་པ་རྣམས་ཀྱི་བྱེ་བྲག་གིས་ཐ་དད་པ་སྟེ། རེ་ཞིག་ཤེས་པའི་རྣམ་པའི་བྱེ་བྲག་གིས་ཐ་དད་པ་ནི་སྡུག་བསྔལ་དང་ཀུན་འབྱུང་བ་ལ་
[200b.5]རྗེས་སུ་ཤེས་པའི་རྣམ་པ་དག་དང་ཞེས་བྱ་བ་དེ་ལྟ་བུ་ལ་སོགས་པ་འབྱུང་བའི་ཕྱིར་རོ། །དམིགས་པའི་བྱེ་བྲག་གིས་ཐ་དད་པ་ཡང་སྲིད་པའི་རྩེ་མོ་པའི་སྡུག་བསྔལ་དང་ཀུན་འབྱུང་བ་ལ་དམིགས་པ་ཞེས་བྱ་བ་དེ་ལྟ་བུ་ལ་སོགས་པ་འབྱུང་བའི་ཕྱིར་རོ། །ལྔ་བཅུ་རྩ་གཉིས་ཡིན་ནོ་ཞེས་བྱ་བ་ནི་དང་
[200b.6]པོ་བརྒྱད་ཚན་གཉིས་ཏེ། བཅུ་དྲུག་དང་། བསམ་གཏན་དང་པོའི་འགོག་པ་ལ་དམིགས་པ་བཞི་ནས་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞིའི་བར་དུ་བཞི་ཚན་དགུ་ལ་སུམ་ཅུ་རྩ་དྲུག་སྟེ། བཅུ་དྲུག་དང་སུམ་ཅུ་རྩ་དྲུག་ནི་ལྔ་བཅུ་རྩ་གཉིས་སུ་འགྱུར་རོ། །མི་
[200b.7]ལྕོགས་པ་མེད་པས་བསྡུས་པ་ཇི་ལྟ་བར་ཞེས་བྱ་བ་རྒྱས་པར་འབྱུང་བ་ནི་དངོས་གཞིའི་བསམ་གཏན་ལ་མ་བརྟེན་ཅིང་མ་ཞུགས་པར་སྐྱེ་བས་ན་མི་ལྕོགས་པ་མེད་པས་ཏེ། བཤད་མ་ཐག་པའི་རྣམ་པ་གང་གིས་མི་ལྕོགས་པ་མེད་པས་བསྡུས་པའི་རྡོ་རྗེ་ལྟ་བུའི་ཏིང་ངེ་འཛིན་ལྔ་བཅུ་རྩ་གཉིས་
[201a]
[201a.1]ཡིན་པའི་རྣམ་པ་དེ་ཉིད་ཀྱི་བསམ་གཏན་ཁྱད་པར་ཅན་གྱིས་བསྡུས་པ་ཡང་ལྔ་བཅུ་རྩ་གཉིས་ཡིན་ནོ། །ཇི་ལྟར་ཤེས་པས་ཤེ་ན། བསམ་གཏན་ཁྱད་པར་ཅན་གྱིས་བསྡུས་པ་སྲིད་པའི་རྩེ་མོ་པའི་སྡུག་བསྔལ་དང་ཀུན་འབྱུང་བ་ལ་དམིགས་པ་སྡུག་བསྔལ་དང་ཀུན་
[201a.2]འབྱུང་བ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བརྒྱད་དང་། འགོག་པ་དང་ལམ་ལ་ཆོས་ཤེས་པའི་རྣམ་པ་དག་དང་མཚུངས་པར་ལྡན་པ་བརྒྱད་དང་། འགོག་པ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བསམ་གཏན་དང་པོའི་འགོག་པ་ལ་དམིགས་
[201a.3]པ་བཞི་ནས་དེ་བཞིན་དུ་སྲིད་པའི་རྩེ་མོའི་འགོག་པ་ལ་དམིགས་པའི་བར་དུ་བཞི་དང་། ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞི་སྟེ། རྗེས་སུ་ཤེས་པའི་ཕྱོགས་དང་མཐུན་པ་ཟད་པར་ལ་དམིགས་པའི་ཕྱིར་རོ། །དེ་དག་ནི་ཤེས་པའི་རྣམ་པ་དང་། དམིགས་པའི་
[201a.4]བྱེ་བྲག་གིས་ཐ་དད་པའི་ཕྱིར་ལྔ་བཅུ་རྩ་གཉིས་ཡིན་ནོ། །བསམ་གཏན་ཁྱད་པར་ཅན་གྱིས་བསྡུས་པ་ཇི་ལྟ་བ་དེ་བཞིན་དུ་བསམ་གཏན་དང་པོས་བསྡུས་པ་ལྔ་བཅུ་རྩ་གཉིས་ཡིན་པ་ནས་བསམ་གཏན་བཞི་པས་བསྡུས་པའི་བར་དུ་ལྔ་བཅུ་རྩ་གཉིས་ཡིན་ནོ། །གྲངས་བཞིན་དུ་ཞེས་བྱ་བ་རྒྱས་པར་འབྱུང་བ་
[201a.5]ནི་ནམ་མཁའ་མཐའ་ཡས་སྐྱེ་མཆེད་ཀྱིས་བསྡུས་པ་ནི་ཉི་ཤུ་རྩ་བརྒྱད་དོ། །རྣམ་ཤེས་མཐའ་ཡས་སྐྱེ་མཆེད་ཀྱིས་བསྡུས་པ་ནི་ཉི་ཤུ་རྩ་བཞིའོ། །ཅི་ཡང་མེད་པའི་སྐྱེ་མཆེད་ཀྱིས་བསྡུས་པ་ནི་ཉི་ཤུའོ། །སྲིད་པའི་རྩེ་མོ་ན་ནི་འཕགས་པའི་ལམ་མེད་པས་དེས་བསྡུས་པ་མེད་པའི་ཕྱིར་མི་
[201a.6]བསམ་མོ། །དེ་དག་ན་ཆོས་ཤེས་པ་མེད་པའི་ཕྱིར་ཞེས་བྱ་བ་ནི་ཆོས་ཤེས་པ་ནི་ས་དྲུག་པ་ཡིན་པའི་ཕྱིར་དེ་ལྟ་བས་ན་འགོག་པ་དང་ལམ་ལ་ཆོས་ཤེས་པའི་རྣམ་པ་དག་དང་མཚུངས་པར་ལྡན་པ་བརྒྱད་མེད་དོ། །རྗེས་སུ་ཤེས་པས་ས་འོག་མའི་འགོག་པ་ལ་དམིགས་པ་མེད་པའི་ཕྱིར་འགོག་པ་ལ་རྗེས་སུ་
[201a.7]ཤེས་པའི་རྣམ་པ་དག་དང་མཚུངས་པར་ལྡན་པ་བསམ་གཏན་བཞིའི་འགོག་པ་ལ་དམིགས་པ་བཅུ་དྲུག་ཀྱང་མེད་པས་ཉི་ཤུ་རྩ་བརྒྱད་དུ་འགྱུར་ཏེ། ལྔ་བཅུ་རྩ་གཉིས་ལས་བརྒྱ་དང་བཅུ་དྲུག་དེ་ལྟར་བོར་བའི་ཕྱིར་རོ། །ཇི་ལྟ་ཞེ་ན། ནམ་མཁའ་མཐའ་ཡས་སྐྱེ་མཆེད་ཀྱིས་བསྡུས་པ་
[201b]
[201b.1]སྲིད་པའི་རྩེ་མོ་པའི་སྡུག་བསྔལ་དང་ཀུན་འབྱུང་བ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བརྒྱད་དོ། །འགོག་པ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་ནམ་མཁའ་མཐའ་ཡས་སྐྱེ་མཆེད་ལ་སོགས་པའི་འགོག་པ་ལ་དམིགས་པ་བཅུ་དྲུག་དང་། ལམ་ལ་རྗེས་
[201b.2]སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞི་སྟེ། དེ་དག་ནི་ཤེས་པའི་རྣམ་པ་དང་། དམིགས་པའི་བྱེ་བྲག་གིས་ཐ་དད་པའི་ཕྱིར་ཉི་ཤུ་རྩ་བརྒྱད་ཡིན་ནོ། །དེ་བཞིན་དུ་རྣམ་ཤེས་མཐའ་ཡས་སྐྱེ་མཆེད་ཀྱིས་བསྡུས་པ་ནི་ནམ་མཁའ་མཐའ་ཡས་སྐྱེ་མཆེད་ཀྱི་འགོག་པ་ལ་དམིགས་པ་བཞི་
[201b.3]བོར་ནས་ཉི་ཤུ་རྩ་བཞི་ཡིན་པར་སྦྱར་རོ། །ཅི་ཡང་མེད་པའི་སྐྱེ་མཆེད་ཀྱིས་བསྡུས་པ་ནི་རྣམ་ཤེས་མཐའ་ཡས་སྐྱེ་མཆེད་ཀྱི་འགོག་པ་ལ་དམིགས་པ་གཞན་བཞི་ཡང་བོར་ནས་ཉི་ཤུ་ཡིན་ནོ། །ཡང་ཅིའི་ཕྱིར་གཟུགས་མེད་པ་རྣམས་རང་གི་ས་དང་ས་གོང་མ་པ་ཁོ་ནའི་འགོག་པ་ལ་དམིགས་ཀྱི།
[201b.4]བསམ་གཏན་བཞིན་དུ་ས་འོག་པ་ནི་མ་ཡིན་ཞེ་ན། ས་འོག་མའི་སྡུག་བསྔལ་ལ་མ་དམིགས་པར་དེའི་འགོག་པ་ལ་དམིགས་པར་མི་ནུས་སོ། །སྡུག་བསྔལ་ཡང་ཐམས་ཅད་ཟག་པ་དང་བཅས་པ་ཡིན་ལ། གཟུགས་མེད་རྣམ་བཞི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་ཡིན། །ཞེས་
[201b.5]བྱ་བ་འདི་ཡང་ངེས་པས་འདི་ནི་རྒྱུ་ཡིན་ནོ། །བསམ་གཏན་རྣམས་ནི་ཀུན་དུ་ལྟ་བ་ཡིན་པའི་ཕྱིར་མི་དགག་སྟེ། བསམ་གཏན་དགེ་ཡུལ་ཡོད་དགུ་ཡིན། །ཞེས་འཆད་པར་འགྱུར་རོ། །ཡང་ཅིའི་ཕྱིར་འགོག་པ་ཁོ་ན་ལ་དམིགས་ཀྱི་སྡུག་བསྔལ་ལམ་ཀུན་འབྱུང་བ་ལ་ནི་མ་ཡིན་ཞེ་ན། སྲིད་
[201b.6]པའི་རྩེ་མོ་མན་ཆད་ཀྱི་ས་ལས་འདོད་ཆགས་དང་བྲལ་བའི་ཕྱིར་རོ། །དེ་ལ་ནི་སྲིད་པའི་རྩེ་མོ་པའི་རྣམ་པ་དགུ་པ་རྡོ་རྗེ་ལྟ་བུས་གཞོམ་པར་བྱ་བ་ཁོ་ན་ལུས་སོ། །ས་འོག་མ་པའི་གཉེན་པོ་ལ་དམིགས་པ་ནི་ཡོད་དེ་ཞེས་བྱ་བ་ནི་ཤེས་པའི་དབང་དུ་བྱས་པ་ཡིན་ཏེ། དེ་ཡང་རྡོ་རྗེ་ལྟ་བུའི་ཏིང་ངེ་འཛིན་
[201b.7]དང་མཚུངས་པར་ལྡན་པར་རིག་པར་བྱའོ། །གཉེན་པོ་དེ་ནི་ཕན་ཚུན་དུ་རྒྱུ་ཡིན་པའི་ཕྱིར་རོ་ཞེས་བྱ་བ་ནི། ས་དགུའི་ལམ་ནི་ཕན་ཚུན་དུ། །མཉམ་དང་ཁྱད་པར་ཅན་དག་གི །ཞེས་བྱ་བའི་ཕྱིར་ལམ་ལ་རྗེས་སུ་ཤེས་པ་ཐམས་ཅད་ནི་རྗེས་སུ་ཤེས་པའི་ཕྱོགས་དང་མཐུན་པ་ས་དགུ་པའི་དམིགས་པ་
[202a]
[202a.1]ཡིན་ནོ། །གང་དག་ཅེས་བྱ་བ་རྒྱས་པར་འབྱུང་བ་ནི་ཆོས་མངོན་པ་གང་དག་འགོག་པ་ལ་རྗེས་སུ་ཤེས་པ་འབའ་ཞིག་ཏུ་མ་ཟད་ཀྱི། ལམ་ལ་རྗེས་སུ་ཤེས་པ་ཡང་ས་རེ་རེའི་གཉེན་པོ་ལ་དམིགས་པ་ཡིན་པར་འདོད་པ་དེ་དག་གི་ལྟར་ན་ཉི་ཤུ་རྩ་བརྒྱད་ལྷག་པར་བསྣན་ན་མི་
[202a.2]ལྕོགས་པ་མེད་པས་བསྡུས་པའི་རྡོ་རྗེ་ལྟ་བུ་ནི་བརྒྱད་ཅུ་ཡིན་ནོ། །ཇི་ལྟར་བྱས་པས་ཤེ་ན། སྔ་མ་ལྟར་ན་རྗེས་སུ་ཤེས་པའི་ཕྱོགས་དང་མཐུན་པ་ཟད་པར་ལ་དམིགས་པ་ཡིན་པའི་ཕྱིར་ལམ་ལ་རྗེས་སུ་ཤེས་པའི་རྣམ་པ་བཞི་དང་མཚུངས་པར་ལྡན་པ་བཞི་ཡིན་ནོ། །ད་ནི་ཁ་ཅིག་གི་གཞུང་
[202a.3]ལུགས་ཀྱིས་ས་རེ་རེའི་གཉེན་པོ་ལ་དམིགས་པ་ཡིན་པར་ཡང་རྣམ་པར་འཇོག་སྟེ། མི་ལྕོགས་པ་མེད་པས་བསྡུས་པ་བསམ་གཏན་དང་པོའི་གཉེན་པོ་ལ་དམིགས་པ། ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞི་ནས། དེ་བཞིན་དུ་ཅི་ཡང་མེད་པའི་སྐྱེ་
[202a.4]མཆེད་ཀྱི་གཉེན་པོ་ལ་དམིགས་པ་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པའི་བར་དུ་བཞི་སྟེ། དེ་ལྟར་ན་ཉི་ཤུ་རྩ་བརྒྱད་ལྷག་པ་ཡིན་ནོ། །ལྔ་བཅུ་རྩ་གཉིས་ལ་ཉི་ཤུ་རྩ་བརྒྱད་ཀྱིས་ལྷག་པར་བསྣན་ན་བརྒྱད་ཅུར་འགྱུར་རོ། །ཡང་ཅིའི་ཕྱིར་སྲིད་པའི་རྩེ་མོའི་
[202a.5]གཉེན་པོ་ལ་དམིགས་པ་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞི་མི་བགྲང་ཞེ་ན། སྨྲས་པ། ཟག་པ་མེད་པའི་ལམ་སྲིད་པའི་རྩེ་མོའི་བསྡུས་པ་སྲིད་པའི་རྩེ་མོའི་གཉེན་པོ་ནི་མེད་ཀྱི། བསམ་གཏན་དང་པོའི་ས་པ་ནས་ཅི་ཡང་མེད་པའི་སྐྱེ་མཆེད་ཀྱི་ས་
[202a.6]པའི་བར་ནི་ཡོད་དེ། དེ་ལྟ་བས་ན་དེ་དག་གི་གཉེན་པོ་ལ་དམིགས་པ་ཁོ་ན་བཤད་ཀྱི་སྲིད་པའི་རྩེ་མོའི་གཉེན་པོ་ལ་དམིགས་པ་ནི་མ་ཡིན་ནོ། །གཞན་དག་འཆད་པ་ནི་གང་དག་ལམ་ལ་རྗེས་སུ་ཤེས་པ་ཡང་ས་རེ་རེའི་གཉེན་པོ་ལ་དམིགས་པ་ཡིན་པར་འདོད་པ་ནི་འགོག་པ་ལ་རྗེས་སུ་ཤེས་པ་
[202a.7]ཇི་ལྟ་བ་བཞིན་དུ་འདོད་པ་ཞེས་བྱ་བར་བསམ་པ་ཡིན་ནོ། །དེ་དག་གི་ལྟར་ན་སྲིད་པའི་རྩེ་མོ་པའི་སྡུག་བསྔལ་དང་། ཀུན་འབྱུང་བ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བརྒྱད་དང་། འགོག་པ་དང་ལམ་ལ་ཆོས་ཤེས་པའི་རྣམ་པ་དག་དང་མཚུངས་པར་ལྡན་པ་བརྒྱད་དང་།
[202b]
[202b.1]འགོག་པ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བསམ་གཏན་དང་པོའི་འགོག་པ་ལ་དམིགས་པ་བཞི་ནས་སྲིད་པའི་རྩེ་མོའི་འགོག་པ་ལ་དམིགས་པའི་བར་དུ་བཞི་སྟེ་སུམ་ཅུ་རྩ་གཉིས་དང་། དེ་བཞིན་དུ་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་ཡང་དེ་
[202b.2]དང་འདྲ་བར་སུམ་ཅུ་རྩ་གཉིས་ཡིན་པས་མི་ལྕོགས་པ་མེད་པས་བསྡུས་པ་རྡོ་རྗེ་ལྟ་བུ་ནི་བརྒྱད་ཅུ་ཡིན་ནོ་ཞེས་ཟེར་རོ། །དེ་དག་གི་ལྟར་ན་རྗེས་སུ་ཤེས་པའི་ཕྱོགས་དང་མཐུན་པར་ཟད་པར་ལ་དམིགས་པའི་ཕྱིར་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞི་པོ་གང་དག་ཡིན་
[202b.3]པ་དག་ནི་མེད་ཀྱི་དེ་དག་གི་གོར་སྲིད་པའི་རྩེ་མོའི་གཉེན་པོ་ལ་དམིགས་པ་དག་ཡོད་པས་འདིར་རྡོ་རྗེ་ལྟ་བུ་བརྒྱད་ཅུ་ཡིན་ནོ། །བསམ་གཏན་བཞི་པས་བསྡུས་པའི་བར་དུ་ཡང་དེ་དང་འདྲའོ། །ཇི་ལྟ་ཞེ་ན། ཉི་ཤུ་རྩ་བརྒྱད་ལྷག་པར་བསྣན་ནས་བསམ་གཏན་ཁྱད་པར་ཅན་གྱིས་བསྡུས་པའི་
[202b.4]རྡོ་རྗེ་ལྟ་བུ་བརྒྱད་ཅུ་ཡིན་ནོ། །བསམ་གཏན་ཁྱད་པར་ཅན་གྱིས་བསྡུས་པ་ཇི་ལྟ་བ་དེ་བཞིན་དུ། བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པས་བསྡུས་པའི་རྡོ་རྗེ་ལྟ་བུ་ཡང་བརྒྱད་ཅུ་ཡིན་ནོ། །ནམ་མཁའ་མཐའ་ཡས་སྐྱེ་མཆེད་ལ་སོགས་པ་དག་ནི་ཞེས་བྱ་བ་ནི་སྲིད་པའི་རྩེ་མོ་མ་
[202b.5]གཏོགས་པའི་གཟུགས་མེད་པ་གསུམ་པོ་དག་ན་ནི་གོ་རིམས་བཞིན་དུ་བཞི་བཅུ་དང་། སུམ་ཅུ་རྩ་གཉིས་དང་། ཉི་ཤུ་རྩ་བཞི་ཡིན་ནོ། །ཇི་ལྟར་བྱས་པས་ཤེ་ན། རེ་ཞིག་ནམ་མཁའ་མཐའ་ཡས་སྐྱེ་མཆེད་ཀྱི་རྡོ་རྗེ་ལྟ་བུའི་ཏིང་ངེ་འཛིན་ཉི་ཤུ་རྩ་བརྒྱད་ལ་ནམ་མཁའ་མཐའ་ཡས་སྐྱེ་མཆེད་ཀྱི་
[202b.6]གཉེན་པོ་ལ་དམིགས་པ་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞི་ནས་ཅི་ཡང་མེད་པའི་སྐྱེ་མཆེད་ཀྱི་གཉེན་པོ་ལ་དམིགས་པའི་བར་བཞིས་བསྣན་ཏེ། བཅུ་གཉིས་ཀྱིས་བསྣན་ན་བཞི་བཅུར་འགྱུར་རོ། །དེ་བཞིན་དུ་ཉི་ཤུ་རྩ་བཞི་ལ་ནི་རྣམ་ཤེས་མཐའ་ཡས་སྐྱེ་
[202b.7]མཆེད་ཀྱི་གཉེན་པོ་ལ་དམིགས་པ་བཞི་དང་། ཅི་ཡང་མེད་པའི་སྐྱེ་མཆེད་ཀྱི་གཉེན་པོ་ལ་དམིགས་པ་བཞིས་བསྣན་ནས་སུམ་ཅུ་རྩ་གཉིས་སུ་འགྱུར་རོ། །དེ་བཞིན་དུ་ཉི་ཤུ་ལ་ནི་ཅི་ཡང་མེད་པའི་སྐྱེ་མཆེད་ཀྱི་གཉེན་པོ་ལ་དམིགས་པ་གཉེན་པོ་བཞིས་བསྣན་ནས་ཉི་ཤུ་རྩ་བཞིར་འགྱུར་རོ། །
[203a]
[203a.1]སྨྲས་པ། ས་འོག་མའི་གཉེན་པོ་ལ་དམིགས་པ་ནི་ཡོད་དེ། དེ་ནི་ཕན་ཚུན་རྒྱུ་ཡིན་པའི་ཕྱིར་རོ་ཞེས་བཤད་པ་ཡིན་ནམ། །ཡང་ཅིའི་ཕྱིར་ནམ་མཁའ་མཐའ་ཡས་སྐྱེ་མཆེད་ལ་སོགས་པས་བསྡུས་པ་རང་གི་ས་དང་ས་གོང་མའི་གཉེན་པོ་ལ་དམིགས་པ་ཁོ་ནར་བཤད་ཀྱི། ས་
[203a.2]འོག་མའི་གཉེན་པོ་ལ་དམིགས་པ་ནི་མ་ཡིན་ཞེ་ན། འདིར་སྨྲས་པ། ཁྱད་པར་དུ་མ་བྱས་པར་རྗེས་སུ་ཤེས་པའི་ཕྱོགས་དང་མཐུན་པའི་ལམ་ས་དགུ་པ་ནི་ས་འོག་མའི་གཉེན་པོ་ལ་དམིགས་པ་ཡིན་ནོ་ཞེས་བཤད་ཀྱི། ནམ་མཁའ་མཐའ་ཡས་སྐྱེ་མཆེད་ལ་སོགས་པས་བསྡུས་པ་ས་འོག་
[203a.3]མའི་གཉེན་པོ་ལ་དམིགས་པ་ནི་མ་ཡིན་ནོ། །འོ་ན་ཅི་ཞེ་ན། རང་གི་ས་དང་ས་གོང་མའི་གཉེན་པོ་ཁོ་ན་ལ་དམིགས་པ་ཡིན་ནོ། །དེ་ལ་རྗེས་སུ་ཤེས་པའི་ཁྱད་པར་མེད་པའི་ངོ་བོར་འོག་མ་ལ་དམིགས་པ་ཡིན་གྱི། ཁྱད་པར་གྱི་ངོ་བོར་ནི་མ་ཡིན་ནོ། །རང་གི་ས་དང་ས་གོང་མ་ལ་དམིགས་པ་ནི་
[203a.4]ཁྱད་པར་གྱི་ངོ་བོར་ཡང་ཡིན་ནོ་ཞེས་བྱ་བ་འདིར་ནི་གཞན་གྱི་གཞུང་ལུགས་ཀྱིས་བཤད་པ་ཡིན་ནོ། །སྔ་མ་སྟེ་རྗེས་སུ་ཤེས་པ་ནི་རྗེས་སུ་ཤེས་པའི་ཕྱོགས་དང་མཐུན་པ་ཐམས་ཅད་ལ་ཅིའི་ངོ་བོ་ཁོ་ནར་དམིགས་སོ་ཞེས་བྱ་བ་དེ་ནི་བྱེ་བྲག་ཏུ་སྨྲ་བ་རྣམས་ཀྱི་གཞག་པའི་ཕྱོགས་ཡིན་ཏེ། འདི་ལྟར་སློབ་
[203a.5]དཔོན་འདུས་བཟངས་ཀྱིས་ལམ་ལ་རྗེས་སུ་ཤེས་པ་ཐམས་ཅད་ནི་རྗེས་སུ་ཤེས་པའི་ཕྱོགས་དང་མཐུན་པས་དགུ་པའི་དམིགས་པ་ཡིན་ནོ་ཞེས་བཤད་དོ། །གཞན་དག་ནི་འདི་སྐད་ཟེར་ཏེ། སྲིད་པའི་རྩེ་མོའི་སྡུག་བསྔལ་དང་། ཀུན་འབྱུང་བ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་
[203a.6]ལྡན་པ་བརྒྱད་དང་། འགོག་པ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་ནམ་མཁའ་མཐའ་ཡས་སྐྱེ་མཆེད་ཀྱི་འགོག་པ་ལ་དམིགས་པ་བཞི་ནས་སྲིད་པའི་རྩེ་མོ་པའི་འགོག་པ་ལ་དམིགས་པའི་བར་བཞི་སྟེ། བཅུ་དྲུག་དང་། ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་
[203a.7]པར་ལྡན་པ་ཡང་ནམ་མཁའ་མཐའ་ཡས་སྐྱེ་མཆེད་ཀྱི་གཉེན་པོ་ལ་དམིགས་པ་བཞི་ནས་སྲིད་པའི་རྩེ་མོའི་གཉེན་པོ་ལ་དམིགས་པའི་བར་བཞི་སྟེ་བཅུ་དྲུག་གོ། །དེ་དག་ནི་བཅུ་དྲུག་ཕྲག་གཉིས་དང་། སྔར་བཤད་པའི་བརྒྱད་ནས་ནམ་མཁའ་མཐའ་ཡས་སྐྱེ་མཆེད་ཀྱིས་བསྡུས་པའི་རྡོ་རྗེ་ལྟ་བུ་བཞི་
[203b]
[203b.1]བཅུར་འགྱུར་བ་ཡིན་ནོ། །རྣམ་ཤེས་མཐའ་ཡས་སྐྱེ་མཆེད་ཀྱིས་བསྡུས་པ་ནི་སུམ་ཅུ་རྩ་གཉིས་ཏེ། ནམ་མཁའ་མཐའ་ཡས་སྐྱེ་མཆེད་ཀྱི་འགོག་པ་དང་གཉེན་པོ་ལ་དམིགས་པ་བརྒྱད་དོར་རོ། །ཅི་ཡང་མེད་པའི་སྐྱེ་མཆེད་ཀྱིས་བསྡུས་པ་ནི་ཉི་ཤུ་རྩ་བཞི་སྟེ། རྣམ་ཤེས་མཐའ་ཡས་སྐྱེ་མཆེད་ཀྱི་
[203b.2]འགོག་པ་དང་། ལམ་ལ་དམིགས་པ་གཞན་བརྒྱད་ཀྱང་དོར་རོ་ཞེས་ཟེར་ཏེ། །དེ་དག་ནི་སྲིད་པའི་རྩེ་མོ་ལ་ཡང་། གཉེན་པོའི་ལམ་ས་འོག་མ་པ་ཡོད་དོ་ཞེས་ཟེར་རོ། །ཡང་རིགས་དང་དབང་པོའི་བྱེ་བྲག་གིས་ནི་ཆེས་མང་བ་ཡིན་ནོ་ཞེས་བྱ་བ་ཇི་ལྟ་བུ་ཡིན་ཞེ་ན། རེ་ཞིག་ཐམས་ཅད་ཀྱི་དང་
[203b.3]པོར་བརྒྱད་བཤད་པ་དེ་དག་ལས་སྲིད་པའི་རྩེ་མོ་པའི་སྡུག་བསྔལ་ལ་དམིགས་པ་མི་རྟག་པའི་རྣམ་པ་དང་མཚུངས་པར་ལྡན་པའི་རྡོ་རྗེ་ལྟ་བུ་གང་ཡིན་པ་དེ་རིགས་དྲུག་གི་བྱེ་བྲག་གིས་ཁྱད་པར་རྣམ་པ་དྲུག་གོ། །དེ་བཞིན་དུ་སྡུག་བསྔལ་ལ་སོགས་པའི་རྣམ་པ་དང་མཚུངས་པར་ལྡན་པ་གསུམ་
[203b.4]ཡང་སོ་སོར་ཁྱད་པར་རྣམ་པ་དྲུག་ཡིན་ལ། དེ་དག་ཀྱང་སོ་སོར་དབང་པོ་ཆུང་ངུ་དང་འབྲིང་དང་ཆེན་པོའི་བྱེ་བྲག་གིས་ཐ་དད་དོ། །ཇི་ལྟར་འདི་དག་གི་སོ་སོར་རིགས་དང་དབང་པོའི་བྱེ་བྲག་གིས་ཐ་དད་པ་དེ་བཞིན་དུ་སྲིད་པའི་རྩེ་མོ་པའི་ཀུན་འབྱུང་བ་ལ་དམིགས་པ་བཞི་ཡང་སོ་སོར་རིགས་དྲུག་གི་བྱེ་
[203b.5]བྲག་གིས་ཁྱད་པར་རྣམ་པ་དྲུག་ཡིན་ལ། དབང་པོ་གསུམ་གྱི་བྱེ་བྲག་གིས་ཁྱད་པར་རྣམ་པ་གསུམ་ཡིན་ནོ། །ཇི་ལྟར་བརྒྱད་པོ་འདི་དག་རིགས་དང་། དབང་པོའི་བྱེ་བྲག་གིས་སོ་སོར་ཁྱད་པར་རྣམ་པ་དྲུག་དང་། རྣམ་པ་གསུམ་ཡིན་པ་དེ་བཞིན་དུ་མི་ལྕོགས་པ་མེད་པས་བསྡུས་པ་ཤེས་
[203b.6]པའི་རྣམ་པ་དང་། དམིགས་པའི་བྱེ་བྲག་གིས་ཐ་དད་པ་དག་ནས་ཅི་ཡང་མེད་པའི་སྐྱེ་མཆེད་ཀྱིས་བསྡུས་པའི་བར་ཐམས་ཅད་ཀྱང་རིགས་དང་། དབང་པོའི་བྱེ་བྲག་གིས་ཐ་དད་པར་ལམ་འདིས་སྦྱར་བར་བྱའོ། །ཡང་ན་འདི་ལྟར་སྦྱར་བར་བྱའོ། །ཕྱོགས་དང་པོ་ལ་མི་ལྕོགས་
[203b.7]པ་མེད་པས་བསྡུས་པ་ལྔ་བཅུ་རྩ་གཉིས་ཡིན་པར་རིགས་དང་དབང་པོའི་བྱེ་བྲག་གིས་ཐ་དད་པར་ལམ་འདིས་སྦྱར་བར་བྱའོ། །ཕྱོགས་དང་པོ་ལ་མི་ལྕོགས་པ་མེད་པ་མེད་པས་བསྡུས་པ་ལྔ་བཅུ་རྩ་གཉིས་ཡིན་པ་ལྟར་ཅི་ཡང་མེད་པའི་སྐྱེ་མཆེད་ཀྱིས་བསྡུས་པ་ཉི་ཤུ་ཡིན་པའི་
[204a]
[204a.1]བར་ཡང་དེ་དང་འདྲ་སྟེ། སྤྱིར་བསྡུས་ན་རྡོ་རྗེ་ལྟ་བུ་སུམ་བརྒྱ་བརྒྱད་ཅུ་རྩ་བཞིར་འགྱུར་རོ། །དེ་དག་རིགས་དང་དབང་པོའི་བྱེ་བྲག་གིས་དྲུག་འགྱུར་དང་། སུམ་འགྱུར་དུ་བསྒྱུར་ན་དྲུག་སྟོང་དགུ་བརྒྱ་རྩ་བཅུ་གཉིས་སུ་འགྱུར་རོ། །ཕྱོགས་གཉིས་པ་ལ་ནི་གང་ལ་དང་པོ་
[204a.2]བརྒྱད་ཅུ་ཡིན་པ་ནས་ཅི་ཡང་མེད་པའི་སྐྱེ་མཆེད་ལ་ཉི་ཤུ་རྩ་བཞི་ཡིན་པའི་བར་གཅིག་ཏུ་བསྡོམས་ན་ལྔ་བརྒྱ་བདུན་ཅུ་རྩ་དྲུག་ཏུ་འགྱུར་རོ། །རིགས་དང་དབང་པོའི་བྱེ་བྲག་གིས་དྲུག་འགྱུར་དང་སུམ་འགྱུར་དུ་བསྒྱུར་ན་རྡོ་རྗེ་ལྟ་བུ་ཁྲི་སུམ་བརྒྱ་དྲུག་ཅུ་རྩ་བརྒྱད་དུ་འགྱུར་རོ། །དེ་ཉིད་ཀྱི་ཕྱིར་དེ་ནི་དང་པོ་
[204a.3]ཉིད་དུ་ཞེས་བྱ་བ་གང་གི་ཕྱིར་ཞེ་ན། དང་པོ་ཉིད་དུ་ཟག་པ་ཐམས་ཅད་ཟད་པའི་ཐོབ་པ་དང་ལྷན་ཅིག་སྐྱེ་བའི་ཕྱིར་ཞེས་བྱ་བ་སྨོས་ཏེ། གང་གི་ཕྱིར་ཤེས་པ་དེ་དང་པོ་ཉིད་དུ་ཟག་པ་ཐམས་ཅད་ཟད་པའི་ཐོབ་པ་དང་ལྷན་ཅིག་སྐྱེས་པའི་ཕྱིར་ཟད་པ་ཤེས་པ་ཞེས་བྱ་སྟེ། བར་གྱི་ཚིག་མི་མངོན་པར་བྱས་
[204a.4]པའི་ཕྱིར་རམ། ངེས་པའི་ཚིག་གི་ཚུལ་གྱིས་སོ། །དང་པོ་ཉིད་དུ་ཞེས་སྨོས་པ་ནི་མི་སྐྱེ་བ་ཤེས་པ་ལས་ཁྱད་པར་དུ་བྱ་བའི་ཕྱིར་རོ། །ཐམས་ཅད་ཅེས་སྨོས་པ་ནི་རྒྱུན་དུ་ཞུགས་པ་ལ་སོགས་པའི་ཤེས་པ་ལས་ཁྱད་པར་དུ་བྱ་བའི་ཕྱིར་ཏེ། སྒྲ་འཇུག་པ་ནི་བརྡ་ལ་ལྟོས་པས་སོ། །དེ་ཉིད་ཀྱི་ཕྱིར་ཞེས་
[204a.5]བྱ་བ་ནི་དེ་རང་གི་དོན་ཡོངས་སུ་རྫོགས་པ་ན་གཞན་གྱི་དོན་བྱེད་པར་འོས་པའི་ཕྱིར་ཏེ། གཞན་གྱི་དོན་བྱེད་པར་བཤད་པའི་ཕྱིར་ཞེས་བྱ་བའི་ཐ་ཚིག་གོ། །འདོད་ཆགས་དང་བཅས་པ་ཐམས་ཅད་ཀྱིས་མཆོད་པར་འོས་པའི་ཕྱིར་ཞེས་བྱ་བ་ལ་འདོད་ཆགས་དང་བཅས་པ་ནི་སོ་སོའི་སྐྱེ་བོ་དང་སློབ་པ་རྣམས་
[204a.6]ཏེ། དེ་དག་ཐམས་ཅད་ཀྱིས་མཆོད་པར་འོས་པས་དགྲ་བཅོམ་པ་ཡིན་ནོ། །གྲུབ་པོ་ཞེས་བྱ་བ་ཅི་གྲུབ་ཅེ་ན། གང་ཟག་སྔར་བཤད་པ་གཞན་བདུན་ནི་སློབ་པ་དག་ཡིན་ནོ་ཞེས་བྱ་བ་སྨོས་ཏེ། འབྲས་བུ་ལ་གནས་པ་གསུམ་དང་། ཞུགས་པ་བཞི་བཤད་པ་ཡིན་ཏེ། འདི་ཁོ་ན་མི་སློབ་པ་ཡིན་ནོ་
[204a.7]ཞེས་དམིགས་ཀྱིས་བསྩལ་བའི་ཕྱིར་འདི་ལས་གཞན་པའི་འཕགས་པ་རྣམས་ནི་སློབ་པ་ཡིན་ནོ་ཞེས་བྱ་བར་གྲུབ་བོ། །ཅིའི་ཕྱིར་སློབ་པ་ཡིན་ཞེས་བྱ་བ་ནི་རྒྱུ་གང་གིས་ན་གང་ཟག་བདུན་པོ་དེ་དག་སློབ་པ་ཞེས་བྱ་ཞེ་ན། ཟག་པ་ཟད་པར་བྱ་བའི་ཕྱིར་རྟག་ཏུ་སློབ་པའི་ངང་ཚུལ་ཅན་ཡིན་པའི་
[204b]
[204b.1]ཕྱིར་ཞེས་བྱ་བ་སྨོས་ཏེ། འདི་དག་སློབ་པའི་ངང་ཚུལ་ཅན་ཡིན་པས་ན་སློབ་པ་དག་གོ། །གང་ལ་སློབ་པའི་ངང་ཚུལ་ཅན་ཡིན་ཞེ་ན། བསླབ་པ་གསུམ་པོ་ལའོ། །བསླབ་པ་གང་ཡིན་ཞེ་ན། ལྷག་པའི་ཚུལ་ཁྲིམས་དང་། ལྷག་པའི་སེམས་དང་། ལྷག་པའི་ཤེས་རབ་བོ། །དེ་དག་གི་
[204b.2]རང་བཞིན་ཅི་ཞེ་ན། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་རང་བཞིན་དག་ཡིན་ནོ་ཞེས་བྱ་བ་སྨོས་སོ། །ལྷག་པའི་ཚུལ་ཁྲིམས་ལ་སློབ་པས་ན་ལྷག་པའི་ཚུལ་ཁྲིམས་ལ་སྟེ། དེ་བཞིན་དུ་ལྷག་པའི་ཤེས་རབ་ཀྱི་བར་ལ་སློབ་པས་ན་ལྷག་པའི་ཤེས་རབ་སློབ་པའོ། །བསླབ་
[204b.3]པ་གསུམ་ལས་ཐ་མི་དད་པའི་ཕྱིར་ཚུལ་ཁྲིམས་ལ་སོགས་པའི་རང་བཞིན་ཉིད་བསླབ་པ་ཡིན་ནོ་ཞེས་ཟེར་རོ། །སོ་སོའི་སྐྱེ་བོ་ཡང་སློབ་པ་ཡིན་པར་འགྱུར་རོ་ཞེས་བྱ་བ་ནི་སོ་སོའི་སྐྱེ་བོ་ཡང་ཇི་སྐད་བཤད་པ་དག་ལ་སློབ་པས་སོ། །མ་ཡིན་ཏེ། བདེན་པ་ཡང་དག་པ་ཇི་ལྟ་བ་བཞིན་རབ་ཏུ་མི་ཤེས་པའི་
[204b.4]ཕྱིར་དང་ཞེས་བྱ་བ་ནི་དེ་ནི་དེ་ལྟ་མ་ཡིན་ནོ། །ཅིའི་ཕྱིར་ཞེ་ན། དགེ་སློང་དག་འཕགས་པའི་ཤེས་རབ་ཀྱིས་མཐོང་བ་གང་ཡིན་པ་དེ་ནི་ཞེས་འབྱུང་བས་སྡུག་བསྔལ་ལ་སོགས་པའི་བདེན་པ་རྣམས་ཡང་དག་པ་ཇི་ལྟ་བ་བཞིན་རབ་ཏུ་མི་ཤེས་པའི་ཕྱིར་ཏེ། ཁོང་དུ་མ་ཆུད་པའི་ཕྱིར་རོ། །འདི་
[204b.5]ལྟར་མདོ་ལས་ལྷག་པའི་ཚུལ་ཁྲིམས་དང་། ལྷག་པའི་སེམས་ཀྱི་བསླབ་པ་རྒྱ་ཆེར་བཤད་ནས་ལྷག་པའི་ཤེས་རབ་ཀྱི་བསླབ་པ་གང་ཡིན་ཞེ་ན། འདི་ནི་སྡུག་བསྔལ་འཕགས་པའི་བདེན་པ་ཡིན་ནོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཤིང་། འདི་ནི་སྡུག་བསྔལ་ཀུན་འབྱུང་
[204b.6]བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པ་ཡིན་ནོ་ཞེས་བྱ་བར་ཡང་དག་པ་ཇི་ལྟ་བ་བཞིན་ཤེས་པ་ཡིན་ནོ་ཞེས་གསུངས་ཏེ། དེ་ལྟར་བདེན་པ་ཡང་དག་པ་ཇི་ལྟ་བ་བཞིན་དུ་མི་ཤེས་པའི་ཕྱིར་རོ། །གཞན་ཡང་
[204b.7]སློབ་པ་གཏོང་བའི་ཕྱིར་ཏེ། སོ་སོར་ཐར་པའི་སྡོམ་པ་ཡོངས་སུ་གཏོང་བ་དང་དྲོ་བར་གྱུར་པ་ལ་སོགས་པ་ལས་ཡོངས་སུ་ཉམས་པའི་སྒོ་ནས་ཚུལ་ཁྲིམས་ལ་སོགས་པ་གང་ལ་བསླབ་པ་དེ་ལ་སློབ་པ་གཏོང་བའི་ཕྱིར་རོ། །འཕགས་པ་ནི་ཆུང་ཟད་གཏོང་དུ་ཟིན་ཀྱང་ཐམས་ཅད་མ་
[205a]
[205a.1]ཡིན་ཏེ། འཕགས་པ་ནི་ནམ་ཡང་བསླབ་པ་གསུམ་ཆར་མེད་པ་མ་ཡིན་ནོ། །འཕགས་པ་རང་བཞིན་དུ་གནས་པ་ཞེས་བྱ་བ་ནི་སེམས་ཅན་རྣམས་ཀྱི་རང་བཞིན་ནི་མཉམ་པར་མ་བཞག་པའི་གནས་སྐབས་ཡིན་ཏེ། དེ་ལ་གནས་པའི་འཕགས་པ་བསོད་སྙོམས་པ་
[205a.2]ལ་སོགས་པ་སྤྱོད་དུ་གཤེགས་པ་སློབ་པའི་ངང་ཚུལ་ཅན་མ་ཡིན་པས་སློབ་པ་མ་ཡིན་པར་འགྱུར་རོ་སྙམ་དུ་བསམས་པ་ཡིན་ནོ། །བསམ་པའི་སྒོ་ནས་ཏེ་ཞེས་བྱ་བ་ནི་འདུན་པའི་སྒོ་ནས་སོ། །ལམ་དུ་འགྲོ་བ་གནས་པ་བཞིན་ནོ་ཞེས་བྱ་བ་ལ། ལམ་དུ་འགྲོ་བ་ཞེས་བྱ་བ་ནི་གང་ཞིག་ལམ་དུ་ཞུགས་
[205a.3]ཏེ་འགྲོ་བ་དེ་ནི་འདུག་ཏུ་ཟིན་ཀྱང་འགྲོ་བའི་བསམ་པ་མ་བོར་བའི་ཕྱིར་ལམ་དུ་འགྲོ་བ་ཞེས་བྱ་བ་ཉིད་དེ་དེ་དང་འདྲའོ། །ཐོབ་པ་དང་རྗེས་སུ་འབྲེལ་པའི་ཡང་ཕྱིར་ཏེ། འཕགས་པ་ནི་རང་བཞིན་དུ་གནས་ཀྱང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དག་གིས་ཐོབ་པ་དང་རྗེས་སུ་འབྲེལ་ཏོ། །
[205a.4]དེ་ལྟ་བས་ན་རང་བཞིན་ལ་གནས་ཀྱང་སློབ་པའི་ངང་ཚུལ་ཅན་ཁོ་ན་ཡིན་ནོ། །སློབ་པ་དང་མི་སློབ་པའི་ཞར་ལ་ཡང་སློབ་པའི་ཆོས་རྣམས་གང་ཞེ་ན་ཞེས་བྱ་བ་ལ་སོགས་པ་འདི་བརྗོད་དོ། །སློབ་པའི་ཆོས་ཟག་པ་མེད་པ་འདུས་བྱས་ཀྱི་ངོ་བོ་ཉིད་དག་ཡིན་ཏེ། མི་སློབ་པའི་ཆོས་མི་སློབ་པ་རྣམས་ཀྱང་
[205a.5]དེ་དང་འདྲའོ། །ཅིའི་ཕྱིར་མྱ་ངན་ལས་འདའ་བ་སློབ་པ་མ་ཡིན་ཞེས་བྱ་བ་ནི་སློབ་པས་ཐོབ་པ་གང་ཡིན་པ་སྙམ་དུ་བསམས་པ་ཡིན་ནོ། །མི་སློབ་པ་དང་སོ་སོའི་སྐྱེ་བོ་གཉི་ག་ཡང་དེ་དང་ལྡན་པའི་ཕྱིར་རོ་ཞེས་བྱ་བ་ནི་སོ་སོའི་སྐྱེ་བོ་ཡང་འཇིག་རྟེན་པའི་ལམ་གྱིས་ཐོབ་པའི་མྱ་ངན་ལས་འདས་པ་
[205a.6]དང་ལྡན་ནོ། །ཞུགས་པ་དང་པོ་ཞེས་བྱ་བ་ནི་མཐོང་བའི་ལམ་ལ་གནས་པའོ། །ཞུགས་པ་ལྷག་མ་རྣམས་ཞེས་བྱ་བ་རྒྱས་པར་འབྱུང་བ་ནི་ཞུགས་པ་ལྷག་མ་ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཉིད་ལ་ཞུགས་པ་རྣམས་ནི་འབྲས་བུ་ལ་གནས་པ་གསུམ་ལས་ཐ་
[205a.7]མི་དད་པའི་ཕྱིར་རོ། །རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བའི་འབྲས་བུ་ལ་གནས་པ་དག་ལས་ཐ་མི་དད་པའི་ཕྱིར་ཏེ། ལན་ཅིག་ཕྱིར་འོང་བ་ལ་ཞུགས་པ་ལ་སོགས་པ་ནི་རྒྱུན་དུ་ཞུགས་པ་ལ་སོགས་པ་ལས་ཐ་དད་པ་མ་ཡིན་ནོ་ཞེས་བྱ་བའི་ཐ་ཚིག་གོ། །མཐར་
[205b]
[205b.1]གྱིས་འཐོབ་པའི་ཕྱིར་དེ་སྐད་ཅེས་བཤད་ཀྱི་ཞེས་བྱ་བ་ནི་མཐར་གྱིས་འབྲས་བུ་བཞི་འཐོབ་པའི་ཕྱིར་རྫས་སུ་ནི་ལྔ་ཡིན་ཏེ་ཞེས་བཤད་པར་ཟད་དོ། །ཕལ་ཆེར་དང་འདོད་པ་ལས་འདོད་ཆགས་དང་བྲལ་བ་དག་ཅིག་ཡིན་ན་ནི་ཞེས་བྱ་བ་ནི་ཕལ་ཆེར་ལས་འདོད་ཆགས་དང་བྲལ་བ་ནི་རྣམ་པ་དྲུག་ཟད་པའོ། །
[205b.2]འདོད་པ་ལས་འདོད་ཆགས་དང་བྲལ་བ་ནི་རྣམ་པ་དགུ་ཟད་པའོ། །མཐོང་བའི་ལམ་ལ་སྟེ། མཐོང་བའི་ལམ་གྱི་གནས་སྐབས་ན་གོ་རིམས་བཞིན་དུ་ལན་ཅིག་ཕྱིར་འོང་བ་དང་། ཕྱིར་མི་འོང་བའི་འབྲས་བུ་ལ་ཞུགས་པ་དག་ཡིན་གྱི་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དག་ནི་མ་ཡིན་ནོ། །
[205b.3]འོ་ན་ཅི་ཞེ་ན། དེ་ལས་གཞན་པ་དག་ཡིན་ནོ། །དེ་ལྟ་ཡིན་དང་རྫས་སུ་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བའི་འབྲས་བུ་ལ་ཞུགས་པ་གསུམ་དང་། འབྲས་བུ་ལ་གནས་པ་བཞི་སྟེ་བདུན་དུ་འགྱུར་གྱི་དགྲ་བཅོམ་པ་ཉིད་ཀྱི་འབྲས་བུ་ལ་ཞུགས་པ་གཅིག་པུ་
[205b.4]ཕྱིར་མི་འོང་བའི་འབྲས་བུ་ལས་ཐ་མི་དད་དོ་ཞེས་བྱ་བར་ཁོང་དུ་ཆུད་པར་བྱའོ། །བསྒོམ་པའི་ལམ་རྣམ་པ་གཉིས་སུ་བཤད་པ་ལ་ཞེས་བྱ་བ་ནི་བསྒོམ་པའི་ལམ་ནི་རྣམ་པ་གཉིས་ཏེ། མཐོང་བ་ཞེས་བྱ་ཟག་པ་མེད། །ཅེས་འབྱུང་བའི་ཕྱིར་རོ། །དེའི་ཉོན་མོངས་པ་རྒྱས་པར་འགྱུར་བའི་
[205b.5]ཕྱིར་ཏེ་ཞེས་བྱ་བ་ནི་འདི་ལྟར་འཇིག་རྟེན་པའི་ལམ་དེ་ལ་དེའི་ས་པའི་ཉོན་མོངས་པ་དམིགས་པའི་སྒོ་ནས་རྒྱས་པར་འགྱུར་རོ། །ཉོན་མོངས་པ་གང་ཞིག་ཅེས་བྱ་བ་རྒྱས་པར་འབྱུང་བ་ནི། ཆོས་མཐུན་པ་དང་ཆོས་མི་མཐུན་པའི་དཔེ་སྟོན་པར་བྱེད་པ་ཡིན་ཏེ། ས་གང་བའི་ལམ་ཡིན་པ་དེ་
[205b.6]ནི་ས་དེའི་ཉོན་མོངས་པའི་གཉེན་པོ་མ་ཡིན་ཏེ། དེའི་ཉོན་མོངས་པ་རྒྱས་པར་འགྱུར་བའི་ཕྱིར་ས་དེ་པའི་ཆོས་གཞན་མཉམ་པར་མ་བཞག་པ་ལྟ་བུའོ། །ཆོས་མི་མཐུན་པ་ནི་གོང་མའི་ཉེར་བསྡོགས་ཀྱི་ལམ་ལྟ་བུའམ་དེའི་གཉེན་པོ་ཟག་པ་མེད་པའི་ལམ་ལྟ་བུའོ། །འཇིག་རྟེན་པའི་ལམ་གྱིས་
[205b.7]ཀྱང་འདོད་ཆགས་དང་བྲལ་བ་ཞེས་བྱ་བ་ནི་ས་གོང་མའི་ཉེར་བསྡོགས་ཀྱིས་སོ། །འཇིག་རྟེན་ལས་འདས་པས་ཀྱང་ཞེས་བྱ་བ་ནི་དེའི་གཉེན་པོ་ཟག་པ་མེད་པའི་ལམ་རང་གི་དང་ས་འོག་མ་པས་སོ། །འཕགས་པ་འཇིག་རྟེན་པའི་ལམ་གྱི་འདོད་ཆགས་དང་བྲལ་བར་ཞེས་བྱ་བ་ནི་
[206a]
[206a.1]དཔེར་ན་རྒྱུན་དུ་ཞུགས་པ་ཞི་གནས་སྤྱད་པ་ཞིག་འཇིག་རྟེན་པའི་ལམ་གྱིས་འདོད་ཆགས་དང་བྲལ་བར་གྱུར་པ་རྣམས་རྣམ་པ་རེ་རེ་ཞིང་བྲལ་བའི་ཐོབ་པ་ཟག་པ་དང་བཅས་པ་དང་། ཟག་པ་མེད་པ་དག་སྐྱེའོ། །བསམ་གཏན་ལ་བརྟེན་ཏེ་ཞེས་བྱ་བ་ནི་འདི་ལྟར། མི་སློབ་པ་
[206a.2]དགུ་ལ་བརྟེན་ཏེ། སློབ་པ་དྲུག་ལ་ཞེས་འབྱུང་བའི་ཕྱིར་སློབ་པ་ནི་ས་དྲུག་ལ་བརྟེན་ཏེ་དབང་པོ་རྣམས་འཕོ་བར་བྱེད་ཀྱི་གཟུགས་མེད་པ་ལ་ནི་མ་ཡིན་ནོ་ཞེས་བྱ་བར་ངེས་སོ། །དེའི་ཕྱིར་སྨྲས་པ། བསམ་གཏན་ལ་བརྟེན་ཏེ་དབང་པོ་རྣམས་འཕོ་བར་བྱེད་པ་གང་ཡིན་པ་དེ་ལམ་སྔ་མ་ཟད་པར་བཏང་བའི་ཕྱིར་
[206a.3]ཏེ། གཟུགས་མེད་པའི་ལམ་དབང་པོ་རྟུལ་པོས་བསྡུས་པ་སྔར་ཐོབ་པ་རྣམས་བཏང་བའི་ཕྱིར་དང་། འཕེལ་བ་འབྲས་བུ་ཁྱད་པར་བཅས། །བཏང་སྟེ་འབྲས་བུ་འཐོབ་པར་འགྱུར། །ཞེས་འབྱུང་བས་འབྲས་བུའི་ལམ་འབའ་ཞིག་ཐོབ་པའི་ཕྱིར་ཏེ། ཕྱིར་མི་འོང་བའི་འབྲས་བུ་དབང་པོ་རྣོན་པོའི་
[206a.4]ངོ་བོ་ཉིད་འབའ་ཞིག་ཐོབ་པའི་ཕྱིར། ས་གོང་མའི་ཉོན་མོངས་པའི་བྲལ་བ་སྟེ། གཟུགས་མེད་པ་ན་སྤྱོད་པའི་ཉོན་མོངས་པའི་བྲལ་བ་དང་མི་ལྡན་པར་འགྱུར་རོ། །ཉེས་པ་གཞན་འདི་ཡང་ཡོད་དེ། ས་གོང་མ་པའི་ཉོན་མོངས་པའི་བྲལ་བ་དེ་བཏང་ནས་ས་གོང་མའི་ཉོན་མོངས་པ་དེ་དག་དང་ལྡན་པར་
[206a.5]ཡང་འགྱུར་རོ། །སྲིད་རྩེའི་ཕྱེད་ལས་རྣམ་གྲོལ་དང་། །གོང་མར་སྐྱེས་པ་བཞིན་མི་ལྡན། །ཞེས་བྱ་བ་ནི་ཕྱེད་ལས་རྣམ་པར་གྲོལ་བ་ནི་ཕྱེད་ལས་རྣམ་པར་གྲོལ་ལོ། །སྲིད་པའི་རྩེ་མོའི་ཕྱེད་ལས་རྣམ་པར་གྲོལ་བ་ནི་སྲིད་རྩེའི་ཕྱེད་ལས་རྣམ་གྲོལ་ལོ། །གོང་དུ་སྐྱེས་པ་ནི་གོང་དུ་སྐྱེས་པའོ། །སྲིད་པའི་
[206a.6]རྩེ་མོའི་ཕྱེད་ལས་གྲོལ་བ་དང་། གོང་དུ་སྐྱེས་པ་ནི་སྲིད་པའི་རྩེ་མོའི་ཕྱེད་ལས་གྲོལ་བ་དང་། གོང་དུ་སྐྱེས་པ་ཡིན་ནོ། །དེ་དང་འདྲ་བས་སྲིད་རྩེའི་ཕྱེད་ལས་རྣམ་གྲོལ་དང་། གོང་མར་སྐྱེས་པ་བཞིན་ནོ། །མི་ལྡན་པ་ནི་དེ་དག་དང་དེ་ཞེས་བྱ་བ་ཚིག་ལྷག་མ་ཡིན་ནོ། །དུ་ཞེས་བྱ་བའི་སྒྲ་ནི་ཉེས་པ་
[206a.7]སྔ་མ་བསལ་བའི་ཕྱིར་རོ། །དོན་དེ་རྣམ་པར་གྲོལ་བའི་ཕྱིར་དེ་ལ་འཇིག་རྟེན་པའི་བྲལ་བའི་ཐོབ་པ་མེད་དུ་ཟིན་ཀྱང་ཞེས་བྱ་བ་རྒྱས་པར་སྨོས་ཏེ། གང་ཟག་དེ་ལ་འཇིག་རྟེན་པའི་ཐོབ་པ་མེད་དུ་ཟིན་ཀྱང་ཉོན་མོངས་པ་དེ་དག་ལྡན་པར་མི་འགྱུར་རོ། །དཔེར་ན་སྲིད་པའི་རྩེ་མོའི་རྣམ་པ་ཕྱེད་
[206b]
[206b.1]ལས་རྣམ་པར་གྲོལ་བ་ལ་ཞེས་བྱ་བ་རྒྱས་པར་འབྱུང་བ་ནི་དེ་ལ་ནི་སྲིད་པའི་རྩེ་མོའི་རྣམ་པ་ཕྱེད་ལས་བྲལ་བའི་ཐོབ་པ་འཇིག་རྟེན་པ་མེད་དེ། དེའི་གཉེན་པོ་འཇིག་རྟེན་པའི་ལམ་མེད་པའི་ཕྱིར་རོ། །དེའི་བྲལ་བའི་ཐོབ་པ་འཇིག་རྟེན་ལས་འདས་པ་ཡང་བསམ་གཏན་ལ་བརྟེན་ཏེ། དབང་པོ་
[206b.2]འཕོ་བས་བཏང་བར་འགྱུར་མོད་ཀྱི། ཁྱེད་སྲིད་པའི་ཉོན་མོངས་པའི་རྣམ་པ་དེ་དག་དང་ལྡན་པར་མི་འགྱུར་བར་ཁས་ལེན་པ་ལྟར་འདི་ཡང་དེ་དང་འདྲའོ། །ཡང་དཔེར་ན་སོ་སོའི་སྐྱེ་བོ་བསམ་གཏན་དང་པོ་ཡན་ཆད་དུ་སྐྱེས་པ་སྟེ། བསམ་གཏན་གཉིས་པ་ལ་སོགས་པར་སྐྱེས་པ་བསམ་
[206b.3]གཏན་དང་པོའི་ས་པ་དེའི་བྲལ་བ་ཐོབ་པའི་ཕྱིར་རོ། །འདོད་པ་ན་སྤྱོད་པའི་ཉོན་མོངས་པའི་བྲལ་བའི་ཐོབ་པ་གཏང་བས་ཏེ། ས་འཕོས་པ་དང་ཉམས་པ་ཡིས། །བསམ་གཏན་ཐོབ་པའི་དགེ་བ་གཏོང་། །དེ་བཞིན་དུ་གཟུགས་མེད་ཅེས་བྱ་བར་ངེས་པས་གཏོང་བ་ཡིན་ནོ། །དེའི་ཕྱིར་ཡང་
[206b.4]འདོད་པ་ན་སྤྱོད་པའི་ཉོན་མོངས་པ་དེ་དག་དང་ལྡན་པར་མི་འགྱུར་བར་ཁས་ལེན་པ་ལྟར་གང་ཟག་འདི་ཡང་དེ་དང་འདྲའོ། །སོ་སོའི་སྐྱེ་བོ་ཞེས་སྨོས་པ་ནི་འདི་ལྟར་འཕགས་པ་འཇིག་རྟེན་པའི་ལམ་གྱིས་འདོད་པའི་ཁམས་ཀྱི་གོང་མ་ལས་འདོད་ཆགས་དང་བྲལ་བར་འགྱུར་བ་ལ་ནི་ཉོན་མོངས་
[206b.5]པའི་བྲལ་བའི་ཐོབ་པ་འཇིག་རྟེན་པ་དང་འཇིག་རྟེན་ལས་འདས་པ་ཡང་ཡོད་དོ། །དེ་ལ་འདོད་པ་ན་སྤྱོད་པའི་ཉོན་མོངས་པའི་བྲལ་བའི་ཐོབ་པ་འཇིག་རྟེན་པ་གང་ཡིན་པ་དེ་ནི་བསམ་གཏན་དང་པོ་ཡན་ཆད་དུ་སྐྱེས་པས་འཕོ་བས་བཏང་བར་འགྱུར་གྱི་འཇིག་རྟེན་ལས་འདས་པ་ནི་མ་ཡིན་ཏེ།
[206b.6]འཕགས་པ་ནི། འབྲས་ཐོབ་སྦྱངས་དང་ཉམས་པ་ཡིས། །ཞེས་བྱ་བར་གཏོང་བར་ངེས་པའི་ཕྱིར་རོ། །འཕགས་པ་ནི་བསམ་གཏན་དང་པོ་ཡན་ཆད་དུ་སྐྱེས་ཀྱང་འཇིག་རྟེན་ལས་འདས་པ་དེ་ཡོད་ན་ཡང་དེ་དག་དང་ལྡན་པ་མི་སྲིད་ཀྱི་སོ་སོའི་སྐྱེ་བོ་ནི་དེ་ལྟ་མ་ཡིན་པས་སོ་སོའི་
[206b.7]སྐྱེ་བོ་སྨོས་སོ། །དེ་ལྟ་བས་ན། བཏང་ལ་ཉོན་མོངས་མི་ལྡན་ཕྱིར། ཞེས་སྨོས་པ་གང་ཡིན་པ་འདི་ནི་ཤེས་པར་བྱེད་པ་མ་ཡིན་ནོ། །ཐམས་ཅད་ལས་ཞེས་བྱ་བ་ནི་རང་གི་ས་དང་ས་གོང་མ་དང་འོག་མ་ལས་ཏེ། དེ་ནི་ཟག་པ་མེད་པའི་ཕྱིར་རོ། །བཏང་སྙོམས་ཀྱི་དབང་པོ་ཐུན་མོང་
[207a]
[207a.1]མ་ཡིན་པའི་ཕྱིར་ཞེས་བྱ་བ་ནི་བསམ་གཏན་བཞི་པ་ལ་སོགས་པའི་སྙོམས་པར་འཇུག་པ་དང་། དེའི་ཉེར་བསྡོགས་དག་བཏང་སྙོམས་ཀྱི་དབང་པོ་འདྲ་བས་སོ། །ལ་ལ་བསམ་གཏན་དངོས་གཞི་ལ་འཇུག་མི་ནུས་ཏེ་ཞེས་བྱ་བ་ནི་དབང་པོ་རྟུལ་པོའོ། །དབང་པོ་
[207a.2]འཕོ་བ་ནི་དཀའ་བའི་ཕྱིར་རོ་ཞེས་བྱ་བ་ནི་བཏང་སྙོམས་ཀྱི་དབང་པོའི་མཇུག་ཐོགས་སུ་ཡིད་བདེ་བའི་དབང་པོའམ། བདེ་བའི་དབང་པོ་བསྐྱེད་དཀའ་བའི་ཕྱིར་དངོས་གཞི་དང་ཉེར་བསྡོགས་དག་གིས་བཏང་སྙོམས་ཀྱི་དབང་པོ་འདྲ་བས་སོ། །ཅིའི་ཕྱིར་དངོས་གཞི་ཁོ་ན་ལས་རྣམ་པར་གྲོལ་བའི་
[207a.3]ལམ་ཐ་མ་མངོན་དུ་བྱེད་ཀྱི་ཉེར་བསྡོགས་ལས་ནི་མ་ཡིན་ཞེ་ན། འདོད་ཆགས་དང་བྲལ་བའི་ས་ལ་གུས་པའི་ཕྱིར་རོ། །འདོད་ཆགས་དང་བྲལ་ཟིན་པའི་ཕྱིར་འོག་མ་ལ་ནི་མ་ཡིན་ཏེ། དེའི་ཉེར་བསྡོགས་ཁོ་ནས་འོག་མ་ལས་འདོད་ཆགས་དང་བྲལ་བར་བྱས་པའི་ཕྱིར་རོ། །བདེན་པའི་རྣམ་
[207a.4]པར་ཞུགས་པ་དག་ཡིན་ནོ་ཞེས་བྱ་བ་ནི་མི་རྟག་པ་ལ་སོགས་པའི་རྣམ་པར་ཞུགས་པ་དག་ཡིན་ནོ། །ཅི་རིགས་པར་ཞེས་བྱ་བ་ནི་ཁ་ཅིག་ན་རེ་ས་འོག་མ་ལ་རགས་པར་ལྟ་ན་གོང་ས་ལ་དེ་ལས་བཟློག་པ་ཞི་བར་བལྟའོ་ཞེས་ཟེར་རོ། །གཞན་དག་ན་རེ་ཞི་བ་ལ་སོགས་པའི་རྣམ་པ་དག་ལ་རེས་
[207a.5]འགའ་ནི་རྣམ་པ་དང་པོ་གཅིག་གི་རྣམ་པར་ལྟ་སྟེ། མཐའ་དག་ཏུ་ལྟ་བར་ངེས་པ་ནི་མེད་དོ་ཞེས་ཟེར་རོ། །རགས་པ་ཞེས་བྱ་བ་ལ། རགས་པ་ཞེས་བྱ་བ་ནི་ཆེ་ལོང་ཡིན་ནོ། །མ་ཞི་བའི་ཕྱིར་རགས་པའོ། །ཇི་ལྟར་ས་འོག་མ་ཞི་བ་ཡིན་ཞེ་ན། མངོན་པར་འདུ་བྱེད་པ་ཤིན་ཏུ་ཆེས་པ་ཉིད་
[207a.6]ཀྱིས་ཏེ། གནས་འོག་མ་འདི་ཡང་ལམ་དང་བཅས་ཏེ་མངོན་པར་འདུ་བྱེད་པ་ཆེན་པོས་འབད་དེ་བསྒྲུབ་པར་བྱ་བ་ཡིན་ལ། གནས་གོང་མ་འདི་ཡང་ལམ་དང་བཅས་ཏེ་མངོན་པར་འདུ་བྱེད་པ་ཆེན་པོ་ཡིན་པ་ལས། དེ་གཉིས་ཀྱི་ནང་ན་འདི་མངོན་པར་འདུ་བྱེད་པ་ཤིན་ཏུ་ཆེས་ཆེ་བ་ཡིན་ནོ། །དེའི་
[207a.7]ངོ་བོ་ནི་ཉིད་དེ་དེའི་ཕྱིར་རོ། །ཐ་བ་ནི་གཞིག་པར་དཀའ་བ་ཡིན་ནོ། །སྨད་པའི་ཐ་བ་ནི་ངན་པ་སྟེ། ཐ་བ་ངན་པས་ན་ཐ་བ་ངན་པའོ། །ཇི་ལྟར་ས་འོག་མ་གྱ་ནོམ་པ་མ་ཡིན་ཞེ་ན། གནས་ངན་ལེན་རབ་ཏུ་མང་བ་ཉིད་ཀྱིས་མི་མཐུན་པར་གྱུར་པའི་ཕྱིར་རོ་ཞེས་བྱ་བ་སྨོས་ཏེ། གནས་ངན་ལེན་ནི་
[207b]
[207b.1]ལུས་དང་སེམས་དག་ལས་སུ་མི་རུང་བ་ཉིད་དེ། ཉོན་མོངས་པ་དང་མཐུན་པ་ཞེས་བྱ་བའི་ཐ་ཚིག་གོ། །འདི་ལ་གནས་ངན་ལེན་མང་པོ་ཡོད་པས་ན་གནས་ངན་ལེན་མང་པོ་སྟེ། གནས་འོག་མ་འདི་ཡང་ལམ་དང་བཅས་ཏེ་གནས་ངན་ལེན་མང་པོ་ཡིན་ལ། གནས་གོང་མ་འདི་ཡང་ལམ་དང་བཅས་
[207b.2]ཏེ་གནས་ངན་ལེན་མང་པོ་ཡིན་པ་ལས་དེ་དག་གཉིས་ཀྱི་ནང་ན་འདི་གནས་ངན་ལེན་ཤིན་ཏུ་ཆེས་མང་ངོ་། །དེའི་ངོ་བོ་ནི་ཉིད་དེ་དེའི་ཕྱིར་རོ། །རྩིག་པ་ལས་ངེས་པར་མི་འབྱུང་བ་བཞིན་ཏེ། དཔེར་ན་རྩིག་པ་དེ་ཉིད་ཀྱིས་དེས་ནོན་པའི་ནམ་མཁའི་ཕྱོགས་ཀྱི་རྩིག་པ་དེ་ཉིད་ལས་ངེས་པར་མི་འབྱུང་
[207b.3]བ་ལྟར་དེ་ཉིད་ཀྱིས་ས་དེ་ལས་ངེས་པར་མི་འབྱུང་བའི་ཕྱིར་ཏེ། ས་དེ་ཉིད་ཀྱིས་ས་དེ་ཉིད་ལས་ངེས་པར་མི་འབྱུང་བའི་ཕྱིར་རོ། །རྩིག་པ་སྟུག་པོ་ལྟ་བུར་ཞེས་བྱ་བ་ནི་རྩིག་པ་སྟུག་པོའི་ངོ་བོར་རོ། །དེ་དག་ལས་བཟློག་པ་ཞེས་བྱ་བ་ནི་མངོན་པར་འདུ་བྱེད་པ་ཤིན་ཏུ་ཆུང་བ་ཉིད་ཀྱི་ཕྱིར་དང་། གནས་
[207b.4]ངན་ལེན་རབ་ཏུ་ཉུང་བ་ཉིད་ཀྱིས་མི་མཐུན་པ་མེད་པར་གྱུར་པའི་ཕྱིར་དང་། ས་དེ་གཉིས་ལས་དེས་ངེས་པར་འབྱུང་བ་ཡིན་པའི་ཕྱིར་གོ་རིམས་བཞིན་དུ་ཞི་བ་དང་། གྱ་ནོམ་པ་དང་། ངེས་པར་འབྱུང་བའི་རྣམ་པ་ཅན་དག་ཡིན་ནོ། །ཞར་ལ་འོངས་པ་རྫོགས་སོ།། །།དཀྱུས་མ་ཁོ་
[207b.5]ན་བརྗོད་པར་བྱ་སྟེ་ཞེས་བྱ་བ་ནི་ཟད་པ་ཤེས་པའི་རྗེས་ལ་འབྱུང་བ་བརྗོད་པར་བྱ་བ་ཡིན་ཏེ། འཇིག་རྟེན་པའི་བར་ཆད་མེད་པ་དང་རྣམ་པར་གྲོལ་བའི་ལམ་གྱི་མཚན་ཉིད་ནི་ཞར་ལ་བསྟན་པར་ཟད་དོ། །གལ་ཏེ་མི་གཡོ་ཟད་ཤེས་ལས། །མི་སྐྱེས་བློ་གྲོས་ཞེས་བྱ་བ་ནི་ཡང་བྱར་མེད་པ་ཉིད་དུ་ཤེས་པ་སྟེ།
[207b.6]དེའི་ཚེ་དེ་ལ་འདི་སྐྱེའོ། །ཡོངས་སུ་ཉམས་པ་སྲིད་པའི་ཕྱིར་ཞེས་བྱ་བ་ནི་ཉོན་མོངས་པ་སྐྱེ་བའི་གོ་སྐབས་ཡོད་པས་འདི་ལ་མི་སྐྱེ་བ་ཤེས་པས་མི་སྐྱེའོ། །ཅིའི་ཕྱིར་ཞེ་ན། ཡོངས་སུ་ཉམས་པ་སྲིད་པའི་ཕྱིར་ཏེ། འདི་ལྟར་འདི་ནི་ཡོངས་སུ་ཉམས་པ་སྲིད་ལ་གང་ལ་མི་སྐྱེ་བ་ཤེས་པ་ཡོད་པ་དེ་ལ་ནི་
[207b.7]ཡོངས་སུ་ཉམས་པ་མེད་པས་སོ། །དེས་དགེ་སྦྱོང་དུ་འགྱུར་ཞེས་བྱ་བ་ནི་དགེ་སྦྱོང་གི་ཚུལ་དང་ལྡན་པས་དགེ་སྦྱོང་ཡིན་ཏེ། དཔེར་ན་དཀར་པོའི་ཚུལ་དང་ལྡན་པས་རས་ཡུག་དཀར་པོ་ཞེས་བྱ་བ་ལྟ་བུའོ། །དེའི་རྒྱུ་མཐུན་པ་དང་སྐྱེས་བུ་བྱེད་པའི་འབྲས་བུ་ཡིན་པའི་ཕྱིར་རོ་ཞེས་བྱ་བ་ནི་ཅི་རིགས་པར་རྣམ་པར་གྲོལ་བའི་
[208a]
[208a.1]ལམ་དང་། འདུས་མ་བྱས་རྣམས་ཀྱང་དགེ་སྦྱོང་གི་ཚུལ་བར་ཆད་མེད་པའི་ལམ་གྱི་མཚན་ཉིད་དེའི་རྒྱུ་མཐུན་པའི་འབྲས་བུ་དང་སྐྱེས་བུ་བྱེད་པའི་འབྲས་བུ་ཡིན་པའི་ཕྱིར་ཏེ། རྣམ་པར་གྲོལ་བའི་ལམ་རྣམས་ནི་དེའི་རྒྱུ་མཐུན་པ་དང་། སྐྱེས་བུ་བྱེད་པའི་འབྲས་བུ་ཡིན་ནོ། །འདུས་མ་
[208a.2]བྱས་རྣམས་ནི་སྐྱེས་བུ་བྱེད་པའི་འབྲས་བུ་ཁོ་ན་ཡིན་ཏེ། གང་གི་སྟོབས་ཀྱིས་གང་བསྐྱེད་དེ། །སྐྱེས་བུ་བྱེད་ལས་སྐྱེས་པའི་འབྲས། །གང་གི་སྟོབས་ཀྱིས་གང་ཐོབ་པ། །དེ་ནི་སྐྱེས་བུ་བྱེད་པའི་འབྲས། །ཞེས་བྱ་བའི་ཕྱིར་རོ། །དེ་ལྟ་ན་འོ་ན་ནི་ཞེས་བྱ་བ་རྒྱས་པར་འབྱུང་བ་ལ། ཚིག་གི་དོན་ནི་ཇི་
[208a.3]ལྟར་སོ་སོའི་སྐྱེ་བོ་པ་ནི་ནིའི་ཚིག་ལ་ཁ་བསྐང་བ་བྱེད་པ་ལྟར་སངས་རྒྱས་ཐམས་ཅད་མཁྱེན་པས་གང་གསུངས་པ་ཡང་ཁ་བསྐང་བར་བྱ་དགོས་པར་འགྱུར་རོ་ཞེས་བྱ་བའོ། །ལམ་སྔ་མ་བཏང་བ་དང་ཞེས་བྱ་བ་རྒྱས་པར་འབྱུང་བ་ལ། ལམ་སྔ་མ་བཏང་བ་ནི་ཞུགས་པའི་ལམ་བཏང་བའི་ཕྱིར་རོ། །སྔོན་
[208a.4]མེད་པའི་ལམ་ཐོབ་པ་ནི་འབྲས་བུའི་ཐོབ་པའི་ཕྱིར་རོ། །ཐམས་ཅད་ཀྱི་ཐོབ་པ་གཅིག་རྙེད་པའི་ཕྱིར་རོ་ཞེས་བྱ་བ་ནི་རྒྱུན་དུ་ཞུགས་པའི་འབྲས་བུ་འཐོབ་པའི་དུས་ན་མཐོང་བས་སྤང་བ་ཐམས་ཅད་ཀྱི་ཐོབ་པ་བསྒོམ་པའི་ལམ་གྱིས་བསྡུས་པ་གཅིག་རྙེད་ལ། དེ་བཞིན་དུ་ལན་ཅིག་ཕྱིར་འོང་བའི་
[208a.5]འབྲས་བུ་ཐོབ་པའི་དུས་ན་ཡང་མཐོང་བས་སྤང་བར་བྱ་བ་སྤངས་པ་དང་། བསྒོམ་པས་སྤང་པ་རྣམ་པ་དྲུག་པོ་ཐམས་ཅད་ཀྱི་ཐོབ་པ་གཅིག་རྙེད་དེ། ཕྱིར་མི་འོང་བ་དང་། དགྲ་བཅོམ་པ་ཉིད་ཀྱི་འབྲས་བུ་དག་ལ་ཡང་དེ་བཞིན་དུ་སྦྱར་བར་བྱའོ། །ཆོས་དང་རྗེས་སུ་ཤེས་པ་རྣམ་པ་བཞིའི་ཞེས་བྱ་
[208a.6]བ་ནི་བདེན་པའི་བྱེ་བྲག་གིས་ཆོས་དང་རྗེས་སུ་ཤེས་པ་རྣམ་པ་བཞི་པོ་ཡང་དེ་ཁོ་ན་བཞིན་དུ་རྣམ་པ་བཞི་བཞི་ཡིན་པས་ཤེས་པ་བརྒྱད་ཅིག་ཅར་དུ་འཐོབ་བོ། །འཇིག་རྟེན་པའི་ལམ་གྱིས་ཐོབ་པའི་འབྲས་བུ་གཉིས་ཞེས་བྱ་བ་ནི་ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་
[208a.7]འབྲས་བུ་སྟེ། དེ་དག་ནི་འཇིག་རྟེན་པའི་ལམ་གྱིས་ཀྱང་ཐོབ་པར་སྲིད་ན། དེ་ཇི་ལྟར་དགེ་སྦྱོང་གི་ཚུལ་ཟག་པ་མེད་པའི་ལམ་གྱིས་མཚན་ཉིད་ཀྱི་འབྲས་བུར་རུང་། མཐོང་བའི་ལམ་ཀྱི་འབྲས་བུ་སྤངས་པ་ཡང་ཞེས་བྱ་བ་ལ། ཡང་ཞེས་བྱ་བའི་སྒྲས་ནི་བསྒོམ་པའི་ལམ་གྱི་འབྲས་བུ་ཡང་གཟུང་
[208b]
[208b.1]སྟེ། སྤངས་པ་རྣམ་པ་གཉིས་པོ་དེའི་ཐོབ་པ་ཡང་ལན་ཅིག་ཕྱིར་འོང་བའི་འབྲས་བུར་བསྡུས་པའམ་ཕྱིར་མི་འོང་བའི་འབྲས་བུར་བསྡུས་པ་གཅིག་རྙེད་དོ། །དེ་ལྟ་བས་ན་མཐོང་བའི་ལམ་གྱི་འབྲས་བུ་སྤངས་པ་དང་ལྡན་པའི་ཕྱིར་ལན་ཅིག་ཕྱིར་འོང་བའི་འབྲས་བུའམ་ཕྱིར་མི་འོང་བའི་འབྲས་བུ་འདུས་མ་བྱས་ནི་དགེ་སྦྱོང་གི་
[208b.2]ཚུལ་གྱི་འབྲས་བུ་ཡིན་ནོ། །ཀུན་དུ་སྦྱོར་བ་གསུམ་སྤངས་པ་ཞེས་བྱ་བ་ལ་ཀུན་དུ་སྦྱོར་བ་གསུམ་ནི་མཐོང་བའི་ལམ་གྱིས་སྤངས་པ་ཡིན་ནོ། །ཐ་མའི་ཆ་དང་མཐུན་པ་ལྔའི་ཕྱོགས་གཅིག་པོ་འཇིག་ཚོགས་ལ་ལྟ་བ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། ཐེ་ཚོམ་རྣམས་ཀྱང་མཐོང་བའི་ལམ་ཁོ་
[208b.3]ནས་སྤངས་ན། སྤངས་པ་དེ་ཅིའི་ཕྱིར་ལན་ཅིག་ཕྱིར་འོང་བ་དང་། ཕྱིར་མི་འོང་བའི་འབྲས་བུ་ཉིད་དག་ཏུ་གཞག །དེའི་ཕྱིར་སྤངས་པ་འདྲེན་མར་འཇུག་པས་བཅོམ་ལྡན་འདས་ཀྱིས་དེ་སྐད་གསུངས་སོ་ཞེས་བྱ་བར་མངོན་ནོ། །དེའི་སྟོབས་ཀྱིས་ཡོངས་སུ་ཉམས་པ་མི་འཆི་བའི་ཕྱིར་ཞེས་བྱ་བ་ནི། འཇིག་
[208b.4]རྟེན་པ་ཡིས་ཆགས་བྲལ་བའི། །འཕགས་ལ་བྲལ་བའི་ཐོབ་རྣམས་གཉིས། །ཞེས་བྱ་བ་དེ་ལ་བྲལ་བའི་ཐོབ་པ་ཟག་པ་མེད་པས་འཇིག་རྟེན་པའི་ལམ་གྱིས་ཐོབ་པའི་སྤངས་པ་གང་ཡིན་པ་དེ་འཛིན་པར་བྱེད་དོ། །འབྲས་ལ་ཉམས་པ་འཆི་བ་མེད། །ཅེས་འབྱུང་བའི་ཕྱིར་ཐོབ་པ་དང་ལྡན་པའི་
[208b.5]གནས་སོ་ཞེས་བྱ་བའི་ཐ་ཚིག་སྟེ། དེ་མེད་ན་འཇིག་རྟེན་པ་ཡོངས་སུ་ཉམས་པ་བཞིན་དུ་འཆི་བར་འགྱུར་རོ། །དེའི་སྟོབས་ཀྱིས་ཞེས་བྱ་བ་ནི་བྲལ་བའི་ཐོབ་པ་ཟག་པ་མེད་པའི་སྟོབས་ཀྱིས་ཞེས་བྱ་བའི་ཐ་ཚིག་གོ།། །།བམ་པོ་ལྔ་བཅུ་པ། ཟག་པ་མེད་པའི་ཐོབ་པ་འཇིག་རྟེན་པའི་
[208b.6]ལམ་གྱིས་ཉེ་བར་སྐྱེད་པ་ད་ལྟར་ཡོད་པ་དང་། འཕགས་པའི་ལམ་ཡན་ལག་བརྒྱད་པོ་འཇིག་རྟེན་པའི་སྟོབས་ཀྱིས་ཐོབ་པར་བྱ་བ་མ་འོངས་པ་འདུས་བྱས་དེ་ལ་དགེ་སྦྱོང་གི་ཚུལ་གྱི་འབྲས་བུ་ཡོད་པར་རྣམ་པར་གཞག་ན་ཡང་མི་འགལ་ལོ། །མདོ་ལས་ནི་གཙོ་བོ་ཡིན་པའི་ཕྱིར་དགེ་སྦྱོང་གི་ཚུལ་
[208b.7]གྱི་འབྲས་བུ་འདུས་མ་བྱས་སྨོས་ཏེ། དེར་ནི་འདུས་བྱས་ཀྱང་འདོད་པར་བྱའོ། །ཉོན་མོངས་པ་རྣམས་སྤོང་བའི་ཕྱིར་ཚངས་པའི་ཚུལ་ལོ་ཞེས་བྱ་བ་ནི་འདིས་སྡིག་པ་མི་དགེ་བའི་ཆོས་རྣམ་པ་དུ་མ་སྤངས་པས་ཚངས་པའོ། །དེའི་ངོ་བོ་ནི་ཚངས་པའི་ཚུལ་ཡིན་ཏེ། ཟག་པ་མེད་པའི་ལམ་མོ། །
[209a]
[209a.1]ཇི་ལྟར་ཚངས་པའི་འཁོར་ལོ་ཡིན་ཞེ་ན། ཚངས་པའི་འཁོར་ལོ་ནི། ཚངས་པས་བསྐོར་ཕྱིར་རོ་ཞེས་བྱ་བ་སྨོས་ཏེ། གང་གི་ཕྱིར་ཚངས་པས་བསྐོར་བ་དེའི་ཕྱིར་ཚངས་པའི་འཁོར་ལོ་ཞེས་བྱའོ། །ཚངས་པའི་ཚུལ་བླ་ན་མེད་པ་དང་ལྡན་པའི་ཕྱིར་ཞེས་བྱ་བ་ནི་ཟག་པ་མེད་
[209a.2]པའི་ལམ་བླ་ན་མེད་པ་དང་ལྡན་པའི་ཕྱིར་ཞེས་བྱ་བའི་ཐ་ཚིག་གོ། །དཔེར་བརྗོད་པ་ནི། བཅོམ་ལྡན་འདས་དེ་ནི་ཚངས་པ་ཞེས་ཀྱང་བྱ་ཞེས་བྱ་བ་འདི་ནི་ཡིན་ཏེ། འདི་ནི་འཚོ་བྱེད་ཀྱིས་སྨྲས་པ་ཡིན་ནོ། །མྱུར་བར་འགྲོ་སོགས་རྩིབས་སོགས་ཕྱིར། །ཞེས་བྱ་བ་ནི་མྱུར་བར་འགྲོ་བ་ལ་སོགས་པའི་ཕྱིར་
[209a.3]དང་། རྩིབས་ལ་སོགས་པའི་ཕྱིར་ཞེས་བྱ་བའི་ཐ་ཚིག་གོ། །མྱུར་དུ་འགྲོ་བའི་ཕྱིར་དང་ཞེས་བྱ་བ་རྒྱས་པར་འབྱུང་བ་ནི་འདི་ནི་མཐོང་བའི་ལམ་འཁོར་ལོ་རིན་པོ་ཆེ་དང་ཆོས་མཐུན་པར་བརྗོད་པ་ཡིན་ཏེ། ཇི་ལྟར་འཁོར་ལོ་རིན་པོ་ཆེ་མྱུར་དུ་འགྲོ་བ་དེ་བཞིན་དུ་མཐོང་བའི་ལམ་ཡང་སེམས་ཀྱི་སྐད་ཅིག་བཅོ་
[209a.4]ལྔས་བདེན་པ་མངོན་པར་རྟོགས་པའི་ཕྱིར་མྱུར་དུ་འགྲོ་བ་ཡིན་ནོ། །འདོར་བ་དང་འཇུག་པའི་ཕྱིར་ཞེས་བྱ་བ་ནི་ཇི་ལྟར་ཡུལ་གཞན་འདོར་ཞིང་ཡུལ་གཞན་དུ་འཇུག་པ་དེ་བཞིན་དུ་འདིར་ཡང་བར་ཆད་མེད་པའི་ལམ་ནི་འདོར་ལ་རྣམ་པར་གྲོལ་བའི་ལམ་ནི་མངོན་དུ་འགྱུར་བའི་སྒོ་ནས་འཇུག་པ་འམ་བདེན་པའི་དམིགས་པ་གཞན་
[209a.5]འདོར་བ་དང་འཇུག་པའི་ཕྱིར་རོ། །མ་རྒྱལ་བ་རྒྱལ་བར་བྱེད་པ་དང་རྒྱལ་བ་རྣལ་དུ་དགོད་པའི་ཕྱིར་ཞེས་བྱ་བ་ནི་ཇི་ལྟར་དེ་གྲོང་དང་གྲོང་རྡལ་ལ་སོགས་པ་མ་རྒྱལ་བ་ལས་ནི་རྒྱལ་བར་བྱེད་ལ་རྒྱལ་བ་དག་ནི་རྣལ་དུ་དགོད་པ་དེ་བཞིན་དུ་འདི་ཡང་བར་ཆད་མེད་པའི་ལམ་གྱིས་འཇིག་ཚོགས་ལ་ལྟ་བ་ལ་སོགས་པ་ཉོན་མོངས་
[209a.6]པ་མ་རྒྱལ་བ་རྣམས་ལས་ནི་དེ་དག་གིས་ཐོབ་པ་གཅོད་པའི་སྒོ་ནས་རྒྱལ་བར་བྱེད་ལ། རྣམ་པར་གྲོལ་བའི་ལམ་གྱིས་རྒྱལ་བ་རྣམས་ནི་ཉོན་མོངས་པའི་བྲལ་བའི་ཐོབ་པ་དང་ལྷན་ཅིག་སྐྱེས་པའི་སྒོ་ནས་རྣལ་དུ་འགོད་དོ། །འཕར་བ་དང་འབབ་པའི་ཕྱིར་ཞེས་བྱ་བ་ནི་ཇི་ལྟར་དེ་ལ་ལར་འཕར་ཤིང་ལ་ལར་
[209a.7]འབབ་པ་དེ་བཞིན་དུ་འདི་ཡང་བར་ཆད་མེད་པའི་ལམ་དང་རྣམ་པར་གྲོལ་བའི་ལམ་རྣམས་ཡང་དང་ཡང་མངོན་དུ་བྱེད་པའམ། འདོད་པ་ལ་སོགས་པའི་སྡུག་བསྔལ་ལ་སོགས་པའི་དམིགས་པའི་སྒོ་ནས་ཅི་རིགས་པར་འཕར་ཞིང་འབབ་སྟེ། གཟུགས་དང་གཟུགས་མེད་པའི་ཁམས་ལ་དམིགས་
[209b]
[209b.1]པའི་ཕྱིར་འཕར་རོ། །འདོད་པའི་ཁམས་ལ་དམིགས་པའི་ཕྱིར་འབབ་བོ། །ཡང་དག་པའི་ལྟ་བ་དང་ཞེས་བྱ་བ་རྒྱས་པར་འབྱུང་བ་ནི། འདི་ནི་ཚུལ་ཁྲིམས་ལ་བརྟེན་ནས་ཏིང་ངེ་འཛིན་ཐོབ་ལ་ཏིང་ངེ་འཛིན་ཐོབ་པས་ཤེས་རབ་ཡང་དག་པ་ཇི་ལྟ་བ་བཞིན་རབ་ཏུ་སྐྱེའོ། །དེའི་ཕྱིར་ཡང་དག་པའི་ངག་དང་།
[209b.2]ལས་ཀྱི་མཐའ་དང་། འཚོ་བ་རྣམས་ནི་ལྟེ་བ་ལྟ་བུ་ཡིན་ཏེ། ཚུལ་ཁྲིམས་ནི་གཞིར་གྱུར་པ་ཡིན་པས་ཡང་དག་པའི་ལྟ་བ་ལ་སོགས་པ་དེ་ལ་རག་ལས་ཏེ་འཇུག་པའི་ཕྱིར་རོ། །ཏིང་ངེ་འཛིན་ནི་མུ་ཁྱུད་ལྟ་བུ་ཡིན་ཏེ། དེས་གཞན་དག་ཉེ་བར་འཛིན་པའི་ཕྱིར་རོ། །ཡང་དག་པའི་ལྟ་བ་ལ་སོགས་
[209b.3]པ་ནི་རྩིབས་ལྟ་བུ་ཡིན་ཏེ། འཁོར་ལོའི་རྩིབས་བཞིན་དུ་ཕན་ཚུན་དུ་འཇུག་པའི་ཕྱིར་རོ། །འདི་ག་ལས་ཞེས་བྱ་བ་ནི་མཐོང་བའི་ལམ་ཆོས་ཀྱི་འཁོར་ལོ་ཡིན་ནོ་ཞེས་བྱ་བ་ནི་བྱེ་བྲག་ཏུ་སྨྲ་བ་རྣམས་ཀྱི་རང་དགའ་ཞིག་ཡིན་ནམ། འོན་ཏེ་ལུང་ལས་འབྱུང་ཞེས་བྱ་བ་ཡིན་ནོ། །དེ་སྐྱེས་ན་ཆོས་ཀྱི་
[209b.4]འཁོར་ལོ་བསྐོར་རོ་ཞེས་བྱ་བ་ནི་མདོ་ལས་མཐོང་བའི་ལམ་སྐྱེས་ན། ཆོས་ཀྱི་འཁོར་ལོ་བསྐོར་ཏོ་ཞེས་འབྱུང་བའི་ཕྱིར་རོ། །ཇི་སྐད་དུ་ཞེ་ན། བཅོམ་ལྡན་འདས་ཡུལ་བཱ་རཱ་ཎ་སཱི་ན་དྲང་སྲོང་ལྷུང་བ་རི་དགས་ཀྱི་གནས་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་ལྔ་སྡེ་པོ་རྣམས་ལ་བཀའ་
[209b.5]སྩལ་པ། དགེ་སློང་དག་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་འཕགས་པའི་བདེན་པ་ཡིན་ནོ་ཞེས་ཚུལ་བཞིན་དུ་ཡིད་ལ་བྱེད་པ་ལ་མིག་སྐྱེས་སོ། །ཤེས་པ་དང་། རིག་པ་དང་། སློ་སྐྱེས་སོ། །སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་
[209b.6]པའོ། །འདི་ནི་སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པའོ་ཞེས་བྱ་བར་ཚུལ་བཞིན་ཡིད་ལ་བྱེད་པ་ལ་མིག་སྐྱེས་སོ། །ཤེས་པ་དང་། རིག་པ་དང་། བློ་སྐྱེས་སོ། །སྔོན་མ་ཐོས་པའི་ཆོས་རྣམས་ལ་སྡུག་བསྔལ་འཕགས་པའི་བདེན་པ་དེ་བདག་གིས་མངོན་པར་ཤེས་
[209b.7]པས་ཡོངས་སུ་ཤེས་པར་བྱའོ་ཞེས་ཚུལ་བཞིན་དུ་ཡིད་ལ་བྱེད་པ་ལ་མིག་སྐྱེས་སོ་ཞེས་བྱ་བ་སྔ་མ་བཞིན་ནོ། །སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འཕགས་པའི་བདེན་པ་དེ་བདག་གིས་མངོན་པར་ཤེས་པས་སྤང་བར་བྱའོ་ཞེས་བྱ་བ་སྔ་མ་བཞིན་ནོ། །སྔོན་མ་ཐོས་པའི་ཆོས་རྣམས་
[210a]
[210a.1]ལ་སྡུག་བསྔལ་འགོག་པ་འཕགས་པའི་བདེན་པ་དེ་བདག་གིས་མངོན་པར་ཤེས་པས་མངོན་དུ་བྱའོ་ཞེས་བྱ་བ་དེ་སྔ་མ་བཞིན་ནོ། །སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པ་དེ་བདག་གིས་མངོན་པར་ཤེས་པས་བསྒོམ་པར་
[210a.2]བྱའོ་ཞེས་བྱ་བ་སྔ་མ་བཞིན་ནོ། །སྔོན་མ་ཐོས་པའི་ཆོས་རྣམས་ལ་སྡུག་བསྔལ་འཕགས་པའི་བདེན་པ་དེ་བདག་གིས་མངོན་པར་ཤེས་པས་ཡོངས་སུ་ཤེས་སོ་ཞེས་བྱ་བ་སྔ་མ་བཞིན་ནོ། །སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འཕགས་པའི་བདེན་པ་དེ་བདག་གིས་མངོན་པར་
[210a.3]ཤེས་པས་སྤངས་སོ་ཞེས་བྱ་བ་སྔ་མ་བཞིན་ནོ། །སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པ་འཕགས་པའི་བདེན་པ་དེ་བདག་གིས་མངོན་པར་ཤེས་པས་མངོན་དུ་བྱས་སོ་ཞེས་བྱ་བ་དེ་སྔ་མ་བཞིན་ནོ། །སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྱུར་བའི་ལམ་འཕགས་
[210a.4]པའི་བདེན་པ་དེ་ད་དག་གིས་མངོན་པར་ཤེས་པས་བསྒོམས་སོ་ཞེས་བྱ་བ་སྔ་མ་བཞིན་ནོ། །དགེ་སློང་དག་ཇི་སྲིད་དུ་ང་ལ་འཕགས་པའི་བདེན་པ་བཞི་པོ་དག་ལ་དེ་ལྟར་ལན་གསུམ་དུ་བཟླས་ཏེ། རྣམ་པ་བཅུ་གཉིས་པའི་མིག་མ་སྐྱེས་ཤིང་། ཤེས་པ་ཡང་མེད། རིག་པ་ཡང་མེད། བློ་ཡང་
[210a.5]མེད་པ་དེ་སྲིད་དུ་ང་ལྷ་དང་བཅས། བདུད་དང་བཅས། ཚངས་པ་དང་བཅས། དགེ་སྦྱོང་དང་བྲམ་ཟེ་དང་བཅས། ལྷ་དང་མིར་བཅས་པའི་སྐྱེ་དགུའི་འཇིག་རྟེན་འདི་ལས་གྲོལ་ཞིང་ངེས་པར་འབྱུང་སྟེ། མི་ལྡན་པས་ཕྱིན་ཅི་ལོག་དང་བྲལ་བའི་སེམས་ཀྱིས་མང་དུ་གནས་པར་མ་གྱུར་ཏོ། །དེ་སྲིད་
[210a.6]དུ་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་བྱ་བར་ཤེས་པར་མ་གྱུར་ཏོ། །དགེ་སློང་དག་གང་ནས་བཟུང་སྟེ། ང་འཕགས་པའི་བདེན་པ་བཞི་པོ་དག་ལ་དེ་ལྟར་ལན་གསུམ་དུ་བཟླས་ཏེ། རྣམ་པ་བཅུ་གཉིས་པའི་མིག་སྐྱེས་ཤིང་། ཤེས་
[210a.7]པ་དང་། རིག་པ་དང་། བློ་སྐྱེས་པ་དེ་ནས་བཟུང་སྟེ། ང་ལྷ་དང་བཅས། བདུད་དང་བཅས། ཚངས་པ་དང་བཅས། དགེ་སྦྱོང་དང་བྲམ་ཟེར་བཅས་པ། ལྷ་དང་མིར་བཅས་པའི་སྐྱེ་དགུའི་འཇིག་རྟེན་འདི་ལས་གྲོལ་ཞིང་ངེས་པར་འབྱུང་སྟེ། མི་ལྡན་པས་ཕྱིན་ཅི་ལོག་དང་བྲལ་བའི་
[210b]
[210b.1]སེམས་ཀྱིས་མང་དུ་གནས་པར་གྱུར་ཏོ། །དེ་ནས་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་བྱ་བར་ཤེས་པར་གྱུར་ཏོ། །ཆོས་ཀྱི་རྣམ་གྲངས་འདི་བཤད་པ་ན། ཚེ་དང་ལྡན་པ་ཀུན་ཤེས་ཀཽཎྜི་ནྱ་དང་། ལྷ་བརྒྱད་ཁྲི་ཆོས་རྣམས་ལ་ཆོས་ཀྱི་མིག་རྡུལ་
[210b.2]མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བཅོམ་ལྡན་འདས་བདག་གིས་ཆོས་ཀུན་འཚལ་ཏོ། །ཀུན་ཤེས་ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བདེ་བར་གཤེགས་པ་བདག་གིས་ཆོས་ཀུན་འཚལ་ཏོ་
[210b.3]ཞེས་གསོལ་བ་དང་། ས་བླ་བའི་གནོད་སྦྱིན་རྣམས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱས་ཆོས་ཀུན་ཤེས་སོ་ཞེས་སྒྲ་འབྱིན་དབྱངས་སྒྲོགས་པར་བྱེད་ཅིང་གྲོགས་པོ་དག་བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱིར་དྲང་སྲོང་ལྷུང་བ་རི་དགས་ཀྱི་གནས་འདིར་ཆོས་ཀྱི་འཁོར་ལོ་ཆོས་དང་མཐུན་པ་དགེ་སྦྱོང་ངམ་
[210b.4]བྲམ་ཟེའམ། ལྷའམ། བདུད་དམ་ཚངས་པའམ། སུས་ཀྱང་འཇིག་རྟེན་ན་སྐྱེ་བོ་མང་པོ་ལ་ཕན་པར་བྱ་བའི་ཕྱིར་ཆོས་དང་མཐུན་པར་མ་བསྐོར་བ་ལན་གསུམ་དུ་བཟླས་ཏེ། རྣམ་པ་བཅུ་གཉིས་པ་བསྐོར་ཏོ་ཞེས་བྱ་བ་རྒྱས་པར་འབྱུང་ངོ་། །དེ་བས་ན་མདོ་ལས་དེ་ལྟར་འཕགས་པ་ཀཽཎྜི་ནྱ་ལ་མཐོང་
[210b.5]བའི་ལམ་སྐྱེས་པ་དང་ལྷ་རྣམས་ཀྱིས་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་ཏོ་ཞེས་སྨྲས་པར་འབྱུང་བའི་ཕྱིར་མཐོང་བའི་ལམ་ཆོས་ཀྱི་འཁོར་ལོ་ཡིན་ནོ་ཞེས་བྱ་བར་མངོན་ནོ། །ཇི་ལྟར་ན་དེ་ལན་གསུམ་དུ་བཟླས་པ་དང་ཞེས་བྱ་བ་རྒྱས་པར་འབྱུང་བ་ནི། འདི་ནི་སྡུག་བསྔལ་འཕགས་
[210b.6]པའི་བདེན་པའོ་ཞེས་བྱ་བ་ནི་བཟླས་པ་གཅིག་ཡིན་ནོ། །དེ་ཡོངས་སུ་ཤེས་པར་བྱའོ་ཞེས་བྱ་བ་ནི་གཉིས་པ་ཡིན་ནོ། །དེ་ཡོངས་སུ་ཤེས་སོ་ཞེས་བྱ་བ་ནི་གསུམ་པ་ཡིན་ཏེ། འདི་དག་ནི་ལན་གསུམ་དུ་བཟླས་པ་ཡིན་ནོ། །བཟླས་པ་རེ་རེ་ལ་སྟེ། སྡུག་བསྔལ་ལོ་ཞེས་བྱ་བ་འདི་ལ་མིག་
[210b.7]སྐྱེས་སོ། །ཤེས་པ་དང་། རིག་པ་དང་། བློ་སྐྱེས་སོ་ཞེས་བྱ་བ་རྣམ་པ་བཞིའོ། །ཡོངས་སུ་ཤེས་པར་བྱའོ་ཞེས་བྱ་བ་འདི་ལ་ཡང་རྣམ་པ་བཞིའོ། །ཡོངས་སུ་ཤེས་སོ་ཞེས་བྱ་བ་འདི་ལའང་བཞི་སྟེ། འདི་དག་ནི་རྣམ་པ་བཅུ་གཉིས་ཡིན་ནོ། །དེ་ལ་ཟག་པ་མེད་པའི་ཤེས་རབ་ནི་དོན་
[211a]
[211a.1]མངོན་སུམ་གྱི་ཕྱིར་མིག་གོ། །ཐེ་ཚོམ་མེད་པའི་ཕྱིར་ཤེས་པའོ། །ཡང་དག་པའི་དོན་གྱི་ཕྱིར་རིག་པའོ། །རྣམ་པར་དག་པའི་ཕྱིར་བློ་སྟེ། ངེས་པའི་ཚིག་ཏུ་རྣམ་པར་དག་པའི་བློ་ལ་བློ་ཞེས་བྱ་བའི་ཕྱིར་རོ། །ཡང་ཕྱི་རོལ་པ་དག་གིས་བདེན་པ་མཐོང་བ་ནི་ལྟ་བ་ངན་པ་དང་།
[211a.2]ཐེ་ཚོམ་དང་། མ་རིག་པ་རྣམས་ཀྱི་གཉེན་པོ་མ་ཡིན་ལ་ཟག་པ་དང་བཅས་པ་ཡང་ཡིན་པས་ཁྱད་པར་དུ་བྱ་བའི་ཕྱིར་མིག་ལ་སོགས་པ་སྨོས་སོ། །ཡང་ལན་གསུམ་དུ་བཟླས་པ་དག་ལ་དང་པོ་མཐོང་བ་ནི་མིག་གོ། །ཇི་ལྟར་མཐོང་བ་ལ་དཔྱོད་པ་ནི་ཤེས་པའོ། །ཇི་ལྟར་ཡོད་པ་ལ་བརྟེན་ནས་རིག་པ་སྟེ།
[211a.3]ཇི་སྙེད་ཡོད་པ་འཛིན་པའི་ཕྱིར་རོ། །ཇི་ལྟ་བ་བཞིན་དུ་ཡོད་པ་ལ་བརྟེན་ནས་བློ་སྟེ། ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་པའི་ཕྱིར་རོ། །ཡང་མ་ཐོས་པའི་ཆོས་དག་ལ་རྗེས་སུ་དཔོག་པའི་ཤེས་པ་དགག་པའི་ཕྱིར་མིག་ཅེས་བྱའོ། །མོས་པ་ལས་བྱུང་བའི་ཤེས་པ་དགག་པའི་ཕྱིར་ཤེས་
[211a.4]པ་ཞེས་བྱའོ། །མངོན་པའི་ང་རྒྱལ་ལས་བྱུང་བའི་ཤེས་པ་དགག་པའི་ཕྱིར་རིག་པ་ཞེས་བྱའོ། །ཟག་པ་དང་བཅས་པ་དགག་པའི་ཕྱིར་བློ་ཞེས་བྱའོ། །བདེན་པ་རེ་རེ་ལ་ཡང་དེ་དང་འདྲའོ་ཞེས་བྱ་བ་འདི་ནི་སྡུག་བསྔལ་ཀུན་འབྱུང་བ་འཕགས་པའི་བདེན་པའོ། །དེ་སྤང་བར་བྱའོ། །དེ་སྤངས་
[211a.5]སོ་ཞེས་བྱ་བ་འདི་དག་ནི་ལན་གསུམ་དུ་བཟླས་པ་ཡིན་ནོ། །བཟླས་པ་རེ་རེ་ལ་མིག་སྐྱེས་སོ། །ཤེས་པ་དང་། རིག་པ་དང་། བློ་སྐྱེས་སོ་ཞེས་བྱ་བ་འདི་དག་ནི་རྣམ་པ་བཅུ་གཉིས་ཡིན་ཏེ། འགོག་པ་དང་ལམ་གྱི་བདེན་པ་དག་ལ་ཡང་དེ་བཞིན་དུ་སྦྱར་བར་བྱའོ། །སྨྲས་པ་གལ་ཏེ་བདེན་པ་རེ་རེ་ལ་
[211a.6]ཡང་དེ་དང་འདྲ་བར་ལན་གསུམ་དུ་བཟླས་པ་དང་རྣམ་པ་བཅུ་གཉིས་ཡིན་ན་གོ། །ལན་བཅུ་གཉིས་སུ་བཟླས་པ་དང་རྣམ་པ་བཞི་བཅུ་རྩ་བརྒྱད་དུ་འགྱུར་ན། ཅིའི་ཕྱིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་ཞེས་བྱ་ཞེ་ན། དེའི་ཕྱིར་གསུམ་ཚན་དང་བཅུ་གཉིས་སུ་ཆོས་མཐུན་པའི་ཕྱིར་ལན་
[211a.7]གསུམ་དུ་བཟླས་ཏེ་རྣམ་པ་བཅུ་གཉིས་ཞེས་བཤད་ཅེས་བྱ་བ་སྨོས་སོ། །གཉིས་དང་། གནས་བདུན་ལ་མཁས་པ་བསྟན་པ་བཞིན་ནོ་ཞེས་བྱ་བ་ནི་གཉིས་བསྟན་པ་ལྟ་བུ་དང་། གནས་བདུན་ལ་མཁས་པ་བསྟན་པ་ལྟ་བུའོ། །དཔེར་ན་མང་པོ་ཞིག་བཤད་པའི་རྗེས་ལ། དགེ་སློང་དག་དེའི་
[211b]
[211b.1]ཕྱིར་ཁྱེད་ལ་གཉིས་ཤིག་བསྟན་པར་བྱས་ཏེ་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །གཉིས་གང་ཞེ་ན། མིག་དང་། གཟུགས་རྣམས་ཞེས་བྱ་བ་ནས་ཡིད་དང་ཆོས་རྣམས་སོ་ཞེས་བྱ་བའི་བར་ལྟ་བུ་སྟེ། ཇི་ལྟར་འདི་ལ་གཉིས་སུ་ཆོས་མཐུན་པའི་ཕྱིར་གཉིས་ཞེས་བཤད་
[211b.2]པ་དེ་བཞིན་དུ་སུམ་ཚན་དང་བཅུ་གཉིས་སུ་ཆོས་མཐུན་པའི་ཕྱིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་ཞེས་བཤད་དོ། །ཡང་དཔེར་ན་དགེ་སློང་གནས་བདུན་ལ་མཁས་པ་ནི་གཟུགས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །གཟུགས་ཀུན་འབྱུང་བ་དང་། གཟུགས་འགོག་པ་དང་།
[211b.3]གཟུགས་འགོག་པར་འགྱུར་བའི་ལམ་དང་། གཟུགས་ཀྱི་རོ་མྱང་བ་དང་། ངེས་པར་འབྱུང་བ་དང་། ཉེས་དམིགས་ཀྱང་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །གནས་བདུན་ལ་མཁས་པའི་དགེ་སློང་དོན་རྣམ་པ་གསུམ་ལ་ཉེ་བར་རྟོག་པ་ནི་མྱུར་བ་ཁོ་ནར་ཆོས་འདུལ་བ་འདི་ལ་སྡུག་
[211b.4]བསྔལ་གྱི་མཐའ་རབ་ཏུ་ཤེས་སོ་ཞེས་འབྱུང་བ་ལྟ་བུ་སྟེ། ཕུང་པོ་རེ་རེ་ལ་གནས་བདུན་ལ་མཁས་པར་ཆོས་མཐུན་པའི་ཕྱིར་རོ། །དེ་བཞིན་དུ་འདིར་ཡང་སུམ་ཚན་དང་བཅུ་གཉིས་སུ་ཆོས་མཐུན་པའི་ཕྱིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་ཞེས་བཤད་དོ། །བཟླས་པ་འདི་དག་གིས་ཞེས་བྱ་བ་
[211b.5]རྒྱས་པར་འབྱུང་བ་ནི་མདོ་ལས་ཇི་སྐད་དུ་བསྟན་པའི་བཟླས་པ་འདི་དག་གིས་ནི་གྲངས་བཞིན་དུ་མཐོང་བ་དང་། བསྒོམ་པ་དང་། མི་སློབ་པའི་ལམ་རྣམས་བསྟན་ཏེ། འདི་ནི་སྡུག་བསྔལ་འཕགས་པའི་བདེན་པའོ་ཞེས་བྱ་བ་ནས་བཟུང་སྟེ། འདི་ནི་སྡུག་བསྔལ་འགོག་པར་འགྱུར་བའི་ལམ་འཕགས་
[211b.6]པའི་བདེན་པའོ་ཞེས་བྱ་བའི་བར་གྱིས་ནི་མཐོང་བའི་ལམ་བསྟན་ཏོ། །སྡུག་བསྔལ་འཕགས་པའི་བདེན་པ་དེ་མངོན་པར་ཤེས་པས་ཡོངས་སུ་ཤེས་པར་བྱའོ་ཞེས་བྱ་བ་ནས་བཟུང་སྟེ། སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པ་དེ་མངོན་པར་ཤེས་པས་བསྒོམ་པར་བྱའོ་
[211b.7]ཞེས་བྱ་བའི་བར་གྱིས་ནི་བསྒོམ་པའི་ལམ་བསྟན་ཏོ། །སྡུག་བསྔལ་འཕགས་པའི་བདེན་པ་དེ་མངོན་པར་ཤེས་པས་ཡོངས་སུ་ཤེས་སོ་ཞེས་བྱ་བ་ནས་བཟུང་སྟེ། སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པ་དེ་མངོན་པར་ཤེས་པས་བསྒོམས་སོ་ཞེས་བྱ་བའི་བར་གྱིས་ནི་
[212a]
[212a.1]མི་སློབ་པའི་ལམ་བསྟན་ཏོ། །འདིར་སློབ་དཔོན་གྱིས། གལ་ཏེ་དེ་ལྟ་ན་ཞེས་བྱ་བ་རྒྱས་པར་སྨོས་ཏེ། གལ་ཏེ་དེ་ལྟར་བཟླས་པ་དེ་དག་གི་གྲངས་བཞིན་དུ་མཐོང་བ་ལ་སོགས་པའི་ལམ་བསྟན་ན། འོ་ན་ནི་མཐོང་བའི་ལམ་ཁོ་ན་ལན་གསུམ་དུ་བཟླས་པ་ཡང་མ་ཡིན་ལ་རྣམ་པ་
[212a.2]བཅུ་གཉིས་ཀྱང་མ་ཡིན་ནོ། །འོ་ན་ཅི་ཞེ་ན། ལན་ཅིག་བཟླས་པ་དང་རྣམ་པ་བཞི་ཡིན་ན། ཇི་ལྟར་མཐོང་བའི་ལམ་འདི་ཆོས་ཀྱི་འཁོར་ལོར་རྣམ་པར་གཞག །བཟླས་པ་མེད་པས་འཁོར་ལོ་དང་ཆོས་མཐུན་པ་མེད་པའི་ཕྱིར་འཁོར་ལོ་མི་རུང་ངོ་སྙམ་དུ་དགོངས་པ་ཡིན་ནོ། །དེ་ལྟ་བས་ན་
[212a.3]ཆོས་ཀྱི་རྣམ་གྲངས་དེ་ཉིད་ཆོས་ཀྱི་འཁོར་ལོ་ཡང་ཡིན་ཏེ། ཆོས་ཀྱི་འཁོར་ལོ་རབ་ཏུ་སྟོན་པའི་ཕྱིར་རོ། །ལན་གསུམ་དུ་བཟླས་པ་དང་རྣམ་པ་བཅུ་གཉིས་ཀྱང་ཡིན་པར་རུང་སྟེ་དེ་དག་གི་དོན་རབ་ཏུ་སྟོན་པའི་ཕྱིར་རོ། །ལན་གསུམ་དུ་བཟླས་པའི་ཕྱིར་རོ་ཞེས་བྱ་བ་ནི་སྡུག་བསྔལ་ཞེས་བྱ་
[212a.4]བ་ནས་ལམ་ཞེས་བྱ་བའི་བར་ནི་བཟླས་པ་གཅིག་ཡིན་ནོ། །ཡོངས་སུ་ཤེས་པར་བྱ་ཞེས་བྱ་བ་ནས་བསྒོམ་པར་བྱ་ཞེས་བྱ་བའི་བར་ནི་གཉིས་པ་ཡིན་ནོ། །ཡོངས་སུ་ཤེས་སོ་ཞེས་བྱ་བ་ནས་བསྒོམས་སོ་ཞེས་བྱ་བའི་བར་ནི་གསུམ་པ་ཡིན་ནོ། །བདེན་པ་རྣམས་ལ་རྣམ་པ་གསུམ་དུ་བྱས་པའི་ཕྱིར་རོ་ཞེས་
[212a.5]བྱ་བ་ནི་སྡུག་བསྔལ་ལོ། །ཀུན་འབྱུང་བའོ། །འགོག་པའོ། །ལམ་མོ་ཞེས་བྱ་བར་བདེན་པའི་རང་གི་ངོ་བོ་ལ་དམིགས་པའི་རྣམ་པ་བཞིའོ། །ཡོངས་སུ་ཤེས་པར་བྱ། སྤང་བར་བྱ། མངོན་སུམ་དུ་བྱ། བསྒོམ་པར་བྱ་ཞེས་བྱ་བ་ཡོངས་སུ་ཤེས་པ་ལ་སོགས་པའི་ཚུལ་བྱ་བའི་ངོ་བོར་
[212a.6]དམིགས་པའི་རྣམ་པ་གཉིས་པ་བཞིའོ། །ཡོངས་སུ་ཤེས་སོ། །སྤངས་སོ། །མངོན་སུམ་དུ་བྱས་སོ། །བསྒོམས་སོ་ཞེས་བྱ་བ་ཡོངས་སུ་ཤེས་པ་ལ་སོགས་པའི་ཚུལ་མཐར་ཐུག་པར་དམིགས་པའི་རྣམ་པ་གསུམ་པ་བཞི་སྟེ། རྣམ་པ་བཅུ་གཉིས་སུ་འགྱུར་རོ། །དེ་བསྐོར་བ་ཞེས་བྱ་བ་ནི་ཆོས་ཀྱི་རྣམ་
[212a.7]གྲངས་དེ་བསྐོར་བ་ནི་གཞན་གྱི་རྒྱུད་ལ་གོ་བར་བྱེད་པ་སྟེ། གདུལ་བའི་སྐྱེ་བོའི་རྒྱུད་ལ་གཏོང་བར་བྱེད་པ་ཡིན་ནོ། །ཇི་ལྟར་གོ་བར་བྱེད་ཅེ་ན། དོན་ཤེས་པར་བྱེད་པའི་ཕྱིར་རོ། །ཡང་ན་འཕགས་པའི་ལམ་ཐམས་ཅད་དེ། མཐོང་བ་དང་། བསྒོམ་པ་དང་། མི་སློབ་པའི་ལམ་ཡང་ཆོས་ཀྱི་
[212b]
[212b.1]འཁོར་ལོ་ཡིན་ཏེ། འདུལ་བའི་སྐྱེ་བོའི་རྒྱུད་ལ་འཇུག་པས་འཁོར་ལོ་ཞེས་བྱ་བའི་ཕྱིར་རོ། །གལ་ཏེ་འཕགས་པའི་ལམ་ཐམས་ཅད་ཆོས་ཀྱི་འཁོར་ལོ་ཡིན་ན། ཇི་ལྟར་འཕགས་པ་ཀཽཎྜི་ནྱ་ལ་མཐོང་བའི་ལམ་སྐྱེས་པ་ཙམ་གྱིས་དེ་བསྐོར་ཏོ་ཞེས་སྨྲས་ཤེ་ན་དེའི་ཕྱིར་སྨྲས་པ། དེ་ནི་གཞན་གྱི་རྒྱུད་ལ་སྟེ།
[212b.2]འཕགས་པ་ཀཽཎྜི་ནྱའི་རྒྱུད་ལ་མཐོང་བའི་ལམ་བསྐྱེད་པའི་ཕྱིར་བསྐོར་བར་བརྩམས་པ་ཡིན་ཏེ། དང་པོར་བསྐོར་བ་ཡིན་པས་དེའི་ཕྱིར་བསྐོར་བ་ཞེས་བྱའོ། །ལས་དང་པོ་པ་ལ་ཡང་རབ་ཏུ་ཞེས་པའི་སྒྲ་ཡོད་དེ། དཔེར་ན་འབྲས་ཆན་རབ་ཏུ་ཟོས་སོ་ཞེས་བྱ་བ་ལྟ་བུའོ། །གསུམ་པ་གོ་ཅིའི་ཕྱིར་མི་ཐོབ་ཅེས་
[212b.3]བྱ་བ་ནི། གལ་ཏེ་གཟུགས་ཀྱི་ཁམས་སུ་སྐྱེས་པ་ཞིག་ངེས་པ་ལ་འཇུག་ན་སེམས་ཀྱི་སྐད་ཅིག་བཅུ་དྲུག་ལ་ཅིའི་ཕྱིར་ཕྱིར་མི་འོང་བའི་འབྲས་བུ་མི་ཐོབ་སྙམ་དུ་བསམས་པ་ཡིན་ནོ། །ལན་དུ་གོང་ན་མཐོང་ལམ་མེད་ཅེས་བྱ་བ་སྨོས་ཏེ། ཉན་པ་མེད་ཅེས་བྱ་བ་ནི་གཟུགས་མེད་པའི་ཁམས་ན་ཡོད་ན་ཡང་རང་
[212b.4]བྱུང་གི་བྱང་ཆུབ་ནི་མི་སྲིད་པའི་ཕྱིར་ཉན་ཐོས་ཀྱི་བྱང་ཆུབ་ཁོ་ན་ཡོད་པར་འགྱུར་གྲང་ན། ཉན་ཐོས་ཀྱི་མངོན་པར་རྟོགས་པ་ཡང་གཞན་ལས་མ་ཐོས་པར་མི་འབྱུང་ངོ་། །གཞན་ཡང་ཁམས་འོག་མ་ལ་མི་དམིགས་པའི་ཕྱིར་ཏེ། གཟུགས་མེད་དངོས་གཞི་དགེ་རྣམས་ཀྱི། །སྤྱོད་ཡུལ་ཟག་
[212b.5]བཅས་འོག་མ་མིན། །ཞེས་འབྱུང་བ་ལ་མཐོང་བའི་ལམ་ནི་ཁམས་གསུམ་ཆར་ལ་དམིགས་དགོས་པས་དེའི་ཕྱིར་དེ་ན་དེ་མེད་དོ། །རྩོམ་པ་ནི་མགོ་འཇུག་པ་སྟེ། ཐབས་ཞེས་བྱ་བའི་ཐ་ཚིག་གོ། །འདི་ལ་ཡོངས་སུ་ཉམས་པའི་ཆོས་ཀྱི་རང་བཞིན་ཡོད་པས་ན་ཡོངས་སུ་ཉམས་པའི་
[212b.6]ཆོས་ཅན་ནོ། །འཆི་བར་སེམས་པའི་ཆོས་ཅན་ནི་བདག་ཉིད་འཆི་བར་སེམས་པའི་ཆོས་ཅན་ནོ། །རྗེས་སུ་སྲུང་བའི་ཆོས་ཅན་ནི་རྣམ་པར་གྲོལ་བ་དེ་རྗེས་སུ་སྲུང་ནུས་པ་གང་ཡིན་པའོ། །གནས་པ་ལས་མི་བསྐྱོད་པ་ནི་རྣམ་པར་གྲོལ་བ་གང་ལ་གནས་པ་དེ་ལས་མི་གཡོ་བའོ། །རྟོགས་
[212b.7]པའི་སྐལ་བ་ཅན་ནི་དབང་པོ་འཕོ་བའི་སྐལ་བ་ཅན་ནོ། །མི་གཡོ་བའི་ཆོས་ཅན་ནི་འདི་ལ་མི་གཡོ་ཞིང་མི་འགྱུར་བའི་ཆོས་ཡོད་པས་ན་མི་གཡོ་བའི་ཆོས་ཅན་ནོ། །དེ་ཡང་རྣམ་པ་གཉིས་ཏེ། རང་བཞིན་གྱིས་དབང་པོ་རྣོན་པོ་དང་། དབང་པོ་འཕོས་པས་དབང་པོ་རྣོན་པོའོ། །ལྔ་ནི་དད་པས་
[213a]
[213a.1]མོས་ལས་སྐྱེས། །ཞེས་བྱ་བ་ནི་དད་པས་མོས་པ་ལས་སྐྱེས་པ་ཁོ་ན་ཡིན་ནོ་ཞེས་ངེས་པར་བཟུང་བ་ཡིན་ནོ། །དེ་དག་ནི་དད་པས་མོས་པར་གྱུར་པ་ལས་སྐྱེས་པའོ་ཞེས་བྱ་བའི་ཐ་ཚིག་སྟེ། །དད་པས་མོས་པ་སྔོན་དུ་འགྲོ་བ་དག་ཡིན་ནོ་ཞེས་བཤད་པའི་དོན་ཏོ། །དྲུག་པ་ནི་གཞན་དུ་
[213a.2]ཡང་འགྱུར་རོ་ཞེས་བཤད་ཟིན་ཏོ། །དུས་དང་སྦྱོར་བ་ཞེས་བྱ་བ་ནི་ཡོ་བྱད་དང་། ནད་མེད་པ་དང་། ཡུལ་གྱི་ཁྱད་པར་ལ་སོགས་པའི་མཚན་ཉིད་ཀྱི་དུས་ལས་བྱུང་བས་ན་དུས་དང་སྦྱོར་བ་པའོ། །འཕངས་པ་ཡིན་ཞེས་བྱ་བ་ཅི་ཞེ་ན། སེམས་ཀྱི་རྣམ་པར་གྲོལ་བའོ། །ཅིའི་ཕྱིར་འཕངས་ཤེ་ན། རྟག་ཏུ་རྗེས་
[213a.3]སུ་བསྲུང་བར་བྱ་བ་ཡིན་པའི་ཕྱིར་ཏེ། འཇིག་རྟེན་ན་ཡང་འཕངས་པ་ནི་རྟག་ཏུ་རྗེས་སུ་བསྲུང་བར་བྱ་བ་ཡིན་ནོ་ཞེས་བྱ་བར་སྣང་ངོ་། །མདོ་ལས་ཀྱང་འདི་ལྟ་སྟེ་དཔེར་ན་སྐྱེས་བུ་མིག་གཅིག་ཡོད་པ་ལ་ཉེ་དུ་རྣམས་འདིའི་མིག་གཅིག་མ་ཞར་བ་གང་ཡིན་པ་ང་ཡང་ཞར་བར་གྱུར་ན་མི་རུང་ངོ་ཞེས་དེའི་མིག་ལ་
[213a.4]གྲོང་བ་དང་། ཚ་བ་དང་། རྡལ་རྡུལ་གྱིས་མི་ཕོག་པར་བྱ་བའི་ཕྱིར་མིག་ཡ་གཅིག་ལ་ལེགས་པར་རབ་ཏུ་རྗེས་སུ་བསྲུང་བར་བྱའོ་སྙམ་དུ་སེམས་པ་ལྟར་ཞེས་གསུངས་སོ། །དེ་བཞིན་དུ་དགྲ་བཅོམ་པ་དུས་ཀྱིས་རྣམ་པར་གྲོལ་བའི་ཆོས་འདི་ཡང་རྗེས་སུ་བསྲུང་བར་བྱ་བ་དང་། བརྩེ་བར་བྱ་བ་དང་།
[213a.5]རྗེས་སུ་གཟུང་བར་བྱ་བ་ཡིན་ནོ། །དེའི་ཕྱིར་དུས་ཀྱིས་རྣམ་པར་གྲོལ་བའི་དགྲ་བཅོམ་པ་ཡང་དེ་བཞིན་དུ་ཅི་ནས་ཀྱང་བདག་ཆོས་འདི་ལས་ཡོངས་སུ་མི་ཉམས་པར་བྱའོ་ཞེས་ལེགས་པར་རབ་ཏུ་རྗེས་སུ་སྲུང་བར་སེམས་པས་དེ་ལས་ཡོངས་སུ་ཉམས་པར་མ་འགྱུར་རོ། །མར་གྱི་བུམ་པ་བཞིན་ནོ་ཞེས་བྱ་བ་
[213a.6]ནི་དཔེར་ན་མར་གྱིས་གང་བའི་བུམ་པ་ལ་བར་གྱི་ཚིག་གང་བ་ཞེས་བྱ་བའི་སྒྲ་མི་མངོན་པར་བྱས་པའི་ཕྱིར་མར་གྱི་བུམ་པ་ཞེས་བྱ་བ་ལྟ་བུའམ། དཔེར་ན་མར་ལ་ལྟོས་པའི་བུམ་པ་ནི་མར་གྱི་བུམ་པ་སྟེ། གང་དུ་མར་ལྡུགས་པ་ཡིན་ནོ། །ལྟོས་པ་ཞེས་བྱ་བའི་སྒྲ་མི་མངོན་པར་བྱས་པའི་ཕྱིར་མར་
[213a.7]གྱི་བུམ་པ་ཞེས་བྱ་བ་དེ་བཞིན་དུ་འདིར་ཡང་བར་གྱི་ཚིག་ལྟོས་པ་ཞེས་བྱ་བའི་སྒྲ་མི་མངོན་པར་བྱས་པའི་ཕྱིར་རོ། །འདི་དག་ནི་དུས་ལ་ལྟོས་པ་ཡང་ཡིན་ལ་རྣམ་པར་གྲོལ་བ་ཡང་ཡིན་པས་དུས་ཀྱིས་རྣམ་པར་གྲོལ་བ་ཞེས་བཤད་དོ། །དུས་ནི་ཡོ་བྱད་ལ་སོགས་པ་ཡིན་པར་བཤད་ཟིན་ཏོ། །ཇི་
[213b]
[213b.1]ལྟར་གཡོ་བར་མི་ནུས་པའི་ཕྱིར་ཞེ་ན། ཡོངས་སུ་མི་ཉམས་པའི་སྒོ་ནས་ཞེས་བྱ་བ་སྨོས་སོ། །ཡང་ན་དུས་གཞན་གྱི་བར་དང་། གཏན་དུ་རྣམ་པར་གྲོལ་བའི་ཕྱིར་ཞེས་བྱ་བ་ནི་དུས་གཞན་གྱི་བར་དུ་རྣམ་པར་གྲོལ་བའི་ཕྱིར་དུས་ཀྱིས་རྣམ་པར་གྲོལ་བ་ཉིད་ཡིན་ལ་གཏན་དུ་རྣམ་པར་གྲོལ་བའི་ཕྱིར་དུས་དང་
[213b.2]མི་སྦྱོར་བར་རྣམ་པར་གྲོལ་བ་ཉིད་ཡིན་ནོ་ཞེས་བྱ་བའི་ཐ་ཚིག་གོ། །ཇི་ལྟར་དེ་ལྟ་ཡིན་ཞེ་ན་སྨྲས་པ། ཡོངས་སུ་ཉམས་པ་སྲིད་པ་དང་། མི་སྲིད་པའི་སྒོ་ནས་ཏེ། ཡོངས་སུ་ཉམས་པ་སྲིད་པའི་སྒོ་ནས་དུས་གཞན་གྱི་བར་དུ་རྣམ་པར་གྲོལ་བའི་ཕྱིར་དུས་ཀྱིས་རྣམ་པར་གྲོལ་བ་ཞེས་བྱ་བ་ལ་ཡོངས་སུ་
[213b.3]ཉམས་པ་མི་སྲིད་པའི་སྒོ་ནས་གཏན་དུ་རྣམ་པར་གྲོལ་བའི་ཕྱིར་དུས་དང་མི་སྦྱོར་བར་རྣམ་པར་གྲོལ་བ་ཞེས་བྱའོ། །དེ་ནི་མཐོང་ཐོབ་རྒྱུ་ལས་བྱུང་། །ཞེས་བྱ་བ་ནི་གལ་ཏེ་དེ་སློབ་པར་གྱུར་པ་ལས་དབང་པོ་དག་འཕོ་བར་བྱེད་ན་ཡང་མཐོང་བས་ཐོབ་པ་ཉིད་དུ་འགྱུར་ལ། འོན་ཏེ་རང་བཞིན་གྱིས་དབང་
[213b.4]པོ་རྣོན་པོ་ཞིག་ཡིན་ན་ཡང་སེམས་ཀྱི་སྐད་ཅིག་བཅུ་དྲུག་ལ་མཐོང་བས་ཐོབ་པ་ཁོ་ན་ཡིན་ཏེ། དེ་ལྟ་བས་ན་མི་གཡོ་བའི་ཆོས་ཅན་འདི་ནི་མཐོང་བས་ཐོབ་པ་སྔོན་དུ་འགྲོ་བ་ཞེས་བྱའི། མི་གཡོ་བའི་ཆོས་ཅན་དགྲ་བཅོམ་པ་ཉིད་ཀྱི་གནས་སྐབས་ན་དབང་པོ་དག་འཕོ་བར་བྱེད་པ་གང་
[213b.5]ཡིན་པ་དེ་ནི་མཐོང་བས་ཐོབ་པ་སྔོན་དུ་འགྲོ་བ་མ་ཡིན་ཞེས་བྱ་བར་ཁོང་དུ་ཆུད་པར་བྱའོ། །ཁ་ཅིག་ནི་དང་པོ་ཉིད་ནས་འཆི་བར་སེམས་པའི་ཆོས་ཅན་གྱི་རིགས་ཅན་ཡིན་ལ་ཞེས་བྱ་བར་བརྗོད་ཀྱི་ཡོངས་སུ་ཉམས་པའི་ཆོས་ཅན་ཡིན་ནོ་ཞེས་ནི་མི་བརྗོད་དོ། །འདི་ལྟར་དེ་ནི་སྦྱངས་པ་ལས་གྱུར་
[213b.6]པ་མ་ཡིན་པས་ཁ་ཅིག་ནི་དང་པོ་ནས་དེའི་རིགས་ཅན་ཡིན་ནོ་ཞེས་བསྟན་ཏོ། །ཡོངས་སུ་ཉམས་པའི་ཆོས་ཅན་གྱི་རིགས་ཅན་ཞེས་བྱ་བ་ནས་མི་གཡོ་བའི་ཆོས་ཅན་གྱི་རིགས་ཅན་ཞེས་བྱ་བའི་བར་འདི་ཅི་ཞིག་ཡིན་ཞེ་ན། དེས་ནི་ཡོངས་སུ་ཉམས་པའི་ཆོས་ཅན་ལ་སོགས་པའི་རིགས་མ་
[213b.7]བསྟན་ཏོ། །དེ་ལ་ཁ་ཅིག་ནི་འདི་སྐད་དུ་རིགས་ཞེས་བྱ་བ་ནི་དགེ་བའི་རྩ་བ་དག་ཡིན་ཏེ། འགའ་ཞིག་ལ་ཡོངས་སུ་ཉམས་པའི་ཆོས་ཅན་ནས་མི་གཡོ་བའི་ཆོས་ཅན་གྱི་བར་དུ་འགྱུར་བ་གང་ཡིན་པ་དེ་ལྟ་བུ་དེ་དག་ཡོད་དོ་ཞེས་བརྗོད་དོ། །གཞན་དག་ན་རེ་རིགས་ཞེས་བྱ་བ་ནི་སོ་སོའི་
[214a]
[214a.1]སྐྱེ་བོའི་གནས་སྐབས་ནས་བཟུང་སྟེ། དབང་པོའི་ཁྱད་པར་ཡིན་ནོ་ཞེས་ཟེར་རོ། །མདོ་སྡེ་པ་དག་ན་རེ་རིགས་ཞེས་བྱ་བ་ནི་སེམས་ཀྱི་ས་བོན་ནུས་པ་ཡིན་ཏེ་སོ་སོའི་སྐྱེ་བོ་དང་སློབ་པའི་གནས་སྐབས་ན་ཡང་ཡོངས་སུ་ཉམས་པའི་ཆོས་ཀྱི་ས་བོན་རྒྱུ་ཡོད་ན་ཡོངས་སུ་ཉམས་པའི་ཆོས་ཅན་གྱི་
[214a.2]རིགས་ཅན་ཞེས་བྱ་བ་ལ། དེ་བཞིན་དུ་མི་སློབ་པའི་གནས་སྐབས་ན་ཡང་དེའི་ས་བོན་འཇུག་པ་རྙེད་ནས་ཡོངས་སུ་ཉམས་པའི་ཆོས་ཅན་ཞེས་བྱ་སྟེ། མི་གཡོ་བའི་ཆོས་ཅན་གྱི་བར་དུ་ཡང་དེ་དང་འདྲའོ་ཞེས་ཟེར་རོ། །དེ་ལ་ཡོངས་སུ་ཉམས་པའི་ཆོས་ཅན་ཞེས་བྱ་བ་རྒྱས་པར་འབྱུང་བ་ལ། གལ་ཏེ་
[214a.3]ཡོངས་སུ་ཉམས་པའི་ཆོས་ཅན་ནི་ཡོངས་སུ་ཉམས་པར་འགྱུར་བའི་སྐལ་བ་དང་ལྡན་ཞེས་བྱ་བ་དེ་ཙམ་ཁོ་ན་ཞིག་བརྗོད་ཀྱི། འདི་འཆི་བར་སེམས་པ་ལ་སོགས་པའི་ཆོས་ཅན་ནི་མ་ཡིན་པ་ཞེས་བྱ་བ་དེ་མ་བརྗོད་ན། འཆི་བར་སེམས་པའི་ཆོས་ཅན་ལ་སོགས་པ་བཞི་པོ་དེ་དག་ཐམས་ཅད་ཀྱང་
[214a.4]ཡོངས་སུ་ཉམས་པར་འགྱུར་བའི་སྐལ་བ་དང་ལྡན་པས་ཡོངས་སུ་ཉམས་པའི་ཆོས་ཅན་དེ་དག་ཁོ་ན་གང་ཡང་རུང་བ་ཞིག་ཡིན་པར་འགྱུར་གྱི། དེ་དག་ལས་གཞན་ལྔ་པ་ནི་མེད་དོ། །དེའི་ཕྱིར་ལྔ་པ་འདི་ནི་དེ་དག་ལས་གཞན་པ་ཁོ་ན་ཞེས་ཁྱད་པར་དུ་བྱ་བའི་ཕྱིར་འཆི་བར་སེམས་པ་ལ་སོགས་པའི་
[214a.5]ཆོས་ཅན་མ་ཡིན་པའོ་ཞེས་སྨོས་སོ། །འཆི་བར་སེམས་པའི་ཆོས་ཅན་ལ་སོགས་པ་བཞི་ནི་ཡོངས་སུ་ཉམས་པའི་ཆོས་ཅན་མ་ཡིན་པ་ལས་རེ་རེའི་ཁྱད་པར་གྱི་མཚན་ཉིད་བསྟན་པ་ཁོ་ནས་འཆི་བར་སེམས་པའི་ཆོས་ཅན་ནི་འཆི་བར་སེམས་པར་འགྱུར་བའི་སྐལ་བ་དང་ལྡན་གྱི། རྗེས་སུ་སྲུང་བའི་
[214a.6]ཆོས་ཅན་མ་ཡིན་པ་གང་ཡིན་པའོ་ཞེས་བྱ་བ་འདི་ནི་བརྗོད་མི་དགོས་པར་འགྱུར་ཏེ། རྗེས་སུ་སྲུང་བའི་ཆོས་ཅན་ཡང་དེ་དང་འདྲའོ། །ཡོངས་སུ་ཉམས་པར་འགྱུར་བའི་རྐྱེན་སྟོབས་དང་ལྡན་པ་མེད་ན་ཞེས་བྱ་བ་ནི་གལ་ཏེ་ཡོངས་སུ་ཉམས་པར་འགྱུར་བའི་རྐྱེན་སྟོབས་དང་ལྡན་པར་གྱུར་ན་དེ་
[214a.7]ཡོངས་སུ་ཉམས་པར་འགྱུར་རོ་སྙམ་དུ་བསམས་པ་ཡིན་ནོ། །རྐྱེན་སྟོབས་དང་ལྡན་པ་སྨོས་པ་འདིས་ནི་སྔར་བཤད་པ་ཡོངས་སུ་ཉམས་པའི་ཆོས་ཅན་ལས་ཁྱད་པར་དུ་བྱེད་དེ། ཡོངས་སུ་ཉམས་པའི་ཆོས་ཅན་ནི་ཡོངས་སུ་ཉམས་པར་འགྱུར་བའི་རྐྱེན་སྟོབས་དང་མི་ལྡན་པས་ཀྱང་ཡོངས་སུ་ཉམས་
[214b]
[214b.1]པར་འགྱུར་རོ། །ཡོངས་སུ་ཉམས་པར་འགྱུར་བའི་རྐྱེན་རྣམས་ནི་མདོ་ལས་ཇི་སྐད་དུ་འབྱུང་བ་སྟེ། རྐྱེན་ལྔ་དང་། རྒྱུ་ལྔས་དུས་ཀྱིས་རྣམ་པར་གྲོལ་བའི་དགྲ་བཅོམ་པ་ཡོངས་སུ་ཉམས་པར་འགྱུར་རོ། །ལྔ་གང་ཞེ་ན། ལས་ཀྱི་མཐའ་ལ་ཞུགས་པ་ཡིན། སྨྲ་བ་ལ་ཞུགས་པ་ཡིན། རྩོད་པ་
[214b.2]ལ་ཞུགས་པ་ཡིན། རིང་དུ་རྒྱུ་བའི་སྦྱོར་བ་དང་ལྡན་པ་ཡིན། ནད་ཀྱི་རྣམ་པ་ཡུན་རིང་པོས་ཐེབས་པ་ཡིན་ཞེས་བྱ་བ་ཡིན་ནོ། །རྗེས་སུ་མ་བསྲུངས་ཀྱང་ཞེས་བྱ་བ་འདིས་ནི་རྗེས་སུ་སྲུང་བའི་ཆོས་ཅན་ལས་ཁྱད་པར་དུ་བྱེད་དེ། འདི་ནི་རྗེས་སུ་མ་བསྲུངས་ཀྱང་ཡོངས་སུ་ཉམས་པར་མི་འགྱུར་ལ་དེ་ནི་བསྲུངས་
[214b.3]ཀྱང་ཉམས་པར་འགྱུར་བས་འབྲས་བུ་དེ་རྗེས་སུ་མ་བསྲུངས་ཀྱང་འབྲས་བུ་དེ་ལ་གནས་པར་འགྱུར་བའི་སྐལ་བ་ཅན་ཡིན་ཞིང་འབྲས་བུ་དེ་ལས་ཉམས་པར་མི་འགྱུར་བ་དང་། མངོན་པར་བརྩོན་པ་མེད་ན་སྟེ། བརྩོན་འགྲུས་མེད་ན་རྟོགས་པའི་སྐལ་བ་ཅན་ཐོབ་པར་འཕེལ་བར་ཡང་མི་འགྱུར་བ་སྟེ།
[214b.4]ཤུགས་ཀྱིས་ན་གལ་ཏེ་བརྩོན་པར་བྱེད་ན་སྐལ་བ་ཅན་དུ་འགྱུར་རོ་ཞེས་བཤད་པ་ཡིན་ནོ། །དེ་ལྟར་ན་འདི་རྟོགས་པའི་སྐལ་བ་ཅན་ལས་ཀྱང་བྱེ་བྲག་ཏུ་བྱས་པ་ཡིན་ཏེ། དེ་ནི་མངོན་པར་བརྩོན་པ་མེད་ཀྱང་རྟོགས་པར་འགྱུར་བའི་སྐལ་བ་ཅན་ཡིན་ནོ། །དང་པོ་གཉིས་ཞེས་བྱ་བ་རྒྱས་པར་འབྱུང་བ་ལ་
[214b.5]ཡོངས་སུ་ཉམས་པའི་ཆོས་ཅན་ནི་རྒྱུན་དུ་སྦྱོར་བ་དང་གུས་པར་སྦྱོར་བ་མེད་པ་ཡིན་ནོ། །འཆི་བར་སེམས་པ་ཡང་རྒྱུན་དུ་སྦྱོར་བ་མེད་པ་ཡིན་མོད་ཀྱི། ཁྱད་པར་དུ་གུས་པར་སྦྱོར་བ་མེད་པ་ཡིན་པས་འདི་གཉིས་བྱེ་བྲག་ཡིན་ནོ། །དབང་པོ་རྟུལ་པོ་ཡིན་ནོ་ཞེས་བྱ་བ་ནི་དྲུག་པ་ལས་ཁྱད་པར་དུ་བྱེད་པ་ཡིན་
[214b.6]ནོ། །དྲུག་པ་ནི་དབང་པོ་རྣོན་པོ་ཡིན་ཏེ། འདི་གཉིས་དབང་པོས་བྱས་པའི་བྱེ་བྲག་ཡོད་ཀྱི་སྦྱོར་བས་བྱས་པ་ནི་མ་ཡིན་ནོ། །དེ་ལྟར་བྱས་ན་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་དེ་ལྟར་ངེས་པ་མེད་པ་དེའི་ཕྱིར་གཟུགས་དང་གཟུགས་མེད་པའི་ཁམས་དག་ན་ཡང་དགྲ་བཅོམ་པ་དྲུག་ཡོད་ཀྱི།
[214b.7]འདོད་པའི་མས་འབའ་ཞིག་ན་དྲུག་ཡོད་པ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །གཟུགས་དང་གཟུགས་མེད་པའི་ཁམས་དག་ན་ནི་གནས་པ་ལས་མི་བསྐྱོད་པ་དང་མི་གཡོ་བའི་ཆོས་ཅན་དང་གཉིས་ཞེས་བྱ་བ་ལ། གནས་པ་ལས་མི་བསྐྱོད་པ་ནི་གནས་པ་ལས་མི་བསྐྱོད་
[215a]
[215a.1]པ་ཉིད་དུ་དད་པར་འགྱུར་བ་ཡིན་གྱི་རྟོགས་པའི་སྐལ་བ་ཅན་ཉིད་དུ་བྱ་བར་གུས་པ་ནི་མ་ཡིན་པས་འདོད་པའི་ཁམས་ཀྱི་གནས་པ་ལས་མི་གཡོ་བ་ནི་རྟོགས་པའི་སྐལ་བ་ཅན་ཉིད་དུ་འགྱུར་ལ། དེ་གཟུགས་དང་གཟུགས་མེད་པའི་ཁམས་དག་ན་ནི་ཡོངས་སུ་ཉམས་པའི་རྐྱེན་
[215a.2]སྟོབས་དང་ལྡན་པ་མེད་པས་དེ་ཡོངས་སུ་ཉམས་པར་ཡང་མི་འགྱུར་ལ། དབང་པོ་དག་འཕོ་བ་ཡང་མེད་པས་དེ་ན་གནས་པ་ལས་མི་གཡོ་བའི་རིགས་ཁོ་ནར་འདུག་གོ། །མི་གཡོ་བའི་རྣམ་པར་གྲོལ་བ་དང་ལྡན་པའི་ཕྱིར་མི་གཡོ་བའི་ཆོས་ཅན་ཡང་ཡོད་པ་ཉིད་པས་དེ་གཉིས་ཁོ་ན་ཡོད་ཀྱི་དེ་
[215a.3]ལས་གཞན་པ་དག་ནི་མེད་དོ། །གཟུགས་དང་གཟུགས་མེད་པའི་ཁམས་དེ་གཉིས་ན་ཡོངས་སུ་ཉམས་པ་དང་འཆི་བར་སེམས་པ་དང་དབང་པོ་འཕོ་བ་མེད་པའི་ཕྱིར་ཏེ། རེ་ཞིག་དེ་ན་ཡོངས་སུ་ཉམས་པ་མེད་པའི་ཕྱིར་ཡོངས་སུ་ཉམས་པའི་ཆོས་ཅན་མེད་དོ། །རྗེས་སུ་སྲུང་བའི་ཆོས་ཅན་ཡང་ཡོངས་
[215a.4]སུ་ཉམས་པ་མེད་པ་ཉིད་ཀྱིས་རྗེས་སུ་བསྲུང་བར་བྱ་བ་ཉིད་མི་འཐད་པའི་ཕྱིར་མེད་དོ། །དབང་པོ་འཕོ་བ་མེད་པ་དེ་ཉིད་ཀྱི་ཕྱིར་རྟོགས་པའི་སྐལ་བ་ཅན་ཡང་མེད་དེ། དེ་སྐད་དུ། དེ་དང་གོང་དུ་སྐྱེས་པ་ནི། །ཡོངས་ཉམས་དབང་པོ་འཕོ་མི་བསྟེན། །ཞེས་འབྱུང་བས་སོ། །དེ་ན་ནི་བདག་ཉིད་འཆི་བར་
[215a.5]སེམས་པ་ཡང་མེད་ལ་གཞན་གྱིས་གསོད་པ་ཡང་མེད་པས་འཆི་བར་སེམས་པ་ཡང་མེད་དོ། །འཆི་བར་སེམས་པའི་ཆོས་ཅན་ལ་སོགས་པ་ཞེས་བྱ་བ་ནི་འཆི་བར་སེམས་པ་དང་། རྗེས་སུ་སྲུང་བའི་ཆོས་ཅན་དང་། གནས་པ་ལས་མི་བསྐྱོད་པ་དང་། རྟོགས་པའི་སྐལ་བ་ཅན་དག་གོ། །ཡོངས་
[215a.6]སུ་ཉམས་པའི་ཆོས་ཅན་ནི་རང་གི་རིགས་ལས་ཡོངས་སུ་ཉམས་པར་མི་འགྱུར་རོ་ཞེས་བྱ་བ་ནི་རིགས་དེ་བཅོས་མ་མ་ཡིན་པའི་ཕྱིར་རོ། །ཡོངས་སུ་ཉམས་པའི་ཆོས་ཅན་ལ་སོགས་པ་ལྔ་ཞེས་བྱ་བ་ནི་འདི་ལྟར་འབྲས་བུ་ནི་གློ་བུར་བ་ཡིན་པའི་ཕྱིར་ཡོངས་སུ་ཉམས་པའི་ཆོས་ཅན་ཡང་འབྲས་བུ་
[215a.7]ལས་ཡོངས་སུ་ཉམས་པ་སྲིད་དོ། །དང་པོ་ལས་ནི་ཞེས་བྱ་བ་ནི་རིགས་དང་འབྲས་བུ་ལས་སོ། །དེ་ཡོངས་སུ་ཉམས་པར་མི་འགྱུར་ཞེས་བྱ་བ་ནི་དགྲ་བཅོམ་པའོ། །ཅིའི་ཕྱིར་ཞེ་ན། སློབ་པ་དང་། མི་སློབ་པའི་ལམ་དག་གིས་བརྟེན་པོར་བྱས་པའི་ཕྱིར་རོ་ཞེས་བྱ་བ་སྨོས་ཏེ། སློབ་པའི་
[215b]
[215b.1]གནས་སྐབས་ན་ཡོད་པའི་རིགས་གང་ཡིན་པ་དེ་ནི་སློབ་པའི་ལམ་གྱིས་ཀྱང་བསྒོམས་ལ་མི་སློབ་པའི་གནས་སྐབས་ན་ཡང་བསྒོམས་པས་ལམ་དེ་དག་གིས་བརྟན་པོར་བྱས་པའི་ཕྱིར་དགྲ་བཅོམ་པ་དེ་དེ་ལས་ཡོངས་སུ་ཉམས་པར་མི་འགྱུར་རོ། །སློབ་པ་ཇི་ལྟ་བུ་ཡིན་ཞེ་ན། སྨྲས་པ། སློབ་པ་
[215b.2]ནི་འཇིག་རྟེན་པ་དང་འཇིག་རྟེན་ལས་འདས་པའི་ལམ་དག་གིས་བརྟན་པོར་བྱས་པའི་ཕྱིར་རིགས་དང་པོ་ལས་ཡོངས་སུ་ཉམས་པར་མི་འགྱུར་ཏེ། དེའི་བདག་ཉིད་ཀྱི་རིགས་དང་པོ་གང་ཡིན་པ་དེ་ནི་སྔོན་འཇིག་རྟེན་པའི་ལམ་གྱིས་ཀྱང་བསྒོམས་ལ་ཕྱིས་སློབ་པའི་ལམ་གྱིས་ཀྱང་བསྒོམས་པས་
[215b.3]དེ་དེ་ལས་ཡོངས་སུ་ཉམས་པར་མི་འགྱུར་རོ། །འདིར་ལ་ལ་ན་རེ་གང་གི་རིགས་དང་པོ་གང་ཡིན་པ་དེ་ལས་ནི་དེ་ཡོངས་སུ་ཉམས་པར་མི་འགྱུར་ཏེ། སློབ་པ་དང་མི་སློབ་པའི་ལམ་དག་གིས་བརྟེན་པོར་བྱས་པའི་ཕྱིར་རོ་ཞེས་བཤད་པ་གང་ཡིན་པ་དེ་ནི་གཏན་ཚིགས་མ་ཡིན་ཏེ། འདི་ལྟར་འཆི་
[215b.4]བར་སེམས་པའི་ཆོས་ཅན་སྦྱངས་པ་ལས་གྱུར་པའི་རིགས་གང་ཡིན་པ་དེ་ལས་ཡོངས་སུ་ཉམས་པར་འགྱུར་བའི་རིགས་དེ་ཡང་སློབ་པ་དང་མི་སློབ་པའི་ལམ་དག་གིས་བརྟན་པོར་བྱས་པས་ཡོངས་སུ་མི་ཉམས་པར་འགྱུར་རོ། །དེ་ལྟ་བས་ན་རིགས་དེ་ཉིད་འདི་ལྟར་དང་པོ་ལས་ནི་ཡོངས་སུ་
[215b.5]ཉམས་པར་མི་འགྱུར་ལ་སྦྱངས་ཏེ་ཐོབ་པ་ལས་ནི་ཡོངས་སུ་ཉམས་པར་འགྱུར་བ་དེ་ལྟ་བུ་ཡིན་ནོ། །གང་ཡང་སློབ་པ་ནི་འཇིག་རྟེན་པ་དང་འཇིག་རྟེན་ལས་འདས་པའི་ལམ་དག་གིས་བརྟན་པོར་བྱས་པའི་ཕྱིར་ཡོངས་སུ་ཉམས་པར་མི་འགྱུར་རོ་ཞེས་སྨྲས་པ་གང་ཡིན་པ་དེ་ཡང་
[215b.6]གཏན་ཚིགས་མ་ཡིན་ཏེ། རྒྱུན་དུ་ཞུགས་པ་ཡང་ཡོངས་སུ་ཉམས་པར་ཐལ་བར་འགྱུར་བའི་ཕྱིར་ཏེ། རྒྱུན་དུ་ཞུགས་པའི་འབྲས་བུ་ནི་འཇིག་རྟེན་པའི་ལམ་གྱིས་བརྟན་པོར་བྱས་པ་མ་ཡིན་པས་འདི་ལ་འབད་པར་བྱའོ་ཞེས་ཟེར་རོ། །འདིར་བདག་གིས་གང་གི་ཕྱིར་དེ་སྐད་དུ་བཤད་པ།
[215b.7]སློབ་དཔོན་གྱི་དགོངས་པ་བསྟན་པར་བྱའོ། །ཇི་ལྟར་ཞེ་ན། རེ་ཞིག་འཆི་བར་སེམས་པའི་ཆོས་ཅན་སྦྱངས་པ་ལས་གྱུར་པའི་རིགས་གང་ཡིན་པ་དེ་ལས་ཡོངས་སུ་ཉམས་པར་འགྱུར་ཞེས་སྨྲས་པ་གང་ཡིན་པ་དེ་ནི་རིགས་པ་མ་ཡིན་ཏེ། འཆི་བར་སེམས་པའི་ཆོས་ཅན་གྱི་རིགས་གང་
[216a]
[216a.1]ཡིན་པ་ནི་སློབ་པའི་གནས་སྐབས་ན་ཡང་བསྒོམས་ལ། ཕྱིས་མི་སློབ་པའི་གནས་སྐབས་ན་ཡང་བསྒོམས་ཏེ་བརྟེན་པོར་བྱས་པས་དགྲ་བཅོམ་པ་ཉིད་ལས་ཡོངས་སུ་ཉམས་པར་མི་འགྱུར་ཏེ། སློབ་པའི་གནས་སྐབས་ན་དང་པོར་གྱུར་པའི་ཕྱིར་རོ། །སློབ་དཔོན་འདུས་བཟང་
[216a.2]གིས་ཀྱང་སློབ་པའི་གནས་སྐབས་ན་རིགས་གཞན་ཐོབ་ནས་དགྲ་བཅོམ་པ་ཉིད་འཐོབ་པ་གང་ཡིན་པ་དེ་ཡང་ལམ་དེ་ཡོངས་སུ་མི་འདོར་ཏེ། སྦྱངས་པ་ལས་གྱུར་པའི་རིགས་ཁོ་ན་ལས་མི་གནས་པ་ནི་མ་ཡིན་ནོ་ཞེས་བཤད་དོ། །འཆི་བར་སེམས་པའི་ཆོས་ཅན་གྱི་རིགས་མི་སློབ་པའི་གནས་སྐབས་ན་འཕྲལ་
[216a.3]ཁོ་ན་ལ་ཐོབ་ཀྱི་སློབ་པའི་གནས་སྐབས་ན་ཐོབ་པ་མ་ཡིན་པ་གང་ཡིན་པ་དེ་ལས་ནི་དེ་ཡོངས་སུ་ཉམས་པས་ན་ཉམས་པར་འགྱུར་ཏེ། དེ་ནི་གནས་སྐབས་གཉིས་ཀྱིས་བརྟན་པོར་མ་བྱས་པའི་ཕྱིར་རོ། །དེ་བས་ན་འདི་ནི་གཏན་ཚིགས་སུ་མི་རུང་བ་ཉིད་དོ། །གང་ཡང་སློབ་པ་ནི་འཇིག་རྟེན་དང་འཇིག་
[216a.4]རྟེན་ལས་འདས་པའི་ལམ་དག་གིས་བརྟན་པོར་བྱས་པའི་ཕྱིར་ཡོངས་སུ་ཉམས་པར་མི་འགྱུར་རོ་ཞེས་སྨྲས་པ་གང་ཡིན་པ་དེ་ཡང་གཏན་ཚིགས་མ་ཡིན་ཏེ། རྒྱུན་དུ་ཞུགས་པ་ཡང་ཡོངས་སུ་ཉམས་པར་འགྱུར་བའི་ཕྱིར་ཏེ། རྒྱུན་དུ་ཞུགས་པའི་འབྲས་བུ་ནི་འཇིག་རྟེན་པ་དང་འཇིག་
[216a.5]རྟེན་ལས་འདས་པའི་ལམ་གྱིས་བརྟན་པོར་མ་བྱས་པས་ཞེས་སྨྲས་པ་གང་ཡིན་པ་དེ་ཡང་ཁོང་དུ་མ་ཆུད་པར་སྨྲས་པ་ཡིན་ནོ། །གཏན་ཚིགས་དེ་ནི་རིགས་ཀྱི་ཕྱིར་བཤད་པ་ཡིན་གྱི། འབྲས་བུའི་ཕྱིར་ནི་མ་ཡིན་ཏེ། དེ་ལ་ནི་གང་གིས་ན་འབྲས་བུ་དང་པོ་ལས་ཡོངས་སུ་ཉམས་པར་མི་འགྱུར་
[216a.6]བའི་གཏན་ཚིགས་འཆད་པར་འགྱུར་རོ། །འབྲས་བུ་གང་ཞིག་ཅིག་ཅར་དུ་འཇིག་རྟེན་དང་འཇིག་རྟེན་ལས་འདས་པའི་ལམ་དག་གིས་འཐོབ་པ་ནི་ཆུང་ཟད་ཀྱང་མེད་ཀྱི། རིགས་ནི་འཇིག་རྟེན་དང་འཇིག་རྟེན་ལས་འདས་པའི་ལམ་དག་གིས་བརྟན་པོར་བྱས་པ་སྲིད་དེ། ཚེ་འདི་པའི་དྲོ་བར་
[216a.7]གྱུར་པ་ལ་སོགས་པའམ་ཚེ་ཕ་རོལ་པོའི་སྤོང་བའི་ལམ་མམ། འཇིག་རྟེན་པ་དང་འཇིག་རྟེན་ལས་འདས་པའི་ལམ་གཞན་གྱིས་སློབ་པའི་གནས་སྐབས་ན་བསྒོམས་པའི་ཕྱིར་རོ། །ཕྱིས་སྦྱངས་པས་ཐོབ་པ་གང་ཡིན་པ་དེ་ལས་ནི་ཞེས་བྱ་བ་ནི་ཕྱིས་ཐོབ་པའི་རིགས་གློ་བུར་བ་གང་ཡིན་པ་སྟེ།
[216b]
[216b.1]གནས་སྐབས་གཉིས་སུ་ཐོབ་པ་མ་ཡིན་པ་དེ་ལས་ནི་ཡོངས་སུ་ཉམས་པར་འགྱུར་རོ། །རིགས་བསྟན་ནས་འབྲས་བུ་བསྟན་པར་བྱ་སྟེ། གང་གི་འབྲས་བུ་དང་པོ་གང་ཡིན་པ་ཞེས་བྱ་བ་རྒྱས་པར་སྨོས་སོ། །དེ་ཉིད་ཀྱི་ཕྱིར་རྒྱུན་དུ་ཞུགས་པའི་འབྲས་བུ་ལས་ཡོངས་སུ་ཉམས་པ་མེད་དོ་ཞེས་བྱ་
[216b.2]བ་ནི་འདི་ལྟར་རྒྱུན་དུ་ཞུགས་པའི་འབྲས་བུ་ནི་གལ་ཏེ་འཐོབ་ན་གདོན་མི་ཟ་བར་དང་པོ་ཡིན་ནོ། །ལན་ཅིག་ཕྱིར་འོང་བ་དང་། །ཕྱིར་མི་འོང་བའི་འབྲས་བུ་དག་ནི་རེས་འགའ་དང་པོ་ཡིན་ཏེ། གལ་ཏེ་ཕལ་ཆེར་འདོད་ཆགས་དང་བྲལ་བ་དང་། འདོད་པ་ལས་འདོད་ཆགས་དང་བྲལ་བ་དག་ཡིན་
[216b.3]ནའོ། །རེས་འགའ་ནི་དང་པོ་མ་ཡིན་ཏེ། གལ་ཏེ་མཐར་གྱིས་པའི་ཡིན་ནའོ། །དེ་ལ་རྒྱུན་དུ་ཞུགས་པའི་འབྲས་བུའམ། ལན་ཅིག་ཕྱིར་འོང་བའི་འབྲས་བུའམ། ཕྱིར་མི་འོང་བའི་འབྲས་བུ་ཡང་རུང་འབྲས་བུ་དང་པོ་གང་དང་གང་ཡིན་པ་དེ་ལས་ནི་ཡོངས་སུ་ཉམས་པར་མི་འགྱུར་གྱི། ལན་ཅིག་
[216b.4]ཕྱིར་འོང་བའི་འབྲས་བུའམ། ཕྱིར་མི་འོང་བའི་འབྲས་བུའམ། དགྲ་བཅོམ་པ་ཉིད་ཀྱི་འབྲས་བུའང་རུང་ཕྱིས་ཐོབ་པ་གང་ཡིན་པ་དེ་ལས་ནི་ཡོངས་སུ་ཉམས་པར་འགྱུར་རོ། །དེ་ལྟར་བྱས་ན་ཞེས་བྱ་བ་ནི་གང་གི་རིགས་དང་འབྲས་བུ་དང་པོ་གང་ཡིན་པ་དེ་ལས་ཡོངས་སུ་ཉམས་པར་མི་འགྱུར་
[216b.5]རོ་ཞེས་བྱས་ནའོ། །གོ་རིམས་བཞིན་དུ་རྣམ་པ་ལྔ་དང་དྲུག་དང་བདུན་ཡིན་ཞེས་བྱ་བ་ནི་རྗེས་སུ་སྲུང་བའི་ཆོས་ཅན་ནི་རྣམ་པ་ལྔ་ཡིན་ཏེ། དེའི་སོ་ན་གནས་བཞིན་དུ་ཡོངས་སུ་མྱ་ངན་ལས་འདའ་བ་དབང་པོ་འཕོ་བ་དང་། ཡོངས་སུ་ཉམས་ནས་སློ་བ་པ་ཉིད་དུ་འགྱུར་བ་དང་། ཡོངས་སུ་ཉམས་པ་
[216b.6]དང་། འཆི་བར་སེམས་པའི་ཆོས་ཅན་གྱི་རིགས་སུ་སླར་འོང་བ་དང་། གནས་པ་ལས་མི་བསྐྱོད་པ་ནི་རྣམ་པ་དྲུག་ཡིན་ཏེ། ལྔ་པོ་དེ་དག་ཉིད་དང་། དྲུག་པ་རྗེས་སུ་སྲུང་བའི་ཆོས་ཅན་གྱི་རིགས་སུ་སླར་འོང་བའོ། །རྟོགས་པའི་སྐལ་བ་ཅན་ནི་རྣམ་པ་བདུན་ཡིན་ཏེ། དྲུག་པོ་དེ་དག་ཉིད་དང་།
[216b.7]བདུན་པ་གནས་པ་ལས་མི་བསྐྱོད་པའི་རིགས་ཅན་དུ་སླར་འོང་བའོ། །དེ་སློབ་པར་གྱུར་ན་ཕྱིས་ཞེས་བྱ་བའི་ཚིག་གཅིག་ཁོང་ནས་དབྱུང་ངོ་། །གང་གི་རིགས་དང་པོ་གང་ཡིན་པ་སློབ་པའི་གནས་སྐབས་ན་ཡོད་པ་དེ་ཁོ་ན་ལ་གནས་ཀྱི་གཞན་ལ་ནི་མ་ཡིན་ནོ། །དེ་ལྟ་མ་ཡིན་ན་རིགས་ཁྱད་
[217a]
[217a.1]པར་ཅན་རྙེད་པའི་ཕྱིར་ཏེ། སློབ་པའི་གནས་སྐབས་ཀྱི་རིགས་ལས་ཁྱད་པར་ཅན་རྙེད་པའི་ཕྱིར་གང་ཟག་དེ་འཕེལ་བ་ཁོ་ནར་འགྱུར་གྱི་ཡོངས་སུ་ཉམས་པར་ནི་མི་འགྱུར་རོ། །ཇི་ལྟར་བྱས་པས་ཤེ་ན། རེ་ཞིག་དཔེར་ན་ཡོངས་སུ་ཉམས་པའི་ཆོས་ཅན་དགྲ་བཅོམ་པ་ཉིད་ཀྱི་གནས་
[217a.2]ན་དབང་པོ་སྦྱངས་པས་རྟོགས་པའི་སྐལ་བ་ཅན་ཉིད་དུ་གྱུར་པ་དེ་དགྲ་བཅོམ་པ་ཉིད་ལས་ཡོངས་སུ་ཉམས་ཏེ། སློབ་པར་གྱུར་པ་དེའི་རིགས་པས་ཀྱང་ཡོངས་སུ་ཉམས་ན་ལུགས་ལས་བཟློག་པ་གནས་པ་ལས་མི་བསྐྱོད་པའི་རིགས་ནས་འཆི་བར་སེམས་པའི་ཆོས་ཅན་གྱི་རིགས་ཀྱི་བར་ལ་མི་
[217a.3]གནས་སོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་རིགས་གཞན་ལ་གནས་པར་གྱུར་ནའོ། །རིགས་ཁྱད་པར་ཅན་རྙེད་པའི་ཕྱིར་ཞེས་བྱ་བ་ནི་རིགས་དེ་ནི་ཡོངས་སུ་ཉམས་པའི་རིགས་ལས་ཁྱད་ཞུགས་པ་ཡིན་པས་སོ། །དེ་ལྟ་བས་ན་དགྲ་བཅོམ་པ་ཉིད་ལས་ཡོངས་སུ་ཉམས་ན་དབང་པོ་སྦྱངས་
[217a.4]པས་ཐོབ་པ་ལས་ཀྱང་གདོན་མི་ཟ་བར་ཡོངས་སུ་ཉམས་པར་འགྱུར་རོ། །ཅིའི་ཕྱིར་འབྲས་བུ་དང་པོ་ལས་ཡོངས་སུ་ཉམས་པ་མེད་ཅེས་བྱ་བ་ནི་གང་གི་འབྲས་བུ་དང་པོ་གང་ཡིན་པ་དེ་སྟེ། རྒྱུན་དུ་ཞུགས་པའི་འབྲས་བུའམ། ལན་ཅིག་ཕྱིར་འོང་བའི་འབྲས་བུའམ། ཕྱིར་མི་འོང་བའི་
[217a.5]འབྲས་བུའོ། །མཐོང་བས་སྤང་བར་བྱ་བ་རྣམས་གཞི་མེད་པའི་ཕྱིར་ཏེ། རྟེན་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་དག་ནི། བདག་གི་གཞི་ལ་འཇུག་པ་ཡིན། །ཞེས་བྱ་བ་རྒྱས་པར་འབྱུང་བ་ནི་མཐོང་བས་སྤང་བར་བྱ་བ་དེ་དག་ལ་བརྟེན་ནས་ཞུགས་པ་ཡིན་ནོ། །ཅིའི་ཕྱིར་ཞེ་ན།
[217a.6]འཇིག་ཚོགས་ལ་ལྟ་བའི་རྩ་བ་ཅན་ཡིན་པའི་ཕྱིར་རོ། །འདི་ལྟར་མཐོང་བས་སྤང་བར་བྱ་བ་རྣམས་ནི་བདག་ཏུ་ལྟ་བའི་དབང་གིས་ཀུན་དུ་འབྱུང་སྟེ། མདོ་ལས་ཀྱང་། འཇིག་རྟེན་ན་ལྟ་བ་ཐ་དད་པར་གྱུར་པ་གང་ཡིན་པ་དེ་དག་ནི་འཇིག་ཚོགས་ལ་ལྟ་བའི་གཞི་ཅན་ཡིན་ཏེ། འཇིག་ཚོགས་ལ་
[217a.7]ལྟ་བ་ལས་ཀུན་དུ་འབྱུང་བ། འཇིག་ཚོགས་ལ་ལྟ་བའི་རིགས་ཅན། འཇིག་ཚོགས་ལ་ལྟ་བ་ལས་རབ་ཏུ་སྐྱེ་བ་ཡིན་ནོ་ཞེས་གསུངས་སོ། །བདག་དེ་ཡང་མེད་དོ་ཞེས་བྱ་བ་ནི་གཞི་མེད་པའི་ཕྱིར་ཡོངས་སུ་ཉམས་པ་མེད་དོ། །བདེན་པ་ལ་དམིགས་པའི་ཕྱིར་ཞེས་བྱ་བ་ནི་སྡུག་བསྔལ་ལ་
[217b]
[217b.1]སོགས་པའི་བདེན་པ་དག་ལ་རྟག་པ་ལ་སོགས་པར་འཛིན་པའི་ཕྱིར་རོ། །དེ་ལྟ་མ་ཡིན་པའི་ཉོན་མོངས་པ་གང་ཞིག་ཡིན་ཏེ། འདོད་ཆགས་ལ་སོགས་པ་བསྒོམ་པས་སྤང་བར་བྱ་བ་ཡང་མི་གཙང་བ་ལ་སོགས་པའི་དངོས་པོ་ལ་གཙང་བ་དང་། བདེ་བ་དང་། རྟག་པ་དང་བདག་གི་རྣམ་པ་དག་ཏུ་
[217b.2]དམིགས་པའི་ཕྱིར་ཕྱིན་ཅི་ལོག་ཏུ་དམིགས་པ་ཡིན་ནོ། །བདག་ཡང་དག་པ་མ་ཡིན་པ་སྒྲོ་འདོགས་པར་བྱེད་ལ་ཞེས་བྱ་བ་ནི་ཇི་སྐད་དུ་དགེ་སློང་དག་གང་ལ་ལ་བདག་གོ་ཞེས་ཡང་དག་པ་རྗེས་སུ་ལྟ་བ་ནི་ཉེ་བར་ལེན་པའི་ཕུང་པོ་ལྔ་པོ་འདི་ཁོ་ན་ལ་བདག་དང་བདག་གིར་ཡང་དག་པར་རྗེས་སུ་ལྟ་བར་ཟད་
[217b.3]དོ་ཞེས་གསུངས་པ་ལྟ་བུ་ཡིན་ནོ། །མཐར་འཛིན་པ་ལ་སོགས་པ་ཡང་དེའི་གཞི་ལ་ཞུགས་པ་ཡིན་པས་ཞེས་བྱ་བ་ནི་དེ་ལས་གཞན་པའི་མཐོང་བས་སྤང་བར་བྱ་བ་རྣམས་ཀྱང་བདག་གི་གཞིའི་རྗེས་སུ་ཞུགས་པ་ཡིན་ཏེ། བདག་རྟག་གོ། །ཆད་དོ་ཞེས་བྱ་བའམ། བདག་མེད་དོ་ཞེས་བྱ་
[217b.4]བའམ། འདི་ཁོ་ན་མཆོག་ཡིན་ནོ། །འདི་ནི་དག་པ་ཡིན་ནོ། །ཅི་འདི་ཡོད་དམ་མེད་ཅེས་བྱ་བ་དེ་ལྟ་བུ་ལ་སོགས་པའི་རྣམ་པར་ཞུགས་པས་གཞི་མེད་པ་དག་ཅེས་བྱ་སྟེ། རྟེན་དག་མེད་ཅེས་བྱ་བའི་དོན་ཏོ། །བདག་ལ་སོགས་པ་ནི་བདག་ཀྱང་མེད་དོ་ཞེས་བྱ་བ་ནི་གང་གི་ཕྱིར་དངོས་པོར་བརྗོད་
[217b.5]པ་ཞེས་བྱ་བའི་ཐ་ཚིག་སྟེ། སྩོགས་པ་སྨོས་པ་ནི་བདག་གི་བསྡུ་བ་འམ། དབང་ཕྱུག་ལ་སོགས་པ་བསྡུ་བ་ཡིན་ནོ། །གཞི་ཡིད་དུ་འོང་བ་དང་། ཡིད་དུ་མི་འོང་བའི་མཚན་ཉིད་སོ་སོར་ངེས་པ་ཞེས་བྱ་བ་ནི་བསྒོམ་པས་སྤང་བར་བྱ་བ་འདོད་ཆགས་ཀྱི་གཞི་ནི་སྐྲ་དང་སོ་སྡུག་པ་ལ་སོགས་པའི་མཚན་
[217b.6]ཉིད་ཡིད་དུ་འོང་བ་ཡིན་ནོ། །ཁོང་ཁྲོ་བའི་ནི་དེ་དག་མི་སྡུག་པ་ཡིད་དུ་མི་འོང་བ་ཡིན་ཏེ། ང་རྒྱལ་གྱི་ཡང་ཡིད་དུ་འོང་བ་ཡིན་ནོ། །མ་རིག་པའི་ཡང་གཉིས་པོ་དེ་ཉིད་ཆུང་ཟད་ཀུན་དུ་རྨོངས་པར་འགྱུར་བ་ཡིན་ནོ། །མཐོང་བས་སྤང་བར་བྱ་བ་རྣམས་ལ་ནི། བདག་ལ་སོགས་པའི་མཚན་ཉིད་
[217b.7]མེད། ཅེས་བྱ་བ་ནི་མཐོང་བས་སྤང་བར་བྱ་བ་དེ་ལ་དམིགས་པའི་འདོད་ཆགས་ལ་སོགས་པ་ལ་མ་གཏོགས་པ་རྣམས་ལ་ནི་བཞི་པོ་བདག་གི་མཚན་ཉིད་སོ་སོར་ངེས་པ་ཅུང་ཟད་ཀྱང་མེད་པས། དེ་ལྟ་བས་ན་གཞི་མེད་པ་དག་ཅེས་བྱ་བ་སྟེ། དེ་ལྟ་བས་ན་གཞི་སོ་སོར་ངེས་པ་མེད་པ་དག་
[218a]
[218a.1]ཅེས་བྱ་བའོ་ཞེས་བྱ་བའི་དོན་ཏོ། །སློབ་དཔོན་གྱིས་གཞན་ཡང་ཞེས་བྱ་བ་རྒྱས་པར་སྨོས་ཏེ། འཕགས་པ་སློབ་པ་ངེས་པར་མི་རྟོག་ཅིང་མི་སེམས་པ་ལ་དྲན་པ་ཉམས་པས་ཏེ། དྲན་པ་ཉོན་མོངས་པ་ཅན་དང་ལྡན་པས་འདོད་ཆགས་ལ་སོགས་པ་ཉོན་མོངས་པ་རྣམས་སྐྱེ་
[218a.2]བར་འགྱུར་གྱི་ངེས་པར་རྟོག་པ་ལ་ནི་མ་ཡིན་ཏེ། ངེས་པར་མི་རྟོག་པ་འགའ་ཞིག་ལ་དྲན་པ་ཉམས་པས་ཐག་པ་ལ་སྦྲུལ་གྱི་འདུ་ཤེས་སྐྱེའི་ངེས་པར་རྟོག་པ་ལ་ནི་མ་ཡིན་པ་དེ་དང་འདྲའོ། །བདག་ཏུ་ལྟ་བ་ལ་སོགས་པ་ཞེས་བྱ་བ་ལ་སོགས་པ་བྱ་བའི་སྒྲས་ནི་མཐར་འཛིན་པར་ལྟ་བ་ལ་
[218a.3]སོགས་པ་བསྡུའོ། །ཡང་ཅིའི་ཕྱིར་ངེས་པར་མི་རྟོག་པ་ལ་བདག་ཏུ་ལྟ་བ་ལ་སོགས་པ་འབྱུང་བར་མི་རུང་ཞེ་ན། ཀུན་དུ་རྟོག་པར་བྱེད་པ་ཡིན་པའི་ཕྱིར་ཏེ། གང་དག་ཅེ་ན་བདག་ཏུ་ལྟ་བ་ལ་སོགས་པ་ཉོན་མོངས་པ་རྣམས་སོ། །དེ་བས་ན་འཕགས་པ་ལ་ངེས་པར་མི་རྟོག་པའི་སྒོ་ནས་བདག་ཏུ་ལྟ་བ་
[218a.4]ལ་སོགས་པ་འབྱུང་བར་མི་རུང་བས་ཡོངས་སུ་ཉམས་པའི་རྒྱུ་མེད་པའི་ཕྱིར་མཐོང་བས་སྤང་བར་བྱ་བ་སྤངས་པས་ཡོངས་སུ་ཉམས་པ་མེད་དོ། །དགྲ་བཅོམ་པ་ཉིད་ལས་ཀྱང་ཡོངས་སུ་ཉམས་པ་མེད་དོ་ཞེས་བྱ་བ་ལ། ཀྱང་ཞེས་བྱ་བའི་སྒྲས་ནི་མཐོང་བས་སྤང་བར་བྱ་བ་སྤངས་པས་ཡོངས་སུ་
[218a.5]ཉམས་པ་མེད་པ་འབའ་ཞིག་ཏུ་མ་ཟད་ཀྱི། དགྲ་བཅོམ་པ་ཉིད་ལས་ཀྱང་ཡོངས་སུ་ཉམས་པ་མེད་དོ་ཞེས་སྟོན་པར་བྱེད་དོ། །དང་པོ་མ་ཡིན་པ་ལ་ལན་ཅིག་ཕྱིར་འོང་བ་དང་ཕྱིར་མི་འོང་བའི་འབྲས་བུ་དག་ལས་ནི་ཡོངས་སུ་ཉམས་པ་སྲིད་དེ། དེ་ནི་འཇིག་རྟེན་པའི་ལམ་གྱིས་ཐོབ་པ་
[218a.6]སྲིད་པའི་ཕྱིར་རོ་སྙམ་དུ་བསམས་པ་ཡིན་ནོ། །དེ་ཉིད་རིགས་པ་ཡིན་ནོ་ཞེས་བྱ་བ་ནི་སློབ་དཔོན་གཞུང་འཛུགས་པ་ཡིན་ནོ། །དགེ་སློང་དག་འཕགས་པའི་ཤེས་རབ་ཀྱིས་སྤངས་པ་གང་ཡིན་པ་དེ་ནི་སྤངས་པ་ཡིན་ནོ་ཞེས་བྱ་བ་ནི་འཕགས་པའི་ཤེས་རབ་ཀྱིས་སྤངས་པ་གང་
[218a.7]ཡིན་པ་དེ་ཁོ་ན་སྤངས་པ་ཡིན་ཏེ། ད་ནི་ཡང་མི་སྐྱེའི་འཇིག་རྟེན་པས་སྤངས་པ་གང་ཡིན་པ་དེ་ནི་ཡང་སྐྱེའོ་སྙམ་དུ་དགོངས་པ་ཡིན་ནོ། །སློབ་པ་ལ་བག་ཡོད་པ་ལ་ཞེས་བྱ་བ་རྒྱས་པར་འབྱུང་བ་ནི་དགྲ་བཅོམ་པ་ཉིད་ལས་ཡོངས་སུ་ཉམས་པ་མེད་དོ་ཞེས་བྱ་བའི་ཁུངས་མདོའི་ཚིག་
[218b]
[218b.1]གཉིས་པ་ཡིན་ཏེ། འདིའི་དོན་ནི་སློབ་པ་ལ་བག་ཡོད་པར་བྱ་བའི་ཕྱིར་སློབ་པས་བག་ཡོད་པར་བྱའོ་ཞེས་བག་ཡོད་པའི་ལས་སྟོན་པར་མཛད་པ་འདི་ཡིན་ནོ། །སློབ་པ་ལ་ཡང་འཕགས་པའི་ཤེས་རབ་ཀྱིས་སྤངས་པ་ཡོད་པ་མ་ཡིན་ནམ། ཇི་ལྟར་ན་དེ་ལ་བག་ཡོད་པ་ལ་བག་ཡོད་པར་བྱར་
[218b.2]ཡོད་ཅེ་ན། འདི་ལྟར་འདིས་ནི་འབྲས་བུའི་ཁྱད་པར་བ་ཡང་ཐོབ་པར་བྱ་དགོས་ལ། དེ་ལ་སྤངས་པ་འཇིག་རྟེན་པའི་ལམ་གྱིས་བྱས་པ་ཡང་ཡོད་པས་སོ། །འདིར་བྱེ་བྲག་ཏུ་སྨྲ་བ་དག་ན་རེ་མདོ་ལས། ཀུན་དགའ་བོ་དགྲ་བཅོམ་པ་ལ་ཡང་རྙེད་པ་དང་བཀུར་སྟིས་བར་ཆད་བྱེད་པ་ཡིན་པར་ང་
[218b.3]སྨྲའོ་ཞེས་འབྱུང་བའི་ཕྱིར་དགྲ་བཅོམ་པ་ལ་ཡང་ཡོངས་སུ་ཉམས་པ་ཡོད་དོ་ཞེས་ཟེར་ན་དེའི་ཕྱིར། ཀུན་དགའ་བོ་དགྲ་བཅོམ་པ་ལ་ཡང་ཞེས་བྱ་བ་རྒྱས་པར་མདོ་འདི་ལས་མཐོང་བའི་ཆོས་ལ་བདེ་བར་གནས་པ་ཙམ་ཁོ་ན་ལས་ཡོངས་སུ་ཉམས་པར་འགྱུར་བར་གསུངས་པར་ཟད་དེ། ཞེས་
[218b.4]འབྱུང་བའི་བར་འདི་སྨོས་སོ།། །།བམ་པོ་ལྔ་བཅུ་གཅིག་པ། ཇི་ལྟ་ཞེ་ན། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགྲ་བཅོམ་པ་ལ་ཡང་རྙེད་པ་དང་བཀུར་སྟིས་བར་ཆད་བྱེད་པ་ཡིན་པར་ང་སྨྲའོ། །ཚེ་དང་ལྡན་པ་
[218b.5]ཀུན་དགའ་བོས་གསོལ་པ། བཅོམ་ལྡན་འདས་དེ་ཅིའི་སླད་དུ་འདི་སྐད་ཅེས་ཀུན་དགའ་བོ་དགྲ་བཅོམ་པ་ལ་ཡང་རྙེད་པ་དང་བཀུར་སྟིས་བར་ཆད་བྱེད་པ་ཡིན་པར་ང་སྨྲའོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་མ་ཐོབ་པ་ཐོབ་པར་བྱ་བ་དང་། མ་རྟོགས་
[218b.6]པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བ་ལ་བར་ཆད་བྱེད་པ་ནི་མ་ཡིན་པ་ཉིད་དོ། །འོན་ཀྱང་འདིས་ལྷག་པའི་སེམས་ལས་བྱུང་བ་མཐོང་བའི་ཆོས་ལ་བདེ་བར་གནས་པ་བཞི་པོ་ཐོབ་པ་གང་དག་ཡིན་པ་དེ་གང་ཡང་རུང་བ་ཞིག་ལས་འདི་ཡོངས་སུ་ཉམས་
[218b.7]པར་འགྱུར་བར་ང་སྨྲ་སྟེ། དེ་ཡང་འདྲེས་པར་གནས་པ་ཡིན་ནོ། །གཅིག་པུ་མ་འདྲེས་པ་བག་ཡོད་པ་བརྟུན་པར་གནས་པ་འདིས་སེམས་ཀྱི་རྣམ་པར་གྲོལ་བ་ལུས་ཀྱིས་མངོན་དུ་བྱས་པ་གང་ཡིན་པ་དེ་ལས་ནི་རྣམ་གྲངས་གང་གིས་ཀྱང་ཡོངས་སུ་ཉམས་པར་འགྱུར་བར་ང་མི་སྨྲའོ། །
[219a]
[219a.1]ཀུན་དགའ་བོ་དེ་ལྟ་བས་ན་ཁྱོད་ཀྱིས་འདི་ལྟར་སློབ་པར་བྱ་སྟེ། རྙེད་པ་དང་བཀུར་སྟི་གང་ཡིན་པ་དེ་ཟིལ་གྱིས་གནོན་པར་བྱའི། རྙེད་པ་དང་བཀུར་སྟི་བྱུང་བ་ལ་སེམས་ཀུན་ནས་དཀྲིས་ཏེ་མི་འདུག་པ་དེ་ལྟར་ཀུན་དགའ་བོ་ཁྱོད་ཀྱིས་བསླབ་པར་བྱའོ་ཞེས་གསུངས་པ་ཡིན་ནོ། །གལ་
[219a.2]ཏེ་བྱེ་བྲག་ཏུ་སྨྲ་བ་ན་རེ་མི་གཡོ་བ་ཞེས་ཁྱད་པར་དུ་བྱས་པའི་ཕྱིར་རྣམ་པར་གྲོལ་བ་དུས་དང་སྦྱོར་བ་ལ་ཡོངས་སུ་ཉམས་པ་ཡོད་དོ་ཞེས་ཟེར་ན་དེའི་ཕྱིར་སྨྲས་པ། གལ་ཏེ་དུས་དང་སྦྱོར་བ་ལ་ཡོད་དོ་ཞེ་ན། ཁོ་བོ་ཅག་ཀྱང་དེ་སྐད་དུ་དུས་དང་སྦྱོར་བ་ལ་ཡོངས་སུ་ཉམས་པ་ཡོད་དོ་ཞེས་ཟེར་རོ། །དེ་དཔྱད་པར་བྱ་
[219a.3]སྟེ། རྣམ་པར་གྲོལ་བ་དུས་དང་སྦྱོར་བ་དེ་ནི་དཔྱད་པར་བྱ་བ་ཡིན་ནོ། །ཇི་ལྟ་ཞེ་ན། སྨྲས་པ་ཅི་རྣམ་པར་གྲོལ་བ་དུས་དང་སྦྱོར་བ་དགྲ་བཅོམ་པ་ཉིད་ཡིན་ནམ། འོན་ཏེ་རྣམ་པར་གྲོལ་བ་དུས་དང་སྦྱོར་བ་འཇིག་རྟེན་པའི་བསམ་གཏན་དག་ཁོ་ན་ཡིན་ཞེས་བྱ་བ་ཡིན་ནོ། །ཅིའི་ཕྱིར་དེ་ལྟར་དོགས་པར་བྱེད་ཅེ་ན།
[219a.4]བསམ་གཏན་དངོས་གཞིའི་ཏིང་ངེ་འཛིན་ཞེས་བྱ་བ་ལ་སོགས་པ་སྨོས་ཏེ། བསམ་གཏན་ཉིད་ཏིང་ངེ་འཛིན་ཡིན་པས་བསམ་གཏན་གྱི་ཏིང་ངེ་འཛིན་ནོ། །དངོས་གཞི་སྨོས་པ་ནི་ལམ་སླ་བ་རྣམས་ཀྱི་མཆོག་ཡིན་པའི་ཕྱིར་རོ། །དུས་སུ་མངོན་སུམ་དུ་འགྱུར་བའི་ཕྱིར་རོ་ཞེས་བྱ་བ་ནི་སྒྲ་མེད་པ་
[219a.5]ལ་སོགས་པའི་དུས་ལ་ལར་མངོན་སུམ་དུ་འགྱུར་བའི་ཕྱིར་ཏེ། དུས་ལས་བྱུང་བས་ན་རྣམ་པར་གྲོལ་བ་དུས་དང་སྦྱོར་བ་ཞེས་ཀྱང་བྱའོ། །ཡང་དང་ཡང་དུ་བཙལ་བར་བྱ་བ་ཡིན་པའི་ཕྱིར་ཕངས་པ་ཞེས་བྱ་བ་ནི་ཉམས་ཤིང་ཉམས་ན་འདོད་པར་བྱ་བ་ཡིན་པའི་ཕྱིར་ཏེ། དོན་དུ་གཉེར་བར་བྱ་བ་ཡིན་
[219a.6]པའི་ཕྱིར་རོ་ཞེས་བྱ་བའི་ཐ་ཚིག་གོ། །གཞན་དག་ན་རེ་རོ་མྱང་བར་བྱ་བ་ཡིན་པའི་ཕྱིར་ཞེས་ཟེར་རོ་ཞེས་བྱ་བ་ནི་བཙུན་པ་དགའ་ལྡན་ཡིན་ཏེ། ཟག་པ་དང་བཅས་པ་ཉིད་ཀྱིས་རོ་མྱང་བ་དང་མཚུངས་པར་ལྡན་པའི་བསམ་གཏན་དང་ལྡན་པའི་ཕྱིར་ཕངས་པ་ཡིན་ནོ་སྙམ་དུ་བསམས་པ་ཡིན་ནོ། །
[219a.7]དགྲ་བཅོམ་པ་ཉིད་ཀྱི་རྣམ་པར་གྲོལ་བ་ཞེས་བྱ་བ་རྒྱས་པར་འབྱུང་བ་ནི་དགྲ་བཅོམ་པ་ཉིད་རྣམ་པར་གྲོལ་བ་ཡིན་པས་ན་དགྲ་བཅོམ་པ་ཉིད་ཀྱི་རྣམ་པར་གྲོལ་བ་སྟེ། ཐོབ་པའི་ཚུལ་གྱིས་རྟག་ཏུ་རྗེས་སུ་འབྲེལ་པའི་ཕྱིར་རོ། །དུས་དང་སྦྱོར་བ་ཡིན་པར་ཡང་མི་རུང་ཞེས་བྱ་བ་འདིས་ནི་རྣམ་
[219b]
[219b.1]པར་གྲོལ་བ་དུས་དང་སྦྱོར་བ་ལས་དགྲ་བཅོམ་པ་ཉིད་ཀྱི་རྣམ་པར་གྲོལ་བ་བཟློག་སྟེ་སྟོན་ཏོ། །ཡང་དོན་དུ་གཉེར་བར་བྱ་བ་མ་ཡིན་པའི་ཕྱིར་ཕངས་པ་ཡང་མ་ཡིན་ནོ་ཞེས་བྱ་བ་འདིས་ནི་ཕངས་པ་ལས་བཟློག་སྟེ། དགྲ་བཅོམ་པ་ཉིད་ཀྱི་རྣམ་པར་གྲོལ་བ་ཕངས་པ་མ་ཡིན་ནོ་ཞེས་སྟོན་པར་བྱེད་དོ། །རྟག་ཏུ་རྗེས་སུ་
[219b.2]འབྲེལ་པ་ཉིད་དུ་ཡོད་པས་དོན་དུ་གཉེར་བར་བྱ་བ་མ་ཡིན་པའི་ཕྱིར་ཕངས་པ་མ་ཡིན་ནོ་ཞེས་བྱ་བའི་ཐ་ཚིག་གོ། །ལྷག་པའི་སེམས་ལས་བྱུང་བ་དག་ཁོ་ན་ལས་ཞེས་བྱ་བ་ནི་ལྷག་པའི་སེམས་ལ་ཡོད་པས་ན་ལྷག་པའི་སེམས་ལས་བྱུང་བ་སྟེ། མཐོང་བའི་ཆོས་ལ་བདེ་བར་གནས་པ་དག་ཡིན་ནོ། །ཅིའི་ཕྱིར་དེ་
[219b.3]དག་ཁོ་ན་ལས་ཡོངས་སུ་ཉམས་པར་གསུངས་ཤེ་ན། ལྷག་པའི་སེམས་ལས་བྱུང་བ་མཐོང་བའི་ཆོས་ལ་བདེ་བར་གནས་པ་བཞི་པོ་ཐོབ་པ་གང་དག་ཡིན་པ་དེ་གང་ཡང་རུང་བ་ཞིག་ལས་འདི་ཡོངས་སུ་ཉམས་པར་འགྱུར་བར་ང་སྨྲའོ་ཞེས་འབྱུང་བའི་ཕྱིར་རོ། །གལ་ཏེ་རྣམ་པར་གྲོལ་བ་
[219b.4]དུས་དང་སྦྱོར་བའི་མཚན་ཉིད་ཀྱི་དགྲ་བཅོམ་པ་ཉིད་ལས་ཡོངས་སུ་ཉམས་པ་ཞིག་སྲིད་པར་གྱུར་ན། དེ་ཅིའི་ཕྱིར་དེ་དག་ཁོ་ན་ལས་ཡོངས་སུ་ཉམས་པར་འགྱུར་རོ་ཞེས་གསུངས་པར་འགྱུར་ཏེ། དེ་དག་ཁོ་ན་ལས་ཡོངས་སུ་ཉམས་པར་འགྱུར་རོ་ཞེས་གསུངས་པར་མི་འགྱུར་རོ་ཞེས་བྱ་བའི་ཐ་
[219b.5]ཚིག་གོ། །དབང་ཉམས་པའི་ཕྱིར་ཞེས་བྱ་བ་ནི་ཏིང་ངེ་འཛིན་མངོན་དུ་འགྱུར་བའི་དབང་ཉམས་པའི་ཕྱིར་རོ་ཞེས་བྱ་བའི་དོན་ཏོ། །དེ་ནི་ཡོངས་སུ་ཉམས་པར་མི་འགྱུར་བའི་ཆོས་ཅན་ཡིན་ཞེས་བྱ་བ་ནི་མདོ་ལས་ཡོངས་སུ་ཉམས་པར་མི་འགྱུར་བའི་ཆོས་ཅན་ལས་གཞན་ཡིན་པར་འབྱུང་སྟེ།
[219b.6]སློབ་པ་བཅོ་བརྒྱད་ཆེར་བཤད་ནས། བཀའ་སྩལ་པ། མི་སློབ་པ་དགུ་གང་ཞེ་ན། ཡོངས་སུ་ཉམས་པའི་ཆོས་ཅན་དང་། ཡོངས་སུ་ཉམས་པར་མི་འགྱུར་བའི་ཆོས་ཅན་དང་། འཆི་བར་སེམས་པའི་ཆོས་ཅན་དང་། རྗེས་སུ་བསྲུང་བའི་ཆོས་ཅན་དང་། གནས་པ་ལས་མི་བསྐྱོད་པ་
[219b.7]དང་། རྟོགས་པའི་སྐལ་བ་ཅན་དང་། མི་གཡོ་བའི་ཆོས་ཅན་དང་། ཤེས་རབ་ཀྱིས་རྣམ་པར་གྲོལ་བ་དང་། གཉི་གའི་ཆ་ལས་རྣམ་པར་གྲོལ་བ་སྟེ། འདི་དག་ནི་མི་སློབ་པ་དགུ་ཞེས་བྱའོ་ཞེས་གསུངས་སོ། །དེ་ལ་གང་ཞིག་མཐོང་བའི་ཆོས་ལ་བདེ་བར་གནས་པ་དག་ལས་ཡོངས་སུ་
[220a]
[220a.1]ཉམས་པར་འགྱུར་བ་དེ་ནི་ཡོངས་སུ་ཉམས་པའི་ཆོས་ཅན་ཡིན་ནོ། །གང་ཞིག་དེ་དག་ཉིད་ལས་ཡོངས་སུ་ཉམས་པར་མི་འགྱུར་བ་དེ་ནི་ཡོངས་སུ་ཉམས་པར་མི་འགྱུར་བའི་ཆོས་ཅན་ཡིན་ནོ། །དེ་བཞིན་དུ་འཆི་བར་སེམས་པའི་ཆོས་ཅན་ལ་སོགས་པ་ལ་ཡང་སྦྱར་བར་བྱའོ། །ཇི་ལྟ་
[220a.2]ཞེ་ན། གང་ཞིག་ཏིང་ངེ་འཛིན་ཉམས་པའི་འཇིགས་པས་བདག་ཉིད་འཆི་བར་སེམས་པ་དེ་ནི་འཆི་བར་སེམས་པའི་ཆོས་ཅན་ནོ། །གང་ཞིག་ཡོན་ཏན་གྱི་ཁྱད་པར་ཅུང་ཟད་ཅིག་རྗེས་སུ་བསྲུང་བ་དེ་ནི་རྗེས་སུ་བསྲུང་བའི་ཆོས་ཅན་ནོ། །གང་ཞིག་ཡོན་ཏན་གང་ཁོ་ན་ལ་གནས་པ་དེ་ལས་རྗེས་སུ་
[220a.3]མ་བསྲུངས་ཀྱང་མི་གཡོ་བ་དེ་ནི་གནས་པ་ལས་མི་བསྐྱོད་པ་ཡིན་ནོ། །གང་ཞིག་གང་དུ་རྟོགས་པར་བྱེད་ཅིང་ཡོན་ཏན་གྱི་ཁྱད་པར་སྐྱེད་པར་བྱེད་པ་ཞེས་བྱ་བའི་ཐ་ཚིག་སྟེ། དེ་ནི་རྟོགས་པའི་སྐལ་བ་ཅན་ནོ། །གང་ཞིག་བྱུང་བ་དག་ལས་ཡོངས་སུ་ཉམས་པར་མི་འགྱུར་བ་དེ་ནི་མི་གཡོ་
[220a.4]བའི་ཆོས་ཅན་ནོ། །ཁྱད་པར་ཅི་ཡོད་ཅེ་ན་ཞེས་བྱ་བ་ནི་ཡོངས་སུ་ཉམས་པར་མི་འགྱུར་བའི་ཆོས་ཅན་ལ་སོགས་པ་གསུམ་ཆར་ཡང་ཡོངས་སུ་མི་ཉམས་པ་དང་ལྡན་པའི་ཕྱིར་ཁྱད་པར་མ་མཐོང་ནས་འདྲི་བ་ཡིན་ནོ། །སྦྱངས་པ་ལས་གྱུར་པ་མ་ཡིན་ཞེས་བྱ་བ་ནི་རང་བཞིན་གྱིས་དབང་
[220a.5]པོ་རྣོན་པོ་ཡིན་གྱི། དབང་པོ་སྦྱངས་པས་ཐོབ་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལས་གཡོ་བར་འགྱུར་བ་ཡིན་ཞེས་བྱ་བ་ནི་ཡོན་ཏན་གྱི་ཁྱད་པར་དེ་ལས་ཞེས་བྱ་བའི་དོན་ཏོ། །འདི་ནི་ཁྱད་པར་ཡིན་པར་མངོན་ནོ་ཞེས་བྱ་བ་ནི་སློབ་དཔོན་རང་གི་གཞུང་ལུགས་སྟོན་པ་ཡིན་ནོ། །གལ་
[220a.6]ཏེ་བྱེ་བྲག་ཏུ་སྨྲ་བ་ན་རེ་ཚེ་དང་ལྡན་པ་གནག་ཚོགས་ཅན་དགྲ་བཅོམ་པ་ཉིད་ལས་ཡོངས་སུ་ཉམས་པ་མ་ཡིན་ནམ་ཞེས་དེ་སྐད་དུ་སྨྲ་བར་འགྱུར་བས་དེའི་ལན་བརྩམ་པར་བྱ་སྟེ། ཚེ་དང་ལྡན་པ་གནག་ཚོགས་ཅན་ཞེས་བྱ་བ་རྒྱས་པར་སྨོས་སོ། །སློབ་པར་གྱུར་པ་ཞེས་བྱ་བ་ནི་རེ་ཞིག་དགྲ་
[220a.7]བཅོམ་པ་མ་ཡིན་པའོ། །ལུས་དང་སྲོག་ལ་མི་ལྟ་བའི་རྒྱུས་མཚོན་གྱིས་འདེབས་པར་བྱེད་ཅེས་བྱ་བ་ནི་མཚོན་གྱིས་སྣུན་པར་བྱེད་པའོ། །འཆི་བའི་དུས་ཁོ་ནར་དགྲ་བཅོམ་པ་ཉིད་ཐོབ་པ་ནི་མཚོན་གྱིས་བཏབ་པའི་འོག་ཏུ་ཞེས་བྱ་བའི་ཐ་ཚིག་སྟེ། མཚོན་གྱིས་བཏབ་པ་དེ་ཉིད་ཀྱིས་
[220b]
[220b.1]ཡོངས་སུ་མྱ་ངན་ལས་འདས་པར་གྱུར་ཏོ། །བཅུ་ལས་འཕྲོས་པ་ལས་ཀྱང་ཞེས་བྱ་བ་ནི་བཅུ་ལས་འཕྲོས་པ་ཞེས་བྱ་བའི་མདོ་ལས་སོ། །ཅི་ཞིག་གསུངས་ཤེ་ན། བསྐྱེད་པར་བྱ་བའི་ཆོས་ནི་གཅིག་སྟེ་ཞེས་བྱ་བ་སྨོས་སོ། །གང་ཡིན་ཞེ་ན། སེམས་རྣམ་པར་གྲོལ་བ་དུས་དང་སྦྱོར་བས་ཡིད་དུ་
[220b.2]འོང་བ་ཡིན་ནོ་ཞེས་བྱ་བ་སྨོས་ཏེ། མཐོང་བའི་ཆོས་ལ་བདེ་བར་གནས་པའོ་སྙམ་དུ་དགོངས་པ་ཡིན་ནོ། །མངོན་སུམ་དུ་བྱ་བའི་ཆོས་ནི་གཅིག་སྟེ། གང་ཞེ་ན། སེམས་རྣམ་པར་གྲོལ་བ་མི་གཡོ་བ་ཡིན་ནོ་ཞེས་བྱ་བ་སྨོས་ཏེ། དགྲ་བཅོམ་པ་ཉིད་དོ་སྙམ་དུ་དགོངས་པ་ཡིན་ནོ། །རྣམ་པར་
[220b.3]གྲོལ་བ་མི་གཡོ་བའི་མཚན་ཉིད་ཀྱི་དགྲ་བཅོམ་པ་ཉིད་ལོགས་ཤིག་ཏུ་སྨོས་པའི་ཕྱིར་སེམས་རྣམ་པར་གྲོལ་བ་ཡིད་དུ་འོང་བ་ནི་དགྲ་བཅོམ་པ་ཉིད་ཀྱི་ངོ་བོ་ཉིད་མ་ཡིན་པར་གསུངས་སོ་སྙམ་དུ་བསམས་པ་ཡིན་ནོ། །བྱེ་བྲག་ཏུ་སྨྲ་བ་དག་དགྲ་བཅོམ་པ་རྣམ་པ་གཉིས་ཡོད་པའི་ཕྱིར་ལོགས་ཤིག་ཏུ་
[220b.4]སྨོས་པར་ཟད་དོ་ཞེས་སྨྲ་བར་འགྱུར་བའི་གོ་སྐབས་མཐོང་ནས་ཡང་། གལ་ཏེ་ཞེས་བྱ་བ་རྒྱས་པར་སྨོས་ཏེ། གལ་ཏེ་སེམས་རྣམ་པར་གྲོལ་བ་དུས་དང་སྦྱོར་བ་པ་ཡིད་དུ་འོང་བ་དགྲ་བཅོམ་པ་ཉིད་ཁོ་ན་ཡིན་པར་གྱུར་ན་ཅིའི་ཕྱིར་མདོ་གཞན་ལས་མ་ཡིན་གྱི། བཅུ་ཚན་དེ་ཁོ་ན་ལས་མངོན་
[220b.5]སུམ་དུ་བྱ་བའི་ཆོས་ནི་གཅིག་སྟེ། སེམས་རྣམ་པར་གྲོལ་བ་ནི་མི་གཡོ་བའོ་ཞེས་དགྲ་བཅོམ་པ་ཉིད་ལས་གཉིས་སུ་སྨོས་པར་འགྱུར། མི་འགྱུར་བ་ཁོ་ནའོ་ཞེས་བྱ་བའི་ཐ་ཚིག་སྟེ། འདི་སྐད་དུ་མངོན་སུམ་དུ་བྱ་བའི་ཆོས་ནི་གཅིག་སྟེ། སེམས་རྣམ་པར་གྲོལ་བ་ཡིན་ནོ་ཞེས་བཤད་
[220b.6]པར་འགྱུར་རོ། །གལ་ཏེ་ཁྱོད་དགྲ་བཅོམ་པ་ཉིད་རྣམ་པ་གཉིས་ཡོད་པས་དེའི་ཕྱིར་གཅིག་ནི་བསྐྱེད་པར་བྱ་བ་ཡིན་ནོ། །གཉིས་པ་ནི་མངོན་སུམ་དུ་བྱ་བ་ཡིན་ནོ་ཞེས་ཚིག་གི་བྱེ་བྲག་ཏུ་བཤད་པ་ཡིན་ནོ་ཞེས་ཟེར་ན། འདིར་སྨྲས་པ། དགྲ་བཅོམ་པ་ཉིད་བསྐྱེད་པར་བྱ་བ་ཡིན་པར་ནི་
[220b.7]གང་དུ་ཡང་མ་གསུངས་སོ། །འོ་ན་ཅི་ཞེ་ན་མདོ་དེ་དང་དེ་ལས་མངོན་སུམ་དུ་བྱ་བ་ཡིན་པར་གསུངས་སོ། །ཁས་བླངས་ཏེ་ཡང་བརྗོད་པར་བྱ་སྟེ། དབང་པོ་རྟུལ་པོས་བསྡུས་པའི་དགྲ་བཅོམ་པ་ཉིད་བསྐྱེད་པར་བྱ་བ་ཡིན་ནོ་ཞེ་ན། ཡང་འདིས་ཅི་ཞིག་ཤེས་པར་བྱས་ཤིང་བསྟན་པ་ཡིན།
[221a]
[221a.1]རེ་ཞིག་གལ་ཏེ་བསྐྱེད་པར་བྱ་བར་ནུས་པ་ཡིན་ནོ་ཞེས་བྱ་བ་འདི་ཤེས་པར་བྱས་པ་ཡིན་ནོ་ཞེ་ན་ནི་གཞན་དབང་པོ་རྣོན་པོས་བསྡུས་པའི་དགྲ་བཅོམ་པ་ཉིད་ཀྱང་ནུས་སོ། །དེ་ལྟ་ཡིན་ན་ནི་མདོ་ལས་འདི་སྐད་དུ། བསྐྱེད་པར་བྱ་བའི་ཆོས་ནི་གཅིག་སྟེ། སེམས་རྣམ་པར་
[221a.2]གྲོལ་བའོ་ཞེས་བརྗོད་དགོས་པར་འགྱུར་རོ། །འོན་ཏེ་བསྐྱེད་པར་འོས་པ་ཡིན་ནོ་ཞེས་བྱ་བ་འདི་ཤེས་པར་བྱས་པ་ཡིན་ནོ་ཞེ་ན་ནི་གཞན་དབང་པོ་རྣོན་པོས་བསྡུས་པའི་དགྲ་བཅོམ་པ་ཉིད་ཆེས་ཤིན་ཏུ་འོས་པ་ཡིན་ཏེ། དེ་ནི་མི་གཡོ་བའི་ཕྱིར་ཤིན་ཏུ་བསྐྱེད་པར་བྱ་བར་འོས་སོ་སྙམ་དུ་བསམས་
[221a.3]པ་ཡིན་ནོ། །འོ་ན་དུས་ཀྱིས་རྣམ་པར་གྲོལ་བ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་རྣམ་པར་གྲོལ་བ་དུས་དང་སྦྱོར་བ་དགྲ་བཅོམ་པ་ཉིད་ཡིན་ན་ནི་དེ་ལྟ་ན་དེ་དང་ལྡན་པའི་ཕྱིར་དུས་ཀྱིས་རྣམ་པར་གྲོལ་བའི་དགྲ་བཅོམ་པ་ཞེས་བྱར་རུང་ངོ་སྙམ་དུ་བསམས་པ་ཡིན་ནོ། །ཏིང་ངེ་འཛིན་མངོན་སུམ་དུ་
[221a.4]འགྱུར་བ་དུས་ལ་ལྟོས་པ་ཡིན་ནོ་ཞེས་བྱ་བ་ནི་འདི་ལྟར་འདིའི་ཏིང་ངེ་འཛིན་ནི་ཟག་པ་དང་བཅས་པའམ་ཟག་པ་མེད་པ་ཡང་རུང་ནད་མེད་པ་དང་། ཡུལ་གྱི་ཁྱད་པར་ལ་སོགས་པའི་མཚན་ཉིད་ཀྱི་དུས་ལ་ལྟོས་སོ། །ཆོས་མངོན་པ་ལས་ཀྱང་ཞེས་བྱ་བ་རྒྱས་པར་འབྱུང་ལ། འདིར་དཔེར་
[221a.5]བརྗོད་པ་ནི་འདོད་པའི་འདོད་ཆགས་ཀྱི་ཕྲ་རྒྱས་མ་སྤངས་ཞེས་བྱ་བ་འདི་ཡིན་ནོ། །དེ་ལ་ཡང་ཚུལ་བཞིན་མ་ཡིན་པའི་ཡིད་ལ་བྱེད་པ་ཞེས་བྱ་བ་འདི་ཡང་དཔེར་བརྗོད་པ་ཡིན་ནོ། །གལ་ཏེ་དེ་ལྟ་བུ་ནི་ཡོངས་སུ་ཚང་བ་ལས་སྐྱེས་པ་ཡིན་ནོ་ཞེ་ན་ཞེས་བྱ་བ་ནི་གལ་ཏེ་དེ་ལྟ་བུ་ནི་ཉོན་མོངས་པའི་
[221a.6]རྒྱུ་ཡོངས་སུ་ཚང་བ་ལས་སྐྱེ་བ་ཡིན་ནོ། །ཡུལ་གྱི་སྟོབས་ཁོ་ན་ལས་སྐྱེ་བ་ནི་ཉོན་མོངས་པའི་རྒྱུ་ཡོངས་སུ་མ་ཚང་བ་ཡིན་ནོ་སྙམ་དུ་སེམས་ན། དེ་ནི་རིགས་པ་མ་ཡིན་ནོ། །ཅིའི་ཕྱིར་ཞེ་ན། རྒྱུ་ཡོངས་སུ་མ་ཚང་བར་གོ་གང་ཞིག་སྐྱེ་ཞེས་བྱ་བ་སྨོས་ཏེ། སྐྱེ་བ་དང་ལྡན་པ་གང་ཞིག་རྒྱུ་ཡོངས་སུ་
[221a.7]མ་ཚང་བར་སྐྱེ། རྒྱུ་དང་རྐྱེན་ཚོགས་པ་ཇི་སྙེད་ཅིག་གིས་འབྲས་བུ་སྐྱེད་པར་གྲགས་པ་དེ་ནི་དེའི་ཕྱོགས་གཅིག་མ་ཚང་ན་དེ་སྐྱེད་པར་མི་འགྱུར་ཏེ། དཔེར་ན་མིག་དང་གཟུགས་ལ་སོགས་པ་དང་ཡིད་ལ་བྱེད་པ་ཚོགས་པས་མིག་གི་རྣམ་པར་ཤེས་པ་སྐྱེད་པར་གྲགས་པ་དེ་ནི་དེ་ལས་གང་
[221b]
[221b.1]ཡང་རུང་བ་ཞིག་མ་ཚང་ན་དེ་སྐྱེད་པར་མི་འགྱུར་བ་ལྟ་བུའོ། །དེ་ལྟ་བས་ན་དེ་ནི་གྱི་ནའོ། །དེ་ལྟ་བུ་ཞེས་བྱ་བ་ནི་དེའི་རྣམ་པ་འམ་དེའི་ངོ་བོ་ཉིད་དོ། །འོན་ཏེ་མ་སྐྱེས་ཞེས་བྱ་བ་ནི་གཉེན་པོའོ། །དེའི་ས་བོན་གྱི་ཆོས་ཉིད་ཅེས་བྱ་བ་ནི་ས་བོན་གྱི་ངོ་བོ་ཉིད་ཅེས་བྱ་བའི་ཐ་ཚིག་སྟེ། དེ་རྩ་ནས་
[221b.2]མ་བཏོན་ཅིང་དྲུངས་མ་ཕྱུང་ན་ཇི་ལྟར་ཟག་པ་ཟད་པ་ཡིན། ཁྱོད་དེ་ལྟ་ཡིན་དུ་ཟད་མོད་ཅེས་ཟེར་ན། དེའི་ཕྱིར་ཟག་པ་མ་ཟད་ན་ཡང་ཇི་ལྟར་དགྲ་བཅོམ་པ་ཉིད་ཡིན་ཞེས་བྱ་བ་སྨོས་ཏེ། དེ་ལྟར་དཔྱོད་པ་ཞེས་བྱ་བ་ནི་དྲན་པ་དང་ལྡན་པར་དཔྱོད་པ་ཞེས་བྱ་བའི་ཐ་ཚིག་སྟེ། དེ་མ་ཐག་ཏུ་དྲན་པ་
[221b.3]སྨོས་པའི་ཕྱིར་རོ། །དེ་ནི་སློབ་པ་ཡིན་ནོ་ཞེས་ཟེར་བ་འདི་ཡོངས་སུ་སྤང་བའི་ཕྱིར་ཡོངས་སུ་ཉམས་པར་སྨྲ་བ་དེ་ཉིད་ཀྱིས་དེ་ནི་དེ་ལས་དགྲ་བཅོམ་པ་ཁོ་ན་ཡིན་པར་བསྟན་ཞེས་བྱ་བ་སྨོས་སོ། །ཇི་ལྟར་བསྟན་པ་ཡིན་ཞེ་ན། ཡུན་རིང་པོ་ནས་ཞེས་བྱ་བ་རྒྱས་པར་སྨོས་སོ། །ཡོངས་སུ་མི་ཉམས་
[221b.4]པར་སྨྲ་བ་དག་འདི་སྐད་དུ། སེམས་དབེེན་པ་ལ་གཞོལ་བ་ཡིན་ཞེས་བྱ་བ་ནས་མྱ་ངན་ལས་འདའ་བ་ལ་བབ་པ་ཞེས་བྱ་བའི་བར་འདི་ནི་སློབ་པ་ཡིན་ནོ་ཞེས་སྨྲ་བར་འགྱུར་བའི་གོ་སྐབས་འདི་ཡོངས་སུ་སྤངས་པའི་ཕྱིར་ཡང་ཡོངས་སུ་ཉམས་པར་སྨ་བས་མདོ་གཞན་ལས་དེ་ནི་དགྲ་
[221b.5]བཅོམ་པའི་སྟོབས་ཡིན་པར་ཡང་གསུངས་ཞེས་བྱ་བ་སྨྲས་སོ། །ཇི་སྐད་དུ་ཞེ་ན། བཙུན་པ་དགེ་སློང་དགྲ་བཅོམ་པ་ཟག་པ་ཟད་པའི་སྟོབས་དུ་ཞིག་མཆིས། ཤཱ་རིའི་བུ་དགེ་སློང་དགྲ་བཅོམ་པའི་སྟོབས་ནི་བརྒྱད་དེ། ཡུན་རིང་པོ་ནས་སེམས་དབེེན་པ་ལ་གཞོལ་བ་ཡིན་ཞེས་བྱ་བ་ནས། མྱ་ངན་
[221b.6]ལས་འདས་པ་ལ་བབ་པ་ཡིན་ཞེས་བྱ་བའི་བར་དང་། འདིས་ནི་འདོད་པ་རྣམས་སོལ་བའི་ཕུང་པོ་ལྟ་བུར་མཐོང་བ་ཡིན་ཏེ། ཇི་ལྟར་འདོད་པ་རྣམས་ཤེས་ཤིང་འདོད་པ་རྣམས་མཐོང་བ་འདིས་འདོད་པ་ལ་འདོད་པའི་འདུན་པ་དང་། འདོད་པའི་ཆགས་པ་ནས་རྒྱས་པར་འདོད་པ་ལ་ལྷག་པར་ཞེན་
[221b.7]པའི་བར་གང་ཡིན་པ་དེ་ལ་འདིའི་སེམས་ཡོངས་སུ་གཏུགས་ཏེ་མི་གནས་པ་དེ་ལྟར་ཡང་འདིས་འདོད་པ་རྣམས་མཐོང་བ་ཡིན་ནོ་ཞེས་རྒྱས་པར་འབྱུང་ངོ་། །གཞན་ཡང་སོལ་བའི་ཕུང་པོ་ལྟ་བུའི་མདོ་དེ་ཉིད་ལས་བསིལ་བར་གྱུར་ཅིང་གསལ་བར་གྱུར་པ་ཞེས་གསུངས་པའི་ཕྱིར་དགྲ་
[222a]
[222a.1]བཅོམ་པ་ཁོ་ན་ཡིན་པར་བསྟན་ཏོ། །དེ་སྐད་དུ་འབྱུང་བ་ཡང་ཡོད་མོད་ཀྱི་ཞེས་བྱ་བ་ནི་སོལ་བའི་ཕུང་པོ་ལྟ་བུའི་མདོ་ལས་དགྲ་བཅོམ་པ་ཡིན་པར་བསྟན་ཏོ་ཞེས་གང་སྨྲས་པའོ། །ཇི་སྲིད་དུ་སྤྱོད་པ་ལེགས་པར་མ་རྟོགས་པ་ཞེས་བྱ་བ་ནི་བསོད་སྙོམས་ལ་སོགས་པ་སྤྱོད་
[222a.2]པའོ། །སློབ་པའི་གནས་སྐབས་ཀྱི་དབང་དུ་མཛད་ནས་དེ་སྐད་གསུངས་པའི་ཕྱིར་ཉེས་པ་མེད་དོ་ཞེས་བྱ་བ་ནི་བརྒྱ་ལ་རེས་འགའ་ཞིག་དྲན་པ་ཉམས་པ་ལས་སྡིག་པ་མི་དགེ་བའི་རྣམ་པར་རྟོག་པ་དག་སྐྱེ་བར་འགྱུར་རོ་ཞེས་གསུངས་པ་གང་ཡིན་པ་དེ་ནི་སློབ་པའི་གནས་སྐབས་ཀྱི་དབང་དུ་
[222a.3]མཛད་ནས་གསུངས་ཀྱི་དགྲ་བཅོམ་པ་ཉིད་ཀྱི་གནས་སྐབས་ནི་མ་ཡིན་ནོ། །ཡུན་རིང་པོ་ནས་སེམས་དབེན་པ་ལ་གཞོལ་བ་ཞེས་གསུངས་པ་གང་ཡིན་པ་དེ་ནི་སློབ་པ་ལ་ཡང་སྲིད་ལ་དགྲ་བཅོམ་པ་ནི་ཕུལ་དུ་ཕྱིན་པ་ཡིན་པས་ཁྱད་པར་ཡོད་དོ། །ཟག་པའི་གནས་ལྟ་བུའི་ཆོས་ཐམས་
[222a.4]ཅད་ལས་བསིལ་བར་གྱུར་ཅིང་བསལ་བར་གྱུར་པ་ཞེས་གསུངས་པ་གང་ཡིན་པ་དེ་ཡང་སློབ་པའི་གནས་སྐབས་ཀྱི་དབང་དུ་མཛད་པ་ཡིན་ཏེ། ཟག་པའི་གནས་ལྟ་བུའི་ཆོས་འདོད་པ་ན་སྤྱོད་པ་ལས་བསིལ་བར་གྱུར་པ་ཞེས་གསུངས་པའི་ཕྱིར་རོ། །སློབ་དཔོན་ནི་དགྲ་བཅོམ་པ་ཉིད་
[222a.5]ཀྱི་གནས་སྐབས་ཀྱི་དབང་དུ་མཛད་ནས་དེ་སྐད་དུ་གསུངས་ཀྱང་ཉེས་པ་མེད་དོ་སྙམ་དུ་དགོངས་སོ། །སྦྱོར་བ་མི་སྲིད་པའི་ཕྱིར་མཐོང་བའི་ལམ་ལ་ནི་མ་ཡིན་ནོ་ཞེས་བྱ་བ་ནི་མཐོང་བའི་ལམ་ནི་སྐད་ཅིག་བཅོ་ལྔ་ཡིན་ཏེ། དེ་ལ་དབང་པོ་འཕོ་བར་སྦྱོར་བའི་གོ་སྐབས་མེད་དོ། །ལ་ལ་ནི་སོ་སོའི་
[222a.6]སྐྱེ་བོའི་གནས་སྐབས་ན་དབང་པོ་རྣམས་འཕོའོ་ཞེས་བྱ་བ་ཅི་རིགས་པའི་རྣམ་པ་དང་ལྡན་པའི་ལམ་གྱིས་དབང་པོ་རྣམས་འཕོའམ། འོན་ཏེ་ཞི་བ་ལ་སོགས་པའི་རྣམ་པ་དང་ལྡན་པས་ཡིན་ཞེ་ན། ཁྱད་པར་དུ་མ་བྱས་པའི་ཕྱིར་གཉི་གར་ཡང་སྲིད་དོ་སྙམ་བྱེད་དེ། འདི་ལྟར་དོན་འདི་ནི་སློབ་
[222a.7]དཔོན་གྱིས་འཕགས་པ་རྣམས་ཀྱི་དབང་པོ་ནི་ཟག་པ་དང་བཅས་པའི་ལམ་གྱིས་འཕོ་བ་མེད་དོ་ཞེས་འཆད་པར་འགྱུར་བས་འབགས་པ་རྣམས་ཀྱི་ཞེས་ཁྱད་པར་དུ་མཛད་པའི་ཕྱིར་རོ། །ཅི་ནས་ཀྱང་བདག་གི་དབང་པོ་དག་རྣོན་པོར་འགྱུར་བར་བྱའོ་ཞེས་སྦྱོར་བར་བསམས་ནས། འཇིག་
[222b]
[222b.1]རྟེན་པའམ་འཇིག་རྟེན་ལས་འདས་པའི་ལམ་གོམས་པར་བྱེད་པ་ན་བར་ཆད་མེད་པ་དང་རྣམ་པར་གྲོལ་བའི་ལམ་གྱི་རིམ་གྱིས་དབང་པོ་དག་འཕོའོ་ཞེས་བྱ་བར་རིག་པར་བྱའོ། །ལ་ལ་ནི་དད་པས་མོས་པའི་གནས་སྐབས་ནའོ་ཞེས་བྱ་བ་འདིར་མི་སློབ་པ་མ་སྨོས་པ་ནི་སློབ་པ་དང་སོ་སོའི་
[222b.2]སྐྱེ་བོའི་གནས་སྐབས་ཡིན་པའི་ཕྱིར་ཏེ། མི་སློབ་པ་ཡང་དབང་པོ་དག་འཕོའོ་ཞེས་བྱ་བར་ཁོང་དུ་ཆུད་པར་བྱའོ། །ཇི་ལྟར་ན་མི་གཡོ་བའི་ཆོས་ཅན་མཐོང་བའི་ཆོས་ལ་བདེ་བར་གནས་པ་དག་ལས་ཡོངས་སུ་ཉམས་པར་འགྱུར་ཞེས་བྱ་བ་ནི་འདི་དབང་པོ་རྣོ་བའི་ཕྱིར་མཐོང་བའི་ཆོས་
[222b.3]ལ་བདེ་བར་གནས་པ་དག་ལས་ཀྱང་ཡོངས་སུ་ཉམས་པ་མི་སྲིད་ན་རྣམ་པར་གྲོལ་བ་མི་གཡོ་བ་ལས་ལྟ་སྨོས་ཀྱང་ཅི་དགོས་ཏེ་མི་སྲིད་དོ་སྙམ་ནས་འདྲི་བ་ཡིན་ནོ། །སངས་རྒྱས་ལ་ནི་ཉེ་བར་སྤྱད་པ་ལས་ཡོངས་སུ་ཉམས་པ་ཁོ་ན་མངའ་ཞེས་བྱ་བ་ནི་གདུལ་བའི་དོན་ལ་ཞུགས་པའི་
[222b.4]ཕྱིར་མཐོང་བའི་ཆོས་ལ་བདེ་བར་གནས་པ་དག་ཉེ་བར་མི་སྤྱོད་དེ་མངོན་དུ་མི་མཛད་དོ་ཞེས་བྱ་བའི་དོན་ཏོ། །དེ་དང་མ་ཐོབ་པ་ལས་ཡོངས་སུ་ཉམས་པ་ཡང་ཡོད་ཅེས་བྱ་བ་ནི་མི་གཡོ་བའི་ཆོས་ཅན་ལ་ནི་ཇི་ཞིག་གིས་བརྩལ་བས་ཉེ་བར་སྤྱད་པ་ལ་ཡོངས་སུ་ཉམས་པ་དེ་དང་། གང་ཟག་
[222b.5]ཁྱད་པར་ཅན་གྱི་ཆོས་མ་ཐོབ་པའི་ཕྱིར་མ་ཐོབ་པ་ལས་ཡོངས་སུ་ཉམས་པ་ཡང་ཡོད་དེ། འདི་ལྟར་མི་གཡོ་བའི་ཆོས་ཅན་ལ་ཡང་ལ་ལས་ཉན་ཐོས་ཆེན་པོ་འཕགས་པ་ཤཱ་རིའི་བུ་དང་མཽད་གལ་ལ་སོགས་པའི་རབ་ཀྱི་མཐའ་པ་ལ་སོགས་པའི་ཆོས་དང་། རང་བྱུང་གི་ཆོས་ཀྱང་
[222b.6]ཁ་ཅིག་མ་ཐོབ་ལ་ཉན་ཐོས་ཆེན་པོས་ཀྱང་རང་བྱུང་གི་ཆོས་ཁྱད་པར་ཅན་ཁ་ཅིག་ཐོབ་པ་དང་མི་ལྡན་ནོ་ཞེས་བྱ་བ་ལ་སོགས་པ་ཡིན་ནོ། །དགྲ་བཅོམ་པ་གཞན་ལ་ཞེས་བྱ་བ་ནི་ཡོངས་སུ་ཉམས་པའི་ཆོས་ཅན་ལ་སོགས་པ་དབང་པོ་རྟུལ་པོ་ལའོ། །ཐོབ་པ་ལས་ཡོངས་སུ་ཉམས་
[222b.7]པ་ཡང་ཡོད་དོ་ཞེས་བྱ་བ་ལ། ཡང་ཞེས་བྱ་བའི་སྒྲས་ནི་སྔར་བཤད་པའི་ཡོངས་སུ་ཉམས་པ་ཡང་ཡོད་དོ། །མི་གཡོ་བའི་ཆོས་ཅན་ཉེ་བར་སྤྱད་པ་ལས་ཡོངས་སུ་ཉམས་པར་འབྱུང་བའི་ཕྱིར་མདོ་དང་མི་འགལ་ལོ་ཞེས་བྱ་བ་ནི། འདིས་མཐོང་བའི་ཆོས་ལ་ཞེས་བྱ་བ་ནས་གང་
[223a]
[223a.1]ཡང་རུང་བ་ཞིག་ལས་འདི་ཡོངས་སུ་ཉམས་པར་འགྱུར་བར་ནི་ང་སྨྲ་ཞེས་བྱ་བའི་བར་འབྱུང་བ་གང་ཡིན་པའི་མདོ་དེ་དང་མི་འགལ་ལོ། །དགྲ་བཅོམ་པ་དྲུག་ཅར་གྱི་རྣམ་པར་གྲོལ་བ་ཡང་མི་གཡོ་བ་ཡིན་ནོ་ཞེས་བཤད་པ་དང་བྱེ་བྲག་ཏུ་སྨྲ་བ་ན་རེ་གལ་ཏེ་དགྲ་བཅོམ་པ་ཐམས་
[223a.2]ཅད་ཀྱི་རྣམ་པར་གྲོལ་བ་ཟག་པ་མེད་པ་མི་གཡོ་བ་ཉིད་ཡིན་ན། ཅིའི་ཕྱིར་དུས་དང་མི་སྦྱོར་བར་རྣམ་པར་གྲོལ་བ་ཁོ་ན་མི་གཡོ་བའི་ཆོས་ཅན་དུ་རྣམ་པར་འཇོག་ལ་གཞན་དག་ནི་མ་ཡིན་ཞེས་སྨྲ་བར་འགྱུར་ཏེ། དེའི་ཕྱིར་ཡོངས་སུ་མི་ཉམས་པར་སྨྲ་བ་ན་རེ་ཐམས་ཅད་ཀྱི་རྣམ་པར་གྲོལ་བ་ཟག་པ་
[223a.3]མེད་པ་མི་གཡོ་བ་ཡིན་ལ་ཞེས་བྱ་བ་འདི་སྨོས་ཏེ། དེ་ཡང་བདེན་ན། མི་གཡོ་བའི་ཆོས་ཅན་དུ་ཇི་ལྟར་རྣམ་པར་བཞག་པ་ནི་དེ་བཞིན་དུ་བཤད་ཟིན་ཅེས་བྱ་བ་ནི་མཐོང་བའི་ཆོས་ལ་བདེ་བར་གནས་པ་དག་ལས་ནི་ལ་ལ་རྙེད་པ་དང་བཀུར་སྟིས་གཡེན་སྤྱོ་བའི་ཉེས་པས་དབང་ཉམས་པའི་ཕྱིར་
[223a.4]ཡོངས་སུ་ཉམས་པར་འགྱུར་ཏེ། དབང་པོ་རྟུལ་པོ་གང་ཡིན་པའོ། །ལ་ལ་ཡོངས་སུ་ཉམས་པར་མི་འགྱུར་ཏེ། དབང་པོ་རྣོན་པོ་གང་ཡིན་པ་སྟེ། དེ་ཉིད་མི་གཡོ་བའི་ཆོས་ཅན་དུ་གཞག་གོ་ཞེས་བྱ་བ་ཡིན་ནོ། །གང་གི་ཕྱིར་དབང་པོ་རྟུལ་པོ་མཐོང་བའི་ཆོས་ལ་བདེ་བར་གནས་པ་དག་
[223a.5]ལས་རྙེད་པ་དང་བཀུར་སྟིས་གཡེན་སྤྱོ་བའི་ཉེས་པས་ཡོངས་སུ་ཉམས་པར་འགྱུར་གྱི་དབང་པོ་རྣོན་པོ་ནི་མ་ཡིན་པ་དེའི་ཕྱིར་ཇི་ལྟར་ན་མི་གཡོ་བའི་ཆོས་ཅན་མཐོང་བའི་ཆོས་ལ་བདེ་བར་གནས་པ་དག་ལས་ཡོངས་སུ་ཉམས་པར་འགྱུར་ཞེས་བྱ་བ་འདི་ནི་ཀླན་ཀར་མི་རུང་ངོ་ཞེས་ཟེར་རོ། །ཡང་
[223a.6]ན་འདི་ནི་སྦྱར་བ་གཞན་ཡིན་ཏེ། གོང་དུ་ནི་མི་གཡོ་བའི་ཆོས་ཅན་མཐོང་བའི་ཆོས་ལ་བདེ་བར་གནས་པ་དག་ལས་ཡོངས་སུ་ཉམས་པ་མེད་དོ་ཞེས་བཤད་དོ། །མདོ་ལས་ནི་ཁྱད་པར་དུ་མ་སྨོས་པས་གང་ལ་རྣམ་པར་གྲོལ་བ་མི་གཡོ་བ་ཡོད་པ་དེ་ཡང་མཐོང་བའི་ཆོས་ལ་བདེ་བར་གནས་
[223a.7]པ་དག་ལས་ཡོངས་སུ་ཉམས་པ་སྐད་དུ་འབྱུང་བས་དེའི་ཕྱིར། ཐམས་ཅད་ཀྱི་རྣམ་པར་གྲོལ་བ་ཟག་པ་མེད་པ་ནི་མི་གཡོ་བ་ཡིན་ཞེས་བྱ་བ་འདི་བརྗོད་དེ། དེ་ཁོ་ནས་མི་གཡོ་བའི་ཆོས་ཅན་དུ་རྣམ་པར་གཞག་པ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །དེ་ཉིད་ཀྱི་ཕྱིར་མི་གཡོ་བའི་ཆོས་
[223b]
[223b.1]ཅན་དུ་ཇི་ལྟར་རྣམ་པར་གཞག་པ་ནི་དེ་བཞིན་དུ་བཤད་ཟིན་པས་དེའི་ཕྱིར་མདོ་སྡེ་ལ་བརྟེན་ནས་ཇི་ལྟར་མི་གཡོ་བའི་ཆོས་ཅན་མཐོང་བའི་ཆོས་ལ་བདེ་བར་གནས་པ་དག་ལས་ཡོངས་སུ་ཉམས་པར་འགྱུར་ཞེས་སྨྲས་པ་གང་ཡིན་པ་འདི་ནི་ཀླན་ཀར་མི་རུང་ངོ་ཞེས་ཟེར་རོ། །ཆུང་ངུ་ཞེས་བྱ་བ་ནི་
[223b.2]ཞན་པའོ། །དེ་ལྟ་མ་ཡིན་ན་ཚངས་པར་སྤྱད་པ་ཡིད་བརྟན་དུ་མི་རུང་བར་འགྱུར་རོ་ཞེས་བྱ་བ་ནི་གལ་ཏེ་དགྲ་བཅོམ་པ་ཉིད་ལས་ཡོངས་སུ་ཉམས་པ་ཡང་སྐྱེ་བར་འགྱུར་ན། ཚངས་སྤྱོད་འདི་ལ་ལེགས་སྤྱད་ཅིང་། །རྣམ་ལ་འང་ལེགས་པར་བསྒོམས་པ་ནི། །ཇི་ལྟར་ནད་དང་བྲལ་བ་བཞིན། །
[223b.3]ཆེ་ཟད་པ་ལས་དགའ་བར་འགྱུར། །ཞེས་བྱ་བ་ཡིད་བརྟན་དུ་རུང་བ་དེ་ལྟ་བུར་མི་འགྱུར་རོ། །བྱ་བ་མ་ཡིན་དེ་མི་བྱེད། །ཅེས་བྱ་བ་ནི་མི་ཚངས་པར་སྤྱོད་པ་ལ་སོགས་པའི་མཚན་ཉིད་དོ། །རྩལ་པོ་ཆེ་འགྲེད་པ་རྡེག་མི་འཆའ་བ་བཞིན་ནོ་ཞེས་བྱ་བ་ནི་དཔེར་ན་རྩལ་པོ་ཆེ་འགྲེད་ན་མཐུས་བདག་
[223b.4]ཉིད་གཟུང་བའི་ཕྱིར་རྡེག་འཆའ་བར་མི་འགྱུར་བ་དེ་བཞིན་དུ་འཕགས་པ་འབྲས་བུ་ལས་ཡོངས་སུ་ཉམས་པ་ཡང་འབྲས་བུ་དེ་མ་ཐོབ་པར་མི་འཆི་འོ། །རྩལ་པོ་ཆེ་ཞེས་སྨོས་པ་ནི་རྩལ་ཞན་པ་མ་ཡིན་ནོ། །གཞན་དག་ན་རེ་རྩལ་པོ་ཆེ་ནི་སྟོབས་དང་ལྡན་པ་ཡིན་ནོ་ཞེས་ཟེར་རོ། །ཇི་ལྟར་
[223b.5]གོམས་པར་བྱས་པ་ཡིན་ཞེ་ན། སློབ་པ་དང་མི་སློབ་པའི་ལམ་དག་གིས་བརྟེན་པོར་བྱས་པའི་ཕྱིར་རོ་ཞེས་བྱ་བ་སྨོས་སོ། །སྦྱོར་བའི་ལམ་ནི་ཐམས་ཅད་དུ་གཅིག་ཁོ་ན་ཡིན་ནོ་ཞེས་བྱ་བ་ནི་མི་གཡོ་བ་རྟོགས་པར་བྱ་བ་དང་། མཐོང་བས་ཐོབ་པར་བྱེད་པ་ལའོ། །འཕགས་པ་རྣམས་
[223b.6]ཀྱི་དབང་པོ་ནི་ཟག་པ་དང་བཅས་པའི་ལམ་གྱིས་འཕོ་བ་མེད་དོ་ཞེས་བྱ་བ་ནི་འཕགས་པའི་དབང་པོ་འཕོ་བར་བརྗོད་པར་འདོད་པའི་ཕྱིར་རོ། །དེ་ལྟ་མ་ཡིན་ན། ལ་ལ་ནི་སོ་སོའི་སྐྱེ་བོའི་གནས་སྐབས་ན་དབང་པོ་རྣམས་འཕོའོ་ཞེས་བྱ་བ་དེ་འགལ་བར་འགྱུར་རོ། །གཞན་དུ་ནི་མ་
[223b.7]ཡིན་ཏེ། ཡོངས་སུ་ཉམས་པ་མི་སྲིད་པའི་ཕྱིར་རོ་ཞེས་བྱ་བ་ནི་ཡོངས་སུ་ཉམས་པས་འཇིགས་པའི་ཕྱིར་དབང་པོ་འཕོ་བར་འདོད་ན་གཞན་འདོད་པ་ན་སྤྱོད་པའི་ལྷའི་རིས་དྲུག་དང་། གཟུགས་དང་གཟུགས་མེད་པའི་ཁམས་དག་ན་ནི་ཡོངས་སུ་ཉམས་པ་མེད་དོ། །འཕགས་པ་
[224a]
[224a.1]ཁམས་གོང་མར་སྐྱེས་པ་ནི་དབང་པོ་དག་ཀྱང་མི་འཕོ་ལ། ཇི་ལྟར་ཡང་ཡོངས་སུ་ཉམས་པར་མི་འགྱུར་རོ་ཞེས་བཤད་པ་ཡིན་ཏེ། འདི་ལ་གཏན་ཚིགས་ནི་དུས་གཞན་གྱི་བར་དུ་ཡོངས་སུ་བསྒོམས་པས་དབང་པོ་རྣམས་ཆེས་ཡོངས་སུ་སྨིན་པའི་ཕྱིར་དང་།
[224a.2]རྟེན་ཁྱད་པར་ཅན་རྙེད་པའི་ཕྱིར་རོ་ཞེས་བཤད་པ་ཡིན་ནོ། །ཡང་ཅིའི་ཕྱིར་འདོད་པ་ན་སྤྱོད་པའི་ལྷ་དག་གི་ནང་ན་ཡོངས་སུ་ཉམས་པ་མེད་ཅེ་ན། སྔོན་ཡུལ་ཤིན་ཏུ་རྒྱ་ཆེན་པོ་དག་ལས་ཡིད་བྱུང་སྟེ། དེས་ན་བདེན་པ་རྣམས་མཐོང་བར་གྱུར་པ་གང་ཡིན་པ་དེ་དག་ཇི་ལྟར་དེ་དག་ཉིད་ལ་དམིགས་
[224a.3]ནས་ཡོངས་སུ་ཉམས་པར་འགྱུར་ཏེ། གདོན་མི་ཟ་བར་དབང་པོ་རྣོན་པོ་དག་ཡིན་ནོ་སྙམ་དུ་བསམས་པ་ཡིན་ནོ། །མི་སློབ་པ་དགུ་དག་ལ་བརྟེན་ཏེ་ཞེས་བྱ་བ་ནི་དེའི་འབྲས་བུ་ས་དགུས་བསྡུས་པ་ཉིད་སྲིད་པའི་ཕྱིར་རོ། །འབྲས་བུ་དང་འབྲས་བུ་ཁྱད་པར་ཅན་ཞེས་བྱ་བ་ལ། འབྲས་
[224a.4]བུ་ནི་ལན་ཅིག་ཕྱིར་མི་འོང་བའི་འབྲས་བུའོ། །འབྲས་བུ་ཁྱད་པར་ཅན་ནི་སྤོང་བའི་སྦྱོར་བ་དང་། བར་ཆད་མེད་པ་དང་། རྣམ་པར་གྲོལ་བ་དང་། ཁྱད་པར་གྱི་ལམ་གྱི་མཚན་ཉིད་བསམ་གཏན་དང་པོ་ལ་སོགས་པའོ། །ལམ་གྱི་འབྲས་བུ་ཁོ་ན་འཐོབ་པར་འགྱུར་ཞེས་བྱ་བ་ནི་འདོད་པའི་
[224a.5]ཁམས་ལས་འདོད་ཆགས་དང་བྲལ་བ་ཙམ་གྱིས་བསྡུས་པའོ། །ཕྱིར་མི་འོང་བའི་འབྲས་བུ་གཟུགས་མེད་པས་བསྡུས་པ་ནི་མེད་དོ་ཞེས་བྱ་བ་ནི། མདོ་ལས། ཐ་མའི་ཆ་དང་མཐུན་པ་ལྔ་སྤངས་པའི་ཕྱིར་ཕྱིར་མི་འོང་བ་ཡིན་ནོ་ཞེས་འབྱུང་བའི་ཕྱིར་དང་། དེ་ན་ཡང་མཐོང་བའི་ལམ་
[224a.6]མེད་པའི་ཕྱིར་ཏེ། དེ་མེད་པ་ནི་འདོད་པའི་ཁམས་ལ་མི་དམིགས་པའི་ཕྱིར་རོ་ཞེས་དེ་ནི་བཤད་ཟིན་ཏོ། །མི་གཡོ་བའི་ཆོས་ཅན་རྣམ་པ་གཉིས་ཏེ་ཞེས་བྱ་བ་ནི་མདོ་ལས་འབྱུང་བའི་ཕྱིར་རོ། །སངས་རྒྱས་གཉིས་ནི་མི་གཡོ་བའི་བྱེ་བྲག་ཁོ་ན་ཡིན་ཞེས་བྱ་བ་ནི་མི་གཡོ་བའི་ཆོས་ཅན་
[224a.7]དབང་པོ་ཆུང་ངུ་དང་། འབྲིང་དང་། ཆེན་པོའི་བྱེ་བྲག་གིས་རྣམ་པ་གསུམ་དུ་དབྱེ་སྟེ། ཉན་ཐོས་ཀྱིས་མི་གཡོ་བའི་ཆོས་ཅན་ནི་དབང་པོ་ཆེན་པོའི་ཆུང་ངུ་ཡིན་ནོ། །རང་སངས་རྒྱས་ནི་དབང་པོ་ཆེན་པོའི་འབྲིང་ཡིན་ནོ། །ཡང་དག་པར་རྫོགས་པའི་སངས་རྒྱས་ནི་ཆེན་པོའི་ཆེན་པོ་ཡིན་ནོ། །
[224b]
[224b.1]ཆུང་ངུའི་ཆུང་ངུ་ལ་སོགས་པོ་དབང་པོ་རྣམ་པ་དགུའི་བྱེ་བྲག་གིས་ཞེས་བྱ་བ་ནི་ཡོངས་སུ་ཉམས་པའི་ཆོས་ཅན་དབང་པོ་ཆུང་ངུའི་ཆུང་ངུ་ཡིན་པ་ནས་བཅོམ་ལྡན་འདས་དབང་པོ་ཆེན་པོའི་ཆེན་པོ་ཡིན་པའི་བར་རོ། །བདུན་ཡིན་ཏེ་ཞེས་བྱ་བ་ནི། རང་སངས་རྒྱས་དང་ཡང་དག་པར་རྫོགས་པའི་
[224b.2]སངས་རྒྱས་དག་ནི་གཉི་གའི་ཆ་ལས་རྣམ་པར་གྲོལ་བ་ཁོ་ནས་བསྡུས་པའི་ཕྱིར་རོ། །དང་པོ་ཉིད་ནས་ཞེས་བྱ་བ་རྒྱས་པར་འབྱུང་བ་ནི་དང་པོ་སོ་སོའི་སྐྱེ་བོའི་གནས་སྐབས་ཉིད་ན་གཞན་གྱི་དྲིང་འཇོག་པས་གཞན་ལས་དྲན་པ་ཉེ་བར་གཞག་པ་ལ་སོགས་པའི་ཆོས་ཐོས་ནས་ཕྱིས་དོན་རྣམས་ལ་སྦྱོར་
[224b.3]བའི་ཕྱིར་ཏེ། བསམ་པ་དང་བསྒོམ་པ་སྟོན་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་བཞིན་དུ་སྔོན་སོ་སོའི་སྐྱོ་བོའི་གནས་སྐབས་ཉིད་ན་ཤེས་རབ་ཀྱིས་གསུང་རབ་ཡན་ལག་བཅུ་གཉིས་པའི་ཆོས་ཀྱི་རྗེས་སུ་འབྲང་བས་བདག་ཉིད་ཀྱིས་བྱང་ཆུབ་ཀྱི་ཕྱོགས་དང་མཐུན་པ་ལ་སོགས་པའི་ཆོས་ཀྱི་
[224b.4]རྗེས་སུ་འབྲང་ཞིང་དོན་རྣམས་ལ་སྦྱོར་བའི་ཕྱིར་ཏེ། བསམ་པ་དང་བསྒོམ་པ་བསྟེན་པའི་ཕྱིར་རོ། །དེ་ལྟར་ན་སྦྱོར་བ་ལས་ནི་དད་པ་དང་། ཆོས་ཀྱི་རྗེས་སུ་འབྲང་བ་དག་ཡིན་ནོ། །དད་པས་མོས་པ་དང་ཤེས་རབ་ལྷག་པའི་སྒོ་ནས་ཞེས་བྱ་བ་ནི་དད་པས་མོས་པ་ལྷག་པ་དང་། ཤེས་རབ་ལྷག་པའི་སྒོ་
[224b.5]ནས་སོ། །དད་པས་མོས་པ་ནི་དད་པས་མོས་པ་སྟེ། དེ་ལྷག་པའི་ཕྱིར། དབང་པོ་རྟུལ་པོ་ཉིད་ཡིན་ལ། ཤེས་རབ་ལྷག་པའི་ཕྱིར་དབང་པོ་རྣོན་པོ་ཉིད་ཡིན་ནོ། །རྣམ་པར་གྲོལ་བ་ལས་ནི་ཞེས་བྱ་བ་ནི་ཉོན་མོངས་པ་ལས་རྣམ་པར་གྲོལ་བ་ལས་སོ། །ཤེས་རབ་ཀྱིས་རྣམ་པར་གྲོལ་བ་ཞེས་བྱ་
[224b.6]བ་ནི་ཤེས་རབ་ཀྱིས་ཉོན་མོངས་པ་ལས་རྣམ་པར་གྲོལ་བའི་ཕྱིར་རོ། །སྙོམས་པར་འཇུག་པ་དང་རྣམ་པར་གྲོལ་བ་ལས་ནི་ཞེས་བྱ་བ་ནི་སྙོམས་པར་འཇུག་པ་དང་རྣམ་པར་གྲོལ་བ་ལས་སོ། །དེ་ལ་དད་པའི་རྗེས་སུ་འབྲང་བ་ལ་དབང་པོའི་སྒོ་ནས་ནི་ཞེས་བྱ་བ་རྒྱས་པར་འབྱུང་བ་ལ། དད་པས་
[224b.7]རྗེས་སུ་འབྲང་བ་འདི་དག་ཇི་ལྟར་བགྲང་བ་དེ་བཞིན་དུ་གཞུང་ཇི་ལྟ་བ་རབ་ཏུ་བསྟན་པར་བྱ་སྟེ། དབང་པོ་ཆུང་ངུ་དང་། འབྲིང་དང་། ཆེན་པོའི་ཕྱིར་དབང་པོའི་སྒོ་ནས་ནི་གསུམ་མོ། །འདིར་ཡང་འདི་ལྟར་ཁོང་དུ་ཆུད་པར་བྱ་སྟེ། དད་པས་རྗེས་སུ་འབྲང་བ་ཐམས་ཅད་དབང་པོ་རྟུལ་པོ་ཁོ་
[225a]
[225a.1]ན་ཡིན་མོད་ཀྱི། འོན་ཀྱང་ཤིན་ཏུ་རྟུལ་བ་དང་ཆེས་ཤིན་ཏུ་རྟུལ་བར་གནས་པའི་ཕྱིར་འདི་དག་ལ་དབང་པོ་ཆུང་ངུ་དང་། འབྲིང་དང་། ཆེན་པོ་ཞེས་བྱ་བ་ཁྱད་པར་རྣམ་པ་གསུམ་ཡོད་དོ། །རིགས་ཀྱི་སྒོ་ནས་ནི་ལྔའོ། །ཇི་ལྟ་ཞེ་ན། ཡོངས་སུ་ཉམས་པའི་ཆོས་ཅན་གྱི་
[225a.2]རིགས་ནས་རྟོགས་པའི་སྐལ་བ་ཅན་གྱི་རིགས་ཞེས་བྱ་བའི་བར་ལྔ་ཡིན་ནོ། །ཡང་རིགས་དང་དབང་པོའི་བྱེ་བྲག་གིས་བརྒྱད་དུ་གྱུར་པ་དེ་དག་རེ་རེ་ཞིང་ལམ་གྱི་སྒོ་ནས་ནི་བཅོ་ལྔ་ཡིན་ནོ། །ཇི་ལྟ་ཞེ་ན་བཟོད་པ་བརྒྱད་དང་ཤེས་པ་བདུན་ལ་གནས་པའོ་ཞེས་བྱ་བ་སྨོས་ཏེ། མཐོང་བའི་ལམ་
[225a.3]ལ་སྐད་ཅིག་བཅོ་ལྔ་སྟེ། སྡུག་བསྔལ་ལ་ཆོས་ཤེས་པའི་བཟོད་པ་ནས་ལམ་ལ་རྗེས་སུ་ཤེས་པའི་བཟོད་པའི་བར་བཟོད་པ་བརྒྱད་དང་། སྡུག་བསྔལ་ལ་ཆོས་ཤེས་པ་ནས་འགོག་པ་ལ་རྗེས་སུ་ཤེས་པའི་ཕྱིར་ཤེས་པ་བདུན་ནོ། །ལམ་ལ་རྗེས་སུ་ཤེས་པ་ནི་བསྒོམ་པའི་ལམ་གྱིས་བསྡུས་
[225a.4]པའི་ཕྱིར་རོ། །བརྒྱད་དང་བདུན་ནི་བཅོ་ལྔར་འགྱུར་ཏེ། དེ་ལྟ་བུ་དེ་ལ་གནས་པ་བཅོ་ལྔ་ཡིན་ནོ། །དེ་ལྟར་ལམ་གྱི་སྒོ་ནས་རྣམ་པ་བཅོ་ལྔར་ཐ་དད་པ་འདི་དག་ཡང་རེ་རེ་བཞིན་འདོད་ཆགས་དང་བྲལ་བའི་སྒོ་ནས་ནི་བདུན་ཅུ་རྩ་གསུམ་སྟེ། ཇི་ལྟ་ཞེ་ན། རེ་ཞིག་འདོད་པའི་ཁམས་ལ་འཆིང་བ་
[225a.5]མཐའ་དག་དང་ལྡན་པ་གཅིག་དང་། འདོད་པ་ལས་འདོད་ཆགས་དང་བྲལ་བ་རྣམ་པ་གཅིག་ལས་འདོད་ཆགས་དང་བྲལ་བ་ནས་རྣམ་པ་དགུ་ལས་འདོད་ཆགས་དང་བྲལ་བའི་བར་དང་། ཅི་ཡང་མེད་པའི་སྐྱེ་མཆེད་ལས་འདོད་ཆགས་དང་བྲལ་བ་དགུའི་བར་ཡིན་ནོ། །གོང་ན་ནི་མི་སྲིད་
[225a.6]དེ། འཇིག་རྟེན་པའི་ལམ་སྲིད་པའི་རྩེ་མོའི་གཉེན་པོ་མེད་པའི་ཕྱིར་རོ། །དེ་དག་ནི་དགུ་བརྒྱད་ནི་བདུན་ཅུ་གཉིས་ཡིན་ཏེ། སྔར་བཤད་པ་འཆིང་བ་མཐའ་དག་དང་ལྡན་པས་བསྣན་ན་བདུན་ཅུ་རྩ་གསུམ་དུ་འགྱུར་རོ། །ཡང་འདོད་ཆགས་དང་བྲལ་བའི་སྒོ་ནས་བདུན་ཅུ་རྩ་གསུམ་དུ་སོ་སོར་ཐ་དད་
[225a.7]པ་འདི་དག་རེ་རེ་ཞིང་རྟེན་གྱི་སྒོ་ནས་ནི་དགུའོ། །ཇི་ལྟ་ཞེ་ན། གླིང་གསུམ་དང་། ལྷའི་རིས་དྲུག་ཏུ་སྐྱེས་པའོ་ཞེས་བྱ་བ་སྨོས་ཏེ། གླིང་གསུམ་ནི་བྱང་གི་སྒྲ་མི་སྙན་མ་གཏོགས་པ་དག་སྟེ། བྱང་གི་སྒྲ་མི་སྙན་ན་ནི་ལམ་མེད་པའི་ཕྱིར་རོ། །ལྷའི་རིས་དྲུག་ནི་འདོད་པ་ན་སྤྱོད་པ་དག་སྟེ།
[225b]
[225b.1]དེའི་གོང་ན་མཐོང་བའི་ལམ་མེད་པའི་ཕྱིར་རོ། །དེ་རྣམས་སུ་སྐྱེས་པས་ན་འདི་དག་རེ་རེ་ཞིང་དགུ་འགྱུར་དུ་འགྱུར་རོ། །དབང་པོ་དང་རིགས་དང་། ལམ་དང་། འདོད་ཆགས་དང་བྲལ་བ་དང་། རྟེན་གྱི་སྒོ་ནས་བསྡོམས་ན་ནི་ཞེས་བྱ་བ་ནི་མཇུག་སྡུད་པར་སྨོས་པ་སྟེ། འདི་ཉིད་གཅིག་གོ་ཞེས་བྱ་བ་ནི་འགྲེལ་
[225b.2]པའི་ནང་དུ་བྲིས་པར་ཟད་དོ། །གང་ཟག་གཞན་དག་ཀྱང་ཅི་རིགས་པར་དེ་བཞིན་དུ་བརྩི་བར་བྱའོ་ཞེས་བྱ་བ་ནི་ཆོས་ཀྱི་རྗེས་སུ་འབྲང་བ་ལ་སོགས་པ་སྟེ། ཇི་ལྟར་དད་པས་རྗེས་སུ་འབྲང་བ་དབང་པོ་དང་། རིགས་དང་ལམ་དང་འདོད་ཆགས་དང་བྲལ་བ་དང་རྟེན་གྱི་སྒོ་ནས་བརྩིས་པ་དེ་ཁོ་ན་བཞིན་དུ་བརྩི་བར་
[225b.3]བྱའོ། །ཅི་རིགས་པར་ཞེས་བྱ་བ་ནི་ཆོས་ཀྱི་རྗེས་སུ་འབྲང་བ་དང་། མཐོང་བས་ཐོབ་པ་དང་། དུས་དང་མི་སྦྱོར་བར་རྣམ་པར་གྲོལ་བ་རྣམས་ལ་ནི་རིགས་ཀྱི་ཁྱད་པར་མེད་ལ། དད་པས་མོས་པ་དང་། དུས་ཀྱིས་རྣམ་པར་གྲོལ་བ་དག་ལ་ནི། རིགས་ཀྱི་ཁྱད་པར་ཡང་ཡོད་པས་ཅི་རིགས་པར་ཞེས་སྨོས་སོ། །
[225b.4]དེ་ལ་ཆོས་ཀྱི་རྗེས་སུ་འབྲང་བ་དབང་པོའི་སྒོ་ནས་ནི་གསུམ་མོ། །རིགས་ཀྱི་སྒོ་ནས་ནི་གཅིག་ཁོ་ན་སྟེ་ཁྱད་པར་མེད་དོ། །ལམ་གྱི་སྒོ་ནས་ནི་བཅོ་ལྔ་སྟེ། བཟོད་པ་བརྒྱད་དང་ཤེས་པ་བདུན་ལ་གནས་པའོ། །འདོད་ཆགས་དང་བྲལ་བའི་སྒོ་ནས་ནི་བདུན་ཅུ་རྩ་གསུམ་སྟེ། འཆིང་བ་མཐའ་དག་དང་
[225b.5]ལྡན་པ་དང་། འདོད་པ་ལས་འདོད་ཆགས་དང་བྲལ་བའི་ཕྱིར་དགུ་ནས་དེ་བཞིན་དུ་ཅི་ཡང་མེད་པའི་སྐྱེ་མཆེད་ལས་འདོད་ཆགས་དང་བྲལ་བའི་ཕྱིར་གྱི་བར་དུའོ། །རྟེན་གྱི་སྒོ་ནས་ནི་དགུ་སྟེ། གླིང་གསུམ་དང་། ལྷའི་རིས་དྲུག་ཏུ་སྐྱེས་པའོ། །དེ་བཞིན་དུ་དབང་པོ་དང་། རིགས་དང་། ལམ་
[225b.6]དང་། འདོད་ཆགས་དང་བྲལ་བ་དང་། རྟེན་གྱི་སྒོ་ནས་བསྡོམས་ན་ནི་ཉི་ཁྲི་དགུ་སྟོང་ལྔ་བརྒྱ་དྲུག་ཅུ་རྩ་ལྔར་འགྱུར་རོ། །དེ་བཞིན་དུ་དད་པས་མོས་པ་དབང་པོའི་སྒོ་ནས་ནི་གསུམ་མོ། །རིགས་ཀྱི་སྒོ་ནས་ནི་སོ་སོར་ལྔའོ། །འདོད་ཆགས་དང་བྲལ་བའི་སྒོ་ནས་ནི་སོ་སོར་བདུན་ཅུ་རྩ་གསུམ་ཁོ་ན་སྟེ་
[225b.7]སྔ་མ་བཞིན་ནོ། །རྟེན་གྱི་སྒོ་ནས་ནི་དགུ་སྟེ། གླིང་གསུམ་དང་། ལྷའི་རིས་དྲུག་ཏུ་སྐྱེས་པའོ། །དེ་བཞིན་དུ་དབང་པོ་དང་། རིགས་དང་། འདོད་ཆགས་དང་བྲལ་བ་དང་། རྟེན་གྱི་སྒོ་ནས་བསྡོམས་ན་ནི་དགུ་སྟོང་བརྒྱད་བརྒྱ་ལྔ་བཅུ་རྩ་ལྔར་འགྱུར་རོ། །འདིར་ནི་འབྲས་བུ་ལ་གནས་པ་སེམས་
[226a]
[226a.1]བཅུ་དྲུག་ཐོབ་པ་འབའ་ཞིག་གི་དབང་དུ་བྱས་པ་ཡིན་ཏེ། དེའི་ཚེ་དབང་པོ་རྟུལ་པོ་དང་། རྣོན་པོ་དག་དད་པས་མོས་པ་དང་། མཐོང་བས་ཐོབ་པ་དག་ཡིན་པས་འདིར་དེ་གཉིས་བརྗོད་པར་འདོད་པའི་ཕྱིར་རོ། །སྐལ་ལྡན་ཁྱད་པར་ཅན་ན་རེ་ལམ་གྱི་སྒོ་ནས་ནི་དགུ་ཡིན་ཏེ།
[226a.2]བསྒོམ་པའི་ལམ་ལ་གནས་པ་ཡིན་ནོ་ཞེས་ཟེར་རོ། །དེ་ནི་བསམ་པ་གང་གིས་དེ་སྐད་དུ་སྨྲས་པ་ཁོང་དུ་མ་ཆུད་དོ། །གལ་ཏེ་འདི་སྐད་དུ་ལམ་གྱི་སྒོ་ནས་ནི་ས་དང་ས་ན་དགུར་འགྱུར་རོ་སྙམ་དུ་སེམས་པར་འགྱུར་ན་ནི་འདོད་ཆགས་དང་བྲལ་བའི་སྒོ་ནས་ནི་བདུན་ཅུ་རྩ་གསུམ་སྟེ་ཞེས་བྱ་བ་དེ་དང་ཐ་མི་
[226a.3]དད་པའི་ཕྱིར་དེ་ཁོ་ན་བསྟན་པར་གྱུར་པས་རིགས་པ་ཡིན་ཏེ། ཚད་ཀྱང་དེ་ཁོ་ནར་ཟད་དོ། །འོན་ཏེ་བསྒོམ་པའི་ལམ་ཟག་པ་མེད་པ་ས་དགུ་པ་ལ་གནས་པའི་ཕྱིར་འདི་དག་དགུ་ཉིད་དུ་རྣམ་པར་འཇོག་ན་ནི། དེ་ལྟ་ཡིན་ན་ཚད་དེ་ཡང་དགུར་བསྒྱུར་བ་བྱས་ན་དེ་དག་འདི་སྙེད་དུ་འགྱུར་ཏེ། བརྒྱད་ཁྲི་
[226a.4]བརྒྱད་སྟོང་དྲུག་བརྒྱ་དགུ་བཅུ་རྩ་ལྔར་འགྱུར་ཏེ། དེ་བཞིན་དུ་འོག་མ་ཡང་བཤད་པར་བྱའོ། །གལ་ཏེ་དད་པས་མོས་པ་རྡོ་རྗེ་ལྟ་བུའི་ཏིང་ངེ་འཛིན་གྱི་བར་བཟུང་ན་ནི་དེའི་ཕྱིར་དེ་ལྟ་བུ་མ་ཡིན་པར་བརྩི་དགོས་ཏེ། དད་པས་མོས་པ་དབང་པོའི་སྒོ་ནས་ནི་གསུམ་མོ། །རིགས་ཀྱི་སྒོ་ནས་ནི་སོ་སོར་ལྔའོ། །
[226a.5]འདོད་ཆགས་དང་བྲལ་བའི་སྒོ་ནས་ནི་བདུན་ཅུ་རྩ་གསུམ་གྱི་ཐོག་ཏུ་སྲིད་པའི་རྩེ་མོའི་རྣམ་པ་བརྒྱད་ལས་འདོད་ཆགས་དང་བྲལ་བའི་ཕྱིར་བརྒྱད་ཀྱིས་བསྣན་ཏེ་བརྒྱད་ཅུ་རྩ་གཅིག་གོ། །རྟེན་གྱི་སྒོ་ནས་ནི་ཉི་ཤུ་རྩ་དགུའོ། །ཇི་ལྟ་ཞེ་ན། འདོད་པའི་ཁམས་ནི་སྐྱེ་བའི་གནས་དགུ་དང་། གཟུགས་
[226a.6]ཀྱི་ཁམས་ན་གནས་བཅུ་དྲུག་དང་། གཟུགས་མེད་པ་བཞིའོ། །དེ་བཞིན་དུ་དབང་པོ་དང་། རིགས་དང་། འདོད་ཆགས་དང་བྲལ་བ་དང་། རྟེན་གྱི་སྒོ་ནས་བསྡོམས་ན་ནི་སུམ་ཁྲི་ལྔ་སྟོང་ཉིས་བརྒྱ་སུམ་ཅུ་རྩ་ལྔའོ། །མཐོང་བས་ཐོབ་པ་ལ་རིགས་ཀྱི་བྱེ་བྲག་ནི་མེད་དོ། །དབང་པོ་དང་། འདོད་ཆགས་
[226a.7]དང་བྲལ་བ་དང་། རྟེན་གྱི་སྒོ་ནས་བསྡོམས་ན་ནི་སྟོང་དགུ་བརྒྱ་བདུན་ཅུ་རྩ་གཅིག་ཏུ་འགྱུར་རོ། །གལ་ཏེ་མཐོང་བས་ཐོབ་པ་རྡོ་རྗེ་ལྟ་བུའི་ཏིང་ངེ་འཛིན་གྱི་བར་གཟུང་ན་ནི་འདི་ལྟར་བརྩི་བར་བྱ་སྟེ། དབང་པོ་དང་། འདོད་ཆགས་དང་བྲལ་བ་དང་། རྟེན་གྱི་སྒོ་ནས་བསྡོམས་ན་བདུན་སྟོང་བཞི་བཅུ་
[226b]
[226b.1]རྩ་བདུན་དུ་འགྱུར་རོ། །ལུས་ཀྱིས་མངོན་དུ་བྱེད་པ་ནི་དད་པས་མོས་པ་དང་། མཐོང་བས་ཐོབ་པའི་ནང་དུ་འདུས་པས་མི་རྩིའོ། །གལ་ཏེ་རྩི་ན་དབང་པོའི་སྒོ་ནས་ནི་གསུམ་མོ། །རིགས་ཀྱི་སྒོ་ནས་ནི་གལ་ཏེ་ལུས་ཀྱིས་མངོན་དུ་བྱེད་པ་དེ་དད་པས་མོས་པ་ཡིན་ན་ལྔའོ། །གལ་ཏེ་མཐོང་བས་ཐོབ་པ་
[226b.2]ཡིན་ན་ནི་རིགས་ཀྱི་ཁྱད་པར་མེད་དོ། །ལམ་ནི་གཉི་གའི་ཡང་དབྱེ་བ་མེད་དོ། །ཅི་ཡང་མེད་པའི་སྐྱེ་མཆེད་ལས་འདོད་ཆགས་དང་བྲལ་བའི་ཕྱིར་འདོད་ཆགས་དང་བྲལ་བའི་སྒོ་ནས་ཀྱང་ཁྱད་པར་མེད་དོ། །གལ་ཏེ་སྲིད་པའི་རྩེ་མོ་པའི་འཆིང་བ་མཐའ་དག་དང་ལྡན་པ་དང་རྣམ་པ་གཅིག་ལས་འདོད་ཆགས་དང་བྲལ་བ་
[226b.3]ནས་རྣམ་པ་བརྒྱད་ལས་འདོད་ཆགས་དང་བྲལ་བའི་བར་ཞིག་ཡིན་ན་ནི་ལམ་དང་འདོད་ཆགས་དང་བྲལ་བའི་སྒོ་ནས་ཁྱད་པར་ཡོད་མོད་ཀྱི་ལུས་ཀྱིས་མངོན་དུ་བྱེད་པ་ཉིད་ནི་ལམ་དང་འདོད་ཆགས་དང་བྲལ་བས་བྱས་པ་མ་ཡིན་པས་འདི་དེས་བྱས་པ་དེའི་ཁྱད་པར་དུ་ནི་རྣམ་པར་མི་གཞག་འོ(གོ།) །སྐལ་ལྡན་ཁྱད་
[226b.4]པར་ཅན་ན་རེ་རྟེན་གྱི་སྒོ་ནས་ནི་ཁྱད་པར་རྣམ་པ་མང་སྟེ། འདོད་པ་ན་སྤྱོད་པའི་རྟེན་ཅན་ཡིན་པ་ནས་སྲིད་པའི་རྩེ་མོའི་བར་གྱི་རྟེན་ཅན་ཡིན་པའི་ཕྱིར་རོ་ཞེས་ཟེར་ཏེ། ཇི་ལྟར་ན་ལུས་ཀྱིས་མངོན་དུ་བྱེད་པ་ནམ་མཁའ་མཐའ་ཡས་སྐྱེ་མཆེད་ལ་སོགས་པའི་རྟེན་ཅན་ཡིན། འདི་ལྟར་རིགས་པ་སྙམ་བྱེད་དེ།
[226b.5]རྟེན་གྱི་སྒོ་ནས་ནི་འདོད་པའི་ཁམས་ན་སྐྱེ་བའི་གནས་དགུ་དང་། གཟུགས་ཀྱི་ཁམས་ན་གནས་བཅུ་དྲུག་སྟེ་ཉི་ཤུ་རྩ་ལྔའོ། །འཕགས་པ་ནི་དེ་དག་ཏུ་འགོག་པའི་སྙོམས་པར་འཇུག་པ་སྐྱེད་དོ། །གལ་ཏེ་འདོད་པ་དང་གཟུགས་ཀྱི་རྟེན་ཅན་གྱི་འགོག་པའི་སྙོམས་པར་འཇུག་པའི་སྐྱེད་པ་དང་ལྡན་
[226b.6]པའི་ཕྱིར་མི་འོང་བ་ལུས་ཀྱིས་མངོན་དུ་བྱེད་པར་གྱུར་པ་དེའི་ལྡན་པ་ཙམ་དང་འབྲེལ་པའི་ཕྱིར་ཕྱིས་ཀྱང་ལུས་ཀྱིས་མངོན་དུ་བྱེད་པ་སྲིད་པའི་རྩེ་མོའི་རྟེན་ཅན་ཉིད་དུ་འདོད་ན་ནི་སྲིད་པའི་རྩེ་མོའི་རྟེན་ཅན་དང་ཉི་ཤུ་རྩ་དྲུག་ཡིན་པར་ཁོང་དུ་ཆུད་པར་བྱའོ། །དེ་བཞིན་དུ་དབང་པོ་དང་། རིགས་དང་རྟེན་གྱི་སྒོ་ནས་
[226b.7]བགྲངས་ཏེ་བརྩི་བར་བྱ་སྟེ། ཤེས་རབ་ཀྱིས་རྣམ་པར་གྲོལ་བའི་བྱེ་བྲག་ཀྱང་དབང་པོའི་སྒོ་ནས་ནི་གསུམ་མོ། ཤེས་རབ་ཀྱིས་རྣམ་པར་གྲོལ་བ་རིགས་ཀྱི་སྒོ་ནས་ནི་གལ་ཏེ་དུས་ཀྱིས་རྣམ་པར་གྲོལ་བ་ཞིག་ཡིན་ན་ལྔའོ། །འོན་ཏེ་དུས་དང་མི་སྦྱོར་བ་རྣམ་པར་གྲོལ་བ་ཞིག་ཡིན་ན་ནི་ཁྱད་པར་མེད་དོ། །
[227a]
[227a.1]གཉི་གའི་ཆ་ལས་རྣམ་པར་གྲོལ་བ་ཡང་དེ་བཞིན་དུ་སྦྱར་བར་བྱའོ། །ཤེས་རབ་དང་ཏིང་ངེ་འཛིན་གྱི་སྟོབས་དག་གིས་ཉོན་མོངས་པ་དང་རྣམ་པར་ཐར་པའི་སྒྲིབ་པ་ལས་རྣམ་པར་གྲོལ་བའི་ཕྱིར་རོ་ཞེས་བྱ་བ་ནི་ཤེས་རབ་ཀྱི་སྟོབས་ཀྱིས་ཉོན་མོངས་པའི་སྒྲིབ་པ་ལས་རྣམ་པར་
[227a.2]གྲོལ་བའི་ཕྱིར་དང་། ཏིང་ངེ་འཛིན་གྱི་སྟོབས་ཀྱིས་རྣམ་པར་ཐར་པའི་སྒྲིབ་པ་ལས་རྣམ་པར་གྲོལ་བའི་ཕྱིར་རོ། །རྣམ་པར་ཐར་པ་དག་ནི་གཟུགས་ཅན་གཟུགས་རྣམས་ལ་ལྟ་བ་ཞེས་བྱ་བ་བརྒྱད་འཆད་པར་འགྱུར་རོ། །དེ་ལ་ཉོན་མོངས་པའི་སྒྲིབ་པ་ཞེས་བྱ་བ་ནི་ཉོན་མོངས་པ་ཉིད་སྒྲིབ་པ་
[227a.3]ཡིན་ནོ། །རྣམ་པར་ཐར་པའི་སྒྲིབ་པ་ཞེས་བྱ་བ་ནི་རྣམ་པར་ཐར་པ་རྣམས་ཀྱིས་སྒྲིབ་པ་ཡིན་ཏེ། དེ་ཡང་གང་གིས་རྣམ་པར་ཐར་པ་དག་སྐྱེད་པར་མི་ནུས་པ་སྟེ། ལུས་དང་སེམས་ལས་སུ་མི་རུང་བ་ཉིད་དོ། །འདི་ལ་གང་ཞིག་ཉོན་མོངས་པ་ལྔ་སྤངས་ཏེ་ཞེས་བྱ་བ་ནི་འཇིག་ཚོགས་ལ་ལྟ་བ་ལ་
[227a.4]སོགས་པ་ཐ་མའི་ཆ་དང་མཐུན་པ་ལྔ་བཤད་པ་ཡིན་ནོ། །མི་འཕྲོགས་ཆོས་ལྡན་ཞེས་བྱ་བ་ནི་ཡོངས་སུ་མི་ཉམས་པའི་ཆོས་ཅན་ཞེས་བྱ་བའི་ཐ་ཚིག་གོ། །འབྲས་བུ་ཁོ་ན་ལས་སོ་ཞེས་བྱ་བ་རྒྱས་པར་འབྱུང་བ་ནི་དད་པས་མོས་པ་ཡིན་པའི་ཕྱིར་དབང་པོའི་སྒོ་ནས་ཡོངས་སུ་རྫོགས་པ་ཉིད་མ་ཡིན་ནོ། །
[227a.5]ལུས་ཀྱིས་མངོན་དུ་བྱེད་པ་མ་ཡིན་པའི་ཕྱིར་སྙོམས་པར་འཇུག་པའི་སྒོ་ནས་ཀྱང་མ་ཡིན་ནོ། །ཕྱིར་མི་འོང་བ་ཡིན་པའི་ཕྱིར་འབྲས་བུའི་སྒོ་ནས་ནི་ཡོངས་སུ་རྫོགས་པ་ཉིད་ཡོད་དོ། །དབང་པོ་ཁོ་ན་ལས་སོ་ཞེས་བྱ་བ་ནི་མཐོང་བས་ཐོབ་པ་ཡིན་པའི་ཕྱིར་དབང་པོའི་སྒོ་ནས་ཡོངས་སུ་རྫོགས་པ་ཉིད་ཡིན་
[227a.6]ལ། འདོད་ཆགས་དང་མ་བྲལ་བའི་ཕྱིར་འབྲས་བུའི་སྒོ་ནས་ཀྱང་མ་ཡིན་ལ། སྙོམས་པར་འཇུག་པའི་སྒོ་ནས་ཀྱང་མ་ཡིན་ཏེ། ཕྱིར་མི་འོང་བའི་འབྲས་བུ་དང་། སྙོམས་པར་འཇུག་པ་དག་མ་ཐོབ་པའི་ཕྱིར་རོ། །དེ་བཞིན་དུ་གཞན་དག་ལ་ཡང་ཅི་རིགས་པར་སྦྱར་བར་བྱའོ། །སྙོམས་པར་འཇུག་པ་ཁོ་
[227a.7]ན་དང་ཞེས་བྱ་བ་ནི་སྙོམས་པར་འཇུག་པ་ཁོ་ནའི་སྒོ་ནས་ཡོངས་སུ་རྫོགས་པ་ཉིད་ཡིན་གྱི། དབང་པོ་དང་འབྲས་བུ་དག་གི་སྒོ་ནས་ནི་མ་ཡིན་ནོ་ཞེས་བྱ་བ་དེ་ནི་མེད་དོ། །ཅིའི་ཕྱིར་ཞེ་ན། ཕྱིར་མི་འོང་བའི་འབྲས་བུ་མ་ཐོབ་པར་འགོག་པའི་སྙོམས་པར་འཇུག་པ་མེད་པས་སོ། །འབྲས་བུ་མེད་པར་སྙོམས་པར་
[227b]
[227b.1]འཇུག་པ་དང་། དབང་པོ་ལས་ཞེས་བྱ་བ་ནི་འགོག་པའི་སྙོམས་པར་འཇུག་པ་དང་དབང་པོ་ཁོ་ན་ལས་ཡོངས་སུ་རྫོགས་པ་ཉིད་ཡིན་གྱི་འབྲས་བུའི་སྒོ་ནས་ནི་མ་ཡིན་ནོ་ཞེས་བྱ་བ་དེ་ཡང་མེད་དེ། འདི་ལྟར་ཕྱིར་མི་འོང་བའི་འབྲས་བུ་མ་ཐོབ་པ་ལ་འགོག་པའི་སྙོམས་པར་འཇུག་པ་མེད་པས་སོ། །དབང་
[227b.2]པོ་དང་སྙོམས་པར་འཇུག་པ་ལས་སོ་ཞེས་བྱ་བ་ནི་དབང་པོ་རྣོ་བའི་ཕྱིར་དང་། འགོག་པའི་སྙོམས་པར་འཇུག་པ་ཐོབ་པའི་ཕྱིར་ཞེས་བྱ་བའི་ཐ་ཚིག་གོ། །དབང་པོ་ཁོ་ན་ལས་སོ་ཞེས་བྱ་བ་ནི་དུས་དང་མི་སྦྱོར་བར་རྣམ་པར་གྲོལ་བ་ཞེས་འབྱུང་བའི་ཕྱིར། འདི་དབང་པོའི་སྒོ་ནས་ནི་ཡོངས་སུ་རྫོགས་པ་ཉིད་
[227b.3]ཡིན་ལ། ཤེས་རབ་ཀྱིས་རྣམ་པར་གྲོལ་བ་ཞེས་འབྱུང་བའི་ཕྱིར་འདི་སྙོམས་པར་འཇུག་པའི་སྒོ་ནས་ཡོངས་སུ་རྫོགས་པ་ཉིད་ནི་མ་ཡིན་ཏེ། འགོག་པའི་སྙོམས་པར་འཇུག་པ་མ་ཐོབ་པ་ནི་ཤེས་རབ་ཀྱིས་རྣམ་པར་གྲོལ་བ་ཞེས་བཤད་དོ། །སྙོམས་པར་འཇུག་པ་ཁོ་ན་ལས་སོ་ཞེས་བྱ་བ་ནི་དུས་
[227b.4]ཀྱིས་རྣམ་པར་གྲོལ་བ་ཞེས་འབྱུང་བའི་ཕྱིར་འདི་དབང་པོའི་སྒོ་ནས་ཡོངས་སུ་རྫོགས་པ་ཉིད་མ་ཡིན་ནོ། །གཉི་གའི་ཆ་ལས་རྣམ་པར་གྲོལ་བ་ཞེས་འབྱུང་བའི་ཕྱིར་འདི་སྙོམས་པར་འཇུག་པའི་སྒོ་ནས་ཡོངས་སུ་རྫོགས་པ་ཉིད་ནི་ཡིན་ཏེ། འགོག་པའི་སྙོམས་པར་འཇུག་པ་ཐོབ་པ་ནི་གཉི་གའི་ཆ་
[227b.5]ལས་རྣམ་པར་གྲོལ་བ་ཞེས་བཤད་དོ། །དབང་པོ་དང་སྙོམས་པར་འཇུག་པ་དག་ལས་སོ་ཞེས་བྱ་བ་ཅི་ཞེ་ན། ཡོངས་སུ་རྫོགས་པ་ཉིད་ཡིན་ཏེ། དུས་དང་མི་སྦྱོར་བར་རྣམ་པར་གྲོལ་བའི་ཕྱིར་དབང་པོའི་སྒོ་ནས་སོ། །གཉི་གའི་ཆ་ལས་རྣམ་པར་གྲོལ་བའི་ཕྱིར་སྙོམས་པར་འཇུག་པ་ལས་སོ་
[227b.6]ཞེས་སྟོན་པར་བྱེད་དོ། །བར་ཆད་མེད་པའི་ལམ་ནི་གང་གིས་སྒྲིབ་པ་རབ་ཏུ་སྤོང་བའོ་ཞེས་བྱ་བ་ནི་མི་སྤོང་བའི་ལམ་སྲིད་པའི་ཕྱིར་ཏེ། བར་ཆད་མེད་པའི་ལམ་གང་ཞིག་གིས་དབང་པོ་འཕོ་བ་ལ་སོགས་པར་སྒྲིབ་པ་རབ་ཏུ་མི་སྤོང་བར་བྱེད་པ་དེ་ཡོད་དོ། །དེས་སྤང་བར་བྱ་བའི་སྒྲིབ་པ་ལས་ངེས་པར་
[227b.7]གྲོལ་བ་དང་པོ་ཉིད་དུ་སྐྱེ་བ་གང་ཡིན་པའོ་ཞེས་བྱ་བ་ནི་བར་ཆད་མེད་པའི་ལམ་གྱིས་སྤང་བར་བྱ་བའི་སྒྲིབ་པ་ལས་ངེས་པར་གྲོལ་བ་གང་ཡིན་པའོ། །དང་པོ་ཉིད་དུ་ཞེས་བྱ་བ་ཁྱད་པར་སྨོས་པ་ནི། འདི་ལྟར་སྐད་ཅིག་མ་གསུམ་པ་ལ་སོགས་པ་ལ་དེ་དང་རིགས་མཐུན་པའི་ལམ་ནི་ཁྱད་པར་ཅན་གྱི་ལམ་
[228a]
[228a.1]ཡིན་པར་འདོད་དེ། དེ་ཉིད་ཀྱི་ཕྱིར་ཁྱད་པར་ཅན་གྱི་ལམ་ནི་དེ་དག་ལས་གཞན་པའི་ལམ་གང་ཡིན་པའོ་ཞེས་བྱ་བ་སྨོས་སོ། །གཞན་ཡང་གལ་ཏེ་དང་པོ་ཉིད་དུ་ཞེས་བྱ་བ་མ་བརྗོད་ཀྱི་རྣམ་པར་གྲོལ་བའི་ལམ་ནི་དེས་སྤང་བར་བྱ་བའི་སྒྲིབ་པ་ལས་ངེས་པར་གྲོལ་བ་གང་ཡིན་པའོ་ཞེས་བྱ་བ་
[228a.2]དེ་ཙམ་ཞིག་སྨོས་པར་འགྱུར་ན། དེ་ལྟ་ན་ནི་སྡུག་བསྔལ་ལ་ཆོས་ཤེས་པ་ཕན་ཆད་བར་ཆད་མེད་པའི་ལམ་ལ་སོགས་པ་ཐམས་ཅད་དེས་སྤང་བར་བྱ་བའི་སྒྲིབ་པ་ལས་ངེས་པར་གྲོལ་བར་སྐྱེ་བ་ཡིན་པས་ཐམས་ཅད་རྣམ་པར་གྲོལ་བའི་ལམ་དུ་འགྱུར་བ་ཞིག་ན་བར་ཆད་མེད་པའི་ལམ་ལ་སོགས་པ་ཡང་རྣམ་པར་གྲོལ་
[228a.3]བའི་ལམ་ཉིད་དུ་ཐལ་བར་འགྱུར་བའི་ཕྱིར་དེ་ཡང་མི་འདོད་དོ། །དེ་ལྟ་བས་ན་བར་ཆད་མེད་པའི་ལམ་སྡུག་བསྔལ་ལ་ཆོས་ཤེས་པའི་བཟོད་པས་སྤང་བར་བྱ་བའི་སྒྲིབ་པ་མཐོང་བས་སྤང་བར་བྱ་བའི་རིས་ནས། བསྒོམ་པས་སྤང་བར་བྱ་བའི་རིས་ཀྱི་བར་གང་ཡིན་པ་སྤང་བར་བྱ་བའི་སྒྲིབ་པ་དེ་ལས་ངེས་པར་གྲོལ་
[228a.4]བས་དང་པོ་ཉིད་དུ་སྐྱེས་པ་གང་ཡིན་པ་དེས་རྣམ་པར་གྲོལ་བའི་ལམ་ཡིན་གྱི་གཞན་ནི་དེས་སྤང་བར་བྱ་བའི་སྒྲིབ་པ་ལས་ངེས་པར་གྲོལ་བ་ཉིད་ཡིན་ཡང་མ་ཡིན་ནོ། །སྦྱོར་བའི་ལམ་ལ་སོགས་པ་གསུམ་པོ་དེ་དག་ལས་གཞན་པ་གང་ཡིན་པ་དེ་ནི་ཁྱད་པར་ཅན་གྱི་ལམ་ཡིན་ཏེ། སྐད་ཅིག་མ་བཅུ་དྲུག་
[228a.5]པ་ལམ་ལ་རྗེས་སུ་ཤེས་པའི་མཚན་ཉིད་ཕན་ཆད་དེ་དང་རིས་མཐུན་པ་སྐད་ཅིག་མ་བཅུ་བདུན་པ་ལ་སོགས་པ་ཟག་པ་མེད་པའི་སྐད་ཅིག་མ་གང་ཡིན་པ་དེ་དག་ནི་ཁྱད་པར་ཅན་གྱི་ལམ་གྱི་ངོ་བོ་ཉིད་ཡིན་པར་ཁོང་དུ་ཆུད་པར་བྱའོ། །གཞན་རྣམ་པར་གྲོལ་བའི་ཡེ་ཤེས་ཀྱི་རབ་ཀྱི་མཐའ་པ་ཟད་པ་ཤེས་པ་ལ་སོགས་
[228a.6]པ་གང་ཡིན་པ་དེ་ཡང་དེ་དང་འདྲ་བར་བརྗོད་པར་བྱ་སྟེ། མཐོང་བའི་ཆོས་ལ་བདེ་བར་གནས་པར་བྱེད་པའམ། ཡོན་ཏན་ཁྱད་པར་ཅན་མངོན་པར་སྒྲུབ་པར་བྱེད་པའི་ལམ་གང་ཡིན་པ་དེ་ཡང་ཁྱད་པར་ཅན་གྱི་ལམ་ཁོ་ན་ཡིན་ནོ། །སྦྱོར་བའི་ལམ་ནི་གང་གི་མཇུག་ཐོགས་སུ་བར་ཆད་མེད་པའི་ལམ་སྐྱེ་
[228a.7]བའོ་ཞེས་བཤད་པས་དེའི་ཕྱིར་སྦྱོར་བའི་ལམ་ནི་འཇིག་རྟེན་པའི་ཆོས་ཀྱི་མཆོག་ཡིན་ནོ་ཞེས་བྱ་བར་མངོན་ནོ། །ལུགས་ལས་བཟློག་པར་བཟོད་པ་ལ་སོགས་པའི་ལམ་གང་ཡིན་པ་དེ་གང་གི་ནང་དུ་འདུས་པར་བརྗོད་པར་བྱ་ཞེ་ན་སྨྲས་པ། སྦྱོར་བའི་ལམ་ཁོ་ནའི་ནང་དུ་འདུས་ན་འདི་ནི་སྦྱོར་བའི་ལམ་ཐག་རིང་
[228b]
[228b.1]པོ་ཡིན་པས་དེ་ནི་འཇིག་རྟེན་པའི་ཆོས་ཀྱི་མཆོག་དག་དང་ཁྱད་པར་དེ་ཡོད་དོ། །ཡང་ན་དཔེར་བརྗོད་པའི་ཕྱིར་བར་ཆད་མེད་པ་དང་། ཉེ་བ་ཁོ་ན་སྦྱོར་བའི་ལམ་དུ་བཤད་དོ།། །།བམ་པོ་ལྔ་བཅུ་གཉིས་པ། དེ་ནས་དེར་འགྲོ་བའི་ཕྱིར་འདི་ནི་མྱ་ངན་ལས་འདས་པའི་ལམ་ཡིན་ནོ་ཞེས་བྱ་བ་ནི་
[228b.2]འཇིག་རྟེན་ན་གང་ནས་འགྲོ་བ་དེ་ལམ་ཡིན་ནོ་ཞེས་གྲགས་ལ་འདི་ནས་ཀྱང་མྱ་ངན་ལས་འདས་པར་འགྲོ་ཞིང་ཕྱིན་པར་བྱེད་དེ། དེ་ལྟ་བས་ན་ལམ་ཡིན་ནོ་ཞེས་སྟོན་པར་བྱེད་དོ། །འདིས་མྱ་ངན་ལས་འདས་པ་ཚོལ་བའི་ཕྱིར་ཞེས་བྱ་བ་ནི་སྐད་ཀྱི་དབྱིངས་ལས་ལམ་ཚོལ་བར་བྱེད་པ་ཡིན་ནོ་ཞེས་འབྱུང་བས་གང་
[228b.3]གིས་མྱ་ངན་ལས་འདས་པ་ཚོལ་ཞིང་ཐོབ་པར་བྱེད་པ་དེ་ནི་ལམ་ཡིན་ནོ། །རྣམ་པར་གྲོལ་བ་དང་ཁྱད་པར་ཅན་གྱི་ལམ་དག་ཇི་ལྟར་ན་ལམ་ཉིད་ཡིན་ཞེས་བྱ་བ་ནི་དེ་གཉིས་ཀྱིས་མྱ་ངན་ལས་འདས་པ་ཐོབ་པར་བྱེད་པ་མ་ཡིན་ཏེ། དེ་ཐོབ་པ་ལ་ནི་སྦྱོར་བ་དང་བར་ཆད་མེད་པའི་ལམ་ཁོ་ན་ནུས་པ་ཡོད་ཀྱི་དེ་གཉིས་ནི་མ་
[228b.4]ཡིན་ནོ་སྙམ་དུ་བསམས་པ་ཡིན་ནོ། །དེ་དང་འདྲ་བ་དང་ཆེས་ཆེ་བ་ཡིན་པའི་ཕྱིར་ཞེས་བྱ་བ་ནི་དམིགས་པ་དང་རྣམ་པ་དང་ཟག་པ་མེད་པ་ཉིད་དུ་ཆོས་མཐུན་པའི་ཕྱིར་སྤང་བའི་ལམ་དང་འདྲ་བ་ཡིན་ལ། རྒྱུ་བསགས་པའི་སྒོ་ནས་ཆེས་ཆེ་བ་དག་ཀྱང་ཡིན་ཏེ། ཇི་ལྟར་བར་ཆད་མེད་པའི་ལམ་བདེན་པ་བཞི་
[228b.5]ལ་དམིགས་ཤིང་རྣམ་པ་བཅུ་དྲུག་དང་ཟག་པ་མེད་པ་ཡིན་པ་ལྟར་རྣམ་པར་གྲོལ་བ་དང་ཁྱད་པར་ཅན་གྱི་ལམ་དག་ཀྱང་དེ་དང་འདྲ་ལ་ཆེས་ཆེ་བ་ཉིད་ཀྱིས་དེ་གཉིས་ཁྱད་ཞུགས་པ་ཡང་ཡིན་ནོ། །གོང་ནས་གོང་དུ་ཕྱིན་པར་བྱེད་པའི་ཕྱིར་རམ་ཕུང་པོའི་ལྷག་མ་མ་ལུས་པར་འཇུག་པའི་ཕྱིར་རོ་ཞེས་བྱ་བ་ནི་
[228b.6]གང་གི་ཕྱིར་རྣམ་པར་གྲོལ་བའི་ལམ་དང་ཁྱད་པར་ཅན་གྱི་ལམ་གྱིས་ལམ་གོང་ནས་གོང་དུ་ཕྱིན་པར་བྱེད་པའམ། གང་གི་ཕྱིར་དེ་གཉིས་ཀྱིས་ཕུང་པོའི་ལྷག་མ་མེད་པའི་མྱ་ངན་ལས་འདས་པར་འཇུག་སྟེ། དེ་དག་སྐྱེས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པར་འཇུག་པ་དེའི་ཕྱིར་འདི་གཉིས་ལམ་
[228b.7]ཉིད་ཡིན་ནོ་ཞེས་བྱ་བའི་ཐ་ཚིག་གོ། །གཞན་དག་ན་རེ་འདི་སྐད་དུ་གོང་ནས་གོང་དུ་ཕྱིན་པར་བྱེད་པའི་ཕྱིར་ཕུང་པོའི་ལྷག་མ་མ་ལུས་པར་འཇུག་པ་ཡིན་ཏེ། དེ་ལྟ་བས་ན་འདི་གཉིས་ལམ་ཉིད་ཡིན་ནོ་ཞེས་ཟེར་རོ། །མྱ་ངན་ལས་འདས་པ་སྒྲུབ་པར་བྱེད་པའི་ཕྱིར་ཞེས་བྱ་བ་ནི་འདི་ལྟར་འདིས་མྱ་ངན་ལས་
[229a]
[229a.1]འདས་པ་སྒྲུབ་པར་བྱེད་པས་ཞེས་བྱ་བའི་ཐ་ཚིག་གོ། །དེ་བཞིན་དུ་སླ་བ་ཡང་རྣམ་པ་གཉིས་སོ་ཞེས་བྱ་བ་ནི་མངོན་པར་ཤེས་པ་བུལ་བ་སླ་བའི་ལམ་ཡང་ཡོད། མངོན་པར་ཤེས་པ་མྱུར་བ་སླ་བའི་ལམ་ཡང་ཡོད་ཅེས་བྱ་བ་ཡིན་ནོ། །ཡན་ལག་གིས་ཡོངས་སུ་ཟིན་པ་དང་། ཞི་གནས་
[229a.2]དང་ལྷག་མཐོང་མཉམ་པ་དག་གིས་འབད་མི་དགོས་པར་ངང་གིས་འབྱུང་བའི་ཕྱིར་རོ་ཞེས་བྱ་བ་ནི་ཡན་ལག་དག་གིས་ཡོངས་སུ་ཟིན་པ་དང་། ཞི་གནས་དང་ལྷག་མཐོང་དག་མཉམ་པ་ཉིད་ནི་ཡན་ལག་གིས་ཡོངས་སུ་ཟིན་པ་དང་། ཞི་གནས་དང་ལྷག་མཐོང་མཉམ་པ་ཉིད་དེ། དེ་དག་གིས་ན་འབད་མི་དགོས་པར་
[229a.3]ངང་གིས་འབྱུང་བ་ཡིན་པས་དེའི་ཕྱིར་ལམ་སླ་བ་ཡིན་ནོ། །གང་གི་ཕྱིར་བསམ་གཏན་དག་ནི་ཡན་ལག་གིས་ཡོངས་སུ་ཟིན་པ་དང་། ཞི་གནས་དང་ལྷག་མཐོང་དག་མཉམ་པ་ཡིན་པ་དེའི་ཕྱིར་འབད་པ་མི་དགོས་པར་ངང་གིས་འབྱུང་བ་ཡིན་པས་དེའི་ཕྱིར་ལམ་དེ་ནི་སླ་བ་ཞེས་བྱའོ། །ཡན་ལག་
[229a.4]གིས་ཡོངས་སུ་མ་ཟིན་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི་མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་དང་། གཟུགས་མེད་པ་དག་ནི་ཡན་ལག་གིས་ཡོངས་སུ་མ་ཟིན་པའི་ཕྱིར་འབད་ནས་འབྱུང་བ་ཡིན་ནོ། །དེ་དག་ཅི་རིགས་པར་ཞི་གནས་དང་ལྷག་མཐོང་ཆུང་བའི་ཕྱིར་འབད་
[229a.5]ནས་འབྱུང་བ་ཡང་ཡིན་ཏེ། མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་དག་ནི་ཞི་གནས་ཆུང་བའི་ཕྱིར་འབད་ནས་འབྱུང་བ་ཡིན་ནོ། །གཟུགས་མེད་པ་དག་ནི་ལྷག་མཐོང་ཆུང་བའི་ཕྱིར་འབད་ནས་འབྱུང་བ་ཡིན་ནོ། །དེའི་ཕྱིར་མི་ལྕོགས་པ་མེད་པ་ལ་སོགས་པ་དེ་དག་ནི་ལམ་
[229a.6]དཀའ་བ་ཡིན་ནོ། །མངོན་པར་ཤེས་པ་བུལ་བ་ཞེས་བྱ་བ་ནི་འདི་ལ་མངོན་པར་ཤེས་པ་བུལ་བ་ཡོད་པས་མངོན་པར་ཤེས་པ་བུལ་བ་སྟེ། ཤེས་རབ་ཆུང་བ་ཞེས་བྱ་བའི་ཐ་ཚིག་གོ། །མངོན་པར་ཤེས་པ་མྱུར་བ་ཞེས་བྱ་བ་ནི་ཤེས་རབ་རྣོ་བའོ། །ཡང་ན་མངོན་པར་ཤེས་པ་འདི་གང་
[229a.7]ཟག་མོང་རྟུལ་ཞིང་བླུན་པའི་ཡིན་པས་མངོན་པར་ཤེས་པ་བུལ་བ་ཡིན་ཏེ། དེ་བཞིན་དུ་མངོན་པར་ཤེས་པ་གང་ཟག་ཡིད་རྣོན་པོའི་ཡིན་པས་མངོན་པར་ཤེས་པ་མྱུར་བའོ་ཞེས་བྱ་བར་སྦྱར་བར་བྱའོ། །དྲན་པ་ཉེ་བར་གཞག་པ་བཞི་ནི་ལུས་དང་། ཚོར་བ་དང་། སེམས་དང་། ཆོས་དྲན་པ་ཉེ་བར་
[229b]
[229b.1]གཞག་པ་ཇི་སྐད་དུ་བཤད་པ་དག་ཡིན་ནོ། །ཡང་དག་པར་སྤོང་བ་བཞི་ནི་སྡིག་པ་མི་དགེ་བའི་ཆོས་སྐྱེས་པ་རྣམས་སྤོང་བའི་ཕྱིར་འདུན་པ་སྐྱེད་དོ། །རྩོལ་བ་བྱེད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །ཡང་དག་པར་རབ་ཏུ་འཇོག་གོ། །སྡིག་པ་མི་དགེ་བའི་ཆོས་མ་སྐྱེས་པ་རྣམས་ནི་མི་
[229b.2]སྐྱེད་པའི་ཕྱིར་འདུན་པ་སྐྱེད་དོ་ཞེས་བྱ་བ་སྔ་མ་བཞིན་ནོ། །དགེ་བའི་ཆོས་མ་སྐྱེས་པ་རྣམས་སྐྱེད་པའི་ཕྱིར་འདུན་པ་སྐྱེད་དོ་ཞེས་བྱ་བ་སྔ་མ་བཞིན་ནོ། །དགེ་བའི་ཆོས་སྐྱེས་པ་རྣམས་གནས་པ་དང་། མི་བརྗེད་པ་དང་། བསྒོམ་པ་ཡོངས་སུ་རྫོགས་པར་བྱ་བ་དང་། ཕྱིར་ཞིང་གོམས་པ་དང་། འཕེལ་ཞིང་རྒྱས་པ་
[229b.3]དང་། ཡེ་ཤེས་ཀྱིས་མངོན་སུམ་དུ་བྱ་བའི་ཕྱིར་འདུན་པ་སྐྱེད་དོ་ཞེས་བྱ་བ་སྔ་མ་བཞིན་ནོ། །རྫུ་འཕྲུལ་གྱི་རྐང་པ་བཞི་ནི་འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པ། རྫུ་འཕྲུལ་གྱི་རྐང་པ་དང་། དེ་བཞིན་དུ་བརྩོན་འགྲུས་དང་། སེམས་དང་། དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་
[229b.4]པ་རྫུ་འཕྲུལ་གྱི་རྐང་པ་དག་སྟེ། རྫུ་འཕྲུལ་གྱི་རྐང་པ་ནི་རྫུ་འཕྲུལ་གྱི་རྒྱུ་ཞེས་བྱ་བའི་ཐ་ཚིག་གོ། །དབང་པོ་ལྔ་ནི་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཀྱི་དབང་པོ་དག་གོ། །སྟོབས་ལྔ་ནི་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་
[229b.5]ཀྱི་སྟོབས་དག་གོ། །བྱང་ཆུབ་ཀྱི་ཡན་ལག་བདུན་ནི་དྲན་པ་དང་། ཆོས་རབ་ཏུ་རྣམ་པར་འབྱེད་པ་དང་། བརྩོན་འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དག་སྟེ། དྲན་པ་ཉིད་ཡང་དག་བྱང་ཆུབ་ཀྱི་ཡན་ལག་ཡིན་པས་
[229b.6]དྲན་པ་ཡང་དག་བྱང་ཆུབ་ཀྱི་ཡན་ལག་སྟེ་བཏང་སྙོམས་ཉིད་ཡང་དག་བྱང་ཆུབ་ཀྱི་ཡན་ལག་ཡིན་པས་ན་བཏང་སྙོམས་ཡང་དག་བྱང་ཆུབ་ཀྱི་ཡན་ལག་གི་བར་དུ་ཡང་དེ་དང་འདྲའོ། །འཕགས་པའི་ལམ་ཡན་ལག་བརྒྱད་ནི་ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་
[229b.7]པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །དེ་གཉིས་ཀྱིས་མ་རིག་པ་མ་ལུས་པར་སྤངས་པའི་ཕྱིར་ཞེས་བྱ་བ་ནི་གང་གི་ཕྱིར་ཁམས་གསུམ་པའི་མ་རིག་པ་མ་
[230a]
[230a.1]ལུས་པར་སྤངས་པ་དེའི་ཕྱིར་དེ་གཉི་ག་བྱང་ཆུབ་ཡིན་ཏེ། འདིས་ནི་སློབ་པ་དང་སོ་སོའི་སྐྱེ་བོ་རྣམས་ཀྱི་ཤེས་རབ་ནི་བྱང་ཆུབ་ཏུ་རྣམ་པར་མི་བཞག་གོ་ཞེས་སྟོན་པར་བྱེད་དོ། །གཞན་ཡང་གོ་རིམས་བཞིན་དུ། རང་གི་དོན་བྱས་པ་དང་ཡང་བྱར་མེད་པ་ཉིད་ཡང་དག་པ་ཇི་ལྟ་བ་བཞིན་དུ་
[230a.2]རྟོགས་པའི་ཕྱིར་ཏེ། ཟད་པ་ཤེས་པས་བདག་གིས་སྡུག་བསྔལ་ཡོངས་སུ་ཤེས་སོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །བདག་གིས་ཀུན་འབྱུང་བ་སྤངས་སོ་ཞེས་བྱ་བ་དང་། བདག་གིས་འགོག་པ་མངོན་དུ་བྱས་སོ་ཞེས་བྱ་བ་དང་། བདག་གིས་ལམ་བསྒོམས་སོ་ཞེས་བྱ་བར་
[230a.3]ཡང་དག་པ་ཇི་ལྟ་བ་བཞིན་དུ་ཤེས་སོ་ཞེས་བྱ་བར་ཡང་དག་པ་ཇི་ལྟ་བ་བཞིན་རྟོགས་པའི་ཕྱིར་ཟད་པ་ཤེས་པ་དེ་བྱང་ཆུབ་ཡིན་ནོ། །མི་སྐྱེ་བ་ཤེས་པས་ཀྱང་བདག་གིས་སྡུག་བསྔལ་ཡོངས་སུ་ཤེས་ཏེ། ཡང་ཡོངས་སུ་ཤེས་པར་བྱར་མེད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །
[230a.4]བདག་གིས་ཀུན་འབྱུང་བ་སྤངས་ཏེ། ཡང་སྤང་དུ་མེད་དོ་ཞེས་བྱ་བ་དང་། བདག་གིས་འགོག་པ་མངོན་དུ་བྱས་ཏེ། ཡང་མངོན་དུ་བྱར་མེད་དོ་ཞེས་བྱ་བ་དང་། བདག་གིས་ལམ་བསྒོམས་ཏེ། ཡང་བསྒོམ་དུ་མེད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་བྱ་བར་ཡང་བྱར་
[230a.5]མེད་པ་ཇི་ལྟ་བ་བཞིན་རྟོགས་པའི་ཕྱིར་མི་སྐྱེ་བ་ཤེས་པ་དེ་ཡང་བྱང་ཆུབ་ཡིན་ནོ། །བདག་གིས་སྡུག་བསྔལ་ཡོངས་སུ་ཤེས་སོ་ཞེས་བྱ་བ་འདིས་ནི་ཟད་པ་ཤེས་པ་བསྟན་ལ། ཡང་ཤེས་པར་བྱར་མེད་དོ་ཞེས་བྱ་བ་འདིས་ནི་མི་སྐྱེ་བ་ཤེས་པ་བསྟན་པས་གཉི་ག་ཡང་གང་ཟག་དབང་པོ་རྣོན་པོའི་ཡིན་པར་
[230a.6]སྟོན་ཏོ་ཞེས་ཐམས་ཅད་ལ་སྦྱར་བར་བྱའོ། །དེ་ལྟར་ཟད་པ་ཤེས་པ་དང་། མི་སྐྱེ་བ་ཤེས་པ་བྱང་ཆུབ་ཡིན་ནོ་ཞེས་ཡན་ལག་གི་དོན་རབ་ཏུ་བསྒྲུབས་ནས་སྤྱིའི་དོན་རབ་ཏུ་བསྒྲུབ་པའི་ཕྱིར། དེ་དང་མཐུན་པ་ཉིད་ཕྱིར། སུམ་ཅུ་རྩ་བདུན་དེའི་ཕྱོགས་མཐུན། །ཞེས་བྱ་བ་སྨོས་ཏེ། བྱང་ཆུབ་དེ་དང་མཐུན་
[230a.7]པ་ནི་དེ་དང་མཐུན་པའོ། །དེའི་ངོ་བོ་ནི་དེ་དང་མཐུན་པ་ཉིད་དེ། དེ་དང་མཐུན་པ་ཉིད་དེའི་ཕྱིར་བྱང་ཆུབ་ཀྱི་ཕྱོགས་དང་མཐུན་པའོ། །བྱང་ཆུབ་ཀྱི་ཕྱོགས་ལ་བཟང་ཞིང་མཐུན་པས་ན་གསུང་རབ་ལས། དྲན་པ་ཉེ་བར་གཞག་པ་ལ་སོགས་པ་སུམ་ཅུ་རྩ་བདུན་བྱང་ཆུབ་ཀྱི་ཕྱོགས་དང་མཐུན་པ་ཡིན་པར་
[230b]
[230b.1]འབྱུང་ངོ་། །རྫས་སུམ་ཅུ་ཞེས་བྱ་བ་ནི་ཁ་ཅིག་གི་གཞུང་ལུགས་ཡིན་ཏེ། བྱེ་བྲག་ཏུ་སྨྲ་བ་རྣམས་ཀྱི་ལྟར་ན་ལུས་དང་ངག་དག་ཐ་དད་པའི་ཕྱིར་ཚུལ་ཁྲིམས་ཀྱི་ཡན་ལག་རྣམས་རྫས་གཉིས་ཡིན་པས་བཅུ་གཅིག་ཡིན་ནོ་ཞེས་འཆད་པར་འགྱུར་བའི་ཕྱིར་རོ། །དྲན་པ་ཉེར་གཞག་ཤེས་རབ་སྟེ། །ཞེས་
[230b.2]བྱ་བ་ནི་དྲན་པ་ཉེ་བར་གཞག་པ་ནི་ཤེས་རབ་ཡིན་ནོ་ཞེས་བྱ་བའི་ཐ་ཚིག་གོ། །འདིས་དྲན་པ་ཉེ་བར་འཇོག་པའི་ཕྱིར་ཏེ། འདི་ལྟར་མདོ་ལས། ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ་ཞེས་བྱ་བ་རྒྱས་པར་འབྱུང་ངོ་། །བརྩོན་འགྲུས་ཡང་དག་འཇོག་ཅེས་བྱ། །ཞེས་བྱ་བ་ནི་འདི་ལྟར་སྡིག་པ་མི་དགེ་
[230b.3]བའི་ཆོས་སྐྱེས་པ་རྣམས་སྤངས་པའི་ཕྱིར་འདུན་པ་སྐྱེད་དོ། །རྩོལ་བར་བྱེད་དོ། །བརྩོན་འགྲུས་རྩོམ་མོ་ཞེས་འབྱུང་བ་ཐམས་ཅད་སྦྱར་རོ། །རྫུ་འཕྲུལ་རྐང་པའི་ཏིང་འཛིན་ཏོ། །ཞེས་བྱ་བ་ནི་འདི་ལྟར་འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པ་རྫུ་འཕྲུལ་གྱི་རྐང་པ་སྒོམ་པར་བྱེད་དོ་ཞེས་འབྱུང་བ་ཐམས་ཅད་
[230b.4]སྦྱར་རོ། །འདིར་སྤོང་བའི་འདུ་བྱེད་ཅེས་སྨོས་པའི་མདོ་ལས་བརྒྱད་འབྱུང་བ་ཡིན་ནོ། །ཇི་ལྟ་ཞེ་ན་དེ་ལྟ་བུའི་འདུན་པ་གང་ཡིན་པ་དང་། རྩོལ་བ་གང་ཡིན་པ་དང་། ཤིན་ཏུ་སྦྱངས་པ་གང་ཡིན་པ་དང་། དྲན་པ་གང་ཡིན་པ་དང་། ཤེས་བཞིན་གང་ཡིན་པ་དང་། སེམས་འདུ་བྱེད་པ་གང་ཡིན་པ་དང་།
[230b.5]སེམས་མངོན་པར་འདུ་བྱེད་པ་གང་ཡིན་པ་དང་། བཏང་སྙོམས་གང་ཡིན་པ་དེ་དག་ནི་སྤོང་བའི་འདུ་བྱེད་ཅེས་བྱའོ་ཞེས་འབྱུང་ངོ་། །དེའི་ཕྱིར་རེ་ཞིག་དབང་པོ་དང་ཞེས་རྒྱས་པར་འབྱུང་བ་ནི་རང་གི་མིང་གིས་སྨོས་པའི་དབང་པོ་དང་སྟོབས་ཀྱི་ངོ་བོ་ཉིད་དད་པ་དང་། བརྩོན་འགྲུས་དང་། དྲན་པ་དང་།
[230b.6]ཏིང་ངེ་འཛིན་དང་། ཤེས་རབ་ཀྱི་རྫས་ལྔ་གང་དག་ཡིན་པ་དེ་དག་ལས་དྲན་པ་ཉེ་བར་གཞག་པ་བཞི་པོ་གང་དག་ཡིན་པ་དེ་ནི་ཤེས་རབ་ཁོ་ན་ཡིན་ལ། བྱང་ཆུབ་ཀྱི་ཡན་ལག་དག་གི་ནང་ན་ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གང་ཡིན་པ་དང་། ལམ་དག་གི་ནང་ན་ཡང་དག་པའི་
[230b.7]ལྟ་བ་གང་ཡིན་པ་ཡང་རྫས་གཞན་མ་ཡིན་ནོ། །ཡང་དག་པར་སྤོང་བ་བཞི་པོ་གང་དག་ཡིན་པ་དང་། བྱང་ཆུབ་ཀྱི་ཡན་ལག་དག་གི་ནང་ན་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་གང་ཡིན་པ་དང་། ལམ་དག་གི་ནང་ན་ཡང་དག་པའི་རྩོལ་བ་གང་ཡིན་པ་དེ་ནི་བརྩོན་འགྲུས་ཁོ་ན་ཡིན་ནོ། །
[231a]
[231a.1]རྫུ་འཕྲུལ་གྱི་རྐང་པ་བཞི་པོ་གང་དག་ཡིན་པ་དང་། བྱང་ཆུབ་ཀྱི་ཡན་ལག་དག་གི་ནང་ན་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་གང་ཡིན་པ་དང་། ལམ་གྱི་ནང་ན་ཡང་དག་པའི་ཏིང་ངེ་འཛིན་ནི་ཏིང་ངེ་འཛིན་ཁོ་ན་ཡིན་ནོ། །གང་ཤེས་རབ་ཀྱི་དབང་པོ་ལ་སོགས་པའི་ངོ་བོ་ཉིད་མ་
[231a.2]ཡིན་པ་ཅི་ཞིག་ལུས་ཤེ་ན། བྱང་ཆུབ་ཀྱི་ཡན་ལག་དག་གི་ནང་ན་དགའ་བ་དང་། ཤིན་ཏུ་སྦྱངས་པ་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་རྣམས་དང་། ལམ་གྱི་ཡན་ལག་དག་གི་ནང་ན་ཡང་དག་པའི་རྟོག་པ་དང་། ཚུལ་ཁྲིམས་ཀྱི་ཡན་ལག་གསུམ་པོ་ཡང་དག་པའི་ངག་དང་། ཡང་དག་
[231a.3]པའི་ལས་ཀྱི་མཐའ་དང་། ཡང་དག་པའི་འཚོ་བ་རྣམས་ཞེས་བྱ་བ་དག་ལུས་སོ། །རྫས་བཅུ་པོ་ཡིན་ནོ་ཞེས་བྱ་བ་ནི་དད་པ་ལ་སོགས་པ་ལྔ་དང་། དགའ་བ་ཡང་དག་བྱང་ཆུབ་ཀྱི་ཡན་ལག་ལ་སོགས་པ་ལྔ་སྟེ། ཚུལ་ཁྲིམས་ཀྱི་ཡན་ལག་གསུམ་ནི་རྣམ་པར་རིག་བྱེད་མ་ཡིན་པའི་ངོ་བོ་ཉིད་ཡིན་པའི་
[231a.4]ཕྱིར་རྫས་གཅིག་ཏུ་རྣམ་པར་གཞག་གོ། །བྱེ་བྲག་ཏུ་སྨྲ་བ་རྣམས་ཀྱི་ལྟར་ན་ལུས་དང་ངག་གི་ལས་དག་ཐ་དད་ཅིང་རིགས་མི་མཐུན་པའི་ཕྱིར་རྫས་གཉིས་ཡིན་པས་རྫས་བཅུ་གཅིག་ཡིན་ནོ། །བསམ་པའི་དབང་གིས་ནི་ཕྱོགས་གཉི་ག་ལྟར་ན་ཡང་ཉེས་པ་མེད་དོ། །གལ་ཏེ་དངོས་སུ་ཚོགས་པ་དེ་ལ་
[231a.5]རྫས་ཇི་སྙེད་ཅིག་ཡོད་པ་རིལ་གྱིས་བགྲང་ན་ནི་དེ་དག་རྫས་བཅུ་མ་ཡིན་པ་དེ་ཉིད་དེ། མཉམ་པར་གཞག་པའི་རྣམ་པར་རིག་བྱེད་མ་ཡིན་པའི་གཟུགས་རྣམས་རྫས་བདུན་ཡིན་པའི་ཕྱིར་རྫས་བཅུ་དྲུག་ཡིན་ནོ་ཞེས་བརྗོད་དགོས་པར་འགྱུར་རོ། །གཙོ་བོ་སྨོས་པས་དྲན་པ་ཉེ་བར་གཞག་པ་ལ་སོགས་པ་ནི་ཤེས་
[231a.6]རབ་ལ་སོགས་པའི་རང་བཞིན་ཡིན་ནོ་ཞེས་དེ་སྐད་བཤད་ཀྱི་དྲན་པ་ཉེ་བར་གཞག་པ་དང་། ཡང་དག་པར་རབ་ཏུ་འཇོག་པ་དང་རྫུ་འཕྲུལ་གྱི་རྐང་པ་རྣམས་ནི་ཅི་རིགས་པར་སྦྱོར་བ་ལས་བྱུང་བའི་ཡོན་ཏན་ཐོས་པ་དང་བསམས་པ་དང་བསྒོམས་པ་ལས་བྱུང་བ་ཟག་པ་དང་བཅས་པ་དང་ཟག་པ་མེད་པ་ཐམས་ཅད་ཀྱང་
[231a.7]ཡིན་ནོ། །གཙོ་བོ་ཞེས་བྱ་བ་ནི་དེའི་སྟོབས་ཀྱིས་གཞན་དག་འཇུག་པ་ལ་བྱའི་དེ་དག་མེད་པ་ནི་མ་ཡིན་ཏེ། དྲན་པ་ཉེ་བར་གཞག་པ་རྣམས་ཀྱི་གཙོ་བོ་ནི་ཤེས་རབ་ཡིན་པས་དེའི་ཕྱིར་ཤེས་རབ་སྨོས་ཀྱི། དྲན་པ་ཉེ་བར་གཞག་པ་ཤེས་རབ་ཁོ་ན་ཡིན་པར་ནི་མ་ཟད་དོ། །འོ་ན་ཅི་ཞེ་ན། ཤེས་རབ་དང་།
[231b]
[231b.1]བརྩོན་འགྲུས་དང་། ཏིང་ངེ་འཛིན་དང་། དགའ་བ་དང་། ཤིན་ཏུ་སྦྱངས་པ་དང་། བཏང་སྙོམས་དང་། ཡང་དག་པའི་རྟོག་པ་ལ་སོགས་པ་ཡང་ཡིན་ནོ། །སྦྱོར་བ་ལས་བྱུང་བ་ཞེས་སྨོས་པ་ནི་སྐྱེས་ནས་ཐོབ་པའི་དད་པ་ལ་སོགས་པ་གསལ་བའི་ཕྱིར་རོ། །དེ་བཞིན་དུ་ཡང་དག་པར་སྤོང་བ་རྣམས་
[231b.2]ཀྱི་གཙོ་བོ་ནི་བརྩོན་འགྲུས་ཡིན་ལ། རྫུ་འཕྲུལ་གྱི་རྐང་པ་རྣམས་ཀྱི་གཙོ་བོ་ནི་ཏིང་ངེ་འཛིན་ཡིན་པས་ཞེས་བྱ་བ་རྒྱས་པར་བརྗོད་པར་བྱའོ། །རྫུ་འཕྲུལ་གྱི་རྐང་པ་དག་ནི་ཏིང་ངེ་འཛིན་ཡིན་ནོ་ཞེས་བྱ་བ་འདི་ག་ལས་བྱུང་ཞེ་ན། མདོ་ལས་ཏེ། དགེ་སློང་དག་དགེ་སློང་གི་འདུན་པའི་དབང་དུ་བྱས་ནས་ཏིང་ངེ་
[231b.3]འཛིན་ཐོབ་སྟེ། དེ་ནི་འདིའི་འདུན་པའི་ཏིང་ངེ་འཛིན་ཡིན་ནོ། །དགེ་སློང་དག་དགེ་སློང་གི་སེམས་དང་། བརྩོན་འགྲུས་དང་། དཔྱོད་པའི་དབང་དུ་བྱས་ནས་ཀྱང་ཏིང་ངེ་འཛིན་ཐོབ་སྟེ། དེ་ནི་འདིའི་དཔྱོད་པའི་ཏིང་ངེ་འཛིན་གྱི་བར་ཡིན་ནོ་ཞེས་གསུངས་སོ། །དེས་ལུས་དང་ངག་དང་ཡིད་ཡང་དག་པར་
[231b.4]རབ་ཏུ་འཇོག་པས་སོ་ཞེས་བྱ་བ་ནི་རབ་ཏུ་འཇོག་པ་དང་། འཛིན་པ་དང་། ངེས་པར་བྱེད་པའམ། རེས་འགའ་འདིས་འཇུག་པར་བྱེད་པས་ན་རབ་ཏུ་འཇོག་པའོ། །དེ་ནི་ཡོན་ཏན་ཐམས་ཅད་འབྱོར་པའི་རྟེན་ཡིན་པའི་ཕྱིར་རོ་ཞེས་བྱ་བ་ནི་འདི་ལྟར་ཡོན་ཏན་ཐམས་ཅད་འབྱོར་པའི་མཚན་ཉིད་རྫུ་འཕྲུལ་ནི་ཏིང་
[231b.5]ངེ་འཛིན་དེ་ལ་བརྟེན་ཏེ། རྫུ་འཕྲུལ་གྱི་རྐང་པ་དང་། རྟེན་ཡིན་པས་ན་རྫུ་འཕྲུལ་གྱི་རྐང་པ་ཞེས་བྱའོ། །གང་དག་རྫུ་འཕྲུལ་ནི་ཏིང་ངེ་འཛིན་ཁོ་ན་ཡིན་ལ་འདུན་པ་ལ་སོགས་པ་འདུན་པ་དང་། སེམས་དང་བརྩོན་འགྲུས་དང་། དཔྱོད་པ་ཞེས་བྱ་བ་དག་ནི་རྐང་པ་ཡིན་ནོ་ཞེས་དེ་སྐད་དུ་ཟེར་བ་བྱེ་བྲག་ཏུ་སྨྲ་བ་དེ་
[231b.6]དག་གི་ལྟར་ན་འདུན་པ་དང་སེམས་པ་དག་ལྷག་པའི་ཕྱིར་བཅུ་གཅིག་གི་ནང་དུ་བསྣན་ན་བྱང་ཆུབ་ཀྱི་ཕྱོགས་དང་མཐུན་པ་བཅུ་གསུམ་དུ་འགྱུར་རོ། །བརྩོན་འགྲུས་དང་ཤེས་རབ་དག་ནི་ལྷག་མ་ཡིན་ཏེ། ཡང་དག་པར་སྤོང་བ་དང་། དྲན་པ་ཉེ་བར་གཞག་པ་དག་གི་ནང་དུ་འདུས་པའི་ཕྱིར་རོ། །མང་པོར་
[231b.7]འགྱུར་བ་ཞེས་བྱ་བའི་བར་རྒྱས་པར་གསུངས་ཞེས་བྱ་བ་ནི་མང་པོར་གྱུར་ཅིང་གཅིག་ཏུ་འགྱུར་བ་དང་། སྣང་བར་འགྱུར་བ་དང་མི་སྣང་བར་འགྱུར་བ་ཤེས་པ་དང་མཐོང་བས་ཉམས་སུ་མྱོང་བར་བྱེད་དེ། ལུས་ཀྱིས་ཐོགས་པ་མེད་པར་རྩིག་པ་ལ་ཡང་ཐལ་བྱུང་དུ་འགྲོའོ། །ས་ལ་ཡང་བྱེའུ་ཟུལ་བྱེད་དེ། དཔེར་
[232a]
[232a.1]ན་ཆུ་ལ་བྱ་བ་བཞིན་ནོ། །ཆུའི་རྒྱུན་ལ་ཡང་མི་འབྱིང་བར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་བཅས་ནས་འདུག་སྟེ། དཔེར་ན་འདབ་ཆགས་བྱ་བཞིན་ནོ། །ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་བ་འདི་དག་ལ་ཡང་ལག་པས་ཉུག་པར་
[232a.2]བྱེད་ཡོངས་སུ་ཉུག་པར་བྱེད་ཅིང་ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་བྱེད་དེ། འདི་ནི་རྫུ་འཕྲུལ་ཞེས་བྱའོ། །རྫུ་འཕྲུལ་གྱི་རྐང་པ་དག་གང་ཞེ་ན། འདུན་པའི་ཏིང་ངེ་འཛིན་དང་། བརྩོན་འགྲུས་ཀྱི་ཏིང་ངེ་འཛིན་དང་། སེམས་ཀྱི་ཏིང་ངེ་འཛིན་དང་། དཔྱོད་པའི་ཏིང་ངེ་འཛིན་ཏེ། འདི་
[232a.3]དག་ནི་རྫུ་འཕྲུལ་གྱི་རྐང་པ་ཞེས་བྱའོ་ཞེས་འབྱུང་བ་ཡིན་ནོ། །ཏིང་ངེ་འཛིན་གྱི་མཚན་ཉིད་ནི་དེ་ལྟ་བུ་མ་ཡིན་ཏེ། དེ་ལྟ་བས་ན་རྫུ་འཕྲུལ་ནི་ཏིང་ངེ་འཛིན་ཁོ་ན་མ་ཡིན་ནོ། །འདིར་སློབ་དཔོན་འདུས་བཟང་ན་རེ་དེ་དག་ལ་ཉེས་པ་འདིར་མི་འགྱུར་ཏེ། དེ་དག་ནི་ཏིང་ངེ་འཛིན་རྫུ་འཕྲུལ་གྱི་རྐང་པ་དང་རྫུ་འཕྲུལ་
[232a.4]ཡང་ཡིན་ནོ་ཞེས་བྱ་བར་འདོད་དོ། །འདུན་པ་ལ་སོགས་པ་སྨོས་པ་ནི་ཏིང་ངེ་འཛིན་བཞི་ཚན་ཉིད་དུ་ཤེས་པར་བྱ་བའི་ཕྱིར་རོ། །ཏིང་ངེ་འཛིན་ལ་ལ་ནི་དགེ་བའི་རྩ་བ་སྦྱོར་བའི་གནས་སྐབས་ན་གཙོ་བོ་ཡིན་ལ། ལ་ལ་ནི་དགེ་བའི་རྩ་བ་གྲུབ་པའི་གནས་སྐབས་ན་གཙོ་བོ་ཡིན་ཏེ། འདི་ལ་སྔ་མ་ནི་རྫུ་
[232a.5]འཕྲུལ་གྱི་རྐང་པ་ཡིན་ནོ། །ཕྱི་མ་ནི་རྫུ་འཕྲུལ་ཞེས་བྱའོ། །འདི་ལས་རྫུ་འཕྲུལ་གྱི་རྐང་པའི་འབྲས་བུ་རྫུ་འཕྲུལ་གྱི་སྒྲར་བཤད་པས་འདི་དག་ལ་མདོ་སྡེ་དང་འགལ་བ་ཡང་མེད་དེ། ཡོངས་སུ་ཤེས་པའི་འབྲས་བུ་ལ་དེའི་སྒྲར་བརྗོད་པ་ལ་སོགས་པ་བཞིན་ནོ་ཞེས་ཟེར་རོ། །ཆུང་ངུ་དང་། ཆེན་པོ་དག་
[232a.6]གིས་ཞེས་བྱ་བ་ནི། དབང་པོ་རྣམས་ནི་ཆུང་ངུ་ཡིན་ནོ། །སྟོབས་རྣམས་ནི་ཆེན་པོ་ཡིན་ནོ། །འདི་དག་གི་ཆུང་ངུ་དང་། ཆེན་པོའི་བྱེ་བྲག་ཇི་ལྟ་བུ་ཞེ་ན། གཏན་ཚིགས་སུ་རྫི་བ་དང་རྫི་བ་མེད་པའི་ཕྱིར་རོ་ཞེས་བྱ་བ་སྨོས་ཏེ། དེ་དག་གི་མི་མཐུན་པའི་ཕྱོགས་སུ་གྱུར་པ་མ་དད་པ་དང་། ལེ་ལོ་དང་།
[232a.7]བརྗེད་ངས་པ་དང་། གཡེང་བ་དང་། ཤེས་བཞིན་མ་ཡིན་པ་རྣམས་པར་བར་དུ་ཀུན་དུ་འབྱུང་བའི་ཕྱིར་དབང་པོ་རྣམས་ནི་རྫི་བ་ཡིན་ནོ། །སྟོབས་རྣམས་ནི་དེ་ལྟ་མ་ཡིན་པས་ཡང་དེ་དག་ལ་སྟོབས་ཞེས་བཤད་དོ། །ལས་ནི་དང་པོ་པ་དག་དང་། །ངེས་འབྱེད་ཆ་མཐུན་རྣམས་དང་ནི། །ཞེས་བྱ་བ་ནི་འདི་
[232b]
[232b.1]དག་གནས་སྐབས་སྔར་བཤད་པ་ཡིན་ནོ། །བསྒོམ་དང་མཐོང་ལ་རབ་ཏུ་ཕྱེ། །ཞེས་བྱ་བ་ནི་གནས་སྐབས་གཉིས་ཡིན་པས་གནས་སྐབས་བདུན་དག་ཏུ་སྡེ་ཚན་བདུན་གོ་རིམས་བཞིན་རབ་ཏུ་འབྱེད་ཅིང་རབ་ཏུ་རྣམ་པར་འཇོག་པའམ། གཙོ་བོར་བྱེད་པ་ཡིན་ཏེ། ལས་དང་པོ་པའི་གནས་སྐབས་སུ་ནི་དྲན་པ་
[232b.2]ཉེ་བར་གཞག་པ་རྣམས་སོ། །དྲོ་བར་གྱུར་པའི་གནས་སྐབས་སུ་ནི་ཡང་དག་པར་རབ་ཏུ་འཇོག་པ་རྣམས་སོ། །རྩེ་མོའི་གནས་སྐབས་སུ་ནི་རྫུ་འཕྲུལ་གྱི་རྐང་པ་རྣམས་སོ། །བཟོད་པའི་གནས་སྐབས་སུ་ནི་དབང་པོ་རྣམས་སོ། །འཇིག་རྟེན་པའི་ཆོས་ཀྱི་མཆོག་གི་གནས་སྐབས་སུ་ནི་སྟོབས་རྣམས་སོ། །བསྒོམ་
[232b.3]པའི་ལམ་གྱི་གནས་སྐབས་སུ་ནི་བྱང་ཆུབ་ཀྱི་ཡན་ལག་རྣམས་སོ། །མཐོང་བའི་ལམ་གྱི་གནས་སྐབས་སུ་ནི་འཕགས་པའི་ལམ་ཡན་ལག་བརྒྱད་པའོ། །ཁྱད་པར་ཐོབ་པའི་རྒྱུས་བརྩོན་འགྲུས་སྤེལ་ཏེ། དེའི་ཕྱིར་དྲོ་བར་གྱུར་པ་དག་ལ་ནི་ཡང་དག་པར་རབ་ཏུ་འཇོག་པ་རྣམས་སོ། །ཡོངས་སུ་ཉམས་
[232b.4]པར་མི་འགྱུར་བའི་དགེ་བའི་རྩ་བ་ལ་འཇུག་པའི་ཕྱིར་རྩེ་མོ་དག་ལ་ཞེས་བྱ་བ་ནི། རྩེ་མོ་ཐོབ་པ་རྩ་མི་འཆད། །ཅེས་འབྱུང་བས་རྩེ་མོ་རྣམས་ནི་ཡོངས་སུ་མི་ཉམས་པ་དང་། མཐུན་པ་དག་ལ་འཇུག་པ་ཡིན་ཏེ། འདི་རྣམས་ཀྱིས་འཇུག་པའི་ཕྱིར་འཇུག་པའོ། །ཡོངས་སུ་མི་ཉམས་པ་ནི་བཟོད་
[232b.5]པ་དག་གི་ཚེ་ཡིན་ཏེ། དེའི་གནས་སྐབས་ཀྱི་ཏིང་ངེ་འཛིན་རྣམས་འབྱོར་པའི་རྟེན་ཡིན་པས་རྩེ་མོ་དག་ལ་ནི་རྫུ་འཕྲུལ་གྱི་རྐང་པ་རྣམས་རྣམ་པར་གཞག་གོ། །ཡང་ཡོངས་སུ་ཉམས་པར་མི་འགྱུར་བའི་སྒོ་ནས་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་སྔ་མ་གཉིས་ཁོ་ན་ལས་ཡོངས་སུ་ཉམས་
[232b.6]པ་སྲིད་ཀྱི་བཟོད་པ་དག་ལ་ནི་ཡང་ཡོངས་སུ་ཉམས་པ་མེད་པ་དེའི་ཕྱིར་དད་པ་ལ་སོགས་པ་དབང་པོ་ཐོབ་པ་ཡིན་ནོ། །དེ་བས་ན་བཟོད་པ་དག་ལ་ནི་དབང་པོ་རྣམས་རྣམ་པར་གཞག་གོ། །ཉོན་མོངས་པ་རྣམས་ཀྱིས་མི་བརྫི་བའི་ཕྱིར་རམ་ཞེས་བྱ་བ་ནི་འདི་ལྟར་གནས་སྐབས་དེ་ན་ཉོན་མོངས་པ་ཀུན་དུ་མི་
[232b.7]འབྱུང་བའི་ཕྱིར་ཉོན་མོངས་པ་རྣམས་ཀྱིས་མི་བརྫི་བ་ཡིན་ནོ། །འཇིག་རྟེན་པའི་ཆོས་གཞན་དག་གིས་མི་བརྫི་བའི་ཕྱིར་ཞེས་བྱ་བ་ནི་ཡང་ན་འཇིག་རྟེན་པའི་ཆོས་གཞན་དག་གིས་མི་བརྫི་བའི་ཕྱིར་འཇིག་རྟེན་པའི་ཆོས་ཀྱི་མཆོག་གི་གནས་སྐབས་སུ་ནི་དད་པ་ལ་སོགས་པ་སྟོབས་རྣམས་ཞེས་བྱ་བར་
[233a]
[233a.1]རབ་ཏུ་འབྱེད་དོ། །བྱང་ཆུབ་དང་ཉེ་བའི་ཕྱིར་ཞེས་བྱ་བ་ནི་ཟད་པ་དང་། མི་སྐྱེ་བ་ཤེས་པ་དང་ཉེ་བའི་ཕྱིར་ཞེས་བྱ་བའི་ཐ་ཚིག་གོ། །ཟད་པ་དང་མི་སྐྱེ་བ་ཤེས་པ་དག་ནི་བསྒོམ་པའི་ལམ་ལ་ཡིན་གྱི་མཐོང་བའི་ལམ་ལ་ནི་མ་ཡིན་ཏེ། མཐོང་བའི་ལམ་ནི་དེ་དག་དང་ཐག་རིང་སྟེ།
[233a.2]དེའི་བར་དུ་བསྒོམ་པའི་ལམ་གྱིས་ཆོད་པའི་ཕྱིར་རོ། །འགྲོ་བས་རབ་ཏུ་ཕྱེ་བའི་ཕྱིར། །ཞེས་བྱ་བ་ནི་ལམ་ལ་ནི་འཇིག་རྟེན་ན་འདིས་འགྲོའོ་ཞེས་འགྲོ་བས་རབ་ཏུ་ཕྱེ་བ་ཡིན་ནོ། །ཡང་ན་ལམ་འགྲོ་བས་ན་ལམ་ཡིན་ཏེ། འཇིག་རྟེན་ན་ལམ་འདི་དམར་བུ་ཅན་དུ་འགྲོ་ཞེས་ཟེར་བའི་ཕྱིར་རོ། །
[233a.3]མཐོང་བའི་ལམ་ནི་ཤིན་ཏུ་འགྲོ་བས་རབ་ཏུ་ཕྱེ་བ་ཡིན་གྱི་བསྒོམ་པའི་ལམ་ནི་མ་ཡིན་ནོ། །ཇི་ལྟ་ཞེ་ན། དེ་ནི་མྱུར་བར་འགྲོ་བ་ཡིན་པའི་ཕྱིར་རོ་ཞེས་བྱ་བ་སྨོས་ཏེ། དེ་དང་ལྡན་པ་ཡང་དེས་མྱུར་དུ་འགྲོའི་བསྒོམ་པའི་ལམ་ལ་ནི་སའི་དབྱེ་བ་བརྩལ་བའི་ཕྱིར་ཡུན་རིང་མོ་ཞིག་ཏུ་འགྲོའོ། །གཞན་
[233a.4]དག་ཅེས་བྱ་བ་ནི་སློབ་དཔོན་ཡིན་ཏེ། བདག་ལ་སོགས་པ་ཞེས་བསམ་པའི་ཕྱིར་རོ། །གོ་རིམས་མ་ཉམས་པ་ཁོ་ནར་ཞེས་བྱ་བ་ནི་ཇི་ལྟར་བྱེ་བྲག་ཏུ་སྨྲ་བ་རྣམས་ཀྱིས་རིམ་པ་གཞན་དུ་སྦྱར་བ་དེ་ལྟར་དེ་བཞིན་དུ་མ་སྦྱར་བར་བྱང་ཆུབ་ཀྱི་ཕྱོགས་དང་མཐུན་པ་རྣམས་གོ་རིམས་བཞིན་དུ་བརྗོད་དེ། བྱང་
[233a.5]ཆུབ་ཀྱི་ཡན་ལག་རྣམས་མཐོང་བའི་ལམ་ལ་འཇོག་པའི་ཕྱིར་རོ། །ཡུལ་རྣམ་པ་མང་པོ་ལ་ཞེས་བྱ་བ་རྒྱས་པར་འབྱུང་བ་ནི་ཡུལ་ནི་གཟུགས་ལ་སོགས་པའི་བྱེ་བྲག་དང་སྔོན་པོ་ལ་སོགས་པའི་བྱེ་བྲག་གིས་རྣམ་པ་མང་པོ་ཡིན་ཏེ། དེ་ལ་གཡེང་བ་ནི་རྣམ་པར་གཡེང་བའོ། །འདི་དག་ལ་ཡུལ་རྣམ་པ་
[233a.6]མང་པོ་ལ་གཡེང་བར་འཕྲོ་བའི་ངང་ཚུལ་ཡོད་པས་ན་ཡུལ་རྣམ་པ་མང་པོ་ལ་གཡེང་བར་འཕྲོ་བའི་བློ་རྣམས་ཏེ། དེ་དག་ཚར་གཅད་པའི་ཕྱིར་དྲན་པ་ཉེ་བར་གཞག་པ་རྣམས་སོ། །ཞེན་པ་ལ་བརྟེན་པ་ཞེས་བྱ་བ་ནི་སྲེད་པ་ལ་བརྟེན་པ་ཞེས་བྱ་བའི་ཐ་ཚིག་གོ། །དྲན་པའི་ཀུན་དུ་རྟོག་པ་རྣམས་ཞེས་བྱ་བ་ནི་
[233a.7]ཡུལ་ཉམས་སུ་མྱོང་བ་དྲན་པའི་ཀུན་དུ་རྟོག་པ་རྣམས་ཞེས་བྱ་བའམ། འདོད་པའི་ཀུན་དུ་རྟོག་པ་རྣམས་ཞེས་བྱ་བའི་དོན་ཏོ། །དེའི་སྟོབས་ཀྱིས་ཞེས་བྱ་བ་ནི་དྲན་པ་ཉེ་བར་གཞག་པའི་སྟོབས་ཀྱིས་ཞེས་བྱ་བའི་ཐ་ཚིག་གོ། །དགོས་པ་རྣམ་པ་བཞི་བསྒྲུབ་པའི་ཕྱིར་ཞེས་བྱ་བ་ལ། དགོས་པ་རྣམ་པ་
[233b]
[233b.1]བཞི་ནི་སྡིག་པ་མི་དགེ་བའི་ཆོས་སྐྱེས་པ་རྣམས་སྤང་བ་དང་མ་སྐྱེས་པ་རྣམས་མི་སྐྱེད་པ་དང་། དེ་བཞིན་དུ་དགེ་བ་མ་སྐྱེས་པ་རྣམས་སྐྱེད་པ་དང་། སྐྱེས་པ་རྣམས་གནས་པར་བྱ་བ་ལ་སོགས་པ་ཡིན་ནོ། །དེའི་འོག་ཏུ་ཏིང་ངེ་འཛིན་རྣམ་པར་སྦྱོང་བའི་ཕྱིར་ཞེས་བྱ་བ་ནི་དེའི་འོག་ཏུ་ཡང་དག་པར་རབ་ཏུ་
[233b.2]འཇོག་པ་དག་གི་རྗེས་ལ་ཏིང་ངེ་འཛིན་རྣམ་པར་སྦྱོང་བའི་ཕྱིར་རྫུ་འཕྲུལ་གྱི་རྐང་པ་རྣམས་རབ་ཏུ་འབྱེད་དོ། །འཇིག་རྟེན་ལས་འདས་པའི་ཆོས་རྣམས་ཀྱི་བདག་པོར་གྱུར་པ་ཞེས་བྱ་བ་ནི་དེ་འདྲེན་པར་བྱེད་པ་ཡིན་པའི་ཕྱིར་དེ་དག་གི་བདག་པོར་གྱུར་པར་རིག་པར་བྱའོ། །དབང་པོ་དེ་དག་ཉིད་གང་གི་ཚེ་
[233b.3]མི་མཐུན་པའི་ཕྱོགས་ཀུན་དུ་སྤྱོད་པ་ལས་ངེས་པར་རྒྱལ་བ་སྟེ། མ་དང་ཕ་ལ་སོགས་པ་ཀུན་དུ་སྤྱོད་པ་ལས་ངེས་པར་རྒྱལ་བར་གྱུར་པ་དེའི་ཚེ་སྟོབས་རྣམས་སོ། །དབང་པོའི་གནས་སྐབས་ན་ནི་ཉོན་མོངས་པ་ཀུན་དུ་སྤྱོད་པ་སྲིད་དེ། བཟོད་པའི་གནས་སྐབས་ན་ནི་ཐག་རིང་བའི་ཕྱིར་རོ། །མཐོང་བའི་
[233b.4]ལམ་ལ་ནི་བྱང་ཆུབ་ཀྱི་ཡན་ལག་རྣམས་ཞེས་བྱ་བ་ནི་བྱང་ཆུབ་ནི་ཟག་པ་མེད་པའི་ཤེས་རབ་ཡིན་པའི་ཕྱིར་རོ། །གཉི་ག་ལ་ནི་ལམ་གྱི་ཡན་ལག་རྣམས་ཞེས་བྱ་བ་ནི་མཐོང་བའི་ལམ་དང་བསྒོམ་པའི་ལམ་དག་ལའོ། །ཇི་ལྟ་ཞེ་ན། འདི་ལྟར་ཞེས་བྱ་བ་རྒྱས་པར་སྨོས་ཏེ། བསྒོམ་པའི་ལམ་ཡོངས་སུ་
[233b.5]རྫོགས་པ་ནི་བསྒོམ་པ་ཡོངས་སུ་རྫོགས་པའོ། །འཕགས་པའི་ལམ་ཡན་ལག་བརྒྱད་པ་གནས་སྐབས་དེར་གྱུར་པ་ན་སྟེ་དེར་གྱུར་ན་དྲན་པ་ཉེ་བར་གཞག་པ་བཞི་ཡོངས་སུ་རྫོགས་པར་འགྱུར་བ་ནས་བྱང་ཆུབ་ཀྱི་ཡན་ལག་བདུན་གྱི་བར་དུ་ཡོངས་སུ་རྫོགས་པར་འགྱུར་རོ་ཞེས་བསྒོམ་པ་
[233b.6]ཡོངས་སུ་རྫོགས་ན་ཞེས་གསུངས་པའི་ཕྱིར་བསྒོམ་པའི་ལམ་ལ་ཡང་འཕགས་པའི་ལམ་ཡན་ལག་བརྒྱད་པོ་ཡོད་དོ་ཞེས་བྱ་བར་མངོན་ནོ། །མཐོང་བའི་ལམ་ལ་ནི་བསྒོམ་པ་ཡོངས་སུ་རྫོགས་པར་མི་འགྱུར་རོ། །འོ་ན་ཇི་ལྟ་ཞེ་ན། བསྒོམ་པའི་ལམ་ལ་རྫོགས་པར་འགྱུར་རོ། །ཡང་
[233b.7]གསུངས་སོ་ཞེས་བྱ་བ་ནི་གཉི་ག་ལ་ལམ་གྱི་ཡན་ལག་དག་རྣམ་པར་གཞག་པ་ཞེས་བྱ་བ་ཡིན་ནོ། །འདི་ནི་འཕགས་པའི་བདེན་པའི་ཚིག་བླ་དགས་ཡིན་ནོ་ཞེས་བྱ་བ་ནི་མཐོང་བའི་ལམ་ཡིན་པར་སྟོན་ཏོ། །ཇི་ལྟར་རྟོགས་པའི་ལམ་གྱིས་འཇུག་ཅེས་བྱ་བ་ནས་རྒྱས་པར་འདི་ནི་འཕགས་པའི་
[234a]
[234a.1]ལམ་ཡན་ལག་བརྒྱད་ཀྱི་ཚིག་བླ་དགས་ཡིན་ནོ་ཞེས་བྱ་བའི་བར་འབྱུང་བ་ནི་བསྒོམ་པའི་ལམ་ཡིན་པར་སྟོན་ཏེ། ཇི་ལྟར་ཐོབ་པའི་ལམ་གྱིས་བྱང་ཆུབ་ཀྱི་བར་དུ་འཇུག་ཅིང་ངེས་པར་འབྱུང་བས་སོ། །དེ་ལྟར་མཐོང་བའི་ལམ་ལ་ཡང་ལམ་གྱི་ཡན་ལག་རྣམས་རྣམ་པར་འཇོག་
[234a.2]པས་དེའི་ཕྱིར། གཉི་ག་ལ་འཕགས་པའི་ལམ་ཡན་ལག་བརྒྱད་འདོད་པར་བྱ་དགོས་པས་བྱང་ཆུབ་ཀྱི་ཡན་ལག་རྣམས་ནི་སྔ་ལ། འཕགས་པའི་ལམ་ཡན་ལག་བརྒྱད་པ་ནི་འཕྱིའོ་ཞེས་བྱ་བའི་གོ་རིམས་གྲུབ་པ་ཡིན་ནོ། །བྱང་ཆུབ་ཡན་ལག་ལམ་ཡན་ལག །ཟག་པ་མེད་ཅེས་བྱ་བ་ནི་ཟག་པ་
[234a.3]མེད་པ་ཁོ་ན་ཡིན་ནོ་ཞེས་ངེས་པར་གཟུང་བ་ཡིན་ནོ། །གཞན་རྣམས་གཉིས་པོ་ཞེས་བྱ་བ་ནི་དྲན་པ་ཉེ་བར་གཞག་པ་ལ་སོགས་པ་སྟོབས་ལ་ཐུགས་པ་རྣམས་སོ། །སྟོབས་ཀྱིས་དྲང་དགོས་པའི་ཕྱིར་ཞེས་བྱ་བ་ནི་སྟོབས་ཀྱིས་ཏེ། བརྩོན་འགྲུས་ཀྱིས་མངོན་དུ་བྱ་བ་ཡིན་པའི་ཕྱིར་མི་ལྕོགས་པ་མེད་པ་ན་
[234a.4]དགའ་བ་མེད་དེ། བདེ་བླག་ཏུ་ཐོབ་པ་ནི་སེམས་དགའ་བར་འགྱུར་གྱི་གཞན་ནི་མ་ཡིན་ནོ། །གཞན་ཡང་ས་འོག་མའི་དོགས་པ་དང་བཅས་པའི་ཕྱིར་ཏེ། ཡོངས་སུ་ཉམས་པར་དོགས་པ་དང་བཅས་པ་དེའི་ཕྱིར་དེ་ན་དགའ་བ་མེད་དེ། དོགས་པ་དང་བཅས་ན་སེམས་དགའ་བར་མི་འགྱུར་རོ། །ཡང་
[234a.5]དག་པའི་རྟོག་པ་མ་གཏོགས་པ་ཞེས་བྱ་བ་ལ། ཡང་དག་པའི་རྟོག་པ་ནི་རྣམ་པར་རྟོག་པ་ཡིན་པས་སོ། །བྱང་ཆུབ་དང་ནི་ལམ་ཡན་ལག །མ་གཏོགས་འདོད་ཁམས་སྲིད་རྩེ་ན། །ཞེས་བྱ་བ་ཇི་ལྟར་ན་སྲིད་པའི་རྩེ་མོ་ན་ལུས་དྲན་པ་ཉེ་བར་གཞག་པ་ཡོད་དེ་དེ་ན་ལུས་ནི་མེད་དོ། །ལུས་དྲན་
[234a.6]པ་ཉེ་བར་གཞག་པ་ནི་ལུས་ལ་དམིགས་པའི་ཤེས་རབ་ཡིན་ན་གྲུབ་པའི་མཐའ་ལས། གཟུགས་མེད་དངོས་གཞི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་མིན། །ཞེས་འབྱུང་བས་སྲིད་པའི་རྩེ་མོ་ནི་འདོད་པའི་ཁམས་དང་གཟུགས་ཀྱི་ཁམས་ལ་དམིགས་པ་ཡང་མ་ཡིན་ནོ་ཞེ་ན། འདི་
[234a.7]ནི་རྣམ་པར་བཤད་པ་བྱེད་པ་གང་གིས་ཀྱང་མ་བྲིས་ཏེ། དེའི་ཕྱིར་འདིར་ནི་རྣམ་པར་གཞག་པར་བྱའོ། །ལུས་ཀྱི་ངོ་བོ་ཉིད་གང་ཡིན་ཞེ་ན། འབྱུང་བ་དང་འབྱུང་བ་ལས་གྱུར་པ་ཉིད་ཡིན་པར་བཤད་དེ། ལུས་ནི་འབྱུང་བ་དང་འབྱུང་བ་ལས་གྱུར་པ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལ་གལ་ཏེ་ཤེས་
[234b]
[234b.1]རབ་འབྱུང་བ་འབའ་ཞིག་ལ་དམིགས་པ་འམ། འབྱུང་བ་ལས་གྱུར་པ་འབའ་ཞིག་ལ་དམིགས་པར་གྱུར་ན་ཡང་དེ་ལུས་དྲན་པ་ཉེ་བར་གཞག་པ་ཁོ་ན་ཡིན་པར་འགྱུར་ལ། སྲིད་པའི་རྩེ་མོ་ན་ཡང་ཤེས་རབ་དགེ་བ་ཟག་པ་དང་བཅས་པས་ཟག་པ་མེད་པའི་སྡོམ་པ་ལ་ལམ་ཞེས་བྱ་བ་འམ། ཅི་
[234b.2]ཡང་མེད་པའི་སྐྱེ་མཆེད་ཅེས་བྱ་བར་དམིགས་སོ། །གཟུགས་མེད་པའི་དངོས་གཞི་དགེ་བ་རྣམས་ནི་ཟག་པ་དང་བཅས་པ་འོག་མ་ལ་དམིགས་པར་མི་འདོད་ཀྱི། ཟག་པ་མེད་པ་འོག་མ་ལ་དམིགས་པར་མི་འདོད་པ་ནི་མ་ཡིན་པས་དེའི་ཕྱིར་དེ་ན་ལུས་དྲན་པ་ཉེ་བར་གཞག་པ་ཡོད་པར་རིག་པར་བྱའོ། །
[234b.3]ཤེས་ནས་དད་པ་ནི་བཞི་སྟེ། སངས་རྒྱས་དང་། ཆོས་དང་། དགེ་འདུན་ལ་ཤེས་ནས་དད་པ་དང་། འཕགས་པ་དགྱེས་པའི་ཚུལ་ཁྲིམས་དག་གོ། །དེ་ལ་སྡུག་བསྔལ་གྱི་བདེན་པ་ལ་སོགས་པ་ནི་ཆོས་ཡིན་པའི་ཕྱིར་དང་། སངས་རྒྱས་དང་། ཆོས་དང་། དགེ་འདུན་གྱི་ངོ་བོ་ཉིད་མ་ཡིན་པའི་
[234b.4]ཕྱིར་གོ་རིམས་བཞིན་དུ། ཆོས་ཤེས་ནས་དད་པ་དང་། འཕགས་པ་དགྱེས་པའི་ཚུལ་ཁྲིམས་ཟག་པ་མེད་པ་རྣམས་འཐོབ་ཀྱི་སངས་རྒྱས་དང་དགེ་འདུན་ལ་ཤེས་ནས་དད་པ་ནི་མ་ཡིན་ནོ། །ལམ་གྱི་བདེན་པ་མངོན་པར་རྟོགས་ན། །སངས་རྒྱས་དང་དེའི་ཉན་ཐོས་ཀྱི་དགེ་འདུན་ལ་ཤེས་ནས་
[234b.5]དད་པ་འཐོབ་སྟེ། ལམ་ནི་སངས་རྒྱས་དང་། དགེ་འདུན་གྱི་ངོ་བོ་ཉིད་ཡིན་པའི་ཕྱིར་རོ། །འདིར་གང་ལ་ཆོས་སུ་དགོངས་པ་ཡིན་ཞེས་བྱ་བ་ནི་དགེ་བའི་ཆོས་ཞེས་བྱ་བ་ལ་སོགས་པ་མང་བ་ཞིག་ཡོད་ན། ཆོས་ལ་ཤེས་ནས་དད་པ་འཐོབ་པོ་ཞེས་བཤད་པ་གང་ཡིན་པ་དེ་འདིར་གང་ལ་ཆོས་སུ་དགོངས་
[234b.6]པ་ཡིན་ཞེས་བྱ་བ་ཡིན་ནོ། །ཡང་ན་འདི་ནི་སངས་རྒྱས་དཀོན་མཆོག་དང་དགེ་འདུན་དཀོན་མཆོག་ཅེས་བྱ་བ་ཡིན་ཏེ། དེ་ལྟ་བས་ན་འདི་ཡང་འདིར་ཆོས་དཀོན་མཆོག་ཡིན་པར་དགོངས་པར་འགྱུར་ཏེ། དཀོན་མཆོག་གསུམ་གྱི་ངོ་བོ་ཉིད་ནི། གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་
[234b.7]དགེ་འདུན་བྱེད་པའི་ཆོས། །མི་སློབ་པ་དང་གཉི་ག་དང་། །མྱ་ངན་འདས་ལ་སྐྱབས་སུ་འགྲོ། །ཞེས་བཤད་པ་འདི་ཡིན་པས། དེ་ཅི་འདི་མྱ་ངན་ལས་འདས་པའི་ཆོས་ཡིན་པར་དགོངས་སམ་སྙམ་ནས། དེའི་ཕྱིར་འདིར་གང་ལ་ཆོས་སུ་དགོངས་པ་ཡིན་ཞེས་འདྲིའོ། །ཆོས་བདེན་གསུམ་
[235a]
[235a.1]དང་ཞེས་བྱ་བ་རྒྱས་པར་འབྱུང་བ་ནི་སྡུག་བསྔལ་དང་། ཀུན་འབྱུང་བ་དང་། འགོག་པའི་བདེན་པ་དང་། བྱང་ཆུབ་སེམས་དཔའ་སློབ་པའི་གནས་སྐབས་ཀྱི་ལམ་ཟག་པ་མེད་པ་དང་། རང་སངས་རྒྱས་ཀྱི་ལམ་སློབ་པ་དང་མི་སློབ་པའི་མཚན་ཉིད་ནི་འདིར་ཆོས་ཡིན་པར་དགོངས་སོ། །དེའི་
[235a.2]ཕྱིར་བདེན་པ་བཞི་ཆར་ཡང་ཞེས་བྱ་བ་རྒྱས་པར་འབྱུང་བ་ནི་ལམ་གྱི་བདེན་པ་མངོན་པར་རྟོགས་ན་ཡང་བྱང་ཆུབ་སེམས་དཔའ་དང་རང་སངས་རྒྱས་ཀྱི་ལམ་གྱི་མཚན་ཉིད་ཀྱི་ཆོས་མངོན་པར་རྟོགས་པར་འགྱུར་ཏེ། དེ་ལྟ་བས་ན་བདེན་པ་བཞི་ཆར་ཡང་མངོན་པར་རྟོགས་ན་ཆོས་ལ་ཤེས་ནས་དད་པ་ཐོབ་པོ་ཞེས་
[235a.3]བཤད་དོ། །སངས་རྒྱས་དང་དགེ་འདུན་དག་གི་ལམ་ལ་ནི་ཆོས་ཞེས་མི་བརྗོད་དེ་འདི་ལྟར་དེ་མངོན་པར་རྟོགས་ན་སངས་རྒྱས་དང་དགེ་འདུན་ལ་ཤེས་ནས་དད་པ་ཐོབ་པས་སོ། །ཡང་ཇི་ལྟར་ལམ་མངོན་པར་རྟོགས་ན་དད་པའི་མཚན་ཉིད་གསུམ་པོ་སངས་རྒྱས་དང་། ཆོས་དང་དགེ་འདུན་ལ་ཤེས་ནས་
[235a.4]དད་པ་རྣམས་ཅིག་ཅར་དུ་མངོན་དུ་འགྱུར་ཞེ་ན། དེ་ཉིད་དད་པའི་གཞིའི་བྱེ་བྲག་ལ་ལྟོས་ནས་མིང་གསུམ་འཐོབ་པས་ཉེས་པ་མེད་དོ། །ཡང་ན་ཆོས་ལ་ཤེས་ནས་དད་པ་ནི་ད་ལྟར་བྱུང་བ་ཡིན་ལ། མ་འོངས་པ་ནི་གསུམ་ཆར་འཐོབ་པས་དེའི་ཕྱིར། ལམ་མངོན་རྟོགས་ན་སངས་རྒྱས་དང་། །དེ་ཡི་
[235a.5]དགེ་འདུན་དག་ལ་ཡང་། །ཞེས་བཤད་དོ། །གལ་ཏེ་གཞི་ལ་ལྟོས་ཏེ་ཤེས་ནས་དད་པ་རྣམ་པར་གཞག་ན་ནི་ཆོས་ལ་ཤེས་ནས་དད་པ་སྔར་གདོན་དགོས་སོ་ཞེ་ན། དེའི་ཕྱིར་འདི་དག་གི་རིམ་པ་ནི་ལངས་ནས་ཇི་ལྟར་མངོན་དུ་བྱེད་པ་དེ་བཞིན་དུ་བཀོད་དོ་ཞེས་བྱ་བ་སྨོས་སོ། །སྨན་པ་དང་། སྨན་དང་ནད་
[235a.6]གཡོག་ལྟ་བུར་གྱུར་པའི་ཕྱིར་རོ་ཞེས་བྱ་བ་ལ། བཅོམ་ལྡན་འདས་ནི་མདོ་ལས་སྨན་པ་ཟུག་རྔུ་འབྱིན་པ་བླ་ན་མེད་པ་ཞེས་འབྱུང་བས་སྨན་པ་ལྟ་བུ་ཡིན་ཏེ། ཆོས་ཀྱི་སྨན་སྟོན་པའི་ཕྱིར་རོ། །ཆོས་ནི་སྨན་ལྟ་བུ་ཡིན་ཏེ། ཉོན་མོངས་པའི་ནད་གསོ་བའི་ཕྱིར་དང་། མྱ་ངན་ལས་འདས་པ་
[235a.7]ནད་མེད་པ་འཐོབ་པར་བྱེད་པའི་ཕྱིར་རོ། །དགེ་འདུན་ནི་ནད་གཡོག་ལྟ་བུ་ཡིན་ཏེ། མྱ་ངན་ལས་འདས་པ་ནད་མེད་པ་ཐོབ་པར་བྱ་བའི་ཕྱིར། ཕན་ཚུན་གྲོགས་བྱེད་པའི་ཕྱིར་རོ། །སེམས་རབ་ཏུ་དང་བས་བྱས་པའི་ཚུལ་ཁྲིམས་ཀྱང་རབ་ཏུ་དང་བ་ཡིན་པས་ཞེས་བྱ་བ་ནི་སེམས་རབ་ཏུ་དང་
[235b]
[235b.1]བ་རྣམ་པ་གསུམ་པོ་ཀྱེ་མ་བཅོམ་ལྡན་འདས་ནི་ཡང་དག་པར་རྫོགས་པའི་སངས་རྒྱས་ཡིན་ནོ། །དེའི་ཆོས་འདུལ་བ་ནི་ལེགས་པར་གསུངས་པ་ཡིན་ནོ། །དེའི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ་ཡིན་ནོ་ཞེས་བྱ་བ་དེས་བྱས་པའི་ཚུལ་ཁྲིམས་ཀྱང་རབ་ཏུ་དང་བ་ཡིན་ནོ། །ཚུལ་ཁྲིམས་
[235b.2]ཉིད་རབ་ཏུ་དང་བ་ཡིན་པ་འམ་ཚུལ་ཁྲིམས་ཀྱི་རབ་ཏུ་དང་བ་ཟག་པ་མེད་པ་ཉིད་ཡིན་པས་ཚུལ་ཁྲིམས་རབ་ཏུ་དང་བ་སྟེ་ཚུལ་ཁྲིམས་རབ་ཏུ་དང་བ་ནི་རབ་ཏུ་དང་བ་གསུམ་གྱི་ཐ་མར་བཞི་པ་བཤད་དོ། །ཅིའི་ཕྱིར་ཞེ་ན། སྨྲས་པ། འདི་ནི་ཀྱེ་མ་བཅོམ་ལྡན་འདས་ནི་ཡང་དག་པར་རྫོགས་པའི་སངས་རྒྱས་
[235b.3]ཡིན་ནོ་ཞེས་བྱ་བ་རྒྱས་པར་འབྱུང་བ་དེ་ལྟར་རབ་ཏུ་དང་བར་གྱུར་པའི་སྒྲུབ་པ་ཡིན་ཏེ། འཕགས་པ་དགྱེས་པའི་ཚུལ་ཁྲིམས་ནི་སྒྲུབ་པ་ཡིན་ནོ་ཞེས་བྱ་བའི་ཐ་ཚིག་གོ། །ཡང་ན་ནད་མེད་པར་གྱུར་པ་ལྟ་བུ་ཡིན་པའི་ཕྱིར་རོ་ཞེས་བྱ་བ་ཅི་ཞེ་ན། སྨན་པ་དང་། སྨན་དང་། ནད་གཡོག་དང་། ནད་མེད་པའི་
[235b.4]གོ་རིམས་དང་མཐུན་པར་ཚུལ་ཁྲིམས་རབ་ཏུ་དང་བ་ཐ་མར་བཤད་པ་ཡིན་ནོ། །ཡང་ན་སྟོན་པར་བྱེད་པ་དང་། ལམ་དང་། ལམ་གྲོགས་དང་། བཞོན་པ་ལྟ་བུ་ཡིན་ནོ་ཞེས་བྱ་བ་ཅི་ཞེ་ན། ཐ་མར་བཞི་པ་བཤད་དོ་ཞེས་བྱ་བའི་སྐབས་ཡིན་ནོ། །བཅོམ་ལྡན་འདས་ནི་སྟོན་པར་བྱེད་པ་ལྟ་བུ་ཡིན་ནོ། །
[235b.5]ཆོས་ནི་ལམ་ལྟ་བུ་ཡིན་ནོ། །དགེ་འདུན་ནི་ལམ་གྲོགས་ལྟ་བུ་ཡིན་ནོ། །འཕགས་པ་དགྱེས་པའི་ཚུལ་ཁྲིམས་དག་ནི་བཞོན་པ་ལྟ་བུ་ཡིན་ནོ། །འཕགས་པ་རྣམས་དགྱེས་ཤིང་མཉེས་པར་འགྱུར་བས་ན་འཕགས་པ་དགྱེས་པ་དག་གོ། །ཡན་ལག་བརྒྱད་དང་ལྡན་ནོ་ཞེས་བྱ་བ་ནི་སློབ་པ་ནི་ཡན་
[235b.6]ལག་བརྒྱད་དང་ལྡན་ནོ། །བརྒྱད་གང་ཞེ་ན་སློབ་པའི་ཡང་དག་པའི་ལྟ་བ་ནས། སློབ་པའི་ཡང་དག་པའི་ཏིང་ངེ་འཛིན་གྱི་བར་རོ། །མི་སློབ་པ་ནི་ཡན་ལག་བཅུ་དང་ལྡན་ནོ། །བཅུ་གང་ཞེ་ན། མི་སློབ་པའི་ཡང་དག་པའི་ལྟ་བ་ནས་མི་སློབ་པའི་ཡང་དག་པའི་ཏིང་ངེ་འཛིན་གྱི་བར་དང་། མི་སློབ་པའི་
[235b.7]ཡང་དག་པའི་རྣམ་པར་གྲོལ་བ་དང་། མི་སློབ་པའི་ཡང་དག་པའི་ཤེས་པའོ། །རྣམ་པར་གྲོལ་བ་དང་དེ་སོ་སོ་རང་གི་ཤེས་པ་དག་གི་རབ་ཏུ་ཕྱེ་བ་ཡིན་པས་ཞེས་བྱ་བ་ནི་རྣམ་པར་གྲོལ་བ་སྟེ་སོ་སོ་རང་གི་ཤེས་པས་དེའི་སོ་སོ་རང་གི་ཤེས་པའོ། །རྣམ་པར་གྲོལ་བ་དང་དེའི་སོ་སོ་རང་གི་ཤེས་པ་ནི་རྣམ་པར་
[236a]
[236a.1]གྲོལ་བ་དང་དེའི་སོ་སོ་རང་གི་ཤེས་པ་དག་གོ། །དེ་དག་གིས་རབ་ཏུ་ཕྱེ་བ་ཡིན་ཏེ། ཉོན་མོངས་པ་ལས་རྣམ་པར་གྲོལ་བ་དང་། ཉོན་མོངས་པ་ལས་རྣམ་པར་གྲོལ་བ་སོ་སོ་རང་གི་ཤེས་པས་བདག་ནི་ཉོན་མོངས་པ་དག་ལས་རྣམ་པར་གྲོལ་ལོ་ཞེས་བྱ་བར་རབ་ཏུ་ཕྱེ་ཞིང་རབ་ཏུ་བསྟན་
[236a.2]པས་ཞེས་བྱ་བའི་ཐ་ཚིག་གོ། །མི་སློབ་པ་དེ་ཁོ་ན་ལ་དེ་སྨོས་པ་སྟེ་རྣམ་པར་གྲོལ་བ་སྨོས་པ་དང་། རྣམ་པར་གྲོལ་བའི་ཡེ་ཤེས་སྨོས་པ་རིགས་པ་དང་ལྡན་པ་ཡིན་གྱི་སློབ་པ་ལ་ནི་མ་ཡིན་ནོ། །མོས་པ་ནི་རྣམ་པར་གྲོལ་བ་འདུས་བྱས་ཡིན་ནོ་ཞེས་བྱ་བ་ནི་མོས་པ་དང་རྣམ་པར་གྲོལ་བ་ཞེས་བྱ་བ་ནི་
[236a.3]སྐད་ཀྱི་དབྱིངས་གཅིག་པའི་ཕྱིར་རོ། །ཡན་ལག་རྣམས་ནི་འདུས་བྱས་ཡིན་པའི་ཕྱིར་རོ་ཞེས་བྱ་བ་ནི་ཇི་ལྟར་ཡང་དག་པའི་ལྟ་བ་ལ་སོགས་པའི་དུས་བྱས་ཡིན་པ་དེ་བཞིན་དུ་མོས་པ་ཡང་འདུས་མ་བྱས་ནི་མ་ཡིན་ཏེ། སྐལ་བ་མི་མཉམ་པའི་ཕྱིར་རོ། །མདོ་ལས། རྣམ་པར་གྲོལ་བ་གཉིས་སུ་
[236a.4]གསུངས། །ཞེས་བྱ་བ་ནི་འདོད་ཆགས་ལས་འདོད་ཆགས་དང་བྲལ་བའི་ཕྱིར་སེམས་རྣམ་པར་གྲོལ་ལ། མ་རིག་པ་ལས་འདོད་ཆགས་དང་བྲལ་བའི་ཕྱིར་ཤེས་རབ་རྣམ་པར་གྲོལ་བས་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་ཡིན་ནོ་ཞེས་བྱ་བའི་ཐ་ཚིག་གོ། །དེ་ཉིད་
[236a.5]རྣམ་པར་གྲོལ་བའི་ཕུང་པོ་ཡིན་པར་ཡང་ལྟའོ་ཞེས་བྱ་བ་ནི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཞེས་བྱ་བ་འདིར་བལྟ་བར་བྱའོ། །གཞན་དག་ན་རེ་ཞེས་བྱ་བ་ནི་
[236a.6]སློབ་དཔོན་ནོ། །འོ་ན་མདོ་ལས་ཞེས་བྱ་བ་ནི་སྟག་གི་བྱང་ཆུབ་ཀྱི་བུ་དག་བཞི་པོ་འདི་དག་ནི་ཡོངས་སུ་དག་པའི་གཙོ་བོ་ཡིན་ཏེ། བཞི་གང་ཞེ་ན། ཚུལ་ཁྲིམས་ཡོངས་སུ་དག་པ་གཙོ་བོ་དང་། ཏིང་ངེ་འཛིན་ཡོངས་སུ་དག་པ་གཙོ་བོ་དང་། ལྟ་བ་ཡོངས་སུ་དག་པ་གཙོ་བོ་དང་། རྣམ་པར་
[236a.7]གྲོལ་བ་ཡོངས་སུ་དག་པ་གཙོ་བོ་ཞེས་བྱ་བ་རྒྱས་པར་བཤད་ནས། སྟག་གི་བྱང་ཆུབ་ཀྱི་བུ་དག་རྣམ་པར་གྲོལ་བ་ཡོངས་སུ་དག་པ་གཙོ་བོ་གང་ཡིན་ཞེ་ན་ཞེས་བྱ་བ་ནས་འདུན་པ་དང་བརྩོན་འགྲུས་ཞེས་བྱ་བའི་བར་རྒྱས་པར་གསུངས་སོ། །སྟག་གི་བྱང་ཆུབ་ཀྱི་བུ་དག་ཅེས་མང་པོའི་ཚིག་སྨོས་
[236b]
[236b.1]པ་ནི་དེ་དག་མང་བའི་ཕྱིར་རོ། །རྣམ་པར་གྲོལ་བ་ཡོངས་སུ་དག་པའི་གཙོ་བོ་ཞེས་བྱ་བ་ནི་རྣམ་པར་གྲོལ་བའི་ཡོངས་སུ་དག་པའི་གཙོ་བོ་ནི་རྣམ་པར་གྲོལ་བ་ཡོངས་སུ་དག་པ་སྟེ་དེའི་ཆེད་ཀྱི་གཙོ་བོ་ནི་བརྩོན་འགྲུས་ཡིན་པས་རྣམ་པར་གྲོལ་བ་ཡོངས་སུ་དག་པའི་གཙོ་བོའོ། །དེ་ལྟར་ན་འདིར་རྣམ་པར་
[236b.2]གྲོལ་བ་དང་། ཡོངས་སུ་དག་པ་དང་། གཙོ་བོ་ཞེས་བྱ་བ་དྲི་བ་གསུམ་སྟེ། དེ་ལ་འདི་ལ་དགེ་སློང་འདོད་ཆགས་ལས་སེམས་འདོད་ཆགས་དང་བྲལ་ཞིང་རྣམ་པར་གྲོལ་བ་ཡིན་ཞེ་སྡང་དང་གཏི་མུག་ལས་སེམས་འདོད་ཆགས་དང་བྲལ་ཞིང་རྣམ་པར་གྲོལ་བ་ཡིན་ཏེ་ཞེས་བྱ་བ་ནི་རྣམ་པར་གྲོལ་བ་
[236b.3]བཤད་དོ། །འདི་ལྟར་རྣམ་པར་གྲོལ་བའི་ཕུང་པོ་ཡོངས་སུ་མ་རྫོགས་པ་ཡོངས་སུ་རྫོགས་པར་བྱེད་པའམ། ཡོངས་སུ་རྫོགས་པ་རྗེས་སུ་འཛིན་པར་བྱེད་པ་ཞེས་བྱ་བས་ནི་རྣམ་པར་གྲོལ་བ་ཡོངས་སུ་དག་པ་ཡོངས་སུ་རྫོགས་པ་དང་རྗེས་སུ་འཛིན་པའི་མཚན་ཉིད་བཤད་དོ། །འདུན་པ་དང་བརྩོན་
[236b.4]འགྲུས་གང་ཡིན་པ་ཞེས་བྱ་བ་རྒྱས་པར་འབྱུང་བས་ནི་གཙོ་བོ་བཤད་དེ། གང་གི་ཕྱིར་དེ་ལྟར་འདོད་ཆགས་ལ་སོགས་པ་ལས་རྣམ་པར་གྲོལ་ཞིང་སྤངས་པ་ཡིན་ནོ་ཞེས་མདོ་ལས་རྣམ་པར་གྲོལ་བའི་མཚན་ཉིད་དེ་ལྟ་བུ་ཡིན་པར་བཤད་ཀྱི་མོས་པ་ནི་མ་ཡིན་པར་བཤད་པ་དེའི་ཕྱིར་རྣམ་པར་གྲོལ་བ་ནི་
[236b.5]མོས་པ་ཁོ་ན་ཡིན་པར་མ་ཟད་དོ། །འོ་ན་ཅི་ཞེ་ན། དེ་ཁོ་ན་ཤེས་པས་འདོད་ཆགས་ལ་སོགས་པ་སྤངས་ན། སེམས་དྲི་མ་མེད་པ་ཉིད་དེ་ཟག་པ་མེད་པའི་ངོ་བོ་ཉིད་དང་དོན་གཞན་མ་ཡིན་པར་གྱུར་པ་མར་གྱི་ཉིང་ཁུ་དང་བ་ལྟ་བུ་ཡིན་ནོ་ཞེས་ཟེར་རོ། །དེ་སྐྱེ་བ་ལ་གེགས་བྱེད་པའི་ཕྱིར་རོ་ཞེས་བྱ་བ་ནི་མི་
[236b.6]སློབ་པའི་སེམས་དེ་སྐྱེ་བ་ལ་གེགས་བྱེད་པའི་ཕྱིར་ཉོན་མོངས་པའི་ཐོབ་པ་ནི་གེགས་ཡིན་ནོ། །འོ་ན་སྐྱེ་བར་འགྱུར་བ་མ་ཡིན་པ་ཞེས་བྱ་བ་ནི་མི་སློབ་པ་མ་འོངས་པ་ཉིད་རྡོ་རྗེ་ལྟ་བུའི་མཇུག་ཐོགས་སུ་མི་འབྱུང་བ་གང་ཡིན་པའོ། །འཇིག་རྟེན་པ་ཞེས་བྱ་བ་ནི་མི་སློབ་པ་ཁོ་ནའི་རྒྱུད་ལ་འཇིག་རྟེན་པ་ཡོད་
[236b.7]པ་གང་ཡིན་པའོ། །སྐྱེ་བར་ངེས་པ་གང་ཡིན་པ་དེ་ཁོ་ན་བཤད་དོ་ཞེས་བྱ་བ་ནི་བསྟན་བཅོས་ལས། མ་འོངས་པ་སྐྱེ་བ་ལ་མངོན་དུ་ཕྱོགས་པ་གང་ཡིན་པ་དེ་ཁོ་ན་རྣམ་པར་གྲོལ་བར་འགྱུར་རོ་ཞེས་བཤད་དེ། དེ་རྣམ་པར་གྲོལ་བ་ནི་བརྟག་སླ་བའི་ཕྱིར་རོ་སྙམ་དུ་དགོངས་པ་ཡིན་ནོ། །སྐྱེ་བའི་སྒྲིབ་
[237a]
[237a.1]པ་དེ་ཉིད་ལས་སོ་ཞེས་བྱ་བ་ནི་དེའི་ཉོན་མོངས་པའི་ཐོབ་པ་དེ་ཉིད་ལས་ཏེ། འདིར་གཏན་ཚིགས་ཀྱང་དེ་སྐྱེ་བ་ལ་གེགས་བྱེད་པའི་ཕྱིར་རོ་ཞེས་བྱ་བ་དེ་ཁོ་ན་བརྗོད་པར་བྱའོ། །གལ་ཏེ་མི་སློབ་པའི་རྒྱུད་ལ་ཡོད་པའི་འཇིག་རྟེན་པ་རྣམ་པར་གྲོལ་བར་འགྱུར་རོ་ཞེས་ཁས་ལེན་ན་སློབ་པ་ལ་ཡང་
[237a.2]འཇིག་རྟེན་པ་སྐྱེ་ན་ཅིའི་ཕྱིར་རྣམ་པར་གྲོལ་བར་འགྱུར་རོ་ཞེས་བྱ་བར་ཁས་མི་ལེན་ཅེ་ན། དེའི་ཕྱིར་དེ་ནི་དེ་དང་མི་འདྲའོ་ཞེས་བྱ་བ་ལ་སོགས་པ་སྨོས་ཏེ། སློབ་པའི་འཇིག་རྟེན་པ་དེ་ནི་ཉོན་མོངས་པའི་ཐོབ་པ་དང་། ལྷན་ཅིག་པ་ཡིན་གྱི་མི་སློབ་པའི་འཇིག་རྟེན་པ་དེ་ནི་དེ་ལྟ་མ་ཡིན་པས་མི་འདྲའོ། །འགག་
[237a.3]པར་འགྱུར་བ་ཞེས་བྱ་བ་ནི་འགག་པ་ལ་མངོན་དུ་ཕྱོགས་པའོ། །དེའི་སྒྲིབ་པ་ཞེས་བྱ་བ་ནི་མི་སློབ་པའི་སེམས་ཀྱི་སྒྲིབ་པའོ། །བསྟན་བཅོས་སམ། འདི་ཉིད་ལས། ཉོན་མོངས་བཅོམ་པ་འདུས་མ་བྱས། །ཞེས་རྣམ་པར་གྲོལ་བ་འདུས་མ་བྱས་སུ་བཤད་པ་གང་ཡིན་པ་དང་། ཁམས་གསུམ་
[237a.4]པོ་འབྱུང་བ་གང་དག་ཡིན་པ་སྟེ། གང་ལས་འབྱུང་ཞེ་ན། མདོ་འམ། བསྟན་བཅོས་ལས་སོ། །འདོད་ཆགས་ཀུན་ཟད་འདོད་ཆགས་བྲལ། །ཞེས་བྱ་བ་ནི་ཁྱད་པར་བརྗོད་པར་བཞེད་ནས་འདི་སྐད་ཅེས་བཤད་དོ། །ཁྱད་པར་བརྗོད་པར་མི་བཞེད་ན་ནི་འདོད་ཆགས་དང་བྲལ་བ་གང་ཡིན་པ་དེ་སྤངས་པ་
[237a.5]ཞེས་ཀྱང་བྱ་ལ། འགོག་པ་ཞེས་ཀྱང་བྱ་བ་ལ་སོགས་པ་ཡིན་ནོ། །གཞི་ཞེས་བྱ་བ་ནི་གཟུགས་ལ་སོགས་པ་ཟག་པ་དང་བཅས་པའོ། །མུ་བཞིའོ་ཞེས་བྱ་བ་ནི་ཡིད་འབྱུང་བར་འགྱུར་ལ་འདོད་ཆགས་དང་བྲལ་བར་མི་འགྱུར་བ་ཡང་ཡོད། འདོད་ཆགས་དང་བྲལ་བར་འགྱུར་ལ་ཡིད་འབྱུང་བར་
[237a.6]མི་འགྱུར་བ་ཡང་ཡོད། གཉི་གར་འགྱུར་བ་ཡང་ཡོད། གཉི་གར་མི་འགྱུར་བ་ཡང་ཡོད་ཅེས་བྱ་བ་ཡིན་ནོ། །སྡུག་བསྔལ་རྒྱུ་བཟོད་ཤེས་རྣམས་ཀྱིས། །ཡིད་འབྱུང་ཞེས་བྱ་བ་འདིས་ནི་དངོས་པོའི་རྒྱུ་ལས་བྱུང་བའི་ཡིད་འབྱུང་བ་སྟོན་ཏོ། །གང་གིས་སྤོང་འགྱུར་བ། ཀུན་གྱི་འདོད་ཆགས་བྲལ་
[237a.7]བར་འགྱུར། །ཞེས་བྱ་བ་འདིས་ནི་སྤོང་བར་བྱེད་པའི་རྒྱུ་ལས་བྱུང་བའི་འདོད་ཆགས་དང་བྲལ་བར་སྟོན་ཏོ། །དེ་ལྟ་ན་མུ་བཞི་གྲུབ་སྟེ་ཞེས་བྱ་བ་ནི་དེ་ལྟར་ཡིད་འབྱུང་བ་དང་འདོད་ཆགས་དང་བྲལ་བའི་རྒྱུ་ཡོངས་སུ་བཅད་དེ། སྦྱར་ན་མུ་བཞི་འགྲུབ་པོ་སྙམ་དུ་དགོངས་པ་ཡིན་ནོ། །ཇི་ལྟ་ཞེ་ན། ཡིད་འབྱུང་
[237b]
[237b.1]བ་ཁོ་ན་ཡིན་ཞེས་བྱ་བ་རྒྱས་པར་སྨོས་ཏེ། སྡུག་བསྔལ་དང་ཀུན་འབྱུང་བ་ལ་བཟོད་པ་རྣམས་དང་། སྡུག་བསྔལ་བ་དང་ཀུན་འབྱུང་བ་ལ་ཤེས་པ་རྣམས་ཀྱིས་ནི་ཡིད་འབྱུང་བ་ཁོ་ན་ཡིན་ཏེ། ཡིད་འབྱུང་བའི་དངོས་པོ་ལ་དམིགས་པའི་ཕྱིར་རོ། །སྡུག་བསྔལ་དང་ཀུན་འབྱུང་བ་དག་ནི་ཡིད་འབྱུང་
[237b.2]བའི་དངོས་པོའི་དམིགས་པ་ཡིན་ནོ། །འདོད་ཆགས་དང་བྲལ་བར་མི་འགྱུར་ཏེ། ཉོན་མོངས་པ་དག་མི་སྤོང་ན་ཞེས་བྱ་བའི་ཚིག་གིས་སྤོང་བར་བྱེད་པ་མེད་པའི་ཕྱིར་རོ། །མཐོང་བའི་ལམ་ལ་འགོག་པ་དང་། ལམ་ལ་བཟོད་པ་རྣམས་དང་བསྒོམ་པའི་ལམ་ལ་འགོག་པ་དང་ལམ་ཤེས་པ་རྣམས་ཀྱི་ནི་འདོད་
[237b.3]ཆགས་དང་བྲལ་བ་ཁོ་ན་ཡིན་ཏེ། ཉོན་མོངས་པ་དག་སྤོང་ན་ཞེས་འབྱུང་བས་སྤོང་བར་བྱེད་པ་ཡོད་པའི་ཕྱིར་རོ། །ཡིད་འབྱུང་བར་མི་འགྱུར་ཏེ། མཆོག་ཏུ་དགའ་བའི་དངོས་པོ་ལ་དམིགས་པའི་ཕྱིར་རོ། །མྱ་ངན་ལས་འདས་པ་དང་ལམ་དག་ནི་མཆོག་ཏུ་དགའ་བའི་དངོས་པོའི་དམིགས་པ་ཡིན་ནོ། །
[237b.4]སྔ་མ་རྣམས་ཀྱི་ཉོན་མོངས་པ་དག་སྤོང་ན་གཉི་ག་ཡིན་ནོ་ཞེས་བྱ་བ་ནི་སྔ་མ་སྡུག་བསྔལ་དང་ཀུན་འབྱུང་བ་ལ་བཟོད་པ་དང་ཤེས་པ་རྣམས་ཀྱིས་ནི་ཡིད་འབྱུང་བར་ཡང་འགྱུར་ལ། འདོད་ཆགས་དང་བྲལ་བར་ཡང་འགྱུར་ཏེ། ཡིད་འབྱུང་བའི་དངོས་པོ་ལ་དམིགས་པའི་ཕྱིར་ཡིད་འབྱུང་བར་འགྱུར་རོ། །
[237b.5]ཉོན་མོངས་པ་དག་སྤོང་ན་ཞེས་བྱ་བའི་ཚིག་གིས་དེ་སྤོང་བར་བྱེད་པ་ཡོད་པའི་ཕྱིར་འདོད་ཆགས་དང་བྲལ་བར་འགྱུར་རོ། །ཕྱི་མ་རྣམས་ཀྱི་ཉོན་མོངས་པ་དག་མི་སྤོང་བ་གཉི་ག་མ་ཡིན་ནོ་ཞེས་བྱ་བ་ནི་ཕྱི་མ་འགོག་པ་དང་ལམ་ལ་བཟོད་པ་དང་ཤེས་པ་རྣམས་ཀྱིས་ནི་ཡིད་འབྱུང་བར་ཡང་མི་འགྱུར་ལ།
[237b.6]འདོད་ཆགས་དང་བྲལ་བར་ཡང་མི་འགྱུར་ཏེ། མཆོག་ཏུ་དགའ་བའི་དངོས་པོ་ལ་དམིགས་པའི་ཕྱིར་ཡིད་འབྱུང་བར་མི་འགྱུར་རོ། །ཉོན་མོངས་པ་དག་མི་སྤོང་ན་ཞེས་བྱ་བའི་ཚིག་གིས་སྤོང་བར་བྱེད་པ་མེད་པའི་ཕྱིར་འདོད་ཆགས་དང་བྲལ་བར་མི་འགྱུར་རོ། །སྨྲས་པ་མུ་དང་པོ་དང་། བཞི་པ་ལ་
[237b.7]ཉོན་མོངས་པ་དག་མི་སྤོང་ན་ཞེས་བསྟན་པ་གང་ཞིག་གང་དག་ཉོན་མོངས་པ་མི་སྤོང་ཞེ་ན། དེ་ལ་འདོད་ཆགས་དང་བྲལ་བ་ཞིག་ཅེས་བྱ་བ་རྒྱས་པར་སྨོས་ཏེ། དེ་ལ་ཞེས་བྱ་བ་ནི་དོན་ཉེ་བར་དགོད་པའི་ཕྱིར་རོ། །འདོད་པའི་ཁམས་ནས་ཅི་ཡང་མེད་པའི་སྐྱེ་མཆེད་ཀྱི་བར་ལས་ཀྱང་རུང་འདོད་ཆགས་དང་
[238a]
[238a.1]བྲལ་བ་ཞིག་བདེན་པ་རྣམས་ལྟ་ཞིང་མངོན་པར་རྟོགས་པར་བྱེད་ན་ཆོས་ཤེས་པ་དང་བཟོད་པ་རྣམས་ཀྱིས་ཆོས་ཤེས་པ་རྣམས་དང་། ཆོས་ལ་བཟོད་པ་རྣམས་ཀྱིས་ཉོན་མོངས་པ་དག་མི་སྤོང་སྟེ། འཇིག་རྟེན་པའི་བསྒོམ་པའི་ལམ་གྱིས་སྔར་སྤངས་ཟིན་པའི་ཕྱིར་བྲལ་བའི་ཐོབ་
[238a.2]པ་ཟག་པ་མེད་པ་སྐྱེ་བ་འབའ་ཞིག་ཏུ་ཟད་དོ། །རྗེས་སུ་ཤེས་པ་དང་བཟོད་པ་དག་གིས་ནི་གདོན་མི་ཟ་བར་ཉོན་མོངས་པ་དག་སྤོང་སྟེ། འཇིག་རྟེན་པའི་ལམ་གྱིས་སྲིད་པའི་རྩེ་མོ་ལས་འདོད་ཆགས་དང་བྲལ་བ་མེད་དོ། །ཤེས་པ་རྣམས་ཀྱིས་ནི་བསྒོམ་པའི་ལམ་ལ་སྦྱོར་བ་དང་། རྣམ་པར་གྲོལ་
[238a.3]བ་དང་། ཁྱད་པར་ཅན་གྱི་ལམ་རྣམས་དང་། བར་ཆད་མེད་པའི་ལམ་ཡང་ཁ་ཅིག་གིས་དབང་པོ་འཕོ་བ་ལ་སོགས་པའི་གནས་སྐབས་ན་ཉོན་མོངས་པ་དག་མི་སྤོང་ངོ་། །གང་དག་ཅིག་ལུས་ཤེ་ན། དེ་དག་ལས་གཞན་པའི་བར་ཆད་མེད་པའི་ལམ་རྣམས་ཏེ། དེ་རྣམས་ཀྱིས་ཉོན་མོངས་པ་
[238a.4]སྤོང་ངོ་ཞེས་བྱ་བར་གྲུབ་པོ། །ཆོས་མངོན་པའི་མཛོད་ཀྱི་འགྲེལ་བཤད་སློབ་དཔོན་རྒྱལ་པོའི་སྲས་གྲགས་པའི་བཤེས་གཉེན་གྱིས་མཛད་པ་དོན་གསལ་བ་ཞེས་བྱ་བ་ལས་གང་ཟག་དང་ལམ་བསྟན་པ་ཞེས་བྱ་བ་སྟེ་མཛོད་ཀྱི་གནས་དྲུག་པའོ།། །།བམ་པོ་ལྔ་བཅུ་གསུམ་པ། མཛོད་
[238a.5]ཀྱི་གནས་དྲུག་པའི་འོག་ཏུ་བདུན་པ་ཉེ་བར་དགོད་པ་འབྲེལ་པ་བསྟན་པའི་ཕྱིར། བཟོད་པ་རྣམས་ཞེས་ཀྱང་འབྱུང་ཞེས་བྱ་བ་རྒྱས་པར་སྨོས་ཏེ། འཇིག་རྟེན་པའི་ཆོས་མཆོག་ལས། ཆོས་ཀྱི་བཟོད་པ་ཟག་པ་མེད། །ཅེས་བྱ་བ་ནས་བཟུང་སྟེ། བཟོད་པ་བརྒྱད་བཤད་དོ། །འདོད་སྡུག་བསྔལ་ལ་
[238a.6]དེ་ནས་ནི། །དེ་ཉིད་ལ་ཆོས་ཤེས་དེ་བཞིན། །ཞེས་བྱ་བ་དེར་ཤེས་པ་བཤད་དོ། །གལ་ཏེ་མིན། ཟད་པ་ཤེས་སམ་མི་སློབ་ལྟ། །ཞེས་བྱ་བ་དེར་ཡང་དག་པའི་ལྟ་བ་བཤད་དོ། །དེ་ཉིད་རྣམ་གྲོལ་གཉིས་བྱང་ཆུབ། །ཇི་སྐད་བཤད་ཤེས་པ་ཞེས་བྱ་བར་ཡང་དག་པའི་ཤེས་པ་བཤད་དོ། །ཡང་
[238a.7]ན་དྲུག་པའི་མཇུག་འདི་ཉིད་ནས། །སྡུག་བསྔལ་རྒྱུ་བཟོད་ཤེས་རྣམས་ཀྱིས། །ཡིད་འབྱུང་གང་གིས་སྤོང་འགྱུར་བ། །ཀུན་གྱི་འདོད་ཆགས་བྲལ་བར་འགྱུར། །ཞེས་འབྱུང་བས་འདི་ཐམས་ཅད་བཤད་དོ། །ཡང་ན་བསྟན་བཅོས་དང་འབྲེལ་བའི་ཕྱིར་འདི་ཉེ་བར་འགོད་དེ། བསྟན་བཅོས་
[238b]
[238b.1]ལས་ནི་བཟོད་པ་རྣམས་ཞེས་ཀྱང་འབྱུང་། ཤེས་པ་རྣམས་ཞེས་ཀྱང་འབྱུང་། ཡང་དག་པའི་ལྟ་བ་ཞེས་ཀྱང་འབྱུང་། ཡང་དག་པའི་ཤེས་པ་ཞེས་ཀྱང་འབྱུང་ལ། འདི་ནི་དེར་མདོར་བསྡུ་བ་ཙམ་ཡིན་པས་དེའི་ཕྱིར། ཅི་བཟོད་པ་དག་ཡིན་ལ་ཤེས་པ་མ་ཡིན་ནམ་ཞེས་བྱ་བ་རྒྱས་པར་འདྲིའོ། །དྲི་མེད་
[238b.2]བཟོད་རྣམས་ཤེས་པ་མིན། །ཞེས་བྱ་བ་བཟོད་པ་དྲི་མ་མེད་པ་དག་ཁོ་ན་ཤེས་པ་མ་ཡིན་ནོ་ཞེས་ངེས་པར་གཟུང་བའི་ཕྱིར་བཟོད་པ་ཟག་པ་དང་བཅས་པ་རྣམས་ནི་ཤེས་པ་ཡིན་ནོ་ཞེས་བཤད་པར་འགྱུར་ཏེ། དེ་ནི་ཀུན་རྫོབ་ཤེས་པ་ཡིན་པར་འདོད་དོ། །དེས་སྤང་བར་བྱ་བ་ཞེས་བྱ་བ་ནི་བཟོད་པས་སྤང་བར་
[238b.3]བྱ་བའི་ཕྲ་རྒྱས་ཐེ་ཚོམ་མ་སྤངས་པའི་ཕྱིར་ཏེ། སྐབས་ལ་བབ་པའི་ཕྱིར་གནས་སྐབས་དེ་དག་ཏུ་ཕྲ་རྒྱས་རྣམས་སྤོང་གི་སྤངས་པ་ནི་མ་ཡིན་ནོ། །ཤེས་པ་ནི་ངེས་པ་ཡིན་པར་འདོད་ཀྱི་མ་ངེས་པ་ནི་མ་ཡིན་པས་བཟོད་པ་རྣམས་ཤེས་པ་མ་ཡིན་ཏེ། བཟོད་པ་རྣམས་ནི་བཟོད་པའི་ངོ་བོར་སྐྱེའི་ངེས་
[238b.4]པའི་ངོ་བོ་མ་ཡིན་པས་ཤེས་པ་མ་ཡིན་ནོ་ཞེས་བརྗོད་དོ། །ཕྲ་རྒྱས་ཐེ་ཚོམ་མ་སྤངས་པའི་ཕྱིར་རོ་ཞེས་བྱ་བ་དེ་ཙམ་ཞིག་བརྗོད་པར་བྱ་བ་ཡིན་ན། ཅིའི་ཕྱིར་དེས་སྤང་བར་བྱ་བའི་ཞེས་ཁྱད་པར་སྨོས་ཤེ་ན། སྐད་ཅིག་མ་གཉིས་པ་ལ་བཟོད་པ་དང་པོ་སྤང་བར་བྱ་བའི་ཕྲ་རྒྱས་ཐེ་ཚོམ་སྤང་བར་འགྱུར་
[238b.5]བས་བཟོད་པ་དང་པོ་ཁོ་ན་ཤེས་པ་མ་ཡིན་ནོ་ཞེས་བྱ་བར་གོ་བར་འགྱུར་གྱི་བཟོད་པ་གཞན་དག་ནི་མ་ཡིན་པས་དེའི་ཕྱིར་དེ་སྤང་བར་བྱ་བའི་ཞེས་ཁྱད་པར་སྨོས་སོ། །ཡང་དག་པར་རྟོག་པའི་བདག་ཉིད་ཅན་ཡིན་པའི་ཕྱིར་ཞེས་བྱ་བ་ནི་ཉེ་བར་རྟོག་པའི་ངོ་བོ་ཉིད་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །
[238b.6]ཡང་དག་པར་རྟོག་པ་མེད་པ་དང་ཡོངས་སུ་ཚོལ་བའི་བསམ་པ་ཅན་མ་ཡིན་པའི་ཕྱིར་ཞེས་བྱ་བ་ནི་འདི་ལ་ཡང་དག་པར་རྟོག་པ་མེད་པས་ན་ཡང་དག་པར་རྟོག་པ་མེད་པའོ། །ཡོངས་སུ་ཚོལ་བར་སེམས་ཤིང་འདོད་པ་ནི་ཡོངས་སུ་ཚོལ་བའི་བསམ་པ་མེད་པའོ། །འདི་ལ་ཡོངས་སུ་ཚོལ་བའི་
[238b.7]བསམ་པ་མེད་པས་ཡོངས་སུ་ཚོལ་བའི་བསམ་པ་ཅན་མ་ཡིན་ནོ། །དེ་ནི་ཡང་དག་པར་རྟོག་པ་མེད་པ་ཡང་ཡིན་ལ། ཡོངས་སུ་ཚོལ་བའི་བསམ་པ་ཅན་མ་ཡིན་པ་ཡང་ཡིན་པས་ཡང་དག་པར་རྟོག་པ་མེད་པ་དང་། ཡོངས་སུ་ཚོལ་བའི་བསམ་པ་ཅན་མ་ཡིན་པ་སྟེ། དེའི་ཕྱིར་ཟད་པ་ཤེས་
[239a]
[239a.1]པ་དང་མི་སྐྱེ་བ་ཤེས་པ་ལྟ་བ་མ་ཡིན་ནོ་ཞེས་བྱ་བའི་ཐ་ཚིག་གོ། །འདི་ཇི་སྲིད་དུ་བྱ་བ་མ་བྱས་པ་དེ་སྲིད་དུ་སྡུག་བསྔལ་ལ་སོགས་པའི་བདེན་པ་དག་ལ་ཉེ་བར་རྟོག་ཅིང་བསམ་པ་དག་པ་ནས་མི་རྟག་པ་ལ་སོགས་པའི་རྣམ་པ་ཇི་སྐད་བཤད་པ་དག་གིས་ཡོངས་སུ་ཚོལ་བར་
[239a.2]བྱེད་དོ། །བྱ་བ་བྱས་ནས་ནི་དེ་དག་གིས་སྡུག་བསྔལ་ལ་སོགས་པ་འཕགས་པའི་བདེན་པ་ཇི་ལྟར་མཐོང་བ་དག་ཁོ་ན་ལ་བདག་གིས་སྡུག་བསྔལ་ཡོངས་སུ་ཤེས་ཏེ་ཡང་ཤེས་པར་བྱར་མེད་དོ་ཞེས་བྱ་བ་ལ་སོགས་པར་སོ་སོར་རྟོག་པ་ཙམ་དུ་ཟད་དེ། དེ་ལྟ་བས་ན་དེ་དག་ནི་ལྟ་བའི་ངོ་བོ་ཉིད་མ་ཡིན་ནོ། །
[239a.3]དེ་ལས་གཞན་འཕགས་བློ་གཉི་ག །ཞེས་བྱ་བ་ནི་སྡུག་བསྔལ་ལ་ཆོས་ཤེས་པ་ནས་ལམ་ལ་རྗེས་སུ་ཤེས་པའི་བར་གྱི་ཤེས་རབ་དེ་ནི་ཉེ་བར་རྟོག་པར་ཞུགས་པ་ཡང་ཡིན་ལ། དེའི་ཡུལ་ཅན་གྱི་ཐེ་ཚོམ་སྤངས་པ་ཡིན་ནོ། །གཞན་ཞེས་བྱ་བ་ནི་འཇིག་རྟེན་པ་སྟེ། དེ་ནི་ཐམས་ཅད་ཤེས་པ་ཡིན་
[239a.4]ནོ་ཞེས་ངེས་པར་གཟུང་བས་ཤེས་པ་མ་ཡིན་པའི་ཤེས་རབ་གང་ཡིན་པ་དེ་མེད་དོ་ཞེས་བྱ་བའི་ཐ་ཚིག་གོ། །ཤེས་རབ་དེ་ཡང་གང་ཞེ་ན། རྣམ་པར་ཤེས་པའི་ཚོགས་ལྔ་ལས་བྱུང་བ་དགེ་བ་དང་། མི་དགེ་བ་དང་། ལུང་དུ་མ་བསྟན་པ་དང་། ཡིད་ལས་བྱུང་བ་ལྟ་བའི་ངོ་བོ་ཉིད་མ་ཡིན་པ་
[239a.5]ཉོན་མོངས་པ་དང་མཚུངས་པར་ལྡན་པ་དང་། མ་བསྒྲིབས་ལ་ལུང་དུ་མ་བསྟན་པའོ། །ལྟ་བའི་ངོ་བོ་ཉིད་གང་ཡིན་པ་དང་། ཡིད་ལས་བྱུང་བ་དགེ་བ་གང་ཡིན་པ་དེ་ཅི་ཞིག་ཡིན་ཞེ་ན། དྲུག་ནི་ལྟ་བའང་ཡིན་ཞེས་བྱ་བ་སྨོས་ཏེ། འཇིག་རྟེན་པའི་ཤེས་རབ་རྣམ་པ་དེ་དྲུག་ནི་ལྟ་བ་ཡིན་གྱི་དྲུག་
[239a.6]ཁོ་ན་ཞེས་ངེས་པར་གཟུང་བའི་ཕྱིར་གཞན་ནི་ལྟ་བ་མ་ཡིན་ནོ། །གཞན་ཡང་གང་ཞེ་ན། སྔར་བཤད་པ་འཇིག་རྟེན་པ་གང་ཡིན་པའོ། །འདི་དང་གཞན་དག་ཀྱང་ཤེས་པ་ནི་ཡིན་ནོ་ཞེས་བྱ་བ་ནི་ལྟ་བའི་ངོ་བོ་ཉིད་ཀྱི་ཤེས་རབ་རྣམ་པ་དྲུག་པོ་འདི་དང་། དེ་ལས་གཞན་པ་སྔར་བཤད་པ་རྣམས་ཀྱང་
[239a.7]ཤེས་པ་ཞེས་ནི་བྱའོ། །གང་གི་ཕྱིར་དྲུག་པོ་འདི་དག་ཤེས་པ་ཞེས་ཀྱང་བྱ་ལ། ལྟ་བ་ཞེས་ཀྱང་བྱ་བ་དེ་ཉིད་ཀྱི་ཕྱིར་དྲུག་ནི་ལྟ་བའང་ཡིན་ཞེས་ཡང་ཞེས་བྱ་བའི་སྒྲ་འདོན་ཏོ། །ཤེས་པ་བཅུས་ཞེས་བྱ་བ་གང་དག་གིས་ཤེ་ན། ཆོས་དང་རྗེས་དང་ཀུན་རྫོབ་དང་། །གཞན་གྱི་སེམས་དང་
[239b]
[239b.1]སྡུག་བསྔལ་དང་། ཀུན་འབྱུང་བ་དང་འགོག་པ་དང་། ལམ་དང་ཟད་དང་མི་སྐྱེ་ཤེས་པ་དག་གིས་སོ། །ཤེས་པ་བཅུ་ཁོ་ནར་བཤད་པ་འདི་ནི་ངེས་པར་གཟུང་བར་བྱ་བའི་དོན་ཡིན་ཏེ། འཆི་འཕོ་བ་དང་སྐྱེ་བ་དང་། གང་ཟག་དང་འཁོར་ཤེས་པ་ལ་སོགས་པ་ནི་འདི་དག་ཁོ་ནའི་ནང་དུ་
[239b.2]འདུས་པའི་ཕྱིར་རོ། །མདོར་བསྡུ་ན་ནི་གཉིས་ཏེ། ཤེས་པ་ཟག་བཅས་ཟག་པ་མེད། །ཅེས་བྱ་བ་ཡིན་ནོ། །ཕལ་ཆེར་ཞེས་བྱ་བ་ཁྱད་པར་སྨོས་པ་ནི་ཀུན་རྫོབ་ཀྱི་ཤེས་པ་ཕལ་ཆེར་བུམ་པ་དང་སྣམ་བུ་ལ་སོགས་པ་ཀུན་རྫོབ་ཏུ་ཡོད་པའི་དངོས་པོ་ལ་དམིགས་ཀྱི་རེས་འགའ་ནི་རང་དང་སྤྱིའི་
[239b.3]མཚན་ཉིད་ཀྱང་འཛིན་ཏོ། །ཀུན་རྫོབ་ཀྱི་ཞེས་བྱ་བ་ནི་ཀུན་རྫོབ་ལ་འབྱུང་བའོ། །ཟག་པ་མེད་པ་ཡང་མདོར་བསྡུ་ན་ཆོས་ཤེས་པ་དང་། རྗེས་སུ་ཤེས་པ་ཞེས་བྱ་བ་གཉིས་ཏེ། སྡུག་བསྔལ་ཤེས་པ་ལ་སོགས་པ་ནི་འདི་དག་ཁོ་ནའི་ནང་དུ་འདུས་པའི་ཕྱིར་རོ། །དམིགས་པ་ནི་ཅི་རིགས་པར་
[239b.4]ཞེས་བྱ་བ་ནི་གང་གིས་དམིགས་པ་གང་ཡིན་པ་དེ་ནི་དེའི་ཡིན་ཏེ། མིག་གི་རྣམ་པར་ཤེས་པའི་དམིགས་པ་ནི་སྒྲ་མ་ཡིན་ནོ། །དེ་དག་ལ་དམིགས་པའི་ཕྱིར་རོ་ཞེས་བྱ་བ་ནི་སྡུག་བསྔལ་ལ་སོགས་པ་ལ་དམིགས་པའི་ཕྱིར་རོ་ཞེས་བྱ་བའི་ཐ་ཚིག་གོ། །རྣམ་བཞི་དེ་དག་ནི་ཞེས་བྱ་བ་ནི་ཆོས་
[239b.5]དང་རྗེས་སུ་ཤེས་པ་གཉིས་པོ་ལྟ་བའི་རང་བཞིན་མ་ཡིན་པ་སྡུག་བསྔལ་ལ་སོགས་པ་ལ་དམིགས་པའི་བྱེ་བྲག་གིས་རྣམ་པ་བཞི་པོ་དེ་དག་ཁོ་ན་ཟད་པ་ཤེས་པ་དང་། མི་སྐྱེ་བ་ཤེས་པ་ཞེས་བྱའོ། །དེ་གཉིས་དང་པོ་སྐྱེས་པ་ནི་ཟད་པ་ཤེས་པ་དང་མི་སྐྱེ་བ་ཤེས་པ་དེ་གཉིས་དང་པོ་སྐྱེས་པ་ནི་
[239b.6]སྡུག་བསྔལ་རྒྱུ་རྗེས་ཤེས་པ་ཡིན་ཏེ། གདོན་མི་ཟ་བར་སྡུག་བསྔལ་དང་ཀུན་འབྱུང་བ་ལ་དམིགས་པ་དག་ཡིན་ནོ་ཞེས་བྱ་བའི་དོན་ཏེ། ཅིའི་ཕྱིར་ཞེ་ན། སྲིད་པའི་རྩེ་མོ་པའི་ཕུང་པོ་ལ་སྡུག་བསྔལ་ལམ་ཀུན་འབྱུང་བ་ལ་རྗེས་སུ་ཤེས་པའི་རྣམ་པར་དམིགས་པའི་ཕྱིར་རོ་ཞེས་བྱ་བ་
[239b.7]སྨོས་ཏེ། འདི་ལྟར་ཟད་པ་དང་མི་སྐྱེ་བ་ཤེས་པ་དང་པོ་སྐྱེས་པ་དེ་དག་ནི་གདོན་མི་ཟ་བར་སྲིད་པའི་རྩེ་མོ་པའི་ཕུང་པོ་རྣམས་ལ་མི་རྟག་པ་ལ་སོགས་པའི་སྡུག་བསྔལ་གྱི་རྣམ་པ་དང་། རྒྱུ་ལ་སོགས་པའི་ཀུན་འབྱུང་བའི་རྣམ་པར་དམིགས་སོ། །དང་པོར་སྐྱེས་པ་མ་ཡིན་པ་དེ་དག་ནི་
[240a]
[240a.1]བདེན་པ་གཞན་ལ་དམིགས་པ་དག་ཀྱང་ཡིན་ནོ་ཞེས་བྱ་བར་ཤུགས་ཀྱིས་བཤད་པར་འགྱུར་རོ། །རྡོ་རྗེ་ལྟ་བུའི་ཏིང་ངེ་འཛིན་གྱི་མཇུག་ཐོགས་སུ་ཟད་པ་ཤེས་པ་འབྱུང་ལ། དེའི་རྗེས་ལ་མི་སྐྱེ་བ་ཤེས་པ་འབྱུང་བ་དེའི་ཕྱིར་ཅི་རྡོ་རྗེ་ལྟ་བུའི་ཏིང་ངེ་འཛིན་ཀྱང་དེ་གཉིས་དང་དམིགས་
[240a.2]པ་གཅིག་པ་ཞིག་ཡིན་ནམ་ཞེས་འདྲི་སྟེ། ཀྱང་ཞེས་བྱ་བའི་སྒྲའི་དོན་ནི་ཇི་ལྟར་ཟད་པ་དང་། མི་སྐྱེ་བ་ཤེས་པ་དམིགས་པ་གཅིག་ཡིན་པ་ལྟར། ཅི་རྡོ་རྗེ་ལྟ་བུའི་ཏིང་ངེ་འཛིན་ཀྱང་དེ་གཉིས་དང་དམིགས་པ་གཅིག་པ་ཞིག་ཡིན་ནམ་ཞེས་བྱ་བ་ཡིན་ནོ། །དེ་གཉིས་དང་ཞེས་བྱ་བ་ནི་
[240a.3]དང་པོ་སྐྱེས་པ་དག་དང་ཞེས་བྱ་བའི་དོན་ཏོ། །གལ་ཏེ་སྡུག་བསྔལ་དང་ཀུན་འབྱུང་བ་ལ་དམིགས་ན་ནི་ཡིན་ནོ་ཞེས་བྱ་བ་ཅི་ཞེ་ན། དེ་གཉིས་དང་དམིགས་པ་གཅིག་པ་ཡིན་ནོ་ཞེས་བྱ་བར་སྦྱར་རོ། །འོན་ཏེ་འགོག་པ་དང་ལམ་ལ་དམིགས་པ་ཞིག་ཡིན་ན་ནི་དམིགས་པ་གཅིག་པ་མ་ཡིན་ཏེ།
[240a.4]དེ་གཉིས་ནི་ངེས་པར་སྲིད་པའི་རྩེ་མོ་པའི་ཕུང་པོ་ལ་དམིགས་པའི་ཕྱིར་རོ། །དཔེར་ན་དུག་མདས་ཕོག་སྟེ། ཤི་བའི་དུག་ཡན་ལག་ཐམས་ཅད་ལ་ཁྱབ་ནས་ཤི་བའི་ཚེ་རྨའི་ཕྱོགས་ཁོ་ནར་གནས་ཀྱི་གཞན་དུ་མ་ཡིན་པ་དེ་བཞིན་དུ་རྣལ་འབྱོར་པ་འདིའི་ཤེས་པ་དེ་དག་ཀྱང་སྤང་བར་བྱ་བ་སྲིད་
[240a.5]པའི་རྩེ་མོ་པའི་ཕུང་པོའི་མཚན་ཉིད་ཁོ་ན་ལ་གནས་སོ། །བཞི་ལས་ཕ་རོལ་སེམས་རིག་པ། ཞེས་བྱ་བ་ནི་ཆོས་ཤེས་པ་ལ་སོགས་པ་བཞི་ཁོ་ན་ལས་ཡིན་ཏེ། དེ་དག་གིས་བསྡུས་པའི་ཕྱིར་རོ། །སྡུག་བསྔལ་ཤེས་པ་ལ་སོགས་པ་ལས་ནི་མ་ཡིན་ཏེ། གཞན་གྱི་རྣམ་པ་ཅན་ཡིན་པའི་ཕྱིར་
[240a.6]རོ། །གཞན་གྱི་སེམས་ཤེས་པ་ཟག་པ་མེད་པ་ནི་ལམ་ཤེས་པ་ཡིན་པའི་ཕྱིར་ལམ་གྱི་རྣམ་པ་ཅན་ཁོ་ན་ཡིན་ནོ། །ཟག་པ་དང་བཅས་པ་གང་ཡིན་པ་དེ་ནི་འདོད་ཆགས་དང་བཅས་པ་དང་། །འདོད་ཆགས་དང་བྲལ་བ་ཞེས་བྱ་བར་འཇིག་རྟེན་པའི་རྣམ་པ་ཅན་ཡིན་ནོ། །དད་པས་མོས་པ་
[240a.7]དང་དུས་ཀྱིས་རྣམ་པར་གྲོལ་བའི་ལམ་གྱིས་ཞེས་བྱ་བ་ནི་གྲངས་བཞིན་དུ་དད་པས་མོས་པའི་ལམ་གྱིས་མཐོང་བས་ཐོབ་པའི་ལམ་མི་ཤེས་ལ། དུས་ཀྱིས་རྣམ་པར་གྲོལ་བའི་ལམ་གྱིས་དུས་དང་མི་སྦྱར་བར་རྣམ་པར་གྲོལ་བའི་ལམ་མི་ཤེས་སོ། །འོག་མས་གོང་མ་ཞེས་བྱ་བ་ནི་ཕྱིར་མི་འོང་བའི་
[240b]
[240b.1]ལམ་གྱིས་དགྲ་བཅོམ་པའི་ལམ་མི་ཤེས་ལ། དགྲ་བཅོམ་པའི་ལམ་གྱིས་རང་སངས་རྒྱས་ཀྱི་ལམ་མི་ཤེས་སོ་ཞེས་བྱ་བ་ལ་སོགས་པའོ། །དེ་གཉིས་ནི་འདོད་པའི་ཁམས་ལ་སོགས་པ་དང་ཁམས་གོང་མའི་གཉེན་པོ་ལ་དམིགས་པའི་ཕྱིར་རོ་ཞེས་བྱ་བ་ནི་ཆོས་ཤེས་པའི་ཕྱོགས་དང་མཐུན་པ་
[240b.2]དང་། རྗེས་སུ་ཤེས་པའི་ཕྱོགས་དང་མཐུན་པ་དེ་གཉིས་ལ་ཆོས་ཤེས་པའི་ཕྱོགས་དང་མཐུན་པ་ནི་འདོད་པའི་ཁམས་ཀྱི་གཉེན་པོ་ལ་དམིགས་སོ། །རྗེས་སུ་ཤེས་པའི་ཕྱོགས་དང་མཐུན་པ་ནི་ཁམས་གོང་མའི་གཉེན་པོ་ལ་དམིགས་སོ་ཞེས་བྱ་བར་ངེས་སོ། །མཐོང་བའི་ལམ་ལ་ཕ་རོལ་གྱི་
[240b.3]སེམས་ཤེས་པ་མེད་དོ་ཞེས་བྱ་བ་ནི་མཐོང་བའི་ལམ་ཡུན་ཐུང་བའི་ཕྱིར་རོ། །སྡུག་བསྔལ་ལ་ཆོས་ཤེས་པའི་བཟོད་པ་དང་ཆོས་ཤེས་པའོ་ཞེས་བྱ་བ་ནི་སྲིད་པའི་ཕྱིར་དེ་སྐད་བཤད་དེ། རེས་འགའ་ནི་སྦྱོར་བའི་དབང་གིས་སྡུག་བསྔལ་ལ་རྗེས་སུ་ཤེས་པའི་བཟོད་པ་དང་སྡུག་བསྔལ་ལ་རྗེས་
[240b.4]སུ་ཤེས་པ་ཡང་ཤེས་པར་སྲིད་དོ། །བརྒྱད་པ་ཀུན་འབྱུང་བ་ལ་རྗེས་སུ་ཤེས་པ་དང་ཞེས་བྱ་བ་ནི་ཆོས་ལ་ཤེས་པ་དང་བཟོད་པའི་ཕྱོགས་དང་མཐུན་པ་གཉིས་ཤེས་ནས་རྗེས་སུ་ཤེས་པའི་ཕྱོགས་དང་མཐུན་པའི་སེམས་ཤེས་པར་བྱའོ་ཞེས་སྦྱོར་བར་བྱས་ནས་བརྒྱད་པ་ཀུན་འབྱུང་བ་ལ་རྗེས་སུ་
[240b.5]ཤེས་པ་ཤེས་པར་ནུས་སོ། །སྦྱོར་བ་ཆུང་བའི་ཕྱིར་རོ་ཞེས་བྱ་བ་ནི་སྦྱོར་བ་ཆུང་བའི་ཕྱིར་ཞེས་བྱ་བའི་ཐ་ཚིག་སྟེ། ཉན་ཐོས་ཀྱི་གཞན་གྱི་སེམས་ཤེས་པ་རྗེས་སུ་ཤེས་པའི་ཕྱོགས་དང་མཐུན་པ་ལ་དམིགས་པ་དེ་ནི་སྦྱོར་བ་ཆེན་པོས་བསྒྲུབ་པར་བྱ་བ་ཡིན་ཏེ། དེའི་ཕྱིར་དེ་ཇི་སྲིད་དེ་ལ་སྦྱོར་བ་རྩོམ་
[240b.6]པ་དེ་སྲིད་ཀྱིས་དེས་སེམས་བཅུ་དྲུག་རྗེས་སུ་འཐོབ་པར་འགྱུར་བས་དེའི་ཕྱིར་བར་སྐབས་སུ་ནི་མི་ཤེས་སོ། །དང་པོ་དང་གཉིས་པ་དང་བཅོ་ལྔ་པ་རྣམས་ཞེས་བྱ་བ་དེ་གསུམ་ཁོ་ན་ཤེས་སོ། །ཇི་ལྟ་ཞེ་ན། སྡུག་བསྔལ་ལ་ཆོས་ཤེས་པའི་བཟོད་པ་དང་། སྡུག་བསྔལ་ལ་ཆོས་ཤེས་པ་ཤེས་ནས་
[240b.7]སྦྱོར་བ་གཞན་བྱས་ཏེ་སྐད་ཅིག་མ་བཅོ་ལྔ་པ་ལམ་ལ་རྗེས་སུ་ཤེས་པའི་བཟོད་པ་ཤེས་སོ། །ཇི་ལྟར་ན་ཟག་པ་མེད་པའི་ཤེས་པས་དེ་ལྟར་ཤེས་ཞེས་བྱ་བ་ནི་ཟག་པ་མེད་པ་རྣམས་ནི་སྡུག་བསྔལ་ལ་སོགས་པའི་རྣམ་པ་ཅན་ཡིན་པའི་ཕྱིར་ལ། འདི་ནི་བདག་གིས་སྡུག་བསྔལ་ཡོངས་སུ་ཤེས་
[241a]
[241a.1]སོ་ཞེས་བྱ་བ་ལ་སོགས་པའི་རྣམ་པ་ཅན་ཡིན་པའི་ཕྱིར་ཀུན་རྫོབ་ལ་སོགས་པའི་རྣམ་པ་ཅན་ཡིན་པས་དེའི་ཕྱིར་འདྲིའོ། །བསྟན་བཅོས་ལས་དེའི་བྱེ་བྲག་གིས་དེ་གཉིས་ཀྱི་བྱེ་བྲག་བསྟན་ཏོ་ཞེས་བྱ་བ་ནི། དེའི་རྗེས་ལ་ཐོབ་པ་ཀུན་རྫོབ་ཀྱི་ཤེས་པ་གཉིས་པོ་དེའི་བྱེ་
[241a.2]བྲག་གིས་ཏེ། བདག་གིས་སྡུག་བསྔལ་ཡོངས་སུ་ཤེས་སོ་ཞེས་བྱ་བ་ནས། ལམ་བསྒོམས་སོ་ཞེས་བྱ་བར་ཤེས་པའི་བར་དང་། བདག་གིས་སྡུག་བསྔལ་ཡོངས་སུ་ཤེས་ཏེ། ཡང་ཡོངས་སུ་ཤེས་པར་བྱར་མེད་དོ་ཞེས་བྱ་བ་ནས། བདག་གིས་ལམ་བསྒོམས་ཏེ་ཡང་བསྒོམ་དུ་མེད་དོ་
[241a.3]ཞེས་བྱ་བར་ཤེས་པའི་བར་དེ་ལྟ་བུའི་ངོ་བོས་ཟད་པ་དང་མི་སྐྱེ་བ་ཤེས་པ་ཟག་པ་མེད་པ་དེ་གཉིས་ཀྱི་བྱེ་བྲག་བསྟན་ཅིང་ཤེས་པར་བྱས་སོ། །དེ་ཉིད་ཀྱི་ཕྱིར་དེའི་རྒྱུ་ལས་བྱུང་བ་ནི་དེ་རྒྱུར་བྱས་པ་དང་དེ་སྔོན་དུ་བཏང་བ་ཞེས་བྱ་བའི་ཐ་ཚིག་སྟེ། རྒྱུ་མཐུན་པས་རྣམ་པར་མི་རྟོག་པ་དེ་གཉིས་ཀྱི་ཁྱད་
[241a.4]པར་རྗེས་སུ་དཔག་གོ་སྙམ་དུ་བསམས་པ་ཡིན་ནོ། །ཟག་པ་མེད་པས་ཀྱང་དེ་ལྟར་ཤེས་ཏེ་ཞེས་བྱ་བ་ནི་གཞན་དག་ན་རེ་རྣམ་པ་བཅུ་དྲུག་ལ་མ་གཏོགས་པའི་ཟག་པ་མེད་པའི་རྣམ་པ་ཡོད་དེ། དེས་དེ་ལྟར་ཤེས་སོ་ཞེས་ཟེར་རོ། །གལ་ཏེ་བསྟན་བཅོས་ལས་དེའི་རྒྱུ་ལས་བྱུང་བའི་
[241a.5]ཤེས་པ་དང་མཐོང་བ་ཞེས་འབྱུང་བས་ཟད་པ་དང་མི་སྐྱེ་བ་ཤེས་པ་ཟག་པ་མེད་པ་ནི་སྡུག་བསྔལ་ཡོངས་སུ་ཤེས་སོ་ཞེས་བྱ་བ་ལ་སོགས་པ་ཀུན་རྫོབ་ཀྱི་ཤེས་པའི་འབྲས་བུ་ཅན་ཡིན་པར་བརྗོད་ན། ཟད་དང་མི་སྐྱེའི་བློ་ལྟ་མིན། །ཞེས་ལྟ་བ་མ་ཡིན་པར་འབྱུང་བ་གང་ཡིན་པ་དེ་དང་
[241a.6]འགལ་ལོ་ཞེ་ན་དེའི་ཕྱིར་མཐོང་བ་སྨོས་པ་ནི་བཤད་པ་འཕངས་པའི་ཕྱིར་ཞེས་བྱ་བ་སྨོས་སོ། །བསྟན་བཅོས་ལས་ཤེས་པ་དང་། མཐོང་བ་ཞེས་སྨོས་པ་གང་ཡིན་པ་དེ་ནི་བཤད་པ་འཕངས་པ་ལས་གྱུར་ཏེ། སྡུག་བསྔལ་ཤེས་པ་ལ་སོགས་པ་ལ་ཤེས་པ་དང་མཐོང་བ་དང་།
[241a.7]རིག་པ་དང་། བློ་དང་། རྟོགས་པ་ཞེས་འབྱུང་བས་ཚིག་དེ་འཕངས་པའི་ཕྱིར་འདི་ཉེ་བར་གནས་པ་ཡིན་པས་དེ་འདོན་པ་རྣམས་ཀྱི་ཚིག་ཏུ་ཟད་ཀྱི་ཟད་པ་དང་མི་སྐྱེ་བ་ཤེས་པ་དེ་དག་ལྟ་བའི་ངོ་བོ་ཉིད་ནི་མ་ཡིན་ཏེ། ལྟ་བ་མ་ཡིན་པའི་ངོ་བོ་ཉིད་དག་གོ་ཞེས་བྱ་བའི་ཐ་ཚིག་གོ། །
[241b]
[241b.1]ཡང་ན་མངོན་སུམ་དུ་འཇུག་པའི་ཕྱིར་རོ་ཞེས་བྱ་བ་ནི་ཤེས་པ་འདི་གཉིས་ལ་མངོན་སུམ་དུ་འཇུག་པ་ཡོད་པས་འདི་ནི་མངོན་སུམ་དུ་འཇུག་པའོ། །དེའི་ཕྱིར་འདི་གཉིས་ལ་མཐོང་བ་ཞེས་སྨོས་ཏེ། ཤེས་པ་འདི་གཉིས་ནི་རྗེས་སུ་དཔག་པ་ལས་བྱུང་བ་ལྟ་བུའམ། ལུང་ལས་བྱུང་བ་ལྟ་
[241b.2]བུར་ལྐོག་ཏུ་འཇུག་པ་ནི་མ་ཡིན་ནོ། །མཐོང་བ་ཡང་མངོན་སུམ་དུ་འཇུག་པ་ཡིན་པར་འདོད་དེ། དཔེར་ན་མིག་གི་རྣམ་པར་ཤེས་པ་ལྟ་བུའོ། །དེ་དང་ཆོས་མཐུན་པར་ཤེས་པ་འདི་གཉིས་ཀྱང་མཐོང་བ་ཞེས་བཤད་དོ། །དེ་ཉིད་ཀྱི་ཕྱིར་ཞེས་བྱ་བ་ནི་མངོན་སུམ་དུ་འཇུག་པ་དེ་ཉིད་ཀྱི་ཕྱིར་
[241b.3]བསྟན་བཅོས་ལས། རེ་ཞིག་ཤེས་པ་གང་ཡིན་པ་དེ་ནི་མཐོང་བ་ཡང་ཡིན་ནོ། །མཐོང་བ་ཡིན་ལ་ཤེས་པ་མ་ཡིན་པ་ཡང་ཡོད་དེ། མངོན་པར་རྟོགས་པའི་ཁོངས་སུ་གཏོགས་པ་བཟོད་པ་བརྒྱད་ལྟ་བུའོ་ཞེས་འབྱུང་ངོ་། །དེའི་ཕྱིར་འདི་སྐད་དུ་འདི་གཉིས་ནི་མཐོང་བ་ཉིད་ཡིན་པར་འདོད་
[241b.4]ཀྱི་ལྟ་བ་མ་ཡིན་ནོ་ཞེས་བཤད་པར་འགྱུར་རོ། །དེ་ལ་ཞེས་བྱ་བ་ནི་ཤེས་པ་བཅུ་པོ་དག་ལ་ཀུན་རྫོབ་ཤེས་པ་ནི་ཀུན་རྫོབ་ཤེས་པ་ཁོ་ན་སྟེ། རང་གི་ངོ་བོས་བསྡུས་པ་ཡིན་ནོ། །གཅིག་པོ་གཞན་གྱི་སེམས་ཤེས་པའི་ཆ་ཕྱོགས་གཅིག་ཀྱང་ཡིན་ཏེ། ཟག་པ་དང་བཅས་པ་དང་། ཟག་པ་མེད་པ་དེའི་ཟག་
[241b.5]པ་དང་བཅས་པའི་ཆ་ཁོ་ན་ཀུན་རྫོབ་ཤེས་པ་ཡིན་གྱི། ཟག་པ་མེད་པ་ནི་མ་ཡིན་ནོ། །ཆོས་ཤེས་པ་ནི་ཤེས་པ་བཅུ་དག་གི་ནང་ན་ཤེས་པ་གཅིག་ཡིན་ཏེ། ཆོས་ཤེས་པ་ཁོ་ན་ཡིན་ནོ། །སྡུག་བསྔལ་དང་ཀུན་འབྱུང་བ་དང་འགོག་པ་དང་། ལམ་དང་། གཞན་གྱི་སེམས་དང་། ཟད་
[241b.6]པ་དང་མི་སྐྱེ་བ་ཤེས་པ་བདུན་གྱི་ཆ་ཡང་ཡིན་ནོ། །ཇི་ལྟ་ཞེ་ན། སྡུག་བསྔལ་ཤེས་པ་ནི་ཆོས་དང་རྗེས་སུ་ཤེས་པའི་ངོ་བོ་ཉིད་ཡིན་ཏེ། དེའི་ཆ་ཆོས་ཤེས་པ་གང་ཡིན་པ་དེ་ཆོས་ཤེས་པ་ཡིན་ནོ། །དེ་བཞིན་དུ་ཀུན་འབྱུང་བ་ཤེས་པ་ནས་མི་སྐྱེ་བ་ཤེས་པའི་བར་ཆོས་དང་རྗེས་སུ་ཤེས་པའི་
[241b.7]ངོ་བོ་ཉིད་ཀྱི་ཆ་ཆོས་ཤེས་པས་དེ་ཆོས་ཤེས་པ་ཡིན་གྱི་རྗེས་སུ་ཤེས་པའི་ཆ་ནི་མ་ཡིན་ནོ། །གཞན་གྱི་སེམས་ཤེས་པ་ཆོས་དང་རྗེས་དང་ཀུན་རྫོབ་ཤེས་པའི་ངོ་བོ་ཉིད་ཀྱི་ཡང་ཆོས་ཤེས་པའི་ཆ་དེ་ཆོས་ཤེས་པ་ཡིན་ནོ། །རྗེས་སུ་ཤེས་པ་ཡང་དེ་དང་འདྲ་སྟེ། རྗེས་སུ་ཤེས་པ་གཅིག་ཁོ་ན་
[242a]
[242a.1]ཡིན་ལ། བདུན་གྱི་ཆ་ཡང་ཡིན་ཏེ། སྡུག་བསྔལ་ཤེས་པ་ལ་སོགས་པ་དེ་དག་ཉིད་ཀྱི་ཆ་རྗེས་སུ་ཤེས་པ་གང་ཡིན་པ་དེ་ནི་རྗེས་སུ་ཤེས་པ་ཡིན་ནོ་ཞེས་བྱ་བར་སྦྱར་རོ། །སྡུག་བསྔལ་ཤེས་པ་ནི་ཤེས་པ་བཅུའི་ནང་ན་ཤེས་པ་གཅིག་ཡིན་ཏེ། སྡུག་བསྔལ་ཤེས་
[242a.2]པ་དེ་ཉིད་ཡིན་ནོ། །ཆོས་དང་རྗེས་དང་ཟད་པ་དང་མི་སྐྱེ་བ་ཤེས་པ་བཞིའི་ཆ་ཡང་ཡིན་ཏེ། ཆོས་ཤེས་པ་ལ་སོགས་པ་བཞི་པོ་དེ་དག་ནི་བདེན་པ་བཞི་ལ་དམིགས་པ་ཡིན་ཏེ། དེ་དག་གི་ཆ་སྡུག་བསྔལ་ལ་དམིགས་པ་གང་ཡིན་པ་དེ་སྡུག་བསྔལ་ཤེས་པ་ཡིན་གྱི་ཆ་གཞན་ནི་མ་ཡིན་ནོ། །
[242a.3]ཀུན་འབྱུང་བ་དང་འགོག་པ་ཤེས་པ་ཡང་དེ་འདྲ་བར་སྦྱར་བར་བྱ་སྟེ། སོ་སོར་ཤེས་པ་གཅིག་ཡིན་ཏེ། ཀུན་འབྱུང་བ་ཤེས་པ་དང་འགོག་པ་ཤེས་པ་ཡིན་ལ། བཞིའི་ཆ་ཡང་ཡིན་ཏེ། ཆོས་དང་རྗེས་དང་ཟད་པ་དང་མི་སྐྱེ་བ་ཤེས་པ་རྣམས་ཀྱི་ཆ་ཀུན་འབྱུང་བ་ལ་དམིགས་པ་འམ།
[242a.4]འགོག་པ་ལ་དམིགས་པའི་ཆ་གང་ཡིན་པ་དེ་ནི་ཀུན་འབྱུང་བ་ཤེས་པ་དང་། འགོག་པ་ཤེས་པ་ཡིན་ནོ། །ལམ་ཤེས་པ་ནི་ཤེས་པ་བཅུའི་ནང་ན་ཤེས་པ་གཅིག་ཡིན་ཏེ། ལམ་ཤེས་པ་དེ་ཉིད་ཡིན་ནོ། །ཆོས་དང་། རྗེས་དང་། ཟད་པ་དང་། མི་སྐྱེ་བ་དང་། གཞན་གྱི་སེམས་
[242a.5]ཤེས་པ་དང་། ལྔའི་ཆ་ཡང་ཡིན་ཏེ། ལྔ་པོ་འདི་དག་ནི་ལམ་ཤེས་པ་དང་། ལམ་ཤེས་པ་མ་ཡིན་པའི་ངོ་བོ་ཉིད་ཡིན་ཏེ། དེ་དག་གི་ཆ་ལམ་ཤེས་པ་གང་ཡིན་པ་དེ་ནི་ལམ་ཤེས་པ་ཡིན་གྱི་གཞན་ནི་མ་ཡིན་ནོ། །ཕ་རོལ་གྱི་སེམས་ཤེས་པ་ནི་ཤེས་པ་བཅུའི་ནང་ན་ཤེས་པ་གཅིག་ཡིན་ཏེ།
[242a.6]ཕ་རོལ་གྱི་སེམས་ཤེས་པ་དེ་ཉིད་ཡིན་ནོ། །ཆོས་དང་། རྗེས་དང་། ལམ་དང་། ཀུན་རྫོབ་ཤེས་པ་བཞིའི་ཆ་ཡང་ཡིན་ཏེ། ཤེས་པ་བཞི་པོ་འདི་དག་ནི་གཞན་གྱི་སེམས་ཤེས་པ་དང་། གཞན་གྱི་སེམས་ཤེས་པ་མ་ཡིན་པའི་ངོ་བོ་ཉིད་ཡིན་ཏེ། དེ་དག་གི་ཆ་གཞན་གྱི་སེམས་ཤེས་པ་གང་
[242a.7]ཡིན་པ་དེ་ནི་གཞན་གྱི་སེམས་ཤེས་པ་ཡིན་གྱི་གཞན་ནི་མ་ཡིན་ནོ། །ཟད་པ་ཤེས་པ་ནི་ཤེས་པ་བཅུའི་ནང་ན་ཤེས་པ་གཅིག་ཡིན་ཏེ། ཟད་པ་ཤེས་པ་དེ་ཉིད་ཡིན་པས་རང་གི་ངོ་བོས་བསྡུས་པ་ཡིན་ནོ། །ཆོས་དང་། རྗེས་དང་། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་
[242b]
[242b.1]ཤེས་པ་དྲུག་གི་ཆ་ཡང་ཡིན་ཏེ། ཟད་པ་ཤེས་པ་ནི་བདག་གིས་སྡུག་བསྔལ་ཡོངས་སུ་ཤེས་སོ་ཞེས་བྱ་བ་ལ་སོགས་པའི་རྣམ་པ་ཅན་གྱི་ཤེས་པའི་རྒྱུ་མཐུན་པ་ཅན་ཡིན་ནོ། །དེ་ལ་འདོད་པ་ན་སྤྱོད་པའི་སྡུག་བསྔལ་ལ་སོགས་པ་ལ་དམིགས་པ་གང་ཡིན་པ་དེ་ནི་ཆོས་ཤེས་པའི་ནང་དུ་
[242b.2]འདུས་སོ། །གཟུགས་དང་གཟུགས་མེད་པ་ན་སྤྱོད་པའི་སྡུག་བསྔལ་ལ་སོགས་པ་ལ་དམིགས་པ་གང་ཡིན་པ་དེ་ནི་རྗེས་སུ་ཤེས་པའི་ནང་དུ་འདུས་སོ། །སྡུག་བསྔལ་ལ་སོགས་པ་སོ་སོ་ལ་དམིགས་པ་གང་ཡིན་པ་དེ་ནི་སྡུག་བསྔལ་ཤེས་པ་ནས་ལམ་ཤེས་པའི་བར་ཡིན་ནོ། །དེ་ལྟ་
[242b.3]བས་ན་འདིར་དེ་དག་གི་ཆ་དེ་ལྟ་བུའི་མཚན་ཉིད་གང་ཡིན་པ་དེ་ནི་ཟད་པ་ཤེས་པ་ཡིན་གྱི་གཞན་ནི་མ་ཡིན་པས་དྲུག་གི་ཆ་ཡང་ཡིན་ཞེས་བྱའོ། །མི་སྐྱེ་བ་ཤེས་པ་ཡང་དེ་དང་འདྲ་བར་ཤེས་པ་བཅུའི་ནང་ན་ཤེས་པ་གཅིག་ཡིན་ཏེ། མི་སྐྱེ་བ་ཤེས་པ་དེ་ཉིད་ཡིན་ནོ། །དྲུག་གི་ཆ་ཡང་ཡིན་ཏེ། ཆོས་
[242b.4]དང་རྗེས་དང་སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་ཤེས་པ་དག་གི་ཆ་བདག་གིས་སྡུག་བསྔལ་ཡོངས་སུ་ཤེས་ཏེ་ཡང་ཡོངས་སུ་ཤེས་པར་བྱར་མེད་དོ་ཞེས་བྱ་བ་ལ་སོགས་པའི་རྣམ་པ་ཅན་འདོད་པ་དང་། གཟུགས་དང་གཟུགས་མེད་པ་ན་སྤྱོད་པའི་སྡུག་བསྔལ་ལ་སོགས་པ་
[242b.5]ལ་དམིགས་པ་གང་ཡིན་པ་དེ་ནི་མི་སྐྱེ་བ་ཤེས་པ་ཡིན་གྱི། ཆ་གཞན་ནི་མ་ཡིན་པས་དྲུག་གི་ཆ་ཡང་ཡིན་ཞེས་བྱའོ། །རྣམ་པ་རྣམ་པ་སྤྱོད་ཡུལ་དང་། །ཞེས་བྱ་བ་ནི་རྣམ་པ་དང་། སྤྱོད་ཡུལ་ནི་རྣམ་པ་སྤྱོད་ཡུལ་ལོ། །རྣམ་པ་དང་རྣམ་པ་དང་སྤྱོད་ཡུལ་ནི་རྣམ་པ་རྣམ་པ་སྤྱོད་ཡུལ་ཏེ། དེའི་
[242b.6]ཕྱིར་རོ། །རང་བཞིན་ལས་ནི་ཀུན་རྫོབ་ཤེས་པ་སྟེ་ཞེས་བྱ་བ་ནི་རང་བཞིན་ལས་ཏེ། ངོ་བོ་ཉིད་ཀྱི་ཀུན་རྫོབ་ཀྱི་ཤེས་པ་ཡིན་ནོ། །ཡང་ན་ཀུན་རྫོབ་ལ་ཤེས་པས་ན་ཀུན་རྫོབ་ཤེས་པ་སྟེ། དེ་ཅིའི་ཕྱིར་ཞེ་ན། དོན་དམ་པ་མི་ཤེས་པའི་ཕྱིར་རོ། །ཆོས་ཤེས་པ་ནི་འདོད་པའི་ཁམས་ཀྱི་གཉེན་པོ་
[242b.7]ཡིན་ལ་རྗེས་སུ་ཤེས་པ་ནི། ཁམས་གོང་མའི་གཉེན་པོ་ཡིན་ཏེ། འདི་ལྟར་བསྟན་བཅོས་ལས། ཆོས་ཤེས་པ་གང་ཞེ་ན། འདོད་པ་དང་ལྡན་པའི་འདུ་བྱེད་རྣམས་ཤེས་པ་ཟག་པ་མེད་པ་གང་ཡིན་པ་དང་། འདོད་པ་དང་ལྡན་པའི་འདུ་བྱེད་རྣམས་ཀྱི་རྒྱུ་ཤེས་པ་ཟག་པ་མེད་པ་གང་
[243a]
[243a.1]ཡིན་པ་དང་། འདོད་པ་དང་ལྡན་པའི་འདུ་བྱེད་རྣམས་འགོག་པ་ཤེས་པ་ཟག་པ་མེད་པ་གང་ཡིན་པ་དང་། འདོད་པ་དང་ལྡན་པའི་འདུ་བྱེད་རྣམས་སྤོང་བར་འགྱུར་བའི་ལམ་ཤེས་པ་ཟག་པ་མེད་པ་གང་ཡིན་པ་འདི་ནི་ཆོས་ཤེས་པ་ཞེས་བྱའོ། །གཞན་ཡང་ཆོས་
[243a.2]ཤེས་པ་དང་། ཆོས་ཤེས་པའི་ས་ཤེས་པ་ཟག་པ་མེད་པ་གང་ཡིན་པ་དེ་ནི་ཆོས་ཤེས་པ་ཞེས་བྱའོ། །རྗེས་སུ་ཤེས་པ་གང་ཞེ་ན། གཟུགས་དང་གཟུགས་མེད་པ་དང་ལྡན་པའི་འདུ་བྱེད་རྣམས་ཤེས་པ་ཟག་པ་མེད་པ་གང་ཡིན་པ་དང་། གཟུགས་དང་གཟུགས་མེད་པ་དང་ལྡན་པའི་འདུ་བྱེད་
[243a.3]རྣམས་ཀྱི་རྒྱུ་ཤེས་པ་ཟག་པ་མེད་པ་གང་ཡིན་པ་དང་། གཟུགས་དང་གཟུགས་མེད་པ་དང་ལྡན་པའི་འདུ་བྱེད་རྣམས་འགོག་པ་ཤེས་པ་ཟག་པ་མེད་པ་གང་ཡིན་པ་དང་། གཟུགས་དང་གཟུགས་མེད་པ་དང་ལྡན་པའི་འདུ་བྱེད་རྣམས་སྤོང་བར་འགྱུར་བའི་ལམ་ཤེས་པ་ཟག་པ་མེད་པ་གང་ཡིན་པ་འདི་ནི་
[243a.4]རྗེས་སུ་ཤེས་པ་ཞེས་བྱའོ། །གཞན་ཡང་རྗེས་སུ་ཤེས་པ་དང་། རྗེས་སུ་ཤེས་པའི་ས་ཤེས་པ་ཟག་པ་མེད་པ་གང་ཡིན་པ་འདི་ནི་རྗེས་སུ་ཤེས་པ་ཞེས་བྱའོ་ཞེས་བྱ་བ་ལ་སོགས་པ་བཤད་དོ། །རྣམ་པ་ལས་ནི་སྡུག་བསྔལ་དང་ཀུན་འབྱུང་བ་ཤེས་པ་དག་ཅེས་བྱ་བ་ནི་རྣམ་པ་ཁོ་ན་ལས་ཡིན་གྱི་དེ་
[243a.5]གཉིས་ཉེ་བར་ལེན་པའི་ཕུང་པོ་ལྔའི་མཚན་ཉིད་དུ་ཁྱད་པར་མེད་པའི་ཕྱིར་དམིགས་པ་ལས་ནི་མ་ཡིན་ཏེ། འདི་ལྟར་བསྟན་བཅོས་ལས། སྡུག་བསྔལ་ཤེས་པ་གང་ཞེ་ན། ཉེ་བར་ལེན་པའི་ཕུང་པོ་ལྔ་ལ་མི་རྟག་པ་དང་། སྡུག་བསྔལ་བ་དང་། སྟོང་པ་དང་བདག་མེད་པར་ཡིད་ལ་བྱེད་པའི་ཤེས་
[243a.6]པ་ཟག་པ་མེད་པ་གང་ཡིན་པའོ། །ཀུན་འབྱུང་བ་ཤེས་པ་གང་ཞེ་ན། ཟག་པ་དང་བཅས་པའི་རྒྱུ་ལ་རྒྱུ་དང་། ཀུན་འབྱུང་བ་དང་། རབ་ཏུ་སྐྱེ་བ་དང་། རྐྱེན་ཉིད་དུ་ཡིད་ལ་བྱེད་པའི་ཤེས་པ་ཟག་པ་མེད་པ་གང་ཡིན་པ་སྟེ། འདི་ནི་ཀུན་འབྱུང་བ་ཤེས་པ་ཞེས་བྱའོ་ཞེས་བཤད་དོ། །རྣམ་པ་
[243a.7]དང་དམིགས་པ་ལས་ནི་འགོག་པ་དང་ལམ་ཤེས་པ་དག་ཅེས་བྱ་བ་ནི་འགོག་པ་དང་། ལམ་ཤེས་པ་དག་ནི་རྣམ་པ་དང་དམིགས་པ་ལས་རྣམ་པར་གཞག་སྟེ། འདི་ལྟར་བསྟན་བཅོས་ལས། འགོག་པ་ཤེས་པ་གང་ཞེ་ན་འགོག་པ་ལ་འགོག་པ་དང་། ཞི་བ་དང་། གྱ་ནོམ་པ་དང་།
[243b]
[243b.1]ངེས་པར་འབྱུང་བའི་ཡིད་ལ་བྱེད་པའི་ཤེས་པ་ཟག་པ་མེད་པ་གང་ཡིན་པ་སྟེ། འདི་ནི་འགོག་པ་ཤེས་པ་ཞེས་བྱའོ། །ལམ་ཤེས་པ་གང་ཞེ་ན། ལམ་ལ་ལམ་དང་། རིགས་པ་དང་། སྒྲུབ་པ་དང་། ངེས་པར་འབྱིན་པར་ཡིད་ལ་བྱེད་པའི་ཤེས་པ་ཟག་པ་མེད་པ་གང་ཡིན་པ་སྟེ། འདི་ནི་ལམ་
[243b.2]ཤེས་པ་ཞེས་བྱའོ་ཞེས་བཤད་དོ། །དང་པོ་ཉིད་དུ་ཞེས་བྱ་བ་སྨོས་པ་ནི་མི་སྐྱེ་བ་ཤེས་པ་ལས་ཁྱད་པར་དུ་བྱ་བའི་ཕྱིར་ཏེ། དེ་ཡང་བྱ་བ་བྱས་པའི་རྒྱུད་ལ་ནི་སྐྱེའོ། །ཟག་པ་མེད་པའི་ཤེས་པ་ཐམས་ཅད་ཀྱི་རྒྱུ་ཅན་ཡིན་པའི་ཕྱིར་རོ་ཞེས་བྱ་བ་ནི་ཤེས་པ་བཅུ་སྔར་སྐྱེད་པའི་དབང་དུ་བྱས་ཏེ་མི་
[243b.3]སྐྱེ་བ་ཤེས་པ་ནི་སྐལ་བ་མཉམ་པའི་རྒྱུས་ཟག་པ་མེད་པ་ཐམས་ཅད་ཀྱི་རྒྱུ་ཅན་ཡིན་ནོ། །ཟད་པ་ཤེས་པ་ནི་ཟག་པ་མེད་པ་ཐམས་ཅད་ཀྱི་རྒྱུ་ཅན་མ་ཡིན་ཏེ། མི་སྐྱེ་བ་ཤེས་པ་ཁྱད་པར་དུ་འཕགས་པའི་ཕྱིར་རྒྱུ་མ་ཡིན་ནོ། །ཐམས་ཅད་ཀྱི་གཉེན་པོ་ཐམས་ཅད་ཡིན་པའི་ཕྱིར་ཞེས་བྱ་བ་ནི་
[243b.4]འདོད་པའི་ཁམས་མཐོང་བ་དང་བསྒོམ་པས་སྤང་བར་བྱས་པས་བསྡུས་པ་རྣམ་པ་ལྔ་པོ་ཐམས་ཅད་ཀྱི་གཉེན་པོ་ཆོས་ཤེས་པ་མཐོང་བ་དང་བསྒོམ་པའི་ལམ་གྱིས་བསྡུས་(པའིཕགས་,པའི་འཕགས་)པའི་བདེན་པ་བཞི་ལ་དམིགས་པ་ཐམས་ཅད་ཡིན་པས་ཆོས་ཤེས་པ་འདོད་པའི་ཁམས་ཁོ་ནའི་གཉེན་པོ་
[243b.5]ཡིན་ནོ་ཞེས་བཤད་མོད་ཀྱི། འོན་ཀྱང་ཆོས་ཤེས་པ་གཟུགས་དང་གཟུགས་མེད་པའི་ཁམས་དག་གི་གཉེན་པོ་ཡང་ཡོད་པ་སྲིད་དོ། །དེ་གང་ཞེ་ན། འགོག་པ་དང་ལམ་ལ་ཆོས་ཤེས་པ་གང་ཡིན་པ་སྟེ། འགོག་པ་དང་ལམ་དག་ནི། ཁམས་སུ་གཏོགས་པ་མ་ཡིན་པས་དེ་དག་ནི་
[243b.6]འོག་མ་ཡང་དམན་པར་རྣམ་པར་མི་གཞག་གོ། །སྡུག་བསྔལ་དང་ཀུན་འབྱུང་བའི་བདེན་པ་དག་ནི་ས་འོག་མ་དམན་པ་ཡིན་པས་དེ་དག་ལ་དམིགས་པའི་ཆོས་ཤེས་པ་ནི་གཟུགས་དང་གཟུགས་མེད་པའི་ཁམས་ཀྱི་གཉེན་པོ་མ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །བསྒོམ་
[243b.7]པའི་ལམ་ལ་ཞེས་བྱ་བ་སྨོས་པ་ནི་གཟུགས་དང་གཟུགས་མེད་པ་ན་སྤྱོད་པའི་མཐོང་བས་སྤང་བར་བྱ་བ་རྣམས་ནི་རྗེས་སུ་ཤེས་པའི་བཟོད་པས་གཞོམ་པར་བྱ་བ་ཡིན་ནོ། །འོ་ན་རྗེས་སུ་ཤེས་པ་འགོག་པ་དང་ལམ་ལ་དམིགས་པ་བསྒོམ་པའི་ལམ་གྱིས་བསྡུས་པ་ཅིའི་ཕྱིར་ཁམས་གསུམ་གྱི་
[244a]
[244a.1]གཉེན་པོ་མ་ཡིན་ཞེ་ན། འདོད་པའི་ཁམས་ལས་རྒྱལ་ཟིན་པའི་ཕྱིར་ཏེ། ཆོས་ཤེས་པ་ཁོ་ནས་འདོད་པའི་ཁམས་ལས་སྔར་རྒྱལ་བར་གྱུར་ནས་དེའི་འོག་ཏུ་རྗེས་སུ་ཤེས་པ་སྐྱེ་བས་དེའི་ཕྱིར་འདོད་པའི་ཁམས་ལས་རྒྱལ་ཟིན་པས་དེ་ནི་འདོད་པའི་ཁམས་ཀྱི་གཉེན་པོ་མ་ཡིན་གྱི།
[244a.2]ཆོས་ཤེས་པ་ནི་གཟུགས་དང་གཟུགས་མེད་པའི་ཁམས་དག་ལས་མ་རྒྱལ་བའི་ཕྱིར་གཉེན་པོ་ཡིན་པར་རུང་ངོ་། །རྗེས་སུ་ཤེས་པ་ནི་རྣམ་པ་ཐམས་ཅད་དུ་ཞེས་བྱ་བ་ནི་བསྒོམ་པའི་ལམ་གྱིས་བསྡུས་པ་ཡང་ཞེས་བྱ་བ་ཡིན་ནོ། །དེ་དག་ནི་འོག་ནས་ཞེས་བྱ་བ་ནི་མི་རྟག་པ་ལ་སོགས་པའི་རྣམ་པ་དེ་
[244a.3]དག་ནི་འོག་ནས་བཤད་པར་བྱའོ། །རྣམ་པ་བཅུ་དྲུག་ཅེས་བྱ་བ་ནི་དྲོ་བར་གྱུར་པ་ལ་སོགས་པ་ནའོ། །རང་དང་སྤྱིའི་མཚན་ཉིད་ལ་སོགས་པ་འཛིན་པའི་ཕྱིར་རོ་ཞེས་བྱ་བ་ནི་རང་གི་མཚན་ཉིད་དང་སྤྱིའི་མཚན་ཉིད་འཛིན་པའི་ཕྱིར་རོ། །སོགས་པ་ཞེས་བྱ་བའི་སྒྲས་ནི་ཟོ་ཤིག །འདུག་ཤིག་
[244a.4]སོང་ཤིག་ཅེས་བྱ་བ་ལ་སོགས་པ་བསྡུ་སྟེ། འདི་དག་ནི་རང་གི་མཚན་ཉིད་ཀྱི་རྣམ་པ་ཡང་མ་ཡིན་ལ། སྤྱིའི་མཚན་ཉིད་ཀྱི་རྣམ་པ་ཡང་མ་ཡིན་ནོ། །འོ་ན་ཅི་ཞེ་ན། དེ་ལྟ་བུ་རྣམ་པ་དག་ཁོ་ན་ཡིན་ནོ། །གཉི་ག་ཡང་ཞེས་བྱ་བ་ནི་ཟག་པ་དང་བཅས་པ་དང་ཟག་པ་མེད་པའོ། །འོ་ན་ཞེས་བྱ་བ་
[244a.5]རྒྱས་པར་འབྱུང་བ་ནི་འདོད་ཆགས་དང་སེམས་ཅིག་ཅར་འཛིན་ཏོ་སྙམ་དུ་བསམས་པ་ཡིན་ཏེ། མདོ་ལས་འདི་སྐད་དུ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདོད་ཆགས་དང་བྲལ་བའི་
[244a.6]སེམས་ལ་འདོད་ཆགས་དང་བྲལ་བའི་སེམས་སོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདོད་ཆགས་དང་བཅས་པ་དང་འདོད་ཆགས་དང་བྲལ་བ་ཇི་ལྟ་བ་བཞིན་དུ་ཞེ་སྡང་དང་བཅས་པ་དང་ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་
[244a.7]དང་། ཀུན་དུ་བསྡུས་པ་དང་། རྣམ་པར་གཡེངས་པ་དང་། ཞུམ་པ་དང་། རབ་ཏུ་གཟུང་བ་དང་། ཆུང་ངུ་དང་ཆེན་པོར་གྱུར་པ་དང་། ཉེ་བར་མ་ཞི་བ་དང་། ཉེ་བར་ཞི་བ་དང་། རྒོད་པ་དང་། རྒོད་པ་མ་ཡིན་པ་དང་། མཉམ་པར་མ་བཞག་པ་དང་། མཉམ་པར་བཞག་པ་དང་།
[244b]
[244b.1]མ་བསྒོམས་པ་དང་། བསྒོམས་པ་དང་། རྣམ་པར་མ་གྲོལ་བ་དང་། རྣམ་པར་གྲོལ་བའོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ་ཞེས་འབྱུང་ངོ་། །གོས་དང་དྲི་མ་ཅིག་ཅར་མི་འཛིན་པ་བཞིན་ནོ་ཞེས་བྱ་བ་ནི་ཇི་ལྟར་གོས་དང་དྲི་མ་དག་ཅིག་ཅར་མི་འཛིན་པ་དེ་འདྲའོ། །ཇི་
[244b.2]ལྟ་ཞེ་ན། གང་གི་ཚེ་རྣམ་པར་ཤེས་པ་གོས་སོ་སྙམ་དུ་ཡོངས་སུ་གཅོད་པའི་རྣམ་པ་ཅན་དུ་སྐྱེ་བ་དེའི་ཚེ་དྲི་མ་མི་འཛིན་ལ། གང་གི་ཚེ་རྣམ་པར་ཤེས་པ་དྲི་མའོ་སྙམ་དུ་ཡོངས་སུ་གཅོད་པའི་རྣམ་པ་ཅན་དུ་སྐྱེ་བ་དེའི་ཚེ་གོས་མི་འཛིན་ཏོ། །འདྲེས་པའི་འདོད་ཆགས་དང་བཅས་པ་ཉིད་དང་། ལྡན་
[244b.3]པའི་འདོད་ཆགས་དང་བཅས་པ་ཉིད་དོ་ཞེས་བྱ་བ་ལ། འདྲེས་པའི་འདོད་ཆགས་དང་བཅས་པ་ཉིད་ནི་འདོད་ཆགས་དང་མཚུངས་པར་ལྡན་པའི་ཕྱིར་རོ། །ལྡན་པའི་འདོད་ཆགས་དང་བཅས་པ་ཉིད་ནི། ཁ་ཅིག་ན་རེ་འདོད་ཆགས་ཀྱི་ཐོབ་པ་དང་འབྲེལ་པའི་ཕྱིར་རོ་ཞེས་ཟེར་རོ། །གཞན་དག་
[244b.4]ན་རེ་འདོད་ཆགས་རྒྱས་པར་འགྱུར་བའི་དམིགས་པ་ཡིན་པའི་ཕྱིར་རོ་ཞེས་ཟེར་རོ། །གཉིས་ཀྱིས་ཞེས་བྱ་བ་ནི་འདྲེས་པའི་འདོད་ཆགས་དང་བཅས་པ་ཉིད་དང་། ལྡན་པའི་འདོད་ཆགས་དང་བཅས་པ་ཉིད་ཀྱིས་ཞེས་བྱ་བའི་ཐ་ཚིག་གོ། །དེ་ལས་གཞན་པ་ཟག་པ་དང་བཅས་པ་ཞེས་བྱ་
[244b.5]བ་ནི་ཉོན་མོངས་པ་ཅན་དང་། ལུང་དུ་མ་བསྟན་པ་དང་། འཇིག་རྟེན་པའི་དགེ་བ་གང་ཡིན་པ་དེ་ནི་ལྡན་པའི་འདོད་ཆགས་དང་བཅས་པས་འདོད་ཆགས་དང་བཅས་པ་ཡིན་ཏེ། དེ་ལྟར་ན་འདི་གཉི་ག་ཡང་འདོད་ཆགས་དང་བཅས་པ་ཁོ་ནར་བཤད་པ་ཡིན་ནོ། །སྨྲས་པ་ཅིའི་ཕྱིར་ལ་ལའི་
[244b.6]གཞུང་ལུགས་ཀྱིས་འདོད་ཆགས་ཀྱི་གཉེན་པོ་ནི་འདོད་ཆགས་དང་བྲལ་བ་ཡིན་ནོ་ཞེས་ཟེར་ན། འདི་ལྟར་དེ་དག་ན་རེ་གལ་ཏེ་འདོད་ཆགས་དང་མཚུངས་པར་མི་ལྡན་པ་འདོད་ཆགས་དང་བྲལ་བ་ཡིན་ན་ནི་ཉོན་མོངས་པ་གཞན་དང་མཚུངས་པར་ལྡན་པ་སྟེ། ཞེ་སྡང་ལ་སོགས་པ་དང་
[244b.7]མཚུངས་པར་ལྡན་པ་ཡང་འདོད་ཆགས་དང་བྲལ་བ་ཡིན་པར་འགྱུར་བ་ཞིག་ན། འདོད་ཆགས་དང་མཚུངས་པར་མི་ལྡན་པ་དེ་ཡང་འདོད་ཆགས་དང་བཅས་པ་ཡིན་ཏེ། མདོ་ལས་ཞེ་སྡང་ལ་སོགས་པ་དང་མཚུངས་པར་ལྡན་པ་ལ་འདོད་ཆགས་དང་བྲལ་བ་ཞེས་ནི་མ་བཤད་དེ།
[245a]
[245a.1]ཞེ་སྡང་དང་བཅས་པ་དང་། གཏི་མུག་དང་བཅས་པ་ཞེས་བྱ་བ་ལ་སོགས་པ་འབྱུང་བའི་ཕྱིར་རོ། །གང་དག་གི་ལྟར་ན་འདོད་ཆགས་ཀྱི་གཉེན་པོ་ནི་འདོད་ཆགས་དང་བྲལ་བ་ཡིན་ནོ་ཞེས་བྱ་བ་དེ་དག་གི་ལྟར་ན་ནི་འདི་ཉེས་པ་མེད་དེ། འདོད་ཆགས་ཀྱི་གཉེན་པོ་ནི་ཞེ་སྡང་ལ་
[245a.2]སོགས་པ་དང་མཚུངས་པར་ལྡན་པ་མ་ཡིན་ནོ་ཞེས་ཟེར་རོ། །གཞན་དག་ན་རེ་ཞེས་བྱ་བ་ནི་ཆོས་མངོན་པ་པ་དག་གོ། །དེ་ལྟ་ན་ནི་འོ་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་འདོད་ཆགས་དང་མཚུངས་པར་ལྡན་པའི་སེམས་ནི་འདོད་ཆགས་དང་བཅས་པ་ཡིན་ལ། འདོད་ཆགས་ཀྱི་གཉེན་པོ་ནི་
[245a.3]འདོད་ཆགས་དང་བྲལ་བ་ཡིན་ན་དེའི་གཉེན་པོ་མ་ཡིན་པ་འདོད་ཆགས་དང་བཅས་པའི་སེམས་ཀྱི་གཉེན་པོ་མ་ཡིན་པའི་སེམས་ཉོན་མོངས་པ་ཅན་མ་ཡིན་པ་མ་བསྒྲིབས་ལ་ལུང་དུ་མ་བསྟན་པ་ནི་འདོད་ཆགས་དང་མཚུངས་པར་མི་ལྡན་པའི་ཕྱིར་འདོད་ཆགས་དང་བཅས་པ་ཡང་མ་ཡིན་ལ།
[245a.4]འདོད་ཆགས་ཀྱི་གཉེན་པོ་མ་ཡིན་པའི་ཕྱིར་འདོད་ཆགས་དང་བྲལ་བ་ཡང་མ་ཡིན་ནོ། །དེ་ལྟ་བུ་ལ་སོགས་པ་ཞེས་བྱ་བའི་སྒྲས་ནི་ཞེ་སྡང་དང་བཅས་པ་དང་། གཏི་མུག་དང་བཅས་པ་ཞེས་བྱ་བ་ཡང་འདྲ་བར་ཐལ་བར་འགྱུར་བར་སྦྱར་བར་བྱའོ། །ཇི་ལྟ་ཞེ་ན། ཁ་ཅིག་ན་རེ་མདོ་འདིར་ནི་
[245a.5]ཞེ་སྡང་དང་མཚུངས་པར་ལྡན་པའི་སེམས་ནི་ཞེ་སྡང་དང་བཅས་པ་ཡིན་ལ། ཞེ་སྡང་གི་གཉེན་པོ་ནི་ཞེ་སྡང་དང་བྲལ་བར་བཤད་པ་ཡིན་ཏེ། གལ་ཏེ་ཞེ་སྡང་དང་མཚུངས་པར་མི་ལྡན་པ་ཞེ་སྡང་དང་བྲལ་བ་ཡིན་ན་ནི་ཉོན་མོངས་པ་གཞན་དང་མཚུངས་པར་ལྡན་པ་ཡང་ཡིན་པར་འགྱུར་རོ་
[245a.6]ཞེས་ཟེར་རོ། །གཞན་དག་ན་རེ་དེ་ལྟ་ན་ནི་འོ་ན་དེའི་གཉེན་པོ་མ་ཡིན་པའི་སེམས་ཉོན་མོངས་པ་ཅན་མ་ཡིན་པ་ཞེ་སྡང་དང་བཅས་པ་མ་ཡིན་ལ། ཞེ་སྡང་དང་བྲལ་བ་ཡང་མ་ཡིན་ཞེས་བྱ་བ་དང་། དེ་བཞིན་དུ་གཏི་མུག་དང་བཅས་པའི་སེམས་ཀྱང་བརྗོད་པར་བྱའོ། །དེ་ལྟ་བས་ན་འདིར་
[245a.7]འདོད་ཆགས་དང་ལྡན་པས་ཀྱང་འདོད་ཆགས་དང་བཅས་པའི་སེམས་སུ་འདོད་པར་བྱའོ། །ཀྱང་ཞེས་བྱ་བའི་སྒྲས་ནི་འདོད་ཆགས་དང་མཚུངས་པར་ལྡན་པས་ཀྱང་ཞེས་བྱ་བ་ཡིན་ནོ། །གཏི་མུག་དང་བཅས་པ་དང་། གཏི་མུག་དང་བྲལ་བའི་བར་དུ་ཡང་དེ་དང་འདྲ་བར་ཤེས་པར་བྱའོ་ཞེས་
[245b]
[245b.1]བྱ་བ་ནི་དེ་ལྟ་བས་ན་མདོ་འདིར་ཞེ་སྡང་དང་ལྡན་པས་ཀྱང་ཞེ་སྡང་དང་བཅས་པ་དང་། གཏི་མུག་དང་ལྡན་པས་ཀྱང་གཏི་མུག་དང་བཅས་པར་འདོད་པར་བྱའོ་ཞེས་བྱ་བ་ཡིན་ནོ། །དམིགས་པ་ལ་མངོན་པར་སྡུད་པའི་ཕྱིར་ཞེས་བྱ་བ་ནི་དགེ་བའི་སེམས་ནི་རྣམ་པར་གཡེང་བ་དང་མཚུངས་པར་མི་ལྡན་ཏེ། དེ་ལྟ་བས་ན་
[245b.2]དེའི་དམིགས་པ་ལ་དེ་མངོན་པར་སྡུད་པས་ཀུན་དུ་བསྡུས་པ་ཡིན་ནོ། །ཉོན་མོངས་པ་ཅན་གྱི་གཉིད་དང་མཚུངས་པར་ལྡན་པའི་ཕྱིར་ཞེས་བྱ་བ་ནི་གཉིད་ནི་རྣམ་པ་གཉིས་ཏེ། ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་པའོ། །སེམས་དེ་ཉིད་ཉོན་མོངས་པ་ཅན་གྱི་གཉིད་དང་མཚུངས་པར་ལྡན་
[245b.3]པའི་ཕྱིར་བསྡུས་པ་ཡང་ཡིན་ལ། ཉོན་མོངས་པ་ཅན་ཡིན་པའི་ཕྱིར་རྣམ་པར་གཡེང་བ་ཡང་ཡིན་པར་འགྱུར་བར་འཆོལ་བའི་སྐྱོན་དུ་འགྱུར་རོ། །བསྟན་བཅོས་དང་འགལ་བར་ཡང་འགྱུར་རོ་ཞེས་བྱ་བ་ཇི་ལྟ་ཞེ་ན། སེམས་ཀུན་དུ་བསྡུས་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ་
[245b.4]ཞེས་རྒྱས་པར་ཇི་སྐད་དུ་འགྲེལ་པའི་ནད་དུ་བྲིས་པ་ལྟ་བུ་ཡིན་ནོ། །དེ་དག་ལས་རེ་ཞིག་རྗེས་སུ་ཤེས་པ་ནི་ཀུན་དུ་བསྡུས་པའི་སེམས་ལ་དམིགས་པ་མ་ཡིན་ཏེ། འདོད་པའི་ཁམས་ལས་ཡན་ཆད་ན་གཉིད་མེད་པའི་ཕྱིར་དང་། རྗེས་སུ་ཤེས་པ་ཡང་འདོད་པའི་ཁམས་ལ་མི་དམིགས་
[245b.5]པའི་ཕྱིར་རོ། །ལམ་ལ་ཤེས་པ་ཡང་ཀུན་དུ་བསྡུས་པ་ལ་དམིགས་པར་མི་སྲིད་དེ། ལམ་ཤེས་པ་ནི་ལམ་ལ་དམིགས་པ་ཡིན་ལ་ལམ་གྱིས་བསྡུས་པའི་སེམས་ཀྱང་གཉིད་དང་མཚུངས་པར་མི་ལྡན་པས་སོ། །དེས་ན་འདི་སྐད་དུ་དེ་ཤེས་པའི་ཤེས་པ་ནི་གཉིས་ཏེ། ཆོས་ཤེས་པ་དང་། ཀུན་
[245b.6]རྫོབ་ཤེས་པའོ་ཞེས་བརྗོད་དགོས་པར་འགྱུར་རོ། །གང་དག་ན་རེ་ཀུན་དུ་བསྡུས་པའི་ཤེས་པ་ནི་དམིགས་པ་ལ་མངོན་པར་སྡུད་པའི་ཕྱིར་དགེ་བ་ཡིན་ནོ་ཞེས་ཟེར་བ་དེ་དག་གི་ལྟར་ན་ཉེས་པ་འདི་གཉིས་སུ་མི་འགྱུར་ཏེ། དེ་ནི་ཉོན་མོངས་པ་ཅན་གྱི་གཉིད་དང་མཚུངས་པར་མི་ལྡན་པས་བསྡུས་
[245b.7]པ་ཡང་ཡིན་ལ། རྣམ་པར་གཡེངས་པ་ཡང་ཡིན་པར་མི་འགྱུར་རོ། །བསྟན་བཅོས་དང་འགལ་བ་ཡང་མེད་དེ། ཀུན་དུ་བསྡུས་པའི་སེམས་དགེ་བ་ནི་ཁམས་གསུམ་གྱིས་བསྡུས་པ་དང་མ་བསྡུས་པ་ཡིན་པས་དེ་ཤེས་པའི་ཤེས་པ་ནི་བཞི་ཞེས་བྱ་བ་འགྲུབ་སྟེ། གཟུགས་དང་
[246a]
[246a.1]གཟུགས་མེད་པའི་སེམས་དགེ་བ་ལ་དམིགས་པ་ཟག་པ་མེད་པའི་ཤེས་པ་ནི་རྗེས་སུ་ཤེས་པ་ཡིན་ལ། ལམ་གྱིས་བསྡུས་པའི་སེམས་དགེ་བ་ལ་དམིགས་པ་ནི་ལམ་ཤེས་པ་ཡང་ཡིན་ནོ། །རྣམ་པར་བྱང་བ་ཆུང་ངུ་དག་གིས་བསྟེན་པའི་ཕྱིར་ཞེས་བྱ་བ་ནི་དགེ་བ་
[246a.2]ཆུང་ངུ་དག་གིས་བསྟེན་པའི་ཕྱིར་ཞེས་བྱ་བའི་ཐ་ཚིག་གོ། །དེ་ལས་བཟློག་པ་ཡིན་པའི་ཕྱིར་ཞེས་བྱ་བ་ནི་རྣམ་པར་བྱང་བ་ཆེན་པོ་དག་གིས་བསྟེན་པའི་ཕྱིར་ཞེས་བྱ་བའི་དོན་ཏོ། །རྩ་བ་དང་རིན་དང་ཞེས་བྱ་བ་རྒྱས་པར་འབྱུང་བ་ནི་རྩ་བ་ལ་སོགས་པ་སྟོབས་ལ་ཐུག་པ་རྣམས་རེ་རེ་ཞིང་ཆུང་བ་དང་ཆེ་
[246a.3]བ་ཉིད་ཡིན་ཏེ། རྩ་བ་ཉུང་བ་དང་མང་བའི་ཕྱིར་གོ་རིམས་བཞིན་དུ་ཆུང་ངུ་དང་ཆེན་པོར་གྱུར་པ་ཡིན་པར་རིག་པར་བྱའོ། །ཇི་ལྟ་ཞེ་ན། སྨྲས་པ་ཉོན་མོངས་པ་ཅན་མི་དགེ་བའི་རྩ་བ་གཉིས་པ་གཏི་མུག་དང་ཆགས་པ་དང་ཞེ་སྡང་དག་ལས་གང་ཡང་རུང་བ་ཞིག་གིས་རྩ་བ་དང་བཅས་པ་
[246a.4]ཡིན་ཏེ། ཚོགས་པ་གཅིག་ལ་དེ་གཉིས་འདུ་བ་མེད་པའི་ཕྱིར་རོ། །དགེ་བ་ནི་དགེ་བའི་རྩ་བ་གསུམ་པོ་མ་ཆགས་པ་དང་། ཞེ་སྡང་མེད་པ་དང་གཏི་མུག་མེད་པ་དག་གིས་ཏེ། འདི་རྣམས་ནི་མེད་ན་མི་འབྱུང་བའི་ཕྱིར་རོ། །དེ་དང་འདྲ་བ་མ་འོངས་པ་ཐོབ་པ་མེད་པའི་ཕྱིར་ཞེས་བྱ་བ་ནི་ལུགས་
[246a.5]ཀྱི་དགེ་བའི་ཆོས་འདུས་བྱས་དག་འཐོབ་པར་འགྱུར་རོ་ཞེས་བྱ་བ་ཡིན་པས་ཉོན་མོངས་པ་ཅན་དང་འདྲ་བ་མ་འོངས་པ་ཐོབ་ཅིང་རྙེད་པ་ནི་མེད་པའི་ཕྱིར་རོ། །ཕུང་པོ་གསུམ་གྱིས་རྗེས་སུ་འབྲང་བ་དང་བཅས་པ་ཡིན་ནོ་ཞེས་བྱ་བ་ནི་ཚོར་བ་དང་། འདུ་ཤེས་དང་། འདུ་བྱེད་ཀྱི་ཕུང་པོ་རྣམས་སོ། །རྣམ་
[246a.6]པར་ཤེས་པའི་ཕུང་པོས་ནི་མ་ཡིན་ཏེ། ཚོགས་པ་གཅིག་ལ་རྣམ་པར་ཤེས་པ་གཉིས་པ་མེད་པ་དང་། བདག་ཉིད་ཀྱིས་བདག་ཉིད་ལ་བྱེད་པ་ཡང་འགལ་བའི་ཕྱིར་རོ། །དགེ་བ་ནི་དེ་དང་འདྲ་བ་མ་འོངས་པ་ཐོབ་པ་ཡོད་པའི་ཕྱིར་འཁོར་བ་མང་བ་ཡིན་ལ། ཕུང་པོ་བཞི་པོ་ཚོར་བ་
[246a.7]ལ་སོགས་པ་གསུམ་པོ་དེ་དག་གཟུགས་ཀྱི་ཕུང་པོ་བསམ་གཏན་དང་། ཟག་པ་མེད་པའི་སྡོམ་པས་བསྡུས་པ། སེམས་ཀྱི་རྗེས་སུ་འབྲང་བས་ཅི་རིགས་པར་རྗེས་སུ་འབྲང་བ་དང་བཅས་པ་ཡིན་ནོ། །ཡང་ཉོན་མོངས་པ་ཅན་ནི་སྟོབས་ཆུང་བ་ཡིན་ནོ་ཞེས་བྱ་བ་དགེ་བ་ཡང་ལོག་
[246b]
[246b.1]པར་ལྟ་བའི་སྐད་ཅིག་མ་གཅིག་གིས་དགེ་བའི་ཕུང་པོ་ལྔ་འཇོམས་པའི་ཕྱིར། སྟོབས་ཆུང་བ་མ་ཡིན་ནམ་ཞེ་ན། དེ་ནི་གཏན་དུ་འཆད་པ་མ་ཡིན་ཏེ། ཡང་མཚམས་སྦྱོར་བའི་ཕྱིར་རོ། །སྡུག་བསྔལ་ལ་ཆོས་ཤེས་པའི་བཟོད་པས་ནི་ཕྲ་རྒྱས་བཅུ་པོ་གཏན་དུ་གཅོད་དོ། །དེའི་ཕྱིར་ཡང་
[246b.2]ཞེས་བྱ་བ་ལ། ཡང་ཞེས་བྱ་བའི་སྒྲས་ནི་སྔར་བཤད་པའི་ཕྱིར་ཡང་ཞེས་བྱ་བ་ཡིན་ནོ། །དེའི་གཉེན་པོ་ཡིན་པའི་ཕྱིར་ཞེས་བྱ་བ་ནི་རྒོད་པའི་གཉེན་པོ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །རྣམ་པར་མ་ཞི་བ་དང་། རྣམ་པར་ཞི་བ་ཡང་དེ་དང་འདྲའོ་ཞེས་བྱ་བ་ནི་རྣམ་པར་མ་ཞི་བ་ནི་
[246b.3]རྒོད་པ་དང་མཚུངས་པར་ལྡན་པའི་ཕྱིར་ཉོན་མོངས་པ་ཅན་ཡིན་ལ། རྣམ་པར་ཞི་བ་ནི་དེའི་གཉེན་པོ་ཡིན་པའི་ཕྱིར་དགེ་བ་ཡིན་ནོ། །ཡང་ན་དེ་ནི་ཉོན་མོངས་པ་དང་མཚུངས་པར་ལྡན་པ་དང་མཚུངས་པར་མི་ལྡན་པའི་སྒོ་ནས་ཉེ་བར་མ་ཞི་བ་དང་ཉེ་བར་ཞི་བ་ཡིན་ནོ། །མཉམ་པར་གཞག་
[246b.4]པ་ནི་དེའི་གཉེན་པོ་ཡིན་པའི་ཕྱིར་དགེ་བ་ཡིན་ནོ་ཞེས་བྱ་བ་ནི་རྣམ་པར་གཡེང་བའི་གཉེན་པོ་ཡིན་པའི་ཕྱིར་རོ། །འཐོབ་པ་དང་བསྟེན་པའི་བསྒོམ་པ་དག་གིས་ཞེས་བྱ་བ་ནི་སྔོན་མ་ཐོབ་པ་ལས་འཐོབ་པ་ནི་འཐོབ་པའོ། །མངོན་དུ་བྱེད་པ་ནི་བསྟེན་པའོ། །དེ་དག་ཉིད་བསྒོམ་པ་ཡིན་ཏེ། མ་
[246b.5]བསྒོམས་པ་ནི་དེ་དག་གིས་མ་བསྒོམས་པའི་ཕྱིར་རོ། །ཉོན་མོངས་པ་ཅན་ནི་དགེ་བ་བཞིན་དུ་མ་འོངས་པ་ཐོབ་པ་ཡང་མེད་ལ། དམན་པའི་ཕྱིར་བསྟེན་པར་འོས་པ་ཡང་མ་ཡིན་ཏེ། འཐོབ་དང་བསྟེན་ཅེས་བྱ་བ་ནི་དགེ་བ་འདུས་བྱས་འཐོབ་པའོ་ཞེས་འབྱུང་ངོ་། །དེ་གཉིས་ཀྱིས་
[246b.6]ཞེས་བྱ་བ་ནི་འཐོབ་པ་དང་བསྟེན་པའི་བསྒོམ་པ་དག་གིས་ཞེས་བྱ་བའི་ཐ་ཚིག་གོ། །རང་བཞིན་དང་རྒྱུད་རྣམ་པར་གྲོལ་བ་དག་གིས་རྣམ་པར་མ་གྲོལ་བའི་ཕྱིར་ཞེས་བྱ་བ་ནི་ཉོན་མོངས་པ་དག་དང་མཚུངས་པར་ལྡན་པའི་ཕྱིར་རང་བཞིན་རྣམ་པར་གྲོལ་བས་ཀྱང་རྣམ་པར་གྲོལ་བ་མ་ཡིན་ལ།
[246b.7]ཉོན་མོངས་པ་ཟད་པའི་རྒྱུད་ལ་མི་སྐྱེ་བའི་ཕྱིར་རྒྱུད་རྣམ་པར་གྲོལ་བས་ཀྱང་རྣམ་པར་གྲོལ་བ་མ་ཡིན་ནོ། །རྣམ་པར་གྲོལ་བ་ནི་ཉོན་མོངས་པ་དང་མཚུངས་པར་མི་ལྡན་པའི་ཕྱིར་དང་། ཉོན་མོངས་པ་ཟད་པའི་རྒྱུད་ལ་སྐྱེ་བའི་ཕྱིར་དགེ་བ་ཡིན་ནོ། །རྨུགས་པ་དང་གཉིད་དང་ལྷན་ཅིག་
[247a]
[247a.1]པར་གྱུར་ཞེས་བྱ་བ་ནི་རྨུགས་པ་དང་གཉིད་དང་མཚུངས་པར་ལྡན་པའོ། །ལྷག་མཐོང་དང་མཚུངས་པར་མི་ལྡན་པ་ཞེས་བྱ་བ་ནི་ནང་དུ་ཀུན་དུ་འགོག་པ་དང་ལྷན་ཅིག་པར་གྱུར་ཞེས་བྱ་བ་དེ་ཁོ་ན་སྟོན་པར་བྱེད་པ་ཡིན་ནོ། །རྣམ་པར་འཕྲོས་པ་ཞེས་བྱ་བ་ནི་རྗེས་སུ་གཡེངས་པ་
[247a.2]ཞེས་བྱ་བ་འདིའི་བཤད་པ་ཡིན་ནོ། །ཉོན་མོངས་པ་ཅན་གྱི་གཉིད་དང་ལྷན་ཅིག་པར་གྱུར་པ་རྣམ་པར་གཡེངས་པ་ཉིད་དུ་དམ་མ་བཅས་པའི་ཕྱིར་རོ་ཞེས་བྱ་བ་ཅིའི་ཕྱིར་འདི་ལ་རྣམ་པར་གཡེངས་པ་ཉིད་དུ་ཡིན་པར་དམ་མི་འཆའ། ཅི་ཉོན་མོངས་པ་ཅན་གྱི་སེམས་གཉིད་དང་ལྷན་ཅིག་པར་
[247a.3]གྱུར་པ་ལ་རྣམ་པར་གཡེངས་པ་ཉིད་མེད་པས་དམ་མི་འཆའ་འམ་འོན་ཏེ་འདི་ལ་རྣམ་པར་གཡེངས་པ་ཉིད་ཡོད་མོད་ཀྱི་ཀུན་དུ་བསྡུས་པ་ཉིད་དུ་རྣམ་པར་གཞག་པའི་ཕྱིར་དམ་མི་འཆའ་ཞེ་ན། གཉི་གར་ཡང་འཆད་དེ་ཁ་ཅིག་ན་རེ་ཉོན་མོངས་པ་ཅན་གཉིད་དང་ལྷན་ཅིག་པར་གྱུར་པ་ལས་གཞན་
[247a.4]པའི་ཉོན་མོངས་པ་ཅན་གང་ཡིན་པ་དེ་ནི་རྣམ་པར་གཡེངས་པ་ཡིན་ལ། གཉིད་དང་ལྷན་ཅིག་པར་གྱུར་པ་ནི་ཉོན་མོངས་པ་ཅན་མ་ཡིན་པར་ཁྱད་པར་མེད་པར་ཀུན་དུ་བསྡུས་པ་ཡིན་པར་དམ་འཆའོ་ཞེས་ཟེར་རོ། །གཞན་དག་ན་རེ་གཉིད་དང་མཚུངས་པར་ལྡན་པ་གང་ཡིན་པ་དེ་ནི་ཀུན་དུ་
[247a.5]བསྡུས་པ་ཁོ་ན་ཡིན་གྱི་རྣམ་པར་གཡེངས་པ་ནི་མ་ཡིན་ཏེ། རྣམ་པར་གཡེངས་པ་ནི་ཡུལ་རྣམས་ལ་རྣམ་པར་འཕྲོས་པ་གང་ཡིན་པ་དེ་ཁོ་ན་ཡིན་ནོ། །དེའི་ཕྱིར་འདིར་གཉིད་དང་མཚུངས་པར་ལྡན་པའི་སེམས་ལ་དམ་མི་འཆའོ་ཞེས་ཟེར་རོ། །བསྟན་བཅོས་དང་འགལ་བ་ནི་བླའི་ཞེས་བྱ་
[247a.6]བ་ནི་བསྟན་བཅོས་ཆོས་མངོན་པ་སངས་རྒྱས་ཀྱིས་གསུངས་པ་མ་ཡིན་ནོ་སྙམ་དུ་བསམས་པ་ཡིན་ནོ། །མཚན་ཉིད་ཀྱང་ཐ་མི་དད་པར་བཤད་པའི་ཕྱིར་ཞེས་བྱ་བ་ནི་དེ་དག་ཐམས་ཅད་ཉོན་མོངས་པ་ཅན་དུ་བཤད་པས་རྣམ་པར་གཡེངས་པ་ལ་སོགས་པ་ནས་རྣམ་པར་མ་གྲོལ་བ་ལ་ཐུག་པ་
[247a.7]འདི་དག་གི་མཚན་ཉིད་ཉོན་མོངས་པ་ཅན་ཉིད་དུ་ཁྱད་པར་མེད་དེ། ཉོན་མོངས་པ་ཅན་ཉིད་ནི་ཉོན་མོངས་པའི་ས་མང་པོ་དག་དང་མཚུངས་པར་ལྡན་པའི་ཕྱིར་རོ། །ཀུན་དུ་བསྡུས་པ་དང་། རབ་ཏུ་གཟུང་བ་ལ་སོགས་པའི་མཚན་ཉིད་ཀྱང་ཐ་མི་དད་པར་བཤད་པའི་ཕྱིར་དོན་གྱི་ཁྱད་པར་
[247b]
[247b.1]ཡང་མ་བཤད་པ་ཡིན་ནོ་ཞེས་བྱ་བར་སྦྱར་རོ། །སོགས་པ་ཞེས་བྱ་བའི་སྒྲས་ནི་ཆེན་པོ་དང་། རྒོད་པ་མ་ཡིན་པ་དང་། རྣམ་པར་ཞི་བ་དང་། མཉམ་པར་བཞག་པ་དང་། བསྒོམས་པ་དང་། རྣམ་པར་གྲོལ་བ་རྣམས་བསྡུས་ཏེ། འདི་དག་ནི་དགེ་བ་ཉིད་དུ་ཁྱད་པར་མེད་དོ། །དགེ་
[247b.2]བ་ཉིད་གང་ཡིན་ཞེ་ན། དགེ་བའི་ས་མང་པོ་པ་དག་དང་མཚུངས་པར་ལྡན་པའི་ཕྱིར་རོ། །མ་བཤད་པ་མ་ཡིན་པ་ཉིད་དེ་ཞེས་བྱ་བ་ལ། ཉིད་ཅེས་བྱ་བ་ནི་ཚིག་གི་ཕྲད་དོ། །མ་བཤད་པ་མ་ཡིན་ཞེས་དགག་པ་གཉིས་སྨོས་པ་ནི་བཤད་པ་ཁོ་ན་ཞེས་བྱ་བའི་ཐ་ཚིག་གོ། །ཅི་ཞིག་བཤད་
[247b.3]ཅེ་ན། ཚིག་རྣམས་ཀྱི་དོན་གྱི་ཁྱད་པར་རོ། །ཇི་ལྟར་ཞེ་ན། སྨྲས་པ། རྣམ་པར་གཡེངས་པ་ལ་སོགས་པ་ཉོན་མོངས་པ་ཅན་དུ་མཚུངས་ཤིང་ཉོན་མོངས་པ་ཅན་ཉིད་དུ་འདྲ་ཡང་འདི་ལྟར་སེམས་ཉོན་མོངས་པ་ཅན་འདི་ནི་རྣམ་པར་གཡེངས་པ་དང་ལྡན་པའི་ཕྱིར་རྣམ་པར་གཡེངས་པ་ཉིད་ཡིན་ནོ། །
[247b.4]ཉོན་མོངས་པ་ཅན་གྱི་ལེ་ལོ་དང་ལྡན་པའི་ཕྱིར་ཞུམ་པ་ཡིན་ནོ། །རྒོད་པ་དང་ལྡན་པའི་ཕྱིར་རྒོད་པ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པ་ཉེས་པའི་ཁྱད་པར་བསྟན་པས་དེ་དག་གི་ཉེས་པའི་ཁྱད་པར་ཡང་དག་པར་བསྟན་པའི་ཕྱིར་དོན་གྱི་ཁྱད་པར་བཤད་པ་ཁོ་ན་ཡིན་ནོ། །དེ་བཞིན་དུ་ཀུན་དུ་
[247b.5]བསྡུས་པ་ལ་སོགས་པ་དགེ་བའི་ཡང་འདི་ལྟར་སེམས་དགེ་བ་འདི་ནི་ཀུན་དུ་བསྡུས་པ་ཡིན་ནོ། །རབ་ཏུ་བཟུང་བ་ཡིན་ནོ་ཞེས་བྱ་བ་རྒྱས་པར་ཡོན་ཏན་གྱི་ཁྱད་པར་ཡང་དག་པར་བསྟན་པས་དོན་གྱི་ཁྱད་པར་བཤད་པ་ཁོ་ན་ཡིན་ནོ། །མདོ་དང་འགལ་བ་མ་སྤངས་པའི་ཕྱིར་ཞེས་བྱ་བ་ནི་མདོ་
[247b.6]ལས་ནི་ཀུན་དུ་བསྡུས་པ་ནི་རྨུགས་པ་དང་། གཉིད་དང་ལྷན་ཅིག་པར་གྱུར་པ་ཡིན་ནོ་ཞེས་འབྱུང་སྟེ། རྨུགས་པ་དང་ལྡན་པས་ཉོན་མོངས་པ་ཅན་གྱི་གཉིད་དང་མཚུངས་པར་ལྡན་པ་གང་ཡིན་པ་དེ་ནི་ཀུན་དུ་བསྡུས་པ་ཡིན་གྱི། དགེ་བ་ནི་མ་ཡིན་ཏེ། རྨུགས་པ་ནི་ཉོན་མོངས་པའི་
[247b.7]ས་མང་པོ་པ་ཡིན་པའི་ཕྱིར་རོ། །གལ་ཏེ་མདོ་ལས་ཞེས་བྱ་བ་རྒྱས་པར་འབྱུང་བ་ནི་གལ་ཏེ་མདོ་ལས་ཁྱེད་ཀྱི་ལུགས་ལྟར་བཅོམ་ལྡན་འདས་ཀྱིས་ཞུམ་པ་ཉིད་རྒོད་པ་ཡིན་པར་དགོངས་པར་གྱུར་ན་ནི། ཞུམ་པ་དང་རྒོད་པ་དག་ཐ་དད་པར་གསུངས་པ་ཉིད་དུ་མི་འགྱུར་རོ། །ཇི་ལྟ་ཞེ་ན།
[248a]
[248a.1]སྨྲས་པ། གང་གི་ཚེ་སེམས་ཞུམ་པ་སྟེ་ལེ་ལོ་དང་མཚུངས་པར་ལྡན་པ་དང་། ཞུམ་པར་དོགས་པ་སྟེ་འདི་ནི་ཞུམ་པར་འགྱུར་རོ་ཞེས་བྱ་བར་དོགས་པ་ནི་ཞུམ་པར་དོགས་པའོ། །དེའི་ཚེ་ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་ཡང་
[248a.2]དག་བྱང་ཆུབ་ཀྱི་ཡན་ལག་རྣམས་བསྒོམ་པ་ནི་དུས་མ་ཡིན་ནོ་ཞེས་བྱ་བ་ངེས་པར་འདིར་མི་འགྱུར་གྱི་འདི་སྐད་དུ་དེའི་ཚེ་ཆོས་རབ་ཏུ་རྣམ་པར་འབྱེད་པ་དང་། བརྩོན་འགྲུས་དང་། དགའ་བ་ཡང་དག་བྱང་ཆུབ་ཀྱི་ཡན་ལག་རྣམས་བསྒོམ་པའི་དུས་ཀྱང་མ་ཡིན་ནོ་ཞེས་
[248a.3]བརྗོད་དགོས་པར་འགྱུར་རོ། །ཅིའི་ཕྱིར་ཞེ་ན། སེམས་ཞུམ་པ་དེ་ཉིད་རྒོད་པ་ཡིན་པའི་ཕྱིར་རོ། །དེ་བཞིན་དུ་སེམས་རྒོད་པ་དང་རྒོད་པར་དོགས་པ་དེའི་ཚེ་ཆོས་རབ་ཏུ་རྣམ་པར་འབྱེད་པ་དང་། བརྩོན་འགྲུས་དང་། དགའ་བ་ཡང་དག་བྱང་ཆུབ་ཀྱི་ཡན་ལག་རྣམས་བསྒོམ་པའི་དུས་
[248a.4]མ་ཡིན་ནོ་ཞེས་བྱ་བའི་ངེས་པ་འདིར་མི་འགྱུར་གྱི་འདི་སྐད་དུ་དེའི་ཚེ་ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་རྣམས་བསྒོམ་པའི་དུས་ཀྱང་མ་ཡིན་ནོ་ཞེས་བརྗོད་དགོས་པར་འགྱུར་རོ། །ཅིའི་ཕྱིར་ཞེ་ན། སེམས་རྒོད་པ་དེ་ཉིད་ཞུམ་
[248a.5]པ་མ་ཡིན་པའི་ཕྱིར་རོ། །ཡང་ན་བྱེ་བྲག་མེད་པར་གང་གི་ཚེ་སེམས་ཞུམ་པ་དང་ཞུམ་པར་དོགས་པའམ། རྒོད་པ་དང་རྒོད་པར་དོགས་པ་དེའི་ཚེ་ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་དང་། ཆོས་རབ་ཏུ་རྣམ་པར་འབྱེད་པ་དང་། བརྩོན་འགྲུས་དང་། དགའ་
[248a.6]བ་ཡང་དག་བྱང་ཆུབ་ཀྱི་ཡན་ལག་རྣམས་བསྒོམ་པའི་དུས་མ་ཡིན་ནོ་ཞེས་བརྗོད་དགོས་པར་འགྱུར་རོ། །དྲན་པ་ཡང་དག་བྱང་ཆུབ་ཀྱི་ཡན་ལག་མ་སྨོས་པ་ནི་དྲན་པ་ནི་ཀུན་དུ་འགྲོ་བ་ཡིན་པའི་ཕྱིར་སེམས་གཉི་ག་ལ་མ་བཤད་ཀྱང་གྲུབ་པའི་ཕྱིར་ཏེ། མདོ་ལས། དྲན་པ་ནི་ཀུན་དུ་
[248a.7]སོང་བ་ཡིན་ནོ་ཞེས་ང་སྨྲའོ་ཞེས་འབྱུང་བའི་ཕྱིར་རོ། །ཡང་ཇི་ལྟར་ན་བྱེ་བྲག་ཏུ་སྨྲ་བ་ཞུམ་པ་གང་ཡིན་པ་དེ་ཉིད་རྒོད་པ་ཡིན་ནོ་ཞེས་བྱ་བར་འདོད་པར་མངོན་ཞེ་ན། སེམས་ཞུམ་པ་ནི་ལེ་ལོ་དང་མཚུངས་པར་ལྡན་པའི་ཕྱིར་ཉོན་མོངས་པ་ཅན་ཡིན་ནོ། །སེམས་རྒོད་པ་ནི་རྒོད་པ་དང་
[248b]
[248b.1]མཚུངས་པར་ལྡན་པའི་ཕྱིར་ཉོན་མོངས་པ་ཅན་ཡིན་ནོ་ཞེས་འབྱུང་བའི་ཕྱིར་རོ། །ཅི་འདི་ལ་བྱང་ཆུབ་ཀྱི་ཡན་ལག་རྣམས་སོ་སོར་བསྒོམ་མམ་ཞེས་བྱ་བ་ནི་གལ་ཏེ་རེས་འགའ་ཤིན་ཏུ་སྦྱངས་པ་ལ་སོགས་པ་བསྒོམ་པ་ཁོ་ན་ཡིན་ལ། ཆོས་རབ་ཏུ་རྣམ་པར་འབྱེད་པ་ལ་སོགས་པ་བསྒོམ་པ་མ་ཡིན་
[248b.2]པའམ། རེས་འགའ་ཆོས་རབ་ཏུ་རྣམ་པར་འབྱེད་པ་ལ་སོགས་པ་བསྒོམ་པ་ཁོ་ན་ཡིན་གྱི་ཤིན་ཏུ་སྦྱངས་པ་ལ་སོགས་པ་བསྒོམ་པ་མ་ཡིན་ན་སོ་སོར་བསྒོམ་པ་ཡིན་ནོ། །འདི་དག་ཡིད་ལ་བྱེད་པ་བསྒོམ་པ་ཡིན་པར་འདོད་ཀྱི་མངོན་སུམ་དུ་འགྱུར་བ་ནི་མ་ཡིན་ནོ་ཞེས་བྱ་བ་ལ། ཡིད་ལ་
[248b.3]བྱེད་པ་ནི་དམིགས་པར་བྱེད་པ་སྟེ། སེམས་ཞུམ་པའི་ཚེ་ཤིན་ཏུ་སྦྱངས་པ་ལ་སོགས་པ་ལ་དམིགས་པར་བྱ་ཞིང་གཏད་པར་བྱ་བའི་དུས་མ་ཡིན་ལ། སེམས་རྒོད་པའི་ཚེ་ཆོས་རབ་ཏུ་རྣམ་པར་འབྱེད་པ་ལ་སོགས་པ་དམིགས་པར་བྱ་བའི་དུས་མ་ཡིན་ནོ་ཞེས་བྱ་བའི་དོན་ཡིན་གྱི།
[248b.4]དེའི་ཚེ་ཤིན་ཏུ་སྦྱངས་པ་ལ་སོགས་པ་མངོན་དུ་མི་བྱ་བའི་ཆོས་རབ་ཏུ་རྣམ་པར་འབྱེད་པ་ལ་སོགས་པ་ནི་མངོན་དུ་བྱའོ་ཞེས་བྱ་བའམ། ཆོས་རབ་ཏུ་རྣམ་པར་འབྱེད་པ་ལ་སོགས་པ་མངོན་དུ་བྱའི་ཤིན་ཏུ་སྦྱངས་པ་ལ་སོགས་པ་ནི་མ་ཡིན་ནོ་ཞེས་བྱ་བ་ལྟ་བུར་མངོན་སུམ་དུ་འགྱུར་བའི་
[248b.5]བསྒོམ་པ་ཡིན་པར་ནི་མི་འདོད་དོ། །འདི་ལས་ལེ་ལོ་ལྷག་པའི་སེམས་ཞེས་བྱ་བ་རྒྱས་པར་འབྱུང་བ་ནི་གང་ལེ་ལོ་ལྷག་ཅིང་ཤས་ཆེ་ལ་རྒོད་པ་ནི་བག་ལ་ཞ་བར་འདུག་པ་དེ་ནི་ཞུམ་པ་ཡིན་ལ། གང་ལ་རྒོད་པ་ལྷག་ལ་ལེ་ལོ་ནི་བག་ལ་ཞ་བར་འདུག་པ་དེ་ནི་རྒོད་པ་ཡིན་པས་འདི་
[248b.6]གཉིས་ལ་བྱེ་བྲག་ཡོད་པའི་ཕྱིར་མདོ་ལས་སོ་སོར་སྨོས་པ་དང་འགལ་བ་མེད་དོ།། །།བམ་པོ་ལྔ་བཅུ་བཞི་པ། དེ་གཉིས་ཀྱང་ཚོགས་པ་གཅིག་ལ་ལྷན་ཅིག་པ་ཡིན་པའི་ཕྱིར་སེམས་དེ་ཉིད་ཞུམ་པ་ཡང་ཡིན་ལ། དེ་ཉིད་རྒོད་པ་ཡང་ཡིན་ནོ་ཞེས་སྨྲའོ་ཞེས་བྱ་བ་ནི་ཞུམ་པ་ནི་
[248b.7]ལེ་ལོ་དང་མཚུངས་པར་ལྡན་པའི་ཕྱིར་ཉོན་མོངས་པ་ཅན་ཡིན་ནོ། །རྒོད་པ་ནི་རྒོད་པ་དང་མཚུངས་པར་ལྡན་པའི་ཕྱིར་ཉོན་མོངས་པ་ཅན་ཡིན་ནོ། །སློབ་དཔོན་གྱིས་བསམ་པ་ཅན་ཞེས་བྱ་བ་ནས་མདོའི་དགོངས་པ་ནི་ལེ་ལོ་ལྷག་པའི་སེམས་ནི་ཞུམ་པ་ཞེས་བཤད་ལ། རྒོད་པ་
[249a]
[249a.1]ལྷག་པ་ནི་རྒོད་པ་ཞེས་བཤད་ཅེས་བྱ་བ་འདི་མ་ཡིན་ནོ་ཞེས་བྱ་བའི་བར་སྨོས་ཏེ། འདི་ལྟར་གང་གི་ཚེ་སེམས་ཞུམ་པ་དང་ཞུམ་པར་དོགས་པ་ཞེས་བྱ་བ་རྒྱས་པར་གསུངས་ཀྱི། འདི་སྐད་དུ་ལེ་ལོ་ལྷག་པ་ཞེ་འམ། རྒོད་པ་ལྷག་པ་ཞེས་ཁྱད་པར་དུ་ནི་མ་མཛད་དོ། །འདོད་
[249a.2]ཆགས་དང་ལྡན་པའི་སེམས་ཐམས་ཅད་འདོད་ཆགས་དང་བཅས་པ་ཡིན་ནོ་ཞེས་གང་བཤད་པ་ཞེས་བྱ་བ་ཇི་སྐད་དུ་བཤད་ཅེ་ན། དེ་ལ་འདོད་ཆགས་དང་མཚུངས་པར་ལྡན་པའི་སེམས་ནི་གཉིས་ཀྱི་འདོད་ཆགས་དང་བཅས་པ་ཡིན་ནོ། དེ་ལས་གཞན་པ་གང་ཟག་པ་དང་བཅས་པ་ནི་ལྡན་པའི་
[249a.3]འདོད་ཆགས་དང་བཅས་པས་འདོད་ཆགས་དང་བཅས་པ་ཡིན་ནོ་ཞེས་འབྱུང་བའི་ཕྱིར་དང་། དེ་ལྟ་བས་ན་འདིར་འདོད་ཆགས་དང་ལྡན་པས་ཀྱང་འདོད་ཆགས་དང་བཅས་པའི་སེམས་སུ་འདོད་པར་བྱ་སྟེ་ཞེས་འབྱུང་བའི་ཕྱིར་རོ། །སློབ་པའི་སེམས་ཟག་པ་མེད་པ་ཡང་འདོད་ཆགས་དང་
[249a.4]བཅས་པར་འགྱུར་རོ་ཞེས་བྱ་བ་ནི་སློབ་པའི་རྒྱུད་ལ་འདོད་ཆགས་ཀྱི་ལྷག་མ་དང་བཅས་པའི་ཕྱིར་རོ། །གལ་ཏེ་འདོད་ཆགས་ཀྱི་དམིགས་པ་ཡིན་ནོ་ཞེས་བྱ་བ་ནི་འདོད་ཆགས་ཀྱི་དམིགས་པ་གང་ཡིན་པ་སྟེ་འདོད་ཆགས་དང་ལྡན་པས་འདོད་ཆགས་དང་བཅས་པ་ཡིན་པར་འདོད་ན་ནི་དགྲ་
[249a.5]བཅོམ་པའི་སེམས་ཟག་པ་དང་བཅས་པ་ཡང་གཞན་གྱི་འདོད་ཆགས་ཀྱི་དམིགས་པ་ཡིན་པའི་ཕྱིར་འདོད་ཆགས་དང་ལྡན་པས་ན་གཞན་གྱི་སེམས་རིག་པའམ། གཞན་གྱི་སེམས་ཤེས་པས་འདོད་ཆགས་དང་བཅས་པ་ཞེས་བྱ་བར་གཟུང་བར་འགྱུར་རོ། །འོན་ཏེ་དེ་ལ་འདོད་ཆགས་ཀྱི་མི་
[249a.6]དམིགས་སོ་ཞེས་བྱ་བར་འདོད་ན་དེའི་ཕྱིར། ཡང་ན་དེ་ཇི་ལྟར་ཟག་པ་དང་བཅས་པ་ཡིན་ཞེས་བྱ་བ་སྨོས་སོ། །གལ་ཏེ་ཉོན་མོངས་པ་སྤྱི་པའི་དམིགས་པ་ཡིན་པའི་ཕྱིར་རོ་ཞེ་ན་ཞེས་བྱ་བ་ནི་འོན་ཏེ་ཉོན་མོངས་པ་སྤྱི་པ་ལྟ་བ་དང་། ཐེ་ཚོམ་དང་མ་རིག་པ་རྣམས་ཀྱི་དམིགས་པ་ཡིན་པས་དེའི་ཕྱིར་ཟག་པ་དང་
[249a.7]བཅས་པའོ་ཞེས་བྱ་བར་འདོད་ན་དེ་ལྟ་ན་ཡང་དགྲ་བཅོམ་པའི་སེམས་ཟག་པ་དང་བཅས་པ་གཏི་མུག་གི་དམིགས་པ་ཡིན་པའི་ཕྱིར་གཏི་མུག་དང་བཅས་པར་གཟུང་བར་འགྱུར་ཏེ། གཏི་མུག་ཀྱང་ཉོན་མོངས་པ་སྤྱི་པ་ཡིན་པ་དགྲ་བཅོམ་པ་ཉིད་ཀྱི་སེམས་ཀྱང་གཞན་གཏི་མུག་གི་དམིགས་པར་འགྱུར་
[249b]
[249b.1]བས་སོ། །གཞན་གྱི་སེམས་ཤེས་པ་ནི་ཐོབ་པ་ལ་དམིགས་པ་ཡང་མ་ཡིན་ཞེས་བྱ་བ་ནི་གང་གི་ཕྱིར་གཞན་གྱི་སེམས་ཤེས་པ་སེམས་དང་སེམས་ལས་བྱུང་བ་ལ་དམིགས་པ་ཡིན་པར་འདོད་པས་དེའི་ཕྱིར་འདོད་ཆགས་ཀྱི་ཐོབ་པ་དང་བཅས་པ་ཉིད་ཀྱི་འདོད་ཆགས་དང་ལྡན་པའི་ཕྱིར་འདོད་
[249b.2]ཆགས་དང་བཅས་པའོ་ཞེས་བྱ་བར་ཡང་མི་དམིགས་སོ། །སེམས་དེ་ལ་དམིགས་པའི་འདོད་ཆགས་ལ་དམིགས་པ་ཅན་ཡང་མ་ཡིན་ནོ་ཞེས་བྱ་བ་ལ། དེ་ལ་ཞེས་བྱ་བ་ནི་ཕ་རོལ་པོའི་སེམས་གཞན་གྱི་སེམས་ཤེས་པས་གཟུང་བར་བྱ་བ་གང་ཡིན་པ་དེ་ནི་དེ་ལ་ཞེས་བྱ་བའི་སྒྲར་བརྗོད་དོ། །སེམས་
[249b.3]དེ་ལ་དམིགས་པ་ནི་སེམས་དེ་ལ་དམིགས་པའི་འདོད་ཆགས་སོ། །གཞན་གྱི་སེམས་ཤེས་པ་འདི་ལ་དམིགས་པ་སེམས་དེ་ལ་དམིགས་པའི་འདོད་ཆགས་ཡོད་པས་ན་དེ་ནི་སེམས་དེ་ལ་དམིགས་པའི་འདོད་ཆགས་ལ་དམིགས་པ་ཅན་ནོ། །འདི་ལྟར་གཞན་གྱི་སེམས་ཤེས་པ་ནི་འདོད་
[249b.4]ཆགས་དེ་ལྟ་བུ་ལ་དམིགས་པ་ཡང་མ་ཡིན་ཏེ། ཤིན་ཏུ་བསྐལ་པའི་ཕྱིར་རོ། །གཞན་གྱི་སེམས་ཤེས་པ་ནི་རྫས་རེ་རེ་ཞིང་ཡུལ་ཡིན་པས་གཞན་གྱི་སེམས་ཤེས་པ་ནི་སེམས་དེའི་དམིགས་པ་ནི་མི་འཛིན་ཏེ། དེའི་རྣམ་པ་དང་དམིགས་པ་ལ་མི་ལྟོས་པ་ཡིན་ཏེ་ཞེས་འབྱུང་བའི་ཕྱིར་དང་། སེམས་འདི་
[249b.5]ཆགས་པ་ཡིན་ནོ་ཞེས་བྱ་བར་ཤེས་ཀྱི་ཞེས་འབྱུང་བའི་ཕྱིར་རོ། །དེའི་ཕྱིར་འདོད་ཆགས་དང་ལྡན་པས་འདོད་ཆགས་དང་བཅས་པའི་སེམས་མ་ཡིན་ནོ། །འདོད་ཆགས་དང་མཚུངས་པར་མི་ལྡན་པའི་སེམས་ཞེས་བྱ་བ་ནི་འདོད་ཆགས་ཀྱི་ཐོབ་པ་ཡོད་དུ་ཟིན་ཀྱང་ཞེས་བྱ་བར་བསམས་
[249b.6]པ་ཡིན་ནོ། །འདོད་པའི་སྲིད་པ་དང་། གཟུགས་ཀྱི་སྲིད་པ་དང་། གཟུགས་མེད་པའི་སྲིད་པར་ཕྱིར་མི་ལྡོག་པའི་ཆོས་ཅན་ཡིན་ཞེས་བྱ་བ་ནི་ཁམས་གསུམ་པའི་འདོད་ཆགས་དང་བྲལ་བར་བསྟན་པའི་ཕྱིར་རོ་སྙམ་དུ་བསམས་པ་ཡིན་ནོ། །དེར་ནི་དེའི་ཐོབ་པ་དང་བྲལ་བ་ལས་
[249b.7]དགོངས་ཏེ་གསུངས་པ་ཡིན་ནོ་ཞེས་བྱ་བ་ནི་འདོད་ཆགས་ལ་སོགས་པའི་ཐོབ་པའི་བྲལ་བ་ལས་དགོངས་ཏེ་གསུངས་པ་ཡིན་གྱི། མི་ལྡན་པ་ཙམ་ནི་མ་ཡིན་ནོ་ཞེས་སྟོན་པར་བྱེད་དོ། །བཤད་པ་མ་ཡིན་ནམ་ཞེས་བྱ་བ་རྒྱས་པར་འབྱུང་བ་གོང་དུ་བཤད་ཅེ་ན། ཁ་ཅིག་ན་རེ་
[250a]
[250a.1]མདོ་འདིར་ནི་ཞེས་བྱ་བ་ནས། གལ་ཏེ་འདོད་ཆགས་དང་མཚུངས་པར་མི་ལྡན་པ་འདོད་ཆགས་དང་བྲལ་བ་ཡིན་ན་ནི་ཉོན་མོངས་པ་གཞན་དང་མཚུངས་པར་ལྡན་པ་ཡང་ཡིན་པར་འགྱུར་རོ་ཞེས་ཟེར་བ་དེར་རོ། །ཉོན་མོངས་པ་གཞན་དང་མཚུངས་པར་ལྡན་ཡང་
[250a.2]འདོད་ཆགས་དང་མཚུངས་པར་མི་ལྡན་པའི་ཕྱིར་འདོད་ཆགས་དང་བྲལ་བ་ཡིན་ནོ་སྙམ་པའི་དགོངས་པ་འདིས་སོ། །གལ་ཏེ་དེ་ལྟ་ན་ཞེ་སྡང་དང་བཅས་པ་དང་། གཏི་མུག་ལ་སྩོགས་པ་དང་བཅས་པ་ཞེས་བྱ་བ་ལ་སོགས་པར་བརྗོད་པར་མི་བྱ་བར་འགྱུར་རོ་ཞེ་ན། དེའི་ཕྱིར་དེ་ནི་འདོད་ཆགས་
[250a.3]དང་བྲལ་བ་ཞེས་བྱ་བར་མི་གཟུང་ངོ་ཞེས་བྱ་བ་ལ་སོགས་པ་སྨོས་ཏེ། ཞེ་སྡང་ལ་སོགས་པ་དང་མཚུངས་པར་ལྡན་པའི་སེམས་དེ་ནི་འདོད་ཆགས་དང་བྲལ་བར་མི་གཟུང་ངོ་། །འོ་ན་ཅི་ཞེ་ན། ཞེ་སྡང་དང་བཅས་པ་དང་། གཏི་མུག་དང་བཅས་པ་ཞེས་བྱ་བ་དེ་ལྟ་བུ་ལ་སོགས་པར་བཟུང་སྟེ།
[250a.4]ཞེ་སྡང་ལ་སོགས་པ་དང་མཚུངས་པར་ལྡན་པ་ཉིད་ཀྱི་ཁྱད་པར་དུ་བྱས་པ་ཉིད་དོ། །འདིར་སྩོགས་པ་ཞེས་བྱ་བའི་སྒྲས་ནི་ཀུན་དུ་བསྡུས་པ་དང་། རྣམ་པར་གཡེངས་པ་ཞེས་བྱ་བ་ལ་སོགས་པ་མདོ་ལས་བཤད་པའི་ཚིག་རྣམས་བསྡུའོ། །དེ་ལྟ་མ་ཡིན་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་གཟུགས་
[250a.5]ལ་སོགས་པའི་དངོས་པོ་ཆེ་གེ་མོ་ཞིག་ལ་ཆགས་སོ་ཞེས་བྱ་བར་ཤེས་པར་འགྱུར་ན་ནི། དེ་ལ་གཟུགས་ལ་དམིགས་པར་ཡང་འགྱུར་ཏེ། དེ་ལྟ་ཡིན་ན་ནི་གཟུགས་ལ་དམིགས་པའི་ཕྱིར་དེ་གཞན་གྱི་སེམས་ཤེས་པ་ཡིན་པར་ཡང་མི་འགྱུར་རོ། །དེ་ལ་དམིགས་པའི་ཕ་རོལ་གྱི་སེམས་འཛིན་
[250a.6]པ་ན་རང་གི་ངོ་བོ་འཛིན་པར་འགྱུར་རོ་ཞེས་བྱ་བ་ནི་ཕ་རོལ་གྱི་སེམས་དམིགས་པ་དང་བཅས་པ་འཛིན་པར་འདོད་ན་གཞན་གྱི་སེམས་ཤེས་པས་རང་གི་བདག་ཉིད་འཛིན་པར་འགྱུར་ཏེ། འདི་ལྟར་གཞན་གྱི་སེམས་རིག་པས་གང་ཞིག་གི་སེམས་འཛིན་པར་བྱེད་པ་དེ་ཡང་གཞན་གྱི་སེམས་རིག་པ་དེའི་
[250a.7]སེམས་ལ་དམིགས་པར་འགྱུར་བ་གང་ཡིན་པ་དེ་ནི་སྲིད་པ་ཡོད་དོ། །དེའི་ཕྱིར་གཞན་གྱི་སེམས་ཤེས་པས་དམིགས་པ་རང་ཉིད་ཡོངས་སུ་ཤེས་པའི་ཕྱིར་གཞན་གྱི་སེམས་རིག་པ་འདིས་རང་གི་སེམས་ཁོ་ན་ལ་དམིགས་པར་འགྱུར་བ་ཞིག་ན། སེམས་དེས་དེ་ཉིད་འཛིན་པ་གང་ཡིན་པ་དེ་ནི་
[250b]
[250b.1]རིགས་པ་མ་ཡིན་ཏེ། བདག་ཉིད་ལ་བྱེད་པ་འགལ་བའི་ཕྱིར་རོ། །གཞན་གྱི་སེམས་ཤེས་པ་ཐམས་ཅད་ཅེས་བྱ་བ་རྒྱས་པར་འབྱུང་བ་ནི་འདི་ལ་ཡུལ་སེམས་དང་སེམས་ལས་བྱུང་བ་རྣམས་དང་། རྫས་ཀྱི་རང་གི་མཚན་ཉིད་དང་། ད་ལྟར་བྱུང་བ་རྣམས་དང་། ཕ་རོལ་གྱི་རྒྱུད་དང་། འདོད་པ་དང་།
[250b.2]གཟུགས་དང་ལྡན་པ་ཡིན་པ་རྣམས་ཞེས་བསྡུ་བའི་ཚིག་རྣམ་པར་སྦྱར་ཏེ། སེམས་དང་སེམས་ལས་བྱུང་བ་ཞེས་སྨོས་པ་ནི་གཟུགས་ལ་སོགས་པ་ལས་ཁྱད་པར་དུ་བྱ་བའི་ཕྱིར་རོ། །རྫས་ཞེས་སྨོས་པ་ནི་ཀུན་རྫོབ་ཏུ་ཡོད་པ་བསལ་བའི་ཕྱིར་རོ། །རང་གི་མཚན་ཉིད་ཅེས་སྨོས་པ་ནི་སྤྱིའི་མཚན་ཉིད་
[250b.3]བཟློག་པའི་ཕྱིར་རོ། །ད་ལྟར་བྱུང་བ་ཞེས་སྨོས་པ་ནི་འདས་པ་དང་མ་འོངས་པ་ལས་དགར་བའི་ཕྱིར་རོ། །ཕ་རོལ་གྱི་རྒྱུད་ཅེས་སྨོས་པ་ནི་རང་གི་རྒྱུད་གསལ་བའི་ཕྱིར་རོ། །འདོད་པ་དང་གཟུགས་དང་ལྡན་པ་དང་། ལྡན་པ་མ་ཡིན་པ་ཞེས་སྨོས་པ་ནི་གཟུགས་མེད་པ་དང་ལྡན་པ་དགག་
[250b.4]པའི་ཕྱིར་རོ། །མཐོང་བའི་ལམ་བཀག་པ་ཞེས་བྱ་བ་ནི་མཐོང་བའི་ལམ་ལ་གནས་པ་ན་གཞན་གྱི་སེམས་ཤེས་པ་མངོན་དུ་མི་བྱེད་པས་དེའི་ཕྱིར་མཐོང་བའི་ལམ་གྱིས་བསྡུས་པ་མེད་དེ། མཐོང་བའི་ལམ་ནི་སེམས་དང་སེམས་ལས་བྱུང་བ་རྣམ་པར་ཆད་པ་ལ་དམིགས་པ་མ་ཡིན་ནོ། །
[250b.5]བསྒོམ་པའི་ལམ་ལ་དམིགས་པ་ཞེས་བྱ་བ་ནི་བསྒོམ་པའི་ལམ་གྱིས་བསྡུས་པ་ཡིན་ནོ་ཞེས་བྱ་བའི་ཐ་ཚིག་གོ། །སྟོང་པ་ཉིད་དང་མཚན་མ་མེད་པ་དང་མི་ལྡན་པ་ཞེས་བྱ་བ་ནི་སྟོང་པ་ཉིད་ཀྱི་ཏིང་ངེ་འཛིན་དང་། མཚན་མ་མེད་པའི་ཏིང་ངེ་འཛིན་དང་མི་ལྡན་པ་སྟེ། སྟོང་པ་ཉིད་ཀྱི་ཏིང་ངེ་
[250b.6]འཛིན་ནི་སྡུག་བསྔལ་ཤེས་པ་དང་མཚུངས་པར་ལྡན་ལ། མཚན་མ་མེད་པའི་ཏིང་ངེ་འཛིན་ནི་འགོག་པ་ཤེས་པ་དང་མཚུངས་པར་ལྡན་པ་ཡིན་ན། གཞན་གྱི་སེམས་ཤེས་པ་ནི་རྣམ་པ་དང་དམིགས་པ་ཐ་དད་པའི་ཕྱིར་སྡུག་བསྔལ་ཤེས་པའམ་འགོག་པ་ཤེས་པ་མ་ཡིན་པས་དེ་གཉིས་
[250b.7]དང་མི་ལྡན་པ་ཞེས་བྱའོ། །ཤུགས་ཀྱིས་ན་སྨོན་པ་མེད་པའི་ཏིང་ངེ་འཛིན་དང་མཚུངས་པར་ལྡན་པ་ནི་སྲིད་དོ་ཞེས་བཤད་པར་འགྱུར་རོ། །ཟད་པ་དང་མི་སྐྱེ་བ་ཤེས་པས་མ་བསྡུས་པ་ཞེས་བྱ་བ་ནི་ཟད་པ་ཤེས་པ་དང་མི་སྐྱེ་བ་ཤེས་པས་མ་བསྡུས་པ་སྟེ། ཟད་པ་དང་མི་སྐྱེ་བ་ཤེས་པའི་
[251a]
[251a.1]ངོ་བོ་ཉིད་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། གཞན་གྱི་སེམས་ཤེས་པ་ནི་རྫས་ཀྱི་རང་གི་མཚན་ཉིད་ལ་དམིགས་པ་དང་། ཀུན་དུ་རྟོག་པ་དང་ཡོངས་སུ་ཚོལ་བའི་བསམ་པ་ཅན་ཡིན་ན། ཟད་པ་ཤེས་པ་དང་མི་སྐྱེ་བ་ཤེས་པ་ནི་དེ་ལྟ་བུ་མ་ཡིན་པས་དེ་
[251a.2]གཉིས་ཀྱིས་མ་བསྡུས་སོ། །བར་ཆད་མེད་པའི་ལམ་བཀག་པ་ཞེས་བྱ་བ་ནི་དེའི་སྤོང་བའི་ལམ་ཡིན་ལ། གཞན་གྱི་སེམས་ཤེས་པ་ནི་རྣམ་པར་གྲོལ་བ་དང་ཁྱད་པར་གྱི་ལམ་ཡིན་པས་སོ། །དོན་དམ་པ་དག་ཡིན་ཡང་ཀུན་རྫོབ་ལ་བརྟེན་པའི་ཕྱིར་རོ་ཞེས་བྱ་བ་ནི་དོན་དམ་པའི་རྒྱུ་མཚན་ཅན་
[251a.3]ཡིན་པ་འམ། དོན་དམ་པས་རྩེན་པའི་ཕྱིར་དོན་དམ་པ་དག་གོ། །དེ་གཉིས་ཀུན་རྫོབ་ལ་བརྟེན་པའི་ཕྱིར་ཏེ། གང་གི་ཕྱིར་འདི་དག་ཀུན་རྫོབ་ལ་བརྟེན་པ་དེའི་ཕྱིར་སྟོང་པ་དང་བདག་མེད་པའི་རྣམ་པ་ཅན་དག་མེད་དོ། །ཇི་ལྟར་འདི་དག་ཀུན་རྫོབ་ལ་བརྟེན་ཅེ་ན། བདག་གི་སྐྱེ་བ་ཟད་དོ། །
[251a.4]འདི་ལས་སྲིད་པ་གཞན་མི་ཤེས་སོ་ཞེས་བྱ་བ་ཡིན་ཏེ་གོ་རིམས་བཞིན་ནོ། །འདི་དག་ཟག་པ་མེད་པ་ཡིན་ན་ཇི་ལྟར་དེ་ལྟ་བུའི་རྣམ་པ་ཅན་དག་ཡིན་ཞེ་ན། དེ་དག་གི་སྟོབས་ཀྱིས་རྗེས་སུ་ཐ་སྙད་འདོགས་པའི་སྒོ་ནས་ཏེ། ཤེས་པ་གཞན་གྱིས་ཞེས་བྱ་བ་ཚིག་ལྷག་མ་ཡིན་ནོ། །གང་གི་ཕྱིར་དེ་
[251a.5]དག་གི་རྗེས་ལས་སྐྱེས་པ་ཀུན་རྫོབ་ཀྱི་ཤེས་པ་དེ་དག་དེ་ལྟ་བུའི་རྣམ་པ་ཅན་དུ་འཇུག་པ་དེའི་ཕྱིར་དེ་དག་གི་རྒྱུ་མཐུན་པས་དེ་གཉིས་ཀུན་རྫོབ་ལ་བརྟེན་པ་ཞེས་བྱའི་དེ་གཉིས་དངོས་སུ་ཀུན་རྫོབ་ལ་བརྟེན་པ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །གང་གི་ཕྱིར་དེ་ལྟར་རྒྱུ་མཐུན་པས་དེ་ཉིད་བདག་ཏུ་ལྟ་བ་ལ་བརྟེན་པ་ཁོ་
[251a.6]ནར་འཇུག་པའི་ཕྱིར་སྟོང་པ་དང་བདག་མེད་པའི་རྣམ་པ་མ་གཏོགས་པ་རྣམ་པ་བཅུ་བཞི་དང་མཚུངས་པར་ལྡན་པ་དག་ཡིན་ནོ། །མི་ལྡན་པའི་སེམས་ཀྱིས་ཞེས་བྱ་བ་ནི་ཟག་པ་མེད་པས་སོ། །རིགས་པས་བསྐྱེད་པའི་སྒོ་ནས་ཤེས་པར་འགྱུར་རོ་ཞེས་བྱ་བ་ནི་ཕྱིན་ཅི་མ་ལོག་པར་ཤེས་པར་འགྱུར་
[251a.7]རོ་ཞེས་བྱ་བའི་ཐ་ཚིག་གོ། །འདི་ནི་གནས་ཡོད་དོ། །འདི་ནི་གཞི་ཡོད་དོ་ཞེས་བྱ་བ་ནི་འདི་གཉིས་ཀྱང་ཟག་པ་མེད་པའི་རྣམ་པ་ཡིན་ཏེ། འདི་ནི་གནས་ཡོད་དོ་ཞེས་བྱ་བ་ནི་འདི་ནི་མཚན་ཉིད་ཡོད་དོ་ཞེས་བྱ་བའི་དོན་ཏོ། །འདི་ནི་གཞི་ཡོད་དོ་ཞེས་བྱ་བ་ནི་འདི་ནི་རྒྱུ་ཡོད་དོ་ཞེས་བྱ་བའི་ཐ་ཚིག་གོ། །
[251b]
[251b.1]འདིའི་དོན་ནི་འདི་མ་ཡིན་ཞེས་བྱ་བ་རྒྱས་པར་འབྱུང་བ་ནི་ངག་གམ་ཚིག་གཉིས་པོ་འདི་ཡིན་ཏེ། གལ་ཏེ་འདི་ནི་གནས་ཡོད་དོ། །འདི་ནི་གཞི་ཡོད་དོ་ཞེས་བྱ་བ་མི་རྟག་པ་ལ་སོགས་པར་ཤེས་པར་འགྱུར་བ་གང་ཡིན་པ་འདི་ནི་སྲིད་དོ། །འདི་ནི་རིགས་སོ་ཞེས་བྱ་བ་ཡིན་ནོ་ཞེས་བྱ་བར་འདོད་ན་དེ་ནི་
[251b.2]གཞན་ནས་མི་འབྱུང་བའི་ཕྱིར་མི་རུང་སྟེ། ཚིག་གཞན་ནས་ཚིག་དེ་གཉིས་མི་འབྱུང་བའི་ཕྱིར་རོ། །མཐོང་བས་སྤང་བར་བྱ་བ་ཞེས་བྱ་བ་ནི་མཐོང་བས་སྤང་བར་བྱ་བའི་རྣམ་པའོ། །རིགས་པ་མ་ཡིན་པས་བསྐྱེད་པའི་སྒོ་ནས་ཤེས་པར་འགྱུར་ཞེས་བྱ་བ་ནི་ཕྱིན་ཅི་ལོག་ཏུ་ཤེས་པར་འགྱུར་རོ་ཞེས་
[251b.3]སྟོན་ཏོ། །བདག་དང་བདག་གི་ཞེས་བྱ་བ་ནི་འཇིག་ཚོགས་ལ་ལྟ་བ་དང་མཚུངས་པར་ལྡན་པའི་སེམས་ཀྱིས་སོ། །ཆད་པ་དང་རྟག་པ་ཞེས་བྱ་བ་ནི་མཐར་འཛིན་པའི་ལྟ་བས་སོ། །རྒྱུ་མེད་པ་དང་བྱེད་པ་མེད་པ་དང་སྐུར་པ་འདེབས་པ་ཞེས་བྱ་བ་ནི་ལོག་པར་ལྟ་བས་སོ། །མཆོག་དང་གཙོ་བོ་
[251b.4]དང་ཁྱད་པར་དུ་འཕགས་པ་དང་། དམ་པ་ཞེས་བྱ་བ་ནི་ལྟ་བ་མཆོག་ཏུ་འཛིན་པས་སོ། །དག་པ་དང་གྲོལ་བ་དང་ངེས་པར་འབྱིན་པ་ཞེས་བྱ་བ་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པས་སོ། །ནེམ་ནུར་དང་ཡིད་གཉིས་དང་ཐེ་ཚོམ་ཞེས་བྱ་བ་ནི་ཐེ་ཚོམ་གྱིས་སོ། །ཆགས་པ་ཞེས་
[251b.5]བྱ་བ་ནི་འདོད་ཆགས་ཀྱིས་སོ། །སྡང་བ་ཞེས་བྱ་བ་ནི་ཞེ་སྡང་གིས་སོ། །རློམ་པ་ཞེས་བྱ་བ་ནི་ང་རྒྱལ་གྱིས་སོ། །རྨོངས་པ་ཞེས་བྱ་བ་ནི་གཏི་མུག་གིས་སོ། །དེར་ཡང་འདི་སྐད་དུ་འབྱུང་བར་འགྱུར་བ་ཞིག་ན། དེ་སྐད་ཀྱང་མི་འབྱུང་སྟེ། དེའི་ཕྱིར་དེའི་དོན་ནི་འདི་མ་ཡིན་ནོ་ཞེས་
[251b.6]བྱ་བར་ཤེས་སོ། །རྫས་སུ་བདུན་ཡིན་ཞེས་བྱ་བར་ནི་ཁ་ཅིག་གི་གཞུང་ལུགས་ཀྱིས་རྫས་སུ་སྡུག་བསྔལ་གྱི་རྣམ་པ་བཞི་དང་ཀུན་འབྱུང་བ་ལ་སོགས་པ་རྣམ་པ་རེ་རེ་སྟེ་བདུན་ཡིན་ནོ། །རྒྱུའི་རྣམ་པ་གང་ཡིན་པ་དེ་ནི་ཀུན་འབྱུང་བ་དང་། རབ་ཏུ་སྐྱེ་བ་དང་། རྐྱེན་ཀྱང་ཡིན་པས་རྣམ་
[251b.7]གྲངས་ཙམ་དུ་ཟད་ཀྱི་ཁྱད་པར་ནི་མེད་དེ་དཔེར་ན་དབང་པོ་དང་བརྒྱ་བྱིན་དང་ཁྱེར་འཇིག་ཅེས་བྱ་བ་དང་འདྲའོ། །དེ་བཞིན་དུ་འགོག་པ་ཉིད་ཞི་བ་དང་གྱ་ནོམ་པ་དང་ངེས་པར་འབྱུང་བ་ཡིན་པས་རྣམ་པ་གཅིག་ཡིན་ལ། ལམ་ཉིད་ཀྱང་རིགས་པ་དང་། སྒྲུབ་པ་དང་། ངེས་པར་
[252a]
[252a.1]འབྱིན་པ་ཡིན་པས་རྣམ་པ་གཅིག་ཡིན་ནོ་ཞེས་ཟེར་ཏེ། དེས་ན་འདི་སྐད་དུ་རྣལ་འབྱོར་པས་སྡུག་བསྔལ་གྱི་རྣམ་པ་ནི་བཞིར་མངོན་དུ་བྱེད་ལ་རྒྱུ་ལ་སོགས་པའི་རྣམ་པ་ནི་གཅིག་ཏུ་མངོན་དུ་བྱེད་དོ་ཞེས་བཤད་པར་འགྱུར་རོ། །བྱེ་བྲག་ཏུ་སྨྲ་བ་རྣམས་ནི་རྫས་སུ་རྣམ་པ་
[252a.2]བཅུ་དྲུག་གོ་ཞེས་བརྗོད་དེ་སྡུག་བསྔལ་གྱི་རྣམ་པ་བཞིན་དུ་ཀུན་འབྱུང་བ་ལ་སོགས་པའི་རྣམ་པ་ཐམས་ཅད་ཀྱང་སོ་སོར་མངོན་དུ་བྱ་དགོས་པའི་ཕྱིར་རྣམས་རྣམས་ནི་ཤེས་རབ་ཀྱི་ངོ་བོ་ཉིད་ཡིན་པས་སོ་ཞེས་ཟེར་རོ། །རྐྱེན་ལ་རག་ལས་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི་མི་རྟག་པ་ནི་རྐྱེན་ལ་རག་
[252a.3]ལས་པའི་ཕྱིར་ངེས་པ་མ་ཡིན་ཏེ། རྐྱེན་ལ་རག་ལས་ཏེ་སྐྱེ་བའི་ཕྱིར་རོ་ཞེས་བྱ་བའི་ཐ་ཚིག་གོ། །གནོད་པའི་བདག་ཉིད་ཡིན་པའི་ཕྱིར་ཞེས་བྱ་བ་ནི་གནོད་པར་བྱེད་པའི་བདག་ཉིད་ཡིན་པའི་ཕྱིར་རོ་ཞེས་བྱ་བའི་དོན་ཏོ། །མི་མཐུན་པའི་ཕྱོགས་ཀྱིས་ཞེས་བྱ་བ་ནི་གཉེན་པོས་ཞེས་བྱ་བའི་ཐ་ཚིག་
[252a.4]སྟེ། འགལ་བའི་ཕྱོགས་ནི་མི་མཐུན་པའི་ཕྱོགས་ཡིན་པས་སོ། །ས་བོན་གྱི་ཆོས་ཀྱི་ཚུལ་གྱི་རྒྱུའོ་ཞེས་བྱ་བ་ནི་ཐག་རིང་པོའི་གནས་སྐབས་ཀྱི་རྒྱུ་སྟོན་པར་བྱེད་དེ། དང་པོའི་ས་བོན་ལྟ་བུའོ། །ཚུལ་ཞེས་བྱ་བའི་སྒྲས་ནི་འདིར་ལུགས་ཀྱི་དོན་ཡིན་ནོ། །འབྱུང་བའི་ཚུལ་གྱིས་ཀུན་འབྱུང་
[252a.5]བའོ་ཞེས་བྱ་བ་ནི་སྐད་ཅིག་མ་གང་གི་མཇུག་ཐོགས་སུ་སྐྱེ་བར་འགྱུར་བ་ཐག་ཉེ་བའི་གནས་སྐབས་ཀྱི་རྒྱུ་སྟོན་པར་བྱེད་དེ། འདི་ལས་ཀུན་འབྱུང་བའི་ཕྱིར་རོ། །འབྲེལ་བའི་ཚུལ་གྱིས་རབ་ཏུ་སྐྱེ་བའོ་ཞེས་བྱ་བ་ནི། རྒྱུན་གྱི་ཚུལ་གྱིས་རྒྱུན་མི་འཆད་པར་སྟོན་པར་བྱེད་དེ་ས་བོན་དང་མྱུ་གུ་དང་
[252a.6]སྡོང་བུ་ལ་སོགས་པ་དང་འདྲའོ། །མངོན་པར་སྒྲུབ་པའི་དོན་གྱིས་ན་རྐྱེན་ཞེས་བྱ་བ་ནི་རྒྱུ་ལ་སོགས་པ་མང་པོ་ཞིག་ལས་སྐྱེ་བར་སྟོན་པར་བྱེད་དེ་དཔེར་ན་འཇིམ་གོང་དང་ཐལ་ཞར་ལ་སོགས་པ་མང་པོ་ཞིག་ལས་བུམ་པ་འགྲུབ་པ་དེ་དང་འདྲའོ། །མེ་གསུམ་ཞི་བའི་ཕྱིར་ཞེས་བྱ་བ་ནི་འདོད་ཆགས་
[252a.7]དང་ཞེ་སྡང་དང་གཏི་མུག་གི་མེ་ཞི་བའི་ཕྱིར་ཞེས་བྱ་བའི་དོན་ཏོ། །འཚེ་བ་མེད་པའི་ཕྱིར་ཞེས་བྱ་བ་ནི་སྡུག་བསྔལ་མེད་པའི་ཕྱིར་ཞེས་བྱ་བའི་དོན་ཏོ། །སྐྱོན་ཐམས་ཅད་དང་བྲལ་བའི་ཕྱིར་ཞེས་བྱ་བ་ནི་སྡུག་བསྔལ་གྱི་རྒྱུ་ཐམས་ཅད་དང་བྲལ་བའི་ཕྱིར་རོ། །བགྲོད་པའི་དོན་གྱིས་ཞེས་བྱ་བ་ནི་མྱ་
[252b]
[252b.1]ངན་ལས་འདས་པར་རོ། །རིགས་པ་དང་ལྡན་པའི་ཕྱིར་ཞེས་བྱ་བ་ནི་འཐད་པ་དང་ལྡན་པའི་ཕྱིར་རམ་ཐབས་དང་ལྡན་པའི་ཕྱིར་རོ། །ཡང་དག་པར་བསྒྲུབ་པའི་དོན་གྱིས་སྒྲུབ་པའོ་ཞེས་བྱ་བ་ནི་འདིས་མྱ་ངན་ལས་འདས་པ་སྒྲུབ་པས་ན་སྒྲུབ་པའོ། །ངེས་པར་འབྱིན་པར་བྱེད་པའོ་ཞེས་བྱ་བ་ནི་
[252b.2]གཏན་དུ་ངེས་པར་འབྱིན་པར་བྱེད་པས་ན་ངེས་པར་འབྱིན་པར་བྱེད་པའོ། །གཏན་དུ་བ་མ་ཡིན་པའི་ཕྱིར་མི་རྟག་པའོ་ཞེས་བྱ་བ་སྔར་ནི་སྔ་ན་མེད་པས་མི་རྟག་པར་བཤད་ལ་ང་ནི་ཞིག་ནས་མེད་པས་མི་རྟག་པའོ་ཞེས་སྟོན་ཏོ། །ཁུར་ལྟ་བུར་གྱུར་པའི་ཕྱིར་ཞེས་བྱ་བ་ནི་ཁུར་བུ་ལྟ་བུར་གྱུར་པའི་ཕྱིར་
[252b.3]ཞེས་བྱ་བའི་དོན་ཏོ། །སྡུག་བསྔལ་གྱིས་གང་ཟག་དེ་འཚིར་ཞིང་གནོད་པར་བྱེད་དོ་ཞེས་བྱ་བའི་ཐ་ཚིག་གོ། །འདོད་དགུར་བྱེད་པ་མེད་པའི་ཕྱིར་ཞེས་བྱ་བ་ནི་འདི་ལ་འདོད་དགུར་བྱེད་པའི་ངང་ཚུལ་ཡོད་པས་ན་འདོད་དགུར་བྱེད་པའོ། །འདོད་དགུར་བྱེད་པ་མ་ཡིན་པས་ན་འདོད་དགུར་བྱེད་
[252b.4]པ་མེད་པ་སྟེ། དེའི་ཕྱིར་བདག་མེད་པ་ཡིན་ནོ། །དོན་འདི་ནི་མདོ་ལས་ཀྱང་གསུངས་ཏེ། དགེ་སློང་དག་གལ་ཏེ་གཟུགས་བདག་ཡིན་པར་གྱུར་ན་གཟུགས་བདག་ཉིད་ལ་གནོད་པ་བྱེད་པར་མི་འགྱུར་གྱི། ངེས་པའི་ཚིག་ལས་བདག་ནི་འདོད་དགུར་བྱེད་པ་ཡིན་ནོ་ཞེས་སྨོས་པའི་
[252b.5]ཕྱིར་གཟུགས་ལ་འདི་ལྟར་ནི་གྱུར་ཅིག །འདི་ལྟར་ནི་མ་གྱུར་ཅིག་ཅེས་བྱ་བ་བཞིན་དུ་ཡང་འགྱུར་བ་ཞིག་ན་ཞེས་འབྱུང་བ་ཡིན་ནོ། །འོང་བའི་ཚུལ་གྱིས་རྒྱུའོ་ཞེས་བྱ་བ་ནི་འདི་ལས་འོང་བས་ན་རྒྱུ་སྟེ་འདི་ལས་སྐྱེ་བས་ན་ཞེས་བྱ་བའི་ཐ་ཚིག་གོ། །འབྱུང་བའི་ཚུལ་གྱིས་ཞེས་བྱ་བ་ནི་
[252b.6]མ་འོངས་པའི་དུས་ནས་འབྱུང་བས་ན་ཞེས་བྱ་བའི་ཐ་ཚིག་གོ། །འཕེལ་བའི་ཚུལ་གྱིས་ཞེས་བྱ་བ་ནི་རྒྱུན་ཆགས་པའི་ཚུལ་གྱིས་སོ། །སོ་སོར་འབྲང་བའི་དོན་གྱིས་ཞེས་བྱ་བ་ནི་བསྐྱེད་པར་བྱ་བ་ལ་གཙོ་བོ་ཡིན་ནོ་སྙམ་དུ་བསམས་པ་ཡིན་ནོ། །འབྲེལ་པ་མེད་པས་འབྲེལ་པ་ཞིག་
[252b.7]པའི་ཕྱིར་ཞེས་བྱ་བ་ནི་སྡུག་བསྔལ་སྔ་མ་ཞིག་པས་ཕྱི་མའི་འབྲེལ་པ་ཞིག་པར་འགོག་པ་ཡིན་ནོ་ཞེས་བྱ་བའི་ཐ་ཚིག་གོ། །འདུས་བྱས་ཀྱི་མཚན་ཉིད་གསུམ་དང་བྲལ་བའི་ཕྱིར་ཞེས་བྱ་བ་ནི་སྐྱེ་བ་དང་འཇིག་པ་དང་གནས་པ་ལས་གཞན་དུ་འགྱུར་བ་ཉིད་དང་བྲལ་བའི་ཕྱིར་རོ། །ཡིད་
[253a]
[253a.1]བརྟན་པའི་མཆོག་ཡིན་པའི་ཕྱིར་ཞེས་བྱ་བ་ནི་སྡུག་བསྔལ་ཐམས་ཅད་རྒྱུན་ཆད་པས་མཆོག་ཏུ་བདེ་བའི་ཕྱིར་རོ། །མྱ་ངན་ལས་འདས་པའི་གྲོང་དང་མི་འགལ་བའི་དོན་གྱིས་སྒྲུབ་པའོ་ཞེས་བྱ་བ་ནི་འདི་ལྟར་འདི་ནི་མྱ་ངན་ལས་འདས་པའི་གྲོང་དང་མི་འགལ་ཞིང་སླུ་
[253a.2]བར་མི་བྱེད་དོ། །འོ་ན་ཅི་ཞེ་ན་སྒྲུབ་པར་བྱེད་པ་ཁོ་ན་སྟེ། དེའི་ཕྱིར་འདིས་སྒྲུབ་པར་བྱེད་པས་ན་སྒྲུབ་པའོ། །འདུན་པའི་རྩ་བ་ཅན་ཞེས་བྱ་བ་ནི་འདུན་པའི་རྒྱུ་ཅན་ཞེས་བྱ་བའི་ཐ་ཚིག་སྟེ། འདིར་འདུན་པ་ནི་སྲེད་པའི་རྣམ་གྲངས་ཡིན་ནོ། །འདུན་པ་ལས་ཀུན་འབྱུང་བ་ཞེས་བྱ་བ་
[253a.3]ནི་འདུན་པ་ལས་ཡང་དག་པར་སྒྲུབ་པའོ། །འདུན་པའི་རིགས་ཅན་ཞེས་བྱ་བ་ནི་འདུན་པའི་རྐྱེན་ཅན་ཞེས་བྱ་བའི་ཐ་ཚིག་གོ། །རབ་ཏུ་སྐྱེ་བ་ཞེས་བྱ་བའི་སྒྲ་ཐ་མར་གདོན་པ་འབའ་ཞིག་ཏུ་ཟད་དོ་ཞེས་བྱ་བ་ནི་ཆོས་མངོན་པ་པ་རྣམས་ཀྱིས་ཞེས་བྱ་བའི་ཚིག་གཅིག་ཁོང་ནས་འབྱུང་བ་
[253a.4]སྟེ། མདོའི་རྗེས་སུ་འབྲང་བར་བྱའོ་སྙམ་དུ་བསམས་པ་ཡིན་ནོ། །རྒྱུ་དང་ཀུན་འབྱུང་བ་དང་རྐྱེན་དང་རབ་ཏུ་སྐྱེ་ཞེས་བྱ་བའི་ཐ་ཚིག་གམ་འདུན་པའི་ཚོགས་འདི་དག་ལ་ཁྱད་པར་ཅི་ཞིག་ཡོད་པར་འགྱུར། ངའོ་སྙམ་པ་ནི་བྱེ་བྲག་མེད་པར་ལུས་ལ་འདུན་པ་ཡིན་ནོ་ཞེས་བྱ་བ་ནི་རྫས་གཅིག་
[253a.5]ལ་དམིགས་ཀྱིས་མ་བཀར་བར་ཉེ་བར་ལེན་པའི་ཕུང་པོ་ལྔ་པོ་སྤྱི་ལ་ཁྱད་པར་མེད་པར་ངའོ་སྙམ་དུ་འཛིན་པའམ་རྣམ་པ་གཞན་གྱིས་ཁྱད་པར་དུ་བྱས་པ་ད་ལྟར་བྱུང་བའི་ལུས་ཀྱི་དངོས་པོ་ལ་དམིགས་པ་འམ་དུས་གསུམ་པའི་ལུས་ལ་དམིགས་པའི་སྒོ་ནས་ལུས་དོན་དུ་གཉེར་བ་ནི་ལུས་
[253a.6]ལ་འདུན་པ་སྟེ་དང་པོ་ཡིན་ནོ། །གྱུར་ཅིག་སྙམ་པ་ནི་བྱེ་བྲག་མེད་པར་ཞེས་བྱ་བ་ནི་ཡང་སྲིད་པ་ཙམ་དོན་དུ་གཉེར་གྱི་ཁྱད་པར་གྱི་ངོ་བོའི་དོན་དུ་གཉེར་བ་ནི་མ་ཡིན་པ་སྟེ་གཉིས་པ་ཡིན་ནོ། །འདི་ལྟ་བུར་གྱུར་ཅིག་སྙམ་པ་ཞེས་བྱ་བ་ནི་རྣམ་པ་འདི་ལྟ་བུར་གྱུར་ཅིག་སྙམ་པ་ནི་བྱེ་བྲག་ཏུ་ཡང་སྲིད་
[253a.7]པ་ལ་འདུན་པ་སྟེ་གསུམ་པ་ཡིན་ནོ། །བཞི་པ་ནི་ཉིང་མཚམས་སྦྱོར་བ་འཆིང་བ་ལ་འདུན་པ་ཡིན་ནོ་ཞེས་བྱ་བ་ནི་ཉིང་མཚམས་སྦྱོར་བ་ཉིད་འཆིང་བ་ཡིན་པས་ན་ཉིང་མཚམས་སྦྱོར་བ་འཆིང་བ་སྟེ། བཞི་པ་ནི་དེ་ལ་འདུན་ཅིང་དོན་དུ་གཉེར་བ་ཡིན་ནོ། །ཡང་ན་ལས་མངོན་པར་
[253b]
[253b.1]འདུ་བྱེད་པ་ལ་འདུན་པ་ཡིན་ནོ་ཞེས་བྱ་བ་ནི་བཞི་པ་ཞེས་བྱ་བའི་སྐབས་ཡིན་ཏེ། ཡང་ན་ལས་མངོན་པར་འདུ་བྱེད་པ་དེ་ལ་འདུན་པ་ཡིན་ནོ། །ཇི་ལྟར་དེ་ལ་འདུན་ཞེ་ན་སྦྱིན་པ་འདི་ལྟ་བུ་དང་འདི་ལྟ་བུར་སྦྱིན་ནོ་སྙམ་པ་ཡིན་ནོ། །ཡང་ན་ཇི་ལྟར་ན་འདུན་པ་དེ་དག་རྩ་བ་ལ་སོགས་པའི་སྒྲར་བརྗོད་ཅེ་ན།
[253b.2]དེ་བསྟན་པའི་ཕྱིར་དེ་ལ་དང་པོ་ནི་ཞེས་བྱ་བ་རྒྱས་པར་སྨོས་ཏེ། རྒྱུ་དང་པོའམ་དང་པོའི་རྒྱུ་ཡིན་པས་ན་དང་པོའི་རྒྱུ་སྟེ། དེའི་ཕྱིར་འདུན་པའི་རྩ་བ་ཅན་ཡིན་ཏེ། རྩ་བའི་སྒྲ་ནི་རྒྱུའི་དོན་ཡིན་ནོ། །འབྲས་བུའི་ས་བོན་བཞིན་ནོ་ཞེས་བྱ་བ་ནི་དཔེར་ན་འབྲས་བུའི་དང་པོའི་རྒྱུ་སྟེ་ཐག་རིང་བའི་རྒྱུ་ས་བོན་
[253b.3]ཡིན་པ་དེ་དང་འདྲ་བར་འདུན་པ་དང་པོ་འདི་ཡང་སྡུག་བསྔལ་གྱི་དང་པོའི་རྒྱུ་ཡིན་ནོ། །དེས་དེ་ཡང་དག་པར་འགྲུབ་པའི་ཕྱིར་ཞེས་བྱ་བ་ནི་འདུན་པ་གཉིས་པ་དེས་སྐད་ཅིག་མ་བརྒྱུད་པས་ཡང་སྲིད་པ་ཡང་དག་པར་འགྲུབ་པའི་ཕྱིར་འབྲས་བུའི་མྱུ་གུ་ལ་སོགས་པ་སྐྱེ་བ་བཞིན་ཏེ་དཔེར་
[253b.4]ན་མྱུ་གུ་ལ་སོགས་པ་སྐྱེ་བ་བརྒྱུད་པས་འབྲས་བུ་ཀུན་འབྱུང་བ་དེ་དང་འདྲའོ། །འདུན་པ་གསུམ་པ་འདི་ལྟ་བུར་གྱུར་ཅིག་སྙམ་པ་ནི་དེ་དང་འདྲ་བའི་སྡུག་བསྔལ་གྱི་རྐྱེན་ཡིན་ཞེས་བྱ་བ་ནི་ཡང་སྲིད་པའི་འདུན་པ་ཅི་འདྲ་བ་དེ་དང་འདྲ་བའི་སྡུག་བསྔལ་གྱི་རྐྱེན་དུ་འགྱུར་ཏེ། དེ་ལ་ཁྱད་
[253b.5]པར་གྱི་ངོ་བོ་ཡོད་པའི་ཕྱིར་འབྲས་བུ་ཁྱད་པར་གྱི་ངོ་བོ་ཅན་ཁོ་ན་སྐྱེའོ་སྙམ་དུ་བསམས་པ་ཡིན་ནོ། །འབྲས་བུའི་ཞིང་དང་། ཆུ་དང་ལུད་ལ་སོགས་པ་བཞིན་ནོ་ཞེས་བྱ་བ་ལ། ལུད་ནི་བ་ལང་གི་ལྕི་བ་སྐམ་པོའོ། །སྩོགས་པ་ཞེས་བྱ་བའི་སྒྲས་ནི་རླུང་དང་ཉི་མ་ལ་སོགས་པ་བསྡུ་
[253b.6]སྟེ། དེས་ཀྱང་འབྲས་བུ་ཕུན་སུམ་ཚོགས་པར་འགྱུར་བས་སོ། །ནུས་པ་ནི་བསིལ་བའི་ནུས་པ་དང་དྲོ་བའི་ནུས་པ་ཉིད་དོ། །སྨིན་པ་ནི་དྲོ་བ་ཞུ་བ་དང་། བསིལ་བ་ཞུ་བ་ཉིད་དོ། །མཐུ་ནི་ནུས་པའི་ཁྱད་པར་ཡིན་ཏེ། དཔེར་ན་འབྲས་བུར་འདྲ་བ་ལས་བི་ཛ་པུ་རའི་ཁུ་བ་ནི་མཁྲིས་
[253b.7]པ་སྐྱེད་ལ། སྐྱུ་རུ་རའི་ཁུ་བ་ནི་ཞི་བར་བྱེད་པ་ལྟ་བུའོ། །དེ་ཁོ་ན་ལས་དེ་སྐྱེ་བའི་ཕྱིར་ཞེས་བྱ་བ་ནི་ཉིང་མཚམས་སྦྱོར་བ་འཆིང་བ་ལ་འདུན་པ་དེ་ཁོ་ན་ལས་ཡང་སྲིད་པའི་མཚན་ཉིད་དེ་སྐྱེ་ཞིང་འབྱུང་བའི་ཕྱིར་འབྲས་བུའི་ཐ་མ་མེ་ཏོག་བཞིན་ནོ། །དཔེར་ན་ཐ་མ་མེ་ཏོག་ལས་འབྲས་
[254a]
[254a.1]བུ་རབ་ཏུ་སྐྱེ་བ་དེ་དང་འདྲ་སྟེ། འདིར་འདུན་པ་བཞི་པ་ནི་ཡང་སྲིད་པའི་མངོན་སུམ་གྱི་རྒྱུ་ཡིན་ནོ། །སྔ་མ་གསུམ་ནི་བརྒྱུད་པའི་རྒྱུ་ཡིན་ནོ། །ཡང་ན་ཞེས་བྱ་བ་རྒྱས་པར་འབྱུང་བ་ནི་སྲིད་པ་རྣམ་པར་དཔྱད་པ་རྣམས་ཀྱི་འདུན་པ་བཞི་ནི་གོ་རིམས་བཞིན་དུ་ལྔ་ཚན་གཉིས་དང་བཞི་ཚན་གཉིས་
[254a.2]ཡིན་ཏེ། འདུན་པ་དང་པོ་ནི་རྣམ་པ་ལྔ་ཡིན་ལ། གཉིས་པ་ཡང་རྣམ་པ་ལྔ་ཡིན་ནོ། །གསུམ་པ་ནི་རྣམ་པ་བཞི་ཡིན་ལ། བཞི་པ་ཡང་རྣམ་པ་བཞི་ཡིན་ནོ། །ཇི་ལྟར་ཞེ་ན་དགེ་སློང་དག་ངའོ་སྙམ་པ་ཡོད་ཅིང་བདག་ཏུ་ལྟ་བ་ཡོད་ན་ང་འདི་ལྟ་བུའོ་སྙམ་པ་འབྱུང་
[254a.3]སྟེ་ཞེས་བྱ་བ་ནི་ང་ནི་འདི་འདྲ་བའོ་སྙམ་པ་འབྱུང་བ་སྟེ། དེ་དང་ལྡན་པས་སྲེད་པ་སྐྱེད་པར་བྱེད་དོ་ཞེས་བྱ་བའི་དོན་ཏོ། །ང་ནི་འདི་འདྲའོ་སྙམ་པ་ཞེས་བྱ་བ་ནི་སྔོན་ཇི་ལྟ་བ་ཁོ་ན་ཡིན་གྱི་གཞན་དུ་མ་ཡིན་ནོ་ཞེས་བྱ་བའི་ཐ་ཚིག་གོ། །ང་དེ་ལྟ་མ་ཡིན་ནོ་སྙམ་པ་ཞེས་བྱ་བ་ནི་ཁ་དོག་དང་སྟོབས་དང་སྤོབས་པ་
[254a.4]ལ་སོགས་པ་རྣམ་པ་གཞན་དུ་མཐོང་བའི་ཕྱིར་རོ། །ང་བཟང་ངོ་སྙམ་པ་དང་། བཟློག་པ་ང་ངན་ནོ་སྙམ་པ་འབྱུང་བར་འགྱུར་ཏེ། བདག་ལ་འདུན་པ་རྣམ་པ་ལྔ་པོ་འདི་ནི་ཁྱད་པར་མེད་པ་དང་པོ་ཡིན་ནོ། །དེ་ལ་འབྱུང་བར་འགྱུར་རོ་སྙམ་པ་འབྱུང་བར་འགྱུར་ཞེས་བྱ་བ་ནི་རྟག་པའི་ངོ་བོར་རོ། །འབྱུང་
[254a.5]བར་མི་འགྱུར་རོ་སྙམ་པ་ཞེས་བྱ་བ་ནི་ཆད་པའི་ངོ་བོར་རོ། །འདི་ལྟ་བུར་འབྱུང་བར་འགྱུར་རོ་སྙམ་པ་ཞེས་བྱ་བ་ནི་རྒྱས་པར་བཤད་པ་སྔ་མ་དང་འདྲ་སྟེ། ཡང་སྲིད་པ་ལ་འདུན་པ་རྣམ་པ་ལྔ་པོ་འདི་ཁྱད་པར་མེད་པར་གཉིས་པ་ཡིན་ནོ། །དེ་ལ་གྱུར་ཅིག་སྙམ་པ་འབྱུང་བར་འགྱུར་ཞིང་དེ་ལ་འདི་ལྟ་བུར་
[254a.6]གྱུར་ཅིག་སྙམ་པ་དང་། དེ་འདྲ་བར་གྱུར་ཅིག་སྙམ་པ་དང་། དེ་ལྟ་མ་ཡིན་པར་གྱུར་ཅིག་སྙམ་པ་འབྱུང་བར་འགྱུར་བ་ཡང་སྲིད་པ་ལས་འདུན་པ་རྣམ་པ་བཞི་པོ་འདི་ཁྱད་པར་མེད་པ་གསུམ་པ་ཡིན་ནོ། །གྱུར་ཀྱང་ཅི་མ་རུང་སྙམ་པ་དང་། འདི་ལྟ་བུར་གྱུར་ཀྱང་ཅི་མ་རུང་སྙམ་པ་དང་། དེ་འདྲ་
[254a.7]བར་གྱུར་ཀྱང་ཅི་མ་རུང་སྙམ་པ་དང་། དེ་ལྟ་མ་ཡིན་པར་གྱུར་ཀྱང་ཅི་མ་རུང་སྙམ་པ་འབྱུང་བར་འགྱུར་བ་ཉིང་མཚམས་སྦྱོར་བ་འཆིང་བ་ལ་འདུན་པ་རྣམ་པ་བཞི་པོ་འདི་ནི་བཞི་པ་ཡིན་ནོ། །དེ་ལ་དང་པོ་ནི་སྡུག་བསྔལ་གྱི་དང་པོའི་རྒྱུ་ཡིན་པའི་ཕྱིར་རྩ་བའི་རྒྱུ་ཡིན་ནོ་ཞེས་བྱ་བ་རྒྱས་པར་སྔ་མ་བཞིན་དུ་སྦྱར་
[254b]
[254b.1]བར་བྱའོ། །སོ་སོར་ངེས་པའི་ཕྱིར་སྒྲུབ་པ་སྟེ་ཞེས་བྱ་བ་ནི་ངེས་པར་སྒྲུབ་ཅིང་སྒྲུབ་པར་བྱེད་པ་ནི་སྒྲུབ་པའོ། །ཡང་ཇི་ལྟར་སོ་སོར་ངེས་པ་ཡིན་ཞེ་ན། དེ་ཉིད་ཀྱིས་དེར་འགྲོ་བའི་ཕྱིར་ཏེ། ཇི་སྐད་དུ་ཞེས་བྱ་བ་རྒྱས་པར་འབྱུང་བ་ལྟ་བུ་ཡིན་ནོ། །རྟག་པ་དང་བདེ་བ་དང་བདག་གི་དང་བདག་ཏུ་ལྟ་བ་སྤྱད་པ་རྣམས་ཀྱི་
[254b.2]ཞེས་བྱ་བ་ནི་འདི་དག་ལ་རྟག་པ་དང་བདེ་བ་དང་བདག་གི་དང་བདག་གོ་ཞེས་བྱ་བར་ལྟ་བ་སྤྱད་པ་ཡིན་པས་ན་གང་ཟག་འདི་དག་ནི་རྟག་པ་དང་བདེ་བ་དང་བདག་གི་དང་བདག་ཏུ་ལྟ་བ་སྤྱད་པ་ཡིན་ཏེ་དེ་དག་གི་གཉེན་པོར་གོ་རིམས་བཞིན་དུ་མི་རྟག་པ་ལ་སོགས་པའི་རྣམ་པ་ཡིན་ནོ། །རྒྱུ་མེད་དོ་ཞེས་རྒྱུ་མེད་
[254b.3]པར་ལྟ་བ་སྤྱད་པ་རྣམས་ཀྱི་གཉེན་པོར་རྒྱུའི་རྣམ་པའོ། །རྒྱུ་དབང་ཕྱུག་གམ། གཙོ་བོ་འམ། དུས་ཞེས་བྱ་བ་གཅིག་པུ་ཡིན་ནོ་ཞེས་རྒྱུ་གཅིག་པུར་ལྟ་བ་སྤྱད་པ་རྣམས་ཀྱི་གཉེན་པོར་རྒྱུ་ནི་ཀུན་འབྱུང་བ་ཡིན་གྱི་གཅིག་པུ་མ་ཡིན་ནོ་ཞེས་འབྱུང་བའི་རྣམ་པའོ། །དངོས་པོ་ནི་འགྱུར་བ་ཡིན་
[254b.4]ནོ་ཞེས་འགྱུར་བར་ལྟ་བ་སྤྱད་པ་རྣམས་ཀྱི་གཉེན་པོར་དང་པོ་འབྱུང་བ་འདི་ཡིན་གྱི་སྔ་ནས་གནས་པ་ལས་འགྱུར་བ་ནི་མ་ཡིན་ནོ་ཞེས་རབ་ཏུ་སྐྱེ་བའི་རྣམ་པའོ། །འཇིག་རྟེན་འདི་ནི་བློ་སྔར་བཏང་སྟེ་བྱས་པ་ཡིན་ནོ་ཞེས་བློ་སྔར་བཏང་བར་ལྟ་བ་རྣམས་ཀྱི་གཉེན་པོར་རྐྱེན་གྱི་རྣམ་པ་སྟེ། འགྲོ་བ་
[254b.5]འདི་ནི་དབང་ཕྱུག་གིས་བྱས་པ་མ་ཡིན་ནོ། །འོ་ན་ཅི་ཞེ་ན། རྐྱེན་ཅེས་བྱ་བའི་སྒྲས་ནི་ཟློས་པའི་དོན་ཡིན་པས་དེ་དང་དེ་ལ་བརྟེན་ནས་འདི་འབྱུང་ངོ་ཞེས་བྱ་བ་ཡིན་ནོ། །དེ་ལྟ་བས་ན་འགྲོ་བ་ནི་རྐྱེན་དུ་མས་བསྐྱེད་པ་ཡིན་ནོ་ཞེས་བསྟན་པར་འགྱུར་རོ། །འདི་ལྟར་རིག་པར་འགྱུར་རོ་ཞེས་བྱ་བ་ནི་
[254b.6]མདོ་སྡེ་བའི་གཞུང་ལུགས་ཡིན་ནོ། །རྣམ་པ་ནི་དམིགས་པ་འཛིན་པའི་བྱེ་བྲག་ཡིན་ནོ་ཞེས་བྱ་བ་ནི་ངེས་པའི་ཚུལ་སྟོན་པར་བྱེད་དེ། དེ་ལྟ་ཡིན་ན་ཤེས་རབ་ཀྱང་རྣམ་པ་དང་བཅས་པར་འགྱུར་རོ་ཞེས་བྱ་བར་གྲུབ་པོ། །དགེ་བ་ལ་སོགས་པའི་བྱེ་བྲག་ཅེས་བྱ་བ་ལ། སྩོགས་པ་
[254b.7]ཞེས་བྱ་བའི་སྒྲས་ནི་མི་དགེ་བ་དང་ལུང་དུ་མ་བསྟན་པ་དང་། ས་དང་རྟེན་བསྡུའོ། །ཚིགས་སུ་བཅད་པའི་དང་པོ་ན་ཡོད་པའི་ཕྱིར་ཞེས་བྱ་བ་ནི་འདིའི་དང་པོ་ཡིན་གྱི་བསྟན་བཅོས་ཀྱི་ནི་མ་ཡིན་ནོ་ཞེས་སྟོན་ཏེ། བསྟན་བཅོས་ལས་ནི་ཆོས་ཤེས་པ་དང་པོར་འབྱུང་ངོ་། །དྲུག་ན་ཆོས་
[255a]
[255a.1]ཞེས་བྱ་བ་ནི་འདོད་པ་ན་སྤྱོད་པའི་སྡུག་བསྔལ་ལ་སོགས་པ་ལ་དམིགས་པའི་ཕྱིར་རོ། །གཟུགས་མེད་པ་གསུམ་ན་ཡོད་དོ་ཞེས་བྱ་བ་ནི་རྗེས་སུ་ཤེས་པ་བསྒོམ་པའི་ལམ་གྱིས་བསྡུས་པ་ཁོ་ནའོ། །དེ་བཞིན་དྲུག་ཅེས་བྱ་བ་ནི་སྡུག་བསྔལ་ཤེས་པ་ལ་སོགས་པ་རྗེས་སུ་
[255a.2]ཤེས་པའི་ངོ་བོ་ཉིད་སྲིད་པའི་ཕྱིར་རོ། །གཟུགས་དང་གཟུགས་མེད་པའི་ཁམས་དག་ཏུ་ནི་མངོན་སུམ་དུ་མི་བྱེད་དོ་ཞེས་བྱ་བ་ནི་གཟུགས་མེད་པ་རྣམས་འདོད་པ་ན་སྤྱོད་པའི་སྡུག་བསྔལ་ལ་སོགས་པ་ལ་མི་དམིགས་པའི་ཕྱིར་རེ་ཞིག་ཆོས་ཤེས་པ་གཟུགས་མེད་པའི་ཁམས་སུ་མངོན་སུམ་དུ་
[255a.3]མི་བྱེད་པར་ནི་རིགས་ན། གཟུགས་ཀྱི་ཁམས་སུ་གོ་ཅིའི་ཕྱིར་མངོན་སུམ་དུ་མི་བྱེད་ཅེ་ན། ཁ་ཅིག་ན་རེ་ཆོས་ཤེས་པ་ནི་ལྷུར་འདོད་པའི་ཁམས་རྣམ་པར་སུན་འབྱིན་པ་ཡིན་ན། གཟུགས་ཀྱི་ཁམས་སུ་སྐྱེས་པ་ལ་ནི་ཆོས་ཤེས་པ་འདོད་པའི་ཁམས་རྣམ་པར་སུན་འབྱིན་པ་མི་འབྱུང་སྟེ།
[255a.4]འདོད་ཆགས་དང་བྲལ་བ་དང་ས་འཕོས་པས་དེ་ཡོངས་སུ་བཏང་བའི་ཕྱིར་རོ། །འདོད་པའི་ཁམས་སུ་སྐྱེས་པ་ནི་དེའི་འདོད་ཆགས་དང་བྲལ་ཡང་འདོད་པའི་ཁམས་ཀྱི་ཕུང་པོའི་ལྷག་མ་ལུས་པའི་ཕྱིར་དེ་མངོན་སུམ་དུ་བྱེད་དོ། །དེའི་ཕྱིར་ཆོས་ཤེས་པ་གཟུགས་ཀྱི་ཁམས་སུ་མངོན་སུམ་དུ་མི་
[255a.5]བྱེད་དོ་ཞེས་ཟེར་རོ། །སློབ་དཔོན་འདུས་བཟང་ན་རེ་ཆོས་ཤེས་པ་འདོད་པའི་ཁམས་ཁོ་ནར་མངོན་སུམ་དུ་བྱེད་ཀྱི་དེ་ལ་སྙོམས་པར་འཇུག་པ་དང་ལྡང་བའི་སེམས་རྣམས་འདོད་པའི་ཁམས་ཁོ་ན་ན་ཡོད་པའི་ཕྱིར་གཟུགས་དང་གཟུགས་མེད་པའི་ཁམས་དག་ཏུ་མ་ཡིན་ནོ། །ཡང་ན་རྗེས་སུ་
[255a.6]འབྲང་བའི་རྟེན་མེད་པའི་ཕྱིར་ཏེ། འཆལ་བའི་ཚུལ་ཁྲིམས་ཀུན་ནས་སློང་བར་བྱེད་པའི་ཉོན་མོངས་པའི་འཐོབ་པའི་མི་མཐུན་པའི་ཕྱོགས་ཡིན་པའི་ཕྱིར་ཆོས་ཤེས་པའི་རྗེས་སུ་འབྲང་བའི་ཚུལ་ཁྲིམས་ཀྱི་རྟེན་འདོད་པ་ན་སྤྱོད་པའི་འབྱུང་བ་དག་ཁོ་ན་ཡིན་ན། དེ་དག་ཀྱང་དེ་ན་མེད་པས་ཆོས་
[255a.7]ཤེས་པ་ནི་འདོད་པའི་ཁམས་ཀྱི་རྟེན་ཅན་ཁོ་ན་ཡིན་ནོ་ཞེས་ཟེར་རོ། །འགོག་པ་ཤེས་པ་ནི་གཅིག་སྟེ། ཆོས་དྲན་པ་ཉེ་བར་གཞག་པ་ཡིན་ནོ་ཞེས་བྱ་བ་ནི་ཆོས་དྲན་པ་ཉེ་བར་གཞག་པ་བསྟན་པ་ལས་ཆོས་ནི་ལུས་དང་ཚོར་བ་དང་སེམས་དག་ལས་གཞན་པ་ཡིན་ཞེས་བཤད་པས་སོ། །
[255b]
[255b.1]གཞན་པའི་ཤེས་པ་རྣམས་ནི་དྲན་པ་ཉེ་བར་གཞག་པ་བཞི་ཆར་ཡིན་ནོ་ཞེས་བྱ་བ་ནི་ཆོས་དང་རྗེས་དང་ཀུན་རྫོབ་དང་། སྡུག་བསྔལ་དང་། ཀུན་འབྱུང་བ་དང་། ལམ་དང་། ཟད་པ་དང་མི་སྐྱེ་བ་ཤེས་པ་རྣམས་ལ་ནི་དྲན་པ་ཉེ་བར་གཞག་པ་བཞིའི་ངོ་བོ་ཉིད་ཡོད་དེ། སྡུག་བསྔལ་ཤེས་པ་ཡང་
[255b.2]རེས་འགའ་ནི་ལུས་ལ་དམིགས་ལ། རེས་འགའ་ནི་ཆོས་ཀྱི་བར་ལ་དམིགས་སོ། །ཀུན་འབྱུང་ཤེས་པ་ཡང་དེ་དང་འདྲའོ། །ལམ་ཤེས་པ་ཡང་གལ་ཏེ་ཟག་པ་མེད་པའི་སྡོམ་པ་ལ་དམིགས་ན་དེ་ལུས་དྲན་པ་ཉེ་བར་གཞག་པ་ཡིན་ནོ། །ལྷག་མ་ནི་གོ་སླའོ། །རྗེས་སུ་ཤེས་པ་མ་
[255b.3]གཏོགས་སོ་ཞེས་བྱ་བ་ནི་ཆོས་ཤེས་པ་མ་གཏོགས་སོ། །གལ་ཏེ་ཟག་པ་མེད་པའི་ཤེས་པ་ལ་དམིགས་པར་བྱེད་ན། ཆོས་ཤེས་པའི་ཕྱོགས་དང་མཐུན་པ་ཁོ་ན་ལ་དམིགས་པར་བྱེད་ལ། དེ་བཞིན་དུ་རྗེས་སུ་ཤེས་པ་ཡང་རྗེས་སུ་ཤེས་པའི་ཕྱོགས་དང་མཐུན་པ་ཁོ་ན་ལ་དམིགས་པར་
[255b.4]བྱེད་དོ་ཞེས་བྱ་བར་ངེས་ཏེ། དེ་ལ་ཆོས་ཤེས་པ་ལམ་ཤེས་པར་གྱུར་པའི་དམིགས་པས་ནི་ཆོས་ཤེས་པ་གཞན་དང་སྡུག་བསྔལ་ཤེས་པ་ལ་སོགས་པ་མི་སྐྱེ་བ་ཤེས་པ་ལ་ཐུག་པའི་བར་ཡིན་པར་སྲིད་ལ། སྡུག་བསྔལ་བ་དང་ཀུན་འབྱུང་བ་ཤེས་པར་གྱུར་པའི་དམིགས་པ་ནི་ཀུན་
[255b.5]རྫོབ་ཤེས་པ་ཡིན་པར་སྲིད་ལ། གཞན་གྱི་སེམས་ཤེས་པར་གྱུར་པའི་དམིགས་པ་ནི་གཞན་གྱི་སེམས་ཤེས་པ་ཡིན་པར་སྲིད་པས། དེའི་དམིགས་པ་ཤེས་པ་དགུ་ཡིན་ནོ། །དེ་བཞིན་དུ་རྗེས་སུ་ཤེས་པ་ལ་ཡང་སྦྱར་བར་བྱའོ། །ལམ་ཤེས་པའི་དམིགས་པ་ལ་ཡང་དགུ་ཁོ་ན་
[255b.6]ཡིན་ཏེ། ཀུན་རྫོབ་ཤེས་པ་མ་གཏོགས་སོ་ཞེས་བྱ་བ་ནི་ལམ་ཤེས་པ་ནི་ཟག་པ་མེད་པའི་ལམ་ལ་དམིགས་པར་ངེས་པའི་ཕྱིར་ཀུན་རྫོབ་ཤེས་པ་ལ་མི་དམིགས་སོ། གཉིས་ཏེ་ཀུན་རྫོབ་དང་གཞན་གྱི་སེམས་ཤེས་པ་ཡིན་ནོ་ཞེས་བྱ་བ་ནི་སྡུག་བསྔལ་དང་ཀུན་འབྱུང་བའི་བདེན་
[255b.7]པའི་ཁོངས་སུ་གཏོགས་པ་དག་གོ། །གཞན་གྱི་སེམས་ཤེས་པ་ཟག་པ་མེད་པ་གང་ཡིན་པ་དེའི་དམིགས་པ་ནི་ཤེས་པ་དགུ་ཡིན་ལ། ཟག་པ་དང་བཅས་པ་གང་ཡིན་པ་དེའི་དམིགས་པ་ནི་ཀུན་རྫོབ་ཤེས་པ་དང་། གཞན་གྱི་སེམས་ཤེས་པ་ཡིན་པར་སྲིད་དོ། །ཟད་པ་ཤེས་
[256a]
[256a.1]པ་དང་མི་སྐྱེ་བ་ཤེས་པ་དག་ནི་སྡུག་བསྔལ་དང་ཀུན་འབྱུང་བ་ཤེས་པ་ལ་སོགས་པའི་ངོ་བོ་ཉིད་ཡིན་པས་དེ་དག་གི་དམིགས་པ་ནི་ཤེས་པ་བཅུ་ཆར་ཡང་ཡིན་ནོ། །མཚུངས་པར་ལྡན་པ་དང་ལྡན་པ་མ་ཡིན་པའི་བྱེ་བྲག་གིས་ཞེས་བྱ་བ་ལ། མཚུངས་པར་ལྡན་པ་ནི་
[256a.2]སེམས་དང་སེམས་ལས་བྱུང་བ་རྣམས་སོ། །ལྡན་པ་མ་ཡིན་པ་ནི་ཐོབ་པ་ལ་སོགས་པའོ། །དགེ་བ་དང་ལུང་དུ་མ་བསྟན་པའི་བྱེ་བྲག་གིས་ཞེས་བྱ་བ་ལ་དགེ་བ་ནི་སོ་སོར་བརྟགས་པས་འགོག་པ་ཡིན་ཏེ། མཆོག་ཏུ་བདེ་བའི་ཕྱིར་རོ། །ལུང་དུ་མ་བསྟན་པ་ནི་ནམ་མཁའ་དང་།
[256a.3]སོ་སོར་བརྟགས་པ་མ་ཡིན་པས་འགོག་པ་དག་གོ། །འདོད་པ་ན་སྤྱོད་པ་དང་། ཟག་པ་མེད་པ་དང་བཞི་ཞེས་བྱ་བ་ནི་མཚུངས་པར་ལྡན་པ་དང་ལྡན་པ་མ་ཡིན་པའི་བྱེ་བྲག་གིས་སོ། །གཟུགས་དང་གཟུགས་མེད་པ་ན་སྤྱོད་པ་དང་ཟག་པ་མེད་པ་དང་དྲུག་ཅེས་བྱ་བ་ནི་སོ་སོར་
[256a.4]མཚུངས་པར་ལྡན་པ་དང་ལྡན་པ་མ་ཡིན་པའི་བྱེ་བྲག་གིས་ཏེ། འདོད་པ་དང་གཟུགས་དང་། གཟུགས་མེད་པ་ན་སྤྱོད་པ་རྣམས་ཀྱང་བྱེ་བྲག་དེ་ཉིད་ཀྱིས་དྲུག་ཡིན་ནོ། །གཉིས་ཏེ་ཟག་པ་མེད་པ་དག་ཡིན་ནོ་ཞེས་བྱ་བ་ནི་དེ་ཉིད་ཀྱིས་སོ། །འདོད་པ་དང་གཟུགས་ན་སྤྱོད་པ་དང་ཟག་པ་
[256a.5]མེད་པ་མཚུངས་པར་ལྡན་པ་རྣམས་ཡིན་ནོ་ཞེས་བྱ་བ་ནི་གཟུགས་མེད་པ་ན་སྤྱོད་པའི་སེམས་དང་སེམས་ལས་བྱུང་བ་རྣམས་དང་ལྡན་པ་མ་ཡིན་པ་དང་། འདུས་མ་བྱས་ཐམས་ཅད་ནི་གཞན་གྱི་སེམས་ཤེས་པའི་ཡུལ་མ་ཡིན་པའི་ཕྱིར་རོ། །འདུས་མ་བྱས་ལུང་དུ་མ་བསྟན་པ་མ་གཏོགས་
[256a.6]སོ་ཞེས་བྱ་བ་ནི་ཟད་པ་དང་མི་སྐྱེ་བ་ཤེས་པ་དག་ནི་བདེན་པ་བཞི་ལ་དམིགས་པའི་ཕྱིར་ལ། འདུས་མ་བྱས་ལུང་དུ་མ་བསྟན་པ་ནི་བདེན་པ་བཞི་ལ་མ་གཏོགས་པའི་ཕྱིར་རོ། །ཤེས་པ་གཅིག་གིས་ཆོས་ཐམས་ཅད་ཤེས་པར་འགྱུར་བ་ཡོད་དམ་ཞེ་ན། མེད་དོ་ཞེས་བྱ་བ་ཇི་ལྟར་ཤེས་ཤེ་ན།
[256a.7]མདོ་ལས་ཏེ། ཀྱེ་གཽ་ཏ་མ་བདག་ཅག་འདུན་ཁང་འདིར་འདུས་ཏེ་མཆིས་པ་རྣམས་འདི་ལྟ་བུའི་བཀའ་མཆིད་ཐོར་བུ་གླེང་ལངས་ཏེ། དགེ་སྦྱོང་གཽ་ཏ་མ་འདི་སྐད་དུ་དགེ་སྦྱོང་ངམ་བྲམ་ཟེ་ཡང་རུང་གང་ཐམས་ཅད་ཤེས་ཤིང་ཐམས་ཅད་མཐོང་བར་འགྱུར་བ་དེ་ནི་འགའ་ཡང་མེད་དོ་ཞེས་
[256b]
[256b.1]གསུངས་ཞེས་གྲག་གོ་ཞེས་མཆི་ན་ཀྱེ་གཽ་ཏ་མ་འདི་མད་དམ། བཀའ་སྩལ་པ། ཀྱེ་ངས་དེ་སྐད་དུ་སྨྲས་པར་ནི་དྲན་མོད་ཀྱི། འོན་ཀྱང་དགེ་སྦྱོང་ངམ་བྲམ་ཟེ་ཡང་རུང་གང་ཅིག་ཅར་ཐམས་ཅད་ཤེས་པའམ་མཐོང་བ་དེ་ནི་འགའ་ཡང་མེད་དོ་ཞེས་བྱ་བ་ཡིན་ནོ་ཞེས་འབྱུང་ངོ་། །ཡུལ་དང་ཡུལ་ཅན་ཐ་
[256b.2]དད་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི་ཡུལ་དང་ཡུལ་ཅན་གང་ཡིན་པ་དེ་ཉིད་དེའི་ཡུལ་མ་ཡིན་ཏེ། རལ་གྲིའི་སོ་དེ་ཉིད་དེ་ཉིད་ཀྱིས་མི་གཅོད་པ་དེའི་ཕྱིར་ཀུན་རྫོབ་ཤེས་པ་དེས་རང་གི་ངོ་བོ་མི་འཛིན་ཏོ། །དམིགས་པ་གཅིག་པའི་ཕྱིར་དེས་ལྷན་ཅིག་འབྱུང་བའི་སེམས་དང་སེམས་ལས་
[256b.3]བྱུང་བ་རྣམས་ཀྱང་མི་འཛིན་ཏེ། ཀུན་རྫོབ་ཤེས་པ་འདིའི་དམིགས་པ་གང་ཡིན་པ་དེ་ཉིད་མཚུངས་པར་ལྡན་པ་རྣམས་ཀྱི་ཡིན་ནོ། །གལ་ཏེ་མཚུངས་པར་ལྡན་པ་དེ་དག་འཛིན་པར་འགྱུར་ན་ནི། ཀུན་རྫོབ་ཤེས་པ་དང་དམིགས་པ་གཅིག་པའི་ཕྱིར་རང་གི་ངོ་བོ་ལ་དམིགས་པར་འགྱུར་
[256b.4]བ་ཞིག་ན་དེ་ཡང་རིགས་པ་མ་ཡིན་ཏེ། དེ་ལྟ་བས་ན་དེས་དེ་དག་མི་འཛིན་ཏོ། །ཧ་ཅང་ཉེ་བའི་ཕྱིར་ལྷན་ཅིག་འབྱུང་བ་ལྡན་པ་མ་ཡིན་པ་དེ་དག་ཀྱང་མི་འཛིན་ཏེ། མིག་གིས་མིག་སྨན་དང་མིག་སྨན་གྱི་ཐུར་མ་མི་མཐོང་བ་བཞིན་ནོ། །དེ་ཡང་ཞེས་བྱ་བ་ནི་ཀུན་རྫོབ་ཤེས་པའོ། །དེ་ནི་ས་རྣམ་
[256b.5]པར་ཆད་པ་ལ་དམིགས་པའི་ཕྱིར་རོ་ཞེས་བྱ་བ་ནི་འདི་ལྟར་ཀུན་རྫོབ་ཤེས་པ་གཟུགས་ན་སྤྱོད་པ་བསྒོམས་པ་ལས་བྱུང་བ་ནི་འདོད་པའི་ཁམས་སམ། བསམ་གཏན་དང་པོ་ནས་སྲིད་པའི་རྩེ་མོའི་བར་ས་རྣམ་པར་ཆད་པ་ཁོ་ན་ལ་དམིགས་སོ། །ཅིའི་ཕྱིར་ཞེ་ན། བར་ཆད་མེད་པ་དང་རྣམ་པར་གྲོལ་བའི་
[256b.6]ལམ་རྣམས་གོ་རིམས་བཞིན་དུ་ས་འོག་མ་དང་གོང་མ་ལ་དམིགས་པའི་ཕྱིར་ཏེ་གོ་རིམས་བཞིན་དུ། ཞི་སྩོགས་རགས་སྩོགས་རྣམ་པ་ནི། །གོང་དང་འོག་མའི་སྤྱོད་ཡུལ་ཅན། །ཞེས་འབྱུང་བས་སོ། །གལ་ཏེ་དེས་ས་ཐམས་ཅད་ལ་དམིགས་པར་གྱུར་ན་ནི་ཐམས་ཅད་ལས་ཅིག་
[256b.7]ཅར་འདོད་ཆགས་དང་བྲལ་བར་འགྱུར་རོ། །སྦྱོར་བ་དང་ཁྱད་པར་གྱི་ལམ་དག་གི་དམིགས་པ་ཡང་ཅི་རིགས་པར་ས་འགའ་ཞིག་ཁོ་ན་ཡིན་ནོ། །ཇི་ལྟ་ཞེ་ན། ངེས་པར་འབྱེད་པའི་ཆ་དང་མཐུན་པའི་སྦྱོར་བའི་ལམ་གྱིས་བསྡུས་པ་གང་གི་དམིགས་པ་འདོད་པའི་ཁམས་ཡིན་པ་
[257a]
[257a.1]དེའི་ཁམས་གཞན་དག་མ་ཡིན་ཏེ། གང་གི་དམིགས་པ་གཞན་དག་ཡིན་པ་དེའི་འདོད་པའི་ཁམས་མ་ཡིན་ནོ། །མི་སྡུག་པ་དང་། ཚད་མེད་པ་དང་། ཟིལ་གྱིས་གནོན་པའི་སྐྱེ་མཆེད་ལ་སོགས་པ་དང་། རྣམ་པར་སུན་འབྱིན་པ་དང་། ཁྱད་པར་ཅན་གྱི་ལམ་
[257a.2]གྱིས་བསྡུས་པའི་དམིགས་པ་ནི་འདོད་པའི་ཁམས་ཁོ་ན་ཡིན་གྱི། ཁམས་གཞན་དག་མ་ཡིན་ནོ། །ཟག་མེད་སྐད་ཅིག་དང་པོ་ལ། །ཆགས་ཅན་ཤེས་པ་གཅིག་དང་ལྡན། །ཞེས་བྱ་བ་ནི་འདི་ལྟར་བཟོད་པ་ཡང་ཤེས་པ་མ་ཡིན་ལ། ཟག་པ་མེད་པའི་ཤེས་པ་གཞན་དང་ཡང་
[257a.3]མི་ལྡན་པས་སོ། །ཆགས་ཅན་ཞེས་སྨོས་པ་ནི་འདི་ལྟར་འདོད་ཆགས་དང་བྲལ་བ་ནི་གཞན་གྱི་སེམས་ཤེས་པ་དང་ཡང་ལྡན་པར་འགྱུར་རོ། །གཉིས་པ་ལ་གསུམ་ཞེས་བྱ་བ་ནི་སྡུག་བསྔལ་ལ་ཆོས་ཤེས་པ་དེ་ཉིད་ཆོས་ཤེས་པ་ཞེས་ཀྱང་བྱ་ལ། སྡུག་བསྔལ་ཤེས་པ་ཞེས་ཀྱང་
[257a.4]བྱ་བས་མིང་ཐ་དད་པའི་སྒོ་ནས་གཉིས་སུ་ཉེ་བར་གདགས་ན་ཆོས་ཤེས་པ་དང་། སྡུག་བསྔལ་ཤེས་པ་དང་། ཀུན་རྫོབ་ཤེས་པ་སྟེ་གསུམ་དང་ལྡན་ནོ། །བཞི་ལ་ཞེས་བྱ་བ་ནི་སྡུག་བསྔལ་ལ་རྗེས་སུ་ཤེས་པའི་སྐད་ཅིག་དང་། ཀུན་འབྱུང་བ་དང་། འགོག་པ་དང་། ལམ་ལ་ཆོས་ཤེས་
[257a.5]པའི་སྐད་ཅིག་མ་དག་ལ་སྟེ། བཟོད་པ་དག་ལ་ནི་སྔ་མ་ཁོ་ན་བཞིན་དུ་ལྡན་པའི་ཕྱིར་རོ། །སྡུག་བསྔལ་ལ་རྗེས་སུ་ཤེས་པའི་སྐད་ཅིག་མ་ལ་ནི་རྗེས་སུ་ཤེས་པ་ཁོ་ན་འཕེལ་གྱི། ཆོས་ཤེས་པ་ནི་མ་ཡིན་ཏེ། དེ་དག་དང་ནི་སྔ་ནས་ལྡན་པའི་ཕྱིར་རོ། །ཀུན་འབྱུང་བ་ལ་ཆོས་ཤེས་པའི་སྐད་ཅིག་མ་ལ་ནི་
[257a.6]ཀུན་འབྱུང་བ་ཤེས་པ་ཁོ་ན་འཕེལ་གྱི། ཆོས་དང་རྗེས་སུ་ཤེས་པ་དག་ནི་མ་ཡིན་ཏེ། དེ་དག་དང་ནི་སྔ་ནས་ལྡན་པའི་ཕྱིར་རོ། །དེ་བཞིན་དུ་འགོག་པ་དང་ལམ་ལ་ཆོས་ཤེས་པའི་སྐད་ཅིག་མ་དག་ལ་ནི་འགོག་པ་དང་ལམ་ཤེས་པ་དག་ཁོ་ན་འཕེལ་ལོ་ཞེས་བརྗོད་པར་བྱའོ། །འདོད་ཆགས་དང་
[257a.7]བྲལ་བ་ཞིག་ཡིན་ན་ནི་ཐམས་ཅད་དུ་གཞན་གྱི་སེམས་ཤེས་པ་ལྷག་པར་ལྡན་ཞེས་བྱ་བ་ནི་སྡུག་བསྔལ་ལ་ཆོས་ཤེས་པའི་བཟོད་པ་ནས་ལམ་ལ་ཆོས་ཤེས་པའི་སྐད་ཅིག་མའི་བར་ལ་གཞན་གྱི་སེམས་ཤེས་པ་དང་ཇི་སྐད་བཤད་པའི་ཤེས་པ་དེ་དག་དང་ཡང་ལྡན་ནོ་ཞེས་བྱ་བར་རིག་པར་བྱའོ། །ལམ་
[257b]
[257b.1]ལ་རྗེས་སུ་ཤེས་པ་ལ་ནི་འདོད་ཆགས་དང་མ་བྲལ་བ་ཞིག་ཡིན་ན་བདུན་པོ་དེ་དག་དང་ལྡན་ནོ། །འདོད་ཆགས་དང་བྲལ་བ་ཞིག་ཡིན་ན་ནི་བརྒྱད་དེ། དེ་དག་དང་གཞན་གྱི་སེམས་ཤེས་པ་དང་ལྡན་ནོ། །ཟད་པ་དང་མི་སྐྱེ་བ་ཤེས་པ་དག་དང་ནི་དགྲ་བཅོམ་པ་ཁོ་ན་དང་ལྡན་ནོ་ཞེས་བྱ་བར་རྟོགས་པར་སླ་
[257b.2]བའི་ཕྱིར་དེའི་ཕྱིར་མདོར་མ་བྱས་སོ་ཞེས་བྱ་བར་ཁོང་དུ་ཆུད་པར་བྱའོ། །ཤེས་པ་ཇི་ལྟར་སྐྱེས་པ་རྣམས། །མ་འོངས་པ་འཐོབ་ཅེས་བྱ་བ་ནི་འདིར་རྙེད་པའི་འཐོབ་པ་དང་། བསྟེན་པའི་འཐོབ་པ་དང་། འཐོབ་པ་རྣམ་པ་གཉིས་ཀྱི་དབང་དུ་བྱས་པ་ཡིན་ཏེ། རྙེད་པའི་འཐོབ་པ་ནི་ཐོབ་པའི་སྒོ་
[257b.3]ནས་སོ། །བསྟན་པའི་འཐོབ་པ་ནི་མངོན་སུམ་དུ་གྱུར་པའི་སྒོ་ནས་སོ། །ཇི་ལྟར་སྐྱེས་པ་རྣམས་འཐོབ་ཅེས་བྱ་བ་ནི་གང་དང་གང་སྐྱེས་པ་དེ་དག་འཐོབ་པོ་ཞེས་བྱ་བའི་ཐ་ཚིག་སྟེ། དཔེར་ན་སྡུག་བསྔལ་ལ་ཆོས་ཤེས་པའི་བཟོད་པ་སྐྱེས་ན་དེ་དང་འདྲ་བའི་བཟོད་པ་མ་འོངས་པ་ཁོ་ན་འཐོབ་པོ། །དེའི་
[257b.4]རྣམ་པ་བཞི་ཞེས་བྱ་བ་ནི་སྐལ་བ་འདྲ་བའི་ཕྱིར་བཟོད་པའི་རྣམ་པ་སྟེ། མི་རྟག་པ་ལ་སོགས་པའི་རྣམ་པ་བཞི་ཡིན་གྱི་གཞན་ནི་མ་ཡིན་ནོ། །དེ་བཞིན་དུ་སྡུག་བསྔལ་ལ་ཆོས་ཤེས་པ་སྐྱེས་ན་དེ་ཉིད་མ་འོངས་པ་འཐོབ་ཅིང་དེའི་རྣམ་པ་བཞི་ཁོ་ན་འཐོབ་སྟེ། དེ་བཞིན་དུ་སྡུག་བསྔལ་ལ་རྗེས་
[257b.5]སུ་ཤེས་པའི་བཟོད་པ་ལ་སོགས་པ་ལ་ཡང་སྦྱར་བར་བྱའོ། །ཤེས་པ་དང་རྣམ་པ་འདྲ་བ་ཁོ་ན་འཐོབ་ཅེ་ན་ཞེས་བྱ་བ་ནི་ཅིའི་ཕྱིར་མཐོང་བའི་ལམ་ཁོ་ན་ལ་ཤེས་པ་འདྲ་བ་འཐོབ་ཅིང་རྣམ་པ་ཡང་འདྲ་བ་འཐོབ་ཀྱི་བསྒོམ་པའི་ལམ་ལ་ནི་མ་ཡིན་ཞེས་བྱ་བ་ཡིན་ནོ། །བཟོད་པ་རྣམས་ཡོངས་སུ་མ་
[257b.6]དྲིས་པ་ནི་བསྒོམ་པའི་ལམ་ལ་དེ་དག་མེད་པའི་ཕྱིར་རོ། །ཡང་ན་དེ་དག་ཀྱང་འདྲ་བ་འཐོབ་པའི་ཕྱིར་དྲི་བར་བྱ་དགོས་ཏེ། སྡུག་བསྔལ་ལ་བཟོད་པ་སྐྱེས་ན་ཀུན་འབྱུང་བ་ལ་སོགས་པའི་བཟོད་པའི་རྣམ་པ་འཐོབ་པ་ནི་མ་ཡིན་ནོ། །དཔེར་བརྗོད་པ་ཙམ་གྱི་དོན་དུ་ཟད་པས་ཤེས་པ་ཡོངས་སུ་དྲིས་
[257b.7]ཀྱི་བཟོད་པ་ནི་ཡོངས་སུ་མ་དྲིས་སོ། །རིགས་རྣམས་མ་ཐོབ་པའི་ཕྱིར་ཞེས་བྱ་བ་ནི་སྐལ་བ་མཉམ་པའི་རྒྱུ་རྣམས་མ་ཐོབ་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཇི་ལྟ་ཞེ་ན། སྡུག་བསྔལ་ལ་ཆོས་ཤེས་པའི་བཟོད་པ་སྐྱེས་ན་དེའི་རིགས་དང་དེའི་རྣམ་པ་བཞིའི་རིགས་རྣམས་འཐོབ་པར་
[258a]
[258a.1]འགྱུར་གྱི། སྡུག་བསྔལ་ལ་ཆོས་ཤེས་པ་ལ་སོགས་པའི་མ་ཡིན་ནོ། །ཡང་མི་རྟག་པ་ལ་སོགས་པའི་རྣམ་པ་དག་ལས་རྣམ་པ་རེ་རེ་ཞིག་མངོན་སུམ་དུ་གྱུར་ན། ཅིའི་ཕྱིར་རྣམ་པ་ལྷག་མ་རྣམས་ཀྱི་རིགས་འཐོབ། གང་གིས་ན་དེ་དག་ཀྱང་འཐོབ་པར་འགྱུར་ཞེ་ན།
[258a.2]དམིགས་པ་མཚུངས་པ་ཉིད་ཀྱིས་འདྲ་བའི་ཕྱིར་ཐམས་ཅད་ཀྱི་རིགས་འཐོབ་བོ། །དེ་བཞིན་དུ་སྡུག་བསྔལ་ལ་ཆོས་ཤེས་པ་སྐྱེས་པ་ནས། ལམ་ལ་རྗེས་སུ་ཤེས་པའི་བཟོད་པ་སྐྱེས་པའི་བར་ལ་དེ་དག་དང་དེ་དག་གི་རྣམ་པའི་རིགས་རྣམས་འཐོབ་པར་འགྱུར་བས་དེ་དག་ཁོ་ན་འཐོབ་པར་འགྱུར་གྱི་
[258a.3]གཞན་ནི་མ་ཡིན་ནོ། །བསྒོམ་པའི་ལམ་ལ་ནི་ཤེས་པ་འདྲ་བ་དང་། མི་འདྲ་བ་དང་། དེ་དག་གི་རྣམ་པ་ཐམས་ཅད་མངོན་སུམ་དུ་འགྱུར་བའི་ཕྱིར་ཐམས་ཅད་ཀྱི་རྒྱུ་ཐོབ་པར་འགྱུར་བས་དེ་ལས་ཁྱད་པར་དུ་འཕགས་པའི་ཤེས་པའི་རྣམ་པ་མ་འོངས་པ་འཐོབ་པར་འགྱུར་རོ། །རྗེས་གསུམ་
[258a.4]ལ་ནི་ཀུན་རྫོབ་ཀྱང་། །ཞེས་བྱ་བ་ནི་སྔོན་མ་ཐོབ་པའོ། །ཆོས་ཤེས་པ་ལ་ནི་མ་ཡིན་ཏེ། བདེན་པ་ཟད་པར་མངོན་པར་མ་རྟོགས་པའི་ཕྱིར་རོ་ཞེས་བྱ་བ་ནི་དེའི་ཚེ་གཟུགས་དང་གཟུགས་མེད་པ་ན་སྤྱོད་པའི་སྡུག་བསྔལ་ཡོངས་སུ་ཤེས་པ་དང་། ཀུན་འབྱུང་བ་སྤངས་པ་དང་། དེའི་འགོག་པ་
[258a.5]མངོན་དུ་བྱས་པ་མ་ཡིན་ནོ། །ལམ་གྱི་བདེན་པ་ནི་སྔོན་འཇིག་རྟེན་པའི་ལམ་གྱིས་མངོན་པར་མ་རྟོགས་པའི་ཕྱིར་ཞེས་བྱ་བ་ནི་ཐོག་མ་མེད་པ་ཅན་གྱི་འཁོར་བ་ནི་སྔོན་འཇིག་རྟེན་པའི་ལམ་གྱིས་སྡུག་བསྔལ་དང་ཀུན་འབྱུང་བ་དང་། འགོག་པ་མངོན་པར་རྟོགས་ཀྱི། ཀུན་རྫོབ་ཤེས་པས་ནི་
[258a.6]ནམ་ཡང་ལམ་ལ་ལམ་ལ་སོགས་པའི་རྣམ་པར་མངོན་པར་མ་རྟོགས་སོ། །དེ་བས་ན་གསུམ་ལས་བདེན་པ་རེ་རེ་མངོན་པར་རྟོགས་པའི་རྗེས་ལ་འཐོབ་པར་འགྱུར་གྱི། ལམ་ལ་རྗེས་སུ་ཤེས་པ་ལ་ནི་མ་ཡིན་ནོ། །ལམ་ནི་ཟད་པར་བསྒོམ་པར་མི་ནུས་ཞེས་བྱ་བ་ནི་མངོན་སུམ་དུ་བྱ་
[258a.7]བར་ཞེས་བྱ་བའི་ཐ་ཚིག་གོ །དེའི་ཚེ་ཀུན་འབྱུང་བ་ཡང་ཐམས་ཅད་སྤངས་པ་མ་ཡིན་པས་ཞེས་བྱ་བ་ནི་འགོག་པ་དང་། ལམ་མཐོང་བ་དང་། བསྒོམ་པས་སྤང་བར་བྱ་བའོ། །སྡུག་བསྔལ་ནི་ཁམས་གསུམ་པ་ཐམས་ཅད་ཡོངས་སུ་ཤེས་ཏེ། དེ་ནི་ཡོངས་སུ་ཤེས་པར་བྱ་བ་ཡིན་
[258b]
[258b.1]པའི་ཕྱིར་རོ། །དེའི་ཕྱིར་ཀུན་འབྱུང་བ་འབའ་ཞིག་ལ་རྒོལ་ལོ། །དེའི་བདེན་པ་མཐོང་བས་སྤང་བར་བྱ་བ་ཞེས་བྱ་བ་ནི་ཀུན་འབྱུང་བའི་བདེན་པ་མཐོང་བས་སྤང་བར་བྱ་བ་ཞེས་བྱ་བའི་དོན་ཏོ། །རིགས་མང་བའི་ཕྱིར་ཞེས་བྱ་བ་ལ། རིགས་ནི་ལུས་ཀྱི་རྒྱུད་ཀྱི་ནུས་པའི་ཁྱད་པར་ཡིན་ནོ། །འདི་
[258b.2]ལ་རིགས་དེ་དག་མང་པོ་ཞིག་ཡོད་པས་ལམ་རིགས་མང་པོ་ཅན་ཡིན་ཏེ། ཉན་ཐོས་ཀྱི་རིགས་དང་། རང་སངས་རྒྱས་ཀྱི་རིགས་དང་། དེ་བཞིན་དུ་སངས་རྒྱས་ཀྱི་རིགས་སོ། །ཉན་ཐོས་ཀྱི་རིགས་ཀྱང་ཆུང་ངུ་དང་ཆེན་པོའི་བྱེ་བྲག་གིས་ཕན་ཚུན་ཐ་དད་པ་སྟེ། དེ་དག་ལས་མཐོང་བས་སྤང་བར་
[258b.3]བྱ་བའི་གཉེན་པོ་འགའ་ཞིག་ཁོ་ན་བསྒོམ་ཞིང་མངོན་སུམ་དུ་བྱེད་པར་ཟད་ཀྱི་ལམ་ཟད་པར་བསྒོམ་པར་ནི་མི་ནུས་སོ། །མཐོང་བའི་ལམ་གྱི་འཁོར་ཡིན་པའི་ཕྱིར་ཞེས་བྱ་བ་ནི་ཀུན་རྫོབ་ཤེས་པ་ནི་མཐོང་བའི་ལམ་གྱི་འཁོར་ཡིན་པས་དེའི་ཕྱིར་མཐོང་བའི་ལམ་ལ་བདེན་པ་གསུམ་གྱི་རྗེས་ཁོ་
[258b.4]ན་ལ་འཐོབ་ཀྱི། ལམ་གྱི་རྗེས་ལ་ནི་མ་ཡིན་ཏེ། དེ་ནི་བསྒོམ་པའི་ལམ་ཡིན་པའི་ཕྱིར་རོ། །བསྒྲུབ་པར་བྱ་བ་མ་ཡིན་པའི་ཕྱིར། ཤེས་པར་བྱེད་པ་མ་ཡིན་ནོ་ཞེས་བྱ་བ་ནི་མཐོང་བའི་ལམ་གྱི་འཁོར་ཁོ་ན་ཡིན་གྱི། བསྒོམ་པའི་ལམ་གྱི་འཁོར་མ་ཡིན་ནོ་ཞེས་བྱ་བ་འདི་ནི་བསྒྲུབ་དགོས་
[258b.5]སོ། །ཁོ་བོ་ནི་དེ་བསྒོམ་པའི་ལམ་གྱི་འཁོར་ཡང་ཡིན་ནོ་ཞེས་ཟེར་རོ། །ཆེས་ཁྱད་པར་དུ་འཕགས་པ་བདེན་པ་ལ་དམིགས་པ་ཞེས་བྱ་བ་ནི་མཐོང་བའི་གནས་སྐབས་ལས་སྔོན་འཇིག་རྟེན་པ་ཡོད་པ་གང་ཡིན་པ་དེ་བས་འཇིག་རྟེན་པ་འདི་ཆེས་ཁྱད་པར་དུ་འཕགས་སོ་སྙམ་དུ་
[258b.6]བསམས་པ་ཡིན་ནོ། །དེ་མངོན་སུམ་དུ་འགྱུར་བར་ནུས་པའི་རྟེན་རྙེད་པ་གང་ཡིན་པ་དེ་ཉིད་ཅེས་བྱ་བ་ནི་ཀུན་རྫོབ་ཤེས་པ་སྟེ། མངོན་སུམ་དུ་འགྱུར་བར་ནུས་པའི་རྟེན་རྙེད་པ་གང་ཡིན་པ་འདི་དེ་རྙེད་པ་ཡིན་གྱི་དོན་གཞན་དུ་འགྱུར་བ་ནི་མེད་དོ་ཞེས་བྱ་བ་ཡིན་ནོ། །རིགས་རྙེད་ན་རིགས་
[258b.7]ལས་བྱུང་བ་ཡང་རྙེད་པ་ཡིན་ནོ་ཞེས་བྱ་བ་ལ། རིགས་ནི་དེ་སྐྱེད་པར་ནུས་པའི་རྒྱུ་ཡིན་ནོ། །དེ་ལས་བྱུང་བ་ན་རིགས་ལས་བྱུང་བ་ནི་ཀུན་རྫོབ་ཤེས་པ་ཡིན་ཏེ། འདི་སྐད་དུ་དེ་མངོན་སུམ་དུ་འགྱུར་བར་ནུས་པའི་རྟེན་རྙེད་ན་རྟེན་དེས་བསྐྱེད་པར་བྱ་བ་དེ་ཡང་རྙེད་པ་ཡིན་ནོ་ཞེས་བཤད་པར་
[259a]
[259a.1]འགྱུར་རོ། །ཡང་ཅིའི་ཕྱིར་བྱེ་བྲག་ཏུ་སྨྲ་བ་རྣམས་དེ་ལྟར་མི་འདོད་ཅེ་ན། དེ་ནི་མཐོང་བའི་ལམ་གྱིས་ཐོབ་པར་བྱ་བ་ཡིན་ནོ། །ཇི་ལྟར་དེ་བསྒོམ་པའི་ལམ་ལ་མངོན་སུམ་དུ་འགྱུར་ཏེ་མཐོང་བའི་ལམ་ལ་ནི་དེ་སྐྱེ་བའི་གོ་སྐབས་མེད་པས་མི་སྐྱེ་བའི་ཆོས་ཅན་
[259a.2]ཡིན་ནོ་ཞེས་བརྗོད་དོ། །དེ་བཞིན་དུ་མཐོང་བའི་ལམ་བསམ་གཏན་བཞི་པའི་ས་པ་ཡིན་ནོ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་བསམ་གཏན་དང་པོའི་ས་པ་ཞིག་ཡིན་ན། བསམ་གཏན་དང་པོའི་ས་པ་དང་། མི་ལྕོགས་པ་མེད་པའི་ས་པ་དང་། འདོད་པ་ན་སྤྱོད་པ་དང་ས་
[259a.3]གསུམ་པ་འཐོབ་པོ། གལ་ཏེ་བསམ་གཏན་ཁྱད་པར་ཅན་གྱི་ས་པ་ཞིག་ཡིན་ན་བསམ་གཏན་ཁྱད་པར་ཅན་གྱི་ས་པ་དང་། སྔར་བཤད་པ་བསམ་གཏན་དང་པོ་ལ་སོགས་པའི་ས་པ་དང་། ས་བཞི་པ་འཐོབ་པོ། དེ་བཞིན་དུ་གལ་ཏེ་བསམ་གཏན་གཉིས་པའི་ས་པ་ཡིན་ན། བསམ་
[259a.4]གཏན་གཉིས་པའི་ས་པ་ནས་འདོད་པ་ན་སྤྱོད་པའི་བར་ས་ལྔ་པ་འཐོབ་པོ། །གལ་ཏེ་བསམ་གཏན་གསུམ་པའི་ས་པ་ཞིག་ཡིན་ན། བསམ་གཏན་གསུམ་པ་ནས་འདོད་པ་ན་སྤྱོད་པའི་བར་ས་དྲུག་པ་འཐོབ་བོ། །གལ་ཏེ་བསམ་གཏན་བཞི་པའི་ས་པ་ཞིག་ཡིན་ན་བསམ་གཏན་བཞི་
[259a.5]པའི་ས་པ་ནས་འདོད་པ་ན་སྤྱོད་པའི་བར་ས་བདུན་པ་འཐོབ་བོ། །གཅིག་གྲངས་བཅད་པས་ལྷག་མ་ནི་དྲན་པ་ཉེ་བར་གཞག་པ་བཞི་ཆར་ཡིན་ནོ་ཞེས་བྱ་བར་གྲུབ་པོ་ཞེས་བྱ་བ་ནི་འགོག་པའི་ནི་ཐ་མ་ཁོ་ན་ཡིན་ལ་ཐ་མ་ཁོ་ན་ཡང་འགོག་པའི་ཡིན་ནོ་ཞེས་གཉི་ག་ངེས་པར་གཟུང་བའི་ཕྱིར་ལྷག་
[259a.6]མ་ནི་དྲན་པ་ཉེ་བར་གཞག་པ་བཞིའི་ངོ་བོ་ཉིད་ཡིན་ནོ་ཞེས་བྱ་བར་གྲུབ་པར་འགྱུར་རོ། །སྡུག་བསྔལ་ནི་ལུས་ལ་སོགས་པའི་ངོ་བོ་ཉིད་ཡིན་པའི་ཕྱིར་སྡུག་བསྔལ་མངོན་པར་རྟོགས་པ་ན་འཐོབ་པའི་ཀུན་རྫོབ་ཤེས་པ་གང་ཡིན་པ་དེ་ནི་དྲན་པ་ཉེ་བར་གཞག་པ་བཞི་ཆར་ཡིན་ཏེ། དེ་
[259a.7]བཞིན་དུ་ཀུན་འབྱུང་བ་ལ་ཡང་བརྗོད་པར་བྱའོ། །བདེན་པ་དེའི་རྣམ་པ་ཅན་ཁོ་ན་ཡིན་ནོ་ཞེས་བྱ་བ་ནི་སྡུག་བསྔལ་མངོན་པར་རྟོགས་པ་ན། འཐོབ་པའི་ཀུན་རྫོབ་ཤེས་པ་གང་ཡིན་པ་དེ་ནི་སོ་སོར་མི་རྟག་པ་དང་སྡུག་བསྔལ་བ་དང་། སྟང་(སྟོང་)པ་དང་། བདག་མེད་པའི་རྣམ་པ་ཅན་
[259b]
[259b.1]ཡིན་ཏེ། དེ་བཞིན་དུ་ཀུན་འབྱུང་བ་དང་། འགོག་པ་ལ་ཡང་བརྗོད་པར་བྱའོ། །འདིའི་དམིགས་པ་ཡང་བདེན་པ་དེ་ཉིད་ཡིན་ནོ་ཞེས་བྱ་བ་ནི་འདི་ལྟར་རྣམ་པ་དེ་ནི་དེ་ལ་དམིགས་པའི་ཕྱིར་རོ། །སྦྱོར་བ་ལས་བྱུང་བ་ཡིན་ཞེས་བྱ་བ་ནི་དེས་ན་སྐྱེ་བས་འཐོབ་པ་མ་ཡིན་ནོ། །ཕུང་པོ་བཞི་དང་། ལྔའི་
[259b.2]རང་བཞིན་ཡིན་ནོ་ཞེས་བྱ་བ་ནི་འདོད་པ་ན་སྤྱོད་པ་ལ་རྗེས་སུ་འབྲང་བའི་གཟུགས་མེད་པའི་ཕུང་པོ་བཞིའི་རང་བཞིན་ཡིན་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོའི་ངོ་བོ་ཉིད་ཡིན་ནོ་ཞེས་བྱ་བའི་ཐ་ཚིག་གོ། །ས་གོང་མ་པ་ནི་ཕུང་པོ་ལྔའི་རང་བཞིན་ཡིན་
[259b.3]ཏེ། བསམ་གཏན་གྱི་སྡོམ་པའི་མཚན་ཉིད་ཀྱི་གཟུགས་ཀྱི་ཕུང་པོ་ཡོད་པའི་ཕྱིར་རོ། །ཤེས་པ་གཉིས་ད་ལྟར་བྱུང་བ་ཡིན་ཞེས་བྱ་བ་ནི་རྗེས་སུ་ཤེས་པ་དང་ལམ་ཤེས་པ་སྟེ། ལམ་ལ་རྗེས་སུ་ཤེས་པ་ནི་དེ་གཉི་གའི་ངོ་བོ་ཉིད་ཡིན་པའི་ཕྱིར་རོ། །མ་འོངས་པ་དྲུག་ཅེས་བྱ་བ་ནི་ཆོས་ཤེས་པ་
[259b.4]ལ་སོགས་པའོ། །ཀུན་རྫོབ་ཤེས་པ་ནི་མི་འཐོབ་སྟེ། སྔོན་རྙེད་ཟིན་པ་ནི་མི་འཐོབ་བོ་ཞེས་འཆད་པར་འགྱུར་རོ། །གཞན་གྱི་སེམས་ཤེས་པ་ཡང་མི་འཐོབ་སྟེ། འདོད་ཆགས་དང་བྲལ་བའི་ཕྱིར་རོ། །དེའི་གོང་མ་ཆགས་བཅས་ཀྱི། །བསྒོམ་པའི་ལམ་ལ་བདུན་འཐོབ་བོ། །ཞེས་བྱ་
[259b.5]བ་ནི་རྣམ་པ་གཅིག་སྤངས་པ་ནས་རྣམ་པ་བརྒྱད་སྤངས་པའི་བར་ཏེ། ཇི་སྲིད་དུ་འདོད་ཆགས་དང་བྲལ་བ་མ་ཡིན་ཞིང་། ཇི་སྲིད་དུ་རྣམ་པ་དགུ་པ་སྤངས་པ་ཡིན་པའི་བར་སྐབས་འདིར་སྦྱོར་བ་དང་བར་ཆད་པ་མེད་པ་དང་རྣམ་པར་གྲོལ་བ་དང་ཁྱད་པར་ཅན་གྱི་ལམ་ཐོབ་པ་ན་ཤེས་པ་བདུན་
[259b.6]འཐོབ་སྟེ། གཞན་གྱི་སེམས་ཤེས་པ་མ་གཏོགས་པ་ཆོས་ཤེས་པ་ལ་སོགས་པ་འཐོབ་བོ། །གལ་ཏེ་བསྒོམ་པའི་ལམ་འཇིག་རྟེན་པ་ཞི་བ་ལ་སོགས་པ་དང་རགས་པ་ལ་སོགས་པའི་རྣམ་པ་ཅན་ཞིག་ཡིན་ནི་ཀུན་རྫོབ་ཤེས་པ་ད་ལྟར་འབྱུང་བ་ཡིན་ནོ། །ཤེས་པ་བཞི་ལས་ཞེས་བྱ་བ་ནི་སྡུག་
[259b.7]བསྔལ་དང་ཀུན་འབྱུང་བ་དང་འགོག་པ་དང་། ལམ་ལ་ཆོས་ཤེས་པ་གང་ཡང་རུང་བ་ཞིག་གོ། །འདོད་པའི་ཁམས་ཀྱི་གཉེན་པོ་མ་ཡིན་པའི་ཕྱིར་རྗེས་སུ་ཤེས་པ་རྣམས་ནི་མ་ཡིན་ནོ།། །།བམ་པོ་ལྔ་བཅུ་ལྔ་པ། མངོན་པར་ཤེས་པ་ལྔ་ཞེས་བྱ་བ་ནི་ཟག་པ་ཟད་པའི་མངོན་པར་ཤེས་པ་མ་གཏོགས་
[260a]
[260a.1]སོ། །རྗེས་སུ་ཤེས་པ་བཞི་ཞེས་བྱ་བ་ནི་སྡུག་བསྔལ་དང་ཀུན་འབྱུང་བ་དང་འགོག་པ་དང་། ལམ་ལ་རྗེས་སུ་ཤེས་པའོ། །ཆོས་ཤེས་པ་གཉིས་ཞེས་བྱ་བ་ནི་འགོག་པ་དང་། ལམ་ལ་དམིགས་པ་དག་སྟེ། ཁམས་གསུམ་གྱི་གཉེན་པོ་ཉིད་དུ་རུང་བའི་ཕྱིར་རོ། །ཀུན་རྫོབ་ཤེས་
[260a.2]པ་མི་འཐོབ་སྟེ། སྲིད་པའི་རྩེ་མོའི་གཉེན་པོ་མ་ཡིན་པའི་ཕྱིར་རོ་ཞེས་བྱ་བ་ནི་ས་བདུན་ལས་འདོད་ཆགས་དང་བྲལ་བ་ནི་འཇིག་རྟེན་ལས་འདས་པས་ཐོབ་ཀྱང་ཀུན་རྫོབ་ཤེས་པ་འཐོབ་སྟེ། ཉོན་མོངས་པའི་རྣམ་པ་དེའི་གཉེན་པོ་ནི་འཇིག་རྟེན་ལས་འདས་པ་འབའ་ཞིག་ཏུ་མ་ཟད་ཀྱི། ཀུན་
[260a.3]རྫོབ་ཤེས་པ་ཡང་ཡིན་པས་དེ་ན་དེ་ལྟ་བུའི་ཀུན་རྫོབ་ཤེས་པ་ཡང་འཐོབ་པོ། །མི་གཡོ་བ་རྟོགས་པར་བྱེད་པ་ན་ནི་ཀུན་རྫོབ་ཤེས་པ་གཉེན་པོའི་ངོ་བོ་དེ་ལྟ་བུ་མེད་པས་དེའི་ཕྱིར་དེ་ནི་མི་འཐོབ་པོ། །དེར་ནི་ཟད་པ་ཤེས་པ་བདུན་པ་ཡིན་ཞེས་བྱ་བ་ནི་བར་ཆད་མེད་པའི་ལམ་ལ་གནས་པའི་ཕྱིར་དེ་ན་
[260a.4]ཟད་ཤེས་པ་འཐོབ་ཀྱི། མི་སྐྱེ་བ་ཤེས་པ་ནི་མ་ཡིན་ཏེ། བར་ཆད་མེད་པའི་ལམ་ལ་གནས་པ་ནི་མི་གཡོ་བའི་ཆོས་ཅན་མ་ཡིན་ནོ། །མི་གཡོ་བའི་ཆོས་ཅན་གྱིས་ནི་མི་སྐྱེ་བ་ཤེས་པ་ཡང་འཐོབ་པོ། །སྲིད་པའི་རྩེ་མོ་ལས་འདོད་ཆགས་དང་བྲལ་བའི་རྣམ་པར་གྲོལ་བའི་ལམ་བརྒྱད་ལ་ཡང་
[260a.5]ཤེས་པ་བདུན་ཁོ་ན་འཐོབ་ཅེས་བྱ་བ་ནི་གཞན་གྱི་སེམས་ཤེས་པ་ཇི་ལྟར་འཐོབ་ཅེ་ན། གཞན་གྱི་སེམས་ཤེས་པ་ནི་བར་ཆད་མེད་པའི་ལམ་ལ་བཀག་གི །རྣམ་པར་གྲོལ་བའི་ལམ་ལ་ནི་མ་ཡིན་པས། དེའི་ཕྱིར་རྣམ་པ་གཅིག་སྤངས་པ་ནས་རྣམ་པ་བརྒྱད་སྤངས་པའི་བར་ལ་འཕགས་པའི་
[260a.6]གང་ཟག་དེ་ལམ་དེ་ལས་ལངས་ནས་མངོན་སུམ་དུ་བྱེད་པར་འགྱུར་བ་གཞན་གྱི་སེམས་ཤེས་པ་སྔ་མ་བས་ཁྱད་པར་དུ་འཕགས་པའི་གཞན་གྱི་སེམས་ཤེས་པ་འཐོབ་སྟེ། རྒྱུད་ཀྱི་ཁྱད་པར་གྱི་སྒོ་ནས་གཞན་གྱི་སེམས་ཤེས་པ་ཁྱད་པར་ཅན་དུ་འདོད་དོ། །འདོད་ཆགས་དང་བཅས་པ་དང་། འདོད་
[260a.7]ཆགས་དང་བྲལ་བ་གཉི་གས་རྣམ་པར་གྲོལ་བའི་ལམ་ལ་འཐོབ་བོ་ཞེས་བྱ་བ་ཡིན་ནོ། །སྦྱོར་བའི་ལམ་ལ་ནི་དེ་གཉིས་ཀྱིས་ཞེས་བྱ་བ་ནི་འདོད་ཆགས་དང་བཅས་པ་དང་འདོད་ཆགས་དང་བྲལ་བ་དེ་གཉིས་ཀྱིས་ཀུན་རྫོབ་ཤེས་པ་ཡང་འཐོབ་བོ། །རྣམ་པར་གྲོལ་བའི་ལམ་ལ་ཅིའི་ཕྱིར་རྩོད་ཅེ་ན།
[260b]
[260b.1]ཁ་ཅིག་ན་རེ་མཐོང་བའི་ལམ་དང་འདྲ་བའི་ཕྱིར་དེ་ན་མངོན་པར་རྟོགས་པའི་རྗེས་ལས་བྱུང་བ་དང་འདྲ་བར་དེ་འཐོབ་པོ་ཞེས་ཟེར་རོ། །གཞན་དག་ན་རེ། མངོན་པར་རྟོགས་པ་ཡང་མེད་ལ། མཐོང་བའི་ལམ་དང་འདྲ་བ་ཡང་མ་ཡིན་ནོ་ཞེས་ཟེར་ཏེ། དེ་ལྟར་རྩོད་དོ། །དྲུག་འཐོབ་སྟེ་
[260b.2]སྔ་མ་བཞིན་ནོ་ཞེས་བྱ་བ་ནི་ཆོས་དང་རྗེས་དང་སྡུག་བསྔལ་དང་། ཀུན་འབྱུང་བ་དང་འགོག་པ་དང་ལམ་ཤེས་པ་རྣམས་སོ། །ཀུན་རྫོབ་ཤེས་པ་ནི་མ་ཡིན་ཏེ། མཐོང་བའི་ལམ་དང་འདྲ་བའི་ཕྱིར་རོ་ཞེས་བྱ་བ་འདིར་མཐོང་བའི་ལམ་དང་ཅི་ཞིག་འདྲ་ཞེ་ན། འབྲས་བུ་འཐོབ་པ་
[260b.3]སྟེ། ཇི་ལྟར་མཐོང་བའི་ལམ་གྱིས་རྒྱུན་དུ་ཞུགས་པའི་འབྲས་བུའམ། ལན་ཅིག་ཕྱིར་འོང་བའམ། ཕྱིར་མི་འོང་བའི་འབྲས་བུ་འཐོབ་པ་དེ་བཞིན་དུ་འདིས་ཀྱང་བར་ཆད་མེད་པའི་ལམ་གྱིས་སློབ་པའི་དབང་པོ་སྦྱོང་བ་ན་རྒྱུན་དུ་ཞུགས་པའི་འབྲས་བུ་ལ་སོགས་པ་དབང་པོ་རྣོན་པོས་
[260b.4]བསྡུས་པ་འདུས་བྱས་དག་འཐོབ་ལ། མཐོང་བའི་ལམ་ལ་ཡང་བར་ཆད་མེད་པའི་ལམ་གྱི་གནས་སྐབས་ན་ཀུན་རྫོབ་ཤེས་པ་མི་འཐོབ་པ་ལྟར་འདིར་ཡང་དེ་དང་འདྲའོ། །དེ་ལྟ་བས་ན་མཐོང་བའི་ལམ་དང་འདྲ་བའི་ཕྱིར་བར་ཆད་མེད་པའི་ལམ་ལ་ཀུན་རྫོབ་ཤེས་པ་མི་འཐོབ་པོ། །དེ་བཞིན་
[260b.5]དུ་དྲུག་འཐོབ་པོ་ཞེས་བྱ་བ་ནི་ཆོས་དང་རྗེས་དང་སྡུག་བསྔལ་དང་། ཀུན་འབྱུང་བ་དང་འགོག་པ་དང་། ལམ་ཤེས་པ་རྣམས་སོ། །འདིར་ཡང་སྲིད་པའི་རྩེ་མོའི་གཉེན་པོ་མ་ཡིན་པའི་ཕྱིར་ཀུན་རྫོབ་ཤེས་པ་ཡང་མི་འཐོབ་ལ། བར་ཆད་མེད་པའི་ལམ་ཐམས་ཅད་ལ་བཀག་པའི་ཕྱིར་གཞན་གྱི་
[260b.6]སེམས་ཤེས་པ་ཡང་མ་ཡིན་ནོ། །ལྷག་མ་གང་ཞིག་ཡིན་པའི་ཞེས་བྱ་བ་རྒྱས་པར་འབྱུང་བ་ཇི་ལྟར་འདོད་པ་ལས་འདོད་ཆགས་དང་བྲལ་བའི་རྣམ་པར་གྲོལ་བའི་ལམ་དགུ་པ་ལྷག་མ་ཡིན་ཞེ་ན། དེ་ཡི་གོང་མ་ཆགས་བཅས་ཀྱི། །བསྒོམ་པའི་ལམ་ལ་བདུན་འཐོབ་པོ། །ཞེས་འབྱུང་
[260b.7]བའི་ཕྱིར་རོ། །ས་བདུན་ལས་འདོད་ཆགས་དང་བྲལ་བ་དང་། མངོན་པར་ཤེས་པ་དང་། སྤེལ་མར་བསྒོམ་པ་དག་གི་རྣམ་པར་གྲོལ་བའི་ལམ་རྣམས་ཀྱང་ལྷག་མ་ཡིན་ཏེ། ས་བདུན་ལས་རྒྱལ་མངོན་ཤེས་དང་། །མི་གཡོ་ཐོབ་དང་སྤེལ་བསྒོམས་པའི། །བར་ཆད་མེད་པའི་ལམ་དག་
[261a]
[261a.1]དང་། །ཞེས་འབྱུང་བའི་ཕྱིར་རོ། །དེ་བཞིན་དུ་གང་ཞིག་མི་གཡོ་བ་ཉིད་དུ་འཕོ་བ་དེའི་རྣམ་པར་གྲོལ་བའི་ལམ་ཐ་མ་ལ་ཡང་བཅུ་འཐོབ་པོ་ཞེས་འབྱུང་བའི་ཕྱིར་རྣམ་པར་གྲོལ་བའི་ལམ་བརྒྱད་ཀྱང་ལྷག་མ་ཡིན་ནོ། །འདོད་ཆགས་དང་བྲལ་བ་ཕྱིར་མི་འོང་བའི་སྦྱོར་བ་དང་ཁྱད་
[261a.2]པར་ཅན་གྱི་ལམ་ཐམས་ཅད་ཀྱང་ལྷག་མ་ཡིན་ཏེ། དེ་དག་གི་ཐོབ་པ་མ་སྨོས་པའི་ཕྱིར་རོ། །སློབ་པའི་ནི་དེ་ལྟ་བུ་ཡིན་ནོ་ཞེས་བྱ་བ་ནི་བཤད་པའི་ལྷག་མ་ལ་བརྒྱད་འཐོབ་ཅེས་གང་བསྟན་པ་ཡིན་ནོ། །ཡང་དེ་ལྟར་ཁྱད་པར་དུ་ནི་མ་བྱས་ན། ཇི་ལྟར་ཁྱད་པར་རྟོགས་པར་འགྱུར་ཞེ་ན། མི་སློབ་པ་ནི་
[261a.3]གདོན་མི་ཟ་བར་ཤེས་པ་དགུ་འམ་བཅུ་འཐོབ་པ་དང་ལྡན་པའི་ཕྱིར་རོ། །དེ་ཉིད་ཀྱི་ཕྱིར་མི་སློབ་པ་ནི་མངོན་པར་ཤེས་པ་ལ་སོགས་པ་ཞེས་བྱ་བ་ལ་སོགས་པ་སྨོས་ཏེ། སྩོགས་པ་ཞེས་བྱ་བའི་སྒྲས་ནི་སྤེལ་མར་བསྒོམ་པ་དང་། བསམ་གཏན་ལ་སོགས་པ་བསྡུའོ། །མངོན་པར་ཤེས་པ་མངོན་པར་སྒྲུབ་
[261a.4]པ་དང་། སྤེལ་མར་བསྒོམས་པའི་སྦྱོར་བ་དང་། རྣམ་པར་གྲོལ་བ་དང་། ཁྱད་པར་ཅན་གྱི་ལམ་གང་ཡིན་པ་དེ་དག་ལ་གལ་ཏེ་དུས་ཀྱིས་རྣམ་པར་གྲོལ་བ་ཞིག་ཡིན་ན་ནི་མི་སྐྱེ་བ་ཤེས་པ་མ་གཏོགས་པ་ཤེས་པ་དགུ་འཐོབ་པོ། །གལ་ཏེ་མི་གཡོ་བའི་ཆོས་ཅན་ཞིག་ཡིན་ན་ནི་དེ་ཉིད་བསྣན་ཏེ་
[261a.5]བཅུ་འཐོབ་པོ། །བརྒྱད་དམ་དགུ་འཐོབ་པོ་ཞེས་བྱ་བ་ནི་དུས་ཀྱིས་རྣམ་པར་གྲོལ་བས་ནི་བརྒྱད་འཐོབ་ལ། མི་གཡོ་བའི་ཆོས་ཅན་གྱིས་ནི་གཞན་གྱི་སེམས་ཤེས་པ་མ་གཏོགས་པ་དགུ་འཐོབ་སྟེ། དེའི་བར་ཆད་མེད་པའི་ལམ་དག་ལ་བཀག་པའི་ཕྱིར་རོ། །མངོན་པར་ཤེས་
[261a.6]པའི་རྣམ་པར་གྲོལ་བའི་ལམ་གཉིས་ཞེས་བྱ་བ་ནི་ལྷའི་རྣ་བ་དང་ལྷའི་མིག་གི་མངོན་པར་ཤེས་པའི་རྣམ་པར་གྲོལ་བའི་ལམ་དག་སྟེ། མིག་དང་རྣ་བའི་མངོན་ཤེས་ནི། །ལུང་དུ་མ་བསྟན་ཞེས་འབྱུང་བའི་ཕྱིར་དེ་དག་གི་རྣམ་པར་གྲོལ་བའི་ལམ་དག་ཀྱང་ལུང་དུ་མ་བསྟན་པ་ཡིན་ལ། ཆོས་
[261a.7]ལུང་དུ་མ་བསྟན་པ་ལ་ནི་མ་འོངས་པ་འཐོབ་པ་མེད་དོ། །སོ་སོའི་སྐྱེ་བོ་ནི་འདོད་པ་དང་། བསམ་གཏན་གསུམ་ལས་འདོད་ཆགས་དང་བྲལ་བ་ཞེས་བྱ་བ་ནི་བསམ་གཏན་བཞི་པ་མ་སྨོས་པ་ནི་འདི་ལྟར་བསམ་གཏན་བཞི་པ་ལས་འདོད་ཆགས་དང་བྲལ་བའི་རྣམ་པར་གྲོལ་བའི་ལམ་ཐ་མ་གང་
[261b]
[261b.1]ཡིན་པ་དེ་ལ་ནི་ནམ་མཁའ་མཐའ་ཡས་སྐྱེ་མཆེད་ཀྱི་དངོས་གཞི་འཐོབ་ལ། གཞན་གྱི་སེམས་ཤེས་པ་གཟུགས་མེད་པའི་ཁམས་ཀྱིས་བསྡུས་པ་ཡང་མེད་དེ། གཟུགས་ལ་བརྟེན་ནས་སྒྲུབ་པར་བྱེད་པ་ཡིན་པའི་ཕྱིར་རོ། །སྦྱོར་བ་རྣམས་དང་མངོན་པར་ཤེས་པ་གསུམ་གྱི་རྣམ་པར་གྲོལ་བའི་ལམ་རྣམས་
[261b.2]དང་། ཚད་མེད་པ་ལ་སོགས་པའི་ཡོན་ཏན་མངོན་པར་སྒྲུབ་པ་རྣམས་ཞེས་བྱ་བ་ནི་སྦྱོར་བའི་ལམ་རྣམས་དང་མངོན་པར་ཤེས་པ་གསུམ་གྱིས་རྣམ་པར་གྲོལ་བའི་ལམ་རྣམས་དང་། ཚད་མེད་པ་ལ་སོགས་པའི་ཡོན་ཏན་མངོན་པར་སྒྲུབ་པ་རྣམས་ཞེས་ཚིག་རྣམ་པར་སྦྱར་རོ། །སྩོགས་པ་ཞེས་བྱ་བའི་སྒྲས་
[261b.3]ནི་རྣམ་པར་ཐར་པ་དང་། ཟིལ་གྱིས་གནོན་པའི་སྐྱེ་མཆེད་ལ་སོགས་པའི་ཡོན་ཏན་བསྡུས་ཏེ། ཚད་མེད་པ་ལ་སོགས་པའི་ཡོན་ཏན་མངོན་པར་བསྒྲུབ་པ་ཞེས་བྱ་བ་ཡིན་ནོ། །བསམ་གཏན་གྱི་ས་པ་སྨོས་པ་ནི་ཉེར་བསྡོགས་བསྩལ་བའི་ཕྱིར་ཏེ། དེ་ལ་གཞན་གྱི་སེམས་ཤེས་པ་མེད་དོ། །མངོན་པར་
[261b.4]ཤེས་པ་གསུམ་ནི་རྫུ་འཕྲུལ་གྱི་ཡུལ་ཤེས་པའི་མངོན་པར་ཤེས་པ་དང་། སྔོན་གྱི་གནས་རྗེས་སུ་དྲན་པའི་མངོན་པར་ཤེས་པ་གསུམ་གྱི་རྣམ་པར་གྲོལ་བའི་ལམ་དང་སེམས་ཀྱི་རྣམ་གྲངས་ཤེས་པའི་མངོན་པར་ཤེས་པའོ། །འདོད་པ་དང་བསམ་གཏན་གསུམ་ལས་འདོད་ཆགས་དང་བྲལ་བའི་
[261b.5]རྣམ་པར་གྲོལ་བའི་ལམ་ཐ་མ་དེ་དག་དང་། བསམ་གཏན་གྱི་ས་པ་དག་གི་སྦྱོར་བའི་ལམ་དག་དང་། བསམ་གཏན་གྱི་ས་པ་ཁོ་ནའི་མངོན་པར་ཤེས་པ་གསུམ་གྱི་རྣམ་པར་གྲོལ་བའི་ལམ་དང་ཚད་མེད་པ་དང་། རྣམ་པར་ཐར་པ་དང་། ཟིལ་གྱིས་གནོན་པའི་སྐྱེ་མཆེད་དང་། ཟད་པར་གྱི་སྐྱེ་
[261b.6]མཆེད་ལ་སོགས་པའི་ཡོན་ཏན་མངོན་པར་(བསྒྲུར་,བསྒྲུབ་)པ་རྣམས་ཀྱི་སྦྱོར་བ་དང་། རྣམ་པར་གྲོལ་བ་དང་། ཁྱད་པར་ཅན་གྱི་ལམ་དེ་དག་ལ་དེ་དག་གིས་བསྡུས་པ་གང་ཡིན་པའི་ཀུན་རྫོབ་ཤེས་པ་མ་འོངས་པ་འཐོབ་པོ། །དྲོ་བར་གྱུར་པ་ལ་སོགས་པ་ངེས་པར་འབྱེད་པའི་ཆ་དང་མཐུན་པ་དག་མ་
[261b.7]གཏོགས་པ་ཕ་རོལ་གྱི་སེམས་ཤེས་པ་ཁྱད་པར་ཅན་ཡོན་ཏན་གྱི་ཁྱད་པར་ཐོབ་པ་མངོན་སུམ་དུ་བྱེད་པར་འགྱུར་བ་གང་ཡིན་པ་དེ་ཁོ་ན་ཡང་འཐོབ་པོ། །ངེས་པར་འབྱེད་པའི་ཆ་དང་མཐུན་པ་དེ་དག་ལ་ནི་གཞན་གྱི་སེམས་ཤེས་པ་མི་འཐོབ་པོ། །ཅིའི་ཕྱིར་ཞེ་ན། མཐོང་བའི་ལམ་གྱི་འཁོར་ཡིན་པའི་
[262a]
[262a.1]ཕྱིར་རོ་ཞེས་བྱ་བ་སྨོས་ཏེ། ཇི་ལྟར་མཐོང་བའི་ལམ་ལ་གཞན་གྱི་སེམས་ཤེས་པ་མི་འཐོབ་པ་དེ་བཞིན་དུ། དེའི་འཁོར་ལ་ཡང་མི་འཐོབ་པོ་སྙམ་དུ་བསམས་པ་ཡིན་ནོ། །སྔོན་མེད་པའི་ལམ་འཐོབ་པ་གཞན་ལ་ཞེས་རྒྱས་པར་འབྱུང་བ་ནི་སོ་སོའི་སྐྱེ་བོ་ཁོ་ནའི་སྔོན་མེད་པའི་ལམ་
[262a.2]འཐོབ་པ་གཞན་ལ་སྟེ། འདོད་པ་དང་བསམ་གཏན་གསུམ་ལས་འདོད་ཆགས་དང་མ་བྲལ་བའི་རྣམ་པར་གྲོལ་བའི་ལམ་ཐ་མ་རྣམས་མ་གཏོགས་པ་སྦྱོར་བ་དང་། བར་ཆད་མེད་པ་དང་། ཁྱད་པར་ཅན་གྱི་ལམ་འཐོབ་པ་གང་ཡིན་པ་སྔོན་མེད་པའི་ལམ་ཐོབ་པ་དེ་ལ་ནི་ཀུན་རྫོབ་ཤེས་པ་ཁོ་ན་མ་
[262a.3]འོངས་པ་འཐོབ་ཀྱི་གཞན་གྱི་སེམས་ཤེས་པ་ནི་མ་ཡིན་ནོ། །དེ་བཞིན་དུ་མངོན་པར་ཤེས་པ་གསུམ་དང་། ཚད་མེད་པ་ལ་སོགས་པའི་ཡོན་ཏན་མངོན་པར་སྒྲུབ་པ་དག་གི་བར་ཆད་མེད་པའི་ལམ་ཐོབ་པ་གང་ཡིན་པ་སྔོན་མེད་པའི་ལམ་ཐོབ་པ་དེ་དེ་ལ་ཡང་ཀུན་རྫོབ་ཤེས་པ་ཁོ་ན་མ་འོངས་པ་འཐོབ་ཀྱི་
[262a.4]གཞན་གྱི་སེམས་ཤེས་པ་ནི་མ་ཡིན་ཏེ། དེ་ནི་གཉན་པོ་མ་ཡིན་པའི་ཕྱིར་རོ། །ཡང་ལམ་གང་ལ་ཞེས་བྱ་བ་ནི་འཇིག་རྟེན་པའམ་འཇིག་རྟེན་ལས་འདས་པ་ལའོ། །ལམ་ས་གང་ཡིན་པ་ཞེས་བྱ་བ་ནི་མི་ལྕོགས་པ་མེད་པ་ལ་སོགས་པ་ཟག་པ་དང་བཅས་པ་དང་ཟག་པ་མེད་པའོ། །དང་པོ་ཉིད་
[262a.5]དུ་ས་གང་ཐོབ་པ་ཞེས་བྱ་བ་ནི་འདོད་ཆགས་དང་བྲལ་བའི་སྒོ་ནས་བསམ་གཏན་དང་པོ་ནས་སྲིད་པའི་རྩེ་མོའི་བར་ཏེ། ས་དེ་ལ་ཞེས་བྱ་བའི་ཐ་ཚིག་གོ། །ཇི་ལྟ་ཞེ་ན། གལ་ཏེ་མི་ལྕོགས་པ་མེད་པའི་ས་ལ་བརྟེན་ཏེ། འཇིག་རྟེན་པའི་ལམ་གྱིས་འདོད་པ་ལས་འདོད་ཆགས་དང་བྲལ་ནས་བསམ་
[262a.6]གཏན་དང་པོ་ཐོབ་ན་རྣམ་པར་གྲོལ་བའི་ལམ་དགུ་པ་ལ་ཀུན་རྫོབ་ཤེས་པ་ཉེར་བསྡོགས་ཀྱི་ངོ་བོ་ཉིད་མི་ལྕོགས་པ་མེད་པའི་ས་པ་དང་། དངོས་གཞིའི་ངོ་བོ་ཉིད་བསམ་གཏན་དང་པོའི་ས་པ་འཐོབ་པོ། །དེ་བཞིན་དུ་བསམ་གཏན་གཉིས་པའི་ཉེར་བསྡོགས་ལ་བརྟེན་ཏེ་བསམ་གཏན་དང་པོ་ལས་
[262a.7]འདོད་ཆགས་དང་བྲལ་ནས། བསམ་གཏན་གཉིས་པ་འཐོབ་ན་ཡང་དེ་ཁོ་ན་བཞིན་དུ་ཀུན་རྫོབ་ཤེས་པ་བསམ་གཏན་གཉིས་པའི་ཉེར་བསྡོགས་ཀྱིས་བསྡུས་པ་དང་བསམ་གཏན་གཉིས་པའི་དངོས་གཞིས་བསྡུས་པ་འཐོབ་པོ། །དེ་བཞིན་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ཉེར་བསྡོགས་
[262b]
[262b.1]ལ་བརྟེན་ཏེ། ཅི་ཡང་མེད་པའི་སྐྱེ་མཆེད་ལས་འདོད་ཆགས་དང་བྲལ་ནས་སྲིད་པའི་རྩེ་མོ་འཐོབ་ན་ཞེས་བྱ་བའི་བར་རྒྱས་པར་སྦྱར་བར་བྱའོ། །གང་གི་ཚེ་མི་ལྕོགས་པ་མེད་པའི་ས་ཟག་པ་མེད་པ་ལ་བརྟེན་ཏེ་འདོད་པ་ལས་འདོད་ཆགས་དང་བྲལ་ནས་བསམ་གཏན་དང་པོ་འཐོབ་པ་དེའི་ཚེ་ཡང་དེ་
[262b.2]ཁོ་ན་བཞིན་དུ་ཀུན་རྫོབ་ཤེས་པ་དེ་འཐོབ་པོ། །གང་གི་ཚེ་བསམ་གཏན་དང་པོའི་དངོས་གཞིའི་ས་ལ་བརྟེན་ཏེ་བསམ་གཏན་དང་པོ་ལས་འདོད་ཆགས་དང་བྲལ་ནས་ཟག་པ་མེད་པའི་བསམ་གཏན་དང་པོ་འཐོབ་པ་དེའི་ཚེ་ཡང་ཀུན་རྫོབ་ཤེས་པ་བསམ་གཏན་གཉིས་པའི་ཉེར་བསྡོགས་ཀྱིས་
[262b.3]བསྡུས་པ་བསམ་གཏན་དང་པོའི་རྣམ་པ་དང་པོའི་གཉེན་པོར་གྱུར་པ་ནས། བརྒྱད་པའི་གཉེན་པོར་གྱུར་པའི་བར་འཐོབ་སྟེ། ས་དེ་ནི་དེའི་ཚེ་དང་པོར་འཐོབ་བོ། །རྣམ་པར་གྲོལ་བའི་ལམ་དགུ་པ་ལ་ནི་ཀུན་རྫོབ་ཤེས་པ་མ་འོངས་པ་བསམ་གཏན་གཉིས་པའི་དངོས་གཞིས་བསྡུས་པ་ཡང་འཐོབ་
[262b.4]པོ། །དེ་བཞིན་དུ་ཟག་པ་མེད་པའི་བསམ་གཏན་ཁྱད་པར་ཅན་གྱི་ས་པ་ལ་བརྟེན་པ་ནས་ཅི་ཡང་མེད་པའི་སྐྱེ་མཆེད་ཟག་པ་མེད་པ་ལ་བརྟེན་ཏེ་ཀུན་རྫོབ་ཤེས་པ་འཐོབ་པའི་བར་སྦྱར་བར་བྱའོ། །གང་ལས་ཆགས་བྲལ་བྱ་ཕྱིར་ཞེས་བྱ་བ་ནི་ས་གང་ལས་འདོད་ཆགས་དང་བྲལ་བར་བྱ་བའི་ཕྱིར་རོ། །
[262b.5]གང་ཐོབ་པ་ཞེས་བྱ་བ་ནི་ས་གང་ཞིག་ཐོབ་པ་ནི་གང་ཐོབ་པ་སྟེ། དེ་གཉི་གར་ཡང་ཟག་པ་མེད་པའི་ཤེས་པ་དེའི་འོག་མ་ཡང་འཐོབ་བོ། །ཇི་ལྟ་ཞེ་ན། འགྲེལ་པ་ལས་ས་གོང་ལས་འདོད་ཆགས་དང་བྲལ་བར་བྱ་བ་ལ་ཡང་ཞེས་བྱ་བ་སྨོས་ཏེ། ཡང་ཞེས་བྱ་བའི་སྒྲས་ནི་ས་གང་ཡིན་པ་འབའ་ཞིག་ཏུ་མ་
[262b.6]ཟད་ཀྱི་ཞེས་བྱ་བ་ཡིན་ནོ། །སྦྱོར་བའི་ལམ་ལ་སོགས་པ་ཞེས་བྱ་བ་ལ། སྩོགས་པ་ཞེས་བྱ་བའི་སྒྲས་ནི་བར་ཆད་མེད་པ་དང་། རྣམ་པར་གྲོལ་བ་དང་། ཁྱད་པར་ཅན་གྱི་ལམ་བསྡུའོ། །ལམ་ཡང་རྣམ་པ་གཉིས་ཡིན་ཞེས་བྱ་བ་ནི་འཇིག་རྟེན་པ་དང་འཇིག་རྟེན་ལས་འདས་པའོ། །འདོད་ཆགས་དང་བྲལ་བས་
[262b.7]ས་གང་ཞིག་ཐོབ་པ་ཞེས་བྱ་བ་ནི་ས་གོང་མ་པ་སྟེ། དེའི་ས་པ་དང་ས་འོག་མ་པའི་ཟག་པ་མེད་པའི་ཤེས་པ་རྣམས་ཐོབ་པར་འགྱུར་རོ། །འདི་ལྟ་སྟེ། ཟག་པ་མེད་པའི་བསམ་གཏན་གཉིས་པ་ལ་བརྟེན་ནས་བསམ་གཏན་གསུམ་པ་ལས་འདོད་ཆགས་དང་བྲལ་བར་བྱེད་ན། ལམ་ས་གང་ཡིན་པ་སྟེ།
[263a]
[263a.1]བསམ་གཏན་གཉིས་པའི་ས་པ་ཡིན་པ་དེའི་ས་པའི་ཟག་པ་མེད་པའི་ཤེས་པ་ཡང་འཐོབ་ལ། རྣམ་པར་གྲོལ་བའི་ལམ་དགུ་པ་ལས་ས་གང་ལས་འདོད་ཆགས་དང་བྲལ་བར་བྱེད་པ་སྟེ། ས་གསུམ་ལས་འདོད་ཆགས་དང་བྲལ་བར་བྱེད་པ་དེའི་ས་པ་བསམ་གཏན་གསུམ་པའི་ས་པའི་
[263a.2]ཟག་པ་མེད་པའི་ཤེས་པ་ཡང་འཐོབ་པོ། །ས་འོག་མ་པ་བསམ་གཏན་དང་པོའི་ས་པ་དང་། བསམ་གཏན་ཁྱད་པར་ཅན་གྱི་ས་པ་དང་། མི་ལྕོགས་པ་མེད་པའི་ས་པའི་ཟག་པ་མེད་པའི་ཤེས་པ་ཡང་འཐོབ་སྟེ། ས་འོག་མ་པ་ཡང་དེའི་སྦྱོར་བའི་ལམ་ལ་སོགས་པ་ཡིན་པ་སྲིད་པས་དེ་ལྟ་བུ་འཐོབ་པར་
[263a.3]འགྱུར་རོ། །འོན་ཏེ་བསམ་གཏན་གསུམ་པའི་ཉེར་བསྡོགས་ལ་བརྟེན་ཏེ་བསམ་གཏན་གཉིས་པ་ལས་འདོད་ཆགས་དང་བྲལ་བར་བྱེད་ན། དེ་ན་བར་ཆད་མེད་པའི་ལམ་དང་། རྣམ་པར་གྲོལ་བའི་ལམ་བརྒྱད་ལ་ཉེར་བསྡོགས་ཏེ་ཟག་པ་དང་བཅས་པ་ཡིན་པས་དེའི་ས་པའི་ཟག་པ་མེད་པའི་ཤེས་པ་མི་འཐོབ་
[263a.4]སྟེ། དེ་མེད་པའི་ཕྱིར་རོ། །ས་འོག་མ་པའི་ཟག་པ་མེད་པའི་ཤེས་པ་བསམ་གཏན་གཉིས་པའི་ས་པ་དང་། བསམ་གཏན་དང་པོའི་ས་པ་དང་། མི་ལྕོགས་པ་མེད་པའི་ས་པ་དེ་ལྟ་བུ་ནི་འཐོབ་པོ། །དེ་བཞིན་དུ་གཞན་ལ་ཡང་སྦྱར་བར་བྱ་སྟེ། འདི་ནི་ཕྱོགས་ཡིན་ནོ། །ཟད་པ་ཤེས་པ་ཟག་བཅས་ཀྱང་། །ཞེས་
[263a.5]བྱ་བ་ལ། ཀྱང་ཞེས་བྱ་བའི་སྒྲས་ནི་ཟག་པ་མེད་པ་ཡང་ཞེས་བྱ་བ་ཡིན་ཏེ། དགྲ་བཅོམ་པར་གྱུར་ནས་ཡོན་ཏན་ཟག་པ་དང་བཅས་པ་གང་དག་མངོན་སུམ་དུ་བྱེད་པ་དེ་དག་གནས་སྐབས་དེ་ན་འཐོབ་པར་འགྱུར་རོ། །ཚད་མེད་པ་དང་རྣམ་པར་ཐར་པ་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་
[263a.6]ཟིལ་གྱིས་གནོན་པའི་སྐྱེ་མཆེད་དང་། ཟད་པར་གྱི་སྐྱེ་མཆེད་ལ་སོགས་པ་བསྡུའོ། །སྤྲོག་མ་ཐག་པ་བཅད་དེ་དབུགས་ཕྱིན་པ་ལྟ་བུ་དང་ཆོས་མཐུན་པར་ཞེས་བྱ་བ་ནི་སྤྲོག་མ་གང་ཞིག་ཐག་པས་གཞུངས་ཏེ་བཅིངས་པ་ཐག་པ་བཅད་ནས་སྤྲོག་མ་དབུགས་ཕྱིན་པ་ལྟ་བུ་ཞེས་བྱ་སྟེ། དབུགས་ཕྱིན་
[263a.7]པ་ལྟ་བུ་དང་འདྲ་བའི་སྒྲར་བརྗོད་པའི་ཕྱིར་རོ། །སྤྲོག་མ་ཐག་པ་བཅད་དེ་དབུགས་ཕྱིན་པ་ལྟ་བུ་དེ་དང་ཆོས་མཐུན་པར་ཏེ། ཇི་ལྟར་སྤྲོག་མ་དེ་ཐག་པས་གཞུངས་ཏེ་བཅིངས་པ་ལས་ཐག་པ་བཅད་དེ་དབུགས་ཕྱིན་པ་ལྟ་བུ་དེ་བཞིན་དུ་རྡོ་རྗེ་ལྟ་བུའི་ཏིང་ངེ་འཛིན་གྱིས་ཉོན་མོངས་པའི་ཐོབ་པ་བཅད་དེ། མི་
[263b]
[263b.1]སློབ་པའི་རྒྱུད་ལ་མི་སྡུག་པ་ལ་སོགས་པའི་ཡོན་ཏན་ཇི་སྐད་བཤད་པ་རྣམས་འབྱུང་བ་ན་དབུགས་ཕྱིན་པ་ལྟ་བུ་ཡིན་ནོ། །དབུགས་ཕྱིན་པ་ནི་སྲོག་ཆགས་ཀྱི་ཆོས་ཡིན་པའི་ཕྱིར་ལྟ་བུ་ཞེས་བྱ་བར་སྨོས་སོ། །ཅིའི་ཕྱིར་ཞེ་ན། རང་གི་སེམས་ལ་རྒྱལ་སྲིད་ཆེན་པོ་ཉིད་ཐོབ་ན་ཞེས་བྱ་བ་སྨོས་ཏེ། རྒྱལ་པོ་ཐམས་
[263b.2]ཅད་པས་ལྷག་པའི་རྒྱལ་པོ་ནི་རྒྱལ་སྲིད་ཆེན་པོའོ། །དེའི་ངོ་བོ་ནི་རྒྱལ་སྲིད་ཆེན་པོ་དེ་ཉིད་དོ། །ཉོན་མོངས་པའི་གཞན་གྱི་དབང་དང་བྲལ་བའི་ཕྱིར་རང་གི་སེམས་ལ་རྒྱལ་སྲིད་ཆེན་པོ་ཉིད་དེ། རང་གི་སེམས་ལ་དབང་བ་ཞེས་བྱ་བའི་ཐ་ཚིག་གོ། །དེ་ཐོབ་པའི་དགྲ་བཅོམ་པ་ལ་ཆོས་དགེ་བ་ཐམས་
[263b.3]ཅད་སྐྱེས་ལྟ་བུའི་ཐོབ་པ་དག་གིས་བསྩུ་བའི་ཕྱིར་ཡོན་ཏན་དེ་དག་ཐོབ་པར་འགྱུར་ཏེ། དཔེར་ན་རྒྱལ་པོ་ཡང་རྒྱལ་པོ་འགའ་ཞིག་གིས་རྒྱལ་སྲིད་ཆེན་པོ་ཐོབ་ན་ཡུལ་གྱི་མི་རྣམས་གོས་ལ་སོགས་པའི་སྐྱེས་ཀྱིས་བསྩུ་བ་དེ་དང་འདྲའོ། །དེ་བཞིན་དུ་ཉོན་མོངས་པའི་ཐོབ་པ་བཅད་ན་རང་གི་ཐོབ་
[263b.4]པ་རྙེད་པའི་ཕྱིར་ཡོན་ཏན་རྣམས་དབུགས་ཕྱིན་པ་བཞིན་དུ་དེ་དག་ཆེས་སྦྱངས་པའི་ཐོབ་པ་སྐྱེའོ་ཞེས་བྱ་བའི་ཐ་ཚིག་སྟེ། འདོད་པའི་ཁམས་སུ་དགྲ་བཅོམ་པ་ཉིད་ཐོབ་ན་ནི་ཅི་རིགས་པར་མི་སྡུག་པ་ལ་སོགས་པ་ཐོས་པ་དང་བསམས་པ་དང་བསྒོམས་པ་ལས་བྱུང་བ་ཁམས་གསུམ་པ་ཐོབ་པོ། །གཟུགས་
[263b.5]དང་གཟུགས་མེད་པའི་ཁམས་དག་ཏུ་དགྲ་བཅོམ་པ་ཐོབ་ན་ནི་གོ་རིམས་བཞིན་དུ་ཁམས་གཉིས་པ་དང་། ཁམས་གསུམ་པ་འཐོབ་སྟེ། དེ་བཞིན་དུ་སའི་སྒོ་ནས་ཀྱང་རྟོགས་པར་བྱའོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་སྐྱེས་པ་ཞིག་གིས་དགྲ་བཅོམ་པ་ཉིད་ཐོབ་ན་ནི་དེའི་ས་པ་ཁོ་ནའི་
[263b.6]ཡོན་ཏན་འཐོབ་པོ་ཞེས་བྱ་བར་ཁོང་དུ་ཆུད་པར་བྱའོ། །གང་ཇི་སྙེད་པ་ཞེས་བྱ་བ་རྒྱས་པར་འབྱུང་བ་ལ་སློབ་དཔོན་ནི་འཁོར་བ་ན་འདྲིས་པ་གང་རྣམ་པར་ཉམས་པ་ལས་ཡང་རྙེད་ཅིང་མངོན་སུམ་དུ་བྱེད་པ་དེ་ཡང་མ་འོངས་པ་མི་འཐོབ་སྟེ། འཁོར་བ་ན་ཐོབ་པ་བཏང་བའི་ཕྱིར་རོ། །འདི་ནི་བསམ་
[263b.7]གཏན་དང་ཚད་མེད་པ་ལ་སོགས་པ་འཁོར་བ་ན་འདྲིས་པ་མ་ཡིན་པ་ཁྱད་པར་ཅན་གང་ཟག་པ་མེད་པ་དང་མཐུན་པ་གང་ཡིན་པ་དེ་མངོན་སུམ་དུ་གྱུར་ན། དེ་དང་མཐུན་པ་ཁོ་ན་མ་འོངས་པ་འཐོབ་པོ་ཞེས་སྟོན་ཏོ། །སློབ་དཔོན་འདུས་བཟང་ཡང་དོན་དེ་ཉིད་འཆད་དེ་སྔོན་རྙེད་ཟིན་པ་ནི་མི་
[264a]
[264a.1]འཐོབ་པོ། །གང་རྣམ་པར་ཉམས་པ་ལས་ཀྱང་རྙེད་པ་དེ་ཡང་མི་འཐོབ་སྟེ། ཤུགས་ཀྱིས་ན་གང་སྔོན་མ་རྙེད་པ་དེ་ནི་འབད་ནས་མངོན་དུ་བྱེད་པའི་ཕྱིར་འཐོབ་པོ། །ལམ་རྒྱུན་མ་བཅད་པ་ནི་འབད་ནས་མངོན་དུ་བྱེད་པས། དེས་འཕངས་པ་ཡང་སྟོབས་དང་ལྡན་པའི་ཕྱིར་
[264a.2]མ་འོངས་པ་འཐོབ་པོ། །སྔོན་རྒྱུན་བཅད་པ་ནི་ཐོབ་པ་རྒྱུན་བཅད་པའི་ཕྱིར་འབད་པ་མེད་པར་མངོན་སུམ་དུ་འགྱུར་ཏེ། བྱ་བ་བྱས་པ་དང་འབྲས་བུ་བྱུང་ཟིན་པའི་ཕྱིར་ཤུགས་ཉམས་པས་དེ་མངོན་དུ་གྱུར་ན་མ་འོངས་པ་འཐོབ་པ་མེད་ཀྱི། མ་འོངས་པ་གང་ཞིག་འབད་ནས་བསྐྱེད་པ་དེ་ནི་འཐོབ་པོ་སྙམ་དུ་བསམས་
[264a.3]པ་ཡིན་ནོ། །དེ་ལྟ་ཡིན་ན་རེ་ཞིག་ཀུན་རྫོབ་ཤེས་པ་ནི་ཞེས་བྱ་བ་ལ་སོགས་པ་རྒྱས་པར་འབྱུང་བ་གང་ཡིན་པ་དེ་ནི་འཕགས་པའི་རྒྱུད་ལ་མངའ་བ་ཁོ་ན་ཡིན་པར་གཟུང་སྟེ། འཁོར་བ་ན་འདྲིས་པ་མ་ཡིན་པའི་ཕྱིར་རོ། །འདིར་སློབ་དཔོན་དབྱིག་བཤེས་ཀྱིས་བྲིས་པ་ནི། འདི་ལ་བྱེ་བྲག་ཏུ་སྨྲ་བ་རྣམས་ན་རེ་
[264a.4]འདི་ནི་དེ་ལྟ་མ་ཡིན་ནོ། །ཅིའི་ཕྱིར་ཞེ་ན། འདི་ལྟར་བཏང་བའི་ཕྱིར་འདི་ནི་མ་ཐོབ་པ་ཡིན་ཏེ། དེ་ལྟ་བས་ན་ཐོབ་པ་བཏང་བ་ཡང་ཕྱིས་རྙེད་ན་ཐོབ་པར་འགྱུར་བ་ཁོ་ནའོ་ཞེས་ཟེར་ཞེས་གྲགས་ཏེ། དེ་ཇི་ལྟར་ན་སྔོན་མེད་པ་ཡིན། ཇི་ཙམ་དུ་སྔོན་རྙེད་པ་ཞེས་བྱ་བ་དེ་ལྟ་བུ་ནི་འཇིག་རྟེན་ན་སྔོན་མེད་པར་གྲགས་པ་མ་
[264a.5]ཡིན་ནོ་ཞེའོ། །གཞན་དག་ན་རེ་འདི་ནི་ཚེ་གཅིག་གི་དབང་དུ་བྱས་ནས་བཤད་པ་ཡིན་གྱི་ཚེ་རབས་གཞན་དུ་ནི་མ་ཡིན་ཏེ། ཚེ་འདི་ཁོ་ན་ལ་རྣམ་པར་ཉམས་པ་ལས་ཡང་རྙེད་པ་གང་ཡིན་པ་དེ་ནི་མི་འཐོབ་སྟེ། ཐོབ་པ་བཏང་བའི་ཕྱིར་རོ། །ཚེ་རབས་གཞན་ན་རྙེད་པ་གང་ཡིན་པ་དེ་ནི་ཐོབ་སྟེ། རྙེད་པ་བརྗེད་
[264a.6]པའི་ཕྱིར་རོ་ཞེས་ཟེར་རོ། །འཐོབ་པ་ནི་རྣམ་པ་བཞི་ཞེས་བྱ་བ་ལ། རྙེད་པ་ཉིད་འཐོབ་པ་ཡིན་པས་ན། རྙེད་པ་འཐོབ་པ་སྟེ། མ་འོངས་པ་རྙེད་པ་ཉིད་འཐོབ་པ་ཡིན་ནོ་ཞེས་བྱ་བའི་ཐ་ཚིག་གོ། །དེ་བཞིན་དུ་བསྟེན་པ་ཉིད་དང་། གཉེན་པོ་ཉིད་དང་། ཐག་བསྲིང་བ་ཉིད་ཐོབ་པ་ཡིན་པས་
[264a.7]ཞེས་བརྗོད་པར་བྱའོ། །བསྟེན་པ་ནི་ཅི་ཞིག་ཡིན་ཐག་བསྲིང་བའི་བར་ནི་ཅི་ཞིག་ཡིན་ཞེ་ན། བསྟེན་པ་ནི་ཡང་དང་ཡང་དུ་མངོན་སུམ་དུ་བྱེད་པའོ། །གཉེན་པོ་ནི་ལམ་ཡིན་ཏེ། ཇི་སྐད་དུ་མདོ་ལས་ལུས་བསྒོམས་པ། སེམས་བསྒོམས་པ་ཞེས་འབྱུང་བ་ལྟ་བུ་སྟེ། ལུས་དང་སེམས་ཀྱི་གཉེན་པོ་བསྒོམས་པ་
[264b]
[264b.1]ཞེས་བྱ་བའི་ཐ་ཚིག་གོ། །ལུས་ཀྱི་གཉེན་པོ་ནི་བསམ་གཏན་བཞི་པ་ལས་འདོད་ཆགས་དང་བྲལ་བར་བྱེད་པའི་ལམ་གང་ཡིན་པ་སྟེ། འདི་ལྟར་ལུས་བསྒོམས་པ་དང་། སེམས་བསྒོམས་པ་དང་། ཚུལ་ཁྲིམས་བསྒོམས་པ་ནི་དགེ་སློང་ཞེས་བྱའོ། །ཇི་ལྟར་ལུས་བསྒོམས་པ་ཡིན་ཞེ་ན། ལུས་ལ་འདོད་ཆགས་དང་
[264b.2]བྲལ་བ། སྲིད་པ་དང་བྲལ་བ་སྐོམ་པ་དང་བྲལ་བ། དགའ་བ་དང་བྲལ་བ། འཆུམས་པ་དང་བྲལ་བའོ་ཞེས་འབྱུང་ངོ་། །ཡང་ན་ལུང་ལས་གཟུགས་ཀྱི་འདོད་ཆགས་ཟད་པར་བྱེད་པའི་བར་ཆད་མེད་པའི་ལམ་གང་ཡིན་པ་དེ་ཡིན་ཏེ། དེས་འདོད་ཆགས་དང་བྲལ་བར་འགྱུར་རོ་ཞེས་འབྱུང་ངོ་། །ཐག་བསྲིང་བ་ནི་ཉོན་
[264b.3]མོངས་པའི་ཐོབ་པ་གཅོད་པའོ། །མ་འོངས་པ་རྣམས་ཀྱི་ནི་གཅིག་གོ་ཞེས་བྱ་བ་ནི་རྙེད་པ་འཐོབ་པའོ། །ད་ལྟར་བྱུང་བ་རྣམས་ཀྱི་ནི་གཉི་གའོ་ཞེས་བྱ་བ་ནི་རྙེད་པ་དང་བསྟེན་པ་ཐོབ་པ་དག་གོ། །དེ་ལྟར་ན་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་ཟག་པ་དང་བཅས་པ་དང་། ཟག་པ་མེད་པ་རྣམས་ཀྱི་ཁྱད་
[264b.4]པར་མེད་པར་རྙེད་པ་དང་བསྟེན་པ་ཐོབ་པ་དག་ནི། དགེ་བ་འདུས་བྱས་རྣམས་ཀྱི་ཡིན། །ཞེས་བཤད་པ་ལ་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་ཁྱད་པར་མེད་པར་གཉེན་པོ་དང་ཐག་བསྲིང་བ་འཐོབ་པ་དག་ནི་ཟག་པ་དང་བཅས་པའི་ཆོས་རྣམས་ཀྱི་ཡིན་ཞེས་བཤད་པ་དེའི་ཕྱིར་འདི་
[264b.5]ལྟར་དགེ་བ་ཟག་པ་དང་བཅས་པ་འཐོབ་པར་འདོད་པ་གང་དག་ཡིན་པའི་འཐོབ་པ་བཞི་ཡིན་ཏེ། དགེ་བ་ཡིན་པའི་ཕྱིར་རྙེད་པ་དང་བསྟེན་པ་འཐོབ་པ་དག་ཡིན་ལ། ཟག་པ་དང་བཅས་པ་དག་ཡིན་པའི་ཕྱིར་གཉེན་པོ་དང་ཐག་བསྲིང་བ་འཐོབ་པ་དག་ཡིན་ནོ། །འོ་ན་འདུས་བྱས་ཀྱི་དགེ་བ་ཟག་པ་དང་བཅས་
[264b.6]པ་མ་ཡིན་པ་ཟག་པ་མེད་པ་གང་དག་ཡིན་པ་དང་། ཉོན་མོངས་པ་ཅན་ལུང་དུ་མ་བསྟན་པ་གང་དག་ཡིན་པ་དེ་དག་གི་ཐོབ་པ་དུ་ཞེ་ན། ཟག་པ་མེད་པ་རྣམས་ཀྱི་གཉིས་ཡིན་ཞེས་བྱ་བ་སྨོས་ཏེ། རྙེད་པ་དང་བསྟེན་པ་འཐོབ་པ་དག་ཡིན་ནོ། །ཉོན་མོངས་པ་ཅན་ལུང་དུ་མ་བསྟན་པ་རྣམས་ཀྱི་ཅི་ཞེ་ན། འཐོབ་པ་
[264b.7]གཉིས་ཡིན་ཏེ། གཉེན་པོ་དང་། ཐག་བསྲིང་བ་འཐོབ་པ་དག་གོ། །སྔ་མ་ནི་དབང་པོ་རྣམས་ཀྱི་ཡིན་ཞེས་བྱ་བ་ནི་མིག་ལ་སོགས་པའི་ནི་སྡོམ་པ་འཐོབ་པ་ཡིན་ནོ་ཞེས་བྱ་བའི་ཐ་ཚིག་གོ། །ཕྱི་མ་ནི་ལུས་ཀྱི་ཡིན་ཞེས་བྱ་བ་ནི་རྣམ་པར་འཇིག་པ་འཐོབ་པའོ། །ཡང་ཐོབ་པ་དེ་གཉིས་གོ་རིམས་བཞིན་དུ་
[265a]
[265a.1]ལུང་གིས་བསྟན་པའི་ཕྱིར་དབང་པོ་དྲུག་པོ་འདི་དག་ཅེས་བྱ་བ་རྒྱས་པར་སྨོས་ཏེ། དབང་པོ་སྡོམ་པ་དེ་ནི་དྲན་པ་དང་ཤེས་བཞིན་གྱི་ངོ་བོ་ཉིད་ཡིན་པར་བཤད་ལ། རྣམ་པར་འཇོག་པ་ཡང་ལུས་ལ་དམིགས་པའི་ཉོན་མོངས་པ་ཐག་བསྲིང་བ་ཡིན་ནོ། །དེ་གཉིས་ཞེས་བྱ་བ་རྒྱས་པར་འབྱུང་བ་
[265a.2]ནི་སྡོམ་པ་དང་རྣམ་པར་འཇིག་པ་འཐོབ་པ་དག་ནི་གོ་རིམས་བཞིན་དུ་གཉེན་པོ་དང་ཐག་བསྲིང་བ་འཐོབ་པའི་ཁོངས་སུ་ཡང་འདུས་ལ། གཉི་ག་ཡང་གཉི་གའི་ཁོངས་སུ་འདུས་སོ་ཞེས་བྱས་ཀྱང་འགལ་བ་མེད་དོ། །གང་ཟག་ཐམས་ཅད་ཀྱིས་འཐོབ་པ་སྤྱིར་བཤད་ཀྱི་ཞེས་བྱ་བ་ནི། ཟད་པ་ཤེས་ལ་ཟག་
[265a.3]བཅས་ཀྱང་། །ཞེས་འབྱུང་བའི་ཕྱིར་ཉན་ཐོས་དང་རང་སངས་རྒྱས་དང་། ཡང་དག་པར་རྫོགས་པའི་སངས་རྒྱས་རྣམས་ཀྱིས་ཟད་པ་ཤེས་པའི་སྐད་ཅིག་མ་ལས་ཡོན་ཏན་ཐོབ་པར་བཤད་པ་ཡིན་ནོ། །སྟོབས་བཅུ་ཞེས་བྱ་བ་རྒྱས་པར་འབྱུང་བ་ལ། བྱེ་བྲག་ཏུ་སྨྲ་བ་རྣམས་ནི་སྟོབས་ལ་སོགས་པ་ཐུགས་རྗེ་
[265a.4]ཆེན་པོ་ལ་ཐུག་པ་འདི་དག་མ་འདྲེས་པ་བཅོ་བརྒྱད་དུ་རྣམ་པར་འཇོག་གོ། །ཁ་ཅིག་ནི་སྟོབས་ལ་སོགས་པ་མ་གཏོགས་པ་མ་འདྲེས་པ་བཅོ་བརྒྱད་གཞན་བརྗོད་དེ། འདི་ལྟ་སྟེ། དེ་བཞིན་གཤེགས་པ་ལ་འཁྲུལ་པ་མི་མངའ། ཅ་ཅོ་མི་མངའ། འཕྱར་བ་མི་མངའ། འདུ་ཤེས་ཐ་དད་པ་མི་མངའ།
[265a.5]ཐུགས་ལུང་དུ་མ་བསྟན་པ་མི་མངའ། སོ་སོར་མ་བརྟགས་པའི་བཏང་སྙོམས་མི་མངའ། འདས་པ་ལ་ཡེ་ཤེས་གཟིགས་པ་ཐོགས་པ་མི་མངའ། མ་འོངས་པ་ལ་ཡེ་ཤེས་གཟིགས་པ་ཐོགས་པ་མི་མངའ། ད་ལྟར་བྱུང་བ་ལ་ཡེ་ཤེས་གཟིགས་པ་ཐོགས་པ་མི་མངའ། སྐུའི་ཕྲིན་ལས་ཐམས་ཅད་ཡེ་ཤེས་ཀྱི་
[265a.6]རྗེས་སུ་འབྲང་བ་ཡིན། གསུང་གི་ཕྲིན་ལས་ཐམས་ཅད་ཡེ་ཤེས་ཀྱི་རྗེས་སུ་འབྲང་བ་ཡིན། ཐུགས་ཀྱི་ཕྲིན་ལས་ཐམས་ཅད་ཡེ་ཤེས་ཀྱི་རྗེས་སུ་འབྲང་བ་ཡིན་ཏེ། འདུན་པ་ཉམས་པ་མི་མངའ། བརྩོན་འགྲུས་ཉམས་པ་མི་མངའ། དྲན་པ་ཉམས་པ་མི་མངའ། ཏིང་ངེ་འཛིན་ཉམས་པ་
[265a.7]མི་མངའ། རྣམ་པར་གྲོལ་བ་ཉམས་པ་མི་མངའ། རྣམ་པར་གྲོལ་བའི་ཡེ་ཤེས་གཟིགས་པ་ཉམས་པ་མི་མངའ་ཞེས་བྱ་བ་ཡིན་ནོ། །དེ་ལ་ཅ་ཅོ་ཞེས་བྱ་བ་ནི་བབ་ཅོལ་དུ་སྨྲ་བའོ། །འཕྱར་བ་ནི་རྩེ་བར་སེམས་པའོ། །འདུ་ཤེས་སྣ་ཚོགས་ནི་འདོད་ཆགས་དང་ཞེ་སྡང་དང་གཏི་མུག་གི་སྒོ་ནས་བདེ་
[265b]
[265b.1]བ་དང་། སྡུག་བསྔལ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཡུལ་དག་ལ་འདུ་ཤེས་ཐ་དད་པ་ཉིད་དོ། །ལྷག་མ་ནི་གོ་སླའོ། །སྟོབས་བཅུ་ནི་གནས་དང་གནས་མ་ཡིན་པ་མཁྱེན་པའི་སྟོབས་དང་། ལམ་དང་རྣམ་པར་སྨིན་པ་མཁྱེན་པའི་སྟོབས་དང་། བསམ་གཏན་དང་རྣམ་
[265b.2]པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་མཁྱེན་པའི་སྟོབས་དང་། དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས་དང་། མོས་པ་སྣ་ཚོགས་མཁྱེན་པའི་སྟོབས་དང་། ཁམས་སྣ་ཚོགས་མཁྱེན་པའི་སྟོབས་དང་། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང་།
[265b.3]སྔོན་གྱི་གནས་རྗེས་སུ་དྲན་པ་མཁྱེན་པའི་སྟོབས་དང་། འཆི་འཕོ་དང་སྐྱེ་བ་མཁྱེན་པའི་སྟོབས་དང་། ཟག་པ་ཟད་པ་མཁྱེན་པའི་སྟོབས་སོ། །མདོ་ལས་འབྱུང་བ་ནི། ཚེ་དང་ལྡན་པ་དེ་བཞིན་གཤེགས་པའི་སྟོབས་ནི་བཅུ་སྟེ། བཅུ་གང་ཞེ་ན། ཚེ་དང་ལྡན་པ་འདི་ལ་དེ་བཞིན་གཤེགས་པ་ནི་གནས་
[265b.4]ལ་ཡང་གནས་སུ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གནས་མ་ཡིན་པ་ཡང་གནས་མ་ཡིན་པར་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཚེ་དང་ལྡན་པ་འདི་ནི་དེ་བཞིན་གཤེགས་པའི་སྟོབས་དང་པོ་ཡིན་ཏེ། སྟོབས་དེ་དང་ལྡན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་
[265b.5]རྫོགས་པའི་སངས་རྒྱས་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་སྒྲོགས་པར་མཛད་དོ། །ཚེ་དང་ལྡན་པ་གཞན་ཡང་དེ་བཞིན་གཤེགས་པ་ནི་ལས་ཀྱི་ཆོས་ཡང་དག་པར་བླངས་པ་འདས་པ་དང་། མ་འོངས་པ་
[265b.6]བ་དང་། ད་ལྟར་བྱུང་བ་རྣམས་ལ་གནས་དང་། རྒྱུ་དང་། གཞི་དང་རྣམ་པར་སྨིན་པར་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཚེ་དང་ལྡན་པ་དེ་བཞིན་གཤེགས་པས་གོང་མ་ལྟར་རྣམ་པར་སྨིན་པའི་བར་དུ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་གང་ཡིན་པ་འདི་ནི་དེ་བཞིན་གཤེགས་
[265b.7]པའི་སྟོབས་གཉིས་པ་ཡིན་ཏེ། སྟོབས་དེ་དང་ཞེས་བྱ་བ་སྔ་མ་བཞིན་ནོ། །ཚེ་དང་ལྡན་པ་གཞན་ཡང་དེ་བཞིན་གཤེགས་པ་ནི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བ་དང་། རྣམ་པར་དག་པ་ཡང་
[266a]
[266a.1]དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཚེ་དང་ལྡན་པ་དེ་བཞིན་གཤེགས་པ་ཞེས་བྱ་བ་སྔ་མ་བཞིན་ནོ། །འདི་ནི་དེ་བཞིན་གཤེགས་པའི་སྟོབས་གསུམ་པ་ཡིན་ཏེ། སྟོབས་དེ་དང་ཞེས་བྱ་བ་སྔ་མ་བཞིན་ནོ། །ཚེ་དང་ལྡན་པ་གཞན་ཡང་དེ་བཞིན་གཤེགས་པ་ནི་སེམས་ཅན་གཞན་
[266a.2]རྣམས་དང་། གང་ཟག་གཞན་རྣམས་ཀྱི་དབང་པོ་མཆོག་དང་མཆོག་མ་ཡིན་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཚེ་དང་ལྡན་པ་དེ་བཞིན་གཤེགས་པས་ཞེས་བྱ་བ་སྔ་མ་བཞིན་ནོ། །འདི་ནི་དེ་བཞིན་གཤེགས་པའི་སྟོབས་བཞི་པ་ཡིན་ཏེ། སྟོབས་དེ་དང་ཞེས་བྱ་བ་སྔ་མ་བཞིན་ནོ། །
[266a.3]ཚེ་དང་ལྡན་པ་གཞན་ཡང་དེ་བཞིན་གཤེགས་པ་ནི་སེམས་ཅན་རྣམས་ཀྱི་ཁམས་སྣ་ཚོགས་དང་། ཁམས་དུ་མ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཚེ་དང་ལྡན་པ་དེ་བཞིན་གཤེགས་པས་ཞེས་བྱ་བ་སྔ་མ་བཞིན་ནོ། །འདི་ནི་དེ་བཞིན་གཤེགས་པའི་སྟོབས་ལྔ་པ་ཡིན་ཏེ། སྟོབས་
[266a.4]དེ་དང་ཞེས་བྱ་བ་སྔ་མ་བཞིན་ནོ། །ཚེ་དང་ལྡན་པ་གཞན་ཡང་དེ་བཞིན་གཤེགས་པ་ནི་འཇིག་རྟེན་གྱི་མོས་པ་སྣ་ཚོགས་དང་། མོས་པ་དུ་མ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཚེ་དང་ལྡན་པ་དེ་བཞིན་གཤེགས་པས་ཞེས་བྱ་བ་སྔ་མ་བཞིན་ནོ། །འདི་ནི་དེ་བཞིན་གཤེགས་པའི་
[266a.5]སྟོབས་དྲུག་པ་ཡིན་ཏེ། སྟོབས་དེ་དང་ཞེས་བྱ་བ་སྔ་མ་བཞིན་ནོ། །ཚེ་དང་ལྡན་པ་གཞན་ཡང་དེ་བཞིན་གཤེགས་པ་ནི་ཐམས་ཅད་དུ་འགྲོ་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཚེ་དང་ལྡན་པ་དེ་བཞིན་གཤེགས་པས་ཞེས་བྱ་བ་སྔ་མ་བཞིན་ནོ། །དེ་བཞིན་གཤེགས་
[266a.6]པའི་སྟོབས་བདུན་པ་ཡིན་ཏེ། སྟོབས་དེ་དང་ཞེས་བྱ་བ་སྔ་མ་བཞིན་ནོ། །ཚེ་དང་ལྡན་པ་གཞན་ཡང་དེ་བཞིན་གཤེགས་པ་ནི་སྔོན་གྱི་གནས་རྣམ་པ་དུ་མ་རྗེས་སུ་དགོངས་ཏེ། འདི་ལྟ་སྟེ་ཚེ་གཅིག་ཀྱང་དགོངས། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་།
[266a.7]བརྒྱད་དང་། དགུ་དང་། བཅུ་དང་། ཉི་ཤུ་ནས་འཇིག་པ་དང་ཆགས་པའི་བསྐལ་པ་དུ་མའི་བར་དུ་ཡང་རྗེས་སུ་དགོངས་ཏེ། གང་དུ་བདག་མིང་ནི་འདི་ཞེས་བྱ། རིགས་ནི་འདི་ལྟ་བུ། རུས་ནི་འདི་ལྟ་བུ། ཁ་ཟས་ནི་འདི་ལྟ་བུ་ཟ་ཟ། བདེ་བ་དང་། སྡུག་བསྔལ་ནི་འདི་ལྟ་བུ་ཞིག་ཉམས་སུ་མྱོང་། ཚེ་ནི་
[266b]
[266b.1]འདི་ཙམ་ཐུབ། ཡུན་ནི་འདི་སྲིད་ཅིག་གནས་གནས། ཚེའི་མཐའ་ནི་འདི་སྲིད་ཅིག་ཡིན་པར་གྱུར་པ་ན་སེམས་ནི་དེ་དག་བྱུང་ངོ་། །བདག་གནས་དེ་ནས་ཤི་འཕོས་ནས་ནི་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་ནི་འདིར་སྐྱེས་སོ་ཞེས་སྔོན་གྱི་གནས་རྣམ་པ་དུ་མ་རྣམ་པ་དང་བཅས། ཡུལ་
[266b.2]ཕྱོགས་དང་བཅས། གླེང་གཞི་དང་བཅས་པར་རྗེས་སུ་དགོངས་སོ། །ཚེ་དང་ལྡན་པ་དེ་བཞིན་གཤེགས་པས་ཞེས་བྱ་བ་སྔ་མ་བཞིན་ནོ། །འདི་ནི་དེ་བཞིན་གཤེགས་པའི་སྟོབས་བརྒྱད་པ་ཡིན་ཏེ། སྟོབས་དེ་དང་ཞེས་བྱ་བ་སྔ་མ་བཞིན་ནོ། །ཚེ་དང་ལྡན་པ་གཞན་ཡང་དེ་བཞིན་གཤེགས་པ་ནི་ལྷའི་
[266b.3]སྤྱན་རྣམ་པར་དག་པ་མིའི་ལས་འདས་པས་སེམས་ཅན་འཆི་འཕོ་བ་དང་། སྐྱེ་བ་དང་། ཁ་དོག་བཟང་པོ་དང་། ཁ་དོག་ངན་པ་དང་། དམན་པ་དང་། གྱ་ནོམ་པ་རྣམས་ཀྱང་གཟིགས་ལ་སེམས་ཅན་ལས་ཇི་ལྟ་བ་བཞིན་དུ་ཉེ་བར་འགྲོ་བ་བདེ་འགྲོ་ལ་སོགས་པར་འགྲོ་བ་ཡང་ཡང་དག་པ་ཇི་ལྟ་བ་བཞིན་རབ་
[266b.4]ཏུ་མཁྱེན་ཏེ། སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན་པ། ངག་དང་ཡིད་ཀྱི་ཉེས་པར་སྤྱོད་པ་དང་ལྡན་པ། འཕགས་པ་རྣམས་ལ་སྐུར་པ་འདེབས་པ། ལོག་པར་ལྟ་བའི་ལས་ཀྱི་ཆོས་ཡང་དག་པར་བླངས་པའི་ཕྱིར་རྒྱུ་དེ་དང་རྐྱེན་དེས་ལུས་ཞིག་སྟེ། ཤི་བའི་འོག་ཏུ་ངན་འགྲོ་ལོག་
[266b.5]པར་ལྟུང་བ་སེམས་ཅན་དམྱལ་བ་དག་གི་ནང་དུ་སྐྱེ་བར་འགྱུར་རོ། །སེམས་ཅན་འདི་དག་ནི་ལུས་ཀྱི་ལེགས་པར་སྤྱོད་པ་དང་ལྡན་པ། ངག་དང་ཡིད་ཀྱི་ལེགས་པར་སྤྱོད་པ་དང་ལྡན་པ། འཕགས་པ་རྣམས་ལ་སྐུར་པ་མི་འདེབས་པ་ཡང་དག་པའི་ལྟ་བ་ཅན་ཏེ། ཡང་དག་པའི་ལྟ་བའི་ལས་ཀྱི་ཆོས་
[266b.6]ཡང་དག་པར་བླངས་པའི་ཕྱིར་རྒྱུ་དེ་དང་རྐྱེན་དེས་ལུས་ཞིག་ནས་བདེ་འགྲོ་མཐོ་རིས་སུ་ལྷ་དག་གི་ནང་དུ་སྐྱེ་བར་འགྱུར་རོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཚེ་དང་ལྡན་པ་དེ་བཞིན་གཤེགས་པས་ཞེས་བྱ་བ་སྔ་མ་བཞིན་ནོ། །འདི་ནི་དེ་བཞིན་གཤེགས་པའི་སྟོབས་དགུ་
[266b.7]པ་སྟེ། སྟོབས་དེ་དང་ཞེས་བྱ་བ་སྔ་མ་བཞིན་ནོ། །ཚེ་དང་ལྡན་པ་གཞན་ཡང་དེ་བཞིན་གཤེགས་པ་ནི་ཟག་པ་རྣམས་ཟད་པའི་ཕྱིར་མཐོང་བའི་ཆོས་ཁོ་ན་ལ་ཟག་པ་མེད་པའི་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་རང་གི་མངོན་པར་ཤེས་པས་མངོན་སུམ་དུ་བྱས་ནས་
[267a]
[267a.1]རྫོགས་པར་བྱས་ཏེ། བདག་གི་ཟག་པ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་བྱ་བ་གསུངས་སོ། །ཚེ་དང་ལྡན་པ་དེ་བཞིན་གཤེགས་པས་ཞེས་བྱ་བ་སྔ་མ་བཞིན་ནོ། །འདི་ནི་དེ་བཞིན་གཤེགས་པའི་སྟོབས་བཅུ་པ་ཡིན་
[267a.2]ཏེ། སྟོབས་དེ་དང་ཞེས་བྱ་བ་སྔ་མ་བཞིན་དུ་འབྱུང་ངོ་། །གནས་དང་གནས་མིན་ཤེས་པ་བཅུ། །ཞེས་བྱ་བ་ལ་གནས་དང་། གནས་མ་ཡིན་པ་ནི་གནས་དང་གནས་མིན་ཏེ། དེ་མཁྱེན་པ་ཉིད་སྟོབས་ཡིན་ནོ། །དེ་ནི་ཤེས་པ་བཅུ་ཡིན་ཏེ། ཤེས་པ་བཅུའི་ངོ་བོ་ཉིད་དོ་ཞེས་བྱ་བའི་དོན་ཏོ། །ཇི་ལྟ་ཞེ་ན།
[267a.3]གནས་དང་གནས་མ་ཡིན་པ་ནི་མདོར་བསྡུ་ན་འདུས་བྱས་དང་འདུས་མ་བྱས་སོ། །དེ་ཡང་འདོད་པ་དང་གཟུགས་དང་གཟུགས་མེད་པ་ན་སྤྱོད་པ་དང་། ཟག་པ་མེད་པ་རྣམས་མཚུངས་པར་ལྡན་པ་དང་། ལྡན་པ་མ་ཡིན་པའི་བྱེ་བྲག་གིས་རྣམ་པ་བརྒྱད་དུ་དབྱེའོ། །དེ་བཞིན་དུ་འདུས་མ་བྱས་ཀྱང་དགེ་བ་
[267a.4]དང་ལུང་དུ་མ་བསྟན་པའི་བྱེ་བྲག་གིས་རྣམ་པ་གཉིས་སུ་དབྱེའོ། །དེ་ལ་ཀུན་རྫོབ་ཤེས་པའི་ཡུལ་ནི་ཆོས་བཅུ་ཆར་ཡིན་ཏེ། དེ་ཆོས་བཅུ་ཆར་ལ་འཇུག་གོ་ཞེས་བྱ་བའི་ཐ་ཚིག་གོ། །ཆོས་ཤེས་པ་ནི་ལྔ་སྟེ། འདོད་པ་ན་སྤྱོད་པ་དང་ཟག་པ་མེད་པ་དང་གཞི་དང་འདུས་མ་བྱས་དགེ་བའོ། །རྗེས་སུ་
[267a.5]ཤེས་པ་ནི་བདུན་ཏེ། གཟུགས་དང་གཟུགས་མེད་པ་ན་སྤྱོད་པ་དང་། ཟག་པ་མེད་པ་དྲུག་དང་འདུས་མ་བྱས་དགེ་བའོ། །སྡུག་བསྔལ་དང་ཀུན་འབྱུང་བ་ཤེས་པ་དག་གི་ནི་དྲུག་སྟེ། འདོད་པ་དང་གཟུགས་དང་གཟུགས་མེད་པ་ན་སྤྱོད་པ་རྣམས་སོ། །འགོག་པ་ཤེས་པའི་ནི་གཅིག་སྟེ། འདུས་
[267a.6]མ་བྱས་དགེ་བ་ཁོ་ནའོ། །ལམ་ཤེས་པའི་ནི་གཉིས་ཏེ། ཟག་པ་མེད་པ་དག་གོ། །གཞན་གྱི་སེམས་ཤེས་པའི་ནི་གསུམ་སྟེ། འདོད་པ་དང་གཟུགས་ན་སྤྱོད་པ་དང་། ཟག་པ་མེད་པ་མཚུངས་པར་ལྡན་པ་དག་གོ། །ཟད་པ་དང་མི་སྐྱེ་བ་ཤེས་པ་དག་གི་ཡུལ་ནི་ཆོས་དགུ་ཡིན་ཏེ། འདུས་མ་བྱས་
[267a.7]ལུང་དུ་མ་བསྟན་པ་མ་གཏོགས་སོ། །དེ་ལྟར་བྱས་ན་གནས་དང་གནས་མ་ཡིན་པ་མཁྱེན་པའི་སྟོབས་ནི་ཤེས་པ་བཅུ་ཡིན་ནོ། །ཡང་ཇི་ལྟར་ན་ཆོས་བཅུ་ལ་གནས་དང་གནས་མ་ཡིན་པ་ཞེས་བྱ་ཞེ་ན། སྲིད་པ་ནི་གནས་སོ། །མི་སྲིད་པ་ནི་གནས་མ་ཡིན་པའོ། །ཡང་ན་བུད་མེད་སངས་རྒྱས་ཉིད་བྱེད་པར་
[267b]
[267b.1]འགྱུར་བ་གང་ཡིན་པ་འདི་ནི་གནས་མ་ཡིན་ཞིང་གོ་སྐབས་མེད་དོ། །སྐྱེས་པ་བྱེད་བར་འགྱུར་བ་གང་ཡིན་པ་འདི་ནི་གནས་ཡིན་ནོ། །བུད་མེད་ཚངས་པ་ཉིད་བྱེད་པར་འགྱུར་བ་གང་ཡིན་པ་འདི་ནི་གནས་མ་ཡིན་ཞིང་གོ་སྐབས་མེད་དོ། །སྐྱེས་པ་བྱེད་པར་འགྱུར་བ་གང་ཡིན་པ་འདི་ནི་གནས་ཡིན་ནོ་ཞེས་
[267b.2]བྱ་བ་དང་། དེ་བཞིན་དུ་སྡུག་བསྔལ་འགོག་པ་འདི་ནི་གནས་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པའི་རྣམ་པར་ཞུགས་པ་ནི་གནས་དང་གནས་མ་ཡིན་པ་མཁྱེན་པའི་སྟོབས་ཡིན་པར་ཁོང་དུ་ཆུད་པར་བྱའོ། །ལས་འབྲས་ལ་བརྒྱད་ཅེས་བྱ་བ་ནི་ལས་ཟག་པ་དང་བཅས་པ་དང་དེའི་རྣམ་པར་སྨིན་པ་ནི་
[267b.3]སྡུག་བསྔལ་དང་ཀུན་འབྱུང་བའི་བདེན་པས་བསྡུས་པའི་ཕྱིར་འགོག་པ་དང་ལམ་ཤེས་པ་དག་ནི་མ་ཡིན་ནོ། །དེའི་ཕྱིར་དེ་ལས་གཞན་པ་དེ་དག་ལ་དམིགས་པའི་ཤེས་པ་བརྒྱད་སྲིད་དོ། །བསམ་གཏན་སྩོགས། །དབང་པོ་མོས་དང་ཞེས་བྱ་བ་རྒྱས་པར་འབྱུང་བ་ནི། འདི་དག་ལ་བསམ་གཏན་ལ་སོགས་པ་
[267b.4]ཡོད་པས་ན་བསམ་གཏན་ལ་སོགས་པ་སྟེ། བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པའོ། །བསམ་གཏན་ནི་བཞིའོ། །རྣམ་པར་ཐར་པ་ནི་བརྒྱད་དོ། །ཏིང་ངེ་འཛིན་ནི་སྟོང་པ་ཉིད་ལ་སོགས་པ་གསུམ་མོ། །སྙོམས་པར་འཇུག་པ་ནི་འདུ་ཤེས་མེད་པའི་སྙོམས་
[267b.5]པར་འཇུག་པ་དང་འགོག་པའི་སྙོམས་པར་འཇུག་པ་དང་གཉིས་དང་། མཐར་གྱིས་གནས་པའི་སྙོམས་པར་འཇུག་པ་དགུའོ། །དབང་པོ་ནི་དབང་པོ་རྣམས་སོ། །མོས་པ་ནི་སེམས་ལས་བྱུང་བའོ། །བསམ་གཏན་ལ་སོགས་པ་དང་། དབང་པོ་རྣམས་དང་མོས་པ་དག་ཅེས་ཟླས་དབྱེ་བ་ཡིན་ཏེ། དེ་དག་ལ་ནི་
[267b.6]འགོག་པ་ཤེས་པ་མ་གཏོགས་པ་ཤེས་པ་དགུའོ། །ཇི་ལྟ་ཞེ་ན། བསམ་གཏན་ལ་སོགས་པ་ནི་ཟག་པ་དང་བཅས་པ་དང་ཟག་པ་མེད་པ་དང་། མཚུངས་པར་ལྡན་པ་དང་། ལྡན་པ་མ་ཡིན་པའི་བྱེ་བྲག་གིས་དེ་དག་ལ་དམིགས་པའི་ཤེས་པ་དགུ་སྲིད་དོ། །དེ་དག་འདུས་བྱས་ཡིན་པའི་ཕྱིར་འགོག་
[267b.7]པ་ཤེས་པ་ནི་མ་ཡིན་ནོ། །དད་པ་ལ་སོགས་པའི་དབང་པོ་དག་ལ་ཡང་དབང་པོ་ཆུང་ངུ་དང་། འབྲིང་དང་ཆེན་པོའི་བྱེ་བྲག་གིས་གཙོ་བོ་དང་གཙོ་བོ་མ་ཡིན་པ་མཁྱེན་པ་གང་ཡིན་པ་དེ་ནི་མཆོག་དང་མཆོག་མ་ཡིན་པ་མཁྱེན་པའི་སྟོབས་ཡིན་ལ། ཟག་པ་དང་བཅས་པ་དང་ཟག་པ་མེད་པའི་
[268a]
[268a.1]བྱེ་བྲག་གིས་ཐ་དད་པ་དེ་དག་ལ་ཡང་འགོག་པ་ཤེས་པ་མ་གཏོགས་པ་ཤེས་པ་དགུ་སྲིད་དོ། །མོས་པ་སྣ་ཚོགས་པ་དེ་དག་ནི་ཟག་པ་དང་བཅས་པ་དང་། ཟག་པ་མེད་པ་དང་། ཁམས་གསུམ་པ་ཡིན་པས་དེ་དག་ལ་དམིགས་པའི་ཕྱིར་དེ་ཁོ་ན་བཞིན་དུ་འགོག་པ་ཤེས་པ་མ་གཏོགས་
[268a.2]པ་ཤེས་པ་དགུ་སྲིད་དེ། ཁམས་སྣ་ཚོགས་མཁྱེན་པའི་སྟོབས་ཀྱང་དེ་དང་འདྲའོ། །དེ་ལ་ཁམས་ནི་སློབ་དཔོན་འདུས་བཟང་ན་རེ། སྔོན་གོམས་པའི་བག་ཆགས་ཀྱིས་ཡང་དག་པར་གྲུབ་པའི་བསམ་པ་ལ་བྱའོ་ཞེས་ཟེར་རོ། །དེ་ཡང་སེམས་དང་སེམས་ལས་བྱུང་བ་ཁྱད་པར་ཅན་དེ་དང་དེ་
[268a.3]དག་ཡིན་ཏེ། དེ་བཞིན་དུ་ཟག་པ་དང་བཅས་པ་དང་། ཟག་པ་མེད་པའི་བྱེ་བྲག་གིས་ཐ་དད་པ་རྣམས་ལ་འགོག་པ་ཤེས་པ་མ་གཏོགས་པ་ཤེས་པ་དགུ་ཡིན་ནོ་ཞེས་སྔ་མ་བཞིན་དུ་སྦྱར་བར་བྱའོ། །ལམ་དག་ལ་ཞེས་བྱ་བ་རྒྱས་པར་འབྱུང་བ་ལ། འདིར་ལམ་ནི་དམྱལ་བ་ལ་སོགས་པར་འགྲོ་
[268a.4]བ་མང་པོ་ཞིག་ཡོད་དེ། དམྱལ་བར་འགྲོ་བའི་ལམ་ནས་ལྷར་འགྲོ་བ་དང་འགོག་པར་འགྲོ་བའི་བར་ཡིན་ནོ། །དེ་ལ་དམྱལ་བར་འགྲོ་བའི་ལམ་གང་ཡིན་པ་དེ་ནི་རྒྱུ་ཡིན་ཏེ་དེ་དག་གིས་བསྒྲུབ་པའི་ཕྱིར་རོ། །ལམ་ནི་སྒྲུབ་པ་ཡིན་པར་རུང་སྟེ། དེས་བྲལ་བསྒྲུབ་པར་བྱེད་ན་འགོག་པ་གོ་ཇི་ལྟ་
[268a.5]ཞེ་ན། དེ་ཡང་སྒྲུབ་པ་ཡིན་ཏེ། དེར་བསྒྲུབ་པའི་ཕྱིར་རོ། །ཡང་ན་བསྒྲུབས་པའི་འབྲས་བུ་ཡིན་པའི་ཕྱིར་སྒྲུབ་པ་ཞེས་བྱའོ། །དེ་ཉིད་ཀྱི་ཕྱིར་གལ་ཏེ་ལམ་འབྲས་བུ་དང་བཅས་པར་གཟུང་ན་ནི་ཞེས་བྱ་བ་སྨོས་སོ། །ཐམས་ཅད་དུ་འགྲོ་བའི་ལམ་ནི་འདིར་རྒྱུན་ཡིན་པར་འདོད་དེ། འདི་
[268a.6]ལྟར་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་ཞེས་འབྱུང་ངོ་། །འཇིག་ཚོགས་འབྱུང་བ་དང་བྲལ་བར་འགྲོ་བ་ཞེས་བྱ་བའི་ཐ་ཚིག་སྟེ། དེ་ལ་འཇིག་ཚོགས་ནི་ཉེ་བར་ལེན་པའི་ཕུང་པོ་ལྔའོ། །འབྱུང་བ་ནི་འདིར་ཀུན་འབྱུང་བ་ཡིན་པར་འདོད་དེ། དེ་ལྟར་ན་སྡུག་བསྔལ་གྱི་ཕུང་
[268a.7]པོ་ཆེན་པོ་འབའ་ཞིག་ཀུན་འབྱུང་བར་འགྱུར་རོ་ཞེས་འབྱུང་ངོ་། །འབྲལ་བ་ནི་འཇིག་ཚོགས་འགོག་པ་ཡིན་ནོ། །འདི་ལ་དེ་ཐམས་ཅད་དུ་འགྲོ་བའི་ངང་ཚུལ་ཡོད་པས་ན་ཐམས་ཅད་དུ་འགྲོ་བའོ། །འདི་ནི་ཐམས་ཅད་དུ་འགྲོ་བ་ཡང་ཡིན་ལ་ལམ་ཡང་ཡིན་པས་ཐམས་ཅད་དུ་འགྲོ་བའི་
[268b]
[268b.1]ལམ་སྟེ། དེ་མཁྱེན་པའོ། །དེ་ཉིད་སྟོབས་ཡིན་པས་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་ཏེ། དེ་ནི་ཤེས་པ་བཅུ་ཡིན་པར་སྦྱར་བར་བྱའོ། །གལ་ཏེ་ཟག་པ་ཟད་པ་ཤེས་པ་འགོག་པ་ཤེས་པ་ཁོ་ན་ཡིན་ན་ཞེས་བྱ་བ་ནི་ཟག་པ་རྣམས་ཟད་ཅིང་འགག་པར་ཤེས་པ་སྟེ། ཟག་པ་མེད་
[268b.2]པའི་འགོག་པ་ལ་དམིགས་པའི་ཤེས་པ་ཞེས་བྱ་བའོ། །དེ་ལྟ་ཡིན་ན་ཤེས་པ་དྲུག་ཡིན་ཏེ། འགོག་པ་ཤེས་པའི་རིགས་ཁོ་ན་ཆོས་ཤེས་པ་ལ་སོགས་པའི་བྱེ་བྲག་གིས་ཐ་དད་པར་བྱས་པའི་ཕྱིར་རོ། །འོན་ཏེ་ཟད་པ་ཤེས་པ་ཟག་པ་ཟད་པའི་རྒྱུད་ལ་ཞེས་བྱ་བ་ནི་ཟག་པ་ཟད་པ་ན་ཤེས་པ་གང་
[268b.3]ཡིན་པ་དེ་ནི་ཟག་པ་ཟད་པའི་ཤེས་པའོ་ཞེས་བྱ་བའི་དོན་ཏེ། ཟག་པ་ཟད་པའི་རྒྱུད་ལ་ནི་ཤེས་པ་ཐམས་ཅད་འབྱུང་བས་ཤེས་པ་བཅུ་ཡིན་ནོ། །གཞན་དུ་སངས་རྒྱས་མི་འབྱུང་བའི་ཕྱིར་རོ་ཞེས་བྱ་བ་ནི་འཛམ་བུའི་གླིང་ལས་གཞན་དུ་སངས་རྒྱས་མི་འབྱུང་བའི་ཕྱིར་རོ། །སྟོབས་བཅུ་ནི་
[268b.4]འཛམ་བུའི་གླིང་གི་སྐྱེས་པའི་རྟེན་ཅན་ཡིན་ཏེ། སངས་རྒྱས་ལ་བརྟེན་ནས་སྐྱེ་བའི་ཕྱིར་རོ་སྙམ་དུ་བསམས་པ་ཡིན་ནོ། །ཤེས་པ་རྣམ་པ་བཅུ་པོ་དེ་ཉིད་གཞན་གྱི་ནི་སྟོབས་ཞེས་མི་བྱའི་ཞེས་བྱ་བ་ནི་གཞན་ལ་ནི་དེ་ཡོད་མོད་ཀྱི་ཐོགས་པ་ཡོད་པའི་ཕྱིར་སྟོབས་མ་ཡིན་གྱི། གང་ཐོགས་པ་མེད་པ་
[268b.5]དེ་སྟོབས་མ་འདྲེས་པ་ཡིན་ནོ་སྙམ་དུ་བསམས་པ་ཡིན་ནོ། །རབ་ཏུ་འབྱུང་བར་འདོད་པའི་ཕྱིར་བཏང་བ་ཞེས་བྱ་བ་རྒྱས་པར་འབྱུང་བ་ནི། རབ་ཏུ་འབྱུང་བར་འདོད་པ་ནི་རབ་ཏུ་འབྱུང་བར་འདོད་པའོ། །རབ་ཏུ་འབྱུང་བར་འདོད་པའི་མི་དེ་སླར་བཏང་བ་ན་ནི་རབ་ཏུ་འབྱུང་བར་འདོད་པའི་མི་ཕྱིར་
[268b.6]བཏང་བའོ། །འདི་ནི་ཇི་ལྟར་གཞན་གྱི་ཤེས་པ་ཐོགས་པར་འགྱུར་བའི་དཔེར་བརྗོད་པ་ཡིན་ཏེ། འཕགས་པ་ཤཱ་རིའི་བུས་རབ་ཏུ་འབྱུང་བར་འདོད་པའི་མི་ཞིག་ཐར་པའི་ཆ་དང་མཐུན་པའི་དགེ་བའི་རྩ་བ་རྣམ་པར་བལྟས་ན། མ་མཐོང་ནས་སླར་བཏང་སྟེ་རབ་ཏུ་མ་བྱུང་ངོ་ཞེས་བྱ་བའི་ཐ་ཚིག་གོ། །
[268b.7]བཅོམ་ལྡན་འདས་ཀྱིས་ནི་གཟིགས་ནས་རབ་ཏུ་བྱུང་ངོ་། །དེའི་དབང་དུ་བྱས་ནས་དགེ་སློང་རྣམས་ཀྱིས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། འདི་ཉིད་ཀྱིས་གང་དགྲ་བཅོམ་པ་ཉིད་འཐོབ་པའི་ལས་དེ་བྱས་ཏེ། ལས་རྣམས་ནི་སའི་ཁམས་ལ་རྣམ་པར་མི་སྨིན།
[269a]
[269a.1]ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། ཟིན་པའི་ཕུང་པོ་དང་། ཁམས་དང་། སྐྱེ་མཆེད་དེ་དག་ཁོ་ན་ལ་ཞེས་བྱ་བ་རྒྱས་པར་གསུངས་སོ། །ཡང་འདི་སྐད་དུ། འབྱུང་ཁུངས་རྡོ་ཡི་གསབ་གསེབ་ན། །བག་ལ་ཞ་བའི་གསེར་བཞིན་དུ། །
[269a.2]ངས་ནི་འདི་ཡི་ཐར་པ་ཡི། །ས་བོན་ཤིན་ཏུ་ཕྲ་བ་མཐོང་། །ཞེས་བྱ་བ་གསུངས་སོ་ཞེས་གྲག་གོ། །སྐྱེ་བ་ལ་སོགས་པའི་མཐའ་མ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་འཆི་འཕོ་བའི་མཐའ་མ་ཤེས་པ་བསྡུའོ། །སྲེད་མེད་ཀྱི་བུའི་སྟོབས་ཞེས་བྱ་བ་ལ། སྲེད་མེད་ཅེས་བྱ་བ་འདི་ནི་
[269a.3]སྟོབས་ཀྱི་མིང་ཡིན་ནོ། །གང་ལ་སྟོབས་དེ་ཡོད་པ་དེ་མིང་སྲེད་མེད་ཀྱི་བུ་ཞེས་བྱ་བ་སྟེ། སྟོབས་མཆོག་དང་ཚན་པོ་ཆེ་བཞིན་ནོ། །བཙུན་པ་ཞེས་བྱ་བ་ནི་དཔེས་སྟོན་པའི་གནས་བརྟན་ཡིན་ནོ། །དེ་ལྟ་མ་ཡིན་ན་ཞེས་བྱ་བ་ནི་སྐུའི་སྟོབས་ཐུགས་ཀྱི་སྟོབས་བཞིན་དུ་མི་འདོད་ན་ཡེ་ཤེས་ཀྱི་སྟོབས་
[269a.4]མཐའ་ཡས་པ་བཟོད་པར་མི་འགྱུར་ཏེ། བཅོམ་ལྡན་འདས་བཟོད་པའི་ངང་ཚུལ་ཅན་དུ་མི་འགྱུར་རོ་ཞེས་བྱ་བའི་ཐ་ཚིག་གོ། །གཞན་དག་ཚིགས་ན་ཞེས་བཤད་པར་རུས་པའི་ཚིགས་ཀྱི་ཁྱད་པར་ཉེ་བར་དགོད་པའི་ཕྱིར། ཀླུ་མདུད་པ་ཞེས་བྱ་བ་རྒྱས་པར་སྨོས་ཏེ། སངས་རྒྱས་རྣམས་ཀྱི་ཚིགས་ནི་
[269a.5]ཀླུ་མདུད་པ་ལྟ་བུ་ཡིན་ནོ། །གླུ་མདུད་པ་ནི་ཀླུ་སྦྲེལ་བ་ཡིན་ནོ། །རང་སངས་རྒྱས་རྣམས་ཀྱི་ཚིགས་ནི་ལུ་གུ་རྒྱུད་ལྟ་བུ་ཡིན་ནོ། །འཁོར་ལོས་སྒྱུར་བ་རྣམས་ཀྱི་ཚིགས་ནི་གཟེར་བུས་བཏབ་པ་ལྟ་བུ་ཡིན་ནོ། །གླང་ཆེན་སྩོགས། བདུན་ཅུས་ཀླགས་པའི་སྟོབས་ཡིན་ནོ། །ཞེས་བྱ་བ་ནི་གླང་ཆེན་ལ་སོགས་པ་
[269a.6]སྟེ། གླང་པོ་དང་། སྤོས་ཀྱི་གླང་པོ་ཆེ་དང་། ཚན་པོ་ཆེ་དང་། རབ་གནོན་དང་། ཡན་ལག་མཆོག་དང་། སྟོབས་མཆོག་དང་། སྲེད་མེད་ཀྱི་བུ་དང་བདུན་ཡིན་ནོ། །དེའི་སྟོབས་བཅུར་བསྒྲེས་པ་སྟེ། ཇི་ལྟ་ཞེ་ན། སྨྲས་པ་གླང་པོ་ཆེ་ཕལ་པ་བཅུའི་སྟོབས་གང་ཡིན་པ་དེ་ནི་སྤོས་ཀྱི་གླང་པོ་ཆེ་གཅིག་གི་སྟོབས་
[269a.7]ཡིན་ནོ། །དེ་བཞིན་དུ་སྤོས་ཀྱི་གླང་པོ་ཆེ་བཅུའི་སྟོབས་གང་ཡིན་པ་དེ་ནི་ཚན་པོ་ཆེ་གཅིག་གི་སྟོབས་ཡིན་པ་ནས། དེ་བཞིན་དུ་སྟོབས་མཆོག་བཅུའི་སྟོབས་གང་ཡིན་པ་དེ་ནི་སྲེད་མེད་ཀྱི་བུ་གཅིག་གི་སྟོབས་ཡིན་ཏེ། འདི་ནི་གོང་དུ་བཅུར་བསྒྲེ་བའི་ལུགས་ཡིན་ནོ། །གོང་དུ་བཅུ་འགྱུར་དུ་
[269b]
[269b.1]སྐྱེད་པ་ནི་སྲེད་མེད་ཀྱི་བུའི་སྟོབས་ཀྱི་ཕྱེད་ཡིན་ཞེས་བྱ་བ་ནི་དང་པོར་དེ་ཁོ་ན་བཞིན་དུ་བསྡོམས་ལ་སྟོབས་མཆོག་ལ་སོགས་པ་བཅུའི་སྟོབས་གང་ཡིན་པ་དེ་ནི་སྲེད་མེད་ཀྱི་བུའི་སྟོབས་ཕྱེད་ཡིན་ནོ། །དེ་གཉིས་སུ་བསྒྱུར་བ་ནི་སྲེད་མེད་ཀྱི་བུའི་སྟོབས་ཡིན་ནོ། །སློབ་དཔོན་ནི་ཇི་ལྟར་ཆེས་ཆེ་བ་དེ་ལྟར་རུང་ངོ་ཞེས་ཕྱོགས་
[269b.2]སྔ་མ་ཉིད་གཞུང་འཛུགས་ཏེ། གཏན་ཚིགས་ནི་དེ་ལྟ་མ་ཡིན་ན། མཁྱེན་པའི་སྟོབས་མཐའ་ཡས་པ་བཟོད་པར་མི་འགྱུར་རོ་ཞེས་བྱ་བ་དེ་ཉིད་ཡིན་ནོ། །གཞན་དུ་ན་ལྷས་བྱིན་གྱིས་བསད་པའི་གླང་པོ་ཆེ་ཞབས་ཀྱི་མཐེ་བོས་ར་བ་དང་འོབས་བདུན་འདོར་བར་ཡང་མི་འགྱུར་རོ། །འབྱུང་བ་ཆེན་པོའི་ཁྱད་པར་ཁོ་ན་
[269b.3]ཡིན་ཞེས་བྱ་བ་ནི་སྟོབས་འདི་ནི་འབྱུང་བ་ཆེན་པོའི་ཁྱད་པར་ཁོ་ན་ཡིན་གྱིས་འབྱུང་བ་ལས་གྱུར་པ་ནི་མ་ཡིན་ནོ་ཞེས་སྟོན་པར་བྱེད་དོ། །བདུན་ལས་དོན་གཞན་དུ་གྱུར་པ་རྒྱུར་བྱས་པའི་གཟུགས་ཡིན་ཞེས་བྱ་བ་ནི་གཞན་དག་ན་རེ་སྟོབས་ཞེས་བྱ་བ་ནི་རྒྱུར་བྱས་པའི་གཟུགས་འཇམ་པ་ཉིད་ལ་སོགས་པ་
[269b.4]སྔར་བཤད་པ་དག་ལས་དོན་གཞན་དུ་གྱུར་པ་ཁོ་ན་ཡིན་ནོ་ཞེས་ཟེར་རོ།། །།བམ་པོ་ལྔ་བཅུ་དྲུག་པ། མདོ་ལས་ཇི་སྐད་འབྱུང་བ་བཞིན་ནོ་ཞེས་བྱ་བ་ནི་ཤཱ་རིའི་བུ་བཞི་བོ་འདི་དག་ནི་དེ་བཞིན་གཤེགས་པའི་མི་འཇིགས་པ་ཡིན་ཏེ། མི་འཇིགས་པ་དེ་དག་དང་ལྡན་ན་དེ་བཞིན་གཤེགས་པ་
[269b.5]དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །བཞི་གང་ཞེ་ན། ཀྱེ་མ་ང་མངོན་པར་རྫོགས་པར་སངས་རྒྱས་པ་ལ་འདི་ན་
[269b.6]ཆོས་འདི་དག་མངོན་པར་རྫོགས་པར་སངས་མ་རྒྱས་སོ་ཞེས་ང་ལ་དགེ་སྦྱོང་ངམ་བྲམ་ཟེ་གང་ཡང་རུང་འགའ་ཡང་ཆོས་དང་མཐུན་པས་རྒོལ་ཞིང་གླེང་བར་བྱེད་པའི་རྒྱུ་མཚན་ཡང་དག་པར་རྗེས་སུ་མ་མཐོང་ངོ་། །དེ་ལྟར་ངས་རྒྱུ་མཚན་ཡང་དག་པར་རྗེས་སུ་མ་མཐོང་བས་བདེ་བ་ཐོབ་པ་དང་འཇིགས་པ་
[269b.7]མེད་པར་གྱུར་ཅིང་མི་འཇིགས་པ་ཐོབ་པར་གནས་ཏེ། ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་། ཚངས་པའི་འཁོར་ལོ་བསྐོར། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པ་འདི་ནི་མི་འཇིགས་པ་དང་པོ་ཡིན་ནོ། །ཀྱེ་མ་ང་ཟག་པ་ཟད་པ་ལ་འདི་ན་ཟག་པ་འདི་དག་མ་སྤངས་སོ་
[270a]
[270a.1]ཞེས་ང་ལ་ཞེས་བྱ་བ་སྔ་མ་བཞིན་ནོ། །འཁོར་གྱི་ནང་དུ་སེང་གེའི་སྒྲ་སྒྲོགས་ཞེས་བྱ་བའི་བར་དུ་སྔ་མ་བཞིན་ཏེ། འདི་ནི་མི་འཇིགས་པ་གཉིས་པ་ཡིན་ནོ། །འདི་ནི་ངས་ཉན་ཐོས་རྣམས་ལ་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ན་བར་དུ་གཅོད་པར་མི་འགྱུར་རོ་
[270a.2]ཞེས་ང་ལ་ཞེས་བྱ་བ་སྔ་མ་བཞིན་ཏེ། འདི་ནི་མི་འཇིགས་པ་གསུམ་པ་ཡིན་ནོ། །འདི་ན་ངས་ཉན་ཐོས་རྣམས་ལ་ངེས་པར་འབྱིན་པའི་ལམ་དུ་གསུངས་པ་ངེས་པར་འབྱིན་པ་སྡུག་བསྔལ་ཡང་དག་པར་ཟད་པར་བྱེད་པའི་ཆེད་དུ་ངེས་པར་འབྱུང་བ་ལ་སྡུག་བསྔལ་གྱི་མཐར་བྱེད་པའི་ཆེད་དུ་ངེས་པར་འབྱུང་བ་མ་
[270a.3]ཡིན་ནོ་ཞེས་ང་ལ་ཞེས་བྱ་བ་སྔ་མ་བཞིན་ཏེ། །འདི་ནི་མི་འཇིགས་པ་བཞི་པ་ཡིན་ནོ་ཞེས་འབྱུང་ངོ་། །གནས་དང་གནས་མ་ཡིན་པ་མཁྱེན་པའི་སྟོབས་ཇི་ལྟ་བར་ཞེས་བྱ་བ་རྒྱས་པར་འབྱུང་བ་ནི་གནས་དང་གནས་མ་ཡིན་པ་མཁྱེན་པའི་སྟོབས་ཤེས་པ་བཅུ་དང་ས་ཐམས་ཅད་ཀྱིས་བསྡུས་པ་ཇི་ལྟ་བར་ཀྱེ་མ་ང་མངོན་
[270a.4]པར་རྫོགས་པར་སངས་རྒྱས་པར་གྱུར་པ་ལ་ཞེས་བྱ་བའི་མི་འཇིགས་པ་འདི་ཡང་དེ་དང་འདྲ་སྟེ། དེ་ཁོ་ན་བཞིན་དུ་ཆོས་རྣམས་རྣམ་པ་བཅུར་ཕྱེ་ནས་སྦྱར་བར་བྱའོ། །ཟག་པ་ཟད་པ་མཁྱེན་པའི་སྟོབས་ཤེས་པ་དྲུག་གམ་བཅུ་དང་ས་བཅུ་གཅིག་གིས་བསྡུས་པ་ཇི་ལྟ་བར་ཀྱེ་མ་ང་ཟག་པ་ཟད་པར་གྱུར་
[270a.5]པ་ལ་ཞེས་བྱ་བའི་མི་འཇིགས་པ་འདི་ཡང་དེ་དང་འདྲ་སྟེ། འདིར་ཡང་ཁོ་ན་བཞིན་དུ་ཆོས་རྣམས་རྣམ་པ་བཅུར་ཕྱེ་ནས་ཤེས་པ་དྲུག་གམ་བཅུར་སྦྱར་བར་བྱའོ། །ལས་བདག་གིར་བྱ་བ་མཁྱེན་པའི་སྟོབས་འགོག་པ་དང་། ལམ་ཤེས་པ་མ་གཏོགས་པ་ཤེས་པ་བརྒྱད་དང་། ས་ཐམས་ཅད་ཀྱིས་
[270a.6]བསྡུས་པ་ཇི་ལྟ་བར་ངས་གང་དག་ཉན་ཐོས་རྣམས་ལ་བར་དུ་གཅོད་པའི་ཆོས་སུ་གསུངས་པ་ལ་ཞེས་བྱ་བ་རྒྱས་པར་གསུངས་པ་མི་འཇིགས་པ་གསུམ་པ་ཡང་དེ་དང་འདྲའོ། །འདིར་ཡང་དེ་ཁོ་ན་བཞིན་དུ་ཆོས་རྣམས་ཕྱེ་ནས་སྡུག་བསྔལ་དང་ཀུན་འབྱུང་བའི་བདེན་པས་བསྡུས་པ་ཁོ་ན་བར་དུ་གཅོད་པ་ཡིན་
[270a.7]གྱི། འགོག་པ་དང་ལམ་གྱི་བདེན་པས་བསྡུས་པ་ནི་མ་ཡིན་པས། ཤེས་པ་བརྒྱད་དོ་ཞེས་སྦྱར་བར་བྱའོ། །ཀུན་དུ་འགྲོ་བའི་ལམ་མཁྱེན་པའི་སྟོབས་ཤེས་པ་བཅུའམ་དགུ་དང་། ས་ཐམས་ཅད་ཀྱིས་བསྡུས་པ་ཇི་ལྟ་བར་ངས་ཉན་ཐོས་རྣམས་ཀྱི་ངེས་པར་འབྱུང་བའི་ལམ་དུ་གསུངས་
[270b]
[270b.1]པ་ལ་ཞེས་བྱ་བའི་མི་འཇིགས་པ་འདི་ཡང་དེ་དང་འདྲའོ། །འདི་ཡང་ཟག་པ་དང་བཅས་པ་དང་། ཟག་པ་མེད་པའི་ལམ་འབྲས་བུ་དང་བཅས་པ་གཟུང་ན་ནི་ཤེས་པ་བཅུའོ་དེ་འབྲས་བུ་མེད་པ་གཟུང་ན་ནི་དགུའོ་ཞེས་བྱ་བར་སྦྱར་རོ། །མི་འཇིགས་པ་ནི་མི་སྐྲག་པ་ཡིན་ལ་འདི་དག་གིས་ཀྱང་
[270b.2]མི་སྐྲག་པར་འགྱུར་རོ་ཞེས་བྱ་བ་ནི་བྱེ་བྲག་ཏུ་སྨྲ་བ་ནི་ཤེས་པ་རྣམས་མི་འཇིགས་པ་ཡིན་ནོ་ཞེས་ཟེར་རོ། །སློབ་དཔོན་ནི་ཤེས་པས་བྱས་པ་ནི་མི་འཇིགས་པ་ཡིན་པར་རུང་གི་ཤེས་པ་ཉིད་ནི་མ་ཡིན་ནོ་ཞེས་འཆད་དོ། །ཡང་ན་མི་འཇིགས་པ་ནི་མི་སྐྲག་པ་ཡིན་ལ་ཞེས་བྱ་བ་ནི་འདི་ཐམས་ཅད་སློབ་
[270b.3]དཔོན་གྱི་ཚིག་ཁོ་ན་ཡིན་ཏེ། འདི་ལྟར་དེ་ནི་འཇིགས་པའི་གཉེན་པོས་སེམས་ལས་བྱུང་བའི་ཆོས་ཡིན་ལ་འཇིགས་པ་ཡང་སེམས་ལས་བྱུང་བའི་ཆོས་ཡིན་ནོ། །ཤེས་པ་རྒྱུར་གྱུར་པ་འདི་དག་གིས་ཀྱང་མི་སྐྲག་པར་འགྱུར་བས་ན་ཇི་ལྟར་ཤེས་པ་ཉིད་མི་འཇིགས་པ་ཡིན་ཏེ། ཤེས་པས་བྱས་
[270b.4]པ་ནི་མི་འཇིགས་པ་ཡིན་པར་རུང་གི་ཤེས་པ་ཉིད་ནི་མ་ཡིན་ནོ་ཞེའོ། །མདོ་ལས་ཇི་སྐད་འབྱུང་བ་བཞིན་ནོ་ཞེས་བྱ་བ་ནི་དགེ་སློང་དག་དྲན་པ་ཉེ་བར་གཞག་པ་གསུམ་པོ་འདི་དག་ནི་གང་དག་འཕགས་པ་སྟེན་པར་བྱེད་པ་སྟེ། འཕགས་པས་དེ་དག་བསྟེན་ན་འཁོར་ལ་རྗེས་སུ་སྟོན་པར་འོས་སོ། །
[270b.5]གསུམ་གང་ཞེ་ན། དགེ་སློང་དག་འདི་ན་སྟོན་པ་ཐུགས་བརྩེ་བ་ཐུགས་རྗེ་ཅན། དོན་བཞེད་པ་ཕན་པར་བཞེད་པ་ཐུགས་རྗེ་སྟེ། ཉན་ཐོས་རྣམས་ལ་འདི་ནི་ཁྱེད་ལ་ཕན་པར་བྱེད་པ། འདི་ནི་ཁྱེད་ལ་བདེ་བར་བྱེད་པ་འདི་ནི་ཁྱེད་ལ་ཕན་པ་དང་བདེ་བར་བྱེད་པའོ་ཞེས་ཆོས་སྟོན་པར་མཛད་ཅིང་། ཉན་ཐོས་དེ་དག་དེ་ལ་
[270b.6]ཉན་པར་བྱེད། རྣ་བ་གཏོད་པར་བྱེད་ཀུན་ཤེས་པའི་སེམས་ཉེ་བར་འཇོག་པར་བྱེད། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པར་བྱེད། སྟོན་པའི་བསྟན་པ་ལས་མི་འགལ་བར་བྱེད་ན། དེས་དེ་བཞིན་གཤེགས་པ་ཀུན་དུ་དགྱེས་པར་ཡང་མི་འགྱུར་གྱི། ཡིད་བདེ་བ་ཡང་མ་ཡིན་ཐུགས་ཡ་ཡ་
[270b.7]པོར་ཡང་མི་འགྱུར་གྱི། དེ་ལ་དེ་བཞིན་གཤེགས་པ་དྲན་པ་དང་ཤེས་བཞིན་དུ་བཏང་སྙོམས་སུ་བཞུགས་ཏེ། འདི་ནི་གང་དག་འཕགས་པ་སྟེན་པར་བྱེད་པ་སྟེ། འཕགས་པས་དེ་དག་བསྟེན་ན་ཚོགས་ལ་རྗེས་སུ་སྟོན་པར་འོས་པའི་དྲན་པ་ཉེ་བར་གཞག་པ་དང་པོ་ཡིན་ནོ། །གཞན་ཡང་
[271a]
[271a.1]དགེ་སློང་དག་འདི་ན་སྟོན་པ་ཐུགས་བརྩེ་བ་ཞེས་བྱ་བ་སྔ་མ་བཞིན་ནོ། །ཉན་ཐོས་དེ་དག་དེ་ལ་ཉན་པར་མི་བྱེད། །རྣ་བ་གཏོད་པར་མི་བྱེད། ཀུན་ཤེས་པའི་སེམས་ཉེ་བར་འཇོག་པར་མི་བྱེད། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པར་མི་བྱེད། སྟོན་པའི་བསྟན་པ་ལས་
[271a.2]འགལ་བར་བྱེད་ན། དེས་དེ་བཞིན་གཤེགས་པ་ཀུན་ནས་མནར་སེམས་སུ་ཡང་མི་འགྱུར། མི་བཟོད་པ་ཡང་མ་ཡིན། འཚིག་པ་ཡང་མི་མངའ། ཐུགས་མ་རངས་པ་ཡང་མི་མངའི། དེ་ལ་དེ་བཞིན་གཤེགས་པ་དྲན་པ་དང་ཤེས་བཞིན་དུ་བཏང་སྙོམས་སུ་བཞུགས་ཏེ། འདི་ནི་གང་དག་
[271a.3]འཕགས་པས་སྟེན་པར་བྱེད་པ་སྟེ། འཕགས་པས་དེ་དག་བསྟེན་ན་ཚོགས་ལ་རྗེས་སུ་སྟོན་པར་འོས་པའི་དྲན་པ་ཉེ་བར་གཞག་པ་གཉིས་པ་ཡིན་ནོ། །གཞན་ཡང་དགེ་སློང་དག་འདི་ན་སྟོན་པ་ཐུགས་བརྩེ་བ་ཞེས་བྱ་བ་སྔ་མ་བཞིན་ནོ། །ཉན་ཐོས་ཁ་ཅིག་ནི་དེ་ལ་ཉན་པར་བྱེད་པ་ནས་སྟོན་པའི་
[271a.4]བསྟན་པ་ལས་མི་འགལ་བའི་བར་དུ་བྱེད་ལ། ཁ་ཅིག་ནི་ཉན་པར་མི་བྱེད་པ་ནས་སྟོན་པའི་བསྟན་པ་ལས་འགལ་བའི་བར་དུ་བྱེད་ན། དེས་དེ་བཞིན་གཤེགས་པ་ཀུན་དུ་དགྱེས་པར་ཡང་མི་འགྱུར། ཡིད་བདེ་བ་ཡང་མ་ཡིན། ཐུགས་ཡ་ཡ་པོར་ཡང་མི་འགྱུར་ལ། ཀུན་ནས་མནར་སེམས་
[271a.5]སུ་ཡང་མི་འགྱུར། །མི་བཟོད་པ་ཡང་མ་ཡིན། འཚིག་པ་ཡང་མི་མངའ། ཐུགས་མ་རངས་པ་ཡང་མི་མངའི། དེ་ལ་དེ་བཞིན་གཤེགས་པ་དྲན་པ་དང་ཤེས་བཞིན་དུ་བཏང་སྙོམས་སུ་བཞུགས་ཏེ། འདི་ནི་གང་དག་འཕགས་པ་སྟེན་པར་བྱེད་པ་སྟེ། འཕགས་པས་དེ་དག་བསྟེན་ན་
[271a.6]ཚོགས་ལ་རྗེས་སུ་སྟོན་པར་འོས་པའི་དྲན་པ་ཉེ་བར་གཞག་པ་གསུམ་པ་ཡིན་ནོ་ཞེས་འབྱུང་ངོ་། །དྲན་དང་ཤེས་རབ་ཅེས་བྱ་བ་ནི་གཉི་གའི་ངོ་བོ་ཉིད་ཡིན་པར་སྟོན་ཏེ། དྲན་པ་དང་ཤེས་བཞིན་དུ་ཞེས་འབྱུང་བའི་ཕྱིར་རོ། །གང་གི་ཚེ་ཉན་ཐོས་ཀྱང་ཞེས་བྱ་བ་རྒྱས་པར་འབྱུང་བ་ནི། གང་གི་
[271a.7]ཚེ་ཉན་ཐོས་ཉོན་མོངས་པ་སྤངས་པ་ཡང་སློབ་མ་གུས་པར་ཉན་པ་དང་། གུས་པར་མི་ཉན་པ་དང་། གཉི་ག་དག་ལ་ཀུན་དུ་དགའ་བ་སྟེ། རྗེས་སུ་ཆགས་པའམ། ཀུན་ནས་མནར་སེམས་ཏེ་ཞེ་སྡང་མི་འབྱུང་ན། ཅིའི་ཕྱིར་འདི་དག་སངས་རྒྱས་ཀྱི་ཆོས་མ་འདྲེས་པ་ཐུན་མོང་མ་ཡིན་པ་རྣམས་ཞེས་
[271b]
[271b.1]བ་(བྱ་)ཞེ་ན། བག་ཆགས་དང་བཅས་པར་སྤངས་པའི་ཕྱིར་རོ་ཞེས་བྱ་བ་སྨོས་ཏེ། ཀུན་དུ་དགའ་བ་ལ་སོགས་པ་བག་ཆགས་དང་བཅས་ཏེ་སྤངས་པའི་ཕྱིར་རོ། །བག་ཆགས་ཞེས་བྱ་བ་འདི་ཅི་ཞེ་ན། ཉན་ཐོས་རྣམས་ལས་གང་ཞིག་གིས་སྔོན་ཉོན་མོངས་པ་གང་སྤྱད་པ་དེའི་དེས་བྱས་པའི་ལུས་དང་ངག་གི་
[271b.2]གཡོ་བར་འགྱུར་བའི་རྒྱུ་ནུས་པའི་ཁྱད་པར་སེམས་ལ་ཡོད་པ་ནི་བག་ཆགས་ཞེས་བྱའོ། །བཙུན་པ་གོ་ཆ་མཐའ་ཡས་ན་རེ་བག་ཆགས་ནི་ལུང་དུ་མ་བསྟན་པའི་སེམས་ཀྱི་ཁྱད་པར་ཡིན་ནོ་ཞེས་ཟེར་རོ། །སློབ་དཔོན་གྱིས་ཡང་ན་ཞེས་བྱ་བ་རྒྱས་པར་སྨོས་ཏེ། ཉན་ཐོས་རྣམས་གང་གི་ཡིན་པ་ནི་ཉན་ཐོས་
[271b.3]རྣམས་སངས་རྒྱས་བཅོམ་ལྡན་འདས་ཀྱི་ཡིན་གྱི། ཉན་ཐོས་ཀྱི་མ་ཡིན་ནོ། །ཅིའི་ཕྱིར་ཞེ་ན། ཉན་ཐོས་ཐམས་ཅད་ནི་སངས་རྒྱས་ཀྱི་ཕྱིར་རབ་ཏུ་བྱུང་བ་ཡིན་ནོ། །གུས་པར་ཉན་པ་དང་གུས་པར་མ་ཉན་པ་དང་གཉིས་པོ་དེ་དག་ལ་སྟེ། ཉན་ཐོས་དེ་དག་གུས་པར་ཉན་པ་དང་གུས་པར་མི་ཉན་པ་དང་། གཉི་ག་
[271b.4]དག་ལ་ཉན་པ་དང་ཐོས་པ་དང་ལྡན་པའི་དེ་ཁོ་ན་ལ་དེ་མི་འབྱུང་བ་སྟེ། ཀུན་དུ་དགའ་བ་དང་། ཀུན་ནས་མནར་སེམས་མི་འབྱུང་བ་ཡ་མཚན་རྨད་དུ་བྱུང་བར་རྣམ་པར་གཞག་གི་གཞན་ཉན་ཐོས་ལ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལྟ་མ་ཡིན་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་ཀུན་རྫོབ་ཤེས་པའི་
[271b.5]ངོ་བོ་ཉིད་མ་ཡིན་གྱི་སྙིང་རྗེ་བཞིན་དུ་ཞེ་སྡང་མེད་པའི་ངོ་བོ་ཉིད་ཡིན་པར་གྱུར་ན་ནི་སེམས་ཅན་ཐམས་ཅད་ལ་དམིགས་པར་ཡང་འགྲུབ་པར་མི་འགྱུར་ཏེ། ཁམས་གསུམ་པའི་སེམས་ཅན་ལ་དམིགས་པར་འགྲུབ་པར་མི་འགྱུར་རོ་ཞེས་བྱ་བའི་ཐ་ཚིག་གོ། །དཔེར་ན་སྙིང་རྗེ་ནི་ཁམས་གསུམ་པ་ལ་
[271b.6]དམིགས་པ་མ་ཡིན་ནོ། །འོ་ན་ཅི་ཞེ་ན། སེམས་ཅན་སྡུག་བསྔལ་བ་ལ་དམིགས་པའི་ཕྱིར། འདོད་པ་ན་སྤྱོད་པའི་སེམས་ཅན་ལ་དམིགས་པ་ཡིན་ཏེ། འདི་ཡང་དེ་དང་འདྲ་བར་འགྱུར་རོ་སྙམ་དུ་བསམས་པ་ཡིན་ནོ། །སྙིང་རྗེ་བཞིན་དུ་སྡུག་བསྔལ་གསུམ་གྱི་རྣམ་པ་ཅན་དུ་ཡང་འགྲུབ་པར་མི་
[271b.7]འགྱུར་རོ་ཞེས་བྱ་བར་སྦྱར་རོ། །ཇི་ལྟར་སྙིང་རྗེ་སྡུག་བསྔལ་གྱི་སྡུག་བསྔལ་ཁོ་ནའི་རྣམ་པ་ཅན་ཡིན་གྱི་སྡུག་བསྔལ་གསུམ་གྱི་རྣམ་པ་ཅན་མ་ཡིན་ཏེ། སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་གྱི་རྣམ་པ་ཅན་དེ་ལྟ་བུར་མི་འགྱུར་བ་ཞིག་ན་
[272a]
[272a.1]སྡུག་བསྔལ་གསུམ་གྱི་རྣམ་པ་ཅན་དུ་ཡང་འདོད་དེ། དེའི་ཕྱིར་ཀུན་རྫོབ་ཤེས་པའི་ངོ་བོ་ཉིད་ཡིན་ནོ། །ཆེན་པོའི་སྒྲར་བརྗོད་པ་ཉིད་ཀྱི་རྒྱུ་བསྟན་པའི་ཕྱིར་འདི་ཅིའི་ཕྱིར་ཞེས་བྱ་བ་ལ་སོགས་པ་སྨོས་སོ། །བསོད་ནམས་དང་ཡེ་ཤེས་ཀྱི་ཚོགས་ཆེན་པོས་ཡང་དག་པར་འགྲུབ་པའི་ཕྱིར་རོ་ཞེས་བྱ་བ་ནི། བསོད་
[272a.2]ནམས་ཀྱི་ཚོགས་ཆེན་པོས་ཡང་དག་པར་འགྲུབ་པའི་ཕྱིར་དང་། ཡེ་ཤེས་ཀྱི་ཚོགས་ཆེན་པོས་ཡང་དག་པར་འགྲུབ་པའི་ཕྱིར་རོ་ཞེས་བྱ་བའི་ཐ་ཚིག་སྟེ། དེ་ལ་བསོད་ནམས་ཀྱི་ཚོགས་ཆེན་པོ་ནི་ཕ་རོལ་ཏུ་ཕྱིན་པ་གསུམ་པོ་སྦྱིན་པ་དང་། ཚུལ་ཁྲིམས་དང་བཟོད་པའི་ཕ་རོལ་ཏུ་ཕྱིན་པའོ། །ཡེ་ཤེས་ཀྱི་
[272a.3]ཚོགས་ཆེན་པོ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །བརྩོན་འགྲུས་དང་བསམ་གཏན་གྱི་ཕ་རོལ་ཏུ་ཕྱིན་པ་དག་ནི་གཉི་གར་གཏོགས་པའི་ཕྱིར་རྣམ་པ་གཉི་ག་ཡིན་ཏེ། བརྩོན་འགྲུས་མེད་པར་སྦྱིན་པ་སྦྱིན་པ་དང་། ཚུལ་ཁྲིམས་ཡང་དག་པར་ལེན་པ་དང་། བཟོད་པ་བསྒོམ་པ་ཡང་མེད་པས་བརྩོན་འགྲུས་ནི་བསོད་ནམས་ཀྱི་
[272a.4]ཚོགས་ཆེན་པོ་དང་ཆ་མཐུན་པ་ཡིན་ནོ། །དེ་བཞིན་དུ་བརྩོན་འགྲུས་མེད་པར་ཤེས་རབ་མི་འབྱུང་བས་ཡེ་ཤེས་ཀྱི་ཚོགས་ཆེན་པོ་དང་ཆ་མཐུན་པ་ཡིན་ནོ། །དེ་བཞིན་དུ་བསམ་གཏན་ཡང་བྱམས་པ་ལ་སོགས་པ་ཚད་མེད་པ་རྣམ་པ་བཞི་བསྒོམ་པའི་ཕྱོགས་དང་མཐུན་པ་ནི་བསོད་ནམས་ཀྱི་ཚོགས་ཆེན་པོ་དང་ཆ་མཐུན་
[272a.5]པ་ཡིན་ནོ། །དྲན་པ་ཉེ་བར་གཞག་པ་ལ་སོགས་པ་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་བསྒོམ་པའི་ཕྱོགས་དང་མཐུན་པའི་བསམ་གཏན་ནི་ཡེ་ཤེས་ཀྱི་ཚོགས་ཆེན་པོ་དང་ཆ་མཐུན་པ་ཡིན་ནོ། །དེ་ལྟར་བསོད་ནམས་དང་ཡེ་ཤེས་ཀྱི་ཚོགས་ཆེན་པོ་དག་གིས་ཡང་དག་པར་འགྲུབ་ཅིང་འགྲུབ་
[272a.6]པའི་ཕྱིར། ཐུགས་རྗེ་འདི་ཆེ་བས་ན་ཐུགས་རྗེ་ཆེན་པོའོ། །རྣམ་པ་ནི་སྡུག་བསྔལ་གསུམ་ལ་རྟོགས་པའི་ཕྱིར་རོ་ཞེས་བྱ་བ་ནི་འདི་ལྟར་སྡུག་བསྔལ་གསུམ་ཆར་ལ་ཡང་དམིགས་ཀྱི། སྙིང་རྗེ་བཞིན་དུ་སྡུག་བསྔལ་གྱི་སྡུག་བསྔལ་ཁོ་ན་ལ་དམིགས་པ་ནི་མ་ཡིན་ནོ། །དམིགས་པ་ནི་ཁམས་གསུམ་པའི་
[272a.7]སེམས་ཅན་ལ་དམིགས་པའི་ཕྱིར་རོ་ཞེས་བྱ་བ་ནི་འདི་ལྟར་ཁམས་གསུམ་དུ་སྐྱེས་པའི་སེམས་ཅན་རྣམས་ལ་དམིགས་ཀྱི། སྙིང་རྗེ་བཞིན་དུ་འདོད་པའི་ཁམས་སུ་སྐྱེས་པ་ཁོ་ན་ལ་དམིགས་པ་ནི་མ་ཡིན་ཏེ། སྤྱོད་ཡུལ་འདོད་པའི་སེམས་ཅན་ཡིན། །ཞེས་འབྱུང་བའི་ཕྱིར་རོ། །མཉམ་པ་ཉིད་ནི་
[272b]
[272b.1]སེམས་ཅན་ཐམས་ཅད་ལ་འདྲ་བར་འཇུག་པའི་ཕྱིར་རོ་ཞེས་བྱ་བ་ནི་འདི་ལྟར་ཁམས་གསུམ་དུ་གཏོགས་པའི་སེམས་ཅན་ཐམས་ཅད་ལ་འདུ་བྱེད་ཀྱི་སྡུག་བསྔལ་གྱི་རྣམ་པར་འདྲ་བར་འཇུག་སྟེ། དེའི་ཕྱིར་ཡང་ཐུགས་རྗེ་ཆེན་པོ་ཞེས་བྱའོ། །དེ་བས་ཆེས་ཆེ་བ་མེད་པའི་ཕྱིར་རོ་ཞེས་བྱ་བ་ནི་ཤེས་
[272b.2]རབ་ཀྱི་ངོ་བོ་ཉིད་ཡིན་པས་ཤིན་ཏུ་རྣོ་བའི་ཕྱིར་ཏེ། ཇི་ལྟར་དེས་ཐུགས་རྗེ་ཆེ་བ་ལྟར་སྙིང་རྗེ་ནི་དེ་ལྟ་མ་ཡིན་ནོ། །ཐ་དད་དུ་བྱ་བ་ནི་ཁྱད་པར་རོ། །ཞེ་སྡང་མེད་པ་དང་གཏི་མུག་མེད་པའི་ངོ་བོ་ཉིད་ཡིན་པའི་ཕྱིར་རོ་ཞེས་བྱ་བ་ནི་གོ་རིམས་བཞིན་དུ་སྙིང་རྗེ་ནི་ཞེ་སྡང་མེད་པའི་ངོ་བོ་ཉིད་ཡིན་པའི་ཕྱིར་ལ། ཐུགས་
[272b.3]རྗེ་ཆེན་པོ་ནི་གཏི་མུག་མེད་པའི་ངོ་བོ་ཉིད་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །སྡུག་བསྔལ་གཅིག་དང་གསུམ་གྱི་རྣམ་པ་ཅན་ཡིན་པའི་ཕྱིར་རོ་ཞེས་བྱ་བ་ནི་སྙིང་རྗེ་ནི་སྡུག་བསྔལ་གཅིག་གི་རྣམ་པ་ཅན་ཡིན་པའི་ཕྱིར་ལ། ཐུགས་རྗེ་ཆེན་པོ་ནི་སྡུག་བསྔལ་གསུམ་གྱི་རྣམ་པ་ཅན་
[272b.4]ཡིན་པའི་ཕྱིར་ཏེ། འོག་མ་ཐམས་ཅད་ལ་ཡང་གྲངས་བཞིན་དུ་སྦྱར་བར་བྱའོ། །བསམ་གཏན་བཞི་དང་བསམ་གཏན་བཞི་པའི་ས་པ་ཡིན་པའི་ཕྱིར་རོ་ཞེས་བྱ་བ་ནི་སྙིང་རྗེ་ནི་བསམ་གཏན་བཞི་པའི་ས་པ་ཡིན་ནོ། །མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་དག་ནི་བསམ་
[272b.5]གཏན་དང་པོ་སྨོས་པས་བསྡུས་པའི་ཕྱིར་ས་དྲུག་པ་ཞེས་ནི་མ་བཤད་དོ། །ཐུགས་རྗེ་ཆེན་པོ་ནི་བསམ་གཏན་བཞི་པའི་ས་པ་ཁོ་ན་ཡིན་ཏེ་ཏིང་ངེ་འཛིན་ཐམས་ཅད་ལས་སུ་རུང་བ་ཉིད་ཀྱིས་དེ་ཁོ་ནས་དེ་སྐྱེད་པར་ནུས་པའི་ཕྱིར་རོ། །ཉན་ཐོས་ལ་སོགས་པ་དང་། སངས་རྒྱས་ཀྱི་རྒྱུད་ལས་སྐྱེས་པ་ཡིན་
[272b.6]པའི་ཕྱིར་རོ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་རང་སངས་རྒྱས་དང་སོ་སོའི་སྐྱེ་བོ་རྣམས་བསྡུའོ། །འདོད་པའི་ཁམས་དང་སྲིད་པའི་རྩེ་མོ་ལས་འདོད་ཆགས་དང་བྲལ་བས་ཐོབ་པའི་ཕྱིར་རོ་ཞེས་བྱ་བ་ནི་སྙིང་རྗེ་ནི་འདོད་པ་ལས་འདོད་ཆགས་དང་བྲལ་བས་འཐོབ་ལ། ཐུགས་རྗེ་ཆེན་པོ་
[272b.7]ནི་སྲིད་པའི་རྩེ་མོ་ལས་འདོད་ཆགས་དང་བྲལ་བས་འཐོབ་པོ། །ཡོངས་སུ་མི་སྐྱོབ་པ་དང་ཡོངས་སུ་སྐྱོབ་ཅེས་བྱ་བ་ནི་སྙིང་རྗེ་ནི་ཉན་ཐོས་ལ་སོགས་པར་སྙིང་རྗེ་བར་བྱེད་པ་འབའ་ཞིག་ཏུ་ཟད་པས་ཡིད་ལ་ཉམ་ང་བ་འབའ་ཞིག་ཏུ་ཟད་ཀྱི་ཞེས་བྱ་བའི་ཐ་ཚིག་སྟེ་འཁོར་བའི་འཇིགས་པ་ལས་ནི་
[273a]
[273a.1]ཡོངས་སུ་མི་སྐྱོབ་པོ། །ཐུགས་རྗེ་ཆེན་པོས་ནི་བཅོམ་ལྡན་འདས་ཐུགས་རྗེ་བར་མཛད་པ་ནི་འཁོར་བའི་འཇིགས་པ་ཆེན་པོ་ལས་ཡོངས་སུ་སྐྱོབ་པོ། །མི་འདྲ་བ་དང་འདྲ་བར་ཐུགས་རྗེ་མཛད་པའི་ཕྱིར་རོ་ཞེས་བྱ་བ་ནི་སྙིང་རྗེས་ནི་སྡུག་བསྔལ་བ་ཁོ་ན་ལ་སྙིང་རྗེ་བའི་ཕྱིར་མི་འདྲ་བར་སྙིང་རྗེ་བར་
[273a.2]བྱེད་དེ། ཐུགས་རྗེ་ཆེན་པོས་ནི་སེམས་ཅན་ཐམས་ཅད་ལ་འདྲ་བར་ཐུགས་རྗེ་བར་མཛད་པའི་ཕྱིར་རོ། །སྔོན་གྱི་བསོད་ནམས་དང་ཡེ་ཤེས་ཀྱི་ཚོགས་ཀྱིས་ཡང་དག་པར་འགྲུབ་པ་ཞེས་བྱ་བ་ནི་ཚེ་རབས་སྔ་མ་དག་གི་བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་སྔར་བཤད་པས་ཡང་དག་པར་འགྲུབ་
[273a.3]པོ། །ཆོས་ཀྱི་སྐུ་ཡོངས་སུ་འགྲུབ་ཅེས་བྱ་བ་ལ། ཆོས་ཀྱི་སྐུ་ནི་ཟག་པ་མེད་པའི་ཆོས་ཀྱི་རྒྱུན་གྱི་ཚོགས་སམ་གནས་ཡོངས་སུ་གྱུར་པ་ཡིན་ནོ། །དོན་སྤྱོད་པ་ཞེས་བྱ་བ་ལ། །དོན་ནི་འཇིག་རྟེན་གྱི་མཐོ་རིས་དང་བྱང་གྲོལ་མཛད་པའོ། །དེ་སྒྲུབ་པ་ནི་དོན་སྤྱོད་པ་སྟེ། སངས་རྒྱས་ཐམས་ཅད་ཀྱི་གཞན་གྱི་དོན་
[273a.4]མཛད་པའི་རྒྱུ་ཐུགས་རྗེ་ཆེན་པོ་ནི་འདྲའོ། །དུས་ཇི་ལྟ་བ་བཞིན་དུ་ཞེས་བྱ་བ་ནི་ཐམས་ཅད་ལ་སྦྱར་རོ། །ཇི་ལྟ་ཞེ་ན། ཡུན་ཤིན་ཏུ་རིང་བ་དང་ཡུན་ཐུང་ངུར་འཚོ་བའི་ཕྱིར་ཞེས་བྱ་བ་སྨོས་ཏེ། དུས་ཇི་ལྟ་བ་བཞིན་དུ་སྐྱེ་དགུ་རྣམས་ཀྱི་ཚེ་རིང་བའི་ཚེ་ནི་སངས་རྒྱས་བཅོམ་ལྡན་འདས་སྐུ་ཚེ་རིང་བར་འབྱུང་ལ། ཐུང་
[273a.5]བའི་ཚེ་ནི་ཐུང་བར་རོ། །དེ་བཞིན་དུ་ཅི་རིགས་པར་འཇིག་རྟེན་གྱི་རྒྱལ་རིགས་བཀུར་བའི་ཚེ་ནི་རྒྱལ་རིགས་སུ་འབྱུང་ལ། བྲམ་ཟེ་བཀུར་བའི་ཚེ་ནི་བྲམ་ཟེར་རོ། །དུས་ཇི་ལྟ་བ་བཞིན་དུ་འོད་སྲུངས་ལ་སོགས་པའི་རིགས་དང་། གཽ་ཏ་མ་ལ་སོགས་པའི་རིགས་སུ་ཡང་འབྱུང་ངོ་། །དེ་བཞིན་དུ་འཇིག་རྟེན་པའི་
[273a.6]བོང་ཚོད་ཆུང་བའི་ཚེ་ནི་སྐུ་བོང་ཚོད་ཆུང་ལ། བོང་ཚོད་ཆེ་བའི་ཚེ་ནི་སྐུ་བོང་ཚོད་ཆེ་བའོ། །རྒྱུ་ཕུན་སུམ་ཚོགས་པ་ནི་བསོད་ནམས་དང་ཡེ་ཤེས་ཀྱི་ཚོགས་ནི་མཚན་ཉིད་དོ། །འབྲས་བུ་ཕུན་སུམ་ཚོགས་པ་ནི་ཆོས་ཀྱི་སྐུའི་མཚན་ཉིད་དོ། །ཕན་འདོགས་པ་ཕུན་སུམ་ཚོགས་པ་ནི་འགྲོ་བའི་དོན་སྤྱོད་པའི་མཚན་ཉིད་དོ། །
[273a.7]བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་ལ་གོམས་པ་ཞེས་བྱ་བ་ལ། བསོད་ནམས་ནི་ཕ་རོལ་ཏུ་ཕྱིན་པ་ལྔའི་ངོ་བོ་ཉིད་དོ། །ཡེ་ཤེས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དག་སྟེ། བསོད་ནམས་དང་ཡེ་ཤེས་དེ་དག་ཐམས་ཅད་ཀྱི་ཚོགས་སོ། །དེ་གོམས་པ་ནི་ཡང་དང་ཡང་དུ་སྦྱོར་བའོ། །
[273b]
[273b.1]ཡུན་རིང་པོ་ནས་གོམས་པ་ཞེས་བྱ་བ་ནི་བསྐལ་པ་གྲངས་མེད་པ་གསུམ་དུའོ། །བར་ཆད་མེད་པའི་གོམས་པ་ཞེས་བྱ་བ་ནི་བར་ཆད་དང་བཅས་པ་མ་ཡིན་པར་རོ། །གུས་པར་བྱས་ཏེ་གོམས་པ་ཞེས་བྱ་བ་ནི་གུས་པ་དྲག་པོས་སོ། །འབྲས་བུ་ཕུན་སུམ་ཚོགས་པ་ཡང་རྣམ་པ་བཞི་སྟེ་ཞེས་བྱ་བ་ནི་
[273b.2]ཆོས་ཀྱི་སྐུ་ཡོངས་སུ་གྲུབ་པས། ཡེ་ཤེས་ལ་སོགས་པ་ཕུན་སུམ་ཚོགས་པ་བཞིར་འགྱུར་བས་དེ་དག་ཀྱང་འབྲས་བུ་ཕུན་སུམ་ཚོགས་པ་ཞེས་བྱ་བར་རྣམ་པར་གཞག་གོ། །ཡེ་ཤེས་ཕུན་སུམ་ཚོགས་པ་ཡང་རྣམ་པ་བཞི་སྟེ་ཞེས་འཆད་པར་འགྱུར་ལ། དེ་བཞིན་དུ་སྤངས་པ་ཕུན་སུམ་ཚོགས་པ་དང་།
[273b.3]མཐུ་ཕུན་སུམ་ཚོགས་པ་དང་། གཟུགས་ཀྱི་སྐུ་ཕུན་སུམ་ཚོགས་པ་ཡང་རྣམ་པ་བཞི་སྟེ་ཞེས་འཆད་པར་འགྱུར་བས་འདི་དག་ནི་དེའི་ཚེ་ཉིད་ལ་འཆད་པར་འགྱུར་རོ། །ཕན་འདོགས་པ་ཕུན་སུམ་ཚོགས་པ་ཡང་རྣམ་པ་བཞི་སྟེ། ཇི་ལྟ་ཞེ་ན། །ངན་སོང་གསུམ་དང་འཁོར་བའི་སྡུག་བསྔལ་ལས་གཏན་དུ་
[273b.4]ཐར་པར་མཛད་པ་ཕུན་སུམ་ཚོགས་པའོ་ཞེས་བྱ་བ་ནི་དམྱལ་བ་ལ་སོགས་པ་ངན་སོང་གསུམ་དང་འཁོར་བ་སྟེ། དེ་དག་གི་སྡུག་བསྔལ་ལས་གཏན་དུ་ཐར་པར་མཛད་པ་དེ་ཉིད་ཕུན་སུམ་ཚོགས་པ་ཡིན་ནོ། །ཡང་ན་ཐེག་པ་གསུམ་དང་བདེ་འགྲོ་ལ་འགོད་པར་མཛད་པ་ཕུན་སུམ་ཚོགས་པའོ་ཞེས་བྱ་བ་ནི་ཉན་
[273b.5]ཐོས་ཀྱི་ཐེག་པ་ལ་སོགས་པ་ཐེག་པ་གསུམ་དང་བདེ་འགྲོ་ལ་འགོད་པའོ། །དེ་ཉིད་ཕུན་སུམ་ཚོགས་པ་ཡིན་ཏེ་ཡང་ན་ཕན་འདོགས་པ་ཕུན་སུམ་ཚོགས་པ་རྣམ་པ་བཞི་དེ་ཡིན་ནོ། །མ་བསྟན་པར་མཁྱེན་པ་ཞེས་བྱ་བ་ནི་བདག་ཉིད་ཀྱིས་མངོན་པར་རྫོགས་པར་བྱང་ཆུབ་པའི་དོན་གྱིས་སོ། །ཐམས་ཅད་མཁྱེན་
[273b.6]པ་ཞེས་བྱ་བ་ནི་རང་དང་སྤྱིའི་མཚན་ཉིད་མ་ལུས་པར་ཐུགས་སུ་ཆུད་པའི་དོན་གྱིས་སོ། །རྣམ་པ་ཐམས་ཅད་མཁྱེན་པ་ཞེས་བྱ་བ་ནི་རྣམ་པ་ཀུན་མཁྱེན་པའི་དོན་གྱིས་སོ། །མ་འབད་པར་མཁྱེན་པ་ཞེས་བྱ་བ་ནི་བཞེད་པ་ཙམ་གྱིས་ཐུགས་སུ་ཆུད་པའི་དོན་གྱིས་སོ། །ཉོན་མོངས་པ་ཐམས་ཅད་སྤངས་པ་ཞེས་བྱ་བ་
[273b.7]ནི་མཐོང་བ་དང་བསྒོམ་པས་སྤང་བར་བྱ་བའི་ཉོན་མོངས་པ་ཁམས་གསུམ་པ་ཆད་པའི་ཕྱིར་རོ། །གཏན་དུ་སྤངས་པ་ཞེས་བྱ་བ་ནི་ཡོངས་སུ་མི་ཉམས་པའི་སྒོ་ནས་སོ། །བག་ཆགས་དང་བཅས་ཏེ་སྤངས་པ་ཞེས་བྱ་བ་ནི་རྗེས་སུ་འབྲེལ་པ་མེད་པའི་ཕྱིར་རོ། །ཏིང་ངེ་འཛིན་དང་སྙོམས་པར་འཇུག་པའི་སྒྲིབ་པ་ཐམས་
[274a]
[274a.1]ཅད་སྤངས་པའོ་ཞེས་བྱ་བ་ནི་གཉི་གའི་ཆ་ལས་རྣམ་པར་གྲོལ་བའི་ཕྱིར་རོ། །ཕྱིའི་ཡུལ་སྤྲུལ་པ་དང་ཡོངས་སུ་བསྒྱུར་བ་དང་། བྱིན་གྱིས་རློབ་པའི་མངའ་ཕུན་སུམ་ཚོགས་པ་ཞེས་བྱ་བ་དེ་ལ་སྤྲུལ་པ་ནི་ཕྱིའི་ཡུལ་སྔོན་མེད་པ་འབྱིན་པའོ། །ཡོངས་སུ་བསྒྱུར་བ་ནི་རྡོ་ལ་སོགས་པ་གསེར་
[274a.2]ལ་སོགས་པའི་དངོས་པོར་མཛད་པའོ། །བྱིན་གྱིས་རློབ་པ་ནི་ཡུན་རིང་དུ་གནས་པར་མཛད་པའོ། །སྐུ་ཚེ་གཏོང་བ་དང་བྱིན་གྱིས་རློབ་པའི་མངའ་ཕུན་སུམ་ཚོགས་པ་ནི་སྐུ་ཚེ་གཏོང་བ་དང་བྱིན་གྱིས་རློབ་པར་མཛད་པ་ལ་མངའ་ཕུན་སུམ་ཚོགས་པས་སོ། །བསྒྲིབས་པ་དང་ཞེས་བྱ་བ་རྒྱས་པར་འབྱུང་བ་ནི་བསྒྲིབས་
[274a.3]པ་ལ་གཤེགས་པ་དང་། ནམ་མཁའ་ལ་གཤེགས་པ་དང་། ཤིན་ཏུ་རིང་བ་ལ་མྱུར་དུ་གཤེགས་པའོ། །ཆུང་ངུར་མང་པོ་འཇུག་པར་མཛད་པ་ནི་ཁྱོད་ཆུང་ངུའི་ནང་དུ་གླང་པོ་ཆེ་ལ་སོགས་པ་མང་པོ་འཇུག་པར་མཛད་པ་སྟེ། བསྒྲིབས་པ་དང་ནམ་མཁའ་དང་ཤིན་ཏུ་རིང་བ་ལ་མྱུར་བར་གཤེགས་པ་དང་། ཆུང་
[274a.4]ངུར་མང་པོ་འཇུག་པར་མཛད་པ་སྟེ། དེ་དག་ལ་མངའ་ཕུན་སུམ་ཚོགས་པ་ཞེས་བྱ་བར་སྦྱར་རོ། །ཡ་མཚན་གྱི་ཆོས་ནར་མ་རང་བཞིན་གྱིས་འབྱུང་བ་རྣམ་པ་སྣ་ཚོགས་རྣམ་པ་དུ་མ་དེ་དག་ཕུན་སུམ་ཚོགས་པ་ཞེས་བྱ་བར་སྦྱར་རོ། །སངས་རྒྱས་བཅོམ་ལྡན་འདས་དེ་དག་གཤེགས་པ་ན་མཐོན་དམན་མཉམ་པར་
[274a.5]འགྱུར་ཏེ་མཐོང་བ་གང་ཡིན་པ་དེ་ནི་དམའ་བར་འགྱུར་ལ། དམའ་བ་གང་ཡིན་པ་དེ་ནི་མཐོན་པོར་འགྱུར་རོ། །ལོང་བ་རྣམས་ཀྱིས་ནི་མིག་འཐོབ་བོ། །འོན་པ་རྣམས་ཀྱིས་ནི་རྣ་བ་འཐོབ་པོ། །སྨྱོན་པ་རྣམས་ཀྱིས་ནི་དྲན་པ་འཐོབ་བོ་ཞེས་བྱ་བ་གང་ཡིན་པ་དེ་ནི་ཆོས་ཉིད་ཡིན་ཏེ། ཐམས་ཅད་མདོ་ལས་ཇི་སྐད་
[274a.6]འབྱུང་བ་བཞིན་ཁོང་དུ་ཆུད་པར་བྱའོ། །མཚན་ཕུན་སུམ་ཚོགས་པ་ཞེས་བྱ་བ་ནི་སྐྱེས་བུ་ཆེན་པོའི་མཚན་མཛོད་སྤུ་དང་། གཙུག་ཏོར་ལ་སོགས་པ་སུམ་ཅུ་རྩ་གཉིས་ཕུན་སུམ་ཚོགས་པའོ། །དཔེ་བྱད་བཟང་པོ་ཕུན་སུམ་ཚོགས་པ་ཞེས་བྱ་བ་ནི་སོར་མོ་ཟླུམ་པ་དང་། སེན་མོ་ཟངས་ཀྱི་མདོག་ལྟ་
[274a.7]བུ་ལ་སོགས་པ་དཔེ་བྱད་བཟང་པོ་བརྒྱད་ཅུ་ཕུན་སུམ་ཚོགས་པའོ། །སྟོབས་ཕུན་སུམ་ཚོགས་པ་ནི་སྲེད་མེད་ཀྱི་བུའི་སྟོབས་སོ། །འདིའི་སྐུ་གདུང་རྡོ་རྗེ་ལྟ་བུར་སྲ་བས་ན་སྐུ་གདུང་རྡོ་རྗེ་ལྟར་སྲ་བའོ། །སྐུ་གདུང་རྡོ་རྗེ་ལྟར་སྲ་བའི་ངོ་བོ་སྟེ། དེ་ཕུན་སུམ་ཚོགས་པས་ན་སྐུ་གདུང་རྡོ་རྗེ་ལྟར་སྲ་བ་ཉིད་ཕུན་སུམ་ཚོགས་
[274b]
[274b.1]པའོ། །དེ་ལྟར་ན་དེ་དག་ནི་སངས་རྒྱས་རྣམས་ཀྱི་ཆེ་བའི་བདག་ཉིད་ཀུན་ནས་མདོར་བསྡུས་པ་ཡིན་ཏེ། སྐྱེས་བུ་དམ་པ་རབ་ཏུ་དང་བ་སྐྱེད་པ་གང་སུ་ཡང་རུང་བ་སངས་རྒྱས་བཅོམ་ལྡན་འདས་ལ་བསྟོད་པ་དང་། སྟོད་པ་དང་། བསྟོད་པར་འགྱུར་བ་དེ་དག་ཐམས་ཅད་ནི་ཕུན་སུམ་ཚོགས་པ་དམ་པ་གསུམ་པོ་
[274b.2]འདི་ཁོ་ནས་སོ། །འདི་ལ་བསྐལ་པ་གྲངས་མེད་པ་དུ་མ་ཡོད་པས་ན་སྐུ་ཚེ་བསྐལ་པ་གྲངས་མེད་པ་དུ་མ་སྟེ། སངས་རྒྱས་བཅོམ་ལྡན་འདས་རྣམས་གལ་ཏེ་དེ་བྱིན་གྱིས་རློབ་པར་མཛད་ན། དེ་ལྟར་ན་དེ་དག་གི་ཆེ་བའི་བདག་ཉིད་དེ་མཐའ་དག་མཁྱེན་པ་དང་བརྗོད་པར་སྤྱོད་དེ། དེའི་རབ་ཏུ་དབྱེ་བ་མཐའ་ཡས་
[274b.3]པས་ཤིན་ཏུ་མང་བའི་ཕྱིར་རོ་སྙམ་དུ་དགོངས་པ་ཡིན་ནོ། །རེ་ཞིག་དེ་ལྟར་ན་ཞེས་བྱ་བ་རྒྱས་པར་འབྱུང་བ་ནི། ཡོན་ཏན་རྣམས་དང་ཡེ་ཤེས་རྣམས། །མཐུ་དང་ཕན་འདོགས་པ་ཞེས་ཟླས་དབྱེ་བ་ཡིན་ནོ། །མཐའ་ཡས་པ་ཡང་ཡིན་ལ་རྨད་དུ་བྱུང་བ་ཡང་ཡིན་པས་ཞེས་གཞི་མཐུན་པར་བསྡུ་བ་ཡིན་ནོ། །དེ་དག་
[274b.4]ཉིད་རིན་པོ་ཆེ་ཆེན་པོ་སྟེ། དེ་བཞིན་གཤེགས་པ་རྣམས་ནི་དེ་དག་གི་འབྱུང་གནས་ཡིན་ནོ། །འོན་ཀྱང་བྱིས་པ་སོ་སོའི་སྐྱེ་བོ་རང་གི་ཡོན་ཏན་དབུལ་བས་རྗེས་སུ་དཔོག་པར་གྱུར་པས་མོས་པ་བཅོམ་ཞིང་དགའ་བ་བཅོམ་པར་གྱུར་པ་རྣམས་ནི་སངས་རྒྱས་ལ་གུས་པའི་བར་དུ་མི་བྱེད་དེ། དད་པར་མི་བྱེད་དོ་ཞེས་བྱ་
[274b.5]བའི་ཐ་ཚིག་གོ། །དད་པ་ཙམ་གྱིས་ཞེས་བྱ་བ་ནི་མི་རྟོགས་པར་ཞེས་བྱ་བའི་ཐ་ཚིག་གོ། །རྣམ་པར་སྨིན་པར་མ་ངེས་པ་ཞེས་བྱ་བ་ནི་རྣམ་པར་སྨིན་པར་ངེས་པ་རྣམས་ལས་ནི་རྒལ་བར་མི་འགྱུར་རོ་སྙམ་དུ་བསམས་པ་ཡིན་ནོ། །ལྷ་དག་གི་ནང་ན་ཡོད་པས་ན་ལྷའི་ཡིན་ནོ། །འབྲས་བུ་མེད་པ་མ་ཡིན་པ་དང་། ཡིད་དུ་
[274b.6]འོང་བ་དང་། མཆོག་ཏུ་གྱུར་པ་དང་། མྱུར་བ་དང་མཐའ་བཟང་བའི་ཕྱིར་རོ་ཞེས་བྱ་བ་ལ། འབྲས་བུ་མེད་པ་མ་ཡིན་པ་ནི་འབྲས་བུ་འབྱིན་པར་ངེས་པར་གནས་པའི་ཕྱིར་རོ། །འབྲས་བུ་ཡིད་དུ་འོང་བ་ནི་འབྲས་བུ་ལྷའི་ཡུལ་ཡིན་པའི་ཕྱིར་རོ། །འབྲས་བུ་མཆོག་ཏུ་གྱུར་པ་ནི་འབྲས་བུ་མང་བའི་ཕྱིར་རོ། །འབྲས་བུ་
[274b.7]མྱུར་བ་ནི་འབྲས་བུ་མཐོང་བའི་ཆོས་ལ་སོགས་པ་ལ་མྱོང་བར་འགྱུར་བའི་ཕྱིར་རོ། །འབྲས་བུ་མཐའ་བཟང་བ་ནི་འབྲས་བུ་མྱ་ངན་ལས་འདས་པ་ཡིན་པའི་ཕྱིར་ཡིན་ཏེ། དེ་བཞིན་གཤེགས་པ་ནི་དེ་དག་མངའ་བའི་ཕྱིར་བསོད་ནམས་ཀྱི་ཞིང་བླ་ན་མེད་པ་ཞེས་བྱའོ། །བྱ་བ་ཞེས་བྱ་བ་ནི་མཆོད་པ་ལ་སོགས་པ་ཕན་པའོ། །
[275a]
[275a.1]ཅི་རིགས་པར་ཞེས་བྱ་བ་ནི་ཇི་སྲིད་པར་ཏེ། སངས་རྒྱས་བཅོམ་ལྡན་འདས་རྣམས་ཀྱི་ཡོན་ཏན་ཉོན་མོངས་པ་མེད་པ་དང་། །སྨོན་ནས་ཤེས་པ་ལ་སོགས་པ་ཁ་ཅིག་ནི་ཉན་ཐོས་དང་ཐུན་མོང་ཡིན་ནོ། །མངོན་པར་ཤེས་པ་དང་། བསམ་གཏན་དང་གཟུགས་མེད་པ་ལ་སོགས་པ་ཁ་
[275a.2]ཅིག་ནི་སོ་སོའི་སྐྱེ་བོ་དང་ཐུན་མོང་ཡིན་ནོ། །སོགས་པ་ཞེས་བྱ་བའི་སྒྲས་ནི་སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པ་ལ་སོགས་པ་བསྡུའོ། །འགའ་ཡང་དེ་ལ་དམིགས་ནས་འདོད་ཆགས་སམ་ཞེ་སྡང་ངམ་ང་རྒྱལ་སྐྱེ་བར་མི་འགྱུར་བ་ཞེས་བྱ་བ་ནི་དེས་བདག་ཉིད་མཐོང་བ་ལ་སོགས་པ་ཡོངས་སུ་སྤོང་
[275a.3]བའི་ཕྱིར་ཏེ། ཇི་ལྟ་ཇི་ལྟར་ཏིང་ངེ་འཛིན་ལས་མ་ལངས་པ་དེས་བདག་མཐོང་ནས་འདིའི་འདོད་ཆགས་སྐྱེ་བར་མ་གྱུར་ཅིག །འདིའི་ཞེ་སྡང་དང་། འདིའི་ང་རྒྱལ་དང་། འདིའི་བག་མེད་པ་སྐྱེ་བར་མ་གྱུར་ཅིག་ཅེས་བྱ་བར་མངོན་པར་རྟོགས་པར་གྱུར་པ་དེ་ལྟ་དེ་ལྟར་ཏིང་ངེ་འཛིན་དེ་ལས་ལངས་ནས་ཀྱང་རྗེས་སུ་མཐུན་པར་
[275a.4]བྱེད་དོ། །འདི་ནི་གཞན་གྱི་སེམས་སྲུང་བའི་ཐབས་ཀྱི་ཁྱད་པར་ཡིན་གྱི། ཉོན་མོངས་པ་མེད་པའི་ཏིང་ངེ་འཛིན་དེ་སྐྱེས་པ་ཙམ་ཁོ་ནའི་མཐུས་གཞན་དག་གི་ཉོན་མོངས་པ་སྐྱེ་བར་མི་འགྱུར་བ་ནི་མ་ཡིན་ནོ་ཞེས་བྱ་བའི་དོན་དུ་བཟུང་ངོ་། །ཉོན་མོངས་པར་མི་བྱེད་པས་ན་ཞེས་བྱ་བ་ནི་ཉོན་མོངས་པར་བྱེད་པར་མི་
[275a.5]འགྱུར་བས་ཞེས་བྱ་བའི་ཐ་ཚིག་གོ། །བསམ་གཏན་བཞི་པ་ནི་ལམ་སླ་བ་རྣམས་ཀྱི་མཆོག་ཡིན་པའི་ཕྱིར་རོ། །ཉོན་མོངས་པ་མེད་པ་ནི་དེའི་ས་པ་ཁོ་ན་ཡིན་གྱི། ས་གཞན་པ་ནི་མ་ཡིན་ནོ། །ཡོངས་སུ་སྤང་བར་མི་ནུས་སོ་ཞེས་བྱ་བ་ནི་ཡོངས་སུ་ཉམས་པ་སྲིད་པའི་ཕྱིར་རོ། །ཉོན་མོངས་པ་བཞི་དང་བཅས་པ་ནི་
[275a.6]འདོད་ཆགས་ལ་སོགས་པ་བསྒོམ་པས་སྤང་བར་བྱ་བ་དག་ཡིན་ནོ། །ཉོན་མོངས་པ་བཞི་མེད་པ་ནི་ཀུན་དུ་འགྲོ་བ་མཐོང་བས་སྤང་བར་བྱ་བ་དག་ཡིན་ཏེ། ཀུན་དུ་འགྲོ་བ་ནི་རང་གིས་མཐའ་དག་ལ་དམིགས་པའི་ཕྱིར་གཞན་གྱི་རྒྱུད་ལ་དམིགས་པ་ཡང་ཡོད་པས་ཡོངས་སུ་སྤང་བར་མི་ནུས་སོ། །དེའི་དམིགས་པ་ཐམས་ཅད་
[275a.7]ཅད་དོ་ཞེས་བྱ་བ་ནི་ཐམས་ཅད་ལ་དམིགས་པས་དམིགས་པ་ཐམས་ཅད་དོ། །ཡང་ན་འདིའི་དམིགས་པ་ཐམས་ཅད་ཡིན་པས་དམིགས་པ་ཐམས་ཅད་དེ་ཉོན་མོངས་པ་མེད་པ་བཞིན་དུ་ཉོན་མོངས་པ་ཙམ་ལ་དམིགས་པ་ནི་མ་ཡིན་ནོ། །འོ་ན་ཅི་ཞེ་ན། གཟུགས་ལ་སོགས་པ་ལ་དམིགས་པ་ཡང་ཡིན་ནོ་ཞེས་
[275b]
[275b.1]བྱ་བའི་ཐ་ཚིག་གོ། །བྱེ་བྲག་ཏུ་སྨྲ་བ་རྣམས་ན་རེ་ཞེས་སྨོས་པ་ནི་གཞན་དག་གི་གཞུང་ལུགས་ལྟར་ན་གཟུགས་མེད་པ་ཡང་མཁྱེན་ཏོ་ཞེས་སྟོན་ཏེ། སངས་རྒྱས་རྣམས་ཀྱི་ཡུལ་དུ་མ་གྱུར་པ་ནི་མེད་དོ་སྙམ་དུ་བསམས་པ་ཡིན་ནོ། །སྨོན་ནས་ཤེས་པས་གཟུགས་མེད་པ་རྣམས་མངོན་སུམ་དུ་ནི་མི་ཤེས་
[275b.2]སོ། །ཅིའི་ཕྱིར་ཞེ་ན། འདི་ལྟར་སྨོན་ནས་ཤེས་པ་ནི་བསམ་གཏན་བཞི་པའི་ས་པ་ཡིན་ཏེ། རང་དང་འོག་སའི་ཡུལ་ཅན་ཡིན་ཞེས་འཆད་པར་འགྱུར་ལ། སྨོས་ནས་ཤེས་པ་ཡང་མངོན་པར་ཤེས་པ་དང་འདྲ་བ་ཡིན་པས་སོ། །རྒྱུ་མཐུན་པ་དང་སྤྱོད་པའི་བྱེ་བྲག་ལས་ཞེས་བྱ་བ་དེ་ལ་རྒྱུ་མཐུན་པ་ནི་དམན་ཞིང་དམན་
[275b.3]པ་ཡིན་ནོ། །སྤྱོད་པ་ནི་གཟུགས་མེད་པའི་སྙོམས་པར་འཇུག་པ་ལ་གནས་པ་ཡིན་ནོ། །དེ་ལྟར་ན་འབྲས་བུས་རྒྱུ་རྗེས་སུ་དཔག་ལ། རྒྱུས་ཀྱང་འབྲས་བུ་རྗེས་སུ་དཔག་གོ་ཞེས་བསྟན་པ་ཡིན་ཏེ། དེ་ནས་ཤི་འཕོས་པ་རྣམས་དང་། དེའི་སྙོམས་པར་འཇུག་པ་ཐོབ་པ་རྣམས་ཀྱི་དེ་གཉི་ག་འདིར་
[275b.4]མངོན་སུམ་པ་ཡིན་ནོ། །འདིར་དཔེ་ནི་ཞིང་པ་ལྟ་བུའོ་ཞེས་བྱ་བ་ནི་དཔེར་ན་ཞིང་པས་འབྲས་བུས་ས་བོན་དང་ས་བོན་གྱིས་འབྲས་བུ་རྟོགས་པ་ལྟ་བུའམ། དཔེར་ན་ཞིང་པས་ཞིང་འདི་ལྟ་བུ་ལུས་ནི་འབྲུ་འདི་ལྟ་བུར་འགྱུར་རོ་ཞེས་བྱ་བར་ཤེས་པའམ། འབྲུ་མཐོང་ནས་འདིའི་ཞིང་ནི་འདི་འདྲའོ་ཞེས་རྗེས་སུ་
[275b.5]དཔག་པར་བྱེད་པ་དེ་བཞིན་དུ་སེམས་ཅན་ལུས་ཞི་བ་མཐོང་ནས་འདི་ནི་གཟུགས་མེད་པ་ནས་ཤི་འཕོས་པའོ་ཞེས་བྱ་བ་དང་། གཟུགས་མེད་པ་དག་ཏུ་སྐྱེ་བར་འགྱུར་རོ་ཞེས་བྱ་བར་རྗེས་སུ་དཔོག་གོ། །སྨོན་པ་སྔར་བཏང་བ་ཞེས་བྱ་བ་ནི་གཏོད་པ་སྔར་བཏང་བ་སྟེ། སྨོན་ཅིང་གཏོད་ནས་ཞེས་བྱ་བའི་ཐ་ཚིག་གོ། །ཏིང་
[275b.6]ངེ་འཛིན་དེའི་ཡུལ་དུ་ཇི་ཙམ་ཞིག་གྱུར་པ་ཞེས་བྱ་བ་ནི་ཉན་ཐོས་ཀྱི་ཡུལ་དུ་ཡང་ཇི་ཙམ་ཞིག་གྱུར་པ་དེ་ཙམ་ཤེས་ལ། རང་སངས་རྒྱས་ཀྱི་བར་དུ་ཡང་རང་གི་ཡུལ་དུ་ཇི་ཙམ་ཞིག་གྱུར་པ་ཞེས་བྱ་བ་ལ་སོགས་པ་ཡིན་ནོ། །ཆོས་སོ་སོ་ཡང་དག་པར་རིག་པ་ནི་འདིར་བསྟན་པའི་ཆོས་ཡིན་ནོ། །ཆོས་ཞེས་བྱ་བའི་སྒྲ་ནི་
[275b.7]དོན་དུ་མ་སྟེ། འདི་ལྟ་སྟེ། དགེ་སློང་དག་ཁྱེད་ལ་ཆོས་བཤད་པར་བྱ་སྟེ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་དག་པ། ཡོངས་སུ་བྱང་བ། ཚངས་པར་སྤྱོད་པ་རབ་ཏུ་བཤད་དོ་ཞེས་བྱ་བ་དེར་ནི་བཤད་པའི་ཆོས་ཡིན་ནོ། །ཆོས་
[276a]
[276a.1]གང་ཞེ་ན། འཕགས་པའི་ལམ་ཡན་ལག་བརྒྱད་པའོ་ཞེས་བྱ་བ་དེར་ནི་སྒྲུབ་པའི་ཆོས་ཡིན་ནོ། །ཆོས་ལ་སྐྱབས་སུ་འགྲོའོ་ཞེས་བྱ་བ་དེར་ནི་འབྲས་བུའི་ཆོས་མྱ་ངན་ལས་འདས་པ་ཞེས་བྱ་བ་ལ་སོགས་པ་ཡིན་ནོ། །ཐོགས་པ་མེད་པ་ཞེས་བྱ་བ་ནི་བཟློག་པར་མི་ནུས་པའོ། །དེ་བཞིན་
[276a.2]ཞེས་བྱ་བའི་སྒྲ་ནི་མི་གཡོ་བའི་ཆོས་ཅན་གྱི་ཡིན་པ་དང་། མིའི་རྟེན་ཅན་ཉིད་ཡིན་ནོ་ཞེས་བྱ་བའི་དོན་འདི་གཉིས་ཁོ་ན་དང་སྦྱར་ཏེ། དམིགས་པ་ལ་སོགས་པ་ནི་ལོགས་ཤིག་སྨོས་པའི་ཕྱིར་རོ། །རིགས་པ་དང་ཐགས་ཐོགས་མེད་པར་མངོན་པར་བརྗོད་པ་ཉིད་ཅེས་བྱ་བ་ལ་རིགས་པ་ནི་དོན་དང་འབྲེལ་པའོ། །ཐགས་ཐོགས་
[276a.3]མེད་པ་ནི་ཐོགས་པ་མེད་པའོ། །རིགས་པ་དང་ཐགས་ཐོགས་མེད་པར་མངོན་པར་བརྗོད་པ་ནི་རིགས་པ་དང་ཐགས་ཐོགས་མེད་པར་མངོན་པར་བརྗོད་པའོ། །དེའི་ངོ་བོ་སྟེ། རིགས་པ་དང་ཐགས་ཐོགས་མེད་པར་མངོན་པར་བརྗོད་པ་ཉིད་དེ་ལའོ། །ཏིང་ངེ་འཛིན་ལ་དབང་བ་ནི་ཏིང་ངེ་འཛིན་ལ་དབང་བའོ། །
[276a.4]ཏིང་ངེ་འཛིན་ལ་དབང་བ་གསལ་བར་བྱ་ཞིང་མི་བརྗེད་པར་བྱ་བ་ནི་ཏིང་ངེ་འཛིན་ལ་དབང་བ་གསལ་བར་བྱའོ། །སྤོབས་པ་སོ་སོ་ཡང་དག་པར་རིག་པ་ནི་དེ་ལ་ཐོགས་པ་མེད་པར་ཤེས་པ་ཡིན་པས་ཁྱད་པར་ཡོད་དོ། །ཇི་ལྟར་སྤོབས་པ་སོ་སོ་ཡང་དག་པར་རིག་པ་ནི་ཤེས་པ་དགུའི་རང་བཞིན་ཡིན་ཞེ་ན། ངག་ལ་
[276a.5]དམིགས་པ་གང་ཡིན་པ་དེ་ནི་སྡུག་བསྔལ་དང་། ཀུན་འབྱུང་བ་དང་། ཆོས་དང་རྗེས་དང་ཟད་པ་དང་། མི་སྐྱེ་བ་དང་། ཀུན་རྫོབ་ཤེས་པའི་རང་བཞིན་ཡིན་ལ། ལམ་ལ་དམིགས་པ་གང་ཡིན་པ་དེ་ནི་ལམ་དང་། ཆོས་དང་། རྗེས་དང་། ཟད་པ་དང་། མི་སྐྱེ་བ་དང་། ཀུན་རྫོབ་དང་། གཞན་གྱི་སེམས་ཤེས་
[276a.6]པའི་རང་བཞིན་ཡིན་པས་མདོར་བསྡུ་ན་ཤེས་པ་དགུའི་རང་བཞིན་ཡིན་ཏེ། འགོག་པ་ཤེས་པ་མ་གཏོགས་སོ། །གལ་ཏེ་དོན་ཆོས་ཐམས་ཅད་ཡིན་ན་ནི་ཤེས་པ་བཅུ་ཡིན་ནོ་ཞེས་བྱ་བ་ནི་ཅི་རིགས་པར་ཤེས་པ་བཅུའི་དམིགས་པར་མི་འགྱུར་བའི་ཆོས་གང་ཡིན་པ་དེ་ནི་མེད་དོ། །གལ་ཏེ་དོན་མྱ་ངན་ལས་འདས་པ་
[276a.7]ཡིན་ན་ནི་ཤེས་པ་དྲུག་སྟེ་ཞེས་བྱ་བ་ནི་འགོག་པ་ཤེས་པ་ནི་ཆོས་ཤེས་པ་ལ་སོགས་པ་ལྔའི་རང་བཞིན་ཡིན་པའི་ཕྱིར་རོ། །མིང་གི་ཚོགས་ལ་སོགས་པ་དང་། ངག་ལ་དམིགས་པའི་ཕྱིར་རོ་ཞེས་བྱ་བ་ནི་སྡུག་བསྔལ་ཤེས་པ་ལ་སོགས་པ་ཟད་པ་མེད་པ་ནི་སྡུག་བསྔལ་གྱི་ཕྱོགས་གཅིག་གམ། ཀུན་འབྱུང་
[276b]
[276b.1]བའི་ཕྱོགས་གཅིག་ལ་རང་གི་མཚན་ཉིད་ཀྱི་རྣམ་པར་མི་དམིགས་སོ། །འོ་ན་ཅི་ཞེ་ན། ཉེ་བར་ལེན་པའི་ཕུང་པོ་ལྔ་ལ་སྤྱིའི་མཚན་ཉིད་དུ་དམིགས་ཏེ། དེའི་ཕྱིར་ཀུན་རྫོབ་ཤེས་པའི་རང་བཞིན་དག་ཡིན་ནོ། །ཡན་ཆད་ན་མིང་གི་ཚོགས་མེད་པའི་ཕྱིར་རོ་ཞེས་བྱ་བ་ནི། གཟུགས་མེད་པའི་ཁམས་ན་ཆོས་
[276b.2]སོ་སོ་ཡང་དག་པར་རིག་པ་མེད་དོ་ཞེས་སྟོན་པར་བྱེད་དེ། གང་ན་མིང་གི་ཚོགས་ཡོད་པ་དེ་ཉིད་ན་ཚིག་དང་ཡི་གེའི་ཚོགས་ཀྱང་ཡོད་དོ་ཞེས་བྱ་བར་ཚུལ་འདྲ་བས་མིང་གི་ཚོགས་མེད་པར་བརྗོད་པས་ཚིག་དང་ཡི་གེའི་ཚོགས་ཀྱང་མེད་པར་གྲུབ་པ་ཡིན་ནོ། །ཡན་ཆད་ན་རྟོགས་པ་མེད་པའི་ཕྱིར་རོ་ཞེས་བྱ་བ་ནི་
[276b.3]བསམ་གཏན་གཉིས་པ་ལ་སོགས་པ་ན་སྟེ། མདོ་ལས་བརྟགས་ཤིང་དཔྱད་ནས་ཚིག་ཏུ་སྨྲའོ་ཞེས་འབྱུང་བའི་ཕྱིར་རོ། །སོ་སོ་ཡང་དག་པར་རིག་པ་འདི་དག་ནི་སྙོམས་པར་ཞུགས་པ་ན་ཡང་མིང་དང་དོན་ལ་སོགས་པ་ལ་དམིགས་པ་ཉིད་ཡིན་ལ། ལངས་ནས་ཡང་དེའི་རྗེས་ལ་ཐོབ་པའི་ཤེས་པ་ཐོགས་པ་
[276b.4]མེད་པས་མིང་དང་དོན་ལ་སོགས་པ་ལ་དམིགས་པ་ཉིད་ཡིན་ནོ། །སྨྲ་བ་ནི་དེའི་རྗེས་ལས་ཐོབ་པ་ཁོ་ན་ཡིན་ནོ། །ཕོ་དང་མོ་ལ་སོགས་པའི་ཚིག་བླ་དགས་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་དུས་དང་བྱེད་པ་པོ་ལ་སོགས་པ་བསྡུའོ། །ཚིག་བླ་དགས་ནི་རྣམ་གྲངས་ཡིན་ནོ། །ཡང་ན་དེའི་དབང་དུ་བྱས་
[276b.5]པའི་ཚིག་ནི་ཚིག་བླ་དགས་སོ། །དེ་ལ་ཐགས་ཐོགས་མེད་པར་ཞེས་བྱ་བ་ནི་ཚིག་བླ་དགས་དེ་ལའམ། ཚིག་དང་ཡི་གེའི་ཚོགས་དེ་ལའོ། །དེ་ཉིད་ཀྱིས་འདི་དག་གི་གོ་རིམས་དྲུག་པ་ཡིན་ནོ་ཞེས་བྱ་བ་ནི་གང་གི་ཕྱིར་ཚིག་དང་ཡི་གེའི་རྗེས་སུ་འབྲངས་ནས་དོན་རྟོགས་པ་དང་། དེའི་གཅིག་དང་། གཉིས་དང་
[276b.6]མང་པོ་དང་། མོ་དང་། ཕོ་ལ་སོགས་པའི་བླ་དགས་དང་། དེ་ལ་ཐགས་ཐོགས་མེད་པར་དེའི་ཕྱིར་གོ་རིམས་དྲུག་པ་ཡིན་ནོ། །དེའི་ཕྱིར་གཟུགས་ཞེས་བྱ་བ་དེ་ལྟ་བུ་ལ་སོགས་པ་ཡིན་ནོ་ཞེས་བྱ་བ་ལ། སོགས་པ་ཞེས་བྱ་བའི་སྒྲས་ནི་རྣམ་པར་ཤེས་པས་ན་རྣམ་པར་ཤེས་པའོ། །སོགས་པས་ན་སེམས་སོ་ཞེས་
[276b.7]འབྱུང་བ་ལ་སོགས་པའི་ངེས་པའི་ཚིག་བསྡུའོ། །ལན་དང་ལན་སྤོབས་པས་ན་སྤོབས་པ་ཡིན་ནོ་ཞེས་བྱ་བ་ནི་བརྩད་པའི་ཚུལ་གྱིས་སོ། །གོ་རིམས་བཞིན་དུ་ཞེས་བྱ་བ་ནི་ཆོས་སོ་སོ་ཡང་དག་པར་རིག་པའི་སྔོན་གྱི་སྦྱོར་བ་ནི་རྩིས་ཡིན་ནོ། །དོན་སོ་སོ་ཡང་དག་པར་རིག་པའི་ནི་སངས་རྒྱས་ཀྱི་བཀའ་ཡིན་ནོ། །ངེས་
[277a]
[277a.1]པའི་ཚིག་སོ་སོ་ཡང་དག་པར་རིག་པའི་ནི་སྒྲ་རིག་པ་ཡིན་ནོ། །སྤོབས་པ་སོ་སོ་ཡང་དག་པར་རིག་པའི་ནི་གཏན་ཚིགས་ཡིན་ནོ། །བྱེ་བྲག་ཏུ་སྨྲ་བ་རྣམས་ན་རེ་སངས་རྒྱས་ཀྱི་བཀའ་ཁོ་ན་ཡིན་ནོ་ཞེས་བརྗོད་དོ། །དེ་ནི་རྣམ་དྲུག་ཅེས་བྱ་བ་ནི་བསམ་གཏན་བཞི་པ་ལ་ལ་ནི་ཉོན་མོངས་པ་
[277a.2]མེད་པའི་བདག་ཉིད་ཡིན་ལ། ལ་ལ་ནི་སྨོན་ནས་ཤེས་པའི་བདག་ཉིད་ཡིན་ནོ། །ལ་ལ་ནི་སོ་སོ་ཡང་དག་པར་རིག་པ་གསུམ་གྱི་བདག་ཉིད་ཡིན་ནོ། །ལ་ལ་ནི་དེ་དག་ལ་མ་གཏོགས་པར་རབ་ཀྱི་མཐའ་པ་འབའ་ཞིག་ཡིན་ནོ། །སོ་སོ་ཡང་དག་པར་རིག་པ་གསུམ་ཞེས་བྱ་བ་ནི་དེ་ན་རྟོག་པ་མེད་པའི་ཕྱིར་
[277a.3]ངེས་པའི་ཚིག་སོ་སོ་ཡང་དག་པར་རིག་པ་མ་གཏོགས་ཏེ། དེ་ནི་རྟོག་པ་དང་དཔྱོད་པ་དང་བཅས་པས་སློང་བར་བྱེད་དོ། །འོ་ན་ཇི་ལྟར་ཁྱད་པར་མེད་པ་དྲུག་པོ་དེ་དག་རབ་མཐའ་པས་ཞེས་དེ་སྐད་དུ་བཤད་ཅེ་ན། དེའི་ཕྱིར་ངེས་པའི་ཚིག་སོ་སོ་ཡང་དག་པར་རིག་པ་ནི་དེའི་སྟོབས་ཀྱིས་འཐོབ་པ་ཡིན་གྱི།
[277a.4]དེ་བསམ་གཏན་བཞི་པའི་ས་པ་ནི་མ་ཡིན་ནོ་ཞེས་བྱ་བ་སྨོས་སོ། །འོ་ན་ཅི་ཞེ་ན། འདོད་པའི་ཁམས་དང་བསམ་གཏན་དང་པོའི་ས་པ་ཞེས་བྱ་བའི་ཐ་ཚིག་གོ། །ས་ཐམས་ཅད་ཀྱིས་མཐུན་པར་བྱས་པ་ཞེས་བྱ་བ་ནི་ས་ཀུན་གྱིས་མཐུན་པར་བྱས་པ་ཞེས་བྱ་བའི་དོན་ཏོ། །འདི་ལ་མཐར་རབ་ཏུ་ཕྱིན་པ་ཡོད་
[277a.5]པའི་ཕྱིར་རབ་ཀྱི་མཐའ་པའོ། །མུ་བཞི་པ་བཞིན་ནོ་ཞེས་བྱ་བ་ནི་དཔེར་ན་མུ་བཞི་པ་ནི་དྲི་མ་རྣམ་པ་བཞི་ཡིན་པ་དེ་དང་འདྲའོ། །རྫུ་འཕྲུལ་གྱི་ཡུལ་ཞེས་བྱ་བ་རྒྱས་པར་འབྱུང་བ་ལ། མངོན་པར་ཤེས་པ་དྲུག་ནི་རྫུ་འཕྲུལ་གྱི་ཡུལ་ཤེས་པ་མངོན་དུ་བྱ་བ་དང་། ལྷའི་རྣ་བ་དང་། སེམས་ཀྱི་རྣམ་གྲངས་དང་།
[277a.6]སྔོན་གྱི་གནས་དང་། འཆི་འཕོ་དང་། སྐྱེ་བ་དང་། ཟག་པ་ཟད་པ་ཤེས་པ་མངོན་དུ་བྱ་བའི་མངོན་པར་ཤེས་པའོ། །འདིར་མདོ་ནི་འདི་ན་དགེ་སློང་རྫུ་འཕྲུལ་གྱི་ཡུལ་ཤེས་པ་མངོན་དུ་བྱ་བའི་མངོན་པར་ཤེས་པ་རྣམ་པ་དུ་མ་ཉམས་སུ་མྱོང་བར་བྱེད་དེ། གཅིག་ཏུ་གྱུར་ནས་མང་པོར་འགྱུར། །མང་པོར་གྱུར་
[277a.7]ནས་གཅིག་ཏུ་འགྱུར། །ཞེས་བྱ་བ་ནས་འདི་ནི་རྫུ་འཕྲུལ་གྱི་ཡུལ་ཤེས་པ་མངོན་དུ་བྱ་བའི་མངོན་པར་ཤེས་པ་ཞེས་བྱའོ་ཞེས་བྱ་བའི་བར་འབྱུང་བ་ཡིན་ཏེ། གཞུང་རྒྱས་པར་ནི། རྫུ་འཕྲུལ་རྐང་པ་ཏིང་ངེ་འཛིན། །ཞེས་བྱ་བ་དེར་བྲིས་པར་བལྟ་བར་བྱའོ། །དེ་བཞིན་དུ་འདི་ན་དགེ་སློང་ལྷའི་རྣ་བ་རྣམ་པར་དག་
[277b]
[277b.1]པ་མི་ལས་འདས་པས་མི་དང་མི་མ་ཡིན་པའི་སྒྲ་ཐག་རིང་པོ་ན་ཡོད་པ་གང་དག་ཡིན་པ་འམ། ཐག་ཉེ་བ་ན་ཡོད་པ་གང་དག་ཡིན་པ་ཡང་རུང་གཉི་ག་ཐོས་ཏེ། འདི་ནི་ལྷའི་རྣ་བ་ཤེས་པ་མངོན་དུ་བྱ་བའི་མངོན་པར་ཤེས་པ་ཞེས་བྱའོ། །འདི་ན་དགེ་སློང་ལྷའི་མིག་རྣམ་པར་དག་པ་མིའི་ལས་འདས་
[277b.2]པས་སེམས་ཅན་རྣམས་མཐོང་སྟེ་ཞེས་བྱ་བ་ནས་འདི་ནི་ལྷའི་མིག་ཤེས་པ་མངོན་དུ་བྱ་བའི་མངོན་པར་ཤེས་པ་ཞེས་བྱའོ་ཞེས་བྱ་བའི་བར་གཞུང་མདོ་མང་པོ་ལས་འབྱུང་བ་བཞིན་ནོ། །འདི་ན་དགེ་སློང་སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ་ཞེས་བྱ་བ་ནས་འདི་ནི་སྔོན་གྱི་གནས་རྗེས་སུ་དྲན་པ་མངོན་དུ་
[277b.3]བྱ་བའི་མངོན་པར་ཤེས་པ་ཞེས་བྱའོ་ཞེས་བྱ་བའི་བར་དང་། འདི་ན་དགེ་སློང་སེམས་ཅན་གཞན་དང་གང་ཟག་གཞན་དག་ནི་ཡིད་ཀྱི་རྟོག་པ་དང་དཔྱོད་པ་ཡིད་ཀྱིས་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་བྱ་
[277b.4]བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་སོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་
[277b.5]དང་། རྣམ་པར་གཡེངས་པ་དང་། ཀུན་དུ་བསྡུས་པ་དང་། ཞུམ་པ་དང་། རབ་ཏུ་འཛིན་པ་དང་། རྒོད་པ་དང་། རྒོད་པ་མ་ཡིན་པ་དང་། རྣམ་པར་མ་ཞི་བ་དང་། རྣམ་པར་ཞི་བ་དང་། མཉམ་པར་བཞག་པ་དང་། རྣམ་པར་བཞག་པ་མ་ཡིན་པ་དང་། མ་བསྒོམས་པ་དང་། བསྒོམས་པ་དང་། སེམས་
[277b.6]རྣམ་པར་མ་གྲོལ་བ་ལ་སེམས་རྣམ་པར་མ་གྲོལ་བའོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །སེམས་རྣམ་པར་གྲོལ་བ་ལ་སེམས་རྣམ་པར་གྲོལ་བའོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཏེ། འདི་ནི་སེམས་ཀྱི་རྣམ་གྲངས་ཤེས་པ་མངོན་དུ་བྱ་བའི་མངོན་པར་ཤེས་པ་
[277b.7]ཞེས་བྱ་བའོ། །འདི་ན་དགེ་སློང་འདི་ནི་སྡུག་བསྔལ་འཕགས་པའི་བདེན་པའོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པའོ་ཞེས་བྱ་
[278a]
[278a.1]བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །དེ་ལྟར་ཤེས་ཤིང་དེ་ལྟར་མཐོང་བ་དེ་འདོད་པའི་ཟག་པ་ལས་སེམས་རྣམ་པར་གྲོལ་བར་འགྱུར། །སྲིད་པའི་ཟག་པ་དང་། མ་རིག་པའི་ཟག་པ་ལས་སེམས་རྣམ་པར་གྲོལ་བར་འགྱུར་རོ། །རྣམ་པར་གྲོལ་ན་རྣམ་པར་
[278a.2]གྲོལ་ལོ་ཞེས་བྱ་བར་ཡེ་ཤེས་མཐོང་བར་འགྱུར་ཞིང་། བདག་གི་ཟག་པ་ཟད་དོ་ཞེས་བྱ་བ་ནས། འདི་ལས་སྲིད་པ་གཞན་མི་ཤེས་སོ་ཞེས་བྱ་བའི་བར་དུ་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཏེ། འདི་ནི་ཟག་པ་ཟད་པ་ཤེས་པ་མངོན་དུ་བྱ་བའི་མངོན་པར་ཤེས་པ་ཞེས་བྱའོ་ཞེས་བྱ་བ་གཞུང་མདོ་
[278a.3]མང་པོ་ལས་འབྱུང་བ་བཞིན་ནོ། །རྫུ་འཕྲུལ་ནི་ཏིང་ངེ་འཛིན་ཏོ། །དེའི་ཡུལ་ནི་སྤྲུལ་པ་དང་འགྲོ་བ་སྟེ། རྫུ་འཕྲུལ་གྱི་ཡུལ་ཤེས་པའོ། །དེ་མངོན་དུ་བྱ་བ་ནི་མངོན་སུམ་དུ་འགྱུར་བ་ཡིན་པས་རྫུ་འཕྲུལ་གྱི་ཡུལ་ཤེས་པ་མངོན་དུ་བྱ་བའི་མངོན་པར་ཤེས་པའོ། །ལྷའི་རྣ་བ་དེ་ལས་བྱུང་བའི་ཤེས་པ་སྟེ།
[278a.4]དེ་མངོན་དུ་བྱ་བ་ནི་ལྷའི་རྣ་བ་ཤེས་པ་མངོན་དུ་བྱ་བའིའོ། །སེམས་ཀྱི་རྣམ་གྲངས་ནི་ཁྱད་པར་ཏེ། ཆགས་པ་དང་། སྡང་བ་དང་། རྨོངས་པ་ཞེས་བྱ་བའམ། ཡང་ན་རྣམ་གྲངས་ནི་གོ་རིམས་ཡིན་ཏེ། རེས་འགའ་ནི་ཆགས་སོ། །རེས་འགའ་ནི་སྡང་ངོ་། །རྨོངས་སོ་ཞེས་བྱ་བ་ལྟ་བུའོ། །དེ་ཤེས་པ་སྟེ། དེ་མངོན་
[278a.5]དུ་བྱ་བའིའོ། །སྔོན་གྱི་གནས་དེ་རྗེས་སུ་དྲན་པ་སྟེ། དེ་ཤེས་པ་དེ་མངོན་དུ་བྱ་བའིའོ། །འཆི་འཕོ་བ་དང་སྐྱེ་བ་ནི་འཆི་འཕོ་དང་སྐྱེ་བ་དག་གོ། །དེ་དག་ཤེས་པ་སྟེ། དེ་མངོན་དུ་བྱ་བའིའོ། །ཟག་པ་རྣམས་ཟད་པ་དེ་ཤེས་པ་སྟེ། དེ་མངོན་དུ་བྱ་བའི་མངོན་པར་ཤེས་པ་ཞེས་རེ་རེ་ལ་སྦྱར་བར་བྱའོ། །དེ་
[278a.6]དགེ་སྦྱོང་གི་ཚུལ་གྱི་འབྲས་བུ་བཞིན་དུ་ཞེས་བྱ་བ་ནི་དཔེར་ན་དགེ་སྦྱོང་གི་ཚུལ་གྱི་འབྲས་བུ་འདུས་བྱས་རྣམ་པར་གྲོལ་བའི་ལམ་གྱི་རང་བཞིན་ཡིན་པ་དང་འདྲའོ། །སེམས་ལ་ཤེས་པ་ལྔ་ཡིན་ནོ་ཞེས་བྱ་བ་ལ་སེམས་ལ་ཞེས་བྱ་བ་ནི་སེམས་ཀྱི་རྣམ་གྲངས་མངོན་པར་ཤེས་པའོ། །དེ་ནི་ཤེས་པ་ལྔའི་ངོ་བོ་
[278a.7]ཉིད་ཡིན་ནོ་ཞེས་བྱ་བའི་ཐ་ཚིག་སྟེ། གཞན་གྱི་སེམས་ཤེས་པ་ཟག་པ་མེད་པ་ནི་ཆོས་དང་། རྗེས་དང་ལམ་དང་གཞན་གྱི་སེམས་ཤེས་པ་ཉིད་སྲིད་ལ། ཟག་པ་དང་བཅས་པ་ནི་ཀུན་རྫོབ་དང་གཞན་གྱི་སེམས་ཤེས་པ་ཉིད་སྲིད་པའི་ཕྱིར་རོ། །སྟོབས་བཞིན་ནོ་ཞེས་བྱ་བ་ནི་ཟག་པ་ཟད་པའི་སྟོབས་ཤེས་པ་ཇི་ལྟ་བ་
[278b]
[278b.1]བཞིན་ནོ། །གལ་ཏེ་ཟག་པ་ཟད་པ་ཤེས་པ་ཟག་པ་ཟད་པ་ལ་དམིགས་པ་ཡིན་ན་ནི་ཤེས་པ་དྲུག་ཡིན་ཏེ། འགོག་པ་ཤེས་པ་ནི་ཆོས་དང་རྗེས་དང་ཟད་པ་དང་མི་སྐྱེ་བ་ཤེས་པ་ཞེས་བྱ་བའི་ཕྱིར་ལ། ཀུན་རྫོབ་ཤེས་པ་ཡང་འགོག་པ་ལ་དམིགས་པ་ཉིད་སྲིད་པའི་ཕྱིར་རོ། །གལ་ཏེ་ཟག་པ་ཟད་པའི་
[278b.2]ཤེས་པ་གང་ཡིན་པ་དེ་ཡིན་ན་ནི་ཤེས་པ་བཅུ་སྟེ། ཟག་པ་ཟད་པའི་རྒྱུད་ལ་ཤེས་པ་བཅུ་ཆར་ཡོད་པའི་ཕྱིར་རོ། །དེ་བཞིན་དུ་གལ་ཏེ་ཟག་པ་ཟད་པ་ལ་དམིགས་པར་འགྱུར་བ་མངོན་པར་ཤེས་པ་གང་ཡིན་པ་དེ་ཟག་པ་ཟད་པ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ན་ནི་ཤེས་པ་དྲུག་
[278b.3]ཡིན་ཏེ། དེ་དང་འདྲའོ། །གལ་ཏེ་ཟག་པ་ཟད་པའི་མངོན་པར་ཤེས་པ་གང་ཡིན་པ་དེ་ཡིན་ན་ནི་ཤེས་པ་བཅུ་སྟེ། དེ་དང་འདྲའོ། །འདི་ནི་ས་ཐམས་ཅད་པ་ཡིན་པར་ཡང་ཤེས་པར་བྱའོ་ཞེས་བྱ་བ་ནི་སྟོབས་བཞིན་ནོ་ཞེས་སྨོས་པ་འདི་ཁོ་ནས་ཀྱང་དོན་འདིར་འགྱུར་ལ། གང་གི་ཕྱིར་ལྔ་ཁོ་ན་བསམ་
[278b.4]གཏན་བཞི་དག་ནའོ་ཞེས་ངེས་པར་གཟུང་བ་དེའི་ཕྱིར་ཡང་མངོན་པར་ཤེས་པ་དྲུག་པ་འདི་ནི་ས་ཐམས་ཅད་པ་ཡིན་ནོ་ཞེས་བྱ་བར་མངོན་ནོ། །རེ་ཞིག་གསུམ་ནི་མེད་དེ་ཞེས་བྱ་བ་ནི་རྫུ་འཕྲུལ་དང་། ལྷའི་རྣ་བ་དང་། མིག་གི་མངོན་པར་ཤེས་པ་དག་གོ། །ཅིའི་ཕྱིར་ཞེ་ན། གཟུགས་ལ་དམིགས་པ་
[278b.5]ཡིན་པའི་ཕྱིར་ཏེ། གཟུགས་མེད་པ་རྣམས་ནི་གཟུགས་ཀྱི་འདུ་ཤེས་བཤིག་པའི་ཕྱིར་གཟུགས་ལ་མི་དམིགས་སོ། །གཟུགས་ལ་སྟེགས་བཅས་ནས་མངོན་པར་བསྒྲུབ་པར་བྱ་བ་ཡིན་པའི་ཕྱིར་རོ་ཞེས་བྱ་བ་ནི་གཟུགས་ཀྱི་སྒོ་ནས་བསྒྲུབ་པར་བྱ་བ་ཡིན་པའི་ཕྱིར་རོ། །གཟུགས་ལ་དམིགས་པའི་
[278b.6]ལམ་གྱིས་བསྒྲུབ་པར་བྱ་བ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་སྟེ། གཟུགས་འདི་འདྲ་བས་ན་སེམས་འདི་འདྲ་བར་འགྱུར་རོ་ཞེས་བྱ་བ་ཡིན་ན། གཟུགས་མེད་པ་རྣམས་ནི་གཟུགས་ལ་མི་དམིགས་སོ། །སྔོན་གྱི་གནས་རྗེས་སུ་དྲན་པ་ཡང་མེད་དེ། མཐར་གྱིས་སྔོན་གྱི་གནས་གཞན་རྗེས་སུ་དྲན་
[278b.7]པས་མངོན་པར་འགྲུབ་པའི་ཕྱིར་རོ། །འདི་ལྟར་མཐར་གྱིས་བདག་ཉིད་ཀྱི་གནས་གཞན་དག་རྗེས་སུ་དྲན་པས་སྒྲུབ་པར་བྱེད་ན། གཟུགས་མེད་དངོས་གཞི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་མིན། །ཞེས་འཆད་པར་འགྱུར་བས་གཟུགས་མེད་པ་རྣམས་ཀྱང་འདོད་པ་ན་སྤྱོད་པའི་ཆོས་ལ་
[279a]
[279a.1]མི་དམིགས་ལ། བདག་ཉིད་ཀྱི་གནས་གཞན་འདོད་པ་ན་སྤྱོད་པ་དེ་དག་ཀྱང་མངོན་པར་བསྒྲུབ་པའི་དུས་ན་དེའི་དམིགས་པ་ཡིན་པས་དེའི་ཕྱིར་དེའི་ས་པ་མེད་དོ། །གནས་དང་རུས་ལ་སོགས་པ་ལ་དམིགས་པའི་ཕྱིར་ཞེས་བྱ་བ་ནི་དེ་ནས་ཤི་འཕོས་ནས་ཀྱང་ཆེ་གེ་མོ་ཞིག་ཏུ་
[279a.2]སྐྱེས་སོ་ཞེས་བྱ་བ་ལྟ་བུ་སྟེ། འདི་ལྟར་མདོ་ལས། གང་དུ་བདག་མིང་འདི་ཞེས་བྱ། རིགས་ནི་འདི་ལྟ་བུ། རུས་ནི་འདི་ལྟ་བུ། ཁ་ཟས་ནི་འདི་ལྟ་བུ་ཟ་ཟ། བདེ་བ་དང་སྡུག་བསྔལ་ནི་འདི་ལྟ་བུ་ཞིག་ཉམས་སུ་མྱོང་། ཚེ་ནི་འདི་ཙམ་ཞིག་ཐུབ། ཡུན་ནི་འདི་སྲིད་ཅིག་གནས་གནས། ཚེའི་མཐའ་ན་འདི་སྲིད་
[279a.3]ཅིག་ཡིན་པར་གྱུར་ན། སེམས་ཅན་ནི་དེ་དག་བྱུང་ངོ་། །བདག་གནས་དེ་ནས་ཤི་འཕོས་ནས་ནི་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་ནི་འདིར་སྐྱེས་སོ་ཞེས་སྔོན་གྱི་གནས་རྣམ་པ་དུ་མ་རྣམ་པ་དང་བཅས། ཡུལ་ཕྱོགས་དང་བཅས། གླེང་གཞི་དང་བཅས་པར་རྗེས་སུ་དྲན་ནོ་ཞེས་
[279a.4]གསུངས་ན། གཟུགས་མེད་པ་རྣམས་ནི་གནས་དང་རུས་ལ་སོགས་པ་ལ་དམིགས་པ་དང་། ས་འོག་མ་ལ་དམིགས་པ་མ་ཡིན་པས་འདིའི་ཕྱིར་ཡང་གཟུགས་མེད་པའི་ས་པ་མ་ཡིན་ནོ། །ཇི་ལྟར་གཞན་གྱི་སེམས་ཤེས་པ་གཟུགས་ལ་སྟེགས་བཅས་ནས་མངོན་པར་བསྒྲུབ་པར་བྱ་བ་ཡིན་ཞེ་ན།
[279a.5]དེའི་ཕྱིར་གཞན་གྱི་སེམས་ཤེས་པར་འདོད་པ་ནི་ཞེས་བྱ་བ་རྒྱས་པར་སྨོས་སོ། །གཏོད་ཅེས་བྱ་བ་ནི་གཏོད་པར་བྱེད་པའོ། །མཚན་མ་བཟུང་ནས་ཞེས་བྱ་བ་ནི་སེམས་ཀྱི་རྣམ་པ་ཡོངས་སུ་བཅད་ནས་ཞེས་བྱ་བའི་ཐ་ཚིག་གོ། །དེའི་ལུགས་ལས་བཟློག་སྟེ་ཞེས་བྱ་བ་ནི་སེམས་དེའི་ལུགས་ལས་བཟློག་པ་སྟེ།
[279a.6]འགགས་མ་ཐག་པའི་གནས་སྐབས་གཞན་རྣམས་ཡིད་ལ་བྱེད་དོ། །ཐོད་རྒལ་དུ་ཡང་དྲན་ནོ་ཞེས་བྱ་བ་ཚེ་གཅིག་གམ་གཉིད་ཐོད་རྒལ་དུ་རྒལ་ནས་ཀྱང་དྲན་ནོ། །གནས་གཙང་མ་རྣམས་ཇི་ལྟར་དྲན་ཞེ་ན་ཞེས་བྱ་བ་ནི་གལ་ཏེ་སྔོན་ཉམས་སུ་མྱོང་བ་ཁོ་ན་དྲན་ནའོ། །གནས་གཙང་མ་རྣམས་འདིར་འོང་བ་
[279a.7]ནི་མེད་དེ་ཕྱིར་མི་འོང་བ་ཡིན་པའི་ཕྱིར་རོ། །དེས་ན་འདིར་དེ་དག་ཉམས་སུ་མྱོང་བ་མེད་དོ། །དེར་ཡང་མ་ཡིན་ཏེ་སོ་སོའི་སྐྱེ་བོ་རྣམས་དེར་མི་སྐྱེ་བའི་ཕྱིར་རོ། །ཐོས་པས་ཉམས་སུ་མྱོང་བའི་ཕྱིར་རོ་ཞེས་བྱ་བ་ནི་དེས་གནས་གཙང་མ་པའི་ལྷ་རྣམས་ནི་འདི་ལྟ་བུ་ཡིན་ནོ་ཞེས་ཐོས་པས་སོ། །ཉམ་སུ་མྱོང་བ་རྣམ་
[279b]
[279b.1]གཉིས་ཏེ། །མཐོང་བས་ཉམས་སུ་མྱོང་བ་དང་། །ཐོས་པས་ཉམས་སུ་མྱོང་བའོ། །ཕ་རོལ་པོའི་རྒྱུད་ལ་བརྟེན་ནས་བསྐྱེད་དོ་ཞེས་བྱ་བ་ནི་སྔོན་གྱི་གནས་རྗེས་སུ་དྲན་པ་ཤེས་པ་ནི་བསམ་གཏན་གྱིས་བསྡུས་པ་ཡིན་པས་དེས་གཟུགས་མེད་པ་ན་སྤྱོད་པའི་སེམས་མི་འཛིན་ན་ནི་ཇི་ལྟར་ཕ་རོལ་པོའི་རྒྱུད་
[279b.2]ལ་བརྟེན་ནས་སྐྱེད་ཅེ་ན། ཕ་རོལ་པོའི་ཡིད་ཀྱི་རྣམ་པར་ཤེས་པ་འགགས་མ་ཐག་པའི་མཚན་མ་བཟུང་ནས་ཞེས་བྱ་བ་རྒྱས་པར་སྦྱར་རོ། །གཞན་དག་ཅེས་བྱ་བ་ནི་གང་དག་གཟུགས་མེད་པ་ནས་ཤི་འཕོས་པ་མ་ཡིན་པ་དེ་དག་གི་སྔོན་གྱི་གནས་རྗེས་སུ་དྲན་པ་ཤེས་པ་ནི་རང་གི་རྒྱུད་ལ་བརྟེན་ནས་སྐྱེད་
[279b.3]དེ་སླ་བའི་ཕྱིར་རོ། །རྫུ་འཕྲུལ་ལ་སོགས་པའི་ཞེས་བྱ་བ་ནི་རྫུ་འཕྲུལ་དང་། ལྷའི་རྣ་བ་དང་། ལྷའི་མིག་གི་མངོན་པར་ཤེས་པ་གསུམ་པོ་དག་གི་སྟེ། གོ་རིམས་བཞིན་དུ་རྫུ་འཕྲུལ་གྱི་སྦྱོར་བ་ནི་ཡང་བ་ཡིད་ལ་བྱེད་པ་ཡིན་ནོ། །ལྷའི་རྣ་བའི་སྦྱར་བ་ནི་སྒྲ་ཡིད་ལ་བྱེད་པ་ཡིན་ནོ། །ལྷའི་མིག་གི་ནི་སྣང་
[279b.4]བ་ཡིད་ལ་བྱེད་པ་ཡིན་ནོ། །འདི་དག་ཇི་ལྟར་འཐོབ་ཅེ་ན་ཞེས་བྱ་བ་ནི་འཐོབ་པའི་དབང་དུ་བྱས་ནས་འདྲི་བ་སྟེ། མངོན་སུམ་དུ་འགྱུར་བ་ནི་འདྲིས་པ་དང་མ་འདྲིས་པ་གཉི་ག་ཡང་སྦྱོར་བ་ཁོ་ནས་ཡིན་ནོ། །མ་འདྲིས་པ་རྣམས་ནི་སྦྱོར་བས་ཞེས་བྱ་བ་ནི་བྱེ་བྲག་ཅན་ཏེ་སྔོན་མ་བསྐྱེད་པ་ཐམས་ཅད་དོ། །ཐམས་ཅད་
[279b.5]ཀྱང་སྦྱོར་བས་བསྐྱེད་པ་ཡིན་ནོ་ཞེས་བྱ་བ་ནི་འདོད་ཆགས་དང་བྲལ་བས་འཐོབ་པ་གང་དག་ཡིན་པ་དང་། སྦྱོར་བས་འཐོབ་པ་གང་དག་ཡིན་པ་དེ་དག་ཐམས་ཅད་ཀྱང་ངོ་། །སྒྲ་མ་གཏོགས་སོ་ཞེས་བྱ་བ་ནི་སྒྲ་ནི་རྒྱུན་ཆད་པའི་ཕྱིར་སྤྲུལ་པར་མི་བྱེད་དེ། འདོད་པར་གཏོགས་པའི་སྤྲུལ་པ་ནི་ཕྱིའི་སྐྱེ་མཆེད་
[279b.6]བཞི་ཞེས་འཆད་པར་འགྱུར་རོ། །འོ་ན་ཅི་ཞེ་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་མིག་གི་མངོན་པར་ཤེས་པའི་དམིགས་པ་གཟུགས་ཀྱི་སྐྱེ་མཆེད་ཡིན་ན། འོ་ན་ཇི་ལྟར་ཤི་འཕོས་པ་དང་སྐྱེ་བ་ཤེས་པས་སེམས་ཅན་འདི་དག་ནི་ལུས་ཀྱིས་ཉེས་པར་སྤྱོད་པ་དང་ལྡན་ནོ་ཞེས་བྱ་བ་དེ་ལྟ་བུར་ཤེས་ཏེ། མིག་
[279b.7]གི་རྣམ་པར་ཤེས་པས་ནི་ངག་དང་ཡིད་ཀྱི་ལས་དང་ལྡན་པར་མི་འཛིན་ནོ། །སོགས་པ་ཞེས་བྱ་བའི་སྒྲས་ནི་ལོག་པར་ལྟ་བ་བསྡུའོ། །དེ་ནི་དེས་མི་ཤེས་སོ་ཞེས་བྱ་བ་ནི་ངག་དང་ཡིད་ཀྱི་ལས་དང་ལྡན་པ་ལ་སོགས་པ་དེ་ནི་མིག་གི་རྣམ་པར་ཤེས་པ་དེས་མི་ཤེས་སོ། །འོ་ན་གང་གིས་ཤེས་ཤེ་ན། དེ་ལས་
[280a]
[280a.1]གཞན་པ་མངོན་པར་ཤེས་པའི་འཁོར་དུ་གྱུར་པའི་ཤེས་པ་ཞེས་བྱ་བ་སྨོས་ཏེ། དེ་ནི་ཡིད་ཀྱི་ཡིན་ནོ་ཞེས་བྱ་བའི་ཐ་ཚིག་གོ། །ལྷག་མ་ཞེས་བྱ་བ་ནི་སྔོན་གྱི་གནས་དང་ཟག་པ་ཟད་པའི་མངོན་པར་ཤེས་པ་དག་ནི་དྲན་པ་ཉེ་བར་གཞག་པ་བཞི་ཆར་གྱི་རང་བཞིན་དག་ཡིན་ནོ། །ཇི་ལྟར་
[280a.2]ཟག་པ་ཟད་པའི་མངོན་པར་ཤེས་པ་དྲན་པ་ཉེ་བར་གཞག་པ་བཞིའི་རང་བཞིན་ཡིན་ཞེ་ན། ཤེས་པ་བཅུའི་ངོ་བོ་ཉིད་ཡིན་པའི་ཕྱིར་རོ། །ཤེས་པ་དྲུག་གི་ངོ་བོ་ཉིད་ཡིན་ན་ཡང་ལུས་དང་ཚོར་བ་དང་སེམས་དྲན་པ་ཉེ་བར་གཞག་པ་མ་འོངས་པ་དག་འཐོབ་བོ། །འོ་ན་ཇི་ལྟར་དེ་དག་བསམ་གཏན་བཞི་པའི་
[280a.3]ས་པར་འགྲུབ་ཅེས་བྱ་བ་ནི་མིག་གི་ཤེས་པ་དང་། རྣ་བའི་ཤེས་པ་དང་བསམ་གཏན་གཉིས་པ་ལ་སོགས་པའི་ས་པ་ནི་མེད་དེ། མིག་དང་རྣ་བའི་ཤེས་པ་དང་མཚུངས་པར་མི་ལྡན་པའི་ཕྱིར་རོ། །དེ་དག་ཀྱང་གཉིས་པ་ལ་སོགས་པ་ན་མེད་པའི་ཕྱིར་ཏེ། གཉིས་པ་སོགས་ན་ལུས་མིག་དང་། །རྣ་བའི་
[280a.4]རྣམ་ཤེས་རྣམ་རིག་སློང་། །གང་ཡིན་དེ་ནི་དང་པོར་གཏོགས། །ཞེས་ཁྱད་པར་འགྱུར་རོ། །རྟེན་གྱི་དབང་གིས་ཞེས་བྱ་བ་རྒྱས་པར་འབྱུང་བ་ནི་རྟེན་མིག་དང་རྣ་བའི་དབང་གིས་དེ་དག་གི་ཤེས་པ་དག་ཀྱང་བསམ་གཏན་བཞི་པའི་ས་པ་ཉིད་ཡིན་ཏེ། མིག་དང་རྣ་བ་དག་ནི་བསམ་གཏན་བཞི་པའི་ས་པར་རྣམ་
[280a.5]པར་གཞག་གོ། །དེ་ནི་གཙོ་བོའམ་ཕལ་ཆེ་བ་བསྟན་པ་ཡིན་ནོ་ཞེས་བྱ་བ་ནི་གཙོ་བོར་གྱུར་པས་ན་གཙོ་བོ་སྟེ། ཕལ་ཆེ་བ་ཡང་དེ་དང་འདྲའོ། །མངོན་པར་ཤེས་པ་དགེ་བ་ནི་གཙོ་བོར་གྱུར་པས་དེའི་ཕྱིར་དེ་ལ་ལྟོས་ནས་མངོན་པར་ཤེས་པ་བཅུ་ནི་ཤེས་རབ་དགེ་བའི་ཞེས་བསྟན་པར་མཛད་དོ། །ཡང་ན་མངོན་
[280a.6]པར་ཤེས་པ་ཕལ་ཆེར་དགེ་བ་ཡིན་པས་དེའི་ཕྱིར་དེ་སྐད་དུ་བསྟན་ཏེ། མོན་སྲེན་སྡེའུ་ལ་སོགས་པ་ཡོད་བཞིན་དུ་ཡང་མོན་སྲན་གྲེའུའི་ཕུང་པོ་ཞེས་ཐ་སྙད་འདོགས་པ་བཞིན་ནོ། །སྔོན་མཐའ་སོགས། མ་རིག་པ་ནི་བཟློག་ཕྱིར་རོ། །ཞེས་བྱ་བ་ནས་གོ་རིམས་བཞིན་དུ་ཞེས་བྱ་བའི་བར་འབྱུང་བ་ནི་རེ་ཞིག་
[280a.7]སྐལ་ལྡན་ཁྱད་པར་ཅན་ལ་སོགས་པ་ན་རེ་སྔོན་གྱི་གནས་རྗེས་སུ་དྲན་པས་ནི་སྔོན་གྱི་མཐའ་ལ་ཀུན་དུ་རྨོངས་པ་ཟློག་པར་བྱེད་དོ། །འཆི་འཕོ་དང་སྐྱེ་བའི་མངོན་པར་ཤེས་པས་ནི་བར་ལ་ཀུན་དུ་རྨོངས་པ་ཟློག་པར་བྱེད་དོ། །ཟག་པ་ཟད་པའི་མངོན་པར་ཤེས་པས་ནི་འདི་ལས་སྲིད་པ་གཞན་མི་ཤེས་སོ་
[280b]
[280b.1]ཞེས་ཕྱི་མའི་མཐའ་ལ་ཀུན་དུ་རྨོངས་པ་སེལ་བར་བྱེད་དོ་ཞེས་ཟེར་ཏེ། འཆད་པར་བྱེད་པ་དེ་དག་གི་བསམ་པ་ནི་དུས་ཀྱི་རིམ་པ་ནི་འདས་པ་དང་། ད་ལྟར་བྱུང་བ་དང་། མ་འོངས་པའི་དུས་ཞེས་བྱ་བ་ཡིན་པས་དེ་ལྟ་བས་ན་དོན་གྱི་ཚུལ་ནི་དེ་ལྟ་བུ་ཡིན་ནོ་སྙམ་པ་ཡིན་ནོ། །སློབ་དཔོན་འདུས་
[280b.2]བཟང་ན་རེ། སྔོན་མཐའ་སོགས། མ་རིག་པ་ནི་བཟློག་ཕྱིར་རོ། །ཞེས་བྱ་བ་སྔོན་གྱི་གནས་མངོན་པར་ཤེས་པས་ནི་སྔོན་གྱི་མཐའ་ལ་ཀུན་དུ་རྨོངས་པ་ཟློག་པར་བྱེད་དོ། །འཆི་འཕོ་དང་སྐྱེ་བའི་མངོན་པར་ཤེས་པས་ནི་ཕྱི་མའི་མཐའ་ལ་ཀུན་དུ་རྨོངས་པ་ཟློག་པར་བྱེད་དོ།། །།བམ་པོ་ལྔ་
[280b.3]བཅུ་བདུན་པ། ཟག་པ་ཟད་པའི་མངོན་པར་ཤེས་པས་ནི་བར་ལ་ཀུན་དུ་རྨོངས་པ་ཟློག་པར་བྱེད་དོ། །དེའི་ཕྱིར་གསུམ་ཁོ་ན་རིག་པ་ཉིད་ཡིན་ཏེ། སྔ་མས་ནི་བདག་དང་གཞན་གྱི་རྒུད་པ་མཐོང་ནས་ཀུན་དུ་སྐྱོ་བ་སྐྱེ་བའི་ཕྱིར་རོ། །བར་མས་ནི་གཞན་ཁོ་ནའི་སྟེ། དེ་ལྟར་ཀུན་དུ་སྐྱོ་ན་གསུམ་པས་ཡང་དག་
[280b.4]པའི་དོན་རྟོགས་པའི་ཕྱིར་རོ་ཞེས་ཟེར་རོ། །འདིར་གང་ཡིན་པར་ཁོང་དུ་ཆུད་པར་བྱ་ཞེ་ན། སློབ་དཔོན་འདུས་བཟང་གིས་བཤད་པ་ཁོ་ན་རིག་པའི་ངོ་བོ་ཡིན་པར་བལྟ་བར་བྱའོ། །སློབ་དཔོན་གྱི་དགོངས་པ་ཡང་དེ་ལྟ་བུ་ཉིད་ཡིན་པར་མངོན་ཏེ། འདི་ལྟར་སྔོན་གྱི་གནས་དང་། འཆི་འཕོ་དང་། སྐྱེ་བ་དང་
[280b.5]ཟག་པ་ཟད་པ་ཤེས་པ་མངོན་དུ་བྱ་བ་རྣམས་ནི་མི་སློབ་པའི་རིག་པ་གསུམ་ཞེས་བྱའོ་ཞེས་བཤད་ནས། འདི་དག་གིས་ནི་གོ་རིམས་བཞིན་དུ་སྔོན་གྱི་མཐའ་དང་། ཕྱི་མའི་མཐའ་དང་། བར་ལ་ཀུན་དུ་རྨོངས་པ་ཟློག་པར་བྱེད་དོ་ཞེས་བཤད་དོ། །མངོན་པར་ཤེས་པ་གསུམ་ཁོ་ན་རིག་པ་གསུམ་ཡིན་ནོ་ཞེས་
[280b.6]བྱ་བ་ཅི་མངོན་ཞེ་ན། འདི་ལྟར་མདོ་ཉིད་ལས་འདི་སྐད་དུ་མི་སློབ་པའི་སྔོན་གྱི་གནས་རྗེས་སུ་དྲན་པ་ཤེས་པ་མངོན་དུ་བྱེད་པའི་རིག་པ་དང་། མི་སློབ་པའི་འཆི་འཕོ་དང་སྐྱེ་བ་ཤེས་པ་མངོན་དུ་བྱ་བའི་རིག་པ་དང་། མི་སློབ་པའི་ཟག་པ་ཟད་པ་ཤེས་པ་མངོན་དུ་བྱེད་པའི་རིག་པ་ཞེས་འབྱུང་བས་རིག་པ་གསུམ་དུ་
[280b.7]རྣམ་པར་གཞག་པའི་ཕྱིར་ལ། འདི་སྐད་དུ་སྡེ་སྣོད་གསུམ་པ་ཡིན། རིག་པ་གསུམ་ཡིན་ཞེས་ཀྱང་འབྱུང་བས་སོ། །མི་སློབ་པའི་རིག་པ་ཡིན་ནོ་ཞེས་བྱ་བ་ནི། ཟག་པ་མེད་པའི་ཕྱིར་རོ་སྙམ་དུ་བསམས་པ་ཡིན་ནོ། །དེ་གཉིས་ནི་ཞེས་བྱ་བ་ནི་སྔོན་གྱི་གནས་དང་། འཆི་འཕོ་དང་སྐྱེ་བའི་མངོན་པར་ཤེས་
[281a]
[281a.1]པ་དག་ནི་ཟག་པ་ཟད་པ་དང་བཅས་པའི་ཕྱིར་སློབ་པ་ཡང་མ་ཡིན་ལ་མི་སློབ་པ་ཡང་མ་ཡིན་ནོ། །གོ་རིམས་བཞིན་དུ་ཆོ་འཕྲུལ་གསུམ་ཡིན་ཏེ་ཞེས་བྱ་བ་ནི་རྫུ་འཕྲུལ་གྱི་ཡུལ་གྱི་མངོན་པར་ཤེས་པ་དག་ནི་རྫུ་འཕྲུལ་གྱི་ཆོ་འཕྲུལ་ཡིན་ནོ། །སེམས་ཀྱི་རྣམ་གྲངས་ཀྱི་མངོན་པར་ཤེས་པ་
[281a.2]ནི་ཀུན་རྗོད་པའི་ཆོ་འཕྲུལ་ཏེ། ཁྱོད་ཀྱི་སེམས་ནི་འདི་འདྲའོ་ཞེས་བྱ་བ་ཡིན་ནོ། །ཟག་པ་ཟད་པའི་མངོན་པར་ཤེས་པ་ནི་རྗེས་སུ་བསྟན་པའི་ཆོ་འཕྲུལ་ཏེ། ཡང་དག་པ་ཇི་ལྟ་བ་བཞིན་སྟོན་པ་ཞེས་བྱ་བའི་ཐ་ཚིག་གོ། །ཞེ་འགྲས་པ་དང་བར་མར་གནས་པ་རྣམས་ཀྱི་ཞེས་བྱ་བ་ནི་ངེས་པའི་ཚིག་གི་ཚུལ་
[281a.3]བརྟེན་ནས་བཤད་པ་ཡིན་ནོ། །མི་འཁྲུལ་པའི་ཕྱིར་ཞེས་བྱ་བ་ནི་ཉོན་མོངས་པ་ཟག་པ་ཟད་པ་མེད་ན་མི་འབྱུང་བའི་ཕྱིར་རོ། །འབྱོར་པར་བྱེད་ཅེས་བྱ་བ་ནི་འགྲུབ་པར་བྱེད་ཅེས་བྱ་བའི་ཐ་ཚིག་གོ། །ཐག་རིང་པོ་ལ་ཉེ་བར་མོས་ནས་ཞེས་བྱ་བ་ནི་མོས་པས་གྲུབ་པ་ནི་མོས་པ་ལས་བྱུང་བ་སྟེ། ཐག་རིང་པོ་
[281a.4]གང་ཡིན་པ་དེ་ཉེ་བར་མོས་ཤིང་དེས་མྱུར་དུ་འགྲོ་བའི་ཕྱིར་མོས་པ་ལས་བྱུང་བ་ཞེས་བྱའོ། །ཕྱིའི་སྐྱེ་མཆེད་བཞི་ཞེས་བྱ་བ་ནི་ནང་གི་སྐྱེ་མཆེད་ནི་སྤྲུལ་པར་མི་བྱེད་དེ། དེ་སྤྲུལ་ན་སྔོན་མེད་པའི་སེམས་ཅན་འབྱུང་བར་ཐལ་བར་འགྱུར་བའི་ཕྱིར་རོ། །བདག་དང་གཞན་གྱི་ལུས་དང་འབྲེལ་པའོ་ཞེས་བྱ་བ་ནི་བདག་ཉིད་
[281a.5]སེང་གེར་བསྒྱུར་བའམ་གླང་པོ་ཆེར་བསྒྱུར་བ་གང་ཡིན་པ་དེ་ནི་བདག་གི་ལུས་དང་འབྲེལ་པ་ཡིན་ནོ། །བདག་ཉིད་ལས་ཕྱི་རོལ་དུ་སེང་གེའམ་གླང་པོ་ཆེར་སྤྲུལ་པ་གང་ཡིན་པ་དེ་ནི་གཞན་གྱི་ལུས་དང་འབྲེལ་པ་ཡིན་ནོ། །དེ་ཁོ་ན་བཞིན་དུ་རྣམ་པ་གཉིས་ཡིན་ཞེས་བྱ་བ་ནི་བདག་དང་གཞན་གྱི་ལུས་དང་
[281a.6]འབྲེལ་པའོ། །གཟུགས་ཀྱི་ཁམས་ན་ཡང་དེ་དང་འདྲ་བས་ཞེས་བྱ་བ་ནི་ཇི་ལྟར་འདོད་པའི་ཁམས་སུ་སྐྱེས་པ་སྤྲུལ་པ་འདོད་པ་ན་སྤྱོད་པ་དང་། །གཟུགས་ན་སྤྱོད་པ་དང་རྣམ་པ་གཉིས་སྤྲུལ་པར་བྱེད་ལ། དེ་ཡང་བདག་གི་ལུས་དང་འབྲེལ་པ་དང་། གཞན་གྱི་ལུས་དང་འབྲེལ་པ་དང་རྣམ་པ་གཉིས་ཡིན་པས་
[281a.7]རྣམ་པ་བཞི་ཡིན་པ་དེ་བཞིན་དུ། གཟུགས་ཀྱི་ཁམས་སུ་སྐྱེས་པ་ཡང་རྣམ་པ་བཞི་སྤྲུལ་པར་བྱེད་པས་མདོར་བསྡུ་ན་སྤྲུལ་པ་ནི་རྣམ་པ་བརྒྱད་ཡིན་ནོ། །གོས་དང་རྒྱན་བཞིན་དུ་མི་ལྡན་ནོ་ཞེས་བྱ་བ་ནི་དཔེར་ན་གོས་དང་རྒྱན་རང་གི་ལུས་དང་འབྲེལ་པ་དག་ཀྱང་སེམས་ཅན་དུ་མི་བགྲང་བའི་ཕྱིར་རམ། དབང་པོའི་
[281b]
[281b.1]རྟེན་དང་མ་འབྲེལ་པའི་ཕྱིར་མི་ལྡན་པ་དེ་དག་འདྲའོ། །སྐྱེ་མཆེད་གཉིས་ཞེས་བྱ་བ་ནི་གཟུགས་དང་རེག་བྱའི་སྐྱེ་མཆེད་དོ། །དྲི་དང་རོའི་སྐྱེ་མཆེད་ནི་མ་ཡིན་ཏེ། མི་ལྡན་པའི་ཕྱིར་རོ་སྙམ་དུ་བསམས་པ་ཡིན་ནོ། །སྒྲའི་སྐྱེ་མཆེད་ཀྱང་མ་ཡིན་ཏེ་འཆད་པའི་ཕྱིར་རོ། །གཞན་དག་ན་རེ་བསྣུན་པ་
[281b.2]ལས་འབྱུང་བའི་ཕྱིར་རོ་ཞེས་ཟེར་ཏེ། གློ་བུར་བ་ཡིན་པའི་ཕྱིར་རོ་སྙམ་དུ་བསམས་པ་ཡིན་ནོ། །བསམ་གཏན་གཉིས་པའི་འབྲས་བུ་ནི་གསུམ་སྟེ་ཞེས་བྱ་བ་ནི་ས་འོག་མ་པ་དེ་གཉིས་དང་རང་གི་ས་པའོ། །བཞི་དང་ལྔར་སྦྱར་བར་བྱའོ་ཞེས་བྱ་བ་ནི་བསམ་གཏན་གསུམ་པའི་ས་པ་ནི་བཞི་སྟེ། ས་འོག་
[281b.3]མ་པ་གསུམ་དང་རང་གི་ས་པའོ། །བསམ་གཏན་བཞི་པའི་ས་པ་ནི་ལྔ་སྟེ། ས་འོག་མ་པ་བཞི་དང་རང་གི་ས་པའོ་ཞེས་བྱ་བ་ཡིན་ནོ། །བསམ་གཏན་གཉིས་པ་ལ་སོགས་པའི་འབྲས་བུ་ཞེས་བྱ་བ་རྒྱས་པར་འབྱུང་བ་ནི་སྤྲུལ་པ་པོས་སྤྲུལ་པ་བསམ་གཏན་གཉིས་པ་ལ་སོགས་པའི་འབྲས་བུ་སྤྲུལ་པ་
[281b.4]གང་ཡིན་པ་དེ་ནི་བསམ་གཏན་དང་པོའི་ས་པའི་སྤྲུལ་པ་དེའི་འབྲས་བུ་སྟེ། བསམ་གཏན་དང་པོའི་འབྲས་བུ་ལས་ཁྱད་པར་དུ་འཕགས་ཏེ། སྤྲུལ་པ་བསམ་གཏན་གཉིས་པའི་འབྲས་བུ་དེ་ནི་བསམ་གཏན་གཉིས་པའི་ས་པར་འགྲོ་བའི་བསམ་གཏན་དང་པོའི་འབྲས་བུ་ནི་དེར་མི་འགྲོའོ། །འོ་ན་ཅི་ཞེ་
[281b.5]ན། བསམ་གཏན་དང་པོའི་ས་པ་ཁོ་ནར་འགྲོ་བས། འགྲོ་བའི་བྱེ་བྲག་གི་སྒོ་ནས་ཁྱད་པར་ཡོད་དོ། །དེ་བཞིན་དུ་བསམ་གཏན་གསུམ་པ་ལ་སོགས་པའི་འབྲས་བུ་ལ་ཡང་སྦྱར་བར་བྱའོ། །རྙེད་པ་ནི་བསམ་གཏན་བཞི་ཡིན་ནོ་ཞེས་བྱ་བ་ནི་སྤྲུལ་པའི་སེམས་རྣམས་ཀྱང་བསམ་གཏན་གྱི་དངོས་གཞི་
[281b.6]དག་བཞིན་དུ་འདོད་ཆགས་དང་བྲལ་བའི་སྒོ་ནས་རྙེད་དོ། །སྤྲུལ་པའི་སེམས་ནི་བསམ་གཏན་དག་པ་པའི་མཇུག་ཐོགས་སུ་སྐྱེ་ཞེས་བྱ་བ་ནི་སྤྲུལ་པའི་སེམས་མངོན་སུམ་དུ་གྱུར་པ་ན། དང་པོ་གང་ཡིན་པ་དེ་ནི་དག་པ་པ་ལས་སྐྱེའོ། །སྤྲུལ་པའི་སེམས་ཀྱི་མཇུག་ཐོགས་སུ་ཞེས་བྱ་བ་ནི་གཉིས་པ་ལ་
[281b.7]སོགས་པའི་རྒྱུན་གྱི་ཚེའོ། །སྤྲུལ་པའི་སེམས་ལས་ཀྱང་བསམ་གཏན་དག་པ་པ་ཞེས་བྱ་བ་ནི་སྤྲུལ་པའི་སེམས་ལས་ལངས་པའི་ཚེའོ། །སྤྲུལ་པའི་སེམས་ཞེས་བྱ་བ་ནི་རྒྱུན་གྱི་ཚེའོ། །ཏིང་ངེ་འཛིན་གྱི་འབྲས་བུ་ལ་གནས་པ་ཞེས་བྱ་བ་ནི་སྤྲུལ་པའི་སེམས་ལ་གནས་པའོ། །ས་གོང་མ་པ་ཞེས་བྱ་
[282a]
[282a.1]བ་ནི་བསམ་གཏན་གཉིས་པ་ལ་སོགས་པའི་ས་པ་སྟེ། བསམ་གཏན་དང་པོའི་ས་པས་སྨྲར་འཇུག་གོ། །ཡན་ཆད་བསམ་གཏན་གཉིས་པ་ལ་སོགས་པ་ན་ནི་རྣམ་པར་རིག་བྱེད་ཀུན་ནས་སློང་བར་བྱེད་པ་རྟོག་པ་དང་དཔྱོད་པ་དང་བཅས་པའི་སེམས་མེད་པའི་ཕྱིར་རོ། །
[282a.2]འདི་ལྟར་བརྟགས་ཤིང་དཔྱད་ནས་ཚིག་ཏུ་སྨྲའོ་ཞེས་འབྱུང་བས་སོ། །སྤྲུལ་པའི་སེམས་མེད་པའི་ཕྱིར་སྤྲུལ་པ་མེད་ན་ཞེས་བྱ་བ་ནི་རྒྱུ་མཚན་མེད་ན་རྒྱུ་མཚན་ལས་བྱུང་བ་ཡང་མེད་པས་ཡོད་པ་མ་ཡིན་ན། ཇི་ལྟར་སྤྲུལ་པ་འདི་སྨྲར་འཇུག་སྙམ་དུ་བསམས་པ་ཡིན་ནོ། །བྱིན་གྱིས་བརླབས་ནས་གཞན་
[282a.3]འཇུག་ཕྱིར། །ཞེས་བྱ་བ་ནི་སྤྲུལ་པ་པོ་གནས་པར་འདོད་པས་སྤྲུལ་པའི་སེམས་ཀྱིས་སྤྲུལ་པ་སྤྲུལ་ནས། དེ་ཡང་འདི་གནས་པར་གྱུར་ཅིག་ཅེས་བྱིན་གྱིས་བརླབས་ནས་དེའི་འོག་ཏུ་གཞན་རྣམ་པར་རིག་བྱེད་ཀུན་ནས་སློང་བར་བྱེད་པ་རྟོག་པ་དང་དཔྱོད་པ་དང་བཅས་པའི་སེམས་ཀྱིས་སྨྲར་འཇུག་གོ། །
[282a.4]སྔོན་གྱི་བསམ་པའི་རྒྱུན་རྗེས་སུ་འབྲང་བའི་ཕྱིར་ཏེ། དེས་སྔར་སྤྲུལ་པ་སྤྲུལ་པར་བྱའོ། །དེས་བྱིན་གྱིས་བརླབ་པར་བྱའོ། །དེ་སྨར་གཞུག་གོ་སྙམ་དུ་སེམས་ལ་རྣམ་པར་གཞག་པས་སོ། །གནས་སྐབས་གཉིས་ལ་བྱིན་གྱི་རླབས་སྲིད་པའི་ཕྱིར་ཅི་གསོན་པོ་ཁོ་ན་ལ་བྱིན་གྱི་རླབས་ཡོད་དམ་ཞེས་འདྲིའོ། །
[282a.5]འཕགས་པ་འོད་སྲུངས་ཆེན་པོའི་བྱིན་གྱི་རླབས་ཀྱིས་ཞེས་བྱ་བ་ནི་འཕགས་པ་འོད་སྲུངས་ཆེན་པོའི་མོས་པས་ཞེས་བྱ་བའི་ཐ་ཚིག་གོ། །སྐྱེ་བ་ལས་སྐྱེས་རྣམ་གསུམ་མོ། །ཞེས་བྱ་བ་ནི་ལྷ་ལ་སོགས་པ་རེས་འགའ་ནི་གཞན་དག་ལ་ཕན་གདགས་པའི་ཕྱིར་སྤྲུལ་པར་བྱེད་ལ། རེས་འགའ་ནི་རྣམ་
[282a.6]པར་འཚེ་བའི་ཕྱིར་ཞེས་བྱ་བ་ལ་སོགས་པ་ཡིན་ནོ། །དེ་དག་གིས་བྱས་པ་ཞེས་བྱ་བ་རྒྱས་པར་འབྱུང་བ་ནི་ལྷ་ལ་སོགས་པས་བྱས་པའི་སྤྲུལ་པའི་བདག་དང་གཞན་དང་འབྲེལ་པ་ནི་སྐྱེ་མཆེད་དགུ་པ་ཡིན་ནོ། །དེ་ཅིའི་ཕྱིར་ཞེ་ན། སྒྲ་མེད་པའི་གཟུགས་ཅན་གྱི་སྐྱེ་མཆེད་ཡིན་པའི་ཕྱིར་ཏེ། འདི་ལྟར་དེ་ལ་སྒྲ་
[282a.7]མེད་པའི་མིག་ལ་སོགས་པའི་སྐྱེ་མཆེད་དང་། གཟུགས་ལ་སོགས་པའི་སྐྱེ་མཆེད་ཡོད་པས་སོ། །སྒྲ་ནི་རྒྱུན་མེད་པའི་ཕྱིར་སྤྲུལ་པར་མི་བྱེད་དོ། །སེམས་མེད་པ་ཡིན་པའི་ཕྱིར་ཡིད་དང་ཆོས་ཀྱི་སྐྱེ་མཆེད་དག་ཀྱང་སྤྲུལ་པར་མི་བྱེད་དོ། །སྤྲུལ་པ་སེམས་མེད་དོ་ཞེས་བྱ་བ་ཅི་མངོན་ཞེ་ན། བསྟན་བཅོས་
[282b]
[282b.1]ལས་ཏེ། འདི་སྐད་དུ་སྤྲུལ་པ་དེ་འབྱུང་བ་ཆེན་པོ་བཞི་ལས་གྱུར་པ་ཞེས་བརྗོད་པར་བྱའམ། འབྱུང་བ་ཆེན་པོ་བཞི་ལས་གྱུར་པ་མ་ཡིན་པ་ཞེས་བརྗོད་པར་བྱ། སྨྲས་པ་འབྱུང་བ་ཆེན་པོ་བཞི་ལས་གྱུར་པའོ་ཞེས་བརྗོད་པར་བྱའོ། །རྒྱུར་བྱས་པའི་གཟུགས་ཅན་ནམ། རྒྱུར་བྱས་པའི་གཟུགས་ཅན་མ་
[282b.2]ཡིན་པ་ཞེས་བརྗོད་པར་བྱ། སྨྲས་པ་རྒྱུར་བྱས་པའི་འབྲས་བུ་གཟུགས་ཅན་ནོ་ཞེས་བརྗོད་པར་བྱ་སྟེ། སེམས་མེད་པ་ཞེས་ཀྱང་བརྗོད་པར་བྱའོ། །གང་གི་སེམས་ཀྱི་དབང་གིས་འཇུག་ཅེས་བརྗོད་པར་བྱ། སྨྲས་པ། སྤྲུལ་པ་པོའི་སེམས་ཀྱི་དབང་གིས་འཇུག་གོ་ཞེས་བརྗོད་པར་བྱའོ་ཞེས་འབྱུང་ངོ་། །
[282b.3]གལ་ཏེ་སྐྱེ་མཆེད་དགུ་པ་སྤྲུལ་པར་བྱེད་ན་དབང་པོ་སྤྲུལ་པའི་ཕྱིར་ཇི་ལྟར་སྔོན་མེད་པའི་སེམས་ཅན་འབྱུང་བར་མི་འགྱུར་ཏེ། དབང་པོ་རྣམས་ནི་སེམས་ཅན་དུ་སྟོན་པ་ཡིན་ནོ་ཞེ་ན། དེའི་ཕྱིར་དབང་པོ་དང་ཐ་མི་དད་པའི་ཕྱིར་རོ་ཞེས་བྱ་བ་སྨོས་ཏེ། འདི་གང་གི་ཕྱིར་མིག་ལ་སོགས་པའི་དབང་པོ་ལྔ་རང་དང་གཞན་
[282b.4]གྱི་ལུས་དང་འབྲེལ་པའི་སྤྲུལ་པ་གཟུགས་དང་དྲི་དང་། རོ་དང་རེག་བྱའི་ངོ་བོ་ཉིད་དང་ཐ་མི་དད་པར་གནས་པ་དེའི་ཕྱིར་སྐྱེ་མཆེད་དགུ་པ་ཞེས་བྱ་བའི་དབང་པོ་ནི་སྤྲུལ་པར་མི་བྱེད་དེ། འདི་ནི་གྲུབ་པའི་མཐའ་ཡིན་ནོ། །རང་དང་གཞན་གྱི་ལུས་དང་མ་འབྲེལ་པ་སྤྲུལ་པར་བྱེད་པ་གང་ཡིན་པ་དེ་ནི་སྐྱེ་མཆེད་བཞི་
[282b.5]པ་ཁོ་ན་ཡིན་ནོ། །དཔེར་ན་ང་ལས་གཞོན་ནུ་དང་། སྲིད་པ་བར་མ་རྣམས་ཀྱི་ལྟ་བུའོ་ཞེས་བྱ་བ་འདི་གཉིས་ནི་ལས་ལས་སྐྱེས་པའི་རྫུ་འཕྲུལ་གྱི་དཔེར་བརྗོད་པ་ཡིན་ནོ། །དེ་དག་ཅི་ལྷའི་ཁོ་ན་ཡིན་ནམ་ཞེས་བྱ་བ་ནི་ལྷའི་ཞེས་བྱ་བ་སྒྲ་འདི་དངོས་ཤིག་ཡིན་ནམ། འོན་ཏེ་ཉེ་བར་བཏགས་པ་ཞིག་ཡིན་སྙམ་དུ་
[282b.6]སེམས་པ་སྟེ། གལ་ཏེ་དེ་དག་ལྷ་ལ་ཡོད་པས་ན་ལྷའིའོ་ཞེས་བྱ་བའི་དོན་དུ་གཟུང་ན་ནི་སྒྲ་འདི་དངོས་ཡིན་པར་འགྱུར་རོ། །འོན་ཏེ་ལྷའི་དང་འདྲ་བས་ལྷའིའོ་ཞེས་བྱ་བ་ནི་ཉེ་བར་བཏགས་པ་ཡིན་ནོ། །བྱང་ཆུབ་སེམས་དཔའ་དང་། འཁོར་ལོས་སྒྱུར་བ་དང་། ཁྱིམ་བདག་རིན་པོ་ཆེ་རྣམས་ཀྱི་ལྟ་བུ་ཞེས་
[282b.7]བྱ་བ་ནི་ཉེ་བར་བཏགས་པ་ཉིད་ཀྱི་དཔེ་ཡིན་པར་སྟོན་ཏོ། །རྣམ་པར་ཤེས་པ་དང་བཅས་པ་ཡིན་པའི་ཕྱིར་ཞེས་བྱ་བ་ནི་གཟུགས་ཉམས་སུ་མྱོང་བའི་སྒོ་ནས་བསྒྲུབ་པའི་ཕྱིར་རྟག་ཏུ་རྣམ་པར་ཤེས་པ་དང་བཅས་པས་བརྟེན་པས་མཚུངས་པ་ཁོ་ན་ཡིན་ནོ། །ཞར་བ་དང་ནོངས་པ་མེད་པའི་ཕྱིར་ཞེས་བྱ་བ་ལ་ཞར་བ་
[283a]
[283a.1]ནི་གཏན་མ་ཚང་བའོ། །ནོངས་པ་ནི་ཡོ་བའོ། །ཐམས་ཅད་མི་མཐོང་བ་ཞེས་བྱ་བ་ནི་དོན་གྱིས་ནི་འདི་སྐད་དུ་ལྷའི་མིག་གིས་ནི་རྒྱབ་ལོགས་སུ་ཡང་མཐོང་ལ་མདུན་དུ་ཡང་མཐོང་གི །ལྷའི་མིག་མ་ཡིན་པས་ནི་དེ་ལྟ་མ་ཡིན་ནོ་ཞེས་བཤད་པ་ཡིན་ནོ། །ལྷའི་རྣ་བ་ལ་སོགས་པ་
[283a.2]བཞི་ཡང་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་ལྷའི་མིག་དང་། སྔོན་གྱི་གནས་རྗེས་སུ་དྲན་པ་དང་། གཞན་གྱི་སེམས་ཤེས་པ་བསྡུས་ཏེ། ལྷའི་རྣ་བ་ལ་སོགས་པ་བཞི་པོ་འདི་ཡང་སྐྱེ་བས་འཐོབ་པ་ཡོད་དོ། །གང་དག་གིས་ལྷའི་མིག་སྐྱེ་བས་འཐོབ་པ་ཡིན་ཞེ་ན། འདོད་པ་ན་སྤྱོད་པའི་ལྷ་རྣམས་
[283a.3]དང་། ཀླུ་རྣམས་དང་། གཟུགས་ན་སྤྱོད་པ་རྣམས་ཀྱིའོ། །གཟུགས་མེད་པ་ན་སྤྱོད་པ་རྣམས་ཀྱི་ནི་མ་ཡིན་ཏེ། དེ་ན་གཟུགས་མེད་པའི་ཕྱིར་རོ། །རྫུ་འཕྲུལ་གྱིས་འགྲོ་བ་དང་། སྤྲུལ་པ་ཡང་མེད་དོ། །ལྷའི་རྣ་བ་དང་མིག་ཀྱང་འཐོབ་པ་མེད་དོ། །རང་དང་གཞན་གྱི་རྒྱུད་དུ་ཡོངས་སུ་དཔྱོད་པ་མེད་པའི་
[283a.4]ཕྱིར་གཞན་གྱི་སེམས་ཤེས་པ་ཡང་མེད་དོ། །འདོད་པ་དང་གཟུགས་ན་སྤྱོད་པའི་སེམས་ཅན་ལྟ་བུར་སྔོན་གྱི་གནས་རྗེས་སུ་དྲན་པ་ཡང་མེད་དེ། དེ་ལྟ་བུའི་ལུས་ཡང་དག་པར་མི་འགྲུབ་པའི་ཕྱིར་རོ། །ཡང་ན་འདོད་པ་དང་གཟུགས་ན་སྤྱོད་པའི་སེམས་ཅན་ལྟ་བུར་མངོན་པར་ཤེས་པ་ཐམས་ཅད་ཀྱང་
[283a.5]མེད་དེ། དེ་ལྟ་བུའི་ལུས་ཡང་དག་པར་མི་འགྲུབ་པའི་ཕྱིར་རོ། །ཇི་ལྟར་བསྒོམས་པའི་འབྲས་བུ་དགེ་བ་ཁོ་ན་ཡིན་པ་ལྟ་བུ་ནི་མ་ཡིན་ནོ་ཞེས་བྱ་བ་ནི་བཟློག་པའི་དཔེའོ། །འགྲོ་བ་གཞན་ན་གནས་པས་ནི་རྟག་ཏུ་ཤེས་སོ་ཞེས་བྱ་བ་ནི་ལྷ་ལ་སོགས་པའི་འགྲོ་བ་ན་གནས་པས་ནི་གཞན་གྱི་སེམས་ཤེས་པ་
[283a.6]དང་། སྔོན་གྱི་གནས་རྗེས་སུ་དྲན་པ་དེ་དག་གིས་དེ་རྟག་ཏུ་ཤེས་ཏེ། སྡུག་བསྔལ་གྱི་ཚོར་བས་མཉེན་པའི་ཕྱིར། མི་ལ་སྐྱེ་བས་ཐོབ་པ་མེད། ཅེས་བྱ་བ་ནི་མི་རྣམས་ཀྱི་རྫུ་འཕྲུལ་ལ་སོགས་པ་ཇི་སྐད་བཤད་པ་དེ་ནི་འདོད་ཆགས་དང་བྲལ་བ་ཐོབ་པ་དང་། རྟོག་གེ་དང་། རིག་པ་དང་། སྨན་གྱི་
[283a.7]ལས་ཀྱིས་བྱས་པ་ནི་ཡོད་ཀྱི། །སྐྱེས་ནས་ཐོབ་པ་ནི་མེད་དོ། །འོ་ན་རང་བཞིན་གྱིས་ཚེ་རབས་དྲན་པ་གང་ཡིན་པ་ཇི་ལྟ་བུ་ཞེས་བྱ་བ་ནི་ཚེ་རབས་དྲན་པ་ཉིད་ནི་སྔོན་གྱི་གནས་རྗེས་སུ་དྲན་པར་འགྱུར་ལ། དེ་ཡང་སྐྱེས་ནས་འབྱུང་བས་ཇི་ལྟར་རོ། །འདི་སྐྱེས་ནས་ཐོབ་པ་མ་ཡིན་སྙམ་དུ་བསམས་པ་ཡིན་ནོ། །
[283b]
[283b.1]དེ་དག་གིས་ནི་ལས་ཀྱི་ཁྱད་པར་ལས་སྐྱེས་པ་ཡིན་ཞེས་སྨོས་པ་ནི་བྱང་ཆུབ་སེམས་དཔའ་དེ་དག་གི་ནི་ལས་ཀྱི་ཁྱད་པར་གྱིས་འགྲུབ་པ་ཡིན་ནོ། །སྐྱེས་ནས་ཐོབ་པ་ཞེས་བྱ་བ་ནི་གང་ཐམས་ཅད་ཀྱི་སྐྱེས་པའི་དུས་ཉིད་ན་རང་བཞིན་གྱིས་འཐོབ་པ་ཡིན་གྱི་དཔེར་ན་བྱ་རྣམས་ནམ་མཁའ་ལ་འགྲོ་བ་
[283b.2]ལྟ་བུ་སྐྱེས་པའི་དུས་ཀྱི་འོག་ཏུ་ཡང་གང་ཡང་རུང་བའི་ནི་མ་ཡིན་པ་ཉིད་དོ། །དེ་ལྟ་བས་ན་དེ་དག་གི་དེ་ནི་ལས་ཀྱི་ཁྱད་པར་ལས་སྐྱེས་པ་ཡིན་ནོ། །ཇི་ལྟ་ཞེ་ན། རྣམ་པ་གསུམ་སྟེ་ཞེས་བྱ་བ་རྒྱས་པར་སྨོས་ཏེ། བསྒོམས་པའི་འབྲས་བུ་ནི་ཇི་སྐད་དུ་བཤད་པ་ལྟ་བུ་ཡིན་ནོ། །སྐྱེ་བས་ཐོབ་པ་ནི་ལྷ་ལ་
[283b.3]སོགས་པ་ཡིན་ནོ། །ལས་ལས་སྐྱེས་པ་ནི་དཔེར་ན་བྱང་ཆུབ་སེམས་དཔའ་དེ་དག་གི་ལྟ་བུ་ཡིན་ནོ། །ཆོས་མངོན་པའི་འགྲེལ་བཤད་སློབ་དཔོན་རྒྱལ་པོའི་སྲས་གྲགས་པའི་བཤེས་གཉེན་གྱིས་མཛད་པ་དོན་གསལ་བ་ཞེས་བྱ་བ་ལས་ཡེ་ཤེས་བསྟན་པ་ཞེས་བྱ་བ་སྟེ་མཛོད་ཀྱི་གནས་བདུན་
[283b.4]པའོ།། །།བདུན་པའི་འོག་ཏུ་མཛོད་ཀྱི་གནས་བརྒྱད་པ་ཉེ་བར་དགོད་པའི་འགྲེལ་པ་བསྟན་པའི་ཕྱིར། ཤེས་པའི་སྐབས་ཀྱིས་ཞེས་བྱ་བ་རྒྱས་པར་སྨོས་ཏེ། ཤེས་པའི་སྐབས་ཤེས་པ་བཅུའི་སྐབས་ཀྱིས་ཤེས་པའི་རང་བཞིན་ཤེས་པའི་ངོ་བོ་ཉིད་སྨོན་ནས་ཤེས་པ་དང་། སོ་སོ་ཡང་དག་
[283b.5]པར་རིག་པའི་ཤེས་པ་ལ་སོགས་པ་བཤད་ཟིན་ཏོ། །རང་བཞིན་གཞན་ཏིང་ངེ་འཛིན་ལ་སོགས་པ་བརྗོད་པར་བྱའོ། །ཡོན་ཏན་ཐམས་ཅད་ཀྱི་རྟེན་ཡིན་པའི་ཕྱིར་ཞེས་བྱ་བ་ནི་གཟུགས་མེད་པ་དག་ཀྱང་ཡོན་ཏན་གྱི་རྟེན་ཡིན་པར་ནི་འདོད་མོད་ཀྱི། ཡོན་ཏན་ཐམས་ཅད་ཀྱི་རྟེན་ནི་མ་ཡིན་ནོ། །བསམ་
[283b.6]གཏན་རྣམས་ནི་ཡོན་ཏན་རྣམས་ཀྱི་རྟེན་ཡིན་ནོ། །བསམ་གཏན་རྣམས་ནི་རྣམ་པ་གཉིས་སོ་ཞེས་བྱ་བ་ནི་རྒྱུའི་བསམ་གཏན་དང་འབྲས་བུའི་བསམ་གཏན་རྣམས་སོ་ཞེས་བྱ་བའི་ཐ་ཚིག་གོ། །དགེ་བ་རྩེ་གཅིག་པ་ཞེས་བྱ་བ་ནི་སེམས་དགེ་བ་རྣམས་ཀྱི་རྩེ་གཅིག་པའོ། །བྱེ་བྲག་མེད་པར་ཞེས་བྱ་བ་
[283b.7]ནི་བསམ་གཏན་ཐམས་ཅད་ཀྱི་མཚན་ཉིད་ཀྱང་འདི་ཡིན་ནོ། །དེའི་ཕྱིར་ཏིང་ངེ་འཛིན་གྱི་རང་བཞིན་ཡིན་པའི་ཕྱིར་རོ་ཞེས་བྱ་བ་སྨོས་ཏེ། བསམ་གཏན་རྣམས་ནི་ཞེས་བྱ་བ་ཚིག་ལྷག་མ་ཡིན་ནོ། །ཡང་ན་བྱེ་བྲག་མེད་པར་ཞེས་བྱ་བ་ནི་ཏིང་ངེ་འཛིན་ཙམ་སྨོས་པ་ཡིན་ནོ། །དབྱེ་ན་ནི། རྗེས་འབྲང་བཅས་ན་
[284a]
[284a.1]ཕུང་པོ་ལྔ། །ཞེས་བྱ་བ་ཡིན་ཏེ། འདིར་གཟུགས་ཀྱི་ཕུང་པོ་ནི་རྣམ་པར་རིག་བྱེད་མ་ཡིན་པའི་གཟུགས་སོ། །དམིགས་པ་གཅིག་པ་ཉིད་དོ་ཞེས་བྱ་བ་ནི་སེམས་རྣམས་ཀྱི་དམིགས་པ་གཅིག་པ་ཉིད་དོ། །ཡང་སེམས་དང་སེམས་ལས་བྱུང་བ་ཐམས་ཅད་ཀྱང་དམིགས་
[284a.2]པ་གཅིག་པ་ཉིད་ཡིན་ན། ཅིའི་ཕྱིར་སེམས་རྣམས་ཀྱི་དམིགས་པ་གཅིག་པ་ཉིད་ཅེས་བྱའི། སེམས་དང་སེམས་ལས་བྱུང་བ་རྣམས་ཀྱི་ཞེས་ནི་མི་བྱ་ཞེ་ན་གཙོ་བོ་ཡིན་པའི་ཕྱིར་རོ། །སེམས་དམིགས་པ་གཅིག་པ་དག་ཁོ་ན་ཏིང་ངེ་འཛིན་ཡིན་ཞེས་བྱ་བ་ནི་གནས་སྐབས་ཀྱི་ཁྱད་པར་ཡིན་པའི་ཕྱིར་
[284a.3]སེམས་ཀྱི་ཡོན་ཏན་དང་ངོ་བོ་བཞིན་ནོ། །བྱེ་བྲག་ཏུ་སྨྲ་བ་ན་རེ། སེམས་རྣམས་ཁོ་ན་ཏིང་ངེ་འཛིན་མ་ཡིན་གྱི། གང་གིས་དེ་དག་རྩེ་གཅིག་ཅིང་མཉམ་པར་གཞག་པར་བྱེད་པའི་ཆོས་དེ་ཏིང་ངེ་འཛིན་ཡིན་ཏེ། དཔེར་ན་བྱེ་བྲག་པའི་ལུགས་ཀྱིས་དཀར་པོའི་ཡོན་ཏན་དང་ལྡན་པའི་ཕྱིར་རས་ཡུག་
[284a.4]དཀར་པོ་ཡིན་ལ། ཡོན་ཏན་དེ་ཉིད་འདི་ལ་ཡོད་པས་ནི་དཀར་པོ་ཅན་ཞེས་བྱ་བ་དེ་དང་འདྲའོ་ཞེས་ཟེར་རོ། །སྐད་ཅིག་མ་ཡིན་པའི་ཕྱིར་སེམས་ཐམས་ཅད་རྩེ་གཅིག་པ་ནི་མ་ཡིན་ནམ། ཅི་ན་འདི་སྐད་དུ་གང་གིས་དེ་དག་རྩེ་གཅིག་པར་བྱེད་པའི་ཆོས་དེ་ཏིང་ངེ་འཛིན་ཡིན་ཞེས་བརྗོད་གལ་ཏེ་གཉིས་པ་དེ་ལས་
[284a.5]རྣམ་པར་མི་གཡེང་བ་ཡིན་ནོ་ཞེ་ན་ཞེས་བྱ་བ་ནི། གལ་ཏེ་འདི་སྙམ་དུ་སེམས་གཉིས་པ་ཏིང་ངེ་འཛིན་དེའི་སྒོ་ནས་དམིགས་པ་དེ་ལས་རྣམ་པར་མི་གཡེང་བ་ཡིན་ནོ་སྙམ་དུ་སེམས་ན། མཚུངས་པར་ལྡན་པ་ལ་ཏིང་ངེ་འཛིན་དོན་མེད་པ་ཡིན་ནོ། །སེམས་དང་པོ་ཏིང་ངེ་འཛིན་དང་མཚུངས་པར་ལྡན་པ་
[284a.6]གང་ཡིན་པའི་མཚུངས་པར་ལྡན་པ་དེ་ལས་ཏིང་ངེ་འཛིན་དོན་མེད་པ་ཡིན་ཏེ། ཏིང་ངེ་འཛིན་གྱིས་དེ་ལ་བྱ་བ་ནི་མི་བྱེད་ཀྱི། གཉིས་པ་ལ་བྱ་བ་བྱེད་པའི་ཕྱིར་རོ། །གཞན་ཡང་རྒྱུ་གང་ཁོ་ན་ལས་ཏིང་ངེ་འཛིན་རྩེ་གཅིག་པ་ཉིད་ཀྱི་མཚན་ཉིད་དུ་འདོད་པའི་རྒྱུ་དེ་ཁོ་ན་ལས་སེམས་རྣམས་ཀྱི་དམིགས་
[284a.7]པ་གཅིག་པ་ཉིད་དུ་ཡང་ཅིའི་ཕྱིར་མི་འདོད། ཏིང་ངེ་འཛིན་དོན་གཞན་དུ་གྱུར་པས་ཅི་ཞིག་བྱ་སྙམ་དུ་བསམས་པ་ཡིན་ནོ། །མ་ཡིན་ཏེ། ཏིང་ངེ་འཛིན་སྟོབས་ཆུང་བའི་ཕྱིར་རོ་ཞེས་བྱ་བ་ནི་ཏིང་ངེ་འཛིན་ས་མང་པོ་པ་ཡོད་པའི་ཕྱིར་སེམས་ཐམས་ཅད་རྩེ་གཅིག་པ་ཉིད་དུ་ནི་ཐལ་བར་མི་འགྱུར་ཏེ།
[284b]
[284b.1]སེམས་གང་ཞིག་ཏིང་ངེ་འཛིན་སྟོབས་ཆུང་བ་དེ་དང་མཚུངས་པར་ལྡན་པ་དེ་ནི་རྩེ་གཅིག་པ་མ་ཡིན་ལ་སེམས་གང་ཞིག་སྟོབས་ཅན་དང་མཚུངས་པར་ལྡན་པ་དེ་ནི་རྩེ་གཅིག་པ་ཡིན་པས་ཏིང་ངེ་འཛིན་ས་མང་པོ་པ་ཉིད་ཡིན་ཡང་སེམས་ཐམས་ཅད་རྩེ་གཅིག་པ་ཉིད་དུ་ཐལ་བར་མི་
[284b.2]འགྱུར་རོ། །སེམས་རྩེ་གཅིག་པ་དག་ཁོ་ན་ཞེས་བྱ་བ་རྒྱས་པར་འབྱུང་བ་ནི་སེམས་རྩེ་གཅིག་པ་དག་ཁོ་ན་ཏིང་ངེ་འཛིན་ཡིན་གྱི། །དོན་གཞན་དུ་གྱུར་པ་ནི་མ་ཡིན་ནོ། །འདི་ལྟར་མདོ་ལས་ལྷག་པའི་སེམས་ཀྱི་བསླབ་པ་ཞེས་བྱ་བ་ནི་ལྷག་པའི་སེམས་ཀྱི་བསླབ་པ་གང་ཞེ་ན། བསམ་གཏན་བཞིའོ་
[284b.3]ཞེས་བྱ་བ་ཐམས་ཅད་དང་། དེ་བཞིན་དུ་སེམས་ཡོངས་སུ་དག་པའི་གཙོ་བོ་ནི་བསམ་གཏན་བཞི་ཁོ་ན་ཡིན་ནོ་ཞེས་བཤད་དོ། །མདོ་འདི་ནི། རྫུ་འཕྲུལ་རྐང་པ་ཏིང་ངེ་འཛིན། །ཅེས་བྱ་བ་དེར་བྲིས་སོ། ཇི་ལྟར་ལྷག་པའི་ཚུལ་ཁྲིམས་ཀྱི་བསླབ་པ་ཚུལ་ཁྲིམས་ཁོ་ན་ཡིན་གྱི་དེ་ལས་གཞན་པ་
[284b.4]མ་ཡིན་ལ། ལྷག་པའི་ཤེས་རབ་ཀྱི་བསླབ་པ་ཡང་ཤེས་རབ་ཁོ་ན་ཡིན་གྱི། དེ་ལས་གཞན་པ་མ་ཡིན་པ་དེ་བཞིན་དུ་ལྷག་པའི་སེམས་ཀྱི་བསླབ་པ་ཡང་སེམས་ཁོ་ན་ཡིན་གྱི་དེ་ལས་གཞན་པ་ནི་མ་ཡིན་པས་སེམས་ལས་མ་གཏོགས་པའི་ཏིང་ངེ་འཛིན་མེད་དོ་ཞེས་བྱ་བའི་ཐ་ཚིག་སྟེ། ལྷག་པའི་
[284b.5]སེམས་ཀྱི་བསླབ་པ་ནི་ཏིང་ངེ་འཛིན་མིན་པར་འདོད་དོ། །ཡང་ཇི་ལྟར་མདོ་དེ་ཉིད་ལས་ཚུལ་ཁྲིམས་ཡོངས་སུ་དག་པའི་གཙོ་བོ་དང་། ལྟ་བ་ཡོངས་སུ་དག་པའི་གཙོ་བོ་དང་། རྣམ་པར་གྲོལ་བ་ཡོངས་སུ་དག་པའི་གཙོ་བོ་ཞེས་བཤད་པའི་ཚུལ་ཁྲིམས་ཡོངས་སུ་དག་པ་ནི་ཚུལ་ཁྲིམས་ལས་གཞན་པ་
[284b.6]མ་ཡིན་ལ། དེ་བཞིན་དུ་ལྟ་བ་ཡོངས་སུ་དག་པ་དང་། རྣམ་པར་གྲོལ་བ་ཡོངས་སུ་དག་པ་ཡང་དེ་དག་ལས་གཞན་པ་མ་ཡིན་པ་དེ་ཁོ་ན་དང་འདྲ་བར་སེམས་ཡོངས་སུ་དག་པ་ཡང་སེམས་ལས་གཞན་པ་མ་ཡིན་ཏེ། སེམས་ཡོངས་སུ་དག་པ་ནི་བསམ་གཏན་བཞིའི་མཚན་ཉིད་ཀྱི་ཏིང་ངེ་འཛིན་ཡིན་
[284b.7]པས་སོ། །དེ་ལྟ་ན་ནི་འོ་ན་ཞེས་བྱ་བ་ནི་གལ་ཏེ་བསམ་གཏན་རྣམས་ཏིང་ངེ་འཛིན་གྱི་རང་བཞིན་ཡིན་ན། ཏིང་ངེ་འཛིན་ཐམས་ཅད་བསམ་གཏན་དུ་ཐལ་བར་འགྱུར་རོ། །ཏིང་ངེ་འཛིན་དགེ་བ་དང་ཉོན་མོངས་པ་ཅན་དང་ལུང་དུ་མ་བསྟན་པ་རྣམས་ཀྱང་བསམ་གཏན་དུ་ཐལ་བར་འགྱུར་ཏེ། ཏིང་ངེ་འཛིན་ནི་
[285a]
[285a.1]ས་མང་པོ་པ་ཡིན་པའི་ཕྱིར་རོ། །མ་ཡིན་ཏེ། ཕུལ་དུ་ཕྱིན་པ་དང་ལྡན་པ་ལ་ཞེས་བྱ་བ་རྒྱས་པར་འབྱུང་བ་ནི་དེ་ནི་དེ་ལྟ་མ་ཡིན་ཏེ། ཏིང་ངེ་འཛིན་ཕུལ་དུ་ཕྱིན་པ་དང་ལྡན་པ་ལ་བསམ་གཏན་གྱི་མིང་དུ་བཏགས་པའི་ཕྱིར་ཉི་མ་བཞིན་ནོ། །དཔེར་ན་གང་ཞིག་ཕུལ་དུ་ཕྱིན་པར་སྣང་བར་
[285a.2]བྱེད་པ་དེ་ཁོ་ན་ཉི་མ་ཡིན་གྱི། སྲིན་བུ་མེ་ཁྱེར་ལ་སོགས་པ་ནི་མ་ཡིན་པ་དེ་དང་འདྲའོ། །དེ་ནི་ཞེས་བྱ་བ་རྒྱས་པར་འབྱུང་བ་ནི་ཡན་ལག་དང་ལྡན་པའི་ཏིང་ངེ་འཛིན་དེ་ནི་ཞི་གནས་དང་ལྷག་མཐོང་རྟ་གཉའ་སྦྲེལ་བས་ཤིང་རྟ་འདྲེན་པ་དང་འདྲ་བས་ཟུང་དུ་འབྲེལ་བར་ངང་གིས་འབྱུང་བའོ། །དེའི་ཕྱིར་མདོ་ལས་
[285a.3]མཐོང་བའི་ཆོས་ལ་བདེ་བར་གནས་པ་ཞེས་བཤད་དོ། །ལམ་སླ་བ་ཞེས་བྱ་བ་ནི་ཡན་ལག་དང་ལྡན་པའི་ཏིང་ངེ་འཛིན་ཉིད་ལམ་སླ་བ་ཞེས་བཤད་དོ་ཞེས་བྱ་བར་སྦྱར་ཏེ། སླ་བའི་ཕྱིར་དེས་ནི་ཤིན་ཏུ་ཡང་སེམས་པར་བྱེད་དོ། །ཉོན་མོངས་པ་ཅན་ཇི་ལྟར་བསམ་གཏན་ཡིན་ཞེ་ན་ཞེས་བྱ་བ་ནི་གལ་ཏེ་དགེ་བའི་
[285a.4]ཡན་ལག་དང་ལྡན་པའི་ཏིང་ངེ་འཛིན་བསམ་གཏན་ཡིན་ན། །ཉོན་མོངས་པ་ཅན་རོ་མྱང་བ་དང་མཚུངས་པར་ལྡན་པ་ཇི་ལྟར་བསམ་གཏན་ཉིད་དུ་བཤད་ཅེས་བྱ་བ་ཚིག་ལྷག་མ་ཡིན་ནོ། །བསམ་གཏན་ནི་རྣམ་པ་གསུམ་སྟེ་རོ་མྱང་བ་དང་མཚུངས་པར་ལྡན་པ་དང་། དག་པ་དང་། ཟག་པ་མེད་པའོ་ཞེས་
[285a.5]འབྱུང་བའི་ཕྱིར་རོ། །ལོག་པར་ངེས་པར་སེམས་པའི་ཕྱིར་རོ་ཞེས་བྱ་བ་ནི་ལོག་པར་ངེས་པར་རྟོག་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཧ་ཅང་ཐལ་བར་འགྱུར་རོ་ཞེས་བྱ་བ་ནི་འདོད་པའི་འདོད་ཆགས་ཀྱིས་ཀུན་ནས་དཀྲིས་པའི་སེམས་ཀྱིས་ཀྱང་ལོག་པར་ངེས་པར་སེམས་པའི་ཕྱིར་དེར་ཐལ་བར་འགྱུར་རོ་
[285a.6]ཞེ་ན། མ་ཡིན་ཏེ་དེ་དང་མཐུན་པ་ཁོ་ན་ལ་ཞེས་བྱ་བ་རྒྱས་པར་སྨོས་ཏེ་དེ་ནི་དེ་ལྟར་ཐལ་བར་འགྱུར་བ་མ་ཡིན་ཏེ། དེ་དང་མཐུན་པ་མཚར་གཅིག་མཚན་ཉིད་མང་པོ་མི་མཐུན་པ་མེད་པའི་ཉོན་མོངས་པ་ཅན་ལ་བསམ་གཏན་ཞེས་མིང་དུ་བཏགས་པ་སྟེ་ས་བོན་རུལ་བ་བཞིན་ནོ། །དཔེར་ན་རྡོ་ལ་སོགས་པ་ས་བོན་མ་
[285a.7]ཡིན་པ་ཁ་ཅིག་ནི་དེའི་རིགས་དང་མཚན་ཉིད་ཤིན་ཏུ་མི་འདྲ་བའི་ཕྱིར་ས་བོན་རུལ་པ་ཞེས་མི་བྱའོ། །འོ་ན་ཅི་ཞེ་ན། ས་བོན་གྱི་རིགས་ཉིད་ཉམས་པ་གང་ཡིན་པ་དེ་ཁོ་ན་ལ་ས་བོན་རུལ་བའོ་ཞེས་མིང་དུ་འདོགས་པ་དེ་དང་འདྲའོ། །བསམ་གཏན་མི་དགེ་བ་དག་ཀྱང་གསུངས་སོ་ཞེས་བྱ་བ་ནི་འདོད་པའི་འདོད་
[285b]
[285b.1]ཆགས་ཀྱིས་ཀུན་ནས་དཀྲིས་པ་དེ་འདོད་པའི་འདོད་ཆགས་ཀྱིས་ཀུན་ནས་དཀྲིས་པ་ནང་དུ་བྱས་ནས་སེམས་པར་བྱེད། རབ་ཏུ་སེམས་པར་བྱེད་དོ་ཞེས་རྒྱས་པར་འབྱུང་བ་ཡིན་ཏེ། འདིས་ནི་འདོད་པའི་འདོད་ཆགས་ལ་སོགས་པས་ཀུན་ནས་དཀྲིས་པ་ཡང་བསམ་གཏན་ཉིད་ཡིན་པས་ཉེས་པ་མེད་དོ། །
[285b.2]ཞེས་སྟོན་པར་བྱེད་དོ། །དུ་བ་དང་མེ་བཞིན་ནོ་ཞེས་བྱ་བ་ནི་དཔེར་ན་འདི་ན་དུ་བ་ཡོད་པས་ཞེས་དུ་བ་སྨོས་པས་མེ་ཡང་སྨྲས་པ་ཡིན་ཏེ། མེ་མེད་ན་དུ་བ་མི་འབྱུང་བས་ལྷན་ཅིག་སྤྱོད་པའི་ཕྱིར་རོ། །མེད་ན་མི་འབྱུང་བ་འདི་ཉིད་ཀྱིས་དུ་བ་གཙོ་བོ་ཡིན་ནོ། །གང་ན་དུ་བ་ཡོད་པ་དེ་ན་མེ་ཡོད་ཀྱི་གང་ན་མེ་ཡོད་པ་
[285b.3]དེ་ན་དུ་བ་ཡོད་པ་ནི་མ་ཡིན་ཏེ། འདི་ལྟར་ལྕགས་བཞུ་བ་དང་མདག་མ་ལ་སོགས་པ་ལ་མེ་ཁོ་ན་འཛིན་གྱི་དུ་བ་ནི་མ་ཡིན་ནོ། །དེ་ལྟ་བས་ན་དུ་བ་ནི་གཙོ་བོ་ཡིན་པའི་ཕྱིར་སྔར་སྨོས་ཏེ། ནོར་ལྷ་དང་སྲིད་སྒྲུབ་བཞིན་ནོ། །དེ་ལྟ་མ་ཡིན་ན་ནི་མེ་ཞེས་བྱ་བའི་སྒྲ་སྔར་སྨོས་པར་འགྱུར་རོ། །ཡང་ལྷན་ཅིག་སྤྱོད་པ་ཇི་ལྟ་བུ་
[285b.4]རྟོག་པ་མེད་པར་ནི་དགའ་བ་དང་བདེ་བ་དང་ལྡན་པའི་དཔྱོད་པ་མེད་དོ་ཞེས་བྱ་བ་སྨོས་ཏེ། ཇི་ལྟར་བསམ་གཏན་ཁྱད་པར་ཅན་གྱི་དཔྱོད་པ་དགའ་བ་དང་བདེ་བ་དང་ལྡན་པ་མ་ཡིན་པས་རྟོག་པ་མེད་པ་ལྟར་དཔྱོད་པ་འདི་ནི་དེ་ལྟ་བུ་མ་ཡིན་ནོ། །དེ་བས་ན་དཔྱོད་པ་དང་དགའ་བ་དང་བདེ་བ་དང་ལྡན་ཞེས་དགའ་
[285b.5]བ་དང་བདེ་བ་དང་བཅས་པར་སྟོན་པས་དཔྱོད་པ་འདི་ཁྱད་པར་དུ་བྱས་པ་ཡིན་ཏེ། བསམ་གཏན་དང་པོ་ནི་དགའ་བ་དང་བདེ་བ་དང་ལྡན་པའི་དཔྱོད་པ་དང་དགའ་བ་དང་བདེ་བ་དང་མཚུངས་པར་ལྡན་ནོ་ཞེས་བྱ་བའི་ཐ་ཚིག་གོ། །གལ་ཏེ་རྟོག་པ་དང་དགའ་བ་དང་བདེ་བ་དང་ལྡན་པའོ་ཞེས་མདོར་བྱས་ན་ཉེས་
[285b.6]པ་ཅི་ཡོད་ཅེ་ན། དེ་ལྟར་བྱ་བར་ནི་མི་ནུས་ཏེ། ཡན་ལག་ལྔ་ལྔ་སྤངས་པ་ཡིན། །ཞེས་འཆད་པར་འགྱུར་བ་བསམ་གཏན་གཉིས་པ་ནི་རྟོག་པ་སྤངས་པའོ་ཞེས་བྱས་ན་བསམ་གཏན་ཁྱད་པར་ཅན་ཡང་བསམ་གཏན་གཉིས་པར་འགྱུར་རོ། །གཞན་ཡང་བསམ་གཏན་དང་པོ་ཡན་ལག་བཞི་པར་
[285b.7]བསྟན་པའི་མཇུག་ནས་གོ་རིམས་བཞིན་འདི་སྐད་དུ། རྟོག་པ་དང་བཅས། དཔྱོད་པ་དང་བཅས་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་རྫོགས་པར་བྱས་ཏེ་གནས་སོ་ཞེས་བཤད་དོ། །དེ་ལ་བསམ་གཏན་དང་པོ་ལ་དཔྱོད་པ་དང་དགའ་བ་དང་བདེ་བ་དང་ཏིང་ངེ་འཛིན་དག་
[286a]
[286a.1]ཡོད་པས་ཡན་ལག་དེ་བཞི་དང་ཐམས་ཅད་ཀྱི་དང་པོར་བཤད་པ་རྟོགས་པ་དང་། ཡན་ལག་ལྔ་པ་ཞེས་བྱ་བའོ། །གཉིས་པ་ཡང་རྟོག་པ་མེད་ཅིང་དཔྱོད་པ་མེད་ལ་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་རྫོགས་པར་བྱས་ཏེ་གནས་
[286a.2]སོ་ཞེས་འབྱུང་སྟེ། ཡན་ལག་བཞི་པོ་འདི་དག་ལས་ཡན་ལག་དང་པོ་དཔྱོད་པའི་མཚན་ཉིད་སྤངས་པ་ཡིན་ནོ། །གསུམ་པ་ཡང་འདི་སྐད་དུ། དགའ་བ་ལས་འདོད་ཆགས་དང་བྲལ་ནས་བཏང་སྙོམས་སུ་གནས་ཤིང་ཞེས་བྱ་བ་ནས་རྒྱས་པར་བདེ་བར་གནས་སོ་ཞེས་བརྗོད་པ་བསམ་གཏན་
[286a.3]གསུམ་པ་རྫོགས་པར་བྱས་ཏེ་གནས་སོ་ཞེས་བྱ་བའི་བར་འབྱུང་བ་ཡིན་ཏེ། ཡན་ལག་གཞན་དགའ་བའི་མཚན་ཉིད་ཀྱང་སྤངས་པ་ཡིན་ནོ། །བཞི་པ་ཡང་འདི་སྐད་དུ། བདེ་བ་ཡང་སྤངས་ཤིང་ཞེས་བྱ་བ་ནས་རྒྱས་པར་སྡུག་བསྔལ་ཡང་མ་ཡིན་པ་བདེ་བ་ཡང་མ་ཡིན་པ་བཏང་སྙོམས་དང་
[286a.4]དྲན་པ་ཡོངས་སུ་དག་པ་ཅན་བསམ་གཏན་བཞི་པ་རྫོགས་པར་བྱས་ཏེ་གནས་སོ་ཞེས་བྱ་བའི་བར་འབྱུང་བ་ཡིན་ཏེ། ཡན་ལག་བདེ་བ་ཡང་སྤངས་པས་དེ་ལ་ཏིང་ངེ་འཛིན་འབའ་ཞིག་ལུས་སོ། །དེའི་ཕྱིར་འདི་སྐད་དུ། དཔྱོད་དང་དགའ་དང་བདེ་དང་ལྡན། །ཞེས་མདོར་བྱས་སོ། །དེ་དག་གི་
[286a.5]ཡང་སྐྱེ་བ་རྣམས་ནི་བཤད་ཟིན་ཏོ་ཞེས་བྱ་བ་ནི། གཟུགས་མེད་ཁམས་ན་གནས་མེད་དེ། །སྐྱེ་བ་ལས་ནི་རྣམ་པ་བཞི། །ཞེས་འབྱུང་བའི་ཕྱིར་རོ། །རྗེས་སུ་འབྲང་བའི་གཟུགས་མེད་པའི་ཕྱིར་རོ་ཞེས་བྱ་བ་ནི་བསམ་གཏན་དང་ཟག་པ་མེད་པའི་སྡོམ་པ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །དབེེན་
[286a.6]པ་ཞེས་བྱ་བ་ནི་འདིས་རྣམ་པར་འབྱེད་པར་བྱེད་པས་དབེེན་པའོ། །ལམ་གང་གིས་ཞེས་བྱ་བ་ནི་བར་ཆད་མེད་པའི་ལམ་གྱིས་སོ། །ཡང་ན་རྣམ་པར་གྲོལ་བའི་ལམ་གྱིས་ཀྱང་ཡིན་ཏེ། དེ་དང་འབྲས་བུ་གཅིག་པའི་ཕྱིར་རོ། །འདོད་ཆགས་དང་བྲལ་བར་འགྱུར་བའི་ཕྱིར་རོ་ཞེས་བྱ་བ་ནི་དེས་འདོད་
[286a.7]ཆགས་དང་བྲལ་བར་འགྱུར་བའི་ཕྱིར་རོ་ཞེས་བྱ་བའི་དོན་ཏོ། །གཟུགས་ཀྱི་འདུ་ཤེས་བཤིག་ཅེས་བྱ། །ཞེས་བྱ་བ་ནི་འདི་ལ་གཟུགས་ཀྱི་འདུ་ཤེས་བཤིག་པ་ཡོད་པས་ན་གཟུགས་ཀྱི་འདུ་ཤེས་བཤིག་པའོ། །འདི་དག་ལ་གཟུགས་ཀྱི་འདུ་ཤེས་བཤིག་པ་ཞེས་བྱ་བས་ན་གཟུགས་ཀྱི་འདུ་
[286b]
[286b.1]ཤེས་བཤིག་ཅེས་བྱའོ། །རེ་ཞིག་འདི་ནི་བསྒྲུབ་པར་བྱ་བ་ཡིན་ནོ་ཞེས་ཟེར་བ་ནི་སྡེ་པ་གཞན་དག་གོ། །གལ་ཏེ་ཡོད་ན་ཞེས་ཟེར་བ་ནི་བྱེ་བྲག་ཏུ་སྨྲ་བའོ། །ཆུང་ཟད་སེར་བ་བཞིན་ནོ་ཞེས་བྱ་བ་ནི་ཇི་ལྟར་ཆང་ཆུང་ཙམ་སེར་བ་ལ་ཅུང་ཟད་སེར་བ་ཞེས་བྱ་བ་དེ་བཞིན་དུ། གཟུགས་ཅུང་ཟད་ཅིག་
[286b.2]ཡོད་པ་ལ་གཟུགས་མེད་པ་ཞེས་བྱའོ། །དེ་དག་མེད་ན་དེ་ལུས་དང་ངག་མེད་ན་ཇི་ལྟར་དེ་དག་གི་སྡོམ་པ་སྟེ་ལུས་དང་ངག་གི་སྡོམ་པ་དག་ཏུ་འགྱུར། གཟུགས་མེད་པ་ན་སྤྱོད་པའི་འབྱུང་བ་མེད་པར་ནི་གཟུགས་མེད་པ་ན་སྤྱོད་པའི་འབྱུང་བ་ལས་གྱུར་པ་མི་རུང་ངོ་། །གལ་ཏེ་ཟག་པ་མེད་པའི་སྡོམ་
[286b.3]པ་བཞིན་ནོ་ཞེས་བྱ་བ་ནི་དེ་ལ་འདི་སྙམ་དུ་ཇི་ལྟར་ཟག་པ་མེད་པའི་འབྱུང་བ་དག་མེད་བཞིན་དུ་ཡང་ཟག་པ་མེད་པའི་སྡོམ་པ་འབྱུང་བ་ལས་གྱུར་པའི་གཟུགས་ཡོད་པ་དེ་བཞིན་དུ་གཟུགས་མེད་པ་ན་སྤྱོད་པའི་འབྱུང་བ་དག་ཀྱང་མེད་མོད་ཀྱི། འོན་ཀྱང་གཟུགས་མེད་པ་ན་སྤྱོད་པའི་སྡོམ་པ་འབྱུང་བ་ལས་
[286b.4]གྱུར་པའི་གཟུགས་ཡོད་དོ་སྙམ་དུ་སེམས་ན། དེ་ནི་མ་ཡིན་ཏེ། ཟག་པ་དང་བཅས་པའི་འབྱུང་བ་ཡོད་པའི་ཕྱིར་རོ། །ཟག་པ་དང་བཅས་པའི་འབྱུང་བ་དག་ཡོད་པས་དེ་དག་གཟུགས་མེད་པ་རྣམས་ན་ཡོད་ཅིང་། ཟག་པ་མེད་པའི་འབྱུང་བ་དག་ནི་མེད་དེ། དེའི་ཕྱིར་ཟག་པ་མེད་པའི་སྡོམ་པ་ནི་
[286b.5]གང་དུ་སྐྱེས་པ་དེ་ན་ཡོད་པའི་ཟག་པ་དང་བཅས་པ་དག་རྒྱུར་བྱས་ནས་སྐྱེས་པས་མི་འདྲ་བའི་ཕྱིར་རྟོག་པ་འདི་ནི་རུང་བ་མ་ཡིན་ནོ། །སྙོམས་པར་འཇུག་པ་ལ་ཡང་དེ་དགག་པ་བཤད་དོ་ཞེས་བྱ་བ་ནི་སྐྱེ་བའི་གཟུགས་བཀག་པ་འདི་ཉིད་ཀྱིས་སྙོམས་པར་འཇུག་པ་ལ་ཡང་གཟུགས་བཀག་པར་བཤད་
[286b.6]པ་ཡིན་པས་འདི་ལ་འབད་པ་གཞན་ནི་མི་བྱའོ། །ཇི་ལྟ་ཞེ་ན། གལ་ཏེ་ལུས་དང་ངག་གི་སྡོམ་པ་ཙམ་ཞིག་གོ་ཞེ་ན། དེ་དག་མེད་ན་ཇི་ལྟར་དེ་དག་གི་སྡོམ་པར་འགྱུར། འབྱུང་བ་མེད་པར་ནི་འབྱུང་བ་ལས་གྱུར་པ་མི་རུང་ངོ་། །གལ་ཏེ་ཟག་པ་མེད་པའི་སྡོམ་པ་བཞིན་ནོ་ཞེ་ན་མ་ཡིན་ཏེ། ཟག་
[286b.7]པ་དང་བཅས་པའི་འབྱུང་བ་ཡོད་པའི་ཕྱིར་རོ་ཞེས་བྱ་བ་ཡིན་ནོ། །གཞན་དག་ན་རེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་འདས་ནས་ཞེས་འབྱུང་བས་སྙོམས་པར་འཇུག་པ་ལ་ཡང་དེ་དགག་པར་བཤད་པ་ཡིན་ནོ་ཞེས་ཟེར་རོ། །དེ་ལྟར་ན་གཟུགས་མེད་པའི་སྙོམས་པར་
[287a]
[287a.1]འཇུག་པ་ལ་ཡང་གཟུགས་མེད་ལ་གཟུགས་མེད་པར་སྐྱེ་བ་དག་ལ་ཡང་མེད་དོ་ཞེས་བཤད་པ་ཡིན་ནོ། །གལ་ཏེ་བོང་ཚོད་ཆུང་བའི་ཕྱིར་རོ་ཞེ་ན་ནི་ཞེས་བྱ་བ་ནི་འོན་ཏེ་རྡུལ་ཕྲ་རབ་ཙམ་གྱི་གཟུགས་ཤིག་ཡོད་པ་དེའི་ཕྱིར་དེ་དག་ལ་གཟུགས་ཅུང་ཟད་ཅིག་ཡོད་དོ་ཞེས་བྱ་
[287a.2]བར་འདོད་ན་ནི་ཕྲ་བའི་ཕྱིར་ཆུའི་སྐྱེ་བོ་གཟུགས་བལྟར་མི་སྣང་བ་དག་ལ་ཡང་ཐལ་བར་འགྱུར་ཏེ། གཟུགས་མེད་པར་ཐལ་བར་འགྱུར་རོ་ཞེས་བྱ་བའི་དོན་ཏོ། །གལ་ཏེ་དང་བའི་ཕྱིར་རོ་ཞེ་ན་ཞེས་བྱ་བ་ནི་དེ་ལ་འདི་སྙམ་དུ་གཟུགས་དང་བའི་ཕྱིར་གཟུགས་མེད་པ་དག་ཡིན་ནོ་སྙམ་དུ་སེམས་ན། སྲིད་
[287a.3]པ་བར་མ་དང་། གཟུགས་ན་སྤྱོད་པ་དག་ལ་ཡང་ཐལ་བར་འགྱུར་ཏེ། སྲིད་པ་བར་མ་དང་གཟུགས་ན་སྤྱོད་པ་དག་ལ་ཡང་ཐལ་བ་ནི་དང་བའི་ཕྱིར་རྡོ་རྗེའི་རི་ལ་ཡང་ཐོགས་པ་མེད་པར་འགྲོ་བས་དེ་དག་ལ་ཡང་ཐལ་བར་འགྱུར་རོ། །སྙོམས་པར་འཇུག་པ་བཞིན་དུ་སྐྱེ་བ་ཁྱད་པར་དུ་འཕགས་
[287a.4]པའི་ཕྱིར་རོ་ཞེས་བྱ་བ་ནི་ཇི་ལྟར་ནམ་མཁའ་མཐའ་ཡས་ལ་སོགས་པའི་སྙོམས་པར་འཇུག་པ་དག་ཆེས་ཤིན་ཏུ་ཁྱད་པར་དུ་འཕགས་པ་དེ་བཞིན་དུ་དག་གི་སྐྱེ་བའི་ཁྱད་པར་ཡང་དང་བ་དང་ཆེས་དང་བ་དང་ཆེས་ཤིན་ཏུ་དང་བའོ་ཞེས་ཁས་བླང་དགོས་སོ། །དེའི་ཕྱིར་སྙོམས་པར་འཇུག་པ་བཞིན་
[287a.5]དུ་སྐྱེ་བ་ཆེས་ཤིན་ཏུ་དང་བས་ཞེས་བྱ་བར་ཁྱད་པར་དུ་འཕགས་པའི་ཕྱིར་དེ་ཁོ་ན་གཟུགས་མེད་པ་ཁོ་ནར་འགྱུར་རོ། །གལ་ཏེ་ཡང་གཟུགས་མེད་པར་སྐྱེ་བའི་གཟུགས་ནི་དང་བའི་ཕྱིར་ས་འོག་མ་པའི་དབང་པོས་མི་འཛིན་པས་གཟུགས་མེད་པ་རྣམས་ཞེས་བྱ་བའོ་ཞེ་ན། བསམ་གཏན་དུ་
[287a.6]སྐྱེ་བའི་གཟུགས་ཀྱང་ཞེས་བྱ་བ་རྒྱས་པར་སྨོས་སོ། །འདི་ལྟར་སྦྱར་ཏེ། བསམ་གཏན་དུ་སྐྱེ་བའི་གཟུགས། བསམ་གཏན་གཉིས་པའི་ས་པ་ཡང་ས་འོག་མ་པའི་དབང་པོ་སྟེ། བསམ་གཏན་དང་པོའི་ས་པའི་དབང་པོས་མི་ཟིན་ལ། དེ་བཞིན་དུ་ས་གོང་མ་པའི་ཆེས་ཤིན་ཏུ་དང་བའི་ཕྱིར་
[287a.7]བསམ་གཏན་བཞི་པའི་ས་པའི་གཟུགས་ཀྱང་བསམ་གཏན་གསུམ་པའི་ས་པའི་བར་གྱི་དབང་པོས་མི་ཟིན་ཏོ། །དེ་ལྟར་ན་བསམ་གཏན་དུ་སྐྱེས་པའི་གཟུགས་ཀྱང་ས་འོག་མ་པའི་དབང་པོས་མི་ཟིན་པའི་ཕྱིར། གཟུགས་མེད་པ་དེ་དང་ཁྱད་པར་ཅི་ཞིག་ཡོད་ན་འདི་ལྟར་ཆེས་ཤིན་ཏུ་གསལ་བའི་
[287b]
[287b.1]ཚུལ་འདྲ་བ་ཡང་དེ་དག་ཁོ་ན་གཟུགས་མེད་པར་འདོད་ཀྱི་གཟུགས་ན་སྤྱོད་པ་རྣམས་ནི་མ་ཡིན་ཏེ། དེ་ལྟ་བས་ན་དེ་ན་གཟུགས་མེད་དོ། །འོན་ཏེ་ཁམས་གཉིས་ཀྱི་མིང་ནི་དོན་དང་མཐུན་པ་ཡིན་ཏེ། འདོད་པའི་ཡོན་ཏན་གྱིས་རབ་ཏུ་ཕྱེ་བ་ནི་འདོད་པའི་ཁམས་ཡིན་ལ། གཟུགས་ཀྱིས་
[287b.2]རབ་ཏུ་ཕྱེ་བ་ནི་གཟུགས་ཀྱི་ཁམས་ཡིན་གྱི། གཟུགས་མེད་པའི་ཁམས་ཀྱི་མིང་ནི་དོན་དང་མཐུན་པ་མ་ཡིན་ནོ། །འོ་ན་ཅི་ཞེ་ན། འདོད་རྒྱལ་བ་ཡིན་ནོ་ཞེ་ན། ཁམས་གཉིས་ཀྱི་མིང་ནི་དོན་དང་མཐུན་པ་ཡིན་གྱི། གཟུགས་མེད་པའི་ཁམས་ཀྱི་ནི་མ་ཡིན་ནོ་ཞེས་བྱ་བ་དེ་ལ་རིགས་པ་ཅི་
[287b.3]ཞིག་ཡོད། དེ་ལྟར་རིགས་པས་གཟུགས་མེད་པའི་ཁམས་ན་གཟུགས་མེད་དོ་ཞེས་བཀག་ནས་ལུང་སྨོས་ཏེ་དོགས་པ་ཟློག་པར་བྱེད་དོ། །དེ་ལ་གཟུགས་རབ་ཏུ་གྲུབ་པར་བྱ་བའི་ཕྱིར་གལ་ཏེ་ཚེ་དང་དྲོད་གཉིས་ཞེས་བྱ་བ་རྒྱས་པར་སྨོས་ཏེ། གལ་ཏེ་གཟུགས་མེད་པ་དག་ན་གཟུགས་
[287b.4]ཡོད་པ་ཉིད་གྲུབ་བོ་ཞེ་ན་ཞེས་བྱ་བའི་ཚིག་འདི་ནི་རེ་རེ་ལ་སྦྱར་བར་བྱའོ། །ཇི་ལྟ་ཞེ་ན། གལ་ཏེ་ཚེ་དང་དྲོད་གཉིས་འདྲེས་པར་གསུངས་པའི་ཕྱིར། གཟུགས་ཡོད་པ་ཉིད་དུ་གྲུབ་བོ་ཞེ་ན་ཞེས་བྱ་བ་སྟེ། དེ་ལ་འདི་སྙམ་དུ་མདོ་ལས། ཚེ་དང་ལྡན་པ་གསུས་པོ་ཆེ་ཚེ་གང་ཡིན་པ་དང་དྲོད་གང་
[287b.5]ཡིན་པའི་ཆོས་འདི་དག་ནི་འདྲེས་པ་སྟེ། མ་འདྲེས་པ་མ་ཡིན་ནོ་ཞེས་རྒྱས་པར་འབྱུང་བས་དེའི་ཕྱིར་དེ་ན་ཚེ་ཡོད་ན་དྲོད་ཀྱང་ཡོད་པར་འགྱུར་ལ། དྲོད་ནི་གཟུགས་ཡིན་ནོ་ཞེས་བྱ་བར་གྲུབ་བོ་སྙམ་དུ་སེམས་ནའོ། །གལ་ཏེ་འདམ་བུའི་ཤོག་གཉིས་བཞིན་དུ་མིང་དང་གཟུགས་དག་ཕན་ཚུན་
[287b.6]བསྟེན་ཏོ་ཞེས་གསུངས་པའི་ཕྱིར་གཟུགས་མེད་པ་དག་ན་གཟུགས་ཡོད་པ་ཉིད་དུ་འགྲུབ་བོ་ཞེ་ན་ཞེས་བྱ་བ་སྟེ། མདོ་ལས་ཚེ་དང་ལྡན་པ་ཤཱ་རིའི་བུ་དཔེར་ན་འདམ་བུའི་ཤོག་གཉིས་གནམ་དུ་བསྒྲེངས་ཏེ་ཕན་ཚུན་བསྟེན་ཅིང་འདུག་པ་དེ་ལ་འགའ་ཞིག་གིས་གཅིག་བོར་ན་ཅིག་ཤོས་འགྱེལ་
[287b.7]བར་འགྱུར་ལ་ཅིག་ཤོས་བོར་ན་ཡང་ཅིག་ཤོས་འགྱེལ་བར་འགྱུར་རོ། །ཚེ་དང་ལྡན་པ་ཤཱ་རིའི་བུ་དེ་བཞིན་དུ་མིང་དང་གཟུགས་ཀྱང་ཕན་ཚུན་བརྟེན་ཅིང་གནས་ཞེས་བྱ་བ་རྒྱས་པར་འབྱུང་བ་ཡིན་ནོ། །གལ་ཏེ་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་གསུངས་པའི་ཕྱིར་དེ་ལྟ་
[288a]
[288a.1]བས་ན་གཟུགས་མེད་པ་དག་ན་གཟུགས་ཡོད་པ་ཉིད་དུ་འགྲུབ་བོ་ཞེ་ན་ཞེས་བྱ་བ་སྟེ། རྟེན་ཅིང་འབྲེལ་པར་འབྱུང་བའི་མདོ་ལས། ཉིང་མཚམས་སྦྱོར་བའི་མཚན་ཉིད་ཀྱི་སྐབས་སུ་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་གསུངས་པའི་ཕྱིར་དེ་ལྟ་བས་ན་
[288a.2]གཟུགས་མེད་པ་དག་ན་གཟུགས་ཡོད་དོ་ཞེས་བྱ་བར་གྲུབ་བོ་ཞེ་ན་ཞེས་བྱ་བ་ཡིན་ནོ། །གཟུགས་ནས་འདུ་བྱེད་ཀྱི་བར་ལས་ཞེས་བྱ་བ་རྒྱས་པར་འབྱུང་བ་ནི་གལ་ཏེ་མདོ་ལས་དགེ་སློང་དག་རྣམ་པར་ཤེས་པ་གཟུགས་སུ་ཉེ་བར་འགྲོ་བ། གཟུགས་ལ་དམིགས་པ། གཟུགས་ལ་བརྟེན་པ་གནས་
[288a.3]སོ། །དགེ་སློང་དག་གང་ལ་ལ་ཞིག་འདི་སྐད་དུ་བདག་ནི་གཟུགས་དང་ཚོར་བ་ནས་འདུ་བྱེད་ཀྱི་བར་དག་ལས་གཞན་དུ་རྣམ་པར་ཤེས་པར་འགྲོ་བའམ་འོང་བར་སྨྲའོ་ཞེས་ཟེར་ན། དེའི་ངག་དེ་ནི་དེའི་ཚིག་ཙམ་དུ་ཟད་དོ་ཞེས་གསུངས་ཏེ། ལུང་འདི་དང་སྦྱར་ན་ཡང་གཟུགས་མེད་པ་དག་ན་གཟུགས་
[288a.4]ཡོད་དོ་ཞེས་བྱ་བར་འགྲུབ་བོ་ཞེས་དེ་སྙམ་དུ་སེམས་ན་མ་ཡིན་ཏེ། དཔྱད་པར་བྱ་བ་ཡིན་པའི་ཕྱིར་རོ། །འོན་ཏེ་ཐམས་ཅད་ལས་ཞེས་བྱ་བ་ནི་འདོད་པ་དང་གཟུགས་དང་གཟུགས་མེད་པ་ན་སྤྱོད་པ་ལས་སོ། །འདིར་དགོངས་པའི་དོན་འདི་ཡིན་ཏེ། འདོད་པ་ན་སྤྱོད་པའི་ཚེ་ཁོ་ན་ལས་དགོངས་ནས་དེ་
[288a.5]སྐད་དུ་གསུངས་པ་ཡིན་ཏེ། འདི་ལྟར། ཚེ་དང་དྲོད་དང་རྣམ་ཤེས་ཀྱིས། །གང་ཚེ་ལུས་འདི་འདོར་བྱེད་ཅིང་། །བོར་ནས་དེ་ཚེ་ཉལ་བ་ནི། །ཇི་ལྟར་ཤིང་ལ་སེམས་མེད་བཞིན། །ཞེས་འབྱུང་ངོ་། །གཟུགས་མེད་པའི་ཁམས་ན་ནི་ལུས་ཀྱང་མེད་ན་ལུས་འཇིག་པ་ལྟ་ག་ལ་ཞིག་ཡོད། གཟུགས་
[288a.6]ཀྱི་ཁམས་ན་ནི་ལུས་ཡོད་མོད་ཀྱི་ལུས་འཇིག་པར་མངོན་པ་ནི་མེད་དོ། །གང་ཡང་མིང་དང་གཟུགས་དག་ཕན་ཚུན་བསྟེན་པ་ཉིད་དུ་གསུངས་པ་དེ་ཡང་འདོད་པ་དང་། གཟུགས་ན་སྤྱོད་པ་ཁོ་ན་ལས་དགོངས་ཏེ་གསུངས་སོ་ཞེས་བྱ་བར་མངོན་ཏེ། གཉི་ག་ཡོད་ན་ཕན་ཚུན་བསྟེན་པ་ཉིད་སྲིད་པས་སོ། །
[288a.7]གང་ཡང་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་ནི་འདི་ལ་རྐྱེན་རྣམ་པར་ཤེས་པ་ཡོད་པས་རྣམ་པར་ཤེས་པའི་རྐྱེན་གྱིས་མིང་དང་གཟུགས་སོ་ཞེས་དེ་སྐད་དུ་དྲུག་པའི་དོན་དུ་འབྲུ་མང་པོ་པར་ཚིག་བསྡུས་པ་ཡིན་ནོ། །འདིར་ཅི་རྣམ་པར་ཤེས་པ་འདོད་པ་ན་སྤྱོད་པའི་འདུ་བྱེད་ཀྱི་རྐྱེན་
[288b]
[288b.1]ཅན་ནས། གཟུགས་མེད་པ་ན་སྤྱོད་པའི་འདུ་བྱེད་ཀྱི་རྐྱེན་ཅན་གྱི་བར་ཐམས་ཅད་མིང་དང་གཟུགས་ཀྱི་རྐྱེན་ཡིན་ནམ། འོན་ཏེ་མིང་དང་གཟུགས་ཐམས་ཅད་རྣམ་པར་ཤེས་པའི་རྐྱེན་ཅན་ཡིན་ཞེ་ན། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་འདི་ལ་བདག་ནི་མིང་དང་གཟུགས་
[288b.2]ཐམས་ཅད་ཀྱི་རྐྱེན་རྣམ་པར་ཤེས་པ་ཡིན་ནོ་ཞེས་བྱ་བར་ངེས་པར་གཟུང་གི་རྣམ་པར་ཤེས་པ་ཐམས་ཅད་མིང་དང་གཟུགས་ཀྱི་རྐྱེན་ཡིན་ནོ་ཞེས་བྱ་བར་ནི་ངེས་པར་མི་བཟུང་ངོ་ཞེས་ཟེར་ཏེ། རྣམ་པར་ཤེས་པ་ཅུང་ཟད་ཅིག་ནི་མིང་ཁོ་ནའི་རྐྱེན་ཡིན་ཏེ། གཟུགས་མེད་པ་ན་སྤྱོད་པའི་འདུ་བྱེད་ཀྱི་རྐྱེན་
[288b.3]ཅན་གང་ཡིན་པའོ། །ཅུང་ཟད་ཅིག་ནི་མིང་དང་གཟུགས་ཀྱི་རྐྱེན་ཡིན་ཏེ། འདོད་པ་དང་། གཟུགས་ན་སྤྱོད་པའི་འདུ་བྱེད་ཀྱི་རྐྱེན་ཅན་གང་ཡིན་པའོ། །དེས་ན་འདི་སྐད་དུ་མིང་དང་གཟུགས་འདིའི་རྐྱེན་ནི་རྣམ་པར་ཤེས་པ་ཁོ་ན་ཡིན་གྱི། མིང་དང་གཟུགས་འདི་འདུས་པ་ཁོ་ནའི་རྐྱེན་ནི་མ་
[288b.4]ཡིན་ནོ་ཞེས་བཤད་པ་ཡིན་ནོ། །སྲིད་པའི་ཕྱིར་དེ་སྐད་དུ་བཤད་པར་ཟད་དེ། འདི་ལྟར་རྫུས་ཏེ་སྐྱེ་བ་རྣམས་ནི་རྣམ་པར་ཤེས་པའི་རྐྱེན་གྱིས་སྐྱེ་མཆེད་དྲུག་ཁོ་ན་ཡིན་གྱི། མིང་དང་གཟུགས་ནི་མ་ཡིན་ནོ། །སྐྱེ་མཆེད་དྲུག་མ་གྲུབ་པའི་གནས་སྐབས་ཀྱི་ཕུང་པོ་ལྔ་ལ་ནི་མིང་དང་གཟུགས་ཞེས་བྱའོ། །
[288b.5]དོན་འདི་ཉིད་མདོ་ལས་ཀྱང་སྟོན་ཏེ། ཀུན་དགའ་བོ་གལ་ཏེ་རྣམ་པར་ཤེས་པ་མའི་མངལ་དུ་ཞུགས་པར་མ་གྱུར་ན། འོན་ཀྱང་མིང་དང་གཟུགས་དེ་ནུར་ནུར་པོ་ཉིད་དུ་བརྒྱལ་བར་འགྱུར་རམ། བཙུན་པ་མ་ལགས་སོ། །ཀུན་དགའ་བོ་གལ་ཏེ་རྣམ་པར་ཤེས་པ་ཞུགས་ནས་མྱུར་བ་ཁོ་ནར་འདོར་
[288b.6]བར་བྱེད་ན་འོན་ཀྱང་མིང་དང་གཟུགས་དེ་འདི་ལྟ་བུ་ཉིད་དུ་མངོན་པར་འགྱུར་རམ། བཙུན་པ་མ་ལགས་སོ། །ཀུན་དགའ་བོ་གང་གི་ཚེ་བྱིས་པའམ་གཞོན་ནུ་མའམ་གཞོན་ནུ་མའི་རྣམ་པར་ཤེས་པ་ཆད་ཅིང་ཞིག་ལ་མེད་པར་གྱུར་ན། འོན་ཀྱང་མིང་དང་གཟུགས་དེ་འཕེལ་ཞིང་རྒྱས་པར་
[288b.7]འགྱུར་རམ། བཙུན་པ་མ་ལགས་སོ། །དེ་ལྟ་བས་ན་ཁྱོད་ཀྱིས་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། མིང་དང་གཟུགས་ཀྱང་རྣམ་པར་ཤེས་པའི་རྐྱེན་ཅན་ཡིན་ལ། རྣམ་པར་ཤེས་པ་གང་ཡིན་པ་ཡང་མིང་དང་གཟུགས་ཀྱི་རྐྱེན་ཅན་ཡིན་ནོ་ཞེས་བྱ་བ་རྒྱས་པར་གསུངས་སོ། །
[289a]
[289a.1]འདིར་ཅི་གཟུགས་ལ་སོགས་པ་དེ་དག་ཐམས་ཅད་མེད་ན་དེ་བཀག་གམ་ཞེས་བྱ་བ་ནི་འོང་བ་དང་འགྲོ་བ་བཀག་པའོ། །དེ་ལ་འཇིག་རྟེན་སྔ་མ་ནས་སྲིད་པ་བར་མའི་རྒྱུན་གྱིས་འདིར་སྐྱེ་བ་ནི་འོང་བའོ། །སྲིད་པ་བར་མའི་རྒྱུན་གྱིས་ཡང་འཇིག་རྟེན་འདི་ནས་འཇིག་རྟེན་
[289a.2]ཕ་རོལ་དུ་སྐྱེ་བ་ནི་འགྲོ་བའོ། །འོན་ཏེ་གཟུགས་ལ་སོགས་པའི་ནང་ནས་གང་ཡང་རུང་བ་འགའ་ཞིག་ཀྱང་ཞེས་བྱ་བ་ནི་འདི་དཔྱད་པར་བྱ་དགོས་སོ། །བདག་ནི་ཐམས་ཅད་མེད་ན་དེ་བཀག་པ་ཡིན་ནོ་ཞེས་ཟེར་རོ། །གལ་ཏེ་བྱེ་བྲག་མེད་པར་གསུངས་པའི་ཕྱིར་དཔྱད་པར་མི་བྱའོ་ཞེ་ན་ཞེས་
[289a.3]བྱ་བ་ནི་གལ་ཏེ་འདི་སྙམ་དུ་མདོའི་ཚིག །ཚེ་དང་ལྡན་པ་གསུས་པོ་ཆེ་ཚེ་གང་ཡིན་པ་དང་དྲོད་གང་ཡིན་པ་ཞེས་བྱ་བ་ནས། རྒྱས་པར་རྣམ་པར་ཤེས་པ་གཟུགས་སུ་ཉེ་བར་འགྲོ་བ་གནས་སོ་ཞེས་བྱ་བའི་བར་འདི་ནི་ཁྱད་པར་མེད་པར་གསུངས་པ་ཡིན་ཏེ། མདོའི་ཚིག་འདི་དང་སྦྱར་ན་འདོད་པ་
[289a.4]དང་གཟུགས་ན་སྤྱོད་པའི་ཚེ་ལས་དགོངས་ཏེ་གསུངས་སམ་ཞེས་བྱ་བ་ནས་དེ་དག་ཐམས་ཅད་མེད་ན་དེ་བཀག་གམ་ཞེས་བྱ་བའི་བར་ལྟ་བུར་བྱེ་བྲག་ཏུ་ནི་མ་ཕྱེའོ་སྙམ་དུ་སེམས་ན། འདིར་སྨྲས་པ། ཧ་ཅང་ཐལ་བར་འགྱུར་ཏེ། བྱེ་བྲག་མེད་པར་གསུངས་པའི་ཕྱིར་ཚེ་མེད་པར་ཕྱིའི་དྲོ་བ་ཡང་
[289a.5]ཡོད་པར་མི་འགྱུར་ཏེ། འདི་སྐད་དུ་ཚེ་དང་ལྡན་པ་གསུས་པོ་ཆེ་ཚེ་གང་ཡིན་པ་དང་། ནང་གི་དྲོ་བ་གང་ཡིན་པ་ཞེས་བྱ་བ་ལ་སོགས་པ་ལྟ་བུར་ཁྱད་པར་དུ་ནི་མ་བྱས་སོ། །ཕྱིའི་གཟུགས་ཤིང་དང་རྩིག་པ་ལ་སོགས་པ་སེམས་ཅན་དུ་བགྲང་བ་མ་ཡིན་པ་ཡང་རྣམ་པར་ཤེས་པ་ལ་བརྟེན་པ་ཉིད་དུ་
[289a.6]འགྱུར་ཏེ། ཁྱད་པར་མེད་པར་འབྱུང་བའི་ཕྱིར་རོ། །རྣམ་པར་ཤེས་པ་གནས་པ་བཞི་བཞིན་དུ་ཞེས་བྱ་བ་རྒྱས་པར་འབྱུང་བ་ནི་ཇི་ལྟར་ཁྱོད་ཀྱི་ལྟར་ན་རྣམ་པར་ཤེས་པ་གནས་པ་བཞི་ཁྱད་པར་མེད་པར་གསུངས་པའི་ཕྱིར་གཟུགས་མེད་པའི་ཁམས་ན་གཟུགས་ཡོད་པ་ཉིད་བཞིན་དུ་ཟས་བཞི་
[289a.7]གསུངས་པའི་ཕྱིར་གཟུགས་དང་གཟུགས་མེད་པའི་ཁམས་དག་ན་ཡང་ཁམ་དུ་བྱེད་པའི་ཟས་ཡོད་པས་ཐལ་བར་འགྱུར་རོ། །མདོ་ལས་ནི་འདི་སྐད་དུ་ཟས་བཞི་ནི་སེམས་ཅན་བྱུང་བ་རྣམས་གནས་པར་བྱེད་པ་དང་སྲིད་པ་ཚོལ་བ་རྣམས་ལ་ཕན་འདོགས་པར་བྱེད་པ་ཡིན་ནོ། །བཞི་གང་ཞེ་ན། ཁམ་
[289b]
[289b.1]གྱི་ཟས་རགས་པ་དང་ཕྲ་བ་དང་། གཉིས་པ་རེག་པའི་ཟས་དང་། གསུམ་པ་ཡིད་ལ་སེམས་པའི་ཟས་དང་། བཞི་པ་རྣམ་པར་ཤེས་པའི་ཟས་སོ་ཞེས་འབྱུང་སྟེ། དེ་ལྟར་སེམས་ཅན་རྣམས་གནས་པར་བྱ་བའི་ཕྱིར་ཟས་བཞི་ཁྱད་པར་མེད་པར་གསུངས་ཀྱི་འདོད་པ་ན་སྤྱོད་པ་རྣམས་ཞེས་བྱེ་
[289b.2]བྲག་ཏུ་ནི་མ་མཛད་པའི་ཕྱིར་ཁྱོད་ཀྱི་ལྟར་ན་གཟུགས་དང་གཟུགས་མེད་པའི་ཁམས་དག་ན་ཡང་ཁམ་གྱི་ཟས་ཡོད་པར་ཐལ་བར་འགྱུར་རོ། །གལ་ཏེ་ཁམ་དུ་བྱེད་པའི་ཟས་ཟ་བའི་ལྷ་རྣམས་ལས་འདས་ཞེས་བྱ་བ་རྒྱས་པར་འབྱུང་བ་ནི་དེ་ལ་སྡེ་པ་གཞན་དག་འདི་སྙམ་དུ་སྤྱིར་བསྟན་པ་ལ་དམིགས་
[289b.3]ཀྱིས་བསྩལ་བ་ཡོད་དེ། འཆར་བྱེད་ལ་སོགས་པའི་མདོ་ལས། ལུས་ཞིག་ནས་ཁམ་དུ་བྱེད་པའི་ཟས་ཟ་བའི་ལྷ་རྣམས་ལས་འདས་ཏེ། ལྷ་ཡིད་ཀྱི་ལུས་ཅན་འགའ་ཞིག་ཏུ་སྐྱེའོ་ཞེས་ཁམ་དུ་བྱེད་པའི་ཟས་ཟ་བའི་ལྷ་རྣམས་ལས་འདས་ཏེ་ཞེས་གསུངས་པའི་ཕྱིར་དང་དགའ་བའི་ཟས་ཞེས་
[289b.4]གསུངས་པའི་ཕྱིར་ཞེས་བྱ་བ་ནི་དགེ་སློང་དག་འཇིག་རྟེན་འཇིག་པའི་དུས་གང་ཡིན་པ་དེ་ཡོད་དེ། འཇིག་རྟེན་འཇིག་པ་ན་སེམས་ཅན་ཕལ་ཆེར་འོད་གསལ་བའི་ལྷའི་རིས་སུ་སྐྱེ་བར་འགྱུར་ཞིང་དེ་དག་གཟུགས་བཟང་པོ་ཡིད་ལས་བྱུང་བ་དབང་པོ་མ་ཚང་བ་མེད་ཅིང་ངན་པ་མ་ཡིན་པ། ཡན་ལག་
[289b.5]དང་ཉིང་ལག་ཐམས་ཅད་དང་ལྡན་པ། ཁ་དོག་བཟང་པོ་བརྟན་པ་རང་གི་འོད་ཅན་ནམ་མཁའ་ལ་འགྲོ་བ། དགའ་བ་ཟ་ཞིང་དགའ་བའི་ཟས་ཅན་ཚེ་རིང་བ་དུས་རིང་པོར་གནས་པར་འགྱུར་རོ་ཞེས་བྱ་བ་དེ་ལྟ་བུ་ལ་སོགས་པ་མདོ་དག་ལས་གསུངས་པའི་ཕྱིར་ཁམ་དུ་བྱེད་པའི་ཟས་ཡོད་པར་ཐལ་བར་མི་
[289b.6]འགྱུར་རོ་སྙམ་དུ་སེམས་ན། གལ་ཏེ་དེ་ལྟ་ན་གཟུགས་མེད་པ་དག་ན་ཡང་གཟུགས་ཡོད་པར་ཐལ་བར་མི་འགྱུར་རོ། །ཅིའི་ཕྱིར་ཞེ་ན། དམིགས་ཀྱིས་བསྩལ་བའི་ཕྱིར་རོ། །ཇི་ལྟ་ཞེ་ན། གཟུགས་མེད་པ་རྣམས་ནི་གཟུགས་རྣམས་ལས་ངེས་པར་འབྱུང་བ་ཡིན་ནོ་ཞེས་བྱ་བ་ནི་མདོའི་ཚིག་
[289b.7]དམིགས་ཀྱིས་བསྩལ་བ་གཅིག་ཡིན་ནོ། །གཟུགས་མེད་པའི་རྣམ་པར་ཐར་པ་ཞི་བ་གང་དག་གཟུགས་རྣམས་ལས་འདས་ནས་ཞེས་བྱ་བ་ནི་གཉིས་པ་ཡིན་ནོ། །གཟུགས་ཅན་མ་ཡིན་པའི་སེམས་ཅན་དག་ཡོད་ཅེས་བྱ་བ་ནི་གསུམ་པ་ཡིན་ནོ། །རྣམ་པ་ཐམས་ཅད་དུ་གཟུགས་ཀྱི་འདུ་ཤེས་
[290a]
[290a.1]རྣམས་ལས་ཡང་དག་པར་འདས་ནས་ཞེས་བྱ་བ་ནི་བཞི་པ་ཡིན་ནོ། །གཟུགས་ཤིག་ཡོད་ན་ཞེས་བྱ་བ་ནི་གལ་ཏེ་གཟུགས་མེད་པའི་སྙོམས་པར་འཇུག་པ་དང་། སྐྱེ་བ་དག་ལ་གཟུགས་ཤིག་ཡོད་པར་གྱུར་ན། གཟུགས་ཡོད་ཕན་ཆད་རང་གི་གཟུགས་གདོན་མི་ཟ་
[290a.2]བར་འདུ་ཤེས་པར་བྱེད་པར་འགྱུར་བས་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ནས་ཞེས་འབྱུང་བ་སྨོས་པར་མི་འགྱུར་བ་ཞིག་ན་སྨོས་ཏེ། དེའི་ཕྱིར་ཡང་དེ་ན་གཟུགས་མེད་དོ། །གལ་ཏེ་ས་འོག་མ་པའི་གཟུགས་རགས་པ་ཞེས་བྱ་བ་རྒྱས་པར་འབྱུང་བ་ནི་
[290a.3]གལ་ཏེ་འདི་སྙམ་དུ་གཟུགས་མེད་པའི་རྣམ་པར་ཐར་པ་གང་དག་ཅེས་བྱ་བ་རྒྱས་པར་འབྱུང་བ་ནི་ས་འོག་མ་པའི་གཟུགས་རགས་པ་ལས་དགོངས་ཏེ་གསུངས་པ་ཡིན་ནོ་སྙམ་དུ་སེམས་ན། འདི་ལ་བདག་ཁམ་གྱི་ཟས་ལ་ཡང་མཚུངས་སོ་ཞེས་ཟེར་རོ། །ཇི་ལྟ་ཞེ་ན། ཁམ་དུ་བྱེད་པའི་ཟས་ཟ་
[290a.4]བའི་ལྷ་རྣམས་ལས་འདས་ཏེ་ཞེས་བྱ་བ་ནི་ས་འོག་མ་པའི་ཁམ་གྱི་ཟས་རགས་པ་ལས་དགོངས་ཏེ་གསུངས་པ་ཡིན་གྱི། གཟུགས་ན་སྤྱོད་པའི་ཁམ་གྱི་ཟས་ཕྲ་བ་ལས་དགོངས་པ་ནི་མ་ཡིན་ནོ། །གལ་ཏེ་ཡང་ས་འོག་མ་པའི་གཟུགས་རགས་པ་ལས་ངེས་པར་འབྱུང་བའི་ཕྱིར་གཟུགས་
[290a.5]མེད་པ་དག་ཅེས་བྱ་ན་ནི་བསམ་གཏན་རྣམས་ཀྱང་ས་འོག་མ་པ་ལས་ངེས་པར་འབྱུང་བ་ཡིན་པའི་ཕྱིར་གཟུགས་མེད་པར་ཐལ་བར་འགྱུར་རོ། །ཇི་ལྟ་ཞེ་ན། བསམ་གཏན་དང་པོར་ནི་འདོད་པ་ན་སྤྱོད་པའི་གཟུགས་རགས་པ་ལས་ངེས་པར་འབྱུང་བ་ཡིན་ལ། དེ་བཞིན་དུ་བསམ་གཏན་བཞི་པའི་
[290a.6]བར་དུ་གོང་ནས་གོང་དུ་གཟུགས་རགས་པ་ལས་ངེས་པར་འབྱུང་བ་ཡིན་པས་གཟུགས་མེད་པར་ཐལ་བར་འགྱུར་རོ། །ཚོར་བ་ལ་སོགས་པ་ལས་ཀྱང་ངེས་པར་འབྱུང་བ་ཡིན་པར་ཅིའི་ཕྱིར་མ་བཤད་ཅེས་བྱ་བ་ནི་གལ་ཏེ་རང་གི་ས་པའི་གཟུགས་ཡོད་བཞིན་དུ་ཡང་ས་འོག་མ་པའི་གཟུགས་ཡོད་
[290a.7]བཞིན་དུ་རགས་པ་ལས་ངེས་པར་འབྱུང་བའི་ཕྱིར་གཟུགས་མེད་པ་དག་ཅེས་བྱ་བ་ནི་རང་གི་ས་པའི་ཚོར་བ་ཡོད་བཞིན་དུ་ཡང་གཟུགས་མེད་པ་རྣམས་ནི་ཚོར་བ་ལ་སོགས་པ་ལས་ངེས་པར་འབྱུང་བ་ཡིན་པའི་ཕྱིར་ཚོར་བ་མེད་པའོ་ཞེས་ཀྱང་ཅིའི་ཕྱིར་མ་བཤད། སོགས་པ་ཞེས་བྱ་བའི་སྒྲ་ནི་རང་གི་
[290b]
[290b.1]ས་པའི་རྣམ་པར་ཤེས་པ་ཡོད་བཞིན་དུ་རྣམ་པར་ཤེས་པ་མེད་པའོ་ཞེས་བྱ་བའི་བར་དུ་ཅིའི་ཕྱིར་མ་བཤད་ཅེས་བྱ་བ་ཡིན་ནོ། །ཅིའི་ཕྱིར་ཞེ་ན། ས་འོག་མ་པའི་ཚོར་བ་ལ་སོགས་པ་ལས་ངེས་པར་འབྱུང་བའི་ཕྱིར་ཏེ། ས་འོག་མ་པའི་ཚོར་བ་ལ་སོགས་པ་རགས་པ་ལས་ངེས་པར་འབྱུང་བའི་
[290b.2]ཕྱིར་རོ་ཞེས་བྱ་བའི་ཐ་ཚིག་གོ། །གཟུགས་ཀྱི་རྣམ་པ་ཟད་པ་ལས་འདས་པ་ཞེས་བྱ་བ་ནི་གཟུགས་མེད་པ་དག་ནི་སྙོམས་པར་འཇུག་པ་དང་། སྐྱེ་བ་ལ་གཟུགས་ཀྱི་རྣམ་པ་གང་ཅི་ཡང་རུང་རགས་པའམ། ཕྲ་བའམ། ནང་གིའམ། ཕྱིའི་ཡང་རུང་སྟེ་དེ་ཐམས་ཅད་ལས་འདས་པ་ཡིན་ནོ། །ཚོར་བ་ལ་
[290b.3]སོགས་པའི་རྣམ་པ་ལས་ནི་མ་ཡིན་ཏེ། གཟུགས་མེད་པ་དག་ནི་སྙོམས་པར་འཇུག་པ་དང་། སྐྱེ་བ་ལ་ཚོར་བ་ཐམས་ཅད་ལས་འདས་པ་མ་ཡིན་ཏེ། བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་ཡོད་པའི་ཕྱིར་རོ། །སོགས་པ་ཞེས་བྱ་བའི་སྒྲས་ནི་རྣམ་པར་ཤེས་པའི་བར་བརྗོད་
[290b.4]པར་བྱའོ། །དེའི་ཕྱིར་གཟུགས་རྣམས་ལས་ངེས་པར་འབྱུང་བ་ཞེས་གསུངས་ཀྱི་ཚོར་བ་ལ་སོགས་པ་ལས་ངེས་པར་འབྱུང་བ་ཞེས་ནི་མ་གསུངས་སོ། །དེ་ལྟ་བས་ན་ཁོ་བོ་ཅག་དེ་སྐད་དུ་སྨྲ་བ་ལ་ནི་ས་འོག་མ་པའི་ཚོར་བ་ལ་སོགས་པ་ལས་ངེས་པར་འབྱུང་བའི་ཕྱིར་ཚོར་བ་ལ་སོགས་པ་ལས་ཀྱང་
[290b.5]ངེས་པར་འབྱུང་བ་ཡིན་པར་ཅིའི་ཕྱིར་མ་བཤད་ཅེས་བྱ་བའི་ཐལ་བ་འདིར་མི་འགྱུར་རོ། །སྨྲས་པ། གལ་ཏེ་གཟུགས་མེད་པ་རྣམས་གཟུགས་རྣམས་ལས་ངེས་པར་བྱུང་བ་ཡིན་ན། འོ་ན་མདོ་ལས་ང་ནི་སྲིད་པས་སྲིད་པ་ལས་འབྱུང་བར་མི་སྨྲའོ་ཞེས་གསུངས་པ་གང་ཡིན་པ་དེ་ཇི་ལྟར་ན་གཟུགས་
[290b.6]མེད་པའི་སྲིད་པས་གཟུགས་ཀྱི་སྲིད་པ་ལས་ངེས་པར་འབྱུང་ཞེ་ན། སྲིད་པས་སྲིད་པ་ལ་ངེས་པར་མི་འབྱུང་བར་གསུངས་པ་ནི་དེ་ཉིད་ཀྱིས་དེ་ལས་ངེས་པར་མི་འབྱུང་བའི་ཕྱིར་དེ་སྐད་དུ་བཤད་པར་ཟད་དོ། །ཐམས་ཅད་དང་གཏན་དུ་ངེས་པར་འབྱུང་བ་མ་ཡིན་པའི་ཕྱིར་ཏེ། ཐམས་ཅད་ལས་ངེས་པར་
[290b.7]འབྱུང་བ་མ་ཡིན་པ་ནི་གཟུགས་ཀྱི་སྲིད་པས་འདོད་པའི་སྲིད་པ་ལས་ངེས་པར་འབྱུང་མོད་ཀྱི། དེས་གཟུགས་མེད་པའི་སྲིད་པ་ལས་ཀྱང་ངེས་པར་འབྱུང་བ་ནི་མ་ཡིན་ནོ། །དེས་འདོད་པའི་སྲིད་པ་ལས་གཏན་དུ་ངེས་པར་འབྱུང་བ་ཡང་མ་ཡིན་ཏེ། ཡང་འོང་བའི་ཕྱིར་རོ། །དེ་བཞིན་དུ་གཟུགས་མེད་
[291a]
[291a.1]པའི་སྲིད་པས་ཀྱང་གཟུགས་ཀྱི་སྲིད་པ་ལས་ངེས་པར་བྱུང་གི་འདོད་པའི་སྲིད་པ་ལས་ནི་མ་ཡིན་ལ་གཟུགས་མེད་པའི་སྲིད་པས་གཟུགས་ཀྱི་སྲིད་པ་ལས་གཏན་དུ་ངེས་པར་འབྱུང་བ་ཡང་མ་ཡིན་ནོ། །ཇི་ལྟར་གནས་པ་ནི་སྔར་བཤད་ཟིན་ཏོ་ཞེས་བྱ་བ་ནི། དེར་ནི་རིས་དང་
[291a.2]སྲོག་ལ་ཡང་། །སེམས་ཀྱི་རྒྱུད་ནི་བརྟེན་པ་ཡིན། །ཞེས་བྱ་བ་ལ་སོགས་པ་ཡིན་ནོ། །གསུམ་པོ་ཞེས་བྱ་བ་ནི་གཟུགས་མེད་པ་ཞེས་བྱ་བར་སྦྱར་བའི་ཕྱིར་ཕོའི་རྟགས་ཀྱིས་བསྟན་པ་ཡིན་ནོ། །དེ་ལྟར་སྦྱོར་ཕྱིར་ཞེས་བྱ་བ་ནི་སྦྱོར་བའི་དུས་ན་ནམ་མཁའ་ལ་སོགས་པར་འགྱུར་གྱི་གཞན་ན་ནི་ཅི་
[291a.3]རིགས་པར་ཆོས་གཞན་དག་ལ་ཡང་དམིགས་སོ་ཞེས་སྟོན་ཏོ། །དམན་ཕྱིར་འདུ་ཤེས་མེད་འདུ་ཤེས་མེད་པའང་མ་ཡིན་པའོ་ཞེས་བྱ་བ་ནི་ཅིའི་ཕྱིར་གཟུགས་མེད་པ་བཞི་པ་འདུ་ཤེས་ཅན་ཞེས་ཀྱང་མི་བྱ་ལ་འདུ་ཤེས་མེད་པ་ཞེས་ཀྱང་མི་བྱ་ཞེ་ན། དམན་པའི་ཕྱིར་ཏེ། དམན་ཕྱིར་ཞེས་བྱ་བ་ནི་རྒྱུ་
[291a.4]གང་གིས་གཟུགས་མེད་པ་བཞི་པ་དེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཅེས་བྱ་བའི་རྒྱུ་དེ་ཉིད་བརྗོད་པ་ཡིན་ནོ། །མིང་དང་དོན་དང་མཐུན་པར་བཏགས་པའི་ཕྱིར་འདིའི་སྦྱོར་བ་ཡང་དེ་ལྟ་བུ་ཡིན་པར་བརྗོད་པ་ཡིན་ནོ། །དེ་ཉིད་ཀྱི་ཕྱིར་གལ་ཏེ་དེ་ལ་ཡང་འདི་ལྟར་སྦྱོར་མོད་ཀྱི་ཞེས་བྱ་བ་ལ་
[291a.5]སོགས་པ་སྨོས་སོ། །འདུ་ཤེས་ནི་འབྲས་སོ་ཞེས་བྱ་བ་ནི་འབྲས་དང་འདྲ་བས་ན་འབྲས་ཏེ་ཟུག་རྔུའི་བར་དུ་ཡང་དེ་དང་འདྲའོ། །འདུ་ཤེས་མེད་པ་པ་ནི་ཀུན་དུ་རྨོངས་པའོ་ཞེས་བྱ་བ་ནི་འདུ་ཤེས་མེད་པ་ཡང་ཀུན་དུ་རྨོངས་པའི་རྒྱུ་ཡིན་ནོ་ཞེས་བྱ་བར་ཤེས་ཏེ། འདུ་ཤེས་ཀུན་དུ་ཆད་པའི་ཕྱིར་རོ་སྙམ་
[291a.6]དུ་བསམས་པ་ཡིན་ནོ། །འདི་ནི་ཞི་བ་ཞེས་བྱ་བ་གང་ཡིན་ཞེ་ན། འདི་ལྟ་སྟེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཅེས་བྱ་བ་སྨོས་ཏེ། འདུ་ཤེས་དམན་པ་ལ་མངོན་པར་དགའོ།། །།བམ་པོ་ལྔ་བཅུ་བརྒྱད་པ། འདིར་ཅིའི་ཕྱིར་དེ་དག་གིས་དེ་ལ་དེ་ལྟར་འཛིན་ཞེས་དྲི་བར་བྱ་སྟེ། དེ་དག་
[291a.7]གིས་ཞེས་བྱ་བ་ནི་དེ་ལ་སྙོམས་པར་འཇུག་པ་དག་གིས་སོ། །དེ་ལ་ཞེས་བྱ་བ་ནི་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའོ། །དེ་ལྟར་འཛིན་ཞེས་བྱ་བ་ནི་འདུ་ཤེས་མེད་འདུ་ཤེས་མེད་མིན་ཞེས་འཛིན་ཞེས་བྱ་བའི་ཐ་ཚིག་གོ། །དེ་བས་ན་དེ་སྐད་དུ་ཡོངས་སུ་འདྲི་བས་བརྒལ་བས་ནི་འདུ་ཤེས་རྣམས་ཆུང་བའི་ཕྱིར་
[291b]
[291b.1]འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཅེས་བྱའོ་ཞེས་བྱ་བ་འདི་གདོན་མི་ཟ་བར་བརྗོད་དགོས་པས་དེ་ཉིད་བཤད་དོ། །སྙོམས་པར་འཇུག་པའི་དངོས་གཞིའི་རྫས་ཞེས་བྱ་བ་ནི་དེ་དག་གི་ཡན་ལག་ནི་ཉེ་བར་མི་དགོད་དོ་སྙམ་དུ་བསམས་པ་ཡིན་ནོ། །ཇི་ལྟར་བདུན་ནི་རྣམ་པ་གསུམ་ཡིན་ཞེ་ན།
[291b.2]རོ་མྱང་བ་དང་མཚུངས་པར་ལྡན་པ་རྣམས་དང་དག་པ་པ་རྣམས་དང་། ཟག་པ་མེད་པ་རྣམས་སོ་ཞེས་བྱ་བ་སྨོས་སོ། །ཟག་པ་མེད་པ་ནི་མེད་དོ་ཞེས་བྱ་བ་ནི་འདུ་ཤེས་དམན་པའི་ཕྱིར་རོ། །རོ་མྱོང་བར་བྱེད་པ་གང་ཡིན་པ་དེ་ལས་ནི་ལངས་པ་ཡིན་ནོ་ཞེས་བྱ་བ་དག་པ་པ་ལས་སོ། །གང་གིས་རོ་
[291b.3]མྱོང་བར་བྱེད་པ་དེ་ལ་ནི་སྙོམས་པར་ཞུགས་པ་ཡིན་ནོ་ཞེས་བྱ་བ་ནི་རོ་མྱོང་བ་དང་མཚུངས་པར་ལྡན་པ་ལའོ། །ཡན་ལག་བཞི་པའི་དམག་ཡན་ལག་ལས་དོན་གཞན་དུ་གྱུར་པ་མ་ཡིན་པས་ཇི་ལྟ་བར་ཡན་ལག་ལྔ་པའི་བསམ་གཏན་ཡང་དེ་དང་འདྲ་སྟེ། དོན་གཞན་མ་ཡིན་ནོ་ཞེས་རང་གི་གཞུང་
[291b.4]ལུགས་སྟོན་པར་བྱེད་དོ། །དགའ་བ་ལ་སོགས་པ་ཞེས་བྱ་བ་ནི་སྔར་བཤད་པ་དགའ་བ་དང་བདེ་བ་དང་། སེམས་རྩེ་གཅིག་པ་ཉིད་དང་ནང་རབ་ཏུ་དང་བ་སྟེ། གཉིས་པ་ནི་ཡན་ལག་བཞི་པ་ཡིན་ནོ། །གསུམ་པ་ལ་ལྔ་བཏང་སྙོམས་དང་ཞེས་བྱ་བ་ནི་འདི་འདུ་བྱེད་ཀྱི་བཏང་སྙོམས་ཡིན་པར་བཟུང་
[291b.5]སྟེ། དགའ་བ་ལ་རྩོལ་བ་མེད་པའི་མཚན་ཉིད་གང་ཡིན་པའོ། །དྲན་པ་ནི་བཏང་སྙོམས་ཀྱི་རྒྱུ་མཚན་མི་བརྗེད་པ་ཡིན་ནོ། །ཤེས་བཞིན་ནི་དྲན་པ་མི་བརྗེད་པ་ཡིན་ནོ། །བཞི་པ་ལ་བཏང་སྙོམས་ཡོངས་སུ་དག་པ་ཞེས་བྱ་བ་ནི་བཏང་སྙོམས་ཀྱི་ཡོངས་སུ་དག་པ་ནི་བཏང་སྙོམས་ཡོངས་སུ་དག་པ་
[291b.6]སྟེ། ས་འོག་མ་པའི་སྐྱོན་དང་བྲལ་བའི་ཕྱིར་རོ། །སྐྱོན་ནི་བརྒྱད་འཆད་པར་འགྱུར་རོ། །དྲན་པ་ཡོངས་སུ་དག་པ་ཡང་དེ་དང་འདྲའོ། །བསམ་གཏན་དང་པོ་པ་ཞེས་བྱ་བ་ནི་བསམ་གཏན་དང་པོ་ན་ཡོད་པའོ། །དེ་ཉིད་ཀྱི་ཕྱིར་སྨྲས་པ་ཞེས་བྱ་བ་ནི་གང་གི་ཕྱིར་གཉིས་པ་ལ་སོགས་པ་ན་ནང་རབ་ཏུ་
[291b.7]དང་བ་ལ་སོགས་པ་འཕེལ་བས་སོ། །ཇི་ལྟ་ཞེ་ན། མུ་བཞི་སྟེ་བསམ་གཏན་དང་པོ་ན་ཡོད་ལ་གཉིས་པ་ན་མ་ཡིན་པ་ཡང་ཡོད། གཉིས་པ་ན་ཡོད་ལ་དང་པོ་ན་མ་ཡིན་པ་ཡང་ཡོད། གཉི་ག་ན་ཡོད་པ་ཡང་ཡོད། །གཉི་ག་ན་མ་ཡིན་པ་ཡང་ཡོད་དོ། །དེ་བཞིན་དུ་བསམ་གཏན་གྱི་ཡན་ལག་
[292a]
[292a.1]ཐམས་ཅད་ཕན་ཚུན་སྦྱར་བར་བྱའོ་ཞེས་བྱ་བ་ཇི་ལྟ་ཞེ་ན། ཡན་ལག་གང་དག་བསམ་གཏན་དང་པོ་ན་ཡོད་པ་དེ་དག་གསུམ་པ་ན་ཡང་ཡོད་དམ་ཞེ་ན། མུ་བཞི་སྟེ། མུ་དང་པོ་ནི་རྟོག་པ་དང་དཔྱོད་པ་དང་དགའ་བ་དང་བདེ་བ་དག་གོ། །གཉིས་པ་ནི་བཏང་སྙོམས་དང་
[292a.2]དྲན་པ་དང་ཤེས་བཞིན་དང་བདེ་བ་དག་གོ། །གསུམ་པ་ནི་ཏིང་ངེ་འཛིན་ཏོ། །མུ་བཞི་པ་ནི་བཤད་པ་ལ་མ་གཏོགས་པའི་ཆོས་རྣམས་སོ། །ཡན་ལག་གང་དག་བསམ་གཏན་དང་པོ་ན་ཡོད་པ་དེ་དག་བཞི་པ་ན་ཡང་ཡོད་དམ་ཞེ་ན། མུ་བཞི་སྟེ། མུ་དང་པོ་ནི་རྟོག་པ་དང་དཔྱོད་པ་དང་དགའ་བ་
[292a.3]དང་བདེ་བ་དག་གོ། །གཉིས་པ་ནི་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པའི་ཚོར་བ་དང་། བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་དག་པའོ། །གསུམ་པ་ནི་ཏིང་ངེ་འཛིན་ཏོ། །བཞི་པ་ནི་བཤད་པ་ལ་མ་གཏོགས་པའི་ཆོས་རྣམས་སོ། །ཡན་ལག་གང་
[292a.4]དག་བསམ་གཏན་གཉིས་པ་ན་ཡོད་པ་དེ་དག་གསུམ་པ་ན་ཡང་ཡོད་དམ་ཞེ་ན། མུ་བཞི་སྟེ། མུ་དང་པོ་ནི་ནང་རབ་ཏུ་དང་བ་དང་། དགའ་བ་དང་བདེ་བ་དག་གོ། །གཉིས་པ་ནི་བཏང་སྙོམས་དང་དྲན་པ་དང་ཤེས་བཞིན་དང་བདེ་བ་དག་གོ། །གསུམ་པ་ནི་ཏིང་ངེ་འཛིན་ཏོ། །བཞི་པ་ནི་བཤད་པ་
[292a.5]ལ་མ་གཏོགས་པའི་ཆོས་རྣམས་སོ། །ཡན་ལག་གང་དག་བསམ་གཏན་གཉིས་པ་ན་ཡོད་པ་དེ་དག་བཞི་པ་ན་ཡང་ཡོད་དམ་ཞེ་ན། མུ་བཞི་སྟེ། མུ་དང་པོ་ནི་ནང་རབ་ཏུ་དང་བ་དང་། དགའ་བ་དང་བདེ་བ་དག་གོ། །གཉིས་པ་ནི་ཏིང་ངེ་འཛིན་མ་གཏོགས་པ་དེའི་ཡན་ལག་རྣམས་སོ། །གསུམ་
[292a.6]པ་ནི་ཏིང་ངེ་འཛིན་ཏོ། །བཞི་པ་ནི་བཤད་པ་ལ་མ་གཏོགས་པའི་ཆོས་རྣམས་སོ། །ཡན་ལག་གང་དག་བསམ་གཏན་གསུམ་པ་ན་ཡོད་པ་དེ་དག་བཞི་པ་ན་ཡང་ཡོད་དམ་ཞེ་ན། མུ་བཞི་སྟེ། མུ་དང་པོ་ནི་ཏིང་ངེ་འཛིན་མ་གཏོགས་པ་དེའི་ཡན་ལག་རྣམས་སོ། །གཉིས་པ་ནི་ཏིང་ངེ་འཛིན་མ་གཏོགས་
[292a.7]པ་དེའི་ཡན་ལག་རྣམས་སོ། །གསུམ་པ་ནི་ཏིང་ངེ་འཛིན་ཏོ། །བཞི་པ་ནི་བཤད་པ་ལ་མ་གཏོགས་པའི་ཆོས་རྣམས་ཏེ། འདི་ནི་དེ་དག་ལས་གཅིག་དབྲི་བ་ཞེས་བྱ་བ་ཡིན་ནོ། །ཅིའི་ཕྱིར་བསམ་གཏན་གསུམ་པ་ན་ཡོད་པའི་བདེ་བ་རྫས་གཞན་དུ་བརྗོད་ཅེ་ན་ཞེས་བྱ་བ་ཇི་སྐད་དུ་བརྗོད་ཅེ་ན། །དེ་དག་
[292b]
[292b.1]ནི་བསམ་གཏན་གྱི་ཡན་ལག་བཅོ་བརྒྱད་ཡིན་ཏེ་ཞེས་རྒྱས་པར་བཤད་ནས། ཡང་མིང་གི་སྒོ་ནས་ནི་དེ་ལྟའོ། །རྫས་སུ་བཅུ་གཅིག །རྫས་སུ་ནི་དེ་དག་བཅུ་གཅིག་ཡིན་ཏེ། བསམ་གཏན་དང་པོའི་ས་པ་ནི་ལྔ་པའོ། །གཉིས་པ་ལ་ནི་ནང་རབ་ཏུ་དང་བ་ལྷག་གོ། །གསུམ་པ་ལ་ནི་བཏང་
[292b.2]སྙོམས་དང་། དྲན་པ་དང་། ཤེས་བཞིན་དང་། བདེ་བ་རྣམས་སོ་ཞེས་སྨོས་པའི་ཕྱིར་རོ། །བདེ་བའི་དབང་པོ་དང་མི་ལྡན་པའི་ཕྱིར་ཏེ་ཞེས་བྱ་བ་ནི་བདེ་བའི་དབང་པོ་མི་སྲིད་པའི་ཕྱིར་རོ། །བསམ་གཏན་གསུམ་ཆར་ན་ཡང་སེམས་ལས་བྱུང་བའི་བདེ་བའི་དབང་པོ་མེད་པ་ཁོ་ནའོ། །འོ་ན་ཅི་ཞེ་ན།
[292b.3]ལུས་ཀྱི་བདེ་བ་ཁོ་ན་ཡན་ལག་ཏུ་རྣམ་པར་གཞག་སྟེ། མཉམ་པར་གཞག་པའི་གནས་ཀྱི་བར་སྐབས་སུ་ཀུན་འབྱུང་བའི་ཕྱིར་རོ། །འདི་ནི་དཔེས་སྟོན་པ་རྣམས་ཀྱི་ཕྱོགས་ཡིན་ནོ་ཞེས་གྲག་སྟེ། དེ་དག་གི་ལྟར་ན་བདེ་བའི་དབང་པོ་ས་གཉིས་པ་འདོད་པ་དང་བསམ་གཏན་དང་པོའི་ས་པ་ཁོ་ནར་མ་ཟད་
[292b.4]དོ། །འོ་ན་ཅི་ཞེ་ན། བདེ་བའི་དབང་པོ་ནི་འདོད་པ་ན་སྤྱོད་པ་ནས་བསམ་གཏན་གསུམ་པའི་ས་པའི་བར་ས་བཞི་པ་ཡང་ཡིན་ནོ། །དེ་ཉིད་ཀྱི་ཕྱིར་བྱེ་བྲག་ཏུ་བཤད་པ་ལས། མདོ་སྡེ་པའི་བཙུན་པས་ཆོས་མངོན་པ་པ་རྣམས་ཀྱི་ལྟར་ན་ཟོ་ཆུན་རྒྱུད་མོ་ལྟ་བུར་མིག་གི་རྣམ་པར་ཤེས་པ་ལ་སོགས་པ་
[292b.5]འོག་ནས་གོང་དུ་འདྲེན་ཏོ་ཞེས་བཤད་དེ། དེའི་འདོད་པ་ནི་མིག་གི་རྣམ་པར་ཤེས་པ་ལ་སོགས་པ་བསམ་གཏན་གཉིས་པ་ལ་སོགས་པའི་ས་པ་ཡང་ཡོད་དོ་ཞེས་བྱ་བ་འདི་ཡིན་ནོ། །ཚིག་དེ་ནི་འགའ་ཞིག་གིས་སྒྲོ་བཏགས་པ་ཡིན་ཞེས་བྱ་བ་ནི་སེམས་ལས་བྱུང་བ་ཞེས་འབྱུང་བ་གང་ཡིན་པ་དེའོ། །
[292b.6]བདེ་བ་ལུས་ཀྱིས་མྱོང་ལ་ཞེས་རང་གི་སྒྲས་གསུངས་པའི་ཕྱིར་རོ་ཞེས་བྱ་བ་ནི་བསམ་གཏན་གསུམ་པ་བསྟན་པ་ལས་འདི་སྐད་དུ། དགའ་བ་ལས་འདོད་ཆགས་དང་བྲལ་ནས། བཏང་སྙོམས་དང་དྲན་པ་དང་ཤེས་བཞིན་དུ་གནས་ཤིང་བདེ་བ་ལུས་ཀྱིས་མྱོང་ལ་གང་འཕགས་པ་རྣམས་ཀྱིས་བཏང་
[292b.7]སྙོམས་དང་དྲན་པ་དང་ཤེས་བཞིན་དང་ལྡན་ཞིང་བདེ་བ་ལ་གནས་སོ་ཞེས་བརྗོད་པ་བསམ་གཏན་གསུམ་པ་རྫོགས་པར་བྱས་ཏེ་གནས་སོ་ཞེས་བཤད་དོ། །གལ་ཏེ་དེ་སེམས་ལས་བྱུང་བ་ཡིན་པར་གྱུར་ན་ཇི་ལྟར་དེ་ལུས་ཀྱིས་མྱོང་བར་འགྱུར། ཡིད་ཀྱི་ལུས་ཀྱིས་ཞེས་བྱ་བ་ནི་ཡིད་ཀྱི་ཚོགས་ཀྱིས་
[293a]
[293a.1]སོ། །དེ་སྐད་དུ་བཤད་དེ་ཡོན་ཏན་ཅི་ཞིག་ཡོད་ཅེས་བྱ་བ་ནི་བདེ་བ་ཡིད་ཀྱིས་མྱོང་ལ་ཞེའམ། བདེ་བ་མྱོང་ལ་ཞེས་དེ་སྐད་དུ་བརྗོད་པར་བྱ་བར་འགྱུར་རོ་སྙམ་དུ་བསམས་པ་ཡིན་ནོ། །བསམ་གཏན་བཞི་པ་ལ་ཤིན་ཏུ་སྦྱངས་པ་མང་བཞིན་དུ་བདེ་བ་མ་སྨོས་པའི་ཡང་ཕྱིར་
[293a.2]རོ་ཞེས་བྱ་བ་ནི་བསམ་གཏན་བཞི་པ་ལ་ཤིན་ཏུ་སྦྱངས་པའི་བདེ་བ་མང་བ་ཡིན་ཞིང་ཆེས་ཕལ་ཆེ་བ་ཡིན་ཏེ། བསམ་གཏན་གཞན་དག་པས་བསམ་གཏན་བཞི་པ་ཆེས་ཤིན་ཏུ་སྦྱངས་པའི་ཕྱིར་རོ། །དེ་མང་བཞིན་དུ་ཡང་བདེ་བ་མ་སྨོས་ཏེ། བསམ་གཏན་བཞི་པ་ལ་བདེ་བ་མ་བརྗོད་དོ། །བདེ་བ་དེ་
[293a.3]མ་བརྗོད་པའི་ཕྱིར་བསམ་གཏན་གསུམ་པ་ལ་ཚོར་བའི་བདེ་བ་ཁོ་ན་ཡོད་དོ་ཞེས་བྱ་བར་ཤེས་ཀྱི། བཞི་པ་ལ་ནི་ཚོར་བའི་བདེ་བ་ཡོད་པ་མ་ཡིན་པས་དེ་ལ་མ་བརྗོད་དོ་སྙམ་དུ་བསམས་པ་ཡིན་ནོ། །གལ་ཏེ་བདེ་བའི་ཚོར་བ་དང་མཐུན་པའི་ཤིན་ཏུ་སྦྱངས་པ་བདེ་བ་ཡིན་ནོ་ཞེ་ན་ཞེས་བྱ་བ་ནི། གལ་ཏེ་
[293a.4]བསམ་གཏན་དང་པོ་དང་གཉིས་པ་དག་ལ་ནི་བདེ་བའི་ཚོར་བ་དང་མཐུན་པའི་ཤིན་ཏུ་སྦྱངས་པ་ཡོད་པས་དེ་དག་གིས་ནི་བདེ་བ་ཞེས་བཤད་དོ། །བསམ་གཏན་བཞི་པའི་ཤིན་ཏུ་སྦྱངས་པ་ནི་བདེ་བའི་ཚོར་བ་དང་མཐུན་པ་མ་ཡིན་པས་མ་བཤད་དོ་སྙམ་དུ་སེམས་ན། གལ་ཏེ་དེ་ལྟ་ན་གསུམ་པ་ན་ཡོད་
[293a.5]པའི་ཤིན་ཏུ་སྦྱངས་པ་བདེ་བར་མ་གསུངས་པ་ཡང་ཅིའི་ཕྱིར་བསམ་གཏན་གསུམ་པའི་ཤིན་ཏུ་སྦྱངས་པ་ཡང་བདེ་བའི་ཚོར་བ་དང་མཐུན་པ་ཡིན་ན། ཅིའི་ཕྱིར་དེ་ལ་ཤིན་ཏུ་སྦྱངས་པའི་བདེ་བ་མ་བཤད། ཁྱེད་ཀྱིས་ནི་དེ་ལ་ཚོར་བའི་བདེ་བ་ཁོ་ན་རྣམ་པར་གཞག་གི་ཤིན་ཏུ་སྦྱངས་པའི་བདེ་བ་ནི་མ་ཡིན་
[293a.6]ཏེ། བདེ་བ་གཉིས་མི་སྨོས་པའི་ཕྱིར་རོ། །གལ་ཏེ་བཏང་སྙོམས་ཀྱིས་བཅོམ་པའི་ཕྱིར་རོ་ཞེ་ན་ཞེས་བྱ་བ་ནི། གལ་ཏེ་བསམ་གཏན་གསུམ་པའི་བཏང་སྙོམས་ནི་ལས་སུ་རུང་བའི་མཚན་ཉིད་ཡིན་ཏེ། དེས་ཤིན་ཏུ་སྦྱངས་པ་བཅོམ་པས་མ་བརྗོད་དོ་ཞེས་བྱ་བར་འདོད་ན་མ་ཡིན་ཏེ། བཏང་སྙོམས་ཁོ་
[293a.7]ནས་དེ་འཕེལ་བའི་ཕྱིར་རོ། །དེ་ནི་དེ་ལྟ་མ་ཡིན་ཏེ། བཏང་སྙོམས་ཁོ་ནས་བསམ་གཏན་གསུམ་པའི་ཤིན་ཏུ་སྦྱངས་པའི་བདེ་བ་འཕེལ་བའི་ཕྱིར་རོ། །གནོད་པར་བྱེད་པའི་རྒྱུ་ཉིད་ཀྱི་འཕེལ་བར་རུང་བ་མ་ཡིན་ན། ཇི་ལྟར་བཏང་སྙོམས་ཁོ་ནས་དེ་འཕེལ་ཞེ་ན། དེའི་ཕྱིར་སྔ་མ་གཉིས་པས་དེ་ཁྱད་པར་
[293b]
[293b.1]དུ་འཕགས་པས་ཞེས་བྱ་བ་སྨོས་ཏེ། སྔ་མ་བསམ་གཏན་དང་པོ་དང་གཉིས་པའི་ཤིན་ཏུ་སྦྱངས་པ་དག་པས་བསམ་གཏན་གསུམ་པའི་ཤིན་ཏུ་སྦྱངས་པ་ཁྱད་པར་དུ་འཕགས་པ་ཡིན་ཏེ། བསམ་གཏན་སྔ་མ་དག་པས་གསུམ་པ་ཁྱད་པར་དུ་འཕགས་པའི་ཕྱིར་རོ། །གང་གི་ཚེ་ཞེས་བྱ་བ་རྒྱས་
[293b.2]པར་འབྱུང་བ་ནི་གང་གི་ཚེ་འཕགས་པ་ཉན་ཐོས་རབ་ཏུ་དབེན་པ་ལས་སྐྱེས་པའི་བདེ་བ་ལུས་ཀྱིས་མངོན་སུམ་དུ་བྱས་ནས་རྫོགས་པར་བྱས་ཏེ། གནས་པ་དེའི་ཚེ་འདིའི་ཆོས་ལྔ་ནི་སྤོང་བར་འགྱུར་ལ། ཆོས་ལྔ་པོ་ནང་རབ་ཏུ་དང་བ་དང་། དགའ་བ་དང་ཤིན་ཏུ་སྦྱངས་པ་དང་། བདེ་བ་དང་ཏིང་ངེ་འཛིན་
[293b.3]ནི་བསྒོམས་པ་ཡོངས་སུ་རྫོགས་པར་འགྱུར་རོ་ཞེས་འབྱུང་ངོ་། །ཤིན་ཏུ་སྦྱངས་པ་དང་བདེ་བ་དག་གཞན་མ་ཡིན་པ་ཉིད་ཡིན་ན་ཇི་ལྟར་འདི་དག་ལྔ་ཉིད་དུ་འགྱུར། དོན་གཞན་ཉིད་ཡིན་ན་ནི་བསམ་གཏན་གསུམ་ཆར་ན་ཡང་བདེ་བ་ལུས་ཀྱི་ཁོ་ན་ཡིན་ནོ་ཞེས་བྱ་བར་གྲུབ་པ་ཡིན་ནོ། །གལ་ཏེ་
[293b.4]སྙོམས་པར་ཞུགས་པ་ལ་ཇི་ལྟར་ལུས་གྱི་རྣམ་པར་ཤེས་པ་འབྱུང་ཞེ་ན། འདིར་སྨྲས་པ། ཏིང་ངེ་འཛིན་གྱི་ཁྱད་པར་ལས་སྐྱེས་པ་ཤིན་ཏུ་སྦྱངས་པ་ཞེས་བྱ་བ་ནི་ཤིན་ཏུ་སྦྱངས་པ་ཞེས་བརྗོད་པ་བདེ་བ་མྱོང་བར་འགྱུར་བ་བདེ་བའི་ཚོར་བ་དང་མཐུན་པའི་རླུང་གིས་ལུས་ལ་རྒྱས་པའི་ཕྱིར་ཏེ།
[293b.5]ལུས་ལ་ཁྱབ་པའི་ཕྱིར་རོ། །ཅི་ཞེ་ན། ལུས་ཀྱི་རྣམ་པར་ཤེས་པ་འབྱུང་བ་ཁོ་ནའོ། །གལ་ཏེ་ཕྱི་རོལ་དུ་རྣམ་པར་གཡེངས་པའི་ཕྱིར་ཏིང་ངེ་འཛིན་ལས་ཉམས་པར་འགྱུར་རོ་ཞེ་ན་ཞེས་བྱ་བ་ནི་གལ་ཏེ་ལུས་ཀྱི་རྣམ་པར་ཤེས་པ་སྐྱེས་པས་ཕྱི་རོལ་དུ་རྣམ་པར་གཡེངས་པའི་ཕྱིར་ཏེ། ཕྱིའི་ཡུལ་ལ་
[293b.6]རྣམ་པར་གཡེངས་པའི་ཕྱིར་ཏིང་ངེ་འཛིན་ཉམས་པར་འགྱུར་རོ་སྙམ་དུ་སེམས་ན་མ་ཡིན་ཏེ། ཏིང་ངེ་འཛིན་ལས་སྐྱེས་པ་ཞེས་བྱ་བ་རྒྱས་པར་སྨོས་ཏེ། དེ་ནི་དེ་ལྟར་མི་འགྱུར་རོ། །ཅིའི་ཕྱིར་ཞེ་ན། ཏིང་ངེ་འཛིན་ལས་སྐྱེས་པ་ལུས་ཀྱི་ནང་དུ་བྱུང་བ་སྟེ། ཕྱི་རོལ་དུ་བྱུང་བ་མ་ཡིན་པ་ཞེས་བྱ་བའི་ཐ་
[293b.7]ཚིག་གོ། །ལུས་ཀྱི་བདེ་བ་ལུས་ཀྱི་རྣམ་པར་ཤེས་པ་དང་མཚུངས་པར་ལྡན་པའི་ཚོར་བའི་བདེ་བ་ནི་ཏིང་ངེ་འཛིན་དང་མཐུན་པའི་ཕྱིར་ཏིང་ངེ་འཛིན་ཉམས་པར་མི་འགྱུར་རོ་ཞེས་བྱ་བའི་ཐ་ཚིག་གོ། །མ་ཡིན་ཏེ། དེ་ཉིད་ཀྱི་ཕྱིར་རོ་ཞེས་བྱ་བ་ནི་དེ་ཉིད་ཀྱི་ཕྱིར་ལུས་ཀྱི་རྣམ་པར་ཤེས་པ་སྐྱེས་པའི་ཚེ་
[294a]
[294a.1]ལྡང་བར་མི་འགྱུར་ཏེ། ཏིང་ངེ་འཛིན་དང་མཐུན་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་མངོན་དུ་གྱུར་མ་ཐག་ཏུ་ཏིང་ངེ་འཛིན་ཉེ་བར་གནས་སོ་སྙམ་དུ་བསམས་པ་ཡིན་ནོ། །འདོད་པ་ན་སྤྱོད་པའི་ལུས་ཀྱི་རྣམ་པར་ཤེས་པས་གཟུགས་ན་སྤྱོད་པའི་རེག་བྱ་མི་འཛིན་པའི་ཕྱིར་
[294a.2]ལུས་ཀྱི་རྣམ་པར་ཤེས་པ་དེ་ནི་གཟུགས་ན་སྤྱོད་པ་ཁོ་ན་ཡིན་གྱི་འདོད་པ་ན་སྤྱོད་པ་ནི་མ་ཡིན་ནོ། །དེ་ཉིད་ཀྱི་ཕྱིར་དེ་དང་མཚུངས་པར་ལྡན་པའི་བདེ་བ་ནི་བསམ་གཏན་གྱི་ཡན་ལག་ཏུ་མི་འགྲུབ་བོ་ཞེ་ན། ཤིན་ཏུ་སྦྱངས་པའི་རྣམ་པར་ཤེས་པ་སྐྱེས་པའི་ཕྱིར་རོ་ཞེས་བྱ་བ་ནི་ཏིང་ངེ་འཛིན་གྱི་སྟོབས་བསྐྱེད་
[294a.3]པའི་སྒོ་ནས་འདོད་པ་ན་སྤྱོད་པའི་ལུས་ཀྱི་དབང་པོས་གཟུགས་ན་སྤྱོད་པ་འཛིན་ཏེ་མཉམ་པར་གཞག་པའི་ལུས་ཀྱི་དབང་པོ་གང་ཡིན་པ་དེ་ནི་ས་གོང་མ་པའི་ལུས་ཀྱི་རྣམ་པར་ཤེས་པའི་རྟེན་དུ་འགྱུར་བའི་གནས་སྐབས་དེར་འགྱུར་བ་ཡིན་ནོ། །ཟག་པ་མེད་པ་དག་ཏུ་ཡང་འགྱུར་རོ་ཞེས་བྱ་བ་ནི་
[294a.4]ཤིན་ཏུ་སྦྱངས་པའི་མཚན་ཉིད་ཀྱི་རེག་བྱ་དང་དེ་ལ་དམིགས་པ་ལུས་ཀྱི་རྣམ་པར་ཤེས་པ་སྟེ། རེག་བྱ་དང་ལུས་ཀྱི་རྣམ་པར་ཤེས་པ་དེ་དག་ཟག་པ་མེད་པར་ཡང་འགྱུར་རོ། །ཅིའི་ཕྱིར་ཞེ་ན། ཡན་ལག་ཅུང་ཟད་ཅིག་ནི་ཟག་པ་དང་བཅས་པ་ཅུང་ཟད་ཅིག་ནི་ཟག་པ་མེད་པ་ཡིན་ན་མི་རུང་བས་ཞེས་བྱ་
[294a.5]བ་སྨོས་ཏེ། གལ་ཏེ་དེ་སྙམ་དུ་སེམས་ན། ལུས་ཀྱི་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ཏུ་གསུངས་པས་འདོད་པའི་ཕྱིར་རོ་ཞེས་བྱ་བ་སྨོས་ཏེ། ལུས་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་མངོན་པར་ཤེས་པ་དང་། རྫོགས་པར་བྱང་ཆུབ་པ་དང་མྱ་ངན་ལས་འདའ་བར་འགྱུར་བ་
[294a.6]གང་ཡིན་པ་དང་། སེམས་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་མངོན་པར་ཤེས་པ་དང་། རྫོགས་པར་བྱང་ཆུབ་པ་དང་མྱ་ངན་ལས་འདའ་བར་འགྱུར་བ་གང་ཡིན་པ་ཞེས་འབྱུང་བའི་ཕྱིར་རོ། །བྱང་ཆུབ་ཀྱི་ཡན་ལག་ཉིད་དུ་འབྱུང་བའི་ཕྱིར་རེག་བྱ་དང་ལུས་ཀྱི་རྣམ་པར་ཤེས་པ་དག་ཟག་པ་
[294a.7]མེད་པར་འདོད་དོ། །གལ་ཏེ་བྱང་ཆུབ་ཀྱི་ཡན་ལག་དང་མཐུན་པའི་ཕྱིར་རོ་ཞེ་ན་ཞེས་བྱ་བ་ནི་ཇི་སྟེ་འདི་སྐད་དུ་གང་གི་ཕྱིར་ལུས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་དང་མཐུན་པ་དེའི་ཕྱིར་བྱང་ཆུབ་ཀྱི་ཡན་ལག་ཅེས་ཉེ་བར་འདོགས་ཀྱི་དེ་བྱང་ཆུབ་ཀྱི་ཡན་ལག་ནི་མ་ཡིན་ནོ་ཞེས་ལན་འདེབས་པར་བྱེད་ན།
[294b]
[294b.1]ཟག་པ་མེད་པ་ཉིད་ཀྱང་དེ་དང་འདྲ་སྟེ། རེག་བྱ་དང་ལུས་ཀྱི་རྣམ་པར་ཤེས་པ་དེ་དག་ནི་ཟག་པ་མེད་པ་དང་མཐུན་པའི་ཕྱིར་ཟག་པ་མེད་པ་ཞེས་ཉེ་བར་འདོགས་ཀྱི། ཟག་པ་མེད་པ་ཉིད་ནི་མ་ཡིན་པས་དེ་ལྟར་ན་འདི་དག་ཟག་པ་མེད་པ་ཉིད་ཡིན་ནོ། །གལ་ཏེ་ཟག་པ་དང་བཅས་པའི་ཆོས་ཞེས་བྱ་བ་
[294b.2]རྒྱས་པར་འབྱུང་བ་ནི་གལ་ཏེ་ཟག་པ་དང་བཅས་པའི་ཆོས་རྣམས་གང་ཞེ་ན། མིག་ཇི་སྙེད་པ་དང་། གཟུགས་རྣམས་ཇི་སྙེད་པ་དང་། མིག་གི་རྣམ་པར་ཤེས་པ་གཞན་ཇི་སྙེད་པ་དང་། ལུས་ཇི་སྙེད་པ་དང་། རེག་བྱ་རྣམས་ཇི་སྙེད་པ་དང་། ལུས་ཀྱི་རྣམ་པར་ཤེས་པ་རྣམས་ཇི་སྙེད་པའོ་ཞེས་འབྱུང་
[294b.3]བའི་མདོ་འདི་དང་འགལ་ལོ་ཞེས་དེ་སྙམ་དུ་སེམས་ན་མ་ཡིན་ཏེ། རེག་བྱ་དང་ལུས་ཀྱི་རྣམ་པར་ཤེས་པ་གཞན་ལས་དགོངས་ཏེ་གསུངས་པའི་ཕྱིར་ཤིན་ཏུ་སྦྱངས་པ་དེ་ལ་མ་གཏོགས་པའི་རེག་བྱ་རྣམས་དང་། ལུས་ཀྱི་རྣམ་པར་ཤེས་པ་དེ་ལ་མ་གཏོགས་པའི་ལུས་ཀྱི་རྣམ་པར་ཤེས་པ་རྣམས་ལས་
[294b.4]དགོངས་ཏེ་གསུངས་པའི་ཕྱིར་རོ། །གལ་ཏེ་ཟག་པ་མེད་པ་ལ་ཞེས་བྱ་བ་རྒྱས་པར་འབྱུང་བ་ནི་ཟག་པ་མེད་པ་སྟེ། ཟག་པ་མེད་པ་རྣམ་པར་གཞག་པ་ལ་ཡན་ལག་ཅུང་ཟད་ཅིག་ནི་ཟག་པ་དང་བཅས་པ་ཅུང་ཟད་ཅིག་ནི་ཟག་པ་མེད་པར་འགྱུར་བ་མ་ཡིན་ནམ་ཞེས་བྱ་བ་ནི་གལ་ཏེ་རེག་བྱ་དང་ལུས་ཀྱི་
[294b.5]རྣམ་པར་ཤེས་པ་ནི་ཟག་པ་དང་བཅས་པ་ཡིན་པའི་ཕྱིར་ལ། དེ་དག་ལས་གཞན་པ་ནི་ཟག་པ་མེད་པ་ཡིན་པའི་ཕྱིར་ཉེས་པ་དེར་འགྱུར་རོ་སྙམ་དུ་སེམས་ན། འདིར་ཅིག་ཅར་མ་ཡིན་པའི་ཕྱིར་ཉེས་པ་ཅི་ཞིག་ཡོད་ཅེས་བྱ་བ་སྨོས་ཏེ། གང་གི་ཚེ་ཟག་པ་མེད་པའི་ཡན་ལག་ཀུན་དུ་འབྱུང་བ་དེའི་ཚེ་
[294b.6]ཟག་པ་དང་བཅས་པ་ཀུན་དུ་མི་འབྱུང་ལ། གང་གི་ཚེ་ཟག་པ་དང་བཅས་པ་ཀུན་དུ་འབྱུང་བ་དེའི་ཚེ་ཟག་པ་མེད་པ་ཀུན་དུ་མི་འབྱུང་བས་དེ་ནི་ཉེས་པ་མེད་དོ། །གལ་ཏེ་བདེ་བ་དང་དགའ་བ་ཕྲད་པ་མེད་པའི་ཕྱིར་ཏེ། ལུས་ཀྱི་བདེ་བ་དང་སེམས་ཀྱི་དགའ་བ་ཕྲད་པ་མེད་ཅིང་ཅིག་ཅར་མ་ཡིན་པའི་
[294b.7]ཕྱིར་བསམ་གཏན་དང་པོ་ཡན་ལག་ལྔ་པར་མི་འགྱུར་རོ་ཞེ་ན་ཞེས་བྱ་བ་ནི་གལ་ཏེ་དེ་སྙམ་དུ་སེམས་ན། དེ་ནི་ཉེས་པ་མེད་དོ། །ཅིའི་ཕྱིར་ཞེ་ན། སྲིད་པའི་ཕྱིར་བསྟན་པས་རྟོག་པ་དང་དཔྱོད་པ་བཞིན་ནོ། །ཇི་ལྟར་བསམ་གཏན་དང་པོ་རྟོག་པ་དང་བཅས་དཔྱོད་པ་དང་བཅས་ཞེས་བྱ་བ་རྟོག་པ་དང་དཔྱོད་
[295a]
[295a.1]པ་དག་རྣམ་གྲངས་ཀྱིས་འབྱུང་བ་ལྟར་བདེ་བ་དང་དགའ་བ་དག་ཀྱང་དེ་དང་འདྲ་སྟེ། སྲིད་པའི་ཕྱིར་བསྟན་པས་དེ་ནི་ཉེས་པ་མེད་དོ། །གལ་ཏེ་བསྒྲུབ་པར་བྱ་བ་ཡིན་ནོ་ཞེ་ན་ཞེས་བྱ་བ་ནི་རྟོག་པ་དང་དཔྱོད་པ་དག་རྣམ་གྲངས་ཀྱིས་འབྱུང་ངོ་ཞེས་བྱ་བ་བསྒྲུབ་པར་བྱ་བ་ཡིན་ནོ་
[295a.2]ཞེ་ན་སྨྲས་པ། སྒྲུབ་པ་ཡིན་ནོ། །ཇི་ལྟ་ཞེ་ན། རྟོག་པ་དང་དཔྱོད་པ་དག་འགལ་བའི་ཕྱིར་ཞེས་བྱ་བ་སྨོས་ཏེ། གང་གི་ཚེ་སེམས་རྩིང་བ་དེའི་ཚེ་ཞིབ་པ་ཉིད་མེད་ལ། གང་གི་ཚེ་ཞིབ་པ་ཉིད་དེའི་ཚེ་རྩིང་བ་ཉིད་མེད་པས་འགལ་བའི་ཕྱིར་རྟོག་པ་དང་དཔྱོད་པ་དག་ཅིག་ཅར་མ་ཡིན་ནོ། །ཉེས་པ་
[295a.3]སྨོས་པའི་ཕྱིར་ཞེས་སྨོས་པ་ནི་རྩིང་བ་དང་ཞིབ་པ་ཉིད་ས་དང་རྣམ་པའི་བྱེ་བྲག་གིས་ལྟོས་པ་ཅན་ཡིན་ན་ནི་སྲིད་པའི་རྩེ་མོའི་བར་ལ་རྟོག་པ་དང་དཔྱོད་པ་དག་ཡོད་པར་འགྱུར་རོ་ཞེས་བྱ་བ་ལ་སོགས་པ་ཡིན་ནོ། །ཁ་ཅིག་ནི་ཉེས་པ་མ་སྨོས་པའི་ཕྱིར་ཞེས་འདོན་ཏེ། ཕྲད་པ་མེད་པ་ལ་ཉེས་པ་འགའ་
[295a.4]ཡང་མ་སྨོས་སོ་ཞེས་བྱ་བའི་ཐ་ཚིག་གོ། །ཡན་ལག་གཉིས་དང་གསུམ་དང་བཞི་བོར་ནས་ཞེས་བྱ་བ་ནི་ཡན་ལག་གཉིས་བོར་ནས་བསམ་གཏན་གཉིས་པ་རྣམ་པར་གཞག་སྟེ། དེ་ན་རྟོག་པ་དང་དཔྱོད་པ་དག་མེད་པའི་ཕྱིར་རོ། །ཡན་ལག་གསུམ་བོར་ནས་བསམ་གཏན་གསུམ་པ་རྣམ་པར་
[295a.5]གཞག་སྟེ། དེ་ན་དགའ་བ་ཡང་མེད་པས་སོ། །ཡན་ལག་བཞི་བོར་ནས་བསམ་གཏན་བཞི་པ་རྣམ་པར་གཞག་སྟེ། དེ་ནི་བདེ་བ་ཡང་མེད་དོ། །འདུ་ཤེས་ལ་སོགས་པ་ནི་ཡན་ལག་ཉིད་དུ་བཤད་པ་མ་ཡིན་ནོ་ཞེས་བྱ་བ་ནི་དོན་འདུ་ཤེས་ལ་སོགས་པ་ནི་བསམ་གཏན་གཞན་དག་ལ་བོར་བ་མེད་
[295a.6]པས་སོ། །ཡང་ན་ཅིའི་ཕྱིར་ལྔ་ཁོ་ན་ཡན་ལག་ཉིད་ཡིན་ཞེས་བྱ་བ་ནི་གལ་ཏེ་དོན་འདི་ཡིན་པར་མི་དགོངས་ནའོ། །གལ་ཏེ་ཕན་པའི་ཕྱིར་ལྔ་ཁོ་ན་ཡན་ལག་ཉིད་ཡིན་ནོ་ཞེ་ན། དེ་ནི་མ་ཡིན་ཏེ་རྟོག་པ་དང་དཔྱོད་པ་གཉིས་པས་དྲན་པ་དང་ཤེས་རབ་དག་ཆེས་ཕན་པའི་ཕྱིར་རོ། །ཇི་ལྟར་དྲན་པ་
[295a.7]དང་ཤེས་རབ་དག་ཕན་པར་འདོད་པ་དེ་ལྟར་རྟོན་པ་དང་དཔྱོད་པ་དག་ནི་ཆེས་ཕན་པ་མ་ཡིན་ཏེ། དྲན་པ་ཉེ་བར་གནས་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ལ་ཞུམ་པ་དང་རྒོད་པ་ལ་སོགས་པ་མེད་པའི་ཕྱིར་རོ། །དེ་ལྟ་བས་ན་འདི་ནི་དཔྱད་པར་བྱ་བ་ཡིན་ནོ་ཞེས་བྱ་བ་ནི་འདི་ནི་རྣལ་འབྱོར་
[295b]
[295b.1]སྤྱོད་པའི་ས་མཐོང་བས་དཔྱོད་པར་བྱ་བ་ཡིན་ནོ་ཞེས་སློབ་དཔོན་གྱིས་དེར་བལྟ་བར་ཁུངས་འབྱིན་པ་ཡིན་ནོ། །དེ་ལ་བསྡུས་པའི་དོན་ནི་འདི་ཡིན་པར་བལྟ་སྟེ། ཆོས་གཞན་དག་ཡོད་བཞིན་དུ་ཅིའི་དབང་དུ་བྱས་ནས་རྟོག་པ་ལ་སོགས་པ་ཁོ་ན་ཡན་ལག་ཉིད་དུ་རྣམ་པར་གཞག་ཅེ་ན་དེ་ཙམ་གྱིས་
[295b.2]གཉེན་པོ་དང་། ཕན་ཡོན་དང་། དེ་གཉི་གའི་རྟེན་གྱི་ཡན་ལག་ཡོངས་སུ་རྫོགས་པའི་ཕྱིར་རོ། །གཟུགས་མེད་པ་དག་ལ་ནི་ཡན་ལག་རྣམ་པར་གཞག་པ་མེད་དོ། །ཞི་གནས་སུ་རོ་གཅིག་པ་ཉིད་ཀྱི་ཕྱིར་རོ། །འདི་སྐད་དུ་གཉེན་པོའི་ཡན་ལག་གི་ཕྱིར་དང་། ཕན་ཡོན་གྱི་ཡན་ལག་གི་
[295b.3]ཕྱིར་དང་། དེ་གཉི་གའི་རྟེན་གྱི་ཡན་ལག་གི་ཕྱིར་ཞེས་བཤད་པ་ཡིན་ཏེ། རེ་ཞིག་བསམ་གཏན་དང་པོ་ལ་གཉེན་པོའི་ཡན་ལག་ནི་རྟོག་པ་དང་དཔྱོད་པ་ཡིན་ཏེ། དེ་དག་གིས་འདོད་པའི་གནོད་སེམས་དང་། རྣམ་པར་འཚེ་བ་སྤོང་བའི་ཕྱིར་རོ། །ཕན་ཡོན་གྱི་ཡན་ལག་ནི་དགའ་བ་དང་བདེ་བ་ཡིན་
[295b.4]ཏེ། རྟོག་པ་དང་དཔྱོད་པ་དག་གིས་མི་མཐུན་པའི་ཕྱོགས་སྤངས་ནས་དེ་ལས་དབེན་པ་ལས་སྐྱེས་པའི་དགའ་བ་དང་བདེ་བ་འཐོབ་པའི་ཕྱིར་རོ། །དེ་གཉི་གའི་རྟེན་གྱི་ཡན་ལག་ནི་སེམས་རྩེ་གཅིག་པ་ཉིད་ཡིན་ཏེ། རྟེན་གྱི་སྟོབས་ཀྱིས་རྟོག་པ་ལ་སོགས་པ་འཇུག་པའི་ཕྱིར་རོ། །དེ་བཞིན་དུ་བསམ་
[295b.5]གཏན་གཉིས་པ་ལ་གཉེན་པོའི་ཡན་ལག་ནི་ནང་རབ་ཏུ་དང་བ་ཡིན་ཏེ། དེས་རྟོག་པ་དང་དཔྱོད་པ་སྤོང་བའི་ཕྱིར་རོ། །དགའ་བ་དང་བདེ་བ་དང་སེམས་རྩེ་གཅིག་པ་ཉིད་ནི་ཡན་ལག་ལྷག་མ་དག་ཡིན་ཏེ། སྔ་མ་བཞིན་ནོ། །བསམ་གཏན་གསུམ་པ་ལ་གཉེན་པོའི་ཡན་ལག་ནི་བཏང་སྙོམས་དང་།
[295b.6]དྲན་པ་དང་། ཤེས་བཞིན་ཡིན་ཏེ་དེ་དག་གིས་དགའ་བ་སྤོང་བའི་ཕྱིར་རོ། །བདེ་བ་དང་སེམས་རྩེ་གཅིག་པ་ཉིད་ནི་གོ་རིམས་བཞིན་དུ་ཡན་ལག་ལྷག་མ་དག་ཡིན་ཏེ་སྔ་མ་བཞིན་ནོ། །བསམ་གཏན་བཞི་པ་ལ་གཉེན་པོའི་ཡན་ལག་ནི་བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་
[295b.7]དག་པ་ཡིན་ཏེ། དེ་དག་གིས་བསམ་གཏན་དག་ན་བདེ་བ་སྤོང་བའི་ཕྱིར་རོ། །ཕན་ཡོན་གྱི་ཡན་ལག་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་ཡིན་ནོ། །དེ་གཉི་གའི་རྟེན་གྱི་ཡན་ལག་ནི་སེམས་རྩེ་གཅིག་པ་ཉིད་ཡིན་ནོ། །རབ་ཏུ་དང་བ་དད་པ་ཡིན། །ཞེས་བྱ་བ་ནི་དད་
[296a]
[296a.1]པ་ཉིད་རབ་ཏུ་དང་བ་ཡིན་པས་རབ་ཏུ་དང་བ་དད་པ་ཡིན་ནོ། །རྫས་གཞན་མེད་ན་ཇི་ལྟར་སེམས་ལས་བྱུང་བ་ཉིད་དུ་འགྲུབ་ཅེས་བྱ་བ་ནི་རྟོག་པ་ལ་སོགས་པའོ། །སྐལ་ལྡན་ཁྱད་པར་ཅན་ན་རེ་སེམས་ལ་སྣ་ཚོགས་པ་ཡོད་པའི་ཕྱིར་སེམས་ཀྱི་གནས་སྐབས་ཀྱི་བྱེ་བྲག་
[296a.2]ཀྱང་སེམས་ལས་འབྱུང་བ་ཡིན་ཏེ། ཡིད་ཀྱི་བརྗོད་པ་ཚོལ་བའི་གནས་སྐབས་ནི་རྟོག་པའོ། །ཡིད་ཀྱི་བརྗོད་པ་སོ་སོར་རྟོག་པའི་གནས་སྐབས་ནི་དཔྱོད་པའོ། །སེམས་ཀྱི་གནས་སྐབས་དག་ཀུན་ནས་སློང་བར་བྱེད་པ་ནི་རྟོག་པའོ། །དེ་ལས་གཞན་པའི་གནས་སྐབས་ནི་དཔྱོད་པའོ་ཞེས་ཟེར་རོ། །
[296a.3]སེམས་ཀྱི་གནས་སྐབས་རྣམ་པར་མ་གཡེངས་པ་ནི་ཏིང་ངེ་འཛིན་ཏོ། །སེམས་ཀྱི་གནས་སྐབས་རབ་ཏུ་ཞི་བར་འབྱུང་བ་ནི་ནང་རབ་ཏུ་དང་བའོ། །བསམ་གཏན་དག་ན་ཡོད་པའི་བདེ་བ་ནི་ཡིད་བདེ་བ་ཡིན་པར་མི་རུང་བ་ཉིད་ཀྱི་ཞེས་བྱ་བ་ནི་བདེ་བའི་ཚོར་བའི་ངོ་བོ་ཉིད་དུ་འདྲ་ན་ཡིད་ཀྱི་ཡིན་ཡང་ཅིའི་
[296a.4]ཕྱིར་ཡིད་བདེ་བ་ལ་བདེ་བ་ཞེས་མི་བརྗོད་ཅེ་ན། རྒྱུ་ཡོད་དེ་དགའ་བ་འདི་ནི་ཉེ་བར་མ་ཞི་བ་ཡིན་པས་དེ་ནི་སེམས་མཉམ་པར་གཞག་པ་དེ་ཡང་གཡེངས་པ་ལྟ་བུ་དང་། ཁེངས་པ་ལྟ་བུ་དང་། དགའ་བ་དང་བཅས་པ་དང་། གད་མོ་དང་བཅས་པ་དང་། འཕྱར་བ་ལྟ་བུར་རྣམ་པར་འཇོག་སྟེ།
[296a.5]གང་གི་ཚེ་ཉེ་བར་ཞི་བར་གྱུར་པ་དེའི་ཚེ་ས་གཞན་ཐོབ་ན་དེའི་རིགས་ཅན་ཉིད་ཀྱི་ཚོར་བ་ལ་བདེ་བ་ཞེས་བྱའོ། །ཉོན་མོངས་པ་ལས་དབེེན་པ་མ་ཡིན་པའི་ཕྱིར་རོ་ཞེས་བྱ་བ་ནི་དེའི་ས་པའི་ཉོན་མོངས་པ་རྣམས་ལས་མ་གྲོལ་བའི་ཕྱིར་རོ་ཞེས་བྱ་བའི་ཐ་ཚིག་གོ། །ཉོན་མོངས་པས་རྙོགས་པའི་ཕྱིར་རོ་
[296a.6]ཞེས་བྱ་བ་ནི་ཉོན་མོངས་པ་རྣམས་ཀྱིས་རབ་ཏུ་མ་དང་བའི་ཕྱིར་རོ་ཞེས་བྱ་བའི་ཐ་ཚིག་གོ། །ཉོན་མོངས་པ་ཅན་གྱི་བདེ་བས་ཀུན་དུ་རྨོངས་པར་བྱས་པའི་ཕྱིར་རོ་ཞེས་བྱ་བ་ནི་ཉོན་མོངས་པ་ཅན་གྱི་བདེ་བས་བསླད་པའི་ཕྱིར་དྲན་པ་དང་ཤེས་བཞིན་མེད་དོ། །ཉོན་མོངས་པས་དྲི་མ་ཅན་དུ་བྱས་པའི་ཕྱིར་
[296a.7]རོ་ཞེས་བྱ་བ་ནི་དེའི་ས་པའི་ཉོན་མོངས་པ་རྣམས་ཀྱིས་དྲི་མ་ཅན་དུ་བྱས་པའི་ཕྱིར་བཏང་སྙོམས་དང་དྲན་པ་ཡོངས་སུ་རྫོགས་པ་དག་མེད་དོ། །དེ་གཉིས་ནི་དགེ་བའི་ས་མང་པོ་པ་ཡིན་པའི་ཕྱིར་རོ་ཞེས་བྱ་བ་ནི་ཤིན་ཏུ་སྦྱངས་པ་དང་བཏང་སྙོམས་དག་ནི་དགེ་བའི་ས་མང་པོ་པ་ལས་བྱུང་བ་སྟེ། དད་དང་
[296b]
[296b.1]བག་ཡོད་ཤིན་ཏུ་སྦྱངས། །བཏང་སྙོམས་ངོ་ཚ་ཤེས་ཁྲེལ་ཡོད། །རྩ་བ་གཉིས་རྣམ་མི་འཚེ་དང་། །བརྩོན་འགྲུས་རྟག་ཏུ་དགེ་ལས་འབྱུང་། །ཞེས་འབྱུང་བའི་ཕྱིར་རོ། །ཡང་ཅི་ཕྱོགས་སྔ་མ་ལྟར་ན་བསམ་གཏན་ཉོན་མོངས་པ་ཅན་དག་ལ་ཡང་དེ་དག་ཡོད་དམ་ཞེ་ན་སྨྲས་པ་མེད་དོ། །
[296b.2]ཅིའི་ཕྱིར་དེ་སྐད་དུ་མ་བཤད་ཅེ་ན། མ་བཤད་བཞིན་དུ་འགྲུབ་པའི་ཕྱིར་རོ། །གཞན་དག་ན་རེ་དགེ་བའི་ས་མང་པོ་པ་ཤིན་ཏུ་སྦྱངས་པ་དང་བཏང་སྙོམས་དག་མ་སྨོས་པའི་ཕྱིར་དེ་དག་ཡོད་པ་ཁོ་ནའོ་ཞེས་ཟེར་རོ། །དབུགས་དག་ཅེས་བྱ་བ་ནི་དབུགས་འབྱུང་བ་དང་། དབུགས་རྔུབ་པ་
[296b.3]དག་སྟེ་གཉིས་ཉིད་དུ་རབ་ཏུ་བསྟན་པའི་ཕྱིར་འདིར་གཉིས་ཀྱི་ཚིག་ཏུ་བསྟན་ཏོ། །གཞན་དག་ན་རེ་རྟོག་པ་དང་དཔྱོད་པ་དང་དགའ་བ་དང་བདེ་བ་དག་གིས་གཡོ་བར་མི་འགྱུར་བའི་ཕྱིར་ཞེས་བྱ་བ་ནི་ཇི་ལྟར་བསམ་གཏན་སྔ་མ་གསུམ་རྟོག་པ་ལ་སོགས་པས་གཡོ་བར་བྱེད་དེ། བསམ་གཏན་
[296b.4]དང་པོ་ནི་རྟོག་པ་དང་དཔྱོད་པ་དག་གིས་གཡོ་ལ། གཉིས་པ་ནི་དགའ་བས། གསུམ་པ་ནི་བདེ་བས་གཡོ་བ། དེ་ལྟར་བཞི་པ་ནི་སྐྱོན་བརྒྱད་དང་བྲལ་བའི་ཕྱིར་དེ་དག་གིས་མི་གཡོ་སྟེ། མདོ་ལས། དཔེར་ན་རླུང་མེད་པའི་མར་མེ་རླུང་གིས་མི་གཡོ་བ་དེ་དང་འདྲའོ་ཞེས་གསུངས་སོ་ཞེས་ཟེར་རོ། །
[296b.5]དང་པོར་གཏོགས་ཞེས་བྱ་བ་ནི་བསམ་གཏན་དང་པོས་བསྡུས་པ་ཡིན་ནོ། །སྤྲུལ་པའི་སེམས་བཞིན་དུ་ཞེས་བྱ་བ་ནི་ས་དེ་པའི་སྤྲུལ་པ་སྤྲུལ་པར་འདོད་པའི་སྤྲུལ་པ་པོ་གང་དག་ཡིན་པ་ས་འོག་མའི་སྤྲུལ་པའི་སེམས་མངོན་སུམ་དུ་བྱེད་པ་དེ་དང་འདྲའོ། །དམན་པའི་ཕྱིར་དགེ་བ་ཡང་མ་ཡིན་ནོ་ཞེས་
[296b.6]བྱ་བ་ནི་བསམ་གཏན་དང་པོའི་ས་པའི་དགེ་བ་དེ་ནི་བསམ་གཏན་གཉིས་པའི་ས་པ་བས་དམན་ཞིང་ཐ་ཆད་ཡིན་པས་དེའི་ཕྱིར་མངོན་སུམ་དུ་མི་བྱེད་དེ། དགོངས་པའི་ཕྱིར་དེ་དག་བསམ་གཏན་དང་པོའི་ས་པ་མངོན་སུམ་དུ་བྱེད་ཀྱི་གུས་པས་ནི་མ་ཡིན་ནོ། །དགེ་བ་དེ་ནི་རྣམ་པར་སྨིན་པ་དང་བཅས་པ་
[296b.7]ཡིན་ན་དེ་དག་ནི་དེའི་རྣམ་པར་སྨིན་པ་དོན་དུ་གཉེར་བ་མ་ཡིན་པས་དགེ་བའི་སེམས་མངོན་དུ་བྱ་བ་ལ་འབད་པ་མི་བྱེད་དོ། །འདོད་ཆགས་བྲལ། སྐྱེ་བ་ལས་ཞེས་བྱ་བ་ནི་འདོད་ཆགས་དང་བྲལ་བས་སོ། །སྐྱེ་བས་ཤེ་འམ་ཞེས་བྱ་བའི་སྒྲ་མི་མངོན་པར་བསྟན་པ་ཡིན་ཏེ། དེ་དང་མི་ལྡན་པ་
[297a]
[297a.1]ནི་ས་འོག་མ་ལས་འདོད་ཆགས་དང་བྲལ་བས་བསམ་གཏན་ནམ་གཟུགས་མེད་པ་དག་པ་པ་འཐོབ་སྟེ། འདོད་པ་ལས་འདོད་ཆགས་དང་བྲལ་བས་ནི་ངེས་པར་འབྱེད་པའི་ཆ་དང་མཐུན་པ་མ་གཏོགས་པ་དག་པ་པ་དང་པོ་རྣམ་པ་གསུམ་འཐོབ་ལ། དེ་བཞིན་དུ་ཅི་ཡང་
[297a.2]མེད་པའི་སྐྱེ་མཆེད་ལས་འདོད་ཆགས་དང་བྲལ་བས་ནི་སྲིད་པའི་རྩེ་མོ་འཐོབ་པའི་བར་དུའོ། །སྲིད་པའི་རྩེ་མོ་མ་གཏོགས་པ་ཞེས་བྱ་བ་ནི་དེ་ནི་ས་འོག་མ་ལས་འདོད་ཆགས་དང་བྲལ་བ་ཁོ་ནས་འཐོབ་བོ། །ས་འོག་མར་སྐྱེ་བ་ལས་ཞེས་བྱ་བ་ནི་གོང་ནས་ས་འོག་མར་སྐྱེ་བ་ན་དེ་འཐོབ་བོ། །སྦྱོར་བ་ལས་
[297a.3]ཀྱང་ངེས་པར་འབྱེད་པའི་ཆ་དང་མཐུན་པའི་ཞེས་བྱ་བ་ནི་དེའི་འཐོབ་པ་དེ་ནི་འདོད་ཆགས་དང་བྲལ་བ་དང་སྐྱེ་བས་བྱས་པ་མ་ཡིན་ནོ། །ཡོངས་སུ་ཉམས་པ་ལས་ཀྱང་ཉམས་པའི་ཆ་དང་མཐུན་པ་ཞེས་བྱ་བ་ནི། གནས་པའི་ཆ་དང་མཐུན་པ་ལས་ཡོངས་སུ་ཉམས་ན་ཉམས་པའི་ཆ་དང་མཐུན་པ་འཐོབ་བོ། །
[297a.4]དེ་ཉིད་ཀྱི་ཕྱིར་ཞེས་བྱ་བ་ནི་གང་གི་ཕྱིར་ཡོངས་སུ་ཉམས་པས་ཀྱང་ཉམས་པའི་ཆ་དང་མཐུན་པ་འཐོབ་པའི་ཕྱིར་རོ། །དེ་བཞིན་དུ་ཡོངས་སུ་ཉམས་པ་དང་། སྐྱེ་བས་འཐོབ་པ་དང་འདོར་བར་འགྱུར་བ་ཡང་སྦྱར་བར་བྱའོ། །ཇི་ལྟ་ཞེ་ན། དག་པ་པ་ཡོངས་སུ་ཉམས་པས་འཐོབ་ལ་ཡོངས་སུ་ཉམས་
[297a.5]པས་འདོར་བ་ཡོད་དམ་ཞེ་ན། ཡོད་དོ། །དག་པ་པ་སྐྱེ་བས་འཐོབ་ལ་སྐྱེ་བས་འདོར་བ་ཡོད་དམ་ཞེ་ན། སྨྲས་པ་ཡོད་དོ། །ཇི་ལྟ་ཞེ་ན། བསམ་གཏན་དང་པོ་ཉམས་པའི་ཆ་དང་མཐུན་པའོ་ཞེས་བྱ་བ་སྨོས་ཏེ། བསམ་གཏན་དང་པོ་ནི་ཚངས་པའི་འཇིག་རྟེན་ས་གསུམ་གྱི་ཁྱད་པར་ཅན་ཏེ། ཚངས་
[297a.6]པའི་འཇིག་རྟེན་སྐྱེ་བ་ན་ཞེས་འབྱུང་བའི་ཕྱིར་རོ། །ཚངས་པའི་འཇིག་རྟེན་ལས་འདོད་ཆགས་དང་བྲལ་བས་འདོར་རོ་ཞེས་བྱ་བ་ནི། འདི་ལྟར་བསམ་གཏན་དང་པོ་ལས་འདོད་ཆགས་དང་བྲལ་བས་ཉམས་པའི་ཆ་དང་མཐུན་པའི་བསམ་གཏན་ཉོན་མོངས་པ་དང་མཐུན་པའི་ཕྱིར། དེའི་ས་པའི་
[297a.7]ཉོན་མོངས་པ་བཞིན་དུ་འདོར་ཏེ། དེའི་ཕྱིར་ཚངས་པའི་འཇིག་རྟེན་ལས་འདོད་ཆགས་དང་བྲལ་བས་འདོར་རོ་ཞེས་བྱ་བའོ། །རེ་ཞིག་དྲི་བ་དང་པོའི་ལན་ནི་དེ་ལྟ་བུ་ཡིན་ནོ། །ཚངས་པའི་འཇིག་རྟེན་ལས་འདོད་ཆགས་དང་བྲལ་བ་ལས་ཡོངས་སུ་ཉམས་པ་ལས་འཐོབ་ཅེས་བྱ་བ་ནི་གལ་ཏེ་
[297b]
[297b.1]ཚངས་པའི་འཇིག་རྟེན་ལས་འདོད་ཆགས་དང་བྲལ་བ་ལས་ཡོངས་སུ་ཉམས་པས་ཡོངས་སུ་ཉམས་ན་ཡང་ས་དེ་པའི་ཉོན་མོངས་པ་བཞིན་དུ་ཡོངས་སུ་ཉམས་པའི་ཆ་དང་མཐུན་པ་དེ་འཐོབ་བོ། །འདོད་པ་ལས་འདོད་ཆགས་དང་བྲལ་བ་ལས་ཡོངས་སུ་ཉམས་པ་ལས་འདོར་རོ་ཞེས་བྱ་བ་ནི་
[297b.2]གང་གི་ཚེ་འདོད་པ་ལས་འདོད་ཆགས་དང་བྲལ་བ་ལས་ཡོངས་སུ་ཉམས་པ་དེའི་ཚེ་དག་པ་པ་འདོར་རོ། །གོང་ནས་ཚངས་པའི་འཇིག་རྟེན་དུ་སྐྱེ་བ་ན་འཐོབ་ཅེས་བྱ་བ་ནི་བསམ་གཏན་གཉིས་པ་ལ་སོགས་པ་ནས་ཚངས་པའི་འཇིག་རྟེན་དུ་སྐྱེ་བ་ནི་དེའི་ས་པའི་ཉོན་མོངས་པ་བཞིན་དུ་ཉམས་
[297b.3]པའི་ཆ་དང་མཐུན་པ་འཐོབ་བོ། །དེ་ནས་འདོད་པའི་ཁམས་སུ་སྐྱེ་བ་ན་འདོར་རོ་ཞེས་བྱ་བ་ནི་ཚངས་པའི་འཇིག་རྟེན་དེ་ནས་འདོད་པའི་ཁམས་སུ་སྐྱེ་བ་ན་འདོར་རོ། །དབང་པོ་འཕོ་བ་ལས་ཀྱང་སློབ་པ་དང་མི་སློབ་པ་འཐོབ་བོ་ཞེས་བྱ་བ་ནི་དད་པས་མོས་པ་མཐོང་བས་ཐོབ་པ་ཉིད་དུ་གྱུར་ན་སློབ་
[297b.4]པ་འཐོབ་ལ་དུས་ཀྱིས་རྣམ་པར་གྲོལ་བ་ཡང་མི་གཡོ་བ་རྟོགས་ན་མི་སློབ་པ་འཐོབ་བོ། །མཐར་གྱི་ས་པས་མི་འཐོབ་པའི་ཕྱིར་གདོན་མི་ཟ་བ་མ་ཡིན་ཏེ་ཞེས་བྱ་བ་ནི་གལ་ཏེ་མཐར་གྱི་ས་པ་ཞིག་མི་ལྕོགས་པ་མེད་པ་ལ་བརྟེན་ནས་ངེས་པ་ལ་འཇུག་པ་ལ་ནི་མི་འཐོབ་བོ། །རང་གི་ས་པའི་དག་པ་པ་
[297b.5]དང་ཟག་པ་མེད་པ་དག་ཅེས་བྱ་བ་ནི་ལངས་པའི་ཚེ་དང་རྒྱུན་གྱི་ཚེའོ། །བསམ་གཏན་གཉིས་པ་དང་གསུམ་པའི་ས་པའི་ཞེས་བྱ་བ་ནི་སྤེལ་མ་དང་སྤེལ་མ་མ་ཡིན་པ་ལུགས་བཞིན་སྙོམས་པར་འཇུག་པ་དང་ཐོད་རྒལ་དུ་སྙོམས་པར་འཇུག་པ་ནའོ། །རང་གི་ས་པའི་དག་པ་པ་དང་། ཟག་པ་མེད་པ་
[297b.6]ཞེས་བྱ་བ་ནི་སྔ་མ་བཞིན་ནོ། །རྣམ་ཤེས་མཐའ་ཡས་སྐྱེ་མཆེད་ཀྱི་ས་པའི་ཡང་དེ་ཁོ་ན་བཞིན་ཏེ། ལུགས་དང་མི་མཐུན་པར་སྙོམས་པར་འཇུག་པ་ནའོ། །སྲིད་པའི་རྩེ་མོའི་དག་པ་པ་ཁོ་ན་སྟེ། ཟག་པ་མེད་པ་མེད་པའི་ཕྱིར་རོ་ཞེས་བྱ་བ་ནི་ཞེན་པའི་ཕྱིར་ཟག་པ་མེད་པ་མེད་དོ་ཞེས་བཤད་དེ།
[297b.7]ལུགས་དང་མཐུན་པར་སྙོམས་པར་འཇུག་པ་ལས་ལངས་པའི་ཚེ་དེ་འབྱུང་ངོ་། །བསམ་གཏན་གསུམ་པ་དང་བཞི་པ་དང་། དང་པོའི་ས་པ་པའི་ཞེས་བྱ་བ་ནི་སྤེལ་མ་དང་། སྤེལ་མ་མ་ཡིན་པ་ལུགས་དང་མཐུན་པ་དང་ལུགས་དང་མི་མཐུན་པ་དང་ཐོད་རྒལ་དུ་སྙོམས་པར་འཇུག་པའི་དུས་དག་
[298a]
[298a.1]ནའོ། །ནམ་མཁའ་མཐའ་ཡས་སྐྱེ་མཆེད་དང་བསམ་གཏན་བཞི་པའི་ས་པ་བཞི་ཞེས་བྱ་བ་ནི་དུས་དེ་དག་ཉིད་དུའོ། །གསུམ་པོ་ཞེས་བྱ་བ་ནི་ཟག་པ་མེད་པ་མེད་པའི་ཕྱིར་རོ། །དེ་བཞིན་དུ་བསམ་གཏན་དང་གཟུགས་མེད་པ་གཞན་གྱི་མཇུག་ཐོགས་སུ་ཡང་རྫས་བཅུ་སྦྱར་
[298a.2]བར་བྱའོ་ཞེས་བྱ་བ་ནི། འདི་ལྟ་སྟེ། བསམ་གཏན་གསུམ་པའི་མཇུག་ཐོགས་སུ་བཅུ་སྟེ། རང་གི་ས་པ་དག་པ་པ་དང་ཟག་པ་མེད་པ་དང་གཉིས་དང་བསམ་གཏན་བཞི་པ་དང་ནམ་མཁའ་མཐའ་ཡས་སྐྱེ་མཆེད་ཀྱི་ས་པ་བཞི་དང་། དེ་བཞིན་དུ་བསམ་གཏན་དང་པོ་དང་གཉིས་པའི་ས་པ་བཞིའོ། །
[298a.3]བསམ་གཏན་བཞི་པའི་མཇུག་ཐོགས་སུ་བཅུ་སྟེ། རང་གི་ས་པ་དག་པ་པ་དང་ཟག་པ་མེད་པ་དང་གཉིས་དང་། ནམ་མཁའ་དང་རྣམ་ཤེས་མཐའ་ཡས་སྐྱེ་མཆེད་ཀྱི་ས་པ་བཞི་དང་། བསམ་གཏན་གཉིས་པ་དང་གསུམ་པའི་ས་པ་བཞིའོ། །ནམ་མཁའ་མཐའ་ཡས་སྐྱེ་མཆེད་ཀྱི་མཇུག་ཐོགས་
[298a.4]སུ་བཅུ་སྟེ། རང་གི་ས་པ་གཉིས་དང་རྣམ་ཤེས་དང་ཅི་ཡང་མེད་པའི་སྐྱེ་མཆེད་ཀྱི་ས་པ་དང་། བསམ་གཏན་གསུམ་པ་དང་བཞི་པའི་ས་པ་བཞི་འབྱུང་བས་དེ་ལྟར་ན་བཅུར་འགྱུར་རོ། །རྗེས་སུ་ཤེས་པའི་མཇུག་ཐོགས་སུ་ཞེས་བྱ་བ་རྒྱས་པར་འབྱུང་བ་ནི་བསམ་གཏན་རྣམས་ནི་ས་གོང་མ་དང་འོག་
[298a.5]མ་ལ་དམིགས་པའི་ཕྱིར་ཐལ་བར་འགྱུར་བ་ཡོད་པས་འདི་བྱེ་བྲག་ཏུ་བཤད་དོ། །དེའི་རྟེན་དང་དམིགས་པ་འོག་མ་ཡིན་པའི་ཕྱིར་རོ་ཞེས་བྱ་བ་ནི་འདི་ལྟར་ཆོས་ཤེས་པ་དེའི་རྟེན་ནི་འོག་མ་ཡིན་ཏེ། འདོད་པའི་ཁམས་ཀྱི་རྟེན་ཅན་ཡིན་ལ་དམིགས་པ་ཡང་འོག་མ་ཡིན་ཏེ། འདོད་པའི་སྡུག་
[298a.6]བསྔལ་ལ་སོགས་པ་ལ་དམིགས་སོ། །དེའི་རྟེན་དང་དམིགས་པ་འོག་མ་ཡིན་པའི་ཕྱིར་ཆོས་ཤེས་པའི་མཇུག་ཐོགས་སུ་གཟུགས་མེད་པ་དག་ལ་སྙོམས་པར་མི་འཇུག་གོ། །ལྷག་མ་ནི་ཟག་པ་མེད་པ་ལས་ཇི་ལྟ་བ་བཞིན་ནོ་ཞེས་བྱ་བ་ནི་ལྷག་མ་ཇི་ལྟར་ཟག་པ་མེད་པ་ལས་རང་གི་ས་པའི་དག་པ་
[298a.7]པ་དང་ཟག་པ་མེད་པ་དག་དང་ས་གོང་མ་དང་ས་འོག་མ་པ་གསུམ་པའི་བར་འབྱུང་བ་བཞིན་ནོ། །བསམས་ནས་ཞེས་བྱ་བ་རྒྱས་པར་འབྱུང་བ་ནི། གལ་ཏེ་འགའ་ཞིག་གིས་འདི་སྙམ་དུ་བདག་གིས་ནམ་ཕྱེད་དམ། ཟླ་བ་ཤར་བའམ་ཟླ་བ་ནུབ་པའི་ཚེ་སད་པར་བྱའོ་སྙམ་དུ་བློ་བསྐྱེད་ནས་ཉལ་ན་རྒྱུན་
[298b]
[298b.1]སྔོན་གྱི་བསམ་པའི་རྗེས་སུ་འཇུག་པའི་ཕྱིར་དུས་དེ་ཁོ་ནར་སད་པར་འགྱུར་རོ། །ཇི་ལྟར་དེ་ལྟར་བསམས་ནས་ཉལ་བ་དེ་འདོད་པའི་དུས་སུ་སད་པར་འགྱུར་བ་ལྟར་འདི་ཡང་དེ་དང་འདྲ་འོ། །རྣམ་པ་ཐམས་ཅད་དུ་མི་སྐྱེའོ་ཞེས་བྱ་བ་ནི་རང་གི་ས་པ་ཡང་མི་སྐྱེ་ལས་འོག་མ་པ་ཡང་མི་སྐྱེའོ་ཞེས་བྱ་བའི་ཐ་ཚིག་
[298b.2]གོ། །སྙོམས་པར་འཇུག་པའི་དུས་ཀྱི་ཕྱིར་དེ་སྐད་དུ་བཤད་ཀྱི་ཞེས་བྱ་བ་ནི་དག་པ་པ་དང་ཉོན་མོངས་པ་ཅན་གྱི་མཇུག་ཐོགས་སུ་རང་གི་ས་པའི་ཉོན་མོངས་པ་ཅན་ཁོ་ན་སྐྱེའི་གཞན་གྱི་ས་པ་ནི་མ་ཡིན་ནོ་ཞེས་བྱ་བ་ཡིན་ནོ། །ཇི་སྐད་དུ་ཞེ་ན། དག་པ་ལས། དེ་བཞིན་རང་གི་ས་པའི་ཉོན་མོངས་
[298b.3]ཀྱང་། །ཉོན་མོངས་ཅན་ལས་རང་དག་དང་། །ཉོན་མོངས་ཞེས་དེ་སྐད་དུའོ། །ཤི་འཕོ་བའི་ཚེ་ནི་འཆི་བའི་སྲིད་པ་ནའོ། །སྐྱེ་བས་ཐོབ་པའི་དག་པ་པའི་ཞེས་བྱ་བ་རྒྱས་པར་འབྱུང་བ་ནི་སྐྱེ་བའི་བསམ་གཏན་དག་ན་སྐྱེ་བས་ཐོབ་པའི་དགེ་བ་མཉམ་པར་གཞག་པ་མ་ཡིན་པ་གང་ཡིན་པ་དེ་
[298b.4]ཡང་བསམ་གཏན་དག་པ་པ་ཞེས་བྱ་བས་དེ་འདིར་ཤི་འཕོ་བའི་ཚེ་ཞེས་བྱ་བ་འདི་རྒྱས་པར་སྨོས་སོ། །ཅིའི་ཕྱིར་ཞེ་ན། འཆི་བའི་སྲིད་པ་ནི་མཉམ་པར་གཞག་པ་མ་ཡིན་པའི་ཕྱིར་ཏེ། དེའི་ཚེ་སྙོམས་པར་འཇུག་པའི་བསམ་གཏན་དག་པ་པ་མེད་པས་སོ། །དེའི་ཕྱིར་ས་ཐམས་ཅད་པའི་ཉོན་
[298b.5]མོངས་པ་སྐྱེའོ་ཞེས་བྱ་བ་སྨོས་ཏེ། ཉིང་མཚམས་སྦྱོར་བའི་སེམས་ཉོན་མོངས་པ་ཅན་མཉམ་པར་གཞག་པ་མ་ཡིན་པ་རང་གི་ས་པ་དང་ས་གོང་མ་པ་དང་འོག་མ་པ་སྐྱེའོ་ཞེས་བྱ་བའི་ཐ་ཚིག་གོ། །ས་འོག་མ་པ་ནི་མ་ཡིན་ནོ་ཞེས་བྱ་བ་ནི་ཉོན་མོངས་པ་ཅན་ཡོད་ན་དེར་སྐྱེ་བ་མི་སྲིད་པའི་ཕྱིར་རོ། །
[298b.6]ཁྱད་པར་གྱི་ཆ་དང་མཐུན་པ་མ་གཏོགས་སོ་ཞེས་བྱ་བ་ནི་གོང་ན་མེད་པའི་ཕྱིར་རོ། །ཟག་པ་མེད་པ་ནི་དེ་ལས་སྐྱེའོ་ཞེས་བྱ་བ་ནི་ངེས་པར་འབྱེད་པའི་ཆ་དང་མཐུན་པ་ལས་སོ། །ཉམས་པ་དང་གནས་པའི་ཆ་དང་མཐུན་པ་དག་གོ་ཞེས་བྱ་བ་ནི་ཉམས་པའི་ཆ་དང་མཐུན་པ་ནི་རྒྱུན་གྱི་དུས་སུའོ། །
[298b.7]གནས་པའི་ཆ་དང་མཐུན་པ་ནི་ཁྱད་པར་དུ་འགྲོ་བའི་དུས་སུའོ། །ཉམས་པའི་ཆ་དང་མཐུན་པ་མ་གཏོགས་སོ་ཞེས་བྱ་བ་ནི་ཁྱད་པར་གྱི་ཆ་དང་མཐུན་པ་ལས་རྣམ་པར་ཉམས་པ་གནས་པའི་ཆ་དང་མཐུན་པ་ཡོངས་སུ་མ་བཏང་ན་དེ་ཉིད་སྐྱེ་བར་རུང་བའི་ཕྱིར་རོ། །དེ་གཅིག་པུ་སྐྱེའོ་ཞེས་བྱ་བ་ནི་
[299a]
[299a.1]ངེས་པར་འབྱེད་པའི་ཆ་དང་མཐུན་པ་དེ་ཉིད་རྒྱུན་གྱི་ཚུལ་གྱིས་སོ། །འབྲེལ་པ་དང་ཞེས་བྱ་བ་ནི་གོ་རིམས་བཞིན་དུའོ་ཞེས་བྱ་བ་ནི་ལུགས་དང་མཐུན་པའི་གོ་རིམས་བཞིན་དང་ལུགས་དང་མི་མཐུན་པའི་གོ་རིམས་བཞིན་དུའོ། །བྱེད་དེ་ཞེས་བྱ་བ་ནི་བྱེད་པའི་མ་འཇོག་པ་ཞེས་
[299a.2]བྱ་བའི་ཐ་ཚིག་གོ། །ཅིའི་ཕྱིར་ཞེ་ན། དམན་པའི་ཕྱིར། སྲིད་རྩེར་འཕགས་པ་ཅི་ཡང་མེད། །ཅེས་བྱ་བ་ལ། འཕགས་པ་ནི་ཟག་པ་མེད་པ་སྟེ། སྲིད་པའི་རྩེ་མོར་སྐྱེས་པ་ནི་ཟག་པ་མེད་པའི་ཅི་ཡང་མེད་པའི་སྐྱེ་མཆེད་མངོན་སུམ་དུ་བྱས་ཤིང་མངོན་སུམ་དུ་གྱུར་པ་ལས་ཟག་པ་སྤོང་བར་འགྱུར་
[299a.3]རོ། །ནི་ཞེས་བྱ་བའི་སྒྲ་ནི་དམིགས་ཀྱིས་བསྩལ་བའི་དོན་སྟོན་པར་བྱེད་དོ། །རང་གི་མེད་པའི་ཕྱིར་ཞེས་བྱ་བ་ནི་སྲིད་པའི་རྩེ་མོ་པའི་ཟག་པ་མེད་པའི་ལམ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་ཡང་ཉེ་བའི་ཕྱིར་རོ་ཞེས་བྱ་བ་ནི་ཅི་ཡང་མེད་པའི་སྐྱེ་མཆེད་ཟག་པ་མེད་པ་དེ་ཉེ་བའི་ཕྱིར་
[299a.4]ཏེ་ཐག་ཉེ་བའི་ཕྱིར་རོ། །ས་རྣམས་ནི་སྲེད་པས་ཡོངས་སུ་བཅད་པའི་ཕྱིར་ཞེས་བྱ་བ་ནི་ས་གང་གི་སྲེད་པ་གང་ཡིན་པ་དེ་ནི་ས་དེ་ཁོ་ན་ལ་རྒྱས་པར་འགྱུར་བའི་ཕྱིར་དེས་ས་དེ་ཡོངས་སུ་བཅད་པ་ཡིན་ནོ། །དེ་ལྟ་མ་ཡིན་ན་དེ་གོང་མ་ཉིད་དུ་ཡང་འགྲུབ་པར་མི་འགྱུར་བ་ཁོ་ན་སྟེ། ས་གཅིག་པའི་
[299a.5]གནས་གཞན་བཞིན་ནོ། །དེ་ཉིད་ཀྱི་ཕྱིར་གནས་གཞན་གསུམ་གསུམ་པ་རྣམས་དང་། བརྒྱད་པོ་དག་ལྟག་འོག་ཏུ་འདུག་ཀྱང་ས་གཅིག་པ་ཉིད་དུ་འགྲུབ་སྟེ། སྲེད་པའི་འཆོལ་བར་འགྲོ་བ་དང་ལྡན་པའི་ཕྱིར་རོ། །དགེ་བ་ཉིད་དུ་ཐལ་བར་འགྱུར་བའི་ཕྱིར་ཟག་པ་མེད་པ་ལ་ཡང་མ་
[299a.6]ཡིན་ནོ་ཞེས་བྱ་བ་ནི་དེ་དོན་དུ་གཉེར་བ་ནི་དགེ་བའི་ཆོས་ལ་འདུན་པ་ཡིན་པས་སོ། །གཟུགས་མེད་དངོས་གཞི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་མིན། །ཞེས་བྱ་བ་ལ་གཟུགས་མེད་ཅེས་སྨོས་པ་ནི་བསམ་གཏན་བསྩལ་བའི་ཕྱིར་ཏེ། བསམ་གཏན་དག་ནི་ཀུན་དུ་ལྟ་བ་
[299a.7]ཡིན་པའི་ཕྱིར་དངོས་གཞི་ཡང་ཟག་པ་དང་བཅས་པའི་དངོས་པོ་འོག་མ་ལ་དམིགས་པར་འགྱུར་རོ། །དངོས་གཞི་ཞེས་སྨོས་པ་ནི་ཉེར་བསྡོགས་བསྩལ་བའི་ཕྱིར་ཏེ། གཟུགས་མེད་པའི་ཉེར་བསྡོགས་དག་ནི་ས་འོག་མ་པ་ཟག་པ་དང་བཅས་པ་ལ་དམིགས་སོ། །དགེ་བ་ཞེས་སྨོས་པ་ནི་
[299b]
[299b.1]རོ་མྱང་བ་དང་མཚུངས་པར་ལྡན་པ་བསྩལ་བའི་ཕྱིར་དང་། གཉི་ག་དགེ་བར་བསྡུ་བའི་ཕྱིར་རོ། །གལ་ཏེ་གཟུགས་མེད་པ་ཞེས་བྱ་བ་དེ་ཁོ་ན་ཞིག་བརྗོད་ན་ནི་གཟུགས་མེད་པའི་དངོས་གཞི་རོ་མྱང་བ་དང་མཚུངས་པར་ལྡན་པ་དག་ཀྱང་སྤྱོད་ཡུལ་ཟག་པ་མེད་པ་འོག་མ་ཅན་ཡིན་ནོ་ཞེས་བྱ་བ་
[299b.2]སྲིད་པར་འགྱུར་བས་འདི་སྐད་དུ་གཟུགས་མེད་པ་ཟག་པ་དང་བཅས་པ་དག་ཅེས་འཛིན་པར་འགྱུར་རོ། །ཟག་བཅས་ཞེས་སྨོས་པ་ནི་ཟག་པ་མེད་པ་བཟློག་པའི་ཕྱིར་ཏེ། ཆོས་འོག་མ་ཟག་པ་མེད་པ་དག་ནི་གཟུགས་མེད་པའི་དངོས་གཞི་དགེ་བ་རྣམས་ཀྱི་དམིགས་པར་འགྱུར་རོ། །འོག་
[299b.3]མ་ཞེས་སྨོས་པ་ནི་གོང་མ་ལས་ཁྱད་པར་དུ་བྱ་བའི་ཕྱིར་ཏེ། ཟག་པ་དང་བཅས་པས་གོང་མ་པ་ནི་དམིགས་པར་སྲིད་པའི་ཕྱིར་རོ། །དམིགས་པ་ཟག་པ་མེད་པ་ནི་ཞེས་བྱ་བ་སྨོས་ནས། རྗེས་སུ་ཤེས་པའི་ཕྱོགས་དང་མཐུན་པ་ཡིན་ཞེས་བྱ་བ་སྟོན་ཏེ། རྗེས་སུ་ཤེས་པའི་ཕྱོགས་དང་མཐུན་པ་
[299b.4]ཞེས་བྱ་བ་ལ། ཕྱོགས་དང་མཐུན་པ་ཞེས་སྨོས་པས་ནི་སྡུག་བསྔལ་ལ་སོགས་པ་ལ་རྗེས་སུ་ཤེས་པའི་བཟོད་པ་དག་དང་དེ་དག་དང་། ལྷན་ཅིག་འབྱུང་བ་རྣམས་གཟུང་ངོ་། །ཐམས་ཅད་ཅེས་བྱ་བ་ནི་དབང་པོ་དང་རིགས་ལ་སོགས་པའི་བྱེ་བྲག་གིས་ཐ་དད་པས་དགུ་པ་རིལ་གཟུང་ངོ་། །
[299b.5]ཆོས་ཤེས་པའི་ཕྱོགས་དང་མཐུན་པ་ཡང་མ་ཡིན་ཏེ། འདོད་པའི་སྡུག་བསྔལ་ལ་སོགས་པ་ལ་དམིགས་པ་ཉིད་ཀྱིས་ཐག་རིང་བའི་ཕྱིར་རོ། །ས་འོག་མ་པའི་འགོག་པ་ཡང་མ་ཡིན་ནོ་ཞེས་བྱ་བ་ནི་འདི་ནི་གོང་དུ་ས་འོག་མ་པ་ལ་འཛིན་པར་ཐལ་བར་འགྱུར་རོ་ཞེས་རྣམ་པར་བཤད་ཟིན་ཏོ། །
[299b.6]ཟག་པ་མེད་པས་ཉོན་མོངས་པ་རྣམས་སྤོང་ངོ་ཞེས་བྱ་བ་ནི་བསམ་གཏན་དང་གཟུགས་མེད་པ་རྣམས་ལ་ཟག་པ་མེད་པ་གང་ཞིག་སྲེད་པ་དེས་ཉོན་མོངས་པ་རྣམས་ཅི་རིགས་པར་སྤོང་ངོ་། །ཟག་པ་མེད་པ་གང་གིས་ཤེ་ན། དངོས་གཞིས་ཏེ། ཉེར་བསྡོགས་ནི་ཉེར་བསྡོགས་པས་ཀྱང་ཞེས་
[299b.7]དམིགས་ཀྱིས་བསྩལ་བའི་ངོ་བོར་འཆད་པར་འགྱུར་རོ། །དག་པ་པས་ཀྱང་མི་སྤོང་ན། །ཞེས་བྱ་བ་ནི་ཉོན་མོངས་པ་རྣམས་མི་སྤོང་ན་ཞེས་བྱ་བའི་ཐ་ཚིག་དབང་དུ་བྱས་པ་ཡིན་ནོ། །ཉོན་མོངས་ཅན་གྱིས་ལྟ་སྨོས་ཀྱང་ཅི་དགོས་ཞེས་བྱ་བ་ནི་ཉོན་མོངས་པ་ཅན་གྱིས་ཉོན་མོངས་པ་སྤོང་པ་མི་སྲིད་
[300a]
[300a.1]པ་ཁོ་ནའོ་སྙམ་དུ་བསམས་པ་ཡིན་ནོ། །ཅིའི་ཕྱིར་དག་པ་པས་ཉོན་མོངས་པ་དག་མི་སྤོང་ཞེ་ན། འདོད་ཆགས་དང་བྲལ་བའི་ཕྱིར་འོག་མ་པ་ལ་ཡང་མ་ཡིན་ཞེས་བྱ་བ་རྒྱས་པར་སྨོས་ཏེ། ས་འོག་མ་ལས་འདོད་ཆགས་དང་བྲལ་བའི་ཕྱིར་དག་པ་པས་ཀྱང་ས་འོག་མ་
[300a.2]པའི་ཉོན་མོངས་པ་རྣམས་མི་སྤོང་ན་ཉོན་མོངས་པ་ཅན་གྱིས་ལྟ་སྨོས་ཀྱང་ཅི་དགོས། དེ་ཉིད་དེའི་གཉེན་པོ་མ་ཡིན་པ་ཉིད་ཀྱི་ཕྱིར་རང་གི་ས་ན་ཡོད་པ་ཡང་མ་ཡིན་ནོ་ཞེས་བྱ་བ་ནི་བསམ་གཏན་དང་པོ་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་དེ་ཉིད་དེའི་གཉེན་པོ་མ་ཡིན་པའི་ཕྱིར་རོ། །
[300a.3]དེའི་གཉེན་པོ་མ་ཡིན་པ་ནི་དེའི་གཉེན་པོ་མ་ཡིན་པའོ། །དེའི་ངོ་བོ་ནི་ཉིད་དེ། དེའི་གཉེན་པོ་མ་ཡིན་པ་ཉིད་ཀྱི་ཕྱིར་རང་གི་ས་ན་ཡོད་པའི་ཉོན་མོངས་པ་རྣམས་སྤོང་བར་མི་འགྱུར་ཏེ། སྲིད་པས་སྲིད་པ་ལས་ངེས་པར་འབྱུང་བ་ནི་མ་ཡིན་ནོ། །ཆེས་ཁྱད་པར་དུ་འཕགས་པའི་ཕྱིར་གོང་མ་ཡང་
[300a.4]མ་ཡིན་ནོ་ཞེས་བྱ་བ་ནི་ས་གོང་མ་པའི་ཉོན་མོངས་པ་རྣམས་ནི་ས་འོག་མ་པའི་དག་པ་པས་མི་སྤོང་སྟེ། ཉོན་མོངས་པ་རྣམས་ཆེས་ཁྱད་པར་དུ་འཕགས་པའི་ཕྱིར་རོ། །དམན་པ་ལ་བརྟེན་ནས་ཁྱད་པར་ཅན་རྣམས་སྤོང་བར་ནི་རུང་བ་མ་ཡིན་ཏེ། དེའི་ཕྱིར་དག་པ་པས་ཀྱང་ཉོན་མོངས་པ་རྣམས་
[300a.5]མི་སྤོང་ན་ཉོན་མོངས་པ་ཅན་གྱིས་ལྟ་སྨོས་ཀྱང་ཅི་དགོས་ཞེས་བྱ་བ་འདི་གྲུབ་པ་ཡིན་ནོ། །དག་པ་པས་ཀྱང་ཞེས་བྱ་བ་ལ། ཀྱང་ཞེས་བྱ་བའི་སྒྲས་ནི་ཟག་པ་མེད་པས་ཀྱང་ཞེས་བྱ་བ་ཡིན་ཏེ། སྲིད་པའི་སྒོ་ནས་དེ་སྐད་དུ་བཤད་པ་ཡིན་ནོ། །དེ་ཉིད་ཀྱི་ཕྱིར་ས་འོག་མ་པའི་གཉེན་པོ་ཡིན་པའི་
[300a.6]ཕྱིར་རོ་ཞེས་བྱ་བ་སྨོས་ཏེ། འདོད་པ་ན་སྤྱོད་པའི་ཉོན་མོངས་པ་རྣམས་ནི་བསམ་གཏན་དང་པོའི་ཉེར་བསྡོགས་ཀྱིས་སྤོང་ལ། བསམ་གཏན་དང་པོའི་ས་པ་རྣམས་ནི་བསམ་གཏན་གཉིས་པའི་ཉེར་བསྡོགས་ཀྱིས་སྤོང་བ་ནས་དེ་བཞིན་དུ་ཅི་ཡང་མེད་པའི་སྐྱེ་མཆེད་པ་རྣམས་ནི་འདུ་ཤེས་མེད་
[300a.7]འདུ་ཤེས་མེད་མིན་སྐྱེ་མཆེད་ཀྱི་ཉེར་བསྡོགས་ཀྱིས་སྤོང་བའི་བར་དུའོ། །གང་གིས་དེ་ལ་འཇུག་པ་ཞེས་བྱ་བ་ནི་ཉེར་བསྡོགས་གང་གིས་བསམ་གཏན་དང་གཟུགས་མེད་པའི་དངོས་གཞི་དེ་དག་ལ་འཇུག་པའོ། །ཅི་དེ་དག་ཀྱང་རྣམ་པ་གསུམ་ཡིན་ལ་ཞེས་བྱ་བ་ནི་རོ་མྱོང་བ་དང་མཚུངས་
[300b]
[300b.1]པར་ལྡན་པ་ལ་སོགས་པའི་བྱེ་བྲག་གིས་སོ། །དེ་དག་ལ་ཚོར་བ་ཡང་དེ་དང་འདྲ་བར་ཡོད་དམ་ཞེས་བྱ་བ་ནི་ཅི་བསམ་གཏན་དང་པོ་དང་གཉིས་པ་ན་ནི་དགའ་བ་ཡོད་ལ། གསུམ་པ་ལ་ནི་བདེ་བ། བཞི་པ་ལ་ནི་བཏང་སྙོམས་ཞེས་བཤད་པ་ལྟར་ཉེར་བསྡོགས་དག་ལ་ཡང་དེ་དང་འདྲ་འམ་
[300b.2]ཞེས་བྱ་བ་ཡིན་ནོ། །བཏང་སྙོམས་ཀྱི་དབང་པོ་དང་མཚུངས་པར་ལྡན་པ་དག་ཀྱང་ཡིན་ཏེ་འབད་དེ་དྲང་བར་བྱ་བ་ཡིན་པའི་ཕྱིར་ཞེས་བྱ་བ་ནི་མངོན་པར་འདུ་བྱ་བ་མེད་པར་འབྱུང་བའི་ལམ་ནི་དགའ་བ་དང་བདེ་བ་དག་དང་མཚུངས་པར་ལྡན་པ་ཡིན་ན། ཉེར་བསྡོགས་དེ་དག་ནི་འབད་དེ་དྲང་
[300b.3]དགོས་པས་མངོན་པར་འདུ་བྱ་བ་དང་བཅས་པར་འབྱུང་བ་ཡིན་ཏེ། དེའི་ཕྱིར་བཏང་སྙོམས་ཀྱི་དབང་པོ་དང་མཚུངས་པར་ལྡན་པ་ཡིན་ནོ། །ཡང་ས་འོག་མ་ལས་ཡིད་བྱུང་བ་དང་མ་བྲལ་བའི་ཕྱིར་དགའ་བ་དང་བདེ་བ་དག་དང་མི་ལྡན་ཏེ། དེའི་ཕྱིར་ཡང་བཏང་སྙོམས་ཀྱི་དབང་པོ་དང་མཚུངས་
[300b.4]པར་ལྡན་ནོ། །འདོད་ཆགས་དང་བྲལ་བའི་ལམ་ཡིན་པའི་ཕྱིར་རོ་མྱང་བ་དང་མཚུངས་པར་ལྡན་པ་མ་ཡིན་ནོ། །གལ་ཏེ་རོ་མྱང་བ་དང་མཚུངས་པར་ལྡན་པར་གྱུར་ན། འདོད་ཆགས་དང་བྲལ་བའི་ལམ་ཡིན་པར་མི་འགྱུར་ཏེ། སྲེད་པ་དང་མཚུངས་པར་ལྡན་པའི་ལམ་གྱིས་ནི་ཉོན་
[300b.5]མོངས་པ་སྤོང་བར་མི་འགྱུར་རོ། །ཡང་ན་འདི་ལྟར་སྦྱར་ཏེ། འབད་དེ་དྲང་བར་བྱ་བ་ཡིན་པའི་ཕྱིར་བཏང་སྙོམས་ཀྱི་དབང་པོ་དང་མཚུངས་པར་ལྡན་པ་དག་ཀྱང་ཡིན་ལ། ས་འོག་མ་ལས་ཡིད་བྱུང་བ་དང་མ་བྲལ་བའི་ཕྱིར་དང་། འདོད་ཆགས་དང་བྲལ་བའི་ལམ་ཡིན་པའི་ཕྱིར་ཞེས་བྱ་བར་རྒྱུ་
[300b.6]གཉིས་ཀྱིས་རོ་མྱང་བ་དང་མཚུངས་པར་ལྡན་པ་མ་ཡིན་ནོ་ཞེས་བྱ་བ་ཡིན་ནོ། །ལྷག་མ་ནི་སྔ་མ་བཞིན་དུ་བརྗོད་དོ། །ཉེར་བསྡོགས་ཀྱི་སེམས་ཀྱིས་ཉིང་མཚམས་སྦྱོར་བ་ཉོན་མོངས་པ་ཅན་ཡིན་མོད་ཀྱི་ཞེས་བྱ་བ་ནི་བསམ་གཏན་དང་གཟུགས་མེད་པ་བརྒྱད་ཅར་ན་ཡང་གང་གི་ཉེར་བསྡོགས་
[300b.7]གང་ཡིན་པ་དེའི་ཉེར་བསྡོགས་ཀྱི་སེམས་ཉོན་མོངས་པ་ཅན་མཉམ་པར་གཞག་པ་མ་ཡིན་པ་དེས་ཉིང་མཚམས་སྦྱོར་རོ་ཞེས་བྱ་བ་འདི་ནི་གྲུབ་པའི་མཐའ་ཡིན་ནོ། །དེའི་ཕྱིར་འདི་སྐད་དུ་ཉེར་བསྡོགས་ཀྱི་སེམས་ཀྱིས་ཉིང་མཚམས་སྦྱོར་བ་ཉོན་མོངས་པ་ཅན་ཡིན་མོད་ཀྱི་ཞེས་བྱ་བ་
[301a]
[301a.1]རྒྱས་པར་སྨོས་སོ། མི་ལྕོགས་པ་མེད་པ་རོ་མྱང་བ་དང་མཚུངས་པར་ཡང་འདོད་དོ་ཞེས་བྱ་བ་ནི་མི་ལྕོགས་པ་མེད་པ་ནི་བསལ་བའི་ཕྱིར་ཇི་ལྟར་དེ་ཟག་པ་མེད་པ་ཡང་སྲིད་པ་དེ་བཞིན་དུ་རོ་མྱང་བ་དང་མཚུངས་པར་ལྡན་པ་ཡང་ཡིན་ནོ་སྙམ་དུ་བསམས་པའོ། །སློབ་
[301a.2]དཔོན་འདུས་བཟངས་ན་རེ་དངོས་གཞི་ལ་སྙོགས་པའི་ཕྱིར་རོ་མྱང་བའི་སྙོམས་པར་འཇུག་པ་ཡོད་པའི་ཕྱིར་རོ་ཞེས་ཟེར་རོ། །བསམ་གཏན་གྱི་ཁྱད་པར་ཡིན་པའི་ཕྱིར་རོ་ཞེས་བྱ་བ་ནི་བསམ་གཏན་དང་པོའི་དངོས་གཞི་དེ་ཉིད་རྟོག་པ་དང་བྲལ་བས་ཁྱད་པར་དུ་འཕགས་པར་གྱུར་པ་ལ་བསམ་
[301a.3]གཏན་ཁྱད་པར་ཅན་ཞེས་བྱ་བའི་ཐ་ཚིག་གོ། །ཁྱད་པར་མེད་པའི་ཕྱིར་ཞེས་བྱ་བ་ནི་ཇི་ལྟར་བསམ་གཏན་དང་པོ་ལ་ཁྱད་པར་ཡོད་དེ། ལ་ལར་ནི་རྟོག་པ་དང་དཔྱོད་པ་དག །ལ་ལར་ནི་དཔྱོད་པ་ཁོ་ན་ཡིན་པ་ལྟར་གཉིས་པ་ལ་སོགས་པ་ལ་ནི་དེ་ལྟ་མ་ཡིན་པས་དེའི་ཕྱིར་བསམ་གཏན་
[301a.4]གཉིས་པ་ལ་སོགས་པ་ལ་བསམ་གཏན་ཁྱད་པར་ཅན་རྣམ་པར་མི་གཞག་གོ། །དེ་གཉིས་ཀྱི་ཕྱིར་ལམ་དཀའ་བ་ཡིན་ནོ་ཞེས་བྱ་བ་ནི་མངོན་པར་འདུ་བྱ་བ་དང་བཅས་པས་དྲང་བ་ཡིན་པ་དེ་ཉིད་ཀྱི་ཕྱིར་རོ། །རྟོག་པ་ཙམ་ཞིག་བཀག་པའི་ཕྱིར་ཞེས་བྱ་བ་ནི། རྟོག་མེད་བསམ་གཏན་ཁྱད་
[301a.5]པར་ཅན། །ཞེས་སྨོས་པའི་ཕྱིར་རོ། །དེ་ལ་དམིགས་པའི་ཏིང་ངེ་འཛིན་མཚན་མ་མེད་པའི་ཏིང་ངེ་འཛིན་ཡིན་ཏེ་ཞེས་བྱ་བ་ནི་མཚན་མ་མེད་པ་ལས་བྱུང་བས་ན་མཚན་མ་མེད་པའོ། །རྣམ་པ་བཅུ་ཡིན་ནོ་ཞེས་བྱ་བ་ནི་མི་རྟག་པ་དང་སྡུག་བསྔལ་གྱི་རྣམ་པ་སྟེ་གཉིས་དང་ཀུན་འབྱུང་གི་རྣམ་པ་བཞི་
[301a.6]དང་། ལམ་གྱི་རྣམ་པ་བཞི་སྟེ། དེ་དག་ནི་རྣམ་པ་བཅུ་ཡིན་ནོ། །མི་རྟག་པ་དང་སྡུག་བསྔལ་བ་དང་དེའི་རྒྱུ་དག་གིས་ཡིད་འབྱུང་བའི་ཕྱིར་ཞེས་བྱ་བ་ནི་མི་རྟག་པ་དང་སྡུག་བསྔལ་བ་དང་དེའི་རྒྱུ་སྟེ་སྡུག་བསྔལ་དེའི་རྒྱུ་ཀུན་འབྱུང་བས་ཡིད་འབྱུང་བའི་ཕྱིར་རོ། །ཅི་ཞེ་ན་སྨོན་པ་མེད་པ་ཡིན་ཏེ། འཁོར་
[301a.7]བ་མ་བྱས་པ་ཡིན་ཞེས་བྱ་བའི་ཐ་ཚིག་གོ། །ལམ་ཡང་གདོན་མི་ཟ་བར་གཟིངས་ལྟ་བུར་དོར་བར་བྱ་བ་ཡིན་པ་ཉིད་ཀྱི་ཕྱིར་དེ་གཟིངས་ཞེས་བྱ་བ་ནི་གཟིངས་སོ། །འདི་ལ་དེ་དང་འདྲ་བ་ཡིན་པས་ན་ལམ་ནི་གཟིངས་ལྟ་བུའོ། །དེའི་ངོ་བོ་ནི་ཉིད་དེ། ལམ་ནི་གཟིངས་ལྟ་བུའི་ཕྱིར་གདོན་མི་ཟ་བར་དོར་བར་
[301b]
[301b.1]བྱ་བ་ཉིད་ཡིན་ནོ། །དེ་ལྟ་བས་ན་སྨོན་པ་མེད་པ་ཡིན་ནོ་ཞེས་བྱ་བའི་དབང་དུ་བྱས་པ་སྟེ། །དཔེར་ན་གཟིངས་ལ་བརྟེན་ནས་ཆུ་བོ་རྒལ་བ་ནི་དེ་གདོན་མི་ཟ་བར་དོར་བར་བྱ་བ་ཡིན་པའི་ཕྱིར་གཟིངས་ལ་འཆེལ་ཏེ་མི་འདུག་པ་དེ་བཞིན་དུ་ལམ་ལ་བརྟེན་ནས་རྒལ་བ་ཡང་དེ་གདོན་མི་ཟ་བར་དོར་བར་བྱ་བ་ཡིན་
[301b.2]པའི་ཕྱིར་ལམ་ལ་འཆེལ་ཏེ་མི་འདུག་གོ། །དེའི་རྣམ་པ་ཅན་ཞེས་བྱ་བ་ནི་དེ་དག་གི་རྣམ་པ་བཅུ་པོ་ཇི་སྐད་དུ་བཤད་པ་ཅན་ནོ། །དེ་ལས་འདའ་བར་མངོན་དུ་ཕྱོགས་པའི་ཕྱིར་རོ་ཞེས་བྱ་བ་ནི་ལམ་དེ་ལས་འདའ་བར་མངོན་དུ་ཕྱོགས་པའི་ཕྱིར་ཏེ། འདིས་ནི་དེ་གདོན་མི་ཟ་བར་སྤོང་བར་བྱ་བ་ཉིད་དུ་སྟོན་ཏོ། །
[301b.3]མི་རྟག་པ་དང་སྡུག་བསྔལ་བ་དང་དེའི་རྒྱུ་ལས་འདའ་བར་མངོན་དུ་ཕྱོགས་པ་ཞེས་བྱ་བ་དེ་ནི་མ་བཤད་ཀྱང་ཁོང་དུ་ཆུད་པ་ཉིད་དོ། །སྟོང་པ་དང་བདག་མེད་པ་དག་གིས་ནི་ཡིད་མི་འབྱུང་ངོ་ཞེས་བྱ་བ་ནི་སྟོང་པ་དང་བདག་མེད་པའི་རྣམ་པ་དག་གིས་ནི་རྣལ་འབྱོར་པ་ཡིད་འབྱུང་བར་མི་འགྱུར་རོ། །སྡུག་
[301b.4]བསྔལ་གྱི་བདེན་པ་ལ་སྟོང་པ་དང་བདག་མེད་པའི་རྣམ་པ་དག་ཏུ་དམིགས་མོད་ཀྱི་དེ་དག་གིས་སྡུག་བསྔལ་དེ་ལས་ཡིད་འབྱུང་བ་ནི་མ་ཡིན་ནོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་དང་འདྲ་བའི་ཕྱིར་ཏེ། སྟོང་པ་དང་བདག་མེད་པ་དག་ནི་ཆོས་ཐམས་ཅད་ཀྱི་མཚན་ཉིད་ཡིན་པས་མྱ་ངན་ལས་
[301b.5]འདས་པ་ཡང་སྟོང་པ་དང་བདག་མེད་པའི་མཚན་ཉིད་ཡིན་ན། དེ་དག་གིས་མྱ་ངན་ལས་འདས་པ་དེ་ལས་ཡིད་འབྱུང་བ་ཡང་མ་ཡིན་ནོ། །དེ་ལྟ་བས་ན་སྨོན་པ་མེད་པའི་ཏིང་ངེ་འཛིན་ནི་དེ་དག་གི་རྣམ་པ་ཅན་མ་ཡིན་ནོ། །འཇིག་རྟེན་པ་རྣམས་ནི་ས་བཅུ་གཅིག་ན་ཡོད་དོ་ཞེས་བྱ་བ་ནི་འདོད་པའི་ཁམས་
[301b.6]དང་མི་ལྕོགས་པ་མེད་པ་དང་བསམ་གཏན་ཁྱད་པར་ཅན་དང་བསམ་གཏན་དང་གཟུགས་མེད་པ་དག་ནའོ། །གང་ན་ལམ་ཡོད་པ་ན་ཡོད་དོ་ཞེས་བྱ་བ་ནི་འདོད་པའི་ཁམས་དང་སྲིད་པའི་རྩེ་མོ་དང་བསམ་གཏན་གཉིས་པ་ལ་སོགས་པའི་ཉེར་བསྡོགས་མ་གཏོགས་པའི་ས་རྣམས་ནའོ། །ཐར་པའི་སྒོ་ཡིན་
[301b.7]པའི་ཕྱིར་ཞེས་བྱ་བ་ནི་སྒོའི་དོན་ནི་སྒོ་མོའི་དོན་ཏོ་ཞེས་སྟོན་ཏོ། །སྟོང་པ་ཉིད་ལ་སོགས་པ་ལ་དམིགས་པའི་ཕྱིར་དེ་སྐད་ཅེས་བྱའོ་ཞེས་བྱ་བ་ནི་སྟོང་པ་ཉིད་དང་སྨོན་པ་མེད་པ་དང་། མཚན་མ་མེད་པ་ལ་དམིགས་པའི་ཕྱིར་སྟོང་པ་ཉིད་སྟོང་པ་ཉིད་དང་། སྨོན་པ་མེད་པ་སྨོན་པ་མེད་པ་དང་། མཚན་མ་མེད་
[302a]
[302a.1][མེད་]པ་མཚན་མ་མེད་པ་ཞེས་བྱའོ། །སྟོང་པ་དང་མི་རྟག་པར་ཞེས་བྱ་བར་ནི་གྲངས་བཞིན་དུ་སྟོང་པ་ཉིད་སྟོང་པ་ཉིད་ནི་མི་སློབ་པའི་སྟོང་པ་ཉིད་ཀྱི་ཏིང་ངེ་འཛིན་ལ་འདི་ནི་བདག་གི་མ་ཡིན་ནོ་ཞེས་སྟོང་པ་ཉིད་ཀྱི་རྣམ་པར་དམིགས་ཀྱི་བདག་མེད་པའི་རྣམ་པར་ནི་མ་ཡིན་ནོ། །
[302a.2]སྨྲས་པ་འདིར་སྟོང་པ་ཉིད་སྟོང་པ་ཉིད་ཀྱི་ཏིང་ངེ་འཛིན་ནི་སྟོང་པའི་རྣམ་པ་ཁོ་ན་ཡིན་གྱི། སྟོང་པ་ཉིད་ལྟར་བདག་མེད་པའི་རྣམ་པ་ཡང་ཡིན་པ་ནི་མ་ཡིན་པ་གང་ཡིན་པ་དེ་ཅིའི་ཕྱིར་ཞེ་ན། འདིར་སྨྲས་པ་སྟོང་པ་ཉིད་ཀྱི་རྣམ་པར་ཞུགས་པའི་སྟོང་པ་ཉིད་ཀྱི་རྗེས་ལ་བསྐྱེད་པར་བྱ་བ་ཡིན་པའི་ཕྱིར་རོ། །སྨྲས་
[302a.3]པ་ཅིའི་ཕྱིར་སྟོང་པ་ཉིད་ཀྱི་རྣམ་པར་ཞུགས་པའི་སྟོང་པ་ཉིད་ཀྱི་རྗེས་ལས་སྐྱེའི། བདག་མེད་པའི་རྣམ་པར་ཞུགས་པའི་སྟོང་པ་ཉིད་ཀྱི་རྗེས་ལས་མ་ཡིན་ཞེ་ན། འདིར་སྨྲས་པ་དེ་སྐྱེ་བ་དང་མཐུན་པའི་ཕྱིར་ཏེ་སྟོང་པ་ཉིད་ཀྱི་རྣམ་པ་ཅན་གྱི་སྟོང་པ་ཉིད་ཀྱི་ཏིང་ངེ་འཛིན་དེ་ཁོ་ན་སྟོང་པ་ཉིད་སྟོང་པ་ཉིད་ཀྱི་
[302a.4]ཏིང་ངེ་འཛིན་དེ་སྐྱེ་བ་དང་མཐུན་པར་གནས་ཀྱི་བདག་མེད་པའི་རྣམ་པ་ནི་མ་ཡིན་ནོ། །ཇི་ལྟར་སྟོང་པར་མཐོང་བ་དེ་བཞིན་དུ་བདག་མེད་པར་མཐོང་བ་ནི་སྐྱོ་བར་བྱེད་པ་མ་ཡིན་ཏེ། སྲིད་པ་དག་ལ་བདག་མེད་པར་མཐོང་བཞིན་དུ་ཡང་སྟོང་པར་མ་མཐོང་བའི་ཕྱིར་འཁོར་བ་ལ་མངོན་པར་དགའ་བ་
[302a.5]ཡོད་དེ། དཔེར་ན་ལམ་དུ་ཞུགས་པ་ནི་འདྲོན་པོ་ངོ་མི་ཤེས་པ་མཐོང་བས་ཀྱང་དགའ་ལ་གཅིག་པུ་ནི་དེས་སྟོང་པའི་ཕྱིར་མི་དགའ་བ་དེ་དང་འདྲའོ།། །།བམ་པོ་ལྔ་བཅུ་དགུ་པ། མི་རྟག་པའི་རྣམ་པར་དམིགས་སོ་ཞེས་བྱ་བ་ནི་རྣམ་པ་བཅུའི་ནང་ནས་སོ། །སྡུག་བསྔལ་བར་ཡང་མ་
[302a.6]ཡིན་ལ་ཞེས་བྱ་བ་རྒྱས་པར་འབྱུང་བ་ནི་ཟག་པ་མེད་པ་ནི་དེའི་མཚན་ཉིད་མ་ཡིན་པའི་ཕྱིར་སྡུག་བསྔལ་དུ་མི་དམིགས་ཏེ། འཕགས་པ་དང་མི་མཐུན་པ་ཉིད་ཀྱིས་སྡུག་བསྔལ་དུ་འདོད་དོ། །ཟག་པ་མེད་པ་ནི་དེའི་མཚན་ཉིད་མ་ཡིན་པ་ཉིད་ཀྱི་ཕྱིར་རྒྱུ་དང་ཀུན་འབྱུང་བ་དང་། རབ་ཏུ་སྐྱེ་བ་དང་རྐྱེན་གྱི་
[302a.7]རྣམ་པ་དག་ཏུ་ཡང་མ་ཡིན་ཏེ། ཟག་པ་མེད་པ་ནི་ཀུན་མི་འབྱུང་བ་ལ་སོགས་པའི་མཚན་ཉིད་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །ལམ་གྱི་རྣམ་པ་རྣམས་སུ་ཡང་མ་ཡིན་ཏེ། སུན་དབྱུང་བར་བྱ་བ་ཡིན་པའི་ཕྱིར་རོ་ཞེས་བྱ་བ་ནི་མི་སློབ་པའི་ཏིང་ངེ་འཛིན་དེ་ནི་སུན་དབྱུང་བར་བྱ་བ་ཡིན་ན། ལམ་གྱི་རྣམ་པ་
[302b]
[302b.1]དག་ཀྱང་སུན་འབྱིན་པའི་ངོ་བོ་མ་ཡིན་པས་དེའི་ཕྱིར་ཏིང་ངེ་འཛིན་དེ་ལ་ལམ་གྱི་རྣམ་པ་དག་ཏུ་མི་དམིགས་སོ། །འགོག་པའི་རྣམ་པ་དག་ཏུ་ནི་འབྲེལ་པ་མེད་པ་ཉིད་པས་དེ་དག་ཏུ་ནི་མི་བསམ་མོ། །ལྷག་མ་ནི་མི་རྟག་པའི་རྣམ་པ་ཁོ་ནར་རོ། །མ་བརྟགས་ཟད་པ་ལ་ཞེས་བྱ་བ་ནི་སོ་སོར་མ་བརྟགས་
[302b.2]པས་འགོག་པ་ལ་ཞེས་བྱ་བའི་ཐ་ཚིག་སྟེ། མི་སློབ་པའི་མཚན་མ་མེད་པའི་ཏིང་ངེ་འཛིན་གྱིས་སོ་སོར་མ་བརྟགས་པས་འགོག་པ་ལ་འདི་ནི་ཞི་བའོ་ཞེས་ཞི་བར་དམིགས་སོ། །དེའི་སོ་སོར་མ་བརྟགས་པས་འགོག་པ་ཇི་ལྟ་བུ་ཞེ་ན། མི་སློབ་པའི་མཚན་མ་མེད་པའི་ཏིང་ངེ་འཛིན་ལས་ལངས་པ་ལ་
[302b.3]དེའི་རྗེས་ལ་ཟག་པ་དང་བཅས་པའི་སྐད་ཅིག་མ་དང་ཟག་པ་མེད་པ་གཞན་འདའ་བ་གང་དག་ཡིན་པ་སྟེ། གལ་ཏེ་དེ་དག་བྱུང་བར་མ་གྱུར་ན་མི་སློབ་པའི་མཚན་མ་མེད་པའི་སྐད་ཅིག་མ་རྣམས་འབྱུང་བར་འགྱུར་རོ། །ཟག་པ་དང་བཅས་པ་དང་ཟག་པ་མེད་པ་གཞན་དེ་དག་སྐྱེ་བའི་དུས་ན་མི་སློབ་པའི་
[302b.4]མཚན་མ་མེད་པའི་སྐད་ཅིག་མ་དེ་དག་རྐྱེན་མ་ཚང་བས་སོ་སོར་མ་བརྟགས་པས་འགོག་པར་འགྱུར་ཏེ། སོ་སོར་མ་བརྟགས་པས་འགོག་པ་དེ་ལ་ཞི་བའི་རྣམ་པར་དམིགས་སོ། །ཟག་པ་མེད་པ་ལ་སོ་སོར་བརྟགས་པས་འགོག་པ་མེད་པའི་ཕྱིར་སོ་སོར་བརྟགས་པས་འགོག་པ་ལ་མི་དམིགས་སོ། །
[302b.5]ཅིའི་ཕྱིར་ཟག་པ་མེད་པ་ལ་སོ་སོར་བརྟགས་པས་འགོག་པ་མེད་ཅེ་ན། མི་མཐུན་པ་མེད་པའི་ཕྱིར་ཏེ། གང་ཞིག་འཕགས་པ་རྣམས་དང་མི་མཐུན་པ་དེ་ནི་ལྡན་པ་བྲལ་བར་བྱ་བའི་ཕྱིར་དེ་དག་སྒྲིམ་མོ། །བྲལ་བ་ཡང་སོ་སོར་བརྟགས་པས་འགོག་པ་ཡིན་ཏེ། དེའི་ཕྱིར་ཟག་པ་མེད་པ་ལ་སོ་སོར་བརྟགས་
[302b.6]པས་འགོག་པ་མེད་དོ། །གཞན་ཡང་མི་སློབ་པའི་མཚན་མ་མེད་པའི་ཏིང་ངེ་འཛིན་ལ་སོ་སོར་བརྟགས་པས་འགོག་པ་མེད་པའི་ཕྱིར་དང་སོ་སོར་མ་བརྟགས་པས་འགོག་པ་ཡང་དེའི་ཕྱིར་རྒོལ་བར་འགྱུར་བའི་ཕྱིར་དེ་ལ་དགའ་བ་ཁོ་ནས་དེ་རྣམ་པར་སུན་འབྱིན་པར་འདོད་པ་ན། དེའི་སོ་སོར་མ་བརྟགས་པས་
[302b.7]འགོག་པ་ཁོ་ན་ལ་དམིགས་ཏེ། འཇིག་རྟེན་ན་ཡང་དགྲ་དང་བསྡོངས་ནས་གསད་པར་བྱ་བ་གསོད་པ་སྣང་ངོ་། །འགོག་པ་དང་གྱ་ནོམ་པ་དང་། ངེས་པར་འབྱུང་བའི་རྣམ་པར་ནི་མ་ཡིན་ཏེ་ཞེས་བྱ་བ་ནི་འདི་ལྟར་མི་རྟག་པ་ཉིད་ཀྱི་འགོག་པ་དང་ཐུན་མོང་ཡིན་ཏེ། དེའི་ངོ་བོ་ནི་ཉིད་དེ། མི་རྟག་པ་ཉིད་ཀྱི་འགོག་པ་
[303a]
[303a.1]དང་ཐུན་མོང་ཡིན་པ་ཉིད་དེ། དེའི་ཕྱིར་སོ་སོར་མ་བརྟགས་པས་འགོག་པ་འདི་ལ་འགོག་པའི་རྣམ་པར་མི་དམིགས་སོ། །དེ་ལྟ་མ་ཡིན་ན་དེ་ལ་ཞི་བའི་རྣམ་པར་ཁྱད་པར་དུ་འཕགས་པ་དམིགས་པར་མི་འགྱུར་རོ། །འགོག་པའི་རྣམ་པས་ནི་མི་རྟག་པ་ཉིད་ཀྱི་འགོག་པ་ཁོ་ནས་སོ་སོར་མ་
[303a.2]བརྟགས་པས་འགོག་པ་དེ་སུན་ཕྱུང་བ་ཉིད་དུ་འགྱུར་ལ། དེ་སུན་ཕྱུང་ན་ཡང་མི་སློབ་པའི་མཚན་མ་མེད་པའི་ཏིང་ངེ་འཛིན་སུན་ཕྱུང་བར་མ་གྱུར་ཏོ་སྙམ་དུ་བསམས་པ་ཡིན་ནོ། །སོ་སོར་མ་བརྟགས་པས་འགོག་པ་ནི་ལུང་དུ་མ་བསྟན་པ་ཡིན་པའི་ཕྱིར་གྱ་ནོམ་པའི་རྣམ་པར་ཡང་མ་ཡིན་ཏེ། གྱ་ནོམ་པ་ནི་དགེ་
[303a.3]བ་ཡིན་གྱི་ལུང་དུ་མ་བསྟན་པ་ནི་མ་ཡིན་པས་དེའི་ཕྱིར་གྱ་ནོམ་པའི་རྣམ་པར་མི་དམིགས་སོ། །སོ་སོར་མ་བརྟགས་པས་འགོག་པ་ནི་བྲལ་བ་མ་ཡིན་པའི་ཕྱིར་ངེས་པར་བྱུང་བའི་རྣམ་པར་མི་དམིགས་ཏེ། ཀུན་ནས་ཉོན་མོངས་པ་དང་བྲལ་བ་ནི་ཀུན་ནས་ཉོན་མོངས་པ་ལས་ངེས་པར་འབྱུང་བ་ཡིན་པར་
[303a.4]འདོད་དོ། །དེ་ལྟ་བས་ན་སོ་སོར་མ་བརྟགས་པས་འགོག་པས་འཁོར་བ་ལས་ངེས་པར་བྱུང་བ་མ་ཡིན་ཏེ། འདི་ལྟར་ཆོས་དགེ་བ་དང་མི་དགེ་བ་ཁ་ཅིག་གི་སོ་སོར་མ་བརྟགས་པས་འགོག་པ་ཡོད་བཞིན་དུ་དེ་དག་གི་ཐོབ་པ་མ་ཆད་པའི་ཕྱིར་དེ་དག་དང་ལྡན་པ་ཁོ་ན་ཡིན་ནོ། །འཕགས་པའི་ལམ་ལ་སྡང་བའི་
[303a.5]ཕྱིར་ཞེས་བྱ་བ་ཇི་ལྟར་སྡང་ཞེ་ན། སྟོང་པོ་ཉིད་ལ་སོགས་པའི་རྣམ་པས་དེ་ལ་རྒྱབ་ཀྱིས་ཕྱོགས་པའི་ཕྱིར་རོ། །མི་གཡོ་ལ་ཞེས་བྱ་བའི་མི་གཡོ་བའི་ཆོས་ཅན་ལ་སྟེ། དབང་པོ་རྣོ་བའི་ཕྱིར་དེ་སྐྱེད་པའི་མཐུ་ཡོད་ཀྱི་དགྲ་བཅོམ་པ་གཞན་ལ་ནི་མ་ཡིན་ནོ། །དེ་དག་གི་མཐོང་བའི་ཆོས་ལ་བདེ་བར་གནས་པར་འགྱུར་
[303a.6]བའི་ཕྱིར་ཀུན་དུ་ཆགས་པའི་གནས་སུ་འགྱུར་བ་མི་སློབ་པའི་སྟོང་པ་ཉིད་ལ་སོགས་པའི་ཏིང་ངེ་འཛིན་དག་ལ་རྒྱབ་ཀྱིས་ཕྱོགས་པར་བྱ་བའི་ཕྱིར་ཏིང་ངེ་འཛིན་གཞན་དག་ལ་སྙོམས་པར་འཇུག་གོ། །རྒྱ་ཆེར་འབྱུང་ཞེས་བྱ་བ་ནི་མདོ་ལས་ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་མཐོང་
[303a.7]བའི་ཆོས་ལ་བདེ་བར་གནས་པར་འགྱུར་བ་ཡང་ཡོད་ཅེས་བྱ་བ་ནས། ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་ཟག་པ་ཟད་པར་འགྱུར་བ་ཡང་ཡོད་ཅེས་བྱ་བའི་བར་འབྱུང་བ་ཡིན་ནོ། །དེ་ལ་ཀུན་དུ་བསྟེན་པ་ནི་བསྟེན་པ་བསྒོམས་པས་སོ། །གོམས་པར་བྱས་པ་ནི་མི་མཐུན་པ་
[303b]
[303b.1]སྤངས་པས་སོ། །ལན་མང་དུ་བྱས་པ་ནི་མི་མཐུན་པ་ཐག་བསྲིང་བས་སོ། །དེ་དང་པོ་ཡིན་པའི་ཕྱིར་གཞན་དང་གཞན་དག་ཀྱང་ཡིན་པར་ཤེས་པར་བྱའོ་ཞེས་བྱ་བ་ནི་དཔེར་བརྗོད་པའི་ངོ་བོ་ཡིན་པའི་ཕྱིར་རོ། །ཚེ་ཕྱི་མ་ལ་བདེ་བར་གནས་པར་འགྱུར་བ་ནི་ངེས་པ་མེད་ཅེས་བྱ་བ་ལ། ཚེ་ཕྱི་མ་ནི་མ་འོངས་པའི་སྐྱེ་བའོ། །དེར་
[303b.2]བདེ་བར་གནས་པ་སྟེ། འདི་ནི་དེའི་ཆེད་དུ་གདོན་མི་ཟ་བ་མ་ཡིན་ནོ། །ཅིའི་ཕྱིར་ཞེ་ན་སྨྲས་པ། བསམ་གཏན་དང་པོ་ལས་ཉམས་པ་རྣམས་དང་། གཉིས་པ་ལ་སོགས་པར་སྐྱེས་པ་རྣམས་དང་། ཡོངས་སུ་མྱ་ངན་ལས་འདས་པ་རྣམས་ལ་ཚེ་ཕྱི་མ་ལ་བདེ་བར་གནས་པ་མེད་པའི་ཕྱིར་རོ། །ཤེས་པ་མཐོང་བར་
[303b.3]འགྱུར་བ་ཞེས་བྱ་བ་ནི་ཤེས་པར་འགྱུར་བ་དང་། མཐོང་བར་འགྱུར་བ་ཞེས་བྱ་བའི་ཐ་ཚིག་བསྡུའོ། །དེ་ལ་ཤེས་པ་ནི་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པའི་ཤེས་རབ་སྟེ། སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན་པའོ་ཞེས་བྱ་བ་དེ་ལྟ་བུ་ལ་སོགས་པར་རྣམ་པར་རྟོག་པའོ། །མཐོང་
[303b.4]བ་ནི་མིག་གི་རྣམ་པར་ཤེས་པ་དང་མཚུངས་པར་ལྡན་པའི་ཤེས་རབ་རྟོག་པ་མེད་པའོ། །སྨྲས་པ་ལྷའི་མིག་གི་མངོན་པར་ཤེས་པ་ནི་ཤེས་པ་མཐོང་བར་འགྱུར་བ་ཡིན་ནོ་ཞེས་བཤད་པ་ལྷའི་མིག་གི་མངོན་པར་ཤེས་པ་ནི་ཏིང་ངེ་འཛིན་བསྒོམ་པ་མ་ཡིན་ནོ་ཞེ་ན། འདིར་སྨྲས་པ་འདི་ནི་འབྲས་བུ་ལ་རྒྱུ་བཏགས་པ་
[303b.5]ཡིན་ཏེ། རྒྱུ་ཏིང་ངེ་འཛིན་བསྒོམ་པ་གང་གི་འབྲས་བུ་ལྷའི་མིག་གི་མངོན་པར་ཤེས་པ་ཡིན་པའི་འབྲས་བུ་དེ་ལ་ཤེས་པ་མཐོང་བར་འགྱུར་བའི་ཏིང་ངེ་འཛིན་བསྒོམ་པ་ཡིན་ནོ་ཞེས་རྒྱུ་ཉེ་བར་བཏགས་སོ། །གང་དག་གི་ཕྱོགས། རྣམ་གྲོལ་ལམ་བློ་རྣམ་པ་དྲུག །ཅེས་བྱ་བ་འདི་ཡིན་པ་དེ་དག་གི་ལྟར་ན་ནི་
[303b.6]མངོན་པར་ཤེས་པ་དྲུག་ཡིད་ཀྱི་རྣམ་པར་གྲོལ་བའི་ལམ་བསམ་གཏན་གྱིས་བསྡུས་པ་ཁོ་ན་ཡིན་པས་དེ་ནི་ཀླན་ཀར་མི་རུང་བ་ཉིད་དེ། རྣམ་པར་གྲོལ་བའི་ལམ་དེ་དག་ནི་མཉམ་པར་གཞག་པ་ཡིན་པའི་ཕྱིར་རོ། །ཆོས་མངོན་པའི་མཛོད་སེམས་པ་རྣམས་ཀྱི་ལྟར་ན་ནི་ཕྱོགས་གོང་མ་ཁོ་ན་ལྟར་ཁོང་དུ་ཆུད་པར་
[303b.7]བྱ་སྟེ། ལྷའི་མིག་དང་རྣ་བའི་རྣམ་པར་ཤེས་པ་དག་མངོན་པར་ཤེས་པ་ཉིད་དུ་འདོད་པའི་ཕྱིར་རོ། །ཁམས་གསུམ་པ་དང་ཟག་པ་མེད་པ་ཞེས་བྱ་བ་ལ། ཁམས་གསུམ་པ་ནི་མི་སྡུག་པ་དང་དབུགས་རྔུབ་པ་དང་འབྱུང་བ་དྲན་པ་དང་། ཉོན་མོངས་པ་མེད་པ་དང་། སྨོན་ནས་ཤེས་པ་དང་། སོ་སོ་ཡང་དག་པར་རིག་
[304a]
[304a.1]པ་དང་། མངོན་པར་ཤེས་པ་དང་། རྣམ་པར་ཐར་པ་དང་། ཟིལ་གྱིས་གནོན་པའི་སྐྱེ་མཆེད་ལ་སོགས་པའོ། །ཟག་པ་མེད་པ་ནི་རྣམ་པར་ཐར་པའི་སྒོ་དང་ཐོད་རྒལ་གྱི་སྙོམས་པར་འཇུག་པ་དང་། ཟག་པ་ཟད་པའི་མངོན་པར་ཤེས་པ་ལ་སོགས་པ་སྟེ། འདིར་ནི་ཏིང་ངེ་འཛིན་དང་
[304a.2]མཚུངས་པར་ལྡན་པའི་ཕྱིར་སྦྱོར་བ་ལས་བྱུང་བའི་ཡོན་ཏན་རྣམས་ལ་ཏིང་ངེ་འཛིན་བསྒོམ་པའོ་ཞེས་བྱ་བར་ཉེ་བར་བཏགས་པ་ཡིན་ནོ། །ཤེས་རབ་རབ་ཏུ་རྣམ་པར་དབྱེ་བར་འགྱུར་བ་ཞེས་བྱ་བ་ནི་ཤེས་རབ་ཀྱི་ཁྱད་པར་ཕུལ་དུ་ཕྱིན་པར་འགྱུར་བའོ། །བཅོམ་ལྡན་འདས་ཀྱིས་ཆོས་སྟོན་པ་འདི་ནི་བདག་ཉིད་ལ་ཉེ་
[304a.3]བར་གཏོད་པ་ཡིན་ཏེ་ཞེས་བྱ་བ་ལ། །རང་ལ་ཉེ་བར་གཏོད་པ་ནི་བདག་ཉིད་ལ་ཉེ་བར་གཏོད་པའོ། །བདག་ཉིད་ཀྱི་དབང་དུ་མཛད་དེ་བཤད་ཅེས་བྱ་བའི་ཐ་ཚིག་སྟེ། བྱང་ཆུབ་སེམས་དཔའ་ལས་ཀྱི་མཐའ་ལ་གཟིགས་པའི་ཆེད་དུ་ཕྱིར་བྱུང་སྟེ། ཤིང་འཛམ་བུའི་དྲུང་དུ་བསམ་གཏན་དང་པོ་བསྐྱེད་དོ། །བྱང་
[304a.4]ཆུབ་ཀྱི་ཤིང་དྲུང་དུ་ནི་ཐུན་དང་པོ་ལ་ལྷའི་བུའི་བདུད་བཅོམ་ནས་ལྷའི་སྤྱན་བསྐྱེད་དེ། ལྷའི་སྤྱན་དེས་འཆི་འཕོ་བ་དང་སྐྱེ་བའི་གནས་ཉམ་ང་བར་སེམས་ཅན་རྣམས་ལ་གཟིགས་ནས་དེ་དག་ཡོངས་སུ་བསྐྱབ་པའི་ཕྱིར་གུང་ཐུན་ལ་བསམ་གཏན་དང་། རྣམ་པར་ཐར་པ་དང་། སྙོམས་པར་འཇུག་པ་རྣམས་མངོན་
[304a.5]སུམ་དུ་མཛད་དེ། འདིའི་སྦྱོར་བ་ལས་བྱུང་བའི་ཡོན་ཏན་དེ་དག་ནི་ཤེས་རབ་རབ་ཏུ་རྣོན་པོར་བྱེད་པར་འགྱུར་བ་ཡིན་ནོ། །དེའི་འོག་ཏུ་ཐུན་གསུམ་པ་ལ་བསམ་གཏན་བཞི་པ་ལ་བརྟེན་ཏེ། ངེས་པར་ཞུགས་པ་ནས། རྡོ་རྗེ་ལྟ་བུའི་ཏིང་ངེ་འཛིན་གྱིས་ཀུན་དུ་སྦྱོར་བ་ཐམས་ཅད་སྤངས་པའི་དབང་དུ་མཛད་དོ། །
[304a.6]གང་གི་ཕྱིར་དེ་ལྟར་ཆོས་སྟོན་པ་བདག་ཉིད་ལ་ཉེ་བར་གཏོད་པ་ཡིན་པ་དེའི་ཕྱིར་བསམ་གཏན་ཐ་མ་བཞི་པ་ཁོ་ནའི་རྡོ་རྗེ་ལྟ་བུའི་ཏིང་ངེ་འཛིན་གང་ཡིན་པ་ཞེས་བྱ་བའོ། །སེམས་ཅན་ཚད་མེད་པ་ལ་དམིགས་པའི་ཕྱིར་རོ་ཞེས་བྱ་བ་འདི་ནི་ཚད་མེད་པའི་འདུ་ཤེས་སུ་བྱ་བའི་བྱེད་རྒྱུ་ཡིན་ནོ། །གྲངས་བཞིན་
[304a.7]ནོ་ཞེས་བྱ་བ་ནི་གནོད་སེམས་མང་བ་རྣམས་ཀྱི་ནི་དེ་སྤང་བའི་ཕྱིར་བྱམས་པའོ། །རྣམ་པར་འཚེ་བ་མང་བ་རྣམས་ཀྱི་ནི་དེ་སྤོང་བའི་ཕྱིར་སྙིང་རྗེའོ། །མི་དགའ་བ་མང་བ་རྣམས་ཀྱི་ནི་དེ་སྤང་བའི་ཕྱིར་དགའ་བའོ། །འདོད་པའི་འདོད་ཆགས་དང་གནོད་སེམས་མང་བ་རྣམས་ཀྱི་ནི་དེ་དག་སྤང་བའི་ཕྱིར་བཏང་
[304b]
[304b.1]སྙོམས་སོ། །འདོད་པའི་འདོད་ཆགས་ཀྱི་གཉེན་པོ་ཉིད་དུ་ཁྱད་པར་ཅི་ཞིག་ཡོད་ཅེ་ན་ཞེས་བྱ་བ་ནི་འདོད་པའི་འདོད་ཆགས་མང་བ་རྣམས་ཀྱི་ཕྱིར་སེམས་པ་ཡིན་ནོ། །ཕ་དང་མ་དང་བུ་དང་ཉེ་དུའི་འདོད་ཆགས་ཀྱི་གཉེན་པོ་ནི་ཞེས་བྱ་བ་ནི་མི་འབྲེལ་བ་མེད་པ་དག་ལ་ཇི་ལྟ་བ་དེ་བཞིན་དུ་དེ་དག་ལ་བཏང་སྙོམས་
[304b.2]སུ་བྱེད་དོ་སྙམ་དུ་བསམས་པ་ཡིན་ནོ། །དེ་ནི་ཆགས་པས་དྲངས་པ་ཡིན་པའི་ཕྱིར་རོ་ཞེས་བྱ་བ་ནི་གང་གི་ཕྱིར་གནོད་སེམས་ཆགས་པས་དྲངས་པ་ཡིན་པ་དེའི་ཕྱིར་ཆགས་པའི་གཉེན་པོའི་ངོ་བོ་ཉིད་སྟོན་ཏོ་སྙམ་དུ་བསམས་པ་ཡིན་ནོ། །འདི་ནི་གཉི་གའི་རང་བཞིན་ཡིན་ན་རུང་ངོ་ཞེས་བྱ་བ་ནི་མ་ཆགས་
[304b.3]པའི་རང་བཞིན་དང་ཞེ་སྡང་མེད་པའི་རང་བཞིན་ཡིན་ན་རུང་ངོ་ཞེས་བྱ་བའི་ཐ་ཚིག་སྟེ། ཅིའི་ཕྱིར་ཞེ་ན། འདོད་ཆགས་དང་ཞེ་སྡང་དག་གི་གཉེན་པོ་ཡིན་པའི་ཕྱིར་རོ། །འདིར་ཆོས་གཅིག་ལ་གཉི་གའི་རང་བཞིན་ཡིན་ནོ་ཞེས་བྱ་བར་ནི་མི་བཟུང་ངོ་། །འོ་ན་ཅི་ཞེ་ན། མ་ཆགས་པ་དང་ཞེ་སྡང་མེད་པ་དག་
[304b.4]ལ་བཏང་སྙོམས་ཀྱི་སྒྲ་འཇུག་པ་ཡིན་ནོ། །ཀྱེ་མ་སེམས་ཅན་རྣམས་བདེ་བར་གྱུར་ཅིག་ཅེས་བྱ་བ་ནི་ཤོག་ཤིག་སྙམ་དུ་བསམས་པ་ཡིན་ནོ། །ཀྱེ་མ་སེམས་ཅན་རྣམས་ནི་སྡུག་བསྔལ་ལོ་ཞེས་བྱ་བ་ནི་སྡུག་བསྔལ་ལས་གྲོལ་བར་གྱུར་ཅིག་སྙམ་དུ་བསམས་པ་ཡིན་ཏེ། དེ་སྐད་དུ་འཆད་པར་འགྱུར་རོ། །བར་
[304b.5]མར་གནས་པ་ཡིན་པའི་ཕྱིར་རོ་ཞེས་བྱ་བ་ནི་ཕྱོགས་སུ་མ་ལྷུང་བ་ཉིད་ཀྱིས་རྗེས་སུ་ཆགས་པ་ཡང་མེད། ཞེ་འགྲས་པ་ཡང་མེད་ཅེས་བྱ་བའི་ཐ་ཚིག་གོ། །དེ་དང་མི་ལྡན་པ་རྣམས་ལ་ཞེས་བྱ་བ་རྒྱས་པར་འབྱུང་བ་ནི་བདེ་བ་དང་མི་ལྡན་པ་རྣམས་བདེ་བ་ཡོད་པར་མོས་པའི་ཕྱིར་ཇི་ལྟར་ན་ཕྱིན་ཅི་ལོག་པ་ཉིད་དུ་མི་
[304b.6]འགྱུར་ཞེ་ན། གྱུར་ཅིག་སྙམ་དུ་སེམས་པའི་ཕྱིར་རོ་ཞེས་བྱ་བ་ནི་བདེ་བར་གྱུར་ཅིག་སྙམ་དུ་སེམས་པའི་ཕྱིར་ཕྱིན་ཅི་ལོག་མ་ཡིན་ནོ་ཞེས་བྱ་བར་སྐབས་དང་སྦྱར་རོ། །ཡང་ན་བསམ་པ་ཕྱིན་ཅི་མ་ལོག་པའི་ཕྱིར་ཞེས་བྱ་བ་ལ། བསམ་པ་ནི་དགེ་བའི་ཆོས་ཏེ། སེམས་ཅན་རྣམས་བདེ་བར་གྱུར་ཅིག་སྙམ་པའི་
[304b.7]སེམས་དང་སེམས་ལས་བྱུང་བ་འཁོར་དང་བཅས་པ་དེ་དག་ཡིན་ཏེ། བསམ་པ་དེ་ཕྱིན་ཅི་མ་ལོག་པའི་ཕྱིར་ཕྱིན་ཅི་ལོག་ཉིད་མ་ཡིན་ནོ། །ཇི་ལྟར་བསམ་པ་ཕྱིན་ཅི་ལོག་ཉིད་མ་ཡིན་ཞེ་ན། མོས་པར་འདུ་ཤེས་པའི་ཕྱིར་རོ་ཞེས་བྱ་བ་སྨོས་ཏེ། མོས་པའི་འདུ་ཤེས་པ་ནི་མོས་པར་འདུ་ཤེས་པའོ། །དེ་ལྟ་བས་ན་
[305a]
[305a.1]ཇི་ལྟར་མོས་པ་དེ་ཁོ་ན་ལྟར་འདུ་ཤེས་ཏེ། འདི་ནི་མོས་པ་ཡིད་ལ་བྱེད་པ་ཡིན་ནོ་ཞེས་བྱ་བར་ཡོངས་སུ་གཅོད་དོ། །གལ་ཏེ་མི་དགེ་བ་ཉིད་ཡིན་ནོ་ཞེ་ན་ཞེས་བྱ་བ་ནི་ཕྱིན་ཅི་ལོག་ཏུ་འཛིན་པས་སོ། །མ་ཡིན་ཏེ། དགེ་བའི་རྩ་བ་ཡིན་པའི་ཕྱིར་རོ་ཞེས་བྱ་བ་ནི་དེ་ནི་དེ་ལྟ་མ་ཡིན་ནོ། །ཅིའི་ཕྱིར་
[305a.2]ཞེ་ན། དགེ་བའི་རྩ་བ་ཡིན་པའི་ཕྱིར་རོ། །ཡང་ཇི་ལྟར་དགེ་བ་ཡིན་ཞེ་ན། གནོད་སེམས་ལ་སོགས་པའི་གཉེན་པོ་ཡིན་པས་ཞེས་བྱ་བ་སྨོས་ཏེ། བྱམས་པ་ནི་གནོད་སེམས་མེད་པའི་རང་བཞིན་ཡིན་པས་གནོད་སེམས་ཀྱི་གཉེན་པོའོ། །སྙིང་རྗེ་ནི་སྡུག་བསྔལ་སེལ་བའི་རྣམ་པ་ཡིན་པས་སྡུག་བསྔལ་ཉེ་
[305a.3]བར་བསྒྲུབ་པ་རྣམ་པར་འཚེ་བའི་གཉེན་པོ་ཡིན་ནོ། །དགའ་བ་ནི་ཡིད་བདེ་བའི་ངོ་བོ་ཡིན་པའི་ཕྱིར་མི་དགའ་བའི་གཉེན་པོའོ། །བཏང་སྙོམས་ནི་བར་མར་གནས་པའི་ཕྱིར་འདོད་པའི་འདོད་ཆགས་དང་གནོད་སེམས་དག་གི་གཉེན་པོ་ཡིན་པས་སོ། །དེ་ལ་དམིགས་པའི་ཞེས་བྱ་བ་ནི་འདོད་པ་ན་སྤྱོད་པའི་
[305a.4]སེམས་ཅན་ལ་དམིགས་པ་རྣམས་ཀྱི་ཞེས་བྱ་བའི་དོན་ཏོ། །དེ་ནི་སྣོད་ཀྱིས་སྣོད་ན་གནས་པ་བསྟན་པ་ཡིན་ནོ་ཞེས་བྱ་བ་ནི་སྣོད་ཀྱིས་སྣོད་ཅན་སེམས་ཅན་གྱི་འཇིག་རྟེན་བསྟན་ཏོ་ཞེས་བྱ་བའི་ཐ་ཚིག་གོ། །མཉམ་པར་གཞག་པ་དང་མཉམ་པར་གཞག་པ་མ་ཡིན་པ་དང་། དངོས་གཞི་སྦྱོར་བ་སྨོས་པའི་
[305a.5]ཕྱིར་རོ་ཞེས་བྱ་བ་ནི་ཅི་རིགས་པར་གསུམ་ཆར་ཡང་ས་དྲུག་དང་ལྔ་དང་བཅུ་པ་ཉིད་ཡིན་པ་དག་གི་རྒྱུ་བརྗོད་པ་ཡིན་ཏེ་དེ་ལས་མཉམ་པར་གཞག་པ་མ་ཡིན་པ་ནི་འདོད་པའི་ཁམས་དང་སྦྱོར་བ་ནི་ཉེར་བསྡོགས་དག་ཡིན་པར་ཅི་རིགས་པར་སྦྱར་རོ། །ས་དྲུག་པར་རྣམ་པར་གཞག་པ་ལ་ནི་ཉེར་བསྡོགས་མི་ལྕོགས་
[305a.6]པ་མེད་པ་ཡང་ཡིན་པར་འདོད་དེ། གསལ་བ་ཉིད་ཀྱིས་དངོས་གཞི་དང་འདྲ་བའི་ཕྱིར་རོ། །ས་སྔ་མ་རྣམ་པར་གཞག་པ་ལ་ལ་ནི་དངོས་གཞི་དག་ཁོ་ན་བཟུང་སྟེ། བསམ་གཏན་ཁྱད་པར་ཅན་ནི་དངོས་གཞིའི་བསམ་གཏན་དང་པོའི་ཁྱད་པར་ཡིན་པའི་ཕྱིར་རོ། །ས་བཅུ་པ་རྣམ་པར་གཞག་པ་ལ་ནི་མཉམ་པར་
[305a.7]གཞག་པ་མ་ཡིན་པ་འདོད་པའི་ཁམས་ཀྱང་ཡིན་པར་འདོད་ལ། སྦྱོར་བར་གྱུར་པ་ཉེར་བསྡོགས་རྣམས་ཀྱང་ཡིན་པར་བཟུང་ན་དངོས་གཞི་དག་ལྟ་སྨོས་ཀྱང་ཅི་དགོས། བསམ་གཏན་དངོས་གཞིའི་ས་པ་ཡིན་པའི་ཕྱིར་རོ་ཞེས་བྱ་བ་ནི་དངོས་གཞི་ནི་བསམ་གཏན་དག་པ་པའི་ས་པ་ཡིན་ཞེས་བྱ་བའི་ཐ་ཚིག་སྟེ།
[305b]
[305b.1]བསམ་གཏན་དག་པ་པ་དག་གིས་ནི་ཉོན་མོངས་པ་མི་སྤོང་ངོ་ཞེས་སྔར་བཤད་ཟིན་ཏོ། །མོས་པ་ཡིད་ལ་བྱེད་པའི་ཕྱིར་དེ་དག་གི་ཉོན་མོངས་པ་རྣམས་མི་སྤོང་སྟེ། དེ་ཁོ་ན་ཉིད་ཡིད་ལ་བྱེད་པས་ནི་ཉོན་མོངས་པ་སྤང་ན། སེམས་ཅན་ལ་དམིགས་པ་ཡིན་པའི་ཕྱིར་དེ་དག་གིས་མི་སྤོང་སྟེ། ཆོས་
[305b.2]ཀྱི་སྤྱིའི་མཚན་ཉིད་ཡིད་ལ་བྱེད་པས་ཉོན་མོངས་པ་སྤོང་ངོ་ཞེས་བྱ་བ་ནི་གྲུབ་པའི་མཐའ་ཡིན་ནོ། །འོ་ན་ཇི་ལྟ་བུ་ཞེ་ན། དེ་དག་གི་སྦྱོར་བས་ཞེས་བྱ་བ་རྒྱས་པར་སྨོས་ཏེ། བྱམས་པ་ལ་སོགས་པའི་སྦྱོར་བས་གནོད་སེམས་ལ་སོགས་པ་རྣམ་པར་གནོན་པའི་ཕྱིར་རོ། །དེ་དག་གི་གཉེན་པོ་ཉིད་དུ་བཤད་
[305b.3]དོ་ཞེས་བྱ་བ་ནི་གནོད་སེམས་ལ་སོགས་པའི་གཉེན་པོ་ཉིད་དུ་བཤད་དེ། དེ་དག་ནི་རྣམ་པར་གནོན་པའི་སྤོང་བ་ཡིན་ནོ་ཞེས་བྱ་བའི་ཐ་ཚིག་གོ། །སྤངས་པ་ཐག་སྲིང་བར་བྱེད་པའི་ཕྱིར་ཞེས་བྱ་བ་ལ། འདི་ལྟར་བར་ཆད་མེད་པའི་ལམ་འཇིག་རྟེན་པའམ་འཇིག་རྟེན་ལས་འདས་པའི་གནོད་སེམས་
[305b.4]ལ་སོགས་པ་ཉོན་མོངས་པ་དང་ཉེ་བའི་ཉོན་མོངས་པ་སྤངས་པ་རྣམས་དེ་དག་གིས་ཐག་སྲིང་བར་བྱེད་དེ། དེའི་ཕྱིར་དེ་དག་གི་གཉེན་པོ་ཉིད་དུ་བཤད་དོ། །ཇི་ལྟ་ཞེ་ན། སྟོན་པར་བྱེད་དེ། བྱམས་པ་ལ་སོགས་པ་གསུམ་པོ་དག་འདོད་པའི་ཁམས་ཀྱི་ས་པ་དང་མི་ལྕོགས་པ་མེད་པའི་ས་པ་རྣམས་ནི་དངོས་
[305b.5]གཞིའི་ཚད་མེད་པ་དང་འདྲ་བ་དག་ཡོད་དོ། །སྦྱོར་བ་དང་དམིགས་པ་དང་རྣམ་པ་དང་ངོ་བོ་ཉིད་འདྲ་བའི་ཕྱིར་དངོས་གཞི་དག་དང་འདྲ་བ་ཡིན་ནོ། །ཚད་མེད་པ་གསུམ་པོ་དེ་དག་གིས་ཉོན་མོངས་པ་དེ་རྣམས་རྣམ་པར་མནན་ནས་སྤོང་བའི་ལམ་བར་ཆད་མེད་པའི་ལམ་རྣམས་ཀྱིས་རབ་ཏུ་སྤོང་བར་བྱེད་དོ། །རྐྱེན་སྟོབས་
[305b.6]དང་ལྡན་པ་རྙེད་ཀྱང་ཞེས་བྱ་བ་ནི་གནོད་སེམས་ལ་སོགས་པའི་རྐྱེན་སྟོབས་དང་ལྡན་པ་རྙེད་དུ་ཟིན་ཀྱང་ཉོན་མོངས་པ་དེ་དག་གིས་མངོན་དུ་འགྱུར་བའི་སྒོ་ནས་མི་བརྫི་བ་ཡིན་ནོ། །ཆེན་པོ་ལ་ཞེས་བྱ་བ་ནི་མཛའ་བོའི་ཕྱོགས་ལ་སྟེ། མཛའ་བོའི་ཕྱོགས་ལ་ནི་བྱམས་པར་བྱ་སླ་བས་སོ། །རྒྱས་པར་བྱེད་དོ་
[305b.7]ཞེས་བྱ་བ་ནི་ཁྱབ་པར་བྱེད་དོ། །སྔོན་གྱི་བསོད་ནམས་དང་བསོད་ནམས་མ་ཡིན་པའི་འབྲས་བུ་སྣང་བའི་སྒོ་ནས་ཞེས་བྱ་བ་ནི་སྔོན་བསོད་ནམས་ཀྱི་འབྲས་བུ་སྣང་བའི་སྒོ་ནས་གང་ཟག་དགེ་བའི་རྩ་བ་ཀུན་དུ་ཆད་པ་ལ་ཡང་འདིས་ནི་གང་གིས་ན་འདིའི་གཟུགས་ལ་སོགས་པ་ཕུན་སུམ་ཚོགས་པར་གྱུར་པའི་
[306a]
[306a.1]བསོད་ནམས་ཞིག་བྱས་པར་གྱུར་ཏོ་ཞེས་ཡོན་ཏན་གཟུང་བར་ནུས་ལ། རང་སངས་རྒྱས་ལ་ཡང་འདིས་ནི་གང་གིས་ན་འདི་ལ་འདི་ལྟ་བུའི་གཟུགས་ལ་སོགས་པ་མེད་པའི་བསོད་ནམས་མ་ཡིན་པ་ཞིག་གདོན་མི་ཟ་བར་བྱས་པར་གྱུར་ཏོ་ཞེས་སྐྱོན་གཟུང་བར་ནུས་སོ། །སྡུག་བསྔལ་
[306a.2]ལས་ཐར་ཀྱང་ཅི་མ་རུང་སྙམ་དུ་མོས་ཤིང་སྙིང་རྗེ་ལ་སྦྱོར་བར་བྱེད་དོ། །མངོན་པར་དགའ་བར་གྱུར་ཀྱང་ཅི་མ་རུང་སྙམ་དུ་མོས་ཤིང་དགའ་བ་ལ་སྦྱོར་བར་བྱེད་དོ། །དགའ་བ་དང་མི་ལྡན་ནོ་ཞེས་བྱ་བ་ནི་གསུམ་པ་དང་བཞི་པ་དག་ན་ཡིད་བདེ་བ་མེད་པའི་ཕྱིར་རོ། །རྣམ་པར་ཐར་པ་བརྒྱད་ཅེས་
[306a.3]བྱ་བ་ནི་མདོ་ལས་ཇི་སྐད་འབྱུང་བ་བཞིན་ནོ། །ཇི་སྐད་དུ་ཞེ་ན། རྣམ་པར་ཐར་པ་ནི་རྣམ་པ་བརྒྱད་དེ། བརྒྱད་གང་ཞེ་ན། གཟུགས་ཅན་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་དང་པོའོ། །ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་
[306a.4]གཉིས་པའོ། །སྡུག་པའི་རྣམ་པར་ཐར་པ་ལུས་ཀྱིས་མངོན་སུམ་དུ་བྱས་ཏེ་རྫོགས་པར་བྱས་ནས་གནས་པ་འདི་ནི་རྣམ་པར་ཐར་པ་གསུམ་པའོ། །རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ནས་ཐོགས་པའི་འདུ་ཤེས་རྣམས་ནུབ་པར་གྱུར་ཅིང་སྣ་ཚོགས་ཀྱི་འདུ་ཤེས་
[306a.5]རྣམས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་སྙམ་སྟེ། ནམ་མཁའ་མཐའ་ཡས་སྐྱེ་མཆེད་རྫོགས་པར་བྱེད་དེ་གནས་པ་འདི་ནི་རྣམ་པར་ཐར་པ་བཞི་པ་སྟེ། འདི་ལྟ་སྟེ་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ལྟ་བུའོ། །གཞན་ཡང་རྣམ་པ་ཐམས་ཅད་དུ་ནམ་མཁའ་
[306a.6]མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་པར་ཤེས་པ་མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པ་འདི་ནི་རྣམ་པར་ཐར་པ་ལྔ་པ་སྟེ། འདི་ལྟ་སྟེ་རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ལྟ་བུའོ། །གཞན་ཡང་རྣམ་པ་ཐམས་
[306a.7]ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་རྫོགས་པར་བྱས་ཏེ་གནས་པ་འདི་ནི་རྣམ་པར་ཐར་པ་དྲུག་པ་སྟེ། འདི་ལྟ་སྟེ་ཅི་ཡང་མེད་པའི་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ལྟ་བུའོ། །གཞན་ཡང་རྣམ་པ་ཐམས་ཅད་དུ་ཅི་ཡང་མེད་པའི་
[306b]
[306b.1]སྐྱེ་མཆེད་ལས་ཡང་དག་པར་འདས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱས་ཏེ་གནས་པ་འདི་ནི་རྣམ་པར་ཐར་པ་བདུན་པ་སྟེ། འདི་ལྟ་སྟེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ལྟ་བུའོ། །རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་
[306b.2]སྐྱེ་མཆེད་ལས་ཡང་དག་པར་འདས་ཏེ་ཚོར་བ་དང་འདུ་ཤེས་འགོག་པ་ལུས་ཀྱིས་མངོན་སུམ་དུ་བྱས་ནས་རྫོགས་པར་བྱས་ཏེ་གནས་པ་འདི་ནི་རྣམ་པར་ཐར་པ་བརྒྱད་པའོ་ཞེས་འབྱུང་ངོ་། །གཟུགས་ཅན་གཟུགས་རྣམས་ལ་ལྟ་བ་ཞེས་བྱ་བ་ནི་བདག་ཉིད་ཀྱི་གཟུགས་རྣམས་ལ་རྣམ་པར་མ་བཤིག་པར་
[306b.3]ཕྱི་རོལ་གྱི་གཟུགས་རྣམས་ལ་ཡང་ལྟ་བ་ཡིན་ནོ། །རྣམ་པར་བསྔོས་པ་ལ་སོགས་པར་དམིགས་པའི་ཕྱིར་ཚུལ་ནི་མི་སྡུག་པ་བཞིན་རིག་པར་བྱའོ་ཞེས་བྱ་བ་ནི་འདོད་ཆགས་ལྷག་པའི་ཁ་དོག་གི་འདོད་ཆགས་ལ་སོགས་པའི་གཉེན་པོ་ལས་བརྩམས་ཏེ་ཅི་རིགས་པར། མི་སྡུག་མ་ཆགས་ས་བཅུ་དང་། །
[306b.4]དམིགས་པ་འདོད་སྣང་མིས་སྐྱེད་དགེ །ཞེས་བྱ་བ་རྒྱས་པར་སྦྱར་བར་བྱའོ། །གྲངས་བཞིན་ནོ་ཞེས་བྱ་བ་ནི་འདོད་པ་ན་སྤྱོད་པའི་ཁ་དོག་གི་འདོད་ཆགས་ཀྱི་གཉེན་པོར་ནི་བསམ་གཏན་དང་པོའི་ས་པའི་རྣམ་པར་ཐར་པ་ཡིན་ལ། བསམ་གཏན་དང་པོའི་ས་པའི་ཁ་དོག་གི་འདོད་ཆགས་ཀྱི་གཉེན་པོ་
[306b.5]ཡང་བསམ་གཏན་གཉིས་པའི་ས་པའི་རྣམ་པར་ཐར་པ་ཡིན་ཏེ། འདི་གཉིས་ཀྱང་ཐག་བསྲིང་བའི་གཉེན་པོ་ཡིན་པར་རིག་པར་བྱའོ། །སྨྲས་པ་བསམ་གཏན་གཉིས་པ་ལ་སོགས་པ་ནི་ཁ་དོག་གི་འདོད་ཆགས་མེད་དོ་ཞེས་བྱ་བར་ཇི་ལྟར་ཤེས་ཤེ་ན། མིག་གི་རྣམ་པར་ཤེས་པ་མེད་པའི་ཕྱིར་རོ། །
[306b.6]གང་ཞིག་ཡུལ་གང་ལས་འདོད་ཆགས་དང་བྲལ་བ་དེ་ནི་ངེས་པར་དེ་འཛིན་པར་བྱེད་པའི་རྣམ་པར་ཤེས་པ་ལས་ཀྱང་འདོད་ཆགས་དང་བྲལ་བ་ཡིན་ལ། བསམ་གཏན་གཉིས་པ་ལ་སོགས་པ་ན་མིག་གི་རྣམ་པར་ཤེས་པ་ལ་སོགས་པ་མེད་པས་དེའི་ཕྱིར་དེ་དག་ནི་ཁ་དོག་གི་འདོད་ཆགས་དང་བྲལ་བའོ་
[306b.7]ཞེས་བྱ་བར་གྲུབ་བོ། །གཟུགས་མེད་མཉམ་གཞག་དགེ་རྣམས་སོ། །ཞེས་བྱ་བ་ནི་དག་པ་པ་དང་། ཟག་པ་མེད་པའོ། །གཞན་ན་ཡང་མཉམ་པར་མ་བཞག་པ་ཡོད་དེ་ཞེས་བྱ་བ་ནི་གཟུགས་མེད་པ་དག་གི་རྣམ་པར་སྨིན་པའི་སེམས་དང་སེམས་ལས་བྱུང་བ་རྣམས་ལས་བསམས་ནས་བརྗོད་པ་ཡིན་
[307a]
[307a.1]ནོ། །ཕྱོགས་སྔ་མ་ལ་ནི་གཟུགས་མེད་པ་མཉམ་པར་མ་བཞག་པ་ཞེས་བྱ་བ་འཆི་བའི་སྲིད་པའི་གནས་སྐབས་ཁོ་ནའི་ཡིན་པར་སྟོན་ཏོ། །ཉེར་བསྡོགས་ཀྱི་རྣམ་པར་གྲོལ་བའི་ལམ་དག་ཀྱང་རྣམ་པར་ཐར་པ་ཞེས་བྱ་བའི་མིང་འཐོབ་བོ་ཞེས་བྱ་བ་ལ། ཀྱང་ཞེས་བྱ་བའི་
[307a.2]སྒྲས་ནི་དངོས་གཞི་དག་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །བར་ཆད་མེད་པའི་ལམ་རྣམས་ནི་མ་ཡིན་ཏེ་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་ས་འོག་མ་པ་ལ་རྒྱབ་ཀྱིས་ཕྱོགས་པར་རྣམ་པར་ཐར་པ་དག་ཅེས་བྱ་བ་དེའི་ཕྱིར་བར་ཆད་མེད་པའི་ལམ་རྣམས་ནི་འོག་མ་ལ་དམིགས་པས་
[307a.3]རྣམ་པར་ཐར་པ་ཞེས་བྱ་བའི་མིང་མི་འཐོབ་ཀྱི་རྣམ་པར་གྲོལ་བའི་ལམ་དག་ནི་གོང་མ་ལ་དམིགས་པའི་ཕྱིར་མིང་འཐོབ་བོ། །འགོག་པའི་སྙོམས་པར་འཇུག་པ་ཞེས་བྱ་བ་ནི་བརྒྱད་པའོ་ཞེས་བྱ་བའི་ཚིག་ལྷག་མ་ཡིན་ནོ། །འདུ་ཤེས་དང་ཚོར་བ་ལ་རྒྱབ་ཀྱིས་ཕྱོགས་པའི་ཕྱིར་ཞེས་བྱ་བ་ནི་འདུ་ཤེས་
[307a.4]ལ་རྒྱབ་ཀྱིས་ཕྱོགས་པའི་ཕྱིར་དང་ཚོར་བ་ལ་རྒྱབ་ཀྱིས་ཕྱོགས་པའི་ཕྱིར་རྣམ་པར་ཐར་པའོ། །ཡང་ན་འདུ་ཤེས་ཐམས་ཅད་ལ་རྒྱབ་ཀྱིས་ཕྱོགས་པའི་ཕྱིར་རྣམ་པར་ཐར་པའོ། །སྙོམས་པར་འཇུག་པའི་སྒྲིབ་པ་ལས་རྣམ་པར་ཐར་པའི་ཕྱིར་རྣམ་པར་ཐར་པའོ་ཞེས་བྱ་བའི་ཐ་ཚིག་གོ། །དེ་ལ་
[307a.5]སྙོམས་པར་འཇུག་པའི་སྒྲིབ་པ་ནི་སྒྲིབ་པ་གང་ཞིག་ཡོད་ན་སེམས་ལས་སུ་མི་རུང་བས་ཁམས་གསུམ་པའི་འདོད་ཆགས་དང་བྲལ་བ་དག་གིས་ཀྱང་བསམ་གཏན་དང་པོའི་དངོས་གཞི་ཡང་སྐྱེད་པར་མི་བྱེད་པ་ཡིན་ནོ། །ཅི་རིགས་པར་ཞེས་བྱ་བ་ནི་གཉིས་ཀྱི་དམིགས་པ་ནི་རྣམ་པར་བསྔོས་པ་ལ་སོགས་
[307a.6]པའི་གཟུགས་ཡིད་དུ་མི་འོང་བ་འོ། །གསུམ་པའི་དམིགས་པ་ནི་ཡིད་དུ་མི་འོང་བའོ། །དེའི་རྒྱུ་དང་འགོག་པ་དག་ཅེས་བྱ་བ་ནི་སྡུག་བསྔལ་དེའི་ཀུན་འབྱུང་བ་དང་འགོག་པ་དག་གོ། །རྗེས་སུ་ཤེས་པའི་ཕྱོགས་དང་མཐུན་པའི་ལམ་ཐམས་ཅད་ཅེས་བྱ་བ་ནི་གོང་མ་དང་། འོག་མ་དང་། རང་གི་ས་པ་
[307a.7]ཞེས་བྱ་བའི་ཐ་ཚིག་གོ། །སོ་སོར་མ་བརྟགས་པས་འགོག་པ་ཡང་ཡིན་ནོ་ཞེས་བྱ་བ་ནི་སོ་སོར་མ་བརྟགས་པས་འགོག་པ་ཡང་གཟུགས་མེད་པའི་རྣམ་པར་ཐར་པ་རྣམས་ཀྱི་དམིགས་པ་ཡིན་ནོ་ཞེས་བརྗོད་པར་བྱ་སྟེ། གང་དག་གཟུགས་ཅན་མིན་དེ་དག །སྤྱོད་ཡུལ་གང་དང་རང་གི་སའི། །སྡུག་བསྔལ་
[307b]
[307b.1]སོགས་དང་རྗེས་ཤེས་ཕྱོགས། །ཞེས་བྱ་བ་འདིར་མ་སྨོས་པའི་ཕྱིར་རོ། །སྨྲས་པ་སོ་སོར་མ་བརྟགས་པས་འགོག་པ་གང་ཞིག་དེ་དག་གིས་དམིགས་པ་ཡིན་ཞེ་ན། འདིར་སྨྲས་པ། མི་སློབ་པའི་མཚན་མ་མེད་པའི་ཏིང་ངེ་འཛིན་གྱིས་སོ་སོར་མ་བརྟགས་པས་འགོག་པ་ལ་དམིགས་ཏེ། གཟུགས་
[307b.2]མེད་པའི་རྣམ་པར་ཐར་པ་དེ་དག་ནི་མཚན་མ་མེད་པ་མཚན་མ་མེད་པའི་ཏིང་ངེ་འཛིན་གྱི་ངོ་བོ་ཉིད་ཡིན་པ་སྲིད་པས་སོ། །དེ་དག་ཀྱང་ཉེར་བསྡོགས་བདུན་མ་གཏོགས་པས་གཞན་བཅུ་གཅིག་པོ་འདོད་པའི་ཁམས་དང་། མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་དང་། བསམ་གཏན་དང་
[307b.3]གཟུགས་མེད་པ་དག་ནི་བརྒྱད་ན་ཡོད་དོ། །བསྟན་བཅོས་ནི་ཁ་བསྐང་བ་དང་བཅས་པ་ཡིན་པས་བསྟན་བཅོས་ཀྱི་མཚན་ཉིད་བསྟན་པ་ཡིན་ནོ། །ནམ་མཁའ་ཡང་གཅིག་ཡིན་ནོ་ཞེས་བྱ་བར་བརྗོད་པར་བྱ་སྟེ། ནམ་མཁའ་མཐའ་ཡས་སྐྱེ་མཆེད་ཀྱི་དམིགས་པ་ཡིན་ནོ། །བསམ་གཏན་གཉིས་པའི་ས་པའི་ཁ་
[307b.4]དོག་གི་འདོད་ཆགས་མེད་པའི་ཕྱིར་ཞེས་བྱ་བ་ནི་སྤང་བར་བྱ་བ་བསམ་གཏན་གཉིས་པའི་ས་པའི་ཁ་དོག་གི་འདོད་ཆགས་མེད་པའི་ཕྱིར་ཞེས་བྱ་བའི་དོན་ཏོ། །དེ་མེད་པ་ནི་མིག་གི་རྣམ་པར་ཤེས་པ་མེད་པའི་ཕྱིར་རོ། །བདེ་བའི་སྙིང་པོས་བསྐྱེད་པའི་ཕྱིར་རོ་ཞེས་བྱ་བ་ལ། བདེ་བའི་སྙིང་པོ་ནི་བདེ་བ་ཐམས་
[307b.5]ཅད་ཀྱི་གོང་ན་འདུག་པའོ་ཞེས་བྱ་བའི་ཐ་ཚིག་གོ། །དེས་བསྐྱེད་པའི་ཕྱིར་ཏེ། གཡོ་བར་བྱས་པའི་ཕྱིར་བསམ་གཏན་གསུམ་པ་ལ་རྣམ་པར་ཐར་པ་རྣམ་པར་མི་གཞག་གོ། །གལ་ཏེ་བསམ་གཏན་གསུམ་པའི་ས་པའི་ཁ་དོག་གི་འདོད་ཆགས་མེད་ན། ཅིའི་ཕྱིར་སྡུག་པའི་རྣམ་པར་ཐར་པ་སྐྱེད་པར་བྱེད་
[307b.6]ཅེ་ན་དེའི་ཕྱིར་མི་སྡུག་པས་རྒྱུད་ཞུམ་པར་རབ་ཏུ་དགའ་བར་བྱ་བའམ། རྟག་པའི་ཕྱིར་ཏེ་ཞེས་བྱ་བ་སྨོས་སོ། །རྣམ་པར་ཐར་པ་ལ་སོགས་པ་ཞེས་བྱ་བ་ལ། སོགས་པ་ཞེས་བྱ་བའི་སྒྲས་ནི་ཟིལ་གྱིས་གནོན་པའི་སྐྱེ་མཆེད་ལ་སོགས་པ་ཉེ་བར་བསྡུའོ། །འཕགས་པའི་རྫུ་འཕྲུལ་ཅི་ཞེ་ན། མངོན་པར་བསྒྲུབ་པའི་
[307b.7]ཆེད་དུ་ཞེས་བྱ་བར་སྐབས་དང་སྦྱར་རོ། །ཉོན་མོངས་པ་ཐག་བསྲིང་བའི་ཕྱིར་ཞེས་བྱ་བ་ནི་རྣམ་པར་ཐར་པ་ལ་སོགས་པ་ཐག་བསྲིང་བའི་གཉེན་པོ་ཡིན་པའི་ཕྱིར་རོ། །སྙོམས་པར་འཇུག་པ་ལ་དབང་བར་བྱ་བའི་ཕྱིར་ཞེས་བྱ་བ་ནི་སྙོམས་པར་འཇུག་པ་ལ་དབང་བ་ཉིད་དེ་ཡང་ཉོན་མོངས་པ་མེད་པ་ལ་སོགས་
[308a]
[308a.1]པའི་ཡོན་ཏན་མངོན་པར་བསྒྲུབ་པའི་ཆེད་ཡིན་ནོ། །དེ་ཡང་གང་གིས་དངོས་པོ་ཡོངས་སུ་བསྒྱུར་བ་དང་བྱིན་གྱིས་རློབ་པ་དང་ཚེ་གཏོང་བ་ལ་སོགས་པ་བྱེད་པའོ་ཞེས་བྱ་བ་ནི་དེ་ལ་དངོས་པོ་ཡོངས་སུ་བསྒྱུར་བ་ནི་དངོས་པོ་གང་ཞིག་ལ་ཇི་ལྟར་མོས་པ་དེ་ཁོ་ན་བཞིན་དུ་དེར་འགྱུར་བ་སྟེ། ཇི་ལྟར་
[308a.2]གསེར་ལ་སར་བྱ་བ་དེ་ལྟར་མོས་པའི་ཕྱིར་རོ། །བྱིན་གྱིས་རློབ་པ་ནི་དངོས་པོ་བསྟན་པ་ལ་དུས་འདི་སྲིད་དུ་གནས་པར་གྱུར་ཅིག་སྙམ་པ་སྟེ། ཚེ་གཏོང་བ་ཡང་དེ་དང་འདྲའོ། །སོགས་པ་ཞེས་བྱ་བའི་སྒྲས་ནི་རི་རབ་རྡུལ་ཕྲ་རབ་ཀྱི་ནང་དུ་འཛུད་པ་ཞེས་བྱ་བ་དེ་ལྟ་བུ་ལ་སོགས་པ་སྟེ། གཞན་ཡང་མདོ་སྡེ་ལས་བལྟ་
[308a.3]བར་བྱའོ། །ཅིའི་ཕྱིར་གསུམ་པ་དང་བརྒྱད་པ་དག་ཁོ་ན་མངོན་སུམ་དུ་བྱ་བར་བཤད་ལ་གཞན་དག་ནི་མ་ཡིན་ཞེས་བྱ་བ་ལ། ཇི་ལྟར་གསུམ་པ་མངོན་སུམ་དུ་བྱ་བར་བཤད་ཅེ་ན། སྡུག་པའི་རྣམ་པར་ཐར་པ་ལུས་ཀྱིས་མངོན་སུམ་དུ་བྱས་ནས་རྫོགས་པར་བྱས་ཏེ་གནས་པ་ཞེས་འབྱུང་ངོ་། །བརྒྱད་པ་ཡང་འདུ་ཤེས་དང་
[308a.4]ཚོར་བ་འགོག་པ་ལུས་ཀྱིས་མངོན་སུམ་དུ་བྱས་ནས་རྫོགས་པར་བྱས་ཏེ་གནས་པ་ཞེས་འབྱུང་བས་སོ། །དེ་ལ་མངོན་སུམ་དུ་བྱས་ནས་ཞེས་བྱ་བ་ནི་མངོན་སུམ་དུ་བྱས་ཏེ་ཞེས་བྱ་བའི་ཐ་ཚིག་གོ། །རྫོགས་པར་བྱས་ཏེ་གནས་པ་ཞེས་བྱ་བ་ནི་ཏིང་ངེ་འཛིན་དེ་དག་ལ་སྙོམས་པར་ཞུགས་ཏེ་གནས་པ་ཞེས་བྱ་བའི་དོན་ཏོ་
[308a.5]ཞེ་ན་འདིར་སྨྲས་པ། རྣམ་པར་ཐར་པ་དང་པོ་དང་གཉིས་པ་བས་རྣམ་པར་ཐར་པ་གསུམ་པ་གནས་གྱུར་པའི་སྒོ་ནས་གཟུགས་ཅན་གྱི་རྣམ་པར་ཐར་པའི་སྒྲིབ་པ་མཐའ་དག་སྤངས་པས་གཙོ་བོ་ཡིན་པའི་ཕྱིར་གསུམ་པ་མངོན་སུམ་དུ་བྱ་བར་བཤད་དོ། །དེ་བཞིན་དུ་བརྒྱད་པ་ཡང་གནས་གྱུར་པའི་སྒོ་ནས་གཟུགས་
[308a.6]མེད་པའི་རྣམ་པར་ཐར་པའི་སྒྲིབ་པ་མཐའ་དག་སྤངས་པའི་ཕྱིར་གཙོ་བོ་ཡིན་པས་མངོན་དུ་བྱ་བར་བཤད་དོ། །ཁམས་དང་སའི་མཐའ་ན་གནས་པའི་ཕྱིར་རོ་ཞེས་བྱ་བ་ནི་བསམ་གཏན་བཞི་པ་ནི་གཟུགས་ཀྱི་ཁམས་དང་སའི་མཐའ་ན་གནས་པ་ཡིན་ལ་སྲིད་པའི་རྩེ་མོ་ཡང་གཟུགས་མེད་པའི་ཁམས་དང་སའི་
[308a.7]མཐའ་ན་གནས་པ་ཡིན་ནོ། །དེ་བཞིན་དུ་ཆེན་པོ་རྣམས་དང་ཞེས་བྱ་བ་ནི་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆེན་པོ་ཁ་དོག་བཟང་པོ་དང་ཁ་དོག་ངན་པ་རྣམས་ལ་ལྟ་ཞིང་ཞེས་བྱ་བ་ནས་རྒྱས་པར་འདི་ནི་ཟིལ་གྱིས་གནོན་པའི་སྐྱེ་མཆེད་གཉིས་པའོ་ཞེས་བྱ་བའི་བར་འབྱུང་བའོ། །དེ་ཁོ་ན་བཞིན་
[308b]
[308b.1]དུ་ནང་གཟུགས་མེད་པར་འདུ་ཤེས་པ་ཞེས་བྱ་བ་ཇི་ལྟ་བུ་ཞེ་ན། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་ཁ་དོག་བཟང་པོ་དང་ཁ་དོག་ངན་པ་རྣམས་ཞེས་བྱ་བ་ནས་འདི་ནི་ཟིལ་གྱིས་གནོན་པའི་སྐྱེ་མཆེད་གསུམ་པའོ་ཞེས་བྱ་བའི་བར་སྔ་མ་བཞིན་ནོ། །དེ་བཞིན་དུ་ནང་གཟུགས་མེད་པར་
[308b.2]འདུ་ཤེས་པས་ཕྱི་རོལ་གྱི་གཟུགས་ཆེན་པོ་ཁ་དོག་བཟང་པོ་དང་ཁ་དོག་ངན་པ་རྣམས་ལ་ལྟ་ཞིང་ཞེས་བྱ་བ་ནས་འདི་ནི་ཟིལ་གྱིས་གནོན་པའི་སྐྱེ་མཆེད་བཞི་པའོ་ཞེས་བྱ་བའི་བར་སྔ་མ་བཞིན་ཏེ། དེ་ལྟར་བཞི་པོ་དེ་དག་དང་། གཟུགས་མེད་པར་འདུ་ཤེས་པ་ཁོ་ན་སྔོན་པོ་དང་སེར་པོ་དང་དམར་པོ་
[308b.3]དང་དཀར་པོ་རྣམས་ལ་ལྟ་སྟེ་ཞེས་བྱ་བའོ། །ཇི་ལྟ་བུ་ཞེ་ན། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སྔོན་པོ་ཁ་དོག་སྔོན་པོ་སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ་དཔེར་ན་ཟར་མའི་མེ་ཏོག་གམ། ཡུལ་བཱ་རཱ་ཎ་སཱིའི་རས་ཕུན་སུམ་ཚོགས་པ་སྔོན་པོ་ཁ་དོག་སྔོན་པོ་སྔོན་པོ་
[308b.4]ལྟ་བུར་སྟོན་པ། འོད་སྔོན་པོ་འབྱུང་བ་ལྟ་བུ་རྣམས་ལ་ལྟ་ཞིང་གཟུགས་དེ་དག་ཟིལ་གྱིས་མནན་ནས་ཤེས་ཟིལ་གྱིས་མནན་ནས་མཐོང་སྟེ། དེ་ལྟ་བུར་འདུ་ཤེས་པར་གྱུར་པ་འདི་ནི་ཟིལ་གྱིས་གནོན་པའི་སྐྱེ་མཆེད་ལྔ་པའོ། །ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སེར་པོ་ཁ་དོག་སེར་པོ་སེར་
[308b.5]པོ་ལྟ་བུར་སྟོན་པ་འོད་སེར་པོ་འབྱུང་བ་དཔེར་ན་དོང་ཀའི་མེ་ཏོག་གམ། ཡུལ་བཱ་རཱ་ཎ་སཱིའི་རས་ཕུན་སུམ་ཚོགས་པ་སེར་པོ་ཁ་དོག་སེར་པོ་སེར་པོ་ལྟ་བུར་སྟོན་པ་འོད་སེར་པོ་འབྱུང་བ་ལྟ་བུ་རྣམས་ལ་ལྟ་ཞིང་ཞེས་བྱ་བ་ནས་རྒྱས་པར་འདི་ནི་ཟིལ་གྱིས་གནོན་པའི་སྐྱེ་མཆེད་དྲུག་པའོ་ཞེས་བྱ་བའི་བར་དང་། ནང་གཟུགས་
[308b.6]མེད་པར་འདུ་ཤེས་པས་ཕྱི་རོལ་གྱི་གཟུགས་དམར་པོ་ཁ་དོག་དམར་པོ་དམར་པོ་ལྟ་བུར་སྟོན་པ་འོད་དམར་པོ་འབྱུང་བ་དཔེར་ན་བན་དུ་ཛི་བ་ཀའི་མེ་ཏོག་གམ། ཡུལ་བཱ་རཱ་ཎ་སཱིའི་རས་ཕུན་སུམ་ཚོགས་པ་དམར་པོ་ཁ་དོག་དམར་པོ་དམར་པོ་ལྟ་བུར་སྟོན་པ་འོད་དམར་པོ་འབྱུང་བ་རྣམས་ལ་ལྟ་ཞིང་ཞེས་བྱ་བ་
[308b.7]ནས་རྒྱས་པར་འདི་ནི་ཟིལ་གྱིས་གནོན་པའི་སྐྱེ་མཆེད་བདུན་པ་ཡིན་ནོ་ཞེས་བྱ་བའི་བར་དང་། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་དཀར་པོ་ཁ་དོག་དཀར་པོ་དཀར་པོ་ལྟ་བུར་སྟོན་པ་འོད་དཀར་པོ་འབྱུང་བ་དཔེར་ན་སྐར་མ་པ་བ་སངས་སམ། ཡུལ་བཱ་རཱ་ཎ་སཱིའི་རས་ཕུན་སུམ་
[309a]
[309a.1]ཚོགས་པ་དཀར་པོ་ཁ་དོག་དཀར་པོ་དཀར་པོ་ལྟ་བུར་སྟོན་པ། འོད་དཀར་པོ་འབྱུང་བ་རྣམས་ལ་ལྟ་ཞིང་ཞེས་བྱ་བ་ནས་རྒྱས་པར་འདི་ནི་ཟིལ་གྱིས་གནོན་པའི་སྐྱེ་མཆེད་བརྒྱད་པའོ་ཞེས་བྱ་བའི་བར་འབྱུང་སྟེ། སྔ་མ་བཞི་དང་འདི་བཞིན་བརྒྱད་དུ་འགྱུར་རོ། །གཉིས་ནི་རྣམ་པར་
[309a.2]ཐར་པ་དང་པོ་བཞིན་ཏེ་ཞེས་བྱ་བ་ནི་ཇི་ལྟར་རྣམ་པར་ཐར་པ་དང་པོ་གཟུགས་ཅན་གཟུགས་རྣམས་ལ་ལྟ་བ་ཞེས་བྱ་བ་བདག་ལ་ཡོད་པའི་གཟུགས་ལ་ལྟ་ཞིང་ཕྱི་རོལ་གྱི་གཟུགས་ལ་ལྟ་བ་ལྟར་ཟིལ་གྱིས་གནོན་པའི་སྐྱེ་མཆེད་དང་པོ་དག་ཀྱང་དེ་དང་འདྲའོ། །དེ་གཉིས་ལས་གཅིག་ནི་བདག་ཡོད་པའི་
[309a.3]གཟུགས་ལ་ལྟ་ཞིང་ཕྱི་རོལ་ན་ཡོད་པའི་གཟུགས་ལ་ལྟ་སྟེ་འདི་སྐད་དུ་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་ཞེས་བྱ་བ་རྒྱས་པར་འབྱུང་ངོ་། །གཉིས་པ་ཡང་དེ་ཁོ་ན་དང་འདྲ་སྟེ། ཁྱད་པར་ནི་ཕྱི་རོལ་གྱི་གཟུགས་ཆེན་པོ་རྣམས་ལ་ལྟ་བ་ཞེས་བྱ་བ་འདི་ཡོད་དོ། །གཞན་ཡང་
[309a.4]ཇི་ལྟར་རྣམ་པར་ཐར་པ་དང་པོ་བསམ་གཏན་དང་པོའི་ས་པ་དང་། འདོད་པ་ན་སྤྱོད་པའི་ཁ་དོག་གི་འདོད་ཆགས་ཀྱི་གཉེན་པོ་དང་། འདོད་པ་ན་སྤྱོད་པའི་གཟུགས་ཀྱི་སྐྱེ་མཆེད་ལ་དམིགས་པ་ཡིན་པ་ལྟར་ཟིལ་གྱིས་གནོན་པའི་སྐྱེ་མཆེད་འདི་དག་ཀྱང་དེ་དང་འདྲ་བར་རིག་པར་བྱའོ། །གཉིས་ནི་གཉིས་
[309a.5]པ་བཞིན་ནོ་ཞེས་བྱ་བ་ནི་ཇི་ལྟར་རྣམ་པར་ཐར་པ་གཉིས་པའི་མཚན་ཉིད་ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་ཞེས་བྱ་བ་དེ་ལྟ་བུ་ཡིན་པ་ལྟར་ཟིལ་གྱིས་གནོན་པའི་སྐྱེ་མཆེད་གསུམ་པ་དང་། བཞི་པ་དག་ཀྱང་དེ་དང་མཚན་ཉིད་དེ་དང་འདྲ་སྟེ། དེ་དག་ཀྱང་འདི་
[309a.6]སྐད་དུ་འབྱུང་སྟེ། གསུམ་པ་ནི་ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་ཁ་དོག་བཟང་པོ་དང་ཁ་དོག་ངན་པ་རྣམས་ལ་ལྟ་ཞེས་འབྱུང་ངོ་། །བཞི་པ་ནི་ནང་གཟུགས་མེད་པར་ཡང་འདུ་ཤེས་པས་ཕྱི་རོལ་གྱི་གཟུགས་ཆེན་པོ་ཁ་དོག་བཟང་པོ་དང་ཁ་དོག་ངན་པ་རྣམས་ལ་
[309a.7]ལྟ་ཞིང་ཞེས་འབྱུང་ངོ་། །གཞན་ཡང་ཇི་ལྟར་རྣམ་པར་ཐར་པ་གཉིས་པ་བསམ་གཏན་གཉིས་པའི་ས་པ་དང་བསམ་གཏན་དང་པོའི་ས་པའི་ཁ་དོག་གི་འདོད་ཆགས་ཀྱི་གཉེན་པོ་དང་གཟུགས་ན་སྤྱོད་པའི་གཟུགས་ལ་དམིགས་པ་ཡིན་པ་ལྟར་ཟིལ་གྱིས་གནོན་པའི་སྐྱེ་མཆེད་གསུམ་པ་དང་བཞི་པ་
[309b]
[309b.1]ཡང་དེ་དང་འདྲའོ། །གཞན་སྡུག་པའི་རྣམ་པར་ཐར་པ་བཞིན་ཞེས་བྱ་བ་ནི་ཇི་ལྟར་སྡུག་པའི་རྣམ་པར་ཐར་པ་བསམ་གཏན་བཞི་པའི་ས་པ་དང་། གཟུགས་ན་སྤྱོད་པའི་གཟུགས་ཀྱི་སྐྱེ་མཆེད་ཡིད་དུ་འོང་བ་ལ་དམིགས་པ་ཡིན་པ་ལྟར་སྔོན་པོ་དང་དམར་པོ་དང་སེར་པོ་དང་དཀར་པོ་ཟིལ་གྱིས་གནོན་པའི་སྐྱེ་
[309b.2]མཆེད་དག་ཀྱང་དེ་དང་འདྲ་སྟེ། འདིར་ནི་ཁ་དོག་བཞི་ཅན་རྣམ་པར་ཕྱེ་ནས་བཟུང་བ་འབའ་ཞིག་ཏུ་ཟད་དོ། །སྡུག་པའི་རྣམ་པར་ཐར་པའི་ངོ་བོ་ཉིད་མ་ཆགས་པ་ཡིན་པ་ལྟར་འདི་དག་གི་ཡང་དེ་དང་འདྲའོ། །ཇི་ལྟར་སྡུག་པའི་རྣམ་པར་ཐར་པ་འདི་འཁོར་དང་བཅས་པར་བཟུང་བས་ཕུང་པོ་ལྔའི་རང་
[309b.3]བཞིན་ཡིན་པ་ལྟར་འདི་དག་ཀྱང་དེ་དང་འདྲ་བར་ཁོང་དུ་ཆུད་པར་བྱའོ། །དེ་དག་གིས་ནི་རྒྱབ་ཀྱིས་ཕྱོགས་པ་ཙམ་དུ་ཟད་ལ་ཞེས་བྱ་བ་ནི་དམིགས་པ་ཟིལ་གྱིས་གནོན་པ་མ་ཡིན་པའོ། །ཇི་ལྟར་ན་ཟིལ་གྱིས་གནོན་པའི་སྐྱེ་མཆེད་དག་གིས་དམིགས་པ་ཟིལ་གྱིས་གནོན་ཅེ་ན། དེའི་ཕྱིར་ཇི་ལྟར་འདོད་
[309b.4]པ་བཞིན་དུ་མོས་པའི་ཕྱིར་ཞེས་བྱ་བ་སྨོས་ཏེ། དེ་དག་གིས་སྔོན་པོ་དང་སེར་པོ་ལ་སོགས་པར་མོས་པའི་ཕྱིར་ཏེ། སྐད་ཅིག་ལ་སྔོན་པོ་དང་སྐད་ཅིག་ལ་སེར་པོ་ཞེས་བྱ་བ་ལ་སོགས་པ་ལྟ་བུའམ་རྣམ་པར་བསྔོས་པ་ལ་སོགས་པ་ཡིད་དུ་མི་འོང་བ་ཡིད་དུ་འོང་བར་མོས་པའི་ཕྱིར་རོ། །ཉོན་མོངས་པ་མི་སྐྱེ་བའི་
[309b.5]ཕྱིར་རོ་ཞེས་བྱ་བ་ནི་ཀུན་ནས་ཉོན་མོངས་པའི་དངོས་པོ་ལ་སྡུག་པར་དམིགས་ཀྱང་ཉོན་མོངས་པ་མི་སྐྱེ་བའི་ཕྱིར་ཟིལ་གྱིས་གནོན་པའི་སྐྱེ་མཆེད་དེ་དག་གིས་དམིགས་པ་ཟིལ་གྱིས་གནོན་པ་ཡིན་ནོ། །བར་ཆད་མེད་པར་ཟད་པར་རྒྱས་པར་བྱེད་པའི་ཕྱིར་ཞེས་བྱ་བ་ནི་བར་ཆད་མེད་པར་ཟད་པར་ས་ལ་སོགས་པར་
[309b.6]རྒྱས་ཤིང་ཁྱབ་པར་བྱེད་པས་དེའི་ཕྱིར་ཟད་པར་གྱི་སྐྱེ་མཆེད་རྣམས་ཞེས་བྱའོ། །འདོད་པ་ན་སྤྱོད་པའི་གཟུགས་ཀྱི་སྐྱེ་མཆེད་ཡིན་ནོ་ཞེས་བྱ་བ་ནི། འཇིག་རྟེན་གྱི་ནི་ཐ་སྙད་དུ། །ཁ་དོག་དབྱིབས་ལ་ས་ཞེས་བརྗོད། །ཆུ་མེ་ཡང་ངོ་རླུང་ཚོགས་ཁམས། །ཉིད་ཡིན་དེ་དང་འདྲ་བའང་ཡིན། །ཞེས་འབྱུང་
[309b.7]བའི་ཕྱིར་རོ། །ཁ་ཅིག་ན་རེ་རླུང་གི་ནི་རེག་བྱའི་སྐྱེ་མཆེད་ཡིན་ནོ་ཞེས་ཟེར་རོ་ཞེས་བྱ་བ་ནི་གང་དག་རླུང་ལ་གཟུགས་ཀྱི་སྐྱེ་མཆེད་ཡིན་པར་མི་འདོད་པ་དེ་དག་ན་རེ་ཟད་པར་རླུང་གི་དམིགས་པ་ནི་རེག་བྱའི་སྐྱེ་མཆེད་ཡིན་ནོ་ཞེས་ཟེར་རོ། །རྣམ་པར་ཐར་པ་འཇུག་པ་ལས་བྱུང་བ་ཅན་ཡིན་ཞེས་བྱ་བ་ནི་འཇུག་པ་
[310a]
[310a.1]ཉིད་འཇུག་པ་ལས་བྱུང་བ་ཅན་ཡིན་པའམ་འཇུག་པ་ལས་བྱུང་བ་ཡིན་ནོ། །གོང་ནས་གོང་དུ་ཁྱད་པར་དུ་འཕགས་པའི་ཕྱིར་རོ་ཞེས་བྱ་བ་ནི་འདི་ལྟར་རྣམ་པར་ཐར་པ་དག་པས་གོང་མ་ཟིལ་གྱིས་གནོན་པའི་སྐྱེ་མཆེད་ཁྱད་པར་དུ་འཕགས་ལ་ཟིལ་གྱིས་གནོན་པའི་སྐྱེ་མཆེད་དག་པས་
[310a.2]གོང་མ་ཟད་པར་གྱི་སྐྱེ་མཆེད་ཁྱད་པར་དུ་འཕགས་ཏེ། འདི་སྐད་དུ་རྣམ་པར་ཐར་པ་དག་བསྐྱེད་ནས་ཟིལ་གྱིས་གནོན་པའི་སྐྱེ་མཆེད་རྣམས་སྐྱེད་པར་བྱེད་ལ། ཟིལ་གྱིས་གནོན་པའི་སྐྱེ་མཆེད་དག་བསྐྱེད་ནས་ཟད་པར་གྱི་སྐྱེ་མཆེད་རྣམས་སྐྱེད་པར་བྱེད་དོ་ཞེས་བཤད་པ་ཡིན་ནོ། །འགོག་པ་ལས་
[310a.3]གཞན་པའི་རྣམ་པར་ཐར་པ་ཞེས་བྱ་བ་ནི་དེ་ནི་གཅིག་ཏུ་འཕགས་པའི་རྒྱུད་ལ་ཡོད་པའི་ཕྱིར་རོ། །འདྲིས་པ་དང་མ་འདྲིས་པའི་ཕྱིར་རོ་ཞེས་བྱ་བ་ནི་འདོད་ཆགས་དང་བྲལ་བས་ཐོབ་པ་ནི་འདྲིས་པ་དག་ཡིན་ནོ། །སྦྱོར་བ་ལས་བྱུང་བ་ནི་མ་འདྲིས་པ་དག་ཡིན་ནོ། །ལྷག་མ་ཞེས་བྱ་བ་རྒྱས་པར་འབྱུང་བ་ལ་ལྷག་མ་
[310a.4]གང་ཞིག་ཡིན་ཞེ་ན། རྣམ་པར་ཐར་པ་དང་པོ་གསུམ་དང་། ཟིལ་གྱིས་གནོན་པའི་སྐྱེ་མཆེད་བརྒྱད་དང་། ཟད་པར་གྱི་སྐྱེ་མཆེད་བརྒྱད་དེ་དེ་དག་ནི་མིའི་རྟེན་ཅན་ཁོ་ན་ཡིན་ནོ། །ཅིའི་ཕྱིར་ཞེ་ན། ལུང་གི་མཐུས་སྐྱེད་པའི་ཕྱིར་ཏེ་ལྷ་ལ་སོགས་པ་གཞན་ན་ནི་ལུང་མེད་པའི་ཕྱིར་རོ། །ཇི་ལྟར་ན་གཟུགས་དང་
[310a.5]གཟུགས་མེད་པའི་ཁམས་དག་ཏུ་གཟུགས་མེད་པ་དང་བསམ་གཏན་གྱི་ཁྱད་པར་སྐྱེ་ཞེ་ན་ཞེས་བྱ་བ་ནི་གཟུགས་མེད་པའི་ཁམས་སམ། གཟུགས་ཀྱི་ཁམས་སུ་སྟེ། ས་གོང་དུ་སྐྱེས་པ་དེའི་གོང་མའི་བསམ་གཏན་དང་གཟུགས་མེད་པ་གང་ཡིན་པ་དེ་ནི་དེ་བས་ཁྱད་པར་དུ་འཕགས་པས་གཟུགས་མེད་པ་དང་
[310a.6]བསམ་གཏན་གྱི་ཁྱད་པར་རོ། །གཟུགས་མེད་པ་དང་བསམ་གཏན་གྱི་ཁྱད་པར་དེ་ལུང་མེད་པར་ཇི་ལྟར་སྐྱེད་དེ། ལྷག་མ་ནི་མིའི་རྟེན་ཅན་ཁོ་ན་ཡིན་ཏེ། ལུང་གི་མཐུས་སྐྱེད་པའི་ཕྱིར་རོ་ཞེས་བཤད་པས་དེའི་ཕྱིར་འབྲེལ་པ་དེས་ན་ཇི་ལྟར་ན་གཟུགས་དང་གཟུགས་མེད་པའི་ཁམས་དག་ཏུ་ཞེས་བྱ་བ་རྒྱས་པར་
[310a.7]འདྲིའོ། །རྒྱུའི་སྟོབས་ཀྱིས་ནི་ཉེ་བ་དང་ཡང་དང་ཡང་དུ་གོམས་པ་ལས་སོ་ཞེས་བྱ་བ་ནི་ཉེ་བ་ལས་དང་ཡང་དང་ཡང་དུ་གོམས་པ་ལས་སོ། །ཇི་ལྟ་ཞེ་ན། འགའ་ཞིག་གཟུགས་མེད་པའི་སྙོམས་པར་འཇུག་པ་ལ་མཉམ་པར་བཞག་ནས་དེ་ལས་ཡོངས་སུ་ཉམས་ཏེ་རྗེས་ཁོ་ན་ལ་གཟུགས་ཀྱི་
[310b]
[310b.1]ཁམས་སུ་སྐྱེ་ན་གཟུགས་མེད་པའི་སྙོམས་པར་འཇུག་པའི་མཚན་ཉིད་ཀྱི་སྐལ་བ་མཉམ་པའི་རྒྱུ་སྟོབས་དང་ལྡན་པའི་ཕྱིར་དེ་ལ་གཟུགས་ཀྱི་ཁམས་སུ་གཟུགས་མེད་པའི་སྙོམས་པར་འཇུག་པ་སྐྱེའོ། །ཡང་དང་ཡང་དུ་གོམས་པ་ལས་ཀྱང་འགའ་ཞིག་གཟུགས་མེད་པའི་སྙོམས་པར་འཇུག་པ་
[310b.2]ལ་ཡང་དང་ཡང་དུ་མཉམ་པར་བཞག་ནས་དེ་ལས་ཡོངས་སུ་ཉམས་ཏེ། གཟུགས་ཀྱི་ཁམས་སུ་སྐྱེ་ན་དེའི་གཟུགས་མེད་པའི་སྙོམས་པར་འཇུག་པའི་མཚན་ཉིད་ཀྱི་སྐལ་བ་མཉམ་པའི་རྒྱུ་སྟོབས་དང་ལྡན་པའི་ཕྱིར་གཟུགས་ཀྱི་ཁམས་སུ་གཟུགས་མེད་པའི་སྙོམས་པར་འཇུག་པ་སྐྱེའོ། །དེ་བཞིན་དུ་རྣམ་
[310b.3]ཤེས་མཐའ་ཡས་སྐྱེ་མཆེད་ལས་ཡོངས་སུ་ཉམས་ཏེ། ནམ་མཁའ་མཐའ་ཡས་སྐྱེ་མཆེད་དུ་སྐྱེས་པ་ལ་ཡང་དེ་ཁོ་ན་བཞིན་དུ་དེའི་སྙོམས་པར་འཇུག་པ་སྐྱེ་སྟེ། དེའི་གོང་དུ་སྐྱེས་པ་ལ་ཡང་དེ་དང་འདྲའོ། །ལས་ཀྱི་སྟོབས་ཀྱིས་ནི་གཟུགས་ཀྱི་ཁམས་སུ་སྐྱེས་པ་ལ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱི་རྣམ་
[310b.4]པར་སྨིན་པ་ཉེ་བར་གནས་པའི་ཕྱིར་དེ་ལས་འདོད་ཆགས་དང་བྲལ་བ་དང་མཐུན་པའི་རྒྱུད་གནས་ཏེ། འོག་མ་ལས་འདོད་ཆགས་དང་མ་བྲལ་བས་ནི་གོང་མ་གཟུགས་མེད་པའི་ཁམས་སུ་སྐྱེ་བར་མི་ནུས་སོ། །དེ་བཞིན་དུ་གཟུགས་མེད་པའི་ཁམས་སུ་ཡང་ནམ་མཁའ་མཐའ་ཡས་སྐྱེ་མཆེད་དུ་སྐྱེས་པ་ལ་ལས་ཀྱི་
[310b.5]སྟོབས་ཀྱིས་ནི་ས་གོང་མ་པ་རྣམ་ཤེས་མཐའ་ཡས་སྐྱེ་མཆེད་ཀྱི་ས་པའི་ལས་ལན་གྲངས་གཞན་ལ་མྱོང་བར་འགྱུར་བའི་རྣམ་པར་སྨིན་པ་ཉེ་བར་གནས་པའི་ཕྱིར་དེ་ལས་འདོད་ཆགས་དང་བྲལ་བ་དང་མཐུན་པའི་རྒྱུད་གནས་ཏེ། འོག་མ་ལས་འདོད་ཆགས་དང་བྲལ་བས་ནི་གོང་དུ་སྐྱེ་བར་མི་ནུས་སོ། །རྒྱུ་དང་ལས་
[310b.6]ཀྱི་སྟོབས་དེ་དག་གིས་བསམ་གཏན་དང་པོ་ལ་སོགས་པར། བསམ་གཏན་གཉིས་པ་ལ་སོགས་པ་ཇི་ལྟར་སྐྱེ་ཞེ་ན། རྒྱུའི་སྟོབས་ཀྱིས་ནི་ཉེ་བ་དང་ཡང་དང་ཡང་དུ་གོམས་པ་ལས་སོ། །ལམ་གྱི་སྟོབས་ཀྱིས་ནི་ས་གོང་མའི་ཞེས་བྱ་བ་རྒྱས་པར་སྦྱར་བར་བྱའོ། །ཆོས་ཉིད་ཀྱིས་ཀྱང་ཞེས་བྱ་བ་ལ་
[310b.7]ཆོས་ཉིད་ཅེས་བྱ་བ་འདི་ཅི་ཞེ་ན། མདོ་སྡེ་པ་ཁ་ཅིག་ན་རེ་ཆོས་འཇུག་པ་ཤས་ཆེན་པོ་འདི་དག་ཉིད་སྔོན་གྱི་བསམ་གཏན་གྱི་བག་ཆགས་ཀྱི་དབང་གིས་དེ་སྐྱེས་པའི་ལུང་མེད་པར་བསམ་གཏན་སྐྱེ་བ་དང་མཐུན་པ་ནི་ཆོས་ཉིད་དེ། རང་བཞིན་དང་ངོ་བོ་ཉིད་ཡིན་ནོ་ཞེས་བྱ་བའི་ཐ་ཚིག་གོ་ཞེས་ཟེར་རོ། །བྱེ་བྲག་ཏུ་
[311a]
[311a.1]སྨྲ་བ་ཁ་ཅིག་ན་རེ་ཡང་། གཞན་ལས་དེའི་ལུང་མ་མནོས་པར་ཚེ་རབས་སྔ་མའི་སྐལ་བ་མཉམ་པའི་རྒྱུ་ལས་རྒྱུ་མཐུན་པའི་འབྲས་བུ་བསམ་གཏན་སྐྱེ་བ་ནི་ཆོས་ཉིད་ཡིན་ནོ་ཞེས་ཟེར་རོ། །དགེ་བའི་ཆོས་རྣམས་ཀྱི་འཇུག་པ་ཤས་ཆེ་བ་ཉིད་ཀྱི་ཕྱིར་ཞེས་བྱ་བ་ནི་འཇིག་པའི་དུས་དེ་ན་
[311a.2]དགེ་བའི་ལས་ཀྱི་ལམ་རྣམས་ཀྱི་ཞེས་བྱ་བའི་ཐ་ཚིག་སྟེ། འཇུག་པ་ནི་ཆོས་དེ་དག་ཉིད་ཀྱི་བྱེད་པ་གང་ཡིན་པའོ། །འདི་དག་ལ་འཇུག་པ་ཤས་ཆེ་ཞིང་མཆོག་ཏུ་གྱུར་པ་ཡོད་པས་ན་འཇུག་པ་ཤས་ཆེ་བ་དག་གོ། །དེའི་ངོ་བོ་ནི་ཉིད་དེ་དེའི་ཕྱིར་རོ། །འདི་སྐད་དུ་དགེ་བ་དེ་དག་བདག་ཉིད་མཆོག་ཏུ་གྱུར་པ་
[311a.3]ཐོབ་པའི་ཕྱིར་ཏེ། དེ་སྐྱེ་བ་དང་མཐུན་པའི་བདག་ཉིད་དུ་རེད་པའི་ཕྱིར་གཞན་ལས་ལུང་མནོས་པ་མེད་པར་སྔོན་གྱི་བསམ་གཏན་གྱི་བག་ཆགས་ཡོད་ན་བསམ་གཏན་སྐྱེའོ་ཞེས་བཤད་པ་ཡིན་ནོ། །ཆོས་རྣམས་ཀྱི་རྣམ་པ་འདི་ལྟ་བུ་ཞེས་བྱ་བ་ནི་ཟག་པ་དང་བཅས་པ་དང་ཟག་པ་མེད་པའི་ཆོས་རྣམས་ཀྱི་
[311a.4]རྣམ་པ་ཁམས་དང་ས་དང་། དམིགས་པ་དང་རྣམ་པ་ལ་སོགས་པ་སྟེ་ཅི་རིགས་པ་ཞེས་བྱ་བའི་ཐ་ཚིག་གོ། །དེ་འཛིན་བྱེད་པ་སྨྲ་བྱེད་དང་། །སྒྲུབ་པར་བྱེད་པ་ཁོ་ན་ཡིན། །ཞེས་བྱ་བ་ནི་ལུང་དང་རྟོགས་པའི་བདག་ཉིད་ཀྱི་དམ་པའི་ཆོས་དེ་སྟེ་གྲངས་བཞིན་དུ་ལུང་ནི་སྨྲ་བར་བྱེད་པ་གང་དག་ཡིན་པ་དེ་དག་དེ་འཛིན་པར་བྱེད་པ་ཡིན་ལ།
[311a.5]རྟོགས་པ་ནི་སྒྲུབ་པར་བྱེད་པ་གང་དག་ཡིན་པ་དེ་དག་འཛིན་པར་བྱེད་པ་ཡིན་ནོ། །རྟོགས་པ་ནི་དེ་ལྟ་བུ་ཡིན་གྱི་ཞེས་བྱ་བ་ནི་ལོ་སྟོང་དུ་གནས་སོ་ཞེས་བྱ་བའོ། །ལུང་ནི་ཡུན་རིང་དུ་གནས་སོ་ཞེས་བྱ་བ་ནི་ལོ་སྟོང་གི་འོག་ཏུ་ཡང་ཞེས་བྱ་བའི་ཐ་ཚིག་སྟེ། ཕྱོགས་འདི་དག་ཉིད་རིགས་པར་ལྟའོ། །གང་
[311a.6]ཡིན་པའི་ཞེས་བྱ་བ་རྒྱས་པར་འབྱུང་བ་ནི་ཅི་ཆོས་མངོན་པའི་མཛོད་ཀྱི་མཚན་ཉིད་འདི་ལས་ཆོས་མངོན་པ་བཤད་པ་གང་ཡིན་པ་འདི་ཉིད་སྟོན་པས་ཆོས་མངོན་པ་ཡེ་ཤེས་ལ་འཇུག་པ་ལ་སོགས་པའི་མཚན་ཉིད་དུ་བཤད་དམ་ཞེ་ན། དེའི་ཕྱིར། བདག་གི་མངོན་པའི་ཆོས་འདི་ཕལ་ཆེར་ནི།
[311a.7]ཁ་ཆེ་བྱེ་བྲག་སྨྲ་བའི་ཚུལ་གྲུབ་བཤད། །ཅེས་བྱ་བ་འདི་རྒྱས་པར་སྨོས་ཏེ། ཁ་ཆེའི་ཡུལ་ན་འཁོད་པས་ན་ཁ་ཆེའོ། །བྱེ་བྲག་ཏུ་བཤད་པས་རྩེན་པས་ན་བྱེ་བྲག་ཏུ་སྨྲ་བའོ་ཞེས་དེ་ནི་རྣམ་པར་བཤད་ཟིན་ཏོ། །ཁ་ཆེ་ཡིན་ལ་བྱེ་བྲག་ཏུ་སྨྲ་བ་མ་ཡིན་པ་ཡང་ཡོད་དེ། འདུལ་བ་ཤེས་པ་ལ་སོགས་
[311b]
[311b.1]པ་དང་། མདོ་སྡེ་པ་བཙུན་པ་ལ་སོགས་པ་གང་དག་ཡིན་པའོ། །བྱེ་བྲག་ཏུ་སྨྲ་བ་ཡིན་ལ་ཁ་ཆེ་མ་ཡིན་པ་ཡང་ཡོད་དེ། ཉི་འོག་པའི་བྱེ་བྲག་ཏུ་སྨྲ་བ་གང་དག་ཡིན་པའོ། །དེ་བས་ན་ཁྱད་པར་གཉི་ག་སྨོས་ཏེ། བདག་གིས་ནི་འདིར་དེ་དག་གི་ལུགས་ཀྱི་གྲུབ་པའི་ཆོས་མངོན་པ་གང་ཡིན་པ་དེ་ཕལ་
[311b.2]ཆེར་བཤད་དོ། །ཤུགས་ཀྱིས་ན་གཞན་གྱི་ལུགས་ཀྱིས་གྲུབ་པ་ཡང་བསྟན་ཏོ་ཞེས་བཤད་པ་ཡིན་ནོ། །ཁ་ཆེ་བྱེ་བྲག་ཏུ་སྨྲ་བའི་ལུགས་སམ། གཞན་གྱི་ལུགས་ཀྱང་རུང་ཚིག་འདི་ལ་ཉེས་པར་ཟིན་པ་གང་ཡིན་པ་དེ་ནི་བདག་གིས་ཉེས་ཏེ་བདག་གི་སྐྱོན་ཡིན་ནོ། །ཅིའི་ཕྱིར་ཞེ་ན། དམ་
[311b.3]ཆོས་ཚུལ་ལ་ཚད་མ་ཐུབ་རྣམས་ཡིན། །ཞེས་བྱ་བ་སྨོས་ཏེ། རྟོགས་པ་དང་ལུང་གི་མཚན་ཉིད་ཀྱི་དམ་པའི་ཆོས་ཀྱི་ཚུལ་ལ་སྟེ་བརྗོད་པ་ལ་ཚད་མ་ནི་ཐུབ་པ་སངས་རྒྱས་བཅོམ་ལྡན་འདས་རྣམས་དང་། སངས་རྒྱས་ཀྱི་སྲས་འཕགས་པ་ཤཱ་རིའི་བུ་ལ་སོགས་པ་ཡིན་ཏེ། ཆོས་ཐམས་ཅད་
[311b.4]རྣམ་པ་ཐམས་ཅད་དུ་རྟོགས་པར་བྱ་བ་ལ་ཐུགས་གཅུགས་པ་དག་ཅེས་བྱ་བའི་ཐ་ཚིག་གོ། །སྟོན་པ་འཇིག་རྟེན་མིག་ནི་ཟུམ་གྱུར་ཅིང་། །ཞེས་བྱ་བ་ནི་འཇིག་རྟེན་གྱི་ཁམས་ཀྱི་མིག་ཏུ་གྱུར་པ་ལམ་དང་ལམ་མ་ཡིན་པ་ཡང་དག་པར་སྟོན་པར་བྱེད་པ་བཅོམ་ལྡན་འདས་ཡོངས་སུ་མྱ་ངན་
[311b.5]ལས་འདས་ཤིང་སྟེ། འདིས་ནི་འཇིག་རྟེན་ལོང་བར་གྱུར་པ་ཉིད་སྟོན་ཏོ། །དཔང་གྱུར་སྐྱེ་བོ་ཕལ་ཆེར་ཟད་པ་ན། །ཞེས་བྱ་བ་ལ། དཔང་དུ་གྱུར་པ་ནི་མངོན་སུམ་དུ་མཐོང་བ་སྟེ། བཅོམ་ལྡན་འདས་ཀྱི་དཔང་དུ་གྱུར་པའི་སྐྱེ་བོ་བཅོམ་ལྡན་འདས་ནི་ལམ་དང་ལམ་མ་ཡིན་པ་མཁྱེན་པ་ཡིན་
[311b.6]ནོ་ཞེས་བྱ་བར་དེ་ཁོ་ན་ཉིད་རྟོགས་པ་གྲོགས་སུ་གྱུར་པ་གང་ཡིན་པ་དེ་ཟད་ཅིང་ཡོངས་སུ་མྱ་ངན་ལས་འདས་པ་ན་མ་རིག་པའི་མུན་པས་དེ་ཁོ་ན་ཉིད་མ་མཐོང་བ་རང་དགར་གྱུར་པ་བཅོས་སུ་མི་བཏུབ་པ་རང་གི་ལྟ་བས་རྟོག་གེ་ངན་པར་ཞུགས་པ་ཁྱེད་ཅག་གིས་བཅོམ་ལྡན་འདས་ཀྱི་བསྟན་པ་
[311b.7]ཚིག་དང་དོན་གྱི་སྒོ་ནས་དཀྲུགས་སོ། །རང་བྱུང་རང་བྱུང་བསྟན་པ་གཅེས་འཛིན་རྣམས། །མཆོག་ཏུ་ཞིར་གཤེགས་འགྲོ་མགོན་མེད་པ་ན། །ཞེས་བྱ་བའི་ཚིགས་སུ་བཅད་པ་གཉིས་པ་འདིས་ནི་སྔར་བཤད་པའི་ཚིགས་སུ་བཅད་པའི་དོན་གྱི་གཏན་ཚིགས་ཀྱི་ངོ་བོ་ཉེ་བར་བཀོད་པ་ཡིན་ཏེ།
[312a]
[312a.1]སངས་རྒྱས་དང་སངས་རྒྱས་ཀྱི་སྲས་རྣམས་ཡོངས་སུ་མྱ་ངན་ལས་འདས་ཏེ། འགྲོ་བ་མགོན་མེད་པ་ན་བསྟན་པ་ནུབ་པར་བྱེད་པའི་རྒྱུ་ལྟ་བ་ལ་སོགས་པ་སྐྱོན་གྱི་དྲི་མ་རང་ཉམས་སུ་གྱུར་པས་དགའ་མགུར་རང་དགར་དེང་སང་འཇིག་རྟེན་འདི་ན་སྤྱོད་དོ། །དེ་བས་ན་དེ་
[312a.2]ལྟར་ལྐོག་མར་སྲོག་ཕྱིན་འདྲ་སྟེ་སྲོག་ལྐོག་མར་ཕྱིན་པ་དང་འདྲ་བར་ཞེས་བྱ་བའི་ཐ་ཚིག་གོ། །དེ་ཡང་རིག་ལ་སྐྱོན་རྣམས་ཀྱང་སྟོབས་དང་ལྡན་པའི་དུས་སུ་རིག་ནས་ཐར་པ་འདོད་པ་དག་གིས་བག་ཡོད་ཀྱིས་ཞེས་བྱ་བ་ཡིན་ནོ། །ཆོས་མངོན་པ་མཛོད་ཀྱི་འགྲེལ་བཤད་དོན་གསལ་བ་ཞེས་
[312a.3]བྱ་བ་སློབ་དཔོན་རྒྱལ་པོའི་སྲས་གྲགས་པའི་བཤེས་གཉེན་གྱིས་མཛད་པ་ལས་སྙོམས་པར་འཇུག་པ་བསྟན་པ་ཞེས་བྱ་བ་སྟེ་མཛོད་ཀྱི་གནས་བརྒྱད་པའོ།། །།བམ་པོ་དྲུག་ཅུ་པ། ཡང་ཅི་འདི་ལས་གཞན་ལ་ཐར་པ་ཡོད་དམ་ཞེས་བྱ་བ་ནི། ཐར་པ་འདོད་པ་དག་གིས་བག་ཡོད་གྱིས། །
[312a.4]ཞེས་འབྱུང་བས་དོན་གྱིས་ནི་སློབ་དཔོན་གྱིས་འདི་ཁོ་ན་ཐར་པའི་ཐབས་ཡིན་གྱི་འདི་ལས་ཐར་པའི་ཐབས་གཞན་མེད་དེ། དེ་ལྟ་བས་ན་ཐར་པ་འདོད་པ་རྣམས་ཀྱིས་འདི་ལ་བག་ཡོད་པར་བྱའོ་ཞེས་བཤད་པས། གླེང་བ་པོས་ཀྱང་ཅི་འདི་ལས་ཞེས་བྱ་བ་རྒྱས་པར་འདྲི་བ་ལ་མེད་དོ་ཞེས་བྱ་བ་
[312a.5]སྨྲས་སོ། །ཅིའི་ཕྱིར་ཞེ་ན། བདག་ཏུ་ལྟ་བའི་ཕྱིན་ཅི་ལོག་ལ་ཞེན་པ་ཉིད་ཀྱི་ཕྱིར་ཞེས་བྱ་བ་སྨོས་ཏེ། མུ་སྟེགས་ཅན་རྣམས་ནི་བདག་ཏུ་ལྟ་བའི་ཕྱིན་ཅི་ལོག་ལ་ཞེན་པ་ཡིན་པས་བདག་ཏུ་ལྟ་བ་ཕྱིན་ཅི་ལོག་ལ་ཞེན་པའོ། །དེའི་ངོ་བོ་ནི་ཉིད་དེ། དེའི་ཕྱིར་གཞན་ལ་ཐར་པ་མེད་དོ། །དོན་
[312a.6]འདི་ནི་བསྟོད་པ་བྱས་པས་ཀྱང་བཤད་དེ། ཡིད་ལ་ང་རུ་འཛིན་དང་བཅས་ན་སྐྱེ་རྒྱུན་ཞི་མ་འགྱུར། །བདག་ཏུ་ལྟ་བ་ཡོད་ན་སྙིང་ལས་ངར་འཛིན་མི་གཡོ་ལགས། །གང་ཕྱིར་འགྲོ་ལ་བདག་མེད་སྨྲ་བའི་སྟོན་པ་གཞན་མེད་པ། །དེའི་ཕྱིར་ཁྱོད་ཀྱི་ལུགས་ལས་ཉེར་ཞི་བྱེད་པའི་ལམ་གཞན་མེད། །
[312a.7]ཅེས་བྱ་བ་ཡིན་ནོ། །འདི་ལ་སྒྲུབ་པ་ནི་སེར་སྐྱ་དང་འུག་པ་པ་ལ་སོགས་པ་ལ་ནི་ཐར་པ་མེད་དེ། བདག་ཏུ་ལྟ་བ་ཕྱིན་ཅི་ལོག་ལ་ཞེན་པའི་ཕྱིར་དེ་ཁོ་ན་ཉིད་མ་མཐོང་བའི་སྐྱེས་བུ་བཞིན་ནོ། །ཉོན་མོངས་པ་རྣམས་ནི་བདག་ཏུ་འཛིན་པ་ལས་རབ་ཏུ་སྐྱེ་བ་ཡིན་ནོ་ཞེས་བྱ་བ་ནི་ཇི་སྐད་དུ་འཇིག་རྟེན་
[312b]
[312b.1]འདི་ན་དགེ་སྦྱོང་དང་བྲམ་ཟེ་ཁ་ཅིག་གི་ལྟ་བ་ཐ་དད་པར་གྱུར་པ་གང་དག་ཡིན་པ་དེ་དག་ནི་འཇིག་ཚོགས་ལ་ལྟ་བའི་རྩ་བ་ཅན་ཡིན་ནོ་ཞེས་རྒྱས་པར་འབྱུང་བ་ལྟ་བུ་སྟེ། བདག་ཏུ་ལྟ་བ་ཡོད་ན་བདག་ལ་ཆགས་པ་ལ་སོགས་པ་ཉོན་མོངས་པ་རྣམས་རབ་ཏུ་འབྱུང་ངོ་། །བདག་ཏུ་མངོན་པར་བརྗོད་པ་འདི་
[312b.2]ནི་ཕུང་པོའི་རྒྱུད་ཁོ་ན་ལ་འཇུག་གི་ཞེས་བྱ་བ་ལ། བདག་ཏུ་མངོན་པར་བརྗོད་པ་ནི་བདག་ཏུ་འདོགས་པ་ཞེས་བྱ་བའི་ཐ་ཚིག་གོ། །བརྗོད་པར་བྱ་བ་གཞན་ལ་ནི་མ་ཡིན་ནོ་ཞེས་བྱ་བ་ནི་ཕུང་པོའི་རྒྱུད་ལས་གཞན་པ་བརྟགས་པ་ལ་ནི་ཞེས་བྱ་བའི་དོན་ཏོ། །ཅིའི་ཕྱིར་དེ་ལྟར་ཡིན་ཞེ་ན། མངོན་སུམ་དང་
[312b.3]རྗེས་སུ་དཔག་པ་མེད་པའི་ཕྱིར་ཞེས་བྱ་བ་སྨོས་ཏེ། མངོན་སུམ་དང་རྗེས་སུ་དཔག་པ་མེད་པའི་ཕྱིར་དེ་མེད་པ་ཉིད་དོ་སྙམ་དུ་བསམས་པ་ཡིན་ནོ། །ལུང་ནི་རྗེས་སུ་དཔག་པའི་ནང་དུ་འདུས་པའི་ཕྱིར་ལོགས་ཤིག་ཏུ་མ་བརྗོད་དོ། །དེ་དག་ནི་བར་ཆད་བྱེད་པ་མེད་ན་མངོན་སུམ་དུ་དམིགས་
[312b.4]པ་ཡིན་ཏེ་ཞེས་བྱ་བ་ལ་བར་ཆད་བྱེད་པ་མེད་ན་ཞེས་བྱ་བ་ནི་དམིགས་པའི་བགེགས་བྱེད་པ་ཧ་ཅང་ཉེ་བ་དང་ཧ་ཅང་རིང་བ་ལ་སོགས་པ་མེད་ནའོ། །མངོན་སུམ་ཞེས་བྱ་བ་ནི་དམིགས་པའི་ཁྱད་པར་ཡིན་ཏེ། མངོན་སུམ་ཉིད་དུ་དམིགས་པ་ཞེས་བྱ་བའི་ཐ་ཚིག་གོ། །ཡང་ན་དམིགས་པ་
[312b.5]ནི་མངོན་སུམ་གྱི་ཚད་མ་ཡིན་ཏེ་འདིས་དམིགས་པར་བྱེད་པས་ན་དམིགས་པའོ། །ཡུལ་དྲུག་ཅེས་བྱ་བ་ནི་གཟུགས་དང་སྒྲ་དང་དྲི་དང་རོ་དང་རེག་བྱའི་སྐྱེ་མཆེད་རྣམས་དང་ཆོས་ཀྱི་སྐྱེ་མཆེད་ཚོར་བ་ལ་སོགས་པའི་མཚན་ཉིད་དང་རྣལ་འབྱོར་པའི་ཡུལ་ལུང་དང་རྣམ་པར་རྟོག་པ་ལས་འདས་
[312b.6]པའོ། །ཡིད་ཅེས་བྱ་བ་ཅི་ཞེ་ན་མངོན་སུམ་དུ་དམིགས་པ་ཡིན་ཏེ། འགགས་མ་ཐག་པའི་ཡིད་ནི་མཇུག་ཐོགས་སུ་བྱུང་བའི་ཡིད་ཀྱི་རྣམ་པར་ཤེས་པས་ཆགས་པའམ་སྡང་བའམ། བདེ་བ་དང་མཚུངས་པར་ལྡན་པའམ། སྡུག་བསྔལ་དང་མཚུངས་པར་ལྡན་པ་ཞེས་བྱ་བ་དེ་ལྟ་བུ་ལ་
[312b.7]སོགས་པ་རྣམ་པར་ཤེས་སོ། །གཞན་དག་ན་རེ་རང་རིག་པས་དམིགས་སུ་ཞེས་ཟེར་རོ། །མངོན་སུམ་རྣམ་པ་གཉིས་པོ་འདི་ནི་གཟུང་བའི་རྣམ་པ་དང་འཛིན་པའི་རྣམ་པ་ཡིན་ནོ། །ཡང་ན་རྗེས་སུ་དཔག་པས་ཞེས་བྱ་བ་རྒྱས་པར་འབྱུང་བ་ནི་གང་དུ་མངོན་སུམ་མི་འཇུག་པ་དེར་ནི་རྗེས་
[313a]
[313a.1]སུ་དཔག་པས་དམིགས་པ་ཡིན་ནོ། །དཔེར་ན་དབང་པོ་ལྔ་ལྟ་བུའོ་ཞེས་བྱ་བ་ནི་མིག་གི་དབང་པོ་ལ་སོགས་པ་ལྟ་བུའོ། །རྒྱུ་ཞིང་དང་ཆུ་ལ་སོགས་པ་ཡོད་ཀྱང་རྒྱུ་གཞན་ས་བོན་གྱི་མཚན་ཉིད་མེད་ན་འབྲས་བུ་མེད་པར་མཐོང་ལ་ས་བོན་དེ་ཡོད་ན་ནི་ཡང་མྱུ་གུ་ཡོད་པར་
[313a.2]མཐོང་ངོ་། །དཔེར་ན་མྱུ་གུ་ལྟ་བུའོ་ཞེས་བྱ་བ་ནི་དཔེ་ཉེ་བར་བཀོད་པ་ཡིན་ནོ། །དེ་ལྟར་དཔེ་ཉེ་བར་བཀོད་ནས་དངོས་བསྟན་པའི་ཕྱིར་ཡུལ་སྣང་བར་གྱུར་པ་དང་རྒྱུ་ཡིད་ལ་བྱེད་པ་ཡོད་ཀྱང་ཞེས་བྱ་བ་རྒྱས་པར་སྨོས་ཏེ། ཡུལ་གཟུགས་ལ་སོགས་པ་མངོན་སུམ་དུ་གྱུར་པ་དང་། དེ་སྐྱེད་པ་རྒྱུ་ཡིད་
[313a.3]ལ་བྱེད་པ་ཡོད་དུ་ཟིན་ཀྱང་ཡུལ་འཛིན་པ་མིག་གི་རྣམ་པར་ཤེས་པ་ལ་སོགས་པ་མེད་པར་མཐོང་ལ་ཡང་ཡོད་པར་མཐོང་ངོ་། །གང་དག་གི་ཞེ་ན། གྲངས་བཞིན་དུ་སྟོན་ཏེ། ལོང་བ་དང་འོན་པ་ལ་སོགས་པའི་ནི་མེད་དོ། །མ་ལོང་བ་དང་མ་འོན་པ་ལ་སོགས་པའི་ཡོད་དོ། །སྩོགས་པ་ཞེས་བྱ་
[313a.4]བའི་སྒྲས་ནི་སྣའི་དབང་པོ་ལ་སོགས་པ་ཉམས་པའི་བསྡུའོ། །དེའི་ཕྱིར་དེ་ལ་ཡང་རྒྱུ་གཞན་མ་ངེས་པའི་ངོ་བོ་ཅི་ཞིག་གྲངས་བཞིན་དུ་མེད་པ་དང་ཡོད་པ་ཁོ་ནར་ངེས་སོ། །དེ་ཡང་ཅི་ཞིག་ཡིན་ཞེ་ན། སྨྲས་པ་ལྟོས་པར་བྱ་བའི་རྒྱུ་གཞན་གང་ཡིན་པ་དེ་ནི་དབང་པོ་སྟེ་མིག་ལ་སོགས་པ་ཡིན་ནོ་
[313a.5]སྙམ་དུ་བསམས་པ་ཡིན་ནོ། །འདི་ལ་སྒྲུབ་པ་ནི་རྣམ་པར་ཤེས་པ་ལྔའི་ཚོགས་སྐྱེད་པར་བྱེད་པར་འདོད་པ་ཡུལ་དང་ཡིད་ལ་བྱེད་པའི་མཚན་ཉིད་ཀྱི་དངོས་པོ་འདི་ནི་རྒྱུ་གཞན་དང་ལྷན་ཅིག་རང་གི་འབྲས་བུ་སྐྱེད་པར་བྱེད་པ་ཡིན་ཏེ། རེས་འགའ་ཁོ་ན་རང་གི་འབྲས་བུ་སྐྱེད་པར་བྱེད་པའི་ཕྱིར་རོ། །གང་ཞིག་རེས་
[313a.6]འགའ་ཁོ་ན་རང་གི་འབྲས་བུ་སྐྱེད་པར་བྱེད་པ་དེ་ནི་རྒྱུ་གཞན་དང་ལྷན་ཅིག་རང་གི་འབྲས་བུ་སྐྱེད་པར་བྱེད་པ་ཡིན་ནོ། །དཔེར་ན་མྱུ་གུ་སྐྱེད་པར་བྱེད་པ་ཞིང་དང་ཆུ་དང་ས་བོན་གྱི་མཚན་ཉིད་ཀྱི་རྒྱུ་གཞན་དང་ལྷན་ཅིག་རང་གི་འབྲས་བུ་མྱུ་གུ་སྐྱེད་པར་བྱེད་པ་རེས་འགའ་ཁོ་ན་རང་གི་འབྲས་བུ་སྐྱེད་
[313a.7]པར་བྱེད་པ་ལྟ་བུ་སྟེ། ས་བོན་ཡོད་པའི་གནས་སྐབས་ན་མྱུ་གུ་སྐྱེད་པར་བྱེད་པའི་ཕྱིར་དང་། ས་བོན་མེད་པའི་གནས་སྐབས་ན་རང་གི་འབྲས་བུ་སྐྱེད་པར་མི་བྱེད་པའི་ཕྱིར་རོ། །ཡུལ་དང་ཡིད་ལ་བྱེད་པའི་མཚན་ཉིད་ཀྱི་དངོས་པོ་དེ་ཡང་དེ་དང་འདྲ་སྟེ། དེ་ནི་མ་ལོང་བ་དང་མ་འོན་པའི་
[313b]
[313b.1]གནས་སྐབས་ན་ནི་རང་གི་འབྲས་བུ་རྣམ་པར་ཤེས་པ་ལྔའི་ཚོགས་ཀྱི་མཚན་ཉིད་སྐྱེད་པར་བྱེད་པ་ཡིན་ལ། ལོང་བ་དང་འོན་པའི་གནས་སྐབས་ན་ནི་སྐྱེད་པར་བྱེད་པ་མ་ཡིན་ནོ། །དེ་ལྟ་བས་ན་འདི་ནི་རྒྱུ་གཞན་དང་ལྷན་ཅིག་འབྲས་བུ་སྐྱེད་པར་བྱེད་པ་ཡིན་ནོ། །དེ་ནི་དབང་པོ་ཡིན་ནོ་ཞེས་བྱ་བ་ཇི་ལྟར་
[313b.2]ན་དེ་དབང་པོ་ཡིན་ནོ་ཞེས་བྱ་བར་ཡོངས་སུ་གཅོད་དེ། འདི་ལ་རྒྱུ་གཞན་ཞིག་ཡོད་དོ་ཞེས་བྱ་བ་དེ་ཁོ་ན་ཙམ་ཞིག་ཏུ་ཡོངས་སུ་གཅོད་ཀྱི་དེ་དབང་པོ་ཡིན་ནོ་ཞེས་བྱ་བར་ནི་མ་ཡིན་ནོ་ཞེ་ན་འདི་ནི་དྲང་སྲོང་ཆེན་པོའི་སྨོན་ནས་ཤེས་པའི་ཡོངས་སུ་བཅད་པའི་ཕྱིར་དང་། མིག་གི་རྣམ་པར་ཤེས་པ་ལ་
[313b.3]སོགས་པའི་རྒྱུ་མིག་གི་དབང་པོ་ལ་སོགས་པ་ཡོད་པ་ཉིད་དོ་ཞེས་བྱ་བ་ལ། ཐམས་ཅད་རྩོད་པ་མེད་པའི་ཕྱིར་གྲུབ་པ་ཁོ་ན་ཡིན་ནོ། །བདག་ནི་དེ་ལྟར་ཡོད་པ་མ་ཡིན་པས་བདག་མེད་དོ་ཞེས་བྱ་བ་ནི་མཇུག་སྡུད་པ་ཡིན་ནོ། །སྒྲུབ་པ་ནི་དོན་གྱིས་ན་འདི་སྐད་དུ་བདག་ནི་མེད་དེ། ཚད་མས་
[313b.4]མི་དམིགས་པའི་ཕྱིར་གཏན་མེད་པ་ལྟ་བུའོ་ཞེས་བཤད་པ་ཡིན་ནོ། །གལ་ཏེ་རྗེས་སུ་དཔག་པ་ཡོད་དེ་དེའི་ཕྱིར་གཏན་ཚིགས་མ་གྲུབ་པ་ཡིན་ནོ་ཞེ་ན་མ་ཡིན་ཏེ། དེ་བརྗོད་དགོས་པའི་ཕྱིར་རོ། །གལ་ཏེ་དེ་ཡོད་ན་དེ་སྨྲོས་ཤིག །ཚིག་ཙམ་གྱིས་ནི་གཏན་ཚིགས་འདི་མ་གྲུབ་པ་ཡིན་ནོ་
[313b.5]ཞེས་བཟློག་ཏུ་མི་རུང་ངོ་། །འོ་ན་གང་གནས་མའི་བུ་རྣམས་ཞེས་བྱ་བ་རྒྱས་པར་འབྱུང་བ་གནས་མའི་བུ་ནི་འཕགས་པ་མང་པོས་བཀུར་བའི་སྡེ་པ་དག་སྟེ། འདིས་ནི་བདག་ཏུ་ལྟ་བ་ཕྱིན་ཅི་ལོག་ལ་ཞེན་པ་ཉིད་ཀྱི་མཚན་ཉིད་ཀྱི་གཏན་ཚིགས་མ་ངེས་སོ་ཞེས་སྟོན་པར་བྱེད་དེ། གནས་མའི་བུ་
[313b.6]རྣམས་ནི་སངས་རྒྱས་པ་ཡིན་པའི་ཕྱིར་ཐར་པ་མི་འདོད་པ་མ་ཡིན་ནོ། །ཡང་ན་བདག་མེད་དོ་ཞེས་བྱ་བ་འདིས་ཕྱོགས་འདི་སྐྱོན་དང་བཅས་པ་ཡིན་ནོ་ཞེས་ཕྱོགས་སྔ་མ་འགལ་བར་སྟོན་ཏེ། གནས་མའི་བུའི་སྡེ་དག་རང་གི་ཕྱོགས་ཡིན་པས་སོ། །འདི་ནི་རེ་ཞིག་དཔྱད་པར་བྱ་བ་
[313b.7]ཡིན་ཏེ་ཞེས་བྱ་བ་ནི་དེའི་སྡེའི་གང་ཟག་བཏགས་པར་ཡོད་པ་ཡིན་པས་ཉེས་པ་མེད་དོ་སྙམ་དུ་བསམས་པའོ། །རྫས་སུ་ཞེས་བྱ་བ་ནི་ཅི་ཞིག་བཏགས་པར་ཞེས་བྱ་བ་འདི་ཡང་ཅི་ཞིག་ཡིན་ཞེས་གླེངས་པ་དང་། སློབ་དཔོན་གྱིས་གལ་ཏེ་གཟུགས་ལ་སོགས་པ་བཞིན་དུ་དངོས་
[314a]
[314a.1]པོ་གཞན་ཞིག་ཡིན་ནོ་ཞེ་ན་ནི་རྫས་སུ་ཡོད་པ་ཡིན་ནོ་ཞེས་བྱ་བ་སྨོས་ཏེ། གལ་ཏེ་ཇི་ལྟར་གཟུགས་ལ་སོགས་པ་སྒྲ་ལ་སོགས་པ་ལས་དངོས་པོ་ཐ་དད་པ་ལྟར་འདོད་ན་ནི་གཟུགས་ནི་སྒྲ་ལས་མཚན་ཉིད་ཐ་དད་པ་ཡིན་ནོ་ཞེས་བྱ་བ་ལ་སོགས་པ་ལྟ་བུར་གང་ཟག་
[314a.2]རྫས་སུ་ཡོད་དོ་ཞེས་ཁས་བླངས་པ་ཡིན་ནོ། །གལ་ཏེ་འོ་མ་ལ་སོགས་པ་བཞིན་དུ་སྤྱི་ཡིན་ནོ་ཞེ་ན་ཞེས་བྱ་བ་ནི་གལ་ཏེ་ཇི་ལྟར་འོ་མ་དང་ཁྱིམ་དང་། དམག་ལ་སོགས་པ་གཟུགས་དང་སྒྲ་དང་དྲི་དང་རོ་དང་རེག་བྱ་དག་དང་རྩྭ་དང་ཤིང་དང་སོ་བག་དག་དང་། གླང་པོ་ཆེ་དང་། རྟ་དང་ཤིང་རྟ་ལ་སོགས་
[314a.3]པ་དེ་དག་ལས་དངོས་པོ་གཞན་ཡིན་པར་མི་འདོད་ཀྱི། དེ་དག་ཉིད་ཀྱི་སྤྱི་ཙམ་དུ་ཟད་དོ་ཞེས་བྱ་བ་དེ་ལྟར་འདོད་ན་ནི། གང་ཟག་བཏགས་པར་ཡོད་དོ་ཞེས་ཁས་བླངས་པ་ཡིན་ཏེ། གཟུགས་ལ་སོགས་པ་དང་རྩྭ་ལ་སོགས་པ་དང་། གླང་པོ་ཆེ་ལ་སོགས་པ་ལས་གཞན་པ་འོ་མ་དང་། ཁྱིམ་
[314a.4]དང་དམག་ཅེས་བྱ་བའི་དངོས་པོ་ནི་ཅི་ཡང་མེད་དོ། །དེ་ལས་ཅིར་འགྱུར་ཞེས་བྱ་བ་ནི་དེ་ལས་ཉེས་པ་ཅིར་འགྱུར་ཞེས་བྱ་བའི་ཐ་ཚིག་གོ། །རེ་ཞིག་གལ་ཏེ་རྫས་སུ་ཡོད་ན་ཞེས་བྱ་བ་ནི་ཕྱོགས་སྔ་མ་ལ་བརྟེན་ནའོ། །གང་ཟག་དེ་རང་བཞིན་ཐ་དད་པའི་ཕྱིར་ཏེ་མཚན་ཉིད་ཐ་དད་པའི་ཕྱིར་ཕུང་པོ་
[314a.5]རྣམས་ལས་གཞན་ནོ་ཞེས་བརྗོད་པར་བྱའི་ཕུང་པོའི་སྤྱི་ཙམ་ནི་མ་ཡིན་ནོ། །ཕན་ཚུན་གྱི་ཕུང་པོ་བཞིན་ནོ་ཞེས་བྱ་བ་ནི་ཇི་ལྟར་མཚན་ཉིད་ཐ་དད་པའི་ཕྱིར་གཟུགས་ཀྱི་ཕུང་པོ་ལས་ཚོར་བའི་ཕུང་པོ་གཞན་ཡིན་པ་ལྟར་ཕུང་པོ་དག་ལས་གང་ཟག་ཀྱང་དེ་དང་འདྲ་བར་འགྱུར་ཏེ། གང་ཟག་ནི་གཟུགས་
[314a.6]ཀྱི་ཕུང་པོ་ལ་སོགས་པའི་མཚན་ཉིད་མ་ཡིན་པའི་ཕྱིར་རོ། །འདིའི་རྒྱུ་ཡང་བརྗོད་དགོས་སོ་ཞེས་བྱ་བ་ནི་གལ་ཏེ་འདུས་བྱས་ཡིན་ནོ་སྙམ་དུ་བསམས་པ་ཡིན་ནོ། །འོན་ཏེ་འདུས་མ་བྱས་ཡིན་ན་ནི་དེའི་ཕྱིར་མུ་སྟེགས་ཅན་གྱི་ལྟ་བུར་ཡང་ཐལ་བར་འགྱུར་ཞེས་བྱ་བ་ནི་འདུས་མ་བྱས་ཡིན་པ་
[314a.7]དེའི་ཕྱིར་གནས་མའི་བུ་རྣམས་མུ་སྟེགས་ཅན་གྱི་ལྟ་བར་ཐལ་བར་འགྱུར་རོ། །དགོས་པ་མེད་པ་ཉིད་དུ་ཡང་འགྱུར་རོ་ཞེས་བྱ་བ་ནི། མཁའ་ལ་ཆར་ཉིས་ཅི་ཞིག་བྱ། །དེ་གཉིས་འབྲས་བུ་པགས་པ་ཡོད། །གལ་ཏེ་པགས་འདྲ་དེ་མི་རྟག །གལ་ཏེ་མཁའ་འདྲ་འབྲས་བུ་མེད། །སྙམ་དུ་
[314b]
[314b.1]བསམས་པ་ཡིན་ནོ། །ལོང་བ་ལྟ་བུའི་ཚིག་དོན་མི་གསལ་བ་འདི་ཞེས་བྱ་བ་འདི་ལོང་བ་དང་འདྲ་བས་ན་ལོང་བ་ལྟ་བུའོ། །ཅིའི་ཕྱིར་ཞེ་ན། འདི་ལྟར་དོན་མི་གསལ་བ་སྟེ། དོན་མི་མངོན་པ་ཞེས་བྱ་བའི་ཐ་ཚིག་གོ། །ཕུང་པོ་རྣམས་ལ་དམིགས་ནས་ཞེས་བྱ་བ་ནི་བཟུང་ནས་ཞེས་བྱ་བའི་དོན་ཏེ། ཇི་ལྟར་
[314b.2]དཔེར་ན་གཟུགས་ལ་སོགས་པ་བཟུང་ནས་འོ་མ་འདོགས་ཀྱི། གཟུགས་ལ་སོགས་པ་ལ་མ་གཏོགས་པའི་འོ་མ་མེད་པ་ལྟར་གང་ཟག་ཀྱང་དེ་དང་འདྲ་བས་གང་ཟག་བཏགས་པའི་ཡོད་པར་འགྱུར་རོ་ཞེས་བྱ་བའི་ཐ་ཚིག་གོ། །ཕུང་པོ་རྣམས་ལ་བརྟེན་ནས་ཞེས་བྱ་བ་ནི་གལ་ཏེ་ཕུང་པོ་རྣམས་ལ་
[314b.3]བརྟེན་ཏེ་གནས་ནས་སོ། །སྐྱོན་དེ་ཉིད་དུ་འགྱུར་རོ་ཞེས་བྱ་བ་ནི་ཕུང་པོ་དེ་དག་ཉིད་ལ་གང་ཟག་འདོགས་པར་འགྱུར་རོ་ཞེས་བྱ་བའི་ཐ་ཚིག་གོ། །ཡང་ན་གང་ཟག་འདོགས་པའི་རྐྱེན་ནི་ཕུང་པོ་དག་ཡིན་གྱི་གང་ཟག་ནི་མ་ཡིན་ནོ། །གང་ཟག་ནི་དེ་ཁོ་ན་བཞིན་དུ་བཏགས་པའི་ཡོད་པ་ཡིན་
[314b.4]པས་སྐྱོན་དེ་ཉིད་དུ་འགྱུར་རོ། །ཇི་ལྟར་བུད་ཤིང་རྒྱུར་བྱས་ནས་མེ་འདོགས་པ་བཞིན་ནོ་ཞེས་བྱ་བ་ལ། གནས་མའི་བུ་རྣམས་ཀྱི་བསམ་པ་ནི་གང་ཟག་རྫས་སུ་ཡོད་པ་ལ་གཞན་མ་ཡིན་པ་ཡང་མ་ཡིན་ཏེ། རང་གི་ཉེ་བར་ལེན་པ་རྒྱུར་བྱས་ནས་གདགས་པར་བྱ་བ་ཡིན་པའི་ཕྱིར་རོ། །
[314b.5]དངོས་པོ་གཞན་ཡང་མ་ཡིན་གཞན་མ་ཡིན་པ་ཡང་མ་ཡིན་པ་གང་ཞིག་རང་གི་ཉེ་བར་ལེན་པ་རྒྱུར་བྱས་ནས་འདོགས་པ་དེ་ནི་རྫས་སུ་ཡོད་དེ། དཔེར་ན་མེ་ལྟ་བུའོ་སྙམ་པ་ཡིན་ནོ། །དེ་ཉིད་ཀྱི་ཕྱིར་གལ་ཏེ་གཞན་ཡིན་ན་ནི་ཞེས་བྱ་བ་རྒྱས་པར་སྨྲས་ཏེ། འཇིག་རྟེན་དང་འགལ་བ་དང་
[314b.6]རང་གི་གྲུབ་པའི་མཐའ་དང་འགལ་བ་སྟོན་པར་བྱེད་དོ། །རྟག་པར་ཐལ་བར་འགྱུར་རོ་ཞེས་བྱ་བ་ནི་འདུས་མ་བྱས་ལྟ་བུར་རོ། །ཆད་པར་ཐལ་བར་འགྱུར་རོ་ཞེས་བྱ་བ་ནི་ཕུང་པོ་བཞིན་དུའོ། །རེ་ཞིག་འཇིག་རྟེན་ན་ནི་ཤིང་ལ་སོགས་པ་མེ་འབར་བ་ལ་བུད་ཤིང་ཞེས་བྱ་བ་རྒྱས་པར་འབྱུང་བ་
[314b.7]འདིས་ནི་དཔེ་མ་གྲུབ་པ་ཉིད་དུ་སྟོན་ཏེ། མེ་དང་བུད་ཤིང་དག་ནི་གཞན་པ་ཉིད་དུ་འདོད་དོ། །དེས་དེ་ཚིག་པ་དང་སྲེག་པར་བྱེད་ཅེས་བྱ་བ་ནི་མེ་དེས་བུད་ཤིང་དེ་ཚིག་པར་བྱེད་སྲེག་པར་བྱེད་ཅེས་བྱ་བའི་ཐ་ཚིག་སྟེ། དེ་གཞོབ་ཏུ་འབྱིན་ཅིང་ཐལ་བར་རློག་གོ། །རྒྱུར་འགྱུར་བར་བྱེད་པའི་ཕྱིར་རོ་ཞེས་
[315a]
[315a.1]བྱ་བ་ནི་ཐལ་བར་རློག་གོ་ཞེས་བྱ་བའི་ཐ་ཚིག་གོ། །གཞན་དག་ན་རེ་ཚིག་པ་དང་སྲེག་པར་བྱེད་པ་ཞེས་བྱ་བ་ནི་རྣམ་གྲངས་དག་ཡིན་ནོ་ཞེས་ཟེར་རོ། །བརྒྱད་པ་ཡིན་ནོ་ཞེས་བྱ་བ་ནི་བུད་ཤིང་དང་མེ་དེ་གཉི་ག་འབྱུང་བ་ཆེན་པོ་བཞི་དང་རྒྱུར་བྱས་པའི་གཟུགས་བཞི་པོ་
[315a.2]གཟུགས་ནས་རེག་བྱའི་བར་ཞེས་བྱ་བ་རྫས་བརྒྱད་པ་ཡིན་ཏེ། གྲུབ་པའི་མཐའ་ལས། འདོད་ན་དབང་པོ་མེད་པ་ཡི། །སྒྲ་མེད་རྡུལ་ཕྲན་རྫས་བརྒྱད་དོ། །ཞེས་བྱ་བའི་ཕྱིར་རོ། །དུས་ཐ་དད་པའི་ཕྱིར་ཞེས་བྱ་བ་ནི་བུད་ཤིང་ནི་སྔ་ལ་མེ་ནི་འཕྱིའོ། །དུས་ཐ་དད་པ་དག་ཀྱང་གཞན་པ་ཉིད་
[315a.3]དུ་མཐོང་སྟེ་ས་བོན་དང་མྱུ་གུ་དག་ལྟ་བུའོ། །མི་རྟག་པར་ཡང་འགྱུར་རོ་ཞེས་བྱ་བ་ནི་སྐྱེ་བ་དང་ལྡན་པ་གཟུགས་ལ་སོགས་པ་མི་རྟག་པ་ཉིད་དུ་མཐོང་བའི་ཕྱིར་རོ། །འོན་ཏེ་ཤིང་ལ་སོགས་པ་འབར་བ་དེ་ཉིད་ལ་ཞེས་བྱ་བ་ནི་དེ་གཉི་གའི་མཚན་ཉིད་ཀྱི་སྤྱི་ལའོ། །དེ་གཉིས་ཀྱང་མཚན་ཉིད་ཐ་
[315a.4]དད་པའི་ཕྱིར་གཞན་ཉིད་ཡིན་པར་གྲུབ་བོ་ཞེས་བྱ་བ་ནི་མེ་དང་བུད་ཤིང་མཚན་ཉིད་དེ་ལྟ་བུ་དེ་གཉིས་ཀྱང་མཚན་ཉིད་ཐ་དད་པའི་ཕྱིར་གཞན་ཉིད་ཡིན་པར་གྲུབ་སྟེ། སའི་ཁམས་ལ་སོགས་པའི་མཚན་ཉིད་གཞན་ཡིན་པའི་ཕྱིར་རོ། །མཚན་ཉིད་ཐ་དད་པ་རྣམས་ནི་གཞན་ཉིད་ཡིན་པར་མཐོང་
[315a.5]སྟེ། གཟུགས་དང་ཚོར་བ་ལ་སོགས་པ་ལྟ་བུའོ། །རྒྱུར་བྱས་པའི་དོན་ཡང་བརྗོད་དགོས་ཏེ་ཞེས་བྱ་བ་ནི་གཞན་ཡིན་པའི་ཕྱིར་རོ་སྙམ་དུ་བསམས་པ་ཡིན་ནོ། །དེ་ནི་དེའི་རྒྱུ་ཡང་མ་ཡིན་ལ་ཞེས་བྱ་བ་ནི་འབྱུང་བ་གསུམ་གྱི་མཚན་ཉིད་ཀྱི་བུད་ཤིང་དེ་ནི་དྲོ་བའི་མཚན་ཉིད་ཀྱི་མེ་དེའི་རྒྱུར་
[315a.6]རུང་བ་མ་ཡིན་ཏེ། ལྷན་ཅིག་སྐྱེས་པའི་ཕྱིར་བ་ལང་གི་རྭ་གཡས་གཡོན་བཞིན་ནོ། །དེ་གདགས་པའི་རྒྱུ་ཡང་མ་ཡིན་ཞེས་བྱ་བ་ནི་མེ་གདགས་པའི་འོ། །གལ་ཏེ་རྒྱུར་བྱས་པའི་དོན་རྟེན་གྱི་དོན་ནམ་ཞེས་བྱ་བ་ནི་བུད་ཤིང་རྒྱུར་བྱས་ནས་ཞེས་བྱ་བ་བུད་ཤིང་ལ་བརྟེན་ནས་ཞེས་བྱ་
[315a.7]བའི་ཐ་ཚིག་གོ། །ལྷན་ཅིག་འབྱུང་བའི་དོན་ཞེས་བྱ་བ་ནི་ལྷན་ཅིག་འབྱུང་བའི་དོན་བུད་ཤིང་དང་ལྷན་ཅིག་འབྱུང་བ་ཉིད་དུ་བཟུང་ནས་ཞེས་བྱ་བའི་དོན་ཏོ། །རྟེན་ནམ་ལྷན་ཅིག་འབྱུང་བ་དག་ཡིན་པར་འགྱུར་ཞེས་བྱ་བ་ནི་རྟེན་དུ་གྱུར་པ་དང་ལྷན་ཅིག་འབྱུང་བར་འགྱུར་རོ་ཞེས་བྱ་བའི་ཐ་ཚིག་
[315b]
[315b.1]སྟེ། གནས་མའི་བུ་རྣམས་གཞན་ཉིད་དུ་གསལ་བར་དམ་འཆའ་བ་ཡིན་ནོ། །ད་མད་ན་ཞེས་བྱ་བ་ནི་ཕུང་པོ་མེད་ནའོ། །འབྱུང་བ་གཞན་གྱི་རང་བཞིན་ཡིན་པའི་ཕྱིར་རོ་ཞེས་བྱ་བ་ནི་སའི་ཁམས་ལ་སོགས་པའི་རང་བཞིན་ཡིན་པའི་ཕྱིར་རོ། །གཞན་པ་དེ་ཡང་ཞེས་བྱ་བ་ནི་དྲོ་བ་ཉིད་དང་
[315b.2]ལྡན་པ་འབའ་ཞིག་དྲོ་བར་མ་ཟད་ཀྱི་གཞན་མེ་འབར་བ་དང་འབྲེལ་པའི་ས་ལ་སོགས་པ་དེ་ཡང་དྲོ་བར་འགྲུབ་པོ། །དེའི་ཕྱིར་ཇི་ལྟར་དེ་གཞན་ཉིད་ཡིན་ན་ཉེས་པ་མེད་པ་ལྟར་འདི་ཡང་དེ་དང་འདྲའོ། །དེས་ན་བརྗོད་པར་བྱ་བ་མ་ཡིན་ནོ་ཞེས་བྱ་བའི་ཕྱོགས་དེ་མེད་པར་འགྱུར་རོ། །ཤིང་ལ་སོགས་
[315b.3]པ་ཞེས་བྱ་བ་ནི་ཤིང་དང་རྩྭ་དང་བ་ལང་གི་ལྕི་བ་ལ་སོགས་པའོ། །བརྗོད་པར་བྱ་བ་མ་ཡིན་པ་ཞེས་བྱ་བ་ནི་གང་ཟག་གོ། །བརྗོད་པར་མི་བྱ་བར་འགྱུར་ཏེ་ཞེས་བྱ་བ་ནི་ཤེས་བྱ་ནི་རྣམ་པ་ལྔ་སྟེ་ཞེས་བྱ་བར་རོ། །འོ་ན་ཇི་སྐད་དུ་བརྗོད་པར་བྱ་ཞེ་ན། དེ་ནི་འདས་པ་ལ་སོགས་པ་ལས་ལྔ་པ་ཡང་མ་ཡིན་ལ་ལྔ་པ་མ་
[315b.4]ཡིན་པར་བརྗོད་པར་བྱའོ་ཞེས་བྱ་བ་སྨོས་སོ། །གཟུགས་ཀྱང་ཞེས་བྱ་བ་རྒྱས་པར་འབྱུང་བ་ནི་གཟུགས་ཀྱང་མིག་ལ་སོགས་པ་ཡོད་ན་དེ་དམིགས་པའི་ཕྱིར་མིག་ལ་སོགས་པ་རྒྱུར་བྱས་ནས་གཟུགས་འདོགས་སོ་ཞེས་བཏགས་པ་ཡིན་པར་བརྗོད་པར་བྱའོ། །དམིགས་པར་བྱེད་ན་ཞེས་བྱ་
[315b.5]བ་ནི་ཉེ་བར་མཚོན་པར་བྱེད་ན་སྟེ། དེའི་ཉེ་བར་ལེན་པ་ཡིན་པའི་ཕྱིར་རོ། །གཟུགས་རྣམས་ཞེས་ཀྱང་བརྗོད་པར་མི་བྱ་གཟུགས་རྣམས་མ་ཡིན་ནོ་ཞེས་ཀྱང་བརྗོད་པར་མི་བྱའོ་ཞེས་བྱ་བ་ནི་དེའི་མཚན་ཉིད་མ་ཡིན་པའི་ཕྱིར་དང་བརྗོད་པར་བྱ་བ་མ་ཡིན་པའི་ཕྱིར་ཏེ། ཆོས་ཀྱི་བར་དུ་
[315b.6]ཡིན་པ་དང་མ་ཡིན་པར་བརྗོད་པར་མི་བྱ་བ་ཡང་དེ་དང་འདྲའོ། །འོ་མའམ་ཆུ་དམིགས་པར་བྱེད་ན་ཞེས་བྱ་བ་ནི་དཔེར་བརྗོད་པ་གཉིས་སོ། །དེ་ལྟ་བས་ན་དེ་ནི་འདི་སྐད་དུ་གལ་ཏེ་མིག་གིས་རྣམ་པར་ཤེས་པར་བྱ་བའི་གཟུགས་རྣམས་ལ་བརྟེན་ནས་འོ་མ་དམིགས་པར་བྱེད་ན་ནི་འོ་མ་མིག་
[315b.7]གིས་རྣམ་པར་ཤེས་པར་བྱ་བ་ཡིན་ནོ་ཞེས་བརྗོད་པར་བྱ་བ་ལ། གཟུགས་རྣམས་ཞེས་ཀྱང་བརྗོད་པར་མི་བྱ། གཟུགས་རྣམས་མ་ཡིན་ཞེས་ཀྱང་བརྗོད་པར་མི་བྱའོ་ཞེས་བྱ་བ་ཐམས་ཅད་བརྗོད་པར་བྱའོ། །དེ་བཞིན་དུ་གལ་ཏེ་མིག་གིས་རྣམ་པར་ཤེས་པར་བྱ་བའི་གཟུགས་རྣམས་
[316a]
[316a.1]ལ་བརྟེན་ནས་ཆུ་དམིགས་པར་བྱེད་ན་ནི་ཆུ་མིག་གིས་རྣམ་པར་ཤེས་པར་བྱ་བ་ཡིན་ནོ་ཞེས་བརྗོད་པར་བྱ་ལ། གཟུགས་རྣམས་ཞེས་ཀྱང་བརྗོད་པར་མི་བྱ། གཟུགས་རྣམས་མ་ཡིན་ཞེས་ཀྱང་བརྗོད་པར་མི་བྱའོ་ཞེས་བྱ་བ་འདི་ཐམས་ཅད་ཀྱང་བརྗོད་
[316a.2]པར་བྱའོ། །འོ་མ་དང་ཆུ་གཉིས་བཞི་ཉིད་དུ་ཐལ་བར་འགྱུར་དུ་འོང་བས་སོ་ཞེས་བྱ་བ་ནི་གལ་ཏེ་གཟུགས་རྣམས་ཞེས་བྱ་བ་ནས་རེག་བྱ་རྣམས་ཞེས་བྱ་བའི་བར་དུ་བརྗོད་ན་ནི་འོ་མ་དང་ཆུ་བཞི་ཚན་དུ་ཐལ་བར་འགྱུར་ཏེ་འོ་མ་དང་ཆུ་རྣམ་པ་བཞི་པར་འགྱུར་རོ་ཞེས་བྱ་བའི་ཐ་ཚིག་གོ། །སྒྲ་ནི་གློ་བུར་
[316a.3]པ་ཡིན་པས་འདིར་མ་གཏོགས་སོ། །དེའི་ཕྱིར་ཇི་ལྟར་གཟུགས་ལ་སོགས་པ་འདུས་པའི་སྤྱི་ཁོ་ན་ལ་འོ་མ་འམ་ཆུ་ཞེས་འདོགས་པ་དེ་བཞིན་དུ་ཕུང་པོ་རྣམས་ཀྱི་སྤྱི་ཁོ་ན་ལ་གང་ཟག་འདོགས་སོ་ཞེས་བྱ་བར་གྲུབ་བོ། །གཟུགས་རྣམས་གང་ཟག་དམིགས་པའི་རྒྱུ་ཞིག་ཡིན་ནམ་ཞེས་བྱ་བ་དང་།
[316a.4]གཟུགས་རྣམས་དམིགས་ན་གང་ཟག་དམིགས་ཞེས་བྱ་བ་འདི་གཉིས་ལ་ཁྱད་པར་ཅི་ཞིག་ཅེ་ན། ཕྱོགས་སྔ་མ་ལ་ནི་གཟུགས་རྣམས་རྒྱུ་ཉིད་ཀྱི་དབང་དུ་བྱས་པ་ཡིན་ནོ། །གཉིས་པ་ལ་ནི་རྒྱུ་ཉིད་མ་ཡིན་ནོ། །འོ་ན་ཅི་ཞེ་ན། གཟུགས་རྣམས་རྒྱུར་བྱས་ནས་གང་ཟག་དམིགས་སོ་ཞེས་བྱ་བ་ཡིན་
[316a.5]ནོ། །དེ་ལ་གལ་ཏེ་གཟུགས་རྣམས་རྒྱུ་ཉིད་ཡིན་པར་འདོད་ལ་གང་ཟག་དེ་ཡང་ཕུང་པོ་དེ་དག་ལས་གཞན་དུ་བརྗོད་པར་མི་བྱའོ་ཞེ་ན། འོ་ན་ནི་ཁྱེད་ལ་གཟུགས་ཀྱང་ཞེས་བྱ་བ་རྒྱས་པར་འབྱུང་བ་འདི་ལྟ་བུར་ཐལ་བར་འགྱུར་ཏེ། ཇི་ལྟར་ཁྱེད་ཀྱི་གཟུགས་རྣམས་གང་ཟག་དམིགས་པའི་
[316a.6]རྒྱུ་ཡིན་ལ་དེ་ཡང་དེ་དག་ལས་གཞན་དུ་བརྗོད་པར་མི་བྱ་བ་ལྟར། སྣང་བ་དང་མིག་དང་ཡིད་ལ་བྱེད་པ་དག་ཀྱང་གཟུགས་དམིགས་པའི་རྒྱུ་ཡིན་ལ། དེ་ཡང་སྣང་བ་ལ་སོགས་པ་དེ་དག་ལས་གཞན་དུ་བརྗོད་པར་མི་བྱའོ། །དེ་དག་ནི་དེ་དམིགས་པའི་རྒྱུ་ཡིན་པའི་ཕྱིར་རོ་ཞེས་བྱ་བ་ནི་སྣང་བ་
[316a.7]ལ་སོགས་པ་དེ་དག་ནི་གཟུགས་དམིགས་པའི་རྒྱུ་ཡིན་པའི་ཕྱིར་རོ། །གང་ཟག་གཟུགས་ལས་རང་བཞིན་ཐ་མི་དད་པར་འགྱུར་ཏེ། དམིགས་པ་དེ་ཁོ་ནས་དམིགས་པར་བྱ་བ་ཡིན་པའི་ཕྱིར་གཟུགས་བཞིན་ནོ། །གཟུགས་ཁོ་ན་ལ་དེ་འདོགས་པར་ཞེས་བྱ་བ་ནི་གང་ཟག་དེ་འདོགས་
[316b]
[316b.1]པར་ཏེ་འགྱུར་ན་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། རྒྱུ་དེ་ཉིད་ཀྱི་ཕྱིར་རོ། །འདི་ནི་གཟུགས་སོ་ཞེས་བྱ་བ་རྒྱས་པར་འབྱུང་བ་ནི་དམིགས་པ་གཅིག་པ་ཉིད་ཡིན་ན་གཟུགས་དང་གང་ཟག་དག་ཡོངས་སུ་གཅོད་པར་མི་འགྱུར་རོ། །འོན་ཏེ་འདི་ནི་གཟུགས་སོ། །འདི་ནི་གང་ཟག་གོ་ཞེས་བྱ་བ་དེ་
[316b.2]ལྟར་ཡོངས་སུ་མི་གཅོད་ན་ནི་ཇི་ལྟར་གཉི་ག་དམ་བཅའ། གཟུགས་ཁོ་ན་དམ་བཅའ་དགོས་པར་འགྱུར་ཏེ། དེ་དམིགས་པ་ཡོད་པའི་ཕྱིར་རོ། །དེ་བཞིན་དུ་ཆོས་ཀྱི་བར་དག་ལས་ཀྱང་བརྗོད་པར་བྱའོ་ཞེས་བྱ་བ་ཇི་ལྟར་ཞེ་ན། གང་ཡང་རྣ་བས་རྣམ་པར་ཤེས་པར་བྱ་བའི་སྒྲ་རྣམས་ལ་བརྟེན་ནས་གང་ཟག་
[316b.3]དམིགས་པར་བྱེད་ཅེས་སྨྲས་པའི་ཚིག་དེའི་དོན་ཅི་ཞིག་ཡིན་ཞེ་ན། ཅི་རེ་ཞིག་སྒྲ་རྣམས་གང་ཟག་དམིགས་པའི་རྒྱུ་ཞིག་ཡིན་ནམ། འོན་ཏེ་སྒྲ་རྣམས་དམིགས་ན་གང་ཟག་དམིགས་སོ་ཞེས་བྱ་བ་ཡིན། གལ་ཏེ་སྒྲ་རྣམས་གང་ཟག་དམིགས་པའི་རྒྱུ་ཡིན་ལ། དེ་ཡང་དེ་དག་ལས་གཞན་དུ་བརྗོད་པར་མི་
[316b.4]བྱའོ་ཞེ་ན་ནི། དེ་ལྟ་ན་ནི་འོ་ན་སྒྲ་ཡང་རྣ་བ་དང་ཡིད་ལ་བྱེད་པ་ལ་སོགས་པ་ལས་གཞན་དུ་བརྗོད་པར་མི་བྱ་སྟེ། དེ་དག་ནི་དེ་མི་དམིགས་པའི་རྒྱུ་ཡིན་པའི་ཕྱིར་རོ། །འོན་ཏེ་སྒྲ་རྣམས་དམིགས་ན་གང་ཟག་དམིགས་སོ་ཞེ་ན་ནི། ཅི་དམིགས་པ་དེ་ཁོ་ནས་དམིགས་སམ་འོན་ཏེ་གཞན་གྱིས། གལ་ཏེ་
[316b.5]དེ་ཁོ་ནས་སོ་ཞེ་ན་ནི་གང་ཟག་སྒྲ་ལས་རང་བཞིན་ཐ་མི་དད་པའམ། སྒྲ་ཁོ་ན་ལ་དེ་འདོགས་པར་འགྱུར་ན་འདི་ནི་སྒྲའོ། །འདི་ནི་གང་ཟག་གོ་ཞེས་བྱ་བ་འདི་ཡང་ཇི་ལྟར་ཡོངས་སུ་གཅོད་འོན་ཏེ་དེ་ལྟར་ཡོངས་སུ་མི་གཅོད་ན་ནི་གཟུགས་ཀྱང་ཡོད་དོ། གང་ཟག་ཀྱང་ཡོད་དོ་ཞེས་བྱ་བ་འདི་ཡང་ཇི་ལྟར་
[316b.6]དམ་བཅའ་སྟེ། དམིགས་པའི་དབང་གིས་དེ་ཡོད་པར་དམ་བཅའ་བར་ཟད་དོ། །ཕྱོགས་འདིས་ཆོས་ཀྱི་བར་དག་ལས་ཀྱང་སྦྱར་བར་བྱའོ། །སྔོན་པོ་ལས་སེར་པོ་ལྟ་བུ་ཞེས་བྱ་བ་ནི་གང་གི་ཚེ་ཡོངས་སུ་གཅོད་པས་སྔོན་པོ་དམིགས་པ་དེའི་ཚེ་སེར་པོ་མི་དམིགས་སོ། །ཕྱིས་དམིགས་
[316b.7]པ་ནི་དམིགས་པ་གཞན་གྱིས་དམིགས་ཏེ་སེར་པོ་དེ་ཡང་སྔོན་པོ་ལས་གཞན་ཡིན་ནོ་ཞེས་བྱ་བར་གྲགས་སོ། །དེ་ལྟ་ན་གང་ཟག་ཀྱང་དམིགས་པ་གཞན་གྱིས་དམིགས་པས་གཟུགས་ལས་གཞན་པར་འགྱུར་རོ། །དེ་བཞིན་དུ་སྐད་ཅིག་མ་ལས་སྐད་ཅིག་མ་གཞན་གཞན་ཡིན་པ་བཞིན་ནོ་ཞེས་
[317a]
[317a.1]དཔེར་བརྗོད་པར་བྱའོ། །དེ་བཞིན་དུ་ཆོས་ཀྱི་བར་དག་ལས་ཀྱང་བརྗོད་པར་བྱའོ་ཞེས་བྱ་བ་ཇི་ལྟ་ཞེ་ན། འོན་ཏེ་གཞན་གྱིས་སོ་ཞེ་ན་ནི། དུས་ཐ་དད་པར་དམིགས་པའི་ཕྱིར་གཞན་ཡིན་པར་འགྱུར་ཏེ། དཔེར་ན་རྫ་བོ་ཆེའི་སྒྲ་ལས་རྫ་རྔའི་སྒྲ་དང་། སྐད་ཅིག་མ་ལས་སྐད་ཅིག་མ་
[317a.2]གཞན་བཞིན་ཏེ། ཇི་སྐད་དུ་གོང་དུ་སྔོན་པོ་ལས་སེར་པོ་ལྟ་བུ་དང་། སྐད་ཅིག་མ་ལས་སྐད་ཅིག་མ་གཞན་བཞིན་ནོ་ཞེས་བཤད་པ་ལྟ་བུའོ། །འོན་ཏེ་གཞན་གྱིས་སོ་ཞེ་ན་ནི་ཞེས་བྱ་བ་ནས་རྒྱས་པར་ཆོས་ཀྱི་བར་དག་ལས་ཀྱང་བརྗོད་པར་བྱ་བས་ན་ཡུལ་མཚན་ཉིད་ཐ་དད་པ་དང་མཚན་ཉིད་ཐ་དད་
[317a.3]མ་ཡིན་པ་དུས་ཐ་དད་པར་དམིགས་པས་གཞན་པ་ཉིད་དུ་བསྟན་པ་ཁོ་ན་ཡིན་ནོ། །འོ་ན་གཟུགས་དང་གང་ཟག་བཞིན་དུ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་ཇི་ལྟར་གཟུགས་དང་གང་ཟག་དག་གཞན་དང་གཞན་མ་ཡིན་པར་བརྗོད་པར་བྱ་བ་མ་ཡིན་པ་དེ་བཞིན་དུ། དེ་དག་དམིགས་པ་དག་
[317a.4]ཀྱང་གཞན་དང་གཞན་མ་ཡིན་པར་བརྗོད་པར་བྱ་བ་མ་ཡིན་ནོ་ཞེས་དེ་སྐད་དུ་སྨྲ་ན་འོ་ན་ནི་དེས་ན་འདུས་བྱས་ཀྱང་བརྗོད་པར་བྱ་བ་མ་ཡིན་པའི་ཕྱིར་རོ། །དེ་དག་དམིགས་པ་འདུས་བྱས་དེ་ཡང་བརྗོད་པར་བྱ་བ་མ་ཡིན་པས་གྲུབ་པའི་མཐའ་ཉམས་པ་ཡིན་ནོ། །གྲུབ་པའི་མཐའ་གང་ཟག་ཁོ་ན་བརྗོད་པར་བྱ་བ་
[317a.5]མ་ཡིན་ནོ་ཞེས་བྱ་བ་གང་ཡིན་པ་འདི་ཉམས་པར་འགྱུར་ཏེ། འདུས་བྱས་ཀྱང་བརྗོད་པར་བྱ་བ་མ་ཡིན་པའི་ཕྱིར་རོ། །གལ་ཏེ་ཡང་འདི་ཡོད་ལ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་འདི་གཟུགས་རྣམས་སམ་མ་ཡིན་ནོ་ཞེས་བརྗོད་པར་བྱ་བ་མ་ཡིན་ན། འོ་ན་ཅིའི་ཕྱིར་བཅོམ་ལྡན་འདས་
[317a.6]ཀྱིས་གཟུགས་བདག་མ་ཡིན་པ་ནས་རྣམ་པར་ཤེས་པ་བདག་མ་ཡིན་ཞེས་བྱ་བའི་བར་འདི་གསུངས་ཏེ། དེ་སྐད་དུ་གསུངས་པས་གང་ཟག་ནི་བརྗོད་པར་བྱ་བ་ཁོ་ན་ཡིན་གྱི་བརྗོད་པར་བྱ་བ་མ་ཡིན་པ་ནི་མ་ཡིན་ནོ་ཞེས་བསྟན་པ་ཡིན་ནོ། །སྒྲ་ལ་སོགས་པ་བཞིན་དུ་ཞེས་བྱ་བ་ནི་གང་ཟག་
[317a.7]ནི་གཟུགས་ཀྱི་རྣམ་པར་ཤེས་པས་མི་དམིགས་ཏེ། དེའི་དམིགས་པའི་རྐྱེན་དུ་མ་གྱུར་པའི་ཕྱིར་སྒྲ་བཞིན་ནོ། །སོགས་པ་ཞེས་བྱ་བའི་སྒྲས་ནི་འདིར་དྲི་བཞིན་ནོ། །རོ་བཞིན་ནོ་ཞེས་བྱ་བ་ལ་སོགས་པར་སྦྱར་ཏེ། དེ་བཞིན་དུ་འདི་རྣ་བའི་རྣམ་པར་ཤེས་པ་ལ་སོགས་པ་མི་
[317b]
[317b.1]དམིགས་པ་ཉིད་དུ་བརྗོད་པར་བྱ་སྟེ་འདི་ནི་ཕྱོགས་ཡིན་ནོ། །ཉེ་བར་དགོད་པ་འདིས་ནི་དམ་བཅས་པ་ཆོས་ཅན་གྱི་ཁྱད་པར་ལས་བཟློག་པའི་སྐྱོན་བརྗོད་དོ་ཞེས་བྱ་བར་ཁོང་དུ་ཆུད་པར་བྱའོ། །གཉིས་ལ་བརྟེན་ནས་ཞེས་བྱ་བ་ནི་གཉིས་ལ་བརྟེན་ནས་ཞེས་གསུངས་ཀྱི་གསུམ་ལ་བརྟེན་ནས་སྐྱེའོ་ཞེས་ནི་མ་
[317b.2]གསུངས་པས་འདིས་ནི་མདོ་དང་འགལ་བ་ཡིན་ནོ། །དགེ་སློང་མིག་གི་རྣམ་པར་ཤེས་པ་སྐྱེད་པ་ལ་རྒྱུ་ནི་མིག་ཡིན་ནོ་ཞེས་བྱ་བ་རྒྱས་པར་འབྱུང་བ་ལ་ཉེ་བའི་རྐྱེན་ནི་རྒྱུ་ཡིན་ནོ། །རིང་བ་ནི་རྐྱེན་ཁོ་ན་ཡིན་ནོ། །གཞན་དག་ན་རེ་སྐྱེད་པར་བྱེད་པ་ནི་རྒྱུའོ། །རྐྱེན་ནི་དམིགས་པ་ཙམ་དུ་ཟད་དོ་ཞེས་ཟེར་
[317b.3]རོ། །གཞན་དག་ན་རེ་འདི་གཉིས་ནི་རྣམ་གྲངས་ཡིན་ནོ་ཞེས་ཟེར་རོ། །གང་ཟག་གཟུགས་ལས་གཞན་ཡིན་ཞེས་བྱ་བའི་ཕྱོགས་སུ་ཐལ་བར་འགྱུར་ཏེ། རྣ་བའི་རྣམ་པར་ཤེས་པས་རྣམ་པར་ཤེས་པར་བྱ་བ་ཡིན་པའི་ཕྱིར་སྒྲ་བཞིན་ནོ། །དེ་བཞིན་དུ་གང་ཟག་སྒྲ་ལས་གཞན་ཡིན་ཞེས་བྱ་བའི་
[317b.4]ཕྱོགས་སུ་ཐལ་བར་འགྱུར་ཏེ། མིག་གི་རྣམ་པར་ཤེས་པའི་ཡུལ་ཡིན་པའི་ཕྱིར་གཟུགས་བཞིན་ནོ། །དེ་བཞིན་དུ་གཞན་དག་ལས་ཀྱང་སྦྱར་བར་བྱའོ་ཞེས་བྱ་བ་ནི་གང་ཟག་གཟུགས་དང་སྒྲ་དག་ལས་གཞན་ཡིན་ནོ་ཞེས་བྱ་བའི་ཕྱོགས་སུ་ཐལ་བར་འགྱུར་ཏེ། སྣའི་རྣམ་པར་ཤེས་པས་རྣམ་པར་
[317b.5]ཤེས་པར་བྱ་བ་ཡིན་པའི་ཕྱིར་དྲི་བཞིན་ནོ་ཞེས་བྱ་བ་སྟེ། འདི་ནི་སྦྱོར་བའི་ཕྱིར་ཕྱོགས་ཡིན་ནོ། །རང་རང་གི་སྤྱོད་ཡུལ་དང་ཡུལ་ཉམས་སུ་མྱོང་བ་ཡིན་གྱི་ཞེས་འབྱུང་བའི་ཕྱིར་གང་ཟག་ཉམས་སུ་མྱོང་བ་ནི་མ་ཡིན་ནོ་ཞེས་བཤད་པ་ཡིན་ནོ། །ཡིད་ཀྱི་དབང་པོ་ནི་འདི་དག་གི་རྟེན་ཡིན་ནོ་ཞེས་བྱ་བ་འདི་ནི་ཞར་ལ་བཤད་
[317b.6]པར་ཟད་ཀྱི་འདི་དཔེར་བརྗོད་པ་ནི་མ་ཡིན་ནོ། །དེ་ལྟ་མོད་ཀྱི་ཡིད་ནི་དབང་པོ་འདི་དག་གི་རྟེན་ཡིན་ནོ་ཞེས་བྱ་བ་ནི་དེ་ལ་ལྟོས་པའི་དབང་པོ་རྣམས་རྣམ་པར་ཤེས་པ་སྐྱེ་བའི་རྒྱུ་ཡིན་ནོ་ཞེས་བྱ་བའི་ཐ་ཚིག་གོ། །ཡང་ན་གང་ཟག་ཡུལ་མ་ཡིན་པར་འགྱུར་རོ་ཞེས་བྱ་བ་ནི་གལ་ཏེ་མདོ་སྡེ་ཚད་མར་བྱ་ནའོ། །དེས་ན་ཅིར་
[317b.7]འགྱུར་ཞེ་ན། གལ་ཏེ་ཡུལ་མ་ཡིན་ནོ་ཞེ་ན་ཞེས་བྱ་བ་སྨོས་ཏེ། གལ་ཏེ་གང་གི་ཡུལ་ཡང་མ་ཡིན་ན་འོ་ན་ནི་རྣམ་པར་ཤེས་པར་བྱ་བ་མ་ཡིན་པར་འགྱུར་རོ། །དེའི་ཕྱིར་ཞེས་བྱ་བ་ནི་རྣམ་པ་ལྔ་སྟེ་ཞེས་བྱ་བ་རང་གི་གྲུབ་པའི་མཐའ་དང་འགལ་བར་འགྱུར་རོ། །གལ་ཏེ་དེ་ལྟར་མདོ་ལས་གཞན་གྱིས་གཞན་གྱི་སྤྱོད་
[318a]
[318a.1]ཡུལ་དང་ཡུལ་ཉམས་སུ་མྱོང་བ་ནི་མ་ཡིན་ནོ་ཞེས་འབྱུང་བའི་ཕྱིར་མིག་ལ་སོགས་པ་ལྔའི་ཚད་མར་བྱས་ན་རང་གི་ཡུལ་འཁྲུལ་པ་མེད་དོ། །རང་གི་ཡུལ་ལ་འཁྲུལ་པ་མེད་ན་ཡང་གང་ཟག་མིག་གི་རྣམ་པར་ཤེས་པ་ལ་སོགས་པས་རྣམ་པར་ཤེས་པར་བྱ་བ་མ་ཡིན་ནོ། །དེ་ལྟར་ན་ནི་ཡིད་
[318a.2]ཀྱི་དབང་པོ་ཡང་འཁྲུལ་པ་མེད་པར་འགྱུར་ཏེ། མདོ་ལས་དབང་པོ་དྲུག་པོ་འདི་དག་ནི་སྤྱོད་ཡུལ་ཐ་དད་པ་ཅན་ཡིན་ཞིང་ཞེས་བྱ་བ་རྒྱས་པར་འབྱུང་བའི་ཕྱིར་རོ། །འགའ་ཞིག་གིས་སྲོག་ཆགས་དྲུག་པོ་ཁྱི་དང་བྱ་དང་ཝ་དང་ཆུ་སྲིན་བྱིས་པ་གསོད་དང་སྦྲུལ་དང་སྤྲེའུ་རྣམས་སྦྲེལ་ནས་བར་དུ་མདུད་པ་བོར་ཏེ། བོར་བ་དེ་དག་
[318a.3]གྲོང་དང་ནམ་མཁའ་དང་། དུར་ཁྲོད་དང་། ཆུའི་ནང་དང་གྲོག་མཁར་དང་། ནགས་ཚལ་གྱི་ནང་འདོད་པའི་ཕྱིར་རང་རང་གི་སྤྱོད་ཡུལ་དང་ཡུལ་འདོད་པ་དེ་བཞིན་དུ་དབང་པོ་དྲུག་པོ་འདི་དག་ཀྱང་རང་རང་གི་སྤྱོད་ཡུལ་དང་ཡུལ་འདོད་པ་ཡིན་ནོ་ཞེས་དེ་ལྟར་འདིར་དཔེ་ཙམ་དུ་བྱའོ། །གལ་ཏེ་མདོའི་ཚིག་ཡོད་
[318a.4]བཞིན་དུ་ཡང་ཡིད་ཀྱི་དབང་པོ་འཁྲུལ་པ་ཡིན་ན་ནི། དེ་ལྟ་ན་མིག་ལ་སོགས་པའི་དབང་པོ་རྣམས་ཀྱང་འཁྲུལ་པར་འགྱུར་རོ། །འཁྲུལ་ན་ནི་གང་ཟག་མིག་གི་རྣམ་པར་ཤེས་པ་ལ་སོགས་པས་རྣམ་པར་ཤེས་པར་བྱ་བ་ཡིན་པར་འགྱུར་རོ་ཞེ་ན། །འདིར་དེ་ནི་དབང་པོ་ཁོ་ན་ལ་དབང་པོ་ཡིན་པར་མ་གསུངས་ཀྱི་ཞེས་བྱ་
[318a.5]བ་རྒྱས་པར་སྨོས་ཏེ། སྲོག་ཆགས་དྲུག་པ་ལྟ་བུའི་མདོ་དེ་ལས་ནི། མིག་ལ་སོགས་པའི་དབང་པོ་ཁོ་ན་ལ་དབང་པོ་ཡིན་པར་མ་གསུངས་སོ། །ཅིའི་ཕྱིར་ཞེ་ན། མིག་ལ་སོགས་པ་དབང་པོ་ལྔ་ལ་མཐོང་བ་ལ་སོགས་པར་འདོད་པར་མི་སྲིད་པའི་ཕྱིར་རོ། །འདི་ལྟར་འདི་དག་ལ་
[318a.6]མཐོང་བ་དང་ཐོས་པ་ལ་སོགས་པར་འདོད་པ་མི་སྲིད་དེ། གཟུགས་ཀྱི་ངོ་བོ་ཉིད་ཡིན་པའི་ཕྱིར་རོ། །དེ་དག་ནི་རྣམ་པར་ཤེས་པ་ཞེས་མིག་གི་རྣམ་པར་ཤེས་པ་ལ་ཡང་མཐོང་བ་ལ་སོགས་པར་འདོད་པ་མི་སྲིད་པའི་ཕྱིར་རོ། །ཅིའི་ཕྱིར་འདི་དག་ལ་མཐོང་བ་དང་ཐོས་པ་ལ་སོགས་པ་འདོད་པ་མི་སྲིད་ཅེ་ན། རྣམ་
[318a.7]པར་རྟོག་པ་མེད་པའི་ཕྱིར་རོ། །དེ་དག་གི་དབང་གིས་དྲངས་པའི་ཡིད་ཀྱི་རྣམ་པར་ཤེས་པ་ནི་དབང་པོ་ཡིན་པར་གསུངས་ཏེ་དབང་པོ་དང་འདྲ་བའི་ཕྱིར་རོ། །དེ་ནི་དེ་དག་གི་དབང་གིས་དྲངས་པ་ཡིན་ནོ་ཞེས་བྱ་བར་ཇི་ལྟར་ཤེས་ཤེ་ན། གལ་ཏེ་མིག་གི་སྒོ་དང་རྣ་བ་ལ་སོགས་པའི་སྒོ་ནས་མིག་གི་རྣམ་པར་ཤེས་པ་
[318b]
[318b.1]ལ་སོགས་པ་སྐྱེས་པར་མ་གྱུར་ན་གཞན་དུ་ན་ཇི་ལྟར་ཡིད་ཀྱི་རྣམ་པར་ཤེས་པ་རྣམ་པར་རྟོག་པ་ཅན་དེ་སྐྱེ་བར་འགྱུར། དེའི་ཕྱིར་དེ་དག་གི་དབང་གིས་དྲངས་པ་ཡིན་ནོ་ཞེས་བྱ་བར་ཤེས་པས་ཡིད་ཀྱི་རྣམ་པར་ཤེས་པ་མིག་གི་དབང་པོ་ལ་སོགས་པ་ལྟ་བུ་དེ་རང་རང་གི་སྤྱོད་ཡུལ་དང་ཡུལ་ཉམས་སུ་མྱོང་
[318b.2]ཞིང་གཟུགས་ལ་སོགས་པ་འདོད་པ་ཡིན་ནོ། །ཡིད་ཀྱི་དབང་འབའ་ཞིག་གིས་དྲངས་པའི་ཡིད་ཀྱི་རྣམ་པར་ཤེས་པ་གང་ཡིན་པ་ཞེས་བྱ་བ་རྒྱས་པར་འབྱུང་བ་ནི་ཡིད་ཀྱི་དབང་གིས་དྲངས་པ་གང་ཡིན་པ་དེ་ནི་དེ་ལས་གཞན་པ་མིག་ལ་སོགས་པའི་ཡུལ་ལ་མི་འདོད་པ་ཉིད་དོ། །འོ་ན་ཅི་ཞེ་ན། རང་
[318b.3]གི་ཡུལ་ཆོས་ཀྱི་སྐྱེ་མཆེད་ཁོ་ན་ལ་དམིགས་ཏེ། དེའི་ཕྱིར་གལ་ཏེ་དེ་ལྟ་ན་ཡིད་ཀྱི་དབང་པོ་ཡང་འཁྲུལ་པ་མེད་པར་འགྱུར་ཏེ་ཞེས་སྨྲས་པ་གང་ཡིན་པ་དེ་ཉེས་པ་མེད་དོ། །གང་ཟག་ནི་མ་ཡིན་པས་ཞེས་བྱ་བ་ཅི་ཞེ་ན་མངོན་པར་ཤེས་པར་བྱ་བ་དང་ཡོངས་སུ་ཤེས་པར་བྱ་བའོ། །དེ་ལྟ་བས་ན་
[318b.4]གང་ཟག་འདི་རྣམ་པར་ཤེས་པར་བྱ་བ་ཡང་མ་ཡིན་ཏེ། དོན་གྱིས་ན་འདི་མངོན་པར་ཤེས་པར་བྱ་བ་དང་ཡོངས་སུ་ཤེས་པར་བྱ་བ་མ་ཡིན་ནོ་ཞེས་བཤད་ཀྱི་དོན་གྱི་རྣམ་པར་ཤེས་པར་བྱ་བ་མ་ཡིན་ནོ་ཞེས་ནི་མ་བཤད་པ་ཡིན་ནམ་ཞེ་ན། དེའི་ཕྱིར་ཤེས་རབ་དང་རྣམ་པར་ཤེས་པ་གཉིས་ནི་
[318b.5]ཡུལ་འདྲ་བའི་ཕྱིར་རོ་ཞེས་བྱ་བ་སྨོས་སོ། །མིག་ལ་སོགས་པ་ནི་རྣམ་པར་ཤེས་པར་བྱ་བ་ཡང་ཡིན་གྱི་མངོན་པར་ཤེས་པར་བྱ་བ་འབའ་ཞིག་ཏུ་ནི་མ་ཟད་དོ། །བདག་མེད་པས་ཞེས་བྱ་བ་ནི་མིག་གིས་ཏེ། མིག་གི་རྣམ་པར་ཤེས་པས་ཞེས་བྱ་བའི་དོན་ཏོ། །ངེས་པའི་དོན་གྱི་མདོ་ལ་བརྟེན་པར་
[318b.6]གསུངས་ཞེས་བྱ་བ་ནི་དགེ་སློང་དག་བཞི་པོ་འདི་དག་ནི་བརྟེན་པ་ཡིན་ནོ། །བཞི་གང་ཞེ་ན། ཆོས་ལ་བརྟེན་གྱི་གང་ཟག་ལ་མ་ཡིན་པ་དང་། དོན་ལ་བརྟེན་གྱི་ཚིག་འབྲུ་ལ་མ་ཡིན་པ་དང་། ངེས་པའི་དོན་གྱི་མདོ་ལ་བརྟེན་གྱི་དྲང་བའི་དོན་ལ་མ་ཡིན་པ་དང་། ཡེ་ཤེས་ལ་བརྟེན་གྱི་རྣམ་པར་ཤེས་པ་
[318b.7]ལ་མ་ཡིན་པའོ་ཞེས་འབྱུང་བ་ཡིན་ནོ། །བཏགས་པ་ལ་ལྷུང་བར་ཟད་ཅེས་བྱ་བ་ནི་གང་ཁོ་ན་ལ་ཐ་སྙད་གདགས་པའི་དོན་དུ་བདག་གོ་ཞེས་གདགས་པར་བྱ་བ་དེ་ཁོ་ན་ལ་བདག་ཏུ་མངོན་པར་ཞེན་པར་ཟད་དོ། །འདིར་དཔེར་བརྗོད་པ་ནི། འདི་ལ་བདག་གམ་སེམས་ཅན་མེད། །ཅེས་བྱ་བ་འདི་དང་།
[319a]
[319a.1]གང་ཟག་དམིགས་པ་མ་ཡིན་ནོ། །ཞེས་བྱ་བ་འདི་ཡིན་ནོ། །དེ་ཡང་འགའ་ཡང་མི་དམིགས་སོ། །ཞེས་བྱ་བ་འདི་ཡང་དཔེར་བརྗོད་པ་ཡིན་ཏེ། གང་ཞིག་སྟོང་པ་ཉིད་གོམས་པར་བྱེད་པའི་རྣལ་འབྱོར་པ་ཡང་མེད་དོ། །བདག་ཏུ་ལྟ་བ་དང་ཞེས་བྱ་བ་ནས་སྲོག་ཏུ་ལྟ་བར་
[319a.2]འགྱུར་ཞེས་བྱ་བའི་བར་ནི་ཉེས་དམིགས་དང་པོའོ། །མུ་སྟེགས་ཅན་རྣམས་དང་ཁྱད་པར་མེད་པར་འགྱུར་ཞེས་བྱ་བ་ནི་གཉིས་པའོ། །ལམ་གོལ་བར་ཞུགས་པར་འགྱུར་ཞེས་བྱ་བ་ནི་གསུམ་པའོ། །འདིའི་སེམས་སྟོང་པ་ཉིད་ལ་མི་འཇུག་ཅིང་ཞེས་བྱ་བ་ནས་རྣམ་པར་གྲོལ་བར་མི་འགྱུར་ཞེས་བྱ་བའི་
[319a.3]བར་ནི་བཞི་པའོ། །འདིའི་འཕགས་པའི་ཆོས་རྣམས་རྣམ་པར་བྱང་བར་མི་འགྱུར་རོ་ཞེས་བྱ་བ་ནི་ལྔ་པའོ། །འོ་ན་ནི་དེ་དག་གི་སྟོན་པ་ཡང་སངས་རྒྱས་མ་ཡིན་ཞེས་བྱ་བ་ནི་དེ་དག་ལ་སངས་རྒྱས་ཀྱི་བཀའ་ཚད་མ་མ་ཡིན་པས་སོ་སྙམ་དུ་བསམས་པའོ། །འདི་ནི་སངས་རྒྱས་ཀྱི་བཀའ་མ་ཡིན་ནོ་ཞེས་
[319a.4]བྱ་བ་འདི་འགའ་ཞིག་གིས་མདོ་སྡེ་རྣམས་སྒྲོ་བཏགས་སོ་སྙམ་དུ་བསམས་པ་ཡིན་ནོ། །སྡེ་པ་གཞན་ཐམས་ཅད་ལས་ཞེས་བྱ་བ་ནི་གོས་དམར་བའི་སྡེ་པ་ལ་སོགས་པ་ལས་སོ། །མདོ་དང་མི་འགལ་བ་ནི་མདོ་སྡེ་དང་འགལ་བ་མེད་པའོ། །ཆོས་ཉིད་དང་ཡང་མི་འགལ་བ་ནི་རྟེན་ཅིང་འབྲེལ་པར་འབྱུང་བའི་
[319a.5]ཆོས་ཉིད་དང་ངོ་། །ཆོས་ཐམས་ཅད་ནི་བདག་མེད་པའོ་ཞེས་བྱ་བ་ནི་དེ་དག་ནི་བདག་གི་ངོ་བོ་ཉིད་ཀྱང་མ་ཡིན་ལ། དེ་དག་ལ་ཡང་བདག་མེད་པས་ཆོས་ཐམས་ཅད་ནི་བདག་མེད་པའོ། །གཉིས་ལ་བརྟེན་ནས་ཞེས་བྱ་བ་ནི་མིག་དང་གཟུགས་རྣམས་ནས། ཡིད་དང་ཆོས་རྣམས་ཀྱི་བར་ལའོ། །
[319a.6]བདག་མེད་པ་ནི་ཕུང་པོ་དང་། སྐྱེ་མཆེད་དང་ཁམས་རྣམས་ཡིན་ནོ་ཞེས་སྨྲས་ན་རེ་ཞིག་སྔར་གཟུགས་རྣམས་ཞེས་ཀྱང་བརྗོད་པར་མི་བྱ། གཟུགས་རྣམས་མ་ཡིན་ཞེས་ཀྱང་བརྗོད་པར་མི་བྱའོ་ཞེས་སྨྲས་པ་གང་ཡིན་པ་དེ་ནི་བསལ་ཏེ། བདག་གཞན་ཡིན་པའི་ཕྱིར་དེ་ནི་བོར་བར་འགྱུར་རོ། །
[319a.7]དེ་ལྟ་བས་ན་བདག་ཏུ་འཛིན་པ་ཐམས་ཅད་ནི་བདག་མེད་པ་ཁོ་ན་ལ་ཡིན་ནོ་ཞེས་བྱ་བ་ནི་དེ་ལས་གཞན་མེད་པས་སོ། །གལ་ཏེ་དེ་ལྟ་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་རྗེས་སུ་དྲན་པ་ན་ཉེ་བར་ལེན་པའི་ཕུང་པོ་ལྔ་པོ་འདི་དག་ཁོ་ན་རྗེས་སུ་དྲན་པར་གྱུར་ཏམ། རྗེས་སུ་དྲན་ནམ་རྗེས་སུ་དྲན་པར་འགྱུར་གྱི་གང་
[319b]
[319b.1]ཟག་ནི་མ་ཡིན་ནམ། ཅིའི་ཕྱིར་བདག་ནི་འདས་པའི་དུས་ན་གཟུགས་འདི་ལྟ་བུ་དང་ལྡན་པར་གྱུར་ཏོ་ཞེས་གསུངས་ཏེ། བདག་ཅེས་གསུངས་པའི་ཕྱིར་གང་ཟག་ལ་བྱ་བར་སྟོན་ཏོ། །གང་ཟག་དེ་ལྟར་རྣམ་པ་དུ་མས་རྗེས་སུ་དྲན་པ་དེ་དག་དེ་ལྟར་རྗེས་སུ་དྲན་ནོ་ཞེས་བྱ་བར་ཚིག་ཁོང་ནས་དྲང་ངོ་། །འདི་ལ་ནི་མ་
[319b.2]བཏོན་པ་ཁོ་ན་སྐབས་ཡིན་ནོ་ཞེས་བྱ་བ་ནི་བདག་མེད་ཅེས་འདོན་པ་ཡིན་ན་འཇིག་ཚོགས་ལ་ལྟ་བ་ཡོངས་སུ་འཛིན་པར་ཐལ་བར་འགྱུར་རོ་ཞེས་བྱ་བའི་ཐ་ཚིག་གོ། །འཇིག་ཚོགས་ལ་ལྟ་བའི་མུ་ནི་ཉི་ཤུ་འབྱུང་སྟེ། བདག་གཟུགས་ཡིན་ནོ་ཞེས་ཡང་དག་པར་རྗེས་སུ་ལྟ་བ་དང་། བདག་གཟུགས་དང་ལྡན་
[319b.3]པ་དང་། གཟུགས་བདག་གི་ཡིན་པ་དང་། གཟུགས་ལ་བདག་གནས་པ་ཞེས་བྱ་བ་ནས་དེ་བཞིན་དུ་རྣམ་པར་ཤེས་པའི་བར་དུ་བརྗོད་པར་བྱའོ། །ཕུང་པོ་དང་རྒྱུན་ལ་སོགས་པ་བཞིན་ནོ་ཞེས་བྱ་བ་ནི་ཕུང་པོ་བཞིན་དང་རྒྱུན་བཞིན་ནོ། །སོགས་པ་ཞེས་བྱ་བའི་སྒྲས་ནི་བཏུང་བ་ལ་སོགས་པ་བསྡུའོ། །སྐད་ཅིག་
[319b.4]མ་གཅིག་ལ་མང་པོ་རྣམས་འདུས་པ་ནི་ཕུང་པོའོ། །སྐད་ཅིག་མ་མང་པོ་ལ་འདུས་པ་དག་ནི་རྒྱུན་ནོ། །ཕུང་པོའི་དཔེ་ནི་ཆོས་མང་པོ་དག་ལ་གང་ཟག་འདོགས་པར་སྟོན་ཏོ། །རྒྱུན་གྱི་དཔེ་ནི་གཟུགས་དང་ཚོར་བ་ལ་སོགས་པའི་ཕུང་པོ་དག་ནི་རྒྱུན་མང་པོ་ཉིད་ཡོད་ན་གང་ཟག་འདོགས་པར་སྟོན་ཏོ། །འདི་ཇི་
[319b.5]ལྟར་ཁོང་དུ་ཆུད་ཅེས་བྱ་བ་ནི་སངས་རྒྱས་ཞེས་བྱ་བའི་རྒྱུད་ལ་གང་དུ་བཞེད་པར་གཏད་པ་ཙམ་གྱིས་ཕྱིན་ཅི་མ་ལོག་པའི་མཁྱེན་པ་སྐྱེ་བ་གང་ཡིན་པའི་མཐུ་འདི་ཡོད་ཀྱི། གང་ཟག་ནི་མ་ཡིན་ནོ་ཞེས་བྱ་བའོ། །སྨྲས་པ། འདས་པ་ལ་སོགས་པ་གསུངས་པའི་ཕྱིར་ཏེ། རྫོགས་སངས་རྒྱས་འདས་གང་
[319b.6]དག་དང་། །ཞེས་བྱ་བ་རྒྱས་པར་བརྗོད་ནས། དེ་ལྟ་བས་ན་ཕུང་པོའི་རྒྱུན་ཁོ་ན་ལ་སངས་རྒྱས་ཞེས་བྱའི་གང་ཟག་ལ་ནི་མ་ཡིན་ནོ་ཞེས་མཇུག་བསྡུའོ། །དགེ་སློང་དག་ཁྱེད་ལ་ཁུར་ཡང་བསྟན་ཏོ་ཞེས་བྱ་བ་རྒྱས་པར་འབྱུང་བ་ནི་དགེ་སློང་དག་ཁྱེད་ལ་ཁུར་ལེན་པ་དང་ཁུར་འདོར་བ་དང་ཁུར་ཁྱེར་
[319b.7]བ་ཡང་བསྟན་གྱི་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །ཁུར་གང་ཞེ་ན། ཉེ་བར་ལེན་པའི་ཕུང་པོ་ལྔའོ། །ཁུར་ལེན་པ་གང་ཞེ་ན། ཡང་སྲིད་པའི་སྲེད་པ་དགའ་བའི་འདོད་ཆགས་དང་ལྡན་པ་དེ་དང་དེར་མངོན་པར་དགའ་བའོ། །ཁུར་འདོར་བ་གང་ཞེ་ན། ཡང་
[320a]
[320a.1]སྲིད་པ་པའི་སྲེད་པ་དགའ་བའི་འདོད་ཆགས་དང་ལྡན་པ་དེ་དང་དེར་མངོན་པར་དགའ་བ་དེ་ཉིད་མ་ལུས་པར་སྤངས་པ་དང་། སོ་སོར་ངེས་པར་འབྱུང་བ་དང་། བྱང་བར་གྱུར་པ་དང་། ཟད་པ་དང་། འགོག་པ་དང་། ཉེ་བར་ཞི་བ་དང་། ནུབ་པ་གང་ཡིན་པའོ། །ཁུར་ཁྱེར་བ་གང་ཞེ་ན།
[320a.2]གང་ཟག་ཡིན་ནོ་ཞེས་བརྗོད་པར་བྱ་སྟེ། ཚེ་དང་ལྡན་པ་དེ་མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ། ཟས་ནི་འདི་ལྟ་བུ་ཞིག་ཟ་ཟ། བདེ་བ་དང་སྡུག་བསྔལ་ནི་འདི་ལྟ་བུ་ཞིག་མྱོང་། ཚེ་ནི་འདི་ཙམ་ཞིག་ཐུབ། ཡུན་ནི་འདི་སྲིད་ཅིག་གནས་གནས། ཚེའི་མཐའ་ནི་འདི་ཙམ་
[320a.3]ཞིག་གོ་ཞེས་བྱ་བ་གང་ཡིན་པའོ། །ཁུར་ཁྱེར་བར་བྱེད་པས་ན་ཁུར་ཁྱེར་བ་སྟེ་དཔེར་བརྗོད་པ་ནི་འདི་ཡིན་ནོ། །དེ་ཉིད་ཀྱི་ཕྱིར་ཁུར་ཉིད་ཁུར་ཁྱེར་བ་ཡིན་པར་ནི་རིགས་པ་མ་ཡིན་ཏེ་ཞེས་བྱ་བ་སྨོས་སོ། །ཇི་སྐད་དུ་བཤད་པའི་མཚན་ཉིད་ཅན་གྱི་ཕུང་པོ་ལེན་པ་ཡང་ཕུང་པོས་མ་བསྡུས་པར་ཐལ་བར་
[320a.4]ཡང་འགྱུར་རོ་ཞེས་བྱ་བ་ནི་གང་ཟག་བཞིན་དུ་ཕུང་པོས་མ་བསྡུས་པར་ཐལ་བར་འགྱུར་བ་ཞིག་ན། དེ་ལྟར་ཡང་མི་འདོད་དེ་དེ་ལྟ་བས་ན་ཕུང་པོ་ལེན་པ་བཞིན་གང་ཟག་ཕུང་པོ་དག་ལས་དོན་གཞན་དུ་འགྱུར་བ་མ་ཡིན་ནོ། །ཁུར་ཁྱེར་བ་ནི་བཅོམ་ལྡན་འདས་ཀྱིས་ཅི་ནས་ཀྱང་ཞེས་བྱ་བ་
[320a.5]ཐམས་ཅད་རྒྱས་པར་བརྗོད་ནས། གཞན་དུ་ཤེས་པར་མི་འགྱུར་བར་ཞེས་བྱ་བ་བརྗོད་པར་བྱའོ། །གལ་ཏེ་གང་ཟག་རྫས་སུ་ཡོད་པར་འགྱུར་ན་མདོ་དེ་ལས་ཁུར་ཁྱེར་བ་གང་ཞེ་ན། གང་ཟག་ཡིན་ནོ་ཞེས་བརྗོད་པར་བྱ་སྟེ་ཞེས་བྱ་བ་དེ་ཁོ་ན་ཙམ་ཞིག་གསུངས་པར་འགྱུར་གྱི། ཡང་
[320a.6]ཚེ་དང་ལྡན་པ་མིང་ནི་འདི་ཞེས་བྱ་ཞེས་བྱ་བ་ནས་རྒྱས་པར་ཚེའི་མཐའ་ནི་འདི་ཙམ་ཞིག་གོ་ཞེས་བྱ་བའི་བར་རྣམ་པར་མ་ཕྱེ་བར་འགྱུར་རོ། །ཡང་ཁྱད་པར་དུ་མཛད་པ་འདི་ནི་གང་ཟག་བཏགས་པར་ཡོད་པ་ཡིན་ནོ་ཞེས་ཤེས་པར་བྱ་བའི་ཕྱིར་རོ་སྙམ་དུ་དགོངས་པ་ཡིན་ཏེ། ཅི་ནས་ཀྱང་དེ་ཉིད་
[320a.7]བཏགས་པའི་ཡོད་པ་ཡིན་པར་ཤེས་པར་བྱའི། གང་ཟག་རྫས་སུ་ཡོད་པ་ལ་རྟག་པ་དང་བརྗོད་པར་བྱ་བ་མ་ཡིན་ནོ་ཞེས་གཞན་དུ་ནི་ཤེས་པར་མ་བྱེད་ཅིག་ཅེས་བྱ་བ་ཡིན་ནོ། །ཕུང་པོ་སྔ་མ་རྣམས་ཞེས་བྱ་བ་རྒྱས་པར་འབྱུང་བ་དེ་ལ་ཕུང་པོ་གང་དག་གནོད་པ་བྱེད་ཅིང་སྡུག་བསྔལ་གྱི་རྒྱུར་གྱུར་པ་དེ་
[320b]
[320b.1]དག་ནི་ཁུར་ཞེས་བཤད་དོ། །ཕྱི་མ་གནོད་པར་འགྱུར་བ་གང་དག་ཡིན་པ་དེ་དག་ནི་ཁུར་ཁྱེར་བ་ཞེས་བཤད་དོ། །སེམས་ཅན་སྐྱེ་བ་པ་ཞེས་བྱ་བ་ནི་སྐྱེ་བ་ལ་མཛེས་པར་བྱེད་པའི་ཕྱིར་རོ། །གང་ཟག་བདེན་པ་རྣམས་ཀྱི་ཁོངས་སུ་མ་གཏོགས་པའི་ཕྱིར་རོ་ཞེས་བྱ་བ་ནི་ཇི་ལྟར་ཀུན་
[320b.2]བརྟགས་པའི་གང་ཟག་ནི་སྡུག་བསྔལ་ལ་སོགས་པའི་ཁོངས་སུ་མ་གཏོགས་ཏེ། གང་ཟག་ནི་སྡུག་བསྔལ་ནས་ལམ་གྱི་བར་མ་ཡིན་ནོ། །དེའི་གང་ཟག་ལ་སྐུར་པ་འདེབས་པའི་ལོག་པར་ལྟ་བ་འདི་ནི་བདེན་པ་མཐོང་བས་སྤང་བར་བྱ་བ་ཡང་མ་ཡིན་ཏེ། བདེན་པ་གང་ལ་ལོག་པར་ཞུགས་
[320b.3]པ་དེ་ནི་བདེན་པ་དེ་མཐོང་བས་སྤོང་བར་འགྱུར་རོ། །དེ་བཞིན་དུ་གང་ཟག་སྡུག་བསྔལ་དང་ཀུན་འབྱུང་བའི་ཁོངས་སུ་མ་གཏོགས་པའི་ཕྱིར་བསྒོམ་པས་སྤང་བར་བྱ་བ་ཡང་མ་ཡིན་ཏེ། བསྒོམ་པས་སྤང་བར་བྱ་བའི་ཉོན་མོངས་པ་ནི་བསྒོམ་པས་སྤང་བར་བྱ་བའི་སྡུག་བསྔལ་དང་ཀུན་
[320b.4]འབྱུང་བའི་དངོས་པོ་ཁོ་ན་ལ་དམིགས་སོ། །དེ་ལྟར་ན་དེ་ནི་བསྒོམ་པས་སྤང་བར་བྱ་བ་མ་ཡིན་པ་ཉིད་དུ་ཐལ་བར་འགྱུར་ཏེ། གང་ཟག་དེ་གཉིས་ཀྱི་ཁོངས་སུ་མ་གཏོགས་པས་དེའི་ཕྱིར་དེ་བསྒོམ་པས་སྤང་བར་བྱ་བ་མ་ཡིན་པར་འགྱུར་རོ། །ཡང་ན་ལྟ་བ་ནི་ནམ་ཡང་བསྒོམ་པས་སྤང་བར་བྱ་བ་མ་ཡིན་པས་
[320b.5]དེ་བསྒོམ་པས་སྤང་བར་བྱ་བ་མ་ཡིན་ནོ། །ཏིལ་གཅིག་དང་འབྲས་ཐུག་པོ་ཆེ་གཅིག་ཅེས་བྱ་བ་ལྟ་བུ་དང་། ཕུང་པོ་གཅིག་དང་ཚིག་གཅིག་ཅེས་བྱ་བ་བཞིན་ནོ་ཞེས་བྱ་བ་ནི་ཇི་ལྟར་རྫས་བརྒྱད་པ་ཡིན་ཡང་ཏིལ་གཅིག་དང་འབྲས་ཐུག་པོ་གཅིག་ཅེས་བྱ་བ་དང་། དེ་བཞིན་དུ་ཕུང་པོ་གཅིག་དང་ཚིག་གཅིག་
[320b.6]ཅེས་བྱ་བ་ལྟར་གང་ཟག་གཅིག་ཅེས་བྱ་བ་ཡང་དེ་དང་འདྲའོ། །སྐྱེ་བ་དང་ལྡན་པ་ཉིད་དུ་ཁས་བླངས་པའི་ཕྱིར་རོ་ཞེས་བྱ་བ་ནི་སྐྱེའོ་ཞེས་སྨྲས་པས་དེ་སྐྱེ་བ་དང་ལྡན་པ་ཉིད་དུ་ཁས་བླངས་པ་ཡིན་ཏེ། དེའི་ཕྱིར་ཁྱེད་ཀྱིས་འདུས་བྱས་ཡིན་ནོ་ཞེས་བརྗོད་དགོས་སོ། །ཕུང་པོ་གཞན་ལེན་པའི་ཕྱིར་ཞེས་བྱ་བ་ནི་དེ་འདུས་
[320b.7]བྱས་ཉིད་དུ་མི་འགྱུར་རོ་སྙམ་དུ་བསམས་པ་ཡིན་ནོ། །དཔེར་ན་རིག་པ་བླངས་པའི་ཕྱིར་མཆོད་སྦྱིན་པ་སྐྱེས་སོ་ཞེས་བྱ་བ་འདི་འབྱུང་བའི་དོན་དུ་སྐྱེས་པ་མ་ཡིན་པ་དེ་དང་འདྲ་སྟེ། ཐམས་ཅད་སྦྱར་བར་བྱའོ། །ཆོས་སུ་བརྡར་བཏགས་པ་མ་གཏོགས་པ་ཞེས་བྱ་བ་ནི་རྟེན་ཅིང་འབྲེལ་པར་
[321a]
[321a.1]འབྱུང་བའི་མཚན་ཉིད་ལ་མ་གཏོགས་པ་སྟེ། དེ་ཡང་འདི་ལྟ་སྟེ། འདི་ཡོད་པས་ན་ཞེས་བྱ་བ་ལ་སོགས་པ་ཡིན་ནོ། །བྱེད་པ་པོ་ནི་མི་དམིགས་སོ་ཞེས་བྱ་བ་རྒྱས་པར་འབྱུང་བ་ནི་ལས་ནི་བྱེད་པ་པོ་མི་དམིགས་སོ། །དེ་ཡང་ཅི་འདྲ་བ་ཞིག་ཅེ་ན་སྨྲས་པ། གང་ཞིག་ཚེ་འདིའི་ཕུང་
[321a.2]པོ་རྣམས་འདོར་ཞིང་གཏོང་ལ་ཚེ་ཕྱི་མའི་ཕུང་པོ་གཞན་དག་ཉིང་མཚམས་སྦྱོར་ཞིང་ཉེ་བར་ལེན་པར་བྱེད་པ་རྫས་སུ་ཡོད་པར་གནས་པའོ། །དབོ་ལས་སྐྱེས་ལེན་ཅེས་མི་སྨྲའོ་ཞེས་བྱ་བ་ནི་གལ་ཏེ་ངས་འདི་སྐད་དུ་འདི་ལེན་ཏོ་སྨྲས་ན། ཚིག་དེ་ཁྱོད་ལ་ལེགས་པར་འགྱུར་རམ། བཙུན་པ་མ་
[321a.3]ལགས་སོ། །དེ་ལྟ་བས་ན་ཕུང་པོ་རྣམས་ལེན་པར་བྱེད་པ་དང་འདོར་བར་བྱེད་པ་ནི་འགའ་ཡང་མེད་དོ་ཞེས་འབྱུང་བ་ཡིན་ནོ། །དེ་ཡང་དེ་དང་འདྲ་ལ་ཞེས་བྱ་བ་ནི་སྐད་ཅིག་རེ་རེ་ལ་སྔོན་མེད་པ་ཁོ་ན་ལས་སྐྱེ་བ་ཁོ་ནའོ་ཞེས་བྱ་བའི་ཐ་ཚིག་སྟེ། གལ་ཏེ་གང་ཟག་ཡིན་ནོ་ཞེ་ན་ནི་དེ་མ་གྲུབ་བོ་ཞེས་བྱ་བ་ལ་
[321a.4]སོགས་པ་ཉེ་བར་དགོད་པས་ནི་དཔེ་མ་གྲུབ་པ་ཉིད་དུ་སྟོན་ཏོ། །ལུས་དང་རིག་པ་དང་རྟགས་བཞིན་དུ་ཞེས་བྱ་བ་ལ་རིག་པ་དང་རྟགས་ནི་རིག་པ་དང་རྟགས་སོ། །ལུས་དང་རིག་པ་དང་རྟགས་ནི་ལུས་དང་རིག་པ་དང་རྟགས་དག་གོ། །དེ་དག་དང་འདྲ་བར་ཏེ་ལུས་དང་རིག་པ་དང་རྟགས་བཞིན་དུ་
[321a.5]ཕུང་པོ་དང་གང་ཟག་དག་གཞན་ཉིད་དུ་འགྱུར་རོ། །ཇི་ལྟར་བླང་བར་བྱ་བའི་རིག་པ་དང་རྟགས་ལས་ལུས་གཞན་ཉིད་ཡིན་པ་དེ་བཞིན་དུ་བླང་བར་བྱ་བ་ཕུང་པོ་ལས་ཀྱང་གང་ཟག་གཞན་ཉིད་ཡིན་ནོ་སྙམ་དུ་བསམས་པ་ཡིན་ནོ། །རྒ་བ་དང་ན་བ་ཡང་ལུས་གཞན་ཁོ་ན་ཡིན་ནོ་ཞེས་བྱ་བ་ནི་གནས་
[321a.6]སྐབས་རྣམས་སྐད་ཅིག་རེ་རེ་ལ་གཞན་ཉིད་ཡིན་པར་བསམས་པ་སྟེ་དེ་ལ་རྒ་བ་སྐྱེས་སོ། །ན་བ་སྐྱེས་སོ་ཞེས་གང་སྨྲས་པའི་དཔེ་མ་གྲུབ་པོ་ཞེས་སྟོན་པར་བྱེད་དོ། །འོན་ཏེ་ཡང་ལུས་གནས་པ་ལ་གནས་སྐབས་གཞན་ལོག་ན་གནས་སྐབས་གཞན་འབྱུང་ངོ་སྙམ་དུ་སེམས་ན་གྲངས་
[321a.7]ཅན་པའི་འགྱུར་བར་སྨྲ་བ་དེ་ནི་མཛོད་གྱི་གནས་གོང་མར་བཀག་ཟིན་ཏོ། །ཇི་སྐད་དུ་ཞེ་ན་གནས་པ་གང་ལ་ཆོས་གཞན་གྱི་ཁྱད་པར་དུ་ཡོངས་སུ་བརྟག་པར་བྱ་བའི་ཆོས་ཅན་དེ་ཉིད་ཡོད་པ་མ་ཡིན་ཏེ། དེ་ཉིད་འདི་ཡིན་ལ་དེ་ལྟ་ན་ཡང་མ་ཡིན་ནོ་ཞེས་བྱ་བའི་ཚིག་གི་རིགས་པ་འདི་ནི་སྔོན་
[321b]
[321b.1]མ་བྱུང་བ་ཞེས་བྱ་བའོ། །འབྱུང་བ་དག་ནི་བཞི་ཡིན། གཟུགས་ནི་གཅིག་ཡིན་ཞེས་བྱ་བ་ནི་གཟུགས་གང་ཞེ་ན། འབྱུང་བ་ཆེན་པོ་བཞི་དག་དང་ཞེས་བྱ་བ་ལ་སོགས་པ་ཡིན་ནོ། །སྨྲ་བ་འདི་ནི་ཕྱོགས་ལ་ཡོད་པ་ཡིན་ནོ་ཞེས་བྱ་བ་ནི་སྨྲ་བ་འདི་ཕྱོགས་འགའ་ཞིག་ལ་ཡོད་དོ་ཞེས་བྱ་བའི་ཐ་
[321b.2]ཚིག་གོ། །འབྱུང་བ་ཙམ་གྱི་ཕྱོགས་ལ་འོ་ཞེས་བྱ་བ་ནི་གནས་བརྟན་སངས་རྒྱས་ལྷའི་ཕྱོགས་ལ་ཡོད་ཀྱི། ཁོ་བོ་ཅག་གི་ཕྱོགས་ལ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ཡང་ཞེས་བྱ་བ་ནི་འབྱུང་བ་ཙམ་གྱི་ཕྱོགས་ལ་འབྱུང་བ་དག་ལས་གཟུགས་གཞན་མ་ཡིན་པ་དེ་བཞིན་དུ་ཕུང་
[321b.3]པོ་དག་ལས་གང་ཟག་གཞན་མ་ཡིན་ནོ་ཞེས་ཁས་བླངས་པ་ཡིན་པས་རང་གི་གྲུབ་པའི་མཐའ་ཡོངས་སུ་བོར་བར་འགྱུར་རོ་སྙམ་དུ་བསམས་པ་ཡིན་ནོ། །ཅིའི་ཕྱིར་བཅོམ་ལྡན་འདས་ཀྱིས་སྲོག་དེ་ཉིད་ལུས་ཡིན་པའམ་གཞན་ཡིན་ནོ་ཞེས་ལུང་མ་བསྟན་ཞེས་བྱ་བ་ལ། དེ་ལ་དེ་དག་གི་བསམ་པ་ནི་གལ་ཏེ་ཕུང་
[321b.4]པོ་དག་ཁོ་ན་ལ་གང་ཟག་ཉེ་བར་འདོགས་ན་ཅིའི་ཕྱིར་ལུས་ཁོ་ན་སྲོག་ཡིན་ནོ་ཞེས་མ་བཤད་སྙམ་པ་འདི་ཡིན་ནོ། །སྔ་མ་དག་ཁོ་ནས་ཞེས་བྱ་བ་ནི་གནས་བརྟན་ཀླུ་སྡེ་ལ་སོགས་པས་སོ། །སྨྲ་བ་མང་བ་ཞེས་བྱ་བ་ནི་གཅོར་པའོ། །ཕ་རོལ་པོས་གལ་ཏེ་གང་ཟག་བརྗོད་པར་བྱ་བ་མ་ཡིན་ན་ཅིའི་ཕྱིར་བཅོམ་ལྡན་
[321b.5]འདས་ཀྱིས་ཀྱང་མེད་པ་ཁོ་ནའོ་ཞེས་མ་གསུངས་ཞེས་བྱ་བ་སྨོས་སོ། །དེ་ནི་དེ་བསྟན་པ་ཡང་མི་བཟོད་དོ་ཞེས་བྱ་བ་ནི་བདག་མེད་པ་བསྟན་དུ་མི་རུང་ངོ་ཞེས་བྱ་བའི་དོན་ཏོ། །སྔ་ནས་ཀུན་དུ་རྨོངས་པ་ཞེས་བྱ་བ་ནི་འཇིག་ཚོགས་ལ་ལྟ་བ་དང་ལྡན་པའི་རྨོངས་པས་སོ། །ཕྱིར་ཞིང་ཆེས་རྒྱས་པར་འགྱུར་
[321b.6]ཞེས་བྱ་བ་ནི་ཆད་པར་ལྟ་བ་དང་ལྡན་པའི་ལྟ་བ་གཞན་སྐྱེད་པར་འགྱུར་རོ་སྙམ་དུ་བསམས་པ་ཡིན་ནོ། །དེ་ཉིད་ཀྱི་ཕྱིར་བདག་གི་བདག་སྔོན་ཡོད་པར་འགྱུར་བ་ལས་ད་ནི་བདག་གི་དེ་ཡང་མེད་དོ་ཞེས་བྱ་བ་སྨོས་སོ། །འདིར་སྨྲས་པ་ཞེས་བྱ་བ་ནི་བཙུན་པ་གཞོན་ནུ་ལེན་གྱིས་སོ། །ལྟ་བའི་མཆེ་བས་
[321b.7]སྨས་པ་དང་ཞེས་བྱ་བ་ནི་ལྟ་བ་ཉིད་མཆེ་བ་ཡིན་ཏེ། སངས་རྒྱས་བཅོམ་ལྡན་འདས་རྣམས་ནི་དེས་སྨས་པ་ལ་ལྟོས་ནས་གཉེན་པོ་ཆོས་བདག་མེད་པ་ཡང་སྟོན་པར་མཛད་དོ། །ལས་རྣམས་འཇིག་པ་ལ་ལྟོས་ནས་ཏེ་བྱས་པ་ཆུད་ཟ་བ་ལ་ལྟོས་ནས་གང་ཟག་ཡོད་པ་ཉིད་ལྟ་བུར་སྟོན་པ་རྣམས་གཞན་དུ་ཡང་སྟོན་
[322a]
[322a.1]པར་མཛད་དོ། །སྟག་མོས་ཕྲུ་གུ་ཁྱེར་བ་ལྟར། །ཞེས་བྱ་བ་ནི་ཇི་ལྟར་སྟག་མོས་འདིའི་ལུས་མཆེ་བས་སྨོས་པར་འགྱུར་ན་མི་རུང་ངོ་སྙམ་ནས་སོས་ཧ་ཅང་བག་མེད་པར་བཟུང་སྟེ་ཡང་ཕྲུ་གུ་མི་ཁྱེར་མི་ཁྲིད་ལ་འདིས་འདི་ལ་ལྷུང་སྟེ་སྣད་པར་གྱུར་དུ་འོང་ངོ་སྙམ་ནས་སོས་ཧ་ཅང་ལྷད་
[322a.2]ལྷོད་དུ་བཟུང་སྟེ། ཡང་དེ་མི་ཁྱེར་གྱི་རན་པར་བཟུང་སྟེ་ཁྱེར་བ་ལྟ་བུར་ཞེས་བྱ་བའི་ཐ་ཚིག་གོ། །གཞན་དག་ནི་ཁྲིད་པ་ཞེས་འདོན་ཏེ་གནས་གཞན་ནས་ཁྲིད་ཅིང་སྤོག་པར་བྱེད་པ་ཞེས་བྱ་བའི་དོན་ཏོ། །དེ་བཞིན་དུ་དོན་སྟོན་པ་ལ་རྒྱུ་བསྟན་པའི་ཕྱིར་བདག་ཡོད་ཉིད་དུ་ཞེས་བྱ་བ་ལ་སོགས་པ་རྒྱས་པར་
[322a.3]སྨོས་ཏེ། གལ་ཏེ་བདག་ཡོད་པ་ཉིད་དུ་ཞུགས་པར་གྱུར་ན་འདུལ་བའི་སྐྱེ་བོ་ནི་འཇིག་ཚོགས་ལ་ལྟ་བའི་མཚན་ཉིད་ཀྱི་ལྟ་བའི་མཆེ་བས་ཞེས་སྨོས་པར་འགྱུར་རོ། །ཀུན་རྫོབ་རྟོགས་པར་མ་གྱུར་ནས་ཞེས་བྱ་བ་ནི་ཆོས་ཀྱི་བརྡ་མི་ཤེས་པ་སྟེ། ལས་ཀྱི་འབྲས་བུ་མེད་དོ་སྙམ་ནས་དགེ་བའི་ཆོས་སྟག་
[322a.4]གི་ཕྲུ་གུ་ལྟ་བུ་ཉམས་པར་བྱེད་པར་འགྱུར་རོ། །བཏགས་པ་ལ་ཡོད་པ་ནི་བཏགས་པ་སྟེ་ལ་ལ་གང་ཟག་ཀུན་རྫོབ་ཏུ་ཡོད་པ་ཡང་མེད་དོ་སྙམ་དུ་འཛིན་པར་འགྱུར་བས་དེའི་ཕྱིར་མེད་དོ་ཞེས་ཀྱང་མ་གསུངས་སོ། །ཡོད་ན་ཅིའི་ཕྱིར་ཡོད་མི་གསུང་། །ཞེས་བྱ་བ་ནི་གལ་ཏེ་གང་ཟག་ཡང་དག་པའི་དོན་དུ་
[322a.5]ཡོད་ན་བཅོམ་ལྡན་འདས་ཅིའི་ཕྱིར་གང་ཟག་ཡོད་དོ་ཞེས་མི་གསུང་། གཟུགས་ཡོད་དོ་ཞེས་སྨྲས་པ་ལ་ནི་ཉེས་པར་མི་འགྱུར་ཏེ། དེ་ཡོད་པའི་ཕྱིར་རོ། །གཅེར་བུ་པའི་ཉན་ཐོས་ཀྱི་བྱེའུ་བཟུང་བ་བཞིན་ནོ་ཞེས་བྱ་བ་ནི་གཅེར་བུ་པའི་ཉན་ཐོས་ཤིག་གིས་བྱེའུ་གསོན་པོ་ཞིག་བཟུང་ནས་བཅོམ་ལྡན་
[322a.6]འདས་ལ་བྱིའུ་འདི་གསོན་ནམ་མི་གསོན་ཞེས་དྲིས་སོ། །དེའི་བསམ་པ་ནི་འདི་ཡིན་ཏེ། གལ་ཏེ་དགེ་སྦྱོང་གཽ་ཏ་མ་གསོན་ནོ་ཞེས་གསུངས་ན་ནི་དེས་དེ་བཙིར་ནས་བསད་དེ་སྟོན་པར་བྱེད་དོ། །གལ་ཏེ་བཅོམ་ལྡན་འདས་ཀྱིས་འདི་སྐད་དུ་ཤིའོ་ཞེས་གསུངས་ན་ནི་དེས་དེ་གསོན་པོ་ཁོ་ནར་སྟོན་པར་བྱེད་དོ། །
[322a.7]དེ་ནི་ཇི་ལྟར་ན་འཇིག་རྟེན་གྱི་ཐམས་ཅད་མཁྱེན་པ་མ་ཡིན་པར་ཤེས་པར་འགྱུར་སྙམ་དུ་མངོན་པར་ཞེན་ཏོ། །བཅོམ་ལྡན་འདས་ཀྱིས་ནི་དེའི་བསམ་པ་མཁྱེན་ནས་ལུང་མ་བསྟན་གྱི། འདི་གསོན་ནམ་མི་གསོན་པ་ནི་ཁྱོད་ཀྱི་སེམས་ཀྱི་ཁོ་ན་ལས་སོ་ཞེས་བྱ་བ་ཁོ་ན་གསུངས་པ་དེ་དང་འདྲ་བར་འདི་ཡང་ལུང་མ་
[322b]
[322b.1]བསྟན་ཏོ། །བཞི་ཚན་འདི་ནི་དོན་མཐུན་ནོ། །ཞེས་བྱ་བ་ནི་འཇིག་རྟེན་རྟག་གོ་འཇིག་རྟེན་མི་རྟག་གོ་ཞེས་བྱ་བའི་བཞི་ཚན་འདི་དང་འཇིག་རྟེན་མཐའ་དང་ལྡན་ནོ། །འཇིག་རྟེན་མཐའ་དང་མི་ལྡན་ནོ་ཞེས་བྱ་བའི་བཞི་ཚན་འདི་དོན་གཅིག་གོ། །གལ་ཏེ་དེ་ལྟ་ན་ཇི་ལྟར་ལུང་མ་བསྟན་པའི་དངོས་པོ་བཅུ་བཞིར་འགྱུར་ཏེ། འཇིག་
[322b.2]རྟེན་རྟག་གོ་ཞེས་བྱ་བ་ནི་བཞི་ཚན་གཅིག་གོ། །མཐའ་དང་ལྡན་ནོ་ཞེས་བྱ་བ་ནི་བཞི་ཚན་གཉིས་པའོ། །དེ་བཞིན་འོངས་པ་ཤི་ནས་ཡོད། །ཅེས་བྱ་བ་ནི་བཞི་ཚན་གསུམ་པའོ། །སྲོག་དེ་ལུས་དེ་ཡིན་པ་དང་། །སྲོག་ཀྱང་གཞན་ལ་ལུས་ཀྱང་གཞན་ནོ་ཞེས་བྱ་བ་ནི་གཉིས་ཚན་ནོ། །བཞི་ཚན་གསུམ་དང་། གཉིས་
[322b.3]ཚན་གཅིག་ན་ལུང་དུ་མ་བསྟན་པའི་དངོས་པོ་བཅུ་བཞིའོ་ཞེ་ན། རྣམ་གྲངས་ཀྱི་ངོ་བོ་ཉིད་དུ་རྣམ་པར་གཞག་པ་ལ་ཡང་བཅུ་བཞི་ཉིད་སྲིད་པས་ཉེས་པ་མེད་དོ། །དེ་ཉིད་རྣམ་གྲངས་གཞན་གྱིས་འདྲིའམ་ཞེས་བྱ་བ་འདི་མཐའ་དང་ལྡན་པ་ཞེས་ཞུས་པ་གང་ཡིན་པའོ། །ཇི་ལྟ་ཞེ་ན་ཅི་ལགས། འཇིག་རྟེན་ཐམས་
[322b.4]ཅད་ལམ་འདིས་ངེས་པར་འབྱུང་ངམ་ཞེས་བྱ་བ་འདི་ནི་མཐའ་དང་ལྡན་པ་ཞེས་བྱ་བ་དང་རྟག་པ་ཞེས་བྱ་བ་ཞུས་པ་ཡིན་ནོ། །འོན་ཏེ་འཇིག་རྟེན་ཕྱོགས་གཅིག་ལགས། །ཞེས་བྱ་བ་འདིས་ནི་མཐའ་དང་ལྡན་པ་ཡང་ཡིན་ལ་མཐའ་དང་མི་ལྡན་པ་ཡང་ཡིན་ཞེས་བྱ་བ་དང་། རྟག་པ་ཡང་ཡིན་མི་རྟག་པ་ཡང་
[322b.5]ཡིན་ཞེས་བྱ་བ་དང་པོ་ཡིན་ནོ། །གང་ཟག་གསོན་པོ་ནི་ཡོད་དོ་ཞེས་བྱ་བ་ནི་གང་ཟག་དེ་ཉིད་དང་གཞན་ཉིད་དུ་བརྗོད་པར་བྱ་བ་མ་ཡིན་པར་བརྗོད་པ་འདི་ནི་ལུང་སྟོན་པ་སྙམ་དུ་བསམས་པ་ཡིན་ནོ། །རྟག་པའི་ཉེས་པར་ཐལ་བར་འགྱུར་བའི་ཕྱིར་རོ་ཞེས་བྱ་བ་ནི་གནས་མའི་བུའི་ཚིག་གོ། །
[322b.6]འོ་ན་ཅིའི་ཕྱིར་འདི་ལུང་སྟོན་ཅེས་བྱ་བ་རྒྱས་པར་འབྱུང་བ་ནི་སློབ་དཔོན་གྱི་ཚིག་གོ། །གཟིགས་སམ་མི་གཟིགས་ཞེས་བྱ་བ་འདི་ཡང་བརྗོད་པར་མི་བྱ་བ་ཡིན་ན་ཞེས་བྱ་བ་ནི་གཟིགས་སོ། །མི་གཟིགས་སོ་ཞེས་བརྗོད་པར་མི་བྱ་བ་ཡིན་ན་ཞེས་བྱ་བའི་ཐ་ཚིག་གོ། །རིམ་གྱིས་རིམ་གྱིས་
[322b.7]མི་བརྗོད་པར་གྱིས་ཤིག་ཅེས་བྱ་བ་ནི་བཅོམ་ལྡན་འདས་ཐམས་ཅད་མཁྱེན་པ་ཡིན་ནམ་མ་ཡིན་ཞེས་མི་བརྗོད་པའོ། །རིམ་གྱིས་རིམ་གྱིས་ཞེས་སྨོས་པ་ནི་ཤཱཀྱ་བུའི་མཚུངས་པ་དག་རབ་ཏུ་འཁྲུག་པ་ཡོངས་སུ་སྤངས་པའི་ཕྱིར་རོ། །བདེན་པ་དང་གནས་པར་ཞེས་བྱ་བ་ནི་བརྟན་པའི་ངོ་བོར་
[323a]
[323a.1]ཞེས་བྱ་བའི་ཐ་ཚིག་གོ། །ལྟ་བའི་གནས་སུ་གསུངས་སོ་ཞེས་བྱ་བ་ནི་ལོག་པར་ལྟ་བའི་གནས་སུ་གསུངས་སོ་སྙམ་པ་ཡིན་ནོ། །སློབ་དཔོན་གྱིས་ཡོད་དོ་སྙམ་པ་ཡང་ལྟ་བའི་གནས་སུ་གསུངས་ཞེས་བྱ་བ་སྨོས་ཏེ། འཇིག་ཚོགས་ལ་ལྟ་བའི་གནས་སུ་ཞེས་བྱ་བའི་
[323a.2]དོན་ཏོ། །ཕྱོགས་འདི་ནི་ལན་བཏབ་ཟིན་ཞེས་བྱ་བ་ཇི་སྐད་དུ་ཞེ་ན། །མ་ཡིན་ཏེ་བཀག་པའི་ཕྱིར་རོ། །བཅོམ་ལྡན་འདས་ཀྱིས་དོན་དམ་པ་སྟོང་པ་ཉིད་ཀྱི་མདོ་ཁོ་ན་ལས་ཞེས་བྱ་བ་ནས་རྒྱས་པར་འདི་དག་ནི་དཔེ་ངན་པ་ཡིན་ནོ་ཞེས་བྱ་བའི་བར་ཡིན་ནོ། །གཞན་དག་ན་རེ་རྒྱུར་བྱས་ནས་ཞེས་བྱ་བ་
[323a.3]འདི་ཅི་ཞེས་བྱ་བ་ནས་བཟུང་སྟེ་ཞེས་རྣམ་པར་འཆད་དོ། །རང་གི་གཞུང་ལུགས་ཀྱིས་ཇི་ལྟར་འཁོར་བ་དེ་བཞིན་དུ་བསྟན་པའི་ཕྱིར། ཇི་ལྟར་མེ་སྐད་ཅིག་མ་ཡིན་ཡང་ཞེས་བྱ་བ་རྒྱས་པར་སྨོས་སོ། །མེ་ནི་སྐད་ཅིག་མ་ཡིན་པར་གྲགས་ལ། དེ་ཡང་ཡུལ་གཞན་དུ་འབྱུང་བའི་རྒྱུན་གྱིས་འགྲོ་བ་
[323a.4]དེ་བཞིན་དུ་སྲེད་པ་ཉེ་བར་ལེན་པ་ཅན་སེམས་ཅན་ཞེས་བྱ་བ་ཕུང་པོའི་ཚོགས་འདི་ལ་སྲེད་པ་ཉེ་བར་ལེན་པ་ཡོད་པ་སྲེད་པས་ཉེ་བར་ལེན་པ་ཅན་ཏེ། སྐད་ཅིག་མ་ཡིན་ཡང་འཁོར་རོ། །མིག་བཟངས་ཞེས་བྱ་བའི་སྟོན་པ་ཞེས་བྱ་བ་ནི་ཉི་མ་བདུན་འཆར་བའི་མདོ་ལས། བཅོམ་ལྡན་འདས་འདི་ཡང་དྲང་
[323a.5]སྲོང་མིག་བཟངས་ཞེས་བྱ་བར་གྱུར་ཏོ་ཞེས་འབྱུང་ངོ་། །ཕུང་པོ་རྣམས་གཞན་ཡིན་པའི་ཕྱིར་རོ་ཞེས་བྱ་བ་ནི་སྐད་ཅིག་མ་ཉིད་ཡིན་ན་གཞན་ཡིན་པའི་ཕྱིར་རོ་སྙམ་དུ་བསམས་པའོ། །རྒྱུད་གཅིག་པ་ཉིད་དུ་སྟོན་པར་མཛད་པ་ཡིན་ཞེས་བྱ་བ་ནི་གང་གི་ཕྱིར་མིག་བཟངས། སངས་རྒྱས་ཀྱི་རྒྱུད་
[323a.6]ཁོ་ན་ཡིན་པར་འགྱུར་བ་དེའི་ཕྱིར་དེ་ཉིད་ང་ཡིན་ནོ་ཞེས་ཐ་མི་དད་པར་ཉེ་བར་བཏགས་སོ།། །།བམ་པོ་དྲུག་ཅུ་གཅིག་པ་སྟེ་ཐ་མའོ། །དཔེར་ན་སྔོན་མཐོང་བའི་མེ་གང་ཡིན་པ་དེ་སྲེག་ཅིང་འོངས་སོ་ཞེས་བྱ་བ་དེ་ལྟ་བུ་སྟེ། རྒྱུན་གྱི་འཇུག་པས་དེ་ཉིད་ཡིན་ནོ་ཞེས་བྱ་བས་དེ་དང་འདྲའོ། །དེ་ནི་དེ་དག་
[323a.7]གི་འཇིག་ཚོགས་ལ་ལྟ་བ་ཡིན་ནོ་ཞེས་བྱ་བ་ནི་དེ་ནི་དེ་བཞིན་གཤེགས་པ་དེ་དག་གི་བདག་དང་བདག་གི་རྣམ་པ་ཅན་གྱི་འཇིག་ཚོགས་ལ་ལྟ་བར་འགྱུར་རོ། །བདག་དང་བདག་གིར་ཆགས་པ་འཆིང་བ་ཤིན་ཏུ་དམ་པོས་གླགས་པ་ཞེས་བྱ་བ་ནི། བདག་ཏུ་ལྟ་བ་དང་བདག་གིར་ལྟ་བ་ཡོད་ན་
[323b]
[323b.1]བདག་ཏུ་ཆགས་པ་དང་བདག་གིར་ཆགས་པར་འགྱུར་རོ། །དེའི་ཕྱིར་འཇིག་ཚོགས་ནི་འཆིང་བ་ཡིན་པས་འཆིང་བ་དམ་པོ་ཅན་རྣམས་ལ་ཐར་པ་ཐག་རིང་བར་འགྱུར་ཏེ་མེད་པ་ཁོ་ནར་འགྱུར་རོ་སྙམ་དུ་བསམས་པ་ཡིན་ནོ། །ཁ་ཅིག་ནི་གང་ཟག་ཏུ་འཛིན་ཞེས་བྱ་བ་ནི་གནས་མའི་
[323b.2]བུ་རྣམས་སོ། །ཁ་ཅིག་ནི་ཐམས་ཅད་མེད་པ་ཉིད་དུ་འཛིན་པ་གང་ཡིན་པ་ཞེས་བྱ་བ་ནི་དབུ་མ་སེམས་པར་བྱེད་པ་རྣམས་སོ་སྙམ་དུ་བསམས་པའོ། །དྲན་པའི་ཡུལ་ལ་འདུ་ཤེས་པའི་རྒྱུ་ལས་བྱུང་བའི་སེམས་ཀྱི་ཁྱད་པར་ལས་སོ་ཞེས་བྱ་བ་ལ་དྲན་པའི་ཡུལ་ནི་ཉམས་སུ་མྱོང་བའི་དོན་ཏོ། །འདི་ལ་དེ་
[323b.3]ལ་འདུ་ཤེས་པའི་རྒྱུ་ལས་བྱུང་བ་རྒྱུ་ཡོད་པས་ན་དྲན་པའི་ཡུལ་ལ་འདུ་ཤེས་པའི་རྒྱུ་ལས་བྱུང་བའི་སེམས་ཀྱི་ཁྱད་པར་ཏེ། སེམས་འགའ་ཁོ་ན་ཞིག་ཡིན་གྱི་ཐམས་ཅད་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལས་དྲན་པའམ་ངོ་ཤེས་པར་འགྱུར་རོ། །དེ་ལྟར་གཉི་ག་ཁྱད་པར་དུ་བྱས་པ་
[323b.4]དང་། སེམས་ཀྱི་ཁྱད་པར་ཇི་ལྟ་བུ་ལས་ཞེས་འདྲི་བ་ལ་དེ་ལ་གཏད་པ་དང་ཞེས་བྱ་བ་རྒྱས་པར་སྨོས་སོ། །དྲན་པར་བྱ་བ་དེ་ལ་གཏད་པ་ནི་དེ་ལ་གཏད་པ་སྟེ། གང་ལ་དེ་དང་འདྲ་བ་དང་འབྲེལ་པ་ཅན་གྱི་འདུ་ཤེས་ལ་སོགས་པ་དང་ལྡན་པ་གང་དག་ཡིན་པ་དེ་དག་ཡོད་པ་ནི་དེ་ལ་གཏད་པ་དང་འདྲ་
[323b.5]བ་དང་འབྲེལ་པ་ཅན་གྱི་འདུ་ཤེས་ལ་སོགས་པ་དང་ལྡན་པའི་སེམས་ཀྱི་ཁྱད་པར་རོ། །སོགས་པ་ཞེས་བྱ་བ་སྨོས་པས་ནི་སྨོན་པས་གཟས་པ་དང་གོམས་པ་ལ་སོགས་པ་བསྡུའོ། །འདི་དག་ལ་རྟེན་གྱི་ཁྱད་པར་དང་མྱ་ངན་དང་། རྣམ་པར་གཡེངས་པ་ལ་སོགས་པ་ཡོད་པས་ན་རྟེན་གྱི་ཁྱད་པར་
[323b.6]དང་མྱ་ངན་དང་རྣམ་པར་གཡེངས་པ་ལ་སོགས་པའོ། །དེ་དག་གི་མཐུ་མ་ཉམས་པའི་སེམས་ཀྱི་ཁྱད་པར་ཏེ་དེ་ཉིད་འདིས་བསྟན་པ་ཡིན་ནོ། །སེམས་ཀྱི་ཁྱད་པར་དེ་ལྟ་བུ་དེ་ལས་དྲན་པའམ་ངོ་ཤེས་པར་འགྱུར་རོ། །དེ་ལྟ་བས་ན་འདི་སྐད་དུ་བཤད་པ་ཡིན་ཏེ། དེ་ལ་གཏད་པ་དང་
[323b.7]ལྡན་པ་ལས་ནི་གལ་ཏེ་དེ་ལ་གཏོང་བར་བྱེད་ན་འོ། །འདྲ་བའི་འདུ་ཤེས་ལ་སོགས་པ་དང་ལྡན་པ་ལས་ནི་གང་ལ་འདྲ་བ་ལས་ཀྱང་དྲན་པར་འབྱུང་བའོ། །འབྲེལ་བ་ཅན་གྱི་འདུ་ཤེས་ལ་སོགས་པ་དང་ལྡན་པ་ལས་ནི་གང་ལ་འདྲ་བ་མེད་ཀྱང་དུ་བ་ལ་སོགས་པ་མཐོང་བ་ལས་
[324a]
[324a.1]དྲན་པར་འགྱུར་བའོ། །སྨོན་པས་གཟས་པ་དང་གོམས་པ་ལ་སོགས་པ་དང་ལྡན་པ་ལས་ནི་གང་ལ་དུས་འདིའི་ཚེ་དྲན་པར་བྱའོ་སྙམ་པའམ། འདི་དེ་དྲན་པར་བྱ་བ་ལ་གོམས་པའོ། །རྟེན་གྱི་ཁྱད་པར་ལ་སོགས་པས་མཐུ་མ་ཉམས་པ་ཅན་ལས་ཞེས་བྱ་བ་ནི་རྟེན་གྱི་ཁྱད་པར་
[324a.2]ནད་ཀྱི་མཚན་ཉིད་དང་མྱ་ངན་དང་བྱ་བ་གཞན་ལ་རྣམ་པར་གཡེངས་པས་སོ། །སོགས་པ་ཞེས་བྱ་བའི་སྒྲས་ནི་ལས་དང་རིག་སྔགས་ལ་སོགས་པས་ཟིན་པ་བསྡུའོ། །དེ་ལྟ་བུ་ཡིན་ཡང་ཞེས་བྱ་བ་རྒྱས་པར་འབྱུང་བ་ནི་དེ་ལ་གཏད་པ་ཞེས་བྱ་བ་ནས་འདུ་ཤེས་པ་ལ་སོགས་པ་དང་ལྡན་པ་དང་།
[324a.3]མཐུ་མ་ཉམས་པ་ཅན་ཡིན་ཡང་ངོ་ཞེས་བྱ་བའི་ཐ་ཚིག་གོ། །དེའི་རྒྱུ་ལས་བྱུང་བ་མ་ཡིན་པ་ཞེས་བྱ་བ་ནི་དྲན་པའི་ཡུལ་ལ་འདུ་ཤེས་པའི་རྒྱུ་ལས་བྱུང་བ་མ་ཡིན་པ་ཞེས་བྱ་བའི་དོན་ཏོ། །སྐྱེད་པར་ཞེས་བྱ་བ་ནི་སྐྱེད་པའོ། །གཞན་ལྟ་བུས་ཞེས་བྱ་བ་ནི་དེ་ལ་གཏད་པ་ཞེས་བྱ་བ་ནས་འདུ་ཤེས་ལ་
[324a.4]སོགས་པ་དང་ལྡན་པ་དང་མཐུ་མ་ཉམས་པ་ཅན་མ་ཡིན་པས་སོ། །མ་ཡིན་ཏེ་འབྲེལ་པ་མེད་པའི་ཕྱིར་རོ་ཞེས་བྱ་བ་ནི་ལྷ་སྦྱིན་དང་མཆོད་སྦྱིན་གྱི་སེམས་དག་རྒྱུ་དང་འབྲས་བུའི་དངོས་པོར་ཞེན་པའི་ཐ་ཚིག་གོ། །ཇི་ལྟར་རྒྱུད་གཅིག་ལ་ཡོད་པའི་སེམས་དག་རྒྱུ་དང་འབྲས་བུར་གྱུར་པའི་ཕྱིར་
[324a.5]འབྲེལ་པ་ལྟར་ལྷ་སྦྱིན་དང་མཆོད་སྦྱིན་གྱི་སེམས་དག་ནི་དེ་ལྟར་འབྲེལ་པ་མ་ཡིན་པས་འདིས་ནི་དཔེ་དང་དངོས་པོ་དག་མི་འདྲ་བ་ཉིད་དུ་སྟོན་ཏོ། །དེ་ལ་གལ་ཏེ་ཕ་རོལ་པོ་འདི་སྐད་དུ་ལྷ་སྦྱིན་གྱིས་ཉམས་སུ་མྱོང་བའི་སེམས་ཀྱིས་དོན་ཉམས་སུ་མྱོང་བ་ནི་དེའི་དྲན་པའི་སེམས་ཀྱིས་མི་དྲན་ཏེ།
[324a.6]གཞན་ཡིན་པའི་ཕྱིར་མཆོད་སྦྱིན་གྱི་སེམས་བཞིན་ནོ་ཞེས་སྒྲུབ་པར་སྨྲ་བར་བྱེད་ན། དེའི་སྒྲུབ་པའི་གཏན་ཚིགས་ནི་རང་ལ་མ་ངེས་པའི་ཕྱིར་དང་ཕྱོགས་སྔ་མ་མངོན་སུམ་དང་འགལ་བས་ཕྱོགས་སྐྱོན་དང་བཅས་པའི་ཕྱིར་རོ། །འོན་ཏེ་ལྷ་སྦྱིན་གྱིས་ཉམས་སུ་མྱོང་བའི་སེམས་དང་རྗེས་སུ་
[324a.7]དྲན་པའི་སེམས་དག་གཞན་པ་ཉིད་དུ་དམ་བཅའ་བ་ལ་སུན་འབྱིན་པ་འདི་བརྗོད་ན་ནི་དེ་སུན་འབྱིན་པ་མ་ཡིན་ཏེ། མཐོང་བས་གནོད་པ་སུན་འབྱིན་པ་མི་འཐད་པའི་ཕྱིར་རོ། །ཁྱོད་ཀྱི་གྲུབ་པའི་མཐའ་ལས་ཀྱང་ལྷ་སྦྱིན་གྱི་ཉམས་སུ་མྱོང་བའི་སེམས་ཀྱིས་ཉམས་སུ་མྱོང་བའི་དོན་ནི་
[324b]
[324b.1]དེའི་དྲན་པའི་སེམས་ཀྱིས་དྲན་པར་འབྱུང་ངོ་། །སེམས་གཞན་གྱིས་མཐོང་ལ་སེམས་གཞན་གྱིས་དྲན་ནོ་ཞེས་ཀྱང་མི་ཟེར་རོ་ཞེས་བྱ་བ་ནི་གཞན་གྱི་ན་ཞིག་གིས་དྲན་པ་མ་ཡིན་ནོ་སྙམ་དུ་བསམས་པ་ཡིན་ནོ། །མཐོང་བའི་སེམས་ལས་དྲན་པའི་སེམས་གཞན་སྐྱེའོ་ཞེས་བྱ་བ་ནི་རྒྱུ་ཡོད་པའི་ཕྱིར་
[324b.2]ཏེ། རྒྱུ་ས་བོན་ཡོད་པ་ལས་མྱུ་གུ་བཞིན་ནོ་ཞེས་བྱ་བའི་ཐ་ཚིག་གོ། །དྲན་པ་ཁོ་ན་ལས་ངོ་ཤེས་པ་ཡང་ཡིན་ནོ་ཞེས་བྱ་བ་ནི་དྲན་པ་ཡོད་ན་ངོ་ཤེས་ཏེ་བདག་གིས་མཐོང་བ་གང་ཡིན་པ་དེ་ཉིད་འདི་ཡིན་ནོ་ཞེས་བྱ་བར་དྲན་པའི་ཕྱིར་རོ། །འོ་ན་གང་ནག་པས་དྲན་ནོ་ཞེས་བྱ་བ་ནི་གལ་ཏེ་སེམས་ཀྱི་ཁྱད་པར་
[324b.3]ཁོ་ནས་དྲན་ན། འོ་ན་གང་ནག་པས་དྲན་ནོ་ཞེས་བྱ་བ་ཇི་ལྟ་བུ་ཡིན་ཞེས་བྱ་བའི་ཚིག་ཁོང་ནས་དྲང་ངོ་། །དེ་ཡང་དེ་ཞེས་བྱ་བ་རྒྱས་པར་འབྱུང་བ་ནི་ནག་པ་ཞེས་བྱ་བ་འདུ་བྱེད་ཀྱི་ཚོགས་ཀྱི་རྒྱུན་དེ་ཡང་བ་ཞེས་བྱ་བ་དེ་ཡུལ་གཞན་དུ་དང་འགྱུར་བ་འབྱུང་བ་སྟེ། ཡུལ་གཞན་དུ་འབྱུང་བ་དང་འགྱུར་
[324b.4]བ་འབྱུང་བ་ལ་རྒྱུའི་དངོས་པོར་ཡིན་ལ་བསམས་ནས་ཅི་ཞེ་ན། རྗེ་བོ་ཞེས་བརྗོད་པར་ཟད་ཀྱི་གང་ཟག་ནི་མ་ཡིན་ཏེ། ཐ་སྙད་འདི་ནི་རྒྱུ་དང་འབྲས་བུའི་དངོས་པོ་ལ་ལྟོས་པ་ཡིན་གྱི་གང་ཟག་ལ་ལྟོས་པ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །དེ་ཉིད་ཀྱི་ཕྱིར་གཅིག་པུ་ནི་འགའ་ཡང་མེད་ཅེས་
[324b.5]བྱ་བ་རྒྱས་པར་སྨོས་སོ། །དེ་བཞིན་དུ་སུ་ཞིག་གིས་རྣམ་པར་ཤེས་པ་ཞེས་བྱ་བ་ལ་སོགས་པ་རྒྱས་པར་འབྱུང་བ་ནི་བདག་མེད་ན་སུ་ཞིག་གིས་དེ་ལྟར་རྣམ་པར་ཤེས། རྣམ་པར་ཤེས་ཞེས་བྱ་བའི་དོན་འདི་ཅི་ཡིན། རྣམ་པར་ཤེས་པས་ཡུལ་འཛིན་པའོ། །ཅི་དེ་འཛིན་པ་རྣམ་པར་ཤེས་
[324b.6]པ་ལས་གཞན་ཞིག་ཡིན་ནམ། འོ་ན་ནི་རྣམ་པར་ཤེས་པར་བྱེད་དོ། །གང་གིས་དེ་བྱེད་པ་དེ་ནི་བཤད་ཟིན་ཏེ། རྣམ་པར་ཤེས་པའི་རྒྱུ་ནི་དབང་པོ་དང་དོན་དང་ཡིད་ལ་བྱེད་པ་དག་དང་སེམས་ཀྱི་ཁྱད་པར་ཡིན་ནོ་ཞེས་བརྗོད་པར་བྱ་སྟེ། དབང་པོ་ལ་སོགས་པ་རྒྱུ་གཞན་དང་ལྡན་པའི་ཕྱིར་
[324b.7]རོ། །དེ་ཉིད་ཀྱི་ཕྱིར་ཅི་རིགས་པར་དབང་པོ་དང་དོན་དང་ཡིད་ལ་བྱེད་པ་དག་ཡིན་ནོ་ཞེས་བྱ་བ་འདི་ནི་ཁྱད་པར་ཡིན་ནོ་ཞེས་བྱ་བ་སྨོས་སོ། །འོ་ན་གང་ནག་པས་རྣམ་པར་ཤེས་སོ་ཞེས་བྱ་བ་ཇི་ལྟ་བུ་ཞེ་ན། ནག་པ་ཞེས་བྱ་བའི་རྒྱུད་དེ་ལས་དེ་སྐྱེ་བར་མཐོང་ནས་སྨྲ་བར་ཟད་དོ། །བདག་
[325a]
[325a.1]མེད་ན་རྣམ་པར་ཤེས་པ་འདི་སུའི་ཡིན། དྲུག་པ་འདིའི་དོན་ཇི་ལྟ་བུ་ཡིན། རྗེ་བོའི་དོན་ཡིན་ནོ། །དཔེར་ན་གང་གི་རྗེ་བོ་གང་ལྟ་བུ་ཡིན་ཞེས་བྱ་བ་ནས་རྒྱས་པར་རྣམ་པར་ཤེས་པ་གང་དུ་སྦྱར་བར་བྱ་བ་ནི་འདི་ལྟར་འདིའི་རྗེ་བོ་བཙལ། རྣམ་པར་ཤེས་པར་བྱ་བའི་དོན་ལའོ། །ཅིའི་ཕྱིར་སྦྱར་བར་བྱ། རྣམ་པར་ཤེས་
[325a.2]པར་བྱ་བའི་ཕྱིར་རོ། །ཀྱེ་མ་དེ་ཉིད་དེའི་དོན་དུ་སྦྱར་རོ་ཞེས་བྱ་བ་ནི་བསོད་ནམས་ཀྱིས་བསྐྱེད་པ་རྣམས་ཀྱིས་ལེགས་པར་སྨྲས་སོ། །ཇི་ལྟར་སྦྱར་བར་བྱ། བསྐྱེད་པའི་སྒོ་ནས་སམ། འོན་ཏེ་མངག་པའི་སྒོ་ནས་རྣམ་པར་ཤེས་པ་ལ་འགྲོ་བ་མི་རུང་བས་བསྐྱེད་པའི་སྒོ་ནས་སོ། །དེ་ལྟ་བས་ན་ནི་རྒྱུ་ཁོ་ན་རྗེ་བོ་ཡིན་
[325a.3]ལ། འབྲས་བུ་ཁོ་ན་བྲན་ཡིན་པར་འགྱུར་ཏེ་ཞེས་བྱ་བའི་བར་དང་རྒྱས་པར་དེ་ནི་རྣམ་པར་ཤེས་པའི་རྒྱུ་གང་ཡིན་པ་དེ་ཁོ་ནའི་ཡིན་ནོ། །གང་ཡང་ནག་པས་ཞེས་བྱ་བའི་བར་དང་། རྒྱས་པར་དེ་ལྟ་བས་ན་དེ་ལ་ཡང་རྒྱུའི་དངོས་པོ་མ་གཏོགས་པ་རྗེ་བོའི་དངོས་པོ་མེད་དོ་ཞེས་བྱ་བའི་བར་ཡིན་ནོ། །སོགས་
[325a.4]པ་ཞེས་བྱ་བའི་སྒྲས་ནི་སུ་ཞིག་གིས་ཚོར། སུའི་ཚོར་བ་ཡིན། སུ་ཞིག་གིས་འདུ་ཤེས། སུའི་འདུ་ཤེས་ཡིན་ཞེས་བྱ་བ་ལ་སོགས་པ་བསྡུ་སྟེ། འདི་ནི་ཕྱོགས་ཡིན་ནོ། གང་བྱ་བ་ནི་བྱེད་པ་པོ་ལ་ལྟོས་པའི་ཕྱིར་ཏེ་ཞེས་ཟེར་བ་ནི། བརྡ་སྤྲོད་པ་པའོ། །དེ་ཡང་དགོས་སོ་ཞེས་བྱ་བ་ནི་
[325a.5]རྣམ་པར་ཤེས་པ་པོ་ཡང་དགོས་ཏེ། གང་ཟག་གོ་སྙམ་དུ་བསམས་པ་ཡིན་ནོ། །འགྲོའོ་འགྲོ་བའོ་ཞེས་བརྗོད་པ་བཞིན་ནོ་ཞེས་བྱ་བ་ནི་དཔེར་ན་མེ་འགྲོའོ། །སྒྲ་འགྲོའོ་ཞེས་འགྲོ་བ་པའི་སྒྲར་བརྗོད་པའམ། དཔེར་ན་མེའི་འགྲོ་བའོ་སྒྲའི་འགྲོ་བའོ་ཞེས་བྱ་བ་ལྟར་ལྷ་སྦྱིན་གྱི་འགྲོ་
[325a.6]བའོ། །ལྷ་སྦྱིན་གྱི་འགྲོ་བའོ་ཞེས་བྱ་བ་ཡང་དེ་དང་འདྲ་སྟེ། དཔེ་འདིས་ན་ལྷ་སྦྱིན་གྱིས་རྣམ་པར་ཤེས་སོ་ཞེས་བྱ་བ་འགྲུབ་བོ། །འདྲ་བར་བདག་ཉིད་ཐོབ་པའི་ཕྱིར། ཞེས་བྱ་བ་ནི་རྒྱུ་དང་འདྲ་བར་འབྲས་བུའི་བདག་ཉིད་ཐོབ་པའི་ཕྱིར་རོ། །ཆུང་ཟད་ཀྱང་མི་བྱེད་མོད་ཀྱི་ཞེས་བྱ་བ་ནི་
[325a.7]ཡོངས་སུ་གཡོ་བ་མི་བྱེད་མོད་ཀྱི་ཞེས་བྱ་བའི་དོན་ཏོ། །དེའི་རྣམ་པ་ཉིད་དོ་ཞེས་བྱ་བ་ནི་སྔོན་པོ་ལ་སོགས་པ་ཡུལ་གྱི་རྣམ་པ་ཉིད་དོ་ཞེས་བྱ་བའི་ཐ་ཚིག་གོ། །རྣམ་པར་ཤེས་པའི་རྒྱུར་གྱུར་པའི་ཕྱིར་ཞེས་བྱ་བ་ནི་རྣམ་པར་ཤེས་པ་ཡང་རྣམ་པར་ཤེས་པ་གཞན་གྱི་རྒྱུ་ཡིན་ཏེ། དེའི་ཕྱིར་རྣམ་པར་ཤེས་པ་
[325b]
[325b.1]གཞན་སྐྱེད་པར་བྱེད་པ་ལ་རྣམ་པར་ཤེས་སོ་ཞེས་བྱའོ། །རྒྱུ་ལ་བྱེད་པ་པོའི་སྒྲར་བསྟན་པའི་ཕྱིར་ཞེས་བྱ་བ་ནི་རྒྱུ་ནི་བྱེད་པ་པོར་གྱུར་པའི་ཕྱིར་དཔེར་ན་དྲིལ་བུ་ནི་སྒྲོགས་པའི་རྒྱུ་ཡིན་པས་དྲིལ་བུས་སྒྲོགས་སོ་ཞེས་བྱ་བ་དེ་དང་འདྲའོ། །གཅིག་ཁོ་ན་ཡིན་པའི་ཕྱིར་སྒྲོན་མ་ཞེས་བྱ་བ་ནི་མེ་ལྕེ་རྣམས་ཀྱི་
[325b.2]རྒྱུན་ལ་ཉེ་བར་འདོགས་པར་བྱེད་ལ་དེ་ཡུལ་གཞན་དག་ཏུ་འབྱུང་བ་སྟེ། སྒྲོན་མ་རྒྱུན་གྱི་ངོ་བོ་དེ་ཡུལ་གཞན་དུ་འབྱུང་བ་ལ་ཡུལ་དེ་དང་དེར་འགྲོའོ་ཞེས་བྱའོ། །དེ་བཞིན་དུ་གཅིག་ཁོ་ན་ཡིན་པའི་ཕྱིར་སེམས་རྣམས་ཀྱི་རྒྱུད་ལ་རྣམ་པར་ཤེས་པ་ཉེ་བར་འདོགས་པར་བྱེད་ལ། རྣམ་
[325b.3]པར་ཤེས་པ་རྒྱུན་གྱི་ངོ་བོ་དེ་ཡུལ་གཞན་དག་ལ་སྐྱེ་བ་ལ་རྣམ་པར་ཤེས་སོ་ཞེས་བྱ་སྟེ། རྣམ་པར་ཤེས་པ་རྒྱུན་གྱི་སྐྱེ་བས་རྣམ་པར་ཤེས་སོ་སྙམ་དུ་བསམས་པ་ཡིན་ནོ། །ཡང་ན་ཇི་ལྟར་གཟུགས་འགྱུར་རོ་ཞེས་བྱ་བ་ལ་སོགས་པ་རྒྱས་པར་འབྱུང་བ་ནི་ཇི་ལྟར་འགྱུར་བ་པོ་གཟུགས་
[325b.4]ལས་འགྱུར་བ་དང་། གནས་པ་པོ་ལས་གནས་པ་དོན་གཞན་མ་ཡིན་པ་ལྟར་རྣམ་པར་ཤེས་པ་ལ་ཡང་དེ་དང་འདྲ་བར་འགྱུར་ཏེ། བྱ་བ་ལོགས་ཤིག་ན་མི་དམིགས་པའི་ཕྱིར་རྣམ་པར་ཤེས་པ་པོའི་རྣམ་པར་ཤེས་པ་ལས་བྱ་བ་དོན་གཞན་མ་ཡིན་པ་ཉིད་དོ། །ཡང་ན་བྱེ་བྲག་ཏུ་སྨྲ་བའི་
[325b.5]གཞུང་ལུགས་ཀྱི་རྗེས་སུ་འབྲངས་པས་སུན་དབྱུང་བ་ཡིན་ནོ། །བདག་ལས་མ་ཡིན་ན་ཞེས་བྱ་བ་ནི་གལ་ཏེ་རྣམ་པར་ཤེས་པ་བདག་ལས་མི་སྐྱེ་ན། རྣམ་པར་ཤེས་པའི་མཚན་ཉིད་ཀྱི་རྒྱུ་ལ་ཁྱད་པར་མེད་པའི་ཕྱིར་རྣམ་པར་ཤེས་པ་དེ་དང་འདྲ་བ་ཁོ་ནར་སྐྱེ་བར་འགྱུར་རོ། །གལ་ཏེ་
[325b.6]བདག་ལས་སྐྱེ་ན་ནི་དེའི་བསམ་པའི་ཁྱད་པར་ལས་རྣམ་པར་ཤེས་པ་ཁྱད་པར་ཅན་སྐྱེའོ་སྙམ་དུ་བསམས་པ་ཡིན་ནོ། །རིམ་པ་ངེས་པར་སྐྱེ་བར་མི་འགྱུར་ཞེས་བྱ་བ་ནི་ཅིའི་ཕྱིར་རིམ་པ་དང་ངེས་པར་སྐྱེ་བར་མི་འགྱུར། རིམ་པ་མ་ངེས་པར་ནི་མི་སྐྱེ་སྟེ། བ་ལང་གི་བློའི་མཇུག་ཐོགས་སུ་བུད་མེད་ཀྱི་བློ་དང་།
[325b.7]བུད་མེད་ཀྱི་བློ་ལས་མ་ཧེའི་བློ་སྐྱེ་ན་ཅིའི་ཕྱིར་མྱུ་གུ་དང་སྡོང་བུ་དང་འདབ་མ་ལ་སོགས་པ་བཞིན་དུ་མཇུག་ཐོགས་སུ་བ་ལང་གི་སེམས་ཁོ་ན་སྐྱེ་བར་མི་འགྱུར། མྱུ་གུ་ལས་སྡོང་བུ་ཁོ་ན་སྐྱེ་བར་འགྱུར་གྱི་འདབ་མ་ལ་སོགས་པ་མ་ཡིན་པ་དང་། སྡོམ་བུ་ལས་འདབ་མ་ཁོ་ན་སྐྱེ་བར་འགྱུར་གྱི།
[326a]
[326a.1]མེེ་ཏོག་ལ་སོགས་པའམ། མྱུ་གུ་ལ་སོགས་པ་མ་ཡིན་པ་དེ་དང་འདྲ་བར་རོ། །བསམ་གཏན་རྫོགས་པ་ལས་མཉམ་པར་གཞག་པ་རྣམས་ལ་ཞེས་བྱ་བ་ནི་བསམ་གཏན་རྫོགས་ཤིང་མཐར་ཕྱིན་པས་མཉམ་པར་གཞག་པ་རྣམས་ལ་ལུས་དང་སེམས་འདྲ་བ་སྐྱེ་ནའོ། །
[326a.2]བདག་ཉིད་ཅེས་བྱ་བ་ནི་གཞན་གྱིས་མ་བརྩལ་བར་སྙམ་དུ་བསམས་པ་ཡིན་ནོ། །དེ་ལྟར་ན་འདིས་ནི་ཅིའི་ཕྱིར་རྟག་ཏུ་དེ་དང་འདྲ་བ་ཁོ་ནར་སྐྱེ་བར་མི་འགྱུར་ཞེས་དྲིས་པ་གང་ཡིན་པ་དེའི་ལན་བཏབ་པ་ཡིན་ནོ། །རིམ་པ་ངེས་པར་སྐྱེ་བར་མི་འགྱུར་ཞེས་དྲིས་པ་གང་ཡིན་པ་དེ་བསྟན་པའི་ཕྱིར།
[326a.3]སེམས་རྣམས་ཀྱི་རིམ་པ་ཡང་ངེས་པ་ཁོ་ན་སྟེ་ཞེས་བྱ་བ་སྟེ། འདི་ནི་འདོད་པ་ཁོ་ནའོ། །རིགས་ཀྱི་བྱེ་བྲག་ལས་ཞེས་བྱ་བ་ནི་བསྒོས་པའི་བྱེ་བྲག་ལས་སོ། །བུད་མེད་ཀྱི་སེམས་ཀྱི་མཇུག་ཐོགས་སུ་ཞེས་བྱ་བ་རྒྱས་པར་འབྱུང་བ་ནི་བུད་མེད་ཀྱི་སེམས་ཏེ་བུད་མེད་ལ་དམིགས་པའི་སེམས་ཀྱི་
[326a.4]མཇུག་ཐོགས་སུའོ། །བུད་མེད་ཀྱི་དེའི་ལུས་ནི་དེའི་ལུས་སོ། །གལ་ཏེ་བྲམ་ཟེ་འམ་གཞན་ཡང་རུང་དགེ་བ་ཞིག་ལ་དེའི་ལུས་སུན་འབྱིན་པ་བྱེད་པའི་སེམས་སམ། དེའི་ཁྱོའམ་བུ་ལ་སོགས་པའི་སེམས་སྐྱེས་པ་སྟེ་དེའི་ཁྱོ་དང་བུ་ལ་སོགས་པའོ། །སོགས་པ་ཞེས་བྱ་བའི་སྒྲས་ནི་
[326a.5]བུ་མོ་ལ་སོགས་པ་བསྡུའོ། །དེ་དག་ལ་དམིགས་པའི་སེམས་ནི་ཁྱོ་དང་བུ་ལ་དམིགས་པའི་སེམས་ཏེ། གལ་ཏེ་དེའམ་གཞན་ཞིག་བུད་མེད་ཀྱི་སེམས་དེའི་མཇུག་ཐོགས་སུ་སྐྱེས་པར་འགྱུར་བ་ཡང་ཕྱིས་དུས་གཞན་རྒྱུད་ལ་ཡོངས་སུ་གྱུར་པ་ལས་བུད་མེད་ཀྱི་སེམས་སྐྱེ་ན་བུད་མེད་ཀྱི་
[326a.6]སེམས་ཕྱིས་སྐྱེས་པ་དེ་ནི་དེའི་ལུས་སུན་འབྱིན་པའི་སེམས་བསྐྱེད་པ་སྟེ། བུད་མེེད་ཀྱི་ལུས་སུན་འབྱིན་པའི་སེམས་བསྐྱེད་པ་ལ་ནུས་པའམ། དེའི་ཁྱོའམ་བུ་ལ་སོགས་པའི་སེམས་བསྐྱེད་པ་ལ་ནུས་པ་ཡིན་ནོ། །ཅིའི་ཕྱིར་ཞེ་ན། དེའི་རིགས་ཅན་ཡིན་པ་ཉིད་ཀྱི་ཕྱིར་རོ་ཞེས་བྱ་
[326a.7]བ་སྨོས་ཏེ། འདི་ལ་དེའི་ལུས་སུན་འབྱིན་པའི་སེམས་སམ། དེའི་ཁྱོའམ་བུ་ལ་སོགས་པའི་རིགས་ཡོད་པས་ན་དེའི་རིགས་ཅན་གྱི་སེམས་སོ། །དེའི་ངོ་བོ་ནི་ཉིད་དོ། །དེའི་ཕྱིར་ཏེ་དེ་དང་རིགས་མཐུན་པའི་ཕྱིར་རོ་སྙམ་དུ་བསམས་པ་ཡིན་ནོ། །གཞན་དུ་ན་ནི་ཞེས་བྱ་བ་ནི་དེའི་
[326b]
[326b.1]རིགས་ཅན་མ་ཡིན་པའོ། །ཡང་བུད་མེད་ཀྱི་སེམས་ལས་རྣམ་གྲངས་ཀྱིས་ཞེས་བྱ་བ་རྒྱས་པར་འབྱུང་བ་ནི་ཅིག་ཅར་མ་ཡིན་པར་རྣམ་གྲངས་ཀྱིས་བུད་མེད་ཀྱི་སེམས་ལས་དེའི་ལུས་སུན་འབྱིན་པའི་སེམས་ཀྱང་སྐྱེ་བ་དེ་ལས་དེའི་ཁྱོའི་སེམས་དང་། དེ་ལས་དེའི་བུའི་སེམས་དང་དེ་ཉིད་ལས་དེའི་
[326b.2]བུ་མོའི་སེམས་དང་དེ་ཉིད་ལས་ཡང་ཡོངས་སུ་གྱུར་པ་ལས་དང་པོའི་སེམས་སྐྱེས་པར་གྱུར་ན་བུད་མེད་ཀྱི་སེམས་དེ་ལས་མཇུག་ཐོགས་སུ་སྐྱེས་པའི་སེམས་རྣམས་ཀྱི་ནང་ནས་བསྐྱེད་པར་བྱ་བའི་སེམས་རྒྱུན་གྱིས་ཆེས་མང་བ་དང་ནུས་པའི་སྒོ་ནས་ཆེས་གསལ་བ་དང་། ཆེས་ཉེ་བ་གང་ཡིན་
[326b.3]པའི་སེམས་དེ་ཁོ་ན་སྐྱེ་བར་འགྱུར་རོ། །དེའི་དགོས་པ་སྟོབས་དང་ལྡན་པའི་ཕྱིར་རོ་ཞེས་བྱ་བ་ནི་ཆེས་མང་བའམ། ཆེས་གསལ་བའམ་ཆེས་ཉེ་བ་དེའི་དགོས་པ་སྟོབས་དང་ལྡན་པའི་ཕྱིར་རོ། །དེའི་འདུས་པའི་ལུས་དང་ཞེས་བྱ་བ་རྒྱས་པར་འབྱུང་བ་དེའི་དུས་ན་ཉེ་བར་གནས་པ་ནི་དེའི་འདུས་པ་སྟེ།
[326b.4]ལུས་ཀྱི་རྐྱེན་གྱི་ཁྱད་པར་དང་། ཕྱི་རོལ་གྱི་རྐྱེན་གྱི་ཁྱད་པར་རོ། །མ་གཏོགས་པ་ནི་མེད་ན་ཞེས་བྱ་བའི་ཐ་ཚིག་སྟེ། གང་ལ་ལུས་སམ་ཕྱི་རོལ་གྱི་རྐྱེན་ཉེ་བར་གནས་པ་དེ་ཉིད་སྐྱེ་བར་འགྱུར་བས་སོ། །བསྒོས་པ་དེ་ཉིད་ཆོས་སྟོབས་དང་ལྡན་ཞེས་བྱ་བ་ནི་ཆེས་མང་བ་དང་། ཆེས་གསལ་བ་དང་
[326b.5]ཆེས་ཉེ་བར་བསྒོས་པར་བཤད་པ་གང་ཡིན་པ་དེ་ཉིད་སྟོབས་དང་ལྡན་པ་ཡིན་ན་ཅིའི་ཕྱིར་རྟག་ཏུ་འབྲས་བུ་མི་འབྱིན། སེམས་དེ་མི་འབྱུང་བ་ནི་མ་ཡིན་ནོ་ཞེས་གཞན་གྱིས་བརྒལ་བ་དང་། བཤད་པ་གནས་པ་གཞན་དུ་འགྱུར་བ་ཉིད་ན་འདུས་བྱས་ཀྱི་མཚན་ཉིད་ཡིན་པའི་ཕྱིར།
[326b.6]འདིའི་མཚན་ཉིད་གནས་པ་ལས་གཞན་དུ་འགྱུར་བ་ཉིད་ཡིན་པས་ན་གནས་པ་ལས་གཞན་དུ་འགྱུར་བའི་མཚན་ཉིད་དེའི་ཕྱིར་རོ། །འདུས་བྱས་ཀྱི་མཚན་ཉིད་གཞན་དུ་འགྱུར་བ་དེ་ཡང་བསྒོས་པ་གཞན་གྱི་འབྲས་བུ་སྐྱེ་བ་སྟེ། བསྒོས་པ་གཞན་གྱི་འབྲས་བུ་སེམས་གཞན་སྐྱེ་བའི་རྗེས་སུ་
[326b.7]མཐུན་པའི་ཕྱིར་རྟག་ཏུ་དེ་ཉིད་འབྲས་བུ་མི་འབྱིན་ཏོ་ཞེས་བྱ་བར་སྦྱར་རོ། །འདི་སྐད་དུ་ཞེས་བྱ་བ་ནི་གནས་བརྟན་སྒྲ་གཅན་ཟིན་གྱིས་སོ། །རྣམ་པ་ཐམས་ཅད་ཅེས་བྱ་བ་འདི་རྣམ་པ་ཀུན་ཏེ་རྣམ་པ་ཀུན་རྨ་བྱའི་མདོངས་འདིའི་ཁ་དོག་དང་དགོད་པ་ལ་སོགས་པའི་རྣམ་པ་ཇི་སྙེད་པ་དེ་དག་གི །
[327a]
[327a.1]འདིས་ན་ཁ་དོག་ནི་འདི་ལྟ་བུའོ། །དགོད་པ་ནི་འདྲ་བའོ། །འདི་ལྟར་ནི་འཚེར་རོ་ཞེས་བྱ་བ་འདི་ལྟ་བུ་ལ་སོགས་པའི་རྣམ་པ་འདི་ནི་རྒྱུ་ཡིན་ནོ། །འདི་ནི་རྒྱུ་མ་ཡིན་ནོ་ཞེས་བྱ་བར་ཤེས་པར་བྱ་བ་མིན་ཏེ། ཐམས་ཅད་མཁྱེན་པ་མ་ཡིན་པ་ཉན་ཐོས་དང་རང་སངས་རྒྱས་ལ་སོགས་པས་
[327a.2]ཤེས་པར་མི་ནུས་སོ། །དེ་ཤེས་ཀུན་མཁྱེན་སྟོབས་ཡིན་ནོ། །ཞེས་བྱ་བ་ནི་གང་གིས་དེའི་རྒྱུ་ཤེས་པར་བྱེད་པ་དེ་ནི་ཐམས་ཅད་མཁྱེན་པའི་སྟོབས་ཡིན་ནོ་སྙམ་དུ་བསམས་པ་ཡིན་ནོ། །གཟུགས་ཅན་མ་ཡིན་པའི་སེམས་ཀྱི་བྱེ་བྲག་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་ནི་གཟུགས་ཀྱི་རྒྱུ་ཡང་རྣམ་པ་
[327a.3]ཐམས་ཅད་ཤེས་པར་མི་ནུས་ན་གཟུགས་ཅན་མ་ཡིན་པ་རྣམས་ཀྱི་ལྟ་སྨོས་ཀྱང་ཅི་དགོས་ཞེས་བྱ་བའི་ཐ་ཚིག་གོ། །མུ་སྟེགས་ཅན་གང་ལ་ལ་ཞེས་བྱ་བ་ནི་བྱེ་བྲག་པའོ། །གལ་ཏེ་ཡིད་དང་ཕྲད་པའི་བྱེ་བྲག་ལ་ལྟོས་པའི་ཕྱིར་རོ་ཞེ་ན་ཞེས་བྱ་བ་ནི་གལ་ཏེ་སེམས་སྐྱེ་བ་ནི་བདག་ལས་རབ་ཏུ་སྐྱེ་བར་འདྲ་མོད་ཀྱི།
[327a.4]བདག་རེས་འགའ་ཡིད་དང་འབྲེལ་པའི་བྱེ་བྲག་ལས་སྐྱེ་བས་དེའི་ཕྱིར་སེམས་རྟག་ཏུ་དེ་དང་འདྲ་བ་ཁོ་ནར་ཡང་སྐྱེ་བར་མི་འགྱུར་ལ་མྱུ་གུ་དང་སྡོང་བུ་དང་འདབ་མ་ལ་སོགས་པ་བཞིན་དུ་རིམ་པ་ངེས་པར་ཡང་སྐྱེ་བར་མི་འགྱུར་རོ་ཞེས་བྱ་བར་འདོད་ན་ནི་མ་ཡིན་ནོ། །འབྲེལ་པ་གཞན་མ་ཡིན་པའི་ཕྱིར་
[327a.5]རོ་ཞེས་བྱ་བ་ནི་དེ་ནི་དེ་ལྟ་མ་ཡིན་ནོ། །ཅིའི་ཕྱིར་ཞེ་ན། བདག་དང་ཡིད་དེ་དག་ལས་འབྲེལ་པ་གཞན་དུ་མ་གྲུབ་པའི་ཕྱིར་ཏེ། ཁོ་བོ་ཅག་ལ་ནི་འབྲེལ་པ་ཞེས་བྱ་བའི་དངོས་པོ་གྲུབ་པ་ཅི་ཡང་མེད་དོ། །འབྲེལ་པ་ཅན་དག་ཅེས་བྱ་བ་རྒྱས་པར་འབྱུང་བ་ནི་འབྲེལ་པ་ཁས་བླངས་ཀྱང་འབྲེལ་པ་ཅན་
[327a.6]འཇིག་རྟེན་ན་གྲགས་པ་ཤིང་ངམ་གཞན་གང་ཡང་རུང་བ་དག་ནི་ཡོངས་སུ་ཆད་པའི་ཕྱིར་ཏེ། ཡུལ་ཡོངས་སུ་ཆད་པར་མཐོང་བའི་ཕྱིར་ཞེས་བྱ་བའི་ཐ་ཚིག་གོ། །མཚན་ཉིད་རྣམ་པར་བཤད་པའི་ཕྱིར་ཞེས་བྱ་བ་ནི་བྱེ་བྲག་པའི་རྒྱུད་ལས་ཕྲད་པའི་མཚན་ཉིད་བསྟན་པའི་ཕྱིར་རོ། །དེས་ན་ཅི་ཞེ་ན་བདག་
[327a.7]ཡོངས་སུ་ཆད་པར་ཐལ་བར་འགྱུར་ཏེ། གང་ན་བདག་ཡོད་པ་དེ་ན་ཡིད་མེད་ལ་གང་ན་ཡིད་ཡོད་པ་དེ་ན་བདག་མེད་པས་ཡུལ་ཡོངས་སུ་ཆད་པ་ཉིད་དུ་ཐལ་བར་འགྱུར་རོ། །བདག་ཡིད་དང་ཕྲད་པ་ཞེས་བྱ་བ་འདིས་ནི་རྗེས་སུ་དཔག་པ་དང་། ལུང་གི་ཕྱོགས་པ་འདི་ཆོས་ཅན་གྱི་ཁྱད་པར་ལས་བཟློག་
[327b]
[327b.1]པར་འགྱུར་བ་བསྟན་པ་ཡིན་ཏེ། ཆོས་ཅན་ནི་བདག་གོ། །དེའི་ཁྱད་པར་ནི་ཐམས་ཅད་ན་ཡོད་པ་ཉིད་དོ། །དེ་ལས་བཟློག་པ་ནི་ཐམས་ཅད་ན་མེད་པ་ཉིད་དོ། །དེའི་ཕྱིར་ཡིད་འཕོས་པ་ལས་བདག་འཕོ་བར་ཐལ་བར་འགྱུར་ཞེས་བྱ་བ་ནི་ཕྲད་པ་ནི་མ་ཕྲད་པ་སྔོན་དུ་འགྲོ་བའི་ཕྲད་པ་ཡིན་ནོ་ཞེས་
[327b.2]བྱ་བའི་མཚན་ཉིད་དེའི་ཕྱིར་ཏེ། ཡིད་འཕོས་པ་ལས་ཏེ་ཡིད་ལུས་ཀྱི་ཕྱོགས་གང་དང་གང་དུ་འཕོ་བ་དེ་དང་དེ་ནས་བདག་འཕོ་ཞིང་འདོར་རོ་ཞེས་བྱ་བར་ཐལ་བར་འགྱུར་ཏེ། དཔེར་ན་སྐྱེས་བུ་སའི་ཕྱོགས་གང་དང་གང་དུ་འཕོ་བ་དེ་དང་དེ་ནས་ཉི་མ་འཕོས་པ་ལྟ་བུའོ། །དེ་ལྟ་ཡིན་ན་ཡང་འདི་ནི་བྱ་
[327b.3]བ་མེད་པ་ཉིད་ལ་གནོད་པར་འགྱུར་བས་དེ་ཉིད་དམ་བཅས་པའི་ཉེས་པ་ཡིན་ནོ། །ཉམས་པར་ཞེས་བྱ་བ་ནི་བདག་ཅེས་བྱ་བ་དང་ཐལ་བར་འགྱུར་རོ་ཞེས་བྱ་བར་སྦྱར་རོ། །གང་དང་གང་དུ་ཡིད་འཕོ་བ་དེ་དང་དེར་བདག་འཇིག་པས་དེ་ཉིད་འདིར་དམ་བཅས་པའི་ཉེས་པ་ཡིན་ཏེ། བདག་
[327b.4]མི་རྟག་པར་འགྱུར་བའི་ཕྱིར་རོ། །གལ་ཏེ་ཕྱོགས་གཅིག་ཕྲད་དོ་ཞེ་ན་ཞེས་བྱ་བ་ནི་ཡིད་བདག་གི་ཕྱོགས་གཅིག་དང་ཕྲད་པའམ། བདག་གི་ཕྱོགས་གཅིག་ཡིད་དང་ཕྲད་པ་སྟེ། གལ་ཏེ་ལུས་ཀྱི་ཕྱོགས་གང་ན་ཡིད་གནས་པར་གྱུར་པ་དེ་ན་ཡོད་པའི་བདག་གི་ཕྱོགས་དང་ནི་ཡིད་མི་ཕྲད་ཀྱི། ཕྱོགས་
[327b.5]གཞན་དང་ནི་གློ་ནས་ཕྲད་དོ་དེ་ལྟ་བས་ན་ཕྲད་པ་ནི་མ་ཕྲད་པ་སྔོན་དུ་འགྲོ་བ་ཉིད་ཡིན་ཡང་བདག་གི་ཕྱོགས་མ་ཕྲད་པ་ཁོ་ན་དང་ཡིད་དང་ཕྲད་དོ་ཞེས་བྱ་བར་འདོད་ན། དེ་ནི་མ་ཡིན་ཏེ་ཕྱོགས་དེ་ཉིད་ཀྱི་ཡིན་པ་ཉིད་དུ་མི་རུང་བའི་ཕྱིར་རོ། །བདག་ལ་ནི་ཕྱོགས་གཞན་ཡང་ཡོད་པ་མ་ཡིན་ལ། བདག་
[327b.6]གི་ཕྱོགས་ཀྱང་རུང་བ་མ་ཡིན་ནོ། །ཕྲད་པ་ཡོད་དུ་ཆུག་ན་ཡང་ཞེས་བྱ་བ་རྒྱས་པར་འབྱུང་བ་ནི་ཕྲད་པ་ཁས་བླངས་སུ་ཟིན་ཀྱང་། འོན་ཀྱང་འགྱུར་བ་མེད་པའི་ཕྱིར་ཡིད་རྟག་ཏུ་ཁྱད་པར་མེད་པ་ལ་ཇི་ལྟར་ཕྲད་པ་ཁྱད་པར་དུ་འགྱུར་ཏེ། ཇི་ལྟར་ཕྲད་པ་ཁྱད་པར་ཅན་དུ་འགྱུར་ན་འདི་ལྟར་
[327b.7]དེ་སྐད་བཤད། གལ་ཏེ་བློའི་ཁྱད་པར་ལྟོས་པ་ཡིན་ནོ་ཞེ་ན། ཇི་ལྟར་བློའི་ཁྱད་པར་ཡིན་ཞེས་དེ་ཉིད་ལ་ཀླན་ཀ་ཚོལ་བར་བྱེད་དོ་ཞེས་བྱ་བ་ནི། བདག་རྟག་ཏུ་ཁྱད་པར་མེད་པ་ཡིན་ན་ཅིའི་ཕྱིར་དེ་འདྲ་བ་ཁོ་ནར་མི་སྐྱེ། རྒྱུའི་ཁྱད་པར་ལས་ནི་འབྲས་བུའི་ཁྱད་པར་དུ་འདོད་དེ་དུང་དང་རྫ་རྔ་པ་ཊ་ཧ་ལ་
[328a]
[328a.1]སོགས་པའི་སྒྲ་བཞིན་ནོ། །གལ་ཏེ་འདུ་བྱེད་ཀྱི་ཁྱད་པར་ལ་ལྟོས་པའི་བདག་དང་ཡིད་ཕྲད་པ་ལས་སོ་ཞེ་ན་ཞེས་བྱ་བ་ནི་གལ་ཏེ་བདག་དང་ཡིད་ནི་རྟག་ཏུ་ཁྱད་པར་མེད་མོད་ཀྱི་བདག་དང་ཡིད་སྦྱོར་བ་འདུ་བྱེད་ཀྱི་ཁྱད་པར་ལ་ལྟོས་པའི་ཁྱད་པར་ལས་བློའི་ཁྱད་པར་དུ་འགྱུར་བར་
[328a.2]འདོད་ནའོ། །འདི་སྐད་དུ་དགོས་པའི་ཁྱད་པར་གྱི་མཚན་ཉིད་ཀྱིས་འདུ་བྱེད་ཀྱི་ཁྱད་པར་ལས་བདག་དང་ཡིད་སྦྱོར་བའི་ཁྱད་པར་དུ་འགྱུར་ལ། དེའི་ཁྱད་པར་ལས་བློའི་ཁྱད་པར་དུ་འགྱུར་རོ་ཞེས་སྨྲས་པ་ཡིན་ནོ། །འདིར་འདུ་བྱེད་ཀྱི་ཁྱད་པར་ལ་ལྟོས་པའི་སེམས་ཁོ་ན་ལས་ཞེས་བྱ་བ་རྒྱས་པར་སྨོས་
[328a.3]ཏེ། འདི་ལ་སློབ་དཔོན་གྱི་དགོངས་པ་ནི་ཁོ་བོའི་ལྟར་ན་སེམས་ཀྱང་ཡོད་ན། དགོས་པའི་ཁྱད་པར་གྱི་མཚན་ཉིད་ཀྱི་འདུ་བྱེད་ཀྱི་ཁྱད་པར་གང་ཁོ་བོ་ཅག་བག་ཆགས་དང་ས་བོན་ཞེས་བྱ་བར་རྣམ་པར་འཇུག་པ་དེ་ཡང་ཡོད་པ་ཉིད་པས་བརྩད་པ་མེད་ཀྱི། དངོས་པོ་གཞན་ཡིན་ནམ་མ་
[328a.4]ཡིན་ཞེས་བྱ་བ་ཙམ་ཞིག་ཁྱད་པར་ཡོད་དོ། །དེ་ལྟ་བས་ན་འདུ་བྱེད་ཀྱི་ཁྱད་པར་ལ་ལྟོས་པའི་སེམས་ཁོ་ན་ལས་བློའི་ཁྱད་པར་དུ་འགྱུར་བ་ན། བདག་གམ་དེ་དང་ཕྲད་པར་བརྟགས་པས་ཅི་ཞིག་བྱ་སྙམ་པ་འདི་ཡིན་ནོ། །བདག་གི་ནུས་པ་ནི་ཆུང་ཟད་ཀྱང་མི་དམིགས་ཏེ་ཞེས་བྱ་བ་རྒྱས་པར་འབྱུང་བ་ནི་སྨན་
[328a.5]པ་ངན་གཡོ་ཅན་འགའ་ཞིག་གིས་ནད་པ་འགའ་ཞིག་སྨན་བྱིན་ནས་བསམས་པ། སྨན་འདི་ནི་རྙེད་སླ་བ་ཡིན་ཏེ། དེ་འཁོར་དང་བཅས་པས་ཀྱང་ཤེས་སོ། །སྨན་འདིས་ཀྱང་ནད་པ་འདིའི་ནད་ཞི་བར་ནི་འགྱུར་རོ། །དེ་ལྟ་བས་ན་བདག་ཁྱད་དུ་བསད་ནས་གཞན་ཡང་འདི་བྱེད་པར་འགྱུར་རོ། །དེ་
[328a.6]ནས་བདག་གིས་ནོར་རྙེད་པར་མི་འགྱུར་རོ་སྙམ་དུ་བསམས་ནས་ཕུ་སྭཱ་ཧཱ་ཕུ་སྭཱ་ཧཱ་ཞེས་སྔགས་ཀྱིས་བཏབ་ནས་སྔགས་འདིས་ནི་སྨན་འདི་འགྲུབ་བོ་ཞེས་སྐྱེ་བོ་ལ་བསྟན་ན། དེ་ལ་ཇི་ལྟར་སྨན་གྱི་དོན་འགྲུབ་པར་བྱ་བ་ལ་སྨན་པ་ངན་པ་གཡོ་ཅན་གྱིས་ཕུ་སྭཱ་ཧཱ་ཞེས་བྱ་བ་རྣམས་ཀྱི་ནུས་པ་མེད་ཀྱི། སྨན་གྱི་
[328a.7]ནུས་པ་ཡིན་པ་དེ་བཞིན་དུ་བློའི་ཁྱད་པར་སྐྱེ་བར་བྱ་བ་ལ་བདག་གི་ནུས་པ་མེད་ཀྱི་སེམས་ཁོ་ནའི་ནུས་པ་ཡིན་ནོ། །གལ་ཏེ་བདག་ཡོད་ན་དེ་གཉིས་སྲིད་དོ་ཞེ་ན་ནི་ཞེས་བྱ་བ་ནི་གལ་ཏེ་བདག་ཡོད་ན་འདུ་བྱེད་དང་སེམས་དེ་གཉིས་སྲིད་པས་དེའི་ཕྱིར་བདག་ཡོད་དོ་ཞེས་བྱ་བར་འདོད་ན། འདིར་སྨྲས་པའི་
[328b]
[328b.1]ཚིག་ཙམ་དུ་ཟད་ཀྱི་འདི་ལ་རིགས་པ་ནི་འགའ་ཡང་མེད་དོ། །གལ་ཏེ་དེ་ནི་རྟེན་ཡིན་ནོ་ཞེ་ན་ཞེས་བྱ་བ་ནི་གལ་ཏེ་དེ་ནི་དེ་གཉིས་ཀྱི་རྟེན་ཡིན་ནོ་ཞེས་བྱ་བར་འདོད་ནའོ། །དཔེར་ན་གང་གི་རྟེན་གང་ཡིན་པ་དེ་ལྟ་བུ་ཞེས་བྱ་བ་ནི་རྟེན་གྱི་ངོ་བོའི་དཔེར་བརྗོད་པ་ཚོལ་བའོ། །འདི་རྟེན་གྱི་དོན་དུ་མི་རིགས་པ་དེ་
[328b.2]བསྟན་པའི་ཕྱིར་དེ་དག་ཀྱང་ཞེས་བྱ་བ་རྒྱས་པར་སྨོས་ཏེ། འདུ་བྱེད་དང་སེམས་དེ་དག་ཀྱང་རི་མོ་དང་རྒྱ་ཤུག་ལ་སོགས་པ་ལྟར་དེ་དཔེར་ན་རྩིག་པ་ལ་རི་མོ་དང་གཞོང་བུ་ལ་རྒྱ་ཤུག་བརྟེན་པ་ལྟར་རོ། །སོགས་པ་ཞེས་བྱ་བའི་སྒྲས་ནི་སྣོད་ལ་ཟས་ཞེས་བྱ་བ་ནས་སོགས་པ་བསྡུ་སྟེ། འདུ་བྱེད་
[328b.3]དང་སེམས་དེ་དག་ནི་རྟེན་བདག་དེ་ལ་དེ་ལྟ་མ་ཡིན་ལ། དེ་ཡང་རྩིག་པ་དང་གཞོང་བུ་ལ་སོགས་པ་ལྟར་རྟེན་དུ་རིགས་པ་མ་ཡིན་ཏེ། བདག་དེ་ཡང་རྩིག་པ་ལྟ་བུ་དང་གཞོང་བུ་ལྟ་བུར་རྟེན་དུ་རིགས་པ་མ་ཡིན་ནོ། །སོགས་པ་ཞེས་བྱ་བའི་སྒྲས་ནི་སྣོད་ལ་སོགས་པ་བསྡུའོ། །ཅིའི་ཕྱིར་ཞེ་ན། ཐོགས་པ་
[328b.4]ཐ་དད་པ་ཉིད་ཀྱི་ཉེས་པར་འགྱུར་བའི་ཕྱིར་རོ་ཞེས་བྱ་བ་སྨོས་ཏེ་ཐོགས་པ་ཉིད་དུ་ཉེས་པར་འགྱུར་བའི་ཕྱིར་དང་། ཐ་དད་པ་ཉིད་ཀྱི་ཉེས་པར་འགྱུར་བའི་ཕྱིར་རོ། །ཐོགས་པ་དང་བཅས་པ་ཉིད་དུ་ཐལ་བར་འགྱུར་བའི་ཕྱིར་དང་། ཡུལ་ཐ་དད་པ་ཉིད་དུ་ཐལ་བར་འགྱུར་བའི་ཕྱིར་རོ་ཞེས་བྱ་བའི་ཐ་ཚིག་སྟེ། ཇི་
[328b.5]ལྟར་རི་མོ་དང་རྒྱ་ཤུག་དག་དང་། རྩིག་པ་དང་གཞོང་བུ་དག་ལ་བརྟེན་པ་དང་རྟེན་གྱི་ངོ་བོ་ཡིན་ལ། ཐོགས་པ་ཉིད་དང་ཐ་དད་པ་ཉིད་དུ་མཐོང་བ་ལྟར་དེ་དག་ཀྱང་དེ་དང་འདྲ་བར་འགྱུར་བ་ཞིག་ན་དེ་ལྟར་ཡང་མི་འདོད་དེ་དེའི་ཕྱིར་བདག་ནི་རྟེན་མ་ཡིན་ནོ། །དཔེར་ན་དྲི་ལ་སོགས་པ་ལས་ས་གཞན་མ་ཡིན་
[328b.6]པ་ལྟར་བློ་ལ་སོགས་པ་ལས་ཀྱང་བདག་གཞན་མ་ཡིན་ནོ། །སྐྱེས་བུ་དམ་པ་སུ་ཞིག་དྲི་ལ་སོགས་པ་ལས་ས་གཞན་ཡིན་པར་ངེས་པར་འཛིན་པར་བྱེད་དེ། ས་གང་ཞིག་ཡིན་ཞེས་སྨྲ་ན་འདི་ལྟར་གཟུགས་དང་དྲི་ལ་སོགས་པ་ལས་གཞན་པའོ་ཞེས་བྱ་བ་ལྟ་བུར་གཟུགས་དང་དྲི་དང་རོ་དང་
[328b.7]རེག་བྱ་དག་ལས་གཞན་པར་ནི་བསྟན་པར་མི་ནུས་སོ། །གལ་ཏེ་དྲི་ལ་སོགས་པ་ལས་ས་གཞན་པ་ཡིན་ན་སའི་དྲི་ལ་སོགས་པ་ཞེས་བྱ་བའི་ཐ་སྙད་འདི་ཇི་ལྟར་འདོགས་ཏེ། ནག་པའི་ལ་བ་ཞེས་གཞན་གྱིས་གཞན་ཐ་སྙད་འདོགས་པར་མི་མཐོང་ངོ་ཞེ་ན། འདིར་སའི་དྲི་ལ་སོགས་པ་
[329a]
[329a.1]ཞེས་བྱ་བའི་ཐ་སྙད་ནི་ཞེས་བྱ་བ་རྒྱས་པར་སྨོས་སོ། །ཁྱད་པར་དུ་བྱ་བའི་ཕྱིར་ཞེས་བྱ་བ་ནི་ཆུ་ལ་སོགས་པ་ཁྱད་པར་དུ་བྱ་བའི་ཕྱིར་ཞེས་བྱ་བའི་ཐ་ཚིག་གོ། །ཇི་ལྟ་ཞེ་ན་ཅི་ནས་དེ་བདག་ཉིད་ཅེས་བྱ་བ་རྒྱས་པར་འབྱུང་བས་སྟོན་པར་བྱེད་དོ། །ཉིད་ཅེས་བྱ་བ་ནི་དེ་དག་ལ་མ་གཏོགས་
[329a.2]པ་སའི་རྫས་བཟློག་པའི་ཕྱིར་ཏེ། ཅི་ནས་ཀྱང་དྲི་ལ་སོགས་པ་བསྡུའོ། །དེ་དག་ཉིད་དེ་ཞེས་བྱ་བས་ཞེས་བྱ་བར་ཤེས་པར་འགྱུར་བ་དེ་ལྟར་ཁྱད་པར་དུ་བྱ་བའི་ཕྱིར་ཐ་སྙད་འདོགས་སོ་ཞེས་བྱ་བར་སྦྱར་རོ། །གཞན་ནི་མ་ཡིན་ནོ་ཞེས་བྱ་བ་ནི་ཅི་ནས་ཀྱང་ས་ཞེས་བྱ་བ་ལས་གཞན་པ་ཆུ་ཞེས་བྱ་བ་ལ་སོགས་པར་
[329a.3]ཤེས་པར་མི་འགྱུར་བར་ཞེས་བྱ་བའི་དོན་ཏོ། །ཤིང་གི་གཟུགས་ཀྱི་ལུས་བཞིན་ནོ་ཞེས་བྱ་བ་ནི་འཇི་བ་ལས་བྱས་པ་ལ་སོགས་པ་གཞན་དག་ལས་ཁྱད་པར་དུ་བྱ་བའི་ཕྱིར་ཤིང་གི་གཟུགས་ཀྱི་ལུས་ཞེས་ཐ་སྙད་འདོགས་ལ་ཤིང་གི་གཟུགས་ཀྱི་ལུས་གཞན་ཡང་མ་ཡིན་པ་ལྟར་འདིར་ཡང་དེ་བཞིན་
[329a.4]དུ་ཐ་སྙད་འདོགས་པར་འགྱུར་བས་བྲི་ལ་སོགས་པ་ལས་གཞན་པ་ཡང་མ་ཡིན་ནོ། །འདུ་བྱེད་ཀྱི་ཁྱད་པར་ལ་ལྟོས་པ་ཡིན་དུ་ཟིན་ཀྱང་བདག་དང་ཡིད་ཕྲད་པའོ། །གང་ཞིག་སྟོབས་ཆེ་བ་ཞེས་བྱ་བ་ནི་འདུ་བྱེད་ཀྱི་ཁྱད་པར་ཏེ། དེས་འདུ་བྱེད་ཀྱི་ཁྱད་པར་གཞན་དག་ལ་བགེགས་བྱེད་དོ། །སྟོབས་
[329a.5]ཆེ་བ་ཉིད་ཅིའི་ཕྱིར་འབྲས་བུ་མི་འབྱིན་ཏེ་ཞེས་བྱ་བ་ནི་སློབ་དཔོན་གྱི་ཚིག་ཡིན་ནོ། །དེ་ཉིད་ཀྱི་ཡང་བཤད་པ་དེའི་ཚུལ་ཏེ་འདུ་བྱེད་ཀྱི་ཚུལ་འཇིགས་པའམ་བགེགས་བྱེད་པ་གང་ཡིན་པ་དེ་ནི་ས་བོན་གྱི་བདག་ཉིད་ཀྱིས་བསྒོས་པའི་ཡིན་ན་ནི་བདག་ཏུ་རྟོག་པ་ནི་དོན་མེད་ཅིང་དགོས་པ་མེད་པ་ཡིན་ཏེ། འདུ་བྱེད་ཀྱི་དོན་དུ་
[329a.6]དེར་བརྟག་གྲང་ན་འདུ་བྱེད་དེའི་བྱ་བ་གང་ཡིན་པ་དེ་ནི་བསྒོས་པ་ཁོ་ནས་བྱེད་དོ། །དྲན་པ་ལ་སོགས་པ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་དྲན་པ་དང་འདུ་བྱེད་དང་འདོད་པ་དང་ཞེ་སྡང་ལ་སོགས་པ་ནི་ཡོན་ཏན་གྱི་དངོས་པོ་ཡིན་པའི་ཕྱིར་ལ། རྫས་ལ་བརྟེན་པའི་ཡོན་ཏན་ནི་ཡོན་ཏན་དང་ལྡན་པ་
[329a.7]ཡིན་ནོ་ཞེས་དེ་སྐད་དུ་མཚན་ཉིད་བསྟན་པའི་ཕྱིར་ཡོན་ཏན་གྱི་རྫས་དེ་ཡང་གདོན་མི་ཟ་བར་རྫས་ལ་བརྟེན་པ་ཡིན་པའི་ཕྱིར་རོ། །གཞན་ནི་མངོན་སུམ་པ་མ་ཡིན་པ་ཉིད་ལ་སོགས་པའི་རྒྱུས་ན་དེ་དག་གི་རྟེན་ས་ལ་སོགས་པའི་གཞན་ཡིན་པར་ཡང་རུང་བ་མ་ཡིན་ནོ། །དེ་བས་ན་འདི་དག་
[329b]
[329b.1]གི་རྟེན་གང་ཡིན་པ་དེ་ནི་བདག་ཡིན་པས་དེ་ལྟ་བས་ན་བདག་ནི་ཡོད་དོ་ཞེས་བྱ་བར་འདོད་ན། མ་ཡིན་ཏེ་མ་གྲུབ་པའི་ཕྱིར་ཏེ། དེ་ནི་དེ་ལྟ་མ་ཡིན་ནོ། །ཅིའི་ཕྱིར་ཞེ་ན། དྲན་པ་ལ་སོགས་པ་ནི་ཡོན་ཏན་གྱི་དངོས་པོ་ཉིད་དུ་མ་གྲུབ་པའི་ཕྱིར་རོ། །ཡོད་པ་ཐམས་ཅད་རྫས་ཡིན་ཞེས་བྱ་བ་ནི་མཚན་
[329b.2]ཉིད་ཀྱི་སྒོ་ནས་ཡོད་པ་གང་ཡིན་པ་དེ་ནི་རྫས་ཡིན་ནོ། །དགེ་སྦྱོང་གི་ཚུལ་གྱི་འབྲས་བུ་ནི་རྫས་དྲུག་གོ་ཞེས་བྱ་བ་ནི་གཟུགས་ཀྱི་ཕུང་པོ་ལ་སོགས་པ་ལྔ་ནི་དགེ་སྦྱོང་གི་ཚུལ་གྱི་འབྲས་བུ་འདུས་བྱས་ཡིན་ལ། དྲུག་པ་ནི་འདུས་མ་བྱས་ཡིན་པས་རྫས་དྲུག་ཡིན་ནོ། །དེ་དག་རྫས་ལ་བརྟེན་
[329b.3]པ་ཉིད་དུ་ཡང་མ་གྲུབ་པ་སྟེ་ཞེས་བྱ་བ་ནི་དྲན་པ་ལ་སོགས་པའོ། །རྟེན་གྱི་དོན་ནི་བརྟགས་ཟིན་ཏོ་ཞེས་བྱ་བ་ནི་དཔེར་ན་གང་གི་རྟེན་གང་ལྟ་བུ་དེ་དག་ཀྱང་རི་མོ་དང་རྒྱ་ཤུག་ལ་སོགས་པ་ལྟ་བུར་བརྟེན་པ་མ་ཡིན་ལ་ཞེས་བྱ་བ་རྒྱས་པར་རོ། །རྣམ་པ་དེ་དག་ཅེས་བྱ་བ་ནི་དཀར་ཤམ་ལ་སོགས་
[329b.4]པའི་རྣམ་པ་དག་གོ། །འདི་ནི་ཕུང་པོ་རྣམས་ལས་ཞེས་བྱ་བ་ནི་བདག་ཏུ་འཛིན་པའོ། །བདག་ཏུ་འཛིན་པ་ནི་མ་ཡིན་ནོ་ཞེས་བྱ་བ་ནི་བདག་གོ་སྙམ་པ་དེ་ལྟ་བུའི་རྣམ་པ་ཅན་གྱི་ཤེས་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །འདི་ནི་དེ་ཉིད་འོངས་པ་ཡིན་ནོ་ཞེས་བྱ་བ་ནི་དྲུག་པ་འདིའི་དོན་ཇི་ལྟ་བུ་ཡིན།
[329b.5]རྗེ་བོའི་དོན་ཡིན་ནོ། །དཔེར་ན་གང་གི་རྗེ་བོ་གང་ལྟ་བུ་ཡིན། དཔེར་ན་བའི་རྣམ་པ་ནག་པ་ལྟ་བུ་ཡིན་ནོ། །འདི་ཇི་ལྟར་དེའི་རྗེ་བོ་ཡིན། དེ་རྨོ་བ་དང་བཞོ་བ་ལ་སོགས་པ་ལ་སྦྱར་བ་དེ་ལ་རག་ལུས་པ་ཡིན་ནོ། །ངར་འཛིན་པ་གང་དུ་སྦྱར་བར་བྱ་བ་ནི་འདི་ལྟར་འདིའི་རྗེ་བོ་བཙལ། བདག་ཏུ་འཛིན་པར་བྱ་བའི་
[329b.6]དོན་ལའོ། །ཅིའི་ཕྱིར་སྦྱར་བར་བྱ། བདག་ཏུ་འཛིན་པར་བྱ་བའི་ཕྱིར་རོ། །ཀྱེ་མ་དེ་ཉིད་དེའི་དོན་དུ་སྦྱར་རོ་ཞེས་བྱ་བ་ནི་བསོད་ནམས་ཀྱིས་བསྐྱེད་པ་རྣམས་ཀྱིས་ལེགས་པར་སྨྲས་སོ། །ཇི་ལྟར་སྦྱར་བར་བྱ། ཅི་སྐྱེད་པའི་སྒོ་ནས་སམ། འོན་ཏེ་མ་དག་པའི་སྒོ་ནས་བདག་ཏུ་འཛིན་པ་ལས་འགྲོ་
[329b.7]བ་མི་རུང་བས་བསྐྱེད་པར་བྱ་བའི་སྒོ་ནས་སོ། །དེ་ལྟ་ན་ནི་རྒྱུ་ཁོ་ན་རྗེ་བོ་ཡིན་ལ་འབྲས་བུ་ཁོ་ན་བྲན་ཡིན་པར་འགྱུར་ཏེ། འདི་ལྟར་རྒྱུ་ནི་འབྲས་བུ་ལ་དབང་བྱེད་ལ་འབྲས་བུས་ཀྱང་དེ་དང་ལྡན་པ་རྒྱུ་ཡིན་པས་དེ་ནི་བདག་ཏུ་འཛིན་པའི་རྒྱུ་གང་ཡིན་པ་དེ་ཁོ་ནའི་ཡིན་ནོ་ཞེས་བྱ་བ་ཡིན་ནོ། །ཤིང་ལྗོན་པའི་
[330a]
[330a.1]མེ་ཏོག་ཆགས་སོ་ཞེས་བྱ་བ་ནི་གྲུབ་པའི་མཐའ་གང་ལ་ཤིང་ལྗོན་པ་ཡན་ལག་ཅན་དུ་མི་འདོད་ཅིང་འབྱུང་བ་ཆེན་པོ་རིགས་མི་མཐུན་པ་བཞིས་བརྩམས་པ་ཡིན་པར་མི་འདོད་པ་དེ་ལ་དཔེ་ཡིན་ནོ། །གང་ལ་ཤིང་ལྗོན་པ་ཡན་ལག་ཅན་ཡོད་པ་དེ་ལ་ནི་དཔེ་གཉིས་པ་ནགས་
[330a.2]ཚལ་འབྲས་བུ་ཆགས་སོ་ཞེས་བྱ་བ་ཡིན་ཏེ། །ནགས་ཚལ་ཞེས་བྱ་བ་ནི་ཆུང་ཟད་ཀྱང་མེད་དོ། །ཇི་ལྟར་ནགས་ཚལ་གང་ལ་འབྲས་བུ་བྱུང་བ་དེའི་འབྲས་བུ་ཆགས་སོ་ཞེས་བྱ་བ་དེ་བཞིན་དུ་སྐྱེ་མཆེད་དྲུག་གི་མཚན་ཉིད་ཀྱི་རྟེན་གང་ལ་བདེ་བའམ་སྡུག་བསྔལ་བྱུང་བ་དེ་ལ་བདེ་བའམ་སྡུག་བསྔལ་བ་
[330a.3]ཞེས་བྱའོ། །དེ་ལྟར་ནི་བཤད་ཟིན་ཏོ་ཞེས་བྱ་བ་ནི། དེ་གྱུར་པ་ལས་འགྱུར་བའི་ཕྱིར། །རྟེན་ནི་མིག་ལ་སོགས་པ་ཡིན། །ཞེས་སྐྱེ་མཆེད་དྲུག་ཇི་ལྟར་བརྟེན་པ་དེ་ལྟར་ནི་བཤད་ཟིན་ཏོ། །འོན་ཏེ་ཕུང་པོ་ལྔ་ཞེས་བྱ་བ་ནི་ཁྱོད་དཔེར་བྱེད་ན་ཞེས་བྱ་བར་སྐབས་དང་སྦྱར་རོ། །དེ་ཉིད་བྱེད་པ་པོ་ཡིན་ཏེ་ཞེས་བྱ་བ་ནི་ཕུང་
[330a.4]པོ་ལྔའི་མཚན་ཉིད་དེ་ཉིད་བྱེད་པ་པོ་ཡིན་གྱི་བདག་ནི་མ་ཡིན་པས། ཁོ་བོ་ཅག་གི་ཕྱོགས་གྲུབ་པོ། །དེ་ལ་ཡང་རང་དབང་མེད་པར་བརྟེན་པའི་ཕྱིར་ལས་འདི་རྣམ་པ་གསུམ་སྟེ་ཞེས་བྱ་བ་རྒྱས་པར་སྨྲས་སོ། །ལུས་ནི་སེམས་གཞན་གྱི་དབང་གིས་འཇུག་སྟེ་ལུས་ཀྱི་ལས་ནི་སེམས་ཀྱིས་རབ་ཏུ་
[330a.5]བཅུག་པའི་ཕྱིར་རོ། །སེམས་ཀྱང་ལུས་ལ་རང་གི་རྒྱུའི་དབང་གིས་འཇུག་སྟེ། ཡིད་ལ་བྱེད་པ་ལ་སོགས་པའི་གཞན་གྱི་དབང་ཡིན་པའི་ཕྱིར་རོ། །དེ་ཡང་དེ་དང་འདྲ་སྟེ་སེམས་ཀྱི་རྒྱུད་ཡང་རང་གི་རྒྱུའི་གཞན་གྱི་དབང་གིས་འཇུག་པས་ལུས་སམ་སེམས་སམ་སེམས་ཀྱི་རྒྱུ་འམ་གཞན་ཡང་
[330a.6]རུང་གང་ལ་ཡང་རང་དབང་མེད་ཀྱི། བཞི་ཡིས་སེམས་དང་སེམས་བྱུང་རྣམས། །གསུམ་གྱིས་སྙོམས་པར་འཇུག་པ་གཉིས། །གཞན་དག་གཉིས་ལས་སྐྱེ་བར་འགྱུར། །ཞེས་འབྱུང་བས་དངོས་པོ་ཐམས་ཅད་ནི་རྐྱེན་གྱི་གཞན་གྱི་དབང་གིས་འཇུག་གོ། །བདག་ཀྱང་ལྟོས་པ་མེད་པ་ནི་བློའི་
[330a.7]ཁྱད་པར་སྐྱེ་བའི་རྒྱུ་མ་ཡིན་པས་རྒྱུ་ཉིད་དུ་ཁས་མི་ལེན་པའི་ཕྱིར་རང་དབང་ཅན་དུ་མི་འགྲུབ་བོ། །དེ་ལྟ་བས་ན་དེ་ལྟ་བུའི་མཚན་ཉིད་ཅེས་བྱ་བ་ནི་བྱེད་པ་པོ་རང་དབང་ཅན་ནོ། །འོ་ན་བྱེད་པ་པོ་ཇི་ལྟ་བུ་ཞེ་ན། གང་ཞིག་གང་གི་རྒྱུའི་གཙོ་བོ་ཡིན་པ་དེ་ནི་དེའི་བྱེད་པ་པོ་ཞེས་བྱ་བ་སྨོས་ཏེ། གཙོར་དེ་ལ་
[330b]
[330b.1]བརྟེན་ནས་སྐྱེ་བའི་ཕྱིར་རོ། །དེ་ནི་དེ་ལྟ་བུར་ཡང་བྱེད་པ་པོར་མི་རུང་ངོ་ཞེས་བྱ་བ་ནི་རྒྱུའི་གཙོ་བོའི་ངོ་བོར་ཡང་མི་རུང་ངོ་ཞེས་བྱ་བའི་ཐ་ཚིག་གོ། །དེ་རྒྱུ་མ་ཡིན་པ་ཉིད་དུ་བསྟན་པའི་ཕྱིར་དྲན་པ་ལས་ནི་འདུན་པ་སྐྱེའོ་ཞེས་བྱ་བ་རྒྱས་པར་སྨོས་ཏེ། དང་པོར་དྲན་པར་བྱ་བའི་དོན་ལ་དྲན་པ་སྐྱེའོ། །
[330b.2]དྲན་པ་ལས་ནི་འདུན་པ་སྐྱེ་སྟེ་བྱེད་པར་འདོད་པའོ། །འདུན་པ་ལས་ནི་རྟོག་པ་སྟེ། །རྣལ་འབྱོར་སྤྱོད་པའི་ལུགས་ཀྱིས་ནི་འདུ་བྱེད་ཀྱི་མཚན་ཉིད་སེམས་པའི་ཁྱད་པར་རམ། ཤེས་རབ་ཀྱི་ཁྱད་པར་ཡིན་ནོ། །བྱེ་བྲག་ཏུ་སྨྲ་བའི་ལུགས་ཀྱིས་ནི་རྣམ་པར་རྟོག་པའི་མཚན་ཉིད་ཀྱི་ངེས་པར་རྟོག་པའོ། །
[330b.3]རྣམ་པར་རྟོག་པ་ལས་རབ་ཏུ་འབད་པ་སྟེ་བརྩོན་འགྲུས་སོ། །རབ་ཏུ་འབད་པ་ལས་རླུང་ངོ་། །དེ་ནས་རླུང་ལས་ནི་ལས་དེ་ཡུལ་གཞན་དུ་འབྱུང་བའི་མཚན་ཉིད་འབྱུང་ན། འདི་ལ་བདག་ཅི་ཞིག་བྱེད་རྣམ་པར་ཤེས་པ་ལ་ནུས་པ་བཀག་པའི་ཕྱིར་རོ་ཞེས་བྱ་བ་ནི་དམིགས་པ་གང་ཡིན་པ་དེ་ཉིད་རྣམ་པར་ཤེས་པ་
[330b.4]ཡིན་ན་འདུ་བྱེད་ཀྱི་ཁྱད་པར་ལ་ལྟོས་པའི་སེམས་ཁོ་ན་ལས་ཡིན་པར་ཟད་ཀྱི་བདག་གི་ནུས་པ་ནི་ཆུང་ཟད་ཀྱང་མི་དམིགས་ཏེ། སྨན་གྱི་འབྲས་བུ་གྲུབ་པ་ལ་སྨན་པ་ངན་གཡོ་ཅན་གྱིས་ཕུ་སྭཱ་ཧཱ་ཞེས་སྨྲས་པ་དག་བཞིན་ནོ་ཞེས་རྣམ་པར་ཤེས་པ་ལ་ནི་བདག་གི་ནུས་པ་བཀག་གོ། །ཇི་ལྟར་ཡིན་པ་དེ་
[330b.5]ལྟར་ནི་བཤད་ཟིན་ཏོ་ཞེས་བྱ་བ་ནི། དེར་གྱུར་པ་ལས་འགྱུར་བའི་ཕྱིར། །རྟེན་ནི་མིག་ལ་སོགས་པ་ཡིན། །ཞེས་བྱ་བའོ། །དེ་ལ་བརྟེན་པ་ཞེས་བྱ་བ་ནི་བདག་ལ་བརྟེན་པའོ། །ཚིག་གི་ལུགས་ཀྱིས་ནི་ལན་བཏབ་ཟིན་ཏོ་ཞེས་བྱ་བ་ནི་གང་གི་རྟེན་གང་ལྟ་བུ། དེ་དག་ཀྱང་རི་མོ་དང་རྒྱ་ཤུག་ལ་སོགས་
[330b.6]པ་ལྟ་བུར་བརྟེན་པ་མ་ཡིན་ལ། དེ་ཡང་རྩིག་པ་དང་གཞོང་བུ་ལ་སོགས་པ་ལྟར་རྟེན་དུ་རིགས་པ་མ་ཡིན་ཏེ། ཐོགས་པ་དང་ཐ་དད་པ་ཉིད་ཀྱི་ཉེས་པར་འགྱུར་བའི་ཕྱིར་རོ། །གལ་ཏེ་དེ་ནི་དེ་ལྟ་བུར་རྟེན་མ་ཡིན་ནོ། །འོ་ན་ཇི་ལྟ་བུ་ཞེ་ན་ཞེས་བྱ་བ་རྒྱས་པར་འབྱུང་བ་ཡིན་ནོ། །དེས་བསྐྱེད་པས་སོ་ཞེས་བྱ་
[330b.7]བ་ནི་ས་བོན་དེས་དེའི་ནུས་པ་བསྐྱེད་པས་སོ་ཞེས་བྱ་བའི་ཐ་ཚིག་གོ། །ཇི་སྐད་དུ་བཤད་པ་ལྟ་བུའོ་ཞེས་བྱ་བ་ལྟ་བུ་ནི་གནས་བརྟན་སྒྲ་གཅན་ཟིན་གྱིས་སོ། །ཉེ་བ་གང་དང་གོམས་གང་དང་། །ཞེས་བྱ་བ་རྒྱས་པར་འབྱུང་བ་ནི་རྒྱུད་གཅིག་ལ་ལས་བཞི་པོ་ལྕི་བ་དང་ཉེ་བ་དང་གོམས་པ་དང་སྔོན་བྱས་པ་
[331a]
[331a.1]ཡོད་པའི་བཞི་པོ་དེ་དག་ནི་དེ་དག་གི་ནང་ན་ལས་ལྕི་བ་སྔ་མ་ཡིན་པས་དེ་ནི་གསུམ་པས་སྔར་སྨིན་ཏོ། །ཉེ་བ་དང་གོམས་པ་དང་སྔར་བྱས་པ་རྣམས་ཀྱི་ནང་ན་ཡང་ཉེ་བ་སྔ་མ་ཡིན་པས་དེ་ནི་གཉིས་པས་སྔར་སྨིན་ཏོ། །གོམས་པ་དང་སྔར་བྱས་པ་དག་ལ་ཡང་གོམས་པ་སྔ་མ་ཡིན་
[331a.2]པས་གཅིག་པས་སྔར་སྨིན་ཏོ། །དེ་དག་མེད་ན་ཚེ་སྔ་མ་ལ་བྱས་པ་ལན་གྲངས་གཞན་ལ་མྱོང་བ་སྨིན་པར་འགྱུར་རོ། །ཉོན་མོངས་པ་ཅན་མ་ཡིན་པ་རྣམས་ཀྱི་ཞེས་བྱ་བ་ནི་དགེ་བ་དང་མ་བསྒྲིབས་ལ་ལུང་དུ་མ་བསྟན་པ་རྣམས་ཀྱིའོ། །རྣམ་པར་འདྲུལ་བའི་ཁྱད་པར་ལས་སྐྱེས་པ་ཞེས་བྱ་བ་ནི་ས་དང་ཆུ་དང་
[331a.3]འབྲེལ་པ་ལས་འབྲས་བུའི་རྣམ་པར་འགྱུར་བ་ཕྲ་མོ་ནི་རྣམ་པར་འདྲུལ་བའོ། །དེའི་ཁྱད་པར་ནི་དེ་ཉིད་ཁྱད་པར་ཅན་ཡིན་ཏེ། དེ་ལས་རྣམ་པར་འགྱུར་བའི་ཁྱད་པར་སྐྱེའོ། །དེ་ལས་འབྲས་བུ་གཞན་སྐྱེའོ། །རྣམ་པར་འགྱུར་བའི་ཁྱད་པར་ཇི་ལྟ་བུ་ཞིག་ལས་ཡིན་པ་བསྟན་པའི་ཕྱིར། དེ་ལས་འབྱུང་
[331a.4]བའི་རྣམ་པ་མྱུ་གུ་འགྲུབ་པར་བྱེད་པ་ཡོད་པ་གང་ཡིན་པ་དེ་ནི་དེའི་ས་བོན་ཞེས་བྱ་བ་སྨོས་ཏེ། མྱུ་གུ་དེའི་ས་བོན་ཡིན་ནོ། །འབྱུང་བའི་རྣམ་པ་གཞན་ནི་མ་ཡིན་ཏེ། སྔོན་གྱི་ས་བོན་གྱི་གནས་སྐབས་ཀྱི་འབྱུང་བའི་རྣམ་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །འགྱུར་བའི་མིང་གིས་ཞེས་བྱ་བ་ནི་ཇི་ལྟར་
[331a.5]འབྲས་ཆན་འཚེད་དོ། །ཕྱེ་འཐག་གོ་ཞེས་འབྱུང་བར་འགྱུར་བའི་མིང་གིས་ཐ་སྙད་འདོགས་པ་དེ་བཞིན་དུ། རྒྱུན་སྔ་མ་ས་བོན་གྱི་གནས་སྐབས་མ་རུལ་བ་ལ་ཡང་འབྱུང་བར་འགྱུར་བའི་མིང་གིས་ས་བོན་ཞེས་བྱའོ། །འདྲ་བའི་ཕྱིར་ཞེས་བྱ་བ་ནི་རྒྱུན་སྔ་མ་དེ་ཡང་འབྱུང་བ་རྣམ་པར་འགྱུར་བའི་
[331a.6]ཁྱད་པར་རྣམ་པར་འདྲུལ་བའི་ཁྱད་པར་ལས་སྐྱེས་པ་དང་འདྲ་བའི་ཕྱིར་ས་བོན་ཞེས་བྱའོ། །དེ་བཞིན་དུ་འདི་ལ་ཡང་ཞེས་བྱ་བ་རྒྱས་པར་འབྱུང་བ་ནི་གལ་ཏེ་དམ་པའི་ཆོས་ཉན་པ་དང་ཚུལ་བཞིན་ཡིད་ལ་བྱེད་པའི་རྐྱེན་གྱི་ཁྱད་པར་ལས་སྐྱེས་པ་དགེ་བ་ཟག་པ་དང་བཅས་པའི་སེམས་ཀྱི་འགྱུར་བ་སྐྱེ་
[331a.7]བའམ་དམ་པ་མ་ཡིན་པའི་ཆོས་མཉན་པ་དང་ཚུལ་བཞིན་མ་ཡིན་པ་ཡིད་ལ་བྱེད་པའི་རྐྱེན་གྱི་ཁྱད་པར་ལས་སྐྱེས་པ་མི་དགེ་བའི་སེམས་ཀྱི་འགྱུར་བ་སྐྱེ་ན། དེ་ལས་རྣམ་པ་གཞན་སྐྱེའི། གཞན་དུ་ནི་མ་ཡིན་པས་དེ་ནི་མཚུངས་སོ། །ཇི་ལྟར་འབྲས་བུ་ཁོ་ན་ལས་འབྲས་བུ་གཞན་མི་འབྱུང་གི །འོ་ན་ཅི་
[331b]
[331b.1]ཞེ་ན་འགྱུར་བའི་ཁྱད་པར་ལས་ཡིན་པ་དེ་བཞིན་དུ་རྣམ་པར་སྨིན་པ་ཁོ་ན་ལས་རྣམ་པར་སྨིན་པ་གཞན་མི་འབྱུང་ངོ་། །འོ་ན་ཅི་ཞེ་ན་སེམས་ཀྱི་འགྱུར་བའི་ཁྱད་པར་ལས་འབྱུང་བས་དེ་ནི་མཚུངས་སོ། །འབྲས་བུའི་ནང་དུ་གེ་སར་དམར་པོ་ཞེས་བྱ་བ་ནི་འབྲས་བུའི་ནང་དུ་གང་ན་བི་ཛ་པུ་རའི་ཁུ་བ་སྐྱུར་བོ་ཡོད་པའི་
[331b.2]གེ་སར་རོ། །དེ་ལས་ནི་དེ་གཞན་མི་སྐྱེ་བ་ཞེས་བྱ་བ་ནི་གེ་སར་དམར་པོ་དེ་ལས་ནི་ཡང་གེ་སར་དམར་པོ་དེ་མི་སྐྱེའོ། །འོ་ན་ཅི་ཞེ་ན་གེ་སར་ཕལ་པ་དམར་པོ་མ་ཡིན་པ་ཁོ་ན་སྐྱེའོ་ཞེས་བྱ་བའི་ཐ་ཚིག་གོ། །འདི་ནི་འདིར་དཔེར་བརྗོད་པ་ཡིན་ཏེ། ཇི་ལྟར་རྒྱ་སྐྱེགས་ཀྱིས་ཁ་དོག་བསྒྱུར་བའི་མ་ཏུ་ལུང་གའི་
[331b.3]མེ་ཏོག་དང་འབྲས་བུ་ཅན་གྱི་གེ་སར་དམར་པོ་གཞན་མི་འབྱུང་བ་དེ་བཞིན་དུ་ལས་ལས་སྐྱེས་པའི་རྣམ་པར་སྨིན་པ་ལས་ཀྱང་རྣམ་པར་སྨིན་པ་གཞན་མི་སྐྱེའོ། །འདིར་སྨྲས་པ། སེམས་འདི་ས་བོན་མཐའ་ཡས་པ་དང་ལྷན་ཅིག་རྒྱུན་གྱིས་འབྱུང་། །ས་བོན་དེ་ནི་རང་རྐྱེན་བྱུང་ན་སེམས་ལ་རྒྱས་པར་འགྱུར། །
[331b.4]དེ་རྒྱས་རིམ་གྱིས་འཇུག་པ་རྙེད་ན་དུས་སུ་འབྲས་བུ་འགྲུབ། །མ་ཏུ་ལུང་གའི་མེ་ཏོག་བསྐུས་ཚོན་དེ་ཡི་གེ་སར་བཞིན། །ཡང་སྨྲས་པ། ཇི་ལྟར་རས་བལ་ས་བོན་དང་། །མ་ཏུ་ལུང་གའི་མེ་ཏོག་ལ། །རྒྱ་སྐྱེགས་བསྐུས་ན་དེ་ཞིག་ཀྱང་། །བསྒོས་པའི་རྒྱུད་ཀྱི་རིམ་པ་ཡིས། །རས་བལ་དང་ནི་གེ་
[331b.5]སར་ལ། །དམར་པོ་འབྱུང་བར་འགྱུར་བ་ལྟར། །ལས་རྣམས་ཞིག་ནའང་བསྒོས་པ་ནི། །དེ་ཉིད་དེ་ཡི་འབྲས་བུ་སྐྱེད། །ལས་དང་ཞེས་བྱ་བ་ཐམས་ཅད་འབྱུང་བ་ལ། དེ་བསྒོས་ཞེས་བྱ་བ་ནི་ལས་ཀྱིས་བསྒོས་པའོ། །བསྒོས་པ་དེའི་འཇུག་པ་རྙེད་པ་ནི་དེའི་རྙེད་པ་སྟེ། །དེ་དང་འཇུག་པ་རྙེད་པ་དེ་ལས་འབྲས་
[331b.6]བུ་ཞེས་བྱ་བ་འདི་བཞིན་ནོ། །སངས་རྒྱས་ལས་གཞན་པ་ཉན་ཐོས་ལ་སོགས་པས་དགའ་མགུར་རྣམ་པ་ཐམས་ཅད་དེའི་རྣམ་པ་ཀུན་ངེས་པར་གདོན་མི་ཟ་བར་རབ་ཏུ་མི་ཤེས་སོ། །དོན་གྱིས་ན་སངས་རྒྱས་ཁོ་ནས་དེ་ཐམས་ཅད་རྣམ་པ་ཐམས་ཅད་རབ་ཏུ་མཁྱེན་ཏོ་ཞེས་བཤད་པ་ཡིན་ནོ། །
[331b.7]དེ་ལྟར་ཞེས་བྱ་བ་རྒྱས་པར་འབྱུང་བ་ནི་སྐབས་རྫོགས་པའི་དོན་ཏམ་གོང་དུ་རབ་ཏུ་བསྟན་པའི་དོན་ཏོ། །སངས་རྒྱས་རྣམས་ཀྱི་གསུང་རབ་ཀྱི་ཆོས་ཉིད་གཏན་ཚིགས་ཀྱི་ལམ་ལེགས་པར་གསུངས་པས་དག་པ་ཁ་ན་མ་ཐོ་བ་མེད་པ་འདི་མཐོང་ནས་ཏེ་མཐོང་བར་གྱུར་ནས་སོ། །མུ་སྟེགས་དག་ནི་ཡང་དག་
[332a]
[332a.1]པ་ཇི་ལྟ་བ་བཞིན་མཐོང་བ་མེད་པས་ལོང་བ་དག་གོ། །ལྟ་ངན་ནི་ལྟ་བ་སྨད་པ་སྟེ། དེ་གཡོ་བའོ། །འདི་དག་ལ་ལྟ་བ་ངན་པ་སྣ་ཚོགས་གཡོ་བ་ཡོད་པས་ན་ལྟ་བ་ངན་པ་སྣ་ཚོགས་གཡོ་ཅན་དག་སྟེ། མཐོ་རིས་དང་བྱང་གྲོལ་གྱི་ལམ་ལ་མ་ཞུགས་པ་དང་ལོག་པ་ལ་ཞུགས་
[332a.2]པ་རྣམས་སོ་ཞེས་བྱ་བའི་ཐ་ཚིག་གོ། །མུ་སྟེགས་སེར་སྐྱ་བ་དང་འུག་པ་ལ་སོགས་པ་དེ་ལྟ་བུ་དེ་དག་གི་གཞུང་ལུགས་སམ། ལྟ་བ་སྤངས་ཤིང་བོར་ཏེ་འཁོར་བ་ནས་མྱ་ངན་ལས་འདས་པར་འགྲོའོ་ཞེས་བྱ་བའི་ཚིག་ཁོང་ནས་དྲང་ངོ་། །སེམས་ཅན་དེ་དག་གང་ཞེ་ན། འཕགས་པ་ཉན་ཐོས་ཤེས་རབ་ཀྱི་
[332a.3]མིག་དང་ལྡན་པ་རྣམས་སོ། །ཡང་ན་གསུང་རབ་ཀྱི་ཆོས་ཉིད་དེ་ཁོ་ན་ལ་འགྲོ་སྟེ་སྒྲུབ་པོ་ཞེས་བྱ་བའི་ཐ་ཚིག་གོ། །གསུང་རབ་ཀྱི་ཆོས་ཉིད་ནི་འདིར་བདག་མེད་པའམ། སངས་རྒྱས་ཀྱི་རྗེས་སུ་བསྟན་པའོ། །གཞན་དག་ན་རེ་གསུང་རབ་ནི་མདོ་ལ་སོགས་པ་གསུང་རབ་ཀྱི་ཡན་ལག་བཅུ་གཉིས་སུ་
[332a.4]བཏགས་པའོ། །དེའི་ཆོས་ཉིད་ནི་རིགས་པ་དང་ལྡན་པའི་ཕྱིར་ལེགས་པར་གསུངས་པ་ཉིད་དང་མྱ་ངན་ལས་འདས་པ་བརྗོད་པའི་ཕྱིར་མྱ་ངན་ལས་འདས་པ་ལ་གཞོལ་བ་ཉིད་ཡིན་ཏེ། ཇི་སྐད་དུ་ཆོས་འདི་དག་ཐམས་ཅད་ནི་མྱ་ངན་ལས་འདས་པ་ལ་གཞོལ་བ་མྱ་ངན་ལས་འདས་པ་ལ་བབ་པ་མྱ་ངན་
[332a.5]ལས་འདས་པ་ལ་འབབ་པ་སྟེ། མངོན་པར་བརྗོད་པ་ན་མྱ་ངན་ལས་འདས་པ་ཁོ་ན་མངོན་པར་བརྗོད་པའོ་ཞེས་གསུངས་པ་ལྟ་བུའོ་ཞེས་ཟེར་རོ། །བདག་མེད་པར་འདུ་ཤེས་པ་ནི་མྱ་ངན་ལས་འདས་པ་ཞི་བའི་འདུ་ཤེས་སུ་གནས་ཏེ། བདག་ཆད་པ་དང་བྲལ་བའི་ཕྱིར་རོ། །དེ་ལྟར་ན་ལོང་བ་
[332a.6]མ་ཡིན་པ་རྣམས་འགྲོའི། ལོང་བ་རྣམས་ནི་མ་ཡིན་ནོ། །ལོང་བ་རྣམས་ནི་བདག་མེད་པ་མ་མཐོང་བས་འཁོར་བའི་རྒྱ་མཚོར་འཁྱམས་པ་ཉིད་དོ། །དེ་བསྟན་པའི་ཕྱིར་དེ་བཞིན་གཤེགས་པ་ཞེས་བྱ་བ་ལ་སོགས་པ་སྨོས་སོ། །དེ་བཞིན་གཤེགས་པ་ཉིད་ཉི་མ་སྟེ། དེ་བཞིན་གཤེགས་པ་ནི་ཆོས་ཟབ་མོ་
[332a.7]མངོན་པར་རབ་ཏུ་སྟོན་པའི་ཕྱིར་ཉི་མ་ལྟ་བུ་ཡིན་ནོ། །དེའི་གསུང་དག་སྟེ་དེ་དག་ཉིད་འོད་ཡིན་ནོ། །དེ་དག་གི་སྣང་བ་དང་ལྡན་པས་དེ་བཞིན་གཤེགས་པ་ཉི་མའི་གསུང་འོད་ཀྱི་སྣང་ལྡན་ཞེས་བྱའོ། །མྱ་ངན་ལས་འདས་པ་ཉིད་གྲོང་ཡིན་པས་མྱ་ངན་ལས་འདས་གྲོང་ངོ་། །དེའི་ལམ་གཅིག་པ་ཞེས་བྱ་བ་ནི་
[332b]
[332b.1]མྱ་ངན་ལས་འདས་པའི་གྲོང་གི་ལམ་གཅིག་པུ་སྟེ། ལམ་གཞན་མ་ཡིན་ནོ་ཞེས་བྱ་བའི་ཐ་ཚིག་གོ། །འཕགས་པ་སྟོང་ཕྲག་གིས་བགྲོད་པས་ན་འཕགས་པ་སྟོང་གིས་བགྲོད་པའོ། །འདི་ཞེས་བྱ་བ་ནི་བདག་མེད་པ་འདིའོ། །ཕྱེ་ཡང་ཞེས་བྱ་བ་ནི་བདག་མེད་པ་མྱ་ངན་ལས་འདས་པའི་གྲོང་གི་ལམ་གཅིག་པུ་དེ་
[332b.2]བཞིན་གཤེགས་པ་ཉི་མའི་གསུང་གི་འོད་ཟེར་གྱི་སྣང་བ་དང་ལྡན་པའི་འདིའི་རྣམ་པ་ཕྱེ་ཡང་མུ་སྟེགས་ཅན་ནམ་གནས་མའི་བུ་ཡང་རུང་སྟེ། ཤེས་རབ་ཀྱི་མིག་གསལ་བ་མེད་པའི་ཕྱིར་རམ། མིག་མ་རིག་པའི་རབ་རིབ་ཀྱི་སྦུབས་ཀྱིས་ཁེབས་པའི་ཕྱིར་དམན་པའི་མིག་གིས་མི་མཐོང་ངོ་། །
[332b.3]འདིར་ལམ་གྱི་ཡོན་ཏན་ནི་གསུམ་སྟེ་འདི་ལྟ་སྟེ། འདོད་པའི་ཡུལ་དུ་ཕྱིན་པར་བྱེད་པའི་ཕྱིར་བགྲོད་པ་གཅིག་པུ་ཉིད་དང་གང་གིས་ན་བག་ཚ་བ་མེད་པར་འགྲོ་བ་སྣང་བ་དང་བཅས་པ་ཉིད་དུ། སྡོང་དུམ་དང་ཚེར་མ་ལ་སོགས་པ་རྣལ་བའི་ཕྱིར་གང་གིས་ན་བདེ་བླག་ཏུ་འགྲོ་བ་བགྲོད་ཅིང་
[332b.4]རྗེས་སུ་བགྲོད་པའོ། །བདག་མེད་པའི་ལམ་འདི་ཡང་དེ་དང་ཆོས་མཐུན་པར་བལྟ་བར་བྱའོ། །རྒྱུ་བཞིས་ནི་ལམ་མི་མཐོང་སྟེ། མུན་པ་མུན་ནག་དང་བཅས་པ་ཉིད་དང་། ཉི་མས་སྣང་བར་བྱས་ཀྱང་མ་བགྲོད་པ་ཉིད་དང་། མི་མང་པོས་བགྲོད་ཀྱང་བསྒྲིབས་པ་ཉིད་དང་། ཕྱེ་ཡང་ལྟ་བ་པོའི་མིག་
[332b.5]དམན་པ་ཉིད་དོ། །དེ་དག་ལས་འདིར་ལམ་འདི་མི་མཐོང་བའི་རྒྱུར་ནི་ལྟ་བ་པོའོ། །ཉེས་པ་ཁོ་ནས་ལམ་མ་མཐོང་གི་ལམ་གྱི་ཉེས་པས་ནི་མ་ཡིན་ནོ་ཞེས་བྱ་བ་གཅིག་ཁོ་ན་བཤད་དེ། འདིར་མིག་དམན་པ་དེས་འདི་མི་མཐོང་ཞེས་བྱ་བར་ཁོང་དུ་ཆུད་པར་བྱའོ། །དེ་ལྟར་འདི་ནི་ཕྱོགས་
[332b.6]ཙམ་ཞིག་ཅེས་བྱ་བ་ཐམས་ཅད་འབྱུང་བ་ལ། དེ་ལྟར་ཞེས་བྱ་བ་ནི་ཇི་སྐད་དུ་བཤད་པ་ལྟར་རོ། །ཕྱོགས་ཉིད་ཕྱོགས་ཙམ་སྟེ་ཙམ་ཞེས་བྱ་བ་ནི་ཉིད་ཅེས་བྱ་བའི་དོན་ཏོ། །ཡང་ན་འདི་ལ་ཕྱོགས་ཙམ་ཡོད་པས་ན་ཕྱོགས་ཙམ་སྟེ། ཆོས་མངོན་པའི་བསྟན་བཅོས་ཆེན་པོ་ལས་ཉུང་ངུ་འདི་དག་གིས་བསྟན་
[332b.7]ཏོ་ཞེས་བྱ་བ་ཚིག་ལྷག་མ་ཡིན་ནོ། །སུ་དག་ལ་ཞེ་ན་ཤིན་ཏུ་མཁས་པ་རྣམས་ལ་ཞེས་བྱ་བ་སྟེ་དམ་པ་རྣམས་ལ་ཞེས་བྱ་བའི་དོན་ཏོ། །ཇི་ལྟ་བུར་ཞེ་ན། རང་གི་མཐུ་ཡིས་རྣམ་འཕེལ་བའི། །དུག་ལ་རྨ་ཡི་ཕྱོགས་བཞིན་དུ། །ཞེས་བྱ་བ་སྨོས་ཏེ། ཇི་ལྟར་འགའ་ཞིག་གི་དུག་ནི་ནང་གི་མཐུས་རྨའི་ཕྱོགས་ཁྱབ་ནས་ཡན་
[333a]
[333a.1]ལག་དང་ཉིང་ལག་ཐམས་ཅད་ཀྱི་ནང་དུ་འཕེལ་བར་འགྱུར་རོ་སྙམ་དུ་བསམས་ནས་ཇི་ལྟར་ན་འདི་འཕེལ་བར་འགྱུར་སྙམ་སྟེ། དེའི་རྨ་འབྱིན་པ་དེ་བཞིན་དུ་ཤིན་ཏུ་མཁས་པ་རྣམས་ནི་རང་གི་མཐུས་འཕེལ་བའི་ཕྱིར་དུག་དང་འདྲ་བ་ཡིན་ནོ། །དེ་བས་ན་ཤིན་ཏུ་མཁས་པ་མགོ་
[333a.2]སྨོས་པས་གོ་བ་ཤེས་རབ་ཅན་དེ་དག་ལ་བདག་གིས་ཇི་ལྟར་ན་གཞུང་ཉུང་ངུས་ཆོས་མངོན་པའི་བསྟན་བཅོས་ཆེན་པོ་ཁ་ཆེའི་བྱེ་བྲག་ཏུ་སྨྲ་བའི་ལུགས་གྲུབ་པ་དོན་གྱི་སྒོ་ནས་རྟོགས་པར་འགྱུར་སྙམ་སྟེ་འདི་བསྟན་ཏོ། །གཞན་དག་ན་རེ་འདི་ནི་ཕྱོགས་ཙམ་ཞིག་ཅེས་བྱ་བ་འདི་ནི་བདག་མེད་པར་དགག་པ་
[333a.3]འདི་ཁོ་ནའི་དབང་དུ་བྱས་ནས་བཤད་པ་ཡིན་ཏེ། བདག་གིས་མངོན་པའི་ཆོས་འདི་ཕལ་ཆེར་ནི། །ཁ་ཆེ་བྱེ་བྲག་སྨྲའི་ཚུལ་གྲུབ་པ་བཤད། །ཅེས་བྱ་བ་འདི་ཉིད་ཀྱིས་དོན་དེ་བཤད་ཟིན་པ་དེའི་ཕྱིར་རོ་ཞེས་ཟེར་རོ། །མཛོད་ཀྱི་གནས་བརྒྱད་པ་དང་འགྲེལ་པ་གང་ཟག་རྣམ་པར་གཏན་ལ་འབེེབས་པ་
[333a.4]འདི་ཡང་རྫོགས་སོ།། །།ཆོས་མངོན་སྣ་ཚོགས་དོན་གྱི་ཟ་མ་ཏོག །ཆོས་མངོན་མཛོད་འདི་རྣམ་པར་ཕྱེ་བ་ཡི། །དགེ་བ་བདག་གིས་ཐོབ་པ་གང་ཡིན་དེས། །འཇིག་རྟེན་ཀུན་གྱི་བདེ་བ་འབྱུང་གྱུར་ཅིག །བསྟན་བཅོས་པདྨ་མཚོ་ལས་སྐྱེས་པ་གཙང་། །བདུད་རྩིའི་རོ་རྨད་བྱུང་བ་སྲེད་སེལ་
[333a.5]གནས་གྱུར་པ། །བདག་གི་བཤད་ཚིག་ཉི་ཟེར་དག་གིས་གསལ་བྱས་འདི། །སྐྱེ་བོ་མཁས་པའི་བུང་བ་རྣམས་ཀྱིས་བརྟེན་པར་ཤོག །གང་གིས་བསྟན་བཅོས་ཐམས་ཅད་རྟོགས་གྱུར་ནས། །མཁས་པའི་གྲགས་ཐོབ་གྲགས་པའི་བཤེས་གཉེན་དེས། །རྣམ་པར་བཤད་པ་གཞན་ལ་མ་མགུ་
[333a.6]ནས། །རྣམ་པར་བཤད་པ་འདི་ནི་བྱས་པ་ཡིན། །དེ་ཡིས་རྣམ་པར་བཤད་པ་འདི། །དཔལ་དང་ཚིག་གི་བདག་པོ་སྟེ། །དམ་པའི་དོན་ལུང་དོན་གཉེར་བ། །ལྷ་སྐུ་ལྷ་དང་འདྲ་ཕྱིར་བྱས། །ཆོས་མངོན་པའི་མཛོད་ཀྱི་འགྲེལ་བཤད་དོན་གསལ་བ་ཞེས་བྱ་བ་སློབ་དཔོན་རྒྱལ་པོའི་སྲས་གྲགས་པའི་
[333a.7]བཤེས་གཉེན་གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་བི་ཤུདྡྷ་སིཾ་ཧ་དང་། ཞུ་ཆེན་གྱི་ལོ་ཙཱ་བ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། །འདི་ལ་ཤློཀ་ནི་ཁྲི་བརྒྱད་སྟོང་ཡོད་དོ། །བམ་པོ་ནི་དྲུག་ཅུར་བྱས་སོ།། །།