[1a] [1b] [1b.1]{T3140}༄༅༅། །རྒྱ་གར་སྐད་དུ། བཛྲ་ཨཱ་བ་ལི་ནཱ་མ་མཎྜལ་ཨུ་པཱ་ཡི་ཀཱ། བོད་སྐད་དུ། དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ [1b.2]ཕྱག་འཚལ་ལོ། །དཔལ་ལྡན་རྡོ་རྗེ་དབང་ཕྱུག་ལ་འདུད་བདུད་རྣམས་སྲིད་དགྲའི་ཞབས་དྲན་གྱིས་ཤིག་ཀྭའི། །ཁྲོ་བོ་རྣམས་ནི་ཕྱོགས་སུ་རྒྱུག་མཛོད་རྡོ་རྗེ་ལྷ་མོ་བཀྲ་ཤིས་གླུ་དབྱངས་ལོང་། །དཔལ་ལྡན་ [1b.3]རྡོ་རྗེ་འཆང་གི་ཕུན་ཚོགས་དཀྱིལ་འཁོར་ཆེན་པོར་འགྲོ་བ་ཡོངས་གཟུང་ཕྱིར། །འཇིགས་པ་མེད་པའི་མཐུ་ཡིས་བགེགས་མེད་འདིར་ནི་རྡོ་རྗེ་ཕྲེང་བ་འདུ་བར་ཤོག །གང་གི་འོད་ཀྱིས་ནང་གི་མུན་བསལ་ནས། །རྡོ་རྗེ་ [1b.4]འཆང་དཔལ་སྐུར་བཅས་འཛིན་པ་འདི། །རྡོ་རྗེ་འཆང་གིས་ཕྱི་ནང་རྡོ་རྗེ་བཞིན། །རིམ་པར་བརྒྱུད་པ་སྙིང་ལ་གཟུང་བར་མཛོད། །དཀྱིལ་འཁོར་ལ་སོགས་ཆོ་ག་ནི། །སྟོན་པས་རྒྱུད་སྡེ་གཉིས་སུ་སྤྲོས། །དེ་ [1b.5]འདིར་བྱ་བ་ནུས་བསྡུས་ནས། །གསལ་བར་རིམ་པས་བཤད་པར་བྱ། །གཞན་ཡང་སློབ་དཔོན་རྣམས་ཀྱིས་བྱ་བའི་གཞུང་མཛད་རྣམས། །རྫོགས་དང་སྐབས་སུ་བབ་དང་གསལ་བར་བརྗོད་པ་མིན། །ཁ་ཅིག་ཀྱང་ [2a] [2a.1]ནི་གདམས་པ་དང་བྲལ་རིགས་པ་མེད། །དེ་ཕྱིར་ཁོ་བོའི་འདི་ནི་དེ་འདིར་ཡོན་ཏན་བརྒྱན། །འདིར་སེམས་ཅན་ཐམས་ཅད་ཐོག་མ་མེད་པའི་མ་རིག་པ་ལ་སོགས་པ་དོར་བར་དཀའ་བའི་འཆིང་བ་བརྒྱུད་པས་བཅིངས་པའི་བློ་ཅན་ [2a.2]བཟློག་པར་དཀའ་བའི་ལས་ཀྱི་རླུང་གི་ཤུགས་ཀྱིས་འཕངས་ལ། ཕལ་ཆེར་ངན་སོང་གསུམ་དང་བདེ་འགྲོ་གཉིས་ཀྱིས་འཁོར་བའི་རྒྱ་མཚོ་ཟབ་མོའི་དབའ་ཀློང་ཤིན་ཏུ་རྒལ་དཀའ་བར་སོ་སོར་ཡང་དང་ཡང་དུ་ལྷུང་ཞིང་འཐོན་པས་དལ་སྐབས་མེད་ཅིང་ [2a.3]རང་དབང་མེད་པར་ལུས་ལེན་པ་རྣམས་སྙིང་རྗེ་མཆོག་ཏུ་གཞོལ་བས་ཡང་དག་པར་འདོན་པར་བརྩོན་པ་རྣམས་ཀྱིས། དང་པོར་མཆོད་ཡོན་ལ་སོགས་པ་ཉེ་བར་མཁོ་བ་བསགས་པ་ལ་སོགས་པའི་རིམ་པས་ཡིད་དུ་འོང་བའི་གཙུག་ལག་ཁང་ལ་སོགས་ [2a.4]པ་བྱ་བ་དང་། རབ་ཏུ་གནས་པ་བྱ་བ་ལ་སོགས་པ་བསྒྲུབ་པ་དང་། དབང་བསྐུར་དང་། ཐོས་བསམ་ལ་སོགས་པའི་བསོད་ནམས་དང་ཡེ་ཤེས་ཀྱི་ཚོགས་ལ་ཇི་ལྟར་རིགས་པར་སྤྲོ་བ་བསྐྱེད་དུ་གཞུག་གོ། །དེ་ནས་སློབ་དཔོན་མང་དུ་ཐོས་པ། གསང་ [2a.5]སྔགས་ཀྱི་ཚུལ་ལ་མཁས་པ། བློ་བརྟན་པ། སེར་སྣ་མེད་པ། སྤྲོ་བའི་ངང་ཚུལ་ཅན། སྙིང་རྗེ་དང་ལྡན་པས་རིམ་པ་བཞིན་དུ་གཙུག་ལག་ཁང་ལ་སོགས་པར་མཆོད་ཡོན་དང་། མཆོད་ཡོན་ལ་སོགས་པ་དབུལ་བའི་མཚན་ཉིད་དང་། སྔོན་དུ་ [2b] [2b.1]བསྙེན་པའི་དགོས་པ་དང་། སློབ་མ་བསྡུ་བ་དང་། ས་བརྐོ་བ་དང་། ས་སྦྱང་བ་དང་། ས་གཟུང་བ་དང་། བགེགས་ལ་ཕུར་བུ་གདབ་པ་དང་། སའི་ལྷ་མོ་ལྷག་པར་གནས་པ་དང་། བུམ་པ་ལྷག་པར་གནས་པ་དང་། ལྷ་ལྷག་པར་གནས་པ་དང་། དཀྱིལ་འཁོར་གྱི་ཐིག་གདབ་པ་དང་། ཚོན་དགྱེ་བ་ [2b.2]དང་། བུམ་པ་དགོད་པ་དང་། དཀྱིལ་འཁོར་བསྒྲུབ་པ་དང་། སྐུ་གཟུགས་ལ་སོགས་པའི་རབ་གནས་དང་། རྫིང་ལ་སོགས་པའི་རབ་གནས་དང་། ཨ་མྲའི་སྐྱེད་མོས་ཚལ་ལ་སོགས་པའི་རབ་གནས་དང་། སློབ་མ་ལྷག་པར་གནས་པ་དང་། སློབ་དཔོན་འཇུག་པ་དང་།སློབ་མ་འཇུག་པ་དང་། [2b.3]ཕྲེང་བ་དང་། ཆུ་དང་། ཅོད་པན་དང་། རྡོ་རྗེ་དང་། དྲིལ་བུ་དང་། མིང་གི་དབང་དང་། དམ་ཚིག་གསུམ་སྦྱིན་པ་དང་། སློབ་དཔོན་གྱི་དབང་དང་། སྔགས་སྦྱིན་པ་དང་། མིག་སྨན་དང་། མེ་ལོང་གི་དབང་དང་། མདའ་འཕང་བ་དང་། གསང་བ་དང་། ཤེས་རབ་ཡེ་ཤེས་དང་། དབང་བཞི་ [2b.4]པ་དང་། རིག་མའི་བརྟུལ་ཞུགས་དང་། རྡོ་རྗེའི་བརྟུལ་ཞུགས་དང་། སྤྱོད་པའི་བརྟུལ་ཞུགས་དང་། ལུང་བསྟན་པ་དང་། རྗེས་སུ་གནང་བ་དང་། དབུགས་དབྱུང་བ་དང་། རང་དབང་བསྐུར་བ་དང་། སྦྱིན་སྲེག་དང་། དཀྱིལ་འཁོར་བསྡུ་བ་དང་། ཡིད་ཀྱི་དཀྱིལ་འཁོར་བསྡུ་བ་དང་། གཏོར་མ་དང་། [2b.5]བགེགས་བཟློག་པ་དང་། རྡོ་རྗེ་དྲིལ་བུའི་མཚན་ཉིད་དང་། བཟུང་བ་སྟེ་ཆོ་ག་ལྔ་བཅུ་བསྒྲུབ་པར་བྱའོ། །དེ་ལ་ཉི་མ་བཟང་པོའི་སྔ་དྲོ་ལ། གཏོར་མ་སྦྱིན་པ་སྔོན་དུ་འགྲོ་བས་གཙུག་ལག་ཁང་ལ་སོགས་པའི་ས་བརྟག་པར་བྱའོ། །དེ་ལ་ཤར་དུ་ཤིང་ཨ་ཤྭདྠ་དང་། མེར་ཤིང་ཨརྫུན་དང་། ལྷོར་ཤིང་པ་ [2b.6]ལཀྵ་དང་། བདེན་བྲལ་དུ་ཤིང་པ་ལཱ་ཤ་དང་། ནུབ་ཏུ་ཤིང་ནྱ་གྲོ་དྷ་དང་། རླུང་དུ་ཤིང་ཤལ་མ་ལི་དང་། བྱང་དུ་ཤིང་བ་ཀུ་ལ་དང་། དབང་ལྡན་དུ་ཤིང་ཨུ་དུམྺཱ་ར་དང་། ས་ཤིན་ཏུ་རུས་སྦལ་གྱི་རྒྱབ་ལྟ་བུ་ནི་འཆི་བའམ་ནོར་ཉམས་པའི་རྒྱུ་ཡིན་པ་དང་། བྱང་མཐོ་བ་ནི་རིགས་ཆད་པས་འཇིགས་པ་དང་། ཤར་ [2b.7]མཐོ་བ་དང་། དབུས་དམའ་བ་ནི་སྒྲུབ་པ་པོ་ཉམས་པས་འཇིགས་པས་ཡོངས་སུ་དོར་ཏེ། རྒྱལ་སྲིད་དམ་རིག་པ་འཛིན་པ་ལ་སོགས་པའི་རྒྱུ་ཡིན་པས། གང་ཅུང་ཟད་དབུས་མཐོ་བ། དཀར་བ་གྲུ་བཞི་པ། །གཡས་སྐོར་གྱི་རྒྱུན་དབང་ལྡན་མཚམས་སུ་འབར་ཞིང་འཇམ་པའོ། །དེར་ནི་མཐོ་གང་ཙམ་ [3a] [3a.1]དུ་ནི། ཁུང་བུར་བརྐོས་ནས་ས་དེ་ཉིད། །ཁུང་བུར་མྱུར་དུ་བཀང་བ་ན། །གལ་ཏེ་ས་དེ་ལྷག་གྱུར་ན། །དེ་ཚེས་དེ་བཟང་ཞེས་བྱ། །སླར་ཡང་དོང་དེ་བཀང་བ་ཡི། །མཐོ་གང་ཙམ་དུ་བརྐོས་པ་ཡི། །ཁུང་བུ་དེ་ནི་ཆུས་བཀང་བ། །ཉ་ལྕིབས་དང་ནི་ཉ་གསོན་དང་། །ལྡན་པར་ [3a.2]ཞེས་ནི་ཁ་ཅིག་གོ། །གོམ་པ་བརྒྱར་ནི་ཡང་དག་ཕྱིན། །སླར་ཡང་འོངས་ནས་ཡང་དག་བརྟགས། །ཆུ་ཡིས་གང་ནས་བཟང་པོ། །དམའ་བ་ཕན་པ་འདོད་པས་སྡང་། །གལ་ཏེ་ཆུ་དེ་སྒྲ་དང་བཅས། །ཀླུ་རྣམས་འཇིགས་པ་ཡང་དག་སྟོན། །དེ་ལྟར་སའི་མཚན་ཉིད་ལེགས་པར་ཤེས་པའི་སློབ་དཔོན་ཁྲུས་ [3a.3]བྱས་ཏེ། མཆོད་པའི་ཡོ་བྱད་དྲུང་དུ་བྱས་པས། ཇི་ལྟར་རྙེད་པའི་གོས་དང་རྒྱན་ལ་སོགས་པའི་ཆས་སུ་ཞུགས་ལ་ལྷའི་རྣལ་འབྱོར་ཤིན་ཏུ་བསྒོམས་ཏེ། ཕྱི་དྲོའི་དུས་སུ་ས་དེའི་དབུས་སུ་བ་ལང་གི་པགས་པའི་ཁྱོན་ཙམ་ཞེས་པ་འདིས་དཀྱིལ་འཁོར་གྲུ་བཞི་པ་ཞེས་གསུངས་ཏེ། ས་དང་བའི་ལྕི་བ་ [3a.4]དག་གིས་བྱས་ལ། དེར་དཀྱིལ་འཁོར་གྱི་འཁོར་ལོ་བསྒོམས་ཏེ་ཡང་དག་པར་མཆོད་ལ། ཕྱོགས་ཀྱི་གཏོར་མ་བྱིན་ཏེ། པུས་མོ་གཡས་པས་ལ་བཙུགས་ལ་ཐལ་མོ་སྦྱར་ཏེ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་དང་། འཇིག་རྟེན་སྐྱོང་བ་ལ་སོགས་པ་རྣམས་ [3a.5]ལས་བླང་བར་བྱའོ། །ཁམས་གསུམ་འདི་ནི་མགོན་གང་དག །ཆེན་པོས་མཆོད་པ་བཞུགས་རྣམས་དང་། །ལྷ་དང་ཀླུ་དང་གནོད་སྦྱིན་དང་། །དྲི་ཟ་དང་ནི་ལྷ་མིན་སོགས། །དེ་དང་དེ་ལ་འདི་གསོལ་བགྱི། །སེམས་ཅན་ཀུན་གྱི་དོན་བསྒྲུབ་ཕྱིར། །ས་ཡི་ཆ་ནི་མཛེས་པ་འདིར། །གཙུག་ [3a.6]ལག་ཁང་བཞེངས་འབྱོར་པ་ལ། །ཐོས་བསམ་ལ་སོགས་མཆོག་འཇུག་པས། །ཆོས་ཉིད་རྟོགས་པར་བྱ་བའི་ཕྱིར། །ཆེ་གེ་བདག་ནི་ཆེ་གེ་མོའི། །གྲགས་པ་དམ་པ་བྱ་བར་བརྩོན། །གལ་ཏེ་ཁྱོད་ཀྱིས་བཟོད་གནང་ན། །བགྱིད་དེ་གཞན་དུ་མ་ཡིན་ནོ། །རྨི་ལམ་ལ་སོགས་མཚན་མ་ཡིས། །ས་ [3a.7]བཟང་འདི་ནི་བདག་ལ་སྩོལ། །ཞེས་ལན་གསུམ་བརྗོད་པར་བྱའོ། །དེའི་རྗེས་སུ་ཨོཾ་མུ་ཙི་ལི་སྭཱ་ཧཱ། ཨོཾ་མོ་ཧཱ་ནི་སྭཱ་ཧཱ། ཨོཾ་དཾ་ཏི་ལི་སྭཱ་ཧཱ། ཞེས་པ་རྨི་ལམ་བརྟག་པ་འདིས་ལག་པ་གཡོན་པས་ཁར་ལན་ཉི་ཤུ་རྩ་གཅིག་ཏུ་བསྔགས་ལ། བཅོམ་ལྡན་འདས་ལོ་ཀེ་ཤྭ་རའི་དྲུང་དུ་མཆོད་པ་སྔོན་དུ་འགྲོ་བས་ [3b] [3b.1]མགོ་ལྷོར་བསྟན་ཅིང་ཁ་ཤར་དུ་ཕྱོགས་ལ་གོས་གཙང་མས་བརྒྱན་ལ། ཕྱོགས་གཙང་མར་ཇི་ལྟར་འདོད་པར་ཉལ་བར་བྱའོ། །རྨི་ལམ་ངན་ན་བདུད་རྩི་འཁྱིལ་པའི་སྔགས་བཟླས་པས་སམ། དོན་དམ་པར་ཆོས་ཐམས་ཅད་རང་བཞིན་མེད་པར་མོས་པས་སམ། ཡང་ན་སླར་ཡང་རྨི་ལམ་བརྟག་པར་ [3b.2]བྱས་པས་ལྷ་རྣམས་ཀྱིས་གནང་བའམ། མ་བཀག་པའི་ས་ལ་འོག་ནས་འཆད་པ་རྣམས་བྱའོ། །བཀག་པ་ལ་ནི་མ་ཡིན་པ་ཁོ་ནའོ། །རྨི་ལམ་བཟང་ན་ནི་ཉི་མ་གཉིས་པ་བཟང་པོའི་སྔ་དྲོའི་དུས་སུ་ས་གནོན་གྱི་ཕྱག་རྒྱ་དང་། རྡོ་རྗེའི་སྐྱིལ་མོ་ཀྲུང་བཅས་ཏེ། རྡོ་རྗེ་སེམས་དཔའི་རྣལ་འབྱོར་དང་ལྡན་པས་ [3b.3]ཨོཾ་བྷུ་ཁཾ་ཞེས་པའི་སྔགས་ཀྱིས་ས་གཞི་སྟོང་པ་ཉིད་དང་། ཧཱུཾ་ལཾ་ཧཱུཾ་ཞེས་པས་རྡོ་རྗེའི་རྡུལ་ཕྲ་རབ་ཀྱི་རང་བཞིན་དུ་བསྒོམས་ལ། ཨོཾ་མེ་དི་ནཱི་བཛཱི་བྷ་བ་བཛྲ་བནྡྷ་ཧཱུཾ་ཞེས་པས་བྱིན་གྱིས་བརླབ་པོ། །ལག་པ་གཡས་པར་ཟླ་བ་ལ་ཧཱུཾ་གསུམ་བསམས་ལ་ལན་གསུམ་བརྗོད་པ་དང་། དེའི་འོད་ཟེར་དང་སོར་མོའི་རྩེ་མོས་ [3b.4]མནན་པ་དང་། དེའི་སྒྲ་རྣམས་ཀྱིས་བསྐུལ་བ་ལས་སའི་ལྷ་མོ་སེར་མོ་ལུས་ཕྱེད་དམ་ཐམས་ཅད་འཐོན་པ་ཕྱག་གཉིས་ན་གསེར་གྱི་བུམ་པ་དང་། མི་འཇིགས་པ་ཅན་རྒྱན་བཟང་པོས་བརྒྱན་པ་ལ་ཞབས་བསིལ་དང་ཞལ་བསིལ་དང་མཆོད་ཡོན་སྔོན་དུ་འགྲོ་བའི་མེ་ཏོག་ལ་སོགས་པས་མཆོད་དེ། སྐྱོབ་པ་སངས་ [3b.5]རྒྱས་ཐམས་ཅད་ཀྱིས། །སྤྱོད་པའི་ཚུལ་དང་ཁྱད་པར་དང་། ས་དང་ཕ་རོལ་ཕྱིན་རྣམས་ལ། །ལྷ་མོ་ཁྱོད་ནི་དབང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་དཔུང་བཅོམ་པ། །དེ་བཞིན་བདག་གིས་བདུད་ཀྱི་དཔུང་། །བཅོམ་ནས་གཙུག་ལག་ཁང་སོགས་བགྱི། །ཞེས་ལན་གསུམ་ [3b.6]དུ་གསོལ་བ་བཏབ་པས་ཀྱིས་ཤིག་ཅེས་གསུངས་ནས་དེ་ཉིད་དུ་ཐིམ་སྟེ་སའི་ངོ་བོར་གནས་པར་བསམ་མོ། །དེ་ནས་ས་གཞི་དེར་བཾ་ལས་བྱུང་བའི་འཁོར་ལོ་དང་། བྷཱུཾ་ལས་བྱུང་བའི་གཞལ་ཡས་ཁང་བསྒོམ་པར་བྱའོ། །ཁ་ཅིག་ཏུ་ཡཾ་རཾ་བཾ་ལཾ་སུཾ་རྣམས་ཡོངས་སུ་གྱུར་བ་ལས། རླུང་དང་མེ་དང་ཆུ་ [3b.7]དང་ས་དང་རིའི་རྒྱལ་པོ་རི་རབ་ཙམ་གྱི་སྟེང་དུ་བྷཱུཾ་ལས་བྱུང་བའི་རྒྱལ་བའི་ས་གཞིའོ་ཞེས་སོ། །དེ་ལ་གཞལ་ཡས་ཁང་གི་ནང་དུ་དྲིའི་དཀྱིལ་འཁོར་བྱས་ལ། རང་གི་སྙིང་གའི་ས་བོན་གྱི་འོད་ཟེར་རྣམས་ཀྱིས་དཀྱིལ་འཁོར་གྱི་འཁོར་ལོ་དང་། ཕྱོགས་སྐྱོང་ལ་སོགས་པ་རྣམས་སྤྱན་དྲངས་ལ་ཞབས་ [4a] [4a.1]བསིལ་དང་། ཞལ་བསིལ་དང་། མཆོད་ཡོན་དང་། མཆོད་པ་དང་གཏོར་མ་དབུལ་བ་སྔོན་དུ་འགྲོ་བས་ལྕེ་ཧཱུཾ་ལས་རྡོ་རྗེར་བྱས་ལ་སྦོས་ཕོར་བཟུང་སྟེ། དྲིལ་བུ་དཀྲོལ་ཞིང་བཅོམ་ལྡན་ཞེས་བྱ་བ་ལ་སོགས་པ་ནས། ཉེ་བར་གནས་པར་མཛད་པའི་རིགས། །ཉེས་པའི་བར་འཆད་པར་ [4a.2]འགྱུར་བའི་ཚིགས་སུ་བཅད་པའི་རབ་གནས་ཀྱི་སྒྲའི་གནས་སུ་གཙུག་ལག་ཁང་ལ་སོགས་པའི་སྒྲ་བཅུག་པས་ཉེ་བར་གནས་པ་དང་། སངས་རྒྱས་དང་བྱང་ཆུབ་སེམས་དཔའ་དང་། ལྷ་དང་ཀླུ་ལ་སོགས་པ་རྣམས་ཀྱིས་ཀྱང་ནམ་མཁའ་ཡོངས་སུ་གང་བར་བསམས་ལ། འཆད་པར་འགྱུར་བའི་རྣམ་པར་རྒྱལ་བ་ [4a.3]ལ་སོགས་པའི་བུམ་པའམ། ཡོན་བདག་གི་དབང་གིས་དེ་དག་མེད་ན་གཞན་གྱི་ཡང་ནང་དུ་ཉ་གསོན་བཅུག་པ་རྣམས་རིམ་པ་བཞིན་དུ་གཞག་པར་བྱའོ། །ལས་བྱེད་པ་རྣམས་བགེགས་མཐར་བྱེད་ལ་སོགས་པ་ལས་ཐམས་ཅད་པའི་ལྷའི་རྣམ་པར་སྤྲུལ་ཏེ། དེ་དག་གིས་ཁུང་བུ་གྲུ་བཞི་པ་རྒྱར་ཁྲུ་དོ་པ་ཟབས་ [4a.4]སུ་དེའི་ཕྱེད་པའི་དོང་བརྐོ་བར་བྱའོ། །དེའི་དབང་ལྡན་དུ་ཟླུམ་པོ་དེའི་ཚད་དམ་དེའི་ཕྱེད་པ་ཡང་ངོ་། །དེ་གཉིས་ཀ་ས་དང་བའི་ལྕི་བས་བྱུག་པར་བྱའོ། །དེ་ནས་ཁུང་བུ་གྲུ་བཞི་པར་འཆད་པར་འགྱུར་བའི་མཆོད་ཡོན་གྱི་སྔགས་ཉིད་ཀྱིས་མཆོད་ཡོན་གྱི་སྣོད་ནས་མཆོད་ཡོན་ནས་རིམ་པ་བཞིན་དུ་རྣམ་པར་རྒྱལ་བ་ལ་སོགས་པའི་ [4a.5]བུམ་པ་རྣམས་ཀྱིས་ཆུ་བླུགས་པས། ཇི་ལྟར་གྲུ་བཞི་པ་བཀང་ནས་དེའི་རྒྱུན་གྱིས་ཟླུམ་པོ་དགད་བར་བྱའོ། །དེའི་རྗེས་སུ་ཉ་ལྕིབས་དང་ཉ་གསོན་བཅུག་ལ་ཆུ་གཡས་སུ་འཁྱིལ་བར་བལྟས་ལ། ཤིང་འོ་མ་ཅན་གྱི་འདབ་མ་བཅུག་ནས། བདག་ཉིད་ཛཱཾ་ལས་སྐྱེས་པའི་རྡོ་རྗེ་དང་། ཛཱཾ་ལས་ཛཱཾ་གུ་ལི་སོར་མོ། [4a.6]རྩ་བ་དང་གཡས་པ་དང་གཡོན་པའི་ཞལ་གསུམ་སེར་བ་དང་། གནག་པ་དང་། དཀར་བ། གདེངས་ཀ་བདུན་པ། རིན་པོ་ཆེའི་ཅོད་པན་ཅན། ཕྱག་དྲུག་གི་གཡས་པ་གཉིས་ཀྱིས་རྡོ་རྗེ་དང་མདའ་དང་། ཅིག་ཤོས་དག་གིས་གཞུ་དང་ཞགས་པ་དང་བཅས་པའི་སྡིགས་མཛུབ་འཛིན་པ། རང་སྣང་གི་ཐབས་ལ་ [4a.7]འཁྱུད་པ། ན་བཟའ་སྣ་ཚོགས་དང་སྦྲུལ་གྱིས་བརྒྱན་པ། སྣ་ཚོགས་པདྨ་དང་ཉི་མའི་གདན་ལ་བཞུགས་པ། ཉི་མའི་འོད་ཅན་དུ་བསྒོམས་ཏེ། པད་སྐོར་ལན་ལྔ་བྱས་ལ་དབང་ཆེན་གྱི་བར་དུ་བལྟས་པས། ས་གཞི་སྣ་ཚོགས་རྡོ་རྗེའི་རང་བཞིན་དུ་བསམ་མོ། །ལྟད་མོ་པའི་མི་རྣམས་སོ་རྩི་དང་མེ་ཏོག་གི་ཕྲེང་ [4b] [4b.1]བ་དང་། ཙནྡན་ལ་སོགས་པས་ཚིམ་པར་བྱའོ། །བསྲུང་བའི་དོན་དུ་དབང་པོ་ལ་སོགས་པ་ཕྱོགས་སྐྱོང་བ་བཅུ་འཁོར་དང་བུ་དང་ཆུང་མ་དང་བཅས་པ་དབང་ལྡན་དུ་བསམས་ལ། དེ་རྣམས་ཀྱི་སྟེང་དུ་འོག་ནས་འཆད་པར་འགྱུར་བའི་ཕུར་པ་བཅུ་ལ་ལས་ཐམས་ཅད་པའི་སྔགས་ཀྱིས་བརྒྱ་རྩ་བརྒྱད་དུ་བསྔགས་ [4b.2]པ་དང་། དོན་གྲུབ་རྣམས་ཨོཾ་གྷ་གྷ་ཞེས་པ་ལ་སོགས་པའི་སྔགས་ཀྱིས་བསྲུང་བའི་དོན་དུ་གདབ་པར་བྱའོ། །དེ་ནས་བགེགས་དང་བྲལ་བའི་བསམ་པས་ས་བདག་དང་ཀླུ་བརྟག་པར་བྱའོ། །དེ་ཡང་ས་གང་དང་གཙུག་ལག་ཁང་ལ་སོགས་པ་བྱ་བ་ཉེ་འཁོར་དང་བཅས་པ་དེ་གྲུ་བཞིར་བཅལ་ལ། ས་དེའི་ནང་གི་ཕྱོགས་ [4b.3]སུ་ས་བདག་ཀླུ་ཉལ་བ་ལ་སོགས་པའི་མཚན་ཉིད་ངེས་པར་བཟུང་སྟེ་ས་འདུལ་བྱའོ། །དེ་ལ་ཉི་མ་རྒྱུ་བའི་སྟོན་ཟླ་ར་བ་ལ་སོགས་པ་ཟླ་བ་གསུམ་གསུམ་རིམ་པ་བཞིན། ཤར་དང་ལྷོ་དང་ནུབ་དང་བྱང་ཕྱོགས་སུ་མགོ་བསྟན་ཅིང་ལྷོ་ལ་སོགས་པར་ཁ་ཕྱོགས་ཏེ། ས་དེའི་ནང་དུ་ས་བདག་ཀླུ་ཉལ་ལོ་ཞེས་གྲགས་སོ། ། [4b.4]དེ་བརྟགས་ནས་རྡོ་རྗེ་ཁུ་ཚུར་གྱིས་ཐིག་སྐུད་བཟུང་སྟེ། །སྒྲུབ་པའི་གྲོགས་དང་བཅས་པ་གཡས་སྐོར་གྱིས་བགྲོད་པས་མེ་དང་རླུང་དུ་གནས་ཏེ། ཤར་དང་ནུབ་དང་བྱང་དང་ལྷོའི་ཕྱོགས་སུ་ཐིག་བཏབ་ནས། ཉི་མ་འཆར་བ་ནས་བརྩམས་ལ་ཀླུའི་མཚན་ལས་ཁྲུ་གང་དོར་བའི་མཚམས་ཀྱི་ཆར་གཡས་སྐོར་དུ་རྩིག་ [4b.5]རྨང་བརྐོ་བར་བྱའོ། །མཐོང་བའི་ཐད་ཀར་ཡང་ཞེས་པ་ནི་ཁ་ཅིག་གོ། །གང་གི་ཕྱིར་མགོ་ལ་བརྐོས་ན་ཕ་དང་བུ་ལ་སོགས་པ་ཉམས་པར་འགྱུར་རོ། །རྒྱབ་ཀྱི་ཆར་ནི་བདག་ཉིད་ཉམས་པའམ་ཡུལ་འཕོ་བའོ། །མཇུག་མར་ནི་བ་ལང་དང་མ་ཧེ་ལ་སོགས་པ་ཉམས་པར་འགྱུར་རོ། །ས་དེ་ལ་རྡོ་ཡོད་ན་རླུང་འབྱུང་ [4b.6]ངོ་། །རུས་པ་ཡོད་ན་ཟུག་གཟེར་རོ། །གྱོ་དུམ་ཡོད་ན་ལྐུགས་པ་ཉིད་དོ། །ཕུབ་མ་དང་སོལ་བ་ཡོང་ན་རིམས་སོ། །སྐྲ་དང་རྩྭ་དང་ཤིང་ལ་སོགས་པ་ཡོད་ན་ཉེ་བར་འཚེ་བ་ཕྲ་མོའོ་ཞེས་པས། སྡོང་དུམ་དང་རྩྭ་དང་གྲོག་སྦུར་དང་། ཀེང་རུས་དང་སོལ་བ་ལ་སོགས་པ་བསལ་ལ། ས་དང་མེ་དང་དེ་བཞིན་ [4b.7]གཤེགས་པ་རྣམས་དང་། གནས་དེའི་བདག་པོ་དང་། ཕྱོགས་སྐྱོང་དང་འཇིག་རྟེན་སྐྱོང་བ་དང་ཞིང་སྐྱོང་རྣམས་ཞི་བའི་སྦྱིན་སྲེག་གིས་ཚིམ་པར་བྱས་ཏེ་སའི་བདག་པོ་དང་ཡོན་བདག་གི་ཞི་བ་བྱའོ། །ཕྱི་ནས་གཏོར་མ་ཡང་དབུལ་ལོ། །ཆོ་ག་ཕྱི་མ་རྣམས་སུ་ཡང་ངོ་། །ནུས་པ་ཇི་ལྟ་བས་དགའ་སྟོན་དང་། [5a] [5a.1]དགེ་འདུན་གྱི་སྟོན་མོ་བྱའོ། །བླ་མ་ལ་ཡོན་དབུལ་ལོ། །བཟོ་བོ་དང་ལས་བྱེད་པ་རྣམས་ཀྱང་མཉེས་པར་བྱའོ་ཞེས་པ། གཙུག་ལག་ཁང་དང་། མཆོད་རྟེན་དང་། གཙང་ཁང་ཕྱུར་བུ་དང་། ཁང་བཟངས་དང་། དགོན་གནས་རྣམས་ཀྱི་མཆོད་ཡོན་གྱི་ཆོ་གའོ། །རྫིང་དང་རྫིང་བུ་དང་ཁྲོན་ [5a.2]པ་ལ་སོགས་པ་བྱེད་པ་ལ་གཏོར་མ་དང་མཆོད་ཡོན་ལ་སོགས་པ་སྔོན་དུ་འགྲོ་བས་དེ་མ་ཐག་པ་བཞིན་དུ་མཆོད་ཡོན་བྱས་ལ་ཨོཾ་བཾ་བཛྲ་བ་རུ་ཎ་ཧཱུཾ་ཞེས་པས་རྡོ་རྗེ་ཆུ་བདག་གི་གཟུགས་ཅན་རྣམ་པར་སྣང་མཛད་བསམས་ལ། དེ་ཡོངས་སུ་གྱུར་པ་ལས་ཀླུ་རིགས་བརྒྱད་ཀྱི་བདུད་རྩིའི་ཆུས་གང་བ། ཨོཾ་བཛྲ་སཏྭ་ས་མ་ཡ་སྟྭཾ་ཞེས་ [5a.3]བརྗོད་ཅིང་། དབང་ཆེན་གྱི་གཏིང་ལ་ཐུག་པར་ཡན་ལག་བརྒྱད་དང་ལྡན་པའི་ཆུས་གང་བར་བལྟ་བར་བྱའོ། །ཞེས་པ་རྫིང་ལ་སོགས་པའི་མཆོད་ཡོན་གྱི་ཆོ་གའོ། །སྐུ་གཟུགས་དང་པུ་སྟི་ལ་སོགས་པ་བྱེད་པ་ལ་ནི་གཏོར་མ་དང་མཆོད་པ་སྔོན་དུ་འགྲོ་བས། བཟོ་བོ་རྣམས་བྱེད་པར་འགྱུར་བའི་ལྷའི་རིགས་ཀྱི་བདག་ [5a.4]པོའི་གཟུགས་སུ་དང་། ཡིག་མཁན་རྣམས་སྣང་བ་མཐའ་ཡས་ཀྱི་ངོ་བོར་ཏེ། སྙིང་གར་རང་རང་གི་ས་བོན་དང་། སྙིང་ག་དང་མགྲིན་པ་དང་། མགོ་བོ་རྣམས་ལ་རིམ་པ་བཞིན་རྡོ་རྗེ་དང་པདྨ་དང་འཁོར་ལོ་རྣམས་ལ་གནས་པའི་ཧཱུཾ་ཨཱཿཨོཾ་རྣམས་དང་། གཡོན་པ་དང་ཅིག་ཤོས་ཀྱི་ལག་པ་དག་ལ་ཟླ་བ་དང་རྡོ་རྗེ་ངག་དང་ [5a.5]ལྡན་པར་སྐད་ཅིག་གིས་བསམས་ལ། སྙིང་ག་ལ་སོགས་པར་རེག་ཅིང་ཧཱུཾ་ཨཱཿཨོཾ་ཞེས་བརྗོད་པས་བྱིན་གྱིས་བརླབས་ནས། ཤིང་དང་འཇིམ་པ་དང་རྡོ་དང་རས་ལ་སོགས་པའི་རྫས་གཙང་མ་རྣམས་སྟོང་པ་ཉིད་དུ་ལྷག་པར་མོས་ནས་སྐད་ཅིག་གིས་སྙིང་གའི་ས་བོན་གྱིས་བྱེད་པར་འགྱུར་བའི་ལྷའི་གཟུགས་སུ་བསམས་ [5a.6]ལ། བཅོམ་ལྡན་འདས་ཞེས་པ་ལ་སོགས་པ་ནས། ཉེ་བར་གནས་པར་མཛད་པའི་རིགས། །ཞེས་པའི་བར་དུ་བརྗོད་པར་བྱའོ། །ཤོག་བུ་ནི་ཡི་གེ་དྷཱིཿབསྒོམས་པའི་འོད་ཟེར་གྱིས་སྤྱན་དྲངས་པའི་གསུང་རྡོ་རྗེ་ཡི་གེའི་རྣམ་པར་གྱུར་པར་བསྒོམ་མོ། །རང་ཉིད་ཀྱིས་ཀྱང་ཨོཾ་བཛྲ་སཏྭ་ཧཱུཾ་ཞེས་པ་དང་། ཨོཾ་ཨཱཿ [5a.7]བིགྷྣཱནྟ་ཀྲྀཏ་ཧཱུཾ་ཞེས་ལན་ཉི་ཤུ་རྩ་གཅིག་ཏུ་བསྔགས་པའི་པིར་ལ་སོགས་པ་དང་། སྨྱུ་གུ་ཤེས་རབ་ཡེ་ཤེས་ཀྱི་བདག་ཉིད་དུ་དང་། སྣག་ཚ་ཡང་རྡོ་རྗེའི་རྡུལ་ཕྲ་རབ་ཡོངས་སུ་གྱུར་པ་ལས་ཡེ་ཤེས་ཀྱི་བདུད་རྩིའི་རྣམ་པར་བསམ་ཞིང་། ཡང་ཨོཾ་དྷཱིཿཤུ་ཏི་སྨྲྀ་ཏི་བི་ཛ་ཡ་སརྦ་ཨ་ཛྙཱ་ན་པ་ཌ་ལ་ཨ་པ་ཧ་རི་ཎཾ་ཧྲཱིཿསྭཱ་ཧཱ་ཞེས་པས་ [5b] [5b.1]སྨྱུ་གུ་དང་སྣག་ཚ་ལ་བསྔགས་ལ་དེ་རྣམས་ལ་གཏད་དོ། །ཡི་གེ་བརྒྱ་པས་བརྟན་པར་བྱའོ། །བཟོ་བོ་མཉེས་པ་དང་དགེ་འདུན་ལ་སྟོན་མོ་ལ་སོགས་པ་བྱའོ། །ཐམས་ཅད་དུ་ཡང་འདིར་སྒོམ་པའི་ལྷ་གཤེགས་སུ་གསོལ་བར་བྱའོ། །ཞིག་པ་དང་གས་པའི་གཙུག་ལག་ཁང་ལ་སོགས་པ་ལྷར་འདུས་བྱ་བར་འདོད་ [5b.2]པས་གཏོར་མ་དང་མཆོད་པ་ལ་སོགས་པ་བྱས་ཏེ། རབ་གནས་ཀྱི་ཚེ་བཞུགས་སུ་གསོལ་བའི་ལྷ་རྣམས་གཤེགས་སུ་གསོལ་ལ། དེ་ཁོ་ན་བཞིན་དུ་འདུས་བྱ་བ་ལ་སོགས་པ་བྱའོ། །སྐུ་གཟུགས་ལ་སོགས་པའི་མཆོད་ཡོན་གྱི་ཆོ་གའོ། །འདིར་འཆད་བཞིན་པའི་ཆོ་ག་རྣམས་སུ་ཇི་ལྟར་རིགས་པར། གསེར་ [5b.3]དངུལ་རྡོ་དང་ཟངས་དང་ཤིང་། །སར་བྱས་ཉ་ཕྱིས་དུང་དང་ནི། །འདབ་མའི་སྐྱོང་བུ་ཞབས་བསིལ་དང་། བསང་གཏོར་ཞལ་བསིལ་མཆོད་ཡོན་སྣོད། །དེ་དང་སྣོད་གཞན་དུ་ནས་དང་འོ་མ་དང་། མེ་ཏོག་དཀར་པོ་དང་། ཀུ་ཤ་དང་། ཏིལ་དང་། འབྲས་ཡོས་དང་། དྲི་དཀར་པོའི་ཆུ་བདུད་རྩི་དང་བཅས་ [5b.4]པ་རྣམས་བླུགས་ལ། ཨོཾ་ཨཱཿཧཱུཾ་ཞེས་པའི་སྔགས་དང་། རང་གི་རིགས་ཀྱི་བདག་པོའི་སྔགས་དང་། བདུད་རྩི་འཁྱིལ་པའི་སྔགས་ཀྱིས་ལན་བདུན་ནམ། བརྒྱ་རྩ་བརྒྱད་དུ་བསྔགས་ཏེ་ཞི་བའི་དོན་དུའོ། །རྒྱས་པའི་དོན་དུ་ཏིལ་དང་ཞོ་དང་མེ་ཏོག་སེར་པོ་དང་། ཀུ་ཤ་དང་། དྲི་སེར་པོའི་ཆུ་བདུད་རྩི་ [5b.5]དང་བཅས་པ་བླུགས་ལ་དེ་ལྟར་བཟླས་པར་བྱའོ། །དེ་ནས་རང་གི་གཡོན་ལོགས་སུ་མཆོད་ཡོན་གྱི་སྣོད་དང་། ཞབས་བསིལ་གྱི་སྣོད་དང་། བསང་གཏོར་དང་ཞལ་བསིལ་གྱི་སྣོད་གཞག་པར་བྱའོ། །དེ་རྣམས་ཀྱི་མདུན་དུ་བཟེད་ཞལ་གྱི་སྣོད་སྟོང་པ་གསུམ་ཡང་ངོ་། །དེ་ལ་ཁུ་ཚུར་གཡས་པའི་མཐེ་ [5b.6]བོང་དང་། མཛུབ་མོའི་སྐམ་པས་ཞབས་བསིལ་གྱི་སྣོད་ཀྱི་ཆུ་དང་མེ་ཏོག་འགྱིང་བའི་ཚུལ་གྱིས་སོར་མོ་རྣམས་བསྐོར་ཞིང་བླངས་ལ་འཆད་པར་འགྱུར་བའི་སྔགས་ཀྱིས་མཛུབ་མོ་དང་གུང་མོ་དང་སྲིན་ལག་དང་། མཐེའུ་ཆུང་རྣམས་རིམ་གྱིས་དགྲོལ་ཞིང་སྣོད་དུ་ལན་གསུམ་དབུལ་ལོ། །སྣོད་གཉིས་པའི་ [5b.7]ཆུ་ལག་པ་གཡས་པར་བཟུང་བའི་ཀུ་ཤའི་ཆུན་པོའི་རྩེ་མོས་བླངས་ཏེ་བཟེད་ཞལ་གྱི་སྣོད་གཉིས་པར་ལན་གསུམ་བསང་གཏོར་བྱའོ། །ལས་ཐམས་ཅད་པའི་བུམ་པའི་ཆུས་བསང་གཏོར་བྱ་བ་ལ་ཡང་དེ་ལྟར་རོ། །སྣོད་གཉིས་པ་ཉིད་ཀྱི་ཆུ་གཡས་པའི་ཁུ་ཚུར་གྱི་མཐེ་བོང་དང་། མཛུབ་མོའི་སྐམ་པས་ [6a] [6a.1]མེ་ཏོག་བཟུང་ལ། ཞལ་བསིལ་གྱི་ཆེད་དུ་བཟེད་ཞལ་གཉིས་པ་དེ་ཉིད་དུ་འཆད་པར་འགྱུར་བའི་སྔགས་བརྗོད་ཅིང་། ཁ་འོག་ཏུ་ཕྱོགས་པའི་ཁུ་ཚུར་གྱི་མཐེ་ཆུང་དང་སྲིན་ལག་དང་གུང་མོ་དང་མཛུབ་མོ་རྣམས་རིམ་གྱིས་དགྲོལ་ཞིང་ལན་གསུམ་དུ་དབུལ་ལོ། །གསུམ་པ་མཆོད་ཡོན་གྱི་སྣོད་ཀྱི་ [6a.2]ཆུ་ལ་སོགས་པ་སྙིམ་པས་བཟུང་ལ། ཨོཾ་ཨཱཿཧྲཱིཿཔྲ་བ་ར་སཏྐཱ་རཾ་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཞེས་བརྗོད་ཅིང་བཟེད་ཞལ་གྱི་སྣོད་གསུམ་པར་རྡོ་རྗེ་ཐལ་མོ་ཕྱེ་བས་ལན་གསུམ་དབུལ་ལོ། །གོང་གི་ཞབས་བསིལ་དང་། བསང་གཏོར་དང་། ཞལ་བསིལ་གསུམ་ནི་ཨརྒྷཾ་གྱི་སྒྲ་དོར་ནས་རིམ་པ་བཞིན་དུ་པཱ་དྱཾ་ [6a.3]དང་། པྲོཀྵ་ཎཾ་དང་། ཨཉྫ་མ་ནཾ་ཞེས་པ་བཅུག་པས་དབུལ་ལོ། །ཞབས་བསིལ་དང་། བསང་གཏོར་དང་། མཆོད་ཡོན་སྦྱིན་པའི་རིམ་པས་འདི་ནི་ཕལ་ཆེར་ལས་མཐོང་ངོ་། །ཁ་ཅིག་ཏུ་ནི་གཞན་དུའོ། །བསང་གཏོར་ནི་ཇི་ལྟར་རིགས་པའོ། །ཁ་ཅིག་ཏུ་ནི་དང་པོ་མཆོད་ཡོན་དབུལ་ལོ། །ཁ་ཅིག་ [6a.4]ཏུ་ནི་མཆོད་ཡོན་དབུལ་བ་ཁོ་ནའོ། །སྐབས་ཇི་ལྟ་བར་ཇི་ལྟར་འོས་པར་བྱའོ། །དེ་ལ་ཞབས་བསིལ་གྱི་ཆུ་ནི་ལྷ་རྣམས་ཀྱི་ཞབས་བཀྲུ་བའི་ཕྱིར་དབུལ་བར་བསམ་མོ། །བསང་གཏོར་ནི་སྐུ་ཐམས་ཅད་ལའོ། །ཞལ་བསིལ་ནི་ཕྱག་གམ་ཞལ་དུའོ། །མཆོད་ཡོན་ནི་མདུན་ནམ་དབུ་ལའོ། །མེ་ཏོག་ནི་དབུ་ [6a.5]ལའོ། །བདུག་སྤོས་དང་མར་མེ་ནི་མདུན་དུའོ། །ལྷ་བཤོས་ནི་མདུན་ནམ་ཕྱག་གམ་ཞལ་དུའོ། །དྲི་ནི་ཐུགས་ཀར་རོ། །དེ་ལྟ་བུ་ནི་ཆོ་ག་ཐམས་ཅད་དུའོ། །མཆོད་ཡོན་ལ་སོགས་པ་དབུལ་བའི་མཚན་ཉིད་ཀྱི་ཆོ་གའོ། །དེ་ནས་གཙུག་ལག་ཁང་ལ་སོགས་པ་རྫོགས་པའི་རབ་ཏུ་གནས་པའམ། དབང་ [6a.6]བསྐུར་བའི་དོན་དུ་གསོལ་བ་བཏབ་པར་གྱུར་པས་སམ། རང་ངམ་གཞན་གྱི་དངོས་གྲུབ་སྒྲུབ་པ་ལ་སོགས་པ་དོན་དུ་གཉེར་བས་སམ། སེམས་ཅན་གྱི་དོན་ཆེན་པོ་མཐོང་བས་སམ། གཞན་གྱིས་བསྐུལ་བས་ཀྱང་རུང་སྟེ་དཀྱིལ་འཁོར་བྲི་བའི་ཕྱིར། ཐམས་ཅད་མཁྱེན་པའི་ལམ་ཤེས་པས། །སྔོན་ [6a.7]དུ་བསྙེན་པའི་ཚོགས་བསགས་ཤིང་། །བགེགས་ནི་རྣམ་པར་ཉམས་བྱེད་བྱ། །བསྙེན་པ་མེད་པས་དངོས་གྲུབ་མེད། །དེ་ཕྱིར་རིམ་གཉིས་དེ་ཉིད་རིག །དབེན་པར་ཡང་དག་གནས་ནས་ནི། །ལྷ་ཡི་འཁོར་ལོ་བསྒོམ་པར་བྱ། །སྐྱོ་ན་དེ་ཡི་གསང་སྔགས་བཟླ། །འཁོར་ལོའི་གཙོ་བོའི་འབུམ་ [6b] [6b.1]བཟླས་ཤིང་། །ཡང་ན་རང་གི་ལྷག་ལྷའི་འབུམ། །དཀྱིལ་འཁོར་པ་ཡི་ཁྲི་ཡིན་ཏེ། །འདི་ནི་སྔོན་དུ་བསྙེན་པར་བརྗོད། །དེ་ཡང་བསྐྱེད་པ་དང་རྫོགས་པའི་རིམ་པའི་ལྷ་རྣམས་ཀྱི་བསྒོམ་པའི་རིམ་པ་དང་སྔགས་དག་གཞན་དུ་ཚུལ་བཞིན་དུ་རྒྱས་པར་གསལ་བར་བྱས་པས་འདིར་མ་སྤྲོས་སོ། ། [6b.2]འཆད་པར་འགྱུར་བའི་རྡུལ་ཚོན་གྱི་དཀྱིལ་འཁོར་མང་པོ་རྣམས་ཀྱི་སོ་སོའི་དབྱིབས་དང་སྐུ་མདོག་དང་། ཞལ་དང་ཕྱག་དང་མཚན་མ་དང་སྔགས་ཙམ་བརྗོད་ཀྱང་གཞུང་མང་བར་འགྱུར་བས་ཉུང་ངུ་ལ་མོས་པ་རྣམས་མི་འཇུག་པར་དོགས་པས་དབྱིབས་ལ་སོགས་པ་ཙམ་ཡང་འདིར་མ་བསྟན་ [6b.3]ནོ། །ཁོ་བོ་ཅག་གིས་རྫོགས་པའི་རྣལ་འབྱོར་གྱི་ཕྲེང་བར་ནི་དབང་པོ་རྣོན་པོའི་བློ་ངོར་བྱས་ཏེ་དཀྱིལ་འཁོར་གྱི་ལྷ་བསྒོམ་པའི་རིམ་པ་དང་། སྙིང་པོ་བསྡུས་པ་བརྗོད་པ་ནི་ངེས་པར་བསྒོམ་པར་བྱའོ། །དེའི་ཕྱིར་འོད་ཀྱི་སྙེ་མ་དང་རྫོགས་པའི་རྣལ་འབྱོར་གྱི་ཕྲེང་བ་ནི་རྡོ་རྗེ་ཕྲེང་བའི་ཆ་ལག་གོ། །དེ་ལྟར་ [6b.4]སྔོན་དུ་བསྙེན་པ་རྒྱས་པར་བྱས་པས་སྐད་ཅིག་གིས་དཀྱིལ་འཁོར་གྱི་ལྷའི་རྣལ་འབྱོར་རྣམ་པ་ཐམས་ཅད་ཡོངས་སུ་རྫོགས་པ་སྤྲོ་བ་དང་བསྡུ་བ་མངོན་དུ་བྱ་བར་ནུས་པས་འཁོར་ལོར་གནས་པ་ཉིད་ཀྱི་འཁོར་ལོ་ཅན་གྱིས་མ་བཀག་པའམ། ཚོགས་བསགས་པ་ཉིད་ཀྱི་གནང་བས་ཀྱང་དཀྱིལ་འཁོར་དང་ [6b.5]རབ་ཏུ་གནས་པ་དང་སློབ་མ་བསྡུ་བ་ལ་སོགས་པ་བྱའོ། །སྔོན་དུ་བསྙེན་པའི་ངེས་པ་དང་དགོས་པའི་ཆོ་གའོ། །དེ་ལ་རབ་གནས་ཀྱི་ཆོ་ག་ནི། མགོའི་ཟླ་བ་དང་། མཆུའི་ཟླ་བ་དང་། དབོའི་ཟླ་བ་དང་། ས་གའི་ཟླ་བ་དང་། སྣྲོན་གྱི་ཟླ་བ་དང་། ཆུ་སྟོད་ཀྱི་ཟླ་བའམ། ནག་པའི་ཟླ་བའི་ཉ་ལ་ཞེས་དུས་ཀྱི་འཁོར་ [6b.6]ལོ་ལས་གསུངས་པས་ནག་པའི་ཟླ་བའམ། གཞན་དུ་གསུངས་པའི་སྨིན་དྲུག་གི་ཟླ་བ་དང་། དབྱུག་པའི་ཟླ་བ་ལ་ཚེས་གཉིས་དང་གསུམ་དང་། ལྔ་དང་བདུན་དང་བཅུ་གསུམ་དང་བཅོ་ལྔ་རྣམས་ལ། གཟའ་ཟླ་བ་དང་ལྷག་པ་དང་ཕུར་བུ་དང་པ་བ་སངས་རྣམས་སུ་སྣར་མ་ལ་ནོར་རྙེད་པར་འགྱུར་རོ། །མགོ་ [6b.7]ལ་ཞི་བའོ། །ལག་ལ་སྐལ་བ་བཟང་པོ་ཅན་ནོ། །རྒྱལ་ལ་རྒྱལ་བའོ། །དབོ་ལ་འཁོར་འཕེལ་ལོ། །མེ་བཞི་ལ་དངོས་གྲུབ་འགྲུབ་བོ། །ལྷ་མཚམས་ལ་འདོད་པ་འབྱུང་ངོ་། །སྣྲོན་ལ་བདེ་བའོ། །སྣྲུབས་དང་གྲོ་བཞིན་ལ་གཞུང་ལ་མཁས་པར་འགྱུར་རོ། །ཆུ་སྟོད་དང་ཆུ་སྨད་དག་ལ་བུ་འཕེལ་ལོ། །ཁྲུམས་ [7a] [7a.1]སྟོད་དང་ཁྲུམས་སྨད་ལ་ནོར་འཕེལ་ལོ། །ཞི་བའི་གཟའ་བསྟན་པའི་དུས་སྦྱོར་ལ་བྱ་བ་བཟང་བར་འགྱུར་རོ། །དགེ་བའི་བྱ་བ་ལ་དངོས་གྲུབ་ཀྱི་རྒྱུར། སྦྱོར་བ་ནི་རྣམ་པར་སེལ་བ་དང་། ཤིན་ཏུ་བསྐྲད་པ་དང་། ཟུག་རྔུ་དང་། འབྲས་དང་། བྱ་བ་མ་གྲུབ་པ་དང་། རྡོ་རྗེ་དང་། ཀུན་དུ་ལྟུང་དང་། [7a.2]ཡོངས་སུ་བསྣུན་དང་། ཤ་ཁོ་ན་འཛིན་པ་རྣམས་དང་བྲལ་བའོ། །བྱེད་པ་ཡང་འཇུག་ཕོད་དང་བྲལ་བའོ་ཞེས་པ་ཟླ་བ་དང་། ཚེས་དང་། གཟའ་དང་། རྒྱུ་སྐར་དང་། སྦྱོར་བ་དང་། བྱེད་པ་བཟང་པོ་རྣམས་རང་དང་གཞན་གྱི་གྲུབ་མཐའི་རིམ་པས་སམ། རྟེན་ཅིང་འབྲེལ་པར་འབྱུང་བའི་ཆོ་གས་ཀྱང་ཟླ་ [7a.3]བ་བཅུ་གཉིས་པོ་རྣམས་ལ་ཡང་ཡུད་ཙམ་བཟང་པོ་རྣམས་བརྟགས་ནས་དཀྱིལ་འཁོར་བྲི་བའི་དོན་དུ་སློབ་མས་ལན་གཉིས་སམ། ལན་གསུམ་དུ་གསོལ་བ་བཏབ་པ་ཙམ་གྱིས། གལ་ཏེ་མཁོ་བའི་ཡོ་བྱད་མ་ཚོགས་ན་དེའི་ཚེ་སློབ་མ་དེའི་ལྟེ་བར་ཉི་མའི་དཀྱིལ་འཁོར་ལ་གནས་པའི་ཧཱུཾ་གི་འོད་ཟེར་གྱིས་སྙིང་གར་ [7a.4]གནས་པའི་ཀཾ་ལས་བྱུང་བའི་སྡིག་པ་ཤ་ཟ་ལྟར་གནག་ཅིང་། གཟུགས་རྣམ་པར་འགྱུར་བ། གཅེར་བུ་འབྲས་འཆང་བ་སྐྲ་གྱེན་དུ་འགྲེང་བ་སྣ་རྩེ་ནས་ཕྱུང་ལ་ཡི་གེ་ཧཱུཾ་དེ་ཡང་སྙིང་གནས་འོངས་ནས་ཡོངས་སུ་གྱུར་པ་ལས་འཆད་པར་འགྱུར་བའི་ཁྲོ་བོ་ཆེན་པོ་རྡོ་རྗེ་ཧཱུཾ་མཛད་དུ་རྣམ་པར་བསྒོམས་ནས་ཕྱིར་ [7a.5]འཐོན་ཏེ། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་བཱན་བིདྱ་རཱ་ཛ་ཆེ་གེ་མོའི་སརྦ་པཱ་པཾ་ན་ཤ་ཡ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བརྗོད་ཅིང་ཕྱག་ན་གནས་པའི་རྡོ་རྗེ་འབར་བས་ཕྱུང་བའི་སྡིག་པ་སྟོང་པར་མཛད་པར་བསམ་མོ། །སློབ་མའི་སེམས་ [7a.6]ཀྱི་བགེགས་རྣམས་ཀྱང་བདུད་རྩི་འཁྱིལ་པ་ལྟེ་བ་ནས་འོག་ཕུར་བུའི་རྣམ་པ་ཅན་གྱིས། ཨོཾ་བཛྲ་ཀཱི་ལི་ཀཱི་ལ་ཡ་སྱ་སརྦ་བི་གྷྣཱན་བནྡྷ་བནྡྷ་ཧཱུཾ་ཧཱུཾ་ཕཊ། ཅེས་པས་རྡོ་རྗེ་ཧཱུཾ་མཛད་ཀྱིས་བཀའ་བསྒོ་བ་དང་། རང་ཉིད་ཀྱིས་ཀྱང་འདོན་ཞིང་ཕུར་བུ་བཏབ་ནས། ཕུར་བུའི་འོད་ཟེར་ཤིན་ཏུ་དྲག་པོ་རྣམས་ [7a.7]ཀྱིས་སྡང་བ་ཀུན་བསྲེག་པར་བྱའོ། །སློབ་མ་དེ་ཡང་སཾ་ལས་ཀུན་ཏུ་བཟང་པོའི་གཟུགས་སུ་བསམས་ཏེ། བསྲུང་བའི་དོན་དུ་སྙིང་གར་ཨ་ལས་སྐྱེས་པའི་ཟླ་བའི་དཀྱིལ་འཁོར་དབྱངས་ཐ་མ་ལས་བྱུང་བའི་སྣ་ཚོགས་རྡོ་རྗེས་མཚན་པ་དང་། མགོ་བོ་ལ་ཟླ་བ་ལ་གནས་པའི་ཧཱུཾ་ལས་བྱུང་བའི་རྡོ་རྗེ་རྩེ་མོ་ [7b] [7b.1]ལྔ་པ་གྱེན་དུ་འགྲེང་བ་ལས་མཱ་མ་ཀཱི་དབུས་སུ་བཞུགས་པར་བསམས་ལ། དེའི་ཡེ་ཤེས་ཀྱི་ལྷ་མོའི་ཐུགས་ཀའི་ཟླ་བ་ལ་གནས་པའི་རྡོ་རྗེ་ལྟེ་བའི་ནང་དུ་ཆུད་པའི་སྔགས་ཀྱི་ཕྲེང་བ་ལས་བྱུང་བའི་རྡོ་རྗེ་སེར་པོ་ཕྲ་མོའི་འོད་ཟེར་སྤྲོས་པས་ལུས་ཐམས་ཅད་ཁྱབ་པར་བྱས་ཏེ། གོ་ཆ་བགོ་བར་བསམ་ཞིང་། ཨོཾ་ [7b.2]ཨཱཿཤཾ་ཀ་ར་ཤཱནྟིཾ་ཀ་རེ་གྷུཊྚི་ནི་གྷཱ་ཏ་ཡ་གྷཱ་ཏ་ཡ། གྷུཊྚ་ནི་ཆེ་གེ་མོ་ལ་རཀྵ་རཀྵ་སྭཱ་ཧཱ་ཧཱུཾ་ཞེས་བརྗོད་པས་བསྲུང་བར་བྱའོ། །འཁྱིལ་བའི་སྔགས་ཀྱང་བཟླས་པའི་ཆེད་དུ་འདི་ལ་སྦྱིན་ནོ། །དེ་ལྟར་བྱས་ན་འདི་ལ་བགེགས་རྣམས་ཀྱིས་མེ་ཚུགས་ཤིང་མཁོ་བའི་ཡོ་བྱད་རྣམས་ཀྱང་བདེ་བར་རྙེད་པར་འགྱུར་རོ། །སློབ་ [7b.3]མ་བསྡུ་བའི་ཆོ་གའོ། །དེ་ནས་ཉེ་བར་མཁོ་བ་ཚོགས་པ་དང་། གྲོགས་ཤིན་ཏུ་ཡིད་གཞུངས་པ་དང་ལྡན་པས་ཉ་ནས་བཟུང་སྟེ། གཞན་ཉའི་བར་དུའམ་དཀར་པོའི་ཚེས་གཅིག་གམ། ལྔ་འམ། བརྒྱད་དམ། བཅུའམ། བཅུ་གསུམ་མམ། བཅུ་བཞི་ནས་བརྩམས་པས་སམ། ཉའི་ཚེ་ཡང་རུང་སྟེ་སྔ་དྲོ་ནས་ [7b.4]བརྩམས་ཏེ་དཀྱིལ་འཁོར་གྱི་ལས་བྱའོ། །དཀྱིལ་འཁོར་དུ་འཇུག་པའི་ཉིན་མོའི་སློབ་དཔོན་དང་སློབ་མར་བཅས་པ་སྨྱུང་པར་གནས་པར་བྱའོ། །དེ་ལ་ནི་གཟའ་དང་རྒྱུ་སྐར་དང་ཡུད་ཙམ་ལ་སོགས་པ་བཟང་པོའི་སྔ་དྲོའི་དུས་སུ་རིག་མ་དང་བཅས་པས་འཁོར་ལོའི་གཙོ་བོའི་ལྷའི་རྣལ་འབྱོར་བྱས་ཤིང་སྔོན་དུ་ [7b.5]བསྙེན་པ་བྱས་པས་ཤར་ཕྱོགས་སུ་དཀྱིལ་འཁོར་བྲིས་ན་སའི་བདག་པོ་འཆི་བ་དང་། ཡུལ་མི་ལ་ཉེ་བར་འཚེ་བ་སྣ་ཚོགས་འབྱུང་ངོ་། །ལྷོ་ཕྱོགས་སུ་ནི་གང་གི་དོན་དུ་དཀྱིལ་འཁོར་འདྲི་བ་དེ་འཆིའོ། །ཆུར་ནི་སློབ་དཔོན་ནོ། །གནོད་སྦྱིན་དུ་ནི་དེར་ཞུགས་པའོ། །མེར་ནི་ཆར་རོ། །བདེན་བྲལ་དུ་ [7b.6]ནི་མུ་གེའོ། །རླུང་དུ་ནི་ཆར་རླུང་ངོ་། །མཆོད་རྟེན་ལ་ཉེ་བར་ནི་འཆིའོ། །ཀླུ་གནས་པའི་ཆུ་དང་ཉེ་བར་ནི་ཆུ་འབྱུང་ངོ་། །ཤིང་གྲིབ་ཏུ་བྱས་པ་འཆིའོ་ཞེས་ཤེས་ནས། ཐམས་ཅད་དོར་ཏེ་གྲོང་རྡལ་དང་། གྲོང་ཁྱེར་དང་། གྲོང་དང་། སྐྱེད་མོས་ཚལ་དང་། གཙུག་ལག་ཁང་དང་། ཁྱིམ་རྣམས་ཀྱི་དབང་ལྡན་ [7b.7]གྱི་མཚམས་སུའམ། ཡང་ན་གང་དུ་ཡིད་ལ་འཐད་པར་གྱུར་ཅིང་ཤར་དང་བྱང་གཞོལ་བ་རབ་ཏུ་ཤེས་པའི་དཀྱིལ་འཁོར་གྱིས་གཞི་དེ་བརྟགས་ནས། དེར་དྲི་ལ་སོགས་པས་མཎྜལ་བྱས་ཏེ། དཀྱིལ་འཁོར་གྱི་ལྷ་རྣམས་མཆོད་ནས་གཏོར་མ་བྱིན་ལ་ནམ་མཁའ་ལ་བཏེག་སྟེ། དེར་གནས་པའི་ཞིང་སྐྱོང་ལ་སོགས་ [8a] [8a.1]པ་ལ་གཏོར་མ་དང་ཞལ་ཟས་ལ་སོགས་པས་མཆོད་དེ། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་བསླང་བར་བྱ། །དཀྱིལ་འཁོར་དོན་དུ་ཁྱེད་ཀྱིས་སྩོལ། །ཞེས་ལན་གསུམ་གསོལ་བ་བཏབ་སྟེ་དེ་དག་གིས་རྨི་ལམ་ [8a.2]ལ་སོགས་པར་བྱིན་པའམ། མ་བཀག་པར་རིག་ནས་ཉི་མ་གཞན་གྱི་སྔ་དྲོ་ལ་ནམ་མཁའི་དཀྱིལ་ན་བཞུགས་པའི་དཔལ་རྡོ་རྗེ་འཆང་ལ་སོགས་པ་རྣམས་ལ་ཡིད་ཀྱིས་གསོལ་བ་བཏབ་ལ་རྗེས་སུ་གནང་བ་ཞུས་ཏེ། ཉི་མའི་གུང་ལ་སྲུང་བའི་འཁོར་ལོ་དང་བགེགས་ལ་ཕུར་བུས་བཏབ་པ་བསྒོམས་པས་ [8a.3]སམ། དྲག་པོའི་སྦྱིན་སྲེག་གིས་བགེགས་བསྐྲད་པར་བྱའོ། །སྦྱིན་སྲེག་གི་ཕྱོགས་ལ་སློབ་མ་བསྲུང་བའི་དོན་དུ་ཕྱི་དྲོའི་ཚེ། མེ་མཚམས་ན་གནས་པའི་ཐབ་ཁུང་དུ་ཞི་བའི་སྦྱིན་སྲེག་བྱས་ལས་དེ་ཡང་ཨོཾ་ཨཱཿབིགྷྣཱནྟ་ཀྲྀ་ཏ་ཧཱུཾ་ཞེས་པ་ལ་སོགས་པ་ལས་ཐམས་ཅད་པའི་སྔགས་བཟླས་པའི་ཡུངས་ཀར་དང་། [8a.4]ཆུ་དང་ཐལ་བ་རྣམས་ཀྱིས་བསང་ངོ་། །དེ་ནས་ས་དེར་རྡོ་རྗེ་སྐྱིལ་ཀྲུང་བཅས་ཏེ། སའི་ལྷ་མོ་མཆོད་པར་འགྱུར་བའི་གཟུགས་ཅན་བསྒོམས་ལ། ཞབས་བསིལ་དང་། ཞལ་བསིལ་དང་། མཆོད་ཡོན་དང་། མཆོད་པ་སྔོན་དུ་འགྲོ་བས། ཨོཾ་ཚུར་སྤྱོན་ཞེས་པ་ལ་སོགས་པས་སམ། སྐྱོབ་པ་ཞེས་བྱ་བ་ལ་ [8a.5]སོགས་པས་ལན་གསུམ་དུ་གསོལ་བ་བཏབ་པས་དེ་ལྟར་གྱིས་ཤིག་ཅེས་བརྗོད་པ་ཅན་ཡིད་ཀྱིས་བཏེག་ལ་ནམ་མཁའ་ལ་བཞུགས་སུ་གསོལ་ལོ། །དེ་ནས་ས་དེ་བགེགས་མེད་པར་རིག་ནས་གཏོར་མ་བྱིན་ཏེ་སྔར་བཞིན་དུ་ས་བདག་ཀླུའི་མཚན་གྱི་ཆར་མགྲིན་པ་ནུབ་ཙམ་མམ། ཆུ་ལ་ཐུག་པའམ། རྡོ་ [8a.6]ལ་ཐུག་པའམ། དངོས་གྲུབ་དམན་པ་དང་འབྲིང་དང་མཆོག་གི་དབྱེ་བས་པུས་མོའམ་དཀུའམ་ལྟེ་བ་ཙམ་དུ་བརྐོ་བར་བྱ་བའོ། །ས་རྐོ་བའི་ཆོ་གའོ། །དེ་ནས། རྡོ་བར་བཅས་ན་རླུང་ཆེན་པོ། །རུས་པར་བཅས་ན་ཟུག་གཟེར་འབྱུང་། །གྱོ་དུམ་དང་བཅས་ལྐུགས་པ་ཉིད། །ཕུབ་མ་སོལ་བ་ལྡན་ན་རིམས། ། [8a.7]སྐྲ་དང་རྩ་བ་ཤིང་སོགས་བཅས། །ཉེ་བར་འཚེ་བ་ཕྲ་མོ་འབྱུང་། །ཞེས་ཤེས་པར་བྱ་སྟེ། ཐལ་བ་དང་སོལ་བ་དང་སྐྲ་དང་ཕུབ་མ་དང་རྡོ་བ་དང་རུས་པ་དང་གྱོ་དུམ་དང་སོ་ཕག་དང་ཤིང་དུམ་ལ་སོགས་པ་བསལ་ལ། ས་དེ་ཉིད་དྲི་བཟང་པོའི་ཆུ་དང་སྦྱར་བས་དོང་དགང་ངོ་། །མ་ཁེངས་ན་གཞན་གྱིས་ཀྱང་ངོ་། ། [8b] [8b.1]དེ་ནས་ཡི་གེ་ཧཱུཾ་དང་ལས་ཐམས་ཅད་པའི་སྔགས་བཟླས་པའི་དྲི་བཟང་པོའི་ཆུས་གཏོར་ཞིང་བརྡུངས་ལ། ཁྲུ་ཕྱེད་ཙམ་དུ་མཐོ་ཞིང་མཉམ་ལ་ཅུང་ཟད་རུས་སྦལ་གྱི་རྒྱབ་ལྟར་མཐོ་བ་དང་། ཤར་དང་བྱང་གི་མཚམས་ཡིད་ཙམ་དམའ་བར་བྱའོ། །གཞན་ཡང་། ས་སེལ་ཉེས་པ་ཐམས་ཅད་ནི། །གལ་ཏེ་ [8b.2]འབྱུང་བར་མི་ནུས་ན། །ལག་པས་རེག་ལ་སྔགས་བཟླས་བྱ། །དེ་ཉིད་དག་པ་མཆོག་ཏུ་འགྱུར། །ཁང་བཟངས་བྲག་སྟེང་བ་གླང་ལྷས། །གཙུག་ལག་ཁང་སོགས་ཆུ་འགྲམ་མམ། །སྔོན་དུས་བྱས་པའི་གནས་དག་ཏུ། །མ་བརྐོས་ན་ཡང་དག་པ་ཡིན། །དེར་ནི་བདུད་རྩི་འཁྱིལ་པ་འབའ་ཞིག་གིས་སྡང་ [8b.3]བ་རྣམས་བསལ་ཞིང་། །ཡུངས་ཀར་དང་ཆུ་དང་ཐལ་བ་ལ་བཟླས་ལ་གཏོར་བར་བྱའོ། །ས་འདི་དང་བརྐོས་ཤིང་བརྡུངས་པ་ལ་ཤར་གྱི་ཕྱོགས་ནས་བརྩམས་ཏེ་བའི་རྣམ་ལྔ་ལ་དེ་བཟླས་པས་བྱུག་ཅིང་དྲིའི་ཆུས་ཀྱང་གཏོར་ལ། ཨོཾ་བྷུཿཁཾ་ཞེས་བརྗོད་པས་ནམ་མཁར་རོ། །དེ་ནས་ཧཱུཾ་ལཾ་ཧཱུཾ་ཞེས་བརྗོད་པས་ [8b.4]རྡོ་རྗེའི་རང་བཞིན་དུ་བསྒོམས་ཏེ། ཨོཾ་མེ་དི་ནཱི་བཛྲཱི་བྷ་བ་བཛྲ་བནྡྷ་ཧཱུཾ་ཞེས་པ་དང་། ཨོཾ་ཧ་ན་ཧ་ན་བཛྲ་ཀྲོ་དྷ་ཧཱུཾ་ཕཊ་ཅེས་པ་དང་། ཨོཾ་ཨཱཿཧཱུཾ་ཤོདྷ་ཡ་ཤོ་དྷ་ཡ་རཀྵ་རཀྵ་ཧཱུཾ་ཧཱུཾ་ཕཊ་ཅེས་པས་བསྔགས་ཤིང་ལག་པས་རེག་སྟེ་བྱིན་གྱིས་བརླབ་པར་བྱའོ། །ས་དེའི་དབུས་སུ་ཇི་ལྟར་འོས་པར་རིན་པོ་ཆེ་ལྔ་དང་སྨན་ལྔ་ [8b.5]དང་། འབྲུ་ལྔ་ལ་ལས་ཐམས་ཅད་པ་བཟླས་པ་བཅུག་སྟེ། དེ་བཟླས་པའི་དྲིའི་ཆུས་བྱུགས་པར་ནམ་མཁའ་ལ་གནས་པའི་སའི་ལྷ་མོ་ལ་གཏོར་མ་དང་ཞལ་བསིལ་ལ་སོགས་པ་ཕུལ་ཏེ་བསྟིམས་ལ། ཨོཾ་ཨཱཿཧཱུཾ་ཞེས་བརྗོད་ཅིང་ལག་པ་པད་སྐོར་གྱི་ཕྱག་རྒྱའོ། །ཡི་གེ་བརྒྱ་བ་ཡང་བརྗོད་པར་ [8b.6]བྱའོ། །སྣ་ཚོགས་པ་སྟོང་པ་ཉིད་དང་རོ་གཅིག་པའོ། །ཞེས་བསྟན་པར་མོས་པས་ས་དེ་ཉིད་ཀྱི་རང་བཞིན་དུ་རྣམ་པར་དག་པར་མོས་པར་བྱ་བ་ནི་བླ་ན་མེད་པའི་རྣམ་པར་དག་པའོ། །དེ་ནས་འཆད་པར་འགྱུར་བའི་རིམ་པས་ཤར་ལ་སོགས་པའི་ཕྱོགས་ངེས་པར་བྱས་ཏེ་དཀྱིལ་འཁོར་གྱི་གནས་དེ་ [8b.7]རྒྱར་ཇི་ལྟར་འདོད་པར་ཕུབ་པའི་སྒོ་བཞི་པའི་གཞལ་ཡས་ཁང་གི་དབུས་སུ་ཆུད་པ། ཕྱོགས་བཞིར་རྟ་བབས་དང་དྲ་བའི་ཁོར་ཡུག་གིས་བསྐོར་བ་ཐམས་ཅད་དུ་རྒྱན་སྣ་ཚོགས་དང་། མེ་ཏོག་གི་ཕྲེང་བ་དང་། དྲིལ་བུ་དང་ལྡན་པ། ཏོག་དམ་པ་དང་། བླ་རེས་སྦྲས་པའོ། །དེ་ལྟར་ས་སྦྱང་ [9a] [9a.1]བའི་ཆོ་ག་རྣམ་པ་གསུམ་ཡིན་ནོ། །དེར་དཀྱིལ་འཁོར་གྱི་སའི་དབུས་སུ་མེ་ཏོག་གཅལ་དུ་བཀྲམ་པར་འདུག་ལ་རྡོ་རྗེ་དང་དྲིལ་བུ་བཟུང་སྟེ་འདྲི་བར་འགྱུར་བའི་དཀྱིལ་འཁོར་གྱི་རྣལ་འབྱོར་དང་ལྡན་པས། སྲུང་བའི་འཁོར་ལོ་ལ་སོགས་པས་བགེགས་བསལ་ཏེ། སྤོས་ཕོར་བཟུང་ [9a.2]ལ་ལྕེ་ཧཱུཾ་ལས་སྐྱེས་པའི་རྡོ་རྗེར་བྱས་ནས། མ་ལུས་ཕྱོགས་ན་བཞུགས་པ་ཡི། །སངས་རྒྱས་རྣམས་ནི་བདག་ལ་དགོངས། །བདག་ནི་རྡོ་རྗེ་ཆེ་གེ་ཡིས། །འདིར་ནི་དཀྱིལ་འཁོར་བྲི་བར་བགྱི། །སངས་རྒྱས་ལ་སོགས་ཀུན་བྱོན་འཚལ། །དངོས་གྲུབ་འདི་ནི་ཡང་དག་སྩོལ། །ཞེས་སངས་ [9a.3]རྒྱས་ལ་སོགས་པ་རྣམས་ལ་སྙན་གསན་ཞིང་མཆོད་ལ། རྣམ་པར་སྣང་མཛད་ལ་སོགས་པ་ནམ་མཁའ་ལ་བཞུགས་པ་དང་། ཤར་ལ་སོགས་པའི་གནས་སུ་སློབ་མ་རྡོ་རྗེ་དང་། རྡོ་རྗེ་དྲིལ་བུ་འཛིན་པ་ཅི་ལྟར་རིགས་པར་རྣམ་པར་སྣང་མཛད་ལ་སོགས་པའི་རྣལ་འབྱོར་དང་ལྡན་པ་བཞི་རྣམས་ཀྱིས་སམ། [9a.4]སློབ་མ་གཅིག་ཉིད་རིམ་པ་བཞིན་དེ་དང་དེར་སོང་བས་ཀྱང་། དེ་བཞིན་གཤེགས་པ་ཀུན་ཞི་བ། དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་ཉིད་ཐམས་ཅད་ཡང་དག་རྫོགས། །མཚན་ཉིད་མིན་པ་ཐམས་ཅད་ [9a.5]སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ཞི་བའི་ཆོས་མཆོག་ལས་བྱུང་བ། །ཡེ་ཤེས་སྤྱོད་པ་རྣམ་སྦྱོང་མཛད། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་ [9a.6]ཅིང་དྲི་མ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་དམ་པ་བཤད་དུ་གསོལ། །ཞེས་པའི་ཚིགས་སུ་བཅད་པ་བཞི་རེ་རེ་སོ་སོ་ནས་བདག་ཉིད་ལ་གསོལ་བ་འདེབས་སུ་གཞུག་གོ། །རིགས་ལྔ་དང་ལྡན་པའི་ཕྱིར་དེ་བཞིན་གཤེགས་པ་ཀུན་གྱི་རང་བཞིན་ནོ། །རྣམ་པར་སྣང་མཛད་ལ་ [9a.7]སོགས་པ་ཞི་བ་ཆེན་པོའི་ཏིང་ངེ་འཛིན་འབྱུང་བས་ཞི་བའོ། །དེ་བཞིན་གཤེགས་པ་ཐམས་ཅད་གནས་པས་ན་གནས་སོ། །དྲན་པ་ཉེ་བར་གཞག་པ་ལ་སོགས་པ་རྣམས་ཀྱི་རང་བཞིན་མེད་པ་ཉིད་ཀྱི་ངོ་བོས་ནི་ཆོས་ཀུན་བདག་མེད་པའི་མཆོག་གོ། །སྟོང་པ་དང་སྙིང་རྗེ་དབྱེར་མེད་པ་བདེ་བ་ཆེན་པོའི་སྙིང་པོ་ [9b] [9b.1]ལེན་པ་གསལ་བར་བྱེད་པའི་ཕྱིར་རྡུལ་ཚོན་གྱི་དཀྱིལ་འཁོར་ཡང་དཀྱིལ་འཁོར་རོ། །གྲུ་བཞི་པ་ཉིད་ལ་སོགས་པའི་མཚན་ཉིད་དང་ལྡན་པ་རྫོགས་པའོ། །ཕྲ་བ་དང་སྦོམ་པའི་ཉེས་པ་དང་བྲལ་བས་ན་སྤངས་པའོ། །སྐུའི་མཆོག་སྐུ་རྡོ་རྗེའི་རང་བཞིན་འདི་ལ་ཡོད་པས་ན་སྐུའི་མཆོག་གོ། །དཀར་པོའི་ཆོས་ [9b.2]ཀྱི་ངོ་བོར་གསལ་བར་བྱུང་བས་ཆོས་མཆོག་ལས་འབྱུང་བའོ། །དེ་ལྟ་བུར་གྱུར་པའི་ཡེ་ཤེས་ཀྱི་ཆེད་དུ་སྤྱོད་པ་གང་ཡིན་པ་དེ་སྦྱོང་བར་བྱེད་པས་ན་ཡེ་ཤེས་སྤྱོད་པ་རྣམ་སྦྱོང་མཛད་དོ། །དེ་གསལ་བར་མཛད་པ་པོ་ཉིད་ཀྱིས་གསུང་རྡོ་རྗེའི་རང་བཞིན་ནོ། །ཆོས་ཐམས་ཅད་ཀྱི་ངོ་བོར་སྤྲོ་བས་ན་སེམས་ཆེན་ [9b.3]པོའོ། །དོན་དམ་པར་ཀུན་བརྟགས་ཐམས་ཅད་དང་བྲལ་བས་ཐུགས་རྡོ་རྗེའི་རང་བཞིན་ནི་རང་བཞིན་དག་ཅིང་དྲི་མ་མེད་དོ། །འདུལ་བར་འོས་པ་འདུལ་བ་ན་ཁ་ལོ་སྒྱུར་བ་སྟེ་བཤད་དུ་གསོལ་ཞེས་དེ་ལྟར་མངོན་དུ་བྱེད་ཅིང་ངོ་། །དངོས་སུ་གསོལ་བ་འདེབས་པ་པོ་མེད་ན་བསམ་གཏན་གྱིས་ཀྱང་དེ་ལྟར་བྱ་ [9b.4]སྟེ་འདི་ལྟར་མན་ངག་གོ། །དེ་ནས་དཀྱིལ་འཁོར་གྱི་འཁོར་ལོ་ལ་སོགས་པ་སྤྲོ་བ་ལ་སོགས་སྔོན་དུ་འགྲོ་བས་བསྒོམས་པའི་དཀྱིལ་འཁོར་རྡོ་རྗེ་ཁུ་ཚུར་གཉིས་ཀྱི་མཛུབ་མོ་གཉིས་བརྐྱང་ལ་རྩེ་མོ་སྦྱར་བ་འོག་ཏུ་ཕྱོགས་པར་སྤྱི་བོར་བཟུང་ཞིང་ཧཱུཾ་བཛྲ་ཨུ་ཏིཥྛ་ཞེས་བརྗོད་ཅིང་ནམ་མཁའ་ལ་བཏེག་སྟེ། དེ་ [9b.5]ནས་སྐྱིལ་ཀྲུང་བཤིག་ལ་ལངས་ཏེ། ཁ་ཤར་དུ་ཕྱོགས་པས་མཉམ་པའི་རྐང་སྟབས་བྱས་ལ། མགོ་བོར་ཐལ་མོ་སྦྱར་བས་དེ་བཞིན་གཤེགས་པ་རྣམས་ལ་ཕྱག་བྱས་ནས། སེམས་ཅན་མ་རིག་པའི་མུན་པར་སོང་ཞིང་བདུད་ཀྱིས་བྱིན་གྱིས་བརླབས་པ་རྣམས་ལ་མངོན་པར་བལྟས་ལ། བདུད་ [9b.6]བསལ་བར་བྱ་བའི་ཕྱིར། སྐད་ཅིག་གིས་མཆོད་པར་འགྱུར་བའི་རྡོ་རྗེ་ཧཱུཾ་མཛད་སྐུ་ཁྲོ་བོའི་ཆ་བྱད་ཅན། སྨིན་མ་གཉེར་ཞིང་མཆེ་བ་གཙིགས་པ། ཤིན་ཏུ་ཁྲོས་པའི་ཆ་བྱད་ཀྱིས་གཡོ་བ་ལ་སོགས་པ་དང་ལྡན་པས་ཡི་གེ་མས་མིག་གཡས་པ་ཉི་མར་བྱས་པ་དང་། ཡི་གེ་ཊས་མིག་གཡོན་པ་ཟླ་བར་ [9b.7]བྱས་པ་དང་། ཡི་གེ་ཧཱུཾ་གིས་མིག་འབྲས་གཉིས་དུས་མཐའི་མེ་ལྟར་བྱས་པའི་རྡོ་རྗེའི་བལྟ་བའི་ཕྱོགས་ཐམས་ཅད་དུ་འགྲོ་བ་ལ་བལྟ་བ་དང་། ང་རྒྱལ་བསྐྱེད་པར་བྱས་ཏེ། ང་ནི་རང་ཉིད་རྡོ་རྗེ་ཅན། །རྡོ་རྗེ་སེམས་དཔའ་རང་ཉིད་ང་། །ང་ནི་སངས་རྒྱས་རྒྱལ་པོ་ཆེ། །ང་ནི་སྟོབས་ཅན་རྡོ་རྗེ་ཅན། ། [10a] [10a.1]ང་ནི་རྣལ་འབྱོར་དབང་ཕྱུག་རྒྱལ། །ཕྱག་ན་རྡོ་རྗེ་སྟོན་པ་ང་། །བདག་པོ་རྡོ་རྗེ་བདག་པོ་སྟེ། །བྱིན་གྱིས་བརླབས་པ་མི་འདོར་རོ། །ཞེས་སོ། །དེ་ནས་རྐང་པའི་མཐིལ་དུ་རྡོ་རྗེ་འབར་བ་བསྒོམ་ཞིང་སྐབས་ཇི་ལྟར་བགྱི་བ་དང་བཅས་པའི་པད་སྐོར་བྱེད་ཅིང་། རྡོ་རྗེ་གསོར་ནས་ [10a.2]དྲིལ་བུ་དཀྲོལ་ཞིང་རྡོ་རྗེའི་རྐང་སྟབས་ཉིད་ཀྱིས་དབང་ལྡན་གྱི་ཕྱོགས་སུ་ཕྱིན་ལ་དེ་ནས་བརྩམས་ཏེ་སློབ་མ་དང་ལྷན་ཅིག་གཡས་སྐོར་དུ་དཀྱིལ་འཁོར་གྱིས་གཞིར་རྡོ་རྗེའི་རྐང་སྟབས་ཀྱིས་གར་བྱེད་ཅིང་། །མིག་གཉིས་ལག་གཉིས་དེ་བཞིན་དཀུ། །རྐང་པ་གཞོགས་སུ་གཡས་སུ་བསྐོར། ། [10a.3]ཕེག་རྡོབ་སྦྱོར་བས་དགྱེར་བར་བྱ། །སླར་ཡང་གཡོན་དུ་དེ་བཞིན་ནོ། །དེ་ནས་རྒྱུག་པའི་གར་བྱེད་ནས། །དེ་ནས་གཡོ་ཞིང་གར་བྱའོ། །མྱུར་དུ་ཕེག་རྡོབ་དེ་བཞིན་དུ། །གར་བྱེད་འཁོར་ལོ་འདྲར་བསྐོར་ཞིང་། །གང་སུ་དག་ལྷ་དང་། ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཡི་དྭགས་ [10a.4]དང་། ཤ་ཟ་དང་། བརྗེད་བྱེད་དང་། འབྱུང་པོ་དང་། མཁའ་འགྲོ་དང་། མཁའ་འགྲོ་མ་དང་། གྲིབ་གནོན་རྒན་པོ་དང་། གྲིབ་གནོན་རྒན་མོ་དང་། གཡོག་དང་འཁོར་དང་། ནམ་མཁའ་ལྡིང་དང་། མི་འམ་ཅི་དང་། རིག་སྔགས་འཆང་གྲུབ་པ་ཁྱེད་རྣམས་དེངས་ཤིག །སའི་ཕྱོགས་འདིར་བདག་ [10a.5]རྡོ་རྗེ་སློབ་དཔོན་ཆེ་གེ་མོ་ཞེས་པས་སེམས་ཅན་ཐམས་ཅད་ཀྱིས་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་དང་། སློབ་མ་ཆེ་གེ་མོ་ཞེས་བྱ་བའི་མངོན་པར་བྱང་ཆུབ་པ་རྫོགས་པར་བྱ་བའི་དོན་དུ་དཔལ་ཆེ་གེ་མོ་ཞེས་པའི་དཀྱིལ་འཁོར་ཆེན་པོ་བྲི་བར་བྱའོ། །དེའི་ཕྱིར་རྡོ་རྗེ་འཆང་ཆེན་པོའི་བཀའ་འདི་ཐོས་ [10a.6]ནས་མྱུར་དུ་དེངས་ཤིག །གང་དག་མི་འགྲོ་བ་དེའི་མགོ་བོ་བདག་གིས་ཧཱུཾ་མཛད་ཀྱི་རྡོ་རྗེ་འབར་བ་གསལ་ཞིང་རབ་ཏུ་གསལ་བའི་ཡེ་ཤེས་ཀྱི་རྡོ་རྗེ་ཆེན་པོ་འདིས་རྣམ་པ་བརྒྱར་དགས་པར་བྱའོ་ཞེས་པའམ། ལུས་ངག་ཡིད་ལ་གནས་པ་ཡི། །བགེགས་ཀྱི་ཚོགས་ཀུན་ཡང་དག་ཉོན། །ང་ནི་དཔལ་ [10a.7]ལྡན་རྡོ་རྗེ་འཆང་། །བཀའ་ཡི་འཁོར་ལོ་སྦྱོར་བ་པོ། །རྡོ་རྗེ་འབར་བའི་གཟུགས་ཀྱིས་ནི། །ལུས་གསུམ་ལས་བྱུང་དགས་བྱ་སྟེ། །གལ་ཏེ་ཁ་ཅིག་བདག་ལ་འདས། །འདིར་ནི་འཇིག་འགྱུར་གཞན་དུ་མིན། །ཞེས་ལན་གསུམ་བརྗོད་ཅིང་ཁྲོ་བོ་དཔག་ཏུ་མེད་པ་སྤྲོས་པས་བགེགས་རྣམས་བསལ་ [10b] [10b.1]བར་བྱའོ། །དཀྱིལ་འཁོར་གྱིས་གཞི་ཡང་དབང་ཆེན་གྱི་གཏིང་གི་བར་དུ་ཧཱུཾ་ལས་བྱུང་བའི་རྡོ་རྗེའི་རང་བཞིན་དུ་བྱིན་གྱིས་བརླབ་བོ། །འདིར་བསྐོར་བའི་དུས་སུ་སྒྲོ་སོ་སོར་བདག་ཉིད་གཡོན་དུ་གནས་པའི་སློབ་མས་དྲིལ་བུའི་ནང་དུ་རྡོ་རྗེ་གཞུག་པར་བྱའོ། །དེའི་རྡོ་རྗེ་ཡང་བདག་ཉིད་ཀྱི་དྲིལ་བུར་རོ། ། [10b.2]དེ་ལྟར་མདུན་དང་གཡས་དང་རྒྱབ་ཏུ་ཡང་ངོ་། །དེ་ལ་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་རྐང་མཐིལ་དུ་བསམས་ནས། རྐང་མཐིལ་དེས་རྡོ་རྗེ་དེ་ས་ལ་བྲི་ཞིང་གར་གྱིས་བསྐོར་བར་བྱའོ། །དེ་ནས་དེ་བཞིན་དུ་རྩེ་གསུམ་པའོ། །དེ་ནས་དེ་བཞིན་དུ་རྩེ་ལྔ་པའོ། །དེ་ནས་སྣ་ཚོགས་རྡོ་རྗེ་ཡང་དེ་བཞིན་ [10b.3]དུ་སྟེ་འོན་ཀྱང་ཕྱིར་ལོག་ནས་བསྐོར་ཞིང་རྗེས་དགོད་དོ། །བཞི་པོ་འདི་རྣམས་རྡོ་རྗེས་མཚན་པ་དང་། རྡོ་རྗེ་འདྲི་བས་རྡོ་རྗེའི་རྐང་སྟབས་ཏེ་སོ་སོར་གཡས་སྐོར་དུ་གཡས་བརྐྱང་ལ་སོགས་པ་རྣམས་བྱེད་པས་ལན་རེ་བྱའོ། །དེ་ནས་གཡོན་པའི་བྱིན་པ་བསྐུམ་ནས་མཐོ་ལྔའི་བར་དུ་རྐང་པ་ [10b.4]གཡས་པ་འགྱིང་བ་དང་བཅས་པས་དྲང་པོར་བརྐྱང་བ་ནི་གཡས་བརྐྱང་ངོ་། །བྱིན་པ་གཡས་པ་བསྐུམ་ནས་གཡོན་པ་དེ་བཞིན་དུ་བྱས་པ་ནི་གཡོན་བརྐྱང་ངོ་། །སོར་ཉི་ཤུ་རྩ་དྲུག་གི་རྒྱར་བརྐྱང་བའི་སོར་མོ་ལོགས་སུ་བསྟན་ཅིང་། པུས་མོ་གཉིས་དྲང་པོར་བྱས་པ་ནི་ས་གའོ། །ས་གའི་ [10b.5]རྐང་སྟབས་ཉིད་བར་དུ་ཁྲུ་དོ་བ་ངང་པའི་གཤོག་པ་ལྟར་བྱས་པ་ནི་ཟླུམ་པོའི་རྐང་སྟབས་སོ། །རྐང་པ་གཉིས་ཀྱི་སོར་མོ་ཕན་ཚུན་སྦྱར་བ་ནི་མཉམ་པའི་རྐང་སྟབས་སོ། །ལྔ་པོ་འདི་རྣམས་བྱེད་པ་ན་རེ་རེ་བྱེད་ཅིང་བསྐོར་བ་ལན་རེ་རྫོགས་པར་བྱའོ་ཞེས་པ་ནི་ཁ་ཅིག་གོ། །རེ་རེ་བྱེད་ཅིང་བསྐོར་ [10b.6]བ་ལན་གསུམ་མོ་ཞེས་པ་ནི་གཞན་དག་གོ། །འདིར་ངེས་པ་ཅུང་ཟད་མེད་དོ་ཞེས་པ་ཁ་ཅིག་གོ། །རྟིང་པ་གཉིས་ཀྱི་བར་དུ་སོར་མོ་བཞི་བྱས་ཤིང་རྐང་པ་གཡོན་པ་དྲང་པོར་བྱས་ཏེ་འགྱིང་བ་དང་བཅས་པས་གཡས་པ་མཐོ་གང་གི་བར་དུ་ལོགས་སུ་བསྟན་ཅིང་ཡངས་པ་ཅན་གྱི་སྒྲོལ་མའི་ [10b.7]ཞབས་ལྟར་བྱས་པ་ནི་སྐྱེས་པའི་རྐང་སྟབས་སོ། །དེ་ཁོ་ན་བཞིན་དུ་གཡས་པ་དྲང་ཞིང་གཡོན་པ་ལོགས་སུ་བསྟན་པ་ནི་སྐྱེས་པའི་རྐང་སྟབས་ཀྱི་ཟླའོ། །མཉམ་པའི་རྐང་སྟབས་བྱས་ཏེ་མཐོ་གསུམ་གྱི་བར་དུ་རྐང་པ་གཡས་པ་གཡོན་པའི་མདུན་དུ་བཞག་པ་ནི་རྣམ་པར་གཙིགས་པའི་ [11a] [11a.1]རྐང་སྟབས་སོ། །དེ་ཁོ་ན་བཞིན་དུ་གཡས་པ་དྲང་པོར་བྱས་ཏེ། གཡོན་པ་གཡས་པའི་མདུན་དུ་མཐོ་གསུམ་གྱི་བར་དུ་བཞག་པ་ནི་རྣམ་པར་གཙིགས་པའི་རྐང་སྟབས་ཀྱི་ཟླའོ། །འདུག་ནས་ཀྱང་རྐང་པའི་མཐིལ་གཉིས་ཁ་སྦྱོར་བ་ནི་ཁ་སྦྱོར་གྱི་རྐང་སྟབས་སོ། །རྐང་པ་གཡས་ [11a.2]པས་རྐང་པ་གཡོན་པ་མནན་པ་ནི་རུས་སྦལ་གྱི་རྐང་སྟབས་སོ། །རྐང་པ་གཅིག་བཏེག་སྟེ་རྐང་པ་གཅིག་བསྐོར་བ་ནི་རྐང་གཅིག་གོ། །རྐང་སྟབས་བདུན་པོ་འདི་དང་བུད་པའི་དྲ་བ་ནི་གནས་ངེས་པ་མེད་པར་བྱའོ། །གཡས་པ་དང་གཡོན་པ་དག་གིས་ཀུན་ནས་ལུས་གཡོ་བ་ནི་བུང་བའི་དྲ་བའོ། ། [11a.3]གཡས་བརྐྱང་བ་ལ་སོགས་པ་བཅུ་གསུམ་པོ་འདི་དག་བྱེད་པ་ན་ཇི་ལྟར་རིགས་པར་རྒྱ་མཚོའི་རླབས་དང་། རི་བོ་འདེགས་པ་དང་། རོལ་བའི་བསྐྱོད་པ་དང་། ཁྲོ་བོའི་བསྐྱོད་པ་དང་། གོམ་པ་བགྲོད་པ་དང་། ཚུལ་བཞི་དང་། བསྣུན་པ་ལ་སོགས་པ་ཀུན་ནས་བསྐྱོད་པ་དགུ་དང་། རྡོ་རྗེ་བསྒྲེང་བ་ལ་ [11a.4]སོགས་པ་དྲུག་དང་། རལ་གྲི་ལ་སོགས་པའི་ཚུལ་བཅུ་གསུམ་བྱའོ། །དེ་ནས་གཡས་བརྐྱང་གི་གར་བྱས་ལ་ཁ་ལྷོར་ཕྱོགས་ཏེ། སྙིང་གར་གཡོན་པའི་སྡིགས་མཛུབ་བསྒྲེངས་ནས་གཞོགས་གཡོན་དུ་ས་ལ་འགྱེལ་བ་ལྟར་བྱས་ཏེ། ནམ་མཁར་བལྟ་ཞིང་རྡོ་རྗེ་དང་བཅས་པའི་ལག་པ་གཡས་པས་བདུད་ [11a.5]ཐམས་ཅད་ལ་བསྣུན་ནོ། །བསྣུན་པའི་ཀུན་ཏུ་བསྐྱོད་པའོ། །པད་སྐོར་སྔོན་དུ་འགྲོ་བས་གར་བྱེད་ལ་རྡོ་རྗེ་བླངས་ཏེ་གཡོན་པའི་སྡིགས་མཛུབ་ཀྱིས་བསྡིགས་ཤིང་། གཡས་རྡོ་རྗེ་དང་བཅས་པས་དབྱུག་པའི་ཕྱག་རྒྱ་བསྒྲེངས་ལ་མཉམ་པའི་རྐང་སྟབས་ཀྱིས་གནས་ཏེ། འགྱིང་བ་དང་བཅས་པའི་རྡོ་རྗེ་ [11a.6]རྐང་སྟབས་ཀྱིས་རྐང་པ་གཡས་པ་བསྐུམ་ལ། གཡོན་པ་མཐོ་ཕྱེད་དང་གསུམ་དུ་བཞག་སྟེ་བརྟན་པར་བྱས་ནས་རྐང་པ་གཉིས་གཤོག་པར་གནས་སོ། །དེ་ནས་པུས་མོ་གཡས་པ་བསྐུམ་ལ་དབྱུག་པའི་ཕྱག་རྒྱ་སྟེང་དུ་བརྐྱང་སྟེ། གཡོན་པའི་སྡིགས་མཛུབ་ཀྱིས་བསྡིགས་ཤིང་། ལྟོ་བ་གཡོན་པ་སྨད་ལ་ [11a.7]མིག་གཡོན་པ་བཙུམས་ཏེ་བསྐོར་ཞིང་དཀྱིལ་འཁོར་ལ་བལྟས་ནས་ཁྲོ་གཉེར་བྱའོ། །འདི་ནི་འདར་བར་བྱེད་པའི་ཀུན་དུ་བསྐྱོད་པ་སྟེ་དཀུ་གཡས་པའི་ཆར་བསྡུའོ། །དེ་བཞིན་དུ་རྡོ་རྗེ་བསླངས་ནས་མཉམ་པའི་རྐང་སྟབས་ཀྱིས་གནས་ཏེ་རྐང་པ་མཉམ་པར་མཐོ་ཕྱེད་དང་གསུམ་དུ་བརྐྱང་ནས་རྐང་པ་གཉིས་ [11b] [11b.1]ཟུར་གསུམ་དུ་བྱས་ཏེ་མདུན་དུ་ལག་པ་བརྡབས་ནས་དབྱུག་པའི་ཕྱག་རྒྱ་འཕྱར་ཞིང་སྡིགས་མཛུབ་ནུ་མ་གཡོན་པར་བཞག་སྟེ་བལྟ་བར་བྱའོ། །འདི་ནི་སྐྲག་པར་བྱེད་པའི་ཀུན་དུ་བསྐྱོད་པ་སྟེ་དཀུ་གཡོན་པའི་ཕྱོགས་སུ་བསྡུ་བའོ། །དེ་བཞིན་དུ་རྡོ་རྗེ་བསླང་བའི་ཕྱག་རྒྱ་བཅས་ནས་མཉམ་པའི་རྐང་ [11b.2]སྟབས་ཀྱིས་གནས་ཏེ་དབྱུག་པའི་ཕྱག་རྒྱ་ཕྱར་ལ། མིག་གཡས་པ་བཙུམས་ཏེ་མིག་གཡོན་པས་ནུ་མར་སྡིགས་མཛུབ་བཙུགས་ལ་བལྟའོ། །གཡོན་པ་རྡོ་རྗེའི་རྐང་སྟབས་བྱས་ཏེ་པུས་མོ་གཡས་པ་བསྐུམ་ལ་རྐང་པ་བཏེག་སྟེ་ཁྲོ་བ་དང་བཅས་པས། ཅིག་ཅར་གཡོན་ཕྱོགས་སུ་འཁོར་ལོ་བཞིན་ [11b.3]དུ་བསྐོར་རོ། །ཡང་རྐང་པ་དེ་བསྐུམ་ལ་གཡོན་བརྐྱང་ཕྱེད་པ་གཞག་པར་བྱ་སྟེ་རྐང་པ་གཉིས་གཤོག་པར་གནས་པ་བརྟན་པར་བྱས་ནས་གནས་སོ། །འདི་ནི་ཡང་དག་པར་དཀྲུགས་པའི་ཀུན་དུ་བསྐྱོད་པ་སྟེ། རྡོ་རྗེ་གར་གྱི་སྦྱོར་བས་དཀུ་གཡས་པའི་ཆར་བསྡུའོ། །དེ་བཞིན་དུ་རྡོ་རྗེ་ [11b.4]བསླངས་ནས་མཉམ་པའི་རྐང་སྟབས་ཀྱིས་གནས་ཏེ་དབྱུག་པའི་ཕྱག་རྒྱ་འཕྱར་ལ་མིག་གཡོན་པ་ནུ་མར་སྡིགས་མཛུབ་ལ་བལྟའོ། །པུས་མོ་གཡོན་པ་བསྐུམ་སྟེ་གཡས་པ་རྡོ་རྗེའི་རྐང་སྟབས་སུ་བྱས་ནས་གཡོན་པ་བཏེག་པ་དང་དུས་གཅིག་ཏུ་གཡས་ཕྱོགས་སུ་བསྐོར་ཏེ་དེ་ནས་ [11b.5]གཞག་པར་བྱའོ། །བཞག་པའི་རྐང་པ་བསྐུམ་ཞིང་གྲུ་གསུམ་དུ་བྱས་ལ་གཡས་པ་གཤོག་པའི་རྣམ་པར་བྱས་ཏེ་གཡས་བརྐྱང་དུ་བཞག་པར་བྱའོ། །རྣམ་པར་རྨོངས་བྱེད་ཀྱི་ཀུན་དུ་བསྐྱོད་པ་སྟེ་གར་བྱེད་ཅིང་དཀུ་གཡོན་པའི་ཕྱོགས་སུ་བསྡུའོ། །འདི་ཉིད་རྐང་པ་གཡོན་པས་བསྐོར་ [11b.6]བས་སླར་མདུན་དུ་ལག་པ་ས་ལ་བརྡབ་སྟེ་སླར་དབྱུག་པའི་ཕྱག་རྒྱ་བསྒྲེང་བར་བྱའོ། །འདི་ནི་ཁྱད་པར་དུ་མྱུར་བའི་ཀུན་དུ་བསྐྱོད་པའོ། །རྨོངས་པར་བྱེད་པའི་ལྟ་སྟངས་ཉིད་ཁ་གདངས་པའི་ཀུན་དུ་བསྐྱོད་པ་སྟེ། འོན་ཀྱང་ཁ་གདངས་ནས་ལྕེ་དྲིལ་བུ་དཀྲོལ་བཞིན་དུ་བྱས་ཏེ་འཁོར་ལོ་བཞིན་ [11b.7]བསྐོར་བར་བྱའོ། །དེ་བཞིན་དུ་རྡོ་རྗེ་བསླངས་ནས་རྐང་པ་གཉིས་མཐོ་གང་ཙམ་གྱི་བར་དུ་བྱས་ཏེ་གྲུ་གསུམ་བྱ་ཞིང་པུས་མོ་གཡས་པ་ཅུང་ཟད་བསྐུམ་ལ་པུས་མོ་གཡོན་པ་དང་གསུས་པ་དང་། ནུ་མ་གཡོན་པའི་ཆ་སྨད་དེ། ནུ་མར་སྡིགས་མཛུབ་བྱ་ཞིང་དབྱུག་པ་ལན་གཉིས་བསྒྲེང་ལ་དེ་མ་ [12a] [12a.1]ཐག་ཏུ་དབྱུག་པ་ལ་བལྟ་ཞིང་གདོང་བསྐོར་བ་ནི་ཀཱ་ལི་ཀཱི་ལ་ཞེས་པའི་ཀུན་དུ་བསྐྱོད་པ་སྟེ་དཀུ་གཡས་པའི་ཆར་བ་སྡུའོ། །དེ་ཉིད་ནི་ཀཱི་ལི་ཀཱི་ལི་ཆེན་པོ་ཡིན་ཏེ་གང་གི་ཚེ་དབྱུག་པ་ལ་བལྟ་བར་གནས་པ་གཡས་པའི་དཔུང་པའི་ཕྱོགས་ནས་རང་གི་རྒྱབ་ཏུ་ཁྱེར་ཞིང་མིག་གཡོན་པ་ [12a.2]བཙུམས་ཏེ་ཁྲོས་ཤིང་རྐང་པ་རྣམ་པར་རྐྱོང་བར་བྱེད་པའི་ཚེའོ། །བསྡུ་བ་ནི་སྔ་མ་བཞིན་ནོ། །གཡོན་པ་དཀུར་བྱས་ཏེ་གཡས་པ་རྡོ་རྗེ་སྙིང་གར་བསྒྲེང་བ་ནི་རྡོ་རྗེ་བསྒྲེང་བའོ། །གཡོན་པའི་རྡོ་རྗེ་ཁུ་ཚུར་གྱི་མཛུབ་མོ་བསྒྲེངས་པས་སྙིང་གར་སྡིགས་མཛུབ་བྱེད་ཅིང་། གཡས་པའི་རྡོ་རྗེ་ཁུ་ཚུར་གྱིས་བཟུང་བའི་རྡོ་རྗེ་ [12a.3]བརྡེག་པའི་ཚུལ་དུ་བྱས་པ་ནི་རྡོ་རྗེ་འཕེན་པའོ། །སོར་མོ་བཞི་རྩེ་མོ་བསྐུམ་པས་མཐེ་བོང་མནན་པ་ནི་རྡོ་རྗེའི་ཁུ་ཚུར་རོ། །རྡོ་རྗེ་ཁུ་ཚུར་ལས་སྟེང་དང་འོག་ཏུ་ལག་པ་བརྐྱང་བས་ཁ་གདངས་པ་དང་སྣ་བུག་དང་འགྲམ་པ་དང་མིག་རྣམས་ལ་བསྡིགས་པའི་ཚུལ་དུ་བྱས་པ་ནི་རྡོ་རྗེ་འཇིགས་བྱེད་དོ། །ལག་པ་གཡས་པའི་རྡོ་རྗེ་ [12a.4]གཡས་སྐོར་དུ་བསྐོར་ནས་རིམ་གྱིས་ས་ལ་རྐང་པ་གཉིས་འཇོག་པ་ནི་རྡོ་རྗེ་འཁྱིལ་བའི། །ལག་པ་གཡོན་པ་བརྐྱང་ལ་དེའི་མཁྲིག་མར་རྡོ་རྗེ་དང་བཅས་པའི་ལག་པ་གཡས་པའི་མཁྲིག་མར་སྦྱར་བས་གར་བྱེད་པ་ནི་རྡོ་རྗེའི་གར་རོ། །རྡོ་རྗེའི་གར་སྔོན་དུ་འགྲོ་བས་དཀུ་གཉིས་སུ་བཙུགས་ཏེ་མགོ་གཡོན་པར་སྨད་པ་ [12a.5]ནི་བུད་བྱེད་སྒྱུ་མ་བྱེད་པའོ། །དཀུ་གཉིས་སུ་བཙུགས་པ་ནི་རྡོ་རྗེ་སྒེག་མོའི་ཕྱག་རྒྱའོ། །རྡོ་རྗེ་ཁུ་ཚུར་གཡོན་པའི་སྦུབས་ལས་རྡོ་རྗེ་ཁུ་ཚུར་གཡས་པ་ཕྱུང་ནས་རལ་གྲིའི་ཚུལ་དུ་བཟུང་བ་ནི་རལ་གྲིའི་ཚུལ་ལོ། །སྙིང་གར་སྡིགས་མཛུབ་བྱེད་ཅིང་གཡས་པ་རྡོ་རྗེ་རྩེ་གསུམ་པ་ཀུན་དུ་བརྐྱང་བ་ནི་རྡོ་རྗེའི་ཚུལ་ལོ། [12a.6]རྡོ་རྗེ་བསྡམས་པས་བཟུང་བའི་གཏུན་ཤིང་གིས་བགེགས་བརྡུང་བ་ནི་གཏུན་ཤིང་གི་ཚུལ་ལོ། །ཐལ་མོ་སྦྱར་ནས་སོར་མོའི་རྩེ་མོ་ཕན་ཚུན་བསྣོལ་བ་ནི་རྡོ་རྗེ་ཐལ་མོའོ། །དེ་ལྟར་རྩ་བ་ཡང་དག་པར་བསྡམས་པ་རྡོ་རྗེ་བསྡམས་པའོ། །སྙིང་གར་རྡོ་རྗེ་ཁུ་ཚུར་གཉིས་ཀྱི་མཐེ་ཆུང་གཉིས་དང་མཛུབ་མོ་དག་རྡོ་རྗེ་ [12a.7]བསྡམས་པ་བྱས་ནས་འཁོར་ལོ་བཞིན་ཕྱེ་བ་ནི་འཁོར་ལོའི་ཚུལ་ལོ། །གཡས་པའི་རྡོ་རྗེ་ཁུ་ཚུར་གྱི་མཛུབ་མོ་གཉིས་གུང་མོ་དག་འགྱིང་བ་དང་བཅས་པས་བརྐྱང་ནས་སྟེང་དུ་བཞག་པ་ནི་བ་དན་གྱི་ཚུལ་ལོ། །ཐལ་མོ་སྙིམ་པ་ཁ་སྦྱར་ཏེ་པདྨ་བཞིན་ཁ་ཕྱེ་བ་ནི་པདྨའི་ཚུལ་ལོ། །ཁུ་ཚུར་གཡས་པའི་ནང་དུ་ [12b] [12b.1]མཐེ་བོང་བཅུག་སྟེ་མཛུབ་མོ་བརྐྱང་ལ་ལག་པ་སྟེང་དུ་བསྒྲེང་པ་ནི་དབྱུག་པའི་ཚུལ་ལོ། །གཡས་པའི་མཛུབ་མོ་ལྕགས་ཀྱུའི་ཚུལ་དུ་བཟུང་བ་ནི་ལྕགས་ཀྱུའི་ཚུལ་ལོ། །ལག་པ་གཡས་པའི་སོར་མོ་རྣམས་བརྐྱང་ལ་བཀུག་པ་ནི་གདེངས་ཀའི་ཚུལ་ལོ། །ལག་པ་གཡོན་པར་གཞུ་བླངས་ཏེ་གཡས་ [12b.2]པས་རྒྱུད་རྣ་བའི་བར་དུ་དྲང་ཞིང་རླུང་གཟུང་བར་བྱའོ། །འདི་ནི་གཞུའི་ཚུལ་ལོ། །གཡས་པའི་མཛུབ་མོ་དང་གུང་མོ་དག་གིས་གཡས་ཕྱོགས་ནས་མདའ་དྲང་བར་བྱ་བ་ནི་མདའ་དྲང་བའི་ཚུལ་ལོ། །དེ་དག་ཉིད་ཀྱིས་མདའ་འཕེན་པའི་ཚུལ་དུ་བྱས་པ་ནི་མདའ་འཕེན་པའི་ཚུལ་ལོ། །བསྟོད་པ་བྱེད་པའི་ [12b.3]ཚུལ་དུ་སྙིང་གར་ཐལ་མོ་སྦྱར་བ་གཟུང་བ་ནི་ཕྱག་འཚལ་བའི་ཚུལ་ལོ། །དེ་ནས་ཕྱག་འཚལ་བའི་ཚུལ་དང་པད་སྐོར་བྱས་ནས་རྡོ་རྗེ་གསོར་ཞིང་དྲིལ་བུ་དཀྲོལ་ལ་རྡོ་རྗེའི་རྐང་སྟབས་ཀྱིས་གར་བྱས་ནས། དཀྱིལ་འཁོར་གྱིས་གཞིའི་དབུས་སུ་ཞུགས་ཏེ་འདུག་ལ་གདན་བཅུའི་ཚུལ་བྱེད་ཅིང་ཧཱུཾ་ [12b.4]བརྗོད་པ་སྔོན་དུ་འགྲོ་བས་ཁྲོ་བོ་དཔག་ཏུ་མེད་པ་སྤྲོས་པས་བགེགས་རྣམས་བསལ་ཞིང་དབང་ཆེན་གྱི་བར་དུ་དཀྱིལ་འཁོར་གྱིས་རྡོ་རྗེའི་རང་བཞིན་དུ་བསྒོམ་མོ། །དེ་ལ་རྡོ་རྗེའི་སྐྱིལ་ཀྲུང་གིས་ས་གནོན་གྱི་ཕྱག་རྒྱ་བཅིང་བ་ནི་རྡོ་རྗེའི་གདན་གྱི་ཚུལ་ལོ། །ཏིང་ངེ་འཛིན་གྱི་ཕྱག་རྒྱ་བཅིང་བ་ནི་བསམ་ [12b.5]གཏན་གྱི་ཚུལ་ལོ། །བརླ་གཡས་པ་དང་བྱིན་པའི་དབུས་སུ་རྐང་པ་གཡོན་པ་བཞག་ནས་དེའི་སྟེང་དུ་བརླ་གཡོན་པ་དང་བྱིན་པའི་དབུས་སུ་གཡས་པ་བཞག་པ་ནི་རྡོ་རྗེ་སྐྱིལ་ཀྲུང་ངོ་། །བྱིན་པ་གཡས་པ་བྱིན་པ་གཡོན་པར་བཞག་སྟེ་པུས་མོ་གཉིས་སྨད་པ་ནི་པདྨའི་གདན་ནོ། །བརླ་གཡོན་པའི་ [12b.6]སྟེང་དུ་རྐང་པ་གཡས་པ་གཞག་ལ་གཡོན་པ་བརླ་གཡས་པའི་འོག་ཏུ་གཞག་པ་ནི་སེམས་དཔའི་སྐྱིལ་ཀྲུང་ངོ་། །རྐང་པ་གཡོན་པས་སྐྱིལ་ཀྲུང་ཕྱེད་པ་བྱས་ཏེ་དེ་དང་ཉེ་བར་པུས་མོ་གཡས་པ་སྟེང་དུ་དྲང་བར་བྱ་བ་ནི་དཔའ་བོའི་འདུག་སྟངས་སོ། །གཡོན་པ་སྐྱིལ་ཀྲུང་ཕྱེད་པ་བྱས་ཏེ་དེའི་སྟེང་དུ་པུས་མོ་ [12b.7]གཡས་པ་བསྙལ་ལ། རྐང་པ་གཡས་པ་བརླ་གཡོན་པའི་རྩར་གན་རྐྱལ་དུ་བཞག་པ་ནི་དཔའ་བོའི་འདུག་སྟངས་སོ་ཞེས་ཁ་ཅིག་གོ། །སྟན་མཐོན་པོ་ལ་གནས་ཏེ་རྐང་པ་གཉིས་དྲང་པོར་བཟུང་བ་ནི་བཟང་པོའི་འདུག་སྟངས་སོ། །རྐང་པ་གཉིས་མཐོ་གང་གི་བར་དུ་སྟན་ལ་བཀོད་ལ་ཙོག་པུར་གནས་ [13a] [13a.1]པ་ནི་ཙོག་པུའི་འདུག་སྟངས་སོ། །རྐང་པ་གཡས་པ་སེམས་དཔའི་སྐྱིལ་ཀྲུང་བཅས་ལ་འགྱིང་བ་དང་བཅས་པས་གཡོན་པ་བརྐྱང་བ་ནི་རོལ་པའི་འདུག་སྟངས་སོ། །རྐང་པ་གཉིས་ཁ་སྦྱར་ལ་འདུག་པ་ནི་བཀྲ་ཤིས་ཅན་ནོ། །རྡོ་རྗེའི་རྐང་སྟབས་ལ་སོགས་པ་འདི་རྣམས་ཇི་ལྟར་ [13a.2]རིགས་པར་རྡོ་རྗེའི་ལྟ་སྟངས་གཉིས་ལས་མདུན་དུ་བལྟ་བ་ནི་མདུན་དུ་ཕྱོགས་པ་དང་། རྒྱབ་ཏུ་ཕྱིར་ཕྱོགས་པ་སྟེ་ལྟ་བ་རྣམ་པ་གཉིས་དང་། སྒེག་པ་དང་། དཔའ་བ་དང་། མི་སྡུག་པ་དང་། དྲག་པོ་དང་། བཞད་པ་དང་། འཇིགས་སུ་རུང་བ་དང་། སྙིང་རྗེ་བ་དང་། རྨད་དུ་བྱུང་བ་དང་། ཞི་བའི་ [13a.3]ཉམས་མན་ངག་གི་སྙེ་མར་རྣམ་པར་ཕྱེ་བ་རྣམས་བསྒྲུབ་པར་བྱའོ། །རྡོ་རྗེའི་རྐང་སྟབས་ལ་སོགས་པ་ནས་རྡོ་རྗེའི་ལྟ་བའི་བར་གྱི་སྟང་སྟབས་རྣམས་ནི་སྒྱུ་འཕྲུལ་དྲ་བ་དང་། དཔལ་མཆོག་དང་པོ་དང་། ཁྲོ་བོ་རྣམ་པར་རྒྱལ་བ་ལ་སོགས་པའི་རྒྱུད་དུ་གསུངས་པ་འདིར་ཆེ་བ་རྣམས་བསྒྲུབ་པར་བྱའོ། །ཡོངས་ [13a.4]སུ་མི་ཤེས་པས་སམ་མི་ནུས་པས་སམ་བྱ་བ་བསྡུས་པ་ལ་དགའ་བས་སམ་མི་འདོད་པས་ཀྱང་རུང་སྟེ། རྡོ་རྗེའི་རྐང་སྟབས་ལ་སོགས་པ་ཐམས་ཅད་དམ་ཉུང་ཟད་མ་བསྒྲུབས་ན་ཡང་སྐབས་སུ་བབ་པ་ཉམས་པར་མི་འགྱུར་ཏེ། བགེགས་བསལ་བ་ནི་བསྐོར་བ་ལ་སོགས་པས་ཀྱང་འགྲུབ་པའི་ཕྱིར་རོ་ཞེས་ [13a.5]མན་ངག་རིག་པ་རྣམས་གསུང་ངོ་། །དེ་ནས་དཀྱིལ་འཁོར་གྱིས་གཞི་དྲིས་བྱུགས་ལ་མེ་ཏོག་དང་སྤོས་ལ་སོགས་པ་དང་ཟུར་བཞི་དང་སྒོ་བཞིར་སྤོས་ཕོར་ལ་སོགས་པ་དང་། གར་དང་གླུ་ལ་སོགས་པས་ཡང་དག་པར་མཆོད་ནས་ལག་པས་རེག་ཅིང་དཀྱིལ་འཁོར་གྱི་བདག་པོའི་སྔགས་བརྒྱ་རྩ་བརྒྱད་དང་། [13a.6]ཡི་གེ་བརྒྱ་པ་ལན་བདུན་བཟླས་ལ་དེ་ཉིད་དུ་ལྷའི་འཁོར་ལོ་སྤྲོ་ཞིང་བསྡུ་བས་ཉལ་བར་བྱའོ། །ས་ཡོངས་སུ་བཟུང་བའི་ཆོ་གའོ། །དེ་ནས་སྔ་བར་ལངས་ནས་འགྲོ་བ་རྡོ་རྗེ་འཆང་གི་གོ་འཕང་ལ་དགོད་པར་བྱ་བའི་ཆེད་དུ་བགེགས་མེད་པར་བྱའོ་ཞེས་བསམས་ནས། སྐད་ཅིག་གིས་སྟོང་ཉིད་ཀྱི་རྗེས་ལ་རཾ་ལས་བྱུང་ [13a.7]བའི་ཉི་མ་ལ་གནས་པའི་ཧཱུཾ་ལས་སྐྱེས་པའི་སྣ་ཚོགས་རྡོ་རྗེ་ལ་གནས་པའི་ཧཱུཾ་གི་འོད་ལས་བྱུང་བའི་རྡོ་རྗེ་འབར་བ་འཕྲོས་པས་མཚམས་མེད་ཅིང་དུམ་བུ་གཅིག་ཏུ་གྱུར་པའི་རྡོ་རྗེའི་རབ་དང་། གུར་དང་མདའི་དྲ་བ་དང་བླ་རེ་དང་། འོག་ཏུ་ས་གཞི་འབར་ཞིང་འོད་ཟེར་བཟོད་པར་དཀའ་བའི་སྣ་ཚོགས་རྡོ་རྗེའི་རང་ [13b] [13b.1]བཞིན་དུ་བསྒོམ་མོ། །དེའི་དབུས་སུ་སྐད་ཅིག་གིས་བདག་ཉིད་རྡོ་རྗེ་སེམས་དཔའི་ངོ་བོ་ཡོངས་སུ་གྱུར་ནས། ཁྲོ་བོ་འཇིག་རྟེན་གསུམ་ལས་རྣམ་པར་རྒྱལ་བ། མིང་གཞན་ནི་རྡོ་རྗེ་ཧཱུཾ་མཛད་ཅེས་པ་གཡས་བརྐྱང་བའི་ཞབས་ཀྱིས་སྣ་ཚོགས་པདྨ་དང་ཉི་མ་ལ་གནས་པའི་འཇིགས་བྱེད་དང་དུས་མཚན་ [13b.2]མནན་པ། རབ་ཏུ་ཁྲོས་པ་བསྐལ་བའི་མཐའི་མེ་ལྟར་འོད་ཟེར་གྱི་ཕུང་པོ་འབར་བ། འགྲོ་བ་མ་ལུས་པའི་བགེགས་ཀྱི་ཚོགས་ཟབ་ལྟ་བུ། སྔོ་བ་དང་སེར་བ་དང་། ལྗང་གུའི་མདོག་ཅན་གྱི་རྩ་བ་དང་། གཡས་པ་དང་། ཅིག་ཤོས་ཀྱི་ཞལ་གསུམ་གདངས་པ། མཆེ་བ་གཙིགས་པ། ལྗགས་འདྲིལ་ [13b.3]བ། ཞལ་རེ་རེ་ཞིང་སྨིན་མ་འཁྱུག་པ་ཁྲོ་གཉེར་དང་བཅས་པ། སྤྱན་གསུམ་དམར་ཞིང་ཟླུམ་པ། ཕྱག་རྒྱ་དྲུག་དང་ལྡན་པ། དཔྲལ་བར་ཐོད་པ་ལྔས་བརྒྱན་པ། ཁྲག་འཛག་པའི་མགོ་བོའི་ཕྲེང་བ་མགུལ་ལ་འཕྱང་བ། མགོ་བོ་དང་བཅས་པའི་སྐེ་རགས་ཅན། སྟག་གི་པགས་པའི་ན་བཟའ་འཕྱང་ [13b.4]བ། མཐའ་ཡས་ནག་པོས་བཅིངས་པའི་དབུ་སྐྲ་ཁམ་པ་གྱེན་དུ་འབར་བ། འཇོག་པོ་ལ་སོགས་པའི་ཀླུའི་རྒྱལ་པོ་བརྒྱད་ཀྱིས་བརྒྱན་པ། རྡོ་རྗེ་དང་དྲིལ་བུ་དང་ལྡན་པའི་ཕྱག་རྒྱ་གཉིས་ཀྱི་རྡོ་རྗེ་ཁུ་ཚུར་གཉིས་རྒྱབ་སྦྱར་ཏེ། མཐེའུ་ཆུང་གཉིས་སྤྲེལ་ཞིང་མཛུབ་མོ་གཉིས་བརྐྱང་བར་བྱས་པའི་འཇིག་ [13b.5]རྟེན་གསུམ་ལས་རྣམ་པར་རྒྱལ་བའི་ཕྱག་རྒྱས་རང་འོད་ཀྱི་ཤེས་རབ་དང་སྙོམས་པར་འཇུག་པ་ཕྱག་གཡས་པ་དག་གིས་ལྕགས་ཀྱུ་དང་ཞགས་པ་དང་། གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པ། ཡི་གེ་ཧཱུཾ་དྲག་པོ་སྒྲོགས་ཤིང་ཕྱོགས་སུ་ལྟ་བས་རང་གི་སྙིང་གར་ཧཱུཾ་ལས་སྤྲོས་པའི་འོད་ཟེར་གྱིས་ [13b.6]ཕྱོགས་བཅུའི་བགེགས་རྣམས་བཀུག་སྟེ། ཧཱུཾ་ལས་སྤྲོས་པའི་ཁྲོ་བོ་བཅུ་ལ་གཏད་པར་བྱའོ། །ཁྲོ་བོ་དེ་རྣམས་ཀྱིས་ཀྱང་སྲིད་དུ་སོར་བཅོ་བརྒྱད་པའམ། བཅུ་གཉིས་པའམ། བརྒྱད་པ་སྦོམ་དུ་རིམ་པ་བཞིན་དུ་སོར་དྲུག་པ་དང་བཞི་པ་དང་། དྲུག་ཆ་དང་བཅས་པའི་ཕྱེད་དང་གསུམ་པ་སེང་ལྡེང་ [13b.7]ལས་བྱས་པའམ། རུས་པ་ལས་བྱས་པའམ། ལྕགས་ལས་བྱས་པའི་ཕུར་པ་བཅུ་སྣོད་གསར་པར་བཞག་ལ་ཡུངས་ཀར་དང་། ཙནྡན་དམར་པོས་བྱུགས་ནས་ཚོན་སྐུད་ལྔས་དཀྲིས་ལ་མཆོད་དེ། དེ་རེ་རེ་ལ་མེ་ཏོག་གི་ཕྲེང་བ་དམར་པོས་བཅིངས་ཏེ། ལྟེ་བ་ནས་འོག་ཏུ་རྩེ་གཅིག་པའི་རྣམ་པ་ [14a] [14a.1]སྟེང་དུ་བདག་ཉིད་ཀྱི་གཟུགས་ཅན་བསྐལ་པའི་མཐའི་མེ་ལྟར་འབར་བར་བསྒོམས་ནས་གཡོན་པའི་རྡོ་རྗེ་ཁུ་ཚུར་གྱིས་བཟུང་སྟེ། ཕྱག་གཡས་པས་མཚན་པའི་གཙོ་བོ་ཡོངས་སུ་གྱུར་པའི་ཐོ་བ་མེ་ཏོག་དམར་པོའི་ཕྲེང་བ་བཅིངས་པ་བཟུང་ནས། སྒྲ་རིང་པོར་བརྗོད་པའི་ཧཱུཾ་ལས་ [14a.2]བྱུང་བའི་ཁྲོན་པ་བཅུར་བགེགས་དེ་རྣམས་བཅུག་ལ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བི་གྷྣཱ་ན་བིགྷྣཱ་ན་ཧཱུཾ་ཞེས་པའམ། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུ་ཥྚཱཾ་ཕཊ་ཕཊ་ཀཱི་ལ་ཡ་སརྦ་པཱ་པཾ་ཕཊ་ཕཊ་ཧཱུཾ་ཧཱུཾ་བཛྲ་ཀཱི་ལ་བཛྲ་དྷཱ་ར་ཨཱ་ཛྙཱ་པ་ཡ་ཏི་སརྦ་བི་གྷྣཱ་ན་ཀཱ་ཡ་ཝཱ་ཀྩི་ཏྟཾ་ཀཱི་ལ་ཡ་ཧཱུཾ་ཧཱུཾ་ཕཊ་ཕཊ་ཅེས་བརྗོད་པ་སྔོན་དུ་འགྲོ་ [14a.3]བས་མགོ་བོར་ཕུར་བུས་བཏབ་ནས། ཨོཾ་བཛྲ་མུངྒ་ར་ཨཱ་ཀོ་ཊ་ཡ་ཧཱུཾ་ཞེས་བརྗོད་ཅིང་བརྡུང་བར་བསམས་ལ། དབང་ལྡན་ནས་བཟུང་ནས་གཡས་སྐོར་དུ་དཀྱིལ་འཁོར་གྱི་ཕྱིའི་རྡོ་རྗེ་ཕྲེང་བའི་ཕྱི་རོལ་གྱི་འོད་ཟེར་གྱི་ཕྲེང་བའི་ཕྱོགས་བརྒྱད་དུ་དང་པོར་སློབ་དཔོན་གྱིས་གདབ་པ་དང་བརྡུང་བར་བྱའོ། །མི་ནུས་ [14a.4]ན་དེའི་རྗེས་ལ་སྒོའི་སློབ་དཔོན་རྣམས་ཀྱིས་སོ། །གཙུག་ཏོར་གྱི་ཕུར་བ་ནི་ཤར་གྱི་ཕུར་པ་ལས་ཤར་དུའོ། །གནོད་མཛེས་ཀྱི་ནི་ནུབ་ཀྱི་ཕུར་པ་ལས་ནུབ་ཏུ་གདབ་པར་བྱའོ། །གལ་ཏེ་ཡང་དེ་ཉིད་བསྡུས་པ་ལ་སོགས་པར་ཕྱིའི་འོད་ཟེར་གྱི་ཕྲེང་བ་ལ་གདབ་པོ་ཞེས་གསུངས་སོ། །དེ་ལྟ་ན་ཡང་ད་ལྟར་གྱི་སློབ་ [14a.5]དཔོན་རྣམས་ནི་དཀྱིལ་འཁོར་གྱི་ཁང་པ་ལས་ཕྱི་རོལ་དུ་ཕུར་པ་བཏབ་ནས། དེའི་སྟེང་དུ་སའི་གོང་བུ་བཅུ་བྱས་པར་ཕུར་པའི་གཟུགས་ཀྱི་ཁྲོ་བོ་རྣམས་ལ་ཐུན་སོ་སོ་ལ་མེ་ཏོག་ལ་སོགས་པ་དང་བདུག་པ་དང་གཏོར་མ་དབུལ་བ་རྣམས་ཀྱིས་མཉེས་པར་བྱའོ་ཞེས་གསུངས་ཤིང་མཛད་པ་ནི་མི་འགལ་ཏེ། གང་གི་ཕྱིར་ [14a.6]དེ་ལྟར་བྱས་ནས་ཡང་མངོན་པར་འདོད་པའི་དངོས་གྲུབ་འགྲུབ་པའི་ཕྱིར་རོ། །དེ་ལྟར་ཕུར་བུ་བཏབ་པ་དང་བརྡུང་བ་དག་གིས་བགེགས་ཀྱི་ཚོགས་བདེ་བ་ཆེན་པོས་དེ་བཞིན་ཉིད་དུ་རོ་གཅིག་པ་དང་། བགེགས་ལྷག་མ་རྣམས་ཀྱང་རིང་དུ་བྲོས་པར་བསམ་མོ། །དེ་ལྟ་བུས་སྟེང་དང་འོག་དང་ཕྱོགས་སུ་ཁོར་ [14a.7]ཡུག་ཆེན་པོའི་བར་དུ་འགྲོ་བ་རྣམས་རྣམ་པ་ཐམས་ཅད་དུ་བགེགས་མེད་པར་བརྟན་པར་མོས་པར་བྱའོ་ཞེས་རིམ་པ་གཅིག་གོ། །ཡང་ན་ཨོཾ་ཨཱཿཧཱུཾ་ཡ་མཱནྟ་ཀྲྀཏ་སརྦ་དུཥྚ་ཨིནྡྲ་ཨུ་པ་ཨིནྡྲ་ནཾ་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་པྲཛྙཱནྟ་ཀྲྀཏ་སརྦ་དུཥྚ་ཡ་མན་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་པདྨཱ་ནྟ་ཀྲི་ཏ་ [14b] [14b.1]སརྦ་དུཥྚ་ནཱ་གནས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་བི་གྷྣཱ་ནྟ་ཀྲྀ་ཏ་སརྦ་དུཥྚ་ཀུ་བེ་ར་ན་ས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཨ་ཙ་ལ་སརྦ་དུཥྚ་ཨཱི་ཤྭ་ན་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཊཀྐི་རཱ་ཛ་སརྦ་དུཥྚ་ཨ་གྣི་ན་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ནི་ལ་དཎྜ་སརྦ་དུ་ཥྚ་ན་ནཻ་རྲྀ་ཏ་ན་ས་པ་རི་ [14b.2]སཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་མ་ཧཱ་བ་ལ་སརྦ་དུཥྚ་བཱ་ཡུ་ན་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཙཀྲ་བརྟི་ན་སརྦ་དུཥྚ་ཨརྐ་ཙནྡྲ་པི་ཏ་མ་ཧཱ་ན་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་སུ་མྦྷ་སརྦ་དུཥྚ་བེ་མ་ཙི་ཏྲི་པྲྀ་ཐི་བཱི་དེ་བ་ཏཱ། ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཅེས་པའི་སྔགས་ཀྱིས་ཤར་ལ་སོགས་ [14b.3]པར་དབང་པོ་ལ་སོགས་པའི་ངོ་བོ་བགེགས་རྣམས་ལ་ཕུར་བུ་གདབ་པ་དང་བརྡུང་བར་བྱའོ། །གཞན་ཐམས་ཅད་ནི་སྔ་མ་བཞིན་ནོ་ཞེས་པ་རིམ་པ་གཉིས་པའོ། །ཁ་ཅིག་ནི་མཚམས་བཞི་ཁོ་ནར་ཕུར་པ་བཞི་གདབ་པོ་ཞེས་ཟེར་རོ། །སྒོ་རྣམས་ཁོ་ན་ལ་ཞེས་པ་ནི་གཞན་ནོ། །ཁྲོ་བོ་རྣམས་དང་དབང་པོ་ [14b.4]ལ་སོགས་པ་རྣམས་ཀྱི་ཁ་དོག་དང་དབྱིབས་ལ་སོགས་པ་འདོད་པར་གྱུར་ན་སྲུང་བའི་འཁོར་ལོ་རྒྱས་པར་བསྒོམ་པ་ནི་མན་ངག་གི་སྙེ་མར་རིག་པར་བྱའོ། །ཡང་ན་སིང་ལྡེང་ལ་སོགས་པའི་ཕུར་པ་མེད་པར་ཇི་ལྟར་བརྗོད་པའི་སྒོམ་པ་ཁོ་ནས་ཕུར་པ་གདབ་པ་དང་། བརྡུང་བ་བྱས་ལ་ལག་པ་གན་རྐྱལ་དུ་ [14b.5]གནས་པ་བསྒྱུར་ནས་ཨོཾ་ཨཱཿབཛྲ་ཧཱུཾ་ཞེས་བརྗོད་ཅིང་ས་ལ་བསྣུན་ཅིང་དེ་ལྟར་མོས་པར་བྱའོ། །བགེགས་ལ་ཕུར་བུས་གདབ་པའི་ཆོ་གའོ། །དེའི་རྗེས་ལ་དཀྱིལ་འཁོར་གྱི་སའི་དབུས་སུ་འདུག་སྟེ། དྲིའི་དཀྱིལ་འཁོར་བྱས་པར་རང་གི་མདུན་དུ་སའི་ལྷ་མོ་བཾ་ལས་བྱུང་བར་བསྒོམས་ནས་ལག་པ་ [14b.6]གཡས་པའི་ཟླ་བར་ཧཱུཾ་བསམས་ཏེ། སོར་མོའི་རྩེ་མོས་ལ་ལན་གསུམ་བསྣུན་པ་དང་། དེའི་སྒྲ་དང་ཧཱུཾ་གི་འོད་ཟེར་རྣམས་ཀྱིས་བསྐུལ་བས་སའི་ལྷ་མོ་ཡེ་ཤེས་སེམས་དཔའི་ངོ་བོ་འཐོན་པ་དང་ལྷན་ཅིག་འདྲེས་པར་གྱུར་པ་དགའ་བ་དང་ལྡན་པའི་ཐུགས་ཅན་སེར་མོ་ཞི་བ་ན་བཟའ་དཀར་པོ་ [14b.7]བསྣམས་པ་རྒྱན་སྣ་ཚོགས་ཅན། ཕྱག་གཡོན་པ་གསེར་གྱི་བུམ་པ་བཟང་པོ་བསྣམས་ཤིང་། ཅིག་ཤོས་ཀྱིས་མི་འཇིགས་པ་མཛད་པ། ཞལ་གཅིག་མ་མདུན་དུ་གནས་པ་ལ་མཆོད་ཡོན་ལ་སོགས་པ་སྔོན་དུ་འགྲོ་བས་མཆོད་པའི་མཇུག་ཐོག་ཏུ། ཨོཾ་ཚུར་སྤྱོན་ཚུར་སྤྱོན་ས་ཡི་ནི། །ལྷ་མོ་ [15a] [15a.1]ཆེན་མོ་འཇིག་རྟེན་ཡུམ། །རིན་ཆེན་ཀུན་གྱིས་རབ་གང་མ། །བཟང་པོའི་རྒྱན་གྱིས་རྣམ་བརྒྱན་མ། །དོ་ཤལ་རྐང་གདུབ་སྒྲ་ལྡན་མ། །རྡོ་རྗེ་སེམས་དཔའ་རབ་མཆོད་མ། །མཆོད་ཡོན་འདི་ནི་བཞེས་བྱས་ནས། །དཀྱིལ་འཁོར་ལས་ནི་ལེགས་བསྒྲུབ་མཛོད། ཧཱི་ཧཱི་ཧཱི་ཧཱི་ཧཱཾ་སྭཱ་ཧཱ་ [15a.2]ཞེས་ལན་གསུམ་བརྗོད་ལ་སྤྱན་དྲངས་པ་དང་། ཉེ་བར་གནས་པར་གསོལ་བ་དང་བཅས་པའི་ལྷ་དང་གནས་པར་བྱའོ། །ལེགས་བསྒྲུབ་མཛོད་ཅེས་པའི་ཤུགས་ཀྱིས་ནི་ཉེ་བར་གནས་པར་བརྗོད་དོ། །ཡང་ན། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་རྣམས་ [15a.3]དང་། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་དཔུང་བཅོམ་པ། །དེ་ལྟར་བདག་གིས་བདུད་ཀྱི་སྟོབས། །བཅོམ་ནས་དཀྱིལ་འཁོར་འདྲི་བར་བགྱི། །ཞེས་ལན་གསུམ་བརྗོད་ལ་ལྷག་པར་གནས་པར་བྱའོ། །དེ་ཡང་དེ་ལྟར་གྱིས་ཤིག་ཅེས་གསུངས་ནས་དེ་ [15a.4]ཉིད་དུ་ཐིམ་པར་བསམ་པར་བྱའོ། །དེ་ནས་རྡོ་རྗེ་བཅིང་བ་ནང་དུ་བྱས་ནས་དེས་ས་དེ་མནན་ལ་ཨོཾ་བཛྲཱི་བྷ་བ་ཧཱུཾ། ཞེས་ལན་གསུམ་བརྗོད་དེ་རྡོ་རྗེ་བསྡམས་པ་ལས་བྱུང་བའི་ཡི་གེ་ཧཱུཾ་འབར་བ་འཕྲོས་པས་དབང་ཆེན་གྱི་འོག་གི་བར་རྡོ་རྗེར་བྱས་པར་བསམས་ནས་ཨོཾ་བཛྲ་ཌི་ཌ་ཏི་ཥྛ་ཞེས་ལན་གསུམ་བརྗོད་པས་བྱིན་ [15a.5]གྱིས་བརླབ་པོ། །དེ་ནས་ས་རང་གི་དབང་དུ་འགྱུར་རོ། །ནོར་འཛིན་མ་ལྷག་པར་གནས་པའི་ཆོ་གའོ། །དེ་ནས་དཀྱིལ་འཁོར་གྱི་ས་ལ་དྲི་ཞིམ་པོའི་བདུད་རྩི་ལྔ་དང་བཅས་པ་ལ་ཡི་གེ་གསུམ་གྱིས་བསྔགས་པས་བྱུག་ཅིང་། མེ་ཏོག་གཅལ་དུ་དགྲམ་དུ་བཅུག་ལ། ཕྱི་དྲོའི་དུས་སུ་ཁྲུས་བྱ་ཞིང་ལུས་ལ་དྲི་ [15a.6]བཟང་པོས་བྱུགས་ཏེ་གོས་དམར་པོ་བཟང་པོ་གྱོན་ལ། མེ་ཏོག་གི་ཕྲེང་བ་ཅན་གྱི་ཞལ་དྲི་ཞིམ་པོས་བགོས་ལ། དོ་ཤལ་དང་། རྐང་གདུབ་དང་། རྣ་རྒྱན་དང་། དཔུང་རྒྱན་དང་། ལག་གདུབ་དང་། འོག་པག་དང་། སོར་གདུབ་ལ་སོགས་པའི་རྒྱན་གྱིས་བརྒྱན་ཏེ། ཨོཾ་ཧཱུཾ་སྭཱ་ཧཱ་ཞེས་པ་དང་། ཨོཾ་བཛྲ་ཨུ་ཥྞཱི་ཥ་ [15a.7]ཧཱུཾ་ཕཊ་ཅེས་པ་དག་གིས་གོ་རིམས་བཞིན་དུ་ལན་བདུན་དུ་བསྔགས་པའི་གོས་དམར་པོ་དང་ཅོད་པན་གྱིས་བརྒྱན་པ་དཀྱིལ་འཁོར་གྱི་གཞིའི་དབུས་སུ་ཤར་དུ་ཕྱོགས་པར་འདུག་པའམ། ཕྱོགས་གཞན་ལ་ནི་དཀྱིལ་འཁོར་གྱི་ཤར་ནས་ནུབ་ཏུ་ཕྱོགས་པས་འདུག་སྟེ། དཀྱིལ་འཁོར་གྱི་བདག་པོའི་རྣལ་ [15b] [15b.1]འབྱོར་དང་ལྡན་པས་ལྷ་རྣམས་ཀྱི་གནས་སུ་བདུད་རྩི་དང་། ཙནྡན་དང་། གུར་གུམ་ལ་སོགས་པས་མཎྜལ་རྣམས་བྱས་ལ་རང་གི་དམ་ཚིག་གི་འཁོར་ལོ་ཇི་ལྟ་བར་བསྒོམས་ནས་དེ་ལ་ནམ་མཁའ་ལ་གནས་པའི་ཡེ་ཤེས་ཀྱི་འཁོར་ལོ་སྤྱན་དྲངས་ནས་བཅུག་སྟེ། མཆོད་པ་དང་བསྟོད་པ་དང་བདུད་རྩི་ [15b.2]མྱང་བ་བྱའོ། །དེ་ནས་བསྒོམས་པའི་དཀྱིལ་འཁོར་གྱི་ཕྱི་རོལ་དུ་ཤར་ལ་སོགས་པའི་ཕྱོགས་སུ་གནས་པའི་བུམ་པ་རྣམས་སམ། ཕྱོགས་གཞན་ལ་ནི་བྱང་དུ་ཕྱོགས་པས་དབང་ལྡན་གྱི་མཚམས་ན་གནས་པའི་བུམ་པ་རྣམས་ལྷག་པར་གནས་པར་བྱའོ། །དེ་ལ་ཞི་བ་དང་། རྒྱས་པ་དག་གི་བུམ་ [15b.3]པའི་ལྟོ་བ་ནི་ཟླུམ་པོ་སོར་བཅུ་དྲུག་གོ། །ལྟོ་བའི་འོག་ནས་ཁ་དང་མཆུའི་བར་གྱི་དཔངས་སུ་ནི་སོར་ཉི་ཤུའོ། །ཁའི་མཚམས་ནས་འཕྱང་བའི་མཆུ་དག་ནི་སོར་གཉིས་སོ། །མགྲིན་པ་ནི་སོར་དྲུག་གོ། །མཆུའི་མཐའ་ནས་མཆུའི་མཐའི་བར་གྱི་ཁ་ནི་སོར་བརྒྱད་དོ། །སོར་བརྒྱད་ཀྱི་ཆ་ [15b.4]གཉིས་ནི་མགུལ་བའི་སྦུབས་སོ། །ཆ་གཅིག་གིས་ནི་བཅུ་གཉིས་ཀྱི་ཞེང་ངོ་། །དབྱེ་བ་དང་བསྐྲད་པ་དག་གི་ལྟོ་བ་ནི་ཟླུམ་པོར་སོར་བཅུ་གཉིས་སོ། །དཔངས་སུ་སོར་ཉི་ཤུ་རྩ་བཞིའོ། །སྐེ་བ་ཡོན་པོ་སྟེ་སོར་བརྒྱད་དོ། །ཁ་ནི་སོར་དྲུག་གོ། །མཆུ་གཉིས་ནི་སོར་རེ་རེའོ། །དབང་དང་ [15b.5]དགུག་པ་དག་གི་བུམ་པ་ནི་བཟོ་པོས་ཇི་ལྟར་བྱས་པའོ། །རེངས་པ་ལ་ནི་ཐུང་ཞིང་ཟླུམ་པ་དང་། དཔངས་སུ་སོར་བཅུ་དྲུག་གོ། །མགྲིན་པ་ནི་སོར་བཞིའོ། །ཁ་ནི་སོར་དྲུག་པའོ། །མཆུ་ནི་སྦོམ་ཞིང་སོར་གཉིས་པའོ། །ལས་ཐམས་ཅད་པ་ལ་ཞི་བ་ལ་སོགས་པའི་ལས་ལ་བརྗོད་པའི་བུམ་ [15b.6]པ་རྣམས་གཟུང་བར་བྱའོ། །འདི་ནི་དུས་ཀྱི་འཁོར་ལོ་ལས་གསུངས་པའོ། །དེ་ལས་གཞན་པའི་རྒྱུད་རྣམས་ལས་བུམ་པ་རྩ་བ་དང་ནག་ནོག་མེད་པ་ལ་མཆུ་འཕྱང་བ། མགྲིན་པ་རིང་བ། གསུས་པ་ཆེ་བ་རྣམས་ཞེས་གསུངས་པ་ཡང་སོར་བཅུ་དྲུག་པ་ལ་སོགས་པར་རིག་པར་བྱའོ། །འདིར་ [15b.7]ཀླུའི་བློ་གྲོས་ཞབས་ཀྱིས་གསུངས་པ། གསེར་རམ་དངུལ་ལམ་ཟངས་མའམ། །ཡང་ནས་ལས་བྱས་པ་ཉིད། །ཇི་ལྟར་རྙེད་པའི་བུམ་པ་ནི། །རབ་བཟང་བརྟུལ་ཞུགས་ཅན་གྱིས་དགོད། །ཅེས་སོ། །དེའི་ཕྱིར་གསེར་ལ་སོགས་པའི་བུམ་པ་བརྗོད་པའི་མཚན་ཉིད་དང་ལྡན་པ་སྙོང་པར་བྱས་ [16a] [16a.1]ནས། བཾ་ལས་རིན་པོ་ཆེའི་ངོ་བོར་བསྒོམས་ལ་ཞི་བ་དང་རྒྱས་པའི་དོན་དུ་འབྲས་བཏགས་པའམ། ཐོད་ལོ་ཀོར་རམ། ཙནྡན་གྱི་ལྡེ་གུས་དཀར་པོར་བྱས་ཏེ་ལྷའི་མཚན་མ་བྲིས་ཏེ་བདུད་རྩི་ལྔ་དང་བཅས་པའི་དྲིའི་ཆུ་དང་། རིན་པོ་ཆེ་དང་། སྨན་དང་། འབྲུ་ལྔ་དང་ལྡན་པ་ཡལ་འདབ་ [16a.2]ཀྱིས་ཁ་བརྒྱན་པ། སྐེ་ལ་མེ་ཏོག་ཕྲེང་བ་དང་བཅས་པའི་གོས་ཟུང་བཅིངས་པ་རྣམས་བླ་རེའི་འོག་ཏུ་འཆད་པར་འགྱུར་བའི་རྡུལ་ཚོན་གྱི་དཀྱིལ་འཁོར་གྱི་མཚན་མ་དགོད་པའི་རིམ་པས་སོ་སོར་དྲིའི་མཎྜལ་གྱི་སྟེང་དུ་རང་དང་མཐུན་པའི་གདན་ལ་དཀྱིལ་འཁོར་གྱི་རྣམ་པར་མདུན་དུ་བཀོད་ནས། ཆོ་ག་མཁས་ [16a.3]པས་གོས་སྟེང་དུ། །སྲད་བུ་དཀར་བཟང་དགོད་པར་བྱ། །ཞེས་གླུའི་བློ་གྲོས་ཞབས་ཀྱིས་གསུངས་ཤིང་མན་ངག་དེའི་ཕྱིར། ཧཱུཾ་ལན་བདུན་བཟླས་པའི་སྲད་བུ་དཀར་པོ་བདུན་གྱིས། ཨོཾ་བཛྲ་ཤི་ཁ་ར་རུ་ཊ་མ་ཊ་དི་ཤཾ་བནྡྷ་བནྡྷ་ཧཱུཾ་ཞེས་པའི་སྔགས་ཀྱིས་དཀྲི་བར་བྱའོ། །རྒྱུད་གཞན་དུ་ཞི་བ་ལ་སོགས་ [16a.4]པའི་ལས་དང་མཐུན་པའི་ཁ་དོག་ཅན་ལྔ་རྣམས་ཀྱིས་ཞེས་སོ། །རིན་པོ་ཆེ་ལྔ་ནི་མུ་ཏིག་དང་། གསེར་དང་། པདྨ་རཱ་ག་དང་། བྱེ་རུ་དང་མུ་མེན་ནོ། །པདྨ་རཱ་ག་མ་རྙེད་ན་དངུལ་ལམ་ཟངས་སམ་དུང་ངོ་། །མུ་མེན་གྱི་གནས་སུ་ནོར་བུ་ཡང་རུང་ངོ་། །འབྱོར་པ་ཆུང་ན་རྣམ་པར་རྒྱལ་བ་དང་། ལས་ཐམས་ཅད་ [16a.5]པའི་བུམ་པ་དག་ལ་རིན་པོ་ཆེ་སྙིང་བོར་བྱའི། བུམ་པ་གཞན་ལ་ནི་མ་ཡིན་ནོ། །དེ་ཡང་རྣམ་པར་རྒྱལ་བའི་བུམ་པ་ལ་ངེས་པར་རིན་པོ་ཆེའི་སྙིང་པོར་བྱའོ། །སྨན་ལྔ་ནི་བྲྀ་ཧ་ཏི་དང་། ཀཎྜ་ཀ་རི་དང་། དཎྜ་ཨུཏྤལ་དཀར་དམར་དང་། ཨ་པ་ར་ཛི་ཏ་དཀར་པོ་རྣམས་སོ། །འབྲུ་ལྔ་ནི་ཏིལ་དང་། ནས་དང་། མོན་ [16a.6]སྲན་དང་། འབྲས་སོ་བ་དང་། གྲོ་རྣམས་སོ། །ཁ་ཅིག་ཏུ་ནི་གྲོའི་གནས་སུ་མོན་སྲན་གྲེའུའོ། །ཨ་མྲ་དང་། ནཱ་ག་གེ་སར་དང་། ཨ་ཤོ་ཀ་དང་། ཨ་ཤྭདྠ་དང་། ཨུ་དུམྺཱ་ར་སྟེ་ལྔ་པོ་རྣམས་གང་ཡང་རུང་བའི་ཡལ་འདབ་པོ། །ནཱ་ག་གེ་སར་མེད་ན་ནྱ་གྲོ་དྷའམ། ཛམྦུའི་ལོ་མའོ། །གོས་ནི་དམར་པོ་ [16a.7]འམ། སེར་པོའམ་དཀར་པོའོ། །ཁ་ཅིག་ཏུ་ནི་ལྗང་གུ་དང་སྔོན་པོ་ཡང་གསུངས་སོ། །རྣམ་པར་རྒྱལ་བའི་བུམ་པ་ལ་ཆོས་འབྱུང་གི་དབུས་སུ་པདྨ་ལ་ཇི་ལྟར་རིགས་པར་ཟླ་བའམ་ཉི་མར་བདག་པོའི་མཚན་མའམ་ས་བོན་ནོ། །བུམ་པ་གཞན་རྣམས་ལ་ནི་པདྨ་ལ་གནས་པའི་ཟླ་བའམ་ཉི་མར་ཇི་ལྟར་ [16b] [16b.1]རིགས་པར་ལྷ་རྣམས་ཀྱི་རང་རང་གི་མཚན་མའམ་ས་བོན་ནོ། །དེ་སྐད་དུ་ཡང་ཀླུའི་བློའི་ཞབས་ཀྱིས། དཀྱིལ་འཁོར་པ་ནི་ཐམས་ཅད་ཀྱི། །ས་བོན་ཡང་ན་མཚན་མའང་རུང་། །གུར་གུམ་ལ་སོགས་མངོན་འདུས་བྱས། །མཁས་པས་བུམ་པའི་ལོགས་ལ་བྲི། །ཞེས་གསུངས་སོ། །དཀྱིལ་ [16b.2]འཁོར་གང་དུ་ལྷ་ཇི་སྙེད་ཡོད་པ་དེ་སྙེད་དུ་དེ་རྣམས་ཀྱི་བུམ་པའོ། །ཡང་ན་དབུས་ཀྱི་ཕོ་བྲང་གི་ལྷ་རྣམས་ཁོ་ནའིའོ། །དེ་ལ་རིགས་ཀྱི་ཡུམ་རྣམས་ཀྱི་བཞིའོ། །དེ་བཞིན་གཤེགས་པ་རྣམས་ཀྱི་ལྔའོ། །ཡང་ན་དེ་བཞིན་གཤེགས་པ་ཁོ་ནའི་ལྔའོ། །ཡང་ན་བདག་པོའི་གཅིག་དང་། དེ་བཞིན་ [16b.3]གཤེགས་པ་བཞིའི་གཅིག་དང་རིགས་ཀྱི་ཡུམ་བཞིའི་གཅིག་དང་། གཟུགས་རྡོ་རྗེ་ལ་སོགས་པ་དྲུག་གི་གཅིག་དང་། ཁྲོ་བོ་བཞིའི་གཅིག་སྟེ་ལྔའོ། །ཡང་ན་གཙོ་བོ་ཁོ་ནའི་གཅིག་གོ། །ཕྱོགས་འདི་རྣམས་ལ་ལས་ཐམས་ཅད་པའི་བུམ་པ་ལྷག་པར་བྱ་སྟེ། སློབ་མ་ལ་སོགས་པ་བསང་བའི་དོན་ [16b.4]དུའོ། །ཁ་ཅིག་གིས་ནི་འདི་མི་འདོད་དོ། །བུམ་པ་གཉིས་པ་ཡང་མེད་ན་རྣམ་པར་རྒྱལ་བའི་བུམ་པ་ལ་གཙོ་བོའི་མཚན་མ་དང་། དེའི་གཡོན་དུ་ལས་ཐམས་ཅད་པའི་མཚན་མ་བྲི་བར་བྱའོ་ཞེས་པ་ནི་ཕྱོགས་གཞན་ཏེ། དེའི་མཚན་མ་ནི་བགེགས་མཐར་བྱེད་ཀྱིའོ། །རྣམ་པར་སྣང་མཛད་ལ་ [16b.5]སོགས་པའི་མཚན་མ་བཞི་ཕྱོགས་བཞིར་བྲིའོ་ཞེས་པའི་ཕྱོགས་ལ་གཙོ་བོའི་མཚན་མ་ནི་རྣམ་པར་སྣང་མཛད་ཀྱི་མཚན་མའི་སྟེང་དུའོ། །ཁ་ཅིག་ཏུ་ནི་དེ་ཉིད་ཁའི་སྟེང་དུའོ་ཞེས་བཤད་དོ། །སྤྱན་མ་ལ་སོགས་པ་རྣམས་ཀྱི་ཡང་ཕྱོགས་བཞི་རུའོ་ཞེས་པ་ནི་ཕྱོགས་གཞན་ནོ། །ཡང་ན། སངས་རྒྱས་ [16b.6]ལྔ་དང་ལྷ་མོ་བཞི། །ཁྲོ་བོ་བཞི་ཡི་བུམ་པ་རྣམས། །སོ་སོར་འཁྱིལ་བའི་གཅིག་དང་ནི། །གཟུགས་ཀྱི་རྡོ་རྗེ་སོགས་དྲུག་ལའང་། །མཚན་མ་ལྷན་པ་གཅིག་ཡིན་ནོ། །ཞེས་བྱ་བས་བཅོ་ལྔའོ། །འགའ་ཞིག་གིས་བརྗོད་པའི་ཕྱོགས་རྣམས་ལས་ཕྱོགས་གཞན་དུ་བརྗོད་པ་ནི་མི་རིགས་སོ། ། [16b.7]དེ་ལྟར་འཇམ་པའི་རྡོ་རྗེའི་དཀྱིལ་འཁོར་ལ་ཉི་ཤུ་དང་། བཅུ་དང་། དྲུག་དང་། གཉིས་དང་། གཅིག་དང་། བཅོ་ལྔ་སྟེ་བུམ་པའི་གྲངས་རྣམ་པར་གཞག་པའོ། །བསྡུས་པའི་རིམ་པའི་དཀྱིལ་འཁོར་དུ་ལྔ་པ་གཉིས་པའི་ཕྱོགས་ལ་ནི། དེ་བཞིན་གཤེགས་པ་རྣམས་ཀྱི་གཅིག་གོ། །ཡུམ་རྣམས་ [17a] [17a.1]ཀྱི་གཅིག་གོ། །གཟུགས་རྡོ་རྗེ་མ་ལ་སོགས་པ་བཞིའི་གཅིག་གོ། །བྱང་ཆུབ་སེམས་དཔའ་བརྒྱད་ཀྱི་གཅིག་གོ། །ཁྲོ་བོ་བཅུའི་གཅིག་གོ་ཞེས་པ་ནི་ཁྱད་པར་རོ། །རང་ཕྱོགས་སྲས་གཉིས་བདག་གི་གཅིག། །ཁྲོ་དྲུག་བཙུན་མོ་རྣམས་ཀྱི་ཡང་། །ཕོ་བྲང་གནས་དང་སྒོ་ [17a.2]སྐྱོང་དང་། བགེགས་དགྲའི་རེ་རེ་ཉི་ཤུའོ། །ཞེས་པ་ནི་ཁ་ཅིག་གོ། །ཁ་སྦྱོར་དུ་གསུངས་པའི་རྡོ་རྗེ་དབྱིངས་ཀྱི་དཀྱིལ་འཁོར་དུ་ཕྱོགས་གཉིས་པའི་ལྔ་པ་ལ་ནི། ཕོ་བྲང་ན་གནས་པ་རྣམས་ཀྱི་གཅིག་གོ། །རིམ་པ་གཉིས་པར་གནས་པ་རྣམས་ཀྱི་གཅིག་གོ། །ཕྱོགས་ཀྱི་ལྷ་མོ་རྣམས་ཀྱི་གཅིག་གོ། ། [17a.3]མཚམས་ཀྱི་ལྷ་མོ་བརྒྱད་རྣམས་ཀྱི་གཅིག་གོ། །སྒོ་སྐྱོང་རྣམས་ཀྱི་གཅིག་གོ་ཞེས་པ་ནི་ཁྱད་པར་རོ། །དེ་བཞིན་གཤེགས་པ་དང་རིགས་ཀྱི་ཡུམ་དང་སྒོ་སྐྱོང་རྣམས་ཀྱི་བུམ་པ་སོ་སོར་རོ། །རིམ་པ་གཉིས་པར་གནས་པའི་ཕྱོགས་ཀྱི་ལྷ་མོ་རྣམས་ཀྱི་གཅིག་གོ། །མཚམས་ཀྱི་ལྷ་མོ་རྣམས་ཀྱི་གཅིག་གོ། ། [17a.4]རིམ་པ་གསུམ་པའི་ཕྱོགས་ཀྱི་གཡོན་ཕྱོགས་སུ་གནས་པ་རྣམས་ཀྱི་གཅིག་གོ། །གཡས་ཕྱོགས་ན་གནས་པ་རྣམས་ཀྱི་གཅིག་གོ། །མཚམས་སུ་གནས་པ་རྣམས་ཀྱི་གཅིག་གོ། །དེའི་ཕྱི་རོལ་དུ་མཚམས་སུ་གནས་པ་རྣམས་ཀྱི་གཅིག་གོ། །ལས་ཐམས་ཅད་པའི་གཅིག་སྟེ་དེ་ལྟར་ཉི་ཤུ་ཞེས་པ་ནི་ཁ་ཅིག་གོ། ། [17a.5]བདེ་མཆོག་གི་དཀྱིལ་འཁོར་ལ་ནི་འཁོར་ལོ་ལྔ་ལ་སོ་སོར་རེ་རེ་སྟེ་ལྔའོ། །ཡང་ན་ཕོ་བྲང་དུ་གནས་པ་རྣམས་ཁོ་ནའི་ལྔའོ། །ཡང་ན་འདི་རྣམས་ཀྱི་ལྔ་དང་འཁོར་ལོ་བཞིའི་བཞི་སྟེ་དགུའོ། །ཡང་ན་དབུས་ཀྱི་ཕོ་བྲང་དང་དམ་ཚིག་གི་འཁོར་ལོ་ལ་གནས་པ་རྣམས་ཀྱི་བཅུ་གསུམ་མོ། །ཐུགས་ཀྱི་འཁོར་ལོར་ཕྱོགས་ [17a.6]སུ་གནས་པ་རྣམས་ཀྱི་གཅིག་དང་། མཚམས་ཀྱི་གནས་པ་རྣམས་ཀྱི་གཅིག་གོ། །དེ་བཞིན་དུ་གསུང་གི་འཁོར་ལོ་དང་སྐུའི་འཁོར་ལོར་ཡང་དེ་བཅུ་དགུའོ། །ཕྱོགས་འདི་རྣམས་སུ་ལྷ་སོ་སོའི་དགོད་པ་ལས་ཀྱང་དུམ་སྐྱེས་མའི་ལས་ཐམས་ཅད་པའི་ལྷག་པར་དགོད་དོ། །འདིའི་རྗེས་སུ་འབྲངས་པས་ [17a.7]དཀྱིལ་འཁོར་གཞན་རྣམས་ལ་ཡང་ཇི་ལྟར་རིགས་པར་བུམ་པའི་གྲངས་རིག་པར་བྱའོ། །དེ་ལ་གཙོ་བོ་ཡིན་པའི་ཕྱིར་དང་བྱ་བ་མང་པོའི་ཕྱིར་རྣམ་པར་རྒྱལ་བའི་སྟེང་དུ་ཇི་ལྟར་རྙེད་པའི་བདུད་རྩི་ལྔ་དང་། དྲི་བཟང་གི་ཆུ་ཨོཾ་བཛྲ་ཨ་མྲྀ་ཏོ་ད་ཀ་ཋཿཧཱུཾ་ཞེས་བྱ་བ་དང་། ཡི་གེ་གསུམ་གྱིས་ལན་བདུན་བསྔགས་ [17b] [17b.1]པས་ཡེ་ཤེས་ཀྱི་བདུད་རྩིར་བྱས་པའི་རྡོ་རྗེའི་རྡུལ་ཕྲ་རབ་ཀྱི་རང་བཞིན་དང་ལྡན་པའི་དུང་ཆོས་སམ་པདྨའི་སྣོད་ཧཱུཾ་གིས་བསྔགས་པ་དང་། མེ་ཏོག་ཕྲེང་བ་བཅིངས་པའི་རྡོ་རྗེ་བཞག་ནས། ནང་དུ་ཨོཾ་ཏ་པྟེ་མ་ཧཱ་ཏཔྟེ་སྭཱ་ཧཱ། ཞེས་བྱ་བས་དྲངས་པའི་ལྷའི་གངྒཱའི་ཆུའི་ངོ་བོའི་ཆུ་ལ་ལྷའི་འཁོར་ལོའི་གདན་ [17b.2]དང་བཅས་པ་སྐད་ཅིག་གིས་བསམས་ལ་མདུན་དུ་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་འཁོར་ལོ་སྤྱན་དྲངས་ལ། ཞབས་བསིལ་དང་ཞལ་བསིལ་དང་། མཆོད་ཡོན་ཕུལ་ལ་དེ་ནས་དེ་དམ་ཚིག་གི་འཁོར་ལོ་ལ་བཅུག་ནས་འདོད་ཆགས་ཆེན་པོས་ཞུ་བར་གྱུར་ནས་བྱང་ཆུབ་སེམས་ཀྱི་ངོ་ [17b.3]བོར་སྔར་བླུགས་པའི་ཆུ་དང་རོ་གཅིག་ཏུ་གྱུར་པར་བསམ་མོ། །མཚན་མ་ལ་ཡང་དམ་ཚིག་གི་ལྷ་དང་ཡེ་ཤེས་ཀྱི་ལྷ་གཅིག་ཏུ་གྱུར་པར་བསམ་མོ། །དེ་ནས་ཧཱུཾ་བརྗོད་ཅིང་རྡོ་རྗེ་དང་འབྲེལ་བའི་མེ་ཏོག་གི་ཕྲེང་བའི་མཐའ་གཡོན་པའི་ཁུ་ཚུར་གྱིས་བཟུང་ལ་འཁོར་ལོའི་གཙོ་བོའི་སྙིང་པོའི་སྔགས་སམ་ཨོཾ་བཛྲོད་ [17b.4]ཀ་ཧཱུཾ་ཞེས་བྱ་བས་ཆུ་ལ་བརྒྱ་རྩ་བརྒྱད་བསྔགས་ནས་དེར་འཁྱིལ་པ་བཟླས་པའི་མེ་ཏོག་དཀར་པོ་གསུམ་གཞུག་པར་བྱའོ། །བུམ་པ་གཞན་ལྷ་གང་དང་གང་ཡིན་པ་དེ་དང་དེའི་སྔགས་ཀྱིས་བརྒྱ་རྩ་བརྒྱད་དམ་ཉི་ཤུ་རྩ་གཅིག་གམ་བདུན་དུ་བཟླས་ཏེ་སྟེང་གི་རྡོ་རྗེ་མེ་ཏོག་གི་ཕྲེང་བའི་མཐར་དེ་ལྟར་བཟུང་ནས་ [17b.5]སོ། །དེ་བཞིན་དུ་མེ་ཏོག་ཀྱང་གཞུག་པར་བྱའོ། །དེ་ནས་རྣམ་པར་རྒྱལ་བ་ལ་སོགས་པའི་བུམ་པ་རྣམས་ལ་མེ་ཏོག་ལ་སོགས་པས་ཡང་དག་པར་མཆོད་ལ། བསྲུང་བའི་དོན་དུ་ལས་ཐམས་ཅད་པའི་བུམ་པའི་ཆུས་དེའི་ཡལ་འདབ་ཉིད་ཀྱིས་བསངས་ཏེ། འདིར་ཇི་སྲིད་དུ་དཀྱིལ་འཁོར་གྱི་བྱ་ [17b.6]བ་རྣམས་རྫོགས་པ་དེ་སྲིད་དུ་བགེགས་རྣམས་བཟློག་པར་མཛོད་ཅིག་ཅེས་བརྗོད་ཅིང་གཏོར་མ་བྱིན་ནས་ཉེ་བར་རེག་སྟེ། མི་བསྐྱོད་རྡོ་རྗེ་ཞེས་བྱ་བ་ལ་སོགས་པའི་བསྟོད་པ་སྔོན་དུ་འགྲོ་བས་དྲིལ་བུ་དཀྲོལ་བར་བྱའོ། །བདག་ཉིད་དང་སློབ་མ་རྣམས་ལ་ཡང་བསང་གཏོར་བྱ་བའི་དོན་དུ་བུམ་པ་དེ་རྣམས་ [17b.7]ལས་ཆུ་ཉུང་ཟད་བླངས་ལ་དཀྱིལ་འཁོར་ཁང་པའི་ཤར་སྒོའི་བྱང་གི་ཆར་མན་ཇི་ལ་གནས་པའི་དུང་ཆོས་ལ་སོགས་པར་གཞག་གོ། །གཞན་དུ་ནི་ལས་ཐམས་ཅད་པའི་བུམ་པ་ཉིད་ཀུ་ཤའི་ཆུན་པོ་དང་ལྡན་པ་དེའི་དོན་དུ་དེར་གཞག་པར་བྱའོ་ཞེས་སོ། །བུམ་པ་རྣམས་ལ་མངོན་པར་བསྔགས་པ་དང་། [18a] [18a.1]མཆོད་པ་ལ་སོགས་པ་ཉི་མ་སོ་སོར་ཐུན་གསུམ་མམ་གཅིག་ཏུ་བྱའོ། །འཁོར་ལོའི་གཙོ་བོ་ལ་སོགས་པའི་སྔགས་ནི་སྒྲུབ་ཐབས་ལ་སོགས་པ་རྣམས་ཀྱི་ནང་དུ་ཤེས་པར་བྱའོ། །སླར་མདོར་བསྡུས་པ་ནི་རྫོགས་པའི་རྣལ་འབྱོར་གྱི་ཕྲེང་བ་ཕལ་ཆེར་གྲགས་པའི་ཕྱིར་ཁ་ཅིག་བརྗོད་ [18a.2]པར་བྱ་སྟེ། དེ་ལ་འཇམ་པའི་རྡོ་རྗེའི་དཀྱིལ་འཁོར་ལ་གཙོ་བོ་མི་བསྐྱོད་པ་དང་ལྷན་ཅིག་དབྱེར་མེད་པའི་ཨོཾ་ཨཱཿམཱཾ་ཧཱུཾ། རྣམ་པར་སྣང་མཛད་ཀྱི་ཨོཾ་ཨཱཿཛི་ན་ཛིཀ་ཧཱུཾ། རིན་ཆེན་འབྱུང་ལྡན་གྱི་ཨོཾ་ཨཱཿརཏྣ་དྷྲྀཀ་ཧཱུཾ། སྣང་བ་མཐའ་ཡས་ཀྱི་ཨོཾ་ཨཱཿཨཱ་རོ་ལྀ་ཀ་ཧཱུཾ། དོན་ཡོད་གྲུབ་པའི་ཨོཾ་ཨཱཿ་པྲཛྙཱ་དྷྲྀ་ཀ་ཧཱུཾ། [18a.3]སྤྱན་མའི་ཨོཾ་ཨཱཿམོ་ཧ་ར་ཏཱི་ཧཱུཾ། མཱ་མ་ཀཱིའི་ཨོཾ་ཨཱཿདྭེ་ཥ་ར་ཏཱི་ཧཱུཾ། གོས་དཀར་མོའི་ཨོཾ་ཨཱཿརཱ་ག་ར་ཏཱི་ཧཱུཾ། སྒྲོལ་མའི་ཨོཾ་ཨཱཿབཛྲ་ར་ཏཱི་ཧཱུཾ། གཟུགས་རྡོ་རྗེ་མའི་ཨོཾ་ཨཱཿརཱུ་པ་བཛྲ་ཛཿཧཱུཾ། སྒྲ་རྡོ་རྗེ་མའི་ཨོཾ་ཨཱཿཤབྟ་བཛྲེ་ཧཱུཾ་ཧཱུཾ། དྲི་རྡོ་རྗེ་མའི་ཨོཾ་ཨཱཿགནྡྷ་བཛྲེ་བཾ་ཧཱུཾ། རོ་རྡོ་རྗེ་མའི་ཨོཾ་ཨཱཿརཱ་ས་བཛྲ་ཧོཿཧཱུཾ། རེག་ [18a.4]བྱ་རྡོ་རྗེ་མའི་ཨོཾ་ཨཱཿསྤ་ཪྵེ་བཛྲེ་ཁཾ་ཧཱུཾ། ཆོས་ཀྱི་དབྱིངས་ཀྱི་རྡོ་རྗེ་མའི་ཨོཾ་ཨཱཿདྷརྨ་དྷཱ་ཏུ་བཛྲེ་རཾ་ཧཱུཾ། གཤིན་རྗེ་གཤེད་ཀྱི་ཨོཾ་ཨཱཿཡ་མཱནྟ་ཀྲྀཏ་ཧཱུཾ། ཤེས་རབ་མཐར་བྱེད་ཀྱི་ཨོཾ་ཨཱཿཔྲཛྙཱནྟ་ཀྲྀཏ་ཧཱུཾ། པདྨ་མཐར་བྱེད་ཀྱི་ཨོཾ་ཨཱཿཔདྨཱནྟ་ཀྲྀཏ་ཧཱུཾ། བདུད་རྩི་འཁྱིལ་པའི་ཨོཾ་ཨཱཿབིགྷྣཱནྟ་ཀྲྀཏ་ཧཱུཾ། གང་གི་ཚེ་འཇམ་པའི་ [18a.5]རྡོ་རྗེ་དང་དབྱེར་མེད་པའི་མི་བསྐྱོད་པས་འཁོར་ལོའི་གཙོ་བོ་བྱེད་པ་དེའི་ཚེ་ཨོཾ་ཨཱཿ བཛྲ་དྷྲྀཀ་ཧཱུཾ་ངོ་། །བསྡུས་པའི་རིམ་པའི་དཀྱིལ་འཁོར་ལ་མི་བསྐྱོད་པ་ལ་སོགས་པ་རྣམས་ཀྱི་སྔགས་ནི་སྔར་བརྗོད་པ་ཉིད་དོ། །བྱམས་པ་ལ་སོགས་པ་རྣམས་ཀྱི་ཨོཾ་ཨཱཿམཻ་ཏྲི་ཡ་མཾ་ཧཱུཾ། ཨོཾ་ཨཱཿཀྵི་ཏི་གརྦྷ་ཐླྷིཾ་ཧཱུཾ། ཨོཾ་ཨཱཿ [18a.6]བཛྲ་པཱ་ཎི་ཨོཾ་ཧཱུཾ། ཨོཾ་ཨཱཿཁ་གརྦྷ་ཨོཾ་ཧཱུཾ། ཨོཾ་ཨཱཿལོ་ཀེ་ཤྭ་ར་ཨོཾ་ཧཱུཾ། ཨོཾ་ཨཱཿམཉྫུ་གྷོ་ཥ་ཧཱུཾ་ཧཱུཾ། ཨོཾ་ཨཱཿསརྦ་ནི་བ་ར་ཎ་བིསྐཾ་བྷི་ནི་ཨོཾ་ཧཱུཾ། ཨོཾ་ཨཱཿས་མནྟ་བྷ་དྲ་སཾ་ཧཱུཾ། ཨོཾ་ཨཱཿཨ་ཙ་ལ་ཧཱུཾ་ཧཱུཾ། ཨོཾ་ཨཱཿཊ་ཀི་རཱ་ཛ་ཧཱུཾ་ཧཱུཾ། ཨོཾ་ཨཱཿནཱི་ལ་དཎྜ་ཧཱུཾ་ཧཱུཾ། ཨོཾ་ཨཱཿམ་ཧཱ་བ་ལ་ཧཱུཾ་ཧཱུཾ། ཨོཾ་ཨཱཿཨུཥྞཱི་ཥ་ཧཱུཾ་ཧཱུཾ། ཨོཾ་ཨཱཿསུམྦྷ་ [18a.7]ཧཱུཾ་ཧཱུཾ། གང་གི་ཚེ་མི་བསྐྱོད་པ་དང་དབྱེར་མེད་པའི་རྡོ་རྗེ་སེམས་དཔའ་འཁོར་ལོའི་གཙོ་བོ་བྱེད་པ་དེའི་ཚེ་འདིར་ཨོཾ་ཨཱཿཧཱུཾ་ཧཱུཾ་ཞེས་པ་སྔགས་སོ། །ཁ་སྦྱོར་དུ་གསུངས་པའི་རྡོ་རྗེ་སེམས་དཔའི་དཀྱིལ་འཁོར་ལ་ནི། ཨོཾ་ཨཱཿབཛྲ་ཨ་མྲྀ་ཏ་མ་ཧཱ་སུ་ཁ་ཧཱཾ་སྭཱ་ཧཱ། ཞེས་པ་ནི་འཁོར་ལོའི་གཙོ་བོ་རྡོ་རྗེ་སེམས་ [18b] [18b.1]དཔའི་སྙིང་པོའི་སྔགས་སོ། །ཨོཾ་ཨཱཿབཛྲ་གྷ་ཎྚེ་ཧོཿཧཾ་སྭཱ་ཧཱ། ཞེས་པ་རྡོ་རྗེ་དྲིལ་བུ་མའི་སྔགས་ཏེ་ལས་ཐམས་ཅད་པའོ། །སྔགས་གཞན་རྣམས་ནི་རྒྱུད་ཉིད་དུ་ཕྱོགས་གཅིག་ཏུ་གསུངས་སོ། །འཁོར་ལོ་སྡོམ་པའི་དཀྱིལ་འཁོར་དུ་གཙོ་བོའོ། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ། ཌཱ་ཀི་ནི་ཛཱ་ལ་སཾ་ཝར་ [18b.2]སྭཱ་ཧཱ་ཞེས་པ་ནི་སྙིང་པོའོ། །ཨོཾ་ཁཎྜ་རོ་ཧི་ཧཱུཾ་ཧཱུཾ་ཕཊ་ཞེས་པ་ནི་དུམ་སྐྱེས་མའི་སྔགས་ཏེ་ལས་ཐམས་ཅད་པའོ། །དཀྱིལ་འཁོར་པ་གཞན་རྣམས་ཀྱི་སྔགས་ནི་བདེ་མཆོག་གི་མངོན་པར་རྟོགས་པར་ཁོ་བོས་གདམས་ངག་དང་བཅས་པ་བྲིས་སོ། །ཀྱེའི་རྡོ་རྗེའི་དཀྱིལ་འཁོར་དུ་ནི་འཁོར་ལོའི་གཙོ་བོའི་ཨོཾ་དེ་ [18b.3]ཝ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་སྙིང་པོའོ། །ཨོཾ་ཨཱཿ་སྭཱ་ཧཱ་ཞེས་པའམ། ཨོཾ་ཨཱཿབཛྲ་གྷསྨ་རཱི་ཨོཾ་ཧཱུཾ་སྭཱ་ཧཱ། ཞེས་པ་ཟ་ཕོད་མའི་སྔགས་ཏེ་ལས་ཐམས་ཅད་པའོ། །སྔགས་གཞན་རྣམས་ནི་ཁ་སྦྱོར་དུ་བསྡུས་སོ། །དེ་ཁོ་ན་ཉིད་བསྡུས་པར་གསུངས་པའི་རྡོ་རྗེ་དབྱིངས་ཀྱི་དཀྱིལ་འཁོར་ལོ་ནི་ [18b.4]འཁོར་ལོའི་གཙོ་བོའི་ཨོཾ་སརྦ་ཏ་ཐཱ་ག་ཏ་མ་ཧཱ་ཡོ་གི་ཤྭ་རཱ་ཧཱུཾ་ཞེས་པ་ནི་སྙིང་པོའོ། །ཨོཾ་བཛྲ་ཡཀྵ་ཧཱུཾ་ཞེས་པ་རྡོ་རྗེ་གནོད་སྦྱིན་གྱི་སྔགས་ཏེ། ལས་ཐམས་ཅད་པའོ། །གཞན་ནི་དེ་ཁོ་ན་ཉིད་བསྡུས་པའི་རྒྱུད་དུ་ཡང་དག་པར་བསྡུས་སོ། །འདིར་དཀྱིལ་འཁོར་ལ་སོགས་པའི་ལས་ལ་ཉེ་བར་མཁོ་བའི་ [18b.5]ཕྱིར། དང་པོར་རྡུལ་ཚོན་དཀར་པོ་ལ་སོགས་པས་པདྨ་འདབ་མ་བརྒྱད་པ་བྲིས་པའི་ལྟེ་བར་རྣམ་རྒྱལ་གྱི་བུམ་པའམ་ལས་ཐམས་ཅད་པའི་བུམ་པ་གཞག་གོ། །ཤར་གྱི་འདབ་མ་ལ་འཆད་པར་འགྱུར་བའི་ཆོ་གས་ལྷག་པར་གནས་པར་བྱས་པའི་ཚོན་སྣ་ལྔའི་ཐིག་སྐུད་གནས་པའི་སྣོད་དོ། ། [18b.6]ལྷོར་རྡོ་རྗེའོ། །བྱང་དུ་རྡོ་རྗེ་དྲིལ་བུའོ། །ནུབ་དང་མཚམས་ཀྱི་འདབ་མ་རྣམས་ལ་ནི་ཇི་ལྟར་རིགས་པའི་རྡུལ་ཚོན་ལྔའི་སྣོད་རྣམས་སོ། །བུམ་པ་དེའི་ཆུ་ལ་འཁྱིལ་བའི་སྔགས་སམ། ཨོཾ་ཨཱ་ཨཱ་ཨཾ་ཨཿཞེས་པ་བརྗོད་ཅིང་ཚོན་དང་ཐིག་ལ་བསང་གཏོར་བྱའོ། །བུམ་པ་ལྷག་པར་གནས་པའི་ [18b.7]ཆོ་གའོ། །དེ་ནས་དཀྱིལ་འཁོར་གྱིས་གཞི་དྲི་བཟང་པོ་ལ་སོགས་པས་བྱུག་ཅིང་མེ་ཏོག་གི་གཅལ་བཀྲམ་སྟེ། དེར་ནུབ་ཏུ་ཕྱོགས་པས་བདུད་རྩི་ལྔ་དང་བཅས་པ་དྲི་བཟང་པོས་ཇི་ལྟར་འབྱུང་བའི་བདག་པོ་ལྔའི་ལེའུ་ཚེ་རྣམས་སུ་མཎྜལ་གྲུ་བཞི་པ་དང་། ལྷ་གཞན་རྣམས་ལ་ཟླུམ་པོར་བྱས་ལ། [19a] [19a.1]མཎྜལ་དེ་རྣམས་སུ་རང་གི་སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་པའི་འཁོར་ལོའི་གཙོ་བོ་ལ་སོགས་པའི་ལྷའི་དཀྱིལ་འཁོར་ཇི་ལྟར་རིགས་པར་པདྨ་ལ་གནས་པའི་ཟླ་བའམ་ཉི་མ་རྣམས་ལ་བཀོད་ནས། ཞབས་བསིལ་ལ་སོགས་པ་སྔོན་དུ་འགྲོ་བས་མཆོད་པ་དང་། བསྟོད་པ་ [19a.2]དང་བདུད་རྩི་མྱང་བ་བྱ་སྟེ། པུས་མོ་གཡས་པ་ས་ལ་བཙུགས་ཤིང་ལྕེ་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་བྱས་པར་ཧཱུཾ་བཀོད་དེ། ལག་པ་གཡས་པར་སྤོས་ཕོར་ཐོགས་ཏེ་གཡོན་པས་རྡོ་རྗེ་དྲིལ་བུ་དཀྲོལ་ཞིང་། བཅོམ་ལྡན་ཆེ་གེ་རྡོ་རྗེ་མཆོག །རིག་པའི་རྒྱལ་པོ་ཁྱོད་ལ་འདུད། །སློབ་མ་རྣམས་ལ་ [19a.3]བརྩེ་ཕྱིར་དང་། །ཁྱེད་རྣམས་ལ་ཡང་མཆོད་པའི་ཕྱིར། །མགོན་པོ་ཐུགས་རྗེའི་བདག་ཉིད་ཅན། །དཀྱིལ་འཁོར་འདྲི་བར་བདག་འཚལ་ལོ། །དེ་ཕྱིར་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པར་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་ [19a.4]འབྲས་གནས་དང་། །གཞན་ཡང་གང་དག་གསང་སྔགས་ལྷ། །ལྷ་དང་འཇིག་རྟེན་སྐྱོང་བ་དང་། །འབྱུང་པོ་བྱང་ཆུབ་བསྟན་གནས་དང་། །སེམས་ཅན་བསྟན་ལ་མངོན་དགའ་བ། །གང་སུ་རྡོ་རྗེའི་སྤྱན་མངའ་རྣམས། །བདག་ལ་ཡང་དག་དགོངས་སུ་གསོལ། །བདག་ནི་ཆེ་གེ་རྡོ་རྗེ་ཅན། །ཆོ་ག་ [19a.5]འབྱུང་བའི་དཀྱིལ་འཁོར་ནི། །ཇི་ལྟར་ནུས་པའི་ཉེར་སྤྱོད་པས། །འགྲོ་བ་སྦྱང་ཕྱིར་བྲི་བར་བྱ། །དེ་ཕྱིར་བདག་དང་སློབ་མ་ལ། །རྗེས་སུ་བརྩེ་བས་ཉེར་བཟུང་ནས། །དཀྱིལ་འཁོར་དང་བཅས་ཐམས་ཅད་ནི། །ཉེ་བར་བྱོན་པར་མཛད་པར་རིགས། །ཞེས་དོན་མངོན་དུ་བྱེད་ཅིང་ལན་གསུམ་ [19a.6]དུ་བརྗོད་པས་གསོལ་བ་གདབ་པར་བྱའོ། །འགྲོ་འཁོར་བྱ་དོན་སྩོལ་ནི་འགྲོ་བ་ལ་དཀྱིལ་འཁོར་གྱི་བྱ་བ་རྣམས་ཀྱི་དོན་རབ་ཏུ་སྩོལ་བའོ། །སེམས་ཅན་ནི་མི་ལ་སོགས་པའོ། །རྡོ་རྗེའི་སྤྱན་ནི་ལྷའི་མིག་གོ། །ལྷ་ལྷག་པར་གནས་པའི་ཆོ་གའོ། །དེ་ནས། དམ་ཚིག་ཉམས་པར་དོགས་པ་ཡི། །སློབ་མ་ [19a.7]མིན་པ་གཞུག་མི་བྱ། །ཞེས་གསུངས་པའི་ཕྱིར་ཤར་སྒོར་འདུག་སྟེ་འཆད་པར་འགྱུར་བའི་སྡོམ་པ་གཉིས་སྦྱིན་པ་སྔོན་དུ་འགྲོ་བའི་ལྷག་པར་གནས་པའི་ཆོ་གས་སམ། སློབ་དཔོན་གྱི་སྡོམ་པ་སྦྱིན་པ་སྔོན་དུ་འགྲོ་བའི་ལྷག་པར་གནས་པའི་ཆོ་གས་སྔར་རང་ཉིད་ཀྱིས་དབང་མ་བྱིན་པར་གདུལ་བྱ་ [19b] [19b.1]སྒོའི་སློབ་དཔོན་དུ་འོས་པ་རྣམས་ལ་ལྷག་པར་གནས་པར་བྱའོ། །དེ་དག་ཀྱང་བཞི་དང་། མེད་ན་གཉིས་སམ། གསུམ་མམ། ཐ་ན་གཅིག་གིས་ཀྱང་བྱ་བར་འདོད་དོ། །དེ་རྣམས་ལས་གཞན་དེ་ལྟར་བྱས་པའི་སློབ་མ་ལྔ་པ་ནི་ལས་ཀྱི་རྡོ་རྗེར་བྱའོ་ཞེས་རྒྱུད་གཞན་དུ་འདོད་དེ། མེད་ན་དེ་རྣམས་ཉིད་དོ། ། [19b.2]དེ་ལྟར་སློབ་མ་ལྷག་པར་གནས་པའི་དོན་དུ་ལྷའི་དཀྱིལ་འཁོར་བཀོད་པ་རྣམས་མཆོད་དེ། ཡེ་ཤེས་ཀྱི་ཐིག་ལ་སོགས་པའི་དོན་དུ་དཀྱིལ་འཁོར་གྱིས་གཞིའི་སྟེང་དུ་ནམ་མཁའ་ལ་བློས་བཀོད་ནས་ཤར་དུ་ཕྱོགས་ཏེ་རྡོ་རྗེ་འཆང་གི་རྣལ་འབྱོར་རམ་དཀྱིལ་འཁོར་གྱི་གཙོ་བོའི་རྣལ་འབྱོར་དང་ལྡན་ཞིང་ [19b.3]མཚན་མ་ཐོབ་པས། གཞོན་ནུ་མ་མ་ཉམས་པས་བཀལ་བའམ། དཔའ་བོའི་རིན་གྱིས་ཉོས་པའི་སྐུད་པ་ལྔ་པ་ལྔ་སྣོད་ལྔར་གནས་པ་རྣམས་དྲི་ཞིམ་པོའི་ཚོན་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོ་རྣམས་ཡུངས་ཀར་གྱི་ཕྱེ་མ་དང་། བདུད་རྩི་ལྔ་དང་བསྲེས་པ་རྣམས་ཀྱིས་ [19b.4]སོ་སོར་ཁ་བསྒྱུར་ཏེ། གཡོན་པའི་ལག་མཐིལ་དུ་སོར་མོའི་རྩེ་མོ་ནས་བརྩམས་ཏེ་མཐེ་བོའི་རྩ་བའི་བར་དུ་བཀོད་ལ། བྷྲཱུཾ་ཨོཾ་ཧྲཱིཿཁཾ་ཧཱུཾ་གི་ཡི་གེ་རྣམས་སམ། བྷྲཱུཾ་ཨཱཾ་ཛྲཱིཾ་ཁཾ་ཧཱུཾ་གི་ཡི་གེ་རྣམས་སམ། ཨོཾ་ཨ་སྭ་ཧ་ཧཱུཾ་རྣམས་སམ། རྒྱུད་ཇི་ལྟ་བར་བསྐྱེད་པའི་དེ་བཞིན་གཤེགས་པ་ལྔའི་ངོ་པོར་གྱུར་པར་བསྒོམས་ [19b.5]ནས་ནམ་མཁའ་ལ་བཞུགས་སུ་གསོལ་བའི་རང་རང་གི་ཕྱོགས་ཀྱི་དེ་བཞིན་གཤེགས་པ་བསྡུས་པར་གྱུར་པའི་དེ་བཞིན་གཤེགས་པ་ལྔའི་ཐུགས་ཀར་བྷྲཱུཾ་ལ་སོགས་པ་ལས་གྲུབ་པའི་ཡེ་ཤེས་ཀྱི་སྐུད་པ་འོད་ཟེར་གྱི་རང་བཞིན་བལྟས་ལ། ཨོཾ་ཨཱཿཤཱ་ཤོ་ཏ་བཛྲ་སུ་ཏྲཾ་མེ་པྲ་ཡཙྪ་མ་ཧཱ་མཎྜལ་སཱུ་ཏྲ་ན་ཡ་ཧཱུཾ་ཞེས་ [19b.6]པས་རྣམ་པར་སྣང་མཛད་དང་མིང་བསྒྱུར་ནས་རིན་ཆེན་འབྱུང་ལྡན་ལ་སོགས་པ་རྣམས་ལ་ཡང་གསོལ་བ་གདབ་པར་བྱའོ། །མིག་གཉིས་ཛཿ་ལས་བསྐྱེད་བའི་ཟླ་བ་དང་ཉི་མ་སེར་པོའི་རང་བཞིན་དུ་བྱ་སྟེ། ཨོཾ་དཱིཔྟ་དྲིཥྚ་ཨཾ་ཀུ་ཤ་ཛཿཞེས་བརྗོད་ནས། མིག་རབ་ཏུ་མྱུར་དུ་བསྒྲིལ་ཞིང་མིག་གི་རྫི་མ་འདེགས་ཤིང་ [19b.7]བརྡེབ་པ། འབར་བའི་ལྟ་སྟངས་ལྕགས་ཀྱུ་ལྟ་བུས་རྣམ་པར་སྣང་མཛད་ལ་སོགས་པ་བསྐུལ་བས་དེ་རྣམས་བཀུག་ལ་རང་རང་གི་ཁ་དོག་ཅན་གྱི་ཐིག་སྐུད་ལག་པ་ན་གནས་པ་རྣམས་ལ་བསྟིམ་མོ། །དེ་ཉིད་ཀྱི་ཕྱིར་དེ་རྣམས་ནི་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་རང་བཞིན་ནོ། །མེ་ལོང་ལྟ་བུ་ལ་ [20a] [20a.1]སོགས་པའི་ཡེ་ཤེས་རྣམས་ནི་རེ་རེ་ཞིང་ཡེ་ཤེས་བཞི་རྗེས་སུ་འགྲོ་བའི་ཕྱིར་དང་ས་བོན་རེ་རེ་ལས་དེ་བཞིན་གཤེགས་པ་ལྔ་སྤྲོ་ཞིང་སྡུད་པའི་ཕྱིར་ན་ཉི་ཤུ་རྩ་ལྔར་ཕྱེ་བ་ཡིན་ནོ། །ཡེ་ཤེས་རེ་རེ་ཞིང་ལྷ་ཉི་ཤུའི་དཀྱིལ་འཁོར་གྱི་བདག་ཉིད་ཡིན་པས་རྣམ་པ་བརྒྱར་ཕྱེ་བ་ཡིན་ནོ་ཞེས་ཁ་ཅིག་ཏུ་ [20a.2]གསུངས་སོ། །དེ་ནས་རྣམ་པར་སྣང་མཛད་ཀྱི་གཟུགས་སམ། བདུད་རྩི་འཁྱིལ་པ་ལ་ཐམས་ཅད་པའི་གཟུགས་ཀྱིས་སློབ་མ་ཐིག་སྐུད་འཛིན་པ་དང་ལྷན་ཅིག་ཏུ་ཨོཾ་ཨཱཿཨ་ནྱོ་ནྱ་ཨ་ནུ་ག་ཏ་སརྦ་དྷ་རྨཱཿསྤ་ར་སྤ་ར། ཨ་ནུ་པྲ་བི་ཥྚཿསརྦ་དྷ་རྨཱཿཨཱ་དྱནྟ་ཨ་ནུ་པྲ་བིཥྟ་སརྦ་དྷརྨཱཿཨོཾ་ཨཱཿཧཱུཾ་ཞེས་བརྗོད་ཅིང་དང་པོར་སྐུད་བ་ལྔ་ [20a.3]ལྔས་ཐིག་སྐུད་རེ་རེ་བྱའོ། །དེ་ནས་དེ་ལྟར་བསྒྲིལ་བའི་ལྔ་རྣམས་ཀྱིས་ཐིག་སྐུད་གཅིག་ཏུ་བསྒྲིལ་བའི་ཐིག་སྐུད་སློབ་དཔོན་དང་སློབ་མའི་ལག་པ་གཡོན་པའི་མཛུབ་མོ་ནས་བརྩམས་ནས་སོར་མོ་བཞིའི་དབུས་སུ་བཅུག་ཅིང་རྒྱབ་ནས་དྲངས་ཏེ་སླར་ཡང་བཅུག་ཅིང་དྲངས་ནས། དེ་དག་རྡོ་རྗེ་ཁུ་ཚུར་དུ་བྱས་པ་ཉིད་ [20a.4]དག་གིས་མཛུབ་མོའི་རྒྱབ་ཀྱིས་ལ་སྦྱར་ཏེ་མནན་པའི་བར་གྱི་ལྷག་པ་མ་གཏོགས་པ་ཇི་སྲིད་དུ་དཀྱིལ་འཁོར་གྱི་ཉིས་འགྱུར་དུ་རིང་བ་དང་། སྦོམ་དུ་ནས་ཀྱི་ཉི་ཤུ་ཆས་ལྷག་པའི་སློབ་དཔོན་གྱིས་ནས་ཀྱི་ཚད་དུ་འགྱུར་བ་དེ་ལྟར་བྱའོ། །ནས་བདུན་གྱིས་སོར་གྱི་ཚིགས་གཅིག་ཅེས་མངོན་པ་ནས་བཤད་དོ། །སྦོམ་ [20a.5]དུ་འཁོར་ལོའི་བརྒྱད་ཆའི་ཉི་ཤུ་ཆར་བཤད་པ་ནི་སོར་ཉི་ཤུ་རྩ་བཞིའི་བདག་ཉིད་ཁྲུ་གང་བའི་དཀྱིལ་འཁོར་ཁོ་ནའི་ཡིན་ནོ། །ཁྲུ་གཉིས་པ་ལ་སོགས་པའི་དཀྱིལ་འཁོར་གྱི་ཚད་ཀྱང་དེས་མཚོན་ནས་རིག་པར་བྱའོ། །ཀུན་དགའ་སྙིང་པོ་ལ་སོགས་པས་ནི་ཁྲུ་དྲུག་པའི་དཀྱིལ་འཁོར་དུ་ཐིག་སྐུད་སྦོམ་དུ་མཐེའུ་ཆུང་གི་ཚད་ [20a.6]དུ་བྱ་ཞིང་གཞན་རྗེས་སུ་མཐུན་པར་བྱའོ་ཞེས་སོ། །བསྒྲིལ་བའི་རྗེས་ལ་སྔར་གྱི་ས་གཞི་དྲིས་བྱུགས་པའི་གསེར་ལ་སོགས་པའི་སྣོད་གཙང་མར་དྲིའི་ཆུ་དང་། བདུད་རྩི་ལྔ་དང་། བའི་རྣམ་ལྔས་སྤངས་ཤིང་ཡི་གེ་གསུམ་ནང་དུ་ཆུད་པ་བཞག་ལ། དྲི་དང་མེ་ཏོག་དང་། སྤོས་རྣམས་ཀྱིས་མཆོད་དེ། ལག་པས་རེག་ [20a.7]ཅིང་འཁྱིལ་པ་བཟླས་པས་བསྲུང་བར་བྱའོ། །དེ་ནས་གཡས་པ་དང་ཅིག་ཤོས་ཀྱི་མིག་དག་ལ་མ་དང་ཊའི་ཡི་གེ་དག་ལས་ཉི་མ་དང་ཟླ་བ་དེ་དག་བལྟས་ཏེ། སྔར་བཞིན་བཛྲ་དྲྀཥྚི་མ་ཊ་ཞེས་པས་བརྟན་པར་བྱས་ལ། ལས་ཐམས་ཅད་པ་བཟླས་པའི་བདུད་རྩིའི་ཆུ་དང་། ཡུངས་ཀར་དང་དྲིའི་ཆུས་གཏོར་ཏེ། རྡོ་རྗེ་ [20b] [20b.1]དང་བཅས་པའི་ལག་པ་གཡས་པས་རེག་ལ། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ་ཞེས་པ་འདི་བཟླས་ནས། ཡི་གེ་གསུམ་གྱིས་བརྒྱ་རྩ་བརྒྱད་དུ་བཟླས་པས་ལྷག་པར་གནས་པར་བྱའོ། །ཡང་དཀྱིལ་འཁོར་གྱིས་ལ། ཨོཾ་སརྦ་སཾ་ཤོ་དྷ་ནི་ཧཱུཾ་ཕཊ་ཅེས་པའི་སྔགས་ཀྱིས་བུམ་པ་ཐམས་ཅད་ཀྱི་ཆུས་བསང་གཏོར་ [20b.2]བྱས་པས་གཙང་མའི་དྲི་ཆུས་བྱུགས་ནས། ཕྱི་རོལ་དུ་མེ་ཏོག་གཅལ་དུ་བཀྲམ་ལ། ནམ་མཁའ་ལ་བྲི་བར་བྱ་བའི་དཀྱིལ་འཁོར་བཞུགས་པར་དམིགས་ཏེ། མཆོད་ཡོན་དབུལ་བ་སྔོན་དུ་འགྲོ་བས་མཆོད་ཅིང་བསྟོད་ནས། རང་ཉིད་དེའི་རྣལ་འབྱོར་དང་ལྡན་པས་སྒྲུབ་པའི་གྲོགས་པོ་རྣམ་པར་སྣང་མཛད་དམ་ [20b.3]འཁྱིལ་པའི་གཟུགས་སུ་བསམས་ནས། རང་དང་དེའི་གཡོན་པ་དང་ཅིག་ཤོས་ཀྱི་མིག་དག་ལ་ཛཿལས་སྐྱེས་པའི་ཉི་མ་དང་། ཟླ་བ་འོད་ཟེར་སེར་པོ་ཅན་བསྒོམས་ཏེ། རྡོ་རྗེའི་རྐང་པས་ཐིག་སྐུད་དེ་རྡོ་རྗེའི་ཁུ་ཚུར་གཡོན་པས་གཟུང་བ་ལྟེ་བར་བཟུང་ཞིང་། སྒྲུབ་པའི་གྲོགས་པོས་དེ་ལྟར་ཐིག་སྐུད་བཟུང་ལ། ཛྫཿཛྫཿ [20b.4]ཛྫཿཞེས་པའི་ཡི་གེ་ཛྫཿགསུམ་གྱིས་ཀྱང་བསྐུལ་ལོ། །སྒྲུབ་པའི་གྲོགས་པོས་ཀྱང་ཛྫཿཛྫཿཛྫཿཞེས་པའི་ཡི་གེ་ཛྫཿགསུམ་གྱིས་དྲངས་ནས། དེ་ཁོ་ན་བཞིན་དུ་མངོན་དུ་བལྟ་ཞིང་གནས་པས་ནུབ་ཕྱོགས་སུ་གནས་ཏེ་ཤར་དུ་ཁ་བལྟས་པ་དང་། ལྷོར་གནས་ཏེ་བྱང་དུ་ཁ་བལྟས་པས། ཚངས་ཐིག་གཉིས་ལྟེ་བ་དང་ [20b.5]མཉམ་པའི་བར་སྣང་ལ་བརྐྱང་ནས། རྡོ་རྗེ་དང་བཅས་པའི་ལག་པ་གཡས་པའི་མཐེ་བོ་དང་མཛུབ་མོ་དག་གིས་ཐིག་སྐུད་བཟུང་བས་འདེབས་ཤིང་སེ་གོལ་གྱི་སྒྲ་བྱའོ། །ཐིག་གདབ་པ་ཐམས་ཅད་དུ་ཡང་། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མཱ་ཧཱུཾ། ཧཱུཾ་ཨོཾ་སྭཱ་ཨ་ཧ་ཞེས་བརྗོད་པར་བྱའོ། །ཐིག་གི་སྒྲ་དེས་ཀྱང་ནམ་མཁའ་ཀུན་ [20b.6]ཁྱབ་པའི་དེ་བཞིན་གཤེགས་པ་རྣམས་བསྐུལ་བར་བྱའོ། །དེ་རྣམས་ཀྱང་བྱོན་ནས་ཐིག་སྐུད་རྣམས་ལ་ཐིམ་པར་བསྒོམ་མོ། །སྒྲ་འདིའི་དོན་ནི། སེམས་ཅན་དོན་དུ་ཁྱེད་རྣམས་ཀྱི། །དུས་ཡིན་དེ་ཕྱིར་འདིར་སྤྱོན་ཅིག །ཅེས་པའི་བརྡའོ། །ཐམས་ཅད་དུ་ཡང་སློབ་དཔོན་དང་སྒྲུབ་པའི་གྲོགས་པོ་གཡས་སྐོར་དུ་འགྲོ་ [20b.7]ཞིང་ཕྱོགས་ཐམས་ཅད་མཉམ་པ་ཉིད་དུ་མོས་པར་བྱའོ། །ནམ་མཁའི་ཐིག་གཉིས་བཞིན་དུ་ས་ལ་ཡང་ཚངས་ཐིག་གཉིས་ཀའི་ལག་པ་ཐིག་སྐུད་དང་བཅས་པས་མཉམ་པོར་སྨད་པས་གདབ་པར་བྱའོ། །འོན་ཀྱང་དང་པོར་ཁྲུའི་ཚད་ཀྱི་མཎྜལ་གྱི་དབུས་སུ་མཐོ་གང་གི་ཚད་ཀྱི་ཤིང་བུ་བཀོད་པའི་གྲིབ་མ་འཇུག་པ་ [21a] [21a.1]དང་། འབྱུང་བའི་རྩེ་མོ་མཎྜལ་གྱི་རེ་ཁཱའི་དབུས་གང་དག་ཏུ་གནས་པ་དེ་གཉིས་སུ་ཐིག་ལེ་གཉིས་བྱས་པ་ནི་ནུབ་དང་ཤར་རོ། །དེའི་སྟེང་དུ་ཐིག་སྐུད་བཟུང་ནས་མཎྜལ་གཉིས་བྱས་པས་ཉར་འགྱུར་རོ། །དེ་ནས་དེའི་མགོ་དང་མཇུག་མའི་མཐར་ཐིག་ལེ་བྱས་པ་ནི་ལྷོ་དང་བྱང་ངོ་། ། [21a.2]དེའི་སྟེང་དུ་ཐིག་སྐུད་བཟུང་ནས་མཎྜལ་གཞན་གཉིས་བྱའོ། །ཕུབ་པའི་གནས་སུ་ནི་ཕྱོགས་རྣམས་སུ་ཐིག་ལེ་བཞི་བྱས་པའི་སྟེང་དུ་ཟླུམ་པོ་བཞི་བསྐོར་བར་བྱའོ། །དེ་ནས་ཕྱོགས་རྣམས་སུ་ཉའི་མགོ་མཇུག་དག་གི་དབུས་སུ་ཐིག་སྐུད་བཟུང་ནས། འོད་ཟེར་གྱི་ཕྲེང་བའི་བར་དུ་ཚངས་ཐིག་གཉིས་རྐང་པ་ [21a.3]གཡོན་པ་སྐྱིལ་ཀྲུང་ཕྱེད་པར་བྱས་ནས་རྐང་པ་གཡས་པ་ས་ལ་བཙུགས་ཏེ། དེ་ལས་བཟློག་ནས་འདུག་ཅིང་ཇི་ལྟར་རིགས་པར་རྒྱབ་ཀྱིས་འགྲོ་བའི་སློབ་མ་དང་ལྷན་ཅིག་ཏུ་གཡོན་པའི་རྡོ་རྗེ་ཁུ་ཚུར་གྱིས་ཐིག་སྐུད་བཟུང་ནས་ནམ་མཁའ་ལ་ཐིག་གདབ་པའི་མོས་པས་གདབ་པར་བྱའོ། །དེ་ལྟར་ཐིག་གདབ་པ་གཞན་ [21a.4]རྣམས་ལ་ཡང་ངོ་། །ཐིག་གདབ་པ་ན། མཚན་མ་མིན་པས་འགྲུབ་མི་འགྱུར། །ཐིག་སྐུད་ཆད་ན་བླ་མ་འཆི། །དམན་དང་ལྷག་པ་ལས་ནི་ནང་། །ཕྱོགས་རྨོངས་ན་ནི་སློབ་མ་འཁྲུལ། །ཞེས་ཤེས་པར་བྱས་ལ། བཅོས་པའི་ཆོ་ག་ཡང་བྱའོ། །གལ་ཏེ་ཐིག་ནི་གདབ་པ་ལ། །འགའ་ཡང་ནུས་ལྡན་མ་གྱུར་ [21a.5]ཅིང་། །དེ་བཞིན་གཡོག་པོ་དང་བྲལ་ན། །ཕུར་པ་ལ་བཅིངས་རང་ཉིད་གདབ། །མེའི་མཚམས་སུ་གནས་པས་རླུང་གི་མཚམས་ཀྱི་ཐིག་དང་། །བདེན་བྲལ་གྱི་མཚམས་སུ་གནས་ཏེ་དབང་ལྡན་གྱི་མཚམས་ཀྱི་ཐིག་གོ། །འདི་གཉིས་རེ་རེ་ཞིང་སྒོའི་ཚད་བཅུ་བདུན་ནོ། །དེ་ནས་མཎྜལ་ལྔ་བྲིའོ། །ཚངས་ཐིག་ཁོ་ན་ [21a.6]གདབ་པའི་དོན་དུ་ཐིག་སྐུད་དཀྱིལ་འཁོར་ཉིས་འགྱུར་དུ་རིང་བར་གསུངས་ལ། དཀྱིལ་འཁོར་ཡང་འདིར་སྣ་ཚོགས་རྡོ་རྗེའི་ལྟེ་བར་ཆུད་པའི་རྩ་བའི་དཀྱིལ་འཁོར་འཁོར་དང་བཅས་པ་རྩ་བའི་ཐིག་ལས་ཕྱིར་ཆ་ཆུང་བརྒྱད་པའི་བར་དུ་སྟེ། ཆ་ཆུང་བཞི་བཅུ་རྩ་བརྒྱད་དོ། །དེའི་ཕྱི་རོལ་དུ་ཆ་ཆུང་བཅུ་གཉིས་དང་། [21a.7]གཉིས་དང་། གཉིས་དང་། གཉིས་དང་། བཞི་ཉིད་དེ་གོ་རིམས་བཞིན་དུ་རྟ་བབས་དང་། ཆོས་ཀྱི་འཁོར་ལོ་དང་ར་དང་པདྨའི་འདབ་མ་དང་རྡོ་རྗེའི་ཕྲེང་བ་དང་འོད་ཀྱི་ཕྲེང་བ་རྣམས་ཏེ། ལོགས་གཅིག་ལ་ནི་ཆ་ཆུང་ཉི་ཤུ་རྩ་བཞིའོ། །ལོགས་གཉིས་པར་ཡང་དེ་ལྟར་རོ། །དེ་བས་ཆ་ཆུང་བཞི་བཅུ་རྩ་བརྒྱད་དོ། །དེའི་ཕྱིར་ [21b] [21b.1]ཐིག་སྐུད་ཆ་ཆུང་དགུ་བཅུ་རྩ་དྲུག་ཏུ་འགྱུར་རོ། །དེ་ཡང་། ཕྱོགས་ཆ་མཉམ་པར་ཤེས་ནས་ནི། །དཀྱིལ་འཁོར་ལས་ནི་ཉིས་འགྱུར་སྲིད། །ཤར་དང་ནུབ་ཏུ་རིང་བ་ཡིས། །ཚངས་ཐིག་ཡང་དག་གདབ་པར་བྱ། །ཞེས་པ་དང་། གཞན་དུ་ཡང་། ངེས་པར་འདི་ནི་དཀྱིལ་འཁོར་ལས། །དཀྱིལ་འཁོར་ས་གཞི་ [21b.2]ཉིས་འགྱུར་བཟུང་། །དབང་པོ་ཆུ་ཡི་ཕྱོགས་རིང་བའི། །ཐིག་ནི་ཆ་ཆུང་རྗེས་འགྲོ་གདབ། །ཅེས་གསུངས་སོ། །ར་དང་འོད་ཟེར་དག་ལ་ཆ་ཆུང་གཅིག་དང་གསུམ་ཉིད་དམ། ཆ་ཆུང་གཉིས་གཉིས་ཉིད་ན་ཐིག་སྐུད་ཆ་ཆུང་དགུ་བཅུ་རྩ་གཉིས་སུ་འགྱུར་ཏེ། དེའི་ཚེ་དཀྱིལ་འཁོར་གྱི་འོད་ཀྱི་མཐའ་ལས་ཐིག་ [21b.3]སྐུད་ཆ་ཆུང་བཞིས་ལྷག་པར་འགྱུར་རོ། །དེ་ནི་གཟུང་བའི་དོན་དུ་ཡིན་ནོ་ཞེ་ན། མི་རིགས་ཏེ། ཁྲུ་གང་ནས་ནི་བརྩམས་ནས་ནི། །ཇི་སྲིད་ཁྲུ་ནི་སྟོང་གི་བར། །ཞེས་གསུངས་པའི་ཕྱིར་རྩ་བའི་དཀྱིལ་འཁོར་ཁྲུ་སྟོང་པའི་བརྒྱད་ཆའི་སྒོའི་བཞི་ཆ་དང་བཅས་པའི་ཁྲུ་སུམ་ཅུ་རྩ་གཅིག་ཆ་ཆུང་དུ་འགྱུར་ལ། དེ་ [21b.4]བཞིས་ནི་ཐིག་སྐུད་ཁྲུ་བརྒྱ་ཉི་ཤུ་རྩ་ལྔས་ལྷག་པར་འགྱུར་ཏེ། དེ་ཅི་ཞིག་བྱ། འདབ་མ་དང་རྡོ་རྗེ་ཕྲེང་བ་དག་ཆ་ཆུང་རེ་རེ་དག་ཀྱང་མི་རིགས་སོ། །དེའི་ཕྱིར་རྣམ་པ་འདི་ལྟ་བུ་གཞན་ཡང་ངོ་། །ལོགས་ཀྱི་སྟེང་ན་རྟ་བབས་སྒོའི་སུམ་འགྱུར་གྱི་ཕྱོགས་ལ་འདིར་ལུང་དང་འགལ་ཞེས་མང་པོ་རྣམས་གསུང་ངོ་། ། [21b.5]འདིར་ནི་ཁྲུ་གང་ལ་སོགས་པའི་ཚད་ཀྱི་འཁོར་ལོའི་ཕྱོགས་རྣམས་སུ་དེའི་ཚད་དུ་རྩ་བའི་ཐིག་བཞིས་ཡོངས་སུ་བཅད་པའོ། །དེའི་ཕྱིར་སློབ་དཔོན་མེ་མཚམས་སུ་གནས་ཏེ་བྱང་དུ་ཁ་བལྟས་པས་ཤར་གྱི་རྩ་བའི་ཐིག་འཁོར་ལོའི་ཚད་དུ་གདབ་པར་བྱའོ། །རླུང་མཚམས་སུ་གནས་ཏེ་ལྷོར་ཁ་བལྟས་པས་ [21b.6]ནུབ་ཏུའོ། །དེ་ཉིད་དུ་གནས་ཏེ་ཤར་དུ་ཁ་བལྟས་པས་བྱང་དུའོ། །སླར་མེ་མཚམས་སུ་ཕྱིན་ནས་ནུབ་ཏུ་ཁ་བལྟས་ཏེ་ལྷོར་རོ། །དེ་ལྟར་ཡང་མཁའ་འགྲོ་མ་རྡོ་རྗེ་གུར་ལས། དང་པོ་ཚངས་པའི་ཐིག་ཡིན་ཏེ། །གཉིས་པ་ཟུར་གྱི་ཐིག་ཡིན་ནོ། །གསུམ་པ་ལ་ནི་ངོས་བཞི་རུ། །ཐིག་བཞི་རབ་ཏུ་གདབ་པར་ [21b.7]བྱ། །ཞེས་གསུངས་སོ། །ཐིག་དེའི་གཅིག་གི་བརྒྱད་ཆ་ནི་སྒོ་ཡིན་ལ་སྒོའི་བཞི་ཆ་ནི་ཆ་ཆུང་གཅིག་གོ། །དེ་ནས་ཚངས་པའི་ཐིག་གི་ངོས་སུ་གཡས་དང་གཡོན་དག་གི་ཆ་ཆུང་གཉིས་གཉིས་རྩ་བའི་ཐིག་གིས་དང་བཅས་པ་དེ་ཆ་ཆུང་བཞི་པ་སྟེ། དེར་གནས་པའི་ཚངས་ཐིག་གི་ངོས་གཉིས་ཀྱི་རྩ་བའི་ཐིག་ [22a] [22a.1]ནི། ཧཱི་ཡིག་ཁྲོ་བོའི་ལྟ་བ་ཡིས། །དེ་ནས་སྒོ་ཡང་དབྱེ་བར་བྱ། །ཞེས་གསུངས་པའི་ཕྱིར། བཅོམ་ལྡན་འདས་ཀྱི་སྐུ་གཡོན་པ་དང་ཅིག་ཤོས་ཀྱི་མིག་དག་གི་ཡི་གེ་ཧཱུཾ་གིས་ཟླ་བ་དང་ཉི་མར་བསྐྱེད་ནས་ཁྲོ་བོའི་ལྟ་བས་ཐམས་ཅད་དུ་བལྟ་ཞིང་། ཧཱི་ཧཱི་ཞེས་བརྗོད་ཅིང་ཐར་བའི་སྒོའི་ [22a.2]གེགས་སུ་གྱུར་པའི་སྒྲིབ་པ་དབྱི་བར་བྱའོ། །ཞེས་ལྷག་པར་མོས་པས་དབྱི་བར་བྱའོ། །དེ་ནས་རྩ་བའི་ཐིག་ལས་ཕྱི་རོལ་དུ་རིམ་པ་བཞིན་དུ་ཆ་ཆུང་གཅིག་དང་། གཉིས་དང་། གཅིག་དང་། གཉིས་དང་། གཅིག་དང་། གཅིག་གི་བར་དོར་ལ་ཐིག་དྲུག་ནི་ཟུར་ཐིག་ལས་ལོགས་སུ་འཐོན་པར་གདབ་ [22a.3]པོ། །དེ་ལ་དང་པོ་གཉིས་ཚོན་དང་། སྟེགས་བུའི་ས་དག་གི་ཡིན་ཏེ། ཕན་ཚུན་རྩེ་མོར་རེག་པ་ཆ་ཆུང་གཉིས་པའི་ཐིག་གཅིག་དང་ལྡན་ཞིང་ཆ་ཆུང་གསུམ་གྱི་བར་ཚངས་ཐིག་ཡོངས་སུ་དོར་བར་གནས་པའི་གསུམ་ནི་རིན་པོ་ཆེའི་ཕ་གུ་དང་། དོ་ཤལ་དང་། རིན་པོ་ཆེའི་ཤར་བུ་རྣམས་ཀྱི་ས་སྟེ་ཆ་ཆུང་ [22a.4]བརྒྱད་སྤངས་པར་རོ། །བཞི་པ་ནི་ཟུར་ཐིག་གཉིས་པའི་བར་བར་དུའོ། །དེ་ནས་སྟེགས་བུའི་ཐིག་ལས་བྱུང་བའི་ཐིག་བཞི་སྟེ། དེ་ལ་གཅིག་ནི་དར་དཔྱངས་ཀྱིས་ཡིན་ཏེ། ལོགས་སུ་ཐིག་གསུམ་གྱི་རྩེ་མོ་ལ་རེག་པའོ། །དེའི་གློར་ཆ་ཆུང་རེ་རེ་དོར་བར་ཐིག་གསུམ་སྟེ། རྟ་བབས་ཀྱི་ཀ་བ་དང་བར་དང་ཚོན་ [22a.5]གྱི་སའོ། །བཞི་པོ་འདི་རྣམས་ལ་དང་པོ་གསུམ་ནི་སྲིད་དུ་ཆ་ཆུང་ལྔའོ། །ཞེས་པ་ནི་ཆ་ཆུང་བཞིའོ། །འདིར་དཀྱིལ་འཁོར་དང་རྟ་བབས་ཀྱི་བར་གྱིས་ནི་མུན་པའི་སྣམ་བུ་དང་། ལོང་བའི་སྣམ་བུ་དང་། སྟོང་པའི་སྣམ་བུ་དང་། བར་སྣང་སྐབས་ཀྱི་སྣམ་བུ་ཞེས་བརྗོད་དོ། །དེ་ནས་ཚངས་པའི་ཐིག་གི་ལོགས་སུ་ཆ་ [22a.6]ཆུང་གཉིས་སྤངས་པར་རྩ་ཐིག་ནས་སྒོ་ཁྱུད་ཆ་ཆུང་བཞི་པ་དྲང་པོར་འཐོན་ཏེ། ལོགས་སུ་འགྲམ་པ་ཆ་ཆུང་གཉིས་སོང་ནས། སྟེང་དུ་ལོགས་སུ་ཆ་ཆུང་གཉིས་འཐོན་པའི་ཐིག་ཀྱོག་པོ་གཉིས་པ་ཅིག་གདབ་བོ། །དེའི་རྩེ་མོ་ནས་ལོགས་སུ་ཚངས་ཐིག་གི་ལོགས་གཉིས་པར་གནས་པ་དེ་ལྟ་བུ་ཀྱོག་པོའི་རྩེ་མོའི་ [22a.7]བར་དུ་སོང་བས་ཆ་ཆུང་བརྒྱད་པ་གདུང་མཚོན་པར་བྱེད་པའི་ཐིག་གོ། །དེ་བཞིན་དུ་དེའི་གློའི་ཐིག་གི་རྩེ་མོ་ནས་གཞན་དེའི་གློའི་ཐིག་གི་རྩེ་མོའི་བར་དུ་ཆ་ཆུང་བཅུ་པའི་ཐིག་གཅིག་སྟེ་ཡ་ཕུབས་ཀྱི་སའམ། གདུང་དང་བཅས་པའི་བྲེ་ཕུལ་གྱི་སའམ་གདུང་གི་སྟེང་གི་ཚོན་སྣ་ལྔའི་སའོ། །དེའི་ཕྱིའི་ཆ་ཆུང་ [22b] [22b.1]གཅིག་ནི་དཀྱིལ་འཁོར་དང་རྟ་བབས་ཀྱི་བར་གྱི་སྣམ་བུའོ། །འདིས་ནི། སྒོ་ནི་འཁོར་ལོའི་བརྒྱད་ཆ་སྟེ། །སྟེགས་བུ་དང་ནི་བྲལ་བར་འདོད། །སྒོ་ཡི་ཚད་ཀྱི་སྒོ་ཁྱུད་དེ། །དེ་བཞིན་ལྷ་ཡི་སྣམ་བུའོ། །སྟེགས་བུ་ཀུན་ནས་སྒོ་ཡི་ཕྱེད། །དེ་བཞིན་འགྲམ་དང་ལོགས་དང་ནི། །དྲ་བ་དྲ་ཕྱེད་ཉི་ཟླ་དང་། །མེ་ [22b.2]ཏོག་ཕྲེང་བའི་སྣམ་བུའོ། །རྩ་བའི་ཐིག་གིས་ལས་ཕྱིར། །ཚོན་གྱིས་ནི་དེ་ཡི་ཕྱེད། །ཅེས་པ་འདི་ཡང་བཤད་པ་ཡིན་ནོ། །ལྷའི་སྣམ་བུ་ནི་རྩ་བའི་ཐིག་གི་ནང་དུའོ། །སྟེགས་བུ་ལ་ནི་གཟུངས་ཀྱི་སྣམ་བུ་དང་གར་གྱི་སྣམ་བུ་ཞེས་ཀྱང་བརྗོད་དོ། །འདིར་ངོས་སུ་སོང་བ་ནི་ལོགས་ཡིན་ཞིང་། །སྟེང་དུ་སོང་བ་ [22b.3]ནི་འགྲམ་པའོ་ཞེས་བརྗོད་པ་ནི། ལུང་དང་མི་ལྡན་ཞིང་། །སྒོ་མཉམ་སྒོ་ཁྱུད་སྟེང་དུ་འགྱུར། །ངོས་སུ་འགྲམ་པ་སྒོ་ཡི་ཕྱེད། །ཅེས་བཤད་པ་དང་འགལ་ལོ། །བར་གྱི་སྣམ་བུའི་དཔངས་སུ་ཆ་ཆུང་ལྔའོ། །སྲིད་དུ་ནི་སྒོ་གསུམ་གྱི་ཚད་དོ། །ཀླུའི་བློའི་ཞབས་ནི་ལོགས་ཀྱི་ཐིག་གཉིས་ལ་གནས་པའི་ [22b.4]ཐིག་ཉིད་གདུང་དུ་དགོངས་ནས་བར་གྱི་སྣམ་བུ་དང་ཡ་ཕུབས་ཀྱི་སྣམ་བུ་ནི་མི་བཞེད་དོ། །དེ་ཡང་། སྒོ་ནི་འཁོར་ལོའི་བརྒྱད་ཆ་སྟེ། །དེ་བཞིན་ལྷ་ཡི་སྣམ་བུའོ། །སྒོ་ཁྱུད་སྒོ་ཡི་ཚད་ཡིན་ཏེ། །དེ་བཞིན་དུ་ནི་འགྲམ་དང་ལོགས། །དེ་ཡི་ཕྱེད་དུ་སྟེགས་བུ་ཡིན། །སྟེགས་བུའི་ཕྱེད་དུ་ཚོན་གྱིས། །དྲ་བ་ [22b.5]སྟེགས་བུའི་ཚད་དུ་འགྱུར། །རིན་ཆེན་ས་ནི་དེ་ཡི་ཕྱེད། །རིན་ཆེན་ཤར་བུ་མདའ་ཡབ་ཕྱིའི། །ཀ་བ་ལ་སོགས་ས་དེ་བཞིན། །ཞེས་རྒྱུད་གཞན་དུ་གསུངས་སོ། །གང་ཡང་ཕྱོགས་འདི་ལ་བྲེ་ཕུལ་གྱི་དོན་དང་མདའ་ཡབ་ཀྱི་དོན་དུ་ལོགས་ཀྱི་ཐིག་གཉིས་ལ་གནས་པའི་ཐིག་གི་ཕྱི་རོལ་དུ་ཆ་ཆུང་གཅིག་ [22b.6]གི་བར་སྤངས་ནས་ཐིག་གཅིག་ཅེས་སྨྲ་བ་དེ་ལ་ནི་འདིར་རྗོད་པར་བྱེད་པའི་གཞུང་མེད་ཅིང་རང་གིས་བརྟགས་པ་ཡིན་ན་ཡང་། །ཤིང་རྟ་ཆེན་པོ་རྣམས་ཀྱིས་རྩ་བའི་ཐིག་གི་ཕྱི་རོལ་ཆ་ཆུང་བརྒྱད་པའི་གནས་ཀྱིས་བསྐོར་བ་ནི་རྩ་བའི་དཀྱིལ་འཁོར་འཁོར་དང་བཅས་པ་ཡིན་ནོ་ཞེས་མང་དུ་བཤད་པ་འདི་ [22b.7]དང་འགལ་བས་རྟོགས་པར་གྱིས་ཤིག །མཛེས་པའི་དོན་དུ་རིན་པོ་ཆེ་དང་། རིན་ཆེན་ཤར་བུའི་སྟེང་དུ་མདའ་ཡབ་ཀྱི་སྣམ་བུ་བྱེད་དོ་ཞེ་ན་གྱིས་ཤིག།བདག་ལ་འདིར་བགེགས་ཀྱིས་ཅི་ཞིག་བྱ། སྒོ་ཁྱུད་དང་འགྲམ་དང་ལོགས་ཀྱི་ཚད་མཉམ་པ་དང་། མི་མཉམ་པའི་ཕྱོགས་འདི་དག་བཅོམ་ [23a] [23a.1]ལྡན་འདས་ཀྱིས་རྒྱུད་ཐ་དད་དུ་གསུངས་སོ། །འདིར་ཆ་ཆུང་བརྒྱད་པའི་མདའ་ཡབ་ཀྱིས་ཇི་ལྟར་གཞལ་ཡས་ཁང་མཛེས་པའི་དེ་ལྟར་མདའ་ཡབ་དང་བྲལ་ན། མགོ་བཅད་པ་ལྟ་བུའི་རིན་པོ་ཆེ་དང་ཤར་བུ་རྣམས་ཀྱི་ནི་མ་ཡིན་ཞིང་། ལྷ་ཁང་ཆེན་པོ་ལ་སོགས་པ་རྣམས་ལ་ཡང་མཐོང་བས། [23a.2]འདིར་བྲི་བྱའི་དཀྱིལ་འཁོར་ལ་མདའ་ཡབ་ནི་དར་དཔྱངས་ཀྱི་ཐིག་གི་བར་དུའོ། །བསྒོམ་བྱའི་དཀྱིལ་འཁོར་ལ་ནི་ལོགས་ཀྱི་སྟེང་གི་བར་དུ་སྟེ། མདའ་ཡབ་རྣམས་ནི་ལོགས་ཅན་དང་། །ཞེས་རྡོ་རྗེ་ཕྲེང་བའི་རྒྱུད་དུ་གསུངས་པའི་ཕྱིར་རོ། །གདུང་གི་འོག་ཏུ་ཀ་བ་གཉིས་མ་བྲིས་ཀྱང་བསྒོམ་བྱའི་དཀྱིལ་ [23a.3]འཁོར་ལ་རིག་པར་བྱ་སྟེ། གྲུ་བཞི་པ་དང་སྒོ་བཞི་པ། །ཀ་བ་བརྒྱད་ཀྱིས་ཉེ་བར་མཛེས། །ཞེས་པའི་ལུང་གིས་སོ། །འདིས་དཀྱིལ་འཁོར་གྱི་ནང་གི་ཀ་བ་བརྒྱད་ནི་མ་གསུངས་ཏེ། དེ་དག་ནི་བདེ་མཆོག་ལ་སོགས་པའི་དཀྱིལ་འཁོར་ལ་མེད་ལ། ཀ་བ་བརྒྱད་ཀྱིས་ཉེ་བར་མཛེས། །ཞེས་པའི་ [23a.4]མཚན་ཉིད་འདི་ཡང་དཀྱིལ་འཁོར་ཐམས་ཅད་ཀྱི་ཁྱབ་བྱེད་ཡིན་པས་སོ། །གཞོགས་ཀྱི་ཀ་བ་རྣམས་ནི་རྟ་བབས་རྣམས་ཁོ་ནའིའོ། །དེ་ཉིད་ཀྱི་ཕྱིར་གང་དག་སྒོའི་རྩ་བ་ནས་སྒོ་ཁྱུད་ལ་སོགས་པ་སྟེང་དུ་ནམ་མཁའ་ལ་ལངས་པར་རྟོགས་པ་དེ་དག་གིས་ནི་གསུང་རབ་ཀྱི་དོན་མ་ཤེས་པ་ཉིད་དོ། །རྡུལ་ཚོན་གྱི་ [23a.5]རྩིག་པ་ལ་ནི་རིན་པོ་ཆེ་དང་། དྲ་བ་དང་དྲ་པ་ཕྱེད་པ་དང་། རིན་པོ་ཆེའི་ཤར་བུ་དང་། མདའ་ཡབ་རྣམས་རིམ་པ་བཞིན་དུ་སྟེང་དུ་བརྩེགས་པ་མཛེས་པར་བསྟན་པའོ། །རིན་པོ་ཆེའི་ཤར་བུ་ནི་བྱ་འདབ་ནས་དབྱངས་པར་ཤེས་པར་བྱའོ། །ཁ་ཅིག་ཏུ་ནི་རིན་པོ་ཆེའི་ཤར་བུའི་ཆ་ཆུང་བདུན་པ་ལ་རིན་པོ་ཆེ་རྣམས་ [23a.6]བྲི་བར་བྱའོ་ཞེས་གསུངས་སོ། །གང་ཞིག་དེ་ལྟར་ཐིག་ཐུང་མི་འདོད་པ་དེས་ནི་ལོགས་སུ་ཟུར་ཐིག་གི་བར་དུ་རྩ་བའི་ཐིག་ལས་ཕྱིར་རིམ་པ་བཞིན་དུ་ཆ་ཆུང་གཅིག་དང་། གཉིས་དང་། གཅིག་དང་། གཉིས་དང་། གཅིག་དང་། གཅིག་གི་བར་དོར་ནས་ཐིག་དྲུག་གདབ་པར་བྱའོ། །རྩ་བའི་ཐིག་ལས་ [23a.7]འཐོན་པའི་ཐིག་བདུན་ཡང་ཚངས་ཐིག་གི་གཡས་སུ་ཐིག་དྲུག་པའི་བར་དུའོ། །དེ་ལ་གཅིག་ནི་ཆ་ཆུང་གཉིས་སྤངས་པར་རོ། །གཞན་རྣམས་ནི་ཆ་ཆུང་རེ་རེ་སྤངས་པར་རོ། །དེ་ལྟར་གཡོན་དུ་ཡང་ངོ་། །སྔར་བརྗོད་པའི་རིམ་པས་ཐིག་ཐུང་བཏབ་པ་ལྟར་གནས་པ་ལས་གཞན་དུ་བྱའོ། །ཀ་བའི་སྟེང་དུ་རྟ་བབས་ [23b] [23b.1]ཏེ་ཆ་ཆུང་བཅུ་གཉིས་སོ། །དེ་ལ་ཀ་བའི་རྩེ་མོ་ནས་ཕྱིར་ཐིག་བཅུ་གཅིག་གོ། །དེ་ལ་རྟ་བབས་སྒོའི་སུམ་འགྱུར་ཏེ། དེ་ཡང་སྣམ་བུ་བཅུ་གཅིག་པ་ཞེས་གསུངས་པའི་ཕྱིར། བར་རྣམས་ནི་གོ་རིམས་བཞིན་དུ་གསེར་དང་། རིན་པོ་ཆེའི་ཤར་བུ་དང་། རིན་པོ་ཆེ་དང་། རྨིག་པ་དང་། མུན་པ་དང་། བ་ [23b.2]རཎྜ་དང་། མུན་པ་དང་། རིན་ཆེན་ཤར་བུ་དང་། རིན་པོ་ཆེ་དང་། རྨིག་པ་དང་། མདའ་ཡབ་རྣམས་ཀྱི་སྣམ་བུའོ། །དེ་རྣམས་ལས་མུན་པའི་སྣམ་བུ་གཉིས་སོ་སོར་དབངས་སུ་ཆ་ཆུང་ཕྱེད་དང་གཉིས་སོ། །སྣམ་བུ་དགུ་ནི་སོ་སོར་ཆ་ཆུང་རེ་རེའོ། །འདིར་གསེར་གྱི་སྣམ་བུ་ནི་མེད་དེ། འདི་ནི་བྲེ་ཕུལ་ [23b.3]གྱི་སྣམ་བུ་ཡིན་ནོ་ཞེས་པ་ནི་ཁ་ཅིག་གོ། །ཡང་ན་རིན་པོ་ཆེའི་ཤར་བུ་དང་། རིན་པོ་ཆེ་དང་རྨིག་པ་དང་། གསེར་དང་། ཆུ་སྲིན་དང་། གསེར་དང་། རྨིག་པ་དང་། རིན་པོ་ཆེ་དང་། རྨིག་པ་དང་། གསེར་དང་། མདའ་ཡབ་རྣམས་ཀྱི་སྣམ་བུ་ཡིན་ཏེ། འདི་རྣམས་ཀྱི་དབངས་སུ་དང་པོ་དང་གཉིས་པ་ནི་ཆ་ [23b.4]ཆུང་ཕྱེད་དང་གཉིས་སོ། །གསུམ་པ་ནི་ཆ་ཆུང་གཅིག་གོ། །བཞི་པ་ནི་ཆ་ཆུང་ཕྱེད་དོ། །ལྔ་པ་ནི་ཆ་ཆུང་ཕྱེད་དང་གཉིས་སོ། །དྲུག་པ་ནི་ཆ་ཆུང་ཕྱེད་དོ། །བདུན་པ་ནི་ཆ་ཆུང་གཅིག་གོ། །བརྒྱད་པ་ནི་ཆ་ཆུང་ཕྱེད་དང་གཉིས་སོ། །དགུ་པ་ནི་ཆ་ཆུང་གཅིག་གོ། །བཅུ་པ་ནི་ཆ་ཆུང་ཕྱེད་དོ། །བཅུ་གཅིག་ [23b.5]པ་ནི་ཆ་ཆུང་ཕྱེད་དང་གཉིས་སོ། །འདི་རྣམས་དང་སྔར་བརྗོད་པའི་སྣམ་བུ་བཅུ་གཅིག་པོ་རྣམས་ཀྱི་རྒྱའི་ཚད་བརྗོད་པར་བྱ་སྟེ། དེ་ལ་ཚངས་པའི་ཐིག་གི་གཡས་དང་གཡོན་དུ་ཆ་ཆུང་ཕྱེད་དང་དྲུག་དོར་བར་སྣམ་བུ་དང་པོ་སྟེ་ཆ་ཆུང་ཕྱེད་དང་གསུམ་པའོ། །དེའི་སྟེང་དུ་ཐིག་དང་པོ་ནི་ཆ་ཆུང་ཕྱེད་དང་ [23b.6]བཞིའོ། །ཆ་ཆུང་དྲུག་དོར་བར་གཉིས་པ་དང་གསུམ་པ་སྟེ། ཆ་ཆུང་གསུམ་པའོ། །ཆ་ཆུང་བཞི་དོར་བར་བཞི་པ་སྟེ། ཆ་ཆུང་ལྔ་བའོ། །ཆ་ཆུང་ཕྱེད་དང་བཞི་དོར་བར་ལྔ་པ་ནི་ཆ་ཆུང་ཕྱེད་དང་ལྔ་པའོ། །ཆ་ཆུང་གསུམ་དོར་བར་དྲུག་པ་སྟེ་ཆ་ཆུང་ལྔ་པའོ། །བདུན་པ་ལ་སོགས་པ་བཞི་ནི་ཆ་ཆུང་ [23b.7]བདུན་པའོ། །བཅུ་གཅིག་པ་ནི་ཆ་ཆུང་ལྔ་པའོ། །འདི་ལ་སྣམ་བུ་ལྔ་པའི་ལོགས་སུ་ཆ་ཆུང་ཕྱེད་དང་བཞི་ནི་སྟེང་གི་ཆ་ལའོ། །བདུན་པ་ལ་འོག་ཏུ་ཆ་ཆུང་གསུམ་པ་སྟེ་སྟེང་དུ་ཆ་ཆུང་དྲུག་པའོ། །སྣམ་བུ་རྣམས་རེ་རེ་ཞིང་ཕྱིར་ངོས་ཀྱི་མཐར་ཐིག་གཅིག་ཇི་ལྟར་རིགས་པར་རོ། །ནང་གི་མཐར་ [24a] [24a.1]ཡང་ཐིག་དང་པོའི་ཆ་ཆུང་ཕྱེད་དོར་ནས་ཇི་ལྟར་རིགས་པར་གྱེན་དུ་འགྲེང་བའི་ཐིག་གཅིག་གོ། །དེ་དག་ནི་གཞན་དང་འབྲེལ་པས་ཀྱོག་པོ་གཅིག་ཏུ་མཐོང་སྟེ། ཇི་ལྟར་མཛེས་པར་བྲི་བར་བྱའོ། །འདིའི་ནང་དུ་རིན་པོ་ཆེ་ལ་སོགས་པ་བྲི་བའི་དོན་དུ་ཆ་ཆུང་ཕྱེད་དོར་ནས་དེ་ཁོ་ན་ [24a.2]བཞིན་དུ་ཐིག་ཀྱོག་པོ་གཅིག་གོ། །བྲེ་ཕུལ་གྱི་སྣམ་བུ་འདོད་པ་ལ་ནི་དེ་ཆ་ཆུང་བཅུ་དྲུག་པ་ཡིན་ནོ། །གང་དག །རྒྱལ་པོ་ཉེས་པ་གསུམ་ཉི་མ། །རྒྱལ་པོ་ཕྱོགས་དང་མི་རྣམས་གསུམ། །ཕྱོགས་ཏེ་ཐད་ཀར་ཆ་ཆུང་རྣམས། །རྟ་བབས་སྣམ་བུའི་རིམ་པ་ཡིན། །ཞེས་འདོད་པ་དེ་ལ་བར་གྱི་ [24a.3]ཆ་ཆུང་རྣམས་ལ་རིན་པོ་ཆེའི་ཤར་བུ་ལ་སོགས་པ་མེད་པས་རིན་ཆེན་ཤར་བུ་འདི་ལ་ཆ་ཆུང་བཅོ་བརྒྱད་དང་ལྡན་པ་ཡིན་ནོ་ཞེས་པ། ལ་སོགས་པ་བརྗོད་པར་ཇི་ལྟར་རིགས་ཞེས་བརྟག་པར་བྱའོ། །སྟེང་དུ་ཆུ་སྲིན་གྱི་ཁ་ནས་འཐོན་པའི་མུ་ཏིག་གི་ཆུན་འཕྱང་ལ་སོགས་པ་ནི་ཇི་ལྟར་མཛེས་པར་རོ། །རྟ་ [24a.4]བབས་ཀྱི་སྟེང་གི་ཚངས་ཐིག་ལ་ཆོས་ཀྱི་འཁོར་ལོ་རྩིབས་བཅུ་གཉིས་པ་ཆ་ཆུང་གཉིས་པའོ། །རྩིབས་བརྒྱད་ལྡན་པའི་འཁོར་ལོ་ནི། །ཆ་ལྔ་ལྡན་པའི་མུ་ཁྱུད་ཅན། །ཞེས་པ་ནི་ཁ་ཅིག་ཏུའོ། །དེའི་གདན་པདྨ་དང་ཟླ་བ་ནི་རྟ་བབས་ཀྱི་སྣམ་བུ་བཅུ་གཅིག་པ་ལའོ། །གདན་གྱི་གཡས་གཡོན་གྱི་ [24a.5]ལོགས་དག་ཏུ་གནས་པའི་མདའ་ཡབ་རྣམས་ལ་གནས་པའི་རི་དྭགས་དང་། རི་དྭགས་མོ་ནི་འཁོར་ལོ་ལ་ཁ་བལྟས་ཤིང་འཁོར་ལོ་ལས་ཆ་ཆུང་ཕྱེད་ཙམ་དུ་རིང་བར་གནས་པ་སྟེ། ཆ་ཆུང་གཅིག་ཏུ་མགྲིན་པ་དང་བཅས་པའི་གདོང་པ་འགྲེང་ཞིང་མིག་འཁོར་ལོའི་རྩེ་མོ་ལ་བལྟ་བ་བྲི་བར་བྱའོ། །དྲི་ [24a.6]མ་མེད་པའི་འོད་ལས་ནི། །འཁོར་ལོའི་གཡས་དང་གཡོན་དུ་ནི། །རི་དྭགས་དང་རི་དྭགས་མོའོ། །ཞེས་གསུངས་སོ། །ཁ་ཅིག་ནི་མདའ་ཡབ་མེད་དེ། དེའི་སྣམ་བུ་ལ་ནི་རི་དྭགས་དང་། རི་དྭགས་མོ་དག་ཁོ་ན་གནས་སོ་ཞེས་ཟེར་རོ། །འདོད་པ་དེ་ནི་འཕགས་པ་ཀླུའི་བློའི་ཞབས་ཀྱིས། །བུམ་ [24a.7]པ་ཀ་བའི་སྟེང་གནས་པའི། །སྒོ་ལས་སུམ་འགྱུར་རྟ་བབས་ནི། །ཕྱོགས་ཅན་མདའ་ཡབ་དག་དང་ལྡན། །དྲིལ་བུའི་སྒྲ་ནི་ཡང་དག་སྒྲོགས། །ཞེས་པའི་ལུང་དང་འགལ་ལོ། །འདིས་ནི་གདན་གྱི་གཞོགས་ན་གནས་པའི་རི་དྭགས་དང་རི་དྭགས་མོའི་མཇུག་མའི་ཕྱི་རོལ་གྱི་ཕྱོགས་དག་ཏུ་མདའ་ཡང་ [24b] [24b.1]གཉིས་གཉིས་གསུངས་སོ། །དེ་ཉིད་ཀྱི་ཕྱིར་བཞེད་པ་འདི་ལ་ནི་རི་དྭགས་དང་རི་དྭགས་མོ་དག་མདའ་ཡབ་ལ་གནས་པ་མ་ཡིན་ནོ། །འཁོར་ལོའི་ཕྱི་རོལ་གྱི་ཆ་ཆུང་གཉིས་ལ་སྣ་ཚོགས་རྡོ་རྗེའི་རའི་རྩེ་མོ་སྟེ། འཁོར་ལོའི་རྩིབས་ཀྱི་བར་རྣམས་སུ་ཡང་མཐོང་བའོ། །ར་ཆ་ཆུང་བཅུ་བཞི་བར་འདོད་པ་ [24b.2]ལ་ནི་འཁོར་དང་བཅས་པའི་དཀྱིལ་འཁོར་ཆ་ཆེན་བཅུ་གཉིས་པའི་རྟེན་སྣ་ཚོགས་རྡོ་རྗེའི་ལྟེ་བ་ཆ་ཆེན་བཅུ་གཉིས་པའི་ཕྱོགས་སོ་སོའི་ར་པདྨའི་ལྟེ་བའི་མཐའི་བར་དུ་གནས་པ་རྣམས་ནི་སྒོའི་ཆ་བཞི་དང་ལྡན་པའོ་ཞེས་པར་མི་འགྱུར་ཏེ། འདོད་པ་དེ་ནི་སྔར་དཔྱད་པ་ཡང་ཡིན་ནོ། །དཀྱིལ་འཁོར་གྱི་ལྟེ་བར་ [24b.3]སེང་ལྡེང་གི་ཕུར་པ་འོག་རྩེ་གཅིག་པ་སྟེ། སྟེང་རྡོ་རྗེ་རྩེ་ལྔ་པའི་རྣམ་པ་ཧཱུཾ་ལས་སྐྱེས་པར་བསམས་ནས་གདབ་པའི་སྔགས་ཀྱིས་བརྒྱ་རྩ་བརྒྱད་དུ་བཟླས་ནས། བརྡུང་བའི་སྔགས་ཀྱིས་རྡོ་རྗེ་ཐོ་བས་བརྡུངས་ཏེ། དེ་ལ་ཐིག་སྐུད་ཆ་ཆུང་དགུ་བཅུ་རྩ་དྲུག་པ་ཉིས་བལྟབ་བྱས་པ་བཏགས་པས་དབང་ལྡན་ [24b.4]གྱི་ཕྱོགས་ནས་བརྩམས་ནས་གཡས་སུ་ར་ཡི་རྩེ་མོ་ནས་ཕྱི་རོལ་པདྨའི་གེ་སར་གྱི་རི་མོ་ཟླུམ་པོར་བསྐོར་བར་བྱའོ། །དེའི་ཕྱི་རོལ་དུ་ཆ་ཆུང་གཉིས་པའི་པདྨའི་འདབ་མའི་ཕྲེང་བའི་ཁོར་ཡུག་གི་ཐིག་ཟླུམ་པོ་འདབ་མའི་རྩེ་མོས་རེག་པ་ཆོས་འབྱུང་གི་ཆ་མཚོན་པར་བྱེད་པའོ། །ཁ་ཅིག་ན་རེ་གང་དུ་ཡང་ [24b.5]བདེ་མཆོག་ལ་སོགས་པའི་དཀྱིལ་འཁོར་གྱི་ཁྱད་པར་འགའ་ཞིག་ལ་ཆོས་འབྱུང་བསྒོམ་པ་མེད་པ་དེ་ནི་ཆོས་ཀྱི་དབྱིངས་ཀྱི་ནང་དུ་ཆུད་པ་ཁོ་ན་ཡིན་པས་ཐིག་དེ་ནི་ཆོས་ཀྱི་དབྱིངས་མཚོན་པ་ཡིན་ནོ་ཞེས་སོ། །གཞན་དག་ནི་དེ་ཁོར་ཡུག་ཆེན་པོའི་ངོ་བོ་ཡིན་ནོ་ཞེས་སོ། །དེའི་ཕྱི་རོལ་དུ་ཆ་ཆུང་གཉིས་པའི་ [24b.6]རྡོ་རྗེའི་ཕྲེང་བའི་ཐིག་ཟླུམ་པོ་སྟེ། མཐུག་ཅིང་སྲ་བ་ཁོར་ཡུག་ཆེན་པོའི་ངོ་བོའོ། །རྡོ་རྗེའི་སྣམ་བུ་ལ་རྡོ་རྗེ་རྩེ་གསུམ་པ་རྣམས་སམ། རྩེ་ལྔ་པ་རྣམས་སམ་སྣ་ཚོགས་རྡོ་རྗེ་རྣམས་ཀྱང་རུང་སྟེ་ལུང་ཇི་ལྟ་བར་བྲི་བར་བྱའོ། །དེའི་ཕྱི་རོལ་དུ་ཆ་ཆུང་བཞི་པའི་འོད་ཟེར་གྱི་སའི་ཐིག་ཟླུམ་པོ་ནི་འོད་ཟེར་ [24b.7]འཕྲོ་བའི་ཚད་མཉམ་པར་བྱ་བའི་དོན་དུའོ། །དེ་ཉིད་ཀྱི་ཕྱིར་དེར་ཚོན་གྱི་རེ་ཁཱ་མི་བྱའོ། །ཀུན་དགའ་སྙིང་པོ་ནི་འོད་ཀྱི་དཀྱིལ་འཁོར་ལས་ཕྱི་རོལ་དུ་ཁོར་ཡུག་ཟླུམ་པོར་གདབ་པོ་ཞེས་སོ། །རྟ་བབས་ཀྱི་གློ་རྣམས་སུ་ནི་དར་དཔྱངས་ཀྱི་སྣམ་བུའི་སྟེང་དུ་ཆུ་སྲིན་གྱི་ཁ་ལས་བྱུང་བའི་སྣ་ཚོགས་རྡོ་རྗེའི་ར་ [25a] [25a.1]རྣམས་ནི་ཅུང་ཟད་གཞོགས་སུ་སོང་ནས་ཕྱིར་འབྱུང་བ་དབུས་ཀྱི་རྒྱར་ཆ་ཆུང་གསུམ་དང་ལྡན་པ་སྲིད་དུ་ཆ་ཆུང་བཅུ་དྲུག་པའོ། །སྣ་ཚོགས་རྡོ་རྗེ་རྩེ་ལྔ་པའི་ཕྱོགས་ལ་རའི་འགྲམ་དུ་རབ་གཞན་དག་གོ། །རྟ་བབས་ཀྱི་ཀ་བ་རྩིག་པའི་ཐིག་ལས་འཐོན་ཞིང་ཆ་ཆུང་བདུན་པའོ་ཞེས་ [25a.2]པའི་ཕྱོགས་ནི་མི་རིགས་ཏེ། གཞལ་ཡས་ཁང་ལས་ཅུང་ཟད་རིང་བར་རྟ་བབས་ཀྱི་ཀ་བ་རྣམས་རེ་རེ་ཞིང་སྟེགས་བུ་གྲུ་བཞི་པ་ལ་གནས་པའི་ཕྱིར་རོ། །ས་མཉམ་པོ་ལ་གནས་པ་ཉིད་ཀྱིས་སྟེགས་བུ་དང་འབྲེལ་པ་བཞིན་མཐོང་བས་སྟེགས་བུའི་ཕྱི་ངོས་སུ་འདི་རྣམས་བྲི་བར་རིགས་སོ། །དེ་བཞིན་དུ་ [25a.3]བར་གྱི་སྣམ་བུ་ནི་སྟེང་དུ་བཞི་ཆས་ཉུང་བའི་སྒོ་གཉིས་ཀྱི་ཚད་ཡིན་ནོ་ཞེས་པ་ནི་འཆལ་པའི་རྟོག་པར་རིག་པར་བྱའོ། །དེ་ལྟ་བུ་འདི་ནི་ཕྱོགས་གཅིག་བརྗོད་པའོ། །རྩ་བའི་ཐིག་བཞིས་ཡོངས་སུ་བཅད་པའི་རྩ་བའི་དཀྱིལ་འཁོར་ཁོ་ན་ལས་ཐིག་སྐུད་ཉིས་འགྱུར་གྱིས་རིང་བ་སྟེ། དེས་ཚངས་པའི་ [25a.4]ཐིག་ཆ་ཆུང་དྲུག་ཅུ་རྩ་བཞི་གདབ་པར་བྱའོ། །དེ་ལྟར་ཡང་། ཚངས་ཐིག་གི་ནི་ལོགས་རེ་རེར། །ཆ་ཆེན་བརྒྱད་རྣམས་གདབ་པར་བྱ། །ཆ་ཆེན་འདི་རྣམས་ཉིད་ལ་ནི། །རེ་རེ་ཞིང་ཡང་ཆ་ཆུང་བཞིར། །དེ་ནས་ཚངས་ཐིག་ལོགས་རེ་རེར། །ཆ་ཆུང་སུམ་ཅུ་རྩ་གཉིས་སོ། །ཆ་ཆེན་སྒོ་ཡི་ཚད་ཡིན་ [25a.5]ཏེ། །བཞི་ཆ་ཆ་ཆུང་བརྒྱད་ཆ་བཞི། །ཞེས་གསུངས་སོ། །གཞན་དུ་ཡང་བརྗོད་པ། དཀྱིལ་འཁོར་ཉིས་འགྱུར་ལྷག་པར་ནི། །གྲུ་བཞི་དག་པར་ཡང་དག་བྱས། །དེ་ནས་ཐིག་སྐུད་དཀར་བྱས་ནས། །རང་ཉིད་སྒྲུབ་པའི་གྲོགས་དང་ལྡན། །ཙནྡན་དཀར་པོ་བསྲེས་པ་ཡི། །སཱ་ལུ་བཏགས་པས་ [25a.6]སྤང་བར་བྱ། །ཚངས་པའི་ཐིག་ནི་དག་པ་གཉིས། །འཁོར་ལོའི་ཚང་ནི་གང་ཡིན་པ། །དེ་ཡི་ཉིས་འགྱུར་གདབ་པར་བྱ། །དེ་ཡི་ཕྱེད་དུ་རྩ་བའི་ཐིག །ཅེས་སོ། །ཚངས་པའི་ཐིག་གི་རྩེ་མོའི་ཕ་རོལ་དུ་པདྨའི་གེ་སར་དང་། པདྨའི་འདབ་མ་དང་། རྡོ་རྗེ་དང་འོད་ཀྱི་ཕྲེང་བ་རྣམས་ཀྱི་ཐིག་ཟླུམ་པོའོ། ། [25a.7]ཇི་སྐད་དུ། ཁོར་ཡུག་གི་ནི་ནང་དུ་ཡང་། །སྲིད་དུ་སྒོ་ཡི་བཅུ་དྲུག་གོ། །ཞེས་བཤད་པ་ནི་གེ་སར་གྱི་རེ་ཁཱ་ནས་བརྩམས་ནས་ཁོར་ཡུག་ཏུ་འདོད་དོ། །དེ་ཇི་ལྟར་རིགས་ཏེ་གེ་སར་དང་འདབ་མ་དང་། ཆོས་འབྱུང་རྣམས་ནི་རྡོ་རྗེའི་ཕྲེང་བ་དང་མ་འབྲེལ་ལ། རྡོ་རྗེ་ཕྲེང་བའི་ཚུལ་ཅན་རྡོ་རྗེའི་ར་བ་ནི་ཁོར་ཡུག་ [25b] [25b.1]དུ་བཤད་དོ། །དེ་ལྟར་ཡང་འཕགས་པ་ཀླུའི་ཞལ་སྔ་ནས། རྟ་བབས་རྡོ་རྗེའི་རྩེ་མོ་ཅན། །དེ་ཡི་ཕྱི་རོལ་ཁོར་ཡུག་སྟེ། །རྡོ་རྗེའི་ཕྲེང་བ་འོད་བཟང་ལྡན། །ཞེས་གསུངས་སོ། །འདིས་ནི་རྡོ་རྗེ་ཕྲེང་བ་ཉིད། །ཁོར་ཡུག་འོད་བཟང་ལྡན་ཞེས་གསལ་བར་བརྗོད་དོ། །ཅི་སྟེ་ཟླུམ་སྐོར་དུ་མཐུན་པའི་ཕྱིར་ [25b.2]གེ་སར་ལ་སོགས་པ་ཡང་ཁོར་ཡུག་དང་འདྲ་བས་ཁོར་ཡུག་ཏུ་བཏགས་ལ། འདི་རྣམས་བཏགས་པར་ཡང་བཞེད་པ་ཡིན་པར་གོ་བར་བྱ་སྟེ། དེའི་ཕྱི་རོལ་ཞེས་གསུངས་པའི་ཕྱིར་རོ་ཞེ་ན་གལ་ཏེ་དེ་ལྟར་ན་དེ་ནི་ལེགས་པར་བརྗོད་དོ། །ཁ་ཅིག་ན་རེ་དེ་བས་ཚིག་འདི་ཉིད་ཀྱིས་གེ་སར་ལ་སོགས་པ་མེད་དོ་ཞེས་པ་ནི་ [25b.3]མི་རིགས་ཏེ། པདྨ་ལ་སྣ་ཚོགས་རྡོ་རྗེ་གནས་པའི་ཕྱིར་རོ། །ཁ་ཅིག་ཏུ་ནི་པདྨ་དང་ཆོས་འབྱུང་མེད་པར་ཡང་དེ་ཡོད་དོ་ཞེས་གསུངས་སོ་ཞེ་ན། །དེ་ལྟར་འདིར་པདྨའི་འདབ་མ་དང་བཅས་པ་ཉིད་ལ་དེར་བཏགས་པ་ལེགས་སོ། །བསྡུས་པའི་རིམ་པར་ཡང་། བརྟན་གཡོའི་བདག་ཉིད་སྟོང་པར་ [25b.4]བསྒོམས་ནས་སུ། །ཆོ་གའི་སྦྱོར་བ་འདི་ཡིས་ནི། །ཡེ་ཤེས་ས་གཞི་བྱིན་གྱིས་བརླབ། །ནམ་མཁའི་ཁམས་ཀྱི་དབུས་གནས་པར། །རླུང་གི་དཀྱིལ་འཁོར་བསྒོམ་པར་བྱ། །ཞེས་པ་ལ་སོགས་པ་ནས། །དཀྱིལ་འཁོར་བཞི་བསྡུས་རྡོ་རྗེ་ཡིས། །ས་ཡི་ཆ་ཡི་དཀྱིལ་འཁོར་ཏེ། དེར་ནི་བྷཱུཾ་ཡིག་ [25b.5]ལས་བྱུང་བའི། །གཞལ་ཡས་ཁང་པར་རྣམ་པར་བསྒོམ། །ཞེས་པའི་བར་དུ་སྟེ། འདིར་ཡེ་ཤེས་ས་གཞི་དང་ནམ་མཁའི་ཁམས་ནི་ཆོས་འབྱུང་ངོ་། །དེའི་དབུས་ནི་པདྨའོ། །དེར་གནས་པའི་རླུང་དང་མེ་དང་ཆུ་དང་སའི་དཀྱིལ་འཁོར་བཞི་འདྲེས་པར་གྱུར་པས། སའི་ཆ་སྣ་ཚོགས་རྡོ་རྗེའི་ངོ་བོར་ [25b.6]བསྐྱེད་ནས། དེའི་སྟེང་དུ་ཟླ་བའི་དཀྱིལ་འཁོར་ལ་བྷཱུཾ་ལས་གཞལ་ཡས་ཁང་ངོ་ཞེས་པའི་དོན་ཏོ། །དེ་ནས་འདིར་པདྨ་མེད་པར་སྣ་ཚོགས་རྡོ་རྗེའོ་ཞེས་པ་ནི་ཆེར་འཁྲུལ་ལོ། །སྣ་ཚོགས་རྡོ་རྗེའི་ལྟེ་བ་ནི་སྒོའི་ཚད་བཅུ་གཉིས་སོ། །དེའི་ར་བ་རྣམས་ཀྱི་སྲིད་དུ་སོ་སོར་སྒོ་གཉིས་སོ། །དེ་ལ་རྩ་བའི་ [25b.7]ཐིག་གི་ནང་དུ་སྒོའི་ཚད་བརྒྱད་དོ། །ཕྱི་རོལ་སྲིད་དུ་སྒོ་གཉིས་སོ། །དེ་ལ་བར་སྐབས་ཀྱི་སྣམ་བུ་མེད་པ་ཉིད་དོ། །རྟ་བབས་ནི་རྟ་བབས་ཀྱི་ཀ་བའི་བར་དུ་ངོས་སུ་སྒོ་ལས་སུམ་འགྱུར་རོ། །ཀ་བའི་སྟེང་གི་རྟ་བབས་དེའི་དཔངས་སུ་སྒོ་གཅིག་གི་ཚད་ལ་སྣམ་བུ་བཅུ་གཅིག་གོ། །དེ་ལ་གོ་རིམས་ [26a] [26a.1]བཞིན་དུ་རིན་ཆེན་ཤར་བུ་དང་། རིན་པོ་ཆེ་དང་། རྟ་མིག་དང་གསེར་དང་། ཆུ་སྲིན་དང་། གསེར་དང་། རྨིག་པ་དང་། རིན་པོ་ཆེ་དང་། རྨིག་པ་དང་། གསེར་དང་མདའ་ཡབ་རྣམས་ཀྱི་སྣམ་བུ་སྟེ། སྒོའི་བརྒྱད་ཆ་དང་། བརྒྱད་ཆ་དང་། བཅུ་གཉིས་ཆ་དང་། ཉི་ཤུ་རྩ་བཞི་ཆ་ [26a.2]དང་། བརྒྱད་ཆ་དང་། ཉི་ཤུ་རྩ་བཞི་ཆ་དང་། བཅུ་གཉིས་ཆ་དང་། བརྒྱད་ཆ་དང་། བཅུ་གཉིས་ཆ་དང་། ཉི་ཤུ་རྩ་བཞི་ཆ་དང་། བརྒྱད་ཆའོ། །རིན་ཆེན་ཤར་བུ་རིན་ཆེན་གནས་དང་གསེར། །ཆུ་སྲིན་དེ་ནས་གསེར་གྱི་གནས་དང་ནི། །རིན་ཆེན་གནས་དང་གསེར་དང་མདའ་ཡབ་སྟེ། །གནས་ [26a.3]རྣམས་ཆ་ནི་བཅུ་གཉིས་ཆ་རུ་འགྱུར། །གསེར་གྱི་རྣམ་གྲངས་སྒོ་ཡི་ཉེར་བཞི་ཆ། །སྣམ་བུ་ལྷག་མ་སྒོ་ཡི་བརྒྱད་ཆ་ཡིན། །ཞེས་གསུངས་སོ། །འདི་རྣམས་ཀྱི་རྒྱའི་ཚད་བརྗོད་པར་བྱ་སྟེ། ཚངས་ཐིག་གི་གཡས་དང་གཡོན་དུ་ཆ་ཆུང་ཕྱེད་དང་ལྔ་དོར་བར་སྣམ་བུ་དང་པོ་ནི་ཆ་ཆུང་ཕྱེད་དང་ [26a.4]གསུམ་པའོ། །དེའི་སྟེང་གི་ཐིག་དང་པོ་ནི་ཆ་ཆུང་ཕྱེད་དང་བཞི་པའོ། །ཆ་ཆུང་ལྔ་དོར་བར་གཉིས་པ་དང་གསུམ་པ་སྟེ་ཆ་ཆུང་གསུམ་པའོ། །ཆ་ཆུང་བཞི་དོར་བར་བཞི་པ་ཆ་ཆུང་གསུམ་མོ། །ཆ་ཆུང་ཕྱེད་དང་བཞི་དོར་བར་ལྔ་པ་ཆ་ཆུང་ཕྱེད་དང་བཞིའོ། །ཆ་ཆུང་གསུམ་དོར་བར་དྲུག་པ་ནི་ཆ་ཆུང་ [26a.5]ལྔ་པའོ། །བདུན་པ་ལ་སོགས་པ་གསུམ་ནི་ཆ་ཆུང་བརྒྱད་པའོ། །བཅུ་པ་ནི་ཆ་ཆུང་བདུན་པའོ། །བཅུ་གཅིག་པ་ནི་ཆ་ཆུང་དྲུག་པའོ། །སྣམ་བུ་རྣམས་སོ་སོའི་ཕྱིའི་མཐར་ཐིག་གཅིག་གྱེན་དུ་ཇི་ལྟར་རིགས་པར་རོ། །ནང་གི་མཐར་ཡང་སྟེ་ཐིག་དང་པོ་ནི་ཆ་ཆུང་ཕྱེད་དོར་ནས་གྱེན་དུ་འགྲེང་ [26a.6]བའོ། །འདི་ཉིད་ནི་ཐིག་གཞན་དང་འབྲེལ་པས་ཀྱོག་པོ་གཅིག་ཏུ་མཐོང་བར་འགྱུར་ཏེ། ཇི་ལྟར་མཛེས་པར་བྱའོ། །འདིའི་ནང་དུ་རིན་པོ་ཆེ་ལ་སོགས་པ་བྲི་བའི་དོན་དུ་ཆ་ཆུང་ཕྱེད་དོར་ཏེ། དེ་ཁོ་ན་བཞིན་དུ་ཐིག་ཀྱོག་པོ་གཅིག་གོ། །འགའ་ཞིག་ནི། དེ་ལ་རྒྱར་ནི་ཆ་ཆེན་པོ། །བཞི་ཡིས་ནོར་ [26a.7]བུའི་སྣམ་བུའོ། །དེ་བཞིན་རྟ་མིག་བཅད་པ་དང་། །རང་གི་མཚན་མས་བརྒྱན་པ་སྟེ། །ཆ་ཆེན་ཕྱེད་དང་བཞི་པ་ནི། །རིན་ཆེན་ཤར་བུ་གསེར་དེ་བཞིན། །ཆ་ནི་ཆེན་པོ་གསུམ་ཉིད་ཀྱིས། །ཆུ་སྲིན་དང་ནི་མདའ་ཡབ་པོ། །ཞེས་སྨྲའོ། །འདོད་པ་དེ་ལ་བར་གྱི་ཆ་ཆུང་རྣམས་ལ་རིན་ཆེན་ཤར་བུ་ལ་སོགས་ [26b] [26b.1]པ་མེད་ན། རིན་ཆེན་ཤར་བུའི་སྣམ་བུ་ཆ་ཆུང་བཅུ་དྲུག་ཅེས་པ་ལ་སོགས་པ་བརྗོད་པ་ཇི་ལྟར་རིགས་ཞེས་དཔྱད་པར་བྱའོ། །རྟ་བབས་ཀྱི་སྟེང་དུ་སྒོ་ཚད་གཅིག་གི་ཚངས་ཐིག་ལ་ཆུ་ཆུང་གཉིས་པའི་འཁོར་ལོའོ། །དེའི་གདན་ནི་མདའ་ཡབ་ཀྱི་སྣམ་བུའོ། །དེའི་གློ་དག་ཏུ་སྔོན་བཞིན་རི་དྭགས་དང་ [26b.2]རི་དྭགས་མོའོ། །དེ་དག་གི་མཇུག་མའི་ཕ་རོལ་ཏུ་མདའ་ཡབ་ལ་གནས་ཤིང་། སྤྲེའུས་བཟུང་བའི་ཟླ་ཚེས་དང་། རིན་པོ་ཆེ་དང་། རྡོ་རྗེའི་རྩེ་མོ་ཅན་གྱི་ཆ་ཆུང་ཕྱེད་དང་གསུམ་པའི་རིན་པོ་ཆེའི་ཡུ་བ་ལ་མཐའ་མར་དར་ལྕེའི་ཤམ་བུ་དང་བཅས་པའི་གཡོག་ཆ་ཆུང་གཉིས་པའི་གདུགས་དཀར་པོ་གཉིས་ [26b.3]ཏེ། ཁ་ཅིག་ཏུ་ནི་དམར་པོ་དར་དཔྱངས་གཉིས་འཕྱང་བའོ། །དེའི་སྟེང་ཡུ་བ་བཞི་པའི་ཆད། །གདུགས་གཡོག་དག་ཀྱང་དེ་བཞིན་ནོ། །ཞེས་ནི་གཞན་ཟེར་རོ། །ཁ་ཅིག་ནི་གདུགས་ཆ་ཆུང་དྲུག་པའོ་ཞེས་སོ། །མདའ་ཡབ་མཐའ་མའི་སྟེང་དུ་ཆ་ཆུང་གཅིག་པའི་རྒྱལ་མཚན་དང་བ་དན་ནོ། །འཁོར་ལོ་ལས་ [26b.4]ཕྱིར་ངོས་སུ་ཆ་ཆུང་གཉིས་པའི་སྣ་ཚོགས་རྡོ་རྗེའི་ར་སྟེ། འཁོར་ལོའི་རྩིབས་ཀྱི་བར་བར་རྣམས་སུ་ཡང་མཐོང་བཞིན་པའོ། །དེའི་ཕྱི་རོལ་གྱི་ཕྲེང་བ་གཉིས་ཀྱི་སྣམ་བུ་དག་ནི་ཆ་ཆུང་གཅིག་པ་དག་གམ། གཉིས་པ་དག་གོ། །འོད་ཀྱི་ཕྲེང་བ་ནི་ཆ་ཆུང་གཉིས་པའོ། །དེ་ལྟར་ཡང་རྡོ་རྗེ་མཁའ་འགྲོའི་རྒྱུད་ལས། [26b.5]ཕྱི་རོལ་འོད་ཀྱི་དཀྱིལ་འཁོར་ནི། །ཚོན་གྱི་ས་ཡི་ཉིས་འགྱུར་ཚད། །ཁོར་ཡུག་དེ་ཡི་ཕྱི་རོལ་དུ། །ཤིང་སོགས་དུར་ཁྲོད་བརྒྱད་པོ་ཡིན། །ཞེས་གསུངས་སོ། །དུར་ཁྲོད་རྣམས་ནི་དུར་ཁྲོད་ན་གནས་པའི་ལྷ་རྣམས་ཁོ་ན་ལ་ཡོད་ཀྱི་གཞན་རྣམས་ལ་ནི་མ་ཡིན་ནོ། །སྐལ་བ་དང་མི་ལྡན་པ་འདུས་པ་ནི་དེ་ [26b.6]རྣམས་ཀྱང་རྡུལ་ཚོན་གྱི་དཀྱིལ་འཁོར་དུ་མི་བྲིའོ། །གཞན་དུ་འོད་ཟེར་གྱི་སྣམ་བུ་ཆ་ཆུང་བཞི་པར་གསུངས་སོ། །ཁ་ཅིག་ཏུ་ནི་བདེ་མཆོག་གི་དཀྱིལ་འཁོར་ལ། །རྡོ་རྗེ་པདྨ་འཁོར་ལོའི་གཟུགས། །ར་བ་གསུམ་ཡང་དགོད་པར་བྱ། །ཞེས་པ་འདིས་རྡོ་རྗེ་ཕྲེང་བ་ལས་ཕྱི་རོལ་དུ་པདྨ་དང་འཁོར་ [26b.7]ལོའི་ཕྲེང་བ་དག་གསུངས་སོ། །ཟླུམ་པོ་བསྐོར་བའི་དོན་དུ་ཐིག་སྐུད་མཐོ་གང་ལ་སོགས་པ་ལྷག་པར་བྱའོ། །ཐིག་སྐུད་བརྐྱང་བས་ཀྱང་ཟླུམ་པོའི་ཐིག་བྱའོ། །བཅོམ་ལྡན་འདས་ཀྱིས་དཀྱིལ་འཁོར་ཉིས་འགྱུར་དུ་རིང་བར་གསུངས་པ་ནི་བྲི་བྱའི་དཀྱིལ་འཁོར་ལ་སྣ་ཚོགས་རྡོ་རྗེ་དང་དེའི་རྟེན་གྱི་ལྟེ་བའི་ [27a] [27a.1]མཐའ་མ་མཉམ་པ་ཚུན་ཆད་རྩ་བའི་དཀྱིལ་འཁོར་གྱི་ནང་དང་ཕྱི་མཉམ་པར་མཚོན་པ་སྟེ་འདི་ནི་ཕྱོགས་གཉིས་པའོ། །ཀླུའི་བློའི་ཞབས་ཀྱིས་ནི་ཕྱོགས་དང་པོ་ཉིད་བསྔགས་སོ། །དེས་ནི་སྒོ་ཁྱུད་དང་འགྲམ་དག་གི་ཚད་མཉམ་པ་དང་། བུམ་པ་ཀ་བའི་སྟེང་གནས་པའི། །རྟ་བབས་སྒོ་ [27a.2]ལས་སུམ་འགྱུར་དང་། །ཞེས་གསུངས་སོ། །དེ་ལྟར་ན་རྟ་བབས་ནི་སྒོ་ལས་ངོས་སུ་སུམ་འགྱུར་དུ་མི་འགྱུར་ཏེ་བཞི་འགྱུར་དུ་འགྱུར་རོ། །དེའི་ཕྱིར་དེ་ནི་དབངས་སུ་སུམ་འགྱུར་ཉིད་དུ་བཞེད་དོ། །ཀུན་ཏུ་སྟེགས་བུ་སྒོ་ཡི་ཕྱེད། །འགྲམ་དང་ལོགས་ཀྱང་དེ་བཞིན་ནོ། །ཞེས་པའི་ལུང་ལས། བཅོམ་ [27a.3]ལྡན་འདས་ཀྱིས་འགྲམ་པ་ནི་སྒོའི་ཕྱེད་དུ་ཡང་གསུངས་ལ། ངོས་སུ་རྟ་བབས་སྒོའི་སུམ་འགྱུར་གྱི་ཕྱོགས་ཀྱང་ངོ་། །དེ་ལྟར་ཕྱོགས་གཉིས་ཀ་ཡང་ཁོ་བོས་བཤད་དོ། །ཕྱོགས་གཉིས་པ་ལ་དབུས་ཀྱི་དཀྱིལ་འཁོར་ལས་པདྨའི་གེ་སར་གྱི་ཟླུམ་པོའི་ཐིག་ཚུན་ཆད་ཀྱི་དཀྱིལ་འཁོར་དུ་ཉིས་འགྱུར་དུ་བརྗོད་ [27a.4]དོ། །ཕྱོགས་དང་པོ་ལ་ནི་དབུས་ཀྱི་དཀྱིལ་འཁོར་འཁོར་དང་བཅས་པ་ལས་འོད་ཀྱི་ཕྲེང་བའི་བར་ཉིས་འགྱུར་དུའོ། །རྟ་བབས་ཀྱི་ཀ་བ་ལས་ཕྱི་རོལ་པདྨའི་གེ་སར་ཟླུམ་པོའི་ཐིག་ལས་ཚུ་རོལ་ཆ་ཆུང་བཅུ་བཞི་པའོ་ཞེས་པ་ནི་ཕྱོགས་གཉིས་ཀ་དང་ཡང་མི་མཐུན་པས་སྤངས་སོ། །འདིར་སྒོ་དང་སྒོ་ཁྱུད་ཀྱི་ [27a.5]མཚམས་སུ་ཆ་ཆུང་གཅིག་པ་ལ་ཟླ་ཚོས་ལ་གནས་པའི་རིན་པོ་ཆེ་དམར་པོའམ། སེར་པོའམ། ལྗང་གུའམ། ནག་པོ་ཡང་རུང་སྟེ། སྟེང་དུ་རྡོ་རྗེ་ཕྱེད་པས་མཚན་པའམ། ཡོངས་སུ་རྫོགས་པའི་རྡོ་རྗེས་མཚན་པའོ། །དེ་ལྟར་ཡང་། ཚོན་གྱི་ས་ལས་ཕྱི་ཡི་ཟུར། །སྒོ་དང་སྒོ་ཁྱུད་མཚམས་རྣམས་སུ། ། [27a.6]ཟླ་བ་རིན་ཆེན་རྡོ་རྗེས་མཚན། །ཀུན་ནས་ཡོངས་སུ་འབར་བ་ཡིན། །ཞེས་གསུངས་སོ། །གཞན་དུ་ཡང་། སྟེགས་བུའི་ཕྱི་དང་ནང་གི་ཟུར་རྣམས་སུ། །ཟླ་བ་ཉི་མ་རིན་ཆེན་རྡོ་རྗེ་དག། །རྡོ་རྗེས་མཚན་པའམ་རིན་ཆེན་གཅིག་པོ་ནི། །མཁས་པ་རྣམས་ཀྱིས་རིམ་བཞིན་ཡང་དག་བྲི། །ཞེས་སོ། །རྟ་ [27a.7]བབས་ཀྱི་ཀ་བ་རྣམས་ནི་སྟེགས་བུ་གྲུ་བཞི་པ་ལ་གནས་པའི་བུམ་པ་ལ་གནས་པའོ། །དེ་ལྟར་ཡང་། ཆུ་སྲིན་ཁ་ནས་ཆུ་སྲིན་བར། །རྟ་བབས་སྒོ་ལས་སུམ་འགྱུར་རོ། །སྟེགས་བུ་བུམ་པ་ལས་བྱུང་བའི། །རྟ་བབས་ཀ་བ་དྲང་པོར་བྱ། །ཞེས་གསུངས་སོ། །དེ་རྣམས་ཀྱི་རྩ་བ་དང་རྩེ་མོ་ལ་ནོར་བུས་ [27b] [27b.1]སྤྲས་པའོ། །དབུས་སུ་གླང་པོ་ཆེའི་སྟེང་དུ་དཔུང་པ་ལ་བཏེག་པའི་སེང་གེའོ། །རྟ་བབས་ཀྱི་གདུང་ནས་དང་ངེ་མེད་པའི་ཕྱོགས་ལ་རིན་ཆེན་ཤར་བུའི་སྣམ་བུ་ནས་འཕྱང་བའི་རིན་པོ་ཆེའི་པ་ཏྲ་འཕྲོ་བ་ལས་ཇི་ལྟར་མཛེས་པར་དབྱངས་བའི་ཁ་དོག་དམར་པོ་དང་སེར་པོ་ལ་སོགས་པའམ་སྣ་ཚོགས་པའི་དར་དཔྱངས་ [27b.2]དང་། རིན་པོ་ཆེའི་ཡུ་བ་ཅན་གྱི་རྔ་ཡབ་རྣམས་སོ། །ཁ་གཅིག་ཏུ་ནི་དར་དཔྱངས་ཀྱི་སྣམ་བུ་ལ་གླང་པོ་ཆེའི་སྟེང་དུ་སེང་གེའི་ཁ་ནས་རིན་པོ་ཆེའི་དོ་ཤལ་འཕྱང་བ་དང་། ཀ་བའི་དབུས་སུ་མེ་ལོང་ཞེས་གསུངས་སོ། །རིན་པོ་ཆེའི་སྣམ་བུ་ལ་ནི་ཟུར་གསུམ་དང་། ཐིག་ལེ་དང་། གྲུ་བཞི་དང་། ཟླུམ་པོ་རྣམས་ [27b.3]རིམ་པས་རིན་པོ་ཆེའི་བཅིངས་པ་ནི་ཀ་བ་སོ་སོའི་གཞོགས་སུའོ། །དྲ་བའི་སྣམ་བུ་ལ་གསེར་གྱི་སྐེ་རགས་བཞིའི་ངོས་སུ་ཆུ་སྲིན་མ་ཀ་རའི་ཁ་ནས་བྱུང་བའི་མུ་ཏིག་གི་དོ་ཤལ་སྐུད་པ་དམར་པོ་ལས་བརྒྱུས་ཤིང་། གློ་གཉིས་དང་། སྟེང་དང་འོག་ཏུ་གསེར་གྱིས་བསྡམས་པའི་ནོར་བུ་དབུས་ན་ཡོད་པ་དང་། དོ་ [27b.4]ཤལ་གྱི་གློ་གཉིས་སུ་དོ་ཤལ་ཕྱེད་པ་ཅུང་ཟད་ཐུང་བར་འཕྱང་བའི་རིན་པོ་ཆེའི་ཕྲེང་བ་དྲང་ཞིང་རྩེ་མོ་གསེར་གྱིས་བསྡམས་པའི་ནོར་བུ་སྦོམ་པོ་དང་ལྡན་པས་མཛེས་པ་དང་། ཁ་ཅིག་ཏུ་ནི་རིན་པོ་ཆེའི་ཡུ་བ་ཅན་གྱི་རྔ་ཡབ་དང་། དྲིལ་བུའི་མཐར་རྔ་ཡབ་འཕྱང་བའོ། །ཁ་ཅིག་ཏུ་ནི་དྲ་བ་ཕྱེད་པའི་གློ་གཉིས་སུ་ [27b.5]ཡིད་དུ་འོང་བའི་མེ་ཏོག་ཕྲེང་བའི་དྲ་བ་ཕྱེད་པ་འཕྱང་ཞིང་། དེའི་གློར་གོས་སྣ་ཚོགས་པའི་དྲ་བ་ཕྱེད་པའོ་ཞེས་གསུངས་སོ། །གཞན་ནི་གྲྭ་རྣམས་སུ་ཡིད་དུ་འོང་བའི་མེ་ཏོག་གི་ཕྲེང་བའི་ངོ་ཤལ་ཕྱེད་པ་དང་། དར་གྱི་ཆུན་པོའི་དོ་ཤལ་རྣམས་སོ་ཞེའོ། །དོ་ཤལ་གྱི་ནང་དུ་ཁ་ཅིག་ཏུ་ནི་པདྨ་ལ་ཟླ་ཚེས་དང་ [27b.6]རྡོ་རྗེ་ཕྱེད་བས་མཚན་པའི་ཉི་མའི་དཀྱིལ་འཁོར་རོ། །ཁ་ཅིག་ཏུ་ནི་རིན་པོ་ཆེའོ། །ཁ་ཅིག་ཏུ་ནི་པདྨ་ལ་གནས་པའི་རྡོ་རྗེའོ། །ཕྱོགས་རྣམས་སུ་པདྨའི་འདབ་མ་ཕྱེད་པའི་དབྱིབས་ཅན་གྱི་མདའ་ཡབ་རྣམས་ལ་གསེར་གྱི་བུམ་པ་ལ་གནས་པའམ། རིན་པོ་ཆེའི་བུམ་པ་ལ་གནས་པའི་རྒྱལ་མཚན་དང་། བ་ [27b.7]དན་བརྒྱད་དེ། ཟླ་ཚེས་དང་རིན་པོ་ཆེ་དང་། རྡོ་རྗེ་དང་ལྡན་པའི་རྩེ་མོ་ཅན་རིན་པོ་ཆེའི་དབྱུག་པ་ལ་བཅིངས་ཞིང་དྲིལ་བུ་འཁྲོལ་བ་བཅིངས་པའི་དར་ལྕེ་གསུམ་པ་རྩེ་མོ་ལ་རི་དྭགས་ཀྱི་རྒྱལ་པོ་དང་། ངང་པའི་རྒྱལ་པོ་དང་ཀླུ་ཟ་བ་དང་། ཉ་སྦུ་རྒྱས་པ་དང་ཆུ་སྲིན་གྱིས་མཚན་པ། རླུང་གིས་བསྐྱོད་པས་སུམ་ [28a] [28a.1]ཁུགས་སུ་འཁྱོག་ཅིང་འགྱིང་བའི་ཆ་བྱད་ཅན། དྲིལ་ཆུང་གི་སྒྲ་སྒྲོགས་པས་སིལ་སིལ་ཟེར་བ་རྔ་ཡབ་དང་བཅས་པའོ། །བ་དན་རྣམས་ཀྱང་དེ་བཞིན་དེ། །རི་དྭགས་ལ་སོགས་པའི་མཚན་མ་གཞན་དང་ནི་བྲལ་བའོ། །གྲྭ་བཞིར་མངའ་ཡབ་ཀྱི་སྟེང་དུ་གདུགས་བཞིའོ། །རྟ་བབས་ལ་རྣམ་ [28a.2]པར་བཀྲ་བའི་བླ་རེ་དང་དོ་ཤལ་དང་དོ་ཤལ་ཕྱེད་པའོ། །རྟ་མིག་དང་བ་དན་གྱི་མཐའ་རྣམས་སུ་རྒྱལ་མཚན་དང་བ་དན་རྣམས་ཏེ་ཇི་ལྟར་མཛེས་པར་རོ། །སེང་གེ་དང་། སེང་གེ་རྐང་པ་བརྒྱད་པ་དང་། ངང་པ་དང་། རྨ་བྱ་དང་། མིའམ་ཅི་དང་། མིའམ་ཅི་མོ་རྣམས་ཀྱང་ངོ་། །རྟ་བབས་ཀྱི་གཞོགས་རྣམས་སུ་ [28a.3]ཤིན་ཏུ་མི་རིང་བར་བུམ་པ་བཟང་པོ་ལས་སྐྱེས་པའི་དཔག་བསམ་གྱི་ཤིང་རྣམས་ཏེ། གླང་པོ་ཆེ་ལ་སོགས་པ་རིན་པོ་ཆེ་བདུན་དང་ལྡན་པའོ། །བར་བར་དུ་ནི་གྲུབ་ཐོབ་རྣམས་དང་། མེ་ཏོག་གི་ཕྲེང་བ་བཟུང་བ་སྤྲིན་གྱི་སྦུབས་ལས་བྱུང་བའི་ལྷའི་ལུས་ཅན་རྣམས་སོ། །དེ་ལྟ་བུ་འདི་ནི་རྩ་བའི་དཀྱིལ་འཁོར་ [28a.4]ལས་ཕྱི་རོལ་དུ་ཐིག་གདབ་ཅིང་བྲི་བའི་རིམ་པ་སྟེ་དཀྱིལ་འཁོར་ཐམས་ཅད་ཀྱི་ཐུན་མོང་ངོ་། །ནང་དུ་ནི་བྱེ་བྲག་ཏུ་བརྗོད་པར་བྱ་སྟེ། རྩ་བའི་ཐིག་གི་ནང་དུ་སྒོའི་ཚད་དུ་ལྷ་སྣམ་དོར་ནས་ངོས་ཐིག་གཅིག་ཟུར་ཐིག་གཉིས་ཀྱི་བར་དུའོ། །དེའི་ནང་དུ་གཟུགས་རྡོ་རྗེ་མ་ལ་སོགས་པ་དགོད་པའི་དོན་དུ་སྒོ་ [28a.5]ཚད་དོར་ནས་ཚངས་པའི་ལྟེ་བ་ལ་གནས་པའི་ཐིག་སྐུད་ཀྱིས་ཚངས་པའམ་དབང་ལྡན་གྱི་ཐིག་ནས་བཟུང་ནས། དབུས་ཀྱི་དཀྱིལ་འཁོར་གྱི་མཚམས་ཀྱི་ཟླུམ་པོའི་ཐིག་དང་པོའོ། །དེའི་ནང་དུ་རྡོ་རྗེ་ཕྲེང་བའི་ཆ་ཆུང་སྤངས་ནས་དེ་ལྟར་ཟླུམ་པོའི་ཐིག་གཉིས་པའོ། །དེ་ནས་ཕྱོགས་གཞན་གྱི་ཟླུམ་པོའི་ཐིག་ [28a.6]གི་བར་དུ་ཚངས་ཐིག་གི་གཡས་ཕྱོགས་སུ་ཐིག་གཉིས་ཏེ། དང་པོ་ནི་ཆ་ཆུང་གཉིས་དོར་བར་རོ། །གཉིས་པ་ནི་གཙོ་བོའི་མཚན་མ་དང་ཀ་བའི་ཆ་ཆུང་དོར་ནས་སོ། །དེ་ལྟར་གཡོན་དུའོ། །འདིར་ལྷོར་གནས་ཏེ་བྱང་དུ་ཕྱོགས་པས་ཤར་ཕྱོགས་སུ་ཀ་བའི་ཐིག་གདབ་བོ། །བྱང་དུ་གནས་ཏེ་ལྷོར་ཕྱོགས་ [28a.7]པས་ནུབ་ཏུའོ། །ནུབ་ཏུ་གནས་ཏེ་ཤར་དུ་ཕྱོགས་པས་བྱང་དུའོ། །ཤར་དུ་གནས་ཏེ་ནུབ་ཏུ་ཕྱོགས་པས་ལྷོར་རོ། །རྡོ་རྗེ་མཁའ་འགྲོར་ནི་ཟླུམ་པོའི་ཐིག་དང་པོ་ལས་ཕྱིར་འོད་ཀྱི་ཕྲེང་བའི་དོན་དུ་ཆ་ཆུང་གཅིག་སྤངས་པར་ཟླུམ་པོའི་ཐིག་གཅིག་གསུངས་སོ། །དེ་ནས་ཚངས་ཐིག་དང་ཟུར་ཐིག་ཕྱི་བས་ [28b] [28b.1]རེ་མིག་དགུར་འགྱུར་རོ། །གཞན་ཡང་ཚངས་ཐིག་དང་གཙོ་བོའི་གནས་ཀྱི་སྣམ་བུའི་ནང་གི་ཐིག་རྣམས་ནི་དབྱི་བར་བྱའོ། །ལྷའི་གནས་དང་ཚོན་ཁྱད་པར་དུ་བྱ་བའི་དོན་དུ་ཟུར་ཐིག་དང་ལྷ་སྣམ་གྱི་ཐིག་རྣམས་ནི་གཞག་ཅིང་རྡུལ་ཚོན་གདབ་པ་ཉིད་ཀྱིས་གཡོགས་པར་བྱའོ། །འདིར་གལ་ཏེ་དེ་ལྟར་ [28b.2]གདབ་པ་ལས་གཞན་དུ་གདབ་པར་འདོད་ན་དེའི་ཚེ་ཚངས་ཐིག་གི་ཕྱི་རོལ་དུ་ཆ་ཆུང་གཉིས་སྤངས་པར་ཐིག་གཅིག་གོ། །དེའི་ཕྱི་རོལ་དུ་ཆ་ཆུང་རེ་རེ་དོར་བར་ཐིག་དྲུག་སྟེ། ཐིག་བདུན་ཀ་ཡང་གཞལ་ཡས་ཁང་གི་མདའ་ཡབ་ཀྱི་ཐིག་གི་བར་དུའོ། །དེ་ལ་དཀྱིལ་འཁོར་གྱི་བརྗོད་པའི་བདུན་གདབ་པ་ཉིད་ [28b.3]བཏབ་ནས་སྔར་བཞིན་ཐིག་ཟླུམ་པོ་གསུམ་བྱས་ཏེ། སྔོན་གྱི་ཐིག་གདབ་པའི་རིམ་པས་གནས་པའི་ཐིག་རྣམས་བཞག་སྟེ་གཞན་རྣམས་དབྱི་བར་བྱའོ། །འདི་གཉིས་ཀ་ཡང་འཇམ་པའི་རྡོ་རྗེའི་དཀྱིལ་འཁོར་གྱི་ཐིག་གདབ་པའོ། །གཙོ་བོ་གཞན་དགོད་པ་ལ་ཡང་འདིའོ། །འདིས་ནི། གྲུ་བཞི་ [28b.4]པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །ཐིག་བཞི་དང་ནི་ཡང་དག་ལྡན། །ཕྱི་ཡི་དཀྱིལ་འཁོར་ཐིག་གདབ་བྱ། །དེ་ཡི་ནང་དུ་དཀྱིལ་འཁོར་ནི། །དཀྱིལ་འཁོར་བརྒྱད་པ་ལྟ་བུ་ཡིན། །ཕྱི་ཡི་འཁོར་ལོའི་ཕྱེད་དུ་ནི། །ཀུན་ནས་ཡོངས་སུ་ཟླུམ་པོའོ། །འཁོར་ལོ་ཀ་བ་ལ་ [28b.5]སོགས་སྤྲས། །རྡོ་རྗེ་ཕྲེང་བས་བསྐོར་ཞིང་མཛེས། །ཞེས་པ་དང་། འཁོར་ལོ་ཀ་སོགས་ཐིག་རྣམས་ཀྱི། །ས་ནི་ཚོན་གྱི་ས་དང་མཉམ། །ཞེས་པ་ཡང་རྣམ་པར་ཕྱེའོ། །བསྡུས་པའི་རིམ་པར་གསུངས་པའི་དཀྱིལ་འཁོར་ལ་ཡང་གདབ་པའི་ཚུལ་འདི་ཉིད་དོ། །ཁྱད་པར་དུ་ཟླུམ་པོའི་ཐིག་ [28b.6]གཉིས་པའི་ནང་དུ་ཡང་རྡོ་རྗེ་ཕྲེང་བའི་ཆ་ཆུང་དོར་བར་ཟླུམ་པོའི་ཐིག་གསུམ་མོ། །ཟླུམ་པོ་དང་པོའི་ནང་དུ་ནི་འོད་ཀྱི་ཕྲེང་བའོ། །ཟླུམ་པོའི་ཐིག་དང་པོ་ལས་ཕྱི་ངོས་སུ་ནི་ཟླུམ་པོའི་ཐིག་མེད་དོ། །ཀླུའི་བློའི་ཞབས་ཀྱིས་གང་གསུངས་པ། དབུས་ཀྱི་འཁོར་ལོ་ཡི་ནི་ཚད། །རྩ་བའི་ཐིག་གི་ཕྱེད་ཀྱིས་ [28b.7]སོ། །ཞེས་དང་། ཚངས་ལས་སྟེགས་བུ་ཙམ་དུ་འགྱུར། །སྟེགས་བུ་ཕྱེད་དུ་གཉིས་པ་སྟེ། །གསུམ་པ་སྟེགས་བུ་ཕྱེད་དང་གཉིས། །སྟེགས་བུའི་ཕྱེད་ཀྱི་གཞན་ཡིན་ཏེ། །འོད་ཟེར་ལྔ་ཡིས་རྣམ་བརྒྱན་པའི། །རྡོ་རྗེ་ཕྲེང་བ་གསལ་བར་བྱ། །ནང་གི་འཁོར་ལོའི་ཕྱི་རོལ་དུ། །ཐིག་བཞི་མཉམ་ [29a] [29a.1]པར་ཀུན་ནས་བྲི། །རྡོ་རྗེས་མཚན་ཞིང་ལེགས་མཛེས་པའི། །ཀ་བ་བརྒྱད་ནི་ནང་དུ་བྲི། །དེ་ཉིད་དུ་ནི་རེ་མིག་དགུ། །རྡོ་རྗེ་ཀ་བའི་བར་དུའོ། །ཞེས་སོ། །དཔལ་ཁ་སྦྱོར་གྱི་རྒྱུད་དུ་གསུངས་བའི་རྡོ་རྗེ་སེམས་དཔའི་དཀྱིལ་འཁོར་ལ། རྩ་བའི་ཐིག་གི་ནང་དུ་ཆ་ཆུང་གསུམ་གྱི་བར་སྤངས་ [29a.2]ནས་བར་དུ་ཆ་ཆུང་ཕྱེད་པའི་ཟླུམ་པོའི་ཐིག་གཉིས་ཀྱི་དབུས་སུ་ཆུད་པའི་འཁོར་ལོའི་ཕྲེང་བའོ། །དེའི་ནང་དུ་ཆ་ཆུང་གསུམ་དོར་ནས་བར་དུ་ཆ་ཆུང་ཕྱེད་པའི་ཐིག་ཟླུམ་པོ་གཉིས་ཀྱི་བར་དུ་ཆུད་པའི་པདྨའི་ཕྲེང་བའོ། །དེའི་ནང་དུ་ཆ་ཆུང་གསུམ་དོར་ཏེ་ཟླུམ་པོའི་ཐིག་གི་མཐའ་ནས་ཆ་ཆུང་ཕྱེད་ཀྱི་བར་དུ་ནི་འོད་ཟེར་ [29a.3]གྱི་ཕྲེང་བའོ། །དེའི་ནང་དུ་ཆ་ཆུང་ཕྱེད་ཀྱི་བར་གྱི་ཐིག་ཟླུམ་པོ་གཉིས་ཀྱི་ནང་དུ་རྡོ་རྗེའི་ཕྲེང་བའོ། །འདིར་ནང་གི་ཐིག་ཟླུམ་པོ་ནས་ཕྱོགས་གཞན་གྱི་ཟླུམ་པོའི་ཐིག་གི་བར་དུ་ཚངས་པའི་གཡས་ལོགས་སུ་ཐིག་གཉིས་ཏེ། དང་པོ་ནི་ཆ་ཆུང་ཕྱེད་དང་གཉིས་དོར་བར་རོ། །གཉིས་པ་ནི་གཙོ་བོའི་མཚན་མ་དང་ [29a.4]ཀ་བའི་ཆ་ཆུང་ཕྱེད་དོར་ནས་སོ། །དེ་ལྟར་གཡོན་དུ་ཡང་ངོ་། །སྔོན་བཞིན་ཚངས་ཐིག་ལ་སོགས་པ་དབྱིའོ་ཞེས་པ་བྱེ་བྲག་དང་བཅས་པ་གདབ་པའི་ཚུལ་ལོ། །ཡེ་ཤེས་མཁའ་འགྲོ་མའི་དཀྱིལ་འཁོར་དུ། རྩ་བའི་ཐིག་གི་ནང་དུ་ཆ་ཆུང་བཞི་དོར་བར་ཐིག་ཟླུམ་པོའོ། །དེ་ནས་དབུས་ཀྱི་ཆ་ཆུང་དོར་ [29a.5]བར་གཉིས་པའོ། །དེ་ནས་རྡོ་རྗེ་ཕྲེང་བའི་ཆ་ཆུང་དོར་བར་གསུམ་པའོ། །དེ་ནས་ལྷ་མོའི་ཆ་ཆུང་དྲུག་དོར་བར་ངོས་ཀྱི་ཐིག་གཅིག་སྟེ་ཟླུམ་པོ་ལ་རེག་པའོ། །དེ་ནས་ཀ་བ་དང་གཙོ་བོའི་ཕྱག་མཚན་གྱི་དོན་དུ་ཆ་ཆུང་གཅིག་དོར་ནས་དེ་བཞིན་དུ་གཉིས་པའོ་ཞེས་པ་ཁྱད་པར་གྱི་ཐིག་གོ། །བཅུ་བདུན་གྱི་བདག་ [29a.6]ཉིད་དགྱེས་པའི་རྡོ་རྗེ་བཞིའི་དཀྱིལ་འཁོར་ལ། རྩ་བའི་ཐིག་གི་ནང་དུ་ཚངས་པ་དང་ཟུར་ཐིག་རྣམས་ཉིད་དེ་ཐིག་གཞན་བཏབ་པ་ནི་མེད་དོ། །ཚངས་པའི་ཐིག་ལས་ཕྱི་ངོས་སུ་ཐིག་ཟླུམ་པོ་བཞིའོ། །དེ་ལ་དང་པོ་ནི་ལྟེ་བ་ཡིན་ཏེ་ཆ་ཆུང་གཅིག་གི་བརྒྱད་ཆས་ལྷག་པའི་ཆ་ཆུང་ཕྱེད་དང་གསུམ་དོར་ནས་སོ། ། [29a.7]གཉིས་པ་ནི་འདབ་མ་རྣམས་ཀྱི་སྟེ་བཞི་ཆ་དང་བཅས་པའི་ཆ་ཆུང་ལྔའི་བར་དོར་ནས་སོ། །དེའི་ཕྱི་ངོས་སུ་ཆ་ཆུང་གཅིག་གི་བརྒྱད་ཆ་དོར་ནས་ཀྱང་། ཆ་ཆུང་གཅིག་དོར་བར་གསུམ་པ་སྟེ་རྡོ་རྗེའི་ཕྲེང་བ་ཡིན་ནོ། །བཞི་པ་ནི་དབུས་ཀྱི་འོད་ཟེར་གྱི་ཐིག་སྟེ་ཆ་ཆུང་གཅིག་དོར་ནས་སོ། །ཉི་ཤུ་རྩ་གསུམ་གྱི་བདག་ཉིད་ [29b] [29b.1]ཅན་དང་། བཅོ་ལྔའི་བདག་ཉིད་ཅན་བདག་མེད་མ་དང་། ཀུ་རུ་ཀུལླེའི་དཀྱིལ་འཁོར་ལ་ཡང་དེ་ཉིད་དོ། །རྡོ་རྗེ་བདུད་རྩི་བཞི་ཡང་དེ་ལྟར་རོ། །དགུའི་བདག་ཉིད་ཅན་དགྱེས་པ་རྡོ་རྗེ་བཞིའི་ནི་ཚངས་ཐིག་ལས་ཕྱི་ངོས་སུ་ལྟེ་བའི་དོན་དུ་ཆ་ཆུང་ལྔ་དོར་ནས་གསེར་གྱི་ཐིག་ཟླུམ་པོ་གཅིག་གོ། །དེའི་ཕྱི་ངོས་སུ་ [29b.2]འདབ་མའི་དོན་དུ་ཆ་ཆུང་བཅུ་སྤངས་པར་ཐིག་གཅིག་གོ་ཞེས་པ་ཁྱད་པར་རོ། །དེའི་ཕྱི་ངོས་སུ་ཆ་ཆུང་གཅིག་ལ་བུམ་པ་རྣམས་སམ་དེ་ལ་རྡོ་རྗེའི་ཕྲེང་བའོ་ཞེས་པ་ཁ་ཅིག་གོ། །ལྔའི་བདག་ཉིད་བཅོམ་ལྡན་འདས་སྒྱུ་མ་ཆེན་མོའི་དཀྱིལ་འཁོར་ལ་ཡང་དེ་ལྟ་བུ་ཉིད་དོ། །དགུའི་བདག་ཉིད་བཅོམ་ལྡན་འདས་ [29b.3]སངས་རྒྱས་ཐོད་པའི་དཀྱིལ་འཁོར་ལ་ཡང་དེ་ལྟར་རོ། །རྡོ་རྗེ་ཧཱུཾ་མཛད་ཀྱི་དཀྱིལ་འཁོར་ལ་ཚངས་པའི་ཐིག་ནས་ཆ་ཆུང་ཕྱེད་དང་གསུམ་དོར་བར་གེ་སར་གྱི་ཐིག་ཟླུམ་པོའོ། །དེའི་ཕྱི་ངོས་སུ་འདབ་མའི་དོན་དུ་ཆ་ཆུང་ལྔ་དོར་བར་ཐིག་ཟླུམ་པོའོ། །དེ་ནས་ཆ་ཆུང་དོར་བར་ཕྱོགས་དང་ཕྱོགས་མཚམས་རྣམས་སུ་ཆ་ཆུང་ [29b.4]ཕྱེད་དང་བརྒྱད་པའི་འདབ་མ་བརྒྱད་དེ། ཤར་གྱི་པདྨ་ལས་ཕྱི་རོལ་ཏུ་པདྨ་ཆ་ཆུང་གསུམ་པའོ། །ནུབ་ཀྱི་པདྨ་ལས་ཀྱང་དེ་བཞིན་ནོ་ཞེས་པ་གདབ་པའི་ཁྱད་པར་རོ། །བཅོམ་ལྡན་འདས་བདེ་མཆོག་དང་རྡོ་རྗེ་ཕག་མོའི་དཀྱིལ་འཁོར་ལ་རྩ་བའི་ཐིག་གི་ནང་དུ་ཚངས་ཐིག་དང་ཟུར་ཐིག་གཉིས་གནས་པ་ལ། ཚངས་ [29b.5]ཐིག་ལས་ཕྱི་ངོས་སུ་ཆ་ཆུང་གཉིས་དོར་ནས་ཐིག་གཅིག་རྩ་བའི་ཐིག་ལ་ཐུག་པར་གདབ་བོ། །ཟུར་ཐིག་གི་གཡས་དང་གཡོན་དུ་ཆ་ཆུང་གཉིས་དོར་བར་ཐིག་རེ་རེ་སྟེ། སྲིད་དུ་ལྟེ་བའི་གློ་གཉིས་པས་སྒོའི་ཚད་བཞི་བཞིའོ། །དེ་ནས་ཚངས་ཐིག་དང་ཟུར་ཐིག་གི་ཕྱིའི་ཐིག་ལས་ཕྱི་རོལ་དུ་ཆ་ཆུང་གཉིས་དོར་བར་ [29b.6]ཐིག་དང་པོ་སྟེ། ཚངས་ཐིག་དང་ཟུར་ཐིག་དང་དེ་དག་གི་གློའི་ཐིག་གི་སྟེང་དག་ཏུ་སྒོའི་ཚད་དེ། ཐད་ཀར་ལོགས་དག་ཏུ་ཆ་ཆུང་གཉིས་གཉིས་ཀྱི་ཕྱིར་རོ། །དེའི་ཕྱི་ངོས་སུ་དེ་ལྟར་ཐིག་ལྔའོ། །དེ་བཞིན་དུ་ཟུར་དང་དེ་དག་གི་འགྲམ་གྱི་ཐིག་གི་སྟེང་ཏུ་ཐིག་དྲུག་པ་ཡང་ངོ་། །དེ་ནས་ཚངས་ཐིག་གི་གཡས་སུ་ [29b.7]དང་པོའི་ཆ་ཆུང་གཅིག་གི་མཐའ་ནས་ཕྱུང་སྟེ། གཉིས་པའི་རྩེ་མོར་སོང་ནས་གསུམ་པའི་ཆ་ཆུང་གཅིག་གི་མཐར་ཞུགས་ཏེ་བཞི་བའི་རྩེ་མོར་སོང་ནས་ལྔ་བའི་ཆ་ཆུང་གཅིག་གི་མཐར་ཞུགས་ཏེ། དྲུག་པའི་རྩེ་མོར་སོང་ནས་བདུན་པའི་ཆ་ཆུང་གཅིག་གི་མཐར་ཞུགས་པའི་ཐིག་ཀྱོག་པོ་གཅིག་གོ། །འདིའི་ [30a] [30a.1]ནང་དུ་ཆ་ཆུང་ཕྱེད་དོར་ནས་འདི་ལྟ་བུའི་ཀྱོག་པོའི་ཐིག་གཉིས་པའོ། །དེ་ལྟ་བུའི་ཐིག་ཀྱོག་པོ་གཉིས་ཚངས་ཐིག་གི་གཡོན་དུ་ཡང་ངོ་། །དེ་བཞིན་དུ་ཟུར་ཐིག་གཡོན་དང་ཅིག་ཤོས་དག་ཏུ་ཡང་ངོ་། །དེ་ནས་ལྟེ་བར་ཐིག་སྐུད་བཟུང་ནས་རྩ་བའི་ཐིག་ནས་བརྩམས་ནས་ནང་དུ་སྒོ་རེ་རེ་སྤངས་ [30a.2]པར་ཚངས་ཐིག་ལ་ཐིག་སྐུད་བཟུང་བས་ཐིག་ཟླུམ་པོ་བཞིའོ། །ཇི་སྐད་དུ། རྩ་བའི་ཐིག་ནས་ཉེར་བཟུང་སྟེ། །ཟླུམ་པོའི་ཐིག་ནི་རྣམ་བཞིའོ། །འཁོར་ལོ་གསུམ་ནི་སྒོ་ཚད་དུ། །ཡང་དག་བསྐོར་བས་ཕྱིན་པའོ། །ལྷག་མ་པདྨ་འདབ་མ་བརྒྱད། །ཚད་དེ་འདི་ལས་ལྷག་ཆད་མིན། །ཐུགས་སོགས་ [30a.3]འཁོར་ལོའི་མུ་ཁྱུད་ལ། །རྡོ་རྗེ་པདྨ་འཁོར་ལོའི་ཕྲེང་། །ཞེས་གསུངས་སོ། །དེ་ལ་དང་པོ་གསུམ་རེ་རེའི་ནང་དུ་ཆ་ཆུང་ཕྱེད་དོར་བར་ཟླུམ་པོའི་ཐིག་གཅིག་གོ། །བཞི་པ་ཐུགས་ཀྱི་འཁོར་ལོའི་ལྟེ་བའི་ནང་མཚོན་པར་བྱེད་པའི་ནང་དུ་ཆ་ཆུང་གི་བཞི་ཆ་ལས་ཕ་རོལ་ཆ་ཆུང་ཕྱེད་དང་གསུམ་པའི་འདབ་མདོར་ [30a.4]བར་ལྟེ་བའི་དོན་དུ་གེ་སར་གྱི་ཕྲེང་བའི་ངོ་བོའི་ཐིག་གཅིག་གོ། །རྡོ་རྗེའི་ཕྲེང་བའི་དོན་བཞི་པའི་ནང་དུ་ཆ་ཆུང་ཕྱེད་དོར་བར་ཟླུམ་པོ་གཅིག་གོ་ཞེས་ཀྱང་ཁ་ཅིག་གོ། །གཞན་ནི་རྩིབས་ཀྱི་གློ་དག་ཏུ་ཤིན་གཏུ་མི་བཟད་པའི་རྡོ་རྗེ་བཞིས་བསྐོར་རོ་ཞེས་སོ། །ཁ་ཅིག་ནི་རྩིབས་ཀྱི་འགྲམ་གྱི་སྟེང་དུ་ཇི་ [30a.5]ལྟར་རིགས་པར་རྡོ་རྗེ་དང་པདྨ་དང་འཁོར་ལོའི་ཕྲེང་བའོ་ཞེས་སོ། །འདིར་ཕྱི་རོལ་གྱི་ཐིག་ཟླུམ་པོ་དང་ནང་གི་ཐིག་ཟླུམ་པོ་དང་། རྩིབས་ཀྱི་ཐིག་རྣམས་བསྲུང་ལ་གཞན་ནི་དབྱི་བར་བྱའོ། །ཁྱད་པར་དུ་གདབ་པའོ། །ཉི་ཤུ་རྩ་ལྔའི་བདག་ཉིད་ཀྱི་སངས་རྒྱས་ཐོད་པའི་དཀྱིལ་འཁོར་ལ་ཡང་འདི་ཉིད་ཡིན་ནོ། ། [30a.6]ཁྱད་པར་ནི་དང་པོར་བརྗོད་པའི་ཟླུམ་པོའི་ཐིག་བཞི་པ་དང་། ཟེའུ་འབྲུའི་ཐིག་མི་བྱའོ། །ཟླུམ་པོའི་ཐིག་དྲུག་པའི་ནང་དུ་ནི་འདབ་མ་ཆ་ཆུང་ལྔ་པ་དོར་ནས་འདིར་གེ་སར་གྱི་རང་བཞིན་ཟླུམ་པོའི་ཐིག་གཅིག་གོ། །དཔལ་རྣལ་འབྱོར་ནམ་མཁའི་དཀྱིལ་འཁོར་ལ་རྩ་བའི་ཐིག་གི་ནང་དུ་ཆ་ཆུང་ཕྱེད་དང་བཅས་པའི་ [30a.7]གསུམ་དོར་ནས་བར་དུ་ཆ་ཆུང་གཅིག་པའི་ཟླུམ་པོའི་ཐིག་གཉིས་ཀྱི་དབུས་སུ་ཆུད་པའི་རྡོ་རྗེའི་ཕྲེང་བའོ། །དེ་ནས་ཆ་ཆུང་ཕྱེད་དང་བཞི་དོར་བར་ཐིག་གཞན་རྣམས་ནི་བསྡུས་པའི་རིམ་པར་གསུངས་པའི་དཀྱིལ་འཁོར་བཞིན་ནོ། །རྩ་བའི་ཐིག་གི་ནང་དུ་གཞལ་ཡས་ཁང་གཉིས་པ་སྟེ། ཐིག་ཀྱང་འོག་ནས་འཆད་ [30b] [30b.1]པར་འགྱུར་བའི་བཞི་བཅུ་རྩ་གསུམ་གྱི་བདག་ཉིད་འཇམ་པའི་རྡོ་རྗེའི་དཀྱིལ་འཁོར་ལྟ་བུའོ་ཞེས་གཞན་ནོ། །གཅིག་དབུས་ཀྱི་གཞལ་ཡས་ཁང་པས་གཞལ་ཡས་ཁང་གཉིས་པ་ཟླུམ་པོའོ་ཞེས་སོ། །གཞན་ནི་འདིར་གཞལ་ཡས་ཁང་མེད་དེ་རྡོ་རྗེའི་ཕྲེང་བ་ནི་སྔར་བཞིན་ནོ་ཞེས་སོ། །བཅུ་གསུམ་གྱི་བདག་ [30b.2]ཉིད་དཔལ་གཤིན་རྗེ་གཤེད་ཀྱི་དཀྱིལ་འཁོར་ལ་ཚངས་ཐིག་དང་ཟུར་ཐིག་རྣམས་ཁོ་ན་སྟེ་གཞན་མེད་དོ། །དེ་ལ་ཚངས་ཐིག་ནས་སྒོ་གཉིས་ཀྱི་བར་དོར་ནས་ཟུར་ཐིག་གི་བར་དུ་ངོས་སུ་སྣ་ཚོགས་རྡོ་རྗེའི་ལྟེ་བའི་ཐིག་གཅིག་གོ། །དེའི་ནང་དུ་ཆ་ཆུང་གཅིག་དོར་ནས་རྡོ་རྗེའི་ཕྲེང་བའི་ཐིག་གཅིག་གོ། །ལྟེ་བའི་ཐིག་ལས་ [30b.3]སྒོའི་བར་དུ་རྭ་ལྔའོ། །དེའི་རྗེས་ལ་ཚངས་ཐིག་དང་ཟུར་ཐིག་རྣམས་དབྱི་བར་བྱའོ། །འདི་ནི་ཁྱད་དུ་གདབ་པའོ། །རྡོ་རྗེ་སྒྲོལ་མའི་དཀྱིལ་འཁོར་ལ་ཚངས་ཐིག་དང་ཟུར་ཐིག་རྣམས་གནས་པ་ཉིད་ལ་ཚངས་ཐིག་གི་ཕྱི་རོལ་དུ་ལྟེ་བའི་ཆ་ཆུང་གསུམ་དོར་བར་ཐིག་ཟླུམ་པོ་གཅིག་གོ། །དེའི་ཕྱི་ངོས་སུ་འདབ་ [30b.4]མ་ཆ་ཆུང་དྲུག་དོར་བར་ཐིག་ཟླུམ་པོ་གཅིག་གོ། །ཚངས་ཐིག་དང་ཟུར་ཐིག་རྣམས་དབྱིའོ། །ཉི་ཤུ་རྩ་ལྔའི་བདག་ཉིད་ཅན་འོད་ཟེར་ཅན་གྱི་དཀྱིལ་འཁོར་ལ་འཇམ་པའི་རྡོ་རྗེའི་དཀྱིལ་འཁོར་བཞིན་ཐིག་གདབ་བོ། །བཅུ་གསུམ་གྱི་བདག་ཉིད་ཅན་བསྲུང་བ་ལྔའི་དཀྱིལ་འཁོར་ལ་ཚངས་ཐིག་དང་ཟུར་ཐིག་རྣམས་ [30b.5]ཉིད་དེ་གཞན་ནི་མེད་དོ། །དེ་ལ་ཚངས་པའི་ཐིག་གི་ཕྱི་རོལ་ཀུན་ཏུ་ཆ་བཞི་དོར་བར་དབུས་ཀྱི་པདྨའོ། །དེའི་ཕྱི་ངོས་སུ་ཆ་ཆུང་གཅིག་དོར་བར་ཕྱོགས་རྣམས་སུ་པདྨ་བཞིའོ། །ཚངས་ཐིག་དང་ཟུར་ཐིག་དབྱིའོ་ཞེས་པ་ཁྱད་པར་དུ་གདབ་པའོ། །ལྔ་བཅུ་ང་གསུམ་གྱི་བདག་ཉིད་ཅན་རྡོ་རྗེ་དབྱིངས་ཀྱི་དཀྱིལ་ [30b.6]འཁོར་ལ་རྩ་བའི་ཐིག་གི་ནང་ན་རང་གི་སྒོ་གཉིས་ཀྱི་ཚད་སྤངས་པར་ཟུར་ཐིག་གཉིས་ཀྱི་བར་དུ་ངོས་སུ་ཐིག་གཅིག་གོ། །དེ་ཉིད་ནི་གཉིས་པ་ནང་གི་དཀྱིལ་འཁོར་གྱི་རྩ་བའི་ཐིག་ཡིན་ཏེ། སྒོ་དང་སྒོ་ཁྱུད་ལ་སོགས་པ་མདའ་ཡབ་ཀྱི་ཐིག་གི་བར་དང་ལྡན་ཞིང་རྟ་བབས་ལ་སོགས་པ་མེད་པའོ། །རྩ་བའི་ [30b.7]ཐིག་འདིའི་ནང་དུ་བར་མེད་པ་ཉིད་ཟླུམ་པོའི་ཐིག་དང་པོའོ། །དེའི་ནང་དུ་རྡོ་རྗེ་ཕྲེང་བའི་ཆ་ཆུང་གཅིག་སྤངས་པར་གཉིས་པའོ། །དེ་ལས་ཕྱོགས་གཞན་གྱི་ཐིག་ཟླུམ་པོའི་བར་དུ་ཚངས་ཐིག་གི་གཡས་ཀྱི་ཆར་ཐིག་གཉིས་ཏེ་དང་པོ་ཆ་ཆུང་གཉིས་སྤངས་པར་རོ། །གཉིས་པ་ནི་ཀ་བའི་ཆ་ཆུང་དོར་བར་རོ། ། [31a] [31a.1]དེ་ལྟར་གཡོན་དུ་ཡང་ངོ་། །དེ་ནས་ཚངས་ཐིག་དང་ཟུར་ཐིག་ཕྱི་བས་རེའུ་མིག་དགུར་འགྱུར་རོ། །གཞན་ཚངས་ཐིག་དང་གཙོ་བོའི་གནས་ཀྱི་སྣམ་བུའི་ནང་གི་ཐིག་རྣམས་ནི་དབྱིའོ། །ཁྱད་པར་དུ་གདབ་པའོ། །དེ་ཉིད་བསྡུས་པ་ལས་དབུས་ཀྱི་གཞལ་ཡས་ཁང་རྟ་བབས་དང་ [31a.2]བཅས་པའོ་ཞེས་གསུངས་པ་ནི་ཁམས་གསུམ་རྣམ་རྒྱལ་གྱི་དཀྱིལ་འཁོར་ཁོ་ནའི་འོ། །གང་ཡང་། རྡོ་རྗེའི་ཀ་རྩེ་གནས་རྣམས་སུ། །དཀྱིལ་འཁོར་ལྔ་ཡི་བརྒྱན་པའོ། །ཞེས་གསུངས་པ་ནི་དེ་བཞིན་གཤེགས་པ་ལྔའི་གནས་རྣམས་སུ་རྡོ་རྗེའི་རི་མོ་ཟླུམ་པོ་བྲི་བར་བྱ་སྟེ། དེ་རྣམས་ལ་ཡང་ཟླ་བའི་ [31a.3]དཀྱིལ་འཁོར་ལྔ་བྲིས་ཞེས་ཀུན་དགའ་སྙིང་པོས་བཤད་པ་འདི་ནི་མི་རིགས་ཏེ། རྡོ་རྗེའི་རི་མོ་ཟླུམ་པོའི་རྗོད་བྱེད་རྒྱུད་ཚིག་འདི་ལ་མེད་པའི་ཕྱིར་རོ། །བཞི་བཅུ་རྩ་གསུམ་གྱི་བདག་ཉིད་ཅན་འཇམ་པའི་རྡོ་རྗེའི་དཀྱིལ་འཁོར་ལ་རྩ་བའི་ཐིག་གི་ནང་དུ་སྒོ་གཉིས་སྤངས་པར་ཟུར་ཐིག་གཉིས་ལ་རེག་པའི་ [31a.4]ལོགས་ཐིག་གཅིག་གོ། །དེ་ཉིད་ནི་གཉིས་པ་ནང་གི་དཀྱིལ་འཁོར་གྱི་རྩ་བའི་ཐིག་ཡིན་ཏེ། སྒོ་དང་སྒོ་ཁྱུད་ལ་སོགས་པ་མདའ་ཡབ་ཀྱི་ཐིག་གི་བར་དུ་ལྡན་ཞིང་རྟ་བབས་ལ་སོགས་པ་མེད་པའོ། །འདིའི་ནང་དུ་རང་གི་སྒོ་གཉིས་སྤངས་པར་ཟུར་ཐིག་ལ་རེག་པའི་ལོགས་ཐིག་གཅིག་གོ། །དེ་ཉིད་གསུམ་པ་ནང་གི་ [31a.5]དཀྱིལ་འཁོར་གྱི་རྩ་བའི་ཐིག་ཡིན་ཏེ། སྒོ་དང་སྒོ་ཁྱུད་ལ་སོགས་པ་དང་ལྡན་ཞིང་རྟ་བབས་ལ་སོགས་པ་མེད་པའོ། །རྩ་བའི་ཐིག་འདིའི་ནང་དུ་བར་མེད་པ་ཉིད་དུ་ཟླུམ་པོའི་ཐིག་དང་པོའོ། །ཞེས་པ་ལ་སོགས་པ་བཤད་པའི་རྡོ་རྗེ་དབྱིངས་ཀྱི་ནང་གི་དཀྱིལ་འཁོར་ལྟ་བུའི་དཀྱིལ་འཁོར་གསུམ་པའོ། །ཁྱད་ [31a.6]པར་དུ་གདབ་པའོ། །བཅོམ་ལྡན་འདས་ཆོས་ཀྱི་དབྱིངས་ངག་གི་དབང་ཕྱུག་གི་དཀྱིལ་འཁོར་ལ་དཀྱིལ་འཁོར་ཐམས་ཅད་ཐུན་མོང་དུ་ཕྱིའི་དཀྱིལ་འཁོར་གྱི་ཐིག་གདབ་པའི་ཚུལ་སྔར་བརྗོད་པ་ཤེས་པར་བྱ་སྟེ། ཕྱིའི་རྩ་བའི་ཐིག་ལ་སོགས་པའི་ཐིག་བདུན་ནི་ཟླུམ་པོ་སྟེ་འདི་ནི་ཁྱད་པར་རོ། །གང་གསུངས་བ་ [31a.7]ཀུན་ནས་ཟླུམ་པོ་བཟང་པོ་སྟེ། ཞེས་པ་ལ་སོགས་པའོ། །སྒོ་ཁྱུད་དང་འགྲེལ་པའི་རྩ་བའི་ཐིག་འདིའི་ནང་དུ་སྒོ་གཉིས་ཀྱི་བར་སྤངས་ནས་ཟུར་ཐིག་གཉིས་པོ་ལ་རེག་པའི་ངོས་ཐིག་གཅིག་གོ། །དེ་ཉིད་ནི་གཉིས་པ་ནང་གི་དཀྱིལ་འཁོར་གྱི་རྩ་བའི་ཐིག་ཡིན་ཏེ། སྒོ་དང་སྒོ་ཁྱུད་ལ་སོགས་པ་ནས་མདའ་ཡབ་ [31b] [31b.1]གྱི་བར་དང་ལྡན་ཞིང་རྟ་བབས་མེད་པའོ། །རྩ་བའི་ཐིག་འདིའི་ནང་དུ་དེ་ལྟ་བུའི་དཀྱིལ་འཁོར་གསུམ་པའི་རྩ་བའི་ཐིག་ནི་དེ་བཞིན་ནོ། །རྩ་བའི་ཐིག་འདིའི་ནང་དུ་རང་གི་སྒོ་གཉིས་ཞེས་པ་ལ་སོགས་པ་བརྗོད་པའི་རྡོ་རྗེ་དབྱིངས་ཀྱི་ནང་གི་དཀྱིལ་འཁོར་བཞིན་དུ་དཀྱིལ་འཁོར་བཞི་པའོ། །ཁྱད་པར་དུ་གདབ་པའོ། ། [31b.2]ངན་སོང་ཡོངས་སུ་སྦྱོང་བའི་དཀྱིལ་འཁོར་ལ་བསྡུས་པའི་རིམ་པར་གསུངས་པའི་དཀྱིལ་འཁོར་བཞིན་དུ་གདབ་པ་སྟེ། འོན་ཀྱང་རྡོ་རྗེ་ཕྲེང་བའི་ནང་དུ་ཀ་བ་བརྒྱད་ལ་སོགས་པ་མེད་པར་འཁོར་ལོ་རྩིབས་བརྒྱད་སེར་པོ་ཉིད་ཀྱིས་བརྒྱན་པ་ནི་ཁྱད་པར་ཞེས་སོ། །བཅོམ་ལྡན་འདས་འབྱུང་པོ་འདུལ་བྱེད་ཀྱི་དཀྱིལ་ [31b.3]འཁོར་ལ་རྩེ་བའི་ཐིག་གྲུ་བཞི་པའི་ནང་དུ་ཆ་ཆུང་བཞི་དོར་བར་ཟུར་ཐིག་གཉིས་ལ་རེག་པའི་ལོགས་ཐིག་གསུམ་མོ། །དེའི་ནང་དུ་ཆ་ཆུང་བཞིའི་བར་དུ་དེ་བཞིན་དུ་ལོགས་ཐིག་གཅིག་གོ། །དེའི་ནང་དུ་ཆ་ཆུང་བཞི་དོར་བར་འཇམ་པའི་རྡོ་རྗེའི་དཀྱིལ་འཁོར་དུ་བརྗོད་པའི་ནང་གི་ཕོ་བྲང་ལྟ་བུའི་ནང་གི་ཕོ་བྲང་ངོ་། །རིམ་ [31b.4]པ་བཞིན་གདབ་པའོ། །མཁའ་འགྲོ་ལྔའི་དཀྱིལ་འཁོར་ལ་རྩ་བའི་ཐིག་གི་ནང་དུ་དཀྱིལ་འཁོར་ཆེན་པོའི་སྒོ་བཞི་ཆའི་ཆ་ཕྱེད་དང་གཉིས་ཀྱི་བར་དོར་ནས། གཞན་ཆ་ཆུང་དགུའི་བར་ལ་ཆ་མཉམ་པ་བཅུ་གཉིས་བྱས་ནས་ལོགས་སོ་སོར་ཆ་གཉིས་དོར་ཏེ། དབུས་ཀྱི་ཆ་གཉིས་ཀྱི་ཚད་ཀྱི་རྩ་བའི་ཐིག་བཞིའོ། ། [31b.5]དེ་རེ་རེའི་བརྒྱད་ཆ་ནི་སྒོའོ། །རྩ་བའི་ཐིག་ལས་ཕྱི་ངོས་སུ་ཐིག་དྲུག་ཅེས་པ་ལ་སོགས་པ་སྔར་བཞིན་དུ་བྱའོ། །དེ་ལྟར་ཕྱོགས་རྣམས་སུ་རྟ་བབས་མེད་པའི་གཞལ་ཡས་ཁང་བཞི་པའོ། །དབུས་སུ་ཡང་དེ་བཞིན་དུ་གཞལ་ཡས་ཁང་ལྔ་པའོ། །ཆ་ཆུང་དགུ་ཞེས་པ་ལ་སོགས་པ་ནི་འདིར་ཡང་རིག་པར་བྱའི། [31b.6]དེ་ལྟ་མོད་ཀྱི་གཞལ་ཡས་ཁང་འདི་དང་བཞི་པོ་རྣམས་ཀྱི་བར་ན་དཀྱིལ་འཁོར་ཆེན་པོའི་ཆ་ཆུང་གཅིག་གོ། །འདིར་ཀྱེའི་རྡོ་རྗེའི་གཞལ་ཡས་ཁང་ལ་རྩ་བའི་ཐིག་གི་ནང་དུ་ཆ་ཆུང་གཅིག་ལ་གནས་ཤིང་། ཐིག་གཉིས་ཀྱི་ནང་དུ་སོན་པའི་རྡོ་རྗེའི་ཕྲེང་བ་གྲུ་བཞིས་བསྐོར་བའི་ཟླ་བ་ཕྱེད་པའི་རྣམ་པའོ། །རྟག་པའི་ [31b.7]འཁོར་ལོའི་ཕྲེང་བས་བསྐོར་བའི་ཟླུམ་པོའོ། །རྡོ་རྗེ་ཉི་མའི་ཆ་དགུ་པའི་རིན་པོ་ཆེའི་ཕྲེང་བས་བསྐོར་བའི་རིན་པོ་ཆེ་ཆ་དགུ་པའམ་བརྒྱད་པ་ལྟ་བུའོ། །པདྨ་གར་གྱི་དབང་ཕྱུག་གི་པདྨའི་ཕྲེང་བས་བསྐོར་བའི་གྲུ་བཞི་པ་ཟུར་བཞི་སྒོ་ལ་ཕྱོགས་པའམ་པདྨའི་རྣམ་པའོ། །རྟ་མཆོག་གི་རལ་གྲིའི་ཕྲེང་བས་བསྐོར་ [32a] [32a.1]བའི་གྲྭ་གསུམ་པའོ། །ཁྱད་པར་དུ་གདབ་པའོ། །གཞལ་ཡས་ཁང་ཐམས་ཅད་དུ་ཡང་རང་རང་ལ་ལྟོས་ནས་རྩ་བའི་ཐིག་དང་སྒོ་དང་ཆ་ཆུང་གི་ཚད་རྣམས་རིག་པར་བྱའོ། །འཁོར་ལོས་སྒྱུར་བ་དྲུག་གི་དཀྱིལ་འཁོར་རོ། །གཞལ་ཡས་ཁང་ཆེན་པོའི་ཆ་ཆུང་གི་ཚད་ཀྱིས་ཚངས་ [32a.2]ཐིག་ནས་གང་ཆ་ཆུང་བཞི་པའི་བར་གཞན་ཆ་ཆུང་བཞི་པའི་བར་དང་བཅས་པ་དེ་ཆ་ཆུང་བཅུ་གཉིས་སུ་བྱས་ལ། མདུན་དང་རྒྱབ་དང་གཡས་དང་གཡོན་གྱི་མཐའ་རྣམས་སུ་སོ་སོར་ཆ་གཉིས་ཀྱི་ནང་དུ་རྩ་བའི་ཐིག་ཆ་བརྒྱད་ཀྱི་ཚད་དུ་གདབ་པོ། །དེ་དང་བསྟུན་པའི་སྒོའི་ཆ་ཆུང་གིས་སྒོ་ཁྱུད་ལ་སོགས་པའི་ [32a.3]ཐིག་དང་མདའ་ཡབ་ཀྱི་ཐིག་གི་བར་དུ་གདབ་པོ། །དེ་ནས་ཕྱི་རོལ་དུ་དཀྱིལ་འཁོར་ཆེན་པོའི་ཆ་ཆུང་གི་ཚད་ཀྱིས་ཆ་ཆུང་གཉིས་ཀྱི་བར་དོར་ནས་ཚངས་ཐིག་ལ་ཐིག་སྐུད་བཟུང་ནས་ཚད་ཀྱི་དོན་དུ་ཐིག་ཟླུམ་པོ་གཅིག་གོ། །འདིའི་ཆ་མཉམ་པ་ལྔ་བྱས་ནས་ཆ་རེ་རེའི་དབུས་ལས་བྱུང་བའི་ཚངས་ཐིག་ [32a.4]ནི་དཀྱིལ་འཁོར་ཆེན་པོའི་ཆ་ཆུང་གི་ཚད་ཀྱི་ཆ་ཆུང་བརྒྱད་པའོ། །དེའི་དབུས་སུ་དེ་བཞིན་དུ་ཚངས་ཐིག་གཞན་ནོ། །གཉིས་པ་འདི་རེ་རེ་ཞིང་ཆ་ཆུང་གཉིས་སུ་བྱས་ལ་ཞེས་པ་ལ་སོགས་པ་ནས་རབ་ཏུ་གདབ་པོ་ཞེས་པའི་མཐར་ཐུག་པ་དེ་མ་ཐག་པར་བརྗོད་པ་དག་བྱའོ། །དཀྱིལ་འཁོར་དྲུག་པོ་འདི་ [32a.5]རྣམས་ལ་ཟུར་ཐིག་རྣམས་ཀྱང་གདབ་པར་བྱའོ། །འདི་རྣམས་ཀྱི་ཚངས་ཐིག་ནས་ཕྱི་ངོས་སུ་ལྟ་བའི་ཆ་ཆུང་གསུམ་གྱི་བར་སྤངས་པར་ཐིག་ཟླུམ་པོ་གཅིག་གོ། །དེའི་ཕྱི་ངོས་སུ་འདབ་མའི་ཆ་ཆུང་དྲུག་སྤངས་བར་ཐིག་ཟླུམ་པོ་གཅིག་གོ། །དེའི་ཕྱི་ངོས་སུ་ཕྱོགས་དང་མཚམས་རྣམས་སུ་ཆ་ཆུང་དྲུག་ [32a.6]པའི་པདྨ་བརྒྱད་དོ། །དེ་ནས་ཐིག་ཟླུམ་པོ་གཅིག་གོ །དེའི་ཕྱི་ངོས་སུ་ཆ་ཆུང་གཅིག་དོར་བར་ཐིག་ཟླུམ་པོའོ། །དེ་ནས་ཐམས་ཅད་དུ་ཚང་བ་དང་ཟུར་ཐིག་དབྱི་བར་བྱའོ། །དེ་ལྟ་བུ་ནི་འདིར་གདབ་པའི་ཁྱད་པར་རོ། །གཞན་ཕོ་བྲང་བདུན་པ་ལ་སོགས་པའི་གཞལ་ཡས་ཁང་གི་ཁྱད་པར་རྣམས་ཀྱང་ [32a.7]བཤད་པའི་རྗེས་སུ་འབྲངས་ཏེ་དཔག་ལ་མཁས་པ་རྣམས་ཀྱིས་ཐིག་གདབ་པའོ། །དུས་ཀྱི་འཁོར་ལོའི་དཀྱིལ་འཁོར་ལ་ནི་འདིར་བརྗོད་པའི་རྒྱུད་གཞན་མ་ལུས་པར་གསུངས་པའི་ཆོ་ག་རྣམས་ལས་ཉི་མའི་ཤིང་རྟ་ལ་སོགས་པ་འདུལ་བའི་དོན་དུ་བྱ་བ་མི་མཐུན་པར་གསུངས་སོ། །དེའི་ཕྱིར་ [32b] [32b.1]རྫོགས་པའི་རིམ་པའི་རྣལ་འབྱོར་པས་བཅོམ་ལྡན་འདས་རྡོ་རྗེ་འཆང་ཆེན་པོ་ཉིད་མངོན་པར་འདོད་པ་ཐམས་ཅད་གྲུབ་པར་བྱ་བའི་ཕྱིར་སྐུ་སྣ་ཚོགས་པས་དཀྱིལ་འཁོར་མ་ལུས་པའི་དབང་ཕྱུག་ཉིད་དུ་འགྱུར་རོ་ཞེས་ལྷག་པའི་མོས་པ་བསྟན་པས། རྒྱུད་གཞན་གྱི་ཆོ་གས་ཀྱང་རབ་གནས་ལ་སོགས་པ་ [32b.2]བྱ་བ་མི་འགལ་ཏེ་མངོན་པར་འདོད་པ་སྒྲུབ་པར་བྱེད་དོ་ཞེས་པས། དུས་ཀྱི་འཁོར་ལོའི་བྱ་བ་སྤྲོས་པ་དོར་ནས་དཀྱིལ་འཁོར་གྱི་ཐིག་གདབ་པ་ཙམ་བརྗོད་པར་བྱའོ། །རྡུལ་ཚོན་བྲི་བ་ཙམ་ནི་འཆད་པར་འགྱུར་བའི་རྡུལ་ཚོན་བྲི་བའི་སྐབས་སུ་བརྗོད་པར་བྱའོ། །འདིར་སློབ་དཔོན་གྱི་མཐེ་བོ་ཉི་ཤུ་རྩ་བཞི་ཁྲུ་ཡིན་ [32b.3]ལ། ཁྲུ་བཞིས་དཀྱིལ་འཁོར་རོ། །དེ་ཉིས་འགྱུར་སྲིད་དུ་ཁྲུ་བརྒྱད་པའི་ཚངས་ཐིག་གཉིས་གདབ་པར་བྱའོ། །དེ་ནས་དེ་བཞིན་དུ་ཟུར་ཐིག་གཉིས་སོ། །ཐིག་སྐུད་ནི་སྦོམ་དུ་སློབ་དཔོན་གྱི་ནས་ཀྱི་ཚད་དོ། །དེ་ལ་ཐུགས་ཀྱི་དཀྱིལ་འཁོར་གྱི་སྒོའི་དྲུག་ཆ་ནི་མཐེ་བོང་ཕྱེད་ཀྱི་ཚད་དེ་ཆ་ཆུང་དུ་ཐ་སྙད་གདགས་ [32b.4]པར་བྱའོ། །དེ་ལ་ཚངས་ཐིག་གི་ལྟེ་བར་གཙོ་བོའི་པདྨའི་ལྟེ་བའི་དོན་དུ་ཚངས་ཐིག་ལས་ཕྱི་ངོས་སུ་ཆ་ཆུང་གཉིས་དོར་ནས་ཚངས་ཐིག་གཞན་གྱི་སྟེང་དུ་བཟུང་སྟེ་ཐིག་ཟླུམ་པོ་གཅིག་གདབ་པོ། །དེ་ནས་འདབ་མའི་ཆ་ཆུང་བཞི་དོར་ནས་ཐིག་གཅིག་གདབ་བོ། །དེ་ནས་རྡོ་རྗེའི་ཕྲེང་བའི་ཆ་ཆུང་སྤངས་པར་ཐིག་ [32b.5]གཅིག་གོ། །དེ་ནས་ལྷའི་པདྨའི་ཆ་ཆུང་བཞི་དོར་བར་ཐིག་གཅིག་གོ། །དེ་ནས་རྡོ་རྗེའི་ཕྲེང་བའི་ཆ་ཆུང་གཅིག་དོར་བར་ཐིག་གཅིག་གོ། །ཐིག་བཞི་པོ་འདི་རྣམས་ནི་ཟུར་ཐིག་གཉིས་ཀྱི་བར་དུའོ། །འདིར་ལྷའི་ཆ་ཆུང་བཞིའི་དབུས་སུ་ནི་པདྨའི་ཆ་ཆུང་བཞི་པའོ། །དེའི་འགྲམ་གཉིས་སུ་ཀ་བ་གཉིས་ཏེ་ [32b.6]རྒྱར་ཆ་ཆུང་རེ་རེ་སྲིད་དུ་ཆ་ཆུང་བཞིའོ། །དེ་གཉིས་ཀྱི་འགྲམ་དུ་རྒྱར་ཆ་ཆུང་གསུམ་པའི་བུམ་པ་གཉིས་ཏེ་དེ་ལྟར་རིང་བའོ། །དེ་དག་གི་འགྲམ་དུ་དེ་བཞིན་དུ་ཀ་བ་གཉིས་སོ། །དེ་ནས་ཟུར་ཐིག་གི་མཐར་ཐུག་པའི་ཐིག་མཐའ་མ་ལས་ཕྱི་ངོས་སུ་ཆ་ཆུང་བདུན་གྱི་བར་སྤངས་ནས་ཐིག་གཅིག་གོ། །དེ་ནས་ལྷ་ [32b.7]སྣམ་གྱི་ཆ་ཆུང་བཞི་པའི་བར་སྤངས་ནས་ཐིག་གཅིག་གོ། །དེ་ནས་ཆ་ཆུང་གཅིག་དོར་ནས་རྩ་བའི་ཐིག་སྟེ་ཟུར་ཐིག་གི་བར་དུའོ། །འདིར་ཐུགས་ཀྱི་དཀྱིལ་འཁོར་ནི་རྩ་བའི་ཐིག་གི་མཐར་ཐུག་པ་ཁོ་ནའོ། །དེ་ལྟར་གསུང་གི་དཀྱིལ་འཁོར་དང་དེ་བཞིན་དུ་སྐུའི་དཀྱིལ་འཁོར་རོ། །ཚངས་ཐིག་གི་གཡས་ [33a] [33a.1]གཡོན་དུ་རྩ་བའི་ཐིག་ཆ་ཆུང་གསུམ་གསུམ་སྔོན་བཞིན་ཕྱི་བས་སྒོ་ནི་ཆ་ཆུང་དྲུག་པ་སྟེ་འཁོར་ལོའི་བརྒྱད་ཆར་འགྱུར་རོ། །སྒོ་ཁྱུད་དང་འགྲམ་དང་ལོགས་གསུམ་གྱི་ཚད་ནི་སྒོ་དང་མཉམ་མོ། །རྩ་བའི་ཐིག་ལས་ཕྱི་རོལ་དུ་ཆ་ཆུང་ཕྱེད་དང་གཉིས་དོར་བར་རྩིག་པའི་ཐིག་སྟེ། །ཟུར་ཐིག་ [33a.2]ལས་འཐོན་ནས་སྒོ་ཁྱུད་དང་འགྲམ་དང་ལོགས་ཀྱི་རྗེས་སུ་འགྲོ་བས་གསུམ་ཀྱོག་པོ་མདའ་ཡབ་ཀྱི་ཐིག་གི་མཐར་ཐུག་པའོ། །དེའི་གློར་རྟ་བབས་ཀྱི་ཀ་བའི་ཆ་ཆུང་ཕྱེད་དང་གཉིས་དོར་བར་མདའ་ཡབ་ཀྱི་ཐིག་ལ་རྩེ་མོ་རེག་པའི་ཐིག་སྟེ། ནང་གི་དཔངས་སུ་ཆ་ཆུང་ཕྱེད་དང་བརྒྱད་པའོ། །རྩ་བའི་ཐིག་གི་ཕྱིའི་ [33a.3]ཐིག་ལས་ཕྱི་ངོས་སུ་སྟེགས་བུའི་ཆ་ཆུང་གསུམ་གྱི་བར་དོར་ནས་ཐིག་གོ། །དེ་ནས་རིན་པོ་ཆེའི་ཕ་གུའི་ཆ་ཆུང་ཕྱེད་དང་གཉིས་དོར་བར་ཐིག་གོ། །དེ་ནས་དྲ་བ་དང་དྲ་བ་ཕྱེད་པའི་སྣམ་བུའི་ཆ་ཆུང་གསུམ་དོར་བར་ཐིག་གོ། །དེ་ནས་རིན་ཆེན་ཤར་བུའི་ཆ་ཆུང་ཕྱེད་དང་གཉིས་དོར་བར་ཐིག་གོ། །དེ་ནས་མདའ་ [33a.4]ཡབ་ཀྱི་སྣམ་བུའི་ཆ་ཆུང་ཕྱེད་དང་གཉིས་དོར་བར་མདའ་ཡབ་ཀྱི་ཐིག་སྟེ་ཟུར་ཐིག་ནས་ཟུར་ཐིག་གཞན་གྱི་བར་དུ་རིང་བའོ། །སྟེགས་བུའི་ཐིག་ལ་སོགས་པ་བཞི་ནི་ཐིག་གཞན་གྱི་བར་དུའོ། །འདིར་ནི་ཀ་བ་གཅིག་གི་སྟེང་ནས་ཀ་བ་གཉིས་པའི་སྟེང་དུ་སོན་པའི་ཐིག་ནི་གདུང་མཚོན་པར་བྱེད་པ་སྟེ། འདིའི་ནང་ [33a.5]དུ་མདའ་ཡབ་རྣམས་བྲི་བར་མི་བྱའོ། །ཀ་བའི་སྟེང་དུ་རྟ་བབས་ནི་སྒོའི་ཚད་ལས་སྟེང་དུ་སུམ་འགྱུར་རོ། །དེ་ཡང་རིམ་པ་གསུམ་པ་སྟེ། དང་པོ་ནི་ཆ་ཆུང་དྲུག་གོ། །གཉིས་པ་ནི་ཆ་ཆུང་ཕྱེད་དང་ལྔའོ། །གསུམ་པ་ནི་ཆ་ཆུང་ཕྱེད་དང་བཞིའོ། །ཧར་མི་ནི་ཆ་ཆུང་གཉིས་སོ། །དེའི་སྟེང་དུ་བུམ་པ་ཆ་ཆུང་གཉིས་ [33a.6]པའོ། །དེ་ལ་རིམ་པ་དང་པོ་ལ་ཀ་བའི་སྟེང་དུ་ཆ་ཆུང་གཅིག་པའི་སྣམ་བུ་ཆ་ཆུང་ཉི་ཤུ་རྩ་བཞིར་རིང་བའོ། །དེའི་སྟེང་དུ་ཆ་ཆུང་གཅིག་པའི་མྱོས་པས་བསྲུང་བའི་སྣམ་བུ་ཆ་ཆུང་བཅུ་དྲུག་ཏུ་རིང་བའོ། །དེའི་སྟེང་དུ་དབུས་སུ་ཆ་ཆུང་བཞི་པ་གྲུ་བཞི་པ་སྟེ་མཆོད་པའི་ལྷ་མོའི་གནས་སོ། །དེའི་གཡས་དང་ [33a.7]གཡོན་དུ་ཆ་ཆུང་གཅིག་པའི་ཀ་བའོ། །དེ་དག་གི་གློར་དེ་བཞིན་དུ་མཆོད་པའི་ལྷ་མོའི་གནས་སོ། །དེའི་གློར་སླར་ཡང་ཀ་བ་ཆ་ཆུང་གཅིག་པའོ། །དེ་དག་གི་གཞོགས་སུ་རྟ་བབས་ཀྱི་ཀ་བའི་སྟེང་དུ་མཆེ་བ་ཅན་གྱི་དབང་པོ་དག་མནན་པའི་མགོ་བོའི་སྟེང་དུ་བཏེག་པའི་སེང་གེ་དག་གོ། །དེ་དག་གི་མགོ་དང་ [33b] [33b.1]ཀ་བ་བཞིའི་སྟེང་དུ་ཆ་ཆུང་ཕྱེད་པའི་སྣམ་བུ་ཆ་ཆུང་བཅོ་བརྒྱད་དུ་རིང་བའོ། །དེའི་སྟེང་དུ་ཆ་ཆུང་གཅིག་པའི་མྱོས་པས་བསྲུང་བའི་ཆ་ཆུང་བཅུ་གཉིས་སུ་རིང་བའོ། །དེའི་སྟེང་དུ་ཆ་ཆུང་གསུམ་པའི་སྣམ་བུ་ཆ་ཆུང་བཅུ་གཉིས་སུ་རིང་བའོ། །དེ་ལ་སོ་སོར་བཞི་ཆས་ཉུང་བའི་ཆ་ཆུང་གཅིག་པའི་ཀ་ [33b.2]བ་བཞིའོ། །ཀ་བའི་བར་རྣམས་སུ་སོ་སོར་ཆ་ཆུང་གསུམ་པའི་ལྷའི་གནས་གསུམ་མོ། །ཕྱིའི་ཀ་བའི་གློ་དག་ཏུ་གདུང་འདེགས་པའི་ལྷ་མོ་གཉིས་སོ། །དེ་དག་གི་མགོ་གཉིས་དང་ཀ་བ་རྣམས་ཀྱི་སྟེང་དུ་ཆ་ཆུང་ཕྱེད་པའི་སྣམ་བུ་ཆ་ཆུང་བཅོ་ལྔར་རིང་བའོ། །དེའི་སྟེང་དུ་ཆ་ཆུང་གཅིག་པའི་མྱོས་པས་ [33b.3]བསྲུང་བའི་སྣམ་བུ་ཆ་ཆུང་བརྒྱད་དུ་རིང་བའོ། །དེའི་སྟེང་དུ་ཆ་ཆུང་གཉིས་པའི་སྣམ་བུ་ཆ་ཆུང་བརྒྱད་དུ་རིང་བའོ། །དེ་ནས་སོ་སོར་ཆ་ཆུང་ཕྱེད་པའི་ཀ་བ་བཞིའོ། །ཀ་བའི་བར་རྣམས་སུ་ལྷའི་གནས་གསུམ་སྟེ་རེ་རེ་ཞིང་ཆ་ཆུང་གཉིས་གཉིས་པའོ། །ཕྱིའི་ཀ་བའི་གློ་དག་ཏུ་གདུང་འདེགས་པའི་ལྷ་མོ་ [33b.4]གཉིས་སོ། །དེའི་སྟེང་དུ་ཆ་ཆུང་ཕྱེད་པའི་སྣམ་བུ་ཆ་ཆུང་བཅུ་གཉིས་སུ་རིང་བའོ། །དེའི་སྟེང་དུ་ཧར་མི་སྟེ་སྲིད་དུ་ཆ་ཆུང་བརྒྱད་པོའོ། །དེའི་སྟེང་དུ་བུམ་པའོ། །དེའི་གཡས་དང་གཡོན་དུ་རྒྱལ་མཚན་གྱི་ཡུ་བའི་གནས་སོ། །དེ་ལྟར་སྣམ་བུ་ཐམས་ཅད་ཀྱི་རྩེ་མོ་ལ་དྲིལ་བུ་དང་མདའ་ཡབ་དང་མེ་ལོང་དང་ [33b.5]རྒྱལ་མཚན་དང་བ་དན་རྣམས་སོ། །འདིར་ཐུགས་ཀྱི་དཀྱིལ་འཁོར་རྩ་བའི་ཐིག་ནས་ཕྱི་ངོས་སུ་གསུང་གི་དཀྱིལ་འཁོར་རོ། །དེའི་ཕྱོགས་རེ་རེར་ཆ་ཆུང་བཅུ་གཉིས་བའི་གནས་ནི་ཐུགས་ཀྱི་དཀྱིལ་འཁོར་གྱི་རྩིག་པ་ལ་སོགས་པ་ནས་མདའ་ཡབ་ཀྱི་མཐར་ཐུག་པའི་སྣམ་བུ་རྣམས་ཀྱིས་ཁྱབ་པའོ། །དེའི་ཕྱི་ [33b.6]ངོས་སུ་ཆ་ཆུང་བདུན་པའི་བར་སྤངས་ནས་ཐིག་གཅིག་གོ། །དེ་ནས་ཆ་ཆུང་བཞི་པའི་ལྷ་སྣམ་དོར་ནས་ཐིག་གཅིག་གོ། །སྣམ་བུ་འདི་ལ་ཆ་ཆུང་བཞི་པའི་པདྨ་རྣམས་ཏེ། འོན་ཀྱང་ཕྱོགས་སུ་སོན་པ་ཐུགས་ཀྱི་དཀྱིལ་འཁོར་གྱི་རྟ་བབས་ཀྱི་འོག་ཏུ་གནས་པ་ནི་རིམ་པ་གཉིས་པའི་མྱོས་པས་བསྲུང་བ་ལ་ [33b.7]སོགས་པའི་ཆ་ཆུང་བཞི་པའི་གནས་སུ་ཀ་བ་གཉིས་ཀྱི་ཆ་ཆུང་ཕྱེད་པ་བསྣུར་ནས་བྲི་བར་བྱའོ། །དེ་ནས་ལྷ་སྣམ་གྱི་ཐིག་ལས་ཕྱི་ངོས་སུ་ཆ་ཆུང་གཅིག་དོར་བར་རྩ་བའི་ཐིག་གོ། །ཐིག་གསུམ་པོ་འདི་ཟུར་ཐིག་གི་མཐར་ཐུག་བར་རིང་བའོ། །རྩ་བའི་ཐིག་ལ་ཚངས་ཐིག་གི་གཡས་དང་གཡོན་དུ་ཆ་ཆུང་དྲུག་ [34a] [34a.1]དྲུག་སྔོན་བཞིན་ཕྱི་བས་སྒོ་ཆ་ཆུང་བཅུ་གཉིས་སུ་འགྱུར་རོ། །དེ་ནས་སྒོ་ཁྱུད་ལ་སོགས་པ་ནས་རྟ་བབས་ཀྱི་མཐར་ཐུག་པ་རྣམས་ཐུགས་ཀྱི་དཀྱིལ་འཁོར་གྱི་སྒོ་ཁྱུད་ལ་སོགས་པ་ལས་ཉིས་འགྱུར་དུ་འགྱུར་རོ། །གསུང་གི་དཀྱིལ་འཁོར་འདིའི་རྩ་བའི་ཐིག་ལས་ཕྱི་ངོས་སུ་སྐུའི་དཀྱིལ་ [34a.2]འཁོར་རོ། །དེའི་ཕྱོགས་རེ་རེ་ཆ་ཆུང་ཉི་ཤུ་རྩ་བཞིའི་གནས་ནི་གསུང་གི་དཀྱིལ་འཁོར་གྱི་རྩིག་པ་ལ་སོགས་པ་མདའ་ཡབ་ཀྱི་མཐར་ཐུག་པའི་སྣམ་བུ་རྣམས་ཀྱིས་ཁྱབ་པའོ། །དེའི་ཕྱི་ངོས་སུ་ཆ་ཆུང་བཅུ་གཅིག་དོར་ནས་ཐིག་གོ། །དེའི་ཕྱི་ངོས་སུ་ཆ་ཆུང་བཅུ་གཉིས་ཀྱི་ལྷ་སྣམ་དོར་ནས་ཐིག་གོ། ། [34a.3]ལྷ་སྣམ་འདི་ལ་པདྨ་བཅུ་གཉིས་ཏེ་རེ་རེ་ཞིང་ཆ་ཆུང་བཅུ་གཉིས་པའོ། །དེ་ལ་ཆ་ཆུང་བཅུ་གཉིས་པའི་པདྨ་ཆ་བདུན་བྱས་ནས་དབུས་ཀྱི་ཆ་ནི་ལྟེ་བའོ། །གཡས་དང་གཡོན་གྱི་ཆ་དག་ནི་འདབ་མ་བཞིའོ། །དེའི་གཡས་དང་གཡོན་དུ་བརྒྱད་དོ། །དེའི་གཡས་དང་གཡོན་དག་བཅུ་དྲུག་གོ། །དེ་ལྟར་དཀྱིལ་ [34a.4]འཁོར་གསུམ་རྣམས་ཀྱི་འདབ་མ་ཉི་ཤུ་རྩ་བརྒྱད་དོ། །ལྷ་སྣམ་གྱི་ཐིག་ལས་ཕྱི་ངོས་སུ་ཆ་ཆུང་གཅིག་དོར་བར་རྩ་བའི་ཐིག་གོ། །ཐིག་གསུམ་པོ་འདི་སྲིད་དུ་ཟུར་ཐིག་གི་བར་དུའོ། །རྩ་བའི་ཐིག་གི་ཚངས་ཐིག་གི་གཡས་དང་གཡོན་དག་ཏུ་ཆ་ཆུང་བཅུ་གཉིས་སྔོན་བཞིན་ཕྱི་བ་ལས་སྒོ་ཆ་ཆུང་ཉི་ཤུ་རྩ་ [34a.5]བཞི་ཡིན་ནོ། །དེ་ནས་དེའི་སྒོ་ཁྱུད་ལ་སོགས་པ་ནས་རྟ་བབས་ཀྱི་མཐར་ཐུག་པ་རྣམས་གསུང་གི་དཀྱིལ་འཁོར་གྱི་སྒོ་ཁྱུད་ལ་སོགས་པ་ཉིས་འགྱུར་ཏེ་ཆུའི་ཁོར་ཡུག་གི་ཕྱེད་ཚུན་ཆད་དོ། །གསུང་གི་དཀྱིལ་འཁོར་གྱི་རྟ་བབས་རྣམས་ཀྱི་ཕྱི་རོལ་དུ་སྐུའི་དཀྱིལ་འཁོར་གྱི་སྒོའི་དབུས་རྣམས་སུ་ཆ་ཆུང་བཅུ་ [34a.6]གཉིས་པའི་ཤིང་རྟ་རྣམས་སོ། །དེ་ནས་སའི་ཁོར་ཡུག་ཆ་ཆུང་བཅུ་གཉིས་པའོ། །དེའི་ཕྱི་ངོས་སུ་ཆུའི་ཁོར་ཡུག་ཆ་ཆུང་ཉི་ཤུ་རྩ་བཞིའོ། །དེ་ནས་མེའི་ཁོར་ཡུག་ཆ་ཆུང་ཉི་ཤུ་རྩ་བཞིའོ། །དེ་ནས་རླུང་གི་ཁོར་ཡུག་ཆ་ཆུང་ཉི་ཤུ་རྩ་བཞིའོ། །རླུང་གི་ཁོར་ཡུག་ལས་ཕྱི་ངོས་སུ་ནམ་མཁའི་ཁོར་ཡུག་ཆ་ [34a.7]ཆུང་བཅུ་གཉིས་སོ། །ཁོར་ཡུག་དེའི་ཕྱི་ངོས་སུ་འོད་ཟེར་གྱི་ཕྲེང་བ་ཆ་ཆུང་ཉི་ཤུ་རྩ་བཞིའོ། །སའི་ཁོར་ཡུག་ལ་སོགས་པ་དྲུག་པོ་འདི་རྣམས་རང་རང་གི་དང་པོར་ཐིག་ཟླུམ་པོའོ། །འོད་ཀྱི་ཁོར་ཡུག་གི་མཐར་ཡང་སྟེ་ཐིག་ཟླུམ་པོ་བདུན་ནོ། །དེ་ལྟ་བུ་འདི་ནི་གཙོ་བོ་ཐུགས་རྡོ་རྗེའི་དཀྱིལ་འཁོར་གསུམ་ [34b] [34b.1]གྱི་བདག་ཉིད་ཀྱི་དཀྱིལ་འཁོར་རོ། །འདིའི་ཐིག་སྐུད་ལ་ནི་ཁྲུ་བརྒྱད་དེ་སའི་ཁོར་ཡུག་གི་ཐོག་མའི་བར་དུའོ་ཞེས་པ་ནི། ཕྱོགས་དང་པོའོ། །གང་གི་ཚེ་ཐུགས་ཀྱི་དཀྱིལ་འཁོར་གྱི་སྒོའི་ཚད་དང་། གསུང་གི་དཀྱིལ་འཁོར་གྱི་སྒོའི་ཚད་བསྡོམས་ནས་སྒོ་ཆ་ཆུང་བཅོ་བརྒྱད་ཡོངས་སུ་བརྟགས་ཏེ། [34b.2]དེའི་དྲུག་ཆ་ལ་ཆ་ཆུང་གི་ཐ་སྙད་བྱེད་པ་དེའི་ཚེ། ཆ་ཆུང་དེས་གཙོ་བོའི་པདྨའི་ལྟེ་བ་ལ་སོགས་པ་ནས་འོད་ཀྱི་ཕྲེང་བའི་མཐར་ཐུག་པར་ཆ་ཆུང་གི་གྲངས་བྱའོ། །དེའི་ཚེ་གཙོ་བོ་ཐུགས་རྡོ་རྗེ་དཀྱིལ་འཁོར་གསུམ་གྱི་བདག་ཉིད་ཀྱི་དཀྱིལ་འཁོར་ཁྲུ་བཅུ་གཉིས་དང་། དེའི་ཉིས་འགྱུར་གྱི་ཐིག་སྐུད་ནི་སའི་ [34b.3]ཁོར་ཡུག་གི་ཐོག་མའི་བར་དུ་ཁྲུ་ཉི་ཤུ་རྩ་བཞིའོ། །ཕྱོགས་གཉིས་པའོ། །གང་གི་ཚེ་བཅོམ་ལྡན་འདས་ཐུགས་རྡོ་རྗེ་གསུང་རྡོ་རྗེའི་གནས་སུ་གྱུར་ནས་གསུང་རྡོ་རྗེ་ནི་གཙོ་བོ་སྟེ། དེ་ལས་གཞན་པའི་ལྷ་ལ་སོགས་པའི་བཀོད་པ་ནི་ཕྱོགས་དང་པོ་བཞིན་དུ་སྟེ། གང་གི་ཚེ་ཡང་། དབུས་ཀྱི་དཀྱིལ་འཁོར་ [34b.4]གྲུ་བཞི་པ་དང་། དེའི་ཉིས་འགྱུར་གཉིས་པ་དང་། དེ་ཉིས་འགྱུར་གསུམ་པ་ཡིན་པ་དེའི་ཚེ་ཁྲུ་བཅུ་དྲུག་གི་དཀྱིལ་འཁོར་གསུམ་གྱི་བདག་ཉིད་གསུང་གི་དཀྱིལ་འཁོར་དང་། དེ་ཉིས་འགྱུར་གྱི་ཐིག་སྐུད་ནི་ཁྲུ་སུམ་ཅུ་སོ་གཉིས་པ་སྟེ། སའི་ཁོར་ཡུག་གི་དང་པོའི་བར་དུའོ་ཞེས་པ་ཕྱོགས་གསུམ་པའོ། ། [34b.5]གང་གི་ཚེ་དང་པོར་བརྗོད་པའི་ཐུགས་ཀྱི་དཀྱིལ་འཁོར་གྱི་སྒོའི་ཚད་དང་། དང་པོར་བརྗོད་པའི་སྐུའི་དཀྱིལ་འཁོར་གྱི་སྒོའི་ཚད་བསྡོམས་ནས་སྒོ་ཆ་ཆུང་སུམ་ཅུར་ཡོངས་སུ་བརྟགས་ཏེ། དེའི་དྲུག་ཆ་ལ་ཆ་ཆུང་དུ་འདོགས་པ་དེའི་ཚེ། ཆ་ཆུང་དེས་གཙོ་བོའི་ལྟེ་བ་ལ་སོགས་པ་ནས་འོད་ཀྱི་ཁོར་ཡུག་གི་མཐར་ [34b.6]ཐུག་པར་ཆ་ཆུང་གི་གྲངས་བྱ་ཞིང་། བཅོམ་ལྡན་འདས་ཐུགས་རྡོ་རྗེ་ཡང་སྐུ་རྡོ་རྗེའི་གནས་སུ་བྱའོ། །སྐུ་རྡོ་རྗེ་ནི་གཙོ་བོ་སྟེ། དེ་ལས་གཞན་པའི་ལྷ་ལ་སོགས་པ་དགོད་པ་ནི་ཕྱོགས་དང་པོ་བཞིན་ཏེ། དེའི་ཚེ་གཙོ་བོ་སྐུ་རྡོ་རྗེའི་དཀྱིལ་འཁོར་གསུམ་གྱི་བདག་ཉིད་ཁྲུ་ཉི་ཤུ་དང་། དེ་ཉིས་འགྱུར་གྱི་ཐིག་སྐུད་ [34b.7]ཀྱང་སའི་ཁོར་ཡུག་གི་ཐོག་མའི་བར་དུ་ཁྲུ་བཞི་བཅུ་པའོ་ཞེས་པ་ནི་ཕྱོགས་བཞི་པའོ། །དེ་ལྟར་ཡང་དྲི་མ་མེད་པའི་འོད་ལས་ཐིག་སྐུད་ཁྲུ་བརྒྱད་པ་ཞེས་པའི་རྩ་བ་ལ་ཁྲུ་བརྒྱད་པ་ཞེས་པ་ནི་དཀྱིལ་འཁོར་ཉིས་འགྱུར་རོ་ཞེས་བཀྲལ་ནས། དེ་ལ་དང་པོའི་སངས་རྒྱས་ལས། ཐུགས་ཀྱི་དཀྱིལ་འཁོར་ཁྲུ་བཅུ་ [35a] [35a.1]གཉིས་སུ་བྱ་ཞིང་ཐིག་སྐུད་ནི་ཁྲུ་ཉི་ཤུ་རྩ་བཞིའོ། །དེ་བཞིན་དུ་གསུང་གི་དཀྱིལ་འཁོར་ནི་ཁྲུ་བཅུ་དྲུག་པའོ། །སྐུའི་དཀྱིལ་འཁོར་ནི་ཁྲུ་ཉི་ཤུའོ་ཞེས་པ་ནི་ཐིག་སྐུད་ཉིས་འགྱུར་གྱི་ངེས་པ་ཡིན་ནོ་ཞེས་གསུངས་སོ། །ཡང་དབང་གི་དོན་དུ་དབུས་ཀྱི་དཀྱིལ་འཁོར་ཙམ་བྲི་བར་རྗེས་སུ་ [35a.2]གནང་སྟེ། ཇི་སྐད་དུ། དབང་གི་དོན་དུ་དཀྱིལ་འཁོར་རམ་ནི་རིགས་ཀྱི་དབང་ལས་ཕྱི་ཡི་འཁོར་ལོས་རབ་ཏུ་དམན་པར་འགྱུར། ཞེས་གསུངས་སོ། །གང་ཡང་ཁམས་གསུམ་རྣམ་པར་རྒྱལ་བའི་རྒྱུད་ལས་སྒོ་འཁོར་ལོའི་དགུ་ཆ་དང་། དཀྱིལ་འཁོར་ཆེན་པོ་བཀོད་པའི་རྒྱུད་ལས་འཁོར་ལོའི་བཅུ་ཆར་ [35a.3]གསུངས་པ་དེ་ལྟར་ནི་སློབ་དཔོན་རྣམས་ཀྱིས་ཐ་སྙད་མི་བྱེད་པས་ན་ཁོ་བོས་སྤངས་སོ། །དཀྱིལ་འཁོར་གྱི་ཚད་ཀྱང་རབ་ཏུ་གྲགས་པ་བརྗོད་ཀྱི་འདི་ཙམ་འབའ་ཞིག་ནི་མ་ཡིན་ཏེ། དེ་ལྟར་ཡང་བཅོམ་ལྡན་འདས་ཀྱིས། །འཛམ་བུ་གླིང་གི་དབང་ཕྱུག་གམ། །འཁོར་ལོས་སྒྱུར་བའི་རྒྱལ་པོ་ཡིས། ། [35a.4]ཀུན་ནས་དཔག་ཚད་མཐའ་རུ་ནི། །ཕྱི་རོལ་དཀྱིལ་འཁོར་བྲི་བར་བྱ། །མཁས་པས་གདུལ་བྱའི་སྐྱེ་བོ་ཡི། །སེམས་རྣམས་ཡང་དག་བལྟས་ནས་ནི། །འདོད་པས་ཚད་ནི་བྱས་ན་ཡང་། །ཉེས་པ་ཅུང་ཟད་ཡོད་མ་ཡིན། །རང་གི་འདོད་པས་དཀྱིལ་འཁོར་ཀུན། །ལག་པའི་མཐིལ་དུ་བྲི་བྱས་ན། །བསྟན་ [35a.5]བཅོས་ལས་གསུངས་དོན་བྱེད་དེ། །ས་སྟེང་སོགས་སུ་སྨོས་ཅི་དགོས། །ཞེས་གསུངས་སོ། །དཀྱིལ་འཁོར་དཔག་ཏུ་མེད་པའི་དབྱེ་བ་ཐ་དད་པ་རྣམས་ཇི་ཙམ་ཞིག་བརྗོད་ཅིང་བྱ་བར་ནུས། །གང་གི་ཕྱིར་ན་བཅོམ་ལྡན་འདས་ཀྱིས། །དཀྱིལ་འཁོར་ཇི་ལྟ་བ་དེ་བཞིན། །རབ་ཏུ་བསྟན་པར་སུ་ཡིས་ [35a.6]ནུས། །རང་གི་ལྷ་ཡི་སྦྱོར་བ་ཡིས། །དཀྱིལ་འཁོར་བརྟག་པར་གྲུབ་པ་ཡིན། །ཞེས་གསུངས་སོ། །འདིར་ཐིག་གདབ་པའི་བསྡུ་བའི་ཚིགས་སུ་བཅད་པ་ནི། ཤར་སོགས་ཕྱོགས་ཀྱི་ཐིག་ལེའི་སྟེང་། །སྲད་བུ་བཟུང་ནས་མཎྜལ་བཞིའི། །ཉ་ཡི་མགོ་དང་མཇུག་མའི་མཐར། །ཚངས་ཐིག་དང་ནི་ [35a.7]ཟུར་ཐིག་གདབ། །ཟུར་དེ་སྒོ་ཚད་བདུན་དང་ཕྱོགས། །ཁྲུ་ལ་སོགས་པའི་རྩ་བའི་ཐིག །དབུས་སུ་བརྒྱད་ཆ་ཕྱི་བ་སྟེ། །སྒོ་དེའི་བཞི་ཆ་ཆ་ཆུང་སྟེ། །རྩ་བའི་ཕྱི་རོལ་གཅིག་དང་གཉིས། །གཅིག་གཉིས་གཅིག་དང་གཅིག་གི་མཐར། །ཐིག་དྲུག་ཟུར་ནས་ངོས་སུ་སྟེ། །ཚངས་ལས་རིམ་གྱིས་རིང་ [35b] [35b.1]བར་ནི། །ཆ་ཆུང་གསུམ་དུ་དང་པོའི་ཐིག །གཉིས་ཐིག་ཆ་ཆུང་གཉིས་རྩེར་རེག །ཆ་ཆུང་བརྒྱད་དུ་གསུམ་སྟེགས་བུའི། །ཐིག་ལས་དྲང་པོའི་ཐིག་བཞི་སྟེ། །གསུམ་ནི་ཆ་ཆུང་ལྔ་བཞི་པ། །ཆ་ཆུང་བཞི་དེའི་དང་པོ་ནི། །ངོས་ཐིག་རྩེ་མོར་ཡང་དག་རེག །གསུམ་ནི་ཆ་ཆུང་རེ་རེའི་བར། ། [35b.2]བཞི་པའི་རྩེ་ནས་ངོས་སུ་ཐིག །ཆ་ཆུང་བཅུ་དང་ལྡན་པའོ། །རྩ་བའི་རྩེ་ནས་བྱུང་བའི་ཐིག །ཆ་ཆུང་བཞི་པ་ངོས་སྟེང་དུ། །ཆ་ཆུང་གཉིས་གཉིས་ཐད་ཀར་ནི། །ཆ་ཆུང་བརྒྱད་དེ་གསུམ་འཁྱོག་པ། །ཀ་བའི་རྩེ་ནས་ཕྱི་ངོས་སུ། །ཆ་ཆུང་རེ་རེ་དོར་བར་ཐིག །བཅུ་གཅིག་འདི་ལ་ལྔ་པ་དག ། [35b.3]བདུན་པ་ཆ་ཆུང་ཕྱེད་དང་གཉིས། །ཡང་ན་གསུམ་པ་བདུན་པ་དང་། །དགུ་པ་ཆ་ཆུང་རེ་རེའོ། །བཞི་པ་དྲུག་པ་བཅུ་པ་རྣམས། །སོ་སོར་ཆ་ཆུང་ཕྱེད་ཕྱེད་དོ། །ལྔ་ནི་ཆ་ཆུང་ཕྱེད་དང་གཉིས། །དེ་ལ་ཕྱོགས་གཉིས་སུ་ནི་རྒྱར། །ཚངས་བའི་གཡས་དང་གཡོན་དུ་ནི། །ཆ་ཆུང་ཕྱེད་བཅས་མངའ་ཡི་ [35b.4]མཐར། །སྣམ་བུ་ཆ་ཆུང་ཕྱེད་དང་གསུམ། །ཐིག་ནི་ཆ་ཆུང་ཕྱེད་དང་བཞི། །ཆ་ཆུང་དྲུག་མཐར་གཉིས་པ་དང་། །གསུམ་པ་ཆ་ཆུང་གསུམ་པའོ། །ཆ་ཆུང་བཞི་མཐར་བཞི་པ་ནི། །ཆ་ཆུང་ལྔ་སྟེ་མདའ་ཕྱེད་བཅས། །གསུམ་དོར་ནས་ནི་ཕྱེད་དང་ལྔ། །གསུམ་ནས་དྲུག་པ་ཆ་ཆུང་ལྔ། །བཞི་ [35b.5]ནི་ཆ་ཆུང་བདུན་རྣམས་ཏེ། །ཐིག་བཅུ་གཅིག་པ་ཆ་ཆུང་ལྔ། །སྣམ་བུ་ལྔ་པའི་སྟེང་དུ་ནི། །ངོས་སུ་ཆ་ཆུང་ཕྱེད་དང་བཞི། །བདུན་པའི་འོག་ལ་ཆ་ཆུང་གསུམ། །སྟེང་གི་ཆ་ཆུང་དྲུག་སྟེང་དུ། །སྣམ་བུ་རྣམས་མཐར་སོན་པའི་ཐིག །གཞན་གྱི་མཐའ་དང་ལྷན་ཅིག་ཏུ། །ཀྱོག་པོ་གཅིག་གོ་འདི་ནང་ [35b.6]དུའང་། །ཆ་ཆུང་ཕྱེད་ནས་དེ་བཞིན་གཞན། །དེ་ཕྱིར་ཆ་ཆུང་རིག་བྱེད་མཐར། །ཐིག་ཟླུམ་དེ་ནས་གཉིས་ཡིན་ཏེ། །ཆ་ཆུང་གཉིས་གཉིས་དོར་བར་རོ། །བཞི་དོར་བར་ནི་ཟླུམ་པོ་གཞན། །འགྲམ་ལོགས་སྒོ་དང་མཉམ་པ་ན། །མུན་པའི་སྣམ་བུ་མེད་པའོ། །རྟ་བབས་སྒོ་ལས་སུམ་འགྱུར་ནི། །ངོས་ཉིད་ [35b.7]དུ་སྟེ་སྟེང་མིན་པ། །དེ་ཚེ་ཐིག་ནི་དྲང་པོ་གསུམ། །སྟེགས་བུའི་ཐིག་ལས་དེ་ལྟར་གཞལ། །ཕྱོགས་ནི་དེ་མ་ཐག་པ་ཡི། །རྟ་བབས་སྣམ་བུ་དྲག་པོའི་ལས། །དཔངས་སུ་ཚད་ནི་སྒོ་ཡི་ཆ། །ནོར་ལྷ་ནོར་ལྷ་ཉི་མ་དང་། །རྒྱལ་བ་ནོར་ལྷ་རྒྱལ་བ་དང་། །ཉི་མ་ནོར་ལྷ་ཉི་མ་དང་། །རྒྱལ་བ་ནོར་ལྷ་གོ་རིམས་བཞིན། ། [36a] [36a.1]འདི་རྣམས་ངོས་ཀྱིས་བརྗོད་པར་བྱ། །ཚངས་པའི་གཡས་དང་གཡོན་དུ་ནི། །ཆ་ཆུང་ཕྱེད་དང་ལྔ་དོར་ནས། །སྣམ་བུ་ཆ་ཆུང་ཕྱེད་དང་གསུམ། །ཐིག་ནི་ཆ་ཆུང་ཕྱེད་དང་བཞི། །གཉིས་པ་དང་ནི་གསུམ་པ་ནི། །ཆ་ཆུང་ལྔ་ནས་ཆ་ཆུང་གསུམ། །བཞི་པ་ཆ་ཆུང་བཞི་དོར་ནས། །ཆ་ཆུང་གསུམ་ [36a.2]མདའ་ཆ་ཆུང་ནི། །ཕྱེད་དང་བཞི་ནས་ཕྱེད་དང་བཞི། །གསུམ་ནས་དྲུག་པ་ཆ་ཆུང་ལྔ། །དེ་ནས་གསུམ་ནས་བརྒྱད་གཅིག་ནི། །ཆ་ཆུང་བདུན་དེ་ཐ་མ་དྲུག །དེ་ཕྱིར་ཆ་ཆུང་རིག་བྱེད་མཐར། །ཟླུམ་པོ་གཉིས་ནས་དེ་བཞིན་ཐིག །ཆ་ཆུང་གཉིས་མཐར་ཟླུམ་པོ་སྟེ། །ཐ་མ་ཆ་ཆུང་བཞི་པའི་མཐར། །ཚངས་ [36a.3]ལས་ཆ་ཆུང་བརྒྱད་མཐར་དང་། །བདུན་པའི་མཐའ་རུ་ཟླུམ་པོའི་ཐིག །དེ་ནས་ཡང་དག་དྲངས་ནས་ནི། །ཕྱོགས་གཞན་ཐིག་གི་མཚམས་སོང་བའི། །ཐིག་གཉིས་རིམ་བཞིན་ཚངས་པའི་ཕྱིར། །ཆ་ཆུང་གཉིས་གསུམ་དོར་བར་རོ། །ཕྱི་ཟླུམ་ཐིག་ལས་ཕྱི་ངོས་སུ། །ཆ་ཆུང་དོར་བར་ཟླུམ་པོའི་ཐིག ། [36a.4]དེ་ནས་ཆ་ཆུང་གསུམ་དོར་ནས། །ཟུར་ཐིག་བར་དུ་གནས་པའི་ཐིག །ཀུན་དུ་སོན་པའི་ཚངས་ཐིག་དང་། །རེའུ་མིག་སྣམ་བུའི་རེ་ཁཱ་དབྱི། །རྩ་བའི་ནང་གི་དཀྱིལ་འཁོར་དུ། །ལྷ་ཡི་དབྱེ་བས་ཐིག་གདབ་པ། །ཅུང་ཟད་ཐ་དད་བདེ་མཆོག་གི། །གཞན་དེ་དེ་ཡིས་བརྗོད་པར་བྱ། །ཚངས་དང་ཟུར་ཐིག་ [36a.5]གནས་པ་ལས། །གཞན་མིན་དེ་ཡི་ཚངས་ལས་ཕྱིར། །ཆ་ཆུང་གཉིས་དོར་རྩ་བའི་བར། །ཐིག་གདབ་ཟུར་གྱི་འགྲམ་དག་ཏུ། །དེ་བཞིན་ལྟེ་བའི་ལོགས་དག་ལས། །སྒོ་ནི་བཞི་བཞིར་དེ་ཡི་སྲིད། །ལྟེ་བའི་ཕྱི་རུ་ཆ་ཆུང་བཞི། །དོར་བར་ཆ་ཆུང་བཞི་པའི་ཐིག །ཐད་ཀར་ཚངས་དང་ཟུར་ལ་གནས། ། [36a.6]འདིར་ནི་ཡང་ནི་ཐིག་ལྔ་ཡང་། །ཆ་ཆུང་གཉིས་གཉིས་དོར་བར་རོ། །དེ་བཞིན་དེ་རྣམས་དང་དྲུག་པ། །མཚམས་སུ་ཡང་དག་སོན་པའོ། །ཚངས་པ་དང་ནི་ཟུར་ཐིག་གི། །གཡས་དང་གཡོན་པའི་བདུན་རྣམས་ལས། །ལྔ་པ་གསུམ་པ་དང་པོ་ཡི། །ཆ་ཆུང་གཅིག་གི་མཐའ་ལས་འཐོན། །རང་གི་གཉིས་ [36a.7]པའི་རྩེར་སོང་ནས། །བདུན་པ་ཡིས་ནི་དབུས་སུ་སོང་། །ཐིག་གཅིག་ཀྱོག་པོ་ལྔ་རུ་འགྱུར། །དེ་ནང་དུ་ཡང་ཆ་ཆུང་ཕྱེད། །དོར་ནས་དེ་བཞིན་གཞན་ཡིན་ནོ། །ཚངས་ལས་རིམ་བཞིན་རྒྱལ་པོ་དང་། །ཉི་ཀླུ་ཆུ་མིག་ཆ་ཆུང་ནི། །དོར་བར་ཟླུམ་པོའི་ཐིག་ལྔའོ། །དང་པོ་གསུམ་གྱི་ནང་དུ་ཡང་། །ཆ་ཆུང་ཕྱེད་ [36b] [36b.1]ཕྱེད་དོར་ནས་ཐིག །ཟླུམ་པོ་གསུམ་མོ་རྩིབས་ཟླུམ་གྱི། །ཐིག་ལས་གཞན་ནི་དབྱི་བར་བྱ། །མངས་པས་འཇིགས་པས་གཞན་གྱི་ནི། །ཁྱད་པར་བསྡུ་བ་མ་བྱས་སོ། །ཞེས་པའོ། །དེ་ནས་ཐིག་གདབ་པའི་མཐའ་མཆོད་པ་དང་གཏོར་མ་སྔོན་དུ་འགྲོ་བས། །ཨོཾ་ཨཱཿཧཱུཾ་བཛྲ་མུཿཞེས་པས་ཡེ་ཤེས་ཀྱི་ཐིག་ [36b.2]གཤེགས་ཏེ། ནམ་མཁའ་ལ་གནས་པའི་དེ་བཞིན་གཤེགས་པ་རྣམས་ཀྱི་ཐུགས་ཀར་བཅུག་ནས་ཚོན་སྣ་ལྔའི་ཐིག་སྐུད་གནས་ཇི་ལྟ་བ་བཞིན་གཞག་པར་བྱའོ། །ཐིག་གདབ་པའི་ཆོ་གའོ།། །།དེ་ནས་གཏོར་མ་བྱིན་ལ། བཾ་ལཾ་རཾ་ཧཾ་མཾ་རྣམས་ཀྱི་ས་བོན་ལས་བྱུང་བའི་དཀར་པོ་དང་སེར་པོ་དང་། དམར་ [36b.3]པོ་དང་ལྗང་གུ་དང་ནག་པོའི་ཚོན་རྣམས་གོ་རིམས་བཞིན་དུ་ཟླ་ཤེལ་དང་། སྦུག་དང་། པདྨ་རཱ་ག་དང་། མརྒཏ་དང་། ཨིནྡྲ་ནཱི་ལ་ལས་བྱུང་བ་རྣམས་སམ། ཡང་ན་མུ་ཏིག་དང་། གསེར་དང་། བྱི་རུ་རྣམས་དང་བསྲེས་པ་དང་། མུ་མེན་ལས་སྐྱེས་པ་རྣམས་ཏེ། བསྲེས་པ་ནི་འདིར་མུ་ཏིག་ལ་སོགས་པ་བཞིའོ། ། [36b.4]ཡང་ན་ཁམ་པ་ལས་བྱས་པའམ། འབྲས་ལས་བྱས་པའམ། མེ་ཏོག་ལས་བྱས་པའམ། ཇི་ལྟར་རིགས་པར་སོ་ཕག་གི་ཕྱེ་མའམ། སོལ་བ་དང་རུས་པའི་ཕྱེ་མ་ལ་སོགས་པས་ཀྱང་རུང་སྟེ། ལེགས་པར་འདུ་བྱས་པ་བཟང་པོ་རྣམས། བྷྲཱུཾ་ཨཾ་ཧྲཱིཿཁཾ་ཧཱུཾ་རྣམས་ལས་སྐྱེས་པའི་རྣམ་པར་སྣང་མཛད་ལ་སོགས་ [36b.5]པའི་ངོ་བོར་བསྒོམས་ནས། ནམ་མཁའ་ལ་བཀོད་པའི་དེ་བཞིན་གཤེགས་པ་རྣམས་ཀྱི་ཐུགས་ཀར། བྷྲཱུཾ་ལ་སོགས་པ་ལས་གྲུབ་པའི་ཡེ་ཤེས་ཀྱི་ཚོན་རྣམས་ཐིག་སྐུད་འདུ་བྱ་བར་བརྗོད་པའི་འབར་བའི་ལྟ་སྟངས་ཀྱིས་བཀུག་སྟེ་བཅུག་པ་རྣམས་དང་རོ་གཅིག་ཏུ་གྱུར་པས། ཡེ་ཤེས་ཀྱི་ཚོན་དུ་གྲུབ་པ་ [36b.6]རྣམས་ལ་བྷཱུཾ་ལ་སོགས་པ་མངོན་པར་བསྔགས་ནས། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་པའི་སྔགས་ཀྱིས་བརྒྱ་རྩ་བརྒྱད་དུ་བསྔགས་སོ། །དེ་བཞིན་དུ་འབར་བའི་བལྟ་བས་ཡང་དག་པར་གཟི་བྱིན་བསྐྱེད་ཅིང་རེ་རེ་ལ་ཧཱི་ཡིག་བཀོད་ནས་བདེན་པ་གང་གིས་སེམས་ཅན་རྣམས་རྡུལ་ཚོན་མང་ཞིང་། སངས་ [36b.7]རྒྱས་བཅོམ་ལྡན་འདས་རྣམས་ནི་སེམས་ཅན་རྣམས་ལ་ཆགས་པས་རྗེས་སུ་ཆགས་པར་འགྱུར་བའི་བདེན་པ་དེས་རྡུལ་ཚོན་རྣམས་འབར་བར་གྱུར་ཅིག་ཅེས་བདེན་པའི་བྱིན་གྱི་རླབས་ཀྱིས་སྦར་བར་བྱའོ། །ལྷ་བསྒོམ་པ་ཕུལ་དུ་བྱུང་བ་ལས་ནི་འབར་རོ། །དྲི་དང་མེ་ཏོག་ལ་སོགས་པས་མཆོད་ནས་ [37a] [37a.1]སྣོད་གསར་པར་གཞག་པར་བྱའོ། །དེ་ནས་དཀྱིལ་འཁོར་གྱི་ལྟེ་བ་ན་གནས་པའི་ཕུར་བ་འཆད་པར་འགྱུར་བའི་ཧཱུཾ་བཞི་པའི་སྔགས་ཀྱིས་བཏོན་ནས། བློས་རང་གི་ལག་པའི་རྡོ་རྗེ་ལ་བསྟིམས་ཏེ། ཕུར་བུའི་ཁུང་བུ་ཚོན་ལྔས་བཀང་ལ་མཉམ་པར་བྱས་ཏེ། དྲིལ་བུའི་སྒྲ་དང་རྡོ་རྗེའི་གླུས་ [37a.2]མཚན་མ་ངན་པ་བསལ་བར་བྱའོ། །ཆོས་དབྱིངས་འདི་ནི་དག་པ་སྟེ། །སེམས་ཅན་རྣམས་ནི་རབ་གྲོལ་མཛད། །རང་ཉིད་རྒྱལ་པོ་རྡོ་རྗེ་འཆང་། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་པར་གྲོལ། །འཁོར་ལོའི་ནང་དུ་ཡང་དག་གནས། །ཞེས་པས་ཆོས་དབྱིངས་ [37a.3]རྣམ་པར་དག་པར་མོས་ནས། དང་པོར་ནང་གི་དཀྱིལ་འཁོར་དུ་འདུག་སྟེ། ལག་པ་གཡས་པ་རྡོ་རྗེས་མཚན་ཞིང་གཡོན་པ་རྡོ་རྗེ་ཁུ་ཚུར་གྱིས། ཨོཾ་བཛྲར་ག་ས་མ་ཡ། ཨོཾ་ཨཱཿཧཱུཾ་ཞེས་པའམ། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་པ་བརྗོད་ཅིང་དཀྱིལ་འཁོར་གྱི་ནང་དུ་ཤར་དུ་ཕྱོགས་པར་འདུག་པས་དབང་ལྡན་ [37a.4]གྱི་མཚམས་ནས་བརྩམས་ཏེ་གཡས་སྐོར་དུ་ཚོན་དགྱེ་བར་བྱའོ། །ཕྱི་ནས་སློབ་དཔོན་ནམ་རི་མོ་མཁན་ལ་སོགས་པས་ཇི་ལྟར་བདེ་བར་དགྱེ་བར་བྱའོ། །སྦོམ་དུ་སྒོ་ཡི་ཉི་ཤུ་ཆར། །རེ་ཁཱ་ཡང་དག་དྲང་བར་བྱ། །མཉམ་ཉིད་དྲང་ལ་མ་ཆད་པ། །ཇི་ལྟར་རིགས་པར་ཕན་ཚུན་གྱི། །བར་གྱི་ཚད་ནི་ནས་ཙམ་ [37a.5]སྟེ། །འོག་དང་སྟེང་ནི་ཅི་མཛེས་བྱ། །སྦོམ་པོར་བཀྱེ་ན་ནད་འབྱུང་ངོ་། །ཕྲ་མོ་ཡིས་ནི་ནོར་རྣམས་ཉམས། །ཡོན་པ་ཡིས་ནི་རྣམ་པར་སྡང་། །ཆད་ན་བླ་མ་སློབ་མ་འཆི། །གཡས་སྐོར་མིན་པར་བཀྱེ་ན་ནི། །ཚོན་རྣམས་ཕུར་པས་བཏབ་པར་འགྱུར། །ཕུར་པས་བཏབ་པ་ནི་དངོས་གྲུབ་ཀྱི་རྒྱུ་ཡང་མ་ [37a.6]ཡིན་པའོ། །ཕན་ཚུན་འདྲེས་ན་རིགས་ཆད་པར་འགྱུར་རོ། །བཅོམ་ལྡན་འདས་ཀྱིས་ཉེས་པ་ཞི་བར་བྱ་བའི་ཕྱིར་གསུངས་པ། ཚོན་བཀྱེ་བ་ལ་ཉེས་པ་གང་། །དེ་ཉིད་བསམ་སྦྱོར་མེད་ལའོ། །དེ་ཉིད་བསམ་བཟང་སྦྱོར་རྣམས་ལ། །སུས་ཀྱང་བར་ཆད་བྱ་མི་ནུས། །དཀྱིལ་འཁོར་ཇི་ལྟ་བ་དེ་བཞིན། །ཇི་ [37a.7]སྲིད་དུ་ནི་བརྟགས་པ་ཡིན། །ཞེས་པའི་བར་དུའོ། །ཚོན་གྱི་རེ་ཁཱ་རྣམས་ལ་ཡང་རིན་ཆེན་དཀར་པོ་ལ་སོགས་པ་ལས་བྱས་པའི་ཐུར་མ་ལ་སོགས་པའི་ངོ་བོར་མོས་པར་བྱའོ། །འཇུག་དང་འབྱུང་ལས་ཐིག་ལས་ཚོན། །འགོམས་པའི་སྡིག་པས་འཇིགས་པ་ཡིས། །རྡོ་རྗེ་ཤུགས་ཀྱི་ཡེ་ཤེས་ཀྱིས་ [37b] [37b.1]ཚོན་གྱི་རེ་ཁཱ་ཡིད་ཀྱིས་ནམ་མཁའ་ལ་བཏེག་ལ། ཨོཾ་བཛྲ་བེ་གཱ་ཀྲ་མ་ཧཱུཾ་ཞེས་བརྗོད་ཅིང་རྩ་བའི་ཐིག་གི་ནང་གི་དཀྱིལ་འཁོར་དུ་བྲི་བའི་ཕྱིར་འཇུག་པ་འབྱུང་བར་འགྱུར་རོ། །དེ་ལ་དང་པོར་ལྷ་ཐམས་ཅད་ཀྱི་དཀྱིལ་འཁོར་ལ་ཕྱི་དང་ནང་གི་དཀྱིལ་འཁོར་གྱི་སྤྱིའི་ཚོན་གྱི་ཁ་དོག་གི་རིམ་པ་བརྗོད་པར་བྱའོ། ། [37b.2]ཤར་དང་ལྷོ་དང་ནུབ་དང་བྱང་གི་ཕྱོགས་ཀྱི་དེ་བཞིན་གཤེགས་པ་དང་། དབུས་ཀྱི་གཙོ་བོའི་ཁ་དོག་གི་གོ་རིམས་བཞིན་དུ་ཕྱིའི་རེ་ཁཱ་ནས་བརྩམས་ཏེ། ནང་གི་རེ་ཁཱའི་བར་དུ་ཚོན་ལྔའི་རྩིག་པའི་རེ་ཁཱའི་ཁ་དོག་གོ། །ཕྱོགས་དང་དབུས་སུ་ལྷ་གཞན་དགོད་པ་ནི་རྒྱས་འདེབས་ཀྱི་དེ་བཞིན་གཤེགས་པའི་ [37b.3]མདོག་གི་རིམ་པས་སོ། །བསྒོམ་བྱའི་དཀྱིལ་འཁོར་ལ་རྩིག་པ་ལྔ་པོ་འདི་དག་རིན་པོ་ཆེ་ཁ་དོག་ལྔ་ལས་གྲུབ་ཅིང་ནས་ཀྱི་བར་ཙམ་པའོ་ཞེས་པ་ནི་ཁ་ཅིག་གོ། །རྩིག་པ་འདི་ནི་གཅིག་པ་ཉིད་ཀྱིས་རིམ་གྱིས་སྟེང་ནས་སྟེང་དུ་ཁ་དོག་ལྔའི་རིན་པོ་ཆེ་ལས་བྱས་པའོ་ཞེས་པ་ནི་གཞན་དག་གོ། །དེ་ལ་ [37b.4]འདོད་པ་དང་པོ་ལ་ནི་རིན་པོ་ཆེའི་སྣམ་བུའི་ས་དམར་པོ་དང་། དོ་ཤལ་དང་དོ་ཤལ་ཕྱེད་པའི་ས་ནག་པོའོ། །འདོད་པ་གཉིས་པ་ལ་ནི་དང་པོའི་ཁ་དོག་གི་རིན་པོ་ཆེའི་རང་བཞིན་གྱི་ཆ་ཉིད་རྣམ་པར་བཀྲ་བའི་རིན་པོ་ཆེའི་སྣམ་བུའོ། །ཡང་ན་དེ་ལ་ཁ་དོག་གཞན་གྱི་རིན་པོ་ཆེ་ལས་བྱས་པ་བཀོད་པའི་ [37b.5]རིན་པོ་ཆེའི་སྣམ་བུའོ། །ལྔ་པའི་ཁ་དོག་གི་རིན་པོ་ཆེའི་རང་བཞིན་གྱི་ཆ་ཉིད་དྲ་བ་དང་དྲ་བ་ཕྱེད་པ་སྣ་ཚོགས་པའི་སྣམ་བུའམ། ཡང་ན་དེ་ལ་མདོག་གཞན་གྱི་རིན་པོ་ཆེ་ལས་བྱས་པ་བཀོད་པའི་དྲ་བ་དང་དྲ་བ་ཕྱེད་པ་སྣམ་བུའོ། །ཕྱོགས་གཞན་བརྗོད་པ་ནི་དེའི་སྟེང་དུ་རིན་པོ་ཆེའི་སྣམ་བུ་དྲ་བའི་ [37b.6]སྣམ་བུ་ལྟ་བུའོ། །འདོད་པ་གཉིས་ཀ་ལ་ཡང་སྟེགས་བུ་ནི་ཤེལ་ལམ་གསེར་གྱི་རང་བཞིན་ནམ་པདྨ་རཱ་གའི་རང་བཞིན་ནམ། །རིན་པོ་ཆེ་གཞན་ཡང་རུང་སྟེ་ཇི་ལྟར་མཛེས་པའོ། །རིན་པོ་ཆེའི་ཤར་བུ་དང་མདའ་ཡབ་རྣམས་ནི་དཀར་པོའོ། །རིན་པོ་ཆེའི་ཤར་བུ་དང་མདའ་ཡབ་དང་། དར་དཔྱངས་ཀྱི་བར་ [37b.7]གྱིས་གཞི་ནི་སྔོན་པོ་སྟེ། ནམ་མཁའི་ངོ་བོ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་བར་གྱི་སྣམ་བུ་ལ་མུན་པའི་སྣམ་བུ་ཞེས་བརྗོད་དོ། །གདུང་ནི་ཇི་ལྟར་མཛེས་པར་རིན་པོ་ཆེ་ལས་བྱས་པ་སྟེ། རིན་པོ་ཆེ་སྣ་ཚོགས་པའི་པ་ཏྲ་འཕྲོ་བ་ལ་སོགས་པས་བརྒྱན་པའོ། །རྟ་བབས་ཀྱི་ཀ་བ་རྣམས་ནི་རང་ [38a] [38a.1]རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་གོ། །ཀྱོག་པོའི་ནང་གི་བླ་རེས་ཀྱི་འོག་གིས་ཡང་སྟེ། དེ་ནི་རང་གི་དེ་བཞིན་གཤེགས་པའི་ཁ་དོག་གི་འོད་ཀྱིས་སྦྲས་པའི་ནམ་མཁའི་རང་བཞིན་ནོ། །རྟ་རྨིག་དང་། བ་རན་དང་། ཆུ་སྲིན་གྱི་སྣམ་བུ་ནི་ཁ་དོག་ཇི་ལྟར་མཛེས་པར་ [38a.2]རོ། །འཁོར་ལོ་རྣམས་ནི་གསེར་གྱི་ཁ་དོག་གོ། །ཁ་ཅིག་རིན་པོ་ཆེ་གཞན་ལས་ཀྱང་བྱས་པའོ་ཞེས་སོ། །རི་དྭགས་དང་རི་དྭགས་མོ་ནི་གསེར་གྱི་རང་བཞིན་ཏེ། རིན་པོ་ཆེ་གཞན་གྱིས་སྤྲས་པའོ། །སྣ་ཚོགས་རྡོ་རྗེའི་ལྟེ་བ་ནི་ནག་པོའོ། །ཁ་ཅིག་ཏུ་གཙོ་བོའི་དེ་བཞིན་གཤེགས་པའི་མདོག་གོ། །དབུས་ཀྱི་ [38a.3]ར་རྣམས་ནི་རང་རང་གི་ཕྱོགས་རྣམས་ཀྱི་དེ་བཞིན་གཤེགས་པའི་མདོག་གོ། །དེ་ལས་གཞན་པ་རྣམས་ནི་དེའི་གློ་དག་གི་དེ་བཞིན་གཤེགས་པའི་མདོག་གོ། །ར་ལྔ་བ་ལ་ནི་དེ་ལས་གཞན་པའི་ཕྱོགས་དང་དབུས་ཀྱི་དེ་བཞིན་གཤེགས་པའི་མདོག་སྟེ་ཇི་ལྟར་རིགས་པར་རོ། །ཕྱོགས་གཅིག་གི་ར་ཐམས་ཅད་ [38a.4]ཀྱང་རང་རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་ཀྱང་ཁ་ཅིག་ཏུའོ། །འཁོར་ལོའི་དབང་པོའི་ཞལ་བཞི་པ་ཉིད་ལ་རང་རང་གི་ཕྱོགས་ཀྱི་ཞལ་གྱི་མདོག་གོ་ཞེས་པ་ནི་ཕྱོགས་གཞན་ནོ། །བུམ་པ་བཟང་པོ་རྣམས་ནི་གསེར་ལས་བྱས་པའོ། །དཔག་བསམ་གྱི་ཤིང་རྣམས་ནི་དེ་ལས་གཞན་པའི་ [38a.5]ཤིང་བཟང་པོ་ལྟ་བུའོ། །པདྨའི་ལྟེ་བ་ནི་ལྗང་གུའོ། །གེ་སར་ནི་སེར་པོའོ། །འདབ་མ་རྣམས་ནི་ཁ་དོག་སྣ་ཚོགས་པའོ། །དེའི་ས་གཞི་ནི་དམར་པོས་ཤས་ཆེ་བའི་དཀར་པོའོ། །ཆོས་འབྱུང་གི་ཆའི་རེ་ཁཱ་ནི་དཀར་པོའོ། །ཁོར་ཡུག་གི་ཕྱོགས་ལ་ཡང་ཤེལ་ཉིད་ཡིན་ན་རེ་ཁཱ་དཀར་པོའམ་གསེར་ཉིད་ [38a.6]ཡིན་ན་ནི་སེར་པོའོ། །རྡོ་རྗེ་རྣམས་དང་དེའི་རེ་ཁཱ་ནག་པོའོ། །གཞན་རྣམས་ནི་དཀར་པོའམ་སེར་པོའོ་ཞེས་གསུངས་སོ། །རྡོ་རྗེའི་ས་གཞིའི་མདོག་ནི་ཇི་ལྟར་མཛེས་པ་སྟེ། བསྒོམ་བྱའི་དཀྱིལ་འཁོར་ལ་འོག་ཏུ་རླུང་གི་དཀྱིལ་འཁོར་གྱི་མཐའ་ནས་སྟེང་དུ་འོག་མིན་གྱི་མཐའི་བར་དུ་རྡོ་རྗེའི་ར་བ་ [38a.7]གནས་པའི་ཕྱིར་དང་། རླུང་ལ་སོགས་པ་རྣམས་ནི་ཇི་ལྟར་རིགས་པར་ཁ་དོག་སྣ་ཚོགས་པའི་ཕྱིར་རོ། །འོད་ཟེར་རྣམས་ནི་དེ་བཞིན་གཤེགས་པ་ལྔའི་ཁ་དོག་སྟེ་འཕྲོ་བའི་ཚུལ་ལོ། །འཇམ་པའི་རྡོ་རྗེ་ནི། རྫོགས་སངས་ཡེ་ཤེས་སྐུ་ཡིན་ཕྱིར། །ངག་དབང་རྡོ་རྗེའི་རིགས་སུ་བརྗོད། ཆོས་སྐུའི་ [38b] [38b.1]རང་བཞིན་དག་པ་ལ། །འདི་ཡི་ཐུགས་ཀྱི་དཀྱིལ་འཁོར་རོ། །ཞེས་པའི་རིགས་པས། །དཀར་པོ་སེར་པོ་དེ་བཞིན་དམར། །ལྗང་གུ་དང་ནི་ནག་པོ་ཉིད། །རྩིག་པའི་ཚོན་ཞེས་གསུངས་སོ། །གང་གི་ཚེ། །ཆོས་རྣམས་རང་བཞིན་གྱིས་ནི་དཀར། །དེས་ན་ངག་དབང་འདིར་དཀར་ཉིད། །ཅེས་ [38b.2]གསུངས་པས། །གསུང་རྡོ་རྗེ་དཀར་པོ་གཙོ་བོར་གྱུར་པ་དེའི་ཚེ་ནི་ཚོན་གྱི་རེ་ཁཱ་དཀར་པོ་དང་སེར་པོ་དང་ལྗང་གུ་དང་དཀར་པོའོ། །ཁ་སྦྱོར་དུ་གསུངས་པའི་རྡོ་རྗེ་སེམས་དཔའ་དཀར་པོ་ཉིད་ཡིན་ཡང་མི་བསྐྱོད་པ་དང་། ལྷན་ཅིག་རོ་གཅིག་པ་ཉིད་དུ་བསྟན་པའི་ཕྱིར། ནང་གི་རྩིག་པ་ནག་པོ་ཉིད་དོ། །གཞན་ [38b.3]དུ་ནི་དཀར་པོ་ཁོ་ན་ཡིན་ཏེ། ཇི་སྐད་དུ། གསུང་རྡོ་རྗེ་གཙོ་བོར་གྱུར་པ་ཁ་ཅིག་ཏུ་དཀར་པོ་ཉིད་དུ་འགྱུར་བའོ་ཞེས་གསུངས་སོ། །རྩ་བའི་ཐིག་གི་ནང་གི་དཀྱིལ་འཁོར་དུ་ཡང་ཟུར་ཐིག་གཉིས་གཉིས་ཀྱིས་བཅད་པའི་ཕྱོགས་བཞིའི་ས་གཞི་རྣམས་རང་རང་གི་དེ་བཞིན་གཤེགས་པའི་མདོག་གོ། །བསྒོམ་ [38b.4]བྱའི་དཀྱིལ་འཁོར་གྱི་ཕྱོགས་བཞིའི་ཐིག་རྣམས་དེ་བཞིན་ནོ། །ཀ་བ་རྣམས་ཀྱང་དེ་བཞིན་ཏེ། རང་རང་གི་རེའུ་མིག་གི་དེ་བཞིན་གཤེགས་པའི་མཚན་མའི་ཕྲེང་བས་མཚན་པའོ། །གཙོ་བོའི་ས་ནི་གཙོ་བོའི་མདོག་གོ། །སྣ་ཚོགས་པདྨའི་འདབ་མ་ནི། །བདེན་བྲལ་ལྗང་ལ་དབང་ལྡན་ནག །མེ་ [38b.5]དང་རླུང་གི་མཚམས་ནི་སེར། །ཕྱོགས་རྣམས་ཀྱི་ནི་དམར་པོའོ། །གཙོ་བོའི་སྣམ་བུ་ལ་ནི་གཙོ་བོའི་མཚན་མའི་ཕྲེང་བའོ། །རེ་ཁཱ་གཞན་ནི་མདོག་དང་སྦོམ་ཕྲ་ཇི་ལྟར་མཛེས་པའོ། །བདེ་མཆོག་གི་དཀྱིལ་འཁོར་ལ་ནི་ཐུགས་ཀྱི་འཁོར་ལོ་ནག་པོ། དེའི་རྩིབས་ཀྱི་བར་རྣམས་ནི་དམར་པོ་སྟེ། གསུང་ [38b.6]གི་འཁོར་ལོའི་ལྟེ་བ་ཡིན་པའི་ཕྱིར་རོ། །གསུང་གི་འཁོར་ལོ་དམར་པོའོ། །དེའི་རྩིབས་བར་རྣམས་ནི་དཀར་པོ་སྟེ། སྐུའི་འཁོར་ལོའི་ལྟེ་བ་ཡིན་པའི་ཕྱིར་རོ། །སྐུའི་འཁོར་ལོ་ནི་དཀར་པོའོ། །དེའི་རྩིབས་རྣམས་ཀྱི་བར་ནི་ཤར་ལ་སོགས་པའི་ཕྱོགས་རྣམས་སུ་རྣམ་པར་སྣང་མཛད་ལ་སོགས་པའི་ [38b.7]དེ་བཞིན་གཤེགས་པའི་ཁ་དོག་གོ། །མུ་ཁྱུད་གསུམ་ནི་གོ་རིམས་བཞིན་དུ་རྡོ་རྗེ་ནག་པོ་དང་། པདྨ་དམར་པོ་དང་། འཁོར་ལོ་དཀར་པོའི་ཕྲེང་བས་བསྐོར་བའོ། །ཕྱི་ངོས་ནས་བརྩམས་ཏེ་ནང་གི་བར་དུ་ལྗང་གུ་དང་། དཀར་པོ་དང་། དམར་པོ་དང་། སེར་པོ་དང་། ནག་པོའི་ཁ་དོག་གི་རེ་ཁཱ་ལྔའོ། ། [39a] [39a.1]ཤར་དང་། བྱང་དང་། ནུབ་དང་། ལྷོ་དང་། དབུས་ཀྱིས་རྣམས་དང་། ཐོག་རྣམས་ཀྱི་ཁ་དོག་དཀར་པོ་དང་། ལྗང་གུ་དང་། དམར་པོ་དང་། སེར་པོ་དང་། ནག་པོའོ། །གཞན་ནི་རེ་ཁཱ་ལྔ་དང་། ས་གཞི་དང་། ཐོག་རྣམས་ནག་པོ་དང་། ལྗང་གུ་དང་། དམར་པོ་དང་། སེར་པོ་དང་། [39a.2]དཀར་པོ་དང་བསྲེས་པའི་སྔོན་པོའི་མདོག་གོ་ཞེས་ཟེར་རོ། །དེ་བཞིན་དུ་སྔ་མ་དང་། ཕྱི་མར་ཁ་དོག་གི་རིམ་པ་ཡོངས་སུ་བསམས་ནས་རྡུལ་ཚོན་དགྱེ་བར་བྱའོ། །དེ་ཡང་སྐལ་བ་དང་མི་ལྡན་པ་འདུས་ན་མཚན་མ་དང་ཕྱག་རྒྱ་ཇི་ལྟར་རིགས་པར་བྲིའོ། །སྐལ་བ་དང་མི་ལྡན་པ་མེད་ན་ནི་ལྷའི་སྐུ་བྲི་བར་ [39a.3]བྱ་ཞིང་། བྲིས་སྐུའམ། ལུགས་མའམ། འབུར་དུ་བཏོད་པའམ། ལེགས་པར་འདུས་བྱས་པ་གཞག་པར་བྱའོ། །དེ་ལྟར་ཀླུའི་བློའི་ཞབས་ཀྱིས། ཇི་ལྟར་ནུས་པས་དཀྱིལ་འཁོར་དུ། །ས་བོན་དགོད་བྱ་ཡང་ན་ནི། །མཚན་མའམ་ལྷ་ཡི་གཟུགས་ཉིད་དེ། །ལུགས་མའམ་བཟོ་བྱས་དགོད་པར་ [39a.4]བྱ། །ཞེས་གསུངས་སོ། །ཕྱག་རྒྱ་བྲི་བ་ནི་མངོན་པར་བརྗོད་པའི་རྒྱུད་བླ་མ་ལས་གསུངས་ཏེ། མི་ནུས་ན་ནི་བྲིས་པ་ཡི། །ཕྱག་རྒྱའམ་མཚན་མ་དགོད་པར་བྱའོ། །གང་ཡང་གསུངས་པ། ཚོན་ནམ་ཡང་ན་པིར་རྣམས་ཀྱིས། །བྲིས་པ་རྣམས་ཀྱིས་རྣམ་པར་སྤྲས། །ཞེས་སོ། །དཔལ་ཁ་སྦྱོར་གྱི་ [39a.5]རྒྱུད་དུ་ཡང་། དེ་ལྟར་ལུགས་མ་དང་། འདུས་བྱས་པ་ལ་སོགས་པའི་གཟུགས་དང་། མཚན་མའི་ཕྱག་རྒྱ་དང་ལྡན་པའོ་ཞེས་གསུངས་སོ། །དེའི་ཕྱིར་འཇམ་པའི་རྡོ་རྗེའི་དཀྱིལ་འཁོར་ལ། ལྟེ་བར་བཅོམ་ལྡན་འདས་འཇམ་པའི་རྡོ་རྗེའི་ཟླ་བ་རལ་གྲི་སྔོ་བསངས་སོ། །ཤར་དུ་ཟླ་བ་ལ་རྣམ་པར་ [39a.6]སྣང་མཛད་ཀྱི་འཁོར་ལོ་དཀར་པོ་རྩིབས་བརྒྱད་པའོ། །ལྷོར་ཉི་མ་ལ་རིན་ཆེན་འབྱུང་ལྡན་གྱི་རིན་པོ་ཆེ་ལྗང་གུ་ཆ་དགུ་པའོ། །ནུབ་ཏུ་ཉི་མ་ལ་མགོན་པོ་འོད་དཔག་མེད་ཀྱི་པདྨ་དམར་པོ་འདབ་མ་བརྒྱད་པའོ། །བྱང་དུ་ཉི་མ་ལ་དོན་ཡོད་གྲུབ་པའི་རལ་གྱི་ལྗང་གུའོ། །མེར་ཟླ་བ་ལ་སྤྱན་མའི་མིག་འབྲས་ [39a.7]ནག་པོ་ཅན་གྱི་མིག་དཀར་པོ་གཉིས་སྤྲིན་ལ་གནས་པའོ། །བདེན་བྲལ་དུ་ཟླ་བ་ལ་མཱ་མ་ཀཱིའི་རྡོ་རྗེ་ནག་པོ་རྩེ་ལྔ་པ་སྟེ་རྒྱུད་དུ་དེ་ལྟར་བཤད་པའི་ཕྱིར་རོ། །རླུང་དུ་ཟླ་བ་ལ་གོས་དཀར་མོའི་པདྨ་དམར་པོ་ཁ་བྱེ་བ་ཡུ་བ་དང་རྩ་བ་དང་བཅས་པའོ། །དབང་ལྡན་དུ་ཟླ་བ་ལ་སྒྲོལ་མའི་ཨུཏྤལ་མདོག་སྔོ་སེར་རོ། ། [39b] [39b.1]མེ་ལ་སོགས་པའི་མཚམས་བཞི་དང་། ཤར་སྒོའི་གཡོན་དང་གཡས་སུ་ཆ་ཆུང་གཉིས་གཉིས་སྤངས་པའི་འགྲམ་དག་ཏུ་ཟླ་བ་རྣམས་ལ་གོ་རིམས་བཞིན་དུ་གཟུགས་དང་སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱི་དབྱིངས་ཀྱི་རྡོ་རྗེ་མ་རྣམས་ཀྱི་མེ་ལོང་དཀར་པོ་དང་། དྲི་ཟའི་པི་ཝང་སྔོན་པོ་དང་ [39b.2]དྲི་སེར་པོའི་དུང་དང་། རོའི་སྣོད་དམར་པོ་དང་། རས་སྣ་ཚོགས་དང་། ཆོས་འབྱུང་དཀར་པོའོ། །ཤར་ལ་སོགས་པའི་སྒོར་ཉི་མ་རྣམས་ལ་གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་དང་བགེགས་མཐར་བྱེད་ཀྱི་གོ་རིམས་བཞིན་དུ་རྡོ་རྗེ་ཐོ་བ་ནག་པོ་དང་། རྡོ་རྗེས་མཚན་ [39b.3]པའི་དབྱུག་པ་དཀར་པོ་དང་། པདྨ་དམར་པོ་དང་། རྡོ་རྗེ་ཁ་གྱེས་པ་སྔོན་པོའོ། །འདིར་ཟླ་བ་དང་ཉི་མ་བཅུ་དགུ་ནི་སྣ་ཚོགས་པདྨ་ལ་གནས་པའོ། །མཚན་མ་ཐམས་ཅད་ནི་འོད་ཟེར་དང་བཅས་པ་རང་རང་གི་ཕྱོགས་སུ་མགོ་བསྟན་པའོ། །འཁོར་ལོའི་དབང་ཕྱུག་ནི་མགོ་ནུབ་ཏུ་བསྟན་པའོ། །དེ་ལྟར་ [39b.4]ཕྱི་མ་རྣམས་སུ་ཡང་ངོ་། །རྡོ་རྗེ་སེམས་དཔའ་འཁོར་ལོའི་དབང་ཕྱུག་ཉིད་ལ་ནི་དབུས་སུ་ཆུ་སྐྱེས་དང་ཟླ་བ་ལ་ནི་ཞི་བའི་རྡོ་རྗེ་སྔོན་པོའོ། །ཁ་ཅིག་ནི་སྣ་ཚོགས་རྡོ་རྗེའོ་ཞེས་སོ། །མཁས་པ་རྣམས་ནི་དབུས་ཀྱི་འོད་ཟེར་གྱི་ཐིག་ཟླུམ་པོ་ལ་ཚོན་གྱིས་རེ་ཁཱ་མི་བྱའོ་ཞེས་སོ། །ཟླུམ་པོའི་ཐིག་གི་ཕྱི་ངོས་སུ་ [39b.5]ཚངས་པའི་ཐིག་གི་གློ་སོ་སོར་ཆ་ཆུང་བཞི་དོར་ནས་བུམ་པ་ཆ་ཆུང་བཞི་པ་སྟེ། བདུད་རྩིས་བཀང་པའི་གསར་གྱི་བུམ་པ་ཆ་བརྒྱད་དོ་ཞེས་ཕྱོགས་གཅིག་གོ། །གཞན་ནི་རིན་པོ་ཆེའི་རང་བཞིན་རང་གི་ཕྱོགས་ཀྱི་དེ་བཞིན་གཤེགས་པའི་མདོག་གོ་ཞེས་སོ། །འདི་དང་ཕྱི་མ་རྣམས་ལ་དབུས་སུ་དེ་བཞིན་ [39b.6]གཤེགས་པ་གཞན་པའི་མཚན་མ་དགོད་པ་ནི། དེའི་དབུས་སུ་དབུས་ཀྱི་མཚན་མ་བྲི་བར་བྱའོ། །བསྡུས་པའི་རིམ་པར་གསུངས་པའི་དཀྱིལ་འཁོར་ལ། དབུས་སུ་ཉི་མ་ལ་མི་བསྐྱོད་པའི་རྡོ་རྗེ་ཁ་གྱེས་པ་རྩེ་ལྔ་པ་ཨིནྡྲ་ནཱི་ལ་ལྟ་བུ་དང་། རེག་བྱ་རྡོ་རྗེ་མའི་སྣ་ཚོགས་པའི་གོས་སོ། །རྣམ་པར་ [39b.7]སྣང་མཛད་ལ་སོགས་པའི་རིམ་པ་དང་པོ་དང་གཉིས་པར་གནས་པ་བཅུ་གཉིས་པོ་རྣམས་ཀྱི་མཚན་མ་རྣམས་ནི་སྔ་མ་བཞིན་ནོ། །རིམ་པ་གསུམ་པའི་སྒོའི་འགྲམ་གྱི་སྣམ་བུ་ལ་ཚངས་པའི་ཐིག་ནས་ཆ་ཆུང་བཞི་དོར་བར་གཡོན་དུ་བྱམས་པའི་ཀླུ་ཤིང་གི་མེ་ཏོག་གི་འཁོར་ལོ་དང་བཅས་པའོ། ། [40a] [40a.1]གཡས་སུ་སའི་སྙིང་པོའི་འཁོར་ལོ་རྩིབས་བརྒྱད་པ་དཀར་པོའོ། །ལྷོར་དེ་བཞིན་དུ་ཕྱག་ན་རྡོ་རྗེའི་དང་། ནམ་མཁའི་སྙིང་པོའི་རྡོ་རྗེ་དང་། རིན་པོ་ཆེ་མརྒཏ་ཆ་དགུ་པའོ། །ནུབ་ཏུ་དེ་བཞིན་དུ་འཇིག་རྟེན་དབང་ཕྱུག་དང་། འཇམ་པའི་དབྱངས་ཀྱི་པདྨ་དམར་པོ་དང་རྡོ་རྗེའོ། །བྱང་དུ་ [40a.2]དེ་བཞིན་དུ་སྒྲིབ་པ་ཐམས་ཅད་རྣམ་པར་སེལ་བ་དང་། ཀུན་དུ་བཟང་པོའི་རལ་གྲི་དང་རྡོ་རྗེའོ། །ཤར་ལ་སོགས་པའི་སྒོ་རྣམས་སུ་རིམ་པ་བཞིན་དུ་གཤིན་རྗེ་གཤེད་ལ་སོགས་པ་རྣམས་ཀྱི་རྡོ་རྗེ་ཐོ་བ་དང་། རྡོ་རྗེས་མཚན་པའི་དབྱུག་པ་དཀར་པོ་དང་། པདྨ་དམར་པོ་དང་། སྣ་ཚོགས་རྡོ་རྗེའོ། །མེ་ལ་སོགས་ [40a.3]པའི་མཚམས་སུ་གོ་རིམས་བཞིན་དུ་མི་གཡོ་བ་དང་། འདོད་པའི་རྒྱལ་པོ་དང་། དབྱུག་པ་སྔོན་པོ་དང་། སྟོབས་པོ་ཆེ་རྣམས་ཀྱི་རལ་གྲི་དང་། རྡོ་རྗེ་དང་རྡོ་རྗེས་མཚན་པའི་དབྱུག་པ་སྔོན་པོ་དང་། རྡོ་རྗེས་མཚན་པའི་དབྱུག་པ་ནག་པོའོ། །གཙུག་ཏོར་འཁོར་ལོས་སྒྱུར་བའི་རྡོ་རྗེ་སྔོན་པོ་དང་། གཤིན་རྗེ་ [40a.4]གཤེད་ཀྱི་མཚན་མ་ལ་སོགས་ཕྱི་ངོས་སུའོ། །ཁ་ཅིག་ནི་འཁོར་ལོ་སེར་པོ་ཞེས་བྱའོ། །གནོད་མཛེས་རྒྱལ་པོའི་རྡོ་རྗེ་ནི་པདྨ་མཐར་བྱེད་ཀྱི་མཚན་མ་ལས་ཕྱི་ངོས་སུའོ། །བྱམས་པ་ལ་སོགས་པ་བརྒྱད་རྣམས་ཀྱི་མཚན་མ་ནི་ཟླ་བ་ལ་གནས་པའོ། །གཤིན་རྗེ་གཤེད་ལ་སོགས་པའི་མཚན་མ་བཅུ་ [40a.5]ནི་ཉི་མ་ལ་གནས་པའོ། །འདིར་ཉི་མ་དང་ཟླ་བ་སུམ་ཅུ་རྩ་གཅིག་ནི་སྣ་ཚོགས་པདྨ་ལ་གནས་པའོ། །བུམ་པ་བྲི་བ་ནི་སྔར་བཞིན་ནོ། །ཁ་སྦྱོར་དུ་གསུངས་པའི་རྡོ་རྗེ་སེམས་དཔའི་དཀྱིལ་འཁོར་ལ་དབུས་སུ་ཟླ་བ་ལ་རྡོ་རྗེ་སེམས་དཔའི་རྡོ་རྗེ་རྩེ་ལྔ་པ་སྔོན་པོའོ། །ཤར་དུ་ཟླ་བ་ལ་རྣམ་པར་སྣང་མཛད་ཀྱི་ [40a.6]འཁོར་ལོའོ། །ལྷོར་ཉི་མ་ལ་རིན་ཆེན་དབང་པོའི་རིན་ཆེན་ནོ། །ནུབ་ཏུ་ཉི་མ་ལ་སྣང་བ་མཐའ་ཡས་ཀྱི་མདའོ། །བྱང་དུ་ཉི་མ་ལ་དོན་ཡོད་གྲུབ་པའི་སྣ་ཚོགས་རྡོ་རྗེའོ། །སྤྱན་མའི་སྤྲིན་ལ་གནས་པའི་མིག་ཉིད་དོ། །མཱ་མ་ཀཱིའི་མདའོ། །གོས་དཀར་མོའི་མདའོ། །སྒྲོལ་མའི་ཨུཏྤལ་དམར་པོའོ། ། [40a.7]རིམ་པ་གཉིས་པར་ཤར་དུ་དྲག་མོའི་མདའོ། །ལྷོར་རྡོ་རྗེ་གཟུགས་མའི་རྡོ་རྗེའོ། །ནུབ་ཏུ་འདོད་ཆགས་རྡོ་རྗེ་མའི་རལ་གྲིའོ། །བྱང་དུ་རྡོ་རྗེ་ཞིབ་མོའི་ཏིལ་པ་ཐུང་ངུའོ། །དཔལ་ལྡན་དུ་རྡོ་རྗེ་གནོད་སྦྱིན་མའི་དབྱུག་པ་དཀར་སེར་རོ། །མེར་མཁའ་འགྲོ་མའི་པདྨ་དམར་སེར་རོ། །བདེན་བྲལ་དུ་སྒྲ་རྡོ་རྗེ་མའི་ [40b] [40b.1]ཤ་ཀྟིའོ། །རླུང་དུས་རྡོ་རྗེ་མའི་བུམ་པ་དཀར་ལྗང་ངོ་། །རིམ་པ་གསུམ་པར་ཤར་གྱི་ཕྱོགས་སུ་བཞད་མའི་རྡོ་རྗེ་ཁ་དོག་དམར་པོའོ། །ལྷོར་སྒེག་མའི་འཁར་རྔའོ། །ནུབ་ཏུ་གླུ་མའི་འཁོར་རྔའོ། །བྱང་དུ་གར་མའི་རྡོ་རྗེ་རྩེ་གསུམ་པ་ལྗང་གུའོ། །དབང་ལྡན་དུ་གླིང་བུ་མའི་གླིང་བུའོ། །མེར་པི་ཝང་ [40b.2]མའི་པི་ཝང་ངོ་། །བདེན་བྲལ་དུ་མུ་ཀུནྡ་མའི་མུ་ཀུནྡའོ། །རླུང་དུ་རྫ་རྔ་མའི་རྫ་རྔའོ། །ཕྱིའི་སྣམ་བུའི་མེར་མེ་ཏོག་མའི་མེ་ཏོག་གི་ཕྲེང་བའོ། །བདེན་བྲལ་དུ་བདུག་སྤོས་མའི་སྤོས་ཕོར་རོ། །རླུང་དུ་མར་མེ་མའི་མར་མེའི་མཆོད་སྡོང་ངོ་། །དབང་ལྡན་དུ་དྲི་མའི་དྲིའི་དུང་ཆོས་སོ། །ཤར་དུ་མེ་ལོང་མའི་མེ་ལོང་ [40b.3]ངོ་། །ལྷོར་རོ་མའི་རོའི་སྣོད་དོ། །ནུབ་དུ་རེག་བྱ་མའི་གོས་སྣ་ཚོགས་སོ། །བྱང་དུ་ཆོས་མའི་ཆོས་འབྱུང་དཀར་པོའོ། །ཤར་ལ་སོགས་པའི་སྒོར་ནི་གོ་རིམས་བཞིན་དུ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་དྲིལ་བུམ་རྣམས་ནི་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་ [40b.4]པ་དང་། རྡོ་རྗེ་ཕྲེང་བའི་བདག་ཉིད་ཀྱི་རྡོ་རྗེ་ལྕགས་སྒྲོག་དང་། རྡོ་རྗེ་དྲིལ་བུམ་རྣམས་ཏེ་ཉི་མ་ལ་གནས་པའོ། །འདིར་བརྗོད་པའི་ཉི་མའི་གདན་ལ་གནས་པའི་མཚན་མ་བདུན་ལས་མཚན་མ་གཞན་ནི་ཟླ་བ་ལ་གནས་པའོ། །ཉ་མ་དང་ཟླ་བ་སུམ་ཅུ་རྩ་བདུན་པོ་འདི་རྣམས་ནི་སྣ་ཚོགས་པདྨའི་སྟེང་དུ་ཐོད་ [40b.5]པ་རྣམས་ལ་གནས་པའོ། །བུམ་པ་བྲི་བ་ནི་སྔ་མ་བཞིན་ཏེ། ཐིག་ཟླུམ་པོ་དྲུག་པ་ལས་ཕྱི་རོལ་ཞེས་པ་ནི་ཁྱད་པར་རོ། །ཡེ་ཤེས་ཀྱི་མཁའ་འགྲོ་མའི་དཀྱིལ་འཁོར་ལ་དབུས་དང་། ཤར་དང་བྱང་དང་། ནུབ་དང་། ལྷོ་རྣམས་སུ་གོ་རིམས་བཞིན་དུ་ཡེ་ཤེས་མཁའ་འགྲོ་མ་དང་། རྡོ་རྗེ་མཁའ་འགྲོ་ [40b.6]མ་དང་། མཁའ་འགྲོ་མ་མི་ཟད་མ་དང་། རོ་ལངས་མ་དང་། གཏུམ་མོ་རྣམས་ཀྱི་རྡོ་རྗེས་མཚན་པའི་ཁ་ཊྭཱཾ་ག་རྣམས་སོ། །དབང་ལྡན་དང་། མེ་དང་བདེན་བྲལ་དང་རླུང་རྣམས་སུ་སེང་གེ་མོ་དང་སྟག་མོ་དང་། ཅེ་སྤྱང་མོ་དང་འུག་པ་མོ་རྣམས་ཀྱི་རྡོ་རྗེ་ལྕགས་ཀྱུ་རྣམས་སོ། །ཤར་དང་བྱང་དང་ནུབ་དང་། [40b.7]ལྷོའི་སྒོ་རྣམས་སུ་རྒྱལ་པོའི་དབང་མོ་དང་། གསལ་བྱེད་མ་དང་། འཇིགས་བྱེད་མ་དང་། ཀཾ་པོ་ཛཱི་རྣམས་ཀྱི་གོ་རིམས་བཞིན་དུ་ལག་པ་གཉིས་སྙིམ་པ་ཁ་བྱེ་བ་དང་། ཐལ་མོ་སྦྱར་བ་དང་། སྙིམ་པ་ཁྲག་གིས་བཀང་བ་དང་། རྡོ་རྗེ་ཐལ་མོ་ཁ་སྦྱར་བའི་མཐེ་བོའི་རྩེ་མོ་གཉིས་སྦྱར་བའི་མཛུབ་མོ་ [41a] [41a.1]གཉིས་སྦྱར་བའོ། །འདིར་མཚན་མ་དང་ཕྱག་རྒྱ་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའོ། །བསྒོམ་པར་བྱ་བའི་དཀྱིལ་འཁོར་ལ་ཡེ་ཤེས་མཁའ་འགྲོ་མ་ལ་སོགས་པའི་སྣ་ཚོགས་པདྨ་ནི་རིམ་པ་བཞིན་དུ། སེང་གེ་དང་མཆེ་བ་ཅན་དཀར་པོ་དང་། རིན་པོ་ཆེ་སྣ་བདུན་གྱི་ [41a.2]ཕུང་པོ་དང་། མ་ཧེ་དང་། སྤྲུལ་གྱི་དབང་པོ་བརྒྱད་ཀྱི་མཇུག་མ་དང་། རོ་བཞི་ལ་གནས་པ་སྟེ། དེ་ལྟར་རྡུལ་ཚོན་གྱི་དཀྱིལ་འཁོར་ལ་ནི་སྐལ་བ་དང་མི་ལྡན་པ་འདུས་པ་ན་བྲི་བར་མི་བྱའོ། །གཞན་དུ་ནི་ངལ་བས་འཇིགས་པ་དང་། ཡོན་བདག་བསྡུས་པ་ལ་དགའ་བས་སོ། །སྐལ་བ་དང་ལྡན་པ་ [41a.3]རབ་ཏུ་དང་བར་བྱ་བའི་དོན་དུ་ནི་ཡོན་བདག་གི་དབང་ལས་བྲི་བར་བྱའོ། །དེ་ལྟར་ཕྱི་མ་རྣམས་ལ་ཡང་ཇི་ལྟར་འབྱུང་བ་བྲི་བ་དང་མི་བྲི་བར་རིག་པར་བྱའོ། །ཕྱི་ངོས་ཀྱི་ཐིག་ཟླུམ་པོའི་ཕྱི་ངོས་སུ་བུམ་པ་བྲིའོ། །བཅུ་བདུན་གྱི་བདག་ཉིད་ཀྱི་ཀྱེའི་རྡོ་རྗེ་གསུམ་གྱི་དཀྱིལ་འཁོར་ལ་སྣ་ཚོགས་པདྨའི་ལྟེ་བ་ [41a.4]ལ་ཁྲོ་བོའི་རྡོ་རྗེ་སྔོན་པོའོ། །ཤར་དང་ལྷོ་ལ་སོགས་པ་དང་། དབང་ལྡན་དང་མེ་ལ་སོགས་པའི་འདབ་མ་རྣམས་ལ་ནི་རིམ་པ་བཞིན་དུ་རྡོ་རྗེ་དྲག་མོ་དང་། རྡོ་རྗེ་གཟུགས་མ་དང་། འདོད་ཆགས་རྡོ་རྗེ་མ་དང་། རྡོ་རྗེ་ཞི་བ་མོ་དང་། རྡོ་རྗེ་གནོད་སྦྱིན་མ་དང་། རྡོ་རྗེ་མཁའ་འགྲོ་མ་དང་། སྒྲ་རྡོ་རྗེ་མ་དང་། ས་རྡོ་རྗེ་མ་ [41a.5]རྣམས་ཀྱི་མདའ་དང་། རྡོ་རྗེ་དང་རལ་གྲི་དང་། ཏལ་པ་ཐུང་དུ་དང་། དབྱུག་པ་སེར་པོ་དང་། པདྨ་དམར་སེར་དང་། ཤཀྟི་དང་། བུམ་པ་དཀར་ལྗང་ངོ་། །རིམ་པ་གཉིས་པར་དབང་ལྡན་དང་མེ་ལ་སོགས་པ་རྣམས་སུ་གླིང་བུམ་དང་། པི་ཝང་མ་དང་། མུ་ཀུནྡ་མ་དང་། རྫ་རྔ་མ་རྣམས་ཀྱི་གླིང་བུ་ [41a.6]དང་། པི་ཝང་དང་། རྔ་མུ་ཀུནྡ་དང་རྫ་རྔ་རྣམས་སོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་དྲིལ་བུ་མ་རྣམས་ཀྱི་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་དང་། རྡོ་རྗེ་དྲིལ་བུ་རྣམས་སོ། །མཚན་མ་ [41a.7]བཅུ་བདུན་པོ་འདི་རྣམས་ནི་ཐོད་པ་དང་ཉི་མ་ལ་གནས་པའོ། །གླིང་བུ་མ་ལ་སོགས་པ་བརྒྱད་ཀྱི་ནི་ཐོད་པའི་འོག་ཏུ་སྣ་ཚོགས་པདྨའོ། །ཕྱག་གཉིས་པ་དང་བཞི་བ་ལ་ནི་ཐོད་པ་མེད་དོ། །ཕྱག་བཅུ་དྲུག་པའི་དཀྱིལ་འཁོར་ལ་སྣ་ཚོགས་པདྨའི་ལྟེ་བ་ལ་ཁྲོ་བོའི་རྡོ་རྗེ་སྔོན་པོའོ། །ཤར་ལ་སོགས་པ་དང་། [41b] [41b.1]དབང་ལྡན་ལ་སོགས་པའི་འདབ་མ་རྣམས་ལ་གཽ་རཱི་དང་། ཙཽ་རཱི་དང་། རོ་ལངས་མ་དང་། ཟ་ཕོད་མ་དང་། སྦོས་མ་དང་། རི་ཁྲོད་མ་དང་། གཏུམ་མོ་དང་། རབ་ཏུ་རྨོངས་བྱེད་མ་རྣམས་ཀྱི་རིམ་པ་བཞིན་དུ་མདའ་དང་། རྡོ་རྗེ་དང་། ཐོད་པ་ཁྲག་དང་བཅས་པ་ལ་གནས་པའི་རུས་སྦལ་དང་། ཚིལ་ [41b.2]གྱིས་བཀང་བ་ལ་གནས་པའི་སྦྲུལ་དང་། ཤས་བཀང་བ་ལ་གནས་པའི་སེང་གེ་དང་། ཁུ་བ་དང་བཅས་པའི་ཐོད་པ་ལ་གནས་པའི་དགེ་སློང་དང་། ཁྲག་དང་བཅས་པའི་ཐོད་པ་ལ་གནས་པའི་སྟག་དང་ཆང་གི་སྣོད་རྣམས་སོ། །རིམ་པ་གཉིས་པའི་མཚམས་རྣམས་སུ་གླིང་བུ་མ་ལ་སོགས་པའི་མཚན་མ་ནི་སྔ་ [41b.3]མ་བཞིན་ནོ། །ཤར་ལ་སོགས་པའི་སྒོར་སྟག་གདོང་མ་དང་། ཕག་གདོང་མ་དང་། ཁྱི་གདོང་མ་དང་། སེང་གེའི་གདོང་མ་རྣམས་ཀྱི་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་དང་། རྡོ་རྗེ་དྲིལ་བུའོ། །མཚན་མ་བཅུ་བདུན་པོ་འདི་རྣམས་ཉི་མ་ལ་གནས་པའོ། །གླིང་བུ་མ་ལ་སོགས་ [41b.4]པ་བརྒྱད་ཀྱི་ཉི་མའི་འོག་ཏུ་སྣ་ཚོགས་པདྨ་རྣམས་སོ། །དབུས་ཀྱི་འོད་ཟེར་གྱི་ཕྱི་ངོས་སུ་སྔར་བཞིན་དུ་བུམ་པ་རྣམས་སོ། །བདག་མེད་མའི་དཀྱིལ་འཁོར་ལ་སྣ་ཚོགས་པདྨའི་ལྟེ་བ་དང་། ཤར་ལ་སོགས་པའི་འདབ་མ་རྣམས་ལ་གོ་རིམས་བཞིན་དུ་བདག་མེད་མ་དང་། རྡོ་རྗེ་མ་དང་། དཀར་མོ་དང་། [41b.5]ཆུ་མ་དང་། རྡོ་རྗེ་མཁའ་འགྲོ་མ་རྣམས་དང་། རིམ་པ་གཉིས་པར་ཕྱག་བཅུ་དྲུག་པའི་དཀྱིལ་འཁོར་དུ་བརྗོད་པའི་དཀར་མོ་ལ་སོགས་པ་རྣམས་ཀྱི་རྡོ་རྗེའོ། །གླིང་བུ་མ་ལ་སོགས་པའི་མཚན་མ་ནི་སྔ་མ་བཞིན་དུའོ། །རྟ་གདོང་མ་ལ་སོགས་པའི་གྲི་གུག་རྣམས་སོ། །མཁའ་སྤྱོད་མའི་རྡོ་རྗེ་ནི་རྟ་གདོང་ [41b.6]མའི་ཕྱི་ངོས་སུའོ། །ས་སྤྱོད་མའི་རྡོ་རྗེ་ནི་ཁྱི་གདོང་མའི་ཕྱི་ངོས་སུའོ། །འདིར་གྲི་གུག་བཞི་ནི་ཉི་མ་ལ་གནས་པའོ། །མཚན་མ་གཞན་ནི་ཟླ་བའི་དཀྱིལ་འཁོར་ལ་གནས་པའོ། །ཕྱིའི་དཀར་མོ་ལ་སོགས་པ་བཅོ་བརྒྱད་པོ་རྣམས་ཀྱི་ཟླ་བ་དང་། ཉི་མ་ནི་སྣ་ཚོགས་པདྨ་ལ་གནས་པའོ། །གླིང་བུམ་ [41b.7]ལ་སོགས་པ་བརྒྱད་མེད་པ་ནི་ལྷག་མ་ལྷ་མོ་བཅོ་ལྔ་པོ་རྣམས་ཀྱི་ཟླ་བ་ལ་གྲི་གུག་རྣམས་སོ། །མཁའ་སྤྱོད་མའི་མཚན་མ་ནི་དཀར་མོའི་ཕྱི་ངོས་སོ། །རོ་ལངས་མའི་ཕྱི་ངོས་སུ་ས་སྤྱོད་མའོ། །དེ་བཞིན་དུ་ཀུ་རུ་ཀུལླེའི་དཀྱིལ་འཁོར་ལ་ཡང་ཡིན་ཏེ། ཁྱད་པར་ནི་ཟླ་བ་ལ་ཡུ་བ་དང་བཅས་པའི་ཨུཏྤ་ [42a] [42a.1]ལ་དམར་པོ་ཁ་འབུས་པའི་མདའ་ཡོད་པའོ། །འདིར་ལྷ་མོ་བཅོ་ལྔ་པོ་རྣམས་ཀྱང་ཀུ་རུ་ཀུལླེའི་བཞིན་དུ་མདོག་དམར་པོའོ། །རྡོ་རྗེ་བདུད་རྩིའི་དཀྱིལ་འཁོར་དང་པོ་ལ་སྣ་ཚོགས་པདྨའི་ལྟེ་བ་དང་། ཤར་ལ་སོགས་པ་དང་དབང་ལྡན་ལ་སོགས་པའི་འདབ་མ་རྣམས་ལ་གོ་རིམས་བཞིན་དུ་ [42a.2]རྡོ་རྗེ་བདུད་རྩི་དང་། ཞི་བ་མོ་དང་། ཟླ་ལྡན་མ་དང་། རི་བོང་ཅན་མ་དང་། ཟླ་དཀྱིལ་མ་དང་། ཟླ་ཚེས་མ་དང་། ཡིད་འོང་མ་དང་། ཡིད་ཚིམ་བྱེད་པ་རྣམས་ཀྱི་རྡོ་རྗེའོ། །ཁྱད་པར་ནི་ཟླ་ཚེས་མའི་ཟླ་བ་ཆ་གཅིག་པའོ། །རིམ་པ་གཉིས་པར་དབང་ལྡན་ལ་སོགས་པ་རྣམས་སུ་མེ་ཏོག་མ་དང་། བདུག་སྤོས་མ་དང་། མར་ [42a.3]མེ་མ་དང་། དྲི་ཆབ་མ་རྣམས་ཀྱི་མེ་ཏོག་གི་ཟ་མ་ཏོག་དང་། སྤོས་ཕོར་དང་། མར་མེའི་མཆོད་སྡོང་དང་། དྲིའི་དུང་ཆོས་རྣམས་སོ། །ཤར་ལ་སོགས་པའི་སྣམ་བུ་རྣམས་སུ་གླིང་བུ་མ་ལ་སོགས་པ་བཞིའི་གླིང་བུ་ལ་སོགས་པ་བཞིའོ། །ཤར་ལ་སོགས་པའི་སྒོ་རྣམས་སུ་ཁྲོ་གཉེར་རིམ་པར་ལྡན་དང་། [42a.4]འཇིགས་སྡིགས་དང་། རྟ་གཟུགས་དང་། ཚོགས་ཀྱི་གཙོ་བོ་རྣམས་ཀྱི་རྡོ་རྗེ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་རྣམས་སོ། །མཚན་མ་ཉི་ཤུ་རྩ་གཅིག་པོ་འདི་རྣམས་ནི་ཟླ་བ་ལ་གནས་པའོ། །མེ་ཏོག་མ་ལ་སོགས་པ་བཅུ་གཉིས་ཀྱི་ཟླ་བའི་འོག་ཏུ་སྣ་ཚོགས་པདྨའོ། །ཡང་ན་དཀྱིལ་ [42a.5]འཁོར་པ་ཐམས་ཅད་ལ་ཆོས་འབྱུང་བྲི་བར་བྱའོ། །འདི་ཉིད་ཁོ་ན་བྲི་བར་བྱའོ་ཞེས་པ་ནི་གཞན་དག་གོ། །གཞན་རྡོ་རྗེ་བདུད་རྩི་གསུམ་གྱི་དཀྱིལ་འཁོར་གྱི་མཚན་མ་རྣམས་ནི་རྡོ་རྗེ་བདུད་རྩིའི་རྒྱུད་དུ་རིག་པར་བྱའོ། །དགུའི་བདག་ཉིད་ཅན་ཀྱེའི་རྡོ་རྗེ་གསུམ་གྱི་དཀྱིལ་འཁོར་ལ་སྣ་ཚོགས་པདྨའི་ལྟེ་ [42a.6]བར་ཉི་མ་ལ་རྡོ་རྗེ་སྔོན་པོ་ཁ་གྱེས་པའོ། །ཤར་ལ་སོགས་པ་དང་དབང་ལྡན་ལ་སོགས་པའི་འདབ་མར་ཟླ་བ་རྣམས་ལ་གོ་རིམས་བཞིན་དུ་དཀར་མོ་དང་། ཆོམ་རྐུན་མ་དང་། རོ་ལངས་མ་དང་། ཟ་ཕོད་མ་དང་། སྤོས་མ་དང་། རི་ཁྲོད་མ་དང་། གཏུམ་མོ་དང་། གཡུང་མོ་རྣམས་ཀྱི་གྲི་གུག་དང་། ཅང་ཏེའུ་ [42a.7]དང་། རུས་སྦལ་དང་། སྦྲུལ་དང་། སེང་གེ་དང་། དགེ་སློང་དང་། འཁོར་ལོ་དང་། རྡོ་རྗེ་རྣམས་སོ། །ཕྱག་བཅུ་དྲུག་པའི་ཉི་མ་ལ་སྣ་ཚོགས་རྡོ་རྗེས་མཚན་པའོ། །ཐོད་པ་དཀར་པོ་ཞེས་པ་ནི་ཁྱད་པར་རོ། །ཕྱི་ངོས་ཀྱི་ཟླུམ་པོ་ལས་ཕྱི་ངོས་སུ་བུམ་པ་རྣམས་སོ། །སྒྱུ་མ་ཆེན་མོའི་དཀྱིལ་འཁོར་ལ་པདྨ་ [42b] [42b.1]དམར་པོའི་ལྟེ་བར་ཉི་མ་ལ་བཅོམ་ལྡན་འདས་མ་སྒྱུ་མ་ཆེན་པོའི་པདྨའི་སྣོད་དོ། །ཤར་ལ་སོགས་པའི་འདབ་མའི་ཟླ་བ་རྣམས་ལ་གཡས་སྐོར་དུ་རྡོ་རྗེ་མཁའ་འགྲོ་མ་དང་། རིན་ཆེན་མཁའ་འགྲོ་མ་དང་། པདྨ་མཁའ་འགྲོ་མ་དང་། སྣ་ཚོགས་མཁའ་འགྲོ་མ་རྣམས་ཀྱི་རྡོ་རྗེ་དང་། རིན་པོ་ཆེའི་སྙེ་མ་དང་། སྣ་ [42b.2]ཚོགས་ཆུ་སྐྱེས་དང་། རལ་གྲིའོ། །སངས་རྒྱས་མཁའ་འགྲོ་མ་ནི་རྡོ་རྗེ་སེམས་དཔའ་ལ་འཁྱུད་ནས་གནས་པས་དེའི་མཚན་མ་ཐ་དད་དུ་མི་དགོད་དོ། །དགུའི་བདག་ཉིད་སངས་རྒྱས་ཐོད་པའི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་ཉི་མ་ལ་ཅང་ཏེའུའོ། །ཤར་དང་བྱང་དང་ནུབ་དང་ལྷོ་དང་དབང་ [42b.3]ལྡན་དང་མེ་དང་བདེན་བྲལ་དང་། རླུང་གི་འདབ་མར་ཉི་མ་རྣམས་ལ་སྣ་ཚོགས་སྡེ་མ་དང་། འདོད་མ་དང་། ས་འོག་ན་གནས་མ་དང་། ལེགས་བཟངས་མ་དང་། ཆང་འཚོང་མ་དང་། འབྱུང་མོ་དང་། ཕྱག་བཞི་མ་དང་། ནམ་མཁའ་ལ་གནས་མ་རྣམས་ཀྱི་གྲི་གུག་རྣམས་སོ། །རྡོ་རྗེ་ཧཱུཾ་མཛད་ཀྱི་དཀྱིལ་ [42b.4]འཁོར་ལ་དབུས་སུ་རྡོ་རྗེ་ཧཱུཾ་མཛད་ཀྱི་རྡོ་རྗེའོ། །ཤར་ལ་སོགས་པར་གཡོན་སྐོར་དུ་རྡོ་རྗེ་དབྱུག་པ་དང་། ཉི་མ་མེ་དང་། རྡོ་རྗེ་གཙུག་ཏོར་དང་། རྡོ་རྗེ་འཁྱིལ་པ་རྣམས་དང་། མེ་ལ་སོགས་པར་གཡས་སྐོར་དུ་རྡོ་རྗེ་གནོད་སྦྱིན་དང་། རྡོ་རྗེ་དུས་དང་། ནག་པོ་ཆེན་པོ་དང་། རྡོ་རྗེ་བསྡིགས་པ་དང་། གཙུག་ [42b.5]ཏོར་དང་། རྡོ་རྗེ་ས་འོག་རྣམས་ཀྱི་རྡོ་རྗེ་ཐོ་བ་དང་། རྡོ་རྗེ་དབྱུག་པ་དང་། ཆུ་སྐྱེས་དམར་པོ་དང་། སྣ་ཚོགས་རྡོ་རྗེ་དང་། ལྕགས་ཀྱུ་དང་། དགྲ་སྟ་དང་། རྩེ་གསུམ་དང་། རལ་གྲི་དང་། འཁོར་ལོ་དང་། རྡོ་རྗེའི་གཏུན་ཤིང་རྣམས་ཏེ། མཚན་མ་ཐམས་ཅད་ནི་སྣ་ཚོགས་ཆུ་སྐྱེས་དང་ཉི་མ་ལ་གནས་པའོ། ། [42b.6]ཡང་ན་ཤར་ལ་སོགས་པའི་ཕྱོགས་སུ་གཡས་སྐོར་དུ་གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་དང་། བགེགས་མཐར་བྱེད་རྣམས་ཀྱི་རྡོ་རྗེའི་ཐོ་བ་དང་། རྡོ་རྗེས་མཚན་པའི་དབྱུག་པ་དཀར་པོ་དང་། པདྨ་དམར་པོ་དང་། སྣ་ཚོགས་རྡོ་རྗེའོ། །མེ་ལ་སོགས་པའི་མཚམས་ [42b.7]རྣམས་སུ་མི་གཡོ་བ་དང་། འདོད་པའི་རྒྱལ་པོ་དང་། དབྱུག་པ་སྔོན་པོ་དང་། སྟོབས་པོ་ཆེ་རྣམས་ཀྱི་རལ་གྲི་དང་། རྡོ་རྗེ་དང་། རྡོ་རྗེས་མཚན་པའི་དབྱུག་པ་སྔོན་པོ་དང་། རྡོ་རྗེས་མཚན་པའི་དབྱུག་པ་ནག་པོའོ། །གཤིན་རྗེ་གཤེད་ཀྱི་མཚན་མ་ལས་ཕྱི་ངོས་སུ་གཙུག་ཏོར་འཁོར་ལོ་ཙན་གྱི་རྡོ་རྗེའོ། ། [43a] [43a.1]པདྨ་མཐར་བྱེད་ཀྱི་མཚན་མ་ལས་ཕྱི་ངོས་སུ་གནོད་མཛེས་ཀྱི་རྡོ་རྗེའོ། །མཚན་མ་བཅུ་གཅིག་པོ་འདི་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའོ། །ཡང་ན་བགེགས་དགྲའི་རྡོ་རྗེ་ཁ་གྱེས་པའོ། །མེ་ལ་སོགས་པ་རྣམས་སུ་འདོད་པའི་རྒྱལ་པོ་དང་། དབྱུག་པ་སྔོན་པོ་དང་། སྟོབས་ [43a.2]པོ་ཆེ་དང་། མི་གཡོ་བ་རྣམས་ཀྱི་ལྕགས་ཀྱུ་དང་། རྡོ་རྗེས་མཚན་པའི་དབྱུག་པ་སྔོན་པོ་དང་། རྩེ་གསུམ་པ་དང་། རལ་གྲིའོ། །གཙུག་ཏོར་འཁོར་ལོ་ཅན་གྱི་འཁོར་ལོ་སེར་པོ་ཆེན་པོའོ། །གཞན་རྣམས་ཀྱི་བཤད་མ་ཐག་པ་སྔ་མ་བཞིན་ནོ། །ཡང་ན་གཤིན་རྗེ་གཤེད་ལ་སོགས་པ་བཞི་པོ་རྣམས་ཀྱི་ [43a.3]རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་དང་། རྡོ་རྗེ་དྲིལ་བུ་རྣམས་ཏེ། །གཞན་རྣམས་ཀྱི་བཤད་མ་ཐག་པ་སྔ་མ་བཞིན་ནོ། །བདེ་མཆོག་གི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་གནས་པའི་ཉི་མ་ལ་དཔལ་བདེ་མཆོག་གི་རྡོ་རྗེ་རྩེ་ལྔ་པ་སྔོན་པོ་ཁ་གྱེས་པའོ། །ཕྱོགས་ [43a.4]བཞིའི་འདབ་མ་ལ་མཁའ་འགྲོ་མ་དང་། ལཱ་མ་དང་། དུམ་སྐྱེས་མ་དང་། གཟུགས་ཅན་མ་རྣམས་ཀྱི་གྲི་གུག་རྣམས་སོ། །མཚམས་ཀྱི་འདབ་མ་རྣམས་ལ་པདྨའི་སྣོད་རྣམས་སོ། །ཐུགས་ཀྱི་འཁོར་ལོ་ལ་སོགས་པའི་རྩིབས་ཉི་ཤུ་རྩ་བཞི་ལ་རབ་ཏུ་གཏུམ་མོ་དང་། གཏུམ་མིག་མ་དང་། འོད་ལྡན་མ་ [43a.5]དང་། སྣ་ཆེན་མ་དང་། དཔའ་བོའི་བློ་ཅན་མ་དང་། མིའུ་ཐུང་མ་དང་། ལང་ཀའི་དབང་ཕྱུག་མ་དང་། ཤིང་གྲིབ་མ་དང་། ས་སྲུང་མ་དང་། འཇིགས་བྱེད་ཆེན་མོ་དང་། རླུང་གི་ཤུགས་ཅན་མ་དང་། ཆང་འཐུང་མ་དང་། ལྷ་མོ་སྔོ་བསངས་མ་དང་། རབ་ཏུ་བཟང་མོ་དང་། རྟ་རྣ་མོ་དང་། བྱ་གདོང་མ་དང་། འཁོར་ [43a.6]ལོའི་ཤུགས་ཅན་མ་དང་། དུམ་སྐྱེས་མ་དང་། ཆང་འཚོང་མ་དང་། འཁོར་ལོའི་གོ་ཆ་མ་དང་། རབ་ཏུ་དཔའ་མོ་དང་། སྟོབས་ཅན་མོ་དང་། འཁོར་ལོས་སྒྱུར་མ་དང་། བརྩོན་འགྲུས་ཆེན་མོ་རྣམས་ཀྱི་གྲི་གུག་གོ། །གཙོ་བོ་མ་ཡིན་པའི་ཕྱིར་དཔའ་བོ་རྣམས་ཀྱི་མཚན་མ་ནི་མི་བྲིའོ། །སྒོ་རྣམས་སུ་ཁྭ་ [43a.7]གདོང་མ་དང་། འུག་གདོང་མ་དང་། ཁྱི་གདོང་མ་དང་། ཕག་གདོང་མ་རྣམས་དང་། མཚམས་སུ་གཤིན་རྗེ་བརྟན་མ་དང་། གཤིན་རྗེ་ཕོ་ཉ་མོ་དང་། གཤིན་རྗེ་མཆེབ་མོ་དང་། གཤིན་རྗེ་འཇོམས་མ་རྣམས་ཀྱི་སྣ་ཚོགས་ཆུ་སྐྱེས་དང་། ཉི་མ་རྣམས་ལ་གྲི་གུག་གོ། །འདིར་ཤར་ལ་སོགས་པའི་ [43b] [43b.1]ཕྱོགས་སུ་གཡོན་སྐོར་དུ་དང་། མེ་ལ་སོགས་པའི་མཚམས་སུ་གཡས་སྐོར་དུ་མཚན་མ་དགོད་དོ། །ཕྱི་ངོས་སུ་ཟླུམ་པོའི་ཐིག་ལས་ཕྱི་རོལ་གྱི་མཚམས་ཀྱི་ཆར་བུམ་པ་རྣམས་བྲིའོ། །དེ་ལས་གཞན་པའི་འཁོར་ལོ་སྡོམ་པ་དང་། རྡོ་རྗེ་ཕག་མོའི་དཀྱིལ་འཁོར་རྣམས་ཀྱི་མཚན་མ་རྣམས་ནི་རྫོགས་ [43b.2]པའི་རྣལ་འབྱོར་གྱི་ཕྲེང་བར་བརྗོད་དོ། །ཉི་ཤུ་རྩ་ལྔའི་བདག་ཉིད་སངས་རྒྱས་ཐོད་པའི་དཀྱིལ་འཁོར་ལ་དབུས་སུ་སྣ་ཚོགས་ཆུ་སྐྱེས་ལ་ཉི་མར་ཅང་ཏེའུའོ། །ལྷ་མོ་ཉི་ཤུ་རྩ་བཞི་རྣམས་ཀྱི་གྲི་གུག་རྣམས་ཏེ་ཤར་ལ་སོགས་པའི་ཕྱོགས་སུ་གཡོན་སྐོར་དང་། མེ་ལ་སོགས་པའི་མཚམས་སུ་གཡས་སྐོར་ [43b.3]རོ། །དེ་ལ་འཁོར་ལོ་ནག་པོའི་རྩིབས་ཀྱི་སྟེང་དུ་ཕྱོགས་ཀྱི་འདབ་མ་ལ་ལེགས་ཕྲེང་ཅན་མ་དང་། ཐོད་པ་ཅན་མ་དང་། འཇིགས་མ་དང་། མི་ཐུབ་མ་རྣམས་ཀྱིའོ། །མཚམས་ཀྱི་འདབ་མ་རྣམས་ལ་ཐོད་པ་རྣམས་སོ། །དེ་ནས་རྡོ་རྗེ་སྔོན་པོའི་ཕྲེང་བའོ། །རིམ་པ་གཉིས་པ་ལ་རྩིབས་བརྒྱད་དམར་པོ་ [43b.4]ལ་གནས་པའི་ཆུ་སྐྱེས་བརྒྱད་རྣམས་ལ་ཕྱོགས་རྣམས་སུ་དགེ་བའི་སྐེ་རགས་མ་དང་། གཟུགས་ཅན་མ་དང་། རྣམ་རྒྱལ་མ་དང་། འོད་ཅན་མ་རྣམས་ཀྱིའོ། །མཚམས་རྣམས་སུ་དུས་ཅན་མ་དང་། མཚོ་ཆེན་མ་དང་། བྱེད་མ་དང་། གསོད་མ་རྣམས་ཀྱིའོ། །དེ་ནས་རྡོ་རྗེ་ཕྲེང་བ་དམར་པོའོ། །རིམ་ [43b.5]པ་གསུམ་བར་རྩིབས་བརྒྱད་དཀར་པོ་ལ་གནས་པའི་པདྨ་འདབ་བརྒྱད་ལ་ཕྱོགས་སུ་སྒྲོལ་མ་དང་། འཇིགས་མཐོང་མ་དང་། ལེགས་མཐོང་མ་དང་ཐུབ་དཀའ་མ་རྣམས་ཀྱིའོ། །མཚམས་རྣམས་སུ་དགེ་མ་དང་། གྲིབ་གནོན་མ་དང་། དུས་མཚན་མ་དང་། གྲགས་ཆེན་མ་རྣམས་ཀྱིའོ། ། [43b.6]དེ་ནས་རྡོ་རྗེ་ཕྲེང་བ་དཀར་པོའོ། །སྒོའི་པདྨ་རྣམས་ལ་མཛེས་མ་དང་། ནོར་འཛིན་མ་དང་། སྐལ་བཟང་མོ་དང་། མཐོང་བ་ཡིད་འོང་མ་རྣམས་ཀྱིའོ། །པདྨ་ཉི་ཤུའི་སྟེང་དུ་ཉི་མ་རྣམས་ལ་གྲི་གུག་རྣམས་སོ་ཞེས་གདམས་སོ། །རྣལ་འབྱོར་ནམ་མཁའི་དཀྱིལ་འཁོར་གྱི་དབང་ཕྱུག་གི་སྣ་ཚོགས་ [43b.7]པདྨ་དང་། རྡོ་རྗེ་སྔོན་པོ་རྩེ་ལྔ་པའོ། །ཤར་དང་བྱང་དང་ནུབ་དང་ལྷོའི་རེའུ་མིག་རྣམས་ལ་པདྨ་དང་ཉི་མ་ལ་གནས་པའི་ཁ་ཊྭཱཾ་ག་རྣམས་སོ། །དབང་ལྡན་དང་མེ་ལ་སོགས་པའི་རེའུ་མིག་རྣམས་ལ་ཁ་ཊྭཱཾ་ག་དང་། ལྕགས་ཀྱུ་དང་། དགྲ་སྟ་དང་། དབྱུག་པའོ། །ཤར་ལ་སོགས་པའི་རེའུ་མིག་ [44a] [44a.1]རྣམས་ལ་ཁ་ཊྭཱཾ་ག་རྣམས་ཀྱི་ཕྱི་ངོས་སུ་རིམ་པ་བཞིན་དུ་ཁར་བསྡུས་པའི་ལག་པ་གཉིས་དང་། སྙིམ་པ་སྦྱར་བ་དང་ཁྲག་གི་སྙིམ་པ་དང་། གཏུན་ཤིང་ངོ་། །ཁ་ཊྭཱཾ་ག་ལ་སོགས་པའི་མཚན་མ་རྣམས་པདྨ་དང་ཉི་མར་གནས་པའོ། །འོད་ཟེར་གྱི་ཁོར་ཡུག་གི་ཕྱི་རོལ་གྱི་ཤར་ཕྱོགས་སུ་ [44a.2]བདུད་རྩིའི་ཐོད་པ་གསུམ་མོ། །བྱང་དུ་སྒྲོན་མའི་ཐོད་པ་གསུམ་དང་། ནུབ་དུ་གཏོར་མའི་ཐོད་པ་གསུམ་དང་། ལྷོར་བཏུང་བའི་ཐོད་པ་གསུམ་དང་། དབང་ལྡན་དུ་སྙེམས་པའི་ལག་པ་དང་། དྲིའི་སྣོད་དོ། །མེར་ནི་པི་ཝང་དང་། མེ་ཏོག་གི་ཟ་མ་ཏོག་གོ། །བདེན་བྲལ་དུ་སྡིགས་མཛུབ་ཀྱི་ལག་པ་དང་སྤོས་ [44a.3]སྣོད་དོ། །རླུང་དུ་ཐལ་མོ་དང་མར་མེའོ། །དེ་ནས་རྡོ་རྗེ་ཕྲེང་བའི་ཁོར་ཡུག་གི་ཕྱིའི་ཤར་ལ་སོགས་པའི་སྣམ་བུ་རྣམས་ལ་སོ་སོར་བཞི་བཞི་དང་སྒོ་དང་མཚམས་སུ་བརྒྱད་དེ་ཁ་ཊྭཱཾ་ག་ཉེར་བཞིའོ། །བདུད་རྩིའི་ཐོད་པ་ལ་སོགས་པ་ནི་མཚོ་སྐྱེས་མ་ཉི་མ་ལ་གནས་པའོ། །གཤིན་རྗེ་གཤེད་ཀྱི་དཀྱིལ་འཁོར་ལ་སྣ་ [44a.4]ཚོགས་རྡོ་རྗེའི་ལྟེ་བའི་དབུས་སུ་བཅོམ་ལྡན་འདས་གཤིན་རྗེ་གཤེད་ཀྱི་རྡོ་རྗེ་སྔོན་པོ་རྩེ་ལྔ་པ་ཁ་གྱེས་པའོ། །ཤར་དང་ལྷོ་ལ་སོགས་པའི་རའི་རྩ་བ་རྣམས་སུ་རྟག་པ་དང་། རིན་ཆེན་དབང་པོ་དང་། སྣང་བ་མཐའ་ཡས་དང་། དོན་ཡོད་གྲུབ་པ་རྣམས་ཀྱི་འཁོར་ལོ་དཀར་པོ་རྩིབས་བརྒྱད་པ་དང་། རིན་པོ་ཆེ་ [44a.5]ལྗང་གུ་ཆ་དགུ་པ་དང་། པདྨ་དམར་པོ་འདབ་མ་བརྒྱད་པ་དང་། རལ་གྲི་ལྗང་གུ་རྣམས་སོ། །སྣ་ཚོགས་རྡོ་རྗེའི་མེ་དང་། བདེན་བྲལ་ལ་སོགས་པའི་གྲྭར་རྡོ་རྗེ་ཙརྩི་ཀ་དང་། རྡོ་རྗེ་ཕག་མོ་དང་། རྡོ་རྗེ་དབྱངས་ཅན་མ་དང་། དཀར་མོ་རྣམས་ཀྱི་འཁོར་ལོ་དང་རྡོ་རྗེ་དང་པདྨ་དང་རལ་གྲིའོ། །དེ་ནས་རྡོ་རྗེ་ཕྲེང་ [44a.6]བའོ། །དེ་ནས་སྣ་ཚོགས་རྡོ་རྗེའི་ཕྱོགས་སོ་སོར་ར་ལྔའོ། །ཤར་དང་ལྷོ་ལ་སོགས་པའི་སྒོ་རྣམས་སུ་ཐོ་བ་གཤིན་རྗེ་གཤེད་དང་། དབྱུག་པ་གཤིན་རྗེ་གཤེད་དང་། པདྨ་གཤིན་རྗེ་གཤེད་དང་། རལ་གྲི་གཤིན་རྗེ་གཤེད་རྣམས་ཀྱི་རྡོ་རྗེ་རྩེ་མོ་ཉི་ཤུ་པས་མཚན་པའི་ཐོ་བ་དང་། དབྱུག་པ་དཀར་པོ་དང་། [44a.7]པདྨ་དམར་པོ་དང་། རལ་གྲིའོ། །འདིར་རྟག་པ་དང་། ལྷ་མོ་རྣམས་ཀྱི་མཚན་མ་ནི་ཟླ་བ་ལ་གནས་པའོ། །གཞན་གྱི་ནི་ཉི་མ་ལ་གནས་པའོ། །ཉི་མ་དང་ཟླ་བའི་འོག་ཏུ་ནི་སྣ་ཚོགས་པདྨའོ། །དཀྱིལ་འཁོར་གྱི་མཚམས་རྣམས་སུ་པདྨ་ལ་གནས་པའི་ཐོད་པ་བཞིའོ། །རའི་གློ་རྣམས་སུ་བུམ་པ་ [44b] [44b.1]རྣམས་སོ། །རྡོ་རྗེ་སྒྲོལ་མའི་དཀྱིལ་འཁོར་ལ་སྣ་ཚོགས་པདྨའི་ལྟེ་བར་ཟླ་བ་ལ་རྡོ་རྗེ་རྩེ་དགུ་པ་གསེར་གྱི་མདོག་ཅན་ནོ། །ཤར་དང་ལྷོ་ལ་སོགས་པའི་འདབ་མར་ཟླ་བ་རྣམས་ལ་མེ་ཏོག་སྒྲོལ་མ་དང་། བདུག་སྦོས་སྒྲོལ་མ་དང་། མར་མེ་སྒྲོལ་མ་དང་། དྲིའི་སྒྲོལ་མ་རྣམས་ཀྱི་མེ་ཏོག་གི་ཕྲེང་བ་དང་། [44b.2]སྦོས་ཕོར་དང་། མར་མེའི་ཀོང་བུ་དང་། དྲིའི་དུང་ཆོས་རྣམས་སོ། །མེ་ལ་སོགས་པའི་འདབ་མར་རྟག་པ་དང་། མི་བསྐྱོད་པ་དང་། སྣང་བ་མཐའ་ཡས་དང་། དོན་ཡོད་གྲུབ་པའི་རྣམ་པར་དག་པའི་འཁོར་ལོ་དང་། རྡོ་རྗེ་དང་། པདྨ་དང་། རལ་གྲི་རྣམས་སོ། །ཤར་དང་ལྷོ་ལ་སོགས་པའི་སྒོ་རྣམས་ [44b.3]སུ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་དྲིལ་བུ་མ་རྣམས་ཀྱི་ལྕགས་ཀྱུ་ལ་སོགས་པ་སྔ་མ་བཞིན་ཏེ། སྣ་ཚོགས་པདྨ་དང་ཉི་མ་ལའོ། །རྡོ་རྗེ་ལྕགས་ཀྱུ་མའི་ཕྱི་ངོས་སུ་གཙུག་ཏོར་རྣམ་པར་རྒྱལ་བའི་འཁོར་ལོ་སྣ་ཚོགས་པདྨ་དང་ཉི་མ་ལའོ། །རྡོ་རྗེ་ལྕགས་སྒྲོག་མའི་ [44b.4]ཕྱི་ངོས་སུ་རྡོ་རྗེ་གནོད་མཛེས་མའི་སྦྲུལ་གྱི་ཞགས་པ་སྟེ། སྣ་ཚོགས་ཆུ་སྐྱེས་དང་ཉི་མ་ལའོ། །མེ་ལ་སོགས་པའི་མཚམས་སུ་པདྨ་ལ་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་སྒྲོལ་མ་རྣམས་ཀྱི་རྣམས་པར་དག་པའི་བྱང་ཆུབ་ཀྱི་སེམས་ཀྱི་བུམ་པ་དང་། རི་རབ་དང་མེ་ཐབ་དང་རྒྱལ་མཚན་ཆེན་པོའོ། །པདྨའི་ [44b.5]ཕྱི་ངོས་སུ་བུམ་པ་རྣམས་སོ། །འོད་ཟེར་ཅན་གྱི་དཀྱིལ་འཁོར་གྱི་དབུས་ཀྱི་སྣ་ཚོགས་པདྨར་ཉི་མའམ། ཟླ་བ་ལ་མདའ་སྟེ་མཚན་མོ་ཟླ་བ་ལ་གནས་ཤིང་ཉིན་མོ་ཉི་མ་ལ་གནས་ཏེ་ལྷ་མོ་རྣམ་པར་རྒྱུའོ། །ཤར་དང་ལྷོ་ལ་སོགས་པའི་ཕྱོགས་སུ་ཨརྐ་མ་སཱི་དང་། མརྐ་མ་སཱི་དང་། ཨནྡ་ར་དྷ་ན་མ་སཱི་དང་། [44b.6]ཏེ་ཛོ་མ་སཱིའི་ལྷ་མོ་རྣམས་ཀྱི་གོ་རིམས་བཞིན་དུ་ཁབ་དང་སྐུད་པ་དང་བཅས་པའི་ཁབ་དང་། ཨ་ཤྭ་ཀའི་ཡལ་ག་དང་མདའ་རྣམས་སོ། །མེ་དང་སྲིན་པོ་ལ་སོགས་པའི་མཚམས་རྣམས་སུ་ཨུ་ད་ཡ་མ་སཱི་དང་། གུལྨ་མ་སཱི་དང་། མ་ན་མ་སཱི་དང་། ཙཱི་བ་ར་མ་སཱི་རྣམས་ཀྱི་མཚན་མ་ནི་གོ་རིམས་བཞིན་དུ་ཨརྐ་ [44b.7]མ་སཱི་ལ་སོགས་པའི་མཚན་མ་བཞིན་ནོ། །ཕྱིའི་ཕོ་བྲང་གི་སྣམ་བུའི་ཤར་དུ་མ་ཧཱ་ཙི་བ་ར་མ་སཱི་དང་། བ་ར་ཧ་མུ་ཁའི་ལྷ་མོ་དག་གི་རྡོ་རྗེ་དང་ལྕགས་ཀྱུ་གཉིས་སོ། །ལྷོ་ཕྱོགས་སུ་ལྷ་མོ་པ་དཱ་ཀྲ་མ་སཱི་དང་། བ་ར་ལཱི་དག་གི་ཨ་ཤོ་ཀའི་འདབ་མ་གཉིས་སོ། །ནུབ་ཏུ་ལྷ་མོ་པ་ར་ཀྲ་མ་སཱི་དང་། བ་ད་ལཱི་དག་གི་མདའ་ [45a] [45a.1]གཉིས་སོ། །བྱང་དུ་ལྷ་མོ་ཨུརྨ་མ་སཱི་དང་། བ་རཱ་ལཱི་དག་གི་ཁབ་གཉིས་སོ། །མེ་ལ་སོགས་པའི་མཚམས་སུ་བཏྟཱ་ལཱི་དང་། བཏྟ་ལཱི་དང་། བ་རཱ་ལཱ་དང་། བ་རཱ་ཧ་མུ་ཁི་རྣམས་ཀྱི་ཁབ་དང་སྐུད་པ་དང་བཅས་པའི་ཁབ་དང་ཨ་ཤོ་ཀའི་ལོ་མ་དང་མདའ་རྣམས་སོ། །ཤར་སྒོར་ལྷ་མོ་ཨ་ལོའི་ [45a.2]རྡོ་རྗེ་ལྕགས་ཀྱུའོ། །ལྷོར་ལྷ་མོ་ཏ་ལོའི་རྡོ་རྗེ་ཞགས་པའོ། །ནུབ་དུ་ལྷ་མོ་ཀ་ལོའི་རྡོ་རྗེ་ལྕགས་སྒྲོག་གོ། །བྱང་དུ་ལྷ་མོ་སཙྪ་ལོ་སཾ་བ་མཱུ་རྡྷི་ཊཱིའི་རྡོ་རྗེ་དྲིལ་བུའོ། །འདིར་སྒོ་སྐྱོང་མའི་མཚན་མ་རྣམས་ནི་པདྨ་དང་ཉི་མ་ལ་གནས་པའོ། །གཞན་དག་གི་ནི་པདྨ་དང་ཟླ་བ་ལའོ། །སྲུང་བ་ལྔའི་དཀྱིལ་འཁོར་ལ་དབུས་ [45a.3]སུ་སྣ་ཚོགས་ཆུ་སྐྱེས་ཀྱི་ལྟེ་བར་ཟླ་བ་ལ་སོ་སོར་འབྲང་མ་ཆེན་མོའི་རིན་པོ་ཆེའི་ཆུན་པོའོ། །ཤར་དུ་སྣ་ཚོགས་པདྨ་དང་ཟླ་བ་ལ་སྟོང་ཆེན་མོ་རབ་ཏུ་འཇོམས་པའི་འཁོར་ལོའོ། །ལྷོར་སྣ་ཚོགས་པདྨ་དང་ཉི་མ་ལ་གསང་སྔགས་ཆེན་མོ་རྗེས་སུ་འཛིན་པའི་རྡོ་རྗེའོ། །ནུབ་ཏུ་སྣ་ཚོགས་པདྨ་དང་ཉི་མ་ལ་བསིལ་ [45a.4]བའི་ཚལ་ཆེན་མོའི་པདྨའོ། །བྱང་དུ་སྣ་ཚོགས་པདྨ་དང་ཟླ་བ་ལ་རྨ་བྱ་ཆེན་མོའི་རྨ་བྱའི་མཇུག་སྒྲོའོ། །རིམ་པ་གཉིས་པར་མེ་ལ་སོགས་པའི་མཚམས་སུ་ནག་མོ་དང་། དུས་མཚན་མོ་དང་། རྣ་བ་ནག་མོ་དང་། དཀར་མོ་རྣམས་ཀྱི་དུང་དང་། རྡོ་རྗེས་མཚན་པའི་རྒྱལ་མཚན་དང་། དགྲ་སྟྭ་དང་། རྩེ་གསུམ་ [45a.5]རྣམས་སོ། །སྣམ་བུ་རྣམས་ལ་བུམ་པ་རྣམས་སོ། །ཤར་ལ་སོགས་པའི་སྒོར་སྣ་ཚོགས་པདྨ་དང་ཉི་མ་རྣམས་ལ་རྡོ་རྗེ་ལྕགས་ཀྱུ་མ་ལ་སོགས་པའི་རྡོ་རྗེ་ལྕགས་ཀྱུ་ལ་སོགས་པ་བཞིའོ། །རྡོ་རྗེ་དབྱིངས་ཀྱི་དཀྱིལ་འཁོར་ལ་སྣ་ཚོགས་པདྨའི་ལྟེ་བར་ཟླ་བ་ལ་བཅོམ་ལྡན་འདས་རྡོ་རྗེ་དབྱིངས་ཀྱི་རྡོ་རྗེ་རྩེ་ལྔ་པ་ [45a.6]དཀར་པོའོ། །ལྟེ་བའི་ཤར་ལ་སོགས་པའི་ཕྱོགས་ཀྱི་འདབ་མར་ཟླ་བ་རྣམས་ལ་གོ་རིམས་བཞིན་དུ་གཡས་སྐོར་དུ་སེམས་མ་རྡོ་རྗེ་མ་དང་། རིན་ཆེན་རྡོ་རྗེ་མ་དང་། ཆོས་ཀྱི་རྡོ་རྗེ་མ་དང་། ལས་ཀྱི་རྡོ་རྗེ་མ་རྣམས་ཀྱི་རྡོ་རྗེ་དམར་པོ་རྩེ་ལྔ་པ་དང་། རྡོ་རྗེ་རྩེ་ལྔ་བའི་རྩེ་མོ་ཅན་གྱི་རིན་པོ་ཆེ་དང་། རྡོ་རྗེ་རྩེ་ལྔ་པས་མཚན་ [45a.7]པའི་པདྨ་འདབ་བརྒྱད་དཀར་དམར་དང་། དེ་བཞིན་གཤེགས་པ་ལྔའི་ཁ་དོག་གི་སྣ་ཚོགས་རྡོ་རྗེའོ། །ཤར་ལ་སོགས་པའི་པདྨའི་ལྟེ་བར་ཟླ་བའི་དཀྱིལ་འཁོར་རྣམས་ལ་གོ་རིམས་བཞིན་དུ་མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་མེད་དང་། དོན་ཡོད་གྲུབ་པ་རྣམས་ཀྱི་རྡོ་རྗེ་རྩེ་ལྔ་པ་སྔོན་ [45b] [45b.1]པོ་དང་། རྡོ་རྗེ་རིན་པོ་ཆེ་དང་། རྡོ་རྗེ་པདྨ་དང་། སྣ་ཚོགས་རྡོ་རྗེ་དང་། མི་བསྐྱོད་པའི་པདྨའི་ཤར་ལ་སོགས་པའི་ཕྱོགས་ཀྱི་འདབ་མར་ཟླ་བ་རྣམས་ལ་རྡོ་རྗེ་སེམས་དཔའ་དང་། རྡོ་རྗེ་རྒྱལ་པོ་དང་། རྡོ་རྗེ་ཆགས་པ་དང་། རྡོ་རྗེ་ལེགས་པ་རྣམས་ཀྱི་རིམ་པ་བཞིན་དུ་རྡོ་རྗེ་རྩེ་ལྔ་པ་དང་། རྡོ་རྗེ་ལྕགས་ཀྱུ་དང་། མདའ་ [45b.2]དང་། རྡོ་རྗེའོ། །རིན་ཆེན་འབྱུང་ལྡན་གྱི་པདྨ་ལ་རྡོ་རྗེ་རིན་ཆེན་དང་། རྡོ་རྗེ་གཟི་བརྗིད་དང་། རྡོ་རྗེ་ཏོག་དང་། རྡོ་རྗེ་བཞད་པ་རྣམས་ཀྱི་རིམ་པ་བཞིན་དུ་རྡོ་རྗེ་སྔོན་པོ་རྩེ་ལྔ་པ་གཉིས་ཀྱིས་མཚན་པའི་རིན་པོ་ཆེའི་ཕྲེང་བ་དང་། ཉི་མ་དང་། ཡིད་བཞིན་གྱི་ནོར་བུའི་རྒྱལ་མཚན་དང་། སོའི་ཕྲེང་བ་དང་ལྡན་པའི་ [45b.3]རྡོ་རྗེའོ། །སྣང་བ་མཐའ་ཡས་ཀྱི་རྡོ་རྗེ་ཆོས་དང་། རྡོ་རྗེ་རྣོན་པོ་དང་། རྡོ་རྗེ་རྒྱུ་དང་། རྡོ་རྗེ་སྲུང་བ་རྣམས་ཀྱི་པདྨ་དམར་པོ་དང་། རལ་གྲི་དང་། འཁོར་ལོ་རྩིབས་བརྒྱད་པ་དང་། རྡོ་རྗེ་རྩེ་གཅིག་པའི་ལྕེའོ། །དོན་ཡོད་གྲུབ་པའི་རྡོ་རྗེ་ལས་དང་། རྡོ་རྗེ་སྲུང་བ་དང་། རྡོ་རྗེ་གནོད་སྦྱིན་དང་། རྡོ་རྗེ་ཁུ་ཚུར་ [45b.4]རྣམས་ཀྱི་སྣ་ཚོགས་རྡོ་རྗེ་དང་། རྡོ་རྗེ་གོ་ཆ་དང་། རྡོ་རྗེས་མཚན་པའི་མཆེ་བ་དང་། རྡོ་རྗེ་རྩེ་ལྔ་པའོ། །མི་བསྐྱོད་པ་ལ་སོགས་པ་སོ་སོའི་བྱང་ཆུབ་སེམས་དཔའ་གསུམ་པའི་མཚན་མ་ནི་བྱང་གི་འདབ་མར་དང་། བཞི་པའི་མཚན་མ་ནི་ནུབ་ཀྱི་འདབ་མ་ལ་བྲི་བར་བྱའོ། །མེ་ལ་སོགས་པའི་པདྨའི་ལྟེ་ [45b.5]བའི་ཟླ་བ་རྣམས་ལ་རྡོ་རྗེ་སྒེག་མོ་དང་། རྡོ་རྗེ་ཕྲེང་བ་མ་དང་། རྡོ་རྗེ་གླུ་མ་དང་། རྡོ་རྗེ་གར་མ་རྣམས་ཀྱི་རྡོ་རྗེ་དང་། རིན་པོ་ཆེའི་ཕྲེང་བ་དང་། པི་ཝང་དང་། རྡོ་རྗེའོ། །དབུས་ཀྱི་གཞལ་ཡས་ཁང་ལས་ཕྱི་རོལ་གྱི་སྣམ་བུའི་ཤར་དུ་བྱམས་པ་དང་། མཐོང་བ་དོན་ཡོད་དང་། ངན་སོང་ཀུན་འདྲེན་དང་། མྱ་ངན་ [45b.6]དང་མུན་པ་ཐམས་ཅད་འཇོམས་པའི་བློ་གྲོས་རྣམས་ཀྱི་པདྨ་དང་ཟླ་བ་རྣམས་ལ་རྡོ་རྗེ་རྩེ་ལྔ་པ་རྣམས་སོ། །ལྷོ་ཕྱོགས་སུ་སྤོས་ཀྱི་གླང་པོ་དང་། དཔའ་བར་འགྲོ་བ་དང་། ནམ་མཁའ་མཛོད་དང་། ཡེ་ཤེས་ཏོག་རྣམས་ཀྱི་པདྨ་དང་ཟླ་བ་རྣམས་ལ་རྡོ་རྗེ་རིན་པོ་ཆེ་རྣམས་སོ། །ནུབ་ཏུ་འོད་དཔག་མེད་ [45b.7]དང་། ཟླ་འོད་དང་། བཟང་སྐྱོང་དང་། དྲ་བ་ཅན་གྱི་འོད་རྣམས་ཀྱི་ཆུ་སྐྱེས་དང་། ཟླ་བ་རྣམས་ལ་རྡོ་རྗེ་པདྨ་རྣམས་སོ། །བྱང་དུ་རྡོ་རྗེ་སྙིང་པོ་དང་། བློ་གྲོས་མི་ཟད་པ་དང་། སྤོབས་པ་བརྩེགས་པ་དང་། ཀུན་དུ་བཟང་པོ་རྣམས་ཀྱི་པདྨ་དང་ཟླ་བ་རྣམས་ལ་སྣ་ཚོགས་རྡོ་རྗེ་རྣམས་སོ། །ཕྱིའི་དཀྱིལ་འཁོར་གྱི་མེ་ [46a] [46a.1]ལ་སོགས་པའི་གྲྭ་རྣམས་སུ་པདྨ་དང་ཟླ་བ་རྣམས་ལ་རྡོ་རྗེ་བདུག་སྤོས་མ་དང་། རྡོ་རྗེ་མེ་ཏོག་མ་དང་། རྡོ་རྗེ་མར་མེ་མ་དང་། རྡོ་རྗེ་དྲི་ཆབ་མ་རྣམས་ཀྱི་མཚན་མ་ནི་སྔ་མ་བཞིན་ནོ། །ཤར་ལ་སོགས་པའི་སྒོར་པདྨ་དང་ཟླ་བ་རྣམས་ལ་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་ [46a.2]དང་། རྡོ་རྗེ་འབེབས་པ་རྣམས་ཀྱི་མཚན་མ་རྣམས་སོ། །སྣམ་བུ་རྣམས་ལ་བུམ་པ་རྣམས་སོ། །བཞི་བཅུ་རྩ་གསུམ་གྱི་བདག་ཉིད་ཅན་འཇམ་པའི་རྡོ་རྗེའི་དཀྱིལ་འཁོར་ལ་ཕྱིའི་དཀྱིལ་འཁོར་གྱི་རྩིག་པ་ལྔ་ནི་སྔོན་པོ་དང་། དམར་པོ་དང་། དཀར་པོ་དང་། ལྗང་གུ་དང་། སེར་པོ་སྟེ། ཤར་ལ་སོགས་པའི་ [46a.3]ཕྱོགས་དང་། དབུས་ཀྱིས་ཐམས་ཅད་ཀྱང་ངོ་། །དཀྱིལ་འཁོར་གཉིས་པ་ལ་རྩིག་པ་གསུམ་སྟེ། སྔོན་པོ་དང་། དཀར་པོ་དང་། སེར་པོའོ། །འཁོར་ལོ་གསུམ་པ་ལ་རྩིག་པ་དཀར་པོ་གཅིག་གོ། །དེ་ལ་དབུས་ཀྱི་ས་གཞི་སེར་པོ་ལ་སྣ་ཚོགས་པདྨ་དང་ཟླ་བ་ལ་འཇམ་དཔལ་གྱི་རལ་གྲི་ཡུ་བ་སེར་པོ་ཅན་ [46a.4]ནོ། །ཤར་ལ་སོགས་པའི་རེ་མིག་གི་ཉི་མ་ལ་མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པ་རྣམས་རྡོ་རྗེ་སྔོན་པོ་དང་། རིན་པོ་ཆེ་དང་། པདྨ་དཀར་པོ་དང་། རལ་གྲིའོ། །དབང་ལྡན་ལ་སོགས་པའི་རེའུ་མིག་གི་ཟླ་བ་རྣམས་ལ་སྤྱན་མ་དང་། མཱ་མ་ཀཱི་དང་། གོས་ [46a.5]དཀར་མོ་དང་། སྒྲོལ་མ་རྣམས་ཀྱི་རྡོ་རྗེ་སེར་པོ་དང་། རྡོ་རྗེ་སྔོན་པོ་དང་། རྡོ་རྗེ་དཀར་བོ་དང་། རྡོ་རྗེ་ལྗང་གུའོ། །རིམ་པ་གཉིས་པའི་དཀྱིལ་འཁོར་ལ་ཤར་ལ་སོགས་པའི་ཕྱོགས་སུ་ཟླ་བ་རྣམས་ལ་སེམས་མ་རྡོ་རྗེ་མ་དང་། རིན་ཆེན་རྡོ་རྗེ་མ་དང་། ཆོས་ཀྱི་རྡོ་རྗེ་མ་དང་། ལས་ཀྱི་རྡོ་རྗེ་མ་རྣམས་ཀྱི་ [46a.6]མཚན་མ་ནི་མི་བསྐྱོད་པ་ལ་སོགས་པ་བཞིན་ནོ། །དབང་ལྡན་ལ་སོགས་པའི་མཚམས་སུ་ཟླ་བ་རྣམས་ལ་ཙུནྡ་དང་། རིན་ཆེན་དཀར་མདའ་དང་། ཁྲོ་གཉེར་ཅན་དང་། རྡོ་རྗེ་ལྕགས་སྒྲོག་མ་རྣམས་ཀྱི་རལ་གྲི་དང་། རིན་པོ་ཆེ་སེར་པོ་དང་། རྡོ་རྗེ་དཀར་པོ་དང་། རྡོ་རྗེ་ལྕགས་སྒྲོག་ལྗང་གུ་རྣམས་སོ། ། [46a.7]རིམ་པ་གསུམ་པའི་དཀྱིལ་འཁོར་ལ་ཤར་གྱི་ཟླ་བ་རྣམས་ལ་བྱམས་པ་དང་། འཇམ་དཔལ་དང་། སྤོས་ཀྱི་གླང་པོ་དང་། ཡེ་ཤེས་ཏོག་རྣམས་ཀྱི་ཀླུ་ཤིང་གི་ཡལ་ག་མེ་ཏོག་དང་བཅས་པ་དང་། རལ་གྲི་དང་། ལག་ལྡན་གྱི་སྣམ་བུ་ལ་གནས་པ་དང་། ཡིད་བཞིན་གྱི་ནོར་བུ་སེར་པོའོ། །ལྷོའི་ཟླ་བ་ [46b] [46b.1]རྣམས་ལ་བཟང་སྐྱོང་དང་། བློ་གྲོས་རྒྱ་མཚོ་དང་། བློ་གྲོས་མི་ཟད་དང་། སྤོབས་པ་བརྩེགས་པ་རྣམས་ཀྱི་མདའ་དམར་པོ་དང་། དཀར་པོ་དང་སེར་པོ་དང་། ལྗང་གུའོ། །ནུབ་ཀྱི་ཟླ་བ་རྣམས་ལ་མཐུ་ཆེན་ཐོབ་པ་དང་། ངན་སོང་ཀུན་འདྲེན་དང་། མྱ་ངན་དང་མུན་པ་ཐམས་ཅད་ངེས་པར་འཇོམས་ [46b.2]པའི་བློ་གྲོས་དང་། དྲ་བ་ཅན་གྱི་འོད་རྣམས་ཀྱི་པདྨ་དཀར་པོ་དང་། མདའ་དཀར་པོ་དང་། མདའ་སེར་པོ་དང་། ཨུཏྤལ་དམར་པོ་ལ་གནས་པའི་ཉི་མའོ། །བྱང་ཕྱོགས་ཀྱི་ཟླ་བ་རྣམས་ལ་ཟླ་འོད་དང་། འོད་དཔག་མེད་དང་། ནམ་མཁའ་མཛོད་དང་། སྒྲིབ་པ་ཐམས་ཅད་རྣམ་པར་སེལ་བ་ [46b.3]རྣམས་ཀྱི་ཨུཏྤལ་ལ་གནས་པའི་ཟླ་བ་དང་། བུམ་པ་དམར་པོ་དང་། མདའ་སེར་པོ་དང་། མདའ་སྔོན་པོའོ། །འདིར་གོ་རིམས་བཞིན་དུ་ཤར་ལ་སོགས་པའི་སྒོ་རྣམས་སུ་ལོགས་གཉིས་ཀྱི་སྣམ་བུ་ལ་མཚན་མ་གཉིས་གཉིས་སོ། །ཤར་ལ་སོགས་པའི་སྒོར་ཉི་མ་རྣམས་ལ་གཤིན་རྗེ་ [46b.4]མཐར་བྱེད་དང་། གཞན་གྱིས་མི་ཐུབ་པ་དང་། རྟ་མགྲིན་དང་། བདུད་རྩི་འཁྱིལ་པ་རྣམས་ཀྱི་རལ་གྲི་ཡུ་བ་ནག་པོ་ཅན་དང་། རྡོ་རྗེ་སེར་པོ་དང་། རྡོ་རྗེ་དབྱུག་པ་དམར་པོ་དང་། རལ་གྲི་ཡུ་བ་སྔོན་པོ་ཅན་དང་། དབང་ལྡན་ལ་སོགས་པའི་མཚམས་ཀྱི་ཉི་མ་རྣམས་ལ་མི་གཡོ་བ་དང་། འདོད་པའི་ [46b.5]རྒྱལ་པོ་དང་། དབྱུག་པ་སྔོན་པོ་དང་། སྟོབས་པོ་ཆེ་རྣམས་ཀྱི་རལ་གྲི་སྔོན་པོ་དང་། རྡོ་རྗེ་སྔོན་པོ་དང་། རྡོ་རྗེ་དབྱུག་པ་སྔོན་པོ་དང་། རྡོ་རྗེ་དབྱུག་པ་སྔོན་པོའོ། །གཤིན་རྗེ་གཤེད་ཀྱི་མཚན་མའི་ཕྱི་རོལ་དུ་ཉི་མ་ལ་གནོད་མཛེས་ཀྱི་རལ་གྲིའོ། །རྟ་མགྲིན་གྱི་མཚན་མའི་ཕྱི་ངོས་སུ་ཉི་མ་ལ་རྡོ་རྗེས་འོག་ [46b.6]གི་རྡོ་རྗེ་ལྕགས་ཀྱུའོ། །ཟླ་བ་དང་ཉི་མ་ཐམས་ཅད་ཀྱི་འོག་ཏུ་སྣ་ཚོགས་ཆུ་སྐྱེས་སོ། །སྣམ་བུ་རྣམས་ལ་བུམ་པ་རྣམས་སོ། །ཁ་ཅིག་ཏུ་ནི་གཤིན་རྗེ་གཤེད་ཀྱི་མཚན་མའི་ཕྱི་ངོས་སུ་ཉི་མ་ལ་གཙུག་ཏོར་འཁོར་ལོས་སྒྱུར་བའི་འཁོར་ལོ་དང་དེའི་ཕྱི་ངོས་སུ་གནོད་མཛེས་ཀྱི་རལ་གྲིའོ་ཞེས་གསུངས་སོ། ། [46b.7]ཆོས་ཀྱི་དབྱིངས་གསུང་གི་དབང་ཕྱུག་གི་དཀྱིལ་འཁོར་ལ་ནང་གི་འཁོར་ལོ་ཚོན་དཀར་པོས་དགང་བར་བྱའོ། །གཞན་ནི་སྔ་མ་བཞིན་ནོ། །དབུས་ཀྱི་དཀྱིལ་འཁོར་གྱི་དབུས་སུ་སྣ་ཚོགས་པདྨའི་ལྟེ་བར་ཟླ་བ་ལ་འཇམ་པའི་དབྱངས་ཀྱི་རལ་གྲི་ཡུ་བ་སེར་པོ་ཅན་ནོ། །ཤར་ལ་སོགས་པ་དང་དབང་ལྡན་ [47a] [47a.1]ལ་སོགས་པའི་འདབ་མའི་ཟླ་བ་རྣམས་ལ་གོ་རིམས་བཞིན་གཡས་སྐོར་དུ་གཙུག་ཏོར་ཆེན་པོ་དང་། གདུགས་དཀར་པོ་དང་། གཟི་བརྗིད་ཕུང་པོ་དང་། རྣམ་པར་རྒྱལ་བའི་གཙུག་ཏོར་དང་། འོད་ཟེར་རྣམ་པར་འཕྲོ་བ་དང་། འཕགས་པ་དང་། ཆེར་འཕགས་པ་དང་། རྒྱལ་ [47a.2]བ་སྟེ་གཙུག་ཏོར་བརྒྱད་པོ་རྣམས་ཀྱི་འཁོར་ལོ་སེར་པོ་རྣམས་སོ། །ཤར་གྱི་རེ་མིག་གི་དབུས་སུ་སྣ་ཚོགས་ཆུ་སྐྱེས་དང་ཉི་མ་ལ་མི་བསྐྱོད་པའི་རྡོ་རྗེ་སྔོན་པོའོ། །དབང་ལྡན་ལ་སོགས་པའི་མཚམས་སུ་སྣ་ཚོགས་པདྨ་དང་ཟླ་བ་རྣམས་ལ་རྡོ་རྗེ་སེམས་དཔའ་དང་། རྡོ་རྗེ་རྒྱལ་པོ་དང་། རྡོ་རྗེ་ཆགས་པ་དང་། [47a.3]རྡོ་རྗེ་ལེགས་པ་རྣམས་ཀྱི་རྡོ་རྗེ་དང་། རྡོ་རྗེ་ལྕགས་ཀྱུ་དང་། མདའ་དང་རྡོ་རྗེའོ། །ལྷོའི་རེ་མིག་གི་དབུས་སུ་སྣ་ཚོགས་པདྨ་དང་། ཉི་མལ་རིན་ཆེན་འབྱུང་ལྡན་གྱི་ཡིད་བཞིན་གྱི་ནོར་བུ་སེར་པོའི་རྒྱལ་མཚན་ནོ། །དབང་ལྡན་ལ་སོགས་པའི་མཚམས་ཀྱི་སྣ་ཚོགས་ཆུ་སྐྱེས་དང་། ཟླ་བ་རྣམས་ལ་རྡོ་རྗེ་ [47a.4]རིན་ཆེན་དང་། རྡོ་རྗེ་ཉི་མ་དང་། རྡོ་རྗེ་ཏོག་དང་། རྡོ་རྗེ་བཞད་པ་རྣམས་ཀྱི་རྡོ་རྗེ་རྩེ་ལྔ་པ་གཉིས་ཀྱིས་མཚན་པའི་རིན་པོ་ཆེའི་ཕྲེང་བ་དང་། ཉི་མའི་དཀྱིལ་འཁོར་དང་། ཡིད་བཞིན་གྱི་ནོར་བུའི་རྒྱལ་མཚན་དང་། སོའི་ཕྲེང་བ་དང་ལྡན་པའི་རྡོ་རྗེའོ། །ནུབ་ཀྱི་རེ་མིག་གི་དབུས་སུ་སྣ་ཚོགས་པདྨར་ཉི་མ་ལ་ [47a.5]སྣང་བ་མཐའ་ཡས་ཀྱི་པདྨ་དམར་པོའོ། །དབང་ལྡན་ལ་སོགས་པའི་མཚམས་སུ་སྣ་ཚོགས་ཆུ་སྐྱེས་དང་ཟླ་བ་རྣམས་ལ་རྡོ་རྗེ་ཆོས་དང་། རྡོ་རྗེ་རྣོན་པོ་དང་། རྡོ་རྗེ་རྒྱུ་དང་རྡོ་རྗེ་སྲུང་བ་རྣམས་ཀྱི་པདྨ་དང་། རལ་གྲི་དང་། ཆོས་ཀྱི་འཁོར་ལོ་དང་། རྡོ་རྗེ་རྩེ་གཅིག་པའི་ལྕེའོ། །བྱང་ཕྱོགས་ཀྱི་རེ་མིག་གི་ [47a.6]དབུས་སུ་སྣ་ཚོགས་པདྨ་དང་ཉི་མ་ལ་དོན་ཡོད་གྲུབ་པའི་རལ་གྲིའོ། །དབང་ལྡན་ལ་སོགས་པའི་མཚམས་སུ་སྣ་ཚོགས་པདྨ་དང་ཟླ་བ་རྣམས་ལ་རྡོ་རྗེ་ལས་དང་། རྡོ་རྗེ་སྲུང་བ་དང་། རྡོ་རྗེ་གནོད་སྦྱིན་དང་རྡོ་རྗེ་ཁུ་ཚུར་རྣམས་ཀྱི་རྡོ་རྗེ་རྩེ་གསུམ་པ་དང་། རྡོ་རྗེ་གོ་ཆ་དང་། རྡོ་རྗེས་མཚན་པའི་མཆེ་བ་ [47a.7]དང་། རྡོ་རྗེ་རྩེ་ལྔ་པའོ། །དབང་ལྡན་ལ་སོགས་པའི་མཚམས་ཀྱི་རེ་མིག་གི་པདྨ་དང་ཟླ་བ་རྣམས་ལ་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་རྣམས་ཀྱི་མཚན་མ་རྣམས་ནི་འཇམ་པའི་དབྱངས་དང་། མི་བསྐྱོད་པ་དང་། སྣང་བ་མཐའ་ཡས་དང་། དོན་ཡོད་གྲུབ་པའི་མཚན་མ་ [47b] [47b.1]བཞིན་ནོ། །ཤར་ལ་སོགས་པའི་སྒོར་སྣ་ཚོགས་པདྨ་དང་ཉི་མ་རྣམས་ལ་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་དང་། རྡོ་རྗེ་འབེབས་པ་རྣམས་ཀྱི་རྡོ་རྗེ་ལྕགས་ཀྱུ་ལ་སོགས་པའོ། །ནང་གི་དཀྱིལ་འཁོར་འདི་ལས་དཀྱིལ་འཁོར་གཉིས་པར་ཤར་ཕྱོགས་སུ་སྣ་ཚོགས་པདྨ་ [47b.2]དང་ཟླ་བ་རྣམས་ལས་བཅུ་གཉིས་སོ། །མོས་པས་སྤྱོད་པ་དང་། རབ་ཏུ་དགའ་བ་དང་། དྲི་མ་མེད་པ་དང་། འོད་བྱེད་པ་དང་། འོད་འཕྲོ་བ་དང་། སྦྱང་དཀའ་བ་དང་། མངོན་དུ་གྱུར་པ་དང་། རིང་དུ་སོང་བ་དང་། མི་གཡོ་བ་དང་། ལེགས་པའི་བློ་གྲོས་དང་། ཆོས་ཀྱི་སྤྲིན་དང་། ཀུན་དུ་འོད་ཀྱི་ [47b.3]ས་རྣམས་ཀྱི་གོ་རིམས་བཞིན་དུ་གཡས་སྐོར་དུ་པདྨ་དམར་པོ་དང་། ཡིད་བཞིན་གྱི་ནོར་བུ་དང་། པདྨ་དཀར་པོ་དང་། སྣ་ཚོགས་པདྨ་ལ་གནས་པའི་ཉི་མ་དང་། ཨུཏྤལ་དང་། ནོར་བུ་མརྒད་དང་། པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་། སྣ་ཚོགས་ཆུ་སྐྱེས་ཀྱི་སྟེང་དུ་སྣ་ཚོགས་ [47b.4]རྡོ་རྗེ་ཡུ་བ་དང་བཅས་པའི་པདྨ་དང་། ཟླ་བ་ལ་གནས་པའི་རྡོ་རྗེ་རྩེ་ལྔ་པ་དམར་པོ་དང་། ཨུཏྤལའི་སྟེང་དུ་རལ་གྲི་དང་། ཆོས་ཀྱི་སྤྲིན་གྱིས་ཡོངས་སུ་བསྐོར་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་། པདྨ་ལ་བཞུགས་པའི་ཡང་དག་པར་རྫོགས་པའི་སངས་རྒྱས་ཀྱི་སྐུའོ། །ལྷོར་སྣ་ཚོགས་པདྨ་ [47b.5]དང་ཟླ་བ་རྣམས་ལ་རིན་ཆེན་པདྨའི་ཕ་རོལ་ཏུ་ཕྱིན་པ་དང་། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྟོབས་དང་། སྨོན་ལམ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་དང་། རྡོ་རྗེ་ལས་ཀྱི་ཕ་རོལ་ཏུ་ཕྱིན་པ་བཅུ་གཉིས་ [47b.6]རྣམས་ཀྱི་པདྨའི་སྟེང་དུ་ཟླ་བའི་དཀྱིལ་འཁོར་དང་འབྲུ་སྣ་ཚོགས་པའི་རིན་པོ་ཆེའི་སྙེ་མ་དང་། ལོ་མ་དང་བཅས་པའི་ཨ་ཤོ་ཀའི་མེ་ཏོག་གི་ཆུན་པོ་དང་། པདྨ་དཀར་པོ་དང་། ཨུཏྤལ་སྔོན་པོ་དང་། པདྨ་དཀར་པོ་དང་། པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་། ཆུ་སྐྱེས་སེར་པོ་ལ་ [47b.7]གནས་པའི་རྡོ་རྗེ་དང་། ཨུཏྤལ་ལ་གནས་པའི་རལ་གྲི་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་། རིན་པོ་ཆེ་སྣ་ཚོགས་པའི་འབྲས་བུས་བརྒྱན་པའི་བྱང་ཆུབ་ཀྱི་ཤིང་གི་ཡལ་ག་དང་། ཨུཏྤལ་ལ་གནས་པའི་སྣ་ཚོགས་རྡོ་རྗེའོ། །ནུབ་ཏུ་སྣ་ཚོགས་ཆུ་སྐྱེས་དང་། ཟླ་བ་རྣམས་ལ་ཚེ་དང་། [48a] [48a.1]སེམས་དང་། ཡོ་བྱད་དང་། ལས་དང་། སྐྱེ་བ་དང་། རྫུ་འཕྲུལ་དང་། མོས་པ་དང་། སྨོན་ལམ་དང་། ཡེ་ཤེས་དང་། ཆོས་ལ་དབང་བ་རྣམས་དང་། དེ་བཞིན་ཉིད་དང་། སངས་རྒྱས་ཀྱི་བྱང་ཆུབ་སྟེ། དབང་བཅུ་གཉིས་རྣམས་ཀྱི་ནོར་བུ་པདྨ་རཱ་ག་ལ་གནས་པའི་ཏིང་ངེ་ [48a.2]འཛིན་གྱི་ཕྱག་རྒྱ་དང་ལྡན་པའི་ཚེ་དཔག་མེད་པའི་སངས་རྒྱས་ཀྱི་གཟུགས་དང་། རྡོ་རྗེ་དམར་པོ་རྩེ་ལྔ་པ་དང་། ཡིད་བཞིན་གྱི་ནོར་བུའི་རྒྱལ་མཚན་དང་། སྣ་ཚོགས་རྡོ་རྗེ་དང་། མེ་ཏོག་ཛཱ་ཏི་ཁ་དོག་སྣ་ཚོགས་པའི་ཡལ་འདབ་དང་། པདྨ་ལ་གནས་པའི་ཉི་ཟླའི་དཀྱིལ་འཁོར་དང་། པྲི་ཡང་ཀུའི་མེ་ [48a.3]ཏོག་གི་སྙེ་མ་དང་། ཨུཏྤ་ལ་སྔོན་པོ་དང་། ཨུཏྤ་ལ་གནས་པའི་རལ་གྲི་དང་། པདྨ་ལ་གནས་པའི་བུམ་པ་བཟང་པོ་དང་། འདམ་སྐྱེས་དཀར་པོ་དང་། ཆུ་སྐྱེས་སེར་པོ་ལ་གནས་པའི་རྡོ་རྗེ་རྩེ་ལྔ་པའོ། །བྱང་ཕྱོགས་སུ་སྣ་ཚོགས་པདྨ་དང་ཟླ་བ་རྣམས་ལ་དབྱིག་གི་བློ་གྲོས་མ་དང་། རིན་པོ་ [48a.4]ཆེའི་སྐར་མདའ་དང་། གཙུག་ཏོར་རྣམ་པར་རྒྱལ་མ་དང་། འོད་ཟེར་ཅན་དང་། རི་ཁྲོད་ལོ་མ་ཅན་དང་། ཇཾ་གུ་ལཱི་དང་། སྒོ་མཐའ་ཡས་མ་དང་། སྐུལ་བྱེད་མ་དང་། ཤེས་རབ་འཕེལ་མ་དང་། ལས་དང་སྒྲིབ་པ་ཐམས་ཅད་རྣམ་པར་སེལ་མ་དང་། ཡེ་ཤེས་མི་ཟད་པའི་ཟ་མ་ཏོག་དང་། སངས་ [48a.5]རྒྱས་ཀྱི་ཆོས་ཐམས་ཅད་ཀྱི་མཛོད་ལྡན་མ་རྣམས་ཏེ། གཟུངས་བཅུ་གཉིས་རྣམས་ཀྱི་འབྲས་ཀྱི་སྙེ་མ་དང་། ཡིད་བཞིན་གྱི་ནོར་བུའི་རྒྱལ་མཚན་དང་། ནོར་བུ་ཟླ་བ་ཆུ་ཤེལ་གྱི་བུམ་པ་དང་། སྐུད་པ་དང་བཅས་པའི་ཁབ་དང་། རྨ་བྱའི་མཇུག་སྒྲོ་དང་། དུག་གི་མེ་ཏོག་གི་ཆུན་པོ་དང་། པདྨ་དམར་པོ་ [48a.6]ལ་གནས་པའི་མི་ཟད་པའི་གཏེར་ཆེན་པོའི་བུམ་པ་དང་། རིལ་པ་སྤྱི་བླུགས་ལ་ཕྲེང་བ་དཔྱངས་པ་དང་། ཨུཏྤལ་སྔོན་པོ་ལ་གནས་པའི་རལ་གྲི་དང་། རྡོ་རྗེ་རྩེ་གསུམ་པས་མཚན་པའི་པདྨ་དཀར་དམར་དང་། རིན་པོ་ཆེའི་ཟ་མ་ཏོག་དང་། པདྨ་ལ་གནས་པའི་རིན་པོ་ཆེ་སྣ་ཚོགས་པའི་དཔེ་སྒྲོ་མ་མོ། །ཤར་ལ་ [48a.7]སོགས་པའི་སྒོར་ཆུ་སྐྱེས་དང་། ཉི་མ་རྣམས་ལ་ཆོས་སོ་སོ་ཡང་དག་པར་རིག་པ་དང་དོན་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པ་རྣམས་ཀྱི་རྡོ་རྗེ་དང་ལྕགས་ཀྱུ་དང་། རིན་པོ་ཆེའི་ཞགས་པ་དང་། མཐའ་གཉིས་སུ་པདྨས་ [48b] [48b.1]མཚན་པའི་ལྕགས་སྒྲོག་དང་། རྡོ་རྗེ་རྩེ་གསུམ་པས་མཚན་པའི་དྲིལ་བུའོ། །མེ་ལ་སོགས་པའི་མཚམས་སུ་སྒེག་མོ་དང་། ཕྲེང་བ་མ་དང་། གླུ་མ་དང་། གར་མ་རྣམས་ཀྱི་རྡོ་རྗེ་དང་། རིན་པོ་ཆེའི་ཕྲེང་བ་དང་། པི་ཝང་དང་། རྡོ་རྗེའོ། །དཀྱིལ་འཁོར་གསུམ་པར་པདྨ་དང་ཟླ་བ་རྣམས་ལ་ཤར་ཕྱོགས་ [48b.2]སུ་ཀུན་དུ་བཟང་པོའི་ཨུཏྤལ་ལ་ལ་གནས་པའི་རལ་གྲི་དང་། བློ་གྲོས་མི་ཟད་པའི་རལ་གྲི་དང་། སའི་སྙིང་པོའི་པདྨ་ལ་གནས་པའི་དཔག་བསམ་གྱི་ཤིང་དང་། ནམ་མཁའི་སྙིང་པོའི་རིན་པོ་ཆེའོ། །ལྷོ་ཕྱོགས་སུ་ནམ་མཁའ་མཛོད་ཀྱི་ཡིད་བཞིན་གྱི་ནོར་བུ་དང་། ཕྱག་ན་རིན་ཆེན་གྱི་རིན་པོ་ཆེ་དང་། [48b.3]བློ་གྲོས་རྒྱ་མཚོའི་དུང་དང་། རྡོ་རྗེ་སྙིང་པོའི་རྡོ་རྗེའོ། །ནུབ་ཏུ་སྤྱན་རས་གཟིགས་དབང་ཕྱུག་གི་པདྨ་དང་། མཐུ་ཆེན་ཐོབ་ཀྱི་རལ་གྲི་དང་། ཟླ་འོད་ཀྱི་རྡོ་རྗེ་དང་བཅས་པའི་འཁོར་ལོ་དང་། དྲ་བ་ཅན་གྱི་འོད་ཀྱི་རལ་གྲིའོ། །བྱང་དུ་པདྨ་དང་ཟླ་བ་རྣམས་ལ་འོད་དཔག་མེད་དང་། སྤོབས་པ་བརྩེགས་པ་ [48b.4]དང་། མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་དང་། སྒྲིབ་པ་ཐམས་ཅད་རྣམ་པར་སེལ་བ་རྣམས་ཀྱི་སྣ་ཚོགས་པདྨ་དང་། པདྨ་ལ་གནས་པའི་རལ་གྲི་དང་། རྡོ་རྗེ་རྩེ་ལྔ་པ་དང་། རལ་གྲིའོ། །ཤར་ལ་སོགས་པའི་སྒོར་པདྨ་དང་། ཉི་མ་རྣམས་ལ་གཤིན་རྗེ་མཐར་བྱེད་ [48b.5]དང་། ཤེས་རབ་མཐར་བྱེད་དང་། པདྨ་མཐར་བྱེད་དང་། བགེགས་མཐར་བྱེད་རྣམས་ཀྱི་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་རྣམས་སོ། །དབང་ལྡན་ལ་སོགས་པའི་མཚམས་སུ་སྣ་ཚོགས་ཆུ་སྐྱེས་དང་ཉི་མ་རྣམས་ལ་འཇིག་རྟེན་གསུམ་ལས་རྣམ་པར་ [48b.6]རྒྱལ་བ་དང་། རྡོ་རྗེ་ཉི་མ་མེ་ལྟར་འབར་བ་དང་། ཧེ་རུ་ཀ་རྡོ་རྗེ་དང་། རྟ་མཆོག་རྣམས་ཀྱི་རལ་གྲི་དང་། རྡོ་རྗེ་དང་། རྡོ་རྗེ་རྩེ་ལྔ་པ་དང་། སྣ་ཚོགས་རྡོ་རྗེ་རྣམས་སོ། །གཤིན་རྗེ་མཐར་བྱེད་ཀྱི་མཚན་མའི་ཕྱིར་གཙུག་ཏོར་འཁོར་ལོས་སྒྱུར་བའི་འཁོར་ལོ་སེར་པོའོ། །པདྨ་མཐར་བྱེད་ཀྱི་ [48b.7]མཚན་མའི་ཕྱིར་གནོད་མཛེས་ཀྱི་རྡོ་རྗེའོ། །འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པའི་མཚན་མ་བཞིའི་ཕྱི་ངོས་སུ་དཀྱིལ་འཁོར་གསུམ་པ་ཁོ་ནའི་ཟུར་གྱི་ནང་དུ་རེ་ཁཱ་བྱའོ། །དེའི་ཕྱི་ངོས་ཀྱི་གནས་ཀྱི་མེ་ལ་སོགས་པའི་ཟུར་ཐིག་རྣམས་ཀྱི་གཡས་ལོགས་སུ་གནས་པའི་ [49a] [49a.1]པདྨ་དང་ཟླ་བ་རྣམས་ལ་མེ་ཏོག་མ་དང་། བདུག་སྤོས་མ་དང་། མར་མེ་མ་དང་། དྲི་ཆབ་མ་རྣམས་ཀྱི་མེ་ཏོག་གི་སྣོད་དང་། སྤོས་ཕོར་དང་། རིན་པོ་ཆེའི་སྒྲོན་མའི་མཆོད་སྡོང་དང་དུང་ངོ་། །གཡོན་ལོགས་སུ་གནས་པའི་པདྨ་དང་ཟླ་བ་རྣམས་ལ་རྡོ་རྗེ་གཟུགས་མ་དང་། རྡོ་རྗེ་སྒྲ་མ་ [49a.2]མ་དང་། རྡོ་རྗེ་རོ་མ་དང་། རྡོ་རྗེ་རེག་བྱ་མ་རྣམས་ཀྱི་མེ་ལོང་དང་། པི་ཝང་དང་། རོའི་སྣོད་དང་། གོས་སྣ་ཚོགས་སོ། །ཕྱི་རོལ་རྡོ་རྗེའི་རིགས་ཀྱི་དཀྱིལ་འཁོར་ལ་པདྨ་རྣམས་ལ་ཤར་ལ་སོགས་པའི་ཕྱོགས་སུ་དབང་པོ་དང་། གཤིན་རྗེ་དང་། ཆུ་བདག་དང་། ལུས་ངན་པོ་རྣམས་ཀྱི་རྡོ་རྗེ་དང་། [49a.3]དབྱུག་པ་དང་། ཀླུའི་ཞགས་པ་དང་། ལྕགས་ཀྱུའོ། །དབང་ལྡན་ལ་སོགས་པའི་མཚམས་སུ་དབང་ལྡན་དང་། མེ་ལྷ་དང་། སྲིན་པོའི་བདག་པོ་དང་། རླུང་ལྷ་རྣམས་ཀྱི་རྩེ་གསུམ་པ་དང་། བླུགས་གཟར་དང་། རལ་གྲི་དང་། རླུང་རས་སོ། །དེ་ནས་དབང་ལྡན་གྱི་ཕྱི་ངོས་དང་ཉེ་བར་ [49a.4]དབང་ལྡན་གྱི་མཚམས་ནས་བརྩམས་ཏེ། མཚན་མ་རྣམས་རིམ་གྱིས་བྲི་བར་བྱའོ། །དེ་ལ་ཚངས་པའི་བགྲང་ཕྲེང་ངོ་། །ཁྱབ་འཇུག་གི་འཁོར་ལོའོ། །དབང་ཕྱུག་ཆེན་པོའི་རྩེ་གསུམ་པ་དང་། གདོང་དྲུག་གི་ཤག་ཏི་དང་། ཚངས་མོའི་ཕྲེང་བ་དང་། དྲག་མོའི་རྩེ་གསུམ་དང་། ཁྱབ་འཇུག་མའི་འཁོར་ [49a.5]ལོ་དང་། གཞོན་ནུ་མའི་ཤཀྟི་དང་། དབང་མོའི་རྡོ་རྗེ་དང་། ཕག་མོའི་ཉ་རོ་ཧི་ཏ་དང་། ཙ་མུཎྜིའི་གྲི་གུག་དང་། བྷྲྀངྒི་རི་ཏིའི་ཕྲེང་བ་དང་། ཚོགས་བདག་གི་དགྲ་སྟ་དང་། ནག་པོ་ཆེན་པོའི་རྩེ་གསུམ་དང་། དགའ་བྱེད་དབང་ཕྱུག་གི་རྫ་རྔ་དང་། ཉི་མའི་པདྨ་ལ་གནས་པའི་དཀྱིལ་འཁོར་དང་། ཟླ་བའི་ [49a.6]ཀུནྡ་ལ་གནས་པའི་དཀྱིལ་འཁོར་དང་། མིག་དམར་གྱི་གྲི་གུག་དང་། ལྷག་པའི་མདའ་དང་། ཕུར་བུའི་ཕྲེང་བ་དང་། པ་ཝ་སངས་ཀྱི་ཕྲེང་བ་དང་། སྤེན་པའི་དབྱུག་པ་ནག་པོ་དང་། སྒྲ་གཅན་གྱི་ཟླ་བ་དང་། མཇུག་རིངས་ཀྱི་ཀླུའི་ཞགས་པ་དང་། སྟོབས་བཟངས་ཀྱི་གཤོལ་དང་། རྒྱལ་བར་བྱེད་པའི་ [49a.7]མེ་ཏོག་གི་ཕྲེང་བ་དང་། སྦྲང་རྩིར་བྱེད་པའི་ཆུ་སྲིན་གྱི་རྒྱལ་མཚན་དང་། དཔྱིད་ཀྱི་ཟླ་དང་། མཐའ་ཡས་དང་། ནོར་རྒྱས་དང་། འཇོག་པོ་དང་། སྟོབས་ཀྱི་རྒྱུ་དང་། པདྨ་དང་། པདྨ་ཆེན་པོ་དང་། དུང་སྐྱོང་དང་། རིགས་ལྡན་རྣམས་ཀྱིས་ཐལ་མོ་སྦྱར་བའམ། ཡང་ན་རང་རང་གི་ཕའི་མཚན་མ་དང་འདྲ་ [49b] [49b.1]བའི་མཚན་མའོ། །དེ་ལ་མཐའ་ཡས་དང་རིགས་ལྡན་ནི་བྲམ་ཟེ་སྟེ་མེ་ལྷའི་བུའོ། །ནོར་རྒྱས་དང་དུང་སྐྱོང་ནི་རྒྱལ་རིགས་ཏེ་དབང་པོའིའོ། །འཇོག་པོ་དང་པདྨ་ཆེན་པོ་ནི་རྗེའུའི་རིགས་ཏེ་རླུང་ལྷའོ། །སྟོབས་ཀྱི་རྒྱུ་དང་པདྨ་ནི་དམངས་རིགས་ཏེ་ཆུ་ལྷའིའོ། །ཐགས་བཟངས་རིས་དང་། སྟོབས་ལྡན་ [49b.2]དང་། རབ་ཏུ་ཚིམ་བྱེད་དང་། རྣམ་པར་སྣང་བྱེད་ལ་སོགས་པ་ལྷ་མ་ཡིན་གྱི་དབང་ཕྱུག་ཆེན་པོ་རྣམས་ཀྱི་རལ་གྲིལ་སོགས་པའི་མཚོན་ཆ་སྣ་ཚོགས་པའོ། །ནམ་མཁའ་ལྡིང་གི་དབང་པོའི་ཐལ་མོ་སྦྱར་བའོ། །མིའམ་ཅིའི་རྒྱལ་པོ་ལྗོན་པའི་པི་ཝང་ངོ་། དྲི་ཟའི་རྒྱལ་པོ་ཟུར་ཕུད་ལྔ་པའི་པི་ [49b.3]ཝང་ངོ་། །རིག་པ་འཛིན་པའི་རྒྱལ་པོ་དོན་ཀུན་གྲུབ་པའི་མེ་ཏོག་གི་ཕྲེང་བའོ། །གང་བ་བཟང་པོ་དང་། ནོར་བུ་བཟང་པོ་དང་། ནོར་སྦྱིན་དང་། རྣམ་ཐོས་ཀྱི་བུ་དང་། ཙི་པི་ཀུཎྜ་ལི་དང་། ཀི་ལི་མི་ལི་དང་། སྒོའི་དབང་པོ་དང་། སྤྱོད་པའི་དབང་པོ་སྟེ། གནོད་སྦྱིན་གྱི་དབང་པོ་རྣམས་ཀྱི་ཤིང་ཐོག་ [49b.4]བི་ཛ་པཱུ་ར་རྣམས་སོ། །འཕྲོག་མའི་ཆང་བུ་གཉིས་སོ། །ཐ་སྐར་དང་། བྲ་ཉེ་དང་། སྨིན་དྲུག་དང་། སྣར་མ་དང་། མགོ་དང་། ལག་དང་། ནམ་སོ་དང་། རྒྱལ་དང་སྐག་དང་། མཆུ་དང་། གྲེ་དང་། དབོ་དང་། མེ་བཞི་དང་། ནག་པ་དང་། ས་རི་དང་། ས་ག་དང་། ལྷ་མཚམས་དང་། [49b.5]སྣྲོན་དང་། སྣྲུབས་དང་། ཆུ་སྟོད་དང་། ཆུ་སྨད་དང་། གྲོ་བཞིན་དང་། མོན་གྲེ་དང་། མོན་གྲུ་དང་། ཁྲུམས་སྟོད་དང་། ཁྲུམས་སྨད་དང་། ནམ་གྲུ་དང་། བྱི་བཞིན་རྣམས་ཀྱི་ནི་ལག་པ་ཐལ་མོ་སྦྱར་བའི་ཕྱག་རྒྱ་རྣམས་སོ། །འདིར་ཡང་སྒོ་རྣམས་སུ་རྡོ་རྗེ་ལྕགས་ཀྱུ་ལ་སོགས་པའོ། །དཀྱིལ་འཁོར་ [49b.6]བཞི་པ་ལ་བུམ་པ་རྣམས་སོ། །ངན་སོང་ཡོངས་སུ་སྦྱོང་བའི་དཀྱིལ་འཁོར་ལ་རྡོ་རྗེ་ཕྲེང་བ་སྔོན་པོའི་ནང་དུ་འཁོར་ལོ་རྩིབས་བརྒྱད་སེར་པོའི་དབུས་སུ་ཆོས་ཀྱི་འཁོར་ལོའི་ཕྱག་རྒྱ་སེར་པོའོ། །ཤར་ལ་སོགས་པའི་རྩིབས་རྣམས་ལས་གནོན་གྱི་ཕྱག་རྒྱ་དཀར་པོ་དང་། མཆོག་སྦྱིན་གྱི་ཕྱག་རྒྱ་སྔོན་པོ་ [49b.7]དང་། བསམ་གཏན་གྱི་ཕྱག་རྒྱ་དམར་པོ་དང་། མི་འཇིགས་པའི་ཕྱག་རྒྱ་ལྗང་གུ་རྣམས་སོ། །མེ་ལ་སོགས་པའི་རྩིབས་རྣམས་ལ་ཉི་མ་དང་ཡིད་བཞིན་ནོར་བུའི་རྒྱལ་མཚན་དང་། རལ་གྲི་དང་། གདུགས་སོ། །རྡོ་རྗེ་ཕྲེང་བའི་ཕྱིའི་མེ་ལ་སོགས་པའི་མཚམས་རྣམས་སུ་སྒེག་མོ་ལ་སོགས་པའི་ [50a] [50a.1]མཚན་མའོ། །ཤར་ལ་སོགས་པའི་སྣམ་བུ་རྣམས་ལ་སྒོའི་གཡོན་དུ་མཚན་མ་གཉིས་ཏེ། གཡས་སུ་ཡང་ངོ་། །དེར་ཀླུ་ཤིང་གི་མེ་ཏོག་དང་། སྤྱན་དང་བཅས་པའི་ཆུ་སྐྱེས་དང་། ལྕགས་ཀྱུ་དང་། དབྱུག་པ་དང་། དུང་དང་། རལ་གྲི་དང་། པདྨ་ལ་གནས་པའི་ཆོས་ཀྱི་ [50a.2]སྒྲོ་མ་དང་། ཡིད་བཞིན་གྱི་ནོར་བུའི་རྒྱལ་མཚན་དང་། བདུད་རྩིའི་བུམ་པ་དང་། པདྨ་ལ་གནས་པའི་ཟླ་བའི་གཟུགས་དང་། རིན་པོ་ཆེ་དང་། རྡོ་རྗེ་གུར་དང་། རྡོ་རྗེ་དང་བཅས་པའི་ཨུཏྤལ་དང་བདུད་རྩིའི་བུམ་པ་དང་། ཆུ་སྐྱེས་ལ་གནས་པའི་རིན་པོ་ཆེ་དང་། རིན་པོ་ཆེའི་སྙེ་མའོ། །མེ་ལ་སོགས་ [50a.3]པའི་མཚམས་རྣམས་ལ་མེ་ཏོག་ལ་སོགས་པའི་མཚན་མ་རྣམས་སོ། །སྒོ་རྣམས་ལ་རྡོ་རྗེ་ལྕགས་ཀྱུ་ལ་སོགས་པ་རྣམས་སོ། །མཚན་མ་སུམ་ཅུ་རྩ་བདུན་པོ་རྣམས་སྣ་ཚོགས་པདྨ་དང་ཟླ་བ་ལ་གནས་པའོ། །མགྲིན་པ་སྔོན་པོ་ལ་སོགས་པ་རྣམས་ཀྱི་མཚན་མ་ནི་མི་བྲི་བ་ཡང་ངོ་། །འབྱུང་པོ་འདུལ་བྱེད་ཀྱི་ [50a.4]དཀྱིལ་འཁོར་ལ་རྩིག་པ་ལྔ་དང་། ཤར་ལ་སོགས་པའི་ས་ནི་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོའོ། །ཐིག་གི་རེ་ཁཱ་གསུམ་ནི་དཀར་པོ་དང་། དམར་པོ་དང་། ནག་པོའོ། །ཐིག་གི་རེ་ཁཱ་གཅིག་དང་། རྡོ་རྗེ་ཕྲེང་བའི་རེ་ཁཱ་གཉིས་ནི་ནག་པོའོ། །ནང་གི་ཕོ་བྲང་གི་དབུས་ཀྱི་ [50a.5]རེ་མིག་ལ་སྣ་ཚོགས་པདྨ་དང་ཟླ་བ་ལ་བཅོམ་ལྡན་འདས་འབྱུང་པོ་འདུལ་བྱེད་ཀྱི་རྡོ་རྗེ་རྩེ་ལྔ་པ་སྔོན་པོའོ། །ཤར་དུ་ཉི་མ་ལ་དབང་ཕྱུག་ཆེན་པོའི་རྩེ་གསུམ་པའོ། །ལྷོར་ཉི་མ་ལ་ཁྱབ་འཇུག་གི་འཁོར་ལོའོ། །ནུབ་ཏུ་ཟླ་བ་ལ་ཚངས་པའི་ཕྲེང་བའོ། །བྱང་དུ་ཉི་མ་ལ་སྨིན་དྲུག་གི་བུའི་ཤཀྟིའོ། །དབང་ལྡན་ [50a.6]དུ་ཟླ་བ་ལ་ཚོགས་བདག་གི་དགྲ་སྟའོ། །མེར་ཉི་མ་ལ་ཉི་མའི་པདྨ་ལ་གནས་པའི་ཉི་མའི་དཀྱིལ་འཁོར་རོ། །བདེན་བྲལ་དུ་ཉི་མ་ལ་སྒྲ་གཅན་གྱི་ཟླ་བའི་དཀྱིལ་འཁོར་རོ། །རླུང་དུ་ཟླ་བ་ལ་དགའ་བྱེད་དབང་ཕྱུག་གི་ཅང་ཏེའུའོ། །རིམ་པ་གཉིས་པར་ཤར་ལ་སོགས་པའི་ཕྱོགས་རྣམས་སུ་དབང་མོ་དང་། [50a.7]ཐིག་ལེ་མཆོག་མ་དང་། ཟླ་བ་མོ་དང་། དཀའ་བཟློག་མ་རྣམས་ཀྱི་ཟླ་བ་ལ་པདྨ་དཀར་པོ་དང་། སྤོས་ཕོར་དང་། མར་མེའི་མཆོད་སྡོང་དང་། གདེངས་ཀའི་རྣམ་པའི་ལག་པའོ། །མེ་ལ་སོགས་པར་རིན་ཆེན་དཔལ་མོ་དང་། དབྱངས་ཅན་མ་དང་། ལྷ་མཛེས་མ་དང་། ཀུན་དུ་འབྱོར་པ་རྣམས་ཀྱི་ཟླ་བ་ [50b] [50b.1]རྣམས་ལ་རིམ་པ་བཞིན་དུ་དྲིའི་དུང་ཆོས་དང་། པི་ཝང་དང་། རིན་པོ་ཆེའི་ཕྲེང་བ་དང་། རྡོ་རྗེ་རྩེ་གསུམ་པའོ། །རིམ་པ་གསུམ་པར་ཤར་ལ་སོགས་པའི་ཕྱོགས་སུ་དབང་པོ་དང་། གཤིན་རྗེ་དང་། ཆུ་བདག་དང་། ལུས་ངན་རྣམས་ཀྱི་ཟླ་བ་ལ་གནས་པའི་རྡོ་རྗེ་དང་། ཉི་མ་ལ་གནས་པའི་ཐོད་པས་ [50b.2]མཚན་པའི་དབྱུག་པ་དང་། ཟླ་བ་ལ་གནས་པའི་ཀླུའི་ཞགས་པ་དང་། ཟླ་བ་ལ་གནས་པའི་དབྱུག་ཏོའོ། །མེ་ལ་སོགས་པའི་མཚམས་སུ་མེ་ལྷ་དང་། བདེན་བྲལ་དང་། རླུང་ལྷ་དང་། ཟླ་བ་རྣམས་ཀྱི་ཉི་མ་ལ་གནས་པའི་ཕྲེང་བ་དང་། ཉི་མ་ལ་གནས་པའི་རལ་གྲི་དང་། ཟླ་བ་ལ་གནས་པའི་ [50b.3]རླུང་རས་དང་། ཟླ་བ་དང་ཀུ་མུ་ད་ལ་གནས་པའི་ཟླ་བའི་དཀྱིལ་འཁོར་རོ། །ཟླ་བའི་མཚན་མ་དང་ཉེ་བར་དབང་ལྡན་གྱི་ཉི་མ་ལ་རྩེ་གསུམ་མོ། །རིམ་པ་བཞི་པར་ཤར་ལ་སོགས་པའི་ཕྱོགས་སུ་སེང་གེའི་རྒྱལ་མཚན་འཛིན་མ་དང་། རྣམ་རྒྱལ་མ་དང་། པད་ཆེན་མ་དང་། ཆང་འཕྲོག་མ་རྣམས་ཀྱི་ [50b.4]ཟླ་བ་ལ་སེང་གེའི་རྒྱལ་མཚན་དང་། ལྕགས་ཀྱུ་དང་། མདའ་དང་། ཡིད་བཞིན་གྱི་ནོར་བུའོ། །དབང་ལྡན་ལ་སོགས་པར་མཆོག་འཕྲོག་མ་དང་། རིན་ཆེན་དབང་ཕྱུག་མ་དང་། རྒྱལ་མ་དང་། འགྲོ་སྐྱོང་མ་རྣམས་ཀྱི་ཟླ་བ་ལ་མེ་ཏོག་གི་སྣོད་དང་། སྤོས་ཕོར་དང་། དྲིའི་དུང་ཆོས་དང་། མར་ [50b.5]མེའི་མཆོད་སྡོང་ངོ་། །འདིར་ཉི་མ་དང་། ཟླ་བ་ཐམས་ཅད་ནི་སྣ་ཚོགས་པདྨ་ལ་གནས་པའོ། །རིམ་པ་བཞི་པར་བུམ་པ་རྣམས་སོ། །མཁའ་འགྲོ་མའི་དཀྱིལ་འཁོར་ལ་དབུས་ཀྱི་གཞལ་ཡས་ཁང་གི་དབུས་སུ་ཤེས་རབ་དང་བཅས་པའི་ཀྱེའི་རྡོ་རྗེའི་གྲི་གུག་དང་ཐོད་པའོ། །ཤར་ལ་སོགས་ [50b.6]པའི་སྒོར་དཀར་མོ་དང་། ཆོམ་རྐུན་མ་དང་། རོ་ལངས་མ་དང་། ཟ་ཕོད་མ་རྣམས་ཀྱི་རྡོ་རྗེ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་རྣམས་སོ། །དབང་ལྡན་ལ་སོགས་པའི་མཚམས་རྣམས་སུ་སྤོས་མོ་དང་། རི་ཁྲོད་མ་དང་། གཏུམ་མོ་དང་། གཡུང་མོ་རྣམས་ཀྱི་བྱང་ཆུབ་ [50b.7]སེམས་ཀྱི་བུམ་པ་དང་། རི་རབ་དང་། མེ་ཁབ་དང་། རྒྱལ་མཚན་ཆེན་པོའི་བ་དན་ནོ། །དེ་ལས་ཤར་གྱི་གཞལ་ཡས་ཁང་གི་དབུས་སུ་རྟག་པའི་ཐོད་པ་ལ་གནས་པའི་རྨ་བྱའོ། །ཤར་ལ་སོགས་པའི་སྒོར་སྐམ་པ་མོ་དང་། ཞགས་པ་མ་དང་། ངོ་ཟླུམ་མ་དང་། ལྕགས་ཀྱུ་འཛིན་མ་རྣམས་ཀྱི་སྐམ་ [51a] [51a.1]པ་དང་། ཞགས་པ་དང་། ཉ་རྒྱ་ཟླུམ་པོ་དང་། ལྕགས་ཀྱུའོ། །དབང་ལྡན་ལ་སོགས་པར་མེ་ཏོག་མ་དང་། བདུག་སྤོས་མ་དང་། མར་མེ་མ་དང་། དྲི་ཆབ་མ་རྣམས་ཀྱི་མེ་ཏོག་གི་སྣོད་དང་། སྤོས་ཕོར་དང་། མར་མེའི་མཆོད་སྡོང་དང་། དྲི་སེར་པོས་གང་བའི་དུང་ངོ་། །ལྷོའི་གཞལ་ [51a.2]ཡས་ཁང་གི་དབུས་སུ་རྡོ་རྗེ་ཉི་མའི་ཐོད་པ་ལ་གནས་པའི་བྱ་ཀ་རཎྜ་དང་། ཤར་ལ་སོགས་པའི་སྒོར་ཉི་ལག་མ་དང་། མར་མེ་མ་དང་། རིན་ཆེན་སྐར་མདའ་མ་དང་། ཕྱག་ན་གློག་ཐོགས་མ་རྣམས་ཀྱི་ཉི་མའི་དཀྱིལ་འཁོར་དང་། མར་མེའི་མཆོད་སྡོང་དང་། རིན་པོ་ཆེ་དང་། གློག་གི་ཕྲེང་བའོ། །དབང་ [51a.3]ལྡན་ལ་སོགས་པར་སྒེག་མོ་དང་། ཕྲེང་བ་མ་དང་། གླུ་མ་དང་། གར་མ་རྣམས་ཀྱི་རྡོ་རྗེ་དང་། རིན་པོ་ཆེའི་ཕྲེང་བ་དང་། ཁར་རྔ་དང་། རྡོ་རྗེའོ། །ནུབ་ཀྱི་གཞལ་ཡས་ཁང་གི་དབུས་སུ་པདྨ་གར་གྱི་དབང་ཕྱུག་གི་ཐོད་པ་ལ་གནས་པའི་དོམ་དང་ཤར་ལ་སོགས་པའི་སྒོར་པདྨ་དང་། ཆོས་འབྱུང་མ་དང་། [51a.4]སྒྲོག་མ་དང་། རང་འཁྱུད་མ་རྣམས་ཀྱི་པདྨ་དང་། ཆོས་འབྱུང་དང་། སྒྲོག་དང་། རྡོ་རྗེའོ། །དབང་ལྡན་ལ་སོགས་པར་གླིང་བུ་མ་དང་། པི་ཝང་མ་དང་། རྔ་མུ་ཀུཎྜ་མ་དང་། རྫ་རྔ་མ་རྣམས་ཀྱི་རང་རང་གི་རོལ་ཆ་རྣམས་སོ། །བྱང་གི་གཞལ་ཡས་ཁང་གི་དབུས་སུ་རྟ་མཆོག་གི་ཐོད་པ་ལ་གནས་པའི་གཟའ་ [51a.5]ལྷག་དང་། ཤར་ལ་སོགས་པའི་སྒོར་སྒོ་ལྕགས་མ་དང་། ལྡེ་ཀྱོག་མ་དང་། སྒོ་གླེགས་མ་དང་། ཡོལ་བ་འཛིན་མ་རྣམས་ཀྱི་སྒོ་ལྕགས་དང་། ལྡེ་ཀྱོག་དང་། སྒོ་གླེགས་དང་། ཡོལ་བའོ། །དབང་ལྡན་ལ་སོགས་པར་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་རྣམས་ཀྱི་འཁོར་ལོ་ [51a.6]དང་། རྡོ་རྗེ་དང་། པདྨ་དང་། ཨུཏྤལའོ། །ཕྱིའི་དཀྱིལ་འཁོར་ཆེན་པོའི་སྒོ་རྣམས་སུ་དཀར་མོ་ལ་སོགས་པའི་མཚན་མ་རྣམས་དང་། དབང་ལྡན་ལ་སོགས་པར་སྤོས་མོ་ལ་སོགས་པའི་མཚན་མ་རྣམས་སོ། །མཚན་མ་འདི་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའི་རྟག་པ་ཁོ་ནའི་ཟླ་བ་ལ་གནས་ [51a.7]པའོ། །དཀྱིལ་འཁོར་སོ་སོ་ལ་བདུད་རྩིའི་བུམ་པ་རྣམས་སོ། །ཁ་ཅིག་ནི་དཀྱིལ་འཁོར་ཆེན་པོ་ཁོ་ན་ལའོ་ཞེས་སོ། །འཁོར་ལོས་སྒྱུར་བ་དྲུག་གི་དཀྱིལ་འཁོར་ལ་མཚན་མ་རྣམས་སྣ་ཚོགས་པདྨ་དང་ཉི་མ་ལ་གནས་པ་སྟེ། སངས་རྒྱས་མཁའ་འགྲོ་ཁོ་ནའི་ཟླ་བ་ལ་གནས་པའོ། །གཞལ་ཡས་ [51b] [51b.1]ཁང་དྲུག་པོ་རྣམས་ཀྱི་གྲྭ་རྣམས་སུ་སྣ་ཚོགས་པདྨ་ལ་གནས་པའི་ཐོད་པ་རྣམས་སོ། །དེ་ལ་དབུས་ཀྱི་དཀྱིལ་འཁོར་གྱི་དབུས་ཀྱི་པདྨ་ལ་རྡོ་རྗེ་སེམས་དཔའི་རྡོ་རྗེའོ། །མཚམས་ཀྱི་པདྨ་རྣམས་ལ་མཁའ་འགྲོ་མ་དང་། ལཱ་མཱ་དང་། དུམ་སྐྱེས་མ་དང་། གཟུགས་ཅན་མ་རྣམས་ཀྱི་ཅང་ཏེའུ་ [51b.2]རྣམས་སོ། །འདིར་དགོད་པའི་རིམ་པ་ནི་ཤར་ལ་སོགས་པའི་སྒོ་རྣམས་སུ་གཡོན་སྐོར་དང་། མེ་ལ་སོགས་པའི་མཚམས་རྣམས་སུ་གཡས་སྐོར་རོ། །སྒོའི་པདྨ་རྣམས་ལ་ཐོད་པའི་དུམ་བུ་དང་། རབ་ཏུ་གཏུམ་མོ་དག་དང་། ཀེང་རུས་ཆེན་པོ་དང་། གཏུམ་པའི་མིག་ཅན་མ་དག་དང་། ཀེང་རུས་ [51b.3]དང་། འོད་ལྡན་མ་དག་དང་། མཆེ་བ་རྣམ་པར་གཙིགས་མ་དང་། སྣ་ཆེན་མ་དག་གི་རྡོ་རྗེ་བཞིའོ། །ཁོར་ཡུག་གི་དབུས་སུ་རྡོ་རྗེའི་ཕྲེང་བའོ། །སངས་རྒྱས་མཁའ་འགྲོའི་དཀྱིལ་འཁོར་དུ་དབུས་ཀྱི་པདྨ་ལ་འཁོར་ལོ་དང་། སྒོའི་པདྨ་རྣམས་ལ་ལྷ་དགྲ་དང་། དཔའ་བོའི་བློ་ཅན་མ་དག་དང་། [51b.4]འོད་དཔག་མེད་དང་། མིའུ་ཐུང་མ་དག་དང་། རྡོ་རྗེ་འོད་དང་། ལང་ཀའི་དབང་ཕྱུག་མ་དག་དང་། རྡོ་རྗེ་ལུས་དང་། ཤིང་གྲིབ་མ་དག་གི་འཁོར་ལོ་རྣམས་སོ། །ཁོར་ཡུག་གི་དབུས་སུ་འཁོར་ལོའི་ཕྲེང་བའོ། །རིན་ཆེན་མཁའ་འགྲོའི་དཀྱིལ་འཁོར་ལ་དབུས་སུ་རིན་པོ་ཆེའོ། །སྒོའི་ [51b.5]ཆུ་སྐྱེས་རྣམས་ལ་མྱུ་གུ་ཅན་དང་། ཨེ་ར་པ་ཏི་དག་དང་། རྡོ་རྗེ་རལ་པ་ཅན་དང་། འཇིགས་བྱེད་ཆེན་མོ་དག་དང་། དཔའ་བོ་ཆེན་པོ་དང་། རླུང་ཤུགས་མ་དག་དང་། རྡོ་རྗེ་ཧཱུཾ་མཛད་དང་། ཆང་འཐུང་མ་དག་གི་རིན་པོ་ཆེ་རྣམས་སོ། །ཁོར་ཡུག་གི་དབུས་སུ་པདྨ་རིན་པོ་ཆེའི་ཕྲེང་བའོ། །པདྨ་ [51b.6]མཁའ་འགྲོའི་དཀྱིལ་འཁོར་ལ་དབུས་སུ་པདྨའོ། །སྒོའི་པདྨ་རྣམས་ལ་ཤིན་ཏུ་བཟང་པོ་དང་། ལྷ་མོ་སྔོ་བསངས་མ་དག་དང་། རྡོ་རྗེ་བཟང་པོ་དང་། ཤིན་ཏུ་བཟང་མོ་དག་དང་། འཇིགས་བྱེད་ཆེན་པོ་དང་། རྟ་རྣམ་དག་དང་། མིག་མི་བཟང་དང་། བྱ་གདོང་མ་རྣམས་ཀྱི་པདྨ་རྣམས་སོ། ། [51b.7]ཁོར་ཡུག་གི་དབུས་སུ་པདྨའི་ཕྲེང་བའོ། །རྡོ་རྗེ་མཁའ་འགྲོའི་དཀྱིལ་འཁོར་ལ་དབུས་སུ་སྣ་ཚོགས་རྡོ་རྗེའོ། །སྒོའི་པདྨ་རྣམས་ལ་སྟོབས་པོ་ཆེ་དང་། འཁོར་ལོའི་ཤུགས་ཅན་མ་དག་དང་། རིན་ཆེན་རྡོ་རྗེ་དང་། དུམ་སྐྱེས་མ་དག་དང་། རྟ་མགྲིན་དང་། ཆང་འཚོང་མ་དག་དང་། ནམ་ [52a] [52a.1]མཁའི་སྙིང་པོ་དང་། འཁོར་ལོའི་གོ་ཆ་མ་དག་གི་རྡོ་རྗེ་རྣམས་སོ། །ཁོར་ཡུག་གི་དབུས་སུ་རྡོ་རྗེའི་ཕྲེང་བའོ། །སྣ་ཚོགས་མཁའ་འགྲོའི་དཀྱིལ་འཁོར་ལ་དབུས་སུ་སྣ་ཚོགས་རྡོ་རྗེའོ། །སྒོའི་པདྨ་རྣམས་ལ་ཧེ་རུ་ཀ་དང་ཤིན་ཏུ་དཔའ་མོ་དག་དང་། པདྨ་གར་གྱི་དབང་ [52a.2]ཕྱུག་དང་། སྟོབས་ཆེན་མོ་དག་དང་། རྣམ་པར་སྣང་མཛད་དང་། འཁོར་ལོས་སྒྱུར་མ་དག་དང་། རྡོ་རྗེ་སེམས་དཔའ་དང་། བརྩོན་འགྲུས་ཆེན་མོ་དག་གི་སྣ་ཚོགས་རྡོ་རྗེ་རྣམས་སོ། །ཁོར་ཡུག་གི་དབུས་སུ་སྣ་ཚོགས་རྡོ་རྗེའི་ཕྲེང་བའོ། །གཞལ་ཡས་ཁང་ཆེན་པོའི་སྒོ་རྣམས་ལ་ཁྭ་གདོང་ [52a.3]མ་དང་། འུག་གདོང་མ་དང་། ཁྱི་གདོང་མ་དང་། ཕག་གདོང་མ་རྣམས་ཀྱི་རྡོ་རྗེ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུའོ། །མཚམས་རྣམས་སུ་གཤིན་རྗེ་བརྟན་མ་དང་། གཤིན་རྗེ་ཕོ་ཉ་མ་དང་། གཤིན་རྗེ་མཆེ་བ་མ་དང་། གཤིན་རྗེ་འཇོམས་མ་རྣམས་ཀྱི་མེ་ལོང་ [52a.4]དང་། པི་ཝང་དང་། དྲིའི་དུང་དང་། རོའི་སྣོད་རྣམས་སོ། །བུམ་པ་རྣམས་ནི་ཇི་ལྟར་རིགས་པར་རོ། །དེ་ལྟར་བརྗོད་པའི་རྗེས་སུ་འབྲངས་ཏེ་དཀྱིལ་འཁོར་གཞན་རྣམས་ལ་རྡུལ་ཚོན་དགྱེ་པ་ཡང་ཤེས་པར་བྱ་སྟེ། གཞུང་མངས་པས་འཇིགས་པས་མ་བསྟན་ཏོ། །དུས་ཀྱི་འཁོར་ལོའི་དཀྱིལ་ [52a.5]འཁོར་ལ་ནི་ཚོན་གྱི་ཁ་དོག་གི་རིམ་པ་བཤད་པ་དག་དང་ཕལ་ཆེར་མི་མཐུན་པས། རྡུལ་ཚོན་གྱི་ཁ་དོག་གི་རིམ་པ་བརྗོད་པར་བྱའོ། །ཐུགས་ཀྱི་དཀྱིལ་འཁོར་གྱི་རྡོ་རྗེའི་ཕྲེང་བ་གཉིས་པའི་བར་གྱི་ནང་གིས་ཐམས་ཅད་ནི་ནག་པོའོ། །ཐུགས་དང་། གསུང་དང་སྐུའི་དཀྱིལ་འཁོར་རྣམས་ཀྱི་ [52a.6]ཤར་གྱིས་ཐམས་ཅད་ནི་ནག་པོའོ། །ལྷོ་ནི་དམར་པོའོ། །ནུབ་ནི་སེར་པོའོ། །བྱང་དུ་ནི་དཀར་པོའོ། །སྟེགས་བུ་ནི་དཀར་པོའོ། །རིན་ཆེན་སྣམ་བུ་ནི་དམར་པོ་སྟེ། དེ་ལ་རིན་པོ་ཆེ་སྣ་ཚོགས་པས་སྤྲས་པའོ། །དྲ་བ་དང་དྲ་བ་ཕྱེད་པའི་ས་ནི་ནག་པོ་སྟེ། དེ་ལ་དྲ་བ་དང་དྲ་བ་ཕྱེད་པ་ནི་དཀར་པོའོ། ། [52a.7]ས་ནག་པོ་ལ་རིན་ཆེན་ཤར་བུ་དཀར་པོའོ། །ས་ནག་པོ་ལ་མདའ་ཡབ་རྣམས་སེར་པོའོ། །རྟ་བབས་ཀྱི་ཀ་བ་རྣམས་སེར་པོའོ། །ཐུགས་ཀྱི་དཀྱིལ་འཁོར་ལ་ནི་གཙོ་བོའི་པདྨ་ལྗང་གུའོ། །ཞི་བ་ལ་སོགས་པ་ལ་ནི་ཁ་དོག་དཀར་པོ་ལ་སོགས་པར་འགྱུར་རོ། །རྡོ་རྗེ་ཕྲེང་བ་དང་། ཀ་བ་བཅུ་དྲུག་ [52b] [52b.1]ནི་ནག་པོ་སྟེ། ཤར་དུ་རལ་གྲི་ནག་པོ་དང་། ལྷོར་རིན་པོ་ཆེ་དམར་པོ་དང་། ནུབ་དུ་འཁོར་ལོ་སེར་པོ་དང་། བྱང་དུ་པདྨ་དཀར་པོ་རྣམས་དང་ལྡན་པའོ། །བུམ་པ་བརྒྱད་ནི་པདྨ་ལ་གནས་ཤིང་དཀར་པོ་སྟེ། པདྨས་ཁ་བརྒྱན་པའོ། །ཐམས་ཅད་དུ་པདྨའི་གདན་གྱི་སུམ་ཆ་ནི་ལྟེ་བའོ། །རྡོ་རྗེ་ [52b.2]ཕྲེང་བ་གཉིས་པ་ནི་ལྗང་གུའོ། །ལྷ་སྣམ་ནི་དཀར་པོའོ། །རྩིག་པའི་རེ་ཁཱ་གསུམ་ནི་ནང་ནས་བརྩམས་ནས་དཀར་པོ་དང་། དམར་པོ་དང་ནག་པོའོ། །དེ་རྣམས་ཀྱིས་ནི་ཆ་དགུར་བྱས་ཏེ། དེ་ལ་ཆ་རེ་དོར་ནས་ཆ་གཉིས་ལ་རེ་ཁཱ་སོ་སོ་བྱའོ། །སྒོ་དང་སྒོ་ཁྱུད་ཀྱི་མཚམས་སུ་རྡོ་རྗེ་དང་རིན་པོ་ [52b.3]ཆེས་སྤྲས་པའོ། །རྟ་བབས་བཅུ་གཉིས་ནི་ཁ་དོག་སྣ་ཚོགས་པའོ། །གསུང་གི་དཀྱིལ་འཁོར་གྱི་ལྷ་སྣམ་དཀར་པོའོ། །དེའི་པདྨ་བརྒྱད་ནི་ཟླ་བ་དང་ཉི་མ་དང་བྲལ་བ་སྟེ། ཕྱོགས་རྣམས་སུ་དམར་པོ་དང་། མཚམས་རྣམས་སུ་དཀར་པོའོ། །རེ་ཁཱ་ལྔའི་ཁ་དོག་ནི་ནང་ནས་བརྩམས་ [52b.4]ཏེ་ལྗང་གུ་དང་། ནག་པོ་དང་། དམར་པོ་དང་། དཀར་པོ་དང་། སེར་པོ་རྣམས་སོ། །དེ་རྣམས་ཀྱིས་ཆ་བཅོ་ལྔར་བྱས་ཏེ་དེར་སྔ་མ་བཞིན་རེ་ཁཱ་བྱའོ། །སྐུའི་དཀྱིལ་འཁོར་གྱི་ལྷ་སྣམ་ནི་དཀར་པོའོ། །དེའི་པདྨ་རྣམས་ནི་ཟླ་བ་དང་ཉི་མ་དང་བྲལ་བའོ། །རེ་ཁཱ་ལྔ་ནི་སྐུའི་དཀྱིལ་འཁོར་བཞིན་ [52b.5]ནོ། །རྟ་བབས་ཀྱི་ཀ་བ་རྣམས་ཀྱི་འོག་གི་སྟེགས་བུའི་གནས་རྣམས་སུ་སྤྲུལ་གྱི་གདན་རྣམས་ཏེ། སོ་སོར་ཆ་ཆུང་བཅུ་གཉིས་སོ། །དེ་ལ་ཤར་གྱི་ཕྱོགས་སུ་ནག་པོ་ཟླུམ་པོ་གཉིས་ཀྱི་སྟེང་དུ་རྒྱལ་མཚན་གཉིས་སོ། །ལྷོར་གྲུ་གསུམ་དམར་པོ་གཉིས་ལ་བཀྲ་ཤིས་ཀྱིས་མཚན་པའོ། །ནུབ་ [52b.6]ཏུ་གྲ་བཞི་སེར་པོ་གཉིས་ལ་རྡོ་རྗེས་མཚན་པའོ། །བྱང་དུ་ཟླ་བ་ཕྱེད་པའི་རྣམ་པ་དཀར་པོ་གཉིས་ལ་པདྨས་མཚན་པའོ། །ཤར་གྱི་གཡས་ཀྱི་ཟླུམ་པོའི་གཡས་སུ་ཀླུའི་རྒྱལ་པོ་རྒྱལ་བ་ཞེས་པའི་བདུད་རྩིའི་བུམ་པའོ། །ནུབ་ཀྱི་གཡོན་གྱི་གྲུ་བཞི་པའི་གཡོན་དུ་རྣམ་པར་རྒྱལ་བ་ཞེས་པའི་བདུད་རྩིའི་ [52b.7]བུམ་པའོ། །ཤར་གྱི་རྟ་བབས་ཀྱི་རིམ་པ་དང་པོའི་མྱོས་པ་བསྲུང་བའི་སྟེང་གི་དབུས་ཀྱི་གྲུ་བཞི་པ་ལ་ཆོས་ཀྱི་འཁོར་ལོ་ནག་པོ། དེའི་གཡས་དང་གཡོན་དུ་རི་དྭགས་དང་རི་དྭགས་མོ་ནག་པོའོ། །ལྷོར་བུམ་པ་བཟང་པོ་དམར་པོའོ། །དེའི་གཡས་དང་གཡོན་དུ་དུང་དང་། པདྨ་དམར་པོའོ། །ནུབ་ཏུ་ [53a] [53a.1]བྱང་ཆུབ་ཀྱི་ཤིང་སེར་པོའོ། །དེའི་གཡས་དང་གཡོན་དག་ཏུ་མིའམ་ཅི་དང་མིའམ་ཅི་མོ་སེར་པོའོ། །བྱང་དུ་རྔ་བོ་ཆེ་དཀར་པོ་སྟེ་དེའི་གཡས་དང་གཡོན་དུ་དབྱུག་པ་དང་ཐོ་བ་དཀར་པོའོ། །མདའ་ཡབ་དང་སའི་ཁོར་ཡུག་གི་དབུས་ཀྱིས་ནི་ནག་པོའོ། །དེར་ཇི་ལྟར་མཛེས་ [53a.2]པར་མཆོད་པའི་ཡོ་བྱད་རྣམས་བྲི་བར་བྱའོ། །སའི་ཁོར་ཡུག་ནི་སེར་པོའོ། །དེར་དབང་ལྡན་གྱི་མཚམས་སུ་ཟླ་བ་ཉ་བའི་དཀྱིལ་འཁོར་འཆར་བ་ཆ་ཆུང་བཅུ་གཉིས་པ་དང་། བདེན་བྲལ་དུ་ནུབ་བཞིན་པའི་ཉི་མ་ཆ་ཆུང་བཅུ་གཉིས་པའོ། །ཆུའི་ཁོར་ཡུག་དཀར་པོའོ། །མེའི་ཁོར་ཡུག་དམར་ [53a.3]པོའོ། །རླུང་གི་ཁོར་ཡུག་ནག་པོའོ། །མེ་དང་རླུང་གི་ཁོར་ཡུག་དེ་དག་གི་དབུས་སུ་སོ་སོར་ཆ་ཆུང་བཅུ་གཉིས་པའི་རྩིབས་བརྒྱད་པའི་དུར་ཁྲོད་ཀྱི་འཁོར་ལོ་བརྒྱད་དེ། ཕྱོགས་སུ་དམར་པོ་རྣམས་དང་། མཚམས་སུ་དཀར་པོ་རྣམས་སོ། །ཤར་གྱི་འཁོར་ལོའི་ཕྱི་ངོས་སུ་སྟོང་པའི་དཀྱིལ་ [53a.4]འཁོར་ནུབ་ཀྱི་འཁོར་ལོའི་ཕྱི་ངོས་སུ་ཡང་སྟོང་པའི་དཀྱིལ་འཁོར་རོ། །སྟོང་པའི་དཀྱིལ་འཁོར་གཉིས་འདྲི་བ་ནི་སྒྲུབ་ཐབས་ཀྱི་ལེའུར་གསུངས་པའི་ཚུལ་གྱིས་སོ། །བཅུ་ཆར་ལ་ཡང་མཚན་མ་ནི་གྲི་གུག་གོ། །རླུང་གི་ཁོར་ཡུག་ལ་མཚན་མ་སྣ་ཚོགས་པ་བྲི་བར་བྱ་སྟེ། འདིར་འདོད་པ་སྤྱོད་ [53a.5]པ་ནི་མ་ཡིན་ནོ། །ནམ་མཁའི་ཁོར་ཡུག་ནི་ནག་པོའོ། །དེའི་ལོགས་གཉིས་སུ་ཆ་ཆུང་གསུམ་གསུམ་དོར་ལ་དེར་རེ་ཁཱ་ཟླུམ་སྐོར་གཉིས་སོ། །དབུས་ཀྱི་ཆ་ཆུང་དྲུག་ལ་ནི་རྡོ་རྗེ་ཕྲེང་བ་ལྗང་གུར་བྱའོ། །འོད་ཟེར་འབར་བ་རྣམས་ནི་ཁ་དོག་རྣམ་པ་ལྔའོ། །ཡང་ནང་གི་དཀྱིལ་འཁོར་ [53a.6]དུ་ཤར་ཕྱོགས་སུ་ཚོན་ནག་པོའི་དཔངས་སུ་ནས་ཀྱི་བཞི་ཆ་གཅིག་གོ། །ལྷོའི་དམར་པོ་ནི་གཉིས་སོ། །ནུབ་ཀྱི་སེར་པོ་ནི་བཞིའོ། །བྱང་གི་དཀར་པོ་ནི་གསུམ་མོ། །རྩིག་པའི་རེ་ཁཱ་རྣམས་ཀྱི་དཔངས་སུ་རྡུལ་ཚོན་སེར་པོ་སུམ་འགྱུར་རོ། །རྡོ་རྗེ་ཕྲེང་བ་རྣམས་ཀྱང་ངོ་། །རེ་ཁཱ་གཞན་ནི་ཚོན་ [53a.7]སེར་པོ་ལས་ཉིས་འགྱུར་རོ། །པདྨ་རྣམས་ནི་སྣམ་བུ་ལས་ཉིས་འགྱུར་གྱིས་སོ། །ཉི་ཟླ་དག་ནི་ཆུ་སྐྱེས་ཀྱི་རེ་ཁཱ་ལས་སོ། །དེ་ལྟར་བརྗོད་པའི་དཔངས་ལས་གསུང་གི་དཀྱིལ་འཁོར་ལ་དཔངས་རྣམས་ནི་ཉིས་འགྱུར་རོ། །དེ་རྣམས་ལས་ཉིས་འགྱུར་ནི་སྐུའི་དཀྱིལ་འཁོར་ལའོ། ། [53b] [53b.1]མདའ་ཡབ་ལས་ཕྱིའི་མཆོད་པའི་ས་ལ་ནས་གཅིག་གོ། །ས་ལ་སོགས་པའི་ཁོར་ཡུག་དང་རེ་ཁཱ་ཟླུམ་སྐོར་གཉིས་ཀྱི་དཔངས་ནི་སྐུའི་དཀྱིལ་འཁོར་གྱི་རྩིག་པའི་རེ་ཁའི་ཚད་དུའོ། །ས་ཐམས་ཅད་དུ་རྡུལ་ཚོན་གཞན་དགྱེ་བ་ཐམས་ཅད་ཀྱི་ཉིས་འགྱུར་གྱི་དབྱེ་བས་མཉམ་པའོ། །དེ་ལ་ [53b.2]གཙོ་བོའི་ལྟེ་བར་ལྟེ་བ་དང་མཉམ་པའི་དཀར་པོ་དང་དམར་པོ་དང་ནག་པོ་དང་དམར་པོའི་ཟླ་བ་དང་ཉི་མ་དང་། སྒྲ་གཅན་དང་དུས་ཀྱི་མེའི་དཀྱིལ་འཁོར་གྱི་སྟེང་དུ་བཅོམ་ལྡན་འདས་དུས་ཀྱི་འཁོར་ལོའི་རྡོ་རྗེ་སྔོན་པོ་རྩེ་གསུམ་པའོ། །ཤར་གྱི་འདབ་མ་ལ་སྤོས་ཕོར་ནག་པོའོ། །ལྷོར་མར་ [53b.3]མེ་དམར་པོའོ། །ནུབ་ཏུ་དུང་སེར་པོའོ། །བྱང་དུ་ལྷ་བཤོས་དཀར་པོའོ། །མེ་ལ་སོགས་པར་རྔ་ཡབ་ནག་པོ་དང་། དམར་པོ་དང་། དཀར་པོ་དང་། སེར་པོའོ། །དེའི་ཕྱི་ངོས་སུ་དབང་ལྡན་དུ་ཆོས་ཀྱི་དུང་དཀར་པོའོ། །མེར་ཡིད་བཞིན་གྱི་ནོར་བུ་ནག་པོའོ། །བདེན་བྲལ་དུ་ཆོས་ཀྱི་ [53b.4]གཎྜཱི་དམར་པོའོ། །རླུང་དུ་དཔག་བསམ་གྱི་ཤིང་སེར་པོའོ། །རིམ་པ་གཉིས་པར་ཤར་དུ་པདྨ་དཀར་པོར་ཉི་མ་ལ་རལ་གྲི་ནག་པོའོ། །མེར་པདྨ་དམར་པོར་ཟླ་བ་ལ་ཨུཏྤལ་སྔོན་པོའོ། །ལྷོར་པདྨ་དཀར་པོར་ཉི་མ་ལ་རིན་པོ་ཆེ་ཆ་དགུ་པ་དམར་པོའོ། །བདེན་བྲལ་དུ་པདྨ་དམར་པོར་ཟླ་བ་ལ་ [53b.5]པདྨ་དམར་པོའོ། །ནུབ་ཏུ་པདྨ་དཀར་པོར་ཉི་མ་ལ་འཁོར་ལོ་སེར་པོའོ། །རླུང་དུ་པདྨ་དམར་པོར་ཟླ་བ་ལ་འཁོར་ལོ་སེར་པོའོ། །བྱང་དུ་པདྨ་དཀར་པོར་ཉི་མ་ལ་པདྨ་དཀར་པོའོ། །དབང་ལྡན་དུ་པདྨ་དམར་པོར་ཟླ་བ་ལ་ཨུཏྤལ་དཀར་པོའོ། །རིམ་པ་གསུམ་པའི་སྣམ་བུ་ལ་སྒོ་སོ་སོའི་ལོགས་གཉིས་ [53b.6]སུ་གཉིས་ཏེ་དེ་ལྟར་པདྨ་བརྒྱད་དོ། །དེ་ལ་དྲུག་རྣམས་ཉི་མ་ལའོ། །ནུབ་དང་བྱང་གི་སྒོའི་གཡོན་དག་ཏུ་ཟླ་བ་གཉིས་སོ། །མཚམས་རྣམས་སུ་པདྨ་དང་ཟླ་བ་བཞི་སྟེ་དེ་རྣམས་སུ་དབང་ལྡན་ནས་བརྩམས་ཏེ་མེ་ལོང་དང་། རྡོ་རྗེ་དང་། རལ་གྲི་དང་། གོས་དང་། རྡོ་རྗེ་དང་། རིན་པོ་ཆེ་དང་རྡོ་རྗེ་ [53b.7]དང་རོའི་སྣོད་དང་། ཆོས་འབྱུང་དང་། འཁོར་ལོ་དང་དྲིའི་དུང་དང་། པི་ཝང་དང་། པདྨ་རྣམས་ཏེ། དཀར་པོ་དང་། སྔོན་པོ་དང་། ནག་པོ་དང་། ལྗང་གུ་དང་། དམར་པོ་དང་། དམར་པོ་དང་། ལྗང་གུ་དང་སེར་པོ་དང་། སྔོན་པོ་དང་། དཀར་པོའོ། །ཤར་སྒོའི་པདྨ་ [54a] [54a.1]དང་། ཉི་མར་རལ་གྲི་ནག་པོ་དང་། ལྷོར་དབྱུག་པ་དམར་པོ་དང་། ནུབ་ཏུ་པདྨ་སེར་པོ་དང་། བྱང་དུ་ཐོ་བ་དཀར་པོའོ། །འདིར་ཉི་མའི་དཀྱིལ་འཁོར་རྣམས་ནི་པདྨ་དཀར་པོ་ལ་གནས་ཤིང་ཟླ་བའི་དཀྱིལ་འཁོར་རྣམས་ནི་པདྨ་དམར་པོ་ལའོ། །ཤར་གྱི་སྟེགས་བུལ་རྟ་བབས་ [54a.2]ཀྱི་ཀ་བའི་རྩ་བའི་གཡོན་དུ་དུང་ནག་པོ་དང་། གཡས་སུ་མེ་ཏོག་སྔོན་པོའི་ཕྲེང་བའོ། །ལྷོར་སྤོས་ཕོར་དམར་པོ་དང་། མར་མེའོ། །ནུབ་ཏུ་ཅོད་པན་སེར་པོ་དང་། དོ་ཤལ་སེར་པོའོ། །བྱང་དུ་འབྲས་བུ་དཀར་པོ་དང་བདུད་རྩི་དཀར་པོས་གང་བའི་ཐོད་པའི་སྣོད་དོ། །སྟེགས་བུ་ཐམས་ཅད་ལ་ནི་རྣམ་ [54a.3]པ་སྣ་ཚོགས་པ་འཛིན་པའི་མཆོད་པའི་ལྷ་མོ་རྣམས་སོ། །ཤར་གྱི་རྟ་བབས་ཀྱི་མཆོད་པའི་ལྷ་མོའི་གནས་ལ་དབུས་སུ་གོས་སོ། །ལྷོར་པདྨའོ། །ནུབ་ཏུ་རྔ་བ་ཊ་ཧའོ། །བྱང་དུ་རྡོ་རྗེའོ། །གསུང་གི་དཀྱིལ་འཁོར་ལ་ནི་ཤར་གྱི་པདྨའི་ལྟེ་བ་དང་འདབ་མ་རྣམས་ལ་གྲི་གུག་ནག་པོ་རྣམས་སོ། །མེར་འཁོར་ལོ་ [54a.4]ནག་པོ་རྣམས་སོ། །གཤིན་རྗེར་དབྱུག་པ་དམར་པོ་རྣམས་སོ། །བདེན་བྲལ་དུ་ཤཀྟི་དམར་པོ་རྣམས་སོ། །ནུབ་ཏུ་རྡོ་རྗེ་སེར་པོ་རྣམས་སོ། །རླུང་དུ་ཚངས་པའི་དབྱུ་གུ་རྩེ་མོ་སེར་པོ་ཅན་རྣམས་སོ། །བྱང་དུ་རྩེ་གསུམ་དཀར་པོ་རྣམས་སོ། །དབང་ལྡན་དུ་པདྨ་དཀར་པོ་རྣམས་སོ། །སྐུའི་དཀྱིལ་འཁོར་ [54a.5]གྱི་སྣམ་བུ་ལ་པདྨའི་ལྟེ་བ་དང་འདབ་མ་རྣམས་ལ་མཚན་མ་རྣམས་སོ། །དེ་ལ་ཤར་གྱི་སྒོའི་གཡས་སུ་རལ་གྲི་རྣམས་སོ། །མེར་དཔག་བསམ་གྱི་ཤིང་རྣམས་སོ། །ལྷོའི་སྒོའི་གཡོན་དུ་རྡོ་རྗེས་མཚན་པའི་དབྱུག་པ་རྣམས་སོ། །གཡས་སུ་ཤཀྟི་རྣམས་སོ། །བདེན་བྲལ་དུ་ཤཀྟིའམ་ཡང་ན་མདུང་ [54a.6]རྣམས་སོ། །ནུབ་ཀྱི་སྒོའི་གཡོན་དུ་རིན་པོ་ཆེའམ། དབྱུག་ཏོ་རྣམས་སོ། །གཡས་སུ་རྡོ་རྗེ་རྣམས་སོ། །རླུང་དུ་ཁབ་རྣམས་སོ། །བྱང་སྒོའི་གཡོན་དུ་རྩེ་གསུམ་རྣམས་སོ། །གཡས་སུ་ཞགས་པ་རྣམས་སོ། །དབང་ལྡན་དུ་དགྲ་སྟ་རྣམས་སོ། །ཤར་སྒོའི་གཡོན་དུ་འཁོར་ལོ་རྣམས་སོ། ། [54a.7]ཤར་སྒོར་དབྱུག་པའོ། །དེའི་ཕྱི་རོལ་དུ་རྡོ་རྗེ་ལྗང་གུའོ། །ལྷོ་སྒོར་མདའ་དམར་པོའོ། །ནུབ་སྒོར་དབྱུག་ཏོ་སེར་པོའོ། །དེའི་ཕྱི་ངོས་སུ་རྩེ་གསུམ་སྔོན་པོའོ། །བྱང་སྒོར་གཏུན་ཤིང་དཀར་པོའོ། །དབྱུག་པ་ལ་སོགས་པའི་མཚན་མ་འདི་རྣམས་པདྨ་དང་ཉི་མ་ལ་གནས་པའོ། །གསུང་དང་ [54b] [54b.1]སྐུའི་དཀྱིལ་འཁོར་དག་གི་ཕྱོགས་ཀྱི་པདྨ་རྣམས་ནི་དམར་པོའོ། །མཚམས་ཀྱི་པདྨ་རྣམས་ནི་དཀར་པོའོ། །འདིར་གསུང་གི་དཀྱིལ་འཁོར་གྱི་སྟེགས་བུ་ལ་ཤར་དུ་སྒོའི་གཡས་སུ་ཨུཏྤལ་དང་། གོས་དང་། གྲི་གུག་དང་། འཁོར་ལོ་དང་། ཁ་ཊྭཱཾ་ག་རྣམས་ནག་པོའོ། །གཡོན་དུ་གྲི་གུག་ [54b.2]དང་། རལ་གྲི་དང་། གྲི་གུག་རྣམས་ནག་པོའོ། །ལྷོའི་སྟེགས་བུ་ལ་སྒོའི་གཡས་སུ་པདྨ་དང་། རོའི་སྣོད་དང་དབྱུག་པ་དང་ཤཀྟི་དང་པདྨ་རྣམས་དམར་པོའོ། །གཡོན་དུ་མདའ་དང་དགྲ་སྟ་དང་། གྲི་གུག་དང་། གྲི་གུག་རྣམས་དམར་པོའོ། །ནུབ་སྒོའི་གཡས་སུ་འཁོར་ལོ་དང་དྲིའི་དུང་ཆོས་དང་། [54b.3]རྡོ་རྗེ་དང་། ཁབ་དང་། འཁོར་ལོ་རྣམས་སེར་པོའོ། །གཡོན་དུ་ཆོས་འབྱུང་ལྗང་གུ་དང་། འཁོར་ལོ་དང་། གྲི་གུག་དང་། གྲི་གུག་རྣམས་སེར་པོའོ། །བྱང་དུ་སྒོའི་གཡས་སུ་ཨུཏྤལ་དང་། མེ་ལོང་དང་། རྩེ་གསུམ་དང་། པདྨ་དང་། ཨུཏྤལ་རྣམས་དཀར་པོའོ། །གཡོན་དུ་པི་ཝང་སྔོན་པོ་དང་། [54b.4]ཐོ་བ་དང་གྲི་གུག་དང་། གྲི་གུག་རྣམས་དཀར་པོའོ། །དེ་ལྟར་མཚན་མ་སུམ་ཅུ་སོ་དྲུག་པོ་རྣམས་ནི་སྐུའི་དཀྱིལ་འཁོར་གྱི་སྟེགས་བུ་རྣམས་ལ་ཡང་ངོ་། །དེ་ནས་འཇམ་པའི་རྡོ་རྗེ་ལ་སོགས་པ་གང་ཡང་རུང་བའི་དཀྱིལ་འཁོར་བྲིས་ལ། །རྣམ་པ་ཐམས་ཅད་དུ་གསལ་བར་གྱུར་པར་ཤེས་ནས། ཡི་གེ་ [54b.5]ཧཱུཾ་དང་། འཁྱིལ་བ་བཟླས་པའི་བདུད་རྩི་ལྔ་དང་བཅས་པའི་དྲིའི་ཆུས་དཀྱིལ་འཁོར་གྱི་ཕྱི་ངོས་སུ་བྱུགས་ལ། །དེ་བཟླས་པའི་ཆུས་འཁོར་ལོ་བསངས་ཏེ། རྡུལ་ཚོན་ལྷག་མ་རྣམས་ལ། ཨོཾ་ཨཱཿཧཱུཾ་བཛྲ་མུཿཞེས་པས་ཡེ་ཤེས་ཀྱི་ཚོན་གཤེགས་སུ་གསོལ་ཏེ། སྣོད་ན་ [54b.6]གནས་པའི་ཚོན་རྣམས་དབེན་པར་གཞག་པར་བྱའོ། །ཚོན་དགྱེ་བའི་ཆོ་གའོ། །དེ་ནས་སྔར་ལྷག་པར་གནས་པར་བྱས་པའི་བུམ་པ་རྣམས་གཡས་སྐོར་དུ་དགོད་པར་བྱས་པའི་བུམ་པ་རྣམས་གཡས་སྐོར་དུ་དགོད་པར་བྱའོ། །དེ་ལ་འཁོར་ལོའི་དབང་པོའི་རྣམ་པར་རྒྱལ་བའི་བུམ་པ་ནི་དཀྱིལ་འཁོར་གྱི་འཁོར་ལོ་ལ་གཡས་སྐོར་བྱས་ནས་ [54b.7]རྡོ་རྗེར་བའི་བདག་ཉིད་ཀྱི་ཁོར་ཡུག་དང་། འབར་བའི་ཕྲེང་བའི་སའི་ཕྱི་ངོས་སུ་དཀྱིལ་འཁོར་གྱི་ཤར་སྒོའི་ཐད་ཀའི་གནས་ལས་ཅུང་ཟད་གཡས་སུ་གཞག་པར་བྱའོ། །གཡོན་ལོགས་སུ་གོ་རིམས་བཞིན་གཡས་སྐོར་དུ་རྣམ་པར་སྣང་མཛད་དང་། སྤྱན་མ་དང་། ལས་ཐམས་ཅད་པའི་བུམ་པ་ [55a] [55a.1]རྣམས་སོ། །གཡས་སུ་གཟུགས་རྡོ་རྗེ་མ་དང་། ཆོས་ཀྱི་དབྱིངས་ཀྱི་རྡོ་རྗེ་མ་དང་། གཤིན་རྗེ་གཤེད་མ་རྣམས་ཀྱིའོ། །ལྷོའི་གཡོན་དུ་རིན་ཆེན་འབྱུང་ལྡན་དང་། མཱ་མ་ཀཱི་དག་གི་དང་། གཡས་སུ་སྒྲ་རྡོ་རྗེ་མ་དང་། ཤེས་རབ་མཐར་བྱེད་དག་གིའོ། །ནུབ་ [55a.2]ཀྱི་གཡོན་དུ་སྣང་བ་མཐའ་ཡས་དང་། གོས་དཀར་མོ་དག་གི་དང་། གཡས་སུ་དྲི་རྡོ་རྗེ་མ་དང་། པདྨ་མཐར་བྱེད་དག་གིའོ། །བྱང་གི་གཡོན་དུ་དོན་ཡོད་གྲུབ་པ་དང་། སྒྲོལ་མ་དག་གི་དང་། གཡས་སུ་རོ་རྡོ་རྗེ་མ་དང་། རེག་བྱ་རྡོ་རྗེ་མ་དང་། བགེགས་མཐར་བྱེད་རྣམས་ཀྱིའོ། ། [55a.3]ཁ་ཅིག་ནི་གཤིན་རྗེ་གཤེད་ལ་སོགས་པ་ཁྲོ་བོ་རྣམས་ཀྱི་ནི་མེ་ལ་སོགས་པའི་མཚམས་རྣམས་སུའོ་ཞེས་སོ། །གཞན་ནི་དེ་བཞིན་གཤེགས་པའི་དེ་མ་ཐག་ཏུ་ཁྲོ་བོ་རྣམས་ཀྱི་རིགས་ཀྱི་ཡུམ་རྣམས་ཀྱི་ནི་སྒོའི་གཡས་ཕྱོགས་རྣམས་སུའོ་ཞེས་སོ། །འདིའི་རྗེས་སུ་འབྲངས་ཏེ་ཕྱོགས་ [55a.4]གཞན་རྣམས་སུ་ཡང་དགོད་པར་ཤེས་པར་བྱའོ། །བཞེད་པ་གཞན་ཡང་ཡོད་དེ་དེས་ཅི་ཞིག་བྱ། དེ་ལྟ་བུ་དེ་ནི་འཇམ་པའི་རྡོ་རྗེའི་དཀྱིལ་འཁོར་དུ་བུམ་པ་དགོད་པའི་ཚུལ་ལོ། །བསྡུས་པའི་རིམ་པའི་དཀྱིལ་འཁོར་ལ་གཡོན་དུ་རིགས་ཀྱི་ཡུམ་གྱི་དེ་མ་ཐག་ཏུ་དང་། གཡས་སུ་ཡང་དང་ [55a.5]པོར་བྱང་ཆུབ་སེམས་དཔའ་བརྒྱད་པ་རྣམས་ཀྱིའོ། །ཟུར་གྱི་ཁྲོ་བོ་རྣམས་ཀྱི་ཟུར་རྣམས་སུའོ། །གཤིན་རྗེ་གཤེད་ཀྱི་རྗེས་ལ་གཙུག་ཏོར་འཁོར་ལོས་སྒྱུར་བའིའོ། །པདྨ་མཐར་བྱེད་ཀྱི་རྗེས་ལ་གནོད་མཛེས་ཀྱི་ཞེས་པ་ཁྱད་པར་རོ། །འདིའི་རྗེས་སུ་འབྲངས་ཏེ་དཀྱིལ་འཁོར་གཞན་རྣམས་ལ་བུམ་ [55a.6]པ་དགོད་པ་རྟོགས་སླ་བས་མ་སྤྲོས་སོ། །གྲྭའི་བུམ་པ་རྣམས་ལ་སྒྲོ་དང་བཅས་པའི་མདའ་བཞི་སྟེ། ཨོཾ་བཛྲ་ཡཀྵ་ཧཱུཾ་ཞེས་པའི་སྔགས་ཀྱིས་དགོད་དོ། །དུས་ཀྱི་འཁོར་ལོའི་རྡུལ་ཚོན་གྱི་དཀྱིལ་འཁོར་ལ་ནི་ཕྱི་ངོས་སུ་ཤར་ལ་སོགས་པའི་ཕྱོགས་རྣམས་སུ་བུམ་པ་བཞིའོ། །རྒྱལ་བའི་བུམ་ [55a.7]པ་ཡང་ཤར་དུ་སྟེ་ལྔ་པའོ། །དེའི་སྟེང་གི་རྣམ་པར་རྒྱལ་བའི་བུམ་པའི་དུང་ཆོས་ནི་དྲུག་པའོ། །དེ་ལྟ་བུ་ནི་བུམ་པ་ལྔ་པའི་ཕྱོགས་ལའོ། །བུམ་པ་བཅུ་པའི་ཕྱོགས་ལ་ནི་ཕྱོགས་བརྒྱད་དུ་བུམ་པ་བརྒྱད་དོ། །ནུབ་ཀྱི་བུམ་པ་ལས་ཕྱི་ངོས་སུ་སོར་གཉིས་སྤངས་པར་རྣམ་པར་རྒྱལ་བའི་བུམ་ [55b] [55b.1]པའོ། །ཤར་གྱི་བུམ་པ་ལས་ཕྱི་ངོས་སུ་སོར་གཉིས་སྤངས་པར་རྒྱལ་བའི་བུམ་པའོ། །དེའི་སྟེང་དུ་རྣམ་པར་རྒྱལ་བ་ཆེན་པོའི་བུམ་པ་དུང་ཆོས་ཏེ་བཅུ་གཅིག་པའོ། །དེ་ལྟར་བུམ་པ་སྟོང་དང་བརྒྱ་རྣམས་སུ་ཡང་ཞི་བ་དང་རྒྱས་པ་དང་ལས་ཐམས་ཅད་པ་ལ་རྣམ་པར་རྒྱལ་བ་ཆེན་པོ་དུང་ཆོས་ཡིན་ [55b.2]ནོ། །བུམ་པ་དགོད་པའི་ཆོ་གའོ། །དེ་ནས་དཀྱིལ་འཁོར་ལ་ཕྱི་ངོས་སུ་ཕྱོགས་བཞིར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པའི་དམ་པའི་ཆོས་བཞི་ཀློག་ཏུ་གཞུག་པར་བྱའོ། །ག་པུར་དང་། ཨ་ཀ་རུ་དང་། ཏུ་རུ་སྐལ་སོགས་པའི་སྤོས་ཕོར་བརྒྱད་གཞག་པར་བྱའོ། །ན་བཟའ་སྣ་ཚོགས་ [55b.3]པ་སྟོང་ལ་སོགས་པའམ། ལྷ་སོ་སོ་ལ་རེ་རེ་འམ། ཇི་ལྟར་ནུས་པ་ཡང་རུང་སྟེ། སློབ་མ་ལ་སོགས་པར་གཞག་པ་དང་། གདུགས་དང་། རྒྱལ་མཚན་དང་། བ་དན་རྣམས་དང་། རྟ་བབས་དང་། གོས་བཟང་པོ་དང་། དྲིལ་བུ་དང་བཅས་པའི་རྔ་ཡབ་དང་། བུམ་པ་གང་བ་དང་། ལོ་མ་ [55b.4]དང་བཅས་པའི་ཆུ་ཤིང་གི་སྡོང་བུའི་ཀ་བ་རྣམས་ལ་ཡི་གེ་ཧཱུཾ་དང་། བདག་པོའི་སྔགས་ཀྱི་བཟླས་པ། ཨོཾ་བཛྲ་སྥ་ར་ཎ་ཁཾ་ཞེས་པས་དབུལ་ཏེ། གནས་ཇི་ལྟ་བ་བཞིན་གཞག་པར་བྱའོ། །དེ་ནས་ཁྲུས་བྱས་ཏེ་དྲི་ཞིམ་པོའི་ལུས་སྟོད་གཡོགས་དང་གཙུག་ཏོར་དང་། རྒྱན་དང་བཅས་པས་ [55b.5]འཁྱིལ་པ་བཟླས་པའི་ཆུས་དཀྱིལ་འཁོར་བསངས་ཏེ། ཡི་གེ་གསུམ་དང་འཁྱིལ་པའི་སྔགས་ཀྱིས་བསྲུངས་ནས་རྡོ་རྗེ་དང་དྲིལ་བུ་བཟུང་སྟེ། ཤར་གྱི་སྒོ་དང་། ཉེ་བར་ནུབ་ཏུ་ཁ་བལྟས་ཏེ་འདུག་ལ་འཁོར་ལོའི་དབང་པོའི་རྣལ་འབྱོར་དང་ལྡན་པས་བྲིས་པའི་དཀྱིལ་འཁོར་སྐད་ཅིག་གིས་ [55b.6]སྟོང་པ་ཉིད་ཀྱི་རྗེས་ལ་སྲུང་བའི་འཁོར་ལོ་དང་། བགེགས་ལ་ཕུར་བུས་གདབ་པ་ལ་སོགས་པའི་ཆོ་ག་འཁོར་དང་བཅས་པས་བསྒོམ་པར་བྱ་བའི་དཀྱིལ་འཁོར་གྱི་རང་བཞིན་དུ་ངེས་པར་བརྟགས་ནས། བཙུན་མོ་མཛེས་ཤིང་མདངས་བཟང་བ། །ལོ་གྲངས་བཅུ་དྲུག་ལོན་རྙེད་ནས། ། [55b.7]དྲི་དང་མེ་ཏོག་བརྒྱན་བྱས་ཏེ། །དེ་ཡི་དབུས་སུ་འདོད་པ་བྱ། །ཡོན་ཏན་སྐེ་རགས་མཱ་མ་ཀཱི། །ཤེས་རབ་ཅན་གྱིས་དེ་བྱིན་རླབས། །ཞི་བ་སྤྲོས་བྱས་སངས་རྒྱས་གནས། །ནམ་མཁའི་དབྱིངས་ནི་རབ་ཏུ་བརྒྱན། །ཞེས་གསུངས་པས་བསྒྲུབ་པའི་ཕྱི་རོལ་གྱི་ཕྱག་རྒྱ་དང་སྙོམས་པར་ [56a] [56a.1]ཞུགས་སམ། དེ་མེད་ན་ཡེ་ཤེས་ཀྱི་ཕྱག་རྒྱ་དང་སྙོམས་པར་འཇུག་པས་ཀྱང་རུང་སྟེ། ཡང་དག་པར་བསྐྱོད་པའི་དགའ་བའི་སྒྲས་ཡེ་ཤེས་ཀྱི་འཁོར་ལོ་སྤྱན་དྲངས་ལ་ཞབས་བསིལ་དང་། མཆོད་ཡོན་ཕུལ་ལ་སྔོན་དུ་འགྲོ་བས་རང་གི་ནང་དུ་བཅུག་ནས་འདོད་ [56a.2]ཆགས་ཆེན་པོས་ཞུ་བར་གྱུར་ཏེ། རྡོ་རྗེའི་ལམ་ནས་པདྨར་ཕྱུང་བའི་ཡེ་ཤེས་ཀྱི་ལྷའི་འཁོར་ལོའི་བདག་ཉིད་སྤྲོས་ཏེ་དམ་ཚིག་གི་འཁོར་ལོ་ལ་གནས་ཇི་ལྟ་བར་ཞུགས་པར་བསམས་ནས་མིག་དང་སྐུ་ལ་སོགས་པ་བྱིན་གྱིས་བརླབས་པའི་དེ་མ་ཐག་ཏུ་རང་གི་སྙིང་གའི་ས་བོན་གྱི་འོད་ཟེར་ [56a.3]གྱིས་བཀུག་པའི་དེ་བཞིན་གཤེགས་པ་དང་། ལྷ་མོ་རྣམས་ཀྱིས་དབང་བསྐུར་ནས་ཇི་ལྟར་རིགས་པར་རྒྱས་གདབ་བོ། །རིགས་མི་ཤེས་པ་རྣམས་ལ་ནི་མི་བསྐྱོད་པའམ་རྡོ་རྗེ་སེམས་དཔས་སོ། །དེ་ནས་ལྷ་མོ་སྤྲོས་པ་རྣམས་ཀྱིས་ཡིད་ཀྱི་རང་བཞིན་གྱི་མཆོད་པས་མཆོད་དེ། བསིལ་ [56a.4]བའི་གོས་དང་། གོས་ཟུང་དང་། བླ་རེ་ལ་དར་དཔྱངས་པ་དང་། ཡི་གེ་གསུམ་གྱིས་བསྔགས་པའི་བཟའ་བ་དང་བཅའ་བ་དང་། བལྡགས་པ་དང་འཇིབ་པ་དང་བཏུང་བའི་ཉེ་བར་སྤྱོད་པ་ལ་སོགས་པ་དང་། གསེར་དང་། བུ་མོ་དང་། གླང་པོ་ཆེ་དང་། རྟ་དང་། བ་ལང་ལ་སོགས་པ་ཕུལ་ [56a.5]ནས་ཕྱི་རོལ་གྱི་རྣལ་འབྱོར་མ་བཅུ་དྲུག་གམ་བརྒྱད་དམ་བཞི་གཟུགས་རྡོ་རྗེ་མ་ལ་སོགས་པའི་ངོ་བོ་རྣམས་ཀྱིས་རང་རང་གི་མཆོད་པས་མཆོད་ནས་དྲིལ་བུ་དཀྲོལ་ཞིང་། མི་བསྐྱོད་རྡོ་རྗེ་ཞེས་པ་ལ་སོགས་པས་བསྟོད་དེ། རང་དང་ཤེས་རབ་ཀྱི་མེ་ཏོག་དང་བཅས་པའི་བྱང་ཆུབ་ཀྱི་སེམས་པདྨའི་ [56a.6]སྣོད་དུ་བཅུག་ནས་བདུད་རྩིར་བྱས་པ་ཕུལ་ཏེ། དེ་རྣམས་བདུད་རྩི་མྱང་བས་ཚིམ་པར་བྱས་ནས་བདེ་བ་ཆེན་པོའི་རང་བཞིན་དུ་མོས་པར་བྱས་ལ་འཁོར་ལོའི་དབང་པོའི་སྔགས་བརྒྱ་རྩ་བརྒྱད་དང་དེ་ལས་གཞན་དཀྱིལ་འཁོར་བའི་སྔགས་ཉི་ཤུ་རྩ་གཅིག་དང་ཡི་གེ་བརྒྱ་པ་བཟླས་པར་བྱའོ། ། [56a.7]འཆད་པར་འགྱུར་བའི་ཆོ་གས་འབྱུང་པོ་ཐམས་ཅད་པའི་གཏོར་མ་ཡང་སྦྱིན་པར་བྱའོ། །ཡང་ན་སྒྲུབ་པའི་གྲོགས་པོ་དཀྱིལ་འཁོར་དུ་བཞག་ལ། ཕྱིར་བྱུང་ནས་ཤར་ལ་སོགས་པའི་ཕྱོགས་རྣམས་སུ་འཆད་པར་འགྱུར་བའི་འབྱུང་པོ་ཐམས་ཅད་པའི་གཏོར་མའི་ཆོ་གས་རང་གི་འདོད་པའི་ལྷ་ [56b] [56b.1]དང་དབང་པོ་ལ་སོགས་པ་ལ་གཏོར་མ་དབུལ་ལོ། །དེ་ནས་ལག་པ་གཡས་པ་གན་རྐྱལ་དུ་བྱས་ནས་གུང་མོ་དང་མིང་མེད་ཅུང་ཟད་བཀུག་ལ་ཁ་ལ་མངོན་དུ་ཕྱོགས་པར་གཟུང་བར་བྱའོ། །དེའི་རྩེ་མོས་ལག་པ་གཉིས་པུས་མོའི་ནང་དུ་བྱས་ནས་ཙོག་ཙོག་པུར་འདུག་ཅིང་མི་སྨྲ་བར་ལག་པའི་ཟེ་འབྲུའི་ [56b.2]ཆས་ཁ་ལ་ལན་མང་དུ་བྱབ་ཅིང་ལན་གཉིས་དང་ལན་གསུམ་དུ་རྣ་བའི་བུ་ག་གཉིས་དང་། མིག་དག་དང་ཁ་དང་ལག་པ་དག་དང་། ལྟེ་བ་དང་མགོ་རྣམས་ལ་རེག་པར་བྱའོ་ཞེས་ཉེ་རེག་གི་ཆོ་ག་བྱའོ། །དེ་ནས་གྲུབ་ན་ལྷག་པ་ལ་སོགས་པའི་ཉེས་པ་ཞི་བར་བྱ་བའི་ཕྱིར་ཞི་བ་དང་དཀྱིལ་ [56b.3]འཁོར་ཚིམ་པར་བྱ་བའི་ཕྱིར་རྒྱས་པའི་སྦྱིན་སྲེག་བྱས་ནས་ཁམས་གསུམ་ལས་རྣམ་པར་རྒྱལ་བའི་རྣལ་འབྱོར་དང་ལྡན་པས་མེ་ཏོག་གི་ཕྲེང་བ་བླངས་ཏེ། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞ་པ་ཡ་གྲིཧྞཱ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བི་དྱ་རཱ་ཛ་ཧཱུཾ་ཧཱུཾ་ཕཊ་སྭཱ་ཧཱ། ཞེས་ [56b.4]དཔལ་ཁ་སྦྱོར་དུ་གསུངས་པའི་ཁམས་གསུམ་རྣམ་པར་རྒྱལ་བའི་སྔགས་ཟློས་ཤིང་རྡོ་རྗེའི་ཤུགས་ཀྱིས་དཀྱིལ་འཁོར་དུ་ཞུགས་ནས་རྡོ་རྗེ་གསོར་ཞིང་དྲིལ་བུ་དཀྲོལ་ཏེ་རྡོ་རྗེའི་རྐང་པས་དེ་ཁོ་ན་བཞིན་དུ་ཨོཾ་ཧཱུཾ་ཕཊ་ཅེས་པ་དང་། ཨོཾ་ཧཱུཾ་ཨཱཿཕཊ་ཅེས་པ་དང་། ཨོཾ་ཧཱུཾ་ཨཱཿཨཱཿཨཱཿཕཊ་ཅེས་པ་དང་། ཨོཾ་ [56b.5]ཧཱུཾ་ཧ་ན་མཱ་ར་ཡ་དུཥྚཱན་གྷཱ་ཏ་ཡ་གྷཱ་ཏ་ཡ་ཨཱཿཨཿཧཱུཾ་ཧྲཱིཿཕཊ་ཅེས་བྱ་བའི་སྔགས་བཞི་གོ་རིམས་བཞིན་ཟློས་པའི་ཤར་དང་ལྷོ་ལ་སོགས་པའི་སྒོའི་སློབ་དཔོན་རྣམས་དང་ལྷན་ཅིག་ཏུ་བསྐོར་བ་གསུམ་བྱས་ནས་ལྷག་པ་དང་མ་ཚང་བའི་ཉེས་པ་ཞི་བར་བྱས་པའི་ཕྱིར་འཁོར་ལོ་ལ་བལྟས་ཏེ། ཕྲེང་བ་ [56b.6]བཅོམ་ལྡན་འདས་ལ་ཕུལ་ནས་བསྐོར་བའི་གྲངས་བཞིན་དུ་ནུབ་སྒོ་ལ་སོགས་པ་བཞིར་གནས་པས་ཤར་སྒོ་ལ་སོགས་པ་བཞི་ཨོཾ་བཛྲོད་གྷ་ཊ་ས་མ་ཡ་པྲ་བེ་ཤ་ཡ་ཧཱུཾ་ཞེས་པའི་སྔགས་ཀྱིས་ཕྱེ་བར་བསམས་ཏེ། ཨོཾ་ས་མ་ཡ་པྲ་བེ་ཤ་མི་ཞེས་བརྗོད་ནས་སླར་ཕྲེང་བ་གར་བྱེད་ཅིང་བླངས་ལ་རང་གི་ངོ་ [56b.7]བོ་ལ་བཅིངས་ཏེ། འཁོར་ལོ་ལ་ཕྱག་འཚལ་ནས། སེམས་ཅན་ཐམས་ཅད་ལ་དངོས་གྲུབ་ཐམས་ཅད་ཀྱི་བཀའ་དྲིན་སྩོལ་ཅིག་ཅེས་གསོལ་བ་བཏབ་ནས། བསྒོམ་པ་དང་བཟླས་པ་བྱའོ། །འདིར་དཀྱིལ་འཁོར་གྱི་ཁང་པ་ལས་ཕྱི་རོལ་དབང་པོ་ལ་སོགས་པ་རྣམས་སུ་གོ་རིམས་ [57a] [57a.1]བཞིན་དུ་དཀར་པོ་དང་སེར་སྐྱ་དང་ནག་པོ་དང་དུད་ཁ་དང་། དམར་པོ་དང་ཁྲ་བོ་དང་སེར་པོ་དང་ལྗང་གུའི་བ་དན་བརྒྱད་དཀྱིལ་འཁོར་གྱི་ལྷ་རྣམས་ལ་ཕུལ་ནས་ཤར་ལ་སོགས་པར་གཟུག་པར་བྱའོ་ཞེས་པ་ནི་ཤེས་རབ་བསྐྱངས་ཀྱིས་སོ། །བཅོམ་ལྡན་འདས་ [57a.2]ཀྱིས་ཀྱང་སངས་རྒྱས་ཐོད་པའི་རྒྱུད་དུ། གྲུ་བཞི་པ་ལ་སྒོ་བཞི་པ། །བ་དན་བརྒྱད་ཀྱིས་རྣམ་པར་བརྒྱན། །ཞེས་གསུངས་སོ། །རྣམ་པར་སྣང་མཛད་དང་། དེའི་རིགས་ཀྱི་ལྷ་རྣམས་ཀྱི་བ་དན་ནི་མེར་དགོད་པར་བྱའོ། །རིན་ཆེན་དབང་པོ་དང་། དེའི་རིགས་ཅན་རྣམས་ཀྱི་བདེན་བྲལ་ [57a.3]དུའོ། །སྣང་བ་མཐའ་ཡས་དང་དེའི་རིགས་ལས་བྱུང་བ་རྣམས་ཀྱི་རླུང་དུའོ། །དོན་ཡོད་གྲུབ་པ་དང་དེའི་རིགས་ཀྱི་ལྷ་རྣམས་ཀྱི་དབང་ལྡན་དུའོ། །འཁོར་ལོའི་དབང་པོའི་ཤར་དུའོ། །དེའི་རིགས་ཀྱི་ལྷ་རྣམས་ཀྱི་ནི་རང་རང་གི་ཕྱོགས་སུའོ་ཞེས་པ་ནི་ཁ་ཅིག་གོ། །དབང་པོའི་སེར་པོ་དང་། ཁྱབ་འཇུག་ [57a.4]གི་ནག་པོ་དང་། ཟླ་བའི་དཀར་པོ་དང་། ཉི་མའི་དམར་པོ་དང་། མེས་པོའི་སེར་པོ་སྟེ་དབང་པོར་རོ། །མེ་ལྷའི་དམར་པོ་དང་། གཤིན་རྗེའི་ནག་པོ་དང་། བདེན་བྲལ་གྱི་དུད་ཁ་རྣམས་ནི་རང་རང་གི་ཕྱོགས་སུའོ། །ནུབ་དུ་ཆུ་ལྷའི་དཀར་པོ་དང་། སའི་ལྷ་མོའི་སེར་པོ་དང་། ཐགས་བཟངས་རིས་ཀྱི་ [57a.5]ནག་པོའོ། །རླུང་དུ་རླུང་ལྷའི་ལྗང་གུའོ། །བྱང་དུ་ལུས་ངན་པོའི་སེར་པོ་དང་། ཚོགས་བདག་གི་དཀར་པོའོ། །དབང་ལྡན་དུ་དབང་ལྡན་གྱི་དཀར་པོའོ། །དེ་ལྟར་བ་དན་བཅོ་ལྔ་ནི་ཕྱོགས་ཀྱི་བདག་པོ་རྣམས་ལ་མཉེས་པར་བྱ་བའི་ཆེད་དུའོ། །མི་འབྱོར་ན་ནུས་པ་ཇི་ལྟ་བར་བ་དན་རྣམས་དབུལ་བར་ [57a.6]བྱའོ། །དཀྱིལ་འཁོར་སྒྲུབ་པའི་ཆོ་ག་འཁོར་དང་བཅས་པའོ། །དེ་ནས་དེར་རྡུལ་ཚོན་གྱི་དཀྱིལ་འཁོར་རམ། རས་བྲིས་ལ་སོགས་པའི་དཀྱིལ་འཁོར་རམ། ཡིད་ཀྱི་དཀྱིལ་འཁོར་མངོན་དུ་བྱས་པ་དེར་ཇི་ལྟར་བརྗོད་པའི་མཆོད་པ་ལ་སོགས་པ་སྔོན་དུ་འགྲོ་བས་སྐུ་གཟུགས་ལ་སོགས་པའི་ [57a.7]རབ་གནས་ཀྱང་སློབ་མ་རབ་ཏུ་གནས་པ་བཞིན་བྱའོ། །དེ་ལ་དཀྱིལ་འཁོར་གཞན་དུ་ཡང་སྔར་བརྗོད་པའི་ཆོ་གས་དང་པོ་བུམ་པ་ལྷག་པར་གནས་པ་དང་། དགོད་པ་དག་བྱས་ནས་སྐུ་གཟུགས་ལ་སོགས་པ་སྟོང་པ་ཉིད་དུ་བསམས་པའི་རྗེས་ལ་ས་བོན་ལ་སོགས་པ་ལས་རྫོགས་པའམ། [57b] [57b.1]སྐད་ཅིག་གིས་ཀྱང་རུང་སྟེ་དམ་ཚིག་སེམས་དཔའི་ངོ་བོ་སྙིང་གའི་ས་བོན་དང་བཅས་པ་བསམས་ནས་གོས་གསར་པ་དམར་པོ་ལ་སོགས་པས་གཡོགས་ཤིང་མེ་ཏོག་དང་ལྡན་པར་བྱས་ནས་དེའི་མེ་ཏོག་གི་ཕྲེང་བ་བླངས་ཏེ་སྐུ་གཟུགས་ལ་སོགས་པ་དང་ལྷན་ཅིག་ཡོན་བདག་སློབ་མ་བཞིན་དུ་རྡུལ་ཚོན་ [57b.2]གྱི་དཀྱིལ་འཁོར་ལ་སོགས་པ་རྣམས་ཀྱང་གང་ཡང་རུང་བའི་དཀྱིལ་འཁོར་དུ་གཞུག་པར་བྱའོ། །སློབ་དཔོན་གྱིས་ཀྱང་སྐུ་གཟུགས་ལ་སོགས་པའི་ལྷའི་མཚན་མའམ་དེའི་རིགས་ཀྱི་བདག་པོའི་མཚན་མ་ལ་མེ་ཏོག་དབུལ་དུ་གཞུག་གོ། །ཡང་ན་མེ་ཏོག་དོར་བ་མེད་པ་ཉིད་དུ་སྐུ་གཟུགས་ལ་ [57b.3]སོགས་པ་དཀྱིལ་འཁོར་མཐོང་བ་ཉིད་ཀྱིས་གཞུག་པའོ། །དེ་ནས་དཀྱིལ་འཁོར་གྱི་ཁང་པའི་ཕྱི་ངོས་ཤར་གྱི་ཕྱོགས་སུའམ་དེར་སྐབས་མེད་ན་དབང་ལྡན་དུ་ཧ་ཅང་མི་རིང་བའི་ཡིད་དུ་འོང་བའི་གནས་སུ་ཁྲུས་ཀྱི་སྟེགས་བུ་གྲུ་བཞི་པ་དཔངས་སུ་ཁྲུ་གཉིས་པའོ། །ཡང་ན་སྲིད་དུ་ཁྲུ་བརྒྱད་པ་དེའི་ [57b.4]ཕྱེད་དུ་མཐོ་བ་དང་ཡང་ན་སྲིད་དུ་ཁྲུ་གཉིས་པ་དེའི་ཕྱེད་དུ་མཐོ་བ་སྟེ། ས་སེལ་ལ་སོགས་པའི་ཉེས་པ་དང་བྲལ་བའི་ས་ལས་བྱས་པའམ་སོ་ཕག་ལ་སོགས་པས་བྱས་པའམ། དེ་མེད་ན་ནི་ཇི་ལྟར་རྙེད་པའམ། ཇི་ལྟར་གནས་པའི་ས་གཞི་ཡང་རུང་སྟེ། འབྲས་བཏགས་པའི་ཁུ་བ་ལ་སོགས་པས་ [57b.5]བྲིས་པའི་སྟེགས་བུ་ཕྱོགས་དང་མཚམས་སུ་བུམ་པ་བརྒྱད་བཞག་ལ། ཤིན་ཏུ་འཇམ་པ་བདུད་རྩི་དང་བཅས་པའི་རྣམ་ལྔ་ལ་སོགས་པས་བྱུགས་པ་བླ་རེ་དང་། གདུགས་དཀར་པོ་དང་། རྒྱལ་མཚན་དང་། བ་དན་དང་། བུམ་པ་གང་བ་དང་། མེ་ཏོག་དང་། གར་དང་གླུ་དང་། རོལ་མོའི་སྒྲ་ལ་ [57b.6]སོགས་པས་སམ་ཇི་ལྟར་རྙེད་པས་ཀྱང་རུང་སྟེ་ཡིད་དུ་འོང་བར་བྱས་ནས། ཚེས་དང་གཟའ་དང་རྒྱུ་སྐར་དང་ཡུད་ཙམ་ལ་སོགས་པ་བཟང་བ་ལ་ཁྲུས་བྱས་ཤིང་། དོ་ཤལ་དང་། རྐང་གདུབ་དང་། དཔུང་རྒྱན་དང་། རྣ་རྒྱན་དང་། གདུ་བུ་དང་། སོར་གདུབ་ལ་སོགས་པས་བརྒྱན་པའམ། ཇི་ལྟར་ [57b.7]རྙེད་པས་བརྒྱན་པའི་སློབ་དཔོན་རྡོ་རྗེ་སེམས་དཔའི་སྐུ་རིག་མ་དང་ལྡན་པས་སྟེགས་བུ་དེའི་དབུས་སུ་སྒོ་ནུབ་ཏུ་བསྟན་པའི་རེ་ཁཱ་གྲུ་བཞི་པ་ཅིག་གིས་བསྐོར་བའི་སྣ་ཚོགས་པདྨ་རྡུལ་ཚོན་ནས་འབྲས་བཏགས་པའི་ཁུ་བ་ལ་སོགས་པས་བྲི་བར་བྱའོ། །ཡང་ན་རྟ་བབས་མེད་པའི་སྒོ་ནུབ་ཏུ་བསྟན་པའི་ [58a] [58a.1]གྲུ་བཞི་པའི་དབུས་སུ་ཆུད་པའམ། ཡང་ན་ནང་གི་དཀྱིལ་འཁོར་གྱི་ཕྱེད་ཀྱི་ཚད་གྲུ་བཞི་པ། སྒོ་བཞི་པ། རིམ་པ་གཉིས་པ། རྟ་བབས་མེད་པ་སྟེ། ཤར་ལ་སོགས་པའི་སྣམ་བུ་ལ་འཁོར་ལོ་དང་། རིན་པོ་ཆེ་དང་། པདྨ་དང་། རལ་གྲི་རྣམས་དང་། མཚམས་རྣམས་སུ་ཡུམ་ [58a.2]བཞིའི་མཚན་མ་དང་། དབུས་སུ་སྣ་ཚོགས་པདྨ་འདབ་མ་བརྒྱད་པ་བྲི་བར་བྱའོ་ཞེས་པ་ནི། །བསྡུས་པ་དང་། འབྲིང་དང་རྒྱས་པའི་དབྱེ་བས་ཁྲུས་ཀྱི་དཀྱིལ་འཁོར་གསུམ་ཡིན་ནོ། །དེའི་སྟེང་དུ་པདྨ་འདབ་མ་བརྒྱད་པ་བྲིས་པའི་ཤིང་སྟན་ནམ་ཟླ་བའི་དཀྱིལ་འཁོར་བྲིས་པའི་རས་ལ་སོགས་ [58a.3]པས་གཡོགས་པའི་སེང་གེའི་གདན་ཁྲུས་ཀྱི་དཀྱིལ་འཁོར་གྱི་པདྨའི་སྟེང་དུ་འཇོག་པར་མོས་པས་བཞག་ནས་སམ། ཁྲུས་ཀྱི་དཀྱིལ་འཁོར་མེད་པར་ཡང་དེ་ལྟར་དང་། གཞན་དུ་ཤིང་སྟན་ལ་སོགས་པར་དཀྱིལ་འཁོར་དེ་བསྒོམས་པར་སྐུ་གཟུགས་དང་ཐང་ཀ་དང་། པོ་ཏི་དང་མཆོད་རྟེན་ལ་ [58a.4]སོགས་པ་ཤར་དུ་ཕྱོགས་པའམ། གཞན་དུ་ཡང་རུང་སྟེ་གཞག་པར་བྱའོ། །གང་ཞིག་གནས་གཞན་དུ་བསྐྱོད་པར་མི་རུང་བ་གཙུག་ལག་ཁང་དང་། མཆོད་རྟེན་དང་། གཙང་ཁང་ཕྱུར་བུ་དང་། སྐུ་གཟུགས་ལ་སོགས་པ་དེ་དེ་ལ་ནི་སྔ་མ་བཞིན་དུ་དམ་ཚིག་སེམས་དཔའི་གཟུགས་སུ་ [58a.5]བསྒོམས་ལ་དཀྱིལ་འཁོར་བསྟན་པར་མོས་པར་བྱའོ། །དེར་ནི་ཁྲུས་ཀྱི་སྟེགས་བུ་དགོས་པ་མེད་དོ། །གཉིས་ཀར་ཡང་ཐོ་རངས་ཀྱི་དུས་སུ་སྐུ་གཟུགས་ལ་སོགས་པ་མདུན་དུ་བྱས་ཏེ། དེ་ལ་མངོན་དུ་ཕྱོགས་པ་ཞབས་བསིལ་དང་མཆོད་ཡོན་ལ་སོགས་པ་དབུལ་བ་སྔོན་དུ་འགྲོ་ [58a.6]བས་སམ། མཆོད་ཡོན་ལ་སོགས་པ་མ་ཕུལ་ཡང་རུང་སྟེ་སྦྱང་བར་བྱའོ། །དེ་ལ་ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཞེས་པ་འཁྱིལ་པའི་སྔགས་དང་། ཡི་གེ་ཧཱུཾ་ལན་བདུན་བཟླས་པའི་དོན་གྲུབ་གཡས་པ་དང་། ཅིག་ཤོས་ཀྱི་ཁུ་ཚུར་གྱིས་བཟུང་ནས། རེ་རེ་ཞིང་གཡོན་ [58a.7]སྐོར་དུ་ལན་གཉིས་སུ་ཨོཾ་སརྦ་པཱ་པཾ་ད་ཧ་ན་བཛྲཱ་ཡ་བཛྲ་སཏྭ་སྱ་སརྦ་པཱ་པཾ་ད་ཧ་སྭཱ་ཧཱ། ཞེས་བརྗོད་ཅིང་བྱ་བས་ལ་དོན་གྲུབ་མེར་དོར་རོ། །དེ་བཞིན་དུ་གཡས་སྐོར་དུའོ། །དེ་བཞིན་དུ་གཡོན་དང་གཡས་སུ་ཆུས་བྱའོ། །དེ་བཞིན་དུ་ཁམ་ཕོར་དཀར་པོ་རྣམས་ཀྱིས་དང་། དེ་བཞིན་དུ་རྩ་དཱུར་བའི་མྱུ་གུ་ [58b] [58b.1]དང་བཅས་པའི་བ་ལྕིའི་ཆང་བུ་རྣམས་ཀྱིས་དང་། དེ་བཞིན་དུ་ཟན་ཆངས་རྣམས་ཀྱིས་དང་། དེ་བཞིན་དུ་སེང་རས་ཀྱིས་ཀྱང་ངོ་། །འོན་ཀྱང་ཁམ་ཕོར་ལ་སོགས་པ་ནི་མེར་མི་དོར་རོ། །དེ་ནས་ལག་པ་དག་གིས་སྐུ་གཟུགས་ལ་ཉེ་རེག་བྱའོ། །འཁོར་ལོའི་གཙོ་བོའི་སྔགས་ཀྱིས་ཇི་ལྟར་ [58b.2]རིགས་པར་སྐུ་གཟུགས་ལ་སོགས་པ་ལ་དངོས་སུའམ་མེ་ལོང་ལ་གཟུགས་བརྙན་ཤར་བ་ལ་ཐུགས་ཀར་དྲིས་བྱུག་པ་དང་། མེ་ཏོག་གི་ཕྲེང་བ་དབུ་ལ་བཅིང་བ་དང་། མདུན་དུ་མཆོད་ཡོན་དབུལ་བ་བྱས་ནས་མར་མེས་ཡོངས་སུ་བསྐོར་ཏེ། འཁྱིལ་པ་དང་ཡི་གེ་ཧཱུཾ་གིས་ལན་བདུན་ [58b.3]བཟླས་པའི་མར་དང་བཅས་པའི་སྤོས་དཀར་གྱི་བདུག་པས་བདུག་པར་བྱའོ་ཞེས་པ་སྦྱང་བའི་རིམ་པའོ། །དེའི་རྗེས་ལ་འཁྱིལ་པ་བཟླས་པའི་དཱུར་བའི་ཆུན་པོས་ཟངས་སྣོད་ན་གནས་པའི་ཞོ་དང་། འོ་མ་དང་། མར་དང་། སྦྲང་རྩི་དང་། བྱེ་མ་ཀ་ར་བསྲེས་པའི་ངོ་བོའི་ཕྱིའི་བདུད་ [58b.4]རྩི་ལྔ་རྣམས་དང་། དེ་ནས་འོ་མ་དང་། ཞོ་དང་། མར་དང་། བའི་ལྕི་བ་དང་། ཆུ་སྟེ། བའི་རྣམ་པ་ལྔས་སྐུ་གཟུགས་བཀྲུར་རུང་བ། ཨོཾ་ཧཱུཾ་ཏྲཱཾ་ཧྲཱིཿཨཱཿཞེས་པའི་སྔགས་ཀྱིས་བྱུག་པར་བྱའོ། །རས་བྲིས་དང་། པོ་ཏི་དང་། ས་ལས་བྱས་པ་ལ་སོགས་པ་དང་བྲིས་པའི་སྐུ་གཟུགས་ [58b.5]ལ་སོགས་པ་ནི་མེ་ལོང་ལ་གཟུགས་བརྙན་ཤར་བ་ལའོ། །དེ་ནས་འཁྱིལ་པ་བཟླས་པའི་དྲི་ཞིམ་པོའི་ཆུ་གཙང་མས་བཀྲུས་ནས་ཁར་བའི་སྣོད་དུ་བླུགས་པའི་ནྱ་གྲོ་དྷ་དང་། ཨུ་དུམྦཱ་ར་དང་། པླཀྵ་དང་། པིཔྤ་ལ་དང་། གནྡྷ་མུནྡྷ་སྟེ་འོ་མ་ཅན་གྱི་ཤིང་ལྔའི་ཤུན་པའི་ཕྱེ་མས་རྣམ་པར་ [58b.6]མཉེས་ཏེ། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། ཞེས་པའི་སྔགས་སམ། ཨོཾ་ཧཱུཾ་ཏྲཱཾ་ཧྲཱིཿཁ་ཁཿཞེས་པ་ཟློས་ཞིང་། ཁར་བའི་སྣོད་ན་གནས་པའི་དྲི་ཞིམ་པོའི་འབྲུ་མར་གྱིས་བྱུགས་ཏེ་མཉེས་ལ། ཁར་བའི་སྣོད་ན་གནས་པའི་སྐྱུ་རུ་རས་བྱུགས་ཏེ། དེ་ལྟར་བཀྲུས་ཏེ། ཁར་བའི་སྣོད་ [58b.7]ན་གནས་པའི་ཡུང་བས་བྱུགས་ཏེ་བཀྲུས་ལ། ཤྲཱི་ཁཎྜ་དང་། ཙནྡན་དམར་པོ་དང་། གུར་གུམ་དང་། གྲནྠི་ཀེ་དང་། ཨ་ག་རུ་རྣམས་སམ། གུར་གུམ་དང་། ཨ་ག་རུ་དང་། གླ་རྩི་དང་། ག་བུར་ལ་སོགས་པ་ཇི་ལྟར་རྙེད་པས་ཀྱང་རུང་སྟེ་བྱུགས་ལ། སྙིང་གའི་ས་བོན་གྱི་འོད་ [59a] [59a.1]ཟེར་གྱིས་བཀུག་པའི་དེ་བཞིན་གཤེགས་པ་དང་། ལྷ་མོ་རྣམས་ཀྱི་བུམ་པ་རྣམས་ཀྱིས་འཁྲུད་བཞིན་པ་དང་། བཀྲ་ཤིས་ཀྱི་གླུ་དང་། རོལ་མོའི་སྒྲ་སྣ་ཚོགས་པ་སྔོན་དུ་འགྲོ་བས་རྣམ་པར་རྒྱལ་བའི་བུམ་པ་ལ་སོགས་པའི་ཆུ་དུང་ཆོས་སམ། གཞན་དུ་ཡང་བླུགས་ [59a.2]པ་རྣམས་ཀྱིས། ཇི་ལྟར་བལྟམས་པ་ཙམ་གྱིས་ཞེས་པ་ལ་སོགས་པ་འཆད་པར་འགྱུར་བ་བརྗོད་ཅིང་ཁྲུས་གསོལ་ལོ། །དེ་ལ་གོས་པའི་ཆུ་ན་བཟའ་འཇམ་པོས་ཕྱིས་ནས་ཇི་ལྟར་ནུས་པས་ན་བཟའ་ལ་སོགས་པས་བརྒྱན་པར་བྱའོ། །དེ་ནས་སྙིང་གའི་སྔགས་ཀྱི་འོད་ཟེར་གྱིས་རབ་ཏུ་ [59a.3]གནས་པར་བྱ་བའི་ཡེ་ཤེས་སེམས་དཔའ་དང་སངས་རྒྱས་དང་། བྱང་ཆུབ་སེམས་དཔའ་ལ་སོགས་པའི་ལྷ་རྣམས་མདུན་གྱི་ནམ་མཁར་སྤྱན་དྲངས་ལ་ཞབས་བསིལ་དང་ཞལ་བསིལ་དང་། མཆོད་ཡོན་དང་། མཆོད་པ་སྔོན་དུ་འགྲོ་བས་པུས་མོ་གཡས་པ་ས་ལ་བཙུགས་ཏེ་གཡོན་པས་ [59a.4]དྲིལ་བུ་དཀྲོལ་བ་དང་། གཡས་པས་སྤོས་དབུལ་ཞིང་། ལྕེ་ཧཱུཾ་ལས་སྐྱེས་པའི་རྡོ་རྗེར་བྱས་ལ། བཅོམ་ལྡན་འདས་ཆེ་གེ་རྡོ་རྗེ་མཆོག། །རིག་པའི་རྒྱལ་པོ་ཁྱོད་ལ་འདུད། །སློབ་མ་རྣམས་ལ་བརྩེ་དོན་དང་། ཁྱེད་རྣམས་ལ་ཡང་མཆོད་ཕྱིར་དང་། །སེམས་ཅན་བསོད་ནམས་སྤེལ་དོན་དང་། [59a.5]བྱང་ཆུབ་སེམས་ནི་བསྐྱེད་པའི་ཕྱིར། །མགོན་པོ་ཐུགས་རྗེའི་བདག་ཉིད་ཅན། །ཁྱེད་ཀྱིས་རབ་གནས་བགྱིད་བར་འཚལ། །དེར་ནི་བཅོམ་ལྡན་བདག་གུས་པས། །བཀའ་དྲིན་གནང་བར་མཛད་པར་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་ [59a.6]གནས་དང་། །གཞན་ཡང་གང་དག་གསང་སྔགས་ལྷ། །ལྷ་དང་འཇིག་རྟེན་སྐྱོང་བ་དང་། །འབྱུང་པོ་བྱང་ཆུབ་བསྟན་གནས་དང་། །སེམས་ཅན་བསྟན་ལ་མངོན་དགའ་དག །གང་གཞན་རྡོ་རྗེའི་སྤྱན་ལྡན་རྣམས། །བདག་ཅག་ལ་ཡང་དགོངས་སུ་གསོལ། །ཆེ་གེ་བདག་ནི་རྡོ་རྗེ་ཅན། ། [59a.7]ཆེ་གེའི་རབ་ཏུ་གནས་པ་ནི། །བགྱིའོ་དེ་ནས་ཁྱེད་རྣམས་ཀྱིས། །ཉེ་བར་གནས་པར་མཛད་པར་འོས། །ཞེས་ལན་གསུམ་བརྗོད་པར་བྱའོ། །དེ་ལྟར་འདིར་རིགས་ཞེས་པའི་བར་གྱིས་རབ་ཏུ་གནས་པའི་དོན་དུ་ལྷག་པར་གནས་པ་དང་། ལྷག་མས་ནི་ཉེ་བར་གནས་པར་གསོལ་བ་བཏབ་ནས་ [59b] [59b.1]ནམ་མཁར་གནས་པའི་ལྷའི་འཁོར་ལོ་མཆོད་དེ་ཕྱག་འཚལ་ནས་བསྟོད་ལ། ཨོཾ་བཛྲ་སུ་ན་རཱ་ག་མ་ནཱ་ཡ་མུཿཞེས་པས་གཤེགས་སུ་གསོལ་བར་བྱའོ། །ཁྲུས་བྱས་པའི་སྐུ་གཟུགས་ལ་སོགས་པའི་ཐུགས་ཀ་དང་། དབུ་དང་མགུར་དང་ཕྱག་དང་སྤྱི་གཙུག་རྣམས་ཡང་དག་པར་བྱུགས་ལ་ [59b.2]མཆོད་དེ་འཁྱིལ་བའི་སྔགས་ཀྱིས་རྡོ་རྗེ་དང་བཅས་པའི་ལག་པ་གཡས་པས་ལན་གསུམ་རེག་ལ་རང་ཉིད་ཇི་ལྟ་བའི་སྔགས་སམ། འཁྱིལ་བའི་སྔགས་བཟླ་བར་བྱའོ། །ཕྱོགས་ཀྱི་གཏོར་མ་ཡང་དབུལ་ལོ། །གང་དུ་ལྷ་ལྷག་པར་གནས་པར་མ་བྱས་པར་རབ་ཏུ་གནས་པ་བྱེད་པ་ལ་མོས་པ་ [59b.3]བརྟན་པ་དེས་ནི་ལྷག་པར་གནས་པར་མ་བྱས་པ་ཉིད་ལྷག་པར་གནས་པའི་དོན་དུ་བརྗོད་པ་དང་། རབ་ཏུ་གནས་པའི་དོན་དུ་འཆད་པར་འགྱུར་བའི་ཆོ་ག་ཐམས་ཅད་ཉི་མ་གཅིག་ལ་བྱའོ། །འོན་ཀྱང་སྦྱང་བ་ལ་སོགས་པའི་ཆོ་ག་མཐུན་པ་ནི་ལན་ཅིག་གི་ཚེ་ཉིད་བྱའི་སླར་མ་ཡིན་ནོ། །དེ་ཡང་ཡོན་ [59b.4]བདག་ལ་ནུས་པ་ཡོད་ན་བསོད་ནམས་བསགས་པའི་དོན་དུ་ལྷག་པར་གནས་པར་བྱ་བ་ཁོ་ནའོ་ཞེས་པ་ལྷ་ལྷག་པར་གནས་པའི་ཆོ་གའོ། །དེའི་རྗེས་ལ་སྔ་བར་ཁྲུས་ཀྱི་སྟེགས་བུ་ཡིད་དུ་འོང་བ་དེ་ལྟར་བྱེད་དུ་བཅུག་ནས། ཡུད་ཙམ་ལ་སོགས་པ་བཟང་བ་ལ་དེ་བཞིན་དུ་རྒྱན་གྱིས་བརྒྱན་པའི་སློབ་ [59b.5]དཔོན་རྡོ་རྗེ་འཆང་གི་ངོ་བོ་ཤེས་རབ་དང་བཅས་པ་འདུག་ལ་གཏོར་མ་དང་མཆོད་པ་སྔོན་དུ་འགྲོ་བའི་སྐུ་གཟུགས་དེ་ལྟར་བཞག་པ་དང་། ལྷ་ཁང་ལ་སོགས་པ་ཇི་ལྟར་གནས་པ་སླར་དམ་ཚིག་སེམས་དཔའི་གཟུགས་སུ་བསྐྱེད་པར་བྱའོ། །དེ་ལ་རྒྱུད་དང་། མངོན་པར་རྟོགས་པ་དང་། སྒྲུབ་ [59b.6]ཐབས་ལ་སོགས་པར་ལྷའི་ཁྱད་པར་བསྐྱེད་པའི་རིམ་པ་རིག་པས་ལྷའི་ཁྱད་པར་གང་གི་གཟུགས་བརྙན་གང་ཡིན་པ་སྟེ་སྟོང་པ་ཉིད་ཀྱི་རྗེས་ལ་རིམ་གྱིས་སམ། ཅིག་ཅར་ཡང་རུང་སྟེ། དེ་ལྟ་བུའི་དམ་ཚིག་སེམས་དཔའི་གཟུགས་སུ་བསྒོམ་པར་བྱའོ། །པོ་ཏི་ནི་ཡི་གེའི་ཚོགས་མ་ [59b.7]ལུས་པ་སྟོང་པ་ཉིད་ཀྱི་རྗེས་ལ་པདྨ་དམར་པོ་དང་། ཉི་མར་ཡི་གེ་ཧྲཱིཿདམར་པོ་ལས་བྱུང་བའི་ཆུ་སྐྱེས་དང་། ཧྲཱིཿཡོངས་སུ་གྱུར་པ་ལས་གོས་དཀར་མོས་འཁྱུད་པའི་སྣང་བ་མཐའ་ཡས་ཡོངས་སུ་གྱུར་པ་ལས་ཡང་དག་པར་བྱུང་བའི་ཡི་གེའི་རྣམ་པ་སྣང་བ་མཐའ་ཡས་ཀྱི་གཟུགས་ [60a] [60a.1]བརྙན་ཤར་བའི་དམ་ཚིག་སེམས་དཔར་གནས་སོ་ཞེས་བསམ་པར་བྱའོ། །མར་མེ་མཛད་དང་གཙུག་ལག་ཁང་ལ་སོགས་པ་ནི་སྟོང་པ་ཉིད་ཀྱི་རྗེས་ལ་པདྨ་དང་ཟླ་བར་བྷྲཱུཾ་དཀར་པོ་ལས་སྐྱེས་པའི་འཁོར་ལོ་རྩིབས་བརྒྱད་པ་དང་། བྷྲཱུཾ་ལས་བྱུང་བའི་རྣམ་པར་སྣང་མཛད་ [60a.2]ལ་སྤྱན་མས་འཁྱུད་པ་ཡོངས་སུ་གྱུར་པ་ལས་མར་མེ་མཛད་ཀྱི་རྣམ་པའམ། གཙུག་ལག་ཁང་གི་གཟུགས་སམ། གཙང་ཁང་ཕྱུར་བུའི་གཟུགས་སམ། མཆོད་རྟེན་གྱི་གཟུགས་སུའོ། །འོན་ཀྱང་གཙུག་ལག་ཁང་ནི་རྣམ་པར་སྣང་མཛད་ཤེས་རབ་དང་བཅས་པའི་ [60a.3]གཟུགས་བརྙན་ཤར་བའི་དམ་ཚིག་སེམས་དཔར་གནས་པར་བྱའོ། །དེ་ལྟར་གཙང་ཁང་ཕྱུར་བུ་དང་། མཆོད་རྟེན་ཡང་བསྒོམ་པར་བྱའོ། །དེ་ལྟར་དམ་ཚིག་སེམས་དཔའ་བསྐྱེད་ནས་ཞབས་བསིལ་དང་། མཆོད་ཡོན་ལ་སོགས་པ་དབུལ་བ་སྔོན་དུ་འགྲོ་བས་སྔ་མ་བཞིན་དུ་སྦྱང་བར་ [60a.4]བྱའོ། །དེ་ནས་དེ་མ་ཐག་ཏུ་བརྗོད་པའི་ཆོ་གས་བདུད་རྩི་ལྔས་བྱུགས་པ་ལ་སོགས་པ་དང་གུར་གུམ་ལ་སོགས་པ་བྱུགས་པ་དང་བཀྲུ་བ་དང་གོས་པའི་ཆུ་ཕྱི་བའི་བར་དུ་བྱས་ནས་དཀྱིལ་འཁོར་གྱི་ཁང་པར་བཅུག་སྟེ། དཀྱིལ་འཁོར་གྱི་དབང་ལྡན་གྱི་མཚམས་སམ་གཞན་ཡང་རུང་ [60a.5]སྟེ། ཧ་ཅང་མི་རིང་བར་དཀྱིལ་འཁོར་ལ་མངོན་དུ་ཕྱོགས་པར་སྐུ་གཟུགས་ལ་སོགས་པ་གཞག་པར་བྱའོ། །གཙུག་ལག་ཁང་ལ་སོགས་པ་བསྐྱོད་པར་མི་ནུས་པ་ནི་རང་གི་གནས་ལ་གནས་པ་ཁོ་ནའོ། །ཇི་ལྟར་རིགས་པར་དེ་དག་གི་ཐུགས་ཀའི་ས་བོན་དང་། མིག་ལ་སོགས་པ་དང་། [60a.6]སྐུ་ལ་སོགས་པ་བྱིན་གྱིས་བརླབས་པ་རྣམས་བསྒོམ་པ་སྔོན་དུ་འགྲོ་བས་རང་གི་སྙིང་གའི་ས་བོན་གྱི་འོད་ཟེར་རྣམས་ཀྱིས་བདག་ཉིད་ཇི་ལྟ་བར་ཡེ་ཤེས་སེམས་དཔའ་ལ་སོགས་པ་སྤྱན་དྲང་བ་ལ་སོགས་པ་དེ་མ་ཐག་པར་བརྗོད་པ་དག་བྱ་སྟེ། བཅོམ་ལྡན་ཞེས་པ་ནས། འོས་ཞེས་པའི་བར་ [60a.7]ལན་གསུམ་བརྗོད་ནས། སྙིང་གའི་འོད་ཟེར་རམ། ལྷ་རྣམས་ཀྱིས་སམ། ཇི་ལྟར་རིགས་པར་ཡེ་ཤེས་སེམས་དཔའ་བཀུག་སྟེ། རང་ཉིད་ཇི་ལྟ་བའི་དམ་ཚིག་སེམས་དཔའ་ལ་བཅུག་ནས་རོ་གཅིག་ཏུ་བྱས་ཏེ་དབང་དུ་བྱའོ། །གཞན་དག་ནི་སྐུ་གཟུགས་ཀྱི་ཐུགས་ཀར་དམ་ [60b] [60b.1]ཚིག་གི་འཁོར་ལོ་བསྐྱེད་ནས། དེ་ཉིད་དུ་ཡེ་ཤེས་ཀྱི་འཁོར་ལོ་གཞུག་པ་ལ་སོགས་པ་བྱའོ་ཞེས་སོ། །དེ་ནས་རང་གི་སྙིང་གའི་ས་བོན་གྱི་འོད་ཟེར་གྱིས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་དང་། སྤྱན་མ་ལ་སོགས་པའི་ལྷ་མོ་རྣམས་མདུན་གྱི་ནམ་མཁར་སྤྱན་དྲངས་ [60b.2]ཏེ་མཆོད་ནས་སྐུ་གཟུགས་ལ་སོགས་པ་ལ་དབང་བསྐུར་བའི་དོན་དུ། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་བསྐྱབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩལ། །དེ་ལྟར་འདི་ལ་སྩལ་དུ་གསོལ། །ཞེས་པའི་ཚིགས་སུ་བཅད་པས་གསོལ་བ་གདབ་པོ། །དེ་བཞིན་ [60b.3]གཤེགས་པ་དེ་རྣམས་ཀྱིས་ཀྱང་ཤེས་རབ་དང་སྙོམས་པར་ཞུགས་ཏེ། ཆགས་པ་ཆེན་པོས་ཞུ་བར་གྱུར་ནས་རང་གི་རྣམ་པར་སྣང་མཛད་ཀྱི་སྒོ་ནས་ཞུགས་ཏེ། རྡོ་རྗེའི་ལམ་ནས་ཕྱུང་བའི་ཁུ་བ་དེ་རྣམས་ཀྱིས་སྐུ་གཟུགས་ལ་སོགས་པ་ལྷ་མོའི་ཁ་ནས་པདྨར་ཞུགས་པ་ལ་དབང་བསྐུར་ [60b.4]ཏེ། སླར་ཞལ་ཕྱག་ལ་སོགས་པའི་གཟུགས་ཀྱིས་པདྨ་ལས་ཕྱུང་སྟེ། ཕྱི་རོལ་གྱི་ནམ་མཁའ་ཡོངས་སུ་བཀང་ནས་གནས་པ་སྤྱན་མ་ལ་སོགས་པའི་རིག་མ་དང་ལྷན་ཅིག་པ་རྣམས་ཀྱིས་གདུགས་དང་། རྒྱལ་མཚན་དང་། གར་དང་། གླུ་དང་། རོལ་མོའི་སྒྲ་དང་། མེ་ཏོག་ [60b.5]དང་། གུར་གུམ་ལ་སོགས་པའི་ཆར་དང་ལྡན་པའི་ཕྱག་གིས་བྱང་ཆུབ་ཀྱི་སེམས་ཀྱི་ངོ་བོ་བདུད་རྩིས་གང་བའི་བུམ་པ་དཀར་པོ་ཅུང་ཟད་ཡོ་བར་བཟུང་བས་སྐུ་གཟུགས་ལ་སོགས་པ་པདྨ་ལས་ཕྱིར་ཕྱུང་བ་དེ་ལ་དབང་བསྐུར་བཞིན་པ་དང་། གཟུགས་རྡོ་རྗེ་མ་ལ་སོགས་པས། བཀྲ་ [60b.6]ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་བྱེད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །ཅེས་པའི་བཀྲ་ཤིས་ཀྱི་གླུའམ། འཆད་པར་འགྱུར་བའི་ [60b.7]གླུས་ཀྱང་རུང་སྟེ། བཀྲ་ཤིས་ཀྱི་གླུ་ལེན་བཞིན་པ་དང་། བདག་ཉིད་ཀྱིས་ཀྱང་དེའམ་དེ་རྣམས་བླངས་ཏེ་རྣམ་པར་རྒྱལ་བའི་བུམ་པ་ལ་སོགས་པའི་ཆུ་གཅིག་ཏུ་བྱས་ཏེ། དུང་ཆོས་སུ་བླུགས་པས་སམ་རིམ་པ་བཞིན་རེ་རེས་ཀྱང་རུང་སྟེ། རིམ་པ་ཇི་ལྟ་བར་ལག་པས་འདབ་མ་དང་ [61a] [61a.1]བཅས་པའི་རྡོ་རྗེ་བཟུང་སྟེ་འདབ་མ་དང་བཅས་པའི་རྡོ་རྗེའི་རྩེ་མོ་ལས་འབབ་པའི་བྱང་ཆུབ་ཀྱི་སེམས་བདུད་རྩིའི་ངོ་བོས། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་ [61a.2]གིས་ཁྲུས་གསོལ་བགྱི། །ཨོཾ་ཨཱཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་སྭཱ་ཧཱ། ཞེས་པ་དང་། ཨོཾ་བཛྲོད་ཀ་ཨ་བྷི་ཥིཉྩ་ཧཱུཾ་ཞེས་བརྗོད་ཅིང་བཅོམ་ལྡན་འདས་རྡོ་རྗེ་སེམས་དཔའ་ཉིད་བླ་མ་དམ་པ་དཀྱིལ་འཁོར་གྱི་གཙོ་བོའི་གཟུགས་ཀྱི་འཁྲུར་འཇུག་པ་དང་། ཁྲུས་གསོལ་བར་ [61a.3]བསྟན་པར་མོས་པས་དབང་བསྐུར་བར་བྱའོ་ཞེས་པ་ཆུའི་དབང་ངོ་། །དེ་བཞིན་གཤེགས་པ་ལྔས་བྱིན་གྱིས་བརླབས་པའི་གོས་སམ། རིན་པོ་ཆེ་ལ་སོགས་པ་ལས་བྱས་པའི་དབུ་རྒྱན་ཨོཾ་ཨཱཿབཛྲ་ཨ་བྷི་ཥིཉྩ་ཧཱུཾ་ཞེས་པའམ། ཨོཾ་བཛྲ་རཏྣ་ཨཱཾ་ཞེས་པའམ། ཨོཾ་ཧཱུཾ་ཏྲཱཾ་ཧྲཱིཿཨཱཿཞེས་པ་འདོན་ [61a.4]ཅིང་། དཀྱིལ་འཁོར་གྱི་བདག་པོའི་གཟུགས་རྡོ་རྗེ་འཆང་བླ་མ་ཉིད་ཀྱིས་བཀོན་པར་མཛད་དོ་ཞེས་བརྟན་པར་ལྷག་པར་མོས་ལ་སྐུ་གཟུགས་ལ་སོགས་པ་ལྷའི་སྐུའི་དབུ་ལ་བཀོན་པར་བྱའོ་ཞེས་པ་ཅོད་པན་གྱི་དབང་ངོ་། །དང་པོ་ལ་ནི་ཨོཾ་ཧཱུཾ་ཏྲཱཾ་ཧྲཱིཿཨཱཿཞེས་པའི་སྔགས་ཀྱིས་དཔྲལ་ [61a.5]བར་དར་དཔྱངས་བཅིང་བར་བྱའོ། །སངས་རྒྱས་རྣམས་ཀྱི་རྡོ་རྗེ་ཡིས། །དབང་འདི་དི་རིང་ཁྱོད་ལ་བསྐུར། །འདི་དེ་སངས་རྒྱས་ཐམས་ཅད་ཉིད། །རྡོ་རྗེ་རབ་ཏུ་གྲུབ་ཕྱིར་ཟུངས། །ཞེས་བརྗོད་ཅིང་རྡོ་རྗེ་དེ་བཞིན་དུ་རྡོ་རྗེ་སེམས་དཔའ་ཉིད་ཀྱིས་གཏད་པར་ལྷག་པར་མོས་པས་གཏད་པར་བྱའོ། །དེར་ཡང་སྐུ་གཟུགས་ [61a.6]ལ་སོགས་པ་ལྷའི་གཟུགས་ཀྱིས་བཟུང་བར་ལྷག་པར་མོས་པར་བྱའོ། །རྡོ་རྗེའི་དབང་ངོ་། །ཨོཾ་བཛྲ་ཨ་དྷི་པ་ཏི་ཏྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ་ཞེས་བརྗོད་ཅིང་དེ་ལྟར་ལྷག་པར་མོས་པས་དྲིལ་བུ་གཏད་པར་བྱའོ། །དེ་ཡང་སྐུ་གཟུགས་ [61a.7]ལ་སོགས་པའི་ལྷས་བཟུང་བར་མོས་པར་བྱའོ། །དྲིལ་བུའི་དབང་ངོ་། །ཨོཾ་བཛྲ་སཏྭ་སྟྭཱཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏཿཨོཾ་ཆེ་གེ་མོ་བཛྲ་སྟྭཾ་ཞེས་བརྗོད་ཅིང་། དེ་བཞིན་དུ་རྡོ་རྗེ་སེམས་དཔའ་ཉིད་སྐུ་གཟུགས་ལ་སོགས་པའི་ལྷ་ལ་རང་ཉིད་ཇི་ལྟ་བ་བཞིན་དུ་མིང་འདོགས་པར་ལྷག་ [61b] [61b.1]པར་མོས་བཞིན་པས་བརྗོད་པར་བྱའོ། །མིང་གི་དབང་ངོ་། །སྐུ་གཟུགས་ལ་སོགས་པའི་ལྷ་རྡོ་རྗེ་དང་རྡོ་རྗེ་དྲིལ་བུ་དང་བཅས་པའི་ཕྱག་གིས་ཡེ་ཤེས་ཀྱི་ཕྱག་རྒྱལ་འཁྱུད་པའི་ཚུལ་བྱས་པར་བསྒོམས་ལ། དེ་མ་ཐག་ཏུ་བརྗོད་པའི་ཆུའི་དབང་གི་ཆོ་གས་མངོན་པར་བཀྲུས་ཏེ། རང་རང་ [61b.2]གི་རིགས་ཀྱི་བདག་པོས་དབུ་ལ་རྒྱས་གདབ་བོ། །རིགས་མི་ཤེས་པ་ལ་ནི་མི་བསྐྱོད་པའམ། རྡོ་རྗེ་སེམས་དཔས་སོ། །དེ་བཞིན་གཤེགས་པ་དང་། བྱང་ཆུབ་སེམས་དཔའ་དང་། ལྷ་མོ་གཞན་རྣམས་ནི་དེ་ཉིད་དུ་ཡེ་ཤེས་སེམས་དཔའི་ངོ་བོ་ཉིད་དུ་བཅུག་ནས། ཨོཾ་སུ་པྲ་ཏིཥྛ་བཛྲཱ་ཡེ་ [61b.3]སྭཱ་ཧཱ། ཞེས་པའི་སྔགས་ཀྱིས་བྱིན་གྱིས་བརླབ་བོ། །གཙུག་ལག་ཁང་དང་མཆོད་རྟེན་ལ་ཨོཾ་ཧཱུཾ་ཧྲཱིཿབྷྲཱུཾ་ཁཾ་ཞེས་པའི་སྔགས་ཀྱིས་ཀྱང་ངོ་། །པོ་ཏི་ལ་ནི་ཨོཾ་སུ་པྲ་ཏིཥྛ་བཛྲ་སྭཱ་ཧཱ། ཞེས་པ་དང་། ཨོཾ་ཧཱུཾ་ཧྲཱིཿསྟྭཱཾ་ཞེས་པའི་སྔགས་དག་གིས་སོ། །སློབ་དཔོན་གྱི་དབང་ངོ་། །དེ་ནས་འཁོར་ [61b.4]ལོའི་དབང་པོའི་སྐུ་རྡོ་རྗེ་སེམས་དཔས་རང་གི་སྙིང་གའི་ས་བོན་གྱི་འོད་ཟེར་གྱིས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་ཚོགས་རིག་མ་དང་བཅས་པ་བཀུག་སྟེ། རྣམ་པར་སྣང་མཛད་ཀྱི་སྒོ་ནས་བཅུག་པ་ཞུ་བར་གྱུར་ཏེ་བདེ་བ་ཆེན་པོ་ཉམས་སུ་མྱོང་ནས། །རྡོ་རྗེ་པདྨ་ [61b.5]དག་གིས་བྱང་ཆུབ་ཀྱི་སེམས་ཀྱི་ངོ་བོ་སྤྲོས་པས་སྐུ་གཟུགས་ལ་སོགས་པའི་ལྷའི་ཞལ་དུ་རབ་ཏུ་འབེབས་པར་བཛྲཱི་བྷ་བ་དྲྀ་ཌྷ་ཏིཥྛ་བྷྲཱུཾ་ཁཾ་བསམ་པར་བྱའོ། །གསང་བའི་དབང་ངོ་། །དེ་ནས་རྡོ་རྗེ་སེམས་དཔའ་དེས་གཏད་པའི་ལྷ་མོ་དང་སྙོམས་པར་ཞུགས་པའི་སྐུ་གཟུགས་ལ་ [61b.6]སོགས་པའི་ལྷ་ལྷན་ཅིག་སྐྱེས་པའི་དགའ་བའི་རང་བཞིན་དུ་མོས་པར་བྱའོ། །ཤེས་རབ་ཡེ་ཤེས་ཀྱི་དབང་ངོ་། །དེའི་རྗེས་ལ་རྡོ་རྗེ་འཆང་དེས་རབ་ཏུ་བརྟན་པའི་དབང་བཞི་པའི་རང་བཞིན་སྐུ་གཟུགས་ལ་སོགས་པའི་ལྷ་བག་ཆགས་དང་བཅས་པའི་སྒྲིབ་པ་སྤངས་པའི་བདེ་བ་ཆེན་ [61b.7]པོའི་རང་བཞིན་སྟོང་པ་ཉིད་དང་། སྙིང་རྗེ་རོ་གཅིག་པར་མོས་པ་བྱའོ། །དབང་བཞི་པའོ། །གང་གི་ཕྱིར་ཕྱེད་བཅས་བཞི་བརྒྱ་པ་ལས། རབ་གནས་ཀྱི་ནི་ཆོ་ག་འདི། །སྔོན་དུ་འཁོར་ལོ་ཡང་དག་བྲི། །སྐུ་གཟུགས་གླེགས་བམ་ལ་སོགས་པ། །སྐྱེས་བུ་ཅན་མཐས་དབང་ [62a] [62a.1]བསྐུར་རོ། །ཆུ་དང་ཅོད་པན་རྒྱུ་མཐུན་ཏེ། །རྡོ་རྗེ་བདག་པོ་མིང་རྣམས་སྨིན། །རྒྱལ་དབང་གིས་འདིར་སྐྱེས་བུ་ཅན། །གསང་བ་སྦྱོར་བས་དྲི་བྲལ་ལོ། །ཞེས་གསུངས་སོ། །དེ་ལ་སྐྱེས་བུ་ཅན་ནི་སློབ་དཔོན་གྱི་དབང་ངོ་། །ཐབས་སྐྱེས་བུ་ཅན་དེའི་ཐབས་ [62a.2]ལས་བྱུང་བ་འདི་ཡིན་ཞིང་སྐྱེས་བུ་ཅན་ནི་དྲི་མ་དང་བྲལ་བའི་དབང་སྟེ། གསང་བ་དང་། ཤེས་རབ་ཡེ་ཤེས་སོ། །དབང་བཞི་པའི་བདག་ཉིད་ནི་འདིའི་མཐར་ཐུག་ཡིན་པས་སྐྱེས་བུ་ཅན་གྱི་མཐའི་དབང་གི་ཆོ་ག་ཞེས་པའི་དོན་ཏོ། །དགེ་བ་ལ་སྤྲོ་བ་ཕུལ་དུ་བྱུང་བའི་ངོ་བོ་སྐྱེས་བུ་བྱེད་ [62a.3]པ་ཁོ་ན་ལས་ཅིག་ཤོས་ཀྱི་འབྲས་བུ་གསུམ་གསལ་བར་འགྱུར་རོ་སྙམ་དུ་དགོངས་པས། སྐྱེས་བུ་ཅན་གྱི་མཐའ་ཞེས་གསུངས་སོ། །སྦྱོར་བ་ནི་འདིར་ཀུན་རྫོབ་ཀྱི་ཤེས་རབ་དང་། དོན་དམ་པའི་ཤེས་རབ་དང་སྦྱོར་བ་དགོངས་སོ་ཞེས་པ་གསུམ་གྱི་བདག་ཉིད་ནི་དྲི་མ་དང་ [62a.4]བྲལ་བའོ། །གཞན་ཡང་སྐུ་གཟུགས་ལ་སོགས་པའི་གཟུགས་སུ་གསལ་བར་བསྒོམས་པའི་ལྷའི་སྐུ་རྣམ་པར་དག་པ་ནི་སློབ་དཔོན་གྱི་དབང་གིས་བསྟན་ཏོ། །གསུང་དང་ཐུགས་དག་པའི་དོན་དུ་གསང་བ་ལ་སོགས་པ་སྦྱིན་པར་བྱ་བ་ཉིད་དོ། །བྱང་ཆུབ་སེམས་དཔའ་ཆེན་པོ་ [62a.5]རྣམས་ལ་ཡང་འདི་རྣམས་སྟེར་ཏེ། ཇི་སྐད་དུ་གསུངས་པ། རྡོ་རྗེ་སྙིང་པོ་ལ་ནི་དབང་། །སྦྱིན་ཕྱིར་ཐིག་ལེ་མཆོག་མ་བཀུག།ཅེས་པ་དང་། བཅོམ་ལྡན་འདས་དོན་གྲུབ་བྱང་ཆུབ་ཤིང་གི་རྩ་བར་འདུག་པ་ལ་ནམ་མཁར་བཞུགས་པའི་ཡང་དག་པར་རྫོགས་པའི་སངས་རྒྱས་རྣམས་ [62a.6]ཀྱིས་མི་གཡོ་བའི་ཏིང་ངེ་འཛིན་འདུས་བྱས་པ་བསལ་ནས་མཚན་ཕྱེད་ན་བླ་ན་མེད་པའི་ཤེས་རབ་གཏད་དེ། ཤེས་རབ་དང་དབང་བཞི་པ་དག་བྱིན་ནོ་ཞེས་སོ། །དེ་ལྟར་དགོངས་པ་ཁོ་ནས་སློབ་མའི་རབ་གནས་བཞིན་དུ་སྐུ་གཟུགས་ལ་སོགས་པའི་རབ་གནས་བྱའོ་ཞེས་ཤིང་རྟ་ཆེན་པོ་ [62a.7]རྣམས་ཀྱིས་ཁྱད་མེད་པར་གསུངས་སོ། །དེ་ནས་སྐུ་གཟུགས་ལ་སོགས་པའི་ལྷ་རྣམས་ལ་རང་རང་གི་སྙིང་པོའི་སྔགས་ཀྱིས་ན་བཟའ་ལ་སོགས་པ་དབུལ་བར་བྱའོ། །ཡང་ན་ཨོཾ་ཨཱཿབཛྲ་བཱ་ས་སེ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུ་ཥེ་ཧཱུཾ་སྭཱ་ཧཱ། ཨོཾ་ཨཱཿབཛྲ་ཧཱུཾ་པེ་ཧཱུཾ་སྭཱ་ཧཱ། ཨོཾ་ཨཱཿབཛྲ་ [62b] [62b.1]དཱི་པེ་ཧཱུཾ་སྭཱ་ཧཱ། ཨོཾ་ཨཱཿབཛྲ་ནི་བི་ཧྱེ་ཧཱུཾ་སྭཱ་ཧཱ། ཨོཾ་ཨཱཿབཛྲ་གནྡྷེ་ཧཱུཾ་སྭཱ་ཧཱ། ཨོཾ་སརྦ་ཨཱ་པ་ར་ཎ་བི་བྷུ་ཥ་ཎེ་སྭཱ་ཧཱ། ཞེས་པའི་སྔགས་འདི་རྣམས་ཀྱིས་སོ། །ཨོཾ་ཨཱཿསརྦ་ཤོ་དྷ་ནི་ཧཱུཾ་ཕཊ། འབྲས་བུ་དང་མེ་ཏོག་ལ་སོགས་པ་དངོས་པོ་སྣ་ཚོགས་པ་བསང་བའི་སྔགས་སོ། །ཨོཾ་ [62b.2]བཛྲ་སྭཱ་ཧཱ། འབྲས་བུ་དབུལ་བའི་སྔགས་སོ། །དམ་ཚིག་གི་རྫས་དང་གི་ཝང་ཡང་ཕུལ་ཏེ། ཨོཾ་བཛྲ་སཏྭ་ཨཱཿཞེས་པའི་སྔགས་ཀྱིས་མེ་ལོང་བསྟན་ཏོ། །དེའི་རྗེས་ལའམ་སྦྱིན་སྲེག་ཡོད་ན་སྦྱིན་སྲེག་གིས་ཚིམ་པར་བྱས་པའི་རྗེས་ལ་ཡོན་བདག་ལ་སོགས་པ་ཞི་བ་ལ་སོགས་པ་ནས། [62b.3]སངས་རྒྱས་ཀྱི་མཐར་ཐུག་པའི་དོན་མངོན་པར་འདོད་པས་སྐུ་གཟུགས་ལ་སོགས་པ་དང་རྗེས་སུ་མཐུན་ཞིང་། ཡོན་བདག་གི་བསམ་པ་དང་བསྟུན་ནས་དྲུག་གམ་གཅིག་ལས་མི་ཉུང་བའི་གསེར་གྱི་ཐུར་མ་དངུལ་གྱི་ཀོང་བུར་བཞག་པའི་མར་དང་སྦྲང་རྩི་བསྐུས་པས། ཨོཾ་ཙཀྵུ་ཙཀྵུཿ [62b.4]ས་མནྟ་ཙཀྵུར་བི་ཤོ་དྷ་ནེ་སྭཱ་ཧཱ། ཞེས་བརྗོད་ཅིང་མིག་སྨན་གྱི་སྐུ་གཟུགས་ཀྱིས་སྤྱན་དབྱེ་བར་བྱའོ། །པོ་ཏི་ལ་སོགས་པའི་ལྷ་ལ་ནི་མེ་ལོང་ལ་གཟུགས་བརྙན་བསྒོམས་པ་ལའོ། །ཞི་བ་ལ་སོགས་པའི་དོན་དུ་ཡོན་བདག་ལ་སོགས་པ་ལ་གཟིགས་པ་ལྷུར་བྱེད་པའི་ལྷག་པའི་ལྷར་ [62b.5]མོས་པར་བྱའོ། །དེའི་རྗེས་སུ་ཐབ་ཁུང་གི་མེ་ལམ་ན་ཇིའི་སྟེང་དུ་གནས་པའི་སྣོད་དུ་དགང་གཟར་དང་བླུགས་གཟར་གྱིས་སམ། དེ་མེད་ན་ཤིང་པི་པྤ་ལའི་འདབ་མས་འབྲས་མ་གྲུགས་པ་དང་། མར་དང་སྦྲང་རྩི་དང་། ཤ་ཁ་ར་རྣམས་དང་བསྲེས་པའི་འོ་མ་བླུགས་ལ་རང་གི་ [62b.6]བདག་པོའི་སྔགས་འགྱིང་བ་དང་བཅས་པས་ཟློས་ཤིང་འོ་ཐུག་བསྒྲུབ་པར་བྱའོ། །སྦྱིན་སྲེག་གི་ཐབ་ཁུང་མེད་ན་མེ་གཞན་ལའོ། །འོ་ཐུག་དེ་ལ། ཨོཾ་དི་བྱ་ཨན་ནེ་ས་མཱ་དྷི་དྷྱཱ་ན་པྲཱ་ཎི་ནེ་སྭཱ་ཧཱ་ཞེས་བསྔགས་ནས་བརྗོད་ཅིང་། སྐུ་གཟུགས་དང་པོ་ཏི་ལ་སོགས་པ་ལ་བསྒོམས་པའི་ [62b.7]གཟུགས་བརྙན་ཤར་བའི་ལྷ་ལ་གསོལ་དུ་གཞུག་གོ། །ཞབས་བསིལ་དང་ཙནྡན་ལ་སོགས་པ་དང་། སོ་རྩི་རྣམས་ཀྱང་དབུལ་ལོ། །དེ་ནས་ཨོཾ་ཧཱུཾ་ཏྲཱཾ་ཧྲཱིཿཨཱཿཞེས་པས་དམ་ཚིག་བསྒྲག་པར་བྱའོ། །དེ་ནས་པོ་ཏི་ལ་སྣང་བ་མཐའ་ཡས་ཤེས་རབ་དང་བཅས་པ་ཡི་གེ་ [63a] [63a.1]རྣམས་ལ་བཅུག་ནས་ཡི་གེའི་གཟུགས་སུ་དང་། རྣམ་པར་སྣང་མཛད་རིག་མ་དང་བཅས་པ་ནི་གཙུག་ལག་ཁང་ངམ་མཆོད་རྟེན་ལ་བཅུག་ནས་གཙུག་ལག་ཁང་གི་གཟུགས་རྫོགས་པའི་སངས་རྒྱས་ཐམས་ཅད་དང་། དེའི་ཆོས་དང་། བྱང་ཆུབ་སེམས་དཔའ་ [63a.2]དང་། ཉན་ཐོས་ལ་སོགས་པའི་རྟེན་དང་། ཏིང་ངེ་འཛིན་སྣ་ཚོགས་པའི་གཞི་དང་། མཆོད་རྟེན་གྱི་གཟུགས་ནི་འཁོར་བ་ཇི་སྲིད་དུ་འགྲོ་བའི་དོན་བྱ་བའི་ཕྱིར་རྡོ་རྗེ་སེམས་དཔའ་ལ་སོགས་པས་བྱིན་གྱིས་བརླབས་པར་བསམ་པར་བྱའོ། །དེ་ནས་མེ་ཏོག་ལ་སོགས་པ་ཕུལ་ནས་ཐལ་མོ་ [63a.3]སྦྱར་ཏེ། ཇི་ལྟར་རྫོགས་པའི་སངས་རྒྱས་ཀུན། །དགའ་ལྡན་དུ་ནི་རབ་བཞུགས་རྣམས། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་སྐུ་གཟུགས་འདིར་བཞུགས་མཛོད། །མགོན་པོ་རྟག་ཏུ་འདིར་བཞུགས་ནས། །མེ་ཏོག་མཆོད་པ་ལ་སོགས་འདིར། །བྱང་ཆུབ་ [63a.4]སེམས་ནི་རྣམ་འཕེལ་ཕྱིར། །ཆེ་གེའི་དོན་དུ་བཞེས་སུ་གསོལ། །ཞེས་པ་འདིས་ཡུན་རིང་དུ་གནས་པའི་དོན་དུ་གསོལ་བ་བཏབ་ནས། འཁྱིལ་བའི་སྔགས་ཟློས་ཤིང་སྐུ་གཟུགས་ལ་སོགས་པའི་འོག་དང་བར་དང་སྟེང་གི་ཆ་རྣམས་ལ་ལག་པ་གཡས་པས་རྡོ་རྗེ་སྟེང་དུ་གསོར་ [63a.5]བས་ལན་གསུམ་བསྐོར་ནས་བརྟན་པར་བྱ་སྟེ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་དབྱིངས་ཁྱོད་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་བ་ཆེ། །རང་བཞིན་འོད་ [63a.6]གསལ་མཆོག་གི་མཆོག །སྟོན་པ་རྡོ་རྗེ་ཁྱོད་ཕྱག་འཚལ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མེད་མཁའ། །རང་བཞིན་དག་པ་གོས་པ་མེད། །རྡོ་རྗེ་སྐུ་ཁྱོད་ཕྱག་འཚལ་ལོ། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ [63a.7]ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ཁྱོད་ཕྱག་འཚལ་ལོ། །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་ཡོངས་རྫོགས་མཛད། །དག་པ་ངོ་བོ་ཉིད་ལས་བྱུང་། །རྡོ་རྗེ་སེམས་དཔའ་ཁྱོད་ཕྱག་འཚལ། །ཞེས་པའི་ཚིགས་སུ་བཅད་པ་དག་གིས་བསྟོད་ནས། [63b] [63b.1]ཆོ་ག་མ་ཚང་བ་ལ་སོགས་པའི་ཉེས་པ་ཞི་བར་བྱ་བའི་ཆེད་དུ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ [63b.2]ཝཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་ས་ཏྭ་ཨཿཞེས་པའི་ཡི་གེ་བརྒྱ་པ་ལན་གསུམ་བརྗོད་ནས། མ་རྙེད་ཡོངས་སུ་མ་ཤེས་དང་། །མ་ནུས་པ་དང་ཆད་པ་དང་། །གཞན་ཡང་གང་བགྱིས་དེ་ཀུན་གྱི། །ཐུགས་རྗེའི་རང་བཞིན་བཟོད་མཛད་རིགས། །ཞེས་བཟོད་པར་ [63b.3]གསོལ་ཏེ། རྫོགས་སངས་རྒྱས་དང་ལྷ་མོ་རྣམས། །དེའི་སྲས་རྣམས་དང་ཚངས་ལ་སོགས། །ལྷ་ཀླུ་རྣམས་ཀྱི་ཆོ་ག་གང་། །མ་ཚང་ལ་སོགས་བཟོད་མཛད་རིགས། །མེ་དང་ས་ཆུ་རླུང་རྣམས་ལས། །སྐུ་གཟུགས་ཡུན་རིངས་སྲུང་དུ་གསོལ། །ཡོན་བདག་དང་ནི་དེ་སྲས་ [63b.4]སོགས། །སློབ་མ་རྣམས་དང་བདག་ལ་ཡང་། །ཀུན་ནས་ཞི་དང་རྒྱས་པ་དང་། །རྟག་ཏུ་བཀྲ་ཤིས་མཛད་དུ་གསོལ། །སངས་རྒྱས་ཡུལ་དུ་གཤེགས་ནས་སླར། །འདིར་ནི་འབྱོན་པར་མཛད་དུ་གསོལ། །ཞེས་ལན་གསུམ་གསོལ་བ་བཏབ་ནས། །ཕྱོགས་ཀྱི་གཏོར་མ་རྣམས་ [63b.5]དང་། འབྱུང་པོ་ཐམས་ཅད་པའི་གཏོར་མ་དབུལ་ལོ། །ཡོན་བདག་གིས་ཀྱང་སྐུ་གཟུགས་ལ་སོགས་པ་ལ་བསྐོར་བ་དང་མཆོད་པ་དང་ཕྱག་བྱས་ནས། སློབ་དཔོན་ལ་ཡང་དག་པའི་ཡོན་དབུལ་བ་རྣམས་ཀྱིས་ཡོངས་སུ་མཉེས་པར་བྱའོ། །འདིར་གཙོ་བོ་སྣང་བ་མཐའ་ཡས་ [63b.6]ཀྱི་དཀྱིལ་འཁོར་དུ་པོ་ཏི་རབ་གནས་བྱའོ། །གཙོ་བོ་རྣམ་པར་སྣང་མཛད་ལ་གཙུག་ལག་ཁང་ལ་སོགས་པའོ། །མི་བསྐྱོད་པའི་གཙོ་བོའམ། རྡོ་རྗེ་སེམས་དཔའ་འམ་གཙོ་བོ་ལ་ནི་སྐུ་གཟུགས་ཐམས་ཅད་དང་རིགས་མི་ཤེས་པ་རྣམས་ཀྱང་རབ་ཏུ་གནས་པར་བྱའོ། །ཡང་ན་ [63b.7]སྐུ་གཟུགས་ཀྱི་ལྷ་ཁང་གི་རིགས་གང་ཡིན་ཤེས་པ་ན་རིགས་དེའི་དེ་བཞིན་གཤེགས་པ་གཙོ་བོའི་དཀྱིལ་འཁོར་དུའོ། །ཁ་ཅིག་ཏུ་ནི། སྐུ་གང་རབ་ཏུ་གནས་བྱ་བ། །རྒྱུད་གང་ལ་ནི་རྣམ་གནས་པ། །དེ་ལ་དེ་ཡི་དཀྱིལ་འཁོར་བྱ། །ཡང་ན་རང་གི་ལྷག་པའི་ལྷ། །སློབ་དཔོན་ [64a] [64a.1]རང་གི་གང་ཡིན་པ། །དེ་ནི་དབྱེ་བ་མཐོང་བས་བྱ། །ཞེས་སོ། །འདིར་དེའི་ཞེས་པ་ནི་སྐུ་གཟུགས་ཀྱི་སྟེ། དེ་ཉིད་དེའི་དཀྱིལ་འཁོར་གྱི་བདག་པོ་ཉིད་ཀྱིས་སོ། །རང་གི་ལྷག་པའི་ལྷ་ནི་སྐུ་དེའི་རིགས་ཀྱི་བདག་པོ་དེ་བཞིན་གཤེགས་པ་སྟེ། དེའི་དཀྱིལ་འཁོར་བྱའོ། ། [64a.2]ཡང་ན་སློབ་དཔོན་རང་གི་བདག་གི་དཀྱིལ་འཁོར་བྱ་སྟེ། འདིར་གང་བསྒོམ་པ་དེ་ཉིད་ནི་འདིའིའོ། །དེ་ལྟར་ཕྱོགས་གསུམ་དུ་བརྗོད་དོ། །འདི་ནི་རྒྱུད་གཞན་གང་ཡང་རུང་བར་བརྗོད་པའི་ཚུལ་དེ་ལྟ་བུའི་དཀྱིལ་འཁོར་དུ་ཡང་རྒྱུད་གཞན་དུ་བཤད་པའི་ལྷ་རྣམས་ཀྱི་རབ་ཏུ་གནས་པའི་ [64a.3]རིགས་ཏེ། ཇི་སྐད་དུ་བཤད་པའི་གཙོ་བོའི་དཀྱིལ་འཁོར་ཉིད་ཀྱིས་དེའི་རིགས་ཀྱི་དཀྱིལ་འཁོར་རྣམས་བསྡུས་པའི་ཕྱིར་རོ། །མདོར་བསྡུས་པའི་རབ་ཏུ་གནས་པ་ལ་ནི་སྐུ་གཟུགས་ལ་སོགས་པ་སྟོང་པ་ཉིད་ཀྱི་རྗེས་ལ། སྐད་ཅིག་གིས་དེ་དང་དེའི་དམ་ཚིག་སེམས་དཔའ་སྤྱན་དང་། [64a.4]སྐུ་ལ་སོགས་པ་བྱིན་གྱིས་བརླབས་པ་བསྐྱེད་ནས། དེ་ལ་དེའི་ཡེ་ཤེས་སེམས་དཔའ་རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པ་བཅུག་ལ་རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་དེ་བཞིན་གཤེགས་པ་ལ་སོགས་པ་རྣམས་དང་། རང་གིས་ཀྱང་བུམ་པའི་ཆུས་ [64a.5]དབང་བསྐུར་ཏེ། མཆོད་ནས་དེའི་སྔགས་བརྒྱ་རྩ་བརྒྱད་བཟླས་སོ་ཞེས་པ་ནི་སྐུ་གཟུགས་ལ་སོགས་པ་རབ་ཏུ་གནས་པར་འགྱུར་རོ། །གང་གི་ཚེ་དེ་བཞིན་གཤེགས་པའི་སྐུ་གདུང་ལ་བཀུར་སྟིའི་ཁྱད་པར་བྱ་བར་འདོད་ན། དེའི་ཚེ་སྒྲུབ་པའི་དུས་ཉིད་དུ་སྐུ་གཟུགས་ཀྱི་དབུའམ་རྒྱབ་ [64a.6]དང་མཆོད་རྟེན་གྱི་དབུས་སྟོང་པར་བྱའོ། །གྲུབ་པ་ན་གྲོ་གར་གུར་གུམ་དང་གི་ཝང་དག་གིས། ན་མོ་བྷ་ག་བ་ཏེ་ཤཱཀྱ་མུ་ན་ཡེ་ཏ་ཐཱ་ག་ཏཱ་ཡ། ཨརྷ་ཏེ་སམྱ་ཀྶཾ་བུདྡྷཱ་ཡ། ཨོཾ་མུ་ནེ་མུ་ནེ་མ་ཧཱ་ནུ་ནེ་ཡེ་སྭཱ་ཧཱ། ཡེ་དྷ་རྨཱ་ཧེ་ཏུ་པྲ་བྷ་བཱ་ཧེ་དུ་ནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མ་ཧཱ་ [64a.7]ཤྲ་མ་ཎཿཞེས་པ་དང་། གཟུགས་ཀྱི་ཁྱད་པར་ཡང་བྲིས་ནས། དེ་ཁྲུས་བྱས་པའི་གདུང་ལ་དཀྲིས་ཏེ། ཨོཾ་མནྟྲ་དྷཱ་ཏུ་གརྒྷཱ་ཡ་སྭཱ་ཧཱ། ཞེས་བརྗོད་ཅིང་སྟོང་པར་གཞུག་གོ། །དེ་ནས་ཨོཾ་བཛྲ་དྷཱ་ཏུ་གརྦྷཱ་ཡ་སྭཱ་ཧཱ། ཞེས་བརྗོད་ཅིང་རྡོ་རྗེའི་འདག་པས་སྟོང་པའི་སྒོ་བཀག་ནས་སྔ་མ་བཞིན་ [64b] [64b.1]དུ་དེ་རབ་ཏུ་གནས་པར་བྱའོ། །གཞན་དག་ནི་བདེ་མཆོག་དང་དགྱེས་པ་རྡོ་རྗེ་ལ་སོགས་པའི་སྐུ་གཟུགས་ལ་ཡང་འདུས་པའི་དམ་ཚིག་སེམས་དཔའ་བསྐྱེད་པ་དང་། ཡེ་ཤེས་ཀྱི་དཀྱིལ་འཁོར་གཞུག་པ་དང་། དབང་བསྐུར་བས་རབ་ཏུ་གནས་པར་འགྱུར་བ་ཉིད་དེ་འདུས་པ་ནི་བླ་ན་མེད་ [64b.2]པའི་ཕྱིར་རོ། །དེའི་རྗེས་ཉིད་ལ་ནི་འདུས་པའི་དམ་ཚིག་དང་ཡེ་ཤེས་ཀྱི་དཀྱིལ་འཁོར་གྱི་དབང་ཕྱུག་ནི་བདེ་མཆོག་ལ་སོགས་པའི་གཟུགས་སུ་གསལ་བར་བསྒོམ་པར་བྱ་ཞིང་། དེའི་སྐུ་གཟུགས་ཀྱང་དེའི་གཟུགས་ཉིད་དོ་ཞེས་པས་ཇི་ལྟར་འགལ་ཞེས་གསུངས་སོ། །རིག་པ་རབ་ཏུ་གནས་ [64b.3]པ་ལ་ནི་སློབ་དཔོན་རྡོ་རྗེ་འཆང་གི་གཟུགས་སུའམ་རིག་པའི་བདག་པོའི་གཟུགས་སུ་བྱ་སྟེ། རིག་པ་ལ་རིག་པའི་བདག་པོ་དང་། དེར་ཡེ་ཤེས་སེམས་དཔའ་གཞུག་པ་ཆོ་ག་བཞིན་བསྒོམ་པར་བྱའོ། །དེ་བཞིན་དུ་ཇི་ལྟར་རིགས་པར་བསྒྲུབ་པར་བྱ་བའི་ཁྱད་པར་ཡང་ངོ་། །དེ་ནས་རིག་པའི་ [64b.4]བདག་པོ་ནི་སྔགས་རྣམས་ལ་དང་། བསྒྲུབ་བྱ་ནི་རང་གི་མིང་ལ་བཅུག་ནས་རིག་པ་སྤྱི་བོའི་བུ་གནས། ཁ་ནས་བཅུག་སྟེ་རྡོ་རྗེའི་ལམ་ནས་བྱུང་བ་ལྷ་མོའི་པདྨར་ཞུགས་པ་ལ་རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་དེ་བཞིན་གཤེགས་པ་དེ་ལྟར་བཞུགས་པས་དབང་བསྐུར་ཏེ། [64b.5]ཕྱིར་བྱུང་བ་རྣམས་ལ་དབང་བསྐུར་བའི་བུམ་པའི་ཆུས་གཏོར་རོ། །ཡང་དག་པར་མཆོད་པའི་རིག་པའི་བདག་པོའི་སྙིང་པོ་བརྒྱ་རྩ་བརྒྱད་བཟླས་སོ། །རིག་པའི་ཁྱད་པར་ལ་ནི་ཁ་ཅིག་ཏུ་བསྒོམ་པའི་ཁྱད་པར་ཉུང་ངུ་ནི་མན་ངག་གི་སྙེ་མར་རྟོགས་པར་བྱའོ། །རིག་པ་རབ་ཏུ་གནས་པའོ། ། [64b.6]སློབ་དཔོན་རྡོ་རྗེ་འཆང་གི་གཟུགས་སུ་རང་གི་ལག་པ་གཡས་པའི་སོར་མོ་རྣམས་རྡོ་རྗེ་རྩེ་ལྔ་པའི་ངོ་བོར་སྐད་ཅིག་གིས་བསྒོམས་པ་ལ་ཡི་གེ་ཨཱཿལས་སྐྱེས་པའི་ཉི་མ་ཨཱཿས་བྱིན་གྱིས་བརླབས་པ་དང་། ལག་པ་གཡོན་པའི་སོར་མོ་རྣམས་པདྨའི་འདབ་མའི་རྣམ་པར་སྐད་ཅིག་གིས་ [64b.7]བསམས་པ་ལ་ཨ་ལས་སྐྱེས་པའི་ཟླ་བ་དེས་བྱིན་གྱིས་བརླབས་པ་བསྒོམས་ནས། དེ་དག་གི་དབུས་སུ་བཟུང་བའི་ཕྲེང་བའི་ཐག་པའི་དབུས་ཀྱི་སྐུད་པ་རྡོ་རྗེ་སེམས་དཔའི་རང་བཞིན་དུ་དང་། ཕྱོགས་དང་མཚམས་ཀྱི་སྐུད་པ་བརྒྱད་ཕྱག་ན་པདྨ་དང་། བྱམས་པ་དང་། ནམ་མཁའ་ [65a] [65a.1]མཛོད་དང་། ཀུན་ཏུ་བཟང་པོ་དང་། ཕྱག་ན་རྡོ་རྗེ་དང་། འཇམ་དཔལ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། སའི་སྙིང་པོའི་བདག་ཉིད་དུ་དང་། ཕྲེང་རྡོག་རྣམས་རྣམ་པར་སྣང་མཛད་ལ་སོགས་པའི་རང་བཞིན་དང་། མདོ་འཛིན་ནི་སྟོབས་དང་མི་འཇིགས་པ་ [65a.2]ལ་སོགས་པའི་ཆོས་ཀྱི་ཕུང་པོའི་མཆོད་རྟེན་དུ་སྐད་ཅིག་གིས་བསམས་ནས་སྙིང་གའི་ས་བོན་གྱི་འོད་ཟེར་གྱིས་བཀུག་པའི་རྡོ་རྗེ་སེམས་དཔའ་ལ་སོགས་པ་རྣམས་རང་ཉིད་ཇི་ལྟ་བ་ལ་བཅུག་སྟེ། ཨ་གྑ་རུ་ཀཱ་རུ་ཎུ་རུ་ཨ་སོ་ཧི་ས་མནྟ་བི་སྭཱ་རུག་ནི་ཨ་ཨ་སཾ་ཁུ་ཨ་ལིག་ཀུ་སི་ཛ་ཛ་ཨི་ཏད་ཏ་ [65a.3]བི་སཱ་རུ། ཨོཾ་པ་དེ་པ་དེ་མ་ཧཱ་ཛྙཱ་ན་སརྦ་བུ་དྡྷ་མ་ཧཾ་བྷ་བེ་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨ་ཁཾ་སྭཱ་ཧཱ། ཞེས་པའི་སྔགས་ཀྱིས་བྱིན་གྱིས་བརླབ་པོ། །བུམ་པའི་ཆུས་དབང་བསྐུར་ཞིང་མཆོད་པར་བྱའོ། །ཕྲེང་བ་རབ་ཏུ་གནས་པའོ། །མདོར་བསྡུས་པ་ནི་ཕྲེང་བ་ལ་གསུང་རྡོ་རྗེ་བསྒོམས་ནས་ཡེ་ཤེས་ [65a.4]སེམས་དཔའ་དང་གཅིག་ཏུ་བྱས་ཏེ་དེའི་གཟུགས་ཡོངས་སུ་གྱུར་པ་ལས་ཕྲེང་བའི་རྣམ་པར་བསམས་ལ། བུམ་པའི་ཆུས་དབང་བསྐུར་ཏེ་མཆོད་ནས་གསུང་རྡོ་རྗེའི་སྙིང་པོ་བརྒྱ་རྩ་བརྒྱད་བཟླས་པར་བྱའོ། །ཕྲེང་བ་རབ་ཏུ་གནས་པར་བྱའོ། །འདི་ནི་སྐུ་གཟུགས་ལ་སོགས་པ་རབ་ཏུ་གནས་ [65a.5]པའི་ཆོ་གའོ།། །།ཡོན་བདག་ལ་ནུས་པ་ཡོད་ན་ཆུ་འགྲམ་དུ་གཙོ་བོ་རྣམ་པར་སྣང་མཛད་ཀྱི་དཀྱིལ་འཁོར་བྲིས་ཏེ་དེའི་འགྲམ་དུ་འཁོར་ལོའི་དབང་ཕྱུག་གི་རྣལ་འབྱོར་དང་ལྡན་པས་གཏོར་མ་རྣམས་རྫིང་ལ་སོགས་པའི་ཕྱོགས་སུ་བཏང་ནས་ཆུ་སྟོང་པར་གྱུར་པར་བསམས་ཏེ། བྷྲཱུཾ་ལས་ [65a.6]སྐྱེས་པའི་འཁོར་ལོ་དང་བྷྲཱུཾ་ལས་གྲུབ་པའི་རྣམ་པར་སྣང་མཛད་སྤྱན་མ་དང་སྙོམས་པར་ཞུགས་པ་ཡོངས་སུ་གྱུར་པ་ལས་རྡོ་རྗེ་ཆུ་ལྷ་དཀར་པོ་མིའི་གདོང་བ་ལ་གདེངས་ཀ་བདུན་པ། ལག་པ་གཡོན་པས་ཀླུའི་ཞགས་པ་བཟུང་བས་མཛེས་མ་ལ་འཁྱུད་པ། གཡས་པ་འགྱིང་བ་དང་བཅས་ [65a.7]པས་ཨུཏྤལ་སྔོན་པོ་བསྣམས་པ། ལྟེ་བའི་འོག་ན་སྦྲུལ་གྱི་རྣམ་པའི་དམ་ཚིག་སེམས་དཔའ་བསྒོམས་ནས་དེ་ལ་རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་རྣམ་པར་སྣང་མཛད་ཞབས་བསིལ་དང་ཞལ་བསིལ་དང་། མཆོད་ཡོན་དབུལ་བ་སྔོན་དུ་འགྲོ་བས། ཨོཾ་བཛྲས་མ་ཡ་ [65b] [65b.1]སྟྭཾ་ཞེས་བརྗོད་ནས་བཅུག་སྟེ་དབང་བསྐུར་ལ་མེ་ཏོག་ལ་སོགས་པས་མཆོད་ནས། དེ་ཡོངས་སུ་གྱུར་ཅིང་གཟུགས་བརྙན་དང་ལྡན་པས་ཡེ་ཤེས་ཀྱི་བདུད་རྩིའི་རང་བཞིན་དྲི་ཞིམ་པ་དང་། རོ་ཞིམ་པ་དང་། ཡང་བ་དང་། དང་བ་དང་། འཇམ་པ་དང་། བསིལ་བ་དང་། གྲེ་བ་དང་ལྟོ་བ་ལ་མི་ [65b.2]གནོད་པ་སྟེ། ཡན་ལག་བརྒྱད་དང་ལྡན་པའི་ཆུ་དབང་ཆེན་གྱི་གཏིང་ལ་ཐུག་པར་ཀླུ་རིགས་བརྒྱད་ཀྱི་གནས་རླབས་ཀྱི་ཕྲེང་བ་དང་ལྡན་པ་ཀུན་ནས་བསྒོམ་པར་བྱའོ། །དེ་ལ་ཡང་ཆུའི་མཐིལ་དུ་བཟོ་བྱས་པའི་ཀླུ་བརྒྱད་སྐད་ཅིག་གིས་དམ་ཚིག་སེམས་དཔའི་ངོ་བོ་སྙིང་གའི་ས་བོན་གྱི་འོད་ཟེར་ [65b.3]གྱིས་བཀུག་པའི་ཡེ་ཤེས་སེམས་དཔའ་དང་དབྱེར་མེད་པ་རྣམས་གཞག་པར་བྱའོ། །རྫིང་དེར་དབུས་སུ་མཆོད་སྡོང་གི་ཤིང་ཟབས་ལས་ཚད་ཉིས་འགྱུར་རམ། དཔངས་དང་མཉམ་པ་ཡང་རུང་སྟེ། དེ་ལྟར་སེམས་དཔའ་གཉིས་ཀྱི་བདག་ཉིད་ཅན་ཆུ་ལྷའི་གཟུགས་བརྙན་དང་ལྡན་པའི་རྩེ་ [65b.4]མོ་ཅན་བཙུགས་པའི་དྲུང་དུའོ། །མཆོད་སྡོང་གི་ཤིང་དང་བྲལ་བའི་ཆུའི་རྟེན་གྱི་དབུས་སུ་ཡང་ངོ་། །དེ་ལ་ཤར་དུ་མཐའ་ཡས་གསེར་ལས་བྱས་པ་དང་། ལྷོར་ར་གན་ལས་བྱས་པའི་པདྨ་དང་། ནུབ་ཏུ་ཟངས་ཀྱི་རང་བཞིན་འཇོག་པོ་དང་། བྱང་དུ་དངུལ་དག་པའི་རང་བཞིན་ལས་ནོར་རྒྱས་ [65b.5]དང་། དབང་ལྡན་དུ་ཞ་ཉེ་དཀར་པོ་ལས་བསྒྲུབས་པའི་པདྨ་ཆེན་པོ་དང་། མེར་ཞ་ཉེའི་རང་བཞིན་གྱི་དུང་སྐྱོང་དང་། བདེན་བྲལ་དུ་ཁར་བ་ལས་བྱས་པའི་ཀརྐོ་ཊ་དང་། རླུང་དུ་ལྕགས་ལས་བྱས་པའི་རིགས་ལྡན་ནོ། །མཆོད་སྡོང་མེད་ན་ནི་དབུས་སུ་རྡོ་རྗེ་ཆུ་ལྷ་ཤེལ་ལས་བྱས་པའོ། ། [65b.6]དེ་ནས་བདུད་རྩི་ལྔ་དང་འོ་མ་དང་ག་པུར་ལ་སོགས་པ་ཆུ་ལྷ་ལ་སོགས་པ་ལ་གཏོར་ཏེ་དེ་རྣམས་ལ་མེ་ཏོག་ལ་སོགས་པས་མཆོད་ལ་འབྱོར་ན་རྒྱས་པའི་དོན་དུ་སྦྱིན་སྲེག་བྱས་ནས་བ་ལང་གི་ལྕི་བ་བྱུགས་པར་འདུག་སྟེ་དྲི་དཀར་པོས་མཎྜལ་བྱས་ནས། རང་གི་སྙིང་གའི་ས་བོན་གྱི་འོད་ཟེར་ [65b.7]གྱིས་བཀུག་པའི་མཎྜལ་ལ་གནས་པའི་པདྨའི་ལྟེ་བ་ལ་རྡོ་རྗེ་ཆུ་ལྷ་དང་། ཤར་གྱི་འདབ་མ་ལ་མཐའ་ཡས་དང་། ལྷོར་པདྨ་དང་ནུབ་ཏུ་འཇོག་པོ་དང་། བྱང་དུ་ནོར་རྒྱས་དང་། དབང་ལྡན་དུ་པདྨ་ཆེན་པོ་དང་། མེར་དུང་སྐྱོང་དང་། བདེན་བྲལ་དུ་ཀརྐོ་ཊ་དང་། །རླུང་དུ་རིགས་ལྡན་དང་། [66a] [66a.1]ཕྱི་རོལ་ཀུན་དུ་ཀླུ་ཐམས་ཅད་བསམས་ནས། ཨོཾ་ཨཱཿབཛྲ་བ་རུ་ཎཱ་ཡ་ཧཱུཾ་སྭཱ་ཧཱ། ཨོཾ་ཨཱཿཨ་ནནྡཱ་ཡ་ཧཱུཾ་སྭཱ་ཧཱ། དེ་ལྟར་རང་གི་མིང་བཅུག་པའི་སྔགས་རྣམས་ཀྱིས་མེ་ཏོག་དཀར་པོས་མཆོད་དེ་ལག་པ་གཡོན་པ་གདེངས་ཀའི་ཚུལ་དུ་ལག་པ་གཡས་པ་བརྐྱང་སྟེ། ཨོཾ་ [66a.2]ཨ་ནནྡ་པཱ་སུ་ཀི་ཏཀྵ་ཀ་ཀརྐོ་ཊ་ཀ་པདྨ་མ་ཧཱ་པདྨ་ཤཾ་ཁཱ་བཱ་ལ་ཀུ་ལི་ཀ་དེ་བ་ཏི་མ་ཧཱ་དེ་བ་ཏི། སོ་མ་ཤི་ཁི་མ་ཧཱ་ཤི་ཁི། དཎྜ་དྷ་ར་མ་ཧཱ་དཎྜ་དྷ་ར་ཨ་པ་ལཱ་ལ་ཧུ་ལུཎྜ་ནནྡ་ཨུ་པ་ནནྡ་སཱ་ག་ར་མ་ཧཱ་སཱ་ག་ར་ཏ་པ་ཏ་མ་ཧཱ་ཏཱ་པ་ཏ། ཤྲཱི་ཀཱནྟི། མ་ཧཱ་ཀཱནྟི། རཏྣ་ཀནྟི། སུ་རཱུ་པ་མ་ཧཱ་སུ་རཱུ་པ། བྷ་ཊ་ཧི་ཀ་མ་ཧོ་ད་ [66a.3]ད་ཤི་ལ་མ་ཧཱ་ཤི་ལི་ལི་ཨོཾ་བྷཀྵ་བྷ་ཀྵ། ཨཱ་གཙྪ་ཨཱ་གཙྪ་མ་ཧཱ་ནཱ་ག་ཨ་དྷི་པ་ཏི་སརྦ་བྷུརྦྷུ་བ་ཕྲུཾ་ཕྲུཾ་སྭཱ་ཧཱ། ཞེས་པ་ཀླུའི་གཏོར་མའི་སྔགས་འདོན་ཞིང་འོ་མའི་གཏོར་མ་བྱིན་གྱིས་བརླབ་པར་བྱའོ། །དེ་ནས་ཡུན་རིང་དུ་གནས་པར་བྱ་བའི་དོན་དུ་གསོལ་བ་བཏབ་སྟེ། ཡི་གེ་བརྒྱ་པ་བཏོན་ [66a.4]ནས་བཟོད་པར་གསོལ་ཏེ། བྱིན་གྱིས་བརླབས་པའི་འོ་མའི་གཏོར་མ་རེ་ཁམ་ཕོར་རྣམས་སུ་ཕྱོགས་བརྒྱད་རྣམས་སུ་དབུལ་ལོ། །དེའི་ཕྱི་ངོས་སུའང་གཏོར་རོ། །གཞོན་ནུ་མ་རྣམས་ཀྱང་ཚིམ་པར་བྱའོ། །རྫིང་དང་རྫིང་བུ་དང་། ཁྲོན་པ་རབ་ཏུ་གནས་པའི་ཆོ་གའོ། །ཨ་མྲའི་ [66a.5]ཚལ་དང་སྐྱེད་མོས་ཚལ་ལ་སོགས་པ་རབ་ཏུ་གནས་པའི་ཆོ་ག་ལ། ཕྱོགས་སུ་གཏོར་མ་བྱིན་ནས་བདག་ཉིད་རྣམ་པར་སྣང་མཛད་ཀྱིས་ཤིང་གི་གཙོ་བོ་སྟོང་པ་ཉིད་ཀྱི་རྗེས་ལ་རྣམ་པར་སྣང་མཛད་ཀྱི་ངོ་བོར་བསམས་ནས་དེར་རྣམ་པར་སྣང་མཛད་ཀྱི་ཡེ་ཤེས་སེམས་དཔའ་མཆོད་ [66a.6]ཡོན་ལ་སོགས་པ་སྔོན་དུ་འགྲོ་བས་བཅུག་ནས། བུམ་པའི་ཆུས་དབང་བསྐུར་ཏེ་དེ་ཡོངས་སུ་གྱུར་པའི་ཤིང་དེ་དང་དེ་ཉིད་ཀྱི་ཚེ་ཤིང་གཞན་རྣམས་ཀྱང་དེ་ཡོངས་སུ་གྱུར་པར་མོས་ཏེ། ཤིང་གི་གཙོ་བོ་དང་དེ་ལ་བྱིན་གྱིས་བརླབ་པའི་ལྷའི་མེ་ཏོག་ལ་སོགས་པས་མཆོད་དེ། འབྲས་ [66a.7]བུ་ལ་སོགས་པས་མཆོག་ཏུ་ཕན་འདོགས་པའི་སྐྱེད་མོས་ཚལ་ལ་སོགས་པ་ཡུན་རིང་དུ་གནས་པའི་ཕྱིར་གསོལ་བ་བཏབ་ནས་ཕྱོགས་ཀྱི་གཏོར་མ་རྣམས་དབུལ་ལོ། །སྐྱེད་མོས་ཚལ་ལ་སོགས་པ་རབ་ཏུ་གནས་པའི་ཆོ་གའོ།། །།བརྗོད་པའི་ཆོ་ག་འདི་དག་ཉིད་ལ་ཐམས་ཅད་དུ་ལས་ [66b] [66b.1]གང་ལ་སྔགས་མ་བརྗོད་པ་དེར་ནི་ལས་ཐམས་ཅད་པའི་སྔགས་བཟླས་སོ་ཞེས་པ་ནི་ཁ་བསྐང་བར་བྱ་བའོ། །དེ་ནས་རྡུལ་ཚོན་གྱི་དཀྱིལ་འཁོར་རམ་དཀྱིལ་འཁོར་གཞན་ཡང་རུང་སྟེ། སྔར་བརྗོད་པའི་ཆོ་གས་དང་པོ་བུམ་པ་ལྷག་པར་གནས་པ་དང་། དགོད་པ་དང་། ཉེ་བར་སྤྱོད་པ་ལྔ་ [66b.2]ལ་སོགས་པའི་མཆོད་པ་བྱས་ནས། ལྷག་གནས་བྱས་པའི་སློབ་མ་རྣམས་ལས་ལེགས་པར་བཏགས་པ་ང་རྒྱལ་ལ་སོགས་པའི་སྐྱོན་དང་བྲལ་བ། དགེ་བསྙེན་ལ་སོགས་པའི་བསླབ་པ་ལ་གནས་པ་ལེགས་པར་ཐོས་པ་ལ་སོགས་པས་ཡོངས་སུ་སྦྱངས་པ། གུས་པ་དང་ལྡན་པ། རྡོ་རྗེ་ [66b.3]སེམས་དཔའི་སྡོམ་པ་བཟུང་བའི་ནུས་པ་དང་ལྡན་ན་རིགས་དང་ཡོན་ཏན་དང་། གཟུགས་དང་བྲལ་བ་རྣམས་ཀྱང་ལྷག་པར་གནས་པར་བྱ་སྟེ། གལ་ཏེ་དེ་དག་ཀྱང་དད་པས་རྡོ་རྗེ་སེམས་དཔའི་སྡོམ་པ་ཤིན་ཏུ་དོན་དུ་གཉེར་ཞིང་རྡོ་རྗེ་ཐེག་པ་ལ་སྟོན་པ་གཞན་མི་ཚོལ་བར་གྱུར་ནའོ། དེ་སྐད་དུ་ [66b.4]བཅོམ་ལྡན་འདས་ཀྱིས་གསུངས་ཤིང་ཕྱེད་དང་བཞི་བརྒྱ་པར་ཡང་། གཟུགས་ངན་ཡོངས་སུ་མེད་པ་དང་། །དམན་པའང་ལྷག་པར་གནས་བྱ་སྟེ། །འཁོར་ནི་བཞི་པོ་རྣམས་ལ་ཡང་། །དཀྱིལ་འཁོར་དག་ཏུ་ཆོ་ག་གནང་། །རང་རང་བསླབ་པ་ལེགས་པར་ལྡན། །ཐེག་ཆེན་ལ་དགའི་བདག་ [66b.5]ཉིད་ཅན། ཞེས་གསུངས་སོ། །འཁོར་བཞི་ནི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་སོ། །ཆོ་ག་ནི་འཇུག་པ་ལ་སོགས་པའོ། །ལྡན་པ་ནི་དེ་ལྷུར་བྱེད་པའོ། །ཐེག་ཆེན་ལ་དགའི་བདག་ཉིད་ཅན། །ཞེས་པ་འདིས་ནི་འགལ་བ་སྤངས་པའི་ཐེག་པ་ [66b.6]འདི་ལ་ཡིད་ཀྱི་ལས་གཙོ་བོ་ཉིད་དུ་སྟོན་པར་བྱེད་དོ། །བཅོམ་ལྡན་འདས་ཀྱིས་རང་བཞིན་གྱི་ཁ་ན་མཐོ་བའི་ལས་ཉིད་ལ་ཡང་། ཀུན་སློང་གི་ཁྱད་པར་ལས་ལྟུང་བར་མི་འགྱུར་བར་མང་དུ་གསུངས་སོ། །ཁོ་བོས་ཀྱང་མན་ངག་གི་སྙེམ་ལ་སོགས་པར་རྣམ་པར་བཀྲོལ་ལོ། །གཞན་དུ། [66b.7]སྙིང་བརྩེར་ལྡན་ཞིང་བྱམས་ཕྱིར་དང་། །སེམས་དགེ་བ་ལ་ལྟུང་བ་མེད། །ཅེས་པ་དང་། སྙིང་རྗེ་ལྡན་ཞིང་དོན་མཐོང་བས། །བཀག་པ་ཡང་ནི་གནང་བ་ཡིན། །ཞེས་སོ། །གང་ཞིག་ཡང་བསོད་ནམས་བསགས་པ་མང་དུ་ཐོས་པ་ལ་སོགས་པས། ཆོས་ཐམས་ཅད་སྒྱུ་མ་དང་། རྨི་ལམ་ [67a] [67a.1]ལྟ་བུ་དང་སྟོང་པ་ཉིད་དུ་རོ་གཅིག་པར་ཤིན་ཏུ་བརྟན་པར་ལྷག་པར་མོས་པར་བྱེད་པ་དེ་ལ་ནི་དགེ་སློང་དང་། རྡོ་རྗེ་འཛིན་པའི་སྡོམ་པ་དག་དང་འགལ་བའི་དྲི་མ་ཡང་ག་ལ་ཡོད། དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་དགེ་སློང་རྡོ་རྗེ་འཛིན་པ་ཞེས་གསུངས་ཏེ། འདི་ནི་ངེས་ [67a.2]པར་ཁས་བླངས་དགོས་སོ། །གཞན་དུ་ན་དུས་མཚུངས་པར་གཉིས་ཀ་ཇི་ལྟར་འགྱུར། དགེ་སློང་གི་ཉམས་སུ་མྱོང་བ་དེའི་སྦྱོར་བའི་བདེ་བའི་བག་ཆགས་སད་པས་རྨི་ལམ་དུ་མཐོང་ན་རྨི་ལམ་དུ་མཐོང་བའི་ཕྱི་རོལ་གྱི་ཕྱག་རྒྱ་ལ་དབང་པོ་གཉིས་ཀྱི་བདེ་བའི་མཐར་ཐུག་པར་ཉམས་སུ་མྱོང་ [67a.3]ན་ཡང་ལྟུང་བ་མེད་དོ་ཞེས་འདུལ་བར་བསྟན་པ་དེ་རྟོགས་པར་བྱའོ། །གལ་ཏེ་ཕྱོགས་ཀྱི་བྱེ་བྲག་སྐྱེ་བོ་ངན་པའི་སྤྱོད་ཡུལ་དུ་གྱུར་ན། དེའི་ཚེ་དེ་ལ་ཡང་ཡེ་ཤེས་ཀྱི་ཕྱག་རྒྱས་གསང་བ་དང་ཤེས་རབ་ཡེ་ཤེས་ཀྱི་དབང་སྦྱིན་པར་བྱའོ། །སྐྱེ་བོ་ངན་པ་མེད་ན་ནི་ལས་ཀྱི་ཕྱག་རྒྱ་ཁོ་ནས་སོ། ། [67a.4]དེ་ཁོ་ན་ཉིད་ལ་མོས་པ་མི་བརྟན་པའི་དགེ་སློང་ལ་ནི་དད་པ་དང་ལྡན་ཡང་ཕྱིའི་ཤེས་རབ་མའི་དབང་བཟུང་བ་བཀག་སྟེ། གཞན་དུ་སྡོམ་པ་ལྔ་མ་ཉམས་པས་དེ་དོན་མེད་པ་ཆེན་པོར་འགྱུར་རོ། །གལ་ཏེ་ཡང་བླ་མ་བསྒོམ་པ་ལ་བརྟན་པར་གྱུར་ན་དེའི་ཚེ་དེ་ལ་ཡང་དེས་གཏད་པའི་ཡེ་ཤེས་ [67a.5]ཀྱི་ཕྱག་རྒྱ་མས་ཤེས་རབ་ཡེ་ཤེས་ཀྱི་དབང་སྦྱིན་ནོ། །བླངས་པ་ལ་ཡང་ཚངས་པར་སྤྱོད་པ་དང་བྲལ་བའི་དོགས་པ་ཡང་མེད་དེ། ལུས་ཀྱི་ལས་མེད་པའི་ཕྱིར་རོ། །དེ་ཡང་སྔར་ཁྱིམ་པ་ཡིན་ན་ཉམས་སུ་མྱོང་བའི་བདེ་བ་དྲན་དུ་བཅུག་པས་དགའ་བ་ལ་སོགས་པའི་དབྱེ་བ་བསྟན་པར་བྱའོ། ། [67a.6]བླ་མ་ཡང་དགེ་སློང་དུ་གྱུར་པ་ན་གསང་བའི་དབང་ལ་སོགས་པ་སྟེར་བའི་ཚེ། བརྗོད་པ་ཐམས་ཅད་མཚམས་སྦྱར་བར་བྱའོ། །ཧ་ཅང་སྤྲོས་པས་ཆོག་གོ། །སྐབས་སུ་བབས་པ་བརྗོད་པར་བྱ་སྟེ། དེ་ལ་སློབ་མ་གཅིག་གམ་གཉིས་སམ་མང་པོ་མཎྜལ་བྱས་ནས་པུས་མོ་ས་ལ་བཙུགས་ཏེ་ [67a.7]མེ་ཏོག་དང་བཅས་པའི་ཐལ་མོ་སྦྱར་བ་རྣམས་ལ་འཇིག་རྟེན་འདི་ཉིད་ཀྱི་མངོན་པར་མཐོ་བ་དོན་དུ་གཉེར་བས་མ་ཡིན། འཇིག་རྟེན་ཕ་རོལ་དུ་མངོན་པར་མཐོ་བའི་ཆེད་དུ་ཡང་མ་ཡིན་གྱི། འོན་ཀྱང་དེ་བཞིན་གཤེགས་པའི་སྐུ་གསུམ་གྱི་ཕུན་སུམ་ཚོགས་པ་ཐོབ་པར་བྱ་བའི་ཕྱིར་དཀྱིལ་འཁོར་ [67b] [67b.1]དུ་འཇུག་པར་བྱའོ། །དེ་ལྟ་ན་ནི་མངོན་པར་མཐོ་བ་གཉིས་ཀྱང་ཐོབ་པར་འགྱུར་རོ་ཞེས་བསྒྲགས་ནས། ཁ་ནས་རང་གི་ལུས་ལ་བཅུག་སྟེ། རྡོ་རྗེའི་ལམ་ནས་འཐོན་ནས་ཤེས་རབ་ཀྱི་པདྨའི་ལམ་ལ་གནས་པ་རྣམས་ལ་སྙིང་གའི་ས་བོན་གྱི་འོད་ཟེར་གྱིས་བཀུག་པའི་ཤེས་རབ་དང་བཅས་ [67b.2]པའི་དེ་བཞིན་གཤེགས་པ་ཁ་ནས་ཞུགས་ཤིང་ཞུ་བར་གྱུར་པ་རྣམས་ཀྱིས་དབང་བསྐུར་བར་བསྒོམས་ནས། དཀྱིལ་འཁོར་གྱི་ཤར་སྒོར་བཞག་སྟེ། འཇུག་པར་གསོལ་བ་འདེབས་སུ་གཞུག་པར་བྱ་སྟེ། སྐྱེ་རྒ་འཆི་བ་ན་ཀྲ་ཡི། །ཆུ་སྲིན་ལ་སོགས་འཇིགས་རུང་བ། །སྲིད་པའི་མཚོ་ [67b.3]ལས་བདག་སྒྲོལ་མཛོད། །དགའ་ཆེན་སྟོན་པ་ཁྱོད་གཅིག་པུ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་ [67b.4]བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །ཞེས་བརྗོད་དུ་གཞུག་ཅིང་ངོ་། །དགའ་ཆེན་ཞེས་པ་ནི་རྡོ་རྗེ་འཆང་དང་མཚུངས་པའོ། །ཚུལ་ནི་ལམ་མོ། །དམ་ཚིག་ནི་སྔགས་དང་། རྒྱུད་དང་། ཕྱག་རྒྱ་ལ་སོགས་པའོ། །ཁ་ཅིག་ནི་དང་ [67b.5]པོར་གསོ་སྦྱོང་བཟུང་བ་རྣམས་ལ་ཞེས་སོ། །དེ་ནས་སློབ་མ་གཅིག་གཙོ་བོར་བྱ་སྟེ། བུ་ཚུར་ཤོག་ཅིག་ཐེག་ཆེན་པོ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་འབྱུང་ [67b.6]བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་རྣམས་ཀྱིས། །ཡེ་ཤེས་མཉམ་མེད་ཡང་དག་བརྙེས། །གསང་སྔགས་སྦྱོར་བ་མཉམ་མེད་པ། །གང་གི་ཤཱཀྱ་སེང་གེ་སོགས། །མཆོག་རྣམས་ཀྱིས་ནི་བདུད་ཀྱི་སྡེ། །མི་བཟད་ཆེན་པོ་སྟོབས་ཆེན་བཅོམ། །འཇིག་རྟེན་རྗེས་འཇུག་ [67b.7]རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བློ་གྲོས་འདི་ནི་གྱིས་ཤིག་བུ། །ཞེས་བྱ་བ་བརྗོད་ཅིང་ཡང་དག་པར་འཛིན་དུ་གཞུག་གོ། །འདི་ནི་ཞེས་པ་ནི་སྔགས་ཀྱི་ཚུལ་ལ་གཞོལ་བའོ། །དེ་ནས། དཀོན་མཆོག་གསུམ་ལ་བདག་ [68a] [68a.1]སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་ལན་གསུམ་བརྗོད་དུ་གཞུག་གོ། །དེ་ལྟར་ཐུན་མོང་གི་སྡོམ་པ་ཅན་གྱིས་སློབ་དཔོན་གྱི་སྡོམ་པ་གཟུང་བའི་ཕྱིར། འཁོར་ལོ་ [68a.2]ཕྱིར་མི་ལྡོག་པའི་དབང་། །དམ་པ་བདག་ལ་སྩལ་ནས་ནི། །མགོན་པོ་འཁོར་ལོ་ལྷ་དག་གི། །དེ་ཉིད་སློབ་དཔོན་ཕྲིན་ལས་དང་། །སངས་རྒྱས་ཀུན་གྱི་དམ་ཚིག་དང་། །སྡོམ་པ་གསང་མཆོག་བཤད་དུ་གསོལ། །སེམས་ཅན་ཀུན་གྱི་དོན་བྱའི་ཕྱིར། །རྟག་ཏུ་བདག་ནི་སློབ་དཔོན་བགྱིད། ། [68a.3]ཅེས་ཁྱད་པར་དུ་གསོལ་བ་འདེབས་སུ་བཅུག་ནས། བྱང་ཆུབ་ཏུ་སེམས་བསྐྱེད་དུ་གཞུག་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་ཆེ་གེ་མོ་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཇི་ [68a.4]ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་ལྟར། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་བསླབ་པ་རྣམ་པ་གསུམ། །དགེ་བ་དང་ནི་ཆོས་སྡུད་དང་། །སེམས་ཅན་དོན་བྱེད་ཚུལ་ཁྲིམས་ནི། །བདག་གིས་སོ་སོར་ [68a.5]བརྟན་པོར་གཟུང་། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་མཆོག་བླ་ན་མེད། །སྡོམ་པ་སངས་རྒྱས་རྣལ་འབྱོར་བྱུང་། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་ཆེན་པོའི་རིགས་བསྡུས་པ། །རྡོ་རྗེ་དྲིལ་བུ་ཕྱག་རྒྱ་ཡང་། །དེ་ཉིད་ཀྱིས་ནི་རབ་ཏུ་གཟུང་། །སློབ་ [68a.6]དཔོན་དག་ཀྱང་གཟུང་བར་བགྱི། །རིན་ཆེན་ཆེན་པོའི་རིགས་མཆོག་གི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རབ་ཏུ་སྦྱིན། །པདྨ་ཆེན་པོའི་རིགས་དག་པ། །བྱང་ཆུབ་ཆེན་པོར་འབྱུང་བ་ལ། །ཕྱི་དང་གསང་བ་ཐེག་པ་གསུམ། །དམ་ཆོས་སོ་སོར་ [68a.7]གཟུང་བར་བགྱི། །ལས་ཆེན་རིགས་ནི་བསྡུས་པ་ལ། །སྡོམ་པ་ཐམས་ཅད་ཡང་དག་ལྡན། །མཆོད་པའི་ལས་ནི་ཅི་ནུས་བཞིན། །ཀུན་ནས་སོ་སོར་གཟུང་བར་བགྱི། །སེམས་ཅན་ཀུན་གྱི་དོན་བགྱིད་ཕྱིར། །བྱང་ཆུབ་སེམས་ནི་བླ་མེད་པ། །དམ་པ་ཡང་དག་བསྐྱོད་བགྱི་ཞིང་། །སྡོམ་པ་མ་ [68b] [68b.1]ལུས་བཟུང་བགྱིས་ནས། །མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་འབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་ལན་གསུམ་བརྗོད་དུ་གཞུག་ཅིང་། །འདི་ནི་མན་ངག་གི་སྙེ་མར་རྣམ་པར་ཕྱེའོ། ། [68b.2]དེ་ནས་བདུད་རྩི་འཁྱིལ་པའི་སྔགས་ཀྱིས་བསྲུངས་ནས། དེ་རྣམས་ཀྱི་སྙིང་ག་དང་། མགྲིན་པ་དང་། སྤྱི་བོ་རྣམས་སུ་རྡོ་རྗེ་དང་པདྨ་དང་འཁོར་ལོའི་སྟེང་དུ་ཉི་མ་དང་ཟླ་བ་ལ་གནས་པའི་ཡི་གེ་ཧཱུཾ་ཨཱཿཨོཾ་ནག་པོ་དང་དམར་པོ་དང་དཀར་པོ་བསམས་ནས། དེ་རྣམས་བརྗོད་སྙིང་ག་དང་། མགྲིན་ [68b.3]པ་དང་། མགོ་བོ་རྣམས་ལ་དྲི་ཆུ་རྡོ་རྗེ་དང་བཅས་པའི་ཁུ་ཚུར་གཡས་པས་བྱུགས་ཏེ་མགོ་བོ་ལ་མེ་ཏོག་དང་། མདུན་དུ་བདུག་སྤོས་དང་། མར་མེ་དང་། སྙིང་གར་སླར་ཡང་དྲི་སྦྱིན་ནོ། །དེའི་རྗེས་ལ་ཨ་ཤྭཏྠ་ལ་སོགས་པའི་སོ་ཤིང་སོར་བཅུ་གཉིས་པ་དྲང་ཞིང་སྲོག་ཆགས་མེད་པ་མ་གས་པ་ [68b.4]རྨ་མེད་པ་དྲི་བཟངས་ཀྱི་ཆུས་བཀྲུས་པ་རྩེ་མོར་མེ་ཏོག་བཅིངས་པ་བྱང་དུ་ཕྱོགས་པའི་སློབ་མ་རྣམས་ལ་སྦྱིན་ནོ། །དེ་རྣམས་ཀྱིས་ཀྱང་ཁྲུ་བཞི་པ་གྲུ་བཞི་པའི་དཀྱིལ་འཁོར་བའི་ལྕི་བ་ལ་སོགས་པས་བྱུགས་པར་ཤར་རམ་བྱང་དུ་ཕྱོགས་པས་སོ་ཤིང་། ཨོཾ་བཛྲ་ཧཱ་ས་ཧ་ཞེས་བརྗོད་ནས་རྩེ་མོ་ [68b.5]ནས་འཆོས་ཏེ་མ་གས་པ་སྟེང་དུ་བལྟ་ཞིང་། ལྟོས་པ་མེད་པར་མདུན་དུ་འདོར་རོ། །དེ་རྣམས་ལ་སོ་ཤིང་ལྷུང་བའི་རྗེས་སུ་འབྲངས་ཏེ་འབྱུང་བར་འགྱུར་བའི་དངོས་གྲུབ་བཤད་པར་བྱའོ། །ཤར་དང་། བྱང་དང་། ནུབ་དང་། ལྷོ་དང་། སྟེང་དང་། འོག་ཏུ་ཕྱོགས་པར་ལྷུང་ན་རིམ་པ་བཞིན་དུ་ཞི་ [68b.6]པ་དང་། རྒྱས་པ་དང་། དབང་དང་། མངོན་སྤྱོད་དང་། རིག་པ་འཛིན་པ་དང་། ས་འོག་གི་དངོས་གྲུབ་རྣམས་སོ། །དཀྱིལ་འཁོར་གྱི་ཕྱི་རོལ་དུ་ལྷུང་ན་ནི་དངོས་གྲུབ་མེད་དོ། །དེ་ནས་བཾ་ལས་སྐྱེས་པའི་ཆུ་དེས་བཟླས་པ་ཁ་བཀྲུ་བའི་ཕྱིར་བྱིན་ནས། འཁྱིལ་པ་ལན་བདུན་བཟླས་པའི་དྲི་ཞིམ་པོའི་ཆུ་ཁྱོར་བ་ [68b.7]གསུམ། ཨོཾ་ཧྲཱིཿབི་ཤུདྡྷ་དྷརྨ་སརྦ་པཱ་པ་ནི་ཙ་ཨ་སྱ་ཤོ་དྷ་ཡ་སརྦ་པི་ཀཝཱན་ཨ་པ་ན་ཧཱུཾ་ཞེས་བརྗོད་ཅིང་བླུད་དོ། །དེ་ནས་དེ་རྣམས་ཕྱི་རོལ་དུ་བཞག་ལ་ཧཱུཾ་ལས་བྱུང་ཞིང་དེ་བཟླས་པའམ། འཁྱིལ་པ་བཟླས་པའི་ཀུ་ཤ་མང་པོ་རྩེ་མོ་མཉམ་པ་སྟན་དུ་འདིང་བའི་དོན་དུ་དང་། དེ་བཞིན་དུ་སྔས་ཀྱི་དོན་དུ་ཡི་ [69a] [69a.1]གེ་དྷཱིཿལས་སྐྱེས་ཤིང་དེ་དང་འཁྱིལ་པ་བཟླས་པའི་ཀུ་ཤ །ཨོཾ་བཛྲ་ཏཱིཀྵྞ་བཾ་ཞེས་པའི་སྔགས་ཀྱིས་སྦྱིན་ནོ། །དེ་ནས་ཧཱུཾ་ལས་བྱུང་བའི་སྐུད་པ་དམར་པོ་སློབ་མའི་ལུས་ཀྱི་ཚད་སུམ་བལྟབ་བྱས་ཏེ་དེ་དང་འཁྱིལ་པ་ལན་བདུན་བཟླས་ལ་མདུད་པ་གསུམ་མམ་དྲུག་བྱས་པ་དེ་ [69a.2]རྣམས་ཀྱི་དཔུང་པ་གཡས་པའམ་གཡོན་པར་རྒྱུད་གཞན་དུ་གསུངས་ཏེ། ཨོཾ་བུདྡྷ་མཻ་ཏྲཱིཾ་རཀྵ་རཀྵ་སརྦ་ན་སྭཱ་ཧཱ། ཞེས་བརྗོད་ཅིང་། རང་ཉིད་ཀྱིས་བཅིངས་ལ་ཡང་དག་པར་བསྲུངས་ནས་སྤྲོ་བ་བསྐྱེད་པར་བྱ་སྟེ། འཇིག་རྟེན་དུ་ནི་ཀུན་མཁྱེན་རྣམས། །རེས་འགའ་འབྱུང་ངམ་མི་འབྱུང་སྲིད། ། [69a.3]ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་འབྱུང་། །གང་གིས་སེམས་ཅན་མཉམ་མེད་དོན། །མྱ་ངན་མི་འདའ་བྱེད་པར་ནུས། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་ཤིན་ཏུ་དཀོན། །བསྐལ་པ་བྱེ་བ་དུ་མ་རུ། །སྡིག་པ་གང་ཞིག་སྔོན་བྱས་པ། ། [69a.4]དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད་ཟད་གྱུར་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་པ་སྨོས་ཅི་དགོས། །སྐྱོབ་པའི་གསང་སྔགས་བཟླས་ནས་ནི། །གོ་འཕང་བླ་ན་མེད་པར་འགྱུར། །སྤྱོད་མཆོག་འདི་ལ་གང་རྣམས་ཀྱི། །བློ་གྲོས་ [69a.5]ཤིན་ཏུ་དྲི་མ་མེད། །དེ་རྣམས་ཀྱི་ནི་སྡུག་བསྔལ་ཀུན། །འབྱུང་བའི་ངན་འགྲོ་ཡང་དག་ཞི། །བདག་ཉིད་ཆེན་པོ་ཁྱེད་རྣམས་ཀྱིས། །དེ་རིང་རྙེད་པ་མཉམ་མེད་རྙེད། །གང་གིས་ཁྱེད་རྣམས་རྒྱལ་བ་ཀུན། །བདག་ཉིད་ཆེན་པོ་སྲས་བཅས་ཀྱིས། །བསྟན་འདི་ཀུན་ལ་ཡོངས་སུ་ [69a.6]བཟུང་། །གནས་པ་སྐྱེ་བར་འགྱུར་བ་ནི། །དེ་ཡིས་ཁྱེད་རྣམས་ཐེག་ཆེན་ལ། །ལེགས་པར་སྐྱེས་པ་ཉིད་དུ་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །གང་གིས་ཁྱེད་རྣམས་འགྲོ་འགྱུར་བས། །དེ་བཞིན་གཤེགས་པར་འགྱུར་བ་ཡིན། །ཞེས་ [69a.7]པ་ཉན་དུ་བཅུག་ནས་སོ། །སྐྱེ་བ་ཉིད་དུ་འགྱུར་བ་ནི་དཀྱིལ་འཁོར་དུ་ཞུགས་པས་སོ། །ཐེག་པ་ཆེན་པོ་ཉིད་རྒྱུད་ནས་མཆོག་ཏུ་ཆེར་འབྱུང་བ་མངའ་བ་གང་ཡིན་པའོ། །དེ་ནས་དེ་རྣམས་འཁྱིལ་པའི་སྔགས་ཀྱིས་བསྲུངས་ནས་བཟླས་པའི་དོན་དུ་འཁྱིལ་པའི་སྔགས་བྱིན་ཏེ། ནང་པར་བདག་ལ་ [69b] [69b.1]རྨི་ལམ་སྨྲོས་ཤིག་ཅེས་བརྗོད་ལ་དཀྱིལ་འཁོར་གྱི་ཁང་པའི་ནང་ངམ། དཀྱིལ་འཁོར་གྱི་སའི་མཐར་རམ། ཡོལ་བ་ལ་སོགས་པས་བཅད་པར་རམ། གཞན་དུ་ཡང་རུང་སྟེ་སེང་གེའི་ཉལ་སྟབས་ཀྱིས་ཉལ་དུ་གཞུག་གོ། །རང་ཉིད་དཀྱིལ་འཁོར་གྱི་ཁང་པར་ཞུགས་ནས་བསྲུང་བའི་དོན་དུ་ [69b.2]འཁྱིལ་པའི་སྔགས་བཟླས་པར་བྱའོ། །འདིར་སྡོམ་པ་གང་སློབ་དཔོན་དུ་མི་བྱེད་པ་ལ་ཡང་སྟེར་བ་དེ་ནི་ཐུན་མོང་སྟེ། སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་ཙམ་གྱི་མཚན་ཉིད་དོ། །གང་ཡང་སློབ་དཔོན་དུ་བྱེད་པ་ལ་སྦྱིན་པ་དེ་ནི་སློབ་དཔོན་གྱི་སྡོམ་པ་སྟེ། རིགས་ལྔས་བསྡུས་པའོ། ། [69b.3]དེ་བས་ནི་འདི་ནི་སྡོམ་པ་གཉིས་སྦྱིན་པ་སྔོན་དུ་འགྲོ་བ་ཙམ་གྱི་སློབ་མ་ལྷག་པར་གནས་པའི་ཆོ་གའོ།། །།དེའི་རྗེས་སུ་བླ་མས་ནང་པར་གཏོར་མ་བཏང་སྟེ། དཀྱིལ་འཁོར་གྱི་ཁང་པ་ནས་འཐོན་ལ། སློབ་མ་རྣམས་ལ་རྨི་ལམ་དྲི་སྟེ། རི་ལ་ལྷུང་བ་ལ་སོགས་པས་མཚན་པའི་རྨི་ལམ་ངན་པ་རྣམས་ནི་ [69b.4]འཁྱིལ་པའི་སྔགས་ཀྱིས་བསྲུངས་ལ། དཀྱིལ་འཁོར་གྱི་ཁང་པར་འཇུག་པའི་ཚེ། སློབ་མ་རྣམས་ཀྱིས། ཨོཾ་པྲ་བི་ཤ་བྷ་ག་ཝན་མ་ཧཱ་སུ་ཁ་མོ་ཀྵ་པུ་རཾ་སརྦ་སིདྡྷིསུ་ཁ་པྲ་དཾ་པ་ར་མ་སུ་ཁོ་ཏ་མ་སིདྡྷྱ་ཛཿཧཱུཾ་བཾ་ཧོཿཔྲ་སིདྡྷྱ་སྭ་ཞེས་སྤྲོ་བ་བསྐྱེད་པ་ཞུགས་ནས། གཡས་སྐོར་དུ་འཁོར་ལོའི་དབང་ཕྱུག་གི་གཟུགས་ [69b.5]ཀྱིས་ནུབ་ལ་སོགས་པའི་སྒོར་གནས་ཏེ། དཀྱིལ་འཁོར་གྱི་ཤར་སྒོ་ལ་སོགས་པར་ཨོཾ་བཛྲོད་གྷ་ཊ་ཡ་ས་མ་ཡ་པྲ་བེེ་ཤ་ཡ་ཧཱུཾ་ཞེས་འདོན་ཞིང་སྒོ་ཕྱེ་ནས་མེ་ཏོག་གི་ཕྲེང་བ། ཨོཾ་པར་མ་སུ་ཁ་ཤ་ཡ་སུ་ལ་ལི་ཏ་བི་ལ་ས་ནི་མ་ཏཻར་ན་མཱ་མི་བྷ་ག་ཝཱན་ཏཾ་ཛཿཧཱུཾ་བཾ་ཧོཿ་ཧི་ཧི་ཧི་ཧཱི་ཧཱིཿཔྲ་ཏིཙྪ་ཀུ་སུ་མཱཉྫ་ལི་ནཱ་ཐ་ཏོ། །ཞེས་པའི་ [69b.6]སྔགས་ཀྱིས་དཀྱིལ་འཁོར་དུ་དོར་ནས་སླར་བཟུང་སྟེ། ཕྲེང་བའི་དབང་གི་བསམ་པས་རང་གི་མགོ་བོར་བཅིངས་ལ། འཁོར་ལོའི་དབང་ཕྱུག་ནི་བླ་མ་མངོན་སུམ་དུ་གྱུར་པར་མོས་པར་བྱ་སྟེ། དེས་སྟེར་བཞིན་པའི་ཕྲེང་བའི་དབང་གཟུང་བ་ལ་སོགས་པ་འཆད་པར་འགྱུར་བའི་དབང་མ་ལུས་པ་དང་། ཆོ་ག་ [69b.7]བཞིན་སློབ་དཔོན་གྱི་ལས་ཐམས་ཅད་ལ་རྗེས་སུ་གནང་བ་ཐོབ་པར་བྱས་ལ། སློབ་མ་གཞུག་པའི་ཆེད་དུ་བདེ་བ་ཆེན་པོའི་བདག་ཉིད་ཤེས་རབ་དང་ཐབས་ཀྱི་རང་བཞིན་དེ་ཁོ་ན་ཉིད་ཀྱི་བསྟོད་པ་སྔོན་དུ་འགྲོ་བས། དཀྱིལ་འཁོར་གྱི་དངོས་གྲུབ་མངོན་པར་ཞུ་ཞིང་བདེན་པའི་བྱིན་རླབས་བྱ་སྟེ། ནམ་མཁའ་ [70a] [70a.1]སྐྱེ་བ་མཚན་མའི་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །མི་བསྐྱོད་རྡོ་རྗེ་དེང་བདག་སྒྲུབས། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་སྒྲུབ་ [70a.2]མཛོད། །ཉེས་པ་མེད་པ་རྟག་པ་ཁྱོད། །འདོད་ཆགས་ཀུན་གྱིས་རྗེས་ཆགས་པ། །བཅོམ་ལྡན་ཆགས་ཆེན་དགའ་བ་ཆེ། །དེ་ཁོ་ན་ཉིད་བདག་གྲུབ་མཛོད། །ཤིན་ཏུ་རྣམ་དག་ཆོས་ཀྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་ཏུ་བཟང་པོ་ཀུན་བདག་ཉིད། །བྱང་ཆུབ་སེམས་ [70a.3]དཔར་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཆེན་མཆོག་གི་ཕྱག་རྒྱ་ཡིས། །རྡོ་རྗེ་ཆེན་པོ་གསོར་བ་ལས། །རྡོ་རྗེ་སྙེམས་བདག་བདག་གྲུབ་མཛོད། །སེམས་ཅན་ཀུན་གྱི་ཡིད་ཁྱབ་པ། །སེམས་ཅན་ཀུན་གྱི་སྙིང་ལ་གནས། །སེམས་ཅན་ཀུན་གྱི་ཡབ་ཀྱང་ [70a.4]ཡིན། །དམ་ཚིག་མཆོག་གིས་འདོད་པ་མཆོག །བདེན་པ་གང་གིས་ཡེ་ཤེས་མཆོག །ཤེས་རབ་ཐབས་བདག་དཀྱིལ་འཁོར་གྱི། །བདེན་པ་དེ་ཡིས་མགོན་པོ་ཁྱོད། །འདོད་པ་བདག་ལ་ཡོངས་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་ [70a.5]རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང་། །དེ་ཉིད་དེ་བཞིན་ཉིད་ངེས་བྱུང་། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བར་སློབ་མ་རྣམས། །ཀུན་གྱིས་སྒྲིབ་མེད་མཐོང་བར་ཤོག །ཅེས་བརྗོད་པར་བྱའོ། །གང་གིས་ [70a.6]སྐྱེ་བ་ལ་ནམ་མཁའི་མཚན་མ་སྟེ། དཔེ་ཡོད་པ་དེ་ནི་དེ་བཞིན་ཉིད་ཀྱི་ཕྱིར་སྟོང་པ་ཉིད་དང་སྙིང་རྗེའི་རང་བཞིན་རྡོ་རྗེ་སེམས་དཔའ་ཞེས་པའི་དོན་ཏོ། །རྡོ་རྗེ་འཛིན་པ་ཀུན་ནི་སྐུ་རྡོ་རྗེ་ལ་སོགས་པའོ། །འདོད་ཆགས་ཀུན་ནི་འདོད་པ་ཐམས་ཅད་ཀྱིས་སེམས་ཅན་རྣམས་ལ་རྗེས་སུ་ཆགས་པའོ། ། [70a.7]ཆགས་ཆེན་ནི་དམིགས་པ་མེད་པའི་སྙིང་རྗེ་ཆེན་པོའོ། །རང་བཞིན་གྱིས་ཡོངས་སུ་དག་པའི་ཕྱིར་གདོད་མ་ནས་གྲོལ་བའོ། །ཀུན་བདག་ཉིད་ནི་ཆོས་ཉིད་ཀྱིས་སོ། །བྱང་ཆུབ་ཀྱི་བདག་ཉིད་ཀྱི་སེམས་ནི་བྱང་ཆུབ་སེམས་དཔའོ། །དམ་ཚིག་མཆོག་གི་སྟེ་ཡང་དག་པའི་ཡེ་ [70b] [70b.1]ཤེས་དང་ལྡན་པ་རྣམས་ཀྱིའོ། །འདོད་པར་བྱ་བས་ན་འདོད་པ་སྟེ་འདི་ནི་མཆོག་ཀྱང་ཡིན་ནོ། །ཉོན་མོངས་པ་དང་། ཤེས་བྱ་དང་། སྙོམས་པར་འཇུག་པའི་སྒྲིབ་པ་དང་བྲལ་བ་དང་། རང་བཞིན་མེད་པ་དང་། སྒྲའི་ཡུལ་མ་ཡིན་པ་ཉིད་ཀྱིས་གསལ་བ་ལ་སོགས་པའི་ཚིག་ལྔའོ། ། [70b.2]སྒྲིབ་པ་མེད་ན་བདེན་པའི་བྱིན་གྱི་རླབས་དང་། བཅོམ་ལྡན་འདས་ཀྱིས་བྱིན་གྱིས་བརླབས་པ་ལས་སོ། །འདི་ནི་སློབ་དཔོན་འཇུག་པའི་ཆོ་གའོ།། །།དེ་ནས་སྒོའི་སློབ་དཔོན་རྣམས་མི་འདོད་ན་གཞན་དང་། འདོད་ན་ནི་དེ་རྣམས་དང་། སློབ་མ་གཞན་ལྷག་པར་གནས་པར་བྱས་པ་སྡོམ་པ་ [70b.3]གཉིས་དང་ལྡན་པ་རྣམས་ཁྲུས་བྱེད་དུ་བཅུག་སྟེ། དྲི་ཞིམ་པོ་ལ་སོགས་པས་དག་པར་བྱས་ལ་ཡོལ་བའི་ཕྱི་རོལ་དུ་རྣམ་པར་སྣང་མཛད་ཀྱི་གཟུགས་སམ། འཁོར་ལོའི་དབང་ཕྱུག་གི་གཟུགས་སུ་དམིགས་ལ་འཁྱིལ་པ་བཟླས་པའི་གོས་དམར་པོའམ། གཞན་གང་ཡང་རུང་བ། ཨོཾ་སརྦ་ཏ་ཐཱ་ག་ཏ་ [70b.4]ཨ་ནུཏྟ་ར་བོ་དྷི་ཨ་ལཾ་ཀཱ་ར་ཝསྟྲ་པཱུ་ཛ་མི་གྷ་ས་མུ་དྲ་སྥ་ར་ཎ་ས་མ་ཡ་ཧཱུཾ་ཞེས་པས་སྨད་གཡོགས་བྱས་ཤིང་། ཨོཾ་བཛྲ་རཀྵ་ཧོ་ཞེས་པས་སྟོད་གཡོགས་ཅན། ཨོཾ་བཛྲ་ཨུཥྞཱི་ཥ་ཧཱུཾ་ཕཊ་ཅེས་པས་གཙུག་ཏོར་བྱས་ལ། བདུད་རྩི་འཁྱིལ་པ་བཟླས་པའི་གོས་དམར་པོའམ་སེར་པོ། ཨོཾ་ཙཀྵུར་བནྡྷ་བར་མཱ་ན་ཡ་ཧཱུཾ་ཞེས་ [70b.5]པའི་སྔགས་ཀྱིས་མིག་རས་བཅིངས་ལ། ཨ་ཁཾ་བཱི་ར་ཧཱུཾ་ཞེས་བརྗོད་ནས་མེ་ཏོག་གི་ཕྲེང་བ་བཟུང་ཞིང་། ཡོན་ཕུལ་བ་ལས་ཐམས་ཅད་པའི་ཆུས་བསངས་ཏེ། སྙིང་ག་དང་། མགྲིན་པ་དང་། སྤྱི་བོར་གནས་པའི་རྡོ་རྗེ་དང་པདྨ་དང་། འཁོར་ལོ་ལ་བཀོད་པའི་ཉི་མ་དང་། ཉི་མ་དང་ཟླ་བའི་སྟེང་དུ་ཧཱུཾ་ནག་པོ་དང་། [70b.6]ཨཱཿདམར་པོ་དང་། ཨོཾ་དཀར་པོའི་འོད་ཟེར་གྱིས་ལུས་འོད་གསལ་བར་བྱས་ཤིང་། ཧཱུཾ་ཞེས་བརྗོད་ནས་དཀྱིལ་འཁོར་གྱི་ཤར་སྒོར་བཞག་སྟེ། ལས་ཀྱི་རྡོ་རྗེ་ཅན་གྱིས་བཟུང་བ་ལ་དཀྱིལ་འཁོར་དུ་གཞུག་པའི་ཕྱིར་དྲི་བར་བྱའོ། །ཀྱེ་དགའ་བ་ལ་དགའ་ཁྱོད་སུ་ཡིན། དེས། བདེ་ཆེན་བདག་ནི་སྐལ་བཟང་ [70b.7]ལགས། །ཞེས་བརྗོད་པར་བྱའོ། །དེ་ནས་ཨོཾ་སརྦ་ཡོ་ག་ཙིཏྟ་ཨུཏྤ་ད་ཡཱ་མི་ཞེས་བརྗོད་དུ་གཞུག་ཅིང་། བྱང་ཆུབ་སེམས་བསྐྱེད་དུ་བཅུག་ལ་སྙིང་གར་རྡོ་རྗེ་མེ་ཏོག་དང་བཅས་པ། ཨོཾ་སུ་ར་ཏེ་ས་མ་ཡ་སྟྭཾ་ཧོཿསིདྡྷྱ་བཛྲ་ཡ་ཐཱ་སུ་ཁཾ་ཞེས་བརྗོད་ཅིང་བཟུང་སྟེ། དེང་ཁྱོད་ལ་དེ་བཞིན་གཤེགས་པ་ཐམས་ [71a] [71a.1]ཅད་ཀྱིས་བྱིན་གྱིས་རློབས་པར་འགྱུར་གྱིས། ཁྱོད་ཀྱིས་ཀྱང་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དཀྱིལ་འཁོར་འདི་དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱ་ཞིང་། མ་དད་པར་ཡང་མི་བྱའོ་ཞེས་བརྗོད་དོ། །ཨོཾ་ཡ་མཱནྟ་ཀྲྀཏ་ཧཱུཾ་ཞེས་བརྗོད་ [71a.2]ཅིང་ཁྲིད་ལ། ཨ་ཁཾ་བཱི་ར་ཧཱུཾ་ཞེས་པ་འདིས་ཡོལ་བའི་ནང་དུ་བཅུག་ནས། མ་ཧཱ་ར་ཏ་སུ་དྲྀཌྷ་སུ་ཏོ་ཥྱ་སུ་སུ་ཁོ་བཛྲ་སཏྭ་ཨདྡྷྱ་སིདྡྷྱ་མ་ཞེས་པ་འདོན་པད་ཀོར་བྱས་ནས་ཐལ་མོ་སྦྱར་བས་དཀྱིལ་འཁོར་གྱི་ཤར་གྱི་སྒོར་ཨོཾ་སརྦ་ཏ་ཐཱ་ག་ཏ་པཱུ་ཛོ་པསྠཱ་ནཱ་ཡ་ཨཱཏྨ་ནཱཾ་ནི་རྱཱ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ [71a.3]ཏིཥྛ་མཱཾ། ཨོཾ་སརྦ་བུདྡྷཱ་པཱུ་ཛོ་པསྠཱ་ནཱ་ཡ་ཨཱཚ་ནཱཾ་ནིརྱཱ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་བཻ་རོ་ཙ་ན་ཨ་དྷི་ཏིཥྛ་སྭ་མཱཾ་ཞེས་པ་དང་། ལྷོར་ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཤེ་ཀཱ་ཡ་ཨཱཏྨ་ནཱཾ་ནི་རྱཱ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། ནུབ་ཏུ་ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་བརྟ་ནཱ་ཡ་ཨཱཏྨ་ནཱཾ་ནིརྱཱ་ཏ་ཡཱ་མི་སརྦ་ཏ་ཐཱ་ག་ [71a.4]ཏ་བཛྲ་དྷརྨ་པྲ་བརྟ་ཡ་མཱཾ། བྱང་དུ་ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨཱ་ཎེ་ཨཱཏྨ་ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཾ། ཞེས་པའི་སྔགས་ལྔས་རིམ་པ་བཞིན་དཀྱིལ་འཁོར་ན་བཞུགས་པའི་མི་བསྐྱོད་པ་ལ་སོགས་པའི་དེ་བཞིན་གཤེགས་པ་རྣམས་ལ་ཕྱག་བྱེད་དུ་བཅུག་ནས། ཡང་ [71a.5]ཤར་སྒོར། ཨོཾ་གུ་རུ་ཙ་ར་ཎོ་པསྠཱ་ནཱ་ཡ་ཨཱཏྨ་ནཱཾ་ནི་ཪྻཱ་ཏ་ཡཱ་མི། ཨོཾ་སརྦ་སཏྭ་པ་རི་ཏྲཱ་ཎ། ཨརྠཾ་ཨཱཏྨ་ནཱཾ་ནིརྱཱ་ཏ་ཡཱ་མི། ཞེས་པའི་དོན་གོ་བ་སྔོན་དུ་འགྲོ་བས་འདོན་དུ་གཞུག་གོ། །ཁ་ཅིག་གིས་འདིའི་སྙིང་གར་སྙོམས་འཇུག་གི་བདེ་བ་ཆེན་པོ་དང་སྙིང་ག་ལ་སོགས་པར་དགོད་པར་གཞན་ [71a.6]ཡང་བཤད་པ་ནི་སྐབས་འདིར་བསྒོམ་པར་མི་བྱ་སྟེ། དེ་ནི་ཆོ་ག་གཞན་ཡིན་ནོ། །དེ་ནས་དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་དེས་ན་ངས་ཁྱོད་ལ་རྡོ་རྗེའི་ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་ [71a.7]ཀྱི་དངོས་གྲུབ་ཀྱང་ཐོབ་པར་འགྱུར་ན་དངོས་གྲུབ་གཞན་རྣམས་ལྟ་སྨོས་ཀྱང་ཅི་དགོས། ཁྱོད་ཀྱིས་ཀྱང་འདིའི་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། ཁྱོད་དམ་ཚིག་ཉམས་པར་གྱུར་ཏེ་རེ་ཞེས་བརྗོད་ནས་མགོ་བོར་རྡོ་རྗེ་བཟུང་ནས་དྲིལ་བུ་དཀྲོལ་ཞིང་། ཁྱོད་ [71b] [71b.1]ཀྱིས་དམ་ཚིག་རྡོ་རྗེ་འདི། །གལ་ཏེ་ཁྱོད་ཀྱིས་འགའ་ཞིག་ལ། །འདི་སྨྲས་ན་ནི་སྤྱི་བོ་འགེམས། །ཞེས་བསྒྲགས་ལ་སྙིང་གར་རྡོ་རྗེ་བཟུང་སྟེ། ཨོཾ་དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། ། [71b.2]ཞེས་བཀའ་བསྒོས་ནས། རྣམ་པར་རྒྱལ་བའི་བུམ་པའི་སྟེང་ན་གནས་པའི་ཆུ་མིང་མེད་དང་། མཐེ་བོང་གིས་བཟུང་བའི་སྣོད་ཀྱི་ཁས་དེའི་ཁར་བླུགས་ཤིང་། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེ། རྡོ་རྗེ་བདུད་རྩིའི་ཆུ་ [71b.3]འཐུངས་ཤིག། །ཨོཾ་པཉྩ་ཨ་མྲྀ་ཏ་ཨུ་ད་ཀ་ཋཿཞེས་བརྗོད་ཅིང་མནའི་བཏུང་བ་བྱེད་དུ་བཅུག་ནས། དེང་ནས་བརྩམས་ནས་ཁྱོད་ཀྱིས་ཕྱག་ན་རྡོ་རྗེ་ང་ཡིན་གྱིས། ངས་འདི་གྱིས་ཤིག་ཅེས་གང་བསྒོ་བ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པ་ཡང་མི་བྱ་སྟེ། ཁྱོད་ཡང་བ་མ་སྤངས་པར་ [71b.4]ཤི་བའི་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་བརྗོད་དོ། །ཁྱོད་ཀྱིས་ཞེས་པ་ནི་ཁྱོད་ལའོ། །དམྱལ་བ་ཞེས་པ་ནི་བརྒལ་དཀའ་བའི་ཆུ་ལྟ་བུའོ། །རྡོ་རྗེ་བདུད་རྩིའི་ཆུ་ཞེས་པ་ལ་རྡོ་རྗེ་ནི་ཚར་གཅོད་པར་བྱེད་པས་སོ། །བདུད་རྩི་སྟེ་རྗེས་སུ་འཛིན་པའི་ཕྱིར་རོ། །དམ་ཚིག་གི་ཆུ་སྦྱིན་པའི་ [71b.5]ཆོ་གའོ།། །།དེའི་རྗེས་སུ་སྒྲུབ་པའི་དུས་ལས་སྔོན་དུ་དངོས་གྲུབ་ལ་སོགས་པ་ངེས་པའི་དོན་དུ་སློབ་མ་དང་སྣོད་ལ་ལྷ་དབབ་པར་བྱའོ། །དེ་ལ་དང་པོར་རི་ལ་སོགས་པ་ཡིད་དང་རྗེས་སུ་མཐུན་པའི་གནས་སུ་སྔོན་དུ་བསྙེན་པ་བྱས་ཤིང་སེམས་བརྟན་པ་རྡོ་རྗེ་སེམས་དཔའི་རྣལ་འབྱོར་ཤིན་ཏུ་ [71b.6]བརྟན་པར་དམིགས་ནས་དབབ་པའི་ནུས་པ་ཐོབ་པ། མཚན་ཉིད་ཐམས་ཅད་དང་ལྡན་པའི་སློབ་མ་ལྷག་གནས་བྱས་པ་མདུན་དུ་བྱས་ཏེ། སྐད་ཅིག་གིས་སྟོང་པ་ཉིད་ཀྱི་རྗེས་ལ་ཡི་གེ་ཨཱཿལས་བྱུང་བའི་སྣང་བ་མཐའ་ཡས་ཀྱི་གཟུགས་སུ་བསྐྱེད་དེ། དེ་བཞིན་གཤེགས་པ་ཐམས་ཅད་ [71b.7]ཀྱིས་བྱིན་གྱིས་བརླབ་ཏུ་གསོལ། །རྡོ་རྗེ་སེམས་དཔའ་བདག་ལ་འབབ་པར་གྱུར་ཅིག་ཅེས་བརྗོད་དུ་བཅུག་ལ། དེའི་སྙིང་གར་ལཾ་ལས་སྐྱེས་པའི་སའི་དཀྱིལ་འཁོར་སེར་པོ་གྲུ་བཞི་པ་རྡོ་རྗེས་མཚན་པ་ཉི་མ་ལ་ཧཱུཾ་སྔོན་པོ་དང་། མགོ་བོར་བཾ་ལས་བྱུང་བའི་ཆུའི་དཀྱིལ་འཁོར་དཀར་ཞིང་ [72a] [72a.1]ཟླུམ་པ་བུམ་པས་མཚན་པ་ཟླ་བ་ལ་ཡི་གེ་ཧ་དཀར་པོ་དང་། མགྲིན་པར་ཡཾ་ལས་བྱུང་བའི་རླུང་གི་དཀྱིལ་འཁོར་སྔོན་པོ་གཞུ་ལྟ་བུ་བ་དན་གཡོ་བ་གཉིས་ཀྱིས་མཚན་པར་ཟླ་བ་ལ་ཨཱཿདམར་པོ་བསྒོམས་ནས། རང་གི་སྙིང་གའི་ས་བོན་གྱི་འོད་ཟེར་རྣམས་ཀྱིས་ཐུགས་དང་སྐུ་དང་ [72a.2]གསུང་རྡོ་རྗེ་རྣམས་སྤྱན་དྲངས་ལ། གོ་རིམས་བཞིན་དུ་དེ་རྣམས་ཀྱི་རང་བཞིན་ཧཱུཾ་ཧཿཨཱའི་ཡི་གེ་རྣམས་ལ་བསྟིམས་ལ། རྐང་པ་དག་གི་འོག་ནས་རླུང་གི་དཀྱིལ་འཁོར་གྱིས་སྦར་བའི་རཾ་ཡོངས་སུ་གྱུར་པའི་མེའི་དཀྱིལ་འཁོར་དམར་པོ་གྲུ་གསུམ་པ་ཡི་གེ་རས་མཚན་པ་འོད་ཟེར་འཕྲོ་བ་ལ་གནས་པའི་ཡི་ [72a.3]གེ་ཛྷཻཿདམར་པོས་སློབ་མ་འདེབས་ཤིང་། ཡི་གེ་ཛྷཻཿའི་འོད་ཟེར་གྱི་ཚོགས་རྐང་པའི་བུ་གནས་ཞུགས་པ་རྣམས་དང་། ཡི་གེ་ཧཱུཾ་ལ་སོགས་པའི་འོད་ཟེར་རྣམས་ཀྱིས་ལུས་མཐའ་དག་ཀུན་ནས་བཀང་བར་བསྒོམ་ཞིང་སྤོས་ཕོར་འདེགས་པ་སྔོན་དུ་འགྲོ་བས་དྲིལ་བུ་དཀྲོལ་ཞིང་ཨཱ་བེེ་ཤ་ཡ་སྟཾ་བྷ་ཡ་ར་ར་ར་ [72a.4]ཙ་ལ་ཙ་ལ་ཡ་ཧཱུཾ་ཧཿཨཱཿཛྷཻཿཞེས་པའི་སྔགས་རྣམ་པ་བརྒྱར་འདོན་ཞིང་། བསམ་གཏན་ལ་གཞོལ་བས་དབབ་པར་བྱའོ། །གལ་ཏེ་ཕེབས་པ་རིང་དུ་འཕར་ན་དེའི་ཚེ་དེའི་སྟེང་དུ་རི་རབ་རྡོ་རྗེའི་རང་བཞིན་དེའི་སྟེང་དུ་དབང་ཆེན་གྱི་དཀྱིལ་འཁོར། དེའི་སྟེང་དུ་རྡོ་རྗེ་སེར་པོ་རྩེ་ལྔ་པ། དེའི་སྟེང་དུ་ཡི་གེ་ཡ། དེའི་ [72a.5]སྟེང་དུ་རྣམ་པར་སྣང་མཛད་བསྒོམས་ཏེ་དེ་བཟློག་པར་བྱའོ། །དེ་ལྟར་ཕེབས་པར་གྱུར་པ་ལ་སློབ་མའི་ཐུགས་རྡོ་རྗེའི་ས་བོན་གྱི་འོད་ཟེར་རྣམས་ཀྱིས་གསུང་རྡོ་རྗེའི་ས་བོན་གྱི་བདག་ཉིད་ཅན་བསྐུལ་ཞིང་ལྕེ་ལ་ཟླ་བ་ལ་གནས་པའི་ཨཱཿདམར་པོ་འོད་ཟེར་གྱི་ཕྲེང་བ་འཁྲུག་པར་བསྒོམས་ནས། རྡོ་རྗེ་སྨྲོས་ [72a.6]ཤིག་ཅེས་བརྗོད་པར་བྱའོ། །དེ་ལྟར་ན་འདིར་རང་ངམ་གཞན་གྱི་དགེ་བའམ། མི་དགེ་བའི་བྱ་བ་བདེན་པར་སྨྲའོ། །དེ་ནས་ཞུགས་པའི་ལྷ་སྙིང་གའི་ས་བོན་གྱི་འོད་ཟེར་གྱིས་བཀུག་ནས་རང་གི་སྙིང་གའི་ས་བོན་ལ་བསྟིམ་ཞིང་། སློབ་མའི་མགོ་བོར་རྡོ་རྗེ་བཟུང་ལ། ཨོཾ་ཁྱེད་ཀྱིས་སེམས་ཅན་ [72a.7]ཞེས་པ་ལ་སོགས་སྔོན་དུ་འགྲོ་བའི་ཧཱུཾ་ཧཿཨཱཿཛྷཻཿམུཿཞེས་པས་གཤེགས་སུ་གསོལ་ལོ། །ཡང་། དྲིལ་བུའི་ཞབས་ཀྱིས་བྲས་པ་ཡི། །བཤང་གཅིལ་སོགས་ཡང་དག་བྱུགས། །བུད་མེད་རས་ནི་རྡུལ་དང་ལྡན། །གཏུབས་ལ་བྱི་ལའི་བྲུན་གྱིས་བྱུག །གུ་གུལ་དང་ནི་རྣམ་པར་བསྲེས། །རོ་ཡི་ [72b] [72b.1]མེ་ནི་ཡང་དག་བླངས། །དེ་ནི་པདྨའི་སྣོད་བཞག་ནས། །དེར་ནི་དེ་ཀུན་བཅུག་ནས་ནི། །གཡས་བརྐྱང་ཞབས་གནས་ཁྲོ་བོ་ནི། །རྡོ་རྗེ་བདག་ཉིད་རྡོ་རྗེ་ཅན། །འཁོར་ལོ་གསུམ་བདག་དེ་ལ་དབབ། །དེ་ནས་སྤོས་ཀྱིས་བདུག་པར་བྱ། །ཕེབས་པར་འགྱུར་ཏེ་ཐེ་ཚོམ་མེད། །ཏིཥྛ་མ་ཧཱ་ཀྲོ་དྷ་ [72b.2]ཨཱ་བེ་ཤ་ཡ་ཧཱུཾ་ཤྲཱི་ཧེ་རུ་ཀཱ་ཡ་བིད་མ་ཧེ་བིདྱ་རཱ་ཛཱ་ཡ་དྷཱི་མ་ཧེ་སྭཱ་ཧཱ། ཞེས་པ་འདིས་དཔའ་བོ་རབ་ཏུ་བསྐུལ་བར་བྱའོ་ཞེས་འབུམ་པ་མངོན་པར་བརྗོད་པའི་རྒྱུད་དུ་གསུངས་པའི་ཆོ་གས་དབབ་པར་བྱའོ། །བཤང་གཅི་ལ་སོགས་ཞེས་པ་ནི་བདུད་རྩི་དང་སྒྲོན་མ་བཅུས་བྱུགས་པའོ། །བླ་མ་བདེ་མཆོག་གི་ [72b.3]གཟུགས་ཅན་གཡས་བརྐྱང་དུ་གནས་པའི་བདེ་མཆོག་གི་བདག་ཉིད་ཀྱི་སློབ་མ་གཡས་བརྐྱང་དུ་གནས་ཤིང་སྙིང་གར་ཐལ་མོ་སྦྱར་བ་ལ་ལག་པ་གཡོན་གྱིས་དྲིལ་བུ་དཀྲོལ་ཞིང་ཏིཥྛ་ཞེས་པ་ལ་སོགས་པའི་སྔགས་བརྗིད་བག་དང་བཅས་པར་ཟློས་ཤིང་ལག་པ་གཡས་ཀྱིས་བདུག་པར་བྱའོ། །དེ་ནས་ [72b.4]གལ་ཏེ་ཕེབས་པ་ཞེས་བྱ་བ་ལ་སོགས་པ་རིག་པར་བྱའོ། །གལ་ཏེ་རྒྱུད་ཁ་ཅིག་ཏུ་བུ་མོ་ལོ་བཅུ་གཉིས་ལོན་པ་སྐྱེས་ནས་མ་ཉམས་པ། ཡན་ལག་དང་ཉིང་ལག་མ་ཉམས་པ་དང་། གཞོན་ནུ་ལོ་དེ་སྙེད་ལོན་པ་བུད་མེད་ཀྱི་ཡུལ་མི་ཤེས་པ། ཡན་ལག་དང་ཉིང་ལག་མ་ཚང་བ་མེད་པའི་སྣོད་ [72b.5]མདུན་དུ་བཞག་ནས་ལྷ་དབབ་པར་བྱའོ་ཞེས་གསུངས་སོ། །དེ་ལྟར་ཡང་བླ་མ་དུས་རྒྱུན་དུ་རྡོ་རྗེ་འཆང་གི་སྐུ་མངོན་དུ་བྱེད་ཅིང་། བསོད་ནམས་བསགས་པ་སྐད་ཅིག་གིས་བརྟན་པར་བསྒོམ་ནུས་པས་ཡན་ལག་མ་ཚང་ཡང་རུང་། ན་ཚོད་མང་དུ་ལོན་ཞིང་འཁྲིག་པ་ཉམས་སུ་མྱོང་བའི་སྣོད་ལ་ [72b.6]ཡང་ལྷ་དབབ་པར་བྱའོ་ཞེས་རྒྱུད་གཞན་རྣམས་སུ་ཡང་མང་དུ་བསྟན་པའི་ཕྱིར་སློབ་མ་ལ་དབབ་པའི་དོན་དུ་དབབ་པར་བྱའོ། །འདི་ནི་དབབ་པའི་ཆོ་གའོ། །དེ་ནས་སློབ་མ་དཀྱིལ་འཁོར་ལ་ཕྱོགས་པ་ལ་ཁྱོད་ཀྱིས་མིག་ལ་ཇི་ལྟར་སྣང་ཞེས་དྲིས་ནས། དེ་ན་རེ་དཀར་པོ་དང་། སེར་པོ་དང་། དམར་པོ་དང་། [72b.7]ནག་པོ་སྣང་ངོ་ཞེས་ཟེར་ན་རིམ་པ་བཞིན་དུ་འདི་ནི་ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་དངོས་གྲུབ་ལ་སྐལ་པ་དང་ལྡན་པར་གོ་བར་བྱས་ནས་འདིའི་མཐེ་བོང་གཉིས་རྡོ་རྗེ་དང་བཅས་པའི་ལག་པ་གཡས་ཀྱིས་བཟུང་སྟེ་རྡོ་རྗེའི་རྐང་སྟབས་ཀྱི་གར་གྱི་ཚུལ་གྱིས་འཁྱིལ་པ་བརྗོད་ཅིང་བསྐོར་བ་ [73a] [73a.1]གསུམ་བྱེད་དུ་བཅུག་ནས་བདེན་པའི་བྱིན་གྱི་རླབས་འདི་བྱའོ། །ཡང་དག་པ་ཡི་དཀྱིལ་འཁོར་འདིར། །བདག་གིས་སློབ་མ་གཞུག་པ་འདིའི། །ལྷ་རྣམས་རིགས་ཀྱི་རིམ་པ་ནི། །བསོད་ནམས་ཇི་ལྟ་དེ་ལྟར་ཤོག །འདི་ཡིས་དངོས་གྲུབ་ཅི་འདྲར་འགྱུར། །རིགས་ནི་གང་ [73a.2]གི་སྣོད་དུ་འགྱུར། །བསོད་ནམས་མཐུ་ཡང་ཅི་འདྲ་བ། །དེ་འདྲར་དཀྱིལ་འཁོར་དུ་གྱུར་ཅིག །ཅེས་པའོ། །དཀྱིལ་འཁོར་དུ་སློབ་མ་གདོང་གཡོགས་དང་བཅས་པ་གཞུག་པའི་ཆོ་གའོ། །དེ་ནས་སྔར་བཟུང་བའི་མེ་ཏོག་གི་ཕྲེང་བ་ཡི་གེ་ཏྲཾ་གིས་བསྔགས་པ་ལས་ཡང་ཞིང་མ་རྙིངས་པའི་མེ་ཏོག་ཅིག་ [73a.3]བཏོན་ལ་དེའི་ལག་པ་ཐལ་མོ་སྦྱར་བར་སྦྱིན་པར་བྱའོ། །དེས་དེའི་ཚེ་མེ་ཏོག་གི་ཕྲེང་བར་མོས་པར་བྱ་སྟེ། རང་ཉིད་ཀྱང་ཡི་གེ་གསུམ་གྱིས་འོད་གསལ་ཞིང་སྡིག་པ་བཀྲུས་པར་མོས་ཤིང་བླ་མས་དེ་ལྟར་བྱིན་གྱིས་བརླབས་པས་གུས་པ་སྔོན་དུ་འགྲོ་བའི་དཀྱིལ་འཁོར་པ་དང་བཅས་པའི་དཀྱིལ་འཁོར་གྱི་ [73a.4]དབང་ཕྱུག་མདུན་ན་གནས་པ་བཞིན་དུ་དམིགས་ལ་དཀྱིལ་འཁོར་དེར་ཡིད་ཀྱིས་ཞུགས་ཏེ་དེའི་དབུ་ལ་ཨོཾ་ཏིཥྛ་བཛྲ་དྲྀཌྷོ་མེ་བྷ་བ་ཤ་ཤྭ་ཏོ་མེ་བྷ་བ་ཧྲྀད་ཡཾ་མེ་ཨ་བྱེ་ཏིཥྛ་སརྦ་སིདྷི་མྨེ་བྲ་ལཙྪ་ཧཱུཾ་ཧ་ཧ་ཧ་ཧ་ཧོཿཨ་ཁཾ་བཱིར་ཧཱུཾ་པྲ་ཏཱིཙྪ་ཀུ་སུ་མ་ཨཉྫ་ལཾ་ནཱ་ཐ་ཧོཿཞེས་བརྗོད་ཅིང་མེ་ཏོག་གཏོར་བར་བྱའོ། །རེ་ཁཱ་ལྔའི་ནང་ [73a.5]དུ་མེ་ཏོག་ལྷུང་བ་དང་བསྟུན་ཏེ། འདི་ལ་རིགས་བསྟན་པར་བྱའོ། །དེའི་རྣལ་འབྱོར་ཡང་སྦྱིན་ནོ། །དངོས་གྲུབ་ཀྱང་མཚོན་པར་བྱའོ། གལ་ཏེ་སངས་རྒྱས་རྣམས་ཀྱི་མཛོད་སྤུའམ་དབུའི་གཙུག་ཏོར་ལ་མེ་ཏོག་ལྷུང་ན་ཕྱག་རྒྱ་ཆེན་པོའི་དངོས་གྲུབ་པོ། །སྤྱན་ནམ་ཞལ་ལ་ནི་སྔགས་ཀྱི་དངོས་གྲུབ་པོ། །ལུས་ [73a.6]ཀྱི་སྟོད་ལ་ནི་མཆོག་གོ། །དབུས་ལ་ནི་འབྲིང་ངོ་། །འོག་གི་ཆ་ལ་དམན་པའོ། །སྐུ་ལ་ཧ་ཅང་རིང་བ་ལ་ཡུན་རིང་པོས་སོ། །ཉེ་བ་ལ་དངོས་གྲུབ་མྱུར་རོ། །ལྷ་རྣམས་ཀྱི་རང་གི་གནས་ནི་རེ་མིག་ལ་སོགས་པ་རྣམ་པར་བཅད་པ་ལས་ཤེས་པར་བྱའོ། །གལ་ཏེ་ལྷ་གཉིས་ཀྱི་བར་དུ་ལྷུང་ན་དེའི་ [73a.7]ཚེ་མེ་ཏོག་གང་ལ་ཉེ་བ་དེའི་རིགས་སུ་འགྱུར་རོ། །མཉམ་པ་ཉིད་ལ་ནི་གཉིས་ཀའི་དངོས་གྲུབ་ཀྱི་མཆོག་གྲུབ་པོ། །དེའི་ཚེ་གང་ལ་དད་པ་དེའི་རིགས་ཡིན་ནོ། །རེ་ཁཱ་ལྔའི་ཕྱི་ངོས་སུ་ལྷུང་ན་ལན་གསུམ་གྱི་བར་དུ་སླར་ཡང་དོར་བར་བྱའོ། །དེ་ལ་ཡང་ཕྱི་རོལ་དུ་ལྷུང་ན་དངོས་གྲུབ་ཕྲ་མོའོ། །ཕྱིའི་ [73b] [73b.1]རེ་ཁཱ་ཟླུམ་པོ་རྣམས་དང་། ཕྱིའི་རྡོ་རྗེར་བའི་ཕྱི་རོལ་ལ་ནི་དངོས་གྲུབ་མེད་དོ། །དཀྱིལ་འཁོར་ཡང་འདི་ལ་མི་བསྟན་ནོ། །སྔགས་བཟླས་པ་ལ་སོགས་པའི་སྐལ་བ་དང་ལྡན་པ་ཉིད་དུ་བསྒྲུབས་ནས་སྐབས་གཞན་དུ་དེ་གཞུག་པར་བྱའོ། །ཕྱིའི་རྡོ་རྗེ་ཕྲེང་བའི་ནང་དུ་ལྷུང་ན་ཚེགས་ཆེན་པོས་སོ། ། [73b.2]དེ་ནས་མེ་ཏོག་དེ་བཟུང་ནས་ཕྲེང་བ་ལ་བཅིངས་ཏེ་ཕྲེང་བ་དེ། ཨོཾ་པྲ་ཏི་གྲིཧྞ་ཏྭཾ་ཨི་མཾ་སཏྭ་མ་ཧཱ་བ་ལ། དེ་བརྗོད་ཅིང་སློབ་མའི་མགོ་བོར་བཅིང་ངོ་། །ཕྲེང་བའི་དབང་གི་ཆོ་གའོ།། །།འདིར་རྡུལ་ཚོན་གྱི་རང་བཞིན་གྱི་ལྷ་རྣམས་ལ་གང་གིས་མེ་ཏོག་གཏོར་བར་གྱུར་ཀྱང་སྐྱོན་ཅུང་ཟད་མེད་དེ། སེམས་ [73b.3]དགེ་བ་ལ་ཉེས་པ་མེད། །ཅེས་པའོ། །དེ་ལྟར་མི་ཤེས་པ་ལ་ནི་དྲི་མ་མེད་པའི་འོད་ལས་རྡུལ་ཚོན་གྱི་དཀྱིལ་འཁོར་དུ་མེ་ཏོག་དོར་ན་རྡུལ་ཚོན་ཉམས་པའི་ཕྱིར་བསོད་ནམས་མ་ཡིན་པར་འགྱུར་རོ། །དེ་བས་ན་རྣམ་པར་རྒྱལ་བའི་བུམ་པ་ལ་གནས་པའི་མཚན་མ་ལ་མེ་ཏོག་གཏོར་བར་བྱའོ་ཞེས་གསུངས་ [73b.4]སོ། །འདིར་ཕེབས་པར་གྱུར་པ་ན་དགེ་བ་ལ་སོགས་པ་སྨྲས་པའི་རྗེས་ལ། ཨོཾ་ཏིཥྛ་བཛྲ་ཞེས་པ་འདིས་ཕེབས་པ་བརྟན་པར་བྱས་ནས་མིག་གི་སྣང་བ་དྲི་བ་ནས་བརྩམས་ཏེ་མགོ་བོར་བཅིང་བའི་མཐར་ཐུག་པར་བྱས་ནས་བབས་པའི་ལྷ་གཤེགས་སུ་གསོལ་བར་བྱའོ། །མི་ནུས་པས་ནི་འབབ་པའི་ [73b.5]ཆོ་ག་མ་བྱས་པར་དམ་ཚིག་གི་ཆུ་སྦྱིན་པའི་མཇུག་ཐོགས་སུ་མིག་གི་སྣང་བ་དྲི་བ་ལ་སོགས་པ་ཐམས་ཅད་བྱའོ་ཞེས་འཆད་དོ། །དེའི་རྗེས་སུ་སློབ་མའི་སྙིང་གར་ཟླ་བ་ལ་བདག་པོ་དང་། དཔྲལ་བར་རཾ་དང་། མིག་གཉིས་ལ་འབར་བ་དང་བཅས་པའི་ཨོཾ་གཉིས་བསྒོམས་ནས། ཨོཾ་དེ་རིང་རྡོ་རྗེ་སེམས་ [73b.6]དཔའ་རང་། །ཁྱེད་ཀྱི་མིག་ནི་འབྱེད་པར་བརྩོན། །རྡོ་རྗེའི་མིག་ནི་བླ་མེད་པ། །ཐམས་ཅད་མིག་ནི་དབྱེ་བར་མཛོད། །ཨོཾ་ཛྙཱ་ན་ཙཀྵུཿཧཱུཾ་ཨ་སྭཱ་ཧཱ། ཞེས་བརྗོད་ཅིང་གདོང་གཡོགས་བསལ་བར་བྱའོ། །རྡོ་རྗེའི་མིག་ནི་གཟུགས་ཅན་ཐམས་ཅད་ལ་ཐོགས་པ་མེད་པའི་མིག་གོ། །བླ་ན་མེད་པ་ནི་སངས་ [73b.7]རྒྱས་རྣམས་ཅི་བཞིན་དུ་སྒྲིབ་པ་སྤང་བའི་ཕྱིར་རོ། །ཐམས་ཅད་མིག་ནི་ཐམས་ཅད་གཟིགས་པའི་ཕྱིར་རོ། །དེ་ནས་ཀྱི་རྡོ་རྗེ་ལྟོས་ཤིག་ཅེས་སྨྲའོ། །ལྷ་རྣམས་ཀྱི་མིང་བརྗོད་པ་སྔོན་དུ་འགྲོ་བས་དཀྱིལ་འཁོར་གྱི་བདག་པོ་ནས་བརྩམས་ཏེ། བྱང་གི་སྒོ་སྐྱོང་ངམ་ཇི་ལྟར་ཡོད་པར་གནོད་མཛེས་ཀྱི་ [74a] [74a.1]བར་དུ་བསྟན་ནས། ད་ནི་དད་པའི་ཤུགས་ཀྱིས་སུ། །དཀྱིལ་འཁོར་འདི་དེ་ཉིད་ལ་ལྟོས། །ཁྱོད་ནི་སངས་རྒྱས་རིགས་སུ་སྐྱེས། །ཕྱག་རྒྱ་སྔགས་ཀྱིས་བྱིན་གྱིས་བརླབས། །དངོས་གྲུབ་ཀུན་ནི་ཕུན་སུམ་ཚོགས། །དམ་ཚིག་མཆོག་ཏུ་ཁྱོད་འགྱུར་གྱིས། །རྡོ་རྗེ་པདྨ་རྩེ་རོལ་ [74a.2]པ། །གསང་སྔགས་རྣམས་ལ་སྒྲུབ་པ་གྱིས། །ཞེས་བརྗོད་དེ། རྡོ་རྗེ་དཀྱིལ་འཁོར་དཀྱིལ་འཁོར་ཆེན་པོར་བདག་ཞུགས་སོ། །རྣལ་འབྱོར་དཀྱིལ་འཁོར་དཀྱིལ་འཁོར་ཆེན་པོ་བདག་གིས་མཐོང་། །གསང་བའི་དཀྱིལ་འཁོར་དཀྱིལ་འཁོར་ཆེན་པོར་བདག་དབང་བསྐུར། །ཞེས་བརྗོད་དུ་བཅུག་ [74a.3]ལ་དམ་ཚིག་ཏུ་གཞུག་གོ། །ཧོཿཧོཿཧོཿཞེས་བྱའོ། །དཀྱིལ་འཁོར་དུ་སློབ་མ་མཐོང་བའི་བདག་ཉིད་ཅན་དུ་གཞུག་པའི་ཆོ་གའོ།། །།དེའི་རྗེས་སུ་ཆུའི་དབང་གི་དོན་དུ་བླ་མ་ལ་ཇི་ལྟར་འབྱོར་པའི་ཡོན་ཕུལ་ནས་པུས་མོ་ས་ལ་བཙུགས་ཏེ་ཐལ་མོ་སྦྱར་བས། བྱང་ཆུབ་རྡོ་རྗེ་སངས་རྒྱས་ལ། ། [74a.4]མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་རབ་ཏུ་བསྒྲལ་བའི་ཕྱིར། །ནམ་མཁའི་རྡོ་རྗེ་དིང་བདག་སྩོལ། །ཞེས་བརྗོད་ཅིང་གསོལ་བ་གདབ་བོ། །དེ་ནས་བླ་མས་རྩ་བའི་དཀྱིལ་འཁོར་གྱི་ཕྱི་རོལ་ཇི་ལྟར་ཁྲུས་ཀྱི་ཆུས་དེ་ལ་མི་རེག་པར་ཤར་གྱི་ཕྱོགས་སུ་འཇུག་པའི་སྒོ་ལ་ཕྱོགས་པར་སྒོ་ནུབ་ [74a.5]ཏུ་བསྟན་པའི་རེ་ཁཱ་གྲུ་བཞི་པ་གཅིག་གིས་བསྐོར་བའི་སྣ་ཚོགས་པདྨ་ཞེས་པ་ནས་བརྩམས་ཏེ། ཤིང་སྟན་ལ་སོགས་པར་དཀྱིལ་འཁོར་དེ་བསྒོམ་པར་བྱ་ཞེས་པའི་མཐར་ཐུག་པ་སྐུ་གཟུགས་ཀྱི་ཁྲུས་ཀྱི་དོན་དུ་སྔར་བསྟན་པར་སློབ་མ་རྡོ་རྗེ་འཆང་གི་གཟུགས་སུ་བསྒོམས་ཤིང་དཀྱིལ་འཁོར་ལ་ [74a.6]མངོན་པར་ཕྱོགས་པ་ལ། ཨོཾ་ཨཱཿབིགྷྣཱ་ཞེས་པ་ལ་སོགས་པ་སྦྱང་བའི་རིམ་པ་སྔར་བརྗོད་པས་སྦྱང་བར་བྱའོ། །དེ་ནས་སྙིང་གའི་ས་བོན་གྱི་འོད་ཟེར་གྱིས་ཕྱོགས་མཐའ་ཡས་པ་ན་བཞུགས་པའི་དེ་བཞིན་གཤེགས་པ་དང་། རིག་པའི་ལྷ་མོ་རྣམས་ལ་མཆོད་དེ། སློབ་མ་དབང་བསྐུར་བའི་དོན་ [74a.7]དུ། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱབས་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་སྩལ་དུ་གསོལ། །ཞེས་པའི་ཚིགས་སུ་བཅད་པས་གསོལ་བ་བཏབ་པས། དེ་བཞིན་གཤེགས་པ་ཤེས་རབ་དང་སྙོམས་པར་ཞུགས་པ་དེ་རྣམས་འདོད་ [74b] [74b.1]ཆགས་ཆེན་པོས་ཞུ་བར་གྱུར་ནས་རྣམ་པར་སྣང་མཛད་ཀྱི་སྒོ་ནས་ནང་དུ་ཞུགས་ཏེ་རྡོ་རྗེའི་ལམ་ནས་བྱུང་བའི་ཁུ་བ་དེ་ཁ་ནས་ལྷ་མོའི་པདྨར་ཞུགས་པའི་སློབ་མ་སྐད་ཅིག་གིས་སྟོང་པ་ཉིད་ཀྱི་རྗེས་ལ་ཧཱུཾ་དང་རྡོ་རྗེ་ལས་སྐྱེས་པའི་མི་བསྐྱོད་པའི་གཟུགས་ཤེས་རབ་དང་བཅས་པའི་ཡེ་ཤེས་ [74b.2]སེམས་དཔའ་དང་དབྱེར་མེད་པ་ལ་དབང་བསྐུར་ནས་སླར་ཕྱག་དང་ཞབས་ལ་སོགས་པའི་སྐུ་རྣམས་ཀྱི་པདྨ་ནས་ཕྱུང་སྟེ། ནམ་མཁའ་གང་བར་གནས་པའི་སྤྱན་མ་ལ་སོགས་པའི་རིག་མ་དང་བཅས་པ་རྣམས་ཀྱིས་གདུགས་དང་། རྒྱལ་མཚན་དང་། བ་དན་དང་། ན་བཟའ་དང་། རོལ་མོའི་སྒྲ་དང་། [74b.3]གླུ་དང་། གར་དང་། མེ་ཏོག་དང་། གུར་གུམ་ལ་སོགས་པའི་ཆར་རྣམས་དང་། ཕྱག་གིས་ཅུང་ཟད་ཡོ་བར་བཟུང་བའི་བུམ་པ་དཀར་པོ་བྱང་ཆུབ་ཀྱི་སེམས་ཀྱི་བདུད་རྩིས་བཀང་བ་རྣམས་ཀྱིས་པདྨ་ལས་ཕྱུང་བའི་སློབ་མ་དབང་བསྐུར་བཞིན་པ་དང་། གཟུགས་རྡོ་རྗེ་མ་ལ་སོགས་པའི་ལྷ་མོ་རྣམས་ [74b.4]ཀྱིས། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་བྱེད་བདེ་བ་ཆེན་པོ་སྟེ། དེ་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་ [74b.5]གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྣམ་རྒྱས་འདབ་འདྲའི་སྤྱན་མངའ་བ། །དེ་ནི་དེ་རིང་ཁྱོད་ལ་ཞི་བྱེད་བཀྲ་ཤིས་ཤོག །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མི་ཡིས་མཆོད། །ཆོས་མཆོག་སྐྱེ་དགུ་རྣམས་ལ་རྟག་ཏུ་ཞི་བྱེད་ [74b.6]པ། །དེ་ནི་དེ་རིང་ཁྱོད་ལ་ཞི་བྱེད་བཀྲ་ཤིས་ཤོག །དམ་ཆོས་ལྡན་པ་ཐོས་དང་བཀྲ་ཤིས་ཀྱིས་ཕྱུག་ཅིང་། །དགེ་འདུན་མི་དང་ལྷ་དང་ལྷ་མིན་ཡོན་གྱི་གནས། །ཚོགས་ཀྱི་མཆོག་རབ་ངོ་ཚ་ཤེས་ཤིང་དཔལ་གྱི་གཞི། །དེ་ནི་དེ་རིང་ཁྱོད་ལ་ཞི་བྱེད་བཀྲ་ཤིས་ཤོག །ཅེས་པའི་བཀྲ་ཤིས་ཀྱི་གླུ་རྣམས་ཀྱིས་ [74b.7]བཀྲ་ཤིས་ཉེ་བར་སྦྱོར་བཞིན་པ་ལ། རང་གིས་ཀྱང་དེ་རྣམས་གླུར་བླངས་ལ་རྣམ་པར་རྒྱལ་བའི་བུམ་པ་ལ་སོགས་པའི་ཆུ་ཅུང་ཟད་བཅུས་ཏེ། པདྨའི་སྣོད་དམ་དུང་ཆོས་སུ་བླུགས་པས་སམ། །ཡང་ན་རྣམ་པར་རྒྱལ་བའི་བུམ་པའི་ཆུ། ཨོཾ་མ་ཧཱ་སུ་ཁ་བཛྲ་སཏྭ་ཨ་བྷི་ཥེ་ཀེ་ན་ཏྭཾ་ཨ་བྷི་ཥིཉྩཱ་མི་སརྦ་ཏ་ཐཱ་ [75a] [75a.1]ག་ཏ་ཨ་བྷི་པྲི་ཏྲན་དྲྀ་ཌྷོ་བྷ་བ་ཞེས་བརྗོད་ནས་སམ། བསྡུས་པ་ལ་དགའ་བས་མ་བརྗོད་ཀྱང་རུང་སྟེ། ཡལ་འདབ་དང་བཅས་པའི་རྡོ་རྗེ་ལག་པ་གཡས་པས་བཟུང་བ་ཡིན་ཏེ། དེ་ནས་དེ་བཞིན་གཤེགས་པ་བཞིའི་བུམ་པ་རྣམས་ཀྱིའོ། །དེ་ནས་ལྷ་མོ་བཞིའི་བུམ་པ་རྣམས་ཀྱིའོ། ། [75a.2]དེ་ནས་ཇི་ལྟར་རིགས་པར་དཀྱིལ་འཁོར་བའི་བུམ་པ་རྣམས་ཀྱིའོ། །མེད་ན་ནི་རྣམ་པར་རྒྱལ་བའི་བུམ་པའི་ཆུ་མི་བསྐྱོད་པའི་བདག་ཉིད་ཅན། བྱང་ཆུབ་ཀྱི་སེམས་ཀྱི་བདུད་རྩིའི་ངོ་བོ་ཡལ་འདབ་དང་བཅས་པའི་རྡོ་རྗེའི་རྩེ་མོས་བླུགས་པས། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡིས་ [75a.3]ཕྱག་བྱས་པ། །རྡོ་རྗེ་གསང་བ་གསུམ་བྱུང་བ། །སངས་རྒྱས་ཀུན་གྱིས་སྦྱིན་པར་བྱ། །ཨོཾ་ཨཱཿབཛྲ་ཨུ་ད་ཀ་ཨ་བྷི་ཥིཉྩ་ཧཱུཾ་སུ་ར་ཏ་སྟྭཾ་ཨ་ཧཾ་ཞེས་བརྗོད་ཅིང་དབང་བསྐུར་བར་བྱའོ། །དེའི་ཚེ་དེ་བདེ་བ་ཆེན་པོ་ཕུན་སུམ་ཚོགས་པར་འགྱུར་རོ་ཞེས་བསམ་དུ་གཞུག་པར་བྱའོ། །ཆུའི་དབང་གི་ཆོ་གའོ། ། [75a.4]དེ་ནས་བྱང་ཆུབ་རྡོ་རྗེ་ཞེས་པ་ལ་སོགས་པས་བླ་མ་ལ་གསོལ་བ་བཏབ་པར་གྱུར་པ་སྟེ། ཨཱཾ་དང་རིན་པོ་ཆེ་ལས་བྱུང་བའི་རིན་ཆེན་འཕྱུང་ལྡན་གྱི་གཟུགས་ཅན་ཡེ་ཤེས་སེམས་དཔའ་དང་གཅིག་ཏུ་གྱུར་པ་ལ་ནམ་མཁའ་ལ་གནས་པའི་དེ་བཞིན་གཤེགས་པ་དང་ལྷ་མོ་རྣམས་ཀྱིས་བུམ་པས་དབང་ [75a.5]བསྐུར་བཞིན་པ་དང་། གཟུགས་རྡོ་རྗེ་ལ་སོགས་པས་བཀྲ་ཤིས་ཀྱི་གླུ་ལེན་པར་བསྒོམ་པར་བྱ་སྟེ། རྡོ་རྗེ་དང་། བདག་པོ་དང་། མིང་གི་དབང་རྣམས་ལ་ཡང་དེ་བཞིན་ནོ། །དེ་ནས་གསེར་དང་རས་ལ་སོགས་པ་ལས་བྱས་པའི་རིན་ཆེན་འབྱུང་ལྡན་ལས་སྐྱེས་ཤིང་དེའི་རང་བཞིན་ཡེ་ཤེས་སེམས་དཔའི་ [75a.6]ངོ་བོ་སློབ་མའི་རིགས་ཀྱི་བདག་པོ་དབུས་ན་གནས་པའི་དེ་བཞིན་གཤེགས་པ་ལྔས་བྱིན་གྱིས་བརླབས་པའི་དབུ་རྒྱན་དེའི་མགོ་བོའི་དབུས་སུ་དཔྲལ་བ་དང་ལོགས་གཉིས་སུ་དང་སྤྱི་བོ་དང་རྒྱབ་རྣམས་སུ་རིམ་པ་བཞིན་དུ་ཨོཾ་བཛྲ་དྷཱ་ཏྭཱི་ཤྭ་རི་ཨ་བྷི་ཥིཉྩ་ཧཱུཾ། ཨོཾ་སཏྭ་བཛྲི་ཨ་བྷི་ཥིཉྩ་བྷྲཱུཾ། ཨོཾ་རཏྣ་བཛྲི་ཨ་ [75a.7]བྷི་ཥིཉྩ་ཨཱཿཨོཾ་དྷརྨ་བཛྲི་ཨ་བྷི་ཥིཉྩ་ཧྲཱིཿཨོཾ་ཀརྨ་བཛྲི་ཨ་བྷིཥིཉྩ་ཏྲཱཾ་ཞེས་པའི་སྔགས་ལྔས་བཞག་ནས། མགོ་ལ་བསྐོན་ཞིང་། དབང་བསྐུར་རྡོ་རྗེ་ཆེན་པོ་ནི། །ཞེས་པ་ལ་སོགས་པའི་ཚིགས་སུ་བཅད་པ་དང་། ཨོཾ་ཨཱཿབཛྲ་མུ་ཀུ་ཊ་ཨ་བྷི་ཥིཉྩ་ཧཱུཾ། སུ་ར་ཏ་སྟྭཾ་ཨ་ཧཾ་ཞེས་བརྗོད་པ་བཛྲ་ཏུ་ཥྱ་ཧོཿ [75b] [75b.1]ཞེས་བརྗོད་པས་དགྱེས་པར་བྱའོ། །ཅོད་པན་གྱི་དབང་གི་ཆོ་གའོ།། །།དེ་ནས་ཨོཾ་ཧཱུཾ་ཏྲཱཾ་ཧྲཱིཿཨཱཿཞེས་པའི་སྔགས་ཀྱིས་དཔྲལ་བར་དར་དཔྱངས་བཅིང་བར་བྱའོ། །དེ་ནས་དེ་ལྟར་གསོལ་བ་བཏབ་པར་གྱུར་པའི་སློབ་མ་ཧྲཱིཿདང་པདྨ་ཡོངས་སུ་གྱུར་པའི་སྣང་བ་མཐའ་ཡས་ [75b.2]ཀྱི་གཟུགས་ཡེ་ཤེས་སེམས་དཔའ་དང་དབྱེར་མེད་པ་དང་། རྡོ་རྗེ་ཡང་སྣང་བ་མཐའ་ཡས་ཀྱི་བདག་ཉིད་དུ་བསམས་ནས། དབང་བསྐུར་རྡོ་རྗེ་ཆེན་པོ་ལ་སོགས་པའི་ཚིགས་བཅད་བཏོན་ཏེ། སངས་རྒྱས་རྣམས་ཀྱི་རྡོ་རྗེ་ཡི། །དབང་གིས་དེར་ནི་ཁྱོད་དབང་བསྐུར། །འདི་དེ་སངས་རྒྱས་ [75b.3]ཐམས་ཅད་ཉིད། །རྡོ་རྗེ་རབ་ཏུ་གྲུབ་ཕྱིར་ཟུང་། །ཞེས་བརྗོད་ཅིང་སློབ་མའི་སྙིང་ག་དང་། མགྲིན་པ་དང་། མགོ་བོ་རྣམས་ལ་རྡོ་རྗེས་རེག་ནས་རྡོ་རྗེ་ལག་པ་གཡས་སུ་སྦྱིན་པར་བྱའོ། །རྡོ་རྗེའི་དབང་གི་ཆོ་གའོ།། །།དེ་ནས་དེ་བཞིན་དུ་གསོལ་བ་བཏབ་པར་གྱུར་པ་དེ། །ཁཾ་དང་རལ་ [75b.4]གྲི་ལས་སྐྱེས་པའི་དོན་ཡོད་གྲུབ་པའི་གཟུགས་ཡེ་ཤེས་སེམས་དཔའ་དང་དབྱེར་མེད་པ་དང་། དྲིལ་བུ་ཡང་དོན་ཡོད་གྲུབ་པ་ཡོངས་སུ་གྱུར་པར་བྱས་ནས་དེའི་ལག་པ་གཡོན་དུ་བྱིན་ལ་ལག་པ་རྡོ་རྗེ་དྲིལ་བུ་དང་ལྡན་པ་དག་གིས་ཕྱག་རྒྱ་ལ་འཁྱུད་པའི་ཚུལ་བྱེད་དུ་བཅུག་སྟེ། དབང་བསྐུར་ཞེས་ [75b.5]པའི་ཚིགས་སུ་བཅད་པ་བརྗོད་པ་སྔོན་དུ་འགྲོ་བས། ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི་ཏིཥྛ་བཛྲ་ས་མ་ཡ་སྟྭཾ་ཞེས་བརྗོད་ལ། ཨོཾ་བཛྲ་གྷཎྜེ་ཨཿཨཿ། བཅོམ་ལྡན་གཟུང་ངོ་བདག་ལ་ནི། །ཡང་དག་ཉེ་བར་གྱུར་པར་མཛོད། །ཅེས་འདོན་དུ་གཞུག་གོ། །བདག་པོའི་དབང་སྟེ་མིང་གཞན་དྲིལ་བུའི་ [75b.6]དབང་གི་ཆོ་གའོ།། །།དེའི་རྗེས་སུ་དེ་བཞིན་དུ་གསོལ་བ་བཏབ་པར་གྱུར་པ་སྟེ། ཨོཾ་དང་འཁོར་ལོ་ལས་སྐྱེས་པའི་རྣམ་པར་སྣང་མཛད་ཀྱི་གཟུགས་ཡེ་ཤེས་སེམས་དཔའ་དང་རོ་གཅིག་པར་བསྒོམས་ནས། མགོ་བོར་རྡོ་རྗེ་དང་དྲིལ་བུ་མཉམ་པར་བཟུང་ཞིང་། དབང་བསྐུར་ཞེས་པ་ལ་ [75b.7]སོགས་པའི་ཚིགས་སུ་བཅད་པ་བརྗོད་དེ། ཨོཾ་བཛྲ་སཏྭ་ཨོཾ་ཨ་བྷི་ཥིཉྩ་མི་བཛྲ་ནཱ་མ་ཨ་བྷི་ཥེ་ཀ་ཏ་ཞེ་སྡང་རྡོ་རྗེ་ཁྱོད་ཅེས་པའམ། གཏི་མུག་རྡོ་རྗེ་ཁྱོད་ཅེས་པ་ལ་སོགས་པས་མེ་ཏོག་ལྷུང་བའི་རྗེས་སུ་འབྲངས་ནས་རང་གི་རིགས་ཀྱི་དབང་པོའི་མིང་རྣམ་པར་སྣང་མཛད་ཀྱི་བདག་ཉིད་ཀྱིས་དབང་ [76a] [76a.1]བསྐུར་བར་བྱའོ། །དེ་ལ་རྡོ་རྗེ་སེམས་དཔའི་མིང་རྣམས་ནི་མཆོག་གི་དང་པོ་དང་། དཔེ་མེད་དང་། ཤིན་ཏུ་དགའ་བ་དང་། རོ་མཉམ་པ་དང་། རྣམ་པར་རྒྱལ་བ་དང་། ཨ་ལ་ལ་དང་། སེམས་པ་དང་། བདེ་ཆེན་དང་། ཡན་ལག་མེད་པ་དང་། ཡེ་ཤེས་དང་། ལྷན་ཅིག་སྐྱེས་ [76a.2]པའི་རྡོ་རྗེ་རྣམས་སོ། །རེ་རེ་ལ་ཡང་རྡོ་རྗེའི་སྒྲ་སྦྱར་བར་བྱ་སྟེ། དེ་བཞིན་གཤེགས་པ་དྲུག་གི་མིང་རྣམས་ཁོ་ན་ལའོ། །མི་བསྐྱོད་པའི་བཞད་པ་དང་། རྣམ་པར་སྒེག་པ་དང་། དགའ་བ་དང་། སྒེག་པ་དང་། རོལ་པ་དང་། རང་བྱུང་དང་། ཞེ་སྡང་དང་། ཧེ་དང་། སྙིང་རྗེ་དང་། ཐུགས་དང་། ཧཱུཾ་ [76a.3]མཛད་དང་། མི་བསྐྱོད་རྡོ་རྗེ་རྣམས་སོ། །རྣམ་པར་སྣང་མཛད་ཀྱི་རྣམ་པར་སྣང་མཛད་དང་། ཨོཾ་མཛད་དང་། རྟག་པ་དང་། དེ་བཞིན་གཤེགས་པ་དང་། སྒྱུ་མ་དང་། སངས་རྒྱས་དང་། གཟུགས་དང་། སྐུ་རྡོ་རྗེ་རྣམས་སོ། །རིན་ཆེན་འབྱུང་ལྡན་གྱི་རིན་པོ་ཆེའམ། ཡིད་བཞིན་གྱི་ནོར་བུ་དང་། [76a.4]ནམ་མཁའ་དང་། གཟི་བརྗིད་དང་། བདུད་ལས་རྒྱལ་བ་དང་། འོད་བྱེད་པ་དང་། ང་རྒྱལ་རྡོ་རྗེ་རྣམས་སོ། །སྣང་བ་མཐའ་ཡས་ཀྱི་འདོད་ཆགས་དང་། སྤྱན་རས་གཟིགས་དང་། ཆོས་དང་། པདྨ་དང་། རྡོ་རྗེ་མྱུ་གུ་དང་། པདྨའི་མྱུ་གུ་དང་། རབ་ཏུ་དགའ་བའི་མྱུ་གུ་དང་། སྙིང་རྗེའི་མྱུ་གུ་དང་། མཆོག་ [76a.5]དགའ་དང་། ཤིན་ཏུ་དགའ་བའི་དགའ་བ་དང་། དཔག་མེད་དང་། གསུང་རྡོ་རྗེ་རྣམས་སོ། །དོན་ཡོད་གྲུབ་པའི་དོན་ཡོད་དང་། རྟ་མཆོག་དང་། དམ་ཚིག་དང་། ཕ་རོལ་ཏུ་ཕྱིན་པ་དང་། ལས་དང་། རླུང་དང་། རེག་བྱ་དང་། ཕྲག་དོག་རྡོ་རྗེ་རྣམས་སོ། །རྡོ་རྗེ་སེམས་དཔའི་བུད་མེད་རྣམས་ཀྱི་རྡོ་རྗེ་ [76a.6]ཤུགས་མ་དང་། རྡོ་རྗེ་རོལ་པ་མོ་དང་། རྡོ་རྗེ་མྱོས་པ་མོ་དང་། རྡོ་རྗེ་ཀངྐ་ན་དང་། རྡོ་རྗེ་བཞིན་མ་དང་། རྡོ་རྗེ་གདན་མ་དང་། རྡོ་རྗེ་ཕྲེང་བ་མ་དང་། རྡོ་རྗེ་འཆང་མའོ། །མི་བསྐྱོད་པའི་རྡོ་རྗེ་བདག་མེད་པ་དང་། རྡོ་རྗེ་ཆགས་མ་དང་། རྡོ་རྗེ་བྱེད་མ་དང་། རྡོ་རྗེ་ཕྲེང་བ་མ་དང་། རྡོ་རྗེ་མཱ་མ་ཀཱི་དང་། ཞེ་སྡང་དགའ་ [76a.7]མའོ། །རྣམ་པར་སྣང་མཛད་ཀྱི་རྡོ་རྗེ་མཁའ་འགྲོ་མ་དང་། རྡོ་རྗེ་དཀར་མོ་དང་། རྡོ་རྗེ་སྒེག་མོ་དང་། རྡོ་རྗེ་སྤྱན་མ་དང་། གཏི་མུག་དགའ་མའོ། །རིན་ཆེན་འབྱུང་ལྡན་གྱི་རྡོ་རྗེ་དོ་ཤལ་མ་དང་། རྡོ་རྗེ་དབུགས་འབྱིན་མ་དང་། རྡོ་རྗེ་འབར་མ་དང་། རྡོ་རྗེ་ཕྲེང་བ་མ་དང་། རྡོ་རྗེ་ནམ་མཁའ་མ་དང་། ནམ་མཁའ་ [76b] [76b.1]དགའ་མའོ། །སྣང་བ་མཐའ་ཡས་ཀྱི་རྡོ་རྗེ་འདོད་ཆགས་མ་དང་། རྡོ་རྗེ་གླུ་མ་དང་། རྡོ་རྗེ་ཨེ་མ་བདེ་བ་དང་། རྡོ་རྗེ་རོ་ལངས་མ་དང་། རྡོ་རྗེ་བློ་གྲོས་མ་དང་། རྡོ་རྗེ་བཞད་མ་དང་། རྡོ་རྗེ་གོས་དཀར་མོ་དང་། འདོད་ཆགས་དགའ་མའོ། །དོན་ཡོད་གྲུབ་པའི་རྡོ་རྗེ་སྙེམས་མ་དང་། རྡོ་རྗེ་སྒྱུ་མ་ [76b.2]དང་། རྡོ་རྗེ་དགོད་མ་དང་། རྡོ་རྗེ་སྒྲོལ་མ་དང་། རྡོ་རྗེ་གར་གྱི་དབང་ཕྱུག་མ་དང་། རྡོ་རྗེ་དམ་ཚིག་མ་དང་། རྡོ་རྗེ་དགའ་མའོ། །མིང་གི་དབང་གི་ཆོ་གའོ།། །།ཕྲེང་བ་དང་ཆུ་ལ་སོགས་པ་དབང་དྲུག་པོ་འདི་རྣམས་ཀྱིས་མ་རིག་པའི་གཉེན་པོ་ནུས་པ་ཉིད་དུ་སྒྲུབ་བར་བྱེད་པས་རིག་པའི་དབང་ [76b.3]ཞེས་བྱའོ། །དབང་འདི་རྣམས་བསྐུར་བའི་སློབ་མ་བྱ་བ་དང་སྤྱོད་པའི་རྒྱུད་དག་མཉན་པ་དང་། བཤད་པ་དང་། སྔགས་བསྒྲུབ་པ་རྣམས་ལ་དབང་བར་འགྱུར་རོ། །རྣལ་འབྱོར་དང་། རྣལ་འབྱོར་མའི་རྒྱུད་རྣམས་ཀྱང་ངོ་ཞེས་སློབ་དཔོན་དུ་སློབ་མའི་འདོད་པ་ནི་ལུང་དང་མི་ལྡན་ཏེ། ལྷན་ཅིག་ [76b.4]སྐྱེས་པའི་དབང་དང་སྡོམ་པ་དང་བྲལ་བ་ལ་དེའི་རང་བཞིན་བརྗོད་པར་བཅོམ་ལྡན་འདས་ཀྱིས་གང་དུ་ཡང་བཀའ་མ་སྩལ་ཞིང་རིགས་པ་ཡང་མ་ཡིན་ནོ། །དབང་འདི་རྣམས་ཀྱང་སློབ་དཔོན་གྱི་དབང་དོན་དུ་མི་གཉེར་བ་ལ་ནི་ཐུན་མོང་གི་སྡོམ་པ་སྔོན་དུ་འགྲོ་བས་སྦྱིན་ནོ། །དོན་དུ་གཉེར་བ་ལ་ནི་ [76b.5]སྡོམ་པ་གཉིས་ཀ་སྔོན་དུ་འགྲོ་བས་སོ། །དེ་ནས་སློབ་མས་ཡོན་དབུལ་ཞིང་ཐལ་མོ་སྦྱར་ཏེ། གང་གིས་བདག་ནི་ཁྱོད་དྲིན་ལན། །རང་དང་གཞན་དོན་ནུས་འགྱུར་བ། །རྡོ་རྗེ་སློབ་དཔོན་གྱི་ནི་དབང་། །ཐུགས་རྗེའི་གཏེར་གྱིས་བདག་ལ་སྩོལ། །ཞེས་བརྗོད་དེ་བླ་མ་ལ་གསོལ་བ་གདབ་པར་བྱས་ [76b.6]པ་དེ། རྡོ་རྗེ་དང་ཧཱུཾ་ལས་སྐྱེས་པའི་རྡོ་རྗེ་སེམས་དཔའི་གཟུགས་སུ་བསམས་ནས། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་མའི་བདག་པོ་བདག། །བཅོམ་ལྡན་འདས་དཔལ་མཆོག་གི་དང་པོའི་སྐྱེས་བུའི་ཞེས་ [76b.7]བརྗོད་ཅིང་དེ་ཁོ་ན་ཉིད་ཀྱིས་འཛིན་དུ་གཞུག་པ་ནི་རྡོ་རྗེའི་དམ་ཚིག་གོ། །བདག་ནི་འགྲོ་བའོ། །དེ་ནས་དྲིལ་བུ་ཨཱཿལས་སྐྱེས་པར་བསྒོམས་ནས། འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །བྱང་ཆུབ་མཆོག་ཏུ་རྒྱལ་བ་བཞེད། །ཁྱོད་ཀྱིས་ཀྱང་ནི་རྟག་ཏུ་ [77a] [77a.1]ཟུང་། ཞེས་བརྗོད་ཅིང་དེ་ཁོ་ན་ཉིད་ཀྱིས་འཛིན་དུ་གཞུག་གོ། །རང་གི་ངང་གིས་འཇུག་པ་དབྱངས་ཀྱིས་རྟོགས་བཞིན་པ་སངས་རྒྱས་ཀྱི་ཤེས་རབ་བཞིན་དུ་དྲིལ་བུ་ཡང་ངོ་། །སློབ་མས་ཀྱང་། སྲིད་པ་ངོ་བོ་ཉིད་ཀྱིས་དག། །ངོ་བོ་ཉིད་དང་སྲིད་བྲལ་བྱས། །རང་བཞིན་དག་མཆོག་ [77a.2]སེམས་དཔའ་ཡིས། །དམ་པའི་སྲིད་པ་བྱེད་པར་འགྱུར། །ཞེས་བརྗོད་ཅིང་དཀྲོལ་བར་བྱའོ། །སྒྲོ་བཏགས་པའི་ངོ་བོ་ཉིད་དང་འགའ་ཁའི་སྲིད་པ་བྱས་པའོ། །འདི་ནི་དྲིལ་བུའི་དམ་ཚིག་གོ། །དེ་ནས་དེ་ལ། ཡིད་ཀྱི་ལུས་ནི་བརྟན་པ་ཉིད། །ཕྱག་རྒྱའི་དམ་ཚིག་རབ་ཏུ་བརྗོད། །རང་གི་ལུས་ནི་ [77a.3]ཐམས་ཅད་བརྟན། །དེས་ན་ཕྱག་རྒྱར་རབ་ཏུ་བསྒྲགས། །ཞེས་པས། ཡེ་ཤེས་ཕྱག་རྒྱར་བྱིན་བརླབས་ནས། །འདོད་པ་ཐམས་ཅད་ལོངས་སྤྱོད་པས། །དངོས་གྲུབ་ཐམས་ཅད་བསྒྲུབ་པར་བྱ། །ཞེས་པ་གོ་བར་བྱས་ལ། །རྡོ་རྗེ་སེམས་དཔའི་སྐུ་དང་། ཡེ་ཤེས་ཀྱི་ཕྱག་རྒྱ་ཁ་སྦྱོར་གྱི་རིམ་པས་བྱིན་ [77a.4]གྱིས་རློབ་ཏུ་བཅུག་ནས་འཁྱུད་པའི་ཚུལ་བྱེད་དུ་གཞུག་གོ། །དེ་ཡང་མཆོག་གི་དང་པོའི་རྒྱུད་ལས། དེ་ཉིད་ཀྱིས་ནི་རྡོ་རྗེ་ཟུང་། །ཆོས་ཀྱི་དྲིལ་བུ་དཀྲོལ་ནས་ནི། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླས། །ཞེས་གསུངས་སོ། །ཕྱག་རྒྱའི་དམ་ཚིག་གོ། །འདི་ནི་ [77a.5]དམ་ཚིག་གསུམ་སྦྱིན་པའི་ཆོ་གའོ།། །།དེའི་རྗེས་ལ་དམ་ཚིག་གསུམ་བཟུང་བ་ནི་སྔ་མ་བཞིན་ཁྲུས་ཀྱི་དཀྱིལ་འཁོར་རམ། གཞན་དུ་དེ་ལྟར་བསྒོམ་པར་བཞག་ལ་རྡོ་རྗེ་སེམས་དཔའི་གཟུགས་སུ་བསྒོམས་ཏེ། ཆུའི་དབང་དུ་བརྗོད་པའི་ཆོ་ག་སྙིང་གའི་ས་བོན་ནས་བརྩམས་ཏེ་རྡོ་རྗེའི་ [77a.6]རྩེ་མོས་བླུགས་ཀྱི་བར་དང་། དབང་བསྐུར་ཆེན་པོའི་རྡོ་རྗེ་ནི། །ཁམས་གསུམ་པ་ཡིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་ཨཱཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་སྭཱ་ཧཱ། ཞེས་བརྗོད་ཅིང་དབང་བསྐུར་རོ། །དེ་ནས་མི་ [77a.7]བསྐྱོད་པ་ཅོད་པན་དུ་བསམས་ནས་དེ་བཞིན་གཤེགས་པ་གཞན་དང་ལྷ་མོ་རྣམས་དེ་ཉིད་དུ་ཡེ་ཤེས་སེམས་དཔའི་ངོ་བོར་བཅུག་ལ། ཨོཾ་སུ་པྲ་ཏིཥྛ་བཛྲ་སྭཱ་ཧཱ། ཞེས་པའི་སྔགས་ཀྱིས་བྱིན་གྱིས་བརླབས་ཏེ་དེ་ལ་མེ་ཏོག་ལ་སོགས་པ་དབུལ་ལོ། །དེ་ལྟར་ཡང་། ཤེས་རབ་བཅུ་དྲུག་ལོན་པ་ལ། ། [77b] [77b.1]ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བས། །སློབ་དཔོན་གྱི་ནི་དབང་དུ་འདོད། །ཅེས་གསུངས་སོ། །དེ་ནས་མདོར་བསྡུ་ན་གཞལ་ཡས་ཁང་འདི་ནི་རྣམ་པར་སྣང་མཛད་ཀྱི་རང་བཞིན་ནོ་ཞེས་པ་ལ་སོགས་པ་དཀྱིལ་འཁོར་གྱི་དེ་ཁོ་ན་ཉིད་རྣམ་པར་དག་པ་དང་། [77b.2]ཕུང་པོ་ལྔ་ནི་མདོར་བསྡུ་ན། །སངས་རྒྱས་ལྔར་ནི་རབ་ཏུ་བསྒྲགས། །ཞེས་པ་ལ་སོགས་པ་ལྷ་རྣམས་ཀྱི་དེ་ཁོ་ན་ཉིད་རྣམ་པར་དག་པ་དང་། དོན་དམ་པར་ནི་དཀྱིལ་འཁོར་ལ་སོགས་པ་རྣམས་ནི་རིམ་པ་གཉིས་ཀ་ལ་ཡང་རང་བཞིན་མེད་པའི་བདག་ཉིད་ཅན་དེ་བཞིན་ཉིད་དེ་ཁོ་ན་ཉིད་རྣམ་པར་ [77b.3]དག་པ་དང་། དཀྱིལ་འཁོར་བྲི་བ་ལ་སོགས་པ་སློབ་དཔོན་གྱི་ལས་ཀྱི་རིམ་པ་འཁོར་དང་བཅས་པ་བརྗོད་པར་བྱའོ། །དེ་ལྟར་དཀྱིལ་འཁོར་གྱི་དེ་ཁོ་ན་ཉིད་ལ་སོགས་པ་ཤེས་པ་དང་། འདའ་བར་བྱ་བ་མ་ཡིན་པའི་ངོ་བོ་དམ་ཚིག་དང་། བྱ་བ་དང་མི་བྱ་བའི་བདག་ཉིད་ཅན་སྡོམ་པ་དེ་ཁོ་ན་ཉིད་ [77b.4]བཞིན་དུ་བསྒྲུབ་པར་བྱ་བ་ལ་སྐལ་བ་དང་ལྡན་པ་ཉིད་བརྗོད་དོ། །དཀྱིལ་འཁོར་གྱི་དེ་ཁོ་ན་ཉིད་ལ་སོགས་པ་རྒྱས་པར་ནི་ཁོ་བོས་མན་ངག་གི་སྙེ་མར་བསྟན་ཏོ། །འདི་ནི་ཕྱིར་མི་ལྡོག་པའི་དབང་སྟེ། མིང་གཞན་སློབ་དཔོན་གྱི་དབང་གི་ཆོ་གའོ།། །།དེ་ནས་རང་གི་སྙིང་པོ་ལ་སོགས་པའི་ [77b.5]སྔགས་བརྒྱ་རྩ་བརྒྱད་དམ་ལན་གསུམ་དུ་བཟླས་པ། བཅོམ་ལྡན་བདག་གིས་སྦྱིན་ལགས་ཀྱིས། །འདི་ལ་ཉེ་བར་མཛད་དུ་གསོལ། །ཞེས་བརྗོད་ཅིང་སློབ་མ་ལ་སྦྱིན་ནོ། །སློབ་མས་ཀྱང་། བཅོམ་ལྡན་བདག་གིས་གཟུང་ལགས་ཀྱིས། །བདག་ལ་ཉེ་བར་མཛད་དུ་གསོལ། །ཞེས་པ་ [77b.6]འདིས་བཟུང་ནས་ལན་གསུམ་དུ་བཟླས་སོ། །སྔགས་གཏད་པའི་ཆོ་གའོ།། །།འདི་ཉིད་སངས་རྒྱས་ཐོད་པ་ལ་སོགས་པའི་རྒྱུད་གཞན་ལས་དང་། དྲིལ་བུ་པའི་ཞབས་ཀྱིས་སྔགས་ཀྱི་དབང་དུ་གསུངས་སོ། །དེ་ནས་གསེར་རམ་དངུལ་གྱི་སྣོད་དུ་བཞག་པའི་མར་དང་སྦྲང་རྩི་དང་། མིག་སྨན་ [77b.7]གསེར་ལས་བྱས་པའི་ཐུར་མས་སློབ་མའི་མིག་ལ་ཡི་གེ་པྲཾ་བསྒོམས་པ་ལ། ཨོཾ་བཛྲ་ནཻ་ཏྲ་ཨ་པ་ཧ་ར་ཕཊ་ལཾ་ཧྲཱིཿཞེས་བརྗོད་ཅིང་བསྐུས་ཏེ། ཐུར་ལྡན་སྨན་པའི་རྒྱལ་པོ་ཡིས། །ཇི་ལྟར་འཇིག་རྟེན་རབ་རིབ་བཞིན། །རྒྱལ་བ་རྣམས་ཀྱིས་བུ་ཁྱོད་ཀྱི། །མི་ཤེས་པ་ཡི་རབ་རིབ་བསལ། །ཞེས་བརྗོད་དོ། ། [78a] [78a.1]བསལ་པ་ནི་སེལ་བར་ནུས་པ་ཉིད་བསྒྲུབ་པའི་ཕྱིར་རོ། །མིག་སྨན་གྱི་ཆོ་གའོ།། །།དེ་ནས་མེ་ལོང་བླངས་ལ་ཡི་གེ་ཨཱཿཡིག་གིས་བསྔགས་ལ་དེ་སློབ་མ་ལ་བསྟན་ཅིང་། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་ [78a.2]དུ་མེད། རྒྱུ་དང་ལས་ལས་ཡང་དག་བྱུང་། །རྡོ་རྗེ་སེམས་དཔའ་མེ་ལོང་བཞིན། །དེ་ནི་གསལ་དག་རྙོག་པ་མེད། །སངས་རྒྱས་ཀུན་བདག་རང་ཉིད་ནི། །བུ་ཁྱོད་ཀྱི་ནི་སྙིང་ལ་ཞུགས། །རང་བཞིན་མེད་ཅིང་གནས་མེད་པར། །ཆོས་རྣམས་དེ་ལྟར་ཤེས་ནས་ཁྱོད། །སེམས་ཅན་དོན་ནི་མཉམ་མེད་ [78a.3]བྱོས། །སྐྱོབ་པ་རྣམས་ཀྱི་སྲས་སུ་སྐྱེ། །ཞེས་བརྗོད་དོ། །གསལ་བ་ནི་ཉོན་མོངས་པའི་དྲི་མ་མེད་པའི་ཕྱིར་རོ། །དག་པ་ནི་ཤེས་བྱའི་སྒྲིབ་པ་དག་པའི་ཕྱིར་རོ། །རྙོག་པ་མེད་པ་ནི་དེ་གཉིས་ཀྱི་བག་ཆགས་དང་བྲལ་བའི་ཕྱིར་རོ། །རང་བཞིན་གྱིས་རྣམ་པར་དག་པ་ཚིགས་སུ་བཅད་པ་དང་པོའོ། །གཉིས་ [78a.4]པ་ནི་དྲི་མ་མེད་པའི་རྣམ་པར་དག་པའོ། །དེར་ནི་སྟེ་ཆོས་རྣམས་སུའོ། །ཞུགས་པ་ནི་བྱིན་གྱིས་རློབ་པའི་ཕྱིར་དང་། ཐོབ་བྱ་ཉིད་དུ་དམིགས་པའི་ཕྱིར་དང་ནུས་པ་གཉིས་ཀྱིས་སོ། །མེ་ལོང་གི་དབང་གི་ཆོ་གའོ།། །།མེ་ལོང་སྟོན་པའི་ཆོ་ག་ལན་གཉིས་སུ་སྨྲས་པས་ནི་འཕགས་པ་ཀླུའི་བློའི་ཞབས་ [78a.5]ཀྱི་དཀྱིལ་འཁོར་གྱི་ཆོ་ག་མ་མཐོང་བ་ཉིད་དོ། །ཁ་ཅིག་གིས་དབང་བསྐུར་བ་ཉིད་དུ་རྣམ་པར་བཤད་པར་འདོད་པ་ལ་ནི་ལན་གཉིས་སྟོན་པའི་ཆོ་ག་གསུངས་པའོ། །དེ་ནས་ཡི་གེ་ཧོཿལས་བྱུང་བའི་གཞུ་ཧོཿཞེས་བརྗོད་ཅིང་བྱིན་ནས། སརྦ་ཏ་ཐཱ་ག་ཏ་ཨ་ནུ་རཱ་ག་ཡཱ་སྭཿཞེས་བརྗོད་དོ། །མདའ་འཕངས་པའི་ [78a.6]ཚེ་ན་ཡང་ངོ་། །སློབ་མས། སརྦ་ཏ་ཐཱ་ག་ཏ་ན་ཨ་ནུ་རཱ་ག་ཡཱ་མི་ཞེས་བརྗོད་ཅིང་བགེགས་ལ་འབིགས་པའི་བསམས་པས་ཕྱོགས་བཞིར་མདའ་བཞི་འཕང་བར་བྱའོ། །སྟེང་དུ་གཅིག་སྟེ་འོག་ཏུ་གཞན་ནོ། །མདའ་འཕང་བའི་ཆོ་གའོ།། །།དེ་ནས་ཡོལ་བ་ལ་སོགས་པས་དབེན་པར་བྱས་པར་སློབ་མས་ [78a.7]གསང་བའི་དབང་གི་དོན་དུ་གཞོན་ནུ་མ་ལང་ཚོལ་སོགས་པ་དང་ལྡན་པའི་ཤེས་རབ་མ་དམ་ཚིག་དང་ལྡན་པའམ། དེ་མེད་ན་གཞན་ཡང་རུང་སྟེ། བླ་མ་ལ་ཕུལ་ནས་ཐལ་མོ་སྦྱར་ཏེ། བླ་མ་རྡོ་རྗེ་སེམས་དཔར་མོས་ནས། ཁྱོད་ཀྱིས་ཞབས་ཀྱི་བཀའ་དྲིན་གྱིས། །བདག་གིས་བླ་མེད་བྱ་བ་ཐོབ། །དེ་ [78b] [78b.1]ཕྱིར་གསང་བའི་དབང་གིས་ནི། །མགོན་པོས་རྗེས་སུ་གཟུང་བར་མཛོད། །ཅེས་པའི་ཚིགས་སུ་བཅད་པས་གསོལ་བ་གདབ་པར་བྱའོ། །དེ་ནས་བླ་མས་འཁོར་ལོའི་དབང་ཕྱུག་གི་ང་རྒྱལ་དང་ལྡན་པས་ཐ་མལ་གྱི་བུད་མེད་ཀྱི་གཟུགས་སྟོང་པ་ཉིད་ཀྱི་རྗེས་ལ། ལྷ་མོའི་གཟུགས་སུ་བསྐྱེད་པ་དེ་དང་། [78b.2]རྡོ་རྗེ་དང་པདྨ་འདུ་བྱ་བ་སྔོན་དུ་འགྲོ་བས། སྙོམས་པར་འཇུག་པར་བྱ་ཞིང་། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་ཅིང་སྙིང་གའི་ས་བོན་གྱི་འོད་ཟེར་གྱིས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་སྤྱན་མ་ལ་སོགས་པ་དང་སྙོམས་པར་འཇུག་པ་བཀུག་ལ་ [78b.3]རྣམ་པར་སྣང་མཛད་ཀྱི་སྒོ་ནས་བདག་ཉིད་ལ་བཅུག་ནས། ཆགས་པ་ཆེན་པོས་ཞུ་བར་གྱུར་ཏེ། ཨ་བ་དྷཱུ་ཏཱི་ནས་འགྲོ་བར་བསམས་ནས་རྡོ་རྗེ་ནོར་བུར་ལན་ཅིག་སྐྱེས་པ་བརྟན་པར་བྱ་སྟེ། པདྨ་ལས་ཕྱུང་ནས་མཐེ་བོ་དང་མིང་མེད་ཀྱིས་རྡོ་རྗེ་ནོར་བུར་བཙིར་ནས་དེ་བཞིན་གཤེགས་པའི་ཁུ་བ་དེ་རང་ [78b.4]གི་བྱང་ཆུབ་ཀྱི་སེམས་དང་དབྱེར་མེད་པར་མོས་པ་བྱས་ཏེ་གསུང་རྡོ་རྗེའི་གཟུགས་ཀྱི་སློབ་མའི་ཁར་མཐོང་ནས། མ་དད་ཀྱིས་དོགས་པས་གདོང་གཡོགས་བཅིངས་ཏེ་དེའི་ལྟ་བ་དང་ལག་པའི་ཡུལ་མིན་པར། འདས་པའི་རྡོ་རྗེ་འཆང་སོགས་ཀྱིས། །ཇི་ལྟར་སངས་རྒྱས་སྲས་དབང་བསྐུར། ། [78b.5]བྱང་ཆུབ་སེམས་ནི་བཟང་པོ་ཡིས། །དེ་ལྟར་བུ་ཁྱོད་དབང་བསྐུར་བགྱི། །ཞེས་པ་དང་། དཀྱིལ་འཁོར་གྱི་བདག་པོའི་སྔགས་ཨོཾ་བཛྲ་དྷྲྀཀ་ཧཱུཾ་ཞེས་པ་ལ་སོགས་པ་རྒྱུད་ཇི་ལྟ་བ་བཞིན་བརྗོད་ཅིང་དབབ་པར་བྱའོ། །དེས་ཀྱང་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ [78b.6]ཀུན་འདུས་པའི་བློས། ཨ་ཧོ་མ་ཧཱ་སུ་ཁཾ་ཞེས་བརྗོད་ཅིང་བཏུང་བར་བྱའོ། །ཤེས་རབ་ཀྱང་ལངས་ལ་གོས་མེད་པ་ཉིད་དུ་རང་གི་ཆུ་སྐྱེས་ན་གནས་པའི་བདུད་རྩིའི་ཐིག་ལེ་རྣམས་དེ་ལྟར་དེའི་ཁར་གཞུག་པར་བྱའོ། །དེས་ཀྱང་དེ་བཞིན་དུ་བཏུང་ངོ་། །ཤེས་རབ་དང་ཐབས་དག་གིས་ཀུན་རྫོབ་ [78b.7]བྱང་ཆུབ་ཀྱི་སེམས་གསང་བ་དག་གིས་དབང་བསྐུར་བ་ན་གསང་བའི་དབང་གི་ཆོ་གའོ།། །།དེ་ནས་དེའམ་གཞན་ཡང་རུང་བའི་ཤེས་རབ་མ་དམ་ཚིག་དང་སྡོམ་པ་ལ་གནས་པའམ། །གཞན་ཡང་རུང་སྟེ་གཟུགས་དང་ལང་ཚོ་དང་ལྡན་པ། བྱང་ཆུབ་རྡོ་རྗེས་ཞེས་བྱ་བ་ལ་སོགས་པའི་ཚིགས་སུ་ [79a] [79a.1]བཅད་པས་གསོལ་བ་བཏབ་པ་ཅན་གྱི་སློབ་མལ། གཟུངས་མ་ཡིད་འོང་འདི་ཁྱོད་ཀྱིས། །བསྟེན་བྱར་སངས་རྒྱས་རྣམས་ཀྱིས་བཏགས། །འཁོར་ལོ་རིམ་པའི་སྦྱོར་བ་ཡིས། །བདེ་བ་དམ་པ་མྱང་བར་གྱིས། །རྡོ་རྗེ་སྐྱིལ་ཀྲུང་གིས་སེམས་ནི། །ནོར་བུའི་ནང་དུ་གནས་བལྟ་ [79a.2]བས། །ཞེས་གོ་བར་བྱས་ནས་གཏད་པར་བྱའོ། །དེས་ཀྱང་གུར་གུམ་ལ་སོགས་པས་དྲི་ཞིམ་པར་བྱས་ཤིང་གོས་མེད་པའི་ཆུ་སྐྱེས་སློབ་མ་ལ་སྟོན་ཞིང་། ཨེ་མ་བདག་གི་པདྨ་འདི། །བདེ་བ་ཐམས་ཅད་ཡང་དག་ལྡན། །གང་ཞིག་ཆོ་གས་བསྟེན་བྱེད་པ། །དེ་ཡི་མདུན་དུ་བདག་གནས་སོ། ། [79a.3]སངས་རྒྱས་བསྟེན་པ་ལ་སོགས་པ། །པདྨར་བྱ་བ་ཇི་བཞིན་གྱིས། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་རྟག་ཏུ་བཞུགས། །བྷཉྫ་མོཀྵ་ཧོཿཞེས་གདོན་ནོ། །དེས་ཀྱང་རང་ཉིད་ལྷའི་གཟུགས་དང་ཤེས་རབ་མ་ལྷ་མོའི་གཟུགས་སུ་བསྐྱེད་ནས། ཨཱཿདང་ཧཱུཾ་དག་ལས་སྐྱེས་པའི་པདྨ་དང་། རྡོ་རྗེ་དག་གི་ [79a.4]ཟེ་འབྲུ་དང་ནོར་བུ་དག་ཨཱཿདང་ཨོཾ་ལས་བསྐྱེད་པ་དང་། རྡོ་རྗེའི་ཁར་ཕཊ་སེར་པོ་བསྒོམས་ནས་གཡོན་པའི་གཡོན་གྱི་ཆར་སོན་པའི་རྩ་མཛུབ་མོ་དང་ལྕེ་རྩེལ་ཧྲཱིཿདམར་པོ་ལ་གནས་པའི་ཡི་གེ་ཤཱི་སྔོན་དུ་འགྲོ་བས་ཡང་དག་པར་བསྐུལ་ནས། ཨོཾ་ཤཱི་ཤཱི་ཤཱི། ཧ་ཧ་ཧ་སྭཱ་ཧཱ། ཞེས་པ་དང་། ཨོཾ་སརྦ་ཏ་ཐཱ་ག་ཏ་ཨ་ [79a.5]ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་སྔགས་བཟླས་ཤིང་བླ་མའི་མན་ངག་ལས་དགའ་བའི་དབྱེ་བ་རིག་པས་རང་གི་སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་པའི་དེ་བཞིན་གཤེགས་པ་ལ་སོགས་པས་ལུས་བྱིན་གྱིས་བརླབས་ལ། བླ་མས་ཀྱང་རྣམ་པར་སྣང་མཛད་དང་སྤྱན་མ་ལ་སོགས་པ་ [79a.6]དཔག་ཏུ་མེད་པ་བཅུག་པ་དང་། རོ་གཅིག་ཏུ་གྱུར་པས་དགའ་བ་བརྩམ་པར་བྱའོ། །ཤེས་རབ་སྦྱོར་བས་དཔལ་ལྡན་ནི། །དེ་ཉིད་ཡང་དག་མཚོན་པར་བྱ། །རྡོ་རྗེ་སྐྱིལ་ཀྲུང་ལས་སེམས་ནི། །ནོར་བུའི་ནང་དུ་ཆུད་པར་བལྟ། །ཞེས་ངེས་པར་བྱས་ལ། ནུས་པ་ཇི་ལྟ་བར་བཟུང་སྟེ། དལ་བུས་བཏང་ [79a.7]ནས་ཆུ་སྐྱེས་ལས་ལྕེ་ཉིད་ཀྱིས་བླངས་ཏེ། དེ་ཁོ་ན་ཉིད་ཀྱི་ལྟ་བས་དམ་ཚིག་གི་ངོ་བོ་བྱང་ཆུབ་ཀྱི་སེམས་བཏུང་བར་བྱའོ། །འཁོར་ལོ་ཞེས་པ་ནི་རྣམ་པར་སྣང་མཛད་ལ་སོགས་པ་རིག་མ་དང་བཅས་པའི་ལྷའི་འཁོར་ལོའོ། །དེའི་རིམ་པས་སྦྱོར་བ་ནི་དགུག་པ་དང་། གཞུག་པ་དང་རྡོ་རྗེའི་ལམ་ནས་དབྱུང་ [79b] [79b.1]བའོ། །ཆོ་ག་ནི་ལྷ་མོའི་གཟུགས་སུ་བསྐྱེད་པ་ལ་སོགས་པའོ། །མོཀྵ་ནི་ཐར་པ་སྟེ་སྤྲོས་པ་ཐམས་ཅད་དང་བྲལ་བ་ལྷག་པའི་ལྷའི་གཟུགས་བླ་མས་བརྗོད་པར་བྱའོ། །དེ་ཉིད་ནི་ཆོས་ཐམས་ཅད་བསམ་དུ་མེད་པ་ཉིད་དོ། །དེའི་གཟུགས་བརྙན་དུ་རྗེས་སུ་མཐུན་པས་ལྷན་ཅིག་སྐྱེས་པའི་དགའ་བའི་ [79b.2]ངོ་བོ་ཤེས་རབ་ཡེ་ཤེས་ལ་དེ་ཉིད་དུ་བརྗོད་དོ། །སེམས་ནི་བྱང་ཆུབ་ཀྱི་སེམས་སོ། །ནོར་བུ་ནི་རྡོ་རྗེའོ། །གལ་ཏེ་བུད་མེད་དབང་བསྐུར་ན་དེའི་ཚེ་ནོར་བུ་ནི་པདྨའིའོ། །བལྟ་ཞེས་པ་ནི་བལྟ་ཞིང་རྟོག་པ་སྟེ་བྱེད་པས་བལྟ་བཞིན་པ་ཞེས་པའི་དོན་ཏོ། །ཤེས་རབ་ཡེ་ཤེས་ཀྱི་དབང་གི་ཆོ་གའོ།། །།དེའི་རྗེས་ [79b.3]ལ་ཚིག་ཙམ་ཁོ་ནས་དབང་བཞི་པ་སྦྱིན་པར་བྱའོ། །ཤེས་རབ་ཡེ་ཤེས་དེ་ཉིད་མྱུ་གུར་གྱུར་པའི་བྱང་ཆུབ་ཀྱི་སེམས་བསྒོམས་པས་རབ་ཏུ་འཕེལ་བཞིན་པ་སྒྲིབ་པ་མེད་པ་ཉིད་དུ་གྱུར་པའི་དེ་ཁོ་ན་ཉིད་ཆོས་ཐམས་ཅད་བསམ་གྱིས་མི་ཁྱབ་པ་ཉིད་ཀྱི་རང་བཞིན་ཡན་ལག་བདུན་དང་ལྡན་པའི་ཕྱག་རྒྱ་ཆེན་པོའི་ [79b.4]བདག་ཉིད་རྡོ་རྗེ་འཆང་ཆེན་པོའི་རང་བཞིན་ཅན་དབང་བཞི་པའི་ངོ་བོ་བརྗོད་པར་བྱའོ། །དབང་བཞི་པའི་ཆོ་གའོ།། །།དེའི་རྗེས་ལ་ཤེས་རབ་དེའི་ལག་པ་སློབ་མའི་ལག་པར་བཞག་ལ་དེ་གཉིས་རང་གི་ལག་པ་གཡོན་པས་བཟུང་སྟེ། རྡོ་རྗེ་དང་བཅས་པའི་ལག་པ་གཡས་པ་སློབ་མའི་མགོ་བོར་བཞག་ [79b.5]ནས། འདིར་ནི་ཁྱེད་རྣམས་དབང་པོ་ཡིན། །བདག་གིས་འདི་ལ་འདི་གཏད་དོ། །ཞེས་དེ་བཞིན་གཤེགས་པ་རྣམས་དཔང་པོར་བཙུགས་ཏེ། ཐབས་གཞན་གྱིས་ནི་སངས་རྒྱས་མིན། །འགྲོ་གསུམ་འདི་ཡང་དག་པ་ཡིན། །དེ་ཕྱིར་འདི་དང་བྲལ་བར་ནི། །ཁྱོད་ཀྱིས་ནམ་ཡང་མ་བྱེད་ [79b.6]ཅིག །འདི་དེ་སངས་རྒྱས་ཐམས་ཅད་ཀྱི། །རིག་པའི་བརྟུལ་ཞུགས་བླ་ན་མེད། །རྨོངས་པ་གང་ཞིག་འདའ་བྱེད་པ། །དེ་ལ་མཆོག་གི་དངོས་གྲུབ་མེད། །ཅེས་བརྗོད་ཅིང་རིག་པའི་བརྟུལ་ཞུགས་སྦྱིན་པར་བྱའོ་ཞེས་པ་རིག་པའི་བརྟུལ་ཞུགས་སྦྱིན་པའི་ཆོ་གའོ།། །།དེ་ནས་སློབ་མ་ [79b.7]རྡོ་རྗེ་སེམས་དཔའི་གཟུགས་སུ་བསྒོམས་ལ། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །ཕྱག་ན་རྡོ་རྗེའི་བརྟུལ་ཞུགས་བརྟན། །ཁྱོད་ཀྱིས་ཀྱང་ནི་རྟག་ཏུ་ཟུང་། །ཞེས་བརྗོད་ཅིང་རྡོ་རྗེ་འཛིན་དུ་གཞུག་གོ། །དེས་ཀྱང་། ཨོཾ་སརྦ་ཏ་ཐ་ག་ཏ་སི་དྡྷི་བཛྲ་ས་མ་ཡ་ [80a] [80a.1]ཏིཥྛ་ཨེ་ཥ་ཏྭཾ་དྡྷ་ར་ཡ་མི་བཛྲ་སཏྭ་ཧཱིཿཧི་ཧི་ཧི་ཧི་ཧཱུཾ་ཞེས་བརྗོད་ཅིང་གཟུང་བར་བྱའོ། །རྡོ་རྗེའི་བརྟུལ་ཞུགས་ཀྱི་ཆོ་གའོ།། །།དེ་ནས་སངས་རྒྱས་ཐོད་པ་དང་། བདེ་མཆོག་དང་། ཀྱེ་རྡོ་རྗེ་ལ་སོགས་པ་གང་ཡང་རུང་བའི་སྙིང་པོའི་སྔགས་ཀྱིས་ཁ་ཊྭཱཾ་ག་དང་། ཅང་ཏེའུ་དང་། པདྨའི་སྣོད་རྣམས་ [80a.2]ལ་ལན་གསུམ་བཟླས་ལ། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །དེས་ན་ཁ་ཊྭཱཾ་ཅང་ཏེའུ་སྣོད། །བྱིན་པ་དཔའ་བོས་བཟུང་བར་གྱིས། །ཞེས་པའི་ཚིགས་སུ་བཅད་པ་བརྗོད་ཅིང་འཛིན་དུ་གཞུག་གོ། །ཁ་ཊྭཱཾ་ག་ལ་སོགས་པ་རྣམས་ལས་གཞན་སྤྱོད་པའི་ཡན་ལག་རྒྱུད་དུ་ [80a.3]གསུངས་པ་ཡང་དེ་དང་དེའི་འཁོར་ལོའི་དབང་ཕྱུག་གི་སྙིང་པོས་བསྔགས་ལ། རྡོ་རྗེ་སེམས་དཔའ་ཞེས་པ་ལ་སོགས་པས་འཛིན་དུ་གཞུག་གོ། །དེ་ལྟར་ཡང་དཔལ་གསང་བ་འདུས་པ་ལས། གཟུགས་ནི་ཐོར་ཚུགས་དབུ་རྒྱན་འཆང་། །ཆེན་པོ་ཁ་དོག་དཀར་པོ་འདྲ། །ཆོ་ག་བཞིན་དུ་ཐམས་ཅད་བྱ། ། [80a.4]སྔགས་ཀྱི་སྡོམ་པས་ཀུན་དུ་བསྡམས། །སྡོང་བུ་རྩ་བ་འབྲས་བུ་རྣམས། །བཟའ་དང་བཅའ་བ་ཐམས་ཅད་སྤྱད། །ཅེས་པ་ལ་སོགས་པ་རིག་པའི་བརྟུལ་ཞུགས་ཡང་དག་པར་བླངས་པས་སྤྱོད་པའི་བརྟུལ་ཞུགས་བྱ་བར་གསུངས་སོ། །གང་ཡང་བཙུན་མོའམ་སྐྱེས་པ་བསྐྱོད་པའི་བརྟུལ་ཞུགས་ཞུན། [80a.5]དེ་རྡོ་རྗེ་ཕག་མོའི་གཟུགས་སམ། བདག་མེད་མའི་གཟུགས་སམ། མེ་ཏོག་ལྷུང་བ་བསྟུན་པའི་རིགས་ཀྱི་ལྷ་མོའི་གཟུགས་སུ་དང་། སྐྱེས་པ་ནི་བདེ་མཆོག་དང་ཀྱེ་རྡོ་རྗེ་ལ་སོགས་པ་གར་ཡང་རུང་བའི་གཟུགས་སུ་བསམས་ནས། དེའམ་དེ་ལ་སྙིང་གའི་ས་བོན་གྱི་འོད་ཟེར་གྱིས་བཀུག་པའི་ཡེ་ཤེས་ཀྱི་ [80a.6]ལྷ་བཅུག་ལ། འཁོར་ལོའི་གཟུགས་ཀྱིས་མི་བསྐྱོད་པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་དབང་། །ལག་པར་རྣམ་པར་སྣང་མཛད་བརྗོད། །སྐ་རགས་ན་ནི་དོན་ཡོད་གནས། །ཞེས་གསུངས་པའི་ཕྱིར་འཁོར་ལོ་དང་རྣ་ཆ་དང་མགུལ་རྒྱན་དང་། གདུ་བུ་དང་སྐ་རགས་རྣམས་ [80a.7]རིམ་པ་བཞིན་དུ་མི་བསྐྱོད་པ་དང་། འོད་དཔག་མེད་དང་། རིན་ཆེན་འབྱུང་ལྡན་དང་། རྣམ་སྣང་དང་། དོན་ཡོད་གྲུབ་པའི་གཟུགས་སུ་སྐད་ཅིག་གིས་བསམས་ལ། དེར་དེ་དང་དེའི་ཡེ་ཤེས་སེམས་དཔའ་དེ་ལྟར་སྤྱན་དྲངས་པ་བཅུག་སྟེ། མི་བསྐྱོད་པ་ལ་སོགས་པ་ཡོངས་སུ་གྱུར་པ་ལས་འཁོར་ལོ་ལ་ [80b] [80b.1]སོགས་པའི་ཕྱག་རྒྱ་རྣམས་མི་བསྐྱོད་པ་ལ་སོགས་པའི་རང་བཞིན་ཁོ་ནའོ་ཞེས་མོས་ནས། ཨོཾ་དྷ་ར་དྷ་ར། དྷཱ་ར་ཡ་དྷཱ་ར་ཡ། མརྡ་མརྡ་བཛྲ་དྷྲྀཀ་ཕཊ་སྭཱ་ཧཱ་ཞེས་པའི་སྔགས་ལན་གསུམ་བཟླས་པའི་འཁོར་ལོ་དེའམ་དེའི་མགོ་བོར་རྡོ་རྗེ་སེམས་དཔའ་ཞེས་པ་ལ་སོགས་པའི་ཚིགས་སུ་བཅད་པ་བརྗོད་ཅིང་ [80b.2]གཞག་པར་བྱའོ། །ཨོཾ་བཛྲ་དྷ་རྨཱ་ས་མ་ཡ་སྟྭཾ་ཧུ་ལུ་ཧུ་ལུ་ཨཱ་རོ་ལྀ་ཀ་ཕཊ་སྭཱ་ཧཱ། ཞེས་ལན་གསུམ་བཟླས་པའི་རྣ་རྒྱན་གཉིས་རྣ་བ་དག་ལའོ། །ཨོཾ་བཛྲ་སུ་རྱཱ་ཏཱ་མོ་པི་དྷ་མ་ན་ས་མ་ཡ་སྟྭམ་ཨ་ཧཾ་རཏྣ་དྷྲྀཀ་ཕཊ་སྭཱ་ཧཱ། ཞེས་ལན་གསུམ་བརྗོད་པའི་མགུལ་རྒྱན་མགུལ་བར་རོ། །ཨོཾ་ཤྭ་ཤྭ་ཏ་པ་ར་མ་ཤྭ་ཤྭ་ཏ་ [80b.3]ཨེ་ཧྱེ་ཧི་ཛིན་ཛིཀ་ཕཊ་སྭཱ་ཧཱ། ཞེས་ལན་གསུམ་བཟླས་པའི་ལག་རྒྱན་གདུ་བུ་བཞིན་ལག་པ་དག་ལའོ། །ཨོཾ་ཕུ་ཕུ་ཧི་ཧི་ཧི་པྲཛྙཱ་དྷྲྀཀ་ཕཊ་སྭཱ་ཧཱ། ཞེས་ལན་གསུམ་བརྗོད་པའི་སྐ་རགས་སྐེད་པ་ལའོ། །བུད་མེད་ཀྱི་ཕྱོགས་ལ་ཚིགས་སུ་བཅད་པ་ལ་དཔའ་བོ་ཞེས་པ་ཕྱུང་ལ་ལྷ་མོ་ཞེས་གཞུག་པར་བྱའོ། །ཡང་ [80b.4]དག་གནས་ཞེས་པའི་རྗེས་ལ་རིམ་པ་བཞིན་དུ། འཁོར་ལོ་མི་བསྐྱོད་པ་ཡི་གཟུགས། །ཞེས་པ་དང་། རྣ་རྒྱན་གཉིས་ནི་གསུང་རྡོ་རྗེ། །ཞེས་པ་དང་། མགུལ་པའི་ཕྲེང་བ་རིན་ཆེན་འབྱུང་། །ཞེས་པ་དང་། ལག་གདུབ་རྟག་པའི་བདག་ཉིད་དོ། །ཞེས་པ་དང་། སྐ་རགས་དོན་ཡོད་གྲུབ་པ་ནི། །ཞེས་ [80b.5]པ་བཅུག་ནས། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་གདོན་པར་བྱའོ། །གང་ཡང་བུད་མེད་དང་སྐྱེས་པ་གང་ལྟ་སྟངས་ལ་སོགས་པའི་ནུས་པ་ཐོབ་པས་གཞན་དོན་དུ་དཔའ་བོའི་བརྟུལ་ཞུགས་བླང་བར་འདོད་ན་རྡོ་རྗེ་ཕག་མོ་གཟུགས་ཅན་མ་དེའམ། །བདེ་མཆོག་མིག་གིས་ཟུགས་ཅན་དེ་ཡེ་ཤེས་ [80b.6]སེམས་དཔའ་དང་རོ་གཅིག་ཏུ་བསམས་ནས་འཁོར་ལོ་ལ་སོགས་པ་སྔར་བཞིན་དུ་མོས་ཤིང་མགོ་བོའི་ཕྲེང་བ་ལ་སོགས་པ་རང་རང་གི་སྔགས་ཀྱིས་ལྷའི་རང་བཞིན་དུ་མོས་ཏེ། ཨོཾ་བཛྲ་བཻ་རོ་ཙ་ནི་ཡེ་ཧུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ལན་གསུམ་དུ་བཟླས་པའི་འཁོར་ལོ་དེ་བཞིན་ཁོ་ནར་བསྐོར་བར་བྱའོ། །སངས་ [80b.7]རྒྱས་ལྔའི་རང་བཞིན་ཐོད་པ་ལྔ་ཡང་སྟེ། གང་གི་ཕྱིར། བཻ་རོ་ཙ་ནའི་སྔགས་གང་ཡིན། །མགོ་བོར་ཐོད་པས་བརྒྱན་པའོ། །ཞེས་གསུངས་སོ། །ཐོད་པ་ནི་འདིར་འཁོར་ལོའི་གཟུགས་ཀྱང་ངོ་། །ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ་ཅེས་ལན་གསུམ་བཟླས་པའི་རྣ་རྒྱན་གཉིས་ཏེ། ཡི་གེ་བདུན་པའི་རིག་སྔགས་ [81a] [81a.1]ཀྱིས། །རྣ་རྒྱན་གྱིས་ནི་རྣ་བ་མཛེས། །ཞེས་གང་གསུངས་པའོ། །རྡོ་རྗེ་ཕག་མོའི་རྩ་བའི་སྔགས་སམ་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ལན་གསུམ་བཟླས་པའི་མགུལ་རྒྱན་ཏེ། རྡོ་རྗེ་ཕག་མོའི་སྔགས་གང་ཡིན། །མགྲིན་པར་མགུལ་རྒྱན་རྣམ་ [81a.2]པར་བརྒྱན། །ཞེས་གང་གསུངས་པའོ། །ཨོཾ་ཧ། ན་མ་ཧི། སྭཱ་ཧཱ་ཧཱུཾ། པཽཥ་ཊ་ཧེ། ཧཱུཾ་ཧཱུཾ་ཧོ། ཕཊ་ཧཾ། ཞེས་ལན་གསུམ་བཟླས་པའི་གདུ་བུ་གཉིས་ཏེ། དཔའ་བོའི་གོ་ཆ་དྲུག་གིས་ནི། །ཕྱག་རྒྱ་འདི་ནི་ལུས་ལ་མཛེས། །ཞེས་གང་གསུངས་པའོ། །ཨོཾ་བཾ། ཧཾ་ཡོཾ། ཧྲིཾ་མོཾ། ཧེཾ་ཧྲིཾ། ཧཱུཾ་ཧཱུཾ། ཕཊ་ཕཊ་ཅེས་ [81a.3]པ་ལན་གསུམ་བཟླས་པའི་སྐ་རགས་ཏེ། རྣལ་འབྱོར་མ་དྲུག་ཅེས་པ་ཡིས། །སྔགས་ཀྱི་སྐ་རགས་རྒྱན་དུ་བྱས། །ཞེས་གང་གསུངས་པའོ། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནཱི་ཛཱ་ལ་སཾ་བ་རཾ་སྭཱ་ཧཱ། ཞེས་ལན་གསུམ་བཟླས་པའི་མི་མགོ་ལྔ་བཅུའི་ཕྲེང་བ་སྐེ་ལ་སྟེ། ལྷ་ཡི་སྙིང་པོའི་སྔགས་ཉིད་ [81a.4]ནི། །ཕྲེང་བ་བརྒྱ་ཕྱེད་བརྒྱན་པའོ། །ཞེས་གང་གསུངས་པའོ། །དེ་ནས་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཞེས་ལན་གསུམ་བཟླས་པའི་སྟག་གི་པགས་པ་ནི་ཤམ་ཐབས་ཀྱི་ཆེད་དུ་སྟེ། སངས་རྒྱས་ཀུན་གྱི་མཁའ་འགྲོ་མས། །པགས་པའི་གོས་ནི་འཛིན་པ་གཞན། །ཞེས་གང་ [81a.5]གསུངས་པའོ། །ཨོཾ་པྲཱ་ཙཎྜེ་ཧཱུཾ་ཧཱུཾ་ཕཊ་ཅེས་པ་ལ་སོགས་པ་ནས། ཨོཾ་རཱུ་པི་ཎཱི་ཡེ་ཧཱུཾ་ཧཱུཾ་ཕཊ་ཅེས་པའི་སྔགས་སུམ་ཅུ་རྩ་དྲུག་གིས་ལན་གསུམ་བཟླས་པའི་ཡེ་ཤེས་ཀྱི་བདུད་རྩིའི་བཏུང་བའི་སྣོད་ནི་ལག་པར་སྦྱིན་ནོ། །འཁོར་ལོ་ཀུན་གྱི་རྣལ་འབྱོར་མའི། །སྔགས་ཀྱིས་བཏུང་བའི་ཐོད་པའོ། །ཞེས་གང་ [81a.6]གསུངས་པའོ། །ཁ་ཊྭཱཾ་ག་དང་ཅང་ཏེའུ་ལ་བཅོམ་ལྡན་འདས་ཀྱི་རྩ་བའི་སྔགས་ལན་གསུམ་བཟླས་ཏེ་རྡོ་རྗེ་སེམས་དཔའ་ཞེས་པ་ལ་སོགས་པའི་ཚིགས་སུ་བཅད་པས་སོ། །དཔལ་བདེ་མཆོག་གི་རྩ་བའི་སྔགས་ལན་གསུམ་བཟླས་པའི་ཚངས་སྐུད་དང་མགྲིན་པར་འཆང་བའི་དོ་ཤལ་དང་རྡོ་རྗེའི་རྒྱན་དང་ [81a.7]རྐུན་པོའི་སྐྲ་ལས་བྱས་པའི་ཅོད་པན་དང་། སྐོར་གཉིས་པའི་སྐ་རགས་དང་ཐལ་བ་དང་། དཔུང་རྒྱན་དང་། རྐང་གདུབ་དང་། གཡེར་ཁ་རྣམས་ནི་རང་གི་གནས་སུའོ། །དཔའ་བོའི་རྩ་བའི་སྔགས་ཀྱིས་གང་། །ཚངས་སྐུད་ལ་སོགས་རྣམས་སུ་བཏགས། །ཞེས་གང་གསུངས་པའོ། །དེ་ལ་ཕྲེང་བ་ [81b] [81b.1]གཅིག་གིས་ཚངས་སྐུད་དོ། །ཕྲེང་བ་བརྒྱད་རྣམས་ཀྱིས་སྐ་རགས་སོ། །དེ་ཉིད་ཀྱི་བུད་མེད་ཀྱི་རྐེད་པར་བཅུ་དྲུག་གིས་སོ། །ཉི་ཤུ་རྩ་ལྔས་དོ་ཤལ་ལོ། །སྐུད་པ་གཅིག་གིས་ཚངས་སྐུད་འགྱུར། །སྐུད་པ་བརྒྱད་ཀྱིས་སྐ་རགས་སོ། །བུད་མེད་བཅུ་དྲུག་ཤེས་པར་བྱ། །ཉི་ཤུ་རྩ་ལྔའི་ཕྲེང་བ་ཅན། ། [81b.2]ཞེས་གང་གསུངས་པའོ། །ཡང་ན་མིའི་རྒྱུས་པ་ལས་བྱས་པའམ། སྐྲ་ལས་བྱས་པའི་ཚངས་སྐུད་དོ། །འདིར་འཁོར་ལོ་ལ་སོགས་པ་དང་རྡོ་རྗེའི་རྒྱན་རྣམས་ཇི་ལྟར་འོས་པར་མིའི་རུས་པ་ལས་བྱས་པའོ། །དེ་ལ་གཅིག་ནི་སྤྱི་བོར་ཏེ། དེ་སྐད་དུ། སོར་མོ་ལྔ་བྱས་དུམ་བུ་ནི། །ཅོད་པན་དག་ཏུ་འཛིན་ [81b.3]པའོ། །གཞན་ནི་རྣ་བ་དང་མགུལ་བ་དང་། སྙིང་ག་དང་། གསང་བ་དང་ལག་པའི་རྒྱན་ཡིན་ཏེ་ཇི་ལྟར་མཛེས་པར་བྱའོ། །སྔགས་སུམ་ཅུ་རྩ་དྲུག་རྣམས་དང་རྩ་བའི་སྔགས་གཉིས་ནི་ཁོ་བོས་དཔལ་བདེ་མཆོག་གི་མངོན་པར་རྟོགས་པའི་སྒྲུབ་ཐབས་སུ་བརྗོད་དོ། །དཔའ་བོའི་སྤྱོད་པའི་བརྟུལ་ཞུགས་ [81b.4]ཉིད་ལ་རྒྱལ་བུ་གཞོན་ནུའི་བརྟུལ་ཞུགས་ཀྱི་སྤྱོད་པ་དང་། རྡོ་རྗེ་ཐོད་པའི་སྤྱོད་པའི་བརྟུལ་ཞུགས་ཞེས་ཀྱང་དཔལ་སཾ་པུ་ཊའི་རྒྱུད་ལས་གསུངས་སོ། །དེ་ནས་ཕྱག་རྒྱལ་སོགས་པས་མཆོད་པར་བྱའོ་ཞེས་པ་སྤྱོད་པའི་བརྟུལ་ཞུགས་སྦྱིན་པའི་ཆོ་གའོ། །དེ་ནས་དེ་བཞིན་གཤེགས་པའི་སྤྱོད་ལམ་གྱི་ [81b.5]ཚུལ་དུ་བྱས་ནས་ཆོས་གོས་ཀྱི་གྲྭ་བཟུང་བའི་ཁུ་ཚུར་གཡོན་པ་སྙིང་གར་བཟུང་ཞིང་གཡས་པས་མི་འཇིགས་པའི་ཕྱག་རྒྱས། སྲིད་པའི་ངན་འགྲོ་ལས་བཏོན་ནས། །སྲིད་པ་ཤིན་ཏུ་ཞི་བྱའི་ཕྱིར། །རྡོ་རྗེ་སེམས་དཔའ་དེ་བཞིན་གཤེགས། །བདག་གིས་ཁྱོད་ནི་ལུང་བསྟན་གྱིས། །ཀྱེ་ཆེ་གེ་མོ་རྡོ་རྗེ་ [81b.6]ཏ་ཐཱ་ག་ཏ་སིདྡྷྱ་ས་མ་ཡ་སྟྭཾ་བྷུར་བྷུ་བཿསྭཿཞེས་པའི་སྔགས་བརྗོད་ཞྭཅིང་མེ་ཏོག་ལྷུང་བ་དང་བསྟུན་པའི་དེ་བཞིན་གཤེགས་པའི་གཟུགས་ཅན་གྱི་སློབ་མ་ལུང་བསྟན་པར་བྱའོ། །གང་ཡང་འདི་ལྟར་ལུང་བསྟན་པ་དེ་དེ་བཞིན་གཤེགས་པ་ཐམས་ཅད་ཀྱིས་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ་ [81b.7]ཞེས་དད་པར་བྱའོ། །ལུང་བསྟན་པའི་ཆོ་གའོ། །རིག་མ་དང་། རྡོ་རྗེ་དང་། སྤྱོད་པའི་བརྟུལ་ཞུགས་དང་། ལུང་བསྟན་པ་འདི་རྣམས་རྒྱུད་ལ་སོགས་པ་ཁ་ཅིག་ཏུ་དབང་བསྐུར་བ་ཉིད་ཀྱི་ཐ་སྙད་དུ་བྱས་སོ། །དེ་ནས་ཁ་སྦྱོར་གྱི་རྒྱུད་དུ། །བཞི་པ་དེ་ནི་དེ་བཞིན་ཡང་། །ཞེས་པའི་རྗེས་ལ། བྱང་ཆུབ་ [82a] [82a.1]སེམས་ཀྱི་དབང་གིས་ནི། །སློབ་མའི་སྡིག་དང་བྲལ་བ་ལ། །དེ་ནས་རྗེས་སུ་གནང་བ་བྱིན། །ཞེས་གསུངས་པས། སློབ་མའི་གདན་གྱི་མདུན་ནམ་ལ་ལར་སྟན་ལ་བྷྲཱུཾ་ལས་སྐྱེས་པའི་ཆོས་ཀྱི་འཁོར་ལོ་ཨོཾ་བཛྲ་ཧེ་ཏུ་མཾ་ཞེས་བརྗོད་པ་དང་། ལག་པ་གཡས་སུ་ཨོཾ་བཛྲ་བྷཱ་ཥ་རཾ་ཞེས་ [82a.2]བརྗོད་ཅིང་ཡི་གེ་ཨཱཿལས་སྐྱེས་པའི་དུང་དང་། གཡོན་དུ་དབྱངས་དང་པོ་ལས་སྐྱེས་པའི་པོ་ཏི་དབྱངས་དང་པོ་བརྗོད་པ་དང་། དབྱངས་ཐ་མ་ལས་སྐྱེས་པའི་དྲིལ་བུ་དབྱངས་ཐ་མ་བརྗོད་ཅིང་བྱིན་ལ་དེ་དྲིལ་བུ་དཀྲོལ་དུ་གཞུག་ཅིང་། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་ [82a.3]མཚན་ཉིད་མེད། །ནམ་མཁའ་མཉམ་པ་ཉིད་སྦྱོར་ལས། །ཐམས་ཅད་མཆོག་ནི་མཉམ་ཉིད་གསལ། །དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་དུད་བླ་མེད་པ། །ཀུན་ནས་ཡོངས་སུ་བཀང་ནས་ནི། །ཆོས་ཀྱི་འཁོར་ལོ་བསྐོར་བར་གྱིས། །ཞེས་བརྗོད་པར་བྱའོ། [82a.4]ཐམས་ཅད་མཆོག་ཅེས་པ་ནི་ཆོས་ཐམས་ཅད་ཀྱི་མཆོག་སྟེ། སྒྲིབ་པ་ཐམས་ཅད་བྲལ་བ་ཉིད་ཀྱིས་ན་རང་བཞིན་མེད་པ་ཉིད་དོ། །གསལ་བ་ནི་བསྒོམས་པས་མངོན་གསུམ་དུ་བྱ་བའོ། །ཆོས་ཀྱིས་ཀྱང་དེ་བཞིན་དུ་གྱིས་ཤིག་པའོ། །དེ་ལྟར་ཡང་དེ་ལ་མོས་པས་ཆོས་ཀྱི་འཁོར་ལོ་བསྐོར་བར་གྱིས་ཤིག་ཅེས་ [82a.5]དྲིལ་བུས་མཚོན་པར་བྱེད་དོ། །དེ་ལྟར་སྤྱིར་རྗེས་སུ་གནང་བ་བྱིན་ནས་རྗེས་སུ་གནང་བ་ལྷག་པར་སྦྱིན་པར་བྱ་བའི་ཆེད་དུ་རིམ་པ་བཞིན་སློབ་མ་རྣམ་པར་སྣང་མཛད་ལ་སོགས་པའི་གཟུགས་སུ་བསྒོམས་ནས། སེམས་ཅན་ཀུན་ལ་ཕན་དོན་ཕྱིར། །འཇིག་རྟེན་ཀུན་ཏུ་ཐམས་ཅད་ནས། །སྣ་ཚོགས་ [82a.6]ཇི་ལྟར་འདུལ་བ་ཡིས། །ཆོས་ཀྱི་འཁོར་ལོ་བསྐོར་བར་གྱིས། །ཤེས་རབ་ཐབས་ཀྱི་རང་བཞིན་དག །ཡིད་བཞིན་ནོར་བུ་ལྟར་མཐོ་བས། །སྐྱེ་མེད་དོགས་དང་བྲལ་བ་ཡིས། །དེ་ལྟར་སེམས་ཅན་དོན་གྱིས་ཤིག །ཅེས་པའི་ཆོས་ཀྱི་སྒྲའི་གནས་སུ་རྡོ་རྗེ་དང་རིན་པོ་ཆེ་དང་པདྨ་དང་ལས་ཀྱི་སྒྲ་ [82a.7]བཅུག་པའི་ཚིགས་སུ་བཅད་པ་ལྔས་རྗེས་སུ་གནང་བ་སྦྱིན་ནོ། །དེས་ཕྱག་བྱས་ལ། གཙོ་བོས་ཇི་ལྟར་བཀའ་བསྒོ་བ། །དེ་བཞིན་དུ་ནི་བདག་གིས་བགྱི། །ཞེས་བརྗོད་དོ། །རྗེས་སུ་གནང་བའི་ཆོ་གའོ། །དེ་ནས། སྤྱི་བོ་རུ་ནི་གདུགས་བཟུང་ནས། །བསྐོར་བ་བྱེད་དུ་བཅུག་ནས་ནི། །དཀྱིལ་འཁོར་ [82b] [82b.1]སྒོར་ནི་ཐལ་སྦྱོར་བ། །གདུགས་བཅས་དབབ་ཅིང་འདི་བརྗོད་བྱ། །རྒྱུད་རྣམས་འཛིན་པར་འགྱུར་བ་ཡི། །སློབ་མ་འདི་ནི་ཕུལ་བ་ལགས། །ཞེས་པས་དཀྱིལ་འཁོར་གྱི་དབང་ཕྱུག་ལ་གསོལ་བ་གདབ་ལ། གདུགས་གཞན་དུ་བཞག་སློབ་མའི་སྙིང་ལ་འབབ་པ་བརྗོད་པར་བྱ་སྟེ། ད་ནི་ཁྱོད་ཉིད་ [82b.2]དཀྱིལ་འཁོར་གྱི། །སློབ་དཔོན་སྔགས་དང་རྒྱུད་འཛིན་པར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་དག་ཀྱང་དགོངས་པར་འགྱུར། །སེམས་ཅན་ཀུན་ལ་བརྩེ་དོན་དུ། །ཁྱོད་ཀྱིས་དཀྱིལ་འཁོར་ཆོ་ག་བཞིན། །རབ་ཏུ་འབད་དེ་བྲི་བར་བྱ། །སྒྲུབ་པ་པོ་རྣམས་རྒྱུད་ལ་སྦྱར། །མཆོག་ཏུ་ [82b.3]གསང་བ་དམ་པ་ཡི། །དཀྱིལ་འཁོར་མཐོང་བཞིན་ཞུགས་པས་ན། །སྡིག་པ་ཀུན་ལས་རྣམ་པར་གྲོལ། །དེ་རིང་ཁྱོད་ནི་བདེ་བར་གནས། །བདེ་ཆེན་ཐེག་པ་འདི་ལས་ནི། །ཕྱིན་ཆད་ཁྱོད་ལ་འཆི་བ་མེད། །སྲིད་པའི་སྡུག་བསྔལ་ལས་ཁྱོད་འདས། །སྲིད་པ་མཐའ་འདས་གྲུབ་ཆེད་དུ། །སངས་རྒྱས་ [82b.4]རྡོ་རྗེ་ཅན་ཀུན་གྱིས། །དེ་རིང་ཚེ་ལྡན་དབང་བསྐུར་རོ། །ཁམས་གསུམ་ཀུན་གྱི་རྒྱལ་སྲིད་ཆེ། །བདག་པོ་ཉིད་དུ་ཁྱོད་ངེས་སོ། །འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་ཉིད། །ཁྱོད་ཀྱིས་ནམ་ཡང་མ་བྱེད་ཅིག །འདོད་པ་ཀུན་ལ་སྤྱོད་ [82b.5]པས་ཁྱོད། །གང་ལའང་འཇིགས་མེད་སྤྱད་པར་གྱིས། །ཤ་ལྔ་བདུད་རྩི་ལྔ་བཟའ་བྱ། །འདི་ལས་གཞན་ཡང་དམ་ཚིག་སྲུང་། །སྲོག་ཆགས་གསད་པར་མི་བྱ་ཞིང་། །བུད་མེད་རིན་ཆེན་སྤང་མི་བྱ། །སློབ་དཔོན་སྤང་བར་མི་བྱ་སྟེ། །དམ་ཚིག་ཤིན་ཏུ་འདའ་བར་དཀའ། །ཤེས་རབ་ཐབས་ཀྱིས་བསམ་ [82b.6]པ་ཡི། །མི་བྱ་ཅུང་ཟད་ཡོད་མ་ཡིན། །མ་འཇིགས་ཁྱོད་ལ་སྡིག་པ་མེད། །དེ་བཞིན་གཤེགས་པའི་གསུང་ཇི་བཞིན། །འདི་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་བཟད་བདེ་སྟེར་བསྟེན་པར་གྱིས། །འགྲོ་བ་བདེ་བ་མྱོང་བར་རྡོ་རྗེ་སེམས་དཔའ་དང་། །མཚུངས་པའི་རྟག་པ་ཉིད་དུ་ [82b.7]ཁྱོད་རྣམས་ཕྱིན་པར་འགྱུར། །གཞན་ཡང་གང་དག་ཆོ་ག་ཇི་ལྟ་བ་བཞིན་དབང་བསྐུར་བ་ལ་དགེ་བའི་ཕྱིར། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་སྡུག་པའི་བུ་དང་འདྲ་བར་ཐུགས་དང་བས་ཡང་དག་པར་དགོངས་པར་མཛད་པ་འདི་ནི་ཆོས་ཉིད་ཡིན་ནོ་ཞེས་པ། །དབུགས་དབྱུང་བའི་ཆོ་ [83a] [83a.1]གའོ། །དེ་ལྟར་དབང་ཐོབ་ཅིང་དབུགས་ཕྱུང་སྟེ། དགའ་བའི་སློབ་མས་དེ་ལྟར་བགྱིའོ། །དེང་བདག་སྐྱེ་བ་འབྲས་བུར་བཅས། །བདག་གི་གསོན་པའང་འབྲས་བུར་བཅས། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་དེང་བདག་འགྱུར། །ཞེས་བརྗོད་ [83a.2]དོ། །གླང་པོ་ཆེ་དང་། རྟ་དང་། རིན་པོ་ཆེ་དང་། ས་ལེ་སྦྲམ་དང་། དངུལ་དང་། གོས་དང་། རྒྱན་དང་། བ་ལང་དང་། མ་ཧེ་དང་། བྲན་པོ་དང་། བྲན་མོ་དང་། ལས་བྱེད་པ་ལ་སོགས་པ་དང་། གཅེས་པའི་ཆུང་མ་དང་། བུ་དང་། བུ་མོ་ལ་སོགས་པ་རྣམས་སམ་ཇི་ལྟར་ནུས་པར་བླ་མ་ལ་ [83a.3]བཀུར་སྟི་བྱས་ཏེ་ཡོན་དབུལ་བར་བྱའོ། །གཏོར་མ་དང་སྦྱིན་སྲེག་དང་སྟོན་མོ་ལ་སོགས་པ་ཡང་བྱའོ། །རྣམ་པར་གྲོལ་ཞེས་པ་ནི་སྡིག་པ་མི་བྱེད་པར་ངེས་པའི་ཕྱིར་རོ། །བདེ་བར་གནས་པ་ནི་བདེ་བ་དང་བདེ་འགྲོ་ལ་ངེས་པའི་ཕྱིར་རོ། །འདས་པ་ནི་ཆོས་ཀྱི་སྐུ་ཐོབ་པའི་ཕྱིར་རོ། །མཐའ་འདས་ཞེས་ [83a.4]པ་མཐའ་མ་མེད་པའི་སྲིད་པ་ལོངས་སྤྱོད་རྫོགས་པའི་སྐུ་སྟེ། རྒྱུན་མི་འཆད་པར་རྟག་པ་འདི་ཉིད་ཀྱིས་སོ། །རྡོ་རྗེ་ནི་མི་ཕྱེད་པའི་སེམས་རབ་ཏུ་དང་བ་སྟེ། བླ་མ་དང་སངས་རྒྱས་རྣམས་ལའོ། །རང་གི་དམ་ཚིག་ནི་རང་གི་ལྷ་ལ་སོགས་པའོ། །བདེ་བ་ཉུང་ཞིང་སྡུག་བསྔལ་མང་བའི་འགྲོ་བར་ཁྱེད་ [83a.5]ཅག་སྐྱེས་ཀྱང་ཁ་ན་མ་ཐོབ་མེད་པའི་བདེ་བ་ཆེན་པོ་རྟག་པ་ཉིད་ཐོབ་པའོ། །འདིར་མེ་ཏོག་ལྷུང་བས་ཉེ་བར་མཚོན་པའི་དེ་བཞིན་གཤེགས་པའི་རང་བཞིན་གྱིས་རྣམ་པར་དག་པ་གསལ་བར་བྱ་བའི་ཕྱིར་དུ་མགོ་བོ་ལ་ཕྲེང་བས་དབང་བསྐུར་རོ། །མ་རིག་པའི་དྲི་མ་འཁྲུང་པར་རུང་བ་ཉིད་དུ་སྒྲུབ་པའི་ཕྱིར་དུ་ཆུའི་ [83a.6]དབང་ངོ་། །དེ་བཞིན་གཤེགས་པས་རྒྱས་འདེབས་པ་འདུ་བྱ་བ་བསྐྱེད་པའི་ཆེད་དུ་གཙུག་ཏོར་བསྐྱེད་པར་རུང་བ་ཉིད་ཀྱི་ཆེད་དུ་ཅོད་པན་གྱི་དབང་ངོ་། །ཉོན་མོངས་པ་ལ་སོགས་པའི་དགྲ་རྩ་བ་ནས་འདོན་པ་ཉིད་ཀྱི་ཕྱིར་དུ་དཔའ་བོའི་དར་དཔྱངས་བཅིང་བ་སྟེ། ཅོད་པན་གྱི་དབང་གི་འཁོར་ཡིན་ནོ། །ཁ་ཅིག་ཏུ་ནི་ [83a.7]དབང་ཐ་དད་པར་བརྗོད་དོ། །ཁ་ཅིག་ཏུ་ནི་དར་དཔྱངས་བྱེ་བཅིང་བ་མ་གསུངས་ཏེ་འདིའི་དོན་བསམ་པའི་ཁྱད་པར་ལས་ཅོད་པན་གྱི་དབང་གིས་ཀྱང་འགྲུབ་པའི་ཕྱིར་རོ། །དབྱེར་མེད་པའི་ཡེ་ཤེས་སྐྱེ་བར་འགྱུར་བར་རུང་བ་ཉིད་དུ་སྒྲུབ་པའི་ཆེད་དུ་རྡོ་རྗེའི་དབང་ངོ་། །སྟོང་པ་དང་སྙིང་རྗེ་དབྱེར་མེད་པ་བླ་ན་མེད་པའི་ཡེ་ཤེས་ [83b] [83b.1]འབྱུང་བའི་བདག་པོ་ཆོས་འབྱུང་རྟོགས་པར་བྱ་བའི་ཆེད་དུ་ཆོས་འབྱུང་གསལ་བར་བྱེད་པའི་དྲིལ་བུ་སྒྲ་དང་བཅས་པས་དབང་བསྐུར་བའོ། །བདག་པོའི་ཆེད་དུ་དབང་ནི་བདག་པོའི་དབང་དུ་ཡང་བརྗོད་དོ། །མ་འོངས་པ་ན་ཐུབ་པའི་གོ་འཕང་གི་མིང་དུ་འོས་པའི་ས་བོན་དགོད་པའི་དོན་དུ་མིང་གི་དབང་ [83b.2]ངོ་། །ཆུའི་དབང་ལ་སོགས་པ་ལྔ་པོ་འདི་རྣམས་རིམ་པ་བཞིན་ཆོས་ཀྱི་དབྱིངས་རྣམ་པར་དག་པ་དང་མཉམ་པ་ཉིད་དང་སོ་སོར་རྟོག་པ་དང་བྱ་བ་གྲུབ་པ་དང་། མེ་ལོང་ལྟ་བུའི་ཡེ་ཤེས་ཀྱི་ས་བོན་ཡོངས་སུ་རྒྱས་པར་བྱེད་པའི་ཕྱིར་དེའི་བདག་ཉིད་དུ་མོས་པར་བྱའོ། །ཆུའི་དབང་ནི་མེ་ལོང་ལྟ་བུའི་ཡེ་ཤེས་ཀྱི་བདག་ [83b.3]ཉིད་དུ་ཡང་དེ་ཉིད་བསྡུས་པ་ལས་གསུངས་ཏེ། མི་བསྐྱོད་པ་ཡང་མེ་ལོང་ལྟ་བུའི་ཡེ་ཤེས་ཀྱི་བདག་ཉིད་དུ་ཡང་ངོ་། །འདི་ནས་བརྩམས་ཏེ་རྣམ་པར་དག་པ་ཟུང་འཇུག་གི་བྱང་ཆུབ་རྟོགས་པར་བྱ་བའི་ཆེད་དུ་བརྩོན་པར་གྱིས་ཤིག་ཅེས་ངེས་པར་བྱ་བར་དགོངས་ནས་དེའི་རང་བཞིན་གྱི་རྡོ་རྗེ་འཛིན་པའི་ངེས་པ་ནི་རྡོ་རྗེའི་ [83b.4]དམ་ཚིག་གོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་རབ་ཏུ་སྟོན་པའི་རྒྱུ་དེ་བཞིན་ཉིད་རྟོགས་པ་ལ་སྦྱར་བའི་ཆེད་དུ་སྒྲ་དང་བཅས་པའི་དྲིལ་བུའི་དམ་ཚིག་གོ། །ཤེས་རབ་དང་ཐབས་ཀྱི་རང་བཞིན་བདེ་བ་ཆེན་པོའི་བདག་ཉིད་རྫོགས་པའི་སངས་རྒྱས་ཀྱི་རང་བཞིན་ཤིན་ཏུ་བརྟན་པར་རུང་བ་ཉིད་དུ་བསྒྲུབ་པའི་ཕྱིར་ [83b.5]ཕྱག་རྒྱའི་དམ་ཚིག་གོ། །དེ་ཉིད་ཀྱི་ཕྱིར་མཁའ་འགྲོ་མ་རྡོ་རྗེ་གུར་ལས་དམ་ཚིག་གཉིས་ཀྱི་འཁོར་ཅན་ཕྱག་རྒྱའི་དམ་ཚིག་ཁོ་ནས་རྫོགས་པའི་སངས་རྒྱས་ཀྱི་དབང་དུ་གསུངས་སོ། །རྒྱུད་གཞན་དུ་ནི་དམ་ཚིག་གསུམ་སློབ་དཔོན་གྱི་དབང་གི་འཁོར་དུ་གསུངས་སོ། །དེ་ལྟར་ཡང་སྔར་ཤེས་རབ་བཅུ་དྲུག་ [83b.6]ཅེས་པ་ལ་སོགས་པ་གསུངས་སོ། །དྲི་མ་འཁྲུད་པར་རུང་བ་ཉིད་ནི་དམ་ཚིག་རྣམ་པར་གཞག་པ་གཉིས་ཀ་ལ་ཡོད་པར་མི་འགལ་ལོ། །ཇི་ལྟར་ས་བཅུ་པ་ལ་ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོ་རྣམས་ཕྱོགས་བཅུའི་དེ་བཞིན་གཤེགས་པ་རྣམས་ཀྱིས་དབང་བསྐུར་བ་དེ་བཞིན་དུ་དམ་ཚིག་ [83b.7]གསུམ་དང་བཅས་པ་འདི་ཡང་དེ་རྣམས་དང་བླ་མས་སེམས་ཅན་གྱི་ཕུང་པོ་དཔག་ཏུ་མེད་པ་ལ་གཞལ་དུ་མེད་པའི་ཆོས་སྟོན་པ་ལ་སོགས་པས་སློབ་དཔོན་དུ་བྱ་བའི་ཆེད་དུ་ཁམས་གསུམ་པའི་ཆོས་ཀྱི་རྒྱལ་སྲིད་དུ་དབང་བསྐུར་བས་ན་སློབ་དཔོན་གྱི་དབང་དང་། ཕྱིར་མི་ལྡོག་པ་རྣམས་ཀྱི་དབང་དང་འདྲ་བས་ [84a] [84a.1]ན་ཕྱིར་མི་ལྡོག་པའི་དབང་ངོ་། །ཕྱིར་མི་ལྡོག་པ་ཉིད་ཀྱིས་བོན་ཉིད་ཀྱང་སྐྲུན་པར་བྱེད་དོ། །དེའི་ཕྱིར་དེ་ལ་ལྟོས་ནས་ཕྱིར་མི་ལྡོག་པར་བྱ་བའི་ཆེད་དུ་དབང་དང་། ཕྱིར་མི་ལྡོག་པ་དང་ལྡན་པའི་དབང་ནི། ཕྱིར་མི་ལྡོག་པའི་དབང་དུ་བརྗོད་དོ། །དེ་ཉིད་ཀྱི་ཕྱིར། རྡོ་རྗེ་གསང་བ་ཡེ་ཤེས་ [84a.2]ཀྱིས། །སློབ་དཔོན་ཞེས་བྱ་གསུམ་འདིར་བརྗོད། །ཅེས་པ་འདོད་པ་ནི་བློ་གྲོས་ངན་པ་རྣམས་ཁོ་ནའིའོ། །བགེགས་མེད་པ་ཉིད་ཀྱི་ཆེད་དང་ཞི་བ་ལ་སོགས་པའི་དངོས་གྲུབ་ཀྱིས་བོན་དགོད་པའི་ཆེད་དང་། དོན་དམ་པའི་སྔགས་ཀྱི་དངོས་གྲུབ་ཀྱི་ཞིང་དག་པར་བྱ་བའི་ཕྱིར་དུ་སྔགས་བརྗོད་དུ་གཞུག་པའོ། །མི་ [84a.3]ཤེས་པའི་ལིང་ཏོག་བསལ་བས་ལྷའི་མིག་གིས་མངོན་པར་ཤེས་པ་བསྐྱེད་པའི་ཆེད་དུ་མིག་སྨན་ནོ། །དེས་ཀྱང་སྣ་ཚོགས་གཟུགས་བརྙན་བཞིན་དུ་ལྟ་བ་འདུས་བྱ་བ་བསྒྲུབ་པའི་ཆེད་དུ་མེ་ལོང་གི་དབང་ངོ་། །བདུད་བཞི་ལས་རྣམ་པར་རྒྱལ་བའི་ཆོས་ཀྱི་དབྱིངས་ཤིན་ཏུ་ཕྲ་བའི་འབེམ་འབིགས་པའི་ས་བོན་ [84a.4]དགོད་པའི་ཆེད་དུ་མདའ་འཕངས་པའོ། །དད་པ་དང་ཤེས་རབ་ཀྱི་ཞིང་དུ་བྱ་བའི་དོན་ནམ། དམ་ཚིག་བསྲུང་བའི་དོན་དང་ངག་དག་པའི་དོན་དུ་གསང་བའི་དབང་ངོ་། །ཕུལ་དུ་ཕྱིན་པའི་ཤེས་པ་འདི་ལ་ཡོད་པས། ཤེས་རབ་ནི་ཕྱི་རོལ་གྱི་གཞོན་ནུ་མའོ། །དེ་ལས་ཡེ་ཤེས་ནི་སེམས་རྣམ་པར་རྟོག་པ་དང་ [84a.5]བྲལ་བ་ལས་རྣམ་པར་དག་པ་ལྷན་ཅིག་སྐྱེས་པའི་དགའ་བ་ནི་ཤེས་རབ་ཡེ་ཤེས་ཀྱི་དབང་ངོ་། །ཡེ་ཤེས་དེ་ཉིད་དྲི་མ་དང་བྲལ་ཞིང་ཡོངས་སུ་དག་པར་རྟོགས་པ་ནི་དབང་བཞི་པའོ། །འདི་དག་ནི་བདེ་བ་ཆེན་པོའི་རོས་ཡིད་འཁྲུད་པའི་ཕྱིར་དབང་ངོ་། །འདི་དག་དང་འབྲེལ་པ་ཁོ་ནར་ཤེས་རབ་ཉིད་ཟག་པ་མེད་ [84a.6]པའི་བདེ་བ་དམ་པ་ཕུན་སུམ་ཚོགས་པའི་དངོས་ཀྱི་ཐབས་ཡིན་པའི་ཕྱིར་ལས་དང་པོ་ལ་སོགས་པའི་གནས་སྐབས་སུ་ཡང་སྤང་བར་མི་བྱའོ་ཞེས་པ། རིག་མའི་བརྟུལ་ཞུགས་སོ། །གང་ཚེ་རྣམ་པར་མི་རྟོག་པས། །ལས་ཀུན་ཐབས་དང་བཅས་པར་སྤྱོད། །རྣམ་པར་མི་རྟོག་བསྒོམས་པ་ལས། །བརྟུལ་ [84a.7]ཞུགས་རྣམས་ཀྱི་མཆོག་གི་མཆོག །ཅེས་རྡོ་རྗེ་མཁའ་འགྲོ་ལས་གསུངས་པས་བརྟུལ་ཞུགས་གཞན་གྱིས་ཅི་ཞིག་བྱ། དེས་ན་ཡེ་ཤེས་ལྔའི་རང་བཞིན་གྱི་བྱང་ཆུབ་སེམས་ཀྱི་བརྟུལ་ཞུགས་ཁོ་ན་ལ་ཤིན་ཏུ་སྦྱར་བའི་ཕྱིར་དུ་རྡོ་རྗེའི་བརྟུལ་ཞུགས་སོ། །སྤྱོད་པ་དང་བྲལ་ན་ཡང་བྱང་ཆུབ་ཀྱི་སེམས་མེ་རྟོག་གོ་ཞེས་ [84b] [84b.1]བསླབ་པའི་དོན་དུ་སྤྱོད་པའི་བརྟུལ་ཞུགས་ཏེ་དེ་ནི་རྣམ་པ་གསུམ་མོ། །དེ་ལ་དང་པོ་ནང་གི་ཕྱག་རྒྱུ་གསུམ་ལ་སྦྱོར་བ་ལྷུར་བྱེད་པ་སྟེ་དེ་ལྟར་ཡང་། ཁ་ཊྭཱཾ་ཅག་ནི་ལྷ་ཡི་སྐུ། །།ཅང་ཏེའུ་ཤེས་རབ་ཏུ་ནི་བཏགས། །ཞེས་དང་། སྔགས་ནི་བཏུང་བའི་ཐོད་པའོ། །ཞེས་གསུངས་པས་སོ། །ལྷའི་སྐུ་ལུས་དང་། ཨ་ [84b.2]ན་ཧ་ཏིའི་ངོ་བོ་གཏུམ་མོའི་སྒྲ་དང་གཉིས་སུ་མེད་པའི་བདེ་བ་ཆེན་པོ་ཉམས་སུ་མྱོང་བའི་རྟེན་ཀུན་རྫོབ་བྱང་ཆུབ་ཀྱི་སེམས་ཏེ་དེ་ལྟར་གསུམ་མཚོན་པར་བྱེད་པའོ། །གཉིས་པ་ནི་རྣལ་འབྱོར་མ་དང་སྤྱོད་པའི་བརྟུལ་ཞུགས་དང་ལྡན་པ་ལས་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ཡེ་ཤེས་ལ་སོགས་པ་ལྔ་བསྐྱེད་པ་ལ་ [84b.3]སྦྱོར་བ་ལྷུར་བྱེད་པའོ། །གསུམ་པ་ནི་ལྟ་སྟངས་བཞི་དང་མངོན་པར་ཤེས་པ་ལ་སོགས་པའི་ནུས་པ་ཐོབ་པར་གྱུར་པ་ན་སེམས་ཅན་གྱི་དོན་སྒྲུབ་པ་ལ་ལྷུར་བྱེད་པ་འཇིག་རྟེན་ལས་ཕྱི་རོལ་དུ་གྱུར་པའི་རྣལ་འབྱོར་པའམ་རྣལ་འབྱོར་མ་ནང་གི་བདག་ཉིད་ཀྱི་རྒྱན་མ་ལུས་པའི་དོན་ནུས་པ་ལྷུར་བྱེད་པ་སྟོང་པ་ཉིད་དང་སྙིང་རྗེ་ [84b.4]ཆེན་པོ་དབྱེར་མེད་པའི་རང་བཞིན་བྱང་ཆུབ་ཀྱི་སེམས་འབྱུང་བ་ལ་སྦྱོར་རོ། །དེ་ལྟར་ཡང་རྣལ་འབྱོར་མ་ཀུན་ཏུ་སྤྱོད་པའི་རྒྱུད་ལས། དང་པོར་མཉམ་གཞག་རྣལ་འབྱོར་པས། །འབད་དེ་ནུས་པ་བསྐྱེད་པར་བྱ། །ནུས་པ་བསྐྱེད་པའི་རྗེས་ལ་ནི། །བརྟུལ་ཞུགས་སྤྱོད་པ་ཡིད་འོང་བ། །རིགས་ལྔ་མཉམ་ [84b.5]པར་ཀུན་སྤྱོད་པ། །རིགས་གཅིག་ཏུ་ནི་རྣམ་པར་བརྟག །མི་རྟོག་སེམས་གཅིག་བདག་ཉིད་ཀྱིས། །འདོད་པའི་ཡོན་ཏན་ལྔ་སྤྱད་པ། །དེ་ལྟར་དཔལ་ལྡན་ཧེ་རུ་ཀའི། །ཡེ་ཤེས་བསམ་པ་ཀུན་རྫོགས་མཛད། །ཤེས་རབ་ཆེ་ལྡན་དེ་ཡིས་ནི། །གཉིས་མེད་ཡེ་ཤེས་བརྟུལ་ཞུགས་བྱེད། །སྤྱོད་ [84b.6]པའི་བརྟུལ་ཞུགས་ལ་ཞུགས་པའི། །རྣལ་འབྱོར་རབ་ཏུ་ངེས་ཤེས་བྱ། །ཞེས་གསུངས་སོ། །ཁམས་གསུམ་དང་དབྱེར་མེད་པའི་ཆོས་ཉིད་རྟོགས་པའི་རིམ་པ་རུང་བ་ཁྱོད་ཡིན་ནོ་ཞེས་གཟེངས་བསྟོད་པའི་དོན་དུ་ལུང་བསྟན་པའོ། །དེ་ལྟར་ཡང་། བྷུར་ནི་རླུང་གི་དཀྱིལ་འཁོར་ལ་སོགས་པའི་འཁོར་ [84b.7]དང་བཅས་པའི་ས་འོག་གོ། །བྷུ་ཝཿཞེས་པ་ནི་ས་སྟེང་གི་འཇིག་རྟེན་ནོ། །སྭཿཞེས་པ་མཐོ་རིས་ཏེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་མཐར་ཐུག་པའོ། །དེ་གསུམ་ཆར་ཡང་ཁྱོད་ཡིན་ཏེ་གང་གི་ཕྱིར། །དེ་རྣམས་ཀྱི་རང་བཞིན་གྱི་དེ་ཁོ་ན་ཉིད་ཀྱི་སམ་ཡ་སྟེ། ས་རབ་ཏུ་དགའ་བ་ལ་སོགས་པའི་ [85a] [85a.1]རིམ་པས་རྟོགས་པར་རུང་བ་ཉིད་ཀྱིས་སོ་ཞེས་པ་ནི་ས་མ་ཡ་སྟྭཾ་བྷུར་བྷུ་བཿསྭཿཞེས་པ་འདིའི་དོན་ནོ། །ཆོ་ག་ཇི་ལྟར་དངོས་གྲུབ་རབ་ཏུ་བསྒྲུབས་ནས་ཆོས་སྟོན་པ་ལ་སོགས་པ་རྣམས་ཀྱིས་སེམས་ཅན་གྱི་དོན་གྱིས་ཤིག་ཅེས་པ་ནི་རྗེས་སུ་གནང་བའོ། །ཁྱོད་ཀྱིས་འདོད་པ་རྣམས་ལ་ཉེ་ [85a.2]བར་ལོངས་སྤྱད་ཀྱང་སྒྲིབ་པ་ཐམས་ཅད་ལས་གྲོལ་བའི་སངས་རྒྱས་དེ་རིང་ཉིད་དོ་ཞེས་དཀྱིལ་འཁོར་དུ་འཇུག་པ་ལ་སོགས་པ་པར་ནུས་པ་ཉིད་དུ་རྒྱས་པར་བྱ་བ་ལ་དགོངས་པར་རྟོགས་པར་བྱ་བའི་ཕྱིར་དབུགས་དབྱུང་བའོ། །རྡོ་རྗེའི་བརྟུལ་ཞུགས་ལ་སོགས་པ་ལྔ་པོ་འདི་རྣམས་ཀྱང་སློབ་དཔོན་གྱི་དབང་གི་ [85a.3]རྗེས་དང་། རིག་པའི་དབང་གི་རྗེས་ལ་དེ་དང་དེ་ཙམ་གྱིས་ཚིམ་པ་རྣམས་ལ་སྦྱིན་པར་བྱའོ་ཞེས་ཁ་ཅིག་གོ། །སྔགས་དང་། མིག་སྨན་དང་། མེ་ལོང་དང་། མདའ་འཕང་བ་རྣམས་ནི་རིག་པའི་དབང་གི་རྗེས་ལ་ཡང་ངོ་། །རིག་པའི་བརྟུལ་ཞུགས་ནི་ཤེས་རབ་ཡེ་ཤེས་ཀྱི་རྗེས་ལ་ཡང་ཁ་ཅིག་ཏུའོ། ། [85a.4]ཁ་ཅིག་ཏུ་ནི་སྔགས་ལ་སོགས་པ་དང་། སྤྱོད་པའི་བརྟུལ་ཞུགས་དང་། སྤྱིར་རྗེས་སུ་གནང་བ་དང་། དམ་ཚིག་གསུམ་དང་། སྐལ་བ་དང་ལྡན་པ་ཉིད་རྣམས་མ་གསུངས་ཏེ། ཇི་ལྟར་རིགས་པར་དབང་གཞན་རྣམས་སུ་དེ་དང་དེའི་དོན་དུ་འདུས་པར་དགོངས་པས་སོ། ཁ་ཅིག་ཏུ་རྗེས་སུ་གནང་བ་ [85a.5]དང་། དབུགས་དབྱུང་བ་དག་ཕྱིར་མི་ལྡོག་པའི་དབང་དུ་བསྡུས་སོ། །འདིར་ན་ཐམས་ཅད་ཐ་དད་དུ་བརྗོད་དོ། །གང་ཡང་མཁའ་འགྲོ་མ་རྡོ་རྗེ་གུར་གྱི་རྒྱུད་ལས། དང་པོར་ཆུ་ཡི་དབང་ཡིན་ཏེ། །གཉིས་པ་ལ་ནི་ཅོད་པན་དབང་། །གསུམ་པ་རྡོ་རྗེའི་དབང་གིས་སོ། །བཞི་པ་རང་གི་བདག་པོ་ཡིན། ། [85a.6]ལྔ་པ་ལ་ནི་མིང་དབང་བསྐུར། །དྲུག་པ་རྫོགས་པའི་སངས་རྒྱས་ཉིད། །བུམ་པའི་དབང་ནི་བདུན་པ་སྟེ། །བརྒྱད་པ་གསང་བའི་དབང་ཡིན་ནོ། །དགུ་པ་ཤེས་རབ་དབང་བསྐུར་ཏེ། །དེ་ཉིད་རྡོ་རྗེའི་སྦྱོར་བ་ཡིས། །ཐམས་ཅད་རྡོ་རྗེ་བརྟུལ་ཞུགས་སྦྱིན། །རང་ཉིད་སྟོན་པ་ལུང་སྟོན་ཏེ། འདི་ནི་དབང་ [85a.7]མཆོག་རིམ་པའོ། །ཞེས་པ་གསུངས་སོ། །དེ་ལ་ཕྲེང་བའི་དབང་ནི་ཆུའི་དབང་ལ་སོགས་པའི་རྒྱུ་ཉིད་ཀྱིས་དང་། སྔགས་ལ་སོགས་པ་རྣམས་ནི་ཇི་ལྟར་རིགས་པར་སློབ་དཔོན་གྱི་དབང་དང་། དབང་བཞི་པ་དང་། འགའ་ཞིག་གི་ཚེ་གཞན་གྱི་འང་འཁོར་ཉིད་དུ་རྒྱུད་གཞན་དུ་གསུངས་པ་ལས་རྟོགས་པར་ [85b] [85b.1]བྱ་བ་ཉིད་ཀྱི་ཕྱིར་མ་གསུངས་སོ། །དེ་ཉིད་ཀྱི་ཕྱིར་དཔལ་གསང་བ་འདུས་པ་ལས། དབང་བསྐུར་རྣམ་གསུམ་ཐ་དད་པ། །རྒྱུད་འདི་རུ་ནི་རབ་ཏུ་བརྟགས། །བུམ་པའི་དབང་ནི་དང་པོ་སྟེ། །གཉིས་པ་གསང་བའི་དབང་ཡིན་ནོ། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ཡང་དེ་བཞིན་ནོ། །ཞེས་སོ། ། [85b.2]དཔལ་ཁ་སྦྱོར་ལས་ཀྱང་། དབང་དེ་ཡང་ནི་རྣམ་པ་བཞི། །དང་པོ་བུམ་པའི་དབང་ཡིན་ཏེ། །གཉིས་པ་ལ་ནི་གསང་བའི་དབང་། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ནི་དེ་བཞིན་ཡང་། །ཞེས་སོ། །བརྟག་པ་གཉིས་པའི་རྒྱུད་ལས་ཀྱང་། །སློབ་དཔོན་གསང་བ་ཤེས་རབ་དང་། །བཞི་པ་དེ་ [85b.3]ཡང་དེ་བཞིན་ནོ། །ཞེས་གསུངས་སོ། །དེ་ལ་ཆུ་དང་། ཅོད་པན་དང་། རྡོ་རྗེ་དང་། བདག་པོ་དང་། མིང་དང་། སློབ་དཔོན་གྱི་དབྱེ་བས་རྣམ་པ་དྲུག་ནི་བུམ་པའི་དབང་སྟེ། ཐམས་ཅད་དུ་དེ་བཞིན་གཤེགས་པ་དང་། སྤྱན་མ་ལ་སོགས་པའི་རིག་མ་རྣམས་ཀྱིས་བུམ་པས་དབང་བསྐུར་བའི་ཕྱིར་རོ། །སློབ་ [85b.4]དཔོན་གྱི་དབང་ནི་མཆོག་ཏུ་ཉེ་བར་བླང་བར་བྱ་བ་ཉིད་ཀྱིས་ཕུལ་དུ་བྱུང་བ་དང་བཅས་པར་བསྐུར་བའི་ཕྱིར། བུམ་པའི་དབང་ནི་བདུན་པ་སྟེ། །ཞེས་གསུངས་སོ། །སློབ་དཔོན་གྱི་དབང་སྟེ་འབྱུང་བའི་རིམ་པའི་རྒྱུད་ཡིན་པའི་ཆུའི་དབང་ལ་སོགས་པ་ལྔ་ཡང་སློབ་དཔོན་གྱི་དབང་དུ་བརྗོད་དོ། །དེས་ན་ཐམས་ཅད་ [85b.5]མི་འགལ་ལོ། །དེ་ལྟ་བུ་འདི་ནི་གཞན་དབང་བསྐུར་བའི་ཆོ་གའོ།། །།རང་ཉིད་ཀྱི་དམ་ཚིག་ཉམས་ན་འདི་ལྟ་བུའི་དབང་ཉིད་ཇི་ལྟར་སློབ་དཔོན་འཇུག་པའི་ཆོ་གར་བླང་བར་བཤད་པ་དེ་ལྟར་བླང་བར་བྱའོ། །འོན་ཀྱང་གལ་ཏེ་བླ་མ་དམ་པ་ཤིན་ཏུ་རིང་བ་ན་ལམ་བགྲོད་དཀའ་བ་ལ་སོགས་པའི་ཉེ་བར་འཚེ་ [85b.6]བས་བགྲོད་པར་མི་ནུས་པའི་ཕྱོགས་ན་བཞུགས་ཏེ། གཞན་དུ་ནི་མ་ཡིན་ནོ། །རྟག་ཏུ་ཡི་དམ་བྱེད་པས་ནི་ཤེས་རབ་དང་ཐབས་རོ་གཅིག་པའི་རང་འདོད་པའི་ལྷའི་སྦྱོར་བས་ཡིད་ཀྱི་རང་བཞིན་གྱི་དཀྱིལ་འཁོར་བསྒོམ་པར་བྱ། །དཀྱིལ་འཁོར་གྱི་དབང་ཕྱུག་ལས་ཆུའི་དབང་ལ་སོགས་པ་གསང་བ་དང་། [85b.7]ཤེས་རབ་ཡེ་ཤེས་དང་། བཞི་པའི་མཐར་ཐུག་པ་དང་། དབུགས་དབྱུང་བའི་མཐར་ཐུག་པར་ཡང་བླང་བར་བྱའོ་ཞེས་པ། རང་དབང་བསྐུར་བའི་ཆོ་གའོ།། །།རྡོ་རྗེ་སེམས་དཔའི་སྡོམ་པ་དང་ལྡན་པ་འདིའི་ལྟུང་བ་ནི་རིགས་རྣམ་པ་གཉིས་ཏེ། རྩ་བའི་ལྟུང་བ་དང་། སྤོམ་པོའི་ལྟུང་བས་སོ། ། [86a] [86a.1]དེ་དག་ཀྱང་མན་ངག་གི་སྙེ་མར་རྣམ་པར་ཕྱེ་བའོ། །བླ་མ་ལ་བརྙས་པ་ལ་སོགས་པའི་ཉེས་པ་ལ་ནུས་པ་ཇི་ལྟ་བར་སྟོན་མོ་སྔོན་དུ་འགྲོ་བའི་དབུལ་བ་བྱས་ནས། བླ་མའི་མདུན་དུ་བཤགས་པ་སྔོན་དུ་འགྲོ་བས་སྡོམ་པ་སྔར་བཞིན་གཟུང་བར་བྱའོ་ཞེས་པ། དབང་གི་ཆོ་ག་གདམས་ [86a.2]པ་དང་བཅས་པ་འཁོར་དང་བཅས་པའོ། །འདིར་བགེགས་ལ་སོགས་པ་ཞི་བའི་དོན་དུ་སྦྱིན་སྲེག་བྱའོ་ཞེས་སྔར་བརྗོད་དོ། །དེས་ན། སྦྱིན་སྲེག་དང་བྲལ་ལས་རྣམས་ལ། །ཡང་དག་དངོས་གྲུབ་མི་འབྱུང་སྟེ། །ཞི་རྒྱས་ལ་སོགས་གྲུབ་དོན་དུ། །སྦྱིན་སྲེག་ལས་ནི་ཡང་དག་བརྩམ། །ཞེས་གསུངས་ [86a.3]པའི་ཕྱིར་སྐབས་ཇི་ལྟ་བར་སྦྱིན་སྲེག་བྱའོ། །དེ་ལ། སེམས་ཅན་དབྱེ་བས་མཐའ་ཡས་ཏེ། །རིགས་ཀྱི་དབྱེ་བས་རྣམ་པ་ལྔ། །ལས་ཀྱི་དབྱེ་བས་རྣམ་པ་བཞི། །ཐབ་ཁུང་རྣམས་སུ་ངེས་པ་འདི། །ཞེས་བཅོམ་ལྡན་འདས་ཀྱིས་གསུངས་སོ། །རྡོ་རྗེ་ཁྲོ་བོ་སྟོམས་པར་འཇུག་པ་གསང་བའི་རྒྱུད་ལས་ནི་ [86a.4]ལས་ཀྱི་དབྱེ་བས་ཐབ་ཁུང་གི་དབྱེ་བ་བརྒྱ་རྩ་བཅུ་བསྟན་ནོ། །འདི་ལྟ་སྟེ། ཞི་བ་ལ་ཡོངས་སུ་ཟླུམ་པོ། རྒྱས་པ་ལ་གྲུ་བཞི། མངོན་སྤྱོད་ལ་གྲུ་གསུམ། དགུག་པ་ལ་ལྕགས་ཀྱུའི་རྣམ་པ། དབང་དུ་བྱེད་པ་ལ་རྡོ་རྗེའི་རྣམ་པ། ནོར་དང་འབྲུ་དགུག་པ་ལ་རིན་པོ་ཆེའི་རྣམ་པ། འདོད་པའི་གཟུགས་ཅན་ [86a.5]ཉིད་ལ་རྟགས་ཀྱི་རྣམ་པ། མི་སྣང་བ་ལ་མདའ་གཞུའི་རྣམ་པ། བཀའ་བསྒོ་བ་ལ་རལ་གྲིའི་རྣམ་པ། སྡིག་པ་ཞི་བར་བྱེད་པ་ལ་རྟ་བབས་དང་བཅས་པའི་ཟླུམ་པོའི་རྣམ་པ་རིག་མ་ཆགས་པར་བྱ་བ་ལ་རང་གི་རིགས་ཀྱི་ཕྱག་རྒྱའི་རྣམ་པ། ནམ་མཁའ་ལ་འགྲོ་བ་ལ་ནམ་མཁའི་དཀྱིལ་འཁོར་གྱི་རྣམ་ [86a.6]པ། རིག་པ་གཟི་བརྗིད་བསྐྱེད་པ་ལ་འབར་བ་དང་བཅས་པའི་རྣམ་པ། དཀྱིལ་འཁོར་ཆེན་པོ་བསྒྲུབ་པ་ལ་འཁོར་ལོའི་རྣམ་པ། ལས་ཐམས་ཅད་པ་ལ་ཕྱིའི་དཀྱིལ་འཁོར་གྲུ་བཞི་པ་ལ་སྒོ་བཞི་པའི་ཐིག་བཏབ་ནས། ཤར་དུ་རྡོ་རྗེས་མཚན་པ། ལྷོར་རིན་པོ་ཆེས་མཚན་པ། ནུབ་ཏུ་པདྨས་མཚན་ [86a.7]པ། བྱང་དུ་ལས་ཀྱི་རྡོ་རྗེས་མཚན་པ་ཞེས་པ་ལ་སོགས་པ་དང་། སླར་ཡང་དབང་ལ་གྲུ་གསུམ་དང་། །མངོན་སྤྱོད་ལ་གྲུ་གསུམ་དང་། ཟླ་བ་ཕྱེད་པའོ་ཞེས་སོ། །ལེགས་པར་གྲུབ་པར་བྱེད་པ་དང་། རྡོ་རྗེ་དྲི་མ་མེད་པ་དང་། རྣམ་པར་སྣང་མཛད་མངོན་པར་བྱང་ཆུབ་པ་དང་། དམ་ཚིག་ [86b] [86b.1]གསུམ་གྱི་རྒྱལ་པོ་དང་། ཀུན་ནས་དབང་བསྐུར་སྐྱེད་པར་བྱེད་པ་དང་། །ཕྱག་ན་རྡོ་རྗེ་སྙིང་པོ་འབྱུང་གནས་དང་། །རྡོ་རྗེ་མངོན་པར་འབྱུང་བའི་རྒྱུད་དུ་ལས་ཐམས་ཅད་པའི་ཐབ་ཁུང་གྲུ་བཞི་པ། རྒྱར་ཁྲུ་གང་ཟབས་སུ་ཁྲུ་ཕྱེད་པའི་ཚད་ཀྱི་ཐབ་ཁུང་གི་སྟེང་དུ་ཞེས་པ་ལ་སོགས་པ་གསུངས་སོ། །དཔུང་ [86b.2]བཟངས་ཀྱིས་ཡོངས་སུ་ཞུས་པ་དང་། པདྨ་འབྱུང་གནས་དང་། ཤིན་ཏུ་རབ་ཏུ་གནས་པའི་རྒྱུད་ལས། ལས་ཐམས་ཅད་པའི་ཐབ་ཁུང་པདྨའི་རྣམ་པ་ཟླུམ་པོ་ཀུན་ཏུ་ཁྲུའི་ཚད་ལས་ཟབས་སུ་ཁྲུ་ཕྱེད་ཀྱི་ཚད་དུ་བརྐོས་ལ། དབུས་ཀྱི་པདྨ་བརྒྱད་ཀྱིས་ཡོངས་སུ་བསྐོར་བའི། ཐབ་ཁུང་གི་སྟེང་དུ་སོར་ [86b.3]བཞི་པའི་བར་དོར་ནས་རྒྱ་དང་དཔངས་སུ་སོར་བཞི་པ་ཐབ་ཁུང་ནས་འཐོན་པའི་པདྨ་རབ་ཏུ་རྒྱས་པའི་འདབ་མའི་རྣམ་པ་ལྟ་བུའི་ཁ་ཁྱེར་ཅན་ཁ་ཁྱེར་གྱི་ཕྱི་ངོས་སུ་པདྨའི་ཕྲེང་བས་ཡོངས་སུ་བསྐོར་བ། ཐབ་ཁུང་གི་ནང་གི་ཕྱོགས་ཀྱི་པདྨ་རྣམས་ལ་རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་རྣམས་ [86b.4]སོ། །མཚམས་ཀྱི་པདྨ་རྣམས་ལ་མིག་གཉིས་དང་། རྡོ་རྗེ་རྩེ་གསུམ་དང་། པདྨ་དང་། ཨུཏྤལའོ། །དབུས་ཀྱི་པདྨ་ལ་འཁོར་ལོ་རྩིབས་བརྒྱད་པའོ། །ཐབ་ཁུང་གི་ནང་གི་མཐར་རྡོ་རྗེ་ཕྲེང་བས་ཡོངས་སུ་བསྐོར་བའི་ཐབ་ཁུང་ནི་ལས་ཐམས་ཅད་པའོ་ཞེས་པ་ལ་སོགས་པ་གསུངས་སོ། །དུས་ཀྱི་ [86b.5]འཁོར་ལོར་ནི་ཞི་བ་ལ་ཐབ་ཁུང་ཟླུམ་པོ་ཁྲུ་གཅིག་པའོ། །རྒྱས་པ་ལ་གྲུ་བཞི་པ་ཁྲུ་གཉིས་པའོ། །མངོན་སྤྱོད་ལ་གཞུའི་རྣམ་པ་ཁྲུ་ཕྱེད་པའོ། །དགུག་པ་ལ་གྲུ་གསུམ་པ་སོར་ཉི་ཤུ་པའོ། །དབྱེ་བ་ལ་ཟུར་ལྔ་པ་ཟླུམ་པའི་ཚད་དོ། །རྨོངས་པ་ལ་ཟུར་དྲུག་པ་སོར་སུམ་ཅུ་པའི་ཚད་དོ། །དབང་ལ་ཟུར་ [86b.6]བདུན་པ་སོར་བཞི་བཅུ་པའོ། །རེངས་པ་ལ་ཟུར་བརྒྱད་པ་སོར་དྲུག་ཅུ་པའོ། །ཐམས་ཅད་དུ་ཐབ་ཁུང་གི་ཕྱེད་ཀྱི་ཚད་ཟབས་སུའོ། །ལས་ཐམས་ཅད་པའི་ཐབ་ཁུང་ནི་ཟླུམ་པོ་ཞེས་པ་ལ་སོགས་པ་གསུངས་སོ། །དཔལ་སངས་རྒྱས་ཐོད་པའི་རྒྱུད་དུ་ནི། ཞི་བའི་ཐབ་ཁུང་ཟུར་བཞི་པ། །སྟེང་དང་འོག་ཏུ་མཐོ་ [86b.7]གང་ངོ་། །རྒྱས་པའི་ཐབ་ཁུང་ཟམ་པོ་སྟེ། །སྟེང་དང་འོག་ཏུ་མཐོ་གསུམ་མོ། །དབང་ལ་ཐབ་ཁུང་གྲུ་གསུམ་སྟེ། །སྟེང་དང་འོག་ཏུ་མཐོ་བརྒྱད་པ། །མངོན་སྤྱོད་ཐབ་ཁུང་ཟླ་ཕྱེད་དེ། །སྟེང་དང་འོག་ཏུ་ཁྲུ་ཡི་ཚད། །ཅེས་པ་ལ་སོགས་པ་གསུངས་སོ། །དེ་ལྟར་ལས་ཐམས་ཅད་པའི་ཐབ་ཁུང་དུ་ཞི་བ་དང་། [87a] [87a.1]རྒྱས་པ་དང་། དབང་དང་། མངོན་སྤྱོད་ལ་སོགས་པ་རྣམས་འགྲུབ་ཀྱང་སོ་སོ་ལ་ཐབ་ཁུང་ཐ་དད་དུ་རྒྱུད་རྣམས་སུ་གསུངས་སོ། །དེ་བཞིན་དུ་རྒྱུད་ཁ་ཅིག་ཏུ་ཞི་བ་ལ་སོགས་པའི་ཐབ་ཁུང་རྣམས་དང་། ལས་ཐམས་ཅད་པའི་དཀྱིལ་འཁོར་དང་མཆུ་དང་ཁ་ཁྱེར་དང་དེའི་ཕྱི་ངོས་རྣམས་སུ་ [87a.2]དབྱིབས་དང་ཁ་དོག་དང་མཚན་མ་དགོད་པ་ཐ་དད་པ་དང་། སའི་ཁྱད་པར་དང་། ཕྱོགས་ཀྱི་ཁྱད་པར་དང་། བསྲེག་བྱ་དང་། མེ་ལྷ་དང་། འདུག་སྟངས་དང་། རྒྱན་དང་། དབྱིབས་དང་། ཕྱོགས་སུ་ལྟ་བ་ལ་སོགས་པའི་ཁྱད་པར་དང་། སྦྱིན་སྲེག་བྱ་བའི་དུས་ཀྱི་ཁྱད་པར་རྣམས་སོ་སོར་བསྟན་ལ། རྒྱུད་གཞན་ [87a.3]རྣམས་སུ་ནི་གཞན་དུ་བསྟན་ཏོ། །རྣལ་འབྱོར་པ་རྡོ་རྗེ་སེམས་དཔའི་སྐུར་མོས་པ་བརྟན་པས་ནི་སྒྱུ་མ་བཞིན་སྣ་ཚོགས་སྟོང་པ་ཉིད་དང་རོ་གཅིག་པར་སྣང་བ་བསྟན་པ་ཉིད་ལས། བརྩེ་བའི་རང་བཞིན་ཅན་གྱི་དོན་དུ་འཇུག་པ་འདི་ཐམས་ཅད་ཀྱིས་མངོན་པར་འདོད་པ་འགྲུབ་པར་འགྱུར་རོ་ཞེས་དགོངས་པ་དང་། ། [87a.4]གདུལ་བྱའི་བསམ་པ་སྣ་ཚོགས་པ་ལས་ཀྱང་སྟེ། ཐུགས་རྗེའི་རང་བཞིན་གྱི་སྐུ་རྣམས་ཀྱི་རྣམ་པར་གཞག་པ་འདི་སྣ་ཚོགས་པ་ཡིན་ནོ། །དེ་ལྟར་ཐམས་ཅད་རྟོགས་ནས་ཁོ་བོ་ཅག་གིས་དེ་ཁོ་ན་ཉིད་བསྡུས་པ་ལ་སོགས་པ་རྣལ་འབྱོར་དང་། རྣལ་འབྱོར་མའི་རྒྱུད་རྣམས་ཀྱི་རྗེས་སུ་འབྲངས་ནས་རབ་ཏུ་སྤྱོད་ [87a.5]པ་མང་པོ་གདམས་པ་དང་བཅས་པ་རྫོགས་ཤིང་གསལ་བར་གཏན་ལ་ཕབ་པའི་ཐབ་ཁུང་གི་མཚན་ཉིད་ལ་སོགས་པ་དང་། སྦྱིན་སྲེག་གི་ཆོ་ག་འོད་ཀྱི་སྙེ་མར་གསལ་བར་བྱས་སོ། །དེའི་ཕྱིར་དེ་ཉིད་ལས་དེ་ཐམས་ཅད་ངེས་པར་བཟུང་ནས་སྦྱིན་སྲེག་བྱ་སྟེ། འདིར་སླར་དེ་བརྗོད་པས་ཅི་ཞིག་བྱ་ངེས་ན་འདིར་ [87a.6]སྦྱིན་སྲེག་གི་ཆོ་ག་འོད་ཀྱི་སྙེ་མར་ཤེས་པར་བྱའོ། །དེ་ནས་ཆོ་ག་ཇི་ལྟ་བར་ཞི་བ་དང་རྒྱས་པའི་སྦྱིན་སྲེག་བྱ་སྟེ། རང་ཉིད་ཀྱི་དཀྱིལ་འཁོར་མཆོད་དེ་ཐམས་ཅད་ཀྱི་ནུས་པ་ཇི་ལྟ་བར་དེ་བཞིན་གཤེགས་པ་ལ་སོགས་པ་རྣམས་ལ་མཆོད་པར་གྱིས་ཤིག་ཅེས་པ་སློབ་མ་ལ་སོགས་པ་རྣམས་ལ་མཆོད་པ་བྱེད་ [87a.7]དུ་བཅུག་ལ་ཞུགས་པ་རྣམས་ཀྱང་བཟའ་བ་དང་བཅའ་བ་དང་བལྡག་པ་དང་ཆང་ལ་སོགས་པ་འཁོར་ལོ་ལ་ཕུལ་བ་རྣམས་ལ་ཚིམ་པར་བྱས་ཏེ། དེ་དག་ལྷན་ཅིག་ཏུ་མཚན་མོ་མི་ཉལ་བར་གླུ་གར་ལ་སོགས་པ་རྣམས་དང་། བྱང་ཆུབ་སེམས་ཀྱི་སྟོབས་ཀྱིས་ཡང་དག་པར་མཆོད་ནས་ཁྱེད་ [87b] [87b.1]རྣམས་ཀྱིས་འཇུག་པ་འདི་སུ་ལ་ཡང་སྨྲ་བར་མི་བྱའོ་ཞེས་བརྗོད་ལ། སློབ་མ་ལ་ནི་ཡོན་བླང་བྱ། །དེས་ཀྱང་གུས་པས་དབུལ་བྱ་སྟེ། །རིན་ཆེན་ཡིད་འོང་ཆུང་མ་དང་། །རང་གི་ལུས་དང་ས་གཞི་དང་། །མདོར་ན་བྱ་བ་དེ་འདྲ་བ། །ཇི་ལྟར་བླ་མ་མཉེས་འགྱུར་བྱ། །བླ་མ་མཉེས་ན་དངོས་ [87b.2]གྲུབ་འགྱུར། །གཞན་དུ་མིན་ཞེས་ཐུབ་པས་གསུངས། །སློབ་དཔོན་བླ་མེད་བྱེད་པ་པོ། །རྡོ་རྗེ་སེམས་དཔའ་མཆོད་པ་ལས། །དེ་ཡིས་བསོད་ནམས་མ་བྱས་ཅི། །དཀའ་ཐུབ་མ་སྤྱད་པ་ཡང་གང་། །ཞེས་སེམས་པས་སོ། །དེ་ནས་སློབ་མ་རྣམས་བཞག་སྟེ། །ཕྱི་རོལ་དུ་བྱུང་ནས་ཕྱོགས་ཀྱི་ [87b.3]གཏོར་མ་དང་། མཆོད་པ་ལ་སོགས་པ་བྱས་ལ། ནང་དུ་ཞུགས་ནས་འཁོར་ལོ་ལ་ཕྱག་འཚལ་ཏེ། འཁོར་ལོའི་དབང་པོ་ལ་ཨརྒྷ་ལ་སོགས་པ་ཕུལ་ནས་དགེ་བ་ཡོངས་སུ་བསྡོས་ཏེ་དཀྱིལ་འཁོར་ལ་ལན་གསུམ་བསྐོར་བ་བྱས་ལ། བཅོམ་ལྡན་འདས་ལ་ཕྱོགས་པས་ཤར་སྒོར་འདུག་སྟེ། ཡི་གེ་བརྒྱ་པ་ལན་ [87b.4]གསུམ་བརྗོད་ནས། མ་རྙེད་ཅེས་པ་ལ་སོགས་པས་བཟོད་པར་གསོལ་ཏེ། ཨོཾ་ཁྱེད་ཀྱིས་ཞེས་པ་ལ་སོགས་པ་དང་། ཨོཾ་ཨཱཿཧཱུཾ་བཛྲ་མུཿཞེས་པས་ཡེ་ཤེས་ཀྱི་དཀྱིལ་འཁོར་གཤེགས་སུ་གསོལ་ནས། རང་གིས་སྤྲུལ་པའི་དཀྱིལ་འཁོར་བདག་ཉིད་ལ་བསྟིམས་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨཱ་དྱ་ནུ་ཏྤནྣ་ [87b.5]ཏྭྟ་ཨོཾ་ཨཱཿཧཱུཾ་ཕཊ་སྭཱ་ཧཱ། ཨོཾ་ཨཱཿཧཱུཾ་མུཿཞེས་འདོན་ཞིང་ཆོས་ཐམས་ཅད་སྐྱེ་བ་མེད་པར་མོས་པས་དྲིལ་བུ་དཀྲོལ་ཞིང་ལག་པ་ན་གནས་པའི་རྡོ་རྗེས་ཤར་སྒོ་ནས་བརྩམས་ཏེ། ཚངས་པའི་ཐིག་གི་ལམ་ནས་གཙོ་བོའི་གནས་ཀྱི་བར་དབྱི་ཞིང་། རང་གི་མགོ་བོ་ལ་རྡུལ་ཚོན་ཅུང་ཟད་བླུགས་ནས་པདྨ་ལ་སོགས་ [87b.6]པ་དབྱི་བར་བྱའོ། །དེ་ནས་སྒོ་རྣམས་དང་ཟུར་རྣམས་ལག་པ་ན་གནས་པའི་རྡོ་རྗེའི་རྩེ་མོས་གཞིག་པར་བྱའོ། །དེ་ནས་ཨོཾ་བཛྲ་ཀཱི་ལ་ཡ་ཨུད་ཀཱི་ལ་ཡ་ཨུད་ཀཱི་ལ་ཡ་སརྦ་ཀཱི་ལན་བཛྲ་དྷ་ར་ཨཱ་ཛྙཱ་ཡ་ཧཱུཾ་ཧཱུཾ་ཧཱུཾ་ཧཱུཾ་ཕཊ་ཧོཿཞེས་པ་ཧཱུཾ་བཞི་པའི་སྔགས་ཀྱིས་ཕུར་བ་རྣམས་བཏོན་ལ། ཨོཾ་རུ་རུ་སྤུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་ [87b.7]སརྦ་ཨརྠ་སཱ་དྷ་ནི་སྭཱ་ཧཱ། ཞེས་པའོ་མ་ལ་བརྒྱ་རྩ་བརྒྱད་བཟླས་པས་བཀྲུའོ། །ཕུར་པའི་ལྷ་རྣམས་ཀྱང་གཤེགས་སུ་གསོལ་ལོ། །ཁུང་བུ་ཡང་དགང་ངོ་། །ཞི་བ་ལ་སོགས་པ་རྔོན་དུ་གཉེར་བ་ལ་རྡུལ་ཚོན་ཅུང་ཟད་བྱིན་ནས་རྡུལ་ཚོན་གཞན་ཐམས་ཅད་རྣམ་པར་རྒྱལ་བའི་བུམ་པ་གཞན་གསར་བ་གོས་ [88a] [88a.1]ཀྱིས་བརྒྱན་པར་བླུགས་ཏེ་གླང་པོ་ཆེའི་སྟེང་ངམ། ཁྱོགས་ལ་བཞག་ལ་ཡོན་བདག་གིས་བྱིན་པའི་རས་ཀྱིས་བརྒྱན་པའི་རྣལ་འབྱོར་མས་བཟུང་བའི་འདོ་ལི་ལ་ཞོན་པའི་སློབ་དཔོན་ནམ་སློབ་མས་དྲིལ་བུའི་སྒྲ་དང་། བཀྲ་ཤིས་ཀྱི་གླུ་དང་། རོལ་མོའི་སྒྲ་དང་། གདུགས་དང་། རྒྱལ་མཚན་ [88a.2]དང་། མཆོད་པ་རྣམས་དང་ལྡན་པས་ཁྱེར་ཏེ་འབབ་ཆུ་ཆེན་པོ་དང་། མཚོ་ཆེན་པོའམ། མཚོ་བྲན་ཆུ་ཟབ་མོའི་འགྲམ་དུ་འདུག་ལ། བ་ལྕིས་བྱུགས་ལ་དྲི་དཀར་པོས་མཎྜལ་བྱས་ཏེ། པདྨའི་ལྟེ་བ་ལ་རྡོ་རྗེ་སེམས་དཔའ་དང་། འདབ་མ་ལ་ཀླུ་རྣམས་སྔ་མ་བཞིན་མཆོད་དེ། ཀླུ་གཏོར་གྱི་སྔགས་ཀྱིས་འོ་མའི་ [88a.3]གཏོར་མ་ཕུལ་ནས་མཆོད་དེ། ཀླུ་རྣམས་ལ་བྱིན་གྱིས་བརླབས་པའི་རྡུལ་ཚོན་གཏད་དེ་ཆུ་ལ་བསྐུར་བར་བྱའོ། །ཀླུ་རྣམས་ཀྱིས་ཀྱང་བཀུར་སྟི་ཆེན་པོས་ས་འོག་གི་ཕྱོགས་བཞིར་ཁྱེར་བར་བསམ་མོ། །གང་དུ་རྡུལ་ཚོན་ཁྱེར་བའི་བུམ་པ་དེ་ཆུས་བཀང་ནས་དེ་ཁོ་ན་བཞིན་དུ་ཁྱེར་ཏེ། དེས་ཞི་བའི་དོན་དུ་དཀྱིལ་ [88a.4]འཁོར་ཁང་པ་ལ་སོགས་པར་གཏོར་བར་བྱའོ། །བ་ལྕིས་བྱུགས་པའི་དཀྱིལ་འཁོར་གྱི་ཁང་པར་གཞོན་ནུ་མ་རྣམས་ལ་འོ་ཐུག་གི་སྟོན་མོ་བྱའོ། །དེ་ནས་སློབ་དཔོན་གྱིས་ནི་ནོར་མཁོ་བའི་ཡོ་བྱད་ཀུན་བསྡུས་ནས། རང་ཉིད་ཀྱིས་ནི་སྤྱད་པར་བྱ། །སློབ་མ་སོགས་ཀྱིས་ཅུང་ཟད་མིན། །རྨང་འཛུགས་པ་དང་ [88a.5]རབ་གནས་དང་། སྦྱིན་སྲེག་འཁོར་ལོའི་ནོར་གང་ཡིན། །དེ་ཀུན་སློབ་མའི་ཁོ་ནའོ་ཞེས། །རྡོ་རྗེ་སེམས་དཔའ་མཆོག་ཉིད་གསུངས། །ཡོན་བདག་གིས་ནི་རབ་གནས་བྱས་པའི་སྐུ་གཟུགས་ལ་སོགས་པ་བསྐྱོད་དུ་རུང་བ་རོལ་མོའི་སྒྲ་ལ་སོགས་པའི་མཆོད་པས་རང་གི་གནས་སུ་ཁྱེར་ལ་མཆོད་པར་ [88a.6]བྱའོ། །སློབ་དཔོན་དང་། སྒོའི་སློབ་དཔོན་རྣམས་དང་། ལས་ཀྱི་རྡོ་རྗེ་ཅན་དང་། རྣལ་འབྱོར་མ་རྣམས་དང་། བཟོ་བོ་རྣམས་ཇི་ལྟར་རིགས་པར་ནུས་པ་ཇི་ལྟ་བར་གོས་ལ་སོགས་པ་རྣམས་དང་། སོ་རྩི་ལ་སོགས་པས་ཚིམ་པར་བྱའོ། །དགེ་འདུན་གྱི་སྟོན་མོ་དང་། ཚོགས་ཀྱི་འཁོར་ལོ་བྱའོ། །དམན་ [88a.7]པ་དང་མགོན་མེད་པ་རྣམས་ཀྱང་ཚིམ་པར་བྱའོ་ཞེས་པ། །དཀྱིལ་འཁོར་ཉེ་བར་བསྡུ་བ་ལ་སོགས་པའི་ཆོ་གའོ།། །།དེ་ལྟར་འདི་ནི་བྲི་བར་བྱ་བའི་དཀྱིལ་འཁོར་གྱི་ཆོ་གའོ། །བྲི་བར་བྱ་བའི་ཆོ་ག་འདི་ཡང་ཡིད་ཀྱིས་བསྒྲུབ་པའི་ཆོ་ག་ཁོ་ནས་འབྲས་བུ་དང་ལྡན་ནོ་ཞེས་བྱ་བས་ཡིད་ཀྱི་ཆོ་ག་ཁོ་ན་མཆོག་ [88b] [88b.1]ཡིན་ནོ། །དེ་ཉིད་ཀྱི་ཕྱིར་དཀྱིལ་འཁོར་གྱི་བདག་པོའི་གཟུགས་ཀྱིས་ས་ཡོངས་སུ་བཟུང་བ་ལ་སོགས་པ་དང་། སྐུ་གཟུགས་ལ་སོགས་པའི་རབ་གནས་དང་། སློབ་མ་དབང་བསྐུར་བ་དང་། གཤེགས་སུ་གསོལ་བ་དང་། ཞི་བའི་སྦྱིན་སྲེག་གི་མཐར་ཐུག་པ་ཐམས་ཅད་ཀྱི་ཡིད་ཀྱིས་བྱའོ། །དེ་ [88b.2]ཉིད་ཀྱི་ཕྱིར་གང་གི་ཚེ་འདི་ཐམས་ཅད་ཡོ་བྱད་འགའ་ཞིག་དང་བྲལ་བས། བྱ་བར་མི་ནུས་པའམ། མི་རིག་པའམ་མི་རྙེད་པ་དེའི་ཚེ་བསྒོམས་ལ་བྱའོ། །ཕྱི་རོལ་གྱི་དངོས་པོ་ཡོད་པ་ལ་ཡང་བསམ་གཏན་ཁོ་ན་གཙོ་བོ་ཡིན་ནོ། །འོན་ཀྱང་འཇིག་རྟེན་པའི་ལྟ་བ་དང་། སྦྱིན་པ་ལ་མངོན་པར་དང་བ་ [88b.3]ལ་སོགས་པས་བསོད་ནམས་འཕེལ་བའི་ཆེད་འབའ་ཞིག་ཏུ་ཕྱིའི་ཆོ་ག་འདོད་དོ། །ཚོགས་པ་དང་བྲལ་བ་ཡི་ནི་བསྒོམ་པ་ཁོ་ནས་ཆོ་ག་ཐམས་ཅད་བསྒྲུབ་པར་བྱའོ་ཞེས་སྔོན་གྱི་སློབ་དཔོན་རྣམས་ཀྱིས་གསུངས་སོ། །དེའི་ཕྱིར་ལས་དང་པོ་པས་ཀྱང་སེམས་བརྟན་པས་ཡིད་ཀྱིས་སྤྲུལ་པའི་ [88b.4]དཀྱིལ་འཁོར་དུ་སྔ་མ་བཞིན་རབ་གནས་དང་། སྐལ་པ་དང་ལྡན་པ་དབང་བསྐུར་བར་བྱའོ། །དེ་ལྟར་ཡང་དཔལ་སངས་རྒྱས་ཐོད་པའི་རྒྱུད་ལས། ཤེས་རབ་པདྨའི་ནང་དབུས་སུ། དཔག་ཚད་བྱེ་བའི་དཀྱིལ་འཁོར་ནི། རིགས་གསུམ་དཀྱིལ་འཁོར་དེ་དབུས་སུ། །མཁས་པས་བློ་བཟང་ [88b.5]དབང་བསྐུར་བྱ། །ཞེས་གསུངས་སོ། །གཞན་དུ་ཡང་། ཡིད་ཀྱིས་འགའ་ཞིག་ཉིད་དུ་ནི། །རྒྱལ་བས་དཀྱིལ་འཁོར་བྱ་བར་བཞེད། །ཅེས་གསུངས་སོ། །ཡིད་ཀྱི་དཀྱིལ་འཁོར་གྱི་ཆོ་གའོ།། །།འདིར་བརྗོད་པའི་ཆོ་ག་རྣམས་དང་། བྱ་བ་གཞན་རྣམས་ལ་ཡང་དང་པོ་དང་མཐར་བགེགས་ཉེ་ [88b.6]བར་ཞི་བའི་ཆེད་དུ་གཏོར་མ་སྦྱིན་ནོ། །དེ་ལ་རིམ་པ་ནི་འདི་ཡིན་ཏེ། དང་པོར་སློབ་དཔོན་ཅོད་པན་ལ་སོགས་པ་ཇི་ལྟར་རྙེད་པས་བརྒྱན་པ། དཔལ་རྡོ་རྗེ་སེམས་དཔའི་གཟུགས་ཀྱི་མདུན་དུ་པི་ཌ་ལ་སོགས་པའི་སྣོད་ཆེན་པོ་རྣམས་སུ་ཟན་དང་། ཁུར་བ་དང་། འབྲས་ཁུར་དང་ལ་དུ་དང་། ཆན་ཐུག་ལ་ [88b.7]སོགས་པ་དང་ཉ་དང་ཤ་དང་། བཙོང་དང་། སྒོག་སྐྱ་དང་། ཆང་དང་། ཆུ་དང་། འོ་མ་ལ་སོགས་པའི་མེ་ཏོག་ལ་སོགས་པ་དང་ལྡན་པ་བླ་རེ་ལ་སོགས་པས་བརྒྱན་པ་རོལ་མོའི་སྒྲ་ལ་སོགས་པ་མདུན་དུ་བདར་ལ། ཟན་དང་ཆུ་ལ་སོགས་པ་ཙམ་ཡང་རུང་སྟེ། ཇི་ལྟར་རྙེད་པ་བཀོད་པ། བཟའ་བ་དང་། [89a] [89a.1]བཅའ་བ་དང་། བལྡག་པ་དང་། བཏུང་བ་རྣམས་སྦྱང་བར་བྱའོ། །དེ་ལ་ཡཾ་ལས་བྱུང་བའི་རླུང་གི་དཀྱིལ་འཁོར་གྱི་སྟེང་དུ་རཾ་ལས་སྐྱེས་པའི་མེར། ཨཱཿལས་བྱུང་བའི་པདྨའི་སྣོད་དཀར་པོ་ཨོཾ་ཨཱཿཧཱུཾ་ལས་བྱུང་བའི་མགོ་བོ་གསུམ་པ་ལ་གནས་པ་དེར་ཟན་ལ་སོགས་པ་ཧཱུཾ་བཱུཾ་ཨཾ་ [89a.2]ཧྲཱིཿཁཾ་བྷྲཱུཾ་ཧཱུཾ་ཧྲཱིཿཏྲཱཾ་གི་ཡི་གེ་ལས་བྱུང་ཞིང་དེས་བྱིན་གྱིས་བརླབས་པའི་བདུད་རྩི་དང་སྒྲོན་མ་ལྔའི་ངོ་བོ་ཧ་ཧོཿཧྲིཿའི་ཡི་གེས་རིམ་པ་བཞིན་ཐ་མལ་པའི་ཁ་དོག་དང་དྲི་དང་། ནུས་པ་བསལ་ནས་རླུང་གིས་བསྐྱོད་པའི་མེ་འབར་བས་གདུངས་པས་ཡི་གེ་ལ་སོགས་པ་ཞུ་བར་གྱུར་ནས། དེའི་རླངས་པ་ལས་བྱུང་བའི་ཧཱུཾ་ [89a.3]ལས་སྐྱེས་པའི་རྡོ་རྗེས་མཚན་པའི་ཁ་ཊཱི་ག་ཞུ་ནས་དེར་ལན་གསུམ་དུ་ཕབ་པས་བདུད་རྩིར་གྱུར་པ་དེའི་སྟེང་དུ་ཨོཾ་ལས་བྱུང་བའི་ཟླ་བ་ལ་གནས་པའི་ཨོམ་ཨཱཿཧཱུཾ་གི་ཡི་གེའི་འོད་ཟེར་རྣམས་ཀྱིས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་རྣམས་ཀྱི་བྱང་ཆུབ་ཀྱི་སེམས་ཀྱི་བདུད་རྩི་དང་། རྒྱ་མཚོ་ལ་སོགས་ [89a.4]པར་གནས་པའི་བདུད་རྩི་དང་ཡི་གེ་གསུམ་དང་ཟླ་བ་དག་ཀྱང་དེར་བཅུག་ནས། ཡི་གེ་གསུམ་གྱིས་ལན་གསུམ་དུ་དངུལ་ཆུ་བཞིན་ཤིན་ཏུ་དངས་པར་བྱིན་གྱིས་བརླབ་པོ། །བདུད་རྩི་བསྒྲུབ་པའོ། །དེ་ནས་བསྡུས་པའི་རིམ་པའི་ཆོ་གའམ། ཡན་ལག་བཞི་པའི་ཆོ་གས་རིམ་གྱིས་སམ། སྐད་ཅིག་གིས་ [89a.5]རྡོ་རྗེ་སེམས་དཔའི་གཟུགས་ཀྱི་མདུན་དུ་དྲི་བཟང་པོ་ལ་སོགས་པས་མཎྜལ་བྱས་པར་རང་རང་གི་དཀྱིལ་འཁོར་གྱི་དབང་པོ་ལ་སོགས་པའི་དེ་བཞིན་གཤེགས་པ་ལ་སོགས་པ་ཐམས་ཅད་ཡང་དག་པར་མཆོད་ནས། མི་བསྐྱོད་རྡོ་རྗེ་ཞེས་པ་ལ་སོགས་པས་བསྟོད་དེ་རང་གི་སྙིང་གའི་ས་བོན་གྱི་འོད་ཀྱིས་ཁྲོ་བོ་དང་ [89a.6]བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བ་ལ་གནས་པའི་གཞལ་ཡས་ཁང་གི་ནང་ན་བཞུགས་པའི་དཀྱིལ་འཁོར་དང་། དབང་པོ་ལ་སོགས་པ་རྣམས་འཁོར་དང་བཅས་པ་དང་། ཀླུ་རྣམས་དང་། སེམས་ཅན་ཐམས་ཅད་བཀུག་ནས་དབང་པོ་ལ་སོགས་པ་རྣམས་སྐད་ཅིག་གིས་འོད་གསལ་ [89a.7]དུ་བཅུག་པའི་རྗེས་ལ་འདུས་པའི་ལྷ་ཤེས་རབ་དང་བཅས་པའི་གཟུགས་སུ་བསམས་ནས། མདུན་དུ་ཞབས་བསིལ་ལ་སོགས་པ་དབུལ་བ་སྔོན་དུ་འགྲོ་བས། དྲིལ་བུ་དཀྲོལ་ཞིང་རྡོ་རྗེ་གསོར་ཏེ་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་སུ་ལྷག་པར་མོས་པ་དང་འཁོར་གསུམ་ཡོངས་སུ་ [89b] [89b.1]དག་པས་གཏོར་ལ། ཨོཾ་ཨཱཿཆེ་གེ་མོ་བཛྲ་ཞེས་རང་གི་འཁོར་ལོའི་དབང་པོ་ལ་སོགས་པ་གནོད་མཛེས་ཀྱི་བར་གྱི་ལྷ་རྣམས་རེ་རེ་ཞིང་བོས་ནས་དེའི་ས་བོན་ཡང་བརྗོད་དེ། སརྦ་དུཥྚཱ་ན་ས་མ་ཡ་མཱུ་ཏྲཱ་པྲ་བྷཾ་ཛ་ཀ་མ་མ་ཤཱནྟི་ཀུཾ་རུ་ཙ་ཀུ་རུ་སྭཱ་ཧཱ་ཧཱུཾ་དང་། ཨོཾ་ཨཱཿསརྦ་དྲྱ་དྷྭ་ཛ་ད་ཤ་དིཀ །ལོ་ཀ་དྷཱ་ཏྭ་ནནྟ་ག་ག་ན། ས་མུ་ [89b.2]དྲ་མེ་གྷ་བྱཱུ་ཧ་པྲ་ས་ར། པ་ར་མཱ་ཎུ་རྫོ་མཎྜལ། པ་རཾ་པ་ར་ཨནྟ་རྒ་ག་ཏ། ས་མཱ་བ་ཏྟི་ཨ་བ་སྠི་ཏཱ། དྷརྨ་དྷཱ་ཏུ་ས་མ་བ་ས་རནྟ། ཨཱ་ཀཱ་ཤཱ་དྷཱ་ཏུ་པརྱ་བ་སཱ་ནཱ། སརྦ་ཏྲྱ་དྷྭ་ཛ་ད་ཤ་དི་ཀ། ལོ་ཀཱ་དྷཱ་ཏྭ་ནནྟ། མེ་གྷ་བྱཱུ་ཧ་པྲ་ས་ར་ག་གན། ས་མཱཿསརྦ་ལོ་ཀ་པཱ་ལཱཿསརྦ་ས་ཏྭཱ་ཤྩ། ཏདྱ་ཐཱ། བཛྲཱ་ཡུ་དྷ་མཱ་ཡཱ་བཛྲ་བཛྲཱ་ [89b.3]ན་ལ། བཛྲ་ཀཱ་ལ་བཛྲ་མུ་ཥ་ལ་ནཱ་ག་བཛྲ། བཛྲ་ཨ་ནཱ་ལི། བཛྲ་བྷཻ་ར་བ། བཛྲ་ཤཽཎྜ། བཛྲ་ཀྲོདྷ། བཛྲ་ཀུཎྜ་ལི། བཛྲ་པྲ་བྷ། མཽ་ན་བཛྲ། བེ་མ་ཙི་ཏྲི། པྲྀ་ཐི་བཱི་དེ་བ་ཏྲཿས་པ་རི་ཝཱ་རཿཨི་མཾ་པུཥྤ། དྷཱུ་པ། དཱི་པ། གནྡྷེ་ནཻ་བིཏྱ་ཨ་དཱི་སཾ་ཡུཀྟཾ། བ་ལི་ཨུ་བ་ཧ་རཾ། པྲ་ཏཱིཙྪ་ཨུ་པ་བྷུ་ཛྙ། མ་མ་ཧི་ར་ཎྱ་སུ་ [89b.4]ཝརྞྞ་དྷ་ན་དྷཱ་ཎྱ། ཨཱ་ཡུཿཡཽ་བ་ན་ཨ་རོ་གྱ། ས་ཏུ་ཁ་ཨ་པ་ཧ་ར་ཀཱ་སརྦ་བིགྷྣཱཾ་བི་ནཱ་ཡ་ཀཱ་ན། སརྦ་དུཥྚ་པྲ་དུཥྚ་ན། མ་ནུ་ཥྱ་ཎ་ཨ་མ་ནུ་ཥྱ་ཎ་ཛཾ་བྷ་ཡ་ཏ། སྟཾ་བྷ་ཡ་ཏ། བནྡྷ་ཡ་ཏ། བི་དྷྭཾ་ས་ཡ་ཏ། མ་མ་ཧི་ར་ཎྱ་སུ་པ་རྞ་དྷ་ན་དྷཱ་ཎྱ་ཨཱ་ཡུ་ར་ཡཽ་བ་ན། ཨ་རོ་གྱ་ས་ཧཱུཾ་ཁཱ་ནི་མ་ཧཱ་སུ་ཁ་པྲ་པྲྀ་དྷ་ཡེ། ཡཱ་བ་ད་ཨཱ་ [89b.5]བོ་དྷ་མཎྜལ་པརྱནྟཾ། དྷོ་ཀ་ཡ་ད་ས་ཏ་ས་ཧཱ་ཡ་ཏཾ། ཤཱནྟིཾ་རཀྵ་ཉྩ་ཀུ་རུ་ཏ་ཧཱུཾ་ཞེས་པའི་སྔགས་དག་གིས་དང་། ཀླུ་གཏོར་གྱི་སྔགས་ཀྱིས་ཀྱང་དབུལ་ལོ། །དེ་རྣམས་ཀྱང་དཀྱིལ་འཁོར་གྱི་བདག་པོ་ནས་བརྩམས་ཏེ་གནོད་མཛེས་ཀྱི་བར་དང་། དེ་ནས་དབང་པོ་ལ་སོགས་པ་འཁོར་དང་བཅས་པ་དང་། དེ་ [89b.6]ནས་ཀླུ་རྣམས་དང་། དེ་ནས་སེམས་ཅན་ཐམས་ཅད་ལྕེ་ཧཱུཾ་ལས་བྱུང་བའི་རྡོ་རྗེ་རྩེ་གཅིག་པ་དམར་པོ་རྣམས་དེའི་འོད་ཟེར་གྱི་སྦུ་གུ་རྣམས་ཀྱིས་སམ། ཡིད་ཀྱིས་བདུད་རྩི་དྲངས་པ་གསོལ་བས་བདེ་བ་ཆེན་པོའི་རང་བཞིན་སྟོང་པ་ཉིད་དང་རོ་གཅིག་པར་ཇི་སྲིད་འདོད་ཀྱི་བར་བསམ་པར་བྱའོ། །ཞལ་བསིལ་ [89b.7]དང་། ཕྱག་བཀྲུ་བ་དང་། སོ་རྩི་ལ་སོགས་པ་བྱིན་ནས་མཆོད་དེ། བྱ་བ་སྒྲུབ་པ་ལ་ལྷུར་བྱེད་པ་རྣམས་ལ་བཟོད་བར་གསོལ་ཏེ། སྔར་བརྗོད་པའི་ཡི་གེ་བརྒྱབ་བཟླས་ནས། ཨོཾ་ཡོ་ག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅ཧཾ། ཞེས་བརྗོད་ཅིང་པད་སྐོར་དང་འཁྱུད་པའི་ཕྱག་རྒྱ་བྱེད་པས་རང་གི་ལྷའི་འཁོར་ལོ་ [90a] [90a.1]བདག་ཉིད་ལ་བཅུག་ནས། སྲུང་བའི་འཁོར་ལོ་ན་གནས་པའི་ཁྲོ་བོ་བཅུ་དང་། དབང་པོ་ལ་སོགས་པ་བསྲུང་བ་ལ་སོགས་པ་མངོན་པར་འདོད་པ་བསྒྲུབ་པ་ལྷུར་བྱེད་པ་རྣམས་དཀྱིལ་འཁོར་གྱི་ཁང་པའི་ཕྱི་ངོས་སུ་ཕྱོགས་བཅུར་དཀྱིལ་འཁོར་གྱི་ལས་རྩོམ་པ་ནས་བརྩམས་ཏེ། ཇི་ [90a.2]སྲིད་མཐར་ཐུག་པའི་བར་དུ་དགོད་པར་བྱའོ། །རྡུལ་ཚོན་གྱི་དཀྱིལ་འཁོར་གཤེགས་སུ་གསོལ་བའི་རྡོ་རྗེས་ལ་ནི་དེ་ལྟར་གཏོར་མ་བཏང་བ་ལ་སོགས་པ་བྱས་ནས་ཁྲོ་བོ་རྣམས་ཀྱང་བདག་ཉིད་ལ་བཅུག་ནས་སེ་གོལ་གསུམ་གཏོག་ཅིང་དབང་པོ་ལ་སོགས་པ་རྣམས་གནས་ཇི་ལྟ་བ་བཞིན་གཤེགས་སུ་ [90a.3]གསོལ་ལོ། །གཞན་དུ་ཡང་ཉི་མ་སོ་སོའམ་ཐུན་སོ་སོ་ལ་གཏོར་མ་སྟེར་བ་ན་དེ་ལྟར་རོ། །འདི་ནི་གཤེགས་སུ་གསོལ་བའི་སྔགས་ཏེ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་གནང་། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་ [90a.4]དུ་གསོལ། །མུཿཞེས་པ་དང་། ཨོཾ་ཨཱཿཧཱུཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤནྣ་ཏྭཱ་ཏ་ཧཱུཾ་མུཿཞེས་པའམ། ཨོཾ་ཨཱཿཧཱུཾ་བཛྲ་མུཿཞེས་པ་འདོན་ཞིང་གཤེགས་སུ་གསོལ་ལོ། །འདིར་ཞི་བ་ལ་སོགས་པ་བྱ་བ་གཙོ་བོའི་དབྱེ་བས་དུས་དང་ཕྱོགས་དང་། ཁ་དོག་གི་དབྱེ་བ་རྟོགས་པར་བྱའོ། །དཀྱིལ་འཁོར་ [90a.5]གྱི་ཁང་པ་ལ་སོགས་པའི་ཕྱི་ངོས་ཤར་ལ་སོགས་པའི་ཕྱོགས་སུ་ཁྲོ་བོ་བཅུའི་སའི་གོང་བུ་དང་ཉེ་བར་མདུན་དུ་གཏོར་མ་ཟན་ལ་སོགས་པ་བསྐོན་པ་ལ་སོགས་པ་བཀང་བའམ། ཁམ་ཕོར་རྣམས་སམ་སྙིམ་པས་དབུལ་བར་བྱའོ། །སའི་གོང་བུ་རྣམས་ལས་ཕྱི་ངོས་སུ་སའི་གོང་བུ་བཅོ་ལྔ་རྣམས་དང་། དེ་ [90a.6]མེད་ན་མཎྜལ་རྣམས་ཀྱི་སྟེང་དུ་དབང་པོ་ལ་སོགས་པ་བཅོ་ལྔ་རྣམས་ལ་ཕྱོགས་བརྒྱད་དུ་སྦྱིན་ནོ། །དབང་པོའི་གཡས་ཕྱོགས་སུ་སྒྱུ་མ་རྡོ་རྗེ་སྟེ་ཁྱབ་འཇུག་ལའོ། །རྡོ་རྗེ་འཇིགས་བྱེད་ནི་ལུས་ངན་ཏེ་དེའི་གཡས་ལོགས་སུ་ལོག་འདྲེན་ལའོ། །རྡོ་རྗེ་ཁྲོ་བོ་ནི་དབང་ལྡན་ཏེ་དབང་ལྡན་དང་ཉེ་དབང་གི་དབུས་སུ་ [90a.7]ཉི་མ་དང་ཟླ་བ་དང་ཚངས་པ་རྣམས་ལའོ། །ཆུ་ལྷ་དང་བདེན་བྲལ་གྱི་བར་དུ་ཐགས་བཟངས་རིས་དང་སའི་ལྷ་མོ་དག་ལའོ། །དབང་པོ་ལ་སོགས་པའི་འཕན་བཅོ་ལྔ་ནི་རང་རང་གི་ཁ་དོག་སྟེ་རང་རང་གི་ཕྱོགས་སུའོ། །དབང་པོ་ལ་སོགས་པའི་སའི་གོང་བུ་རྣམས་ལས་ཕྱི་རོལ་དུ་སའི་གོང་དབུ་བརྒྱད་དམ་ [90b] [90b.1]བ་ལྕིས་མཎྜལ་བྱས་པ་རྣམས་སུ་ཀླུ་རྣམས་ལ་ཁམ་ཕོར་དུའོ་ཐུག་ལ་སོགས་པ་སྦྱིན་ནོ། །ཕྱི་རོལ་དུ་ཡང་གཏོར་མ་ཟན་ལ་སོགས་པ་དང་། མར་དང་། སྦྲང་རྩི་དང་། ཆུ་དང་། འོ་མ་དང་། ཆང་གི་རྒྱུན་རྣམ་པ་ལྔ་གཡས་སུ་གཏོར་རོ། །གཞན་གྱི་དོན་དུ་གཏོར་མ་སྦྱིན་པ་ནི་སྔགས་ལ་ཇི་ལྟར་ཡོད་ [90b.2]པའི་བདག་ལའམ་བདག་གི་ཞེས་བྱ་བ་ནི་ཇི་ལྟར་གནས་པ་ཉིད་བཀླག་པར་བྱའོ། །དེ་ཡང་བདག་ཉིད་དུ་མོས་པར་བྱའོ། །འདི་ལ་ཕན་བཏགས་པ་ནི་བདག་ཉིད་ལ་ཕན་བཏགས་པར་འགྱུར་རོ་ཞེས་པའི་བསམ་པས་དེའི་བྱ་བ་འགྲུབ་པར་འགྱུར་རོ། །བར་དུ་ཡང་དེའི་དོན་དུ་གོ་བར་བྱའོ། །འདུས་པའི་ [90b.3]འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།དྷརྨ་དྷ་ཏུ་ས་མ་བ་ས་ར་ཎཱ་ཞེས་པ་ལ་སོགས་པ་ནི་སྟོང་པ་ཉིད་དང་རོ་གཅིག་པ་དང་། སྟོང་པ་ཉིད་ཀྱི་མཐར་ཐུག་པ་ཞེས་པའི་དོན་ཏོ། །གཏོར་མའི་ཆོ་ག་འདི་ལ་ཁྲོ་བོ་བཅུ་བོ་རྣམས་ཀྱི་གཏོར་མ་ནི་སོ་སོ་རང་གི་སྔགས་རྒྱུད་དུ་གསུངས་པ་རྣམས་ [90b.4]ཀྱིས་ཤིན་ཏུ་ཁྱད་པར་དུ་བསྔགས་སོ། །སྔགས་དེ་རྣམས་ཀྱང་འདིར་མངས་པས་འཇིགས་པས་མ་བརྗོད་དོ། །ཡང་ན་དཔལ་འཁོར་ལོ་སྡོམ་པའི་གཟུགས་ཀྱིས་དྲི་ཞིམ་པོ་ལ་སོགས་པས་མཎྜལ་བྱས་པས་རང་གི་འཁོར་ལོ་མཆོད་ནས་རྐང་པ་བརྒྱད་པའི་སྔགས་ཀྱིས་བསྟོད་དེ། རང་ [90b.5]གི་སྙིང་གར་གནས་པའི་ཧཱུཾ་གི་འོད་ཟེར་རྣམས་ཀྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བར་ཆུད་པའི་གཞལ་ཡས་ཁང་གི་ནང་ན་གནས་པའི་དཀྱིལ་འཁོར་དང་། སྲུང་བའི་འཁོར་ལོའི་ཕྱི་ངོས་སུ་ཕྱོགས་རྣམས་སུ་དབང་པོ་ལ་སོགས་པ་འཁོར་དང་བཅས་པ་དང་། [90b.6]སེམས་ཅན་དཔག་ཏུ་མེད་པ་རྣམས་ནམ་མཁར་བཀུག་ནས་དཔྲལ་བའི་སྟེང་དུ་འབར་བའི་ཕྱག་རྒྱ་བཅས་ཏེ་འགྱིང་བ་དང་བཅས་ནས་ཕཊ་ཅེས་ལན་གསུམ་བརྗོད་ནས། དཀྱིལ་འཁོར་གྱི་མདུན་དུ་སྤྱན་དྲང་ངོ་། །ཨོཾ་ཀ་ཀྐ་ཀཌྜྷ་ན་བབྦ་བྣྡྷན། ཁ་ཁྑ་ཁཱ་ད་ན་སརྦ་དུ་ཥྜཱ་ནཱན་ཧ་ན་ཧ་ན། གྷ་གྷ་གྷཱ་ཏ་ན་ཆེ་ [90b.7]གེ་མོའི་ཤ་ནྟིཾ་ཀུ་རུ་ཧཱུཾ་ཧཱུཾ་ཕཊ་ཕཊ་ཛཿསྭཱ་ཧཱ། ཞེས་པ་འདིས་དབང་པོ་ལ་སོགས་པ་བཀུག་ནས་སྐད་ཅིག་གིས་སྟོང་པ་ཉིད་དུ་བཅུག་པའི་རྗེས་ལ་ཤེས་རབ་དང་བཅས་པའི་བདེ་མཆོག་གི་ལྷའི་སྐུར་བསྒོམས་ནས་ཞབས་བསིལ་ལ་སོགས་པ་དབུལ་བ་སྔོན་དུ་འགྲོ་བས་སྔ་མ་བཞིན་འཁོར་གསུམ་ཡོངས་ [91a] [91a.1]སུ་དག་པས་ལག་པ་གཡོན་པའི་མཐིལ་དུ་ཟླ་བ་ལ་གནས་པའི་ཧཱུཾ་ལས་སྐྱེས་པའི་སྣ་ཚོགས་རྡོ་རྗེའི་ལྟེ་བར་སྔ་མ་ལྟ་བུའི་བདུད་རྩིའི་སྣོད་བཀོད་ནས་སམ་བསྒོམས་ཏེ། ལག་པ་གཡས་པ་རྡོ་རྗེ་ཁུ་ཚུར་བྱས་པའི་སྡིགས་མཛུབ་བརྐྱང་བས་དེ་སྟོན་ཞིང་། བཅོམ་ལྡན་འདས་དང་དེའི་ [91a.2]ཤེས་རབ་མ་དང་། མཁའ་འགྲོ་མ་ལ་སོགས་པ་དང་། ཁྭ་གདོང་མ་ལ་སོགས་པ་རྣམས་ལ་ཇི་ལྟར་རིགས་པར་ཕྱོགས་རྣམས་སུ་གཡོན་སྐོར་དང་། མཚམས་རྣམས་སུ་གཡས་སྐོར་དུ་མེ་ནས་བརྩམས་ཏེ་བསྐོར་ཞིང་། ཨོཾ་བཛྲ་ཌཱ་ཀ་ཨི་མཾ་བ་ལི་གྲྀཧྞ་གྲྀཧྞ་ཧཱུཾ་ཕཊ། ཨོཾ་ཛཿཧཱུཾ་བཾ་ཧོཿས་མ་ཡ་སྟྭཾ་དྲྀ་ཤྱ་ཧོཿ [91a.3]ཞེས་པའི་སྔགས་ལན་གཅིག་དང་། གཉིས་དང་གསུམ་དང་། བཞི་དང་། ལྔ་བརྗོད་པས་ཕུལ་ནས། འཁོར་ལོ་གསུམ་གྱི་ལྷ་རྣམས་ལ། ཨོཾ་ཀ་ར་ཀ་ར། ཀུ་རུ་ཀུ་རུ། བནྡྷ་བནྡྷ། ཏྲཱ་ས་ཡ་ཏྲཱ་ས་ཡ། ཀྵོ་བྷ་ཡ་ཀྵོ་བྷ་ཡ། ཧྲཽཾ་ཧྲཽཾ་ཧྲཿཧྲཿཕེཾ་ཕེཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷ་ཀྵ་བྷ་ཀྵ་བ་ས་རུ་དྷི་ར་ཨནྟྲ་ [91a.4]མཱ་ལ་བ་ལཾ་བི་ནི་གྲྀཧྞ་གྲྀཧྞ་སཔྟ་པཱ་ཏ་ལ་ག་ཏ་བྷུ་ཛཾ་ག་སརྤཾ་ཝཱ་ཏ་རྫ་ཡ་ཏ་རྫ་ཡ། ཨཱ་ཀཌྜྷྱ་ཨཱ་ཀཌྜྷྱ། ཧྲིཾ་ཧྲིཾ། ཛྙཽཾ། ཛྙཽཾ། ཀྵྨཱཾ་ཀྵྨཱཾ། ཧཱཾ་ཧཱཾ། ཧཱིཾ་ཧཱིཾ། ཧཱུཾ་ཧཱུཾ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི། ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་པའི་སྔགས་ལན་ཅིག་བརྗོད་པས་དབུལ་ལོ། །དེ་ནས་སྲུང་བའི་འཁོར་ལོའི་ [91a.5]རྩིབས་ལ་གནས་པའི་ཁྲོ་བོ་བཅུ་ལ། ཨོཾ་བཛྲ་དྷྲཾ་ཀ་བཛྲ་ཧཱུཾ་ཀཱ་ར་བཛྲ་ཧཱུཾ་ཕཊ། ཨོཾ་བཛྲ་དཎྜ་བཛྲ་ཧཱུཾ་ཕཊ། ཨོཾ་བཛྲ་ཨ་ན་ལཱ་རྐ་བཛྲ་ཧཱུཾ་ཕཊ། ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ། ཨོཾ་བཛྲ་ཡཀྵ་བཛྲ་ཧཱུཾ་ཕཊ། ཨོཾ་བཛྲ་ཀཱ་ལ་བཛྲ་ཧཱུཾ་ཕཊ། ཨོཾ་བཛྲ་མ་ཧཱ་བཱ་ལ་བཛྲ་ཧཱུཾ་ཕཊ། ཨོཾ་བཛྲ་བྷཱི་ཥ་ན་བཛྲ་ཧཱུཾ་ཕཊ། ཨོཾ་བཛྲ་ཨུཥྞཱི་ཥ་ཙཀྲ་བརྟི་ [91a.6]བཛྲ་ཧཱུཾ་ཕཊ། ཨོཾ་བཛྲ་པཱ་ཏ་ལ་བཛྲ་ཧཱུཾ་ཕཊ་ཅེས་པའི་སྔགས་བཅུའི་ཧཱུཾ་ཕཊ་ཅེས་པའི་གོང་དུ། ཨི་མཾ་བ་ལིཾ་གྲྀཧྞ་གྲྀཧྞ་ཆེ་གེ་མོའི་ཤཱནྟིཾ་རཀྵ་ཙ་ཀུ་རུ་ཞེས་བཅུག་ལ་ལན་རེ་རེ་བརྗོད་པ་རྣམས་ཀྱི་བསྐོར་ཕྱོགས་གཉིས་དང་། སྟེང་དང་འོག་ཏུ་དབུལ་ལོ། །དེ་ནས་དེའི་ཕྱི་རོལ་དུ་དབང་པོ་ལ་སོགས་པ་རྣམས་ལ། ཨོཾ་ [91a.7]ཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཱཀྵ་ས་བྷཱུ་ཏེ་པྲེ་ཏ་པི་ཤཱ་ཙ་ཨུནྨཱ་ད་ཨ་བ་སྨཱ་ར་ཌཱ་ཀ་ཌཱ་ཀི་ནྱཱ་ད་ཡ། ཨི་མཾ་བ་ལིཾ་གྲྀཧྞནྟུ་ས་མ་ཡ་རཀྵ་ནྟུ། སརྦ་སིདྡྷི་མྨེ་པྲ་ཡཙྪ་ནྟུ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་འདི་ལན་བཞི་བརྗོད་པས་བསྐོར་ཕྱོགས་གཉིས་དང་། སྟེང་དང་འོག་ཏུ་དབུལ་ལོ། །འདིར་ཡང་དེ་རྣམས་དང་དཀྱིལ་ [91b] [91b.1]འཁོར་གྱི་བདག་པོ་ནས་བརྩམས་ཏེ་གནོད་མཛེས་ཀྱི་བར་དུ་ཞེས་པ་ལ་སོགས་པ་སྔར་བརྗོད་པ་ཤེས་པར་བྱའོ། །ཡི་གེ་བརྒྱ་པ་ནི་འདིར་གཞན་ཏེ། ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་ [91b.2]སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱན་བཛྲ་ཧེ་རུ་ཀ། མཱ་མེ་མུཉྩ་ཧེ་རུ་ཀོ་བྷ་ཝ། མ་ཧཱ་ས་མ་ཡ་སཏྭ་ཨཱཿཧཱུཾ་ཕཊ་ཅེས་པའོ། །འདིར་བརྗོད་པའི་ཁྲོ་བོ་བཅུ་མངོན་པར་བརྗོད་པ་བླ་མར་གསུངས་པ་རྣམས་ཀྱི་ཕྱག་དང་། ཕྱག་མཚན་ལ་སོགས་པ་རྫོགས་ [91b.3]པའི་དཀྱིལ་འཁོར་གྱི་ཕྲེང་བའི་བདེ་མཆོག་གི་དཀྱིལ་འཁོར་དུ་ཤེས་པར་བྱའོ། །རྒྱ་ཆེར་བཅོམ་ལྡན་འདས་ཀྱི་བསྒོམ་པའི་རིམ་པ་གདམས་པ་དང་བཅས་པ་ནི་བདག་གིས་བདེ་མཆོག་གི་མངོན་པར་རྟོགས་པའི་སྒྲུབ་ཐབས་སུ་གསལ་བར་བྱས་སོ་ཞེས་པ་བདེ་མཆོག་གི་འབྱུང་པོ་ཐམས་ཅད་ [91b.4]པའི་གཏོར་མའི་ཆོ་གའོ།། །།ཡང་ན་ཀྱེ་རྡོ་རྗེའི་གཟུགས་ཀྱི་སྙིང་གའི་ཧཱུཾ་གི་འོད་ཟེར་གྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བའི་ནང་ན་གནས་པའི་གཞལ་ཡས་ཁང་གི་ནང་ན་གནས་པའི་དཀྱིལ་འཁོར་དང་། སྲུང་བའི་འཁོར་ལོའི་ཕྱི་ངོས་སུ་ཕྱོགས་རྣམས་སུ་ [91b.5]དབང་པོ་ལ་སོགས་པ་འཁོར་དང་བཅས་པ་དང་། སེམས་ཅན་དཔག་ཏུ་མེད་པ་རྣམས་བཀུག་ནས་དབང་པོ་ལ་སོགས་པ་རྣམས་འོད་གསལ་དུ་བཅུག་སྟེ། ཤེས་རབ་དང་བཅས་པའི་ཧེ་རུ་ཀའི་གཟུགས་སུ་གསལ་བར་གྱུར་པར་བསམས་ནས། ཞབས་བསིལ་ལ་སོགས་པ་དབུལ་བ་སྔོན་དུ་ [91b.6]འགྲོ་བས་སྔ་མ་བཞིན་དུ་དག་པས་གཏོར་མ། ཨོཾ་དེ་བ་པི་ཙུ་བཛྲ་ཨི་མཾ་བ་ལིཾ་གྲྀཧྞ་གྲྀཧྞ་ཆེ་གེ་མོའི་ཤཱནྟིཾ་རཀྵ་ཙ་ཀུ་རུ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་བཅོམ་ལྡན་འདས་ལ་དབུལ་ལོ། །ཨོཾ་ཨཱཿནེ་རཱཏྨ་ཡ་ཞེས་པ་ལ་སོགས་པ་མཚན་ནས་བརྗོད་ཅིང་དེ་རྣམས་ཀྱི་ས་བོན་ཡང་བརྗོད་དེ། ཨི་མཾ་བ་ [91b.7]ལིཾ་གྲྀཧྞ་གྲྀཧྞ་ཆེ་གེ་མོའི་ཤཱནྟིཾ་རཀྵ་ཙ་ཀུ་རུ་སྭཱ་ཧཱ་ཧཱུཾ་ཞེས་པ་འདིས་བདག་མེད་མ་ལ་སོགས་པ་རྣམས་ལའོ། །ན་མཿས་མནྟ་བུདྡྷེ་བྷྱོ། ན་མོ་བཛྲ་མུངྒ་ར་ཧ་ཏཱ་ཡ་ཙཎྜ་ལ་ཨཀྵེ་པ་ཀ་རཱ་ཡ་ཧཱུཾ་ཕཊ། ན་མཿས་མནྟ་བུདྡྷེ་བྷྱོ་མ་ཧཱ་དཎྜ་དྷ་ར་བི་བི་དྷ་སུ་ར་ཨ་སུ་ར་མརད་ན་བྷཱུ་ཏཱ་ན་ནི་རྨ་ཐ་ཧཱུཾ་ཕཊ། ན་མཿས་མནྟ་བུདྡྷེ་བྷྱོ་ཧུ་ལུ་ཧུ་ལུ་ [92a] [92a.1]མ་ཧཱ་པདྨ་ཨ་མྲྀ་ཏི་ཀུ་རུ་མ་ཧཱ་བི་ཤཾ་ཀ་ཨཱཿན་མཿས་མནྟ་བུདྡྷེ་བྷྱོ་ན་མོ་བཛྲ་ཀྲོ་དྷཱ་ཡ་མ་ཧཱ་དཾ་ཥྚོ་ཏྐཊ་བྷཻ་ར་བཱ་ཡ། བཛྲ་སནྷོ་ཧ་དརྤཱ་ཡ་ཨ་མྲྀ་ཏ་ཀུཎྜ་ལི་ཧཱུཾ། ན་མཿས་མན་བུདྡྷེ་བྷྱོ་ན་མོ་ཨ་ལ་ལ་ཀཱ་ཎ་ཙེཊྚ་ཙེཊྚ་མོཊྚ་མོཊྚ་ཏུཊྚ་ཏུཊྚ། གྷ་གྷ་གྷཱ་ཏ་ཡ། གྷཱ་ཏ་ཡ་ཧཱུཾ་ཕཊ། ན་མཿས་མནྟ་བུདྡྷེ་བྷྱེ། ། [92a.2]ཊ་ཀྐི་ཧཱུཾ་ཛཿན་མཿས་མནྟ་བུདྡྷེ་བྷྱཿཨོཾ་ཡ་མ་དཎྜཱ་ཡ། ནཱི་ལ་ཡ་ནི་ལ་ད་ཎྜཱ་ཡ་ཏུ་རུ་ཏུ་རུ། མུ་རུ་མུ་རུ་སརྦ་དུཥྚཱཾ་མཱ་ར་ཡ་ཧཱུཾ་ཕཊ། ན་མཿས་མནྟ་བུདྡྷེ་བྷྱོ། ན་མཿམ་ཧཱ་བ་ལཱ་ཡ། ཨུ་ཙྪུཥམ་ཀྲོ་དྷ་ར་ཛཱ་ཡ། སརྦ་ནཱ་ག་ནཱཾ་ཧྲི་ད་ཡཾ་ཏཱ་ཌ་ཡ་ཧཱུཾ་ཕཊ། ན་མཿས་མནྟ་བུདྡྷཱ་ནཱཾ། ན་མཿས་མནྟ་དྷ་རྨཱ་ཎཱཾ། ན་མཿས་མ་ནྟ་སཾ་གྷཱ་ [92a.3]ནཱཾ། ཨོཾ་སི་ཏཱ་ཏ་པ་ཏྲེ། ཨོཾ་བི་མ་ལ། ཨོཾ་ཤཾ་ཀ་ར། ཨོཾ་ཕྲ་ཏྱཾ་གི་ར། བཛྲ་ཨུཥྞཱི་ཥ་ཙ་ཀྲ་ཝརྟི། སརྦ་ཡནྟྲ། མནྟྲ། མཱུ་ལ་ཀརྨཱ་བནྡྷ་ནཾ། ཏཱ་ཌ་ནཾ། ཀཱི་ལ་ནཱཾ་ཝཱ། མ་མ་ཀྲི་ཏེ། ཡེ་ན་ཀེ་ན་ཙི་ཏ་ཀྲི་ཏཾ་ཏ་ཏ། སརྦཱནྟུ། ཙྪིནྡ་ཙྪིནྡ། བྷིནྡ་བྷིནྡ། ཙི་རི་ཙི་རི། གི་རི་གི་རི། མ་ར་མ་ར། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ [92a.4]ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོཿབྷ་ག་ཝཱན་བིདྱཱ་རཱ་ཛ་ཧཱུཾ་ཕཊ། ཅེས་པའི་སྔགས་བཅུས་ཤར་ལ་སོགས་པ་དང་། དབང་ལྡན་ལ་སོགས་བར་གཡས་སྐོར་དུ་དང་། སྟེང་དང་འོག་ཏུ་གཤིན་རྗེ་གཤེད་ལ་སོགས་པའི་ཁྲོ་བོ་ [92a.5]བཅུ་བ་མཁའ་འགྲོ་མ་རྡོ་རྗེ་གུར་དུ་གསུངས་པ་རྣམས་ལའོ། །ཨོཾ་ཨིནྡ། ཛ་མ། ཛ་ལ། ཛཀྑ། བྷཱུ་ཏ། བཧྣི། བཱ་ཨུ། རཀྑ། ཙནྡ། སུཛྫ། མཱ་ད། པཔྤ། ཏ་ལ་པཱ་ཏཱ་ལེ། ཨཊྚ་སཔྤ་སྭཱ་ཧཱ། ཨི་དཾ་བ་ལིཾ། བྷུཉྫ། ཛིགྷ་ཕུལླ། དྷཱུ་པ། མཱཾ་ས། པིཾ་གྷ། ཨཾ་བྷ། སཔྤ། ཀཛྫ་སཱ་ད། ཁནྟི་ [92a.6]ཁུ་ཎི་ཕེ་ཌ་གཱ་ད་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷ་རྨཱ་ནཱཾ་ཨཱདྱ་ནུཏྤནྣ་ཏྭཱ་ཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་དབང་པོ་ལ་སོགས་པ་རྣམས་ལའོ། །ཨིནྡ་ཞེས་པ་ལ་སོགས་པ་བོད་ཚིག་རྣམས་ནི་རང་རང་གི་ཕྱོགས་ཀྱི་སེམས་ཅན་དཔག་ཏུ་མེད་པ་མཚོན་པར་བྱེད་པའོ། །གཱ་ད་ཞེས་པ་ [92a.7]ནི་ལུས་ལའོ། །འདིར་ཡང་དེ་རྣམས་ཀྱི་དཀྱིལ་འཁོར་གྱི་བདག་པོ་ནས་བརྩམས་ཏེ་གནོད་མཛེས་ཀྱི་བར་དུ་ཞེས་པ་ལ་སོགས་པ་འདུས་པའི་གཏོར་མའི་ཆོ་གར་བརྗོད་པ་ནི་འདིར་ཡང་ཤེས་པར་བྱའོ། །འདིར་ཁྲོ་བོའི་སྔགས་རྣམས་ཀྱི་ཡི་གེ་ཧཱུཾ་རྣམས་དང་། ཡི་གེ་ཧཱུཾ་ཨཿའི་གོང་དུ་ཨི་མཾ་བ་ལིཾ་ [92b] [92b.1]གྲྀཧྞ་གྲྀཧྞ་ཞེས་བརྗོད་པར་བྱའོ། །ཁྲོ་བོ་རྣམས་ཀྱི་ཁ་དོག་དང་། ཕྱག་མཚན་ལ་སོགས་པ་རྣམས་ནི་རྫོགས་པའི་རྣལ་འབྱོར་གྱི་ཕྲེང་བར་འཇམ་པའི་རྡོ་རྗེའི་དཀྱིལ་འཁོར་ཇི་ལྟ་བ་བཞིན་ནོ། །ཀྱེ་རྡོ་རྗེའི་འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།གཏོར་མའི་ཆོ་ག་རིམ་པ་གསུམ་ [92b.2]པ་འདི་ཡང་བསྐྱེད་པའི་རིམ་པ་ལའོ། །རྫོགས་པའི་རིམ་པ་ལ་ནི་ཤེས་རབ་དང་ཐབས་ལས་སེམས་མ་གཡོས་བ་བསམ་པ་ཙམ་གྱིས་སྤྱན་དྲངས་པའི་ཤེས་རབ་དང་ཐབས་ཀྱི་རང་བཞིན་རང་གི་འདོད་པའི་དཀྱིལ་འཁོར་གྱི་དབང་ཕྱུག་ལ་སོགས་པའི་ལྷ་དབང་པོ་ལ་སོགས་པ་དང་བཅས་པ་ [92b.3]རྣམས་ལ་ཡེ་ཤེས་ཀྱི་རོ་དང་ཐ་མི་དད་པའི་གཏོར་མ་དབུལ་བ་ནི་གཏོར་མའི་ཆོ་གའོ།། །།དཔལ་ཡང་དག་པར་སྦྱོར་བར་གསུངས་པའི་རྡོ་རྗེ་སེམས་དཔའ་དང་བདེ་མཆོག་དང་། ཡེ་ཤེས་ཀྱི་ཌཱ་ཀི་མ་རྣམས་ཀྱི་གཏོར་མའི་ཆོ་ག་རྒྱས་པ་དང་། ཁ་དོག་དང་། ཕྱག་རྒྱ་དང་། ཕྱག་མཚན་ལ་སོགས་ [92b.4]པ་ཤིན་ཏུ་རྒྱས་པར་མན་ངག་གི་སྙེ་མར་བརྗོད་དོ། །ཁྲོ་བོ་རྣམས་དང་དབང་པོ་ལ་སོགས་པ་རྣམས་ཀྱི་ཡང་ངོ་། །འདིར་གལ་ཏེ་རྡུལ་ཚོན་གྱི་དཀྱིལ་འཁོར་བྲི་བ་ལ་སོགས་པ་ནས་འོག་ནས་ཆུ་རྡོལ་བ་དང་མེ་དང་། རླུང་དང་། སྤྲིན་དང་ཐོག་དང་། མི་དང་ལྷ་དང་ལྷ་མ་ཡིན་གྱི་སྡེ་དང་ [92b.5]གླང་པོ་ལ་སོགས་པ་བགེགས་ཀྱི་རྣམ་པར་འཚེ་བ་ལྷས་བྱས་པའམ་མི་ལ་སོགས་པ་གཞན་གྱིས་བྱས་པ་འབྱུང་བ་སྲིད་དེ། དེའི་ཚེ་ཆོ་ག་བཞིན་དུ་རྡོ་རྗེའི་རང་བཞིན་གྱིས་གཞི་དང་། ར་བ་དང་དྲ་བ་དང་མདའི་ར་བ་དང་བླ་རེའི་ནང་གི་ནམ་མཁའ་ལ་གནས་པའི་རྩིབས་ཀྱི་རྩེ་མོ་ལ་བརྟན་པར་གནས་པའི་ཁྲོ་བ་ [92b.6]བཅུ་ཤིན་ཏུ་འཇིགས་པར་བྱིན་གྱིས་བརླབས་པའི་རྩིབས་བཅུ་པའི་འཁོར་ལོ་སེར་པོ་གཡས་སྐོར་དུ་འཁོར་བའི་ལྟེ་བའི་དབུས་སུ་གནས་པའི་གཞལ་ཡས་ཁང་གི་རྣམ་པར་དཀྱིལ་འཁོར་གྱི་ཁང་པ་སྐད་ཅིག་གིས་སོ་སོར་ཤིན་ཏུ་བརྟན་པར་མོས་པར་བྱའོ། །རྡོ་རྗེའི་རང་བཞིན་གྱི་ས་གཞིལ་སོགས་པས་ [92b.7]བགེགས་ཐམས་ཅད་བཟློག་པར་བསྒོམ་མོ། །ཡང་ན་ཉེ་བར་འཚེ་བ་སོ་སོ་ལ་རྟ་མཆོག་ལ་སོགས་པའི་སྦྱོར་བ་རྣམས་བྱ་སྟེ། དེ་རྣམས་ཀྱང་མན་ངག་གི་སྙེ་མར་གསལ་བར་བསྟན་པས་གཞུང་མངས་ཀྱིས་དོགས་པས་འདིར་མ་བརྗོད་དོ། །གང་ཞིག་རྒྱུན་མི་འཆད་པར་སྙིང་རྗེ་ཆེན་པོ་དང་རོ་གཅིག་ [93a] [93a.1]པའི་སྟོང་པ་ཉིད་ཀྱི་ཏིང་ངེ་འཛིན་གོམས་པར་བྱེད་པ་དེ་ལ་ནི་བགེགས་དཔག་ཏུ་མེད་པ་རྣམས་ཀྱང་ཞི་བར་འགྱུར་ཏེ། དེའི་ཆེད་དུ་རིམ་པ་འདི་དག་མ་ཡིན་ནོ། །གང་ཡང་དཀྱིལ་འཁོར་གྱི་འཁོར་ལོ་སྟོང་པ་ཉིད་དང་རོ་གཅིག་པར་ཤིན་ཏུ་བརྟན་པར་སྒོམ་པར་བྱེད་པ་དེ་ལ་ནི་བགེགས་ [93a.2]ཐམས་ཅད་དང་། ཉེས་པ་གཞན་རྣམས་ཀྱང་འབད་པ་མེད་པར་འགྱུར་ཏེ། རྨི་ལམ་དུ་ཡང་མི་སྣང་ངོ་། །དེའི་དོན་དུ་ཡང་རིམ་པ་འདི་མ་ཡིན་ནོ། །བགེགས་བཟློག་པའི་ཆོ་གའོ།། །།འདི་གཏོར་མ་དང་དཀྱིལ་འཁོར་དང་ས་སྦྱང་བ་ལ་སོགས་པའི་བྱ་བ་ཀུན་ལ་རྡོ་རྗེ་ལ་སོགས་པ་བཟུང་བ་སྔོན་དུ་ [93a.3]འགྲོ་བས་དེ་དག་གི་མཚན་ཉིད་བརྗོད་པར་བྱའོ། །དེ་ལ་རྡོ་རྗེ་རྩེ་ལྔ་པ་ཆ་གསུམ་དུ་མཉམ་པའི་དབུས་ཀྱི་སུམ་ཆའི་ཚད་དུ་ལྟེ་བ་སྟེ་ཟུར་བརྒྱད་པའོ། །ར་རྣམས་ནི་བཞི་པ་རྩེ་མོ་གུག་པའོ། །རའི་དབུས་ཀྱི་འོག་ནི་ཟླུམ་པོའོ། །ར་དབུས་མ་ནི་དྲང་ཞིང་ཟུར་བཞི་པ་རྣོ་བ་རྐེད་དཀྲིས་གསུམ་དང་ལྡན་ [93a.4]པ་ནས་ཀྱི་དབྱིབས་སོ། །འདིའི་རྩེ་མོ་དང་ཕྱོགས་ཀྱི་རའི་རྩེ་མོ་རྣམས་ཀྱི་བར་ནི་ནས་ཙམ་སྟེ་ར་ཐམས་ཅད་ཕན་ཚུན་མཉམ་པའོ། །དབུས་མ་ནི་ཅུང་ཟད་ལྷག་པའོ། །ར་རྣམས་ཀྱི་འོག་ཆུང་ཟད་ཕྲ་བའོ། །དབུས་དེ་ལས་སྦོམ་པའོ། །སྟེང་གི་ར་འོག་གི་ཆ་བས་ཕྲ་བའོ། །དབུས་ཀྱི་ཆ་ཡང་ [93a.5]དབུས་སྦོམ་ཞིང་མཐའ་གཉིས་དེ་བས་ཕྲ་བའོ། །ཟླ་བ་ལ་གནས་པའི་རི་མོ་གསུམ་གྱིས་བསྐོར་བའི་རྩ་བ་ཅན་ར་དབུས་མ་མ་གཏོགས་པའི་ཤར་ལ་སོགས་པའི་རྭ་རྣམས་ནི་ཆུ་སྲིན་གྱི་སོའི་བར་རྣམས་སུ་གནས་པའོ། །འདིའི་སྣ་ནི་སྟེང་དུ་འབྲས་སོ་བའི་ལྐོག་ས་པའི་ཕྱེད་ཀྱི་ཚད་དོ། ། [93a.6]ཆུ་སྲིན་གྱི་གདོང་ནི་རྭའི་བཞི་ཆའོ། །ཆུ་སྲིན་གྱི་གདོང་ནི་ཕྱེད་དུ་འོད་ཟེར་དང་བཅས་པའི་ཟླ་བའི་སྟེང་དུ་བསྐོར་བའི་རེ་ཁཱའི་མུ་ཁྱུད་དོ། །སྐེ་རགས་དེའི་དབུས་ཀྱི་ཆ་ནི་ཅུང་ཟད་ལྷག་པར་བྱའོ། །ཆ་ལྷག་མ་དག་ནི་ཕན་ཚུན་མཉམ་ཞིང་རིམ་གྱིས་ཉིས་འགྱུར་དུ་མཐོ་བའོ། །བསྐོར་བ་ཡང་རྡོ་རྗེའི་ཕྱེད་ཀྱི་ [93a.7]ཆ་སྟེ་བསྐོར་བའི་ཚད་གཉིས་ཀྱང་རྡོ་རྗེའི་སྲིད་དུའོ། །ཟླ་བའི་འོག་ཏུ་པདྨའོ། །པདྨའི་འོག་ཏུ་རིན་པོ་ཆེའི་ཕྲེང་བ་ཕྲ་མོས་བསྐོར་བའོ། །དེའི་འོག་ཏུ་སྐ་རགས་ཀྱི་རི་མོ་དང་འོད་ཟེར་ཡང་ཇི་ལྟར་རིགས་པར་བལྟ་བར་བྱའོ། །རྣོ་བ་དང་རྟུལ་བ་དང་ཁ་གྱེས་པ་དང་། ཞི་བའི་དབྱེ་བས་རྣམ་པ་གཉིས་སོ། ། [93b] [93b.1]སོར་བཞི་ནས་བརྩམས་ཏེ་སོར་ཉི་ཤུའི་བར་དུ་རྡོ་རྗེ་རབ་ཏུ་གྲགས་སོ། །ཁ་ཅིག་ནི་ཇི་ལྟར་འདོད་པར་རོ་ཞེས་སོ། །དྲིལ་བུ་ནི་ཆ་གསུམ་མཉམ་པ་རྡོ་རྗེ་དང་རྗེས་སུ་མཐུན་པའི་ཚད་དོ། །དེའི་འོག་གི་ཆ་གསུམ་པ་ནི་ཁ་ནས་བརྩམས་ནས་ཁར་བའི་དག་པའི་རང་བཞིན་དུ་བྱའོ། །དེའི་སྟེང་གི་ཆ། ། [93b.2]གཉིས་ནི་གསེར་ལ་སོགས་པ་ལས་བྱས་པའོ། །དེའི་ཁར་བའི་དབུས་ཀྱི་ནམ་མཁའི་རྒྱ་དང་། མཆུར་མཉམ་པའོ། །མཆུ་ལས་སྟེང་དུ་སྐེ་རགས་ཀྱི་དབུས་སུ་རྡོ་རྗེ་ལ་སོགས་པའི་ཕྲེང་བའོ། །བདུད་རྩིའི་བུམ་པའི་འོག་ཏུ་གདན་གྲུ་བཞི་པའོ། །དེའི་འོག་ཏུ་ཕྲེང་བ་གསུམ་མོ། །དེའི་འོག་ཏུ་པདྨའོ། ། [93b.3]དེའི་འོག་ཏུ་སྐ་རགས་གཉིས་ཀྱི་དབུས་སུ་ཇི་ལྟར་རིགས་པར་རྡོ་རྗེ་ལ་སོགས་པའི་ཕྲེང་བའོ། །དེའི་འོག་ཏུ་རིན་པོ་ཆེ་སྣ་ཚོགས་པའི་དྲ་བ་དང་དྲ་བ་ཕྱེད་པའོ། །དྲ་བའི་ནང་བརྒྱད་ལ་མཚན་མ་བརྒྱད་དེ། ཤར་ལ་སོགས་པའི་ཕྱོགས་སུ་འཁོར་ལོ་དང་། རིན་པོ་ཆེ་དང་། པདྨ་དང་། རལ་གྲིའོ། ། [93b.4]མེ་ལ་སོགས་པའི་ཕྱོགས་མིན་དུ་སྤྱན་དང་། རྡོ་རྗེ་དང་། པདྨ་དང་། ཨུཏྤལའོ། །བར་བར་དུ་ཀུ་མུ་ཏ་དང་། ཨུཏྤལ་དང་། པདྨ་དང་། རིན་པོ་ཆེ་དང་། པ་ཏྲ་དང་། མྱུ་གུ་ལ་སོགས་པ་ཇི་ལྟར་མཛེས་པའོ། །བུམ་པའི་ཚད་དུ་ཤེས་རབ་ཀྱི་ཞལ་ལོ། །ཞལ་གྱི་སྟེང་དུ་ [93b.5]སྔར་གྱི་རྡོ་རྗེ་ཕྱེད་ལྟ་བུའི་རྡོ་རྗེ་ཕྱེད་དོ། །འདིར་དྲིལ་བུ་ཁ་ཅིག་ནི་ཁ་ཆུ་སྐྱེས་ཅུང་ཟད་ཁ་དབྱེ་བ་ཅན་ནོ། །ཁ་ཅིག་པདྨའོ། །ཁ་ཅིག་ནི་བའི་ཁ་ལྟ་བུའོ། །འདིར་རྡོ་རྗེ་དབུས་དང་ཤར་ལ་སོགས་པའི་ར་ལྟེ་བའི་མཐར་ཐུག་པ་རྣམས་ལ་མི་བསྐྱོད་པ་དང་། རྣམ་པར་ [93b.6]སྣང་མཛད་ལ་སོགས་པ་བསྒོམ་པར་བྱའོ། །ཡང་ན་དབུས་སུ་རྣམ་པར་སྣང་མཛད་དོ། །ཤར་ལ་སོགས་པའི་འདབ་མར་བྱམས་པ་དང་སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། འཇིག་རྟེན་དབང་ཕྱུག་དང་། འཇམ་པའི་དབྱངས་དང་། སྒྲིབ་པ་རྣམ་པར་སེལ་ [93b.7]བ་དང་། ཀུན་དུ་བཟང་པོ་རྣམས་ཏེ། ཆ་བརྒྱད་པ་ལ་རྡོ་རྗེ་སེམས་དཔའོ། །པདྨ་གཞན་གྱི་ཤར་ལ་སོགས་པའི་འདབ་མ་ལ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་འབེབས་མའོ། །མེ་ལ་སོགས་པར་ཙུནྡ་དང་། རིན་ཆེན་སྐར་མདའ་དང་། རྡོ་རྗེ་ལྕགས་ [94a] [94a.1]སྒྲོག་མ་དང་། གཞན་གྱིས་མི་ཐུབ་མ་རྣམས་སོ། །ཕྱོགས་གཞན་གྱི་ར་རྣམས་ལ་ནི་དབུས་སུ་ཡེ་ཤེས་མཁའ་འགྲོ་མ་དང་། ཤར་དུ་རྡོ་རྗེ་མཁའ་འགྲོ་མ་དང་། བྱང་དུ་མཁའ་འགྲོ་མ་དྲག་མོ་དང་། ནུབ་ཏུ་རྡོ་རྗེ་རོ་ལངས་མ་དང་། ལྷོར་གཏུམ་མོའོ། །དྲིལ་བུའི་སྟེང་དུ་ཁ་འོག་ཏུ་ [94a.2]ཕྱོགས་པའི་པདྨའི་འདབ་མ་རྣམས་ལ་གཡས་སྐོར་དུ་ཕྱོགས་སུ་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་དང་། མཚམས་སུ་ནོར་རྒྱུན་མ་དང་། ཙུནྡ་དང་། ཁྲོ་གཉེར་ཅན་དང་། རྡོ་རྗེ་ཕྲེང་བ་མ་རྣམས་སོ། །བུམ་པའི་ནང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་སྐུ་དང་། སྟེང་དུ་ཞལ་ལོ། །དེའི་ [94a.3]སྟེང་དུ་པདྨ་དང་རྡོ་རྗེ་ནི་སྔ་མ་བཞིན་ནོ། །མི་བསྐྱོད་པ་ལ་སོགས་པ་ལྷ་འདི་རྣམས་ཀྱི་ས་བོན་དང་མཚན་མ་དང་། ཕྱག་ལ་སོགས་པ་ནི་མན་ངག་གི་སྙེ་མར་བརྗོད་དོ། །དེ་ནས་དམ་ཚིག་སེམས་དཔའི་ལྷ་བསྐྱེད་ནས་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའི་ལྷ་རྣམས་སྤྱན་དྲངས་ནས། ཞལ་བསིལ་ལ་ [94a.4]སོགས་པ་སྔོན་དུ་འགྲོ་བས་དེ་རྣམས་ལ་བཅུག་སྟེ། ཆོ་ག་བཞིན་དུ་རབ་གནས་བྱས་ནས་མཆོད་པ་ལ་སོགས་པ་བྱས་ཏེ། ལྷ་རྣམས་ཡོངས་སུ་གྱུར་པ་ལས་རྭ་ལ་སོགས་པའི་གཟུགས་བཞུགས་ཤིང་། རྡོ་རྗེ་ཐབས་ཀྱི་རང་བཞིན་དང་། དྲིལ་བུ་ཤེས་རབ་ཀྱི་བདག་ཉིད་དང་གཉིས་ཀ་ཡང་དོན་དམ་པའི་བྱང་ཆུབ་ཀྱི་ [94a.5]སེམས་ཀྱི་རང་བཞིན་ཞེས་ཤིན་ཏུ་བརྟན་པར་མོས་པར་བྱས་ནས། ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡེ་ཏིཥྛ་ཨེ་ཥ་ཏྭཾ་དྷ་རཱ་ཡ་མི་ཧིཿཧི་ཧི་ཧི་ཧི་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བརྗོད་ཅིང་རྡོ་རྗེ་གཡས་པའི་རྒན་པོ་དང་མིང་མེད་དག་གིས་དང་། ཨོཾ་བཛྲ་གྷཎྜ་ཧཱུཾ་ཞེས་བརྗོད་ཅིང་དྲིལ་བུ་གཡོན་པ་དག་གིས་བཟུང་ནས་དེ་གཡོན་ [94a.6]པའི་དཀུར་བཞག་སྟེ། རྡོ་རྗེ་སེམས་དཔའ་ལ་སོགས་པ་རྣམས་མཉེས་པར་བྱའོ་ཞེས་ལྷག་པར་མོས་ཤིང་ཡི་གེ་ཧཱུཾ་བརྗོད་པ་སྔོན་དུ་འགྲོ་བས། སོ་ཧི་ཨ་བཛྫ་མུལླ་ལུ་ཏཱ་ར་ཨ་སཏྭ་བི་མོཀྵ། དྷརྨ་བི་མོཀྵཾ་ཀཛྫ་ཧཱུཾ་བཛྫ་ཧུཙྪ་ཨ་དྷ་རནྟུ་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཞེས་བརྗོད་ཅིང་རྡོ་རྗེ་གསོར་བར་བྱའོ། །དེ་ནས་རྡོ་རྗེ་གཡས་ [94a.7]པའི་དཀུར་བཟུང་བའམ་གསོར་ཞིང་། ཨོཾ་བཛྲ་དྷརྨཱ་ར་ཎི་ཏ་པྲ་ར་ཎི་ཏ་སཾ་པྲ་ར་ནི་ཏ་སརྦ་བུདྡྷ་ཀྵེ་ཏྲ་པྲ་ཙཱ་ལི་ནི་པྲ་ཛྙཱ་པ་ར་མི་ཏཱ་ནཱ་ད་སཾ་བྷ་བེ་བཛྲ་སཏྭ་ཧྲྀ་ད་ཡཾ་སནྟོ་ཥ་ནི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་སྭཱ་ཧཱ། ཞེས་བརྗོད་ཅིང་དྲིལ་བུ་དབུས་ཀྱི་ཕྱོགས་བརྒྱད་རྣམས་སུ་ལྕེ་བསྐྱོད་པས་དཀྲོལ་བར་བྱའོ། །དྲིལ་བུ་དང་རྡོ་རྗེའི་དབྱེ་བ་ [94b] [94b.1]རྣམས་ཀྱི་མཚན་ཉིད་ལ་སོགས་པ་རྒྱས་པར་ནི་མན་ངག་གི་སྙེ་མར་བརྗོད་དོ་ཞེས་པ། རྡོ་རྗེ་དང་དྲིལ་བུའི་མཚན་ཉིད་ལ་སོགས་པའི་ཆོ་གའོ། །དེ་ལྟར་ཐུབ་པ་མཆོག་རྣམས་ཀྱི་ནི་གསུང་གི་རྒྱ་མཚོ་ཟབ་མོ་རུ། །ཁ་ཅིག་ཐོས་པ་ཙམ་ཡང་མི་འཇུག་འགའ་ཞིག་གིས་ཀྱང་གཏིང་མ་རྙེད། །སྙིང་རྗེ་དང་བཅས་བློ་ [94b.2]གྲོས་རྒྱ་ཆེན་མཐུ་ཡིས་ཁོ་བོས་ནང་ཞུགས་ནས། །དགའ་བར་བྱ་ཕྱིར་བདུད་རྩི་འདི་ནི་ཉེར་བླངས་བསྟེན་པར་གྱིས། །འདིར་ནི་བསོད་ནམས་གང་ཞིག་ཤར་དང་འོད་ཆེན་གང་ཞིག་ནང་དུ་འབར། །གཉིས་པོ་དེ་ཡིས་མྱུར་དུ་ཕུན་སུམ་ཚོགས་པ་རྣམས་ཀྱི་འབྱུང་གནས་ནི། །འགྲོ་བ་གསུམ་པ་མི་ [94b.3]འཇིགས་མངའ་བདག་སྣ་ཚོགས་ལུས་ཅན་ཁྲོ་བོ་ནི། །དཀྱིལ་འཁོར་རྡོ་རྗེ་ལྷ་མོ་བདེ་བའི་གཞི་ལ་འདུ་ཞིང་རོལ་བར་ཤོག །དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བ་ཞེས་བྱ་བ་པཎྜི་ཏ་ཆེན་པོ་གནས་བརྟན་ཨ་བྷ་ཡཱ་ཀ་ར་གུཔྟས་མཛད་པ་རྫོགས་སོ།། །།པཎྜི་ཏ་དེ་ཉིད་དང་ལོ་ཙཱ་བ་ཁེར་གད་བནྡེ་འཁོར་ [94b.4]ལོ་གྲགས་ཀྱིས་འགྱུར་ལ། དུས་ཕྱིས་ལོ་ཙཱ་བ་ཤེས་རབ་དཔལ་གྱིས་བཅོས་ཤིང་སླད་ནས་པཎྜི་ཏ་རཏྣ་རཀྵི་ཏ་དང་། རཱ་ཧུ་ལ་ཤྲི་བྷ་དྲ་དང་། མ་ཎི་ཀ་ཤྲཱི་ཛྙཱ་ན་དང་། ཆག་ཆོས་རྗེ་དཔལ་གྱིས་བཅོས་པ་ལ་སླད་ནས་དཔང་ལོ་ཙཱ་བ་བློ་བརྟན་གྱིས་མི་བཅོས་སུ་མི་རུང་བ་རྣམས་བཅོས་ནས་དག་པར་བྱས་པའོ།། །། [94b.5]{T3141}༄༅༅། །རྒྱ་གར་སྐད་དུ། ནིཥྤནྣ་ཡོ་ག་ཨ་བཱ་ལི་ནཱ་མ། བོད་སྐད་དུ། རྫོགས་པའི་རྣལ་འབྱོར་གྱི་ཕྲེང་བ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྡོ་རྗེ་ཅན་གང་འདི་ཡི་འོད་ཀྱིས་འགྲོ་བ་ལོང་བྱེད་མུན་རྣམས་ལས་རྒྱལ་བྱེད། །གང་ཞིག་གནས་ [94b.6]སྐབས་མཐར་ཐུག་དབྱེར་མེད་དཔལ་ལྡན་ཡོན་ཏན་ཚོགས་ཀྱིས་མཛེས་པ་དང་། གང་གི་སྙིང་རྗེའི་ཚོགས་ཀྱི་བདུད་རྩིས་རབ་ཏུ་བརླན་པའི་ཐུགས་ཀྱིས་ཤིན་ཏུ་སྤྲོས་པ་སྟེ། །དེ་དག་རྣམས་ཀྱིས་སྤྱོད་པ་རྨད་བྱུང་འདི་བསྟེན་ཤེས་རབ་རང་བཞིན་ཁྱེད་ལས་མྱུར་གྱུར་ཅིག །རྡོ་རྗེའི་ཕྲེང་བས་བརྒྱན་པའི་ [94b.7]དཀྱིལ་འཁོར་འདིར། །རྡོ་རྗེ་འཆང་སྤྱོད་ཤིན་ཏུ་མཛེས་པ་ཡིས། །སྣ་ཚོགས་སྐྱེས་པ་སྤྲུལ་པའི་ཚོགས་རྣམས་ཀྱིས། །མྱུར་དུ་དོན་ཡོད་ཕུན་སུམ་ཚོགས་པར་ཤོག །འདིར་ནི་ཆུང་ངུ་དང་འབྲིང་པོ་དག་གི་རིམ་པས་ཏིང་ངེ་འཛིན་ལེགས་པར་བསྒོམས་པ་ལས་ཤེས་རབ་མཆོག་དང་ལྡན་པ་ལ། [95a] [95a.1]བཅོམ་ལྡན་འདས་ཀྱིས་སྤྲོ་བ་དང་བསྡུ་བའི་བྱེད་པ་པོ། །རྣམ་པ་ཀུན་གྱི་མཆོག་ལྡན་པ། །ཡེ་ཤེས་སྐད་ཅིག་གིས་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །ཞེས་གསུངས་སོ། །དེ་ཡང་བདག་དང་སེམས་ཅན་ཐམས་ཅད་རྡོ་རྗེ་འཛིན་པ་ཉིད་ཐོབ་པར་འདོད་ [95a.2]པའི་སྤྲོ་བ་དང་ལྡན་པས། ཕུང་པོ་དང་ཁམས་དང་སྐྱེ་མཆེད་ལ་སོགས་པ་གཟུགས་བརྙན་ལྟ་བུར་སྟོང་པ་ཉིད་དང་རོ་གཅིག་པར་ངེས་པར་བྱས་ནས། འོད་རབ་ཏུ་གསལ་བ་ལ་རབ་ཏུ་ཞུགས་ཏེ། སྐད་ཅིག་གི་ཡན་ལག་དང་བཅས་པའི་གཞལ་ཡས་ཁང་གི་དབུས་སུ་དཀྱིལ་འཁོར་དང་དཀྱིལ་འཁོར་པས་ཡོངས་ [95a.3]སུ་བསྐོར་བའི་དཔལ་རྡོ་རྗེ་སེམས་དཔའ་དང་འཇམ་པའི་རྡོ་རྗེ་ལ་སོགས་པའི་སྐུ་སྟོང་པ་ཉིད་དང་། སྙིང་རྗེ་རོ་གཅིག་པའི་བདེ་བ་ཆེན་པོའི་རང་བཞིན་རིགས་ཀྱི་བདག་པོས་དབུ་བརྒྱན་ཅིང་ཐུགས་ཀའི་ས་བོན་དང་ལྡན་པ་ལ་དེ་བཞིན་གཤེགས་པ་དང་། ལྷ་མོ་དང་། བྱང་ཆུབ་སེམས་དཔའ་དང་། ཁྲོ་བོ་ལ་ [95a.4]སོགས་པ་དཔག་ཏུ་མེད་པ་སྤྲོས་ཏེ། ཇི་ལྟར་གཞན་ལ་ཕན་པར་ནུས་པའི་ཆོས་སྟོན་པ་ལ་སོགས་པས་གཞན་བསོད་ནམས་ཀྱི་ཚོགས་མཐར་ཕྱིན་པ་ལ་གཞག་ཅིང་། བསྡུ་བ་བྱས་པས་བསམ་གྱིས་མི་ཁྱབ་པའི་སྐུར་བསྐྱེད་པར་བྱའོ། །དེ་ལ་འདིའི་ཡན་ལག་ལ་སོགས་པ་ནི་ས་འོག་གི་མཐར་ཐུག་པར་ [95a.5]ཇི་ལྟར་མངོན་པར་འདོད་པའི་རྒྱར། གཅིག་ཏུ་སྲ་ཞིང་མཁྲེགས་ལ་འབར་བའི་རྡོ་རྗེའི་རང་བཞིན་གྱིས་ས་གཞི་དང་བསྐལ་པའི་མཐའི་མེ་འབར་བའི་འོད་ཟེར་གྱི་ཕྲེང་བ་དང་ལྡན་པས་མཚམས་བཅིང་བ་དང་། ས་འོག་ནས་སྟེང་གི་བར་དུ་ཤིན་ཏུ་མཐོ་ཞིང་མཁྲེགས་ལ་སྲ་ཞིང་འབར་བའི་རྡོ་རྗེ་ར་བ་དང་། རྡོ་རྗེའི་ར་ [95a.6]བའི་སྟེང་དུ་བར་མཚམས་མེད་པར་དུམ་བུ་གཅིག་ཏུ་གྱུར་ཅིང་སྟེང་དུ་རྡོ་རྗེའི་མདའི་དྲ་བ་དང་། འོག་ཏུ་རྡོ་རྗེའི་བླ་རེས་བརྒྱན་པའི་རྡོ་རྗེའི་གུར་འབར་བའོ། །དེའི་ནང་དུ་གནས་པའི་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་འཁོར་ལོ་རྩིབས་བཅུ་པ་སེར་པོ་གཡས་སྐོར་དུ་འཁོར་བའོ། །དེའི་ཤར་གྱི་རྩིབས་ [95a.7]ལ་གཤིན་རྗེ་མཐར་བྱེད་ནག་པོ། ཞལ་དཀར་པོ་དང་དམར་པོ་རྡོ་རྗེའི་ཐོ་བ་ནག་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །ལྷོའི་རྩིབས་ལ་ཤེས་རབ་མཐར་བྱེད་དཀར་པོ་ཞལ་ནག་པོ་དང་དམར་པོ། རྡོ་རྗེས་མཚན་པའི་དབྱུག་པ་དཀར་པོ་དང་། རལ་གྲི་དང་། ནོར་བུ་དང་པདྨ་འཛིན་པའོ། །ནུབ་ [95b] [95b.1]ཀྱི་རྩིབས་ལ་པདྨ་མཐར་བྱེད་དམར་པོ་ཞལ་སྔོན་པོ་དང་དཀར་པོ། པདྨ་དམར་པོ་དང་རལ་གྲི་དང་ནོར་བུ་དང་འཁོར་ལོ་འཛིན་པའོ། །བྱང་གི་རྩིབས་ལ་བགེགས་མཐར་བྱེད་ནག་པོ་ཞལ་དཀར་པོ་དང་དམར་པོ་ཁྲོ་བོའི་རྡོ་རྗེ་དང་རལ་གྲི་དང་ནོར་བུ་དང་པདྨ་འཛིན་པའོ། །མེར་འདོད་པའི་རྒྱལ་པོ་སྔོན་པོ་ཞལ་ [95b.2]དཀར་པོ་དང་དམར་པོ། ལྕགས་ཀྱུ་དང་རལ་གྲི་དང་ནོར་བུ་དང་མཚོ་སྐྱེས་འཛིན་པའོ། །བདེན་བྲལ་དུ་དབྱུག་པ་སྔོན་པོ་ནག་པོ་ཞལ་དཀར་པོ་དང་དམར་པོ་དབྱུག་པ་སྔོན་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །རླུང་དུ་སྟོབས་པོ་ཆེ་ནག་པོ་ཞལ་དཀར་པོ་དང་དམར་པོ། རྩེ་གསུམ་པ་དང་རལ་ [95b.3]གྲི་དང་ནོར་བུ་དང་པདྨ་བསྣམས་པའོ། །དབང་ལྡན་དུ་མི་གཡོ་བ་སྔོན་པོ་ཞལ་དཀར་པོ་དང་དམར་པོ་རལ་གྲི་དང་ནོར་བུ་དང་པདྨ་འཛིན་པའོ། །སྟེང་དུ་གཙུག་ཏོར་འཁོར་ལོས་སྒྱུར་བ་སེར་པོ་ཞལ་སྔོན་པོ་དང་དམར་པོ། འཁོར་ལོ་སེར་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །འོག་ཏུ་གནོད་ [95b.4]མཛེས་རྒྱལ་པོ་སྔོན་པོ་ཞལ་དཀར་པོ་དང་དམར་པོ་རྡོ་རྗེ་དང་རལ་གྲི་དང་ནོར་བུ་དང་པདྨ་བསྣམས་པའོ། །དེ་ལ་གཙུག་ཏོར་དང་འདོད་པའི་རྒྱལ་པོ་དང་མི་གཡོ་བ་དང་གནོད་མཛེས་རྣམས་ནི་རིན་པོ་ཆེའི་ཅོད་པན་ཅན། རིན་པོ་ཆེ་སྣ་ཚོགས་ཀྱིས་བརྒྱན་པར་གྱུར་པ། མཆེ་བ་ཅུང་ཟད་གཙིགས་པ་སྟོན་ [95b.5]པ། སྨ་ར་དང་བྲལ་བའོ། །དེ་ལས་གཞན་པ་རྣམས་ནི་མི་སྡུག་པའི་གཟུགས་ཅན་སྨིན་མ་འཁྱོག་པ་དང་བཅས་པས་དབུ་སྐྲ་དམར་སེར་གྱེན་དུ་བརྫེས་པ། སྨིན་མ་དང་སྨ་ར་དམར་སེར་དང་བཅས་པ། ཞལ་གདངས་པ། མཆེ་བ་གཙིགས་པ། ལྗགས་འགྱུར་བ། གད་རྒྱངས་དང་ [95b.6]ལྡན་པ། དྲག་པོའི་ཀླུ་བརྒྱད་ཀྱིས་བརྒྱན་པ་སྐུ་བོང་ཐུང་ཞིང་རགས་པ་ལྟོ་བ་འཕྱང་བའོ། །བཅུ་པོ་འདི་དག་ནི་གཡོན་བརྐྱང་བ་གཡས་བསྐུམ་པས་རྩིབས་ཀྱི་རྩེ་མོ་ལ་ཅུང་ཟད་མ་རེག་པའི་སྣ་ཚོགས་པདྨ་དང་། ཉི་མའི་གདན་དང་བཅས་པ་བརྟན་པར་གནས་པ། ཉི་མའི་འོད་ཅན་ཤིན་ཏུ་ [95b.7]ཁྲོས་པ་དང་འབར་བས་ཤིན་ཏུ་འཇིགས་པ་བསྐལ་པ་འཇིག་པའི་དུས་ཀྱི་མེ་ལྟ་བུའི་འོད་དང་ལྡན་པའི་རང་གི་སྐུའི་སྤྲུལ་པ་དཔག་ཏུ་མེད་པའི་ཚོགས་ཀྱིས་ཀྱང་ཁམས་གསུམ་མཐའ་ཡས་པ་ན་གནས་པའི་བགེགས་ཀྱི་ཚོགས་མ་ལུས་པ་ཡང་དང་ཡང་དུ་བརླག་པར་བྱེད་པ་ཕྱག་དྲུག་པ་རྩ་བའི་ [96a] [96a.1]ཕྱག་དག་གིས་རང་དང་འདྲ་བའི་ཤེས་རབ་མ་ལ་འཁྱུད་པ། ཞལ་གསུམ་པ་ཁྱད་པར་དུ་རྩ་བའི་ཞལ་གྱི་མདོག་ནི་སྐུ་མདོག་ལྟ་བུ་སྟེ། གཡས་པ་དང་གཡོན་པ་ཡི་ནི་གོང་དུ་བརྗོད་དོ། །ཞལ་རེ་རེ་ལའང་དམར་ལ་ཟླུམ་པའི་སྤྱན་གསུམ་མོ། །འཁོར་ལོ་ཡང་རྒྱུན་མི་འཆད་པར་ [96a.2]དྲག་ཏུ་འཁོར་བས་བརྟན་པར་གནས་པ་ལྟ་བུར་འབར་བའི་ཚོགས་དཔག་ཏུ་མེད་པ་འཕྲོ་བའོ། །དེའི་ལྟེ་བའི་ནང་དུ་འོག་གི་རྩིབས་ཀྱི་སྟེང་དུ་ཆོས་འབྱུང་གྲུ་གསུམ་དཀར་པོ་ཤིན་ཏུ་ཡངས་པའི་ནང་དུ་འོག་གི་ཟུར་ལ་གནས་པའི་སྣ་ཚོགས་པདྨའི་སྟེང་དུ་སྣ་ཚོགས་རྡོ་རྗེ་དང་བཅས་པའོ། །རྡོ་རྗེ་དེའི་ཕྱོགས་ [96a.3]ཀྱི་ར་རྣམས་དང་ལྟེ་བ་ནི་ཇི་ལྟར་རིགས་པར་རྣམ་པར་སྣང་མཛད་ལ་སོགས་པའི་མདོག་དང་འདྲ་བའོ། །དེར་རིན་པོ་ཆེ་ཁ་དོག་ལྔ་ལས་ཡོངས་སུ་རྫོགས་པ་ཐུབ་པའི་དབང་པོའི་དཀྱིལ་འཁོར་འོད་གསལ་བ་ཕྱོགས་ཀྱི་འཁོར་ལོ་ཐམས་ཅད་སྣ་ཚོགས་པའི་འོད་ཟེར་གྱིས་ཁྱབ་པའི་གཞལ་ཡས་ཁང་ངོ་། །དེའི་ [96a.4]དབུས་སུ་བཅོམ་ལྡན་འདས་དཔལ་རྡོ་རྗེ་སེམས་དཔའ་འཇམ་པའི་རྡོ་རྗེའི་སྐུ་གུར་གུམ་གྱི་མདོག་ལྟ་བུ་གཡས་དང་གཡོན་གྱི་ཞལ་ནག་པོ་དང་དཀར་པོ། རྩ་བའི་ཕྱག་དག་གིས་རང་དང་འདྲ་བའི་ཤེས་རབ་མ་ལ་འཁྱུད་པ། རལ་གྲི་དང་མདའ་དང་ཨུཏྤལ་དང་གཞུ་འཛིན་པ་རིན་པོ་ཆེའི་ཅོད་པན་ཅན་ནོ། །རིན་པོ་ [96a.5]ཆེ་སྣ་ཚོགས་པས་བརྒྱན་པ། འོད་ཟེར་མཐའ་ཡས་པའོ། །དེའི་ཤར་གྱི་ཕྱོགས་སུ་རྣམ་པར་སྣང་མཛད་དཀར་པོ་གཡས་བ་དང་ཅིག་ཤོས་ཀྱི་ཞལ་ནག་པོ་དང་དམར་པོ་ཕྱག་རྣམས་ན་འཁོར་ལོ་རྩིབས་བརྒྱད་པ་དཀར་པོ་དང་། རལ་གྲི་དང་ནོར་བུ་དང་པདྨའོ། །ལྷོར་རིན་ཆེན་འབྱུང་ལྡན་སེར་པོ་རིན་པོ་ཆེ་ [96a.6]མརྒཏ་ཟུར་དགུ་པ་དང་། རལ་གྲི་དང་འཁོར་ལོ་དང་པདྨ་འཛིན་པའོ། །ནུབ་ཏུ་སྣང་བ་མཐའ་ཡས་དམར་པོ་པདྨ་དམར་པོ་དང་རལ་གྲི་དང་ནོར་བུ་དང་། འཁོར་ལོ་འཛིན་པའོ། །བྱང་དུ་དོན་ཡོད་གྲུབ་པ་ལྗང་གུ་རལ་གྲི་དང་འཁོར་ལོ་དང་ནོར་བུ་དང་པདྨ་འཛིན་པའོ། །འདི་གསུམ་གྱི་གཡས་པ་དང་ [96a.7]ཅིག་ཤོས་ཀྱི་ཞལ་ནི་ནག་པོ་དང་དཀར་པོའོ། །དེ་བཞིན་གཤེགས་པ་འདི་དག་ཐམས་ཅད་རིན་པོ་ཆེའི་ཅོད་པན་དང་ལྡན་པ་རིན་པོ་ཆེ་སྣ་ཚོགས་ཀྱིས་བརྒྱན་པའོ། །མེར་སྤྱན་མ་རྣམ་སྣང་དང་མཚུངས་པའོ། །བདེན་བྲལ་དུ་མཱ་མ་ཀཱི་མི་བསྐྱོད་པ་ལྟ་བུ་ཨུཏྤལ་དམར་པོ་དང་། རལ་གྲི་དང་ནོར་བུ་དང་པདྨ་ [96b] [96b.1]འཛིན་པ་སྟེ། སྒྲུབ་ཐབས་ཐམས་ཅད་ལས་དེ་ལྟར་བཤད་པའི་ཕྱིར་རོ། །རླུང་དུ་གོས་དཀར་མོ་སྣང་བ་མཐའ་ཡས་དང་མཚུངས་པའོ། །དབང་ལྡན་དུ་སྒྲོལ་མ་རིན་ཆེན་འབྱུང་ལྡན་ལྟ་བུ་ཨུཏྤལ་སེར་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །དབུས་ཀྱི་རིམ་པ་ལས་ཕྱི་རོལ་དུ་མེའི་མཚམས་ [96b.2]སུ་གཟུགས་རྡོ་རྗེ་མ་རྣམ་པར་སྣང་མཛད་ལྟ་བུ་རིན་པོ་ཆེའི་མེ་ལོང་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །སྲིན་པོར་སྒྲ་རྡོ་རྗེ་མ་མི་བསྐྱོད་པ་ལྟ་བུ་པི་ཝང་སྔོན་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །རླུང་དུ་དྲི་རྡོ་རྗེ་མ་རིན་ཆེན་འབྱུང་ལྡན་ལྟ་བུ་དྲི་ཆབ་ཀྱི་དུང་སེར་པོ་དང་རལ་གྲི་དང་འཁོར་ལོ་དང་ [96b.3]ཆུ་སྐྱེས་འཛིན་པའོ། །དབང་ལྡན་དུ་རོ་རྡོ་རྗེ་མ་སྣང་བ་མཐའ་ཡས་དང་མཚུངས་པ་རོའི་སྣོད་དམར་པོ་དང་རལ་གྲི་དང་ནོར་བུ་དང་འཁོར་ལོ་འཛིན་པའོ། །ཤར་སྒོའི་གཡོན་ལོགས་སུ་རེག་བྱ་རྡོ་རྗེ་མ་དོན་ཡོད་གྲུབ་པ་དང་མཚུངས་པ་གོས་སྣ་ཚོགས་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། ། [96b.4]ཤར་སྒོའི་གཡས་ལོགས་སུ་ཆོས་ཀྱི་དབྱིངས་ཀྱི་རྡོ་རྗེ་མ་རྡོ་རྗེ་སེམས་དཔའ་དང་མཚུངས་པ་ཆོས་འབྱུང་དཀར་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །འཇམ་པའི་རྡོ་རྗེ་ལ་སོགས་པའི་ལྷ་འདི་རྣམས་ནི་ཞལ་གསུམ་པ་ཕྱག་དྲུག་པ་ཕྱག་མཚན་དང་པོ་གཉིས་ནི་གཡས་པ་དག་གིས་སོ། ། [96b.5]གཞན་གཉིས་ནི་གཡོན་པ་དག་གིས་འཛིན་པའོ། །ཐམས་ཅད་ཀྱི་རྩ་བའི་ཞལ་ནི་སྐུ་མདོག་བཞིན་ནོ། །ཤར་ལ་སོགས་པའི་སྒོ་རུ་གཤིན་རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་རྣམས་སོ། །འཇམ་པའི་རྡོ་རྗེ་དང་རྣམ་པར་སྣང་མཛད་དང་ལྷ་མོ་བཅུ་པོ་ [96b.6]རྣམས་ནི་ཟླ་བའི་དཀྱིལ་འཁོར་ལ་རྡོ་རྗེ་སྐྱིལ་ཀྲུང་གིས་བཞུགས་པའོ། །གཞན་ནི་ཉི་མ་ལའོ། །ཟླ་བ་དང་ཉི་མའི་འོག་ཏུ་སྣ་ཚོགས་པདྨའོ། །དེ་བཞིན་གཤེགས་པ་རྣམས་ཀྱི་གཙོ་བོའི་ཕྱག་དག་གིས་རང་འོད་ཀྱི་ཤེས་རབ་དག་ལ་འཁྱུད་པ་སྟེ་དེ་བཞིན་དུ་ཤེས་རབ་རྣམས་འོད་ཀྱི་ཐབས་ལའོ། །དབུ་ [96b.7]ལ་རིགས་ཀྱི་བདག་པོ་སྟེ་འཇམ་པའི་རྡོ་རྗེ་ལ་སོགས་པའི་དེ་བཞིན་གཤེགས་པ་རྣམས་དང་། མཱ་མ་ཀཱི་དང་སྒྲ་རྡོ་རྗེ་མ་དང་། སྲུང་བའི་འཁོར་ལོའི་ཁྲོ་བོ་བརྒྱད་ལ་ནི་མི་བསྐྱོད་པའོ། །སྤྱན་མ་དང་གཟུགས་རྡོ་རྗེ་མ་དང་གཤིན་རྗེ་གཤེད་རྣམས་ལ་ནི་རྣམ་པར་སྣང་མཛད་དོ། །དྲི་རྡོ་རྗེ་མ་ལ་ནི་རིན་ [97a] [97a.1]ཆེན་འབྱུང་ལྡན་ནོ། །གོས་དཀར་མོ་དང་རོ་རྡོ་རྗེ་མ་དང་པདྨ་མཐར་བྱེད་རྣམས་ལ་འོད་དཔག་མེད་དོ། །སྒྲོལ་མ་དང་རེག་བྱ་རྡོ་རྗེ་མ་ལ་ནི་དོན་ཡོད་གྲུབ་པའོ། །ཆོས་ཀྱི་དབྱིངས་ཀྱི་རྡོ་རྗེ་མ་ལ་ནི་རྡོ་རྗེ་འཛིན་པའོ། །གཞན་ནི་མི་བསྐྱོད་པའོ། །འདིར་རྡོ་རྗེ་སེམས་དཔའ་ནི་སྐུ་མདོག་དཀར་ [97a.2]པོ་ལ་ཅུང་ཟད་དམར་པོའི་མདངས་དང་ལྡན་པ་གཡས་པ་དང་ཅིག་ཤོས་ཀྱི་ཞལ་ནི་སྔོན་པོ་དང་དམར་པོ་གཙོ་བོའི་ཕྱག་དག་གིས་རང་འོད་ཀྱི་ཤེས་རབ་ལ་འཁྱུད་པ་རྡོ་རྗེ་སྔོན་པོ་དང་རལ་གྲི་དང་ནོར་བུ་དང་པདྨ་འཛིན་པ། སྣ་ཚོགས་པདྨ་དང་། ཟླ་བའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ་ཟླ་བའི་མདོག་ཅན་རིན་ [97a.3]པོ་ཆེའི་ཅོད་པན་དང་། རིན་པོ་ཆེའི་རྒྱན་དང་ལྡན་པ་དབུལ་མི་བསྐྱོད་པས་རྒྱས་བཏབ་པའོ། །འདིར་འཇམ་པའི་རྡོ་རྗེའི་ཐུགས་ཀར་དམ་ཚིག་སེམས་དཔའ་ལྟ་བུའི་ཡེ་ཤེས་སེམས་དཔའ་དེའི་ཐུགས་ཀར་ཟླ་བར་རལ་གྲིའི་ཡུ་བ་ལ་གནས་པའི་ས་བོན་མཾ་ངོ་། །རྟག་པ་དང་རིན་འབྱུང་དང་། འོད་དཔག་ [97a.4]མེད་དང་དོན་ཡོད་གྲུབ་པ་དང་མི་བསྐྱོད་པ་རྣམས་ཀྱི་ཐུགས་ཀར་ཕྱག་མཚན་ལ་ཇི་ལྟར་རིགས་པར་ཟླ་བའམ། ཉི་མ་ལ། བྷྲཱུཾ། ཨཱཾ། ཛྲཱཾ། ཁཾ། ཧཱུཾ་ངོ་། སྤྱན་ལ་སོགས་པའི་ལྷ་མོ་རྣམས་ལ་ལཱཾ་མཱཾ་པཱཾ་ཏཱཾ། ཛཿཧཱུཾ་བཾ་ཧོཿཁཾ་རཾ་མཾ། ཁྲོ་བོ་རྣམས་ལ་ཧཱུཾ་ངོ་། །ལྷ་ཐམས་ཅད་ཀྱི་སྙིང་པོའི་སྔགས་ནི་རྡོ་རྗེའི་ཕྲེང་བར་བཤད་ [97a.5]དོ། །འདིར་རྫོགས་པའི་རྣལ་འབྱོར་དུ་མིག་ལ་སོགས་པ་བྱིན་གྱིས་བརླབ་པ་དང་ཡེ་ཤེས་སེམས་དཔའ་དགུག་གཞུག་ལ་སོགས་པ་ནི་མ་བཤད་དོ། །དེ་མེད་ཀྱང་མིག་གི་མངོན་པར་ཤེས་པ་ལ་སོགས་པའི་ཡོན་ཏན་གྱི་ཚོགས་དཔག་ཏུ་མེད་ཅིང་བསམ་གྱིས་མི་ཁྱབ་པས་མཛེས་པར་བྱས་པའི་ཡི་དམ་གྱི་ལྷའི་ [97a.6]སྐུ་ཅིག་ཅར་ཁོ་ན་ལ་ལེགས་པར་ཡོངས་སུ་དག་ཅིང་རྣམ་པ་ཐམས་ཅད་ཡོངས་སུ་རྫོགས་པར་རྒྱུན་དུ་ཡང་དང་ཡང་ལྷག་པར་མོས་པ་བརྟན་པར་བྱའོ། །སྙིང་པོའི་སྔགས་ལ་སོགས་པ་བསྟན་པ་ནི་བུམ་པ་ལྷག་པར་གནས་པ་ལ་སོགས་པ་ལ་ཉེ་བར་མཁོ་བའི་ཆེད་དུའོ། །གང་གི་ཚེ་དབུས་སུ་དེ་བཞིན་གཤེགས་ [97a.7]པ་གཞན་གཙོ་བོར་གྱུར་པ་དེའི་དབུས་སུ་གནས་པ་གཞན་དེའི་གནས་སུ་དགོད་དོ། །འོད་དཔག་མེད་དཀར་པོར་ཡང་འགྱུར་ཏེ། ཆོས་རྣམས་དཀར་པོའི་རང་བཞིན་གྱིས། །འདིར་ནི་ངག་གི་དབང་ཕྱུག་དཀར། །ཞེས་གསུངས་པའི་ཕྱིར། འདི་དང་འཆད་པའི་དཀྱིལ་འཁོར་རྣམས་སུ་གང་གི་དཀྱིལ་ [97b] [97b.1]འཁོར་བའི་ལྷའི་གཙོ་བོའི་གནས་གང་དུ་བཤད་པ་དེ་ཉིད་དུ་གཙོ་བོ་དེ་དཀྱིལ་འཁོར་གྱི་དབང་པོ་ལ་མངོན་པར་ཕྱོགས་ཤིང་དེ་དང་འཁྱུད་པ་ནི་དེ་ལ་མངོན་དུ་ཕྱོགས་པ་ཉིད་དེ་གཞན་གྱི་གནས་སུ་ཕྱིན་པའི་ཕྱིར་རོ། །འདིར་ནི་གཞལ་ཡས་ཁང་གི་ཡན་ལག་རྣམ་པ་གསུམ་སྟེ། རྡོ་རྗེའི་ས་གཞི་ལ་སོགས་ [97b.2]པས་ཡོངས་སུ་བསྐོར་བའི་རྡོ་རྗེའི་གུར་དང་། སྲུང་བའི་འཁོར་ལོ་དང་། ཆོས་འབྱུང་ངོ་། །དེ་ལ་རྡོ་རྗེའི་གུར་ནི་འཆད་པར་འགྱུར་བའི་གཞལ་ཡས་ཁང་ཐམས་ཅད་ལའོ། །སྲུང་བའི་འཁོར་ལོ་དང་། ཆོས་འབྱུང་ནི་འགའ་ཞིག་ཁོ་ན་ལ་འཆད་དོ། །བྲི་བར་བྱ་བའི་གཞལ་ཡས་ཁང་རྣམས་ལ་ནི་ཆོས་ཀྱི་ [97b.3]དབྱིངས་ཀྱི་ངོ་བོ་ཆོས་འབྱུང་ངམ་ཆོས་ཀྱི་དབྱིངས་ཀྱི་ཁོངས་སུ་ཆུད་པར་མཚོན་པའི་ཆེད་དུ་རྡོ་རྗེ་ཕྲེང་བ་བྲི་བར་བྱའོ། །ཇི་ལྟར་ཕྱི་རོལ་དེ་བཞིན་ནང་། ཞེས་པས་རྫོགས་རིམ་གྱི་དཀྱིལ་འཁོར་རྟོགས་པར་བྱ་བའི་ཆེད་དུ་འཇིག་རྟེན་ཁམས་ཀྱི་འཁོར་ཡུག་མཚོན་པའི་ཕྱིར་རྡོ་རྗེ་ཕྲེང་བ་བྲི་བ་ནི་ངེས་པར་རོ། །འདིར་སྲུང་ [97b.4]བའི་འཁོར་ལོ་ནི་དེ་ལྟར་མ་ཡིན་པས་བྲི་མི་དགོས་ཏེ། བགེགས་བཟློག་པ་ནི་གཞན་གྱིས་ཀྱང་བྱེད་པས་སོ། །གཞན་ཡང་སྟོང་པ་ཉིད་ཁོ་ན། བཅོམ་ལྡན་འདས་ཀྱིས་བགེགས་ཀྱི་ཚོགས་མ་ལུས་པ་རྩ་བ་དང་བཅས་པ་བརླག་པར་བྱེད་པའི་ནུས་པ་རབ་ཏུ་གྱུར་པས། དེ་ལ་ལྷག་པར་མོས་པ་བརྟན་པ་ཉིད་ [97b.5]བསྐྱེད་པའི་ཆེད་དུ་བྲི་བའི་དཀྱིལ་འཁོར་ལ་སྲུང་བའི་འཁོར་ལོ་བྲི་བར་མ་བསྟན་ཏོ། །བསྒོམ་བྱའི་དཀྱིལ་འཁོར་ལ་ཡང་ཁ་ཅིག་ཏུ་བསྒོམ་པར་གསུངས་པ་ལས་ཐམས་ཅད་དུ་མ་ཡིན་ནོ། །བགེགས་བསལ་བའི་རྗེས་ལ་སྟོང་པ་ཉིད་ལ་རབ་ཏུ་ཞུགས་པས་བསྒོམ་པར་བྱ་བའི་དཀྱིལ་འཁོར་ལ་སྲུང་བའི་ [97b.6]འཁོར་ལོ་མེད་དེ་དེའི་ཕྱིར་མི་འདྲིའོ་ཞེ་ན་དེ་ལྟར་ན་ཁོར་ཡུག་མཚོན་པའི་རྡོ་རྗེའི་ར་བ་ཡང་མི་འདྲི་བར་འགྱུར་རོ། །ཡང་ན་གཞལ་ཡས་ཁང་བསྐྱེད་པའི་དུས་སུ་དེ་ཡང་བསྐྱེད་དོ་ཞེ་ན། མ་ཡིན་ཏེ། བཅོམ་ལྡན་འདས་ཀྱིས་རྡོ་རྗེ་ར་བ་ལན་གསུམ་བསྐྱེད་པར་ནི་གང་ནས་ཀྱང་མ་གསུངས་སོ། །ལན་གཉིས་ [97b.7]བསྐྱེད་པས་ཅི་ཞིག་བྱ་ཅིག་ཅར་རྫོགས་པ་ཉིད་ཀྱང་རྡོ་རྗེའི་ས་གཞི་དང་མཚམས་བཅིང་བ་དང་རྡོ་རྗེའི་ར་བ་ལ་སོགས་ཀུན་བརྟགས་མཐའ་དག་སྟོང་པ་ཉིད་ཀྱི་རང་བཞིན་སྒྱུ་མའི་ངོ་བོར་གནས་པ་ཉིད་དོ། །དེས་ནི་སྲུང་བའི་འཁོར་ལོ་ཡོད་ཀྱང་དཀྱིལ་འཁོར་དུ་མི་འདྲི་བའི་འཐད་པ་བརྗོད་པ་ཉིད་དོ། །ཁ་ [98a] [98a.1]ཅིག་ནི་ཁ་ཅིག་ལ་སྲུང་བའི་འཁོར་ལོ་བྲི་བར་བྱའོ་ཞེས་འདོད་དོ་ཞེས་བྱ་བ་ནི་འཇམ་པའི་རྡོ་རྗེའི་དཀྱིལ་འཁོར་རོ།། །།བསྡུས་པའི་རིམ་པར་གསུངས་པའི་དཀྱིལ་འཁོར་ལ་ནི་གཞལ་ཡས་ཁང་གི་བར་དུ་སྔ་མ་བཞིན་ནོ། །ཁྲོ་བོ་རྣམས་ཀྱི་ཁྱད་པར་ནི་བཤད་པར་བྱའོ། ། [98a.2]གཞལ་ཡས་ཁང་གི་དབུས་སུ་མི་བསྐྱོད་པ་ནག་པོ་དྲག་པོ་གཡས་པ་དང་ཅིག་ཤོས་ཀྱི་ཞལ་དཀར་པོ་དང་དམར་པོ་ཕྱག་གཡས་པ་རྣམས་ནི་ཁྲོ་བོའི་རྡོ་རྗེ་དང་འཁོར་ལོ་དང་པདྨ་བསྣམས་པ། གཡོན་པ་རྣམས་ནི་དྲིལ་བུ་དང་ཡིད་བཞིན་གྱི་ནོར་བུ་དང་རལ་གྲི་འཛིན་པ་རང་དང་འདྲ་བའི་རེག་བྱ་རྡོ་རྗེ་མ་ལ་ [98a.3]འཁྱུད་པའོ། །དེའི་ཤར་ལ་སོགས་པའི་ཕྱོགས་རྣམས་སུ་རྣམ་པར་སྣང་མཛད་ལ་སོགས་པ་དང་། མེ་ལ་སོགས་པའི་མཚམས་རྣམས་སུ་སྤྱན་མ་ལ་སོགས་པའོ། །དེ་ལ་རྣམ་པར་སྣང་མཛད་ནི་ཞི་བ་དཀར་པོའོ། །ཞལ་དཀར་པོ་དང་ནག་པོ་དང་དམར་པོ་འཁོར་ལོ་དང་རྡོ་རྗེ་དང་པདྨ་དཀར་པོ་དང་དྲིལ་བུ་ [98a.4]དང་ནོར་བུ་དང་རལ་གྲི་འཛིན་པའོ། །བཤད་ཟིན་པ་དང་འཆད་པར་འགྱུར་བའི་ཕྱག་མཚན་དང་པོ་ནས་རིམ་པ་བཞིན་དུ་ཕྱག་གཡས་པར་སྟེང་ནས་འོག་ཏུ་དང་། གཡོན་པར་འོག་ནས་སྟེང་དུ་རིག་པར་བྱའོ། །རིན་ཆེན་འབྱུང་ལྡན་ནི་སེར་པོ་སྟེ་ཞལ་སེར་པོ་དང་ནག་པོ་དང་དཀར་པོའོ། །ཞལ་གྱི་མདོག་ [98a.5]གསུམ་ནི་རིམ་པ་བཞིན་དུ་རྩ་བ་དང་གཡས་པ་དང་གཡོན་ཡིན་ནོ། །ནོར་བུ་དང་རྡོ་རྗེ་དང་འཁོར་ལོ་དང་། དྲིལ་བུ་དང་པདྨ་སེར་པོ་དང་རལ་གྲི་འཛིན་པའོ། །སྣང་བ་མཐའ་ཡས་དམར་པོ་ཞལ་དམར་པོ་དང་ནག་པོ་དང་དཀར་པོ་ཕྱག་གཡོན་པས་དྲིལ་བུ་དང་བཅས་པའི་པདྨ་དམར་པོའི་ཡུ་བ་ཐུགས་ཀར་བཟུང་ [98a.6]བ། ཕྱག་གཡས་པས་ཁ་འབྱེད་པའོ། །གཞན་རྣམས་ཀྱིས་རྡོ་རྗེ་དང་འཁོར་ལོ་དང་རིན་པོ་ཆེ་དང་། རལ་གྲི་འཛིན་པའོ། །དོན་ཡོད་གྲུབ་པ་ནི་ལྗང་གུ་ཞལ་ལྗང་གུ་དང་ནག་པོ་དང་དཀར་པོ་རལ་གྲི་དང་སྣ་ཚོགས་རྡོ་རྗེ་དང་འཁོར་ལོ་དང་དྲིལ་བུ་དང་པདྨ་ལྗང་གུ་དང་ནོར་བུ་འཛིན་པའོ། །དེ་བཞིན་གཤེགས་པ་ལྔ་ [98a.7]པོ་འདི་དང་འཆད་པར་འགྱུར་བའི་ཀུན་དུ་བཟང་པོའི་བར་ནི་རལ་པའི་ཐོར་ཅོག་དང་རིན་པོ་ཆེའི་ཅོད་པན་དང་རིན་པོ་ཆེ་ལ་སོགས་པའི་རྒྱན་སྣ་ཚོགས་ཀྱིས་བརྒྱན་པའོ། །སྤྱན་མ་ནི་རྣམ་པར་སྣང་མཛད་དང་མཚུངས་པ་སྟེ། འོན་ཀྱང་པདྨ་དཀར་པོའི་གནས་སུ་ཨུཏྤལ་དཀར་པོའོ། །མཱ་མ་ཀཱི་ནི་མི་བསྐྱོད་པ་ལྟ་བུ་ [98b] [98b.1]སྟེ་འོན་ཀྱང་པདྨའི་གནས་སུ་ཨུཏྤལ་སྔོན་དམར་རོ། །གོས་དཀར་མོ་ནི་སྣང་བ་མཐའ་ཡས་དང་མཚུངས་པའོ། །སྒྲོལ་མ་ནི་དོན་ཡོད་གྲུབ་པ་ལྟ་བུ་སྣ་ཚོགས་རྡོ་རྗེ་དང་འཁོར་ལོ་དང་ཨུཏྤལ་སྡོ་སེར་དང་དྲིལ་བུ་དང་ནོར་བུ་རིན་པོ་ཆེ་དང་རལ་གྲི་འཛིན་པའོ། །རིམ་པ་གཉིས་པར་མེའི་མཚམས་སུ་གཟུགས་ [98b.2]རྡོ་རྗེ་མ་སྤྱན་མ་ལྟ་བུ་སྟེ་འོན་ཀྱང་དང་པོའི་ཕྱག་དག་གིས་མེ་ལོང་དམར་པོ་འཛིན་པའོ། །བདེན་བྲལ་དུ་སྒྲ་རྡོ་རྗེ་མ་སེར་མོ་ཞལ་སེར་པོ་དང་ནག་པོ་དང་དཀར་པོ་དང་ལྡན་པ་རྩ་བའི་ཕྱག་གཉིས་ཀྱིས་པི་ཝང་སྔོན་མོ་བསྒྲིང་བའོ། །ཕྱག་ལྷག་མ་དག་གིས་རྡོ་རྗེ་དང་ཨུཏྤལ་སྔོན་མོ་དང་རིན་པོ་ཆེ་དང་རལ་གྲི་འཛིན་ [98b.3]པའོ། །རླུང་དུ་དྲི་རྡོ་རྗེ་མ་ནི་གོས་དཀར་མོ་ལྟ་བུ་རྩ་བའི་ཕྱག་གཉིས་ཀྱིས་དྲིའི་དུང་ཆོས་སེར་པོ་འཛིན་པའོ། །དབང་ལྡན་དུ་རོ་རྡོ་རྗེ་མ་ལྗང་གུ་ཞལ་ལྗང་གུ་དང་ནག་པོ་དང་དཀར་པོ་ཕྱག་དང་པོ་གཉིས་རོའི་སྣོད་དམར་པོ་འཛིན་པའོ། །ལྷག་མ་རྣམས་ཀྱིས་རྡོ་རྗེ་དང་འཁོར་ལོ་དང་རིན་པོ་ཆེ་དང་རལ་གྲི་འཛིན་ [98b.4]པའོ། །རིམ་པ་གསུམ་པའི་ཤར་གྱི་སྣམ་བུ་ལ་བྱམས་པ་དང་སའི་སྙིང་པོའོ། །ལྷོའི་སྣམ་བུ་ལ་ཕྱག་ན་རྡོ་རྗེ་དང་ནམ་མཁའི་སྙིང་པོའོ། །ནུབ་ཀྱི་སྣམ་བུ་ལ་སྤྱན་རས་གཟིགས་དང་འཇམ་པའི་དབྱངས་སོ། །བྱང་དུ་སྒྲིབ་པ་ཐམས་ཅད་རྣམ་པར་སེལ་བ་དང་ཀུན་དུ་བཟང་པོའོ། །བརྒྱད་པོ་འདི་དག་ནི་རང་ [98b.5]གི་རིགས་ཀྱི་བདག་པོ་དང་མཚུངས་པ་སྟེ། འོན་ཀྱང་བྱམས་པ་ནི་རྩ་བའི་ཕྱག་གིས་འཁོར་ལོས་མཚན་པའི་ཡལ་ག་དང་བཅས་པའི་ཀླུ་ཤིང་གི་མེ་ཏོག་འཛིན་པའོ། །ཤར་ལ་སོགས་པའི་སྒོ་དང་མེ་ལ་སོགས་པའི་མཚམས་དང་སྟེང་དང་འོག་ཏུ་གོ་རིམས་བཞིན་དུ་ཁྲོ་བོ་བཅུའོ། །དེ་ལ་གཤིན་རྗེ་གཤེད་ [98b.6]ནི་ནག་པོ་ནག་པོ་དང་དཀར་པོ་དང་དམར་པོ་རྡོ་རྗེའི་ཐོབ་དང་འཁོར་ལོ་དང་རྡོ་རྗེ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དང་དགྲ་སྟྭ་འཛིན་པའོ། །ཤེས་རབ་མཐར་བྱེད་ནི་དཀར་པོ་ཞལ་དཀར་པོ་དང་ནག་པོ་དང་དམར་པོ། རྡོ་རྗེ་དང་རྡོ་རྗེས་མཚན་པའི་དབྱུག་པ་དཀར་པོ་དང་། རལ་ [98b.7]གྲི་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དང་དགྲ་སྟ་འཛིན་པའོ། །པདྨ་མཐར་བྱེད་ནི་དམར་པོ་ཞལ་དམར་པོ་དང་ནག་པོ་དང་དཀར་པོ། པདྨ་དམར་པོ་དང་རལ་གྲི་དང་གཏུན་ཤིང་དང་དྲིལ་བུ་དང་། དགྲ་སྟ་དང་ཞགས་པ་འཛིན་པའོ། །བགེགས་མཐར་བྱེད་ [99a] [99a.1]ནི་སྔོན་པོ་ཞལ་སྔོན་པོ་དང་དཀར་པོ་དང་དམར་པོ། སྣ་ཚོགས་རྡོ་རྗེ་དང་འཁོར་ལོ་དང་གཏུན་ཤིང་དང་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དང་དགྲ་སྟ་འཛིན་པའོ། །མི་གཡོ་བ་ནི་སྔོན་པོ་ཞལ་སྔོན་པོ་དང་དཀར་པོ་དང་དམར་པོ། རལ་གྲི་དང་རྡོ་རྗེ་དང་ [99a.2]འཁོར་ལོ་དང་སྡིགས་མཛུབ་དང་དགྲ་སྟ་དང་ཞགས་པ་འཛིན་པའོ། །འདོད་པའི་རྒྱལ་པོ་ནི་སྔོན་པོ་ཞལ་སྔོན་པོ་དང་དཀར་པོ་དང་དམར་པོ། ཕྱག་གཉིས་ཀྱིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་འཛིན་པ་གཞན་རྣམས་ཀྱིས་རྡོ་རྗེ་དང་རལ་གྲི་དང་ཞགས་པ་དང་ལྕགས་ཀྱུ་འཛིན་པའོ། །དབྱུག་པ་སྔོན་པོ་ནི་ [99a.3]ནག་པོ་ཞལ་ནག་པོ་དང་དཀར་པོ་དང་དམར་པོ། རྡོ་རྗེས་མཚན་པའི་དབྱུག་པ་སྔོན་པོ་དང་། རལ་གྲི་དང་འཁོར་ལོ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་པདྨ་དང་དགྲ་སྟ་འཛིན་པའོ། །སྟོབས་པོ་ཆེ་ནི་ནག་པོ་ཞལ་ནག་པོ་དང་དཀར་པོ་དང་དམར་པོ་རྡོ་རྗེས་མཚན་པའི་དབྱུག་པ་ [99a.4]ནག་པོ་དང་རལ་གྲི་དང་འཁོར་ལོ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་པདྨ་དང་དགྲ་སྟ་འཛིན་པའོ། །གཙུག་ཏོར་འཁོར་ལོས་སྒྱུར་བ་ནི་ནག་པོ་ཞལ་ནག་པོ་དང་དཀར་པོ་དང་དམར་པོ། རྩ་བའི་ཕྱག་དག་གིས་གཙུག་ཏོར་སྤྱི་བོར་འཛིན་པའོ། །ཕྱག་ལྷག་མ་རྣམས་ཀྱིས་རྡོ་རྗེ་དང་ [99a.5]པདྨ་དང་སྡིགས་མཛུབ་དང་རལ་གྲི་རྣམས་འཛིན་པའོ། །ལག་པ་གཉིས་ཐལ་མོ་གན་རྐྱལ་དུ་མཉམ་པར་བརྐྱང་བའི་སྲིན་ལག་གཉིས་ནི་སེན་མོའི་སྟེང་དུ་མཐེ་བོ་གཉིས་ཀྱི་སེན་མོས་མནན་ཏེ་མཐེའུ་ཆུང་གཉིས་བརྐྱང་ངོ་། །དེ་བཞིན་དུ་གུང་མོ་གཉིས་ཀྱི་སེན་མོ་མཉམ་པར་ཡང་དག་པར་རྩེ་སྤྲད་ལ། [99a.6]མཛུབ་མོ་གཉིས་དབུས་སུ་རྭའི་རྣམ་པ་ནི་ཀུན་དུ་སྣང་བ་ཞེས་བྱ་བ་གཙུག་ཏོར་གྱི་ཕྱག་རྒྱའོ་ཞེས་ཁ་ཅིག་གོ། །འགའ་ཞིག་ཏུ་ནི་གཞན་ནོ། །གནོད་མཛེས་རྒྱལ་པོ་ནག་པོ་ཞལ་ནག་པོ་དང་དཀར་པོ་དང་དམར་པོ། རྡོ་རྗེ་དང་འཁོར་ལོ་དང་རིན་པོ་ཆེ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་ [99a.7]དང་པདྨ་དང་རལ་གྲི་འཛིན་པའོ། །མི་བསྐྱོད་པ་ལ་སོགས་པ་འདི་དག་ནི་སྣ་ཚོགས་པདྨའི་སྟེང་དུ་གོ་རིམས་བཞིན་དུ་རྡོ་རྗེ་རྩེ་ལྔ་པ་དང་འཁོར་ལོ་དང་རིན་པོ་ཆེ་མ་ར་ཀ་ཏ་ཆ་དགུ་པ་དང་པདྨ་དམར་པོ་དང་སྣ་ཚོགས་རྡོ་རྗེ་དང་འཁོར་ལོ་དང་རྡོ་རྗེ་དང་པདྨ་དང་སྣ་ཚོགས་རྡོ་རྗེ་དང་ཀླུ་ཤིང་གི་མེ་ཏོག་དང་འཁོར་ལོ་དང་ [99b] [99b.1]རྡོ་རྗེ་དང་རིན་པོ་ཆེ་དང་། པདྨ་དང་རྡོ་རྗེ་དང་སྣ་ཚོགས་རྡོ་རྗེ་དང་རྡོ་རྗེ་དང་ཐོབ་དང་རྡོ་རྗེ་དང་པདྨ་དམར་པོ་དང་སྣ་ཚོགས་རྡོ་རྗེ་དང་རལ་གྲིའི་ཡུ་བ་དང་རྡོ་རྗེ་དང་རྡོ་རྗེས་མཚན་པའི་དབྱུག་པ་སྔོན་པོ་དང་དབྱུག་པ་ནག་པོ་དང་རྡོ་རྗེ་དང་རྡོ་རྗེ་ལ་གནས་པའི་ཉི་མ་དང་ཟླ་བ་ལ་བཞུགས་པ་ཞལ་གསུམ་ཕྱག་དྲུག་ [99b.2]པའོ། །ཡང་གཞན་ནས་ནི་རང་རང་གི་ལྷའི་མདོག་ལྟ་བུའི་རིན་པོ་ཆེ་ལས་བྱས་པའོ། །དེ་ལ་རྣམ་པར་སྣང་མཛད་དང་ལྷ་མོ་རྣམས་དང་བྱང་ཆུབ་སེམས་དཔའ་རྣམས་ཟླ་བ་ལ་གནས་པའོ། །གཞན་རྣམས་ནི་ཉི་མ་ལ་གནས་པའོ། །མི་བསྐྱོད་པ་ལ་སོགས་པ་རྣམས་ནི་རྡོ་རྗེའི་སྐྱིལ་ཀྲུང་ཅན་ནོ། ། [99b.3]ཁྲོ་བོ་རྣམས་ནི་ཞབས་གཡོན་བརྐྱང་པ་གཡས་བསྐུམ་པ་ཞལ་སོ་སོ་ལ་དམར་ལ་ཟླུམ་པའི་སྤྱན་གསུམ་གསུམ་མངའ་བ་སྒྲ་སྒྲོགས་ཤིང་འབར་བ་སྟེ། ཤིན་ཏུ་འཇིགས་པ་སྲུང་བའི་འཁོར་ལོར་བརྗོད་པའི་འཇིགས་པའི་གཟུགས་ལ་སོགས་པའི་ཁྱད་པར་དང་ལྡན་པའོ། །འདིར་དཀྱིལ་འཁོར་གྱི་ [99b.4]བདག་པོ་ཁོ་ན་ཡུམ་དང་བཅས་པ་སྟེ་གནོད་མཛེས་ཀྱི་བར་དུ་ལྷ་གཞན་རྣམས་ཡུམ་མེད་པའོ། །སྲུང་བའི་འཁོར་ལོ་ལ་གནས་པའི་གཤིན་རྗེ་གཤེད་ལ་སོགས་པ་ནི་རང་གི་འོད་ཀྱི་ཤེས་རབ་དང་བཅས་པ་སྟེ་དེ་རྣམས་ནི་གོ་རིམས་བཞིན་དུ་རྡོ་རྗེ་རོ་ལངས་མ་དང་། གཞན་གྱིས་མི་ཐུབ་མ་དང་ཁྲོ་གཉེར་ཅན་ [99b.5]དང་རལ་པ་གཅིག་མ་དང་། སྣ་ཚོགས་རྡོ་རྗེ་མ་དང་། སྣ་ཚོགས་རིན་ཆེན་མ་དང་། སྣ་ཚོགས་པདྨ་དང་། སྣ་ཚོགས་ལས་མ་དང་། ནམ་མཁའ་རྡོ་རྗེ་མ་དང་། ས་འཛིན་མ་རྣམས་སོ། །མི་བསྐྱོད་པའི་ཐུགས་ཀར་ཡེ་ཤེས་སེམས་དཔའ་ཕྱག་གཉིས་པ་དམར་པོ་ཡུམ་དང་བཅས་པའོ། །དེའི་ཐུགས་ [99b.6]ཀར་ཏིང་ངེ་འཛིན་སེམས་དཔའ་ཧཱུཾ་ནག་པོའོ། །རྣམ་པར་སྣང་མཛད་ཀྱི་ཨོཾ། རིན་ཆེན་འབྱུང་ལྡན་གྱི་སྭཱ། སྣང་བ་མཐའ་ཡས་ཀྱི་ཨཱཿདོན་ཡོད་གྲུབ་པའི་ཧཱ། སྤྱན་མ་ལ་སོགས་པའི་ལྷ་མོ་རྣམས་ཀྱི་ལཱཾ་མཱཾ་པཱཾ་ཏཱཾ། ཛཿཧཱུཾ་བཾ་ཧོཿ། རེག་བྱ་རྡོ་རྗེ་མའི་ཁཾ་ངོ་། །བྱམས་པ་ལ་སོགས་པ་བྱང་ཆུབ་སེམས་ [99b.7]དཔའ་བརྒྱད་པོ་རྣམས་ཀྱི་མཻ་ཐླིཾ། ཨོཾ་ཨོཾ་ཨོཾ་ཧཱུཾ་ཨོཾ་སཾ་ངོ་། །ཁྲོ་བོ་བཅུ་པོ་རྣམས་ཀྱི་ཧཱུཾ་ངོ་། །ལྷ་རྣམས་ཀྱི་སྙིང་པོའི་སྔགས་ནི་རྡོ་རྗེ་ཕྲེང་བར་བརྗོད་དོ། །རིགས་ཀྱི་བདག་པོ་ནི་མི་བསྐྱོད་པ་དང་ཀུན་དུ་བཟང་པོ་གཉིས་ཀྱི་གོང་དུ་བརྗོད་པའི་རྡོ་རྗེ་སེམས་དཔའ་སྟེ། འོན་ཀྱང་རྡོ་རྗེ་དང་འཁོར་ལོ་དང་། པདྨ་དང་ [100a] [100a.1]དྲིལ་བུ་དང་། ནོར་བུ་དང་རལ་གྲི་འཛིན་པ། རང་འདྲ་བའི་རྡོ་རྗེ་དབྱིངས་ཀྱི་དབང་ཕྱུག་མས་ཡང་དག་པར་འཁྱུད་པའོ། །དེ་བཞིན་གཤེགས་པ་རྣམས་དང་མཱ་མ་ཀཱི་དང་། ཕྱག་ན་རྡོ་རྗེ་དང་འཇམ་དཔལ་དང་གཙུག་ཏོར་འཁོར་ལོས་སྒྱུར་བ་དང་། གནོད་མཛེས་རྒྱལ་པོ་རྣམས་ཀྱི་ནི་མི་བསྐྱོད་ [100a.2]པའོ། །སྤྱན་མ་དང་གཟུགས་རྡོ་རྗེ་མ་དང་། བྱམས་པ་དང་སའི་སྙིང་པོ་དང་གཤིན་རྗེ་གཤེད་དང་མི་གཡོ་བ་རྣམས་ཀྱི་རྣམ་པར་སྣང་མཛད་དོ། །སྒྲ་རྡོ་རྗེ་མ་དང་ནམ་མཁའི་སྙིང་པོ་དང་། ཤེས་རབ་མཐར་བྱེད་དང་འདོད་པའི་རྒྱལ་པོ་རྣམས་ཀྱི་ནི་རིན་ཆེན་འབྱུང་ལྡན་ནོ། །གོས་དཀར་མོ་དང་། དྲི་རྡོ་རྗེ་མ་དང་སྤྱན་ [100a.3]རས་གཟིགས་དང་པདྨ་མཐར་བྱེད་དང་དབྱུག་པ་སྔོན་པོ་རྣམས་ཀྱི་ནི་སྣང་བ་མཐའ་ཡས་སོ། །སྒྲོལ་མ་དང་རོ་རྡོ་རྗེ་མ་དང་རེག་བྱ་རྡོ་རྗེ་མ་དང་སྒྲིབ་པ་རྣམ་པར་སེལ་བ་དང་། བགེགས་མཐར་བྱེད་དང་། སྟོབས་པོ་ཆེ་རྣམས་ཀྱི་ནི་དོན་ཡོད་གྲུབ་པའོ། །རྒྱས་འདེབས་ཀྱི་དེ་བཞིན་གཤེགས་པ་ཐམས་ཅད་ནི་རང་ [100a.4]འོད་ཀྱི་ཡུམ་དང་བཅས་པའོ། །དཔལ་ཀུན་ཏུ་ཁ་སྦྱོར་གྱི་རྒྱུད་ལས་གསུངས་པའི་རྡོ་རྗེ་སེམས་དཔའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་སྲུང་བའི་འཁོར་ལོའི་ལྟེ་བའི་དབུས་སུ་རླུང་དང་མེ་དང་ཆུ་དང་སའི་དཀྱིལ་འཁོར་དང་རི་རབ་ཀྱི་སྟེང་དུ་ཆོས་འབྱུང་གི་དཀྱིལ་དུ་གཞལ་ཡས་ཁང་ངོ་། །སྲུང་བའི་འཁོར་ [100a.5]ལོར་གཤིན་རྗེ་གཤེད་ཕྱག་གཡས་པ་གསུམ་གྱིས་རྡོ་རྗེ་ལྕགས་ཀྱུ་དང་འཁོར་ལོ་དང་། རྡོ་རྗེ་རྣམས་བསྣམས་པ། གཡོན་གསུམ་གྱིས་སྙིང་གར་སྡིགས་མཛུབ་དང་བཅས་པའི་ཞགས་པ་དང་དྲིལ་བུ་དང་དགྲ་སྟ་འཛིན་པའོ། །ཤེས་རབ་མཐར་བྱེད་ནི་རྡོ་རྗེ་ཞགས་པ་དང་། རྡོ་རྗེ་དང་རལ་གྲི་དང་སྙིང་ [100a.6]གར་སྡིགས་མཛུབ་དང་དྲིལ་བུ་དང་དགྲ་སྟ་འཛིན་པའོ། །པདྨ་མཐར་བྱེད་ནི་ལྕགས་སྒྲོག་དང་པདྨ་དང་རལ་གྲི་དང་། དྲིལ་བུ་དང་དགྲ་སྟ་དང་ཞགས་པའོ། །བགེགས་དགྲ་ནི་རྡོ་རྗེ་དྲིལ་བུ་དང་རྡོ་རྗེ་རྒྱ་གྲམ་དང་འཁོར་ལོ་དང་། སྙིང་གར་སྡིགས་མཛུབ་དང་བཅས་པའི་ཞགས་པ་དང་གཏུན་ཤིང་དང་ [100a.7]དགྲ་སྟའོ། །མི་གཡོ་བ་ནི་རལ་གྲི་དང་འཁོར་ལོ་དང་རྡོ་རྗེ་དང་སྡིགས་མཛུབ་དང་དགྲ་སྟ་དང་ཞགས་པའོ། །འདོད་པའི་རྒྱལ་པོ་ནི་གཡས་དང་ཅིག་ཤོས་ཀྱི་ཕྱག་གཉིས་ཀྱིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་དང་ལྕགས་ཀྱུ་དང་རལ་གྲི་དང་རྡོ་རྗེ་དང་ཞགས་པའོ། །དབྱུག་པ་སྔོན་པོ་ནི་རྡོ་རྗེས་མཚན་པའི་ [100b] [100b.1]དབྱུག་པ་སྔོན་པོ་དང་། རལ་གྲི་དང་འཁོར་ལོ་དང་སྡིགས་མཛུབ་དང་བཅས་པའི་ཞགས་པ་དང་པདྨ་དང་དགྲ་སྟའོ། །སྟོབས་པོ་ཆེ་ནི་རྩེ་གསུམ་པ་དང་རལ་གྲི་དང་འཁོར་ལོ་དང་། སྙིང་གར་སྡིགས་མཛུབ་དང་བཅས་པའི་ཞགས་པ་དང་པདྨ་དང་དགྲ་སྟའོ། །གཙུག་ཏོར་འཁོར་ལོས་སྒྱུར་བ་ [100b.2]ནི་གཡས་དང་ཅིག་ཤོས་ཀྱི་ཕྱག་དང་པོ་གཉིས་ཀྱིས་སྤྱི་བོར་གཙུག་ཏོར་གྱི་ཕྱག་རྒྱ་དང་འཁོར་ལོ་དང་པདྨ་དང་སྡིགས་མཛུབ་དང་རལ་གྲིའོ། །གནོད་མཛེས་ནི་རྡོ་རྗེ་དང་འཁོར་ལོ་དང་རིན་པོ་ཆེ་དང་། སྙིང་གར་སྡིགས་མཛུབ་དང་བཅས་པའི་ཞགས་པ་དང་པདྨ་དང་རལ་གྲིའོ། །བཅུ་པོ་ [100b.3]འདི་དག་ནི་དབུ་ལ་ཐོད་པ་ལྔས་བརྒྱན་པ་འཁོར་ལོ་ལ་སོགས་པའི་ཕྱག་རྒྱ་ལྔ་དང་ལྡན་པ་མི་མགོའི་ཕྲེང་བ་སྐེ་ལ་འཆང་བ་གོ་རིམས་བཞིན་དུ་རྣམ་པར་སྣང་མཛད་དང་རིན་ཆེན་འབྱུང་ལྡན་དང་འོད་དཔག་མེད་དང་དོན་ཡོད་གྲུབ་པ་དང་རྟག་པ་དང་རིན་ཆེན་འབྱུང་ལྡན་དང་འོད་དཔག་མེད་དང་དོན་ཡོད་གྲུབ་པ་ [100b.4]པ་དང་མི་བསྐྱོད་པ་དང་མི་བསྐྱོད་པས་རྒྱས་བཏབ་པའོ། །གཞལ་ཡས་ཁང་གི་དབུས་སུ་རྡོ་རྗེ་སེམས་དཔའ་ཞལ་འཛུམ་པ་དང་བཅས་པའི་སྐུ་མདོག་དཀར་པོ་ལ་ཅུང་ཟད་དམར་བའི་མདངས་དང་ལྡན་པ་རལ་པའི་ཐོར་ཅོག་ནག་པོ་ལ་གནས་པའི་ནོར་བུ་དང་སྣ་ཚོགས་རྡོ་རྗེ་དང་དེའི་འོག་ཏུ་གཡོན་ངོས་སུ་ [100b.5]གནས་པའི་ཟླ་བ་ཕྱེད་པ་དྲི་མ་མེད་པ་དང་། སངས་རྒྱས་ལྔའི་ཅོད་པན་ཅན་དཔྲལ་བའི་སྟེང་དུ་ཐོད་པ་ལྔ་དང་གཙུག་གི་འཁོར་ལོ་དང་། རྣ་ཆ་དང་མགུལ་རྒྱན་དང་ལག་གདུབ་དང་སྐེ་རགས་དང་ཐལ་བ་རྣམས་ཀྱིས་བརྒྱན་པ་ཞལ་གསུམ་པ་གཡས་པ་དང་ཅིག་ཤོས་ཀྱི་ཞལ་སྔོན་པོ་དང་དམར་པོ་ཞལ་རེ་རེ་ [100b.6]ལ་སྤྱན་གསུམ་གསུམ་དང་ལྡན་པ་ཕྱག་དྲུག་པ་རྡོ་རྗེ་དང་རྡོ་རྗེ་དྲིལ་བུས་རྣམ་པར་མཛེས་པའི་ཕྱག་གཉིས་ཀྱིས་རང་དང་འདྲ་བའི་ཤེས་རབ་ལ་འཁྱུད་ཅིང་ཆུ་སྐྱེས་ལ་མཉམ་པར་སྦྱར་བའི་དགའ་བ་དང་ལྡན་པ་ཕྱག་གཡས་པ་དག་གིས་རལ་གྲི་དང་ལྕགས་ཀྱུ་འཛིན་པ་གཡོན་པ་དག་གིས་ཐོད་པ་དང་ཞགས་ [100b.7]པ་འཛིན་པ་ཉི་མའི་འོད་ཀྱི་དཀྱིལ་འཁོར་ཅན་སྣ་ཚོགས་པདྨ་དང་ཐོད་པ་དང་ཟླ་བའི་གདན་ལ་སྐྱིལ་ཀྲུང་ཕྱེད་པས་བཞུགས་པ་གར་གྱི་ཉམས་དགུ་དང་ལྡན་པའོ། །དེའི་ཐུགས་ཀར་སྣ་ཚོགས་པདྨ་དང་ཟླ་བ་ལ་ཡེ་ཤེས་སེམས་དཔའ་སྐུ་མདོག་དཀར་དམར་སེམས་དཔའི་སྐྱིལ་ཀྲུང་ཅན་སངས་རྒྱས་ལྔའི་ཅོད་ [101a] [101a.1]པན་གྱིས་སྤྲས་པ་རིན་པོ་ཆེའི་རྒྱན་གྱིས་བརྒྱན་པ་རྡོ་རྗེ་དང་རྡོ་རྗེ་དྲིལ་བུ་དང་བཅས་པའི་ཕྱག་གཉིས་ཀྱིས། རང་དང་འདྲ་བའི་ཤེས་རབ་ལ་འཁྱུད་པ། དེའི་ཐུགས་ཀར་ཟླ་བ་ལ་ཏིང་ངེ་འཛིན་སེམས་དཔའི་རང་བཞིན་ཧཱུཾ་ནག་པོའི་རྣམ་པའོ། །འདིར་སེམས་དཔའ་གསུམ་གྱི་བདག་ [101a.2]ཉིད་ཅན་རྡོ་རྗེ་འཆང་གི་ཤར་དུ་རྣམ་པར་སྣང་མཛད་དཀར་པོ་ཞི་བ་ཕྱག་བཞི་པ་གཡས་པ་དག་གིས་འཁོར་ལོ་དང་དྲིལ་བུ་དང་གཡོན་པ་དག་གིས་ཐོད་པ་དང་ཞགས་པ་བསྣམས་པའོ། །ལྷོར་ནི་རིན་ཆེན་འབྱུང་ལྡན་སེར་པོ་ཕྱག་བཞི་པ་གཡས་པ་དག་གིས་རིན་པོ་ཆེ་དང་ལྕགས་ཀྱུ་གཡོན་པ་དག་གིས་ [101a.3]ཐོད་པ་དང་ཞགས་པ་བསྣམས་པའོ། །ནུབ་ཏུ་འོད་དཔག་མེད་དམར་པོ་ཕྱག་བཞི་པ་གཡས་པ་དག་གིས་མདའ་དང་པདྨ་གཡོན་པ་དག་གིས་གཞུ་དང་ཞགས་པ་འཛིན་པའོ། །བྱང་དུ་དོན་ཡོད་གྲུབ་པ་ལྗང་གུ་ཕྱག་བཞི་པ་གཡས་པ་དག་གིས་རྡོ་རྗེ་དང་ལྕགས་ཀྱུ། གཡོན་པ་དག་གིས་དྲིལ་བུ་དང་ཐོད་པ་ [101a.4]འཛིན་པའོ། །དབང་ལྡན་དུ་སྤྱན་མ་དཀར་མོ་ཕྱག་བརྒྱད་མ་གཡས་རྣམས་ཀྱིས་འཁོར་ལོ་དང་། རྡོ་རྗེ་དང་རལ་གྲི་དང་མདའ་རྣམས་སོ། །གཡོན་པ་རྣམས་ཀྱིས་ཐོད་པ་དང་དྲིལ་བུ་དང་ཞགས་པ་དང་གཞུ་རྣམས་སོ། །མེ་ར་མཱ་མ་ཀཱི་སྔོན་མོ་ཕྱག་བཅུ་གཉིས་པ་གཡས་པ་རྣམས་ཀྱིས་མདའ་དང་ [101a.5]རལ་གྲི་དང་རྡོ་རྗེ་དང་འཁོར་ལོ་དང་། རིན་པོ་ཆེ་དང་པདྨའོ། །གཡོན་པ་རྣམས་ཀྱིས་གཞུ་དང་ལྕགས་ཀྱུ་དང་དྲིལ་བུ་དང་ཞགས་པ་དང་ཐོད་པ་དང་ཁ་ཊྭཱཾ་གའོ། །བདེན་བྲལ་དུ་གོས་དཀར་མོ་དམར་མོ་ཕྱག་བརྒྱད་མ་གཡས་རྣམས་ཀྱིས་མདའ་དང་པདྨ་དང་རལ་གྲི་དང་རྡོ་རྗེ་རྣམས་སོ། །གཡོན་པ་རྣམས་ [101a.6]ཀྱིས་གཞུ་དང་ཐོད་པ་དང་ཞགས་པ་དང་། དྲིལ་བུ་བསྣམས་པའོ། །རླུང་དུ་སྒྲོལ་མ་ལྗང་གུ་ཕྱག་བརྒྱད་མ་གཡས་པ་རྣམས་ཀྱིས་ཨུཏྤལ་དམར་པོ་དང་རལ་གྲི་དང་། ལྕགས་ཀྱུ་དང་མདའོ། །ཅིག་ཤོས་རྣམས་ཀྱིས་འཁོར་ལོ་དང་ཞགས་པ་དང་ཐོད་པ་དང་གཞུ་རྣམས་སོ། །རིམ་པ་གཉིས་ [101a.7]པ་ལ་ཤར་གྱི་ཕྱོགས་སུ་རྡོ་རྗེ་དྲག་མོ་དཀར་མོ་ཕྱག་ན་མདའ་དང་ལྕགས་ཀྱུ་དང་གཞུ་དང་བྱང་ཆུབ་ཀྱི་སེམས་ཀྱིས་གང་བའི་ཐོད་པ་འཛིན་པའོ། །ལྷོར་རྡོ་རྗེ་གཟུགས་མ་སེར་མོ་ཕྱག་ན་རྡོ་རྗེ་དང་། མདུང་དང་ཞགས་པ་དང་ཐོད་པ་ཁྲག་གིས་གང་བའོ། །ནུབ་ཏུ་འདོད་ཆགས་རྡོ་རྗེ་མ་དམར་མོ་ [101b] [101b.1]ཕྱག་ན་རལ་གྲི་དང་རྡོ་རྗེ་དང་ཆུས་གང་བའི་ཐོད་པ་དང་དྲིལ་བུའོ། །བྱང་དུ་རྡོ་རྗེ་ཞི་བ་མ་ལྗང་གུ་ནི་ཕྱག་ན་ཏལ་པ་ཐུང་ངུ་དང་བ་དན་གསུམ་པ་དང་རྡོ་རྗེས་མཚན་པའི་ཁ་ཊྭཱཾ་ག་དང་སྨན་གྱིས་གང་བའི་ཐོད་པ་རྣམས་སོ། །དབང་ལྡན་དུ་རྡོ་རྗེ་གནོད་སྦྱིན་མ་ནི་དཀར་སེར་གྱི་མདོག་ལ་ཕྱག་ན་དབྱུག་ཏོ་དང་ཨུཏྤལ་ [101b.2]དང་ཐོད་པ་དང་ཌ་མ་རུའོ། །མེར་རྡོ་རྗེ་མཁའ་འགྲོ་མ་དམར་སེར་ཕྱག་ན་པདྨ་དང་མེ་ལོང་དང་རྐང་མར་གྱིས་གང་བའི་ཐོད་པ་དང་དགྲ་སྟའོ། །བདེན་བྲལ་དུ་སྒྲ་རྡོ་རྗེ་མ་སྔོན་དམར་ཕྱག་ན་ཤཀྟི་དང་དུང་དང་འཁོར་ལོ་དང་ཁྲག་གིས་གང་བའི་ཐོད་པའོ། །རླུང་དུས་རྡོ་རྗེ་མ་དཀར་ལྗང་པདྨ་དང་རྡོ་རྗེ་དང་བདུད་རྩི་ [101b.3]ལྔ་དང་ཤ་ལྔས་གང་བའི་ཐོད་པ་མི་ལྤགས་ཀྱིས་གཡོགས་པ་དང་དྲིལ་བུའོ། །བརྒྱད་པོ་འདི་དག་ནི་ཕྱག་བཞི་པ་དང་པོའི་ཕྱག་མཚན་གཉིས་ནི་གཡས་པ་དག་གིས་འཛིན་པ་གཞན་གཉིས་ནི་གཡོན་པ་དག་གིས་འཛིན་པའོ། །རིམ་པ་གསུམ་པའི་ཤར་དུ་བཞད་མ་དམར་མོ་ཕྱག་གཉིས་རྡོ་རྗེ་དང་རྡོ་རྗེ་ [101b.4]དྲིལ་བུ་དང་བཅས་པས་མངོན་པར་བཞད་པའི་ཚུལ་ཅན་ནོ། །ལྷོར་སྒེག་མོ་སྔོན་པོ་ཕྱག་གཉིས་རྡོ་རྗེ་དང་རྡོ་རྗེ་དྲིལ་བུ་འཛིན་པས་སྙེམས་པ་དང་བཅས་པས་མངོན་པར་སྒེག་པའི་ཚུལ་ཅན་ནོ། །ནུབ་ཏུ་གླུ་མ་སེར་མོ་ནི་སྐུ་ཅུང་ཟད་གཡོ་ཞིང་སྒེག་པའི་ཕྱག་གཉིས་ཀྱིས་ཏིང་ཏིང་ཤག་འཛིན་པའོ། ། [101b.5]བྱང་དུ་གར་མ་ལྗང་གུ་པད་སྐོར་གྱི་ཚུལ་ལ་སོགས་པའི་གར་གྱིས་གཡོ་བའི་ཕྱག་གཉིས་ཀྱིས་རྡོ་རྗེ་རྩེ་གསུམ་པ་དང་རྡོ་རྗེ་དྲིལ་བུ་འཛིན་པའོ། །དབང་ལྡན་དུ་གླིང་བུ་མ་དམར་མོའོ། །མེར་པི་ཝང་མ་སེར་མོ་ཕྱག་གཉིས་མ་སྒེག་མོའི་ཉམས་ཀྱིས་བག་ཙམ་ལུས་གཡོ་བའོ། །བདེན་བྲལ་དུ་མུ་ཀུནྡ་མ་ [101b.6]དཀར་མོའོ། །རླུང་དུ་རྫ་རྔ་མ་དུ་བའི་མདོག་ཅན་ནོ། །བཞི་པོ་འདི་དག་ནི་ཕྱག་གཉིས་ཀྱིས་རང་རང་གི་རོལ་ཆ་བརྡུང་བའོ། །དེ་ནས་ཕྱིའི་སྣམ་བུ་ལ་མེའི་མཚམས་སུ་མེ་ཏོག་མ་དཀར་མོ་ཕྱག་གཡོན་གྱིས་མེ་ཏོག་གི་ཕྲེང་བ་དང་ཅིག་ཤོས་ཀྱིས་འཁོར་ལོ་འཛིན་པའོ། །བདེན་བྲལ་དུ་བདུག་སྤོས་མ་ [101b.7]དུ་བའི་མདོག་ཅན་ཕྱག་གཡོན་གྱིས་བདུག་སྤོས་ཀྱི་སྣོད་དང་ཅིག་ཤོས་ཀྱིས་རིན་པོ་ཆེ་འཛིན་པའོ། །རླུང་དུ་མར་མེ་མ་གསེར་གྱི་མདོག་ཅན་ཕྱག་གཡོན་དུ་མར་མེའི་ཀོང་བུ་གཡས་སུ་པདྨ་འཛིན་པའོ། །དབང་ལྡན་དུ་དྲི་ཆབ་མ་དམར་མོ་ཕྱག་གཡོན་གྱིས་དྲིའི་དུང་ཆོས་དང་ཅིག་ཤོས་ཀྱིས་རལ་ [102a] [102a.1]གྲི་འཛིན་པའོ། །ཤར་གྱི་ཕྱོགས་སུ་མེ་ལོང་མ་དཀར་མོ་ཕྱག་གཉིས་ཀྱིས་མེ་ལོང་འཛིན་པའོ། །ལྷོར་རོ་མ་དམར་མོ་ཕྱག་གཉིས་ཀྱིས་རོའི་སྣོད་འཛིན་པའོ། །ནུབ་ཏུ་རེག་མ་ལྗང་གུ་ཕྱག་གཉིས་ཀྱིས་གོས་སྣ་ཚོགས་འཛིན་པའོ། །བྱང་དུ་ཆོས་མ་དཀར་མོ་ཕྱག་གཉིས་ཀྱིས་ [102a.2]ཆོས་འབྱུང་དཀར་པོ་འཛིན་པའོ། །འདི་རྣམས་དང་རྣམ་པར་སྣང་མཛད་ལ་སོགས་པའི་ལྷ་རྣམས་ནི་ཞལ་གཅིག་སྤྱན་གསུམ་པ་རལ་བའི་ཅོད་པན་ནག་པོ་ལ་ཐོད་པ་ལྔ་དང་འཁོར་ལོ་ལ་སོགས་པས་བརྒྱན་པ། ལྷའི་ན་བཟའ་གོན་པ་སྐྱིལ་ཀྲུང་ཕྱེད་པའི་གར་གྱིས་བཞུགས་པའོ། །ཤར་སྒོར་ [102a.3]རྡོ་རྗེ་ལྕགས་ཀྱུ་མ་ནམ་མཁའི་མདོག་ལྟ་བུ་སྔོ་བསངས་ཞལ་གཡས་ནག་པོ་གཡོན་དཀར་པོ་ཕྱག་དྲུག་པ་གཡས་པ་རྣམས་ཀྱིས་ལྕགས་ཀྱུ་དང་རལ་གྲི་དང་འཁོར་ལོ་འཛིན་པའོ། །གཡོན་རྣམས་ཀྱིས་ཞགས་པ་དང་སྡིགས་མཛུབ་དང་དྲིལ་བུའོ། །ལྷོ་སྒོར་རྡོ་རྗེ་ཞགས་པ་མ་དཀར་སེར་ཞལ་ [102a.4]གཡས་ནག་པོ་གཡོན་དམར་པོ། ཕྱག་དྲུག་པ་གཡས་པ་རྣམས་ཀྱིས་ཞགས་པ་དང་རྡོ་རྗེ་དང་རལ་གྲིའོ། །གཡོན་པ་རྣམས་ཀྱིས་འཁོར་ལོ་དང་དྲིལ་བུ་དང་སྡིགས་མཛུབ་དང་བཅས་པའི་ཞགས་པའོ། །ནུབ་སྒོར་རྡོ་རྗེ་ལྕགས་སྒྲོག་མ་དམར་མོ་ཞལ་གཡས་ནག་པོ་གཡོན་དཀར་པོ་ཕྱག་དྲུག་ [102a.5]པ་གཡས་རྣམས་ཀྱིས་ལྕགས་སྒྲོག་དང་རྡོ་རྗེ་དང་རལ་གྲིའོ། །གཡོན་རྣམས་ཀྱིས་འཁོར་ལོ་དང་དྲིལ་བུ་དང་ལྕགས་ཀྱུའོ། །བྱང་དུ་རྡོ་རྗེ་དྲིལ་བུ་མ་ལྗང་གུ་ཞལ་གཡས་ནག་པོ་གཡོན་དཀར་པོ་ཕྱག་དྲུག་པ་གཡས་པ་རྣམས་ཀྱིས་དྲིལ་བུ་དང་རྡོ་རྗེ་དང་རལ་གྲིའོ། །གཡོན་པ་རྣམས་ཀྱིས་འཁོར་ [102a.6]ལོ་དང་ལྕགས་ཀྱུ་དང་ཞགས་པའོ། །བཞི་པོ་འདི་རྣམས་ནི་ཞལ་རེ་རེ་ལ་སྤྱན་གསུམ་གསུམ་དང་ལྡན་པ་དབུ་སྐྲ་དམར་སེར་འབར་ཞིང་གྱེན་དུ་བརྫེས་པ་ཐོད་པ་ལྔ་དང་འཁོར་ལོ་ལ་སོགས་པས་བརྒྱན་པ་སྟག་གི་པགས་པ་གོན་པ་ཞབས་གཡས་བརྐྱང་བ་གཡོན་བསྐུམ་པས་གར་བྱེད་པའི་ [102a.7]ཚུལ་གྱིས་སྣ་ཚོགས་པདྨ་དང་ཐོད་པ་དང་ཉི་མ་ལ་བཞུགས་པའོ། །རིན་ཆེན་འབྱུང་ལྡན་དང་འོད་དཔག་མེད་དང་དོན་ཡོད་གྲུབ་པ་རྣམས་སྣ་ཚོགས་པདྨ་དང་ཐོད་པ་དང་ཉི་མའི་གདན་ལའོ། །ལྷ་གཞན་ཐམས་ཅད་ནི་སྣ་ཚོགས་པདྨ་དང་ཐོད་པ་ཟླ་བའི་གདན་ལ་གནས་པའོ། །ཐམས་ [102b] [102b.1]ཅད་ཀྱང་ཉི་མའི་འོད་ཟེར་ཅན་ཁོ་ནའོ། །འདིར་རྡོ་རྗེ་སེམས་དཔའ་ཁོ་ན་ཤེས་རབ་དང་བཅས་པ་སྟེ། ལྷ་གཞན་ཐམས་ཅད་ཤེས་རབ་མ་དང་བྲལ་བའོ་ཞེས་པ་ནི་ཕྱོགས་གཅིག་གོ། །རང་ལྟ་བུའི་ཤེས་རབ་མ་དང་བཅས་པ་ཞེས་པ་ནི་ཕྱོགས་གཉིས་པའོ། །རིགས་ཀྱི་བདག་པོ་ནི་རྡོ་རྗེ་ [102b.2]སེམས་དཔའ་ལ་སོགས་པའི་དེ་བཞིན་གཤེགས་པ་རྣམས་དང་མཱ་མ་ཀཱི་དང་སྒྲ་རྡོ་རྗེ་མ་དང་གླུ་མ་དང་རེག་བྱ་རྡོ་རྗེ་མ་དང་ཆོས་ཀྱི་དབྱིངས་ཀྱི་རྡོ་རྗེ་མ་རྣམས་ཀྱི་མི་བསྐྱོད་པའོ། །སྤྱན་མ་དང་རྡོ་རྗེ་དྲག་མོ་དང་སའི་རྡོ་རྗེ་མ་དང་མེ་ཏོག་མ་དང་། བཞད་མ་དང་གླིང་བུ་མ་དང་རྡོ་རྗེ་ལྕགས་ཀྱུ་མ་རྣམས་ཀྱི་རྣམ་ [102b.3]པར་སྣང་མཛད་དོ། །རྡོ་རྗེ་མཁའ་འགྲོ་མ་དང་རྡོ་རྗེ་སྐུ་མ་དང་རྡོ་རྗེ་བདུག་སྤོས་མ་དང་། སྒེག་མོ་དང་པི་ཝང་མ་དང་རྡོ་རྗེ་ཞགས་པ་མ་རྣམས་ཀྱི་རིན་འབྱུང་ངོ་། །གོས་དཀར་མོ་དང་རྡོ་རྗེ་ཆགས་པ་མ་དང་། མར་མེ་མ་དང་དྲི་ཆབ་མ་དང་མུ་ཀུནྡ་མ་དང་ལྕགས་སྒྲོག་མ་རྣམས་ཀྱི་སྣང་བ་མཐའ་ཡས་སོ། །སྒྲོལ་ [102b.4]མ་དང་རྡོ་རྗེ་ཞི་བ་མ་དང་རྡོ་རྗེ་གནོད་སྦྱིན་མ་དང་། གར་མ་དང་རོ་མ་དང་། རྫ་རྔ་མ་དང་དྲིལ་བུ་མ་རྣམས་ཀྱི་དོན་ཡོད་གྲུབ་པའོ། །ཐུགས་ཀའི་ས་བོན་ནི་རྡོ་རྗེ་སེམས་དཔའ་ལ་སོགས་པ་རྣམས་དཀྱིལ་འཁོར་ལོ་དགོད་པའི་རིམ་པས། ཧཱུཾ་བྲུཾ། ཨཱཾ་ཧཱིཿཁཾ་བྷྲཱུཾ། ཧཱུཾ་ཧྲཱིཿཏཾ་ཨཾ་ཨཱཾ་ཨིཾ་ཨཱིཾ་ཨུཾ་ཨཱུཾ་ཨཾ་ཨཱཿརཾ་ཧཱཾ། ཨཱིཾ་རཱཾ་ལཾ་ [102b.5]དྷཾ་ལིཾ། གཾ་བཾ་ལིཾ་ནཾ་རཾ། ཨོཾ་ཨོཾ་ཨེཾ་ཨཻཾ་ཛཿཧཱུཾ་བཾ་ཧོཿཞེས་པའོ། །རྡོ་རྗེ་སེམས་དཔའི་སྙིང་པོའི་སྔགས་ནི་ཨོཾ་བཛྲ་ཨ་མྲྀ་ཏ་མ་ཧཱ་སུ་ཁཾ་ཧཾ་སྭཱ་ཧཱ་ཞེས་པའོ། །རྡོ་རྗེ་དྲིལ་བུའི་སྔགས་ཨོཾ་ཨཱཿབཛྲ་གྷཎྜེ་ཧོཿཧཾ་སྭཱ་ཧཱ་ཞེས་པ་ནི་ལས་ཐམས་ཅད་པའོ། །རྫོགས་པའི་རིམ་པའི་རྣལ་འབྱོར་པ་ལ་ནི་འཁོར་ལོའི་གཙོ་བོའི་སྙིང་པོའི་ [102b.6]སྔགས་ཉིད་ཀྱིས་ལྷ་གཞན་རྣམས་ཀྱི་སྙིང་པོའི་སྔགས་ཀྱིས་བསྒྲུབ་བྱ་ཡང་འགྲུབ་པར་འགྱུར་བས་དེ་རྣམས་ནི་མ་བྲིས་ཏེ་གཞུང་མངས་པས་འཇིགས་པས་སོ། །དེ་བཞིན་དུ་ཐོག་མ་དང་ཐ་མ་ཡང་རིག་པར་བྱའོ། །ཡེ་ཤེས་མཁའ་འགྲོ་མའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་སྣ་ཚོགས་པདྨ་དང་ [102b.7]སྣ་ཚོགས་རྡོ་རྗེའི་ལྟེ་བར་གནས་པའི་གཞལ་ཡས་ཁང་གི་དབུས་སུ་གདུགས་དཀར་པོ་དང་བཅས་པའི་སེང་གེ་ལ་གནས་པའི་སྣ་ཚོགས་པདྨ་དང་ཉི་མར་ཡེ་ཤེས་མཁའ་འགྲོ་མ་སྔོན་མོའོ། །འདིའི་ཅོད་པན་དར་གྱིས་བཅིངས་པའི་སྟེང་དུ་རྡོ་རྗེས་མཚན་པ་སངས་རྒྱས་ལྔ་འོད་འཕྲོ་བས་བརྒྱན་ [103a] [103a.1]པ། རྩ་བའི་ཞལ་ཁྲོ་ཞིང་གད་རྒྱངས་དང་བཅས་པ། གཡས་དཀར་བ་བཞད་པ་དང་བཅས་པ། གཡོན་དམར་བ་སྒེག་པ་དང་བཅས་པ། ཞལ་རེ་རེ་ལ་སྤྱན་གསུམ་གསུམ་པ། གཡས་པའི་ཕྱག་གསུམ་ན་སྟེང་དུ་བསྟན་པའི་ཁ་ཊྭཱཾ་ག་དང་དགྲ་སྟ་དང་རྡོ་རྗེའོ། །གཡོན་གྱི་གསུམ་ [103a.2]ལ་དྲིལ་བུ་དང་ཁྲག་གིས་གང་བའི་ཐོད་པ་དང་རལ་གྲི་རྣམས་སོ། །འདིའི་ཤར་གྱི་ཕྱོགས་སུ་རྡོ་རྗེ་མཁའ་འགྲོ་མ་དཀར་མོ་སྒེག་པའི་ཉམས་དང་ལྡན་པའོ། །བྱང་ཕྱོགས་སུ་འཇིགས་བྱེད་མཁའ་འགྲོ་མ་གསེར་གྱི་མདོག་ཅན་ནོ། །ནུབ་ཏུ་རོ་ལངས་མ་དམར་མོའོ། །ལྷོ་ཕྱོགས་སུ་གཏུམ་མོ་སྔོན་མོའོ། [103a.3]བཞི་པོ་འདི་དག་ཀྱང་སེང་གེ་ལ་གནས་པའི་སྣ་ཚོགས་པདྨ་དང་ཉི་མ་ལ་གནས་པ་གཡས་པ་དང་ཅིག་ཤོས་ཀྱི་ཕྱག་གཉིས་ཀྱིས་སྟེང་དུ་བསྒྲེང་པའི་ཁ་ཊྭཱཾ་ག་དང་ཁྲག་གིས་བཀང་བའི་ཐོད་པ་འཛིན་པའོ། །དབང་ལྡན་དུ་སེང་གེ་མོ་ནི་སེང་གེའི་གདོང་པ་ཅན་གཡས་སེར་གཡོན་དཀར་བའི་ལུས་ཕྱེད་ཕྱེད་པ་གླང་པོ་ [103a.4]ཆེ་དཀར་པོའི་གདན་ལ་བཞུགས་པའོ། །མེའི་མཚམས་སུ་སྟག་མོ་སྟག་གི་གདོང་པ་ཅན་གཡོན་སྔོན་མོ་གཡས་དཀར་བ་ཕྱེད་ཕྱེད་ཀྱི་སྐུ་རིན་པོ་ཆེ་བདུན་གྱི་ཕུང་པོ་ལ་གནས་པའོ། །སྲིན་པོའི་མཚམས་སུ་ཅེ་སྤྱང་མ་ཅེ་སྤྱང་གི་གདོང་ཅན་གཡས་དམར་བ་གཡོན་ནག་པོའི་ལུས་ཕྱེད་ཕྱེད་པ་མ་ཧེ་ལ་ [103a.5]བཞུགས་པའོ། །རླུང་གི་མཚམས་སུ་འུག་པ་མོ་འུག་པའི་གདོང་ཅན་གཡོན་པ་དང་གཡས་པའི་ལུས་ཕྱེད་ཕྱེད་པ་སེར་པོ་དང་དམར་པོའོ། །ཀླུ་བརྒྱད་ཀྱི་གཞུག་མ་རྣམས་ལ་བཞུགས་པའོ། །བཞི་པོ་འདི་དག་ནི་གཡས་པ་དང་གཡོན་པའི་ཕྱག་གཉིས་རྡོ་རྗེ་ལྕགས་ཀྱུ་དང་སྡིགས་མཛུབ་དང་ [103a.6]བཅས་པའི་རྡོ་རྗེ་ཞགས་པས་བརྒྱན་ཅིང་སྣ་ཚོགས་པདྨ་དང་ཉི་མ་ལ་གནས་པའོ། །དེའི་ཤར་སྒོར་རྒྱལ་བའི་དབང་ཕྱུག་མ་དཀར་མོ་ཕྱག་གཉིས་ཀྱིས་ཐལ་མོ་ཁར་བཅུག་པའོ། །བྱང་དུ་གསལ་བྱེད་མ་སེར་མོ་མར་མེ་ལྟ་བུའི་ཐལ་མོ་ཁ་སྦྱར་བ་སྤྱི་བོར་འཛིན་པའོ། །ནུབ་ཏུ་འཇིགས་བྱེད་ [103a.7]མ་དམར་མོ་ཁྲག་གིས་གང་བའི་སྙིམ་པ་སྟེང་དུ་བྱས་ཏེ་ཁའི་ཐད་ཀར་བཟུང་ནས་ཁྲག་གི་རྒྱུན་འཐུང་བར་བྱེད་པའོ། །ལྷོར་ཀམྤོ་ཛི་ནག་པོ་རྡོ་རྗེའི་སྙིམ་པ་ལ་མཐེ་བོའི་རྩེ་མོ་གཉིས་ཕན་ཚུན་སྦྱར་ཏེ་སྡིགས་མཛུབ་གཉིས་ཀྱི་རྩེ་མོ་བརྐྱང་བ་སྦྱར་ནས་རང་གི་གསང་བའི་གནས་སྟོན་པར་ [103b] [103b.1]བྱེད་པའོ། །བཞི་པོ་འདི་དག་ནི་སྣ་ཚོགས་པདྨ་ལ་གནས་པའི་ཡི་དྭགས་ཀྱི་སྙིང་གར་ཉི་མའི་གདན་ལ་བཞུགས་པའོ། །རྡོ་རྗེ་མཁའ་འགྲོ་མ་ལ་སོགས་པ་བཅུ་གཉིས་ནི་ཞལ་གཅིག་ལ་སྤྱན་གསུམ་པའོ། །ལྷ་མོ་བཅུ་གསུམ་པོ་ཐམས་ཅད་ཀྱང་ལྷའི་གོས་དམར་པོ་མནབས་པ་དབུ་ [103b.2]ལ་ཐོད་པ་ལྔའི་ཕྲེང་བ་དང་བཅས་པའི་ཕྱག་རྒྱ་ལྔ་དང་ལྡན་པ་སེམས་དཔའི་སྐྱིལ་ཀྲུང་ཅན་ཀླུའི་རྒྱལ་པོ་བརྒྱད་ཀྱིས་རྣམ་པར་བརྒྱན་པ་བསྐལ་པའི་མཐའི་མེ་འབར་བའི་འོད་ལྟ་བུའི་འོད་ཟེར་གྱི་ཚོགས་ཀྱིས་འཇིགས་པར་བྱེད་པ་གོ་རིམས་བཞིན་དུ་མི་བསྐྱོད་པ་དང་རྣམ་པར་སྣང་མཛད་དང་རིན་ [103b.3]ཆེན་འབྱུང་ལྡན་དང་སྣང་བ་མཐའ་ཡས་དང་། དོན་ཡོད་གྲུབ་པ་དང་མི་བསྐྱོད་པ་དང་། རྣམ་སྣང་དང་རིན་འབྱུང་དང་སྣང་མཐའ་དང་། རྟག་པ་དང་འོད་དཔག་མེད་དང་། དོན་ཡོད་གྲུབ་པ་རྣམས་ཀྱིས་རྒྱས་བཏབ་པའོ། །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཨཱཾ་ཨཱིཾ་ཨཱུཾ་རཱྀཾ་ལཱྀཾ་ཨཻཾ་ཨཽཾ་ཨཱཿའདི་རྣམས་ནི་ཐུགས་ཀའི་ས་ [103b.4]བོན་རྣམས་སོ། །ཨོཾ་ཧྲཱིཿསྭཱ་ཧཱ། ཞེས་བྱ་བ་ནི་ཡེ་ཤེས་མཁའ་འགྲོ་མའི་སྙིང་པོའི་སྔགས་སོ། །ཨོཾ་བེ་ཏཱ་ལཱི་ཧཱུཾ་སྭཱ་ཧཱ། ཞེས་བྱ་བ་ནི་རོ་ལངས་མའི་སྔགས་ཏེ་ལས་ཐམས་ཅད་པའོ།། །།བཅུ་བདུན་གྱི་བདག་ཉིད་ཀྱི་ཀྱེ་རྡོ་རྗེའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དཀྱིལ་ན་གནས་ [103b.5]པའི་གཞལ་ཡས་ཁང་གི་དབུས་སུ་སྣ་ཚོགས་པདྨའི་ཟེ་འབྲུ་ལ་གནས་པའི་རོའི་སྙིང་གར་གནས་པའི་ཁྲག་གིས་གང་བའི་ཐོད་པའི་སྟེང་དུ་ཉི་མ་ལ་ཀྱེའི་རྡོ་རྗེ་རྣམ་པ་གསུམ་མོ། །བཞི་པ་ལ་ནི་རོ་དང་བྲལ་བའོ། །དེ་ལ་འཇིག་རྟེན་གསུམ་ཀུན་དུ་བསྐྱོད་པ་ནག་པོ་སྣ་ཚོགས་རྡོ་རྗེས་མཚན་པའི་དབུ་སྐྲ་ཁམ་སེར་ [103b.6]གྱེན་དུ་བཛེེས་པ་ཐོད་པ་ལྔ་དང་ཕྱག་རྒྱ་དྲུག་དང་། མི་མགོ་རློན་པའི་ཕྲེང་བས་བརྒྱན་པའོ། །རྒྱབ་ཀྱི་ཆར་སྟག་གི་པགས་པའི་སྨད་དཀྲིས་ཅན་ཞབས་གཡོན་པའི་བརླ་ལ་གཡས་པའི་ཞབས་ཀྱི་རྩེ་མོ་ཡང་དག་པར་བཞག་པའི་སྐྱིལ་ཀྲུང་ཕྱེད་པས་གནས་པ་སྤྱན་གསུམ་དམར་ལ་ཟླུམ་པ་ཞལ་གཅིག་ཕྱག་ [103b.7]གཉིས་པ་ཕྱག་གཡོན་པས་ཐོད་པ་ཁྲག་གིས་གང་བ་རྡོ་རྗེས་མཚན་པ་འཛིན་པ། འཆད་པར་འགྱུར་བའི་རང་བཞིན་གྱིས་བདག་མེད་མ་ལ་འཁྱུད་པ། ཕྱག་གཡས་པ་རྡོ་རྗེ་རྩེ་ལྔ་པའི་དབྱུག་པ་བརྡེག་པའི་ཚུལ་གྱིས་འཛིན་པའོ། །ཡང་ན་ཕྱག་བཞི་པ་ཕྱག་གཉིས་པ་ལྟ་བུ་ཕྱག་གཞན་གཉིས་ཀྱིས་ [104a] [104a.1]བདག་ཉིད་ལྟ་བུའི་རྡོ་རྗེ་ཕག་མོ་ལ་ཡང་དག་པར་འཁྱུད་པའོ་ཞེས་བྱ་བ་འདི་ནི་ཁྱད་པར་རོ། །ཡང་ན་ཕྱག་དྲུག་པ་ནག་པོ་ཞལ་གསུམ་པ་ནག་པོ་དང་དཀར་པོ་དང་དམར་པོ། ཞལ་རེ་རེ་ལ་སྤྱན་གསུམ་པ་རལ་པའི་ཅོད་པན་གྱིས་བརྒྱན་པ་ཕྱག་གཡས་པ་རྣམས་ནི་རྡོ་རྗེ་དང་མདའ་དང་རྩེ་གསུམ་ [104a.2]པ་འཛིན་པ། གཡོན་པ་རྣམས་ཀྱིས་རྡོ་རྗེ་དྲིལ་བུ་དང་གཞུ་དང་ཐོད་པའོ། །རྡོ་རྗེ་དང་རྡོ་རྗེ་དྲིལ་བུ་དང་ལྡན་པའི་ཕྱག་གཉིས་ཀྱིས་བདག་ཉིད་ལྟ་བུའི་རྡོ་རྗེ་ལུ་གུ་རྒྱུད་མ་ལ་འཁྱུད་པ་སྟེ། གཞན་ནི་ཇི་ལྟར་རིགས་པར་སྔ་མ་བཞིན་ནོ། །ཧེ་རུ་ཀ་འདི་གསུམ་གྱི་ཤར་ལ་སོགས་པའི་འདབ་མ་བརྒྱད་ལ་རྡོ་རྗེ་ལྷ་ [104a.3]མོ་ལ་སོགས་པ་བརྒྱད་དོ། །དེ་དག་གི་ཕྱི་རོལ་དུ་དབང་ལྡན་ལ་སོགས་པའི་མཚམས་སུ་གླིང་བུ་མ་དང་པི་ཝང་མ་དང་མུ་ཀུཎྜ་མ་དང་རྫ་རྔ་མ་རྣམས་སོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་རྡོ་རྗེ་དྲིལ་བུ་མ་རྣམས་སོ། །ལྷ་མོ་ [104a.4]བཅུ་དྲུག་པོ་འདི་རྣམས་ནི་གང་བཞིན་ཏེ། ཡབ་དང་བྲལ་བའོ། །ཧེ་རུ་ཀ་གསུམ་གྱི་རིགས་ཀྱི་བདག་པོ་མི་བསྐྱོད་པའོ། །ཐུགས་ཀའི་ས་བོན་ཧཱུཾ་ངོ་། །སྙིང་པོའི་སྔགས་ནི་ཨོཾ་ཨཱཿཧཱུཾ་ཧྲཱིཿསྭཱ་ཧཱ། སོ་སོའི་སྔགས་ནི་རིམ་པ་བཞིན་དུ་ཨོཾ་ཏྲཻ་ལོཀྱཱ་ཀྵེ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཛྭ་ལ་བྷྱོ་ཧཱུཾ་ཧཱུཾ་ཧཱུཾ་ཕཊ་ [104a.5]སྭཱ་ཧཱ། ཨོཾ་ཀི་ཊི་ཀི་ཊི་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་སོ། །ཀྱེའི་རྡོ་རྗེ་བཞི་པ་ནི་ཕྱག་བཅུ་དྲུག་པ་མི་བསྐྱོད་པས་རྒྱས་བཏབ་པ་བདག་མེད་པ་དང་སྙོམས་པར་འཇུག་པ། འོན་ཀྱང་འདི་ལ་གོང་དུ་བཤད་པའི་རོའི་གནས་སུ་བདུད་བཞི་སྟེ། དེ་ལ་ཕུང་པོའི་བདུད་ཀྱི་རང་བཞིན་ཚངས་པ་སེར་པོ། ཉོན་ [104a.6]མོངས་པའི་བདུད་ཁྱབ་འཇུག་ནག་པོ། འཆི་བདག་གི་བདུད་དབང་ཕྱུག་ཆེན་པོ་དཀར་པོ། ལྷའི་བུའི་བདུད་ནི་བརྒྱ་བྱིན་ཁམ་སེར་རོ། དེར་བཅོམ་ལྡན་འདས་ཞབས་བཞི་བའི་ཞབས་གཉིས་ཀྱིས་རྡོ་རྗེའི་སྐྱིལ་ཀྲུང་ཕྱེད་པ་རང་གཞན་གཉིས་ཀྱིས་ནི་གཡོན་བསྐུམ་པ་དང་གཡས་བརྐྱང་བས་བཞུགས་ [104a.7]པ། སྐུ་མདོག་ནག་པོ་དང་སྣ་ཚོགས་རྡོ་རྗེ་ལ་སོགས་པ་ནས་སྟག་གི་པགས་པའི་བར་དུ་སྔར་བཤད་པའི་ཁྱད་པར་དང་ལྡན་པ་ཞལ་བརྒྱད་པ་སྤྱན་ཉི་ཤུ་རྩ་བཞི་པ་རྩ་བའི་ཞལ་ནག་པོ་གད་མོ་ཅན་གཡས་པ་དཀར་པོ་གཡོན་དམར་པོ་སྟེང་དུ་གནས་པའི་མཆེ་བ་གཙིགས་པ་ལྷག་མ་རྣམས་ནི་ [104b] [104b.1]ནག་པོའོ། །གཡས་པའི་ཕྱག་རྣམས་ནི་རྡོ་རྗེ་དང་རལ་གྲི་དང་མདའ་དང་འཁོར་ལོ་དང་ཐོད་པ་དང་དབྱུག་པ་དང་རྩེ་གསུམ་པ་དང་ལྕགས་ཀྱུ་རྣམས་སོ། །གཡོན་པ་རྣམས་སུ་དྲིལ་བུ་དང་པདྨ་དང་གཞུ་དང་ཁ་ཊྭཱཾ་ག་བསྒྲེང་བ་དང་ཐོད་པ་དང་རིན་པོ་ཆེ་དང་སྡིགས་མཛུབ་དང་ཞགས་པའོ། །ཤར་ [104b.2]གྱི་འདབ་མར་གཽ་རཱི་དཀར་སེར་ཕྱག་གཡས་པ་གཉིས་ན་མདའ་ཕྱུང་བ་དང་རྡོ་རྗེ་གྲི་གུག་གོ། །གཡོན་གཉིས་ན་གཞུ་དང་ཉ་རོ་ཧི་ཏ་དང་བཅས་པའི་ཁྲག་གིས་གང་བའི་ཐོད་པའོ། །ལྷོར་ཙཽ་རཱི་དམར་མོ་རྡོ་རྗེ་དང་ཌ་མ་རུ་དང་ལྕགས་ཀྱུ་དང་ཕག་པ་དང་བཅས་པའི་ཐོད་པ་ཁྲག་གིས་གང་བའོ། །ནུབ་ཏུ་ [104b.3]རོ་ལངས་མ་ནི་སྐུ་མདོག་དཀར་སེར་རལ་གྲི་དང་རུས་སྦལ་དང་བཅས་པའི་ཐོད་པ་ཁྲག་གིས་གང་བ་དང་ཆང་གིས་གང་བའི་ཐོད་པ་དང་དྲི་ཆུས་གང་བའི་ཐོད་པའོ། །བྱང་དུ་གྷསྨ་རཱི་ལྗང་གུ་ཅུང་ཟད་སེར་བ་རྐང་མར་གྱིས་གང་བའི་ཐོད་པ་ལ་གནས་པའི་སྦྲུལ་དང་མི་འཇིགས་པའི་ཕྱག་རྒྱ་དང་རྡོ་རྗེས་ [104b.4]མཚན་པའི་མེ་ཐབ་དང་དགྲ་སྟའོ། །དབང་ལྡན་དུ་པུཀྐ་སཱི་སེར་མོ་ཤས་གང་བའི་ཐོད་པ་ལ་གནས་པའི་སེང་གེ་དང་མཆོག་སྦྱིན་གྱི་ཕྱག་རྒྱ་དང་དཔག་བསམ་ཤིང་གི་ཡལ་ག་དང་རིན་པོ་ཆེའོ། །མེའི་མཚམས་སུ་ཤ་བ་རཱི་དཀར་མོ་བྱང་ཆུབ་སེམས་ཀྱིས་གང་བའི་ཐོད་པར་གནས་པའི་དགེ་སློང་དང་རྡོ་རྗེ་དང་ཁ་ [104b.5]ཊྭཱཾ་ག་དང་ཞགས་པའོ། །སྲིན་པོའི་མཚམས་སུ་ཙཎྜཱ་ལཱི་སྔོན་མོ་གཡས་སུ་ཁྲག་གིས་གང་བའི་ཐོད་པ་ལ་སྟག་དང་གཡོན་དུ་པདྨ་དཀར་པོ་དང་ཕྱག་གཉིས་ན་རླུང་རས་སོ། །རླུང་གི་མཚམས་སུ་ཌོཾ་བི་ནཱི་ནག་མོ་ཆང་གིས་གང་བའི་ཐོད་པ་དང་རྩེ་གསུམ་པ་གྱེན་དུ་བསྟན་པ་དང་བདུད་རྩི་ལྔས་གང་བའི་ཐོད་པ་ལ་ [104b.6]གནས་པའི་ཅེ་སྤྱང་དང་གཤོལ་ལོ། །དེ་དག་གི་ཕྱིའི་ཟུར་རྣམས་སུ་གླིང་བུ་མ་ལ་སོགས་པ་བཞི་སྔ་མ་བཞིན་དུའོ། །ཤར་གྱི་སྒོ་རུ་རྟ་གདོང་མ་ནག་མོ་ཞལ་རྣམས་ནག་མོ་དང་དཀར་མོ་དང་སེར་མོ་དང་སྟེང་གི་རྟ་གདོང་ལྗང་གུའོ། །ལྷོ་རུ་ཕག་གདོང་མ་སེར་མོ་ཞལ་རྣམས་ནི་སེར་མོ་དང་ནག་མོ་དང་ [104b.7]དཀར་མོའི་སྟེང་དུ་ཕག་ཞལ་དམར་པོའོ། །ནུབ་ཏུ་ཁྱི་གདོང་མ་དམར་པོ་ཞལ་རྣམས་ནི་དམར་མོ་དང་ནག་མོ་དང་དཀར་མོའི་སྟེང་དུ་ཁྱི་གདོང་སེར་པོའོ། །བྱང་སྒོར་སེང་གདོང་མ་ལྗང་གུ་ཞལ་རྣམས་ནི་ལྗང་གུ་དང་ནག་མོ་དང་དཀར་མོའི་སྟེང་དུ་སེང་གེའི་གདོང་པ་དམར་པོའོ། །འདི་ལྟར་རྩ་བ་ [105a] [105a.1]དང་གཡས་པ་དང་ཅིག་ཤོས་དང་སྟེང་གི་རིམ་པས་ཞལ་བཞི་པའོ། །སྒོ་སྐྱོང་མ་རྣམས་ཕྱག་བཞི་པ་རྡོ་རྗེ་ལྕགས་ཀྱུ་མ་ལ་སོགས་པ་བཞིན་དུ་ཕྱག་མཚན་འཛིན་པ་སྣ་ཚོགས་པདྨ་དང་ཁྲག་གིས་གང་བའི་ཐོད་པ་ལ་གནས་པའི་རོའི་སྟེང་དུ་གཡས་བསྐུམ་པ་དང་གཡོན་བརྐྱང་བས་ [105a.2]གནས་པ་དབུ་སྐྲ་དམར་སེར་གྱེན་དུ་བརྫེས་པའོ། །ལྷ་གཞན་རྣམས་ནི་སྐྱིལ་ཀྲུང་ཕྱེད་པ་དང་ལྡན་པ། ཐམས་ཅད་ཀྱང་ཞལ་རེ་རེ་ཞིང་སྤྱན་གསུམ་པ་ཕྱག་རྒྱ་ལྔ་ལ་སོགས་པས་བརྒྱན་པ་ཡབ་མེད་པའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ་། །སྙིང་པོའི་སྔགས་ནི། ཨོཾ་དེ་ཝ་པི་ཙུ་བཛྲ་ [105a.3]ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའོ། །གྷསྨ་རཱིའི་ཨོཾ་ཨོཾ་སྭཱ་ཧཱ། ཞེས་པ་ནི་ལས་ཐམས་ཅད་པའི་སྔགས་སོ། །བདག་མེད་མའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དབུས་སུ་གནས་པའི་གཞལ་ཡས་ཁང་གི་ནང་དུ་སྣ་ཚོགས་པདྨའི་ལྟེ་བར་བདག་མེད་པའོ། །ཤར་ལ་སོགས་པའི་ཕྱོགས་ [105a.4]ཀྱི་པདྨའི་འདབ་མར་རྡོ་རྗེ་མ་དང་གཽ་རཱི་མ་དང་ཆུ་མ་དང་རྡོ་རྗེ་མཁའ་འགྲོ་མ་རྣམས་སོ། །རིམ་པ་གཉིས་པར་སྣ་ཚོགས་པདྨ་རྣམས་ལ་ཤར་ལ་སོགས་པར་གཽ་རཱི། ཙཽ་རཱི་བེེ་ཏཱ་ལཱི་གྷསྨ་རཱི་རྣམས་སོ། །དབང་ལྡན་ལ་སོགས་པར་པུཀྐ་སཱི་དང་ཤ་བ་རཱི་དང་ཙནྜ་ལཱི་དང་ཌོཾ་བི་ནཱི་རྣམས་སོ། །བདག་མེད་མའི་སྟེང་གི་ [105a.5]ཤར་ངོས་ཀྱི་པདྨ་ལ་གནས་པའི་མཁའ་སྤྱོད་མ་སྟེང་ཞལ་ཅན་ནོ། །འོག་གི་ནུབ་ངོས་ཀྱི་པདྨ་ལ་གནས་པའི་ས་སྤྱོད་མ་འོག་ཞལ་ཅན་ནོ། །འདིར་ཕྱི་མ་ལ་གནས་པའི་གཽ་རཱི་ལ་སོགས་པ་བརྒྱད་ནི་ཕྱག་བཅུ་དྲུག་པའི་དཀྱིལ་འཁོར་ལྟ་བུར་སེར་པོ་ལ་སོགས་པའི་མདོག་ཅན་ནོ། །གཞན་བདུན་ [105a.6]ནི་སྔོན་མོའོ། །བཅོ་ལྔ་པོ་ཡང་སྐྱིལ་ཀྲུང་ཕྱེད་པས་རོའི་སྙིང་གར་གནས་པའི་ཟླ་བའི་དཀྱིལ་འཁོར་ལ་གནས་པའོ། །ཞལ་གཅིག་པ་སྤྱན་གསུམ་པ་དམར་བ་དབུ་སྐྲ་དམར་སེར་གྱེན་དུ་བརྫེས་པ་སྟག་གི་པགས་པའི་ཤམ་ཐབས་ཅན་ཕྱག་བཞི་པ་གཡས་དག་གིས་རྡོ་རྗེ་དང་གྲི་གུག་གོ། ། [105a.7]གཡོན་པ་དག་གིས་ཐོད་པ་དང་། གྱེན་དུ་བསྒྲེང་བའི་ཁ་ཊྭཱཾ་ག་འཛིན་པའོ། །དབུ་ལ་ཐོད་པ་ལྔའི་ཕྲེང་བས་བརྒྱན་པ། ཕྱག་རྒྱ་ལྔ་དང་ལྡན་པའོ། །ཟུར་རྣམས་ལ་གླིང་བུ་མ་ལ་སོགས་པ་བཞི་ནི་སྔ་མ་བཞིན་ནོ། །ཤར་གྱི་སྒོར་རྟ་གདོང་མ་དཀར་སྔོ། ལྷོར་ཕག་གདོང་མ་སེར་སྔོ། ནུབ་ཏུ་ [105b] [105b.1]ཁྱི་གདོང་མ་དམར་སྔོ། བྱང་དུ་སེང་གདོང་མ་ལྗང་སྔོ། བཞི་པོ་འདི་དག་ཀྱང་གཡས་བརྐྱང་གཡོན་བསྐུམ་གྱིས་ཉི་མ་ལ་གནས་པའོ། །གཡས་དང་གཡོན་པའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་མིང་གིས་རྗེས་སུ་མཐུན་པའི་ཞལ་གཅིག་མ་ཕྱག་གཉིས་གཉིས་དང་ལྡན་པའོ། ། [105b.2]འདི་དག་གི་ཁྱད་པར་ནི་བདག་མེད་མ་དང་མཚུངས་པའོ། །བདག་མེད་མ་ལ་སོགས་པ་རྣམས་ལ་གོ་རིམས་བཞིན་དུ་མི་བསྐྱོད་པ་དང་རྟག་པ་དང་། རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་དང་མི་བསྐྱོད་པ་དང་། རྟག་པ་དང་རིན་ཆེན་འབྱུང་ལྡན་དང་། སྣང་བ་མཐའ་ [105b.3]ཡས་དང་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་སྣང་བ་མཐའ་ཡས་དང་རྣམ་པར་སྣང་མཛད་དང་མི་བསྐྱོད་པ་རྣམས་ཀྱིས་རྒྱས་བཏབ་པའོ། །གླིང་བུ་མ་ལ་སོགས་པ་དང་སྟག་གདོང་མ་ལ་སོགས་པ་རྣམས་ལ་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་ [105b.4]དོན་ཡོད་གྲུབ་པ་རྣམས་ཀྱིས་སོ། །བདག་མེད་མའི་ཐུགས་ཀའི་ས་བོན་ནི་ཨཱཾ། ཨོཾ་ཨཾ་སྭཱ་ཧཱ། ཞེས་བྱ་བ་ནི་གྷསྨ་རཱིའི་སྔགས་ཏེ་ལས་ཐམས་ཅད་པའོ། །ཡང་ན་བདག་མེད་མ་ལ་སོགས་པ་ལྷ་མོ་བཅོ་ལྔའི་བདག་ཉིད་ཀྱི་དཀྱིལ་འཁོར་རོ། །དེ་ལ་ལྷ་མོ་ཐམས་ཅད་སྐུ་མདོག་ནག་མོ་གཡས་གཡོན་ [105b.5]གྱི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་མཆོད་ཕྱིར་ཐོགས་པ་འདྲ་བའི་ཁ་ཊྭཱཾ་ག་དང་བཅས་པའོ། །གཞན་རྣམས་ནི་གོང་མ་བཞིན་ནོ། །ཨོཾ་ཨཱཿབཛྲ་གྷསྨ་རཱི་ཨོཾ་ཧཱུཾ་སྭཱ་ཧཱ། ཞེས་བྱ་བ་ནི་གྷསྨ་རཱིའི་སྔགས་སོ།། །།གང་གི་ཚེ་དཀྱིལ་འཁོར་གྱི་བདག་པོ་ཀུ་རུ་ཀུལླེ་དམར་མོ་ཕྱག་བཞི་མ་གཡས་ [105b.6]གཉིས་ཀྱིས་མདའ་དང་ལྕགས་ཀྱུ་འཛིན་པ། གཡོན་གཉིས་ཀྱིས་ཨུཏྤལ་ལ་དམར་པོ་དང་གཞུ་འཛིན་པ་ཞལ་གཅིག་པ་སྤྱན་གསུམ་པ་སྣང་བ་མཐའ་ཡས་ཀྱིས་རིགས་ཀྱི་བདག་པོ་བྱས་པ། རྡོ་རྗེ་མ་ལ་སོགས་པ་བཅུ་བཞི་སྐུ་མདོག་དམར་མོ་ཕྱག་གཉིས་ཀྱིས་མདའ་དང་གཞུ་འཛིན་པ་བཅོ་ལྔ་པོ་ [105b.7]ཐམས་ཅད་ཀྱང་པདྨ་དམར་པོ་དང་རོའི་སྙིང་གར་ཟླ་བ་ལ་སྐྱིལ་ཀྲུང་ཕྱེད་པས་གནས་པའོ། །ཀུ་རུ་ཀུལླེའི་སྙིང་གའི་ས་བོན་ནི་ཧྲཱིཿཨོཾ་ཀུ་རུ་ཀུ ལླེ་ཧྲཱིཿསྭཱ་ཧཱ། ཞེས་བྱ་བ་ནི་སྙིང་པོའི་སྔགས་སོ། །གཞན་ནི་སྔར་བཞིན་དུ་སྟེ་དེའི་ཚེ་ཀུ་རུ་ཀུལླེའི་དཀྱིལ་འཁོར་དུ་འགྱུར་རོ། །རྡོ་རྗེ་བདུད་རྩིའི་དཀྱིལ་འཁོར་ [106a] [106a.1]ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དབུས་སུ་གནས་པའི་གཞལ་ཡས་ཁང་གི་དབུས་སུ་སྣ་ཚོགས་པདྨའི་ཟེ་འབྲུར་ཟླ་བ་ལ་དཔལ་རྡོ་རྗེ་བདུད་རྩི་སེམས་དཔའི་སྐྱིལ་ཀྲུང་གིས་གནས་པ་མེ་ཏོག་ཕྲི་ཡང་ཀུ་ལྟ་བུ་ལྗང་སེར། རྩ་བ་དང་གཡས་པ་དང་གཡོན་པའི་ཞལ་གསུམ་མེ་ཏོག་པྲི་ཡང་ [106a.2]ཀུ་ལྟ་བུ་ལྗང་སེར་དང་དཀར་པོ་དང་དམར་པོ་སྣ་ཚོགས་པའི་ལག་གདུབ་དང་རྐང་གདུབ་ལ་སོགས་པ་དང་གོས་རྣམས་ཀྱིས་བརྒྱན་པ་ཕྱག་དྲུག་པ་རྡོ་རྗེ་དང་དྲིལ་བུར་བཅས་པའི་ཕྱག་གཉིས་ཀྱིས་རང་འོད་ཀྱི་ཤེས་རབ་མ་ལ་འཁྱུད་པ་གཡས་པ་གཉིས་ཀྱིས་འཁོར་ལོ་དང་རལ་གྲི། གཡོན་པ་གཉིས་ཀྱིས་ཞགས་ [106a.3]པ་དང་ལྕགས་ཀྱུ་འཛིན་པ་འོད་དམར་པོའི་དཀྱིལ་འཁོར་ཅན་ཞི་བ་དང་སྒེག་པའི་ཉམས་ཀྱི་ཚོགས་ཅན་ནོ། །ཤར་གྱི་འདབ་མར་ཞི་བ་མོ་དཀར་མོ་ཞལ་གསུམ་ནི་དཀར་བ་དང་ནག་པ་དང་དམར་བའོ། །ལྷོར་ཞི་གདོང་མ་སེར་མོ་ཞལ་གསུམ་ནི་སེར་པོ་དང་། དཀར་པོ་དང་དམར་པོའོ། །ནུབ་ཏུ་ཟླ་ལྡན་མ་དམར་མོ་ཞལ་ [106a.4]གསུམ་ནི་དམར་པོ་དང་ནག་པོ་དང་དཀར་པོའོ། །བྱང་དུ་རི་བོང་ཅན་མ་ལྗང་གུ་ཞལ་གསུམ་ནི་ལྗང་གུ་དང་དཀར་པོ་དང་དམར་པོའོ། །མེའི་མཚམས་སུ་ཟླ་དཀྱིལ་མ་སྔོན་མོ་ཞལ་གསུམ་ནི་སྔོན་མོ་དང་དཀར་པོ་དང་དམར་པོའོ། །བདེན་བྲལ་དུ་ཟླ་ཚེས་མ་མེ་ཏོག་པྲི་ཡང་ཀུ་ལྟ་བུ་ལྗང་སེར་ [106a.5]མོ་ཞལ་གསུམ་ནི་ལྗང་སེར་དང་དཀར་པོ་དང་དམར་པོའོ། །རླུང་དུ་ཡིད་འོང་མ་ཨུཏྤལ་སྔོན་མོའི་མདོག་ཅན་ཞལ་གསུམ་ནི་སྔོན་མོ་དང་དཀར་པོ་དང་དམར་པོའོ། །དབང་ལྡན་དུ་ཡིད་ཚིམ་བྱེད་མ་གསེར་གྱི་མདོག་ཅན་མ་ཞལ་གསུམ་ནི་སེར་པོ་དང་དཀར་པོ་དང་དམར་པོའོ། ལྷ་མོ་འདི་རྣམས་ནི་དཀྱིལ་ [106a.6]འཁོར་གྱི་གཙོ་བོའི་ཕྱག་མཚན་ལྟ་བུ་འཛིན་པའོ། །འོན་ཀྱང་འཁོར་ལོའི་གནས་སུ་ཟླ་བའི་དཀྱིལ་འཁོར་འཛིན་པའོ། །ཟླ་ཚེས་མ་ནི་ཟླ་བའི་ཆ་གཅིག་འཛིན་པའོ། །རིམ་པ་གཉིས་པར་དབང་ལྡན་གྱི་མཚམས་སུ་མེ་ཏོག་མ་དཀར་པོ་ནི་ཞལ་གསུམ་པ་དཀར་པོ་དང་ནག་པོ་དང་དམར་པོའོ། ། [106a.7]མེར་བདུག་སྤོས་མ་དུ་བའི་མདོག་ཅན་ཞལ་གསུམ་པ་དུ་བའི་མདོག་དང་དཀར་བ་དང་དམར་བའོ། །བདེན་བྲལ་དུ་མར་མེ་མ་གསེར་གྱི་མདོག་ཅན་མ་ཞལ་གསུམ་པ་གསེར་མདོག་དང་དཀར་པོ་དང་ནག་པོའོ། །རླུང་དུ་དྲི་ཆབ་མ་དམར་མོ་ཞལ་གསུམ་པ་དམར་པོ་དང་ནག་པོ་དང་དཀར་པོའོ། ། [106b] [106b.1]འདི་རྣམས་ནི་གོ་རིམས་བཞིན་དུ་གཡས་ཀྱི་དང་པོས་མེ་ཏོག་གི་ཟ་མ་ཏོག་དང་སྤོས་ཕོར་དང་མར་མེའི་མཆོད་སྡོང་དང་དྲིའི་དུང་ཆོས་འཛིན་པའོ། །ཕྱག་ལྷག་མ་རྣམས་ཀྱིས་གཙོ་བོའི་ཕྱག་མཚན་འཛིན་པའོ། །ཤར་ལ་སོགས་པའི་སྣམ་བུ་ལ་གླིང་བུ་མ་དང་པི་ཝང་མ་དང་མུ་ཀུནྡ་མ་དང་རྫ་རྔ་མ་རྣམས་ནི་ [106b.2]དམར་པོ་དང་སེར་པོ་དང་དཀར་པོ་དང་དུ་བའི་མདོག་ཅན་གྱི་ཞལ་གཅིག་མ་ཕྱག་གཉིས་ཀྱིས་གླིང་བུ་ལ་སོགས་པའི་སྒྲ་སྒྲོགས་པར་བརྩོན་པའོ། །ཤར་གྱི་སྒོར་ཁྲོ་གཉེར་རིམ་པར་ལྡན་མ་སྔོན་པོ་ནམ་མཁའ་ལྟ་བུ་སྔོན་པོ་དང་དཀར་པོ་དང་དམར་པོའི་ཞལ་གསུམ་མོ། །ལྷོའི་སྒོར་འཇིགས་སྡིགས་དཀར་པོ་ [106b.3]འཇིགས་སུ་རུང་བ་དཀར་པོ་དང་ནག་པོ་དང་དམར་པོའི་ཞལ་གསུམ་མོ། །ནུབ་སྒོར་རྟའི་གཟུགས་ཅན་དམར་མོ་དམར་པོ་དང་དཀར་པོ་དང་ནག་པོའི་ཞལ་གསུམ་མོ། །བྱང་སྒོར་ཚོགས་ཀྱི་གཙོ་བོ་ལྗང་གུ་ལྗང་གུ་དང་དཀར་པོ་དང་དམར་པོའི་ཞལ་གསུམ་པའོ། །འདི་དག་ནི་འགྱིང་བའི་ཁྲོ་བོ་འགྱིང་བའི་སྟང་སྟབས་ཀྱིས་ [106b.4]བཞུགས་པ་དཀྱིལ་འཁོར་གྱི་གཙོ་བོའི་ཕྱག་མཚན་འཛིན་པའོ། །ཁྱད་པར་ནི་གཡས་དང་པོའི་ཕྱག་གིས་རིམ་པ་ཇི་ལྟ་བར་ལྕགས་ཀྱུ་དང་ཞགས་པ་དང་། ལྕགས་སྒྲོག་དང་དྲིལ་བུ་འཛིན་པ་མཆེ་བ་ཅུང་ཟད་གཙིགས་པའོ། །འདིར་དཀྱིལ་འཁོར་གྱི་གཙོ་བོའི་གཟུགས་བརྙན་ནི་དེ་བཞིན་གཤེགས་པ་ལྔ་ [106b.5]དང་རྡོ་རྗེས་མཚན་པའི་རིན་པོ་ཆེ་སྣ་ཚོགས་པའི་ཅོད་པན་དང་ལྡན་པའོ། །དེ་ལས་གཞན་པའི་ལྷ་ཉི་ཤུ་པ་རྣམས་ནི་རྡོ་རྗེ་དང་བདུད་རྩི་དང་པོ་ཏིས་མཚན་པའི་རིན་པོ་ཆེའི་ཅོད་པན་ཅན་ཟླ་བའི་དཀྱིལ་འཁོར་ལ་གནས་པ། དཀྱིལ་འཁོར་གྱི་གཙོ་བོ་ལྟ་བུ་རིན་པོ་ཆེ་སྣ་ཚོགས་ཀྱི་རྒྱན་གྱིས་བརྒྱན་པ་ལ་སོགས་ [106b.6]པའོ། །མེ་ཏོག་མ་ལ་སོགས་པ་བཅུ་གཉིས་པ་རྣམས་ཀྱི་ཟླ་བའི་འོག་ཏུ་སྣ་ཚོགས་པདྨའོ། །རྡོ་རྗེ་བདུད་རྩིའི་ཐུགས་ཀའི་ས་བོན་ནི་ཧཿའོ། །ཨོཾ་ཧཿབཛྲ་ཨ་མྲྀ་ཏ་སྭཱ་ཧཱ། ཞེས་བྱ་བ་ནི་སྙིང་པོའི་སྔགས་སོ། །ལས་ཐམས་ཅད་པའི་སྔགས་ཀྱང་འདི་ཉིད་ཡིན་ནོ། །རྡོ་རྗེ་བདུད་རྩི་གཞན་རྣམ་པ་ [106b.7]གསུམ་པོ་འདི་ལྟར་བསྒོམ་པའི་ཁྱད་པར་གྱི་རིམ་པ་ནི་རྡོ་རྗེ་བདུད་རྩིའི་རྒྱུད་ཉིད་ལས་ཤེས་པར་བྱའོ། །མངས་པས་འཇིགས་པས་འདིར་མ་བཤད་དོ།། །།དགུའི་བདག་ཉིད་ཀྱི་དགྱེས་པ་རྡོ་རྗེ་རྣམ་པ་བཞིའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་གནས་པའི་ཆོས་འབྱུང་ལ་གནས་པའི་གཞལ་ཡས་ཁང་ [107a] [107a.1]ངོ་། །ཕྱག་བཅུ་དྲུག་པ་ལ་སླར་ཡང་འཇམ་པའི་རྡོ་རྗེའི་དཀྱིལ་འཁོར་ལྟ་བུ་སྲུང་བའི་འཁོར་ལོ་རྩིབས་བཅུ་པ་ཡང་ཡོད་དོ་ཞེས་པ་ནི་ཕྱོགས་གཉིས་པའོ། །གཞལ་ཡས་ཁང་གི་དབུས་སུ་སྣ་ཚོགས་པདྨའི་ལྟེ་བའི་ནང་དུ་གན་རྐྱལ་དུ་གནས་པའི་ཚངས་པ་དང་ཁྱབ་འཇུག་དང་ [107a.2]དབང་ཕྱུག་དང་། ལྷའི་དབང་པོ་སྟེ། བདུད་རྣམ་པ་བཞིའི་རང་བཞིན་ཅན་གྱི་སྙིང་གར་གནས་པའི་ཉི་མ་ལ་ཞབས་བཞི་པ་གཅེར་བུ་གར་གྱི་ཉམས་དགུ་དང་ལྡན་པ། ཞབས་གཉིས་ཀྱིས་སྐྱིལ་ཀྲུང་ཕྱེད་པ་དང་། ཞབས་གཉིས་ཀྱིས་གཡོན་བསྐུམ་པ་དང་། གཡས་བརྐྱང་བའི་གར་གྱི་ཚུལ་གྱིས་ [107a.3]གནས་པ་དང་སྤྱི་བོར་སྣ་ཚོགས་རྡོ་རྗེས་མཚན་པའི་དབུ་སྐྲ་དམར་སེར་གྱེན་དུ་བརྫེས་པ་དཔྲལ་བའི་སྟེང་དུ་པགས་པ་དང་བྲལ་བའི་མི་མགོ་སྐམ་པོ་ལྔས་བརྒྱན་པ་སངས་རྒྱས་ལྔའི་ཅོད་པན་ཅན། སྐུ་མདོག་ནག་པོ་ཕྱག་བཅུ་དྲུག་པ་ཞལ་བརྒྱད་པ། ཞལ་རེ་རེ་ལ་དམར་ཞིང་ཟླུམ་པའི་སྤྱན་གསུམ་གསུམ་ [107a.4]ཡོད་པ་རྩ་བའི་ཞལ་ནག་པོ་གཡས་པ་རྣམས་ནི་དཀར་པོ་དང་ནག་པོ་དང་ནག་པོའོ། །གཡོན་པ་རྣམས་ནི་དམར་པོ་དང་ནག་པོ་དང་ནག་པོའོ། །སྟེང་གི་ཞལ་ནི་དུ་བའི་མདོག་ཅན་མི་སྡུག་པ་ཞལ་ཐམས་ཅད་ནི་སྨིན་མ་ཀྱོག་པོ་དང་བཅས་པ་ཁྲོ་གཉེར་ཅན་མཆེ་བའི་མྱུ་གུ་གཙིགས་པ་གཡས་པའི་ཕྱག་བརྒྱད་ [107a.5]ཀྱིས་བསྣམས་པའི་ཐོད་པ་རྣམས་ལ་གླང་པོ་ཆེ་དང་རྟ་དང་བོང་བུ་དང་། གླང་དང་རྔ་མོ་དང་མི་དང་ཤར་བྷ་དང་བྱི་ལ་རྣམས་འཛིན་པའོ། །གཡོན་པའི་ཕྱག་བརྒྱད་པའི་ཐོད་པ་རྣམས་ནི་ས་དང་ཆུ་དང་རླུང་དང་མེ་དང་ཟླ་བ་དང་ཉི་མ་དང་གཤིན་རྗེ་དང་ནོར་སྦྱིན་རྣམས་སོ། །གཙུག་གི་འཁོར་ལོ་དང་རྣ་ཆ་དང་མགུལ་ [107a.6]རྒྱན་དང་ལག་གདུབ་དང་སྐ་རགས་དང་ཐལ་བ་རྣམས་དང་མི་མགོ་རློན་པ་ཁྲག་འཛག་པ་ལྔ་བཅུའི་ཕྲེང་བ་དང་དཔུང་རྒྱན་དང་རྐང་གདུབ་རྣམས་ཀྱིས་བརྒྱན་པའོ། །འདིའི་ཡུམ་བདག་མེད་མ་ནག་མོ་གཅེར་བུ་གྲི་གུག་དང་ཐོད་པར་ལྡན་པའི་ཕྱག་གཉིས་ཀྱིས་བཅོམ་ལྡན་འདས་ལ་ཡང་དག་པར་འཁྱུད་པ། གཡས་ [107a.7]བསྐུམ་པ་གཡོན་བརྐྱང་བའི་གར་གྱིས་གནས་པ་ཕྱག་རྒྱ་ལྔ་དང་ལྡན་པ་ཞལ་གཅིག་པ་སྟན་གསུམ་པ་དམར་ལ་ཟླུམ་པ་མཆེ་བ་གཙིགས་པ་དབུ་སྐྲ་དམར་སེར་འབར་བ་གྱེན་དུ་མཛེས་པ། དཔྲལ་བའི་མཚམས་སུ་ཐོད་པ་ལྔས་བརྒྱན་པ། མགྲིན་པར་མི་མགོ་སྐམ་པོའི་ཕྲེང་བ་འཕྱང་བ་དང་། རྐང་གདུབ་ལ་སོགས་ [107b] [107b.1]པས་བརྒྱན་པའོ། །ཤར་ལ་སོགས་པའི་ཕྱོགས་ཀྱི་འདབ་མར་གནས་པའི་ཚངས་པ་དང་དབང་པོ་དང་ཉེ་བའི་དབང་པོ་དང་དྲག་པོའི་སྙིང་གའི་སྟེང་དུ་ཟླ་བ་རྣམས་ལ་གཽ་རཱི་ལ་སོགས་པའོ། །དབང་ལྡན་ལ་སོགས་པའི་འདབ་མར་གནས་པའི་གཤིན་རྗེ་དང་ལུས་ངན་དང་སྲིན་པོ་དང་། ཐགས་བཟངས་རིས་ཀྱི་སྙིང་ [107b.2]གར་ཟླ་བའི་དཀྱིལ་འཁོར་ལ་གནས་པའི་པུཀྐ་སཱི་ལ་སོགས་པའོ། །དེ་ལ་གཽ་རཱི་ནག་མོ་གཡས་ན་གྲི་གུག་གཡོན་ན་རོ་ཧི་ཏའི་ཉ་འཛིན་པའོ། །ཙཽ་རཱི་དམར་མོ་གཡས་ཌ་མ་རུ་གཡོན་ཕག་པ་འཛིན་པའོ། །རོ་ལངས་མ་གསེར་གྱི་མདོག་ཅན་གཡས་གཡོན་གྱི་ཕྱག་གཉིས་ཀྱིས་རུས་སྦལ་དང་པདྨའི་སྣོད་འཛིན་ [107b.3]པའོ། །གྷསྨ་རཱི་ལྗང་གུ་ཕྱག་གཡས་པ་ན་སྤྲུལ་གཡོན་པ་ན་རྣལ་འབྱོར་གྱི་སྣོད་འཛིན་པའོ། །པུཀྐ་སཱི་སྔོན་མོ་ཕྱག་གཡས་པ་ན་སེང་གེ་གཡོན་པ་ན་དགྲ་སྟ་འཛིན་པའོ། །ཤ་བ་རཱི་དཀར་མོ་ཕྱག་གཡས་པ་ན་དགེ་སློང་གཡོན་པ་ན་གསིལ་བྱེད་འཛིན་པའོ། །ཙཎྜ་ལཱི་ནམ་མཁའ་ལྟར་སྔོ་བསངས་མ་ཕྱག་གཡས་ [107b.4]པ་ན་འཁོར་ལོ་གཡོན་པ་ན་གཤོལ་འཛིན་པའོ། །ཌོཾ་བི་ནཱི་ཁྲ་མོ་ཕྱག་གཡས་པ་ན་རྡོ་རྗེ་གཡོན་པ་སྡིགས་མཛུབ་འཛིན་པའོ། །བརྒྱད་པོ་འདི་དག་ནི་སྐྱིལ་ཀྲུང་ཕྱེད་པའི་གར་གྱིས་བཞུགས་པའོ། །ཁྱད་པར་གཞན་ནི་སྔར་བརྗོད་པའི་བདག་མེད་མ་བཞིན་ནོ། །ཧེ་རུ་ཀ་དང་བདག་མེད་མ་དག་གི་རིགས་ཀྱི་བདག་པོ་མི་ [107b.5]བསྐྱོད་པའོ། །གཽ་རཱི་ལ་སོགས་པ་རྣམས་ནི་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་སོ། །པུཀྐ་སཱི་ལ་སོགས་པ་རྣམས་ཀྱི་ཡང་ངོ་། །ཡང་ན་དཀྱིལ་འཁོར་གྱི་གཙོ་བོ་ཕྱག་གཉིས་པ་གཡས་པས་རྡོ་རྗེ་གྱེན་དུ་འཕྱར་བ་གཡོན་པ་རྡོ་རྗེས་མཚན་པའི་ཐོད་པ་འཛིན་པས་བདག་ [107b.6]མེད་མ་ལ་འཁྱུད་པ་ཁ་ཊྭཱཾ་ག་དཔུང་པ་གཡོན་པ་ལ་བརྟེན་པའོ། །ཡང་ན་དཀྱིལ་འཁོར་གྱི་གཙོ་བོ་ཕྱག་བཞི་པ་སྔོན་པོ་ཕྱག་གཡས་པས་རྡོ་རྗེ་འཛིན་པ་གཡོན་པས་ཐོད་པ་ཁྲག་གིས་གང་བ་འཛིན་པ་ཕྱག་ལྷག་མ་དག་རང་དང་མཚུངས་པའི་རྡོ་རྗེ་ཕག་མོ་ལ་འཁྱུད་པའོ། །ཡང་ན་དཀྱིལ་འཁོར་གྱི་གཙོ་བོ་ཕྱག་དྲུག་པ་ [107b.7]སྔོན་པོ་རྩ་བ་དང་གཡས་གཡོན་གྱི་ཞལ་གསུམ་སྔོན་པོ་དང་དཀར་པོ་དང་དམར་པོ། ཕྱག་གཡས་པ་དག་གིས་རྡོ་རྗེ་དང་གྲི་གུག་དང་གཡོན་པ་དག་གིས་རྩེ་གསུམ་པ་དང་དྲིལ་བུ་འཛིན་པ་ལྷག་མ་དག་གིས་རྡོ་རྗེ་ལུ་གུ་རྒྱུད་མ་ལ་འཁྱུད་པའོ། །རྡོ་རྗེ་ལུ་གུ་རྒྱུད་མ་ནི་སྐུ་མདོག་དང་ཞལ་དང་ཕྱག་མཚན་ལ་སོགས་པ་རྣམས་ [108a] [108a.1]བདག་མེད་མ་དང་མཚུངས་པར་ཡན་ལག་མེད་པའི་རྡོ་རྗེའི་ཞབས་ཀྱིས་གསུངས་སོ། །ཕྱག་གཉིས་པ་ལ་སོགས་པ་འདི་རྣམས་སྣ་ཚོགས་པདྨའི་ཟེ་འབྲུ་ལ་རོའི་སྙིང་གར་ཉི་མ་ལ་སྐྱིལ་ཀྲུང་ཕྱེད་པས་གར་མཛད་པ་མི་བསྐྱོད་པས་རྒྱས་བཏབ་པ་སྣ་ཚོགས་རྡོ་རྗེས་མཚན་པ་དབུ་སྐྲ་དམར་སེར་གྱེན་དུ་ [108a.2]བརྫེས་པ་མི་མགོ་ལྔས་དབུ་བརྒྱན་པ། སྨིན་མ་འཁྱོག་པ་དང་བཅས་པའི་ཁྲོ་གཉེར་ཅན་མཆེ་བ་གཙིགས་པ་ཕྱག་བཅུ་དྲུག་པ་བཞིན་དུ་གཙུག་གི་འཁོར་ལོ་ལ་སོགས་པས་བརྒྱན་པ་གཽ་རཱི་ལ་སོགས་པའི་ལྷ་མོ་རྣམས་ཀྱིས་བསྐོར་བའོ། །ལྷ་མོ་ཐམས་ཅད་ནི་ཐལ་བ་དང་བྲལ་བའོ། །རྡོ་རྗེ་ཕག་མོ་དང་རྡོ་རྗེ་ལུ་གུ་ [108a.3]རྒྱུད་མ་ནི་མི་བསྐྱོད་པས་རྒྱས་བཏབ་པའོ། །ཀྱེའི་རྡོ་རྗེ་རྣམ་པ་བཞིའི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། །ཞེས་བྱ་བ་ནི་ཕྱག་བཅུ་དྲུག་པའི་སྙིང་པོའོ། །ཨོཾ་ཏྲཻ་ལོ་ཀྱཱ་ཀྵེ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་ཕྱག་གཉིས་པའོ། །ཨོཾ་ཛྭ་ལ་ཛྭ་ལ་བྷྱོ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱག་བཞི་པའོ། ། [108a.4]ཨོཾ་ཀི་ཊི་ཀི་ཊི་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱག་དྲུག་པའོ། །ཨོཾ་ཨཱཿབཛྲ་གྷསྨ་རཱི་ཨོཾ་ཧཱུཾ་སྭཱ་ཧཱ་ཞེས་བྱ་བ་ནི་གྷསྨ་རཱིའི་སྔགས་ཏེ་ལས་ཐམས་ཅད་པའོ།། །།སྒྱུ་འཕྲུལ་ཆེན་མོའི་དཀྱིལ་འཁོར་ལ་རྡོ་རྗེ་གུར་གྱི་ནང་ན་གནས་པའི་ཆོས་འབྱུང་གི་དབུས་སུ་གཞལ་ཡས་ཁང་ངོ་། །ཁ་ཅིག་ནི་རྡོ་རྗེ་གུར་གྱི་ནང་དུ་ཆོས་འབྱུང་ [108a.5]མེད་པར་གཞལ་ཡས་ཁང་ངོ་ཞེས་སོ། །གཞལ་ཡས་ཁང་གི་དབུས་སུ་པདྨ་དམར་པོ་འདབ་མ་བརྒྱད་པའི་ཟེ་འབྲུར་ཉི་མ་ལ་སྒྱུ་མ་ཆེན་མོ་ལས་བྱུང་བའི་ཧེ་རུ་ཀ་ནག་པོ་ཉི་མ་ལྟ་བུའི་འོད་ཟེར་ཅན་འབར་བའི་ཕྲེང་བ་དུ་མས་འཁྲིགས་པ་འགྱིང་བའི་ཁྲོ་བོ་དབུ་སྐྲ་དམར་སེར་འབར་བ་གྱེན་དུ་བརྫེས་པ་ཐོད་པས་བརྒྱན་ [108a.6]པའི་ཅོད་པན་ཅན་རྩ་བ་དང་གཡས་དང་རྒྱབ་དང་གཡོན་གྱི་ཞལ་བཞི་སྔོན་པོ་དང་སེར་པོ་དང་དཀར་པོ་དང་ལྗང་གུའོ། །ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་པ་ཕྱག་བཞི་པའི་གཡས་གཉིས་ན་ཐོད་པ་དང་མདའ། གཡོན་གཉིས་ན་ཁ་ཊྭཱཾ་ག་དང་གཞུ་འཛིན་པ་ཕྱག་རྒྱ་དྲུག་དང་ལྡན་པ་མིའི་ [108a.7]པགས་པའི་ན་བཟའ་འཛིན་པ། སྐྱིལ་ཀྲུང་ཕྱེད་པའི་གར་གྱིས་བཞུགས་པའོ། །སངས་རྒྱས་མཁའ་འགྲོ་མ་ནི་སྐུ་མདོག་དམར་མོ་གཙོ་བོ་ལྟ་བུའི་ཕྱག་མཚན་ཅན་ཕྱག་གཉིས་ཀྱིས་དེའི་མགུལ་ནས་འཁྱུད་པ། དམར་པོ་དང་སེར་པོ་དང་དཀར་པོ་དང་ལྗང་གུའི་ཞལ་ལོ། །ཤར་གྱི་འདབ་མར་རྡོ་རྗེ་ [108b] [108b.1]མཁའ་འགྲོ་མ་སྔོན་མོ་སེར་པོ་དང་དཀར་པོ་དང་ལྗང་གུའི་ཞལ་རྡོ་རྗེ་དང་ཐོད་པ་དང་དྲིལ་བུ་དང་ཁ་ཊྭཱཾ་ག་འཛིན་པའོ། །ལྷོར་རིན་ཆེན་མཁའ་འགྲོ་མ་སེར་མོ་སེར་པོ་དང་སྔོན་པོ་དང་དཀར་པོ་དང་ལྗང་གུའི་ཞལ་རིན་པོ་ཆེའི་པ་ཏྲ་དང་ཏྲི་ཤཱུ་ལ་དང་མགྲིན་པ་བཙིར་བའི་ཅེ་སྤྱང་དང་བ་དན་འཛིན་པའོ། །ནུབ་ཏུ་ [108b.2]པདྨ་མཁའ་འགྲོ་མ་དཀར་མོ་དཀར་པོ་དང་སེར་པོ་དང་དམར་པོ་དང་། ལྗང་གུའི་ཞལ་སྣ་ཚོགས་པདྨ་དང་མདའ་དང་ཐོད་པ་དང་གཞུ་འཛིན་པའོ། །བྱང་དུ་སྣ་ཚོགས་མཁའ་འགྲོ་མ་ལྗང་གུ་དང་སེར་པོ་དང་དཀར་པོ་དང་སྔོན་པོའི་ཞལ་ལོ། །རལ་གྲི་དང་ཌ་མ་རུ་དང་ཞགས་པ་དང་ཐོད་པ་འཛིན་པའོ། ། [108b.3]ཐམས་ཅད་ཀྱང་ཕྱག་རྒྱ་ལྔ་དང་ལྡན་པ། ཟླ་བའི་གདན་ལ་འོད་དང་ལྡན་པའོ། །འདི་རྣམས་ཀྱི་ཁྱད་པར་གཞན་རྣམས་ནི་གཙོ་བོ་ལྟ་བུའོ། །བཅོམ་ལྡན་འདས་ཀྱི་རིགས་ཀྱི་བདག་པོ་ནི་མི་བསྐྱོད་པའོ། །སངས་རྒྱས་མཁའ་འགྲོ་མ་ལ་སོགས་པ་རྣམས་ཀྱང་གོ་རིམས་ཇི་ལྟར་རྣམ་སྣང་དང་། མི་བསྐྱོད་པ་དང་ [108b.4]རིན་ཆེན་འབྱུང་ལྡན་དང་ངག་གི་དབང་ཕྱུག་དང་དོན་ཡོད་གྲུབ་པ་རྣམས་སོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་ཧཱུཾ་ཧཱུཾ་སྙིང་པོའི་སྔགས་སོ། །སངས་རྒྱས་མཁའ་འགྲོ་མ་ལ་སོགས་པ་རྣམས་ཀྱི་ཡང་ཨོཾ་ཨོཾ་ཧཱུཾ། ཨོཾ་ཧཱུཾ་ཧཱུཾ། ཨོཾ་སྭཱ་ཧཱུཾ། ཨོཾ་ཨཱཿཧཱུཾ། ཨོཾ་ཧཾ་ཧཱུཾ། སྣ་ཚོགས་མཁའ་ [108b.5]འགྲོ་མའི་སྔགས་ནི་ལས་ཐམས་ཅད་པའོ།། །།བཅོམ་ལྡན་འདས་སངས་རྒྱས་ཐོད་པ་ལྷ་དགུའི་བདག་ཉིད་ཀྱི་དཀྱིལ་འཁོར་ནི་རྡོ་རྗེ་གུར་གྱི་ནང་གི་ཆོས་འབྱུང་ལ་གནས་པའི་གཞལ་ཡས་ཁང་གི་དབུས་སུ་སྣ་ཚོགས་པདྨའོ། །དེའི་ཟེ་འབྲུ་ལ་རོའི་སྙིང་གར་ཉི་མའི་གདན་ལ་ཤེས་རབ་མ་དང་བྲལ་བའི་ [108b.6]བཅོམ་ལྡན་འདས་སྐུ་མདོག་ལ་སོགས་པ་ཕྱི་ནས་འཆད་པའི་འཁོར་ལོ་གསུམ་ལ་གནས་པའི་དཔལ་སངས་རྒྱས་ཐོད་པ་བཞིན་ནོ། །ཤར་དང་བྱང་དང་ནུབ་དང་ལྷོའི་འདབ་མ་ལ་རིམ་པ་ཇི་ལྟ་བས་སྣ་ཚོགས་སྡེ་མ་དང་འདོད་མ་དང་ས་འོག་ན་གནས་མ་དང་ལེགས་བཟངས་མོ་རྣམས་ནི་སྐུ་མདོག་སྔོན་མོ་ [108b.7]གཡས་བསྐུམ་པ་གཡོན་བརྐྱང་བ་སྟག་གི་པགས་པའི་ཤམ་ཐབས་ཅན་ཕྱག་གཡས་གཉིས་ཀྱིས་གྲི་གུག་དང་ཐོད་པ་གཡོན་གཉིས་ཀྱིས་ཁ་ཊྭཱཾ་དང་ཌ་མ་རུ་འཛིན་པའོ། །དབང་ལྡན་དང་མེ་དང་བདེན་བྲལ་དང་། རླུང་གི་འདབ་མ་ལ་ཆང་འཚོང་མ་དང་འབྱུང་མོ་དང་ཕྱག་བཞི་མ་དང་ནམ་མཁའ་ལ་གནས་མ་ [109a] [109a.1]རྣམས་ནི་སེར་མོ་ན་བཟའ་སེར་པོ་གོན་པ་འོད་ཟེར་སེར་པོ་འཕྲོ་བ་ཞབས་གཉིས་ཀྱིས་གཡས་བརྐྱང་བ་གཡོན་བསྐུམ་པ་ཀླུ་བརྒྱད་ཀྱིས་བརྒྱན་པ། ཕྱག་གཡས་པ་གཉིས་ཀྱིས་གྲི་གུག་དར་ཌ་མ་རུ། གཡོན་གཉིས་ཀྱིས་ཁ་ཊྭཾ་ག་དང་པདྨའི་སྣོད་འཛིན་པའོ། །བརྒྱད་པོ་འདི་དག་ཀྱང་ [109a.2]ཉི་མའི་དཀྱིལ་འཁོར་ལ་གར་གྱི་ཚུལ་གྱིས་གནས་པ་དབུ་སྐྲ་སེར་པོ་གྱེན་དུ་བརྫེས་པ། དབུ་ལ་ཐོད་པ་ལྔའི་ཕྲེང་བ་དང་ལྡན་པ་ཕྱག་རྒྱ་ལྔ་ལ་སོགས་པས་བརྒྱན་པ་མི་མགོ་རློན་པ་ལྔ་བཅུ་མགུལ་དུ་འཕྱང་བ་མཆེ་བ་ཅུང་ཟད་གཙིགས་པ་ཞལ་གཅིག་ཕྱག་བཞི་པ་སྤྱན་གསུམ་པའོ། །བཅོམ་ལྡན་འདས་ལ་མི་ [109a.3]བསྐྱོད་པ་ལ་སོགས་པ་སངས་རྒྱས་ལྔས་རྒྱས་བཏབ་པའོ། །སྣ་ཚོགས་སྡེ་མ་ལ་སོགས་པ་རྣམས་ལ་མི་བསྐྱོད་པ་དང་རྣམ་སྣང་དང་རིན་འབྱུང་དང་སྣང་མཐའ་རྣམས་ཀྱིས་སོ། །ཆང་འཚོང་མ་ལ་སོགས་པ་རྣམས་ཀྱི་ཡང་དེ་དག་རྣམས་སོ། །ཡང་ན་བཅོམ་ལྡན་འདས་འདི་དང་ཕྱོགས་ཀྱི་ལྷ་མོ་རྣམས་ཀྱང་ [109a.4]མདོག་དཀར་མོ་མཚམས་ཀྱི་ལྷ་མོ་རྣམས་དམར་པོ་འདི་ནི་ཡུམ་དང་བྲལ་བའམ་ཡུམ་དང་བཅས་པའོ། །རྡོ་རྗེ་ཧཱུཾ་མཛད་ཀྱི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དབུས་སུ་གཞལ་ཡས་ཁང་ངོ་། །དེའི་དབུས་སུ་སྣ་ཚོགས་པདྨ་དང་ཉི་མའི་སྟེང་དུ་འཇིགས་བྱེད་དང་དུས་མཆན་གཡོན་བསྐུམ་ [109a.5]གཡས་བརྐྱང་བས་མནན་པའི་འཇིག་རྟེན་གསུམ་ལས་རྣམ་པར་རྒྱལ་བའི་བཅོམ་ལྡན་འདས་ཁྲོ་བོ་ནི་བསྐལ་པ་འཇིག་དུས་མེ་ལྟ་བུའི་འོད་ཟེར་འབར་ཞིང་འགྲོ་བ་མ་ལུས་པའི་བགེགས་ཀྱི་ཚོགས་ཐམས་ཅད་རབ་ཏུ་བསལ་བར་མཛད་པ་སྐུ་མདོག་སྔོན་པོ་དང་སེར་པོ་དང་ལྗང་གུའི་ཞལ་རྩ་ [109a.6]བ་དང་གཡས་དང་གཡོན་གྱི་མི་སྡུག་པ་གདངས་པ། མཆེ་བ་གཙིགས་པ་རབ་ཏུ་གཏུམ་པ་ལྗགས་འདྲིལ་བ་འཇིགས་སུ་རུང་བའི་ཞལ་གསུམ་པ་རེ་རེ་ཞིང་སྤྱན་གསུམ་གསུམ་པ་དམར་ལ་ཟླུམ་པ་སྨིན་མ་གཡོ་བ་ཁྲོ་གཉེར་དང་བཅས་པ། དཔྲལ་བའི་སྟེང་ན་ཐོད་པ་ལྔའི་ཕྲེང་བ་དང་ལྡན་པ། [109a.7]ཁྲག་འཛག་པའི་མི་མགོ་ལྔ་བཅུའི་ཕྲེང་བ་མགུལ་པར་འཕྱང་བ་ཡུམ་དང་བཅས་པ་ཀླུ་མཐའ་ཡས་སྔོན་པོས་དབུ་སྐྲ་འབར་ཞིང་དམར་སེར་གྱེན་དུ་བཅིངས་པ། ཀླུ་འཇོག་པོ་དམར་པོས་རྣ་རྒྱན་བྱས་པ། ཀླུ་པདྨ་ཆེན་པོ་པདྨའི་རྩ་བ་ལྟ་བུ་དཀར་པོས་མགུལ་རྒྱན་བྱས་པ། ཀླུ་ཀརྐོ་ཊ་དཱུར་བ་ལྟ་བུ་ལྗང་ [109b] [109b.1]གུས་མཆོད་ཕྱིར་ཐོགས་བྱས་པ་ནོར་རྒྱས་དཀར་པོས་སྐ་རགས་བྱས་པ། པདྨ་དཀར་པོ་ཀུན་དའི་མེ་ཏོག་ལྟ་བུར་མཛེས་པས་རྐང་གདུབ་བྱས་པ། དུད་སྐྱོང་སེར་པོས་ལག་གདུབ་བྱས་པ། རིགས་ལྡན་དུ་བ་ལྟ་བུ་ཁྲ་བོས་དཔུང་རྒྱན་བྱས་པ། རྡོ་རྗེ་སེམས་དཔས་དབུ་ལ་རྒྱས་བཏབ་པ། རྡོ་རྗེ་དང་ [109b.2]དྲིལ་བུ་འཛིན་པའི་ཕྱག་གཉིས་ཀྱིས་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱས་རང་གི་ཡུམ་ལ་སྙོམས་པར་ཞུགས་པ་གང་ས་གཉིས་ཀྱིས་ལྕགས་ཀྱུ་དང་ཞགས་པ་དང་གཡོན་གཉིས་ཀྱིས་ཐོད་པ་དང་ཁ་ཊྭཾ་ག་འཛིན་པའོ། །འདིའི་ཤར་ཕྱོགས་སུ་རྡོ་རྗེ་དབྱུག་པ་སྔོན་པོ་སྔོན་པོ་དང་སེར་ [109b.3]པོ་དང་ལྗང་གུ་ནི་རྩ་བ་དང་གཡས་དང་གཡོན་གྱི་ཞལ་ལོ། །གཡས་པ་གཉིས་ཀྱིས་རྡོ་རྗེ་ཐོབ་དང་སྡིགས་མཛུབ་དང་བཅས་པའི་རྡོ་རྗེ་གྱེན་དུ་འཕྱར་བ། གཡོན་པ་གཉིས་ཀྱིས་ཐོད་པ་དང་ཁ་ཊྲཱཾ་ག་འཛིན་པའོ། །བྱང་དུ་རྡོ་རྗེ་ཉི་མ་སེར་པོ་སེར་པོ་དང་སྔོན་པོ་དང་ལྗང་གུའི་ཞལ་ལོ། །ཁྱད་པར་དུ་ [109b.4]ཕྱག་དང་པོས་རྡོ་རྗེ་དབྱུག་པ་འཛིན་པ། ཁྱད་པར་དུ་རྡོ་རྗེ་ལ་སོགས་པའི་ཕྱག་མཚན་རྣམས་ཀྱང་རྡོ་རྗེ་དབྱུག་པ་ལྟ་བུའོ། །འོག་ནས་འཆད་པ་རྣམས་ཀྱང་དེ་ལྟར་ཤེས་པར་བྱའོ། །བྱང་དུ་རྡོ་རྗེ་གཙུག་ཏོར་དམར་པོ་དམར་པོ་དང་ལྗང་གུའི་ཞལ་ལོ། །པདྨ་དམར་པོས་མཚན་པའི་ཕྱག་གོ། །ལྷོར་རྡོ་རྗེ་ [109b.5]འཁྱིལ་བ་ལྗང་གུ་ནི་ལྗང་གུ་དང་དཀར་པོ་དང་སེར་པོའི་ཞལ་ལོ། །སྣ་ཚོགས་རྡོ་རྗེས་མཚན་པའི་ཕྱག་གོ། །མེར་རྡོ་རྗེ་གནོད་སྦྱིན་དུ་བའི་མདོག་དུ་བའི་མདོག་དང་སེར་པོ་དང་ལྗང་གུའི་ཞལ་ལོ། །ལྕགས་ཀྱུ་འཛིན་པའོ། །སྲིན་པོར་རྡོ་རྗེ་བདུད་རྩི་དམར་པོ་དམར་པོ་དང་། སེར་པོ་དང་ལྗང་གུའི་ཞལ་ལོ། ། [109b.6]དགྲ་སྟ་འཛིན་པའོ། །རླུང་དུ་ནག་པོ་ཆེན་པོ་སྔོན་པོ་དང་སེར་པོ་དང་ལྗང་གུའི་ཞལ་ཏྲི་ཤཱུ་ལ་འཛིན་པའོ། །དབང་ལྡན་དུ་རྡོ་རྗེ་འཇིགས་སུ་རུང་བ་ནག་པོ་ནག་པོ་དང་། སེར་པོ་དང་ལྗང་གུའི་ཞལ་རལ་གྲི་འཛིན་པའོ། །རྡོ་རྗེ་དབྱུག་པ་ལ་སོགས་པ་བརྒྱད་པོ་འདི་རྣམས་ནི་རིམ་པ་ཇི་ལྟ་བར་གཤིན་ [109b.7]རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་དང་འདོད་པའི་རྒྱལ་པོ་དང་། དབྱུག་པ་སྔོན་པོ་དང་སྟོབས་པོ་ཆེ་དང་མི་གཡོ་བ་རྣམས་ཀྱི་མིང་གཞན་ནོ། །སྟེང་དུ་གཙུག་ཏོར་འཁོར་ལོས་སྒྱུར་པ་དཀར་པོ་དཀར་པོ་དང་སྔོན་པོ་དང་ལྗང་གུའི་ཞལ་འཁོར་ལོ་འཛིན་པའོ། ། [110a] [110a.1]འོག་ཏུ་རྡོ་རྗེ་ས་འོག་གནོད་མཛེས་ཀྱི་མིང་རྣམ་གྲངས་ཅན་སྔོན་པོ་སྔོན་པོ་དང་སེར་པོ་དང་ལྗང་གུའི་ཞལ་རོལ་པ་དང་བཅས་པའི་རྡོ་རྗེ་གཏུན་ཤིང་འཛིན་པའོ། །འདིའི་ཕྱག་གཉིས་ཀྱིས་ཀླུའི་ཞགས་པ་སྡིགས་མཛུབ་དང་བཅས་པ་དང་ཁ་ཊྭཱཾ་གའོ། །རྡོ་རྗེ་དབྱུག་པ་ལ་སོགས་པའི་ཁྲོ་བོ་འདི་ [110a.2]རྣམས་ནི་ཕྱག་མཚན་གྱི་གཙོ་བོ་དང་ཐོད་པས་མཚན་པའི་ཕྱག་གཉིས་ཀྱིས་རང་དང་མཚུངས་པའི་ཡུམ་དང་མཉམ་པར་སྦྱོར་བའོ། །དབུ་སྐྲ་དམར་སེར་འབར་ཞིང་གྱེན་དུ་འཁྱིལ་བ་རང་རང་གི་རིགས་ཀྱི་བདག་པོས་ཅོད་པན་མཛེས་པར་བརྒྱན་པ་སྨིན་མ་གཡོ་བ་དང་བཅས་པའི་ཁྲོ་གཉེར་ཅན་མཆེ་བ་གཙིགས་ [110a.3]པའི་ཞལ་རེ་རེ་ལ་སྤྱན་གསུམ་གསུམ་དང་ལྡན་པ་དམར་ཞིང་ཟླུམ་པ་མི་མགོའི་ཕྲེང་བ་དང་ཕྱག་རྒྱ་ལྔ་ལ་སོགས་པ་དང་ཀླུའི་རྒྱལ་པོ་བརྒྱད་ཀྱིས་བརྒྱན་པ། སྣ་ཚོགས་པདྨ་དང་ཉི་མ་ལ་གནས་པའི་ཕྱོགས་སྐྱོང་བརྒྱད་དང་སྟེང་དུ་ཚངས་པ་དང་འོག་ཏུ་ཐགས་བཟངས་རིས་རྣམས་ལ་གཡས་བརྐྱང་གིས་མནན་ནས་ [110a.4]བཞུགས་པ་རང་གི་རིགས་ཀྱི་བདག་པོས་དབུ་བརྒྱན་པ་སྟེ། ཇི་ལྟར་འཇམ་པའི་རྡོ་རྗེའི་དཀྱིལ་འཁོར་གྱི་རྩིབས་བཅུ་པའི་སྲུང་བའི་འཁོར་ལོར་བཤད་པ་བཞིན་ནོ། །བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་ཁ་བཛྲ་དྷྲྀཀ་བཛྲ་ཧཱུཾ་ཀ་ར་བཛྲ་ཧཱུཾ་ཕཊ་ཅེས་བྱ་བ་ནི་རྡོ་རྗེ་ཧཱུཾ་མཛད་ཀྱི་སྙིང་པོའི་སྔགས་ [110a.5]སོ། །ལས་ཐམས་ཅད་པའི་སྔགས་ནི་ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ་སྭཱ་ཧཱ། ཞེས་བྱ་བའོ། །ཡང་ཤར་ལ་སོགས་པའི་ཕྱོགས་དང་ཕྱོགས་མཚམས་དང་སྟེང་དང་འོག་ཏུ་སྣ་ཚོགས་པདྨ་དང་ཉི་མའི་གདན་རྣམས་ལ་གཡས་སྐོར་གྱིས་གཤིན་རྗེ་མཐར་བྱེད་ལ་སོགས་པའི་ཁྲོ་བོ་བཅུའོ། །འདི་རྣམས་ཀྱི་གནས་ [110a.6]དང་སྐུ་མདོག་ལ་སོགས་པ་བསྡུས་པའི་རིམ་པར་གསུངས་པའི་དཀྱིལ་འཁོར་ཇི་ལྟ་བ་བཞིན་ནོ། །ཡང་ན་འཇམ་པའི་རྡོ་རྗེ་སྲུང་བའི་འཁོར་ལོའི་རྩིབས་བཅུ་པ་བཞིན་ནོ། །ཡང་ན་ཀུན་དུ་ཁ་སྦྱོར་གྱི་རྡོ་རྗེ་སེམས་དཔའི་དཀྱིལ་འཁོར་བཞིན་ནོ། །ཕྱོགས་འདི་གསུམ་ཀ་ལ་ཡང་ཨོཾ་ཨཱཿབིགྷཱ་ཏཀྲྀ་ཏ་ [110a.7]ཧཱུཾ་ཞེས་བྱ་བས་བགེགས་མཐར་བྱེད་ཀྱི་སྔགས་ཏེ་ལས་ཐམས་ཅད་པའོ།། །།བདེ་མཆོག་གི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་རི་རབ་ཀྱི་སྟེང་དུ་སྣ་ཚོགས་པདྨའི་ཟེ་འབྲུ་ལ་གནས་པའི་སྣ་ཚོགས་རྡོ་རྗེའི་ལྟེ་བ་ལ་གནས་པའི་གཞལ་ཡས་ཁང་གི་དབུས་སུ་སྣ་ཚོགས་པདྨའི་ལྟེ་བའི་སྟེང་དུ་ [110b] [110b.1]ཉི་མ་ལ་གནས་པའི་འཇིགས་བྱེད་དང་དུས་མཚན་མོ་གཡས་བརྐྱང་གི་ཞབས་གཉིས་ཀྱིས་མནན་པའི་བཅོམ་ལྡན་འདས་སྐུ་མདོག་ནག་པོ་ཤར་དང་བྱང་ལ་སོགས་པའི་ཞལ་བཞི་ནག་པོ་དང་ལྗང་གུ་དང་དམར་པོ་དང་སེར་པོ་ཞལ་རེ་རེ་ལ་སྤྱན་གསུམ་གསུམ་པ་སྟག་གི་པགས་པའི་ཤམ་ [110b.2]ཐབས་ཅན། ཕྱག་བཅུ་གཉིས་པ་རྡོ་རྗེ་དང་དྲིལ་བུ་དང་བཅས་པའི་ཕྱག་གཉིས་ཀྱིས་རྡོ་རྗེ་ཕག་མོ་ལ་འཁྱུད་པ། ཕྱག་གཉིས་ཀྱིས་རྒྱབ་ཏུ་གླང་པོ་ཆེ་དཀར་པོའི་པགས་པ་ཁྲག་དང་བཅས་པ་བརྒྱངས་ནས་འཛིན་པ། དེ་ལས་གཞན་པའི་གཡས་པའི་ཕྱག་རྣམས་ཀྱིས་ཌ་མ་རུ་དང་དགྲ་སྟ་དང་གྲི་གུག་དང་ [110b.3]རྩེ་གསུམ་འཛིན་པ། གཡོན་རྣམས་ཀྱིས་རྡོ་རྗེས་མཚན་པའི་ཁ་ཊྭཱཾ་ག་དང་ཁྲག་གིས་གང་བའི་ཐོད་པ་དང་རྡོ་རྗེ་ཞགས་པ་དང་ཚངས་པའི་མགོ་བོ་རྣམས་སོ། །མི་མགོ་རློན་པ་ལྔ་བཅུའི་ཕྲེང་བ་མགུལ་དུ་འཕྱང་བ། ཕྱག་རྒྱ་དྲུག་དང་ལྡན་པའི་མིའི་རྒྱུ་མས་མཆོད་ཕྱིར་ཐོགས་བྱས་པ། དཔྲལ་བའི་སྟེང་ [110b.4]དུ་ཐོད་པ་ལྔ་དང་ལྡན་པ། ནོར་བུ་དང་གཡོན་ངོས་སུ་གནས་པའི་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པའི་ཐོར་ཅོག་ནག་པོ་རྣམ་པར་འགྱུར་ཞིང་གདངས་པ། མཆེ་བ་གཙིགས་པའི་ཞལ་ཅན་གར་གྱི་ཉམས་དགུའི་ཚོགས་དང་ལྡན་པའོ། །རྡོ་རྗེ་ཕག་མོ་ནི་དམར་མོ་ཞལ་གཅིག་ཕྱག་ [110b.5]གཉིས་སྤྱན་གསུམ་པ་སྐྲའི་ཚོགས་གྲོལ་བ་གཅེར་བུ་ཐོད་པའི་དུམ་བུའི་སྐ་རགས་བཅིངས་པ་འཁྱུད་པའི་ཕྱག་གིས་བཟུང་བའི་ཐོད་པ་ཁྲག་གིས་བཀང་བ་འཛག་པའི་རྒྱུན་གཙོ་བོ་ལ་སྟོབ་པ། སྡིགས་མཛུབ་དང་བཅས་པ་རྡོ་རྗེ་སྟེང་དུ་འཕྱར་བའི་ཕྱག་གཡས་པས་གདུག་པ་རྣམས་ལ་སྡིགས་པར་ [110b.6]བྱེད་པ་ཁྲག་དང་བྲལ་བའི་མི་མགོ་སྐམ་པོའི་ཕྲེང་བ་ཅན་ཉི་མའི་འོད་ཀྱི་དཀྱིལ་འཁོར་ཅན། ཕྱག་རྒྱ་ལྔ་དང་ལྡན་པ་ཅུང་ཟད་བཞད་པ་ཟླ་མཚན་འབབ་པ་དང་བཅས་པ་སྤུ་གྱེན་དུ་ལངས་པའོ། །དེ་ནས་ཤར་ལ་སོགས་པའི་ཕྱོགས་རྣམས་ལ་གཡོན་སྐོར་གྱི་དང་། མེ་ལ་སོགས་པའི་ཕྱོགས་བྲལ་རྣམས་ལ་ [110b.7]གཡས་སྐོར་གྱིས་དགོད་དོ། །དེ་ལ་ཕྱོགས་ཀྱི་འདབ་མ་ལ་མཁའ་འགྲོ་མ་དང་། ལཱ་མཱ་དང་། དུམ་སྐྱེས་མ་དང་། གཟུགས་ཅན་མ་རྣམས་ནི་ནག་མོ་དང་ལྗང་གུ་དང་དམར་མོ་དང་། སེར་མོའི་མདོག་ཅན་རྣམས་ཞལ་གཅིག་པ་སྤྱན་གསུམ་པ་དབུ་སྐྲ་གྲོལ་བ་ཕྱག་བཞི་མ་གཡོན་པ་གཉིས་ཀྱིས་ཁ་ཊྭཱཾ་ག་ [111a] [111a.1]དང་ཐོད་པ་འཛིན་པ། གཡས་པ་དག་གིས་ཌ་མ་རུ་དང་གྲི་གུག་འཛིན་པ། གཡས་བརྐྱང་བས་གནས་པ་རྣམས་སོ། །མཚམས་ཀྱི་འདབ་མར་བྱང་ཆུབ་ཀྱི་སེམས་དང་ཁྲག་དང་བདུད་རྩི་ལྔ་དང་ཤ་ལྔ་རྣམས་གྲུབ་པའི་བཅུད་ལྟ་བུའི་བདུད་རྩིར་གྱུར་བས་གང་བའི་པདྨའི་སྣོད་རྣམས་སོ། ། [111a.2]ཡང་ན་བཞི་ཆར་ཡང་བདུད་རྩི་ལྔས་གང་བའོ། །དེ་ནས་ཐུགས་ཀྱི་འཁོར་ལོའི་ཤར་གྱི་རྩིབས་སུ་ཐོད་པའི་དམ་བུ་དང་རབ་ཏུ་གཏུམ་མོའོ། །བྱང་དུ་ཀེང་རུས་ཆེན་པོ་དང་གཏུམ་པའི་མིག་ཅན་མའོ། །ནུབ་ཏུ་ཀེང་རུས་དང་འོད་ལྡན་མའོ། །ལྷོ་རུ་མཆེ་བ་རྣམ་པར་གཙིགས་པ་དང་སྣ་ཆེན་མའོ། །མེར་ཆང་ [111a.3]དགྲ་མ་དང་དཔའ་བོའི་བློ་གྲོས་མའོ། །སྲིན་པོར་འོད་དཔག་མེད་དང་མིའུ་ཐུང་མའོ། །རླུང་དུ་རྡོ་རྗེ་འོད་དང་ལང་ཀའི་དབང་ཕྱུག་མའོ། །དབང་ལྡན་དུ་རྡོ་རྗེའི་ལུས་དང་ཤིང་གྲིབ་མའོ། །རིམ་པ་དེ་བཞིན་དུ་གསུང་གི་འཁོར་ལོ་ལ་མྱུ་གུ་ཅན་དང་ས་སྲུང་མའོ། །རྡོ་རྗེ་རལ་པ་ཅན་དང་འཇིགས་བྱེད་ཆེན་ [111a.4]མོའོ། །དཔའ་བོ་ཆེན་པོ་དང་རླུང་གི་ཤུགས་ཅན་མའོ། །རྡོ་རྗེ་ཧཱུཾ་མཛད་དང་ཆང་འཐུང་མའོ། །རྡོ་རྗེ་བཟང་པོ་དང་ལྷ་མོ་སྔོ་བསངས་མའོ། །རྡོ་རྗེ་འོད་དང་ཤིན་ཏུ་བཟང་མོའོ། །འཇིགས་བྱེད་ཆེན་མོ་དང་རྟ་རྣ་མའོ། །མིག་མི་བཟང་དང་བྱ་གདོང་མའོ། །དེ་བཞིན་དུ་སྐུའི་འཁོར་ལོ་ལ་སྟོབས་པོ་ཆེ་ [111a.5]དང་འཁོར་ལོའི་ཤུགས་ཅན་མའོ། །རིན་ཆེན་རྡོ་རྗེ་དང་དུམ་སྐྱེས་མའོ། །རྟ་མགྲིན་དང་ཆང་འཚོང་མའོ། །ནམ་མཁའི་སྙིང་པོ་དང་འཁོར་ལོའི་གོ་ཆ་འཛིན་པའོ། །དཔལ་ཧེ་རུ་ཀ་དང་ཤིན་ཏུ་བཟང་མོའོ། །པདྨ་གར་གྱི་དབང་ཕྱུག་དང་སྟོབས་ཆེན་མའོ། །རྣམ་བར་སྣང་མཛད་དང་འཁོར་ལོས་སྒྱུར་ [111a.6]མའོ། །རྡོ་རྗེ་སེམས་དཔའ་དང་བརྩོན་འགྲུས་ཆེན་མོའོ། །དེ་ལ་ཐོད་པའི་དུམ་བུ་ལ་སོགས་པ་དཔའ་བོ་རྣམས་ཞལ་གཅིག་པ་སྤྱན་གསུམ་པ་རལ་པའི་ཐོར་ཚུགས་ཅན་དཔྲལ་བར་གནས་པའི་རྡོ་རྗེ་ཕྲེང་བས་མཚན་པའི་དཔའ་བོའི་དར་དཔྱངས་ཅན་ཕྱག་བཞི་པ་འཁྱུད་པའི་ཕྱག་གཉིས་ཀྱིས་རྡོ་རྗེ་དང་རྡོ་རྗེ་ [111a.7]དྲིལ་བུ་གཡོན་པས་ཁ་ཊྭཱཾ་ག་དང་གཡས་པ་ཌ་མ་རུ་བསྣམས་པ། ཚངས་པའི་སྐུད་པ་དང་དཔུང་རྒྱན་ཅན་མཆེ་བ་གཙིགས་པའི་ཞལ། ཕྱག་རྒྱ་ལྔ་དང་ལྡན་པ་གཡས་བརྐྱང་གིས་གནས་པའོ། །རབ་ཏུ་གཏུམ་མོ་ལ་སོགས་པའི་ལྷ་མོ་རྣམས་ཞལ་གཅིག་པ་སྤྱན་གསུམ་པ་དྲག་པོའི་གཟུགས་ཅན་མ་ [111b] [111b.1]དབུ་སྐྲ་གྲོལ་བའི་གཅེར་བུ་མ། ཕྱག་གཉིས་པ་འཁྱུད་པའི་ཕྱག་གིས་ཐོད་པ་འཛིན་པ། གཡས་པ་གདུག་པ་རྣམས་བསྡིགས་པའི་གྲི་གུག་འཛིན་པའོ། །སྒོ་རྣམས་ལ་ཁྭ་གདོང་མ་དང་འུག་གདོང་མ་དང་ཁྱི་གདོང་མ་དང་ཕག་གདོང་མ་རྣམས་ནི་མཁའ་འགྲོ་མ་ལ་སོགས་པ་བཞིན་ནོ། །ཁྱད་ [111b.2]པར་དུ་འདི་རྣམས་ཀྱི་ཞལ་ནི་མིང་གི་རྗེས་སུ་མཐུན་པའོ། །མཚམས་རྣམས་སུ་གཤིན་རྗེ་བརྟན་མ་དང་། གཤིན་རྗེ་ཕོ་ཉ་མ་དང་། གཤིན་རྗེ་མཆེ་བ་མ་དང་གཤིན་རྗེ་འཇོམས་མ་རྣམས་ནི་མིའི་ཞལ་ལོ། །གཡས་དང་གཡོན་གྱི་ཕྱོགས་ཀྱི་ལྷ་མོ་གཉིས་ཀྱི་གཡས་དང་གཡོན་གྱི་སྐུ་ཕྱེད་ཕྱེད་འདྲ་ [111b.3]བའོ། །བརྒྱད་པོ་འདི་རྣམས་ནི་རོའི་གདན་ཅན་ནོ། །ཌཱ་ཀི་མ་ལ་སོགས་པའི་ལྷ་མོ་རྣམས་ནི་མི་མགོའི་ཕྲེང་བ་ཅན་རྡོ་རྗེ་ཕྲེང་བས་དཔྲལ་བར་བརྒྱན་པ་ཕྱག་རྒྱ་ལྔ་དང་ལྡན་པ་སྐ་རགས་ལ་སྒྲ་དང་བཅས་པའི་གཡེར་ག་ལ་སོགས་པས་བརྒྱན་པའོ། །རིགས་ཀྱི་བདག་པོ་ནི་བཅོམ་ལྡན་འདས་ཀྱིས་མི་ [111b.4]བསྐྱོད་པའོ། །རྡོ་རྗེ་ཕག་མོའི་རྣམ་པར་སྣང་མཛད་དོ། །ཌཱ་ཀི་མ་ལ་སོགས་པའི་རིན་ཆེན་འབྱུང་ལྡན་དང་། ཐུགས་དང་གསུང་དང་སྐུའི་འཁོར་ལོར་གནས་པ་རྣམས་ནི་མི་བསྐྱོད་པ་དང་སྣང་བ་མཐའ་ཡས་དང་རྟག་པ་རྣམས་སོ། །དམ་ཚིག་གི་འཁོར་ལོ་ལ་གནས་པ་རྣམས་ནི་དོན་ཡོད་གྲུབ་ [111b.5]བའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ། ཌཱ་ཀི་ནཱི་ཛཱ་ལ་སཾ་བ་རཾ་སྭཱ་ཧཱ། སྙིང་པོའོ། །ཨོཾ་ཁཎྜ་རོ་ཧེ་ཧཱུཾ་ཧཱུཾ་ཕཊ་ཅེས་བྱ་བ་ནི་དུམ་སྐྱེས་མའི་སྔགས་ཏེ་ལས་ཐམས་ཅད་པའོ། །ལྷ་གཞན་རྣམས་ཀྱི་ནི་ཁོ་བོས་དཔལ་བདེ་མཆོག་གི་མངོན་པར་ [111b.6]རྟོགས་པའི་སྒྲུབ་ཐབས་སུ་བཤད་པའོ། །ཡང་དཀྱིལ་འཁོར་གྱི་དབང་ཕྱུག་ལ་སོགས་པ་ནས་གཤིན་རྗེ་འཇོམས་མའི་བར་ཐམས་ཅད་ནི་ཞལ་གཅིག་པ་ཕྱག་གཉིས་པ་དེ་ལ་དཔའ་བོ་ཉི་ཤུ་རྩ་ལྔས་འཁྱུད་པའི་གཡས་གཡོན་གྱི་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། ཌཱ་ཀི་མ་ལ་ [111b.7]སོགས་པ་བཞི་དང་ཁྭ་གདོང་མ་ལ་སོགས་པ་རྣམས་ནི་གཡོན་པས་ཐོད་པ་དང་དཔུང་པ་ལ་བརྟེན་པའི་ཁ་ཊྭཱཾ་ག་དང་གཡས་པ་ཌཱ་མ་རུ་འཛིན་པ་གཞན་ཐམས་ཅད་ནི་གོང་བཞིན་ནོ། །ཡང་ན་འདིར་འཁོར་ལོའི་དབང་ཕྱུག་ལ་སོགས་པ་ཕྱག་གཉིས་པ་ཉིད་ཀྱིས་ཕྱོགས་ལ་དཔལ་བདེ་མཆོག་དང་རྡོ་རྗེ་ [112a] [112a.1]ཕག་མོ་གཉིས་ཀྱིས་གསེར་གྱི་མདོག་གམ་སྔོན་པོས་ཡང་སྟེ། བཅོམ་ལྡན་འདས་ནི་ཕྱག་གཡས་པས་རྡོ་རྗེ་གསོར་བ་ལ་མཆོག་ཏུ་བརྩོན་པ་གཡོན་པས་ཐོད་པ་དང་ཁ་ཊྭཱཾ་ག་འཛིན་པའམ། ཡང་ན་རྡོ་རྗེ་དང་དྲིལ་བུའི་ཕྱག་གཉིས་ཀྱིས་འཁྱུད་པས་གནས་པའོ། །ཌཱ་ཀི་མ་ལ་ [112a.2]སོགས་པ་བཞི་ནི་སེར་མོ་གཡས་པ་ཌཱ་མ་རུ་འཛིན་པ་རྣམས་སོ། །ཐུགས་ཀྱི་འཁོར་ལོའི་དཔའ་བོ་རྣམས་ནག་པོ་རྡོ་རྗེ་དང་རྡོ་རྗེ་དྲིལ་བུ་འཛིན་པ་དཔའ་མོ་རྣམས་དཀར་མོ་ཕྱག་གཡས་པས་རྡོ་རྗེ་དང་བཅས་པའི་སྡིགས་མཛུབ་ཅན་རྣམས་སོ། །གསུང་གི་འཁོར་ལོའི་དཔའ་བོ་རྣམས་ནི་དམར་པོ་པདྨ་དང་ [112a.3]པདྨའི་དྲིལ་བུ་འཛིན་པའོ། །ཌཱ་ཀི་མ་རྣམས་ནི་ནག་མོ་ཕྱག་གཡས་པ་ན་པདྨ་དང་བཅས་པའི་སྡིགས་མཛུབ་མཛད་པའོ། །སྐུའི་འཁོར་ལོའི་དཔའ་བོ་རྣམས་ནི་དཀར་པོ་འཁོར་ལོ་དང་འཁོར་ལོའི་དྲིལ་བུ་འཛིན་པའོ། །ལྷ་མོ་རྣམས་ནི་དམར་མོ་གཡས་པས་སྡིགས་མཛུབ་དང་བཅས་པའི་འཁོར་ [112a.4]ལོ་འཛིན་པ་རྣམས་སོ། །དཔའ་བོ་ཐམས་ཅད་ནི་ཡུམ་ལ་འཁྱུད་པར་བརྩོན་པ་གཡས་བརྐྱང་གིས་བཞུགས་པ་རྣམས་སོ། །དཔའ་མོ་རྣམས་ནི་དེའི་བརླ་གཉིས་ལ་འཁྲིལ་བའི་ཚུལ་ལོ། །ཁྭ་གདོང་མ་ལ་སོགས་པ་རྣམས་ནི་གཡས་སྡིགས་མཛུབ་དང་བཅས་པའི་གྲི་གུག་འཛིན་པའོ། །ལྷ་མོ་ཐམས་ [112a.5]ཅད་ནི་གཡོན་པས་ཐོད་པ་འཛིན་པའོ། །གཤིན་རྗེ་བརྟན་མ་ལ་སོགས་པ་ནི་གཡས་པས་ཌཱ་མ་རུ་གཡོན་པས་སྡིགས་མཛུབ་དང་བཅས་པའི་མི་མགོ་འཛིན་པའོ། །ཌཱ་ཀི་མ་ལ་སོགས་པ་རྣམས་དང་ཁྭ་གདོང་མ་ལ་སོགས་པ་རྣམས་ཀྱི་གཡོན་པའི་དཔུང་པ་ལ་ཁ་ཊྭཱཾ་གའོ། །བཅུ་གཉིས་པོ་འདི་ [112a.6]རྣམས་ནི་སྐྱིལ་ཀྲུང་ཕྱེད་པའི་གར་གྱིས་གནས་པ་ཁྱད་པར་གཞན་ཐམས་ཅད་ནི་གོང་བཞིན་ནོ། །འདི་ནི་བདེ་མཆོག་གི་དཀྱིལ་འཁོར་རྣམ་པ་གསུམ་མོ།། །།གང་གི་ཚེ་འདི་རྣམས་ལ་དཔའ་བོ་ཉི་ཤུ་རྩ་ལྔ་མི་བསྒོམ་པར་རྡོ་རྗེ་ཕག་མོ་དཀྱིལ་འཁོར་གྱི་གཙོ་བོར་གྱུར་པ་དེའི་ཚེ་རྡོ་རྗེ་ཕག་མོའི་དཀྱིལ་འཁོར་ [112a.7]གསུམ་མོ། །རྡོ་རྗེ་ཕག་མོའི་སྙིང་གའི་ས་བོན་ནི་བཾ་མོ། །ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཧཱུཾ་ཕཊ་ཅེས་པ་ནི་སྙིང་པོའོ། །བདེ་མཆོག་གི་ཕྱག་གཉིས་པ་ལ་སོགས་པ་ལྷ་འདི་རྣམས་ཀྱི་ཕྱག་གཡས་སུ་གནས་པའི་ཕྱག་མཚན་ནི་བྲི་བྱའི་དཀྱིལ་འཁོར་ལ་བྲི་བར་བྱའོ།། །།བཅོམ་ལྡན་འདས་སངས་རྒྱས་ཐོད་ [112b] [112b.1]པ་ལྷ་ཉི་ཤུ་རྩ་ལྔའི་བདག་ཉིད་ཅན་གྱི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དབུས་སུ་གནས་པའི་གཞལ་ཡས་ཁང་གི་ནང་དུ་འཁོར་ལོ་རྩིབས་བརྒྱད་པ་ནག་པོ་ལ་གནས་པའི་སྣ་ཚོགས་པདྨ་འདབ་བརྒྱད་ཀྱི་ཟེ་འབྲུར་རོ། །གན་རྐྱལ་གྱི་སྙིང་གར་ཉི་མའི་དཀྱིལ་འཁོར་ལ་བཅོམ་ལྡན་ [112b.2]འདས་དཔལ་ཧེ་རུ་ཀ་སྐུ་མདོག་ནག་པོ་སྐྱིལ་ཀྲུང་ཕྱེད་པ་གར་གྱི་ཉམས་དགུས་གར་བྱེད་པ་ཞལ་གཅིག་པ་ཕྱག་བཞི་པ་སྤྱན་གསུམ་དམར་ལ་ཟླུམ་པ་གཡས་ཀྱི་ཕྱག་གཉིས་ན་ཌཱ་མ་རུ་དང་གྲི་གུག་གཡོན་གྱི་ཕྱག་གཉིས་ན་ཐོད་པ་དང་ཁ་ཊྭཱཾ་ག་འཛིན་པའོ། །ཕྱག་རྒྱ་དྲུག་པ་མི་མགོ་རློན་པ་ལྔ་བཅུའི་ [112b.3]ཕྲེང་བ་མགྲིན་པ་ལ་འཕྱང་བ། གཉིས་འཐུང་གི་པགས་པའི་ཤམ་ཐབས་ཅུང་ཟད་རྒྱབ་ན་ཉིལ་བ་སྣ་ཚོགས་རྡོ་རྗེ་དང་ཟླ་བ་ཕྱེད་པས་མཚན་པའི་རལ་བའི་ཐོར་ཅོག་ནག་པོ་ཅན་དཔྲལ་བའི་སྟེང་དུ་ཐོད་པ་ལྔས་བརྒྱན་པ་སངས་རྒྱས་ལྔའི་དབུ་རྒྱན་ཅན་ནོ། །མངའ་བདག་འདིའི་བཙུན་མོ་ནི་སྣ་ [112b.4]ཚོགས་སྡེ་མ་གཅེར་བུ་མི་མགོའི་ཕྲེང་བ་ཅན་སྐྲ་སིལ་བུར་འགྲོ་ཞིང་གྱེན་དུ་འབར་བ་ཐོད་པ་ལྔས་དབུ་བརྒྱན་པ། མཆེ་བ་ཅུང་ཟད་གཙིགས་པ་སྐུ་མདོག་དམར་པོ་ཞལ་གཅིག་ཕྱག་གཉིས་སྤྱན་གསུམ་མ། ཡབ་ཀྱི་མགྲིན་པ་ལ་ཆགས་པའི་ཕྱག་གཡོན་པས་ཐོད་པ་ཁྲག་གི་རྒྱུན་འཛག་པ་ [112b.5]ཡབ་ལ་སྟོབ་པ། གཡས་ཀྱི་ཕྱག་གིས་གྲི་གུག་བརྡེག་པའི་ཚུལ་ལོ། །ཤར་གྱི་རྩིབས་ནག་པོའི་སྟེང་གི་འདབ་མ་ལ་ལེགས་ཕྲེང་ཅན་མའོ། །བྱང་དུ་ཐོད་པ་ཅན་མའོ། །ནུབ་ཏུ་འཇིགས་ཅན་མའོ། །ལྷོར་མི་ཐུབ་མའོ། །དབང་ལྡན་ལ་སོགས་པའི་འདབ་མ་རྣམས་ལ་གཡས་ [112b.6]སྐོར་གྱིས་བྱང་སེམས་དཀར་བ་དང་དམར་བ་དང་བདུད་རྩི་ལྔ་དང་སྒྲོན་མེ་ལྔས་གང་བའི་ཐོད་པ་རྣམས་སོ། །རིམ་པ་དང་པོ་འདི་ནི་རྡོ་རྗེ་ཕྲེང་བ་སྔོན་པོས་བསྐོར་བའོ། །དེ་ནས་རིམ་པ་གཉིས་པ་ནི་རྩིབས་བརྒྱད་དམར་པོ་ལ་གནས་པའི་པདྨ་བརྒྱད་ཀྱི་ཕྱི་རིམ་རྡོ་རྗེ་དམར་པོའི་ཕྲེང་བས་བསྐོར་ [112b.7]བའོ། །དེའི་ཤར་གྱི་རྩིབས་ལ་དགེ་བའི་སྐ་རགས་མའོ། །བྱང་དུ་ནི་གཟུགས་ཅན་མའོ། །ནུབ་ཏུ་རྣམ་རྒྱལ་མའོ། །ལྷོར་འདོད་ཅན་མའོ། །དབང་ལྡན་དུ་དུས་ཅན་མའོ། །མེར་ནི་མཚོ་ཆེན་མའོ། །བདེན་བྲལ་དུ་བྱེད་མའོ། །རླུང་དུ་གསོད་མའོ། །དེ་ནས་རིམ་པ་གསུམ་པ་ [113a] [113a.1]ལ་ནི་འཁོར་ལོ་དཀར་པོ་རྩིབས་བརྒྱད་པ་ལ་གནས་པའི་པདྨ་བརྒྱད་དེ་རྡོ་རྗེ་དཀར་པོའི་ཕྲེང་བས་བསྐོར་བའོ། །དེའི་ཤར་གྱི་རྩིབས་ལ་སྒྲོལ་མའོ། །བྱང་དུ་འཇིགས་མཐོང་མའོ། །ནུབ་ཏུ་ལེགས་མཐོང་མའོ། །ལྷོར་ཐུབ་དཀའ་མའོ། །དབང་ལྡན་དུ་དགེ་ [113a.2]མའོ། །མེར་གྲིབ་ནོན་མའོ། །བདེན་བྲལ་དུ་དུས་མཚན་མའོ། །རླུང་དུ་གྲགས་ཆེན་མའོ། །ཤར་གྱི་སྒོའི་པདྨ་ལ་མཛེས་མའོ། །བྱང་གི་སྒོའི་པདྨ་ལ་ནོར་འཛིན་མའོ། །ནུབ་སྒོའི་པདྨ་ལ་སྐལ་བཟངས་མའོ། །ལྷོ་སྒོའི་པདྨ་ལ་མཐོང་ན་ཡིད་འོང་མའོ། །འདི་རྣམས་ཐམས་ཅད་གཡས་ [113a.3]གཡོན་གྱི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་སོ་ཅུང་ཟད་སྟོན་པ་ཞལ་གཅིག་མ་སྤྱན་གསུམ་མ་རུས་པའི་རྒྱན་གྱིས་བརྒྱན་པ་མི་མགོའི་ཕྲེང་བ་དང་བྲལ་བ། དབུ་སྐྲ་སིལ་བུ་དམར་སེར་གྱི་ཚོགས་གྱེན་དུ་བརྫེས་པ་བྱང་སེམས་འཛག་པ་ཉི་མའི་གདན་ལ་སྐྱིལ་ཀྲུང་ཕྱེད་པའི་གར་གྱི་ཚུལ་ [113a.4]གྱིས་གནས་པ་རྣམས་སོ། །སྒོ་སྐྱོང་མ་རྣམས་ནི་གཡས་བསྐུམ་གཡོན་བརྐྱང་བའོ། །ཐམས་ཅད་ཀྱང་སྟག་གི་པགས་པ་གྱོན་མ་སྐུ་མདོག་སྔོན་མོའོ། །ཡང་ན་ལེགས་ཕྲེང་ཅན་མ་ལ་སོགས་པ་བཞི་ནག་མོའོ། །རིམ་པ་གཉིས་མ་ལ་གནས་པ་རྣམས་དཀར་སེར་རོ། །རིམ་པ་གསུམ་ [113a.5]པ་ལ་གནས་པ་རྣམས་ལྗང་གུ་མའོ། །སྒོའི་ལྷ་མོ་རྣམས་ནག་མོའོ། །བཅོམ་ལྡན་འདས་ལ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ལྔས་རྒྱས་བཏབ་པའོ། །སྣ་ཚོགས་སྡེ་མ་ནི་རྣམ་པར་སྣང་མཛད་ཀྱིས་སོ། །ལེགས་ཕྲེང་ཅན་མ་ལ་སོགས་པ་བཞི་ནི་རིན་འབྱུང་གིས་སོ། །རིམ་པ་ [113a.6]གཉིས་པ་ལ་གནས་པ་རྣམས་ནི་སྣང་བ་མཐའ་ཡས་ཀྱིས་སོ། །རིམ་པ་གསུམ་པ་ལ་གནས་པ་རྣམས་ནི་རྣམ་པར་སྣང་མཛད་ཀྱིས་སོ། །སྒོའི་ལྷ་མོ་རྣམས་ཀྱི་དོན་ཡོད་གྲུབ་པའོ། །བཅོམ་ལྡན་འདས་ཀྱི་སྙིང་གའི་ས་བོན་ནི་ཧཱུཾ་ངོ་། །ཨོཾ་བུདྡྷ་ཀ་པཱ་ལི་ནཱི་ཨཱཿཧཱི་ཧེཿཧཱུཾ་ཕཊ་སྙིང་པོའོ། །སྔགས་ [113a.7]འདི་ཉིད་ཀྱིས་དཀྱིལ་འཁོར་འདིའི་ལས་ཐམས་ཅད་པའོ།། །།དཔལ་རྣལ་འབྱོར་ནམ་མཁའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་རླུང་དང་མེ་དང་ཆུ་དང་སའི་དཀྱིལ་འཁོར་གྱི་སྟེང་དུ་རྒྱ་མཚོ་ཆེན་པོ་ལ་སོགས་པས་ཡོངས་སུ་བསྐོར་བའི་རི་རབ་ཀྱི་སྟེང་དུ་སྣ་ཚོགས་པདྨ་དང་རྡོ་རྗེ་རྒྱ་གྲམ་གྱི་ལྟེ་བ་ལ་ [113b] [113b.1]གནས་པའི་གཞལ་ཡས་ཁང་གི་དཀྱིལ་དུ་དབུས་ཀྱི་རིམ་པའི་ལྟེ་བར་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པའི་བཅོམ་ལྡན་འདས་དཔལ་རྣལ་འབྱོར་ནམ་མཁའ་ནག་པོ་རྩ་བ་དང་གཡས་གཡོན་གྱི་ཞལ་གསུམ་ནག་པོ་དང་དཀར་པོ་དང་དམར་པོ་ [113b.2]ཞལ་རེ་རེ་ལ་སྤྱན་གསུམ་གསུམ་པ་ཕྱག་རྒྱ་དྲུག་དང་ལྡན་པ་དཔྲལ་བར་གནས་པའི་ཐོད་པ་ལྔའི་ཕྲེང་བ་དང་ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པ་ནག་པོའི་ཅོད་པན་ཅན། དེ་བཞིན་གཤེགས་པ་ལྔ་འཕྲོ་བའི་དབུ་རྒྱན་ཅན་སྟག་གི་པགས་པའི་ཤམ་ཐབས་རྒྱབ་ཏུ་ [113b.3]ཅུང་ཟད་ཉིལ་བ། ཕྱག་དྲུག་པ་རྡོ་རྗེ་དང་རྡོ་རྗེ་དྲིལ་བུ་བསྣམས་པའི་ཕྱག་གཉིས་ཀྱིས་ཡེ་ཤེས་ཀྱི་ཌཱ་ཀི་མ་ནག་མོའམ་དཀར་མོ་ལ་འཁྱུད་པ། ལག་པ་གཡས་པ་གཉིས་ཀྱིས་ནུ་མ་དང་མདའ་འཛིན་པ་གཡོན་པ་གཉིས་ཀྱིས་པད་སྣོད་དང་གཞུ་འཛིན་པའོ། །དེ་ནས་ཤར་གྱི་རེ་མིག་ལ་གླང་པོ་ཆེའི་ [113b.4]རྒྱལ་པོ་ལ་འགྱིང་བའི་ཚུལ་གྱིས་གནས་པའི་རྡོ་རྗེ་ཌཱ་ཀི་མ་དཀར་མོ། བྱང་དུ་རྨ་བྱ་ལ་སྐྱིལ་ཀྲུང་ཕྱེད་པས་གནས་པའི་འཇིགས་བྱེད་ཌཱ་ཀི་མ་སེར་མོ་སྦྲུལ་གྱིས་བརྒྱན་པ། ནུབ་ཏུ་བྱ་ཁྱུང་ལ་ཙོག་པུར་གནས་པའི་རོ་ལངས་མ་དམར་མོ། ལྷོར་ཁོལ་པོའི་གདན་ལ་བྱིན་པའི་སྐྱིལ་ཀྲུང་གིས་གནས་པའི་གཏུམ་ [113b.5]མོ་སྔོན་མོ་དབུ་སྐྲ་དམར་པོ་འགྲམ་པར་གྲོལ་ཞིང་སྤྱི་བོར་ཐལ་མོ་སྦྱོར་བའོ། །འདིར་ཡེ་ཤེས་ཀྱི་ཌཱ་ཀི་མ་ལ་སོགས་པ་ལྔ་ནི་གཡས་དང་གཡོན་གྱི་ཕྱག་གཉིས་ཀྱིས་ཁ་ཊྭཱཾ་ག་དང་ཐོད་པ་འཛིན་པའོ། །རྡོ་རྗེ་མཁའ་འགྲོ་མ་ལ་སོགས་པ་རྣམས་ནི་གླང་པོ་ཆེ་ལ་སོགས་པ་ལ་གནས་པའི་པདྨ་དང་ཉི་མ་ལ་གནས་ [113b.6]པ་གླང་པོ་ཆེའི་པགས་པ་སྨད་ལ་གོན་པ་མིའི་པགས་པ་སྟོད་ལ་གོན་པའོ། །དབང་ལྡན་དུ་སེང་གེ་ལ་འགྱིང་བའི་ཚུལ་གྱིས་གནས་བའི་སེང་གེ་མ་དཀར་སེར་ཕྱག་གཉིས་མ་གཡས་པས་སྟེང་དུ་འཕྱར་བའི་ཁ་ཊྭཱཾ་ག་འཛིན་པ། གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པའོ། །མེར་ [113b.7]རྡོ་རྗེ་ཕག་མཆུ་མ་ཟླུམ་པོའི་ཚུལ་གྱིས་བཞུགས་པའི་སྟག་མོ་ཁ་དོག་དཀར་ནག་མོ་ཕྱག་གཉིས་མ་གཡས་པ་དང་ཅིག་ཤོས་ཀྱིས་ལྕགས་ཀྱུ་དང་ཞགས་པ་འཛིན་པའོ། །བདེན་བྲལ་དུ་མ་ཧེ་ལ་སྐྱིལ་ཀྲུང་ཕྱེད་པས་བཞུགས་པ་ཅེ་སྤྱང་མ་ཅེ་སྤྱང་གི་གདོང་ཅན་སྐུ་མདོག་དམར་ནག་དགྲ་སྟ་དང་ཞགས་ [114a] [114a.1]པ་འཛིན་པའི་ཕྱག་གཉིས་སོ། །རླུང་དུ་ཅེ་སྤྱང་གི་གདན་ལ་ཙོག་པུར་བཞུགས་པའི་འུག་པ་མ་འུག་པའི་གདོང་ཅན་དམར་སེར་མོ་ཕྱག་གཉིས་ཀྱིས་དབྱུག་པ་དང་ཞགས་པ་འཛིན་པའོ། །འདི་རྣམས་ནི་རང་རང་གི་ཆིབས་རྣམས་ལ་པདྨ་དང་ཉི་མར་གནས་པའོ། །ཤར་དུ་རྡོ་རྗེ་ [114a.2]ཌཱ་ཀི་མའི་རྒྱབ་ཏུ་ཌཱ་ཀི་མ་དཀར་མོ་ཕྱག་གཉིས་རྩེ་མོ་ཁར་བཅུག་པའོ། །བྱང་དུ་འཇིགས་བྱེད་ཌཱ་ཀི་མའི་རྒྱབ་ཏུ་མར་མེ་མ་སེར་མོ་སྤྱི་བོར་མར་མེ་ལྟ་བུར་ཐལ་མོ་སྦྱར་བ་དང་བཅས་པའོ། །ནུབ་ཏུ་རོ་ལངས་མའི་རྒྱབ་ཏུ་འཇིགས་བྱེད་མ་དམར་མོ་སྙིམ་པ་ཁྲག་གིས་བཀང་བ་ཞལ་དུ་གསོལ་བའོ། །ལྷོར་གཏུམ་ [114a.3]མོའི་རྒྱབ་ཏུ་ཀམྤོ་ཇི་ནག་མོ། ཕྱག་གཉིས་ཀྱིས་ཐུགས་ཀར་གཏུན་ཤིང་འཕྱར་བའོ། །བཞི་པོ་འདི་རྣམས་པདྨ་དང་ཉི་མ་དང་རོ་ལ་གནས་པའོ། །དེ་ནས་རྡོ་རྗེ་ཕྲེང་བ་དང་འོད་ཟེར་གྱི་ཟླུམ་པོའི་རིམ་པ་བསྐོར་བ་ལ་པདྨ་དང་ཟླ་བ་རྣམས་ལ་ཤར་ཕྱོགས་སུ་པུཀྐ་སཱི་དང་ཌཱི་མི་ཌཱི་དང་གཏུམ་མོ་རྣམས་ཕྱག་གཉིས་ [114a.4]ཀྱིས་བདུད་རྩིའི་སྣོད་འཛིན་པའོ། །བྱང་དུ་འཇིགས་བྱེད་མ་དང་གྲགས་མ་དང་ཤ་མ་རྣམས་ནི་ཤ་ལྔས་བཀང་བའི་པདྨའི་སྣོད་འཛིན་པའོ། །ནུབ་ཏུ་དྲག་ཤུལ་མ་དང་འབར་མ་དང་མི་སྡུག་མ་རྣམས་གཏོར་མའི་སྣོད་འཛིན་པའོ། །ལྷོར་ཐོད་པ་མ་དང་རྡོ་རྗེ་མ་དང་བུམ་པ་མ་རྣམས་བཏུང་བའི་སྣོད་འཛིན་པའོ། ། [114a.5]དབང་ལྡན་དུ་སྒེག་མོ་སྙེམས་པའི་ཕྱག་རྒྱ་ཅན་དང་དྲི་ཆབ་མ་དྲིའི་སྣོད་འཛིན་པའོ། །མེའི་མཚམས་སུ་པི་ཝང་མ་པི་ཝང་བསྒྲེང་བ་དང་མེ་ཏོག་མ་མེ་ཏོག་འཐོར་བའོ། །བདེན་བྲལ་དུ་གླུ་མ་ཁའི་ཐད་ཀར་མཛུབ་མོ་གཡོ་བ་དང་། བདུག་སྤོས་མ་སྤོས་དང་བཅས་པའི་སྤོས་ཕོར་འཛིན་པའོ། །རླུང་དུ་གར་མ་ [114a.6]གར་གྱི་ཚུལ་གྱིས་སྟེང་དུ་ཐལ་མོ་སྦྱར་བ་དང་། མར་མེ་མ་མར་མེ་དང་བཅས་པའི་མར་མེའི་སྣོད་འཛིན་པའོ། །ཡེ་ཤེས་ཌཱ་ཀི་མ་ལ་སོགས་པའི་ལྷ་མོ་སུམ་ཅུ་རྩ་གསུམ་པོ་འདི་དག་ནི་ཞལ་གཅིག་པ་ཕྱག་གཉིས་པ་སྤྱན་གསུམ་པ་དབུ་སྐྲ་གྲོལ་བ། དབུ་ལ་ཐོད་པ་ལྔའི་ཕྲེང་བ་ཅན་ནོ། །འཇིགས་བྱེད་ཌཱ་ཀི་ [114a.7]མ་ནི་དབུ་སྐྲ་གྱེན་ལ་བརྫེས་བ། སེང་གེ་མ་ལ་སོགས་པ་ནི་གོས་དམར་པོ་གྱོན་པའོ། །པུཀྐ་སཱི་ལ་སོགས་པ་དང་མེའི་མཚམས་ཀྱི་ལྷ་མོ་རྣམས་དཀར་མོའོ། །འཇིགས་བྱེད་ཌཱ་ཀི་མ་ལ་སོགས་པ་དང་དབང་ལྡན་གྱི་ལྷ་མོ་དག་སེར་མོའོ། །དྲག་ཤུལ་མ་ལ་སོགས་པ་དང་རླུང་མཚམས་ཀྱི་ལྷ་མོ་དག་ [114b] [114b.1]དམར་མོའོ། །ཐོད་པ་མ་ལ་སོགས་པ་དང་བདེན་བྲལ་གྱི་ལྷ་མོ་དག་ནག་མོའོ། །དེ་ནས་རྡོ་རྗེ་ཕྲེང་བ་ཟླུམ་པོའི་ཕྱི་རོལ་གྱི་རིམ་པའི་སྒོ་རྣམས་དང་སྣམ་བུ་རྣམས་ལ་ཆུ་སྐྱེས་དང་ཟླ་བའི་གདན་རྣམས་སོ། །དེ་ལ་ཤར་སྒོར་ཁྱབ་འཇུག་ནག་པོ་དང་། བྱང་དུ་ཚངས་པ་སེར་པོ་དང་། ནུབ་ཏུ་དབང་ཕྱུག་ཆེན་ [114b.2]པོ་དཀར་པོ་དང་། ལྷོར་གདོང་དྲུག་དམར་བོ་དང་། དབང་ལྡན་དུ་དབང་པོ་སེར་པོ་དང་། མེར་ལུས་ངན་སེར་པོ་དང་། སྲིན་པོར་གཤིན་རྗེ་ནག་པོ་དང་། རླུང་དུ་ཆུ་ལྷ་དཀར་པོའོ། །ལྷའི་སྣམ་བུ་ལ་ཤར་དུ་ཀེང་རུས་འཇིགས་བྱེད་དང་ཁ་ཊྭཱཾ་གའི་སྲིན་པོ་དང་ཚོགས་ཀྱི་དབང་ཕྱུག་དང་། དྲིལ་བུའི་རྣ་བ་ [114b.3]ཅན་རྣམས་དཀར་པོའོ། །བྱང་དུ་གཏུམ་མོའི་དབང་ཕྱུག་དང་མདུན་སའི་ལྷ་དང་རིགས་ཀྱི་དབང་ཕྱུག་དང་། ཛྷཾ་གར་འཇིགས་སུ་རུང་བ་རྣམས་སེར་པོའོ། །ནུབ་ཏུ་དྲག་པོའི་འདོད་པ་དང་ཥ་ཎ་ཌི་ལའི་དབང་ཕྱུག་དང་ཌ་མ་རུའི་འདུལ་བྱེད་དང་རྔ་སྒྲས་འཇིགས་བྱེད་རྣམས་དམར་པོའོ། །ལྷོ་རུ་ཏུམ་ [114b.4]བུ་རའི་དབང་ཕྱུག་དང་སྠཱ་ར་ན་དང་། མཆེ་བ་གཙིགས་པ་དང་གཞུ་འཛིན་པ་རྣམས་ནི་ནག་པོའོ། །ཁྱབ་འཇུག་ལ་སོགས་པ་ཉི་ཤུ་རྩ་བཞི་པོ་འདི་རྣམས་ནི་ཞལ་གཅིག་ཕྱག་བཞི་པ་སྤྱན་གསུམ་པ། ཕྱག་གཡས་པ་གཉིས་ཀྱིས་ཁ་ཊྭཱཾ་ག་དང་རྩེ་གསུམ་པ་འཛིན་པའོ། །གཡོན་པ་གཉིས་ཀྱིས་ལྷ་ [114b.5]མོ་ལ་འཁྱུད་པ་དང་ཐོད་པ་འཛིན་པའོ། །རལ་པ་ནག་པོའི་ཐོར་གཙུག་ཅན་རྣམས་ཐོད་པ་ལྔའི་ཕྲེང་བས་དབུ་ལ་བརྒྱན་པ་ཕྱག་རྒྱ་ལྔ་དང་ལྡན་པ། སྟག་གི་པགས་པའི་ཤམ་ཐབས་ཅན་ནོ། །འདི་རྣམས་ཀྱི་ཡུམ་ལྷ་མོ་རྣམས་ཀྱང་ཕྱག་གཡས་པ་དང་ཅིག་ཤོས་ཀྱིས་ཁ་ཊྭཱཾ་ག་དང་ཐོད་པ་འཛིན་ [114b.6]པའོ། །འདིར་དཔལ་རྣལ་འབྱོར་ནམ་མཁའ་ལ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ལྔས་རྒྱས་བཏབ་པའོ། །ཡེ་ཤེས་ཀྱི་མཁའ་འགྲོ་མ་ལ་མི་བསྐྱོད་པའམ། རྡོ་རྗེ་རྣམ་པར་སྣང་མཛད་ཀྱི་རྒྱས་བཏབ་པའོ། །རྡོ་རྗེ་ཌཱ་ཀི་མ་ལ་སོགས་པ་བཞི་ལ་རྟག་ [114b.7]པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པ་རྣམས་ཀྱིས་སོ། །སེང་གེ་མ་ལ་སོགས་པ་བཞི་ནི་མི་བསྐྱོད་པ་དང་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་རྣམས་ཀྱིས་སོ། །ཚངས་པ་ལ་རྣམ་པར་སྣང་མཛད་ཀྱིས་ [115a] [115a.1]སོ། །དབང་ཕྱུག་ཆེན་པོ་ལ་སྣང་བ་མཐའ་ཡས་ཀྱིས་སོ། །ལྷ་གཞན་དཀར་པོ་རྣམས་ལ་རྣམ་པར་སྣང་མཛད་ཀྱིས་སོ། །སེར་པོ་རྣམས་ཀྱི་ནི་རིན་ཆེན་འབྱུང་ལྡན་གྱིས་སོ། །དམར་པོ་རྣམས་ལ་སྣང་བ་མཐའ་ཡས་ཀྱིས་སོ། །ནག་པོ་རྣམས་ལ་མི་བསྐྱོད་ [115a.2]པའོ། །དཀྱིལ་འཁོར་གྱི་དབང་ཕྱུག་གི་སྙིང་གའི་ས་བོན་ཧཱུཾ་ངོ་། །ཨོཾ་ཧཱུཾ་ཧཿསྭཱ་ཧཱ། ཞེས་པ་ནི་སྙིང་པོའི་སྔགས་སོ། །ཨོཾ་གྷུཾ་གྷཿསྭཱ་ཧཱ། རོ་ལངས་མའི་ལས་ཐམས་ཅད་པའི་སྔགས་སོ་ཞེས་བྱ་བ་ནི། རིམ་པ་གསུམ་གྱི་དཀྱིལ་འཁོར་རོ། །དབུས་ཀྱི་དཀྱིལ་འཁོར་གཞལ་ཡས་ཁང་ལྟ་བུ་ལ་ [115a.3]ཌཱ་ཀི་མ་ལ་སོགས་པ་བཞི་པོ་རྣམས་ནི་སྒོ་རྣམས་སུའོ་ཞེས་པ་གཞན་ནོ། །རིམ་པ་གཉིས་པ་ཡང་གཞལ་ཡས་ཁང་གི་དབྱིབས་སོ་ཞེས་པ་ནི་གཞན་ནོ། །དེ་ཡང་ཟླུམ་པོའོ་ཞེས་བྱ་བ་ནི་ཁ་ཅིག་གོ།། །།བཅོམ་ལྡན་འདས་གཤིན་རྗེ་གཤེད་ཀྱི་དཀྱིལ་འཁོར་ལ་རྡོ་རྗེ་གུར་གྱི་དབུས་སུ་ཆོས་འབྱུང་གི་ལྟེ་ [115a.4]བར་གནས་པའི་གཞལ་ཡས་ཁང་གི་དབུས་སུ་སྣ་ཚོགས་མཚོ་སྐྱེས་དང་ཉི་མའི་སྟེང་དུ་གནས་པའི་མ་ཧེ་ནག་པོ་ཁྲོས་པ་རུས་པའི་རྒྱན་གྱིས་བརྒྱན་པའི་རྒྱབ་ཏུ་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་གཤིན་རྗེའི་གདན་ལ་གཡས་བསྐུམ་པ་གཡོན་བརྐྱང་པས་མནན་ནས་བཞུགས་པའི་གཤིན་རྗེ་གཤེད་ [115a.5]ནག་པོ་སྨིན་མ་དང་ཨག་ཚོམ་གྱེན་དུ་ལངས་ཤིང་དབུ་སྐྲ་དམར་སེར་གྱེན་དུ་བརྫེས་པ། རྡོ་རྗེའི་རྒྱན་གྱིས་བརྒྱན་པ་སྐུ་བོང་ཐུང་ཞིང་གསུས་པ་འཕྱང་བ་དྲེགས་པ་མི་མགོའི་ཕྲེང་བ་མགུལ་པར་འཕྱང་བ། ལྗགས་འགྱུ་བ་མཆེ་བ་འབར་བ་གཙིགས་པ། རྩ་བ་དང་གཡས་དང་གཡོན་གྱི་ཞལ་ནག་པོ་དང་ [115a.6]དཀར་པོ་དང་དམར་པོ། ཕྱག་དྲུག་པ་གྲི་གུག་ཐོད་པར་ལྡན་པའི་གཡས་དང་ཅིག་ཤོས་ཀྱི་ཕྱག་གཉིས་ཀྱིས་རང་འོད་ཀྱི་ཤེས་རབ་མ་ལ་འཁྱུད་པ། གཡས་པ་གཉིས་ཀྱིས་རྡོ་རྗེ་དང་རལ་གྲི། གཡོན་པ་གཉིས་ན་འཁོར་ལོ་དང་པདྨ་འཛིན་པའོ། །འཇིག་རྟེན་གསུམ་ལས་རྣམ་པར་རྒྱལ་བ་བཞིན་དུ་ [115a.7]མཐའ་ཡས་ལ་སོགས་པའི་ཀླུས་བརྒྱན་པའོ། །འདིའི་ཤར་དུ་རྣམ་པར་སྣང་མཛད་དཀར་པོ་སྟེ། རྩ་བ་དང་གཡས་དང་ཅིག་ཤོས་ཀྱི་ཞལ་དཀར་པོ་དང་ནག་པོ་དང་དམར་པོ་ཕྱག་གཡས་གཉིས་ན་འཁོར་ལོ་དང་རལ་གྲིའོ། །གཡོན་གྱི་ཕྱག་གཉིས་ན་རིན་པོ་ཆེ་དང་པདྨ་འཛིན་པའོ། །ལྷོ་ཕྱོགས་ [115b] [115b.1]སུ་རིན་ཆེན་འབྱུང་ལྡན་གསེར་བཙོ་མའི་མདོག་ལྟ་བུ་ཞལ་གསུམ་སེར་པོ་དང་སྔོན་པོ་དང་། དཀར་པོ་གཡས་ཀྱི་ཕྱག་དག་ན་རིན་པོ་ཆེ་དང་རལ་གྲིའོ། །གཡོན་པ་དག་ན་འཁོར་ལོ་དང་པདྨ་འཛིན་པའོ། །ནུབ་ཏུ་སྣང་བ་མཐའ་ཡས་དམར་པོ་ཞལ་གསུམ་དམར་པོ་དང་ནག་པོ་དང་དཀར་པོའོ། ། [115b.2]གཡས་པ་དག་ན་པདྨ་དང་རལ་གྲིའོ། །གཡོན་པ་དག་ན་ནོར་བུ་དང་འཁོར་ལོ་འཛིན་པའོ། །བྱང་ཕྱོགས་སུ་ཕྲག་དོག་གཤིན་རྗེ་གཤེད་ལྗང་གུ་ཞལ་གསུམ་ལྗང་གུ་དང་ནག་པོ་དང་། དཀར་པོ་གཡས་པ་དག་ན་འཁོར་ལོ་དང་རལ་གྲི། གཡོན་པ་དག་ན་ནོར་བུ་དང་པདྨ་འཛིན་པའོ། །བཞི་ཆར་ཡང་། [115b.3]ཁྲོ་བོ་འཁོར་ལོའི་བདག་པོའི་མཚན་ཉིད་ཅན་གཡས་པ་དང་ཅིག་ཤོས་ཀྱི་རྩ་བའི་ཕྱག་དག་གིས་གྲི་གུག་དང་ཐོད་པ་འཛིན་ཅིང་རང་དང་འདྲ་བའི་ཡུམ་ལ་འཁྱུད་པའོ། །མེའི་མཚམས་སུ་རྡོ་རྗེ་ཙ་རྩི་ཀ་མ་ནི་སྐེམ་ཞིང་། གཟུགས་དང་ཕྱག་མཚན་རྣམས་ནི་གཏི་མུག་གཤིན་རྗེ་གཤེད་ལྟ་བུའོ། །བདེན་ [115b.4]བྲལ་དུ་རྡོ་རྗེ་ཕག་མོ་ཕག་ཞལ་ཅན་མ་ཞེ་སྡང་གཤིན་རྗེ་གཤེད་ལྟ་བུའོ། །རླུང་དུ་རྡོ་རྗེ་དབྱངས་ཅན་མ་འདོད་ཆགས་གཤིན་རྗེ་གཤེད་ལྟ་བུའོ། །དབང་ལྡན་དུ་དཀར་པོ་ཕྲག་དོག་གཤིན་རྗེ་གཤེད་ལྟ་བུའོ། །འདིར་རྣམ་པར་སྣང་མཛད་ལ་སོགས་པ་ནི་སྣ་ཚོགས་རྡོ་རྗེའི་རའི་རྩ་བ་རྣམས་སུའོ། ། [115b.5]རྡོ་རྗེའི་ར་མཚམས་རྣམས་སུ་རྡོ་རྗེ་ཙ་རྩི་ཀ་ལ་སོགས་པ་བཞི་ནི་རང་འོད་དང་འདྲ་བའི་ཐབས་དང་བཅས་པའོ། །ཤར་སྒོར་ཐོ་བ་གཤིན་རྗེ་གཤེད་ནག་པོ་ཞལ་གསུམ་ནི་ནག་པོ་དང་དཀར་པོ་དང་དམར་པོའོ། །གཡས་དག་གིས་རྡོ་རྗེ་ཐོ་བ་དང་རལ་གྲི། གཡོན་དག་གིས་ནོར་བུ་དང་པདྨ་ [115b.6]འཛིན་པའོ། །ལྷོ་སྒོར་དབྱུག་པ་གཤིན་རྗེ་གཤེད་དཀར་པོ་ཞལ་གསུམ་དཀར་པོ་དང་སྔོན་པོ་དང་དམར་པོའོ། །གཡས་པ་དག་གིས་དབྱུག་པ་དང་རལ་གྲི། གཡོན་པ་དག་གིས་འཁོར་ལོ་དང་པདྨ་འཛིན་པའོ། །ནུབ་སྒོར་པདྨ་གཤིན་རྗེ་གཤེད་འདོད་ཆགས་གཤིན་རྗེ་གཤེད་ལྟ་བུའོ། །བྱང་ [115b.7]སྒོར་རལ་གྲི་གཤིན་རྗེ་གཤེད་ཕྲག་དོག་གཤིན་རྗེ་གཤེད་ལྟ་བུ་ལ་ཅུང་ཟད་སྔོ་བའོ། །ཐམས་ཅད་ཀྱང་མ་རུངས་པ་འཇིགས་པ་གད་རྒྱངས་ཅན་དབུ་སྐྲ་དམར་སེར་འབར་བ་གྱེན་ལ་བརྫེས་ཤིང་མཆེ་བ་གཙིགས་པའི་ཞལ་ཅན་རྩ་བའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་ཅིང་རང་འོད་ཀྱི་ [116a] [116a.1]ཤེས་རབ་མ་ལ་འཁྱུད་པའོ། །འདིར་རྣམ་པར་སྣང་མཛད་དང་ལྷ་མོ་རྣམས་ནི་སྣ་ཚོགས་པདྨ་དང་ཟླ་བ་ལ་གནས་པའོ། །ལྷ་གཞན་རྣམས་ནི་སྣ་ཚོགས་པདྨ་དང་ཉི་མར་གནས་པའོ། །དཀྱིལ་འཁོར་གྱི་མེ་ལ་སོགས་པའི་མཚམས་བཞིར་སྣ་ཚོགས་པདྨ་ལ་གནས་པའི་ [116a.2]ཐོད་པ་བཞི་ནི་བྱང་སེམས་དཀར་བ་དང་དམར་བ་དང་བདུད་རྩི་ལྔ་དང་སྒྲོན་མ་ལྔས་བཀང་བའོ། །གཤིན་རྗེ་གཤེད་ནག་པོའི་རིགས་ཀྱི་བདག་པོ་ནི་སྤྱི་བོར་མི་བསྐྱོད་པའི་བདག་ཉིད་དོ། །རྣམ་པར་སྣང་མཛད་ལ་སོགས་པ་བཞི་ཡང་དེ་བཞིན་ནོ། །དེ་རྣམས་ནི་གོ་རིམས་ཇི་ལྟ་བར་སྤྱན་མ་ལ་ [116a.3]སོགས་པ་བཞི་དང་ཐོ་བ་གཤིན་རྗེ་གཤེད་ལ་སོགས་པ་རྣམས་ཀྱིའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཡཾ་ངོ་། །ཨོཾ་ཧྲཱིཿཥྚྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་སྙིང་པོ་སྔགས་དང་ལས་ཐམས་ཅད་པའི་སྔགས་ཀྱང་འདིའོ།། །།རྡོ་རྗེ་སྒྲོལ་མའི་དཀྱིལ་འཁོར་ལ། །རྡོ་རྗེ་ [116a.4]གུར་གྱི་ནང་དུ་ཆོས་འབྱུང་གི་དཀྱིལ་དུ་གཞལ་ཡས་ཁང་གི་ལྟེ་བ་ལ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཟླ་བ་ལ་བཅོམ་ལྡན་འདས་མ་རྡོ་རྗེ་སྒྲོལ་མ་གསེར་བཙོམ་ལྟ་བུ་སངས་རྒྱས་ལྔའི་ཅོད་པན་རྩ་བ་དང་གཡས་པ་དང་རྒྱབ་དང་གཡོན་གྱི་ཞལ་བཞི་གསེར་མདོག་དང་དཀར་པོ་དང་སྔོན་ [116a.5]པོ་དང་། དམར་པོ་ཕྱག་བརྒྱད་མ་གཡས་ཀྱི་ཕྱག་རྣམས་ཀྱིས་རྡོ་རྗེ་དང་ཞགས་པ་དང་མདའ་དང་དུང་རྣམས་འཛིན་པའོ། །གཡོན་པ་རྣམས་ཀྱིས་ཨུཏྤལ་སེར་པོ་དང་གཞུ་དང་ལྕགས་ཀྱུ་དང་སྡིགས་མཛུབ་པོ། །ཤར་གྱི་འདབ་མར་མེ་ཏོག་སྒྲོལ་མ་དཀར་མོ་ནི་ཕྱག་གཉིས་ཀྱི་མེ་ཏོག་གི་ཕྲེང་བ་ [116a.6]འཛིན་པ། ལྷོར་བདུག་སྦོས་སྒྲོལ་མ་ནག་མོ་ནི་ཕྱག་གཉིས་ཀྱིས་བདུག་སྤོས་འཛིན་པའོ། །ནུབ་ཏུ་མར་མེའི་སྒྲོལ་མ་སེར་མོ་ནི་ཕྱག་གཉིས་ཀྱིས་མར་མེའི་གོང་བུ་འཛིན་པའོ། །བྱང་དུ་དྲིའི་སྒྲོལ་མ་དམར་མོ་ནི་ཕྱག་གཉིས་ཀྱིས་དྲི་ཆབ་ཀྱི་དུང་འཕྱར་བའོ། །ལྷ་མོ་བཞི་པོ་འདི་རྣམས་ནི་ཟླ་བ་ལ་ [116a.7]གནས་པའོ། །མེ་ལ་སོགས་པའི་འདབ་མ་རྣམས་ལ་རྣམ་པར་སྣང་མཛད་ལ་སོགས་པའི་མདོག་ལྟ་བུ་འཁོར་ལོ་དང་རྡོ་རྗེ་དང་པདྨ་དང་རལ་གྲིའོ། །རིམ་པ་གཉིས་པའི་ཤར་སྒོར་རྡོ་རྗེ་ལྕགས་ཀྱུ་མ་དཀར་མོ་ནི་གཡས་པ་ན་ལྕགས་ཀྱུ་འཛིན་པའོ། །ལྷོ་རུ་རྡོ་རྗེ་ཞགས་པ་མ་སེར་མོ་ནི་ཕྱག་ [116b] [116b.1]གཡས་པ་ཞགས་པ་འཛིན་པའོ། །ནུབ་ཏུ་རྡོ་རྗེ་ལྕགས་སྒྲོག་མ་དམར་མོ་ནི་ལྕགས་སྒྲོག་ལ་རྡོ་རྗེས་མཚན་པ་ཕྱག་གཡས་སུའོ། །བྱང་དུ་རྡོ་རྗེ་དྲིལ་བུ་མ་ལྗང་གུ་མ་ནི་ཕྱག་གཡས་པ་རྡོ་རྗེས་མཚན་པའི་དྲིལ་བུ་འཛིན་པའོ། །མེ་ལ་སོགས་པའི་མཚམས་སུ་གནས་པའི་སྣ་ཚོགས་པདྨ་རྣམས་ [116b.2]ལ་སྤྱན་མ་ལ་སོགས་པ་རྣམ་པར་དག་པའི་བྱང་སེམས་ཀྱི་བུམ་པ་དང་། རི་རབ་དང་མེ་ཐབ་དང་རྒྱལ་མཚན་ཆེན་པོའོ། །སྟེང་དུ་གཙུག་ཏོར་རྣམ་པར་རྒྱལ་མ་དཀར་མོ་ནི་འཁོར་ལོ་འཛིན་པའི་ཕྱག་གཡས་པའོ། །འོག་ཏུ་གནོད་མཛེས་མ་སྔོན་མོ་ནི་གཡས་པ་ཀླུའི་ཞགས་པ་འཛིན་པའོ། ། [116b.3]ལྷ་མོ་དྲུག་པོ་འདི་རྣམས་ནི་ཕྱག་གཡོན་པ་སྡིགས་མཛུབ་དང་བཅས་པ་སྣ་ཚོགས་པདྨ་དང་ཉི་མར་གནས་པའོ། །བཅུ་པོ་འདི་རྣམས་ཀྱང་ཞལ་གཅིག་ཕྱག་གཉིས་པའོ། །བཅུ་གཅིག་པོ་རྣམས་ཀྱང་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ་གསེར་གྱི་རྣ་ཆ་གཡོ་བས་བརྒྱན་པ་གོས་སྣ་ [116b.4]ཚོགས་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་པདྨ་རཱ་གའི་འོད་ཟེར་འཕྲོ་བའོ། །རྡོ་རྗེ་སྒྲོལ་མའི་རིགས་བདག་ནི་རིན་ཆེན་འབྱུང་ལྡན་ནོ། །མེ་ཏོག་སྒྲོལ་མ་ལ་སོགས་པ་ནི་རྣམ་པར་སྣང་མཛད་དང་མི་བསྐྱོད་པ་དང་། སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཏེ་རྡོ་རྗེ་ལྕགས་ཀྱུ་ [116b.5]མ་ལ་སོགས་པ་རྣམས་ཀྱི་ཡང་ངོ་། །གཙུག་ཏོར་རྣམ་པར་རྒྱལ་མའི་རིན་འབྱུང་ངོ་། །གནོད་མཛེས་མའི་མི་བསྐྱོད་པའོ། །བཅོམ་ལྡན་འདས་མའི་སྙིང་གའི་ས་བོན་ནི་ཏཱཾ་ངོ་། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཞེས་པ་ནི་སྙིང་པོའི་སྔགས་དང་ལས་ཐམས་ཅད་པའི་ཡང་སྔགས་སོ།། །།འོད་ [116b.6]ཟེར་ཅན་མའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་གནས་པའི་ཆོས་འབྱུང་གི་ནང་དུ་གཞལ་ཡས་ཁང་ངོ་། །ཁ་ཅིག་གི་ལུགས་ལ་ཆོས་འབྱུང་མེད་དོ། །རི་རབ་ཀྱི་སྟེང་དུ་གཞལ་ཡས་ཁང་ངོ་ཞེས་སོ། །གཞལ་ཡས་ཁང་གི་ལྟེ་བར་མཆོད་རྟེན་གྱི་ཕུག་གི་དཀྱིལ་དུ་སྣ་ཚོགས་པདྨ་ལ་གནས་ [116b.7]པའི་ཟླ་བའམ་ཉི་མ་ལ་གཡས་བསྐུམ་པ་གཡོན་བརྐྱང་བས་གནས་པའི་བཅོམ་ལྡན་འདས་མ་འོད་ཟེར་ཅན་མ་སེར་མོ་རིན་པོ་ཆེ་སྣ་ཚོགས་ཀྱི་ཅོད་པན་ཅན་དབུ་སྐྲ་ལ་མཆོད་རྟེན་གྱིས་བརྒྱན་པ། རིན་པོ་ཆེ་རྣམ་པ་སྣ་ཚོགས་ཀྱི་རྒྱན་གྱིས་བརྒྱན་པ། ཞལ་གསུམ་པ་རྩ་བའི་ཞལ་སེར་པོ་ [117a] [117a.1]གཡས་དཀར་པོ་གཡོན་ཞལ་ནག་པོ་ཕག་པའི་ཞལ་ཁྲོས་པས་ཁྲོ་གཉེར་དང་ཟུར་མིག་དང་ལྡན་པ། ལྗགས་འདྲིལ་བ་འཇིགས་པར་བྱེད་མ་ཕྱག་དྲུག་མ་གཡས་པ་རྣམས་ཀྱིས་མདའ་དང་རྡོ་རྗེ་དང་ཁབ་འཛིན་པའོ། །གཡོན་པ་རྣམས་ཀྱིས་གཞུ་དང་སྐུད་པ་དང་། མྱ་ [117a.2]ངན་མེད་པའི་ཤིང་མེ་ཏོག་དང་བཅས་པའི་ཡལ་ག་འཛིན་པའོ། །སྨད་གོས་སྔོན་པོ་གྱོན་པ་སྟོད་གཡོགས་རྣམ་པར་བཀྲ་བའི་གོས་སྔོན་པོ་ཅན། གསེར་མདོག་ལྟ་བུའི་ཕག་པའི་གདན་ལ་བཞུགས་པ་རང་གི་མདོག་ལྟ་བུའི་ཕག་པས་ཡོངས་སུ་བསྐོར་བ། མྱ་ངན་མེད་པའི་མེ་ཏོག་གི་ཕྲེང་ [117a.3]བ་དབུ་ལ་བརྒྱན་པ། ཤར་ཕྱོགས་སུ་ཨརྐ་མ་སཱི་ཞེས་བྱ་བ་མེ་ཏོག་བནྡུ་ཀའི་མདོག་ལྟ་བུ་ཁབ་དང་སྐུད་པ་འཛིན་པ། གཡས་གཡོན་གྱི་ཕྱག་གོ། །ལྷོ་རུ་མརྐ་མ་སཱི་ཞེས་བྱ་བའི་ལྷ་མོ་གསེར་གྱི་མདོག་ལྟ་བུའི་གཡས་པས་སྐུད་པ་དང་བཅས་པའི་ཁབ་དང་། གཡོན་པས་མྱ་ངན་མེད་པའི་ [117a.4]ཤིང་གི་ཡལ་ག་འཛིན་པའོ། །ནུབ་ཏུ་ཨནྟ་ར་དྷྭཾ་ན་མ་སཱི་སེར་མོ་ནི་གཡས་པ་མྱ་ངན་མེད་པའི་ཡལ་ག་གཡོན་པ་སྡིགས་མཛུབ་དང་བཅས་པའི་ཞགས་པ་འཛིན་པའོ། །བྱང་དུ་ནི་ར་མ་སཱི་ཞེས་བྱ་བ་སྐུ་མདོག་དམར་མོ་ཕྱག་གཉིས་ཀྱིས་གཞུ་དང་མདའ་འཛིན་པའོ། །མེའི་མཚམས་ [117a.5]ལ་སོགས་པར་ཨུ་ད་ཡ་མ་སཱི་དང་། གུལྨ་མ་སཱི་དང་། བ་ན་མ་སཱི་དང་། ཙཱི་བ་ར་མ་སཱི་རྣམས་རིམ་པ་ཇི་ལྟ་བ་བཞིན་དུ་ཨརྐ་མ་སཱི་ལ་སོགས་པའི་མདོག་དང་ཕྱག་མཚན་བཞིན་ནོ། །རིམ་པ་གཉིས་པའི་ཤར་གྱི་སྣམ་བུ་ལ་མ་ཧཱ་ཙཱི་བར་མ་སཱི་དང་། བ་རཱ་ཧ་མུ་ཁི་ནི་ནག་མོ་མཆེ་བ་ [117a.6]གཙིགས་པ་འཇིགས་སུ་རུང་བ། གཡས་པ་རྡོ་རྗེ་ལྕགས་ཀྱུ་དང་གཡོན་པས་རྡོ་རྗེ་ཞགས་པ་འཛིན་པའོ། །ལྷོ་རུ་པ་དཱ་ཀྲ་མ་སཱི་དང་བ་རཱ་ལི་སེར་མོ་ནི་གཡས་པས་མྱ་ངན་མེད་པའི་ཡལ་ག་དང་གཡོན་པས་རྡོ་རྗེ་འཛིན་པའོ། །ནུབ་ཏུ་པ་ར་ཀྲ་མ་སཱི་དང་བི་ད་ལི་དམར་མོ་ནི་གཡས་ [117a.7]པ་དང་གཡོན་མདའ་དང་གཞུ་འཛིན་པའོ། །བྱང་དུ་ཨཱུར་མ་སཱི་དང་། བ་རཱ་ལི་ལྗང་གུ་ཁབ་དང་སྐུད་པ་འཛིན་པ། གཡས་པ་དང་གཡོན་གྱི་ཕྱག་གོ། །མེའི་མཚམས་སུ་བ་ཏཱ་ལི་དམར་མོ་གཡས་གཡོན་གྱི་ཕྱག་གཉིས་ཀྱིས་ཁབ་དང་སྐུད་པ་འཛིན་པའོ། །བདེན་བྲལ་དུ་བ་དཱ་ལི་སེར་མོ་ནི་ [117b] [117b.1]གཡས་པ་སྐུད་པ་དང་བཅས་པའི་ཁབ་དང་གཡོན་པས་ཡལ་འདབ་དང་བཅས་པའི་མྱ་ངན་མེད་པའི་མེ་ཏོག་གི་ཆུན་པོ་འཛིན་པའོ། །རླུང་དུ་བ་རཱ་ལི་སྐུ་མདོག་དཀར་མོ་གཡས་པ་དང་གཡོན་པ་གཉིས་ཀྱིས་མྱ་ངན་མེད་པའི་ཡལ་ག་དང་ཞགས་པ་འཛིན་པའོ། །དབང་ལྡན་དུ་བཱ་རཱ་ཧ་མུ་ཁི་དམར་ [117b.2]མོ་ནི་ཕྱག་གཉིས་ཀྱིས་མདའ་དང་གཞུ་འཛིན་པའོ། །ཤར་ལ་སོགས་པའི་སྒོར་ཨཱ་ལོ་དང་ཏཱ་ལོ་དང་ཀཱ་ལོ་དང་སཙྪ་ལོ་སམྤ་ཏ་མུརྡྷི་ཊཱི་རྣམས་ནི་རིམ་པ་ཇི་ལྟ་བ་བཞིན་དུ་དཀར་པོ་དང་སེར་པོ་དང་དམར་པོ་དང་ལྗང་གུ་ཕྱག་གཉིས་མ་རྡོ་རྗེ་ལྕགས་ཀྱུ་དང་ཞགས་པ་དང་ལྕགས་སྒྲོག་དང་། དྲིལ་བུ་འཛིན་ [117b.3]པའོ། །ཨརྐ་མ་སཱི་ལ་སོགས་པའི་ལྷ་མོ་ཉི་ཤུ་རྩ་བཞི་པོ་འདི་རྣམས་ནི་མངོན་པར་གསར་དུ་བྱུང་བའི་ལང་ཚོ་ཅན་མཆོད་རྟེན་གྱིས་དབུ་ལ་བརྒྱན་པ་རིན་པོ་ཆེ་སྣ་ཚོགས་ཀྱིས་བརྒྱན་པ། སྣ་ཚོགས་པའི་གོས་སྔོན་པོས་སྟོད་གཡོགས་བྱས་པ་ཕག་ཞལ་གཅིག་མ་ཕྱག་གཉིས་པ་སྤྱན་གསུམ་པ་གསེར་ [117b.4]མདོག་ལྟ་བུའི་ཕག་པའི་ཚོགས་ཀྱིས་བསྐོར་བ་དང་ལྡན་པ་གསེར་མདོག་ལྟ་བུའི་ཕག་པ་ལ་ཆིབས་པའོ། །སྒོ་སྐྱོང་མ་རྣམས་ནི་སྣ་ཚོགས་པདྨ་དང་ཉི་མ་ལ་གཡོན་བསྐུམ་པ་གཡས་བརྐྱང་བས་གནས་པའོ། །གཞན་ཉི་ཤུ་པོ་ནི་སྣ་ཚོགས་པདྨ་དང་ཟླ་བ་ལ་གཡས་བསྐུམ་གཡོན་བརྐྱང་བས་ [117b.5]གནས་པའོ། །འོད་ཟེར་ཅན་མའི་རིགས་བདག་བརྟག་པའོ། །ཤར་ལ་སོགས་པའི་ཕྱོགས་ལ་གནས་པ་རྣམས་ཀྱི་མི་བསྐྱོད་པ་དང་རིན་ཆེན་འབྱུང་ལྡན་དང་། སྣང་བ་མཐའ་ཡས་དང་དོན་ཡོད་གྲུབ་པ་རྣམས་སོ། །མེ་ལ་སོགས་པའི་ཕྱོགས་བྲལ་རྣམས་སུ་ཡང་དེ་བཞིན་ནོ་ཁ་ཅིག་གོ། ། [117b.6]ཡང་ན་དཀར་པོ་རྣམས་ལ་རྣམ་སྣང་ནག་པོ་རྣམས་ལ་མི་བསྐྱོད་པ། སེར་པོ་རྣམས་ལ་རིན་ཆེན་འབྱུང་ལྡན། དམར་པོ་རྣམས་ལ་སྣང་མཐའ་ལྗང་གུ་རྣམས་ལ་དོན་ཡོད་གྲུབ་པའོ་ཞེས་པ་ནི་གཞན་ནོ། །འོད་ཟེར་ཅན་གྱི་སྙིང་གའི་ས་བོན་ནི་མཱཾ་ངོ་། །ཨོཾ་མཱ་རཱི་ནྱ་སྭཱ་ཧཱ། ཞེས་པ་ནི་སྙིང་པོའི་ [117b.7]སྔགས་སོ། །ཨོཾ་མཱ་རཱི་ཙྱཻ་ཧཱུཾ་སརྦ་བིགྷྣཱཾ་ཨུཚ་དྷ་ཡ་ཧཱུཾ་ཕཊ་སྭཱ་ཧཱ། ཞེས་པ་ནི་ལས་ཐམས་ཅད་པའི་སྔགས་སོ།། །།བསྲུང་བ་ལྔའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་རི་རབ་ཀྱི་སྟེང་དུ་གཞལ་ཡས་ཁང་གི་དབུས་སུ་སྣ་ཚོགས་རྡོ་རྗེའི་ལྟེ་བར་གནས་པའི་སྣ་ཚོགས་པདྨ་དང་ཟླ་བ་ལ་བཅོམ་ [118a] [118a.1]ལྡན་འདས་མ་སོ་སོར་འབྲང་མ་ཆེན་མོ་ནི་འོད་ཟེར་དམར་པོའི་དཀྱིལ་འཁོར་ཅན་ཞལ་བཞི་པ་ཕྱག་བཅུ་གཉིས་པ་རྩ་བའི་ཞལ་སེར་པོ་གཡས་དཀར་པོ་ནུབ་སྔོན་པོ་གཡོན་དམར་པོའོ། །གཡས་པ་རྣམས་ཀྱིས་རིན་པོ་ཆེའི་པ་ཏྲ་དང་འཁོར་ལོ་དང་རྡོ་རྗེ་དང་མདའ་དང་ [118a.2]རལ་གྲི་དང་། མཆོག་སྦྱིན་གྱི་ཕྱག་རྒྱའོ། །གཡོན་པ་རྣམས་ཀྱིས་རྡོ་རྗེ་དང་ཞགས་པ་དང་རྩེ་གསུམ་པ་དང་། གཞུ་དང་དགྲ་སྟ་དང་དུང་རྣམས་འཛིན་པའོ། །དབུལ་མཆོད་རྟེན་གྱིས་བརྒྱན་པ་རྡོ་རྗེའི་སྐྱིལ་ཀྲུང་ཅན་མའོ། །དེའི་ཤར་ཕྱོགས་སུ་སྟོང་ཆེན་མོ་རབ་ཏུ་འཇོམས་མ་ནི་སྣ་ཚོགས་ [118a.3]པདྨ་དང་ཟླ་བ་ལ་རོལ་པའི་ཀུན་ནས་བསྐྱོད་པས་བཞུགས་པ་སྐུ་མདོག་དཀར་པོ་ཟླ་བའི་འོད་ཀྱི་དཀྱིལ་འཁོར་ཅན་ཞལ་བཞི་མ་རྩ་བའི་ཞལ་དཀར་པོ་གཡས་སྔོན་པོ་རྒྱབ་སེར་པོ་གཡོན་པ་ལྗང་གུའོ། །དེའི་གཡས་པ་རྣམས་ཀྱིས་པདྨ་ལ་གནས་པའི་འཁོར་ལོ་རྩིབས་བརྒྱད་པ་དང་མཆོག་ [118a.4]སྦྱིན་པ་དང་ལྕགས་ཀྱུ་དང་མདའ་དང་རལ་གྲི་རྣམས་སོ། །གཡོན་པ་རྣམས་ཀྱིས་རྡོ་རྗེ་དང་སྡིགས་མཛུབ་དང་། ཞགས་པ་དང་གཞུ་དང་དགྲ་སྟ་རྣམས་སོ་ཞེས་བྱ་བའི་ཕྱག་བཅུའོ། །ལྷོ་རུ་སྣ་ཚོགས་པདྨ་དང་ཉི་མར་གནས་པའི་ཉི་མའི་འོད་ཅན་གྱི་གསང་སྔགས་རྗེས་སུ་འཛིན་མ་ཆེན་མོ་ [118a.5]ནི་རྡོ་རྗེ་སྐྱིལ་ཀྲུང་ཅན་མ་ནག་མོ་ནག་མོ་དང་དཀར་པོ་དང་དམར་པོ་ནི་རྩ་བ་དང་གཡས་པ་དང་གཡོན་པའི་ཞལ་ལོ། །ཕྱག་བཅུ་གཉིས་པ་གཡས་པ་དང་གཡོན་པའི་ཕྱག་གཉིས་ཀྱིས་ཆོས་འཆད་ཀྱི་ཕྱག་རྒྱ་འཛིན་པ། གཞན་རྣམ་པ་གཉིས་ཀྱིས་བསམ་གཏན་གྱི་ཕྱག་རྒྱའོ། །གཡས་ [118a.6]པའི་གཞན་རྣམས་ཀྱིས་རྡོ་རྗེ་དང་མདའ་དང་། མཆོག་སྦྱིན་དང་མི་འཇིགས་པའི་ཕྱག་རྒྱའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་། གཞུ་དང་རིན་པོ་ཆེའི་པ་ཏྲ་དང་པདྨས་མཚན་པའི་བུམ་པ་འཛིན་པའོ། །ནུབ་ཏུ་སྣ་ཚོགས་པདྨ་དང་ཉི་མ་ [118a.7]ལ་སྐྱིལ་ཀྲུང་ཕྱེད་པས་བཞུགས་པ། ཉི་མའི་འོད་ཅན་གྱི་བསིལ་བའི་ཚལ་ཆེན་པོ་ནི་དམར་མོ་དམར་པོ་དང་དཀར་པོ་དང་ནག་པོ་དང་རྩ་བ་དང་གཡས་པ་དང་གཡོན་པའི་ཞལ་ལོ། །ཕྱག་བརྒྱད་པའི་གཡས་རྣམས་ཀྱིས་པདྨ་དང་བཅས་པའི་མི་འཇིགས་པའི་ཕྱག་རྒྱ་དང་ [118b] [118b.1]མདའ་དང་རྡོ་རྗེ་དང་རལ་གྲིའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་གཞུ་དང་། རིན་པོ་ཆེའི་རྒྱལ་མཚན་དང་སྙིང་གར་གནས་པའི་པོ་ཏི་འཛིན་པའོ། །བྱང་དུ་སྣ་ཚོགས་པདྨ་དང་ཟླ་བ་ལ་ཟླ་བའི་འོད་ཅན་སེམས་དཔའི་སྐྱིལ་ཀྲུང་ཅན། རྨ་བྱ་ཆེན་མོ་ [118b.2]ལྗང་གུ་ནི་ལྗང་གུ་དང་ནག་པོ་དང་དཀར་པོ་ནི་རྩ་བ་དང་གཡས་དང་གཡོན་གྱི་ཞལ་ལོ། །ཕྱག་བརྒྱད་མ་གཡས་པ་རྣམས་ཀྱིས་རྨ་བྱའི་གཞུག་སྒྲོ་དང་མདའ་དང་མཆོག་སྦྱིན་དང་རལ་གྲིའོ། །གཡོན་པ་རྣམས་ཀྱིས་ལྷུང་བཟེད་ལ་གནས་པའི་དགེ་སློང་དང་གཞུ་དང་པང་དུ་གནས་པའི་བུམ་ [118b.3]པ་རིན་པོ་ཆེ་འབར་བ་འབབ་པ་ཅན་དང་། སྣ་ཚོགས་རྡོ་རྗེ་ལ་རིན་པོ་ཆེས་མཚན་པའི་རྒྱལ་མཚན་འཛིན་པའོ། །རིམ་པ་གཉིས་པ་ལ་མེའི་མཚམས་སུ་ནག་པོ་ནི་ཕྱག་གཉིས་ཀྱིས་དུང་འཛིན་པའོ། །བདེན་བྲལ་དུ་དུས་མཚན་མ་སེར་མོ་ཕྱག་གཉིས་ཀྱིས་རྡོ་རྗེས་མཚན་པའི་རྒྱལ་མཚན་འཛིན་ [118b.4]པའོ། །རླུང་གི་མཚམས་སུ་རྣ་བ་ནག་མོ་དམར་མོ་ཕྱག་གཉིས་ཀྱིས་དགྲ་སྟ་འཛིན་པའོ། །དབང་ལྡན་གྱི་མཚམས་སུ་དཀར་མོ་སྐུ་མདོག་དཀར་མོ་ཕྱག་གཉིས་ཀྱིས་རྩེ་གསུམ་པ་འཛིན་པའོ། །བཞི་པོ་འདི་རྣམས་ནི་ཞལ་གཅིག་ཕྱག་གཉིས་པའོ། །དགུ་པོ་འདི་དག་ནི་རཏྣ་སྣ་ཚོགས་ཀྱི་རྒྱན་དང་ [118b.5]གོས་དང་རིན་པོ་ཆེའི་ཅོད་པན་ཅན། ཞལ་རེ་རེ་ལ་སྤྱན་གསུམ་གསུམ་པ་རིམ་པ་ཇི་ལྟ་བ་བཞིན་དུ་རིན་ཆེན་འབྱུང་ལྡན་དང་། རྣམ་པར་སྣང་མཛད་དང་། མི་བསྐྱོད་པ་དང་། སྣང་བ་མཐའ་ཡས་དང་། དོན་ཡོད་གྲུབ་པ་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་ [118b.6]དང་། རྣམ་པར་སྣང་མཛད་ཀྱིས་རྒྱས་བཏབ་པའོ། །ཤར་ལ་སོགས་པའི་སྒོར་སྣ་ཚོགས་པདྨ་དང་ཉི་མ་ལ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་དྲིལ་བུ་མ་རྣམས་ཀྱི་ཡང་སྔར་བཞིན་ནོ། །སོ་སོར་འབྲང་མ་ལ་སོགས་པ་རྣམས་ཀྱིས་བོན་ནི་པྲཾ་ངོ་། ། [118b.7]ཨོཾ་མ་ཎི་དྷ་རི་བཛྲ་ཎི་མ་ཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་ཅེས་བྱ་བ་ནི་སྙིང་པོའོ། །ས་བོན་ནི་བྲུཾ་མོ། །ཨོཾ་ཨཱཿམ་ཧཱ་ས་ཧཱ་སྲ་པྲ་མརྡ་ནི་བྲཱུཾ་ཧཱུཾ་སྙིང་པོའོ། །ས་བོན་ཧཱུཾ་ངོ་། །ཨོཾ་ཨཱཿམ་ཧཱ་མནྟྲ་ཨ་ནུ་སཱ་རི་ནི་ཧཱུཾ་ཧཱུཾ་སྙིང་པོའོ། །ས་བོན་ནི་ཛྲཱིཾ་ངོ་། ཨོཾ་ཨཱཿམ་ཧཱ་ཤི་ཏ་པ་ཏི་བཛྲི་ཧཱུཾ་སྙིང་པོའོ། །ས་བོན་ནི་མཾ་ངོ་། །ཨོཾ་མ་ཧཱ་ [119a] [119a.1]མཱ་ཡཱུ་ར་བིདྱ་རཱ་ཛྙཱི་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་སྙིང་པོའོ། །དགོས་པའི་དབང་གིས་འདི་རྣམས་གང་ཡང་རུང་བས་འཁོར་ལོའི་དབང་ཕྱུག་མ་བྱའོ། །དཀྱིལ་འཁོར་གྱི་དབང་ཕྱུག་མའི་སྙིང་པོའི་སྔགས་ཀྱིས་ནི་ལས་ཐམས་ཅད་པའི་སྔགས་ཀྱང་བྱའོ། །རྡོ་རྗེ་དབྱིངས་ཀྱི་དཀྱིལ་ [119a.2]འཁོར་ལ་རྡོ་རྗེ་གུར་གྱི་ནང་དུ་གླིང་དང་ཉེ་བའི་གླིང་ཕྲན་དང་རྒྱ་མཚོ་དང་རི་བདུན་ལ་སོགས་པས་ཡོངས་སུ་བསྐོར་བའི་རི་རབ་ཀྱི་སྟེང་གཞལ་ཡས་ཁང་སྟེ་དེའི་དབུས་སུ་སེང་གེའི་སྟེང་དུ་སྣ་ཚོགས་པདྨའི་ཟེ་འབྲུ་ལ་བཅོམ་ལྡན་འདས་རྣམ་པར་སྣང་མཛད་དཀར་པོ་རྡོ་རྗེ་སྐྱིལ་ཀྲུང་གིས་གནས་པ་ཉི་ [119a.3]མའི་འོད་ཅན། སངས་རྒྱས་ལྔས་སྤྲས་པའི་རཏྣའི་ཅོད་པན་གྱིས་བརྒྱན་པའི་རལ་པའི་ཐོར་ཅོག་ཅན་རཏྣ་སྣ་ཚོགས་པའི་རྒྱན་དང་གོས་དང་ལྡན་པ་ཞི་བའི་ཞལ་བཞི་དཀར་པོ་དང་སེར་པོ་དང་དམར་པོ་དང་ལྗང་གུ་དང་། ཕྱག་བརྒྱད་པ་གཡས་པ་དང་གཡོན་པ་གཉིས་ཀྱིས་རྡོ་རྗེ་དང་བཅས་པའི་ [119a.4]བྱང་ཆུབ་མཆོག་གི་ཕྱག་རྒྱ་མཛད་པའོ། །གཞན་གཉིས་ཀྱིས་བསམ་གཏན་གྱི་ཕྱག་རྒྱ་འཛིན་པའོ། །གཡས་པ་གཉིས་ཀྱིས་བགྲང་ཕྲེང་དང་མདའ་འཛིན་པའོ། །གཡོན་པ་གཉིས་ཀྱིས་འཁོར་ལོ་དང་གཞུ་འཛིན་པའོ། །ཡང་ན་འདི་ནི་ཞལ་གཅིག་ཕྱག་གཉིས་པ་སྐུ་མདོག་དཀར་པོ་ [119a.5]རྡོ་རྗེ་དང་བཅས་པའི་བྱང་ཆུབ་མཆོག་གི་ཕྱག་རྒྱ་འཛིན་པའོ། །གཡོན་པའི་རྡོ་རྗེའི་ཁུ་ཚུར་གྱི་མཛུབ་མོ་ལངས་པ་ལ་གཡས་པ་རྡོ་རྗེ་ཁུ་ཚུར་གྱིས་བཟུང་བ་བྱང་ཆུབ་མཆོག་གི་ཕྱག་རྒྱའོ། །ཤར་གྱི་འདབ་མ་ལ་སེམས་མ་རྡོ་རྗེ་མ་སྔོན་མོ་གཡས་པས་རྡོ་རྗེ་རྩེ་ལྔ་པ་དམར་པོ་འཛིན་པ་གཡོན་པས་ [119a.6]སྡིགས་མཛུབ་དང་བཅས་པ་ཞགས་པ་འཛིན་པའོ། །ལྷོར་རིན་ཆེན་རྡོ་རྗེ་མ་སེར་མོ་གཡས་པས་རྡོ་རྗེ་རྩེ་ལྔ་པས་མཚན་པའི་རིན་པོ་ཆེ་འཛིན་པ། གཡོན་པས་སྡིགས་པར་བྱེད་པའི་སྡིགས་མཛུབ་པོ། །ནུབ་ཏུ་ཆོས་ཀྱི་རྡོ་རྗེ་མ་དམར་མོ་ནི་རྡོ་རྗེ་རྩེ་ལྔ་པས་མཚན་པའི་པདྨ་འདབ་མ་ [119a.7]བརྒྱད་པ་དཀར་དམར་གཡས་པས་འཛིན་པ། གཡོན་པས་པདྨ་འཛིན་པའོ། །བྱང་དུ་ལས་ཀྱི་རྡོ་རྗེ་མ་ལྗང་གུ་གཡས་པ་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་དེ་བཞིན་གཤེགས་པ་ལྔའི་ཁ་དོག་ཅན་འཛིན་པ། གཡོན་པས་སྡིགས་མཛུབ་སྡིགས་པར་བྱེད་པའོ། །དེ་ནས་ཤར་ཕྱོགས་ [119b] [119b.1]སུ་གླང་པོ་ཆེའི་དབང་པོའི་སྟེང་དུ་སྣ་ཚོགས་པདྨའི་ལྟེ་བར་མི་བསྐྱོད་པ་སྔོན་པོ་རྡོ་རྗེ་སྐྱིལ་ཀྲུང་གིས་གནས་པ། ཕྱག་གཡས་པ་གུང་མོས་རྡོ་རྗེ་རྩེ་ལྔ་པ་སྔོན་པོ་བཟུང་ནས་ས་གནོན་གྱི་ཚུལ་བྱེད་ཅིང་ཕྱག་གཡོན་པ་གན་རྐྱལ་དུ་པང་དུ་བཞག་པའོ། །ཤར་གྱི་འདབ་མར་རྡོ་རྗེ་སེམས་ [119b.2]དཔའ་དཀར་པོ་ཕྱག་གཡས་པའི་གུང་མོས་སྙིང་གར་འགྱིང་བའི་ཚུལ་གྱིས་རྡོ་རྗེ་གསོར་བའི་སྦྱོར་བའོ། །གཡོན་པའི་རྡོ་རྗེ་ཁུ་ཚུར་གྱིས་ང་རྒྱལ་དང་བཅས་པའི་དྲིལ་བུ་དཀུར་བརྟེན་པའོ། །ལྷོར་རྡོ་རྗེ་རྒྱལ་པོ་སེར་པོ་གཡས་པར་གནས་པའི་རྡོ་རྗེ་ལྕགས་ཀྱུས་འགུགས་པའི་ཚུལ་བྱེད་ [119b.3]ཅིང་ཕྱག་གཡོན་པས་ཞགས་པ་འཛིན་པའོ། །ཁ་ཅིག་ནི་ཕྱག་གཉིས་ཀྱིས་རྡོ་རྗེ་ལྕགས་ཀྱུ་འཛིན་པས་འགུགས་པའི་ཚུལ་བྱེད་པའོ་ཞེས་སོ། །བྱང་དུ་རྡོ་རྗེ་ཆགས་པ་དམར་པོ་ཕྱག་གཡོན་དང་ཅིག་ཤོས་རྣམ་པ་གཉིས་ཀྱིས་གཞུ་དང་མདའ་འཛིན་པའོ། །ནུབ་ཏུ་རྡོ་རྗེ་ལེགས་པ་མརྒད་ཀྱི་ [119b.4]མདོག་ལྟ་བུ་རྡོ་རྗེ་དང་བཅས་པའི་ཕྱག་གཉིས་ཀྱིས་སྙིང་གར་ལེགས་སོ་སྦྱིན་པའི་ཚུལ་བྱེད་པའོ། །ལྷོར་རྟའི་རྒྱབ་ཏུ་སྣ་ཚོགས་པདྨའི་ལྟེ་བར་རིན་ཆེན་འབྱུང་ལྡན་སེར་པོ་རྡོ་རྗེ་སྐྱིལ་ཀྲུང་གིས་བཞུགས་པ། གཡས་པས་རྡོ་རྗེས་མཚན་པའི་རིན་པོ་ཆེ་གུང་མོས་བཟུང་སྟེ་མཆོད་སྦྱིན་གྱི་ཚུལ་ [119b.5]བྱེད་པ། གཡོན་པ་མཉམ་བཞག་གོ། །ཤར་གྱི་འདབ་མར་རྡོ་རྗེ་རིན་ཆེན་སེར་པོ་ནི་གཡས་པའི་རྡོ་རྗེ་ཁུ་ཚུར་གྱི་མཐའ་གཉིས་ལ་རྡོ་རྗེ་གཉིས་ཀྱིས་མཚན་པའི་རིན་པོ་ཆེའི་ཕྲེང་བ་རང་གི་དབང་བསྐུར་བའི་གནས་སུ་འཆིང་བར་བྱེད་ཅིང་གཡོན་པས་རྡོ་རྗེ་དྲིལ་བུ་སྙེམས་པ་དང་བཅས་པས་ [119b.6]དཀུར་བརྟེན་པའོ། །ལྷོ་རུ་རྡོ་རྗེ་གཟི་བརྗིད་དམར་པོ་སྙིང་གར་ཕྱག་གཉིས་ཀྱིས་འཛིན་པའི་ཉི་མས་གསལ་བར་བྱེད་པའོ། །བྱང་དུ་རྡོ་རྗེ་ཏོག་ལྗང་གུ་གཡོན་གྱི་བར་དུ་ལྷུར་གནས་པའི་ཕྱག་གཉིས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་འཛིན་ཅིང་འཕྱར་བའོ། །ནུབ་ཏུ་རྡོ་རྗེ་བཞད་པ་དཀར་ [119b.7]པོ་གཡས་པས་སོའི་ཕྲེང་བ་དང་ལྡན་པའི་རྡོ་རྗེ་འཛིན་པ། གཡོན་པས་ཀྱང་དེ་བཞིན་ཏེ་སོའི་ཕྲེང་བ་དང་ལྡན་པའི་རྡོ་རྗེ་གཉིས་ཁར་བཞག་པའོ། །ནུབ་ཏུ་རྨ་བྱའི་སྟེང་དུ་སྣ་ཚོགས་པདྨའི་ཟེ་འབྲུ་ལ་སྣང་བ་མཐའ་ཡས་རྡོ་རྗེ་སྐྱིལ་ཀྲུང་ཅན་དམར་པོ་ཕྱག་གཡོན་པ་དང་ཅིག་ཤོས་གན་རྒྱལ་དུ་བྱས་ [120a] [120a.1]པ་ཕང་པའི་སྟེང་དུ་བཞག་པ་ཏིང་ངེ་འཛིན་གྱི་ཕྱག་རྒྱའི་གཡས་པའི་གུང་མོས་རྡོ་རྗེས་མཚན་པའི་པདྨ་འཛིན་པའོ། །ཤར་གྱི་འདབ་མར་རྡོ་རྗེ་ཆོས་དམར་སྐྱ་གཡོན་པ་འགྱིང་བའི་ཚུལ་དང་བཅས་པས་པདྨའི་ཡུ་བ་འཛིན་ཅིང་གཡས་པས་ཁ་འབྱེད་པའོ། །ལྷོ་རུ་རྡོ་རྗེ་རྣོན་ [120a.2]པོ་ནམ་མཁའ་ལྟ་བུ་སྔོན་པོ་གཡོན་པས་ཐུགས་ཀར་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་འཛིན་པ་གཡས་པས་རལ་གྲི་འཕྱར་བའི་ཚུལ་དུ་འཛིན་པའོ། །བྱང་དུ་རྡོ་རྗེ་རྒྱུ་གསེར་བཙོ་མའི་མདོག་ཅན་གཡོན་པར་གནས་པའི་འཁོར་ལོ་རྩིབས་བརྒྱད་པ་གཡས་པའི་གུང་མོ་མགལ་མེ་ལྟ་བུ་བསྐོར་ཞིང་ [120a.3]ཆོས་ཀྱི་འཁོར་ལོའི་ཕྱག་རྒྱ་འཛིན་པའོ། །ནུབ་ཏུ་རྡོ་རྗེ་སྨྲ་བ་དམར་པོ་གཡོན་པ་ཆོས་ཀྱི་དུང་དང་གཡས་པས་རྡོ་རྗེ་རྩེ་གཅིག་པའི་ལྕེ་འཛིན་པའོ། །བྱང་དུ་ཁྱུང་གི་སྟེང་དུ་སྣ་ཚོགས་པདྨའི་ལྟེ་བར་དོན་ཡོད་གྲུབ་པ་ལྗང་གུ་རྡོ་རྗེ་སྐྱིལ་ཀྲུང་གིས་བཞུགས་པ། ཕྱག་གཡས་པའི་གུང་མོས་སྣ་ཚོགས་ [120a.4]རྡོ་རྗེ་འཛིན་པས་མི་འཇིགས་པ་སྦྱིན་པའི་ཚུལ་བྱེད་ཅིང་གཡོན་པ་གན་རྐྱལ་དུ་པང་བར་བཞག་པའོ། །ཤར་གྱི་འདབ་མར་རྡོ་རྗེ་ལས་ལྗང་གུ་གཡས་པས་སྙིང་གར་བསླང་བའི་སྦྱོར་བས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་འཛིན་པ། གཡོན་པ་སྣ་ཚོགས་རྡོ་རྗེས་མཚན་པའི་དྲིལ་བུ་དཀུར་ [120a.5]བརྟེན་པ། ཡང་ན་ལག་པ་གཉིས་ཀྱིས་ཐལ་མོ་སྤྱི་བོར་སྦྱར་ནས་སྣ་ཚོགས་རྡོ་རྗེ་སྤྱི་བོར་འཛིན་པའོ། །ལྷོར་རྡོ་རྗེ་བསྲུང་བ་སེར་པོ་ཕྱག་གཉིས་ཀྱི་རྡོ་རྗེའི་གོ་ཆ་འཛིན་པའོ། །བྱང་དུ་རྡོ་རྗེ་གནོད་སྦྱིན་ནག་པོ་ཕྱག་གཉིས་ཀྱིས་མཐེ་ཆུང་གཉིས་ཀྱི་རྡོ་རྗེ་མཆེ་བའི་མཚོན་གྱི་རྩེ་མོ་གཉིས་རང་གི་ཁར་ [120a.6]བཅུག་པས་གདུག་པ་རྣམས་སྡིགས་པར་བྱེད་པའོ། །ནུབ་ཏུ་རྡོ་རྗེ་ཁུ་ཚུར་སེར་པོ་ཁུ་ཚུར་གྱི་མཚམས་སུ་རྡོ་རྗེ་སྟེ། རྡོ་རྗེ་ཁུ་ཚུར་དག་གིས་བཟུང་བའི་རྡོ་རྗེ་རྩེ་ལྔ་པ་བསྡམས་པའོ། །དབུས་ཀྱི་གཞལ་ཡས་ཁང་གི་མེའི་པདྨ་རྡོ་རྗེ་སྒེག་མོ་དཀར་མོ་རྡོ་རྗེ་དཀུར་བརྟེན་པའི་ཕྱག་རྒྱའི་ [120a.7]ཕྱག་གཉིས་ཀྱིས་རྡོ་རྗེ་གཉིས་འཛིན་པའོ། །བདེན་བྲལ་དུ་པདྨ་ལ་ཕྲེང་བ་མ་སེར་མོ་ཕྱག་གཉིས་ཀྱིས་རཏྣའི་ཕྲེང་བ་འཛིན་པའོ། །རླུང་དུ་པདྨ་ལ་གླུ་མ་དམར་མོ་ཕྱག་གཉིས་ཀྱིས་པི་ཝང་གི་རྒྱུད་སྦྲེང་བའོ། །དབང་ལྡན་དུ་པདྨ་ལ་གར་མ་ལྗང་གུ་རྡོ་རྗེ་རྩེ་གསུམ་པ་གཉིས་བཟུང་ [120b] [120b.1]ནས་ཕྱག་གཉིས་ཀྱིས་གར་བྱེད་པའོ། །དབུས་ཀྱི་གཞལ་ཡས་ཁང་གི་ཕྱི་རུ་སྣམ་བུ་ལ་ཤར་དུ་པདྨ་རྣམས་ལ་བྱམས་པ་དང་མཐོང་བ་དོན་ཡོད་དང་ངན་སོང་ཀུན་འདྲེན་དང་། མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་རྣམས་ནི་མི་བསྐྱོད་བ་ལྟ་བུའོ། །ལྷོར་པདྨ་རྣམས་ལ་སྤོས་ཀྱི་ [120b.2]གླང་པོ་དང་། དཔའ་བར་འགྲོ་བ་དང་། ནམ་མཁའ་མཛོད་དང་། ཡེ་ཤེས་ཏོག་རྣམས་ནི་རིན་ཆེན་འབྱུང་ལྡན་ལྟ་བུའོ། །ནུབ་ཏུ་པདྨ་རྣམས་ལ་འོད་དཔག་མེད་དང་། ཟླ་བའི་འོད་དང་བཟང་སྐྱོང་དང་དྲ་བ་ཅན་གྱི་འོད་རྣམས་ནི་འོད་དཔག་མེད་ལྟ་བུའོ། །བྱང་དུ་པདྨ་རྣམས་ལ་རྡོ་རྗེ་སྙིང་པོ་དང་། བློ་ [120b.3]གྲོས་མི་བཟད་པ་དང་། སྤོབས་པ་བརྩེགས་པ་དང་། ཀུན་དུ་བཟང་པོ་རྣམས་ནི་དོན་ཡོད་གྲུབ་པ་ལྟ་བུའོ། །ཡང་ན་ཤར་ལ་སོགས་པའི་སྣམ་བུ་རྣམས་ལ་བསྐལ་པ་བཟང་པོའི་བྱང་ཆུབ་སེམས་དཔའ་བྱམས་པ་ལ་སོགས་པ་སྟོང་དུ་བཞིས་མཚང་བ་བསྒོམ་པར་བྱའོ། །དེའི་མཚན་རྣམས་ [120b.4]མངས་པས་འཇིགས་པས་མ་བཤད་དོ། །མེའི་མཚམས་སུ་པདྨ་ལ་རྡོ་རྗེ་བདུག་སྦོས་མ་དཀར་མོ་དང་བདེན་བྲལ་གྱི་པདྨ་ལ་རྡོ་རྗེ་མེ་ཏོག་མ་སེར་པོ་དང་། རླུང་གི་པདྨ་ལ་རྡོ་རྗེ་མར་མེ་མ་དཀར་དམར་དང་། དབང་ལྡན་གྱི་པདྨ་ལ་རྡོ་རྗེ་དྲི་ཆབ་མ་ལྗང་གུ། བདུག་སྤོས་མ་ལ་སོགས་པ་འདི་ [120b.5]རྣམས་གང་བཞིན་དུ་ཕྱག་མཚན་འཛིན་པའོ། །ཤར་ལ་སོགས་པའི་སྒོའི་པདྨ་རྣམས་ལ་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་དང་། རྡོ་རྗེ་འབེབས་པ་རྣམས་རིམ་པ་བཞིན་དུ་དཀར་པོ་དང་སེར་པོ་དང་དམར་པོ་དང་ལྗང་གུ་རྣམས་ནི་གོང་བཞིན་དུ་ཕྱག་མཚན་འཛིན་པའོ། ། [120b.6]འདིར་བཅོམ་ལྡན་འདས་རྡོ་རྗེ་དབྱིངས་ལས་གཞན་པའི་ལྷ་རྣམས་ནི་ཞལ་གཅིག་ཕྱག་གཉིས་པ་གོས་དང་རཏྣ་སྣ་ཚོགས་ཀྱིས་བརྒྱན་པ་རཏྣའི་ཅོད་པན་ཅན་རྡོ་རྗེ་སེམས་དཔའ་ལ་སོགས་པ་མ་གཏོགས་པ་དཀྱིལ་འཁོར་གྱི་དབང་ཕྱུག་ལ་མངོན་དུ་ཕྱོགས་པའོ། །རྡོ་རྗེ་སེམས་དཔའ་ལ་སོགས་པའི་བྱང་ཆུབ་ [120b.7]སེམས་དཔའ་བཅུ་དྲུག་ནི་རང་གི་རིགས་ཀྱི་བདག་པོ་དེ་བཞིན་གཤེགས་པ་ལ་མངོན་དུ་ཕྱོགས་པའོ། །རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་བར་གྱི་ལྷ་རྣམས་ནི་ཇི་ལྟར་གསུངས་པའི་ལྟེ་བ་དང་འདབ་མ་རྣམས་ལ་གནས་ཤིང་ཉི་མའི་འོད་ཟེར་ཅན་ནོ། །དེ་བཞིན་གཤེགས་ [121a] [121a.1]པ་ལྔ་ལས་གཞན་པའི་ལྷ་བཞི་བཅུ་ཞེ་བརྒྱད་ནི་སེམས་དཔའི་སྐྱིལ་ཀྲུང་གིས་བཞུགས་པའོ། །འདིར་བཅོམ་ལྡན་འདས་རྡོ་རྗེ་དབྱིངས་རྣམ་པར་སྣང་མཛད་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་ལ་རང་འདྲ་བའི་རྡོ་རྗེ་སེམས་དཔས་རྒྱས་བཏབ་པའོ། ། [121a.2]མེ་ལོང་ལྟ་བུའི་ཡེ་ཤེས་ལ་སོགས་པའི་བདག་ཉིད་ཀྱིས་མི་བསྐྱོད་པ་ལ་སོགས་པ་དེ་བཞིན་གཤེགས་པ་བཞིའི་རིགས་ཀྱི་བདག་པོ་ནི་རྣམ་པར་སྣང་མཛད་དོ། །སེམས་མ་རྡོ་རྗེ་མ་དང་རྡོ་རྗེ་སེམས་དཔའ་ལ་སོགས་པ་བཞི་དང་སྒེག་མོ་དང་བདུག་སྤོས་མ་དང་བྱམས་པ་ལ་སོགས་པ་བཞི་དང་། རྡོ་རྗེ་ [121a.3]ལྕགས་ཀྱུ་རྣམས་ཀྱི་མི་བསྐྱོད་པའོ། །རིན་ཆེན་རྡོ་རྗེ་མ་དང་རྡོ་རྗེ་རིན་ཆེན་ལ་སོགས་པ་བཞི་དང་། ཕྲེང་བ་མ་དང་མེ་ཏོག་མ་དང་སྤོས་ཀྱི་གླང་པོ་ལ་སོགས་པ་བཞི་དང་རྡོ་རྗེ་ཞགས་པ་རྣམས་ཀྱི་རིན་ཆེན་འབྱུང་ལྡན་ནོ། །ཆོས་ཀྱི་རྡོ་རྗེ་མ་དང་རྡོ་རྗེ་ཆོས་ལ་སོགས་པ་བཞི་དང་གླུ་མ་དང་། མར་མེ་མ་ [121a.4]དང་། འོད་དཔག་མེད་ལ་སོགས་པ་བཞི་དང་། རྡོ་རྗེ་ལྕགས་སྒྲོག་རྣམས་ཀྱི་སྣང་བ་མཐའ་ཡས་སོ། །ལས་ཀྱི་རྡོ་རྗེ་མ་དང་། རྡོ་རྗེ་ལས་ལ་སོགས་པ་བཞི་དང་། གར་མ་དང་དྲི་ཆབ་མ་དང་། རྡོ་རྗེ་སྙིང་པོ་ལ་སོགས་པ་བཞི་དང་རྡོ་རྗེ་འབེབས་པ་རྣམས་ཀྱི་དོན་ཡོད་གྲུབ་པའོ། །འདིར་ནང་ [121a.5]གི་གཞལ་ཡས་ཁང་གི་སྒོ་རྣམས་སུའང་། རྡོ་རྗེ་ལྕགས་ཀྱུ་ལ་སོགས་པ་སྒོ་སྐྱོང་བཞི་བསྒོམ་པར་བྱའོ་ཞེས་པ་ཕྱོགས་གཞན་ནོ། །རྣམ་པར་སྣང་མཛད་ཀྱི་སྙིང་གའི་ས་བོན་ཨཱཿཨོཾ་སརྦ་ཏ་ཐཱ་ག་ཏཱ་མ་ཧཱ་ཡོ་གཱི་ཤྭ་ར་ཧཱུཾ་ཞེས་པ་ནི་སྙིང་པོའོ། །ཨོཾ་བཛྲ་ཡཀྵ་ཧཱུཾ་ཞེས་པ་ནི་རྡོ་རྗེ་གནོད་སྦྱིན་གྱི་ལས་ [121a.6]ཐམས་ཅད་པའི་སྔགས་སོ། །གང་ཡང་རྡོ་རྗེ་རྩེ་མོ་ལ་སོགས་པའི་རྒྱུད་གཞན་གྱིས་ཀྱང་ལྷའི་རྣམ་པའི་ཁྱད་པར་གསུངས་པ་དེ་ནི་འདིར་མངས་ཀྱིས་དོགས་པས་མ་བཤད་དོ།། །།བཞི་བཅུ་རྩ་གསུམ་གྱི་བདག་ཉིད་ཅན། འཇམ་པའི་རྡོ་རྗེའི་དཀྱིལ་འཁོར་ལ་རྡོ་རྗེ་གུར་གྱི་ནང་ལ་སོགས་ [121a.7]པ་གཞལ་ཡས་ཁང་བར་དུ་དང་པོར་བཤད་པའི་འཇམ་པའི་རྡོ་རྗེའི་དཀྱིལ་འཁོར་བཞིན་ནོ། །འོན་ཀྱང་འདིར་ཁྲོ་བོ་རྣམས་ནི་འོག་ནས་འཆད་པའི་གཟུགས་ཅན་ནོ་ཞེས་པ་ནི་ཕྱོགས་གཅིག་གོ། །རྡོ་རྗེ་གུར་གྱི་ནང་ན་རི་རབ་ཀྱི་སྟེང་ན་སྣ་ཚོགས་པདྨའི་ལྟེ་བར་གནས་པའི་སྣ་ཚོགས་རྡོ་རྗེའི་ལྟེ་བར་གཞལ་ [121b] [121b.1]ཡས་ཁང་ཞེས་པ་ནི་ཕྱོགས་གཉིས་པའོ། །ཕྱོགས་གཉིས་ཀ་ལ་ཡང་མཆོད་རྟེན་དཀར་པོའི་ནང་དུ་གཞལ་ཡས་ཁང་ངོ་། །དེའི་ལྟེ་བ་ལ་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པའི་བཅོམ་ལྡན་འདས་རྣམ་པར་སྣང་མཛད་ཀྱི་རང་བཞིན་འཇམ་པའི་རྡོ་རྗེ་ [121b.2]སྐུ་མདོག་གསེར་བཅོ་མ་ལྟ་བུ་སྡུག་ཅིང་ཡིད་དུ་འོང་བ་མེ་ཏོག་སྣ་ཚོགས་ཀྱིས་མཛེས་པའི་གཙུག་ཕུད་ཅན་གསུམ་གྱིས་རྣམ་པར་བརྒྱན་པ་རྩ་བ་དང་གཡས་དང་གཡོན་གྱི་ཞལ་སེར་པོ་དང་སྔོན་པོ་དང་དཀར་པོ་ཕྱག་དྲུག་པ་གཡས་པ་རྣམས་ཀྱི་རལ་གྲི་དང་། མཆོག་སྦྱིན་དང་མདའ་དང་། གཡོན་པ་ [121b.3]རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་དང་ཆུ་སྐྱེས་སྔོན་པོ་དང་གཞུ་འཛིན་པའོ། །བདག་ལྟ་བུའི་རྡོ་རྗེ་དབྱིངས་ཀྱི་དབང་ཕྱུག་མ་ལ་སྙོམས་པར་ཞུགས་པའོ། །དེའི་ཤར་ཕྱོགས་ཀྱི་ལེ་ཚེ་ལ་གླང་པོ་ཆེའི་སྟེང་དུ་སྣ་ཚོགས་པདྨ་དང་ཉི་མ་ལ་མི་བསྐྱོད་པ་སྔོན་པོ་འགྱིང་བའི་ཚུལ་གྱིས་གནས་པ་ [121b.4]རྩ་བ་དང་གཡས་གཡོན་གྱི་ཞལ་སྔོན་པོ་དང་དཀར་པོ་དང་དམར་པོ་ཕྱག་བརྒྱད་པ་གཡས་པའི་གུང་མོས་སྙིང་གར་རྡོ་རྗེ་གྱེན་དུ་བསྒྲེང་བ། གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་དྲིལ་བུ་དཀུ་ལ་བརྟེན་པ། གཡས་གཞན་རྣམས་ཀྱིས་རལ་གྲི་དང་ལྕགས་ཀྱུ་དང་མདའ་རྣམས་སོ། །གཡོན་པ་རྣམས་ [121b.5]ཀྱིས་ནུ་མ་དང་ཞགས་པ་དང་གཞུ་འཛིན་པའོ། །ལྷོ་རུ་རྟའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་རིན་ཆེན་འབྱུང་ལྡན་སེར་པོ་སེམས་དཔའི་སྐྱིལ་ཀྲུང་གིས་བཞུགས་པ། སེར་པོ་དང་སྔོན་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་རྩ་བའི་ཕྱག་དག་གིས་མཉམ་གཞག་གི་ [121b.6]ཕྱག་རྒྱ་བྱས་ལ། གཡས་པའི་ཕྱག་གཉིས་ཀྱིས་རིན་པོ་ཆེ་དང་རལ་གྲི་འཛིན་པའོ། །གཡོན་པ་གཉིས་ཀྱིས་ནུ་མ་དང་རྡོ་རྗེ་འཛིན་པའོ། །ནུབ་ཏུ་རྨ་བྱའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་སེམས་དཔའི་སྐྱིལ་མོ་ཀྲུང་གིས་གནས་པའི་སྣང་བ་མཐའ་ཡས་དཀར་པོ་དཀར་པོ་དང་སྔོན་པོ་དང་དམར་ [121b.7]པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་གཡོན་པ་སྒེག་པ་དང་བཅས་པའི་པདྨའི་ཡུ་བ་སྙིང་གར་བཟུང་སྟེ། གཡས་པས་ཁ་འབྱེད་པའོ། །གཡས་པ་གཉིས་ཀྱིས་བགྲང་ཕྲེང་དང་རྡོ་རྗེ་འཛིན་པའོ། །གཡོན་པ་གཉིས་ཀྱིས་ནུ་མ་དང་སྤྱི་བླུགས་འཛིན་པའོ། །བྱང་དུ་ཁྱུང་ [122a] [122a.1]གི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་དོན་ཡོད་གྲུབ་པ་སེམས་དཔའི་སྐྱིལ་ཀྲུང་གིས་བཞུགས་པ་ཁ་དོག་དམར་པོ་དམར་པོ་དང་སྔོན་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་དང་པོ་གཉིས་ཀྱིས་བསམ་གཏན་གྱི་ཕྱག་རྒྱ་བཅིང་བའོ། །གཡས་པ་གཉིས་ [122a.2]ཀྱིས་རལ་གྲི་དང་རྡོ་རྗེ་འཛིན་པའོ། །གཡོན་པ་གཉིས་ཀྱིས་ནུ་མ་དང་ལྕགས་ཀྱུ་འཛིན་པའོ། །དབང་ལྡན་དུ་སྤྱན་མ་སེར་མོ་ནི་སེམས་དཔའི་སྐྱིལ་ཀྲུང་ཅན། ཕྱག་བརྒྱད་མ་གཡས་པ་རྣམས་ཀྱིས་མཆོག་སྦྱིན་དང་མི་འཇིགས་པ་དང་རྡོ་རྗེ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་ [122a.3]མཛུབ་དང་བཅས་པའི་ཞགས་པ་དང་། རིན་པོ་ཆེའི་སྙེ་མ་དང་བགྲང་ཕྲེང་དང་གཞུ་འཛིན་པའོ། །མེར་མཱ་མ་ཀཱི་སེམས་དཔའི་སྐྱིལ་ཀྲུང་ཅན་མ་སྔོན་མོ་ནི་ཁྲོ་བ་དང་བཅས་པས་དགོད་པ་ཕྱག་དྲུག་པ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའ་དང་། གཡོན་པ་རྣམས་ཀྱིས་སྡིགས་ [122a.4]མཛུབ་དང་ཞགས་པ་དང་གཞུ་འཛིན་པའོ། །བདེན་བྲལ་དུ་གོས་དཀར་མོ་དམར་པོ་ནི་ཕྱག་དྲུག་པ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའོ། །གཡོན་པ་རྣམས་ཀྱིས་པདྨ་དང་བགྲང་ཕྲེང་དང་གཞུ་འཛིན་ཅིང་འགྱིང་བའི་ཚུལ་གྱིས་གནས་པའོ། །རླུང་དུ་སྒྲོལ་མ་མརྒད་ལྟ་བུའི་མདོག་ [122a.5]ཅན་མ་སེམས་དཔའི་སྐྱིལ་ཀྲུང་གིས་གནས་པ། ཕྱག་དྲུག་པ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་ཨུཏྤལ་དང་གཞུ་འཛིན་པའོ། །རིམ་པ་གཉིས་པ་ལ་ཤར་ལ་སོགས་པའི་ཕྱོགས་རྣམས་སུ་སེམས་མ་རྡོ་རྗེ་མ་ [122a.6]དང་རིན་ཆེན་རྡོ་རྗེ་མ་དང་ཆོས་ཀྱི་རྡོ་རྗེ་མ་དང་། ལས་ཀྱི་རྡོ་རྗེ་མ་རྣམས་རིམ་པ་བཞིན་དུ་སྐུ་མདོག་དང་། ཕྱག་མཚན་ནི་མི་བསྐྱོད་པ་ལ་སོགས་པ་བཞིན་ནོ། །འོན་ཀྱང་ནུ་མ་འཛིན་པ་མེད་པས་སེམས་མ་རྡོ་རྗེ་མ་རིན་ཆེན་རྡོ་རྗེ་མ་ལས་ཀྱི་རྡོ་རྗེ་མ་རྣམས་སྡིགས་མཛུབ་འཛིན་པའོ། །ཆོས་ཀྱི་རྡོ་རྗེ་ [122a.7]མ་ནི་ཞགས་པ་འཛིན་པའོ། །དབང་ལྡན་དུ་ཙུནྡ་དཀར་མོ་ཟླ་བའི་མདོག་ཅན་ཕྱག་ཉི་ཤུ་རྩ་དྲུག་མ་རྩ་བའི་ཕྱག་གཉིས་ཀྱིས་སྙིང་གར་རྩ་བའི་ཕྱག་རྒྱ་དང་། གཡས་པ་རྣམས་ཀྱིས་མི་འཇིགས་པ་དང་རལ་གྲི་དང་རཏྣའི་ཕྲེང་བ་དང་བི་ཛ་པཱུ་ར་དང་མདའ་དང་དགྲ་སྟ་དང་མདུང་ཐུང་དང་ཐོབ་དང་ [122b] [122b.1]ལྕགས་ཀྱུ་དང་རྡོ་རྗེ་དང་བ་དན་གསུམ་གྱི་ཚུལ་དང་བགྲང་ཕྲེང་ངོ་། །གཡོན་པ་རྣམས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་དང་། པདྨ་དང་སྤྱི་བླུགས་དང་ཞགས་པ་དང་གཞུ་དང་ཤག་ཏི་དང་འཁོར་ལོ་དང་རལ་གྲི་དང་སྡིགས་མཛུབ་དང་བུམ་པ་བཟང་པོ་དང་བི་དི་བ་ལ་དང་། ཤེས་རབ་ཀྱི་ཕ་ [122b.2]རོལ་ཏུ་ཕྱིན་པའི་པོ་ཏིའོ། །ཀན་ཛཱི་ཀའི་སྟོད་གཡོགས་བཅིངས་པ་བླ་གོས་ཕྲག་པ་ལ་གཟར་བ་གར་གྱི་ཉམས་དགུའི་རང་བཞིན་རྩ་བའི་ཞལ་དཀར་པོ་གཡས་པའི་སྔོན་པོ་ལྗགས་འགུལ་ཞིང་མཆེ་བ་བག་ཙམ་གཙིགས་པ། གཡོན་པ་སེར་པོ་མ་མཆུ་མནན་པ། ཐལ་མོ་སྦྱར་ཏེ་མཛུབ་ [122b.3]མོ་གཉིས་གུང་མོའི་ཚིགས་པར་ཟླུམ་པོའི་རྣམ་པར་བཞག་སྟེ་མཐེ་བོང་གཉིས་མཛུབ་མོའི་རྩ་བའི་ལོགས་ལ་གཞག་པར་བྱ་སྟེ། སྙིང་གར་བཞག་པ་འདི་ནི་རྩ་བའི་ཕྱག་རྒྱའོ། །མེར་ནི་རིན་ཆེན་སྐར་མདའ་སེར་མོ་ཕྱག་དྲུག་པ་གཉིས་ཀྱིས་སྙིང་གར་རིན་པོ་ཆེ་ཁ་སྦྱོར་འཛིན་པའོ། ། [122b.4]གཡས་པ་གཉིས་མི་འཇིགས་པ་དང་མདའ་འཛིན་པ་གཡོན་པ་གཉིས་ཀྱིས་སྡིགས་མཛུབ་དང་གཞུ་འཛིན་པའོ། །བདེན་བྲལ་དུ་ཁྲོ་གཉེར་ཅན་དཀར་མོ་ཕྱག་དྲུག་མ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་སྤྱི་བླུགས་ [122b.5]དང་གཞུ་འཛིན་པའོ། །རླུང་དུ་རྡོ་རྗེ་ལྕགས་སྒྲོག་མ་ལྗང་གུ་ཕྱག་དྲུག་མ་གཡས་པ་རྣམས་ཀྱིས་རྡོ་རྗེ་དང་རྡོ་རྗེ་ལུ་གུ་རྒྱུད་དང་མདའ་འཛིན་པ་གཡོན་པ་རྣམས་ཀྱིས་སྡིགས་མཛུབ་དང་ཞགས་པ་དང་གཞུ་འཛིན་པའོ། །སྤྱན་མ་ལ་སོགས་པའི་ལྷ་མོ་བཅུ་གཉིས་པོ་འདི་རྣམས་ནི་རོལ་པའི་ཀུན་ [122b.6]དུ་བསྐྱོད་པ་དང་ལྡན་པ་ཟླ་བའི་གདན་ལ་བཞུགས་ཤིང་འོད་དམར་པོའི་དཀྱིལ་འཁོར་ཅན། རང་རང་གི་རིགས་ཀྱི་བདག་པོ་བཞིན་དུ་ཞལ་གསུམ་པའོ། །རིམ་པ་གསུམ་པའི་དཀྱིལ་འཁོར་དུ་ཤར་གྱི་སྣམ་བུ་ལ་བྱམས་པ་གསེར་གྱི་མདོག་ལྟ་བུ་ཕྱག་དང་པོ་གཉིས་ཆོས་འཆད་ཀྱི་ཕྱག་ [122b.7]རྒྱ་དང་། གཡས་པ་མཆོག་སྦྱིན་གྱི་ཕྱག་རྒྱ་དང་གཡོན་པ་མེ་ཏོག་དང་བཅས་པའི་ཀླུ་ཤིང་གི་ཡལ་ག་འཛིན་པའོ། །འཇམ་དཔལ་ནི་བརྗོད་ཟིན་པའི་གཟུགས་ཅན་ཏེ། ཁྱད་པར་དུ་ཤེས་རབ་མ་དང་བྲལ་བའོ། །སྤོས་ཀྱི་གླང་པོ་ལྗང་གུ་གཡོན་པས་བུམ་པར་གནས་པའི་གླང་པོ་ཆེའི་ [123a] [123a.1]སྣ་འཛིན་པའོ། །གཡས་ཀྱི་མཆོག་སྦྱིན་ནོ། །ཡེ་ཤེས་ཏོག་སེར་པོ་གཡོན་པས་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །གཡས་མཆོག་སྦྱིན་ནོ། །ལྷོ་རུ་བཟང་སྐྱོང་སྐུ་མདོག་དམར་པོ། །གཡོན་པ་རཏྣ་འཛིན་པ་གཡས་པས་མཆོག་སྦྱིན་ནོ། །བློ་གྲོས་ [123a.2]རྒྱ་མཚོ་དཀར་པོ་ཕྱག་གཉིས་ཀྱི་སོར་མོ་ཐམས་ཅད་བརྐྱང་བས་ཆུ་རླབས་ཀྱི་ཚུལ་བྱེད་པའོ། །བློ་གྲོས་མི་ཟད་པ་གསེར་གྱི་མདོག་ལྟ་བུ་གཡོན་པའི་ཁུ་ཚུར་སྙིང་གར་བཞག་སྟེ། གཡས་པས་མཆོག་སྦྱིན་ནོ། །སྤོབས་པ་བརྩེགས་པ་ལྗང་གུ་གཡོན་པས་ཁུ་ཚུར་མཁལ་ཁུང་དུ་ [123a.3]བཞག་པའོ། །གཡས་པས་སེ་གོལ་གཏོགས་པའོ། །ནུབ་ཏུ་མཐུ་ཆེན་ཐོབ་དཀར་པོ་གཡོན་པས་བག་ཙམ་ཁ་ཕྱེ་བའི་པདྨ་དཀར་པོའོ། །གཡས་པས་མཆོག་སྦྱིན་ནོ། །ངན་སོང་ཀུན་འདྲེན་དཀར་པོ་ཕྱག་གཉིས་ཀྱིས་སྡིག་པ་སྤྲུག་པའི་ཚུལ་ལོ། །མྱ་ངན་དང་མུན་པ་ཐམས་ཅད་ངེས་ [123a.4]པར་འཇོམས་པའི་བློ་གྲོས་གསེར་གྱི་མདོག་ལྟ་བུ་ཕྱག་གཉིས་ཁ་སྦྱར་བརྡབས་པའི་ཚུལ་ལོ། །དྲ་བ་ཅན་གྱི་འོད་དམར་པོ་གཡོན་པས་ཨུཏྤལ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །གཡས་པས་མཆོག་སྦྱིན་ནོ། །བྱང་དུ་ཟླ་འོད་སྐུ་མདོག་ཟླ་བའི་འོད་ལྟ་བུ་གཡོན་པས་ཨུཏྤ་ [123a.5]ལར་གནས་པའི་ཟླ་བའི་དཀྱིལ་འཁོར་འཛིན་པ་གཡས་པས་མཆོག་སྦྱིན་ནོ། །འོད་དཔག་མེད་དམར་པོ་ཕྱག་གཉིས་ཀྱིས་དབང་བསྐུར་བའི་བུམ་པ་འཛིན་པའོ། །ནམ་མཁའ་མཛོད་སྐུ་མདོག་གསེར་ལྟ་བུས་གཡོན་པས་རྡོ་རྗེ་ཁུ་ཚུར་འགྱིང་པས་དཀུར་བརྟེན་པ། གཡས་པས་ནམ་མཁའ་ [123a.6]ལ་བསྐོར་བའོ། །སྒྲིབ་པ་ཐམས་ཅད་རྣམ་པར་སེལ་བ་སྔོན་པོའམ་དཀར་པོ་གཡོན་པས་ས་ལ་རེག་པ། གཡས་པའི་ཁུ་ཚུར་གྱིས་མཐེ་བོང་དང་སྡིགས་མཛུབ་སྦྱར་ཏེ། དྲི་བའི་ཚུལ་གྱིས་གནས་པའོ། །བྱམས་པ་ལ་སོགས་པའི་བྱང་ཆུབ་སེམས་དཔའ་འདི་རྣམས་ནི་ཟླ་བའི་གདན་ [123a.7]དང་ཟླ་བའི་འོད་ཅན་ནོ། །སེམས་དཔའི་སྐྱིལ་ཀྲུང་གིས་བཞུགས་པ་སྤྱན་གསུམ་པ་རང་ཕྱོགས་ཀྱི་བདག་པོ་བཞིན་དུ་ཞལ་གསུམ་པ་ཕྱག་དྲུག་པ་ཕྱག་གཉིས་ཀྱིས་མཉམ་གཞག་གི་ཕྱག་རྒྱ་བྱས་པ། གཉིས་ཀྱིས་གཞུ་དང་མདའ་འཛིན་པའོ། །བྱམས་པ་དང་འཇམ་དབྱངས་གཉིས་ [123b] [123b.1]ལ་ནི་མཉམ་གཞག་གི་ཕྱག་རྒྱ་མེད་དོ། །འཇམ་པའི་རྡོ་རྗེ་ལ་སོགས་པའི་ལྷ་ཐམས་ཅད་གོས་སྣ་ཚོགས་པ་དང་རིན་པོ་ཆེའི་རྒྱན་དང་རལ་བའི་ཐོར་ཚུགས་དང་འཛུམ་པ་དང་བཅས་པའི་ཞལ་དང་སྒེག་པའི་ཉམས་དང་ལྡན་པའོ། །ཤར་གྱི་སྒོར་མ་ཧེའི་སྟེང་དུ་གཤིན་རྗེ་མཐར་བྱེད་ནག་པོ་ཕྱག་ [123b.2]དྲུག་པ་གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་འཛིན་པའོ། །གཡོན་པས་ཞགས་པ་དང་བཅས་པའི་སྡིགས་མཛུབ་གྱེན་དུ་བསྒྲེངས་པས་སྡིགས་པར་བྱེད་པ། གཡོན་པའི་གཉིས་པས་འཁྱུད་པའི་ལྷ་མོའི་ནུ་མ་འཛིན་པའོ། །དེ་ཡང་ཞལ་གཅིག་པ་ཕྱག་གཉིས་པ་སྐུ་ [123b.3]མདོག་དཀར་པོ་གཡོན་པས་པདྨ་དཀར་པོ་འཛིན་པ་ཕྱག་གཡས་པས་ཡབ་ལ་འཁྱུད་པར་བརྩོན་པའོ། །གཡོན་པའི་གསུམ་པས་དངུལ་གྱི་གཞུ་འཛིན་པའོ། །མརྒད་ལྟ་བུའི་ལྷ་མོ་ལྗང་གུ་ཕྱག་གཉིས་མ་གཡས་ཨུཏྤལ་སྔོན་པོ་འཛིན་པ་ཕྱག་གཡོན་པ་ཡབ་ཀྱི་སྐེ་ལ་འཁྱུད་པས་ [123b.4]གཡས་ཕྱོགས་སུ་བརྒྱན་པ། ཞལ་དྲུག་པ་གསུས་པ་འཕྱང་བ། ཞལ་དྲུག་ནི་སྔོན་པོ་རྩ་བའི་ཞལ་དགྱེས་པའི་གད་མོས་བཞད་པ། གཉིས་པས་འཇིགས་པར་བྱེད་པ། གསུམ་པའི་ཞལ་གདངས་པ། བཞི་པ་འཇིགས་སུ་རུང་བ། ལྔ་པ་རྡོ་རྗེ་མཆེ་བ་ཅན། དྲུག་པ་མགོའི་སྟེང་དུ་ [123b.5]གནས་པ་ལྗགས་འགུལ་བའོ། །ཡང་ན་སྟེང་གི་སྔོན་པོ་རྩ་བ་ལ་སོགས་པའི་ཞལ་རྣམས་ནི་གཡས་སྐོར་གྱིས་སྔོན་པོ་དང་དཀར་པོ་དང་སེར་པོ་དང་དམར་པོ་དང་ལྗང་གུ་རྣམས་སོ། །ལྷོ་སྒོར་གཞན་གྱིས་མི་ཐུབ་པ་སེར་པོ་སེར་པོ་དང་ནག་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། ། [123b.6]ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་དབྱུག་ཐོ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །ནུབ་ཏུ་རྟ་མགྲིན་དམར་པོ་དམར་པོ་དང་སྔོན་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་ [123b.7]གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་ཀ་ན་ཡ་དང་མདའ་རྣམས་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །བྱང་དུ་བདུད་རྩི་འཁྱིལ་བ་སྔོན་པོ་རྐང་པས་བགེགས་མནན་པ། ཕྱག་དྲུག་པ་གཡས་པ་རྣམས་ཀྱིས་ [124a] [124a.1]རལ་གྲི་དང་དགྲ་སྟེ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །དབང་ལྡན་གྱི་མཚམས་སུ་རཏྣའི་རི་བོའི་སྟེང་དུ་མི་གཡོ་བ་སྔོན་པོ་ཕྱག་དྲུག་པ་གཡས་པ་རྣམས་ཀྱིས་རལ་གྲི་དང་ཞགས་ [124a.2]པ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །གཡོན་ངོས་སུ་འཕྱང་བའི་གོས་སྔོན་པོ་འཛིན་པའོ། །ཁྲག་གིས་བརླན་པའི་ལྗགས་འགུལ་བའི་ཞལ་གདངས་པའོ། །མེར་འདོད་པའི་རྒྱལ་པོ་སྔོན་པོ་ཕྱག་ [124a.3]དྲུག་པ་དང་པོ་གཉིས་ཀྱིས་རང་གི་ཕྱག་རྒྱ་བྱས་པ་གཡས་པ་གཉིས་ཀྱིས་རྡོ་རྗེ་དང་མདའ་དང་གཡོན་པ་གཉིས་ནུ་མ་དང་གཞུ་འཛིན་པའོ། །རྡོ་རྗེ་ཁུ་ཚུར་གཉིས་ཕན་ཚུན་རྒྱབ་སྦྱར་ཏེ་མཐེའུ་ཆུང་གཉིས་བསྣོལ་ཏེ་སྡིགས་མཛུབ་གཉིས་ཕྱིར་བརྐྱང་ནས་ཞགས་པའི་ཚུལ་བྱས་པ་ནི་འདོད་པའི་ [124a.4]རྒྱལ་པོའི་ཕྱག་རྒྱའོ། །བདེན་བྲལ་དུ་དབྱུག་པ་སྔོན་པོ་སྐུ་མདོག་སྔོན་པོ་ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་མདའ། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །རླུང་དུ་སྟོབས་པོ་ཆེ་སྔོན་པོ་ཕྱག་བརྒྱད་པ་ [124a.5]གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་རལ་གྲི་དང་མདའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་ཐོ་བ་དང་གཞུ་འཛིན་པའོ། །དཀྱིལ་འཁོར་གྱི་དབང་ཕྱུག་གི་སྟེང་དུ་གནོད་མཛེས་རྒྱལ་པོ་སྔོན་པོ་ཕྱག་གཉིས་ཀྱིས་རྡོ་རྗེ་ཧཱུཾ་མཛད་ཀྱི་ [124a.6]ཕྱག་རྒྱ་བཅིངས་པ་གཡས་པ་གཉིས་ཀྱིས་རལ་གྲི་དང་མདའ་འཛིན་པའོ། །གཡོན་པ་གཉིས་ཀྱིས་ནུ་མ་དང་གཞུ་འཛིན་པའོ། །འདིར་འདོད་པའི་རྒྱལ་པོའི་ཕྱག་རྒྱ་དེ་ཉིད་ཀྱི་མཛུབ་མོ་གཉིས་གྱེན་དུ་བསྒྲེང་བ་ནི་གནོད་མཛེས་ཀྱི་ཕྱག་རྒྱའོ། །འོག་ཏུ་རྡོ་རྗེ་ས་འོག་སྔོན་པོ་ཕྱག་དྲུག་པ་ [124a.7]གཡས་པ་རྣམས་ཀྱིས་རྡོ་རྗེ་དང་ལྕགས་ཀྱུ་དང་མདའ་འཛིན་པའོ། །གཡོན་པ་རྣམས་ཀྱིས་ནུ་མ་དང་ཞགས་པ་དང་བཅས་པའི་རྩེ་གཅིག་པ་དང་གཞུ་འཛིན་པའོ། །བགེགས་མཐར་བྱེད་ལ་སོགས་པ་བདུན་པོ་ནི་སྔོན་པོ་དང་སེར་པོ་དང་དམར་པོ་རྩ་བ་དང་གཡས་གཡོན་གྱི་ཞལ་གསུམ་ [124b] [124b.1]མོ། །ཁྲོ་བོ་བཅུ་ཡང་ཁྲོས་པའི་ལྟ་སྟངས་ཅན་སྤྱན་དམར་པོ་སྨིན་མ་གཡོ་བ་བག་ཙམ་རྩ་བའི་ཞལ་ཁ་ཕྱེ་བ། གཡས་པའི་ཞལ་གདངས་བ། གཡོན་པའི་ཞལ་མ་མཆུ་མནན་པ་མཆེ་བ་གཙིགས་པ་སྟག་གི་པགས་པས་སྨད་དང་སྟོད་ལ་གོན་པ་ཐོད་པའི་ཕྲེང་བས་དབུ་ལ་བརྒྱན་ [124b.2]པ། དབུ་སྐྲ་འབར་བ་གྱེན་ལ་བཅིངས་ཤིང་འཁྱིལ་བ་སྨ་ར་དམར་སེར་རོལ་པའི་ཀུན་ཏུ་བསྐྱོད་པ་ཅན། ཀླུའི་རྒྱལ་པོ་བརྒྱད་ཀྱིས་བརྒྱན་པ། ཕུད་ཀྱི་སྒྲ་སྒྲོགས་པ་དང་བཅས་པའི་གདེངས་ཀ་ཅན་རྣམས་ཀྱིས་འཇིགས་པ་སྣ་ཚོགས་པདྨ་དང་། ཉི་མའི་གདན་ལ་གཡོན་བརྐྱང་ [124b.3]བས་གནས་པའོ། །གཤིན་རྗེ་མཐར་བྱེད་ནི་གཡས་བརྐྱང་བའམ་རྡོ་རྗེ་སྐྱིལ་ཀྲུང་གིས་ཀྱང་བཞུགས་པའོ། །དཀྱིལ་འཁོར་འདི་ལ་གནོད་མཛེས་རྒྱལ་པོའི་གཟུགས་ཁོ་ནས་རྣམ་པར་གནས་པའི་ཕྱིར་གཙུག་ཏོར་འཁོར་ལོས་སྒྱུར་བ་ནི་དཀྱིལ་འཁོར་ཉིད་དུ་ཐ་དད་དུ་མ་ [124b.4]བཤད་དེ། དཔལ་སྒྱུ་འཕྲུལ་དྲ་བའི་རྒྱུད་ལས་རྣལ་འབྱོར་རྒྱས་པར་བསྟན་པ་ལའོ། །འབྲིང་བོར་བསྟན་པ་ལ་ནི་འཇམ་པའི་རྡོ་རྗེའི་སྤྱི་བོའི་སྟེང་ན་རཏྣའི་རི་ལ་གནས་པའི་པདྨ་དང་ཉི་མ་ལ་རྡོ་རྗེ་སྐྱིལ་ཀྲུང་གིས་གནས་པའི་གཙུག་ཏོར་འཁོར་ལོས་སྒྱུར་བ་སེར་པོ་སེར་པོ་དང་སྔོན་པོ་ [124b.5]དང་དཀར་པོ་རྩ་བ་དང་གཡས་དང་གཡོན་གྱི་ཞལ་ལོ། །ཕྱག་བརྒྱད་པའི་ཕྱག་གཉིས་ཀྱིས་མཉམ་གཞག་གི་ཕྱག་རྒྱ་བྱས་པ། གཡས་པ་རྣམས་ཀྱིས་འཁོར་ལོ་དང་བགྲང་ཕྲེང་དང་མདའ་འཛིན་པའོ། །གཡོན་པ་རྣམས་ཀྱིས་འཁོར་ལོ་དང་ནུ་མ་དང་གཞུ་འཛིན་པའོ། ། [124b.6]སྣ་ཚོགས་པའི་གོས་དང་རིན་པོ་ཆེའི་རྒྱན་ཅན། རལ་པའི་ཐོར་ཅོག་གི་ཅོད་པན་ཅན་གཞོགས་གཉིས་སུ་སྤྱན་མ་ལ་སོགས་པའི་ལྷ་མོ་བཞི་པོ་རྣམས་ཀྱིས་བརྒྱན་པའོ་ཞེས་གསུངས་སོ། །དེའི་རྗེས་སུ་འབྲངས་ནས་རྣལ་འབྱོར་རྒྱས་པ་ལ། ཡང་གཙུག་ཏོར་འཁོར་ལོས་སྒྱུར་ [124b.7]བ་ནི་དཀྱིལ་འཁོར་བ་ཐ་དད་དུ་དང་དེའི་སྟེང་དུ་གནོད་མཛེས་རྒྱལ་པོ་ཤེས་པར་བྱའོ་ཞེས་པ་ནི་ཁ་ཅིག་གོ། །ལྷ་གཞན་བཞི་བཅུ་ཞེ་གསུམ་པོ་རྣམས་ཀྱང་ཞལ་རེ་རེ་ལ་སྤྱན་གསུམ་གསུམ་པའོ། །འདིར་ནུ་མ་འཛིན་པར་བསྟན་པ་དེ་ཡང་མི་བསྐྱོད་པ་ལ་སོགས་པ་བཞི་བདག་ལྟ་ [125a] [125a.1]བུའི་ཤེས་རབ་མ་ལ་སྙོམས་པར་ཞུགས་པ་རྣམས་ཀྱིའོ། །ཁྲོ་བོ་རྣམས་ཀྱིས་ནི་བདག་ལྟ་བུའི་ཤེས་རབ་མ་གཡོན་ངོས་སུ་གནས་པའི་ནུ་མ་འཛིན་པའོ་ཞེས་ཤེས་པར་བྱའོ། །གཤིན་རྗེ་མཐར་བྱེད་ལས་གཞན་རྣམས་ལ་ཤེས་རབ་མ་མེད་ཀྱང་དེའི་ནུ་མར་འཛིན་ [125a.2]པའི་ཚུལ་གྱིས་བདག་གི་ནུ་མར་འཛིན་པའོ་ཞེས་པ་ནི་གཞན་ནོ། །འདིར་རྣམ་པར་སྣང་མཛད་ཀྱི་རང་བཞིན་འཇམ་པའི་རྡོ་རྗེ་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་ཀྱི་བདག་ཉིད་ལྟ་བུའི་རྡོ་རྗེ་སེམས་དཔས་རྒྱས་བཏབ་པ། མེ་ལོང་ལྟ་བུའི་ཡེ་ཤེས་ལ་སོགས་པའི་རང་བཞིན་མི་ [125a.3]བསྐྱོད་པ་ལ་སོགས་པའི་དེ་བཞིན་གཤེགས་པ་བཞི་དང་། སྤྱན་མ་དང་ཙུནྡ་རྣམས་ལ་འཇམ་པའི་རྡོ་རྗེས་རྒྱས་བཏབ་པ། མཱ་མ་ཀཱི་དང་སེམས་མ་རྡོ་རྗེ་མ་དང་བྱམས་པ་ལ་སོགས་པ་བཞི་དང་། ཁྲོ་བོ་བཅུ་ལ་མི་བསྐྱོད་པས་རྒྱས་བཏབ་པ། རིན་ཆེན་རྡོ་རྗེ་མ་དང་རིན་ཆེན་སྐར་མདའ་མ་དང་། [125a.4]བཟང་སྐྱོང་མ་ལ་སོགས་པ་བཞི་ལ་རིན་འབྱུང་གིས་རྒྱས་བཏབ་པ། གོས་དཀར་མོ་དང་ཆོས་ཀྱི་རྡོ་རྗེ་མ་དང་ཁྲོ་གཉེར་མ་དང་མཐུ་ཆེན་ཐོབ་ལ་སོགས་པ་བཞི་ལ་སྣང་བ་མཐའ་ཡས་ཀྱིས་རྒྱས་བཏབ་པ། སྒྲོལ་མ་དང་ལས་ཀྱི་རྡོ་རྗེ་མ་དང་རྡོ་རྗེ་ལྕགས་སྒྲོག་མ་དང་། ཟླ་འོད་ [125a.5]ལ་སོགས་པ་བཞི་ལ་དོན་ཡོད་གྲུབ་པས་རྒྱས་བཏབ་པའོ། །འཇམ་པའི་རྡོ་རྗེའི་ཐུགས་ཀར་ས་བོན་ནི་མུཿའོ། །ཨོཾ་ཨཱཿཞེས་པ་སྙིང་པོའི་སྔགས་སོ། །ཨོཾ་ཨཱ་མྲྀ་ཏ་ཀུཎྜ་ལི་བིགྷྣཱ་ནྟ་ཀ་ཧཱུཾ་ཞེས་པ་ལས་ཐམས་ཅད་པའི་སྔགས་སོ།། །།ཆོས་ཀྱི་དབྱིངས་གསུང་གི་དབང་ཕྱུག་གི་ [125a.6]དཀྱིལ་འཁོར་ལ། རྡོ་རྗེ་གུར་ལ་སོགས་པ་བསྒོམ་པར་རྣམ་པར་བཞག་པ་ནི་བཤད་མ་ཐག་པའི་དཀྱིལ་འཁོར་བཞིན་ནོ། །ཁྱད་པར་དུ་གཤིན་རྗེ་གཤེད་ལ་སོགས་པའི་ཁྲོ་བོ་རྣམས་ནི་འཆད་པར་འགྱུར་བའི་གཟུགས་ཅན་ནོ། །མཆོད་རྟེན་ནི་འདིར་མེད་དོ། །གཞལ་ཡས་ཁང་གི་ལྟེ་བ་ [125a.7]ལ་སྣ་ཚོགས་པདྨའི་ཟེ་འབྲུ་ལ་གནས་པའི་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་འཇམ་པའི་དབྱངས་རྡོ་རྗེ་སྐྱིལ་ཀྲུང་དུ་བཞུགས་པ་ཉི་མ་འཆར་བའི་དཀྱིལ་འཁོར་གྱི་འོད་དང་ལྡན་པ་སྐུ་མདོག་གསེར་ལྟ་བུ། ཨིཎྜྲ་ནཱི་ལ་ལྟ་བུའི་གཙུག་ཕུད་དང་ལྡན་པ། རྡོ་རྗེ་དང་རིན་པོ་ཆེ་དང་པདྨ་ [125b] [125b.1]དང་སྣ་ཚོགས་རྡོ་རྗེའི་ཕྲེང་བའི་ཅོད་པན་གྱི་སྟེང་དུ་སངས་རྒྱས་ལྔ་དང་རིན་པོ་ཆེའི་ཅོད་པན་ཅན། རཏྣ་སྣ་ཚོགས་ཀྱིས་བརྒྱན་པ་དང་ན་བཟའ་སྣ་ཚོགས་བསྣམས་པ། སྒེག་པའི་ཉམས་ཀྱི་ཚོགས་དང་ལྡན་པ། སེར་པོ་དང་སྔོན་པོ་དང་དམར་པོ་དང་དཀར་པོ་ནི་རྩ་བ་དང་གཡས་ [125b.2]དང་ནུབ་དང་གཡོན་གྱི་ཞལ་ལོ། །ཕྱག་བརྒྱད་པའི་ཕྱག་གཉིས་ཀྱི་ཆོས་ཀྱི་འཁོར་ལོའི་ཕྱག་རྒྱ་མཛད་པའོ། །གཡས་པ་རྣམས་ཀྱིས་རལ་གྲི་དང་མདའ་དང་རྡོ་རྗེ་བསྣམས་པའོ། །གཡོན་པ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་བུ་སྟི་དང་གཞུ་དང་རྡོ་རྗེ་དྲིལ་བུ་བསྣམས་པའོ། །འདབ་ [125b.3]མ་བརྒྱད་པ་ལ་སེང་གེའི་སྟེང་དུ་གནས་པའི་པདྨ་དང་ཟླ་བའི་དཀྱིལ་འཁོར་རྣམས་ལ་ཤར་ལ་སོགས་པའི་ཕྱོགས་རྣམས་སུ་གཙུག་ཏོར་ཆེན་པོ་དང་གདུགས་དཀར་པོ་དང་གཟི་བརྗིད་ཕུང་པོ་དང་། རྣམ་པར་རྒྱལ་བའི་གཙུག་ཏོར་རྣམས་དང་། དབང་ལྡན་ལ་སོགས་པའི་མཚམས་སུ་འོད་ཟེར་རྣམ་ [125b.4]པར་འཕྲོ་བ་དང་འཕགས་པ་དང་ཆེར་འཕགས་པ་དང་རྒྱལ་བ་རྣམས་སོ། །གཙུག་ཏོར་བརྒྱད་པོ་འདི་རྣམས་ནི་རྡོ་རྗེ་སྐྱིལ་ཀྲུང་དང་རིན་པོ་ཆེའི་ཅོད་པན་ཅན་སྐུ་མདོག་སེར་པོ་ཕྱག་གཉིས་པའོ། །ཕྱག་གཡས་པས་འཁོར་ལོ་གྱེན་དུ་བཟུང་བ། གཡོན་པས་རང་གི་གདན་ལ་མནན་པ་རྣམས་སོ། ། [125b.5]དེ་ནས་ཤར་གྱི་རེ་མིག་གི་དབུས་སུ་གླང་པོ་ཆེའི་རྒྱལ་པོ་ལ་མི་བསྐྱོད་པ་སྔོན་པོ། ཞལ་བཞི་པ་རྩ་བའི་ཞལ་སྔོན་པོ་བག་ཙམ་ཁྲོ་བ་དང་བཅས་པའི་རོལ་པ་དང་ལྡན་པ་གཡས་པ་དཀར་པོ་ཁ་གདངས་པ་དྲག་པོའོ། །ནུབ་ཀྱི་སེར་པོ་དཔའ་བོ་གཡོན་པ་དམར་པོ་མཆེ་བས་མ་མཆུ་མནན་པ་ཕྱག་ [125b.6]བརྒྱད་པ་གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་དང་ལྕགས་ཀྱུ་འཛིན་པ། གཡོན་པ་རྣམས་ཀྱིས་སྡིགས་མཛུབ་དང་དྲིལ་བུ་དང་གཞུ་དང་ཞགས་པ་འཛིན་པའོ། །རྡོ་རྗེ་སེམས་དཔའ་དང་། རྡོ་རྗེ་རྒྱལ་པོ་དང་རྡོ་རྗེ་ཆགས་པ་དང་རྡོ་རྗེ་ལེགས་པ་རྣམས་ཀྱིས་ཡོངས་སུ་བསྐོར་བའོ། ། [125b.7]ལྷོའི་རེ་མིག་གི་དབུས་སུ་རྟ་མཆོག་གི་སྟེང་དུ་རིན་ཆེན་འབྱུང་ལྡན་སེར་པོ་སེར་པོ་དང་། ནག་པོ་དང་དཀར་པོ་དང་དམར་པོའི་ཞལ་བཞི་པ་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་དང་ལྕགས་ཀྱུའོ། གཡོན་པ་རྣམས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་དང་རྡོ་རྗེ་ [126a] [126a.1]དྲིལ་བུ་དང་ཞགས་པ་དང་གཞུ་འཛིན་པའོ། །རྡོ་རྗེ་རིན་ཆེན་དང་རྡོ་རྗེ་ཉི་མ་དང་རྡོ་རྗེ་ཏོག་དང་རྡོ་རྗེ་བཞད་པ་རྣམས་ཀྱིས་ཡོངས་སུ་བསྐོར་བའོ། །ནུབ་ཀྱི་རེ་མིག་གི་དབུས་སུ་རྨ་བྱའི་སྟེང་དུ་སྣང་བ་མཐའ་ཡས་དམར་པོ་དམར་པོ་དང་ནག་པོ་དང་དཀར་པོ་དང་སེར་པོའི་ཞལ་ [126a.2]བཞིའོ། །ཕྱག་བརྒྱད་ཀྱི་གཡས་པ་རྣམས་ཀྱིས་རྡོ་རྗེ་དང་མདའ་དང་རལ་གྲི་དང་ལྕགས་ཀྱུ་འཛིན་པའོ། །གཡོན་པ་རྣམས་ཀྱིས་པདྨ་དང་གཞུ་དང་ཞགས་པ་དང་། དྲིལ་བུ་འཛིན་པའོ། །རྡོ་རྗེ་ཆོས་དང་རྡོ་རྗེ་རྣོན་པོ་དང་། རྡོ་རྗེ་རྒྱུ་དང་རྡོ་རྗེ་གསུང་བ་རྣམས་ཀྱིས་ཡོངས་སུ་བསྐོར་བའོ། །བྱང་གི་ [126a.3]རེ་མིག་གི་དབུས་སུ་ཁྱུང་གི་སྟེང་དུ་དོན་ཡོད་གྲུབ་པ་ལྗང་གུ་ཞལ་བཞི་པ་རྩ་བའི་ཞལ་ལྗང་གུ་མཆེ་བ་གཙིགས་པ་གཡས་སེར་པོ་ཞི་བ་ནུབ་དམར་པོ་སྒེག་པ་དང་བཅས་པ། གཡོན་དཀར་པོ་ཞི་བ་ཕྱག་བརྒྱད་པ། གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་དང་ལྕགས་ཀྱུ་འཛིན་པ། གཡོན་པ་ [126a.4]རྣམས་ཀྱིས་སྡིགས་མཛུབ་དང་དྲིལ་བུ་དང་གཞུ་དང་ཞགས་པ་འཛིན་པའོ། །རྡོ་རྗེ་ལས་དང་རྡོ་རྗེ་བསྲུང་བ་དང་རྡོ་རྗེ་གནོད་སྦྱིན་དང་རྡོ་རྗེ་ཁུ་ཚུར་རྣམས་ཀྱིས་ཡོངས་སུ་བསྐོར་བའོ། །མི་བསྐྱོད་པ་ལ་སོགས་པ་དེ་བཞིན་གཤེགས་པ་རྣམས་རང་རང་གི་ཆིབས་ཀྱི་སྟེང་དུ་སྣ་ཚོགས་པདྨ་དང་ཉི་མའི་ [126a.5]གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ། རཏྣ་སྣ་ཚོགས་དང་གོས་ཀྱིས་བརྒྱན་པ། རིན་པོ་ཆེའི་ཅོད་པན་ནོ། །རྡོ་རྗེ་སེམས་དཔའ་ལ་སོགས་པ་བཅུ་དྲུག་པོ་འདི་རྣམས་ནི་དབང་ལྡན་ལ་སོགས་པའི་མཚམས་སུ་གནས་པའི་སྣ་ཚོགས་པདྨ་དང་ཟླ་བའི་གདན་ལ་གནས་པ་རྡོ་རྗེ་དབྱིངས་ཀྱི་ [126a.6]དཀྱིལ་འཁོར་ལས་བཤད་པའི་རང་བཞིན་ཅན་རྣམས་སོ། །འདི་དག་ཀྱང་ཕྱོགས་སུ་གནས་པའོ་ཞེས་པའི་ཕྱོགས་ཀྱང་ཡོད་དོ། །དབང་ལྡན་ལ་སོགས་པའི་མཚམས་ལ་གནས་པའི་སྣ་ཚོགས་པདྨ་དང་ཟླ་བ་རྣམས་ལ་སེམས་དཔའི་སྐྱིལ་ཀྲུང་ཅན། སངས་རྒྱས་སྤྱན་མ་དང་མ་མ་ཀཱི་དང་གོས་ [126a.7]དཀར་མོ་དང་སྒྲོལ་མ་རྣམས་རིམ་པ་ཇི་ལྟ་བ་བཞིན་དུ་འཇམ་པའི་དབྱངས་དང་མི་བསྐྱོད་པ་དང་སྣང་བ་མཐའ་ཡས་དང་དོན་ཡོད་གྲུབ་པ་ལྟ་བུའོ། །ཤར་གྱི་སྒོ་རུ་རྡོ་རྗེ་ལྕགས་ཀྱུ་དམར་སེར་རྡོ་རྗེ་ལྕགས་ཀྱུ་འཛིན་པ། གཡས་བརྐྱང་གིས་བཞུགས་པའོ། །ལྷོ་རུ་རྡོ་རྗེ་ཞགས་པ་སེར་པོ་ [126b] [126b.1]རྡོ་རྗེ་ཞགས་པ་འཛིན་པ་གཡོན་བརྐྱང་གིས་གནས་པའོ། །ནུབ་ཏུ་རྡོ་རྗེ་ལྕགས་སྒྲོག་དམར་པོ་རྡོ་རྗེ་ལྕགས་སྒྲོག་ཕྱག་གཉིས་ཀྱིས་འཛིན་པས་གའི་སྟང་སྟབས་ཀྱིས་གནས་པའོ། །བྱང་དུ་རྡོ་རྗེ་འབེབས་པ་ལྗང་གུ་ཕྱག་གཉིས་རྡོ་རྗེ་བསྡམས་པས་རྡོ་རྗེ་དྲིལ་བུ་འཛིན་པ། ཟླུམ་པའི་སྟང་སྟབས་ [126b.2]ཀྱིས་གནས་པའོ། །བཞི་པོ་འདི་དག་སྣ་ཚོགས་པདྨ་དང་ཉི་མ་ལ་གནས་པ་ཞལ་གཅིག་པ་ཕྱག་གཉིས་པ་སྤྱན་གསུམ་པ་དབུ་སྐྲ་དམར་སེར་གྱེན་དུ་བརྫེས་པ། སྨར་དམར་སེར་དང་ལྡན་པ་ཀླུ་ཆེན་པོ་བརྒྱད་ཀྱིས་བརྒྱན་པའོ། །ནང་གི་དཀྱིལ་འཁོར་འདི་ལས་དཀྱིལ་འཁོར་གཉིས་པ་ལ། [126b.3]ཤར་གྱི་ཕྱོགས་ཀྱི་དབང་ལྡན་ནས་བརྩམས་ནས་གཡས་སྐོར་དུ་རིམ་པ་བཞིན་དུ་ས་བཅུ་གཉིས་ཀྱི་ལྷ་མོ་རྣམས་ཞལ་གཅིག་ཕྱག་གཉིས་མ། གཡས་པ་ཐམས་ཅད་ཀྱིས་རྡོ་རྗེ་འཛིན་པ། གཡོན་པས་རང་རང་གི་ཕྱག་མཚན་འཛིན་པའོ། །དེ་ལ་མོས་པ་སྤྱོད་པའི་ས་མ་ནི་པདྨ་བཞིན་དུ་ [126b.4]དམར་བ་པདྨ་དམར་པོ་འཛིན་པའོ། །རབ་ཏུ་དགའ་བ་དམར་མོ་ཡིད་བཞིན་གྱི་ནོར་བུ་འཛིན་པའོ། །དྲི་མ་མེད་མ་དཀར་མོ་ཆུ་སྐྱེས་དཀར་པོ་འཛིན་པའོ། །འོད་བྱེད་མ་དམར་མོ་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །འོད་འཕྲོ་མ་མརྒད་ལྟ་བུའི་མདོག་ཨུཏྤ་ [126b.5]ལ་སྔོན་པོ་འཛིན་པའོ། །སྤྱང་ཁ་མ་སེར་མོ་པང་བར་གནས་པའི་ཕྱག་གན་རྐྱལ་གྱིས་མ་ར་ག་ཏའི་ནོར་བུ་བསྣམས་པའོ། །མངོན་དུ་གྱུར་པའི་ས་མ་གསེར་གྱི་མདོག་ཅན་པདྨའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་པའོ། །རིང་དུ་སོང་བ་མ་ནམ་མཁའ་ལྟར་ [126b.6]སྔོ་བསངས་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེ་འཛིན་པའོ། །མི་གཡོ་བ་མ་སྟོན་ཀའི་ཟླ་བའི་མདོག་ལྟ་བུ་ཟླ་བ་ལ་གནས་པའི་རྡོ་རྗེ་རྩེ་ལྔ་བ་དམར་པོས་མཚན་པའི་པདྨའི་ཡུ་བ་འགྱིང་བ་དང་བཅས་པ་འཛིན་པའོ། །ལགས་པའི་བློ་གྲོས་མ་དཀར་མོ་རལ་གྲིས་མཚན་པའི་ཨུཏྤ་ [126b.7]ལ་འཛིན་པའོ། །ཆོས་ཀྱི་སྤྲིན་མ་སེར་མོ་ཆོས་ཀྱི་སྤྲིན་གྱིས་ཡོངས་སུ་བསྐོར་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟེ་འཛིན་པའོ། །ཀུན་ཏུ་འོད་མ་ཉི་མ་ཕྱེད་ཀྱི་ཉི་མའི་མདོག་ཅན་པདྨའི་སྟེང་དུ་ཡང་དག་པར་སྡོགས་པའི་བྱང་ཆུབ་མཚོན་པར་བྱེད་པའི་བདེ་བར་གཤེགས་པའི་སྐུ་ [127a] [127a.1]གཟུགས་འཛིན་པའོ། །ལྷོ་རུ་ཕ་རོལ་ཏུ་ཕྱིན་མ་བཅུ་གཉིས་ནི་ཕྱག་གཉིས་པ་གཡས་པ་ཐམས་ཅད་ཀྱིས་ཡིད་བཞིན་གྱི་ནོར་བུ་འཛིན་པའོ། །གཡོན་པས་རང་རང་གི་ཕྱག་མཚན་འཛིན་པའོ། །ཤེས་རབ་ཀྱི་ཕ་རོལ་ཏུ་ཕྱིན་མ་ནི་ཕྱག་གཉིས་ཀྱིས་ལྷག་པའོ། །དེ་ལ་རིན་ [127a.2]པོ་ཆེའི་པདྨའི་ཕ་རོལ་ཏུ་ཕྱིན་མ་དམར་མོ་པདྨ་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །སྦྱིན་པའི་ཕ་རོལ་ཏུ་ཕྱིན་མ་དཀར་དམར་གྱི་མདོག་ཅན་འབྲས་སོ་བའི་སྙེ་མ་སྣ་ཚོགས་འཛིན་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་མ་དཀར་མོ་མྱ་ངན་མེད་པའི་ཡལ་ག་དང་བཅས་པའི་མེ་ [127a.3]ཏོག་གི་ཆུན་པོ་འཛིན་པའོ། །བཟོད་པའི་ཕ་རོལ་ཏུ་ཕྱིན་མ་སེར་མོ་ཆུ་སྐྱེས་དཀར་པོ་འཛིན་པའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་མ་མ་ར་ག་ཏ་ལྟ་བུའི་མདོག་ཅན་ཨུཏྤལ་སྔོན་པོ་འཛིན་པའོ། །བསམ་གཏན་གྱི་ཕ་རོལ་ཏུ་ཕྱིན་མ་ནམ་མཁའ་ལྟར་སྔོ་བསངས་པདྨ་དཀར་པོ་འཛིན་པའོ། ། [127a.4]ཤེས་རབ་ཀྱི་ཕ་རོལ་ཏུ་ཕྱིན་མ་གསེར་མདོག་ལྟ་བུ་ཡིད་དུ་འོང་མ་པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་འཛིན་མ། ཕྱག་གཉིས་ཀྱིས་ཆོས་ཀྱི་འཁོར་ལོ་བསྐོར་བའི་ཕྱག་རྒྱ་མཛད་པའོ། །ཐབས་ཀྱི་ཕ་རོལ་ཏུ་ཕྱིན་མ་མེ་ཏོག་པྲི་ཡང་ཀུ་ལྟ་བུ་ལྗང་གུ་པདྨ་སེར་པོ་ལ་གནས་ [127a.5]པའི་རལ་གྲི་དང་རྡོ་རྗེ་འཛིན་པའོ། །སྨོན་ལམ་གྱི་ཕ་རོལ་ཏུ་ཕྱིན་མ་ཨུཏྤལ་སྔོན་པོའི་མདོག་ཅན་ཨུཏྤལ་སྔོན་པོ་ལ་གནས་པའི་རལ་གྲི་འཛིན་པའོ། །སྟོབས་ཀྱི་ཕ་རོལ་ཏུ་ཕྱིན་མ་དམར་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་འཛིན་པའོ། །ཡེ་ཤེས་ཀྱི་ཕ་རོལ་ཏུ་ཕྱིན་མ་དཀར་མོ་རཏྣ་སྣ་ཚོགས་ [127a.6]པའི་འབྲས་བུས་བརྒྱན་པའི་བྱང་ཆུབ་ཀྱི་ཤིང་གི་ཡལ་ག་འཛིན་པའོ། །རྡོ་རྗེ་ལས་ཀྱི་ཕ་རོལ་ཏུ་ཕྱིན་མ་ནི་སྐུ་མདོག་སྣ་ཚོགས་པ་ཨུཏྤལ་སྔོན་པོ་ལ་གནས་པའི་སྣ་ཚོགས་རྡོ་རྗེ་འཛིན་པའོ། །ནུབ་ཏུ་དབང་བཅུ་མ་ནི་ཕྱག་གཉིས་གཡས་པ་རྣམས་ཀྱིས་པདྨ་འཛིན་པའོ། །གཡོན་པ་རྣམས་ཀྱིས་ [127a.7]སྙེམས་པས་རང་རང་གི་ཕྱག་རྒྱ་འཛིན་པའོ། །དེ་ལ་ཚེ་ལ་དབང་བ་མ་ནི་དཀར་དམར་གྱི་མདོག་ཅན་ནོར་བུ་པདྨ་རཱ་ག་ལ་གནས་པའི་ཏིང་ངེ་འཛིན་གྱི་ཕྱག་རྒྱ་ཅན་གྱིས་སངས་རྒྱས་ཚེ་དཔག་མེད་ཀྱི་སྐུ་འཛིན་པའོ། །སེམས་ལ་དབང་བ་མ་ནི་དཀར་མོ་རྡོ་རྗེ་རྩེ་ལྔ་པ་དམར་པོ་འཛིན་པའོ། །ཡོ་བྱད་ [127b] [127b.1]ལ་དབང་བ་མ་ནི་སེར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །ལས་ལ་དབང་བ་མ་ནི་ལྗང་གུ་སྣ་ཚོགས་རྡོ་རྗེ་འཛིན་པའོ། །སྐྱེ་བ་ལ་དབང་བ་མ་ནི་སྐུ་མདོག་སྣ་ཚོགས་མ་མེ་ཏོག་ཛཱ་ཏི་ཁ་དོག་སྣ་ཚོགས་པའི་ཡལ་འདབ་འཛིན་པའོ། །རྫུ་འཕྲུལ་ལ་དབང་བ་མ་ནི་ནམ་མཁའ་ [127b.2]ལྟར་སྔོ་བསངས་པདྨ་ལ་གནས་པའི་ཉི་མ་དང་ཟླ་བའི་དཀྱིལ་འཁོར་འཛིན་པའོ། །མོས་པ་ལ་དབང་བ་མ་ནི་པདྨའི་རྩ་བ་ལྟར་དཀར་བའི་པྲི་ཡང་ཀུའི་མ་ཏོག་གི་སྙེམ་འཛིན་པའོ། །སྨོན་ལམ་ལ་དབང་བ་མ་ནི་སེར་མོ་ཨུཏྤལ་སྔོན་པོ་འཛིན་པའོ། །ཡེ་ཤེས་ལ་དབང་བ་མ་སྔོན་མོ་ཨུཏྤ་ [127b.3]ལ་སྔོན་པོ་ལ་གནས་པའི་རལ་གྲི་འཛིན་པའོ། །ཆོས་ལ་དབང་བ་མ་སྐུ་མདོག་དཀར་མོ་པདྨ་ལ་གནས་པའི་བུམ་པ་བཟང་པོ་འཛིན་པའོ། །དེ་བཞིན་ཉིད་མ་དཀར་མོ་ཕྱག་གཡས་པས་པདྨ་དཀར་པོ་འཛིན་པ། གཡོན་པས་རྡོ་རྗེ་རིན་པོ་ཆེའི་སྙེ་མ་འཛིན་པའོ། །སངས་རྒྱས་ཀྱི་བྱང་ [127b.4]ཆུབ་མ་གསེར་གཞུ་ལྟ་བུའི་མདོག་ཅན་ཕྱག་གཡས་ཀྱིས་པདྨ་སེར་པོ་ལ་གནས་པའི་རྡོ་རྗེ་རྩེ་ལྔ་པ་འཛིན་པའོ། །གཡོན་པ་ཡིད་བཞིན་གྱི་ནོར་བུའི་རྒྱལ་མཚན་གྱི་སྟེང་དུ་འཁོར་ལོ་འཛིན་པའོ། །བྱང་དུ་གཟུགས་མ་བཅུ་གཉིས་ནི་ཕྱག་གཉིས་མ་གཡས་པ་རྣམས་ཀྱིས་སྣ་ [127b.5]ཚོགས་རྡོ་རྗེ་དང་གཡོན་པ་རྣམས་སྙེམས་པ་དང་བཅས་པས་རང་རང་གི་མཚན་མ་འཛིན་པ་སྟེ། དེ་ལ་དབྱིག་གི་བློ་གྲོས་མ་སེར་མོ་འབྲས་ཀྱི་སྙེ་མ་འཛིན་པའོ། །རིན་ཆེན་སྐར་མདའ་མ་དམར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །གཙུག་ཏོར་རྣམ་པར་རྒྱལ་མ་ [127b.6]དཀར་མོ་ནོར་བུ་ཟླ་བ་ཆུ་ཤེལ་གྱི་བུམ་པ་འཛིན་པའོ། །འོད་ཟེར་ཅན་དཀར་དམར་སྐུད་པ་དང་བཅས་པའི་ཁབ་འཛིན་པའོ། །རི་ཁྲོད་ལོ་མ་ཅན་ལྗང་གུ་རྨ་བྱའི་མཇུག་སྒྲོ་འཛིན་པའོ། །དགུ་སེལ་མ་དཀར་མོ་དུག་གི་མེ་ཏོག་གི་ཆུན་པོ་འཛིན་པའོ། །སྒོ་མཐའ་ཡས་མ་མེ་ཏོག་ [127b.7]པྲི་ཡང་ཀུ་ལྟར་ལྗང་བུ་ཆུ་སྐྱེས་དམར་པོ་ལ་གནས་པའི་མི་ཟད་པའི་གཏེར་ཆེན་པོའི་བུམ་པ་འཛིན་པའོ། །ཙུནྡ་མ་དཀར་མོ་བགྲང་ཕྲེང་འཕྱང་བའི་རིལ་བ་སྤྱི་བླུགས་འཛིན་པའོ། །ཤེས་རབ་འཕེལ་མ་དཀར་མོ་ཨུཏྤལ་སྔོན་པོ་ལ་གནས་པའི་རལ་གྲི་འཛིན་པའོ། །ལས་ [128a] [128a.1]དང་སྒྲིབ་པ་ཐམས་ཅད་རྣམ་པར་སེལ་བ་ལྗང་གུ་སྟེ་རྡོ་རྗེ་རྩེ་གསུམ་པས་མཚན་པའི་པདྨ་དཀར་དམར་འཛིན་པའོ། །ཡེ་ཤེས་མི་ཟད་པའི་ཟླ་མ་ཏོག་དམར་མོ་རཏྣའི་ཟ་མེ་ཏོག་འཛིན་པའོ། །སངས་རྒྱས་ཐམས་ཅད་ཀྱི་ཆོས་ཀྱི་མཛོད་མོ་སེར་མོ་པདྨ་ལ་གནས་ [128a.2]པའི་རཏྣ་སྣ་ཚོགས་ཀྱི་དཔེ་སྒྲོམ་འཛིན་པའོ། །ཤར་ཕྱོགས་ཀྱི་སྒོར་ཆོས་སོ་སོ་ཡང་དག་པར་རིག་པ་མ་སྐུ་མདོག་དཀར་དམར་ཕྱག་གཉིས་ཀྱིས་རྡོ་རྗེ་ལྕགས་ཀྱུ་དང་ཞགས་པ་འཛིན་པའོ། །ལྷོ་ཕྱོགས་ཀྱི་སྒོར་དོན་སོ་སོ་ཡང་དག་པར་རིག་མ་མ་ར་ཀ་ཏའི་མདོག་ཅན་ཕྱག་གཡོན་གྱི་ [128a.3]རིན་པོ་ཆེའི་ཞགས་པ་འཛིན་པའོ། །ནུབ་ཀྱི་སྒོར་ངེས་པའི་ཚིག་སོ་སོ་ཡང་དག་པར་རིག་པ་མ་དམར་པོའི་ཕྱག་གཉིས་ཀྱིས་མཐའ་གཉིས་སུ་པདྨས་མཚན་པའི་ལྕགས་སྒྲོག་འཛིན་པའོ། །བྱང་གི་སྒོར་སྤོབས་པ་སོ་སོ་ཡང་དག་པར་རིག་པ་མ་མ་ར་ཀ་ཏ་ལྟ་བུ་ལྗང་གུ་ཕྱག་གཉིས་ཀྱིས་རྡོ་རྗེ་ [128a.4]རྩེ་གསུམ་པས་མཚན་པའི་དྲིལ་བུ་འཛིན་པའོ། །མེའི་མཚམས་སུ་སྒེག་མོ་སེར་མོ་སྒེག་པ་དང་བཅས་པའི་ཕྱག་གཉིས་ཀྱིས་རྡོ་རྗེ་གཉིས་འཛིན་པའོ། །བདེན་བྲལ་དུ་ཕྲེང་བ་མ་དམར་སེར་ཕྱག་གཉིས་རཏྣའི་ཕྲེང་བ་འཛིན་པའོ། །རླུང་དུ་གླུ་མ་དམར་མོ་ཕྱག་གཉིས་ཀྱིས་པི་ཝང་བསྒེང་ [128a.5]བའོ། །དབང་ལྡན་དུ་གར་མ་ལྗང་གུ་ཕྱག་གཉིས་ཀྱིས་གར་བྱེད་པའི་ཚུལ་གྱིས་རྡོ་རྗེ་རྩེ་གསུམ་པ་དང་རྡོ་རྗེ་དྲིལ་བུ་འཛིན་པའོ། །མོས་པས་སྤྱོད་པའི་ས་ལ་སོགས་པའི་ལྷ་མོ་འདི་རྣམས་ཐམས་ཅད་ནི་རཏྣའི་རྒྱན་སྣ་ཚོགས་དང་གོས་དང་རཏྣའི་ཅོད་པན་དང་ལྡན་པ་དང་ཅུང་ཟད་འཛུམ་ [128a.6]པ་དང་སྒེག་པའི་ཉམས་དང་ལྡན་པ་སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པའོ། །ཁྱད་པར་དུ་སྒོ་སྐྱོང་མ་རྣམས་ནི་ཉི་མའི་དཀྱིལ་འཁོར་ལ་བཞུགས་པའོ། །གཞན་ནི་དེ་རྣམས་ཀྱང་ཟླ་བ་ལ་གནས་པའོ་ཞེས་སོ། །དཀྱིལ་འཁོར་གསུམ་པ་ [128a.7]དབང་ལྡན་ནས་བརྩམས་ནས་བྱང་ཆུབ་སེམས་དཔའ་རྣམས་ཏེ། དེ་ལ་ཤར་ཕྱོགས་ཀྱི་སྣམ་བུ་ལ་ཀུན་ཏུ་བཟང་པོ་སེར་པོ་ཕྱག་གཡས་པས་མཆོག་སྦྱིན་གཡོན་པས་ཨུཏྤལ་ལ་གནས་པའི་རལ་གྲི་འཛིན་པའོ། །བློ་གྲོས་མི་ཟད་པ་སེར་པོ་གཡས་པས་རལ་གྲི་དང་གཡོན་པས་མི་ [128b] [128b.1]འཇིགས་པས་པདྨ་འཛིན་པའོ། །སའི་སྙིང་པོ་སེར་པོ་གཡས་པས་ས་གནོན་མཛད་པ། གཡོན་པས་པདྨ་ལ་གནས་པའི་དཔག་བསམ་གྱི་ཤིང་འཛིན་པའོ། །ནམ་མཁའི་སྙིང་པོ་ལྗང་གུ་གཡས་པས་རཏྣ་སྣ་ཚོགས་ཀྱི་ཆར་འབེབས་པ། གཡོན་པས་ཡིད་བཞིན་གྱི་ནོར་བུ་འཛིན་ [128b.2]པའོ། །ལྷོ་ཕྱོགས་ཀྱི་སྣམ་བུ་ལ་ནམ་མཁའ་མཛོད་སེར་པོ་གཡས་པས་ཡིད་བཞིན་གྱི་ནོར་བུ་འཛིན་པ། གཡོན་པས་བུམ་པ་བཟང་པོ་ལ་འཕྱང་བའི་དཔག་བསམ་གྱི་ཤིང་འཛིན་པའོ། །ཕྱག་ན་རིན་ཆེན་ལྗང་གུ་ཕྱག་གཡས་པས་རིན་པོ་ཆེ་དང་གཡོན་པས་པདྨ་ལ་གནས་པའི་ཟླ་བའི་དཀྱིལ་ [128b.3]འཁོར་འཛིན་པའོ། །བློ་གྲོས་རྒྱ་མཚོ་དཀར་པོ་གཡས་དུང་དང་གཡོན་པས་རྡོ་རྗེ་རལ་གྲི་འཛིན་པའོ། །རྡོ་རྗེ་སྙིང་པོ་ཨུཏྤལ་སྔོན་པོའི་ལོ་མ་ལྟ་བུའི་མདོག་ཅན་གཡས་པས་རྡོ་རྗེ་དང་གཡོན་པས་མདོ་སྡེ་ས་བཅུ་པའི་པུ་སྟེ་འཛིན་པའོ། །ནུབ་ཏུ་སྤྱན་རས་གཟིགས་དབང་ཕྱུག་གཡས་པས་ [128b.4]མཆོག་སྦྱིན་གྱི་ཕྱག་རྒྱ་གཡོན་པས་ཆུ་སྐྱེས་དཀར་པོ་འཛིན་པའོ། །མཐུ་ཆེན་ཐོབ་སེར་པོ་གཡས་པས་རལ་གྲི་གཡོན་པས་པདྨ་འཛིན་པའོ། །ཟླ་འོད་དཀར་པོ་གཡས་པས་རྡོ་རྗེ་འཁོར་ལོ་དང་གཡོན་པས་པདྨ་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །དྲ་བ་ཅན་གྱི་འོད་ [128b.5]དཀར་དམར་གཡས་པས་རལ་གྲི་དང་གཡོན་པས་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །བྱང་དུ་འོད་དཔག་མེད་དཀར་པོ་གཡས་ན་སྣ་ཚོགས་པདྨ་དང་གཡོན་པས་པདྨ་ལ་གནས་པའི་བུམ་པ་འཛིན་པའོ། །སྤོབས་པ་བརྩེགས་པ་སེར་པོ་གཡས་པས་སེ་གོལ་གཡོན་པས་ [128b.6]པདྨ་ལ་གནས་པའི་རལ་གྲི་འཛིན་པའོ། །མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་གུར་གུམ་ལྟ་བུ་གཡས་པ་རྡོ་རྗེ་རྩེ་ལྔ་པ་དང་གཡོན་པ་ཤཀྟི་འཛིན་པའོ། །སྒྲིབ་པ་ཐམས་ཅད་རྣམ་པར་སེལ་བ་སྔོན་པོ་གཡས་པས་རལ་གྲི་གཡོན་པས་སྣ་ཚོགས་རྡོ་རྗེས་མཚན་པའི་བ་དན་ [128b.7]འཛིན་པའོ། །བཅུ་དྲུག་པོ་འདི་དག་ནི་སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པ་རིན་པོ་ཆེའི་ཅོད་པན་ཅན་རིན་པོ་ཆེ་དང་ན་བཟའ་སྣ་ཚོགས་པས་བརྒྱན་པ་ཞལ་གཅིག་པ་ཕྱག་གཉིས་པ་རྣམས་སོ། །ཤར་སྒོར་མ་ཧེ་ལ་གཤིན་རྗེ་མཐར་ [129a] [129a.1]བྱེད་ནག་པོ་ཞལ་དྲུག་པ་གསུས་པ་འཕྱང་བ་ཞབས་དྲུག་པ་ཕྱག་དྲུག་གི་གཡས་པ་རྣམས་ཀྱིས་ལྕགས་ཀྱུ་དང་རལ་གྲི་དང་མདའ་འཛིན་པ། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་དྲིལ་བུ་དང་གཞུ་འཛིན་པའོ། །ཞལ་དང་ཞབས་རྣམས་ཀྱི་བྱེ་ [129a.2]བྲག་གོང་བཞིན་ནོ། །ལྷོ་སྒོར་ཤེས་རབ་མཐར་བྱེད་སེར་པོ་ཞལ་བཞི་པ་རྩ་བའི་ཞལ་སྒེག་པ་དང་བཅས་པའི་གཡས་གདངས་པ། ནུབ་ཏུ་དྲག་པོ་ཆེན་པོ་གཡོན་ཞི་བ་ཡང་ན་འདི་རྣམས་ནི་གོ་རིམས་ཇི་ལྟ་བས་སེར་པོ་དང་སྔོན་པོ་དང་དམར་པོ་དང་ལྗང་གུ་རྣམས་སོ། །འདི་ནི་ཕྱག་བརྒྱད་པ་ [129a.3]གཡས་པ་རྣམས་ཀྱིས་ཞགས་པ་དང་རྡོ་རྗེ་དང་རལ་གྲི་དང་མདའ་རྣམས་འཛིན་པའོ། །གཡོན་པ་རྣམས་ཀྱིས་སྙིང་གར་ལྕགས་ཀྱུ་དང་རྡོ་རྗེ་དྲིལ་བུ་དང་མདུང་དང་གཞུ་འཛིན་པའོ། །ནུབ་ཏུ་པདྨ་མཐར་བྱེད་དམར་པོ་ཞལ་བཞི་དམར་བ་སྒེག་པ་དང་དྲག་པོ་དང་བཞད་པ་དང་ཞི་བའི་ཉམས་དང་ [129a.4]ལྡན་པ་ནི། རྩ་བ་དང་གཡས་དང་རྒྱབ་དང་གཡོན་པའི་ཞལ་རྣམས་སོ། །ཡང་ན་འདི་རྣམས་ནི་དམར་པོ་དང་ནག་པོ་དང་སེར་པོ་དང་དཀར་པོ་རྣམས་སོ། །ཕྱག་བརྒྱད་པ་ཕྱག་གཉིས་ཀྱིས་རྡོ་རྗེ་ལྕགས་སྒྲོག་འཛིན་པ་ཕྱག་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་འཛིན་པའོ། ། [129a.5]གཡོན་པ་རྣམས་ཀྱིས་དྲིལ་བུ་དང་སྡིགས་མཛུབ་དང་བཅས་པའི་ཞགས་པ་དང་གཞུ་འཛིན་པའོ། །གསུམ་པོ་འདི་དག་ནི་རོལ་པའི་ཀུན་ཏུ་བསྐྱོད་པས་གནས་པའོ། །བྱང་དུ་བགེགས་མཐར་བྱེད་སྔོན་པོ་ཞལ་བཞི་སྔོན་པོའམ་ཡང་ན་སྔོན་པོ་དང་སེར་པོ་དང་དམར་པོ་དང་ལྗང་གུ་ [129a.6]རྣམས་སོ། །ཕྱག་བརྒྱད་པ་གཉིས་ཀྱིས་རྡོ་རྗེ་བསྡམས་པའི་ཚུལ་གྱིས་རྡོ་རྗེ་དྲིལ་བུ་དང་གཡས་པ་རྣམས་ན་རལ་གྲི་དང་མདའ་དང་ལྕགས་ཀྱུ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་གཞུ་དང་དྲིལ་བུ་འཛིན་པའོ། །ཚོགས་ཀྱི་བདག་ [129a.7]པོ་གཡོན་བརྐྱང་བས་ཀུན་ནས་མནན་ནས་བཞུགས་པའོ། །དབང་ལྡན་གྱི་མཚམས་སུ་འཇིག་རྟེན་གསུམ་ལས་རྣམ་པར་རྒྱལ་བ་སྔོན་པོ་ཞལ་བཞི་སྔོན་པོ་རྩ་བའི་ཞལ་ཁྲོ་བ་དང་བཅས་པའི་སྒེག་པ་དང་གཡས་དྲག་པོ་རྒྱབ་དཔའ་བ་གཡོན་མི་སྡུག་པའོ། །ཡང་ན་འདི་དག་སྔོན་པོ་དང་ [129b] [129b.1]སེར་པོ་དང་དམར་པོ་དང་དཀར་པོ་རྣམས་སོ། །འདི་ནི་ཕྱག་བརྒྱད་པ་ཕྱག་གཉིས་ཀྱིས་རྡོ་རྗེ་དང་དྲིལ་བུ་དང་ལྡན་པ་ཐུགས་ཀར་བཟུང་ནས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་མཛད་པ་གཡས་པ་རྣམས་ཀྱིས་རལ་གྲི་དང་ལྕགས་ཀྱུ་དང་མདའ་དང་། གཡོན་པ་རྣམས་ཀྱིས་རྡོ་རྗེ་དང་ཞགས་པ་དང་། གཞུ་ [129b.2]འཛིན་པའོ། །གཡོན་བརྐྱང་བའི་སྟང་སྟབས་ཀྱིས་ཞབས་གཡོན་པས་དབང་ཕྱུག་ཆེན་པོའི་མགོ་མནན་པ་གཡས་པས་ཨུ་མའི་ནུ་མར་མནན་པའོ། །མེར་རྡོ་རྗེ་ཉི་མ་མེ་ལྟར་འབར་བ་ནག་པོ་སྒེག་པ་དང་དཔའ་བ་དང་འཇིགས་སུ་རུང་བ་དང་། སྙིང་རྗེའི་རོ་དང་ལྡན་པའི་ཞལ་བཞི་ནག་པོ་ [129b.3]འམ་ཡང་ན་འདི་དག་ནི་སྔོན་པོ་དཀར་པོ་སེར་པོ་དམར་པོ་རྣམས་སོ། །འདི་ནི་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་དང་འཁོར་ལོ་འཛིན་པའོ། །གཡོན་པ་རྣམས་ཀྱིས་དྲིལ་བུ་དང་ཞགས་པ་དང་གཞུ་དང་ཁ་ཊྭཱཾ་ག་ལ་འབྲེལ་པའི་བ་དན་འཛིན་པའོ། །ཆུང་མ་དང་ [129b.4]བཅས་པའི་ཁྱབ་འཇུག་གཡས་བརྐྱང་གིས་མནན་པའོ། །བདེན་བྲལ་དུ་ཧེ་རུ་ཀ་རྡོ་རྗེ་སྔོན་པོ་སྔོན་པོའི་ཞལ་བཞི་པ་རྩ་བའི་ཞལ་དྲག་པོ་གཡས་པ་རབ་ཏུ་དགའ་བས་བཞད་པ་རྒྱབ་ནི་ཟ་བར་རྔམས་པ་གཡོན་པ་སྒེག་པའོ། །ཡང་ན་འདི་དག་ནི་སྔོན་པོ་དང་དམར་པོ་དང་ལྗང་གུ་དང་དཀར་ [129b.5]པོའོ། །འདི་ནི་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་རྩེ་ལྔ་པ་དང་མདའ་དང་ཁྲག་གིས་བཀང་བའི་ཐོད་པ་དང་། གཡོན་པ་རྣམས་ཀྱིས་སྙིང་གར་པདྨ་ཁ་བྱེ་བ་དང་། གཞུ་དང་དྲིལ་བུ་དང་བ་དན་དང་བཅས་པའི་ཁ་ཊྭཱཾ་ག་འཛིན་པའོ། །ཕྱག་གཉིས་ཀྱིས་འཇིགས་བྱེད་ཀྱི་པགས་པ་ [129b.6]རླུང་གི་གོས་འདྲ་བ་འཛིན་པའོ། །ཆུང་མ་དང་བཅས་པའི་ཚངས་པ་གཡོན་བརྐྱང་བས་མནན་ནས་གནས་པའོ། །རླུང་དུ་རྟ་མཆོག་ལྗང་གུ་ལྗང་གུའི་ཞལ་བཞི་པ་རྩ་བ་ཁྲོ་བོ་དང་བཅས་པའི་སྒེག་པ་གཡས་པ་དྲག་པོ་གཡོན་པའི་ཞལ་ཚངས་པ་ལྟ་བུ་སྟེ། ཡང་ན་ནི་འདི་ནི་ལྗང་གུ་དང་ [129b.7]སྔོན་པོ་དང་དཀར་པོ་རྣམས་ཏེ། སྤྱི་བོར་རྟ་མགོ་ལྗང་གུའོ། །འདི་ནི་ཕྱག་བརྒྱད་པ་གཡས་དང་པོ་སྣ་ཚོགས་རྡོ་རྗེ་དང་བ་དན་གསུམ་པ་དང་ལྡན་པས་ཕྱག་བསྒྲེང་བའི་ཚུལ་བྱས་པ་གཉིས་པས་བ་དན་གསུམ་པའི་ཚུལ་བྱས་པ། ཕྱག་གཉིས་ཀྱིས་རལ་གྲི་དང་མདའ་འཛིན་པའོ། ། [130a] [130a.1]གཡོན་པས་ཕུབ་དང་བཅས་པའི་ཕྱག་གི་སྣ་ཚོགས་ཆུ་སྐྱེས་འཛིན་པ། ལྷག་མ་གསུམ་གྱིས་ཤཀ་ཏི་དང་དབྱུག་པ་དང་གཞུ་རྣམས་འཛིན་པའོ། །ཞབས་གཡོན་བསྐུམ་པ་གཡས་བརྐྱང་བ་དང་གཡས་བསྐུམ་ཞིང་གཡོན་བརྐྱང་བའི་ཞབས་བཞིའོ། །གཡས་དང་ [130a.2]པོ་གཅིག་གིས་དབང་མོ་དང་དཔལ་མོ། གཉིས་པས་དགའ་མོ་དང་ཚིམ་མོ། གཡོན་པ་གཅིག་གིས་དབང་པོ་དང་སྦྲང་རྩིར་བྱེད་པ་དང་། གཉིས་པས་རྒྱལ་བར་བྱེད་པ་དང་། དཔྱིད་ཀྱི་ལྷ་མནན་ནས་གནས་པའོ། །དཀྱིལ་འཁོར་གྱི་བདག་པོའི་སྟེང་དུ་ནམ་མཁའ་ལ་གཙུག་ཏོར་ [130a.3]འཁོར་ལོས་སྒྱུར་བ་སེར་པོ་ཞལ་བཞི་སེར་བའམ་ཡང་ན་སེར་པོ་དང་སྔོན་པོ་དང་དམར་པོ་དང་དཀར་པོའོ། །ཕྱག་བརྒྱད་པའི་གཡས་པ་རྣམས་ཀྱིས་འཁོར་ལོ་དང་ལྕགས་ཀྱུ་དང་རལ་གྲི་དང་མདའོ། །གཡོན་པ་རྣམས་ཀྱིས་དྲིལ་བུ་དང་ཞགས་པ་དང་བགྲང་ཕྲེང་དང་གཞུ་བསྣམས་ [130a.4]པ། རོལ་པའི་ཀུན་དུ་བསྐྱོད་པས་གནས་པའོ། །འོག་ཏུ་གནོད་མཛེས་རྒྱལ་པོ་ནག་པོ་ཞལ་བཞི་པ་དྲག་པོ་དང་ཞི་བ་དང་། བཞད་པ་དང་སྒེག་པའི་ཉམས་དང་ལྡན་པའི་ནག་པོའོ། །ཡང་ན་ཞལ་བཞི་ནི་ནག་པོ་དང་དཀར་པོ་དང་དམར་པོ་དང་སེར་པོའོ། །ཕྱག་བརྒྱད་པའི་གཡས་ [130a.5]པ་རྣམས་ནི་རྡོ་རྗེ་དང་ལྕགས་ཀྱུ་དང་རལ་གྲི་དང་མདའོ། །གཡོན་པ་རྣམས་ཀྱིས་དྲིལ་བུ་དང་ཞགས་པ་གསལ་ཤིང་རྩེ་གཅིག་པ་དང་གཞུ་རྣམས་འཛིན་པ་གཡོན་བརྐྱང་གིས་གནས་པའོ། །ཁྲོ་བོ་བཅུ་པོ་འདི་དག་ནི་སྣ་ཚོགས་ཆུ་སྐྱེས་དང་ཉི་མ་ལ་གནས་པ་ཞལ་རེ་རེ་ཞིང་སྤྱན་གསུམ་ [130a.6]གསུམ་དམར་བ་སྨིན་མ་འཁྱོག་པ་སྟག་གི་པགས་པས་སྐུའི་སྟོད་སྨད་ལ་དཀྲིས་པ་ཐོད་པའི་ཕྲེང་བས་གཙུག་ཏོར་བྱས་པ་དབུ་སྐྲ་འབར་བ་དམར་སེར་གྱེན་དུ་བཅིངས་པ་སྨ་ར་དམར་སེར་དང་ལྡན་པ་ཀླུའི་རྒྱལ་པོ་བརྒྱད་ཀྱིས་འཇིགས་སུ་རུང་བའོ། །དཀྱིལ་འཁོར་གསུམ་པ་ཁོ་ [130a.7]ནའི་གྲྭ་བཞིའི་ནང་ན་འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པ་ཁྲོ་བོ་བཞིའི་ཕྱིའི་རེ་ཁཱའི་ཕྱི་རོལ་གྱི་གནས་སུ་མེ་ལ་སོགས་པའི་ཟུར་ཐིག་བཞི་པོ་རྣམས་ཀྱི་གཡས་ལོགས་སུ་མེ་ཏོག་མ་ལ་སོགས་པ་བཞིའོ། །གཡོན་ལོགས་སུ་གཟུགས་རྡོ་རྗེ་མ་ལ་སོགས་པ་བཞིའོ། ། [130b] [130b.1]དེ་ལ་མེ་ཏོག་མ་སེར་མོ་ཕྱག་ན་མེ་ཏོག་གི་སྣོད་འཛིན་པའོ། །བདུག་སྤོས་མ་ནག་མོ་ཕྱག་ན་བདུག་སྤོས་ཀྱི་ཕོར་པ་འཛིན་པའོ། །མར་མེ་མ་དམར་མོ་ཕྱག་ན་རཏྣའི་སྒྲོན་མེའི་མཆོད་སྡོང་འཛིན་པའོ། །དྲི་ཆབ་མ་ལྗང་གུ་ཕྱག་ན་དྲིའི་དུང་ཆོས་འཛིན་པའོ། །རྡོ་རྗེ་གཟུགས་མ་སེར་ [130b.2]མོ་ཕྱག་ན་མེ་ལོང་འཛིན་པའོ། །རྡོ་རྗེ་སྒྲ་མ་ལྗང་གུ་ཕྱག་ན་པི་ཝང་འཛིན་པའོ། །རྡོ་རྗེ་རོ་མ་དམར་མོ་ཕྱག་ན་རོའི་སྣོད་འཛིན་པའོ། །རྡོ་རྗེ་རེག་བྱ་མ་སྣ་ཚོགས་པའི་ཁ་དོག་ཅན་ཕྱག་ན་གོས་སྣ་ཚོགས་འཛིན་པའོ། །བརྒྱད་པོ་འདི་དག་ནི་ཞལ་གཅིག་ཕྱག་གཉིས་མ་རཏྣའི་ཅོད་པན་ [130b.3]དང་ལྡན་པ་གོས་སྣ་ཚོགས་དང་རིན་པོ་ཆེས་བརྒྱན་པ་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པའོ། །བཞི་པ་རྡོ་རྗེ་རིགས་ཀྱི་དཀྱིལ་འཁོར་ལ་དབང་པོའི་ཕྱོགས་སུ་དབང་པོ་སེར་པོ་གླང་པོ་ཆེ་ས་སྲུང་དཀར་པོའི་སྟེང་ན་གནས་པ་ཕྱག་གཡས་ན་རྡོ་རྗེ་ [130b.4]གཡོན་པ་ནུ་མ་འཛིན་པའོ། །གཤིན་རྗེར་མ་ཧེ་ལ་གཤིན་རྗེ་ནག་པོ་ཕྱག་གཉིས་ཀྱིས་དབྱུག་པ་དང་རྩེ་གཅིག་པ་འཛིན་པའོ། །ཆུར་ཆུ་སྲིན་ལ་ཆུ་བདག་དཀར་པོ་སྦྲུལ་མགོའི་གདེངས་ཀ་བདུན་པ་ཀླུའི་ཞགས་པ་དང་དུང་དཀར་འཛིན་པའོ། །ལུས་ངན་དུ་མི་ལ་ལུས་ངན་སེར་པོ་ [130b.5]ལྕགས་ཀྱུ་དང་དབྱུག་ཏོ་འཛིན་པའོ། །དབང་ལྡན་དུ་དབང་ལྡན་དཀར་པོ་གླང་གི་སྟེང་ན་གནས་པ་རྩེ་གསུམ་དང་ཐོད་པ་འཛིན་པ་ཐོད་པ་དང་རལ་པའི་ཐོར་ཅོག་དང་ཟླ་བ་ཕྱེད་པས་དབུ་བརྒྱན་པ། སྦྲུལ་གྱི་མཆོད་ཕྱིར་ཐོགས་དང་ལྡན་པ་མགྲིན་པ་སྔོན་པོའོ། །མེར་ར་ལ་མེ་ལྷ་ [130b.6]དམར་པོ་བླུགས་གཟར་དང་སྤྱི་བླུགས་འཛིན་པའོ། །བདེན་བྲལ་དུ་སྲིན་པོའི་བདག་པོ་སྔོན་པོ་རོལ་གནས་པ་རལ་གྲི་དང་ཕུབ་འཛིན་པའོ། །རླུང་དུ་རླུང་ལྷ་སྔོན་པོ་རི་དྭགས་ལ་གནས་པ་རླུང་རས་འཛིན་པའོ། །བརྒྱད་པོ་འདི་དག་ནི་ཕྱག་བཞི་པ་ཕྱག་གཡས་པས་ཕྱག་ [130b.7]མཚན་དང་པོ་འཛིན་པ། གཡོན་པས་ཕྱག་མཚན་གཉིས་འཛིན་ཅིང་རང་རང་གི་བཙུན་མོ་ལ་འཁྱུད་པ་ཕྱག་འོག་མ་གཉིས་གཙོ་བོ་ལ་འདུད་པའི་ཚུལ་གྱིས་སྤྱི་བོར་ཐལ་མོ་སྦྱོར་བའོ། །དབང་ལྡན་དང་ཉེ་བའི་ཕྱི་རོལ་དུ་དབང་ལྡན་གྱི་མཚམས་ནས་བརྩམས་ནས་རིམ་པས་ [131a] [131a.1]ཚངས་པ་ལ་སོགས་པ་སྟེ་དེ་ལ་ཚངས་པ་ནི་ངང་པ་ལ་ཞོན་པ་སེར་པོ་ཞལ་བཞི་ནི་སེར་པོའོ། །ཕྱག་བཞི་པ་དང་པོ་གཉིས་ཀྱིས་བགྲང་ཕྲེང་དང་པདྨ་འཛིན་པའོ། །འོག་མ་གཉིས་ཀྱིས་དབྱུག་པ་དང་སྤྱི་བླུགས་བཟུང་ནས་ཐལ་མོ་སྦྱར་བའོ། །ཁྱབ་འཇུག་ནག་ [131a.2]པོ་ཁྱུང་ལ་ཞོན་པ་ཕྱག་བཞི་པ་དང་པོ་གཉིས་ཀྱིས་འཁོར་ལོ་དང་དུང་འཛིན་པ། གཡས་གཡོན་གཉིས་ཀྱིས་མདུང་ཐུང་དང་ས་རཾ་ཁའི་གཞུ་འཛིན་པ་སྤྱི་བོར་ཐལ་མོ་སྦྱར་བའོ། །དབང་ཕྱུག་ཆེན་པོ་དཀར་པོ་གླང་ལ་ཞོན་པ་རལ་པའི་ཐོར་ཅོག་ཅན་ཟླ་བ་ཕྱེད་པས་མཚན་པ། ཕྱག་བཞི་པ་ [131a.3]སྤྱི་བོར་ཐལ་མོ་སྦྱར་བ་དང་རྩེ་གསུམ་པ་དང་ཐོད་པ་འཛིན་པའོ། །གདོང་དྲུག་དམར་པོ་རྨ་བྱ་ལ་ཞོན་པ་གདོང་དྲུག་པ་ཕྱག་དྲུག་པ་གཡས་པ་གཉིས་ཤ་ཀ་ཏི་དང་རྡོ་རྗེ་འཛིན་པ་གཡོན་པ་གཉིས་ཀྱིས་ཁྱིམ་བྱ་དང་དྲིལ་བུ་འཛིན་པའོ། །ལྷག་མ་གཉིས་ཀྱིས་སྤྱི་བོར་ཐལ་མོ་སྦྱར་བའོ། །འདི་ [131a.4]རྣམས་ཀྱང་གོང་བཞིན་དུ་རང་གི་བཙུན་མོ་ལ་འཁྱུད་པའོ། །ཚངས་མ་ནི་ཚངས་པ་དང་མཚུངས་པའོ། །དྲག་མོ་ནི་དྲག་པོ་དང་མཚུངས་པའོ། །ཁྱབ་འཇུག་མ་ནི་ཁྱབ་འཇུག་དང་མཚུངས་པའོ། །གཞོན་དུ་མ་ནི་གདོང་དྲུག་དང་མཚུངས་པའོ། །དབང་མོ་ནི་དབང་པོ་དང་མཚུངས་པའོ། ། [131a.5]ཕག་མོ་ནག་མོ་ནི་འུག་པ་ལ་ཞོན་པ་ཕྱག་བཞི་པ་ཕྱག་གཡས་གཡོན་གཉིས་ཀྱིས་རོ་ཧི་ཏའི་ཉ་དང་ཐོད་པ་འཛིན་པའོ། །གཞན་གཉིས་ཀྱིས་ཐལ་མོ་སྦྱར་བའོ། །ཙ་མུཎྜཱི་དམར་མོ་རི་དྭགས་ལ་ཞོན་པ་ཕྱག་བཞི་མ་གཡས་གཡོན་གྱིས་གྲི་གུག་དང་ཐོད་པ་འཛིན་པ་གཉིས་ཀྱིས་ཐལ་མོ་སྦྱར་བའོ། ། [131a.6]བྷྲྀངྒི་རི་ཏི་ནག་མོ་ཤིན་ཏུ་སྐེམ་པ་ཕྱག་བཞི་པ་གཉིས་ཀྱིས་ཕྲེང་བ་དང་སྤྱི་བླུགས་འཛིན་པ་གཉིས་ཀྱིས་ཐལ་མོ་སྦྱར་བའོ། །ཚོགས་བདག་དཀར་པོ་བྱི་བ་ལ་ཞོན་པ་གླང་པོ་ཆེའི་གདོང་ཅན་སྤྲུལ་གྱི་མཆོད་ཕྱིར་ཐོགས་པ་ཅན་ཕྱག་བཞིའི་གཡས་གཉིས་ཀྱིས་རྩེ་གསུམ་པ་དང་ལ་དུ་གཡོན་ [131a.7]གཉིས་ཀྱིས་དགྲ་སྟ་དང་ལ་ཕུག་འཛིན་པའོ། །ནག་པོ་ཆེན་པོ་ནག་པོ་རྩེ་གསུམ་པ་དང་ཐོད་པ་འཛིན་པའོ། །དགའ་བྱེད་དབང་ཕྱུག་ནག་པོ་རྫ་རྔ་ལ་ཞོན་པ་རྫ་རྔ་བརྡུང་བ་ལ་བརྩོན་པའོ། །ཉི་མ་དམར་པོ་རྟ་བདུན་གྱིས་འདྲེན་པའི་ཤིང་རྟ་ལ་ཞོན་པ་གཡས་པ་དང་གཡོན་པའི་ཕྱག་གཉིས་ [131b] [131b.1]པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །ཟླ་བ་དཀར་པོ་ངང་པ་ལ་ཞོན་པ་ཕྱག་གཡས་པ་དང་གཡོན་པས་ཀུ་མུ་ད་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །མིག་དམར་དམར་པོར་ལ་ཞོན་པ་གཡས་ན་གྲི་གུག་གཡོན་པས་མི་མགོ་ཟ་བའི་ཚུལ་གྱིས་འཛིན་ [131b.2]པའོ། །ལྷག་པ་སེར་པོ་པདྨའི་སྟེང་དུ་མདའ་དང་གཞུ་འཛིན་པའོ། །ཕུར་བུ་དཀར་པོ་ཐོད་པའམ་སྦལ་བ་ལ་ཞོན་པ་ཕྲེང་བ་དང་སྤྱི་བླུགས་འཛིན་པའོ། །པ་བ་སངས་དཀར་པོ་པདྨ་ལ་གནས་པ་ཕྲེང་བ་དང་སྤྱི་བླུགས་འཛིན་པའོ། །སྤེན་པ་ནག་པོ་རུས་སྦལ་ལ་གནས་པ་དབྱུག་པ་འཛིན་ [131b.3]པའོ། །སྒྲ་གཅན་དམར་ནག་ཕྱག་གཉིས་ཀྱིས་ཉི་མ་དང་ཟླ་བ་འཛིན་པའོ། །མཇུག་རིངས་ནག་པོ་རལ་གྲི་དང་ཀླུའི་ཞགས་པ་འཛིན་པའོ། །སྟོབས་བཟངས་དཀར་པོ་གླང་པོ་ལ་གནས་པ་རལ་གྲི་དང་གཤོལ་འཛིན་པའོ། །རྒྱལ་བར་བྱེད་པ་ལྗང་གུ་བྱ་ཀོ་ཀི་ལའི་ཤིང་རྟ་ལ་ཞོན་པ་ལྗང་ [131b.4]གུ་ཕྱག་བཞི་པ་གཡས་པ་གཉིས་ན་མེ་ཏོག་གི་ཕྲེང་བ་དང་མདའ་གཡོན་གཉིས་ཀྱིས་བཏུང་བའི་སྣོད་དང་གཞུ་འཛིན་པའོ། །སྦྲང་རྩིར་བྱེད་པ་དཀར་པོ་ནེ་ཙོའི་ཤིང་རྟ་ལ་གནས་པ་ཕྱག་བཞི་པ་གཡས་ཆུ་སྲིན་གྱི་རྒྱལ་མཚན་དང་མདའ་གཡོན་པ་གཉིས་ན་བཏུང་བའི་སྣོད་འཛིན་པའོ། ། [131b.5]དཔྱིད་ཀྱི་ལྷ་དཀར་པོ་སྤྲེའུ་ལ་གནས་པ་ཕྱག་བཞི་པ་གཡས་པ་གཉིས་ཀྱིས་མདའ་དང་རལ་གྲི་གཡོན་པ་གཉིས་བཏུང་བའི་སྣོད་དང་གཞུ་འཛིན་པའོ། །ཀླུ་མཐའ་ཡས་དང་ནོར་རྒྱས་དང་འཇོག་པོ་དང་སྟོབས་ཀྱི་རྒྱུ་དང་པདྨ་དང་པདྨ་ཆེན་པོ་དང་དུང་སྐྱོང་དང་རིགས་ལྡན་རྣམས་ [131b.6]སྦྲུལ་མགོ་བདུན་དང་ལྡན་པ་ཐལ་མོ་སྦྱར་བའོ། །ཡང་ན་རང་རང་གི་ཡབ་ཀྱི་གཡས་པའི་ཕྱག་མཚན་གྱི་གཙོ་བོ་དང་ལྡན་པས་ཐལ་མོ་སྦྱར་བའོ། །ཐགས་བཟངས་རིས་དང་སྟོབས་ལྡན་དང་ཚིམ་བྱེད་དང་། རྣམ་པར་སྣང་བྱེད་ལ་སོགས་པ་ལྷ་མ་ཡིན་གྱི་དབང་པོ་ཆེན་པོ་ [131b.7]རྣམས་མདོག་ནག་པོ་གཡུལ་འགྱེད་པའི་གོ་ཆ་སྣ་ཚོགས་བགོས་པ་རལ་གྲི་དང་ཕེ་ཏ་ཀ་ལ་སོགས་པའི་མཚོན་ཆ་སྣ་ཚོགས་ཕྱག་གིས་འཛིན་པའོ། །ནམ་མཁའ་ལྡིང་གི་དབང་པོ་གཤོག་པ་བརྐྱང་བ་པུས་མོའི་བར་དུ་དཀར་པོ་དེའི་སྟེང་དུ་ལྟེ་བའི་བར་དུ་སེར་པོ་དེའི་སྟེང་དུ་ [132a] [132a.1]མགྲིན་པའི་བར་དུ་དམར་པོ། །དེའི་སྟེང་དུ་མགོའི་བར་དུ་ནག་པོ་ཕྱག་གཉིས་ཐལ་མོ་སྦྱར་བའོ། །མིའམ་ཅིའི་རྒྱལ་པོ་ལྗོན་པ་དམར་སེར་ཕྱག་གཉིས་ཀྱིས་པི་ཝང་གི་སྒྲ་སྒྲོགས་པའོ། །དྲི་ཟའི་རྒྱལ་པོ་ཟུར་ཕུད་ལྔ་པ་སེར་པོ་ཕྱག་གཉིས་ཀྱིས་པི་ཝང་གི་སྒྲ་སྒྲོགས་ [132a.2]པའོ། །རིག་པ་འཛིན་པའི་རྒྱལ་པོ་དོན་ཀུན་གྲུབ་པ་དཀར་པོ་མེ་ཏོག་གི་ཕྲེང་བ་འཛིན་པའོ། །གང་བ་བཟང་པོ་སྔོན་པོ། ནོར་བུ་བཟང་པོ་སེར་པོ། ནོར་སྦྱིན་དམར་པོ། རྣམ་ཐོས་ཀྱི་བུ་སེར་པོ། པི་ཙི་ཀུཎྜ་ལི་དམར་པོ། ཀི་ལི་མ་ལཱི་ལྗང་གུ། སྒོའི་དབང་པོ་སེར་པོ། སྤྱོད་ [132a.3]པའི་དབང་པོ་སེར་པོ་སྟེ། གང་བ་བཟང་པོ་ལ་སོགས་པའི་གནོད་སྦྱིན་གྱི་བདག་པོ་འདི་དག་ནི་ཕྱག་གཉིས་ཀྱི་གཡས་ཀྱིས་ཤིང་ཐོག་པི་ཛ་པཱུ་ར་དང་གཡོན་ནེའུ་ལེ་འཛིན་པའོ། །འཕྲོག་མ་སེར་མོ་ཕྱག་གཉིས་ཀྱིས་ཟན་གྱི་ཆང་བུ་གཉིས་འཛིན་པ་བུ་དང་བཅས་པའོ། །ཐ་སྐར་དཀར་པོ་དང་། [132a.4]བྲ་ཉེ་ལྗང་གུ་དང་། སྨིན་དྲུག་སྔོ་བསངས་དང་། སྣར་མ་དམར་སྐྱ་དང་། མགོ་ནག་པོ་དང་། ལག་སེར་པོ་དང་། ན་བ་སོ་སོར་པོ་དང་། རྒྱལ་སྔོ་བསངས་དང་། སྐག་དཀར་པོ་དང་། མཆུ་སེར་པོ་དང་། གྲེ་མེ་ཏོག་བྲི་ཡང་ཀུ་ལྟ་བུ་ལྗང་སེར་དང་། སྤོ་ལྗང་གུ་དང་། མེ་བཞི་དཀར་ [132a.5]པོ་དང་། ནག་པ་ལྗང་གུ་དང་། ས་རི་སེར་པོ་དང་། ས་གནག་པོ་དང་། ལྷ་མཚམས་ལྗང་གུ་དང་། སྣོན་སེར་པོ་དང་། སྣུབས་སེར་པོ་དང་། ཆུ་སྟོད་ནག་པོ་དང་། ཆུ་སྨད་དཀར་པོ་དང་། གྲོ་བཞིན་དཀར་སེར་དང་། མོན་གྲེ་ནག་པོ་དང་། མོན་གྲུ་སེར་པོ་དང་། ཁྲུམས་སྟོད་ལྗང་གུ་དང་། [132a.6]ཁྲུམས་སྨད་སེར་པོ་དང་། ནམ་གྲུ་དཀར་སེར་དང་། བྱི་བཞིན་སྔོ་བསངས་སོ། །ཐ་སྐར་ལ་སོགས་པའི་ལྷ་མོ་འདི་རྣམས་ནི་སྟོད་གཡོགས་གཡོ་བ་དང་བཅས་པ་རྣམས་ཐལ་མོ་སྦྱར་བའོ། །གཞན་ཡང་ལྷ་རྣམས་ནི་ཤིང་རྟ་ལ་གནས་པར་ཤེས་པར་བྱའོ། །དབང་པོ་ལ་སོགས་པའི་ལྷ་ [132a.7]རྣམས་པདྨ་ལ་གནས་པ་རེ་རེ་ལའང་འཁོར་དཔག་ཏུ་མེད་པས་བསྐོར་པའོ། །སྦྱོར་བ་ཇི་ལྟ་བ་བཞིན་དུ་རིན་པོ་ཆེ་དང་གོས་སྣ་ཚོགས་པས་བརྒྱན་པ། དཀྱིལ་འཁོར་གྱི་བདག་པོ་བཅོམ་ལྡན་འདས་ལ་ཕྱག་འཚལ་ཞིང་བཀྲ་ཤིས་ཀྱི་ཚིགས་སུ་བཅད་པའི་སྒྲ་ཕྱོགས་ཐམས་ཅད་དུ་སྒྲོགས་ [132b] [132b.1]བའོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་ལ་སོགས་པའི་སྒོ་སྐྱོང་རྣམས་ནི་ནང་གི་དཀྱིལ་འཁོར་བཞིན་ནོ། །འདིར་བཅོམ་ལྡན་འདས་རྣམ་པར་སྣང་མཛད་ཆེན་པོའི་བདག་ཉིད་འཇམ་པའི་དབྱངས་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་ [132b.2]བཞིན་ལ་བདག་ཉིད་ལྟ་བུའི་རྡོ་རྗེ་སེམས་དཔས་རྒྱས་བཏབ་པའོ། །མེ་ལོང་ལྟ་བུ་ལ་སོགས་པའི་ཡེ་ཤེས་ཀྱི་ངོ་བོ་མི་བསྐྱོད་པ་ལ་སོགས་པ་དེ་བཞིན་གཤེགས་པ་བཞི་དང་གཙུག་ཏོར་བརྒྱད་དང་། སྤྱན་མ་ལ་འཇམ་པའི་དབྱངས་ཀྱིས་རྒྱས་བཏབ་པའོ། །རྡོ་རྗེ་སེམས་དཔའ་ལ་སོགས་ [132b.3]པ་བཞི་དང་མཱ་མ་ཀཱི་དང་། རྡོ་རྗེ་ལྕགས་ཀྱུ་དང་ས་བཅུ་གཉིས་དང་ཆོས་སོ་སོ་ཡང་དག་པར་རིག་པ་མ་དང་། སྒེག་མོ་དང་ཀུན་དུ་བཟང་པོ་ལ་སོགས་པ་བཞི་དང་། ཁྲོ་བོ་བཅུ་དང་མེ་ཏོག་མ་དང་། རྡོ་རྗེ་གཟུགས་མ་དང་ཤར་ཕྱོགས་ན་གནས་པའི་ལྷ་རྣམས་ལ་མི་བསྐྱོད་པས་སོ། །རྡོ་རྗེ་ [132b.4]རིན་ཆེན་ལ་སོགས་པ་བཞི་དང་རྡོ་རྗེ་ཞགས་པ་དང་། ཕ་རོལ་ཏུ་ཕྱིན་མ་བཅུ་གཉིས་དང་དོན་སོ་སོ་ཡང་དག་པར་རིག་པ་མ་དང་ཕྲེང་བ་མ་དང་ནམ་མཁའ་མཛོད་ལ་སོགས་པ་བཞི་དང་། བདུག་སྤོས་མ་དང་རྡོ་རྗེ་སྒྲ་མ་དང་ལྷོའི་ཕྱོགས་ན་གནས་པའི་ལྷ་རྣམས་ལ་རིན་ཆེན་འབྱུང་ལྡན་ [132b.5]གྱིས་སོ། །རྡོ་རྗེ་ཆོས་ལ་སོགས་པ་བཞི་དང་གོས་དཀར་མོ་དང་། རྡོ་རྗེ་ལྕགས་སྒྲོག་དང་ཚེ་ལ་དབང་བ་མ་ལ་སོགས་པ་བཅུ་གཉིས་དང་། ངེས་པའི་ཚིག་སོ་སོ་ཡང་དག་པར་རིག་པ་མ་དང་གླུ་མ་དང་སྤྱན་རས་གཟིགས་ལ་སོགས་པ་བཞི་དང་། མར་མེ་མ་དང་རྡོ་རྗེ་རོ་མ་དང་། [132b.6]ནུབ་ཕྱོགས་ན་གནས་པའི་ལྷ་རྣམས་ལ་འོད་དཔག་མེད་ཀྱིས་སོ། །རྡོ་རྗེ་ལས་ལ་སོགས་པ་བཞི་དང་། རྡོ་རྗེ་འབེབས་པ་དང་། གཟུངས་བཅུ་གཉིས་དང་སྤོབས་པ་སོ་སོ་ཡང་དག་པར་རིག་པ་མ་དང་། གར་མ་དང་འོད་དཔག་མེད་ལ་སོགས་པ་བཞི་དང་དྲི་ཆབ་མ་དང་རྡོ་རྗེ་རེག་བྱ་མ་ [132b.7]དང་། བྱང་ཕྱོགས་ན་གནས་པའི་ལྷ་རྣམས་ལ་དོན་ཡོད་གྲུབ་པས་རྒྱས་བཏབ་པའོ། །འཇམ་པའི་དབྱངས་ཀྱི་ཐུགས་ཀའི་ས་བོན་ནི་མུཿའོ། །ཨ་ཨཱ་སརྦ་ཏ་ཐ་ག་ཏ་ཧྲྀ་ད་ཡ་ཧ་ར་ཧ་ར་ཨོཾ་ཧཱུཾ་ཧྲཱིཿབྷ་ག་ཝཱན་ཛྙཱ་ན་མཱུརྟི་ཝཱ་གཱི་ཤྭ་ར་མཧཱ་ཝཱ་ཙ་སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨ་ [133a] [133a.1]དྷཱ་ཏུ་ཛྙཱ་ན་གརྦྷ་ཨཱཿཞེས་བྱ་བ་ནི་སྙིང་པོའི་སྔགས་སོ། །ཨོཾ་ཨ་མྲི་ཏ་ཀུཎྜ་ལི་བགྷྣཱ་ནྟ་ཀ་ཧཱུཾ་ཞེས་བྱ་བ་ནི་བདུད་རྩི་འཁྱིལ་པ་སྟེ་ལས་ཐམས་ཅད་པའི་སྔགས་སོ།། །།ངན་སོང་ཡོངས་སུ་སྦྱོང་བའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་རླུང་དང་མེ་དང་ཆུ་དང་ས་དང་རི་རབ་ཀྱི་ [133a.2]སྟེང་དུ་གཞལ་ཡས་ཁང་གི་དབུས་སུ་ནང་གི་དཀྱིལ་འཁོར་ལ་འཁོར་ལོ་རྩིབས་བརྒྱད་པ་སེར་པོ། རྡོ་རྗེ་ཕྲེང་བ་སྔོན་པོས་བསྐོར་བ་སྟེ། འགའ་ཞིག་ཏུ་འཁོར་ལོ་རྩིབས་བརྒྱད་པ་སྔོན་པོར་གསུངས་སོ། །གཞན་ནི་འདིའི་འཁོར་ལོའི་ལྟེ་བ་སྔོན་པོ་ཤར་གྱི་རྩིབས་དཀར་པོ་ལྷོ་ནག་པོ་ [133a.3]ནུབ་དམར་པོ་བྱང་ལྗང་གུའོ་ཞེས་གསུངས་སོ། །འཁོར་ལོའི་ལྟེ་བ་ལ་སྣ་ཚོགས་པདྨ་ལ་གནས་པའི་སེང་གེའི་སྟེང་དུ་བཅོམ་ལྡན་འདས་ཤཱཀྱ་སེང་གེ་རྣམ་པར་སྣང་མཛད་ཆེན་པོ་ཤིན་ཏུ་གསེར་གྱི་མདོག་ཅན་ཆོས་ཀྱི་འཁོར་ལོའི་ཕྱག་རྒྱ་མཛད་པའོ། །ཤར་གྱི་རྩིབས་ལ་རྡོ་རྗེ་གཙུག་ [133a.4]ཏོར་དཀར་པོས་གནོན་གྱི་ཕྱག་རྒྱ་ཅན་ནོ། །ལྷོའི་རྩིབས་ལ་རིན་ཆེན་གཙུག་ཏོར་སྔོན་པོ་མཆོག་སྦྱིན་གྱི་ཕྱག་རྒྱ་མཛད་པའོ། །ནུབ་ཀྱི་རྩིབས་ལ་པདྨ་གཙུག་ཏོར་དམར་པོ་བསམ་གཏན་གྱི་ཕྱག་རྒྱ་ཅན་ནོ། །བྱང་གི་རྩིབས་ལ་སྣ་ཚོགས་གཙུག་ཏོར་ལྗང་གུ་མི་འཇིགས་པ་རབ་ཏུ་སྦྱིན་པའི་ [133a.5]ཕྱག་རྒྱའོ། །མེའི་རྩིབས་ལ་གཙུག་ཏོར་གཟི་བརྗིད་སྐུ་མདོག་དཀར་དམར་ཕྱག་གཉིས་ཀྱིས་ཉི་མ་འཛིན་པ་ཕྱག་གཡོན་པ་དཀུར་བརྟེན་པའོ། །བདེན་བྲལ་གྱི་རྩིབས་ལ་གཙུག་ཏོར་རྒྱལ་མཚན་སྐུ་མདོག་དམར་ནག་འདྲེས་པས་ཕྱག་གཉིས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་ [133a.6]འཛིན་པའོ། །རླུང་གི་རྩིབས་ལ་གཙུག་ཏོར་རྣོན་པོ་ནམ་མཁའ་ལྟར་སྔོ་བསངས་ཕྱག་གཡས་པས་རལ་གྲི་འཛིན་པ་གཡོན་པས་པོ་ཏི་འཛིན་པའོ། །དབང་ལྡན་གྱི་རྩིབས་ལ་གཙུག་ཏོར་གདུགས་དཀར་སྐུ་མདོག་དཀར་པོ་ཕྱག་གཉིས་ཀྱིས་གདུགས་འཛིན་པའོ། །རྡོ་རྗེ་ཕྲེང་བའི་ཕྱི་རོལ་ [133a.7]མེ་ལ་སོགས་པའི་མཚམས་སུ་སྒེག་མོ་དང་ཕྲེང་བ་མ་དང་གླུ་མ་དང་གར་མ་རྣམས་སྐུ་མདོག་དཀར་མོ་དང་སེར་མོ་དང་དམར་མོ་དང་སྣ་ཚོགས་ཅན་མ་ཕྱག་གཉིས་པའོ། །སྣམ་བུ་ལ་སྒོའི་གཡོན་ལོགས་སུ་བྱང་ཆུབ་སེམས་དཔའ་གཉིས་དང་གཡས་ལོགས་སུ་གཉིས་སོ། །དེ་ལ་ཤར་ [133b] [133b.1]གྱི་སྣམ་བུ་ལ་བྱམས་པ་སེར་པོ། གཡས་པའི་ཕྱག་གིས་ཀླུ་ཤིང་གི་མེ་ཏོག་དང་། གཡོན་པས་སྤྱི་བླུགས་འཛིན་པའོ། །མཐོང་བ་དོན་ཡོད་སེར་པོ་ཕྱག་གཡས་པས་སྤྱན་དང་བཅས་པའི་པདྨ་འཛིན་པ། གཡོན་པས་ཁུ་ཚུར་དཀུར་བརྟེན་པའོ། །ངན་སོང་ཀུན་འདྲེན་དཀར་པོ་ [133b.2]ཕྱག་གཉིས་ཀྱིས་ལྕགས་ཀྱུ་འཛིན་པའོ། །མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་དཀར་སེར་འདྲེས་པའི་མདོག་ཅན་ཕྱག་གཡས་དབྱུག་པ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ལྷོ་ཕྱོགས་ཀྱི་སྣམ་བུ་ལ་སྤོས་ཀྱི་གླང་པོ་དཀར་ལྗང་གཡས་ཀྱིས་དྲིའི་དུང་ [133b.3]ཕོར་འཛིན་པ། གཡོན་པ་ཁུ་ཚུར་དཀུར་བརྟེན་པའོ། །དཔའ་བར་འགྲོ་བ་དཀར་པོ་གཡས་པས་རལ་གྲི་གཡོན་པས་ཁུ་ཚུར་དཀུར་བརྟེན་པའོ། །ནམ་མཁའ་མཛོད་དཀར་སེར་གཡས་པས་པདྨ་ལ་གནས་པའི་ཆོས་ཀྱི་མཛོད་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ཡེ་ཤེས་ [133b.4]ཏོག་སྔོན་པོ་ཕྱག་གཡས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ནུབ་ཀྱི་སྣམ་བུ་ལ་བདུད་རྩིའི་འོད་དཀར་པོ་གཡས་པས་ཅོད་པན་གྱི་སྟེང་དུ་བདུད་རྩིས་གང་བའི་བུམ་པ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ཟླ་བའི་འོད་ [133b.5]དཀར་པོ་གཡས་པས་པདྨ་ལ་གནས་པའི་ཟླ་བ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །བཟང་སྐྱོང་དཀར་པོ་གཡས་པས་རིན་པོ་ཆེ་འབར་བ་དང་བཅས་པ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །དྲ་བ་ཅན་གྱི་འོད་དམར་པོ་གཡས་པས་རྡོ་རྗེའི་གུར་འཛིན་པ། གཡོན་ [133b.6]པས་ཁུ་ཚུར་དཀུར་བརྟེན་པའོ། །བྱང་གི་སྣམ་བུ་ལ་རྡོ་རྗེ་སྙིང་པོ་སྔོ་སྐྱ་གཡས་རྡོ་རྗེ་དང་བཅས་པའི་ཨུཏྤལ་སྔོན་པོ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །བློ་གྲོས་མི་ཟད་པ་དཀར་པོ་ཕྱག་གཉིས་ཀྱིས་བདུད་རྩིས་གང་བའི་བུམ་པ་འཛིན་པའོ། །སྤོབས་པ་བརྩེགས་ [133b.7]པ་དམར་པོ་གཡས་པས་ཆུ་སྐྱེས་ལ་གནས་པའི་རཏྣ་བརྩེགས་པ་བསྣམས་པ་གཡོན་པས་ཁུ་ཚུར་དཀུར་བརྟེན་པའོ། །ཀུན་ཏུ་བཟང་པོ་གསེར་གྱི་མདོག་ཅན་ཕྱག་གཡས་པས་རིན་པོ་ཆེའི་སྙེ་མ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །དཀྱིལ་འཁོར་གྱི་མེ་ལ་སོགས་ [134a] [134a.1]པ་རྣམས་ལ་མེ་ཏོག་མ་དང་བདུག་སྤོས་མ་དང་མར་མེ་མ་དང་། དྲི་ཆབ་མ་རྣམས་ནི་དཀར་མོ་དང་ནག་མོ་དང་དམར་མོ་དང་། ལྗང་གུ་ཕྱག་གཉིས་ཀྱིས་མེ་ཏོག་ལ་སོགས་པ་འཛིན་པའོ། །ཤར་སྒོར་རྡོ་རྗེ་ལྕགས་ཀྱུ་དཀར་པོ་ཕྱག་གཉིས་ཀྱིས་ལྕགས་ཀྱུ་འཛིན་ [134a.2]པའོ། །ལྷོ་རུ་རྡོ་རྗེ་ཞགས་པ་སྔོན་པོ་ཕྱག་གཉིས་ཀྱིས་ཞགས་པ་འཛིན་པའོ། །ནུབ་ཏུ་རྡོ་རྗེ་ལྕགས་སྒྲོག་དམར་མོ་ཕྱག་གཉིས་ཀྱིས་རྡོ་རྗེ་ལྕགས་སྒྲོག་འཛིན་པའོ། །བྱང་དུ་རྡོ་རྗེ་འབེབས་པ་ལྗང་གུ་ཕྱག་གཉིས་ཀྱིས་རྡོ་རྗེ་དྲིལ་བུ་འཛིན་པའོ། །ལྷ་སུམ་ཅུ་སོ་བདུན་པོ་འདི་དག་ [134a.3]ཀྱང་གོས་སྣ་ཚོགས་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་རཏྣའི་ཅོད་པན་ཅན་ཞལ་གཅིག་སྤྱན་གཉིས་པ་ཕྱག་གཉིས་པ་སྣ་ཚོགས་པདྨ་དང་ཟླ་བ་རྣམས་ལ་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །འདིར་རྣམ་པར་སྣང་མཛད་ཆེན་པོ་ནི་རང་ཉིད་དང་མཚུངས་པའི་རྣམ་སྣང་ [134a.4]གིས་རྒྱས་བཏབ་པོ། །རྡོ་རྗེ་གཙུག་ཏོར་ལ་སོགས་པ་བཞི་ལ་རྣམ་པར་སྣང་མཛད་ཆེན་པོས་སོ། །ཤར་གྱི་ཕྱོགས་དང་མེའི་མཚམས་ན་གནས་པའི་ལྷ་རྣམས་ལ་རྡོ་རྗེ་གཙུག་ཏོར་གྱིས་སོ། །ལྷོ་ཕྱོགས་དང་བདེན་བྲལ་གྱི་མཚམས་ན་གནས་པ་རྣམས་ལ་རིན་ཆེན་གཙུག་ཏོར་ [134a.5]གྱིས་སོ། །ནུབ་ཕྱོགས་དང་རླུང་གི་མཚམས་ན་གནས་པ་རྣམས་ལ་པདྨ་གཙུག་ཏོར་གྱིས་སོ། །བྱང་ཕྱོགས་དང་དབང་ལྡན་གྱི་མཚམས་ན་གནས་པ་རྣམས་ལ་སྣ་ཚོགས་གཙུག་ཏོར་གྱིས་སོ། །འདིར་ཕྱི་རོལ་གྱི་དཀྱིལ་འཁོར་གྱི་ལྷའི་གནས་ཀྱི་སྣམ་བུ་ལ་ཟླ་བའི་དཀྱིལ་འཁོར་ཉི་ [134a.6]ཤུ་རྩ་བརྒྱད་པོ་ལྟའོ་ཞེས་རྒྱུད་ལས་གསུངས་པའི་ཕྱིར་འདོད་ཡོན་གྱི་སྣམ་བུ་རྣམས་ལ་བྱང་ཆུབ་སེམས་དཔའ་བཅུ་དྲུག་དགོད་པར་མི་རིགས་སོ། །འགའ་ཞིག་ནི་ནང་གི་དཀྱིལ་འཁོར་ཞེས་རྒྱུད་དུ་གསུངས་པས་ཕྱི་རོལ་གྱི་གཞལ་ཡས་ཁང་གི་ནང་དུ་གཞལ་ཡས་ཁང་གཉིས་པའོ་ཞེས་ [134a.7]སྨྲའོ། །འགའ་ཞིག་ཏུ་ནི་རྣམ་པར་སྣང་མཛད་ཆེན་པོ་ལ་སོགས་པ་དེ་བཞིན་གཤེགས་པ་དགུ་གཙུག་ཏོར་དང་བཅས་པ་དགེ་སློང་གི་ཆ་ལུགས་འཛིན་པར་གསུངས་སོ། །པདྨའི་ཕྲེང་བས་ཡོངས་སུ་བསྐོར་བ་དང་། ཁོར་ཡུག་གི་ནང་དུ་དབང་ལྡན་གྱི་མཚམས་ནས་བརྩམས་ནས་ [134b] [134b.1]གཡས་སྐོར་གྱིས་མགྲིན་པ་སྔོན་པོ་ལ་སོགས་པ་བསྐྱེད་པར་བྱ་སྟེ། །དེ་ལ་དབང་ལྡན་དུ་གླང་ལ་མགྲིན་པ་སྔོན་པོ་དཀར་པོ་མཆོད་ཕྱིར་ཐོགས་པ་ཅན་ཕྱག་གཡས་གཉིས་ན་རྡོ་རྗེ་དང་མཆོད་སྦྱིན་གྱི་ཕྱག་རྒྱ་གཡོན་གཉིས་ན་རྩེ་གསུམ་དང་རལ་གྲི་འཛིན་པའོ། །མགྲིན་སྔོན་མ་མགྲིན་ [134b.2]པ་སྔོན་པོ་ལྟ་བུའོ། །ནམ་མཁའ་ལྡིང་ལ་ཁྱབ་འཇུག་ནག་པོ་གཡས་གཉིས་ན་དབྱུག་ཐོ་དང་རྡོ་རྗེ་གཡོན་གཉིས་ན་དུང་དང་འཁོར་ལོའོ། །གསེར་གྱི་རྡོ་རྗེ་མ་ཁྱབ་འཇུག་ལྟ་བུ་ཁྱད་པར་གསེར་གྱི་མདོག་ཅན་ནོ། །རྨ་བྱ་ལ་རྡོ་རྗེ་དྲིལ་བུ་ཞལ་དྲུག་པ་དམར་བ་གཡས་པ་གཉིས་ན་ [134b.3]ཤཀ་ཏི་དང་རྡོ་རྗེ་གཡོན་པ་གཉིས་ན་ཁྱིམ་བྱ་དང་རྡོ་རྗེ་དྲིལ་བུའོ། །རྡོ་རྗེ་གཞོན་ནུ་མ་རྡོ་རྗེ་དྲིལ་བུ་ལྟ་བུའོ། །ངང་པ་ལ་མི་སྨྲ་རྡོ་རྗེ་སེར་པོ་ཞལ་བཞི་པ་གཡས་པ་གཉིས་ན་རྡོ་རྗེ་དང་སྔགས་བཟླ་བའི་ཕྲེང་བ་གཡོན་པ་གཉིས་ན་དབྱུག་པ་དང་སྤྱི་བླུགས་སོ། །རྡོ་རྗེ་ཞི་བ་མ་ཚངས་པ་ལྟ་བུའོ། ། [134b.4]གླང་པོ་ཆེ་མཆེ་བ་དྲུག་པའི་དབང་པོ་དཀར་པོ་དང་ཟླ་བ་ལ་རྡོ་རྗེ་མཚོན་ཆ་དཀར་པོ་རོལ་པའི་ཀུན་དུ་བསྐྱོད་པས་གནས་པ་ཕྱག་གཡས་ན་རྡོ་རྗེ་རྩེ་ལྔ་པ་གཡོན་པས་རྡོ་རྗེ་རྩེ་གསུམ་དཀུར་བརྟེན་པའོ། །ལྷ་མོ་རྡོ་རྗེ་ཁུ་ཚུར་མ་ནི་རྡོ་རྗེ་མཚོན་ཆ་ཇི་ལྟ་བུའོ། །རྟ་བདུན་གྱི་ཤིང་རྟ་ལ་རྡོ་རྗེ་འཁྱིལ་ [134b.5]བ་དམར་པོ་ཁྲོས་པ་གཡས་པ་ན་པདྨ་གཡོན་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །རྡོ་རྗེ་བདུད་རྩི་མ་རྡོ་རྗེ་འཁྱིལ་པ་བཞིན་ནོ། །ངང་པ་ལ་རྡོ་རྗེ་འོད་དཀར་པོ་ཁྲོ་བོ་ཕྱག་གཡས་པ་རྡོ་རྗེ་གཡོན་པ་པདྨ་ལ་གནས་པའི་ཟླ་བ་འཛིན་པའོ། །རྡོ་རྗེ་མདོག་མ་རྡོ་རྗེ་འོད་ལྟ་བུའོ། །ར་ལ་རྡོ་རྗེ་ [134b.6]དམར་སེར་ཁྲོ་བོ་གཡས་ཀྱིས་རྡོ་རྗེ་དམར་པོ་འཛིན་ཅིང་གཡོན་པས་མི་བཟུང་ནས་ཟ་བའི་ཚུལ་ལོ། །རྡོ་རྗེ་སྐེ་རགས་མ་རྡོ་རྗེ་དམར་སེར་བཞིན་ནོ། །པདྨ་ལ་རྡོ་རྗེ་ཞི་བ་ཁྲོ་བོ་སེར་པོ་མདའ་དང་གཞུ་འཛིན་པའོ། །རྡོ་རྗེ་ཞི་བ་མ་རྡོ་རྗེ་ཞི་བ་བཞིན་ནོ། །སྦལ་པ་ལ་རྡོ་རྗེ་བླ་མ་ཁྲོ་བོ་སེར་པོ་གཡས་ [134b.7]བགྲང་ཕྲེང་དང་གཡོན་སྤྱི་བླུགས་འཛིན་པའོ། །རྡོ་རྗེ་བླ་མ་མ་རྡོ་རྗེ་བླ་མ་བཞིན་ནོ། །པདྨ་ལ་རྡོ་རྗེ་པ་ཝ་སངས་ཁྲོ་བོ་དཀར་པོ་གཡས་ན་བགྲང་ཕྲེང་དང་གཡོན་ན་སྤྱི་བླུགས་འཛིན་པའོ། །རྡོ་རྗེ་པ་ཝ་སངས་མ་རྡོ་རྗེ་པ་ཝ་སངས་བཞིན་ནོ། །རུས་སྦལ་ལ་རྡོ་རྗེ་དབྱུག་པ་ཁྲོ་བོ་ནག་པོ་གཡས་པ་ [135a] [135a.1]ན་རྡོ་རྗེ་གཡོན་པ་ན་དབྱུག་པའོ། །རྡོ་རྗེ་དབྱུག་པ་མ་ནི་རྡོ་རྗེ་དབྱུག་པ་དང་འདྲ་བའོ། །རྡོ་རྗེ་སྒྲ་གཅན་ཁྲོ་བོ་མ་དམར་ནག་གཡས་པས་ཟླ་བའི་དཀྱིལ་འཁོར་དང་གཡོན་པ་ཉི་མ་འཛིན་པའོ། །རྡོ་རྗེ་ལྷ་མིན་མ་ནི་རྡོ་རྗེ་སྒྲ་གཅན་དང་འདྲ་བའོ། །རྡོ་རྗེ་མཇུག་རིངས་ཁྲོ་བོ་མདོག་ [135a.2]ནག་པོ་གཡས་པས་རལ་གྲི་གཡོན་པས་སྤྲུལ་ཞགས་འཛིན་པའོ། །རྡོ་རྗེ་གླུ་མ་རྡོ་རྗེ་མཇུག་རིངས་བཞིན་ནོ། །བཞི་པོ་འདི་དག་དང་རྡོ་རྗེ་ཞི་བ་ལ་སོགས་པ་རྒྱུད་གཞན་ལས་གསུངས་པ་ལྟར་བདག་གིས་བྲིས་སོ། །གླང་པོ་ཆེ་ལ་རྡོ་རྗེ་གླང་སྣ་དཀར་པོ་གཡས་རྡོ་རྗེ་གཡོན་པས་གཤོལ་ [135a.3]འཛིན་པའོ། །རྡོ་རྗེ་འདུལ་བ་མ་རྡོ་རྗེ་གླང་སྣ་བཞིན་ནོ། །དེའི་ཁྱད་པར་ནི་གཡོན་པས་ཁ་ཊྭཱཾ་ག་འཛིན་པའོ། །བྱ་ཀོ་ཀི་ལའི་ཤིང་རྟ་ལ་རྡོ་རྗེ་ཕྲེང་བ་ཅན་ལྗང་གུ་གཡས་པ་ན་རྡོ་རྗེ་གཡོན་པ་ན་མེ་ཏོག་གི་ཕྲེང་བ་འཛིན་པའོ། །རྡོ་རྗེ་བརྟན་མ་རྡོ་རྗེ་ཕྲེང་བ་ཇི་ལྟ་བ་ལས་ཁྱད་པར་ནི་ཕྱག་གཡོན་པ་ན་ [135a.4]མདུང་ངོ་། །ནེ་ཙོའི་ཤིང་རྟ་ལ་རྡོ་རྗེ་དབང་ཅན་སེར་པོ་གཡས་ན་རྡོ་རྗེ་གཡོན་པ་ན་ཆུ་སྲིན་གྱི་རྒྱལ་མཚན་འཛིན་པའོ། །རྡོ་རྗེ་དབང་ཅན་མ་རྡོ་རྗེ་དབང་ཅན་དང་འདྲ་བའོ། །ཁྱད་པར་ནི་སྐུ་མདོག་དམར་བའོ། །སྦལ་པ་ལ་རྡོ་རྗེ་རྣམ་པར་རྒྱལ་བ་དཀར་པོ་རྡོ་རྗེ་དང་རལ་གྲི་འཛིན་པའོ། །རྡོ་རྗེ་ [135a.5]གདན་མ་རྡོ་རྗེ་རྣམ་པར་རྒྱལ་བ་དང་འདྲ་བའོ། །མེ་ཏོག་ལ་རྡོ་རྗེ་གཏུན་ཤིང་སེར་པོ་གཡས་གཡོན་གྱིས་རྡོ་རྗེ་གཏུན་ཤིང་འཛིན་པའོ། །རྡོ་རྗེ་ཕོ་ཉ་མོ་རྡོ་རྗེ་གཏུན་ཤིང་ལྟ་བུའོ། །ཁྱད་པར་ནི་གཡོན་པས་ཁ་ཊྭཱཾ་ག་འཛིན་པའོ། །རལ་རྡོ་རྗེ་མེ་དམར་པོ་གཡས་གཉིས་ཀྱིས་རྡོ་རྗེ་དང་ [135a.6]གོ་ཆ་གཡོན་གཉིས་དབྱུག་ཏོ་དང་། སྤྱི་བླུགས་འཛིན་པའོ། །རྡོ་རྗེ་འབར་མ་རྡོ་རྗེ་མེ་ལྟ་བུའོ། །མ་ཧེ་ལ་རྡོ་རྗེ་ནག་པོ་སྐུ་མདོག་ནག་པོ་རྡོ་རྗེ་དང་ལྕགས་ཀྱུ་འཛིན་པའོ། །རོ་ལངས་ལ་རྡོ་རྗེ་ནག་མོ་སྐུ་མདོག་ནག་མོ་རྡོ་རྗེ་དང་ཁ་ཊྭཱཾ་ག་འཛིན་པའོ། །ལྷག་པར་ཀླུ་ལ་རྡོ་རྗེ་ལྕགས་ཀྱུ་སྔོན་པོ་ཕག་ [135a.7]པའི་ཞལ་རྡོ་རྗེ་དང་ལྕགས་ཀྱུ་འཛིན་པའོ། །མི་ལ་རྡོ་རྗེ་གདོང་མ་སྔོན་མོ་ཕག་གདོང་རྡོ་རྗེ་དང་རལ་གྲི་འཛིན་པའོ། །ཆུ་སྲིན་ལ་རྡོ་རྗེ་ཀླུ་དཀར་པོ་སྦྲུལ་མགོ་བརྒྱད་དང་ལྡན་པ་གཡས་པས་རྡོ་རྗེ་གཡོན་པས་ཀླུའི་ཞགས་པའོ། །ཆུ་སྲིན་ལ་ཆུ་སྲིན་མ་དཀར་མོ་སྦྲུལ་མགོ་བརྒྱད་དང་ལྡན་ [135b] [135b.1]པ་གཡས་པས་རྡོ་རྗེ་དང་གཡོན་པས་རྡོ་རྗེས་མཚན་པའི་ཆུ་སྲིན་འཛིན་པའོ། །རི་དྭགས་ལ་རྡོ་རྗེ་རླུང་སྔོན་པོ་གཡས་པས་རྡོ་རྗེ་གཡོན་པས་རླུང་སྒྲིབ་པའི་གོས་འཛིན་པའོ། །རྡོ་རྗེ་ཤུགས་ཅན་མ་རྡོ་རྗེ་རླུང་ལྟ་བུའོ། །རོ་ལངས་ལ་རྡོ་རྗེ་འཇིགས་བྱེད་སྔོན་པོ་རྡོ་རྗེ་དང་དབྱུག་ཏོ་འཛིན་པའོ། ། [135b.2]རྡོ་རྗེ་རྣམ་པར་གཙིགས་མ་རྡོ་རྗེ་འཇིགས་བྱེད་ལྟ་བུའོ། །ཁྱད་པར་ནི་གཡོན་པས་ཞགས་པ་འཛིན་པའོ། །བྱི་བ་ལ་རྡོ་རྗེ་ལོག་འདྲེན་དཀར་པོ་གླང་པོ་ཆེའི་ཞལ་ཕྱག་གཡས་པ་གཉིས་ཀྱིས་རྡོ་རྗེ་དང་དགྲ་སྟ་གཡོན་པ་གཉིས་ཀྱིས་རྩེ་གསུམ་པ་དང་། དབྱུག་ཏོ་འཛིན་པ་སྤྲུལ་གྱི་མཆོད་ཕྱིར་ [135b.3]ཐོགས་པའོ། །བྲ་བ་བྱི་བ་ལ་སྦྲུལ་མོ་སྔོན་མོ་གཡས་པས་རྡོ་རྗེ་གཡོན་པས་ཕྱགས་ཤིང་འཛིན་པའོ། །བསྡིགས་མ་ལྗང་གུ་གཡས་པས་རྡོ་རྗེ་གཡོན་པས་རལ་གྲིའི་བྱེ་བྲག་ཕེ་ཊ་ཀ་འཛིན་པའོ། །དཔལ་མོ་སྐུ་མདོག་སེར་མོ་གཡས་པས་རྡོ་རྗེ་གཡོན་པས་པདྨ་འཛིན་པ། [135b.4]དབྱངས་ཅན་མ་དཀར་མོ་གཡས་ན་རྡོ་རྗེ་གཡོན་པ་ནི་པི་ཝང་འཛིན་པའོ། སེང་གེ་ལ་བགྲོད་དཀའ་མ་ལྗང་གུ་ཕྱག་གཡས་པ་གཉིས་ན་རྡོ་རྗེ་དང་ཙཀྲ་གཡོན་པ་གཉིས་ན་ལྡེ་མིག་དང་རལ་གྲི་འཛིན་པའོ། །འདིར་མགྲིན་པ་སྔོན་པོ་ལ་སོགས་པའི་ལྷ་འདི་དག་གི་ཕྱག་གཡས་པ་ [135b.5]རྣམས་ན་ཇི་ལྟར་རིགས་པར་རྡོ་རྗེ་རྩེ་གསུམ་པར་རིག་པར་བྱའོ། །ནུབ་ཏུ་རྡོ་རྗེ་ཀླུ་དང་ཉེ་བར་པདྨ་ལ་གནས་པའི་ལྷ་མོ་གསེར་གྱི་མདོག་ལྟ་བུ་ཕྱག་གཉིས་ཀྱིས་བདུད་རྩིས་གང་བའི་བུམ་པ་བསྣམས་པའོ། །ལྷ་མ་ཡིན་རྣམས་ནི་སྐུ་མདོག་སྣ་ཚོགས་པ་གོ་ཆ་སྣ་ཚོགས་པ་བགོས་ [135b.6]ནས་རལ་གྲི་འཛིན་པ་རས་བལ་གྱི་གདན་འཇམ་པ་ལ་གནས་པའོ། །ཀླུ་རྣམས་ནི་ནོར་བུ་དང་ལྡན་པའི་གདེངས་ཀ་ཅན་བཙུན་མོ་དང་བཅས་པའི་ཐལ་མོ་སྦྱར་བའོ། །ཁོར་ཡུག་གི་ཕྱི་རོལ་དུ་མེའི་མཚམས་སུ་མནར་མེད་པའི་དམྱལ་བ་ལ་སོགས་པ་རྣམས་སོ། །བདེན་བྲལ་གྱི་མཚམས་ [135b.7]སུ་ཡི་དྭགས་རྣམས་སོ། །རླུང་གི་མཚམས་སུ་དུད་འགྲོའི་འགྲོ་བ་རྣམས་སོ། །དབང་ལྡན་དུ་མིའི་འགྲོ་བ་རྣམས་སོ། །རིམ་པ་བཞིན་འདི་ནི་རྒྱུད་གཞན་གྱི་ཚུལ་གྱིས་བྲིས་སོ། །གཞན་ནི་རྡོ་རྗེ་འཇིགས་བྱེད་དང་ཉེ་བར་སའི་ལྷ་མོ་དང་གནོད་སྦྱིན་རྣམས་སོ། །རྡོ་རྗེ་ནག་མོ་དང་ [136a] [136a.1]ཉེ་བར་ལྷ་མ་ཡིན་རྣམས་སོ་ཞེས་བྱ་བ་ལ་སོགས་པ་བརྗོད་པར་བྱེད་དོ། །དཀྱིལ་འཁོར་གྱི་བདག་པོའི་ཐུགས་ཀར་ཟླ་བ་ལ་ཨོཾ་མུ་ནེ་མུ་ནེ་མ་ཧཱ་མུ་ནེ་ཡེ་སྭཱ་ཧཱ། ཞེས་བྱ་བའི་སྔགས་དགོད་དོ། །དེ་ཉིད་ནི་སྙིང་པོའི་སྔགས་སོ། །ཨོཾ་ན་མོ་བྷ་ག་ཝ་ཏེ་སརྦ་དུརྒ་ཏི་བ་ [136a.2]རི་ཤོ་དྷ་ནི་རཱ་ཛཱ་ཡ་ཏ་ཐཱ་ག་ཏཱ་ཡ། ཨརྷ་ཏེ་སམྱ་ཀྶཾ་བུདྡྷཱ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནེ་ཤུདྡྷེ་བི་ཤུ་དྷེ་སརྦ་ཀརྨ་ཨཱ་བ་ར་ཎ་བི་ཤུདྡྷེ་སྭཱ་ཧཱ། ཞེས་བྱ་བ་ནི་ཕྲེང་བའི་སྔགས་སོ། །རྡོ་རྗེ་འབེབས་པའི་སྔགས། ཨོཾ་སརྦ་བིད་སརྦ་ཨ་པཱ་ཡ་ག་ཏི་ག་ཧ་ན་བི་ཤོ་དྷ་ [136a.3]ནི་ཧཱུཾ་ཧོཿཕཊ་ཅེས་བྱ་བ་ནི་ལས་ཐམས་ཅད་པའི་སྔགས་སོ། །ཨོཾ་བཛྲ་ཡཀྵ་ཧཱུཾ་ཞེས་གཞན་དག་གོ། །འབྱུང་པོ་འདུལ་བྱེད་ཀྱི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་རི་རབ་ཀྱི་སྟེང་དུ་སྣ་ཚོགས་པདྨའི་ཟེ་འབྲུ་ལ་གནས་པའི་རྡོ་རྗེ་རྒྱ་གྲམ་གྱི་ལྟེ་བའི་དབུས་སུ་གཞལ་ཡས་ཁང་གི་ལྟེ་བ་ [136a.4]ལ་གླང་པོ་ཆེའི་རྒྱལ་པོའི་སྟེང་ངམ་དེ་མེད་ཀྱང་རུང་སྟེ་སྣ་ཚོགས་པདྨ་དང་ཟླ་བ་ལ་འབྱུང་པོ་གཞན་གྱིས་མི་ཐུབ་པ་དཀར་པོ་ཟླ་བ་ཕྱེད་པས་མཚན་པའི་འོད་ཟེར་དང་ལྡན་པ་རལ་པའི་ཐོར་ཅོག་ཅན་སྨ་ར་དམར་སེར་ཐོད་པ་ལྔ་དང་ལྡན་པ་མིག་གསུམ་པ་མཆེ་བ་གཙིགས་པ་འཇིགས་སུ་རུང་ [136a.5]བ་གསུས་པ་འཕྱང་བ་སྤྲུལ་གྱི་མཆོད་ཕྱིར་ཐོགས་པ་ཅན་སྟག་གི་པགས་པས་ཕྱེད་དཀྲིས་པ་ལག་པ་བཞི་པ་གཡས་པ་གཉིས་གྲི་གུག་དང་ཌ་མ་རུ་གཡོན་པ་གཉིས་ཀྱིས་ཐོད་པ་དང་རྩེ་གསུམ་འཛིན་པ་དྲག་པོ། གཡོན་བརྐྱང་གིས་མནན་པའི་བཅོམ་ལྡན་འདས་འབྱུང་པོ་འདུལ་ [136a.6]བྱེད་དྲག་པོ་ཆེན་པོ་སྐུ་མདོག་སྔོན་པོ་ཐོད་པ་ལྔས་མཚན་པའི་ཅོད་པན་ལ་དེ་བཞིན་གཤེགས་པ་ལྔའི་དབུ་སྐྲ་དམར་སེར་གྱེན་དུ་འབར་བས་བཅིངས་པ་གོས་སྔོན་པོ་གོན་པ་ཞལ་མཆེ་བ་གཙིགས་པ་སྤྱན་གསུམ་དམར་བ་སྒེག་པའི་གད་མོ་མཛད་པ། ཕྱག་བཞི་པའི་གཡས་ [136a.7]པས་རྡོ་རྗེ་སྔོན་པོ་འཇིགས་པ་གསོར་ཞིང་གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པ་ཕྱག་གཉིས་ཀྱིས་ཕྱག་རྒྱ་མཛད་པའོ། །ཕྱག་རྒྱ་ནི་སྲིན་ལག་གཉིས་བསྣོལ་ནས་མཛུབ་མོ་གཉིས་བསྐུམ་པར་བྱའོ། །མཐེ་ཆུང་དང་གུང་མོ་ཡང་མཐེ་བོང་རྒན་པོས་མནན་པར་ [136b] [136b.1]བྱའོ་ཞེས་པ་འདི་གསུངས་སོ། །ཀླུའི་རྒྱལ་པོ་བརྒྱད་ཀྱིས་བརྒྱན་པ་སྟེ་དེ་ལ་ཀརྐོ་ཊ་སྔོན་པོས་དབུ་སྐྲ་བཅིངས་པ། འཇོག་པོ་དམར་པོས་མགུལ་རྒྱན་བྱས་པ། དགའ་བོ་དང་ཉེར་དགའ་བོ་སེར་པོས་རྣ་བ་བརྒྱན་པ་སེར་པོ་གཅིག་པས་གཅིག་ཏུ་བགྲང་ངོ་། །མཐའ་ཡས་དཀར་ [136b.2]པོས་ཚངས་སྐུད། ནོར་རྒྱས་དཀར་པོས་སྐ་རགས། ཕྱག་རྒྱ་བཅིངས་པའི་ཕྱག་གཉིས་ཀྱིས་དཔུང་པར་རིགས་ལྡན་ཕུག་རོན་གྱི་མདོག་ལྟ་བུས་བརྒྱན་པ། དུང་སྐྱོང་དཀར་པོས་ཕྱག་གཞན་གཉིས་ཀྱིས་དཔུང་པ་ལ་བརྒྱན་པ། པདྨ་དང་པདྨ་ཆེན་པོ་དམར་པོས་རྐང་གདུབ་བྱས་པའོ། ། [136b.3]མདོག་གཅིག་པས་གཅིག་ཉིད་དོ། །ཤར་ཕྱོགས་ཀྱི་རེ་མིག་ལ་གླང་དང་ཉི་མ་ལ་དབང་ཕྱུག་ཆེན་པོ་མཚན་མ་གྱེན་དུ་ལངས་ལ་ཐོད་པ་ཅན་ཐལ་བའི་མདོག་སྤྱན་གསུམ་པ་ཟླ་བ་ཕྱེད་ཀྱིས་མཚན་པའི་རལ་པའི་ཐོར་ཅོག་ཅན་སྦྲུལ་གྱི་མཆོད་ཕྱིར་ཐོགས་པ་དང་བཅས་པའི་ཕྱག་བཞི་པ་ཕྱག་ [136b.4]གཡས་པ་གཉིས་ཀྱིས་གྲི་གུག་དང་ཌ་མ་རུ་འཛིན་པ་གཡོན་གཉིས་ཀྱིས་ཐོད་པ་དང་རྩེ་གསུམ་པའོ། །ལྷོ་རུ་ནམ་མཁའ་ལྡིང་གི་སྟེང་དུ་ཉི་མ་ལ་ཁྱབ་འཇུག་ནག་པོ་ཅོད་པན་དམར་པོ་ཅན། ཕྱག་གཡས་པ་གཉིས་ཀྱིས་རྔ་ཡབ་དང་དུང་འཛིན་པ། གཡོན་པ་གཉིས་ཀྱིས་འཁོར་ལོ་དང་ [136b.5]དབྱུག་ཏོ་འཛིན་པའོ། །ནུབ་ཏུ་ངང་པ་དང་ཟླ་བའི་སྟེང་དུ་ཚངས་པ་དཀར་པོ་ཞལ་བཞི་པ་གཡས་པ་གཉིས་ཀྱིས་བགྲང་ཕྲེང་དང་གདུགས་ཀྱི་ཡུ་བ་འཛིན་པ་གཡོན་པ་གཉིས་ཀྱིས་པདྨ་དང་སྤྱི་བླུགས་འཛིན་པའོ། །བྱང་དུ་རྨ་བྱ་དང་ཉི་མའི་སྟེང་དུ་སྨིན་དྲུག་གི་བུ་དམར་པོ་གཙུག་ཕུད་གསུམ་དང་ [136b.6]ལྡན་པ་གཡས་པས་རྔ་ཡབ་གཡོན་པས་ཤཀ་ཏི་འཛིན་པའོ། །དབང་ལྡན་དུ་བྲ་བ་བྱི་བ་དང་ཟླ་བ་ལ་ཚོགས་བདག་དཀར་པོ་གླང་པོ་ཆེའི་ཞལ་སྤྱན་གསུམ་པ་སྤྱི་བོར་ཟླ་བ་ཕྱེད་པས་མཚན་པ་ཕྱག་གཡས་པ་གཉིས་ན་ལ་ཕུག་དང་དགྲ་སྟ་གཡོན་གཉིས་ན་རྩེ་གསུམ་དང་ཐོད་པ་འཛིན་པའོ། ། [136b.7]མེར་ཉི་མའི་དཀྱིལ་འཁོར་ལ་ཉི་མ་དམར་པོ་གཡས་པ་དང་གཡོན་པ་གཉིས་ཀྱིས་མཚོ་སྐྱེས་ལ་གནས་པའི་ཉི་མའི་དཀྱིལ་འཁོར་འཛིན་པའོ། །བདེན་བྲལ་དུ་ཤིང་རྟའི་སྟེང་དུ་ཉི་མ་དང་ཟླ་བ་ལ་གནས་པའི་སྒྲ་གཅན་དམར་ནག་དབུ་སྐྲ་དམར་སེར་གྱེན་དུ་བརྫེས་པ་སྨིན་མ་དང་མིག་དང་སྨ་ར་ [137a] [137a.1]དམར་སེར་འབར་བ་མཆེ་བ་བཞི་པ་ཞལ་གདངས་པ་གཡས་གཡོན་གྱི་ཕྱག་གཉིས་ཀྱིས་ཉི་མ་དང་ཟླ་བར་བཅས་པའི་ཐལ་མོ་སྦྱར་བའོ། །རླུང་དུ་ཟླ་བའི་སྟེང་དུ་དགའ་བྱེད་དབང་ཕྱུག་སེར་པོ་གར་བྱེད་ཅིང་སྤྱི་བོར་ཟླ་བ་ཕྱེད་པ་ཅན་སྦྲུལ་གྱི་མཆོད་ཕྱིར་ཐོགས་པ་དང་ལྡན་པ། [137a.2]གཡས་པ་དང་ཅིག་ཤོས་དག་གིས་ཌ་མ་རུ་དང་རྩེ་གསུམ་པ་འཛིན་པའོ། །རིམ་པ་གཉིས་པ་ལ་ཤར་གྱི་ཕྱོགས་སུ་ཟླ་བ་ལ་དཔལ་མོ་དཀར་མོ་ཐུགས་ཀར་ཐལ་མོ་སྦྱར་བས་མེ་ཏོག་པདྨ་འཛིན་པའོ། །ལྷོའི་ཕྱོགས་སུ་ཟླ་བ་ལ་ཐིག་ལེ་མཆོག་མ་དམར་མོ་གར་བྱེད་ཅིང་སྤོས་སྣོད་འཛིན་པའོ། ། [137a.3]ནུབ་ཏུ་ཟླ་བ་ལ་ཟླ་བ་མོ་དམར་མོ་མར་མེ་འཛིན་པའོ། །བྱང་དུ་ཟླ་བ་ལ་དཀའ་བཟློག་མ་སེར་མོ་གདེངས་ཀའི་ལག་པ་བཟློག་ནས་སྤྱི་བོར་བཞག་ནས་གར་བྱེད་པའོ། །མེར་ཟླ་བ་ལ་རིན་ཆེན་དཔལ་མོ་དམར་མོ་དྲིའི་དུང་ཆོས་འཛིན་པའོ། །བདེན་བྲལ་དུ་ཟླ་བ་ལ་དབྱངས་ཅན་མ་ལྗང་གུ་པི་ཝང་ [137a.4]གི་སྒྲ་སྒྲོགས་པའོ། །རླུང་དུ་ཟླ་བ་ལ་ལྷ་མཛེས་མ་ནག་མོ་རིན་པོ་ཆེའི་ཕྲེང་བ་འཛིན་པའོ། །དབང་ལྡན་དུ་ཟླ་བ་ལ་དབང་པོ་འབྱོར་མ་སེར་མོ་གར་བྱེད་མ་ཕྱག་ན་རྡོ་རྗེ་རྩེ་གསུམ་པ་འཛིན་པའོ། །རིམ་པ་གསུམ་པའི་ཤར་དུ་གླང་པོས་སྲུང་དཀར་པོ་དང་ཟླ་བ་ལ་བརྒྱ་བྱིན་སེར་པོ་མིག་སྟོང་དང་ [137a.5]ལྡན་པ་རིན་པོ་ཆེའི་ཅོད་པན་ཅན་ཕྱག་གཡས་པ་སྐྱབས་སྦྱིན་གཡོན་པས་རྡོ་རྗེ་འཛིན་པའོ། །ལྷོར་མ་ཧེ་དང་ཉི་མ་ལ་གཤིན་རྗེ་ནག་པོ་གསུས་པ་འཕྱང་བ་སྤྱན་གསུམ་དང་སྨིན་མ་དང་སྨར་དང་རལ་པ་དམར་སེར་ཅན་ན་བཟའ་སེར་པོ་མནབས་པ་ཕྱག་གཡས་པས་ཐོད་པས་མཚན་ [137a.6]པའི་དབྱུག་པ་འཛིན་པ། གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པའོ། །ནུབ་ཏུ་སྦྲུལ་དང་ཟླ་བ་ལ་ཆུ་ལྷ་དཀར་པོ་སྦྲུལ་གྱི་གདེངས་ཀ་བདུན་དང་ལྡན་པ། གཡས་པས་མཆོག་སྦྱིན་གྱི་ཕྱག་རྒྱ་མཛད་པ། གཡོན་པས་སྦྲུལ་གྱི་ཞགས་པ་འཛིན་པའོ། །བྱང་ [137a.7]དུ་གནོད་སྦྱིན་གྱི་སྟེང་དུ་ལུས་ངན་པོ་སེར་པོ་ཤ་རྒྱས་ཤིང་གསུས་པ་འཕྱང་བ་རིན་པོ་ཆེའི་ཅོད་པན་ཅན་གཡས་བ་དང་གཡོན་པ་གཉིས་ཀྱིས་དབྱུག་ཏོ་དང་ནེའུ་ལེ་འཛིན་པའོ། །མེར་ར་དང་ཉི་མ་ལ་མེ་ལྷ་དམར་པོ་རལ་པ་གསུམ་དང་ལྡན་པ་སྐྲ་དང་སྨར་སེར་ཞིང་འབར་བ་གསུས་པ་འཕྱང་ [137b] [137b.1]བ་ཕྲག་པ་ལ་ཕྱག་ཚང་ཀུ་བ་བཏགས་པ་མཆོད་ཕྱིར་ཐོགས་པ་ཅན་གཡས་པ་གཉིས་ཀྱིས་མཆོག་སྦྱིན་དང་བགྲང་ཕྲེང་འཛིན་པ་གཡོན་པ་གཉིས་ཀྱིས་དབྱུག་པ་རྩེ་གསུམ་པ་དང་སྤྱི་བླུགས་འཛིན་པའོ། །བདེན་བྲལ་དུ་རོ་ལངས་དང་ཉི་མ་ལ་སྲིན་པོ་ནག་པོ། སྨིན་མ་ནག་པོ་དང་། སྨ་ར་ [137b.2]དམར་སེར་འབར་བ་དང་ལྡན་པ་ཕྱག་གཡས་ཀྱིས་རལ་གྲི་དང་གཡོན་གྱིས་མི་ཤས་གང་བའི་ཐོད་པ་འཛིན་པའོ། །རླུང་དུ་རི་དྭགས་དང་ཟླ་བ་ལ་རླུང་ལྷ་སྔོན་པོ་གཙུག་ཕུད་གསུམ་དང་ལྡན་པ་ཕྱག་གཉིས་ཀྱིས་རླུང་རས་འཛིན་པའོ། །དབང་ལྡན་དུ་ངང་པ་དང་ཟླ་བ་ལ་ཟླ་བ་དཀར་པོ་གཡས་ [137b.3]པས་ཀུ་མུ་ད་ལ་གནས་པའི་ཟླ་བའི་དཀྱིལ་འཁོར་གཡོན་པས་མཆོག་སྦྱིན་ནོ། །དབང་ལྡན་ཡང་དབང་ཕྱུག་ཆེན་པོ་ལྟ་བུའོ། །རིམ་པ་བཞི་པའི་ཤར་དུ་ཟླ་བ་ལ་སེང་གེའི་རྒྱལ་མཚན་འཛིན་མ་དཀར་མོ་སེང་གེའི་རྒྱལ་མཚན་འཛིན་པའོ། །ལྷོར་ཟླ་བ་ལ་གནས་པའི་རྣམ་པར་རྒྱལ་ [137b.4]མ་དམར་མོ་ལྕགས་ཀྱུ་འཛིན་པའོ། །ནུབ་ཏུ་ཟླ་བ་ལ་པད་ལྡན་མ་ཆེན་མོ་དཀར་མོ་གཞུ་དང་མདའ་འཛིན་པའོ། །བྱང་དུ་ཟླ་བ་ལ་ཆང་འཕྲོག་མ་དམར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །དབང་ལྡན་དུ་ཟླ་བ་ལ་མཆོག་འཕྲོག་མ་སེར་མོ་ཐུགས་ཀར་མེ་ཏོག་དང་བཅས་པའི་ [137b.5]ཐལ་མོ་ཁ་སྦྱོར་བའོ། །མེར་ཟླ་བ་ལ་རིན་ཆེན་དབང་ཕྱུག་མ་སེར་མོ་སྤོས་ཕོར་འཛིན་པའོ། །བདེན་བྲལ་དུ་ཟླ་བ་ལ་རྒྱན་མ་སེར་མོ་དྲིའི་དུང་ཆོས་འཛིན་པའོ། །རླུང་དུ་ཟླ་བ་ལ་འགྲོ་སྐྱོང་མ་སེར་མོ་མར་མེའི་མཆོད་སྡོང་འཛིན་པའོ། །འདིར་གང་ལ་ཁྱད་པར་གྱི་ཚིག་མེད་པ་དེ་རྣམས་ལ་ [137b.6]ཉི་མ་དང་ཟླ་བ་ཐམས་ཅད་ནི་སྣ་ཚོགས་པདྨ་ལ་གནས་པའོ། །ལྷ་ཐམས་ཅད་སེམས་དཔའི་སྐྱིལ་ཀྲུང་ཅན་གོས་དང་རིན་པོ་ཆེ་སྣ་ཚོགས་ཀྱིས་བརྒྱན་པའོ། །འདིར་དཀྱིལ་འཁོར་གྱི་བདག་པོའི་རིགས་ཀྱི་བདག་པོ་ནི་མི་བསྐྱོད་པའོ། །ཐུགས་ཀའི་ས་བོན་ནི་ཧཱུཾ་ངོ་། །ཧཱུཾ་བཛྲ་ཕཊ་ཅེས་ [137b.7]པ་ནི་སྙིང་པོའོ། །ཡང་ན་ཨོཾ་བྷཱུཾ་ཧ་ཌ་མ་ར་བྷཱུ་ཏ་ཨདྷི་པ་ཏི་ཨཀྵོ་བྷྱ་ཀཱི་རཱི་ཊི་ན་སརྦ་བྷཱུ་ཏ་པྲེ་ཏ་པི་ཤཱ་ཙ་ན་ས་དྷཱ་ཡ་ཧཱུཾ་ཕཊ་ཅེས་བྱ་བ་ནི་ལས་ཐམས་ཅད་པའི་སྔགས་ཀྱང་དེ་ཉིད་དོ། །ཡང་ན་བགེགས་མཐར་བྱེད་ཀྱིས་སོ།། །།མཁའ་འགྲོ་ལྔའི་དཀྱིལ་འཁོར་ལ། རྡོ་རྗེའི་ས་གཞི་ལ་སོགས་པ་ [138a] [138a.1]ནས་བཟུང་ནས་གཞལ་ཡས་ཁང་གི་བར་དུ་སྔར་གྱི་འཇམ་པའི་རྡོ་རྗེའི་དཀྱིལ་འཁོར་བཞིན་དུ་ཤེས་པར་བྱའོ། །དེ་ལ་དབུས་ཀྱི་གཞལ་ཡས་ཁང་གི་དབུས་སུ་བཅོམ་ལྡན་འདས་རྡོ་རྗེ་མཁའ་འགྲོའོ། །ཤར་ལ་སོགས་པའི་སྒོ་རྣམས་སུ་གཽ་རཱི་ལ་སོགས་པ་རྣམས་དང་། [138a.2]དབང་ལྡན་ལ་སོགས་པའི་མཚམས་རྣམས་སུ་པུཀྐ་སཱི་ལ་སོགས་པའོ། །དེ་ལ་གཽ་རཱི་དཀར་མོ་གཡས་པས་ལྕགས་ཀྱུ་འཛིན་པའོ། །ཙཽ་རཱི་དམར་མོ་ཞགས་པ་འཛིན་པའོ། །བེ་ཏཱ་ལཱི་དམར་མོ་ཕྱག་གཉིས་ཀྱིས་ལྕགས་སྒྲོག་འཛིན་པའོ། །གྷ་སྨ་རཱི་ལྗང་གུ་རྡོ་རྗེ་དང་དྲིལ་བུ་འཛིན་པའོ། ། [138a.3]པུཀྐ་སཱི་སྔོན་མོ་ཕྱག་ན་བྱང་ཆུབ་སེམས་ཀྱི་བུམ་པ་འཛིན་པའོ། །ཤ་བ་རཱི་དཀར་མོ་རི་རབ་འཛིན་པའོ། །ཙཎྜ་ལཱི་སྔོན་མོ་མེ་ཐབ་འཛིན་པའོ། །ཌོཾ་བི་ནཱི་སྐུ་མདོག་སྣ་ཚོགས་མ་རྒྱལ་མཚན་ཆེན་པོའི་བ་དན་འཛིན་པའོ། །ཤར་ཕྱོགས་ཀྱི་གཞལ་ཡས་ཁང་གི་དབུས་སུ་ཟླ་བའི་སྟེང་དུ་སངས་རྒྱས་མཁའ་ [138a.4]འགྲོ་དཀར་པོ་སྟེ། རྩ་བའི་ཞལ་དཀར་པོ་གཡོན་པ་དམར་པོ་གཞན་ཐམས་ཅད་སྔོན་པོའོ། །གཡས་པའི་ཕྱག་བརྒྱད་ཀྱི་ཐོད་པ་ན་རྨ་བྱ་དང་མ་ཧེ་དང་། ཆུ་སྲིན་དང་ཉ་དང་རྒྱལ་པོ་དང་རུས་སྦལ་དང་། ལྷག་པའི་ཀླུ་དང་ངང་པ་རྣམས་སོ། །གཡོན་པ་བརྒྱད་ཀྱི་ཐོད་པ་རྣམས་ནི་དཔྱིད་དང་ [138a.5]སྲོག་ཆགས་ཛྱེཥྛ་དང་སྦྲུལ་ཧ་ལ་ཧ་ལ་དང་ཨ་ཛ་ནཱ་བྷྱོ་དང་བྱི་བ་དང་གཡག་དང་དྲི་ཅན་དང་ཅོ་ག་རྣམས་སོ། །ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པ་རྣམས་སུ་རིམ་པ་བཞིན་དུ་སྐམ་པ་མོ་ལ་སོགས་པའི་ལྷ་མོ་རྣམས་སོ། །དེ་ལ་སྐམ་པ་མོ་སྔོན་མོ་ཕྱག་གཡས་པ་ན་སྐམ་པ་ [138a.6]འཛིན་པ། ཞགས་ལྡན་མ་སེར་མོ་ཞགས་པ་འཛིན་པའོ། །དོལ་ཟླུམ་མ་དམར་མོ་ཉ་རྒྱ་ཟླུམ་པོ་འཛིན་པའོ། །ལྕགས་ཀྱུ་མ་ལྗང་གུ་ལྕགས་ཀྱུ་འཛིན་པའོ། །མེ་ཏོག་མ་དཀར་མོ་མེ་ཏོག་གི་ཟ་མ་ཏོག་འཛིན་པའོ། །བདུག་སྤོས་མ་ནག་མོ་སྤོས་ཕོར་འཛིན་པའོ། །མར་མེ་མ་སེར་ [138a.7]མོ་མར་མེའི་མཆོད་སྡོང་འཛིན་པའོ། །དྲི་ཆབ་མ་སེར་མོ་དྲི་སེར་པོས་བཀང་བའི་དུང་འཛིན་པའོ། །ལྷོ་ཕྱོགས་ཀྱི་གཞལ་ཡས་ཁང་གི་དབུས་སུ་རིན་ཆེན་མཁའ་འགྲོ་སེར་པོ་སྟེ། འདིའི་རྩ་བ་དང་གཡོན་པ་གཉིས་སེར་པོ་དང་དཀར་པོ་ལྷག་མ་རྣམས་ནི་སྔོན་པོ། གཡས་པའི་ཐོད་ [138b] [138b.1]པ་རྣམས་ན་བྱ་ཀ་རཎྜ། ངུར་པ་དང་ལུག་དང་བྱ་ཙ་ཀོ་ར་དང་ཁྲ་དང་ཧོར་པ་དང་འོལ་བ་དང་བྱ་ཀུ་རའོ། །གཡོན་པ་རྣམས་ན་སྟོབས་ཀྱི་རྒྱུ་དང་དུང་སྐྱོང་དང་རིགས་ལྡན་དང་པདྨ་དང་པདྨ་ཆེན་པོ་དང་། འཇོག་པོ་དང་ནོར་རྒྱས་དང་མཐའ་ཡས་རྣམས་སོ། །ཤར་ལ་སོགས་པའི་སྒོ་རྣམས་དང་ [138b.2]དབང་ལྡན་ལ་སོགས་པའི་མཚམས་སུ་ལྷ་མོ་རྣམས་ཏེ། དེ་ལ་ཉི་ཕྱག་མ་དཀར་མོ་ཉི་མའི་དཀྱིལ་འཁོར་འཛིན་པའོ། །མར་མེ་མ་སྔོན་མོ་མར་མེའི་མཆོད་སྡོང་འཛིན་པའོ། །རིན་ཆེན་དཀར་མདའ་མ་སེར་མོ་རིན་པོ་ཆེ་འཛིན་པའོ། །གློག་ཕྱག་མ་ལྗང་གུ་གློག་གི་ཕྲེང་བ་འཛིན་པའོ། ། [138b.3]སྒེག་མོ་དམར་མོ་སྙེམས་པ་དང་བཅས་པའི་ཕྱག་གཉིས་ཀྱིས་རྡོ་རྗེ་འཛིན་པའོ། །ཕྲེང་བ་མ་དམར་མོ་ཕྱག་གཉིས་ཀྱིས་རིན་པོ་ཆེའི་ཕྲེང་བ་འཛིན་པའོ། །ཀླུ་མ་དམར་སྐྱ་ཕྱག་གཉིས་ཀྱིས་ཏིང་ཏིང་ཤག་འཛིན་པའོ། །གར་མ་སྣ་ཚོགས་པའི་མདོག་ཕྱག་གཉིས་ཀྱིས་རྡོ་རྗེ་དང་བཅས་ [138b.4]པས་གར་བྱེད་པའོ། །ནུབ་ཀྱི་གཞལ་ཡས་ཁང་གི་དབུས་སུ་པདྨ་མཁའ་འགྲོ་དམར་པོ་སྟེ། འདིའི་རྩ་བའི་ཞལ་དང་གཡོན་པ་ནི་དམར་པོ་དང་དཀར་པོ་དང་ལྷག་མ་རྣམས་ནི་ནག་པོའོ། །ཕྱག་གཡས་པའི་ཐོད་པ་རྣམས་ན་དོམ་དང་བྱ་རྒོད་དང་། བསེ་དང་བ་མན་དང་སྟག་དང་ [138b.5]སྤྲེའུ་དང་། ཆུ་སྲིན་ནཱ་ཀྲ་དང་ཅེ་སྤྱང་རྣམས་སོ། །གཡོན་པ་རྣམས་ན་ཁྭ་དང་འུག་པ་དང་སོ་བྱ་དང་སེང་གེ་དང་བྱ་ས་ར་ས་དང་ར་དང་རི་དྭགས་དང་ཕག་པ་རྣམས་སོ། །ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པ་རྣམས་ལ་ལྷ་མོ་རྣམས་སོ། །དེ་ལ་ཤར་ཕྱོགས་སུ་པདྨ་ [138b.6]དཀར་པོ་པདྨ་འཛིན་པའོ། །ཆོས་འབྱུང་མ་སེར་མོ་ཆོས་འབྱུང་འཛིན་པའོ། །ལྕགས་སྒྲོག་མ་ནག་མོ་ཕྱག་གཉིས་ཀྱིས་ལྕགས་སྒྲོག་འཛིན་པའོ། །རང་འཁྱུད་མ་ལྗང་གུ་སངས་རྒྱས་ཐམས་ཅད་ལ་རྗེས་སུ་ཆགས་པའི་ཕྱག་ན་རྡོ་རྗེ་དང་ཐོད་པ་བཟུང་བས་རང་ལ་འཁྱུད་པའོ། །གླིང་བུ་མ་ [138b.7]དམར་མོ་ཕྱག་གཉིས་ཀྱིས་གླིང་བུ་བཟུང་ནས་སྒྲ་སྒྲོགས་པའོ། །པི་ཝང་མ་སེར་མོ་ཕྱག་གཉིས་ཀྱིས་པི་ཝང་བསྒྲེང་བ་ལ་བརྩོན་པའོ། །མུ་ཀུཎྜ་མ་དཀར་མོ་ཕྱག་གཉིས་ཀྱིས་རྔ་བོ་ཆེ་བརྡུང་བའོ། །རྫ་རྔ་མ་དུ་བའི་མདོག་ཅན་ཕྱག་གཉིས་ཀྱིས་རྫ་རྔ་བརྡུང་བའོ། །བྱང་གི་གཞལ་ཡས་ཁང་གི་ [139a] [139a.1]དབུས་སུ་སྣ་ཚོགས་མཁའ་འགྲོ་དཱུར་བ་ལྟར་ལྗང་གུ་སྟེ། དེའི་རྩ་བའི་ཞལ་ནི་རྟའི་གདོང་ལྗང་གུའོ། །གཞན་རྣམས་ལྷའི་ཞལ་ལོ། །ཕྱོགས་གཅིག་ལ་རྩ་བའི་ཞལ་ཡང་ལྷའི་ཞལ་ལོ། །གཡོན་པ་དཀར་པོ་ལྷག་མ་རྣམས་ནག་པོའོ། །ཕྱག་གཡས་པའི་ཐོད་པ་རྣམས་ [139a.2]ན་གཟའ་ལག་པ་དང་ཕུར་བུ་དང་མཇུག་རིངས་དང་སྒྲ་གཅན་འཛིན་དང་མིག་དམར་དང་པ་ཝ་སངས་དང་སྤེན་པ་དང་ཁྱབ་འཇུག་རྣམས་སོ། །གཡོན་པ་རྣམས་ལ་དབང་པོ་དང་ཆུ་ལྷ་དང་ཚངས་པ་དང་དྲག་པོ་དང་འདོད་པའི་ལྷ་དང་སྟོབས་བཟངས་དང་ཐགས་བཟངས་རིས་དང་སྟོབས་ཅན་རྣམས་སོ། ། [139a.3]ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པར་ལྷ་མོ་རྣམས་སོ། །དེ་ལ་སྒོ་ལྕགས་མ་དཀར་མོ་ནི་སྒོ་ལྕགས་འཛིན་པའོ། །ལྡེ་ཀྱོག་མ་སེར་མོ་ལྡེ་ཀྱོག་འཛིན་པའོ། །སྒོ་གླེགས་མ་དམར་མོ་སྒོ་གླེགས་འཛིན་པའོ། །ཡོལ་བ་འཛིན་མ་ནག་མོ་ཕྱག་གཉིས་ཀྱིས་ཡོལ་བ་འཛིན་ [139a.4]པའོ། །སྤྱན་མ་དཀར་མོ་འཁོར་ལོ་འཛིན་པའོ། །མཱ་མ་ཀཱི་སྔོན་མོ་རྡོ་རྗེ་འཛིན་པའོ། །གོས་དཀར་མོ་དམར་མོ་ཕྱག་ན་པདྨ་འཛིན་པའོ། །སྒྲོལ་མ་ལྗང་གུ་ཕྱག་ན་ཨུཏྤལ་སྔོན་པོ་འཛིན་པའོ། །གཞལ་ཡས་ཁང་ཆེན་པོའི་སྒོ་རྣམས་དང་དབང་ལྡན་ལ་སོགས་པ་རྣམས་སུ་གཽ་རཱི་ལ་སོགས་པ་དང་པུཀྐ་ [139a.5]སཱི་ལ་སོགས་པ་སྟེ་སྔར་བཞིན་ནོ། །འདིར་རྡོ་རྗེ་མཁའ་འགྲོ་ནི་གདན་དང་མདོག་དང་དབྱིབས་དང་ཞལ་དང་ཕྱག་ལ་སོགས་པ་རྣམས་ནི་ཧེ་རུ་ཀ་ལྷ་དགུའི་བདག་ཉིད་ཅན་གྱི་དཀྱིལ་འཁོར་ལ་ཇི་ལྟར་ཕྱག་བཅུ་དྲུག་པའི་དགྱེས་པའི་རྡོ་རྗེ་དང་འཁྱུད་པའི་ཡུམ་བདག་མེད་མ་ཡང་དེ་བཞིན་ནོ། །འཁོར་ལོའི་ [139a.6]མཁའ་འགྲོ་མ་ལ་སོགས་པ་བཞི་པོ་འདི་ནི་བཤད་པའི་ཁྱད་པར་རྣམས་ལས་ཁྱད་པར་གཞན་རྣམས་ནི་རྡོ་རྗེ་མཁའ་འགྲོ་དང་མཚུངས་པའོ། །དེ་ནས་འཁྱུད་པའི་ལྷ་མོ་རྣམས་ནི་གོ་རིམས་ཇི་ལྟ་བར་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་མ་རྣམས་ནི་དཀར་མོ་དང་སེར་མོ་དང་དམར་མོ་དང་ལྗང་གུ་སྟེ་ [139a.7]གྲི་གུག་དང་སྡིགས་མཛུབ་དང་ལྡན་པའི་ཕྱག་གཉིས་པ་རྣམས་སོ། །མཁའ་འགྲོ་མ་ལྔ་པོ་རྣམས་ཀྱང་རེ་རེ་ཞིང་དེ་བཞིན་གཤེགས་པ་ལྔའི་ཅོད་པན་ཅན་ནོ། །གཞལ་ཡས་ཁང་གི་ལྷ་མོ་རྣམས་ནི་གཅེར་བུ་སྤྱན་གསུམ་དམར་ལ་ཟླུམ་པ་མཆེ་བ་གཙིགས་པ་ཞལ་གཅིག་པ་ཕྱག་གཉིས་པ་དབུ་སྐྲ་ [139b] [139b.1]འབར་བ་གྱེན་དུ་བརྫེས་པ་དཔྲལ་བའི་དབྱེས་ལ་ཐོད་པ་ལྔ་དང་མི་མགོ་སྐམ་པོའི་དོ་ཤལ་དང་ཕྱག་རྒྱ་ལྔས་བརྒྱན་པའོ། །སྣ་ཚོགས་པདྨ་དང་རོ་དང་ཉི་མ་རྣམས་ལ་གཡས་བསྐུམ་གཡོན་བརྐྱང་གི་གར་གྱིས་གནས་པའོ། །གང་ཁྱད་པར་མ་བཤད་པ་རྣམས་ནི་གཡོན་པའི་ཁུ་ཚུར་གྱིས་སྡིགས་མཛུབ་སྙིང་ [139b.2]གར་འཛིན་པས་སྡིགས་པར་མཛད་དོ། །འཁྱུད་པའི་ལྷ་མོ་རྣམས་ལ་ནི་གདན་ཐ་དད་པ་མེད་དོ། །གཽ་རཱི་ལ་སོགས་པ་བརྒྱད་ལ་རིམ་པ་བཞིན་དུ་རོའི་གདན་གྱི་གནས་སུ་ཚངས་པ་དང་དབང་པོ་དང་ཉེ་བའི་དབང་པོ་དང་། དྲག་པོ་དང་གཤིན་རྗེ་དང་། ལུས་ངན་པོ་དང་སྲིན་པོ་དང་། ཐགས་བཟངས་རིས་ [139b.3]རྣམས་ཞེས་པ་ནི་ཕྱོགས་གཞན་ནོ། །མཁའ་འགྲོ་མ་རྣམས་དང་གཽ་རཱི་ལ་སོགས་པ་རྣམས་རྡོ་རྗེ་མཁའ་འགྲོ་ལ་ཞལ་མངོན་པར་ཕྱོགས་པའོ། །ལྷ་གཞན་རྣམས་ནི་རང་རང་གི་བདག་པོ་ལ་མངོན་པར་ཕྱོགས་པའོ། །དགྱེས་པ་རྡོ་རྗེའི་སྤྱི་བོར་རྡོ་རྗེ་འཛིན་པ་དང་རྡོ་རྗེའོ། །སྒོ་དང་མཚམས་ཀྱི་ལྷ་མོ་རྣམས་ལ། [139b.4]ཐུགས་དང་། རྟག་པ་དང་། རིན་འབྱུང་དང་། འོད་དཔག་མེད་རྣམས་སོ། །རྟག་པའི་སྤྱི་བོར་འཁོར་ལོ་འཛིན་པ་དང་འཁོར་ལོའོ། །སྒོ་དང་མཚམས་ཀྱི་ལྷ་མོ་རྣམས་ལ་ཐུགས་དང་། རིན་འབྱུང་དང་འོད་དཔག་མེད་དང་། དོན་ཡོད་གྲུབ་པ་རྣམས་སོ། །རྡོ་རྗེ་ཉི་མའི་སྤྱི་བོར་རིན་འབྱུང་དང་ཡིད་བཞིན་ [139b.5]ནོར་བུའོ། །དེའི་སྒོ་དང་མཚམས་ཀྱི་ལྷ་མོ་རྣམས་ཀྱི་ནི་སྐུ་དང་ཐུགས་དང་། འོད་དཔག་མེད་དང་དོན་ཡོད་གྲུབ་པ་རྣམས་སོ། །པདྨ་གར་གྱི་དབང་ཕྱུག་གི་སྤྱི་བོར་པདྨ་འཛིན་པ་དང་། རྡོ་རྗེ་པདྨའོ། །དེའི་སྒོ་དང་མཚམས་ཀྱི་ལྷ་མོ་རྣམས་ཀྱི་ནི་སྐུ་རྡོ་རྗེ་དང་རིན་ཆེན་འབྱུང་ལྡན་དང་མི་བསྐྱོད་པ་དང་ཚེ་ [139b.6]དཔག་མེད་རྣམས་སོ། །རྟ་མཆོག་གི་སྤྱི་བོར་རལ་གྲི་འཛིན་པ་དང་རལ་གྲིའོ། །སྒོ་དང་མཚམས་ཀྱི་ལྷ་མོ་རྣམས་ཀྱི་ནི་སྐུ་རྡོ་རྗེ་དང་གསུང་རྡོ་རྗེ་དང་། འོད་དཔག་མེད་དང་དོན་ཡོད་གྲུབ་པ་རྣམས་སོ། །ཕྱི་རོལ་གྱི་གཽ་རཱི་ལ་སོགས་པ་རྣམས་སྔར་དང་མཚུངས་པའོ། །རྡོ་རྗེ་མཁའ་འགྲོ་ལ་སོགས་ [139b.7]པའི་མཁའ་འགྲོ་རྣམས་ཀྱི་ཐུགས་ཀའི་ས་བོན་ནི་གོ་རིམས་བཞིན་དུ་ཧཱུཾ་ཨོཾ་ཏྲཱཾ་ཨཱཿཁཾ་ཞེས་བྱ་བ་རྣམས་སོ། །སྙིང་པོའི་སྔགས་རྣམས་ནི། ཨོཾ་དྷ་ར་དྷ་ར། དྷཱ་ར་ཡ་དྷཱ་ར་ཡ། མརྡ་མརྡ་བཛྲ་དྷྲྀཀ་ཕཊ་སྭཱ་ཧཱ། ཨོཾ་ཤཱ་ཤྭ་ཏ་པ་ར་མ་ཤཱ་ཤྭ་ཏེ་ཨེ་ཧྱེ་ཧི་ཛི་ན་ཛིཀ་ཧཱུཾ་ཕཊ་སྭཱ་ཧཱ། ཨོཾ་བཛྲ་སཱུརྱ་ཏ་མོ་བིདྷ་མ་ནས་ [140a] [140a.1]མ་ཡ་སྟྭཾ། ཨ་ཧཾ་རཏྣ་དྷྲྀཀ་ཕཊ་སྭཱ་ཧཱ། ཨོཾ་བཛྲ་དྷརྨཱ་ས་མ་ཡ་སྟྭཾ་ཧུ་ལུ་ཧུ་ལུ་ཨཱ་རོ་ལྀ་ཀ་ཕཊ་སྭཱ་ཧཱ། ཨོཾ་ཕུ་ཕུ་ཧི་ཧི་པྲཛྙཱ་དྷྲྀཀ་ཕཊ་སྭཱ་ཧཱ། ཞེས་བྱ་བའོ། །ན་མཿས་མནྟ་བུདྡྷེ་བྷྱོ། ན་མོ་བཛྲ་ཀྲོ་དྷ་ཡ་མ་ཧཱ་དཾ་ཥྚོ་ཏྐ་ཊ་བྷཻ་ར་བཱ་ཡ། བཛྲ་སནྡོ་ཧ་དརྤཱཡ་ཨམྲྀ་ཏ་ཀུཎྜ་ལི་ཧཱུཾ་ཞེས་བྱ་བ་ནི་ [140a.2]བགེགས་མཐར་བྱེད་ཀྱི་སྔགས་ཏེ། ལས་ཐམས་ཅད་པའོ། །མཁའ་འགྲོ་ལྔ་པོ་འདི་དག་གང་ཡང་རུང་བའི་དཀྱིལ་འཁོར་གྱི་དབུས་སུ་བསྒོམ་པར་བྱ་བ་དེ་རེ་རེ་ཡང་སོ་སོའི་དཀྱིལ་འཁོར་དུ་བཅོམ་ལྡན་འདས་ཀྱིས་གསུངས་ཏེ། སངས་རྒྱས་མགོན་པོ་གང་ཞིག་ཉིད། །དབུས་སུ་གྱུར་པའི་དཀྱིལ་ [140a.3]འཁོར་ནི། །དེ་ཉིད་ཀྱི་ནི་དཀྱིལ་འཁོར་གསུངས། །སྙིང་པོ་ལེན་ཕྱིར་དཀྱིལ་འཁོར་ཏེ། དཀྱིལ་འཁོར་རེ་རེ་བསྒོམ་པའམ། ཡང་ན་བསྡུས་པའི་དཀྱིལ་འཁོར་རོ། །ཞེས་གསུངས་སོ།། །།འཁོར་ལོས་སྒྱུར་བ་དྲུག་གི་དཀྱིལ་འཁོར་ལ། །རྡོ་རྗེའི་ས་གཞི་ལ་སོགས་པ་དང་། འཁོར་ལོ་ [140a.4]རྩིབས་བཅུ་པའི་བར་དུ་འཇམ་པའི་རྡོ་རྗེའི་དཀྱིལ་འཁོར་དུ་བཤད་པ་ཇི་ལྟ་བའི་རྩིབས་བཅུ་པའི་འཁོར་ལོའོ། །ཁྲོ་བོ་བཅུ་ནི་གཞན་ཏེ་འཇིག་རྟེན་གསུམ་ལས་རྣམ་པར་རྒྱལ་བའི་ཁྲོ་བོའི་དཀྱིལ་འཁོར་ལས་བཤད་པའི་རྡོ་རྗེའི་དབྱུག་པ་ལ་སོགས་པ་ནས་རྡོ་རྗེས་འོག་གི་བར་ལྟ་བུའོ་ཞེས་པར་ནི་ཁྱད་པར་ [140a.5]རོ། །འཁོར་ལོ་རྩིབས་བཅུ་པ་འདིའི་ལྟེ་བའི་ནང་གི་ཆོས་འབྱུང་གི་དབུས་སུ་རླུང་དང་མེ་དང་ཆུ་དང་གསེར་གྱི་རང་བཞིན་གྱིས་གཞིའི་དཀྱིལ་འཁོར་དང་། རི་རབ་ཀྱི་སྟེང་དུ་སྣ་ཚོགས་ཆུ་སྐྱེས་དང་སྣ་ཚོགས་རྡོ་རྗེའི་ལྟེ་བ་ལ་གཞལ་ཡས་ཁང་ཆེན་པོའོ། །ཕྱོགས་གཞན་ལ་འདིར་ཆོས་འབྱུང་མེད་དོ་ཞེས་པའོ། ། [140a.6]གཞལ་ཡས་ཁང་ཆེན་པོའི་ལྟེ་བར་གནས་པའི་ལྟེ་བར་གནས་པའི་གཞལ་ཡས་ཁང་གི་དབུས་སུ་གནས་སེང་གེའི་སྟེང་དུ་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་གྱི་སྟེང་དུ་བཞུགས་པའི་རྡོ་རྗེ་སེམས་དཔའ་བསྒོམ་པར་བྱའོ་ཞེས་མངོན་པར་བརྗོད་པའི་རྒྱུད་བླ་མ་ལས་གསུངས་པས། །ཉི་མ་ལ་གནས་པའི་འཇིགས་ [140a.7]བྱེད་དང་གཽ་རཱི་དག་གི་སྟེང་དུ་རྡོ་རྗེ་སྐྱིལ་གྲུང་གིས་གནས་པའི་ཡེ་ཤེས་མཁའ་འགྲོ་རྡོ་རྗེ་སེམས་དཔའ་དཀར་པོའམ་ནག་པོ་རྡོ་རྗེ་དང་བཅས་པའི་རྡོ་རྗེ་དྲིལ་བུ་དང་ལྡན་པའི་གཡས་པ་དང་ཅིག་ཤོས་ཀྱི་ཕྱག་གིས་ཡུམ་ལ་འཁྱུད་པའོ། །ལྷ་མོ་དེ་ནི་རྡོ་རྗེ་དང་སྡིགས་མཛུབ་དང་བཅས་པའི་ཕྱག་གཡས་བརྐྱང་པ་ [140b] [140b.1]ཁྲག་གིས་གང་བའི་ཐོད་པ་དབུལ་བའི་ཕྱག་གཡོན་གྱིས་ཡབ་ལ་འཁྱུད་པ་སྐུ་མདོག་དམར་མོ་ཡེ་ཤེས་མཁའ་འགྲོ་མ་སྟེ། མིང་གཞན་ཆོས་ཀྱི་དབྱིངས་ཀྱི་དབང་ཕྱུག་མ་ཞེས་པ་དང་རྡོ་རྗེ་ཕག་མོ་ཞེས་ཀྱང་གྲགས་སོ། །དེ་ནས་ཤར་ལ་སོགས་པའི་ཕྱོགས་ལ་གཡས་སྐོར་གྱིས་སངས་རྒྱས་མཁའ་ [140b.2]འགྲོ་ལ་སོགས་པ་ལྔ་པོ་དགོད་པར་བྱ་སྟེ། དེ་དག་གི་འཁོར་རྣམས་དཀྱིལ་འཁོར་སོ་སོར་ཤར་ལ་སོགས་པའི་སྒོ་རྣམས་སུ་གཡོན་སྐོར་གྱིས་དགོད་ཅིང་མེ་ལ་སོགས་པའི་མཚམས་རྣམས་སུ་གཡས་སྐོར་གྱིས་དགོད་པར་བྱའོ། །རྡོ་རྗེ་སེམས་དཔའ་ཕྱོགས་བྲལ་རྣམས་ལ་རིམ་པ་ཇི་ལྟ་བས་མཁའ་ [140b.3]འགྲོ་མ་དང་ལཱ་མ་དང་། དུམ་སྐྱེས་མ་དང་། གཟུགས་ཅན་མ་རྣམས་ནི་སྔོན་མོ་དང་། སེར་མོ་དང་། དམར་མོ་དང་། ལྗང་གུ་རྣམས་གཡས་བརྐྱང་གིས་བཞུགས་པའོ། །སྒོ་རྣམས་སུ་ཐོད་པའི་དུམ་བུ་དང་། ཀེང་རུས་ཆེན་པོ་དང་ཀེང་རུས་དང་། ཀེང་རུས་ཆེན་པོ་དང་ཀེང་རུས་དང་། མཆེ་བ་རྣམས་པར་གཙིགས་པ་རྣམས་སྐུ་མདོག་ནག་ [140b.4]པོ་རྡོ་རྗེ་དང་རྡོ་རྗེ་དྲིལ་བུ་དང་བཅས་པའི་ཕྱག་གཉིས་ཀྱིས་རབ་ཏུ་གཏུམ་མོ་དང་གཏུམ་པའི་མིག་ཅན་དང་། འོད་ལྡན་མ་དང་སྣ་ཆེན་མ་ཐལ་བ་དཀར་པོའི་མདོག་ཅན་རྣམས་ལ་འཁྱུད་པའོ། །དེ་ནས་རྣམ་པར་སྣང་མཛད་ཀྱི་གཞལ་ཡས་ཁང་གི་དབུས་སུ་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་གནས་ [140b.5]པའི་ཚངས་པའི་སྙིང་གར་སངས་རྒྱས་མཁའ་འགྲོ་རྡོ་རྗེ་སྐྱིལ་ཀྲུང་གིས་བཞུགས་པ་སྐུ་མདོག་དཀར་པོ་འཁོར་ལོ་དང་འཁོར་ལོས་མཚན་པའི་དྲིལ་བུ་འཛིན་པའི་ཕྱག་གཡས་དང་གཡོན་གཉིས་ཀྱིས་སངས་རྒྱས་མཁའ་འགྲོ་མ་ལ་འཁྱུད་པའོ། །སྒོ་རྣམས་ལ་ཆང་དགྲ་དང་། འོད་དཔག་མེད་དང་། རྡོ་རྗེ་འོད་ [140b.6]དང་རྡོ་རྗེ་ལུས་རྣམས་ནི་སྐུ་མདོག་དཀར་པོ་འཁོར་ལོ་དང་འཁོར་ལོས་མཚན་པའི་དྲིལ་བུ་འཛིན་པའི་ཕྱག་གཉིས་ཀྱིས་དཔའ་བོའི་བློ་གྲོས་མ་དང་མིའུ་ཐུང་མ་དང་ལང་ཀའི་དབང་ཕྱུག་མ་དང་ཤིང་གྲིབ་མ་རྣམས་སེར་མོ་ལ་འཁྱུད་པའོ། །རིན་ཆེན་འབྱུང་ལྡན་གྱི་གཞལ་ཡས་ཁང་གི་དབུས་སུ་རྟའི་སྟེང་དུ་སྣ་ [140b.7]ཚོགས་པདྨ་དང་ཉི་མ་ལ་གནས་པའི་ལྷའི་བུ་ཉི་མའི་སྙིང་གར་རིན་ཆེན་མཁའ་འགྲོ་རྡོ་རྗེ་སྐྱིལ་ཀྲུང་དུ་བཞུགས་པ་སྐུ་མདོག་སེར་པོ་རིན་པོ་ཆེ་དང་རིན་པོ་ཆེས་མཚན་པའི་དྲིལ་བུ་འཛིན་པའི་ཕྱག་གཡས་པ་དང་གཡོན་པ་གཉིས་ཀྱིས་རིན་ཆེན་མཁའ་འགྲོ་མ་སེར་མོ་ལ་འཁྱུད་པའོ། །སྒོ་རྣམས་ལ་མྱུ་གུ་ཅན་ [141a] [141a.1]དང་། རྡོ་རྗེ་རལ་པ་ཅན་དང་། དཔའ་བོ་ཆེན་པོ་དང་། རྡོ་རྗེ་ཧཱུཾ་མཛད་རྣམས་སྐུ་མདོག་སེར་པོ་རིན་པོ་ཆེ་དང་། རིན་པོ་ཆེས་མཚན་པའི་དྲིལ་བུ་འཛིན་པའི་ཕྱག་གཉིས་ཀྱིས་ས་སྲུང་མ་དང་འཇིགས་བྱེད་ཆེན་མོ་དང་རླུང་ཤུགས་མ་དང་ཆང་འཐུང་མ་རྣམས་ལྗང་གུའི་ཁ་དོག་དང་ལྡན་པ་ལ་ [141a.2]འཁྱུད་པའོ། །སྣང་བ་མཐའ་ཡས་ཀྱི་དཀྱིལ་འཁོར་གྱི་དབུས་སུ་རྨ་བྱའི་སྟེང་དུ་སྣ་ཚོགས་པདྨ་དང་ཉི་མ་ལ་གནས་པའི་དབང་ཕྱུག་ཆེན་པོའི་སྙིང་གར་པདྨ་མཁའ་འགྲོ་དམར་པོ་རྡོ་རྗེ་སྐྱིལ་ཀྲུང་གིས་བཞུགས་པ་སྐུ་མདོག་དམར་པོ་པདྨ་དང་པདྨས་མཚན་པའི་དྲིལ་བུ་དང་ལྡན་པའི་ཕྱག་གཡས་པ་དང་གཡོན་ [141a.3]པ་གཉིས་ཀྱིས་པདྨ་མཁའ་འགྲོ་དམར་མོ་ལ་འཁྱུད་པའོ། །སྒོ་རྣམས་ལ་ཤིན་ཏུ་བཟང་པོ་དང་རྡོ་རྗེ་བཟང་པོ་དང་འཇིགས་བྱེད་ཆེན་པོ་དང་། མིག་མི་བཟང་རྣམས་དམར་མོ་པདྨ་དང་ཉི་མས་མཚན་པའི་དྲིལ་བུ་དང་བཅས་པའི་ཕྱག་གཉིས་ཀྱིས་ལྷ་མོ་སྔོ་བསངས་མ་དང་། ཤིན་ཏུ་བཟང་མོ་དང་། རྟ་རྣ་མོ་ [141a.4]དང་། བྱ་རོག་གདོང་རྣམས་སྐུ་མདོག་དཀར་མོ་ལ་འཁྱུད་པའོ། །མི་བསྐྱོད་པའི་གཞལ་ཡས་ཁང་གི་དབུས་སུ་གླང་པོ་ཆེའི་སྟེང་དུ་སྣ་ཚོགས་པདྨ་དང་ཉི་མ་ལ་གནས་པའི་ཁྱབ་འཇུག་གི་སྙིང་གར་རྡོ་རྗེ་སྐྱིལ་ཀྲུང་གིས་བཞུགས་པའི་རྡོ་རྗེ་མཁའ་འགྲོ་ནག་པོ་རྡོ་རྗེ་དང་རྡོ་རྗེས་མཚན་པའི་དྲིལ་བུར་ལྡན་པའི་ཕྱག་ [141a.5]གཡས་དང་གཡོན་པ་གཉིས་རྡོ་རྗེ་མཁའ་འགྲོ་མ་ལ་འཁྱུད་པ་སྟེ། ལྷ་མོ་དེ་ནི་དམར་མོའམ་ནག་མོའོ། །སྒོ་རྣམས་ལ་སྟོབས་པོ་ཆེ་དང་། རིན་ཆེན་རྡོ་རྗེ་དང་། རྟ་མགྲིན་དང་། ནམ་མཁའི་སྙིང་པོ་རྣམས་ནག་པོ་རྡོ་རྗེ་དང་རྡོ་རྗེས་མཚན་པའི་དྲིལ་བུ་དང་བཅས་པའི་ཕྱག་གཉིས་ཀྱིས་འཁོར་ [141a.6]ལོའི་ཤུགས་ཅན་མ་དང་། དུམ་སྐྱེས་མ་དང་། ཆང་འཐུང་མ་དང་། འཁོར་ལོའི་གོ་ཆ་མ་རྣམས་སེར་མོ་ལ་འཁྱུད་པའོ། །དོན་ཡོད་གྲུབ་པའི་གཞལ་ཡས་ཁང་གི་དབུས་སུ་ནམ་མཁའ་ལྡིང་གི་སྟེང་དུ་སྣ་ཚོགས་པདྨ་དང་ཉི་མ་ལ་གནས་པའི་ལྷའི་བུ་ཟླ་བའི་སྙིང་གར་རྡོ་རྗེ་སྐྱིལ་ཀྲུང་གིས་བཞུགས་པའི་ [141a.7]སྣ་ཚོགས་མཁའ་འགྲོ་སྐུ་མདོག་ལྗང་གུ་སྣ་ཚོགས་རྡོ་རྗེ་དང་། སྣ་ཚོགས་རྡོ་རྗེས་མཚན་པའི་དྲིལ་བུ་བཟུང་བའི་ཕྱག་གཉིས་ཀྱིས་སྣ་ཚོགས་མཁའ་འགྲོ་མ་ལྗང་གུ་ལ་འཁྱུད་པའོ། །སྒོ་རྣམས་སུ་ཧེ་རུ་ཀ་དང་པདྨ་གར་གྱི་དབང་ཕྱུག་དང་། རྣམ་པར་སྣང་མཛད་དང་། རྡོ་རྗེ་སེམས་དཔའ་རྣམས་སྐུ་མདོག་ [141b] [141b.1]ལྗང་གུ་སྣ་ཚོགས་རྡོ་རྗེས་མཚན་པའི་དྲིལ་བུ་འཛིན་པའི་ཕྱག་གཉིས་ཤིན་ཏུ་དཔའ་མོ་དང་། སྟོབས་ཆེན་མོ་དང་། འཁོར་ལོས་སྒྱུར་བ་དང་། བརྩོན་འགྲུས་ཆེན་མོ་རྣམས་དུ་བ་ལྟ་བུའི་སྔོ་སྐྱའི་མདོག་ཅན་མ་ལ་འཁྱུད་པའོ། །དེ་ལྟར་དཔའ་མོ་ཉི་ཤུ་རྩ་བཞི་ནི་གཡས་བརྐྱང་གིས་གནས་པའོ། །འདིར་ [141b.2]མཁའ་འགྲོ་མ་ལ་སོགས་པ་བཞི་ནི་གཡོན་པ་ཐོད་པ་དང་ཁ་ཊྭཱཾ་ག་འཛིན་པ་གཡས་པས་ཌ་མ་རུ་འཛིན་པའོ། །ཡེ་ཤེས་མཁའ་འགྲོ་མ་དང་རབ་ཏུ་གཏུམ་མོ་ལ་སོགས་པ་རྣམས་ནི་ཕྱག་གཡས་པས་རྡོ་རྗེ་དང་བཅས་པའི་སྡིགས་མཛུབ་གདེངས་པའོ། །སངས་རྒྱས་མཁའ་འགྲོ་མ་དང་དཔའ་བོའི་བློ་གྲོས་མ་ལ་སོགས་ [141b.3]མ་རྣམས་ཀྱིས་ནི་འཁོར་ལོ་དང་བཅས་པའི་སྡིགས་མཛུབ་བོ། །རིན་ཆེན་མཁའ་འགྲོ་མ་དང་ས་སྲུང་མ་ལ་སོགས་པ་རྣམས་ནི་རིན་པོ་ཆེ་དང་བཅས་པའི་སྡིགས་མཛུབ་བོ། །པདྨ་མཁའ་འགྲོ་མ་དང་ལྷ་མོ་སྔོ་བསངས་མ་ལ་སོགས་པ་རྣམས་ནི་པདྨ་དང་བཅས་པའི་སྡིགས་མཛུབ་པོ། །རྡོ་རྗེ་མཁའ་འགྲོ་མ་ [141b.4]དང་ཤུགས་ཅན་མ་འཁོར་ལོ་ལ་སོགས་པ་རྣམས་ནི་རྡོ་རྗེ་དང་བཅས་པའི་སྡིགས་མཛུབ་པོ། །སྣ་ཚོགས་མཁའ་འགྲོ་མ་དང་ཤིན་ཏུ་དཔའ་མོ་ལ་སོགས་པ་རྣམས་ནི་སྣ་ཚོགས་རྡོ་རྗེ་དང་བཅས་པའི་སྡིགས་མཛུབ་པོ། །ཡེ་ཤེས་མཁའ་འགྲོ་མ་ལ་སོགས་པ་ཐམས་ཅད་ལ་ཡང་འཁྱུད་པར་བྱེད་པའི་གཡོན་ [141b.5]པའི་ཕྱག་ཏུ་འཛག་པ་དང་བཅས་པའི་ཁྲག་གིས་བཀང་བའི་ཐོད་པ་འཛིན་པའོ། །དཀྱིལ་འཁོར་ཆེན་པོའི་སྒོ་རྣམས་ལ་ཁྭ་གདོང་མ་དང་། འུག་གདོང་མ་དང་ཁྱི་གདོང་མ་དང་ཕག་གདོང་མ་རྣམས་མིང་གི་རྗེས་སུ་མཐུན་པའི་ཞལ་ཏེ་རིམ་པ་ཇི་ལྟ་བས་སྔོན་པོ་དང་སེར་པོ་དང་དམར་པོ་དང་ལྗང་གུའི་མདོག་ཅན་ [141b.6]རྣམས། ཕྱག་གཡས་པ་རྣམས་ན་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་འཛིན་པའོ། །མཚམས་རྣམས་ལ་གཤིན་རྗེ་བརྟན་མ་དང་། གཤིན་རྗེ་ཕོ་ཉ་མ་དང་། གཤིན་རྗེ་མཆེ་བ་མ་དང་། གཤིན་རྗེ་འཇོམས་མ་རྣམས་ནི་མི་མོའི་གདོང་པ་ཅན་ནོ། །གཡས་དང་གཡོན་པའི་ [141b.7]ལྷ་མོའི་ཁ་དོག་གཡས་གཡོན་གྱི་སྐུ་ཕྱེད་ཕྱེད་དང་ལྡན་པ་རྣམས་ཏེ། ཕྱག་གཡས་པ་ན་མེ་ལོང་དང་པི་ཝང་དང་དྲིའི་དུང་ཆོས་དང་རོའི་སྣོད་རྣམས་འཛིན་པའོ། །ལྷ་མོ་བརྒྱད་པོ་འདི་དག་ཀྱང་ཕྱག་གཡོན་པས་ཐོད་པ་དང་ཁ་ཊྭཱཾ་ག་འཛིན་པ་གཡས་བརྐྱང་གིས་གནས་པའོ། །གཞལ་ཡས་ཁང་དྲུག་ [142a] [142a.1]པོ་རྣམས་ཀྱི་ཡང་མཚམས་སུ་སྣ་ཚོགས་པདྨ་ལ་གནས་པའི་བྱང་ཆུབ་སེམས་ལ་སོགས་པས་གང་བའི་ཐོད་པ་རྣམས་སོ། །མཁའ་འགྲོ་མ་ལ་སོགས་པ་ནས་གཤིན་རྗེ་འཇོམས་མའི་མཐར་ཐུག་པ་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའི་རོ་རྣམས་ལ་བཞུགས་པའོ། །འཁོར་ [142a.2]ལོས་སྒྱུར་བ་རྣམས་ཀྱང་རོ་ལ་གནས་པའོ་ཞེས་པ་ཕྱོགས་གཞན་ནོ། །ལྷ་མོ་རྣམས་ནི་སྐུ་རྒྱབ་ཏུ་འཕྱང་བའི་སྟག་གི་པགས་པའི་ཤམ་ཐབས་དཀྲིས་པ་མཆོད་ཕྱིར་ཐོགས་པ་ཅན་མི་མགོ་རློན་པའི་ཕྲེང་བ་མགྲིན་པ་ལ་འཕྱང་བ་རལ་པ་ནག་པོའི་ཐོར་ཅོག་ཅན་ནོ། །ལྷ་མོ་རྣམས་ནི་གཅེར་བུ་སྐྲ་ནག་པོ་ [142a.3]གྲོལ་ཞིང་མི་མགོ་སྐམ་པོའི་ཕྲེང་བ་མགྲིན་པ་ལ་འཕྱང་བའོ། །ལྷ་བཞི་བཅུ་རྩ་གཉིས་ཀྱང་ཞལ་གཅིག་པ་ཕྱག་གཉིས་པ་སྤྱན་གསུམ་པ་རྡོ་རྗེ་ཕྲེང་བས་མཚན་པའི་དཔྲལ་བའི་སྟེང་དུ་ཐོད་པ་ལྔས་བརྒྱན་པ་དཔུང་རྒྱན་དང་གཡེར་ཁ་ལ་སོགས་པས་བརྒྱན་པ་ཕྱག་རྒྱ་ལྔ་དང་ལྡན་པའོ། །འཁོར་ལོས་སྒྱུར་བ་ [142a.4]རྣམས་ཁོ་ན་ཕྱག་རྒྱ་དྲུག་དང་ལྡན་པ། ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པའི་ཐོར་ཅོག་ཅན་དག་གོ། །ལྷ་མོ་སུམ་ཅུ་རྩ་བཞི་རྣམས་རང་རང་གི་དཀྱིལ་འཁོར་གྱི་བདག་པོ་ལ་མངོན་པར་ཕྱོགས་པའོ། །འཁོར་ལོས་སྒྱུར་བ་རྣམ་པ་ལྔ་དང་ཁྭ་གདོང་མ་ལ་སོགས་པ་རྣམས་ཀྱིས་དབུས་ཀྱི་ [142a.5]དཀྱིལ་འཁོར་གྱི་བདག་པོ་ལ་མངོན་པར་ཕྱོགས་པའོ། །དཔའ་བོ་རྣམས་ནི་རང་རང་གི་ཤེས་རབ་མ་ལ་མངོན་པར་ཕྱོགས་པའོ། །དེ་ལྟར་བཤད་པ་འདི་ནི་ཕྱོགས་གཅིག་གོ། །འཁོར་ལོས་སྒྱུར་བ་དྲུག་པོ་འདི་དག་ཀྱང་ཞབས་གཡས་བརྐྱང་ངོ་ཞེས་བྱ་བ་ནི། ཁྱད་པར་ནི་ཕྱོགས་གཉིས་པའོ། །ཕྱོགས་གཉིས་ [142a.6]པོ་འདི་དག་ལ་ཡེ་ཤེས་མཁའ་འགྲོ་དང་སངས་རྒྱས་མཁའ་འགྲོ་དང་དེ་དག་གི་འཁོར་རྣམས་ཀྱང་སེང་གེའི་སྟེང་དུ་གནས་པ་དང་། རིན་ཆེན་མཁའ་འགྲོ་དང་དེའི་འཁོར་རྣམས་ཀྱང་རྟའི་སྟེང་དུ་གནས་པ་དང་། པདྨ་མཁའ་འགྲོ་དང་དེའི་འཁོར་རྣམས་ཀྱང་རྨ་བྱའི་སྟེང་དུ་གནས་པ་དང་། རྡོ་རྗེ་མཁའ་འགྲོ་དང་དེའི་འཁོར་ [142a.7]རྣམས་ཀྱང་གླང་པོ་ཆེའི་སྟེང་དུ་གནས་པ་དང་། སྣ་ཚོགས་མཁའ་འགྲོ་དང་དེའི་འཁོར་རྣམས་ཀྱང་ནམ་མཁའ་ལྡིང་གི་སྟེང་དུ་གནས་པའོ། །ཡེ་ཤེས་ཀྱི་མཁའ་འགྲོ་མ་ལ་སོགས་པ་འདི་དག་རྡོ་རྗེ་སྐྱིལ་ཀྲུང་ཅན་ནོ། །ཁྭ་གདོང་མ་ལ་སོགས་པ་བརྒྱད་པོ་འདི་དག་ཕྱོགས་སྐྱོང་བརྒྱང་རྣམས་ལ་གཡས་བརྐྱང་གིས་གནས་ [142b] [142b.1]པའོ་ཞེས་པ་ནི་ཕྱོགས་གསུམ་པའོ། །ཕྱོགས་འདི་རྣམས་དང་ཕྱོགས་གཞན་རྣམས་ལ་ཡང་ཡེ་ཤེས་མཁའ་འགྲོ་མ་ལ་སོགས་པ་རྣམས་ནི་ཞལ་གཅིག་ཕྱག་བཞི་པ་ལ་སོགས་པ་ཉིད་དང་། ཞལ་གསུམ་ཕྱག་དྲུག་ལ་སོགས་པ་ཉིད་དང་། ཞལ་ལྔ་ཕྱག་བརྒྱད་པ་ལ་སོགས་པ་ཉིད་དང་། ཞལ་བཞི་ཕྱག་བཅུ་གཉིས་ [142b.2]པ་ལ་སོགས་པ་ཉིད་དང་། ཞལ་བརྒྱད་ཕྱག་བཅུ་དྲུག་པ་ལ་སོགས་པ་ཉིད་ཀྱང་བཅོམ་ལྡན་འདས་ཀྱིས་རབ་ཏུ་སྤྲོས་ནས་གསུངས་ཏེ། གཞུང་མངས་པས་འཇིགས་པས་འདིར་མ་བསྟན་ཏོ། །རང་རང་གི་འཁོར་རྣམས་ལ་དཀྱིལ་འཁོར་གྱི་རིགས་ཀྱི་བདག་པོ་ནི་འཁོར་ལོས་སྒྱུར་བ་དྲུག་གིས་སོ། །འཁོར་ལོས་ [142b.3]སྒྱུར་བ་ལྔ་ལ་ནི་རྡོ་རྗེ་མཁའ་འགྲོས་སོ། །དེ་ཉིད་ལ་ནི་ཡེ་ཤེས་མཁའ་འགྲོས་སོ། །ཁྭ་གདོང་མ་ལ་སོགས་པ་རྣམས་ལ་ནི་སྣ་ཚོགས་མཁའ་འགྲོ་སྟེ། ཡེ་ཤེས་མཁའ་འགྲོའོ་ཞེས་བྱ་བ་ནི་ཁ་ཅིག་གོ། །ཡེ་ཤེས་མཁའ་འགྲོ་ལ་སོགས་པའི་རིམ་པ་ཇི་ལྟ་བར་ཐུགས་ཀའི་ས་བོན་རྣམས་ལ་ནི་བཾ་བྷྲཱུཾ་ཨཱཾ་ཏྲཱཾ་ཧཱུཾ་ཁཾ་ [142b.4]ངོ་། །སྙིང་པོའི་སྔགས་རྣམས་ནི་ཨོཾ་ཤྲཱི་མ་ཧཱ་སུ་ཁ་བཛྲ་སཏྭ་ཌཱ་ཀི་ནཱི་ཛཱ་ལ་སཾ་བ་རཾ་ཕཊ་སྭཱ་ཧཱ། ཨོཾ་ཤྲཱི་བུདྡྷ་ཌཱ་ཀ་ཨ་ལ་ལ་ལ་བྷྲཱུཾ་ཨཱཿཌཱ་ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་རཏྣ་ཌཱ་ཀ་ཏྲཱཾ་ཨཱཿཧཱུཾ་ཌཱ་ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་པདྨ་ཌཱ་ཀ་ཧྲཱིཿཨཱཿཧཱུཾ་ཌཱ་ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་བཛྲ་ཌཱ་ཀ་ཨཱཿཧཱུཾ་ཕཊ་ཌཱ་ [142b.5]ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་བི་ཤྭ་ཌཱ་ཀ་ཧོཿཁཾ་ཨཱཿཧཱུཾ་ཌཱ་ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཞེས་བྱ་བའོ། །ཨོཾ་ཁཾ་ཧཱུཾ་ཕཊ། ཅེས་བྱ་བ་ནི་དུམ་སྐྱེས་མ་སྟེ་ལས་ཐམས་ཅད་པའི་སྔགས་སོ།། །།དཔལ་དུས་ཀྱི་འཁོར་ལོའི་དཀྱིལ་འཁོར་ལ། རྡོ་རྗེ་གུར་གྱི་ནང་དུ་སྲུང་བའི་འཁོར་ལོ་རྩིབས་བཅུ་པ་སྟེ། དེའི་ [142b.6]ཤར་དང་ལྷོ་དང་ནུབ་དང་བྱང་གི་རྩིབས་རྣམས་ལ་ཤིན་ཏུ་སྟོབས་བྱེད་དང་། རྨོངས་བྱེད་དང་། རེངས་བྱེད་དང་། རྒྱལ་བྱེད་རྣམས་ཏེ། གཤིན་རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་ཅེས་བྱ་བ་མིང་གི་རྣམ་གྲངས་སོ། །མེ་ལ་སོགས་པའི་རྩིབས་རྣམས་ལ་ [142b.7]དབྱུག་པ་སྔོན་པོ་དང་འདོད་པའི་རྒྱལ་པོ་དང་། སྟོབས་པོ་ཆེ་དང་མི་གཡོ་བ་རྣམས་སོ། །སྟེང་གི་རྩིབས་ལ་གཙུག་ཏོར་འཁོར་ལོས་སྒྱུར་བའོ། །འོག་གི་རྩིབས་ལ་གནོད་མཛེས་རྒྱལ་པོའོ། །དེ་སྐད་དུ་ཡང་རྩ་བ་ལས། དེ་རྗེས་འཁོར་ལོ་རྩིབས་བཅུ་པ་ནི་ཕྱོགས་དང་ཕྱོགས་བྲལ་ལ་གནས་ཁྲོ་ [143a] [143a.1]བོའི་ཚོགས་རྣམས་བསྒོམ་པར་བྱ། ཞེས་པ་དང་། དྲི་མ་མེད་པའི་འོད་ལས་ཀྱང་སྲུང་བའི་འཁོར་ལོ་ལས་ཁྲོ་བོ་ལ་སོགས་པ་སྤྲོ་བར་བྱ་སྟེ། དཀྱིལ་འཁོར་གྱི་ས་གཞི་སྲུང་བའི་དོན་དུའོ་ཞེས་གསུངས་སོ། །ཁྲོ་བོ་འདི་རྣམས་འཆད་པར་འགྱུར་བའི་གཟུགས་ཅན་ནོ། །སྲུང་བའི་ [143a.2]འཁོར་ལོའི་ལྟེ་བའི་ནང་དུ་ཆོས་འབྱུང་ངོ་། །དེ་སྐད་དུ་དྲི་མ་མེད་པའི་འོད་ལས་གསུངས་པ་ཕྱི་རོལ་དུ་སྐྱེ་བའི་དོན་དུ་ནམ་མཁའི་ཁམས་མཐའ་ཡས་པ་སྟེ། ནང་དུ་ཤེས་རབ་ཆོས་འབྱུང་ཟུར་གསུམ་པའོ་ཞེས་སོ། །དཀྱིལ་འཁོར་དུ་ནམ་མཁའི་ཁམས་ཉིད་ཆོས་འབྱུང་གི་གཟུགས་སུ་བསྒོམ་ [143a.3]པའོ། །ཆོས་འབྱུང་གི་དབུས་སུ་རླུང་དང་མེ་དང་ཆུ་དང་སའི་དཀྱིལ་འཁོར་ལ་གནས་པའི་རི་རབ་དང་སྣ་ཚོགས་པདྨ་དང་ཟླ་བ་དང་། ཉི་མ་དང་། ཐིག་ལེ་ནག་པོའི་གཟུགས་སྒྲ་གཅན་གྱི་དཀྱིལ་འཁོར་གྱི་སྟེང་དུ་གནས་པའི་ཕྱི་རོལ་ནས་རྡོ་རྗེ་འོད་ཟེར་དང་ནམ་མཁའ་དང་རླུང་དང་མེ་དང་ཆུ་དང་སའི་ [143a.4]ཁོར་ཡུག་གིས་ཡོངས་སུ་བསྐོར་བཞིན་པའི་གཞལ་ཡས་ཁང་ཆེན་པོའོ། །ཡང་ན་སྲུང་བའི་འཁོར་ལོ་ནི་བགེགས་ཉེ་བར་ཞི་བ་ཙམ་གྱི་དགོས་པའོ་ཞེས་པ་སྟེ། བགེགས་བཅོམ་པའི་རྗེས་ལ་བསྒོམ་པར་མ་བྱས་ཤིང་ཆོས་འབྱུང་ཡང་བསྒོམ་པར་མ་བྱས་ནས་སྲུང་བའི་གུར་གྱི་ནང་དུ་ནམ་མཁའི་ [143a.5]ནང་དུ་རླུང་ལ་སོགས་པའི་དཀྱིལ་འཁོར་དང་སྒྲ་གཅན་གྱི་དཀྱིལ་འཁོར་གྱི་མཐར་ཐུག་པའི་སྟེང་དུ་གནས་པའི་ཕྱི་རོལ་ནས་འོད་ཟེར་ལ་སོགས་པའི་ཟླུམ་པོ་རྣམས་ཀྱིས་ཡོངས་སུ་བསྐོར་བའི་གཞལ་ཡས་ཁང་ཆེན་པོའོ། །དེའི་ཕྱེད་ཀྱིས་གསུང་གི་དཀྱིལ་འཁོར་རོ། །དེའི་ཕྱེད་ཀྱིས་ཐུགས་ཀྱི་དཀྱིལ་ [143a.6]འཁོར་རོ། །དེའི་ཕྱེད་ཀྱིས་བདེ་ཆེན་གྱི་འཁོར་ལོའོ། །དེའི་ཕྱེད་ཀྱིས་བཅོམ་ལྡན་འདས་ཀྱི་པདྨ་ལྗང་གུའོ། །པདྨའི་སུམ་ཆ་གཅིག་གིས་ཟེ་འབྲུའོ། །དེའི་སྟེང་ནས་སྟེང་དུ་གནས་པའི་ཟླ་བ་དང་ཉི་མ་དང་སྒྲ་གཅན་དང་དུས་ཀྱི་མེའི་དཀྱིལ་འཁོར་གྱི་སྟེང་དུ་གན་རྐྱལ་དུ་གནས་པའི་ཡན་ལག་མེད་པ་ [143a.7]དང་དྲག་པོའི་སྙིང་གར་གཡས་བརྐྱང་གིས་གར་བྱེད་པའི་བཅོམ་ལྡན་འདས་དུས་ཀྱི་འཁོར་ལོ་ནག་པོ། ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པའི་ཐོར་ཚུགས་ཅན། རྡོ་རྗེ་ནོར་བུ་དང་རྡོ་རྗེའི་རྣ་ཆ་དང་། རྡོ་རྗེའི་མགུལ་རྒྱན་དང་། རྡོ་རྗེའི་ལག་གདུབ་དང་། རྡོ་རྗེའི་སྐ་རགས་ [143b] [143b.1]དང་། རྡོ་རྗེའི་རྐང་གདུབ་དང་། རྡོ་རྗེའི་དར་དཔྱངས་དང་། རྡོ་རྗེའི་ཕྲེང་བ་དང་། སྟག་གི་པགས་པ་འཕྱང་བའི་གོས་བསྣམས་པ་ཞལ་བཞི་པ་ཕྱག་བཅུ་གཉིས་པའོ། །དེ་ལ་རྩ་བའི་ཞལ་ནི་ནག་པོ་མཆེ་བ་གཙིགས་པ་དྲག་པོ་གཡས་དམར་པོ་ཆགས་པ་དང་བཅས་པ། ནུབ་སེར་པོ་ཏིང་ངེ་འཛིན་ལ་ [143b.2]གནས་པ། གཡོན་དཀར་པོ་ཞི་བའོ། །སྔོན་པོ་དང་དམར་པོ་དང་དཀར་པོ་དབུས་དང་གཡས་དང་གཡོན་གྱི་མགྲིན་པ་གསུམ་སྟེ། བཅོམ་ལྡན་འདས་མགྲིན་པ་གསུམ་པའོ། །གཡས་པའི་དཔུང་མགོ་དང་པོ་སྔོན་པོ་གཉིས་པ་དམར་པོ་གསུམ་པ་དཀར་པོའོ། །དེ་བཞིན་དུ་གཡོན་པ་སྔོན་པོ་དང་ [143b.3]དམར་པོ་དང་དཀར་པོ་སྟེ། འདི་དག་དཔུང་མགོ་དྲུག་གོ། །བར་ལྷུ་དཔུང་བ་བཅུ་གཉིས་སོ། །ཉེ་བའི་ཕྱག་དཔུང་པ་ནས་བརྩམས་ནས་ཕྱག་ཉི་ཤུ་རྩ་བཞིའོ། །དེ་ལ་གཡས་ཀྱི་དཔུང་པ་གཉིས་སྔོན་པོའོ། །གཉིས་དམར་པོ། གཉིས་དཀར་པོ་སྟེ། དེ་བཞིན་དུ་གཡོན་པ་དག་ཀྱང་ངོ་། །དེ་ [143b.4]བཞིན་དུ་ཕྱག་བཞི་ནག་པོ་བཞི་དམར་པོ་བཞི་དཀར་པོ་སྟེ། གཡས་པ་དང་གཡོན་པ་རྣམས་ཀྱང་ངོ་། །ཕྱག་རེ་རེ་ལ་སོར་མོ་ལྔ་ལྔ་སྟེ། དེ་དག་རེ་རེ་ཞིང་ཚིགས་རྣམ་པ་གསུམ་གསུམ་མོ། །དེ་ལ་མཐེ་བོང་སེར་པོ་མཛུབ་མོ་དཀར་པོ་གུང་མོ་དམར་པོ་སྲིན་ལག་ནག་པོ་མཐེའུ་ཆུང་ལྗང་གུའོ། །ཕྱག་གི་ [143b.5]མཐིལ་ནས་སོར་མོ་ཐམས་ཅད་ཀྱི་ཚིགས་དང་པོའི་ཕྲེང་བ་ནག་པོ་གཉིས་པ་དམར་པོ་གསུམ་པ་དཀར་པོ་སྟེ། དེ་རྣམས་ཀྱང་སོར་གདུབ་རྣམས་ཀྱི་འོད་དང་ལྡན་པའོ། །གཡས་པའི་ཕྱག་ནག་པོ་རྣམས་ལ་རྡོ་རྗེ་དང་རལ་གྲི་དང་རྩེ་གསུམ་དང་གྲི་གུག་གོ། །དམར་པོ་རྣམས་ལ་མེའི་མདའ་དང་རྡོ་རྗེ་ལྕགས་ [143b.6]ཀྱུ་དང་། ཌ་མ་རུ་དང་ཐོ་བའོ། །དཀར་པོ་རྣམས་ལ་འཁོར་ལོ་དང་མདུང་དང་དབྱུག་པ་དང་། དགྲ་སྟ་རྣམས་སོ། །གཡོན་པའི་ནག་པོ་རྣམས་ལ་རྡོ་རྗེ་དྲིལ་བུ་དང་ཕུབ་དང་ཁ་ཊྭཱཾ་ག་ཁ་བྱེ་བ་དང་། ཁྲག་གིས་གང་བའི་ཐོད་པའོ། །དམར་པོ་རྣམས་ལ་གཞུ་དང་ཞགས་པ་དང་ནོར་བུ་རིན་པོ་ཆེ་དང་པདྨ་ [143b.7]དཀར་པོ་རྣམས་སོ། །དཀར་པོ་རྣམས་ལ་དུང་དང་། མེ་ལོང་དང་རྡོ་རྗེ་ལྕགས་སྒྲོག་དང་། ཚངས་པའི་མགོ་བོ་རྣམས་སོ། །བརླ་ནས་བརྩམས་ནས་ཞབས་གཡས་པ་དམར་པོའི་མཐིལ་དམར་པོས་འདོད་པའི་ལྷ་དམར་པོ་ཞལ་གཅིག་ཕྱག་བཞིན་མེ་ཏོག་ལྔའི་མདའ་དང་གཞུ་དང་ཞགས་པ་དང་། [144a] [144a.1]ལྕགས་ཀྱུ་འཛིན་པའི་སྙིང་གར་མནན་པའོ། །བརླ་ནས་བརྩམས་ནས་ཞབས་གཡོན་པ་དཀར་པོའི་མཐིལ་དཀར་པོས་དྲག་པོ་དཀར་པོ་ཞལ་གཅིག་སྤྱན་གསུམ་པ་ཕྱག་བཞི་པ་རྩེ་གསུམ་ཌ་མ་རུ་དང་ཐོད་པ་དང་ཁ་ཊྭཱཾ་ག་འཛིན་པའི་སྙིང་གར་མནན་པའོ། །འདོད་ལྷའི་གཞོགས་སུ་ [144a.2]དགའ་བ་མོ་དང་དབང་ཕྱུག་ཆེན་པོའི་གཞོགས་སུ་དཀར་མོའོ། །ལྷ་མོ་འདི་དག་ནི་བཅོམ་ལྡན་འདས་ཀྱི་ཞབས་ལ་འཇུས་པ་དམན་པའི་བཞིན་ཅན་ནོ། །བཅོམ་ལྡན་འདས་ཀྱིས་འཁྱུད་པའི་སྣ་ཚོགས་ཡུམ་ནི་གཡོན་བརྐྱང་གིས་གནས་པ་གསེར་གྱི་མདོག་ལྟ་བུ་ཕྱག་གཡས་པ་རྣམས་ཀྱིས་གྲི་ [144a.3]གུག་དང་ལྕགས་ཀྱུ་དང་ཌ་མ་རུ་དང་། བགྲང་ཕྲེང་དང་། གཡོན་པ་རྣམས་ན་ཤཀ་ཏི་དང་ཞགས་པ་དང་། པདྨ་དཀར་པོ་དང་རིན་པོ་ཆེ་རྣམས་འཛིན་པའོ། །ཤར་གྱི་འདབ་མ་ལ་ནག་མོ་འབར་མ་ནི་ནག་མོ་ཕྱག་གཡས་པ་རྣམས་ཀྱིས་སྤོས་སྣོད་དང་ཙནྡན་གྱི་སྣོད་དང་གུར་གུམ་གྱི་སྣོད་དང་གླ་རྩི་ [144a.4]དང་བཅས་པའི་ག་པུར་གྱི་སྣོད་དང་། གཡོན་པ་རྣམས་ཀྱིས་དྲིལ་བུ་དང་པདྨ་དང་ལྷའི་ལྗོན་ཤིང་གི་མེ་ཏོག་དང་མེ་ཏོག་སྣ་ཚོགས་ཀྱི་ཕྲེང་བ་འཛིན་པའོ། །ལྷོ་ཕྱོགས་ཀྱི་འདབ་མ་ལ་དམར་མོ་འབར་མ་དམར་མོ་གཡས་པ་རྣམས་ཀྱིས་མར་མེ་དང་དོ་ཤལ་དང་ཅོད་པན་དང་ལག་གདུབ་དང་། [144a.5]གཡོན་པ་རྣམས་ཀྱིས་གོས་དང་སྐ་རགས་དང་རིན་པོ་ཆེའི་རྣ་རྒྱན་དང་། རྐང་གདུབ་འཛིན་པའོ། །ནུབ་ཏུ་སེར་མོ་འབར་མ་སྐུ་མདོག་སེར་མོ། གཡས་པ་རྣམས་ཀྱིས་དུང་དང་གླིང་བུ་དང་ནོར་བུ་དང་། ཅང་ཏེའུ་དང་། གཡོན་པ་རྣམས་ཀྱིས་པི་ཝང་དང་རྔ་ཟླུམ་དང་འཁར་རྔ་དང་དུང་འཛིན་ [144a.6]པའོ། །བྱང་དུ་དཀར་མོ་འབར་མ་དཀར་མོ་གཡས་པ་རྣམས་ཀྱིས་འོ་མའི་སྣོད་དང་ཆུའི་སྣོད་དང་ལྷའི་སྨན་གྱི་སྣོད་དང་ཆང་གི་སྣོད་དང་། གཡོན་པ་རྣམས་ན་བདུད་རྩིའི་སྣོད་དང་། བཅུད་ལེན་གྲུབ་པའི་སྣོད་དང་ཤིང་ཐོག་གི་སྣོད་དང་བཟའ་བའི་སྣོད་འཛིན་པའོ། །མེ་ལ་སོགས་པ་རྣམས་སུ་དུ་ [144a.7]བ་མ་དང་སྨིག་རྒྱུ་མ་དང་མར་མེ་མ་དང་མཁའ་གསལ་མ་རྣམས་ཀྱི་ལྷ་མོ་སྟེ། རིམ་པ་ཇི་ལྟ་བར་ནག་མོ་དང་དམར་མོ་དང་སེར་མོ་དང་། དཀར་མོའི་མདོག་ཅན་ཕྱག་བརྒྱད་ཀྱིས་རང་རང་གི་མདོག་དང་མཚུངས་པའི་རྔ་ཡབ་བརྒྱད་འཛིན་པའོ། །དེ་དག་གི་རྒྱབ་ཀྱི་ཕྱི་རོལ་དུ་ཡིད་བཞིན་གྱི་ནོར་བུ་དང་ཆོས་ [144b] [144b.1]ཀྱི་གཎྜཱི་དང་དཔག་བསམ་གྱི་ཤིང་དང་ཆོས་ཀྱི་དུང་རྣམས་ནག་པོ་དང་དམར་པོ་དང་སེར་པོ་དང་དཀར་པོའོ། །ནག་པོ་འབར་མ་ལ་སོགས་པ་འདི་བརྒྱད་ནི་ཞབས་གཉིས་མཉམ་པའི་སྟང་སྟབས་ཀྱིས་གནས་པའོ། །སྣ་ཚོགས་ཡུམ་ལ་སོགས་པའི་ལྷ་མོ་ཐམས་ཅད་ནི་ཕྱག་རྒྱ་ལྔ་དང་ལྡན་པ་ཕྱག་བརྒྱད་པ་ཞལ་ [144b.2]བཞི་པ་སྤྱན་བཅུ་གཉིས་པའོ། །དེ་ལ་སྣ་ཚོགས་ཡུམ་གྱི་ཤར་དང་ལྷོ་དང་ནུབ་དང་བྱང་གི་རིམ་པས་སེར་པོ་དང་དཀར་པོ་དང་། སྔོན་པོ་དང་དམར་པོའི་ཞལ་རྣམས་ཏེ་དེ་ལྟར་ལྷ་མོ་སེར་མོ་རྣམས་སོ། །ནག་པོ་རྣམས་ཀྱི་ནི་ནག་པོ་དང་དམར་པོ་དང་སེར་པོ་དང་དཀར་པོའི་ཞལ་རྣམས་སོ། །དམར་པོ་རྣམས་ [144b.3]ཀྱི་ནི་དམར་པོ་དང་སེར་པོ་དང་། དཀར་པོ་དང་སྔོན་པོའི་ཞལ་རྣམས་སོ། །དཀར་པོ་རྣམས་ཀྱི་ནི་དཀར་པོ་དང་། ནག་པོ་དང་དམར་པོ་དང་སེར་པོའི་ཞལ་རྣམས་སོ། །རིམ་པ་གཉིས་པ་དང་གསུམ་པ་དག་གི་ལྷ་རྣམས་ནི་ཕྱག་དྲུག་པ་ཞལ་གསུམ་པ་སྤྱན་དགུ་པ་རྣམས་སོ། །དེ་ལ་ཤར་གྱི་ཕྱོགས་ [144b.4]རྣམས་སུ་དོན་ཡོད་གྲུབ་པ་ནག་པོ་དང་དམར་པོ་དང་དཀར་པོའི་ཞལ་ལོ། །ཕྱག་གཡས་པ་རྣམས་ཀྱིས་རལ་གྲི་དང་གྲི་གུག་དང་རྩེ་གསུམ་པ་དང་། གཡོན་པ་རྣམས་ཀྱིས་ཕུབ་དང་། ཐོད་པ་དང་ཁ་ཊྭཱཾ་ག་འཛིན་པ་སྤྱན་མས་འཁྱུད་པའོ། །ལྷོའི་ཕྱོགས་སུ་རིན་ཆེན་འབྱུང་ལྡན་དམར་པོ་དམར་པོ་ [144b.5]དང་དཀར་པོ་དང་ནག་པོའི་ཞལ་ལོ། །གཡས་པ་རྣམས་ཀྱིས་མེའི་མདའ་དང་རྡོ་རྗེ་ལྕགས་ཀྱུ་དང་ཅང་ཏེའུ་བསྣམས་པ། གཡོན་པ་རྣམས་ནི་གཞུ་དང་རྡོ་རྗེ་ཞགས་པ་དང་རིན་པོ་ཆེ་ཆ་དགུ་པ་འཛིན་པ་མཱ་མ་ཀཱི་ལ་འཁྱུད་པའོ། །ནུབ་ཏུ་རྣམ་པར་སྣང་མཛད་སེར་པོ་སེར་པོ་དང་དཀར་པོ་དང་ནག་པོའི་ [144b.6]ཞལ་ལོ། །གཡས་པ་རྣམས་ཀྱིས་འཁོར་ལོ་དང་དབྱུག་པ་དང་། མི་འཇིགས་པའི་ཕྱག་རྒྱས་རྡོ་རྗེའོ། །གཡོན་པ་རྣམས་ཀྱིས་མདུང་དང་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་འཛིན་པ་སྒྲོལ་མ་ལ་འཁྱུད་པའོ། །བྱང་དུ་སྣང་བ་མཐའ་ཡས་དཀར་པོ་དཀར་པོ་དང་ནག་པོ་དང་དམར་པོའི་ཞལ་ལོ། ། [144b.7]གཡས་པ་རྣམས་ཀྱིས་ཐོ་བ་དང་མདུང་དང་རྩེ་གསུམ་པའོ། །གཡོན་པ་རྣམས་ཀྱིས་པདྨ་དཀར་པོ་དང་། མེ་ལོང་དང་བགྲང་ཕྲེང་རྣམས་འཛིན་པ་གོས་དཀར་མོ་ལ་འཁྱུད་པའོ། །བཞི་པོ་འདི་དག་ནི་པདྨ་དཀར་པོ་དང་ཉི་མ་ལ་གནས་པ་རལ་པའི་ཐོར་ཚུགས་ཅན་རྩ་བ་དང་གཡས་གཡོན་གྱི་ [145a] [145a.1]རིམ་པས་ཞལ་རྣམས་སོ། །མེ་དང་བདེན་བྲལ་དང་རླུང་དང་དབང་ལྡན་གྱི་མཚམས་རྣམས་སུ་པདྨ་དམར་པོ་དང་ཟླ་བའི་གདན་ལ་སྒྲོལ་མ་དང་གོས་དཀར་མོ་དང་། སྤྱན་མ་དང་མཱ་མ་ཀཱི་རྣམས་རིམ་པ་བཞིན་དུ་དོན་ཡོད་གྲུབ་པ་དང་རིན་ཆེན་འབྱུང་ལྡན་དང་། རྟག་པ་དང་། སྣང་ [145a.2]བ་མཐའ་ཡས་དང་མཚུངས་པ་རྣམ་པར་སྣང་མཛད་དང་། སྣང་བ་མཐའ་ཡས་དང་། དོན་ཡོད་གྲུབ་པ་དང་། རིན་ཆེན་འབྱུང་ལྡན་རྣམས་ཀྱིས་སྙོམས་པར་ཞུགས་པའོ། །ཡང་ན་སྒྲོལ་མའི་ཁ་ཊྭཱཾ་གའི་གནས་སུ་ཨུཏྤལའོ། །གཞོགས་བརྒྱད་དུ་བདུད་རྩིའི་བུམ་པ་བརྒྱད་དོ། །རིམ་པ་ [145a.3]གསུམ་པའི་སྣམ་བུ་ལ་ཤར་སྒོའི་གཡོན་ངོས་སུ་ཀུན་དུ་བཟང་པོ་སྔོན་པོ་གཡས་པ་རྣམས་ཀྱིས་རྡོ་རྗེ་དང་། གྲི་གུག་དང་དགྲ་སྟ་འཛིན་པ་གཡོན་པ་རྣམས་དྲིལ་བུ་དང་། ཐོད་པ་དང་ཚངས་པའི་མགོ་བོ་འཛིན་པ་སྟེ་ཚངས་པའི་མགོ་བོའི་གནས་སུ་ཡང་ན་ཨུཏྤལའོ། །འདི་ནི་ཆོས་ཀྱི་དབྱིངས་ [145a.4]ཀྱི་རྡོ་རྗེ་མ་ལ་སྙོམས་པར་ཞུགས་པའོ། །ཤར་སྒོའི་ལྷོ་རུ་ནམ་མཁའི་སྙིང་པོ་དོན་ཡོད་གྲུབ་པ་ལྟ་བུའི་དྲི་རྡོ་རྗེ་མ་ལ་འཁྱུད་པའོ། །ལྷོ་སྒོའི་གཡོན་ལོགས་སུ་ཕྱག་ན་རྡོ་རྗེ་ལྗང་གུ་གཡས་པ་རྣམས་ཀྱིས་རྡོ་རྗེ་དང་གྲི་གུག་དང་དགྲ་སྟ་དང་། གཡོན་པ་རྣམས་ཀྱིས་དྲིལ་བུ་དང་། ཐོད་པ་དང་ཚངས་ [145a.5]པའི་མགོ་བོ་འཛིན་པ། སྒྲ་རྡོ་རྗེ་མ་ལ་འཁྱུད་པའོ། །གཡས་སུ་སའི་སྙིང་པོ་རིན་ཆེན་འབྱུང་ལྡན་ལྟ་བུ་གཟུགས་རྡོ་རྗེ་མ་ལ་སྙོམས་པར་ཞུགས་པའོ། །ནུབ་ཀྱི་སྒོའི་གཡོན་ལོགས་སུ་ཆོས་ཀྱི་དབྱིངས་ཀྱི་རྡོ་རྗེ་མ་ཕྱག་ན་རྡོ་རྗེ་ལྟ་བུ་ཀུན་དུ་བཟང་པོས་འཁྱུད་པའོ། །གཡས་ལོགས་སུ་སྒྲིབ་པ་ཐམས་ [145a.6]ཅད་རྣམ་པར་སེལ་བ་རྣམ་པར་སྣང་མཛད་ལྟ་བུ་རེག་བྱ་རྡོ་རྗེ་མ་ལ་འཁྱུད་པའོ། །བྱང་སྒོའི་གཡོན་ལོགས་སུ་སྒྲ་རྡོ་རྗེ་མ་ཀུན་དུ་བཟང་པོ་ལྟ་བུ་ཕྱག་ན་རྡོ་རྗེས་འཁྱུད་པའོ། །གཡས་ལོགས་སུ་འཇིག་རྟེན་དབང་ཕྱུག་འོད་དཔག་མེད་དང་མཚུངས་པ་རོ་རྡོ་རྗེ་མ་ལ་འཁྱུད་པའོ། །ཕྱོགས་བྲལ་རྣམས་ཀྱི་ [145a.7]མེར་རེག་བྱ་རྡོ་རྗེ་མ་སྒྲོལ་མ་ལྟ་བུ་སྒྲིབ་པ་རྣམ་པར་སེལ་བས་སྟོམས་པར་ཞུགས་པའོ། །བདེན་བྲལ་དུ་རོ་རྡོ་རྗེ་མ་གོས་དཀར་མོ་ལྟ་བུ་འཇིག་རྟེན་དབང་ཕྱུག་གིས་འཁྱུད་པའོ། །རླུང་དུ་དྲི་རྡོ་རྗེ་མ་སྤྱན་མ་ལྟ་བུ་ནམ་མཁའི་སྙིང་པོས་འཁྱུད་པའོ། །དབང་ལྡན་དུ་གཟུགས་རྡོ་རྗེ་མ་མཱ་མ་ཀཱི་ལྟ་བུ་སའི་ [145b] [145b.1]སྙིང་པོས་འཁྱུད་པའོ། །འདིར་དོན་ཡོད་གྲུབ་པ་ལ་སོགས་པ་དེ་བཞིན་གཤེགས་པ་རྣམས་དང་། བྱང་ཆུབ་སེམས་དཔའ་རྣམས་ནི་རྡོ་རྗེའི་གདན་གྱིས་བཞུགས་བའོ། །སྒྲོལ་མ་ལ་སོགས་པའི་ལྷ་མོ་རྣམས་ནི་པདྨའི་གདན་གྱི་འདུག་སྟངས་ཀྱིས་བཞུགས་པའོ། །ཤར་གྱི་སྒོ་ལ་ [145b.2]ཁྲོ་བོ་ཤིན་ཏུ་སྟོབས་དོན་ཡོད་གྲུབ་པ་ལྟ་བུ་རེངས་བྱེད་མས་ཡང་དག་པར་འཁྱུད་པ་དེ་ཡང་སྤྱན་མ་ལྟ་བུའོ། །ལྷོ་སྒོ་ལ་རྨོངས་བྱེད་ནི་རིན་ཆེན་འབྱུང་ལྡན་ལྟ་བུ་ལ་རྒྱལ་བྱེད་མས་སྙོམས་པར་ཞུགས་པ་དེ་ཡང་མཱ་མ་ཀཱི་ལྟ་བུའོ། །ནུབ་སྒོར་རེངས་བྱེད་ནི་རྣམ་པར་སྣང་མཛད་ལྟ་བུ་ཤིན་ཏུ་ [145b.3]སྟོབས་མ་ལ་འཁྱུད་པ་དེ་ཡང་སྒྲོལ་མ་ལྟ་བུའོ། །བྱང་སྒོར་ང་རྒྱལ་བྱེད་ནི་ཚེ་དཔག་མེད་ལྟ་བུ་རྨོངས་བྱེད་མ་ལ་ཡང་དག་པར་འཁྱུད་པ་དེ་ཡང་གོས་དཀར་མོ་ལྟ་བུའོ། །འོན་ཀྱང་ཁྲོ་བོ་འདི་རྣམས་ནི་གཡས་བརྐྱང་གིས་གནས་པའོ། །ཁྲོ་བོའི་ལྷ་མོ་རྣམས་ནི་གཡོན་བརྐྱང་གིས་གནས་ [145b.4]པའོ། །དེ་ལ་ལྷ་ཕོ་རྣམས་ཀྱི་གདན་ནི་པདྨ་དཀར་པོ་དག་ལ་ཉི་མ་རྣམས་སོ། །ལྷ་མོ་རྣམས་ཀྱི་གདན་ནི་པདྨ་དམར་པོ་དག་ལ་ཟླ་བའི་དཀྱིལ་འཁོར་རྣམས་སོ། །ཡང་ན་ནག་པོ་དང་། དཀར་པོ་དང་། ལྗང་གུ་རྣམས་ཟླ་བ་ལ་གནས་པའོ། །དམར་པོ་རྣམས་དང་། སེར་པོ་ [145b.5]རྣམས་དང་། ཀུན་དུ་བཟང་པོ་དང་། སྒྲ་རྡོ་རྗེ་མ་ནི་ཉི་མ་ལ་གནས་པའོ། །དེ་དག་གི་རིགས་པ་ཡང་དྲི་མ་མེད་པའི་འོད་ལས་གསུངས་སོ། །འདིར་ནི་གང་གི་གནས་སུ་ལྷ་རྣམས་གང་གསུངས་པ་དེ་དང་དེར་ནི་གཙོ་བོ་ཡིན་པའི་ཕྱིར་དཀྱིལ་འཁོར་གྱི་བདག་པོ་ལ་ཞལ་མངོན་པར་ཕྱོགས་ [145b.6]པ་སྟེ་དེའི་པང་དུ་གནས་པ་ནི་མ་ཡིན་ནོ། །འདིར་འདབ་མ་ལ་གནས་པའི་ལྷ་མོ་བརྒྱད་དང་། བུམ་པ་རྣམས་དང་། ཆོས་ཀྱི་དུང་ལ་སོགས་པ་སྤངས་པར་འགྱུར་བས་ཉི་ཤུ་རྩ་ལྔའི་བདག་ཉིད་ཀྱི་དཀྱིལ་འཁོར་ཡང་བསྒོམ་པར་བྱའོ། །དེའི་ཚེ་བཅོམ་ལྡན་འདས་སྟེང་དུ་གནས་པར་གྱུར་ཏེ་དཔལ་ [145b.7]གསང་བ་འདུས་པ་ལྟ་བུའོ། །ཤར་གྱི་འདོད་ཡོན་ལ་རྟ་བབས་ཀྱི་གཡོན་གྱི་ཀ་བའི་རྩ་བའི་གཡོན་པ་ལ་དྲི་ཆབ་མ་ནག་མོ་དྲིའི་དུང་ཕོར་ཕྱག་ན་འཛིན་པའོ། །གཡས་ཀྱི་ཀ་བའི་རྩ་བའི་གཡས་ལ་ཕྲེང་བ་མ་སྔོན་མོ་མེ་ཏོག་གི་ཕྲེང་བ་འཛིན་པའོ། །ལྷོའི་སྣམ་བུ་ལ་བདུག་སྤོས་མ་ [146a] [146a.1]དམར་མོ་ཕྱག་ན་བདུག་སྤོས་ཀྱི་སྣོད་འཛིན་པའོ། །མར་མེ་མ་དམར་མོ་ཕྱག་ན་མར་མེའི་མཆོད་སྡོང་འཛིན་པའོ། །ནུབ་ཏུ་སྒེག་མོ་སེར་མོ་ཅོད་པན་སེར་པོ་འཛིན་པའོ། །བཞད་མ་སེར་མོ་དོ་ཤལ་སེར་པོ་འཛིན་པའོ། །བྱང་དུ་བདུད་རྩི་མ་ [146a.2]ཞལ་ཟས་མ་ཞེས་བྱ་བའི་མིང་གི་རྣམ་གྲངས་ཅན་དཀར་མོ་ཕྱག་ན་འབྲས་བུ་དཀར་པོ་འཛིན་པའོ། །འབྲས་བུ་མི་ཟད་པའམ། བདུད་རྩིའི་འབྲས་བུ་ཞེས་མིང་གི་རྣམ་གྲངས་ཅན་ཕྱག་ན་བདུད་རྩི་དཀར་པོས་གང་བའི་སྣོད་འཛིན་པའོ། །སྟེགས་བུ་ཐམས་ཅད་ལ་ཡང་མཆོད་ [146a.3]པ་སྣ་ཚོགས་འཛིན་པའི་ལྷ་མོ་གྲངས་མེད་པའོ། །ཤར་གྱི་རྟ་བབས་ཀྱི་མཆོད་པའི་ལྷ་མོའི་གནས་སུ་གར་མ་སྔོན་མོ་གར་གྱི་ཚུལ་གྱིས་གོས་འཛིན་པའོ། །ལྷོར་འདོད་པ་མ་དམར་མོ་པདྨ་ཕྱག་ན་ལྡན་པའོ། །ནུབ་ཏུ་སྒྲ་མ་སེར་མོ་རྔ་པ་ཊ་ཧ་བརྡུང་བའོ། །བྱང་དུ་གླུ་མ་དཀར་མོ་ [146a.4]རྡོ་རྗེ་འཛིན་མའོ། །བདུད་རྩི་མ་ལ་སོགས་པའི་དགོད་པ་འདི་དག་ནི་དབང་བསྐུར་བའི་ལེའུའི་འགྲེལ་པའི་རིམ་པའོ། །དེ་སྐད་དུ་སྒྲུབ་ཐབས་ཀྱི་ལེའུའི་འགྲེལ་པ་ལས་བྱང་ཕྱོགས་སུ་སྒྲ་མ་དང་། གར་མ་དང་། ནམ་མཁའ་རུ་གླུ་མ་དང་འདོད་མའོ། །འོག་གི་འདོད་ཡོན་གྱི་སྣམ་ [146a.5]བུ་ལ་ཞལ་ཟས་མ་དང་། བདུད་རྩིའི་འབྲས་བུ་མ་ཞེས་གསུངས་པ། དེ་དག་ལ་ཡང་དབང་བསྐུར་གྱི་ལེའུ་ལས་གསུངས་པའི་དགོད་པ་ཁོ་ནས་རིག་པར་བྱ་སྟེ། དེའི་རྗེས་སུ་མཐུན་པའི་གཞུང་གི་སྦྱོར་བ་ཉིད་ཀྱིས་སོ། །དེ་ལས་གཞན་དུ་ནི་སྔ་མ་དང་ཕྱི་མ་འགལ་བར་འགྱུར་ [146a.6]རོ། །ལྷ་མོ་བཅུ་གཉིས་པོ་འདི་དག་ནི་པདྨའི་འདུག་སྟངས་ཀྱིས་གནས་པའོ། །གསུང་གི་དཀྱིལ་འཁོར་ལ་ཕྱོགས་ཀྱི་པདྨ་རྣམས་ནི་དམར་པོ་དང་། མཚམས་ཀྱི་རྣམས་ནི་དཀར་པོའོ། །དེ་རྣམས་ཟླ་བ་དང་། ཉི་མའི་གདན་དང་བྲལ་བ་ས་གའི་འདུག་སྟངས་ཀྱིས་གནས་པའི་ [146a.7]ལྷ་མོ་རྣམས་སོ། །དེ་ལ་ཡི་དྭགས་དམར་པོའི་སྟེང་དུ་གནས་པའི་ཤར་གྱི་ཆུ་སྐྱེས་ཀྱི་ཟེ་འབྲུ་ལ་ཙ་རྩི་ཀ་ནག་པོ་ཞལ་གཅིག་པ་སྤྱན་གསུམ་པ་གཡས་པའི་ཕྱག་གཉིས་ཀྱིས་གྲི་གུག་དང་། རྩེ་གསུམ་པ་གཡོན་པ་གཉིས་ཀྱིས་ཐོད་པ་དང་། ཁ་ཊྭཱཾ་ག་འཛིན་པ་དབང་པོ་ལ་འཁྱུད་པའོ། ། [146b] [146b.1]ཤར་ལ་སོགས་པའི་འདབ་མ་བརྒྱད་ལ་འཇིགས་བྱེད་མ་དང་། དྲག་མོ་དང་། མཆེ་བ་ནག་མོ་དང་། ཁ་ནས་མེ་འབར་བ་དང་། རླུང་ཤུགས་མ་དང་། རབ་གཏུམ་མོ་དང་། དྲག་མིག་མ་དང་། སྣ་སྦོམ་མོ་རྣམས་སོ། །ནམ་མཁའ་ལྡིང་གི་སྟེང་དུ་མེའི་ཆུ་སྐྱེས་ཀྱི་ཟེ་འབྲུ་ལ་ཁྱབ་འཇུག་མ་ [146b.2]ནག་མོ་གཡས་དག་གིས་འཁོར་ལོ་དང་དབྱུག་ཏོ། གཡོན་པ་གཉིས་ཀྱིས་པདྨ་དང་། དུང་འཛིན་པ་ཚངས་པ་ལ་འཁྱུད་པའོ། །འདབ་མ་རྣམས་ལ་དཔལ་མོ་དང་། སྒྱུ་མ་མོ་དང་། གྲངས་མ་དང་། ཕུན་སུམ་ཚོགས་མ་དང་། རྣམ་པར་རྒྱལ་མ་དང་། དཔལ་རྒྱལ་བྱེད་མ་དང་། དཔལ་ [146b.3]འཁོར་ལོ་མ་རྣམ་སོ། །མ་ཧེའི་གདན་ལ་ལྷོའི་པདྨའི་ཟེ་འབྲུ་ལ་གནས་པའི་ཕག་མོ་དམར་མོ་ཕག་གདོང་མ་གཡས་གཉིས་ན་དབྱུག་པ་དང་རལ་གྲི། གཡོན་པ་གཉིས་ན་ལྕགས་སྒྲོག་དང་། ཕུབ་འཛིན་པ་དྲག་པོ་ལ་འཁྱུད་པའོ། །འདབ་མ་རྣམས་ལ་ཀེང་རུས་མ་དང་། དུས་མཚན་མ་དང་། [146b.4]རབ་ཏུ་ཁྲོ་གདོང་མ་དང་། ལྕེ་ནག་མ་དང་། གཙིགས་མ་དང་། ནག་མོ་དང་། འཇིགས་མ་དང་། གཟུགས་ངན་མ་རྣམས་སོ། །རྨ་བྱའི་སྟེང་དུ་བདེན་བྲལ་གྱི་ཆུ་སྐྱེས་ཀྱི་ཟེ་འབྲུ་ལ་གནས་པའི་གཞོན་ནུ་མ་དམར་མོ་ཞལ་དྲུག་མ། ཕྱག་གཡས་པ་གཉིས་ན་ཤཀ་ཏི་དང་ལྕགས་ཀྱུ། གཡོན་ [146b.5]པ་གཉིས་ན་རིན་པོ་ཆེ་དང་། ཞགས་པ་ཚོགས་ཀྱི་བདག་པོ་ལ་ཡང་དག་པར་འཁྱུད་པའོ། །འདབ་མ་རྣམས་ལ་པདྨ་དང་། ཡན་ལག་མེད་མ་དང་། གཞོན་ནུ་མ་དང་། རིགས་ཀྱི་བདག་པོའི་འགྲོས་མ་དང་། རིན་ཆེན་ཕྲེང་མ་དང་། ཤིན་ཏུ་སྤྱན་མ་དང་། སྡུག་མ་དང་བཟང་མོའོ། ། [146b.6]ས་སྲུང་གི་སྟེང་དུ་ནུབ་ཀྱི་པདྨའི་ཟེ་འབྲུ་ལ་དབང་མོ་སེར་མོ་གཡས་པ་གཉིས་ན་རྡོ་རྗེ་དང་མདའ། གཡོན་པ་གཉིས་ན་དྲིལ་བུ་དང་། གཞུ་འཛིན་པ་བདེན་བྲལ་གྱིས་འཁྱུད་པའོ། །འདབ་མ་རྣམས་ལ་རྡོ་རྗེ་འོད་མ་དང་། རྡོ་རྗེ་ལུས་ཅན་མ་དང་། གསེར་ལྡན་མ་དང་། ལས་དབང་མ་དང་། རི་མོ་ [146b.7]སྣ་ཚོགས་མ་དང་། ཆུ་ཤིང་མ་དང་། ཨ་ཉ་ལགས་དང་། ཤིན་ཏུ་མིག་འབྲས་མ་རྣམས་སོ། །ངང་པའི་སྟེང་དུ་རླུང་གི་ཆུ་སྐྱེས་ཀྱི་ཟེ་འབྲུ་ལ་ཚངས་པ་མ་སེར་མོ་ཞལ་བཞི་མ་ཕྱག་གཡས་པ་གཉིས་ན་པདྨ་དང་། ཚངས་པའི་དབྱུག་པ་དང་། གཡོན་པ་གཉིས་ན་སྤྱི་བླུགས་དང་སྣོད་འཛིན་ [147a] [147a.1]པ་ཁྱབ་འཇུག་ལ་ཡང་དག་པར་འཁྱུད་པའོ། །འདབ་མ་རྣམས་ལ་སཱ་བིད་ཏྭཱི་དང་། པདྨ་ཅན་དང་། ཆུ་སྐྱེས་ཅན་མ་དང་། བློ་མ་དང་། ངག་གི་དབང་ཕྱུག་མ་དང་། གླུ་མཁན་མ་དང་། གློག་མ་དང་། དྲན་མ་རྣམས་སོ། །གླང་གི་སྟེང་དུ་བྱང་གི་ཆུ་སྐྱེས་ཟེ་འབྲུ་ལ་ [147a.2]དྲག་མོ་དཀར་མོ་གཡས་པ་གཉིས་ན་རྩེ་གསུམ་པ་དང་ཅང་ཏེའུ། གཡོན་པ་གཉིས་ན་ཁ་ཊྭཱཾ་ག་དང་། སྦྲུལ་འཛིན་པ། གཤིན་རྗེ་ལ་འཁྱུད་པའོ། །འདབ་མ་རྣམས་ལ་གཽ་རཱི་དང་། གང་ག་མ་དང་། གཏུམ་མ་དང་། མྱུར་མ་དང་། ཏེ་ཏེ་ལ་དང་། མཚན་ཉིད་མ་དང་། དམར་སེར་མ་ [147a.3]དང་། ནག་མོ་རྣམས་སོ། །སེང་གེའི་སྟེང་དུ་དབང་ལྡན་གྱི་པདྨའི་ཟེ་འབྲུ་ལ་ཕུན་སུམ་ཚོགས་མ་དཀར་མོ་གཡས་པ་གཉིས་ན་པདྨ་དང་བགྲང་ཕྲེང་། གཡོན་པ་གཉིས་ན་པདྨ་དང་རིན་ཆེན་འཛིན་པ། གདོང་དྲུག་གིས་འཁྱུད་པའོ། །འདབ་མ་རྣམས་ལ་དཔལ་མོ་དང་། ཟླ་བའི་རི་མོ་ [147a.4]དང་། རི་བོང་འཛིན་པའི་ཞལ་མ་དང་། ངང་པའི་མདོག་ཅན་མ་དང་། ཉམས་དགའ་མ་དང་། པདྨའི་དབང་ཕྱུག་མ་དང་། སྤྱན་མྱུར་མ་དང་། དྲི་མ་མེད་པའི་རི་བོང་འཛིན་པའོ། །ཙ་རྩི་ཀ་ལ་སོགས་པ་ལྷ་མོ་བདུན་ཅུ་རྩ་གཉིས་པོ་འདི་དག་ནི་ཕྱག་བཞི་པ་སྤྱན་གསུམ་པ་སྟེ། [147a.5]འདིར་ཁྱད་པར་ནི་འདབ་མའི་ལྷ་མོ་རྣམས་ནི་རོལ་པའི་འདུག་སྟངས་ཀྱིས་གནས་པ་ཁ་དོག་ལ་སོགས་པ་རྣམས་རང་རང་གི་གཙོ་མོ་དང་མཚུངས་པ། རང་རང་གི་གཙོ་མོ་ལ་གཟིགས་པའོ། །གཙོ་མོ་བརྒྱད་པོ་འདི་དག་ནི་ས་གའི་རྐང་སྟབས་ཀྱིས་གནས་པ། འཁོར་ལོའི་དབང་ཕྱུག་ [147a.6]ལ་གཟིགས་པའོ། །བརྒྱད་པོ་འདི་རྣམས་ཀྱིས་འཁྱུད་པ་ས་གའི་རྐང་སྟབས་ཀྱིས་གནས་པ། རྗེས་སུ་གཙོ་བོ་རྣམས་དེ་ལ་མངོན་དུ་ཕྱོགས་པའོ། །སྐུའི་དཀྱིལ་འཁོར་གྱི་སྣམ་བུ་རྣམས་ལ་ཉི་ཟླ་གཉིས་དང་བྲལ་བའི་པདྨ་བཅུ་གཉིས་སོ། །དེ་ལ་ཕྱོགས་ཀྱི་པདྨ་རྣམས་ནི་དམར་ [147a.7]པོའོ། །མཚམས་ལ་གནས་པ་རྣམས་ནི་དཀར་པོའོ། །པདྨ་རེ་རེ་ལ་འདབ་མ་རྣམས་ཀྱི་རིམ་པ་དང་པོ་ལ་འདབ་མ་བཞི་དང་། གཉིས་པ་ལ་བརྒྱད་དང་། གསུམ་པ་ལ་བཅུ་དྲུག་སྟེ། དེ་དག་གི་ཕྱི་རོལ་གྱི་རིམ་པའི་ཤར་གྱི་འདབ་མ་ནས་བརྩམས་ནས་གཡས་སྐོར་གྱིས་ཚེས་ [147b] [147b.1]གཅིག་ལ་སོགས་པའི་ཚེས་བརྒྱད་ཀྱི་ལྷ་མོ་རྣམས་དགོད་པར་བྱའོ། །ཟེ་འབྲུ་ལ་ཉ་དང་སྟོང་ནི་གཙོ་བོ་ཉིད་ཀྱིས་གནས་པའོ། །དེ་ལ་ཉ་ནི་ཤེས་རབ་མ། སྟོང་ནི་ཐབས་བདེན་བྲལ་ལ་སོགས་པའོ། །ལྷ་དེ་རྣམས་ཐམས་ཅད་ཀྱང་ཕྱག་བཞི་པའོ། །དེ་ལ་ཤར་གྱི་སྒོའི་གཡས་ [147b.2]ལོགས་སུ་ཡི་དྭགས་དམར་པོའི་སྟེང་དུ་པདྨའི་ཟེ་འབྲུ་ལ་བདེན་བྲལ་ནག་པོ་ཕྱག་གཡས་གཉིས་ན་རལ་གྲི་དང་གྲི་གུག་གོ། །གཡོན་གཉིས་ན་ཕུབ་དང་ཐོད་པའོ། །ཁ་ལ་མེ་འབར་བའི་སྲིན་མོ་ལ་ཡང་དག་པར་འཁྱུད་པའོ། །འདིའི་ནག་པ་ཟླ་བའི་ཚེས་རྣམས་སོ། །མེར་རི་དྭགས་ཀྱི་ [147b.3]སྟེང་དུ་པདྨའི་ཟེ་འབྲུ་ལ་རླུང་ལྷ་ནག་པོ་གཡས་པ་གཉིས་ན་དཔག་བསམ་ཤིང་དང་། མེ་ཏོག་པ་རི་ཛ་ཏའོ། །གཡོན་པ་གཉིས་ན་རིན་པོ་ཆེ་ཨིནྡྲ་ནཱི་ལ་དང་། ཨུཏྤལ་སྔོན་པོ་འཛིན་པའོ། །རབ་ཏུ་གཏུམ་མོ་ལ་འཁྱུད་པའོ། །འདིའི་ས་གའི་ཟླ་བའི་ཚེས་རྣམས་སོ། །ལྷོ་སྒོའི་གཡོན་ལོགས་ [147b.4]སུ་མ་ཧེའི་སྟེང་དུ་པདྨའི་ཟེ་འབྲུ་ལ་གཤིན་རྗེ་དམར་པོ་ནག་པོ་ལ་ཡང་དག་པར་འཁྱུད་པ་གཡས་གཉིས་ན་དབྱུག་པ་དང་རལ་གྲི་གཡོན་གཉིས་ན་ལྕགས་སྒྲོག་དང་ཞགས་པའོ། །འདིའི་སྦོའི་ཟླ་བའི་ཚེས་རྣམས་སོ། །གཡས་ངོས་སུ་ལུག་གི་སྟེང་དུ་ཆུ་སྐྱེས་ཀྱི་ཟེ་འབྲུ་ལ་མེ་ལྷ་དམར་མོ་ཆུ་ལྷ་མ་ལ་ [147b.5]འཁྱུད་པ་ཕྱག་གཉིས་ན་ཤཀ་ཏི་དང་དབྱུག་པ། གཡོན་པ་གཉིས་ན་པདྨ་དང་སྤྱི་བླུགས་སོ། །འདིའི་སྣྲོན་གྱི་ཟླ་བའི་ཚེས་རྣམས་སོ། །བདེན་བྲལ་དུ་རྨ་བྱའི་སྟེང་དུ་ཆུ་སྐྱེས་ཀྱི་ཟེ་འབྲུ་ལ་གདོང་དྲུག་དམར་པོ་གཡས་པ་གཉིས་ན་ཤཀ་ཏི་དང་མདུང་། གཡོན་པ་གཉིས་ན་རིན་པོ་ཆེ་དང་མེ་ལོང་ [147b.6]འཛིན་པ། ཕུན་སུམ་ཚོགས་མ་ལ་འཁྱུད་པའོ། །འདིའི་ཆུ་སྟོད་ཀྱི་ཟླ་བའི་ཚེས་རྣམས་སོ། །ནུབ་ཀྱི་སྒོའི་གཡོན་ངོས་སུ་གླང་པོ་ཆེའི་སྟེང་དུ་པདྨའི་ཟེ་འབྲུ་ལ་ལུས་ངན་པོ་སེར་པོ་ལུས་ངན་མ་ལ་ཡང་དག་པར་འཁྱུད་པ་ཕྱག་གཡས་པ་གཉིས་ན་ནོར་བུ་རིན་པོ་ཆེ་དང་དབྱུག་ཏོ། གཡོན་པ་ [147b.7]གཉིས་ན་ནེའུ་ལེ་དང་པདྨའོ། །འདིའི་རྒྱལ་གྱི་ཟླ་བའི་ཚེས་རྣམས་སོ། །གཡས་ཕྱོགས་སུ་གླང་པོ་ཆེའི་སྟེང་དུ་པདྨའི་ཟེ་འབྲུ་ལ་དབང་པོ་སེར་པོ་རླུང་ལྷ་མ་ལ་ཡང་དག་པར་འཁྱུད་པའོ། །གཡས་པ་གཉིས་ན་རྡོ་རྗེ་དང་མེའི་མདའ་གཡོན་གཉིས་ན་དྲིལ་བུ་དང་གཞུའོ། །འདིའི་ཐ་སྐར་གྱི་ཟླ་བའི་ [148a] [148a.1]ཚེས་རྣམས་སོ། །རླུང་དུ་ངང་པའི་སྟེང་དུ་ཆུ་སྐྱེས་ཀྱི་ཟེ་འབྲུ་ལ་ཚངས་པ་སེར་པོ་གློག་མ་ལ་ཡང་དག་པར་འཁྱུད་པ། གཡས་པ་གཉིས་ན་ཁབ་དང་བགྲང་ཕྲེང་ངོ་། །གཡོན་གཉིས་ན་པདྨ་དང་རྫ་སྣོད་དོ། །འདིའི་སྨིན་དྲུག་གི་ཟླ་བའི་ཚེས་རྣམས་སོ། །བྱང་སྒོའི་གཡོན་ངོས་སུ་གླང་གི་ [148a.2]སྟེང་དུ་པདྨའི་ཟེ་འབྲུ་ལ་དྲག་པོ་དཀར་པོ་གཽ་རཱི་ཡང་དག་པར་སྙོམས་པར་ཞུགས་པ་གཡས་གཉིས་ན་རྩེ་གསུམ་དང་མདའ། གཡོན་གཉིས་ན་སྦྲུལ་གྱིས་དཀྲིས་པའི་ཁ་ཊྭཱཾ་ག་དང་གཞུའོ། །འདིའི་མགོའི་ཟླ་བའི་ཚེས་རྣམས་སོ། །གཡས་སུ་ཆུ་སྲིན་གྱི་སྟེང་དུ་པདྨའི་ཟེ་འབྲུ་ལ་རྒྱ་མཚོའི་ལྷ་དཀར་ [148a.3]པོ་གཡས་གཉིས་ཞགས་པ་དང་རིན་པོ་ཆེའོ། །གཡོན་པ་གཉིས་ན་སྦྲུལ་ཞགས་དང་ཆུ་ཤེལ་གྱི་ནོར་བུ་ཕག་མོ་ལ་ཡང་དག་པར་འཁྱུད་པའོ། །འདིའི་གྲོ་བཞིན་གྱི་ཟླ་བའི་ཚེས་རྣམས་སོ། །དབང་ལྡན་དུ་བྱའི་སྟེང་དུ་པདྨའི་ཟེ་འབྲུ་ལ་ཚོགས་ཀྱི་བདག་པོ་དཀར་པོ་གཞོན་ནུ་མ་ལ་ཡང་དག་པར་འཁྱུད་ [148a.4]པ། གཡས་པ་གཉིས་ན་དགྲ་སྟ་དང་རྡོ་རྗེ་གཡོན་པ་གཉིས་ན་ཞགས་པ་དང་རིན་པོ་ཆེའོ། །འདིའི་ཁྲུམས་ཀྱི་ཟླ་བའི་ཚེས་རྣམས་སོ། །ཤར་གྱི་སྒོའི་གཡོན་ངོས་སུ་ནམ་མཁའ་ལྡིང་གི་སྟེང་དུ་པདྨའི་ཟེ་འབྲུ་ལ་ཁྱབ་འཇུག་ནག་པོ་དཔལ་མོ་ལ་ཡང་དག་པར་འཁྱུད་པ། གཡས་གཉིས་ན་འཁོར་ལོ་ [148a.5]དང་དབྱུག་ཏོ། གཡོན་གཉིས་ན་པདྨ་དང་མདུང་ངོ་། །འདིའི་མཆུའི་ཟླ་བའི་ཚེས་རྣམས་སོ། །འདིར་ལྷ་རྣམས་རྡོ་རྗེའི་གདན་གྱི་འདུག་སྟངས་ཀྱིས་གནས་པའོ། །དཔྱིད་ཟླ་འབྲིང་པོ་ལ་སོགས་པའི་ཚེས་ཀྱི་ལྷ་མོ་རྣམས་ནི་རོལ་པའི་འདུག་སྟངས་ཀྱིས་གནས་པ། རང་རང་གི་བདག་པོ་བདེན་བྲལ་ལ་ [148a.6]སོགས་པའི་མདོག་དང་ཕྱག་མཚན་དང་དབྱིབས་རྣམས་མཚུངས་པ་དེ་རྣམས་ལ་ལྟ་བར་བྱེད་པ་རྣམས་ཏེ། དེ་རྣམས་ནི་དཀྱིལ་འཁོར་གྱི་གཙོ་བོ་ལ་གཟིགས་པའོ། །དེ་རྣམས་ཀྱིས་འཁྱུད་པའི་ལྷ་རྣམས་ཀྱིས་དེ་ཉིད་ལ་ཞལ་ཕྱོགས་པའོ། །ཤར་གྱི་སྒོ་རུ་ཕག་པ་ནག་པོ་བདུན་གྱིས་དྲངས་ [148a.7]པའི་ཤིང་རྟ་ནག་པོ་ལ་དབྱུག་པ་སྔོན་པོ་དོན་ཡོད་གྲུབ་པ་ལྟ་བུའོ། །འདི་ཡིས་འཁྱུད་པའི་འོད་ཟེར་ཅན་མ་ནི་སེར་མོ་གཡས་པའི་ཕྱག་གཉིས་ཀྱིས་འཁོར་ལོ་དང་དབྱུག་པ་གཡོན་པ་གཉིས་ཀྱིས་དུང་དང་རིན་པོ་ཆེ་འཛིན་པའོ། །ལྷོ་ཕྱོགས་སུ་རྟ་དམར་པོ་བདུན་གྱིས་དྲངས་པའི་ཤིང་རྟ་དམར་པོ་ལ་ [148b] [148b.1]འདོད་པའི་རྒྱལ་པོ་རིན་ཆེན་འབྱུང་ལྡན་ལྟ་བུའོ། །འདིས་འཁྱུད་པའི་ཙུནྡ་དཀར་པོ་གཡས་པ་གཉིས་ཀྱིས་ཐོ་བ་དང་དུང་། གཡོན་པ་གཉིས་ཀྱིས་པདྨ་དང་མེ་ལོང་ངོ་། །ནུབ་དུ་གླང་པོ་ཆེ་སེར་པོ་བདུན་གྱིས་དྲངས་པའི་ཤིང་རྟ་སེར་པོ་ལ་སྟོབས་པོ་ཆེ་རྣམ་པར་སྣང་མཛད་ལྟ་བུའོ། །འདིས་འཁྱུད་པའི་ [148b.2]རྡོ་རྗེ་ལྕགས་སྒྲོག་མ་ནག་མོ་གཡས་པ་གཉིས་ཀྱིས་རལ་གྲི་དང་རྡོ་རྗེ་གཡོན་པ་གཉིས་ཀྱིས་བུམ་པ་དང་སྦྲུལ་འཛིན་པའོ། །བྱང་དུ་སེང་གེ་དཀར་པོ་བདུན་གྱིས་དྲངས་པའི་ཤིང་རྟ་དཀར་པོ་ལ་མི་གཡོ་བ་འོད་དཔག་མེད་ལྟ་བུའོ། །འདིས་འཁྱུད་པའི་ཁྲོ་གཉེར་ཅན་དམར་པོ་གཡས་པ་གཉིས་ཀྱིས་ [148b.3]མདའ་དང་ལྕགས་ཀྱུ། གཡོན་པ་གཉིས་ཀྱིས་གཞུ་དང་ཞགས་པ་འཛིན་པའོ། །དཀྱིལ་འཁོར་གྱི་བདག་པོའི་སྟེང་གི་ནམ་མཁའ་ལ་ཁ་དོག་ལྔ་པ་མིག་གསུམ་པའི་ནམ་མཁའ་ལྡིང་གིས་དྲངས་པའི་ཤིང་རྟ་ལྗང་གུ་ལ་གཙུག་ཏོར་འཁོར་ལོས་སྒྱུར་བ་ཕྱག་ན་རྡོ་རྗེ་ལྟ་བུའོ། །འདིའི་ཤེས་རབ་ [148b.4]མ་ཤིན་ཏུ་སྔོན་མོ་ཁ་དོག་སྔོན་མོ་གཡས་པ་གཉིས་ཀྱིས་གྲི་གུག་དང་རྡོ་རྗེ། གཡོན་པ་གཉིས་ཀྱིས་ཐོད་པ་དང་དྲིལ་བུ་འཛིན་པའོ། །དཀྱིལ་འཁོར་གྱི་གཙོ་བོའི་འོག་གི་སའི་འོག་ཏུ་རྐང་པ་བརྒྱད་པའི་སེང་གེ་ནག་པོ་བདུན་གྱིས་དྲངས་པའི་ཤིང་རྟ་ནག་པོ་ལ་གནོད་མཛེས་རྒྱལ་པོ་ཀུན་དུ་བཟང་པོ་ [148b.5]ལྟ་བུའོ། །འདིའི་ཤེས་རབ་མ་དྲག་མིག་མ་ལྗང་གུ་གཡས་པ་གཉིས་ཀྱིས་དགྲ་སྟ་དང་རྩེ་གསུམ་པ་གཡོན་པ་གཉིས་སྦྲུལ་གྱི་ཞགས་པ་དང་ཁ་ཊྭཱཾ་ག་འཛིན་པའོ། །འདིར་དབྱུག་པ་སྔོན་པོ་ལ་སོགས་པ་ཁྲོ་བོ་རྣམས་ནི་ཤིང་རྟའི་སྟེང་ན་པདྨ་དཀར་པོ་དང་ཉི་མ་རྣམས་ལ་གཡས་བརྐྱང་གིས་གནས་པ་ [148b.6]གཙོ་བོ་རྣམས་ནི་རང་རང་གི་གནས་ན་གནས་པའི་ཕྱི་རོལ་ལ་དཀྱིལ་འཁོར་གྱི་བདག་པོ་ལ་གཟིགས་པའོ། །འོད་ཟེར་ཅན་མ་ལ་སོགས་པ་ནི་གཡོན་བརྐྱང་གིས་གནས་པ་རྗེས་སུ་གཙོ་མོ་སྟེ། གཞན་གྱི་གནས་སུ་ཕྱིན་པའི་ཕྱིར་ཁྲོ་བོ་རྣམས་ལ་བལྟ་བའོ། །འདིར་ཤིང་རྟ་རྣམས་ཀྱི་ནག་པོ་ལ་སོགས་ [148b.7]པའི་ཁ་དོག་ཉིད་ནི། སྒོའི་དབུས་སུ་ཤིང་རྟ་དག་ནི་རིགས་ཀྱི་དབང་གི་འགྱུར་བ་ཡིན་ཞེས་བྱ་བ་འདིས་གསུངས་སོ། །དེའི་རྗེས་སུ་འབྲངས་ནས་ཕག་པ་ལ་སོགས་པའི་མདོག་ཀྱང་ཤེས་པར་བྱའོ། །རྟ་བབས་ཀྱི་ཀ་བ་འདི་རྣམས་ཀྱི་འོག་ཏུ་འདོད་ཡོན་གྱི་སྣམ་བུའི་གནས་ཀྱི་སྟེང་དང་འོག་ཏུ་ [149a] [149a.1]ཀླུ་རྣམས་སོ། །དེ་ལ་ཤར་གྱི་སྒོའི་གཡོན་དང་གཡས་དག་ཏུ་རླུང་གི་དཀྱིལ་འཁོར་གཉིས་ཀྱི་སྟེང་དུ་རིམ་པ་ཇི་ལྟ་བས་པདྨ་དང་སྟོབས་ཀྱི་རྒྱུ་གཉིས་ཀ་ནག་པོ་ཁྱི་གདོང་མ་དང་། ཁྭ་གདོང་མ་ལ་འཁྱུད་པའོ། །ལྷོ་སྒོའི་མེའི་དཀྱིལ་འཁོར་གཉིས་ཀྱི་སྟེང་དུ་ནོར་རྒྱས་དང་དུང་སྐྱོང་གཉིས་དམར་པོ་ [149a.2]ཕག་གདོང་མ་དང་། བྱ་གདོང་མ་ལ་འཁྱུད་པའོ། །ནུབ་ཀྱི་སྒོར་སའི་དཀྱིལ་འཁོར་གཉིས་ལ་འཇོག་པོ་དང་པདྨ་ཆེན་པོ་གཉིས་སེར་པོ་ཅེ་སྤྱང་མ་དང་ནམ་མཁའ་ལྡིང་གི་གདོང་མ་ལ་འཁྱུད་པའོ། །བྱང་སྒོའི་ཆུའི་དཀྱིལ་འཁོར་གཉིས་ཀྱི་སྟེང་དུ་མཐའ་ཡས་དང་རིགས་ལྡན་གཉིས་དཀར་པོ་སྟག་གདོང་མ་དང་ [149a.3]འུག་གདོང་མ་གཉིས་ལ་འཁྱུད་པའོ། །སྟེང་གི་ནམ་མཁའ་སྟོང་པའི་དཀྱིལ་འཁོར་ལ་རྒྱལ་བ་ལྗང་གུ་སྔོན་མོ་ལ་འཁྱུད་པའོ། །འོག་ཏུ་ས་འོག་ལ་སྟོང་པའི་དཀྱིལ་འཁོར་ལ་རྣམ་པར་རྒྱལ་བ་སྔོན་པོ་རྡོ་རྗེ་མིག་ཅན་མ་ལ་ཡང་དག་པར་འཁྱུད་པའོ། །ཀླུ་ཐམས་ཅད་ཀྱང་རྡོ་རྗེ་གདན་གྱི་འདུག་སྟངས་ཀྱིས་གནས་ [149a.4]པ་ཕྱག་བཞི་དང་ལྡན་པས་གཡས་པ་གཉིས་ན་བདུད་རྩིའི་བུམ་པ་དང་རྡོ་རྗེ། གཡོན་པ་གཉིས་ཀྱིས་པདྨ་དང་རིན་པོ་ཆེ་འཛིན་པའོ། །སའི་དཀྱིལ་འཁོར་གྱི་ཕྱོགས་བྲལ་དབང་ལྡན་ལ་ཉའི་ཟླ་བའི་དཀྱིལ་འཁོར་ཤར་བའོ། །བདེན་བྲལ་དུ་ཉི་མའི་དཀྱིལ་འཁོར་ནུབ་པའི་ཚུལ་ལོ། །མེ་དང་རླུང་གི་དཀྱིལ་འཁོར་ [149a.5]གྱི་དབུས་སུ་དུར་ཁྲོད་ཆེན་པོ་རྣམས་ལ་འཁོར་ལོ་རྩིབས་བརྒྱད་པ་རྣམས་ཏེ་ཕྱོགས་རྣམས་སུ་དམར་པོ་དང་མཚམས་སུ་དཀར་པོའོ། །དེ་ལ་ཤར་གྱི་འཁོར་ལོ་ལ་ཁྱི་གདོང་མ་ནག་མོའོ། །ལྷོར་ཕག་གདོང་མ་དམར་མོའོ། །ནུབ་ཏུ་ཅེ་སྤྱང་གདོང་མ་སེར་མོའོ། །བྱང་དུ་སྟག་གདོང་མ་དཀར་མོའོ། །མེའི་མཚམས་ [149a.6]ལ་སོགས་པ་ལ་ཁྭ་གདོང་མ་དང་བྱ་རྒོད་གདོང་མ་དང་ནམ་མཁའ་ལྡིང་གི་གདོང་མ་དང་འུག་གདོང་མ་རྣམས་ནི་ནག་མོ་དང་དམར་མོ་དང་སེར་མོ་དང་དཀར་མོའོ། །སྟེང་གི་ནམ་མཁའི་ཤིང་རྟ་ལ་སྔོན་མོ་ནི་ཁ་དོག་སྔོན་མོ་སྟེ། འདིའི་ཤིང་རྟ་ནི་ཤིན་ཏུ་སྔོན་མོའི་ལྟ་བུའོ། །འོག་ཏུ་ས་འོག་གི་ཤིང་རྟ་ལ་རྡོ་རྗེ་མིག་ [149a.7]ཅན་མ་ལྗང་གུ་སྟེ་འདིའི་ཤིང་རྟ་ནི་དྲག་མིག་མའི་ལྟ་བུའོ། །ཁྱི་གདོང་མ་ལ་སོགས་པ་འདི་དག་ཟླུམ་པོའི་སྟང་སྟབས་ཀྱིས་གནས་པ་གོང་དུ་བསྟན་པའི་ཀླུ་པདྨ་ལ་སོགས་པ་རྣམས་ཀྱིས་འཁྱུད་པ་གཡས་དང་གཡོན་གྱིས་གྲི་གུག་དང་ཐོད་པ་འཛིན་པ། སྤྱན་གསུམ་པ་གཅེར་བུ་ཕྱག་རྒྱ་ལྔ་དང་ལྡན་པ་མི་མགོའི་ [149b] [149b.1]ཕྲེང་བ་མགུལ་དུ་འཕྱང་བའོ། །སྔར་གྱི་འཁོར་ལོ་བརྒྱད་པ་རྣམས་ཀྱི་འོག་ཏུ་རིམ་པ་བཞིན་དུ་བསེ་དང་དོམ་དང་སེང་གེ་དང་གཡག་དང་བེ་རུཎྜ་དང་། རུང་བ་དང་མིག་སྔོན་དང་བྱ་མ་བྱི་རྣམས་སོ། །དུད་ཁྲོད་འདི་དག་ཉིད་ལ་རླུང་གི་དཀྱིལ་འཁོར་གྱི་ཤར་དང་མེའི་མཚམས་ཀྱི་ཕྱོགས་གཉིས་སུ་རླུང་གི་དཀྱིལ་འཁོར་ [149b.2]གཉིས་ཀྱི་སྟེང་དུ་གནས་པའི་ཟླ་བ་དང་ཉི་མའོ། །ལྷོ་དང་བདེན་བྲལ་གཉིས་སུ་མེའི་དཀྱིལ་འཁོར་ལ་གནས་པའི་གཟའ་ལག་པ་དང་མིག་དམར་རོ། །ནུབ་དང་རླུང་གི་མཚམས་ལ་སའི་དཀྱིལ་འཁོར་ལ་གནས་པ་མཇུག་རིངས་དང་སྤེན་པའོ། །བྱང་དང་དབང་ལྡན་གྱི་མཚམས་སུ་ཆུའི་དཀྱིལ་འཁོར་ལ་གནས་ [149b.3]པའི་པ་བ་སངས་དང་ཕུར་བུའོ། །སྟེང་དུ་ནམ་མཁའི་དཀྱིལ་འཁོར་ལ་སྒྲ་གཅན་ནོ། །འོག་ཏུ་ནམ་མཁའི་དཀྱིལ་འཁོར་ལ་དུས་ཀྱི་མེའོ། །དེ་བཞིན་དུ་འདིར་རླུང་གི་དཀྱིལ་འཁོར་གྱི་ནང་དུ་དྷྲུ་བ་དང་ཨག་ཏྱོ་དང་སྐར་མ་ཉི་ཤུ་རྩ་བརྒྱད་དང་ཁྱིམ་བཅུ་གཉིས་དང་། ཆ་བཅུ་དྲུག་དང་ཕྱོགས་བཅུའི་འཇིག་ [149b.4]རྟེན་སྐྱོང་བ་དང་དགའ་བ་ཅན་དང་ནག་པོ་ཆེན་པོ་དང་། དྲིལ་བུའི་རྣ་བ་ཅན་དང་། ཉམ་ཆུང་དང་ཞིང་སྐྱོང་རྣམས་དང་། ཕོ་ཉ་མོ་རྣམས་དང་འཕྲོག་མ་དང་གྲུབ་པ་ཐམས་ཅད་ཅེས་བྱ་བ་ལ་སོགས་ཏེ། འབྱུང་པོའི་བྱེ་བྲག་སྐུ་མདོག་དང་ཕྱག་མཚན་དང་གཟུགས་སྣ་ཚོགས་ཅན་བྱེ་བ་ཕྲག་ཕྱེད་དང་བཞིའོ། ། [149b.5]འདི་ལྟར་ཟླ་བ་ལ་སོགས་པའི་ལྷ་རྣམས་རྡོ་རྗེའི་གདན་གྱི་འདུག་སྟངས་ཀྱིས་གནས་པའོ། །ལྷ་མོ་རྣམས་ནི་རོལ་པའི་སྟང་སྟབས་ཀྱིས་གནས་པའོ།། །།གསུང་གི་དཀྱིལ་འཁོར་གྱི་སྟེགས་བུ་ལ་ལྷ་མོ་འདོད་མ་རྣམས་སོ། །དེ་ལ་ཤར་གྱི་སྟེགས་བུ་ལ་སྒོའི་གཡས་སུ་ཞེ་སྡང་འདོད་མ་སྒྲོལ་མའོ། ། [149b.6]གོས་འདོད་མ་རེག་མ་རྡོ་རྗེ་མ་ལྟ་བུ། །ལུས་འཕྲུག་འདོད་མ་ལྷ་མོ་ཙ་མུཎྜཱ་ལྟ་བུ། ཁ་ལུད་འདོར་འདོད་མ་ཁྱབ་འཇུག་མ་ལྟ་བུ། སྐྲོད་འདོད་མ་ཤིན་ཏུ་སྟོབས་ལྟ་བུའོ། །སྒོའི་གཡོན་ངོས་སུ་རབ་ཏུ་ཚ་བ་འདོད་མ་ཤིན་ཏུ་སྔོན་མོ་ལྟ་བུའོ། །རེག་བྱ་འདོད་མ་རྡོ་རྗེ་ལྕགས་སྒྲོག་མ་ལྟ་བུའོ། །ཡན་ལག་ཐམས་ཅད་ [149b.7]དཀྲུག་འདོད་མ་ཁྱི་གདོང་མ་ལྟ་བུའོ། །ལྷག་མ་ཟ་འདོད་མ་ཁྭ་གདོང་མ་ལྟ་བུའོ། །ལྷོའི་སྒོའི་གཡས་ལོགས་སུ་བསྟོད་པར་འདོད་མ་གོས་དཀར་མོ་ལྟ་བུའོ། །ཟས་འདོད་མ་རོ་རྡོ་རྗེ་མ་ལྟ་བུའོ། །ཡན་ལག་གི་སྐུ་མཉེད་འདོད་མ་ཕག་གདོང་མ་ལྟ་བུའོ། །གར་འདོད་མ་གཞོན་ནུ་མ་ལྟ་བུའོ། །སྐམ་འདོད་མ་རྨོངས་བྱེད་མ་ལྟ་ [150a] [150a.1]ལྟ་བུའོ། །སྒོའི་གཡོན་ལོགས་སུ་འགུགས་འདོད་མ་ཁྲོ་གཉེར་མ་ལྟ་བུ། རྒྱུག་འདོད་མ་དྲག་མིག་མ་ལྟ་བུའོ། །དྲི་ཆེན་དྲི་ཆུ་སྤོང་འདོད་མ་ཕག་གདོང་མ་ལྟ་བུའོ། །གཡུལ་ངོ་འདོད་མ་བྱ་རྒོད་གདོང་མ་ལྟ་བུའོ། །ནུབ་ཀྱི་སྒོའི་གཡས་ལོགས་སུ་རེངས་འདོད་མ་སྤྱན་མ་ལྟ་བུ། དྲི་ཆབ་འདོད་མ་དྲི་རྡོ་རྗེ་མ་ལྟ་བུ། ཉལ་ [150a.2]འདོད་མ་དབང་མོ་ལྟ་བུ། ཆུ་ལ་འཛུལ་འདོད་མ་ཚངས་མ་ལྟ་བུ། བཅིངས་འདོད་མ་རེངས་མ་ལྟ་བུའོ། །སྒོའི་གཡོན་ངོས་སུ་འཁྲིག་པ་འདོད་མ་ཆོས་ཀྱི་དབྱིངས་ཀྱི་རྡོ་རྗེ་མ་ལྟ་བུའོ། །ཕུར་བུ་འདེབས་འདོད་མ་འོད་ཟེར་ཅན་མ་ལྟ་བུ། སླུ་འདོད་མ་ཅེ་སྤྱང་གི་གདོང་མ་ལྟ་བུ། སྦྲུལ་གྱིས་བཅིངས་འདོད་མ་ནམ་མཁའ་ལྡིང་གི་གདོང་ [150a.3]མ་ལྟ་བུའོ། །བྱང་གི་སྒོའི་གཡས་སུ་རྒྱས་འདོད་མ་མཱ་མ་ཀཱི་ལྟ་བུ། རྒྱན་འདོད་མ་གཟུགས་རྡོ་རྗེ་མ་ལྟ་བུ། གདན་འདོད་མ་དྲག་མོ་ལྟ་བུ། རྒྱལ་པོའི་སྲིད་འདོད་མ་ཕུན་སུམ་ཚོགས་མ་ལྟ་བུ། འཇམ་པར་སྨྲ་འདོད་མ་ང་རྒྱལ་བྱེད་མ་ལྟ་བུ། སྒོའི་གཡོན་ངོས་སུ་སྒྲ་འདོད་མ་སྒྲ་རྡོ་རྗེ་མ་ལྟ་བུའོ། །ཕྱག་འཚལ་འདོད་མ་ཙུནྡ་ལྟ་བུ་འཐབ་མོ་ [150a.4]མང་པོ་འདོད་མ་སྟག་གདོང་མ་ལྟ་བུ། ཁྱེའུ་ལ་ཁྲོ་འདོད་མ་འུག་གདོང་མ་ལྟ་བུའོ། །ལྷ་མོ་སུམ་ཅུ་རྩ་དྲུག་པོ་འདི་དག་བསྒོམ་པར་བྱའོ། །གང་གསོད་འདོད་མ་ནི་རྡོ་རྗེ་དབྱིངས་ཀྱི་དབང་ཕྱུག་མའི་བསྐྱེད་བྱ་དང་བསྐྱེད་འདོད་མའི་སྣ་ཚོགས་ཡུམ་གྱི་བསྐྱེད་བྱའོ་ཞེས་གསུངས་པའི་འདོད་མ་གཉིས་པོ་དེ་ཇི་ལྟར་རིགས་པར་འདོད་མ་ [150a.5]གཞན་གཉིས་ལ་འདུ་བའི་ཕྱིར་ཐ་དད་དུ་བསྒོམ་པ་མ་ཡིན་ནོ། །གཞན་ཡང་གང་དང་གང་འདོད་མ་དེ་དག་ཐམས་ཅད་འདོད་མ་སུམ་ཅུ་རྩ་དྲུག་པོ་ཉིད་ལ་ཇི་ལྟར་རིགས་པ་འདུ་བར་བྱའོ་ཞེས་པའི་བསམ་པ་ཁོ་ནའོ། །བསྡུ་བར་བྱ་བ་འམ་འདོད་མར་གཅིག་སྟེ། ཉེ་བར་མཚོན་པའི་བརྡ་ཉིད་ཀྱིས་སོ། །དེ་ལྟར་འདོད་མ་ནི་སུམ་ཅུ་རྩ་བདུན་ [150a.6]ཞེས་གསུངས་སོ། །དེ་ཉིད་ཀྱི་ཕྱིར་དྲི་མ་མེད་པའི་འོད་ལས་གསུངས་པ་གཞན་ཡང་གང་དང་གང་ལ་སེམས་ཅན་གྱི་བྱ་བ་དེ་ཐམས་ཅད་འདོད་མ་དེ་ཐམས་ཅད་འདིར་རྣལ་འབྱོར་མའི་བྱ་བ་ཁམས་ཀྱི་བྱེ་བྲག་གིས་ཞེས་གསུངས་སོ། །དེ་བས་ན་རྡུལ་ཚོན་གྱི་དཀྱིལ་འཁོར་ལ་ལྷ་སུམ་ཅུ་རྩ་དྲུག་གི་ས་བོན་དགོད་པར་ [150a.7]བྱ་བར་བཤད་དོ། །འོན་ཀྱང་འདེབས་འདོད་པའི་ས་བོན་ནི་སཿཞེས་བྱ་བས་ཤར་སྒོའི་གཡོན་ངོས་སུ་དགོད་པར་གསུངས་སོ། །སླུ་འདོད་པའི་ས་བོན་ནི་ཀ །ཞེས་བྱ་བ་ལྷོ་སྒོའི་གཡོན་ངོས་སུའོ། །སྦྲུལ་བཅིང་འདོད་མའི་ས་བོན་ལཿཞེས་བྱ་བ་ནི་བྱང་སྒོའི་གཡོན་དུའོ། །དེ་ལྟར་འདོད་མའི་ལྷ་མོ་སྒོམ་པ་ནི་མ་ཡིན་ [150b] [150b.1]ནོ། །གང་དྲི་མ་མེད་པའི་འོད་ལས་འདོད་མ་སུམ་ཅུ་རྩ་བདུན་གྱི་གསུང་གི་དཀྱིལ་འཁོར་གྱི་རང་རང་གི་ཕྱོགས་ལ་རང་རང་གི་རིགས་ཀྱིས་དབྱེ་བས་སོ་ཞེས་གསུངས་པ་འདི་དག་ཐམས་ཅད་ངེས་པར་འདོད་པར་བྱེད་པའོ། །དེ་ལྟར་མ་ཡིན་ན་ཡང་དང་ཡང་དུ་འདོད་མ་སུམ་ཅུ་རྩ་དྲུག་ཅེས་གསུངས་པའི་ཚིག་རྣམས་དང་ [150b.2]ཕན་ཚུན་འགལ་བར་འགྱུར་རོ། །འདོད་མ་འདི་དག་ཟློག་པའི་རང་བཞིན་མ་འདོད་མ་སུམ་ཅུ་རྩ་དྲུག་སྐུའི་དཀྱིལ་འཁོར་གྱི་སྟེགས་བུ་རྣམས་ལ་སྔར་བཞིན་དུ་རང་རང་གི་རིགས་ཀྱི་དབང་གིས་རང་རང་གི་ཕྱོགས་རྣམས་སུའོ། །དུས་ཀྱི་འཁོར་ལོ་ལ་སོགས་པའི་དེ་བཞིན་གཤེགས་པ་རྣམས་ལས་གཞན་པའི་ལྷ་ [150b.3]རྣམས་ཐམས་ཅད་རིན་པོ་ཆེ་སྣ་ཚོགས་ཀྱི་ཅོད་པན་ཅན་ནོ། །འདིར་གང་གི་ཚེ་བཅོམ་ལྡན་འདས་དཔལ་དུས་ཀྱི་འཁོར་ལོ་རྡོ་རྗེ་སེམས་དཔའི་ངོ་བོར་རྣམ་པར་བཞག་ན་དེའི་ཚེ་མི་བསྐྱོད་པ་ལྗང་གུའི་མདོག་གིས་རྒྱས་བཏབ་པའོ། །དེ་བཞིན་དུ་སྣ་ཚོགས་ཡུམ་གང་གི་ཚེ་མི་བསྐྱོད་པའི་རང་བཞིན་དེའི་ཚེ་མི་ [150b.4]བསྐྱོད་པ་སྔོན་པོ་གཟུགས་ཀྱི་རྡོ་རྗེ་སེམས་དཔས་སོ། །དེ་བཞིན་དུ་སྣ་ཚོགས་ཡུམ་རྡོ་རྗེ་དབྱིངས་ཀྱི་དབང་ཕྱུག་མའི་རང་བཞིན་ནོ། །དེ་ལྟར་ན་ཡེ་ཤེས་དང་རྣམ་པར་ཤེས་པ་གཉིས་ལ་ཕན་ཚུན་རྒྱས་བཏབ་པར་འགྱུར་རོ། །དེ་སྐད་དུ་དྲི་མ་མེད་པའི་འོད་ལས། རྒྱལ་བའི་བདག་པོའི་མཆོག་ནི་ཡེ་ཤེས་ཀྱི་ཕུང་ [150b.5]པོའོ། །སྣ་ཚོགས་ཡུམ་གྱི་རྣམ་པར་ཤེས་པའི་ཁམས་སོ། །རྣམ་པར་ཤེས་པ་ནི་ནམ་མཁའི་ཁམས་སོ་ཞེས་གསུངས་སོ། །འདིར་ཡེ་ཤེས་ནི་སྟོང་པ་ཉིད་དང་སྙིང་རྗེ་རོ་གཅིག་པའི་མི་འགྱུར་བའི་བདེ་བ་ཆེན་པོའི་ཡེ་ཤེས་སོ། །གང་གི་ཚེ་དུས་ཀྱི་འཁོར་ལོ་རྣམ་པར་ཤེས་པའི་ཕུང་པོ་དེའི་ཚེ་སྣ་ཚོགས་ཡུམ་ [150b.6]ནམ་མཁའི་ཁམས་རྡོ་རྗེ་དབྱིངས་ཀྱི་དབང་ཕྱུག་མའི་རང་བཞིན་ནོ་ཞེས་བྱ་བའི་དོན་ཏོ། །དེའི་ཕྱིར་གསུངས་པ་འཁྱུད་པར་འགྱུར་བ་ནི་རྡོ་རྗེ་དབྱིངས་ཀྱི་དབང་ཕྱུག་མ་སྣ་ཚོགས་ཡུམ་ཞེས་གསུངས་སོ། །རྡོ་རྗེ་དབྱིངས་ཀྱི་དབང་ཕྱུག་མ་དང་ལྷན་ཅིག་རྣམ་པར་ཤེས་པ་པདྨའི་སྙིང་པོ་ལ་བདེ་བ་ཆེན་པོ་ཞེས་གསུངས་སོ། །དོན་ཡོད་གྲུབ་ [150b.7]པ་དང་། རིན་ཆེན་འབྱུང་ལྡན་དང་། རྣམ་པར་སྣང་མཛད་དང་། འོད་དཔག་མེད་རྣམས་ནི་མི་བསྐྱོད་པ་ལྗང་གུས་རྒྱས་བཏབ་པའོ། །ཡང་ན་དོན་ཡོད་གྲུབ་པ་ནི་རིན་ཆེན་འབྱུང་ལྡན་གྱིས་སོ། །རིན་ཆེན་འབྱུང་ལྡན་ནི་སྣང་བ་མཐའ་ཡས་ཀྱིས་སོ། །དེ་ནི་རྣམ་པར་སྣང་མཛད་ཀྱིས་སོ། །དེ་ནི་མི་བསྐྱོད་པ་ལྗང་གུས་སོ། །ཀུན་དུ་ [151a] [151a.1]བཟང་པོ་དང་། སྒྲ་རྡོ་རྗེ་མ་དང་། གནོད་མཛེས་རྒྱལ་པོ་དང་། ཤིན་ཏུ་སྔོན་མོ་དང་། སྔོན་མོ་དང་། དྲག་མོ་དང་། རྨུགས་བྱེད་དང་། རྣམ་པར་རྒྱལ་བའི་ཀླུ་རྣམས་ནི་མི་བསྐྱོད་པ་སྔོན་པོའི་གཟུགས་ཀྱི་རྡོ་རྗེ་སེམས་དཔས་རྒྱས་བཏབ་པ་རྣམས་སོ། །ཕྱག་ན་རྡོ་རྗེ་དང་ཆོས་ཀྱི་དབྱིངས་ཀྱི་རྡོ་རྗེ་མ་དང་། གཙུག་ཏོར་ [151a.2]འཁོར་ལོས་སྒྱུར་བ་དང་། དྲག་མིག་མ་དང་། ཁྱབ་འཇུག་མ་དང་། གཤིན་རྗེ་དང་། རྒྱལ་བའི་ཀླུ་ནི་མི་བསྐྱོད་པ་ལྗང་གུས་སོ། །ལྷ་གཞན་ནག་པོ་རྣམས་ནི་དོན་ཡོད་གྲུབ་པས་སོ། །དམར་པོ་རྣམས་ནི་རིན་ཆེན་འབྱུང་ལྡན་གྱིས་སོ། །སེར་པོ་རྣམས་ནི་རྣམ་པར་སྣང་མཛད་ཀྱིས་སོ། །དཀར་པོ་རྣམས་ནི་སྣང་ [151a.3]བ་མཐའ་ཡས་ཀྱིས་སོ། །རྒྱས་འདེབས་པའི་དེ་བཞིན་གཤེགས་པ་དྲུག་པོ་འདི་དག་ནི་གཙུག་ཏོར་དང་བཅས་པ། སྣམ་སྦྱར་འཛིན་པས་གནོན་ལ་སོགས་པའི་ཕྱག་རྒྱ་དང་ལྡན་པའོ། །བཅོམ་ལྡན་འདས་དཀྱིལ་འཁོར་གྱི་དབང་པོའི་ཐུགས་ཀའི་ས་བོན་ནི་ཧཱུཾ་ངོ་། །སྔགས་གཞན་རྣམས་ནི་མངས་པས་ [151a.4]འཇིགས་པས་མ་བྲིས་སོ། །དེ་ལྟར་བཤད་པར་བྱ་མོད་ཀྱི། །ཕུན་ཚོགས་སྐུ་ནི་དཔག་མེད་དེ། །རྒྱ་མཚོ་ལ་ནི་ཆུ་འཛིན་གྱིས། །ཆུ་བླངས་ཟད་པར་མི་འགྱུར་རོ། །རྡོ་རྗེ་འཛིན་དཔལ་སྐུ་ཡི་བདུད་རྩིའི་ཆུ་རྒྱུན་ལས། །འདོར་བར་བྱས་པའི་བསོད་ནམས་བདུད་རྩིའི་ཚོགས་ཀྱིས་ནི། །དཔག་མེད་སྐུ་ཡི་རླབས་ནི་ [151a.5]རིམ་པར་བརྒྱུད་པ་ཡིས། །མཁས་པའི་དབང་ཕྱུག་འཇིགས་མེད་གཞན་དོན་བྱེད་གྱུར་ཅིག །རྡོ་རྗེ་ཕག་མོས་མངོན་སུམ་དུ་བྱིན་གྱིས་བརླབས་པའི་པཎྜི་ཏ་ཆེན་པོ་འཇིགས་མེད་འབྱུང་གནས་སྦས་པའི་ཞལ་སྔ་ནས་མཛད་པ་རྫོགས་པའི་རྣལ་འབྱོར་གྱི་ཕྲེང་བ་ཞེས་བྱ་བ་རྫོགས་སོ།། །།འདིའི་གཞུང་ཚད་ [151a.6]ནི་སྟོང་ཉིས་བརྒྱ་བཞུགས་སོ། །རྒྱ་གར་གྱི་པཎྜི་ཏ་ཆེན་པོ་ཐམས་ཅད་མཁྱེན་པའི་དཔལ་བཟང་པོས་འགྱུར་རྙིང་པ་ལ་བརྟེན་ནས་སྨོན་འགྲོའི་གཙུག་ལག་ཁང་དུ་རང་འགྱུར་མཛད་པའོ།། །།པཎྜི་ཏ་དེ་ཉིད་ཀྱིས་ལན་གཉིས་སུ་ཞུས་ཤིང་གཏུགས་སོ། །སླད་ཀྱི་རྒྱ་གར་གྱི་པཎྜི་ཏ་ཆེན་ [151a.7]པོ་མཁས་བཙུན་མཆོག་གི་གྲུབ་པ་བརྙེས་པ། བླ་མ་རྗེ་བཙུན་ཆེན་པོ་རཏྣ་རཀྵི་ཏའི་ཞབས་དང་། བླ་མ་རྗེ་བཙུན་པཎྜི་ཏ་ཆེན་པོ་རེ་བེནྡྲའི་ཞལ་སྔ་ནས། ཆག་ལོ་ཙཱ་བ་ཤཱཀྱའི་དགེ་སློང་དཔལ་གྱི་མཐའ་ཅན་གྱིས་ཞུས་ཤིང་དག་པར་བསྒྱུར་ཏེ་གཏན་ལ་ཕབ་པའོ།། །། [151b] [151b.1]{T3142}༄༅༅། །རྒྱ་གར་སྐད་དུ། ཛྱེ་ཏིརྨཉྫ་རི་ནཱ་མ་ཧོ་མ་པ་ཡིག །བོད་སྐད་དུ། སྦྱིན་སྲེག་གི་ཆོ་ག་འོད་ཀྱི་སྙེ་མ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ཉིད་བསྡུས་སོགས་རྒྱུད་རྣམས་སུ། །རྡོ་རྗེ་འཛིན་པས་སྦྱིན་སྲེག་ལས། །རབ་གཏོར་འཇིགས་མེད་ཤེས་རབ་ [151b.2]དང་། །སྙིང་རྗེ་དགའ་བས་ཡང་དག་བསྡུ། །གཞན་གྱིས་བྱས་པ་ཡོད་མོད་ཀྱི། །རྒྱུ་སྐར་ཁྲོད་ན་ཟླ་བ་ཡི། །འོད་ཟེར་ལྟར་གསལ་ཁྱད་པར་དུ། །དགའ་བ་སྟེར་འདི་ལེགས་བརྟག་བྱ། །དེ་ལ་ཉི་མ་བཟང་པོ་ལ་ཇི་ལྟར་བརྗོད་པའི་ཆོ་གས་རང་གི་འདོད་པའི་ལྷའི་བདག་ཉིད་ཅན་གྱིས་མཆོད་པ་དང་ [151b.3]གཏོར་མ་འབུལ་བ་སྔོན་དུ་འགྲོ་བས། ལག་པ་གཡས་པས་ལ་བཞག་སྟེ། ཨོཾ་ཨཱཿཧཱུཾ་ཞེས་པ་འདིས་དང་། ཨོཾ་ཧ་ན་ཧ་ན་ཀྲོདྷ་ཧཱུཾ་ཕཊ་ཅེས་པའམ། རང་གི་ལྷའི་སྔགས་བརྒྱ་རྩ་བརྒྱད་བཟླས་ཏེ། ཀུན་རྫོབ་ཀྱི་དག་པའི་ཐབ་ཀྱིས་སམ། སྟོང་པ་ཉིད་ཀྱིས་ཀྱང་རུང་སྟེ། ཐབ་ཁུང་རྣམས་བརྐོ་བར་ [151b.4]བྱ་བའི་དོན་དུས་རྣམ་པར་སྦྱངས་ཏེ། ཡང་ན་ཡོན་བདག་གི་དབང་གིས་རྡོ་རྗེ་ཕྲེང་བར་བརྗོད་པའི་ཆོ་ག་རྣམས་ཀྱིས་ས་སྦྱང་བ་དང་། ས་ཡོངས་སུ་གཟུང་བ་དང་། བགེགས་ལ་ཕུར་བུས་གདབ་པ་དང་། སའི་ལྷ་མོ་ལྷག་པར་གནས་པ་ཡང་ཇི་ལྟར་རིགས་པར་འདོད་པས། རྒྱས་པའམ་བསྡུས་པ་ [151b.5]བྱས་ནས་ས་བདག་ཀླུའི་མཆན་ལ་ཐབ་ཁུང་རྣམས་བརྐོ་བར་བྱའོ། །དེ་ལ་ཞི་བའི་ཐབ་ཁུང་ནི་ས་དཀར་པོ་ལ་རྒྱར་ཁྲུ་གང་ཟབས་སུ་སོར་བཅུ་གཉིས་པ་ཟླུམ་པོ་སྟེ། དེའི་དབུས་སུ་སོར་བཅུ་དྲུག་པའི་པདྨའི་སྟེང་དུ་འཁོར་ལོའམ་མགོ་ཤར་དུ་བསྟན་པའི་རྡོ་རྗེ་རྩེ་ལྔ་པ་སྟེ། སོར་བརྒྱད་པའི་ཚད་ཙམ་པ་དཔངས་ [151b.6]སུ་སོར་གཅིག་པའོ། །ཐབ་ཁུང་གི་སྟེང་དུ་སོར་བཞིའི་བར་དོར་བར་རྒྱ་དང་དཔངས་སུ་སོར་བཞི་པ་ཐབ་ཁུང་གི་དབྱིབས་ཅན་ཁ་བགས་ཀྱིས་ནང་དུ་གཞོལ་བའི་ཁ་ཁྱེར་ཁོར་ཡུག་སྟེ། ཕྱིའི་ཟུར་རྣམས་སུ་ཟུར་གསུམ་རྣམས་ལ་འཁོར་ལོའམ་རྡོ་རྗེ་རྩེ་གསུམ་པས་མཚན་པའོ། །ཐབ་ཁུང་ལས་ས་དཀར་ [151b.7]པོ་དང་ཕྱི་རོལ་དུ་ས་གཞི་ཁྲུ་ཕྱེད་དུ་ཀུན་ནས་པའི་ལྕི་བས་ཉེ་བར་བྱུགས་ཏེ། དེ་ཉིད་ལས་བདུད་རྩི་དཀར་པོ་དང་ལྡན་པའི་དྲི་དཀར་པོས་ཉེ་བར་བྱུགས་ལ་ཐུན་གསུམ་དུ་མེ་ཏོག་དཀར་པོའི་སིལ་མ་གཅལ་དུ་དགྲམ་པར་བྱའོ། །རྒྱས་པའི་ཐབ་ཁུང་ནི་ས་གཞི་སེར་པོ་ལ་རྒྱར་ཁྲུ་དོ་ཟབས་སུ་ཁྲུ་གང་པ་གྲུ་ [152a] [152a.1]བཞི་པའམ་རིན་པོ་ཆེ་ཟུར་བརྒྱད་པ་ལྟ་བུ་སྟེ། དེའི་དབུས་སུ་འཁོར་ལོ་རྩིབས་བརྒྱད་པའི་ལྟེ་བ་ལ་གནས་པའི་སོར་དྲུག་པའི་རིན་པོ་ཆེ་རྡོ་རྗེས་མཚན་པའོ། ཐབ་ཁུང་གི་སྟེང་དུ་སོར་བརྒྱད་དོར་བར་རྒྱ་དང་དཔངས་སུ་སོར་བརྒྱད་པའི་ཚད་ཀྱི་ཐབ་ཀྱི་དབྱིབས་ཅན་ལ། ཕྱི་ཟུར་ [152a.2]རྣམས་སུ་རིན་པོ་ཆེས་མཚན་པའི་ཁ་ཁྱེར་རོ། །ཐབ་ཁུང་ལས་སེར་པོ་དང་དེའི་ཕྱི་རོལ་དུ་བའི་ལྕི་བས་ཉེ་བར་བྱུགས་ནས་དེ་དག་ལ་བདུད་རྩི་སེར་པོ་དང་ལྡན་པའི་དྲི་སེར་པོས་ཉེ་བར་བྱུགས་ལ་མེ་ཏོག་སེར་པོ་དགྲམ་པར་བྱའོ། །དབང་གི་ཐབ་ནི་ས་དམར་པོའམ་གཞན་ཡང་རུང་སྟེ་བྷ་གའི་རྣམ་པ་རྩེ་མོ་ [152a.3]ཤར་དུ་བསྟན་པ་ལ་ཨ་ཤྭདྠའི་ལོ་མ་ལྟ་བུའམ་ཟླ་བ་ཕྱེད་པའི་རྣམ་པའི་དབུས་སུ་པདྨ་དམར་པོ་རྡོ་རྗེས་མཚན་པའོ། །དབང་གིས་དགུག་པ་ལ་ཡང་ཐབ་ཁུང་འདི་དག་གམ་ཡང་ན་རྡོ་རྗེ་རྩེ་གཅིག་པའི་རྣམ་པ་ཅན་གྱི་དབུས་སུ་པདྨ་དམར་པོ་རྡོ་རྗེའི་ལྕགས་ཀྱུས་མཚན་པ་སྟེ། ཐབ་ཁུང་གསུམ་ཀ་ [152a.4]ལ་ཡང་གཙོ་བོའི་མཚན་མས་མཚན་པའི་ལྕགས་ཀྱུས་མཚན་པའི་ཐབ་ཁུང་གི་རྣམ་པའི་ཁ་ཁྱེར་གྱིས་བསྐོར་བའོ། །ས་དམར་པོ་བདུད་རྩི་དང་བཅས་པའི་དྲི་དམར་པོས་ཉེ་བར་བྱུགས་ལ་མེ་ཏོག་དམར་པོ་སིལ་མ་དགྲམ་པར་བྱའོ། །ཐབ་ཁུང་གསུམ་པོ་ནི་ཟབས་དང་ཁ་ཁྱེར་ལ་སོགས་པའི་ཚད་ནི་ [152a.5]ཞི་བའི་ཐབ་ཁུང་བཞིན་དུ་ཤེས་པར་བྱའོ། །མངོན་སྤྱོད་ཀྱི་ཐབ་ཁུང་ནི་གས་པ་ཚ་སྒོ་ཅན་དང་རྩུབ་པ་དང་ནམ་མཁའ་ལྟར་ནག་པའི་ས་ལ་གྲུ་གསུམ་བྱང་དུ་ཕྱོགས་པ། ལོགས་རྣམས་ལ་སོར་ཉི་ཤུ་པ་ཟབས་སུ་སོར་བཅུ་པ་དབུས་སུ་པདྨ་ནག་པོ་ལ་གནས་པའི་སོར་བརྒྱད་པའི་ཁྲོ་བོའི་རྡོ་རྗེས་བརྒྱན་པའམ། [152a.6]དབུས་སུ་རྩེ་གསུམ་པ་ལ་གནས་པའི་ཁྲོ་བོའི་རྡོ་རྗེས་བརྒྱན་པའོ། །ཐབ་ཁུང་གི་སྟེང་གི་སོར་གསུམ་དོར་བར་རྒྱ་དང་དཔངས་སུ་སོར་གསུམ་པ་ཁ་ཕྱིར་གཞོལ་བའི་ཁ་ཁྱེར་ཁྲོ་བོའི་རྡོ་རྗེས་མཚན་པས་ཡོངས་སུ་བསྐོར་བའོ། །བདུད་རྩི་དང་བཅས་པའི་ས་ནག་པོ་དང་རོ་བསྲེགས་པའི་ཐལ་བ་དང་། [152a.7]བོང་བུ་དང་རྔ་མོ་ལ་སོགས་པའི་སྤངས་གང་རྙེད་པས་བྱུགས་ཏེ། དྲི་ངན་པའམ་དྲི་མེད་པའི་མེ་ཏོག་སྔོན་པོའམ་དམར་པོ་དག་དང་འབྲུའི་ཕུབ་མ་ལ་སོགས་པ་གཏོར་ལ། འབར་བ་འཁྲུག་པ་འཇིགས་སུ་རུང་བ། མིའི་ཞུན་ལ་སོགས་པའི་མར་མེ་དང་ལྡན་པར་བྱའོ། །ལས་ཐམས་ཅད་པའི་ཐབ་ [152b] [152b.1]ཁུང་ནི། ལས་དང་རྗེས་སུ་མཐུན་པའི་ས་གཞི་ལ། ཞི་བའི་ཐབ་ཁུང་དང་མཚུངས་པ་སྟེ། འོན་ཀྱང་ཆུར་གེ་སར་དང་བཅས་པའི་ཟེའུ་འབྲུ་དང་ཁ་ཁྱེར་ལ་པདྨའི་འདབ་མ་རྣམས་སོ། །དེ་བས་ན་རབ་ཏུ་རྒྱས་པའི་པདྨའི་རྣམ་པ་ཕྱི་རོལ་གྱི་ཕྱོགས་དང་ཕྱོགས་བྲལ་དུ་རྡོ་རྗེས་མཚན་པའམ། སྣ་ཚོགས་རྡོ་རྗེའམ། [152b.2]རལ་གྲིས་མཚན་པའི་ཁ་ཁྱེར་གྱིས་བསྐོར་བ་དབུས་སུ་རྡོ་རྗེ་ཕྲེང་བས་བསྐོར་བའི་འདབ་མ་ལ་གནས་པའི་འདབ་མའི་ཚད་ཀྱིས་དེ་བཞིན་གཤེགས་པ་བཞིའི་མཚན་མའི་ནང་དུ་རྒྱ་དང་དཔངས་སུ་སོར་བརྒྱད་དང་སོར་གཅིག་པའི་རང་རང་གི་མཚན་མ་དང་ཡང་དག་པར་ལྡན་པའོ། །མཚན་མ་ཡང་རྣམ་པར་སྣང་ [152b.3]མཛད་ཀྱི་འཁོར་ལོའམ། དེ་ཁོ་ན་ཉིད་བསྡུས་པར་གསུངས་པའི་རྡོ་རྗེའོ། །རིན་ཆེན་འབྱུང་ལྡན་གྱི་རིན་པོ་ཆེའོ། །འོད་དཔག་ཏུ་མེད་པའི་པདྨའོ། །མི་བསྐྱོད་པའི་ཁྲོ་བོའི་རྡོ་རྗེའོ། །དོན་ཡོད་གྲུབ་པའི་རལ་གྲི་འམ་སྣ་ཚོགས་རྡོ་རྗེའོ། །ཁ་ཅིག་ནི་ཕྱོགས་ཀྱི་རྡོ་རྗེ་དང་བྲལ་བར་ཁོར་ཡུག་ཏུ་ཕྱི་རོལ་རྡོ་རྗེའི་ [152b.4]ཕྲེང་བས་ཀུན་ནས་བསྐོར་བའི་ཁ་ཁྱེར་ཏེ། ཐབ་ཀྱི་དབུས་སུ་རྡོ་རྗེའི་ཕྲེང་བ་མེད་དོ་ཞེས་ཟེར་རོ། །གཞན་ཡང་འདི་ལ་ཕྱོགས་གཞན་ནི་ཐབ་ཁུང་ཐམས་ཅད་ཀྱི་དབུས་ཀྱི་ཆ་རྣམས་ལ་པདྨ་ལ་གནས་པའི་རང་གི་འདོད་པའི་ལྷའི་མཚན་མས་བརྒྱན་པའོ། །དེ་ཡང་གཙོ་བོའི་མཚན་མ་ནི་སྲིད་དང་དཔངས་ [152b.5]སུ་སོར་བརྒྱད་དང་གཅིག་གི་ཚད་རྣམས་ཏེ་ཅིག་ཤོས་ཀྱི་ནི་སོར་དྲུག་པའོ། །ཞེས་སོ། །འདི་དང་སྔར་བརྗོད་པའི་ཕྱོགས་ལ་ཁྱད་པར་མ་སྨོས་པ་ལ་ཁ་ཁྱེར་ལ་གཙོ་བོའི་མཚན་མའི་ཕྲེང་བའོ། །དཀྱིལ་འཁོར་གྱི་ཁང་པ་ལ་སོགས་པའི་ཤར་གྱི་ཕྱོགས་སུ་ཞི་བའི་ཐབ་ཁུང་ངོ་། །ལྷོར་རྒྱས་པའིའོ། །ནུབ་ཏུ་ [152b.6]དབང་དང་དབང་གིས་དགུག་པའི་ཐབ་ཁུང་ངོ་། །བྱང་དུ་མངོན་སྤྱོད་ཀྱི་ཐབ་ཁུང་ངོ་། །དྲག་པོས་དགུག་པའི་ཡང་ངོ་། །ཕྱོགས་གཞན་ཡང་དཔལ་སམྦུ་ཊའི་རྒྱུད་ལས། ཤར་གྱི་ཕྱོགས་སུ་ཞི་བའོ། །དེ་བཞིན་ལྷོར་ནི་མངོན་སྤྱོད་དང་། །ནུབ་ཏུ་དབང་དང་དགུག་པ་དང་། །བྱང་དུ་རྒྱས་པའི་ཐབ་ཁུང་ངོ་། །ཞེས་ [152b.7]གསུངས་སོ། །ཡང་ན་ལས་དང་རྗེས་སུ་མཐུན་པའི་ཐབ་ཚོན་གྱིས་བྲི་བར་བྱའོ། །འདི་ནི་ཐབ་ཁུང་གི་རབ་ཏུ་བྱེད་པའོ། །པ་ལ་ཤ་དང་ཨུ་དུམྺཱ་ར་དང་། ཨ་ཤྭཏྠ་དང་། ཀཤྨ་རི་དང་། ཨ་མྲ་དང་། ཀ་དམྦ་དང་། ཤ་མཱི་དང་། བླཀྵ་དང་། པ་ཊ་ལ་སོགས་པའི་ཤིང་ལོ་མ་ཅན་གྱི་རྩེ་མོའི་ཆ་ལས་སྐྱེས་པའོ། ། [153a] [153a.1]ལོ་མ་གཉིས་དང་ལྡན་པ། རླན་དང་བཅས་པ། མཉམ་པར་བཅད་པ་སོར་བཅུ་གཉིས་པ། མཐེའུ་ཆུང་ཙམ་དུ་སྦོམ་པ། རྩེ་མོ་གཉིས་སྦྲང་རྩི་དང་འོ་མ་དང་མར་དུ་བསྙུགས་པ་བདུད་རྩི་དང་དེའི་ཆུས་བྲན་པ་རྩེ་མོ་ལ་ལོ་མ་ཟུང་དང་བཅས་པའི་ཡམ་ཤིང་རྣམས་སྲིན་ལག་དང་མཐེ་བོང་གིས་བཟུང་སྟེ་རྩེ་ [153a.2]མོ་གཅིག་སྦྱིན་སྲེག་བྱའོ། །ཀུ་ཤའི་དང་ཨ་མྲའི་ལོ་མ་དང་། དཱུར་ཝ་སྟེ་འདི་རྣམས་ཀྱང་རྩེ་མོ་དང་བཅས་པ་གཉིས་སྦྱར་བས་སོ། །རྙིང་ལྕི་ཕྲ་དང་ཀྱོག་པ་དང་། །རིང་ཐུང་ལོ་མ་མེད་པ་དང་། །སྲོག་ཆགས་ཀྱིས་ཟོས་བྲུལ་བ་དང་། །ཤུན་བྲལ་ཆག་དང་བུ་ག་ཅན། །རྩེ་མོ་གཉིས་ལྡན་སྦོམ་པ་སྤང་། །རྙིང་པ་ཡི་ [153a.3]ནི་འཆི་བར་འགྱུར། །ཀྱོག་པས་སྐལ་བ་ངན་པར་འགྱུར། །རིང་ཐུང་རིག་པས་འཕྲལ་དུ་ཉམས། །ལོ་མ་མེད་པས་ན་ཚ་འབྱུང་། །སྦོམ་པོས་ཕུན་སུམ་ཚོགས་པ་ཉམས། །སྐམ་པོས་གཞན་ཡང་མི་འདོད་པར། །ཤེས་བྱ་བསྲེག་བྱ་གཞན་བཤད་བྱ། །འབྲུ་མར་གྱིས་བྱུགས་ཀུ་ཤ་དང་། །ཏིལ་ཞོ་འོ་ [153a.4]མ་སཱ་ལུའི་ཟན། །དཱུར་བ་ཙནྡན་པྲི་ཡང་ཀུ། །ཐང་ཆུ་དྲི་ཞིམ་མེ་ཏོག་དང་། །འབྲས་ཡོས་ཨ་མྲའི་འདབ་མ་རྣམས། །རྩེ་གཉིས་སྦྲང་རྩི་སོགས་སུ་བསྙུགས། །ཇི་ལྟར་རྙེད་པས་སྦྱིན་སྲེག་བྱ། །ནང་གི་བདུད་རྩི་ཞི་བའིའོ། །ཁ་ཅིག་ཏུ་ནི་ཕྱི་རོལ་གྱི་བདུད་རྩི་ལྔའོ་ཞེས་སོ། །རྒྱས་པ་ལ་ཡང་མམ་ [153a.5]ཤིང་ནི་དེ་རྣམས་ཉིད་དེ་དབུས་ཀྱི་ཆ་ལ་སྐྱེས་པ་ཆང་པའི་ཚད་སྲིད་དུ་ཁྲུ་གང་བ་བདུད་རྩི་དང་བཅས་པའི་དྲི་སེར་པོའི་ཆུས་བྲན་པ་ཞོ་དང་འོ་མ་དང་མར་དུ་བསྐུགས་པ་དང་། མངར་གསུམ་དང་འདྲེས་པའི་ཟས་མཆོག་ཞོ་དང་སྦྲང་རྩི་དང་ཞུན་མར་དང་ལྡན་པ་དང་ཏིལ་ནག་པོ་དང་ཞོ་ཟན་དང་། ཞུན་མར་དང་བཅས་པའི་ཤ་ཏ་ [153a.6]པུཥྤ་དང་། བིལ་པའི་འབྲས་བུ་དང་། འབྲས་སཱ་ལུ་དང་། པདྨ་དང་། ནཱ་ག་གེ་སར་དང་། ཀཱརྣི་ཀཱ་ར་དང་འབྲུ་རྣམས་སོ། །ཞིར་བཤད་སྐྱོན་མེད་ཡོན་ཏན་ཅན། །སོ་སོར་འདབ་ལྡན་པྲི་ཡང་ཀུ། །ཙམ་པ་ཀ་དང་པཱུ་ནཱ་ག །ཀླུ་ཤིང་གེ་སར་ལ་བུ་ཙ། །ཀ་ཤོ་ཀ་རྣམས་ཡམ་ཤིང་སྟེ། །དེ་བཞིན་ནགས་ལས་ [153a.7]བྱུང་བ་དང་། །འབྲས་བུ་མེ་ཏོག་སྐྱུར་བ་དང་། །དམར་པོ་ཡང་ན་གཞན་ཡང་ནི། །རང་གི་རྟོག་པ་ལས་གསུངས་པ། །དབང་གི་ལས་ལ་ཤེས་པར་བྱ། །དེ་རྣམས་ཉིད་ནི་ལྕགས་ཀྱུ་ལྟའི། །ཚེར་མ་ཅན་རྣམས་སྔ་མ་བཞིན། །དབང་གིས་དགུག་པ་ལའོ། །མངོན་སྤྱོད་ལ་ནི་ནིམ་པ་དང་། །སེང་ [153b] [153b.1]ལྡེང་ཀུ་བི་དཱ་ར་དང་། །བྷི་ལོ་ཊ་ཀ་དང་མྱོས་བྱེད་རྣམས་སམ། །གཞན་ཡང་ཚ་བ་དང་ཚེར་མ་ཅན་དང་། ཁ་བའི་ཤིང་རྣམས་སམ། །རོ་བསྲེགས་པའི་མགལ་དུམ་དེ་རྩ་བའི་ཆ་ལས་བྱུང་བ། བཀས་པ་སོར་བཅུ་པའི་རྩེ་མོ་གཉིས་རྣོ་བ་ལ་དུག་དང་ཁྲག་དང་ཡུངས་ཀར་གྱིས་བསྐུས་པའི་ཡམ་ཤིང་རྣམས་སོ། །ཡུངས་ [153b.2]ཀར་དང་ཚ་བ་དང་ཏིལ་མར་དང་ཁྲག་དང་ལན་ཚྭ་དང་སྐེ་ཚེ་དང་ནིམ་པའི་ལོ་མ་དང་། རོ་བསྲེགས་པའི་ཐལ་བ་དང་། རྐང་པའི་རྡུལ་དང་། བོང་བུ་དང་། རྔ་མོ་ལ་སོགས་པའི་སྦངས་དང་། སྐྲ་དང་ཁྱིམ་བྱའི་ཚིལ་དང་། ཁྭ་ཏ་ལ་སོགས་པའི་གཤོག་པ་དང་། བཤང་གཅི་དང་ཚེར་མ་དང་རུས་ཕྱེ་དང་གླང་པོ་ཆེའི་ཤ་ལ་སོགས་ [153b.3]པ་ལས་ཅི་ལྟར་རྙེད་པའམ། རྫས་རེ་རེ་ལ་དུག་དང་ལན་ཚྭ་དང་ཁྲག་དང་བསྲེས་པའམ་རྫས་དེ་རྣམས་ཀྱིས་སམ། ཐལ་བ་དང་སོལ་བ་དང་ཕུབ་མ་ལ་སོགས་པ་རྣམས་ལ་དགྲའི་གཟུགས་བྱས་ལ། དུག་ལ་སོགས་པས་བསྐུས་ཏེ་རྐང་པ་གཡོན་པའི་མཐེའུ་ཆུང་ནས་བརྩམས་ཏེ་མཚོན་རྣོན་པོས་བཅད་ཅིང་ [153b.4]སྦྱིན་སྲེག་བྱའོ། །དྲག་པོའི་དགུག་པ་ལ་ནི་གཟུགས་མི་བྱའོ། །ལས་ཐམས་ཅད་པ་ལ་ནི་པཱ་ལ་ཤ་དང་། ཨུ་དུམྺཱ་ར་དང་། པླཀྵ་དང་། སེང་ལྡེང་དང་། ཨརྐ་དང་། ནྱ་གྲོ་དྷ་དང་། བཻ་ཀཾ་ཀ་ཏ་དང་། ཨ་མྲ་དང་། ཤ་མི་དང་། ཀཱ་ཤྨ་རི་དང་། ཨ་པ་མཱརྒ་དང་། ཨ་ཤྭཏྠ་ལས་སྐྱེས་པ་མངོན་པར་གསར་ཞིང་ [153b.5]མཛུབ་གང་བ་དྲང་པོ་བདུད་རྩི་དང་བཅས་པའི་དྲི་བཟང་གི་ཆུས་བྱུགས་པ། ལས་དང་རྗེས་སུ་མཐུན་པའི་སྣུམ་ལ་སོགས་པ་རྩེ་མོ་གཉིས་ལ་བྱུགས་པའི་ཡམ་ཤིང་རྣམས་སོ། །ལས་ཐམས་ཅད་པ་ལ་ཞི་བ་ལ་སོགས་པའི་ལས་ལ་གསུངས་པའི་ནས་དང་འོ་མ་ལ་སོགས་པ་རྣམས་ཀྱང་བསྲེག་པར་བྱའོ། ། [153b.6]ཞི་བ་དང་རྒྱས་པའི་རྫས་གང་ཅུང་ཟད་དང་། གང་ཡང་བདག་ཉིད་ཀྱི་ཁ་ཟས་དེ་ཐམས་ཅད་དང་། མར་གྱིས་བྱུགས་པའི་གུ་གུལ་ལམ་སཱ་ལའི་ཐང་ཆུ་ཡང་ཉིན་རེ་བཞིན་ཞི་བ་ལ་སོགས་པའི་སྔགས་ཐ་དད་པས་སྦྱིན་སྲེག་བྱའོ། །དྲི་དང་མེ་ཏོག་ལ་སོགས་པ་ཉེ་བར་སྤྱོད་པ་རྣམས་ལ་ཡང་ལས་དང་རྗེས་སུ་མཐུན་ [153b.7]པའི་རང་རང་གི་སྔགས་ཇི་ལྟ་བ་བཞིན་བཟླས་པར་བྱའོ། །དེ་ལྟར་ཡང་། ཨརྐ་སེང་ལྡེང་བཻ་ཀཱཾ་ཀ །ཨ་རྫུན་ཨ་པཱ་མརྒ་སོགས། །ཞིར་གསུངས་ཀ་ཏཾ་པ་དོར་ཏེ། །ཅི་ལྟར་དྲང་དང་ཅིག་ཤོས་འདོད། །ཡམ་ཤིང་ཞི་བཞིན་ཡང་དག་གཞན། །ཐུན་མོང་གི་ནི་ཆོ་ག་ལས། །ཞེས་གསུངས་སོ། །རྫས་ [154a] [154a.1]ཀྱི་རབ་ཏུ་བྱེད་པའོ། །བུད་ཤིང་ནི་ཞི་བ་ལ་མཆོད་སྦྱིན་གྱི་ཤིང་རྣམས་ལས། སྲོག་ཆགས་མེད་པ་ཐབ་ཁུང་བས་ཅུང་ཟད་ཀྱིས་ཐུང་བའམ་འབྲོག་དགོན་པའི་བ་ལང་གི་ལྕི་བའོ། །རྒྱས་པ་ལ་ནི་འབྲོག་དགོན་པའི་བ་ལང་གི་ལྕི་བ་མ་གཏོགས་པའི་ཅི་སྙེད་བཤད་པ་བུད་ཤིང་འབྲས་བུ་དང་ [154a.2]བཅས་པའོ། །དབང་དུ་བྱ་བའི་བུད་ཤིང་ནི་ནིམ་པ་དང་ཤིང་སྐྱུར་བ་དང་གཞན་ཡང་མེ་ཏོག་དང་བཅས་པའོ། །དགུག་པ་ལ་ནི་ཚེར་མ་དང་བཅས་པའོ། །མངོན་སྤྱོད་ལ་ནི་ཚ་བ་དང་ཚེར་མ་ཅན་དང་ཁ་བ་དང་དྲི་ངན་པ་དང་དྲི་མ་མེད་པའི་ཤིང་རྣམས་དང་། དུར་ཁྲོད་ཀྱི་ཤིང་ངམ་བོང་བུ་འམ་རྔ་མོ་ལ་སོགས་པའི་སྦངས་ [154a.3]དང་ཤིང་ཤུན་སྐམ་པོས་སོ། །ལས་ཐམས་ཅད་པའི་བུད་ཤིང་ནི་ལས་དང་རྗེས་སུ་མཐུན་པས་སོ། །བུད་ཤིང་གི་རབ་ཏུ་བྱེད་པའོ། །དགང་གཟར་ནི་གསེར་རམ་ཟངས་ལས་བྱས་པ་འམ། །མཆོད་སྦྱིན་གྱི་ཤིང་ལས་བྱས་པ་སྟེ། དེའི་ཡུ་བ་ནི་སྐྱེས་བུ་ཚད་དང་ལྡན་པའི་མཐེ་བོང་གི་སོར་ཉི་ཤུ་རྩ་བཞི་པ་ལ་རྡོ་རྗེ་ལ་སོགས་ [154a.4]པ་དང་བཅས་པའི་ཁུ་ཚུར་གྱིས་གཟུང་དུ་རུང་བའོ། །ཡུ་བ་ལས་སྟེང་དུ་རྒྱར་སོར་བཞི་གྲུ་བཞི་པ་ཟབས་སུ་སོར་གཉིས་ཀྱིས་དམའ་བ་ལ་རྡོ་རྗེ་རྩེ་ལྔ་པ་སོར་གཉིས་པས་མཚན་པ། གྲུ་བཞི་པའི་སྟེང་གི་རྒྱ་ལ་སོར་ཕྱེད་ལ་རྡོ་རྗེའི་ཕྲེང་བའོ། །གྲུ་བཞི་པའི་སྟེང་དུ་པདྨའི་འདབ་མའི་དབྱིབས་ཅན་སོར་བཞི་པ་ཟབས་སུ་མཐེའུ་ [154a.5]ཆུང་གི་ཚད་ལ་སོར་བཞི་པའི་རྡོ་རྗེས་མཚན་པའོ། །ཡང་ན་ཡུ་བའི་སྟེང་གི་ཆར་པདྨའི་འདབ་མའི་རྣམ་པ་སྲིད་དུ་སོར་བརྒྱད་པའི་ཚད་དང་ལྡན་པ་ཇི་ལྟར་མཛེས་པ་ལ་རྒྱར་གྲུ་བཞི་སོར་བཞི་པ་ཟབས་སུ་སོར་གཉིས་ཀྱིས་དམའ་བའི་དབུས་སུ་རྡོ་རྗེ་སོར་བཞི་པ་རྩེ་གསུམ་པའམ། རྩེ་ལྔ་པས་མཚན་པའོ། །སྲིད་དུ་བཅུད་ [154a.6]འཛག་པའི་བུ་ག་མཐེ་བོང་ངམ། ཡང་ན་མཐེའུ་ཆུང་གི་ཚད་དེ་དེའི་སྟེང་དུ་རྡོ་རྗེ་རྩེ་གསུམ་པ་སོར་བཞི་པའོ། །ཡུ་བ་ལས་འོག་ཏུ་རིན་པོ་ཆེ་སོར་གསུམ་པ་དང་། དེའི་འོག་ཏུ་སོར་གསུམ་པའི་རྡོ་རྗེ་ནི་འདོད་པ་གཉིས་ཀ་ལ་སྟེ། བླུགས་གཟར་གྱི་ཡུ་བའི་འོག་ཏུའང་དེ་བཞིན་ནོ། །བླུགས་གཟར་ཀྱང་སྔར་སྨོས་པའི་རྫས་ [154a.7]སམ་ཤིང་ལས་བྱས་པ་སྟེ། དགང་གཟར་གྱི་ཡུ་བའི་ཕྱེད་ཀྱིས་ཕྲ་བ་ཁྲུ་གང་བའི་ཡུ་བ་སྟེ། འདིའི་ཁ་པདྨའི་འདབ་མ་ལྟ་བུ་རྒྱར་སོར་གཉིས་པ་ཟབས་སུ་སོར་གཅིག་པ་དབུས་སུ་རྡོ་རྗེ་རྩེ་ལྔ་པས་མཚན་པའོ། །ཡུ་བའི་འོག་ཏུ་རྡོ་རྗེ་དང་རིན་པོ་ཆེས་ཅི་ལྟར་མཛེས་པར་བྱའོ། །དགང་གཟར་བླུགས་གཟར་མེད་ན་ [154b] [154b.1]སོར་མོ་ལྔ་ཡང་དག་པར་སྦྱར་བས་ཀྱང་དགང་བླུགས་དབུལ་ཞིང་། སོར་མོ་གསུམ་སྦྱར་བས་ནི་ཅིག་ཤོས་སྲེག་བླུགས་སོ། དེ་སྐད་དུ་ཡང་། ཡང་ན་སོར་ལྔ་ཡང་དག་པར། །སྦྱར་བས་དགང་བླུགས་དྲན་བྱ་སྟེ། །དེ་ལྟར་སོར་མོ་གསུམ་སྦྱར་བས། །གཞན་དེ་དགང་གཟར་བླུགས་གཟར་རོ། །ཞེས་གསུངས་སོ། ། [154b.2]པི་པ་ལའི་ལོ་མས་ཀྱང་སྲེག་བླུགས་གཉིས་བྱའོ་ཞེས་གསུངས་སོ། །བླུགས་གཟར་མེད་ན་ཅིག་ཤོས་ཀྱི་སྲེག་བླུགས་ཀྱང་དགང་གཟར་གྱིས་བྱའོ། །དགང་གཟར་བླུགས་གཟར་གྱི་རབ་ཏུ་བྱེད་པའོ། །དེ་ནས་སྒྲུབ་པ་པོས་བྱམས་པ་དང་སྙིང་རྗེ་དང་ལྡན་པས་ཁྲུས་བྱ་ཞིང་ལུས་དྲི་ཞིམ་པོས་བྱུགས་ལ་གོས་དཀར་ [154b.3]པོ་གོན་ཏེ། ལས་དང་རྗེས་སུ་མཐུན་པར་འདོད་པའི་ལྷའི་རྣལ་འབྱོར་གྱིས་སྲུང་བའི་ཆོ་ག་དང་བཟླས་པ་བྱ་ཞིང་མི་སྨྲ་བར་འཇམ་ཞིང་ཤིན་ཏུ་བདེ་བའི་སྟན་ལ་པདྨའི་འདུག་སྟངས་ཀྱིས་འདུག་ལ་སྲོད་ལ་ཁ་ཤར་དུ་བལྟས་ལ་བློས་བསྒྲུབ་བྱ་ལ་དམིགས་ནས་དཀར་པོའི་ཚེས་གཅིག་ནས་བརྩམས་ཏེ་ཞི་བའི་ཡིད་ཀྱིས་ཞི་ [154b.4]བའི་ལས་བྱའོ། །དེ་བཞིན་དུ་རྒྱན་དང་རྗེས་སུ་བྱུག་པ་དང་། ཕྲེང་བསེར་པོ་དང་མཐོ་ཞིང་བདེ་བའི་སྟན་ལ་འདུག་སྟེ། གོས་སྣ་ཚོགས་པ་གོན་ལ། བཟང་པོའི་འདུག་སྟངས་ཀྱིས་འདུག་ལ་དགའ་བའི་ཡིད་ཀྱིས་ཁ་བྱང་དུ་བལྟས་ཏེ་ཉ་ནས་བརྩམས་ནས་སྔ་དྲོ་རྒྱས་པ་བྱའོ། །ཆགས་པའི་སེམས་ཀྱིས་རྒྱན་དམར་པོ་ལ་ [154b.5]སོགས་པས་བཀླུབས་ལ་ཁ་ནུབ་ཕྱོགས་སུ་བལྟ་ཞིང་། མཐོ་ཞིང་བདེ་བའི་སྟན་ལ་འདུག་སྟེ། མཚན་ཕྱེད་དམ་གཞན་དུ་དབང་གི་ལས་བྱའོ། །དབང་གི་དགུག་པ་ལ་ཡང་དེ་བཞིན་ཏེ་འོན་ཀྱང་ཁ་གྱེན་དུ་བལྟའོ། །ལྷ་མཉེས་པར་བྱ་བ་ལ་ཡང་ཁ་ནུབ་ཏུ་ཕྱོགས་པར་བྱའོ། །ཁྲོས་ཤིང་རྒྱན་དང་གོས་སྔོན་ [154b.6]པོའམ་ཁྲག་གམ་ཆུས་གཤེར་བའི་གོས་གོན་ཏེ། སྟན་སྲབ་པ་ལ་ལྷོ་ཕྱོགས་སུ་བལྟས་ཏེ་འདུག་པ་འམ། བསྒྲུབ་བྱའི་གཟུགས་བརྙན་གྱི་བྲང་ལ་གནས་པའམ། སྟན་མེད་པར་ཙོག་པུར་གནས་ཏེ་རྐང་པས་རྐང་པ་མནན། སོ་ཡིས་སོ་འཆའ་ཞིང་མིག་གདོང་ཚུགས་སུ་བལྟ་ཞིང་ཁྲོ་གཉེར་ཅན་སྙིང་རྗེ་ཆེན་ [154b.7]པོ་དང་ལྡན་པས། དཀོན་མཆོག་གསུམ་ལ་གནོད་པ་བཟློག་པའི་དོན་དུ་ནག་པོའི་ཉིན་ཞག་ཡང་རུང་བའི་ཉིན་ཕྱེད་དང་མཚན་ཕྱེད་ལ་ཁྲོ་བོའི་སྐྱིལ་ཀྲུང་དང་ཁྲོ་བོའི་རྣལ་འབྱོར་གྱིས་གང་གི་ཚེ་བསྒྲུབ་བྱའི་སྙིང་གའི་པདྨའི་ནང་ན་གནས་པའི་བསྲུང་བ་དེ་རང་གི་ཧཱུཾ་ཡིག་ལས་སྐྱེས་པའི་རྡོ་རྗེའི་ལྕགས་ [155a] [155a.1]ཀྱུས་བཅད་དེ་ཕྱིར་བཏོན་ནས་རང་ཉིད་ལ་བསྟིམ་པའམ། རང་གི་ཤེས་རབ་ཀྱི་པདྨར་རང་གི་རྡོ་རྗེའི་ཕུར་པས་ཡང་དག་པར་བཏབ་ནས། བསྒྲུབ་བྱ་ཡང་ལྷ་ཐམས་ཅད་ཀྱིས་སྤངས་པར་བསམས་ཏེ། དེ་ཡང་སྡིག་པ་ལས་བཟློག་པར་འདོད་པའི་བརྩེ་བས་སངས་རྒྱས་ཀྱི་ཞིང་ཡོངས་སུ་དག་པའམ། [155a.2]གཞན་ཡང་ཕན་པ་དང་བདེ་བ་ལ་སྤྲོ་བ་བཟང་པོའི་རིགས་སུ་སྐྱེ་བར་བྱས་པ་དེའི་ཚེ་མངོན་པར་སྤྱོད་པ་བྱའོ། དེ་བཞིན་དུ། དྲག་པོས་དགུག་པ་ལ་ཡང་ངོ་། །རེངས་དང་རྨོངས་དང་དབང་ལྡན་ལྟ། །དེ་བཞིན་རྡོ་རྗེ་སྐྱིལ་ཀྲུང་སྟེ། བཽཥཊ་སྔགས་ཀྱི་མཐར་ལྡན་པས། །ཐབ་ཁུང་གྲུ་བཞིར་བྱས་པ་ལ། །སེར་དང་དཀར་པོའི་ [155a.3]རྒྱན་གྱིས་སྤྲས། །རྒྱས་མཚུངས་ཆོ་གས་ཡང་དག་གནས། །བསྐྲད་ལ་དེ་བཞིན་མེར་ཕྱོགས་པས། །རྔ་མོ་ལ་སོགས་སྦངས་ཀྱིས་བྱུགས། །དཀར་ནག་གིས་བརྒྱན་དུག་གིས་བྲི། །བསྲེག་པའི་རྫས་ནི་འདི་ཡིན་ཏེ། །ཁྭ་ཏ་ལ་སོགས་གཤོག་པ་མཆོག །སྤེལ་ཚིག་དང་ནི་ཡང་དག་ལྡན། །འདིར་ནི་ཁྭ་ཏའི་ [155a.4]གཤོག་པ་ལ་སོགས་པའི་མཐར་ཆེ་གེ་མོ་ཨུཙྪ་ཏ་ཡ་ཧཱུཾ་ཕཊ། ཅེས་པའི་སྔགས་བྲིས་པ་དང་ལྡན་པའོ། །དབྱེ་བ་དེ་ལྟར་བདེན་བྲལ་དུ། །ཕྱོགས་ཏེ་རྐང་པ་བཟློག་པས་འདུག །སེར་པོ་ནག་པོས་རྣམ་པར་བརྒྱན། །ཚ་བའི་ཏིལ་མར་དུག་གིས་བྲི། །ཐམས་ཅད་ཕྱོགས་དང་ཕྱོགས་བྲལ་གང་དུ་ཕྱོགས་པ་ [155a.5]དེའི་ཐད་ཀའི་ཕྱོགས་དང་ཕྱོགས་བྲལ་གཞན་རྣམས་སུ་གནས་པས་སོ། །ཡང་ན་དོན་དམ་པར་ཕྱོགས་རང་རྒྱུད་པ་མ་ཡིན་པའི་ཕྱིར། ཇི་ལྟར་རྣམ་པར་གནས་པ་ཁོ་ནས་ཆེན་པོ་ཡིད་ཀྱི་ང་རྒྱལ་གྱིས་ཏིང་ངེ་འཛིན་དུ་ཞུགས་པས་དེ་ཁོ་ན་ལྟར་དེ་དག་ཐམས་ཅད་བྱའོ། །སྒྲུབ་པ་པོའི་རབ་ཏུ་བྱེད་པའོ། །གསེར་ [155a.6]དངུལ་རྡོ་དང་ཟངས་དང་ཤིང་། །ས་སྣོད་ཉ་ཕྱིས་དུང་དང་ནི། །འདབ་མའི་སྐྱོར་བུ་མཆོད་ཡོན་དང་། །བསང་གཏོར་ཞལ་བསིལ་ཞབས་བསིལ་སྣོད། །དེར་ནས་དང་འོ་མ་དང་མེ་ཏོག་དཀར་པོ་དང་ཏིལ་དང་ཀུ་ཤ་དང་འབྲས་ཡོས་དང་ལྡན་པ་བདུད་རྩི་དང་བཅས་པའི་དྲི་དཀར་པོའི་ཆུ་རྣམ་པར་རྒྱལ་བའི་བུམ་པ་ན་གནས་ [155a.7]པ་བླུགས་ལ་སྤོས་ཀྱིས་བདུག་སྟེ། རང་གི་ལྷའི་སྔགས་སམ་ལས་ཐམས་ཅད་པའི་སྔགས་ཀྱི་མཐར་སྭཱ་ཧཱ་དང་བཅས་པ་ཞི་བའི་དོན་ལན་བརྒྱར་བཟླས་པར་བྱའོ། །རྒྱས་པ་ལ་ནི་དེ་བཞིན་དུ་ཏིལ་དང་བཅས་པའི་ཞོ་དང་མེ་ཏོག་སེར་པོ་དང་དྲི་སེར་པོ་ལ་སོགས་པའི་ཆུ་ལ་ཡི་གེ་ཨོཾ་གྱི་མཐའ་ཅན་གྱིས་སོ། །དབང་ [155b] [155b.1]ལ་ནི་དྲི་དམར་པོ་ལ་སོགས་པའི་ཆུ་ལ་ཡི་གེ་ཧོཿའི་མཐའ་ཅན་གྱིས་སོ། །དེ་ཁོ་ན་བཞིན་དུ་དགུག་པ་ལ་མཐར་ཡི་གེ་ཛཿཞེས་པས་སོ། མངོན་སྤྱོད་ལ་ལོངས་སྤྱོད་པའི་རྫ་ཕོར་གྱི་དུམ་བུ་ལ་སོགས་པའི་སྣོད་དུ་ཁྲག་དང་བཅས་པའི་ཀོ་དྲ་བ་དང་བའི་ལྕི་བ་དང་བཅས་པའི་ཆུ་དང་དྲིང་བ་དང་། དྲི་མེད་པའི་མེ་ཏོག་ནག་པོ་ལ་ [155b.2]སོགས་པ་དང་ལྡན་པའི་ཆུ་ལ་མཐར་ཡི་གེ་ཕཊ་ཅེས་པས་སོ། །དེ་ལྟར་དྲག་པོས་དགུག་པ་ལ་ཡང་ངོ་། །རྒྱས་པ་ལ་སོགས་པ་ཐམས་ཅད་དུ་ལས་ཐམས་ཅད་པ་ལ་དྲི་དང་། མེ་ཏོག་དང་ཏིལ་དང་ཀུ་ཤ་དང་འབྲས་ཡོས་དང་ཆུ་རྣམས་ལས་དང་རྗེས་སུ་མཐུན་པ་ཅི་ལྟར་རྙེད་པ་གཞུག་པར་བྱའོ། །མཆོད་ཡོན་གྱི་རབ་ཏུ་ [155b.3]བྱེད་པའོ། །ཞི་བ་དང་། རྒྱས་པ་དང་། དབང་གིས་དགུག་པའི་ལས་རྣམས་ལ་བདུད་རྩི་འཁྱིལ་པའི་སྔགས་དང་ཡི་གེ་ཧཱུཾ་བཟླས་པའི་ཆུ་སྣོད་དང་། མཆོད་ཡོན་ལ་སོགས་པའི་སྣོད་གསུམ་ཡང་རང་གི་གཡོན་དུའོ། །དེ་དག་གི་མདུན་དུ་བཟེད་ཞལ་གྱི་སྣོད་གསུམ་ཡང་མཉྗི་ལ་སོགས་པའི་སྟེང་དུ་བཀོད་ [155b.4]ལ། དེ་ཉིད་བཟླས་པའི་ཆུ་ལག་པ་གཡས་པ་ན་གནས་པའི་ཀུ་ཤའི་རྩེ་མོས་བླངས་པས་ཡམ་ཤིང་དང་བུད་ཤིང་ལ་སོགས་པའི་སྲེག་རྫས་ཐམས་ཅད་བསང་ཞིང་རང་གི་གཡས་ཕྱོགས་སུ་དགོད་པར་བྱའོ། །རང་དང་དགང་གཟར་བླུགས་གཟར་ཡང་བསང་བར་བྱའོ། །རྣམ་པར་རྒྱལ་བ་དང་ལས་ཐམས་ [155b.5]ཅད་པའི་བུམ་པ་ལ་སོགས་པ་ལྷག་པར་གནས་པ་ནི་རྡོ་རྗེ་ཕྲེང་བར་བརྗོད་པའི་ཆོགས་བྱའོ། །ཆོ་ག་བསྡུས་པ་ལ་དགའ་བ་ནི་བུམ་པ་མེད་དོ་ཞེས་ཁ་ཅིག་གོ། གསད་པ་དང་བསྐྲད་པ་ལ་སོགས་པའི་ལས་དང་དྲག་པོའི་དགུག་པ་ལ་ཡང་ལག་པ་གཡོན་གྱིས་བསང་གཏོར་བྱའོ། །གཡས་ཕྱོགས་ [155b.6]སུ་ལས་ཐམས་ཅད་པ་དང་བསང་གཏོར་ལ་སོགས་པའི་སྣོད་དང་གཡོན་ལོགས་སུ་རྫས་ཐམས་ཅད་གཞག་པར་བྱའོ། །དགོད་པའི་རབ་ཏུ་བྱེད་པའོ། །ཞི་བ་ལ་ནི་ཤིང་འོ་མ་ཅན་དང་གཙུབ་ཤིང་ལས་བྱུང་བའི་མེ་དང་། དགོན་པའི་མེ་དང་སྦྱིན་སྲེག་གི་མེ་ཡང་རུང་ངོ་། །རྒྱས་པ་ལ་ནི་རྒྱལ་ [155b.7]པོའམ། རྒྱལ་རིགས་ཀྱི་ཁྱིམ་ནས་བྱུང་བ་དང་། ནགས་མེས་ཚིག་པ་དང་། ནོར་བུ་ལས་བྱུང་བ་དང་། དགེ་འདུན་གྱི་ཚོང་བོང་ལས་བླངས་པའི་མེས་སོ། །དབང་ལ་ནི་སྨད་འཚོང་མ་དང་། རྗེའུ་རིགས་ཀྱི་ཁང་པ་ལས་བྱུང་བའི་མེས་སོ། །དབང་གི་དགུག་པ་ལ་གར་མཁན་དང་མགྲོན་པོས་ [156a] [156a.1]བུས་པའི་མེས་སོ། །དྲག་པོ་ལ་མིའི་རུས་པ་བསྲེགས་པ་དང་རྡོ་དང་གདོལ་པ་ལ་སོགས་པའི་ཁྱིམ་ནས་བྱུང་བའི་མེས་སོ། །དྲག་པོས་དགུག་པ་ལ་ཡང་མེ་དེ་དག་གཟུང་ངོ་། །ལས་ཐམས་ཅད་ལ་ཡང་རང་རང་གི་ཅི་ལྟ་བ་བཞིན་ནོ། །མེའི་རབ་ཏུ་བྱེད་པའོ། །རྡོ་རྗེ་ཕྲེང་བར་བརྗོད་པའི་ཆོ་གས་རྡོ་རྗེ་ [156a.2]དང་དྲིལ་བུ་གསོར་བ་དང་དཀྲོལ་བ་བྱས་ལ་གཏོར་མ་ཕུལ་ཏེ། བསྲུང་བ་དང་ལྡན་པའི་ཡི་གེ་གསུམ་གྱིས་སྣོད་ཀྱི་ནང་དུ་མེ་བཞག་ལ། དེ་ནས་བདུད་རྩི་འཁྱིལ་པའི་སྔགས་ཀྱིས་ཞུན་མར་གྱི་མར་མེ་རབ་ཏུ་སྦར་ནས་དེ་བརྗོད་པའི་ཀུ་ཤའི་རྩེ་མོས་བླངས་པས་ལན་གསུམ་དུ་གཡས་སུ་བསྐོར་བ་དང་། དྲག་པོའི་ལས་ལ་གཡོན་ [156a.3]དུ་བསྐོར་བས་བསང་གཏོར་བྱས་ལ། ཐབ་ཏུ་གཙང་ཞིང་ཤིན་ཏུ་སྐམ་པའི་རྩའི་ཆུན་པོ་དང་བཅས་པ་དུ་བ་མེད་པ་གཞུག་ཅིང་དྲག་པོ་ལ་བཟློག་པས་བཅུག་ནས། ཨོཾ་ཛྭ་ལ་ཛྭ་ལ་ཧཱུཾ་ཞེས་པ་འདི་དང་ཡི་གེ་ཧཱུཾ་གིས་ཀྱང་རླུང་གཡབ་ཀྱི་རླུང་གིས་མེ་རབ་ཏུ་སྦར་ནས་རིགས་ཀྱི་སྙིང་པོ་ལན་བདུན་བཟླས་པའི་བླུགས་གཟར་གྱི་མར་གྱིས་ [156a.4]ཀྱང་རབ་ཏུ་སྦར་བར་བྱའོ། །དྲག་པོ་ལ་ཚྭ་བའི་ཏིལ་མར་གྱིས་དེ་གོང་དུ་ཡང་ངོ་། །དེ་ནས་ཀུ་ཤ་རྣམས་ཨོཾ་བཛྲ་སཏྭ་ཨཱཿཞེས་པ་འདི་བརྗོད་ནས་ཀུ་ཤ་ལྗང་གུ་གཉིས་གཉིས་རྩེ་མོ་གཤིབས་པ་དྲི་མ་མེད་པ་མ་གས་པ་མ་གྲུགས་པ་ཧ་ཅང་ཡང་རིང་བ་མ་ཡིན་པ་རྣམས་དང་པོར་སྒྲུབ་པ་པོའི་གཡོན་གྱི་ཁ་ཁྱེར་ལ་རྩེ་མོ་ [156a.5]ཤར་དུ་བསྟན་པ་དང་། གཤིན་རྗེར་ཕྱོགས་པ་དང་རྩེ་མོ་ནུབ་ཏུ་བལྟ་བ་དང་། བྱང་དུ་ཕྱོགས་པས་དགྲམ་པར་བྱའོ། །དེ་ནས་ཐབ་ཁུང་དུ་རྩེ་མོ་ཤར་དུ་བསྟན་པའི་ཀུ་ཤ་བ་ལང་གི་རྣ་བ་ལྟ་བུ་ཧ་ཅང་མི་རིང་བས་གཡོགས་སོ། །རྒྱས་པ་དང་དབང་དུ་བྱ་བ་དང་། མངོན་སྤྱོད་ཀྱི་ཐབ་ཁུང་རྣམས་སུ་རིམ་པ་བཞིན་དུ་རྩེ་མོ་ [156a.6]བྱང་དང་ནུབ་དང་ལྷོར་བསྟན་པ་རྣམས་ཏེ་དང་པོར་གཡོན་གྱི་ཁ་ཁྱེར་ལ་ཀུ་ཤ་གཉིས་ཀྱི་རྩེ་མོ་ཡང་དེ་ལྟར་རོ། །འདིར་ཡང་སྒྲུབ་པ་པོ་གང་དུ་མངོན་དུ་ཕྱོགས་པ་དེ་ལ་ལྟོས་ནས་ཤར་ལ་སོགས་པའི་ཐ་སྙད་བྱ་སྟེ། དོན་དམ་པར་ཤར་ལ་སོགས་པའི་ཕྱོགས་མེད་པའི་ཕྱིར་རོ། །དེ་ནས་ལྷའི་བདག་ཉིད་ཅན་གྱིས་རང་ [156a.7]གི་སྙིང་གའི་ས་བོན་གྱིས་ཐབ་བསྐྱེད་ནས་མེ་འབར་བ་རིག་ནས་དེའི་དབུས་སུ་བདག་མེད་པར་བསམས་ཏེ་རྃ་ལས་བྱུང་བའི་མེའི་དཀྱིལ་འཁོར་གྲུ་གསུམ་པ་ལ་པདྨ་དང་ཉི་མ་ལ་གནས་པའི་རྃ་ཡིག་ལས་བྱུང་བའམ་སྐད་ཅིག་གིས་རྫོགས་པ་ལྟོ་བ་འཕྱང་བ་ཤ་རྒྱས་པ་སྐུ་བོང་ཐུང་བ་ཞལ་གསུམ་པ་ཞལ་རེ་རེ་ [156b] [156b.1]ཞིང་ཡང་སྤྱན་གསུམ་པ་ཕྱག་གཡས་པ་གཉིས་ཀྱིས་མི་འཇིགས་པ་དང་བགྲང་ཕྲེང་བཟུང་བ། གཡོན་པ་གཉིས་ཀྱིས་དབྱུག་པ་དང་རིལ་བ་སྤྱི་བླུགས་འཛིན་པ། ཕྱག་གཙོ་བོ་གཉིས་ཀྱིས་རང་འོད་ཀྱི་ཤེས་རབ་ལ་འཁྱུད་པ་ལས་དང་རྗེས་སུ་མཐུན་པའི་སྐུ་མདོག་དང་གོས་དང་རྒྱན་དང་ལྡན་པ། རྣམ་པར་ཤེས་ [156b.2]པའི་འོད་ཟེར་གྱི་ཕྲེང་བ་དང་རྒྱས་འདེབས་ཀྱི་རིགས་ཀྱི་བདག་པོ་ཅན་སྨ་ར་དང་སྨིན་མ་རལ་པའི་ཚོགས་དང་ལྡན་པ་མེའི་དཀྱིལ་འཁོར་ལ་གནས་པའི་ས་བོན་གྱི་སྙིང་གར་བརྒྱན་པའི་མེ་ལྷ་རྣམ་པར་བསྒོམས་ལ། དམ་ཚིག་སེམས་དཔའི་སྙིང་གའི་ས་བོན་གྱི་འོད་ཟེར་ལྕགས་ཀྱུས་ནམ་མཁའ་ལ་དམ་ཚིག་སེམས་ [156b.3]དཔའ་དང་འདྲ་བའི་ཡེ་ཤེས་སེམས་དཔའི་མེ་ལྷ་མེ་མཚམས་ནས་བྱོན་པ་དྲང་སྲོང་གི་ཚོགས་ཀྱིས་ཡོངས་སུ་བསྐོར་བ་རྩ་བའི་ཞལ་ནི་སྐུ་མདོག་དང་མཐུན་པ་སྟེ། དེ་དཀར་པོ་ཉིད་ཡིན་ན་གཡས་དང་གཡོན་གྱི་ཞལ་ནག་པོ་དང་དམར་པོ་དང་། སེར་པོ་དང་དམར་པོ། ལྗང་གུ་ཡིན་ན་སྔོན་པོ་དང་དཀར་པོ་སྟེ་སྔོན་པོ་ལ་ [156b.4]ནི་དཀར་པོ་དང་དམར་པོར་རྣམ་པར་བལྟས་ནས་གཡས་པའི་མཐེ་བོང་མི་འཇིགས་པ་བསྐྱོད་པ་དང་། སྔགས་འདིས་སྤྱན་དྲང་བར་བྱའོ། །ཨོཾ་ཚུར་སྤྱོན་ཚུར་སྤྱོན་འབྱུང་བོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །སྲེག་བླུགས་ཞལ་ཟས་བཞེས་སླད་དུ། །འདིར་ནི་ཡང་དག་བསྙེན་པར་མཛོད། །ཅེས་པ་དང་། [156b.5]ཨོཾ་ཨཱགྣ་ཡེ། ཨཱ་དཱི་བྱ། ཨཱ་དཱི་བྱ་ཨཱ་བི་ཤ་ཨཱ་བི་ཤ་མ་ཧཱ་ཤྲཱི་ཡེ་ཧ་བྱཱ་ཀ་བྱཱ་བཱ་ཧཱ་ནཱ་ཡ་སྭཱ་ཧཱ། ཞེས་པའི་སྔགས་འདིས་སྤྱན་དྲངས་ལ་དེ་དང་ལྷན་ཅིག་ལྷགས་པའི་བགེགས་ཐམས་ཅད་གཤིན་རྗེ་གཤེད་ལ་སོགས་པས་བསྐྲད་ནས། དེ་རྣམས་ཀྱིས་ཛཿཧཱུཾ་བཾ་ཧོཿཞེས་པའི་སྔགས་བརྗོད་པས་གོ་རིམས་བཞིན་དུ་ [156b.6]དགུག་པ་དང་གཞུག་པ་དང་བཅིང་བ་དང་དགྱེས་པར་བྱའོ། །ཨོཾ་ཨགྣ་ཡེ། ཨཱ་དཱི་བྱ། ཨཱ་དཱི་བྱ། ཨཱ་བི་ཤ་ཨཱ་བི་ཤ །མ་ཧཱ་ཤྲཱི་ཡེ་ཧ་བྱཱ་ཀ་བྱཱ་བཱ་ཧ་ནཱ་ཡ་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཞེས་པའི་སྔགས་སམ། ཨོཾ་ཨཱཿཧཱུཾ་ཨརྒྷཾ་པྲ་ཏཱིཙྪ་ཧཱུཾ། ཞེས་པ་འདིས་སམ། ཨོཾ་ཨ་ཧྲཱིཿཔྲ་བ་ར་སཏྐ་ར་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཞེས་བྱ་བས་ [156b.7]མཆོད་ཡོན་དབུལ་ལོ། །ཨརྒྷཾ་ཞེས་པའི་གནས་སུ་པཱ་དྱཾ་དང་། ཨཱཉྩ་མ་ནཾ་དང་ཨ་བུ་ཁྱ་ནཾ་ཞེས་པ་བཅུག་ནས། ཞབས་བསིལ་དང་། ཞལ་བསིལ་དང་བསང་གཏོར་དབུལ་ལོ། །ལས་དང་རྗེས་སུ་མཐུན་པའི་མེ་ཏོག་ལ་སོགས་པ་དང་། གསང་བའི་མཆོད་པ་ལ་སོགས་པ་རྣམས་ཀྱིས་ཀྱང་མཆོད་པར་བྱའོ། །ཇི་ལྟར་ [157a] [157a.1]རིགས་པར་ཡང་། ཀུ་ཤའི་ཆུན་པོས་སྣོད་དང་པོར། །ལས་ཀུན་བྱེད་ལས་ཆུ་ཡིས་ནི། །བསང་གཏོར་ལན་གསུམ་དབུལ་བར་བྱ། །དེ་ཉིད་དུ་ནི་ཞལ་བསིལ་ཏེ། །མཛུབ་མོས་མེ་ཏོག་བླངས་ནས་ནི། །ཁུ་ཚུར་འོག་ཏུ་ཁ་བསྟན་ནས། །མཐེའུ་ཆུང་སྲིན་ལག་གུང་མོ་དང་། །མཛུབ་མོ་རིམ་ [157a.2]གྱིས་དགྲོལ་ཞིང་དབུལ། །གཉིས་པའི་དུང་གི་ཆུ་ཡིས་ནི། །མཆོད་ཡོན་བཟེད་ཞལ་གཉིས་པ་རུ། །རྡོ་རྗེའི་སྙིམ་པ་ཁ་ཕྱེ་བས། །དབུལ་ཞིང་ཞབས་བསིལ་གསུམ་པར་ནི། །ཁུ་ཚུར་བཅས་ནས་མཐེ་བ་མཛུབ་ཀྱི། །སྐམ་པས་མེ་ཏོག་བླངས་ནས་སུ། །སངས་རྒྱས་རྣམས་ཀྱི་སྤྱན་སྔར་ནི། །ལན་གསུམ་བསྐོར་ [157a.3]བའི་སོར་མོ་ནི། །མཛུབ་མོ་གུང་མོ་མིང་མེད་དང་། །མཐེའུ་ཆུང་རིམ་གྱིས་དཀྲོལ་བས་སོ། །ཞེས་བྱ་བའི་གདམས་པ་ཁྱད་པར་ཁོ་བོའི་བླ་མ་རྣམས་ཀྱིས་གསུངས་སོ། །ཕྱོགས་གཞན་ནི་དཔལ་སསྤུ་ཊའི་རྒྱུད་ལས། སྔོན་དུ་མཆོད་ཡོན་གྱི་སྣོད་ཅེས་གསུངས་པའི་དགོངས་པའོ། །མདོར་བསྡུས་པའི་ [157a.4]རིམ་པའོ། །རྒྱས་པར་ནི་ཨོཾ་ཨཱཿཛཿཧཱུཾ་ཞེས་པ་འདིས་བཀུག་ནས་ཐབ་ཁུང་གི་མེའི་ཕྱོགས་ཀྱི་ལོགས་ན་ཀུ་ཤའི་ཆུན་པོ་ལ་འདུག་པ་ལ། མཆོད་ཡོན་ལ་སོགས་པ་ཕུལ་ཏེ། དེ་ཉིད་གསུམ་གྱིས་སྤེལ་བའི་ཛཿཧཱུཾ་བཾ་ཧོཿཞེས་བྱ་བའི་རིམ་གྱིས་རྡོ་རྗེ་དང་བཅས་པའི་རྡོ་རྗེ་དྲིལ་བུས་འཁྱུད་པའི་ཚུལ་དང་ལྡན་པའི་ཕྱག་ [157a.5]གཉིས་ཀྱིས་སེ་གོལ་གཏོགས་པ་སྔོན་དུ་འགྲོ་བས་དམ་ཚིག་སེམས་དཔའ་ལ་རབ་ཏུ་བཅུག་ལ་བཅིང་བ་དང་དབང་དུ་བྱས་ནས་ཡང་མཆོད་ཡོན་ལ་སོགས་པ་ཐམས་ཅད་བྱའོ། །དེ་ནས་ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་ཛྭ་ལ་ཡ་སརྦ་བྷ་སྨའི་ཀུ་རུ་སརྦ་དུཥྚཱན་ཧཱུཾ་ཕཊ་དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ་ས་མ་ཡ་ཧཾ་ཞེས་ལན་ [157a.6]གསུམ་དུ་དམ་ཚིག་བསྒྲག་པར་བྱའོ། །དེའི་རྗེས་ལ་ལག་པ་གཡོན་པ་གན་རྐྱལ་དུ་བྱས་ལ་བྱང་ཆུབ་མཆོག་གི་ཁུ་ཚུར་གྱིས་མར་གྱིས་གང་བའི་དགང་གཟར་བཟུང་ནས་ལག་པ་གཡས་པ་ནི་ཁ་སྦུབ་པས་བླུགས་གཟར་གན་རྐྱལ་དུ་བྱས་པ་མར་གྱིས་གང་བ་དང་། དེ་བཞིན་དུ་དྲག་པོའི་ལས་ལ་ནི་དུག་དང་བཅས་པའི་ [157a.7]ཚ་བའི་མར་ནག་གིས་གང་བའི་དགང་གཟར་གཡས་ཀྱིས་བཟུང་ཞིང་གཡོན་པས་བླུགས་གཟར་ཡང་སྟེ་དགང་གཟར་བླུགས་གཟར་གྱི་ཁ་ལ་རང་གི་ལྷའི་ས་བོན། ཡི་གེ་གསུམ་གྱིས་སྤེལ་བའི་འོད་ཟེར་དང་བཅས་པ་དང་། མེ་ལྷའི་ཞལ་དུ་རྃ་རྣམ་པར་བཀོད་ལ་དགང་གཟར་གྱི་ཁར་བླུགས་གཟར་གྱི་ཁ་བཞག་སྟེ་ལག་ [157b] [157b.1]པ་གཉིས་པུས་མོའི་ནང་དུ་དང་། དྲག་པོ་ལ་ཕྱིར་བྱ་སྟེ། ཞི་བ་དང་རྒྱས་པ་དང་། དབང་གིས་དགུག་པའི་ལས་རྣམས་ལ་སྭཱ་ཧཱ་དང་ཨོཾ་དང་ཧོཿདང་ཛཿདང་དྲག་པོ་ལ་ཧཱུཾ་ཧཱུཾ་ངམ་ཕཊ་ཅེས་པ་སྔགས་ཀྱི་མཐར་བརྗོད་ཅིང་ཞལ་ཅུང་ཟད་གདངས་པ་དང་། དྲག་པོ་དང་དྲག་པོའི་དགུག་པ་ལ་ནི་ཞལ་ཤིན་ཏུ་གདངས་པར་དགང་གཟར་ [157b.2]གཡས་སྐོར་དང་། དྲག་པོ་ལ་གཡོན་སྐོར་བྱས་ཏེ་ཡོན་བདག་གི་ནུས་པ་ཇི་ལྟ་བས་དགང་བླུགས་ལན་གསུམ་མམ་ལན་བདུན་དབུལ་བར་བྱ་སྟེ། ཨོཾ་ཨཱགྣ་ཡེ། ཨཱ་དཱི་བྱ། ཨ་བི་ཤ་ཨ་བི་ཤ་མ་ཧཱ་ཤྲཱི་ཡེ་ཧ་བྱ་ཀ་བྱ་བ་ཧ་ནཱ་ཡ་སྭཱ་ཧཱ། ཞེས་པ་མེ་ལྷའི་སྔགས་སམ། ཨོཾ་ན་མཿས་མནྟ་བུདྡྷཱ་ནཱཾ་ཨགྣ་ཡེ་སྭཱ་ཧཱ། ཞེས་བྱ་བས་ [157b.3]དགང་བླུགས་ཀྱི་སྔགས་ཀྱིས་དང་། ཨོཾ་ཨགྣ་ཡེ་སྭཱ་ཧཱ། ཞེས་པ་ཅིག་ཤོས་ཀྱི་མར་གྱི་སྲེག་བླུགས་ཀྱི་སྔགས་ཀྱིས་སོ། །དེ་ནས་མེ་ལ་བགེགས་དང་བྲལ་བ་དང་བགེགས་དང་ལྡན་པར་རྟགས་ཀྱིས་མཚོན་པར་བྱ་སྟེ། རབ་སྔགས་དགེ་བ་མི་ཡི་འོད། །དཔལ་གྱི་བེའུ་དང་རྔ་ཡབ་གདུགས། །རྒྱལ་མཚན་པདྨ་བུམ་ [157b.4]ལྟ་བུ། །རྩེ་གསུམ་རལ་གྲི་ཉ་ལྟ་བུ། །བཀྲ་ཤིས་ཨིནྡྲ་ནཱི་ལ་དང་། །རྡོ་རྗེ་དུང་ལ་སོགས་པ་དང་། །དགང་གཟར་བླུགས་གཟར་རྣམ་པ་དང་། །དཀར་དང་འཇམ་འདྲ་མདོག་སྡུག་དང་། །གཡས་སུ་འཁྱིལ་དང་ཤིན་ཏུ་སྣུམ། །བྱི་རུ་དང་ནི་གསེར་མདོག་འདྲ། །ལུག་རུ་དངུལ་དང་བཻ་ཌཱུརྱ། །ཉི་འོད་འབར་ [157b.5]མཚུངས་དྲི་མ་མེད། །དུ་བ་མེད་ཅིང་དྲི་ཞིམ་པ། །པི་ཝང་རྫ་རྔའི་སྒྲ་ལྡན་མཆོག །ཞི་བར་ཁ་དོག་དཀར་པོར་སྣང་། །རྒྱས་པ་ལ་ནི་གསེར་དང་མཚུངས། །དབང་ལ་དམར་པོ་རྩེ་མོ་མཆོག །མངོན་སྤྱོད་ལ་ནི་སྔོ་ནག་གོ། །ཞི་བའི་ལས་ལ་སོགས་པ་ལ། །གསེར་འདྲ་རྩེ་གཅིག་དམ་པ་སྟེ། །རྩེ་གཉིས་ [157b.6]འབར་བ་འབྲིང་དུ་བསྟན། །རྩེ་གསུམ་སྤྲིན་འདྲ་ཤིན་ཏུ་དམན། །དུ་བ་ཆེ་བ་མི་དགེ་སྟེ། །འབར་དཀའ་མེ་ལྕེ་ཆད་པ་དང་། །རྩུབ་ནག་པཱ་ལ་ཤ་ཡི་མདོག །གསལ་ཞིང་བ་ལང་མགོ་ལྟ་བུ། །མེ་སྟག་འཕྲོ་དང་དྲག་པོའི་སྒྲ། །རོ་ཡི་དྲི་ང་མི་དགེ་བ། །དྲག་པོའི་ལས་ལ་ཤིས་པ་ནི། །དེ་ལྟར་མི་དགེ་བའི་ལྟས་ [157b.7]བགེགས་དང་བཅས་པ་ཉིད་ནི་མེ་ལ་བསང་གཏོར་དང་། སྲུང་བ་ལས་ཐམས་ཅད་པའི་སྔགས་ཀྱིས་མར་གྱི་སྲེག་བླུགས་ལན་བདུན་བྱས་ལ། དེ་ནས་སླར་ཡང་མེ་ལྷའི་སྔགས་སམ། ལས་ཐམས་ཅད་པའི་སྔགས་ཀྱིས་བསང་གཏོར་བྱས་ནས་དགང་བླུགས་གསུམ་མམ་བདུན་ནམ་ལེན་གཅིག་གམ་ཅི་ [158a] [158a.1]འབྱོར་པ་མེ་ལྷའི་སྔགས་ཀྱིས་བསྲེགས་ཏེ་བླུགས་གཟར་ལ་སོགས་པ་རྣམས་ཀྱིས་མར་གྱིས་སྲེག་བླུགས་གསུམ་མམ་བདུན་ནམ་གཅིག་ཅི་ལྟར་རྙེད་པ་བསྲེག་པར་བྱའོ། །དེ་ལྟར་ཡང་། བླུགས་གཟར་གྱིས་ནི་མར་བསྲེག་ཅིང་། །འབྲུ་རྣམས་དེ་ཉིད་ཀྱིས་དབུལ་བྱ། །ཞེས་གསུངས་སོ། [158a.2]དང་པོ་ཡམ་ཤིང་ལ་སོགས་པ་སྦྱང་བར་བྱ་སྟེ། དེ་ལ་ཨོཾ་ཨཱཿསྭཱ་ཧཱ། ཡམ་ཤིང་སྦྱང་བའི་སྔགས་སོ། །ཨོཾ་ཤྲཱིཿསྭཱ་ཧཱ། ཞུན་མར་སྦྱང་བའི་སྔགས་སོ། །ཨོཾ་ཨཱསྭཱ་ཧཱ། རྫས་བཀྲུ་བའི་སྔགས་སོ། །ཨོཾ་ཛི་སྭཱ་ཧཱ། འབྲུ་དག་པར་བྱ་བའི་སྔགས་སོ། །ཨོཾ་ཀུ་རུ་ཀུ་རུ་སྭཱ་ཧཱ། རྫས་གཞན་རྣམས་སྦྱང་བའི་ [158a.3]སྔགས་སོ། །འདིར་ནི་གོ་རིམས་ཡམ་ཤིང་དག །བསྲེགས་ན་ཡམ་ཤིང་མེ་ལ་མར། །ཏིལ་དང་དཱུར་བ་འབྲས་ཞོ་ཟན། །ཀུ་ཤ་ལ་སོགས་བསྲེག་པར་བྱ། །འཆད་པར་འགྱུར་བའི་རང་རང་གི་སྔགས་ཀྱིས་ཡམ་ཤིང་དང་། དཱུར་བ་དང་ཀུ་ཤ་མཐེ་བོང་དང་མིང་མེད་ཀྱིས་བླངས་ནས་སོ། །ཐམས་ཅད་དུ་ཁུ་ [158a.4]བའི་རྫས་རྣམས་ནི་ཞལ་དུའོ། །ཡམ་ཤིང་དང་ནི་མི་རུས་ཀྱི་ཕྱེ་མ་ལ་སོགས་ནི་འོད་ཀྱི་དཀྱིལ་འཁོར་ལའོ། །ཞོ་ཟན་དང་བཟའ་བ་དང་། ཞལ་བསིལ་དང་། ཏིལ་ལ་སོགས་པ་ནི་ཕྱག་ཏུའོ། །དྲི་ནི་ཐུགས་ཀར་རོ། །མེ་ཏོག་ནི་དབུ་ལའོ། །བདུག་སྤོས་ནི་འབར་བ་ལའོ། །ཞབས་བསིལ་ནི་ཞབས་ [158a.5]དག་ལའོ། །མར་མེ་དང་མཆོད་ཡོན་མདུན་དུ་དབུལ་བར་བྱའོ། །མཆོད་ཡོན་གྱི་ཆུ་སྣོད་དུ་ཡང་དབུལ་བར་བྱའོ། །ཁ་ཅིག་ནི། ཀུན་དུ་ལུས་ལ་བསང་གཏོར་དང་། །མདུན་དུ་སྤོས་ཀྱིས་བདུག་པ་དང་། །ཞལ་བསིལ་ཞལ་དུ་ལན་གསུམ་སྟེ། །མཆོད་ཡོན་དབུལ་དབུལ་བར་བྱ། །ཞེས་ཟེར་རོ། ། [158a.6]དེའི་རྗེས་སུ་ཞལ་བསིལ་དང་བསང་གཏོར་བྱས་ལ། མེ་ལྷ་ཐབ་ཏུ་འབར་བའི་རྣམ་པས་སམ། རང་གི་གཟུགས་ཀྱིས་མེའི་ཕྱོགས་སུ་གཞག་པར་བྱའོ། །དེ་ནས་ཡི་གེ་ཧཱུཾ་དང་བདུད་རྩི་འཁྱིལ་པའི་སྔགས་ཀྱིས་ཀྱང་སྔར་བཞིན་དུ་ཆོ་ག་ཇི་ལྟ་བར་ཡོ་བྱད་ལ་ཡང་བསང་གཏོར་བྱས་ནས། ཞི་བ་ལ་རིགས་ཀྱི་བདག་ [158a.7]པོ་དཀར་པོ་དང་ཤིན་ཏུ་ཞི་བ་པདྨ་དཀར་པོ་དང་ཟླ་བ་ལ་གནས་པ་རྣམ་པ་ཐམས་ཅད་དུ་གོས་དང་རྒྱན་དང་འོད་དཀར་པོ་དང་ལྡན་པ་འཁོར་ལོ་ཅན་སྙོམས་པར་འཇུག་པའམ། གཅིག་པུའི་གཟུགས་ཅན་འོད་ཟེར་སྤྲོས་པ་ལས་སྤྲུལ་པའི་སྤྱན་མ་ལ་སོགས་པའི་ལྷས་ཟླ་བ་ཤེལ་གྱི་བུམ་པ་བྱང་ཆུབ་སེམས་ཀྱི་བདུད་ [158b] [158b.1]རྩིས་གང་བ། ཕྱག་གིས་བཟུང་བའི་རྒྱུན་རྣམས་ཀྱིས་བསྒྲུབ་བྱ་ལ་དབང་བསྐུར་བས་དེའི་རིམས་ལ་སོགས་པ་མ་ལུས་པར་སེལ་བར་མཛད་པའོ། །རྒྱས་པ་ལ་ནི་སེར་པོ་ཤིན་ཏུ་རྒྱས་པ་གོས་དང་རྒྱན་སེར་པོ་དང་གདན་སེར་པོ་དང་། ཤིན་ཏུ་དགྱེས་ཤིང་རངས་པ་སྟེ། སྔར་བཞིན་དུ་གསེར་གྱི་བུམ་པ་ལས་ [158b.2]འབབ་པའི་བདུད་རྩིའམ་རཏྣའི་ཆར་པ་རྣམས་ཀྱིས་བསྒྲུབ་བྱའི་ལུས་སམ། ཁང་པ་ཡང་དག་པར་གང་བར་བྱས་ཏེ་རིད་པ་ལ་སོགས་པ་འམ་དབུལ་བ་འཇིག་པར་བྱེད་པའོ། །དབང་ལ་ནི་སྟན་དམར་པོ་ལ་སོགས་པ་དང་ལྡན་པ་སྔར་བཞིན་དུ་ཨུཏྤལ་དམར་པོ་ཁ་བྱེ་བ་ལྟ་བུའི་མདས་སྙིང་ཕུག་ནས་དབང་དུ་ [158b.3]སྡུད་པར་བྱེད་པའོ། །དབང་གིས་དགུག་པ་ལ་ཞགས་པ་དང་ལྕགས་ཀྱུ་དག་གིས་བཅིངས་ཤིང་ཕུག་ནས་འགུགས་པའོ། །མངོན་སྤྱོད་ལ་གདན་ནག་པོ་ལ་སོགས་པ་དང་ལྡན་པ་ཁྲོས་པ་བསྒྲུབ་བྱའི་སྟེང་དུ་རྡོ་རྗེ་མེའི་ཆར་ཕབ་ནས་བསྒྲུབ་བྱ་ཐལ་བར་བྱེད་པའོ། །དྲག་པོས་དགུག་པ་ལ་ཡང་དེ་ [158b.4]ལྟར་བསམ་པར་བྱའོ། །དེ་བཞིན་དུ་ལས་ཐམས་ཅད་པ་ཉིད་རང་གི་ལྷག་པའི་ལྷ་ཉིད་ལས་དང་རྗེས་སུ་མཐུན་པའི་རྣལ་འབྱོར་དང་ལྡན་པའམ། ཡང་ན་ཐབ་ཁུང་དུ་བཀོད་པའི་ལྷའི་རྣལ་འབྱོར་དང་ལྡན་པའོ། །ཁྱད་པར་དུ་ཞི་བ་ལ་བཅོམ་ལྡན་འདས་རྣམ་པར་སྣང་མཛད་དང་། རྒྱས་པ་ལ་རིན་ [158b.5]ཆེན་འབྱུང་ལྡན་དང་། དབང་དང་དབང་གིས་དགུག་པ་ལ་འོད་དཔག་མེད་དང་། བསད་པ་དང་། ཡམས་དང་ཉེ་བར་འཚེ་བ་བསལ་བ་ལ་དོན་ཡོད་གྲུབ་པ་དང་། ཡང་ན་རྣམ་པར་སྣང་མཛད་དང་། མངོན་སྤྱོད་ལ་ནི་མི་བསྐྱོད་པ་འམ་གཤིན་རྗེ་མཐར་བྱེད་ལ་སོགས་པའི་ཁྲོ་བོ་རྣམས་ཀྱི་རྣལ་ [158b.6]འབྱོར་དང་ལྡན་པས་སོ། །ཞི་བ་ལ་སྒྲུབ་ཐབས་དང་མངོན་པར་རྟོགས་པས་ཇི་ལྟར་གསུངས་པའི་རིམ་པས་དམ་ཚིག་སེམས་དཔའ་བསྐྱེད་པ་དང་ཡེ་ཤེས་སེམས་དཔའ་སྤྱན་དྲང་བ་ལ་སོགས་པའི་ཆོ་ག་དང་དབང་བསྐུར་བའི་མཐར་ཐུག་པ་བྱས་ལ། དྲི་བཟང་པོ་དང་མེ་ཏོག་དཀར་པོ་ལ་སོགས་ [158b.7]པ་དེའི་སྔགས་དང་རང་གི་ལྷའི་སྔགས་ཀྱིས་མངོན་པར་བསྔགས་པ་རྣམས་ཀྱིས་མཆོད་པར་བྱའོ། །དེ་བཞིན་དུ་རྒྱས་པ་ལ་ཡང་སྟེ་ཁྱད་པར་དེ་དག་ཉིད་སེར་པོས་སོ། །དབང་དང་དབང་གིས་དགུག་པ་ལ་ཡང་དམར་པོ་རྣམས་ཀྱིས་སོ། །དྲག་པོ་ལ་ནི་དྲི་མེད་པ་དང་། དྲི་ངན་པ་དང་། [159a] [159a.1]བིལ་པ་དང་། ཨརྒ་དང་ཛ་བ་ལ་སོགས་པའི་མེ་ཏོག་རྣམས་དང་། སྤོས་དཀར་ལ་སོགས་པའི་སྤོས་དག་དང་། མི་དང་ཉ་ལ་སོགས་པའི་ཞག་གི་མར་མེ་རྣམས་དང་། ཁ་བ་དང་ཚ་བ་ལ་སོགས་པའི་ཡིད་དུ་མི་འོང་བའི་ཟས་རྣམས་ཀྱིས་སོ། །ཞེས་པ་ཁྱད་པར་རོ། །དེ་ [159a.2]ནས་ཨོཾ་ཨཱཿཧྲཱིཿཔྲ་བར་སཏྐཱ་རཾ་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཞེས་པའི་སྔགས་ཀྱིས་སྔར་བཞིན་དུ་མཆོད་ཡོན་དང་ཞབས་བསིལ་དང་བསང་གཏོར་བྱས་ནས། ཡང་དག་པར་མཆོད་པ་ལས་དང་རྗེས་སུ་མཐུན་པའི་མདོག་ཅན་གྱི་ལྗགས་རྡོ་རྗེའི་རྣམ་པ་ལ་རང་གི་ལྷའི་ས་བོན་དུ་བཀོད་དེ་རང་གི་སྔགས་ཀྱིས་དགང་ [159a.3]བླུགས་གོང་བཞིན་དུ་ཕུལ་ལ། མར་ལ་སོགས་པ་རྫས་རྣམས་རེ་རེའི་སྲེག་བླུགས་གསུམ་མམ་བདུན་ནམ་ཉེར་གཅིག་བསྲེགས་ཏེ་བདུད་རྩི་དང་བཅས་པ་མར་གྱི་སྲེག་བླུགས་ཅི་ལྟར་སྙེད་པ་བསྲེག་པར་བྱའོ། །དཀྱིལ་འཁོར་བྲི་བ་ལ་སོགས་པའི་ལས་ལ་དཀྱིལ་འཁོར་གྱི་གཙོ་བོའམ། རབ་ཏུ་གནས་ [159a.4]པར་བྱ་བའམ་བསྒྲུབ་བྱའི་ལྷ་རྣམས་སམ། ཞི་བ་ལ་སོགས་པའི་ལས་ཀྱི་དབང་དུ་བྱས་པའི་ལྷ་རྣམས་སམ། རང་གི་འདོད་པའི་ལྷ་རྣམས་ཐབ་ཁུང་དུ་གོ་རིམས་ཇི་ལྟ་བ་བཞིན་དུ་བཀོད་ལ། བདག་ཉིད་ཀྱང་རང་གི་ལྷག་པའི་ལྷའི་རྣལ་འབྱོར་དང་ལྡན་པའམ་ཡང་ན་ཐབ་ཁུང་དུ་བཞུགས་པའི་ལྷའི་རྣལ་ [159a.5]འབྱོར་དང་ལྡན་པར་བྱའོ། །དེ་ནས་ཞི་བ་ལ་རང་སྔགས་ཀྱི་མཐར་ཆེ་གེ་མོའི་ཤཱིནྟཾ་ཀུ་རུ་སྭཱ་ཧཱ། ཞེས་པ་དང་། རྒྱས་པ་ལ་པུཥྚིཾ་ཀུ་རུ་ཨོཾ་དང་། དབང་ལ་པ་ཤཾ་ཀུ་རུ་ཧོཿདང་། དགུག་པ་ལ་ཨ་ཀྲིཥྚི་ཀུ་རུ་ཛཿཞེས་པ་དང་། དྲག་པོ་དང་དྲག་པོས་དགུས་པ་ལ་ཡང་མཱ་ར་ཡ་ཕཊ་སྟེ་ཡང་ན་ཧཱུཾ་ཧཱུཾ་དང་། དེ་ [159a.6]བཞིན་དུ་དགུག་པར་གྱིས་ཤིག་བསྐྲད་པར་མཛོད་ཅིག །ཅེས་པ་ལ་སོགས་པའི་ཚིག་དྲེགས་པ་དང་བཅས་ཤིང་ང་རོ་ཆེན་པོ་དང་བཅས་པ་རང་གི་སྔགས་ལ་རང་གང་འདོད་པའི་མིང་སྤེལ་བཅུག་པའམ་ཡང་ན་མ་བཅུག་པར་རང་བཞིན་གྱིས་ཞི་བ་ལ་སོགས་པའི་བསམ་པས་ལྷག་པར་མོས་པར་བཟླས་ [159a.7]ཤིང་སྲེག་རྫས་རྣམས་བརྒྱའམ་སྟོང་ངམ་དཔག་ཏུ་མེད་པ་བསྲེག་པར་བྱའོ། །ཡང་ན་ཐབ་ཁུང་གི་དབུས་སུ་རང་བཞིན་གྱིས་གནས་པའི་དེ་བཞིན་ཉིད་ཀྱི་ཡེ་ཤེས་ཀྱི་རང་བཞིན་གྱི་མེ་ལྷའི་ཐུགས་ཀ་ཁོ་ནར་རང་གིས་བོན་ལས་བྱུང་བའི་རང་གི་འདོད་པའི་ལྷའི་བདག་ཉིད་དམ་དཀྱིལ་འཁོར་གྱི་འཁོར་ [159b] [159b.1]ལོའམ། ཡང་ན་སྔར་བརྗོད་པའི་དཀྱིལ་འཁོར་གྱི་གཙོ་བོ་ལ་སོགས་པའི་ལྷ་བསྒོམས་ཏེ། ཡེ་ཤེས་ཀྱི་དཀྱིལ་འཁོར་སྤྱན་དྲངས་ནས་གཞུག་པ་ལ་སོགས་བྱས་ལ་དེའི་ཞལ་དུ་སྲེག་བླུགས་བྱའོ། །ཕྱོགས་འདི་ལ་གསུངས་པ་ནི་སྡོམ་པ་འབྱུང་བར། མེ་ནི་ངེས་པར་ལྷ་ཡི་ཞལ། །སྦྱིན་སྲེག་ [159b.2]དངོས་གྲུབ་རབ་ཏུ་སྟེར། །ཞེས་གསུངས་སོ། །དེ་ནས་མེ་ལྷ་ལ་སོགས་པའི་སྲེག་བླུགས་ཀྱི་སྔགས་ནི། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སརྦ་པཱ་པཾ་ད་ཧ་ད་ཧ་སྭཱ་ཧཱ། ཞི་བའི་དོན་དུ་ཏིལ་རྣམས་ཀྱིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཚེ་རིང་བའི་དོན་དུ་དཱུར་བ་རྣམས་ཀྱིའོ། །ཨོཾ་བཛྲ་པུཥྚ་ཡེ་སྭཱ་ཧཱ། [159b.3]རྒྱས་པར་བྱ་བའི་ཕྱིར་མ་བཙོས་ཤིང་མ་གྲུགས་པའི་འབྲས་རྣམས་ཀྱིའོ། །ཨོཾ་སརྦ་སཾ་པ་དེ་སྭཱ་ཧཱ། ཕུན་སུམ་ཚོགས་པའི་དོན་དུ་ཞོ་ཟན་དང་འབྲས་མཆོག་གིའོ། །ཨོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ། བསྲུང་བའི་དོན་དུ་ཏིལ་མར་གྱིས་བྱུགས་པའི་ཀུ་ཤ་རྣམས་ཀྱིའོ། །ཨོཾ་བཛྲ་བཱི་ཛཱ་ཡ་སྭཱ་ཧཱ། [159b.4]སོ་བ་དྲི་མ་མེད་པའིའོ། །ཨོཾ་མ་ཧཱ་བི་དྱཱ་སྭཱ་ཧཱ། ནས་ཀྱིའོ། །ཨོཾ་མ་ཧཱ་བ་ལཱ་ཡ་སྭཱ་ཧཱ། སྲན་མ་ཤའིའོ། །ཨོཾ་བཛྲ་གྷ་སྨ་རཱི་སྭཱ་ཧཱ། གྲོའིའོ། །ཨོཾ་བཛྲ་ཡ་ཛྙཱ་ཡ་སྭཱ་ཧཱ། ཨུ་དུམྺཱ་རའིའོ། །ཨོཾ་བོ་ཏི་པྲིཀྵཱ་ཡ་སྭཱ་ཧཱ། ཨ་ཤྭཏྠའི་འོ། །ཨོཾ་བཛྲ་ལ་ཏཱ་ཡཻ་སྭཱ་ཧཱ། པླཀྵའིའོ། །ཨོཾ་བཛྲ་ཀུ་བེེ་རཱ་ཡ་སྭཱ་ཧཱ། [159b.5]ནྱ་གྲོ་དྷའིའོ། །ཨོཾ་ས་ཧཱ་ཀཱ་རཱ་ཡ་སྭཱ་ཧཱ། ཨ་མྲའིའོ། །ཨོཾ་བཛྲ་ཨརྐཱ་ཡ་སྭཱ་ཧཱ། ཨརྒའི་ཡལ་གའིའོ། །ཨོཾ་བཛྲ་བྲསྨ་ཎེ་སྭཱ་ཧཱ། པཱ་ལ་ཤའིའོ། །ཨོཾ་བཛྲ་གཱ་ཏྲཱ་ཡ་སྭཱ་ཧཱ། སེང་ལྡིང་གིའོ། །ཨོཾ་བཛྲ་ཤྲཱ་བ་ཡ་སྭཱ་ཧཱ། བཻ་ཀཾ་ཀའིའོ། །ཨོཾ་བཛྲ་ཤྲཱི་བཱ་ཡ་སྭཱ་ཧཱ། ཤིང་ཤ་མའིའོ། །ཨོཾ་སརྦ་ [159b.6]ཏ་བྷ་ཏྲཱ་ཡ་སྭཱ་ཧཱ། གྷཾ་བྷ་རིའིའོ། །ཨོཾ་བཛྲ་ཤི་ཁ་རཱ་ཡ་སྭཱ་ཧཱ། ཨ་པཱ་མརྒའིའོ། །ཡང་ན་སོ་བ་ལ་སོགས་པ་རྣམས་ནི་ཚིམ་པར་བྱ་བའི་ལྷའི་སྔགས་ཀྱིས་སོ། །རྫས་ལྷག་མ་རྣམས་ནི་ཚིམ་པར་བྱ་བའི་ལྷའི་སྔགས་ཁོ་ན་ས་བསྲེག་པར་བྱའོ། །བསྲེག་བྱའི་རྫས་ཐམས་ཅད་བཤད་པ་ལ་ [159b.7]སོགས་པ་བདུད་རྩི་ལྔས་བྲན་ཅིང་བདུད་རྩིའི་དངོས་པོར་བསྒོམས་པས་སྲེག་བླུགས་བྱའོ། ཞེས་མན་ངག་རིག་ཅིང་མང་དུ་མཁྱེན་པ་རྣམས་གསུང་ངོ་། །དེ་ལྟར་རང་དང་གཞན་གྱིས་རྟོག་པའི་ཆོ་གས་ཇི་ལྟར་རྙེད་པས་སྦྱིན་སྲེག་བྱ་སྟེ། རང་གི་རིགས་ཀྱི་སྙིང་པོ་ལན་གསུམ་མམ་ལན་བདུན་ནམ་ཉེར་ [160a] [160a.1]གཅིག་ཏུ་མར་གྱི་སྲེག་བླུགས་རྣམས་དབུལ་བར་བྱའོ། །དེའི་མཐར་དགང་བླུགས་ཕུལ་ནས། རིགས་ཀྱི་བདག་པོའི་སྙིང་པོ་བརྗོད་པས་མཆོད་ཡོན་དབུལ་བར་བྱའོ། །དེ་ནས་བསང་གཏོར་དང་ཞབས་བསིལ་དང་གོས་གསར་པ་དང་རྡོ་ཐལ་མེད་པའི་སོ་རྩི་དང་དྲག་པོའི་ལས་ལ་ [160a.2]རྡོ་ཐལ་དང་བཅས་པ་ཕུལ་ལ་སྔར་བཞིན་མཆོད་ནས་ཡང་དག་པར་བསྟོད་དེ། ཕྱག་བྱས་ནས་མཆོད་ཡོན་ཕུལ་ནས་མེ་ཏོག་དང་བཅས་པའི་ཐལ་མོ་སྙིང་གར་སྦྱར་ལ་མ་ཚང་བ་ལ་སོགས་པའི་ཉེས་པ་ཞི་བར་བྱ་བའི་ཕྱིར་བཅོམ་ལྡན་འདས་ལ་བཟོད་པར་གསོལ་ཏེ། གང་ཡང་བདག་བློ་རྨོངས་པ་ [160a.3]ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་ཁྱེད་དེ་ཀུན་བཟོད་པར་མཛོད། །མ་རྙེད་ཡོངས་སུ་མ་ཤེས་དང་། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་གཙོ་བོས་བཟོད་མཛད་རིགས། །ཞེས་བརྗོད་ཅིང་ [160a.4]བཟོད་པར་གསོལ་ནས། །མངོན་པར་འདོད་པའི་དངོས་གྲུབ་ཀྱི་ཕྱིར་གསོལ་བ་བཏབ་སྟེ། ལྷག་པ་དང་ཆད་པའི་ཉེས་པ་ཞི་བར་བྱ་བའི་ཕྱིར་ཐར་པའི་སེམས་ཀྱིས་ཨོཾ་བཛྲ་སཏྭ་ཨཿཞེས་ལན་མང་དུ་བརྗོད་ནས་ཡི་གེ་བརྒྱ་པ་བཀླག་པར་བྱ་སྟེ། ཨོཾ་བཛྲ་ས་ཏྭས་མ་ཡ། མ་ནུ་པཱ་ལ་ཡ། བཛྲ་ [160a.5]སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མི་ཙིཏྟཾ་ཤྲི་ཡ། ཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་བཱ་ན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛཱི་བྷ་བ་མ་ཧཱ་ས་མ་ཡ་སཏྭ་ཨཱཿ དེ་ནས་རྗེས་ལ། ཨོཾ་ཁྱེད་ཀྱིས་སེམས་ [160a.6]ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཞེས་བྱ་བས་ཡང་དག་པར་བསྐུལ་ནས་རང་གི་སྔགས་ཡི་གེ་གསུམ་གྱི་ནང་དུ་བྱས་པའི་མཐར་ཡི་གེ་མུཿཞེས་པ་བརྗོད་ཅིང་རང་གི་བདག་པོའི་ [160a.7]མགོན་པོ་ཡིད་ཀྱིས་ཆོ་ག་བཞིན་དུ་གཤེགས་སུ་གསོལ་བར་བྱའོ། །དེ་ནས་མེ་ལྷ་ཐབ་ཁུང་དུ་སྤྱན་དྲངས་ཏེ། སླར་ཡང་དག་པར་མཆོད་ནས་བསང་གཏོར་དང་ཞབས་བསིལ་དང་རྡོ་ཐལ་མེད་པའི་སོ་རྩི་དང་། དྲག་པོ་ལ་རྡོ་ཐལ་དང་བཅས་པའི་སོ་རྩི་དང་གོས་གསར་པ་ཕུལ་ལ་སྲེག་ [160b] [160b.1]རྫས་ལྷག་མ་སྦྱིན་སྲེག་བྱས་ནས་མཐར་དྲིལ་བུ་དཀྲོལ་ཞིང་བསྟོད་པར་བྱའོ། །ཆོ་ག་འདི་ནི་ཕལ་ཆེ་བར་རང་གི་མངོན་པར་འདོད་པའི་དངོས་གྲུབ་ཀྱི་ཆེད་དུའོ། །རབ་ཏུ་གནས་པ་ལ་སོགས་གཞན་དོན་འདོད་པས། ཡོན་ཕུལ་བའི་སློབ་མའི་མཐེ་བོང་གཡས་པ་གཡོན་པའི་མཐེའུ་ཆུང་གིས་ [160b.2]བཟུང་སྟེ། ཐབ་ཁུང་དུ་ལན་གསུམ་དུ་གཡས་སུ་བསྐོར་བ་བྱས་ལ་བླུགས་གཟར་གྱི་མགོ་ལ་གཡས་སྐོར་གྱིས་འཇུག་པས་ལན་བདུན་དུ་སྲེག་བླུགས་ཀྱང་དབུལ་དུ་གཞུག་པར་བྱའོ། །འཁྱིལ་པས་བསྔགས་པའི་སྲུང་སྐུད་དཀར་པོ་དེའི་ལག་པ་ལ་བཅིངས་ལ་བསང་གཏོར་བྱའོ། །བདག་ [160b.3]པོར་གྱུར་ན་རྒྱལ་པོ་ལ་སོགས་པའི་དགེ་བར་དམིགས་ལ་དགང་བླུགས་དབུལ་ལོ། །དེ་ལྟར་ཡང་རྒྱལ་པོ་དང་འཇིག་རྟེན་སྐྱོང་བ་རྣམས་དང་སེམས་ཅན་ཐམས་ཅད་དང་སློབ་མ་རྣམས་དང་། གང་ལ་མངོན་པར་འདོད་པ་རྣམས་ཀྱི་ཡང་རེ་རེ་ཞིང་ལན་གསུམ་མམ་རེ་རེ་ཆོ་ག་སྲེག་བླུགས་དབུལ་བར་ [160b.4]བྱའོ། །ཡོན་ཡང་དབུལ་དུ་གཞུག་གོ། །ཞེས་གསུངས་སོ། །འདི་ནི་ཁྱད་པར་རོ། །དེའི་རྗེས་སུ་ཞལ་བསིལ་ཕུལ་ལ་བསང་གཏོར་བྱས་ཏེ་ཡང་དག་པར་མཆོད་ནས་མཆོད་ཡོན་ཕུལ་ཏེ་བཟོད་པར་གསོལ་ལ་མངོན་པར་འདོད་པའི་དངོས་གྲུབ་ཞུས་ནས་ཨོཾ་བཛྲ་སཏྭ་ཨཿཞེས་བརྗོད་དེ་སྔར་བཞིན་ [160b.5]གཤེགས་པའི་ཆེད་དུ་ཡང་དག་པར་བསྐུལ་ལ། ཨོཾ་བཛྲ་མུཿཞེས་བརྗོད་ཅིང་ཆོ་ག་བཞིན་གཤེགས་སུ་གསོལ་ལོ། །གང་གི་ཚེ་དེ་ལྟར་འཇིག་རྟེན་པའི་ལྷ་རྣམས་ཐབ་ཁུང་དུ་དགོད་པར་འདོད་ན་ཡང་། དེའི་ཚེ་དམ་ཚིག་སེམས་དཔའ་བསྐྱེད་པ་དང་། ཡེ་ཤེས་སེམས་དཔའ་དགུག་པ་དང་དམ་ཚིག་ལ་ [160b.6]རབ་ཏུ་གནས་པར་བྱ་བ་དང་མཆོད་པ་དང་སྦྱིན་སྲེག་ལ་སོགས་པ་མེ་ལྷའི་བཞིན་དུ་སྦྱོར་བ་ཇི་ལྟ་བར་རྗེས་སུ་བསྒྲུབ་ཅིང་། ཕྱིས་ཀྱང་མེ་ལྷ་བཞིན་དུ་གཤེགས་སུ་གསོལ་ལོ། །དེ་ལྟར་ཉིན་རེ་བཞིན་ནམ་བཤད་པའི་དུས་སམ་ཐུན་གསུམ་མམ་ཐུན་བཞིར་བྱའོ། །དེ་ནས་འོ་མ་དང་འབྲས་མ་ [160b.7]ཆག་པ་དང་། མར་དང་སྦྲང་རྩི་དང་ཀ་ར་རྣམས་རང་གི་འདོད་པས་རྗེས་སུ་མཐུན་པའི་དྲིས་བྱུགས་ལ་མགུལ་པར་མེ་ཏོག་ཕྲེང་བས་བཅིངས་པས་སྣོད་ནག་པོ་མ་ཡིན་པ་མནྗིའི་སྟེང་དུ་བཞག་པའི་ནང་དུ་དགང་གཟར་རམ་བླུགས་གཟར་གྱིས་བླུགས་ཏེ། རྡོ་རྗེ་ཕྲེང་བར་བཤད་པའི་ཆོ་གས་བདུད་ [161a] [161a.1]རྩིའི་རང་བཞིན་གྱིའོ་ཐུག་ཐབ་ཁུང་གི་མེ་ལ་བསྒྲུབ་པར་བྱས་ནས་རང་ཉིད་ཅི་ལྟ་བ་བཞིན་དུ་རྣལ་འབྱོར་ལ་སྙོམས་པར་ཞུགས་ཏེ། དེ་བཞིན་གཤེགས་པའི་ལྷག་མ་འདི། །སྡིག་པ་རྣམ་པར་ཉམས་ཕྱིར་གསོལ། །ཞེས་པས་ལྷ་དང་འཇིག་རྟེན་སྐྱོང་བ་དང་རང་ཡང་ཚིམ་པར་ [161a.2]བྱའོ། །ལྷག་མ་ནི་སྦྱིན་བདག་དང་ལྷག་མ་དོན་དུ་གཉེར་བ་རྣམས་ལ་བགོ་བཤའ་བྱའོ། །ཞི་བ་ལ་ནི་འོ་མས་མེ། །གཞིལ་བྱ་རྒྱས་པ་བསྒྲུབ་པ་ལ། །སེར་པོའི་ཆབ་ཀྱིས་དབང་དག་ལ། །འོ་མར་དམར་དང་ནག་པོས་སོ། །དེ་ནས་སྦྱིན་སྲེག་གི་ཐབ་ཀྱི་ཐལ་བ་དང་སོལ་བ་རྣམས་ལས་ཐམས་ཅད་པའི་བུམ་ [161a.3]པར་བླུགས་ལ་ཆུ་བོ་ལ་སོགས་པའི་ཆུ་ལ་བསྐུར་བར་བྱའོ། །ཞེས་པ་ལྷ་ཚིམ་པར་བྱེད་པའི་རབ་ཏུ་བྱེད་པའོ། །འདི་ནི་ཕྱི་རོལ་གྱི་སྦྱིན་སྲེག་གི་ཆོ་གའོ། །འདི་རྣམས་ཐམས་ཅད་ལྷག་ཆད་མེད་པའི་སེམས་ཁོ་ནས་བྱ་སྟེ་ངེས་པར་མངོན་པར་འདོད་པ་འགྲུབ་པར་འགྱུར་རོ། །འདི་ནི་ཡིད་ཀྱི་སྦྱིན་སྲེག་གི་ཁྱད་ [161a.4]པར་ཅིག་གོ། །རྣམ་པ་གཞན་ནི་ཅི་ལྟ་བ་བཞིན་རང་གི་འདོད་པའི་ལྷའི་རྣལ་འབྱོར་དང་ལྡན་པས་བྲིས་པའི་དཀྱིལ་འཁོར་གྱི་གཙོ་བོ་ལས་དང་རྗེས་སུ་མཐུན་པའི་གདན་ལ་སོགས་པ་དང་ལྡན་པ་ཇི་སྐད་བཤད་པའི་མེ་ལ་གནས་པའི་ངོ་བོ་མདུན་གྱི་ནམ་མཁར་གནས་པའི་དཀྱིལ་འཁོར་གྱི་དབུས་སུ་གནས་པར་བྱས་ལ། [161a.5]རང་གི་ལོགས་སུ་རིན་པོ་ཆེ་སྣ་བདུན་གྱི་རང་བཞིན་གྱི་སྣོད་སྦྲང་དང་ཞུན་མར་གྱིས་གང་བ་ནས་རིན་ཆེན་སྣ་བདུན་གྱི་རང་བཞིན་གྱི་དགང་གཟར་དང་བླུགས་གཟར་གྱིས་དགང་བླུགས་དབུལ་བས་ཡིད་ཀྱི་སྦྱིན་སྲེག་བྱས་པ་ཡང་དེ་བཞིན་དུ་རང་གི་འདོད་པའི་ལྷའི་འཁོར་ལོ་ཡང་བསྒོམས་ནས་དགུག་པ་ལ་སོགས་པའི་ [161a.6]ཆོ་ག་ཡིན་གྱིས་རྗེས་སུ་བསྒྲུབ་པར་བྱ་སྟེ། སྦྱིན་སྲེག་གིས་ཚིམ་པར་བྱའོ། །སྦྱིན་སྲེག་གི་ཆོ་ག་འདི་ནི་བླ་ན་མེད་པ་སྟེ་བླ་ན་མེད་པའི་ཡིད་མངོན་པར་འདུ་བྱེད་པའི་རྒྱུ་ཡིན་པའི་ཕྱིར་དང་། ཕྱི་རོལ་གྱི་ཆོ་ག་ལ་ཡང་དོན་དེ་ཉིད་ཡིན་པའི་ཕྱིར་དང་། སངས་རྒྱས་དང་རིག་པ་འཛིན་པ་ལ་སོགས་པའི་དངོས་གྲུབ་ཀྱང་སྣ་ [161a.7]ཚོགས་པ་སྒྱུ་མ་ལྟ་བུའི་འོད་གསལ་བ་རྣམ་པར་དག་པའི་མཚན་ཉིད་ཡིན་པའི་ཕྱིར་རོ། །ཞེས་ཡིད་ཀྱི་སྦྱིན་སྲེག་གི་ཆོ་གའོ། །རང་གི་འདོད་པའི་ལྷའི་རྣལ་འབྱོར་དང་ལྡན་པས་དེའི་ངོ་བོའམ་རྡོ་རྗེ་སེམས་དཔའི་རང་བཞིན་རིམ་པ་ཅི་ལྟ་བར་རང་བཞིན་གྱིས་རྣམ་པར་དག་པའམ་རྣམ་པར་སྣང་མཛད་ལ་སོགས་ [161b] [161b.1]པའི་རང་བཞིན་གཟུགས་ལ་སོགས་པའི་འདོད་པའི་ཡོན་ཏན་རྣམས་ཅི་ལྟར་རྙེད་པ་ལ་ཐེ་ཚོམ་མེད་པར་ཉེ་བར་ལོངས་སྤྱད་པར་བྱའོ། །བཟའ་བའི་དུས་སུ་ནི་རང་གི་ཟས་ཐམས་ཅད་མཉམ་པ་ཉིད་ཀྱིས་རྣམ་པར་དག་པས་བདུད་རྩིར་བྱས་ནས་ལྟེ་བའི་ཐབ་ཁུང་གི་མེས་འཁྱུད་པའི་སྙིང་གར་སོན་པའི་རང་གི་ལྷག་པའི་ [161b.2]ལྷའི་འཁོར་ལོ་ལ་ལག་པའི་དགང་གཟར་ལ་སོགས་པ་ཆོ་ག་བཞིན་དུ་ཡང་དག་པར་ཚིམ་པར་བྱའོ། །ཞེས་པས་ཕྱི་རོལ་གྱི་རྫས་ཀྱིས་ནང་གི་སྦྱིན་སྲེག་གོ། །ཕྱི་རོལ་གྱི་རྫས་ལ་མ་ལྟོས་པའི་ནང་གི་སྦྱིན་སྲེག་མཆོག་ཏུ་དགའ་བ་ཕུན་སུམ་ཚོགས་པའི་རྒྱུ་ནི་དཔལ་ཁ་སྦྱོར་གྱི་རྒྱུད་ཀྱི་འགྲེལ་པར་ཁོ་བོས་གསལ་ [161b.3]བར་བྱས་པས་དེར་ཤེས་པར་བྱའོ། །ཁམས་གསུམ་པ་སྟོང་པ་ཉིད་དང་སྙིང་རྗེ་གཉིས་སུ་མེད་པའི་འཁོར་ལོའི་རྣམ་པའི་ཡེ་ཤེས་ཀྱི་མེ་ལ་གདམས་པ་ཅི་ལྟ་བར་ཕུང་པོ་ལ་སོགས་པའི་བུད་ཤིང་བསྲེགས་པ་ནི་བླ་ན་མེད་པའི་སྦྱིན་སྲེག་གོ། །འདི་ནི་ལྷ་ཐམས་ཅད་ཀྱི་ཆོ་ག་ཐམས་ཅད་སྤྲོས་ཏེ་བཤད་པའོ། །གང་ [161b.4]ཡང་རྣལ་འབྱོར་དང་རྣལ་འབྱོར་མའི་རྒྱུད་ཁ་ཅིག་ཏུ་ཆོ་གའི་དབྱེ་བ་ཅུང་ཟད་ཐ་དད་པ་བསྟན་པ་དེ་ཡང་འདི་དག་གི་རྗེས་སུ་འབྲངས་ནས་ཇི་ལྟར་རིགས་པར་བྱའོ། །འདིར་བསྡུ་བ་ནི་འདི་ཡིན་ཏེ། །ལྷ་ཡི་བདག་ཉིད་ཀྱིས་མཆོད་ཅིང་། །གཏོར་མ་ས་སྦྱངས་ཐབ་ཁུང་བྱ། །ཞི་རྒྱས་དབང་དང་མངོན་སྤྱོད་ལ། །དཀྱིལ་ [161b.5]འཁོར་གྱི་ནི་ཤར་དང་ལྷོ། །ནུབ་དང་བྱང་དུ་ཐབ་ཁུང་རྣམས། །ཤར་བྱང་ནུབ་ལྷོར་ཁ་བལྟས་པའི། །སློབ་དཔོན་གཡོན་དུ་ཆུ་དང་ནི། །མཆོད་ཡོན་ལ་སོགས་སྣོད་རྣམས་དགོད། །གཡས་སུ་ཡམ་ཤིང་མར་ལ་སོགས། །སྲེག་རྫས་རྣམས་ཏེ་མེ་སྦར་ནས། །ཐབ་ཏུ་ཀུ་ཤ་དགྲམ་ཤིང་ [161b.6]གཡོགས། །བུད་ཤིང་མར་གྱིས་རབ་སྦར་ཏེ། །མེ་དང་དེ་ཡི་ཡེ་ཤེས་སྐུ། །གཅིག་བྱས་མཆོད་ཡོན་སོགས་ཀྱིས་མཆོད། །དགང་གཟར་བླུགས་གཟར་ཁ་ལ་འཐོན། །མར་གྱི་དགང་བླུགས་ཀྱིས་ཚིམ་བྱ། །ཡོན་བདག་ནུས་པའི་རྗེས་མཐུན་པས། །གཡས་སུ་བསྐོར་བའི་སྦྱོར་ [161b.7]བས་སོ། །དེ་ནས་མར་སོགས་ཀྱིས་ཀྱང་གཞན། །སྲེག་བླུགས་བླུགས་གཟར་གྱིས་ཀྱང་དབུལ། །ཞབས་བསིལ་ཞལ་བསིལ་བསང་གཏོར་ཆུ། །མཆོད་ཡོན་ཞབས་ཕྱག་སྐུ་དང་མདུན། །ཁུ་བ་ཞལ་དུ་ཡམ་ཤིང་འོད། །བཟའ་བ་ལ་སོགས་ཕྱག་ཏུ་དབུལ། །མེ་ཏོག་དབུ་ལ་ [162a] [162a.1]བདུག་སྤོས་དང་། །མར་མེ་མདུན་དུ་དྲི་ཆབ་ཐུགས། །མེ་ལྷ་དང་ནི་ལྷག་པའི་ལྷ། །དེ་དག་ཚིམ་པ་ལ་སོགས་བྱ། །མར་དང་ཏིལ་དང་དཱུར་བའི་རྩེ། །འབྲས་དང་བཟའ་བའོ་ཐུག་དང་། །ཀུ་ཤ་སོ་བ་ནས་དང་ནི། །མ་ཤཱ་གྲོ་དང་ཨུ་དུམ་བཱར། །པི་པལ་པླཀྵ་ནྱ་གྲོ་དྷ། །ཨ་མྲ་ [162a.2]ཨརྒ་ཚངས་ཤིང་དང་། །སེང་ལྡེང་པཻ་ཀཱཾ་ཀ་ཤ་མཱི། །གྷཾ་བི་ར་ཨ་པཱ་མརྒ། །རིམ་བཞིན་བསྲེགས་ནས་གོས་སྩོགས་དང་། །ཀློག་དང་དྲིལ་བུ་དཀྲོལ་ཞིང་བསྟོད། །བཟོད་གསོལ་ལྷ་དང་མེ་ལྷ་ལ། །དངོས་གྲུབ་བླངས་ནས་གཤེགས་སུ་གསོལ། །ཞི་བ་སོགས་ལ་དགེ་བ་ནི། །བཟློག་པ་ [162a.3]དག་ལས་མི་དགེ་བ། །ཇི་ལྟར་རིགས་པར་ཡིད་དང་ལུས། །བཀླག་དང་ལས་ལ་ཡང་དག་བརྩམས། །ཡང་ན་ཐམས་ཅད་ཡིད་ཀྱིས་སོ། །ནང་དུ་སྙིང་རྗེའི་བདག་ཉིད་དང་། །སྟོང་ཉིད་ཡེ་ཤེས་མེ་ལ་ནི། །འགྲོ་བ་སྦྱིན་སྲེག་རྒྱལ་བ་མཆོད། །ཅེས་པའོ། །ཤེས་རབ་འོད་ཟེར་འབར་ [162a.4]བས་ཡོད་མེད་འཛིན་པའི་རླབས་ཀྱིས་སྲེག་རྫས་ཟད་བྱེད་པ། །རབ་ཏུ་འཆར་བའི་པདྨ་ཁ་བྱེ་དགོད་པ་ཕུན་སུམ་ཚོགས་པའི་ཚུལ། །གང་གི་དེ་ཉིད་དེ་ལྟར་ལེགས་པར་བརྗོད་པའི་དགེ་བའི་བདུད་རྩི་དབང་བསྟན་ནས། །འགྲོ་བས་རྡོ་རྗེ་འཆང་གི་སྐུ་ཡི་ཕུན་སུམ་ཚོགས་པ་རབ་ཏུ་ཐོབ་གྱུར་ཅིག ། [162a.5]ཅེས་པ་སྦྱིན་སྲེག་གི་ཆོ་ག་འོད་ཀྱི་སྙེ་མ་ཞེས་བྱ་བ། རྗེ་བཙུན་མ་རྡོ་རྗེ་རྣལ་འབྱོར་མས་བྱིན་གྱིས་བརླབས་པའི་པཎྜི་ཏ་ཆེན་པོ་ཨ་བྷ་ཡཱ་ཀ་ར་གུཔྟའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་ཆེན་པོ་ཐམས་ཅད་མཁྱེན་པའི་དཔལ་བཟད་པོས་བོད་ཡུལ་ [162a.6]གྱི་དབུས་དྲང་སྲོང་སྲིན་བུ་རིར་རང་འགྱུར་དུ་མཛད་པ་ལ། སླད་ཀྱི་པཎྜི་ཏ་ཆེན་པོ་རིག་པའི་གནས་རྣམས་ཐུགས་སུ་ཆུད་པའི་མཁས་པ་དག་དང་། གྲུབ་པ་བརྙེས་པའི་སྐྱེས་བུ་ཆེན་པོ་རྣམས་ཀྱི་གསུང་གི་བདུད་རྩིའི་རྒྱུན་གྱིས་ཐུགས་གཏམས་ཤིང་དེ་ཁོ་ན་ཉིད་ལ་གཞོལ་བའི་སློབ་དཔོན་ཉི་མའི་དབང་ [162a.7]པོའི་འོད་ཟེར་དང་། ཆག་ལོ་ཙཱ་བ་དགེ་སློང་ཆོས་རྗེ་དཔལ་གྱིས་ལེགས་པར་བསྒྱུར་ཅིང་གཏན་ལ་ཕབ་པ། དུས་ཕྱིས་ཤོང་ལོ་ཙཱ་བ་དགེ་སློང་བློ་བརྟན་གྱིས་ལེགས་པར་བཅོས་ཤིང་དག་པར་བྱས་སོ། །ཚིགས་སུ་བཅད་པ་ཉིས་བརྒྱ་བདུན་ཅུ་རྩ་ལྔ་པའོ།། །། [162b] [162b.1]{T3143}༄༅༅། །རྒྱ་གར་སྐད་དུ། ཨཱརྱ་བུདྡྷ་ཨ་ནུ་སྨྲྀ་ཏི། བོད་སྐད་དུ། འཕགས་པ་སངས་རྒྱས་རྗེས་སུ་དྲན་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ [162b.2]པའི་སངས་རྒྱས་ཏེ། རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སོ། །དེ་བཞིན་གཤེགས་པ་དེ་ནི། བསོད་ནམས་དག་གི་རྒྱུ་མཐུན་པ། [162b.3]དགེ་བའི་རྩ་བ་རྣམས་ཆུད་མི་ཟ་བ། བཟོད་པས་བརྒྱན་པ། བསོད་ནམས་ཀྱི་གཏེར་རྣམས་ཀྱི་གཞི། དཔེ་བྱད་བཟང་པོ་རྣམས་ཀྱིས་སྤྲས་པ། མཚན་གྱི་མེ་ཏོག་རྒྱས་པ་སྤྱོད་ཡུལ་རན་པར་མཐུན་པ། མཐོང་ན་མི་མཐུན་པ་མེད་པ། དད་པས་མོས་པ་རྣམས་ལ་མངོན་པར་དགའ་བ། ཤེས་ [162b.4]རབ་ཟིལ་གྱིས་མི་ནོན་པ། སྟོབས་རྣམས་ལ་བརྫི་བ་མེད་པ། སེམས་ཅན་ཐམས་ཅད་ཀྱི་སྟོན་པ། བྱང་ཆུབ་སེམས་དཔའ་རྣམས་ཀྱི་ཡབ། འཕགས་པའི་གང་ཟག་རྣམས་ཀྱི་རྒྱལ་པོ། མྱ་ངན་ལས་འདས་པའི་གྲོང་ཁྱེར་དུ་འགྲོ་བ་རྣམས་ཀྱི་དེད་དཔོན། ཡེ་ཤེས་དཔག་ཏུ་མེད་པ། སྤོབས་ [162b.5]པ་བསམ་གྱིས་མི་ཁྱབ་པ། གསུང་རྣམ་པར་དག་པ། དབྱངས་སྙན་པ། སྐུ་བྱད་བལྟ་བས་ཆོག་མི་ཤེས་པ། སྐུ་མཚུངས་པ་མེད་པ་འདོད་པ་དག་གིས་མ་གོས་པ། གཟུགས་དག་གིས་ཉེ་བར་མ་གོས་པ། གཟུགས་མེད་པ་དག་དང་མ་འདྲེས་པ། ཕུང་པོ་དག་ལས་རབ་ཏུ་རྣམ་པར་གྲོལ་ [162b.6]བ། ཁམས་རྣམས་དང་མི་ལྡན་པ། སྐྱེ་མཆེད་རྣམས་བསྡམས་པ། མདུད་པ་རྣམས་ཤིན་ཏུ་ཆད་པ། ཡོངས་སུ་གདུང་བ་དག་ལས་རྣམ་པར་གྲོལ་བ། སྲེད་པ་ལས་ཡོངས་སུ་གྲོལ་བ། ཆུ་བོ་ལས་རྒལ་བ། ཡེ་ཤེས་ཡོངས་སུ་རྫོགས་པ། འདས་པ་དང་མ་བྱོན་པ་དང་། ད་ལྟར་ [162b.7]བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་ཡེ་ཤེས་ལ་གནས་པ། མྱ་ངན་ལས་འདས་པ་ལ་མི་གནས་པ། ཡང་དག་པ་ཉིད་ཀྱི་མཐའ་ལ་གནས་པ་སེམས་ཅན་ཐམས་ཅད་ལ་གཟིགས་པའི་ས་ལ་བཞུགས་པ་སྟེ། འདི་དག་ནི་དེ་བཞིན་གཤེགས་པའི་ཡང་དག་པའི་ཆེ་བའི་ཡོན་ཏན་མོ་ [163a] [163a.1]{T3144}༄༅༅། །རྒྱ་གར་སྐད་དུ། ཏྲི་ས་མ་ཡ་རཱ་ཛ་སྱ་སཱ་དྷ་ནཾ། བོད་སྐད་དུ། དམ་ཚིག་གསུམ་གྱི་རྒྱལ་པོའི་སྒྲུབ་པའི་ཐབས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སྲིད་པའི་ངན་འགྲོས་དུབ་རྣམས་ཀྱིས། །སེམས་ནི་རིན་ཆེན་ལྟར་རྨད་བྱུང་། ། [163a.2]ཕུན་ཚོགས་བདེ་བ་ཀུན་འབྱུང་བའི། །དཔལ་ལྡན་དམ་ཚིག་གསུམ་ཕྱག་འཚལ། །སློབ་དཔོན་སྔ་མས་འདི་བརྗོད་པའི། །ཡང་དག་སྒྲུབ་ཐབས་ཡོད་པ་ཉིད། །འོན་ཀྱང་རྒྱས་པས་འཇིགས་རྣམས་ལ། །མདོར་བསྡུས་པ་ནི་ཉེ་བར་བརྗོད། །འདི་ལ་ངེས་པར་དཔལ་དམ་ཚིག་གསུམ་ [163a.3]གྱི་རྒྱལ་པོའི་རྒྱུད་ཆེན་པོའི་སྔགས་ཀྱི་དཀྱིལ་འཁོར་རམ་རྡུལ་ཚོན་གྱི་དཀྱིལ་འཁོར་དུ་ཆོ་ག་བཞིན་དུ་དབང་བསྐུར་བ་ཐོབ་ཅིང་དེ་ལས་གསུངས་པའི་དམ་ཚིག་དང་སྡོམ་པ་གནས་པ་སྔོན་དུ་འགྲོ་བ་བྱས་ཤིང་རི་དང་ནགས་ལ་སོགས་པའི་ཕུག་གམ་ཁང་པ་དགའ་བ་དང་། གནས་ཁང་ཡང་རུང་སྟེ། འགྲུལ་ [163a.4]འཇུག་གིས་རྣམ་པར་དབེན་ཞིང་ཡིད་དགའ་བར་གྱུར་པ་ལ་སྔགས་པས་གནས་པར་བྱས་ལ། རེ་ཞིག་དང་པོར་རྩ་བའི་རིག་པ་འདི་དག་སངས་རྒྱས་ཀྱི་སྐུ་གཟུགས་ཀྱི་མདུན་དུ་མཎྜལ་ལ་མེ་ཏོག་སིལ་མ་མངོན་དུ་བཀྲམ་ཤིང་ལེགས་པར་ཕྱག་འཚལ་ཏེ། བྱང་ཆུབ་སེམས་བསྐྱེད་པ་དང་། སངས་རྒྱས་ [163a.5]དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་དབུལ་བ་དང་དེ་དག་ཕྱག་འཚལ་བ་ལ་དམིགས་ནས། བཟླས་པ་གོམས་པས་སྟོང་བཟླས་པར་བྱ་སྟེ། དེ་ནི་སྔགས་རྣམས་ཐམས་ཅད་འབུམ་ཕྲག་རེ་རེ་བཟླས་པ་བྱས་པར་འགྱུར་རོ། །སྲུང་བ་ལ་སོགས་པ་ཐམས་ཅད་དང་། སྔགས་འདིས་གྲུབ་པ་ [163a.6]ཐོབ་པར་ཡང་འགྱུར་རོ། །དེ་ལ་རིག་པ་ནི་འདི་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དྲི་མ་མེད་པ་དྲི་མ་དག་པར་མཛད་པ་མཐའ་ཡས་པའི་སྲས་དང་བཅས་པའི་རྒྱལ་བ་དཔག་ཏུ་མེད་ཅིང་མཐར་ཐུག་པའི་མཆོག་སྩོལ་བར་མཛད་པ་རྣམས་ཐམས་ཅད་ཀྱིས་ [163a.7]བདག་ལ་སྩལ་དུ་གསོལ། ཤིན་ཏུ་རྒྱ་ཆེ་བའི་དངོས་གྲུབ་ཀྱི་མཆོག་མཐའ་ཡས་པ་ཐམས་ཅད་བདག་ལ་སྩོལ། དེ་ལ་རྡོ་རྗེའི་ཚིག་ནི་འདི་དག་སྟེ། ཨ་ར་ར་ཨ་ས་མ་ས་མནྟ་ཨ་ནནྟ་དྷ་རྨཱ་ཏེ་ཁ་ཎ་ཁ་ཎ་མ་ཧཱ་བི་ར་ཨ་ཙ་ལེ། ས་མ་ས་མ་ཨ་ས་ཧ་མ་ཧཱ་བ་ལེ། ཀ་ཎ་ཀ་ཎ་མ་ཧཱ་བ་ར་གྲྀ་ཀེ་ཧ་ཧ་ཧ་ཧ་བཛྲ་བཛྲ་དྷ་ཡེ་དྷ་ར་དྷ་ [163b] [163b.1]ར་ཧཱུྃ་ཧཱུྃ་མཎྜལ་ས་མ་བཱ་ལ་ཨ་གྲ་བི་གྲ་མེ་ཀུ་རུ་ཀུ་རུ་ཏུ་རུ་ཏུ་རུ་སརྦ་ཐཱ་སར་བཾ་ཧི་ཛྭ་ལ་ཛྭ་ལ་ཨ་གྲེ་ཨ་གྲི་ཎི་ཧཱུྃ་ཕཊ་ཕཊ་སྭཱ་ཧཱ། དེ་ནས་ལས་ཀྱི་སྒྲིབ་པ་ཐམས་ཅད་ཟད་པར་བྱ་བའི་དོན་དུ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཡི་གེ་བརྒྱ་པ་ཚུལ་དེ་ཉིད་ཀྱིས་སྟོང་ཕྲག་བརྒྱད་བཟླས་པར་བྱ་སྟེ། དམ་པའི་ཆོས་ [163b.2]སྤོང་བ་དང་མཚམས་མེད་པ་ལ་སོགས་པའི་ལས་ཀྱི་སྒྲིབ་པ་ལེགས་པར་ཟད་པར་འགྱུར་རོ། །དེ་དག་ཀྱང་འདི་ཡིན་ཏེ། ཐམས་ཅད་དུ་ཉམས་པ་མེད་པའི་ཆོས་ཉིད་ཀྱིས་སྟོབས་བརྙེས་པའི་དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ལ་ཕྱག་འཚལ་ལོ། །ཨོཾ་ཨ་ས་མ་ས་མ་ས་མནྟ་ཏོ་ཨ་ [163b.3]ནནྟཱ་བཱ་ཏི་ཤཱ་ས་ནི་ཧ་ར་ཧ་ར་སྨ་ར་སྨ་ར་ཎ་བི་ག་ཏ་རཱ་ག་བུདྡྷ་དྷེ་རྨ་ཏེ་ས་ར་ས་ར་མ་སཱ་བཱ་ལཱ་ཧ་ས་ཧ་ས་ས་ཏྲ་ཡ་ས་ཏྲ་ཡ་ག་ག་ན་མ་ཧཱ་བཱ་ལ་རཀྵ་ཎེ་ཛྭ་ལ་ཛྭ་ལ་ན་སཱ་ག་རེ་སྭཱ་ཧཱ། དེ་ནས་རང་དང་གཞན་ལ་ངེས་པར་ལེགས་པར་སྒྲུབ་པའི་ཡན་ལག་ཉིད་དུ་སྔོན་དུ་འགྲོ་བའི་ཆོ་ག་རྗེས་སུ་བསྒྲུབ་པར་བྱའོ། །དེ་ལ་དང་པོ་ནང་ [163b.4]པར་སྔར་ལངས་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་རྗེ་བོ་ཡིན་པའི་བསམ་པ་ཉིད་ཀྱིས་འདི་ལྟར་རབ་ཏུ་ཕྱག་འཚལ་ཏེ། འཇིག་རྟེན་ཁམས་ནི་མཐའ་ཡས་ན། །ཇི་སྲིད་རྒྱལ་བ་སྲས་བཅས་པ། །དེ་དག་ཀུན་ལ་ལུས་ངག་དང་། །བདག་ཡིད་ཀྱིས་ཀྱང་ཕྱག་འཚལ་ལོ། ། [163b.5]དེའི་རྗེས་ལ་བྱང་ཆུབ་ཏུ་སེམས་བསྐྱེད་པར་བྱ་སྟེ། བྱང་ཆུབ་སྦྱིན་པར་བྱེད་པ་ཡིས། །རྫོགས་པའི་བྱང་ཆུབ་སེམས་བསྐྱེད་ཅིང་། །སེམས་ཅན་ཀུན་ལ་ཕན་འབྱུང་བའི། །བཟང་པོའི་སྤྱོད་པ་བདག་གིས་སྤྱད། །དེ་ནས་བགེགས་ཐམས་ཅད་ཚར་གཅད་པར་བྱ་བའི་དོན་དུ་རྡོ་རྗེ་གཏུམ་མོའི་ཕྱག་ [163b.6]རྒྱ་བཅིངས་ལ་མི་གཡོ་བའི་སྙིང་པོ་དོན་ཡོད་པ་ལན་གསུམ་བརྗོད་པར་བྱའོ། །དེ་ལ་རྡོ་རྗེའི་ཕྱག་རྒྱ་ནི་འདི་ཡིན་ཏེ། ལག་པ་གཡས་པའི་ཐལ་མོ་གྱེན་དུ་བསླངས་ལ་མཐེ་བོང་གིས་མཛུབ་མོའི་རྩེ་མོ་མནན་པའི་ལྷག་མ་རྣམས་ནི་རྡོ་རྗེའི་མཚན་ཉིད་དོ། །སྔགས་ནི་རྡོ་རྗེ་ཅན་མ་ལུས་པ་ལ་ཕྱག་ [163b.7]འཚལ་ལོ། །ཏྲཱ་ཊ་ཨ་མོ་གྷ་ཙཎྜ་མ་ཧཱ་རོ་ཥ་ཎ་སྭཱ་ཊ་ཡ་ཧཱུྃ་ཏྲ་མ་ཡ་ཏྲ་མ་ཡ་ཧཱུྃ་ཊ་ཊུ་ཧཾ་མཾ། བཀྲ་ཤིས་ཀྱི་ཡང་བཅིང་བར་བྱ་སྟེ། གཉིས་ཀའི་སོར་མོ་རྣམས་སྤེལ་ནས་ནང་དུ་བཀུག་པས་ཁུ་ཚུར་བཅངས་ཏེ། གུང་མོ་གཉིས་རྩེ་གཅིག་ཏུ་ཕྱིར་བསྐྱེད་ལ་མཛུབ་མོ་གཉིས་ཀྱང་མཐེ་བོང་གི་རྩེ་མོས་ [164a] [164a.1]ཅུང་ཟད་མ་རེག་པར་མནན་ལ་གཟུང་བར་བྱའོ། །སྔགས་ནི་ཨོཾ་ཧ་ར་ཧ་ར་མ་ཧཱ་ནི་མཏྟི་ཧཱུྃ་ཕཊ་སྭཱ་ཧཱ། དེ་ནས་གདོང་བཀྲུ་བ་ལ་སོགས་པ་བྱས་ལ་བདེ་བའི་སྟན་ལ་ཉེ་བར་གནས་ཏེ། ཐད་ཀ་དང་གླེགས་བམ་དང་། སྐུ་གཟུགས་ལ་སོགས་པ་གང་ཡང་རུང་བའི་མདུན་དུ་ཕྱོགས་བཅུ་ན་ [164a.2]བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་དམིགས་ཤིང་མེ་ཏོག་སིལ་མ་གཅལ་དུ་བཀྲམ་པའི་མཎྜལ་བྱས་ལ། སྔར་བཞིན་དུ་ཚིགས་སུ་བཅད་པ་གཉིས་ཀྱིས་ཡན་ལག་ཐམས་ཅད་ཀྱིས་ལེགས་པར་ཕྱག་བཙལ་བ་དང་། བྱང་ཆུབ་ཏུ་སེམས་བསྐྱེད་དེ། འདི་ལྟར་སངས་རྒྱས་དང་བྱང་ [164a.3]ཆུབ་སེམས་དཔའ་ཐམས་ཅད་ལ་བདག་ཉིད་དབུལ་བར་བྱ་སྟེ། བདག་མིང་འདི་ཞེས་བགྱི་བ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་ཀྱིས་བདག་ཉིད་དབུལ་གྱིས། ཐམས་ཅད་ནས་དུས་ཐམས་ཅད་དུ་ལེགས་པར་བདག་གཟུང་དུ་གསོལ། སངས་རྒྱས་དང་བྱང་ཆུབ་སེམས་ [164a.4]དཔའ་ཐམས་ཅད་ཀྱིས་བདག་ལ་བྱིན་གྱིས་བརླབ་ཏུ་གསོལ། ཐུགས་རྗེ་ཆེན་པོ་དང་ལྡན་པའི་མགོན་པོ་རྣམས་ཁྱེད་ལ་ནི་དངོས་གྲུབ་ཀྱི་མཆོག་གསོལ་བ་ཡང་ལགས་ཀྱིས་ཞེས་བྱའོ། །དེ་ནས་སྡིག་པ་རྣམས་ཐམས་ཅད་བཤགས་པར་བྱ་སྟེ། འདོད་ཆགས་དང་ཞེ་སྡང་དང་གཏི་མུག་ལས་བསྐྱེད་པའི་དུས་ [164a.5]ཐམས་ཅད་པའི་སྡིག་པ་ཐམས་ཅད་ལྷག་མ་མ་ལུས་པར་ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་མཁྱེན་པ་ལྟར་བདག་གིས་ཀྱང་བཤགས་པར་བགྱིའོ། །ཞེས་བྱ་བའོ། །དེ་ནས་བསོད་ནམས་ལ་རྗེས་སུ་ཡི་རང་བར་བྱ་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བསོད་ནམས་དང་། [164a.6]ཡེ་ཤེས་ཀྱི་ཚོགས་འཇིག་རྟེན་དང་འཇིག་རྟེན་ལས་འདས་པ་དུས་གསུམ་གྱིས་བསྡུས་པ་གང་དག་ཡིན་པ་དེ་དག་རྣམས་ལ་ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་མཁྱེན་པ་ལྟར་རྗེས་སུ་ཡི་རང་བར་གྱུར་པའི་མཆོག་གི་རྗེས་སུ་ཡི་རང་བར་བགྱིའོ་ཞེས་སོ། །དེ་ནས་སྐྱིལ་ཀྲུང་གིས་ལེགས་པར་ [164a.7]གནས་ལ། དམ་ཚིག་གི་ཕྱག་རྒྱ་འདི་བཅིང་བར་བྱ་སྟེ། ཐལ་མོ་སྦྱར་བ་སྤྱི་བོའི་སྟེང་དུ་བཞག་པ་ནི་དམ་ཚིག་གི་ཕྱག་རྒྱའོ། །སྔགས་ནི་ཡང་དག་པར་གྲུབ་པར་སྒྲུབ་པ་ལ་ཕྱག་འཚལ་ལོ། །མཐར་ཕྱིན་པའི་ཐུགས་རྗེས་མཆོག་སྟེར་བ། ཏ་ཡི་ཏ་ཡི། ཨ་ཏི་བ་ལི་ན་མོ་སྟུ་བ་ར་སིདྡྷི་དཱ་ཡ་ཀེ་བྷྱོ། ། [164b] [164b.1]མ་ཧཱ་ཀྲི་པེ་བྷྱཿསྭཱ་ཧཱ། འདི་དག་ནི་ཕྱག་རྒྱ་དང་གསང་སྔགས་ཐམས་ཅད་ཀྱི་དམ་ཚིག་ལེགས་པར་བསྟན་པར་འགྱུར་རོ། །དེ་ནས་སྔར་བཞིན་དུ་རྡོ་རྗེའི་ཕྱག་རྒྱ་བཅིངས་ལ་མི་གཡོ་བའི་སྙིང་པོ་རྗེས་སུ་དྲན་པར་བྱ་བ་ནི། ན་མཿས་མནྟ་བཛྲ་ཎཱཾ་ཨ་ཙ་ལ་ཀཱ་ཎ་ཙནྜ་སཱ་དྷ་ཡ་ཧཱུཾ་ཕཊ། དེའི་རྗེས་ཐོགས་སུ་རྡོ་རྗེ་གཙུག་ [164b.2]ཏོར་གྱི་ཕྱག་རྒྱ་མགོ་ལ་དགོད་པར་བྱ་བ་ལ། གཡས་པ་ཁུ་ཚུར་བཅངས་པའི་མཐེ་བོང་བསླང་བར་བྱ་བའོ། །སྔགས་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཐམས་ཅད་ལ་ཕྱག་འཚལ་ལོ། །ཏྲི་ཤི་ཁཱ་གྲི་ན་མོ་སྟུ་སྟེ། ས་མནྟ་དེ་ས་མནྟཱ་གྲི་གུ་ཧྞཱ་ཙ་ལཱ་གྲ་དྷ་ར་མེ། བི་དྷུ་ཎཱ་ཀླེ་ཤ་དུཿཁཱ་ཛཱ་ལཱ་ན་ཛ་ག་ [164b.3]ཏཿསརྦ་སུ་ཁ་ན་དཱ་ཧི་ཙ་ཤུ་ཏ་ཏྲེ་ད་མ་ཏྲི་ས་མ་ཡེ་ཀུ་རུ་སྭཱ་ཧཱ། འདིས་ནི་སྔགས་པ་ཐེག་པ་ཆེན་པོ་ལས་ཡོངས་སུ་ཉམས་པར་མི་འགྱུར་བ་དང་བར་ཆད་མེད་པར་གྲུབ་པར་ཡང་འགྱུར་རོ། །གཞན་ཡང་ཟླ་མེད་པའི་སྲུང་བ་ཆེན་པོ་གནས་ལྔར་དགོད་པར་བྱ་སྟེ། སྲུང་བ་ཆེན་པོར་འགྱུར་རོ། །སྲིན་ལག་ [164b.4]དང་མཐེའུ་ཆུང་དག་ནང་དུ་བཅུག་པའི་སྙིམ་པ་བྱས་ལ་མཐེའུ་ཆུང་གཉིས་ཕྱིར་བརྐྱང་ལ་རྩེ་མོ་སྦྲང་དེ་སྲིན་ལག་གཉིས་བཀུག་པ་དེའི་སྟེང་དུ་མཐེ་བོང་གཉིས་ཅུང་ཟད་མ་རེག་པར་དགོད་དོ། །གུང་མོ་གཉིས་སྦྱར་ནས་བསྒྲེང་བ་དེའི་ལོགས་ཀྱི་ཚིགས་གསུམ་བར་མཛུབ་མོ་ཅུང་ཟད་བཀུག་པས་བཀོད་པ་ནི་ཟླ་ [164b.5]མེད་པ་ཞེས་བྱ་བའི་ཕྱག་རྒྱའོ། །སྔགས་ནི་ན་མཿས་མནྟ་བཛྲ་ཎཱཾ་ཨོཾ་ཧཾ་ཧཱུཾ་ཕཊ། ཡཱ་ས་ཧེ་ཧཱུཾ་ཕཊ། དེ་ནས་ནི་གོ་ཆ་ཆེན་པོའི་ཕྱག་རྒྱ་སྟེ། རྡོ་རྗེ་མི་ཐུབ་པའི་གོ་ཆ་བགོ་བར་བྱ་བ། མཐེའུ་ཆུང་གཉིས་དང་མཐེ་བོང་གཉིས་ལུ་གུ་རྒྱུད་ཀྱི་རྣམ་པ་གཞན་རྣམས་ཀྱི་རྩ་བ་དང་བར་དང་རྩེ་མོ་ལེགས་པར་སྦྱང་བ་ནི་ [164b.6]རྡོ་རྗེ་མི་ཐུབ་པའོ། །སྔགས་ནི་ན་མཿས་མནྟ། བཛྲ་ཎཱཾ་ཨོཾ་ཧཾ་ཧཱུཾ་བཛྲ་བ་ཡེ་བ་ཀ་བ་ཙེ་ཧོ་བཛྲ་བཛྲ་ཧཱུཾ་ཕཊ། དེ་ལྟར་བདུད་ལ་སོགས་པ་རྣམས་ཀྱིས་ཆེས་ཤིན་ཏུ་ཡང་བརྫི་བར་མི་འགྱུར་རོ། །དེ་ལྟར་བདག་སྲུང་བ་བྱས་ནས་གནས་བསྲུང་བར་བྱ་སྟེ། དེ་ལྟར་རྡོ་རྗེ་གདན་གྱི་ཕྱག་རྒྱས་གདན་རྡོ་རྗེའི་རང་བཞིན་ [164b.7]དུ་བྱིན་གྱིས་བརླབ་པར་བྱ་བ་ལས། སྐྱིལ་ཀྲུང་བཅས་ལ་ཐལ་མོ་གཡོན་པ་བཀན་པའི་སྟེང་དུ་ཐལ་མོ་གཡས་པ་ཁ་ཡར་ལྟ་བ་ལེགས་པར་བཞག་པ་ནི་རྡོ་རྗེ་གདན་གྱི་ཕྱག་རྒྱའོ། །སྔགས་ནི། ན་མཿ་སམནྟ་བཛྲ་ཎཱཾ་ཨོཾ་ཧཾ་ཧཱུཾ་བཛྲ་ནེ་པཾ་ཧཱུཾ་ཕཊ། དེ་ནས་རྡོ་རྗེའི་དཀྱིལ་འཁོར་གྱི་ཕྱག་རྒྱས་བདག་ [165a] [165a.1]ཉིད་ཀྱི་གནས། རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱ་སྟེ། ཐལ་མོ་མཉམ་པར་སྦྱར་བ་མཛུབ་མོ་གཉིས་དང་སྲིན་ལག་གཉིས་ཀྱི་ཚིགས་དབུས་མ་བཅག་ནས་ནང་དུ་བཀུག་སྟེ་ལེགས་པར་བཅུག་པས་ཀ་བའི་རྣམ་པར་རོ། །ལྷག་མ་ཁབ་ཀྱི་རྣམ་པར་བྱ་བ་ནི་རྡོ་ [165a.2]རྗེའི་དཀྱིལ་འཁོར་གྱི་ཕྱག་རྒྱའོ། །སྔགས་ནི། ན་མཿས་མནྟ་བཛྲཱ་ཎཱཾ་ཨོཾ་ཧཾ་ཧཱུྃ་བཛྲཱ་གྲ་བྷུ་བ་ནེ་ལྃ་ཨོཾ་ཧཱུྃ་ཕཊ། ད་ནི་རྡོ་རྗེ་ར་བ་ཡིན་པས། དེའི་ཕྱག་རྒྱ་དགོད་པར་བྱ་སྟེ། སྙིམ་པ་གདངས་པའི་སྲིན་ལག་གཉིས་ནང་དུ་དགུག་གུང་མོ་གཉིས་རྩེ་སྤྲང་ནས་བསྒྲེང་བའི་ཚིགས་གསུམ་པ་ལ་མཛུབ་མོ་གཉིས་རྡོ་རྗེའི་ [165a.3]རྣམ་པར་བཀོད་པའི་ལོགས་ལ་ཡང་མཐེ་བོ་གཉིས་སྦྱར་བ་ནི་ར་བའི་ཕྱག་རྒྱའོ། །སྔགས་ནི། ན་མཿས་མནྟ་བཛྲཱ་ཎཱཾ་ཨོཾ་ཧཾ་ཧཱུཾ་བཛྲ་མཎྜ་ལེ་བནྡྷ་བནྡྷ་ཧཱུཾ་ཕཊ། དེ་ནས་དེའི་སྟེང་དུ་རྡོ་རྗེའི་གུར་ཡིན་པས་དེའི་ཕྱག་རྒྱ་དགོད་པར་བྱ་སྟེ། ཐལ་མོ་མཉམ་དུ་སྦྱོར་ལ་སྲིན་ལག་གཉིས་དང་མཛུབ་མོ་གཉིས་རྒྱབ་སྤྲད་ལ་ནང་དུ་དགུག་ [165a.4]གོ། །གུང་མོ་རྩེ་སྤྲད་ལ་བསྒྲེང་དེ་བཞིན་དུ་མཐེའུ་ཆུང་དང་མཐེབ་མོ་དག་ཀྱང་བྱས་པ་ནི་གུར་གྱི་ཕྱག་རྒྱའོ། །སྔགས་ནི། ན་མཿས་མནྟ་བཛྲཱ་ཎཱཾ་ཨོཾ་ཧཾ་ཧཱུཾ་བཛཱ་གྲ་བྷ་ནེ་མཿཧཱུཾ་ཕཊ། དེ་ནས་ཕྱི་རོལ་དུ་རྡོ་རྗེ་འབར་བ་སྟེ། དེའི་ཕྱག་རྒྱ་དགོད་པར་བྱ་བ་ནི། མི་འཇིགས་པའི་ཕྱག་རྒྱར་བྱས་པའི་རྒྱབ་ཏུ་གཡོན་པ་སོར་མོ་ [165a.5]རྣམས་ཀྱི་བཀབ་ལ། གཡས་པས་བསྐོར་བ་ནི་རྡོ་རྗེ་འབར་བའོ། །སྔགས་ནི། ན་མཿས་མནྟ་བཛྲཱ་ཎཱཾ་ཨོཾ་ཧཾ་ཧཱུཾ་ཕཊ། དེ་ནས་མཚམས་གཅོད་པར་བྱ་སྟེ། ལག་པ་གཡས་པ་ཁུ་ཚུར་བཅངས་པའི་མཛུབ་མོ་བསྒྲེང་བས་གཡས་སུ་བསྐོར་བར་བྱའོ། །བར་མཚམས་མེད་པ་ཞེས་བྱ་བའི་མཚམས་བཅད་པའོ། ། [165a.6]འདིའི་སྔགས་ནི། ན་མཿས་མནྟ་བཛྲ་ཎཱཾ་ཨོཾ་ཧཾ་ཧཱུཾ་མ་སཱི་མཱ་ཧཱ་སཱི་མཱ་བནྡྷེ་བནྡྷ་བནྡྷ་བཛྲེ་བཛྲི་ཎི་ཧཱུཾ་ཕཊ། དེ་ལྟར་སྲུང་བ་ཡན་ལག་དང་བཅས་པ་བྱས་པ་དེས་དེ་ནས་རང་གི་གནས་ནས་གནས་པ་ཉིད་ཀྱིས་སངས་རྒྱས་དང་བྱང་ཆུབ་སེམས་དཔའ་རྣམས་ལ་དེ་བཞིན་གཤེགས་པ་འབྱུང་བའི་ཕྱག་དང་། ཡོན་གྱི་སྙན་ [165a.7]གསན་ལེགས་པར་དབབ་པའོ། །དེས་དེ་དག་རྣམས་ཀུན་ནས་དགོངས་པར་འགྱུར་རོ། །དངོས་གྲུབ་ཀྱི་མཆོག་རྣམས་ཀྱང་སྟེར་བར་འགྱུར་རོ། །ཁུ་ཚུར་གཉིས་གཤིབས་པའི་མཐེའུ་ཆུང་གཉིས་སོ་སོར་ཕྱིར་བརྐྱང་བ་ནི་དེ་བཞིན་གཤེགས་པ་འབྱུང་བའི་ཕྱག་རྒྱའོ། །སྔགས་ནི་སངས་རྒྱས་ [165b] [165b.1]དང་བྱང་ཆུབ་སེམས་དཔའ་རྣམས་ཐམས་ཅད་ལ་ཕྱག་འཚལ་ལོ། །ཨཱཿཨ་མ་ལ་བི་ཀྲཱན་ཏ་ཏེ་ཛི་ནི་ཨ་ར་ཛེ་སྭཱ་ཧཱ། དེ་ནས་དྲི་ལ་སོགས་པའི་ཕྱི་རོལ་གྱི་ཉེ་བར་སྤྱད་པར་བྱ་བ་ཡོད་པ་རྣམས་མི་གཡོ་རྡོ་རྗེའི་ཕྱག་རྒྱས་ཡོངས་སུ་སྦྱངས་ལ་དྲི་ལ་སོགས་པ་རྣམས་སོ་སོར་རང་རང་གི་སྔགས་ཀྱིས་ལན་བརྒྱད་ [165b.2]དུ་མངོན་པར་བསྔགས་ལ་མཆོད་པར་བྱའོ། །དེ་ལ་དྲིའི་སྔགས་ནི། དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཐམས་ཅད་ལ་ཕྱག་འཚལ་ལོ། །མཚུངས་པ་མེད་པའི་བདག་གི་དྲི་དམ་པ་འདི་ནམ་མཁའི་དབྱིངས་དག་ཆེར་ཁྱབ་པས་བཅོམ་ལྡན་འདས་ལ་འཕྲོ་བའི་དོན་ཐམས་ཅད་ [165b.3]སྒྲུབ་པ་སྭཱ་ཧཱ། མེ་ཏོག་གི་སྔགས་ནི། དུས་གསུམ་དུ་གཤེགས་པ་རྣམས་ཐམས་ཅད་ལ་ཕྱག་འཚལ་ལོ། །ཀུན་དུ་བསྐོར་བས་བསྐོར་བའི་མེ་ཏོག་ཆེན་པོ་དང་ལྡན་པ་སྭཱ་ཧཱ། བདུག་སྤོས་ཀྱི་སྔགས་ནི། དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཐམས་ཅད་ལ་ཕྱག་འཚལ་ལོ། ། [165b.4]རྩེ་མོའི་དྲི་མཆོག་གི་རྩེ་མོར་གྱུར་པའི་སྤོས་ཀྱི་རྩེ་མོ་སྭཱ་ཧཱ། མར་མེའི་སྔགས་ནི་དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཐམས་ཅད་ལ་ཕྱག་འཚལ་ལོ། །མཆེད་ཅིང་འབར་བའི་མར་མེའི་སྣང་བའི་རྩེ་མོ་སྭཱ་ཧཱ། ལྷ་བཤོས་ཀྱི་སྔགས་ནི། དུས་གསུམ་དུ་གཤེགས་པའི་དེ་ [165b.5]བཞིན་གཤེགས་པ་རྣམས་ཐམས་ཅད་ལ་ཕྱག་འཚལ་ལོ། །ཨ་ར་ར་པ་ར་ར་ཀ་ར་ར་གཏོར་མ་བཏང་ཞིང་བདག་གིས་གཏོར་མ་དབུལ་བའི་གཏོར་མ་ཆེན་པོ་སྭཱ་ཧཱ། དེ་ནས་ཕྱོགས་བཅུ་འཇིག་རྟེན་གྱི་ཁམས་ན་གནས་པའི་སྣ་ཚོགས་པའི་མཆོད་པའི་ཡན་ལག་གཞན་རྣམས་འདི་ལྟར་དབུལ་བར་ [165b.6]བྱ་སྟེ། ཕྱག་འཚལ་བའི་ཐལ་མོ་སྦྱར་ལ་བདག་གིར་མ་བྱས་ཤིང་ཡོངས་སུ་གཟུང་བ་མེད་པའི་མཆོད་པའི་བྱེ་བྲག་ཏུ་གྱུར་པའི་ཕྱོགས་བཅུའི་འཇིག་རྟེན་གྱི་ཁམས་ན་གང་དག་ཐང་ལས་སྐྱེས་པ་རིན་པོ་ཆེའི་རི་དང་དཔག་བསམ་གྱི་ཤིང་ལ་སོགས་པ་དང་ཆུ་ལས་སྐྱེས་པ་རྒྱ་མཚོའི་རིན་པོ་ཆེ་ལ་ [165b.7]སོགས་པ་དང་། གསེར་གྱི་འདམ་ལས་སྐྱེས་པ་ལ་སོགས་པ་དང་། གཞན་ཡིད་གང་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་གཟུགས་དང་སྒྲ་དང་དྲི་དང་རོ་དང་རེག་བྱ་ལ་སོགས་པ་རྣམས་ཐམས་ཅད་ཀྱང་སྟེ། དེ་དག་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ [166a] [166a.1]རྣམས་ལ་ཅི་ནས་ཀྱང་དབུལ་བར་བགྱིའོ་ཞེས་བྱ་བ་ནི་དཔེའོ། །ཡིད་ཀྱི་རང་བཞིན་གྱི་མཆོད་པའི་སྤྲིན་ཚོགས་རྣམས་ཀྱང་འདི་ལྟར་དབུལ་བར་བྱ་སྟེ། རྩེ་མོ་ཅུང་ཟད་བསྐུམ་ནས་ཐལ་མོ་གང་བར་སྦྱར་བས་ཕྱག་འཚལ་བའི་མཚན་ཉིད་ཀྱི་ཐལ་མོར་བྱས་ལ། འདི་སྐད་དུ་ [166a.2]བརྗོད་པར་བྱའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་རླབས་ཀྱི་སྟོབས་དང་བདག་གི་སྨོན་ལམ་དང་བསོད་ནམས་ཀྱི་སྟོབས་དང་རིག་པའི་གསང་སྔགས་ཀྱི་སྟོབས་ཀྱིས་ཀྱང་། སངས་རྒྱས་དང་བྱང་ཆུབ་སེམས་དཔའ་རྣམས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ [166a.3]མཆོག་ཏུ་རྒྱ་ཆེ་བ་བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་ལས་མངོན་པར་གསུངས་པའི་མཆོད་པའི་སྤྲིན་ཆེན་པོ་ཀུན་དུ་འབྱུང་བར་གྱུར་ཅིག་ཅེས་བསམ་པར་ཡང་བྱས་ལ། མཆོད་པ་བྱིན་གྱིས་རློབ་པར་བྱེད་པའི་རིག་པའི་རྒྱལ་པོ་འདི་ལན་བརྒྱད་རྗེས་སུ་བརྗོད་པར་བྱའོ། །སངས་རྒྱས་ [166a.4]དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཨཏྒ་ཏེ་སྥ་ར་ཧི་མྃ་ག་ག་ན་ཁྃ་ས་མནྟ་ཏ་སྭཱ་ཧཱ། དེ་ནས་འཇིག་རྟེན་གྱི་ཁམས་ཐམས་ཅད་རྣམ་པར་དག་པར་བྱེད་པའི་སངས་རྒྱས་དང་། བྱང་ཆུབ་སེམས་དཔའ་རྣམས་ཐམས་ཅད་ལ་ཡོན་ཏན་སྣ་ཚོགས་པའི་གདངས་དང་ལྡན་པའི་སྒྲ་ [166a.5]དབྱངས་ཀྱི་སྤྲིན་ཚོགས་རྒྱ་མཚོ་དང་། ཆོས་ཀྱི་སྒྲ་དབྱངས་ཀྱི་སྤྲིན་ཚོགས་རྒྱ་མཚོ་རྣམས་ཀྱིས་ཀྱང་ཐམས་ཅད་དུ་ཚིམ་པར་གྱུར་ཅིག་ཅེས་བསམས་ལ། བསྟོད་པ་དང་སྒྲ་དབྱངས་ཀྱི་སྤྲིན་ཚོགས་རྣམས་མངོན་པར་འབྱུང་བར་བྱེད་པའི་རིག་པའི་རྒྱལ་པོ་འདི་ལན་བརྒྱད་རྗེས་སུ་བརྗོད་པར་བྱ་སྟེ། སངས་ [166a.6]རྒྱས་དང་བྱང་ཆུབ་སེམས་དཔའ་རྣམས་ཐམས་ཅད་ལ་ཕྱག་འཚལ་ལོ། །སརྦ་ཏྲ་སཾ་ཀུ་རུ་མི་ཏཱ་བྷི་ཛྙཱ་ར་ཤི་ནི་ན་མོ་སྟུཏྟེ་སྭཱ་ཧཱ། དེ་ནས་འཇིག་རྟེན་གྱི་ཁམས་རྒྱ་མཚོ་ཐམས་ཅད་ཀྱི་བདག་གི་དངོས་པོ་དང་མཚུངས་པར་ཐམས་ཅད་ལ། སངས་རྒྱས་དང་བྱང་ཆུབ་སེམས་དཔའ་སྤྲུལ་པའི་སྤྲིན་ཚོགས་ [166a.7]ཐམས་ཅད་ནས་ཀུན་དུ་སྤྲོས་པས་སེམས་ཅན་རྣམས་ཐམས་ཅད་ཀྱི་སྡུག་བསྔལ་ཐམས་ཅད་རབ་ཏུ་ཞི་བར་མཛད་དུ་གསོལ་བ་དང་། ཀུན་དུ་བཟང་པོའི་སྐུ་ལ་སོགས་པ་དག་པ་མཐར་ཐུག་གི་བར་གྱི་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་ལེགས་པར་ཐོབ་པར་ [166b] [166b.1]མཛད་དུ་གསོལ་ཞེས་ཀྱང་བསམས་ལ་རིག་བའི་རྒྱལ་པོ་འདི་ལན་བརྒྱད་ཀྱི་བར་དུ་རྗེས་སུ་བརྗོད་པར་བྱ་བ་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཐམས་ཅད་ལ་ཕྱག་འཚལ་ལོ། །རྡོ་རྗེ་སེམས་དཔའ་ཆེན་པོ་ལ་ཕྱག་འཚལ་ཞིང་བསྟོད་དོ། །སེམས་ཅན་ལ་ཕན་པ་མཛད་པས་ [166b.2]བཞུགས་སུ་གསོལ། ཐམས་ཅད་ལ་ཆོས་རྣམས་ཐམས་ཅད་བྱིན་གྱིས་བརླབ་ཏུ་གསོལ། སྭཱ་ཧཱ་མཆོད་པ་ལ་སོགས་པ་དེ་དག་རྣམས་ཐམས་ཅད་སྔགས་ལ་སོགས་པའི་སྟོབས་ཀྱི་ཕྱིན་ཅི་ལོག་ཏུ་འགྱུར་བ་མ་ཡིན་ནོ་ཞེས་དད་པར་བྱ་བའོ། །དགེ་བའི་རྩ་བ་དེ་རྣམས་ཀྱང་འདི་ལྟར་བླ་ན་མེད་པ་ཡང་ [166b.3]དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱ་སྟེ། ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་རྗེས་སུ་མཁྱེན་པའི་ཡོངས་སུ་བསྔོ་བར་གྱུར་པ་དེ་ལྟར་བདག་གིས་ཀྱང་དགེ་བའི་རྩ་བ་དེ་དག་ཡོངས་སུ་བསྔོ་བར་བགྱིའོ། །དགེ་བའི་རྩ་བ་འདིས་ཀྱང་བདག་ཀུན་དུ་བཟང་པོའི་སྤྱོད་ [166b.4]པས་བྱང་ཆུབ་མངོན་པར་སངས་རྒྱས་ཏེ་སེམས་ཅན་ཐམས་ཅད་ཀྱང་ཀུན་དུ་བཟང་པོའི་སྤྱོད་པ་ཡོངས་སུ་དག་པ་ལ་རབ་ཏུ་དགོད་པར་བྱའོ་ཞེས་བྱ་བར་རོ། །དེ་ནས་སངས་རྒྱས་དང་བྱང་ཆུབ་སེམས་དཔའ་རྣམས་ཐམས་ཅད་ཀྱི་བྱིན་རླབས་འབྱུང་བར་བྱ་བའི་དོན་དུ། དེའི་ཕྱག་རྒྱ་བཅིངས་ལ་ [166b.5]སྔར་བཤད་པའི་ཡི་གེ་བརྒྱ་པ་དྲན་པར་བྱའོ། །ཡང་ན་ཡི་གེ་ལྔ་པའོ། །ལག་པ་གཉིས་ཕན་ཚུན་དུ་རྒྱབ་སྦྲེལ་བས་གཤིབས་པའི་སོར་མོའི་རྩེ་མོ་གྱེན་དུ་བསྟན་ལ་མཛུབ་མོ་གཉིས་དང་མཐེའུ་ཆུང་གཉིས་ཀྱང་ལུ་གུ་རྒྱུད་དུ་དགོད་ཅིང་གུང་མོ་གཉིས་དང་སྲིན་ལག་དག་ཀྱང་བསྒྲེང་བའི་བར་དུ་ [166b.6]མཐེ་བོང་གཉིས་བཅུག་པ་ཁ་གྱེན་དུ་བསྟན་ལ་བཟུང་བ་ནི་ཡི་གེ་བརྒྱ་པའི་ཕྱག་རྒྱའོ། །ཡི་གེ་ལྔ་པའི་ཕྱག་རྒྱ་ཡང་། ཐལ་མོ་ཁ་སྦྱར་དུ་བྱས་ཏེ་མཛུབ་མོ་གཉིས་ཀྱིས་མཐེ་བོང་གཉིས་རྩེ་མོ་ལ་རེག་པར་བྱས་ལ་ལྷག་མ་ནི་དེ་ཁོ་ན་ཉིད་བཞིན་དུ་ཁབ་ཀྱི་རྣམ་པར་རོ། །སྔགས་ནི་སངས་རྒྱས་ [166b.7]དང་བྱང་ཆུབ་སེམས་དཔའ་རྣམས་ཐམས་ཅད་ལ་ཕྱག་འཚལ་ལོ། །ཨཱ་བཱི་ར་ཧཱུྃ་ཁྃ། ད་ནི་ཕྱག་རྒྱ་ཐམས་ཅད་ཡང་དག་པར་སྡུད་པར་གྱུར་པ་ཀུན་དུ་སྣང་བར་བྱེད་པ་གཙུག་ཏོར་གྱི་ཕྱག་རྒྱའམ་ཆོས་ཀྱི་འཁོར་ལོའི་བཅིང་བར་བྱའོ། །ལག་པ་གཉིས་མཉམ་པོར་བཀན་ནས་བརྐྱང་ལ་ [167a] [167a.1]སྲིན་ལག་དང་མཛུབ་མོ་ལག་པའི་ནང་དུ་སེན་མོས་སེན་མོ་གཏུགས་པ་ལ་མཐེ་བོང་གི་རྩེ་མོ་དགུག་གོ། །མཐེའུ་ཆུང་ནི་རྩེ་སྦྲང་ལ་སྦྱར་ཏེ་བརྐྱང་ངོ་། གུང་མོ་ནི་དེ་ཁོ་ན་ལྟར་སེན་མོའི་རྩེ་མོ་མཉམ་པོར་སླང་ངོ་། །ཀུན་དུ་སྣང་བར་བྱེད་པ་གཙུག་ཏོར་གྱི་ཕྱག་རྒྱའོ། །དེ་ཉིད་ [167a.2]ལ་མཛུབ་མོ་བཤུགས་ལ་སེན་མོས་སེན་མོ་ལ་ཅུང་མ་རེག་པའི་མཎྜལ་གྱི་རྣམ་པ་སྟེ། ཆོས་ཀྱི་འཁོར་ལོའི་ཕྱག་རྒྱའོ། །རིམ་པ་ཇི་ལྟ་བ་བཞིན་དུ་འདི་དག་གཉིས་ཀྱི་སྔགས་ནི། ཨཱཿམཾ་ཧཾ། ཨོཾ་དྱུན་པ་ཏ་ཡཙྪ་ན་ཏ་ཙ་ཀྲེ་ཎ་བཛྲི་ཎཱ་ཧཱུྃ། འདི་དག་གཉིས་གང་ཡང་རུང་བ་བཅིངས་ལ་སྔགས་ལན་ [167a.3]ཅིག་བརྗོད་ལ་འགྲོ་བའམ་འདུག་པས་ཀྱང་བཟླས་པར་བྱ་སྟེ། བདུད་ལ་སོགས་པས་ཟིལ་གྱིས་ནོན་པར་མི་འགྱུར་རོ། །དངོས་གྲུབ་རྣམས་ཀྱང་འདི་ལ་མངོན་སུམ་དུ་འགྱུར་རོ། །མྱུར་དུ་འགྲུབ་པར་བྱ་བའི་དོན་དུ་དེ་ནས་ཆོས་འབྱུང་གི་ཕྱག་རྒྱ་བཅིངས་ལ་དེའི་སྔགས་བརྗོད་པར་བྱའོ། །ལག་པ་ [167a.4]གཡོན་པ་ཁུ་ཚུར་བཅངས་ལ་མཛུབ་མོ་དང་མཐེའུ་ཆུང་དང་མཐེ་བོ་རྣམས་གྱེན་དུ་བརྐྱང་བར་བྱ་བ་ནི་ཆོས་འབྱུང་གི་ཕྱག་རྒྱའོ། །སྔགས་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཨཱཿས་ར་པ་ཐཱ་སར་པ་ཏྲ་ཎ་ཀེ་སྭཱ་ཧཱ། རང་གི་ཕྱག་རྒྱ་དང་སྔགས་ཀྱང་ལན་ [167a.5]ཅིག་བརྗོད་པས་དམ་ཚིག་བརྟན་པར་བྱའོ། །རང་གི་ཕྱག་རྒྱ་རྣམས་ཀྱང་ཅི་རིགས་པར་རིག་པར་བྱའོ། །དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཡན་ལག་ལྔས་ཕྱག་འཚལ་བར་དམིགས་ཤིང་བཟླས་པ་གོམས་པས་ཇི་ལྟར་མངོན་པར་འདོད་པའི་སྔགས་རྣམས་མྱུར་ [167a.6]བར་མ་ཡིན་བུལ་བར་མ་ཡིན་པའི་རྟོག་པ་སྤངས་ལ་སྔགས་ཀྱི་ཡི་གེ་རིག་པའི་སེམས་ཀྱིས་ཇི་སྲིད་དུ་སྐྱོ་བར་མ་གྱུར་པ་དེ་སྲིད་དུ་བཟླས་པར་བྱའོ། །དེ་ནས་ལངས་ཏེ་དེ་བཞིན་གཤེགས་པའི་སྙིང་པོ་ལན་ཅིག་བརྗོད་ལ་འཕགས་པ་སྡོང་པོ་བཀོད་པ་ལ་སོགས་པའི་མདོ་དག་གདོན་པར་ [167a.7]བྱའོ། །ཐ་མར་མཆོད་ཅིང་ཕྱག་བཙལ་ལ་ཟས་བཟའ་བར་བྱའོ། །ཟ་བ་ན་ཡང་སྔགས་འདིས་ལན་བརྒྱད་དུ་མངོན་པར་བསྔགས་ཏེ་དང་པོའི་ཆ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ལྷ་བཤོས་སུ་བྱས་ལ་འབྲིང་པོའི་ཚད་དུ་བཟའ་བར་བྱའོ། །དེ་ལ་སྔགས་ནི་འདི་ཡིན་ཏེ། [167b] [167b.1]སངས་རྒྱས་དང་བྱང་ཆུབ་སེམས་དཔའ་རྣམས་ཐམས་ཅད་ལ་ཕྱག་འཚལ་ལོ། །ཨོཾ་སྟོབས་སྦྱིན་པའི་གཟི་བརྗིད་ཀྱི་ཕྲེང་བ་སྭཱ་ཧཱ། ཟོས་པའི་ལྷག་མ་ཡང་འཕགས་པ་མི་གཡོ་བ་གཏུམ་པོ་དོན་ཡོད་པའི་སྙིང་པོས་ལན་ཅིག་མངོན་པར་བསྔགས་ལ་ལྷག་མའི་ཆང་བུ་སྦྱིན་པར་བྱ་སྟེ། རྟག་ [167b.2]ཏུ་རྗེས་སུ་འབྲེལ་པ་རྣམས་ཀྱིས་བླང་བར་དངོས་གྲུབ་སྟེར་བར་བྱེད་དོ། །ཟོས་པ་ངལ་སོས་ནས་ཀྱང་སྡིག་པ་བཤགས་པ་ལ་སོགས་པ་བྱས་ཏེ། དམ་པའི་ཆོས་ལ་དགའ་བ་ཉིད་ཀྱིས་གནས་པར་བྱའོ། །གལ་ཏེ་ནུས་པར་གྱུར་ན་ཕྱི་དྲོ་ཡང་སྲུང་བ་ལ་སོགས་པ་ཡན་ལག་དང་བཅས་ [167b.3]པ་དང་མཆོད་པ་ལ་སོགས་པ་དེ་དག་ཐམས་ཅད་བྱས་ལ་བཟླས་པ་བྱའོ། །མི་ནུས་ན་སྔ་དྲོ་བྱས་པ་ཉིད་ཀྱི་སྲུང་བ་ལ་སོགས་པ་གཤེགས་སུ་མ་གསོལ་བར་གནས་པ་ཉིད་ཀྱིས་བསམ་པ་བརྟན་པར་བྱས་ལ། འཕགས་པ་མི་གཡོ་རྡོ་རྗེའི་ཕྱག་རྒྱ་སྔགས་དང་བཅས་པས་ [167b.4]བགེགས་བསྐྲད་ཅིང་ཡི་གེ་ལྔ་པ་ལ་སོགས་པ་གཞན་གང་ཡང་རུང་བ་ཕྱག་རྒྱ་དང་བཅས་པས་སྲུང་བ་བྱས་ཏེ། མཆོད་པ་དང་བསྟོད་པ་ལ་སོགས་པ་ཡང་ཉེ་བར་བླངས་ཤིང་སྔར་བཞིན་དུ་བཟླས་པར་བྱའོ། །ཉི་མ་རྒས་པ་དང་ར་བ་དང་གུར་ལ་སོགས་པས་གཤེགས་སུ་གསོལ་ [167b.5]ལ། འོད་ཟེར་གྱི་ཕྲེང་བའི་ཆོ་ག་བསྒོ་བར་བྱ་སྟེ། ཕན་ཚུན་དུ་སོར་མོ་སྦྲེལ་བས་ནང་དུ་ཁུ་ཚུར་ལ་གུང་མོ་གཉིས་ཁབ་བཞིན་དུ་ཕྱིར་བརྐྱང་བ་དེའི་ཚིགས་གསུམ་པ་ལ་མཛུབ་མོ་ཟུང་གི་རྩེ་མོ་སོ་སོར་གཏད་པའི་ལོགས་ལ་མཐེ་བོང་དག་སྦྱར་བ་ནི་འོད་ཟེར་ཕྲེང་བའི་ཕྱག་རྒྱའོ། ། [167b.6]སྔགས་ནི་དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ལ་ཕྱག་འཚལ་ལོ། །དམ་ཚིག་ཆེན་པོ་རྟོགས་པ། མཉམ་པ་ཉིད་ཐུགས་སུ་ཆུད་པ་ཐམས་ཅད་དུ་མཉམ་པར་སེམས་ཅན་རྣམས་སྐྱོབ་པ། ཆོས་ཀྱི་དབྱིངས་ཤིན་ཏུ་ཆགས་པ་མེད་པ་སྭཱ་ཧཱ། [167b.7]ནམ་གྱི་ཆ་སྟོད་དང་ཆ་སྨད་ལ་ཡང་མི་ཉལ་བར་དམ་པའི་ཆོས་གདོན་པ་ལ་སོགས་པ་བྱའོ། །གུང་ཐུན་ལ་ཡང་ཁྲི་སྤངས་པའི་མལ་སྟན་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཡན་ལག་ཐམས་ཅད་ཀྱིས་ལེགས་པར་ཕྱག་འཚལ་བ་ཉིད་ཀྱིས་ཉལ་ [168a] [168a.1]བར་བྱའོ། །མཁྱེན་དུ་གསོལ་བ་ཡང་བྱ་སྟེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་བྱིན་གྱིས་བརླབ་ཏུ་གསོལ། བླ་ན་མེད་པའི་དངོས་གྲུབ་ཀྱི་མཆོག་རྣམས་ཀྱང་སྩལ་དུ་གསོལ། ཁྱེད་ཀྱིས་ཉེ་བར་འཚེ་བ་རྣམས་ཐམས་ཅད་ཀྱང་རབ་ཏུ་ [168a.2]ཞི་བར་མཛད་དུ་གསོལ། ཞེས་སོ། །ཆོ་ག་འདི་ཉིད་ཀྱང་ཉི་མ་རེ་རེ་ཞིང་འབུམ་ཕྲག་བཟླས་པ་དང་ཇི་སྲིད་དུ་ཟླ་བ་ཉའི་བར་དུ་སྟེ། ཇི་སྲིད་དུ་གྲུབ་པའི་རྟགས་བྱུང་བར་གྱུར་གྱི་བར་དུའོ། །དེ་ནས་ཟླ་བ་ཉ་བ་ལ་སོགས་པའི་ཚེས་གྲངས་ལ་ཟས་བཅད་ཅིང་ལྟོགས་པར་ཉལ་བ་བསྙེན་གནས་ [168a.3]ཀྱི་སྡོམ་པ་དང་ལྡན་པས་ལོ་འདབ་ཀྱི་སྟན་ལ་ཉེ་བར་གནས་པའམ་ཀུ་ཤའི་ཆང་བུ་ལ་ལེགས་པར་གནས་པ་ཡང་རུང་སྟེ། མཆོད་རྟེན་དང་ཐང་ཀ་དང་པོ་ཏི་དང་སྐུ་གཟུགས་ལ་སོགས་པ་རྣམས་གང་ཡང་རུང་བའི་མདུན་དུ་མེ་ཏོག་གིས་ཀུན་དུ་གང་བར་བྱས་པའི་མཎྜལ་བྱས་ལ་སྲུང་བ་ [168a.4]དང་མཆོད་པ་ལ་སོགས་པ་ཡན་ལག་དང་བཅས་པ་རྣམས་ནི་སྔ་མ་བཞིན་ཏེ། ཆོས་འབྱུང་བཅིངས་ལ་དེའི་སྔགས་རྗེས་སུ་དྲན་པར་བྱའོ། །དེ་ནས་རང་གི་ལྷའི་ཕྱག་རྒྱ་བཅིངས་ལ་དེའི་སྔགས་ལན་བདུན་ནམ་བརྒྱད་བརྗོད་པས་དམ་ཚིག་བརྟན་པར་བྱའོ། །དེ་ནས་སངས་རྒྱས་དང་བྱང་ [168a.5]ཆུབ་སེམས་དཔའ་ཐམས་ཅད་ལ་ཡན་ལག་ལྔས་ཕྱག་འཚལ་ལ་འཁོར་ལོའམ་རྡོ་རྗེ་ལ་སོགས་པ་བཟུང་ནས་ཀུན་དུ་བཟང་པོ་དང་དེ་བཞིན་གཤེགས་པའི་སྐུ་ལ་སོགས་པ་དག་པར་གྱུར་པ་མངོན་པར་འདོད་པས་དངོས་གྲུབ་རང་དང་ཁད་ཉེ་བར་ཡིད་ལ་བྱས་ཏེ། སངས་རྒྱས་དང་བྱང་ [168a.6]ཆུབ་སེམས་དཔའ་ཐམས་ཅད་ལ་ལེགས་པར་འཚལ་བ་ལ་དམིགས་པས་བཟླས་པས་གོམས་ཤིང་། སངས་རྒྱས་དང་བྱང་ཆུབ་སེམས་དཔའ་རྣམས་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་ལ་རྗེས་སུ་ཡི་རང་བ་གོམས་པར་གྱུར་པའི་སེམས་ཀྱིས་ཉི་མ་རྒས་པ་ནས་ [168a.7]བཟུང་ནས་ཇི་སྲིད་དུ་ནམ་ཕྱེད་དམ་ཉི་མ་ཤར་བའི་བར་དེ་སྲིད་དུ་བཟླས་པར་བྱའོ། །དེ་དག་ལས་ཀྱང་འཁོར་ལོ་ལ་སོགས་པ་གདོན་མི་ཟ་བར་འབར་བར་འགྱུར་རོ། །འབར་བ་ལས་ཀྱང་སངས་རྒྱས་འབྱུང་བ་དང་འདྲ་བར་ལྟས་ཆེན་པོར་གྱུར་པ་ནམ་མཁའ་ལས་མེ་ཏོག་གི་ཆར་འབབ་ [168b] [168b.1]པ་དང་རྔ་དུན་དུའི་སྒྲ་དང་ལྷ་རྫས་ཀྱི་དབྱངས་དང་དེ་བཞིན་གཤེགས་པ་རྣམས་ཀྱིས་ལེགས་སོ་ཞེས་བྱ་བ་ལ་སོགས་པ་དང་། སངས་རྒྱས་ཀྱི་ཞིང་གཡོ་བ་ལ་སོགས་པ་ངོ་མཚར་བ་རྣམས་འབྱུང་ངོ་། །རིག་པ་འཛིན་པའི་རིགས་ཐམས་ཅད་ཀྱང་ལེགས་པར་འདུ་བར་འགྱུར་རོ། །དེ་དག་རྣམས་ [168b.2]ཀྱིས་ཀྱང་དབང་བསྐུར་བར་འགྱུར་རོ། །འཇིག་རྟེན་གྱི་ཁམས་ཐམས་ཅད་དུ་སངས་རྒྱས་དང་བྱང་ཆུབ་སེམས་དཔའ་རྣམས་མཉེས་པར་བྱེད་པ་དང་། མངོན་པར་ཤེས་པ་ལྔ་དང་ལྡན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མངོན་པར་དགྱེས་པར་འགྱུར་བ་དང་། [168b.3]བྱང་ཆུབ་སེམས་དཔའི་སྤྱད་པ་སྤྱོད་པའི་རིག་པ་འཛིན་པའི་རྒྱལ་པོར་འགྱུར་ཏེ། རིག་པ་འཛིན་པའི་འཁོར་མཐའ་ཡས་པ་དང་ལྡན་པ་དང་བདེ་བ་རྗེས་སུ་འཕེལ་བར་འགྱུར་རོ། །འོན་ཀྱང་ལུས་དེ་ཉིད་ཉམས་པར་ཡང་མི་འགྱུར་ཞིང་། ལུས་དེ་ཉིད་ཁོ་ནས་མངོན་དུ་ཚོགས་ཉེ་བར་བསགས་ [168b.4]ཏེ་བྱང་ཆུབ་སེམས་དཔའི་ས་རྣམས་ཐམས་ཅད་ཡང་དག་པར་བགྲོད་ཅིང་ཇི་སྲིད་དུ་མངོན་པར་རྫོགས་པར་སངས་རྒྱས་ཀྱི་བར་དུའོ། །གཞན་ཡང་སངས་རྒྱས་དང་བྱང་ཆུབ་སེམས་དཔའ་མཐོང་བ་དང་ཡིད་བཞིན་གྱི་ནོར་བུ་དང་། བུམ་པ་བཟང་པོ་ལ་སོགས་པ་འཇིག་རྟེན་དང་འཇིག་རྟེན་ [168b.5]ལས་འདས་པའི་དངོས་གྲུབ་ཐམས་ཅད་ཀྱང་ཚུལ་འདི་ཉིད་ཀྱིས་སྤྱི་དང་བྱེ་བྲག་གི་ལེའུ་རྣམས་མཐོང་བས་སམ་ཆོ་ག་བཞིན་དུ་རྒྱུད་ལེགས་པར་བལྟས་ཤིང་ངེས་པར་ཐེ་ཚོམ་མེད་པར་བྱས་ལ་བསྒྲུབ་པར་བྱ་སྟེ། ངེས་པ་ཁོ་ནར་འགྲུབ་པར་འགྱུར་རོ། །འདི་ནི་ཐབས་དང་ལྡན་པའི་སྒྲུབ་ཐབས་ [168b.6]ཀྱི་ཆོ་ག་ཡིན་ལ། ཐབས་དང་བྲལ་བས་ཀྱང་བསྒྲུབ་པར་བྱ་བ་ཡིན་པས། ཇི་སྐད་དུ་བཤད་པ་རྣམས་ནི་བདག་གིས་ནུས་པ་མ་ཡིན་ནོ་ཞེས་ཞུམ་པར་མི་བྱ་བར་ཐ་མར་ན་བདག་ཉིད་གཅིག་པུ་སྲུང་བ་ཙམ་བྱ་སྟེ། མཚམས་བཅད་པ་དང་མཆོད་པ་ལ་སོགས་པ་རྣམས་ནི་བསམ་ [168b.7]པར་བྱ་ཞིང་དེ་དག་གི་སྔགས་བརྗོད་ལ། ཇི་སྲིད་འདོད་ཀྱི་བར་དུ་བཟླས་པར་བྱའོ། །བསྒྲུབས་པར་གྱུར་ན་བརྩོན་འགྲུས་ཀྱི་རྗེས་སུ་མཐུན་པ་དང་ལས་ཀྱི་རྗེས་སུ་མཐུན་པར་ངེས་པ་ཁོ་ནར་འགྲུབ་པ་ཡིན་ཏེ། གཅིག་གིས་ཀྱང་འཇིག་རྟེན་གསུམ་བསྲུང་བར་ནུས་པ་ཡིན་ནོ་ [169a] [169a.1]ཞེས་རྒྱུད་ལས་གསུངས་པའི་ཕྱིར་རོ། །དམ་ཚིག་གསུམ་གྱི་རྒྱལ་པོ་འདི་ནི་དོན་ཡོད་པར་གྲུབ་པ་དང་བར་ཆད་མེད་པར་གྲུབ་པ་ཡིན་ཏེ། འདི་ཡང་སྔགས་དེ་དག་དང་ཆོ་ག་གང་དང་གང་ཡིན་པ་དེ་དང་དེ་ལ་མཁས་པས་བསྒྲུབས་ན་འགྲུབ་པ་ཡིན་ནོ། །འདི་ཉིད་ [169a.2]ཀྱང་གསུངས་པ་ནི་འདི་ལྟ་སྟེ། སྐྱེ་བོའི་འགྲུལ་འཇུག་གིས་རབ་ཏུ་དབེན་པའི་གནས་སུ་ཚོགས་པ་འདུས་པ་ཡོངས་སུ་སྤངས་ཤིང་སེམས་ཅན་ལ་རྗེས་སུ་བརྩེ་བ་རྣམས་ནི། མཆོད་པ་དང་བྲལ་ཞིང་ཐང་ཀ་མེད་ལ་ཁྲུས་ལ་སོགས་པ་དང་མི་ལྡན་པའི་ཀུན་དུ་སྤྱོད་པ་ལ་སོགས་པས་ཞུགས་ [169a.3]ཀྱང་བསྒྲུབ་བྱ་ཅི་ནས་ཀྱང་འགྲུབ་པར་འགྱུར་རོ། །ཡང་གསུངས་པ། ཡ་མཚན་པ་ནི་གཉིས་ཡིན་ཏེ། ཇི་ལྟ་ཇི་ལྟར་སྔགས་བསྒྲུབ་པར་གྱུར་བ་དེ་ལྟ་དེ་ལྟར་རྗེས་སུ་མཐུན་པར་འབྱུང་ངོ་། སྦྱོར་བ་གང་གིས་སྒྲུབ་པར་བྱེད་པ་དེ་ཉིད་ཀྱིས་འགྲུབ་པར་འགྱུར་རོ་ཞེས་སོ། །གཞན་ཡང་ [169a.4]གསུངས་པ། བྱང་ཆུབ་སེམས་ནི་བརྟན་པ་གང་། །བློ་ནི་ཆགས་པ་མེད་གྱུར་པ། །ཐེ་ཚོམ་ནམ་ཡང་བྱ་བ་མིན། །དེས་གྲུབ་འདི་ན་རྟག་པར་གནས། །ཞེས་བྱ་བའོ། །དེའི་ཕྱིར་ན་བརྩོན་འགྲུས་བསྐྱེད་ལ་སོམ་ཉི་རྣམ་པར་སྤངས་པས་བསྒྲུབ་པར་བྱ་སྟེ། ངེས་པར་འགྲུབ་པར་འགྱུར་རོ། ། [169a.5]འདི་ལ་ཡང་གྲུབ་པ་དོན་དུ་གཉེར་བ་རྣམས་ཀྱིས་དམ་ཚིག་བསྲུང་བ་ལ་ཤིན་ཏུ་འབད་པར་བྱ་སྟེ། སྐལ་བ་དང་ལྡན་པ་རྣམས་ཀྱི་དངོས་གྲུབ་ཐམས་ཅད་ནི་དེའི་རྩ་བ་ལས་ཡིན་པའི་ཕྱིར་རོ། །དམ་ཚིག་དེ་ཡང་དམ་པའི་ཆོས་སྤང་བར་མི་བྱའོ། །བླ་མ་ལ་བརྙས་པར་མི་བྱའོ། །མྱོས་པར་འགྱུར་བ་ [169a.6]བཏུང་བར་མི་བྱའོ། །ཉལ་ཁྲི་ལ་ཉལ་བར་མི་བྱའོ། །རྡོ་རྗེའི་རིགས་བཟའ་བར་མི་བྱ་ཞིང་འགོང་བར་ཡང་མི་བྱའོ་ཞེས་བྱ་བ་ལ་སོགས་པ་རྣམས་ནི་ཅི་ནས་ཀྱང་རྒྱུད་ལས་ཤེས་པར་བྱ་སྟེ། རྒྱས་པས་འཇིགས་པའི་ཕྱིར་མ་བྲིས་སོ། །ཁྲུས་བྱེད་པར་འདོད་པ་ཡིན་ན་ཡང་དམ་ཚིག་གསུམ་ [169a.7]ལས་གསུངས་པའི་འཕགས་པ་མི་གཡོ་བའི་དོན་ཡོད་པའི་སྙིང་པོ་རྡོ་རྗེ་གཏུམ་པོ་ཉིད་དང་ལྡན་པས་འདག་ཆལ་ལ་སོགས་པའི་ཁྲུས་ཀྱི་རྫས་རྣམས་ལེན་པ་དང་སྔགས་ཀྱིས་ཀྱང་གདུག་པ་ཚར་བཅད་པ་དང་མཚམས་གཅད་པ་ལ་སོགས་པ་རྣམས་བྱ་སྟེ། དེ་དག་ཉིད་ཁོ་ནས་བར་ཆད་ལ་ [169b] [169b.1]སོགས་པ་ཐམས་ཅད་རབ་ཏུ་ཞི་བར་འགྱུར་རོ། །དམ་ཚིག་གསུམ་གྱི་རྒྱལ་པོའི་སྒྲུབ་ཐབས་རྫོགས་སོ།། །།པཎྜི་ཏ་ཆེན་པོ་ཀུ་མུ་ད་འབྱུང་གནས་བློ་གྲོས་ཀྱི་ཞལ་སྔ་ནས་མཛད་པའོ། །པཎྜི་ཏ་ཨ་བྷ་ཡཱ་ཀ་རའི་ཞལ་སྔ་ནས་པ་ཚབ་ཀྱི་རྒྱུད་ཀྱི་དགེ་སློང་ཚུལ་ཁྲིམས་ [169b.2]རྒྱལ་མཚན་གྱིས་བསྒྱུར་བའོ།། {T3145}༄༅༅། །རྒྱ་གར་སྐད་དུ། བཛྲ་དྷ་ར་སཾ་གཱི་ཏི་སྟུ་ཏི། བོད་སྐད་དུ། རྡོ་རྗེ་འཛིན་པས་ལེགས་པར་གསུངས་པའི་བསྟོད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །མཚུམས་ [169b.3]མེད་སྟོབས་ལྡན་མཉམ་ཉིད་སྙིང་པོར་གྱུར་པའི་ཆོས་མངའ་བ། །ཐུགས་རྗེའི་བདག་ཅན་འགྲོ་བ་རྣམས་ཀྱི་སྡུག་བསྔལ་འཇོམས་མཛད་པ། །ཡོན་ཏན་ལུས་ཀུན་ལྡན་དངོས་གྲུབ་ཐམས་ཅད་སྦྱིན་མཛད་ཅིང་། །དྲི་མེད་སྟོབས་ལྡན་མཉམ་མེད་མཆོག་གི་ཆོས་རབ་དང་ལྡན་པ། །ནམ་ [169b.4]མཁའ་མཉམ་པ་དག་གི་ཡོན་ཏན་རྡུལ་ཕྲན་ཟེར་མི་ཡོད། །དཔེ་ནི་མཚམས་ཀྱི་ཕ་རོལ་འགའ་ཞིག་ན་ཡང་དམིགས་པ་མིན། །དཔེ་ལས་རྣམ་པར་འདས་པའི་དངོས་གྲུབ་མ་ལུས་དམ་པ་རྣམས། །མཐའ་ཡས་སེམས་ཅན་ཁམས་ལ་མཆོག་གི་དངོས་གྲུབ་སྦྱིན་པར་མཛད། །རྟག་ཏུ་དྲི་ [169b.5]མེད་ཐུགས་རྗེའི་ཤུགས་ཀྱིས་བཞེངས་པའི་སྨོན་ལམ་ཅན། །དངོས་གྲུབ་ཇི་སྲིད་འགོག་པ་མེད་པའི་ཆོས་ཉིད་དང་ལྡན་པ། །མ་ལུས་མཆོག་ཏུ་སྒྲུབ་པར་མཛད་པ་སྐྱེ་དགུ་རྣམས་ཀྱི་དོན། །རྟག་ཏུ་རྣམ་པར་བཞེད་པ་ཐུགས་རྗེ་ཆེན་པོའི་བདག་ཉིད་རྣམས། །འགག་པ་མེད་པ་ཉིད་དུ་ [169b.6]ཐུགས་རྗེས་ཀུན་ནས་སྤྱོད་ལྡན་ལ། །མི་གཡོ་རབ་གསལ་འཇིག་རྟེན་གསུམ་ན་དངོས་གྲུབ་མཆོག་རྣམས་གནང་། །དཔག་མེད་གཞལ་དུ་མེད་ལ་ལེགས་པ་ཉིད་དུ་སྙོམས་ཞུགས་པའི། །རྟོགས་ཤིང་མཁྱེན་པའི་ཆོས་ཉིད་ཤིན་ཏུ་ངོ་མཚར་རྨད་དུ་བྱུང་། །དམ་ཚིག་གསུམ་གྱི་ [169b.7]དངོས་གྲུབ་མཆོག་གི་མཆོག་སྦྱིན་མཛད་པས་བདག །མཆོག་སྩོལ་སྩོལ་ན་རྟག་ཏུ་མཆོག་གི་རྟོགས་པའི་རྟོགས་དང་ལྡན། །འཇིག་རྟེན་གསུམ་ན་མཆོག་སྦྱིན་མཆོག་རྣམས་མཐའ་དག་གྲུབ་པ་པོ། །དུས་གསུམ་གཤེགས་པའི་མགོན་པོ་སྒྲིབ་པ་ཀུན་ནས་མི་མངའ་བའོ། ། [170a] [170a.1]དམ་ཚིག་གསུམ་གྱི་རྒྱལ་པོའི་རྟོག་པ་ནས་གསུངས་པ། །རྡོ་རྗེ་འཛིན་པས་ལེགས་པར་གསུངས་པའི་བསྟོད་པའོ། །དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3146}༄༅༅། །རྒྱ་གར་སྐད་དུ། སྟུ་ཏི་ཨ་ནུ་ཤཾ་ས། [170a.2]བོད་སྐད་དུ། བསྟོད་པའི་ཕན་ཡོན། །འདི་དག་སངས་རྒྱས་ཐམས་ཅད་ཀྱི། །ཡང་དག་ཡོན་ཏན་རྒྱ་ཆེན་ཡིན། །དེ་དག་ལན་ཅིག་བརྗོད་པས་ཀྱང་། །གང་ཕྱིར་སྔགས་པས་ཐམས་ཅད་འགྲུབ། །བསྟོད་པའི་རྒྱལ་པོ་འདི་དག་གིས། །དེ་བཞིན་གཤེགས་པ་མཉེས་བྱེད་དེ། ། [170a.3]བསྐལ་པར་གནས་དང་ལྷག་པ་དང་། །དངོས་གྲུབ་རྒྱ་ཆེན་སྟེར་བར་གསུངས། །བལྟ་བས་ཆོག་མི་ཤེས་པ་ཡི། །བདག་ཉིད་སྐུ་ཡང་སྟོན་པར་མཛད། །རྣམ་པར་སྣང་མཛད་མགོན་པོ་ཆེ། །མི་བསྐྱོད་པ་དང་རིན་ཆེན་འབྱུང་། །དག་པའི་རྒྱལ་བ་སྣང་མཐའ་ཡས། །དོན་ [170a.4]ཡོད་གྲུབ་རྒྱལ་ཐམས་ཅད་ཀྱིས། །གསེར་འགྱུར་དང་ནི་བཅུད་ཀྱིས་ལེན། །དེ་ཉིད་མཆོག་ཀྱང་རབ་ཏུ་སྦྱིན། །དངོས་གྲུབ་དགར་གྱུར་རྣམས་ཡངས་ཤིང་། །མ་ལུས་དོན་རྣམས་ཕུན་ཚོགས་པ། །བསམ་པ་ཀུན་ཡང་རྫོགས་བྱེད་པའི། །ཡིད་ལ་སེམས་པ་སྟེར་བར་མཛད། ། [170a.5]ཤེས་རབ་ཆེ་དང་སྟོབས་ཤུགས་རྣམས། །མཆོག་ཏུ་དགེ་བ་སྣང་བར་མཛད། །ཅེས་པ་བསྟོད་པའི་ཕན་ཡོན་དང་བཅས་པ་འདི་ཉིད་ནི་རྣལ་འབྱོར་ཆེན་པོའི་རྒྱུད་རྡོ་རྗེའི་དཀྱིལ་འཁོར་གྱི་རྒྱན་ལས་གསུངས་པ་ཡིན་ནོ། །དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། །། [170a.6]{T3147}༄༅༅། །རྒྱ་གར་སྐད་དུ། ཏྲི་ས་མ་ཡཾ་ས་མ་ཡ་སཱ་དྷ་ནཾ། བོད་སྐད་དུ། དམ་ཚིག་གསུམ་གྱི་དམ་ཚིག་གི་སྒྲུབ་ཐབས། སངས་རྒྱས་ལ་ཕྱག་འཚལ་ལོ། །དམ་ཆོས་གཤེ་བར་མི་བྱ་ཞིང་། །སྤང་བར་ནམ་ཡང་མ་ཡིན་ནོ། །རྫོགས་སངས་རྒྱས་དང་བྱང་ཆུབ་སེམས། །དེ་ [170a.7]དག་ཀུན་མིན་བྱ་བ་མིན། །བླ་མ་དབང་བྱ་བརྙས་མི་བྱ། །ལུས་ཅན་རྣམས་ནི་བརྡེག་མི་བྱ། །སྔགས་དང་ཕྱག་རྒྱ་རང་མི་བྱ། །ཆུད་ཀྱང་ངེས་པར་མི་གསན་ནོ། །སེར་སྣ་དང་ནི་ཆང་བཏུང་བར། །ནམ་ཡང་བྱ་བ་མ་ཡིན་ནོ། །རྡོ་རྗེའི་གཟུགས་ནི་མི་འགོང་ཞིང་། །བཟའ་བར་བྱ་བ་ [170b] [170b.1]ཉིད་ཀྱང་མིན། །ཉལ་ཁྲི་སྟན་དུ་མི་བྱ་ཞིང་། །ཕྱག་རྒྱ་སོགས་ལ་མ་གུས་སྤང་། །བླ་མ་དག་གམ་ལྷ་ལ་ཡང་། །བྱིས་པའི་ཆོས་ཉིད་མི་བྱའོ། །རང་བཞིན་བཟང་དང་ཉེས་བྱེད་ལའང་། །མངོན་སྤྱོད་བྱ་བ་མ་ཡིན་ནོ། །ཉོན་མོངས་བྱ་མིན་བྱེད་གཞུག་དང་། །ཡིད་རང་བར་ཡང་མི་ [170b.2]བྱའོ། །མདོར་ན་བདག་གཞན་རྗེས་མི་མཐུན། །གང་ཡིན་དེ་དག་སྤང་བར་བྱ། །དམ་ཚིག་འདི་ནི་རྟོག་ཆེན་དཔལ། །དམ་ཚིག་གསུམ་གསུངས་དམ་ཚིག་ཡིན། །གཡོ་སྒྱུ་དང་ནི་ལོག་འཚོ་དང་། །དྲི་མ་ལ་དགའ་ཚོགས་པར་འདུ། །ཡིད་གཉིས་ཟ་བར་བྱེད་པ་དང་། །ཡོ་ [170b.3]བྱད་ཕལ་ཆེར་ཡོངས་སུ་འཛིན། །སྙོམ་ལས་ཞུམ་པའི་སེམས་ཉིད་དང་། །བདག་བསྟོད་ལ་སོགས་དེ་བཞིན་ཏེ། །བར་ཆད་བྱེད་པར་གྱུར་པའི་ཆོས། །རྟོག་པའི་རྒྱལ་པོ་ལས་འདི་གསུངས། །སྐྱོན་འདི་རྣམས་ལས་ངེས་གྲོལ་ཞིང་། །སྔར་བཤད་དམ་ཚིག་ལ་གནས་ན། ། [170b.4]འདུ་འཛི་ཀུན་སྤངས་དང་བར་ལྡན། །རྫོགས་པའི་བྱང་ཆུབ་ལ་ཡིད་བརྟན། །ལུས་ངག་ཡིད་ཀྱི་འཇུག་པ་ཀུན། །སྐྱེ་དགུ་སྐྱོབ་ཕྱིར་ཕན་བརྩོན་པས། །དངོས་གྲུབ་དམ་ཚིག་གསུམ་གསུངས་པ། །འདོད་པས་ཆོ་ག་བཞིན་དུ་བསྒྲུབས། །པཎྜི་ཏ་ཆེན་པོ་རིན་ཆེན་འབྱུང་གནས་ [170b.5]སྦས་པས་མཛད་པའི་དམ་ཚིག་གི་སྒྲུབ་ཐབས་རྫོགས་སོ།། །།དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3148}༄༅༅། །རྒྱ་གར་སྐད་དུ། བཛྲ་ཨཱ་ས་ན་སཱ་དྷ་ན། བོད་སྐད་དུ། རྡོ་རྗེ་གདན་གྱི་སྒྲུབ་ཐབས། སངས་རྒྱས་ལ་ཕྱག་ [170b.6]འཚལ་ལོ། །ཡོན་ཏན་ཚོགས་ལྡན་གཞན་དོན་བླ་མར་གྱུར་པའི་དེ་བཞིན་གཤེགས་རྣམས་ཐམས་ཅད་ལ་ནི་འདུད། །དཔལ་ལྡན་རྡོ་རྗེ་གདན་ཞེས་བྱ་བས་བརྒྱན་པའི་ལུས་ཅན་འཁོར་བའི་སྐྱོན་གྱིས་བཟུང་བ་རྣམས། །རེག་ཏུ་མི་འདོད་སངས་རྒྱས་མཆོག་ཉིད་དུལ་བ་བསྡམས་ [170b.7]པ་དམ་པའི་སྒྲུབ་ཐབས་དེ་ཉིད་ནི། །དེ་བཞིན་གཤེགས་པ་ལ་སོགས་ཁ་དོག་སྣ་ཚོགས་མཛེས་པའི་སྐུ་དེ་དག་ནི་ལེགས་པར་བྲི། །དེ་ལས་མདུན་དུ་འཆད་པར་འགྱུར་བའི་ཚུལ་གྱི་མདོག་དང་ཕྱག་ལ་སོགས་པ་དང་ལྡན་པའི་བཅོམ་ལྡན་འདས་ལེགས་པར་བསམས་ལ་མེ་ཏོག་ [171a] [171a.1]ལ་སོགས་པ་དབུལ་བར་བྱའོ། །ཨོཾ་མི་བསྐྱོད་པ་ལ་ཕྱག་འཚལ་ལོ། །ཧཱུྃ། ཨོཾ་རྡོ་རྗེའི་མེ་ཏོག་ཧཱུཾ་སྭཱ་ཧཱ། རེ་རེ་ཞིང་ལན་གསུམ་གསུམ་དབུལ་བར་བྱའོ། །ཨོཾ་རྣམ་པར་སྣང་མཛད་ལ་ཕྱག་འཚལ་ལོ་ཨོཾ། ཨོཾ་རྡོ་རྗེའི་མེ་ཏོག་ཧཱུྃ་སྭཱ་ཧཱ། ཨོཾ་རིན་ཆེན་འབྱུང་ [171a.2]ལྡན་ལ་ཕྱག་འཚལ་ལོ། །ཏྲཱྃ །། ཨོཾ་རྡོ་རྗེའི་མེ་ཏོག་ཧཱུྃ་སྭཱ་ཧཱ། ཨོཾ་སྣང་བ་མཐའ་ཡས་ལ་ཕྱག་འཚལ་ལོ། །ཧྲཱིཿ ཨོཾ་རྡོ་རྗེའི་མེ་ཏོག་ཧཱུཾ་སྭཱ་ཧཱ། ཨོཾ་དོན་ཡོད་གྲུབ་པ་ལ་ཕྱག་འཚལ་ལོ། །ཨཱཿ ཨོཾ་རྡོ་རྗེའི་མེ་ཏོག་ཧཱུཾ་སྭཱ་ཧཱ། ཨོཾ་སྤྱན་མ་ལ་ཕྱག་འཚལ་ལོ། ལཾ། ཨོཾ་རྡོ་རྗེའི་མེ་ཏོག་ཧཱུཾ་སྭཱ་ཧཱ། ཨོཾ་མཱ་མ་ [171a.3]ཀཱི་ལ་ཕྱག་འཚལ་ལོ། །མཱྃ། ཨོཾ་རྡོ་རྗེའི་མེ་ཏོག་ཧཱུྃ་སྭཱ་ཧཱ། ཨོཾ་གོས་དཀར་མོ་ལ་ཕྱག་འཚལ་ལོ། །པཱཾ། ཨོཾ་རྡོ་རྗེའི་མེ་ཏོག་ཧཱུྃ་སྭཱ་ཧཱ། ཨོཾ་སྒྲོལ་མ་ལ་ཕྱག་འཚལ་ལོ། །ཏྃ། ཨོཾ་རྡོ་རྗེའི་མེ་ཏོག་ཧཱུྃ་སྭཱ་ཧཱ། དེ་ནས་ཡང་མི་བསྐྱོད་པའི་རང་བཞིན་གྱི་རྡོ་རྗེ་གདན་ལ་རབ་ཏུ་ཕལ་ཞིང་ཆེས་ཤིན་ཏུ་ཕལ་ཆེ་ [171a.4]བའི་མེ་ཏོག་དབུལ་བར་བྱའོ། །རིམ་པ་འདི་ཉིད་ཁོ་ནས་ཨོཾ་རྡོ་རྗེ་བདུག་སྤོས་ཧཱུྃ་སྭཱ་ཧཱ། ཨོཾ་རྡོ་རྗེའི་དྲི་ཧཱུཾ་སྭཱ་ཧཱ། ཨོཾ་རྡོ་རྗེའི་ལྷ་བཤོས་ཧཱུཾ་སྭཱ་ཧཱ། ཨོཾ་ཞེས་བྱ་བ་ལ་སོགས་པས་མཆོད་པའི་ཆོ་ག་རྣམས་བྱས་ལ། བྱམས་པ་བསྒོམ་པ་ལ་སོགས་པ་སྔོན་དུ་བཏང་བས། དེ་ནས་རང་གི་སྙིང་གར་ [171a.5]ཨ་ཡོངས་སུ་གྱུར་བ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་ཧཱུྃ་གསེར་བཟང་པོའི་མདོག་གོ། །དེ་ལས་འོད་ཟེར་ཀུན་ནས་སྤྲོས་པས་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་བལྟས་ལ། དེའི་རྗེས་ལ་སྐུ་ཁྲུས་དང་། མེ་ཏོག་ལ་སོགས་པ་མཆོད་པའི་སྤྲིན་ [171a.6]གྱི་བཀོད་པས་ལེགས་པར་མཆོད་པར་བྱའོ། །དེ་ནས་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསོད་ནམས་ཡོངས་སུ་བསྔོ་བ་དང་གསུམ་ལ་སྐྱབས་སུ་འགྲོ་བ་དང་། ལམ་ལ་བརྟེན་པ་དང་། བྱང་ཆུབ་ཏུ་སེམས་བསྐྱེད་པ་རྣམས་ཀྱང་། དཀོན་མཆོག་ [171a.7]གསུམ་ལ་བདག་སྐྱབས་མཆི། །ཞེས་བྱ་བ་ལ་སོགས་པ་རྣམས་ཀྱིས་བྱའོ། །དེ་ནས་སྟོང་པ་ཉིད་རྣམ་པར་བསྒོམ་པར་བྱའོ། །ཆོས་ཐམས་ཅད་རང་བཞིན་མེད་པའི་ངོ་བོར་རྣམ་པར་བསྒོམས་ནས་ཀྱང་། མི་ཟད་པའི་ངོ་བོའི་བྱང་ཆུབ་ཀྱི་སེམས་ཀྱི་རང་བཞིན་འོད་གསལ་བའི་བདག་ཉིད་བལྟ་ [171b] [171b.1]བའོ། །བརྟན་པར་བྱ་བའི་དོན་དུ་སྔགས་བརྗོད་པར་བྱ་སྟེ། ཨོཾ་རང་བཞིན་གྱིས་རྣམ་པར་དག་པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་ནི་ང་ཡིན་ནོ། །འོད་ཀྱི་རང་བཞིན་གྱིས་གཟུགས་དེ་ཉིད་ཁོ་ན་ཡོངས་སུ་གྱུར་ནས་ཟླ་བའི་དཀྱིལ་འཁོར་དུའོ། །དེའི་སྟེང་དུ་ཡི་གེ་ཧཱུྃ་ཨ་ལ་ [171b.2]སོགས་པ་དབྱངས་ཡིག་བཅུ་དྲུག་གིས་ཡོངས་སུ་བསྐོར་བའོ། །ཡང་ཀ་ལ་སོགས་པ་གསལ་བྱེད་ཀྱི་ཡི་གེ་རྣམས་ཀྱིས་ཀྱང་ཡོངས་སུ་བསྐོར་བའོ། །ཐམས་ཅད་མདོག་དཀར་པོའོ། །མ་ལུས་པ་ཡོངས་སུ་གྱུར་ནས་ཟླ་བའི་དཀྱིལ་འཁོར་གཟུགས་སུ་བསམ་པར་བྱའོ། །དེའི་སྟེང་དུ་ [171b.3]ས་བོན་གྱི་ཡི་གེ་ཧཱུྃ་ངོ་། །དེར་གྱུར་པ་ལས་རྡོ་རྗེའོ། །རྡོ་རྗེ་དེའི་ལྟེ་བ་ལ་ཡང་ཡི་གེ་ཧཱུྃ་ངོ་། །དེ་དག་མ་ལུས་པ་ཡོངས་སུ་གྱུར་པ་ལས་གསེར་བཟང་པོའི་མདོག་གི་རྡོ་རྗེ་གདན་གྱི་སྐུའོ། །དེའི་གདན་ནི་བདུད་བཞིའོ། །དེ་ཡང་ཕུང་པོ་དང་། ཉོན་མོངས་པ་དང་། འཆི་བདག་དང་། ལྷའི་བུའི་ [171b.4]བདུད་རྣམས་ཏེ། དཀར་པོ་དང་། དམར་པོ་དང་། ནག་པོ་དང་། ལྗང་གུའི་ཁ་དོག་ཏུ་རིམ་པ་ཇི་ལྟ་བར་དེ་དག་རྣམས་ཀྱི་ལུས་བསྒོམ་པར་བྱའོ། །བདུད་འདི་དག་རྣམས་ཡོངས་སུ་དཀྲིགས་པ་ལས་སེང་གེའི་ཁྲི་ཡིན་ནོ། །དེའི་སྟེང་དུ་སྣ་ཚོགས་པདྨ་དང་རྡོ་རྗེའོ། །དེ་ལ་བཞུགས་པའི་ [171b.5]བཅོམ་ལྡན་འདས་ནི་ཕྱག་གཉིས་པ་རྡོ་རྗེའི་སྐྱིལ་མོ་ཀྲུང་གིས་གནས་པ། ཕྱག་གཡས་པས་ས་ནོན་གྱི་ཕྱག་རྒྱ་དང་ལྡན་པ་གཡོན་པ་མཉམ་པར་གཞག་པ་སྐུལ་ན་བཟའ་ངུར་སྨིག་མནབས་པ་ཞི་བའི་བདག་ཉིད་ཅན་དུ་རྣལ་འབྱོར་པས་བསྒོམ་པར་བྱའོ། །དེ་ནས་ཨོཾ་ཆོས་ཀྱི་དབྱིངས་ཀྱི་ [171b.6]རང་བཞིན་གྱི་བདག་ཉིད་ནི་ང་ཡིན་ནོ་བར་ང་རྒྱལ་བསྐྱེད་པར་བྱའོ། །དེ་ནས་བཅོམ་ལྡན་འདས་ཀྱི་གཡས་ཕྱོགས་སུ་མདོག་སེར་བ་ཕྱག་གཉིས་པ་རལ་པ་དང་ཅོད་པན་དང་ལྡན་པ་གཡས་ན་རིན་པོ་ཆེའི་རྔ་ཡབ་བསྣམས་པ་གཡོན་ན་ཀླུ་ཤིང་མེ་ཏོག་གིས་རྒྱས་པ་བསྣམས་པའི་བྱང་ཆུབ་ [171b.7]སེམས་དཔའ་བྱམས་པའོ། །དེ་བཞིན་དུ་གཡོན་ཕྱོགས་སུ་ནི་བྱང་ཆུབ་སེམས་དཔའ་འཇིག་རྟེན་དབང་ཕྱུག་སྟེ། མདོག་དཀར་བ་གཡས་པས་རིན་པོ་ཆེའི་རྔ་ཡབ་བསྣམས་པ་གཡོན་གྱི་པདྨ་དམར་སྐྱ་བསྣམས་པའོ། །གཉིས་ཀ་ཡང་བཅོམ་ལྡན་འདས་ཀྱི་ཞལ་ལ་རྣམ་པར་ [172a] [172a.1]བལྟ་བར་བསྒོམ་པར་བྱའོ། །དེའི་རྗེས་ལ་ནི་གོ་ཆ་དྲུག་དགོད་པར་བྱ་སྟེ། བཅོམ་ལྡན་འདས་ཀྱི་སྤྱན་གཉིས་ལ་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་ཀྵིཾ་ཁ་དོག་དཀར་པོའོ། །རྣ་བ་གཉིས་ཀ་ལ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཛྲཱིཾ་ཁ་དོག་ [172a.2]མཐིང་ནག་གོ། །སྣ་བུག་གཉིས་ལ་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་ཁྃ་ཁ་དོག་སེར་པོའོ། །ལྕེ་ལ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་གྃ་མདོག་དམར་པོའོ། །དཔྲལ་བར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཀྃ་མདོག་ལྗང་གུའོ། །ནུ་མ་གཉིས་ཀྱི་བར་དུ་ཟླ་བའི་དཀྱིལ་ [172a.3]འཁོར་གྱི་སྟེང་དུ་ཡི་གེ་སོཾ་མདོག་དཀར་པོའོ། །འདི་དག་ནི་གོ་ཆ་དྲུག་དགོད་པ་བསྒོམ་པའོ། །དེ་ནས་རང་གི་སྙིང་གར་ཟླ་བའི་དཀྱིལ་འཁོར་ལ་ཡི་གེ་ཧཱུཾ་ཡོངས་སུ་གྱུར་པ་ལས། རྡོ་རྗེ་ལྟེ་བ་ལ་ཧཱུྃ་དང་བཅས་པ་ཟླ་བའི་དཀྱིལ་འཁོར་གྱི་སྟེང་དུ་སྟེ། དེ་དག་ཐམས་ཅད་ཡོངས་སུ་གྱུར་པ་ལས། [172a.4]ཡེ་ཤེས་སེམས་དཔའ་དམ་ཚིག་སེམས་དཔའ་ལྟ་བུ་རྣམ་པར་བསམ་པར་བྱའོ། །དེ་ནས་མགོ་བོ་ལ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཨོཾ་ཡོངས་སུ་གྱུར་པ་ལས་འཁོར་ལོ་ཁ་དོག་དཀར་པོའོ། །དེའི་དཀྱིལ་འཁོར་དུ་ཡང་ཟླ་བ་ལ་གནས་པའི་ཡི་གེ་ཨོཾ་ཞེས་བྱ་བ་ནི་བཅོམ་ལྡན་འདས་ཀྱི་སྐུའི་རྣམ་ [172a.5]པར་དག་པ་བསྒོམ་པའོ། །མགྲིན་པར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཨཱཿཡོངས་སུ་གྱུར་པ་ལས་པདྨ་དམར་པོ་འདབ་མ་བརྒྱད་པའོ། །དེའི་དབུས་སུ་ཟླ་བའི་དཀྱིལ་འཁོར་ལ་གནས་པའི་ཨཱཿཡི་གེ་བྱ་བ་ནི་བཅོམ་ལྡན་འདས་ཀྱི་གསུང་རྣམ་པར་དག་པ་བསྒོམ་པའོ། །ལྟེ་ [172a.6]བའི་གོང་དུ་ཟླ་བའི་དཀྱིལ་འཁོར་དེའི་སྟེང་དུ་ཡི་གེ་ཧཱུྃ་ཡོངས་སུ་གྱུར་པ་ལས་རྡོ་རྗེ་ཁ་དོག་ནག་པོའོ། །དེའི་དབུས་སུ་ཟླ་བའི་དཀྱིལ་འཁོར་ལ་གནས་པའི་ཡི་གེ་ཧཱུྃ་ངོ་ཞེས་བྱ་བ་ནི་བཅོམ་ལྡན་འདས་ཀྱི་ཐུགས་རྣམ་པར་དག་པ་བསྒོམ་པའོ། །འབྲས་བུ་སངས་རྒྱས་ཉིད་ནི་གྲུབ་པར་བྱའོ། ། [172a.7]དེ་ནས་ནམ་མཁའ་ལ་གནས་པའི་བཅོམ་ལྡན་འདས་སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་ལ། ཛཿཧཱུྃཿབྃ་ཧོཿ ཞེས་བྱ་བ་ཡི་གེ་བཞིས་མདུན་དུ་བཞུགས་སུ་གསོལ་ལོ། །དེར་མཆོད་ཡོན་དང་ཞབས་བསིལ་དང་། གདན་དང་། བསང་གཏོར་རྣམས་དབུལ་བར་བྱའོ། [172b] [172b.1]དེ་ནས་ནི་འོ་ཐུག་ལ་སོགས་པའི་ཞལ་ཟས་དྲང་བར་བྱ་སྟེ། འདིས་ནི་བདུད་རྩི་མྱང་བ་བརྗོད་དོ། །དེའི་རྗེས་སུ། །སངས་རྒྱས་ཀུན་ལ་བདག་ཕྱག་འཚལ། །ཞེས་བྱ་བའི་བསྟོད་པ་འདི་དག་གིས་བསྟོད་པར་བྱའོ། །དེ་ནས་ཡེ་ཤེས་སེམས་དཔའ་དང་། དམ་ཚིག་སེམས་དཔའ་ལྷན་ཅིག་གཅིག་ [172b.2]ཏུ་བྱས་ལ། དམ་ཚིག་ཁྱོད་དམ་ཚིག་ཁྱོད་དམ་ཚིག་ཁྱོད་བདག་ཨོཾ་ཨཱཿཧཱུྃ་ཞེས་བྱ་བའི་སྔགས་འདིས་གཉིས་སུ་མེད་པར་བྱ་བའོ། བསྒོམས་པས་ངལ་བར་གྱུར་ན་ནི་ཕྱི་ནས་བཟླས་པ་བྱ་བའོ། །ཨོཾ་ཨཱཿབཛྲ་ཧཱུྃ་སྭཱ་ཧཱ། ཞེས་བྱ་བ་ནི་བཟླས་པའི་སྔགས་སོ། །ཕྱི་ནས་ནི་བླ་ན་མེད་པ་ཡང་དག་ [172b.3]པར་རྫོགས་པའི་བྱང་ཆུབ་ཏུ་བསོད་ནམས་ཡོངས་སུ་བསྡོས་ལ། གཤེགས་སུ་གསོལ་ཏེ། ཇི་ལྟར་བདེ་བར་རྒྱུ་བར་བྱ་བའོ་ཞེས་བྱ་བའོ། །བསོད་ནམས་འདིས་སེམས་ཅན་རྣམས་ཐམས་ཅད་མྱུར་དུ་དེ་བཞིན་གཤེགས་པའི་ཡེ་ཤེས་ཐོབ་པར་གྱུར་ཅིག །གདམས་ངག་གི་རིམ་པའི་བཅོམ་ [172b.4]ལྡན་འདས་རྡོ་རྗེ་གདན་གྱི་སྒྲུབ་ཐབས་ཡོངས་སུ་རྫོགས་སོ།། །།པཎྜི་ཏ་ཆེན་པོ་ཨ་བྷ་ཡཱ་ཀ་རའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3149}༄༅༅། །རྒྱ་གར་སྐད་དུ། བཛྲ་ཨཱ་ས་ན་སཱ་དྷ་ནཾ། བོད་སྐད་དུ། རྡོ་རྗེ་གདན་ [172b.5]གྱི་སྒྲུབ་ཐབས། །སྔོན་དུ་བརྗོད་པའི་རིམ་པས་སྟོང་པ་ཉིད་བསྒོམས་པའི་རྗེས་ཐོགས་ལ། ཟླ་བའི་དཀྱིལ་འཁོར་ལ་ཡི་གེ་ཧཱུྃ་མཐིང་ནག་ཨ་ལ་སོགས་པའི་དབྱངས་ཡིག་དཀར་པོ་བཅུ་དྲུག་གིས་ཡོངས་སུ་བསྐོར་བའོ། །དེ་ནས་ཡི་གེ་ཀ་ལ་སོགས་པ་གསལ་བྱེད་དཀར་པོ་སུམ་ཅུ་རྩ་ [172b.6]གཉིས་ཀྱིས་ཀྱང་ཀུན་ནས་བསྐོར་བའོ། །དེ་དག་ཐམས་ཅད་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དེའི་སྟེང་དུ་ཡང་ས་བོན་དེ་ཉིད་དོ། །དེ་ཡོངས་སུ་གྱུར་པ་ལས་རྡོ་རྗེ་སེར་པོའོ། དེའི་ལྟེ་བ་ལ་ས་བོན་སེར་པོའོ། །དེ་དག་ཐམས་ཅད་ཡོངས་སུ་གྱུར་ནས་རྗེ་བཙུན་སངས་རྒྱས་དཔལ་རྡོ་རྗེ་ [172b.7]གདན་དུ་བདག་ཉིད་སྐད་ཅིག་གིས་རྫོགས་པར་བྱ་སྟེ། སེར་པོ་ཞལ་གཅིག་ཕྱག་གཉིས་པ་བདུད་བཞི་ལེགས་པར་དཀྲིགས་པའི་སེང་གེའི་ཁྲི་ཆེན་པོ་མཆོག་ཏུ་གྱུར་པ། དེའི་སྟེང་དུ་སྣ་ཚོགས་པདྨ་དང་རྡོ་རྗེ་ལ་ལེགས་པར་བཞུགས་ཤིང་། ཕྱག་གཡོན་པ་མཉམ་པར་བཞག་པ་ཕྱག་ [173a] [173a.1]གཡས་པ་ས་གནོན་གྱི་ཕྱག་རྒྱ་དང་ལྡན་པ། སྐུ་ལ་མེ་ཏོག་བན་དྷུ་དམར་པོའི་འོད་དང་ལྡན་པའི་ན་བཟའ་བསྣམས་པ་ཡན་ལག་དང་ཉིང་ལག་ཐམས་ཅད་བལྟ་བས་ཆོག་མི་ཤེས་པའི་སྐུར་བསམ་པར་བྱས་ལ། ཨོཾ་ཆོས་ཀྱི་དབྱིངས་ཀྱི་ངོ་བོའི་བདག་ཉིད་ནི་ང་ཡིན་ནོ། །ཞེས་ [173a.2]གཉིས་སུ་མེད་པའི་ང་རྒྱལ་བྱ་བའོ། །དེའི་རྗེས་ལ་བཅོམ་ལྡན་འདས་ཀྱི་གཡས་ཕྱོགས་སུ་བྱང་ཆུབ་སེམས་དཔའ་བྱམས་པ་གསེར་མདོག་ཏུ་སེར་བ་ཕྱག་གཉིས་པ་རལ་བའི་ཅོད་པན་དང་ལྡན་པ་ཕྱག་གཡས་པས་རྔ་ཡབ་བསྣམས་པ་ཕྱག་གཞན་གཡོན་པ་ན་འདབ་མ་དང་ལྡན་པའི་ཀླུ་ཤིང་ [173a.3]བསྣམས་སོ། དེ་བཞིན་དུ་གཡོན་ན་བྱང་ཆུབ་སེམས་དཔའ་འཇིག་རྟེན་དབང་ཕྱུག་དཀར་པོ་རལ་བའི་ཅོད་པན་དང་ལྡན་པ་རྔ་ཡབ་ཕྱག་གཡས་པ་ན་བསྣམས་པ་ཕྱག་གཡོན་པདྨ་བསྣམས་པའོ། །དེ་དག་གཉིས་ཀ་ཡང་བཅོམ་ལྡན་འདས་ཀྱི་ཞལ་མངོན་དུ་རྣམ་པར་བལྟ་བར་བལྟ་བའོ། ། [173a.4]དེ་ནས་གོ་ཆ་དྲུག་དགོད་པར་བྱ་སྟེ། བཅོམ་ལྡན་འདས་ཀྱི་སྤྱན་གཉིས་ལ་ཟླ་བ་ལ་གནས་པའི་ཡི་གེ་ཀྵིཾ་དཀར་པོའོ། །རྣ་བ་གཉིས་ལ་ཟླ་བ་ལ་གནས་པའི་ཡི་གེ་ཛྲཱིམ་མཐིང་ནག་གོ། །སྣ་བུག་གཉིས་ལ་ཟླ་བ་ལ་གནས་པའི་ཡི་གེ་ཁཾ་སེར་པོའོ། །ལྕེ་ལ་ཟླ་བ་ལ་གནས་པའི་ཡི་གེ་གྃ་ [173a.5]དམར་པོའོ། །དཔྲལ་བར་ཟླ་བ་ལ་གནས་པའི་ཡི་གེ་ཀཾ་ལྗང་གུའོ། །ནུ་མའི་བར་དུ་ཟླ་བ་ལ་གནས་པའི་ཡི་གེ་སྃ་དཀར་པོའོ། །དེ་ནས་སྙིང་གར་ཟླ་བ་ལ་གནས་པའི་ཡི་གེ་ཧཱུྃ་ལས་བྱུང་བའི་རྡོ་རྗེའོ། །ཡང་དེའི་ལྟེ་བར་ཟླ་བ་དང་བཅས་པའི་ཡི་གེ་ཧཱུྃ་ངོ་། །མགྲིན་པར་ཟླ་བའི་ [173a.6]དཀྱིལ་འཁོར་ལ་ཡི་གེ་ཨཱཿདམར་པོ་ལས་སྐྱེས་པའི་པདྨ་དང་ཟླ་བ་ལ་གནས་པའི་ཡི་གེ་ཨཱཿཞེས་བྱ་བ་ནི་བཅོམ་ལྡན་འདས་ཀྱི་གསུང་རྣམ་པར་དག་པ་བསྒོམ་པའོ། །མགོ་བོར་ཟླ་བ་ལ་གནས་པའི་ཡི་གེ་ཨོཾ་ལས་བྱུང་བའི་འཁོར་ལོ་རྩིབས་བརྒྱད་པ་དང་ཟླ་བ་ལ་གནས་པའི་ཡི་ [173a.7]གེ་ཨོཾ་མོ། །ཞེས་བྱ་བ་ནི་བཅོམ་ལྡན་འདས་ཀྱི་སྐུ་རྣམ་པར་དག་པ་རྣམ་པར་བསྒོམ་པའོ། །ལྟེ་བའི་གོང་དུ་ཟླ་བ་ལ་གནས་པའི་རྡོ་རྗེ་དང་བཅས་པའི་ཡི་གེ་ཧཱུཾ་ངོ་ཞེས་བྱ་བ་ནི་བཅོམ་ལྡན་འདས་ཀྱི་ཐུགས་རྣམ་པར་དག་པ་བསྒོམ་པ་ཡིན་ནོ། །དེ་ནས་སྙིང་གའི་ས་བོན་གྱིས་ཡེ་ཤེས་སེམས་ [173b] [173b.1]དཔའ་ཡང་དག་པར་སྤྱན་དྲངས་ལ། མཆོད་ཡོན་དང་ཞབས་བསིལ་དང་། རྣམ་པ་སྣ་ཚོགས་པའི་མཆོད་པ་རྣམས་ཀྱིས་ལེགས་པར་ཚིམ་པར་བྱ་བ་དང་བསྟོད་པ་དང་ཕྱག་འཚལ་བ་སྔོན་དུ་བཏང་བས་དམ་ཚིག་སེམས་དཔས་ལྷན་ཅིག་ཏུ་བྱས་ལ། ཨོཾ་དམ་ཚིག་ཁྱོད་དམ་ཚིག་ཁྱོད་དམ་ཚིག་ [173b.2]ཁྱོད་ཨོཾ་ཨཱཿཧཱུྃ་ཞེས་བྱ་བའི་སྔགས་འདིས་གཉིས་སུ་མེད་པའི་ང་རྒྱལ་བསྐྱེད་པར་བྱའོ། །དེ་ནས་བསྒོམས་པས་ངལ་ན་སྔགས་བཟླས་པར་བྱ་སྟེ། ཨོཾ་ཨཱཿབཛྲ་ཧཱུྃ་སྭཱ་ཧཱ། ཞེས་བྱ་བ་འདི་ནི་རྡོ་རྗེ་གདན་གྱི་སྒྲུབ་ཐབས་ཏེ་རྫོགས་སོ།། {T3150}༄༅༅། །རྒྱ་གར་སྐད་དུ། ཥ་ཊ་ [173b.3]ཀྵ་ར་སཱ་དྷ་ན། བོད་སྐད་དུ། ཡི་གེ་དྲུག་པའི་སྒྲུབ་ཐབས། དང་པོར་རེ་ཞིག་སྔགས་པས་བདེ་བའི་སྟན་ལ་ཉེ་བར་གནས་ཏེ། གདོང་བའི་གཙང་སྦྲ་ལ་སོགས་པ་བྱས་ལ། རང་ཉིད་ཀྱི་སྙིང་གའི་ཟླ་བ་ལ་གནས་པའི་ཡི་གེ་ཧྲཱིཿདཀར་པོ་ལས་རྣམ་པར་འཕྲོས་པའི་འོད་ཟེར་གྱིས། བླ་མ་དང་སངས་ [173b.4]རྒྱས་དང་བྱང་ཆུབ་སེམས་དཔའ་རྣམས་མདུན་དུ་བལྟས་པས། ལེགས་པར་མཆོད་ཅིང་གསུམ་ལ་སྐྱབས་སུ་འགྲོ་བ་ལ་སོགས་པ་རྣམས་བྱ་སྟེ། དཀོན་མཆོག་གསུམ་ལ་བདག་ཕྱག་མཆི། །ཞེས་བྱ་བ་ལ་སོགས་པས་སོ། །ཇི་སྲིད་དུ་སེམས་ཅན་དུ་བསྡུ་བར་བྱ་བས་བསྡུས་པར་ [173b.5]གྱུར་པ། སྒོ་ང་ལས་སྐྱེས་པ་དང་། མངལ་ལས་སྐྱེས་པ་དང་། དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་དང་། གཟུགས་ཅན་དང་། གཟུགས་ཅན་མ་ཡིན་པ་དང་། འདུ་ཤེས་ཡོད་པ་དང་། འདུ་ཤེས་མེད་པ་དང་། འདུ་ཤེས་ཡོད་པ་ཡང་མ་ཡིན་འདུ་ཤེས་མེད་པ་ཡང་ [173b.6]མ་ཡིན་པ་སྟེ། ཇི་སྲིད་དུ་གང་འགའ་ཞིག་སེམས་ཅན་གྱི་ཁམས་སུ་གདགས་པར་བྱ་བས་བཏགས་པར་གྱུར་པ་རྣམས། ཐམས་ཅད་ཀྱང་བདག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ལེགས་པར་དགོད་པར་བྱ་བའོ། །དེ་ནས་ཨོཾ་རང་བཞིན་གྱིས་རྣམ་པར་ [173b.7]དག་པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་ནི་བདག་ཡིན་ནོ་ཞེས་བྱ་བ་ལན་གསུམ་བརྗོད་པར་བྱ་བའོ། །དེའི་རྗེས་སུ་སྟོང་པ་ཉིད་ཡུད་ཙམ་ཅིག་དམིགས་པར་བྱའོ། །དེའི་རྗེས་ཐོགས་ལ་སྙིང་གར་པདྨ་དཀར་པོའི་སྟེང་དུ་ཟླ་བའི་དཀྱིལ་འཁོར་རོ། །དེའི་སྟེང་དུ་ཧྲཱིཿདཀར་ [174a] [174a.1]པོའི་རྣམ་པའོ། །དེ་ལ་འོད་ཟེར་འབུམ་ཕྲག་དུ་མ་ཀུན་ནས་འཕྲོས་པར་བསྒོམས་ལ། དེས་སེམས་ཅན་རྣམས་ཀྱི་ཡང་ཐོག་མ་མེད་པའི་དུས་ནས་བསགས་པའི་འདོད་ཆགས་ལ་སོགས་པའི་ཉོན་མོངས་པའི་ཚོགས་རྣམས་ལྷག་མ་མ་ལུས་པར་རྣམ་པར་སྦྱངས་ཏེ། སླར་ [174a.2]ཡང་དེ་ཉིད་ལ་གཞུག་པར་བྱའོ། །དེ་ཡོངས་སུ་གྱུར་པ་ལས་བདག་ཉིད་འཇིག་རྟེན་དབང་ཕྱུག་གི་གཟུགས་སུ་བསྒོམ་པར་བྱ་སྟེ་རྒྱན་ཐམས་ཅད་ཀྱིས་བརྒྱན་པ་སྐུ་མདོག་དཀར་པོ་ཕྱག་བཞིའི་གཡོན་པས་པདྨ་འཛིན་པ། གཡས་པ་ཕྲེང་བ་འཛིན་པ་ཕྱག་གཞན་དག་གཉིས་ཀྱིས་ཐུགས་ཀར་ཐལ་མོ་ [174a.3]ཁ་སྦྱར་ནས་གནས་པའོ། །ཕྱག་དང་སྐུ་མདོག་དེ་ལྟ་བུ་དང་ལྡན་པ་དག་གིས་ནོར་བུ་འཛིན་པ། གཡས་ཕྱོགས་ན་པདྨ་གཞན་གྱི་སྟེང་ན་གནས་པའོ། །གཡོན་ཕྱོགས་ན་དེ་ཁོ་ན་བཞིན་དུ་ཡི་གེ་དྲུག་གི་རིག་མ་ཆེན་མོ་པདྨ་གཞན་ལ་གནས་པའོ། །དེའི་རྗེས་ལ། ཨོཾ་རྡོ་རྗེ་སེམས་དཔའ་བདེ་བ་ཆེན་པོ་ [174a.4]ཛཿཧཱུྃ་བྃ་ཧོཿ། །དཔའ་བོ་ཁྱོད་ཨ་ལ་ལ་ལ་ལ་ཧོཿཨཿཨཿཨཿཨཿཞེས་བྱ་བ་བྱིན་གྱིས་རློབ་པར་བྱེད་པའི་སྔགས་ཀྱི་རྒྱལ་པོ་བརྗོད་པར་བྱའོ། །དེ་ལྟར་བསྒོམས་ལ་དེ་ནས་སངས་རྒྱས་ཐམས་ཅད་ཀྱི་སྙིང་པོར་གྱུར་པ་ཡིད་བཞིན་གྱི་ནོར་བུར་བརྟག་པར་བྱ་བའི་གསང་སྔགས་ཀྱི་རྒྱལ་པོ་འདི་བདག་ [174a.5]ཉིད་འཇིག་རྟེན་དབང་ཕྱུག་གི་སྙིང་གའི་ཟླ་བའི་དཀྱིལ་འཁོར་ལ་ཁ་དོག་དཀར་པོ་ཕྲེང་བའི་རྣམ་པར་ཁ་ནས་ཕྱིར་བྱུང་ནས་ལྟེ་ཁུང་དུ་ལེགས་པར་འཇུག་པ་འཁོར་ལོ་ལྟར་འཁོར་བའི་ཚུལ་དུ་མཚན་མ་མེད་པའི་རྣལ་འབྱོར་གྱིས་བལྟ་བར་བྱའོ། །དེ་ལྟར་བཟླས་པ་བྱས་ནས། གཡོ་བ་དང་གཞུག་པ་ལ་ [174a.6]སོགས་པ་འཐོབ་སྟེ། དད་པ་དང་སྙིང་རྗེ་དང་ལྡན་ཞིང་བླ་མ་ལ་གུས་པའི་རྣལ་འབྱོར་པ་ནི་དུས་རིང་པོ་མི་ཐོགས་པན་འགྲུབ་པར་འགྱུར་རོ། །ཨོཾ་མ་ཎི་པད་མེ་ཧཱུྃ། བཟླས་པའི་སྔགས་སོ། །དེ་ནས་ལངས་པའི་དུས་ན་ནི་སྔགས་ཀྱི་རྒྱལ་པོ་འདི་བརྗོད་ནས་ལངས་པར་བྱ་སྟེ། ཨོཾ་བཛྲ་སཏྭ་ [174a.7]ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་དྷོ་མེ་བྷ་བ་སུ་ཏོཥྱོ་མེ་བྷ་བ། སུ་པོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲི་ཡཾ་ཀུ་རུ་ཧཱུྃ་ཧ་ཧ་ཧ་ཧ་ཧོཿ། བྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿདེ་སྐད་བརྗོད་ [174b] [174b.1]ལ་ཇི་ལྟར་བདེ་བར་རྒྱུ་བར་བྱ་བའོ། །འཕགས་པ་ཡི་གེ་དྲུག་པ་རིག་པ་ཆེན་མོའི་སྒྲུབ་ཐབས་རྫོགས་སོ།། །།དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3151}༄༅༅། །རྒྱ་གར་སྐད་དུ། ཥ་ཊ་ཀྵ་ར་སཱ་དྷ་ནཾ། བོད་སྐད་དུ། ཡི་གེ་ [174b.2]དྲུག་པའི་སྒྲུབ་ཐབས། འཇིག་རྟེན་དབང་ཕྱུག་ཡི་གེ་དྲུག་པ་ལ་ཕྱག་འཚལ་ལོ། །གཞན་ལ་ཡང་དག་ཕན་བརྩོན་པར། །ཡིད་ཀྱི་ལུས་ཅན་རྣམས་ལ་དམིགས། །སྡུག་བསྔལ་མ་ལུས་ཉེར་ཞི་ཞིང་། །དམ་པའི་བདེ་བས་རབ་གནས་པ། །དེ་ཡིད་སྙིང་ལ་ལེགས་བསམ་ལ། ། [174b.3]བསྒོམ་པར་བྱ་བའོ་དག་པའི་འོད། །འོད་དེ་སྤྲོས་པས་ལུས་ཅན་རང་། །ཀུན་ནས་གསལ་བར་བྱ་བ་ཡིན། །ངལ་སོས་སྔགས་པས་ཆོ་ག་བཞིན། །རྣམ་རྟོག་དམ་པ་མིན་སྤངས་ལ། །འོད་དཀར་ལྷག་པར་འབར་བ་ཡིས། །གསལ་པོར་སྔགས་ནི་བརྗོད་པར་བྱ། །རང་གི་ [174b.4]ལྟེ་བའི་དཀྱིལ་འཁོར་དུ། །དེ་ལྟར་རབ་ཞུགས་སྙིང་གར་བསྡུ། །འདི་བྱེད་པ་ན་ལུས་ངག་ཡིད། །རྣམ་གསུམ་དག་པ་བསྒོམ་པར་བྱ། །དེ་ལ་རང་ལུས་ལེགས་གནས་པས། །བདག་ཉིད་ལུས་སོགས་དག་པར་རོ། །ཕྱིར་འཕྲོས་པ་ཡི་སྔགས་རྣམས་ཀྱིས། །སྲོག་ཆགས་ [174b.5]རྣམས་ལའང་རྣམ་པར་བསམ། །སྔགས་བརྗོད་པ་ལས་བཞེངས་པར་ནི། །མདུན་དུ་ལྷ་གསུམ་བལྟ་བྱས་ལ། །སྔགས་བརྗོད་སྡུད་པའི་རིམ་པ་ཡིས། །རེ་རེ་ཞིང་ནི་དགོད་པ་དང་། །སྣ་ཚོགས་མཆོད་པ་སྤྲུལ་པ་དང་། །དེ་དག་དབུལ་བ་ཉིད་ཀྱང་ངོ་། །དེ་དག་དག་པ་ཡོངས་རྫོགས་ནས། ། [174b.6]འདོད་པའི་དོན་དུ་ཡོངས་སུ་བསྔོ། །དེ་ནས་བཟླས་པ་ཚུལ་བཞིན་བྱ། །སྔགས་བཟླས་པ་ཡི་ཐ་མར་ཡང་། །མཆོད་སོགས་སྔ་མ་བཞིན་བྱས་ལ། །ལྷ་རྣམས་སྙིང་གར་ལེགས་པར་བསྡུས། །དང་པོར་ཏིང་ངེ་འཛིན་ལེགས་འཐོབ་པའི། །སྔགས་པས་དབེན་དང་ཁྱིམ་སོགས་སུ། །ཆོ་ག་འདི་ནི་ [174b.7]ཐུན་ཚོད་བཞིར། །འབུམ་ཕྲག་བཟླས་པར་བྱ་བ་ཡིན། །སྤྲོ་དང་བཟླས་པ་ཀུན་སྤངས་ཏེ། །འཚོ་ཚིས་སེམས་ཁྲལ་བྱ་བ་མིན། །སྡིག་པ་སྦྱང་སོགས་ཐམས་ཅད་ལ། །དཀྱིལ་འཁོར་གྲུ་བཞི་བྱས་ལ་ནི། །ཐད་ཀ་ལ་སོགས་མདུན་དུ་བསྒོམ། །ཡང་ན་རྗེ་དཔོན་མཎྜལ་ལ། །མཆོད་བྱས་ [175a] [175a.1]མཆོད་པ་བྱས་ནས་ཀྱང་། །ཆོ་ག་འདི་ནི་བྱ་བ་ཡིན། །དེ་ལས་ལྷའི་སྐུའི་གདམས་ངག་ནི་འདི་ཡིན་ཏེ། སྐྱིལ་ཀྲུང་དཀར་ཞིང་ཕྲེང་བ་དང་། །པད་བཅས་ཐལ་མོ་ཁ་སྦྱར་བའི། །རྗེ་ལྟ་དེ་དང་མཐུན་པར་ནི། །ལྷ་མོ་ཞེན་པ་མེད་པར་བསྟེན། །འཕགས་པ་སེར་པོར་བསམ་བྱ་ [175a.2]སྟེ། །གཡོན་པས་རིན་ཆེན་གདུགས་འཛིན་ཅིང་། །རིན་ཆེན་དབུ་རྒྱན་ཕྱག་གཡས་སྟོང་། །ཞེན་པ་མེད་པས་རྗེས་སུ་འགྲོ། །འཕགས་པ་ཡི་གེ་དྲུག་པ་རིག་པ་ཆེན་པོ་རྗེ་བཙུན་འཇིག་རྟེན་དབང་ཕྱུག་གི་གདམས་ངག་རྒྱུད་ནས་འོངས་པའི་སྒྲུབ་ཐབས་ཀྱི་ཆོ་གའོ།། །།དགེ་སློང་ [175a.3]ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3152}༄༅༅། །རྒྱ་གར་སྐད་དུ། ཨུ་པ་དེ་ཤ་བི་ཥེ་ཤ་སཱ་དྷ་ནཾ། བོད་སྐད་དུ། གདམས་ངག་གི་ཁྱད་པར་ཡི་གེ་དྲུག་པའི་སྒྲུབ་ཐབས་འགའ་ཞིག་ལ། བཅོམ་ལྡན་འདས་ནི་ནོར་བུ་དང་བཅས་པའི་པོ་ཏིས་མཚོན་པའི་ [175a.4]པདྨ་བསྣམས་པའོ། །ནོར་བུ་འཛིན་པ་ནི་པོ་ཏི་དང་བྲལ་བའི་ནོར་བུ་དང་པདྨ་འཛིན་པའོ། །ཡི་གེ་དྲུག་པ་ནི་ནོར་བུ་དང་བྲལ་བའི་པོ་ཏི་པདྨ་འཛིན་པའོ། །མཆོད་པའི་སྔགས་ནི། ཨོཾ་འཇིག་རྟེན་དབང་ཕྱུག་མེ་ཏོག་བཞེས་སུ་གསོལ་སྭཱ་ཧཱ། དེ་བཞིན་དུ་བདུག་སྤོས་དང་མར་མེ་ཞེས་བྱ་བ་ལ་ [175a.5]སོགས་པ་དག་གིས་གོ་བར་བྱའོ། །ལྷ་གཞན་དག་རྣམས་ལ་ཡང་དེས་གོ་བར་བྱ་བའོ། །ཡེ་ཤེས་ཀྱི་དཀྱིལ་འཁོར་སྤྱན་འདྲེན་པའི་སྔགས་ནི་འདི་ཡིན་ཏེ། ཨོཾ་བདེ་བ་ཆེན་པོ་རྡོ་རྗེ་སེམས་དཔའ་ཛཿཧཱུྃ་བཾ་ཧོཿ དཔའ་བོ་ཁྱོད་ཨ་ལ་ལ་ལ་ལ་ཧོཿཨཿཨཿཨཿཨཿཞེས་སོ། །ཡི་ [175a.6]གེ་དྲུག་པའི་གདམས་ངག་གི་ཁྱད་པར་རྫོགས་སོ།། །།ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3153}༄༅༅། །རྒྱ་གར་སྐད་དུ། ཁཪྶ་པ་ཎ་སཱ་དྷ་ནཾ། བོད་སྐད་དུ། བདེ་བ་འབྱུང་བའི་སྒྲུབ་ཐབས། ཁཪྶ་པ་ཎི་ལ་ཕྱག་འཚལ་ལོ། །རེ་ཞིག་དང་པོར་སྔགས་ [175a.7]པས་བདེ་བའི་སྟན་ལ་ཉེ་བར་གནས་ཤིང་གདོང་པའི་གཙང་སྦྲ་ལ་སོགས་པ་བྱས་པས། གཙང་ཞིང་དབེེན་པའི་ཕྱོགས་སུ་རང་གི་སྙིང་གར་ཡི་གེ་ཨ་ལས་ཟླ་བའི་དཀྱིལ་འཁོར་རྣམ་པར་བསྒོམ་པར་བྱ་བའོ། །དེའི་སྟེང་དུ་ཡི་གེ་ཧྲཱིཿདཀར་པོའོ། །དེའི་འོད་ཟེར་གྱིས་བསྐུལ་ལ་མདུན་ [175b] [175b.1]གྱི་ནམ་མཁའ་ལ་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་ལ་སོགས་པ་སྤྱན་དྲངས་ལ། སྙིང་གའི་ས་བོན་གྱི་འོད་ཟེར་ལས་བྱུང་བའི་མཆོད་པའི་སྤྲིན་གྱིས་ལེགས་པར་མཆོད་ཅིང་སྡིག་པ་བཤགས་པ་ལ་སོགས་པ་དང་། ཚངས་པའི་གནས་བཞི་བསྒོམ་པ་ཡང་བྱ་སྟེ། [175b.2]དེ་ནས་སྟོང་པ་ཉིད་བསྒོམ་པར་བྱ་ཞིང་། ཨོཾ་སྟོང་པ་ཉིད་ཀྱི་ཡེ་ཤེས་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ་ཞེས་བྱ་བ་འདིས་བྱིན་གྱིས་བརླབ་པར་བྱ་བའོ། །དེའི་རྗེས་ལ་སྔར་བཞིན་དུ་ཡི་གེ་ཧྲཱིཿརྣམ་པར་བསྒོམས་ལ་ནམ་མཁའི་དཀྱིལ་ན་སྤྲོས་ཤིང་བསྡུ་བར་ཡང་བྱས་ལ། [175b.3]དེ་ལས་ངེས་པར་བྱུང་བའི་འཇིག་རྟེན་དབང་ཕྱུག་ཏུ་བདག་ཉིད་བསྒོམ་པར་བྱ་སྟེ། དཀར་པོ་འོད་ཟེར་བྱེ་བ་འཕྲོ་བ་རལ་པ་དང་། དབུ་རྒྱན་དང་ལྡན་པ། སྣང་བ་མཐའ་ཡས་ཀྱིས་སྤྱི་བོར་མཚན་པ། རྒྱན་ཐམས་ཅད་ཀྱིས་བརྒྱན་པ། བཞིན་འཛུམ་པ། སྐྱིལ་ཀྲུང་ཕྱེད་པས་པདྨ་ [175b.4]དང་ཟླ་བའི་གདན་ལ་བཞུགས་པ། གཡས་པས་མཆོག་སྦྱིན་པ། གཡོན་པས་པདྨ་བསྣམས་པའོ། །གཡས་ཀྱི་ཕྱོགས་ན་འཕགས་མ་སྒྲོལ་མ་དང་། གཞོན་ནུ་ནོར་བཟངས་གཉིས་སོ། །གཡོན་གྱི་ཕྱོགས་ན་ཁྲོ་གཉེར་ཅན་དང་། རྟ་མགྲིན་གཉིས་སོ། །དེ་ནས་མགོ་བོ་ [175b.5]ལ་ཡི་གེ་ཨོཾ། མགྲིན་པར་ཡི་གེ་ཨཱཿསྙིང་གར་ཡི་གེ་ཧཱུྃ་འདི་དག་རྣམས་ལེགས་པར་བསམས་ལ། ཇི་སྲིད་དུ་སྐྱོ་བར་མ་གྱུར་གྱི་བར་དུ་གནས་པར་བྱའོ། །སྐྱོ་བ་དང་སྔགས་བཟླས་པར་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་ཧྲཱིཿསྭཱ་ཧཱ་བྱ་བའོ། །ཁཪྶ་པ་ཎིའི་སྒྲུབ་ཐབས་རྫོགས་ [175b.6]སོ།། །།པཎྜི་ཏ་ཆེན་པོ་རཏྣ་ཨཱ་ཀ་ར་གུཔྟའི་ཞལ་སྔ་ནས། དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །{T3154}༄༅༅། །རྒྱ་གར་སྐད་དུ། ཁཪྶ་པ་ཎ་སཱ་དྷ་ནཾ། བོད་སྐད་དུ། བདེ་བ་འབྱུང་བའི་སྒྲུབ་ཐབས། བཅོམ་ལྡན་འདས་བདེ་བ་ཐམས་ [175b.7]ཅད་འབྱུང་བར་མཛད་པ་ལ་ཕྱག་འཚལ་ལོ། །མངོན་འདོད་འབྲས་སྟེར་དཔག་བསམ་ལྗོན་ཤིང་དཔལ་ནི་ཀུན་ནས་ཉེར་རྒྱས་པའི། །བདེ་བར་གཤེགས་ཚུལ་ལམ་ཆེན་རྣམས་ནི་ཤིན་ཏུ་བདེ་མཛད་དེད་དཔོན་པ། །སྲིད་ཞི་མཉམ་པར་དགོངས་པ་དངོས་པོའི་རང་བཞིན་མ་ལུས་ཐམས་ཅད་ཀྱི། ། [176a] [176a.1]སྐྱེ་དགུའི་ཆད་པ་འདི་ནི་ཕྱག་ན་པདྨོ་འདི་ཡིས་ཞི་གྱུར་ཅིག །སྔ་མོར་གདོང་སོགས་ལེགས་བཀྲུས་ལ། །དབེན་པའི་གནས་སུ་ཆོ་ག་ཡི། །སྙིང་གའི་ས་བོན་སྤྲོ་བྱ་བ། །པདྨའི་སྟན་ལ་ལེགས་གནས་པའི། །ཟླ་རྒྱས་སྟེང་དུ་རབ་འབར་བ། །ས་བོན་རང་གི་སྙིང་ [176a.2]གར་བསྒོམ། །འོད་དེས་ལེགས་པར་བསྐུལ་བྱས་ལ། །ཡང་དག་སྤྱན་དྲངས་མཁའ་དབྱིངས་མདུན། །དཔལ་ལྡན་ཁཪྶ་པ་ཎ་མགོན། །བླ་མ་སངས་རྒྱས་རྒྱ་མཚོ་སྲས། །མཆོད་སྤྲིན་རྣམ་པ་སྣ་ཚོགས་པ། །ས་བོན་དེ་ལས་བྱུང་བས་མཆོད། །དེ་ནས་མངོན་པར་ཕྱག་བྱས་ལ། ། [176a.3]སྡིག་པ་བཤགས་ལ་སོགས་པའོ། །བློ་འཁོར་བ་ཐོག་མ་མེད་པ་ནས་འཁོར་བ་གང་ཡིན་པར་བདག་གིས་མི་དགེ་བ་བགྱིས་པའམ། བགྱིད་དུ་སྩལ་བའམ། གཞན་བགྱིད་པར་གྱུར་པ་ལ་རྗེས་སུ་ཡི་རང་བར་བགྱིས་པ། དེ་དག་ཐམས་ཅད་བཅོམ་ལྡན་འདས་ཀྱི་སྤྱན་སྔར་བདག་ [176a.4]གིས་བཤགས་པར་བགྱིའོ། །རྫོགས་པའི་སངས་རྒྱས་དང་། སངས་རྒྱས་ཀྱི་སྲས་དང་། འཕགས་པ་རྣམས་དང་གཞན་དག་རྣམས་ཀྱིས་བྱས་པའི་དགེ་བ་གང་ཡིན་པ་ལ་ཡང་རྗེས་སུ་ཡི་རང་ངོ་། །བདག་གིས་དེ་དག་མ་ལུས་རྫོགས་པའི་བྱང་ཆུབ་ཏུ་ཡང་དག་པར་ཡོངས་ [176a.5]སུ་སྐྱང་བར་བགྱིའོ། །ཐུགས་རྗེའི་བདག་བཞིན་བླ་མེད་པའོ། །སངས་རྒྱས་ལ་ནི་བདག་སྐྱབས་མཆི། །ཆོས་ཀྱི་རང་བཞིན་གོས་མེད་པའི། །ཆོས་རྣམས་ཐམས་ཅད་རོ་གཅིག་པའོ། །རབ་དགའ་ལ་སོགས་སར་ཞུགས་པའི། །བྱང་ཆུབ་སེམས་ཚོགས་ལ་དེ་ [176a.6]བཞིན། །མྱ་ངན་ལས་འདས་པར་བཞེད་པའི་སངས་རྒྱས་ལ་ཡང་གཞན་ལ་ཕན་པའི་དོན་དུ་རིང་བར་བཞུགས་པར་བདག་གསོལ་བ་འདེབས་སོ། །སྒྲིབ་པ་ཐམས་ཅད་རྩད་ནས་གཅོད་པར་བྱེད་པའི་རྒྱུར་གྱུར་བ་བྱང་ཆུབ་ཀྱི་སེམས་བདག་གིས་བསྐྱེད་པར་བགྱིའོ། །སྲས་དང་བཅས་ [176a.7]པའི་བདེ་བར་གཤེགས་པའི་ལམ་ལ་བདག་གིས་བསམ་པ་རྣམ་པར་དག་པས་ལེགས་པར་བསྟན་པར་བགྱིའོ། །དེ་ནས་གཅིག་དང་བྲལ་བའི་ཕྱིར་ན། གཡོ་བ་དང་། མི་གཡོ་བའི་འཇིག་རྟེན་འདི་དག་ཉིད་མ་ལུས་པ་ཡང་སྟོང་པའོ་ཞེས་རྣམ་པར་བསམས་ལ། ཨོཾ་སྟོང་པ་ཉིད་ཀྱི་ཡེ་ [176b] [176b.1]ཤེས་ཀྱི་རྡོ་རྗེའི་རང་བཞིན་བདག་ཉིད་ནི་ང་ཡིན་ནོ་ཞེས་བྱ་བས་སྟོང་པ་ཉིད་བྱིན་གྱིས་བརླབ་པར་བྱའོ། །བྱིན་གྱིས་བརླབས་ལ་ཆོས་འདི་དག་ཐམས་ཅད་ནི་རང་བཞིན་གྱིས་རྣམ་པར་དག་པ་ཡིན་ལ་དེ་བཞིན་དུང་ཡང་ཡིན་ནོ་ཞེས་ཀུན་དུ་བལྟས་ལ། ཨོཾ་ཆོས་ཐམས་ཅད་རང་བཞིན་གྱིས་རྣམ་པར་ [176b.2]དག་པས་བདག་ཀྱང་རང་བཞིན་གྱིས་དག་པའོ་ཞེས་བརྗོད་པར་བྱའོ། །དེ་ནས་ནི་བསྒོམ་པའོ། །རྣམ་པར་ཤེས་པའི་བདག་ཉིད་ཙམ་དུ་གྱུར་པ་ལས་སྔོན་གྱི་སྨོན་ལམ་གྱིས་ལེགས་པར་བསྐུལ་བས་ཡི་གེ་པཾ་ལས་ཡོངས་སུ་གྱུར་པ་ལས་ཁ་དོག་སྣ་ཚོགས་པའི་པདྨའོ། །ཨ་ལས་སྐྱེས་པའི་ཟླ་ [176b.3]བའི་དཀྱིལ་འཁོར་རྒྱས་ཤིང་དྲི་མ་མེད་པའོ། །དེའི་སྟེང་དུ་ཤིན་ཏུ་འོད་འབར་བར་གྱུར་པའི་ཡི་གེ་ཧྲཱིཿནམ་མཁའི་དཀྱིལ་གང་བ་དང་། སྤྲོ་བའི་ཚོགས་ཀྱིས་ཁྱབ་པར་རྣམ་པར་བསྒོམས་ལ། དེ་དག་ཡོངས་སུ་གྱུར་པ་ལས་རང་གི་ས་བོན་གྱི་ཡུ་བའི་སྙིང་པོ་ལ་རྒྱན་དུ་བྱས་ཤིང་ཁ་བྱེ་བའི་པདྨ་སྔོན་ [176b.4]དུ་བལྟའོ། །དེ་ནས་དེ་དག་ཀུན་ཡོངས་སུ་གྱུར་ནས་བདག་ཉིད་བཅོམ་ལྡན་འདས་སུ་བསྒོམ་པར་བྱ་སྟེ། གོང་ལྟར་འོད་བྱེ་བ་ཀུན་ནས་འཕྲོ་བས་སྐུ་ཤིན་ཏུ་དཀར་བ་དབུ་རྒྱན་དང་ལྡན་ཞིང་རལ་པ་ནི་བྲང་ཁར་ཏེ། སྣང་བ་མཐའ་ཡས་ཀྱིས་དབུ་བརྒྱན་པ། སྣ་ཚོགས་པདྨ་ལས་བྱུང་ [176b.5]བའི་ཟླ་བའི་དཀྱིལ་འཁོར་ལ་ཕྱེད་ཀྲུང་གིས་བཞུགས་པ། སྐུ་རྒྱན་ཐམས་ཅད་དང་ལྡན་ཞིང་ཞལ་འཛུམ་པ་ལོ་བརྒྱད་གཉིས་ཀྱི་ཚོད་དུ་གྱུར་པ་སྟེ། ཕྱག་གཡས་པས་མཆོག་སྦྱིན་པ། ཕྱག་གཡོན་པས་ཡུ་པ་དང་ལྡན་པའི་པདྨ་བསྣམས་ཤིང་། ཕྱག་སྨད་པ་དེའི་འོག་ན་བདུད་རྩིའི་ [176b.6]རྒྱུན་མདོག་ཤིན་ཏུ་དཀར་བ་འཐུང་བར་བྱེད་པས་ཚིམ་པ་མེད་པར་ཁ་གྱེན་དུ་གདངས་ཤིང་གསུས་པ་ཆེ་བ་ཤིན་ཏུ་རིང་བར་གྱུར་པ་ཉེ་བར་གནས་པའི་ཡི་དྭགས་ལྟ་བུའི་ཁ་ཚིམ་པར་མཛད་དོ། །རི་བོ་པོ་ཊ་ལའི་ནང་ན་བཞུགས་པ་དཔལ་དང་ལྡན་པ་ཐུགས་རྗེས་བརླན་པར་གྱུར་པའི་ཀུན་དུ་གཟིགས་པས་ [176b.7]སྒེག་པའི་ཉམས་དང་ལྡན་པས་ཀུན་ནས་ལེགས་པར་བསྟེན་པར་བྱེད་པ། ཤིན་ཏུ་གཞོན་པ་སྣ་ཚོགས་པའི་མཚན་རྣམས་ཀྱིས་བརྒྱན་པའོ། །དེའི་མདུན་ན་སྒྲོལ་མའོ། །གཡས་ཟུར་ན་གཞོན་ནུ་ནོར་བཟངས་སོ། །དེ་ལ་སྒྲོལ་མ་ནི་ལྗང་གུ་ཕྱག་གཡོན་པས་ཡུ་བ་དང་བཅས་པའི་ [177a] [177a.1]ཨུཏྤ་ལ་བཟུང་ནས་ཕྱག་གཡས་པས་ཁ་འབྱེད་པར་མཛད་པ། རྒྱན་སྣ་ཚོགས་དང་ལྡན་པ། ཤིན་ཏུ་གཞོན་ཤིང་ལང་ཚོལ་བབས་པ་ལྟ་ཟུར་ལེགས་པར་བསྟེན་པའོ། །ནོར་བཟངས་གཞོན་ནུ་ཡང་མཆན་ཁུང་གཡོན་པ་ན་པོ་ཏི་བཅུག་ཅིང་ཐལ་མོ་ཁ་སྦྱར་བ་གསེར་ [177a.2]གྱི་འོད་ཀུན་དུ་སྣང་བ། གཞོན་ནུའི་གཟུགས་སུ་གནས་པ་རྒྱན་རྣམས་ཐམས་ཅད་དང་ལྡན་པའོ། །ནུབ་ཏུ་ནི་ཁྲོ་གཉེར་ཅན་ནོ། །བྱང་དུ་ནི་རྟ་མགྲིན་ནོ། །དེ་ལ་ཁྲོ་གཉེར་ཅན་ནི་ཕྱག་བཞི་མ་གསེར་གྱི་འོད་དང་ལྡན་པ་རལ་པའི་ཐོར་ཚུགས་ཅན། ཕྱག་གཡས་པ་དག་གིས་ཕྱག་ [177a.3]འཚལ་བའི་སྟངས་དང་ཕྲེང་བ་འཛིན་པ་སྤྱན་གསུམ་མའོ། །རྟ་མགྲིན་མདོག་དམར་བ་བོང་ཐུང་གསུས་པ་ཆེ་བ་སྐྲ་སེར་པོ་གྱེན་དུ་འབར་བ་སྦྲུལ་གྱི་ག་ཤ་ཅན། སྨ་ར་ཤིན་ཏུ་སེར་བ་ཁའི་སྒོ་ནས་ཁྲག་ཡོངས་སུ་འཛག་པ་སྤྱན་གསུམ་དམར་ཞིང་ཟླུམ་པ་ཁྲོ་གཉེར་དང་སྨིན་མ་ཤིན་ཏུ་ [177a.4]བསྡུས་པ་སྟག་གི་པགས་པའི་ཤམ་ཐབས་ཅན་དབྱུག་ཐོ་དང་ལྡན་པ་ཕྱག་གཡས་པ་ཕྱག་འཚལ་བའི་སྟངས་ཐབས་སོ། །དེ་དག་ཉིད་ཐམས་ཅད་ཀྱང་རང་གི་གཙོ་བོའི་ཞལ་ལ་སྤྱན་ལྟ་བར་བྱེད་པ། ཇི་ལྟར་མཛེས་པར་གནས་པར་འོད་བསམ་པར་བྱའོ། །འོད་ཟེར་དེ་དག་སླར་ཡང་ས་བོན་ [177a.5]ཡི་གེ་དེ་ཉིད་ལ་ལེགས་པར་ཞུགས་པར་བྱ་བའོ། །དེ་ནས་རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧྲཱིཿརྣམ་པར་བསམས་ལ་དེ་ལས་ཀྱང་རྣམ་པ་སྣ་ཚོགས་པའི་འོད་ཟེར་ཀུན་དུ་སྤྲོས་ཤིང་ཁམས་གསུམ་ཡོངས་སུ་བཀང་བས་སེམས་ཅན་རྣམས་ཐམས་ཅད་ཀྱང་འཇིག་རྟེན་དབང་ཕྱུག་གི་གོ་ [177a.6]འཕང་ལ་རབ་ཏུ་བཀོད་དེ་སླར་ཡང་དེ་དག་སྤྲོས་པ་ཉིད་ཀྱིས་ཡེ་ཤེས་སེམས་དཔའ་སྤྱན་དྲངས་ལ་དམ་ཚིག་སེམས་དཔའ་དང་ཆུ་དང་འོ་མ་བཞིན་དུ་ལྷན་ཅིག་གཅིག་ཏུ་གྱུར་པའི་ངོ་བོར་བསྒོམ་པར་བྱའོ། །དེ་ནས་སྐུ་དང་གསུང་དང་ཐུགས་རྣམ་པར་དག་པ་ནི་རིམ་པ་ཇི་ལྟ་བ་བཞིན་དུ་མགོ་བོ་ལ་ཡི་གེ་ཨོཾ་དཀར་པོ་མགྲིན་པར་ [177a.7]ཡི་གེ་ཨཱཿདམར་པོ། སྙིང་གར་ཡི་གེ་ཧཱུྃ་ནག་པོ་རྣམས་བསམ་པར་བྱ་བའོ། །འདི་དག་གིས་ཀྱང་སེམས་ཅན་གྱི་ཕུང་པོ་མ་ལུས་པའི་ཉོན་མོངས་པའི་ཚོགས་ཐོག་མ་མེད་པ་ནས་འབྱུང་བ་རྣམས་རྣམ་པར་འཇིགས་པར་བྱེད་པ་མཐའ་ཡས་པའི་བསྒོམ་པ་འདི་ནི་ནུས་པ་ཇི་ལྟ་བ་བཞིན་དུ་གསལ་བར་ [177b] [177b.1]བྱ་བའོ། །གསལ་དང་འཛིན་དང་ཤེས་རབ་དང་། །སྐལ་བཟངས་ནད་མེད་ཕུན་ཚོགས་རྣམས། །བསྒོམ་པའི་སྦྱོར་བས་ཐོབ་པ་ཡིན། །རྩོད་ལྡན་ལ་ནི་མངོན་དུ་ཡང་། །བསྒོམ་པས་སྐྱོན་སྔགས་སེམས་རྩེ་གཅིག་པས་བཟླས་སོ། །དེ་ལ་སྔགས་ནི་འདི་ཡིན་ཏེ། ཨོཾ་ཧྲཱིཿསྭཱ་ཧཱ། [177b.2]ཡི་གེ་འདི་དག་རྣམས་ཀྱང་སྟོན་ཀའི་ཟླ་བ་དྲི་མ་མེད་པའི་ཕྲེང་བ་ཉིད་ཀྱིས་འོད་འབར་ཞིང་འོད་ཟེར་དུ་མ་འཕྲོ་བར་བྱེད་པའོ། །བཟླས་པས་སྐྱོན་ཡང་བསོད་ནམས་ཡོངས་སུ་བསྔོས་ལ་ལངས་ཏེ་ལྷའི་ང་རྒྱལ་གྱིས་བགྲོད་པས་ཇི་བདེ་བའི་བགྱི་བ་བྱ་བའོ། །དཔལ་ལྡན་འཇིག་རྟེན་དབང་ཕྱུག་ [177b.3]གི། །སྒྲུབ་ཐབས་ཆོ་ག་བཞིན་བྱས་པས། །བསོད་ནམས་བདག་ལ་ལེགས་བྱུང་གང་། །དེས་དེའི་གོ་འཕང་སྐྱེས་ཐོབ་ཤོག། །ཁཪྶ་པ་ཎ་ཞེས་བྱ་བའི་སྒྲུབ་ཐབས་རྫོགས་སོ།། །།པདྨ་འབྱུང་གནས་བློ་གྲོས་ཀྱི་ཞལ་སྔ་ནས་མཛད་པའོ།། །།པཎྜི་ཏ་ [177b.4]ཨ་བྷ་ཡཱ་ཀ་རའི་ཞལ་སྔ་ནས། དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3155}༄༅༅། །རྒྱ་གར་སྐད་དུ། སིཾ་ཧ་ནཱ་ད་སཱ་དྷ་ནཾ། བོད་སྐད་དུ། སེང་གེ་སྒྲའི་སྒྲུབ་ཐབས། སེང་གེ་སྒྲ་ལ་ཕྱག་འཚལ་ལོ། །དང་པོར་གདོང་བཀྲུ་བ་ལ་ [177b.5]སོགས་པ་བྱས་ནས་བདེ་བའི་སྟན་ལ་གནས་ཏེ། རྣལ་འབྱོར་པས་རང་གི་སྙིང་གར་ཉི་མའི་དཀྱིལ་འཁོར་ལ་ཡི་གེ་ཨ་བལྟས་པས་མདུན་དུ་བླ་མ་དང་སངས་རྒྱས་ལ་སོགས་པ་སྤྱན་དྲངས་ལ་སྡིག་པ་བཤགས་པ་ལ་སོགས་རྣམས་བྱའོ། །དེ་ནས་སྟོང་པ་ཉིད་མངོན་དུ་བྱས་ [177b.6]ཤིང་བྱིན་གྱིས་ཀྱང་བརླབས་ལ། སྨོན་ལམ་རྗེས་སུ་དྲན་པར་བྱ་སྟེ། དེ་ལས་ཨཱཿའི་རྣམ་པ་ཡོངས་སུ་གྱུར་པ་ལས་ཡི་གེ་ཧཱུྃ་ངོ་། །དེ་ཡོངས་སུ་གྱུར་པ་ལས་ཟླ་བའོ། །དེའི་སྟེང་དུ་ཡི་གེ་ཨོཾ་ཡོངས་སུ་གྱུར་པ་ལས་པདྨ་དམར་པོ། དེའི་སྟེང་དུ་ཡི་གེ་ཨཱཿཡོངས་སུ་གྱུར་པ་ [177b.7]ལས་སེང་གེ་དཀར་པོའོ། །དེའི་སྟེང་དུ་ཡི་གེ་ཧྲཱིཿལས་བྱུང་བའི་རྗེ་བཙུན་སེང་གེ་སྒྲ་སྟེ། དཀར་པོ་ཕྱག་གཉིས་པ་རལ་པ་དང་དབུ་རྒྱན་དང་ལྡན་པ་སྤྱན་གསུམ་པ་དཀའ་ཐུབ་ཀྱི་ཆ་ལུགས་འཛིན་པ་རྒྱལ་པོ་ཆེན་པོ་རོལ་པའི་སྟབས་སུ་བཞུགས་པ་ཕྱག་གཡོན་པ་ན་གནས་པའི་པདྨའི་ [178a] [178a.1]སྟེང་ན་རལ་གྲི་འབར་བ་གྱེན་དུ་ལངས་པའོ། །གཡས་ན་རྩེ་གསུམ་དཀར་པོ་ལ་སྦྲུལ་དཀར་པོ་གདེངས་ཀ་ཅན་གྱིས་དཀྲིས་པའོ། །གཡོན་པ་མེ་ཏོག་དྲི་ཞིམ་པོ་སྣ་ཚོགས་ཀྱིས་ཡོངས་སུ་བཀང་བའི་ཐོད་པ་དཀར་པོ། དབུ་རྒྱན་ལ་ནི་མི་བསྐྱོད་པ་བཞུགས་ [178a.2]པ་དེ་བཞིན་གཤེགས་པ་ལྔ་སྤྲོ་བར་མཛད་པ། སྤྲུལ་པ་ཆེན་པོའི་སྐུར་གྱུར་པ་བསྒོམ་པར་བྱའོ། །བཟླས་པའི་སྔགས་ནི་ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུྃ་ཕཊ། འདི་ནི་སེང་གེ་སྒྲའི་སྒྲུབ་ཐབས་སོ། །དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3156}༄༅༅། །རྒྱ་གར་སྐད་དུ། སིཾ་ཧ་ [178a.3]ནཱ་ད་དྷཱ་ར་ནི། བོད་སྐད་དུ། སེང་གེ་སྒྲའི་གཟུངས། ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏརྱ་ཐཱ། ཨོཾ་ཨ་ཀ་ཊེ་པི་ཀ་ཊེ་ནི་ཀ་ཊེ་ཀ་ཊཾ་ཀ་ཊེ་ཀ་རོ་ཊེ་བཱིར་ཡེ་སྭཱ་ཧཱ། འདི་ནི་བཅོམ་ལྡན་འདས་འཕགས་པ་འཇིག་ [178a.4]རྟེན་དབང་ཕྱུག་གི་མདུན་དུ་ནང་པར་སྔ་མོར་བའི་ལྕི་བ་ས་ལ་མ་ལྷུང་བས་མཎྜལ་བརྒྱད་བྱ་སྟེ། མཎྜལ་རེ་རེ་ཞིང་ལན་གསུམ་དུ་བཟླས་པར་བྱ་བའོ། །དེ་ནས་ལན་བདུན་དུ་བའི་ལྕི་བ་ལྷག་མ་མངོན་པར་བསྔགས་ལན་དཔལ་བྱུག་པར་བྱ་སྟེ། ནད་རྣམས་ཐམས་ཅད་ཞི་བར་འགྱུར་རོ། །གལ་ [178a.5]ཏེ་མཚམས་མེད་པ་ལྔ་བྱས་པས་ཀྱང་ཉི་མ་བདུན་པའམ་བཅུ་གསུམ་པའམ་ཉི་མ་ཉི་ཤུ་རྩ་གཅིག་པ་ལ་ཡང་མ་གྲུབ་ན་དེའི་ཚེ་དེ་ཉིད་ཀྱིས་མཚམས་མེད་པ་ལྔ་བྱས་པ་ཡིན་ཞིང་། ངས་སངས་རྒྱས་བཅོམ་ལྡན་འདས་རྣམས་བསླུས་པར་ཡང་འགྱུར་རོ། །སེང་གེ་སྒྲ་ཞེས་བྱ་བའི་གཟུངས་ [178a.6]རྫོགས་སོ།། །།དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3157}༄༅༅། །རྒྱ་གར་སྐད་དུ། སིཾ་ཧ་ནཱ་ད་སཱ་དྷ་ནཾ། བོད་སྐད་དུ། སེང་གེ་སྒྲའི་སྒྲུབ་ཐབས། དང་པོར་རེ་ཞིག་སྔགས་པས་བཞིན་གྱི་གཙང་སྦྲ་ལ་སོགས་པ་བྱས་པ་བདེ་བའི་སྟན་ལ་ [178a.7]གནས་ཏེ། རང་གི་སྙིང་གར་ཟླ་བའི་དཀྱིལ་འཁོར་ལ་ཡི་གེ་ཧྲཱིཿདཀར་པོ་དམིགས་ལ། དེའི་འོད་ཟེར་གྱིས་ལེགས་པར་སྤྱན་དྲངས་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་བསྒོམ་པར་བྱ་བའོ། །དེའི་རྗེས་སུ་མཆོད་པ་དང་སྡིག་པ་བཤགས་པ་ལ་སོགས་ [178b] [178b.1]བྱས་ལ། སྟོང་པ་ཉིད་ལེགས་པར་བསྒོམ་པར་བྱ་ཞིང་། ཨོཾ་སྟོང་པ་ཉིད་ཀྱི་ཡེ་ཤེས་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ་ཞེས་བྱ་བ་འདིས་བྱིན་གྱིས་བརླབ་པར་ཡང་བྱ་བའོ། །དེ་ནས་དེ་མ་ཐག་ཏུ་ཡི་གེ་པཾ་ཡོངས་སུ་གྱུར་པས་པདྨ་དཀར་པོའོ། །དེའི་སྟེང་དུ་ཡི་གེ་སི་ [178b.2]ཡོངས་སུ་གྱུར་པ་ལས་སེང་གེ་དཀར་པོའོ། །དེའི་རྒྱབ་ཏུ་ཟླ་བ་ལ་ཡི་གེ་ཧྲཱིཿལས་ཀུན་ནས་འབྱུང་བའི་འཇིག་རྟེན་དབང་ཕྱུག་སེང་གེ་སྒྲའི་སྐུར་བདག་ཉིད་བསྒོམ་པར་བྱ་བའོ། །དཀར་པོ་ཕྱག་གཉིས་པ་སྣང་བ་མཐའ་ཡས་དང་རལ་པ་དང་དབུ་རྒྱན་ཅན། སྤྱན་གསུམ་པ་ [178b.3]དཀའ་ཐུབ་ཀྱི་ཆ་བྱད་འཛིན་པ་རྒྱལ་པོ་ཆེན་པོའི་འགྱིང་བག་གིས་བཞུགས་པ། ཕྱག་གཡོན་ན་པདྨ་ལངས་པའི་སྟེང་ན་རལ་གྲི་ལངས་པའོ། །གཡས་ན་རྩེ་གསུམ་དཀར་པོ་ལ་སྦྲུལ་དཀར་པོ་གདེངས་ཀ་དང་ལྡན་པས་དཀྲིས་པའོ། །གཡོན་ན་མེ་ཏོག་དྲི་ཞིམ་པོ་སྣ་ཚོགས་ཀྱིས་ཡོངས་ [178b.4]སུ་བཀང་བའི་ཐོད་པ་དཀར་པོའོ། །དེ་བཞིན་གཤེགས་པ་ལྔ་འཕྲོ་བར་མཛད་པ། མྱ་ངན་ལས་འདས་པ་ཆེན་པོའི་སྐུར་བསྒོམ་པར་བྱ་བའོ། །བཟླས་པའི་སྔགས་ནི། ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུྃ་ཕཊ། དེའི་རྗེས་ཐོགས་ལ་ནི་གཟུངས་ཡིན་ཏེ། དཀོན་མཆོག་གསུམ་ལ་ཕྱག་འཚལ་ [178b.5]ལོ། །ཐུགས་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །འདི་ལྟ་སྟེ། ཨོཾ་ཨ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊཾ་ཀ་ཊེ་ཀ་རོ་ཊ་བཱིར་ཡེ་སྭཱ་ཧཱ། །བྱ་བ་འདིའི་རིམ་པ་ནི་བའི་ལྕི་བ་མ་ལྷུང་བར་ནང་པར་ཤིན་ [178b.6]ཏུ་སྔ་བར་བཅོམ་ལྡན་འདས་ཀྱི་སྤྱན་སྔར་མཎྜལ་བརྒྱད་བྱ་སྟེ། མཎྜལ་རེ་རེ་ཞིང་ལན་བཅུ་གསུམ་རྗེས་སུ་བརྗོད་པར་བྱ་བའོ། །བའི་ལྕི་བའི་ལྷག་མ་ལན་བདུན་དུ་མངོན་པར་བསྔགས་ལ། ནད་པ་ལ་ཉེ་བར་བྱུག་པར་བྱ་སྟེ། ནད་རྣམས་ཐམས་ཅད་ཉེ་བར་ཞི་བར་བྱེད་པ་ཡིན་ནོ། །གལ་ [178b.7]ཏེ་མཚམས་མེད་པ་ལྔ་བྱས་པ་རྣམས་ཀྱིས་ཀྱང་ཉི་མ་བདུན་ནམ་ཉི་མ་བཅུ་གསུམ་མམ་ཉི་མ་ཉི་ཤུ་རྩ་གཅིག་ན་ཡང་འདི་གྲུབ་པར་མ་གྱུར་ན་ནི། དེའི་ཚེ་ང་ཉིད་མཚམས་མེད་པ་ལྔ་བྱེད་པར་འགྱུར་བ་ཡིན་ནོ། །སེང་གེ་སྒྲའི་སྒྲུབ་ཐབས་སོ།། །།པཎྜི་ཏ་རཏྣ་ཨཱ་ཀ་རའི་ཞལ་སྔ་ནས། དགེ་སློང་ [179a] [179a.1]ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3158}༄༅༅། །རྒྱ་གར་སྐད་དུ། ཧཱ་ལ་ཧཱ་ལ་སཱ་དྷ་ནཾ། བོད་སྐད་དུ། སྙིང་རྗེ་ཁྲོས་པའི་སྒྲུབ་ཐབས། སྙིང་རྗེ་ཁྲོས་པ་ལ་ཕྱག་འཚལ་ལོ། །སྔར་བཞིན་དུ་སྟོང་པ་ཉིད་ཀྱི་བར་དུ་བསྒོམས་ལ། ས་བོན་ [179a.2]གྱི་ཡི་གེ་ཧྲཱིཿཡོངས་སུ་རྫོགས་པ་ལས་སྙིང་རྗེ་ཁྲོས་པའི་ཐུགས་རྗེ་ཆེན་པོ་ཞལ་གསུམ་པ་ཉིད་ཡང་སྤྱན་གསུམ་པ་རལ་པ་དང་དབུ་རྒྱན་དང་ལྡན་པ་སྟེ། དང་པོའི་ཞལ་དཀར་བ་གཡས་པ་སྔོ་བ་གཡོན་པ་དམར་བ་ཟླ་བ་ཕྱེད་པ་དང་ལྡན་པའི་དབུ་ལ་ཐོད་པས་ཐོད་བྱས་པ་རལ་པའི་ [179a.3]མཐའ་ན་རི་དྭགས་ཀྱི་པགས་པ་རྒྱན་ཐམས་ཅད་ཀྱིས་ལེགས་པར་བརྒྱན་པ་ཤིན་ཏུ་དཀར་བ་གངས་ཀྱི་རི་བོ་དང་མཚུངས་པར་སྣང་བ་སྒེག་པའི་ཉམས་དང་ལྡན་པས་ཤིན་ཏུ་མཛེས་པའོ། །ཞལ་འཛུམ་པ་དང་ལྡན་ཞིང་ཕྱག་དྲུག་པ་སྟག་གི་པགས་པའི་ཤམ་ཐབས་མནབས་པ་སྟེ། [179a.4]ཕྱག་གཡས་པ་ནི་མཆོག་སྦྱིན་པའོ། །གཉིས་པ་ནི་ཕྲེང་བའོ། །གསུམ་པ་ནི་མདའ་གར་ཐབས་སུ་བསྣམས་པའོ། །གཡོན་པ་མི་བསྐྱོད་པ་དང་ལྡན་པའོ། །དེ་བཞིན་དུ་གཉིས་པས་ནི་པདྨ་དཀར་པོའོ། །གསུམ་པས་ནི་གཞུ་ཉིད་དོ། །པུས་མོ་གཡོན་པ་ནས་མདོག་དཀར་བའི་ལྷ་ [179a.5]མོས་བརྟེན་པ་སྟེ། གཡོན་པས་པདྨ་འཛིན་པ་ཕྱག་གཡས་པས་བཅོམ་ལྡན་འདས་ལ་ཆེད་དུ་འཁྱུད་པར་མཛད་པའོ། །རལ་པའི་ཚོགས་ལ་མེ་ཏོག་གིས་མཛེས་པར་གྱུར་པའོ། །གཡས་ཀྱི་ཟུར་ན་སྦྲུལ་གྱིས་དཀྲིས་པའི་མདུང་རྩེ་གསུམ་པའོ། །གཡོན་གྱི་ཟུར་ན་པདྨ་ལ་ [179a.6]གནས་པའི་ཐོད་པ་མེ་ཏོག་དྲི་ཞིམ་པ་སྣ་ཚོགས་ཀྱིས་ལེགས་པར་བཀང་བའོ། །པདྨ་དམར་པོ་དང་ཟླ་བ་ལ་གཡོན་བསླང་བའི་ཕྱེད་ཀྲུང་གིས་བསྐྱོད་པར་གནས་པའི་བཅོམ་ལྡན་འདས་བསྒོམ་པར་བྱ་བའོ། །དེ་ནས་གསང་སྔགས་བཟླས་པར་བྱ་སྟེ། ཨོཾ་བཛྲ་དྷརྨ་ཧྲཱིཿཧཱ་ལ་ཧཱ་ [179a.7]ལ་འཇིག་རྟེན་དབང་ཕྱུག་གི་སྒྲུབ་ཐབས་རྫོགས་སོ།། །།{T3159}༄༅༅། །རྒྱ་གར་སྐད་དུ། ཧཱ་ལ་ཧཱ་ལ་སཱ་དྷ་ནཾ། བོད་སྐད་དུ། སྙིང་རྗེ་ཁྲོས་པའི་སྒྲུབ་ཐབས། བསམ་པ་ཐམས་ཅད་རྫོགས་མཛད་པའི། །སྙིང་རྗེས་ཁྲོས་ལ་གུས་པས་འདུད། །ཐུགས་རྗེའི་བདག་ཉིད་དེ་ [179b] [179b.1]ཡི་ནི། །མདོར་བསྡུས་སྒྲུབ་ཐབས་བརྗོད་པར་བྱ། །དང་པོར་ཡིད་འོང་གནས་སུ་ནི། །ཙནྡན་སོགས་ཀྱིས་ལེགས་བྱུགས་ལ། །ཐང་ཀ་བཀྲམ་སོགས་ལ་བཞུགས་པའི། །བཅོམ་ལྡན་མཆོད་པར་བྱ་བ་ཡིན། །མེ་ཏོག་ལ་སོགས་པ་དབུལ་བའི་སྔགས་ནི། ཨོཾ་རྡོ་རྗེའི་མེ་ཏོག་ [179b.2]ཧཱུྃ། ཨོཾ་རྡོ་རྗེའི་བདུག་པ་ཧཱུྃ། ཨོཾ་རྡོ་རྗེའི་མར་མེ་ཧཱུྃ་ཞེས་བྱ་བ་ལ་སོགས་པས་སོ། །ཨོཾ་དེ་བཞིན་གཤེགས་པ་རྣམས་ཐམས་ཅད་ལ་བདག་གི་མཆོད་པའི་སྤྲིན་ཚོགས་འདིས་ཁྱབ་ནས་ནམ་མཁའི་དབྱིངས་ཀུན་དུ་འཕྲོ་བར་ཧཱུྃ། མཆོད་པ་ཐམས་ཅད་དབུལ་བའི་སྔགས་སོ། ། [179b.3]རབ་ཏུ་མཆོད་ནས་དེ་མདུན་དུ། །བདེ་བའི་སྟན་ལ་གནས་ནས་ཀྱང་། །བྱམས་པ་སྐྱེ་དགུ་རྣམས་ལ་བསྒོམ། །བརྩེ་ཆེན་གྱིས་ནི་རྡོ་རྗེ་ཡང་། །སྙིང་གར་ཟླ་བའི་སྟེང་དུ་ནི། །སྔགས་ཡིག་ཧྲཱིཿནི་རྣམ་བཀོད་ལ། །སངས་རྒྱས་དང་བཅས་དེ་སྲས་རྣམས། །གསལ་བར་ [179b.4]ནམ་མཁའ་གང་བར་བལྟ། །ཧྲཱིཿཡིག་འོད་ཟེར་མཆོད་པ་ཡིས། །དེ་དག་ལེགས་མཆོད་འཁྲུལ་བྲལ་བར། །བསོད་ནམས་འཕེལ་བ་སྒྲུབ་དོན་དུ། །དང་པོ་སྡིག་པ་བཤགས་སོགས་བྱ། །དཀོན་མཆོག་གསུམ་མདུན་སྐྱབས་སོང་ལ། །ཆོས་རྣམས་ཐམས་ཅད་ [179b.5]མཆོག་བདག་མེད། །གསལ་བྱེད་སྙིང་རྗེ་དྲི་མེད་པས། །སྔགས་འདི་ངེས་པར་བརྗོད་པར་བྱ། །ཆོས་ཐམས་ཅད་རང་བཞིན་གྱིས་རྣམ་པར་དག་པ་ནི་བདག་རང་བཞིན་རྣམ་པར་དག་པའོ་ཞེས་སོ། །སྔགས་དོན་མངོན་དུ་བྱེད་པས་ན། །གཟུང་འཛིན་དག་ལས་ངེས་གྲོལ་ [179b.6]བའི། །དངོས་ཀུན་བདག་ཉིད་ཆེན་པོ་བ། །ཤེས་པ་ཙམ་དུ་བསྒོམ་པར་བྱ། །ཧྲཱིཿཡིག་ཟླ་བ་ལེགས་གནས་པ། །སོ་སོ་རང་རིག་དེ་བལྟས་ལ། །དེ་སྐྱེས་པད་དཀར་བསྒོམ་བྱ་སྟེ། །ལྟེ་བ་ཧྲཱིཿཡིག་དང་ལྡན་པའོ། །དེ་ལས་སངས་རྒྱས་ཚོགས་སྤྲོ་དང་། །འགྲོ་བ་སངས་ [179b.7]རྒྱས་ལ་ཡང་དགོད། །སླར་ཡང་དེ་ཉིད་ལ་བསྡུས་ལ། །ཕྱིས་ནི་སྙིང་རྗེས་ཁྲོས་རང་ཉིད། །རིན་ཆེན་རི་བོའི་ཕུག་རྟེན་པའི། །ཞལ་གསུམ་ཕྱག་དྲུག་ཞིར་གྱུར་པ། །པདྨ་དམར་གནས་ཟླ་བ་ལ། །གཡས་བརྐྱང་བསྐྱོད་པས་ལེགས་བཞུགས་པར། །རྩ་བ་གཡོན་ [180a] [180a.1]པ་གཞན་གྱི་ཞལ། །དཀར་དང་སེར་དང་སྔོན་པོ་དང་། །སྤྱན་གསུམ་སྟག་གི་ཤམ་ཐབས་མནབས། །རྒྱན་རྣམས་ཀུན་ལྡན་རབ་ཏུ་མཛེས། །གཡས་ན་མཆོག་སྦྱིན་མདའ་དང་ཕྲེང་། །གཡོན་པ་སྒེག་པའི་དཀུར་བརྟེན་པ། །པད་དཀར་དང་ནི་གཞུ་ [180a.2]ཉིད་ཀྱང་། །འགྱུར་བའི་ཕྱག་གིས་བསྐོར་བར་མཛད། །ཐོད་པ་གཡོན་ན་བཞག་པ་ན། །མེ་ཏོག་སྣ་ཚོགས་ཀྱིས་རབ་བཀང་། །གཡས་ན་དུག་ཅན་གྱིས་དཀྲིས་པའི། །རྩེ་གསུམ་དེ་བཞིན་པདྨ་ཡང་། །སྣང་མཐའ་གཙུག་ཏོར་དམ་པ་སྟེ། །ཐོད་པ་ཡིས་ནི་ཐོད་དུ་བྱས། །ཟླ་ [180a.3]བ་ཕྱེད་པ་དང་ལྡན་མཐོར། །རལ་པ་དབུ་རྒྱན་ལེགས་པར་བརྩེགས། །རྟོག་པའི་དྲ་བ་རྣམ་བསལ་བའི། །སངས་རྒྱས་འོད་ཟེར་ཚོགས་རྣམས་འཕྲོ། །སྙིང་རྗེ་ཁྲོས་པ་འདིར་གྱུར་ནས། །རང་སྙིང་མགྲིན་པ་སྤྱི་རྣམས་སུ། །ཟླ་བ་སྔོ་དམར་དཀར་རིམ་བཞིན། །ཧཱུྃཿཨཱ་ཨོཾ་ [180a.4]རྣམས་བསྒོམ་པར་བྱ། །དེ་བཞིན་སྙིང་ག་བར་དག་ཏུ། །ཟླ་ལ་ལེགས་གནས་ཧྲཱིཿབསྒོམ་བྱ། །དེ་ནས་གནས་གཡོའི་དངོས་གྱུར་པ། །དེ་དག་དེ་ཡི་གཟུགས་སུ་བསྒོམ། །དམ་མིན་རྣམ་རྟོག་ལས་གྲོལ་བའི། །མཉམ་པར་གཞག་པས་སྔགས་བཟླས་ཏེ། ཨོཾ་ཧ་ལཱ་ཧ་ལ་ཧྲཱིཿ [180a.5]མྱུར་མིན་བུལ་བར་མ་ཡིན་ཞིང་། །ཤིན་ཏུ་གསལ་བར་མང་དུ་བཟླས། །བཟླས་པ་བྱས་ནས་ཅི་བདེ་བར། །གཤེགས་སུ་གསོལ་ཞིང་ལེགས་མཆོད་དང་། །ལེགས་པར་བསྟོད་དང་བརྟན་བྱས་ལ། །ཡི་གེ་བརྒྱ་པ་གདོན་པར་བྱ། །ཨོཾ་རྡོ་རྗེ་སེམས་དཔའ་དམ་ཚིག་རྗེས་ [180a.6]སུ་བསྐྱང་དུ་གསོལ། །བདག་རྡོ་རྗེ་སེམས་དཔའ་ཉིད་དུ་ཉེ་བར་གནས་པ་བརྟན་པར་དགོངས། །བདག་ལ་ཤིན་ཏུ་དགྱེས་པར་དགོངས། །བདག་ལ་རྒྱས་པར་མཛད་དུ་གསོལ། །བདག་ལ་རྗེས་སུ་ཆགས་པར་མཛད་དུ་གསོལ། །དངོས་གྲུབ་ཐམས་ཅད་བདག་ལ་ལེགས་ [180a.7]པར་སྩོལ། །བདག་གི་ལས་ཐམས་ཅད་གྲུབ་པར་མཛོད། །སེམས་ངེས་པ་ལེགས་པར་མཛད་དུ་གསོལ། ཧཱུྃ་ཧ་ཧ་ཧ་ཧ་ཧོཿབཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་ཀྱི་རྡོ་རྗེའི་རང་བཞིན་ལས་བདག་ལ་གྲོལ་བར་མཛོད། །རྡོ་རྗེའི་ངོ་བོའི་དམ་ཚིག་སེམས་དཔའ་ [180b] [180b.1]ཆེན་པོ་ཨཱཿཨོཾ་བདག་དང་སེམས་ཅན་ཀུན་དོན་མཛད། །དངོས་གྲུབ་སྩལ་ནས་ཇི་བཞིན་གཤེགས། །སངས་རྒྱས་ཡུལ་དུ་གཤེགས་སུ་གསོལ། །སླར་ཡང་འབྱོན་པར་གསོལ་བ་འདེབས། །འདི་ཡིས་ལེགས་པར་བསྐུལ་བྱས་ལ། །ཨོཾ་ཨཱ་ཡིག་སྒོར་ནི་ཆོས་རྣམས་ཀུན། ། [180b.2]གདོད་ནས་མ་སྐྱེས་མེད་ཕྱིར་རོ། །མུཿཞེས་བྱ་བའོ། །བསམ་གཏན་ལེགས་བླངས་རྣལ་འབྱོར་པས། །རང་གི་ནུས་པའི་སྦྱིན་པ་གཏང་། །གཟུགས་སོགས་འདོད་པ་སྤྱོད་པ་ན། །མ་ལུས་རྟོག་པ་གཏན་ནས་སྤངས། །བླ་མེད་བྱང་ཆུབ་རིང་མིན་པར། །སྒྲུབ་པ་པོ་ནི་དམ་ [180b.3]པས་ཐོབ། །སྒྲུབ་ཐབས་བྲིས་ལས་བདག་གིས་ནི། །དགེ་བ་བླ་མེད་ཐོབ་པ་གང་། །དེས་ནི་འཇིག་རྟེན་མ་ལུས་པ། །མྱུར་བར་སྙིང་རྗེའི་ཁྲོ་ཐོབ་ཤོག །ཧ་ལཱ་ཧ་ལའི་སྒྲུབ་ཐབས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3160}༄༅༅། །རྒྱ་གར་སྐད་དུ་ [180b.4]པདྨ་ནརྟེ་ཤྭ་ར་སཱ་དྷ་ནཾ། བོད་སྐད་དུ། པདྨ་གར་གྱི་དབང་ཕྱུག་གི་སྒྲུབ་ཐབས། །སྔར་བརྗོད་པའི་རིམ་པས་སྣ་ཚོགས་པདྨར་ཟླ་བ་ལ་ཡི་གེ་ཧྲཱིཿདམར་པོ་ཡོངས་སུ་གྱུར་པ་ལས། བདག་ཉིད་པདྨ་གར་གྱི་དབང་ཕྱུག་ཏུ་བསྒོམ་པར་བྱ་སྟེ། སེམས་དཔའི་སྐྱིལ་ཀྲུང་གིས་བཞུགས་ [180b.5]པ། ཞལ་གཅིག་ཕྱག་གཉིས་པ་སྐུ་མདོག་དམར་པོ་རྒྱན་རྣམས་ཐམས་ཅད་ཀྱིས་བརྒྱན་པ་སྣང་བ་མཐའ་ཡས་དབུ་རྒྱན་དུ་བྱས་ཤིང་། གཡོན་ངོས་ན་གོས་དཀར་མོས་ལེགས་པར་འཁྱུད་ཅིང་འཁྱུད་པའི་སྟངས་ཀྱིས་གནས་པའོ། །ཕྱག་གཡོན་པས་པདྨ་དམར་པོ་བསྣམས་ [180b.6]པའོ། །ཕྱག་གཞན་གཡས་པ་ནི་གར་བྱེད་པའི་སྟངས་ཀྱིས་ཁབས་ཀྱི་ཕྱག་རྒྱར་ཁ་འབྱེད་པའོ། །དེ་ནས་ནི་ཨོཾ་དེ་བཞིན་གཤེགས་པ་རྣམས་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ་ཞེས་སྔགས་བརྗོད་པར་བྱ་བའོ། །དེའི་རྗེས་ལ་ཕྱོགས་བརྒྱད་ [180b.7]དུ་ལྷ་མོ་བརྒྱད་རྣམ་པར་བསམ་པར་བྱ་བའོ། །དེ་ལ་པདྨ་དམར་པོ་འདབ་མ་བརྒྱད་པའི་ཤར་གྱི་འདབ་མ་ལ་རྣམ་པར་གཟིགས་མ་པདྨ་དཀར་པོ་དང་དམར་པོ་འཛིན་པའོ། །ལྷོའི་འདབ་མ་ལ་སྒྲོལ་མ་ལྗང་གུ་ཤིང་སྔོན་པོ་དང་པདྨ་འཛིན་པའོ། །ནུབ་ཀྱི་འདབ་མ་ལ་རྔ་མ་འཁོར་ལོ་སེར་ [181a] [181a.1]པོ་དང་། ཨུཏྤལ་སྔོན་པོ་འཛིན་པའོ། །བྱང་གི་འདབ་མ་ལ་ཁྲོ་གཉེར་ཅན། པདྨ་སྐྱ་བོ་དང་སེར་པོ་འཛིན་པའོ། །ཤར་གྱི་གྲྭའི་འདབ་མ་ལ་པདྨའི་དྲི་ལྡན་མ་པདྨ་སེར་པོ་དང་དམར་སེར་འཛིན་པའོ། །ལྷོའི་གྲྭའི་འདབ་མ་ལ་རྡོ་རྗེ་པདྨའི་དབང་ཕྱུག་མ་ནམ་མཁའི་མདོག་དང་ [181a.2]དཀར་བའི་པདྨ་འཛིན་པའོ། །ནུབ་ཀྱི་གྲྭའི་འདབ་མ་ལ་སྣ་ཚོགས་པདྨ་དཀར་བ་དང་དམར་པོ་འཛིན་པའོ། །བྱང་གི་གྲྭའི་འདབ་མ་ལ་སྣ་ཚོགས་རྡོ་རྗེ་མ་ཁ་དོག་སྣ་ཚོགས་པ་སྣ་ཚོགས་པདྨ་འཛིན་པའོ། །དེ་དག་ཐམས་ཅད་ཀྱང་ཞལ་གཅིག་ཕྱག་གཉིས་མ་སྐྱིལ་ཀྲུང་བཅས་ཤིང་ཞི་བའོ། ། [181a.3]ལྟེ་བ་ལ་ནི་བཅོམ་ལྡན་འདས་ཉིད་དོ། །དེ་ནས་གསང་སྔགས་བཟླས་པར་བྱ་སྟེ། ཨོཾ་ཧྲཱིཿཔདྨ་ནཪྟེ་ཤྭ་ར་ཧཱུྃ། པདྨ་གར་གྱི་དབང་ཕྱུག་ཅེས་བྱ་བའི་འཇིག་རྟེན་དབང་ཕྱུག་གི་སྒྲུབ་ཐབས་སོ། །པཎྜི་ཏ་ཆེན་པོ་རཏྣ་ཨཱ་ཀ་རའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། [181a.4]{T3161}༄༅༅། །རྒྱ་གར་སྐད་དུ། པདྨ་ནཪྟེ་ཤྭ་ར་སཱ་དྷ་ནཾ། བོད་སྐད་དུ། པདྨ་གར་གྱི་དབང་ཕྱུག་གི་སྒྲུབ་ཐབས། སྔར་བཤད་པའི་ཚོགས་སྟོང་པ་ཉིད་བསྒོམས་པའི་རྗེས་ལ་སྣ་ཚོགས་པདྨ་ལ་གནས་པའི་ཟླ་བའི་སྟེང་དུ་ཡི་གེ་ཧྲཱིཿདཀར་པོ་རྣམ་པར་བསམ་ཞིང་། དེ་ཡོངས་སུ་གྱུར་ [181a.5]པ་ལས་ཀྱང་པདྨ་གར་གྱི་དབང་ཕྱུག་གི་གདམས་ངག་རྗེ་བཙུན་འཕགས་པ་སྤྱན་རས་གཟིགས་དབང་ཕྱུག་ཏུ་བདག་ཉིད་བསྒོམ་པར་བྱ་བ་ནི། ཞལ་གཅིག་ཕྱག་བཅོ་བརྒྱད་སྐྱིལ་ཀྲུང་ཕྱེད་པ་སྣང་བ་མཐའ་ཡས་དང་རལ་པའི་ཐོར་ཚུགས་དང་ལྡན་པ། ཕྱག་ཐམས་ཅད་ཀྱིས་སྣ་ [181a.6]ཚོགས་པདྨ་བསྣམས་པ། །རྣལ་འབྱོར་མའི་ཚོགས་ཀྱིས་ཡོངས་སུ་བསྐོར་བ། གཡས་དང་གཡོན་གྱི་ཕྱོགས་ན་སྒྲོལ་མ་དང་ནི་ནོར་བཟངས་དང་ཁྲོ་གཉེར་ཅན་དང་རྟ་མགྲིན་གནས་པ། ལྷ་རྫས་ཀྱི་རྒྱན་དང་ན་བཟའ་མངའ་བའོ། །དེ་ནས་སྔགས་བཟླས་པར་བྱ་བ་ཡང་། ཨོཾ་ [181a.7]ཧྲཱིཿཔདྨ་ནརྟེ་ཤྭ་ར་ཧཱུྃ། ནད་ཉེ་བར་ཞི་བར་བྱེད་པའི་ཕན་ཡོན་ཆེན་པོ་དང་ལྡན་པ་སྟེ། པདྨ་གར་གྱི་དབང་ཕྱུག་གི་སྒྲུབ་ཐབས་རྫོགས་སོ།། །།མཁས་པ་རཏྣ་ཨཱ་ཀ་རའི་ཞལ་སྔ་ནས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3162}༄༅༅། །རྒྱ་གར་སྐད་ [181b] [181b.1]དུ། ཧ་རི་ཧ་རི་ཧ་རི་བཱ་ཧ་ན་སཱ་དྷ་ནཾ། བོད་སྐད་དུ། སེང་གེ་དང་བྱ་ཁྱུང་དང་ཁྱབ་འཇུག་ལ་བཞུགས་པའི་སྒྲུབ་ཐབས། སྔར་བརྗོད་པའི་རིམ་པ་ཉིད་ཀྱིས་སྟོང་པ་ཉིད་བསྒོམས་པའི་རྗེས་ཐོགས་ལ། ཡི་གེ་ཧྲཱིཿདཀར་པོ་ཡོངས་སུ་རྫོགས་པར་གྱུར་པ་ལས། སེང་གེ་དང་བྱ་ཁྱུང་དང་ཁྱབ་ [181b.2]འཇུག་ལ་བཞུགས་པ་ལས་བྱུང་བའི་བཅོམ་ལྡན་འདས་སྤྱན་རས་གཟིགས་དབང་ཕྱུག་ཏུ་བདག་ཉིད་བསྒོམ་པར་བྱ་སྟེ། སྐུ་ཐམས་ཅད་དཀར་བ་རལ་བ་དང་དབུ་རྒྱན་དང་ལྡན་པ་ཞི་བའི་ཆ་བྱད་ཅན་ཕྱག་གཡས་པས་བཅོམ་ལྡན་འདས་དེ་བཞིན་གཤེགས་པ་དབང་དུ་མཛད་པ། གཉིས་ [181b.3]པས་ཕྲེང་བ་བསྣམས་པ་གསུམ་པས་ཚུལ་ངན་པར་གནས་པའི་འཇིག་རྟེན་པ་རྣམས་སྟོན་པར་མཛད་དོ། །གཡོན་པས་དབྱུག་ཐོ་བསྣམས་པ་གཉིས་པས་རི་དྭགས་ཀྲིཎྜ་ས་རིའི་པགས་པ་བསྣམས་པ། གསུམ་པས་རིལ་པ་སྤྱི་བླུགས་བསྣམས་པའོ། །སེང་གེ་དང་བྱ་ཁྱུང་དང་ཁྱབ་ [181b.4]འཇུག་གི་ཕྲག་པ་ན་གནས་པར་རོ། །ཨོཾ་ཧྲཱིཿཧཱུྃ་ཞེས་པའི་སྔགས་འདི་བཟླས་པར་བྱ་བའོ། །སེང་གེ་དང་བྱ་ཁྱུང་དང་ཁྱབ་འཇུག་ལ་བཞུགས་པ་ལས་འབྱུང་བའི་སྒྲུབ་ཐབས་སོ། །དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3163}༄༅༅། །རྒྱ་གར་སྐད་དུ། [181b.5]ཧ་རི་ཧ་རི་ཧ་རི་བཱ་ཧ་ན་སཱ་དྷ་ནཾ། བོད་སྐད་དུ། སེང་གེ་དང་བྱ་ཁྱུང་དང་ཁྱབ་འཇུག་ལ་བཞུགས་པའི་སྒྲུབ་ཐབས། དང་པོར་རེ་ཞིག་སྔགས་པས་བདེ་བའི་སྟན་ལ་གནས་ཏེ་འགྲོ་བ་གདོན་པར་འདོད་པའི་བསམ་པས་སྡིག་པ་བཤགས་པ་ལ་སོགས་པའི་བླ་ན་མེད་པའི་མཆོད་པ་རྣམ་ [181b.6]པ་བདུན་བྱས་ལ། ཡི་གེ་ཡྃ་ཡོངས་སུ་རྫོགས་པ་ལས་རླུང་གི་དཀྱིལ་འཁོར་གཞུའི་རྣམ་པ་འདྲ་བ་བ་དན་སྔོན་པོས་མཚན་པའོ། །དེའི་སྟེང་དུ་རཾ་ལས་བྱུང་བའི་མེའི་དཀྱིལ་འཁོར་ཁ་དོག་དམར་པོ་གྲུ་གསུམ་ན་རཾ་དམར་པོས་མཚན་པའོ། །དེའི་སྟེང་དུ་བཾ་ཡིག་རྫོགས་པ་ལས་ཆུའི་ [181b.7]དཀྱིལ་འཁོར་ཁ་དོག་དཀར་པོ་བུམ་པ་དཀར་པོས་དབུས་ན་མཚན་པའོ། །དེའི་སྟེང་དུ་ཡི་གེ་ལཾ་ལས་ལེགས་པར་བྱུང་བའི་སའི་དཀྱིལ་འཁོར་གྲུ་བཞི་པ་ཁ་དོག་སེར་པོ་རྡོ་རྗེ་རྩེ་གསུམ་པ་སེར་པོས་གྲྭ་བཞིར་མཛེས་པར་བྱས་པའོ། །དེའི་སྟེང་དུ་སུཾ་ཡིག་རྫོགས་པས་རིན་པོ་ཆེ་བདུན་གྱི་ [182a] [182a.1]རང་བཞིན་ཅོག་བརྒྱད་དང་ལྡན་པའི་རི་རབ་ལྷུན་པོའོ། །དེའི་སྟེང་དུ་ཡི་གེ་པཾ་ཡོངས་སུ་གྱུར་པ་ལས་འདབ་མ་སྣ་ཚོགས་པའི་པདྨའོ། །དེའི་སྟེང་དུ་བདག་ཉིད་བསམས་ལ། ཨོཾ་ཧྲཱིཿཧཱུྃ་རྣམས་རིམ་པ་བཞིན་དུ་མགོ་བོ་དང་མགྲིན་པ་དང་སྙིང་གར་རྣམ་པར་བཀོད་དེ། བདག་ [182a.2]ཉིད་ཀྱིས་ཐོག་མ་མེད་པའི་དུས་ནས་བསགས་པའི་ལས་ཀྱི་སྒྲིབ་པ་རྣམ་པར་འཇིག་པར་བྱེད་པའི་སེང་གེ་དང་། བྱ་ཁྱུང་དང་ཁྱབ་འཇུག་ལ་བཞུགས་པ་ལས་བྱུང་བའི་འཇིག་རྟེན་དབང་ཕྱུག་གི་སྐུ་གསེར་བཟང་པོའི་མདོག་འོད་ཟེར་འབར་བས་འཁྲིགས་པ་གཞོན་ནུའི་གཟུགས་སུ་ [182a.3]སྔགས་པས་རྣམ་པར་བསམ་པར་བྱ་བའོ། །ཕྱི་ནས་རང་གི་སྙིང་གར་བསོད་ནམས་དང་ཡེ་ཤེས་རྣམ་པར་དག་པ་ཟླ་བའི་དཀྱིལ་འཁོར་དང་ཉི་མའི་དཀྱིལ་འཁོར་རོ། །དེ་ལས་ཡི་གེ་ཧྲཱིཿལས་རྣམ་པར་བྱུང་བའི་འོད་ཟེར་འབར་བས་འཆད་པར་འགྱུར་བའི་གཟུགས་ཀྱི་ཡེ་ཤེས་ [182a.4]སེམས་དཔའ་སྤྱན་དྲང་ཞིང་སྔར་བཤད་པའི་མཆོད་པ་རྣམས་ཀྱིས་ལེགས་པར་མཆོད་ལ། ཡེ་ཤེས་སེམས་དཔའ་དང་དམ་ཚིག་སེམས་དཔའ་གཉིས་གཅིག་ཏུ་བྱས་པ་ལས། བཅོམ་ལྡན་འདས་སེང་གེ་དང་བྱ་ཁྱུང་དང་ཁྱབ་འཇུག་ལ་བཞུགས་པ་ལས་འབྱུང་བའི་འཇིག་རྟེན་དབང་ཕྱུག་ཏུ་ [182a.5]བདག་ཉིད་བརྟན་པའི་སེམས་ཀྱིས་བསྒོམ་པར་བྱ་སྟེ། སྐུ་མདོག་དཀར་བ་ཕྱག་དྲུག་པ་རལ་པ་དང་དབུ་རྒྱན་དང་ལྡན་པ་ཞི་བའི་ཆ་བྱད་ཀྱིས་གནས་པ། ཕྱག་གཡས་པས་རྫོགས་པའི་སངས་རྒྱས་དབང་དུ་མཛད་པ། གཉིས་པས་ཕྲེང་བ་འཛིན་པ། གསུམ་པས་ངན་སོང་ན་གནས་པའི་ [182a.6]འཇིག་རྟེན་ན་དགེ་བ་ཉེ་བར་སྟོན་པར་མཛད་དོ། །གཡོན་པས་དབྱུག་པ་བསྣམས་པ་གཉིས་པས་རི་དགས་ཀྲིཥྞའི་པགས་པ་བསྣམས་པ། གསུམ་པས་རིལ་པ་སྤྱི་བླུགས་བསྣམས་པའི་བཅོམ་ལྡན་འདས་རྣམ་པར་བསམ་པར་བྱའོ། །དེ་ལ་རྣམ་པར་དག་པ་ནི་རླུང་དང་མེའི་དཀྱིལ་འཁོར་ [182a.7]གཉིས་ཀྱིས་ནི་སེང་གེའོ། །ཆུའི་དཀྱིལ་འཁོར་གྱིས་ནི་བྱ་ཁྱུང་ངོ་། །སའི་དཀྱིལ་འཁོར་དང་རི་རབ་ལྷུན་པོ་གཉིས་ཀྱིས་ནི་ཁྱབ་འཇུག་གོ་ཞེས་བྱ་བ་ནི་རྣམ་པར་དག་པའོ། །རྟག་ཏུ་སྒོམ་པར་བྱེད་པའི་རྣལ་འབྱོར་པ་ནི་སེམས་ཅན་ཐམས་ཅད་ཀྱི་དོན་བྱེད་པའི་ནུས་པ་དང་ལྡན་པར་འགྱུར་རོ། ། [182b] [182b.1]སྐྱེ་བོ་རྣམས་ཐམས་ཅད་དགའ་བར་འགྱུར་རོ། །ཤེས་རབ་ཆེན་པོ་དང་ལྡན་པར་འགྱུར་རོ། །ནད་མེད་པ་དང་། ཉེ་བར་འཚེ་བ་དང་བྲལ་ཞིང་ནོར་གྱིས་ཕྱུག་པར་ཡང་འགྱུར་རོ། །དབང་དུ་བྱ་བ་དང་དུག་སེལ་བའི་ལས་ལ་སྟོབས་ཆེན་པོ་དང་ལྡན་པར་འགྱུར་རོ། །བཟླས་པའི་སྔགས་ནི་བླ་ [182b.2]མའི་གདམས་ངག་ལས་ཤེས་པར་བྱའོ། །སེང་གེ་བྱ་ཁྱུང་ཁྱབ་འཇུག་ལ་བཞུགས་པ་ལས་འབྱུང་བའི་འཇིག་རྟེན་དབང་ཕྱུག་གི་སྒྲུབ་ཐབས་སོ། །མཁས་པ་ཆེན་པོ་ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3164}༄༅༅། །རྒྱ་གར་སྐད་དུ། [182b.3]ཏྲཻ་ལོཀྱ་བ་ཤྱཾ་ཀར་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་གསུམ་དབང་དུ་བྱེད་པའི་འཇིག་རྟེན་དབང་ཕྱུག་གི་སྒྲུབ་ཐབས། དང་པོར་རེ་ཞིག་ཡིད་དང་རྗེས་སུ་མཐུན་པའི་གནས་སུ་ཐང་ཀ་དགྲམ་པར་བྱའོ། །དེའི་མདུན་དུ་སའི་དཀྱིལ་འཁོར་གྱི་དབུས་སུ་གུར་གུམ་གྱིས་ཟླ་བའི་ [182b.4]དཀྱིལ་འཁོར་བྱ་སྟེ། རྡོ་རྗེའི་རི་མོ་ཧཱུྃ། ཞེས་བྱ་བའི་སྔགས་ཀྱིས་སོ། །དེའི་རྗེས་ལ་ཛཿཧཱུྃ་བཾ་པདྨ་ལ་བཞུགས་སུ་གསོལ་ཧོཿཞེས་བྱ་བའི་སྔགས་ཀྱིས་སྤྱན་དྲངས་ལ་མཎྜལ་གྱི་དབུས་སུ་འཇིག་རྟེན་གསུམ་དབང་དུ་མཛད་པའི་རྗེ་བཙུན་འཇིག་རྟེན་དབང་ཕྱུག་མཆོད་པ་བྱ་བའོ། ། [182b.5]སྔགས་འདི་དག་གིས་བྱ་བ་ཡིན་ཏེ། ཨོཾ་འཇིག་རྟེན་གསུམ་དབང་དུ་མཛད་པའི་རྡོ་རྗེ་མེ་ཏོག་ཧཱུྃ་བཞེས་སུ་གསོལ་སྭཱ་ཧཱ། དེ་ནས་ཨོཾ་རྡོ་རྗེ་ཐུབ་པ་མུཿཞེས་བྱ་བས་གཤེགས་སུ་གསོལ་ལ། རང་གི་སྙིང་གར་ཡི་གེ་ཨོཾ་དམར་པོ་རྣམ་པར་བསམས་ལ་དེ་ཡོངས་སུ་གྱུར་པ་ལས་ཉི་ [182b.6]མའོ། །དེའི་སྟེང་དུ་ཡི་གེ་ཧྲཱིཿདམར་པོའོ། །དེའི་འོད་ཟེར་གྱིས་དེ་བཞིན་གཤེགས་པ་སྣང་བ་མཐའ་ཡས་ལེགས་པར་སྤྱན་དྲངས་ལ་ཡང་དག་པར་མཆོད་དེ། སྡིག་པ་བཤགས་པ་ལ་སོགས་པ་བྱས་ཤིང་འཇིག་རྟེན་གསུམ་དབང་དུ་བྱ་བའི་ཐབས་རྣམས་ཀྱང་འོད་ཀྱིས་རང་གི་ [182b.7]ས་བོན་ལ་ལེགས་པར་འཇུག་པར་བྱ་སྟེ། དེ་དག་ཡོངས་སུ་གྱུར་པ་ལས་སྐད་ཅིག་གིས་སྐུ་ཐམས་ཅད་དམར་པོ་ཆེན་པོས་དམར་བར་གྱུར་བའི་འཇིག་རྟེན་དབང་ཕྱུག་ཞལ་གཅིག་པ་ཕྱག་གཉིས་པ་སྤྱན་གསུམ་པ་རལ་བ་དང་དབུ་རྒྱན་དང་ལྡན་པ། རྡོ་རྗེས་མཚོན་པའི་ [183a] [183a.1]ཞགས་པ་དང་ལྕགས་ཀྱུ་ཕྱག་ན་བསྣམས་པས་གསུམ་པོ་ལུག་གཉིས་ཀྱི་ཞགས་པས་བཅིང་བའི་སྟེང་ན། པདྨ་དམར་པོ་ལ་རྡོ་རྗེ་སྐྱིལ་མོ་ཀྲུང་གིས་བཞུགས་ཤིང་ལྷ་རྫས་ཀྱི་རྒྱན་དང་ན་བཟས་རྣམ་པར་བརྒྱན་པར་བདག་ཉིད་བསམས་ལ། རྫུ་འཕྲུལ་སྣ་ཚོགས་དང་ལྡན་ [183a.2]པའི་སངས་རྒྱས་དང་བྱང་ཆུབ་སེམས་དཔའ་རྣམས་དང་། རྡོ་རྗེ་རྣལ་འབྱོར་མ་དང་ལྷ་རྣམས་ཀྱིས་ཀྱང་དབང་སྐུར་བར་བྱེད་པར་རྣམ་པར་བསམས་ཏེ། མགོ་བོ་ལ་སྣང་བ་མཐའ་ཡས་བསྒོམ་པར་བྱའོ། །དེ་ནས་སྙིང་གའི་ཉི་མ་ལ་ཧྲཱིཿཧཱུྃ་ཡཾ་ཞེས་བྱ་བ་བཟླས་པས་སྔགས་ཡི་གེ་གསུམ་པོ་ [183a.3]འདི་བསྒོམས་ལ། ཨོཾ་སྟོང་པ་ཉིད་ཀྱི་ཡེ་ཤེས་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ། །ཆོས་ཐམས་ཅད་རྡོ་རྗེའི་བདག་ཉིད་ཀྱི་རྡོ་རྗེའི་བདག་ཉིད་ནི་ང་ཡིན་ནོ་ཞེས་བྱ་བ་རྡོ་རྗེའི་བདག་ཉིད་ཀྱི་སྔགས་གཉིས་བརྗོད་པར་བྱ་བའོ། །དེ་ལྟར་གོམས་པར་བྱས་པ་ལ་གཡོ་བ་འཕར་བ་ལ་ [183a.4]སོགས་པའི་ཡོན་ཏན་འབྱུང་བར་འགྱུར་རོ། །དེའི་རྗེས་ལ། ཨོཾ་ཧྲཱིཿཨཱཿཧཱུྃ་འཕྲོག་མ་གནོད་སྦྱིན་གྱི་དབང་ཕྱུག་མ་སྭཱ་ཧཱ། ཞེས་བྱ་བ་འདིས་ཆང་བུ་སྦྱིན་ནོ། །ཨོཾ་ཨཾ་ཀོཾ་ཧྲཱིཾ་དཔའ་བོ་དང་དཔའ་མོའི་དབང་ཕྱུག་མའི་ཚོགས་འཁོར་དང་བཅས་པ་མ་ལུས་པ་རྣམས་ཨ་ཨ་ཨ་བ་ཏ་ར་ཨ་བ་ཏ་ར་ཕྱོགས་ [183a.5]བཅུ་ནས་གཤེགས་སུ་གསོལ་བ་ཡང་། འཇིག་རྟེན་སྐྱོང་བ་རྣམས་ཀྱིས་ཀྱང་གཏོར་མ་འདི་གྲྀཧྞ་གྲྀཧྞ་ཧཱུྃ་སྭཱ་ཧཱ། ཞེས་བྱ་བས་གཏོར་མ་བཏང་ལ། ལྷའི་རྣལ་འབྱོར་གྱིས་རྣམ་པར་རྒྱུ་བར་བྱ་བ་ཡིན་ནོ། ཨོཾ་ཌྱན་ནས་འབྱུང་བའི་རིམ་པ་འཇིག་རྟེན་གསུམ་དབང་དུ་བྱེད་པའི་འཇིག་རྟེན་དབང་ཕྱུག་གི་ [183a.6]སྒྲུབ་ཐབས། ས་ར་ཧའི་ཞལ་ནས་མཛད་པ་རྫོགས་སོ།། །།ཨ་བྷ་ཡའི་ཞབས་དྲུང་ནས་པ་ཚབ་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3165}༄༅༅། །རྒྱ་གར་སྐད་དུ། ཏྲཻ་ལོཀྱ་བ་ཤྱཾ་ཀ་ར་ལོ་ཀི་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་དབང་ཕྱུག་འཇིག་རྟེན་གསུམ་ [183a.7]དབང་དུ་མཛད་པའི་སྒྲུབ་ཐབས་ཞེས་བྱ་བ། རེ་ཞིག་དང་པོར་ཡིད་ཀྱི་རྗེས་སུ་མཐུན་པའི་གནས་སུ་རྣལ་འབྱོར་པས་ཐང་ཀ་བཀྲམ་ལ། དེའི་མདུན་དུ་སའི་དཀྱིལ་འཁོར་གྱི་དབུས་སུ་གུར་གུམ་གྱིས་ཟླ་བའི་དཀྱིལ་འཁོར་མཛེས་པར་བྱ་བའོ། །སྔགས་འདིས་བྱ་སྟེ། ཨོཾ་རྡོ་རྗེ་རི་མོ་ཧཱུཾ་ཛཿཧཱུྃ་བཾ་ [183b] [183b.1]པདྨ་ལ་བཞུགས་ཧོཿ། །སྔགས་འདིས་སྤྱན་དྲངས་ལ། ཨོཾ་འཇིག་རྟེན་གསུམ་དབང་དུ་མཛད་པ་རྡོ་རྗེའི་མེ་ཏོག་ཧཱུྃ་བཞེས་སུ་གསོལ་སྭཱ་ཧཱ། སྔགས་འདིས་མཎྜལ་གྱི་དབུས་སུ་འཇིག་རྟེན་གསུམ་དབང་དུ་མཛད་པའི་རྗེ་བཙུན་འཇིག་རྟེན་དབང་ཕྱུག་མཆོད་པར་བྱ་བའོ། །ཨོཾ་ཐུབ་པ་རྡོ་རྗེ་མུཿའདི་ [183b.2]ནི་གཤེགས་སུ་གསོལ་བའི་སྔགས་ཡིན་ནོ། །ཕྱི་ནས་ནི་རང་གི་སྙིང་གར་ཡི་གེ་ཨཾ་བསམ་པར་བྱ་བའོ། །དེ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་གྲུབ་པར་བྱའོ། །དེའི་སྟེང་དུ་ཆགས་པའི་ས་བོན་སྐྱ་རེངས་དང་པོའི་འོད་ཟེར་དང་མཚུངས་པར་བལྟས་ལ། འོད་ཟེར་དེ་དག་ [183b.3]གིས་ཀྱང་སྣང་བ་མཐའ་ཡས་མཆོད་ཅིང་སྡིག་པ་བཤགས་པ་ལ་སོགས་པ་ཡང་བྱས་ལ། སླར་ཡང་ལུས་ལ་ལེགས་པར་གཞུག་པར་བྱའོ། །དེ་དག་ཐམས་ཅད་ཡོངས་སུ་གྱུར་པ་ལས་སྐད་ཅིག་གིས་ས་གསུམ་གྱི་ལུག་གཉིས་ཞགས་པས་སྦྲེལ་བའི་ཐོག་གི་པདྨའི་སྟེང་དུ་རྡོ་རྗེའི་སྐྱིལ་མོ་ [183b.4]ཀྲུང་གིས་བཞུགས་པ་སྟེ། སྤྱན་གསུམ་རྣམ་པར་ཕྱེ་བ་རལ་པ་དང་ཅོད་པན་དང་ལྡན་པ་རྡོ་རྗེ་ཁ་དོག་དམར་པོས་མཚོན་པའི་ཞགས་པ་དང་ལྕགས་ཀྱུ་བསྣམས་པའོ། །སྤྲུལ་པ་སྣ་ཚོགས་པ་མངའ་བའི་རྡོ་རྗེ་རྣལ་འབྱོར་མ་རྣམས་ལ་དབང་བསྐུར་བར་གསོལ་བ་གདབ་པའོ། །དེ་བཞིན་དུ་བྱང་ [183b.5]ཆུབ་སེམས་དཔའ་སྣ་ཚོགས་པའི་རྒྱན་དང་ལྡན་པ་རྣམས་ཀྱིས་མཆོད་པར་བྱེད་དོ། །རིག་པ་འཛིན་པ་དང་ཁྱབ་འཇུག་དང་དབང་ཕྱུག་དང་ཚངས་པ་དང་རྣལ་འབྱོར་མའི་ཚོགས་རྣམས་ཀྱིས་ཀྱང་གར་དང་རོལ་མོའི་སྒྲ་བྱེད་ཅིང་སྣ་ཚོགས་པའི་འབྱུང་པོའི་ཚོགས་ལ་སོགས་པ་རྣམས་དང་མི་མགོའི་ཐོད་པའི་ [183b.6]ཕྲེང་བ་སྣ་ཚོགས་པས་བརྒྱན་པ་རྣམས་ཀྱིས་ཀྱང་ངོ་། །དེ་བཞིན་དུ་སྣ་ཚོགས་པའི་གདུགས་དང་རྔ་ཡབ་ལ་སོགས་པ་ཡང་བལྟ་བར་བྱ་བའོ། །དེ་དག་དམིགས་ལ་དམ་ཚིག་ཏུ་དེ་བཞིན་གཤེགས་པ་སྣང་བ་མཐའ་ཡས་མགོ་བོ་ལ་བལྟ་བར་བྱའོ། །འདི་ལྟ་བུ་དག་ཏུ་བདག་ཉིད་བསམ་པར་བྱ་ [183b.7]བའོ། །དེ་ནས་ལྟེ་བའི་ལྟག་ཏུ་ཉི་མའི་དཀྱིལ་འཁོར་འོད་ཟེར་གྱི་རང་བཞིན་དང་ལྡན་པར་བསམས་ལ། དེའི་སྟེང་གི་གཡོན་དུ་ཆགས་པའི་ས་བོན་ནོ། །སྙིང་གར་ཁྲོ་བོའི་ས་བོན་ནོ། །དབྱངས་ཡིག་ཨཱཿའདི་རྣམས་ནི་བསྒོམ་པར་བྱ་བའི་སྔགས་སོ། །དེ་དག་ཐམས་ཅད་བསྒོམས་ཤིང་ [184a] [184a.1]རྡོ་རྗེའི་བདག་ཉིད་ཀྱི་སྔགས་བརྗོད་པས་རྡོ་རྗེའི་བདག་ཉིད་དུ་བསམ་པར་བྱ་སྟེ། ཨོཾ་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་བདག་ཉིད་ནི་ངའོ། །རྡོ་རྗེའི་བདག་ཉིད་ཀྱི་སྔགས་སོ། །དེ་དག་གོམས་པར་གྱུར་པའི་སྦྱོར་བས་གཡོ་བ་དང་བསྐྱོད་པ་དང་། དབབ་པ་བྱས་ལ་ [184a.2]གཉིས་སུ་མེད་པའི་ཡེ་ཤེས་བསྐྱོད་པར་བྱ་བའོ། །རྣལ་འབྱོར་པ་དེ་གླང་པོ་བཞིན་དུ་གྲག་པར་འགྱུར་ཞིང་ཤིན་ཏུ་དགའ་བ་བཞིན་དུ་རིགས་ལྔ་འདུ་བར་འགྱུར་རོ། །གལ་ཏེ་རིགས་ལྔ་འདུ་བར་མ་གྱུར་ན། དེའི་ཚེ་དེའི་ལུས་ལ་གཡོ་བ་དང་བསྐྱོད་པ་དང་དབབ་པ་ལ་སོགས་པ་གནས་པ་མ་ཡིན་ [184a.3]ནོ། །དེ་ལྟར་ཉིན་རེ་བཞིན་རིགས་ལྔ་འདུ་བ་དེས་ནི་འགྲུབ་པར་འགྱུར་བ་ཡིན་ལ། གྲུབ་པ་ཐོབ་པས་ཀྱང་གཞན་གྱི་ལུས་གཡོ་བ་དང་། བསྐྱོད་པ་དང་གབ་པ་བྱས་ལ། འདོད་ཆགས་དང་ཞེ་སྡང་ལ་སོགས་པ་དགག་པར་བྱ་སྟེ། དཔེར་ན་གྲུབ་པའི་གསེར་འགྱུར་གྱིས་ཕུག་པའི་ཟངས་ནི་མདོག་ [184a.4]ངན་པ་དང་བྲལ་བར་འགྱུར་རོ། །དེ་བཞིན་དུ་ལུས་ཉིད་ཀྱང་འབིགས་བྱེད་ཀྱི་བཅུད་ཅན་གྱིས་ཕུག་པས་འདོད་ཆགས་དང་ཞེ་སྡང་ལ་སོགས་པ་དང་བྲལ་བར་འགྱུར་རོ། །ཧཱུྃ་ཧཱུྃ་ཡཱི། བཟླས་པའི་སྔགས་སོ། །ཨོཾ་ཧྲཱི་ཨཱཿགནོད་སྦྱིན་དབང་ཕྱུག་མ་འཕྲོག་མ་སྭཱ་ཧཱ། འཕྲོག་མའི་སྔགས་སོ། ། [184a.5]ཨོཾ་ཨཱཾ་ཀྲོཾ་ཧྲའི་དཔའ་བོ་དང་དཔའ་མོའི་དབང་ཕྱུག་མའི་ཚོགས་འཁོར་དང་བཅས་པ་མ་ལུས་པ་རྣམས་ཨ་ཨ་ཨ་བ་ཏ་ར་ཨ་བ་ཏ་ར་ཕྱོགས་བཅུ་ནས་གཤེགས་སུ་གསོལ་ཞིང་འཇིག་རྟེན་དབང་བ་ཡང་གཏོར་མ་འདི་གྲྀཧྞ་གྲྀཧྞ་ཧཱུྃ་སྭཱ་ཧཱ། གཏོར་མའི་སྔགས་སོ། །ས་ར་ཧའི་ཞལ་སྔ་ནས་ [184a.6]མཛད་པ། ཨོ་ཌི་ཡ་ནས་རྣམ་པར་ཕྱུང་བ་འཇིག་རྟེན་གསུམ་དབང་དུ་མཛད་པའི་སྒྲུབ་ཐབས་སོ། །མཁས་པ་རཏྣ་ཨཱ་ཀ་ར་དང་། དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3166}༄༅༅། །རྒྱ་གར་སྐད་དུ། རཀྟ་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་དབང་ [184a.7]ཕྱུག་དམར་པོའི་སྒྲུབ་ཐབས་ཞེས་བྱ་བ་འཇིག་རྟེན་དབང་ཕྱུག་དམར་པོ་ལ་ཕྱག་འཚལ་ལོ། །ཨོཾ་ཚི་ཊི་ཚི་ཊི། བི་ཀློ་ལི་བི་ཀློ་ལི། ཆེ་གེ་མོ་འཁོར་དང་བཅས་པ་བདག་གི་དབང་དུ་འགྱུར་བར་སྒྲུབས་སྭཱ་ཧཱ། སྔོན་དུ་འགྲོ་བ་ཁྲི་ཕྲག་བཟླས་ལ་ཕྱི་ནས་བསྒྲུབ་པ་བརྩམ་པར་བྱ་བའོ། །ལྷོ་དང་བྱང་གི་ [184b] [184b.1]ངོས་ན་ལྷ་མོ་སྒྲོལ་མ་དང་ཁྲོ་གཉེར་ཅན་དང་བཅས་པའི་རྗེ་བཙུན་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་དམར་པོ་དབྱུག་པ་དང་ཕྲེང་བ་དང་ན་བཟའ་དམར་པོ་དང་ལྡན་པ་ཕྱག་བཞིན་ཞགས་པ་དང་ལྕགས་ཀྱུ་དང་མདའ་དང་གཞུ་བསྣམས་པ་གཅིག་ཏུ་སྒེག་པའི་སྙིམ་པ་མེ་ཏོག་དམར་པོས་ [184b.2]མཛེས་པར་གྱུར་པའི་ཤིང་མྱ་ངན་མེད་དེའི་དྲུང་ན་བཞུགས་པར་བདག་ཉིད་ཐུན་ཚོད་གསུམ་དུ་བསམ་པར་བྱ་བའོ། །ལན་ཚྭ་དང་ཨ་ཧུ་ཏའི་ཞེས་བྱ་བ་བརྒྱ་རྩ་བརྒྱད་སྦྱིན་སྲེག་བྱས་ན་སྐྱེས་པའམ་བུད་མེད་ཀྱང་རུང་སྟེ། ཞག་བདུན་ན་དབང་དུ་འགྱུར་རོ། །བདུན་ཕྲག་གསུམ་གྱིས་ནི་སྐྱེས་བུ་ཆེན་པོ་ [184b.3]ཡང་ངོ་། །ལན་ཚྭ་དང་བསྲེས་པའི་སྤྲ་ཚིལ་གྱི་ཆང་བུ་བྱས་ལ་སོར་བཞིའི་ཚད་ཀྱི་གཟུགས་བརྙན་བྱས་ཏེ་དུ་བ་མེད་པའི་སེང་ལྡེང་གི་སོལ་མེ་ལ་སྔགས་ཟློ་ཡིན་ཐུན་ཚོད་གསུམ་དུ་སྲེག་པར་གྱུར་ན་གང་གི་མིང་བྱས་པ་དབང་དུ་འགྱུར་རོ། །རྡོ་རྗེའི་ཆུས་བསྒོས་པའི་ལན་ཚྭ་ལ་ལན་བརྒྱ་རྩ་བརྒྱད་དུ་ [184b.4]ཡོངས་སུ་བསྔགས་ནས་གང་ལ་བྱིན་པར་གྱུར་པ་དེས་ཟོས་པ་ཙམ་ཉིད་ན་དབང་དུ་འོང་བ་ཡིན་ནོ། །འཇིག་རྟེན་དབང་ཕྱུག་དམར་པོའི་སྒྲུབ་ཐབས་སོ།། །།དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3167}༄༅༅། །རྒྱ་གར་སྐད་དུ། ཨཱརྱ་ཨ་ [184b.5]བ་ལོ་ཀེ་ཏེ་ཤྭ་ར་སཱ་དྷ་ནཾ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་ཐབས། སྔར་བཤད་པའི་ཚུལ་གྱིས་སྟོང་པ་ཉིད་བསྒོམས་པའི་རྗེས་ཐོགས་ལ་ནམ་མཁར་ར་ལས་ངེས་པར་བྱུང་བའི་ཉི་མ་ལ་གནས་པའི་ཡི་གེ་ཧཱུྃ་ལས་བྱུང་བའི་སྣ་ཚོགས་རྡོ་རྗེ་ཡོངས་སུ་ [184b.6]གྱུར་པ་ལས། རྡོ་རྗེའི་ར་བ་དང་རྡོ་རྗེའི་གུར་རྣམ་པར་བསྒོམ་པར་བྱ་བའོ། དེའི་དབུས་སུ་ཤིན་ཏུ་འཇིགས་པ་དུར་ཁྲོད་དོ། །དེའི་ཡང་དབུས་སུ་པདྨ་དམར་པོ་འདབ་མ་བརྒྱད་པའོ། །དེའི་དབུས་སུ་ཡང་ཡི་གེ་ཧྲཱིཿསྔོན་པོ་ལས་ཡང་དག་པར་བྱུང་བ་བཅོམ་ལྡན་འདས་འཕགས་པ་སྤྱན་ [184b.7]རས་གཟིགས་དབང་ཕྱུག་སྟེ། སྐུ་མདོག་ནག་པོ་གཡས་བརྐྱང་བའི་གནས་པས་ཉི་མའི་དཀྱིལ་འཁོར་ལ་བཞུགས་པ། ཞལ་ལྔ་པ་སྤྱན་གསུམ་པ་ཕྱག་བཅུ་གཉིས་པ་གཡས་ཀྱི་ཞལ་གཉིས་ནི་དཀར་བ་དང་དམར་བའོ། །དེ་བཞིན་དུ་གཡོན་གྱི་ཞལ་གཉིས་ནི་སེར་པོ་དང་ [185a] [185a.1]ལྗང་གུའོ། །གཡས་ཀྱི་ཕྱག་རྣམས་ན་ནི་ཌ་མ་རུ་དང་ཁ་ཊྭཱཾ་ག་དང་ལྕགས་ཀྱུ་དང་ཞགས་པ་དང་རྡོ་རྗེ་དང་མདའ་བསྣམས་པའོ། །གཡོན་གྱི་ཕྱག་རྣམས་ན་ནི་སྡིགས་མཛུབ་དང་ཐོད་པ་དང་པདྨ་དམར་པོ་དང་ནོར་བུ་དང་འཁོར་ལོ་དང་གཞུ་བསྣམས་པའོ། །ཞལ་ [185a.2]ཐམས་ཅད་ཀྱང་མཆེ་བ་རྣམ་པར་གཙིགས་པའོ། །ཕྱག་རྒྱ་དྲུག་དང་ལྡན་པ་འཛག་པ་དང་ལྡན་པའི་མགོ་བོ་ཕྲེང་བས་སྐུ་ལ་རྒྱན་དུ་བྱས་པ་གཅེར་བུ་སྐུ་ཐམས་ཅད་ཀྱང་ཤིན་ཏུ་མཛེས་པར་བདག་ཉིད་སྐད་ཅིག་གིས་རྟོགས་པར་བྱས་ལ། དུས་ཕྱིས་སྙིང་གར་ཟླ་བ་ལ་ཡི་གེ་ཧྲཱིཿདབུས་སུ་ཆུད་པར་ཨོཾ་ [185a.3]ཨཱཿཧཱུྃ་ཞེས་བྱ་བའོ། །མུ་ནི་བ་ར་བཛྲེ་ཧཱུྃ་ཛཿཞེས་བྱ་བའི་སྔགས་འདི་ཕྲེང་བ་བྱས་ལ་བཟླས་པ་བྱ་བའོ། །མཚམས་མེད་པ་ལྔ་བྱས་པ་རྣམས་ཀྱིས་ཀྱང་འབུམ་བཟླས་ན་འགྲུབ་བོ། །སྒྱུ་འཕྲུལ་གྱི་དྲ་བའི་ལུགས་ཀྱིས་འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་ཐབས། པཎྜི་ཏ་ཆེན་པོ་ [185a.4]ཤཱནྟ་ཨ་ཀ་རའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3168}༄༅༅། །རྒྱ་གར་སྐད་དུ། སྠིར་ཙཀྲ་སཱ་དྷ་ནཾ། བོད་སྐད་དུ། བརྟན་པའི་འཁོར་ལོའི་སྒྲུབ་ཐབས། ཨོཾ་བརྟན་པའི་འཁོར་ལོ་ལ་ཕྱག་འཚལ་ལོ། །དཔལ་ལྡན་འཁྲུལ་བ་མ་ [185a.5]ལུས་གཏན་ནས་སྤངས་པའི་རི་པོ་འཚེར་བ་རྒྱ་ཆེར་འབར། །དྲི་མེད་དམར་སེར་འོད་ནི་རབ་ཏུ་འཕྲོ་བ་རྒན་ཡང་བྱིས་པ་ཉིད་ཀྱི་གཟུགས། །བྱིས་རྣམས་རྣམ་པར་འཁྲུལ་བྱེད་པ་ཡང་མཆོག་ཏུ་རྟོགས་པའི་ཤེས་རབ་ལ་ནི་དང་བས་འདུད། །དེ་ཡི་འཁོར་ལོ་རིན་ཆེན་འདི་ནི་རང་ཉིད་རྗེས་སུ་ [185a.6]རྟོགས་པར་བྱ་ཕྱིར་བདག་གིས་བྲི། །ཀུན་མཁྱེན་ཡེ་ཤེས་རྒྱ་མཚོ་ཡིས། །མཐའ་ཡས་ཕྱོགས་ཀུན་ལེགས་དགོངས་ནས། །སེམས་ཅན་ཆུ་བོས་ཀུན་སྐྲག་རྣམས། །ཡོངས་སུ་བསྐྱབ་པར་བརྩོན་མཛད་པ། །ཡིད་བཞིན་ནོར་བུར་གྲགས་སེམས་ཀྱི། །དེ་དག་རྣམ་སྣ་ [185a.7]ཚོགས་པས་མཆོད། །བྱས་ལ་འཇིག་རྟེན་བསྐྱབ་དོན་དུ། །བདག་ཉིད་སྐུར་ཡང་གསོལ་བ་གདབ། །དེ་ནས་དགེ་བ་མངོན་པར་འཕེལ་བར་བྱ་བའི་ཕྱིར་སྔགས་པས་འདི་དག་བྱ་སྟེ། འཇིགས་པའི་སྡིག་པ་རྣམས་ནི་ཐམས་ཅད་བཤགས་པར་བགྱི། །དགའ་བས་འགྲོ་བའི་བསོད་ [185b] [185b.1]ནམས་ལ་ནི་རྗེས་ཡི་རང་། །དཀོན་མཆོག་གསུམ་ལ་བདག་ནི་ཅིས་ཀྱང་སྐྱབས་སུ་མཆི། །རྫོགས་སངས་རྒྱས་ཀྱི་བྱང་ཆུབ་སེམས་ནི་རྣམ་པར་བླང་། །ཡང་དེའི་རྗེས་ལ་འདི་བརྩམ་པར་བྱ་སྟེ། གཟུང་འཛིན་དག་གིས་བཅོམ་པའི་འགྲོ་བ་འདི་དག་རྣམས་ནི་རྨི་ལམ་དང་ནི་མིག་ [185b.2]འཕྲུལ་མཚུངས། །རང་བཞིན་གྱིས་ནི་འོད་གསལ་ཕྱིར་ན་དགའ་བ་ཉིད་ཀྱང་ནམ་མཁའ་མཉམ་པར་ཀུན་ཏུ་གནས། །བདག་ཉིད་ཀྱང་ནི་ཡིད་འོང་ཟླ་བ་ངེས་པར་བསམ་བྱ་མདོར་བསྡུ་ན་ནི་ཡི་གེ་མུཿ། །ཡང་ནི་འོད་ཟེར་དྲ་བ་འཁྲིགས་ཤིང་འཕྲོ་བ་དེ་ལས་ཡང་དག་བྱུང་བ་བསྒོམ་པར་ [185b.3]བྱ། །དེ་གཞན་གྱུར་པ་ལས་ཀྱང་ཉམས་པ་མེད་པའི་དཀྱིལ་འཁོར་ནི། །གསེར་འོད་དང་ལྡན་གུར་ཀུམ་དག་གི་འདབ་བཞིན་སེར་གྱུར་པ། །དབྱངས་རྣམས་ཀུན་ན་འབར་བའི་ཕྲེང་བ་ཡིས་ནི་དཀྲིགས་གྱུར་ལས། །ཕྱོགས་ཀྱི་སྒོ་རྣམས་གསལ་བར་བྱེད་པའི་འོད་ནི་བསམ་ [185b.4]པར་བྱ། །དེ་ནས་གཞན་ཡང་མུཿགཟུགས་ས་བོན་ལས་ནི་ལེགས་བྱུང་བའི། །འོད་ཟེར་དམར་པོར་གྱུར་པའི་དཀྱིལ་འཁོར་བསྒོམ་བྱ་སྟེ། །ཀ་ཁ་ལ་སོགས་ཡི་གེ་མ་ལུས་ཀུན་གྱིས་ལེགས་བསྐོར་བ། །གུར་གུམ་དམར་རེངས་ཤིན་ཏུ་འོད་འབར་བ་སྟེ་དེ་སྟོང་ངོ་། །སྔགས་པ་ཡིས་ [185b.5]ནི་དེར་ཡང་ཡི་གེ་མུཿནི་བལྟ་བྱས་ལ། །དེ་ལས་ལེགས་པར་བྱུང་ཞིང་འོད་འབར་འདབ་མ་ལ་ལྡན་པའི། །ཨུཏྤལ་མཆོག་གྱུར་འོད་ཟེར་དྲ་བས་མ་ལུས་རྣམ་འཕྲོ་བ། །མུཿདབྱིབས་ས་བོན་དབུས་ནི་གནས་པ་རྣམ་པར་བསམ་པར་བྱ། །དེ་ལས་ལེགས་བྱུང་འོད་ཀུན་གྱིས་ནི་སངས་ [185b.6]རྒྱས་སྤྲོ་བས་འཇིག་རྟེན་ཀུན་བཀང་ལ། །ཟླ་བས་བསྐོར་བའི་སྐུ་ནི་ཤིན་ཏུ་འོད་འབར་མཆོག་ཏུ་གསལ་ལྡན་ཟུར་ཕུད་ཅན། །འོད་ཟེར་དམར་པོའི་དྲ་བས་མི་བཟད་མུན་པའི་སྒྲིབ་གཡོགས་གཏན་ནས་འཇོམས་མཛད་པ། །རྣམ་པ་ཐམས་ཅད་མཆོག་རྣམས་མྱུར་བར་སྦྱིན་ལ་ [185b.7]མཁས་པའི་དཔལ་ལྡན་རི་དབང་ཕྱུག། །རོལ་ཅིང་སྒེག་པའི་ཉམས་དང་ལྡན་པས་མངོན་དགྱེས་པ། །ཆུ་སྐྱེས་ཕུན་ཚོགས་མངའ་མཛད་བརྗིད་པའི་འགྱིང་བག་ལྡན། །དཔའ་བོ་གཞོན་ནུར་གྱུར་བ་རྒྱན་རྣམས་ཀྱིས་བརྒྱན་པ། །དེ་ཡི་ཞབས་དང་ཉེ་བའི་ཡིད་ཀྱིས་བསྒོམ་པར་ [186a] [186a.1]བྱ། །དེ་ལྟར་ཀུན་བསམ་ངག་གི་དབང་། །སྙིང་གར་ཡི་གེ་མུཿབསྒོམས་ཏེ། །འབར་བ་ཁ་དོག་དམར་པོར་སྣང་། །འབར་བའི་དཀྱིལ་འཁོར་ཀུན་ནས་འཕྲོ། །དེ་ལས་སྐྱེས་པའི་རྩིབས་བརྒྱད་པའི། །འཁོར་ལོ་འོད་ཟེར་མུན་ཉེར་འཇོམས། །མ་ལུས་འོད་ཀྱིས་འགེངས་ [186a.2]བྱེད་པའི། །ཡེ་ཤེས་རང་བཞིན་རྗེ་བོ་བལྟ། །སྤྲུལ་པའི་འཁོར་ལོ་ཕྱོགས་རྣམས་སུ། །ཡིད་འོང་འོད་ཟེར་ཚོགས་བཞིན་ཏེ། །མེ་ཏོག་དམར་པོས་གཏམས་པ་ལྟར། །ཡི་གེ་དམར་པོས་ཀུན་འཁྲིགས་པའོ། །དེ་ལ་རེ་ཞིག་ཡི་གེ་རྣམས་བསམ་པར་བྱ་སྟེ། འཁོར་ལོའི་རྩིབས་རྣམས་ཀྱི་ཤར་དང་ལྷོ་ [186a.3]དང་ནུབ་དང་བྱང་རྣམས་ལ་ནི་རིམ་པ་ཇི་ལྟ་བ་བཞིན་དུ། ཨ་ར་པ་ཙ་རྣམས་སོ། །ལྟེ་བ་ལ་ནི་ཡི་གེ་ནའོ། །མེ་དང་བདེན་བྲལ་དང་རླུང་དང་དབང་ལྡན་གྱི་མཚམས་སུ་ཡང་སྔར་བཞིན་དུ་ནིཿཔྲ་པཉྩའོ། །དེ་ཁོ་ན་བཞིན་དུ་བར་དང་བར་རྣམས་ཀྱི་ནི་ཨ་ལ་སོགས་པའི་དབྱངས་ཡིག་གི་ཚོགས་རྣམས་སོ། ། [186a.4]ཕྱི་རོལ་དུ་ནི་ཡི་གེ་ཀ་ལ་སོགས་པའི་གསལ་བྱེད་རྣམས་སོ། །འདི་དག་གཡོ་བ་མེད་ཅིང་ངེས་པར་ཡང་བྱས་ལ། ཕྱི་ནས་འཁོར་ལོའི་ཡི་གེའི་ཚོགས་དང་འོད་ཟེར་གྱི་ཚོགས་ཀྱི་འོད་ཀྱིས་མུན་པའི་དཀྱིལ་འཁོར་ཀུན་ནས་འཇོམས་པར་བྱེད་པ་རྣམས་རང་གི་ལུས་ཀྱི་བ་སྤུའི་ཁུང་བུ་རྣམས་ནས་འཕྲོས་ [186a.5]པས། ཕྱོགས་བཅུ་འཇིག་རྟེན་གྱི་ཁམས་ན་རྣམ་པར་བཞུགས་པའི་དེ་བཞིན་གཤེགས་པ་རྣམས་ཀྱི་ཐུགས་ཀྱི་ཡེ་ཤེས་ཀྱི་བདུད་རྩི་དག་དང་ལྷན་ཅིག་རོ་གཅིག་ཏུ་གྱུར་ནས། །སླར་ཡང་དེ་དག་ཉིད་ཕྱིར་བསྡུས་ལ་བ་སྤུའི་ཁུང་བུ་དེ་དག་ཉིད་དུ་ལེགས་པར་བཅུག་ལ། རང་གི་ལུས་ཀུན་དུ་གསལ་ [186a.6]བར་བྱེད་པར་རིང་དུ་བསྒོམ་པར་བྱ་བའོ། །སེམས་བརྟན་པ་དང་ཕྱི་ནས་ནི་སྤྲོ་བ་དང་བསྡུ་བའི་རིམ་པས་ཇི་སྲིད་དུ་མངོན་སུམ་དུ་གསལ་བར་མ་གྱུར་པ་དེ་སྲིད་དུ་བསྒོམ་པར་བྱ་བའོ། །འཇམ་དཔལ་ངེས་རྟོགས་ནས་སྐབས་དག་ནི་སྦྱིན་བྱེད་པ། །ཡི་གེ་དག་ནི་ལྷན་ཅིག་ཉིད་དུ་ཡིད་འོང་བའོ། ། [186a.7]འཁོར་ལོ་གསལ་སྣང་ཁོ་ནར་ཉེ་བར་རྟོགས་པ་འདི། །ཉིན་མཚན་བསམ་གཏན་ལ་ནི་མངོན་པར་བརྩོན་ལས་ཡིན། །སྔར་མ་མཐོང་བའི་ངག་གི་རང་བཞིན་རྣམས་དང་ནི། །བཟོ་དང་རིག་པའི་གནས་རྣམས་མ་ལུས་པ་ལ་དེའི། །བློ་ཡི་ནོར་བུའི་སྣང་བ་གསལ་བྱེད་ཇི་ལྟ་བར། །རབ་འཇུག་ [186b] [186b.1]འོད་ཀྱིས་མུན་པ་གཏན་ནས་འཇོམས་པ་ཡིན། །གང་ཕྱིར་འཁོར་ལོ་འདི་ཡང་ཕན་འདོད་ཡིད་ཅན་གྱིས། །ངོ་མཚར་དུ་ཡང་ཟླ་བ་ཕྱེད་ནི་འདིར་བརྟགས་ན། །རིང་པོ་མིན་པ་ཉིད་ན་ཁྱེད་ཅག་ལ་ཡང་ནི། །བདེར་གཤེགས་ངོ་བོ་ཉིད་ཀྱིས་རབ་ཏུ་སད་བྱེད་འགྱུར། །འཁོར་ལོ་རྣམ་བཀོད་ལས་བྱུང་བསོད་ [186b.2]ནམས་གང་ཡིན་འདིས་ནི་གཞན་ཅི་སྨོས། །བདག་ཡིད་ལས་ནི་སྐྱེས་ཀུན་གསལ་བར་བྱེད་པ་དེས་ནི་འཁོར་ལོ་ཉིད། །གསར་ཤར་བཞིན་དུ་འདིས་ནི་གཏི་མུག་མུན་ནག་མཐངས་ནི་འབྱེད་བྱེད་ཅིང་། །ཤིན་ཏུ་གསལ་དང་གསུང་གི་མངའ་བདག་དཔལ་དགྱེས་འདིར་ནི་སྐྱེ་བོ་ཤོག །བརྟན་ [186b.3]པའི་འཁོར་ལོའི་སྒྲུབ་ཐབས་རྫོགས་སོ།། {T3169}༄༅༅། །རྒྱ་གར་སྐད་དུ། སྠི་ར་ཙཀྲ་སཱ་དྷ་ནཾ། བོད་སྐད་དུ། བརྟན་པའི་འཁོར་ལོ་སྒྲུབ་ཐབས། བརྟན་པའི་འཁོར་ལོ་འདི་ནི་དཔལ་དང་ལྡན། །འཇམ་པའི་རྡོ་རྗེ་སྐྱོབ་པར་མཛད་པ་ཉིད། །བཏུད་ནས་བྱིས་པ་རྣམས་ [186b.4]ཀྱིས་རྟོགས་བྱའི་ཕྱིར། །རྣམ་པར་གསལ་བའི་ཚིག་གིས་བྲི་བར་བྱ། །བདེ་བའི་སྟན་ལ་ཉེ་བར་གནས་པའི་རྣལ་འབྱོར་པས་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་ནམ་མཁའ་ལ་གནས་པར་བསམས་ལ། དེ་རྣམས་ལ་ཡིད་ཀྱིས་རང་བཞིན་གྱི་མཆོད་པ་རྣམ་པ་སྣ་ [186b.5]ཚོགས་པས་ཆོ་ག་བཞིན་དུ་མཆོད་དེ། སྡིག་པ་བཤགས་པ་ལ་སོགས་པ་རྣམས་བྱ་བའོ། །དེ་ནས་སྣ་ཚོགས་འདི་དག་སེམས་ཙམ་གྱི་ངོ་བོ་སྟེ་གཟུང་བ་དང་འཛིན་པ་དང་བྲལ་བ་རྨི་ལམ་དང་མཚུངས་ཞིང་གཟུགས་བརྙན་དང་མཚུངས་པར་བདག་ཉིད་ཀྱང་ངེས་པར་བྱས་ལ། གུར་གུམ་གྱི་ [186b.6]འོད་དང་ལྡན་པའི་ཡི་གེ་མུཿལས་བྱུང་བའི་ཨ་ལ་སོགས་པའི་དབྱངས་ཡིག་གི་འོད་ཟེར་འཕྲོས་པ་ལས་ཟླ་བ་དམར་པོར་བལྟ་བའོ། །དེའི་སྟེང་དུ་ཡི་གེ་མུཿཡི་གེ་འོད་འཕྲོས་བ་ལས་བྱུང་བའི་ཡི་གེ་ཀ་ལ་སོགས་པའི་འོད་ཟེར་གྱིས་ཉི་མའི་དཀྱིལ་འཁོར་དམར་པོ་བསྒོམ་པར་བྱ་བའོ། །དེའི་ [186b.7]སྟེང་དུ་ཡི་གེ་མུཿལས་བྱུང་ཞིང་དྲི་མ་མེད་ཅིང་འོད་འཕྲོ་བ་དང་ལྡན་པའི་ཨུཏྤ་ལའི་མཆོག་ལྟེ་བ་ལ་ཡི་གེ་མུཿགནས་པར་བསམ་མོ། །དེ་ཡང་ཡོངས་སུ་གྱུར་པ་ལས་གུར་གུམ་གྱི་མདོག་དང་ལྡན་ཞིང་ཟུར་ཕུད་ལྔ་ལ་གཞོན་ནུའི་རྒྱན་ཅན་གཅིག་ཏུ་སྒེག་པའི་ཉམས་དང་ལྡན་པ་རལ་གྲི་གླེགས་ [187a] [187a.1]བམ་བསྣམས་པའི་ངག་གི་དབང་ཕྱུག་ཟླ་བ་ལ་བཞུགས་པར་བདག་ཉིད་བསྒོམ་པར་བྱའོ། །དེའི་ཐུགས་ཀར་ཡི་གེ་མུཿལས་བྱུང་བའི་འཁོར་ལོ་བརྟན་པོ་རྩིབས་བརྒྱད་པ་སྟེ། འོད་ཟེར་གྱི་རང་བཞིན་འབར་བ་ལས་ཡི་གེ་ཨ་ལ་སོགས་པ་རྣམས་ཀྱི་ཕྲེང་བས་བསྐོར་ [187a.2]བའོ། །འཕྲོས་པ་ལས་ཕྱི་རོལ་དུ་ཡི་གེ་ཀ་ལ་སོགས་པའི་ཕྲེང་བས་ཡོངས་སུ་བསྐོར་བའོ། །དེའི་ལྟེ་བ་ལ་ཡི་གེ་ཨའོ། །ཤར་གྱི་རྩིབས་ལ་རའོ། ལྷོའི་རྩིབས་ལ་པའོ། །ནུབ་ཀྱི་རྩིབས་ལ་ཙའ། །བྱང་གི་རྩིབས་ལ་ནའོ། །མེ་ལ་སོགས་པའི་མཚམས་རྣམས་སུ་ཡང་ཡི་གེ་ནིཿཔྲ་སཉྩ་ [187a.3]རྣམས་གུར་གུམ་གྱི་མདོག་དང་ལྡན་པ་རྣམ་པར་བསམ་པར་བྱས་ལ། འཁོར་ལོའི་འོད་ཟེར་གྱི་ཚོགས་དེ་དག་རྣམས་ཀྱི་ནང་དུ་ལུས་ཀུན་དུ་གསལ་བར་བྱ་སྟེ། བ་སྤུའི་བུ་གའི་གསེབ་རེ་རེ་ནས་སྤྲོས་པས་ཕྱོགས་བཅུའི་འཇིག་རྟེན་གྱི་ཁམས་ཀུན་སྣང་བར་བྱས་ཤིང་སླར་ཡང་བ་སྤུའི་བུ་གའི་ཁུང་བུ་ [187a.4]དེ་དག་རྣམས་ཉིད་དུ་ལེགས་པར་བཅུག་སྟེ། ལུས་ཀུན་ནས་གསལ་བར་བྱ་བ་ནི་དུས་ཡུན་རིང་དུ་རྣམ་པར་བསམ་པར་བྱའོ། །ཨོཾ་ཨ་ར་པ་ཙ་ན་མུཿཞེས་བྱ་བ་ནི་བཟླས་པའི་སྔགས་སོ། །བརྟན་འཁོར་སྒྲུབ་ཐབས་བྱས་པ་ཡིས། །བསོད་ནམས་བདག་ལ་གང་སྐྱེས་པ། །དེས་ནི་འགྲོ་བ་མ་ལུས་ [187a.5]ཀུན། །གཟི་བརྗིད་འཇམ་རྡོར་མཚུངས་པར་ཤོག །ཚིག་ལྷུག་པའི་བརྟན་པའི་འཁོར་ལོའི་སྒྲུབ་ཐབས་སོ།། །།དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3170}༄༅༅། །རྒྱ་གར་སྐད་དུ། བཱ་གཱི་རཱ་ཊ་སཱ་དྷ་ནཾ། བོད་སྐད་དུ། གསུང་གི་མངའ་བདག་གི་ [187a.6]སྒྲུབ་ཐབས། དངོས་གྲུབ་ཐམས་ཅད་རབ་བྱིན་པའི། །ཡེ་ཤེས་རང་བཞིན་མགོན་ལ་འདུད། །ཀྲི་ཡའི་རྒྱུད་ཀྱི་རྗེས་འབྲངས་ལ། །དེ་ཡི་སྒྲུབ་ཐབས་བདག་གིས་བཤད། །དེ་ལ་རེ་ཞིག་དང་པོར་སྔགས་པས་ཡིད་དང་མཐུན་པའི་གནས་སུ་ཇི་ལྟར་བདེ་བར་ཉེ་བར་གནས་ལ། སྡུག་བསྔལ་ [187a.7]གྱི་ཆུ་བོར་བྱིང་བར་གྱུར་པའི་སེམས་ཅན་གྱི་ཁམས་རྣམས་ལ་བལྟས་པས་སྨོན་ལམ་གདབ་པར་བྱ་སྟེ། སྡུག་བསྔལ་བར་གྱུར་པའི་སེམས་ཅན་འདི་དག་རྣམས་འཁོར་བ་ན་འཁོར་བར་གྱུར་པ་དེ་དག་འཇམ་པའི་དབྱངས་སུ་གྱུར་ནས། བླ་ན་མེད་པའི་གོ་འཕང་ལ་ལེགས་པར་དགོད་པར་བྱའོ། ། [187b] [187b.1]ཞེས་བྱ་བར་རོ། །དེ་ནས་ཐང་ཀ་ལ་སོགས་པར་གྱུར་པའི་བཅོམ་ལྡན་འདས་འཇམ་པའི་དབྱངས་དང་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་ཡང་དག་པར་དམིགས་ལ། མེ་ཏོག་ལ་སོགས་པས་ལེགས་པར་མཆོད་ཅིང་ཡན་ལག་ལྔས་ཕྱག་འཚལ་ཏེ། སྡིག་པ་བཤགས་ [187b.2]པ་དང་སླན་ཆད་མི་བྱེད་པར་སྡོམ་པ་དང་། བསོད་ནམས་ལ་རྗེས་སུ་ཡི་རང་བ་དང་བདག་ཉིད་ཀྱི་དངོས་པོ་ཡོངས་སུ་དབུལ་བ་དང་གསུམ་ལ་སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་པ་རྣམས་ཀྱང་བྱ་བ་ནི། ཚིགས་སུ་བཅད་པ་གཉིས་པོ་འདི་དག་གིས་ཡིན་ཏེ། དཀོན་མཆོག་ [187b.3]གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །བདག་གིས་བྱང་ཆུབ་སེམས་ནི་བསྐྱེད་བགྱི་ཞིང་། །འགྲོ་བ་མ་ལུས་བདག་གིས་མགྲོན་དུ་གཉེར། །བྱང་ཆུབ་མཆོག་གི་ [187b.4]སྤྱོད་པ་སྤྱད་བགྱི་ཞིང་། །འགྲོ་ལ་ཕན་ཕྱིར་སངས་རྒྱས་གྲུབ་པར་ཤོག །དེ་ནས་ལམ་ལ་བརྟེན་པར་བྱ་བའོ། །ཨོཾ་ཆོས་ཐམས་ཅད་རང་བཞིན་གྱིས་རྣམ་པར་དག་པས་བདག་ཀྱང་རང་བཞིན་གྱིས་རྣམ་པར་དག་པའོ། །འདིའི་དོན་རྗེས་སུ་རྟོགས་པས་ལན་གསུམ་བརྗོད་ལ་རང་བཞིན་ [187b.5]གྱིས་རྣམ་པར་དག་པར་མོས་པར་བྱ་སྟེ། ཆོས་ཐམས་ཅད་བདག་མེད་པར་བསྒོམ་མོ། །ཁམས་གསུམ་སྟོང་ཞིང་མཚན་ཉིད་མེད་པ་གཟུང་བ་དང་འཛིན་པ་དང་བྲལ་བར་བལྟས་ལ། རང་གི་སྙིང་གར་ཡི་གེ་ཨ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་གསེར་བཙོ་མའི་མདོག་ལྟ་བུའི་ཡི་གེ་ [187b.6]མུཿའོ། །དེ་ལས་ཀུན་དུ་བྱུང་བའི་འོད་ཟེར་གྱི་ཚོགས་ཀྱིས་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་བྱས་ཤིང་ཀུན་དུ་སྣང་བར་ཡང་བྱ་སྟེ། སྐལ་བ་ཇི་ལྟ་བ་བཞིན་དུ་སེམས་ཅན་རྣམས་ཀྱི་དོན་བྱས་ཤིང་དེ་བཞིན་གཤེགས་པ་རྣམས་ཀྱང་བསྐུལ་ནས། ས་བོན་དེ་ཉིད་ལ་ལེགས་པར་གཞུག་ [187b.7]པར་བྱ་བའོ། །དེ་དག་ཐམས་ཅད་ཡོངས་སུ་རྫོགས་པ་ལས་བདག་ཉིད་འཇམ་པའི་དབྱངས་ཀྱི་ངོ་བོ་ཉིད་དུ་བསྒོམ་པར་བྱ་སྟེ། སྐུ་གསེར་བཞུ་བའི་མདོག་དང་མཚུངས་པ་ཞལ་གཅིག་ཕྱག་གཉིས་པ་སེང་གེའི་སྟེང་ན་པདྨ་དང་ཟླ་བའི་གདན་ལ་ཕྱེད་སྐྱིལ་གྱིས་བཞུགས་པ། ཟུར་ཕུད་གསུམ་པ་རིན་ [188a] [188a.1]པོ་ཆེའི་དབུ་རྒྱན་ཅན་ཟླ་བའི་འོད་ཀྱི་དབུ་ཡོལ་དང་ལྡན་པ་གཞོན་ནུའི་རྣམ་པའི་གཟུགས་མངའ་བརྒྱན་རྣམས་ཐམས་ཅད་ཀྱིས་བརྒྱན་ཅིང་། སྒེག་པའི་ཉམས་དང་ལེགས་པར་ལྡན་པ་སྟེ། ཕྱག་གཉིས་ཀྱིས་ཆོས་ཀྱི་འཁོར་ལོའི་ཕྱག་རྒྱ་མཛད་ཅིང་ཕྱག་གཡོན་པས་ཤེས་རབ་ [188a.2]ཀྱི་ཕ་རོལ་ཏུ་ཕྱིན་པ་དང་བཅས་པའི་ཨུཏྤལའི་མཆོག་བསྣམས་པའོ། །ལྗང་ངར་གཡོན་པ་ལ་བརྟེན་ནས་ནི་ཁྲོ་བོ་ཆེན་པོ་གཤིན་རྗེ་གཤེད་དེ། མདོག་མཐིང་ནག་ཞལ་བསྒྱུར་ཞིང་མཆེ་བ་རྣམ་པར་གཙིགས་པ་སྐྲ་ཁམ་སེར་འཁྱིལ་བ་སྤྱན་ཤིན་ཏུ་དམར་ཞིང་ཟླུམ་པས་ཕྱག་གཡས་པས་བཅོམ་ལྡན་ [188a.3]འདས་ཀྱིས་ལྗང་ངར་ལ་འཇུས་པ་གཡོན་པས་དབྱུག་ཐོ་འཛིན་པའོ། །དེ་ལྟར་རྣམ་པར་བསྒོམས་ལ་སྐུ་གསུང་ཐུགས་ཀྱི་ཟླ་བའི་དཀྱིལ་འཁོར་ལ་ཨོཾ་ཨཱཿཧཱུྃ་ཞེས་བྱ་བའི་ཡི་གེ་གསུམ་པོ་དཀར་པོ་དང་དམར་པོ་དང་སྔོན་པོའི་མདོག་ཏུ་རིམ་པ་ཇི་ལྟ་བ་བཞིན་དུ་དགོད་པར་བྱ་བའོ། །དེ་ནས་ནུ་མ་གཉིས་ཀྱི་ [188a.4]བར་དུ་ཟླ་བའི་དཀྱིལ་འཁོར་ལ་ཡི་གེ་མུཿབསམས་ལ་དེ་ནས་མཆོད་པར་བྱ་བ་དང་མཆོད་པར་བྱེད་པ་པོ་ཐ་དད་མེད་པར་དམིགས་ཏེ། རྣམ་པ་སྣ་ཚོགས་པའི་ལྷ་རྣམས་ཀྱིས་ཡང་དག་པར་བསྟོད་པར་གྱུར་བ་བདག་ཉིད་ལྟ་ཞིང་སྤྲོ་བ་དང་བསྡུ་བས་ཇི་སྲིད་དུ་སྐྱོ་བར་གྱུར་པ་མ་ཡིན་པ་དེ་སྲིད་དུ་བསྒོམ་ [188a.5]པར་བྱ་བའོ། །དེ་ལྟར་རྟག་ཏུ་བསྒོམ་བྱས་ན། །སངས་རྒྱས་བྱང་ཆུབ་རབ་ཏུ་འགྲུབ། །སྐྱེ་བ་འདི་ཉིད་རང་ལ་ཡང་། །ཐུགས་རྗེ་ཆེན་པོ་འཇམ་མགོན་འཐོབ། །བསྒོམས་པས་སྐྱོ་བར་གྱུར་ན་རང་གི་སྙིང་གར་ཟླ་བའི་དཀྱིལ་འཁོར་ལ་སྔགས་རྣམ་པར་བཀོད་ལ་ཞེ་ན་པ་མེད་པའི་ཡིད་ཀྱིས་བཟླས་ [188a.6]པར་བྱ་བའོ། །དེ་ལ་སྔགས་ནི་འདི་ཡིན་ཏེ། ཨོཾ་དྷ་རྨ་དྷཱ་ཏུ་བཱ་གཱི་ཤྭ་རི་མུཾ། དེ་ལྟར་བཟླས་པ་བྱས་ལ་བསྒོམས་པས་ཀྱང་སྐྱོ་བར་གྱུར་ནས་གལ་ཏེ་ལངས་པར་འདོད་ན། དེ་ཁོ་ན་བཞིན་དུ་ལེགས་པར་མཆོད་ཅིང་ཡང་དག་པར་བསྟོད་ལ། དགེ་བ་ཡོངས་སུ་བསྔོས་ཏེ་ཚིགས་སུ་བཅད་པ་འདིས་ [188a.7]བཟོད་པར་གསོལ་བར་བྱ་བའོ། །རྨོངས་པའི་བློ་ཅན་བདག་གིས་ནི། །ནོངས་པ་ཅུང་ཟད་གང་བགྱིས་པ། །དེ་ལས་ལུས་ཅན་སྐྱོབ་པའི་མགོན། །ཁྱོད་ཀྱིས་སླར་ཡང་དེ་བཟོད་མཛོད། །སྐྱེ་དགུ་རྣམས་ལ་ཕན་པའི་དོན་དུ་སྨོན་ལམ་གདབ་པར་བྱ་སྟེ། དགེ་བ་འདིས་ཀྱང་བདག་གིས་སངས་ [188b] [188b.1]རྒྱས་ཉིད་ཐོབ་ནས་སྲིད་པའི་རྒྱ་མཚོ་རྒལ་བར་དཀའ་བ་ལས་འགྲོ་བ་མཐའ་དག་སྒྲོལ་བར་ཤོག །དེ་ནས་ཆོས་ཐམས་ཅད་མཉམ་པ་ཉིད་དུ་ལྷག་པར་དམིགས་ལ་ཐམས་ཅད་འཇམ་པའི་དབྱངས་ཀྱི་རང་བཞིན་དུ་བལྟས་ཏེ་རང་གི་ལྷའི་ང་རྒྱལ་དང་ལྡན་པས་ཇི་ལྟར་བདེ་བར་གནས་པར་བྱ་བ་ [188b.2]ཡིན་ནོ། །དེ་ལྟར་ཐུན་བཞིའམ་ཐུན་གསུམ་དུ་ཡང་རུང་སྟེ་བྱ་བ་ཡིན་ནོ། །སྒྲུབ་ཐབས་འདི་བྱས་ལས་བྱུང་བའི། །འབྲས་བུ་བདག་གིས་གང་ཐོབ་པ། །དེས་ནི་སྲིད་གསུམ་འཇིག་རྟེན་འདི། །མ་ལུས་འཇམ་དབྱངས་ཉིད་གྱུར་ཅིག །འཕགས་པ་དཔལ་དང་ལྡན་པ་འཇམ་དཔལ་ [188b.3]གསུང་གི་མངའ་བདག་གི་སྒྲུབ་ཐབས་རྫོགས་སོ།། {T3171}༄༅༅། །རྒྱ་གར་སྐད་དུ། ཝཱ་གཱི་རཱ་ཊ་སཱ་དྷ་ནཾ། བོད་སྐད་དུ། གསུང་གི་མངའ་བདག་གི་སྒྲུབ་ཐབས། སྔགས་པས་རེ་ཞིག་ཐོག་མ་ཉིད་དུ་ས་གཞིའི་ཆ་དྲི་ཞིམ་པོས་ཉེ་བར་བྱུགས་པ་དང་། མེ་ཏོག་སྣ་ཚོགས་ [188b.4]ཀྱིས་ཀྱང་ལེགས་པར་བཀང་ལ། དེའི་དབུས་སུ་སྟན་བདེ་བ་ལ་ལེགས་པར་གནས་ཏེ། གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བརྗོད་པར་བྱའོ། །དེའི་ཕྱི་ནས་ནི་རང་གི་སྙིང་གར་ཡི་གེ་ཨ་བལྟ་བར་བྱའོ། །དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རོ། །དེའི་དབུས་སུ་ཡི་གེ་མུཿ [188b.5]རྣམ་པར་བསམ་པར་བྱའོ། །ཡི་གེ་མུཿདེ་ལས་བྱུང་བའི་ཁ་དོག་ལྔ་དང་ལྡན་པའི་འོད་ཟེར་གྱི་ཚོགས་རྣམས་རང་གི་བ་སྤུའི་བུག་རྣམས་ནས་སྤྲོ་བར་བྱ་སྟེ། འོད་ཟེར་དེ་དག་རྣམས་ཀྱིས་ཀྱང་འཇམ་པའི་དབྱངས་ཀྱི་སྐུས་ནམ་མཁའ་གང་བར་བལྟ་བར་བྱའོ། །དེ་ནས་དེ་དག་རྣམས་མེ་ཏོག་ལ་སོགས་པས་ [188b.6]མཆོད་པར་བྱ་བའོ། །དེ་ནས་དེའི་རྗེས་ལ་སྡིག་པ་བཤགས་པ་དང་བསོད་ནམས་ལ་རྗེས་སུ་ཡི་རང་བ་དང་། སྨོན་ལམ་ལ་སོགས་པ་རྣམས་བྱ་བའོ། །དེ་ནས་ཚངས་པའི་གནས་བཞི་བསྒོམ་པར་བྱ་བའོ། །ཕྱིས་དེ་དག་རྣམས་ཐམས་ཅད་ཀྱང་སྟོང་པ་ཉིད་དུ་བསྒོམས་ཏེ། ཨོཾ་སྟོང་པ་ཉིད་ཀྱི་ཡེ་ཤེས་ཀྱི་ [188b.7]རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ་ཞེས་སྔགས་བརྗོད་པར་བྱའོ། །དེ་ནས་ཡང་རང་གི་སྙིང་གར་ཡི་གེ་ཨ་བལྟ་བར་བྱའོ། །དེ་ཡོངས་སུ་སྨིན་པས་ཟླ་བའི་དཀྱིལ་འཁོར་རོ། །དེའི་དབུས་ན་ཡི་གེ་མུཿའོ། །དེ་དག་ཡོངས་སུ་གྱུར་པ་ལས་འཇམ་པའི་དབྱངས་ཀྱི་སྐུར་བདག་ཉིད་བལྟ་བར་བྱ་སྟེ། [189a] [189a.1]སེང་གེ་ལ་བཞུགས་པ། །གསེར་གྱི་མདོག་ཏུ་སེར་བའི་སྐུ་རྒྱན་ཐམས་ཅད་ཀྱིས་བརྒྱན་པ་ཕྱག་ཆོས་བཤད་པའི་ཕྱག་རྒྱས་བྲེལ་ཅིང་གཡོན་ངོས་ན་ཨུཏྤལ་འཛིན་པ་མི་བསྐྱོད་པས་དབུ་བརྒྱན་ཅིང་། གཡས་ཕྱོགས་ན་གཞོན་ནུ་ནོར་བཟངས། གཡོན་དུ་ནི་གཤིན་རྗེའི་གཤེད་བལྟ་ [189a.2]བར་བྱ་བ་ཡིན་ནོ། །བསྒོམས་པས་དུབ་ན་སྔག་བཟླས་པར་བྱ་བ་ནི། ཨོཾ་ཝཱ་གཱི་ཤྭ་རི་མུཿགསུང་གི་མངའ་བདག་གི་སྒྲུབ་ཐབས་རྫོགས་སོ།། །།ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3172}༄༅༅། །རྒྱ་གར་སྐད་དུ། ཨ་ར་པ་ཙ་ན་སཱ་དྷ་ནཾ། བོད་སྐད་དུ། [189a.3]སྤྲོས་པ་མེད་པའི་སྒྲུབ་ཐབས། ཟླ་བ་ལྟ་བུར་ཤིན་ཏུ་དངས་ཤིང་རལ་གྲི་གླེགས་བམ་ཕྱག་ན་བསྣམས། །ཤིན་ཏུ་ཞི་ཞིང་གཞོན་ནུ་ཟུར་ཕུད་ལྔ་པ་མཆོག་ཏུ་ཡིད་འོང་བ། །དགའ་བ་རྒྱ་ཆེན་ཐར་པ་མཆོག་གི་སྤྱན་ནི་དཀྱུས་རིང་པདྨའི་བདག །བློ་གྲོས་དམན་པ་བསྲེག་མཁས་འཇམ་དབྱངས་ལ་ནི་ [189a.4]ལེགས་པར་ཕྱག་འཚལ་ལོ། །གང་གིས་ཐོགས་ཀྱང་སྐྱེ་འདིར་ཨ་ར་པ་ཙ་ན་ནི་ལེགས་གྲུབ་ཕྱིར། །ཤིན་ཏུ་ཉུང་ངུས་འཁོར་ལོ་རིན་ཆེན་དག་གིས་གདམས་ངག་བདག་གིས་བྱ། །བར་ཆད་མེད་པར་མངོན་པར་བརྩོན་པས་ལོ་ཕྱེད་དག་ནི་བསྒོམས་གྱུར་ན། །ཚིག་རྐང་མ་ལུས་རྣམ་རིག་བློ་ལྡན་པ་ཡི་བློ་ཡི་ [189a.5]མཆོག་ཉིད་ཐོབ། །སྔགས་རིག་ས་ཡི་ཆ་ནི་མཉམ་ཞིང་གཙང་ལ་ཤིན་ཏུ་ཡིད་འོང་བར། །དྲི་ཞིམ་ཆུ་ཡིས་ཉེར་བཏབ་དྲི་བཟངས་མེ་ཏོག་སིལ་མར་བཀྲམ་བྱ་སྟེ། །ཤིན་ཏུ་འཇམ་ཞིང་དགའ་བར་གྱུར་བའི་སྟན་འགའ་ཞིག་ལ་ཉེར་གནས་པ། །བདེ་བའི་བློ་ཡིས་མཚན་མ་མེད་པར་བྱང་ཆུབ་སེམས་ནི་བསྒོམ་པར་ [189a.6]བྱ། །རང་བཞིན་དག་པའི་སྔགས་ནི་ཀུན་དུ་གསལ་བྱས་ལ། །ཐམས་ཅད་མ་ལུས་སྟོང་པ་ཉིད་དུ་རྣམ་པར་བསྒོམ། །ཡང་ནི་དངོས་པོ་རྣམས་དང་ལྷན་ཅིག་བདག་ཉིད་ལུས། །འོད་གསལ་ཉིད་དུ་སྐད་ཅིག་ཁོ་ནར་བལྟ་བར་བྱ། །དེ་ནས་ནམ་མཁར་རང་སྙིང་ཟླ་བའི་དཀྱིལ་འཁོར་ནི། །དབྱངས་ཀྱང་དང་པོ་ [189a.7]འབར་བ་ལས་ནི་རྣམ་བསྒོམ་བྱ། །དེ་ནས་འདི་ལ་ཡིད་དཀར་དྷཱིཿནི་ངེས་བལྟས་ལ། །དེ་ལས་འཇམ་དབྱངས་དྲི་མ་མེད་པར་རྟོགས་བྱ་སྟེ། །གཅིག་ཏུ་བསམ་གཏན་ལ་གཞོལ་པདྨའི་སྟེང་གནས་པ། །ཐམས་ཅད་རྒྱན་རྣམས་ཀྱིས་ནི་མཆོག་ཏུ་འབར་གྱུར་ཅིང་། །ཆགས་བྱས་ཅུང་ཟད་བཞད་པར་མཛད་ [189b] [189b.1]པས་ཡིད་འོང་བ། །ཟླ་བ་བྱེ་བའི་འོད་ལྡན་དབུས་སུ་དགོད་པར་བྱ། །རང་གི་སྙིང་ག་དག་ཏུ་ཡི་གེ་ཨ་མཆོག་རྣམ་པར་སྤྲོས་ལེགས་བལྟ། །མཚུངས་མེད་འོད་ཀྱི་དྲ་བ་དང་ལྡན་འཁོར་ལོའི་གཟུགས་ནི་རྩིབས་བརྒྱད་པ། །དེ་ཡི་སྟེང་དུ་ཟླ་བའི་དཀྱིལ་འཁོར་སྔགས་པ་དེས་ནི་བསྒོམ་བྱས་ལ། །ཟླ་བ་ [189b.2]བཞིན་དུ་ཤིན་ཏུ་དཀར་བར་གྱུར་པའི་དབྱངས་ཉིད་དོ། །གྲུ་གསུམ་པདྨ་རྒྱས་དག་སྤྱན་མངའ་མཛེས་པའི་གཟུགས་ལྡན་མ། །དཀུ་གཉིས་ཤིན་ཏུ་ལེགས་པའི་སྐྲ་ཅན་མ་ནི་གཡས་སུ་བལྟ་བར་བྱ། །གཡོན་དུ་ཉེ་བའི་སྐྲ་ཅན་ཡིད་འོད་ལུས་ནི་འགྱིང་བག་དང་ལྡན་མ། །ཡོན་ཏན་མཐའ་དག་གཏེར་གྱུར་ [189b.3]དེ་དག་ཙ་ན་གཉིས་ལས་བསྒོམ་པར་བྱ། ཤིན་ཏུ་དངས་བའི་ཉིད་ལས་བྱུང་དྲི་མེད་པའི། །དྲ་བའི་འོད་ནི་ངེས་པར་མདུན་དུ་གཡས་སུ་དགོད་པར་བྱ། །པ་ཡིག་ལས་བྱུང་འོད་ཀྱི་རང་བཞིན་ཡིད་འཕྲོག་པ། །ཟླ་འོད་དེ་ནི་རྒྱབ་ཏུ་བཞུགས་སུ་གསོལ་བ་ཡིན། །ཡང་ན་འབར་བའི་ཟླ་བ་དག་ལ་ཡི་ [189b.4]གེ་ནི། །རྒྱ་ཆེན་གཟི་བརྗིད་དང་ལྡན་རྣམ་པར་བསྒོམ་བྱ་ཞིང་། །གཏི་མུག་བྲག་ཆེན་དག་ནི་རྣམ་པར་འཇོམས་བྱེད་ཅིང་། །ཆོག་ཤེས་རྙོག་པ་མེད་པ་དེ་ཡང་བྱེད་པ་ཡིན། །གཏི་མུག་མུན་སྟུག་མ་ལུས་རྣམ་པར་འཇོམས་བྱེད་པའི། །འོག་ཏུ་འཁོར་ལོ་ཉུང་ངུ་འཁོར་བར་རྣམ་པར་བསམ། ། [189b.5]ཟླ་བའི་གཟུགས་ནི་རྒྱ་ཆེན་འོད་ཟེར་དྲ་བ་ཅན། །ལྷ་དང་བཅས་པ་རྣམས་ཀྱིས་མི་གཡོ་བལྟ་བྱ་སྟེ། །ཟླ་བ་ལས་ནི་ཕལ་ཆེན་འོད་ཟེར་སྤྲིན་གྱི་ཚོགས། །ཀུན་ནས་བཀྱེ་ལ་ཕྱོགས་བཅུ་རྣམས་ནི་གསལ་བྱས་བལྟ། །སེམས་ཅན་དག་བྱས་དེ་བཞིན་བདག་ཉིད་ཀྱི་ཡང་ལུས། །ཐ་མར་ཕྱིར་ [189b.6]འོངས་ཟླ་བ་ལས་ནི་ལེགས་པར་བཞུགས། །ཁ་བློ་བརྟན་ཞིང་གདམས་པས་དམ་པ་ཨ་ར་པ་ཙ་ན་ཡི་སྔགས། །ལེགས་པར་ཟློ་དང་སྒོམ་པར་བྱེད་པའི་སྔགས་པས་དུས་རྣམས་ནི། །མཆོག་ཏུ་དྲི་མེད་ཡིད་འོང་ཕ་རོལ་ཕྱིན་པ་དང་ནི་གཞན་དག་ཀྱང་། །ཡིད་གཉིས་སྐྱོན་རྣམས་ཐམས་ཅད་གཏན་ནས་ [189b.7]སྤངས་པའི་རྒྱལ་བ་རྣམས་ཀྱིས་འཐོབ། །དམ་ཆོས་མཛོད་ཀྱི་རབ་གྱུར་བླ་མའི་མཆོག་ནི་དགའ་བའི་རྡོ་རྗེ་ཡིས། །བདེ་གཤེགས་ཚོགས་ཀྱི་སྤྱན་སྔར་ཆོ་ག་བཞིན་དུ་དང་པོར་དབང་བསྐུར་བའི། །བློ་བཟངས་སྒོ་བྱེད་བཤེས་གཉེན་དེས་ནི་ལེགས་སྡེབས་ཨ་ར་པ་ཙ་ན། །འཁོར་ལོ་དམ་པ་གང་ཕྱིར་ [190a] [190a.1]རྟོགས་པ་སྐྱེ་བ་འདི་ལ་གྲུབ་དོན་ནོ། །ཆོ་ག་བཟང་པོས་འཁོར་ལོ་ལེགས་སྤེལ་ལས་བྱུང་བའི། །ཀུན་ནས་རྣམ་ཡངས་བསོད་ནམས་བདག་གིས་གང་ཐོབ་དེས། །འཇིག་རྟེན་མཐའ་དག་སྡིག་པ་ཀུན་ལས་རྣམ་རྒྱལ་ནས། །འཇམ་དབྱངས་བདེ་བ་དམ་པར་གཅིག་ཏུ་ངེས་ [190a.2]གྱུར་ཅིག །སྤྲོས་པ་མེད་པའི་སྒྲུབ་ཐབས་རྫོགས་སོ།། །།ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3173}༄༅༅། །རྒྱ་གར་སྐད་དུ། ཨ་ར་པ་ཙ་སཱ་དྷ་ནཾ། བོད་སྐད་དུ། སྤྲོས་པ་མེད་པའི་སྒྲུབ་ཐབས། དང་པོར་རེ་ཞིག་སྔགས་པས་ཡིད་ [190a.3]དང་རྗེས་སུ་མཐུན་པའི་ས་ཕྱོགས་སུ་བདེ་བའི་སྟན་ལ་ཉེ་བར་གནས་ཏེ། རང་གི་སྙིང་གར་དབྱངས་ཡིག་དང་པོ་ལས་ཀུན་ནས་བྱུང་བའི་ཟླ་བ་ལ་བཞི་པའི་བཞི་པ་ནི་ས་བོན་ཏེ་དྷཱིཿཨཿདང་ཚེག་དྲག་གཉིས་ཀྱང་མཐར་སྦྱར་བ་རྣམ་པར་བསྒོམ་པར་བྱའོ། །དེ་ནས་དེའི་འོད་ཟེར་གྱི་ཚོགས་རྣམས་ཉོན་མོངས་པའི་ [190a.4]མུན་ནག་དང་ལྡན་པའི་སྙིང་རྗེ་དང་དགའ་བ་དང་བཏང་སྙོམས་ཞེས་བྱ་བའི་ཚངས་པའི་གནས་བཞི་པོ་རྣམས་འཆད་པར་འགྱུར་བའི་རིམ་པས་བསྒོམ་པར་བྱ་བའོ། །བྱམས་པ་གང་ཞེ་ན། སེམས་ཅན་ཐམས་ཅད་ལ་བུ་གཅིག་པ་ཉིད་དུ་བྱམས་པའོ། །སྙིང་རྗེ་གང་ཞེ་ན། སྡུག་བསྔལ་རྣམ་པ་གསུམ་གྱིས་ [190a.5]སྡུག་བསྔལ་བར་གྱུར་པའི་སེམས་ཅན་རྣམས་འཁོར་བའི་རྒྱ་མཚོ་ལས་སྒྲོལ་བར་འདོད་པ་ཉིད་དོ། །དགའ་བ་གང་ཞེ་ན། བསྐྱེད་པའི་དགེ་བའི་རྩ་བ་རྣམས་གཞན་གྱི་ལོངས་སྤྱོད་དང་དབང་ཕྱུག་ལ་སོགས་པར་སེམས་དགའ་བ་ཉིད་དོ། །བཏང་སྙོམས་གང་ཞེ་ན། ཐམས་ཅད་ལ་ཁོང་ཁྲོ་བ་དང་ [190a.6]རྗེས་སུ་ཆགས་པ་དང་བྲལ་བས། གཞན་ལ་ཕན་པའི་ཆོས་ཉིད་ལ་ངང་གིས་ཞུགས་པར་གྱུར་པས་ལེགས་པར་འཇུག་པ་ཞེས་བྱ་བའོ། །ཚངས་པའི་གནས་བཞི་བསྒོམས་པའི་རྗེས་ཐོགས་ལ་སྙིང་གའི་ས་བོན་གྱི་འོད་ཟེར་ཉིད་ལས་ཀུན་ནས་བྱོན་པའི་བླ་མ་དང་སངས་རྒྱས་དང་བྱང་ཆུབ་ [190a.7]སེམས་དཔའ་ནམ་མཁའི་ཕྱོགས་མཐའ་དག་ཁྱབ་པ་རྣམས་ཀྱིས། སྤྲོ་བ་དང་བསྡུ་བའི་ཚུལ་གྱིས་འགྲོ་བའི་དོན་གྱི་བྱ་བ་མཛད་པ་ལ་གཅིག་ཏུ་གཞོལ་བར་གྱུར་པར་བལྟས་ལ། རང་གི་སྙིང་གའི་ས་བོན་གྱི་འོད་ཟེར་ཉིད་ལས་ལྷ་རྫས་ཀྱི་དྲི་དང་མེ་ཏོག་གི་བྱེ་བྲག་ལ་སོགས་པ་རྣམས་ངེས་པར་ [190b] [190b.1]སྤྲོས་ཏེ། མཎྜལ་གྱི་བྱ་བ་མངོན་དུ་བཏུད་པའི་ཐལ་མོ་སྦྱར་བས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཞབས་པད་ལ་སྤྱི་བོ་ལེགས་པར་གཏུགས་པའི་ཡན་ལག་ལྔས་ཕྱག་བཙལ་བར་བྱ་བའོ། །འོད་ཟེར་དེ་དག་ཉིད་ལས་ངེས་པར་བྱུང་བའི་མེ་ཏོག་དང་བདུག་སྤོས་དང་མར་མེ་དང་ཕྱེ་མ་ [190b.2]དང་དྲི་དང་ན་བཟའ་དང་རྒྱལ་མཚན་དང་དྲིལ་བུ་དང་བ་དན་ལ་སོགས་པའི་ཕྱི་དང་ནང་གི་མཆོད་པ་ལ་སོགས་པ་རྣམས་ཀྱིས་ལེགས་པར་མཆོད་པར་བྱ་བས་མཆོད་པར་བྱ་བའོ། །དེ་ནས་སྡིག་པ་བཤགས་པ་ལ་སོགས་བྱ་སྟེ། འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་ [190b.3]བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་རྒྱལ་རྣམས་སྤྱན་སྔར་བཤགས། །ཞེས་བྱ་བ་ནི་སྡིག་པ་བཤགས་པའོ། །དེ་བཞིན་གཤེགས་པ་རྣམས་གང་ཡིན་པ་དང་གཞན་དག་ཀྱང་རྫོགས་པའི་བྱང་ཆུབ་ལ་ཀུན་ནས་ལེགས་པར་བརྟེན་པ་ [190b.4]རྣམས་དང་རང་སངས་རྒྱས་དང་དམ་པའི་སྐྱེ་བོ་རྣམས་ཀྱི་ཡང་རུང་སྟེ། བསོད་ནམས་དེ་དག་རྣམས་ཐམས་ཅད་ལ་བདག་རྗེས་སུ་ཡི་རང་བར་བགྱིད་དོ་ཞེས་བྱ་བ་ནི་བསོད་ནམས་ལ་རྗེས་སུ་ཡི་རང་བའོ། །ཐུགས་རྗེའི་ཡོན་ཏན་ཚོགས་ཀྱིས་མཐའ་ཡས་ཕྱོགས་རྣམས་ཁྱབ། །དུས་གསུམ་ [190b.5]ཀུན་དུ་གཤེགས་པའི་སངས་རྒྱས་མ་ལུས་དང་། །མཆོག་ཏུ་སྐྱོན་བྲལ་འཕགས་པའི་ཚོགས་དང་དམ་ཆོས་ལ། །མི་ཕྱེད་དད་པས་བདག་ནི་ལེགས་པར་སྐྱབས་སུ་མཆི། །ཞེས་བྱ་བ་ནི་གསུམ་ལ་སྐྱབས་སུ་འགྲོ་བའོ། །ཚངས་དབང་དང་ནི་དྲག་སོགས་ལས་ཡང་ཆེས་དཀོན་པའོ། ། [190b.6]ཡོངས་དག་རྒྱལ་པ་རྣམས་ཀྱི་ལམ་ལ་གནས་པར་བགྱི། །བདག་ལ་འདིར་བྱུང་བ་ཡི་བསོད་ནམས་ཚོགས་རྣམས་ཀྱིས། །བྱང་ཆུབ་སེམས་རབ་བདག་གིས་འདིར་ནི་བསྐྱེད་པར་བགྱི། །ཞེས་བྱ་བ་ནི་རྒྱལ་བའི་ལམ་ལ་གནས་པ་དང་བྱང་ཆུབ་ཏུ་སེམས་བསྐྱེད་པ་གཉིས་སོ། །དེ་ལྟར་ [190b.7]བླ་ན་མེད་པའི་མཆོད་པ་རྣམ་པ་བདུན་བྱས་པའི་གཏིང་ལ། བླ་མའི་གསུང་གིས་ཕྱི་དང་ནང་དུ་བྱམས་པ་སྟོང་པ་ཉིད་དུ་རྣམ་པར་བསྒོམ་མོ། །དེ་ནས་དེ་བརྟན་པར་བྱ་བའི་དོན་དུ། ཨོཾ་རང་བཞིན་གྱིས་རྣམ་དག་པས་ཆོས་ཀུན་རང་བཞིན་རྣམ་དག་བདག །ཅེས་བྱ་བའི་ཚིགས་ [191a] [191a.1]སུ་བཅད་པའི་དབྱངས་ཀྱིས་སྙན་པར་བྱ་བའོ། །དེའི་རྗེས་ལ་རང་གི་སེམས་ཀྱི་སྣང་བ་ཙམ་འབའ་ཞིག་པ་དང་ཞིང་ཐོགས་པ་མེད་པའི་ངོ་བོར་གྱུར་པའི་དབྱངས་ཡིག་དང་པོ་ལས་བྱུང་བའི་ཟླ་བའི་དཀྱིལ་འཁོར་གྱི་རྣམ་པ་རང་གི་སེམས་རྣམ་པར་བསམ་པར་བྱ་བའོ། །དེའི་སྟེང་དུ་ནི་སྔ་ [191a.2]བཤད་པའི་ས་བོན་ནོ། །ས་བོན་དང་ཟླ་བ་དེ་དག་ཡོངས་སུ་གྱུར་ནས་འོད་འཕྲོ་བའི་རང་བཞིན་གྱི་རལ་གྲིའོ། །དེ་ནས་སྔར་བརྗོད་པའི་ས་བོན་ཟླ་བའི་སྟེང་ན་གནས་པ་ཆང་ཟུངས་ཀྱི་དཀྱིལ་དུའོ། །རལ་གྲི་དང་ས་བོན་དེ་དག་ཡོངས་སུ་གྱུར་པ་ལས་འཇམ་པའི་དབྱངས་ཏེ། སྟོན་ཀའི་ཟླ་བའི་འོད་དང་མཚུངས་པ་ [191a.3]ཕྱོགས་བཅུའི་འཇིག་རྟེན་སྣང་བར་མཛད་པའི་འོད་དང་ལྡན་པ་ཕྱག་གཉིས་པ་གཞོན་ནུའི་གཟུགས་ཅན། ཕྱག་གཡས་ན་རྨོངས་པ་མ་ལུས་པར་རྩད་ནས་གཅོད་པར་མཛད་པ་ལ་གཅིག་ཏུ་གཞོལ་བའི་ཤེས་རབ་ཀྱི་རལ་གྲི་བསྣམས་པའོ། །ཕྱག་གཡོན་པ་ན་ཐབས་སུ་གྱུར་པའི་རིག་པའི་བསྟན་བཅོས་ [191a.4]མཐའ་དག་ཡོངས་སུ་རྫོགས་པའི་པོ་ཏི་ཅིག་བསྣམས་པའོ། །རྒྱན་རྣམས་ཐམས་ཅད་ཀྱིས་བརྒྱན་ཅིང་ན་བཟའ་དམར་པོ་བསྣམས་པ་བསམ་གཏན་གྱིས་གཅིག་ཏུ་ངེས་པར་ཞལ་པདྨ་དང་འདྲ་བར་རྒྱས་ཤིང་སྤྱན་པདྨ་དམར་པོ་དང་མཚུངས་པར་སྐྱེས་བུ་ཆེན་པོའི་མཚན་རྣམས་རྫོགས་པ་ལ་ནོར་བུ་ [191a.5]ཨིནྡྲ་ནཱི་ལའི་ཁ་དོག་མཚུངས་པའི་ཟུར་ཕུད་ལྔ་འཁྱིལ་པ། པདྨ་དཀར་པོ་འདབ་མ་བརྒྱད་པ་དང་ཟླ་བ་དག་ལ་རྡོ་རྗེ་སྐྱིལ་མོ་ཀྲུང་གིས་ཉེ་བར་བཞུགས་པ་སྟེ། དེ་བཞིན་གཤེགས་པ་རྣམས་ཐམས་ཅད་ཀྱི་ཡེ་ཤེས་ཀྱི་ངོ་བོར་གྱུར་པའི་འཇམ་པའི་དབྱངས་ཀྱི་སྐུར་བདག་ཉིད་རྣམ་པར་བསྒོམ་པར་ [191a.6]བྱའོ། །དེ་ལྟར་དམ་ཚིག་སེམས་དཔའི་ང་རྒྱལ་དང་ལྡན་པའི་རྣལ་འབྱོར་པས་རང་གི་སྙིང་གར་ཡི་གེ་ཨ་ངེས་པར་རྫོགས་པ་ལས། དང་པོའི་འཁོར་ལོ་རྩིབས་བརྒྱད་པ་སྤྲོ་བ་དང་བསྡུ་བའི་འོད་ཀྱི་ཚོགས་ཀྱིས་རྨོངས་པ་མ་ལུས་པ་ངེས་པར་འཇིག་པར་བྱེད་ཅིང་གཡས་ཕྱོགས་སུ་འཁོར་བའི་རིམ་གྱིས་ [191a.7]མྱུར་དུ་འཁོར་བར་བལྟ་བར་བྱ་བའོ། །དེའི་སྟེང་དུ་ནམ་མཁའ་ལ་དབྱངས་ཡིག་དང་པོ་ལས་བྱུང་བའི་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་ལྔ་རིམ་པ་ཇི་ལྟ་བ་བཞིན་དུ་ལྟེ་བར་གྱུར་པས་མེ་དང་མཚུངས་པ་འོད་ཟེར་དང་བཅས་པ་རྨོངས་པ་མཐའ་དག་དཔྱིས་འབྱིན་པར་བྱེད་པ་བླ་མའི་གདམས་ [191b] [191b.1]ངག་ལས་ཁྱད་པར་དུ་བསྒོམ་པར་བྱ་བའོ། །ལྷའི་སྐུར་བསྐྱེད་ལ་སྐྱོ་བ་མང་བའི་སྔགས་པས་སྤྲོ་བ་ལ་སོགས་པ་བལྟ་བར་བྱས་ལ་བཟླས་པ་བྱ་བའོ། །ཡང་ན་སྙིང་གའི་ཟླ་བའི་དབུས་སུ་ཤིན་ཏུ་དང་བའི་ཡི་གེ་ཨ་ལས་གྲུབ་པའི་ཨ་ར་པ་ཙ་ན་ཞེས་བྱ་བར་གྲགས་པའི་དཀར་པོ་རྒྱན་ཐམས་ཅད་ཀྱིས་བརྒྱན་པ་ [191b.2]བསམ་གཏན་ལ་གཅིག་ཏུ་ངེས་པར་དགྱེས་པ་རྡོ་རྗེའི་སྐྱིལ་མོ་ཀྲུང་གིས་ལེགས་པར་བཞུགས་པ་སྟེ། ཕྱག་གཡས་པ་དང་གཡོན་པ་དག་གིས་རལ་གྲི་དང་གླེགས་བམ་བསྣམས་པ། མཐའ་དག་ཀྱང་ཨིནྡྲ་ནཱི་ལ་འཁྱིལ་བའི་ཟུར་ཕུད་ལྔ་དང་ལྡན་བཞིན་ཟླ་བ་རྒྱས་པ་དང་མཚུངས་པ། གསུང་གི་མཆོག་ [191b.3]མངའ་བ། རང་གི་ས་བོན་ཟླ་བ་ལ་གནས་པ་སྙིང་གར་རྣམ་པར་བསྒོམ་པར་བྱའོ། །དེའི་མདུན་དུ་ཡི་གེ་ར་དཀར་པོ་ལས་ངེས་པར་བྱུང་བའི་དྲ་བའི་འོད་དེ་རང་གི་སྙིང་གའི་ཟླ་བ་ལ་རང་གིས་བོན་གྱིས་བྱིན་གྱིས་བརླབས་པར་བལྟ་བར་བྱ་བའོ། །དེའི་རྗེས་ལ་རྒྱབ་ཏུ་ཡི་གེ་པ་དཀར་པོ་རྫོགས་པ་ལས་ [191b.4]ཟླ་བའི་འོད་དེ། རང་གི་སྙིང་གའི་ཟླ་བ་ལ་ས་བོན་དང་ལྡན་པར་ལེགས་པར་བལྟ་བར་བྱ་བའོ། །དེ་ནས་གཡས་སུ་གང་བའི་ཡི་གེ་ཙ་རྫོགས་པ་ལས་དཀར་མོ་རྒྱན་ཐམས་ཅད་ཀྱིས་བརྒྱན་པ་ནུ་མ་གཉིས་རྒྱས་པའི་སྐྲ་ཅན་མ་སྟེ། རང་གི་སྙིང་གའི་ཟླ་བ་ལ་ས་བོན་དང་ལྡན་པར་རྣམ་པར་བསམ་མོ། ། [191b.5]དེ་བཞིན་དུ་ཡི་གེ་ན་དཀར་པོ་ལས་གྲུབ་པའི་ཉེ་བའི་སྐྲ་ཙ་ནམ་ཡང་། རང་གི་སྙིང་གའི་ཟླ་བ་ལ་ས་བོན་དང་ཀུན་ནས་ལྡན་པར་རྣམ་པར་བསྒོམས་ལ། ཐམས་ཅད་ཀྱང་ཨ་ར་པ་ཙ་ན་དང་ཆ་འདྲ་བར་རྣམ་པར་བསམ་མོ། །འདིར་ལྷའི་ཚོགས་རྣམས་ཀྱི་སྙིང་གའི་ས་བོན་གྱི་འོད་ཀྱིས་དགའ་བ་དང་སྤྲོ་བ་དང་ [191b.6]བསྡུ་བས་སྐྱེ་དགུ་རྣམས་ཀྱི་རྨོངས་པའི་ཕུང་པོ་རྩ་བ་ནས་གཅོད་ཅིང་། བཟོ་དང་རིག་པའི་གནས་ཀྱི་བསྟན་བཅོས་སུ་གྱུར་པ་མཐའ་དག་གི་ཆོས་ཀྱི་བདུད་རྩིས་སེམས་ཅན་ཐམས་ཅད་ཚིམ་པར་ཡུད་ཙམ་ལ་བདག་ཉིད་གཙང་ལ་ཐོག་སྡུག་དང་བྲལ་བའི་ལུས་ཀྱིས་བསྒོམ་པར་བྱ་ཞིང་། བླ་མའི་ [191b.7]གདམས་ངག་ལས་མཉམ་པར་གཞག་པའི་སྔགས་པས་བཟླས་པ་ཡང་བྱ་སྟེ། རབ་བསྔགས་དང་པོར་རོ། །ས་བོན་གྱི་ཡི་གེ་ལྔ་ནི་བར་དུའོ། །དམ་ཚིག་སེམས་དཔའ་ས་བོན་མཐར་བྱས་པ་ནི་སྔགས་སོ། །གང་གི་ཚེ་ལངས་པར་འདོད་པའི་བསམ་པ་བྱུང་བའི་ཚེ་རང་གི་སྔགས་བླ་མའི་གདམས་ [192a] [192a.1]ངག་གིས་བརྗོད་ལ། ཡི་གེ་བརྒྱ་པའི་ཚིགས་བཅད་བརྗོད་པར་བྱ་སྟེ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྲྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྲྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦྦ་ཀརྨྨ་སུ་ཙ་མེ། ཙི་ཏྟཾ་ཤྲེ་ཡཿཀུ་རུ་ [192a.2]ཧཱུཾ་ཧ་ཧ་ཧ་ཧ་ཧོཿབྷ་ག་བཱན། སརྦྦ་ཏ་ཐཱ་ག་ཏ་བཛྲ་མ་མེ་མུཉྩ། བཛྲི་བྷ་བ་མ་ཧཱ་ས་མ་ཡ་སཏྭ་ཨཿཞེས་བྱ་བའི་སྔགས་ཡི་གེ་བརྒྱ་པ་བཏོན་པའི་རྗེས་ལ། སྤྲོ་བ་ལ་སོགས་པ་ཡང་བཏང་ལ་དམ་ཚིག་སེམས་དཔའི་ང་རྒྱལ་དང་ལྡན་པས་སྤྱོད་ལམ་ཐམས་ཅད་ཀྱིས་གནས་པར་བྱ་སྟེ། མཉམ་པར་ [192a.3]གཞག་པའི་རྣལ་འབྱོར་པ་ནི་ཡང་དག་པའི་ཡེ་ཤེས་ཀྱི་རྒྱ་མཚོའི་ཕ་རོལ་ཏུ་ཕྱིན་པར་གྱུར་ནས་དུས་རིང་པོར་མི་ཐོགས་པ་ཉིད་ན་བླ་ན་མེད་པའི་བྱང་ཆུབ་འཐོབ་པར་འགྱུར་བ་ཡིན་ནོ། །གྲོལ་བའི་ཚིག་གིས་གསལ་བ་འདིར། །སྒྲུབ་ཐབས་སྣང་བ་ལེགས་བྲིས་ལ། །གང་བྱུང་པད་འབྱུང་བསོད་ [192a.4]ནམས་རྒྱུན། །དེས་ནི་སྲིད་པ་ལས་གྲོལ་ཤོག །ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས་སོ། །མཁས་པ་ཆེན་པོ་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3174}༄༅༅། །རྒྱ་གར་སྐད་དུ། ས་དྱོ་ཨ་ནུ་བྷ་བ་ཨ་ར་པ་ཙན་སཱ་དྷ་ནཾ། [192a.5]བོད་སྐད་དུ། འཕྲལ་དུ་ཉམས་སུ་མྱོང་བའི་སྤྲོས་པ་མེད་པའི་སྒྲུབ་ཐབས། ཤེས་རབ་རྨོངས་དུག་གཞོམ་པའི་ཕྱིར། །ཤེས་དོན་གཉེར་སོགས་སྐྱེ་བོ་ལ། །འཇམ་དཔལ་འཕྲལ་དུ་ཉམས་མྱོང་བའི། །སྒྲུབ་ཐབས་ལེགས་པ་ཉིད་དུ་བཤད། །དང་པོར་རེ་ཞིག་རྣལ་འབྱོར་པས་ [192a.6]ཡིད་དུ་འོང་བར་འགྱུར་བའི་ཕྱོགས་འགའ་ཞིག་ཏུ། དབྱངས་ཀྱི་ཡི་གེ་ཨ་ལས་བྱུང་བའི་ཟླ་བ་ལ་གནས་པའི་ས་བོན་གྱི་ཡི་གེ་དྷཱིཿལས་རྣམ་པར་བྱུང་བའི་འོད་ཟེར་ལྕགས་ཀྱུའི་རྣམ་པ་ལྟ་བུས་སྤྱན་དྲངས་པའི་ཨ་ར་པ་ཙན་ལ་སོགས་པ་རྣམས་ལ་མཆོད་པ་ལ་སོགས་པ་ཆོ་ག་ལྟར་བྱས་ [192a.7]ལ། སྟོང་པ་ཉིད་བསྒོམ་པར་བྱའོ། །དེ་ནས་སེམས་ཀྱི་སྣང་བ་ཡོངས་སུ་གྱུར་པ་ལས་ཀུ་མུ་དའི་ཟེ་བ་ལ་གནས་པའི་ཡི་གེ་དྷཱིཿསྟེ་མངོན་པར་གྱུར་ནས་རལ་གྲི་ལངས་པ་ཅིག་བལྟ་བར་བྱའོ། །དེའི་རྩེ་མོ་ལ་དབྱངས་ཡིག་དང་པོ་ཡོངས་སུ་གྱུར་པས་ཟླ་བའི་སྟེང་དུ་ས་བོན་ནོ། །དེ་དག་ཐམས་ [192b] [192b.1]ཅད་ཡོངས་སུ་གྱུར་པ་ལས་རལ་གྲི་དང་པོ་ཏི་བསྣམས་པ་ཟུར་ཕུད་ལྔ་ལེགས་པར་འགྲིལ་བ་ན་བཟའ་དམར་པོ་ཟུང་ཅིག་བསྣམས་ཤིང་སྒེག་པའི་ཆ་བྱད་དང་ལྡན་པ་ཞལ་འཛུམ་པས་རྣམ་པར་རྒྱས་པ་ཟླ་བའི་འཚེར་བག་དང་མཚུངས་པར་མཛེས་པས་འདབ་མ་སྣ་ཚོགས་པའི་པདྨ་ལ་སྐྱིལ་ཀྲུང་ཕྱེད་ [192b.2]པས་བཞུགས་པའི་འཕྲལ་དུ་ཉམས་སུ་མྱོང་བའི་ཨ་ར་པ་ཙ་ནའི་གཟུགས་སུ་བདག་ཉིད་ལེགས་པར་བལྟ་བར་བྱ་བའོ། །དེ་ནས་རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་འཁོར་ལོ་རྩིབས་བརྒྱད་པ་སྟེ་མ་རེག་པར་རོ། །དེའི་སྟེང་དུ་ནས་ཀྱི་རྩེ་མོ་ཙམ་གྱིས་མ་རེག་ [192b.3]པར་དབྱངས་ཡིག་དང་པོ་ལ་སོགས་པ་ལས་ཡང་དག་པར་བྱུང་བའི་ཟླ་བའི་དཀྱིལ་འཁོར་རོ། །དེ་ལ་ཟླ་བའི་ས་བོན་གྱིས་བསྐྱེད་པའི་རལ་གྲིའོ། །དེ་ནས་འཁོར་ལོ་དང་རལ་གྲི་དང་སྔར་བཤད་པའི་རལ་གྲི་ལ་སོགས་པ་ཡོངས་སུ་གྱུར་པ་ལས་ཀྱང་དེ་ཁོ་ན་བཞིན་དུ་འཇམ་པའི་དབྱངས་ [192b.4]རྣམ་པར་བསྒོམ་པར་བྱས་ལ། དེའི་མདུན་དུ་ཡང་ཡི་གེ་ར་ལས་བྱུང་བའི་རལ་གྲི་དབྱངས་ཡིག་དང་པོ་ལས་བསྐྱེད་པའི་ཟླ་བ་ལ་གནས་པར་བསྒོམ་པར་བྱའོ། །རལ་གྲི་ལ་སོགས་པ་ཡོངས་སུ་སྨིན་པ་ལས་གཞོན་ནུ་དྲ་བ་བཅོམ་ལྡན་འདས་ཀྱི་གཟུགས་སུ་བལྟ་བར་བྱའོ། །དེ་བཞིན་ [192b.5]དུ་རྒྱབ་ཏུ་ལྔ་པའི་ཡི་གེ་དང་པོ་ལས་དེ་ཁོ་ན་ལས་ལྟར་ཟླ་བའི་འོད་དོ། །དེ་ཁོ་ན་བཞིན་དུ་ཡི་གེ་ཙ་ལས་སྐྲ་ཅན་མ་ནུ་མ་རྒྱས་པས་རྣམ་པར་མཛེས་པ་ནི་མགོན་པོའི་གཟུགས་སུ་སྟེ་གཡས་སུའོ། །གཡོན་དུ་ཡང་ཉེ་བའི་སྐྲ་ཅན་མ་སྟེ། ཡི་གེ་ན་ལས་དེ་ཁོ་ན་བཞིན་དུའོ། །ཐམས་ཅད་ [192b.6]ཀྱང་རང་གི་སྙིང་གའི་ཟླ་བ་ལ་རང་རང་གི་ས་བོན་ལ་གནས་པར་རྣམ་པར་བསམ་པར་བྱའོ། །དེ་ནས་གཙོ་བོའི་སྙིང་གའི་ས་བོན་ལས་རྣམ་པར་གྱུར་པས་ཀྱང་སྤྱན་དྲངས་པ་དང་ཡེ་ཤེས་སེམས་དཔའ་དང་ལྷན་ཅིག་གཅིག་ཏུ་བྱ་བ་དང་། འཁོར་ལོ་མྱུར་དུ་འཁོར་བ་དང་ཟླ་བ་ལ་གནས་པའི་ལྷ་ [192b.7]བཞི་དང་བཅས་པ་ཉིད་ཀྱང་བརྟན་པ་དང་དག་གོ། །རང་བཞིན་ལྷག་མ་མ་ལུས་པ་སྤྲོ་བ་དང་བསྡུ་བ་ཡང་བསྒོམ་པར་བྱ་བའོ། །བསམ་གཏན་གྱིས་དུབ་པར་གྱུར་ན་ནི་སྔགས་བཟླས་པར་བྱ་བའོ། །དེ་ལ་གསང་སྔགས་ཀྱི་རྒྱལ་པོ་ནི་འདི་ཡིན་ཏེ། ཨ་ར་པ་ཙ་ན་དྷཱིཿཞེས་བྱ་བའོ། །འཇམ་ [193a] [193a.1]དཔལ་འཕྲལ་དུ་ཉམས་མྱོང་བའི། །སྒྲུབ་ཐབས་གང་བྱས་བསོད་ནམས་ནི། །བདག་ལ་བྱུང་དེས་འཇིག་རྟེན་ཡང་། །རྟག་ཏུ་འཇམ་དབྱངས་མཚུངས་པར་ཤོག །འཕྲལ་དུ་ཉམས་སུ་མྱོང་བའི་སྤྲོས་པ་མེད་པའི་སྒྲུབ་ཐབས་སོ། །ཨ་བྷ་ཡའི་ཞལ་སྔ་ནས་དགེ་སློང་ [193a.2]ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3175}༄༅༅། །རྒྱ་གར་སྐད་དུ། ཨུ་མ་ན་ཡཻ་བི་ཥེཿ། བོད་སྐད་དུ། གདམས་ངག་གི་ཁྱད་པར། ས་བོན་ལས་ནི་འོད་ཟེར་སྤྲོ་བྱ་ཞིང་། །དེ་ནས་འོད་ཟེར་རྔུབ་པའི་དབུགས་ཀྱིས་སོ། །དབུགས་འབྱུང་སོགས་ལས་ཡེ་ཤེས་ [193a.3]སེམས་དཔའ་ནི། །ས་བོན་ལས་དྲངས་ལེགས་པར་བསྡུ་བར་བྱ། །ས་བོན་ལས་སྤྲོ་འོད་ནི་ཀུན་བསྡུས་ལ། །ཡེ་ཤེས་སེམས་དཔའ་ལ་སོགས་ངལ་གསོ་ཞིང་། །འབྱུང་དང་རྔུབ་པ་དག་ནི་རིམ་པ་བཞིན། །དབུགས་གནས་བློ་ནི་བརྟན་པ་ཉིད་བྱས་ཏེ། །ཟླ་བའི་གཟུགས་ཀྱི་སྟེང་ [193a.4]གནས་རལ་གྲི་ཟླ་བ་ས་བོན་མཆོག་ལྡན་པ། །རིམ་གྱིས་རྟོགས་པ་ཡོངས་སུ་འབྱེལ་གྱུར་ཞུ་བའི་བདག་ཉིད་བདག་རིག་ཅིང་། །དེ་རྗེས་ལ་ཡང་བློ་གྲོས་ཕུང་པོ་འཇམ་པའི་དབྱངས་སོགས་གཟུགས་ཡིན་ནོ། །བློ་དམན་ལ་ནི་འཁོར་ལོས་སྒྱུར་སོགས་ཐར་པ་རབ་ཏུ་སྦྱིན་པའང་ཡིན། ། [193a.5]ཟླ་བ་ས་བོན་རལ་གྲིའི་ཆང་ཟུངས་དེར། །ཟླ་བའི་ས་བོན་ངེས་པར་འོད་འཕྲོ་བའི། །འོད་ཀྱིས་བྱས་པའི་སྤྲོ་དང་བསྡུ་བར་ནི། །ལྷ་ལྔ་པོ་རྣམས་བསམ་པར་བྱ་བ་ཡིན། །ལྷ་ལྔའི་ཁྱད་པར་གྱི་གདམས་ངག་ཨ་བྷ་ཡའི་ཞལ་སྔ་ནས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། །། [193a.6]{T3176}༄༅༅། །རྒྱ་གར་སྐད་དུ། བཛྲཱ་ནཾ་ཀ་སཱ་དྷ་ནཾ། །བོད་སྐད་དུ། རྡོ་རྗེ་ལུས་མེད་ཀྱི་སྒྲུབ་ཐབས། སྔར་བཤད་པའི་ཆོ་གའི་རིམ་པས་སྟོང་པ་ཉིད་བསྒོམས་པའི་རྗེས་ཐོགས་ལ་སྣ་ཚོགས་པདྨ་དང་ཉི་མ་ལ་ས་བོན་གྱི་ཡི་གེ་བཾ་སེར་པོ་ཡོངས་སུ་གྱུར་པ་ལས་རྗེ་བཙུན་འཇམ་དཔལ་རྡོ་རྗེ་ལུས་མེད་དུ་ [193a.7]བདག་ཉིད་སྐད་ཅིག་གིས་མངོན་པར་རྫོགས་པར་བྱ་སྟེ། སྐུ་མདོག་སེར་པོ་ཞལ་གསུམ་པ། ཕྱག་དྲུག་པ་རལ་པ་དང་ལྡན་པ། ལོ་བརྒྱད་གཉིས་ཀྱི་ཆད་སྒེག་བག་དང་ལྡན་པ། ཞབས་གཡས་པ་བསྐུམ་པ་སྟེ། གཡས་ཀྱི་ཕྱག་གསུམ་ན་རལ་གྲི་དང་མདའ་དང་མེ་ལོང་བསྣམས་པའོ། ། [193b] [193b.1]གཡོན་གྱི་ཕྱག་གསུམ་ན་ནི་ཨུཏྤལ་དང་གཞུ་དང་ཤིང་མྱ་ངན་མེད་བསྣམས་པའོ། །ལྷ་རྫས་ཀྱི་རྒྱན་དང་ན་བཟའ་མཛེས་པར་གྱུར་པ་མི་བསྐྱོད་པ་དབུ་རྒྱན་ལ་གནས་པར་བསྒོམས་ལ། སྨྱོ་བའི་སྦྱོར་བས་བསྒོམ་པར་བྱ་བའོ། །དེ་ལྟར་ཡང་ལྕགས་ཀྱུས་མཁལ་ཁུང་ཕུག་ལ་ཤིང་མྱ་ངན་མེད་ཀྱི་སྙིང་ [193b.2]ལ་གཏོལ་བར་བྱའོ། །རལ་གྲིས་ནི་བསྡིགས་པར་བྱ་ཞིང་བསྒྲུབ་བྱ་ལ་མེ་ལོང་གིས་བསྟན་པར་བྱ་བའོ། །དེ་ནས་ཨུཏྤལ་ལས་རྐང་པ་རྣམ་པར་བཅིངས་ལ་སྐྲ་གྲོལ་བ་མྱོས་ཤིང་བསྐམ་པར་གྱུར་པ་དྲང་བར་བྱ་བ་ཡིན་ནོ། །ཨོཾ་ཆེ་གེ་མོ་ཁུག་མཉྫུ་གྷོ་ཥ་ཧྲཱིཿཛཿཞེས་བྱའོ། །རྡོ་རྗེ་ལུས་མེད་ཀྱི་སྒྲུབ་ [193b.3]ཐབས་རྫོགས་སོ།། {T3177}༄༅༅། །རྒྱ་གར་སྐད་དུ། བཛྲ་ནཾ་ཀ་མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་རྡོ་རྗེ་ལུས་མེད་ཀྱི་སྒྲུབ་ཐབས། སྡིག་པ་བཤགས་པ་ལ་སོགས་པ་སྔར་བཞིན་དུ་བྱས་ལ། སྟོང་པ་ཉིད་བསྒོམས་པའི་རྗེས་སུ་ཡི་གེ་ཧཾ་ལས་བྱུང་བའི་མདའ་ལྟོངས་པ་དང་ལྡན་ [193b.4]པའི་གཞུ་ཡི་གེ་ཧཾ་ཆང་ཟུངས་ཀྱི་དཀྱིལ་ན་གནས་པར་བསྒོམ་པར་བྱའོ། །དེ་དག་ཡོངས་སུ་གྱུར་པ་ལས་ནི་རྡོ་རྗེ་ལུས་མེད་ཅེས་བྱ་བའི་འཇམ་པའི་དབྱངས་ཏེ། མདོག་སེར་པོ་ཕྱག་དྲུག་པ། རྩ་བའི་ཕྱག་གཉིས་ཀྱིས་ནི་ཨུཏྤལ་དམར་པོ་ལས་བྱས་པའི་རྣ་བའི་རྩར་ཁེངས་པར་འགེངས་པའི་གཞུ་ [193b.5]མདའ་དང་བཅས་ནས་བསྣམས་པའོ། །གཡས་པ་གཉིས་ཀྱིས་ནི་རལ་གྲི་དང་མེ་ལོང་བསྣམས་པའོ། །གཡོན་པ་གཉིས་ཀྱིས་ནི་ཨུཏྤལའི་མཆོག་མེ་ཏོག་འདབ་མ་དང་ལྡན་པའི་མྱ་ངན་མེད་དམར་པོ་བསྣམས་པའོ། །རལ་པ་དང་ལྡན་པའི་ཅོད་པན་ལ་མི་བསྐྱོད་པས་བྱིན་གྱིས་བརླབས་པའོ། ། [193b.6]ཞབས་གཡས་བསྐུམ་པ། ལོ་བཅུ་དྲུག་པའི་ཚོད་ཀ་འཇོ་སྒེག་ཆེན་པོ་དང་ལྡན་པའི་སྐུར་བལྟ་བར་བྱའོ། །ཡང་ན་མེ་ལོང་དང་མྱ་ངན་མེད་ཀྱི་ཡལ་ག་བསྣམས་པའི་ཕྱག་གཉིས་དང་བྲལ་བའི་ཕྱག་བཞི་པ་བསྒོམ་པར་བྱའོ། །དེ་ནས་ཡེ་ཤེས་སེམས་དཔའ་དང་གཅིག་ཏུ་བྱས་ལ། ཨོཾ་མཉྫུ་གྷོ་ཥ་ [193b.7]པྲི་ཤྲཱི་ཛཿབྱ་བའི་སྔགས་འདི་བཟླས་པར་བྱ་སྟེ། འབུམ་གྱིས་ས་གསུམ་ན་གནས་པ་ཡང་ཅི་བགྱི་བ་ཉིད་དུ་བྱེད་དོ། །གལ་ཏེ་ཡང་འགའ་ཞིག་དགུག་པར་འདོད་ན་དེའི་ཚེ་འདས་མ་ཐག་ཏུ་བཤད་པའི་བསྒོམ་པ་བྱས་ལ། དེའི་ང་རྒྱལ་གྱིས་བརྟན་པར་གྱུར་པའི་ཡིད་ཀྱིས་རང་གི་སྙིང་གར་པདྨ་ [194a] [194a.1]དམར་པོ་འདབ་མ་བཅུ་དྲུག་པ་ལྟེ་བར་ཡུ་བ་བབས་པ་དང་བཅས་ཤིང་རྩ་བ་དང་ལྡན་པ་དམིགས་པར་བྱ་བའོ། །དེའི་ཡང་ཡུ་བའི་རྩ་བ་ཡི་གེ་ཧཱུཾ་དམར་པོར་བལྟས་ལ། དེའི་འདབ་མ་རྣམས་ལ་ནི་གཡས་སྐོར་དུ་དབྱངས་ཡིག་དམར་པོ་བཅུ་དྲུག་རྣམ་པར་བསྒོམ་པར་ [194a.2]བྱའོ། དེའི་ཟེའུ་འབྲུའི་སྟེང་དུ་ནི་ཇི་ལྟར་རིགས་པར་ཉི་མ་ཟླ་བ་འདི་དག་གི་དཀྱིལ་འཁོར་ཁ་དོག་དམར་པོ་སྟེ། དེ་དག་གི་དབུས་སུ་ཧྲཱིཿདམར་པོ་གཉིས་ཀྱི་སྙིང་པོར་བྱས་པའི་འཆད་པར་འགྱུར་བའི་རང་གི་སྔགས་བལྟ་བར་བྱའོ། །དེ་ནས་དབུགས་དེ་དག་ལས་ཤིན་ཏུ་དགའ་ཞིང་རྒྱས་པའི་བུང་ [194a.3]བ་དམར་པོ་རྣམས་རྣམ་པར་བསྒོམས་ལ། རང་གི་སྔགས་ལས་སྤྲོ་བ་དང་བསྡུ་བའི་ཚོགས་ཀྱིས་ཕྱོགས་བཅུ་དགང་བར་བྱ་ཞིང་ཇི་སྲིད་དུ་འཇིགས་པར་བྱ་བའི་བུད་མེད་ཀྱི་གནས་སུ་སོང་ལ། དེ་རླུང་གི་དཀྱིལ་འཁོར་གྱི་སྟེང་དུ་བསྐྱོན་ལ་འོད་ཟེར་གྱི་རང་བཞིན་ཉིད་ཀྱི་ཞགས་པས་རྐེ་ལེགས་པར་བཅིངས། [194a.4]ཤིང་ཆོས་འབྱུང་ལྕགས་ཀྱུས་དམ་པར་ཕིག་སྟེ། མདུན་དུ་ཐལ་མོ་སྦྱར་བར་བྱས་པས་ཡང་དག་པར་དགུག་པར་བྱ་ཞིང་། མེའི་ཟོ་ཆུན་གྱི་དབུས་སུ་ཕྱུང་ལ་ཡི་གེ་ཧཱུཾ་དམར་པོས་ཁྱབ་པར་བྱས་པའི་མིག་དང་སྙིང་དང་ཡན་ལག་རྣམས་ཐམས་ཅད་རྣམ་པར་བསྒོམ་པར་བྱ་བའོ། །དེ་ནས་ཡང་ [194a.5]དེའི་སྙིང་གར་དབྱངས་ཡིག་བཅུ་དྲུག་དང་བཅས་ཤིང་ཡི་གེ་ཧཱུཾ་དང་ལྡན་པའི་ཡུ་བ་ཅན་འདབ་མ་བཅུ་དྲུག་པ་བལྟ་བར་བྱ་སྟེ། འོན་ཀྱང་མདོག་ངན་པར་རོ། །དེའི་དཀྱིལ་དུ་ཡི་གེ་ཧྲཱིཿའི་དབུས་སུ་ཆུད་པའི་མིང་གི་ཡི་གེ་བསྒོམ་པར་བྱའོ། །དེ་ནས་རང་གི་སྔགས་ཀྱི་ཡི་གེ་སྤྲོས་པའི་གཟི་བརྗིད་ [194a.6]ཀྱིས་ཤིན་ཏུ་དམར་ཞིང་རྣོ་ལ་ཕྲ་བའི་ལྕགས་ཀྱུ་པདྨའི་ཡུ་བ་ལ་གནས་པའི་ཡི་གེ་ཧཱུཾ་གི་འོད་ཟེར་གྱི་སྟེང་དུ་བསྐྱོད་ནས་འཕེན་པར་བྱེད་པ་བུང་བའི་ཚོགས་ཀྱིས་ཕྱི་བཞིན་རྗེས་སུ་འབྲང་བར་གྱུར་པས་རང་ཉིད་ཀྱི་སྣ་བུག་གཡས་པ་དང་ཅིག་ཤོས་ཀྱི་བུ་ག་ནས་ངེས་པར་བྱུང་ནས་བསྒྲུབ་ [194a.7]བྱ་མ་ཡིན་པ་བསྒྲུབ་བྱའི་སྣ་བུག་གི་བུ་ག་ནས་དེའི་སྙིང་ལ་རབ་ཏུ་ཞུགས་ཏེ། ལྕགས་ཀྱུ་དེ་ནི་དེའི་མིང་གི་ཡི་གེ་ཀུན་ནས་འདྲེན་པར་བྱེད་ཅིང་གནས་སོ། །བུང་བ་དེས་ཀྱང་པདྨའི་རྫིང་བུ་དེ་རྩ་བ་ནས་བཤིག་ཅིང་རྙིངས་པར་བྱས་ནས་རང་དབང་དུ་གྱུར་པས་ཅུང་ཟད་སྐེམ་པར་བྱེད་པ་ཡིན་ནོ། །འདི་ནི་ཡུན་ཤིན་ཏུ་བརྟན་པར་ [194b] [194b.1]བལྟ་བར་བྱ་བའོ། །དེ་ནས་དེ་ཁོ་ན་བཞིན་དུ་དབུགས་དེས་བསྐྱོད་པའི་ལྕགས་ཀྱུ་དང་བུང་བ་དེ་དག་ཀྱང་རང་ཉིད་ཀྱི་དབུགས་ཀྱིས་དེའི་སྣ་བུག་གཡས་པའི་བུ་གའི་ལམ་དུ་ཞུགས་པར་བལྟས་ལ། སླར་ཡང་དབུགས་ཀྱི་རླུང་གིས་དགུག་པར་བྱ་ཞིང་ལྕགས་ཀྱུ་དང་བུང་བས་ཡང་དག་པར་དྲངས་ལ་རང་ [194b.2]ཉིད་ཀྱི་སྣ་བུག་གཡོན་པར་ལེགས་པར་བཅུག་སྟེ། དེའི་མིང་གི་ཡི་གེ་རང་གི་སྙིང་གི་སྔགས་ཀྱིས་དམ་པར་མནན་ཞིང་། དེའི་དབྱངས་ཡིག་རྣམས་ཀྱང་བཏབ་ལ་སོ་སོ་ལ་བུང་བའི་མཆོག་རྣམས་ཀྱིས་དབང་དུ་བྱས་པར་རྣམ་པར་བསམ་པར་བྱ་བའོ། །རིམ་པ་འདི་ཉིད་ཀྱིས་རང་གི་རྣམ་པར་ཤེས་པ་ [194b.3]དང་། དེའི་རྣམ་པར་ཤེས་པ་གཅིག་ཏུ་བྱས་པར་ཡང་བལྟ་བའོ། །དེ་ནས་དེའི་ནུ་མ་ཨུཏྤལ་དམར་པོ་ལས་བྱས་པའི་མདའ་རྣོན་པོས་ཕུག་ཅིང་ཆགས་པས་བརྒྱལ་བར་གྱུར་པར་ཡང་བལྟས་ཤིང་། ལྕགས་ཀྱི་ལུ་གུ་རྒྱུད་ཀྱི་གཞུས་དེའི་རྐང་པ་གཉིས་དམ་པོར་བཅིངས་ལ། རང་ཉིད་ཀྱིས་ [194b.4]བཟུང་བའི་ཨུཏྤལའི་རྩ་བའི་བདག་ཉིད་ཀྱི་ཞགས་པས་སྐེ་བཅིངས་ཤིང་ངེས་པར་དྲངས་ཏེ། རང་ཉིད་ཀྱི་རྐང་པའི་དྲུང་དུ་བསྐྱེལ་ལ་མྱ་ངན་མེད་ཀྱིས་སྙིང་བཙོག་པར་བྱ་ཞིང་མངོན་པའི་ང་རྒྱལ་མེད་པར་བྱས་ནས་རལ་གྲིས་བསྡིགས་ཤིང་སྐྱབས་གཞན་མེད་པར་བྱས་ལ། ཡང་སྐྲ་ཞིག་ཅིང་གོས་ [194b.5]མེད་པ་ཤིན་ཏུ་ཆགས་པས་བརྒྱལ་བའི་བདག་ཉིད་ཀྱི་གནས་སྐབས་ནི་མེ་ལོང་གིས་སོ། །ཤིན་ཏུ་འཇིགས་པར་གྱུར་བར་བྲལ་བར་བྱས་ལ་ཤིན་ཏུ་དད་པར་བསྟན་ཏེ། རང་གིས་རིག་པར་བདག་ཉིད་རྗེས་སུ་ཆགས་པར་བྱའོ། །ཨོཾ་ཆེ་གེ་མོ་ཁུག་ཅིག་མཉྫུ་གྷོ་ཥ་ཤྲཱི་ཛཱཿཞེས་བྱ་བའི་རང་ཉིད་ [194b.6]ཀྱི་སྔགས་མིང་དང་བཅས་པ་རྩེ་གཅིག་པའི་ཡིད་ཀྱིས་བཟླས་པར་བྱ་བའོ། །བཤད་མ་ཐག་པའི་རིམ་པ་དེ་ལྟར་གྱིས་དཀར་པོའི་ཚེས་གཅིག་ནས་བརྩམས་ཏེ་ཇི་སྲིད་དུ་བཅུ་བཞིའི་བར་ཁྲི་ཕྲག་ཙམ་བཟླས་པར་བྱའོ། །ཡང་ཟླ་བ་ཉ་ལ་ནི་མཆོད་པ་ཆེན་པོ་བྱས་ལ་ནམ་ཡོལ་ག་བཟླས་པར་བྱའོ། ། [194b.7]དེ་ནས་ནམ་མཁའ་བྱུང་བ་དང་དེ་ངེས་པར་འོང་བར་འགྱུར་རོ། །འོང་ནས་ཀྱང་ཕྱག་རྒྱ་ཆེན་པོ་ལ་སོགས་པ་གྲུབ་པ་དོན་དུ་གཉེར་བ་དང་རང་ཉིད་ཀྱི་ལྷ་མཆོད་པའི་བསམ་པས་དེ་ཇི་ལྟར་བདེ་བར་ཉེ་བར་ལོངས་སྤྱོད་པར་བྱ་བའོ། །འཇམ་དཔལ་རྡོ་རྗེ་ལུས་མེད་ཀྱི་སྒྲུབ་ཐབས་རྫོགས་སོ།། །། [195a] [195a.1]ཨ་བྷ་ཡའི་ཞལ་སྔ་ནས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3178}༄༅༅། །རྒྱ་གར་སྐད་དུ། ཝཱི་གཱི་ཤྭ་ར་སཱ་དྷ་ནཾ། བོད་སྐད་དུ། ངག་གི་དབང་ཕྱུག་གི་སྒྲུབ་ཐབས། །དེ་ཁོ་ན་བཞིན་དུ་སྟོང་པ་ཉིད་དུ་ལ་སོགས་པ་བསྒོམས་པའི་རྗེས་ལ་སྣ་ [195a.2]ཚོགས་པདྨའི་སྟེང་དུ་ཟླ་བ་ལ་ཡི་གེ་ཨ་དཀར་པོ་ལས་བྱུང་བའི་དཔལ་ཆོས་ཀྱི་དབྱིངས་ཀྱི་ངག་གི་དབང་ཕྱུག་སྟེ། སྐུ་ཐམས་ཅད་དཀར་བ་ཞལ་བཞི་པ། ཕྱག་བརྒྱད་པ། སངས་རྒྱས་ལྔ་དང་རིན་པོ་ཆེའི་དབུ་རྒྱན་དང་ལྡན་པ། ལྷ་རྫས་ཀྱི་རྒྱན་དང་ན་བཟའ་མངའ་བ། སྒེག་པ་ལ་ [195a.3]སོགས་པའི་ཉམས་དང་ལྡན་པའོ། །ཕྱག་གཉིས་ཆོས་བཤད་ཀྱི་ཕྱག་རྒྱས་མཚོན་པ་རལ་གྲི་དང་མདའ་དང་རྡོ་རྗེ་ནི་གཡས་པའི་ཕྱག་གསུམ་ནའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་། གཞུ་དང་རྡོ་རྗེ་དྲིལ་བུ་ནི་གཡོན་པའི་ཕྱག་གསུམ་ན་སྟེ། རྡོ་རྗེ་སྐྱིལ་མོ་ཀྲུང་དུ་བདག་ [195a.4]ཉིད་རྫོགས་པར་བྱས་ལ། སྙིང་གར་ཟླ་བ་ལ་ཧཱུཾ་མཐིང་ནག་ལས་བྱུང་བའི་ས་བོན་དང་བཅས་པའི་རྡོ་རྗེ་ནི་ཕྱག་རྒྱ་ཆེན་པོའི་རང་བཞིན་ནོ། །སྨིན་མཚམས་སུ་ཡི་གེ་ཏཾ་སེར་པོ་ལས་ས་བོན་དང་བཅས་པའི་རིན་པོ་ཆེ་སྟེ་ཆོས་ཀྱི་ཕྱག་རྒྱའི་རང་བཞིན་ནོ། །མགྲིན་པར་ཡི་གེ་ཧྲཱིཿདམར་པོ་ [195a.5]ལས་བྱུང་བའི་ས་བོན་དང་བཅས་པའི་པདྨ་ནི་དམ་ཚིག་གི་ཕྱག་རྒྱའི་རང་བཞིན་ནོ། །སྤྱི་བོར་ཡི་གེ་ཨཱཿལྗང་གུ་ལས་བྱུང་བའི་ས་བོན་དང་བཅས་པའི་སྣ་ཚོགས་རྡོ་རྗེ་ནི་ལས་ཀྱི་ཕྱག་རྒྱའི་རང་བཞིན་ནོ། །ཕྱག་རྒྱ་བཞི་དང་ལྡན་པ་འདིར་བདག་ཉིད་རྣམ་པར་བསྒོམས་ལ། ཨོཾ་ཧཱུཾ་ཧྲཱིཿ [195a.6]བྷ་ག་བཱན་ཛྙཱ་ན་མཱ་རྟྟི་བཱ་གཱི་ཤྭ་ར་མ་ཧཱ་ཝཱ་ཙ་སརྦ་དྷ་རྨཱ་ག་ག་ནཱ་མ་ལ་སུ་བ་རི་ཤུདྡྷ་དྷ་རྨ་དྷཱ་ཏུ་ཛྙཱ་ན་གརྦྷ་ཨཿབྱ་བའི་སྔགས་འདིས་བྱིན་གྱིས་བརླབ་པར་བྱའོ། །དེ་ནས་རྡོ་རྗེ་བཅིངས་ལ་གུང་མོ་གཉིས་ཀྱི་ཚིགས་གསུམ་པ་བཅག་པས་རལ་གྲིའི་རྣམ་པ་ལྟ་བུར་གཟུང་བར་བྱ་ཞིང་མཛུབ་མོ་གཉིས་བསླང་སྟེ། [195a.7]མཐེ་བོང་གཉིས་ཀྱིས་སྟོང་པ་བཀག་ལ་གཟུང་བར་བྱ་བ་འདི་ནི་དམ་ཚིག་གི་ཕྱག་རྒྱའོ། །དེ་ནས་རང་གི་ལྕེ་ལ་ཟླ་བ་ལ་གནས་པའི་ཡི་གེ་ཧྲཱིཿདམར་པོ་ས་བོན་གྱིས་བྱིན་གྱིས་བརླབས་པ་བསྒོམས་ལ་ཁྲོ་བོའི་ཚིག་གིས་སྔགས་བཟླས་པར་བྱ་བའོ། །དེ་ལ་བཟླས་པའི་སྔགས་ནི་འདི་ཡིན་ཏེ། ཨོཾ་བཛྲཱ་ [195b] [195b.1]ཏི་ཀྵྞ་དུཿ ཁཙྪེད་པྲ་ཛྙཱ་ན་མུརྟ་ཡེ། ཛྙཱ་ན་ཀཱ་ཡ་བཱ་གཱི་ཤྭ་ར་ཨ་ར་པ་ཙ་ན་མཿགྲངས་བརྒྱ་རྩ་བརྒྱད་དུ་མཚན་བརྗོད་པས་ཀྱང་མཚན་ཡང་དག་པར་བརྗོད་པ་དུས་ཇི་ལྟ་བར་བཀླག་པར་བྱ་བ་ཡིན་ནོ། །ཆོས་ཀྱི་དབྱིངས་ཀྱི་ངག་གི་དབང་ཕྱུག་གི་སྒྲུབ་ཐབས་ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་ [195b.2]པའོ།། {T3179}༄༅༅། །རྒྱ་གར་སྐད་དུ། བཱ་གཱི་ཤྭ་ར་སཱ་དྷ་ནཾ། བོད་སྐད་དུ། ངག་གི་དབང་ཕྱུག་གི་སྒྲུབ་ཐབས། །སྔར་བཤད་པའི་རིམ་པས་སྟོང་པ་ཉིད་བསྒོམས་པའི་རྗེས་ཐོགས་པདྨ་དང་ཟླ་བ་ལ་གནས་པའི་ཡི་གེ་ཧོཿདམར་པོ་ཡོངས་སུ་གྱུར་པ་ལས་ཞབས་བཞི་ཕྱག་བརྒྱད་པ་སྟེ། རྩ་བའི་ [195b.3]ཞལ་ནི་དམར་སྐྱའོ། །ལྷོ་ནི་གུར་གུམ་དང་སྐྱ་རེངས་ཀྱིའོ། །ནུབ་ནི་པདྨ་རཱ་གའིའོ། །བྱང་ནི་དམར་སེར་རོ། །གཉིས་ཀྱིས་ནི་མདའ་གཞུ་བསྣམས་པའོ། །གཞན་གཉིས་ཀྱིས་ནི་ཞགས་པ་དང་ལྕགས་ཀྱུ་བསྣམས་པའོ། །གཞན་གཉིས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་བ་ཏི་དང་རལ་གྲི་བསྣམས་པའོ། ། [195b.4]དེ་བཞིན་དུ་གཞན་གཉིས་ཀྱིས་ནི་རྡོ་རྗེ་དང་དྲིལ་བུ་བསྣམས་པའོ། །ཆགས་པ་ཆེན་པོའི་འཇོ་སྒེག་གི་རོ་མྱོང་བའི་འོད་ཟེར་གྱིས་མཆོག་ཏུ་འབར་བ། རོལ་པས་སྣ་ཚོགས་པདྨ་དང་ཟླ་བའི་གདན་ལ་བཞུགས་པ། ལྷའི་ན་བཟའ་བརྒྱད་དང་ལྡན་པ་རོལ་པ་དང་ཅོད་པན་ལ་སྣང་བ་མཐའ་ཡས་དང་ལྡན་ [195b.5]པའོ། །སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་པའི་སེམས་དཔའ་རང་དབང་གིས་ལེགས་པར་གཞུག་ལ། སྔགས་བཟླས་པར་བྱ་བའོ། །ཨོཾ་མ་ཧཱ་རཱ་ག་ཡ་སརྦ་སཏྭ་ན་ཧོཿཞེས་བྱ་བ་འདི་ནི་ཆོས་ཀྱི་དབྱིངས་ཀྱི་ངག་གི་དབང་ཕྱུག་གི་སྒྲུབ་ཐབས་ལས་དབང་དུ་བྱ་བའི་ཆོ་གའོ། །ཚུལ་ [195b.6]ཁྲིམས་རྒྱལ་མཚན་གྱིས་བསྒྱུར་བའོ།། {T3180}༄༅༅། །རྒྱ་གར་སྐད་དུ། བཱ་གཱི་ཤྭ་ར་སཱ་དྷ་ནཾ། བོད་སྐད་དུ། ངག་གི་དབང་ཕྱུག་གི་སྒྲུབ་ཐབས། དེ་ཁོ་ན་ཉིད་བཞིན་དུ་སྟོང་པ་ཉིད་བསྒོམས་པའི་རྗེས་ཐོགས་ལ་ཆུའི་དཀྱིལ་འཁོར་ལ་པདྨ་དཀར་པོ་འདབ་མ་བརྒྱད་པའི་ལྟེ་བར། ཆོས་ [195b.7]ཐམས་ཅད་ནི་འཆི་བ་ལས་ཀུན་ནས་བཟླས་པར་བྱའོ། །ཞེས་ལྷགས་པར་མོས་པར་བྱས་པས་ཟླ་བ་ལ་གནས་པའི་ཡི་གེ་ཨཾ་དཀར་པོ་ཡོངས་སུ་གྱུར་པ་ལས། དཀར་པོ་ཞལ་གཅིག་ཕྱག་གཉིས་པ་རྡོ་རྗེ་སྐྱིལ་མོ་ཀྲུང་གི་སྟེང་ན་ཕྱག་མཉམ་པར་གཞག་པའི་ཕྱག་རྒྱ་མཛད་ཅིང་། གཞོན་ནུའི་རྒྱན་མ་ [196a] [196a.1]ལུས་པ་རྣམས་ཀྱིས་བརྒྱན་པ། ཟུར་ཕུད་ལྔ་དང་ལྡན་པའི་རྗེ་བཙུན་འཇམ་དཔལ་གྱི་སྐུར་བདག་ཉིད་སྐད་ཅིག་གིས་རྫོགས་པར་བྱས་ཏེ། རང་གི་སྙིང་གའི་ཟླ་བ་དང་པདྨའི་སྟེང་དུ་ཡི་གེ་ཁཾ་ལས་བྱུང་བའི་དུང་ངོ་། །དེའི་དབུས་སུ་ཨོཾ་བཛྲ་ཧཱ་རཾ་ཞེས་བྱ་བས་རྡོ་རྗེ་ལྕེའོ། །ལྕེའི་སྟེང་དུ་ [196a.2]པདྨ་དམར་པོའོ། དེའི་སྟེང་དུ་སངས་རྒྱས་སྣང་བ་མཐའ་ཡས་རྣམ་པར་བསམས་ལ། ཁ་འོག་ཏུ་བལྟས་ནས་བདུད་རྩི་འབབ་པའི་ཡི་གེ་བཾ་དཀར་པོ་རང་ཉིད་ཀྱི་རྐན་གྱི་ཕྱོགས་སུ་བསྒོམ་པར་བྱའོ། །ཨོཾ་བཱ་ཀྱེ་དཾ་ན་མཿབྱ་བ་ནི་བཟླས་པའི་སྔགས་སོ། །འདི་ནི་ཕན་ཡོན་ཆེན་པོ་དང་ལྡན་པ་སྟེ། [196a.3]ཆོས་ཀྱི་དུང་གི་ཏིང་ངེ་འཛིན་ཐོབ་པར་བྱེད་པ་ཆོས་ཀྱི་དབྱིངས་ཀྱི་ངག་གི་དབང་ཕྱུག་གི་སྒྲུབ་ཐབས་སོ།། །།ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3181}༄༅༅། །རྒྱ་གར་སྐད་དུ། བཱ་གཱི་སཱ་དྷ་ནཾ། བོད་སྐད་དུ། ངག་གི་སྒྲུབ་ཐབས། སྐྱོན་གྱི་ [196a.4]དྲ་བ་འཇོམས་མཛད་དཔལ་ལྡན་རྡོ་རྗེ་ཆོས། །ངག་གི་མཎྜལ་འོད་ཟེར་དྲ་བ་སྦྲོ་མཛད་པའི། །མ་ལུས་རྫོགས་སངས་རྒྱས་རྣམས་གསུང་གི་ངོ་བོ་པ། །ཡང་དག་ཕྱག་འཚལ་ངག་གི་སྒྲུབ་ཐབས་བདག་གིས་བརྗོད། །ངོ་བོ་ཉིད་ཀྱི་རང་བཞིན་རྣམ་པར་དག་པའི་སྔགས། །རབ་བརྗོད་བརྩོན་ [196a.5]འགྲུས་རླུང་གི་འགྱིད་བག་དང་ལྡན་པ། །སྒྱུ་མ་སྨིག་སྒྱུ་ཆུ་ཟླ་དང་མཚུངས་པར་གྱུར་པ། །མ་ལུས་འཇིག་རྟེན་འདི་ནི་རྣམ་པར་བསྒོ་མ་བྱས་ལ། །ཐམས་ཅད་རྣམ་དག་ངོ་བོ་བཾ་ཡིག་ས་བོན་ལས། །ལེགས་བྱུང་སྣ་ཚོགས་པདྨ་རྣམ་པར་བསྒོ་མ་བྱ་ཞིང་། །ཡི་གེ་ཨཾ་ལས་སྐྱེས་གྱུར་མཐའ་ [196a.6]ཡས་སྣང་བྱེད་པའི། །ཤིན་ཏུ་དག་པའི་ཟླ་བ་ཆ་ཤས་ཀུན་རྫོགས་པ། །གཞན་ཡང་འོད་ཟེར་དྲ་བ་རབ་ཏུ་སྦྲོ་བྱེད་པའི། །ས་བོན་ཡི་གེ་གསང་བ་མཆོག་ཏུ་དག་བྱེད་པ། །སྤྲོས་མེད་དག་རྣམས་རབ་ཏུ་སྦྲོ་བྱེད་རྒྱུ་གཅིག་པུ། །མེ་ཏོགས་བནྡྷུ་ཀ་ཡི་འོད་དང་མཚུངས་པའོ། །ས་བོན་དེ་ལས་ [196a.7]ལེགས་བྱུང་སྐྱོན་དང་བྲལ་གྱུར་པའི། །ཏིང་འཛིན་ཕྱག་རྒྱས་གནས་པའི་ཕྱག་དེ་པདྨ་དང་། །རྡོ་རྗེའི་གདན་བཞུགས་སྙིང་རྗེ་དག་གིས་མངོན་དགྱེས་པ། །འདོད་ཆགས་རྡོ་རྗེ་ཡོངས་སུ་དག་པའི་འདོད་ཆགས་དཔལ། །རྣམ་དག་སངས་རྒྱས་སྤྲིན་ཚོགས་དྲ་བ་བ་སྤུ་ཡི། །ཁོང་ནས་དེས་སྤྲོ་སྐྱེ་ [196b] [196b.1]དགུ་རྣམས་ལ་ཕན་མཛད་པར། །འགྲོ་བ་རྣམས་ནི་ཐམས་ཅད་དག་གི་རང་བཞིན་ཡང་། །ཤིན་ཏུ་རྣམ་དག་བློ་ཡིས་རྣམ་པར་བསྒོམ་བར་བྱ། །འབར་བས་འཇིག་རྟེན་ཐམས་ཅད་མཆོག་ཏུ་སྣང་བྱེད་པའི། །སྙིང་གི་ཟླ་དཀྱིལ་ལ་ནི་རྡོ་རྗེ་དེས་བལྟ་སྟེ། །ཧཱུཾ་ཡིག་མགོན་བྱུང་སྐུ་ནི་ལྔ་ཡི་བདག་ཉིད་ཅན། ། [196b.2]སངས་རྒྱས་སྤྲིན་ཚོགས་རྣམས་ནི་ངེས་པར་འཕྲོ་བ་དང་། །དེ་དབུས་གཙོ་བོ་ལས་འཕྲོ་རྡོ་རྗེའི་གདན་གནས་པའི། །ཡི་གེ་ཆེན་པོ་རྣམས་ཉམས་རྒྱུད་ལ་ཤིན་ཏུ་འབར། །རྒྱས་བྱེད་སྡུག་བསྔལ་རྣམས་ནི་རབ་ཏུ་འཕེལ་བྱེད་པའི། །མུན་པར་སྲིད་གསུམ་ལུས་ཅན་ཀུན་དུ་སྣང་བྱེད་པ། །དེ་བརྗོད་ [196b.3]མཛེས་པའི་འོད་ཟེར་གྱིས་ནི་ཁྱབ་བྱས་པ། །ཉི་མར་དཀྱིལ་འཁོར་དྲི་མེད་དགའ་བ་དམར་ཆགས་པའི། །ཤེས་རབ་མཆོག་གི་ཕོ་ཉ་དགེ་དག་རབ་སྐྱེད་པ། །རྡོ་རྗེའི་རང་བཞིན་ལྕེ་ནི་རྣམ་པར་རྫོགས་བྱས་ཏེ། །དེ་ལྕེའི་ཆ་ནི་ཨུཏྤལ་དམར་ཞིང་རྣོ་བ་ལ། །དེ་ཉིད་རྒྱ་ཆེན་འོད་ཀྱི་ཡིད་འོང་རྣམ་ [196b.4]པར་བསམ། །བདག་ཉིད་གཟི་བརྗིད་ལྡོག་པ་མེད་པའི་བརྩོན་འགྲུས་ཀྱིས། །རྒོལ་པའི་སྤོབས་པའི་མཆོག་ནི་ངེས་པར་གཞོམ་པར་བྱེད། །རྟག་པར་གོམས་པའི་སྟོབས་ལས་བྱུང་བའི་རིག་པ་ཡིས། །ངག་གི་སྒྲུབ་ཐབས་གྲུབ་པ་འདི་ནི་ཉེར་འདོད་པ། །ངར་ངར་ལྐུགས་པ་སྨྲ་བྱེད་རྒྱན་མི་ [196b.5]འཆད་པར་ཡང་། །ངོ་མཚར་བསྟན་བཅོས་རྣམས་ཀྱི་རིག་པའི་རྣལ་འབྱོར་པས། །བདག་ཉིད་དོན་ཆེན་དང་ནི་འགྲོ་བའི་རྒྱུ་མཚན་དུ། །རྨང་བྱུང་བསྟན་ཆོས་དག་ནི་ངེས་པར་བྱེད་པར་འགྱུར། །འདིས་ནི་གཞན་སེམས་འཇུག་པ་ཤེས་པར་འགྱུར་བ་དང་། །འདོད་ཆགས་སོགས་ལྡན་དེ་དང་དེ་ [196b.6]དག་ཉེ་བར་སྤོང་། །ཏིང་ངེ་འཛིན་དེ་ལ་བསྟན་པ་ཉིད་ཀྱིས་འབད་བྱེད་ཅིང་། །ཤིན་ཏུ་ཕྲ་རག་གསལ་བ་ཉིད་དུ་ངེས་བྱས་ན། །མ་ལུས་སངས་རྒྱས་གོ་འཕང་སྐུ་ནི་འཛིན་བྱེད་པར། །འདི་འགྱུར་འོད་ཀྱང་འདི་ལ་རྣམ་པར་དཔྱད་པར་བྱ། །ཡང་དག་ཡང་དག་མུན་པ་དག་ཀྱང་མདུན་གནསཔར། །སྦྱོར་ [196b.7]བ་གོམས་པས་སྐྱེས་བུ་རྣམས་ལ་འགྱུར་བ་ནི། །འདོད་པས་གདུང་རྣམས་བཞིན་ཏེ་འདིར་ནི་དགའ་བ་ཡིས། །སེམས་ཀྱི་རྗེས་འཇུག་རྣལ་འབྱོར་ལ་ནི་བརྩོན་པར་བགྱིས། །འདིས་ནི་བདག་གིས་གང་ཕྱིར་དགེ་བ་དག་ནི་གང་ཐོབ་པ། །དེས་ནི་འགྲོ་ལ་རྒྱལ་བའི་ཕུན་ཚོགས་མཆོག་རྣམས་སྦྱིན་ [197a] [197a.1]བྱེད་དང་། །འཇིགས་པ་དང་བྲལ་མྱ་ངན་ཟུག་རྔུ་རྣམས་ནི་ལེགས་བཏོན་ནས། །ཟླ་བའི་འོད་ཟེར་ཡིད་དགའ་བ་དང་ཉེ་བར་ཉིད་གྱུར་ཅིག །སེམས་ནི་རྒྱུན་མི་འཆད་པར་དགེ་ལ་རྗེས་སུ་ཞེན་པ་དང་། །བླ་མ་མཆོག་བརྙེས་བདེ་བའི་གདམས་ངག་ལ་ནི་རང་གཞོལ་བའི། ། [197a.2]བརྩོན་ལྡན་པདྨ་དག་གི་རིགས་སུ་ཉེ་བར་སྐྱེ་བྱེད་པ། །ཏིང་འཛིན་དབང་གིས་དགའ་བས་བགྲོད་པར་དཔལ་གནས་འཇུག་པར་ཤོག །འགྲོ་བ་བཟང་པོ་བདག་ཉིད་ཀྱང་ནི་ཤིན་ཏུ་འཐོར་འབར་བའི། །མེ་དཔུང་ར་བའི་དཀྱིལ་ན་གནས་པར་གྱུར་པའི་སྐུ་ཉིད་དང་། །བླ་མ་མཆོག་གི་སྙིང་རྗེ་ཐོད་པའི་ཕྲེང་ [197a.3]བ་དང་ལྡན་པའི། །སྤྲིན་ཚོགས་ཀྱིས་གང་རྡོ་རྗེ་ཕུན་ཚོགས་ཐོབ་པར་ཤོག །ངག་གི་སྒྲུབ་ཐབས་བླ་མེད་འདི། །ལེགས་པར་འགྲོ་བ་བཟང་པོས་བྱས། །དེས་ནི་ངག་གི་སྒྲུབ་བྱས་མ། །ངག་གི་དབང་ཕྱུག་ཉིད་དུ་བརྗོད། །ངག་གི་སྒྲུབ་ཐབས་སོ། །ངག་སྒྲུབ་པའི་པཎྜི་ཏ་ཆེན་པོ་ཤཱཀྱ་རཀྵི་ཏ་ལ་ [197a.4]སོགས་པའི་ཞལ་སྔ་ནས་ལེགས་པར་མཉན་ནས་དགེ་སློང་ཚུལ་ཁྲིམས་རྒྱལ་མཚན་གྱིས་དོགས་པ་དང་བྲལ་བར་བསྒྱུར་བའོ།། {T3182}༄༅༅། །རྒྱ་གར་སྐད་དུ། ཝཱ་གཱི་སཱ་དྷ་ནཾ། བོད་སྐད་དུ། ངག་སྒྲུབ་པའི་ཐབས་ཞེས་བྱ་བ། གསུང་རྡོ་རྗེ་ལ་ཕྱག་འཚལ་ལོ། །སྔར་ [197a.5]གྱི་བཞིན་དུ་སྟོང་པ་ཉིད་དུ་རྣམ་པར་བསྒོམས་ལ། ཡི་གེ་པཾ་ལས་བྱུང་བའི་སྣ་ཚོགས་པདྨ་ཡི་གེ་ཨོཾ་ལས་བསྐྱེད་པའི་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་ཧྲཱིཿདམར་པོ་ཡོངས་སུ་གྱུར་པ་ལས་བདག་ཉིད་སྣང་བ་མཐའ་ཡས་ཀྱི་སྐུར་བསྒོམ་པར་བྱ་སྟེ། མཉམ་གཞག་གི་ཕྱག་རྒྱ་དང་ལྡན་པ། [197a.6]ཐུགས་རྗེའི་མདོག་རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །དེ་ནས་སྙིང་གར་ཟླ་བ་ལ་ཡི་གེ་ཧཱུཾ་ལས་བྱུང་བའི་རྡོ་རྗེ་སྔོན་པོ་རྩེ་ལྔ་པ་གྱེན་དུ་ལངས་ཏེ། དེའི་དབུས་ཀྱི་རྩེ་མོའི་སྟེང་དུ་ཡི་གེ་ཨཱཿདམར་པོ་བསྒོམ་པར་བྱ་བའོ། །ལྕེའི་རྩེ་མེ་ལ་ཡང་ཡི་གེ་ཧྲཱིཿདམར་པོའོ། །འདི་ནི་ངག་སྒྲུབ་པའི་ [197a.7]ཐབས་སོ། །མཁས་པ་དག་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3183}༄༅༅། །རྒྱ་གར་སྐད་དུ། མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་གྱི་སྒྲུབ་ཐབས། སྔར་བཞིན་དུ་སྡིག་པ་བཤགས་པ་ལ་སོགས་པའི་རྗེས་ཐོགས་ལ་སྟོང་པ་ཉིད་ [197b] [197b.1]ལེགས་པར་དམིགས་ཏེ། ཟླ་བ་ལ་གནས་པའི་ཡི་གེ་མཾ་གི་ས་བོན་ངེས་པར་རྫོགས་པ་ལས་འཕགས་པ་འཇམ་པའི་དབྱངས་ཏེ། སྐུ་མདོག་སེར་པོ་ཞལ་གཅིག་ཕྱག་གཉིས་པ་ཟུར་ཕུད་ལྔ་དང་ལྡན་པའི་གཞོན་ནུ་རྒྱན་ཐམས་ཅད་ཀྱིས་བརྒྱན་ཅིང་ཕྱག་གཡོན་ན་ཨུཏྤལ་བསྣམས་པ། ཕྱག་གཡས་པ་རོལ་ [197b.2]པས་བསྐྱོད་པ། སེང་གེའི་ཁྲི་ལ་གནས་པའི་པདྨ་དང་ཟླ་བ་ལ་བཞུགས་པར་བདག་ཉིད་སྐད་ཅིག་གིས་བསྒོམ་པར་བྱ་བའོ། །དེ་ནས་སྙིམ་པ་བཅས་ལ་མཛུབ་མོ་གཉིས་དང་སྲིན་ལག་གཉིས་སེན་མོ་ལ་བརྟེན་པར་བྱས་པ་ནི་ཨུཏྤལ་ཁ་བྱེ་བའི་ཕྱག་རྒྱ་བྱ་བ་ཡིན་ནོ། །ཨོཾ་ཝཱ་གཱི་ཤྭ་རི་མུཾ། ཞེས་བྱ་བ་ནི་ [197b.3]བཟླས་པའི་སྔགས་སོ། །རྒྱལ་པོ་ཆེན་པོ་བརྗིད་པ་ཞེས་བྱ་བའི་འཇམ་དཔལ་གྱི་སྒྲུབ་ཐབས་སོ། །མཁས་པ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3184}༄༅༅། །རྒྱ་གར་སྐད་དུ། སིདྷི་ཀ་བཱི་ར་སཱ་དྷ་ནཾ། བོད་སྐད་དུ། དཔའ་བོ་གཅིག་ཏུ་གྲུབ་པའི་སྒྲུབ་ [197b.4]ཐབས། སྔོན་གྱི་ཟླ་ལྟར་གསལ་འབར་བའི། །དང་པོར་འཇམ་རྡོར་ཕྱག་འཚལ་ནས། །མདོར་བསྡུས་གསལ་བའི་མཆོག་གིས་ནི། །དེ་ཡི་སྒྲུབ་ཐབས་བདག་གིས་བཤད། །དང་པོར་རེ་ཞིག་སྔགས་པས་ཡིད་ཀྱི་རྗེས་སུ་མཐུན་པའི་ས་ཕྱོགས་གཙང་མར་བདེ་བའི་སྟན་གྱི་དབུས་སུ་གནས་ལ། [197b.5]རང་གི་སྙིང་གར་ཡི་གེ་ཨ་ལས་ངེས་པར་བྱུང་བའི་ཟླ་བར་རལ་གྲི་དང་བའི་དེ་ཁོ་ན་ཉིད་མཾ་རྣམ་པར་དགོད་པར་བྱ་བའོ། །དེའི་འོད་ཟེར་ནམ་མཁའ་བཀང་བས་བཅོམ་ལྡན་འདས་དང་། རྗེ་བཙུན་བླ་མ་ནམ་མཁའ་ལ་བལྟས་ཏེ། དེ་ནས་བཅོམ་ལྡན་འདས་ཀྱི་མདུན་དུ་གནས་ལ། ཡིད་ཀྱི་རང་བཞིན་གྱི་ [197b.6]མཆོད་པས་འཇམ་དཔལ་དང་། བླ་མ་རྗེ་བཙུན་མཆོད་པར་བྱ་ཞིང་ཕྱག་འཚལ་ལོ། །དགེ་བ་འཕེལ་བར་བྱ་བའི་དོན་དུ་དེ་ནས་སྡིག་པ་བཤགས་པ་ཐམས་ཅད་ནི་བདག་གིས་བཤགས་པར་བགྱིའོ། །བསོད་ནམས་ཐམས་ཅད་ལ་ནི་བདག་ཡི་རང་ངོ་། །དེ་དག་ཀྱང་བླ་ན་མེད་པའི་སངས་རྒྱས་ཀྱི་བྱང་ [197b.7]ཆུབ་ཏུ་བདག་གིས་ཡོངས་སུ་བསྔོ་བར་བགྱིའོ། །བྱང་ཆུབ་ཀྱི་བར་དུ་སངས་རྒྱས་དང་། ཆོས་དང་དགེ་འདུན་ལ་བདག་སྐྱབས་སུ་མཆིའོ། །བདག་གིས་བརྗོད་པའི་བྱང་ཆུབ་ཏུ་སེམས་བསྐྱེད་པར་བགྱི་བའོ། །དེ་ནས་བཅོམ་ལྡན་འདས་གཉུག་མའི་ས་བོན་དང་ལྷན་ཅིག་གྱུར་པར་བལྟས་ལ། [198a] [198a.1]ཁམས་གསུམ་པོ་ཐམས་ཅད་ཀྱི་འགྲོ་བ་དང་གནས་པའི་རྟེན་ཅིང་འབྲེལ་བར་འབྱུང་བ་རྣམས་རྨི་ལམ་དང་། སྒྱུ་མ་དང་གཟུགས་བརྙན་དང་མཚུངས་ཤིང་དཔྱད་མི་བཟོད་པ་ཉིད་དུ་རྣམ་པར་བསམ་པ་སྟེ། རང་བཞིན་གྱིས་འོད་གསལ་བ་ཉིད་ཡིན་པས་བདག་ཉིད་ཡོངས་སུ་ [198a.2]དག་པ་འབའ་ཞིག་ཏུ་བསྒོམ་པར་བྱ་བའོ། །ཨོཾ་རང་བཞིན་གྱིས་རྣམ་པར་དག་པས་ཆོས་ཐམས་ཅད་རང་བཞིན་གྱིས་དག་པ་ནི་བདག་ཡིན་ནོ་ཞེས་བྱ་བ་འདིས་ཀྱང་བརྟན་པར་བྱ་བའོ། །ཡང་སྨོན་ལམ་གྱི་སྟོབས་ཀྱིས་བསྐྱེད་པའི་ཟླ་བའི་རལ་གྲི་ལ་ལཾ་རྣམ་པར་བལྟས་ལ། དེའི་འོད་ཟེར་སྤྲོས་ [198a.3]པས་འཇམ་པའི་རྡོ་རྗེའི་བདག་ཉིད་ལ་ལེགས་པར་བཅུག་པའི་བདག་ཉིད་ཡི་གེ་མཾ་ལས་བྱུང་བར་བསྒོམ་པར་བྱ་སྟེ། སྐུ་སྟོན་ཀའི་ཟླ་བ་ལྟར་དཀར་བ། ཟུར་ཕུད་ལྔ་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་པས་ཨུཏྤལ་སྔོན་པོ་བསྣམས་ཤིང་། ཕྱག་གཡས་པས་མཆོག་སྦྱིན་པ། [198a.4]སྣ་ཚོགས་པདྨ་དང་ཟླ་བའི་གདན་ལ་རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །དེ་ནས་རང་གི་སྙིང་གའི་ཟླ་བ་ལ་ནོར་བུ་ཤེལ་གྱི་འོད་དང་མཚུངས་པའི་མཾ་གི་འོད་ཟེར་གྱིས་ནམ་མཁའི་མཐས་ཁྱབ་པའི་སྐྱེ་དགུ་རྣམས་ཀྱི་དོན་བྱེད་པར་གྱུར་པ། ཁྱད་པར་གསལ་བར་བྱེད་པ། ཇི་སྲིད་དུ་སྐྱོ་བར་མ་གྱུར་པ་ [198a.5]དེ་སྲིད་དུ་བསྒོམ་པར་བྱ་བའོ། །བསྒོམས་པས་སྐྱོ་བར་གྱུར་ན་གསང་སྔགས་བཟླས་པར་བྱ་བ་ནི། ཨོཾ་ཝཱ་ཀྱེ་དཾ་ན་མཿདང་ཉེ་བའི་སྙིང་པོ་ཡང་བཟླས་པར་བྱ་སྟེ། ཨོཾ་ཧྲཱིཿཧཱུཾ་དེ་ནས་ཡི་གེ་བརྒྱ་པ་བཏོན་ལ། འཇམ་པའི་རྡོ་རྗེའི་ང་རྒྱལ་གྱིས་ལངས་ཏེ། དེ་ཁོ་ན་བཞིན་དུ་རྒྱུ་བར་བྱ་བའོ། །འདིས་ [198a.6]ནི་ཟླ་བ་དྲུག་གིས་ངག་གི་དབང་ཕྱུག་ཉིད་ངེས་པར་སྒྲུབ་པར་བྱེད་དོ། །རྟག་ཏུ་གོམས་པར་བྱས་པའི་སྦྱོར་བས་སྐྱེ་བ་འདི་ཉིད་ཁོ་ན་ལ་སངས་རྒྱས་ཉིད་ཀྱང་སྒྲུབ་པར་བྱེད་པ་ཡིན་ནོ། །བསམ་གཏན་དེ་ལྟ་བུས་གནས་པས་སྔོན་དུ་འགྲོ་བའི་བཟླས་པ་འབུམ་ཕྲག་བདུན་བྱས་ལ། རལ་གྲི་ལ་སོགས་པའི་ [198a.7]དངོས་གྲུབ་རྣམས་བསྒྲུབ་པར་བྱ་བའོ། །དེ་ནས་ཉི་མ་གཟས་བཟུང་བའམ་ཟླ་བ་གཟས་བཟུང་བ་ལ་ཁབ་ལེན་གྱི་ལྕགས་ལས་བརྡུངས་པའི་རལ་གྲི་རང་གི་ལག་ཏུ་བཟུང་ལ། ཟླ་བ་ལ་ལྟ་བས་ཇི་སྲིད་དུ་བཏང་བར་མ་གྱུར་པ་དེ་སྲིད་དུ་བཟླས་པ་བྱས་ན། རལ་གྲིའི་རིག་པ་འཛིན་པར་འགྱུར་རོ། །དེ་བཞིན་དུ་ [198b] [198b.1]རྡོ་རྗེ་དང་། འཁོར་ལོ་དང་། མདུང་རྩེ་གསུམ་དང་། ཐོ་བ་དང་། ཞགས་པ་དང་། ལྕགས་ཀྱུ་ལ་སོགས་པ་རྣམས་ཀྱང་ཡིན་ནོ། །མིག་རྩི་དང་། རྐང་པའི་བྱུག་པ་དང་། ཐིག་ལེ་དང་། དབང་དུ་བྱ་བའི་རྫས་རྣམས་བསོགས་ལ་བསྒྲུབ་པར་བྱ་བའོ། །རིག་པས་བཅུད་ཀྱིས་ལེན་ལེགས་པར་འདུ་བྱས་ལ་ [198b.2]བསྒྲུབ་པར་བྱ་བའོ། །འོ་ཐུག་གི་བཟའ་བའམ། ཞོའི་ཟས་སམ། མར་དང་བཅས་པའམ། ཤ་ཀ་རས་ལྷུང་བཟེད་ཁེངས་པར་བྱས་ལ། ལག་པས་ཀྱང་བཀབ་སྟེ། བཟླས་པ་བྱས་ལ་བཟའ་བར་བྱ་སྟེ། ཚེ་ལོ་ལྔ་བརྒྱ་ཐུབ་པར་འགྱུར་རོ། །མོན་སྲན་དྲེའུ་ཁར་བཅུག་ལ་མྱུ་གུ་བྱུང་གི་བར་དུ་བཟླས་པ་ [198b.3]བྱས་ཏེ། དེ་དག་མེད་པར་གྱུར་ན་སྙན་དངགས་པར་འགྱུར་རོ། །ཐོས་པ་དང་འཛིན་པ་དང་། ངག་ལ་དབང་བ་དང་། ཡིད་གཞུངས་པར་ཡང་འགྱུར་རོ། །ཤིང་ཐོག་པི་ཝང་དག་གིས་འབུམ་ཕྲག་གཅིག་སྦྱིན་སྲེག་བྱས་ན་འཇིག་རྟེན་གསུམ་གྱི་རྒྱལ་སྲིད་ངེས་པར་འགྲུབ་པར་འགྱུར་རོ། །ཇི་སྙེད་པའི་ [198b.4]མེ་ཏོག་དཀར་པོ་རྣམས་ཀྱིས་འབུམ་ཕྲག་བཞི་སྦྱིན་སྲེག་བྱས་པས། ངག་གི་གྲུབ་པ་ཐོབ་ནས་ངག་གི་དབང་ཕྱུག་དང་མཚུངས་པར་འགྱུར་རོ། །མར་གྱིས་བྱུག་པའི་འབྲུ་ལྔའི་སྦྱིན་སྲེག་འབུམ་ཕྲག་བཞི་ཙམ་གྱིས་ཀྱང་གནོད་སྦྱིན་མོ་དང་། ས་འོག་གི་བུ་མོ་ཡང་འགུགས་པར་བྱེད་དོ། །ཚངས་པའི་ཕྱེ་ [198b.5]མ་བྱི་ལ་སྤར་པ་ཙམ་ལ་ལེན་བརྒྱ་རྩ་བརྒྱད་མངོན་པར་བསྔགས་ཏེ། ནམ་མཁའ་བྱུང་བ་དང་མཎྜལ་བྱས་ནས་ཕུན་སུམ་ཚོགས་པ་ཇི་ལྟ་བར་བཅོམ་ལྡན་འདས་ལེགས་པར་མཆོད་ལ་མར་དང་གཉིས་སྦུ་གུས་བཏུང་བར་བྱ་བའོ། །ཤུ་དག་ཞོ་ཕྱེད་ཀྱི་ཚད་ཙམ་དེ་ཁོ་ན་བཞིན་དུ་མངོན་པར་བསྔགས་ལ། [198b.6]མར་རམ་འོ་མའམ། མར་ནག་དང་ཡང་རུང་སྟེ། ཟླ་བ་གཅིག་ཏུ་བཏུང་བར་བྱ་སྟེ། གླེན་པ་དང་ལྐུགས་པ་ཉིད་དང་། ངར་ངར་པོ་དག་ཀྱང་རྣམ་པར་འཇོམས་པར་འགྱུར་རོ། །ཟླ་བ་དྲུག་གས་ནི་མ་ཐོས་པའི་བསྟན་བཅོས་རྣམས་ཀྱང་མངོན་སུམ་དུ་འགྱུར་རོ། །ཤེས་ཟིན་པ་རྣམས་ལས་ནི་རྣམ་པར་ [198b.7]ཉམས་པར་མི་འགྱུར་རོ། །ཐོས་པ་འཛིན་པ་དང་། མཚུངས་པ་མེད་པའི་ཁུ་བྱུག་དང་འདྲ་བར་སྐད་སྙན་པ་དང་། ངག་གསལ་བར་ཡང་འགྱུར་རོ། །དེ་ལ་ཡི་གེ་བརྒྱ་པའི་སྔགས་ནི་འདི་ཡིན་ཏེ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀཌྷོ་མེ་བྷ་བ། སུ་ཏོཥྱོ་མེ་ [199a] [199a.1]བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦྦ་ཀརྨྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་ཝཱན་སརྦྦ་ཏ་ཐཱ་ག་ཏ་བཛྲ་མཱ་མེ་མུཉྩ་བིཛྲཱ་བྷ་བ་མ་ཧཱ་ས་མཱ་ཡ་སཏྭ་ཨཱཿ འཕགས་པ་དཔའ་བོ་གཅིག་ཏུ་གྲུབ་པའི་སྒྲུབ་ཐབས་སོ། །པཎྜི་ཏ་ཆེན་པོ་ཨ་བྷ་ཡ་ཀ་ར་གུཔྟའི་ཞལ་ [199a.2]སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3185}༄༅༅། །རྒྱ་གར་སྐད་དུ། སིདྡྷཻ་ཨེ་ཀ་བཱི་ར་སཱ་དྷ་ནཾ། བོད་སྐད་དུ། དཔའ་བོ་གཅིག་ཏུ་གྲུབ་པའི་སྒྲུབ་ཐབས། སྔར་བཤད་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ། པདྨ་དཀར་པོའི་སྟེང་དུ་ཡི་གེ་ [199a.3]ཨཱཿདཀར་པོ་ལས་བྱུང་བའི་ཟླ་བ་ལ་ཡི་གེ་དྷཱིཿདཀར་པོ་ཡོངས་སུ་གྱུར་པ་ལས་རྗེ་བཙུན་འཇམ་དཔལ་དཔའ་བོ་གཅིག་ཏུ་གྲུབ་པ་ཞེས་བྱ་བ། སྐུ་མདོག་ཐམས་ཅད་དཀར་བ་ཞལ་གཅིག་ཕྱག་གཉིས་པ། གཡས་པས་མཆོག་སྦྱིན་པ། གཡོན་པས་ཨུཏྤལ་སྔོན་པོ་བསྣམས་པ། ལྷ་རྫས་ཀྱི་ [199a.4]རྒྱན་དང་ལྡན་ཞིང་མཛེས་པ། རྣམ་པར་བཀྲ་བའི་ན་བཟའ་བསྣམས་ནས་སྐྱིལ་ཀྲུང་གིས་བཞུགས་པར་བདག་ཉིད་སྐད་ཅིག་གིས་རྫོགས་པར་བྱས་ལ། མགོ་བོ་དང་མགྲིན་པ་དང་། སྙིང་ག་རྣམས་སུ་ཡི་གེ་ཨོཾ་ཨཱཿཧཱུྃ་རྣམས་དགོད་པར་བྱའོ། །ཨཱཿའི་ཡི་གེ་དང་ཧཱུཾ་གི་གཉིས་ཀྱི་བར་དུ་ཡང་ [199a.5]ཡི་གེ་དྷཱིཿའི་འོད་ཟེར་གྱིས་འཇིག་རྟེན་གྱི་དོན་བྱེད་པར་གྱུར་པས་གསང་སྔགས་བཟླས་པར་བྱ་སྟེ། ཨོཾ་རྡོ་རྗེ་རྣོན་པོས་སྡུག་བསྔལ་གཅོད། །ཤེས་རབ་ཡེ་ཤེས་དག་གི་སྐུ། །ཡེ་ཤེས་སྐུ་སྟེ་གསུང་དབང་ཕྱུག །ཨ་ར་པ་ཙ་ན་དབང་འདུད། །དཔའ་བོ་གཅིག་ཏུ་གྲུབ་པའི་སྒྲུབ་ཐབས་སོ། ། [199a.6]མཁས་པ་ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3186}༄༅༅། །རྒྱ་གར་སྐད་དུ། ཨ་ལི་མནྨ་སཱ་དྷ་ནཾ། བོད་སྐད་དུ། ཁོར་ཡུག་མངར་བའི་སྒྲུབ་ཐབས་ཞེས་བྱ་བ། ཁོར་ཡུག་མངར་བའི་སྒྲུབ་པ་ལ་ཕྱག་འཚལ་ལོ། །སྟོན་པ་ལོངས་སྤྱོད་རྫོགས་ [199a.7]པའི་སྐུ། །ཀུན་དགའ་མཚར་བ་རྒྱུ་མཐུན་པ། །བཏུད་ནས་བུང་བའི་ལུས་ཀྱི་ནི། །སྒྲུབ་ཐབས་མདོར་བསྡུས་བཤད་པར་བྱ། །དང་པོར་རེ་ཞིག་མེ་ཏོག་པདྨ་དམར་པོ་དང་མཚུངས་པའི་དཔལ་ཧེ་རུ་ཀའི་སྐུར་བདག་ཉིད་བསྐྱེད་ལ། ཁམས་གསུམ་མ་ལུས་པ་རྣམ་པར་ཤེས་པ་ཙམ་དུ་ཡང་བརྟགས་ [199b] [199b.1]ཏེ། ཡང་རང་གི་སྙིང་གར་ཤིན་ཏུ་དམར་བ། འདབ་མ་བཅུ་དྲུག་གི་ཕྱེད་པའི་ཨུཏྤལ་ཆེན་པོའི་ལྟེ་བ་ལ་ཨའི་སྡེ་དང་། ཀའི་སྡེ་མདོར་བསྡུས་པའི་གཟུགས་སུ་གྱུར་པ། སངས་རྒྱས་ཀྱི་ཡོན་ཏན་མཐའ་དག་རྗེས་སུ་ཆགས་པར་བྱེད་པའི་ཡི་གེ་ཧཱུཾ་གཉིས་ཡིད་ཀྱིས་མངོན་པར་བྲི་བར་བྱའོ། །དེ་ནས་ཡི་ [199b.2]གེ་ཨ་དང་། ཧཱུཾ་དེ་དག་ལས་མཆོག་ཏུ་དམར་ཞིང་ཤིན་ཏུ་མཛེས་པའི་འོད་ཟེར་གྱི་ཚོགས་སྤྲོས་ལ། གུར་གུམ་གྱི་ཁུ་བ་དང་འདྲ་བར་གྱུར་པའི་འོད་ཟེར་གྱི་ཚོགས་དེ་ཉིད་ཀྱིས་ཀྱང་སེམས་ཅན་དང་། སྣོད་ཀྱི་འཇིག་རྟེན་དུ་བཅས་པ་རྣམ་པར་སྦྱངས་ནས་དེ་རྣམས་ཀྱི་ཡང་སྐུ་དང་གསུང་དང་ཐུགས་ལྷན་ཅིག་ [199b.3]གཅིག་ཏུ་བྱས་ཤིང་བཀུག་ལ། ཨའི་ཡི་གེ་དང་ཧཱུཾ་གི་ཡི་གེ་དེ་དག་གཉིས་ཉིད་དང་། ཐིག་ལེ་ལ་ལེགས་པར་གཞུག་པར་བྱ་བའོ། །དེ་ནས་ཨ་ཡིག་དང་། ཧཱུཾ་ཡིག་ཡོངས་སུ་གྱུར་པ་ལས་སྒྲ་སྙན་པ་སྒྲོགས་པའི་བུང་བཟུང་གཅིག་སྟེ། རིན་པོ་ཆེ་དང་མཚུངས་པའི་བུམ་པ་མཆོག་ཏུ་སྙིང་རྗེ་དང་ [199b.4]ལྡན་པས་ཟེའུ་འབྲུའི་རྩི་འཐུང་བར་བྱེད་པ། ཤིན་ཏུ་དགའ་བ་དང་ལྡན་པའི་སྐུ། ཧཱུཾ་གི་སྒྲ་རིང་པོ་སྙན་པར་སྒྲོགས་པའི་བདག་མེད་མ་དག། ཧེ་རུ་ཀའི་རང་བཞིན་དུ་རྣམ་པར་བསམ་པར་བྱ་བའོ། །དེ་ནས་འདི་དག་གི་སྙིང་གར་མེ་ཏོག་ཀུ་སུམྦྷ་དམར་པོ་བསྐུས་པའི་ཁུ་བའི་ཐིགས་པ་འདྲ་ཞིང་། ཡུངས་ [199b.5]ཀར་ཕྲ་མོ་ཙམ་པའི་ཨ་དང་ཧཱུཾ་བལྟ་བར་བྱ་བའོ། །དེའི་རྗེས་ལ་ཟུང་དེ་དག་དབུགས་འབྱུང་བའི་རླུང་གི་ཤིང་རྟ་ལ་ཞོན་ཏེ། སྣ་བུག་གི་བུག་པ་ནས་འཕུར་ནས་ཁམས་གསུམ་ཀུན་ན་གནས་པའི་སེམས་ཅན་རྣམས་ཀྱི་ལུས་དང་ངག་དང་ཡིད་རྣམ་པར་ཁྲིད་ནས་སླར་ཡང་དབུགས་རྔུབ་པའི་རླུང་ལ་ [199b.6]ཞོན་པས། སྙིང་གའི་པདྨའི་ལྟེ་བ་ཇི་ལྟ་བ་དེ་ཉིད་ལ་ལེགས་པར་གཞུག་གོ། །བཅུག་ལ་ཡང་དྲངས་པའི་ལུས་དང་། ངག་དང་ཡིད་ནས་རང་གི་ལུས་དང་ངག་དང་ཡིད་མཉམ་པ་ཉིད་དུ་ལྷག་པར་མོས་པར་བྱ་བའོ། །ཡང་ཇི་སྲིད་དུ་སྐད་ཅིག་ལ་ཡང་ཤིན་ཏུ་གསལ་བར་རྟོགས་པའི་ངོ་བོ་སྐྱེ་བར་ [199b.7]འགྱུར་བ་དེ་ལྟར་བསྒོམ་པར་བྱ་བའོ། །ཕྱི་ནས་ནི་བསྒྲུབ་བྱའམ་བསྒྲུབ་བྱ་མོའི་སྙིང་གར་སྐད་ཅིག་གིས་པདྨ་དམར་པོ་འདབ་མ་བརྒྱད་པ་བསྒོམས་ལ། བདག་ཉིད་ཀྱི་སྙིང་གའི་པདྨའི་ལྟེ་བ་ལ་བུང་བ་ཟུང་དེ་དག་དབུགས་འབྱུང་བའི་རླུང་ལ་ལེགས་པར་ཞོན་ནས། སྣ་བུག་གི་བུ་ག་ལས་འཕུར་ [200a] [200a.1]བས། བསྒྲུབ་བྱ་སྣ་བུག་གི་བུ་ག་ནས་ཉིད་ཀྱི་ལུས་དང་ངག་དང་ཡིད་ཀྱི་རང་བཞིན་གྱི་སྙིང་གའི་པདྨ་ལ་རབ་ཏུ་ཞུགས་སོ། །ཞུགས་ནས་ཀྱང་དེའི་སྙིང་གི་རྩིབས་ཕུག་ནས་ལུས་ཀྱི་རང་བཞིན་གྱི་འདབ་མའི་བདག་ཉིད་རྣམས་འཇིབ་པར་བྱེད་དོ། །ངག་གི་རང་བཞིན་དུ་གྱུར་པའི་ [200a.2]ཟེའུ་འབྲུ་འཇིབ་པར་བྱེད་དོ། །སེམས་ཀྱི་རང་བཞིན་ལྟེ་བ་ལ་ཡང་ཟ་བར་བྱེད་དོ། །དེའི་རྗེས་ལ་སྒྲུབ་པ་པོ་ཉིད་ཀྱི་དབུགས་རྔུབ་པའི་རླུང་གིས་དྲངས་ནས་བསྒྲུབ་བྱའི་སྣ་བུག་གི་བུ་ག་ནས་བྱུང་སྟེ། བདག་ཉིད་ཀྱི་སྣ་བུག་གི་བུ་ག་ནས། སྙིང་གའི་ཨུཏྤལ་ཆེན་པོའི་ལྟེ་བ་ལ་རབ་ཏུ་ཞུགས་ཤིང་། [200a.3]བབས་པས་འགུལ་བར་བྱས་ཤིང་། ལུས་ཀྱི་རང་བཞིན་འདབ་མ་བཏང་ནས། ངག་གི་རང་བཞིན་གྱི་ཟེའུ་འབྲུ་དང་། སེམས་ཀྱི་རང་བཞིན་གྱི་སྙིང་པོ་ཡང་མཆོག་ཏུ་གཡོ་བར་བྱེད་པར་བསམ་པར་བྱ་བའོ། །ཡང་དེ་ཁོ་ན་བཞིན་དུ་སོང་ཞིང་། དེ་ཁོ་ན་བཞིན་དུ་རབ་ཏུ་ཞུགས་ཏེ་དེ་ཁོ་ན་བཞིན་དུ་ [200a.4]བཟུང་ནས། དེ་བཞིན་དུ་ཕྱིར་འོངས་པས། དེ་ཁོ་ན་བཞིན་དུ་མཆོག་ཏུ་གཡོ་བར་བྱེད་པར་ཡང་བསམ་པར་བྱ་བའོ། །ཇི་སྲིད་དུ་རྗེས་སུ་ཆགས་པ་སྟོན་པར་མི་བྱེད་ཀྱི་བར་དུ་དེ་ལྟར་ཡང་དང་ཡང་དུ་བྱ་བའོ། །རྗེས་སུ་ཆགས་པས་སྟོན་པས་ནི་དབང་དུ་གྱུར་པ་ཉིད་དུ་རྟོགས་པར་བྱ་བའོ། ། [200a.5]རྟོགས་ནས་ཀྱང་ཇི་ལྟར་མངོན་པར་འདོད་པའི་དོན་གྲུབ་པར་བྱ་བའི་ཕྱིར་འབད་པར་བྱ་བའོ། །དེ་ལ་བསྒོམ་པ་འདིས་ཀྱང་ལམ་མ་ལོག་པ་དྲི་མ་མེད་པ། ཞེན་པར་གྱུར་པས་ལུས་ཀུན་རྒྱགས་པར་མྱོས་ནས། སྒྲུབ་པ་པོ་རྣམས་ལ་འཁྱུད་པ་དང་། དམ་ཚིག་གི་རྒྱུན་ཆགས་པ་ཉིད་དུ་དགའ་ [200a.6]བར་བྱ་བ་ལ་བརྩོན་པར་བྱེད་པ་ཉིད་དུ་འགྱུར་རོ། །གལ་ཏེ་སྐྱོན་མཐོང་བས་དགའ་བར་མི་བྱེད་ན། དེའི་ཚེ་ལྷ་ཆེན་པོ་སུན་འབྱིན་པར་ཞུགས་པ་ཡིན་པས་དེ་དག་རྟོགས་པར་བྱ་སྟེ། ཕྱིན་ཅི་ལོག་གི་ཡུལ་ལེགས་པར་ཁོང་དུ་ཆུད་པར་བྱ་ཞིང་ཁོང་དུ་ཆུད་པར་བྱས་ནས་ཀྱང་བསྒོམས་པས་དབང་ [200a.7]དུ་བྱ་བ་ཡིན་ནོ། །ཁོར་ཡུག་མངར་བྱེད་བསྒྲུབ་པའི་ཐབས། །རྣམ་བཀོད་ལས་འབྱུང་བསོད་ནམས་གང་། །དེས་ནི་སྐྱེ་དགུ་མཐོང་འགྱུར་ཞིང་། །སྙིང་རྗེའི་སྟོབས་ལྡན་དཔལ་དུ་ཤོག །ཁོར་ཡུག་མངར་བའི་སྒྲུབ་ཐབས། སློབ་དཔོན་ཆེན་པོ་པདྨ་འབྱུང་གནས་ཀྱིས་མཛད་པ། ཨ་བྷ་ཡའི་ [200b] [200b.1]ཞལ་སྔ་ནས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3187}༄༅༅། །རྒྱ་གར་སྐད་དུ། མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་གྱི་སྒྲུབ་ཐབས། འཇམ་དཔལ་ལ་ཕྱག་འཚལ་ལོ། །ཁ་དོག་དམར་པོ་རབ་འབར་འོད་ཟེར་ཕུང་པོ་ཅན། །འཇམ་པའི་རྡོ་རྗེའི་སྐུ་ནི་ཆོ་ག་བཞིན་བསྐྱེད་ [200b.2]དེ། །དབྱངས་ཡིག་བཅུ་དྲུག་པོ་ནི་ཡང་དག་རྫོགས་པ་ལས། །སྙིང་གི་པདྨའི་དབུས་སུ་རྡོ་རྗེ་ལེགས་པར་བསམ། །མེ་ཏོག་བནྡྷུ་ཀ་ཡི་ཁ་དོག་དང་མཚུངས་གཟུགས། །ངེས་པར་དམིགས་བྱ་རྐང་དྲུག་པ་ཞེས་གྲགས་གྱུར་པ། །དབུགས་འབྱུང་རླུང་དག་གིས་ནི་དལ་གྱིས་མ་ལུས་པར། །རྒྱུ་བར་བྱེད་ཅིང་ [200b.3]གཉིད་ཀྱང་སད་པ་ཉིད་བྱས་ནས། །བསྒྲུབ་བྱ་མདུན་ན་གནས་པ་ལེགས་པར་བསམ་བྱ་ཞིང་། །ཐལ་སྦྱར་མིག་གཉིས་ལ་ནི་བུང་བའི་སྒྲ་བསྒྲགས་ནས། །བུང་བ་དེ་ནི་སྣ་སྒོ་གཉིས་ཀྱི་བུ་ག་ལས། །བསྒྲུབ་བྱ་སྐལ་ལྡན་སྙིང་ལ་རྣམ་པར་འཇུག་པ་ཡིན། །དབང་དུ་བྱེད་པའི་འཇམ་དཔལ་གྱི་སྒྲུབ་ཐབས་ [200b.4]སོ།། །།ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3188}༄༅༅། །རྒྱ་གར་སྐད་དུ། མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་གྱི་སྒྲུབ་ཐབས། སྔར་བཤད་པའི་ཆོ་གས་ཡི་གེ་མུཿསེར་པོ་ཡོངས་སུ་གྱུར་པ་ལས་འཇམ་དཔལ་གཞོན་ནུར་གྱུར་པ་ཞལ་ [200b.5]གསུམ་ཕྱག་དྲུག་པ་སྟེ། ཞལ་གུར་གུམ་འོད་ཀྱི་མདོག་དང་། གཡས་པ་དང་ཅིག་ཤོས་ནི་སྔོན་པོ་དང་དཀར་པོ། སེམས་དཔའི་སྐྱིལ་ཀྲུང་གིས་བཞུགས་པ། གཡས་པའི་ཕྱག་གསུམ་ནི་རལ་གྲི་དང་། མདའ་དང་མཆོག་སྦྱིན་པ་དང་ལྡན་ལ། གཡོན་པའི་ཕྱག་གསུམ་ནི་ཤེས་རབ་ཀྱི་ཕ་རོལ་ [200b.6]ཏུ་ཕྱིན་པའི་གླེགས་བམ་དང་། གཞུ་དང་། ཨཏྤ་ལ་སྔོན་པོས་བྲེལ་ཞིང་། སྒེག་པའི་ཉམས་བག་དང་ལྡན་པའི་གཞོན་ནུའི་རྒྱན་དང་། ན་བཟའ་ལ་སོགས་པ་ཅན། མེ་ཏོག་ལ་སོགས་པས་མཛེས་པ་ཆེན་པོ་གྱུར་པའི་ཟུར་ཕུད་གསུམ་གྱིས་རྣམ་པར་མཛེས་པ། དེ་བཞིན་གཤེགས་པའི་རྡུལ་ཕྲ་ [200b.7]རབ་ལས་གྲུབ་པར་བདག་ཉིད་བསྒོམས་ལ། ཨོཾ་མུཿཞེས་བྱ་བའི་སྔགས་འདི་བཟླས་པར་བྱ་བའོ། །འཇམ་དཔལ་གྱི་སྒྲུབ་ཐབས། ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3189}༄༅༅། །རྒྱ་གར་སྐད་དུ། མཉྫུ་ཤྲཱི་སཱ་དྷ་ནཾ། བོད་སྐད་དུ། [201a] [201a.1]འཇམ་དཔལ་གྱི་སྒྲུབ་ཐབས། སྔར་བཤད་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ། པདྨའི་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དཀར་པོ་རྣམ་པར་བསྒོམ་པར་བྱ་སྟེ། སྤྲོ་བར་བྱ་བ་ལ་སོགས་པ་སྔོན་དུ་བཏང་ཞིང་དེ་ཡོངས་སུ་གྱུར་པ་ལས་ཡི་གེ་དྷཱིཿདཀར་པོས་བསྐྱེད་ [201a.2]པའི་འཇམ་དཔལ་ཨ་ར་པ་ཙ་ན་དཀར་པོ་གཅིག་པུ་ཉིད་འབའ་ཞིག་གོ། །རང་ཉིད་ཀྱི་ས་བོན་སྙིང་གར་རྣམ་པར་བསམས་ལ། ཨོཾ་དྷཱིཿསྭཱ་ཧཱ། ཞེས་བཟླས་པར་བྱ་བའོ། །རིག་པ་འཛིན་པའི་སྡེ་སྣོད་ནས་འབྱུང་བའི་འཇམ་དཔལ་གྱི་སྒྲུབ་ཐབས་མདོར་བསྟན་པའོ། །ཨ་བྷ་ཡ་ལས་དགེ་སློང་ཚུལ་ [201a.3]ཁྲིམས་རྒྱལ་མཚན་གྱིས་བསྒྱུར་བའོ།། {T3190}༄༅༅། །རྒྱ་གར་སྐད་དུ། པྲཛྙཱ་བརྡྷ། བོད་སྐད་དུ། ཤེས་རབ་བསྐྱེད་པ། སྐད་ཅིག་གིས་འཇམ་དཔལ་གྱི་རྣལ་འབྱོར་དུ་དམིགས་ལ། ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དཀར་པོ་མར་མེ་གསལ་བར་འབར་བ་ལྟ་བུ་འོད་ [201a.4]ཟེར་དང་བཅས་པ་རྣམ་པར་བསམས་ཏེ། མགོ་པོ་ལ་ཉམས་པ་མེད་པའི་ཡི་གེ་ཧཾ་དཀར་པོ་མགོ་བོ་ལས་འཛག་པར་གྱུར་པ་འོད་ཟེར་དང་བཅས་པ་བསྒོམ་པར་བྱ་བའོ། །དེའི་རྗེས་སུ་ཐིག་ལེའི་འོད་ཟེར་གྱིས་ལེགས་པར་བསྐུལ་བས་ཁུ་བར་གྱུར་ནས་ཡི་གེ་ཧཾ་གིས་ཐིག་ལེ་ཀུན་ནས་ཁྱབ་པར་གྱུར་པ་ [201a.5]ལ་སེམས་བརྟན་པའི་སྔགས་པ་ནི་རིང་པོ་མི་ཐོགས་པར་ཤེས་རབ་མངོན་པར་འཕེལ་བར་འགྱུར་རོ། །ཤེས་རབ་མངོན་པར་བསྐྱེད་པ། ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་པའོ།། {T3191}༄༅༅། །རྒྱ་གར་སྐད་དུ། པྲཛྙཱ་བྲྀདྡྷི། བོད་སྐད་དུ། ཤེས་རབ་འཕེལ་བར་ [201a.6]བྱེད་པ། ལྟེ་ཡུལ་སྟེང་དུ་ལེགས་གསལ་བའི། །ཆོས་འབྱུང་དམར་པོའི་ནང་དུ་ནི། །རྡོ་རྗེ་སྔོན་པོ་རྩེ་ལྔ་པ། །ལྟེ་བར་གཟི་བརྗིད་འོད་མཆོག་ཅན། །ཡི་གེ་ཧཱུཾ་དཀར་སྒྲས་བསྐྱེད་པ། །མཚོག་མའི་མཚམས་སུ་ངེས་འབྱུང་བའི། །ཧཱུཾ་ཡིག་དུད་ཁས་ལེགས་བསྐྱེད་པ། །ནམ་མཁའ་ཁྱབ་ [201a.7]པར་བལྟ་བྱ་བ། །སྒྲ་ཡི་འོད་ཟེར་རྩེ་མོའོ། །ཤེས་རབ་འཕེལ་བའི་ཆོ་ག །ཨ་བྷ་ཡ་ཀ་རའི་ཞལ་སྔ་ནས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3192}༄༅༅། །རྒྱ་གར་སྐད་དུ། མཉྫུ་ཤྲཱི་ཡ་པྲཛྙཱ་ཙཀྲ། བོད་སྐད་དུ། འཇམ་དཔལ་གྱི་ཤེས་རབ་ཀྱི་འཁོར་ལོ། [201b] [201b.1]བླ་མའི་ཞབས་ལ་རྟག་བཏུད་ཅིང་། །དེ་བཞིན་རྡོ་རྗེ་སློབ་དཔོན་ལའང་། །དང་པོར་ཕྱག་འཚལ་འཇམ་པའི་དཔལ། །གང་གིས་གྲུབ་པ་བདག་གིས་བྲི། །སེམས་དཔའི་སྐྱིལ་མོ་ཀྲུང་གིས་གནས། །སྙིང་གའི་ཟླ་བ་ལ་ཡི་གེ་ཨཱི་དང་ཨཿདག་གིས་བརྒྱན་ཅིང་དུང་དང་ཀུནྡ་ལྟར་མཆོག་ཏུ་འབར་ [201b.2]ཞིང་འོད་ཟེར་སྣ་ཚོགས་པ་རྣམས་ཀྱིས་ཀུན་དུ་གང་བའི་ས་བོན་ནོ། །དེས་བསྒྲུབས་པའི་རྫོགས་པའི་སངས་རྒྱས་དང་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྫུ་འཕྲུལ་ཆེན་པོ་དང་ལྡན་པ་དེ་དག་རྣམས་བལྟས་པ་ལ་སྔགས་འདི་དག་གིས་མཆོད་པར་བྱ་བའོ། །ཨོཾ་རྡོ་རྗེའི་མེ་ཏོག་ཧཱུཾ། ཨོཾ་རྡོ་རྗེའི་ [201b.3]བདུག་པ་ཧཱུཾ། ཨོཾ་རྡོ་རྗེའི་མར་མེ་ཧཱུཾ། ཨོཾ་རྡོ་རྗེའི་དྲི་ཆབ་ཧཱུཾ། ཨོཾ་རྡོ་རྗེའི་ལྷ་བཤོས་ཧཱུཾ། དེ་ནས་ནི། བདག་ནི་དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་བདག་གིས་སོ་སོར་བཤགས། །འགྲོ་བའི་བསོད་ནམས་ལ་ནི་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་བར་བགྱི། ། [201b.4]སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བདག་ནི་བྱང་ཆུབ་བར་དུ་སྐྱབས་སུ་མཆི། །བདག་དང་གཞན་དོན་རབ་ཏུ་བསྒྲུབ་བྱའི་ཕྱིར། །བྱང་ཆུབ་སེམས་འདི་བདག་གིས་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བདག་གིས་བསྐྱེད་བགྱི་ཞིང་། །བདག་གིས་སེམས་ཅན་ཐམས་ [201b.5]ཅད་མགྲོན་དུ་གཉེར་བར་བགྱི། །ཡིད་འོང་བྱང་ཆུབ་མཆོག་གི་སྤྱོད་པ་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་ཉིད་ནི་འགྲུབ་པར་ཤོག །ཅེས་པའི་སྨོན་ལམ་སྔོན་དུ་འགྲོ་བས་ཆོས་ཐམས་ཅད་བདག་མེད་པར་བསྒོམ་པར་བྱ་བ་ལ་སྔགས་ནི་འདི་ཡིན་ཏེ། ཨོཾ་སྟོང་པ་ཉིད་ཀྱི་ཡེ་ཤེས་ [201b.6]ཀྱི་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ། །ཁམས་གསུམ་མ་ལུས་པ་རྣམས་སྒྱུ་མ་དང་མཚུངས་པའི་ས་བོན་གྱི་རྣམ་པར་བསམ་པར་བྱ་བའོ། །མཐོང་དང་རིག་པ་ཉིད་དག་དང་། །གང་ཕྱིར་སྒྱུ་བཞིན་ཐམས་ཅད་ནས། །དམིགས་སུ་ཡོད་པ་ཉིད་ཀྱང་མིན། །འཇིག་རྟེན་ཐམས་ཅད་དེ་ལྟར་ [201b.7]གནས། །འདིར་མོས་པ་བསྐྱེད་པར་བྱ་བའོ། །དེ་ནས་ཐོག་མ་མེད་པའི་དུས་ནས་ཡང་དག་པ་མ་ཡིན་པའི་རྟོག་པའི་ས་བོན་སྦྱངས་ལ་རང་བཞིན་གྱིས་དག་པ་ཡིན་ནོ་ཞེས་ཀྱང་མོས་པར་བྱ་བ་ཡང་ཨོཾ་རང་བཞིན་གྱིས་དག་པས་ཆོས་ཐམས་ཅད་ཀྱང་རང་བཞིན་གྱིས་དག་པ་ནི་བདག་ཡིན་ནོ་ཞེས་བྱ་བས་ [202a] [202a.1]སོ། །དེ་ནས་སྔར་བཤད་པའི་ས་བོན་གྱུར་པ་ལས་རལ་གྲིའོ། །དེའི་ཆང་ཟུངས་ཀྱི་ལྟེ་བའི་དབུས་སུ་ཟླ་བའི་དཀྱིལ་འཁོར་རོ། །དེའི་སྟེང་དུ་སྔར་བཤད་པའི་ས་བོན་ནོ། །དེ་དག་ཐམས་ཅད་གཞན་དུ་གྱུར་པས་བདག་ཉིད་འཇམ་དཔལ་གྱི་སྐུ་དང་། ང་ཁོ་ན་འཇིག་རྟེན་ཐམས་ཅད་ [202a.2]ཀྱི་མངའ་བདག་ཡིན་ནོ་ཞེས་བྱ་བ་ཡང་དག་པར་བསམ་པར་བྱ་སྟེ། པདྨ་དང་ཟླ་བའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ་དང་། ཟླ་བ་ལྟ་བུ་འོད་ཟེར་དུ་མ་སྤྲོ་བ་དང་བསྡུ་བས་ནམ་མཁའི་དཀྱིལ་ཁྱབ་པར་མཛད་པ་དང་། རྣམ་པར་མཛེས་པའི་ན་བཟའ་བསྣམས་པ་དང་། སྐྱེ་དགུ་ [202a.3]རྣམས་དགའ་བར་མཛད་པ་དང་། སྐུ་མདོག་དཀར་པོ་ཡིད་དུ་འོང་བ་དང་། ཟུར་ཕུད་ལྔ་དང་ལྡན་པའི་དཔའ་བོ་ཆེན་པོ་དང་། རྒྱན་རྣམས་ཐམས་ཅད་ཀྱིས་བརྒྱན་པ་དང་། ཕྱག་གཡས་པས་རལ་གྲི་གདེངས་པར་མཛད་ཅིང་ཕྱག་གཡོན་པས་ཐུགས་ཀ་ན་པོ་ཏི་བསྣམས་པའོ། །དེ་ནས་ཕྱག་རྒྱ་ [202a.4]བཅིང་བར་བྱ་སྟེ། ལག་པ་གཉིས་ཀྱིས་ཐལ་མོ་ཁ་སྦྱར་བར་བྱས་ལ། མཛུབ་མོ་གཉིས་དང་སྲིན་ལག་གཉིས་ཀྱི་རྩེ་མོ་རྩེ་བཀབ་པ་ནི་ཨུཏྤལའི་ཁ་བྱེ་བས་ལེགས་པར་གནས་པ་སྟེ། རང་གི་སྔགས་ཀྱི་སྙིང་ག་དང་། མགྲིན་པ་དང་། སྨིན་མཚམས་དང་། སྤྱི་བོ་རྣམས་སུ་དགོད་པར་བྱ་ [202a.5]བའོ། །ཕྱི་ནས་ནི་ལྟེ་བའི་འོག་ཏུ་ཡི་གེ་བྷྲཱུཾ་ལས་ཁ་དོག་དཀར་པོ་ཤིང་མྱ་ངན་མེད་ཀྱི་འདབ་མ་དང་ཆ་འདྲ་བའི་ཟླ་བའི་དཀྱིལ་འཁོར་བསམ་པར་བྱ་བའོ། །དེའི་སྟེང་དུ་བརྒྱད་པའི་བཞི་པ་ལ་དང་པོའི་བཅུ་དྲུག་པ་དང་བདུན་པའི་གཉིས་པ་དང་དང་པོའི་བཞི་པས་བརྒྱན་པའོ། །དེ་དག་ཡོངས་སུ་ [202a.6]རྫོགས་པ་ལས་ཡི་གེ་ཧཱུྃ་གིས་ཁ་བྱེ་བར་བྱས་པའི་པདྨ་དྲི་མ་མེད་པ་ལྟེ་བའི་སྟེང་དུ་བསམ་པར་བྱ་བའོ། །དེའི་སྟེང་དུ་ཟླ་བའི་དཀྱིལ་འཁོར་རོ། །དེའི་སྟེང་དུ་སོར་གྱི་བར་ཙམ་བཀག་པ་ན་འཁོར་ལོ་རྩིབས་དྲུག་པ་གཟི་བརྗིད་དང་ལྡན་པའོ། །དེའི་རྩིབས་རྣམས་ལ་ནི་དབྱངས་ཡིག་བཅུ་གཉིས་ [202a.7]པོ་རྣམས་ཡི་གེ་ཟུང་རེ་རེ་དགོད་དོ། །རྩིབས་སོ་སོའི་སྟེང་དུ་ནི་རྩ་བའི་སྔགས་རྣམས་ཀྱི་ཡི་གེ་རེ་རེ་རྣམ་པར་དགོད་པར་བྱ་བའོ། །འཁོར་ལོའི་ནང་གི་ལྟེ་བ་ལ་ནི་ཡི་གེ་དྷཱིཿའོད་ཀྱིས་གང་བ་དང་ལྡན་ཞིང་། གཡོ་བ་མེད་པ་བསྒོམ་པར་བྱ་བའོ། །ཕྱི་རོལ་དུ་མུ་ཁྱུད་ལ་ནི་ང་ཉ་ཎ་ན་མའི་ཡི་གེ་རྣམས་ [202b] [202b.1]དང་བྲལ་བའི་ཀའི་སྡེ་ཚན་མཆོག་ཏུ་འབར་བ་དང་ལྡན་པ་རྣམས་བསམ་པར་བྱ་བའོ། །གཞན་ཡང་སྟེང་དུ་སོར་གྱི་བར་ཙམ་ཡངས་པར་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་ཨ་ར་པ་ཙ་ནའོ། །འདི་དག་བལྟས་ལ་འཁོར་ལོ་ཤིན་ཏུ་མྱུར་བར་བྱ་བ་འཁོར་བ་དང་ལྡན་པར་བསྒོམ་པར་བྱ་ཞིང་། [202b.2]ཇི་སྲིད་དུ་ཟླ་བ་དྲུག་གི་བར་དུ་བཟླས་པར་བྱ་བའི་སྔགས་ཀྱང་འདི་དག་ཡིན་ཏེ། ཨོཾ་བཛྲ་ཏཱིཀྵྞ་ཧཾ་ཉི་མ་རེ་རེ་ཞིང་ཁྲི་ཕྲག་རེ་བཟླས་པར་བྱ་བའོ། །དེ་དག་གིས་བླུན་པོ་ཡང་དག་གི་བདག་པོར་འགྱུར་རོ། །བློ་རྣོ་བ་དང་གཞུང་སྟོང་ཕྲག་རེ་འཛིན་པར་བྱེད་དོ། །རྒྱུན་མི་འཆད་པར་སཾ་སྐྲྀ་ཏ་སྨྲ་བ་པོ། [202b.3]དང་སྙན་དངགས་པ་ཆེན་པོ་ཉིད་དང་བསྟན་བཅོས་ཐམས་ཅད་ཀྱི་ཕ་རོལ་ཏུ་ཕྱིན་པར་འགྱུར་རོ། །གྲུབ་པ་ཐོབ་ནས་ནི་རལ་གྲིའི་རིག་པ་འཛིན་པའི་མངའ་བདག་ཏུ་འགྱུར་ཏེ། རིག་པ་འཛིན་པ་རྣམས་དང་ལྷན་ཅིག་ཏུ་རྩེ་དགའ་བར་བྱེད་དོ། །ཤེས་རབ་འཁོར་ལོ་མཆོག་གྱུར་འདི། །བྲིས་ [202b.4]ལས་བསོད་ནམས་གང་བྱུང་བ། །དེས་ནི་འཇིག་རྟེན་མ་ལུས་འདི། །འཇམ་དཔལ་གོ་འཕང་ཐོབ་པར་ཤོག །འཇམ་དཔལ་གྱི་ཤེས་རབ་འཁོར་ལོ་རྫོགས་སོ།། །།མཁས་པ་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3193}༄༅༅། །རྒྱ་གར་ [202b.5]སྐད་དུ། ཏཱ་ར་སཱ་དྷ་ནཾ། བོད་སྐད་དུ། སྒྲོལ་མའི་སྒྲུབ་ཐབས། སྒྲོལ་མ་ལ་ཕྱག་འཚལ་ལོ། །སྔར་བཞིན་དུ་སྟོང་པ་ཉིད་ཀྱི་མཐར་ཐུག་པར་རྣམ་པར་བསྒོམས་ལ། །པདྨ་དང་ཟླ་བ་ལ་ས་བོན་ཏཱཾ་ཡོངས་སུ་གྱུར་པ་ལས་ས་བོན་ཏཱཾ་གི་སྙིང་པོ་དང་ལྡན་པའི་ཨུཏྤལའི་མཆོག་གོ། །དེ་དག་ལས་ [202b.6]ཡོངས་སུ་གྲུབ་པའི་སྔོན་མོ་དོན་ཡོད་གྲུབ་པ་དབུ་རྒྱན་ལ་གནས་པ་ཕྱག་གཡས་དང་གཡོན་གྱིས་མཆོག་སྦྱིན་པ་དང་། ཨུཏྤལ་བསྣམས་པ། མྱ་ངན་མེད་ལ་དགའ་མ་དང་། འོད་ཟེར་ཅན་དང་རལ་གཅིག་མ་མདུན་དང་གཡས་དང་གཡོན་གྱི་སའི་ཆ་ལ་སྟེ། ལྷའི་བུ་མོ་གཞོན་ནུ་རྒྱན་རྣམས་ [202b.7]དང་ལྡན་པར་བསྒོམས་ལ། ཡེ་ཤེས་སེམས་དཔའ་དང་ལྷན་ཅིག་གཅིག་ཏུ་བྱས་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བྱ་བའི་སྔགས་བཟླས་ལ། དེ་ཡིད་ལ་བྱེད་པ་དང་ལྡན་པ་ཉིད་ཀྱིས་ཇི་ལྟར་འདོད་པར་རྒྱུ་བར་བྱ་བའོ། །འཕགས་མ་སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས་སོ།། །། [203a] [203a.1]ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3194}༄༅༅། །རྒྱ་གར་སྐད་དུ། ཏཱ་ར་སཱ་དྷ་ནཾ། བོད་སྐད་དུ། སྒྲོལ་མའི་སྒྲུབ་ཐབས། སྒྲོལ་མ་ལ་ཕྱག་འཚལ་ལོ། །དང་པོ་སྙིང་གའི་ཟླ་བའི་དཀྱིལ་ན་གནས་པའི་ཏཱྃ་གི་ས་བོན་ལས་ [203a.2]རྣམ་པར་འཕྲོ་བའི་འོད་ཟེར་ལས་གྲུབ་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་བསྒོམ་པར་བྱ་ཞིང་། དེ་དག་ཕྱི་དང་ནང་གི་བདག་ཉིད་ཀྱི་མཆོད་པས་ཀྱང་ལེགས་པར་མཆོད་ཅིང་དེ་དག་གི་སྤྱན་སྔར་བླ་ན་མེད་པའི་མཆོད་པ་རྣམ་པ་བདུན་ཡང་བྱ་བའོ། །དེ་ནས་སྟོང་པ་ཉིད་རྣམ་པར་ [203a.3]བསྒོམས་ལ། ཨོཾ་ཆོས་ཐམས་ཅད་རང་བཞིན་གྱིས་དག་པས་རང་བཞིན་གྱིས་དག་པ་ཡིན་ནོ་ཞེས་བརྗོད་པར་བྱའོ། །དེ་ནས་ཟླ་བ་དང་ཏཱྃ་ལས་ཡང་དག་པར་བྱུང་བའི་ཨུཏྤལ་དཀར་པོ་ལ་གནས་པའི་ཡི་གེ་ཏཱྃ་ལས་ངེས་པར་སྒྲོལ་མ་སྔོན་པོ་སྟེ། ཕྱག་གཉིས་ཀྱི་གཡས་པས་མཆོག་སྦྱིན་པ་ [203a.4]གཡོན་པས་རྩ་བ་དང་བཅས་པའི་ཨུཏྤལའི་མཆོག་སྦྱིན་བསྣམས་པ། རྒྱན་ཐམས་ཅད་ཀྱིས་བརྒྱན་པ་ཟླ་བའི་གདན་ལ་སྐྱིལ་མོ་ཀྲུང་གིས་བཞུགས་པར་བསམ་པར་བྱ་བའོ། །དམ་ཚིག་གི་ཕྱག་རྒྱ་བཅིངས་པ་ནི་ཐལ་མོ་སྦྱར་ལ་མཛུབ་མོ་གཉིས་ཀྱིས་གུང་མོ་གཉིས་རྒྱ་བ་ནས་བཀབ་ཅིང་མཐེ་ [203a.5]བོང་དག་པདྨ་འབྱར་བ་ལྟར་ནང་དུ་བརྐྱང་བ་ནི་ཨུཏྤལ་ཁ་བྱེ་བའི་ཕྱག་རྒྱའོ། །དེ་ནས་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བྱ་བའི་སྔགས་འདི་བཟླས་པར་བྱ་བའོ། །སྒྲོལ་མ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་རྫོགས་སོ།། །།ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་ [203a.6]མཚན་གྱིས་བསྒྱུར་བའོ།། {T3195}༄༅༅། །རྒྱ་གར་སྐད་དུ། ཏཱ་ར་སཱ་དྷ་ནཾ། བོད་སྐད་དུ། སྒྲོལ་མའི་སྒྲུབ་ཐབས། སྒྲོལ་མ་ལ་ཕྱག་འཚལ་ལོ། །སྔ་མ་དག་བཞིན་དུ་སྟོང་པ་ཉིད་ཀྱི་བར་དུ་བསྒོམས་ལ། བྃ་གྱི་ཡི་གེ་ལས་སྐྱེས་པའི་སྣ་ཚོགས་པདྨའི་དབུས་སུ་ཡི་གེ་ཨོཾ་ [203a.7]ལས་བྱུང་བའི་ཟླ་བ་ལ་ཏཱྃ་གི་ཡི་གེ་སྔོན་པོས་བསྐྱེད་པའི་སྒྲོལ་མ་སྐུ་མདོག་སྔོན་མོ་རྒྱན་ཐམས་ཅད་དང་ལྡན་པ་སྟེ། གཡོན་ན་ཨུཏྤལ་སྔོན་པོ་དང་ལྡན་པ་གཡས་ཀྱིས་མཆོག་སྦྱིན་པར་མཛད་པ་སྐྱིལ་ཀྲུང་ཕྱེད་པས་བཞུགས་པ་གཡས་ཀྱི་ཕྱོགས་ན་ནི་མྱ་ངན་མེད་པ་ལ་དགའ་མ་སེར་མོ་རིན་པོ་ཆེ་ [203b] [203b.1]སྣ་ཚོགས་ཀྱིས་དབུ་རྒྱན་དང་ལྡན་ཞིང་གཡས་དང་གཡོན་གྱི་ཕྱག་གཉིས་ན་རྡོ་རྗེ་དང་མྱ་ངན་མེད་ཀྱི་ཡལ་ག་བསྣམས་པའོ། །དེ་བཞིན་དུ་རྨ་བྱ་ཆེན་མོ་སེར་མོ་གཡོན་དང་ཅིག་ཤོས་ཀྱི་ཕྱག་གཉིས་ན་རྨ་བྱའི་མཇུག་སྒྲོ་དང་རྔ་ཡབ་བསྣམས་པའོ། །གཡོན་གྱི་ཕྱོགས་ན་རལ་གཅིག་མ་བོང་ [203b.2]ཐུང་བ་ནག་མོ་སྟག་དང་ཛི་ནའི་པགས་པ་བསྣམས་པ། སྤྱན་གསུམ་མ། ཞལ་མཆེ་བ་རྣམ་པར་གཙིགས་མ། སྐྲ་ཁམ་པ་གྱེན་དུ་བརྫེས་པ། གྲི་གུག་དང་ཐོད་པ་བསྣམས་པའོ། །དེ་བཞིན་དུ་འཕགས་མ་དུག་སེལ་མ་ལྗང་གུ་ཕྱག་གཡས་པ་དང་གཡོན་པ་གཉིས་ན་རྔ་ཡབ་དང་སྦྲུལ་ [203b.3]ནག་པོ་བསྣམས་པར་བསྒོམ་པར་བྱ་བའོ། །ཡང་དེ་ལྟར་བསྒོམས་པས་སྐྱོ་ན་གསང་སྔགས་བཟླས་པར་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཞེས་བྱ་བའོ། །སྒྲོལ་མའི་སྒྲུབ་ཐབས་རྫོགས་སོ།། །།ཨ་གྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། [203b.4]{T3196}༄༅༅། །རྒྱ་གར་སྐད་དུ། ཏཱ་ར་སཱ་དྷ་ནཾ། བོད་སྐད་དུ། སྒྲོལ་མའི་སྒྲུབ་ཐབས། ཡི་གེ་ཏཱྃ་ལས་བྱུང་བའི་ཨུཏྤལ་དབུས་ན་ཡི་གེ་ཏཱྃ་གནས་པ་བསྒོམས་ལ། དེ་དག་ཡོངས་སུ་གྱུར་པ་ལས་འཕགས་མ་སྒྲོལ་མ་སྐུ་མདོག་སྔོན་མོ་གཡས་ཀྱིས་མཆོག་སྦྱིན་པ། གཡོན་གྱིས་ཨུཏྤལ་བསྣམས་ [203b.5]པ། བཟང་པོའི་གདན་ལ་བཞུགས་པ། དོན་ཡོད་གྲུབ་པ་དབུ་རྒྱན་ལ་བཞུགས་པར་བསྒོམས་ཏེ། ཡེ་ཤེས་སེམས་དཔའ་དང་གཅིག་ཏུ་བྱས་པས། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོ་དབང་དུ་གྱིས་ཤིག་སྭཱ་ཧཱ། ཞེས་བྱ་བ་འདི་བསྒྲུབ་བྱའི་མིང་དང་ལྡན་པར་བཟླས་མ་ཐག་ཏུ་བརྗོད་པའི་གྲངས་ངེས་པར་བཟླས་ [203b.6]པར་བྱ་བའོ། །མདའ་ལ་སོགས་པའི་ཕྱག་མཚན་མེད་ན་ཡང་བསྒྲུབ་བྱའི་མགུལ་པ་ཨུཏྤལས་བཅིངས་ལ། རང་གི་ལུས་ཀྱི་འོད་ཟེར་སྤྲོས་པའི་ཚོགས་ཀྱིས་དེའི་ལུས་ཀུན་ནས་ཁྱབ་པར་བྱ་སྟེ། རང་དབང་དུ་གཞག་པར་བྱ་བ་ཡིན་ནོ། །སྒྲོལ་མའི་སྒྲུབ་ཐབས་ཨ་བྷ་ཡ་ལས་ཚུལ་ཁྲིམས་རྒྱལ་ [203b.7]མཚན་གྱིས་བསྒྱུར་བའོ།། {T3197}༄༅༅། །རྒྱ་གར་སྐད་དུ། བཛྲ་ཏཱ་ར་སཱ་དྷ་ནཾ། བོད་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། རྡོ་རྗེ་སྒྲོལ་མ་ལ་ཕྱག་འཚལ་ལོ། །དེ་ནས་སྦྱིན་སྲེག་ལས་མཆོག་གིས། །འདོད་དོན་ཀུན་གྲུབ་དེ་ཡི་ཕྱིར། །རྡོ་རྗེ་སྒྲོལ་མའི་སྒྲུབ་ཐབས་ནི། །བདག་ [204a] [204a.1]གིས་ཡང་དག་རབ་ཏུ་བཤད། །དེ་ལ་སྔགས་ཀྱི་ཚིག་ནི་འདི་དག་རྣམས་ཡིན་ཏེ། ཐུགས་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །འདི་ལྟ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་བདག་གིས་དབང་ [204a.2]བགྱིས་པའི་མ་རུངས་པ་དང་རབ་ཏུ་མ་རུངས་པ་ཐམས་ཅད་རྨུགས་པར་མཛོད་ཅིག །རེངས་པར་མཛོད་ཅིག །རྨོངས་པར་མཛོད་ཅིག །ཆིངས་ཤིག་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་མ་རུངས་པ་ཐམས་ཅད་སྒྲོལ་མ་ལ་སྭཱ་ཧཱ། མ་མོའི་དཀྱིལ་འཁོར་དབུས་གནས་པར། །ལྷ་མོ་སྒྲོལ་མ་རྣམ་བསྒོམས་ཏེ། །ཞལ་ [204a.3]བཞི་མ་ལ་ཕྱག་བརྒྱད་མ། །རྒྱན་རྣམས་ཐམས་ཅད་ཀྱིས་བརྒྱན་མ། །གསེར་གྱི་སྐུ་མདོག་སྐལ་ལྡན་མ། །གཞོན་ནུ་མཚན་རྣམས་མཆོག་ཏུ་འབར། །སངས་རྒྱས་ལྔ་ཡི་དབུ་རྒྱན་ཅན། །རྡོ་རྗེ་ཉི་མ་དབང་བསྐུར་བཞུགས། །ལང་ཚོ་བདོ་ཞིང་མདངས་བཟང་ཅན། །གསེར་གྱི་རྣ་གདུབ་རྣམ་ [204a.4]པར་གཡོ། །སྣ་ཚོགས་པ་ཡི་གདན་བཞུགས་ཤིང་། །འོད་ཟེར་དམར་པོས་རྣམ་པར་བརྒྱན། །རྡོ་རྗེ་ཞགས་པ་དེ་བཞིན་དུ། །མདའ་གཡོན་གསལ་དང་གཡས་པ་རྣམས། །རྡོ་རྗེ་ལྕགས་ཀྱུ་ཨུཏྤལ་གཞུ། །སྡིགས་མཛུབ་མཛད་རྣམས་གཡོན་པ་རྣམས། །རྡོ་རྗེ་སྐྱིལ་ཀྲུང་སྦྱོར་བ་ཡིས། །ས་ [204a.5]གསུམ་སྒྲུབ་པར་བྱེད་པ་ཡིན། །ཤར་དུ་མེ་ཏོག་སྒྲོལ་མ་སྟེ། །ཡི་གེ་ཨོཾ་ཡིག་ལས་གྲུབ་པའི། །ཁ་དོག་དཀར་མོ་ཡིད་འོང་མ། །ཞལ་གཅིག་མ་ལ་ཕྱག་གཉིས་མ། །མེ་ཏོག་ཕྲེང་བས་ཕྱག་བྲེལ་ཞིང་། །རྒྱན་རྣམས་ཀུན་གྱིས་བརྒྱན་པའོ། །ལྷོ་ན་བདུག་སྤོས་སྒྲོལ་མ་ནི། །ཁ་དོག་ནག་མོ་ [204a.6]གཟུགས་བཟང་མ། །ཕྱག་ན་བདུག་པའི་སྣོད་བསྣམས་ཤིང་། །རྒྱན་རྣམས་ཀུན་གྱིས་བརྒྱན་པའོ། །ནུབ་ཀྱི་མར་མེའི་སྒྲོལ་མ་ནི། །མར་མེའི་ཀོང་བུ་ལག་ཐོགས་ཤིང་། །སེར་མོ་རྒྱན་ཆེན་གྱིས་བརྒྱན་མ། །གསེར་གྱི་རྣ་གདུབ་གཡོ་བའོ། །བྱང་གི་དྲི་ཡི་སྒྲོལ་མ་ནི། །ཕྱག་ན་དྲི་ཡི་ [204a.7]དུང་བསྣམས་པའི། །ལྷ་མོ་སྐུ་མདོག་དམར་གྱུར་པ། །དཀྱིལ་འཁོར་ལྟེ་བར་བསྒོམ་པར་བྱ། །ལྕགས་ཀྱུ་མ་སོགས་རབ་དབྱེ་བས། །དེ་ནས་སྒོ་སྲུང་བསྒོམ་པར་བྱ། །ཤར་གྱི་སྒོ་ནི་རྡོ་རྗེ་ལྕགས་ཀྱུ་མ་སྟེ། ཞལ་གཅིག་ཕྱག་གཉིས་མ། ལྕགས་ཀྱུ་དང་ཨུཏྤལ་ཕྱག་ན་བསྣམས་ཤིང་། [204b] [204b.1]ཞལ་རྣམ་པར་བསྒྱུར་བ་མདོག་ནག་མོ། ལྷོའི་སྒོར་ནི་རྡོ་རྗེ་ཞགས་པ་མ་སྟེ། མདོག་སེར་མོ་བཞིན་རྣམ་པར་བསྒྱུར་བ། ཞལ་གཅིག་ཕྱག་གཉིས་མ་ཕྱག་ན་རྡོ་རྗེའི་ཞགས་པ་བསྣམས་པའོ། །ནུབ་ཀྱི་རྡོ་རྗེ་ལྕགས་ཐག་མ་སྟེ། དམར་མོ་ཞལ་གཅིག་ཕྱག་གཉིས་མ། ཞལ་རྣམ་པར་བསྒྱུར་བ་ [204b.2]ཕྱག་ན་རྡོ་རྗེའི་ལྕགས་ཐག་བསྣམས་པའོ། །བྱང་གི་སྒོ་ན་ནི་རྡོ་རྗེ་དྲིལ་བུ་མ་ཁ་དོག་དཀར་མོ་སྟེ། ཞལ་གཅིག་ཕྱག་གཉིས་མ་བཞིན་རྣམ་པར་བསྒྱུར་བ་རྡོ་རྗེ་དྲིལ་བུ་ཕྱག་ན་བསྣམས་པའོ། །དེ་དག་རྣམས་ནི་ཉི་མའི་གདན་ལ་གཡོན་བསྐུམ་པའི་སྟབས་ཀྱིས་བཞུགས་ཤིང་། ཉི་མའི་གཟི་ [204b.3]བརྗིད་ཅན། འབར་བའི་ཕྲེང་བས་དཀྲིགས་པ། སྦྲུལ་གྱིས་བརྒྱན་པར་བསྟན་པར་བྱ་བའོ། །སྟེང་དུ་ནི་གཙུག་ཏོར་རྣམ་པར་རྒྱལ་བ་སྟེང་འོག་ཏུ་ཡང་སུམྦྷ་རྣམ་པར་བསྒོམ་པར་བྱ་བ་ནི། འཁོར་ལོ་དང་ཀླུའི་ཞགས་པ་དང་ལྡན་པར་བསྒོམས་ལ། སྔགས་སྤྲོས་པས་བཟླས་པར་བྱ་བ་ནི། ཨོཾ་ [204b.4]ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཕ་རོལ་ཕྱིན་བཅུ་ལ་བརྟེན་པ། །ཡི་གེ་བཅུ་ལས་ལྷ་བཅུ་ནི། །སྦྱོར་བ་ཡིས་ནི་བསྒོམ་བྱས་ན། །དོན་རྣམས་ཐམས་ཅད་རབ་ཏུ་འགྲུབ། །སངས་རྒྱས་ཀུན་གྱིས་ཕྱག་བྱས་པའི། །སྔགས་ཀྱི་གཙོ་བོ་མཆོག་དེ་དག །བརྗོད་པས་གྲུབ་བྱེད་རྣོ་གྱུར་པ། །རྡོ་རྗེ་གུར་ལས་ [204b.5]གསུངས་པ་ཡིན། །སྔགས་འདིས་སྟོད་གཡོགས་ཀྱི་གྲྭ་ལ་ལན་བདུན་མངོན་པར་བསྔགས་ཏེ། མདུད་པ་བཅིངས་ནས་རི་འབིགས་བྱེད་ལ་འགྲོ་བར་གྱུར་ན་ཡང་འགའ་ཞིག་གིས་ཀྱང་གནོད་པར་མི་ནུས་སོ། །སྟག་དང་། ཆོམ་རྐུན་དང་། ཆུ་སྲིན་ན་ཀྲ་དང་། སེང་གེ་དང་། སྦྲུལ་དང་། མཆེ་བ་ཅན་དང་། མ་ [204b.6]ཧི་ཥ་དང་། དོམ་དང་། བ་མེན་ལ་སོགས་པ་རྣམས་ཀྱང་མིང་དྲན་པ་ཙམ་གྱིས་འཇོམས་ཤིང་ཐུལ་བར་འགྱུར་རོ། །སྔགས་འདིས་ཇི་སྲིད་དུ་ཨུཏྤལ་བརྒྱ་རྩ་བརྒྱད་སྦྱིན་སྲིག་བྱ་སྟེ། ཨོཾ་ཏཱ་རེ་ཏུཏྟཱ་རེ་ཆེ་གེ་མོ་བདག་གི་དབང་དུ་ཁུག་སྭཱ་ཧཱ། སྔགས་འདི་ཁྭ་ཏའི་གཤོག་སྒྲོལ་ལན་སུམ་ཅུ་རྩ་གཉིས་ཀྱི་བར་དུ་ཡོངས་སུ་ [204b.7]བསྔགས་ལ་དགྲའི་སྒོར་སྦས་ཏེ། ཉི་མ་བདུན་ན་སྐྲོད་པར་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་པྲ་ཙ་ལ་ཤཱ་གྷྲི་གཱ་མི་ནི་ལྷ་སྦྱིན་སྐྲོད་ཅིག་ཧཱུཾ་ཧཱུཾ་ཕཊ་ཕཊ། དེ་ནས་སྦྱོར་བ་གཞན་ཡང་ཡོད་དོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་ཨ་བྷི་དྷཱ་ནཱ་ཀུ་མཱ་རཱི་མ་ཛྱ་བི་བཱ་ཧེ་ན་ཏ་སྱཿཔི་ཏཱ་པྲ་ཡཙྪ་ཏུ་སྭཱ་ཧཱ། མྱོས་བྱེད་གཏུམ་པོ་ས་བོན་དང་། ། [205a] [205a.1]དེ་བཞིན་སྨྱོན་པ་ཉིད་དང་ནི། །མྱ་ངན་མེད་འདབ་མེ་ཏོག་ཀྱང་། །སྟོང་ཕྲག་ལྔ་ནི་སྦྱིན་སྲེག་བྱ། །སྦྲང་མར་བུ་རམ་སྦྱིན་སྲེག་ནི། །བུ་མོ་སྒྲུབ་ལ་རབ་ཏུ་བསྔགས། །ཉི་མ་བདུན་ནས་རྣལ་འབྱོར་པས། །རང་འདོད་བུ་མོ་དེ་རྙེད་དོ། །དེ་ནས་སྦྱོར་བ་གཞན་ཡང་ཡོད་དོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་ [205a.2]གེ་མོ་རང་གི་གནས་ནས་མངོན་པར་བཀུག་ནས་བདག་གི་དྲུང་དུ་ཁྲིད་ཤོག་ཛཿསྔགས་འདིས་འབྲས་བུ་བཱ་ཌ་རཱི་ཀཎྜེ་ཀ་རང་བྱུང་གི་མེ་ཏོག་གིས་བྱུགས་ལ་སྟོང་ཕྲག་ལྔ་སྦྱིན་སྲེག་བྱ་བའོ། །བྱ་བ་འདིས་ནི་མིའི་བདག་པོའི་བུ་མོ་ཡང་འགུགས་པར་བྱེད་པ་ཡིན་ནོ། །དེ་ནས་སྦྱོར་བ་གཞན་དག་ཡང་ཡོད་དོ། །ར་ཙས་ [205a.3]ལཱའི་རས་ལ་བཅོམ་ལྡན་འདས་མ་ཞལ་གཅིག་ཕྱག་གཉིས་མ་ལྕགས་ཀྱུ་དང་ཨུཏྤལ་དང་ཞགས་པ་ཕྱག་ན་བསྣམས་པ་རྣམ་པར་བྲིས་ལ། དེའི་མདུན་དུ་ལྷ་རྫས་ཀྱི་མེ་ཏོག་མཆོག་འདི་དག་བྱ་བ་ལ་སོགས་པས་མཆོད་པར་བྱ་བའོ། །དེའི་ཕྱི་ནས་ནི་བསྒོམ་པ་དང་ལྡན་པས་བཟླས་པ་བྱ་སྟེ། ཨོཾ་ཏཱ་རེ་ཏུཏྟཱ་རེ་ [205a.4]ཆེ་གེ་མོས་བདག་འདོད་པའི་སྭ་སྣཾ་ཀ་ཐ་ཡ་ཧཱུཾ་ཕཊ་བྱ་བས་སྟོང་ཕྲག་ལྔ་ནས་འོང་བར་འགྱུར་རོ། །ཞགས་པས་རྐེད་པ་ནས་བཅིངས་ཤིང་ལྕགས་ཀྱུས་ཕུག་ནས་བཟུང་བའི་བསྒྲུབ་བྱ་རྐང་པའི་འོག་ཏུ་བསྒོམས་ལ། བྲན་མོའི་ཚུལ་གྱིས་ལོངས་སྤྱོད་པར་བྱའོ། །དེ་ནས་སྦྱོར་བ་གཞན་ཡང་ཡོད་པ་ནི་སྒྲོལ་མའི་ [205a.5]གཟུངས་ཀྱིས་ལན་བདུན་དུ་མངོན་པར་བསྔགས་ལ། བདག་ཉིད་མིག་གཉིས་མཉེས་ཏེ། རྒྱལ་པོའི་ཕོ་བྲང་གི་སྒོར་ཞུགས་པར་གྱུར་ན་འགལ་བར་ཞུགས་ཤིང་གུས་པ་མེད་པ་ཡང་དེ་ནས་རྒྱལ་པོ་དེ་སློབ་མ་བཞིན་དུ་གུས་པར་བྱེད་དོ། །རབ་ཏུ་དང་བར་གྱུར་པ་ཡང་ལེགས་པར་གསལ་བར་བྱེད་དོ། །མཐུན་ [205a.6]པའི་གཏམ་སྨྲ་བར་བྱེད་དོ། །གཡོག་པོ་ཉིད་དུ་ཡང་ཡོང་བར་འགྱུར་རོ། །གཏུམ་པོ་ཡིན་ཡང་དབང་དུ་འགྱུར་བ་འདི་ནི་མཐོང་བས་ཡིད་ཆེས་པ་དང་ངེས་པར་བདེན་པ་ཡིན་ནོ། །ཡང་དེ་ནས་སྦྱོར་བ་གཞན་དུ་གྱུར་པ་ནི། སྒྲོལ་མའི་གཟུངས་ལན་བརྒྱ་བཟླས་ཤིང་སྦྲུལ་དུག་ཅན་ངོ་གཉིས་པ་ཐལ་བར་བྱས་ [205a.7]ཏེ། བ་ཁ་དོག་དམར་མོའི་མར་དང་ཤིང་ཉི་མའི་ཤིང་བལ་གྱིས་སྡོང་བུ་བྱས་ལ་ལེགས་པར་སྤར་བས་མིག་རྩི་དབབ་པར་བྱ་བའོ། །མིག་རྩི་དེ་དང་རྡོ་རྗེ་ཉི་མ་དང་རྡོ་རྗེ་ཆོས་གཉིས་དང་ལེགས་པར་མཉེས་ཏེ་རྟ་མཆོག་གི་དུ་བ་བདུགས་ལ། ཐལ་བ་དང་ལྷན་ཅིག་ཏུ་མིག་ལ་བྱུགས་པར་གྱུར་པའི་མིག་རྡོ་རྗེ་གང་ [205b] [205b.1]ལ་བལྟས་པ་དེ་གང་གི་ཚེ་པདྨ་གར་གྱི་དབང་ཕྱུག་ཡིན་ཡང་འཛག་པར་མ་གྱུར་ན་དེའི་ཚེ་ང་སྒྲོལ་མ་མ་ཡིན་ཞིང་ངས་སངས་རྒྱས་བཅོམ་ལྡན་འདས་རྣམས་ཀྱི་སྐུ་བཅོམ་པར་ཡང་འགྱུར་རོ། །དེ་ནས་སྦྱོར་བ་གཞན་ཡང་ཡོད་པ་ནི་བུ་ཆུང་སོ་མེད་པའི་ལྕེ་བླངས་ལ་སྒྲོལ་མའི་གཟུངས་ཀྱིས་ལན་བདུན་ [205b.2]མངོན་པར་བསྔགས་ཏེ། བྷྲྀངྒ་རཱ་ཇའི་རྩ་བ་དང་གི་ཝཾ་དང་ལྷན་ཅིག་གཅིག་ཏུ་བྱས་ལ་དཔྲལ་བར་ཐིག་ལེ་བྱུགས་པ་གང་དང་གང་གིས་མཐོང་བ་དེ་དབང་དུ་བྱེད་དོ། །གཞན་ཡ་དགའ་བར་མི་འགྱུར་ཞིང་གཞན་དུ་འགྲོ་བར་ཡང་མི་བྱེད་དེ། བདག་ཉིད་ཀྱང་མི་འདོར་རོ། །དེ་ནས་ནི་སྦྱོར་བ་གཞན་དག་ཀྱང་ཡོད་དེ། [205b.3]གསུས་པའི་འབུ་ལ་སྒྲོལ་མའི་གཟུངས་ཀྱིས་ལན་བདུན་མངོན་པར་བསྔགས་ནས་རྡོ་རྗེ་ཆོས་དང་ལྷན་ཅིག་ཏུ་བྱས་ཏེ། ཏཱམྦུ་ལ་དང་བུ་མོ་ལ་སྦྱིན་ན་ཟོས་པ་ཙམ་གྱིས་རྣལ་འབྱོར་དང་ལྡན་པ་ནི་མི་ཕྱེད་པར་འགྱུར་རོ། །གཞན་ལ་དགའ་བར་མི་བྱེད་ཅིང་གཞན་དུ་འགྲོ་བར་ཡང་མི་འགྱུར་རོ། །རང་གི་ཁྱིམ་ཐབས་ [205b.4]ཀྱང་སྤོང་པར་འགྱུར་རོ། །དེ་ནས་སྦྱོར་པ་གཞན་ཡང་ཡོད་པ་ནི་མར་ནག་ཆེན་པོས་བདག་ཉིད་ཀྱི་ལུས་ལ་བྱུགས་ལ། བསྒོམ་པ་དང་ལྡན་པས་སྒྲོལ་མའི་གཟུངས་ཁྲི་བཟླས་པར་བྱ་བའོ། །བཟླས་པ་དང་འབྲས་ཤཱ་ལི་ཕྱེ་མར་བྱས་པའི་ལྡེ་གུས་དྲི་མ་དྲིལ་ཕྱིས་བྱས་པ། གང་ལ་བྱིན་པ་དེ་ཉི་མ་ལྔར་ཡང་མི་ཕྱེད་ [205b.5]པ་ཡིན་ནོ། །དེ་ནས་སྦྱོར་བ་གཞན་ཡང་ཡོད་པ་ནི་ཟླ་བ་གཟས་བཟུང་བའི་དུས་སུ་སྒྲོལ་མའི་གཟུངས་བཟླས་པ་དང་། སྔོན་དུ་འགྲོ་བ་ཡང་བྱས་པས་དེ་ལྟ་བུར་གྱུར་པའི་འཇིག་རྟེན་དབང་ཕྱུག་བླངས་ལ་དུང་འདེ་གུ་དང་བཅས་པ་བག་མ་ལ་སྦྱིན་པར་བྱ་སྟེ། ཉི་མ་ལྔར་ཡང་རྗེས་སུ་བྱེད་པར་འགྱུར་རོ། །དེ་ནས་སྦྱོར་བ་ [205b.6]གཞན་དག་ཀྱང་ཡོད་དེ། གང་ལ་སྒྲོལ་མའི་གཟུངས་ཀྱི་སྔགས་ཀྱིས་མྱོས་པའི་འབྲས་བུ་ལ་ལན་བརྒྱ་རྩ་བརྒྱད་ཡོངས་སུ་བསྔགས་ཤིང་འབྲས་བུ་དེ་དང་རྟ་མགྲིན་ལྷན་ཅིག་ཏུ་བྱས་པ་གང་ལ་བྱུགས་པ་དེ་དབང་དུ་འགྱུར་རོ། །དེ་ནས་སྦྱོར་བ་གཞན་ཡང་ཡོད་པ་ནི། །ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོའི་འཆིང་བ་གྲོལ། [205b.7]བར་མཛོད་མུཿསྭཱ་ཧཱ། སྔགས་འདི་ཤིང་ཉི་མའི་ཡལ་ག་ལ་བསྒྲུབ་བྱའི་མིང་བར་བཅུག་པ་ལེགས་པར་བྲིས་ལ་ཀུ་ལཱའི་ར་གར་ཏ་ལ་བཞག་ནས་བཅིངས་པ་ལས་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་ཐབས་རྫོགས་སོ།། །།པཎྜི་ཏ་ཆེན་པོ་ཨ་བྷ་ཡཱ་ཀ་རའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་ [206a] [206a.1]གྱིས་བསྒྱུར་བའོ།། {T3198}༄༅༅། །རྒྱ་གར་སྐད་དུ། བཛྲ་ཏཱ་ར་སཱ་དྷ་ནཾ། བོད་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། སྒྲོལ་མ་ལ་ཕྱག་འཚལ་ལོ། །དེ་ནས་སྦྱིན་སྲེག་ལས་མཆོག་གིས། །འདོད་པའི་དོན་ཀུན་སྒྲུབ་བྱེད་ཕྱིར། །རྡོ་རྗེ་སྒྲོལ་མའི་སྒྲུབ་ཐབས་ནི། །བདག་གིས་ཡང་དག་རབ་ཏུ་བཤད། ། [206a.2]དེ་ལ་སྔགས་ཀྱི་ཚིག་ཏུ་གྱུར་པ་ནི་འདི་དག་སྟེ། འདི་ལྟར་ཐུགས་རྗེ་ཆེན་པོ་དང་ལྡན་པ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཀྲི་ཏེ། སརྦ་དུཥྚཱ་ན་ཛཾ་བྷ་ཡ་སྟཾ་བྷ་ཡ། མོ་ཧ་ཡ་བནྡྷ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་ [206a.3]སརྦ་དུཥྚཱ་སྟཾ་བྷ་ནི་ཏཱ་རེ་སྭཱ་ཧཱ། དེ་ལ་རེ་ཞིག་དང་པོར་རང་གི་སྙིང་གར་ཟླ་བའི་དཀྱིལ་འཁོར་གྱི་ས་བོན་གྱི་ཡི་གེ་ཏཱྃ་བསྒོམས་ལ། དེའི་འོད་ཟེར་གྱིས་ཡང་དག་པར་སྤྱན་དྲངས་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་རྣམ་པ་སྣ་ཚོགས་པའི་མཆོད་པ་ལ་སོགས་པས་ལེགས་པར་མཆོད་ཅིང་། [206a.4]གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བརྗོད་པས་སྡིག་པ་བཤགས་པ་ལ་སོགས་པ་བྱས་ལ། དེ་ནས་ཡང་ཚངས་པའི་གནས་བཞི་པོ་རྣམས་བསྒོམས་ཏེ། སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་བདག་ཉིད་ཀྱི་རང་བཞིན་ནི་ང་ཡིན་ནོ། །བྱ་བའི་སྔགས་བརྗོད་པར་བྱ་བའོ། །དེ་ནས་ཡི་གེ་པྃ་ལས་ [206a.5]བྱུང་བའི་པདྨ་ལ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཏཱྃ་གི་ས་བོན་གཞན་ཡང་བསྒོམ་པར་བྱ་ཞིང་དེ་དག་ཡོངས་སུ་གྱུར་པ་ལས། མ་མོའི་དཀྱིལ་འཁོར་དབུས་གནས་པར། །ལྷ་མོ་སྒྲོལ་མ་རྣམ་པར་བསྒོམ། །ཞལ་བཞི་མ་ལ་ཕྱག་བརྒྱད་མ། །རྒྱན་རྣམས་ཀུན་གྱིས་བརྒྱན་པ་ཉིད། །གསེར་གྱི་ [206a.6]ཁ་དོག་དང་མཚུངས་པའི། །གཞོན་ནུ་སྐལ་ལྡན་མཚན་མཆོག་འབར། །སྣ་ཚོགས་པདྨར་ལེགས་བཞུགས་ཤིང་། །ཟླ་བའི་གདན་ལ་ཡང་དག་བཞུགས། །སེར་ནག་དཀར་དང་དམར་བ་ནི། །གཡས་ནས་སྐོར་བའི་ཞལ་བཞི་ཡིན། །ཞལ་རེ་ཞིང་ལ་སྤྱན་གསུམ་མ། །རྡོ་རྗེ་སྐྱིལ་མོ་ཀྲུང་ [206a.7]གིས་བཞུགས། །འོད་ཟེར་དམར་པོ་དང་ལྡན་པ། །སངས་རྒྱས་བཞི་ཡིས་དབུ་བརྒྱན་པ། །གཡས་ཀྱི་ཕྱག་རྣམས་ན་ནི། རྡོ་རྗེ་དང་མདའ་དང་། དུང་བསྣམས་པ་དང་། མཆོག་སྦྱིན་པར་མཛད་པའོ། །གཡོན་པའི་ཕྱག་རྣམས་ན་ཨུཏྤལ་དང་གཞུ་དང་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་ [206b] [206b.1]སྡིགས་མཛུབ་དང་བཅས་པ་བསྣམས་པའོ། །རྡོ་རྗེ་སྐྱིལ་ཀྲུང་སྦྱོར་བ་ཡིས། །ས་གསུམ་སྒྲུབ་པར་བྱེད་པ་ཡིན། །དེ་མདུན་མེ་ཏོག་སྒྲོལ་མ་ནི། །ཡི་གེ་ཨོཾ་ཡིག་ངེས་རྫོགས་ལས། །ཁ་དོག་དཀར་མོ་ཡིད་འོང་མ། །མེ་ཏོག་ཕྲེང་གིས་ཕྱག་གང་ཞིང་། །ཞལ་གཅིག་པ་ལ་ཕྱག་གཉིས་ [206b.2]མ། །རྒྱན་རྣམས་ཀུན་གྱིས་བརྒྱན་པའོ། །ལྷོ་ཕྱོགས་བདུག་པའི་སྒྲོལ་མ་ཡང་། །ཁ་དོག་ནག་མོ་གཟུགས་ལེགས་མ། །སྤོས་ཕོར་གྱིས་ནི་ཕྱག་སྦྲེལ་ཞིང་། །རྒྱན་རྣམས་ཀུན་གྱིས་མཛེས་པ་ཉིད། །ནུབ་ཀྱི་མར་མེ་སྒྲོལ་མ་ཡང་། །ཁ་དོག་སེར་མོ་ཡིད་འཕྲོག་མ། །ལྷ་རྫས་མར་མེའི་ [206b.3]སྣོད་བསྣམས་ཤིང་། །གསེར་གྱི་རྣ་གདུབ་གཡོ་བའོ། །བྱང་གི་དྲི་ཡི་སྒྲོལ་མ་ནི། །དྲི་ཡི་དུང་ཕོར་ཕྱག་ན་བསྣམས། །ལྷ་མོ་ཁ་དོག་དམར་མོ་མདོག །དཀྱིལ་འཁོར་ལྟེ་བར་བསྒོམ་པར་བྱ། །དེ་དག་རྣམས་ནི་ཞལ་གཅིག་མ་ཕྱག་གཉིས་མ། རྒྱན་རྣམས་ཐམས་ཅད་ཀྱིས་བརྒྱན་པ་དང་། རྡོ་ [206b.4]རྗེ་སྐྱིལ་མོ་ཀྲུང་གིས་བཞུགས་པའོ། །དེ་ནས་ཤར་སྒོར་བསྒོམ་བྱ་བ། །འོད་དཀར་རྡོ་རྗེ་ལྕགས་ཀྱུ་མ། །རྡོ་རྗེ་ལྕགས་ཀྱུ་དམ་པ་ཡི། །ཕྱག་མཚན་བདག་ཉིད་ཡིད་འཕྲོག་མ། །ལྷོ་སྒོའི་རྡོ་རྗེ་ཞགས་པ་མ། །ནག་མོ་ཤིན་ཏུ་དགའ་མགུ་མ། །ལྷ་རྫས་རྒྱན་གྱིས་བརྒྱན་པའི་སྐུ། །གོས་ལྡན་ [206b.5]རྡོ་རྗེ་ཞགས་པ་བསྣམས། །རྡོ་རྗེ་ལྕགས་ཐག་སྐུ་མདོག་སེར། །རྡོ་རྗེ་ལྕགས་ཐག་ཕྱག་ན་བསྣམས། །སྣ་ཚོགས་རྒྱན་གྱིས་བརྒྱན་པ་ཉིད། །ནུབ་ཀྱི་སྒོར་ནི་བསམ་པར་བྱ། །བྱང་སྒོར་རྡོ་རྗེ་དྲིལ་བུ་མ། །རྡོ་རྗེའི་དྲིལ་བུ་དང་ལྡན་མ། །འོན་ཀྱང་མདོག་དམར་དགེ་བ་ཡིས། །དཀར་དང་ [206b.6]གཟུགས་གཉིས་ལྷ་སྐུར་བ་ལྟ། །དེ་ནས་སྔགས་པས་སྟེང་དུ་ནི། །གཙུག་ཏོར་རྣམ་རྒྱལ་འཁོར་ལོ་འཛིན། །གཟུགས་ལེགས་ཁ་དོག་སེར་བ་སྟེ། །རྫོགས་པའི་བྱང་ཆུབ་འབྲས་འབྱིན་བསྒོམ། །དེ་ནས་དཀྱིལ་འཁོར་ལྟེ་འོག་ཏུ། །ཕྱག་ན་ཀླུ་ཞགས་བསྣམས་པ་ཡི། །སུམྦྷ་འོད་ [206b.7]འབར་དམ་པའི་སྐུ། །ཁ་དོག་ནག་པོ་བསྒོམ་པར་བྱ། །ཞལ་གཅིག་མ་ལ་ཕྱག་གཉིས་མ། །ཐམས་ཅད་ཤེས་བྱ་ཡིད་འོང་མར། །ལྷ་མོ་དྲུག་པོ་དག་རྣམས་ནི་ཅུང་ཟད་མཆེ་བ་རྣམ་པར་གཙིགས་པ་དང་བསྐྱོད་པའི་སྐྱིལ་ཀྲུང་གིས་ལེགས་པར་བཞུགས་པ་ཡིན་ནོ། །དཀྱིལ་འཁོར་གྱི་ [207a] [207a.1]འཁོར་ལོ་དེ་དག་ཐམས་ཅད་བསྒོམས་ལ་སྙིང་གའི་ས་བོན་གྱི་འོད་ཟེར་གྱིས་ཡང་དག་པར་སྤྱན་དྲངས་པའི་ཡེ་ཤེས་ཀྱི་འཁོར་ལོ་ཛཿཧཱུཾཿབཾ་ཧོཿཞེས་བྱ་བ་འདིས་སྤྱན་དྲངས་པ་ལ་སོགས་པ་རྣམས་བྱ་བའོ། །ལྷ་བཅུ་པོ་དེ་དག་ཀྱང་། ཡི་གེ་བཅུ་ཡི་སྤྲུལ་པ་ཡིན། །ཕ་རོལ་ [207a.2]ཕྱིན་བཅུ་རྣམ་དག་པས། །ལས་རྣམས་ཐམས་ཅད་རབ་སྒྲུབ་བྱེད། །དེ་ལ་ཡི་གེ་བཅུ་པོ་རྣམས་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། དེ་བཞིན་དུ་ལུས་དང་ངག་དང་ཡིད་བྱིན་གྱིས་བརླབ་པ་དབང་བསྐུར་བ་དང་། ཐིག་ལེ་དང་ཕྲ་མོའི་རྣལ་འབྱོར་དང་། བཟླས་པ་ལ་སོགས་པ་རྣམས་ཀྱང་རྟོགས་པར་ [207a.3]བྱ་བ་ཡིན་ནོ། །སངས་རྒྱས་ཀུན་གྱིས་ཕྱག་བྱས་ཤིང་། །བཀླགས་པ་ཙམ་གྱིས་གྲུབ་བྱེད་པའི། །སྔགས་ཀྱི་གཙོ་བོ་མཆོག་འདི་ནི། །ལྷ་རྫས་རྡོ་རྗེ་གུར་ལས་བཤད། །བྱ་བ་ཡིན་ནོ། །འདི་ལ་ཡང་ལས་ནི་འདི་དག་ཡིན་ཏེ། སྔགས་འདིས་ནི་སྟོད་གཡོགས་ཀྱི་གྲྭ་ནས་བཟུང་ལ་ལན་ [207a.4]བདུན་མངོན་པར་བསྔགས་ཏེ། མདུད་པ་བསྡམས་ལ་ཕྱིན་པར་གྱུར་ན་ཡང་འགའ་ཞིག་གིས་ཀྱང་འཇིགས་པར་མི་འགྱུར་རོ། །སྟག་དང་། ཆོམ་རྐུན་དང་། ཆུ་སྲིན་ན་ཀྲ་དང་། སེང་གེ་དང་། སྦྲུལ་དང་། མཆེ་བ་ཅན་དང་། མ་ཧི་ཥ་དང་། དོམ་དང་། བ་མེན་དང་། རྟ་ལ་སོགས་པ་རྣམས་ [207a.5]ཀྱང་བརླག་པར་བྱེད་ཅིང་འཇིག་པར་འགྱུར་རོ། །དེ་བཞིན་དུ་སྔགས་འདིས་ཨུཏྤལ་རྣམས་བརྒྱ་རྩ་བརྒྱད་ཙམ་ཇི་སྲིད་དུ། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོ་བདག་གི་དབང་དུ་གྱིས་ཤིག་སྭཱ་ཧཱ་བྱ་བས་སྦྱིན་སྲེག་བྱས་པས་གང་འདོད་པ་དེ་དབང་དུ་འོང་ངོ་། །དེ་ནས་ཡང་སྔགས་འདིས་ཁྭ་ཏའི་གཤོག་ [207a.6]པའི་སྒྲོ་ལ་ལན་སུམ་ཅུ་རྩ་གཉིས་ཡོངས་སུ་བསྔགས་ཏེ། དགྲ་བོའི་ཁྱིམ་དུ་སྤས་པས་ཉི་མ་བདུན་ན་སྐྲོད་པར་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་བསྐྱོད་ཅིང་རབ་ཏུ་བསྐྱོད་པས་ལྷས་བྱིན་མྱུར་དུ་འགྲོ་བར་སྐྲོད་ཅིག་ཧཱུཾ་ཕཊ་ཅེས་བྱ་བ་འདི་བསྐྲད་པའི་ཆོ་གའོ། །དེ་ནས་སྦྱོར་བ་གཞན་ལ། ཨོཾ་ཏཱ་རེ་ [207a.7]ཏུཏྟཱ་རེ་ཏུ་རེ་ཆེ་གེ་མོར་མངོན་པར་བརྗོད་པའི་ཀུ་མཱ་རཱི་མ་ཛྱ་མུད་བཱ་ཧེ་ན་ཏ་སྱཱ་པི་ཏེ་པྲ་ཡཙྪ་ཏུ་སྭཱ་ཧཱ། མྱོས་བྱེད་གཏུམ་པོའི་ས་བོན་དང་། །དེ་བཞིན་སྨྱོན་པའི་འབྲས་བུ་དང་། །ལོ་འདབ་མེ་ཏོག་མྱ་ངན་མེད། །སྟོང་ཕྲག་ལྔར་ནི་བསྲེག་པར་བྱ། །མར་དང་སྦྲང་རྩི་བུ་རམ་གྱི། །སྦྱིན་སྲེག་བུ་མོ་སྒྲུབ་ལ་ [207b] [207b.1]བསྔགས། །དེ་ནས་རྣལ་འབྱོར་ཉིན་བདུན་ན། །བུ་མོ་རང་ཉིད་འདོད་པ་ཐོབ། །དེ་ནས་སྦྱོར་བ་གཞན་ཡང་། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོར་མངོན་པར་བརྗོད་པ་རང་གི་གནས་ནས་བདག་གི་དྲུང་དུ་ཁུག་ཅིག་ཛཿཞེས་བྱ་བའི་སྔགས་འདིས་འབྲས་བུ་བ་ཌ་རི་ཀཎྜ་ཀཱ་རང་བྱུང་གི་མེ་ཏོག་གིས་བྱུགས་ལ་སྟོང་ཕྲག་ [207b.2]སྦྱིན་སྲེག་བྱ་བའོ། །དེས་ནི་རྒྱལ་པོའི་བུ་མོ་ཡང་འགུགས་པར་བྱེད་དོ། །དེ་ནས་ཡང་སྦྱོར་བར་གྱུར་པ་གཞན་ལ་ར་ཛ་ས་ལཱའི་རས་ལ་བཅོམ་ལྡན་འདས་མ་ཞལ་གཅིག་ཕྱག་གཉིས་མ་ལྕགས་ཀྱུ་དང་ཞགས་པ་དང་ཨུཏྤལ་ཕྱག་ན་བསྣམས་པ་རྣམ་པར་བྲིས་ལ། དེའི་སྤྱན་སྔར་ལྷ་རྫས་ཀྱི་མེ་ཏོག་ [207b.3]མཆོག་འདི་དག་ཅེས་བྱ་བ་ལ་སོགས་པས་མཆོད་པ་བྱས་ཏེ། སྒོམ་པ་དང་ལྡན་པས་སྔགས་བཟླས་པར་བྱ་བ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོ་འདི་དག་འདོད་པའི་རྨི་ལམ་སྟོན་པ་ཧཱུཾ་ཕཊ། སྟོང་ཕྲག་ལྔ་ན་འོང་བར་འགྱུར་ཏེ། ཞགས་པས་མགུལ་པ་བཅིངས་ཤིང་ལྕགས་ཀྱུས་རྣམ་པར་ཕུག་ནས། [207b.4]རྐང་པ་ཨུཏྤལ་ཉིད་ཀྱིས་བཀྱིགས་པས་ཉེ་འཁོར་ཀུན་ནས་དྲངས་པའི་བསྒྲུབ་བྱ་རྐང་པའི་འོག་ཏུ་བསྒོམས་ལ། ཁོལ་མོའི་ངོ་བོས་ལོངས་སྤྱད་པར་བྱ་བའོ། །དེ་ནས་སྦྱོར་བ་གཞན་ལ་སྒྲོལ་མའི་གཟུངས་ཀྱིས་ལན་བདུན་དུ་མངོན་པར་བསྔགས་ལ་བདག་ཉིད་ཀྱི་མིག་གཉིས་བསྲུབ་པར་བྱ་བའོ། །དེ་ [207b.5]རྒྱལ་པོའི་ཕོ་བྲང་འཁོར་དུ་ཞུགས་པར་གྱུར་ན་རྒྱལ་པོ་གུས་པ་ལ་སོགས་པ་བྱེད་པར་འགྱུར་ཞིང་། གཅིག་ཏུ་དབང་དུ་འདུ་བར་འགྱུར་རོ། །དེ་ནས་སྦྱོར་བ་གཞན་ཡང་སྒྲོལ་མའི་གཟུངས་བརྒྱ་ཕྲག་ཙམ་བགྲངས་ལ་སྦྲུལ་དུག་ཅན་གདོང་གཉིས་པ་ཐལ་བར་བྱ་བའོ། །བ་ཁ་དོག་དམར་མོའི་མར་ལ་ [207b.6]ཤིང་ཉི་མའི་ཤིང་བལ་གྱིས་སྡོང་བུ་བྱས་ཏེ། ལེགས་པར་སྦར་ལ་མིག་རྩི་དབབ་པར་བྱ་བའོ། །མིག་རྩི་དེ་རྡོ་རྗེ་ཉི་མ་དང་ལེགས་པར་མཉེས་ལ་རྟ་མཆོག་གིས་བདུག་པར་བྱ་བའོ། །དེ་དག་ཐལ་བ་དང་ལྷན་ཅིག་ཏུ་མིག་ལ་བྱུགས་པར་བྱ་སྟེ། རྡོ་རྗེའི་མིག་གིས་གང་མཐོང་བ་དེ་གལ་ཏེ་པདྨ་ [207b.7]གར་གྱི་དབང་ཕྱུག་ཡིན་ཡང་འཛག་པར་མ་གྱུར་ན་ནི་དེའི་ཚེ་ང་སྒྲོལ་མ་མ་ཡིན་ཞིང་སངས་རྒྱས་བཅོམ་ལྡན་འདས་རྣམས་ཀྱིས་བསླུས་པར་འགྱུར་རོ། །དེ་ནས་སྦྱོར་བ་གཞན་ལ་གསུས་པའི་སྲིན་བུ་ལ་གཟུངས་ལན་བདུན་མངོན་པར་བསྔགས་ཏེ་རྡོ་རྗེ་ཆོས་དང་ལྷན་ཅིག་གཅིག་ཏུ་བྱས་ལ་ཏཱམྦུ་ [208a] [208a.1]ལ་དང་སྦྱིན་པར་བྱ་བའོ། །མིད་པ་ན་རྣལ་འབྱོར་གྱི་མཆོག་འདིས་མི་འབྲལ་བ་དང་རང་གི་ཁྱིམ་ཐབས་དང་ཡང་སྤྱོད་པར་མི་བྱེད་དོ། །དེ་ནས་སྦྱོར་བ་གཞན་ཡང་ཡོད་པ་ནི་བུ་ཆུང་སོ་མེད་པའི་ལྕེ་བླངས་ལ་སྒྲོལ་མའི་གཟུངས་ཀྱིས་ལན་བདུན་དུ་མངོན་པར་བསྔགས་ལ་བྷྲྀངྒ་ [208a.2]རཱ་ཛ་དང་གི་བཾ་དང་གཅིག་ཏུ་བྱས་ཏེ། དཔྲལ་བར་ཐིག་ལེ་བྱས་པས་ནི་གང་གིས་མཐོང་བ་དེ་དབང་དུ་བྱེད་དོ། །དེ་ནས་སྦྱོར་བ་གཞན་ཡང་སྣུམ་ཆེན་པོས་བདག་ཉིད་ཀུན་དུ་བྱུགས་ཏེ། བསྒོམ་པ་དང་ལྡན་པས་སྒྲོལ་མའི་གཟུངས་ཁྲི་ཕྲག་གཅིག་བཟླས་པར་བྱ་བའོ། །བཟླས་པ་དང་འབྲས་ [208a.3]ཤཱ་ལི་ཕྱེ་མར་བྱས་པའི་འདི་གུས་དྲི་མ་དྲིལ་ཕྱིས་བྱས་པས་གང་ལ་སྦྱིན་པར་གྱུར་པ་དེ་ཉི་མ་ལྔར་ཡང་མི་ཕྱེད་དོ། །སྦྱོར་བ་གཞན་ཡང་ཟླ་བ་གཟས་བཟུང་བའི་དུས་ཚོད་དུ་སྒྲོལ་མའི་གཟུངས་བཟླས་པ་དང་སྔོན་དུ་འགྲོ་བ་ཡང་བྱས་པས་དེ་ལས་བྱུར་བའི་འཇིག་རྟེན་དབང་ཕྱུག་དང་དུང་གི་འདེ་ [208a.4]གུ་དང་ལྡན་པ་དེ་གང་ལ་བྱིན་པ་ནི་ཉི་མ་ལྔ་ཉིད་དུ་རྗེས་སུ་འཇུག་པར་འགྱུར་རོ། །སྦྱོར་བ་གཞན་ལ་སྒྲོལ་མའི་གཟུངས་ཀྱིས་མྱོས་པའི་འབྲས་བུ་ལན་བརྒྱ་རྩ་བརྒྱད་ཡོངས་སུ་བསྔགས་ལ། འབྲས་བུ་དེ་དང་རྟ་མགྲིན་དང་ལྷན་ཅིག་ཏུ་བྱས་པ་གང་ལ་བྱུགས་པ་དེ་དབང་དུ་འགྱུར་རོ། །སྦྱོར་ [208a.5]བ་གཞན་ཡང་ཡོད་དེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོའི་འཆིང་བ་གྲོལ་བར་མཛོད་སྭཱ་ཧཱ། སྔགས་འདིས་བསྒྲུབ་བྱའི་མིང་བར་དུ་བཅུག་པ་ཤིང་ཉི་མའི་ཡལ་ག་ལ་ལེགས་པར་བྲིས་པ་ཀུ་ལཱི་ར་ག་ར་ཏ་ལ་སྦས་པར་གྱུར་ན། བཅིངས་པ་ལས་གྲོལ་བར་འགྱུར་རོ། །འདིས་ནི་རྡོ་རྗེ་སྒྲོལ་མའི་ [208a.6]སྒྲུབ་ཐབས་རྫོགས་པ་ཡིན་ནོ།། །།མཁས་པ་ཆེན་པོ་བྱང་ཆུབ་སེམས་དཔའ་དང་ཨ་བྷ་ཡ་ལ་སོགས་པ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3199}༄༅༅། །རྒྱ་གར་སྐད་དུ། ཨཱརྱ་ཏཱ་ར་སཱ་དྷ་ནཾ། བོད་སྐད་དུ། འཕགས་མ་སྒྲོལ་མའི་སྒྲུབ་ [208a.7]ཐབས། སྔར་བཤད་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ། ཡི་གེ་ཨཱཿདམར་པོ་ལས་བྱུང་བའི་པདྨ་དམར་པོའི་སྟེང་དུ་ཡི་གེ་ཧཱུཾ་དཀར་པོ་ལས་སྐྱེས་པའི་པདྨའི་སྣོད་དུ་ཉི་མ་ལ་གནས་པའི་ཡི་གེ་ཧཱུྃ་མཐིང་ནག་ལས་བྱུང་བའི་གྲི་གུག་ས་བོན་དང་བཅས་པ་ཡོངས་སུ་གྱུར་པ་ལས་ [208b] [208b.1]རྗེ་བཙུན་མ་འཕགས་མ་སྒྲོལ་མ་ནག་མོ་སྟེ་ཞལ་གཅིག་མ་སྤྱན་གསུམ་མངའ་བ། ཕྱག་བཞི་མ། གསུས་པ་འཕྱང་བ་ཞལ་མཆེ་བ་གཙིགས་པ། གཡས་བསྐུམས་པའི་ཞབས་ཀྱིས་རོ་མནན་པ། ཀླུ་བརྒྱད་ཀྱིས་བརྒྱན་པ། སྟག་གི་པགས་པའི་ཤམ་ཐབས་ཅན། མགོ་བོའི་ཕྲེང་བ་ [208b.2]འཕྱང་བར་གྱུར་པ། ཕྱག་རྒྱ་ལྔས་རྣམ་པར་བརྒྱན་པ། ཕྱག་གཡས་པ་དག་གིས་རལ་གྲི་དང་གྲི་གུག་བསྣམས་པ། ཕྱག་གཡོན་པ་དག་གིས་ཨུཏྤ་ལ་དང་ཐོད་པ་བསྣམས་པ། མི་བསྐྱོད་པའི་དབུ་གནོན་དང་ལྡན་ཞིང་རལ་པ་སེར་པོ་དང་ལྡན་པ། ཤིན་ཏུ་སྐྲག་པར་བྱེད་པའི་གད་མོ་ [208b.3]ཆེར་སྒྲོགས་པ། འཇིགས་སུ་རུང་བའི་གཟུགས་སུ་རྫོགས་པར་བྱས་ལ། ཧྲིཾ་ཧྲིཾ་ཧཱྃ་ཕཊ་ཅེས་བྱ་བའི་སྔགས་འདི་དུག་དང་། ཤེས་རབ་ཀྱི་དབང་དུ་བྱས་ལ་བཟླས་པར་བྱ་བའོ། །རལ་གྲིའི་གནས་སུ་སྒྲེན་པོ་ཡིས། །མི་རུས་ཕྲེང་བ་བསྒོམ་བྱས་ལ། །སྤྲོ་དང་བསྡུ་བའི་སྦྱོར་བ་ཡིས། ། [208b.4]བླ་མེད་གསང་སྔགས་བཟླས་པར་བྱ། །ཞེས་བྱ་བའོ། །རྒྱ་ནག་ཆེན་པོའི་ལུགས་ཀྱི་འཕགས་མ་སྒྲོལ་མའི་སྒྲུབ་ཐབས་སོ། །མཁས་པ་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3200}༄༅༅། །རྒྱ་གར་སྐད་དུ། ཨཱ་མ་ན་ཡཱ་ན་ཏ་ར། བོད་སྐད་ [208b.5]དུ། གདམས་ངག་གི་ཁྱད་པར། གཡས་ཀྱི་ཞབས་བསྐུམས་ཞབས་ཀྱི་རྩེ་མོས་རོའི་སྙིང་ག་ཉིད་དུ་འཛུགས་མཛད་པ་དང་གཞན། །ཕྱག་ན་རལ་གྲི་ཨུཏྤ་ལ་དང་དགྲི་གུག་བསྣམས་མ་ས་བོན་ཧཱུྃ་གི་ཡི་གེ་མཆོག་བྱོན་མ། །མཐིང་ནག་བོང་ཐུང་ཡངས་མ་རལ་པ་སེར་པོའི་ཐོར་ཚུགས་ [208b.6]དང་ལྡན་རྩེ་ན་ཀླུས་བརྒྱན་ཅིང་། །མི་རོའི་ཐོད་པས་ཀྱང་བརྒྱན་སྲིད་གསུམ་འཇོམས་པར་མཛད་ལ་བརྩོན་པ་སྒོན་ཇེམ་རང་ཉིད་ཡིན། །གདམས་ངག་གི་ཁྱད་པར་གྱི་སྒྲུབ་ཐབས། ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3201}༄༅༅། །རྒྱ་ [208b.7]གར་སྐད་དུ། ཏཱ་ར་སཱ་དྷ་ནཾ། བོད་སྐད་དུ། སྒྲོལ་མའི་སྒྲུབ་ཐབས། སྒྲོལ་མ་སྲིད་གསུམ་སྒོལ་མཛད་མ། །རྒྱ་ནག་ཆེན་པོའི་ལུགས་བཏུད་ནས། །བླ་མའི་གདམས་ངག་ཇི་བཞིན་དུ། །དེ་ཡི་སྒྲུབ་ཐབས་བདག་གིས་བཤད། །རྟགས་གཅིག་དང་ནི་དུར་ཁྲོད་དང་། །ཐམས་ [209a] [209a.1]ཅད་དུ་ཡང་ཁྱིམ་སྟོང་སྟེ། །རྣལ་འབྱོར་པས་ནི་དེར་གནས་ལ། །རིག་པ་སྲིད་གསུམ་སྒྲོལ་མཛད་སྒྲུབ། །སྟན་འཇམ་ནང་ཚངས་ཅན་གནས་པ། །སྟན་གཞན་འཇམ་པོ་ཡིན་ཡང་རུང་། །ལེགས་པར་གནས་ལ་དངོས་གྲུབ་ནི། །མཆོག་ཏུ་གྱུར་པ་བསྒྲུབ་པར་ [209a.2]བྱ། །སྐད་ཅིག་རྣམ་པའི་སྦྱོར་བ་ཡིས། །མཉམ་པར་བཞག་པས་རྡོ་རྗེ་གསུམ། །གནས་གསུམ་དུ་ནི་བསྒོམ་བྱས་ལ། །དེ་ནས་འོད་ཟེར་རྣམ་པར་སྤྲོ། །འདིས་ནི་སྲིད་གསུམ་འགྲོ་བ་ཡི། །སེམས་ཅན་སྣང་བྱས་སླར་ཡང་ནི། །ལེགས་པར་བསྡུ་དང་ཡང་བསྒོམ་པ། ། [209a.3]མཐའ་དག་སྟོང་པ་ཉིད་དུ་སྟེ། །ཨོཾ་སྟོང་པ་ཉིད་སོགས་རང་བཞིན་ཅན། །གསང་སྔགས་དེ་ནས་བརྗོད་པར་བྱ། །དེ་ནས་ནམ་མཁར་བསྒོམ་བྱ་བ། །པདྨར་ཨ་ཡིག་ལས་བྱུང་བ། །ཡང་ནི་དེ་སྟེང་བསྒོམ་བྱ་བ། །ཊཱ་ཡིག་ལས་བྱུང་པད་སྣོད་དོ། །ཡང་ནི་དེ་དབུས་བསྒོམ་བྱ་བ། །ཧཱུྃ་ [209a.4]ཡིག་ཀུན་ནས་མཐིང་ནག་མདོག །དེ་ནས་ཧཱུཾ་ཡིག་ལས་བྱུང་བར། །གྲི་གུག་ས་བོན་གྱིས་བརྒྱན་བལྟ། །གྲི་གུག་ཡོངས་གྱུར་བདག་ཉིད་ནི། །སྒྲོལ་མ་དང་ནི་མཚུངས་པར་བསྒོམ། །ཞབས་གཡས་བསྐུམ་དང་འཇིགས་རུང་བའི། །མགོ་བོའི་ཕྲེང་བ་ལེགས་པར་འཕྱང་། །བོང་ [209a.5]ཐུང་གྲོད་འཇོལ་འཇིགས་རུང་མ། །ཨུཏྤལ་སྔོན་པོས་བརྒྱན་པ་ཉིད། །ལྷ་རྫས་ཞལ་གཅིག་སྤྱན་གསུམ་མ། །འཇིགས་པའི་གད་རྒྱངས་རབ་ཏུ་འབར། །ལེགས་པར་རབ་འཛུམ་རོ་བཅིབས་ཤིང་། །ཀླུ་བརྒྱད་ཀྱིས་ནི་རྣམ་པར་བརྒྱན། །སྟག་གི་པགས་པས་ཕོད་ཀ་དཀྲིས། །སྤྱན་ནི་ [209a.6]དམར་དང་ཟླུམ་པ་སྟེ། །གཞོན་ནུ་ལང་ཚོ་ལ་བབས་མ། །ཕྱག་རྒྱ་ལྔ་ཡིག་རྣམ་པར་བརྒྱན། །འཇིགས་པ་ཆེན་པོར་ལྗགས་འདྲིལ་མ། །ཅུང་ཟད་ཚེམས་གཙིགས་སྡིགས་པར་མཛད། །རལ་གྲི་གྲི་གུག་ཕྱག་གཡས་ན། །གཡོན་ན་ཨུཏྤལ་ཐོད་པ་བསྣམས། །སེར་ཞིང་དྲག་ [209a.7]པའི་ཞལ་གཅིག་གིས། །ཅོད་པན་མི་བསྐྱོད་ཀྱིས་བརྒྱན་བསྒོམ། །བསྒོམ་པའི་སྟོབས་ནི་རྫོགས་པ་ན། །རྣལ་འབྱོར་སྙན་དངགས་མཁན་འགྱུར་རོ། །རྨོངས་དང་གལ་ཏེ་ལྐུགས་གྱུར་ཀྱང་། །བསྒོམ་པའི་རོ་ལ་ཕྱེད་གཉེར་བས། །འཇམ་པའི་ངག་ནི་འཐོབ་པ་དང་། །གསང་ [209b] [209b.1]སྔགས་འབུམ་ཕྲག་བཟླས་པས་ཀྱང་། །སྔགས་ཆེན་འདི་ནི་ཡི་གེ་གསུམ། །མཐའ་མར་ཕཊ་དོ་སྙིང་ལ་གནས། །འོད་ཟེར་ལྔ་དང་ཀུན་ནས་ལྡན། །གཏི་མུག་བུད་ཤིང་སྲེག་བྱེད་ཡིན། །རྣལ་འབྱོར་སྤྱོད་པའི་རྗེས་འབྲངས་ལ། །དེ་བཏུ་བ་ཡི་ཆོ་ག་བཤད། །དང་པོར་ས་ཡི་ཕ་རོལ་ [209b.2]སྦྱིན། །དབྱངས་ཡིག་བཞི་པས་བརྒྱན་པར་བྱ། །ཡི་གེ་ར་ར་གནས་འབར་འཕྲོ་བའི། །ཟླ་བའི་ཐིག་ལེར་ཡང་དག་ལྡན། །དེ་ནས་ཡི་གེ་ཏྲཱྃ་སྦྱིན་ཏེ། །བཞི་པ་ཉིད་ཀྱིས་བརྒྱན་པའོ། །ཡི་གེ་ཨུ་རིང་ལེགས་ལྡན་པའི། །ཡཾ་ནི་ཧཾ་ཡིག་སྦྱར་བར་བྱ། །དེ་ནས་ཕཊ་ཡིག་ཀྱང་སྦྱིན་པ། ། [209b.3]གྲུབ་པའི་གསང་སྔགས་ཡོངས་རྫོགས་ཡིན། །མཁས་པས་རལ་གྲིའི་གནས་སུ་ནི། །སྤྲོ་དང་བསྡུ་བའི་སྦྱོར་བ་ཡིས། །བསྒོམ་བྱ་མི་རུས་ཕྲེང་བ་ཡིས། །སྔགས་ཀྱི་མཆོག་ནི་ལེགས་པར་བཟླས། །བརྟན་པའི་སེམས་ཀྱིས་བརྟག་པར་བྱ། །རྒྱུན་དུ་བསྒོམ་པ་གོམས་པ་ [209b.4]ལས། །མཁས་པ་ཉིད་དང་སྙན་དངགས་པར། །འགྱུར་བ་འདི་ལ་ཐེ་ཚོམ་མེད། །སྒྲོལ་མའི་སྒྲུབ་ཐབས་བྱས་པ་ལས། །བདག་གིས་དགེ་བ་གང་ཐོབ་པ། །དེས་ནི་འགྲོ་ཀུན་སྟོན་པ་ཡི། །བསྟན་ལ་མཁས་པ་ཉིད་དུ་ཤོག །འདི་ནི་རྟག་པའི་རྡོ་རྗེས་བྱས། །འདིས་ནི་བློ་རྣོན་རབ་གྲུབ་ [209b.5]བྱེད། །བགྲོད་དཀའ་འདི་ལ་པཎྜི་ཏ། །བཟང་པོ་རྣམས་ཀྱིས་བཟོད་པར་རིགས། །རྒྱ་ནག་ཆེན་པོའི་ལུགས་ཀྱི་སྒྲོལ་མའི་སྒྲུབ་ཐབས་རྫོགས་སོ།། །།ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3202}༄༅༅། །རྒྱ་གར་སྐད་དུ། ཏཱ་ར་སཱ་དྷ་ [209b.6]ནཾ། བོད་སྐད་དུ། སྒྲོལ་མའི་སྒྲུབ་ཐབས། སྒྲོལ་མ་དཀར་མོ་ལ་ཕྱག་འཚལ་ལོ། །སྔར་བཞིན་དུ་སྟོང་པ་ཉིད་ཀྱི་བར་དུ་བསྒོམས་ལ། །ཐིག་ལེ་དཀར་པོའི་དབུས་གནས་པའོ། །ཏཱྃ་བྱུང་ཟླ་བའི་གདན་ལ་ནི། །རྡོ་རྗེ་སྐྱིལ་ཀྲུང་ལེགས་བཅིངས་ཤིང་། །མཆོག་སྦྱིན་པ་དང་ [209b.7]ཨུཏྤལ་བསྣམས། །སྟོན་ཀའི་ཟླ་བ་ལྟ་བུའི་མདོག །རྒྱབ་ནི་ཟླ་བ་ལ་ལེགས་བརྟེན། །རྒྱན་རྣམས་ཐམས་ཅད་ཡོངས་རྫོགས་མ། །ལོ་ནི་བཅུ་དྲུག་མ་ཡི་སྐུ། །རིམ་གྱིས་འཕགས་མ་སྒྲོལ་བསྒོམས་ལ། །དེ་ཐུགས་འཁོར་ལོ་ཟླ་འོད་ཅན། །རྩིབས་བརྒྱད་ལ་ནི་ཡི་གེ་ [210a] [210a.1]ཡང་། །བརྒྱད་ཀྱིས་ཡོངས་སུ་གང་བའོ། །ཨོཾ་དང་གསལ་བྱེད་ཧ་ཡི་བར། །བསྒྲུབ་བྱའི་མིང་ནི་ཆུད་གནས་པ། །རྩེ་གཅིག་སེམས་ཀྱིས་ལྟེ་བར་བསྒོམ། །ཟླ་དྲུག་བརྟན་པས་དེ་ངེས་བྱ། །སེམས་དུབ་ན་ནི་ཡི་གེ་བཅུའི། །སྔགས་འདི་བཟླས་པར་བྱ་བ་ཡིན། ། [210a.2]དེ་ལ་སྔགས་ནི་འདི་དག་ཡིན་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། སྒྲོལ་མའི་སྙིང་གར་འཁོར་ལོ་སྒོམ་པ་པོ། །འཆི་བདག་སྐྱོན་གྱིས་གོས་པར་འགྱུར་མ་ཡིན། །ཟླ་བ་དྲུག་ཏུ་སྒྲུབ་ལ་བརྩོན་པ་ལ། །དངོས་གྲུབ་ཀུན་ཡང་འབྱུང་བར་འགྱུར་བ་ཡིན། །འཆི་བསླུ་བར་བྱེད་པའི་སྒྲོལ་མའི་སྒྲུབ་ཐབས་ [210a.3]རྫོགས་སོ།། །།ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3203}༄༅༅། །རྒྱ་གར་སྐད་དུ། སཱི་ཏ་ཏཱ་ར་སཱ་དྷ་ནཾ། བོད་སྐད་དུ། སྒྲོལ་མ་དཀར་མོའི་སྒྲུབ་ཐབས། ཟླ་བ་དྲུག་ཏུ་སྒྲུབ་པ་ལ་བརྩོན་པས། །སྒྲོལ་མའི་ཐུགས་ཀར་འཁོར་ལོ་བསྒོམ་ [210a.4]པ་ལ། །འཆི་བདག་སྐྱོན་གྱིས་གོས་པར་འགྱུར་མ་ཡིན། །དངོས་གྲུབ་རྣམས་ཀྱང་ཐམས་ཅད་ཐོབ་པར་འགྱུར། །འཆི་བ་སླུ་བ་བསྡུས་པ་ལས། །སྒྲོལ་མ་དཀར་མོ་བཏོན་པ་ཡི། །བསྒོམས་པས་འཇིགས་པ་སེལ་བྱེད་པའི། །ངག་གི་དབང་ཕྱུག་གིས་འདི་བྱ། །སྡེ་བཞི་དང་པོའི་ཡིག་ [210a.5]ལྡན་ལས། །འོད་ཟེར་ནམ་མཁར་རྣམ་སྤྲོས་པས། །པད་དཀར་ཟླ་བའི་གདན་བལྟས་ལ། །མདུན་དུ་གསུམ་ལ་སྐྱབས་འགྲོ་བརྗོད། །རང་བཞིན་སྒྲོ་བཏགས་གཞོམ་དོན་དུ། །སྟོང་པ་ཉིད་དུ་ཡུད་ཙམ་བལྟ། །དེ་ནས་སྨོན་ལམ་སྟོབས་ལས་ནི། །བྱང་ཆུབ་སེམས་ཀྱི་ཡི་གེ་ཡིན། །ཟླ་བའི་ [210a.6]དཀྱིལ་འཁོར་གདན་སྟེང་ན། །རྡོ་རྗེའི་སྐྱིལ་ཀྲུང་ལེགས་པར་གནས། །མཆོག་སྦྱིན་མ་དང་ཨུཏྤལ་བསྣམས། །སྟོན་ཀའི་ཟླ་བ་ལྟར་དཀར་ཞིང་། །རྒྱབ་ནི་ཟླ་བ་ལ་ལེགས་བརྟེན། །ལོ་ནི་བཅུ་དྲུག་མ་ཡི་ལུས། །རྒྱན་རྣམས་ཀུན་གྱིས་ལེགས་བརྒྱན་མ། །རྫོགས་སངས་དེ་དག་ཐམས་ [210a.7]ཅད་སྲས། །ཡུམ་གྱུར་འདོད་པའི་གཟུགས་འཛིན་མ། །བསྒོམས་ལ་འཕགས་མ་སྒྲོལ་མ་དེའི། །ཐུགས་ཀར་འཁོར་ལོའི་འོད་དཀར་བ། །རྩིབས་བརྒྱད་ལ་ནི་ཡི་གེ་ཡང་། །བརྒྱད་ཀྱིས་ཡོངས་སུ་དགང་བྱ་བ། །ཨོཾ་ཧཱ་གསལ་བྱེད་དབུས་གནས་པའི། །བསྒྲུབ་བྱའི་མིང་སོགས་ [210b] [210b.1]ལྟེ་བར་ནི། །བསྒོམ་བྱ་རྩེ་གཅིག་སེམས་ཀྱིས་ཀྱང་། །ཟླ་དྲུག་བརྟན་པས་ངེས་བྱ་ཞིང་། །སེམས་སྐྱོན་ནི་བཟླས་བྱ་བ། །སྔགས་ཀྱི་ཡི་གེ་བཅུ་པོ་འདི། །ཨོཾ་གྱི་ཡི་གེ་དང་པོར་སྦྱིན། །ཕྱི་ནས་ཏཱ་རེ་ལེགས་པར་སྦྱར། །འདི་དག་རྗེས་ལ་ཏུཏྟཱ་རེ། །དེ་མཐའ་སྭཱ་ཧཱ་ལས་ཀུན་བྱེད། །ཚངས་ [210b.2]དབང་ཁྱབ་འཇུག་ཉི་ཟླ་དྲུག །ཕྱོགས་སྐྱོད་འདོད་པའི་རྒྱལ་པོས་ཀྱང་། །དགག་པར་མི་ནུས་སྤུ་ཡི་རྩེ། །འཆི་བདག་འབྱུང་ལས་གྲོལ་འགྱུར་ཞིང་། །གཉེར་མ་སྐྲ་དཀར་སྐལ་ངན་ནད། །དབུལ་བའང་ཀུན་ནས་ཟད་པར་བྱེད། །སེང་གེ་ལ་སོགས་འཇིགས་ཆེན་བརྒྱད། །སྡུག་ [210b.3]བསྔལ་ཚོགས་རྣམས་འཇིག་པར་བྱེད། །གོས་སྐོམ་ཁང་བཟངས་རིན་ཆེན་སོགས། །བཙལ་བ་མེད་པར་བདེ་བར་རྙེད། །རལ་གྲི་མིག་རྩི་རྐང་བྱུག་དང་། །བུམ་པ་བཟང་སོགས་དངོས་གྲུབ་འབྱུང་། །ཡིད་གཞུངས་སྨྲ་མཁས་སྙན་དངགས་ཉིད། །ཤེས་རབ་གཅིག་ཏུ་དྲི་མེད་ [210b.4]དང་། །འདོད་པའི་དངོས་གྲུབ་གཞན་རྣམས་ཀྱང་། །འཁོར་ལོ་འདི་ལས་རབ་ཏུ་འབྱུང་། །སྒྲོལ་མ་དཀར་མོའི་སྒྲུབ་ཐབས་ཀྱིས། །ནད་དང་འཆི་བདག་རྣམ་འཇོམས་པ། །ལེགས་བྱུང་དགེ་བ་གང་ཡིན་དེས། །སྐྱེ་དགུ་སྒྲོལ་མ་ཉིད་དུ་ཤོག །སྒྲོལ་མ་དཀར་མོའི་སྒྲུབ་ཐབས། [210b.5]ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3204}༄༅༅། །རྒྱ་གར་སྐད་དུ། སཱི་ཏ་ཏཱ་ར་སཱ་དྷ་ནཾ། བོད་སྐད་དུ། སྒྲོལ་མ་དཀར་མོའི་སྒྲུབ་ཐབས། སྔར་བཞིན་དུ་སྟོང་པ་ཉིད་ལ་སོགས་པའི་རྗེས་ཐོགས་ལ། སུྃ་གྱི་ཡི་གེ་ཡོངས་སུ་གྱུར་པ་ལས། [210b.6]རིན་པོ་ཆེ་སྣ་ཚོགས་པའི་རང་བཞིན་གྱི་རི་རབ་ལྷུན་པོ། །དེའི་སྟེང་དུ་ཡི་གེ་པྃ་ལས་པདྨ་དཀར་པོ། དེའི་སྟེང་དུ་ཡི་གེ་ཨ་ལས་ཟླ་བའི་དཀྱིལ་འཁོར་རོ། །དེའི་དབུས་སུ་ཡི་གེ་ཧཱུྃ་དཀར་པོ་ཡོངས་སུ་རྫོགས་པ་ལས། བཅོམ་ལྡན་འདས་མ་སྒྲོལ་མ་དཀར་མོ་སྟེ། སྤྱན་ [210b.7]གསུམ་མ། ཕྱག་བཞི་མ། དེ་བཞིན་གཤེགས་པ་ལྔ་དབུ་རྒྱན་ལ་བཞུགས་པ། སྣ་ཚོགས་པའི་རྒྱན་མངའ་བ། ཕྱག་གཉིས་ཀྱིས་ཨུཏྤལའི་ཕྱག་རྒྱ་མཛད་པ། ཕྱག་གཡས་པ་ན་ཡིད་བཞིན་གྱི་ནོར་བུ་རིན་པོ་ཆེ་ལེགས་པར་བསྣམས་ནས་མཆོག་སྦྱིན་པར་མཛད་པས་ [211a] [211a.1]ནི་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་དོ། །གཡོན་པ་ན་ཨུཏྤལའི་སྡོང་པོ་རྣམ་པར་འཚེར་བ་བསྣམས་པར་བསྒོམ་པར་བྱ་བའོ། །དེའི་གཡས་ཀྱི་ཟུར་དུ་འོད་ཟེར་ཅན་སེར་མོ་ཟླ་བའི་གདན་ལ་གནས་པ། ན་བཟའ་སྔོ་ [211a.2]བ་ཕྱག་གཉིས་ཀྱི་གཡོན་པས་ཤིང་མྱ་ངན་མེད་དམར་པོའི་ཡལ་ག་བསྣམས་པ། གཡས་པས་རྔ་ཡབ་དཀར་པོ་བསྣམས་པ། སྟོད་ཤག་དམར་པོ་དང་རྒྱན་དང་ལྡན་པའོ། །གཡོན་གྱི་ཟུར་ན་རྨ་བྱ་ཆེན་མོ་པྲི་ཡང་ཀུའི་མདོག་ལྟར་སྔོན་མོ་ཕྱག་གཉིས་མ་གཡོན་པས་རྨ་བྱའི་མཇུག་ [211a.3]སྒྲོ་འཛིན་པ་གཡས་པས་རྔ་ཡབ་འཛིན་པའོ། །དེ་ལྟར་རྣམ་པར་བསམས་ལ། ཨོཾ་བཅོམ་ལྡན་འདས་མ་སྒྲོལ་མ་བདག་གི་སྙིང་ལ་ལེགས་པར་ཞུགས་སྭཱ་ཧཱ་ཞེས་བྱ་བ་འདིས་བདག་ཉིད་བྱིན་གྱིས་བརླབ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་སྒྲོལ་མ་ལ་ཕྱག་འཚལ་ལོ། ། [211a.4]ཡིད་འཕྲོག་མ་ཧཱུཾ་ཧཱ་ར་སྭཱ་ཧཱ། སྒྲོལ་མ་དཀར་མོའི་སྒྲུབ་ཐབས་སོ། །ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3205}༄༅༅། །རྒྱ་གར་སྐད་དུ། ཤུཀླ་ཏཱ་ར་སཱ་དྷ་ནཾ། བོད་སྐད་དུ། སྒྲོལ་མ་དཀར་མོའི་སྒྲུབ་ཐབས། དེ་ཁོ་ན་བཞིན་དུ་སྟོང་པ་ཉིད་བསྒོམས་པའི་ [211a.5]རྗེས་ཐོགས་ལ། ར་ཡོངས་སུ་གྱུར་པའི་ཉི་མ་ལ་གནས་པའི་ཧཱུྃ་ལས་གྲུབ་པའི་སྣ་ཚོགས་རྡོ་རྗེ་ཡོངས་སུ་གྱུར་པ་ལས། རྡོ་རྗེའི་རབ་ལ་སོགས་པ་རྣམ་པར་བསམས་པ་དེའི་དབུས་སུ་ཡི་གེ་པྃ་ལས་བྱུང་བའི་པདྨའི་སྟེང་དུ་ཡི་གེ་པྃ་ལས་བྱུང་བའི་ཟླ་བ་ལ་ཡི་གེ་ཧཱུཾ་དཀར་པོ་ལས་སྐྱེས་པའི་ [211a.6]ས་བོན་དང་བཅས་པའི་ཨུཏྤལ་བལྟས་ཏེ། དེ་ནས་སྤྲོ་བ་ལ་སོགས་སྔོན་དུ་བཏང་བའི་དེ་དག་ཡོངས་སུ་གྱུར་པ་ལས་སྒྲོལ་མ་དཀར་མོ་ཞལ་གསུམ་ཕྱག་དྲུག་མ། སེར་པོ་དང་མཐིང་ནག་ནི་གཡས་པ་དང་ཅིག་ཤོས་ཀྱི་ཞལ་ཏེ་ཞལ་སོ་སོ་ཞིང་སྤྱན་གསུམ་གསུམ་མོ། །མཆོག་སྦྱིན་ [211a.7]པ་དང་། ཕྲེང་བ་དང་། མདའ་བསྣམས་པ་ནི་གཡས་ཀྱི་ཕྱག་གསུམ་མོ། །ཨུཏྤལ་དང་། པདྨ་དང་། གཞུ་བསྣམས་པ་ནི་གཡོན་གྱི་ཕྱག་གསུམ་སྟེ། ཟླ་བའི་གདན་ལ་སྐྱིལ་ཀྲུང་ཕྱེད་པས་བཞུགས་པ་ཟླ་བའི་འོད་དང་ལྡན་པ་རལ་པ་དང་ཅོད་པན་ལ་དོན་ཡོད་གྲུབ་པ་གནས་པ། [211b] [211b.1]དབུ་ལ་མགོ་བོ་ལྔས་རྣམ་པར་བརྒྱན་ཅིང་། ཟླ་བ་ཕྱེད་པས་སྤྱི་བོར་བརྒྱན་པ། སྣ་ཚོགས་པའི་རྒྱན་མངའ་བ། ལོ་བརྒྱད་ཕྲག་གཉིས་ཀྱི་ཚད། དུར་ཁྲོད་བརྒྱད་ཀྱི་དབུས་ན་གནས་པ་དང་རང་བཞིན་གྱི་ས་བོན་སྙིང་གའི་ཟླ་བ་ལ་གནས་པའི་བདག་ཉིད་དུ་ཡང་རྣམ་པར་བསམས་ལ་སྔགས་ [211b.2]བཟླས་པར་བྱས་ཏེ། ཨོཾ་ཙ་ལེ་ཨ་ནི་མིཏྟ་ཙཱ་ལེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། བསྙེན་གནས་ཀྱི་མཆོད་པ་སྔོན་དུ་བཏང་ལ་ཐུན་བཞིར་ཟླ་བ་གཅིག་བཟླས་པས་ཞི་བ་ལ་སོགས་པར་འགྱུར་རོ། །སྒྲོལ་མ་དཀར་མོའི་སྒྲུབ་ཐབས་སོ། །ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་ [211b.3]གྱིས་བསྒྱུར་བའོ།། {T3206}༄༅༅། །རྒྱ་གར་སྐད་དུ། ཛཱཾ་གུ་ལི་ཏཱ་ར་སཱ་དྷ་ནཾ། བོད་སྐད་དུ། སྒྲོལ་མ་དུག་སེལ་བའི་སྒྲུབ་ཐབས། སྒྲོལ་མ་དུག་སེལ་མ་ལ་ཕྱག་འཚལ་ལོ། །དུག་སེལ་མ་ཡི་གཟུགས་འཛིན་མའི། །བཅོམ་ལྡན་སྒྲོལ་མ་ལ་བཏུད་ནས། །སེམས་ [211b.4]ཅན་རྣམས་ལ་སྙིང་བརྩེ་བས། །བྲི་བྱ་དེ་རབ་སྒྲུབ་བྱེད་ཐབས། །དང་པོར་རེ་ཞིག་སྔགས་པས་གཙང་མར་ཁྲུས་བྱས་ཤིང་གོས་དང་ཕྲེང་བ་དཀར་པོ་དང་ལྡན་པས་དབེན་པའི་ས་ཕྱོགས་ལེགས་པར་བྱུགས་པར་དྲི་དཀར་པོ་ཤིན་ཏུ་ཞིམ་པས་ཆག་ཆག་བཏབ་ཅིང་། མེ་ཏོག་དཀར་པོའི་ [211b.5]བྱེ་བྲག་རྣམས་ཀྱིས་སིལ་མར་བཀྲམ་པར་བདེ་བའི་སྟན་ལ་ཉེ་བར་གནས་ཏེ། སྐྱེ་དགུ་ལ་བྱམས་པ་དང་སྙིང་རྗེ་ཡང་རྣམ་པར་བསྒོམས་ལ། ཨོཾ་རང་བཞིན་གྱིས་རྣམ་པར་དག་པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་ནི་བདག་ཡིན་ནོ་ཞེས་བརྗོད་པར་བྱའོ། །དེ་ནས་སྟོང་ [211b.6]པ་ཉིད་མངོན་དུ་བྱས་ལ། ཡི་གེ་པཾ་དཀར་པོ་ལས་བྱུང་བའི་པདྨ་དཀར་པོ་འདབ་མ་བརྒྱད་པ། དེའི་སྟེང་དུ་ཡི་གེ་ཨ་ལས་སྐྱེས་པའི་དཀྱིལ་འཁོར་གྱི་སྟེང་དུ་ཡི་གེ་ཧྲཱིཿདཀར་པོ་འོད་ཟེར་གྱི་ཚོགས་དུ་མ་སྤྲོ་བར་བྱེད་པ་བསམ་པར་བྱ་བའོ། །དེ་དག་ལས་བྱུང་བའི་བཅོམ་ལྡན་འདས་མ་ [211b.7]དུག་སེལ་མ་བསྒོམ་པར་བྱ་སྟེ། སྐུ་མདོག་དཀར་བ། ཕྱག་བཞི་མ་རལ་པ་དང་དབུ་རྒྱན་དང་ལྡན་པ་འོད་ཟེར་དཀར་པོ་དང་སྟོད་གཡོགས་དང་ལྡན་པ། རིན་པོ་ཆེ་དཀར་པོའི་རྒྱན་དང་ལྡན་པ། སྦྲུལ་དཀར་པོས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་པའོ། ། [212a] [212a.1]རྩ་བའི་ཕྱག་གཉིས་ཀྱིས་ནི་པི་ཝང་སྦྲེང་བར་མཛད་དོ། །ཕྱག་གཡས་པ་དང་གཡོན་པ་གཉིས་ཀྱིས་ནི་སྦྲུལ་དཀར་པོ་བསྣམས་པས་མི་འཇིགས་པའི་ཕྱག་རྒྱ་མཛད་པ་སྟེ། ཟླ་བའི་འོད་ཟེར་གྱི་ཕྲེང་བ་ལྡན་པ་བསྒོམ་པར་བྱ་བའོ། །མགོ་བོ་དང་མགུལ་བ་དང་ནུ་ [212a.2]མའི་བར་དུ་ཟླ་བའི་དཀྱིལ་འཁོར་ལ་གནས་པའི་ཡི་གེ་ཨཱཿཧྲཱིཿཧཱུཾ་རྣམས་ཇི་སྲིད་མི་སྐྱོ་བའི་བར་དུ་རྣམ་པར་བསྒོམ་པར་བྱ་བའོ། །དེའི་རྗེས་ལ་སྔགས་བཟླས་པར་བྱ་བ་ནི་ཧྲཱིཿསྟེ་འབུམ་ཕྲག་བདུན་བཟླས་པར་བྱ་བའོ། །རྒྱན་དཀར་པོ་དང་ལྡན་པ་དག་གིས་མེ་ཏོག་དཀར་པོ་ཁྲི་ཕྲག་བདུན་ [212a.3]སྦྱིན་སྲེག་བྱའོ། །དེ་ནས་བྱ་ཁྱུང་གི་དབང་ཕྱུག་གི་ནུས་པ་དང་སྙན་དངགས་དང་བསྟན་བཅོས་ཐམས་ཅད་ལ་མཁས་པར་ཡང་འགྱུར་བ་ཡིན་ནོ། །འཕགས་མ་དུག་སེལ་མ་སྒྲོལ་མའི་སྒྲུབ་ཐབས་ཡོངས་སུ་རྫོགས་སོ།། །།ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་ [212a.4]བའོ།། {T3207}༄༅༅། །རྒྱ་གར་སྐད་དུ། དྷ་ན་དཱ་ཏཱ་ར་སཱ་དྷ་ནཾ། བོད་སྐད་དུ། སྒྲོལ་མ་ནོར་སྦྱིན་མའི་སྒྲུབ་ཐབས། སྒྲོལ་མ་ལ་ཕྱག་འཚལ་ལོ། །སྒྲོལ་མ་ལྗང་གུ་ཞལ་གཅིག་ཕྱག་བཞི་མ། །སྤྱན་གཉིས་དང་ལྡན་ཀུན་དུ་དགའ་མཛད་མ། །ངག་གི་དཀྱིལ་འཁོར་གྱི་ནི་ [212a.5]འཁོར་ལོའི་ཡང་། །ལྷ་མོ་བཅུ་གཉིས་ཀྱང་ནི་སྤྱན་གཉིས་མ། །ཁྱད་པར་འཕགས་དང་རྙེད་པར་དཀའ་བ་ཡི། །བཅོམ་ལྡན་འདས་མ་འཕགས་མ་སྒྲོལ་མ་ཡི། །ནོར་སྦྱིན་མ་ཡི་རིམ་པའི་སྒྲུབ་པའི་ཐབས། །མདོར་བསྡུས་པ་ནི་ལེགས་པར་བདག་གིས་བཤད། །རྣལ་འབྱོར་ [212a.6]པས་ནང་པར་སྔ་མོར་བྱང་ཆུབ་ཏུ་སེམས་བསྐྱེད་ལ། རང་གི་སྙིང་གར་ཡི་གེ་ཏཱྃ་སྔོན་པོ་བལྟ་སྟེ། གདོང་བཀྲུ་བ་ལ་སོགས་པ་བྱས་ནས། ཨོཾ་རང་བཞིན་གྱིས་རྣམ་པར་དག་པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་ནི་བདག་ཡིན་ནོ་ཞེས་བརྗོད་ལ། ཨོཾ་ཨ་མྲྀ་ཏེ་ཧཱུཾ་ཕཊ་ [212a.7]ཅེས་བྱ་བ་འདི་དང་། སེ་གོལ་གྱིས་ཕྱོགས་བཅུའི་བགེགས་རྣམས་ཚར་བཅད་ལ། རང་གི་སྙིང་གར་ཡི་གེ་པཾ་ལས་བྱུང་བའི་པདྨ་དམར་པོའི་སྟེང་དུ་ཡི་གེ་ཨཾ་གིས་བསྐྱེད་པའི་ཟླ་བ་ལ་གནས་པར་རང་ཉིད་ཀྱི་ས་བོན་རྣམ་པར་བསྒོམས་ཏེ། དེ་ལས་སྤྲོས་པས་སྤྱན་དྲངས་པའི་བླ་མ་ [212b] [212b.1]དང་། སངས་རྒྱས་དང་བྱང་ཆུབ་སེམས་དཔའ་ནམ་མཁའ་ལ་གནས་པ་རྣམས་ལེགས་པར་མཆོད་ཅིང་། སྡིག་པ་བཤགས་པ་ལ་སོགས་པ་རྣམས་ཀྱང་ཆོ་ག་བཞིན་དུ་བྱས་ཤིང་། སྟོང་པ་ཉིད་ཀྱང་བསྒོམས་ཏེ། བྱིན་གྱིས་ཀྱང་བརླབས་ལ། མདུན་དུ་ཡི་གེ་ར་དམར་པོ་ཡོངས་སུ་གྱུར་ [212b.2]པ་ལས་ཉི་མ་ལ་གནས་པའི་ཡི་གེ་ཧཱུཾ་ནག་པོ་ལས་བྱུང་བའི་སྣ་ཚོགས་རྡོ་རྗེ་རྣམ་པར་བལྟས་ཏེ། དེ་ལས་རྡོ་རྗེ་འཕྲོས་པས་རྡོ་རྗེའི་ས་གཞི་དང་། རྡོ་རྗེའི་ར་བ་དང་། རྡོ་རྗེའི་གུར་བསྒོམ་པར་བྱ་བའོ། །དེ་ནས་སྣ་ཚོགས་རྡོ་རྗེའི་ལྟེ་བ་ལ་ཡི་གེ་པཾ་དམར་པོ་ལས་བྱུང་བའི་པདྨའི་ [212b.3]སྟེང་དུ་ཡི་གེ་ཨ་ལས་བྱུང་བའི་ཟླ་བ་ལ་གནས་པའི་བྷྲཱུྃ་དཀར་པོ་དང་བ་ཡོངས་སུ་གྱུར་པ་ལས་འཁོར་ལོ་དཀར་པོ་དབུས་ན་ཡི་གེ་བྷྲཱུྃ་གནས་པ་དམིགས་ལ། པདྨ་དང་ཟླ་བ་དང་འཁོར་ལོ་དང་ས་བོན་རྣམས་ཡོངས་སུ་གྱུར་པས་བསྐྱེད་པའི་གཞལ་ཡས་ཁང་སྟེ། ཐམས་ཅད་ཀྱང་རིན་ [212b.4]པོ་ཆེ་ལས་གྱུར་པ་གྲུ་བཞི་པ་ལ་སོགས་པའི་ཡོན་ཏན་རྣམས་དང་ལྡན་པ། རིམ་པ་གཉིས་པ་ནང་རིམ་གྱི་ལྟེ་བ་ལ་གནས་པའི་པདྨ་འདབ་མ་བརྒྱད་པའི་སྙིང་པོ་ལ་ཟླ་བ་ཚེས་པས་ཉེ་བར་མཛེས་པར་བྱས་པ། སྒོ་བཞི་ན་གནས་པའི་ཉི་མ་བཞི་ཤིན་ཏུ་འོད་འཕྲོ་བར་བལྟ་བར་བྱའོ། །དེ་ [212b.5]ནས་དབུས་ཀྱི་ཟླ་བའི་སྟེང་དུ་ས་བོན་གྱི་ཡི་གེ་དེ་ཉིད་དོ། །དེ་ནས་འོད་སྤྲོ་བ་དང་བསྡུ་བའོ། །དེ་ནས་ས་བོན་དེ་ལས་བཅོམ་ལྡན་འདས་མ་སྒྲོལ་མར་བདག་ཉིད་བསྒོམ་པར་བྱ་སྟེ། ཟླ་བའི་གདན་དང་འོད་ཟེར་དང་ལྡན་ཞིང་ཞི་བ་སེམས་དཔའི་སྐྱིལ་མོ་ཀྲུང་གིས་བཞུགས་པ། སྐུ་མདོག་ [212b.6]ལྗང་སྔོན་ཞལ་གཅིག་མ། སྤྱན་གཉིས་ཕྱག་བཞི་མ། ཕྲེང་བ་དང་། མཆོག་སྦྱིན་པ་དང་། ཨུཏྤལ་དང་། པོ་ཏི་བསྣམས་པ། སྣ་ཚོགས་པའི་རྒྱན་དང་ན་བཟའ་དང་ལྡན་པའོ། །དེ་ནས་ཨོཾ་ནི་མགོ་ལའོ། །ཏཱ་ནི་དཔྲལ་བར་རོ། །རེ་ནི་མིག་གཉིས་ལའོ། །ཏུ་ནི་མགུལ་ [212b.7]པར་རོ། །ཏྟཱ་ནི་ངག་ལའོ། །རེ་ནི་སྙིང་ལའོ། །ཏུ་ནི་ལྟེ་བར་རོ། །རེ་ནི་གསང་བར་རོ། །སྭཱ་ནི་པུས་མོ་གཉིས་ལའོ། །ཧཱ་ནི་རྐང་པ་གཉིས་ལ་དགོད་པར་བྱའོ། །སྙིང་གར་ཟླ་བ་དང་པདྨ་ལ་གནས་པའི་ས་བོན་གྱི་འོད་ཟེར་གྱིས་ལེགས་པར་བསྐུལ་བ་ལ་སོགས་པའི་ [213a] [213a.1]སྤྱན་མ་ལ་སོགས་པའི་ལྷ་མོ་རྣམས་ཀྱིས་དབང་བསྐུར་བར་གྱུར་པས་དོན་ཡོད་གྲུབ་པ་ཅོད་པན་ལ་བསྒོམ་པར་བྱ་བའོ། །དེ་ནས་ཕྱི་རིམ་ལ་གནས་པའི་ཟླ་བ་ལ་རྡོ་རྗེ་སྒྲོལ་མ་ལ་སོགས་པའི་ལྷ་མོ་རྣམས་སྐད་ཅིག་གིས་བལྟས་པས། ཕྱི་ནས་རྣམ་པར་བསྒོམ་པར་ [213a.2]བྱ་བ་ལས་ཤར་དུ་རྡོ་རྗེ་སྒྲོལ་མ་ནག་མོ་རྡོ་རྗེ་ཕྱག་ན་བསྣམས་པའོ། །ལྷོ་ན་རིན་ཆེན་སྒྲོལ་མ་སེར་མོ་རིན་པོ་ཆེ་ཕྱག་ན་བསྣམས་པའོ། །ནུབ་ན་པདྨའི་སྒྲོལ་མ་དམར་པོ་པདྨ་དམར་པོ་ཕྱག་ན་བསྣམས་པའོ། །བྱང་ན་སངས་རྒྱས་སྒྲོལ་མ་དཀར་མོ་འཁོར་ལོ་བསྣམས་པའོ། །མེ་ [213a.3]མཚམས་ན་མེ་ཏོག་སྒྲོལ་མ་དཀར་མོ་མེ་ཏོག་གི་ཕྲེང་བ་བསྣམས་པའོ། །བདེན་བྲལ་གྱི་མཚམས་ན་བདུག་པའི་སྒྲོལ་མ་ནག་མོ་ཕྱག་ན་སྤོས་ཕོར་བསྣམས་པའོ། །རླུང་མཚམས་ན་མར་མེའི་སྒྲོལ་མ་སེར་མོ་མར་མེའི་སྣོད་བསྣམས་པའོ། །དབང་ལྡན་གྱི་མཚམས་ན་དྲིའི་སྒྲོལ་མ་ [213a.4]དམར་མོ་དྲིའི་དུང་ཆོས་བསྣམས་པའོ། །འདི་དག་རྣམས་ནི་སྣ་ཚོགས་པདྨའི་འདབ་མའི་ཟླ་བ་ལ་སྟེ། བརྒྱད་ཀ་ཡང་ཟླ་བའི་འོད་དང་ལྡན་ཞིང་སེམས་དཔའི་སྐྱིལ་ཀྲུང་གིས་བཞུགས་པ་གཡོན་པས་ཨུཏྤལ་བསྣམས་པ། ཞལ་འཛུམ་པ་སྣ་ཚོགས་པའི་རྒྱན་དང་ན་བཟའ་དང་ལྡན་ [213a.5]པའོ། །ཤར་གྱི་སྒོར་ནི་རྡོ་རྗེ་ལྕགས་ཀྱུ་མ་སྟེ་ནག་མོ་ཕྱག་ན་རྡོ་རྗེ་ལྕགས་ཀྱུ་བསྣམས་པའོ། །ལྷོ་ན་ནི་རྡོ་རྗེ་ཞགས་པ་མ་སྟེ་སེར་མོ་རྡོ་རྗེའི་ཞགས་པ་ཕྱག་ན་བསྣམས་པའོ། །ནུབ་ན་ནི་རྡོ་རྗེ་ལྕགས་ཐག་མ་སྟེ་དམར་མོ་རྡོ་རྗེའི་ལྕགས་ཐག་བསྣམས་པའོ། །བྱང་ན་ནི་རྡོ་རྗེ་དྲིལ་ [213a.6]བུ་མ་སྟེ་དཀར་མོ་རྡོ་རྗེ་དྲིལ་བུ་ཕྱག་ན་བསྣམས་པའོ། །དེ་དག་རྣམས་ནི་སྒོ་བཞིར་ཉི་མ་ལ་བལྟ་བར་བྱ་སྟེ། ཉི་མའི་གཟི་བརྗིད་དང་ལྡན་པ། སྐྲ་སེར་པོ་གྱེན་དུ་འབར་བ། །གཡོན་བསྐུམ་པའི་ཞབས་ཀྱིས་གནས་པ། སྦྲུལ་གྱིས་བརྒྱན་ཅིང་བཞིན་རྣམ་པར་བསྒྱུར་བ་སྟག་ [213a.7]གི་པགས་པའི་ཤམ་ཐབས་བསྣམས་པ། ཕྱག་གཡོན་པ་རྣམས་ཀྱིས་ཨུཏྤལ་བསྣམས་པ་ཡིན་ནོ། །དེ་ནས་ཡེ་ཤེས་སེམས་དཔའ་དང་ལྷན་ཅིག་ཏུ་བྱས་ལ། རང་གི་སྙིང་གའི་པདྨ་ལ་གནས་པའི་རང་གི་ས་བོན་ཤིན་ཏུ་ཕྲ་བ་མི་གཡོ་བའི་ཡིད་ཀྱིས་བསྒོམས་ལ་སྔགས་ [213b] [213b.1]བཟླས་པར་བྱ་བའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་དྷ་ན་མྨེ་ད་ད་སྭཱ་ཧཱ། དེ་ལས་ལངས་པའི་དུས་སུ་ནི། ཨོཾ་ཨ་ཀཱ་རོ་མུ་ཁཾ་ཞེས་བྱ་བ་ལ་སོགས་པའི་སྔགས་དང་ཨུཏྤལའི་ཕྱག་རྒྱས་གཏོར་མ་བཏང་ལ། སྨོན་ལམ་ཡང་བཏབ་སྟེ། ལྷའི་འཁོར་ལོ་རང་གི་ས་བོན་གྱི་ནང་དུ་བསྡུས་ནས། རང་ཉིད་ [213b.2]ཀྱི་ལྷའི་རྣམ་པ་དང་ལྡན་པས་ཇི་ལྟར་བདེ་བར་རྒྱུ་བར་བྱའོ། །ཉི་མ་ཕྱེད་ཀྱི་དུས་དང་ཕྱི་དྲོའི་དུས་ཀྱི་ཐུན་དག་ལ་ནི་རང་གི་སྙིང་གའི་ས་བོན་ལས་སྐད་ཅིག་གིས་ལྷའི་འཁོར་ལོ་ཀུན་དུ་སྤྲོས་ལ་སྔར་བཞིན་དུ་བསྒོམ་པ་དང་བཟླས་པ་ལ་སོགས་པ་བྱ་བའོ། །ཕྱི་དྲོའི་དུས་དང་གུང་གི་དུས་ [213b.3]ཀྱི་ཐུན་ལ་ནི་འདི་དག་ཁྱད་པར་ཡིན་ཏེ། མེ་ཏོག་ཀྱེལ་སོགས་པས་ཡེ་ཤེས་ཀྱི་དཀྱིལ་འཁོར་ལེགས་པར་མཆོད་ལ། ཨོཾ་ཏཱ་རེ་ཏུཏྣ་རེ་ཏུ་རེ་མུཿཞེས་བྱ་བ་འདིས་གཤེགས་སུ་གསོལ་བར་བྱ་བ་ཡིན་ནོ། །སྒོལ་མ་ནོར་སྦྱིན་མའི་སྒྲུབ་ཐབས་སོ །པཎྜི་ཏ་ཆེན་པོ་ཨ་བྷ་ [213b.4]ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3208}༄༅༅། །རྒྱ་གར་སྐད་དུ། ཏཱ་རོདྦྷ་ཝ་ཀུ་རུ་ཀུལླཱ་སཱ་དྷ་ནཾ། བོད་སྐད་དུ། སྒྲོལ་མ་ལས་འབྱུང་བའི་ཀུ་རུ་ཀུལླཱའི་སྒྲུབ་ཐབས། སྒྲོལ་མ་ལས་འབྱུང་བའི་ཀུ་རུ་ཀུལླེ་ལ་ཕྱག་འཚལ་ [213b.5]ལོ། །རེ་ཞིག་ཐོག་མར་སྔགས་པས་ཡིད་དུ་འོང་བར་འགྱུར་བའི་གནས་འགའ་ཞིག་ཏུ་འཇམ་པའི་སྟན་ནང་ཚངས་ཅན་ལ་སོགས་པ་ལ་ཉེ་བར་གནས་ཏེ། ཐང་ཀ་ལ་སོགས་པ་ལ་བཞུགས་པའི་བཅོམ་ལྡན་འདས་མ་བཀྲམ་ལ། ཕྱི་རོལ་གྱི་མཆོད་པ་བྱས་ནས་རང་གི་སྙིང་ [213b.6]གར། དྲི་མེད་ཟླ་བ་ཉ་བའི་མདོག །དབྱངས་ཡིག་དང་པོ་ལེགས་ལས་འབྱུང་། །སེམས་ཀྱི་ཟླ་བ་ལེགས་བསྒོམས་ལ། །ས་བོན་དེ་སྟེང་དགོད་པར་བྱ། །དྲོ་བ་རྣམས་ཀྱི་བཞི་པ་ནི། །མེ་ཡི་ཡི་གེ་སྟེང་ན་གནས། །ཡི་གེ་ཨི་དང་ཡང་དག་ལྡན། །ནམ་མཁའ་གཉིས་ཀྱིས་ [213b.7]བརྒྱན་པའོ། །དེ་ཡི་འོད་ཟེར་སྣ་ཚོགས་ཀྱིས། །འཇིག་རྟེན་དྲི་མ་མེད་བྱས་ཤིང་། །མི་མཇེད་ཁམས་སོགས་སྦྱངས་བྱས་ནས། །ཀུ་རུ་ཀུལླེའི་རིར་སོང་སྟེ། །དེ་ནི་ལེགས་པར་བསྐུལ་ནས་ཀྱང་། །སྤྱན་དྲངས་ནས་ནི་མདུན་དུ་བཞུགས། །ས་བོན་དེ་ལས་མཁས་པ་ [214a] [214a.1]ཡིས། །མཆོད་པའི་སྤྲིན་ཚོགས་ཆེན་པོ་སྤྲོ། །མེ་ཏོག་བདུག་པ་དེ་བཞིན་སྒྲོན། །དྲི་དང་ལྷ་བཤོས་ཚོགས་རྣམས་དང་། །འགྱིང་བག་ཕྲེང་བ་གར་དང་གླུ། །རོལ་མོའི་མཆོད་སོགས་དེ་བཞིན་དུ། །དཀོན་མཆོག་གསུམ་ལ་སྐྱབས་སུ་མཆི། །བདག་ [214a.2]གིས་སྡིག་ཀུན་སོ་སོར་བཤགས། །འགྲོ་བའི་དགེ་ལ་རྗེ་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སྔགས་འདི་ལན་གསུམ་བརྗོད་བྱས་ལ། །དེ་ནས་བཟོད་པ་མཛོད་ཅེས་ཀྱང་། །དེ་ཡི་ཚིགས་སུ་བཅད་པའི་དབྱངས་ནི་འདི་ཡིན་ཏེ། བདག་ནི་རྨོངས་པའི་ཡིད་ཀྱིས་ [214a.3]ཀྱང་། །སྡིག་པ་ཅུང་ཟད་གང་བགྱིས་པ། །ལུས་ཅན་གང་ཡིན་སྐྱོབ་མཛད་པའི། །ལྷ་མོ་ཁྱོད་ཀྱིས་དེ་བཟོད་མཛོད། །སེམས་ནི་བྱམས་ལ་གནས་པར་བྱ། །ཞིང་དེ་ནས་ནི་ཡང་སེམས་སྙིང་རྗེ་ལ་ངེས་པར་བཞག་པར་བྱས་ལ་རབ་ཏུ་དགའ་བའི་སེམས་ཀྱང་ལེགས་པར་བསྐྱེད་ [214a.4]པས་གནས་པར་བྱ་སྟེ། །ཕྱི་ནས་ནི་བཏང་སྙོམས་སུ་བྱས་པས། ཐམས་ཅད་ཀྱང་སེམས་ཙམ་དུ་རྣམ་པར་གཞག་པར་བྱ་བའོ། །རང་བཞིན་ང་རྒྱལ་གཞོམ་དོན་དུ། །དེ་ནས་སེམས་ཀྱང་སྟོང་པར་བྱ། །སྟོང་ཉིད་མེ་ཡིས་བསྲེགས་པས་ནི། །ཡང་སྲིད་ཕུང་པོ་ལྔ་མི་འབྱུང་། ། [214a.5]ཨོཾ་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ། །ཡུད་ཙམ་སྟོང་ཉིད་རྣལ་འབྱོར་བྱ། །སེམས་ངལ་གསོ་བར་བྱ་བ་དང་། །དང་པོའི་སྨོན་ལམ་དྲན་བྱས་ལ། །ཡང་ནི་ས་བོན་ཙམ་དྲན་བྱ། །གཅིག་ཏུ་ཡོངས་སུ་མྱང་འདས་ལས། །བདག་གིས་ [214a.6]སེམས་ཅན་རབ་ཏུ་བསྒྲལ། །འཁོར་བའི་རྒྱ་མཚོ་བརྒལ་དཀའ་ལས། །ཇི་ལྟར་དེ་དག་བདག་གིས་བསྒྲལ། །སྙིང་རྗེས་ཟིན་པས་འདི་རྟོགས་ནས། །སྤྱོད་མེད་སྟོང་པ་ཉིད་བཏང་སྟེ། །ཆོས་ཀྱི་དབྱིངས་ཀྱི་རང་བཞིན་གྱིས། །སེམས་བསྐྱེད་པ་དང་ལྡན་པ་ལ། །ས་བོན་ [214a.7]སངས་རྒྱས་བྱིན་བརླབས་ཀྱིས། །དེ་ལ་ཨུཏྤལ་ཞེས་བྱ་འབྱུང་། །ཨུཏྤ་ལ་ནི་ཟླ་བའི་གཟུགས། །དབྱངས་ཡིག་ཨ་ལས་ལེགས་འབྱུང་ངོ་། །ཟླ་བ་དེར་ཡང་འོད་ཟེར་སྦྱོར་བ་ཡིས། །འཇིག་རྟེན་ཁམས་རྣམས་མ་ལུས་པ། །དེ་ཡི་རྣམ་སྦྱང་བསྒོམ་པར་བྱ། །སྦྱངས་ [214b] [214b.1]ནས་མཁྱེན་བྱ་འོད་ཟེར་གྱིས། །སངས་རྒྱས་བྱེ་བ་ཐམས་ཅད་ནི། །ཨུཏྤལ་དེ་ལ་ཞུགས་པར་བསྒོམ། །དེ་ལས་སྒོལ་མ་འབྱུང་བ་ཡིན། །སྐུ་མདོག་དམར་པོ་ཕྱག་བཞི་མ། །པདྨ་དམར་པོའི་གདན་ལ་བཞུགས། །གོས་དམར་ཟུང་བསྣམས་སྐལ་ལྡན་མ། །རྣ་གདུབ་དབུ་རྒྱན་ [214b.2]དམར་པོ་ཅན། །གཡས་ཀྱི་ཕྱག་གཉིས་མི་འཇིགས་དང་། །མདའ་བསྣམས་པ་དང་གཞན་མ་ཡི། །གཡོན་པའི་ཕྱག་ནི་གཉིས་ཀྱིས་ཀྱང་། །གཞུ་དང་མཆོག་དམར་ཨུཏྤལ་བསྣམས། །ཀུ་རུ་ཀུལླཱའི་རི་ཕུག་གི །ནང་བཞུགས་སྣང་མཐའི་ཅོད་པན་གནས། །པདྨ་དམར་ [214b.3]པོའི་གདན་འོག་ན། །སྒྲ་གཅན་དེ་སྟེང་ཡོངས་གནས་པ། །འདོད་པའི་ལྷ་ནི་ཁྱོ་ཤུག་གཉིས། །ཤིན་ཏུ་རྒྱལ་བ་བསྒོམ་བྱ་སྟེ། །དེ་ལ་རྡོ་རྗེ་སྐྱིལ་ཀྲུང་བཞུགས། །རིག་པ་ཀུན་ལ་རྣམ་སྦྱངས་མ། །རྒྱན་རྣམས་ཐམས་ཅད་ཀྱིས་བརྒྱན་པའི། །བཅོམ་ལྡན་འདས་མ་ [214b.4]ཡང་དག་བསྒོམ། །དམ་ཚིག་སྐུ་ནི་ལེགས་ལྡན་པས། །ཡེ་ཤེས་འཁོར་ལོ་ལེགས་པར་དགུག །སྐད་ཅིག་སྣང་བ་ཡོངས་རྫོགས་པས། །ཡེ་ཤེས་འཁོར་ལོ་མདུན་དུ་བཞུགས། །ཛཿཧཱུཾ་བཾ་ཧོཿ། ཞེས་བྱ་བ་འདིས། སྤྱན་དྲངས་ [214b.5]དགུག་གཞུག་བརྟན་པར་བྱ། དགྱེས་པར་ཡང་བྱ་བའོ། །དམ་ཚིག་གི་ཕྱག་རྒྱའི་སྦྱོར་བས་ཁའི་ལམ་ནས་གཞུག་པར་བྱ་སྟེ། ལག་པ་གཉིས་སྙིམ་པར་བྱས་ལ་གུང་མོ་གཉིས་ཀ་ཡང་རྩེ་སྤྲད་ཅིང་། རྩེ་འོག་མཐིལ་དུ་སྲིན་ལག་གཉིས་དགུག་པ་མཐེབ་མོ་གཉིས་ཁོང་དུ་ [214b.6]བཏང་བའི་འོག་ཏུ་མནན་ལ། མཛུབ་མོ་གཉིས་གུང་མོ་གཉིས་ཀྱི་གློར་སྦྱར་ཞིང་གང་གི་ཚེ་མཐེའུ་ཆུང་གཉིས་ཀྱང་ཅུང་ཟད་རྩེ་དགུག་པའོ། །འདིས་ནི་དམ་ཚིག་བཙིང་བར་བྱ་བ་དང་། འདིས་འཁོར་ལོ་གཞུག་པར་བྱ་བ་ཡང་ཡིན་ནོ། །དེ་ནས་ནི་སངས་རྒྱས་རྣམས་ཀྱི་ཞེས་བྱ་ [214b.7]བའི་ཚིགས་སུ་བཅད་པའི་དབྱངས་བརྗོད་པས་དབང་བསྐུར་བ་དོན་དུ་གཉེར་བར་བྱ་སྟེ། བྱང་ཆུབ་རྡོ་རྗེ་སངས་རྒྱས་རྣམས། །ཇི་ལྟར་བྱིན་པ་ཆེན་པོའི་ཆེ། །བདག་ཀྱང་བསྐྱབ་པར་བགྱིད་དོན་དུ། །མཁའ་རྡོར་ལ་སོགས་བདག་ལ་སྩོལ། །དེ་དག་ཆེར་གྱུར་སྦྱིན་མཛད་དེ། ། [215a] [215a.1]དབང་བསྐུར་རྒྱལ་པོ་ཞེས་བྱ་བའོ། །མེ་ཏོག་དབང་བཞིན་རྒྱལ་པོ་ཡང་། །སྤྱན་མ་ལོ་སོགས་ལྔ་བདག་གིས། །ཁམས་གསུམ་པ་ཡི་ཕྱག་བྱས་པའི། །དབང་བསྐུར་རྡོ་རྗེ་ཆེན་པོ་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་ལེགས་ [215a.2]བྱུང་བདག་གིས་སྦྱིན། །སངས་རྒྱས་དབང་བསྐུར་པ་ཡིན་སྒྲོལ། །ཆོས་ནི་གཙུག་གི་ནོར་བུར་བཞུགས། །ངོ་མཚར་འོད་ཟེར་དམར་འོད་ཀྱིས། །འཇིག་རྟེན་གསུམ་པོ་གསལ་བར་མཛད། །དབང་བསྐུར་རིན་ཆེན་ཐོབ་པས་ནི། །དངོས་གྲུབ་ཐམས་ཅད་རབ་གྲུབ་བྱེད། །ལོ་ཕྱེད་བརྟན་ [215a.3]པས་ལེགས་གནས་དང་། །ཇི་སྐད་བཤད་མཆོག་སྔོན་དུ་བཏང་། །ཐུན་གསུམ་ལ་ནི་གཏོར་མ་བཏང་། །སྒོམ་པའི་རིམ་པ་སྔོན་འགྲོ་བས། །སྒྲོལ་མའི་སྙིང་འོ་ཡིས་ནི་འདིར། །སྔགས་ནི་མཉམ་པར་བཞགས་པས་བཟླས། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། དེ་དག་གི་སྔོན་དུ་འགྲོ་བ་ཡི་གེ་ [215a.4]འབུམ་བཟླས་པ་ལས་ཡང་དག་པར་བརྩམ་པར་བྱ་བའོ། །ཆ་ཤས་ཀྱིས་ནི་ཤེས་རབ་འཕེལ། །ཆ་གཞན་གྱིས་ནི་དབང་དུ་བྱེད། །ཆ་ནི་གསུམ་པ་ཉིད་ཀྱིས་ཀྱང་། །མི་ཡི་དུག་ནི་འབྱིན་པར་བྱེད། །དེ་ནི་འཇིག་རྟེན་ཀུན་གྱི་མཆོད་པར་བྱེད་འགྱུར་ཞིང་། །བུད་མེད་རྒྱགས་པ་དག་གིས་དྲེགས་ [215a.5]ལྡན་རྣམས་ཀྱང་སྟེ། །ཇི་ལྟར་འདོད་བཞིན་སྔགས་འཛིན་བྱེད་པའི་རྗེ་བོ་ཡིས། །བཤད་ལ་གོམས་པའི་སྦྱོར་བས་ལྷ་མི་མཛེས་རྣམས་ཀྱང་། །སྒྲིན་པོས་རིམ་གྱིས་གོམས་བྱས་ཏེ། །དངོས་གྲུབ་ཕྲན་ཚེགས་བསྒྲུབ་བྱས་ལ། །དངོས་གྲུབ་ཆེན་པོ་བསྒྲུབ་པར་བྱ། །ཐམས་ཅད་དུ་འདིར་ [215a.6]ཐེ་ཚོམ་སྤང་། །སྒྲོལ་མ་ལས་བྱུང་བའི་ཀུ་རུ་ཀུལླེའི་སྒྲུབ་ཐབས་རྟོག་པ་ལས་གསུངས་པ་རྫོགས་སོ།། །།པཎྜི་ཏ་ཆེན་པོ་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3209}༄༅༅། །རྒྱ་གར་སྐད་དུ། ཀུ་རུ་ཀུལླཱ་སཱ་དྷ་ནཾ། བོད་སྐད་དུ། [215a.7]ཀུ་རུ་ཀུལླེའི་སྒྲུབ་ཐབས། སྒྲོལ་མ་ལས་ངེས་པར་འབྱུང་བའི་ཀུ་རུ་ཀུལླེ་ལ་ཕྱག་འཚལ་ལོ། །གང་ཞིག་དྲན་པ་ཙམ་གྱིས་ཀྱང་། །ལྷར་བཅས་ལྷ་མིན་མི་རྣམས་ཀྱང་། །རྟག་ཏུ་ཅི་བགྱི་བར་འགྱུར་བའི། །སྒྲོལ་མ་དེ་ལ་བདག་ཕྱག་འཚལ། །དང་པོར་རེ་ཞིག་སྔགས་པས་བུད་མེད་ [215b] [215b.1]ཀྱི་འགྲོ་བ་བའི་འདྲུལ་འཇུག་ལ་སོགས་པ་དང་བྲལ་ཞིང་ཡིད་ཀྱིས་རྗེས་སུ་མཐུན་པའི་གནས་འགའ་ཞིག་ཏུ་བདེ་བའི་སྟན་ལ་གནས་ལ། རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་སྟེང་དུ་འོད་ཟེར་དང་བཅས་པའི་ས་བོན་གྱི་ཡི་གེ་ཧྲཱིཿརྣམ་ [215b.2]པར་སྤྲོས་བའི་འོད་ཟེར་དམར་པོའི་ཚོགས་རྣམས་ཀྱིས་འཇིག་རྟེན་ཀུན་དུ་སྣང་བར་བྱེད་པ་སྔོན་དུ་འགྲོ་བས། ཀུ་རུ་ཀུལླེའི་རིལ་གནས་པའི་ཀུ་རུ་ཀུལླེའི་བཅོམ་ལྡན་འདས་མ་ལེགས་པར་བསྐུལ་ཞིང་སྤྱན་དྲངས་པ་མདུན་གྱི་ནམ་མཁའི་ཡུལ་ཕྱོགས་སུ་ལེགས་པར་བསམས་ལ། [215b.3]སྙིང་གའི་ས་བོན་གྱི་འོད་ཟེར་དེས་པར་སྤྲུལ་བའི་རྣམ་པ་སྣ་ཚོགས་པའི་མེ་ཏོག་དང་བདུག་པ་ལ་སོགས་པའི་མཆོད་པ་རྣམས་ཀྱིས་མཆོད་པར་བྱ་བའོ། །དེའི་རྗེས་ལ་ཕྱག་འཚལ་བ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། ཡོངས་སུ་བསྔོ་ [215b.4]བ་དང་། གསུམ་ལ་སྐྱབས་སུ་འགྲོ་དོན་ནོ། །བྱང་ཆུབ་ཏུ་སེམས་བསྐྱེད་པ་རྣམས་སྔོན་དུ་འགྲོ་བས། བདག་ནི་དཀོན་མཆོག་གསུམ་ལ་སྐྱབས། །བདག་སྡིག་ཐམས་ཅད་སོ་སོར་བཤགས། །སྐྱེ་དགུའི་བསོད་ནམས་ལ་རྗེས་རང་། །སངས་རྒྱས་བྱང་ཆུབ་ཡིད་ཀྱིས་གཟུང་།། [215b.5]ཞེས་བྱ་བ་འདི་ལན་གསུམ་དུ་གདོན་ནོ། །དེ་ནས་ཚངས་པའི་གནས་བཞི་བསྒོམ་པ་སྔོན་དུ་འགྲོ་བས་ཆོས་ཐམས་ཅད་སྟོང་པ་ཉིད་དུ་རྣམ་པར་བསྒོམས་ལ། དེ་བྱིན་གྱིས་རློབ་པའི་སྔགས་བརྗོད་པར་བྱ་སྟེ། ཨོཾ་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ [215b.6]ནོ། །དེའི་རྗེས་ལ་འཇིག་རྟེན་ཐམས་ཅད་སྡུག་བསྔལ་བར་སྙིང་རྗེས་དམིགས་ལ། རང་གི་སེམས་ཉིད་ས་བོན་གྱི་གཟུགས་སུ་རྣམ་པར་བལྟ་བར་བྱའོ། །དེ་ཡོངས་སུ་གྱུར་པ་ལས་ཨུཏྤལ་དམར་པོའི་སྟེང་དུ་དབྱངས་ཡིག་དང་པོ་ཡོངས་སུ་གྱུར་བ་ལས་ཟླ་བ་གནས་ [215b.7]པའི་ས་བོན་གྱི་འོད་ཟེར་གྱིས་སྔར་བཞིན་དུ་འཇིག་རྟེན་ཀུན་དུ་སྣང་བར་བྱས་ཤིང་། དེ་བཞིན་གཤེགས་པ་བྱེ་བ་མཐའ་ཡས་པ་རྣམས་ཡང་དག་པར་བསྐུལ་ནས་སྤྱན་དྲངས་ལ་ནང་དུ་གཞུག་པར་བྱའོ། །ཨུཏྤལ་ལ་སོགས་པ་རྣམས་ཡོངས་སུ་གྱུར་པ་ལས་སྐུ་མདོག་དམར་པོ་ [216a] [216a.1]སྟོང་ཤག་ཤིན་ཏུ་དམར་བ་འོད་ཟེར་དམར་པོས་ཁོར་ཡུག་ཏུ་གྱུར་པ་རྣ་གདུབ་དང་དབུ་རྒྱན་དམར་པོ་དང་ལྡན་པ། ཕྱག་བཞི་ལ་གཡས་པས་མི་འཇིགས་པ་རབ་ཏུ་སྦྱིན་པ། གཉིས་པས་ཡང་དག་བཀང་པའི་མདའ། གཡོན་པས་རིན་པོ་ཆེའི་གཞུ་ [216a.2]བསྣམས་པ། གཉིས་པས་ཨུཏྤལ་དམར་པོ་བསྣམས་པ། དེ་བཞིན་གཤེགས་པ་སྣང་བ་མཐའ་ཡས་དབུ་རྒྱན་ལ་སྟེ། ཀུ་རུ་ཀུལླེའི་རིའི་ཕུག་ན་བཞུགས་ཤིང་སྐྲ་ཅན་གྱི་མགོལ་གནས་པའི་ཆུང་མ་དང་བཅས་པའི་འདོད་པའི་ལྷའི་སྟེང་ན་པདྨ་དང་ཟླ་བ་དམར་པོའི་གདན་ལ་བཞུགས་ [216a.3]པའོ། །སྒེག་པའི་ཉམས་ཀྱིས་འགྱུར་མདོག་ཅིང་ཐོག་མའི་ལང་ཚོ་དང་ལྡན་པའི་ཀུ་རུ་ཀུལླེ་བསྒོམ་པར་བྱ་བའོ། །དེ་ལྟར་དམ་ཚིག་སེམས་དཔའ་རྫོགས་པར་བྱས་ལ། སྐད་ཅིག་གིས་ཡེ་ཤེས་པ་མདུན་དུ་ལེགས་པར་སྤྱན་དྲང་ཞིང་ལེགས་པར་མཆོད་དོ། དམ་ཚིག་གི་ཕྱག་རྒྱས་ [216a.4]ཁའི་ལམ་ནས་ནང་དུ་གཞུག་པར་བྱ་བའོ། །དེ་ལ་དམ་ཚིག་གི་ཕྱག་རྒྱ་ནི་འདི་ཡིན་ཏེ། ཐལ་མོ་ཁ་སྦྱར་ལ་གུང་མོ་གཉིས་རྩེ་སྤྲད་ནས་བསླང་བའི་ནང་དུ་སྲིན་ལག་གཉིས་བཅུག་ལ། གུང་མོ་དག་གི་རྒྱབ་ཏུ་མཛུབ་མོ་གཉིས་ལེགས་པར་བྱ་ཞིང་མཐེ་བོང་གཉིས་ནང་དུ་བཀུག་པ་ནི་ [216a.5]དེའི་རྣམ་པ་ཡིན་པས་ན་ཨུཏྤལའི་ཕྱག་རྒྱའོ། །དེའི་རྗེས་ལ་ནི། བྱང་ཆུབ་རྡོ་རྗེ་སངས་རྒྱས་རྣམས། །ཇི་ལྟར་བྱིན་པ་ཆེན་པོའི་ཆེ། །བདག་ཀྱང་བསྐྱབ་པར་བགྱི་དོན་དུ། །བདག་ལ་མཁའ་རྡོར་ལ་སོགས་སྩོལ། །ཞེས་བྱ་བ་ནི་དོན་དུ་གཉེར་བའོ། །ཁམས་གསུམ་པ་ཡིས་ཕྱག་བྱས་ [216a.6]པའི། །དབང་བསྐུར་རྡོ་རྗེ་ཆེན་པོ་ནི། །བདག་གིས་སྦྱིན་བྱས་ངས་རྒྱས་ཀུན། །གསང་གསུམ་གནས་ལས་ལེགས་བྱུང་ཡིན། །ཞེས་བྱ་བ་འདི་བརྗོད་ནས་སངས་རྒྱས་ཀྱི་བཀས་སྤྱན་མལ་སོགས་པ་རྣམས་ཀྱིས་དབང་བསྐུར་སྦྱིན་པར་བྱེད་པར་བསྒོམ་པར་པ་སྟེ། དབུ་རྒྱན་ལ་ [216a.7]སྣང་བ་མཐའ་ཡས་རྣམ་པར་གནས་པ་ཡིན་ནོ། །དེ་ལྟར་བསྒོམ་པ་བྱས་ལ་བཟླས་པ་བྱ་སྟེ། མྱུར་བ་མ་ཡིན་བུལ་བར་མ་ཡིན་མི་གསལ་བ་མ་ཡིན་ཡན་ལག་དང་བྲལ་བར་མ་ཡིན་པ་དང་། ཡན་ལག་མ་ཡིན་པའི་རྟོག་པ་ཡང་སྤངས་ལ། ཨོཾ་ཀུ་རུ་ཀུལླཱ་ཧྲཱིཿསྭཱ་ཧཱ། དེ་ལྟར་ [216b] [216b.1]ཐུན་ཚོད་གསུམ་དུ་རིམ་པ་བཞིན་དུ་སྐུ་ཁུར་དང་ཤ་ཁར་ལ་སོགས་པའི་གཏོར་མ་བཏང་བ་སྔོན་དུ་བཏང་བས་གུས་པ་དང་བཅས་ཤིང་རྒྱུན་མི་འཆད་པར་བསམ་པ་བརྟན་པོས་ཟླ་བ་དྲུག་ཏུ་བསྒོམ་པར་བྱ་སྟེ། གྲུབ་པའི་རྟགས་འབྱུང་བར་འགྱུར་རོ། །དེ་ནས་ནི་ཟླ་བ་དང་པོ་ལ་ནད་དང་ཉེ་བར་ [216b.2]འཚོ་བཞི་བར་འགྱུར་རོ། །ཟླ་བ་གཉིས་པ་ལ་ནི་ཟས་བསོད་པར་གྱུར་བ་འབྱུང་བར་འགྱུར་རོ། །གསུམ་པ་ལ་ནི་གོས་སྣ་ཚོགས་རྙེད་པར་འགྱུར་རོ། བཞི་པ་ལ་ནི་ཏམྦུ་ལ་རྣམ་པ་སྣ་ཚོགས་པ་རྒྱུན་མི་འཆད་པར་རྙེད་དོ། །ལྔ་པ་ལ་ནི་ངོ་མཚར་ཆེ་བའི་གཟུགས་ལ་སོགས་པའི་ཡོན་ཏན་དང་ [216b.3]ལྡན་པའི་བུད་མེད་འདུ་བར་འགྱུར་རོ། །ཟླ་བ་དྲུག་པ་ལ་ནི་ལྷ་དང་ཀླུ་དང་གནོད་སྦྱིན་དང་དྲི་ཟ་དང་མི་འམ་ཅི་ལ་སོགས་པའི་བུ་མོ་ལེགས་པར་འདུ་བར་འགྱུར་རོ། །བཅོམ་ལྡན་འདས་མ་བསྒོམ་པ་ལ་ནི་ཕལ་ཆེར་བུད་མེད་རྣམས་རྙེད་ཀྱི་ཉེ་བར་འབྱུར་བར་འགྱུར་རོ། །དེས་བདུད་ཀྱི་ལས་ [216b.4]དེ་དག་རྣམས་ཡོངས་སུ་སྤངས་ལ་བཅོམ་ལྡན་འདས་མ་བསྒོམ་པར་བྱ་སྟེ། རྨི་ལམ་མམ་དངོས་སུ་ཡང་རུང་སྟེ། གསལ་བར་བཀའ་བསྒོ་བར་འགྱུར་རོ། །རལ་གྲི་དང་མིག་རྩི་དང་རྐང་པའི་ཕྱུག་པ་དང་མི་སྣང་བར་འགྱུར་བ་དང་། བཅུད་ཀྱིས་ལེན་དང་མཁའ་སྤྱོད་དང་ཞིང་ [216b.5]སྐྱོང་དང་ས་འོག་གྲུབ་པ་ལས་སོགས་པའི་དངོས་གྲུབ་རྣམས་བསྒྲུབ་པར་བྱའོ། །གལ་ཏེ་བཀའ་བསྒོ་བ་མེད་པར་གྱུར་ན་དེའི་ཚེ་སྔར་བཤད་པའི་ཕྱག་རྒྱ་བཅིངས་ལ་མཆོད་པ་དང་གཏོར་མ་བཏང་བ་ལ་སོགས་པ་སྔོན་དུ་འགྲོ་བས་ཟླ་བ་དྲུག་པ་གཞན་གྱི་ཟླ་བ་ལ་མཚན་རངས་པ་བཟླས་པར་ [216b.6]བྱ་བའོ། །དེ་ནས་ནི་འབར་བར་འགྱུར་ཞིང་དངོས་གྲུབ་ཀྱང་འབྱུང་སྟེ། ཕྱག་རྒྱ་དེས་ཚངས་པ་དང་། དབང་པོ་དང་། ཉེ་དབང་དང་། དྲག་པོ་དང་། སྲེད་མེད་ཀྱི་བུལ་སོགས་པ་རྣམས་ཡང་དག་པར་དྲངས་ཤིང་ལེགས་པར་འདུས་ནས་ཅི་བགྱི་ཉིད་དུ་བསྙེན་ཏེ། སྒྲུབ་པ་པ་མངོན་ [216b.7]པར་འདོད་པ་རྣམས་ཕུན་སུམ་ཚོགས་པར་བྱེད་དོ། །དེང་ནས་བཟུང་ནས་སྐྱེ་བ་དང་། རྒ་དང་། འཆི་བ་དང་བྲལ་བར་གྱུར་བ་གྲུབ་ནས་འཇིག་རྟེན་གྱི་ཁམས་གཞན་དུ་ཕྱིན་ཅིང་དེ་བཞིན་གཤེགས་པ་རྣམས་མཐོང་བར་འགྱུར་བ་དང་ས་དང་གཟུངས་ལ་སོགས་པ་ནས་ཐོབ་པར་འགྱུར་རོ། ། [217a] [217a.1]སྒོ་ལམ་ལས་འབྱུང་བའི་ཀུ་རུ་ཀུལླེའི་ཚིག་ལྷུག་པའི་སྒྲུབ་ཐབས་རྫོགས་སོ།། །།པཎྜིཏ་ཆེན་པོ་ཨབྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3210}༄༅༅། །རྒྱ་གར་སྐད་དུ། ཨུ་པ་དེ་ཤ །བོད་སྐད་དུ། གདམས་ [217a.2]ངག །སྭ་ལས་ཀུ་རུ་ཀུལླེར་བསྒོམ། །གཞན་ལས་ངེས་འབྱུང་མཚོ་སྐྱེས་ལ། །བསྒྲུབ་བྱ་ནང་དུ་ཆུད་བྱས་ཤིང་། །འདོད་པས་མོས་པར་བསྒོམ་པར་བྱ། །པདྨ་ཅུང་ཟད་དམར་བསྣམས་པའི། །ཡེ་ཤེས་སེམས་དཔའ་དེ་སྦྱིར་བསམ། །གཟུགས་ལྷུང་འདི་ནི་ཉིན་བདུན་དུ། །ཐུན་ [217a.3]ཚོད་གསུམ་དུ་བསྒོམ་པར་བྱ། །ཀུ་རུ་ཀུལླེས་དཔང་དུ་བྱ་བའི་གདམས་ངག་ཨབྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3211}༄༅༅། །རྒྱ་གར་སྐད་དུ། ཨུ་པ་དེ་ཤནྟ་རཿ། བོད་སྐད་དུ། གདམས་ངག་གི་ཁྱད་པར། ཧྲཱིཿཡིག་མྱོས་པའི་འདབ་མ་ཉེ་བའི་བཅུད་ [217a.4]རྣམས་འཛག་པར་གྱུར་པའི་ལྕེ་དག་དང་ཡང་ནི། །དེ་ཉིད་བློ་གྲོས་སྐྱེད་བར་བྱེད་པ་ལ་ནི་སྙིང་གི་དབུས་ཉིད་དུ་ནི་བྱ་བ་ཡིན། །དེ་ཉིད་མཐོང་དུག་ཟིལ་གནོན་དུག་འཇོམས་བྱེད་པ་ཆོས་ཀྱི་ཡི་གེར་རང་ཉིད་འབབ་པ་སྟེ། །སྒྲོལ་མའི་སྙིང་པོ་འདི་ནི་ཁམས་གསུམ་རྣམ་པར་རྒྱལ་བྱེད་ཤེས་བྱ་སྙིང་རྗེའི་ [217a.5]ཞིང་རྣམས་ཀྱིས། །གདམས་ངག་གི་ཁྱད་པར་ཨབྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3212}༄༅༅། །རྒྱ་གར་སྐད་དུ། ཀུ་རུ་ཀུལླ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །དང་པོར་སྔགས་པས་གདོང་བའི་ཕྱི་བྱད་ [217a.6]ལ་སོགས་པ་བྱས་ཏེ། བདེ་བའི་སྟན་ལ་གནས་པས་ཡི་གེ་ཨ་ལས་བྱུང་བའི་རང་གི་སྙིང་གའི་ཟླ་བ་ལ་ཡི་གེ་ཧྲཱིཿཤིན་ཏུ་དམར་བའི་འོད་ཟེར་གྱི་ལྷ་མོ་ཀུ་རུ་ཀུལླེ་ཡང་དག་པར་སྤྱན་དྲངས་ཤིང་། སྙིང་གའི་ས་བོན་ལས་ཀུན་ནས་བྱུང་བའི་མཆོད་པའི་ཁྱད་པར་གྱིས་ལེགས་པར་མཆོད་ལ་ཕྱག་ [217a.7]འཚལ་བ་དང་། སྡིག་པ་བཤགས་པ་དང་། བསོད་ནམས་རྗེས་སུ་ཡི་རང་བ་དང་། བསྔོ་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། གནས་བཞི་བསྒོམ་པར་བྱ་བ་རྣམས་ཀྱང་བྱས་ཏེ། སྟོང་པ་ཉིད་ཀྱང་རྣམ་པར་བསྒོམ་ཞིང་སྔགས་ཀྱིས་ [217b] [217b.1]ཀྱང་བྱིན་གྱིས་བརླབས་ལ། སྙིང་གའི་ས་བོན་ལས་ངེས་པར་གྲུབ་པའི་ཨུཏྤལ་དམར་པོ་ལས་སྐྱེས་པའི་ཟླ་བའི་དཀྱིལ་འཁོར་ལ་ས་བོན་དེ་ཉིད་བསྒོམ་པར་བྱ་བའོ། །དེ་དག་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་མ་སྟེ། སྐུ་མདོག་དམར་མོ་པདྨ་དང་ཟླ་བ་དམར་པོའི་ [217b.2]གདན་ལ་ན་བཟའ་དམར་པོ་དང་དབུ་རྒྱན་དང་ལྡན་པ། ཕྱག་བཞི་གཡས་པས་མི་འཇིགས་པ་རབ་ཏུ་སྦྱིན་པ། གཞན་གྱིས་ནི་ལེགས་པར་བཀང་བའི་མདའོ། །གཡོན་པའི་གཅིག་གིས་ནི་རིན་པོ་ཆེའི་གཞུ་བསྣམས་པ། གཞན་གྱིས་ནི་ཨུཏྤལ་དམར་པོ་བསྣམས་པ་དབུ་རྒྱན་ [217b.3]ལ་སྣང་བ་མཐའ་ཡས་ཀུ་རུ་ཀུལླེའི་ཁོང་ན་བཞུགས་པར་གྱུར་པའི་སྒེག་པའི་ཉམས་དང་ལྡན་ཞིང་མཆོག་ཏུ་འབར་བར་གྱུར་པའི་གཞོན་ནུ་ལང་ཚོལ་བབ་པའི་ཀུ་རུ་ཀུལླེ་ཇི་སྲིད་དུ་སྐྱོ་བར་མ་གྱུར་པ་དེ་སྲིད་དུ་བསྒོམ་པར་བྱ་བའོ། །སྐྱོ་བར་ནི་སྔགས་བཟླས་པར་བྱ་བའོ། །དེ་ལ་ [217b.4]སྔགས་ནི་འདི་ཡིན་ཏེ། ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། བསྒྲུབ་བྱ་དབང་དུ་བྱ་བར་འདོད་པས་ནི་ཤིང་མྱ་ངན་མེད་དམར་པོའི་རྩ་བར་ལེ་བརྒྱན་རྩིས་དཀྱིལ་འཁོར་གྲུ་གསུམ་པ་བྱས་ལ། དེ་ལ་མེ་ཏོག་དམར་པོས་ལྷ་མོ་ཡང་དག་པར་མཆོད་ཅིང་། བདག་ཉིད་ཀྱང་གོས་དམར་པོས་ [217b.5]བསྒྲུབ་བྱ་སྐྲ་གྲོལ་བ་གཅེར་བུར་གྱུར་ཅིང་། མྱོས་པ་རྡོག་པས་མནན་ཏེ། སྙིང་ཨུཏྤལ་དམར་པོའི་མདས་འབིགས་བཞིན་པས་སྔགས་བཟླས་པར་བྱ་བའོ། །དེ་ལ་སྔགས་ནི་འདི་ཡིན་ཏེ། ཨོཾ་ཀུ་རུ་ཀུལླེ་ཧྲཱིཿཆེ་གེ་མོ་བདག་གི་དབང་དུ་གྱིས་སྭཱ་ཧཱ་ཞེས་བྱ་བའོ། །ཀུ་རུ་ཀུལླེའི་ [217b.6]སྒྲུབ་ཐབས་སོ། །ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3213}༄༅༅། །རྒྱ་གར་སྐད་དུ། ཀུ་རུ་ཀུལླཱ་སཱ་དྷ་ནཾ། བོད་སྐད་དུ། ཀུ་རུ་ཀུལླའི་སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །དང་པོར་སྔགས་པས་བདེ་བའི་སྟན་ལ་ཉེ་བར་གནས་ [217b.7]ལ། སྙིང་གའི་ས་བོན་གྱི་འོད་ཟེར་གྱིས་མདུན་དུ་བཅོམ་ལྡན་འདས་མ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་སྤྱན་དྲངས་ཏེ་ལེགས་པར་མཆོད་ལ་སྐྱབས་སུ་འགྲོ་བ་ལ་སོགས་པ་རྣམས་བྱ་བའོ། །དེ་ནས་སྟོང་པ་ཉིད་དུ་མོས་པར་བྱས་ཏེ། སྔགས་ཀྱིས་ཀྱང་བྱིན་ [218a] [218a.1]གྱིས་བརླབས་ལ། ཡི་གེ་ཨཾ་ལས་ཡང་དག་པར་བྱུང་བའི་ཟླ་བའི་དཀྱིལ་འཁོར་ལ་ཡི་གེ་ཏྃ་འོད་ཟེར་གྱི་ཕྲེང་བ་དང་ལྡན་པར་རྣམ་པར་བསམས་ཏེ། དེ་དག་ཡོངས་སུ་གྱུར་པ་ལས་བཅོམ་ལྡན་འདས་མ་ཀུ་རུ་ཀུལླེར་བ་བལྟ་བར་བྱ་བ་ནི་པདྨ་དང་ཉི་མ་དམར་པོའི་ [218a.2]གདན་ལ་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཕྱག་དྲུག་མ། གཡས་པ་དང་གཡོན་པའི་ཕྱག་དང་པོ་གཉིས་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་མཛད་པ། གཡས་དང་གཡོན་པའི་ཕྱག་གཉིས་པ་དག་གིས་ནི་ལྕགས་ཀྱུ་དང་། ཨུཏྤལ་དམར་པོ་བསམས་ [218a.3]པའོ། །ཕྱག་ལྷག་མ་གཉིས་ཀྱིས་ནི་མདའ་གཞུ་རྣ་བའི་དྲུང་དུ་འགེངས་པར་མཛད་པ། ན་བཟའ་དམར་པོ་བསྣམས་པ། དབུ་རྒྱན་ལ་དེ་བཞིན་གཤེགས་པ་ལྔ་སྟེ། བསྒྲུབ་བྱའི་སྙིང་གའི་ཨུཏྤལ་དམར་པོའི་ལྟེ་བའི་ཟླ་བའི་དཀྱིལ་འཁོར་ལ་ཡི་གེ་ཏཱྃ་དམར་པོ་རྣམ་པར་བསྒོམས་ [218a.4]ལ། རླུང་གི་དཀྱིལ་འཁོར་ལ་བསྐྱོན་ཞིང་སྙིང་ལྕགས་ཀྱུས་ཕུག་ལ་བཀུག་སྟེ། དེའི་སྙིང་ལ་ཉེ་བར་ཞུགས་ལ་ཨུཏྤལ་དམར་པོའི་མདའ་མདེའུས་བསྒྲུབ་བྱ་ཡང་དང་ཡང་དུ་ཕུག་ཅིང་སྔགས་བཟླས་པར་བྱ་བའོ། །དེ་ལ་སྔགས་ནི་འདི་ཡིན་ཏེ། ཨོཾ་ཀུ་རུ་ཀུལླེ་ཧྲཱིཿཆེ་གེ་མོ་ [218a.5]བདག་གི་དབང་དུ་སྒྲུབས་ཧོཿསྭཱ་ཧཱ། དེ་ནས་རྣམ་པར་མྱོས་ཤིང་དབང་དུ་གྱུར་པས་རྐང་པ་གཉིས་ལ་ངེས་པར་གཏུགས་པར་བྱེད་པ་དེ་བལྟས་ལ་བསྐུར་བར་བྱ་སྟེ། དེ་ལྟར་གྱིས་ནི་བརྒྱ་བྱིན་ཡང་དབང་དུ་འདུ་བར་འགྱུར་རོ། །འདི་ནི་ཀུ་རུ་ཀུལླེའི་སྒྲུབ་ཐབས་སོ། །ཨ་བྷ་ཡ་ལས་ [218a.6]དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3214}༄༅༅། །རྒྱ་གར་སྐད་དུ། ཀུ་རུ་ཀུལླཱ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །སྔར་བཞིན་དུ་སྟོང་པ་ཉིད་ཀྱི་མཐར་ཐུག་པར་རྣམ་པར་བསྒོམས་ལ། ཡི་གེར་ཡོངས་ [218a.7]སུ་གྱུར་པ་ལས་ཉི་མ་ལ་ཡི་གེ་ཧྲཱིཿལས་སྤྲོ་བ་དང་བསྡུ་བའི་ཚོགས་རྣམས་ཀྱང་བསྒོམ་ཞིང་། སྐད་ཅིག་གིས་དེ་ཡོངས་སུ་གྱུར་པ་ལས་བཅོམ་ལྡན་འདས་མ་ཀུ་རུ་ཀུལླེ་སྟེ། ཕྱག་བརྒྱད་མ། སྐུ་མདོག་དམར་མོ་པདྨ་དམར་པོ་འདབ་མ་བརྒྱད་པ་དང་ཉི་མ་ལ་རྡོ་རྗེ་སྐྱིལ་ཀྲུང་གིས་ [218b] [218b.1]བཞུགས་ཤིང་། གཞལ་ཡས་ཁང་གི་ནང་ན་གནས་པ། ཕྱག་དང་པོ་གཉིས་ཀྱིས་ཁམས་གསུམ་རྣམ་པར་རྒྱལ་བའི་ཕྱག་རྒྱ་མཛད་པ། གཡས་པའི་ཕྱག་ལྷག་མ་རྣམས་ཀྱིས་ནི་ལྕགས་ཀྱུ་དང་། རྣ་བའི་དྲུང་དུ་བཀང་བའི་མདའ་དང་། མཆོག་སྦྱིན་པའི་ཕྱག་རྒྱ་མཛད་པ། [218b.2]གཡོན་པའི་ཕྱག་ལྷག་མ་རྣམས་ཀྱིས་ནི་ཞགས་པ་དང་གཞུ་དང་ཨུཏྤལ་བསྣམས་པའོ། །རྒྱན་ཐམས་ཅད་དང་ལྡན་པ་བསྒོམ་པར་བྱ་བའོ། །ཤར་གྱི་འདབ་མ་ལ་རབ་ཏུ་དང་བའི་སྒྲོལ་མའོ། །ལྷོའི་འདབ་མ་ལ་གྲུབ་པའི་སྒྲོལ་མའོ། །ནུབ་ཀྱི་འདབ་མ་ལ་རྒྱལ་བའི་སྒྲོལ་མའོ། ། [218b.3]བྱང་གི་འདབ་མ་ལ་རྣ་བའི་སྒྲོལ་མའོ། །དབང་ལྡན་གྱི་འདབ་མ་ལ་ཙུནྡྲའོ། །མེའི་འདབ་མ་ལ་གཞན་གྱིས་མི་ཐུབ་པའོ། །བདེན་བྲལ་གྱི་འདབ་མ་ལ་མར་མེ་རབ་ཏུ་གསལ་བར་སྣང་བའོ། །རླུང་གི་འདབ་མ་ལ་སྒྲོལ་མ་དཀར་མོ་བསྒོམ་པར་བྱ་བའོ། །དེ་དག་ཐམས་ཅད་ཀྱང་ [218b.4]ཁ་དོག་དམར་མོ་དེ་བཞིན་གཤེགས་པ་ལྔ་དབུ་རྒྱན་དུ་གྱུར་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། གཡས་པའི་ཕྱག་དག་གིས་མཆོག་སྦྱིན་པའི་ཕྱག་རྒྱ་དང་། རྣ་བའི་བར་དུ་བཀང་བའི་མདའ་བསྣམས་པ། གཡོན་པའི་ཕྱག་གིས་ཨུཏྤལ་དང་གཞུ་བསྣམས་པ། ཤར་ [218b.5]གྱི་སྒོར་ནི་རྡོ་རྗེ་འཇིགས་བྱེད་མ་སྟེ་གསུས་པ་འཇོལ་བ་ཞལ་རྣམ་པར་བསྒྱུར་བ་མདོག་དམར་བ་མི་བསྐྱོད་པ་དབུ་རྒྱན་ལ་བཞུགས་པ། གཡས་པའི་ཕྱག་གཉིས་ཀྱིས་སྡིགས་མཛུབ་དང་ལྕགས་ཀྱུ་བསྣམས་པ། གཡོན་པའི་ཕྱག་གཉིས་ཀྱིས་རྡོ་རྗེའི་དྲིལ་བུ་དང་ཞགས་པ་ [218b.6]བསྣམས་པའོ། །ལྷོ་སྒོར་ནི་གཞན་གྱིས་མི་ཐུབ་མ་སྟེ་ཁ་དོག་སེར་མོ་དབུ་རྒྱན་ལ་རིན་ཆེན་འབྱུང་ལྡན་བཞུགས་པ། ཕྱག་གཡས་པ་གཉིས་ཀྱིས་ནི་དབྱུག་པ་དང་ལྕགས་ཀྱུ་བསྣམས་པ། གཡོན་པའི་ཕྱག་གཉིས་ཀྱིས་ནི་དྲིལ་བུ་དང་ཞགས་པ་བསྣམས་པའོ། །ནུབ་ [218b.7]སྒོར་ནི་རལ་གཅིག་མ་སྟེ་ཁ་དོག་ནག་མོ་སྐྲ་ནི་གྱེན་ལ་གསུས་པ་འཕྱང་བ། ཚེམས་ཀྱིས་མ་མཆུ་ཀུན་ནས་བསྡམས་པ། དབུ་རྒྱན་ལ་སྣང་བ་མཐའ་ཡས་བཞུགས་པ། གཡས་ཀྱི་ཕྱག་གཉིས་ན་རྡོ་རྗེ་དང་ལྕགས་ཀྱུ་བསྣམས་པ། གཡོན་གྱི་ཕྱག་གཉིས་ན་དྲིལ་བུ་དང་ [219a] [219a.1]ཞགས་པ་བསྣམས་པའོ། །བྱང་གི་སྒོར་ནི་རྡོ་རྗེ་དྲི་ཟ་མ་སྟེ་སེར་ལྗང་མ་དོན་ཡོད་གྲུབ་པ་དབུ་རྒྱན་ལ་བཞུགས་པ། ཞལ་རྣམ་པར་བསྒྱུར་པ། གསུས་པ་འཇོལ་བ། ཕྱག་གཡས་པ་གཉིས་ཀྱིས་ནི་ཁ་ཊྭཱཾ་ག་དང་ལྕགས་ཀྱུ་བསྣམས་པ། གཡོན་པའི་ [219a.2]ཕྱག་གཉིས་ཀྱིས་ནི་དྲིལ་བུ་དང་ཞགས་པ་བསྣམས་པ་བསམ་པར་བྱ་སྟེ། བཞི་པོ་དེ་དག་རྣམས་ནི་གཡོན་བསྐུམ་པའི་ཞབས་ཀྱིས་བཞུགས་པའོ། །དེ་ལ་ཁམས་གསུམ་རྣམ་པར་རྒྱལ་བའི་ཕྱག་རྒྱ་ནི་འདི་ཡིན་ཏེ། ལག་པ་གཉིས་ཀྱི་རྒྱབ་གཉིས་སྤྲད་ལ་སྲིན་ལག་ [219a.3]གཉིས་མདུད་པ་བྱས་ཤིང་མཐེའུ་ཆུང་གཉིས་དང་གུང་མོ་གཉིས་ཀྱིས་ཀུན་ནས་དཀྲིས་ཏེ། མཛུབ་མོ་གཉིས་ལྕགས་ཀྱུའི་རྣམ་པ་ལྟར་བྱས་པ་འགྱིང་བ་དང་ལྡན་པས་དཔྲལ་བའི་ཕྱོགས་སུ་གཟུང་བར་བྱ་བའོ། །བསྒོམས་པས་དུབ་ན་སྔགས་བཟླས་པར་བྱ་སྟེ། ཨོཾ་ཀུ་རུ་ [219a.4]ཀུལླེ་ཧྲཱིཿསྭཱ་ཧཱ། ཁྲི་བཟླས་པས་སྐྱེ་བོ་ཐམས་ཅད་དབང་དུ་འགྱུར་རོ། །ཁྲི་ཕྲག་གིས་ནི་བཀའ་བློན་པའོ། །ཨུཏྤལ་དང་མར་དང་སྦྲང་རྩིས་བྱུགས་པའི་ཤིང་ཨ་ཤྭདྠ་དང་ཡམ་ཤིང་རྣམས་ཀྱིས་སྦྱིན་སྲེག་བྱས་ན་འདོད་པའི་གོ་འཕང་ཐོབ་པར་འགྱུར་རོ། །དཔལ་འབྲས་ཀྱི་ཤིང་གི་མེ་ [219a.5]ལེགས་པར་སྦར་ལ་མར་དང་སྦྲང་རྩིས་བྱུགས་པའི་དཔལ་འབྲས་འཇུག་སྦྱིན་སྲེག་བྱས་པས་ནི་རྒྱལ་པོའི་བློན་པོ་དབང་དུ་འགྱུར་རོ། །ཨུཏྤལ་སྟོང་སྦྱིན་སྲེག་བྱས་ཤིང་ལྷ་མོའི་མདུན་དུ་མར་གྱི་མར་མེ་སྟོང་ཕུལ་བས་ནི་རྒྱལ་པོ་ཐམས་ཅད་དབང་དུ་འགྱུར་རོ། །ཀུ་རུ་ཀུལླེའི་སྒྲུབ་ཐབས་ [219a.6]རྫོགས་སོ།། །།འདི་ནི་ཨིནྡྲ་བྷཱུ་ཏི་བའི་ཞལ་སྔ་ནས་མཛད་པ་ཡིན་ནོ། །ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3215}༄༅༅། །རྒྱ་གར་སྐད་དུ། ཀུ་རུ་ཀུལླཱ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། དེ་ནས་སྔགས་པ་སྐྱེས་པ་དང་བུད་མེད་དག་ [219a.7]དབང་དུ་བྱ་བར་འདོད་པས་དཀར་པོའི་ཚེས་གཅིག་ནས་བརྩམས་ཏེ་ཉི་མ་རེ་རེ་ཞིང་ཐུན་གསུམ་དུ་ཁྲི་ཕྲག་རེ་བཟླས་པར་བྱ་སྟེ། བཅོམ་ལྡན་འདས་མ་ལ་དམིགས་ཤིང་སྨད་གཡོགས་དམར་པོ་བཅིངས་ཏེ། ལུས་ལ་ཡང་ལེགས་པར་གོན་པའོ། །དེ་ལ་རིམ་པ་ནི་འདི་ཡིན་ཏེ། རང་གི་སྙིང་ [219b] [219b.1]གར་ཉི་མ་ལ་གནས་པའི་ཡི་གེ་ཧྲཱིཿདམར་པོས་བསྐྱེད་པའི་པདྨ་དམར་པོ་འདབ་མ་བརྒྱད་པ་རྩ་བ་སྐྱེ་གནས་ཀྱི་བར་དུ་ཟུག་པ་རྣམ་པར་བསམས་ལ། དེའི་འདབ་མ་བརྒྱད་ལ་ནི་ཨཱ་ཨཱི་ཨཱུ་རཱྀ་ལཱྀ་ཨཻ་ཨཽ་ཨཱཿབྱ་བ་དབྱངས་ཡིག་འདི་བརྒྱད་ཡོངས་སུ་གྱུར་པ་ལས་བུང་བ་བརྒྱད་དེ། དགའ་ཞིང་ [219b.2]རྒྱས་ལ་ཁྲོ་བར་གྱུར་པ་ཁ་དོག་དམར་བ་རིམ་གྱིས་གནས་པ་རྣམས་རང་གི་སྣ་བུག་གི་རླུང་གིས་བསྐུལ་ནས་རང་གི་སྣ་བུག་གཡོན་པ་ནས་ཕྱུང་སྟེ། བསྒྲུབ་བྱའི་སྣ་བུག་གི་བུ་ག་གཡས་པ་ནས་རབ་ཏུ་ཞུགས་ཏེ་རྩ་བ་ནས་རྣམ་པར་ཉམས་པར་བྱད་པར་བལྟས་ལ། ཨ་ཨི་ཨུ་རྀ་ལྀ་ཨེ་ [219b.3]ཨོ་ཨཾ་བྱ་བའི་དབྱངས་ཡིག་ཐུང་ངུ་ན་བརྒྱད་པོ་འདི་ཡོངས་སུ་གྱུར་པ་ལས་དེ་དག་བསྒོམས་ལ་རྣ་བའི་དྲུང་དུ་བཀང་བའི་ཨུཏྤལ་དམར་པོའི་མདའ་གཞུའི་ཚོགས་ཀྱིས་བསྒྲུབ་བྱའི་ཟེའུ་འབྲུ་ཕུག་ནས་དེ་དག་ཡོངས་སུ་སྨིན་པ་ལས་མདས་དྲངས་ནས་དེའི་སྣ་བུག་གཡོན་པའི་བུ་ག་ནས་ [219b.4]ངེས་པར་འོངས་པས་རྣལ་འབྱོར་པའི་སྣ་བུག་གཡས་པ་ནས་དེ་རང་གི་སྙིང་ལ་རབ་ཏུ་ཞུགས་པ་རྣམ་པར་བསམ་མོ། །ཕྱི་ནས་ནི་ཨུཏྤལའི་ཡུ་བས་མགྲིན་པ་བཅིངས་ཤིང་སྐྱེ་གནས་ཀྱང་ལྕགས་ཀྱུས་ཕུག་པས་ལྷང་ཀྱོག་བསྐྱོད་ནས་འོད་ཟེར་འབར་བས་མཆོག་ཏུ་དབང་དུ་ [219b.5]བྱས་ཤིང་དེ་ལ་ཞོན་ལ་དགའ་བ་དང་ལྡན་པས་སྔགས་བཟླས་པར་བྱ་བའོ། །ཨོཾ་ཀུ་རུ་ཀུལླེ་ཧྲཱིཿཆེ་གེ་མོ་བདག་གི་དབང་དུ་གྱིས་སྭཱ་ཧཱ། ཉི་མ་བདུན་ན་འགྲུབ་པར་འགྱུར་བ་ཡིན་ནོ། །བུང་བའི་རྣལ་འབྱོར་གྱི་ཀུ་རུ་ཀུལླེའི་སྒྲུབ་ཐབས་སོ། །ཨ་བྷ་ཡ་ལས་དགེ་ [219b.6]སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3216}༄༅༅། །རྒྱ་གར་སྐད་དུ། ཀུ་རུ་ཀུལླཱ་སྭཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། ཨོཾ་ཀུ་རུ་ཀུལླེ་ལ་ཕྱག་འཚལ་ལོ། །དང་པོ་བདེ་བའི་སྟན་ལ་ཉེ་བར་གནས་ལ། ཀུ་རུ་ཀུལླཱའི་གཟུགས་སུ་བྱས་ཏེ། [219b.7]སེམས་ཅན་མ་ལུས་དབང་དུ་བྱས་པ་བརྩམ་པར་བྱ་བའོ། །རང་གི་སྙིང་གར་ཉི་མའི་དཀྱིལ་འཁོར་རོ། །དེའི་སྟེང་དུ་ཡི་གེ་ཏཱྃ་དམར་པོའོ། །དེ་ལས་འོད་ཟེར་ལྔ་ཀུན་ནས་སྤྲོས་ལ་དེ་བཞིན་གཤེགས་པ་རྣམས་ལེགས་པར་མཆོད་ཅིང་། དཀོན་མཆོག་གསུམ་ལ་ [220a] [220a.1]བདག་སྐྱབས་མཆི། །ཞེས་བྱ་བ་ལ་སོགས་པས་སྡིག་པ་བཤགས་པ་ལ་སོགས་པ་རྣམས་ཀྱང་བྱས་ལ། སྟོང་པ་ཉིད་ཀྱང་རྣམ་པར་བསྒོམས་ཤིང་། ཕྱི་ནས་ནི་ཨུཏྤལ་དམར་པོའོ། །དེའི་སྟེང་དུ་ཉི་མའི་དཀྱིལ་འཁོར་རོ། །དེའི་སྟེང་དུ་ཡི་གེ་ཏཱྃ་དམར་ [220a.2]པོའོ། །དེ་དག་རྣམས་ཐམས་ཅད་ཀྱང་ཡོངས་སུ་གྱུར་པ་ལས་ནི་རྗེ་བཙུན་མ་ཀུ་རུ་ཀུལླེ་སྐུ་མདོག་དམར་མོ། ཕྱག་བཞི་མ། གཡས་ཀྱི་ཕྱག་ན་ནི་མདའ་དང་མི་འཇིགས་པའི་ཕྱག་རྒྱའོ། །གཡོན་གྱིས་ནི་གཞུ་དང་ཨུཏྤལ་འཛིན་པ། རྡོ་རྗེ་སྐྱིལ་མོ་ཀྲུང་གིས་གནས་པ། [220a.3]སྟོང་དུ་བསྣམས་པའི་ཤག་ཆུང་དང་ལྡན་པར་བདག་ཉིད་བསྒོམ་པར་བྱ་བའོ། །འོག་ཏུ་ནི་འདོད་པའི་ལྷ་བཟའ་ཤུག་བཅས་པར་བསམ་པར་བྱའོ། ཕྱི་ནས་ནི་བསྒོམ་པ་དང་ལྡན་པས་གསང་སྔགས་བཟླས་པར་བྱ་བའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཀུ་རུ་ལུལླེའི་སྒྲུབ་ཐབས་སོ། །ཨ་ [220a.4]བྷ་ཡ་ལ་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3217}༄༅༅། །རྒྱ་གར་སྐད་དུ། ཀུ་རུ་ཀུལླཱ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། རང་གི་སྙིང་གའི་ཟླ་བའི་དཀྱིལ་འཁོར་གྱི་ཡི་གེ་ཧྲཱིཿལས་བྱུང་བའི་ཨུཏྤལ་དམར་པོའི་དབུས་ན་ཡི་གེ་ཧྲཱིཿགནས་པར་ [220a.5]བསྒོམ་པར་བྱ་བའོ། །དེ་དག་ཡོངས་སུ་གྱུར་པ་ལས་འཕགས་མ་ཀུ་རུ་ཀུལླེ་སྟེ། སྐུ་མདོག་དམར་པོ་པདྨ་དང་ཟླ་བ་དམར་པོའི་གདན་ཅན། འོད་ཟེར་དམར་པོ་ཁོར་ཡུག་ཏུ་འཁྱིལ་བ། ཁ་དོག་དམར་པོ་རྣམ་པ་སྣ་ཚོགས་པའི་སྟོད་གཡོགས་དང་སྨད་གཡོགས་བསྣམས་པ། [220a.6]དབུ་རྒྱན་སྣང་བ་མཐའ་ཡས་ཏེ། ཕྱག་བཞི་མ། རྩ་བའི་ཕྱག་གཉིས་ཀྱིས་ཨུཏྤལ་དམར་པོའི་མདའ་མདེའུ་དང་རྣ་བའི་མཐར་ཐུག་པར་འཐེན་པས་རྣམ་པར་མཛེས་པའི་མེ་ཏོག་གི་གཞུ་བསྣམས་པའོ། །གཡོན་པས་སྡོང་བུ་དང་བཅས་ཤིང་ཁ་བྱེ་བའི་ཨུཏྤལ་དམར་པོ་བསྣམས་ [220a.7]པའོ། །གཡས་པས་ནི་མཆོག་སྦྱིན་པའོ། །ཆེར་འཇོ་ཞིང་སྒེག་པའི་ཉམས་ཀྱིས་འགྱུར་ལྡོག་དང་ལྡན་པར་དམིགས་ལ་ཡེ་ཤེས་སེམས་དཔའ་དང་གཅིག་ཏུ་བྱས་ཏེ། རང་གི་ལུས་ཀྱི་འོད་ཟེར་སྤྲོས་པའི་ལྕགས་ཀྱུས་དྲངས་པའི་ལྷ་དང་། ལྷ་མ་ཡིན་དང་བྱ་ཁྱུང་དང་། མི་ [220b] [220b.1]འམ་ཅི་དང་། ལྟོ་འཕྱེ་ཆེན་པོ་དང་། གནོད་སྦྱིན་དང་། སྐྱེས་པ་དང་བུད་མེད་ཀྱི་ཚོགས་བརྒྱ་ཕྲག་དང་། སྟོང་ཕྲག་ལ་སོགས་པ་རྣམས་ལུས་རབ་ཏུ་འདུད་པར་བྱེད་ཅིང་། ཤིན་ཏུ་གུས་པ་དང་ལྡན་པས་མཆོག་ཏུ་དབང་དུ་གྱུར་པས་ཕྱོགས་བཅུ་རྣམས་སུ་ལེགས་པར་ལྟ་བལྟ་བར་བྱ་ཞིང་། [220b.2]ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། བྱ་བའི་སྔགས་འདི་བཟླས་པར་བྱ་སྟེ། འབུམ་ཕྲག་ནས་བརྩམས་ནས་ཇི་སྲིད་མཐར་ཐུག་པ་མེད་པས་བཅོམ་ལྡན་འདས་མ་མངོན་དུ་བྱ་བའོ། །དེ་ནས་འགའ་ཞིག་དབང་དུ་བྱེད་པར་འདོད་པས་བཟླས་པ་འབུམ་ཕྲག་བྱས་ཤིང་ཇི་སྐད་དུ་བཤད་པའི་རྣལ་འབྱོར་ [220b.3]ལ་གནས་ཏེ། གུས་པས་རབ་ཏུ་འདུད་པར་བྱེད་པའི་ལྷ་དང་ལྷ་མ་ཡིན་ལ་སོགས་པའི་དབུས་སུ་གནས་པའི་བདག་ཉིད་ཀྱི་ལུས་ཀྱི་འོད་ཟེར་གྱིས་དྲངས་པའི་བསྒྲུབ་བྱ་མདུན་དུ་ལེགས་པར་བཞག་ལ། རང་གི་སྙིང་གར་ཨུཏྤལ་དམར་པོ་འདབ་མ་བཅུ་དྲུག་པ་དེའི་སྙིང་ལ་ཡང་རྣམ་པར་ [220b.4]བསམས་ཏེ། འཕགས་པ་རྡོ་རྗེ་ལུས་མེད་ལས་བཤད་པའི་རིམ་པ་ལྟར་བུང་བ་དང་ལྕགས་ཀྱུ་བསྒོམས་པས་དེའི་མིང་གི་ཡི་གེ་རང་གི་སྙིང་གའི་སྔགས་ཀྱིས་དང་པོར་ཀུན་ནས་མནན་ནས། དེ་བཞིན་དུ་མདས་སྙིང་ཕུག་ཅིང་ཆགས་པ་ཆེན་པོ་མོས་པར་གྱུར་པ་དང་། གཞུས་རྐང་པ་ [220b.5]གཉིས་དང་ཨུཏྤལའི་ཞགས་པས་ཀྱང་སྐེ་བ་བཅིངས་ཤིང་ཀུན་ནས་དྲངས་པས་རང་གི་རྐང་པ་གཉིས་ཀྱི་དྲུང་དུ་བསྒྱེལ་བར་བྱའོ། །གལ་ཏེ་སྐྱེས་པ་ཡིན་ན་ནི་ལྕགས་ཀྱུས་སྙིང་ཕུག་པར་བྱ་བའོ། །ཇི་སྟེ་བུད་མེད་ཡིན་ན་ནི་ཆོས་འབྱུང་ནས་སོ། །ཨོཾ་ཀུ་རུ་ཀུལླེ་ཆེ་གེ་མོ་འམ་ཆེ་གེ་མོ་ཡང་ [220b.6]རུང་སྟེ་ཀུན་ནས་ཁུག་ཅིག་ཧྲཱིཿསྭཱ་ཧཱ་ཞེས་བྱ་བའི་སྔགས་བཟླས་པར་བྱའོ། །བསྒྲུབ་བྱ་ཀུན་ནས་དྲངས་ལ་ཡང་སྔགས་ཉིད་ཀྱིས་དབང་དུ་གྱིས་ཤིག་ཅེས་བར་དུ་བཅུག་པས་བཟླས་པར་བྱའོ། །བརྒྱ་བཟླས་པས་ནི་ཐ་མལ་པའི་སྐྱེས་པ་དང་། བུད་མེད་ཀྱི་ཚོགས་དང་། རྒྱལ་པོ་དང་། [220b.7]བློན་པོ་ཡང་དབང་དུ་འགྱུར་རོ། །ཁྲིས་ནི་སྐྱེ་དགུའི་འཇིག་རྟེན་པ་རྣམས་སོ། །འབུམ་གྱིས་ནི་རྒྱལ་པོའོ། །འབུམ་ཕྲག་བདུན་གྱིས་ནི་ལྷ་དང་ལྷ་མ་ཡིན་གྱི་བུ་མོ་རྣམས་ཀྱང་ངོ་། བྱེ་བས་ནི་བྱ་ཁྱུང་དང་རབ་བརྟན་ལ་སོགས་པའི་ལྷའི་དུད་འགྲོ་རྣམས་དང་། ཐ་མལ་པའི་དུད་འགྲོ་ [221a] [221a.1]རྣམས་ཀྱང་ངོ་། །དུས་རིང་པོར་གུས་པ་དང་བཅས་ཤིང་རྒྱུན་མི་ཆད་པས་མཐའ་ཡས་པར་བཟླས་པས་ནི་ས་གསུམ་ཀ་ཡང་དབང་དུ་བྱེད་པར་འགྱུར་བ་ཡིན་ནོ། །ཀུ་རུ་ཀུལླེའི་སྒྲུབ་ཐབས་སོ། །ཨ་བྷ་ཡའི་ཞལ་སྔ་ནས་ཚུལ་ཁྲིམས་རྒྱལ་མཚན་ [221a.2]གྱིས་བསྒྱུར་བའོ།། {T3218}༄༅༅། །རྒྱ་གར་སྐད་དུ། ཀུ་རུ་ཀུལླེ་སྭཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། ཐོག་མར་རེ་ཞིག་སྒོམ་པ་པོས་དྲི་ལྔས་དང་པོ་ཉིད་དུ་ས་ཕྱོགས་ཀྱི་ཉེ་འཁོར་ལེགས་པར་བྱུགས་ལ། སྡོམ་བརྩོན་སེམས་རངས་ཤིང་མཉམ་པར་ [221a.3]གཞག་པས་སྟན་འཇམ་པོ་ལ་ཉེ་བར་གནས་ཏེ། དེའི་རྗེས་ལ་སྙིང་གར་ཡི་གེ་ར་ཡོངས་སུ་གྱུར་པ་ལས་ཉི་མའི་དཀྱིལ་འཁོར་འབར་བའི་ཕྲེང་བའི་འོད་ཟེར་གྱི་དྲ་བས་བསྐོར་བའོ། །དེའི་ལྟེ་བ་ལ་ཡི་གེ་ཧྲཱིཿདམར་པོ་རྣམ་པར་བསམ་པར་བྱའོ། །དེ་ནས་ཡི་གེ་ཧྲཱིཿལས་ཀུན་ནས་འཕྲོས་ [221a.4]པའི་འོད་ཀྱི་དྲ་བས་ཕྱོགས་བཅུ་ཀུན་ན་གནས་པའི་སེམས་ཅན་གྱི་ཁམས་སྣང་བར་བྱས་ཤིང་། དཔལ་དང་ལྡན་པ་ཀུ་རུ་ཀུལླེའི་སྐུར་ཡང་བཀོད་ནས་ཕྱིར་འོངས་པར་གྱུར་ཏེ། དེ་ཉིད་ལ་རབ་ཏུ་ཞུགས་པར་གྱུར་པའི་འོད་ཟེར་འབར་བར་རྣམ་པར་བསྒོམ་པར་བྱ་བའོ། །དེའི་ཕྱི་ནས་ [221a.5]ནི་མདུན་གྱི་ནམ་མཁའ་ལ་ལོ་བརྒྱད་པ་གཉིས་ཀྱི་ཚད་དུ་གྱུར་པ་དབུ་སྐྲ་ཁམ་སེར་གྱེན་དུ་འབར་བ། དབུ་ལ་ཐོད་པ་ལྔས་བརྒྱན་པ། རོ་ལ་བཞུགས་པ། མགོ་བོའི་ཕྲེང་བའི་དོ་ཤལ་དུ་མཛད་པ། སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། ཞལ་གྱི་མཆེ་བ་ཅུང་ཟད་ [221a.6]རྣམ་པར་གཙིགས་པ། ལྗགས་འདྲིལ་བར་མཛད་པ། འཁོར་ལོ་དང་རྣ་རྒྱན་དང་མགུལ་རྒྱན་དང་དཔུང་རྒྱན་དང་རྐེད་རྒྱན་དང་རྐང་རྒྱན་དུ་བྱ་བ་རྣམས་ཀྱིས་བརྒྱན་པ། སྟག་གི་པགས་པའི་ཤམ་ཐབས་བསྣམས་པ། དམར་ལ་ཟླུམ་པ་གཡོན་དུ་འཛུགས་པར་མཛད་ [221a.7]པའི་སྤྱན་གསུམ་གཡོ་བ། སྣང་བ་མཐའ་ཡས་ཀྱི་དབུ་བརྒྱན་པ། ཕྱག་བཞི་མ། ཨུཏྤལ་དམར་པོའི་མདའ་མདེའུ་མ་རྣ་བའི་བར་དུ་ཁེངས་པར་བཀང་པའི་མེ་ཏོག་དམར་པོའི་གཞུ་བསྣམས་པ། ཕྱག་ལྷག་མ་གཉིས་ཀྱིས་ནི་མེ་ཏོག་དམར་པོ་ལས་བྱས་པའི་ལྕགས་ [221b] [221b.1]ཀྱུ་དང་ཨུཏྤལ་དམར་པོ་བསྣམས་པར་བསམ་པར་བྱ་བའོ། །འདི་ཉིད་མཆོད་པའི་དོན་དུ་རང་གི་སྙིང་གའི་ཉི་མའི་དཀྱིལ་འཁོར་ལ་གནས་པའི་ཡི་གེ་ཧྲཱིཿལས་ངེས་པར་བྱུང་བའི་ཉེ་བར་མཁོ་བའི་མཆོད་པ་མེ་ཏོག་དང་། བདུག་པ་དང་། མར་མེ་དང་། དྲི་དང་། ལྷ་བཤོས་ [221b.2]ལ་སོགས་པས་མཆོད་པར་བྱ་བའོ། །མཆོད་པ་དང་། རྣལ་འབྱོར་པ་མཆོག་ཏུ་སྙིང་རྗེ་དང་ལྡན་པས་གུས་པས་བཏུད་ལ་ལུས་ལ་སོགས་པས་ཕྱག་བཙལ་བར་བྱ་བའོ། །དེ་ནས་ནི་གང་བདག་གིས་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ [221b.3]ཡི་རང་བའི་སྡིག་པ་དེ་དག་བཅོམ་ལྡན་འདས་མའི་མདུན་དུ་མངོན་སུམ་དུ་བཤགས་པར་བགྱིའོ། །དེའི་རྗེས་ལ་འཁོར་བའི་རྒྱ་མཚོར་ལྷུང་བར་གྱུར་པའི་སེམས་ཅན་གྱི་ཁམས་རྣམས་ལེགས་པར་སྒྲོལ་བའི་ངོ་བོར་གྱུར་པའི་བྱང་ཆུབ་ཀྱི་སེམས་སྤེལ་བར་བྱ་བའོ། །དེ་ [221b.4]ནས་ཚངས་པའི་གནས་བཞི་བསྒོམ་པར་བྱ་བའོ། །དེའི་རྗེས་ཐོགས་ལ་སྟོང་པ་ཉིད་བསྒོམ་པར་བྱ་བའོ། །དེ་ལ་ནི་སེམས་ཙམ་དུ་བྱིན་གྱིས་བརླབས་ལ་གནས་པར་བྱ་བ་ཡིན་ལ། སྔགས་འདི་ཡིན་ཏེ། ཨོཾ་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་བདག་ཉིད་ [221b.5]ནི་ང་ཡིན་ནོ་ཞེས་བྱ་བ་ནི་སེམས་བྱིན་གྱིས་བརླབ་པའོ། །དེའི་རྗེས་ལ་ནམ་མཁའི་དབྱིངས་སུ་ཡི་གེར་ཡོངས་སུ་གྱུར་པ་ལས་ཉི་མའི་དཀྱིལ་འཁོར་འབར་བའི་ཕྲེང་བས་འཁྲིགས་པར་རྣམ་པར་བསམས་ལ། དེའི་སྟེང་དུ་ཡི་གེ་ཧཱུཾ་མཐིང་ནག་ཡོངས་སུ་གྱུར་ [221b.6]པའི་སྣ་ཚོགས་རྡོ་རྗེ་ལས་རྡོ་རྗེ་ས་གཞི་དང་ར་བ་དང་རྡོ་རྗེའི་གུར་བཅིང་བ་རྣམ་པར་བསྒོམ་པར་བྱ་སྟེ། འདི་ནི་སྲུང་བའི་འཁོར་ལོའོ། །དེའི་དབུས་སུ་ཨེའི་རྣམ་པར་བྱས་པའི་ལྷ་རྫས་ཀྱི་ཆོས་འབྱུང་ཡེ་ཤེས་ཀྱི་ཁ་དོག་དཀར་བ་རྣམ་པར་བསྒོམ་མོ། །དེའི་དབུས་ [221b.7]སུ་ཡི་གེ་ཧྲཱིཿདམར་པོ་ལས་བྱུང་བའི་པདྨ་དམར་པོ་འདབ་མ་བརྒྱད་པའོ། །དེའི་ལྟེ་བའི་སྟེང་དུ་ཡི་གེ་ར་ཡོངས་སུ་གྱུར་པ་ལས་ཉི་མའོ། །དེའི་སྟེང་དུ་རའོ། །ཡང་དེའི་སྟེང་དུ་མཚན་སུམ་ཅུ་རྩ་གཉིས་ཀྱི་བདག་ཉིད་དུ་གྱུར་པའི་ཟླ་བ་རྒྱས་པ་དཀར་པོའོ། །དེའི་ [222a] [222a.1]སྟེང་དུ་ཉི་མའི་དཀྱིལ་འཁོར་ཏེ། ཁ་དོག་དམར་པོ་དཔེ་བྱད་བཟང་པོ་བརྒྱད་ཅུའི་ངོ་བོའོ། །དེ་དག་གི་དབུས་སུ་ཡི་གེ་ཧྲཱིཿདམར་པོ་ཡོངས་སུ་གྱུར་པ་ལས་ཨུཏྤལ་དམར་པོའི་མདའ་རང་ཉིད་ཀྱི་སེམས་ལ་ཞུགས་པར་རྣམ་པར་བསྒོམ་མོ། །ཕྱི་ནས་ [222a.2]ཉི་ཟླ་དང་མདའ་གཅིག་ཏུ་གྱུར་པ་ལས། སྔར་བཞིན་དུ་བདག་ཉིད་ཀུ་རུ་ཀུལླེའི་སྐུར་བསྒོམ་པར་བྱ་བའོ། རྣམ་པར་བསྒོམས་ནས་ཀྱང་རང་གི་སྙིང་གར་ཡི་གེ་ར་ལས་ཉི་མའི་དཀྱིལ་འཁོར་རོ། །དེའི་མཐིལ་དུ་ཕྱིས་ཡང་ཡི་གེ་ཧྲཱིཿབསྒོམ་པར་བྱ་བའོ། །དེ་ལས་བྱུང་བའི་ [222a.3]འོད་ཟེར་གྱིས་བསྐུལ་ལ་མགོན་པོ་དཔག་མེད་སྤྱན་དྲངས་ལ་གསང་བ་ཅིག་ཤོས་ཀྱི་མཆོད་པས་ལེགས་པར་མཆོད་པར་བྱ་བ་དང་། །དབང་ཡང་གསོལ་བ་གདབ་པར་བྱ་བའོ། །དེ་ལ་གསོལ་བ་འདེབས་པ་ནི་འདི་ཡིན་ཏེ། སྣང་མཐའ་མགོན་གྱིས་བདག་དབང་བསྐུར་ [222a.4]དུ་གསོལ། །བྱ་བའོ། །དེ་ནས་མགོན་པོ་དཔག་མེད་ཀྱིས་བདུད་རྩི་ལྔས་གང་བའི་བུམ་པ་རང་ཉིད་ཀྱི་སྙིང་གནས་སྤྲོ་བར་བྱ་བ་དང་། གཞན་དག་ཀྱང་བསྒོམ་པར་བྱས་ལ། དེ་ནས་བདུད་རྩི་ལྔས་ཡོངས་སུ་གང་བར་གྱུར་པའི་བུམ་པ་དེ་དག་གིས་མངོན་པར་བཀྲུ་བར་ [222a.5]བྱ་བའོ། །ཁྲུས་བྱས་པར་གྱུར་ནས་ཀྱང་བུམ་པ་རྣམས་རང་གི་སྙིང་གར་ལེགས་པར་གཞུག་པར་བྱ་བའོ། །དེ་ལ་རབ་ཏུ་བཅུག་ལ་རྣལ་འབྱོར་པས་མགོ་ལ་མགོན་པོ་དཔག་མེད་བསྒོམ་པར་བྱ་བའོ། །འདི་ཐུན་ཚོད་གསུམ་དུ་རྣམ་པར་བསྒོམ་པར་བྱ་ཞིང་སྔགས་ [222a.6]བཟླས་པར་བྱ་བའོ། །དེ་ལ་སྔགས་ནི། ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཙནྡན་དམར་པོས་ཁྱད་པར་དུ་བཟླས་པར་བྱ་བའོ། །ཨོཾ་ཨཱཿཧཱུཾ་ཞེས་བྱ་བས་ཁ་བྱིན་གྱིས་བརླབ་པ་དང་ལུས་སོ། །དེ་ནས་སྔགས་པས་སྐྱེས་པ་དང་བུད་མེད་དག་དབང་དུ་བྱ་བར་འདོད་ན་དཀར་པོའི་ [222a.7]ཚེས་གཅིག་ནས་བརྩམས་ཏེ་སྨད་གཡོགས་དམར་པོ་བཅིངས་ཤིང་ལུས་ཀྱི་དཀྱིལ་འཁོར་ལ་ཡང་གོན་ལ་བཅོམ་ལྡན་འདས་མའི་སྐུ་ལ་ཀུན་ནས་དམིགས་པས་ཐུན་གསུམ་དུ་ཁྲི་ཕྲག་རེ་ཉི་མ་རེ་རེ་ཞིང་ངོ་། །དེའི་རྗེས་ལ་རང་གི་སྙིང་གའི་ཉི་མ་ལ་གནས་པའི་ཡི་གེ་ཧྲཱིཿདམར་པོ་ [222b] [222b.1]ཡོངས་སུ་གྱུར་པ་ལས་པདྨ་དམར་པོ་འདབ་མ་བརྒྱད་པ། ཡུ་བ་སྐྱེ་གནས་ཀྱི་བར་དུ་རྣམ་པར་ཟུག་པ་རྣམ་པར་བསྒོམ་པར་བྱ་བའོ། །དེའི་འདབ་མ་རྣམས་ལ་ནི་མཐའ་མ་མཐའ་མའི་དབྱངས་ཡིག་ཡོངས་སུ་རྫོགས་པ་ལས་ཤིན་ཏུ་དགའ་ཞིང་རྒྱས་ལ་འཕྲོ་བའི་བུང་བ་ [222b.2]དམར་པོ་བརྒྱད་དོ། །སྔ་ཕྱི་རིམ་པའི་གོ་རིམས་ངེས་པས་རང་གི་སྣ་བུག་གི་རླུང་གིས་བསྐྱོད་ནས་འཕུར་ཏེ། གཡས་པ་ལས་ཅིག་ཤོས་ཀྱི་སྣ་བུག་གི་བུ་ག་ནས་བྱུང་བས། བསྒྲུབ་བྱའི་སྣ་བུག་གི་བུ་ག་གཡས་པར་རབ་ཏུ་ཞུགས་པས་པདྨ་རྩ་བ་དང་བཅས་པ་རྣམ་པར་ [222b.3]འཇིབ་པར་བྱེད་དོ། །དང་པོའི་དབྱངས་བརྒྱད་བརྒྱད་པོ་རྣམས་ཀྱིས་ནི་འདབ་མ་ལ་དམར་པོ་ཅུང་ཟད་ལྡན་པ་རྣམ་པར་འཇིབ་པར་བྱེད་པ་འདི་དག་ཏུ་རྣལ་འབྱོར་པས་བལྟ་བར་བྱ་བའོ། །ཕྱི་ནས་ནི་ཨུཏྤལ་དམར་པོའི་མདའ་གཞུ་རྣ་བའི་བར་དུ་བཀང་བ་མིག་ཆད་པར་གཏད་ [222b.4]པའི་སྔགས་པས་ཟེའུ་འབྲུ་རབ་ཏུ་དབུག་པར་བྱ་བའོ། །དེ་ནས་བུང་བ་དེ་དག་རང་གི་དམ་ཚིག་གིས་བསྐུལ་བས་དབྱངས་ཡིག་རེ་རེ་ཁྱེར་ཏེ་སྣ་བུག་གི་བུ་ག་གཡོན་པ་ནས་བྱུང་ནས་རྣལ་འབྱོར་བའི་སྣ་བུག་གི་བུ་ག་གཡས་པ་ནས་ལེགས་པར་བྱ་བ་འདིས་ནི་རང་གི་སྙིང་ལ་རང་དང་ [222b.5]གཞན་གྱི་ཤེས་པ་གཅིག་གི་ངོ་བོར་བྱ་བའོ། །ཕྱི་ནས་ནི་ཨུཏྤལས་མགུལ་པ་བཅིངས་ཤིང་། སྐྱེ་གནས་ལྕགས་ཀྱུས་ཟུག་རྔུ་བསྐྱེད་དེ། མདའི་དྲ་བའི་རྣམ་པར་བསམ་པས་དབང་དུ་བྱ་བའོ། །ཟོ་ཆུན་གྱི་འཁོར་ལོ་ལ་བསྐྱོན་པས་བསྒྲུབ་བྱ་བཀུག་ལ། སྔགས་ [222b.6]ཀྱི་གཟུགས་ཀྱིས་སྒྲུབ་པ་པོས་གདམས་ངག་དང་བཅས་པ་ལེགས་པར་རྟོགས་པར་བྱས་པས་རྟག་ཏུ་དགའ་བས་སྔགས་བཟླས་པར་བྱ་བའོ། །ཨོཾ་ཀུ་རུ་ཀུལླེ་ཧྲཱིཿཆེ་གེ་མོ་བདག་གི་དབང་དུ་གྱིས་སྭཱ་ཧཱ། སྙིང་མ་ལུས་པར་བསྲེག་པ་ནི་མཚན་མོ་བྱ་བའོ། །དེ་ནས་ [222b.7]དེ་མྱོས་པར་གྱུར་པ་དག་གི་སྔགས་ཀྱིས་བསྐུལ་ནས་འོང་བར་འགྱུར་ཏེ། སྐྲ་ཞིག་ཅིང་གོས་མེད་པ་གང་གིས་ཀྱང་མ་གཉེར་ཞིང་གཞན་སུའི་ཡང་དབང་མ་ཡིན་པར་རོ། །དེ་ཐོབ་ནས་ཡི་དམ་གྱི་ལྷའི་སྦྱོར་བས་སངས་རྒྱས་ཀྱི་དཀྱིལ་འཁོར་མཆོད་པར་བྱ་བའོ། །དངོས་ [223a] [223a.1]གྲུབ་རྒྱ་ཆེན་པོ་འགའ་ཞིག་གིས་ཀྱང་རྣམ་པར་འཇོམས་པར་མི་ནུས་སོ། །ཨོཾཌྱ་ན་ནས་དེས་པར་བྱུང་བའི་ཀུ་རུ་ཀུལླེའི་སྒྲུབ་ཐབས་སོ། །མཁས་པ་ཆེན་པོ་བྱང་ཆུབ་སེམས་དཔའ་མ་ལ་བ་དཱ་ན་ཤྲཱི་ཛྙཱ་ནའི་ཞལ་སྔ་ནས། དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་ [223a.2]བའོ།། {T3219}༄༅༅། །རྒྱ་གར་སྐད་དུ། པྲཛྙཱ་པཱ་ར་མི་ཏཱ་སྭཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། སྔར་བཤད་པའི་ཆོ་གའི་རིམ་པས་ཡི་གེ་ཨ་ལས་བྱུང་བའི་ཟླ་བ་ལ་ཡི་གེ་ཧྲཱིཿསེར་པོས་བསྐྱེད་པའི་སྣ་ཚོགས་པདྨ་ལ་ཡི་གེ་ཧཿསེར་པོ་ཡི་གེ་ཨ་ [223a.3]ལ་སོགས་པ་དབྱངས་ཡིག་བཅུ་དྲུག་གིས་ཡོངས་སུ་བསྐོར་བ། ཕྱི་རོལ་དུ་ཀ་ལ་སོགས་པ་བརྗོད་པའི་ཡི་གེ་སུམ་ཅུ་རྩ་གཉིས་ཀྱིས་ཡོངས་སུ་བསྐོར་བར་བྱ་བའོ། །དེ་ནས་འགྱིང་བག་མ་དང་། ཕྲེང་བ་མ་དང་། གར་མ་དང་། གླུ་དབྱངས་མ་དང་། མེ་ཏོག་མ་དང་། བདུག་ [223a.4]པ་མ་དང་། མར་མེ་མ་དང་། དྲི་མ་ཞེས་བྱ་བ་དང་། རྣལ་འབྱོར་མ་བརྒྱད་དོ། །དེ་དག་རྣམས་ཐམས་ཅད་ཡོངས་སུ་གྱུར་པ་ལས་ཡེ་ཤེས་ཀྱི་ཟླ་བའི་དཀྱིལ་འཁོར་ཡིན་ཏེ་འོད་ཟེར་རབ་ཏུ་འབར་བ་དང་ལྡན་པའོ། །དེའི་སྟེང་དུ་ནི་པདྨའོ། །དེའི་སྟེང་དུ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏིའོ། ། [223a.5]དེའི་སྟེང་དུ་ནི་ཟླ་བའི་དཀྱིལ་འཁོར་གཉིས་པའོ། །དེའི་སྟེང་དུ་ནི་པོ་ཏི་གཉིས་པའོ། །དེ་དག་རྣམས་ཐམས་ཅད་ཀྱང་ཡོངས་སུ་གྱུར་པ་ལས་ནི་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ཡིན་ཏེ། སྐུ་མདོག་སེར་མོ། ཞལ་གཅིག་ཕྱག་གཉིས་མ། དེ་བཞིན་གཤེགས་པ་ལྔ་དབུ་རྒྱན་ལ་བཞུགས་པ། [223a.6]ཆོས་འཆད་ཀྱི་ཕྱག་རྒྱ་དང་ལྡན་པ། འདབ་མ་ཁ་དོག་སྣ་ཚོགས་པའི་པདྨ་དང་ཟླ་བའི་གདན་ལ་བཞུགས་པ། རྒྱན་ཐམས་ཅད་དང་ན་བཟའ་དང་ལྡན་མ། གཡས་པ་དང་གཡོན་པའི་གློ་གཉིས་ན་ཨུཏྤལ་ལ་བཞུགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པའོ། །སྔགས་ནི། [223a.7]ཨོཾ་ཨཱཿཧྲཱིཿཧཱུཾ་སྭཱ་ཧཱ། ཡི་གེ་ཧཱུཾ་སེར་པོ་དཔྲལ་བར་རོ། །ཡི་གེ་ཨཱཿདཀར་པོ་མགུལ་པར་རོ། །ཡི་གེ་དྷཱིཿསེར་པོ་སྙིང་གར་རོ། །ཡི་གེ་ཧཱུཾ་ནག་པོ་ལྟེ་བར་ཡིན་ཏེ། བཟླས་པའི་དུས་སུ་ཡི་གེ་བཞི་པའོ། །རྗེས་སུ་བསམ་པར་བྱ་བའོ་བྱ་བ་ཡིན་ནོ། །གསེར་གྱི་མདོག་གི་ཤེས་རབ་ཀྱི་ཕ་རོལ་ཏུ་ཕྱིན་ [223b] [223b.1]མའི་སྒྲུབ་ཐབས་རྫོགས་སོ།། །།པཎྜི་ཏ་ཆེན་པོ་ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3220}༄༅༅། །རྒྱ་གར་སྐད་དུ། པྲཛྙཱ་པཱ་ར་མི་ཏཱ་སྭཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས། སྔར་བཤད་པའི་རིམ་པས་སྟོང་པ་ཉིད་བསྒོམས་པའི་རྗེས་ཐོགས་ལ། པདྨ་དམར་ [223b.2]པོའི་ཟླ་བ་ལ་གནས་པའི་ཡི་གེ་དྷཱིཿསེར་པོ་ཡོངས་སུ་གྱུར་པ་ལས་ཤེས་རབ་ཀྱི་ཕ་རོལ་ཏུ་ཕྱིན་མ་སེར་མོ་སྟེ། རལ་པ་དང་དབུ་རྒྱན་གྱི་མཐའ་ན་མི་བསྐྱོད་པ་བཞུགས་པ། ཆོས་བཤད་པའི་ཕྱག་རྒྱ་མཛད་པ། པོ་ཏི་དང་ལྡན་པའི་ཨུཏྤལ་སྔོན་པོ་གཡོན་པའི་ཟུར་ན་བསྣམས་པ། སྟོད་གཡོགས་དང་སྟོད་ཤག་བསྣམས་པ། ལྷ་རྫས་ཀྱི་ན་ [223b.3]བཟའ་དང་རྒྱན་མངའ་བ་ཞེས་བྱ་བ་དེ་ལྟ་བུར་བསྒོམས་ལ། ཨོཾ་དྷཱིཿཤྲུ་ཏི་སྨྲྀ་ཏི་བི་ཛ་ཡེ་སྭཱ་ཧཱ་ཞེས་བྱ་བའི་སྔགས་བཟླས་པར་བྱ་བའོ། །མདོར་བསྡུས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས་སོ། །མཱ་ལ་བ་ཞེས་བྱ་བ་དྷ་བྱང་ཆུབ་སེམས་དཔའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། [223b.4]{T3221}༄༅༅། །རྒྱ་གར་སྐད་དུ། པྲཛྙཱ་པ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །དེ་ནས་གང་ཞིག་བསྒོམས་ཙམ་གྱིས། རྒོལ་བ་ཐམས་ཅད་ཚར་གཅོད་པར། །ཤེས་རབ་ཕ་རོལ་ཕྱིན་འབྱུང་བ། །དེ་ཕྱིར་བདག་གིས་རབ་བཤད་བྱ། །ཞལ་གཅིག་ [223b.5]ཕྱག་ནི་གཉིས་མ་སྟེ། །ཁ་དོག་དཀར་མོ་ཡིད་འོང་མ། །དབུ་སྐྲ་ཕྱེད་ཕྱེད་འཁྱིལ་བ་དང་། །པད་དཀར་ལ་ནི་ལེགས་བཞུགས་པའང་། །རྡོ་རྗེ་སྐྱིལ་མོ་ཀྲུང་གིས་བཞུགས། །པདྨ་གཡས་པའི་ཕྱག་ན་དང་། །ཤེས་རབ་ཕ་རོལ་ཕྱིན་མའི་གཡོན། །ཁ་དོག་དམར་མོ་རྣམ་པར་བསྒོམ། །རྒྱན་རྣམས་ཐམས་ཅད་ཡོངས་རྫོགས་ནས། ། [223b.6]ལྟེ་བའི་དཀྱིལ་འཁོར་དུ་བསྒོམ་བྱ། །ཨཾ་ཡིག་ཡེ་ཤེས་ལས་ལེགས་བྱང་། །མཆོག་ཏུ་མཐའ་ཡས་དགའ་བྱེད་མའོ། །དམ་ཚིག་སེམས་དཔའ་རྫོགས་བྱས་ལ། །ཡེ་ཤེས་སེམས་དཔའ་བསྒོམ་པར་བྱ། །ཟླ་དྲུག་སྦྱོར་བ་གོམས་པ་ཡིས། །ཤེས་རབ་ཕ་རོལ་ཕྱིན་མར་འགྱུར། །ཞག་བདུན་ན་ནི་རབ་སྦྱོར་བས། །བསྟན་བཅོས་ཀུན་ [223b.7]ལ་འཇིགས་མེད་འགྱུར། །འབུམ་ཕྲག་བཟླས་པའི་སྦྱོར་བ་ཡིས། །ཉིན་རེ་ཚིགས་བཅད་བརྒྱད་བརྒྱ་བྱེད། །རབ་ཏུ་བརྩོན་པ་དག་གིས་ཀྱང་། །གཞུང་ནི་བརྒྱ་ཡང་འཛིན་པར་བྱེད། །འདི་ལ་སྔགས་ཀྱི་ཚིག་ཏུ་གྱུར་པ་རྣམས་ནི། ཨོཾ་པི་ཙུ་པི་ཅུ་པྲ་ཛྙཱ་བརྡྷ་ནི་ཛྭ་ལ་ཛྭ་ལ་མེ་དྷ་བརྡྷ་ནི་དྷི་རི་དྷི་རི་བུདྷི་བརྡྷ་ནི་སྭཱ་ཧཱ་སྔགས་འདིས་མ་སྩལ་བའི་སྦྲང་རྩིལ་ [224a] [224a.1]ལན་བདུན་མངོན་པར་བསྔགས་ནས་ཇི་སྲིད་ཟླ་བ་དྲུག་གི་བར་དུ་སྦུ་གུས་འཐུངས་པས་ཤེས་རབ་ཆེན་པོར་འགྱུར་རོ། །ཨོཾ་པི་སྭཱ་ཧཱ་སྔགས་འདི་ལ་ཡང་མི་བསྐྱོད་པས་རྒྱས་གདབ་པར་བྱ་བ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས་སོ། །པཎྜི་ཏ་ཆེན་པོ་མ་ལ་བ་ཞེས་བྱ་བ་དྷ་བྱང་ཆུབ་སེམས་དཔའི་ཞལ་སྔ་ནས་དགེ་ [224a.2]སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3222}༄༅༅། །རྒྱ་གར་སྐད་དུ། པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། སྔར་བཤད་པའི་ཆོ་གས་རང་གི་སྙིང་གར་པདྨ་དཀར་པོ་འདབ་མ་དང་ལྡན་པའི་ཟླ་བའི་དཀྱིལ་འཁོར་ལ་ཡི་གེ་པྲཾ་དཀར་པོ་རྣམ་པར་བཀོད་དེ། །དེ་ཉིད་ལས་སྔར་ [224a.3]བཞིན་དུ་ཐམས་ཅད་ཚུལ་བཞིན་དུ་བྱས་ནས་ཡི་གེ་པྲཾ་དང་པདྨ་ཡོངས་སུ་གྱུར་པ་ལས་བཅོམ་ལྡན་འདས་མ་ཞལ་གཅིག་ཕྱག་གཉིས་མ་སྐུ་མདོག་དཀར་མོ་སྟེ། ལུང་དང་རྟོགས་པའི་བདག་ཉིད་ཀྱིས་རིན་པོ་ཆེའི་དབུ་རྒྱན་གྱིས་བརྒྱན་པ། ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏིས་མཚན་པའི་པདྨ་ཅན་གཉིས་གཡས་པ་དང་གཡོན་ [224a.4]པའི་ཟུར་གྱི་བར་སྣང་ལ་ལངས་ལ་ལེགས་པར་བསྣམས་པ་ཕྱག་གཉིས་ཀྱིས་ཆོས་བཤད་པའི་ཕྱག་རྒྱ་བཅིངས་ཤིང་། པདྨ་དཀར་པོ་དང་ཟླ་བ་ལ་རྡོ་རྗེ་སྐྱིལ་མོ་ཀྲུང་གིས་བཞུགས་པ། གཞོན་ཤིང་ལང་ཚོ་ལ་བབ་པ་དྲེགས་པ་དང་ལྡན་པ། ན་བཟའ་དང་རྒྱན་རྣམ་པར་བཀྲ་བ་རྣམས་ཀྱིས་བརྒྱན་པ། སོ་སོར་སྣང་བ་ཙམ་དུ་རབ་ཏུ་སྤྲོ་ [224a.5]བར་བྱེད་པའི་འོད་ཟེར་གྱི་ཚོགས་རྣམ་པ་སྣ་ཚོགས་ཀྱིས་ནམ་མཁའ་ཀུན་ནས་འགེངས་པར་བྱེད་པ་མར་མེའི་ཕྲེང་བ་དང་འདྲ་བ་ཐོགས་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་མ་དུ་མ་སྤྲོ་བ་དང་བསྡུ་བའི་སྦྱོར་བས་ཐམས་ཅད་རང་བཞིན་གཅིག་ཏུ་ལྷག་པར་མོས་པས་ཀྱང་ཇི་སྲིད་དུ་ཤེས་རབ་ཀྱི་ཕ་རོལ་ཏུ་ཕྱིན་མ་མངོན་སུམ་ [224a.6]དུ་བྱས་པ་དེ་སྲིད་དུ་བསྒོམ་པར་བྱ་བའོ། །དེ་ནས་ཡང་གང་གི་ཚེ་རྒོད་པར་གྱུར་ན་དེའི་ཚེ་སྣའི་རྩེ་མོ་ལ་པདྨ་དཀར་པོ་སྲན་མ་ཙ་ན་ཀའི་ཚད་ཙམ་བྲིས་པ་དང་འདྲ་བ་རྣམ་པར་བསྒོམས་ལ། དེ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་མ་ཤིན་ཏུ་ཕྲ་མོར་གྱུར་པ་སྔར་བཤད་པའི་གཟུགས་རྩེ་གཅིག་གིས་ཡིད་ཀྱི་དུས་ [224a.7]ཡོངས་སུ་ཆད་པ་མེད་པར་ཡང་དང་ཡང་དུ་བསྒོམ་པར་བྱ་བའོ། །དེ་ནས་བསྐྱེད་པའི་ཕྱོགས་ཀྱི་སྔགས་ནི་ཨོཾ་པྲཾ་སྭཱ་ཧཱ། རྫོགས་པའི་ཕྱོགས་ཀྱི་སྔགས་ནི་ཡོད་པ་ཡིན་ཏེ། དོན་དམ་པའི་རིམ་པའི་ཤེས་རབ་ཀྱི་ཕ་རོལ་ཏུ་ཕྱིན་མའི་རྣལ་འབྱོར་གྱི་གདམས་ངག་ཐོབ་པར་གྱུར་པ། དགེ་འདུན་གྱི་བུ་ཞེས་པ། རིགས་མིང་ཡང་ [224b] [224b.1]སྟེ་བརྩོན་པ་ཡིས། །སྒྲུབ་ཐབས་གསལ་པོར་བྲིས་པ་ནི། །སེམས་ཅན་ཐམས་ཅད་དོན་ཕྱིར་ཡིན། །ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས་སོ། །ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3223}༄༅༅། །རྒྱ་གར་སྐད་དུ། སར་སྭ་ཏི་སྭཱ་དྷ་ནཾ། བོད་སྐད་དུ། དབྱངས་ཅན་མའི་སྒྲུབ་ཐབས། དབྱངས་ [224b.2]ཅན་མ་ལ་ཕྱག་འཚལ་ལོ། །སྔོན་དུ་བརྗོད་པའི་རིམ་པ་དག་གིས་ཇི་སྲིད་དུ་སྟོང་པ་ཉིད་མངོན་དུ་བྱས་ཤིང་བྱིན་གྱིས་ཀྱང་བརླབས་ལ། པདྨ་དཀར་པོ་ཁྲུ་བདུན་གྱི་ཚད་དོ། །དེའི་སྟེང་དུ་ཟླ་བའི་དཀྱིལ་འཁོར་རོ། །དེའི་དབུས་སུ་ཡི་གེ་ཧྲཱིཿདཀར་པོ་སྟེ། དེས་པདྨ་དཀར་པོ་རང་གི་ས་བོན་གྱི་སྙིང་པོ་ཅན་དུ་བསྒོམ་པར་བྱའོ། །དེ་ལས་ཀྱང་ [224b.3]བཅོམ་ལྡན་འདས་མ་དབྱངས་ཅན་མ་ཆེན་མོ་རྗེས་སུ་བསམ་པར་བྱ་བའོ། །སྟོན་ཀའི་ཟླ་བའི་རྣམ་པ་ལྟར་སྣང་བ་པདྨ་དཀར་པོའི་སྟེང་ན་ཟླ་བའི་དཀྱིལ་འཁོར་ལ་བཞུགས་པ། ཕྱག་གཡས་པ་མཆོག་སྦྱིན་པར་མཛད་ཅིང་། གཡོན་པས་པདྨ་དཀར་པོ་ཡུ་བ་དང་ལྡན་པ་བསྣམས་པ། བཞིན་འཛུམ་པ་དང་ལྡན་ཞིང་། མཆོག་ཏུ་ [224b.4]ཐུགས་རྗེའི་རང་བཞིན་ཅན། །ཙནྡན་དང་མེ་ཏོག་དང་ན་བཟའ་དཀར་པོ་དང་ལྡན་པ། མུ་ཏིག་གི་དོ་ཤལ་གྱིས་ཐུགས་ཀ་ནས་མཛེས་པར་གྱུར་པ། རིན་པོ་ཆེ་སྣ་ཚོགས་ཀྱི་རྒྱན་དང་ལྡན་པ། ལོ་བཅུ་གཉིས་མིའི་ཚད་དུ་གྱུར་པ། རྐེད་པའི་སྐབས་དགའ་བར་གྱུར་པ། ཡངས་ལ་མཛེས་པའི་བྲང་ལྕོང་ཞིང་ཕྱལ་བ། འོད་ཟེར་གྱི་བཀོད་པ་ [224b.5]མཐའ་ཡས་པ་སྤྲོ་བར་མཛད་པས་འཇིག་རྟེན་གསུམ་ཀུན་དུ་སྣང་བར་མཛད་པ། དེ་ནས་དེའི་མདུན་དུ་ནི་བཅོམ་ལྡན་འདས་ཤེས་རབ་མའོ། །གཡས་སུ་ནི་ཡིད་གཞུངས་མའོ། །རྒྱབ་ཏུ་ནི་བློ་གྲོས་མའོ། །གཡོན་དུ་ནི་དྲན་པ་མའོ། །དེ་དག་རྣམས་ནི་རང་གི་གཙོ་མོ་དང་ཁ་དོག་ལ་སོགས་པ་མཚུངས་པ་དང་། མངོན་དུ་བལྟ་བས་ [224b.6]གནས་པར་བསམ་པར་བྱ་བའོ། །དེ་ནས་རང་གི་ལྟེ་བའི་ཡུལ་ཕྱོགས་སུ་ཟླ་བའི་དཀྱིལ་འཁོར་ལ་ཡི་གེ་ཨོཾ་དཀར་པོ་བསྒོམ་པར་བྱ་བའོ། །དེ་ལས་ལྷག་མ་མ་ལུས་པའི་ངག་གི་རང་བཞིན་གྱི་ཕྲེང་བ་ངེས་པར་འཕྲོས་པར་གྱུར་པས་རྒྱུན་མི་འཆད་པར་རབ་ཏུ་འབྱུང་བར་བསམ་པར་བྱ་ཞིང་སྔགས་བགྲང་བར་བྱ་བའོ། །དེ་ལ་ [224b.7]སྔགས་ནི་འདི་ཡིན་ཏེ། ཨོཾ་ཧྲཱིཿམ་ཧཱ་མ་ཡཱཾ་གེ་མ་ཧཱ་ས་ར་སྭ་ཏྱེ་ན་མཿདེ་ལྟར་ཡང་བསྙེན་གནས་ལ་གནས་པར་གྱུར་པ་དང་། ངག་མི་སྨྲ་བར་གནས་པ་དང་། རྟག་པར་རྒྱུན་མི་འཆད་པར་ལྷའི་ང་རྒྱལ་གྱིས་ལྷག་པར་གནས་པ་དང་། སྔགས་རྒྱུན་དུ་ཟློས་པ་དང་། ལས་གཞན་ལ་མི་སེམས་པས་ནི་དབྱངས་ཅན་ [225a] [225a.1]མའི་གསུང་འཐོབ་པའོ། །ཟླ་བ་གསུམ་ན་ཚངས་པ་ཡང་འགྲུབ་པར་འགྱུར་རོ། །ཟླ་བ་དྲུག་ན་དབྱངས་ཅན་མ་དང་མཉམ་པར་འགྱུར་བ་ཡིན་ནོ། །དེ་ནས་སྨན་བཤད་པར་བྱ་སྟེ། ར་འོ་འཇིགས་མེད་ཚ་གསུམ་པ་ཐ་དང་། །ཤུ་དག་སི་གུ་རྒྱམ་ཚ་རྣམས་བསྙམས་ལ། ལན་བདུན་མངོན་པར་བསྔགས་ཏེ་ [225a.2]མར་སར་དང་། །འཐུངས་པས་དབྱངས་ཅན་མ་ཉིད་འགྲུབ་པ་ཡིན། །རའོ་བཞི་འགྱུར་དག་ཏུ་བྱ་བ་ཡིན། །མར་ནི་བསྐོལ་བ་སྲང་གཅིག་དག་ཡིན་ཏེ། །སྨན་རྣམས་སྲང་རེ་ཙམ་དུ་བྱས་པས་ནི། །དལ་གྱིས་འཇམ་པོར་མིང་ནི་བློ་གྲོས་བཟང་། །ཟླ་བ་ཙམ་དུ་རབ་ཏུ་སྦྱར་བྱས་པས། །ངག་གི་དབང་ནི་བླ་ན་མེད་པ་འཐོབ། །ཟླ་བ་དྲུག་ཏུ་ [225a.3]ཉེ་བར་སྦྱར་བྱས་པས། །དངོས་སུ་ངག་གི་དབང་ཕྱུག་ཉིད་དུ་འགྱུར། །མཉམ་མེད་ཁུ་བྱུག་སྐད་ནི་ངེས་སྒྲོགས་པའི། །སྙན་པའི་དབྱངས་ནི་སྐྱེ་བར་འགྱུར་བ་ཡིན། །དངོས་རྣམས་སྣ་ཚོགས་པ་ཡི་ནུས་ལྡན་ཕྱིར། །འདི་ལ་ཐེ་ཚོམ་ཟ་བར་བྱ་བ་མིན། །ཞེས་བྱ་བ་ནི་དབྱངས་ཅན་མ་ཆེན་མོའི་སྒྲུབ་ཐབས་སོ། །མཁས་པ་ [225a.4]ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3224}༄༅༅། །རྒྱ་གར་སྐད་དུ། བཛྲ་སཱ་ར་སྭ་ཏི་སཱ་དྷ་ནཾ། བོད་སྐད་དུ། རྡོ་རྗེ་དབྱངས་ཅན་མའི་སྒྲུབ་ཐབས། སྔར་བཤད་པའི་ཆོ་གའི་ཚུལ་གྱིས་སྙིང་གར་པདྨ་དམར་པོ་དང་། ཟླ་བ་ལ་ཡི་གེ་ངོཿདམར་པོའི་ས་བོན་ཡོངས་སུ་གྱུར་པ་ལས་ [225a.5]པདྨ་དམར་པོ་འདབ་མ་བརྒྱད་པ་རང་གི་ས་བོན་གྱི་སྙིང་པོར་གྱུར་པའོ། །དེ་ཡོངས་སུ་གྱུར་པ་ལས་བཅོམ་ལྡན་འདས་དབྱངས་ཅན་མ་སྟེ། ཞལ་གསུམ་ཕྱག་དྲུག་མ། སྐུ་མདོག་ཐམས་ཅད་དམར་བ། སྤྱན་གསུམ་མ་སྔོན་པོ་དང་དཀར་པོ་ནི་གཡས་པ་དང་གཡོན་པའི་ཞལ་ལོ། །པདྨ་དང་རལ་གྲི་དང་གྲི་གུག་གཡས་པའི་ཕྱག་ [225a.6]ན་བསྣམས་པའོ། །ཐོད་པ་དང་རིན་པོ་ཆེ་དང་འཁོར་ལོ་ནི་གཡོན་པའི་ཕྱག་ན་བསྣམས་པའོ། །གཡས་བསྐུམ་པས་གནས་པ། གཞོན་ནུ་མ་གསར་ཞིང་ལང་ཚོ་དང་ལྡན་པ་རྒྱན་སྣ་ཚོགས་པ་དང་ལྡན་པ། མཚན་མ་དང་ས་བོན་གྱིས་ཐུགས་ཀ་ནས་བྱིན་གྱིས་བརླབས་པ། གཞན་གྱི་དོན་མཛད་པ་ལ་བརྩོན་པར་གྱུར་པར་བདག་ཉིད་ [225a.7]རྣམ་པར་བསྒོམ་པར་བྱ་བའོ། །ཨོཾ་བི་ཙུ་པི་ཙུ་པྲཛྙཱ་བརྡྷ་ནི་ཛྭ་ལ་ཛྭ་ལ་མེ་དྷ་བརྡྷ་ནི་དྷི་རི་དྷི་རི་བུ་དྷི་བརྡྷ་ནི་སྭཱ་ཧཱ། ཞེས་བྱ་བའི་སྔགས་འདི་བཟླས་པར་བྱ་བའོ། །རྡོ་རྗེ་དབྱངས་ཅན་མའི་སྒྲུབ་ཐབས་སོ། །མ་ལ་བ་ཞེས་བྱ་བ་དྷའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། {T3225}༄༅༅། །རྒྱ་གར་སྐད་དུ། [225b] [225b.1]ས་ར་སྭ་ཏྭི་སྭ་དྷ་ནཾ། བོད་སྐད་དུ། དབྱངས་ཅན་མའི་སྒྲུབ་ཐབས། རྫོགས་སངས་རྒྱས་རྣམས་གསུང་མངའི་འོད་ཟེར་སྤྲོ་མཛད་ངག་ནི་མཚར་བའི་རོ་དབྱངས་དང་ལྡན་པས། །མྱང་བ་རྣམས་ལ་ཕན་མཛད་རྒལ་དཀའ་མི་ཟད་གཏི་མུག་མུན་པ་ཉེ་བར་འཇོམས་མཛད་མ། །ཡོན་ཏན་རང་བཞིན་རྡོ་རྗེ་དབྱངས་ཅན་མ་ཁྱོད་ལ་འདུད་འདིར་དེའི་ [225b.2]ཡན་ལག་མཉེས་བྱེད་པ། །བློ་གྲོས་རྟོགས་དཀའི་དབང་དུ་བྱས་ནས་འགྲོ་ལ་ཕན་ཕྱིར་བདེ་བར་གཤེགས་ལུགས་བཤད་པར་བྱ། །དང་པོ་ཉིད་དུ་གདོང་སོགས་དག་པར་བྱས་ལ་རབ་ཏུ་སྔ་བར་བརྩེ་ལྡན་བཟོད་པ་ཅན། །བྱམས་པ་མགུ་བས་རངས་པའི་དགའ་བ་དང་ལྡན་གང་ཡིན་སྔགས་པས་གཙང་མའི་གོས་དང་ནི། ། [225b.3]གནས་ཀྱང་ཡིད་འཕྲོག་པར་ནི་ཉིན་ཡང་རུང་སྟེ་རང་གི་སྙིང་གར་པདྨ་བལྟ་བར་བྱ། །དེར་ནི་དྲི་མེད་ཨ་ལས་ངེས་པར་བྱུང་བའི་ཟླ་བ་ལེགས་པར་བསྒོམ་བྱ་དེ་ལ་ཡང་། །དོཿཡིག་འོད་ཟེར་གྱིས་ནི་དགང་བར་བྱ་དང་ཕྱོགས་མཐའ་ཀུན་དུ་ཁྱབ་བྱ་དེ་ལས་ནི། །མདུན་དུ་སངས་རྒྱས་ཚོགས་རྣམས་བལྟ་བྱ་མེ་ཏོག་ལ་ [225b.4]སོགས་མཆོད་ལ་འདི་དག་བསྒོམ་པར་བྱ། །དེ་ནས་ཕྱག་འཚལ་ཡང་ནི་འདི་ཡིས་སྡིག་པ་སོ་སོར་བཤགས་བྱ་དེ་བཞིན་བསོད་ནམས་ལ། །རྗེས་སུ་ཡི་རང་གསུམ་ལ་སྐྱབས་འགྲོ་ཡང་དག་པར་ནི་བརྗོད་པར་བྱ་བའོ་སྔགས་རིག་པས། །ཞེས་སོགས་བསྔོ་བྱས་པར་ནི་ལེགས་བྱས་ཡང་དག་བདག་ཉིད་ཀྱང་ [225b.5]སྟེ་རྟོག་པའི་དྲ་བ་ནི། །ཐམས་ཅད་དེ་ཡིས་སྟོང་པར་དམིགས་བྱ་དེ་ནས་སྣ་ཚོགས་འདི་དག་མ་ལུས་བསྒོམ་བྱ་བ། །གཅིག་དང་དུ་བྲལ་དང་ལྡན་ཚིག་ནི་བརྗོད་བྱ་དག་པ་དམ་པའི་ཡེ་ཤེས་ཀྱིས་རིག་བྱ། །ཨོཾ་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ། །སྟོད་ཉིད་ལས་ [225b.6]ནི་ངེས་བྱུང་པདྨ་ཟླ་བ་དག་ལ་ཉེར་གནས་དོཿཡིག་དམར་པོའོ། །ཡང་ནི་སྣ་ཚོགས་འོད་ཟེར་ཚོགས་ཀྱིས་ཤིན་ཏུ་མཛེས་གྱུར་དེ་ལས་པདྨ་འདབ་བརྒྱད་པ། །དེ་ལས་དམར་མོ་འོད་ཟེར་ཆེར་འབར་བཅོམ་ལྡན་འདས་མ་དམ་པའི་རྒྱན་རྣམས་ཀྱིས་བརྒྱན་མ། །གཡས་བསྐུམ་པ་ཡི་ཞབས་ཀྱིས་ [225b.7]གནས་ཤིང་ཞལ་གསུམ་མ་སྟེ་ཕྱག་དྲུག་དག་གིས་བརྒྱན་པ་མོ། །ཞལ་གཡས་མཐིང་ནག་དང་ནི་པདྨ་རལ་གྲི་གྲི་གུག་རྣམས་ནི་བསྣམས་པས་ཕྱག་རྒྱས་ཤིང་། །གཡོན་ཞལ་དཀར་པོ་དང་ནི་དེ་བཞིན་ཐོད་བཅས་རིན་ཆེན་དམ་པ་དང་ནི་འཁོར་ལོ་བསྣམས། །སྙིང་གི་པདྨ་ལ་གནས་ཟླ་བའི་དབུས་སུ་ [226a] [226a.1]ཉེར་གནས་དེར་ཡང་དོཿནི་འབར་གྱུར་པས། །སྣ་ཚོགས་པ་ཡི་གཏི་མུག་ཉེ་བར་བཅོམ་པར་བྱས་ཤིང་སྤྲོས་པ་ཡིས་ནི་འཇིག་རྟེན་དག་བྱས་ཏེ། །ཉེ་བར་བསྡུས་ལ་རང་སྙིང་ཟླ་བ་ས་བོན་ལ་ནི་བཞག་པར་བལྟ་བྱ་ཡང་ནི་སྤྲོ། །དེ་ཉིད་འདིར་ནི་ཡུད་ཙམ་ཡུད་ཙམ་ཉི་མ་རེ་རེར་བསྒོམ་བྱ་རྟག་ཏུ་ [226a.2]དེ་ལྟ་བའི། །བསྒོམས་བྱས་སྐྱོན་འདི་ཡིས་འདིར་ནི་ས་བོན་ཚོགས་པ་ལེགས་པར་བཏང་ལ་འདི་ཡི་སྔགས། །ཕྲེང་བ་བརྒྱུད་པ་མར་མེའི་རྣམ་པའི་རིམ་པས་སྙིང་པོར་གྱུར་པའི་སྔགས་འདི་འདྲ་བ་བཟླས། །ཨོཾ་པི་ཙུ་པི་ཙུ་པྲཛྙཱ་བརྡྷ་ནི་ཛྭ་ལ་ཛྭ་ལ་མེ་དྷ་བརྡྷ་ནི་དྷི་རི་དྷི་རི་བུདྷི་བརྡྷ་ནི་སྭཱ་ཧཱ། ལྷ་མོའི་སྐུ་ནི་ཡིད་ལ་ [226a.3]བརྟག་བྱ་རབ་ཏུ་དགའ་བས་ཐུན་ཚོད་རྣམས་ནི་ཐམས་ཅད་ལ། །སྔགས་ནི་ལེགས་བཟླ་བདེ་གཤེགས་ལུགས་ཀྱིས་སེམས་ཅན་དོན་ཕྱིར་འདི་དག་ཡོངས་སུ་བསྔོ་བ་དང་། །དགོས་པ་སྒྲུབ་པའི་དབང་གིས་བསམ་གཏན་ལ་ནི་རྩེ་གཅིག་གནས་པར་བྱ་བའོ་ཇི་སྲིད་དུ། །འབུམ་ཕྲག་དག་ན་མ་རྫོགས་ [226a.4]པས་ཏེ་རྫོགས་པར་གྱུར་པ་དང་ནི་ལས་ཀྱི་རིམ་པ་ཡིན། །མི་མཐུན་ཕྱོགས་ཀྱི་རྣམ་པ་ཐམས་ཅད་ཉེ་བར་བཅོམ་པའི་བསམ་གཏན་བྱས་པ་ཉིད་ན་དེ། །དཀར་པོའི་ཚེས་གཅིག་ནས་ནི་ཇི་སྲིད་ཟླ་ཚེས་གནས་པར་གྱུར་པར་རང་གི་ཡིད་དང་ནི། །དེ་སྲིད་ནུབ་རེ་བཞིན་དུ་ལེགས་པར་སྦྱར་བ་ཉིད་བྱ་ཇི་སྲིད་ [226a.5]ཟླ་བ་ཉ་ཡི་བར། །མཚན་མོ་དེ་ཉིད་ལ་ཡང་འདི་ནི་གྲུབ་ཐོབ་རྒྱལ་བར་དཀའ་དང་སྙན་དངགས་པ་ཉིད་འགྱུར། །བཅོམ་ལྡན་འདས་མ་དཔལ་ལྡན་རྡོ་རྗེ་དབྱངས་ཅན་མ་དེ་ཡང་དག་མཉེས་བྱེད་གང་ཡིན་པ། །དཔལ་ལྡན་ནག་པོའི་རྒྱལ་པོས་དཔལ་ལྡན་གཤིན་རྗེ་གཤེད་ཀྱི་རྒྱུད་ནས་ཉེ་བར་བཏོན་ [226a.6]བྱས་ནས། །སེམས་ཅན་རྣམས་ནི་དོན་ཕྱིར་མཛེས་བཀོད་ལས་བྱུང་བསོད་ནམས་བདག་གིས་ཐོག་མར་ཐོག་གྱུར་པ། །དེས་ནི་འགྲོ་རྣམས་ནག་པོ་དང་ནི་ཆ་འདྲ་བཟློག་པར་དཀའ་བའི་གྲུབ་ཐོབ་སྙན་དངགས་ཤོག །དཔལ་འཛིན་གྱིས་བྱས་སྒྲུབ་ཐབས་འདི། །གལ་ཏེ་སངས་རྒྱས་རྣལ་འབྱོར་པ། །དཔལ་ [226a.7]ལྡན་རྡོ་རྗེ་དབྱངས་ཅན་གྱི། །འཇོ་བྱེད་ནང་གི་ཁྱད་པར་ཡིན། །འཕགས་མ་རྡོ་རྗེ་དབྱངས་ཅན་མའི་སྒྲུབ་ཐབས་སོ།། །།པཎྜི་ཏ་ཆེན་པོ་དཱ་དང་ཨ་བྷ་ཡ་དང་ཨ་མ་ར་ལ་སོགས་པ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། །།