[1a]
[1b]
[1b.1]༄༅༅། །དེ་ལྟར་ཆོས་ཀྱི་ཕྱག་རྒྱའི་གཙོ་བོར་གྱུར་པའི་འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་བསྟན་ནས། ད་ནི་ལས་ཀྱི་ཕྱག་རྒྱ་གཙོ་བོར་གྱུར་པའི་འཇིག་རྟེན་གསུམ་གྱི་
[1b.2]འཁོར་ལོའི་ལས་ཀྱི་དཀྱིལ་འཁོར་གྱིས་འདུལ་བའི་སེམས་ཅན་རྗེས་སུ་གཟུང་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་སྨོས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་
[1b.3]པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་དོན་ཏོ། །འདིར་དང་པོར་སྦྱོར་བའི་ཏིང་ངེ་འཛིན་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོར་བཤད་པ་ཉིད་གཟུང་བར་བྱའོ། །བཅོམ་
[1b.4]ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །ཡང་ཞེས་བྱ་བ་ནི་འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་ལ་ལྟོས་པས་ན་ཡང་ཞེས་བྱའོ། །དེ་བཞིན་གཤེགས་པ་ཐམས་ཅད་ནི་ལས་
[1b.5]ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །འདིའི་དམ་ཚིག་ནི་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་འདི་ཉིད་དོ། །དེ་ལས་བྱུང་བ་ནི་སྐྱེས་པ་སྟེ། རྡོ་རྗེ་ཧཱུཾ་མཛད་ཀྱི་ཐུགས་ལ་གནས་
[2a]
[2a.1]པའི་རྡོ་རྗེ་རྩེ་ལྔ་པ་འབར་བ་ལས་བྱུང་བའོ། །དེས་བྱིན་གྱིས་བརླབས་པ་ནི་བརྟན་པར་བྱས་པའི་ཏིང་ངེ་འཛིན་གང་ཡིན་པ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ནས། འཇིག་རྟེན་གསུམ་གྱི་འཁོར་ལོའི་
[2a.2]ལས་ཀྱི་དཀྱིལ་འཁོར་སྤྲུལ་པའི་ཕྱིར། ཕྱག་ན་རྡོ་རྗེའི་ཐུགས་ཀར་གནས་པའི་རྡོ་རྗེ་བརྟན་པར་བྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །འདི་ཞེས་བྱ་བ་ནི་བློ་ལ་གནས་པ་སྟེ། བདག་ཉིད་རང་གི་རིག་པ་དམ་
[2a.3]པ་འདི་གསུངས་པ་ནི་བཤད་པའོ། །ཨོཾ་བཛྲ་ཀརྨ་པྲ་བརྟ་ནི་ས་མ་ཡེ་ཧཱུཾ་ཞེས་བྱ་བ་འདི་ནི། འཇིག་རྟེན་གསུམ་གྱི་འཁོར་ལོ་ཐམས་ཅད་ཀྱི་ལས་ཀྱི་དཀྱིལ་འཁོར་བསྐྱེད་པའི་རྒྱུར་གྱུར་པ་ཉིད་ཀྱིས་རིག་པ་ཐམས་ཅད་ཀྱི་ནང་ན་
[2a.4]མཆོག་ཏུ་གྱུར་པས་ན་རིག་པ་དམ་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ། རྡོ་རྗེ་བྲན་མོ་རྣམས་ཀྱིའོ་ཞེས་བྱ་བའི་བར་དུ་བསྟན་པ་ནི་གོ་སླའོ། །དེ་ནས་ཡང་བཅོམ་
[2a.5]ལྡན་འདས་ཞེས་བྱ་བ་ནས་བརྩམས་ནས་བྲན་མོ་རྣམས་ཀྱིའོ་ཞེས་བྱ་བའི་བར་དུ་བསྟན་པའི་གཞུང་འདིས་ནི་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་
[2b]
[2b.1]གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ལ་སོགས་པ་བསྟན་པ་ནི། འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །འཇིག་རྟེན་གྱི་འཁོར་ལོའི་ལས་ཀྱི་དཀྱིལ་
[2b.2]འཁོར་དུ་དམ་ཚིག་དང་། དབང་བསྐུར་བ་ཐོབ་པ་རྣམས་ཀྱིས་དེ་ལས་གསུངས་པའི་དངོས་གྲུབ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཕྱག་ན་རྡོ་རྗེས་ཞེས་བྱ་བ་ལ་སོགས་པ་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་སློབ་དཔོན་གྱི་ལས་ཀྱི་ཆོ་ག་དང་། སློབ་མ་འཇུག་པའི་
[2b.3]ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བ་ནི་སྐབས་སུ་བབ་པའོ། །ཕྱག་ན་རྡོ་རྗེ་ནི་རྡོ་རྗེ་ཧཱུཾ་མཛད་དོ། །ཡང་ཞེས་བྱ་བ་ནི་ཆོས་ཀྱི་འཁོར་ལོ་ལ་ལྟོས་པའོ། །རྡོ་རྗེའི་རིགས་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པའི་ལས་ཀྱི་དཀྱིལ་འཁོར་འདི་གསུངས་སོ། །དེ་ནས་
[2b.4]ཞེས་བྱ་བ་ནི་དེ་མ་ཐག་པ་སྟེ། སྔར་བསྙེན་པ་བྱས་པའི་རྗེས་ཐོགས་ལ་ཞེས་བྱ་བའི་དོན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་དཔལ་རྡོ་རྗེ་ཧཱུཾ་མཛད་ཀྱི་རྣལ་འབྱོར་དང་། དེ་ལས་བཤད་པའི་རྣལ་
[2b.5]འབྱོར་ཆེན་པོ་བྱས་ལ། དེ་ནས་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་དུ་གསུངས་པའི་རིག་པ་རྣམས་རེ་རེ་ཞིང་ཡང་བཟླས་པ་ཁྲི་བྱའོ། །དེ་ལྟར་བྱས་ན་སྔོན་དུ་བསྙེན་པར་འགྱུར་རོ། །དེ་ནས་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་དུ་གསུངས་པའི་ཏིང་
[2b.6]ངེ་འཛིན་གསུམ་བསྒོམ་པ་སྔོན་དུ་འགྲོ་བས་ཞག་བདུན་བསྒོམ་པར་བྱའོ། །དེ་ནས་དེའི་རྗེས་ཐོགས་ཉིད་ལ་དཀྱིལ་འཁོར་བྲི་བའམ། འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་ལས་གསུངས་པའི་ཏིང་ངེ་འཛིན་རྣམ་པ་གསུམ་བསྒོམ་པ་སྔོན་དུ་འགྲོ་བས་འཇིག་རྟེན་གསུམ་གྱི་འཁོར་
[2b.7]ལོའི་ལས་ཀྱི་དཀྱིལ་འཁོར་ཟླ་བ་གཅིག་གམ་ཟླ་བ་དྲུག་གམ། ལོ་གཅིག་གི་བར་དུ་བསྒོམས་ལ་ཇི་སྲིད་མངོན་སུམ་དུ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་རྗེས་ལ་དཀྱིལ་འཁོར་འདི་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་ཞེས་བྱ་བའི་དོན་ཏོ། །གང་གི་ཕྱིར་འཇིག་རྟེན་
[3a]
[3a.1]གསུམ་གྱི་འཁོར་ལོའི་ལས་ཀྱི་དཀྱིལ་འཁོར་དུ་འཇུག་པ་མེད་ན། དེས་འདུལ་བའི་སེམས་ཅན་གྱི་ཁམས་རྣམས་ཀྱི་འདོད་པའི་དོན་གྱི་དངོས་གྲུབ་ཏུ་མི་འགྱུར་བ་དེའི་ཕྱིར། རབ་ཏུ་བཤད་པར་བྱ་ཞིང་རྣམ་པར་དབྱེ་བར་བྱའོ། །ལས་ཀྱི་དཀྱིལ་འཁོར་དམ་པ་སྟེ། །རྡོ་རྗེའི་
[3a.2]དཀྱིལ་འཁོར་ཚུལ་གྱིས་ནི། །དཀྱིལ་འཁོར་ཐམས་ཅད་སྲད་བུས་བྲེ། །ཞེས་བྱ་བ་ནི། འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ནི་རྡོ་རྗེའི་དཀྱིལ་འཁོར་རོ། །འདིར་དེའི་ཚུལ་གྱིས་ལས་ཀྱི་དཀྱིལ་འཁོར་འདི་ཐམས་ཅད་སྲད་བུས་བྲེ་བར་བྱའོ། །དེ་འདིར་བསྟན་པ་ནི།
[3a.3]གྲྭ་བཞི་པ་ལ་བྱང་ཕྱོགས་སྒོ། །ཕྱི་རོལ་དཀྱིལ་འཁོར་སྲད་བུས་བྲེ། །དེ་ཡི་ནང་དུ་དེར་ཡང་ནི། །དེ་བཞིན་སྒོ་ནི་ཤར་ཕྱོགས་གདོད། །ཅེས་བྱ་བ་གསུངས་སོ། །དཀྱིལ་འཁོར་མཆོག་གི་གནས་སུ་ཕྱོགས་བཞིའི་དབུས་ཀྱི་ཆ་ཐམས་ཅད་དུ་སངས་རྒྱས་དབུས་ན་བཞུགས་པར་བྱ། ཞེས་བྱ་བ་
[3a.4]ནི། སངས་རྒྱས་དབུས་ན་བཞུགས་པ་རྣམས་ནི་སངས་རྒྱས་དབུས་ན་བཞུགས་པ་སྟེ། དཀྱིལ་འཁོར་གྱི་མཆོག་གོ། །དེ་ལ་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་ཉིད་སངས་རྒྱས་སུ་འདོད་ཀྱི། རྣམ་པར་སྣང་མཛད་ལ་སོགས་པ་ནི་མ་ཡིན་ཏེ། གང་གི་ཕྱིར་
[3a.5]འདིར་རྡོ་རྗེ་ཧཱུཾ་མཛད་ལ་སོགས་པའི་གཟུགས་ཀྱིས་གནས་པའི་ཕྱིར་རོ། །དེ་དག་གིས་ནི་ཞེས་བྱ་བ་ནི། དེ་བཞིན་གཤེགས་པ་བཞིའི་རང་རང་གི་ཕྱོགས་གཉིས་ཀར་རིམ་པ་བཞིན་དུ་བྱའོ། །ཡང་གི་སྒྲ་ནི་ངེས་པར་གཟུང་བ་སྟེ་རིམ་པ་ཉིད་དོ། །སེམས་དཔའ་ཆེན་པོ་རྣམས་ཀྱང་གཞག་
[3a.6]ཅེས་བྱ་བ་ནི། ཁྲོ་བོ་རྡོ་རྗེ་སེམས་དཔའ་ལ་སོགས་པ་ནས། ཁྲོ་བོ་རྡོ་རྗེ་ཁུ་ཚུར་གྱི་བར་དུ་བྲི་བར་བྱའོ། །དེའི་ཞེས་བྱ་བ་ནི། བཤད་མ་ཐག་པའི་ཕྱིར་དཀྱིལ་འཁོར་དེའིའོ། །དབུས་ནི་ནང་གི་དཀྱིལ་འཁོར་གྱི་ལྟེ་བའི་ཕྱོགས་སུའོ། །རྡོ་རྗེ་རིག་པ་དམ་པ་ཆུང་མ་དང་བཅས་པ་དང་། རྡོ་རྗེ་སྒེག་མོ་ལ་
[3a.7]སོགས་པའི་གསང་བའི་མཆོད་པ་བཞིའོ། །དེ་ཡི་ལྷ་མོ་གོ་རིམས་བཞིན། །རྡོ་རྗེའི་དཀྱིལ་འཁོར་ཚུལ་བཞིན་དུ། །ཞེས་བྱ་བ་ནི། ནང་གི་དཀྱིལ་འཁོར་གྱི་གོ་རིམས་བཞིན་རྡོ་རྗེ་གསེར་ལ་སོགས་པའི་ལྷ་མོ་རྣམས་འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་གྱི་ཚུལ་གྱིས་རིམ་
[3b]
[3b.1]པ་བཞིན་དུ་བྲི་བར་བྱའོ། །ཇི་ལྟ་བུར་གྱུར་པ་ཞིག་བྲི་བར་བྱ་ཞེ་ན། རང་གི་ཕྱག་རྒྱ་ཕྱག་རྒྱ་འདྲ། །གར་བྱེད་པ་ནི་བྲི་བར་བྱ། །ཞེས་བྱ་བ་ནི། དེ་ལ་རྡོ་རྗེ་གསེར་དང་། རྡོ་རྗེ་གཞོན་ནུ་མ་དང་། རྡོ་རྗེ་ཞི་བ་མོ་དང་། རྡོ་རྗེ་ཁུ་ཚུར་དང་། རྡོ་རྗེ་བདུད་རྩི་དང་། རྡོ་རྗེ་མདའ་དང་། རྡོ་རྗེ་དབྱུག་པ་དང་།
[3b.2]རྡོ་རྗེ་རྐེད་བཅིངས་དང་། རྡོ་རྗེ་འཇུ་མ་དང་། རྡོ་རྗེ་ཟབ་མོ་རྣམས་ཀྱི་ཕྱག་རྒྱ་གང་ཡིན་པ་དེ་ནི་དེའི་ཕྱག་རྒྱའོ། །རྡོ་རྗེ་ཆུ་སྲིན་མ་དང་། རྡོ་རྗེ་རུལ་པ་མོ་དང་། རྡོ་རྗེ་དུས་དང་། རྡོ་རྗེ་ཁ་དང་། རྡོ་རྗེ་འཁོར་མ་དང་། རྡོ་རྗེ་འབར་མ་དང་། རྡོ་རྗེ་མགྱོགས་མ་དང་། རྡོ་རྗེ་ཕོ་ཉ་མ་དང་། རྡོ་རྗེ་དབང་མོ་དང་། རྡོ་རྗེ་
[3b.3]སྒོ་བ་མ་རྣམས་ཀྱི་ཕྱག་རྒྱ་གང་ཡིན་པ་དེ་ནི་ལན་གྱི་ཕྱག་རྒྱར་བརྗོད་དོ། །ལུགས་སུ་བྱུང་བ་དང་། ལུགས་ལས་བཟློག་པའི་ཚུལ་གྱིས་ཕྱག་རྒྱ་དང་ཕྱག་རྒྱའི་ལན་དུ་ཤེས་པར་བྱའོ། །དེ་ལ་རྡོ་རྗེ་གསེར་གྱི་གར་གྱི་མཆོད་པ་བྱས་ལ། རྡོ་རྗེ་ཆུ་སྲིན་གྱི་གར་གྱི་མཆོད་པས་ཕྱག་རྒྱའི་ལན་བྱའོ། །
[3b.4]དེ་བཞིན་དུ་རྡོ་རྗེ་ཟ་བའི་གར་གྱི་མཆོད་པ་བྱ་སྟེ། རྡོ་རྗེ་སྒོ་བ་མའི་གར་གྱི་མཆོད་པས་ཕྱག་རྒྱའི་ལན་གྱི་བར་དུ་བྱའོ། །དེ་ལྟར་རང་གི་ཕྱག་རྒྱ་དང་། ཕྱག་རྒྱའི་ལན་གྱིས་གར་བྱེད་པའི་ཚུལ་གྱིས་བྲི་བར་བྱའོ། །ཅིའི་ཕྱིར་དེ་ལྟར་བྲི་བར་བྱ་ཞེ་ན། སངས་རྒྱས་རྡོ་རྗེ་ཅན་མཆོད་ཕྱིར། །ཞེས་
[3b.5]བྱ་བ་སྨོས་སོ། །ཇི་ལྟར་བྱ་ཞེ་ན། རྡོ་རྗེ་གར་གྱི་ཚུལ་གྱིས་སོ། །ཞེས་བྱ་བ་སྨོས་ཏེ། གར་བྱེད་པའི་ཚུལ་དུ་བྲི་བར་བྱའོ། །དེ་ལྟར་རྡོ་རྗེ་གར་བྱེད་པའི་ཚུལ་གྱིས་གློག་འགྱུ་བ་ལྟ་བུ་མདུན་དུ་བསྐོར་བ་འདི་ནི་རྡོ་རྗེ་གར་བྱེད་པ་ཞེས་གྲགས་སོ། །གྲྭ་དང་སྒོའི་ཕྱོགས་རྣམས་སུ་འདུག་པ་ལ་སོགས་
[3b.6]པ་རིམ་པ་བཞིན་ཞེས་བྱ་བ་ནི། ཕྱི་རོལ་གྱི་དཀྱིལ་འཁོར་གྱི་མཚམས་རྣམས་སུ་བདུག་པ་མ་ལ་སོགས་པའི་ལྷ་མོ་བཞི་དང་། ནང་གི་དཀྱིལ་འཁོར་གྱི་སྒོར་རྡོ་རྗེ་གླང་སྣ་མ་དང་། ཕྲེང་བ་མ་དང་། ཕྱི་རོལ་གྱི་དཀྱིལ་འཁོར་གྱི་སྒོར་རྡོ་རྗེ་དབང་དང་། རྣམ་པར་རྒྱལ་བའི་རྡོ་རྗེ་དག་འཇིག་རྟེན་གསུམ་
[3b.7]གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་ཆོ་ག་བཞིན་དུ་བྲི་བར་བྱའོ་ཞེས་བྱ་བ་འདི་ནི་རིམ་པ་བཞིན་ཞེས་བྱ་བའི་དོན་ཡིན་ནོ། །འདི་སྐད་སྟོན་པ་ཡིན་ཏེ། སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོའི་ཁ་དོག་གིས་ཐིག་སྐུད་སོ་སོར་ཁ་བསྒྱུར་ལ།
[4a]
[4a.1]དེ་ཉིད་ཀྱི་རིམ་པ་བཞིན་བཞག་ལ་ཧཱུཾ་ཏྲཱཾ་ཧྲཱིཿ ཨ་ཨཱ་ཞེས་བྱ་བ་དེ་བཞིན་གཤེགས་པ་རྣམ་པ་ལྔའི་ས་བོན་གྱི་ཡི་གེ་དེ་རྣམས་རང་རང་གི་ཁ་དོག་གི་ཐིག་སྐུད་དེ་རྣམས་ལ་རིམ་པ་བཞིན་དུ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་རྣམས་བཀོད་ལ་བར་སྣང་གི་
[4a.2]ཕྱོགས་ན་བཞུགས་པ་རྣམས་ལས་རང་གི་ས་བོན་ལས་བྱུང་བའི་འོད་ཟེར་དང་ཡང་འབར་བའི་ལྟ་བས་བལྟ་ཞིང་བཀུག་ལ་ལག་ན་གནས་པའི་སྔོན་པོ་ལ་སོགས་པའི་ཐིག་སྐུད་དེ་རྣམས་བཀང་ལ། ཨ་ནྱོ་ནྱ་ཨ་ནུ་ག་ཏ་སརྦྦ་དྷརྨྨཱ་སྥར་སྥར་ཨ་ནུ་པྲ་བིཥྚ་སརྦྦ་དྷརྨྨཱ་ཨ་ཏྱན་ཏ་ཨ་ནུ་པྲ་བིཥྚ་སརྦྦ་དྷརྨཱ།
[4a.3]ཨོཾ་སུམྦྷ་ནི་སུམྦྷ་ཧཱུཾ་གྲྀ་ཧྞ་གྲྀ་ཧྞ་ཧཱུཾ། གྲྀ་ཧྞཱ་པ་ཡ་གྲྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོ། བྷ་ག་ཝཱན་བཛྲ་ཧཱུཾ་ཕཊ། ཅེས་བྱ་བས་བསྒྲིལ་བར་བྱའོ། །དེ་ནས་དྲིས་བྱུགས་ལ། གསེར་ལ་སོགས་པའི་སྣོད་དུ་ཐིག་སྐུད་དེ་བཞག་ལ། མེ་ཏོག་གཏོར་བ་དང་། བདུག་པ་ཕུལ་ལ་རྡོ་རྗེ་བསྡམས་པས་བཟུང་
[4a.4]ལ། ཨོཾ་བཛྲ་སཱུ་ཏྲ་ཨཱ་ཀཪྵ་ཡ་སརྦྦ་མཎྜ་ལ་ཧཱུཾ། ཞེས་བྱ་བ་དེས་སྔགས་ལན་བརྒྱ་རྩ་བརྒྱད་བཟླ་བར་བྱའོ། །དེ་ནས་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་ལས་ཀྱི་ཧཱུཾ་མཛད་ཀྱང་བཟླ་བར་བྱའོ། །དེ་ནས་རིམ་པ་ཇི་ལྟ་བ་བཞིན་དུ་གཡོན་པའི་ཁུ་ཚུར་གྱིས་ཐིག་སྐུད་དེ་བླངས་ལ། ཨོཾ་
[4a.5]བཛྲ་སཱུ་ཏྲ་ཨ་ཀཪྵ་ཡ་སརྦྦ་མཎྜ་ལ་ཧཱུཾ་ཞེས་བྱ་བའི་སྙིང་པོ་འདིས་དཀྱིལ་འཁོར་ཐིག་གདབ་པར་བྱའོ། །དང་པོར་རེ་ཞིག་ཚངས་པའི་ཐིག་གཉིས་གདབ་སྟེ། །དེ་ནས་ཕྱིའི་དཀྱིལ་འཁོར་ཟུར་བཞི་པ། བྱང་ཕྱོགས་སུ་སྒོ་བཏོད་པ་ཐིག་བཏབ་ལ་དེའི་ནང་དུ་ཆ་དྲུག་ཏུ་ཕྱེ་བ་ལས་དཀྱིལ་འཁོར་
[4a.6]གཉིས་པ་ཆ་བཞི་པ་སྒོ་ཤར་དུ་བཏོད་པའོ། །དཀྱིལ་འཁོར་གཉིས་པ་དེའི་དབུས་སུ་དེའི་ཕྱེད་ཀྱི་ཚད་རྡོ་རྗེ་རིག་པ་དམ་པའི་གནས་ཐིག་གདབ་པར་བྱའོ། །དེ་ནས་སྲད་བུ་བྲེས་པ་དེར་དག་པའི་ཚོན་གྱིས་དགང་བར་བྱའོ། །ཚོན་རྩི་འདྲི་བའི་སྙིང་པོ་དང་། །གཡོན་པའི་རྡོ་རྗེ་ཁུ་ཚུར་ཆེས། །
[4a.7]ཆོ་ག་བཞིན་དུ་གཟུང་བར་བྱ། །དང་པོ་བྲིས་ནས་ཕྱིས་ཅི་བདེར། །དེ་ལ་འདི་ནི་ཚོན་གྱི་སྙིང་པོ་ཡིན་ཏེ། ཨོཾ་བཛྲ་རཱ་ཀ་ས་མ་ཡ་ཧཱུཾ། ཚོན་རྩི་འདྲི་བ་ནི་ཚོན་རྩི་དཀར་པོ་ལ་ཡི་གེ་ཨ་ལས། དེ་བཞིན་གཤེགས་པ་རྣམ་པར་སྣང་མཛད་ཀྱི་གཟུགས་བརྙན་དཀར་པོ་དང་། སྔོན་པོ་ལ་ཡི་གེ་ཧཱུཾ་ལས་དེ་བཞིན་
[4b]
[4b.1]གཤེགས་པ་མི་བསྐྱོད་པའི་གཟུགས་བརྙན་སྔོན་པོ་དང་། སེར་པོ་ལ་ཡི་གེ་ཏྭཱཾ་ལས་དེ་བཞིན་གཤེགས་པ་རིན་ཆེན་འབྱུང་ལྡན་གྱི་གཟུགས་བརྙན་སེར་པོ་དང་། དམར་པོ་ལ་ཡི་གེ་ཧྲཱིཿལས་དེ་བཞིན་གཤེགས་པ་འོད་དཔག་མེད་ཀྱི་གཟུགས་བརྙན་དམར་པོ། ལྗང་གུ་ལ་ཡི་གེ་ཨ་ལས། དེ་བཞིན་
[4b.2]གཤེགས་པ་དོན་ཡོད་གྲུབ་པའི་གཟུགས་བརྙན་ལྗང་གུ་བསྐྱེད་ལ། སྔར་བཤད་པའི་ཚོན་རྩི་བྱིན་གྱིས་བརླབ་པའི་ཕྱག་རྒྱ་དང་། ཨོཾ་བཛྲ་རཱ་ཀ་ས་མ་ཡ་ཧཱུཾ། ཞེས་བྱ་པ་འདི་རེ་རེ་ཞིང་ལན་བདུན་བདུན་བཟླས་པར་བྱའོ། །དེ་ལ་དང་པོར་སྔོན་པོ་དང་། དེ་ནས་སེར་པོ་དང་།
[4b.3]དེ་ནས་དམར་པོ་དང་། དེ་ནས་ལྗང་གུ་དང་། དེ་ནས་ཐམས་ཅད་ཀྱི་ནང་དུ་དཀར་པོས་དཀྱིལ་འཁོར་གཉིས་ཚོན་སྣ་ལྔས་བྲི་བར་བྱའོ། །དེ་ལྟར་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོ་དང་། གཟུངས་ཀྱི་དཀྱིལ་འཁོར་རྣམས་ལ་ཡང་ཤེས་པར་བྱའོ། །དེ་ལྟར་དཀྱིལ་འཁོར་བྲིས་ལ། དཀྱིལ་
[4b.4]འཁོར་དབུས་མའི་དབུས་སུ། རྡོ་རྗེ་རིག་པ་དམ་པ་རང་གི་ཆུང་མ་དང་བཅས་པ་གར་བྱེད་པའི་སྦྱོར་བས་གནས་པ་བྲི་བར་བྱའོ། །དཀྱིལ་འཁོར་དེ་ཉིད་ཀྱི་ཤར་ལྷོའི་མཚམས་ཀྱི་ཆ་ལ་སྒེག་མོ། ལྷོ་ནུབ་ཀྱི་མཚམས་སུ་ཕྲེང་བ་མ། ནུབ་བྱང་གི་མཚམས་སུ་གླུ་མ། བྱང་ཤར་གྱི་མཚམས་སུ་གར་
[4b.5]མ་བྲི་བར་བྱའོ། །དཀྱིལ་འཁོར་གཉིས་པའི་ཤར་ཕྱོགས་ཀྱི་ལྷའི་སྣམ་བུའི་དབུས་སུ་རྡོ་རྗེ་རྩེ་ལྔ་པ་འབར་བ་བྲི་བ་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་གི་ཕྱོགས་སུ་ཡང་བྲི་བར་བྱའོ། །དེ་ནས་ཤར་ཕྱོགས་ཀྱི་རྡོ་རྗེའི་ཕྱག་རྒྱའི་བྱང་གི་ཆ་ལ་རྡོ་རྗེ་གསེར་དང་། རྡོ་རྗེ་
[4b.6]གཞོན་ནུ་མ་གཉིས་བྲི་བར་བྱའོ། །རྡོ་རྗེའི་ཕྱག་རྒྱ་དེ་ཉིད་ཀྱི་ལྷོ་ཕྱོགས་ཀྱི་ཆ་ལ་རྡོ་རྗེ་ཞི་བ་དང་། རྡོ་རྗེ་ཁུ་ཚུར་རོ། །ལྷོ་ཕྱོགས་ཀྱི་རྡོ་རྗེ་ཕྱག་རྒྱའི་ཤར་ཕྱོགས་ཀྱི་ཆ་ལ་རྡོ་རྗེ་བདུད་རྩི་དང་། རྡོ་རྗེ་འོད་དོ། །རྡོ་རྗེའི་ཕྱག་རྒྱ་དེ་ཉིད་ཀྱི་ནུབ་ཕྱོགས་ཀྱི་ཆ་ལ། རྡོ་རྗེ་དབྱིག་པ་དང་། རྡོ་རྗེ་རྐེད་བཅིངས་
[4b.7]མའོ། །ནུབ་ཕྱོགས་ཀྱི་རྡོ་རྗེ་ཕྱག་རྒྱའི་ལྷོ་ཕྱོགས་ཀྱི་ཆ་ལ། རྡོ་རྗེ་ཕོ་ཉ་མ་དང་། རྡོ་རྗེ་མགྱོགས་མའོ། །རྡོ་རྗེའི་ཕྱག་རྒྱ་དེ་ཉིད་ཀྱི་བྱང་ཕྱོགས་ཀྱི་ཆ་ལ། རྡོ་རྗེ་འབར་བ་དང་། རྡོ་རྗེ་འཁྱོར་མའོ། །བྱང་ཕྱོགས་ཀྱི་རྡོ་རྗེ་ནུབ་ཕྱོགས་ཀྱི་ཆ་ལ། རྡོ་རྗེ་ཁ་དང་། རྡོ་རྗེ་དུས་སོ། །རྡོ་རྗེའི་ཕྱག་རྒྱ་དེ་ཉིད་ཀྱི་ཤར་
[5a]
[5a.1]ཕྱོགས་ཀྱི་ཆ་ལ་རྡོ་རྗེ་རུལ་པ་མོ་དང་། རྡོ་རྗེ་ཆུ་སྲིན་མོ་བྲི་བར་བྱའོ། །དེ་ཉིད་ཀྱི་དཀྱིལ་འཁོར་གཉིས་པ་མེའི་མཚམས་ཀྱི་ཆ་ལ་འཇིགས་མ། བདེན་བྲལ་དུ་དཔལ་མོ། རླུང་དུ་དབྱངས་ཅན་མ། དབང་ལྡན་དུ་དཀའ་བཟློག་མ་བྲི་བར་བྱའོ། །དཀྱིལ་འཁོར་དེ་ཉིད་ཀྱི་
[5a.2]སྒོའི་དབུས་སུ་རྡོ་རྗེ་འཇུ་མ་དང་། རྡོ་རྗེ་ཟ་བ་མའོ། །ཕྱི་རོལ་གྱི་དཀྱིལ་འཁོར་གྱི་ལྷའི་སྣམ་བུའི་ཤར་ཕྱོགས་ཀྱི་དབུས་ཀྱི་ཆ་ལ་རྡོ་རྗེ་ཧཱུཾ་མཛད། དེའི་བྱང་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་སེམས་དཔའ་དང་། ཁྲོ་བོ་རྡོ་རྗེ་རྒྱལ་པོའོ། །རྡོ་རྗེ་ཧཱུཾ་མཛད་དེ་ཉིད་ཀྱི་ལྷོ་ཕྱོགས་ཀྱི་ཆ་ལ་ཁྲོ་བོ་རྡོ་རྗེ་ཆགས་
[5a.3]པ་དང་། ཁྲོ་བོ་རྡོ་རྗེ་ལེགས་པ་བྲིའོ། །དཀྱིལ་འཁོར་དེ་ཉིད་ཀྱི་ལྷོ་ཕྱོགས་ཀྱི་ཆ་ལ་རིན་ཆེན་ཧཱུཾ་མཛད་དང་། དེའི་ཤར་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་རིན་ཆེན་དང་། ཁྲོ་བོ་རྡོ་རྗེ་ཉི་མའོ། །དེ་ཉིད་ཀྱི་ནུབ་ཕྱོགས་ཀྱི་ཆ་ལ་ཁྲོ་བོ་རྡོ་རྗེ་དཔལ་དང་། ཁྲོ་བོ་རྡོ་རྗེ་བཞད་པའོ། །ནུབ་ཕྱོགས་ཀྱི་ལྷའི་
[5a.4]སྣམ་བུའི་དབུས་ཀྱི་ཆ་ལ་ཆོས་ཀྱི་ཧཱུཾ་མཛད། དེའི་གཡས་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་ཆོས་དང་། ཁྲོ་བོ་རྡོ་རྗེ་རྣོན་པོའོ། །དེ་ཉིད་གཡོན་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་རྒྱུ་དང་། ཁྲོ་བོ་རྡོ་རྗེ་སྲུང་བའོ། །དེའི་བྱང་ཕྱོགས་ཀྱི་ལྷའི་སྣམ་བུའི་དབུས་ཀྱི་ཆ་ལ་ལས་ཀྱི་ཧཱུཾ་མཛད། དེའི་
[5a.5]གཡས་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་ལས་དང་། ཁྲོ་བོ་རྡོ་རྗེ་སྲུང་བའོ། །དེའི་གཡོན་ཕྱོགས་ཀྱི་ཆ་ལ་ཁྲོ་བོ་རྡོ་རྗེ་གནོད་སྦྱིན་དང་། ཁྲོ་བོ་རྡོ་རྗེ་ཁུ་ཚུར་བྲི་བར་བྱའོ། །ཕྱིའི་དཀྱིལ་འཁོར་དེ་ཉིད་ཀྱི་མེའི་མཚམས་ཀྱི་ཆ་ལ། རྡོ་རྗེ་བདུག་པ་མ་དང་། འཇིགས་མའི་མཚན་མའི་ཕྱག་རྒྱ་བྲི་
[5a.6]བར་བྱའོ། །བདེན་བྲལ་དུ་རྡོ་རྗེ་མེ་ཏོག་མ་དང་། ལྷ་མོ་དཔལ་མོའི་མཚན་མའི་ཕྱག་རྒྱའོ། །རླུང་དུ་རྡོ་རྗེ་མར་མེ་དང་། དབྱངས་ཅན་མའི་མཚན་མའི་ཕྱག་རྒྱའོ། །དབང་ལྡན་གྱི་མཚམས་ཀྱི་ཆ་ལ་རྡོ་རྗེ་དྲི་མ་དང་། དཀའ་བཟློག་མའི་མཚན་མའི་ཕྱག་རྒྱ་བྲི་བར་བྱའོ། །ཕྱིའི་དཀྱིལ་འཁོར་གྱི་སྒོའི་
[5a.7]དབུས་སུ་རྡོ་རྗེ་སྒོ་བ་མ་དང་། རྡོ་རྗེ་དབང་མོ་དག་བྲི་བར་བྱའོ། །དེ་ལ་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོར་བཤད་པའི་ཕྱག་རྒྱ་ཆེན་པོ། འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་ལས་
[5b]
[5b.1]བཤད་པའི་རིག་པ་རྣམས་ཀྱིས་བྲི་བར་བྱའོ། །ཁྲོ་བོ་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་དྲིལ་བུའི་མཐར་ཐུག་པ་བྲི་བར་བྱའོ། །སྒེག་མོ་ལ་སོགས་པ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་ཕྱག་རྒྱ་ཆེན་པོའི་སྔགས་ཀྱིས་བྲི་བར་བྱའོ། །
[5b.2]རྡོ་རྗེ་རིག་པ་མཆོག་ལ་སོགས་པ་ནས་རྡོ་རྗེ་ཆུ་སྲིན་གྱི་མཐར་ཐུག་པ་ནི། འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་དུ་བཤད་པའི་ཕྱག་རྒྱ་ཆེན་པོའི་རིག་པ་རྣམས་ཀྱིས་བྲི་བར་བྱའོ། །འཇིགས་མ་ལ་སོགས་པའི། ཨོཾ་སརྦྦ་བཛྲ་ག་མི་ནི་སརྦྦ་བ་ཀྵེ་སཱ་དྷ་ཡ་གུ་ཧྱ་བཛྲི་ཎི་ཧཱུཾ་ཞེས་བྱ་བ་ནི།
[5b.3]འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་མ་མོ་ཐམས་ཅད་ཀྱི་སྤྱིའི་རིག་པ་ཡིན་ནོ། །དེ་ལྟར་དཀྱིལ་འཁོར་བྲིས་ནས། རྡོ་རྗེ་ཧཱུཾ་མཛད་ཀྱི་རྣལ་འབྱོར་པས། ཁྲོ་བོ་ཏི་རཱི་ནྟི་རིའི་ཕྱག་རྒྱ་བཅིངས་ནས། དེས་མེ་ཏོག་གི་ཕྲེང་བ་བླངས་ཏེ། རྡོ་རྗེ་ཤུགས་ཀྱིས་
[5b.4]ཞུགས་ལ། ཧཱུཾ་བཞི་བརྗོད་ཅིང་དཀྱིལ་འཁོར་དུ་ཞུགས་ནས་ལན་བདུན་བསྐོར་བ་བྱས་ཏེ། ལྷག་པ་དང་མ་ཚང་བའི་ཉེས་པ་ཞི་བར་བྱ་བའི་ཕྱིར། རྡོ་རྗེ་དྲིལ་བུ་དཀྲོལ་ཞིང་བལྟ་བར་བྱའོ། །དེ་ནས་བཅོམ་ལྡན་འདས་རྡོ་རྗེ་ཧཱུཾ་མཛད་ལ་མེ་ཏོག་གི་ཕྲེང་བ་ཕུལ་ནས་གར་བྱས་ཏེ་བླངས་ལ་རང་གི་སྤྱི་
[5b.5]བོར་བཅིང་བར་བྱའོ། །དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་སྒོ་དབྱེ་བའི་ཕྱག་རྒྱས་དཀྱིལ་འཁོར་གྱི་སྒོ་གཉིས་ཀ་དབྱེ་བར་བྱའོ། །སྙིང་པོ་ནི་འདི་ཡིན་ཏེ། ཨོཾ་བཛྲ་ཨུཏྒྷ་ཊ་ཡ་ས་མ་ཡ་པྲ་བེ་ཤ་ཤཱི་གྷྲཾ་སྨ་ར་བཛྲ་ས་མ་ཡ་ཧཱུཾ་ཕཊ། དེ་ནས་བུམ་
[5b.6]པ་གཞུག་པ་ལ་སོགས་པའི་ཆོ་ག་རྗེས་སུ་སྤྱད་ནས། སློབ་དཔོན་གྱིས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པའི་རང་ཉིད་འཇུག་པའི་ཆོ་ག་དང་། སློབ་མ་འཇུག་པ་ལ་སོགས་པའི་ཆོ་གའི་ཚུལ་དུ་རྗེས་སུ་སྤྱད་པས་དེ་ནས་བདག་ལ་བྱིན་གྱིས་བརླབ་པ་ལ་སོགས་པ་ཇི་ལྟ་བ་བཞིན་དུ་བྱས་
[5b.7]ཏེ། དཀྱིལ་འཁོར་རྡོ་རྗེས་བསྒྲུབ་པར་བྱའོ། །དེ་ནས་བསྡུ་བ་བྱས་ལ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ཀྱི་མཚན་བརྒྱ་རྩ་བརྒྱད་པས་བཅོམ་ལྡན་འདས་རྡོ་རྗེ་ཧཱུཾ་མཛད་ལ་བསྟོད་པར་བྱའོ། །དེ་ནས་ཞེས་བྱ་བ་ནི། དེ་མ་ཐག་པ་སྟེ།
[6a]
[6a.1]མཚན་བརྒྱ་རྩ་བརྒྱད་པས་བསྟོད་པའི་རྗེས་ཐོགས་ལ་ཞེས་བྱ་བའི་དོན་ཏོ། །འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་འདིར་དགུག་པ་ལ་སོགས་པའི་ལས་བྱས་ནས་ཞེས་བྱ་བ་ནི། དེ་ལ་འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་
[6a.2]བཤད་པའི་ཁྲོ་བོ་རྡོ་རྗེ་ལྕགས་ཀྱུའི་ལས་ཀྱི་ཕྱག་རྒྱས་དགུག་པའི་ལས་ནི། །དེ་ཉིད་དང་པོར་བྱས་པའི་དགུག་པ་ལ་སོགས་པ་ལས་གང་ཡིན་པ་དེ་བྱེད་པའོ། །འདི་སྐད་སྟོན་པ་ཡིན་ཏེ། ཇི་སྐད་བཤད་པའི་ཁྲོ་བོ་རྡོ་རྗེ་ལྕགས་ཀྱུའི་ལས་ཀྱི་ཕྱག་རྒྱས་རྡོ་རྗེ་ཧཱུཾ་མཛད་ལ་སོགས་པ་དགུག་པ་དང་།
[6a.3]དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་ཞགས་པའི་ཕྱག་རྒྱས་དཀྱིལ་འཁོར་དུ་གཞུག་པ་དང་། ལྕགས་སྒྲོག་གི་ཕྱག་རྒྱས་བཅིང་བ་དང་། འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་ཁྲོ་
[6a.4]བོ་རྡོ་རྗེ་འབེབས་པའི་ལས་ཀྱི་ཕྱག་རྒྱས་དབང་དུ་བྱའོ། །དེ་ནས་ཁྲོ་བོ་རྡོ་རྗེ་གནོད་སྦྱིན་ཀྱིས་བགེགས་བསྐྲད་ལ། ཁྲོ་བོ་རྡོ་རྗེ་ཁུ་ཚུར་གྱིས་སྒོ་བཅད་ནས། ཁྲོ་བོ་རྡོ་རྗེ་གོ་ཆས་བསྲུང་བ་ཐམས་ཅད་ཡང་དག་པར་བསྲུང་བར་བྱའོ། །དེ་ནས་རྡོ་རྗེ་ཧཱུཾ་མཛད་ཀྱིས་མཆོད་ཡོན་ཕུལ་ལ། རང་གི་དམ་
[6a.5]ཚིག་གི་ཕྱག་རྒྱས་རྡོ་རྗེ་ཧཱུཾ་མཛད་ལ་སོགས་པ་ཐམས་ཅད་སྔ་མ་བཞིན་དུ་བསྒྲུབས་ལ། དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། དབང་བསྐུར་ནས་ཕྱི་རོལ་གྱི་མཆོད་པ་དང་རྡོ་རྗེ་སྒེག་མོ་ལ་སོགས་པ་མཆོད་པ་རྣམ་པ་བརྒྱད་དང་། རྡོ་རྗེ་གསེར་ལ་སོགས་པ་ལས་ཀྱི་
[6a.6]ཕྱག་རྒྱ་རྣམས་ཀྱིས་ལས་ཀྱི་དཀྱིལ་འཁོར་ཐམས་ཅད་ཡང་དག་པར་མཆོད་ལ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། སློབ་མ་གཞུག་པའི་གནང་བ་ནོད་པར་བྱའོ། །དེ་ནས་སྔ་མ་བཞིན་དུ་སློབ་མ་ལ་ཕྱག་བཞི་བྱེད་དུ་བཅུག་ལ། རྡོ་རྗེ་ཧཱུཾ་མཛད་དུ་བྱིན་གྱིས་བརླབས་ཏེ། རྡོ་རྗེ
[6a.7]ཧཱུཾ་མཛད་ཡོངས་སུ་བཟླས་པའི་ཕྱི་རོལ་ན་གནས་པའི་ཆུས་དབང་བསྐུར་རོ། །རྡོ་རྗེ་འཆང་བའི་ལས་ཀྱི་དམ་ཚིག་གི་ཕྱག་རྒྱ་ཇི་ལྟ་བ་བཞིན་དུ་བཅིངས་ཏེ་ཞེས་བྱ་བ་ནི། དེ་ལྟར་དབང་བསྐུར་ནས་སློབ་དཔོན་རང་ཉིད་རྡོ་རྗེ་འཆང་བའི་སྔར་བཤད་པའི་མཚན་ཉིད་ཅན་བཅིངས་ལ། སློབ་མ་ཡང་འཆིང་
[6b]
[6b.1]དུ་གཞུག་གོ། །འདིའི་སྙིང་པོ་ནི། ཨོཾ་སརྦྦ་ཏ་ཐཱ་ག་ཏ་བཛྲ་དྷཱ་ར་གྲྀ་ཧྞ་ས་མ་ཡ་ཧཱུཾ། འདི་སྐད་དུ་སྨྲོས་ཤིག །ཁྱོད་ཀྱིས་ལྷའི་རིགས་མ་མཐོང་བ་དང་། ལས་མི་ཤེས་པ་སུ་ལ་ཡང་གསང་བའི་ལས་འདི་མ་སྨྲ་ཤིག་ཅེས་བྱ་བ་ལས་མི་ཤེས་པའི་ལས་ཀྱི་དཀྱིལ་འཁོར་དུ་མ་ཞུགས་པས།
[6b.2]ལས་ཀྱི་དཀྱིལ་འཁོར་མ་མཐོང་བ་ལས་མི་ཤེས་པ་ཞེས་བརྗོད་དོ། །འདིར་འཆད་པར་འགྱུར་བའི་ལས་ཀྱི་དཀྱིལ་འཁོར་ལས་བཤད་པའི་གསང་བ་དེ་ཐམས་ཅད་བརྗོད་པར་མི་བྱའོ། །ཁྱོད་དམ་ཚིག་ཉམས་པར་གྱུར་ཏ་རེ་ཞེས་བྱ་བ་ནི་གཟིར་བར་འགྱུར་བའོ། །དེ་ནས་ཡོན་གྱི་མཆོག་
[6b.3]བླངས་ལ། རྡོ་རྗེ་འཛིན་མའི་ཕྱག་རྒྱས་མེ་ཏོག་གི་ཕྲེང་བ་འཛིན་དུ་བཅུག་སྟེ། རྡོ་རྗེ་སློབ་དཔོན་རང་གི་ལས་ཀྱི་རྡོ་རྗེ་འཛིན་པའི་དམ་ཚིག་གི་ཕྱག་རྒྱ་བཅིངས་ཏེ་ཞེས་བྱ་བ་ནི། སློབ་དཔོན་རང་ཉིད་ཀྱིས་ལས་ཀྱི་དཀྱིལ་འཁོར་གྱི་རྡོ་རྗེ་འཛིན་མའི་དམ་ཚིག་གི་ཕྱག་རྒྱ་ཇི་ལྟ་བ་བཞིན་དུ་བཅིངས་ཏེ།
[6b.4]ཁྲོ་བོའི་ལྟ་བས་བལྟ་ཞིང་སློབ་མ་ལ་དབབ་པར་བྱའོ། །སློབ་མ་འདི་སྐད་བརྗོད་དུ་གཞུག་གོ། །ཨོཾ་བཛྲ་ཛིརྱ་ཞེས་བྱ་བ་ལ་སོགས་པ་དེས་འབབ་པར་འགྱུར་རོ། །ཡང་བབས་ན། བདག་ཉིད་ཀྱིས་འཇུག་པར་བྱ་སྟེ། རྡོ་རྗེ་ཤུགས་ཀྱི་སྙིང་པོ་འདིས་འཇུག་པར་བྱའོ། །ཨོཾ་པྲ་བེེ་ཤ་
[6b.5]བཛྲ་པྲ་བེ་ཤ་བཛྲ་ཨཱ་བེ་ཤ་བཛྲ་ཨ་དྷི་ཏིཥྛ་བཛྲ་ཧཱུཾ། གལ་ཏེ་སྔ་མའི་འཇུག་པས་བྱའོ་ཞེ་ན། མ་ཡིན་ཏེ་དབབ་པ་ཙམ་ཡིན་པའི་ཕྱིར་རོ། །འདི་ཉིད་ཀྱིས་བབས་ནས་འཇུག་པར་བྱའོ། །དེ་ནས་སྔ་མ་བཞིན་དུ་རྡོ་རྗེ་ལྕགས་ཀྱུ་ལ་སོགས་པ་རྣམས་ཀྱིས་དགུག་པ་དང་། གཞུག་པ་དང་།
[6b.6]བཅིང་བ་དང་། དབང་དུ་བྱའོ། །ཕྱག་རྒྱ་དང་ལྡན་གྱི་ཕྱག་རྒྱ་རྣམས་ཀྱི་གར་གྱི་མཆོད་པས་མཆོད་པར་བྱའོ་ཞེས་བྱ་བ་ནི་བབས་པའི་མཐུས་མ་བརླབས་པའི་སློབ་མ་རྣམས་ཀྱང་རྡོ་རྗེ་གསེར་གྱི་ཕྱག་རྒྱ་འཆིང་བ་དང་། དེ་ནས་དེ་བཀྲོལ་ན་རྡོ་རྗེ་ཆུ་སྲིན་གྱི་ཕྱག་རྒྱ་འཆིང་བ་དང་། དེ་བཞིན་དུ་རྡོ་རྗེ་
[6b.7]བཟའ་བ་མའི་བར་གྱི་ཕྱག་རྒྱ་བཅིངས་ཏེ། དེ་ནས་དེ་བཀྲོལ་ལ་རྡོ་རྗེ་སྒོ་བ་མའི་ཕྱག་རྒྱ་བཅིང་བར་བྱའོ། །དེ་ལྟར་ན་དེ་ནི་ཕྱག་རྒྱ་དང་ལན་གྱི་ཕྱག་རྒྱ་རྣམས་ཀྱིས་གར་གྱི་མཆོད་པས་མཆོད་པ་ཡིན་ནོ། །དེ་ལྟར་བྱས་པར་གྱུར་ན་དེས་ཅི་ཞིག་ཏུ་འགྱུར་ཞེ་ན་དེང་ཕྱིན་ཆད་ཅེས་བྱ་བ་སྨོས་ཏེ།
[7a]
[7a.1]དེང་ནས་བརྩམས་ཏེ། ལས་ཐམས་ཅད་ཀྱི་རྡོ་རྗེ་གསེར་ལ་སོགས་པའི་ལས་བྱེད་པར་འགྱུར་རོ། །གང་རྣམས་ཀྱིས་བྱེད་པར་འགྱུར་ཞེ་ན། ལུས་དང་ངག་དང་ལྟ་བ་དང་ཡིད་དང་། རྡོ་རྗེའི་ཕྱག་རྒྱ་རྣམས་ཀྱིས་ཞེས་བྱ་བ་སྨོས་ཏེ། དེ་ལ་ལུས་ཀྱི་ཕྱག་རྒྱ་ནི་རྡོ་རྗེ་
[7a.2]ཧཱུཾ་མཛད་ལ་སོགས་པ་དང་། རྡོ་རྗེ་རིག་པ་དམ་པ་ལ་སོགས་པ་རྣམས་ཀྱི་ཕྱག་རྒྱ་ཆེན་པོའོ། །ངག་གི་ཕྱག་རྒྱ་ནི་དེ་དག་གི་རིག་པའོ། །ལྟ་བའི་ཕྱག་རྒྱ་ནི་ཁྲོ་བོའི་ལྟ་བའོ། །ཡིད་ཀྱི་ཕྱག་རྒྱ་ནི་སྒོམ་པའོ། །རྡོ་རྗེའི་ཕྱག་རྒྱ་ནི་རྡོ་རྗེ་འབར་བ་ལ་སོགས་པ་ནས། ཀླུའི་རྡོ་རྗེ་ཀླུའི་ཞགས་
[7a.3]པའི་ཕྱག་རྒྱའི་མཚན་མའི་ཕྱག་རྒྱའོ། །དེར་འདོད་པ་ཞེས་བྱ་བ་ནི། བསམ་པ་ཉིད་ཀྱིས་བྱེད་པ་སྟེ། འདི་ནི་ཕན་ཡོན་བཤད་པ་ཡིན་ནོ། །དེ་ནས་ཡང་གདོང་གཡོགས་པ་བཀྲོལ་ཏེ་ཞེས་བྱ་བ་ནི། དེ་ནས་དུས་ཕྱིས་གདོང་གཡོགས་བཀྲོལ་པར་བྱའོ། །བཀྲོལ་ནས་དངོས་གྲུབ་ཀྱི་རྡོ་རྗེ་
[7a.4]བརྟུལ་ཞུགས་ཀྱི་བར་གྱི་དབང་བསྐུར་བར་བྱའོ། །དེའི་དོན་ནི་འདི་སྐད་སྟོན་པ་ཡིན་ཏོ། །དེ་ལྟར་གར་བྱ་ཞིང་མཆོད་པ་བྱས་ན་ཡང་། དེ་ནས་སློབ་མ་དེ་ལ་སློབ་དཔོན་གྱིས་འདི་སྐད་ཅེས་བརྗོད་དོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རིགས་སུ་ཞུགས་ཀྱིས། ངས་ཁྱོད་ལ་
[7a.5]ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རིགས་ཀྱི་གྲུབ་པ་ཡང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། ཁྱོད་ཀྱིས་ལས་ཀྱི་དཀྱིལ་འཁོར་མ་མཐོང་བ་རྣམས་ལ་མ་སྨྲ་ཤིག །དམ་ཚིག་ཉམས་པར་གྱུར་ཏ་རེ། དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ་འདི་
[7a.6]སྐད་ཅེས་བརྗོད་དོ། །ཁྱོད་ཀྱིས་ལྷའི་རིགས་མ་མཐོང་བ་དང་ལས་མི་ཤེས་པ་སུ་ལ་ཡང་གསང་བའི་ལས་འདི་མ་སྨྲ་ཤིག་ཁྱོད་དམ་ཚིག་ཉམས་པར་གྱུར་ཏ་རེ་ཞེས་བྱའོ། །དེ་ནས་རྡོ་རྗེ་སློབ་དཔོན་རང་ཉིད་རྡོ་རྗེ་འཛིན་མའི་ཕྱག་རྒྱ་ཁ་ཐུར་དང་། གྱེན་དུ་བསྟན་པ་བཅིངས་ཏེ། སློབ་མའི་སྤྱི་བོར་
[7a.7]བཞག་ལ་འདི་སྐད་ཅེས་བརྗོད་དོ། །འདི་ནི་ཁྱོད་ཀྱི་དམ་ཚིག་རྡོ་རྗེ་ཡིན་གྱིས། གལ་ཏེ་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་། མནའི་ཆུ་སྙིང་པོས་སྔགས་ལ། སློབ་མ་དེ་འཐུང་དུ་གཞུག་གོ། །དེ་ལ་མནའི་སྙིང་པོ་ནི་འདི་ཡིན་ཏེ། རྡོ་རྗེ་
[7b]
[7b.1]སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ཨུ་ཏ་ཀ་ཋ་ཞེས་བྱ་བའི་ཚུལ་གྱིས་སོ། །དེ་ནས་སློབ་མ་ལ་འདི་སྐད་བསྒོ་ཤིག །དེང་ཕྱིན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས་ངས་འདི་བྱོས་ཤིག་
[7b.2]ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པ་མ་བྱེད་ཅིག །མི་བདེ་བ་མ་སྤངས་པས་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་སྨྲས་ལ། འདི་སྐད་དུ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་ལ། རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་
[7b.3]སྨྲོས་ཤིག་ཅེས་བསྒོའོ། །དེ་ནས་དེ་རྡོ་རྗེ་འབེབས་པའི་ཕྱག་རྒྱ་དང་། བཛྲ་ཨཱ་བེེ་ཤ་ཨཿཞེས་བྱ་བའི་སྙིང་པོ་འདིས་དབབ་པ་བསྐྱེད་པར་བྱའོ། །དེ་ནས་མེ་ཏོག་དོར་རོ། །སྙིང་པོ་ནི་འདི་ཡིན་ཏེ། ཨོཾ་པྲ་ཏཱིཙྪ་ཨ་དྷི་ཏིཥྛ་བཛྲ་ཧོ། །དེ་ནས་མེ་ཏོག་གི་ཕྲེང་བ་བླངས་ལ་སྤྱི་བོར་བཅིང་བར་བྱའོ། །སྙིང་པོ་ནི་
[7b.4]འདི་ཡིན་ཏེ། ཨོཾ་པྲ་ཏི་གྲྀཧྞ་སྟཱཾ་མི་མཾ་སཏྭ་མ་ཧཱ་བ་ལ། དེ་ནས་དེ་བཞིན་དུ་གདོང་གཡོགས་དགྲོལ་ལོ། །སྙིང་པོ་ནི་འདི་ཡིན་ཏེ། ཨོཾ་རྡོ་རྗེ་སེམས་དཔའ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །རྡོ་རྗེའི་མིག་ནི་བླ་མེད་པ། །ཐམས་ཅད་མིག་ནི་དེང་འབྱེད་ཤོག །ཧེ་བཛྲ་པཱ་ཤྱ། །དེ་ནས་སྒོ་
[7b.5]སྲུང་ནས་བརྩམས་ནས། རིག་པ་དམ་པའི་བར་དུ་དཀྱིལ་འཁོར་བསྟན་ཏོ། །དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ། དེ་སྙིང་གར་བཀྲོལ་དུ་གཞུག་གོ། །ཏིཥྛ་བཛྲ་དྲྀ་ཌྷོ་མེ་བྷཱ་བ་ཤཱ་ཤྭ་ཏོ་མེ་བྷ་བ། ཧྲྀ་ད་ཡ་མེ་ཨ་དྷི་ཏི་ཥྛ་སརྦྦ་སི་དྡྷི་མྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོ། །དེ་ནས་ཆུའི་དབང་བསྐུར་
[7b.6]བར་བྱའོ། །འདིའི་སྙིང་པོ་ནི། ཨོཾ་བཛྲ་ཨ་བྷི་ཥེ་ཀ་ཨ་བྷི་ཥིཉྩ་བཛྲ་དྷ་ར་ཏྲི་ས་མ་ཡ་གྲ་གྲ། དེ་ནས་རྡོ་རྗེ་དབྱིངས་སུ་བཤད་པའི་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ལ་སྔར་བཤད་པའི་རྡོ་རྗེ་རྩེ་གསུམ་པ་ལ་སོགས་པའི་སྙིང་པོས་རྡོ་རྗེ་རིག་པ་དམ་པ་ལ་སོགས་པ་ལ་བྱིན་ལ། མིང་གིས་དབང་བསྐུར་
[7b.7]བར་བྱའོ། །རྡོ་རྗེ་ཧཱུཾ་མཛད་ལ་སོགས་པས་དབང་བསྐུར་པ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་དུ་བཤད་པའི་ལས་ཀྱི་ཆོ་ག་བྱའོ། །དེ་ལྟར་སློབ་དཔོན་གྱིས་ལས་ཀྱི་ཆོ་ག་དང་། སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་འཇིག་རྟེན་གསུམ་གྱི་
[8a]
[8a.1]འཁོར་ལོའི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་འཇིག་རྟེན་གསུམ་གྱི་དཀྱིལ་འཁོར་ཆེན་པོ་ལས་བཤད་པའི་རྣལ་འབྱོར་དང་ཕྱིའི་རྡོ་རྗེ་རིགས་ཀྱི་བཟླས་པ་བྱས་ཏེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་
[8a.2]བཅིང་པའམ་རྡོ་རྗེ་ཆེན་པོའི་རིགས་ཀྱི་རྣལ་འབྱོར་པས། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བསྟན་པའི་ཕྱིར་གར་གྱི་མཆོད་པའི་ཕྱག་རྒྱའི་ཡེ་ཤེས་སློབས་ཤིག་ཅེས་གསུངས་སོ། །གར་གྱི་
[8a.3]མཆོད་པ་ནི་གར་གྱི་མཆོད་པ་སྟེ། འདིར་ཕྱག་རྒྱ་བཅིངས་པའི་ཡེ་ཤེས་ཏེ་སློབས་ཤིག་པར་བསྟན་པའོ། །སངས་རྒྱས་རྡོ་རྗེ་འཛིན་སོགས་ཀྱི། །དམ་ཚིག་ཕྱག་རྒྱ་གཉིས་བྱས་ཏེ། །ཞེས་བྱ་བ་ནི། དེ་ལ་སངས་རྒྱས་ནི་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་
[8a.4]དོ། །རྡོ་རྗེ་འཛིན་ནི་ཁྲོ་བོ་རྡོ་རྗེ་སེམས་དཔའོ། །སོགས་པ་སྨོས་པ་ནི། རྡོ་རྗེ་རྒྱལ་པོ་ནས་བརྩམས་ནས། རྡོ་རྗེ་སྒེག་མོ་ལ་སོགས་པའི་མཆོད་པ་བརྒྱད་ཀྱི་མཐར་ཐུག་པའི་བར་དུ་འདིར་གཟུང་བར་བྱའོ། །སངས་རྒྱས་རྡོ་རྗེ་འཛིན་པ་རྣམས་ནི་སངས་རྒྱས་རྡོ་རྗེ་འཛིན་པ་སྟེ། དེ་དང་པོར་བྱས་པ་མ་
[8a.5]ཡིན་པ་དེ་ནི་སངས་རྒྱས་རྡོ་རྗེ་འཛིན་སོགས་ཀྱིའོ། །དེ་དག་སངས་རྒྱས་རྡོ་རྗེ་འཛིན་སོགས་ཀྱིས་ཞེས་བྱ་བར་སྦྱར་རོ། །དམ་ཚིག་མཆོག་ནི་གཉིས་སུ་བྱ། །ཞེས་བྱ་བ་ནི། མཆོད་པའི་ཕྱག་རྒྱར་གྱུར་པའོ། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་འཇིག་རྟེན་
[8a.6]གསུམ་ལས་རྣམ་པར་རྒྱལ་བ་ལ་སོགས་པའི་དམ་ཚིག་གི་ཕྱག་རྒྱ་ནས་རྡོ་རྗེ་དྲིའི་དམ་ཚིག་གི་ཕྱག་རྒྱའི་མཐར་ཐུག་པའི་དམ་ཚིག་མཆོག་ཅེས་བརྗོད་དོ། །སངས་རྒྱས་དང་རྡོ་རྗེ་འཛིན་པ་གཉིས་སུ་བྱས་པས་ལས་ཀྱི་དཀྱིལ་འཁོར་འདི་རུ་དེ་དག་གི་མཆོད་པའི་ཕྱག་རྒྱར་འགྱུར་རོ། །དེ་
[8a.7]རྣམས་ཀྱིས། །ལས་ཀྱི་དཀྱིལ་འཁོར་མཆོད་པར་བྱ། །ཞེས་བྱ་བར་སྦྱར་རོ། །རྡོ་རྗེ་ལཱ་སྱ་ལ་སོགས་མཆོད། །རྡོ་རྗེ་རིག་པ་དམ་པ་སྟེ། ཞེས་བྱ་བ་ནི། རྡོ་རྗེའི་སྒྲ་ནི་ངེས་པར་གཟུང་བའོ། །རྡོ་རྗེ་སྒེག་མོ་ལ་སོགས་ནི། །གསང་བའི་མཆོད་པའི་ཕྱག་རྒྱའོ། །རྡོ་རྗེ་རིག་པ་དམ་པ་སྟེ། །ཞེས་བྱ་
[8b]
[8b.1]བ་ནི། ཕྱག་རྒྱ་ལྷག་མ་རྣམས་སོ། །ལྷ་ཐམས་ཅད་མཆོད་པ་བྱེད་པ་ཡིན་ནོ་ཞེས་བསྟན་ཏོ། །རིག་པ་འདི་རྣམས་ཐམས་ཅད་ཀྱང་། །ཞེས་བྱ་བ་ནི་རྡོ་རྗེ་གསེར་ནས་བརྩམས་ནས། རྡོ་རྗེ་ཆུ་སྲིན་གྱི་བར་དུ་གར་གྱིས་མཆོད་པར་བྱེད་པའི་རིག་པ་རྣམས་ཡིན་ནོ་ཞེས་བྱ་བར་སྦྱར་རོ། །ལས་ཀྱི་དཀྱིལ་
[8b.2]འཁོར་མཆོད་པར་བྱ། །ཇི་ལྟར་མཆོད་པར་བྱ་ཞེ་ན། །ལྟག་འོག་གོ་རིམས་ཇི་བཞིན་དུ། །ཞེས་བྱ་བ་སྨོས་ཏེ། སློབ་མའམ་གཞན་ཡང་རུང་བ་རྡོ་རྗེ་གསེར་ལ་སོགས་པ་བྱེད་པ་ན། སློབ་དཔོན་གྱིས་རྡོ་རྗེ་ཆུ་སྲིན་བཅིང་བར་བྱའོ། །དེ་བཞིན་དུ་རྡོ་རྗེ་ཟ་བ་འཆིང་བར་བྱེད་པ་ན་སློབ་དཔོན་
[8b.3]གྱིས་རྡོ་རྗེ་སྒོ་བ་མོ་བཅིང་བར་བྱའོ་ཞེས་བྱ་བ་ནི། ལྟག་འོག་གོ་རིམས་ཇི་བཞིན་དུ། །ཞེས་བྱ་བ་ནི་སྒྲའི་དོན་ཡིན་ནོ། །སངས་རྒྱས་རྡོ་རྗེ་འཛིན་སོགས་ཀྱི། །དམ་ཚིག་མཆོག་ནི་གཉིས་སུ་བྱ། །མཆོད་པའི་ཕྱག་རྒྱར་འདིར་འགྱུར་རོ། །ཞེས་བཤད་པ་དེ་ནི་མི་ཤེས་ཏེ། ཇི་ལྟར་གཉིས་སུ་
[8b.4]བྱས་ནས་མཆོད་པའི་ཕྱག་རྒྱར་འགྱུར་རོ་ཞེ་ན། དེ་བཤད་པ་ནི། རྡོ་རྗེ་གར་གྱི་ཚུལ་གྱིས་ནི། །ཕྱག་རྒྱ་ཆེན་པོ་མདོར་བསྡུས་སོ། །ཞེས་བྱ་བ་སྨོས་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་སྔགས་བརྗོད་ཅིང་། འཇིག་རྟེན་གསུམ་ལས་
[8b.5]རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་གར་བྱའོ། །དམ་ཚིག་མཆོག་ནི་གཉིས་བྱས་ཏེ། ཞེས་བྱ་བ་ནི། ཕྱག་རྒྱ་ཆེན་པོ་མདོར་བསྡུས་པ་དེ་དག་གོ། །རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་རྣམས་ཀྱིས་འཇིག་རྟེན་གསུམ་གྱི་འཁོར་ལོའི་ལས་ཀྱི་
[8b.6]དཀྱིལ་འཁོར་ལས་བཤད་པའི་རང་གི་རིག་པ་བརྗོད་ཅིང་དམ་ཚིག་གི་ཕྱག་རྒྱ་གཉིས་སུ་བྱའོ། །ལན་གྱི་ཕྱག་རྒྱ་དགྲོལ་པར་བྱ། །ཞེས་བྱ་བ་ནི། ཁྲོ་བོ་རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་གཉིས་སུ་བྱས་ནས་གང་གི་ཚེ་སློབ་མའམ། གཞན་ཡང་རུང་བ་མཆོད་པ་བྱེད་པར་འགྱུར་བ་དེའི་ཚེ་སློབ་དཔོན་
[8b.7]གྱིས་ཁྲོ་བོ་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་གཉིས་སུ་བྱས་ཏེ། ལས་ཀྱི་དཀྱིལ་འཁོར་མཆོད་པར་བྱའོ། །དེ་ལྟར་ཁྲོ་བོ་རྡོ་རྗེ་བཞད་པའི་དམ་ཚིག་གི་ཕྱག་རྒྱ་གཉིས་སུ་བྱས་ནས། གང་གི་ཚེ་འགའ་ཞིག་གི་ལས་ཀྱི་དཀྱིལ་འཁོར་ལ་མཆོད་པ་བྱེད་པ་དེའི་ཚེ། སློབ་དཔོན་གྱིས་ཁྲོ་བོ་རྡོ་རྗེ་ཆོས་ཀྱི་
[9a]
[9a.1]དམ་ཚིག་གི་ཕྱག་རྒྱ་གཉིས་སུ་བྱས་ནས། ལས་ཀྱི་དཀྱིལ་འཁོར་ལ་མཆོད་པར་བྱའོ། །གང་གི་ཚེ་འགའ་ཞིག་གིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཉིས་སུ་བྱས་ནས་མཆོད་པ་བྱེད་པ་དེའི་ཚེ་སློབ་དཔོན་གྱིས་ལས་ཀྱི་ཧཱུཾ་མཛད་ཀྱི་ཕྱག་རྒྱ་གཉིས་སུ་བྱའོ། །གང་གི་ཚེ་རིན་ཆེན་ཧཱུཾ་མཛད་
[9a.2]ཀྱི་དམ་ཚིག་གི་ཕྱག་རྒྱ་བྱེད་པ་དེའི་ཚེ་སློབ་དཔོན་གྱིས་ཆོས་ཀྱི་ཧཱུཾ་མཛད་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ནས། ལས་ཀྱི་དཀྱིལ་འཁོར་ལ་མཆོད་པ་བྱའོ། །གང་གི་ཚེ་རྡོ་རྗེ་གསེར་གྱི་ཕྱག་རྒྱ་བྱེད་པ་དེའི་ཚེ། རྡོ་རྗེ་ཆུ་སྲིན་གྱི་ཕྱག་རྒྱ་བསྟན་པར་བྱའོ། །དེ་བཞིན་དུ་གང་གི་ཚེ་འགའ་ཞིག་རྡོ་རྗེ་ཟབ་
[9a.3]མོ་འཆིང་བ་དེའི་ཚེ། སློབ་དཔོན་གྱིས་རྡོ་རྗེ་སྒོ་བ་མའི་བར་དུ་ཕྱག་རྒྱ་བསྟན་པར་བྱའོ། །དེ་ལྟར་ན་ལན་གྱི་ཕྱག་རྒྱ་དགྲོལ་བར་བྱ་བ་ཡིན་ནོ། །གར་གྱི་མཆོད་པའི་ཕྱག་རྒྱ་འདི་ཡིས་ནི། །མཆོད་པའི་རྒྱུར་གྱུར་པས་སོ། །གཙོ་བོ་ཐམས་ཅད་ནི་དེ་བཞིན་གཤེགས་པ་ཐམས་ཅད་དོ། །རྡོ་རྗེ་
[9a.4]འཛིན་པ་ཆེ་སོགས་ནི་ཁྲོ་བོ་རྡོ་རྗེ་སེམས་དཔའ་ལ་སོགས་པའོ། །རྡོ་རྗེ་ཧཱུཾ་མཛད་ནས་ཁྲོ་བོ་རྡོ་རྗེ་འབེབས་པའི་བར་གྱི་མཆོད་པ་བྱས་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་གྱུར་པས་ཅིར་འགྱུར་ཞེ་ན། ལས་གྲུབ་པར་ཡང་ངེས་པར་འགྱུར་རོ་ཞེས་བྱ་བ་སྨོས་ཏེ། རྡོ་རྗེ་འཆང་ཆེན་པོ་ལ་སོགས་
[9a.5]པའི་ལས་ཀྱི་དངོས་གྲུབ་རྣམས་ངེས་པར་འགྱུར་རོ། །འདི་སྐད་སྟོན་པ་ཡིན་ཏེ། གང་གི་ཚེ་འགའ་ཞིག་རྡོ་རྗེ་ཧཱུཾ་མཛད་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ནས། གར་བྱེད་པར་སྟོན་པ་དེའི་ཚེ་སློབ་དཔོན་གྱིས་ལས་ཀྱི་ཧཱུཾ་མཛད་ཀྱི་དམ་ཚིག་གི་ཕྱག་རྒྱ་བཅིངས་ལ། དེ་བཞིན་དུ་གཉིས་སུ་བྱས་
[9a.6]པ་བསྟན་པར་བྱའོ། །དེ་བཞིན་དུ་གང་གི་ཚེ་རིན་ཆེན་ཧཱུཾ་མཛད་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ནས་དེ་བཞིན་དུ་སྟོན་པ་དེའི་ཚེ། སློབ་དཔོན་གྱིས་ཆོས་ཀྱི་ཧཱུཾ་མཛད་ཀྱི་ཕྱག་རྒྱ་དེ་བཞིན་དུ་གཉིས་སུ་བྱས་ལ་བསྟན་པར་བྱའོ། །དེ་བཞིན་དུ་གང་གི་ཚེ་ཁྲོ་བོ་རྡོ་རྗེ་སེམས་དཔའི་ཕྱག་རྒྱ་གཉིས་སུ་
[9a.7]བྱས་པ་དེའི་ཚེ་ཁྲོ་བོ་རྡོ་རྗེ་ཁུ་ཚུར་གྱི་ཕྱག་རྒྱའོ། །ཁྲོ་བོ་རྡོ་རྗེ་རྒྱལ་པོའི་ཕྱག་རྒྱ་བྱེད་པ་ན་ཁྲོ་བོ་རྡོ་རྗེ་གནོད་སྦྱིན་གྱི་ཕྱག་རྒྱའོ། །ཁྲོ་བོ་རྡོ་རྗེ་ཆགས་པའི་ཕྱག་རྒྱ་བྱེད་པ་ན་ཁྲོ་བོ་རྡོ་རྗེ་སྲུང་བའི་ཕྱག་རྒྱའོ། །རྡོ་རྗེ་ལེགས་པའི་ཕྱག་རྒྱ་བྱེད་པ་ན་རྡོ་རྗེ་ལས་ཀྱི་ཕྱག་རྒྱའོ། །རྡོ་རྗེ་རིན་ཆེན་གྱི་ཕྱག་རྒྱ་བྱེད་པ་ན། རྡོ་རྗེ་
[9b]
[9b.1]སྲུང་བའི་ཕྱག་རྒྱའོ། །རྡོ་རྗེ་གཟི་བརྗིད་ཀྱི་ཕྱག་རྒྱ་བྱེད་པ་ན། རྡོ་རྗེ་ལྕགས་ཀྱུའི་ཕྱག་རྒྱའོ། །རྡོ་རྗེ་རྒྱལ་མཚན་གྱི་ཕྱག་རྒྱ་བྱེད་པ་ན། རྡོ་རྗེ་རྣོན་པོའི་ཕྱག་རྒྱའོ། །རྡོ་རྗེ་བཞད་པའི་ཕྱག་རྒྱ་བྱེད་པ་ན། །རྡོ་རྗེ་ཆོས་ཀྱི་ཕྱག་རྒྱའོ། །རྡོ་རྗེ་སྒེག་མོ་བྱེད་པ་ན། རྡོ་རྗེ་གར་མ་བྱའོ། །རྡོ་རྗེ་ཕྲེང་བ་མ་
[9b.2]བྱེད་པ་ན། རྡོ་རྗེ་གླུ་མ་བྱའོ། །རྡོ་རྗེ་བདུག་པ་མ་བྱེད་པ་ན། རྡོ་རྗེ་དྲི་ཆབ་མའོ། །རྡོ་རྗེ་མེ་ཏོག་མ་བྱེད་པ་ན། རྡོ་རྗེ་མར་མེ་མ་བྱས་ཏེ། དེ་བཞིན་དུ་གཉིས་སུ་བྱས་ལ་བསྟན་པར་བྱའོ། །དེ་ལྟར་འཇིག་རྟེན་པའི་དམ་ཚིག་གི་ཁུ་ཚུར་གར་བྱས་པ་ལས་བྱུང་བས། རྡོ་རྗེ་གསེར་གྱི་ཕྱག་རྒྱ་བྱེད་པ་ན།
[9b.3]དེ་ནས་རྡོ་རྗེ་ཆུ་སྲིན་གྱི་ཕྱག་རྒྱ་བྱའོ། །རྡོ་རྗེ་གཞོན་ནུ་མའི་ཕྱག་རྒྱ་བྱེད་པ་ན། དེ་ནས་རྡོ་རྗེ་རུལ་པ་མའི་ཕྱག་རྒྱ་བྱའོ། །རྡོ་རྗེ་ཞི་བ་མའི་ཕྱག་རྒྱ་བྱེད་པ་ན། དེ་ནས་རྡོ་རྗེ་དུས་ཀྱི་ཕྱག་རྒྱ་བྱའོ། །རྡོ་རྗེ་ཁུ་ཚུར་གྱི་ཕྱག་རྒྱ་བྱེད་པ་ན། དེ་ནས་རྡོ་རྗེ་ཁའི་ཕྱག་རྒྱ་བྱའོ། །རྡོ་རྗེ་བདུད་རྩིའི་ཕྱག་རྒྱ་བྱེད་
[9b.4]པ་ན། དེ་ནས་འཁྱོར་མའི་ཕྱག་རྒྱ་བྱའོ། །རྡོ་རྗེ་མདངས་ཀྱི་ཕྱག་རྒྱ་བྱེད་པ་ན། རྡོ་རྗེ་འབར་མའི་ཕྱག་རྒྱ་བྱའོ། །རྡོ་རྗེ་དབྱིག་མཆོག་མའི་ཕྱག་རྒྱ་བྱེད་པ་ན། མགྱོགས་མ་རྡོ་རྗེ་མའི་ཕྱག་རྒྱ་བྱའོ། །རྡོ་རྗེ་རྐེད་བཅིངས་མའི་ཕྱག་རྒྱ་བྱེད་
[9b.5]པ་ན། རྡོ་རྗེ་ཕོ་ཉ་མའི་ཕྱག་རྒྱ་བྱའོ། །རྡོ་རྗེ་འཇུ་མའི་ཕྱག་རྒྱ་བྱེད་པ་ན། རྡོ་རྗེ་དབང་མོའི་ཕྱག་རྒྱ་བྱའོ། །འཇིག་རྟེན་པའི་དམ་ཚིག་གི་ཁུ་ཚུར་གཉིས་སུ་བྱས་ན། གར་བྱས་པ་ལས་བྱུང་བའི་ཕྱག་རྒྱ་བཅིངས་པར་བྱའོ། །ཁྲོ་བོ་རྡོ་རྗེ་རིག་པ་དམ་པའི་ཕྱག་རྒྱ་བྱེད་པ་ན། རྡོ་རྗེ་མའི་ཕྱག་རྒྱ་
[9b.6]གཉིས་ཀྱིས་གར་བྱེད་པ་ནི་མཆོད་པའི་ཕྱག་རྒྱ་ཡིན་གྱི་ལན་གྱི་ཕྱག་རྒྱ་ནི་མེད་དོ། །འདི་དག་ནི་གར་གྱི་མཆོད་པའི་ཕྱག་རྒྱའི་ཡེ་ཤེས་སོ། །དེ་ལ་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་དང་། རྡོ་རྗེ་རིག་པ་མཆོག་ལ་སོགས་པ་ནས། རྡོ་རྗེ་ཆུ་སྲིན་གྱི་མཐར་ཐུག་པ་ནི་
[9b.7]འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་ཡིན་པར་ཤེས་པར་བྱའོ། །ཁྲོ་བོ་རྡོ་རྗེ་སེམས་དཔའ་ནས་བརྩམས་ནས། ཁྲོ་བོ་རྡོ་རྗེ་དྲིལ་བུ་མའི་མཐར་ཐུག་པ་རྣམས་ནི། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་
[10a]
[10a.1]བཤད་པའི་ཡི་གེ་ཧཱུཾ་ནི་རྡོ་རྗེ་ཧཱུཾ་མཛད་ཀྱི་ཆོས་ཀྱི་ཕྱག་རྒྱའོ། །ཡི་གེ་ཏྲཱཾ་ནི་རིན་ཆེན་ཧཱུཾ་མཛད་ཀྱི་ཆོས་ཀྱི་ཕྱག་རྒྱའོ། །ཡི་གེ་ཧྲཱིཿནི་ཆོས་ཀྱི་ཧཱུཾ་མཛད་ཀྱིའོ། །ཡི་གེ་ཨ་ནི་ལས་ཀྱི་ཧཱུཾ་མཛད་ཀྱིའོ། །ཧཱུཾ་ཧེ་ཏྲཾ་ཏཾ་ཧི་ཧྲི། དེ་ཧ་དྷེ་ག་ཏི། ཧཱུཾ་གྲཾ་ཀེ་བཾ་ཏྲེ་ཨཱ། རྡོ་རྗེ་སེམས་དཔའ་
[10a.2]ལ་སོགས་པ་ནས་རྡོ་རྗེ་ཁུ་ཚུར་གྱི་བར་གྱིའོ། །མ་ཧཱ་ར་ཏི་ཧཱུཾ། རཱུ་པ་ཤོ་བྷེ་ཧཱུཾ། ཤོ་ཏྲ་སཽ་ཁྱ་ཧཱུཾ། སརྦྦ་པཱུ་ཙེ་ཧཱུཾ། པྲ་ཧླཱ་ད་ནི་ཕ་ལ་ག་མི་ཧཱུཾ། སུ་ཏེ་ཛཾ་གྲ་ཧཱུཾ། སཽ་གནྡྷ་གི་ཧཱུཾ། ཞེས་བྱ་བ་སྒེག་མོ་ལ་སོགས་པ་ནས། ཁྲོ་བོ་རྡོ་རྗེ་དྲི་ཆབ་མའི་བར་གྱི་ཆོས་ཀྱི་ཕྱག་རྒྱའོ། །ཕྱི་རོལ་གྱི་རྡོ་རྗེའི་རིགས་རྣམས་
[10a.3]ཀྱི་ནི་རང་གི་རིག་པའོ། །སྔར་བཤད་པའི་གར་བྱེད་པའི་ཕྱག་རྒྱ་ནི་འཇིག་རྟེན་དང་འཇིག་རྟེན་ལས་འདས་པའི་ལྷ་ཐམས་ཅད་ཀྱི་ལས་ཀྱི་ཕྱག་རྒྱ་ཡིན་ནོ། །རྡོ་རྗེ་ཧཱུཾ་མཛད་ལ་སོགས་པ་དང་། རྡོ་རྗེ་སེམས་དཔའ་ལ་སོགས་པ་རྣམས་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་
[10a.4]ཆེན་པོ་ལས་བཤད་པའི་ཕྱག་རྒྱ་ཆེན་པོ་ཡིན་ནོ། །རྡོ་རྗེ་སྒེག་མོ་ལ་སོགས་པ་གསང་བའི་མཆོད་པ་རྣམས་དང་། རྡོ་རྗེ་རིག་པ་དམ་པ་ལ་སོགས་པ་ནས། རྡོ་རྗེ་ཆུ་སྲིན་ལ་མཐར་ཐུག་གི་བར་དུ་མ་བྷ་མ་དང་བཅས་པས་གར་བྱེད་པ། སྦྱོར་བ་ཅན་ནི་འདིར་ཕྱག་རྒྱ་ཆེན་པོ་ཡིན་ནོ། །འདིའི་
[10a.5]མདོག་དང་ཕྱག་རྒྱ་དང་མཚན་མ་རྣམས་ཀྱི་ངེས་པ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བསྟན་ཟིན་པས་དེ་ཉིད་དུ་ཤེས་པར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་ཆོ་ག་ལྷག་མ་རྣམས་ཀྱང་གཟུང་བར་བྱའོ། །
[10a.6]འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། ཕྱི་རོལ་གྱི་རྡོ་རྗེའི་རིགས་ཐམས་ཅད་ཕྱིར་མི་ལྡོག་པའི་ས་ལ་རབ་ཏུ་གཞག་པའི་རྗེས་ཐོགས་ཉིད་ལའོ། །ཕྱག་ན་རྡོ་རྗེ་ནི་རྡོ་རྗེ་ཧཱུཾ་མཛད་དོ། །
[10a.7]རྡོ་རྗེའི་རིགས་དེ་དག་ཐམས་ཅད་ནི་ཕྱི་རོལ་གྱི་རྡོ་རྗེའི་རིགས་ཐམས་ཅད་ཀྱི་སེམས་ཅན་ཐམས་ཅད་ཀྱི་དོན་ལ་ཡང་དག་པར་སྦྱོར་པའོ། །སེམས་ཅན་ཀྱང་ཡིན་ལ་དེ་ཐམས་ཅད་ཀྱང་ཡིན་པས་ན་སེམས་ཅན་དེ་དག་ཐམས་ཅད་ཀྱི་དོན་ཏོ། །འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱིས་
[10b]
[10b.1]ཇི་ལྟར་མངོན་པར་འདོད་པའི་དངོས་གྲུབ་དེ་བསྒོམ་པ་ནི་སེམས་ཅན་གྱི་དོན་ཏོ། །ཁྱོད་ཀྱིས་དེ་ལྟར་ཡང་དག་པར་ངེས་པར་སྦྱོར་ཞིང་ཡོངས་སུ་མི་གཏོང་བས། དུས་འདི་ནས་ཉེ་པར་བཟུང་སྟེ་སྙིང་པོ་བྱང་ཆུབ་ལ་མཐར་ཐུག་གི་བར་དུ་སེམས་ཅན་གྱི་དོན་མཛད་པའོ། །ཕྱིར་མི་ལྡོག་པའི་ས་ལ་རབ་
[10b.2]ཏུ་གཞག་སྟེ་ཞེས་བྱ་བ་ནི། ཕྱིར་མི་ལྡོག་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པའི་ལམ་ལ་གནས་པ་ཡིན་པ་དེའི་ཕྱིར། འཁོར་བའི་ལམ་ལ་མི་འཇུག་ཅིང་མི་ལྡོག་པ་དེས་ནི་ཕྱིར་མི་ལྡོག་པའི་ཐ་སྙད་དུ་བྱེད་དེ་ཕྱིར་མི་ལྡོག་པ་མེད་ཅིང་མི་ལྡོག་པ་ནི་ཕྱིར་མི་ལྡོག་པའོ། །ས་
[10b.3]དེ་ལ་མངོན་པར་འདུས་བྱས་པས་བྱང་ཆུབ་སེམས་དཔའི་ས་བརྒྱད་པ་རྟོགས་པར་འགྱུར་རོ། །དེས་ན་ཕྱིར་མི་ལྡོག་པའི་ས་ལ་རབ་ཏུ་གཞག་པ། སེམས་ཅན་ལྷག་མ་རྣམས་ཀྱི་དོན་བྱ་བའི་ཕྱིར་དེ་བཞིན་གཤེགས་པ་ཐམས་ཅད་ཀྱི་གསང་བ་ལ། བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་
[10b.4]པ་ཐམས་ཅད་ལ་ཞུས་པ་ཡིན་ནོ། །མཁྱེན་བཞིན་དུ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་གསང་བ་མཁྱེན་དུ་ཟིན་ཀྱང་སྒྱུ་མ་རྡོ་རྗེ་ལ་སོགས་པ་བཅོམ་ལྡན་འདས་རྣམ་པར་སྣང་མཛད་ཀྱིས་ལུང་བསྟན་པའི་དེ་བཞིན་གཤེགས་པ་ཐམས་ཅད་ཀྱི་གསང་བ་ཉོན་ཅིག་ཅེས་བྱ་བ་དེ་གང་ལགས།
[10b.5]ཉན་པ་ནི་རང་ཉིད་ཉམས་སུ་ལེན་པ་དང་། གཞན་ལ་གདམས་ངག་སྟོན་པས་ན། བདག་གསང་བ་ཐམས་ཅད་འཛིན་པར་དབང་བསྐུར་ན་ཞེས་བྱ་བ་ནི་བདག་ཉིད་གསང་བ་འཛིན་པའི་རྒྱུ་མཚན་གྱིས་དབང་བསྐུར་བ་ཡིན་པས་རྒྱུ་དེའི་ཕྱིར། དེ་བཞིན་གཤེགས་པ་ཐམས་ཅད་ཀྱི་གསང་བ་དེ་གང་
[10b.6]ལགས། བཀའ་སྩོལ་ཅིག་ཅེས་པ་སྟེ། ཀུན་ནས་བདག་གིས་རྟོགས་པར་བྱེད་པས་ན་དཀའོ། །དེ་ནས་ཞེས་བྱ་བ་ནི། དེ་མ་ཐག་པའོ། །དེ་བཞིན་གཤེགས་པ་ཐམས་ཅད་ཀྱི་གསང་བ་དེའི་རྡོ་རྗེ་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་སྟེ། མ་ཆགས་པ་དང་མ་སྡང་བ་
[10b.7]དང་མ་རྨོངས་པ་དང་། འདོད་ཆགས་ལ་སོགས་པའི་སྤྱོད་པ་བསྟན་ནས། སེམས་ཅན་གྱི་དོན་མཛད་པས་ན་གསང་བའོ། །དེ་ལ་དམིགས་པའི་ཏིང་ངེ་འཛིན་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཤིང་མངོན་སུམ་དུ་མཛད་
[11a]
[11a.1]པའོ། །འདི་ཞེས་བྱ་བ་ནི་བློ་ལ་གནས་པའོ། །དེ་བཞིན་གཤེགས་པ་ཐམས་ཅད་ཀྱི་གསང་བ་འདི་གསུངས་པ་ནི་བཤད་པའོ། །ཇི་ལྟ་ཇི་ལྟར་འདུལ་འགྱུར་བ། །ཞེས་བྱ་བ་ནི་གང་དང་གང་གི་གཟུགས་ཀྱིས་འདུལ་ཞིང་ལུང་དང་རྟོགས་པ་ལ་རབ་ཏུ་བཞག་པའོ། །
[11a.2]སེམས་ཅན་རྣམས་ཀྱི་རང་བཞིན་ནི། །ཞེས་བྱ་བ་ནི། རང་གི་བདག་ཉིད་དུ་གྱུར་པའི་ངོ་བོ་ནི་རང་བཞིན་ཏེ། དེ་ལ་རང་གི་བདག་ཉིད་ནི་རང་བཞིན་ནོ། །འདི་སྐད་སྟོན་པ་ཡིན་ཏེ། འདོད་ཆགས་སྤྱོད་པ་ལ་སོགས་པ་གང་ཡིན་པ་དེ་དག་གི་འདོད་ཆགས་ཀྱིས་འདོད་ཆགས་སྤང་བ་དང་། ཞེ་སྡང་
[11a.3]སྤྱོད་པ་གང་ཡིན་པ་དེ་དག་ལ་ཁྲོ་བས་ཁྲོ་བ་སྤང་བ་དང་། གཏི་མུག་ལ་སྤྱོད་པ་གང་ཡིན་པ་དེ་དག་ལ་ཁྱབ་འཇུག་སྒྱུ་མའི་གཟུགས་བསྟན་པ་ལ་སོགས་པས་འདུལ་བར་བྱེད་པ་ཡིན་ནོ། །འདི་ཉིད་བཤད་པ་ནི། དེ་ལྟ་དེ་ལྟར་སེམས་ཅན་དོན། །ཞེས་པ་ལ་སོགས་པ་སྟེ། འདོད་ཆགས་ལ་སོགས་
[11a.4]པའི་སྤྱོད་པ་བསྟན་པ་དེ་དང་དེས། དེ་ལྟ་དེ་ལྟར་སེམས་ཅན་གྱི་དོན་བྱས་པས། སེམས་ཅན་མངོན་པར་འདོད་པའི་དོན་ཡོངས་སུ་རྫོགས་པར་འགྱུར་རོ། །ཇི་ལྟར་བྱེད་ཅེ་ན། འདོད་ཆགས་ལ་སོགས་གཙང་བས་བྱ། །ཞེས་བྱ་བ་གསུངས་ཏེ། ཐུགས་རྗེ་ཆེན་པོ་གཞན་གྱི་དབང་
[11a.5]གིས་མ་ཆགས་པ་དང་། མ་སྡང་བ་དང་མ་རྨོངས་པ་ཡིན་པའི་ཕྱིར་རོ། །སེམས་ཅན་ཀུན་ལ་ཕན་པའི་ཕྱིར་ནི། བདེ་བའི་རྣམ་པར་སྨིན་པའི་ལས་དེའི་ཕྱིར་དང་། སངས་རྒྱས་རྣམས་ཀྱིས་བསྟན་པའི་ཕྱིར་འདི་ལྟར་སེམས་ཅན་ཡོངས་སུ་སྦྱང་བའི་ཕྱིར་ཁྱེད་ཀྱིས་གསད་པར་བྱའོ་ཞེས་
[11a.6]གནང་བ་མཛད་པའི་རྒྱུ་མཚན་འདིས་བསད་པ་ནི་བརྒྱལ་བར་བྱེད་པ་ཉིད་ཡིན་ནོ། །གང་ལ་ཞེ་ན། །སེམས་ཅན་ཐམས་ཅད་ལའོ། །སྲོག་གཅོད་པའི་ཀུན་ནས་སློང་བའི་སྡིག་པས་གོས་པར་མི་འགྱུར་རོ་ཞེས་བྱ་བ་ནི། ཐུགས་རྗེ་གཞན་གྱི་དབང་གིས་ཕན་པ་དང་བདེ་བ་ལ་ངེས་པར་སྦྱོར་བའི་
[11a.7]གསོད་པ་ཡིན་པའི་ཕྱིར་རོ། །སེམས་ཅན་ཐམས་ཅད་ཕན་ཕྱིར་དང་། །ཞེས་བྱ་བ་ནི་སྔ་མ་བཞིན་ནོ། །སངས་རྒྱས་རྣམས་ཀྱི་དོན་ནི་སངས་རྒྱས་དོན་ཏེ། ཕ་རོལ་པོ་ལོངས་སྤྱོད་དང་རྒྱགས་པས་དྲེགས་པའི་ཕྱུག་པ་དེ་ལས་ཉམས་པར་བྱས་ནས་བསྟན་པ་ལ་གནས་པར་བྱ་བའི་ཕྱིར་རོ། །དེའི་དོན་
[11b]
[11b.1]ལ་སྦྱོར་བས་སངས་རྒྱས་ཀྱི་དོན་དུ་རབ་ཏུ་སྦྱོར་བ་དེའི་ཕྱིར་སངས་རྒྱས་ཀྱི་འབྲས་བུ་ལ་རབ་ཏུ་སྦྱོར་བ་ནི། སངས་རྒྱས་ཀྱི་དོན་དུ་སྦྱོར་བའོ། །ཕ་རོལ་ནོར་རྣམས་ཕྲོགས་པ་ནི། །རྒྱལ་པོ་ལ་སོགས་པའིའོ། །མ་བྱིན་པར་ལེན་པས་ཀུན་ནས་བསླང་བའི་སྡིག་པས་རྣལ་འབྱོར་བ་དེ་ལ་གོས་པར་མི་འགྱུར་
[11b.2]རོ། །འདོད་ཆགས་འདྲ་བའི་བདེ་བ་མེད། །ཅེས་བྱ་བ་ནི། དེ་ལ་འདོད་ཆགས་ནི་ཆོས་བདག་མེད་པའི་ཆགས་པ་སྟེ། མི་དམིགས་པའི་ཐུགས་རྗེ་ཆེན་པོའོ། །དེ་སྐད་དུ་ཡང་། ཆོས་བདག་མེད་པའི་ཆགས་པ་ཡིས། །མཁས་པ་རྣམས་ནི་དགའ་བར་བྱེད། །ཅེས་གསུངས་སོ། །འདྲ་བ་ནི་
[11b.3]མཚུངས་པ་སྟེ་བདེ་བ་གཞན་ན་མེད་པའོ། །དེ་ལྟ་བུར་གྱུར་པའི་བདེ་བ་དེ་རྒྱལ་བ་རྣམས་དང་དེ་བཞིན་གཤེགས་པ་རྣམས་ལ་དེ་ཕུལ་བར་བསྒོམ་པའི་སྟོབས་ཀྱིས་མངོན་སུམ་དུ་བྱས་པའོ། །སེམས་ཅན་གྱི་ཕྱིར་སེམས་ཅན་ཐམས་ཅད་ལ་ཕན་པ་དང་བདེ་བ་དང་དངོས་གྲུབ་དམ་པའི་
[11b.4]རྒྱུའི་ཕྱིར་རོ། །གཞན་གྱི་ཆུང་མ་ནི་གཞན་གྱི་བུད་མེད་དོ། །གཞན་གྱི་བུད་མེད་མཆོག་ཏུ་གྱུར་པ་ནི་ཕྱག་རྒྱ་ཆེན་པོ་དང་དམ་ཚིག་དང་ཆོས་དང་ལས་ཀྱི་ཕྱག་རྒྱའི་གཟུགས་སོ། །བསྟེན་པ་ནི་བསྒོམ་པའོ། །བསོད་ནམས་ཐོབ་པར་འགྱུར་ཞེས་བྱ་བ་ནི་རྙེད་པར་འགྱུར་བའོ། །དེ་ལ་
[11b.5]བསོད་ནམས་ཞེས་བྱ་བ་ནི་དག་བྱེད་ཀྱི་བསོད་ནམས་ཏེ་གཟུང་བ་དང་འཛིན་པའི་དྲི་མ་འཁྲུད་པར་བྱེད་པ་ཞེས་བྱ་བའི་དོན་ཏོ། །དེ་ཡང་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱ་བའི་ཏིང་ངེ་འཛིན་འདི་མངོན་པར་འདོད་པའི་ཕྱིར་རོ། །སེམས་ཅན་ཀུན་ལ་ཕན་ཕྱིར་དང་། །སངས་
[11b.6]རྒྱས་རྣམས་ཀྱིས་བསྟན་པའི་ཕྱིར། །ཞེས་བྱ་བ་ནི་སྔ་མ་བཞིན་ནོ། །ལས་རྣམས་ཐམས་ཅད་བྱས་པ་ཡིས། །ཞེས་བྱ་བ་ནི། སྦྱོར་བ་དང་། ཡོངས་སུ་སྦྱོར་བ་དང་། སོར་རྟོག་པ་དང་ནན་ཏན་དུ་བྱེད་པའི་བརྩོན་འགྲུས་ཀྱི་རང་བཞིན་རྣམ་པ་བཞིའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་
[11b.7]ལས་ཐམས་ཅད་ནི་ལས་ཐམས་ཅད་དོ། །ཐམས་ཅད་ཀྱིས་སེམས་ཅན་ཐམས་ཅད་ལ་ཕན་པ་དང་བདེ་བ་དང་ཡིད་བདེ་བའི་དངོས་གྲུབ་བྱེད་པའི་རྒྱུའི་ཕྱིར་རོ། །བྱམས་པའི་ཞེས་བྱ་བ་ནི་བསྒོམ་པའོ། །ཤིན་ཏུ་ཕུལ་དུ་བྱུང་བར་འགྱུར་བ་ནམ་མཁའི་ཁམས་ཐམས་ཅད་ཁྱབ་པའི་བསོད་
[12a]
[12a.1]ནམས་བྱ་བ་ནན་ཏན་གྲུབ་པའི་ཡེ་ཤེས་ཀྱི་མཚན་ཉིད་ཐོབ་ཅིང་རྙེད་པའོ། །ཡང་ན་སྲོག་བཅད་པ་དང་མ་བྱིན་པར་ལེན་པ་རྣམས་ནི་བཅོམ་ལྡན་འདས་ཀྱིས་རྣམ་གྲངས་གཞན་དུ་གསུངས་པ་ལྟར་བཤད་པར་བྱའོ། །དེ་ལ་བྱང་ཆུབ་ཀྱི་སེམས་ཀྱི་མཚན་ཉིད་རྟོགས་པས་སེམས་
[12a.2]ཅན་དུ་འཛིན་པ་བསད་པ་ན་སེམས་ཅན་ཐམས་ཅད་བསད་པའོ། །འདིས་བསད་པའི་སེམས་ཅན་རྣམས་མི་བསྐྱོད་རྡོ་རྗེའི་སངས་རྒྱས་ཀྱི་ཞིང་ཁམས་སུ་རྒྱལ་བའི་སྲས་སུ་འགྱུར་རོ་ཞེས་གསུངས་སོ། །ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་སེམས་ཅན་ཐམས་ཅད་ཀྱི་རྒྱུད་ཀྱི་ཉོན་མོངས་པའི་
[12a.3]བག་ཆགས་ཕྲོགས་པས་ན། ཕ་རོལ་ནོར་རྣམས་ཕྲོགས་པ་སྟེ། །ཉོན་མོངས་སེམས་ཅན་ནོར་ཞེས་བཤད། །ཅེས་གསུངས་སོ། །ཉོན་མོངས་འཇིག་རྟེན་ཁམས་རྣམས་ཀྱི། །དབང་བྱས་ཁྲོ་བོ་ཆེར་སྤྲུལ་ནས། །བློ་ལྡན་རྡོ་རྗེ་མགོན་པོ་ཡིས། །རྟོགས་པའི་རྒྱལ་པོ་འདི་གསུངས་སོ། །སེམས་
[12a.4]ཅན་ཁྲོ་བ་རབ་གྲུབ་ཕྱིར། །དྲི་མ་མེད་པའི་དེ་ཉིད་ནི། །སྣང་བྱེད་དགེ་བ་འདི་བཤད་ལས། །བདག་གིས་བསོད་ནམས་གང་བསགས་པ། །དེ་ཡིས་འཇིག་རྟེན་མ་ལུས་པ། །རྡོ་རྗེ་ཁྲོ་ཆེན་ཀུན་དགའ་ཆེ། །སྙིང་པོ་བསམ་མི་ཁྱབ་ཆེན་གཙོ། །རྡོ་རྗེ་ཧཱུཾ་མཛད་གཙོ་གྱུར་ཅིག །དེ་ཁོ་ན་ཉིད་
[12a.5]སྣང་བ་ཞེས་བྱ་བ་ལས་ཕྱི་རོལ་གྱི་རྡོ་རྗེ་རིགས་ཀྱི་བཤད་པ་རྫོགས་སོ།། །།དེ་ལྟར་ཁྲོ་བས་ཁྲོ་བ་སྤང་བའི་ཕྱིར། གནང་བ་ནོད་པས་དེའི་རྗེས་སུ་འཇུག་པའི་རྡོ་རྗེའི་རིགས་ཆེན་པོ་དང་ཕྱིའི་རྡོ་རྗེའི་རིགས་དེས་འདུལ་བའི་སེམས་ཅན་རྗེས་སུ་གཟུང་བའི་ཕྱིར། དམ་ཚིག་གི་ཕྱག་རྒྱ་
[12a.6]གཙོ་བོར་གྱུར་པ་བསྟན་ནས། ད་ནི་གཏི་མུག་གི་གཉེན་པོར་གྱུར་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཀྱི་ཕྱག་རྒྱ་གཙོ་བོར་གྱུར་པའི་པདྨའི་རིགས་དེས་འདུལ་བའི་སེམས་ཅན་རྗེས་སུ་གཟུང་བའི་ཕྱིར། དེ་ནས་ཡང་དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་པ་ལ།
[12a.7]དེ་ནས་ཞེས་བྱ་བའི་སྒྲ་ནི། དེ་མ་ཐག་པ་སྟེ་དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་ཐ་ཚིག་གོ། །འདིར་དང་པོ་སྦྱོར་བའི་ཏིང་ངེ་འཛིན་ནི། རྡོ་རྗེ་དབྱིངས་ལས་གསུངས་པའི་དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་སུ་རྡོ་རྗེ་སེམས་དཔའ་དང་། རྡོ་རྗེ་སྙིང་པོ་དང་། པདྨའི་རིགས་ཀྱི་
[12b]
[12b.1]བདག་པོ་རྡོ་རྗེ་སྤྱན་དང་། རྡོ་རྗེ་སྤྱན་གཉིས་པ་རྡོ་རྗེ་སྣ་ཚོགས་སྤྲུལ་པས་བསྣན་པ་ཡིན་པར་ཤེས་པར་བྱའོ། །དེ་ལྟར་ཡང་ཇི་ལྟར་ཤེས་ཤེ་ན། གང་གི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་
[12b.2]བཏབ་པའི་ཚིག་ཐོས་ནས། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་ག་ལ་བ་དེར་མངོན་དུ་ཕྱོགས་ཏེ་འདུག་ནས། དེ་ནས་བཅོམ་ལྡན་འདས་ཀྱིས་བྱིན་གྱིས་བརླབས་པའི་རྗེས་ཐོགས་ལ་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་ལྟ་བ་དང་། རྡོ་རྗེ་སྣ་ཚོགས་སུ་བྱིན་གྱིས་
[12b.3]བརླབས་ཏེ། དེ་ནས་དེས་བྱིན་གྱིས་བརླབས་པས་དེ་ཐམས་ཅད་ཐ་དད་པར་གྱུར་ཏོ། །ཐམས་ཅད་ཀྱི་གཟུགས་སྟོན་པའི་ཏིང་ངེ་འཛིན་ལ་སྙོམས་པར་ཞུགས་ནས། པདྨའི་རིགས་སྤྲུལ་པར་མཛད་དོ་ཞེས་དེ་མ་ཐག་ཏུ་འཆད་པར་འགྱུར་བའི་ཕྱིར་རོ། །ཐམས་ཅད་ཀྱང་ཡིན་ལ་དེ་བཞིན་
[12b.4]གཤེགས་པ་ཡང་དེ་ཡིན་པས་ན་དེ་བཞིན་གཤེགས་པ་ཐམས་ཅད་དེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་མོ་དང་མཉམ་པའི་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་ལ་སོགས་པ་སངས་
[12b.5]རྒྱས་བཅོམ་ལྡན་འདས་རྣམས་ཡང་གཅིག་ཏུ་འདུས་ཏེ་ཞེས་བྱ་བ་ནི། སྔར་རྡོ་རྗེའི་རིགས་ཀྱིས་འདུལ་བའི་ཕྱིར་འདུ་བར་མཛད་ནས་རྡོ་རྗེ་སེམས་དཔའ་ལ་གསོལ་བ་བཏབ་པ་ཡིན་ལ། ད་ནི་འཆད་པར་འགྱུར་བ་ལ་ལྟོས་པས་ཡང་གི་སྒྲ་སྨོས་སོ། །འདུ་ཞིང་ཚོགས་པར་མཛད་པ་དེ་ནི་
[12b.6]གཅིག་ཏུ་འདུས་པའོ། །བཅོམ་ལྡན་འདས་ནི་བདུད་བཞི་ལས་རྒྱལ་བའོ། །ཕྱག་ན་རྡོ་རྗེ་དེ་ཉིད་ཅེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གནས་པའི་རྡོ་རྗེ་སེམས་དཔའི་གཟུགས་ཅན་རྡོ་རྗེ་འཆང་ཆེན་པོའོ། །ཆོས་ཐམས་ཅད་ཀྱི་བདག་པོ་ནི་ཆོས་ཀྱང་ཡིན་ལ་
[12b.7]ཐམས་ཅད་ཀྱང་དེ་ཡིན་པས་ཆོས་ཐམས་ཅད་དེ་པདྨའི་རིགས་ཀྱི་གཟུགས་ཅན་གྱི་སངས་རྒྱས་ལ་སོགས་པའོ། །དེའི་བདག་པོ་ནི་མངའ་བདག་སྟེ། ཐམས་ཅད་བྱེད་པས་ན་ཆོས་ཀྱི་དབང་ཕྱུག་གོ། །སྤྱན་རས་གཟིགས་ཀྱི་དབང་པོ་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་
[13a]
[13a.1]རྣམ་པར་དག་པའོ་ཞེས་སོ་སོར་རྟོག་པ་དང་། སེམས་ཅན་ཐམས་ཅད་ཡོངས་སུ་སྐྱོབ་པ་ལ་གཟིགས་པས་ན་སྤྱན་རས་གཟིགས་སོ། །དེ་ལ་དབང་པོ་ནི་སྤྱན་རས་གཟིགས་ཀྱི་མངའ་བདག་ཡིན་པས་ན་སྤྱན་རས་གཟིགས་ཀྱི་དབང་ཕྱུག་གོ། །འདིས་ཞེས་བྱ་བ་ནི་འཆད་
[13a.2]པར་འགྱུར་བ་དེ་བློ་ལ་གནས་པའོ། །དེ་བཞིན་གཤེགས་པས་མཚན་བརྒྱ་རྩ་བརྒྱད་པ་དེས་གསོལ་བ་བཏབ་པ་ནི་དོན་དུ་གཉེར་བའོ། །འདི་སྐད་སྟོན་པ་ཡིན་ཏེ། རྡོ་རྗེ་འཆང་ཆེན་པོ་དེ་ཉིད་སྤྱན་རས་གཟིགས་ཀྱི་དབང་པོའི་གཟུགས་འཛིན་པ་ལ་དེ་བཞིན་གཤེགས་པ་ཐམས་ཅད་ཀྱི་པདྨའི་རིགས་
[13a.3]སྤྲུལ་པའི་ཕྱིར་མཚན་བརྒྱ་རྩ་བརྒྱད་པས་གསོལ་བ་འདེབས་པ་ཡིན་གྱིས་ལ་གནས་པའི་བྱང་ཆུབ་སེམས་དཔའ་ནི་མ་ཡིན་ནོ། །པདྨོ་ཞེས་བྱ་བ་ནི་རང་བཞིན་གྱིས་རྣམ་པར་དག་པའོ། །སེམས་དཔའ་ནི་པདྨའི་སེམས་དཔའོ། །པདྨ་ཆེ་ཞེས་བྱ་བ་ནི་རང་བཞིན་གྱིས་རྣམ་པར་དག་པའི་གཟུགས་
[13a.4]དེས་ཐམས་ཅད་དུ་སོང་བས་ན་པདྨ་ཆེན་པོའོ། །འཇིག་རྟེན་དབང་པོ་ཞེས་པ་ནི་འཇིག་རྟེན་དབང་ཕྱུག་གི་གཟུགས་ཀྱིས་བཞུགས་པ་དེའི་འཇིག་རྟེན་དབང་པོའོ། །དབང་ཕྱུག་ཆེ་ཞེས་བྱ་བ་ནི་དབང་ཕྱུག་ཆེན་པོའི་གཟུགས་ཀྱིས་འདུལ་བ་རྣམས་ལ་དོན་ཡོད་པར་ཞགས་པའི་གཟུགས་ཀྱིས་
[13a.5]བཞུགས་པས་ན་དབང་ཕྱུག་ཆེན་པོའོ། །སྤྱན་རས་གཟིགས་དབང་པོ་ཞེས་བྱ་བ་ནི། ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་གཟིགས་པ་དང་སེམས་ཅན་ལ་གཟིགས་པ་འདི་ལ་མངའ་བས་ན་དེ་ནི་འདིར་སྤྱན་རས་གཟིགས་ཀྱི་དབང་པོ་ཞེས་བྱའོ། །བརྟན་པའི་མཆོག་
[13a.6]ཅེས་བྱ་བ་ནི། །བརྟན་པ་ནི་འཇིགས་པ་མེད་པའོ། །དེ་དག་གི་མཆོག་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཏིང་ངེ་འཛིན་གྱི་རང་བཞིན་གྱིས་གཟུང་བ་དང་འཛིན་པའི་རྣམ་པར་རྟོག་པ་སྐྲག་པ་དང་རྟག་ཏུ་བྲལ་བའི་ཕྱིར་རོ། །རྡོ་རྗེ་ཆོས་ཞེས་བྱ་བ་ནི་རྡོ་རྗེ་ནི་སྟོང་པ་ཉིད་ཀྱི་ཏིང་ངེ་འཛིན་ཏོ། །དེའི་ཆོས་
[13a.7]ནི་གཟུགས་སྣ་ཚོགས་བསྟན་ནས། སེམས་ཅན་གྱི་དོན་མཛད་པས་ན་སྤྱན་རས་གཟིགས་དབང་ཕྱུག་སྟེ། རྡོ་རྗེ་ཆོས་ནི་རྡོ་རྗེ་ཆོས་སོ། །ཡང་ན་རྡོ་རྗེ་དང་ཆོས་ནི་རྡོ་རྗེ་ཆོས་ཏེ། སྟོང་པ་ཉིད་ནི་གཟུགས་སོ། །གཟུགས་ཉིད་ནི་སྟོང་པའོ་ཞེས་གསུངས་ཏེ་བདུན་ནོ། །ཆོས་ཀྱི་རྒྱལ་པོ་ཞེས་བྱ་བ་
[13b]
[13b.1]ནི་ནམ་མཁའ་དང་མཉམ་པའི་ཡེ་ཤེས་ནི་ཆོས་སོ། །དེས་འཇིག་རྟེན་གྱི་ཁམས་ཀྱི་བདག་པོའི་གཟུགས་ཀྱིས་རྒྱལ་པོ་ལྟར་གསལ་བར་བྱེད་པས་ན་ཆོས་ཀྱི་རྒྱལ་པོའོ། །དག་པ་ཆེན་པོ་ཞེས་བྱ་བ་ནི་དེ་ཉིད་ཀྱིས་ནམ་མཁའ་དང་མཉམ་པའི་ཡེ་ཤེས་ཀྱི་གཟུགས་ཀྱིས་ཐམས་ཅད་དུ་སོང་བའི་ཕྱིར་
[13b.2]དང་བག་ཆགས་དང་བཅས་པའི་ཉོན་མོངས་པ་སྤངས་པའི་ཕྱིར། དག་པ་ཡང་ཡིན་ལ་ཆེན་པོ་ཡང་ཡིན་པས་ན་དག་པ་ཆེན་པོའོ། །སེམས་དཔའི་རྒྱལ་པོ་ནི་པདྨའི་རིགས་ཐམས་ཅད་ཀྱི་ལྷ་སེམས་དཔའི་གཟུགས་འཛིན་པའི་རྒྱལ་པོ་ནི་སེམས་དཔའི་རྒྱལ་པོ་སྟེ། དེ་དག་གི་སྤྱི་བོར་འོད་
[13b.3]དཔག་ཏུ་མེད་པའི་གཟུགས་ཀྱིས་བཞུགས་པའི་ཕྱིར་རོ། །བློ་གྲོས་ཆེ་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱིས་བཞུགས་པས་ན་དེ་བཞིན་གཤེགས་པ་ཐམས་ཅད་ཀྱི་བློ་གྲོས་ཆེན་པོའོ། །པདྨའི་བདག་ཉིད་ཅེས་བྱ་བ་ནི་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱིས་པདྨ་
[13b.4]ཉིད་དྲི་མ་ཐམས་ཅད་དང་བྲལ་བའི་ཕྱིར། པདྨའི་བདག་ཉིད་ནི་དེའི་རང་བཞིན་དུ་གྱུར་པས་ན་པདྨའི་བདག་ཉིད་དོ། །པདྨ་ཆེ་ཞེས་བྱ་བ་ནི་རང་བཞིན་གྱིས་རྣམ་པར་དག་པའི་གཟུགས་དེ་ཉིད་ཀྱིས་ཐམས་ཅད་དུ་སོང་བའི་ཕྱིར། པདྨ་ཡང་ཡིན་ལ་ཆེན་པོ་ཡང་ཡིན་པས་ན་པདྨ་ཆེན་པོའོ། །པདྨའི་
[13b.5]མགོན་པོ་ཞེས་བྱ་བ་ནི་པདྨའི་རིགས་ཀྱི་པདྨ་དེའི་མགོན་པོ་ནི་པདྨའི་མགོན་པོའོ། །དེས་པདྨའི་རིགས་ལ་སོགས་པ་དབང་དུ་བྱེད་པ་སྟེ། མཚན་བདུན་ནོ། །པདྨ་ལས་བྱུང་ཞེས་བྱ་བ་ནི་པདྨའི་རྒྱུ་ལས་བྱུང་བས་ན་པདྨ་ལས་བྱུང་ངོ་། །པདྨའི་རིགས་ཐམས་ཅད་རྡོ་རྗེ་པདྨའི་གཟུགས་ལས་བྱུང་བའི་ཕྱིར་
[13b.6]རོ། །པད་བཟང་འོད་ཅེས་བྱ་བ་ནི་པདྨའི་རྣམ་པ་ཅན་གྱི་འོད་ཟེར་འབྱུང་བའི་ཕྱིར་རོ། །དེ་སྐད་དུ་ཡང་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་པདྨོ་ལྟ་བུའི་འོད་ཟེར་ཁ་དོག་དང་། གཟུགས་དང་། རྟགས་དང་སྤྱོད་ལམ་རྣམ་པ་དུ་མ་འབྱུང་སྟེ། འཕགས་པ་སྤྱན་རས་གཟིགས་དབང་
[13b.7]པོའི་ཐུགས་ཀར་ཞུགས་སོ་ཞེས་འཆད་པར་འགྱུར་རོ། །པདྨ་དག་པ་ཞེས་བྱ་བ་ནི་པདྨ་ཡིས་དག་པས་ན་པདྨ་དག་པ་སྟེ། རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་དྲི་མ་ཐམས་ཅད་སྤངས་པའི་ཕྱིར་རོ། །རབ་དག་བྱེད་ཅེས་བྱ་བ་ནི་ཤིན་ཏུ་དག་པར་བྱེད་པའི་ཕྱིར་ན་རབ་དག་གོ། །པདྨའི་
[14a]
[14a.1]ཏིང་ངེ་འཛིན་དེས་རང་དང་གཞན་གྱི་བག་ཆགས་དང་བཅས་པའི་ཉོན་མོངས་པའི་དྲི་མ་འཁྲུད་པར་བྱེད་པའི་ཕྱིར་རོ། །རྡོ་རྗེ་པདྨོ་ཞེས་བྱ་བ་ནི་རྡོ་རྗེ་པདྨའི་གཟུགས་ཀྱིས་སོ། །པད་མཆོག་སྐུ་ཞེས་བྱ་བ་ནི་པདྨ་བཟང་པོ་ནི་པདྨ་མཆོག་སྟེ། བཅོམ་ལྡན་འདས་ཀྱི་ཕྱག་
[14a.2]རྒྱའི་གཟུགས་སོ། །དེའི་སྐུ་མདོག་དཀར་དམར་གྱི་སྐུ་མངའ་བ་ནི་པད་མཆོག་སྐུའོ། །པདྨོ་པདྨོ་ཞེས་བྱ་བ་ནི་བཅོམ་ལྡན་འདས་འོད་དཔག་ཏུ་མེད་པ་པདྨའི་ཏིང་ངེ་འཛིན་ལ་བཞུགས་པ་གང་ཡིན་པ་དེ་ལ་པདྨོའི་པདྨ་ཞེས་ཕྱིས་འཆད་པར་འགྱུར་རོ། །དེ་སྐད་དུ་ཡང་། བདག་ཉིད་ཀྱིས་ནི་བདག་ཉིད་དང་། །
[14a.3]རྡོ་རྗེ་ཆོས་ཀྱི་ཏིང་འཛིན་གནས། །པདྨོའི་པདྨོ་བསྒོམས་ན་ནི། །ཟད་མི་ཤེས་པའི་གོ་འཕང་ཐོབ། །ཅེས་འཆད་པར་འགྱུར་བས་ཏེ་གཟུགས་སུ་བྱ་བ་ཡིན་ཏེ་མཚན་བདུན་ནོ། །སྣ་ཚོགས་ཆེན་པོ་ཞེས་བྱ་བ་ནི་སྣ་ཚོགས་ཀྱང་ཡིན་ལ་ཆེན་པོ་ཡང་ཡིན་པས་ན། སྣ་ཚོགས་ཆེན་པོ་སྟེ་ཐམས་ཅད་
[14a.4]ཀྱི་གཟུགས་འཛིན་པས་འགྲོ་བ་འདུལ་བའི་རང་བཞིན་ནོ། །སྣང་བ་ཆེ་ཞེས་བྱ་བ་ནི་སྣང་བ་ཡང་ཡིན་ལ་ཆེན་པོ་ཡང་དེ་ཡིན་པས་ན་སྣང་བ་ཆེ་སྟེ། པདྨ་ཉི་མའི་འོད་ཀྱིས་ནམ་མཁའ་ཐམས་ཅད་འགེངས་པའོ། །དགོས་པ་ཆེན་པོ་ཞེས་བྱ་བ་ནི་དགོས་པ་ཆེན་པོ་འདི་ལ་མངའ་བས་ན་དགོས་པ་ཆེ་སྟེ།
[14a.5]སེམས་ཅན་གྱི་དོན་དུ་དེས་ཐམས་ཅད་པའི་གཟུགས་བསྟན་ནས་ནམ་མཁའ་ཐམས་ཅད་འགེངས་པའོ། །དེ་དང་མཚུངས་ཞེས་བྱ་བ་ནི་ཆེན་པོ་ནི་དེ་བཞིན་གཤེགས་པའོ། །འདིའི་དཔེ་དེ་དང་མཚུངས་པས་ན་ཆེ་དང་མཚུངས་པ་སྟེ། དེ་བཞིན་གཤེགས་པ་དང་མཚུངས་ཞེས་བྱ་བའི་དོན་
[14a.6]ཏོ། །སྐུ་དང་གསུང་དང་ཐུགས་རྡོ་རྗེ་ལྟར་གྱུར་པ་ནམ་མཁའི་ཁམས་ཐམས་ཅད་དུ་རྟག་ཏུ་བཞུགས་པའི་གཟུགས་དང་མཚུངས་པའོ། །བརྟན་པ་ཆེན་པོ་ཞེས་བྱ་བ་ནི་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་ངོ་བོ་དེས་ནམ་མཁའི་ཁམས་ཐམས་ཅད་དུ་ཁྱབ་ཅིང་སྐྲག་པ་མེད་པས་ན་
[14a.7]བརྟན་པ་ཆེན་པོའོ། །དཔའ་བོ་ཆེ་ཞེས་བྱ་བ་ནི་རང་ཉིད་དྲི་མ་མེད་པའི་རྡོ་རྗེ་འཆང་བའི་གཟུགས་ཀྱིས་དམིགས་པ་ཐམས་ཅད་ལ་སྤྱོད་པའི་སེམས་ཅན་སྐྲག་ཅིང་འཇིགས་པར་བྱེད་པས་ན་དཔའ་བོ་ཆེའོ། །དཔའ་ཆེན་ཞེས་བྱ་བ་ནི་དཔའ་བ་ནི་གཟི་བརྗིད་དེ་གཟི་བརྗིད་ཅན་རྣམས་ཀྱི་ནང་ན་གཟི་བརྗིད་
[14b]
[14b.1]ཆེ་བས་ན་དཔའི་ཆེན་ནོ། །རྡོ་རྗེ་ཉི་མ་འཁོར་ལོས་སྒྱུར་བའི་རྒྱལ་པོའི་གཟུགས་ཀྱིས་རྒྱལ་སྲིད་ཐམས་ཅད་འཕྲོག་པར་བྱེད་པས་ན་དཔའ་བོ་ཆེ་བ་སྟེ་མཚན་བདུན་ནོ། །སེམས་ཅན་བསམ་པ་ཞེས་བྱ་བ་ནི་སེམས་ཅན་ཐམས་ཅད་ཀྱི་སེམས་ཀྱི་འདོད་པ་གང་ཡིན་པ་ལ་བསམ་པ་ཞེས་བཤད་དོ། །ཐེག་
[14b.2]པ་ཆེ་ཞེས་བྱ་བ་ནི་སེམས་ཅན་ཐམས་ཅད་ཀྱི་སེམས་དེ་ཉིད་གོམས་པའི་སྟོབས་ཀྱིས་བྱང་ཆུབ་སེམས་དཔའི་ལམ་གྱི་རང་བཞིན་འབྲས་བུ་དང་བཅས་པར་འགྱུར་བ་དེའི་ཕྱིར་ཐེག་པ་ཆེན་པོའོ། །རྣལ་འབྱོར་ཆེན་པོ་ཞེས་བྱ་བ་ནི་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་ནི་རྣལ་འབྱོར་
[14b.3]ཆེའོ། །དེ་སྐད་དུ་ཡང་། ཕྱག་རྒྱ་ཆེན་པོའི་ཏིང་འཛིན་གྱིས། །དེ་ཉིད་ཆེན་པོ་རྗོད་བྱེད་ཅིང་། །ཐམས་ཅད་རེ་རེའང་བདག་ཡིན་པར། །སྒོམ་པ་སེམས་པའི་སྦྱོར་བའོ། །ཞེས་འཆད་པར་འགྱུར་རོ། །ཚངས་པའི་གཟུགས་ཀྱིས་འདུལ་བའི་སེམས་ཅན་རྣམས་འདུལ་བར་བྱེད་པས་ན་མེས་
[14b.4]པོ་ཆེའོ། །བདེ་ཟ་ཞེས་བྱ་བ་ནི་ཤ་མ་ནི་བདེ་བའོ། །དེ་ལ་སྤྱོད་པས་ན་ཟ་བའོ། །ཡང་ན་ལྷ་ཆེན་པོས་འདུལ་བའི་སེམས་ཅན་རྣམས་རྗེས་སུ་གཟུང་བའི་ཕྱིར། དེའི་གཟུགས་སྟོན་པས་ན་བདེ་ཟའོ། །བདེ་བྱེད་ཅེས་བྱ་བ་ནི་བདེ་བར་བྱེད་པས་ན་བདེ་བྱེད་དོ། །དག་པའི་དོན་ཞེས་བྱ་བ་ནི་དག་པ་
[14b.5]ཆོས་ཀྱི་དབྱིངས་དེ་ཉིད་འདི་ལ་མངའ་བས་ན་དག་པའི་དོན་ཏོ། །སངས་རྒྱས་པདྨོ་ཞེས་བྱ་བ་ནི་རྡོ་རྗེ་སེམས་དཔའི་གནས་སུ་འབྱུང་བ་སྟེ། སངས་རྒྱས་ཀྱང་ཡིན་ལ་པདྨ་ཡང་ཡིན་པས་ན་སངས་རྒྱས་པདྨ་སྟེ་མཚན་བརྒྱད་དོ། །ཆོས་ཀྱི་དེ་ཉིད་ནི། པདྨའི་རིགས་ཀྱི་དཀྱིལ་འཁོར་ཏེ། །དེ་རྣམས་
[14b.6]རྐྱང་ཁོ་ན་ཉིད་ནི་ཆོས་ཀྱི་དེ་ཉིད་དོ། །མི་མཉམ་མེད་པས་ཟུར་བཞི་མཉམ། །ཞེས་བྱ་བ་ལ་སོགས་པས་བཤད་ཟིན་པ་དེའི་དོན་ནི་འདིར་ཆོས་ཀྱི་དེ་ཁོ་ན་ཉིད་ཀྱི་དོན་ཏོ། །དམ་པའི་ཆོས་དམ་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཆོས་ཡིན་པས་ན་དམ་པའི་ཆོས་ཏེ་པདྨའི་རིགས་ཀྱི་དཀྱིལ་
[14b.7]འཁོར་རེ། །དག་པའི་ཆོས་ཞེས་བྱ་བ་ནི། དཀྱིལ་འཁོར་དེ་ཉིད་ཀྱིས་འདོད་ཆགས་ལ་སོགས་སྤོང་བ་དེའི་ཕྱིར། དག་པ་ཡང་ཡིན་ལ་ཆོས་ཀྱང་དེ་ཡིན་པས་ན་དག་པའི་ཆོས་སོ། །ཆོས་རབ་བྱེད་ཅེས་བྱ་བ་ནི། པདྨའི་རིགས་ཀྱི་དཀྱིལ་འཁོར་དེ་ཉིད་པདྨའི་རིགས་ཀྱི་ཏིང་ངེ་འཛིན་དེས་སྐྱེད་པར་
[15a]
[15a.1]བྱེད་པའི་ཕྱིར་རོ། །བཟང་པོའི་ཆོས་བྱེད་པའི་ཕྱིར་ཆོས་རབ་བྱེད་དོ། །ཆོས་ཆེན་པོ་ཞེས་བྱ་བ་ནི། པདྨའི་རིགས་ཀྱི་དཀྱིལ་འཁོར་དེ་ཉིད་རྒྱུད་ཕྱི་མ་ཕྱི་མ་ལས་བཤད་པའི་ཚུལ་གྱིས་ཐམས་ཅད་དུ་སོང་བས་ན་ཆོས་ཀྱང་ཡིན་ལ་ཆེན་པོ་ཡང་ཡིན་པས་ན་ཆོས་ཆེན་པོའོ། །
[15a.2]ཆོས་བཟང་མཆོག་ཅེས་བྱ་བ་ནི། ཆོས་དགེ་བའི་ཆོས་ནི་ཆོས་བཟང་པོ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་དེའི་མཆོག་ནི་ཆོས་བཟང་མཆོག་སྟེ་དཀྱིལ་འཁོར་ཉིད་དོ། །ཆོས་ཀྱི་འཁོར་ལོ་ཞེས་བྱ་བ་ནི་པདྨའི་རིགས་ཀྱི་དཀྱིལ་འཁོར་ཐམས་ཅད་ཀྱི་རང་བཞིན་དུ་འགྲོ་བ་ཡིན་པ་དེའི་ཕྱིར།
[15a.3]ཆོས་ཀྱི་འཁོར་ལོ་མཚན་བདུན་ནོ། །སངས་རྒྱས་སེམས་དཔའ་ཞེས་བྱ་བ་ནི་སངས་རྒྱས་ནི་ཉེ་བར་མཚོན་པ་སྟེ། སངས་རྒྱས་ཀྱི་སེམས་དཔའ་ནི་སེམས་ཅན་ནོ། །དེ་བཞིན་གཤེགས་པ་འོད་དཔག་ཏུ་མེད་པའི་སྤྱི་བོ་ན་བཞུགས་པ་དེས་ཉེ་བར་མཚོན་པའི་ཕྱིར་རོ། །སེམས་བཟང་མཆོག་
[15a.4]ཅེས་བྱ་བ་ནི། དག་པའི་སེམས་ནི་སེམས་བཟང་སྟེ། སངས་རྒྱས་པདྨ་ལ་སོགས་པ་དེ་དག་གི་མཆོག་ཏུ་གྱུར་པས་ན་སེམས་བཟང་མཆོག་སྟེ་པདྨའི་རིགས་ཀྱི་བདག་པོའོ། །ཆོས་ཀྱི་སེམས་དཔའ་ཞེས་བྱ་བ་ནི། ཆོས་ཐམས་ཅད་རང་བཞིན་གྱིས་དག་པ་ལས་བྱུང་བའི་ཆོས་ཀྱི་སེམས་
[15a.5]ནི་སེམས་དཔའི་ཆོས་སོ། །སེམས་མཆོག་འཛིན་ཞེས་བྱ་བ་ནི། དགེ་བའི་སེམས་ནི་སེམས་ཀྱི་མཆོག་སྟེ། །སེམས་ཅན་ཀུན་གྱི་སེམས་གང་ཡིན། །བརྟན་ཕྱིར་སེམས་དཔའ་ཞེས་བརྗོད་དོ། །ཞེས་གང་ལ་འཆད་པར་འགྱུར་བ་ནི་འདིར་སེམས་དཔའི་མཆོག་འཛིན་པ་དེས་ན་སེམས་མཆོག་འཛིན་ཞེས་བྱ་
[15a.6]བ། སེམས་དཔའི་དམ་པ་ཞེས་བྱ་བ་བཤད་མ་ཐག་པའི་རྡོ་རྗེ་དང་མཚུངས་པའི་སེམས་དེ་ཉིད་རྡོ་རྗེའི་གཟུགས་ཅན་ཡིན་པས་ན་སེམས་དཔའ་དམ་པའོ། །སེམས་མཆོག་ཅེས་བྱ་བ་ནི་བཤད་མ་ཐག་པའི་སེམས་དཔའ་དམ་པ་དེ་ཉིད་ལེགས་པར་ཤེས་པས་ན་སེམས་མཆོག་ཅེས་སོ། །སེམས་ཅན་
[15a.7]སེམས་དཔའ་ཞེས་བྱ་བ་ནི། རྡོ་རྗེའི་བདག་ཉིད་དུ་བསྒོམས་པས་ཟླ་བའི་དཀྱིལ་འཁོར་གྱི་སྟེང་དུ་སེམས་དཔའི་རྡོ་རྗེར་གྱུར་པ་དེ་ཉིད་སེམས་དཔར་བྱིན་གྱིས་བརླབས་པའི་སྦྱོར་བས་རྡོ་རྗེ་སེམས་དཔར་གྱུར་པའི་སེམས་ནི་སེམས་ཅན་སེམས་དཔའ་ཞེས་བྱ་སྟེ་མཚན་བདུན་ནོ། །སྤྱན་རས་གཟིགས་དབང་
[15b]
[15b.1]ཞེས་བྱ་བ་ནི། རང་བཞིན་གྱིས་རྣམ་པར་དག་པའི་སོ་སོར་རྟོག་པར་དེ་བཞིན་གཤེགས་པ་ཐམས་ཅད་ཀྱིས་གཟིགས་པའི་ཕྱིར་སྤྱན་རས་གཟིགས་སོ། །སྤྱན་རས་གཟིགས་ཀྱི་དབང་ཕྱུག་གི་གཟུགས་འཛིན་པས་ན་སྤྱན་རས་གཟིགས་དབང་ངོ་། །མགོན་པོ་མཆོག་ཅེས་བྱ་བ་ནི། བྱང་ཆུབ་སེམས་
[15b.2]དཔའ་སེམས་ཅན་གྱི་སྐྱབས་དང་མགོན་བྱེད་པ་དེ་དག་གི་ནང་ན་མཆོག་ཡིན་པས་ན་མགོན་པོ་མཆོག་གོ། །མགོན་པོ་ཆེན་པོ་ཞེས་བྱ་བ་ནི་མགོན་པོ་ཡང་ཡིན་ལ་ཆེན་པོ་ཡང་ཡིན་པས་ན་མགོན་པོ་ཆེན་པོ་སྟེ། ཐམས་ཅད་ཀྱི་གཟུགས་སུ་བསྟན་ནས་སེམས་ཅན་ཐམས་ཅད་ཡོངས་སུ་སྐྱོབ་པའི་ཕྱིར་
[15b.3]དང་། ཐམས་ཅད་དུ་འགྲོ་བའི་ཕྱིར་རོ། །རྣམ་པར་གཟིགས་ཞེས་བྱ་བ་ནི་བྱེ་བྲག་ཏུ་གཟིགས་པ་ནི་རྣམ་པར་གཟིགས་སོ། །གང་ལ་ཡོངས་སུ་བསྐྱབ་པའི་དོན་ཡིན་ཞེ་ན། སྣང་བ་ཞེས་བྱ་བ་སྨོས་ཏེ། ཡེ་ཤེས་ཀྱི་སྣང་བས་སོ། །སེམས་ཅན་དང་སྣོད་ཀྱི་འཇིག་རྟེན་གྱི་གཟུགས་ཀྱིས་སེམས་ཅན་གྱི་
[15b.4]དོན་བྱེད་པས་ནི་སྣང་བའོ། །འཇིག་རྟེན་དོན་ཞེས་བྱ་བ་ནི་འཇིག་རྟེན་པས་དོན་དུ་གཉེར་བ་ནི་འཇིག་རྟེན་དོན་ཏོ། །འཇིག་རྟེན་མགོན་ཁྱོད་ཅེས་བྱ་བ་ནི། མིང་གི་སྒོ་ནས་འདི་སྐད་བཏགས་པ་ཡིན་ནོ། །མཚན་བརྒྱད་དོ། །འཇིག་རྟེན་ཡི་གེ་ཞེས་བྱ་བ་ནི། འཇིག་རྟེན་པའི་ཡི་གེ་ནི་འཇིག་རྟེན་ཡི་གེ་
[15b.5]སྟེ། མི་ཟད་པའི་ཕྱིར་ན་ཡི་གེ་ཞེས་བྱ་བའི་ཚིག་གོ། །ཡི་གེ་ཆེ་ཞེས་བྱ་བ་ནི། མི་ཟད་པའི་ཕྱིར་ཡི་གེ་ཆེ་སྟེ། ཡི་གེ་ཆེན་པོ་ནི་ཆོས་ཀྱི་དབྱིངས་ཀྱི་རང་བཞིན་གྱིས་ཐམས་ཅད་དུ་སོང་བའི་ཕྱིར་ཞེས་བྱ་བའི་དོན་ཏོ། །ཡི་གེ་མཆོག་ཅེས་བྱ་བ་ནི། འཇིག་རྟེན་པ་འགའ་ཞིག་ཡི་གེ་འགའ་ཞིག་འདོད་
[15b.6]པ་དེ་དག་གི་ནང་ན་མཆོག་ཡིན་པས་ན་མཛེས་པའོ། །ཡི་གེ་འདྲ་ཞེས་བྱ་བ་ནི། དེ་བཞིན་གཤེགས་པ་དེའི་གཟུགས་དང་འདྲ་བའི་ཡི་གེ་དེ་ལ་འདི་སྐད་ཅེས་བརྗོད་དོ། །ཡི་གེའི་ཡི་གེ་ཞེས་པ་ན། དེ་བཞིན་གཤེགས་པའི་སྤྲུལ་པའི་སྐུ་ནི་ཡི་གེའོ། །ཡི་གེ་དེ་དག་གི་ཡི་གེ་ནི་ལོངས་སྤྱོད་རྫོགས་པའི་
[15b.7]སྐུས་རྟག་ཏུ་གནས་པའི་ཕྱིར་རོ། །ཐམས་ཅད་སྤྱན་ཞེས་བྱ་བ་ནི། ཐམས་ཅད་ཀྱི་སྤྱན་ནི་སྤྱན་ལྔ་སྟེ་ཐམས་ཅད་སྤྱན་ཞེས་བྱའོ། །འཁོར་ལོ་ཡི་གེ་ཞེས་བྱ་བ་ནི། གདུལ་བྱའི་སྐྱེ་བོའི་རྒྱུད་ལ་རིམ་གྱིས་འཕོ་བས་ན་འཁོར་ལོ་སྟེ། སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པ་དང་། རང་
[16a]
[16a.1]བཞིན་གྱིས་འོད་གསལ་བའི་རྣམ་པར་ཐར་པའི་སྒོ་དེ་ཉིད་མི་ཟད་པས་ན་ཡི་གེ་སྟེ། དེའི་རང་བཞིན་ཉིད་ཡི་གེ་འཁོར་ལོའི་མཚན་བདུན་ནོ། །ཕྱག་ན་པདྨོ་ཞེས་བྱ་བ་ནི་ཕྱག་ན་པདྨོ་མངའ་བ་ནི་ཕྱག་ན་པདྨའོ། །ཕྱག་ཆེན་པོ་ཞེས་བྱ་བ་ནི། ཕྱག་ཆེན་པོ་མངའ་བས་ན་ཕྱག་ཆེན་པོ་སྟེ།
[16a.2]ནམ་མཁའི་ཁམས་ཀྱང་ཕྱག་གིས་ཁྱབ་པའོ། །དབུགས་འབྱིན་པ་ཞེས་བྱ་བ་ནི། ངན་སོང་དུ་སོང་བ་དང་། མྱ་ངན་དང་། ཤི་པ་ལ་སོགས་པའི་འཇིགས་པས་སྐྲག་པའི་སེམས་ཅན་རྣམས་བསྲུང་བའི་ཕྱིར་ན་དབུགས་འབྱིན་པའོ། །སྦྱིན་པ་པོ་ཞེས་བྱ་བ་ནི་ནམ་མཁའི་སྙིང་པོའི་ཏིང་ངེ་འཛིན་གྱིས་
[16a.3]སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་པའོ། །སངས་རྒྱས་ཆོས་ཞེས་བྱ་བ་ནི། ཐེག་པ་གསུམ་སྟོན་པའི་ཆོས་ཀྱི་ངོ་བོ་ཡིན་པའི་ཕྱིར་སངས་རྒྱས་རྣམས་ཀྱི་ཆོས་ནི་སངས་རྒྱས་ཆོས་སོ། །སངས་རྒྱས་ཆེ་ཞེས་བྱ་བ་ནི། རྣམ་པར་སྣང་མཛད་ཆེན་པོའི་གཟུགས་ཀྱིས་ཐམས་
[16a.4]ཅད་དུ་སོང་བས་ན། སངས་རྒྱས་ཀྱང་ཡིན་ལ་ཆེན་པོ་ཡང་ཡིན་པས་ན་སངས་རྒྱས་ཆེན་པོའོ། །སངས་རྒྱས་བདག་ཉིད་ཅེས་བྱ་བ་ནི། སངས་རྒྱས་ཐམས་ཅད་ཀྱིས་རྡུལ་ཕྲ་རབ་ལས་བསྒྲུབ་པའི་ཕྱིར་སངས་རྒྱས་བདག་ཉིད་དོ། །མཚན་བདུན་ནོ། །སངས་རྒྱས་གཟུགས་ཞེས་བྱ་བ་ནི། རྡོ་རྗེ་སེམས་
[16a.5]དཔའི་གནས་སུ་པདྨ་སངས་རྒྱས་ཀྱི་གཟུགས་ཀྱིས་བཞུགས་པའི་ཕྱིར་སངས་རྒྱས་གཟུགས་སོ། །གཟུགས་ཆེན་པོ་ཞེས་བྱ་བ་ནི། ཐམས་ཅད་ཀྱི་གཟུགས་ཀྱིས་ནམ་མཁའི་ཁམས་སྤྲོས་པས་ན་གཟུགས་ཆེན་པོའོ། །རྡོ་རྗེའི་གཟུགས་ཞེས་བྱ་བ་ནི། ཐམས་ཅད་ཀྱི་ཕྱག་རྒྱའི་གཟུགས་ཀྱིས་
[16a.6]བཞུགས་པའི་ཕྱིར་རྡོ་རྗེའི་གཟུགས་སོ། །གཟུགས་བཟང་འཆང་ཞེས་བྱ་བ་ནི། གཟུགས་བཟང་པོ་ལྟ་བས་ཆོག་མི་ཤེས་པ་མངའ་བས་ན་གཟུགས་བཟང་འཆང་ངོ་། །ཆོས་ཀྱི་སྣང་བ་ཞེས་བྱ་བ་ནི། ས་དང་ཕ་རོལ་ཏུ་ཕྱིན་པའི་ཆོས་རྣམས་ཀྱིས་སྣང་བར་བྱེད་པས་ན་ཆོས་ཀྱི་སྣང་བའོ། །གཟི་
[16a.7]བརྗིད་མཆོག་ཅེས་བྱ་བ་ནི། དགེ་བའི་གཟི་བརྗིད་ཇི་ལྟ་ཇི་ལྟ་བུའི་གཟི་བརྗིད་མཆོག་དེ་ལྟ་བུ་དེ་ལ་མངའ་བས་ན་གཟི་བརྗིད་མཆོག་གོ། །བྱང་ཆུབ་སེམས་དཔའ་ཆེན་པོ་རྡོ་རྗེ་གཟི་བརྗིད་ནི་འཁོར་ལོས་སྒྱུར་བའི་རྒྱལ་པོའི་གཟུགས་ཀྱིས་རྒྱལ་པོ་ཆོས་ཐམས་ཅད་ཀྱི་གཟི་བརྗིད་ཟིལ་གྱིས་གནོན་པར་བཞུགས་
[16b]
[16b.1]པའི་ཕྱིར་རོ། །གཟུགས་དེ་ཉིད་ཀྱིས་ཁམས་གསུམ་པ་མ་ལུས་པའི་སེམས་ཅན་དང་སྣོད་ཀྱི་འཇིག་རྟེན་སྣང་བར་བྱེད་པས་ན། འཇིག་རྟེན་སྣང་བྱེད་དོ། །མཚན་བདུན་ནོ། །པདྨོའི་དཔལ་གྱི་མགོན་པོ་ཞེས་བྱ་བ་ནི། པདྨའི་རིགས་སྐྱེད་པར་བྱེད་པའི་པདྨོའི་དཔལ་དེ་ནི་མགོན་པོ་སྟེ་བདག་པོའོ། །མགོན་
[16b.2]པོ་མཆོག་ཅེས་བྱ་བ་ནི། སེམས་ཅན་རྣམས་སྐྱོབ་པས་ན་མགོན་པོའོ། །སངས་རྒྱས་པདྨ་ལ་སོགས་པ་དེ་དག་གིས་འགྲོ་བ་རྣམས་འདུལ་བར་བྱེད་པས་ན་མཆོག་གོ། །ཆོས་དཔལ་མགོན་པོ་ཞེས་བྱ་བ་ནི། ཆོས་སོ་སོ་ཡང་དག་པར་རིག་པ་བཞིའི་རང་བཞིན་གྱི་ཤེས་རབ་ནི་ཆོས་སོ། །དཔལ་ནི་ཕུན་སུམ་
[16b.3]ཚོགས་པའོ། །དེའི་མགོན་པོ་ནི་གཉིས་སུ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཏིང་ངེ་འཛིན་ལ་གནས་པའི་ངོ་བོ་ཡིན་པ་དེའི་ཕྱིར་དེ་ལས་སྐྱེས་པའོ། །མགོན་ལྡན་པ་ཞེས་བྱ་བ་ནི། མགོན་པོ་རྣམ་པར་སྣང་མཛད་དེ། དེས་བྱིན་གྱིས་བརླབས་པའི་སྟོབས་ཀྱིས་པདྨའི་རིགས་བསྐྱེད་པའི་ཕྱིར་རོ། །
[16b.4]དེའི་ཕྱིར་མགོན་པོ་དེ་ལ་མངའ་བས་ན་མགོན་ལྡན་པའོ། །ཚངས་པའི་མགོན་པོ་ཞེས་བྱ་བ་ནི། ཚངས་པ་ནི་བསམ་གཏན་དང་པོ་བསྐྱེད་པ་སྟེ། སྟོང་གསུམ་པའི་བདག་པོ་ཚངས་པའི་གཟུགས་ཀྱིས་བདག་པོ་མཛད་པས་ན་ཚངས་པའི་མགོན་པོའོ། །ཚངས་པ་ཆེན་པོ་ཞེས་བྱ་བ་ནི། དེ་ཉིད་ཚངས་པ་
[16b.5]མགོན་པོའི་གཟུགས་ཀྱིས་ཚངས་པ་ཐམས་ཅད་ཀྱི་གཟུགས་ལས་མཆོག་ཏུ་གྱུར་པས་ན་ཚངས་པ་ཆེན་པོའོ། །ཚངས་སྲས་ཞེས་བྱ་བ་ནི། ཚངས་པས་བསྐྱེད་པའི་དྲང་སྲོང་ནི་ཚངས་པའི་སྲས་ཏེ། དེས་འདུལ་བའི་སེམས་ཅན་གྱི་ཁམས་རྣམས་འདུལ་བར་བྱེད་པའི་གཟུགས་དེ་འཛིན་པས་ན་ཚངས་
[16b.6]པའི་སྲས་ཏེ་མཚན་བདུན་ཡིན་ནོ། །སྣང་བ་ཞེས་བྱ་བ་ནི་སྨོན་ལམ་གྱི་ཕ་རོལ་ཏུ་ཕྱིན་པའི་སྣང་བས་ཕྱི་དང་ནང་དུ་བཅས་པའི་མུན་པ་རྣམས་སེལ་བའི་ཕྱིར། སྒྲོན་མ་ལྟ་བུ་ཡིན་པས་ན་སྒྲོན་མ་སྣང་བའོ། །སྣང་མཆོག་ཅེས་བྱ་བ་ནི། གཟུགས་དེ་ཉིད་ཀྱིས་འཇིག་རྟེན་པའི་སྣང་བའི་ནང་ནས་མཆོག་ཏུ་གྱུར་
[16b.7]བས་ན་སྣང་བ་མཆོག་གོ། །སྣང་བའི་གཙོ་བོ་ཞེས་བྱ་བ་ནི། བག་ཆགས་དང་བཅས་པའི་ཉོན་མོངས་པ་དེ་སྤོང་བའི་གཟུགས་ཀྱིས་སྨོན་ལམ་གྱི་ཕ་རོལ་ཏུ་ཕྱིན་པའི་ཡེ་ཤེས་ཀྱི་སྣང་བ་རྣོ་བའི་ཕྱིར་སྣང་བའི་གཙོ་བོའོ། །སྣང་གསལ་ཞེས་བྱ་བ་ནི། པདྨ་སྣང་ཞིང་གསལ་བས་ཕྱི་རོལ་གྱི་སྣང་བའི་གསལ་
[17a]
[17a.1]བ་ཆེས་གསལ་བར་བྱེད་པའོ། །ཤིན་ཏུ་སྣང་བ་ཞེས་བྱ་བ་ནི། ཤིན་ཏུ་སྣང་བས་རབ་ཏུ་གསལ་བར་བྱེད་པ་པདྨའི་སྣང་བའི་གཟུགས་དེ་ཉིད་ཀྱིས་དངོས་པོ་ཐམས་ཅད་གསལ་བར་བྱེད་པའི་ཕྱིར་ཤིན་ཏུ་སྣང་བའོ། །སྣང་བའི་མགོན་པོ་ཞེས་བྱ་བ་ནི། པདྨའི་སྣང་ཞིང་གསལ་
[17a.2]བ་ཐམས་ཅད་ཀྱི་བདག་པོ་ཡིན་པས་ན་མགོན་པོའོ། །སྣང་བ་ཆེ་ཞེས་བྱ་བ་ནི། པདྨ་སྣང་ཞིང་གསལ་བས་ནམ་མཁའ་ཁྱབ་པས་སྣང་བ་ཆེའོ། །སངས་རྒྱས་སྣང་ཁྱོད་ཅེས་བྱ་བ་ནི། བཤད་མ་ཐག་པའི་སྣང་བ་ཐམས་ཅད་ཀྱི་ནང་ནས་སངས་རྒྱས་བཅོམ་ལྡན་འདས་གང་ཡིན་པ་དེ་ནི་སངས་
[17a.3]རྒྱས་སྣང་བ་སྟེ། མཚན་བརྒྱད་ཡིན་ནོ། །སངས་རྒྱས་དབང་བསྐུར་བ་ཞེས་བྱ་བ་ནི། ཁྱོད་དམ་པའི་ཆོས་ཀྱི་འཁོར་ལོ་བསྐོར་ཞིག་པར་དབང་བསྐུར་བ་ནི་སངས་རྒྱས་ཀྱི་དབང་བསྐུར་བའོ། །སངས་རྒྱས་མཆོག་ཅེས་བྱ་བ་ནི། མཉམ་པ་ཉིད་ཀྱི་ཡེ་ཤེས་ཀྱི་ངོ་བོས་སྤྲུལ་པའི་སྐུའི་རང་བཞིན་སངས་
[17a.4]རྒྱས་རྣམས་ཀྱི་མཆོག་ནི་སངས་རྒྱས་མཆོག་གོ། །སངས་རྒྱས་སྲས་པོ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ལས་སྐྱེས་པ་ན་སངས་རྒྱས་སྲས་སོ། །མཁས་ཆེན་པོ་ཞེས་བྱ་བ་ནི། ཐམས་ཅད་མཁྱེན་པའི་ཡེ་ཤེས་ཀྱི་རྣལ་འབྱོར་ཆེན་པོས་དོན་ཐམས་ཅད་ཡོངས་སུ་
[17a.5]མཁྱེན་པ་ནི་མཁས་པ་ཆེན་པོའོ། །སངས་རྒྱས་དབང་བསྐུར་བ་ཞེས་བྱ་བ་ནི། ནམ་མཁའི་སྙིང་པོ་རིན་པོ་ཆེའི་ཅོད་པན་གྱི་གཟུགས་ཀྱིས་དབང་བསྐུར་བ་ནི། སངས་རྒྱས་དབང་བསྐུར་རོ། །གཙུག་གི་མཆོག་ཅེས་བྱ་བ་ནི་པདྨའི་རིགས་ཀྱི་ལྷ་རྣམས་ཀྱི་གཟུགས་ཀྱི་སྤྱི་གཙུག་ན། དེ་བཞིན་གཤེགས་
[17a.6]པ་འོད་དཔག་ཏུ་མེད་པ་འཆང་བའམ། གཞན་ཡང་རུང་བ་རྣམས་ནི་མཆོག་སྟེ། གཙུག་གི་མཆོག་གོ། །སངས་རྒྱས་ཞེས་བྱ་བ་ནི། པདྨའི་རིགས་ཀྱི་ལྷ་རྣམས་ཀྱི་གཟུགས་དེ་དག་ལ་སངས་རྒྱས་ཀྱི་རང་བཞིན་གྱི་སྤྱི་བོར་བཞུགས་པས་ན་སངས་རྒྱས་སངས་རྒྱས་ཁྱོད་དེ། འཇིག་རྟེན་དབང་ཕྱུག་
[17a.7]ཉིད་ལ་སྣང་བ་མཐའ་ཡས་ཞུགས་པ་ཡང་ཡིན་པས་མཚན་བདུན་ཡིན་ནོ། །སངས་རྒྱས་སྤྱན་ཞེས་བྱ་བ་ནི། སངས་རྒྱས་རྣམས་ཀྱི་སྤྱན་ཡིན་པས་ན་སངས་རྒྱས་ཀྱི་སྤྱན་ཏེ། ཐམས་ཅད་མཁྱེན་པའི་ཡེ་ཤེས་སོ། །སྤྱན་ཆེན་པོ་ཞེས་བྱ་བ་ནི། ལྷའི་སྤྱན་ཡང་དེ་ཡིན་ལ། ཆེན་པོ་ཡང་དེ་ཡིན་
[17b]
[17b.1]པས་ན་སྤྱན་ཆེན་པོའོ། །ཆོས་སྤྱན་ཞེས་བྱ་བ་ནི། ཡུལ་ཡོངས་སུ་མ་སྤངས་པར་མཁྱེན་ནས་ཆོས་སྟོན་པ་གང་ཡིན་པ་དེ་ནི་ཆོས་སྤྱན་ནོ། །གཟིགས་པ་ཆེན་པོ་ཞེས་བྱ་བ་ནི། ཤེས་རབ་ཀྱི་སྤྱན་གྱིས་ངོ་བོ་ལ་གཟིགས་པ་ཆེན་པོ་འདི་ལ་མངའ་བས་ན་གཟིགས་པ་ཆེན་པོའོ། །ཏིང་ངེ་འཛིན་གྱི་ཡེ་ཤེས་
[17b.2]ཞེས་བྱ་བ་ནི། ཏིང་ངེ་འཛིན་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་ཡེ་ཤེས་སུ་ངེས་པའོ། །ཐམས་ཅད་པ་ཞེས་བྱ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གྱིས་སངས་རྒྱས་བཅོམ་ལྡན་འདས་རྣམས་ཀྱི་ཐམས་ཅད་པ་ནི་ཁྱོད་དོ། །རྡོ་རྗེ་སྤྱན་ཞེས་བྱ་བ་ནི།
[17b.3]ཤའི་སྤྱན་གྱི་ངོ་བོ་ནི་རྡོ་རྗེ་སྤྱན་ཏེ། རྡོ་རྗེ་སྤྱན་དེས་ཉེ་བར་མཚོན་པ་ནི་རྡོ་རྗེ་སྤྱན་ཞེས་བཤད་པ་སྟེ་མཚན་བདུན་ཡིན་ནོ། །དེ་ལྟར་མཚན་བརྒྱ་རྩ་བརྒྱད་པས་བསྟོད་པའི་ཕན་ཡོན་གསུངས་པ་ནི་བདག་ཉིད་ཀུན་གྱིས་ཞེས་བྱ་བ་སྨོས་ཏེ། འགའ་ཞིག་བཤད་མ་ཐག་པ་འདིས་བདག་ཉིད་ཀུན་གྱིས་དངོས་པོ་
[17b.4]ཐམས་ཅད་ཀྱི་སྒོ་ནས་སོ། །ཡོན་ཏན་གྱི་རྒྱུ་མཚན་གྱི་ཡོན་ཏན་ནོ། །ཁྱོད་ཀྱི་མཚན་བརྒྱ་རྩ་བརྒྱད་པ་རྣམས་ནི་ཁྱོད་ཀྱི་མཚན་བརྒྱ་རྩ་བརྒྱད་པ་ཡང་དག་པར་བརྗོད་པའོ། །བསྟོད་དམ་ནི་བསྟོད་པའི་བསམ་པས་བསྟོད་པར་འདོད་པའོ། །སྒོམ་པར་བྱེད་པ་ནི་དོན་མངོན་དུ་བྱེད་པ་གང་ཡིན་པ་དེས་
[17b.5]ཀྱང་འཇིག་རྟེན་གྱི་དབང་པོ་དང་མཚུངས་པར་འགྱུར་རོ། །དཔའ་བོ་ཁྱོད་ལ་གསོལ་བཏབ་པ། །ཞེས་བྱ་བ་ནི། གུས་པ་སྔོན་དུ་འགྲོ་བས་དོན་དུ་གཉེར་བས་གསོལ་བ་འདེབས་པ་ནི་དོན་གྱི་ཆེད་ཀར་གསོལ་བ་འདེབས་པའོ། །དམིགས་པ་ཐམས་ཅད་ལས་རྣམ་པར་རྒྱལ་བས་ན་དཔའ་བོའོ། །
[17b.6]རང་གི་རིགས་ནི་བསྐྱེད་ནས་ཀྱང་། །ཞེས་བྱ་བ་ནི་པདྨའི་རིགས་བསྐྱེད་པའོ། །ཆོས་ཀྱི་དཀྱིལ་འཁོར་དམ་པ་ནི། །ཞེས་བྱ་བ་ནི་ཆོས་ཀྱི་དཀྱིལ་འཁོར་གྱི་རང་གི་བདག་ཉིད་མཆོག་ཏུ་གྱུར་པ་ཁྱོད་ཀྱིས་བཤད་དུ་གསོལ་ཞེས་དེ་བཞིན་གཤེགས་པ་རྣམས་ཀྱིས་གསོལ་བ་འདེབས་པའོ། །ཐུབ་པ་
[17b.7]ཆེན་པོས་བཤད་དུ་གསོལ། །ཞེས་བྱ་བ་ནི་ལུས་དང་ངག་དང་ཡིད་གསུམ་ཐུབ་པ་དང་ལྡན་པས་ན་ཐུབ་པའོ། །ཐུབ་པ་རྣམས་ཀྱི་ནང་ན་ཐུབ་པ་ཡིན་པས་ན་ཐུབ་པ་ཆེན་པོའོ། །དེ་ལ་ལུས་ཐུབ་པ་ནི། ལུས་ཀྱི་མི་དགེ་བའི་ལས་ཀྱི་ལམ་རྣམ་པ་གསུམ་དང་བྲལ་བའོ། །ངག་གི་ལས་ཀྱི་ལམ་
[18a]
[18a.1]རྣམ་པ་བཞི་དང་བྲལ་བས་ན་ངག་ཐུབ་པའོ། །ཡིད་ཀྱི་མི་དགེ་བའི་ལས་ཀྱི་ལམ་རྣམ་པ་གསུམ་དང་བྲལ་བས་ན་ཡིད་ཐུབ་པའོ། །དེ་ནས་ཞེས་བྱ་བ་ལ་སོགས་པ་ལ། དེ་ནས་ཀྱི་སྒྲ་ནི་དེ་མ་ཐག་པའོ། །དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་རྗེས་
[18a.2]ཐོགས་ཉིད་ལ་སྤྱན་རས་གཟིགས་ཀྱི་དབང་པོ་ཕྱག་ན་རྡོ་རྗེའི་གཟུགས་འཛིན་པས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་ཚིག་ཐོས་ནས། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་ག་ལ་བ་དེར་མངོན་དུ་ཕྱོགས་ཏེ་འདུག་ནས་སོ། །འདུག་ནས་ཅི་ཞིག་བྱེད་ཅེ་ན།
[18a.3]རྡོ་རྗེ་པདྨོ་དེ་རང་གི་ཐུགས་ཀར་བཞག་སྟེ། ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བ་ནི། དང་པོར་སྦྱོར་བའི་ཏིང་ངེ་འཛིན་རྫོགས་པའི་དུས་སུ་དེ་བཞིན་གཤེགས་པ་ཐམས་ཅད་ཀྱིས་ཆོས་ཀྱི་སྐུའི་དབང་བསྐུར་བ་གང་ཡིན་པ་དེས་དབང་བསྐུར་རོ། །དེ་ནས་རང་གི་ཐུགས་ཀའི་ཕྱོགས་སུ་ཕྱག་གཡོན་
[18a.4]པ་བརྐྱང་བའི་ཚུལ་གྱིས་བཟུང་ནས་གནས་པ་ལ། ཕྱག་གཡས་པས་འབྱེད་པའི་ཚུལ་དུ་མཛད་ནས་འདི་ཆེད་དུ་བརྗོད་དོ། །ཨེ་མའོ་ཞེས་བྱ་བ་ནི་ངོ་མཚར་བའོ། །རབ་ཏུ་དག་པའི་ས་ཞེས་བྱ་བ་ནི། མཆོག་ཏུ་གྱུར་པས་ན་རབ་ཏུའོ། །ཅིའི་ཕྱིར་འདི་རབ་ཏུ་དག་པ་ཡིན་ཞེ་ན། གང་གི་ཕྱིར་དྲི་མ་ཐམས་ཅད་དང་
[18a.5]བྲལ་བས་ན་དག་པའི་ཐ་ཚིག་གོ། །དེ་སུའི་ཡིན་ཞེ་ན། རྡོ་རྗེ་པདྨོ་འདི་དག་གི །ཞེས་སྨོས་ཏེ། འདིར་ཅིའི་ཕྱིར་ངོ་མཚར་ཆེ་ཞེ་ན། ཕ་ཡིན་བདག་གི་བུ་ཡང་ཡིན། །ཞེས་བྱ་བ་སྨོས་ཏེ། ཕ་ནི་རྡོ་རྗེ་པདྨའི་སྟེ། འདི་ཡང་བདག་ཉིད་ཡིན་ལ་བུ་ཡང་བདག་ཡིན་པས་ན། བསྐྱེད་པར་བྱ་བ་ཡིན་པའི་ཕྱིར་འདི་ངོ་
[18a.6]མཚར་བའོ། །འདི་སྐད་སྟོན་པ་ཡིན་ཏེ། འདི་གང་ཡིན་པ་ཡང་བདག་ཡིན་ལ་བདག་གང་ཡིན་པའང་འདི་ཡིན་པས་ན་རྡོ་རྗེ་པདྨས་འདུལ་བ་རྣམས་ཀྱིས་དེ་ལྟར་མཐོང་བ་ཡིན་ནོ། །འཇིག་རྟེན་དབང་ཕྱུག་ལས་པདྨ་འབྱུང་ལ། དེ་ལས་ཀྱང་འཇིག་རྟེན་དབང་ཕྱུག་ཏུ་བྱུང་བ་འདི་ངོ་མཚར་བའོ། །རིགས་
[18a.7]འདི་བྱིན་གྱིས་བརླབ་པར་མཛོད། །ཅེས་བྱ་བ་ནི། རང་གི་རིགས་བྱིན་གྱིས་བརླབས་ནས་གང་གིས་སེམས་ཅན་གྱི་དོན་བྱེད་པའི་ཕྱིར་བདག་ལ་གཏད་པའོ། །རིགས་འདི་ནི་ཞེས་བྱ་བ་ནི་རང་གི་ཐུགས་ཀར་བཞག་པ་གང་ཡིན་པ་འདིའོ། །དེའི་དོན་ནི་འདི་སྐད་སྟོན་པ་ཡིན་ཏེ། འདི་ལྟར་བཅོམ་ལྡན་འདས་
[18b]
[18b.1]ཁྱེད་ཀྱི་ཐུགས་ལ་རྡོ་རྗེ་འཆང་ཆེན་པོའི་གཟུགས་ཀྱིས་པདྨའི་རིགས་སུ་རྣམ་པར་གནས་པ་གང་ཡིན་པ་དེ་བདག་ཅག་གི་རིགས་ཀྱི་ནུས་པ་བསྐྱེད་པའི་ཕྱིར། བདག་ལ་དེ་གཏད་པ་ཡིན་གྱི་གཞན་དུ་ནི་མ་ཡིན་ནོ། །དེའི་ཕྱིར་རང་གི་རིགས་འདི་བྱིན་གྱིས་བརླབ་པར་མཛོད་ཅེས་བྱ་བ་ཡིན་ནོ། །དེ་ནས་ཞེས་
[18b.2]བྱ་བ་ནི་དེ་མ་ཐག་པ་སྟེ། གསོལ་བ་བཏབ་པའི་རྗེས་ཐོགས་ཉིད་ལ་བྱའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆོས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོའོ། །དེའི་དམ་ཚིག་ནི་ཧྲཱིཿཞེས་བྱ་བ་ཐུགས་ལ་གནས་སོ། །དེ་ལས་བྱུང་བ་ནི་རྣམ་པར་སྣང་མཛད་ཀྱི་ཐུགས་ལ་གནས་པའི་སེམས་
[18b.3]དཔའི་རྡོ་རྗེ་གང་ལས་པདྨ་ལྟ་བུར་བྱུང་བ་དེ་སྐད་དུ་བཤད་པ་དེས་བྱིན་གྱིས་བརླབས་ཤིང་བརྟན་པར་མཛད་ནས། པདྨོ་ལྟ་བུ་ལ་དམིགས་པའི་ཏིང་ངེ་འཛིན་གང་ཡིན་པ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ཤིང་མངོན་སུམ་དུ་མཛད་ནས་སོ། །འདི་ཞེས་བྱ་བ་ནི་བློ་ལ་གནས་པའོ། །དེ་བཞིན་
[18b.4]གཤེགས་པ་ཐམས་ཅད་ཀྱི་ཆོས་ནི་པདྨའི་འོད་ཟེར་གྱི་གཟུགས་ཅན་ནོ། །དམ་ཚིག་ཅེས་བྱ་བ་ནི་རྒྱུའོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་ནི་རང་གི་ཐུགས་ལ་གནས་པའི་ཐུགས་ཀའི་སེམས་དཔའི་རྡོ་རྗེ་ལས་བྱུང་བ་ནི་ངེས་པར་བྱུང་བའོ། །འདི་སྐད་སྟོན་པ་ཡིན་ཏེ། པདྨའི་རིགས་སྤྲུལ་
[18b.5]བའི་ཕྱིར་དང་པདྨའི་རྣམ་པའི་འོད་ཟེར་ལས་འཕགས་པ་སྤྱན་རས་གཟིགས་དབང་ཕྱུག་ཏུ་བྱིན་གྱིས་བརླབས་པའི་ཕྱིར་སེམས་དཔའི་རྡོ་རྗེ་བྱིན་གྱིས་བརླབས་པའི་རྣམ་པར་ཐུགས་རྩེ་གཅིག་ཏུ་མཛད་ནས་བཅོམ་ལྡན་འདས་རྣམ་པར་སྣང་མཛད་ཀྱིས་རྣམ་པར་སྣང་མཛད་ཆེན་པོ་ལ་བསྐུལ་བར་གྱུར་པ་ཡིན་ནོ། །དེ་བཞིན་གཤེགས་པ་
[18b.6]ཐམས་ཅད་ཀྱི་ཐུགས་ཀ་ནས་ཞས་བྱ་བ་ནི། བསྡུ་བས་བྱིན་ནས་རྣམ་པར་སྣང་མཛད་ལ་སོགས་པའི་ཐུགས་ལས་སོ། །པདྨ་ལྟ་བུ་ནི་པདྨའི་རྣམ་པར་རོ། །ཁ་དོག་དུ་མ་ནི་སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོའི་ཁ་དོག་གོ། །གཟུགས་དུ་མ་ནི་དབྱིབས་སྣ་ཚོགས་པའོ། །རྟགས་དུ་མ་ནི་མཚན་མ་སྣ་ཚོགས་
[18b.7]པའོ། །སྤྱོད་ལམ་དུ་མ་ནི་གནས་པ་དང་། འགྲོ་བ་དང་། འཆག་པ་དང་། འདུག་པ་དང་། ཉལ་བའི་རང་བཞིན་གྱི་པདྨ་ལྟ་བུའི་འོད་ཟེར་བྱུང་ནས། འདོད་ཆགས་ལ་སོགས་པ་རྣམ་པར་དག་པ་དང་ཞེས་བྱ་བ་ནི། དེ་ལ་མི་དམིགས་པའི་ཐུགས་
[19a]
[19a.1]རྗེ་ཆེན་པོ་ཆགས་པའོ། །སོགས་པ་སྨོས་པ་ནི་བྱང་ཆུབ་ཀྱི་སེམས་ལ་སོགས་པ་སྔར་བཤད་པ་རྣམས་གཟུང་བའོ། །འདོད་ཆགས་དང་པོར་བྱས་པ་གང་ཡིན་པ་ནི་འདོད་ཆགས་ལ་སོགས་པའོ། །དེ་ཉིད་རྣམ་པར་དག་པ་དང་། ཆོས་ཉིད་ཀྱི་ཡེ་ཤེས་ཀྱིས་འདོད་ཆགས་ལ་
[19a.2]སོགས་པ་བག་ཆགས་དང་བཅས་པའི་ཉོན་མོངས་པ་སྤངས་པའི་ཕྱིར་རོ། །དེར་ངེས་པའི་ཡེ་ཤེས་ཀྱི་གཟུགས་ཀྱིས་དེ་རྣམས་ཡང་དག་པར་སྦྱང་ཞིང་དག་པ་ལས་འཕགས་པ་སྤྱན་རས་གཟིགས་ཀྱི་དབང་པོའི་ཡེ་ཤེས་ལ་སོགས་པ་གདུལ་བྱ་ལ་བསྐྱེད་པར་བྱ་ཞེས་བྱ་བའི་དོན་ཏོ། །ཡང་སླར་
[19a.3]ལོག་སྟེ་འཕགས་པ་སྤྱན་རས་གཟིགས་དབང་པོའི་ཐུགས་ཀར་ཞུགས་སོ་ཞེས་བྱ་བ་ནི། འོད་ཟེར་ཞུགས་པའོ། །འཕགས་པ་སྤྱན་རས་གཟིགས་དབང་ཕྱུག་འདིས་པདྨའི་རིགས་སྤྲུལ་པར་བྱིན་གྱིས་རློབ་པ་ཡིན་ནོ་ཞེས་གསུངས་པ་ཡིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
[19a.4]ཐམས་ཅད་ཀྱི་ཆོས་ཀྱི་དམ་ཚིག་ཅེས་བྱ་བ་ནི། འཕགས་པ་སྤྱན་རས་གཟིགས་ཀྱི་དབང་པོར་བྱིན་གྱིས་བརླབས་པའི་རྗེས་ཐོགས་ཉིད་ལ། བཅོམ་ལྡན་འདས་རྣམ་པར་སྣང་མཛད་ཀྱིས་དེ་བཞིན་གཤེགས་པ་ཐམས་ཅད་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བའི་པདྨའི་རིགས་ཀྱི་ལྷ་
[19a.5]རྣམས་སོ། །དེ་དག་གི་ཆོས་ནི་པདྨའི་རིགས་ཀྱི་རྟེན་དང་བརྟེན་པའི་དཀྱིལ་འཁོར་རོ། །དེའི་དམ་ཚིག་ནི་སྐྱེད་པར་བྱེད་པའི་རྒྱུའོ། །མིང་དེ་སྐད་ཅེས་བྱ་བ་གང་ཡིན་པ་དེ་རིག་པ་དམ་པ་འདི་གསུངས་སོ། །དེ་ལྟར་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་རྣམས་ཀྱིས་དེ་བཞིན་
[19a.6]གཤེགས་པ་ཐམས་ཅད་ཀྱི་ཆོས་ཀྱི་དམ་ཚིག་གི་རིག་པ་དམ་པ་འདི་གསུངས་སོ། །དེ་ནས་ཞེས་བྱ་བ་ནི་དེ་མ་ཐག་པའོ། །འཕགས་པ་སྤྱན་རས་གཟིགས་ཀྱི་དབང་པོ་ནི་རྡོ་རྗེ་ཆོས་སོ། །པདྨའི་རིགས་སྤྲུལ་ཅིང་བྱིན་གྱིས་བརླབས་པའི་ཕྱིར། གཟུགས་ཀྱང་དེ་ཡིན་ལ་ཐམས་ཅད་ཀྱང་དེ་ཡིན་པས་
[19a.7]ན་གཟུགས་ཐམས་ཅད་པ་སྟེ། པདྨའི་སངས་རྒྱས་ལ་སོགས་པའོ། །དེས་འདུལ་བའི་རྒྱུད་ལ་ཡང་དག་པར་སྟོན་པས་ན། གཟུགས་ཐམས་ཅད་སྟོན་པའོ། །རྒྱུ་མཚན་དེས་མིང་དེ་སྐད་ཅེས་བྱ་བའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་པ་ཡིན་ནོ་ཞེས་བྱ་བ་འདི་ནི་ཐུགས་ལ་
[19b]
[19b.1]གནས་པའོ། །འགྲོ་བ་ཐམས་ཅད་འདུལ་བའི་དམ་ཚིག་ཅེས་བྱ་བ་ནི། སེམས་ཅན་གྱི་ཁམས་ཀྱི་འགྲོ་བ་ཐམས་ཅད་འདིས་འདུལ་བར་བྱེད་པས་འགྲོ་བ་ཐམས་ཅད་འདུལ་བའོ། །པདྨའི་རིགས་དེའི་དམ་ཚིག་གི་རྒྱུར་གྱུར་པ་སྟེ་སྐྱེད་པར་བྱེད་པའི་སྙིང་པོ་ནི་སྒྲའི་གཟུགས་ཏེ། འགྲོ་བ་ཐམས་
[19b.2]ཅད་འདུལ་བའི་དམ་ཚིག་ཅེས་བྱ་བ་འདི་གསུངས་ཤིག་པའོ། །འཕགས་པ་སྤྱན་རས་གཟིགས་དབང་པོའི་ཐུགས་ལས་ཞེས་བྱ་བ་ནི། གཟུང་བ་དང་འཛིན་པའི་རྣམ་པར་རྟོག་པ་ཐམས་ཅད་ལས་འཕགས་ཤིང་རིང་དུ་སོང་བས་ན་འཕགས་པའོ། །སེམས་ཅན་གྱི་ཁམས་རྣམས་འདུལ་བར་
[19b.3]བྱེད་པ་གང་ཡིན་པ་དང་། རང་གི་རིགས་ལ་གཟིགས་པས་ན་སྤྱན་རས་གཟིགས་སོ། །དེ་ལ་དབང་པོ་ནི་མངའ་བདག་སྟེ། འཕགས་པ་སྤྱན་རས་གཟིགས་ཀྱི་དབང་པོའོ། །དེའི་ཐུགས་ལ་ཞེས་བྱ་བ་ནི། སྙིང་གའི་ཟླ་བའི་དཀྱིལ་འཁོར་ལ་གནས་པའི་རྡོ་རྗེ་པདྨའི་འཕགས་པ་སྤྱན་རས་གཟིགས་
[19b.4]དབང་ཕྱུག་གི་ཐུགས་དེ་ལས་སོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་ཅེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གནས་པའི་སེམས་དཔའ་རྡོ་རྗེའི་གཟུགས་ནི་རྡོ་རྗེ་འཆང་ཆེན་པོའོ། །འཕགས་པ་སྤྱན་རས་གཟིགས་ཀྱི་དབང་པོའི་གཟུགས་འཛིན་པ་ཞེས་བྱ་བ་ནི།
[19b.5]སངས་རྒྱས་པདྨོ་ནས་བརྩམས་ནས་པདྨ་འབེབས་པའི་མཐར་ཐུག་པ་དེའི་ནང་ནས་གང་ལ་འཕགས་པ་སྤྱན་རས་གཟིགས་དབང་པོའི་གཟུགས་འཛིན་པ་དེ་ནི་འཕགས་པ་སྤྱན་རས་གཟིགས་དབང་པོའི་གཟུགས་འཛིན་པའོ། །པདྨའི་གདན་ལ་ཟླ་བའི་དཀྱིལ་འཁོར་གྱི་སྟེང་དུ་བཞུགས་པས་
[19b.6]ན་པདྨ་ལ་བཞུགས་པའོ། །རྡོ་རྗེ་རྩེ་ལྔ་པ་ལ་སོགས་པ་ནས་དྲིལ་བུའི་མཐར་ཐུག་པ་པདྨས་མཚན་པའི་མཚན་མའི་ཕྱག་རྒྱ་འཛིན་པའི་ཕྱིར་ན། ཕྱག་རྒྱའི་མཚན་མ་པདྨ་འཛིན་པའོ། །ཁ་དོག་སྣ་ཚོགས་པ་ནི་སྔོན་པོ་དང་སེར་པོ་ལ་སོགས་པའོ། །གཟུགས་ནི་དབྱིབས་རིང་བ་དང་ཐུང་བ་ལ་སོགས་
[19b.7]པའོ། །ཆ་ལུགས་ནི་སངས་རྒྱས་པདྨ་ལ་སོགས་པ་ནས་པདྨ་འབེབས་པའི་བར་ནི་ཆ་བྱད་དོ། །དེ་ཉིད་ཀྱི་རྒྱན་ནི་བཏགས་པའོ། །ཁ་དོག་དང་གཟུགས་དང་། ཆ་བྱད་དང་། རྒྱན་སྣ་ཚོགས་པ་གང་ཡིན་པ་དེ་དག་ནི་སྣ་ཚོགས་པའི་གཟུགས་ཀྱི་ཆ་བྱད་དང་རྒྱན་ནོ། །དེ་བཞིན་གཤེགས་པ་ལ་
[20a]
[20a.1]སོགས་པ་ཞེས་བྱ་བ་ནི་སངས་རྒྱས་པདྨ་ལ་སོགས་པའོ། །སེམས་དཔའ་ཐམས་ཅད་ཀྱི་གཟུགས་འཛིན་པ་ཞེས་བྱ་བ་ནི། དེ་བཞིན་གཤེགས་པ་ལ་སོགས་པ་སེམས་དཔའ་ཐམས་ཅད་ཀྱི་གཟུགས་འཛིན་པའོ། །དེ་ལྟར་གྱུར་པའི་བྱང་ཆུབ་སེམས་དཔའ་ཆེན་པོའི་
[20a.2]ལུས་སུ་གྱུར་ནས་བྱུང་སྟེ། ཟླ་བའི་དཀྱིལ་འཁོར་རྣམས་ལ་འཁོད་ནས་ཆེད་དུ་བརྗོད་པ་ནི་ཆེད་དུ་བརྗོད་དོ་ཞེས་བྱ་བར་སྦྱར་རོ། །ཅི་ཞིག་བྱས་ནས་ཆེད་དུ་བརྗོད་པ་འདི་ཆེད་དུ་བརྗོད་ཅེ་ན། འཇིག་རྟེན་གྱི་ཁམས་ཐམས་ཅད་དུ་ཞེས་བྱ་བ་སྨོས་ཏེ། འཇིག་རྟེན་གྱི་ཁམས་ཐམས་ཅད་དུ་རྣམ་པར་གནས་
[20a.3]པའི་སེམས་ཅན་གང་ཡིན་པ་དེ་དག་ལ་གང་དང་གང་གི་གཟུགས་ཀྱིས་འདུལ་བར་གྱུར་པ་དེ་དང་དེའི་གཟུགས་ཀྱིས་དེ་དག་རང་གི་གཟུགས་སུ་བསྟན་ནས་འདུལ་བར་བྱས་ཏེ། སླར་ལོག་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཚུལ་དུ་བཅོམ་ལྡན་འདས་ཤཱཀྱ་ཐུབ་པ་རྣམ་པར་སྣང་མཛད་ལ་སོགས་
[20a.4]པའི་ཕྱོགས་དང་མཚམས་སུ་དེ་བཞིན་གཤེགས་པ་ལ་སོགས་པ་དང་། སེམས་དཔའ་ཐམས་ཅད་ཀྱི་གཟུགས་ཀྱིས་ཟླ་བའི་དཀྱིལ་འཁོར་རྣམས་ལ་འཁོད་དེ་པདྨ་དང་ཟླ་བའི་དཀྱིལ་འཁོར་ལ་འདུག་ནས་ཆེད་དུ་བརྗོད་པ་གསུངས་སོ། །ཨེ་མའོ་ཞེས་བྱ་བ་ནི་ངོ་མཚར་བའོ། །སྐལ་བ་ཇི་ལྟ་བའི་
[20a.5]སེམས་ཅན་འདུལ་བའི་ཕྱིར། སངས་རྒྱས་པདྨ་ལ་སོགས་པའི་གཟུགས་བསྟན་པ་ནི་སངས་རྒྱས་ཐམས་ཅད་ཀྱི་ཐབས་སོ། །སྙིང་རྗེའི་བདག་ཉིད་ནི་དམིགས་པ་མེད་པའི་ཐུགས་རྗེའི་རང་བཞིན་ནོ། །འདིར་ཅི་ཞིག་ངོ་མཚར་ཞེ་ན། གང་དུ་ཐབས་ཀྱིས་འདུལ་མཛད་ན། །ཞེས་བྱ་བ་སྨོས་
[20a.6]ཏེ། དམིགས་པའི་ཐུགས་རྗེ་ལ་གནས་ནས་ལྷ་རྣམས་སུ་ཡང་གྱུར་པ་ཡིན་ནོ། །འཁོར་བའི་ཕུང་པོ་ཐམས་ཅད་ལས་བཟློག་ནས། ལས་དང་ཉོན་མོངས་པ་བག་ཆགས་དང་བཅས་པ་སྤངས་སུ་ཟིན་ཀྱང་ལྷ་ཆེན་པོ་ལ་སོགས་པ་ལྷའི་གཟུགས་སུ་ཡང་འགྱུར་བ་འདི་ནི་ངོ་མཚར་བའོ།
[20a.7]འདི་སྐད་སྟོན་པ་ཡིན་ཏེ། ཆོས་ཀྱི་དབྱིངས་ཀྱི་རང་བཞིན་གྱི་དེ་བཞིན་གཤེགས་པ་ནི་གཟུགས་ཀྱི་སྐུ་མ་ཡིན་ཡང་ལྷ་ལ་སོགས་པའི་གཟུགས་ཀྱིས་འདུལ་བ་ལ་མོས་པ་རྣམས་ཀྱིས་མཐོང་བ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་ཅེས་བྱ་བ་ནས། ལྷ་རྣམས་སུ་ཡང་གྱུར་པ་
[20b]
[20b.1]ཡིན་ཞེས་བྱ་བའི་བར་གྱི་གཞུང་འདི་ཙམ་གྱིས་འགྲོ་བ་འདུལ་བའི་དཀྱིལ་འཁོར་ཆེན་པོའི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ལ་སོགས་པ་ནི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་
[20b.2]པ་ཡིན་པར་ཤེས་པར་བྱའོ། །འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་དངོས་གྲུབ་རྣམས་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་དམ་ཚིག་དང་དབང་བསྐུར་བས་བསྒྲུབ་པར་བྱའོ་ཞེས་བསྟན་པའི་ཕྱིར། །དེ་ནས་ཡང་བཅོམ་ལྡན་འདས་ཞེས་བྱ་བ་ལ་སོགས་པ་
[20b.3]གསུངས་པ་ནི་སློབ་དཔོན་གྱི་ལས་དང་སློབ་མ་འཇུག་པའི་ཆོ་ག་རྒྱས་པ་ཡིན་ནོ། །རང་གི་རིགས་ཀྱི་དཀྱིལ་འཁོར་སྤྲུལ་པའི་ཕྱིར། དེ་བཞིན་གཤེགས་པ་ཐམས་ཅད་ལ་ཕུལ་ནས། འགྲོ་བ་འདུལ་བའི་དཀྱིལ་འཁོར་ཆེན་པོ་འདི་བཤད་དོ་ཞེས་བྱ་བར་སྦྱར་རོ། །སེམས་ཅན་ཐམས་ཅད་
[20b.4]ཅེས་བྱ་བ་ལ་སོགས་པ་དགོས་པའི་དོན་ཅི་ཞིག་ཡིན་ཞེ་ན། སེམས་ཅན་ཐམས་ཅད་ལ་ངན་སོང་དུ་ལྟུང་བ་དང་འཆི་བ་ལ་སོགས་པས་མི་འཇིགས་པ་ནི། མི་འཇིགས་པ་སྦྱིན་པ་དང་དོན་ཐོབ་པའོ། །དངོས་གྲུབ་དམ་པ་ནི་དེ་སངས་རྒྱས་དང་བྱང་ཆུབ་སེམས་དཔའ་གྲུབ་པའོ། །རྡོ་རྗེ་ཆོས་ཉིད་
[20b.5]ནི་པདྨའི་རིགས་རྡོ་རྗེ་གསང་བའི་རང་བཞིན་ནོ། །དེའི་ཡེ་ཤེས་ནི་ངེས་པའོ། །མངོན་པར་ཤེས་པ་ནི་དྲུག་གོ། །སེམས་ཅན་དེ་ཐམས་ཅད་ལ་མི་འཇིགས་པ་སྦྱིན་པ་དང་། དོན་དང་དངོས་གྲུབ་དམ་པ་དང་། རྡོ་རྗེ་ཆོས་ཉིད་དང་། ཡེ་ཤེས་དང་། མངོན་པར་ཤེས་པའི་འབྲས་བུ་རྙེད་པའི་རྒྱུ་དེའི་
[20b.6]ཕྱིར་ཕུལ་ལོ། །འདི་ཞེས་བྱ་བ་ནི་བློ་ལ་གནས་པའོ། །འགྲོ་བ་ཐམས་ཅད་འདུལ་བའི་ཞེས་བྱ་བ་ཕྱག་རྒྱ་ཆེན་པོ་གཙོ་བོར་གྱུར་པའི་དཀྱིལ་འཁོར་ཏེ། དཀྱིལ་འཁོར་ཆེན་པོ་དེ་གསུངས་ཤིང་བཤད་པའོ། །དེ་ནས་ཞེས་བྱ་བ་ནི་དེ་མ་ཐག་པ་དེ་སྔོན་དུ་བསྙེན་པའི་རྗེས་ཐོགས་ལའོ། །དེ་ནས་
[20b.7]ཞེས་བྱ་བ་ནི་རྒྱུ་དེའི་ཕྱིར་ཏེ་གང་གི་ཕྱིར་འགྲོ་བ་འདུལ་བའི་དཀྱིལ་འཁོར་ཆེན་པོར་འཇུག་པ་མེད་པར་དེས་འདུལ་བའི་སེམས་ཅན་གྱི་ཁམས་རྣམས་ལ་དེ་ལས་གསུངས་པའི་དངོས་གྲུབ་ཏུ་མི་འགྱུར་བ་དེའི་ཕྱིར་རབ་ཏུ་བཤད་པར་བྱ་བ་སྟེ། རབ་ཏུ་ཕྱེ་ནས་ཡང་དག་པར་བཤད་པར་བྱའོ། །
[21a]
[21a.1]དཀྱིལ་འཁོར་ཆེན་པོ་དམ་པ་སྟེ། །ཞེས་བྱ་བ་ནི་མཆོག་ཏུ་གྱུར་པའོ། །རྡོ་རྗེ་དབྱིངས་དང་འདྲ་བ་ནི། །ཞེས་བྱ་བ་ལ་སྤྲུལ་པའི་དཀྱིལ་འཁོར་དང་འདྲ་བས་ན། འགྲོ་བ་འདུལ་བའི་དཀྱིལ་འཁོར་ཆེན་པོའོ། །མཚན་གང་ཡིན་ཞེ་ན། འགྲོ་བ་འདུལ་བ་ཞེས་བྱ་བ་སྟེ། འགྲོ་
[21a.2]བ་འདུལ་བ་ཞེས་མིང་དུ་བཏགས་པའོ། །དེ་ཅི་འདྲ་བ་ཞིག་ཅེ་ན། གྲུ་བཞི་པ་ལ་སྒོ་བཞི་པ། །ཞེས་བྱ་བ་ནི་དེ་དབྱིབས་བཤད་པ་ཡིན་ནོ། །དེ་ཡི་ནང་དུ་སྲད་བུས་ནི། །གྲུ་བཞི་པ་ནི་བྲི་བར་བྱ། །ཞེས་བྱ་བ་ནི་ཕྱིའི་དཀྱིལ་འཁོར་དེ་ཉིད་ཀྱི་ནང་དུ་ནང་གི་སྲད་བུ་གྲུ་བཞི་བར་དེ་ལྟར་བྲི་བར་བྱའོ། །
[21a.3]དེ་ལྟར་ཡིན་ན་ནི་ཅི་ཞིག་ཏུ་འགྱུར་ཞེ་ན། གཉིས་པའི་གྲྭར་ནི་སྒོ་བཏོད་ཅིང་། །ཞེས་བྱ་བ་སྨོས་ཏེ། དཀྱིལ་འཁོར་གཉིས་པ་ཞེས་བྱ་བའི་ཐ་ཚིག་གོ། །གཉིས་པ་དེ་གྲུ་བཞི་བར་བྲི་བར་བྱས་ནས་དཀྱིལ་འཁོར་གཉིས་པ་དེའི་གྲྭ་བཞི་ཕྱིའི་དཀྱིལ་འཁོར་གྱི་སྒོ་ལ་མངོན་དུ་ཕྱོགས་
[21a.4]པར་བྱས་ཏེ། གཉིས་པའི་གྲྭར་ནི་སྒོ་བཏོད་ཅིང་། །ཞེས་བྱ་བ་བཤད་པ་ཡིན་ནོ། །གྲྭ་སྒོ་ལ་མངོན་དུ་ཕྱོགས་པ་གང་ཡིན་པ་དེ་ནི་དེར་ཡང་པདྨའི་རྣམ་པས་ཟུར་སྒོར་བཏོད་པ་ཡིན་ནོ། །པདྨ་འདབ་མ་འདྲ་བར་བྱ་བ་ཡིན། །ཞེས་སྨོས་སོ། །དེ་ཡང་ཇི་ལྟར་བྲི་བར་བྱ་ཞེ་ན། ཀ་བ་བརྒྱད་
[21a.5]ཀྱི་ཚུལ་དུ་ནི། །པདྨ་འདབ་མ་བརྒྱད་པ་བྲི། །ཞེས་བྱ་བ་སྨོས་ཏེ། ཆ་གསུམ་མཉམ་པར་ཐིག་བཏབ་ལ། །ཕྱོགས་དང་མཚམས་རྣམས་སུ་པདྨའི་འདབ་མ་བཞི་བཞི་བྲིས་ལ། འདབ་མ་རྣམས་ལ་རྡོ་རྗེ་བྲིའོ། །དེ་ཡི་གེ་སར་དབུས་སུ་ནི། །སངས་རྒྱས་ཀྱི་ནི་སྐུ་གཟུགས་གཞག །
[21a.6]ཅེས་བྱ་བ་ནི་དཀྱིལ་འཁོར་གཉིས་པ་དེའི་པདྨའི་ལྟེ་བའི་དབུས་སུ་རྣམ་པར་སྣང་མཛད་བྲི་བར་བྱའོ། །སངས་རྒྱས་ཕྱོགས་ཀུན་བྲི་བ་ནི། །པདྨའི་དབུས་སུ་གནས་པ་ཡི། །ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་དེ་ཉིད་ཀྱི་པདྨའི་ལྟེ་བའི་ཕྱོགས་བཞིའི་པདྨའི་གདན་ལ་བྲི་བར་
[21a.7]བྱའོ། །ཅི་ཞིག་བྲི་ཞེ་ན། རྡོ་རྗེ་རིན་ཆེན་པདྨ་དང་། །སྣ་ཚོགས་པདྨོ་དེ་བཞིན་ནོ། །ཞེས་བྱ་བ་སྨོས་ཏེ། རྡོ་རྗེ་སེམས་མའི་གནས་སུ་རྡོ་རྗེ་རྩེ་ལྔ་པས་མཚན་པའི་པདྨའོ། །རྡོ་རྗེ་རིན་ཆེན་མའི་གནས་སུ་ཡིད་བཞིན་གྱི་ནོར་བུ་རིན་པོ་ཆེ་པདྨ་འབའ་ཞིག་གིས་མཚན་པའོ། །རྡོ་རྗེ་ཆོས་མའི་
[21b]
[21b.1]གནས་སུ་པདྨ་འདབ་མ་བཅུ་དྲུག་པའི་རྡོ་རྗེ་པདྨའོ། །རྡོ་རྗེ་ལས་མའི་གནས་སུ་སྣ་ཚོགས་པདྨ་འདབ་མ་བཞི་པ་བྲི་བར་བྱའོ། །རྡོ་རྗེ་ཤུགས་ཀྱིས་བརྒལ་ནས་ནི། །ཞེས་བྱ་བ་ནི་བཤད་ཟིན་ཏོ། །འགྲོ་བ་འདུལ་བའི་དཀྱིལ་འཁོར་དུ། །ཞེས་བྱ་བ་ནི། སེམས་ཅན་གྱི་ཁམས་ཀྱི་འགྲོ་བ་དེ་འདུལ་བར་
[21b.2]བྱེད་པ་འདི་ནི་འགྲོ་བ་འདུལ་བ་སྟེ་འཇིག་རྟེན་དབང་ཕྱུག་གོ། །གཟུགས་རྣམས་ཐམས་ཅད་འབྱིན་པ་ནི། །ཏིང་ངེ་འཛིན་ལ་བཞུགས་པའོ། །དཀྱིལ་འཁོར་གྱི་ཤར་ཕྱོགས་ཀྱི་པདྨའི་འདབ་མ་ལ་དེར་ནི་སྤྱན་རས་གཟིགས་དབང་ཕྱུག་བྲི་བར་བྱའོ། །གཟུགས་རྣམས་ནི་སངས་རྒྱས་པདྨ་ལ་
[21b.3]སོགས་པ་ནས། པདྨ་འབེབས་པའི་མཐར་ཐུག་པའོ། །འབྱིན་པ་ནི་རང་གི་གཟུགས་ཀྱི་སྤྱི་གཙུག་ལ་སོགས་པའི་གནས་རྣམས་ནས། འོད་ཟེར་གྱི་ཚོགས་འབྱིན་པའོ། །འཕགས་པ་སྤྱན་རས་གཟིགས་དབང་ཕྱུག་དེའི་ཕྱོགས་ནི། ཐམས་ཅད་དུ་ནི་ཕྱོགས་བཞིར་རོ། །རྡོ་རྗེ་འགྱིང་
[21b.4]ལ་སོགས་ཚུལ་དུ། །ཞེས་བྱ་བ་ནི་རྡོ་རྗེ་དབྱིངས་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའི་ཚུལ་གྱིས་སོ། །སངས་རྒྱས་ལ་སོགས་སེམས་དཔའ་ཆེ། །མཚན་མ་པདྨོ་འཆང་བ་བྲི། །ཞེས་བྱ་བ་ནི་བྲིའོ་ཞེས་བྱ་བར་ཤེས་པར་བྱའོ། །དེ་ལ་སངས་རྒྱས་ནི་སངས་
[21b.5]རྒྱས་པདྨོ་ལ་སོགས་པ་སྨོས་པས་ནི་པདྨའི་ལྕགས་ཀྱུ་དང་པདྨ་ཆགས་པ་དང་། པདྨ་ལེགས་པ་རྣམས་གཟུང་བར་བྱའོ། །སངས་རྒྱས་དང་པོར་བྱས་པ་གང་ཡིན་པ་དེ་ནི། སངས་རྒྱས་ལ་སོགས་སེམས་དཔའ་ཆེ་སྟེ། བྲི་བར་བྱ་ཞེས་བྱ་བའི་དོན་ཏོ། །སངས་རྒྱས་ལ་སོགས་པ་དེ་དག་
[21b.6]ཇི་ལྟར་བྲི་བར་བྱ་ཞེ་ན། མཚན་མ་པདྨ་འཆང་བ་བྲི། །ཞེས་བྱ་བ་སྨོས་ཏེ། པདྨོའི་རྟགས་ཀྱི་མཚན་མ་ཅན་གྱི་རྡོ་རྗེ་ལ་སོགས་པ་འཆང་བ་ནི་མཚན་མ་པདྨོ་འཆང་བ་སྟེ། པདྨའི་མཚན་མ་ཅན་གྱི་སངས་རྒྱས་ལ་སོགས་པ་བྲི་བར་བྱའོ། །ཐམས་ཅད་དུ་རང་གི་སྙིང་པོ་བརྗོད་ཅིང་། སྙིང་པོའི་དོན་
[21b.7]བྲི་བར་བྱའོ། །དེ་ཡི་དབུས་སུ་བྲི་བ་ནི། །ཞེས་བྱ་བ་ནི་ལྷོ་ཕྱོགས་ཀྱི་པདྨའི་འདབ་མའི་དབུས་སུའོ། །ཐོར་ཚུགས་དབུས་ནའང་དེ་བཞིན་གཤེགས། །ཞེས་བྱ་བ་ནི་འཇིག་རྟེན་དབང་ཕྱུག་གི་རལ་པའི་ཐོར་ཚུགས་བྲིས་ལ། དེའི་དབུས་སུ་དེ་བཞིན་གཤེགས་པ་འོད་དཔག་ཏུ་མེད་པ་བྲི་བར་བྱའོ། །
[22a]
[22a.1]དེའི་ཕྱོགས་ནི་ཐམས་ཅད་དུ་ནི་ཐོར་ཚུགས་ཀྱི་ཕྱོགས་བཞིར་རོ། །ཁྲོ་གཉེར་ལ་སོགས་ཚུལ་དུ་ནི། །ཞེས་བྱ་བ་ནི་དེ་ལ་པདྨའི་ཁྲོ་གཉེར་ནི་བཅོམ་ལྡན་འདས་ནམ་མཁའི་སྙིང་པོའོ། །མཚན་མར་པདྨོ་འཆང་བ་ནི་པདྨའི་ཁུ་ཚུར་དེའི་སྦྱོར་བས་གཡོན་བསྙེམས་པ་དང་བཅས་
[22a.2]པས་པདྨའི་དྲིལ་བུ་བཟུང་ལ། དེ་བཞིན་དུ་ཕྱག་གཡས་པའི་ཁུ་ཚུར་པདྨས་མཚན་པའི་ཡིད་བཞིན་གྱི་ནོར་བུ་དབང་བསྐུར་བའི་གནས་སུ་འཇོག་པའོ། །སོགས་པ་སྨོས་པས་ནི། པདྨའི་ཉི་མ་དང་། དཔལ་དང་བཞད་པ་རྣམས་གཟུང་བར་བྱའོ། །ཁྲོ་གཉེར་ལ་སོགས་པའི་ཚུལ་ཅན་ནི་ཁྲོ་
[22a.3]གཉེར་ལ་སོགས་པའི་ཚུལ་ཏེ། ཁྲོ་གཉེར་ལ་སོགས་པའི་སྦྱོར་བ་དེས་མཚན་མ་པདྨོ་འཆང་བ་བྲི་བར་བྱའོ། །མཚན་མ་དེ་དག་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བསྟན་པ་གང་ཡིན་པ་དེ་ཐམས་ཅད་པདྨའི་མཚན་མ་ཅན་དུ་བྱའོ་ཞེས་བྱ་བའི་དོན་ཏོ། །ལྟག་འོག་གོ་རིམས་ཇི་བཞིན་དུ། །
[22a.4]ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བཤད་པའི་ཆོ་གས་བྲིའོ་ཞེས་བྱ་བའི་ཐ་ཚིག་གོ། །དཀྱིལ་འཁོར་གསུམ་པའང་དེ་བཞིན་ཏེ། །ཞེས་བྱ་བ་ནི་ནུབ་ཕྱོགས་ཀྱི་པདྨའི་འདབ་མ་ནི་དཀྱིལ་འཁོར་གསུམ་པའོ། །དེ་བཞིན་དུ་ཞེས་བྱ་བའི་རྣམ་པ་འདི་ནི་རྡོ་རྗེ་དབྱིངས་ལས་བཤད་པའི་
[22a.5]ཆོ་ག་ཉིད་ཀྱིས་བྱའོ་ཞེས་བྱ་བའི་དོན་ཏོ། །སེམས་དཔའ་ཆེན་པོ་སྙོམས་ཞུགས་པའི་ཏིང་ངེ་འཛིན་མཆོག་གི་ཕྱག་རྒྱས་བཞུགས་པ་ནི། སེམས་དཔའ་ཆེན་པོ་སྙོམས་པར་ཞུགས་པར་བྲིའོ། །གང་དུ་ཞེ་ན། པདྨའི་སྟེང་དུའོ། །སོགས་ཞེས་བྱ་བ་དེ་ནི་སྔ་མ་བཞིན་ནོ། །པདྨོ་གཟིགས་སོགས་
[22a.6]ཚུལ་དུ་ནི། །ཞེས་བྱ་བ་ནི་དེ་ལ་རྡོ་རྗེ་ཆོས་ཀྱི་ཏིང་ངེ་འཛིན་གྱི་སྦྱོར་བས་པདྨ་ལ་གཟིགས་ནས། པདྨའི་འདབ་མཁའ་བྱེད་པར་མཛད་པའོ། །སོགས་པ་སྨོས་པས་ནི། དེ་བཞིན་གཤེགས་པ་ཐམས་ཅད་གཅོད་པ་ལ་སོགས་པ་གཟུང་ངོ་། །དཀྱིལ་འཁོར་བཞི་པའང་དེ་བཞིན་ཏེ། །ཞེས་བྱ་བ་ནི་
[22a.7]བྱང་ཕྱོགས་ཀྱི་པདྨའི་འདབ་མའོ། །དེར་ནི་པདྨོ་ཞལ་བཞི་པ། །པདྨ་མདུང་རྩེ་ཐོགས་པ་བྲི། །ཞེས་བྱ་བ་ནི་སྤྱན་རས་གཟིགས་དབང་ཕྱུག་ཆེན་པོའི་གཟུགས་འཛིན་པ་ཞལ་བཞི་པ། པདྨའི་མདུང་བསྣམས་པ་བྲི་བར་བྱའོ་ཞེས་བྱ་བའི་དོན་ཏོ། །དེ་ཡི་ཕྱོགས་ནི་ཐམས་ཅད་དུ། །ཞེས་བྱ་བ་ནི་
[22b]
[22b.1]སྔ་མ་བཞིན་ནོ། །རྡོ་རྗེ་གར་སོགས་ཚུལ་དུ་ནི། །ཞེས་བྱ་བ་ནི་བཅོམ་ལྡན་འདས་པདྨ་གར་གྱི་དབང་ཕྱུག་གི་གར་གྱིས་བཞུགས་པ་ནི་རྡོ་རྗེ་གར་རོ། །དེ་ཉིད་ཐོག་མར་བྱས་པ་གང་ཡིན་པ་དེ་ནི་རྡོ་རྗེ་གར་ལ་སོགས་པའོ། །དེ་དག་གི་ཚུལ་གྱིས་ལེགས་པར་བཞུགས་པའི་སྦྱོར་བ་དེས་དཀྱིལ་འཁོར་དེ་
[22b.2]ལ་མཚན་མར་པདྨོ་འཛིན་པ་བྲིའོ། །གྲྭ་རྣམས་ཀུན་དུ་བྲི་བ་ནི། །ཞེས་བྱ་བ་ལ་སོགས་པ་ནི་རྡོ་རྗེ་དབྱིངས་ལས་གསུངས་པའི་ཆོ་གས་ཤེས་པར་བྱའོ། །དེ་བཞིན་དུ་པདྨ་ལ་སོགས་པ་མཆོད་པ་བཞི་ཞེས་བྱ་བ་ནི་བདུག་པ་མ་ལ་སོགས་པའོ། །དེ་ནས་ཚོགས་ལ་སོགས་པ་ཀུན། །ཞེས་བྱ་བ་ནི་
[22b.3]གནས་ཀྱི་ངེས་པ་ཙམ་ཡང་ཤེས་པར་བྱའོ། །ཡང་། དེ་ནས་རབ་ཏུ་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །ཞེས་བྱ་བ་ལ་སོགས་པ་ནི་དོན་རྒྱས་པ་བརྗོད་པར་བྱ་སྟེ། ཇི་ལྟར་བཅོམ་ལྡན་འདས་ཀྱིས་བཤད་པའི་མཛད་པ་བཞིན་དུ་བྱའོ། །དེ་ལ་རེ་ཞིག་དཀྱིལ་འཁོར་བྲི་བར་འདོད།
[22b.4]པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་བདག་ཡིན་ནོ་ཞེས་བསྒོམས་ལ་ནང་གི་བདག་ཉིད་ཅན་གྱིས་ཁྲུས་བྱས་ཏེ། སྙིང་པོ་བྱང་ཆུབ་ལ་ཐུག་གི་བར་དུ་དངོས་པོར་འཛིན་པའི་མངོན་པར་ཞེན་པ་མི་བྱའོ། །ཕྱིའི་ཁྲུས་ལ་མངོན་པར་ཞེན་པ་ཡིན་ན་ཡང་ཁྲུས་
[22b.5]ཀྱི་ཆོ་ག་ཡིན་པས་ཁྲུས་བྱའོ། །དེ་ལ་ལྷའི་ཁང་པ་དང་ཉེ་བ་ན་རྐང་པ་དང་ལག་པ་བཀྲུ་སྟེ། ལྷའི་ཁང་པའི་བགེགས་བསྐྲད་ནས། ལྷའི་ཁང་པར་ཞུགས་ལ། བདག་ཉིད་བསྲུང་བ་དང་། གནས་བསྲུང་བ་བྱས་ལ་པདྨའི་རྒྱུའི་ཕྱག་རྒྱས་འགྲོ་བ་འདུལ་བའི་དཀྱིལ་འཁོར་ཆེན་པོ་སྤྲུལ་ལ། མངོན་སུམ་ལྟ་བུར་དམིགས་
[22b.6]ཏེ། མེ་ཏོག་ལ་སོགས་པས་ཡང་དག་པར་མཆོད་ལ་ཕྱོགས་ཐམས་ཅད་ནས་དཀྱིལ་འཁོར་ལྔ་པ་དང་། ཨོཾ་སརྦྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་པྲ་ཎ་མྱ་ན་བཛྲ་བནྡ་ནཾ་ཀ་རོ་མི། ཞེས་བྱ་བའི་སྙིང་པོ་འདིས་ཕྱག་བྱས་ལ་དེ་ནས་ཕྱག་བཞི་བྱ་སྟེ། འདི་ལྟར་ཤར་ཕྱོགས་ནས་རྡོ་རྗེ་ཐལ་མོ་བརྐྱང་ལ་ལུས་ཐམས་
[22b.7]ཅད་ཕབ་སྟེ། ཨོཾ་སརྦྦ་ཏ་ཐཱ་ག་ཏ་པཱུ་ཛོ་པསྠཱ་ནཱ་ཡ་ཨཱཏྨ་ནཱཾ་ནི་ཪ་ཏ་ཡཱ་མི་སརྦྦ་ཏ་ཐཱ་ག་ཏ་བཛྲས་ཏྭ་ཨདྷི་ཏི་ཥྛཱ་སྭ་མཱཾ། ཞེས་བྱ་བ་འདིས་ཕྱག་བྱའོ། །དེ་ནས་ལྷོ་ཕྱོགས་ནས་དེ་བཞིན་དུ་གནས་པ་ལས་རྡོ་རྗེ་ཐལ་མོ་སྙིང་གར་སྦྱར་ཏེ། དཔྲལ་བ་ས་ལ་རེག་པར་བྱས་ལ། ཨོཾ་སརྦྦ་ཏ་ཐཱ་ག་ཏ་པཱུ་ཛ་ཨ་བྷི་ཥི་ཀཱ་ཡ་ཨཱཏྨ་ནཱཾ་
[23a]
[23a.1]ན་ཪྱཱི་ཏ་ཡཱ་མི། སརྦྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥཉྩི་མཱཾ། ཞེས་བྱ་བ་འདིས་ཕྱག་བྱའོ། །དེ་ནས་ནུབ་ཕྱོགས་ནས་དེ་བཞིན་དུ་གནས་པ་ལས། ཇི་ལྟ་བའི་རྡོ་རྗེ་ཐལ་མོ་སྤྱི་བོར་བཞག་སྟེ་ཁ་ས་ལ་རེག་པ་དང་། ཨོཾ་སརྦྦ་ཏ་ཐཱ་ག་ཏ་པཱུ་ཛ་པྲ་བརྟ་ནཱ་ཡ་ཨཱཏྨ་ནཱཾ་ནི་ཪྱཱ་ཏ་ཡཱ་མི། སརྦྦ་ཏ་ཐཱ་ག་ཏ་བཛྲ་དྷརྨྨ་
[23a.2]པྲ་བརྟ་ཡ་མཱཾ། ཞེས་བྱ་བ་འདིས་ཕྱག་བྱའོ། །དེ་ནས་བྱང་ཕྱོགས་ནས་དེ་བཞིན་དུ་གནས་པ་ལས་རྡོ་རྗེ་ཐལ་མོ་སྤྱི་པོ་ནས་ཕབ་སྟེ། སྙིང་གར་སྦྱར་ལ་སྤྱི་བོ་ས་ལ་རེག་པར་སྦྱར་ཏེ། ཨོཾ་སརྦྦ་ཏ་ཐཱ་ག་ཏ་པཱུ་ཛ་ཀརྨ་ཎེ་ཨཱཏྨ་ནཱཾ་ནི་ཪྻཱ་ཏ་ཡཱ་མི། སརྦྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཱཾ། ཞེས་བྱ་བ་འདིས་ཕྱག་བྱའོ། །པུས་
[23a.3]མོ་གཡས་པའི་ལྷང་ས་ལ་བཙུགས་ཏེ། རྡོ་རྗེ་ཐལ་མོ་སྙིང་གར་སྦྱར་ལ་སྡིག་པ་ཐམས་ཅད་བཤགས་པར་བྱའོ། །ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་ཞུགས་པ་ཐམས་
[23a.4]ཅད་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་བདག་ལ་དགོངས་སུ་གསོལ། བདག་མིང་རྡོ་རྗེ་ཆེ་གེ་མོ་ཞེས་བྱ་བ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་།
[23a.5]ལས་ཀྱི་རིགས་སུ་བཞུགས་པ་ཐམས་ཅད་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་ཀྱི་སྤྱན་སྔར་སྡིག་པ་ཐམས་ཅད་སོ་སོར་བཤགས་པས་སོ་སོར་བཤགས་པར་བགྱིའོ། །ཕྱོགས་བཅུ་ན་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་དང་བྱང་ཆུབ་
[23a.6]སེམས་དཔའ་རྣམས་དང་། རང་སངས་རྒྱས་རྣམས་དང་། འཕགས་པ་ཉན་ཐོས་ཡང་དག་པར་སོང་བ་རྣམས་དང་། ཡང་དག་པར་ཞུགས་པ་རྣམས་དང་། སེམས་ཅན་གྱི་ཚོགས་ཐམས་ཅད་ཀྱི་བསོད་ནམས་ཐམས་ཅད་ལ་རྒྱ་ཆེར་རྗེས་སུ་ཡི་རང་བར་བགྱིའོ། །ཕྱོགས་བཅུའི་སངས་རྒྱས་
[23a.7]བཅོམ་ལྡན་འདས་ཆོས་ཀྱི་འཁོར་ལོ་བསྐོར་བར་མི་མཛད་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བའི་ཕྱིར་བསྐུལ་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བར་བཞེད་པ་གང་ཡིན་པ་དེ་ཐམས་ཅད་ལ་མྱ་ངན་ལས་མི་འདའ་བར་གསོལ་བར་འཚལ་
[23b]
[23b.1]ལོ། །དེ་ནས་མེ་ཏོག་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་མེ་ཏོག་གི་བྱེ་བྲག །ཡིད་ལས་བྱུང་བའམ། ཆུ་ལས་སྐྱེས་པའམ། ཐང་ལས་སྐྱེས་པ་
[23b.2]གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། ཕྱག་རྒྱ་དང་། གསང་སྔགས་
[23b.3]དང་། རིག་སྔགས་ཀྱི་ལྷ་ཐམས་ཅད་ལ་དབུལ་བར་བགྱིའོ། །ཨོཾ་སརྦྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བདུག་པ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་
[23b.4]ཅད་ན། ལྷ་དང་མི་རྣམས་ཀྱི་བདུག་པའི་བྱེ་བྲག་ལྷན་ཅིག་སྐྱེས་པའམ། ཡང་དག་པར་སྦྱར་བའམ། ཡོངས་སུ་གྱུར་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར་ཞེས་བྱ་བ་ལ་སོགས་པ་དང་།
[23b.5]ཨོཾ་སརྦྦ་ཏ་ཐཱ་ག་ཏ་དྷཱུ་བེ་པཱུ་ཛ་མེ་གྷ་ས་མུ་དྲ་སྥར་ཎ་ས་མ་ཡེ་ཧཱུཾ། མར་མེའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་སྣང་བའི་བྱེ་བྲག་ཅེས་བྱ་བ་ལ་སོགས་
[23b.6]པས་དབུལ་བར་བྱའོ། །ཨོཾ་སརྦྦ་ཏ་ཐཱ་ག་ཏ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དྲིའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་ཡང་ཕྱོགས་བཅུའི་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་
[23b.7]ཀྱི་དྲིའི་བྱེ་བྲག་ལྷན་ཅིག་སྐྱེས་པའམ། ཡང་དག་པར་སྦྱར་བའམ། ཡོངས་སུ་གྱུར་པ་གང་དག་ཡོད་པ་དེ་རྣམས་འདི་ལྟ་སྟེ་ཞེས་བྱ་བ་ལ་སོགས་པ་དང་། ཨོཾ་སརྦྦ་ཏ་ཐཱ་ག་ཏ་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཐལ་མོ་ཁོང་སྟོང་དུ་སྦྱར་བ་བཅིངས་ལ། འདི་སྐད་ཅེས་བརྗོད་པར་བྱ་སྟེ། གང་
[24a]
[24a.1]ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། རིན་པོ་ཆེའི་རི་བོ་འམ། རྒྱ་མཚོ་ལས་བྱུང་བའི་རིན་པོ་ཆེའི་ཚོགས་གང་དག་ཡོད་པ་དེ་རྣམས་འདི་ལྟ་སྟེ་ཞེས་བྱ་བ་ལ་སོགས་པ་དང་། ཨོཾ་སརྦྦ་ཏ་ཐཱ་ག་ཏ་བོ་དྷྱཾ་ག་
[24a.2]རཏྣ་ཨཱ་ལཾ་ཀ་ར་པཱུ་ཛ་མི་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་ཐམས་ཅད་ཀྱི་དགོད་པ་དང་། སྒེག་པ་དང་། དགའ་བ་དང་། རྩེ་འཇོའི་བདེ་བའི་བྱེ་བྲག་གང་དག་ཡོད་པ་དེ་རྣམས་
[24a.3]འདི་ལྟ་སྟེ་ཞེས་བྱ་བ་ལ་སོགས་པ་དང་། ཨོཾ་སརྦྦ་ཏ་ཐཱ་ག་ཏ་ཧཱ་སྱ་ལཱ་སྱ་ར་ཏ་ཀྲི་ཌི་སཽ་ཁྱ་ཨ་ནུཏྟ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། དཔག་བསམ་གྱི་ཤིང་གང་དག་ཡོད་པ་དེ་རྣམས་
[24a.4]འདི་ལྟ་སྟེ་ཞེས་བྱ་བ་ལ་སོགས་པ་དང་། ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་བོ་དྷྱཾ་ཨཱ་ལཾ་ཀ་ར་ཝ་སྟྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ནས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཀྱིས་འཁོར་བའི་སྡུག་བསྔལ་རྗེས་སུ་དྲན་པར་
[24a.5]བྱས་ནས། སྙིང་རྗེའི་དབང་གིས་སེམས་ཅན་ཐམས་ཅད་བསྒྲལ་བར་བྱ་བའི་ཕྱིར་བྱང་ཆུབ་ཏུ་སེམས་བསྐྱེད་དེ། མ་བསྒྲལ་བ་རྣམས་བསྒྲལ་བར་བྱ་བའི་ཕྱིར་དང་། མ་གྲོལ་བ་རྣམས་དགྲོལ་བར་བྱ་བའི་ཕྱིར་དང་། དབུགས་མ་ཕྱིན་པ་རྣམས་དབུགས་འབྱིན་པར་བྱ་བའི་ཕྱིར་དང་། ཡོངས་
[24a.6]སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བྱ་བའི་ཕྱིར་དང་། སེམས་ཅན་གྱི་ཁམས་མ་ལུས་པ་འཁོར་བའི་རྒྱ་མཚོ་ལས་བསྒྲལ་བར་བྱ་བའི་ཕྱིར། བྱང་ཆུབ་ཏུ་སེམས་བསྐྱེད་པར་བགྱིའོ། །ཨོཾ་སརྦྦ་ཏ་ཐཱ་ག་ཏ་བཛྲ་བོ་དྷི་ཙིཏྟ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། དེ་ནས་
[24a.7]སྒེག་མོའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཡོ་བྱད་ཐམས་ཅད་ཀྱིས་ཡང་དག་པར་འབྱོར་ཅིང་། ཕུན་སུམ་ཚོགས་པ་ཐམས་ཅད་འདོད་པ་ཙམ་ལ་རག་ལས་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་མ་ཧཱ་བཛྲོད་བྷ་བ་དཱ་ན་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་
[24b]
[24b.1]མ་ཡེ་ཧཱུཾ། རྡོ་རྗེ་ཕྲེང་བ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་མི་དགེ་བའི་ལུས་དང་། ངག་དང་ཡིད་ཀྱི་ལས་ཀྱི་མཐའ་ཐམས་ཅད་དང་ཡང་དག་པར་བྲལ་བར་གྱུར་ཅིག །དགེ་བའི་ལུས་དང་ངག་དང་། ཡིད་ཀྱི་ལས་ཀྱི་མཐའ་ཐམས་ཅད་དང་ཡང་དག་
[24b.2]པར་ལྡན་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་བོ་དྷི་ཧ་ར་ཤཱི་ལ་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། རྡོ་རྗེ་གླུ་མཁན་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་མཚན་དང་དཔེ་བྱད་ཐམས་ཅད་ཀྱིས་ཡང་དག་པར་བརྒྱན་པར་བྱས་པ་དང་། རྟག་
[24b.3]ཏུ་ཕན་ཚུན་འཇིགས་པ་མེད་པ་དང་། ཞེ་འགྲས་པ་མེད་པར་ཞུགས་ཤིང་། མིག་དང་ཡིད་མངོན་པར་དགའ་བ་དང་། ཆོས་ཟབ་མོ་ལ་བཟོད་པ་དང་ལྡན་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་བོ་དྷི་ཀྵནྟི་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གར་མཁན་མའི་ཕྱག་རྒྱ་བཅིངས་ལ་འདི་སྐད་
[24b.4]ཅེས་བརྗོད་པར་བྱ་སྟེ། སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ལ་མངོན་པར་བརྩོན་པ་དང་ལྡན་པ་དང་། སངས་རྒྱས་ཉིད་དུ་ཡོངས་སུ་གཞོལ་ཞིང་འཁོར་བ་ཡོངས་སུ་སྤོང་བའི་བརྩོན་འགྲུས་དང་ལྡན་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་སན་ས་རཱ་བ་རི་ཏྱཾ་ག་ཨ་ནུཏྟ་ར་མ་ཧཱ་བིཪྱཱ་པཱ་ར་མི་ཏཱ་
[24b.5]པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མེ་ཏོག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང་བྲལ་བར་གྱུར་ཅིག །བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་དང་། མངོན་པར་
[24b.6]ཤེས་པ་རྣམས་དང་། རིག་པ་ཐམས་ཅད་དབང་དུ་གྱུར་པ་ཕུན་སུམ་ཚོགས་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་སཽ་ཁྱ་བི་ཧཱ་ར་དྷ་ན་པཱ་ར་མི་ཏཱ་བཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བདུག་པ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་འཇིག་རྟེན་དང་
[24b.7]འཇིག་རྟེན་ལས་འདས་པའི་ཤེས་རབ་དང་ཡེ་ཤེས་དང་ཡང་དག་པར་ལྡན་པར་གྱུར་ཅིག །སོ་སོ་ཡང་དག་པར་རིག་པ་བཞི་ཐོབ་སྟེ། བཟོ་དང་བསྟན་བཅོས་ཐམས་ཅད་ཤེས་ཤིང་སྒྱུ་རྩལ་དང་ལྡན་ལ་གསང་བའི་ཆོ་ག་ཤེས་པ་དང་། དེ་ཁོ་ན་ཉིད་མཐོང་སྟེ། ཉོན་མོངས་པ་དང་། ཤེས་བྱའི་སྒྲིབ་པ་
[25a]
[25a.1]ཐམས་ཅད་ཡང་དག་པར་གཅོད་པའི་ཡེ་ཤེས་ཐོབ་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་ཀླེ་ཤ་ཙྪེ་ད་མ་ཧཱ་པྲ་ཛྙཱ་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། ལུས་ཀྱིས་བསྙེན་བཀུར་བྱ་བའི་ཕྱིར། བདག་ཉིད་ཕྱོགས་བཅུའི་འཇིག་རྟེན་གྱི་ཁམས་མ་ལུས་པའི་དེ་
[25a.2]བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པར་ལྷག་པར་མོས་པར་བྱས་ལ། ཨོཾ་སརྦྦ་ཏ་ཐཱ་ག་ཏ་ཀཱ་ཡ་ནི་ཪྱཱིཏ་ན་བཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཐམས་ཅད་དུ་ལྕེ་བརྒྱ་སྟོང་སྙེད་ཀྱི་སྒོ་ནས། མཉམ་ཉིད་མི་གཡོ་ཞེས་བྱ་བའི་བསྟོད་པས་མཆོད་པར་ལྷག་པར་མོས་པ་བྱས་ལ། ཨོཾ་སརྦྦ་
[25a.3]ཏ་ཐཱ་ག་ཏ་ཝཱཀ་ནི་ཪྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བྱང་ཆུབ་སེམས་དཔའ་ཐམས་ཅད་དང་བསམ་པ་གཅིག་པའི་སྦྱོར་བས་ཆོས་ཐམས་ཅད་མཉམ་པ་ཉིད་ལ་ལྷག་པར་མོས་པ་བྱས་ལ། ཨོཾ་སརྦྦ་ཏ་ཐཱ་ག་ཏ་ཙིཏྟ་ནི་ཪྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཆོས་ཐམས་ཅད་སྟོང་པ་ཉིད་དང་།
[25a.4]མཚན་མ་མེད་པ་དང་། སྨོན་པ་མེད་པ་དང་། དངོས་པོ་མེད་པའི་ངོ་བོ་ཉིད་ཀྱིས་རྣམ་པར་དག་པར་མོས་པ་བྱས་ལ། ཨོཾ་སརྦྦ་ཏ་ཐཱ་ག་ཏ་གུ་ཧྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་བརྗོད་པར་བྱའོ། །དེ་ལྟར་མཆོད་པ་ཉི་ཤུས་མཆོད་ནས། དེ་བཞིན་གཤེགས་པ་ཐམས་ཅད་ལ་བདག་ཉིད་དབུལ་
[25a.5]གྱིས་བདག་དུས་ཐམས་ཅད་དང་། རྣམ་པ་ཐམས་ཅད་དུ་སོ་སོར་བཞེས་སུ་གསོལ། ཐུགས་རྗེ་ཆེན་པོ་དང་ལྡན་པའི་མགོན་པོ་ཁྱེད་རྣམས་ཀྱིས་དམ་ཚིག་ཆེན་པོའི་དངོས་གྲུབ་བདག་ལ་སྩལ་དུ་གསོལ། ཞེས་བརྗོད་ལ། དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ཏེ་དགེ་བའི་རྩ་
[25a.6]བ་འདི་དག་གིས། བདག་དང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་བྲལ་བར་གྱུར་ཅིག །འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་དང་ཡང་དག་པར་ལྡན་པའི་བདེ་བ་ཉིད་དང་ཡིད་བདེ་བ་ཉིད་ཀྱིས་མིའི་མཆོག་ཏུ་སེམས་
[25a.7]ཅན་ཐམས་ཅད་གྱུར་ཅིག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་གྲོལ། །ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ལ་
[25b]
[25b.1]སྡོམ་པ་གཟུང་བར་བགྱིའོ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱིས་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །
[25b.2]སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་དང་། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤོང་ངོ་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་
[25b.3]བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རབ་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་
[25b.4]དག་པ་ལ། ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་
[25b.5]གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་གྲོལ་བ་རྣམས་དགྲོལ་བར་བགྱི། །མ་བསྒྲལ་བ་ནི་བསྒྲལ་བར་བགྱི། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་བརྗོད་དོ། །དེ་ནས་བཛྲ་
[25b.6]ཨཉྩ་ལི་ཞེས་བྱ་བས་རྡོ་རྗེ་ཐལ་མོ་བཅིང་བར་བྱའོ། །བཛྲ་བནྡྷ་ཞེས་བྱ་བས་རྡོ་རྗེ་བསྡམས་པ་བཅིང་བར་བྱའོ། །བཛྲ་བནྡྷ་ཏྲཊ་ཞེས་བྱ་བས་རྡོ་རྗེ་བསྡམས་པ་སྙིང་གར་དགྲོལ་བར་བྱའོ། །བཛྲ་ཨཱ་བེ་ཤ །ཞེས་བྱ་བས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ། ཨ་ཞེས་བྱ་བས་བདག་ཉིད་ལ་
[25b.7]དབབ་པར་རིག་པར་བྱའོ། །ཏིཥྛ་བཛྲ་དྲྀ་དྷོ་མེ་ཞེས་བྱ་བ་ལ་སོགས་པས་དབབ་པ་དེ་ཡང་བརྟན་པར་བྱའོ། །བཛྲ་མུཥྚི། ཞེས་བྱ་བས་རྡོ་རྗེ་དབྱིངས་ལས་གསུངས་པའི་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ལ། ཨོཾ་བཛྲ་སནྡྷི་བཾ་ཞེས་བརྗོད་དོ། །ཨོཾ་སརྦྦ་ཨ་བ་ཡ་ཨཱ་ཀཪྵ་ཎ་བི་ཤོ་དྷ་
[26a]
[26a.1]ནེ་བཛྲས་མ་ཡ་ཧཱུཾ་ཕཊ། ཅེས་བྱ་བ་ཕྱག་རྒྱ་དང་བཅས་པས་ངན་འགྲོ་ཐམས་ཅད་དགུག་པར་བྱའོ། །རྡོ་རྗེ་ཕྱག་རྒྱ་གཉིས་ནང་དུ། །མཛུབ་མོ་གཉིས་ནི་བཅིངས་ནས་ཀྱང་། །ལེགས་པར་གྱེན་དུ་འཕངས་པ་ནི། །ལྟུང་བ་སློང་བའི་དམ་པའོ། །ཞེས་བྱ་བའི་ཕྱག་རྒྱས་
[26a.2]ངན་སོང་རྣམས་བཀུག་ལ། དེ་ནས་དེ་རྣམས་ལ་གསུམ་ལ་སྐྱབས་སུ་འགྲོ་བ་སྦྱིན་ནོ། །དུས་འདི་ནས་བཟུང་སྟེ། ཇི་སྲིད་སྙིང་པོ་བྱང་ཆུབ་ལ་འདུག་གི་བར་དུ་ཡང་དག་པར་རྫོགས་པའི་སངས་རྒྱས་དང་། ཆོས་དང་། དགེ་འདུན་དང་། ཕྱག་རྒྱ་དང་བཅས་པ་ལ་སྐྱབས་སུ་མཆིའོ། །དེ་ནས་
[26a.3]སྡིག་པ་བྲལ་བའི་ཕྱག་རྒྱ་བསྟན་ལ། ཨོཾ་བཛྲ་པཱ་ཎི་བི་སྤོ་ཊ་ཡ་སརྦྦ་ཨ་པ་ཡ། བནྡྷ་ཎི་པྲ་མོ་ཀྵ་ཡ། སརྦྦ་ཨ་པ་ཡ་ག་ཏེ་བྷྱ་སཏྠ་སཏྭ་ན་སནྡྲ་ཏ་ཐཱ་ག་ཏ་བྷ་བ་ཏ་བཛྲ་ས་མ་ཡ་ཏྲཊ། ཅེས་བརྗོད་ཅིང་། རྡོ་རྗེ་བཅིངས་པ་དམ་བཅས་ཏེ། །གུང་མོ་གཉིས་ཀ་སྦྱར་ནས་ནི། །ཐ་མ་བཞི་ཡི་རྩེ་མོ་སྦྱར། །སྡིག་
[26a.4]པ་འཇོམས་པར་གྲགས་པ་ཡིན། །དེ་ནས་རྣམ་པར་སྣང་མཛད་ལ་སོགས་པ་ནས། པདྨ་འབེབས་པའི་མཐར་ཐུག་པ་རྣམས་ཀྱི་དམ་ཚིག་གི་ཕྱག་རྒྱ་བཅིངས་ལ། སརྦྦ་ཤུདྡྷོ་ཞེས་བརྗོད་པར་བྱའོ། །སྔགས་དེ་ལན་གསུམ་བརྗོད་ཅིང་བཛྲ་མུཿཞེས་བྱ་བ་འདིས་རང་གི་སྙིང་གར་གཞུག་པར་
[26a.5]བྱའོ། །དེའི་ཚེ་ཨོཾ་ཧཱུཾ་ཧྲཱིཿཧོཿཞེས་བྱ་བའི་སྙིང་པོ་རང་གི་སྙིང་གར་ཟླ་བ་ལ་གནས་པའི་པདྨའི་སྟེང་དུ་བསམ་པར་བྱ་ཞིང་། ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ཆོས་ཐམས་ཅད་བདག་མེད་པར་བསྒོམས་ལ། དེའི་སྙིང་པོ་ཡང་ཡིད་ཀྱིས་བརྗོད་པར་བྱའོ། །དེ་ནས་སྙིང་
[26a.6]པོ་དེ་ཉིད་དབྱངས་ཡིག་བཅུ་དྲུག་དང་བཅས་པའི་ཟླ་བའི་དཀྱིལ་འཁོར་གྱི་རྣམ་པར་རང་གི་སེམས་བསམ་པར་བྱའོ། །དེ་ནས་དེའི་སྟེང་དུ་སྙིང་པོ་དེ་ཉིད་དང་ཡི་གེ་ཀ་ལ་སོགས་པ་ནས། ཀྵའི་མཐར་ཐུག་པ་དང་བཅས་པ་ལས་ཟླ་བའི་དཀྱིལ་འཁོར་གཉིས་པར་བསམ་མོ། །ཟླ་བའི་
[26a.7]དཀྱིལ་འཁོར་གཉིས་པ་དེ་ཉིད་བཤད་མ་ཐག་པའི་སྙིང་པོ་དང་བཅས་པ་ལས་རྡོ་རྗེ་རྩེ་ལྔ་པ་སྙིང་པོ་དེ་ཉིད་བརྗོད་པས་རྡོ་རྗེ་དེ་བཅོམ་ལྡན་འདས་འགྲོ་བ་འདུལ་བ་སྣ་ཚོགས་པདྨར་བསམ་པར་བྱའོ། །དེ་ནས་དེའི་དབུས་སུ་སྙིང་པོ་བཀོད་ལ་བི་ཤྭ་པདྨ་ཨ་ཧཾ་ཞེས་ཕྱག་རྒྱའི་ང་རྒྱལ་བསྐྱེད་
[26b]
[26b.1]པར་བྱའོ། །ཕྱག་རྒྱའི་གཟུགས་དེ་སེམས་དཔར་བྱིན་གྱིས་བརླབ་པའི་སྦྱོར་བས་རྡོ་རྗེ་སེམས་དཔར་བསྒོམས་ལ། བཛྲ་སཏྭ་ཨ་ཧཾ་ཞེས་བརྗོད་པར་བྱའོ། །དེ་ནས་བསྙེམས་པ་དང་བཅས་པས་རྡོ་རྗེ་གསོར་ཞིང་འདི་སྐད་བརྗོད་དོ། །བཛྲ་སཏྭ་ཨ་ཧཾ་ཞེས་བྱ་བ་དང་། ཨོཾ་ཧཱུཾ་ཧྲཱིཿཧོཿཛ་གད་
[26b.2]བི་ན་ཡ་ཨ་ཧཾ་ཞེས་བརྗོད་ལ། རྡོ་རྗེ་སེམས་དཔའ་དེ་འགྲོ་བ་འདུལ་བའི་བདག་ཉིད་དུ་བསམ་པར་བྱའོ། །མ་ཧཱ་ས་མ་ཡ་སཏྭ་ཨ་ཧཾ་ཞེས་བརྗོད་དོ། །དེ་ནས་འགྲོ་བ་འདུལ་བའི་དམ་ཚིག་གི་ཕྱག་རྒྱ་བཅིངས་ལ། ས་མ་ཡ་ཨ་ཧཾ་ཞེས་བྱའོ། །དམ་ཚིག་གི་ཕྱག་རྒྱ་དེ་ཉིད་ཀྱིས་སྙིང་ག་དང་དཔྲལ་བ་
[26b.3]དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །ས་མ་ཡ་སཏྭ་ཨ་དྷི་ཏིཥྟྲ་སྭ་མཱཾ་ཞེས་བྱའོ། །དེ་ནས་སྣ་ཚོགས་པདྨ་འཛིན་པའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ཏེ། དེའི་སྙིང་པོ་བརྗོད་ལ། སྐུ་དང་གསུང་དང་ཐུགས་རྡོ་རྗེ་རྣམས་འགྲོ་བ་འདུལ་བའི་བདག་ཉིད་དུ་བསྒོམ་པར་
[26b.4]བྱའོ། དེ་ནས་ནམ་མཁའ་དང་མཉམ་པའི་སྦྱོར་བས་རང་གི་སྙིང་གར་ཞུགས་ལ། པདྨའི་རྒྱུའི་ཕྱག་རྒྱས་སྟོང་གསུམ་པའི་སངས་རྒྱས་ཀྱི་ཞིང་གི་ཚད་དང་མཉམ་པའི་འགྲོ་བ་འདུལ་བའི་དཀྱིལ་འཁོར་ཆེན་པོར་སྤྲུལ་ལ་རིགས་ཀྱི་དམ་ཚིག་གི་ཕྱག་རྒྱ་བཅིངས་ནས། མེ་ཏོག་གི་ཕྲེང་བ་བླངས་ཏེ།
[26b.5]ཇི་ལྟ་བ་བཞིན་དུ་ཞུགས་ནས་རང་གི་སྤྱི་བོར་མེ་ཏོག་གི་ཕྲེང་བ་དོར་ཏེ་བཅིང་བར་བྱས་ན། དངོས་གྲུབ་ཀྱི་པདྨ་བརྟུལ་ཞུགས་ཀྱི་བར་དུ་སྤྱད་ལ་དཀྱིལ་འཁོར་དེ་མངོན་སུམ་དུ་གྱུར་པ་ལྟ་བུར་བསྒོམ་པར་བྱའོ། །ཡང་བཅོམ་ལྡན་འདས་འགྲོ་བ་འདུལ་བའི་ཕྱག་རྒྱ་བཅིངས་ཏེ། རང་གི་ལུས་ལ་ལྷ་
[26b.6]ཐམས་ཅད་ཀྱི་གནས་རྣམས་སུ་ཡི་གེ་ཧྲཱིཿལས་པདྨའི་གདན་བསྐྱེད་ལ། ཡང་དེ་རྣམས་ལ་ས་མ་ཡ་ཨ། ཞེས་བྱ་བས་ཟླ་བའི་དཀྱིལ་འཁོར་བསམས་ཏེ། ཡིད་ཀྱིས་རང་གི་ལུས་ཀྱི་གནས་སུ་འདུག་ལ། རང་གི་ལུས་ལས་ཕྱི་རོལ་གྱི་མདུན་དུ། ཨོཾ་ཧཱུཾ་ཧྲཱིཿཧོཿཨ། ཞེས་བྱ་བ་འདིས་ཟླ་
[26b.7]བའི་དཀྱིལ་འཁོར་གྱི་སྟེང་དུ་བཅོམ་ལྡན་འདས་འགྲོ་བ་འདུལ་བའི་སྣ་ཚོགས་པདྨ་སྤྲུལ་ལ་པདྨོ་ཨ་ཧཾ་ཞེས་པ་པདྨོའི་ང་རྒྱལ་བསྒོམ་པར་བྱའོ། །དེ་ནས་ཛ་གད་བི་ན་ཡ་ཨ་ཧཾ་ཞེས་བྱ་བས་འགྲོ་བ་འདུལ་བར་བདག་ཉིད་བསམས་ལ། དེ་ཉིད་ལ་རྟ་མགྲིན་ལ་སོགས་པའི་ལས་ཀྱི་ཕྱག་
[27a]
[27a.1]རྒྱ་རྣམས་ཀྱིས་བཅོམ་ལྡན་འདས་དགུག་པ་དང་། གཞུག་པ་དང་། བཅིང་བ་དང་དབང་དུ་བྱའོ། །ཨོཾ་ཧཱུཾ་ཧྲཱིཿཧོཿདྲྀ་ཤྱ་ཞེས་བྱ་བ་དང་། བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་བཅོམ་ལྡན་འདས་ལ་བལྟས་ཏེ། ཛཿཧཱུཾ་བཾ་ཧོཿ། ཞེས་བརྗོད་པ་དེ་ཉིད་ཀྱིས་རང་གི་ལུས་
[27a.2]ཀྱི་གནས་སུ་གནས་པ་ལ་གཞུག་པར་བྱའོ། །ས་མ་ཡ་སྟྭཾ་ཞེས་བརྗོད་པས་འོད་ཀྱི་དཀྱིལ་འཁོར་གྱི་རྣམ་པར་བསྒོམས་ལ། དེས་གྲུབ་པ་དང་ས་མ་ཡ་སྟྭཾ་ཨ་ཧཾ། ཨོཾ་ཧཱུཾ་ཧྲཱིཿཧོཿཞེས་བརྗོད་པས་བཅོམ་ལྡན་འདས་ལ་ཞུགས་པ་དང་། བདག་ཉིད་དང་ལྷན་ཅིག་ཐ་མི་དད་པར་བསྒོམ་པར་བྱའོ། །
[27a.3]དེ་བཞིན་དུ་རྡོ་རྗེ་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་ལ་ཡིད་ཀྱིས་རང་གི་ལུས་ཀྱི་གནས་སུ་འདུག་སྟེ། རང་གི་ལུས་ལས་ཕྱི་རོལ་གྱི་མདུན་དུ་པདྨ་འབེབས་པའི་ཡི་གེ་ཨའི་མཐའ་ཅན་གྱི་སྔགས་ཀྱིས་ཟླ་བའི་དཀྱིལ་འཁོར་གྱི་སྟེང་དུ་པདྨའི་དྲིལ་བུ་བསྐྱེད་ལ་པདྨོ་གྷནྚ་ཨ་ཧཾ། ཞེས་པདྨའི་
[27a.4]དྲིལ་བུའི་ང་རྒྱལ་བྱའོ། །པདྨ་ཨཱ་བེེ་ཤ་ཨ་ཧཾ། ཞེས་བྱ་བ་དེས་པདྨ་འབེབས་པའི་གཟུགས་སུ་བསྒོམས་ལ། དེ་ནས་པདྨ་འབེབས་པ་དེ་ཉིད་ལ་རྟ་མགྲིན་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱིས་དགུག་པ་དང་། གཞུག་པ་དང་། བཅིང་བ་དང་དབང་དུ་བྱས་ཏེ། རང་གི་དམ་ཚིག་གི་ཕྱག་རྒྱས་
[27a.5]བལྟས་ལ། དེའི་སྔགས་བརྗོད་ཅིང་དྲྀ་ཤྱ་ཞེས་ཀྱང་བརྗོད་དོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་། ཛཿཧཱུཾ་བཾ་ཧོཿཞེས་བརྗོད་པས་རང་གི་ལུས་ལ་བཅུག་ལ། ས་མ་ཡ་སྟྭཾ་ཞེས་བྱ་བས་འོད་ཀྱི་དཀྱིལ་འཁོར་དབབ་པ་དང་། ས་མ་ཡ་སྟྭཾ་ཨ་ཧཾ། ཞེས་པ་དང་སྔགས་བརྗོད་པས་པདྨ་འབེབས་
[27a.6]པ་དང་། བདག་ཉིད་ལྷན་ཅིག་ཏུ་གྱུར་པར་བསམ་པར་བྱའོ། །དེ་ནས་འགྲོ་བ་འདུལ་བ་ལ་སོགས་པའི་རྟེན་དང་། བརྟེན་པའི་ལུས་ལ་རྣམ་པར་སྣང་མཛད་དང་། མི་བསྐྱོད་པ་ལ་སོགས་པའི་དེ་བཞིན་གཤེགས་པ་ཐམས་ཅད་ཛཿཧཱུཾ་བཾ་ཧོཿཞེས་བརྗོད་ཅིང་། ཡིད་ཀྱིས་ལེགས་པའི་སྦྱོར་བ་ཡིས།
[27a.7]དམ་ཚིག་གི་ཕྱག་རྒྱ་རྣམས་ཀྱིས་གཞུག་ཅིང་བསྒྲུབ་པར་བྱའོ། །དེ་ནས་དེ་བཞིན་གཤེགས་པ་ལ་སོགས་པ་ནས། པདྨ་འབེབས་པའི་མཐར་ཐུག་པའི་བར་དུ་ཆོས་དང་། ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་དང་རྡོ་རྗེ་སེམས་མ་དང་། རིན་
[27b]
[27b.1]ཆེན་དང་། ཆོས་དང་། རྡོ་རྗེ་ལས་མའི་ཕྱག་རྒྱ་རྣམས་ཀྱིས་དེ་བཞིན་གཤེགས་པ་རྣམས་བྱིན་གྱིས་བརླབ་པ་དང་། འགྲོ་བ་འདུལ་བ་ལ་སོགས་པ་ནས། པདྨ་འབེབས་པའི་བར་དུ་རྡོ་རྗེ་པདྨའི་དམ་ཚིག་གི་ཕྱག་རྒྱས་རང་གི་ལུས་ཀྱི་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོར་
[27b.2]རིམ་པ་བཞིན་དུ་བྱིན་གྱིས་བརླབས་ཏེ། སྙིང་གའི་པདྨའི་ཕྱོགས་རྣམས་སུ་རྡོ་རྗེ་པདྨ་སངས་རྒྱས་ཀྱིས་དབང་བསྐུར་བ་དཔྲལ་བའི་ཕྱོགས་རྣམས་ཀྱི་རྡོ་རྗེ་རིན་ཆེན་མའི་གནས་སུ་བཤད་ཟིན་པའི་རིན་པོ་ཆེ་པདྨའོ། །ལྐོག་མའི་ཕྱོགས་རྣམས་ཀྱི་རྡོ་རྗེ་ཆོས་མའི་གནས་སུ་བཤད་ཟིན་པའི་པདྨོའི་རྡོ་རྗེ་
[27b.3]པདྨའོ། །ཐམས་ཅད་ཀྱི་སྤྱི་བོའི་ཕྱོགས་ཀྱི་རྡོ་རྗེ་ལས་མའི་གནས་སུ་བཤད་ཟིན་པའི་སྣ་ཚོགས་པདྨ་དང་ཟླ་བའི་གདན་རྣམས་ལ་སྣ་ཚོགས་པདྨ་རེ་རེ་ཞིང་རིམ་གྱིས་བསྐྱེད་པར་བྱའོ། །དེ་ནས་རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱས་དེ་བཞིན་གཤེགས་པ་རྣམས་ལ་
[27b.4]དབང་བསྐུར་ལ་འགྲོ་བ་འདུལ་བ་ལ་སོགས་པ་ནས། པདྨ་འབེེབས་པའི་མཐར་ཐུག་པའི་བར་དུ། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་ཆོས་མའི་ཕྱག་རྒྱས་དབང་བསྐུར་བར་བྱའོ། །དེ་ནས་རྡོ་རྗེ་པདྨའི་ཕྱག་རྒྱས་དབང་བསྐུར་བ་དང་། བདག་པོའི་དབང་
[27b.5]བསྐུར་བ་དང་། མིང་གི་དབང་བསྐུར་བ་དང་། དངོས་གྲུབ་ཀྱི་པདྨའི་བརྟུལ་ཞུགས་བླངས་ལ། པདྨའི་སྒེག་མོ་ལ་སོགས་པ་རྣམས་ཀྱིས་མཆོད་པ་དང་། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་ཡང་དག་པར་མཆོད་ལ། དེ་ཉིད་ཀྱིས་ན་པདྨ་གཟུང་། །
[27b.6]ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེ། །བྱིན་གྱིས་བརླབས་ནས་སྙིང་པོ་བཟླ། །དེ་ནས་ཨོཾ་བཛྲ་ཨཱཏྨ་ཀོ྅ཧཾ། ཞེས་བརྗོད་པས་ལྷ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་རང་བཞིན་དུ་བདག་ཉིད་བསྒོམ་པར་བྱའོ། །ཨོཾ་སྭ་བྷཱ་ཝ་ཤུདྡྷོ྅ཧཾ། ཞེས་བྱ་བས་གཟུགས་
[27b.7]བརྙན་དང་མཚུངས་པའི་སྟོང་པ་ཉིད་ཀྱི་རང་བཞིན་དུ་མོས་པ་དང་། ཨོཾ་སརྦ་ས་མོ་ཧཾ་ཞེས་བྱ་བས་བདག་གཉིས་སུ་མེད་པའི་ཡེ་ཤེས་སུ་བསྐྱེད་པར་བྱའོ། །ལྷ་ཐམས་ཅད་ཀྱི་ངོ་བོ་ཉིད་བདག་ཡིན་ནོ་སྙམ་དུ་བསམས་ལ་འདི་ཙམ་གྱིས་ནི་རྣལ་འབྱོར་ཆེན་པོ་རྫོགས་པར་འགྱུར་བ་ཡིན་ནོ། །ད་ནི་
[28a]
[28a.1]གནས་ཀྱི་ངེས་པ་བརྗོད་པར་བྱ་སྟེ། དེ་ལ་སྔགས་པའི་སྙིང་གར་གནས་པའི་ཟླ་བ་ལ་ཟླ་བ་དང་པདྨའི་གདན་གྱི་དབུས་སུ་འགྲོ་བ་འདུལ་བའི་མདུན་དུ་པདྨའི་སངས་རྒྱས། གཡས་སུ་པདྨའི་རྒྱལ་པོ། གཡོན་དུ་པདྨའི་ཆགས་པ། རྒྱབ་ཏུ་པདྨའི་ལེགས་པ། མཛོད་
[28a.2]སྤུའི་ཕྱོགས་སུ་གཙུག་ཕུད་སངས་རྒྱས་དང་། པདྨའི་ཁྲོ་གཉེར་རིག་པའི་རྒྱལ་པོའོ། །མགོ་བོའི་རྒྱབ་ཏུ་པདྨའི་ཉི་མ། ཕྲག་པ་གཉིས་སུ་པདྨའི་དཔལ། སོའི་ཕྲེང་བ་གཉིས་ལ་པདྨའི་བཞད་པ། ལྐོག་མའི་ཕྱོགས་སུ་དབུས་ཀྱི་ཆ་ལ་པདྨའི་ཏིང་ངེ་འཛིན། དེའི་མདུན་དུ་པདྨའི་སྒྲོལ་མ།
[28a.3]རྣལ་འབྱོར་པའི་ནུ་མ་གཉིས་ལ་པདྨ་རྣོན་པོའོ། །ལྟེ་བར་པདྨའི་རྒྱུ། ལྕེ་ལ་པདྨའི་བསྲུང་བ། སྤྱི་གཙུག་ཏུ་པདྨ་དོན་ཡོད་པའི་དབང་ཕྱུག །དེའི་མདུན་དུ་པདྨ་གར་གྱི་དབང་ཕྱུག །རྣལ་འབྱོར་པའི་ནམ་འཚང་གཉིས་སུ་པདྨའི་བསྲུང་བ། ཁར་པདྨའི་གནོད་སྦྱིན། རྐེད་པར་པདྨའི་ཁུ་ཚུར།
[28a.4]སངས་རྒྱས་པདྨའི་གཡོན་ལོགས་སུ་པདྨའི་སྒེག་མོ་དང་། པདྨའི་ཁྲོ་གཉེར། རིག་པའི་རྒྱལ་པོའི་གཡོན་ལོགས་སུ་པདྨའི་ཕྲེང་བ་མ། པདྨ་སྒྲོལ་མའི་གཡོན་ལོགས་སུ་པདྨའི་གླུ་མ། པདྨ་གར་གྱི་དབང་ཕྱུག་གི་གཡོན་ལོགས་སུ་པདྨའི་གར་མ། རྣལ་འབྱོར་པའི་སྣམ་ལོགས་ཀྱི་
[28a.5]གསང་བའི་གནས་སུ་པདྨའི་བདུག་པ་མ། མགོ་ལ་པདྨའི་མེ་ཏོག་མ། མིག་ལ་པདྨའི་མར་མེ་མ། ནུ་མ་དང་བྲང་དང་། སྙིང་གར་པདྨའི་བྱུག་པ་མ། བརླ་གཡས་པ་ལ་རྟ་མགྲིན། བརླ་གཡོན་པ་ལ་དོན་ཡོད་པའི་ཞགས་པ། བྱིན་པ་གཡས་པ་ལ་པདྨའི་ལྕགས་སྒྲོག །བྱིན་པ་གཡོན་
[28a.6]པ་ལ་པདྨའི་འབེབས་པ། དེ་བཞིན་གཤེགས་པ་རྣམས་ནི་རྟེན་དང་བརྟེན་པའི་ལུས་ཀྱི་ཡན་ལག་ཐམས་ཅད་ལ་ཏིལ་དང་ཏིལ་མར་གྱི་ཚུལ་གྱིས་བཞུགས་སོ། །ཉིན་རེ་ཞིང་རྣལ་འབྱོར་ཆེན་པོ་ལན་རེ་བསྒྲུབ་པར་བྱའོ། །དེ་ལྟར་རྣལ་འབྱོར་ཆེན་པོ་བྱས་ནས། ཐུན་བཞིའི་སྦྱོར་བས་ཐམས་ཅད་
[28a.7]ཀྱི་སྔགས་བཟླས་བརྗོད་འབུམ་བྱ་བའམ། ཡང་ན་རང་གི་སྙིང་གར་འཆད་པར་འགྱུར་བའི་འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་ཚུལ་གྱིས་དཀྱིལ་འཁོར་སྤྲུལ་ལ་ཟླ་བ་གཅིག་གམ། ཟླ་བ་དྲུག་དྲུག་གམ། ལོ་གཅིག་གི་བར་དུ་ཇི་སྲིད་རྒྱུན་མི་འཆད་པར་
[28b]
[28b.1]དཀྱིལ་འཁོར་མངོན་སུམ་དུ་མཐོང་བ་དེ་སྲིད་ཀྱི་བར་དུ་བསྒོམ་པར་བྱའོ། །ཡང་ན་དང་པོར་སྦྱོར་བ་དང་། དཀྱིལ་འཁོར་ཆེན་པོ་རྒྱལ་མཆོག་དང་། ལས་ཀྱི་རྒྱལ་མཆོག་བསྒོམས་ལ། ཉིན་རེ་ཞིང་ཐུན་བཞིའི་སྦྱོར་བ་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གི་བར་དུ་དཀྱིལ་འཁོར་བསྒོམ་པར་བྱའོ། །
[28b.2]དེ་ལྟར་སྔ་མ་བཞིན་དུ་རྣལ་འབྱོར་ཆེན་པོ་བསྒོམས་ནས། ས་སྦྱང་བ་དང་། ས་གཟུང་བར་བྱའོ། །དེ་ནས་བདག་ཉིད་ཁྲུས་བྱས་ལ་ལུས་དྲིས་བྱུགས། ཇི་སྙེད་པའི་རྒྱན་གདགས་ཤིང་། ཤིན་ཏུ་དཀར་བའི་གོས་བསྒོ་ཞིང་། མེ་ཏོག་ཕྲེང་བས་གདོང་ཡང་བརྒྱན། ཞག་བདུན་གྱི་བར་དུ་ཏིང་ངེ་འཛིན་
[28b.3]གསུམ་ནས་བརྩམས་ཏེ། དཀྱིལ་འཁོར་བསྒོམས་ནས། དེ་ནས་དཀྱིལ་འཁོར་གྱི་སའི་དབུས་སུ་བདག་དང་གནས་བསྲུང་བ་བྱས་ལ། སྔར་བཤད་པའི་པདྨའི་རྒྱུའི་ལས་ཀྱི་ཕྱག་རྒྱས་དཀྱིལ་འཁོར་སྤྲུལ་ཏེ། ཕྱག་བྱ་བ་ལ་སོགས་པ་སྔོན་དུ་འགྲོ་བས་སྡོམ་པ་བླང་བ་དང་། རྣལ་འབྱོར་ཆེན་པོ་བྱས་
[28b.4]ལ། དེ་ནས་སྔ་མ་བཞིན་དུ། དེ་ཉིད་ཀྱིས་ནི་པདྨ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ནས་སྙིང་པོ་གསུམ་བརྗོད་ཅིང་། །དོན་གསུམ་ནི། རྡོ་རྗེའི་བདག་ཉིད་དང་། ནམ་མཁའ་དང་མཚུངས་པ་དང་། ཆོས་བདག་
[28b.5]མེད་པར་མཉམ་པ་ཉིད་ཀྱིས་སེམས་ཅན་ཐམས་ཅད་དང་མཚུངས་སོ་ཞེས་བསྒོམ་པར་བྱའོ། །དེ་ནས་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། ནམ་མཁའི་ཕྱོགས་སུ་གནས་པ་དང་། ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ། ཨཱ་དྱ་ནུ་ཏྤནྣ་ཏྭ་ཏ་ཅེས་ཡིད་ཀྱིས་བརྗོད་ལ། སྟོང་གསུམ་པའི་སངས་རྒྱས་
[28b.6]ཀྱི་ཞིང་གི་ནམ་མཁའི་ཚད་དང་མཉམ་པར་བསམ་པར་བྱའོ། །དེ་ནས་ནམ་མཁའི་ཕྱོགས་དེར། དང་པོར་ཡི་གེ་ཡཾ་ཡོངས་སུ་གྱུར་པ་ལས། རླུང་གི་དཀྱིལ་འཁོར། དེའི་སྟེང་དུ་ཡི་གེ་བཾ་ལས་འོ་མའི་རྒྱ་མཚོ། དེའི་སྟེང་དུ་ཡི་གེ་ལོ་ལས་གསེར་གྱི་དཀྱིལ་འཁོར། དེའི་སྟེང་དུ་བཾ་ཡོངས་སུ་
[28b.7]གྱུར་པ་ལས་འོ་མའི་རྒྱ་མཚོ་བསམ་པར་བྱའོ། །དེའི་དབུས་སུ་ཧཱུཾ་སུཾ་ཧཱུཾ་ཞེས་བྱ་བ་ལས་རི་རབ་ཆེན་པོ་ཟུར་བཞི་པ། རིན་པོ་ཆེ་སྣ་བཞིའི་རང་བཞིན་ཅན། རིན་པོ་ཆེས་བརྒྱན་པ། སྟོང་གསུམ་པའི་སངས་རྒྱས་ཀྱི་ཞིང་གི་ཚད་དང་མཉམ་པར་བསྒོམ་མོ། །ཨོཾ་བཛྲ་དྲྀ་ཌྷོ་མེ་བྷ་བ་རཀྵ་སརྦྦཾ་སྭཱ་ཧཱ།
[29a]
[29a.1]ཞེས་བརྗོད་ཅིང་རྡོ་རྗེ་བསྡམས་པ་བརྐྱང་སྟེ། ས་ལ་བཞག་ནས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །དེའི་སྟེང་དུ་པདྨའི་རྒྱུའི་ལས་ཀྱི་ཕྱག་རྒྱས་འགྲོ་བ་འདུལ་བའི་ཁང་བུ་བརྩེགས་པ་རྩེ་མོ་རྡོ་རྗེ་དང་ནོར་བུ་རིན་པོ་ཆེ་ལས་བྱས་པ་སྤྲུལ་ལ། པདྨའི་ཁང་བུ་བརྩེགས་
[29a.2]པའི་དབུས་སུ་ཨ་སི་ཨཾ་ཞེས་བྱ་བས་སེང་གེའི་གདན་དང་། ལྷ་ལྷག་མ་རྣམས་ཀྱི་གནས་སུ་ཡི་གེ་ཧྲཱིཿལས་པདྨའི་གདན་དང་། སེང་གེའི་གདན་ལ་སོགས་པ་དེ་རྣམས་ལ་ས་མ་ཡ་ཨ་ཞེས་བྱ་བས་ཟླ་བའི་དཀྱིལ་འཁོར་སྤྲུལ་ལ། དཀྱིལ་འཁོར་གྱི་སའི་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་སྟེ་
[29a.3]བདག་ཉིད་སྤྲོ་བ་བསྐྱེད་པར་བྱའོ། །དེང་དུས་བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །ལྷ་དང་དམ་ཚིག་གིས་མཉམ་པར། །གྱུར་པར་ཡང་ནི་ཐེ་ཚོམ་མེད། །བྱང་ཆུབ་སེམས་དཔའ་སེམས་གཅིག་པས། །མི་ལྡོག་པར་ནི་བདག་གྱུར་ཏེ། །པདྨ་ཆེན་པོའི་རིགས་སུ་
[29a.4]ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གི་མཆོག་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པ། །དེང་བདག་འདུས་པའི་མཆོག་ཡིན་ནོ། །དེ་ནས་ཡན་ལག་ཐམས་ཅད་ཀྱིས་ཕྱག་བྱས་ལ། སྤོས་སྣོད་ལག་ཏུ་ཐོགས་ཏེ། སངས་རྒྱས་ཐམས་ཅད་སྤྱན་དྲང་
[29a.5]བར་བྱའོ། །མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། །བདག་མིང་ཆེ་གེ་ཞེས་བགྱི་བས། །པདྨ་ཅན་གྱི་དཀྱིལ་འཁོར་བྲི། །དེང་འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདི་ནི་སྩལ་དུ་གསོལ། །ཞེས་བརྗོད་ལ། དང་པོའི་སྦྱོར་བ་དང་། དཀྱིལ་
[29a.6]འཁོར་རྒྱལ་མཆོག་དང་། ལས་ཀྱི་རྒྱལ་མཆོག་རྣམས་བསྒོམས་ལ། དེ་ནས་འགྲོ་བ་འདུལ་བའི་གནས་སུ་འགྲོ་བ་འདུལ་བའི་ཕྱག་རྒྱ་ཆེན་པོར་གནས་ཏེ། དེའི་སྔགས་ཟློས་པ་ལ་བརྩོན་པའི་རྣལ་འབྱོར་པ་ལ་སྒྲུབ་པའི་གྲོགས་མཆོག་དེ་བཞིན་གཤེགས་པའི་ང་རྒྱལ་དང་ལྡན་པས་དཀྱིལ་འཁོར་བྲི་
[29a.7]བའི་ཕྱིར། འགྲོ་བ་འདུལ་བའི་མཚན་བརྒྱ་རྩ་བརྒྱད་པས་གསོལ་བ་གདབ་པར་བྱའོ། །དེ་ནས་ལངས་ལ་དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་བྱས་ལ་དེ་བཞིན་གཤེགས་པ་ཐམས་ཅད་ཀྱིས་ནམ་མཁའི་ཁམས་གང་བར་མངོན་དུ་བསམས་ལ། བདག་ནི་རང་ཉིད་པདྨ་ཅན། །པདྨའི་
[29b]
[29b.1]སེམས་དཔར་བདག་རང་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཅན་པདྨ་ཅན་བདག་ཡིན། །བདག་ནི་རྣལ་འབྱོར་དབང་ཕྱུག་རྒྱལ། །ཕྱག་ན་པདྨོ་བརྟན་བདག་ཡིན། །བདག་པོ་པདྨོ་ཆེན་པོ་བདག །བྱིན་གྱིས་བརླབས་པ་མི་འདོར་རོ། །ཨོཾ་ཧཱུཾ་ཧྲཱིཿཧོཿཞེས་བརྗོད་ལ་ང་རྒྱལ་བསྐྱེད་དེ། བཛྲ་
[29b.2]དྲྀ་ཤྱ་ཕཊ། ཅེས་བྱ་བའི་མིག་གཉིས་སུ་བཀོད་ལ་ཡི་གེ་ཨཿལས་རྐང་མཐིལ་དུ་སྣ་ཚོགས་རྡོ་རྗེ་བསྐྱེད་ལ་བདག་ཉིད་སྣ་ཚོགས་པདྨའི་ཕྱག་རྒྱ་བཅིངས་ལ། ཨོཾ་ཧཱུཾ་ཧྲཱིཿཧོཿབཛྲ་ཨདྷི་ཏིཥྛ་མཎྜལ་ཨུ་ཐ་ཡ་ཞེས་བརྗོད་ཅིང་དཀྱིལ་འཁོར་ནམ་མཁའི་ཕྱོགས་སུ་གདེག་པར་བྱའོ། །དེ་ནས་ཕྱག་རྒྱ་དེས་བདག་ཉིད་
[29b.3]ལ་བྱིན་གྱིས་བརླབས་ལ་ཡང་ཕྱག་རྒྱ་ཆེན་པོ་བཅིངས་ཏེ། ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། ཨོཾ་ཧཱུཾ་ཧྲཱིཿཧོཿཞེས་བརྗོད་ནས། །བསྒྱིངས་པའི་ཚུལ་གྱིས་རབ་ཏུ་བསྐོར། །དེ་ནས་བགེགས་བསལ་བ་ལ་སོགས་པ་བྱས་ནས། ཡང་སྒོ་དབྱེ་བའི་ཕྱག་རྒྱས་
[29b.4]སྒོ་ཕྱི་ལ་སྔགས་དང་ཕྱག་རྒྱ་འདི་དང་ལྡན་པས་གསང་བའི་དཀྱིལ་འཁོར་དགུག་པར་བྱའོ། །ཨོཾ་བཛྲ་མཎྜལ་ཧཱུཾ་ཛཿདེའི་ཕྱག་རྒྱ་ནི་འདི་ཡིན་ཏེ། རྡོ་རྗེ་ཁུ་ཚུར་གཉིས་ཀྱི་མཛུབ་མོ་དང་མཐེ་བོ་གཉིས་རྡོ་རྗེར་བྱས་ལ། དཀྱིལ་འཁོར་ཐམས་ཅད་དགུག་པར་བྱེད་པ་ནི་རྡོ་རྗེ་འཁོར་ལོའི་ཕྱག་རྒྱའོ། །ཨོཾ་མ་ཧཱ་
[29b.5]བཛྲ་ཙཀྲ་ཨ་དྷི་ཏིཥྛ་སིད་ཏྱཱ་ཧཱུཾ་ཞེས་བྱ་བ་ཕྱག་རྒྱའི་སྦྱོར་བ་འདིས་ཡང་དཀྱིལ་འཁོར་བྱིན་གྱིས་བརླབ་པར་བྱའོ། །རྡོ་རྗེ་དབྱིངས་ཀྱི་རྡོ་རྗེ་རྒྱུའི་ལས་ཀྱི་ཕྱག་རྒྱ་ནི་འདིའི་ཕྱག་རྒྱ་ཡིན་ནོ། །དེ་ནས་ལག་པ་གཡས་པའི་མཐེ་བོས་རང་གི་མཐེ་ཆུང་གི་སེན་མོ་མནན་ལ། སོར་མོ་ལྷག་མ་རྣམས་རྩེ་གསུམ་པ་
[29b.6]ལྟར་བྱས་ལ་གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་རྩེ་ལྔ་པ་བླངས་ཏེ། དབང་ལྡན་གྱི་ཕྱོགས་ནས་བརྩམས་ནས་བསྐོར་ཏེ། མཚམས་བཞི་རུ་གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་བཟུང་ལ། མཐའ་ཡས་དང་རྣམ་པར་རྒྱལ་བ་དང་སྤྲིན་སྒྲ་དང་གསུས་པོ་ཆེ་ཞེས་བྱ་བ་ཕུར་བུའི་རྣམ་པ་ལྟ་བུ་གྲྭ་བཞིར་བསྐྱེད་
[29b.7]ནས། ལག་པ་གཡས་པ་རྡོ་རྗེ་རྩེ་གསུམ་པ་ལྟར་བྱས་ནས་བརྡུང་ཞིང་། འདི་སྐད་ཅེས་སྙིང་པོ་བཟླ་བར་བྱའོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦྦ་དུཥྡྲཾ་ཕཊ། ཀཱི་ལ་ཡ་ཀཱི་ལ་ཡ། སརྦྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ་བཛྲ་དྷ་ར་ཨཱཛྙཱ་པ་ཡ་ཏི་སྭཱ་ཧཱ། ཞེས་བྱ་བའམ། འཇིག་རྟེན་གསུམ་གྱི་
[30a]
[30a.1]དཀྱིལ་འཁོར་ཆེན་པོ་ལས་བཤད་པའི་སྔགས་ཀྱིས་བྱའོ། །སེང་ལྡེང་ལས་བྱས་པའི་ཕུར་བུ་དཀྱིལ་འཁོར་གྱི་ཟུར་བཞི་དང་ལྟེ་བར་མངོན་པར་བསྔགས་ལ་གདབ་པར་བྱའོ། །དེ་ནས་རྡོ་རྗེ་གནོད་སྦྱིན་གྱིས་ཡོངས་སུ་བགེགས་བསྐྲད་ལ་ར་བ་དང་དྲ་བ་བྱས་ནས་རྡོ་རྗེ་ཁུ་ཚུར་གྱིས་སྒོ་
[30a.2]བཅད་ལ། རྡོ་རྗེ་ཆས་བསྲུང་བ་ཐམས་ཅད་ཡང་དག་པར་བསྲུངས་ལ། པདྨའི་གནོད་སྦྱིན་གྱིས་ཡོངས་སུ་བཟླས་པའི་ཆུའི་བུམ་པ་དཀྱིལ་འཁོར་གྱི་སྒོར་བཞག་ལ་རྡོ་རྗེ་རྩེ་མོ་ཡོངས་སུ་བཟླས་པའི་དྲིའི་ཆུས་མཆོད་པ་ཐམས་ཅད་བསངས་ཏེ། རྡོ་རྗེ་མེ་ལན་གསུམ་བཟླས་ལ། ཨོཾ་བཛྲ་པུཥྤེ་ཧཱུཾ་ཞེས་
[30a.3]བྱ་བ་ལ་སོགས་པའི་སྔགས་ཀྱིས་ཡང་ལན་གསུམ་དུ་བཟླ་བར་བྱའོ། །དེ་ལ་རྡོ་རྗེ་རྩེ་མོ་ལ་སོགས་པའི་ཕྱག་རྒྱ་དང་སྔགས་ནི་འདི་ཡིན་ཏེ། ཨོཾ་བཛྲ་ཤི་ཁ་རེ་རུ་ཊ་མ་ཊ། རྡོ་རྗེ་རྩེ་མོའི་སྔགས་སོ། །ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུཾ་ཕཊ། རྡོ་རྗེ་མེའི་སྔགས་སོ། །བཛྲ་པུཥྤེ་
[30a.4]ཧཱུཾ་ཞེས་བྱ་བ་མེ་ཏོག་གི་སྔགས་སོ། །ཨོཾ་བཛྲ་གནྡྷེ་ཞེས་བྱ་བ་དྲིའི་སྔགས་སོ། །ཨོཾ་བཛྲ་དྷཱུ་པེ་ཧཱུཾ་ཞེས་བྱ་བ་བདུག་པའི་སྔགས་སོ། །ཨ་ཀཱ་རོ་མུ་ཁཾ་སརྦྦ་དྷརྨྨ་ཎཾ། ཨཱདྱ་ནུཏྤྣྣ་ཏྭཱ་ཏ་ཅེས་པ་ལྷ་བཤོས་ཀྱི་སྔགས་སོ། །ཨོཾ་བཛྲ་ཨཱ་ལོ་ཀེ་ཞེས་བྱ་བ་མར་མེའི་སྔགས་སོ། །རྡོ་རྗེ་ཁུ་ཚུར་གཉིས་རི་བོ་
[30a.5]འདེགས་པའི་ཚུལ་དུ་བྱེད་པ་ནི་རྡོ་རྗེ་རྩེ་མོའིའོ། །རྡོ་རྗེ་བསྡམས་པ་ནང་དུ་བཅིངས་ལ་སོར་མོ་འབར་བ་ལྟ་བུ་ལས་མཐེ་བོ་གཉིས་རྡོ་རྗེར་བསྒྲེང་བ་ནི་རྡོ་རྗེ་ཁྲོ་བོ་ཏི་རཱནྟི་རིའི་ཕྱག་རྒྱ་ཞེས་བྱ་བ་འདི་རྡོ་རྗེ་མེའི་ཕྱག་རྒྱ་ཡིན་ནོ། །རྡོ་རྗེ་ཁུ་ཚུར་གཉིས་བཅིངས་ལ་གྱེན་དུ་འཐོར་བའི་ཚུལ་དུ་བྱེད་པ་ནི་མེ་ཏོག་གི་
[30a.6]ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅིངས་ལ་དྲིས་བྱུག་པའི་ཚུལ་དུ་བྱེད་པ་ནི། དྲིའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱིས་བདུག་པ་འཐུལ་བའི་ཚུལ་དུ་བྱེད་པ་ནི་བདུག་པའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱིས་རལ་གྲི་འདེབས་པའི་ཚུལ་དུ་བྱེད་པ་ནི་ལྷ་བཤོས་ཀྱི་ཕྱག་རྒྱའོ། །རྡོ་རྗེ་ཁུ་ཚུར་གཉིས་
[30a.7]བཅིངས་ལ་མཐེ་བོ་གཉིས་གཤིབས་ཏེ་བསྒྲེང་ནས་མར་མེའི་སྡོང་བུ་ལྟར་བྱེད་པ་ནི་མར་མེའི་ཕྱག་རྒྱའོ། །ཨོཾ་ཧཱུཾ་ཧྲཱིཿཧོཿཞེས་བྱ་བ་མེ་ཏོག་གི་རྡོ་རྗེ་ཐལ་མོ་བཅིངས་ལ། མཐེ་བོ་གཉིས་བརྐྱང་སྟེ་ཐལ་མོ་འབྱེད་པའི་ཚུལ་གྱིས་ཡོན་ཆབ་ལ་སྔགས་ལན་བདུན་ནམ་ཉི་ཤུ་རྩ་གཅིག་ཏུ་བཟླས་ལ་གཞག་པར་བྱའོ། །
[30b]
[30b.1]དེ་ནས་དཀྱིལ་འཁོར་གྱི་གནས་ཐམས་ཅད་རྡོ་རྗེ་རྩེ་མོ་ཡོངས་སུ་བཟླས་པའི་དྲི་ཆུ་དང་། པདྨའི་གནོད་སྦྱིན་ཡོངས་སུ་བཟླས་པའི་ཆུས་བྱུགས་ལ། དེ་ཉིད་ཡོངས་སུ་བཟླས་པའི་དྲིའི་ཆུས་ལྷ་རྣམས་ཀྱི་གནས་སུ་དཀྱིལ་འཁོར་བྱའོ། །དེ་ནས་དཀྱིལ་འཁོར་ཐམས་ཅད་ཀྱི་གནས་རྣམས་སུ་ཡིད་ཀྱིས་བཞག་
[30b.2]ལ་རྣམ་པར་སྣང་མཛད་ལ་སོགས་པའི་སྔགས་ལན་བདུན་བཟླས་ཏེ། དྲིའི་དཀྱིལ་འཁོར་རྣམས་ལ་རྣམ་པར་སྣང་མཛད་ལ་སོགས་པ་ནས་པདྨ་འབེབས་པའི་མཐར་ཐུག་པ་ནམ་མཁའི་ཕྱོགས་ནས་ཕབ་སྟེ། རང་རང་གི་སྔགས་ཀྱིས་གཞག་པར་བྱའོ། །བསྐལ་པ་བཟང་པོ་པ་རྣམས་ཀྱང་རང་གི་
[30b.3]གནས་རྣམས་སུ། ཨོཾ་སརྦྦ་སཾ་སྐ་ར་པ་རི་ཤུདྡྷ་དྷརྨྨ་ཏེ་ག་ག་ན་ས་མུངྒ་ཏེ། མ་ཧཱ་ན་ཡ་པ་རི་བཱ་རེ་སྭཱ་ཧཱ། ཞེས་བྱ་བས་གཞག་པར་བྱའོ། །དེ་ནས་རྣམ་པར་རྒྱལ་བའི་བུམ་པར་དྲིའི་ཆུ་ཅུང་ཟད་ཅིག་བླུགས་ལ། རྡོ་རྗེ་མེ་དང་། པདྨའི་གནོད་སྦྱིན་དང་། འགྲོ་བ་འདུལ་བའི་སྔགས་རེ་རེ་ཞིང་བརྒྱ་རྩ་
[30b.4]བརྒྱད་བཟླས་ལ་ལྷའི་རང་བཞིན་དུ་དེ་བསྒོམས་ནས། མཆོད་ཡོན་གྱི་སྔགས་དང་རེ་རེ་ཞིང་མཆོད་ཡོན་ཕུལ་ལ། མཆོད་པ་ཐམས་ཅད་ཕྱག་རྒྱ་དང་བཅས་པས་ཡང་དག་པར་མཆོད་ལ་རང་གི་དམ་ཚིག་གི་ཕྱག་རྒྱས་མེ་ཏོག་གི་ལྕུག་མ་བཟུང་སྟེ། རེ་རེ་ཞིང་སྔགས་བརྒྱ་རྩ་བརྒྱད་མངོན་པར་བཟླས་ལ།
[30b.5]ཡང་བདུག་པས་བདུགས་ལ་ཉིན་ཞག་གཉིས་པ་ལ་དེ་བཞིན་དུ་བཟླས་པར་བྱའོ། །བུམ་པ་དེ་ཡང་ལྷག་པར་གནས་པ་ནི་བཅོམ་ལྡན་འདས་འགྲོ་བ་འདུལ་བའི་སྤྱན་སྔར་གཞག་པར་བྱའོ། །ལྷག་པར་གནས་པ་ཐམས་ཅད་ཇི་ལྟ་བ་བཞིན་དུ་རྫས་སུ་སྤྱད་ལ་དེ་ནས་ཉི་མ་འཆར་ཀའི་དུས་སུ་རྡོ་རྗེ་སློང་
[30b.6]བའི་ཕྱག་རྒྱ་དེ་ཉིད་ཀྱི་དཀྱིལ་འཁོར་ནམ་མཁར་བཞག་ལ་ཐིག་གདབ་པར་བྱའོ། །དེ་ལ་དང་པོར་རེ་ཞིག་ཚོན་རྩི་སྔོན་པོ་དང་སེར་པོ་དང་། དམར་པོ་དང་། ལྗང་གུ་དང་། དཀར་པོ་དྲི་ཞིམ་པ་བསྒོས་ལ། སྲད་བུ་སོ་སོར་ཁ་བསྒྱུར་ལ་གོ་རིམས་འདི་ཉིད་ཀྱིས་བཞག་སྟེ། ཧཱུཾ་ཧྲཱཾ་ཧྲཱིཿཨ་ཨོཾ་ཞེས་
[30b.7]བྱ་བའི་ས་བོན་གྱིས་མི་བསྐྱོད་པ་ལ་སོགས་པ་སྲད་བུ་དེ་རྣམས་ལ་བཀོད་དེ། ཨོཾ་དཱིཔྟ་དྲྀཥྚི་ཨཾ་ཀུ་ཤ་ཛཿཞེས་མིག་གཉིས་སུ་བཀོད་ལ། རབ་ཏུ་གཡོ་ཞིང་འབར་བའི་མིག །མིག་གི་རྫི་མ་འདྲེན་པ་ནི། །ཞེས་བྱ་བའི་འབར་བའི་ལྷ་བས་མི་བསྐྱོད་པ་ལ་སོགས་པ་བསྐུལ་ཞིང་འདི་སྐད་ཅེས་
[31a]
[31a.1]བརྗོད་དེ། བཅོམ་ལྡན་འདས་དཀྱིལ་འཁོར་ཆེན་པོའི་ཐིག་གདབ་པར་བྱ་བའི་ཕྱིར། རྡོ་རྗེའི་ཐིག་བདག་ལ་སྩོལ་ཅིག་ཅེས་བྱ་བས་ཀྱང་བསྐུལ་བར་བྱའོ། །དེ་ནས་རང་གི་ས་བོན་གྱི་འོད་ཀྱིས་བསྐུལ་བའི་མི་བསྐྱོད་པ་ལ་སོགས་པའི་དེ་བཞིན་གཤེགས་པས་བཏང་བའི་སྲད་བུ་
[31a.2]འབར་བའི་ལྕགས་ཀྱུས་བཀུག་སྟེ། རང་གི་ལག་ན་གནས་པའི་སྲད་བུ་དེ་གང་བར་བྱས་ལ། ཨ་ནྱོ་ནྱ་ཨ་ནུ་ག་ཏ་སརྦྦ་དྷརྨྨ་སྥར་སྥར་ཨ་ནུ་པྲ་བིཥྚ་སརྦྦ་དྷརྨྨ། ཨ་ཏྱན་ཏ་ཨ་ནུ་པྲ་བིཥྚ་སརྦྦ་དྷརྨྨཱ་ཨོཾ་ཧཱུཾ་ཧྲཱིཿཧོཿ། ཞེས་བྱ་བ་ཟློས་ཤིང་བསྒྲིལ་བར་བྱའོ། །བསྒྲིལ་ནས་མིག་གཡས་དང་གཡོན་དུ་མ་དང་ཊ་
[31a.3]ལས་ཉི་མ་དང་ཟླ་བ་བསྐྱེད་ལ་བཛྲ་དྲྀཥྚ་ཕཊ་ཅེས་བྱ་བས་བརྟན་པར་བྱས་ལ། སྲད་བུ་དེ་དྲིས་བྱུགས་ལ་གསེར་ལ་སོགས་པའི་སྣོད་དུ་བཞག་ནས། དྲི་དང་མེ་ཏོག་དང་། བདུག་སྤོས་ཀྱིས་མཆོད་ལ། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་བྱ་བ་རྡོ་རྗེ་བསྡམས་པས་བཟུང་སྟེ། ལན་བརྒྱ་རྩ་བརྒྱད་བཟླ་
[31a.4]བར་བྱའོ། །དེ་ནས་རྣམ་པར་སྣང་མཛད་དང་། འགྲོ་བ་འདུལ་བ་དང་། སངས་རྒྱས་ཐོར་ཚུགས་དང་། པདྨའི་ཏིང་ངེ་འཛིན་དང་། པདྨ་དོན་ཡོད་དབང་ཕྱུག་དང་སེམས་དཔའ་བཅུ་དྲུག་དང་། རྡོ་རྗེ་གནོད་སྦྱིན་བཟླས་པའི་དྲིས་དཀྱིལ་འཁོར་གྱི་ས་གཞི་ཡང་བྱུགས་ལ་མེ་ཏོག་གིས་མཛེས་པར་བྱས་ནས་
[31a.5]བར་སྣང་ན་བཞུགས་པའི་ལྷ་ཐམས་ཅད་ལ་ཕྱག་བྱས་ཏེ། ཨོཾ་ཧཱུཾ་ཧྲཱིཿཧོཿཞེས་བྱ་བས་མཆོད་ཡོན་ཕུལ་ལ། དཀྱིལ་འཁོར་གྱི་ལྷ་ཐམས་ཅད་ལ་མཆོད་པ་རྣམ་པ་ལྔ་དང་། སྒེག་མོ་ལ་སོགས་པས་ཡང་དག་པར་མཆོད་ལ། མིག་གཡས་གཡོན་དུ་ཡི་གེ་ཛཿསེར་པོ་བཀོད་ལ། ཉི་མ་དང་ཟླ་བ་སེར་པོའི་
[31a.6]སྣང་བ་བསྐྱེད་དེ། གླུ་དང་རོལ་མོ་ལ་སོགས་པའི་མཆོད་པ་དང་བཅས་པས་དཀྱིལ་འཁོར་བརྟག་པར་བྱའོ། །དེ་ལ་རེ་ཞིག་སྔར་ས་མངོན་པར་བཟླས་པའི་ཁ་དོག་དཀར་པོ་དྲི་ཞིམ་པར་སྲད་བུ་མངོན་པར་སྦངས་ལ། དེ་ནས་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ་ཨོཾ་ཧཱུཾ་ཧྲཱིཿཧོཿཞེས་བྱ་བ་འདིས་རང་
[31a.7]གི་སྙིང་གའི་པདྨ་ལས་གྲུབ་པའི་གྲོགས་པོ་པདྨ་གར་གྱི་དབང་ཕྱུག་གི་གཟུགས་ཀྱིས་ཕྱུང་ལ། གཡོན་པའི་རྡོ་རྗེ་ཁུ་ཚུར་གྱིས་སྲད་བུ་དེ་བཟུང་སྟེ། ཛཿཞེས་བྱ་བས་བསྒྲུབ་པའི་གྲོགས་པོའི་ལག་ཏུ་སྲད་བུ་དེ་གཏད་ལ། ཕྱོགས་ཐམས་ཅད་མཉམ་པ་ཉིད་དུ་བསྒོམ་ཞིང་ཤར་ཕྱོགས་སུ་བལྟས་ཏེ། ཚངས་
[31b]
[31b.1]པའི་ཐིག་གདབ་པར་བྱའོ། །ཛཿཛཿཛཿཞེས་བྱ་བ་བསྒྲུབ་པའི་གྲོགས་པོས་ཡི་གེ་ཛཿགསུམ་གྱིས་ཐིག་སྐུད་དྲང་བར་བྱའོ། །ཡང་སློབ་དཔོན་ལྷོ་རུ་འདུག་ལ་བྱང་དུ་བལྟས་ཏེ། ཚངས་པའི་ཐིག་གཉིས་པ་གདབ་པར་བྱའོ། །དེ་ནས་མེའི་ཆར་གནས་ལ་བྱང་ཕྱོགས་སུ་བལྟས་ཏེ་ཕྱིའི་དཀྱིལ་འཁོར་གྱི་
[31b.2]ཤར་གྱི་ཐིག་གདབ་བོ། །རླུང་གི་ཕྱོགས་སུ་གནས་ལ་ལྷོ་ཕྱོགས་སུ་བལྟས་ཏེ་ནུབ་ཀྱི་ཐིག་གདབ་བོ། །དེ་ཉིད་དུ་འདུག་སྟེ་ཤར་དུ་བལྟས་ནས་བྱང་གི་ཕྱོགས་ཀྱི་ཐིག་གདབ་བོ། །ཡང་མེའི་མཚམས་སུ་འདུག་སྟེ་ནུབ་ཏུ་བལྟས་ལ་ལྷོ་ཕྱོགས་ཀྱི་ཐིག་གདབ་བོ། །དེ་བཞིན་དུ་ལྷའི་སྣམ་བུ་དང་། ཁ་ཁྱེར་གྱི་ཐིག་ཀྱང་
[31b.3]གདབ་པར་བྱའོ། །ཡང་མེའི་མཚམས་སུ་གནས་ཏེ་རླུང་གི་ཕྱོགས་ཀྱི་མཚམས་ཀྱི་བར་དུ་ཐིག་གདབ་པ་དང་། ཡང་བདེན་བྲལ་གྱི་མཚམས་སུ་གནས་ཏེ། དབང་ལྡན་གྱི་མཚམས་ཀྱི་བར་དུ་ཐིག་གདབ་པ་དང་། དེ་ནས་སྒོ་དང་། རྟ་བབས་ཀྱི་ཐིག་ཀྱང་བཏབ་སྣལ་དེའི་ནང་དུ་སྔར་བཤད་པའི་ཚུལ་གྱིས་ཕྱིའི་
[31b.4]དཀྱིལ་འཁོར་གྱི་ཕྱེད་ཀྱི་ཚད་ལ་ཟུར་བཞི་པའི་རི་མོ་གཉིས་པ་ནི་སྒོ་ལ་མངོན་པར་ཕྱོགས་པར་ཐིག་གདབ་པར་བྱའོ། །རི་མོ་གཉིས་པའི་དབུས་སུ་པདྨའི་ཕྲེང་བ་བྲིས་ལ། ཀ་བ་བརྒྱད་དང་ལྡན་པའི་ཆ་གསུམ་མཉམ་པར་ཐིག་བཏབ་ནས། པདྨ་འདབ་མ་བརྒྱད་པའི་ཐིག་ནི་གདབ་པར་བྱའོ། །དེ་ལ་རེ་ཞིག་
[31b.5]སྲད་བུའི་སྔགས་ནི། ཨོཾ་བཛྲ་ས་མ་ཡ་སྭཱ་ཏྲཾ་མཱ་ཏི་ཀྲ་མ་ཧཱུཾ། དེ་ནས་རྡོ་རྗེ་ཧཱུཾ་མཛད་ཀྱི་སྦྱོར་བ་བྱས་ལ། མིག་གཡས་པ་དང་། གཡོན་པར་ཡི་གེ་ཧྲཱིཿལས་ཉི་མ་དང་ཟླ་བ་བསྐྱེད་ལ། ཁྲོ་བོའི་ལྟ་བས་ཀུན་ནས་བལྟས་པས་སྒོ་རྣམས་དབྱེའོ། །སློབ་དཔོན་དང་བསྒྲུབ་པའི་གྲོགས་མཆོག་བསྒྱིངས་པའི་
[31b.6]ཚུལ་གྱིས་བསྐོར་ཕྱོགས་སུ་འགྲོ་བར་བྱ་བ་ནི་ཐིག་གི་ཆོ་གའོ། །དེ་ནས་ཚོན་རྩི་བྱིན་གྱིས་བརླབ་པར་བྱ་སྟེ། དེ་ལ་ཚོན་དཀར་པོ་ལ་ཡི་གེ་ཨོཾ་ལས་རྣམ་པར་སྣང་མཛད་སྐུ་མདོག་དཀར་པོ། ཚོན་སྔོན་པོ་ལ་ཡི་གེ་ཧཱུཾ་ལས་མི་བསྐྱོད་པ་སྐུ་མདོག་མཐིང་ག །ཚོན་སེར་པོ་ལ་ཡི་གེ་ཏྲཱཾ་ལས་རིན་ཆེན་འབྱུང་ལྡན་
[31b.7]སྐུ་མདོག་སེར་པོ། ཚོན་དམར་པོ་ལ་ཡི་གེ་ཧྲཱིཿལས་འོད་དཔག་ཏུ་མེད་པ་སྐུ་མདོག་དམར་པོ། ཚོན་ལྗང་གུ་ལ་ཡི་གེ་ཨ་ལས་དོན་ཡོད་གྲུབ་པ་སྐུ་མདོག་ལྗང་གུར་བསྐྱེད་ལ། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བྱ་བ་འདི་ཕྱག་རྒྱ་དང་ལྡན་པས་རེ་རེ་ལ་ཡང་ལན་བདུན་བདུན་བཟླ་བར་བྱའོ། །དེ་ལ་ཕྱག་
[32a]
[32a.1]རྒྱ་ནི་འདི་ཡིན་ཏེ། རྡོ་རྗེ་ཕྱག་རྒྱ་གཉིས་ལས་ནི། །མཛུབ་མོའི་རྩེ་མོ་མཉམ་སྦྱར་བ། །བྱས་ནས་ཚོན་རྩི་ཐམས་ཅད་ནི། །འབར་བའི་ལྟ་བས་དགུག་པར་བྱ། །ཡི་གེ་ཧི་ཞེས་བྱ་བ་མཐར་སྦྱར་བར་བྱའོ། །དེ་ནས་ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བྱ་བའི་སྙིང་པོ་དང་དབང་ལྡན་གྱི་
[32a.2]ཕྱོགས་ནས་བརྩམས་ཏེ། གཡས་ནས་བསྐོར་བའི་རིམ་པས་གཡོན་པའི་རྡོ་རྗེ་ཁུ་ཚུར་གྱིས་ཚོན་རྩི་ཐོག་མར་བཀྱེ་ལ་ཕྱི་མ་ནི་རྡོ་རྗེ་ཁུ་ཚུར་མེད་ཀྱང་བྱའོ། །རིམ་པ་ནི་འདི་ཡིན་ཏེ། སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། ཐམས་ཅད་ཀྱི་ནང་དུ་དཀར་པོ་བྱའོ། །དེ་ནས་ཇི་སྐད་དུ་བཤད་
[32a.3]པའི་ཕྱིའི་དཀྱིལ་འཁོར་བྲིས་ལ། ནང་གི་དཀྱིལ་འཁོར་ནི་ཟུར་བཞི་བསྣོལ་བའི་རི་མོ་གཉིས་པ་བྲིས་ལ། རི་མོ་གཉིས་པའི་དབུས་སུ་པདྨའི་ཕྲེང་བ་བྲིས་ལ། པདྨ་འདབ་མ་བརྒྱད་པ་ལྟ་བུའི་ཀ་བ་བརྒྱད་པ་བྲི་བར་བྱའོ། །པདྨ་དེའི་གེ་སར་གྱི་དབུས་སུ། སེང་གེ་དང་པདྨའི་གདན་ལ་ཟླ་བའི་དཀྱིལ་
[32a.4]འཁོར་ལ་བཞུགས་པ་རྣམ་པར་སྣང་མཛད་སྔར་བཤད་པའི་ཚུལ་གྱིས་བྲི་བར་བྱའོ། །དེའི་ཕྱོགས་རྣམས་སུ་པདྨ་དང་ཟླ་བའི་གདན་ལ་ཕྱག་རྒྱ་བཞི་བྲི་བར་བྱའོ། །དེ་ལྟར་འགྲོ་བ་འདུལ་བ་ལ་སོགས་པ་ཡང་ཟླ་བ་དང་པདྨའི་གདན་ལ་བྲི་བ་དང་། བསྐལ་པ་བཟང་པོ་རྣམས་ཀྱང་སྔར་བཤད་པའི་རིམ་
[32a.5]པས་ཕྱིའི་དཀྱིལ་འཁོར་གྱི་ཁྱམས་རྣམས་སུ། བྱམས་པ་ལ་སོགས་པའི་བསྐལ་པ་བཟང་པོ་སྟོང་དུ་བཞིས་མ་ཚང་བ་པདྨ་དང་། ཟླ་བའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ་བྲི་བར་བྱའོ། །ཤར་ཕྱོགས་ལ་སོགས་པའི་ཕྱོགས་རྣམས་སུ་མཉམ་པའི་རིམ་པ་བཞིན་དུ་
[32a.6]བྱའོ། །དེ་ནས་ཤར་གྱི་སྣམ་བུ་ལ། སངས་རྒྱས་པདྨ་བཞིན་དུ་པདྨའི་རྡོ་རྗེ་དང་དྲིལ་བུ་བསྣམས་པའོ། །ལྷོ་ཕྱོགས་ཀྱི་སྣམ་བུ་ལ་རྡོ་རྗེ་རིན་པོ་ཆེ་བཞིན་དུ་རིན་ཆེན་པདྨ་བསྣམས་པའོ། །ཡང་ནུབ་ཕྱོགས་ཀྱི་སྣམ་བུ་ལ་རྡོ་རྗེ་ཆོས་བཞིན་དུ་རྡོ་རྗེ་པདྨ་བསྣམས་པའོ། །བྱང་ཕྱོགས་ཀྱི་སྣམ་བུ་
[32a.7]ལ་པདྨ་གར་གྱི་དབང་ཕྱུག་བཞིན་དུ་སྣ་ཚོགས་པདྨ་བསྣམས་པའོ། །དེ་ལ་བཅོམ་ལྡན་འདས་རྣམ་པར་སྣང་མཛད་ནི་སྐུ་མདོག་དཀར་པོ། བྱང་ཆུབ་མཆོག་གི་ཕྱག་རྒྱས་རྡོ་རྗེ་རྩེ་ལྔ་པ་བསྣམས་པ། ཞལ་བཞི་པ། ཞལ་དང་པོ་ཤར་དུ་གཟིགས་པའོ། །རྡོ་རྗེ་སེམས་མའི་གནས་སུ་པདྨས་
[32b]
[32b.1]མཚན་པའི་རྡོ་རྗེ་རྩེ་ལྔ་པ། རྡོ་རྗེ་རིན་ཆེན་མའི་གནས་སུ་ཡིད་བཞིན་གྱི་ནོར་བུའི་རྩེ་མོ་པདྨ་ཅན། རྡོ་རྗེ་ཆོས་མའི་གནས་སུ་པདྨ་འདབ་མ་བཅུ་དྲུག་པའི་རྡོ་རྗེ་པདྨ། རྡོ་རྗེ་ལས་མའི་གནས་སུ་པདྨ་འདབ་མ་བཞི་པ། ཁ་དོག་སྔོན་པོ་དང་། སེར་པོ་དང་། དམར་པོ་དང་། ལྗང་གུའི་འདབ་མ་
[32b.2]བཞི་པ་ལྟེ་བ་དཀར་པོའོ། །བཅོམ་ལྡན་འདས་འགྲོ་བ་འདུལ་བ་ནི་ཕྱག་གཉིས་པ་སྐུ་མདོག་དཀར་དམར། ཕྱག་གཡོན་པས་པདྨའི་སྡོང་བུ་བཟུང་ནས་ཕྱག་གཡས་པས་ཐུགས་ཀར་པདྨ་འབྱེད་པར་མཛད་པས་བཞུགས་པའོ། །སངས་རྒྱས་པདྨ་ནི་ཤཱཀྱ་ཐུབ་པའི་གཟུགས་ཅན་གསེར་གྱི་
[32b.3]མདོག་མངའ་བ། གཡོན་བསྙེམས་པས་པདྨའི་དྲིལ་བུ་བཟུང་ནས། ཕྱག་གཡས་པས་ཁ་ཊྭཱཾ་ག་པདྨས་མཚན་པའི་རྡོ་རྗེ་རྩེ་ལྔ་པ་གུང་མོའི་རྩེ་མོ་ལ་རང་གི་སྙིང་གར་འདེགས་པའི་ཚུལ་གྱིས་འཛིན་པའོ། །པདྨའི་རྒྱལ་པོ་ནི་སྐུ་མདོག་སེར་པོ་ཕྱག་གཡས་ཀྱི་དང་པོ་ན་རྡོ་རྗེ། གཉིས་པ་ན་རལ་གྲི།
[32b.4]གཡོན་གྱི་དང་པོ་ན་ལྕགས་ཀྱུ། གཡོན་གྱི་གཉིས་པ་ན་པདྨ་བསྣམས་པའོ། །པདྨའི་ཆགས་པ་སྐུ་མདོག་དམར་པོ་པདྨའི་མདའ་གཞུ་འགེངས་པས་སངས་རྒྱས་ཐམས་ཅད་གསོད་པའི་ཚུལ་དུ་མཛད་པའོ། །པདྨ་ལེགས་པ་ནི་མརྒད་ཀྱི་མདོག་ཅན་པདྨའི་སེ་གོལ་བརྡབས་པས་དེ་
[32b.5]བཞིན་གཤེགས་པ་ཐམས་ཅད་མཉེས་པར་མཛད་པའོ། །འཇིག་རྟེན་དབང་ཕྱུག་གི་རལ་པའི་དབུས་ན་འོད་དཔག་ཏུ་མེད་པ་ཕྱག་གཡོན་པས་པདྨ་བསྣམས་པ། ཕྱག་གཡས་པ་ཏིང་ངེ་འཛིན་མཆོག་གིས་བཞུགས་པ། སྐུ་མདོག་དམར་པོ་སངས་རྒྱས་ཐོར་ཚུགས་ཞེས་བརྗོད་པའོ། །
[32b.6]པདྨའི་ཁྲོ་གཉེར་ནི་སྐུ་མདོག་སེར་པོ་ཕྱག་གཡས་པ་པདྨའི་ཁུ་ཚུར་གྱིས་པདྨས་མཚན་པའི་ཡིད་བཞིན་གྱི་ནོར་བུས་དབང་བསྐུར་བའི་གནས་སུ་འཇོག་པའི་ཕྱག་གཡོན་པའི་བསྙེམས་པས་པདྨའི་དྲིལ་བུ་འཛིན་པའོ། །པདྨའི་ཉི་མ་ནི་སྐུ་མདོག་དམར་པོ་ཉི་མ་ལྟ་བུ་ཕྱག་གཡོན་པས་པདྨ་
[32b.7]བསྣམས་ཤིང་། ཕྱག་གཡས་པས་པདྨ་ལ་གནས་པའི་ཉི་མའི་དེ་བཞིན་གཤེགས་པ་ཐམས་ཅད་འོད་ཀྱིས་སྣང་བར་མཛད་པ་བསྣམས་པའོ། །པདྨའི་དཔལ་ཟླ་བའི་མདོག་དང་དེའི་ཆ་བྱད་ཅན་ཕྱག་གཡོན་པས་པདྨས་མཚན་པའི་ཡིད་བཞིན་གྱི་ནོར་བུའི་རྒྱལ་མཚན་བསྣམས་པ། ཕྱག་
[33a]
[33a.1]གཡས་པས་མཆོག་སྦྱིན་པའོ། །པདྨ་བཞད་པ་སྐུ་མདོག་དཀར་སེར་ཞལ་བཅུ་གཅིག་པ། ཕྱག་བཅུ་གཉིས་པ་ཚངས་པའི་ཆ་བྱད་ཅན་རལ་པའི་ཐོར་ཚུགས་ཀྱིས་བརྒྱན་པ་དང་། རྒྱན་ཐམས་ཅད་ཀྱིས་རྣམ་པར་བརྒྱན་པའོ། །དེ་ལ་ཞལ་དང་པོ་ཞི་བ། དེ་བཞིན་དུ་
[33a.2]ཞལ་གཡས་པ་དང་། གཡོན་པའི་ཕྱོགས་ཀྱང་ཞི་བ་ཡིན་ལ། རྒྱབ་ཀྱི་ཞལ་གཅིག་ནི་མི་སྡུག་པའི་ཉམས་ཅན་ནོ། །ཡང་ཞལ་དང་པོའི་སྟེང་མ་གཅིག་ནི་མཆེ་བ་གཙིགས་པ། དེའི་གཡས་གཡོན་གྱི་ཞལ་གཉིས་ནི་མི་སྡུག་པའི་ཉམས་ཅན། དེའི་རྒྱབ་ནི་མཆེ་བ་རྣམ་པར་གཙིགས་པ།
[33a.3]དེའི་སྟེང་མའི་ཞལ་དང་པོ་ནི་མཆེ་བ་གཙིགས་པ། ཞལ་གཡས་པ་ནི་མཆེ་བ་ཕྱུང་བ། གཡོན་པ་ནི་དྲག་ཅིང་ཆེར་བཞད་པ། དེའི་སྟེང་མ་གཅིག་ནི་རྫོགས་པའི་སངས་རྒྱས་ཀྱི་ཞལ་ལོ། །ཕྱག་དང་པོ་གཉིས་ནི་ཆོས་སྟོན་པའི་ཕྱག་རྒྱའོ། །གཉིས་པ་གཉིས་ནི་མེ་ཏོག་གི་ཐལ་མོ་མཛད་པ། ཕྱག་
[33a.4]གཡས་པ་ན་སོའི་ཕྲེང་བ་པདྨར་ཆུད་པའི་རྡོ་རྗེ་ཅན་གྱིས་མཚན་པ་དེས་དེ་བཞིན་གཤེགས་པ་ཐམས་ཅད་འཛུམ་པ་ལ་ངེས་པར་སྦྱོར་བའོ། །གཡས་ཀྱི་བཞི་པ་དང་། ལྔ་པ་ན་རལ་གྲི་དང་བགྲང་ཕྲེང་བསྣམས་པ། ཕྱག་གཅིག་གིས་སེམས་ཅན་ཐམས་ཅད་དབུགས་འབྱིན་པར་མཛད་པའོ། །ཕྱག་
[33a.5]གཡོན་པས་པདྨ་དང་གླེགས་བམ་དང་ཡིད་བཞིན་གྱི་ནོར་བུ་དང་། རིལ་བ་སྤྱི་བླུགས་བསྣམས་པར་བཞུགས་པའོ། །པདྨའི་ཏིང་ངེ་འཛིན་ནི་བརྒྱ་བྱིན་གྱི་ཆ་ལུགས་ཅན། སྤྱན་སྟོང་དང་ལྡན་པ་སྐུ་མདོག་དམར་པོ་ཏིང་ངེ་འཛིན་མཆོག་གི་ཕྱག་རྒྱའི་ཕྱག་གཡོན་པས་རྡོ་རྗེ་པདྨ་བསྣམས་པ།
[33a.6]པདྨའི་སྒྲོལ་མ་ནི་རྡོ་རྗེ་ཆོས་ཀྱི་གཟུགས་ཅན་ནོ། །གཞོན་ནུ་ནི་གདོང་དྲུག་བཞིན་དུ་སྐུ་མདོག་དམར་པོ་ཕྱག་བཞི་པ། ཕྱག་གཡོན་པ་པདྨའི་ཁུ་ཚུར་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པ། ཕྱག་གཡས་པའི་ཁུ་ཚུར་གྱིས་པདྨའི་རལ་གྲིས་དེ་བཞིན་གཤེགས་པ་
[33a.7]ཐམས་ཅད་གཅོད་པར་མཛད་པའོ། །གཡས་ཀྱི་གཉིས་པ་ན་མདུང་བསྣམས་པ། གཡོན་གྱི་གཉིས་པ་ན་པདྨ་བསྣམས་པའོ། །པདྨའི་རྒྱུ་ཁྱབ་འཇུག་གི་གཟུགས་ཅན། མགྲིན་པ་སྔོན་པོ་སྤྱན་གསུམ་པ་ཕྱག་གཡས་པ་གཉིས་ན་འཁོར་ལོ་དང་བེེ་ཅོན་བསྣམས་པ། གཡོན་པ་གཉིས་ན་
[33b]
[33b.1]པདྨ་དང་དུང་བསྣམས་པ། སྟག་གི་པགས་པའི་ཤམ་ཐབས་ཅན་སྦྲུལ་ནག་པོའི་མཆོད་ཕྱིར་ཐོགས་འཆང་བ། རི་དགས་ཀྱི་པགས་པ་སྟོད་གཡོགས་སུ་བསྣམས་པ། ཞལ་ཆེར་བཞད་པའོ། །པདྨའི་གསུང་ནི་ཚངས་པའི་གཟུགས་ཅན། མདོག་དཀར་དམར་ཞལ་བཞི་པ། ཕྱག་
[33b.2]གཡས་པ་གཉིས་ན་བགྲང་ཕྲེང་དང་དབྱིག་པ། གཡོན་པ་གཉིས་ན་པདྨ་དང་རིལ་བ་སྤྱི་བླུགས་བསྣམས་པའོ། །པདྨ་དོན་ཡོད་པའི་དབང་ཕྱུག་ནི་ལྷ་ཆེན་པོའི་གཟུགས་ཅན་ཞལ་བཞི་པ་སྤྱན་གསུམ་པ་མགྲིན་པ་སྔོ་བ་སྦྲུལ་གྱི་མཆོད་ཕྱིར་ཐོགས་འཆང་བ་སྟག་གི་པགས་པའི་ཤམ་ཐབས་ཅན།
[33b.3]རི་དྭགས་ནག་པོའི་པགས་པ་སྟོད་གཡོགས་སུ་བསྣམས་པ། ཕྱག་གཡས་ཀྱི་དང་པོས་མཆོག་སྦྱིན་པ། གཉིས་པས་པདྨ་བསྣམས་པ། གཡོན་གྱི་དང་པོ་ན་མདུང་རྩེ་གསུམ་པ་གཉིས་པ་ན་རལ་གྲི། ཞལ་སྔོན་པོ་དང་། སེར་པོ་དང་། དམར་པོ་དང་། ལྗང་གུའི་མདོག་ཅན་ནོ། །པདྨ་གར་གྱི་
[33b.4]དབང་ཕྱུག་གར་གྱི་དབང་ཕྱུག་གི་གཟུགས་ཅན། ཕྱག་གཡས་པ་རྣམས་ན་པདྨ་དང་ལྕགས་ཀྱུ་དང་ཞགས་པ་བསྣམས་པ། གཡོན་པ་རྣམས་ན་མདུང་རྩེ་གསུམ་པ་དང་ལྕགས་སྒྲོག་དང་དྲིལ་བུ་བསྣམས་པ་སྐུ་མདོག་དཀར་པོ་སྤྱན་གསུམ་པའོ། །པདྨའི་བསྲུང་བ་ནི་གསེར་གྱི་མདོག་ཅན། ཕྱག་
[33b.5]གཡས་ཀྱི་དང་པོས་མི་འཇིགས་པ་སྦྱིན་པ། གཡོན་གྱི་དང་པོས་པདྨ་བསྣམས་པ། ཕྱག་གཉིས་ཀྱིས་པདྨའི་གོ་ཆ་བསྣམས་པ། དེ་བཞིན་གཤེགས་པ་ཐམས་ཅད་ལ་གོ་བསྐོན་པའོ། །པདྨའི་གནོད་སྦྱིན་ནི་སྐུ་མདོག་ནག་པོ་གསུས་པོ་ཆེ་བ། ཞལ་མཆེ་བ་རྣམ་པར་གཙིགས་པ། པདྨའི་
[33b.6]མཆེ་བ་གཉིས་ཕྱག་གཉིས་ཀྱི་ཁུ་ཚུར་གྱིས་བཟུང་ནས་ཁར་བཞག་པས་དེ་བཞིན་གཤེགས་པ་ཐམས་ཅད་འཇིགས་པར་བྱེད་པའོ། །པདྨའི་ཁུ་ཚུར་ནི་སྐུ་མདོག་སེར་པོ་དམ་ཚིག་གི་པདྨའི་ཁུ་ཚུར་གྱིས་པདྨས་མཚན་པའི་རྡོ་རྗེ་འཚིར་ཞིང་བཞུགས་པའོ། །པདྨའི་སྒེག་མོ་ནི་མདོག་དཀར་མོ་
[33b.7]པདྨའི་ཁུ་ཚུར་གཉིས་ཀྱིས་པདྨས་མཚན་པའི་རྡོ་རྗེ་རྩེ་ལྔ་པ་གཉིས་བཟུང་ནས་བསྙེམས་པའི་ཚུལ་གྱིས་བསམ་པ་གཡོས་པས་འདུད་པའོ། །པདྨའི་ཕྲེང་བ་མ་མདོག་སེར་པོ། པདྨ་རིན་པོ་ཆེའི་ཕྲེང་བས་དེ་བཞིན་གཤེགས་པ་ཐམས་ཅད་ལ་དབང་བསྐུར་བའོ། །པདྨའི་གླུ་མ་ནི་མདོག་དཀར་
[34a]
[34a.1]དམར་པདྨའི་པི་ཝང་བརྡུང་བའོ། །པདྨའི་གར་མ་ནི་སྣ་ཚོགས་པའི་མདོག་ཅན་པདྨས་མཚན་པའི་རྡོ་རྗེ་རྩེ་གསུམ་བསྣམས་པས་གར་བསྐོར་བའི་ཚུལ་དུ་བྱེད་པའོ། །པདྨའི་བདུག་པ་མ་ནི་སྐུ་མདོག་དཀར་དམར་པདྨའི་སྤོས་ཁང་བསྣམས་ནས་པདྨའི་བདུག་པས་
[34a.2]དེ་བཞིན་གཤེགས་པ་ཐམས་ཅད་ཚིམ་པར་མཛད་པའོ། །པདྨའི་མེ་ཏོག་མ་ནི་སྐུ་མདོག་སེར་པོ། ཕྱག་གཡོན་པས་པདྨའི་མེ་ཏོག་གི་སྣོད་བསྣམས་པ། ཕྱག་གཡས་པས་པདྨའི་མེ་ཏོག་གིས་དེ་བཞིན་གཤེགས་པ་ཐམས་ཅད་ལ་མཆོད་པ་བྱེད་པའོ། །པདྨའི་མར་མེ་མ་ནི་
[34a.3]མདོག་དམར་སྐྱ་པདྨའི་མར་མེའི་སྡོང་བུས་དེ་བཞིན་གཤེགས་པ་ཐམས་ཅད་སྣང་བར་བྱེད་པའོ། །པདྨའི་དྲི་མ་ནི་སྣ་ཚོགས་པའི་མདོག་ཅན། ཕྱག་གཡོན་པས་པདྨའི་དྲིའི་དུང་བསྣམས་པ། ཕྱག་གཡས་པས་པདྨའི་དྲིས་དེ་བཞིན་གཤེགས་པ་ཐམས་ཅད་ལ་མཆོད་ཅིང་བཞུགས་པའོ། །
[34a.4]རྟ་མགྲིན་ནི་མདོག་དམར་སྐྱ། པདྨའི་ལྕགས་ཀྱུས་དེ་བཞིན་གཤེགས་པ་ཐམས་ཅད་འགུགས་པ་དང་། ཞལ་དང་པོའི་མཆེ་བ་རྣམ་པར་གཙིགས་པ། དེའི་སྟེང་དུ་རྟའི་གདོང་མགྲིན་པ་བསྟོད་པ་མདོག་ལྗང་གུའོ། །དོན་ཡོད་པའི་ཞགས་པ་ནི་ཕྱུགས་བདག་གི་གཟུགས་ཅན་སྤྱན་གསུམ་
[34a.5]པ། ཕྱག་བཞི་པ་གཡས་ཀྱི་དང་པོ་ན་ཞགས་པ། གཉིས་པ་ན་མཆོག་སྦྱིན། གཡོན་གྱི་དང་པོ་ན་དབྱིག་པ། གཡོན་གྱི་གཉིས་པ་ན་པདྨ་བསྣམས་པའོ། །པདྨའི་ལྕགས་སྒྲོག་ནི་མདོག་དམར་སྐྱ། པདྨའི་ལྕགས་སྒྲོག་དང་བཅས་པས་དེ་བཞིན་གཤེགས་པ་ཐམས་ཅད་འཆིང་བར་
[34a.6]བྱེད་པའོ། །པདྨ་འབེབས་པ་ནི་ཞལ་དྲུག་པ། གཞོན་ནུ་ཀུན་འགྱེད་ཀྱི་ཆ་ལུགས་ཅན། མདོག་དམར་པོ་ཕྱག་གཡས་ཀྱི་དང་པོ་ན་དྲིལ་བུ། གཉིས་པ་ན་མདུང་། གསུམ་པ་ན་རལ་གྲི། གཡོན་གྱི་དང་པོ་ན་པདྨ། གཉིས་པ་ན་ལྕགས་སྒྲོག །གསུམ་པ་ན་ཁྱིམ་བྱ་བསྣམས་
[34a.7]པས་བཞུགས་པའོ། །དེ་ལ་རྣམ་པར་སྣང་མཛད་དང་། སངས་རྒྱས་ཐོར་ཚུགས་དང་། བསྐལ་པ་བཟང་པོ་རྣམས་ནི་རིན་པོ་ཆེའི་ཅོད་པན་གྱིས་དབང་བསྐུར་བའོ། །ལྷག་མ་རྣམས་ནི་འོད་དཔག་ཏུ་མེད་པའི་པདྨའི་ཕྲེང་བའི་ཅོད་པན་གྱིས་དབང་བསྐུར་བའོ། །རྣམ་པར་སྣང་མཛད་དང་།
[34b]
[34b.1]སངས་རྒྱས་ཐོར་ཚུགས་དང་། ཏིང་ངེ་འཛིན་པདྨའི་རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །འགྲོ་བ་འདུལ་བ་ལ་སོགས་པ་ལྷག་མ་རྣམས་ནི་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །རྣམ་པར་སྣང་མཛད་དང་། སངས་རྒྱས་ཐོར་ཚུགས་དང་། པདྨའི་ཏིང་ངེ་འཛིན་ནི་ཞི་བའི་གཟིགས་པའོ། །
[34b.2]ལྷག་མ་རྣམས་རྡོ་རྗེ་ལྟ་བ་ཅན་ནོ། །དེ་ལྟར་དཀྱིལ་འཁོར་བྲིས་ནས་དགོངས་ཀའི་དུས་སུ་འགྲོ་བ་འདུལ་བའི་དམ་ཚིག་གི་ཕྱག་རྒྱས་མེ་ཏོག་གི་ཕྲེང་བ་བླངས་ལ། རྡོ་རྗེ་ཤུགས་ཀྱིས་དཀྱིལ་འཁོར་དུ་འཇུག་པར་བྱས་ཤིང་། ཨོཾ་ཧཱུཾ་ཧྲཱིཿཧོཿཞེས་ཀྱང་བརྗོད་པར་བྱའོ། །ཡང་དཀྱིལ་འཁོར་ཐམས་ཅད་ཀྱི་ལྷག་པ་
[34b.3]དང་མ་ཚང་བའི་ཉེས་པ་ཞི་བར་བྱ་བའི་ཕྱིར་བལྟས་ལ། རྡོ་རྗེ་དྲིལ་བུ་དཀྲོལ་ཞིང་དཀྱིལ་འཁོར་ལ་ལན་བདུན་བསྐོར་བ་བྱས་ནས་རྡོ་རྗེ་སེམས་དཔའ་ལ་ཕྲེང་བ་དེ་ཕུལ་ཏེ། རྡོ་རྗེ་གར་བྱས་ལ་བླངས་ནས་རང་གི་མགོ་ལ་བཅིང་བར་བྱའོ། །ཨོཾ་ཧཱུཾ་ཧྲཱིཿཧོཿཞེས་རྒྱུན་མི་འཆད་པ་ཁོ་ནར་བཟླས་པར་བྱའོ། །
[34b.4]དེ་ནས་ཡི་གེ་ཧཱུཾ་ལས་བདག་ཉིད་རྡོ་རྗེ་ཧཱུཾ་མཛད་དུ་བསམ་པར་བྱའོ། །དེ་ནས་དབུས་སུ་འདུག་ནས་ནི། །རྡོ་རྗེ་སློབ་དཔོན་མཉམ་གཞག་པས། །རྡོ་རྗེ་སྒོ་ནི་རྣམ་བཞི་པོ། །ཡིད་ཀྱིས་སུ་ནི་དབྱེ་བར་བྱ། །ཨོཾ་བཛྲ་ཨུཏྒྷ་ཊ་ཡ་ས་མ་ཡ་པྲ་བེེ་ཤ་ཡ་ཧཱུཾ། དེའི་ཕྱག་རྒྱ་ནི་འདི་ཡིན་ཏེ། རྡོ་རྗེ་མཛུབ་མོ་གཉིས་
[34b.5]ལེགས་པར། །སྦྱར་ལ་བཀན་ཏེ་བསྡམས་ནས་སུ། །རབ་ཏུ་བྲོས་ནས་དབྱེ་བ་ནི། །སྒོ་དབྱེ་བ་ཡི་མཆོག་ཡིན་ནོ། །དེ་ནས་རིན་པོ་ཆེའམ་ས་ལས་བྱས་པའི་བུམ་པ་རྩ་བ་མི་གནག་པ་གསུས་པ་ཆེ་བ། མགྲིན་པ་རིང་བ། མཆུ་འཕྱང་བ། རིན་པོ་ཆེ་དང་། སྨན་ཐམས་ཅད་དང་། པདྨའི་མེ་ཏོག་ལ་
[34b.6]སོགས་པ་དང་། དྲི་ཞིམ་པོའི་ཆུས་ཡོངས་སུ་བཀང་བ། པདྨས་མཚན་པ། མགུལ་པ་རས་དཀར་པོ་བཟང་པོས་བཅིངས་པ། འདབ་མ་དང་། འབྲས་བུ་དྲི་ཞིམ་པས་ཁ་བརྒྱན་པ། སྤོས་ཆུ་དྲི་ཞིམ་པས་ཀུན་ནས་བྱུགས་ཏེ། མེ་ཏོག་གི་ཕྲེང་བ་བཏགས་པ་ཇི་ལྟ་བ་བཞིན་དུ་ལྷག་པར་གནས་པ་བྱས་
[34b.7]ལ། རྡོ་རྗེ་ཆོས་མས་པདྨའི་མེ་ཏོག་གི་ལྕུག་མ་ཡོངས་སུ་བཟུང་ལ། ཨོཾ་བཛྲ་ཨུ་ད་ཀ་ཧཱུཾ་ཞེས་བྱ་བས་བཟླས་བརྗོད་བརྒྱ་རྩ་བརྒྱད་བྱས་ལ། བཅོམ་ལྡན་འདས་འགྲོ་བ་འདུལ་བའི་སྔགས་ཀྱང་བརྒྱ་རྩ་བརྒྱད་བཟླས་ལ། བུམ་པ་དེ་བཅོམ་ལྡན་འདས་འགྲོ་བ་འདུལ་བའི་སྤྱན་སྔར་གཞག་པར་བྱའོ། །
[35a]
[35a.1]གཉིས་པ་ལ་འགྲོ་བ་འདུལ་བ་བརྒྱ་རྩ་བརྒྱད་བཟླས་ཏེ། འཇུག་པའི་སྒོར་མངོན་པར་ཕྱོགས་པར་གཞག་པར་བྱ་ཞིང་། ཆུ་དེས་བདག་ཉིད་དང་སློབ་མ་ལ་དབང་བསྐུར་བར་བྱའོ། །འཇུག་པའི་དུས་སུ་རྡོ་རྗེ་སེམས་མའི་ཕྱག་རྒྱ་བཅིངས་ལ། སློབ་མ་ཡང་འཆིང་དུ་
[35a.2]གཞུག་གོ། །རྣམ་པར་སྣང་མཛད་ལ་སོགས་པའི་བུམ་པ་ཡང་སོ་སོ་རང་རང་གི་མཚན་མས་མཚན་པ། དེ་རྣམས་ཀྱི་རང་རང་གི་སྔགས་བརྒྱ་རྩ་བརྒྱད་ཡོངས་སུ་བཟླས་ལ་དཀྱིལ་འཁོར་གྱི་ཕྱི་རོལ་གྱི་ཁྱམས་རྣམས་སུ་གཞག་པ་དང་། དེ་རྣམས་ཀྱི་ཕྱི་རོལ་དུ་བུམ་པ་གང་བའོ། །མ་རྙེད་
[35a.3]པར་གྱུར་ན་བཅོམ་ལྡན་འདས་འགྲོ་བ་འདུལ་བ་ལ་རྣམ་པར་རྒྱལ་བའི་བུམ་པ་དང་། རྣམ་པར་སྣང་མཛད་དང་། སངས་རྒྱས་ཐོར་ཚུགས་དང་། པདྨའི་ཏིང་ངེ་འཛིན་དང་། དོན་ཡོད་དབང་ཕྱུག་རྣམས་ལ་རང་རང་གི་སྔགས་བཟླས་པའི་བུམ་པ་དབུལ་བར་བྱའོ། །ཨོཾ་བཛྲ་ཛྷི་ཞེས་བྱ་བའི་རིགས་
[35a.4]ཀྱི་སྙིང་པོ་འདིས་འགྲོ་བ་འདུལ་བའི་རིགས་ཀྱི་བུམ་པ་ལ་བརྒྱ་རྩ་བརྒྱད་བཟླས་པ་བྱས་ཏེ། འགྲོ་བ་འདུལ་བའི་ལྷ་རྣམས་ལ་དབུལ་བར་བྱའོ། །ཨོཾ་བཛྲ་རཏྣ་མུ་ཀུ་ཊ་ཧཱུཾ་ཞེས་བྱ་བས་སངས་རྒྱས་ཐོར་ཚུགས་ཀྱི་རིགས་ཀྱི་བུམ་པ་ལའོ། །ཨོཾ་དྷརྨྨ་པདྨ་ཧྲཱིཿཞེས་བྱ་བས་པདྨའི་ཏིང་ངེ་འཛིན་གྱི་བུམ་
[35a.5]པ་ལའོ། །ཨོཾ་སརྦྦ་མུ་ཁི་ཧཱུཾ་ཞེས་བྱ་བས་པདྨ་དོན་ཡོད་དབང་ཕྱུག་གི་བུམ་པ་ལ་བརྒྱ་རྩ་བརྒྱད་བཟླས་པ་བྱས་ནས། དོན་ཡོད་དབང་ཕྱུག་གི་རིགས་ཀྱི་ལྷ་རྣམས་ལ་དབུལ་བར་བྱའོ། །དེ་ནས་བདག་པོ་ལྔའི་བུམ་པ་གང་བ་དང་། རིགས་བཞིའི་བུམ་པ་གང་བ་བཞི་དབུལ་བར་བྱ་སྟེ། བྱམས་
[35a.6]པ་ལ་སོགས་པའི་བསྐལ་པ་བཟང་པོའི་བྱང་ཆུབ་སེམས་དཔའ་རྣམས་ཀྱི་རང་གི་རིག་པ་ཡོངས་སུ་བཟླས་པའི་བུམ་པ་གང་བར་བྱས་ལ་དབུལ་བར་བྱའོ། །མ་རྙེད་ན་བུམ་པ་རྣམས་དང་བུམ་པ་གང་བ་བཅུ་ལས་ཉུང་བ་དབུལ་བར་མི་བྱའོ་ཞེས་གསུངས་སོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ།
[35a.7]ཇི་སྐད་བཤད་པ་དེ་དག་བྱས་པའི་རྗེས་ཐོགས་ལའོ། །དེ་ནས་འགྲོ་བ་ཐམས་ཅད་འདུལ་བའི་ཞེས་བྱ་བའི་པདྨའི་དཀྱིལ་འཁོར་གྱི་ཆོ་ག་རྒྱས་པ་བཤད་དོ་ཞེས་བྱ་བ་ནི་ལྷའི་རྣལ་འབྱོར་ནས་བརྩམས་ཏེ། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་དུ་སློབ་དཔོན་གྱི་ལས་ཀྱི་ཆོ་གའི་བྱེ་བྲག་རྒྱས་པར་ཕྱེའོ། །
[35b]
[35b.1]དེ་ལ་དང་པོ་ཁོ་ནར་ཞེས་བྱ་བ་ནི། དབབ་པ་ལ་སོགས་པའི་སྔོན་དུ་སོང་བའོ། །པདྨའི་སློབ་དཔོན་ཞེས་བྱ་བ་ནི་འགྲོ་བ་འདུལ་བའི་རྣལ་འབྱོར་ཆེན་པོ་དང་། བྱིན་གྱིས་བརླབས་པའི་སློབ་དཔོན་ནི་པདྨའི་སློབ་དཔོན་ནོ། །རྡོ་རྗེ་དམ་ཚིག་གི་ཕྱག་རྒྱ་བཅིངས་ལ་ཇི་ལྟ་བ་བཞིན་དུ་བཞུགས་ཏེ་ཞེས་བྱ་བ་
[35b.2]ནི་གདོང་གཡོགས་བཅིངས་ལ། ཕྱག་བཞི་བྱས་ཏེ་སྡོམ་པ་བཟུང་ལ། ཕྱི་རོལ་ན་གནས་པའི་བུམ་པའི་ཆུས་བདག་ཉིད་ལ་དབང་བསྐུར་ཏེ། སློབ་མ་འཇུག་པའི་ཆོ་ག་བཞིན་དུ་རྡོ་རྗེ་ཆོས་མ་བཅིངས་ལ་འཇུག་པར་བྱའོ་ཞེས་བྱ་བ་འདི་ནི་ཇི་ལྟ་བ་བཞིན་ཞེས་བྱ་བའི་སྒྲའི་དོན་ཡིན་ནོ། །རྡོ་རྗེ་དབྱིངས་
[35b.3]ཀྱི་དཀྱིལ་འཁོར་ཆེན་པོའི་ཚུལ་དུ་ཞེས་བྱ་བ་ནི། དེ་ལས་བཤད་པའི་ཚུལ་གྱིས་དབབ་པ་ལ་སོགས་པའི་ལས་རྣམས་བྱའོ། །སྙིང་པོ་འདིས་ལས་རྣམས་བྱའོ་ཞེས་བྱ་བ་ནི་དབབ་པ་དང་མེ་ཏོག་དོར་བ་དང་། ཕྲེང་བ་བཅིང་བའི་དབང་དང་། གདོང་གཡོགས་དགྲོལ་བ་དང་། དཀྱིལ་འཁོར་
[35b.4]བལྟ་བ་དང་། དབབ་པ་ཉེ་བར་བསྡུ་བ་དང་། ཆུའི་དབང་དང་། ཕྱག་རྒྱའི་དབང་གིས་ཅོད་པན་གྱི་དབང་བསྐུར་བ་དང་། རྡོ་རྗེ་པདྨ་དང་། བདག་པོ་དང་། མིང་གི་དབང་བསྐུར་བ་དང་། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་རྗེས་ཐོགས་ལ། པདྨའི་རིགས་ཀྱི་སྙིང་པོ་རྗེས་ཐོགས་ལ་འཆད་པར་
[35b.5]འགྱུར་བར་བརྗོད་པ་ནི། ཨོཾ་པདྨ་སྥོ་ཊ་ཨ་དྷི་ཏིཥྛ་ཨ་ཞེས་ཕྱོགས་གཅིག་དཔེར་བརྗོད་པ་ཙམ་གྱིས་དེ་དག་གི་སྙིང་པོ་རྣམས་ཀྱང་བསྟན་པ་ཡིན་ནོ། །སྙིང་པོ་འདི་དཔེར་བརྗོད་པ་ཙམ་གྱིས། དེ་རྣམས་ཀྱི་སྙིང་པོའང་ཤེས་པར་བྱ་སྟེ། ལས་རྣམས་བྱའོ་ཞེས་བྱ་བ་བཤད་པ་ཡིན་ནོ། །ཨོཾ་པདྨ་
[35b.6]སྥོ་ཊ་ཨ་དྷི་ཏིཥྛ་ཨ་ཞེས་བྱ་བ་ནི་དབབ་པའི་དོན་ཏོ། །དཀྱིལ་འཁོར་འདིར་དབབ་པའི་སྙིང་པོ་འདི་དང་། རྡོ་རྗེ་པདྨའི་དམ་ཚིག་གི་ཕྱག་རྒྱ་གཉིས་སུ་བྱས་ནས། ཐལ་མོ་སྦྱར་ནས་ལན་བརྒྱའི་བར་དུ་བཟླས་པར་བྱའོ། །དེ་ནས་རྡོ་རྗེ་དབྱིངས་ལས་བཤད་པའི་གཡོན་པའི་ཁྲོ་བོའི་ཁུ་ཚུར་གྱི་
[35b.7]མཛུབ་མོས། རྡོ་རྗེ་པདྨའི་དམ་ཚིག་གི་ཕྱག་རྒྱའི་གུང་མོ་ལན་བརྒྱའི་བར་དུ་དྲལ་ཞིང་ཨ་ཞེས་བརྗོད་དོ། །དེ་ནས་དེ་བཞིན་དུ་བཀའ་མནོས་ནས་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་མེ་ཏོག་དོར་བ་ལ་སོགས་པ་སྔོན་དུ་འགྲོ་བའི་ཆོ་གའི་གོ་རིམས་ཐམས་ཅད་རྗེས་
[36a]
[36a.1]སུ་སྤྱད་པས། ཇི་ལྟ་བ་བཞིན་དུ་སློབ་མ་འཇུག་པའི་གནང་བ་མནོས་ཏེ། དེ་ནས་ཡང་དམ་ཚིག་གི་ཕྱག་རྒྱས་བདག་ཉིད་དབང་བསྐུར་ཏེ་ཞེས་བྱ་བ་ནི་ཇི་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་དབང་བསྐུར་བར་བཤད་
[36a.2]པ་དེ་བཞིན་དུ་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཆོས་ཀྱི་ཕྱག་རྒྱས་གང་ལ་འོད་དཔག་ཏུ་མེད་པའི་དབང་བསྐུར་བར་བྱ་སྟེ། སློབ་དཔོན་གྱིས་ཞེས་བྱ་བ་ནི་ལྷག་མའོ། །པདྨོའི་དབྱིབས་བླངས་ནས་ཞེས་བྱ་བ་ནི། སངས་རྒྱས་ཀུན་གྱི་པདྨོའི་དབང་། །དེ་རིང་ཁྱེད་
[36a.3]ལ་བསྐུར་བར་བྱ། །སངས་རྒྱས་ཀུན་གྱིས་རབ་གྲུབ་ཕྱིར། །པདྨོ་འདི་ནི་ཁྱོད་ཀྱིས་ལོང་། །ཞེས་བྱ་བ་དང་། ཤིང་ལས་བྱས་པའི་པདྨ་འདབ་མ་བཅུ་དྲུག་པ་སྡོང་བུ་དང་བཅས་པ། ལྟེ་བའི་དབུས་སུ་རྡོ་རྗེ་རྩེ་ལྔ་པ་སོར་བརྒྱད་པ། པདྨ་འདབ་མ་བརྒྱད་པའི་ནང་དུ་ཆུད་པ། འོག་གི་ཆའི་འདབ་མ་
[36a.4]བརྒྱད་ཁ་གྱེས་པ། སྟེང་གི་ཆའི་ཅུང་ཟད་ཁ་མ་བྱེ་བར་གྱུར་པའི་པདྨའི་དབྱིབས་དང་། པདྨའི་དྲིལ་བུ་དང་བཅས་པ་བླངས་ཏེ་རང་གི་མིང་གི་དབང་བསྐུར་རོ། །རང་གི་པདྨོའི་མིང་ནས་བརྗོད་ལ་ཞེས་བྱ་བ་ནི། བདག་ལ་བྱིན་གྱིས་བརླབས་པ་ལ་སོགས་པ་བྱས་ནས་ལོ་ཀེ་ཤྭ་ར་པདྨ་ཧཾ་ཞེས་པའམ།
[36a.5]གཞན་གང་ཡང་རུང་བ་ཇི་ལྟར་ཐོབ་པ་རང་གི་པདྨའི་མིང་གྲགས་པས་ན་བརྗོད་པར་བྱའོ། །པདྨའི་ལྕགས་ཀྱུ་ལ་སོགས་པའི་ལས་རྣམས་བྱའོ་ཞེས་བྱ་བ་ནི། རྡོ་རྗེ་དབྱིངས་ཀྱི་དཀྱིལ་འཁོར་ལས་བཤད་པའི་ཆོ་གས་སྤྲུལ་པ་དང་། བསྡུ་བ་བྱས་ལ། པདྨོའི་སེམས་དཔའ་སེམས་དཔའ་ཆེ། །
[36a.6]ཞེས་བྱ་བ་ལ་སོགས་པའི་མཚན་བརྒྱ་རྩ་བརྒྱད་པས་བསྟོད་པ་བྱས་ལ། སྒོ་དབྱེ་བའི་ཕྱག་རྒྱས་སྒོ་ཕྱེ་ལ། རྟ་མགྲིན་ལ་སོགས་པའི་ལས་ཀྱི་ཕྱག་རྒྱས་དཀྱིལ་འཁོར་གྱི་ལྷ་ཐམས་ཅད་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། པདྨའི་གནོད་སྦྱིན་གྱིས་བགེགས་
[36a.7]བསྐྲད་ལ། ར་བ་དང་དྲ་བ་བྱས་ཏེ། པདྨའི་ཁུ་ཚུར་གྱི་དམ་ཚིག་གི་ཕྱག་རྒྱས་སྒོ་བཅད་ལ། པདྨའི་བསྲུང་བའི་དམ་ཚིག་གི་ཕྱག་རྒྱས་བསྲུང་བ་ཐམས་ཅད་ཡང་དག་པར་བསྲུངས་ཏེ། དཀྱིལ་འཁོར་གྱི་ལྷ་ཐམས་ཅད་ལ་ཕྱག་བྱས་ཏེ། འགྲོ་བ་འདུལ་བ་ལ་མཆོད་ཡོན་དང་། ཞབས་བསིལ་
[36b]
[36b.1]ཕུལ་ལ། སྔགས་དང་ཕྱག་རྒྱས་སོ་སོར་དབུལ་བར་བྱའོ། །དེ་ནས་ཆོས་ཀྱི་ཕྱག་རྒྱ་འདི་ཉིད་ཀྱིས་སེམས་དཔའ་ཆེན་པོ་རྣམས་བསྒྲུབ་པར་བྱའོ་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས་པདྨ་འབེབས་པའི་བར་དུ་ཕྱིས་འཆད་པར་འགྱུར་བའི་དམ་ཚིག་གི་ཕྱག་རྒྱ་ཡིན་གྱི། འདིར་
[36b.2]དེའི་ཆོས་ཀྱི་ཕྱག་རྒྱར་མངོན་པར་འདོད་པའི་ཡི་གེ་བདག་ཉིད་ནི་འདི་མ་ཡིན་ཏེ། སྒྲུབ་པའི་དབང་དུ་བྱས་པའི་ཕྱིར་རོ། །གང་གི་ཕྱིར་དམ་ཚིག་གི་ཕྱག་རྒྱས་དངོས་སུ་སྒྲུབ་པར་བཅོམ་ལྡན་འདས་ཀྱིས་བཤད་པ་དེའི་ཕྱིར། སྐབས་འདིར་མངོན་པར་འདོད་པའི་ཆོས་ཀྱི་ཕྱག་རྒྱ་ཡང་མ་ཡིན་ལ། འདིར་
[36b.3]དམ་ཚིག་གི་ཕྱག་རྒྱ་ལ་ཆོས་ཀྱི་ཕྱག་རྒྱས་ཞེས་བརྗོད་པར་མི་བྱའོ་ཞེས་ཀྱང་བརྗོད་པར་མི་ནུས་ཏེ། དེ་སྐད་དུ་ཡང་། རྒྱུད་ཕྱི་མ་ལས་པདྨའི་རིགས་ཀྱི་ཕྱག་རྒྱ་རྣམ་པ་བཞི་ཀ་ལ་ཡང་ཆོས་ཀྱི་ཕྱག་རྒྱར་བརྗོད་ལ་དེ་བཞིན་གཤེགས་པའི་རིགས་ཀྱི་ཕྱག་རྒྱ་རྣམས་ནི་ཕྱག་རྒྱ་ཆེན་པོ་ཞེས་བྱ་ཞིང་།
[36b.4]རྡོ་རྗེ་རིགས་ཀྱི་ཕྱག་རྒྱ་རྣམས་ལ་ནི་དམ་ཚིག་གི་ཕྱག་རྒྱ་ཞེས་བྱ་ལ། ནོར་བུའི་རིགས་ཀྱི་ཕྱག་རྒྱ་བཞི་ཀ་ལ་ཡང་ལས་ཀྱི་ཕྱག་རྒྱ་ཞེས་འཆད་པར་འགྱུར་བའི་ཕྱིར་རོ། །དེ་ནས་དངོས་གྲུབ་རྣམས་ཀྱང་དེ་བཞིན་ནོ་ཞེས་བྱ་བ་ནི། ཇི་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་དམ་ཚིག་གི་ཕྱག་རྒྱ་
[36b.5]དང་། སེམས་དཔའི་རྡོ་རྗེ་ལ་སོགས་པས། །དེ་ལྟར་སེམས་དཔའ་ཆེན་པོ་བསྒྲུབ། །ཛཿཧཱུཾ་བཾ་ཧོཿཞེས་བརྗོད་ཅིང་ཞེས་བྱ་བས་ལྷ་ཐམས་ཅད་ཀྱི་རང་གི་རིག་པས་དངོས་གྲུབ་སྒྲུབ་པའི་རྒྱུར་བཤད་པ་དེ་བཞིན་དུ་འདིར་ཡང་དངོས་གྲུབ་ཀྱི་དོན་དུ་འགྱུར་རོ། །འདི་སྐད་སྟོན་པ་ཡིན་ཏེ། ཇི་སྐད་བཤད་
[36b.6]པའི་ཚུལ་གྱིས་དཀྱིལ་འཁོར་བྲིས་ལ་ཁྲུས་བྱས་ཏེ། དེ་ནས་བདག་ཉིད་རྡོ་རྗེ་ཧཱུཾ་མཛད་དུ་བྱིན་གྱིས་བརླབས་ལ། ཇི་ལྟ་བ་བཞིན་དུ་སྒོ་དབྱེ་བ་བྱས་ནས་སྔ་མ་བཞིན་དུ་འགྲོ་བ་འདུལ་བའི་རྣལ་འབྱོར་དང་རྣལ་འབྱོར་ཆེན་པོ་དང་ལྡན་པའི་སློབ་དཔོན་གྱིས་གོས་དཀར་མོ་དང་འགྲོ་བ་འདུལ་བའི་རྗེས་སུ་
[36b.7]མཐུན་པའི་རྒྱན་རྣམས་ལ་དྲི་ཞིམ་པོས་བྱུག་པ་དང་། བདུག་པས་བདུགས་ཏེ་པདྨའི་གནོད་སྦྱིན་གྱི་སྔགས་ཀྱིས་གོས་ཐམས་ཅད་ལ་ཡོངས་སུ་བཟླས་ལ་ཟེའུ་ཀ་ལ་སོགས་པ་བཅིངས་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་གྱིས་རྒྱན་ཐམས་ཅད་ལ་མངོན་པར་
[37a]
[37a.1]བསྔགས་ལ་བདག་ཉིད་དང་རྗེས་སུ་མཐུན་པའི་ཅི་རིགས་པའི་རྒྱན་བཏགས་ཏེ། ཡང་སྔགས་གཉིས་ཀྱིས་དེ་བཞིན་གཤེགས་པ་འོད་དཔག་ཏུ་མེད་པ་དང་ལྡན་པའི་པདྨའི་ཕྲེང་བའི་ཅོད་པན་ལ་ཡོངས་སུ་བཟླས་ཏེ། པདྨའི་ཅོད་པན་གྱི་དབང་བསྐུར་བས་བདག་ཉིད་ལ་དབང་
[37a.2]བསྐུར་ཏེ། མཆོད་པ་རྣམ་པ་ལྔས་ཡང་དག་པར་མཆོད་ལ། དཀྱིལ་འཁོར་ཐམས་ཅད་བློས་མངོན་སུམ་ལྟ་བུར་བྱས་ལ་ཕྱག་བྱས་ཏེ། མཆོད་ཡོན་ཕུལ་ནས་མེ་ཏོག་ལ་སོགས་པས་ཡང་དག་པར་མཆོད་དེ། པདྨ་དང་དྲིལ་བུ་བཟུང་ནས་ཡང་གདོང་གཡོགས་དང་གོས་ལ་པདྨའི་གནོད་སྦྱིན་དང་།
[37a.3]རྟ་མགྲིན་ལ་སོགས་པ་སྒོ་སྲུང་རྣམས་ཀྱི་སྔགས་ཡོངས་སུ་བཟླས་ལ། གདོང་གཡོགས་བཅིངས་ནས། མེ་ཏོག་གི་ཕྲེང་བ་བཏགས་ལ་སློབ་དཔོན་གྱིས་ཕྱག་བཞི་བྱའོ། །དེ་ནས་སྡིག་པ་བཤགས་པ་ལ་སོགས་པ་བྱས་ལ། སྡོམ་པ་གཟུང་བར་བྱས་ཏེ། བྱང་ཆུབ་སེམས་ནི་བླ་མེད་པ། །
[37a.4]དམ་པ་བདག་གིས་བསྐྱེད་པར་བགྱི། །ཞེས་བྱ་བ་ནས་བརྩམས་ནས། དབུགས་མ་ཕྱུང་བ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་བྱ་བའི་བར་དུའོ། །དེ་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་ལ་དབང་བསྐུར་ལ་རྡོ་རྗེ་པདྨའི་དམ་ཚིག་གི་ཕྱག་རྒྱ་བཅིངས་
[37a.5]ཏེ་འཇུག་པའི་ཆོ་གས་ཞུགས་ཏེ། དེ་ནས་རྡོ་རྗེ་མནའི་ཆུ་འཐུངས་ལ་དབབ་པའི་ཆོ་གས་དབབ་པ་བྱས་ཏེ། ཨོཾ་པདྨ་སྥོ་ཊ་ཨ་དྷི་ཏིཥྛ་ཨ་ཞེས་བྱ་བ་བརྒྱ་དང་ཡང་ཨ་ཞེས་བྱ་བ་ལན་བརྒྱའི་བར་དུ་བཟླ་བར་བྱའོ། །དེ་ནས་མེ་ཏོག་དོར་ལ་རང་གི་སྤྱི་བོར་བཅིངས་ཏེ། གདོང་གཡོགས་བཀྲོལ་ནས་
[37a.6]དཀྱིལ་འཁོར་བལྟས་ལ། དབབ་པ་ཉེ་བར་བསྡུ་བ་བྱས་ནས། །སློབ་དཔོན་དུ་དབང་བསྐུར་བའི་ཆོ་གས་བདག་ཉིད་དབང་བསྐུར་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། མིག་འབྱེད་པ་ལ་སོགས་པའི་ཆོ་ག་རྗེས་སུ་སྤྱད་ལ། ཚིགས་བཅད་གཉིས་ཀྱིས་རྗེས་སུ་གནང་
[37a.7]བ་མནོས་ནས། དེ་ཉིད་ཀྱིས་ནི་པདྨ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །དེ་ནས་བྱིན་གྱིས་བརླབས་ཏེ་འགྲོ་བ་འདུལ་བའི་སྙིང་པོ་བཟླས་ལ། དངོས་གྲུབ་ཀྱི་པདྨའི་བརྟུལ་ཞུགས་བླངས་ཏེ། བཅོམ་ལྡན་འདས་འགྲོ་བ་འདུལ་བའི་སྙིང་པོ་དང་ཕྱག་རྒྱ་
[37b]
[37b.1]བཞིའི་ཡེ་ཤེས་བསླབས་ནས། གཟེངས་བསྟོད་པ་དང་། ལུང་བསྟན་པ་བླང་བར་བྱའོ། །ཡང་རང་ལ་བྱིན་གྱིས་བརླབས་པ་དང་། ཕྱག་རྒྱ་དང་། ཅོད་པན་དང་། པདྨོ་དང་། བདག་པོ་དང་། མིང་གི་དབང་བསྐུར་བས་རང་ཉིད་ལ་བདག་ཉིད་ཀྱིས་བྱས་ནས། བདག་ཉིད་ཡང་དག་པར་
[37b.2]མཆོད་ལ་བསྒོམ་པར་བྱའོ། །ལོ་ཀེ་ཤྭ་ར་ཨ་ཧཾ་ཞེས་བྱ་བ་ལ་སོགས་པའི་མིང་གང་ཡང་རུང་བ་ནས་བརྗོད་དེ། པདྨ་དང་དྲིལ་བུ་འཛིན་པ་ཉིད་ཀྱིས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ཏེ། རྣམ་པར་སྣང་མཛད་ཀྱི་གནས་སུ་བུདྡྷ་ཧཱུཾ་ཨ་ཞེས་བྱ་བས་རྣམ་པར་སྣང་མཛད་ཀྱི་པདྨས་མཚན་
[37b.3]པའི་རྡོ་རྗེ་རྩེ་ལྔ་པ་བསམས་ལ། དེ་ནས་བཛྲ་པདྨ་ཨ་ཧཾ་ཞེས་བྱ་བས་དེ་བཞིན་གཤེགས་པའི་ང་རྒྱལ་བསྒོམ་པར་བྱའོ། །རྡོ་རྗེ་དེ་ཉིད་ཏ་དྱ་ཐཱ་སརྦྦ་ཏ་ཐཱ་ག་ཏ་སཏྟ་ཐཱ་ཨ་ཧཾ་ཞེས་བྱ་བས་རྣམ་པར་སྣང་མཛད་ཀྱི་བདག་ཉིད་དུ་བསྒོམ་པར་བྱའོ། །དེ་བཞིན་དུ་པདྨ་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་
[37b.4]ལ་པདྨ་འབེབས་པའི་གནས་སུ། ཨོཾ་ཤཾ་མུ་ཁ། པདྨ་ཀུ་མཱ་ར། བེེ་ཤ་དྷ་ར། པདྨ་གྷཎྜ་ཡ། ཨཱ་བི་ཤ་ཡ། སརྦྦ་པདྨ་ཀུ་ལ་ས་མ་ཡཱཾ། སརྦྦ་མུ་དྲཾ། བནྡྷ་ཡ། སརྦྦ་སིདྡྷི་མྨེ་པྲ་ཡཙྪ། པདྨ་ཨཱ་བེེ་ཤ་ཨ་ཨ་ཨ་ཨ་ཞེས་བྱ་བས་པདྨ་འབེབས་པའི་གནས་སུ་པདྨ་དྲིལ་བུའི་གཟུགས་སུ་བདག་ཉིད་བསམ་
[37b.5]པར་བྱའོ། །པདྨ་གྷཎྜ་ཨ་ཧཾ་ཞེས་བྱ་བས་ང་རྒྱལ་བསྐྱེད་ལ། པདྨ་ཨཱ་བེེ་ཤ་ཨ་ཧཾ་ཞེས་བྱ་བས་དྲིལ་བུའི་གཟུགས་དེ་པདྨ་འབེབས་པའི་བར་བསྒོམ་པར་བྱའོ། །དེ་ལྟར་དཀྱིལ་འཁོར་གྱི་འཁོར་ལོ་ཐམས་ཅད་རྡོ་རྗེས་བསྒྲུབ་པར་འགྱུར་རོ། །དེ་ནས་སྒོ་དབྱེ་བའི་ཕྱག་རྒྱས་སྒོ་ཕྱེ་ལ། བསྡུ་
[37b.6]བ་བྱས་ཏེ་མཚན་བརྒྱ་རྩ་བརྒྱད་པས་བསྟོད་ལ། སྒོ་ཐམས་ཅད་ནས་རྟ་མགྲིན་གྱི་ལྕགས་ཀྱུ་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱིས་ལས་བྱས་ཏེ། དེ་བཞིན་དུ་པདྨའི་གནོད་སྦྱིན་གྱིས་བགེགས་བསྐྲད་ལ་ར་བ་དང་དྲ་བ་བྱས་ཏེ། པདྨའི་ཁུ་ཚུར་གྱིས་དཀྱིལ་འཁོར་གྱི་སྒོ་བཅད་ལ། པདྨའི་
[37b.7]བསྲུང་བས་བསྲུང་བ་ཐམས་ཅད་ཡང་དག་པར་བསྲུངས་ཏེ། འགྲོ་བ་འདུལ་བའི་སྙིང་པོས་དཀྱིལ་འཁོར་བའི་ལྷ་ཐམས་ཅད་ལ་མཆོད་ཡོན་ཕུལ་ལ། ཨོཾ་པྲ་ཝ་ར་སཏྐཱ་རཾ་པྲ་ཏཱིཙྪ་སྭཱ་ཧཱ། ཞེས་བྱ་བའི་རིག་པ་འདིས་ཞབས་བསིལ་དབུལ་བར་བྱའོ། །ཕྱག་རྒྱ་ནི་འདི་ཡིན་ཏེ། གཡས་
[38a]
[38a.1]པའི་ཁུ་ཚུར་གྱིས་སོར་མོ་ཐམས་ཅད་བསྐུམ་ལ་མཛུབ་མོ་དང་མཐེ་བོ་གཉིས་བསྐུམ་པ་ལྟར་བྱས་ནས་མེ་ཏོག་བླངས་ཏེ། འབུལ་བའི་ཚེ་སོར་མོ་དེ་རྣམས་བརྐྱང་བར་བྱ་སྟེ། ལྷ་ཐམས་ཅད་ཀྱི་ཞབས་ལ་དབུལ་བར་བྱའོ། །དེ་ནས་རྣམ་པར་སྣང་མཛད་ཀྱི་དམ་ཚིག་གི་ཕྱག་
[38a.2]རྒྱ་བཅིངས་ལ། ཤུདྡྷ་ཧཱུཾ་དྲྀ་ཤྱ་ཛཿཧཱུཾ་བཾ་ཧོཿ། ས་མ་ཡ་ཧཱུཾ། ས་མ་ཡ་སྟྭཾ། ཨ་ཧཾ་བུདྡྷ་ཧཱུཾ་ཞེས་བྱ་བ་ལན་གསུམ་བརྗོད་ལ་རྣམ་པར་སྣང་མཛད་བསྒྲུབ་པར་བྱའོ། །དེ་བཞིན་དུ་བསྐལ་པ་བཟང་པོའི་མཐར་ཐུག་པའི་དམ་ཚིག་གི་ཕྱག་རྒྱ་བཅིངས་ལ། ཨོཾ་སརྦྦ་སཾ་སྐཱ་ར་པ་རི་ཤུདྡྷ་དྷརྨྨ་ཏེ་ག་ག་ན་ས་
[38a.3]མུངྒ་ཏེ་མ་ཧཱ་ན་ཡ་པ་རི་བཱ་རི་སྭཱ་ཧཱ། དྲྀ་ཤྱ་ཛཿཧཱུཾ་བཾ་ཧོཿ། ས་མ་ཡ་ཧཱུཾ། ས་མ་ཡ་སྟྭཾ་ཨ་ཧཾ། ཨོཾ་སརྦྦ་སཾ་སྐཱ་ར་པ་རི་ཤུདྡྷ་དྷརྨྨ་ཏེ་ག་ག་ན་ས་མུངྒ་ཏེ་མ་ཧཱ་ན་ཡ་བ་རི་བཱ་རི་སྭཱ་ཧཱ། ཞེས་བརྗོད་ཅིང་བསྐལ་པ་བཟང་པོ་རྣམས་བསྒྲུབ་པར་བྱའོ། །རྣམ་པར་སྣང་མཛད་ལ་སོགས་པ་ནས། པདྨ་འབེབས་
[38a.4]པའི་བར་གྱི་དམ་ཚིག་གི་ཕྱག་རྒྱ་འཆད་པར་འགྱུར་བ་དང་། བྱམས་པ་ལ་སོགས་པ་བསྐལ་པ་བཟང་པོ་པ་རྣམས་ཀྱི་གཡོན་པ་དེ་བཞིན་གཤེགས་པའི་ཁུ་ཚུར་བཀན་ལ་གཡས་པའི་མཛུབ་མོ་དང་མཐེ་བོང་གཉིས་ཀྱིས་མཐེའུ་ཆུང་ནས་བརྩམས་ཏེ་ཕྱེ་ལ། ཐལ་མོ་ཁོང་སྟོང་དུ་བྱས་པ་ནི་
[38a.5]དམ་ཚིག་གི་ཕྱག་རྒྱའོ། །དེ་ལྟར་དམ་ཚིག་གི་ཕྱག་རྒྱ་རྣམས་ཀྱིས་རྣམ་པར་སྣང་མཛད་ལ་སོགས་པ་བསྒྲུབས་ནས། ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་ཀྱང་རྒྱས་བཏབ་ནས། །དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ་མཆོད་ཡོན་སྔོན་དུ་འགྲོ་བའི་མཆོད་པ་ཐམས་
[38a.6]ཅད་ཀྱིས་ཡང་དག་པར་མཆོད་ལ། གོས་དང་རྒྱན་ཐམས་ཅད་ལ་གདུགས་དང་རྒྱལ་མཚན་དང་། བླ་རེ་སྣ་ཚོགས་པ་ལ་ཡང་པདྨ་གནོད་སྦྱིན་དང་། འགྲོ་བ་འདུལ་བ་དང་། ཡི་གེ་ཨོཾ་མངོན་པར་བཟླས་ཏེ་དབུལ་བར་བྱའོ། །དེ་ནས་མེ་ཏོག་གི་ཤིང་བརྒྱའམ་བཞིའམ་མེ་ཏོག་གི་ཤིང་
[38a.7]རྣམས་ལ་མེ་ཏོག་གི་རིག་པ་དང་། དེ་ནས་མར་མེའི་རིག་པས་མར་མེ་དང་། དྲིའི་རིག་པས་དྲི་དང་། བདུག་པའི་རིག་པས་བདུག་པ་དང་། ཨ་ཀཱ་རོ་མུ་ཁཾ་ཞེས་བྱ་བ་ལ་སོགས་པའི་ལྷ་བཤོས་ཀྱི་རིག་པ་དང་། རོལ་མོའི་ཆ་བྱད་ཐམས་ཅད་ལ་རོལ་མོའི་རིག་པ་རྣམས་དང་། དར་དཔྱངས་དཔྱངས་པར་
[38b]
[38b.1]བྱ་བ་དང་། མེ་ཏོག་གི་ཕྲེང་བ་དང་། རྔ་ཡབ་ཀྱིས་བརྒྱན་ཅིང་། དྲ་བ་དང་དྲ་བ་ཕྱེད་པས་སྤྲས་པ། ཟླ་བ་ཕྱེད་པས་ཉེ་བར་མཛེས་པར་བྱས་པ་དང་། རྟ་དང་། གླང་པོ་ཆེ་དང་། བ་གླང་གི་ཁྱུ་ཤིན་ཏུ་བརྟགས་པ་རྣམས་ཀྱང་དབུལ་བར་བྱའོ། །རྟ་བབས་ཡིད་དུ་འོང་བ་དྲིལ་བུ་ལ་སོགས་པ་དང་
[38b.2]བཅས་པ་ལ་ཡང་། པདྨའི་གནོད་སྦྱིན་དང་། འགྲོ་བ་འདུལ་བ་དང་། ཡི་གེ་ཨོཾ་མངོན་པར་བཟླས་ཏེ་དབུལ་བར་བྱའོ། །དེ་ལ་མཆོད་པ་ཐམས་ཅད་དབུལ་བའི་སྙིང་པོ་ནི་འདི་ཡིན་ཏེ། བཛྲ་སྥ་ར་ཎ་ཁཾ་དེ་ནས་པདྨོའི་སྒེག་མོ། ལ་སོགས་པ་རྣམ་པ་བརྒྱད་ཀྱིས་མཆོད་ལ། པདྨའི་རིགས་ཀྱི་ལས་
[38b.3]ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་ཀྱང་དཀྱིལ་འཁོར་ཐམས་ཅད་ཡང་དག་པར་མཆོད་དེ། ཡི་གེ་ཨོཾ་མངོན་པར་བཟླས་པའི་རིན་པོ་ཆེ་སྣ་བདུན་དང་། མཆོད་པའི་ཡན་ལག་ཐམས་ཅད་ཀྱིས་ནམ་མཁའི་ཁམས་ཐམས་ཅད་གང་བར་བསམས་ལ། ཨོཾ་སརྦྦ་བིཏྤཱུ་ར་
[38b.4]པཱུ་ར་སུ་ར་སུ་ར་ཨཱ་ཝརྟ་ཡ་ཨཱ་ཝརྟ་ཡ་ཧོཿཨོཾ་བཛྲ་སྥ་ར་ཎ་ཁཾ་ཞེས་བྱ་བ་དང་། ཕྱག་འཚལ་བའི་ཐལ་མོ་སྦྱར་བ་བཅིངས་ལ་ཡང་མཆོད་པར་བྱའོ། །སླར་ཡང་པདྨའི་སྒེག་མོ་ལ་སོགས་པ་གསང་བའི་མཆོད་པ་རྣམ་པ་བཞིས་དཀྱིལ་འཁོར་ཐམས་ཅད་ཡང་དག་པར་མཆོད་ལ། ཕྱག་བྱས་ཏེ་
[38b.5]སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་སློབ་དཔོན་གྱིས་བཅོམ་ལྡན་འདས་དངོས་གྲུབ་ཐམས་ཅད་ཀྱི་ཕྱིར། སེམས་ཅན་ཐམས་ཅད་ཀྱི་དོན་མཛོད་ཅིག་ཅེས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་གསོལ་བ་གདབ་པར་བྱའོ། །དེ་ནས་རྡོ་རྗེ་དབྱིངས་ཀྱི་དཀྱིལ་
[38b.6]འཁོར་ཆེན་པོ་ལས་བཤད་པའི་ཆོ་གས་གསོལ་བ་བཏབ་ནས། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ཏེ། སློབ་མ་གཞུག་པའི་གནང་བ་ནོད་པར་བྱས་ཏེ། བདག་མིང་འདི་ཞེས་བགྱི་བ་ཡི། །པདྨའི་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་སྨན་སླད་དུ། །
[38b.7]སློབ་མ་རྣམས་ནི་གཞུག་པར་བགྱི། །པདྨའི་སློབ་དཔོན་གྱི་ལས་ཀྱི་ཆོ་ག་རྒྱས་པའོ། །དེ་ནས་པདྨའི་སློབ་མ་རྣམས་གཞུག་པར་བྱ་ཞེས་བྱ་བ་ནི་སློབ་དཔོན་གྱིས་ལས་ཀྱི་དུས་ཕྱིས་སློབ་མ་འགྲོ་བ་འདུལ་བའི་གཟུགས་སུ་བྱིན་གྱིས་བརླབས་ལ། དེ་ནས་པདྨའི་སློབ་མ་གཞུག་པར་བྱའོ། །
[39a]
[39a.1]དེ་ལ་དང་པོར་ཞེས་བྱ་བ་ནི། སློབ་མ་འཇུག་པའི་སྔོན་དུའོ། །ཇི་སྐད་བཤད་པའི་པདྨའི་སློབ་མའི་སློབ་མ་རྣམས་ཀྱི་དཀྱིལ་འཁོར་ཆེན་པོར་བཅུག་ལ་མནའི་སྙིང་པོ་བྱིན་ལ་འདི་སྐད་ཅེས་བསྒོ་བར་བྱའོ། །དེང་ཁྱོད་ཀྱི་ནི་སྙིང་ག་ནས། །པདྨའི་སེམས་དཔའ་
[39a.2]ཉིད་བཞུགས་ཏེ། །ཞེས་བྱ་བ་ལ་སོགས་པས་མནའ་བསྒག་པར་བྱའོ། །གསང་བའི་ཆོ་ག་རྒྱས་པ་ཞེས་བྱ་བ་ནི། འགྲོ་བ་འདུལ་བའི་དཀྱིལ་འཁོར་ཆེན་པོར་དེ་བཞིན་གཤེགས་པ་ཐམས་ཅད་ཀྱི་གཟུགས་སྦས་ནས། འཕགས་པ་སྤྱན་རས་གཟིགས་དབང་ཕྱུག་གིས་དབང་ཕྱུག་
[39a.3]ཆེན་པོ་ལ་སོགས་པས་འདུལ་བའི་སེམས་ཅན་རྗེས་སུ་གཟུང་བར་གནས་པའི་ཕྱིར་རོ། །གསང་བའི་ཆོ་ག་རྒྱས་པ་ནི་སྣ་ཚོགས་པའི་གཟུགས་ཅན་ནོ། །དེ་བཞིན་དུ་གཞུག་པའི་ཆོ་ག་རྒྱས་པ་ཡང་གསང་བའི་ཆོ་ག་རྒྱས་པ་སྟེ་དམ་ཚིག་མི་ཤེས་པ་ལ་མི་བསྟན་པའི་ཕྱིར་རོ། །
[39a.4]དེ་ནས་སྙིང་པོ་འདིས་དམ་ཚིག་གི་ཕྱག་རྒྱ་བཅིང་བར་བྱའོ་ཞེས་བྱ་བ་ནི། ཇི་སྐད་དུ་བཤད་པའི་གོས་ཀྱི་སྟོད་གཡོགས་དང་སྨད་གཡོགས་དང་། གདོང་གཡོགས་ཀྱང་བཅིངས་ནས་ཕྱག་བཞི་བྱས་ཏེ། ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ལ། རྡོ་རྗེ་ཆོས་མའི་ཕྱག་རྒྱ་
[39a.5]བཅིངས་ཏེ། དེ་སྐད་དུ་ཡང་། རྡོ་རྗེ་ཆོས་ཀྱི་ཏིང་འཛིན་གྱིས། །དམ་ཚིག་སྐད་ཅིག་གིས་འགྲུབ་འགྱུར། །ཞེས་གསུངས་པས། དམ་ཚིག་ནི་དཀྱིལ་འཁོར་གྱི་དངོས་གྲུབ་སྟེ། དཀྱིལ་འཁོར་དུ་ཞུགས་པ་ལས་བྱུང་བ་ཡིན་ནོ་ཞེས་བྱ་བའི་དོན་ཏོ། །དེ་ནས་ཞེས་བྱ་བ་ནི་སློབ་མ་
[39a.6]འཇུག་པའི་གནང་བ་ནོད་པའི་དུས་ཕྱིས་ཕྱག་རྒྱ་བཅིང་བར་མི་བྱ་བའམ། རིམ་པ་ནི་འདི་བཞིན་དུ་མི་བྱའོ། །ལྷག་མ་ནི་གོ་སླའོ། །དེ་ནས་ལས་རྣམས་ཇི་ལྟ་བ་བཞིན་བྱས་ནས་ཞེས་བྱ་བ་ནི། སློབ་དཔོན་གྱི་ལས་ཀྱི་ཆོ་ག་ཇི་སྐད་བཤད་པ་བཞིན་དུ་སློབ་མ་འཇུག་པའི་ཆོ་ག་རྒྱས་པ་ཐམས་ཅད་
[39a.7]ཀྱང་དེ་བཞིན་དུ་བྱའོ་ཞེས་བྱ་བའི་དོན་ཏོ། །པདྨའི་དབྱིབས་ལག་ཏུ་སྦྱིན་ནོ་ཞེས་བྱ་བ་ནི་སྔར་བཤད་པའི་མཚན་ཉིད་ཅན་གྱི་རྡོ་རྗེ་པདྨ་སློབ་མའི་ལག་ཏུ་སྦྱིན་ནོ། །བྱིན་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱང་སྦྱིན་ཏེ། ཨོཾ་པདྨ་ཧསྟ་བཛྲ་དྷརྨྨཱ་ཏྲཾ་པཱ་ལ་ཡ་ཞེས་བྱ་བ་ལ་སོགས་པའོ། །དེ་ལ་རྡོ་རྗེ་
[39b]
[39b.1]ནི་ཆོས་རང་བཞིན་གྱིས་རྣམ་པར་དག་པའོ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་རྟོགས་པའོ། །དེའི་ཆོས་ནི་གཟུང་བ་དང་འཛིན་པའི་རྣམ་པར་རྟོག་པ་སྤངས་ཏེ་དེ་སྐྱོང་བའོ། །ཡང་དག་པའི་དངོས་པོར་འཛིན་པའི་མངོན་པར་ཞེན་པ་མི་བྱེད་པར་ཆོས་ཐམས་ཅད་རང་བཞིན་གྱིས་རྣམ་པར་
[39b.2]དག་པའོ་ཞེས་བྱ་བ་ཐམས་ཅད་ལ་བསྒོམ་པར་གྱིས་ཤིག་དང་འདི་ནི་པདྨ་ཡོངས་སུ་མི་གཏོང་བའི་མཚན་ཉིད་ཀྱིས་བརྟུལ་ཞུགས་སོ། །དེ་ཉིད་བཤད་པ་ནི། ཇི་ལྟར་པདྨ་དམར་པོ་འདི། །ཞེས་བྱ་བ་སྨོས་ཏེ། ཇི་ལྟར་པདྨ་ཁ་དོག་དམར་པོ་འདི་ཁྱོད་ཀྱིས་ཟུང་ཤིག། །རིགས་ཀྱི་ཉེས་པའི་
[39b.3]འདམ་ལ་སོགས་ཆུ་ཡིས་མི་གོས་པ་བཞིན་ནོ། །ཐམས་ཅད་དག་པ་ནི་སྔར་བཤད་པའི་རྡོ་རྗེ་ཆོས་ཀྱི་རང་བཞིན་ནི་བྱང་ཆུབ་ཀྱི་སེམས་བསྐྱེད་ནས་ཆོས་བདག་མེད་པའི་ཆགས་པས་གོས་པས་བྱང་ཆུབ་སེམས་དཔའོ། །བསྒོམ་པ་ནི་གོམས་པར་བྱས་པའོ། །དེ་བཞིན་དུ་གཟུང་བ་དང་འཛིན་
[39b.4]པའི་རྣམ་པར་རྟོག་པའི་དྲི་མའི་ཁམས་གསུམ་པའི་འདོད་ཆགས་ཀྱི་སྡིག་པའི་ཆུས་གོས་པར་མི་འགྱུར་རོ། །དེ་ལ་ཆོས་ཉིད་དེ་ཡིན་ནོ། །ཞེས་བྱ་བ་ནི། ཐོག་མ་མེད་པ་ནས་སྒྲོ་འདོགས་པ་མེད་པའི་རང་བཞིན་ནོ། །འདི་སྐད་སྟོན་པ་ཡིན་ཏེ། ལྷག་པར་གནས་པ་དེ་བཞིན་དུ་བྱས་ནས།
[39b.5]དབང་བསྐུར་བར་འོས་པའི་སློབ་མས་བསླབ་པའི་གཞི་ལྔ་ཡོངས་སུ་གཟུང་བའམ། དགེ་སྦྱོང་དང་དགེ་སློང་གི་སྡོམ་པ་ཡོངས་སུ་བླངས་པ། ལག་ན་མེ་ཏོག་ཐོགས་པའི་སློབ་མས་སློབ་དཔོན་གྱི་ཞབས་གཉིས་ལ་ཕྱག་བྱས་ལ། འདི་སྐད་བརྗོད་པར་བྱའོ། །དགའ་ཆེན་ཁྱོད་བདག་སྟོན་པ་
[39b.6]པས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྡོམ་པ་དག་ཀྱང་བདག་ལ་སྩོལ། །དེ་ནས་ཇི་སྐད་བཤད་པའི་གོས་ཀྱི་སྟོད་གཡོགས་དང་སྨད་གཡོགས་བསྐོན་
[39b.7]ཞིང་གདོང་གཡོགས་ཀྱང་བཅིངས་ལ་སློབ་མ་ཕྱག་བཞི་བྱེད་དུ་གཞུག་གོ། །ཡང་སྒོ་བཞི་ནས་ཕྱག་བཞི་བྱས་ལ། ལག་ན་མེ་ཏོག་ཐོགས་པའི་སློབ་མས་སློབ་དཔོན་ལ་ཡང་ཕྱག་བྱས་ཏེ། སྔར་བཤད་པའི་རིམ་པའི་རིམ་པ་ཉིད་ཀྱིས་བཤགས་པ་དང་། རྗེས་སུ་ཡི་རང་བ་དང་།
[40a]
[40a.1]བསྐུལ་བ་དང་། གསོལ་བ་ཡང་བྱས་ལ། འདི་སྐད་ཅེས་བརྗོད་པར་བྱའོ། །གཙོ་བོ་བདག་ལ་སྡོམ་པ་སྩོལ། །ཐུབ་པ་ཉི་མ་མ་ལུས་པ། །སངས་རྒྱས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །སློབ་དཔོན་དཔང་དུ་གནས་
[40a.2]པ་ལ། །སངས་རྒྱས་རོལ་མོ་ལས་བྱུང་བའི། །མི་ལྡོག་འཁོར་ལོའི་སྦྱོར་བར་ལྡན། །ཐར་པ་ཆེན་པོ་གྲོང་ཁྱེར་མཆོག །གསང་བ་ཆེན་པོར་འཇུག་པར་བགྱི། །གསང་བའི་རིགས་མཐོ་ཐམས་ཅད་དུ། །སློབ་དཔོན་ཆེན་པོར་བདག་འཇུག་མཛོད། །མི་ལྡོག་འཁོར་ལོའི་དབང་
[40a.3]བསྐུར་བས། །སྐལ་བ་ཆེན་པོ་བདག་ལ་སྩོལ། །མཚན་རྣམས་ཀུན་གྱིས་རྒྱས་བཏབ་པ། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་བ་ནི་རྨད་པོ་ཆེ། །སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་
[40a.4]བདག་ནི་སློབ་དཔོན་འགྱུར། །སློབ་དཔོན་ཆེན་པོ་བདག་ལ་སྩོལ། །དེ་ནས་སློབ་དཔོན་གྱིས་དཀྱིལ་འཁོར་གྱི་ལྷ་ཐམས་ཅད་ལ་གསོལ་བ་གདབ་པར་བྱ་སྟེ། ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པ། །དམ་ཚིག་སྡོམ་དང་གསང་བ་ཡིས། །འཁོར་ལོ་
[40a.5]འདིར་ནི་འཇུག་པར་འཚལ། །དེ་ནས་སློབ་དཔོན་གྱིས་ཡང་འདི་སྐད་ཅེས་བརྗོད་པར་བྱ་སྟེ། གསང་བ་ཆེན་པོ་རིགས་དག་པ། །གསང་བ་ཆེན་པོར་འཛིན་པ་ནི། །བདག་ཉིད་ཆེན་པོར་ཁྱོད་འདོད་དམ། །དེས་ཀྱང་འཚལ་ཞེས་བརྗོད་པར་བྱ། །སངས་རྒྱས་ཆོས་དང་དགེ་
[40a.6]འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །དམ་ཚིག་བརྟན་པར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ཡང་། །བློ་ཆེན་ཁྱོད་ཀྱིས་གཟུང་བར་གྱིས། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །
[40a.7]སློབ་དཔོན་དག་ཀྱང་གཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །སྡོམ་པ་དམ་ཚིག་ཡིན་པར་བཤད། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་
[40b]
[40b.1]པ་རྣམ་བཞི་རབ་ཏུ་སྦྱིན། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་བཤད། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་
[40b.2]ལས་ཀྱང་ཅི་ནུས་བྱ། །དེ་ལས་གཞན་པ་བཅུ་བཞི་ནི། །ཕས་ཕམ་པར་ཡང་རབ་ཏུ་བཤད། །སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བ་ཞེས་བཤད་དེ། །ཉིན་དང་མཚན་མོ་ལན་གསུམ་དུ། །ཉིན་རེ་ཞིང་ནི་བཟླ་བར་བྱ། །གང་ཚེ་ཉམས་གྱུར་རྣལ་འབྱོར་པ། །ཁ་ན་མ་ཐོ་སྦོམ་པོར་འགྱུར། །
[40b.3]ཁྱོད་ཀྱིས་སྲོག་ཆགས་བསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་ལོག་པར་མི་སྤྱོད་ཅིང་། །བརྫུན་དུ་སྨྲ་བར་མི་བྱའོ། །ཕུང་ཁྲོལ་ཀུན་གྱི་རྩ་བ་ནི། །ཆང་ནི་རྣམ་པར་སྤང་བར་བྱ། །སེམས་ཅན་གདུལ་ཕྱིར་མ་གཏོགས་པར། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྟེན་
[40b.4]བྱ་ཞིང་། །རྣལ་འབྱོར་པ་རྣམས་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་རྣམས་དང་། །ཡིད་ཀྱི་རྣམ་པ་གསུམ་རྣམས་ཀྱང་། ཅི་ནུས་པར་ནི་རྗེས་སུ་སྐྱོང་། །ཐེག་པ་དམན་ལ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ནི་ཡོངས་
[40b.5]མི་སྤང་། །རྟག་ཏུ་མྱ་ངན་འདས་མི་ཆགས། །ལྷ་དང་ལྷ་མིན་གསང་བ་པ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་རྒྱ་བཞོན་པ་མཚོན་ཆ་དང་། །མཚན་མ་བགོམ་པར་མི་བྱའོ། །འདི་དག་དམ་ཚིག་ཡིན་པར་བཤད། །ཁྱོད་ཀྱིས་ཀྱང་ནི་རྟག་ཏུ་བསྲུངས། །དེས་ཀྱང་འདི་སྐད་
[40b.6]བརྗོད་བྱ་སྟེ། །སློབ་དཔོན་འདིར་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་པ། །དེ་དག་བདག་ནི་བགྱིད་པར་འཚལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །ཞེས་བྱ་
[40b.7]བ་ནས། སེམས་ཅན་མྱ་ངན་འདས་ལ་འགོད། །ཅེས་བྱ་བའི་བར་དུ་བརྗོད་པར་བྱའོ། །གང་ཞིག་སྡོམ་པ་མི་འཛིན་པར་བྱེད་པ་དེ་ལ་ནི། དེང་ཁྱོད་ཅེས་བྱ་བ་ལ་སོགས་པ་བརྗོད་པར་མི་བྱ་སྟེ། སློབ་དཔོན་དུ་རྗེས་སུ་གནང་བ་དང་། དབང་བསྐུར་བ་ཡང་མི་བྱའོ། །དེ་ནས་དེ་མ་ཐག་ཏུ།
[41a]
[41a.1]ཨོཾ་སརྦྦ་ཡོ་ག་ཙིཏྟ་ཨུཏྤ་ད་ཡ་མི་ཞེས་བྱ་བ་འདིས། བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་ནས་སུ། །དེ་ཡི་སྙིང་གར་སྙིང་པོས་ནི། །རྡོ་རྗེ་རབ་ཏུ་གཞག་པར་བྱ། །སུ་ར་ཏེ་ས་མ་ཡ་སཏྭཾ་ཧོ་བཛྲ་སིདྡྷི་ཡ་ཐཱ་སུ་ཁཾ། དེ་ནས་དེ་འགྲོ་བ་འདུལ་པར་
[41a.2]བྱིན་གྱིས་བརླབས་ཏེ། འགྲོ་བ་འདུལ་བའི་དམ་ཚིག་གི་ཕྱག་རྒྱ་དང་། །རྡོ་རྗེ་པདྨ་ལ་སོགས་པའི་ཕྱག་རྒྱ་བཞིས་བྱིན་གྱིས་བརླབས་ལ། དེ་ནས་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ཏེ། དྲི་དང་མེ་ཏོག་ལ་སོགས་པ་རྣམས་ཀྱིས་མཆོད་ཡོན་གྱི་མཆོག་བླངས་ཏེ། རྡོ་རྗེ་
[41a.3]བརྟུལ་ཞུགས་ཀྱིས་དཀྱིལ་འཁོར་ཆེན་པོར་འཇུག་པར་བྱའོ། །དེ་ལ་དང་པོ་རེ་ཞིག་སློབ་དཔོན་གྱིས། ཨོཾ་བཛྲ་པདྨ་ས་མ་ཡ་སྟཱཾ་ཞེས་བརྗོད་ཅིང་རྡོ་རྗེ་པདྨའི་དམ་ཚིག་གི་ཕྱག་རྒྱ་རང་ཉིད་བཅིངས་ལ་སློབ་མ་ཡང་འཆིང་དུ་གཞུག་པར་བྱའོ། །དེ་ཉིད་ཀྱི་གུང་མོའི་སོར་མོ་གཉིས་ཀྱིས་མེ་ཏོག་གི་ཕྲེང་
[41a.4]བ་འཛིན་དུ་བཅུག་ལ། ཨོཾ་པདྨ་ས་མ་ཡ་ཧཱུཾ་ཞེས་བྱ་བའི་སྙིང་པོ་འདི་དང་། རྟ་མགྲིན་གྱི་ལྕགས་ཀྱུའི་ལས་ཀྱི་ཕྱག་རྒྱས་ཤར་ཕྱོགས་ཀྱི་སྒོ་ནས་བཅུག་ལ་དགུག་པར་བྱའོ། །ལྷོ་ཕྱོགས་ཀྱི་སྒོ་ནས་དེ་བཞིན་དུ་བཅུག་ལ་དོན་ཡོད་ཞགས་པའི་ལས་ཀྱི་ཕྱག་རྒྱས་གཞུག་པར་བྱའོ། །ཡང་ནུབ་
[41a.5]ཕྱོགས་ཀྱི་སྒོར་བཅུག་ལ་པདྨའི་ལྕགས་སྒྲོག་གི་ལས་ཀྱི་ཕྱག་རྒྱས་བཅིང་བར་བྱའོ། །དེ་ནས་ཡང་བྱང་ཕྱོགས་ཀྱི་སྒོ་ནས་བཅུག་ལ་པདྨ་འབེབས་པའི་ལས་ཀྱི་ཕྱག་རྒྱས་དབང་དུ་བྱའོ། །ཡང་ཤར་ཕྱོགས་ཀྱི་སྒོ་ནས་དེ་བཞིན་དུ་བཅུག་ལ་འདི་སྐད་ཅེས་བརྗོད་པར་བྱ་སྟེ། དེང་ཁྱོད་དེ་བཞིན་
[41a.6]གཤེགས་པ་ཐམས་ཅད་ཀྱི་པདྨའི་རིགས་སུ་ཞུགས་ཀྱིས། ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་གྲུབ་པ་ཡང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་
[41a.7]ལ་སྨྲ་བར་མ་བྱེད་ཅིག །ཁྱོད་དམ་ཚིག་ཉམས་པར་གྱུར་ཏ་རེ། དེ་ནས་སློབ་དཔོན་རང་ཉིད་ཀྱིས་རྡོ་རྗེ་པདྨའི་དམ་ཚིག་གི་ཕྱག་རྒྱ་ཁ་ཐུར་དུ་བསྟན་པ་དང་། གྱེན་དུ་བསྟན་པ་བཅིངས་ལ་པདྨ་སློབ་མའི་སྤྱི་བོར་བཞག་ལ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་རྡོ་རྗེ་དམ་ཚིག་ཡིན་
[41b]
[41b.1]གྱིས། གལ་ཏེ་ཚུལ་འདི་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་མནའི་སྙིང་པོ་འདི་ལན་ཅིག་བཟླས་པའི་ཆུས་པདྨའི་སློབ་མ་དེ་འཐུང་དུ་བཅུག་ལ་འདི་སྐད་ཅེས་བརྗོད་པར་བྱའོ། །དེ་ལ་མནའི་སྙིང་པོ་ནི་འདི་ཡིན་ཏེ། པདྨའི་
[41b.2]སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །བཛྲ་ཨུ་ད་ཀ་ཋ། དེ་ནས་སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེང་ནས་བརྩམས་ཏེ་ཁྱོད་ཀྱིས་ཕྱག་ན་པདྨོ་ང་ཡིན་གྱིས། ངས་འདི་བྱོས་
[41b.3]ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ། དེ་ནས་ཡང་འདི་སྐད་དུ་བསྒོ་བར་བྱ་སྟེ། གསང་བའི་ཆོ་ག་རྒྱས་པ་འདི་སུ་ལ་ཡང་མ་སྨྲ་ཤིག །ཁྱོད་མི་བདེ་བ་མ་
[41b.4]སྤངས་པར་དུས་བྱས་ནས་སེམས་ཅན་དམྱལ་བར་ལྟུང་བར་གྱུར་ཏ་རེ། དེ་ནས་དེ་བཞིན་གཤེགས་པ་ཐམས་ཅད་ཀྱིས་བདག་ལ་བྱིན་གྱིས་རློབས་ལ། པདྨའི་སེམས་དཔའ་བདག་ལ་འབབ་པར་གྱུར་ཅིག་ཅེས་སྨྲོས་ཤིག་ཅེས་བསྒོའོ། །དེ་ནས་མྱུར་དུ་སློབ་དཔོན་གྱིས་རྡོ་རྗེ་པདྨའི་དམ་ཚིག་
[41b.5]གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དུ་གཞུག་གོ། །འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་འབབ་པར་ཤོག །བཛྲ་ཨཱ་བེ་ཤ་ཨཿཞེས་བྱ་བ་ལན་བརྒྱའི་བར་དུ་བརྗོད་པར་བྱའོ། །དེའི་ཚེ་ཁྲོ་བོའི་ཁུ་ཚུར་བཅིངས་ལ།
[41b.6]རྡོ་རྗེ་པདྨའི་དམ་ཚིག་གི་ཕྱག་རྒྱ་དྲལ་བར་བྱ་ཞིང་། ཨོཾ་ཧཱུཾ་ཧྲཱིཿ་ཧོཿཨ་ཨ་ཨ་ཨ། ཞེས་ལན་བརྒྱའི་བར་བརྗོད་ན་ངེས་པར་འབབ་པར་འགྱུར་རོ། །གང་གི་ཚེ་དེ་ལྟར་བབས་པས་པདྨ། སངས་རྒྱས་ཀྱི་ཕྱག་རྒྱ་འཆིང་བ་དེའི་ཚེ་སློབ་དཔོན་གྱིས་པདྨ་ཁུ་ཚུར་གྱི་ཕྱག་རྒྱ་བཅིང་བར་བྱའོ། །གང་གི་ཚེ་པདྨ་
[41b.7]རྒྱལ་པོའི་ཕྱག་རྒྱ་འཆིང་བ་དེའི་ཚེ། པདྨ་གནོད་སྦྱིན་གྱི་ཕྱག་རྒྱ་བཅིང་བར་བྱའོ། །གང་གི་ཚེ་པདྨ་ཆགས་པའི་ཕྱག་རྒྱ་འཆིང་བ་དེའི་ཚེ། པདྨ་སྲུང་བའི་ཕྱག་རྒྱ་བཅིང་བར་བྱའོ། །གང་གི་ཚེ་པདྨ་ལེགས་པའི་ཕྱག་རྒྱ་འཆིང་བ་དེའི་ཚེ། པདྨ་གར་གྱི་དབང་ཕྱུག་གི་ཕྱག་རྒྱ་བཅིང་བར་བྱའོ། །
[42a]
[42a.1]གང་གི་ཚེ་པདྨ་ཁྲོ་གཉེར་གྱི་ཕྱག་རྒྱ་འཆིང་བ་དེའི་ཚེ། པདྨ་སྲུང་བའི་ཕྱག་རྒྱའོ། །གང་གི་ཚེ་པདྨ་ཉི་མའི་ཕྱག་རྒྱ་འཆིང་བ་དེའི་ཚེ། པདྨ་རྒྱུའི་ཕྱག་རྒྱའོ། །གང་གི་ཚེ་པདྨ་རྒྱལ་མཚན་གྱི་ཕྱག་རྒྱ་འཆིང་བ་དེའི་ཚེ། པདྨ་རྣོན་པོའི་ཕྱག་རྒྱའོ། །གང་གི་ཚེ་པདྨ་
[42a.2]བཞད་པའི་ཕྱག་རྒྱ་འཆིང་བ་དེའི་ཚེ། པདྨ་སྒྲོལ་མའི་ཕྱག་རྒྱ་བྱའོ། །དེ་ལྟ་བུས་ནི་པདྨའི་སངས་རྒྱས་དགོངས་པ་མཛད་པར་འགྱུར་རོ། །དེ་ནས་བབས་པ་དེའི་ལྕེ་ལ་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་བསམས་ལ། བཛྲ་ཛི་ཧྭ་ཞེས་བྱ་བས་བྱིན་གྱིས་བརླབས་ལ། འཇིག་རྟེན་
[42a.3]གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་བཤད་པའི་གར་གྱི་ཕྱག་རྒྱ་དང་། ཁྲོ་བོ་རྡོ་རྗེ་བསྲུང་བའི་གནས་སུ་བཞད་པའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། བྲུ་ཧི་བཛྲ་དེ་ནས་ཐམས་ཅད་སྨྲ་བར་འགྱུར་རོ། །དེ་ནས་ཕྲེང་བ་དེ་པྲ་ཏཱིཙྪ་བཛྲ་ཧོཿ
[42a.4]ཞེས་བྱ་བས་དཀྱིལ་འཁོར་ཆེན་པོར་དོར་བར་བྱའོ། །དེ་ནས་ཨོཾ་པྲ་ཏི་གྲྀ་ཧྣ་སྟྭཾ་མི་མཾ་སཏྭ་མ་ཧཱ་བཱ་ལ་ཞེས་བྱ་བས་ཕྲེང་བ་དེ་དེའི་མགོ་ལ་བཅིང་བར་བྱའོ། །དེ་ནས། པདྨའི་སེམས་དཔའ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །མིག་ནི་ཐམས་ཅད་འབྱིད་མཛད་དེ། །རྡོ་རྗེའི་
[42a.5]མིག་ནི་བླ་ན་མེད། །ཧེ་བཛྲ་པཱ་ཤྱ་དེ་ནས་རྟ་མགྲིན་ནས་བརྩམས་ཏེ་བཅོམ་ལྡན་འདས་རྣམ་པར་སྣང་མཛད་ཀྱི་བར་དུ་དཀྱིལ་འཁོར་ཆེན་པོ་བསྟན་པར་བྱའོ། །དེ་ནས་ཏིཥྛ་བཛྲ་དྲྀ་བྷོ་མེ་བྷཱ་བ། ཤཱ་ཤྭ་ཏོ་མེ་བྷ་བ། ཧྲྀ་ད་ཡཾ་ཨ་དྷི་ཏིཥྛ་སརྦྦ་སིདྡྷི་མྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོཿཞེས་བྱ་བའི་སྙིང་པོ་འདིས་
[42a.6]དབབ་པའི་ཕྱག་རྒྱ་སྙིང་གར་དགྲོལ་བར་བྱའོ། །དེ་ནས་གང་ལ་མེ་ཏོག་བབས་པའི་ལྷ་དེ་སྐུ་དམ་ཚིག་གི་ཕྱག་རྒྱས་དེ་སྤྲུལ་ལ། རྡོ་རྗེ་ཆོས་ཀྱི་ཕྱག་རྒྱ་དང་། རིགས་ཀྱི་དམ་ཚིག་གི་ཕྱག་རྒྱའི་ཁྱད་པར་གྱིས་སློབ་མ་བྱིན་གྱིས་བརླབས་ལ་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། དེ་ནས་
[42a.7]ནང་གི་དཀྱིལ་འཁོར་གྱི་ཕྱི་རོལ་དུ་ཁ་ཤར་ཕྱོགས་ཀྱི་སྒོ་ལ་མངོན་པར་ཕྱོགས་པའམ། ཕྱི་རོལ་གྱི་དཀྱིལ་འཁོར་གྱི་ཕྱི་རོལ་དུ་པདྨ་དང་ཟླ་བའི་སྟེང་དུ་བཞག་ལ། མཆོད་ཡོན་བྱིན་ནས་མཆོད་པ་རྣམ་པ་ལྔ་དང་། སྒེག་མོ་ལ་སོགས་པ་རྣམས་ཀྱིས་ཡང་དག་པར་མཆོད་ལ། རང་གི་ལྷའི་
[42b]
[42b.1]བུམ་པས་དབང་བསྐུར་ཞིང་། དེའི་སྔགས་ཀྱང་བརྗོད་པར་བྱའོ། །ཕྱིས་རྣམ་པར་རྒྱལ་བའི་བུམ་པ་ལས་པདྨའི་ཁུ་ཚུར་གྱིས་ཆུ་བླངས་ལ། ཆུ་དེས་དབང་བསྐུར་བ་དང་འཐུང་དུ་ཡང་གཞུག་གོ། །དེའི་སྔགས་ཨོཾ་བཛྲ་ཨ་བྷི་ཥིཉྩ་ཞེས་བརྗོད་པར་བྱའོ། །དེ་ནས་ཡོད་ཅིང་འབྱོར་བར་གྱུར་
[42b.2]ན་སྔར་བཤད་པའི་ཆོ་གས་གོས་དཀར་པོའི་སྟོད་གཡོགས་དང་། སྨད་གཡོགས་དང་། ཟེའུ་ཀ་བཅིངས་པའི་ཕྱིར། དེ་ལ་ཕྱི་ནས་ཟེའུ་ཀ་ལ་སོགས་པ་བྱའོ། །ཨོཾ་བཛྲ་དྷརྨྨཱ་ས་མ་ཡེ་བཛྲ་པདྨི་ནེ་ཧཱུཾ། ཞེས་བྱ་བས་སློབ་མ་ལ་ཆོས་ཀྱི་རྡོ་རྗེའི་དབང་བསྐུར་བར་བྱའོ། །ཕྱག་རྒྱ་ནི་འདི་ཡིན་
[42b.3]ཏེ། རྡོ་རྗེ་ཐལ་མོ་བསྡམས་ནས་ཀྱང་། །གུང་མོ་རྡོ་རྗེ་མཉམ་སྦྱར་བ། །ཆོས་ཀྱི་རྡོ་རྗེ་རབ་གྲགས་པ། །དེ་ཡིས་དབང་བསྐུར་སྦྱིན་པར་བྱ། །ཡི་གེ་ཧྲཱིཿལས་འོད་དཔག་ཏུ་མེད་པ་བསམས་ལ། འདི་དེའི་སྤྱི་བོར་གཞག་པར་བྱའོ། །འདི་ནི་ཆོས་ཀྱི་སྐུའི་ཅོད་པན་གྱིས་དབང་བསྐུར་བ་ཡིན་ནོ། །དེ་
[42b.4]ནས་ཇི་སྐད་བཤད་པའི་མཚན་ཉིད་ཅན་གྱི་རྡོ་རྗེ་པདྨ་དང་། པདྨའི་དྲིལ་བུ་དང་བཅས་པའི་སློབ་མའི་ལག་པ་གཉིས་སུ་བྱིན་ནས། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་དྷི་པ་ཏི་སྟྭཾ།
[42b.5]ཨ་བྷི་ཥི་ཉྩཱ་མི། ཏིཥྛ་བཛྲ་ས་མ་ཡ་སྟྭཾ། དེ་ནས་ཨོཾ་བཛྲ་སཏྭ་ནཱ་མ་ཨ་བྷི་ཥི་ཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏ། ཀྱེ་འཇིག་རྟེན་དབང་ཕྱུག་པདྨ་ཞེས་བྱ་བ་ལ་སོགས་པའི་སྔགས་འདིས་མིང་གིས་དབང་བསྐུར་བར་བྱ་སྟེ། སློབ་མ་རྡོ་རྗེ་ཐལ་མོ་བསྐོར་བ་དང་། སློབ་དཔོན་ལ་ཕྱག་བྱེད་དུ་བཅུག་ལ།
[42b.6]ཡོན་གྱི་མཆོག་བླངས་ཏེ། དབང་བསྐུར་ཐམས་ཅད་སྦྱིན་པར་བྱའོ། །དེ་ནས་དྲི་ལ་སོགས་པ་དང་། པདྨའི་སྒེག་མོ་ལ་སོགས་པ་རྣམས་ཀྱིས་སློབ་མ་ལ་མཆོད་པར་བྱའོ། །འདི་ནི་སྡོམ་པ་གཟུང་བ་དང་། སྡོམ་པ་མ་བཟུང་བ་རྣམས་ཀྱི་ཐུན་མོང་གི་དབང་བསྐུར་བ་ཡིན་ནོ། །སློབ་དཔོན་དུ་དབང་བསྐུར་
[42b.7]བར་འོས་པ་རྣམས་ཀྱིས་ཁྱད་པར་བརྗོད་པར་བྱ་སྟེ། རྩ་བའི་དཀྱིལ་འཁོར་ལས་ཁྲུ་གཉིས་ཙམ་དོར་བར་དབུས་མའི་དཀྱིལ་འཁོར་གྱི་ཕྱེད་ཀྱི་ཚད་ཀྱི་ཁྲུ་བཞི་པ་སྒོ་ནུབ་ཏུ་བལྟས་པ། ཤར་ཕྱོགས་ཀྱི་སྒོ་ལ་མངོན་པར་ཕྱོགས་པའི་དཀྱིལ་འཁོར་ཚོན་སྣ་ལྔས་བྲིས་ལ། དེའི་དབུས་སུ་པདྨ་
[43a]
[43a.1]འདབ་མ་བརྒྱད་པ། དེའི་སྟེང་དུ་རྡོ་རྗེ་པདྨ་འདབ་མ་བཅུ་དྲུག་པ་བྲིས་ལ། རྩ་བའི་དཀྱིལ་འཁོར་བཞིན་དུ་དཀྱིལ་འཁོར་དེ་ཡང་དག་པར་མཆོད་ནས། དེ་ལ་སེང་གེའི་ཁྲིའམ། ཁྲིའུ་པདྨ་དང་། ཟླ་བ་དར་གྱིས་གཡོགས་ལ། པདྨའི་གནོད་སྦྱིན་ཡོངས་སུ་བཟླས་ཏེ་
[43a.2]སློབ་མ་བཞག་ལ། དེའི་སྟེང་དུ་བླ་རེ་བྲེ་བ་དང་། གཡས་ལོགས་སུ་དར་དང་། མེ་ཏོག་གི་ཕྲེང་བས་བརྒྱན་པའི་གདུགས་དཀར་པོ་རིན་པོ་ཆེའི་ཏོག་ཅན་བྱའོ། །གཡོན་ལོགས་སུ་གོས་དཀར་པོ་སྣ་ཚོགས་པའི་རྒྱལ་མཚན་དང་། བ་དན་སྣ་ཚོགས་པ་བཙུགས་ལ་འགྲོ་བ་འདུལ་བ་དང་།
[43a.3]ཡི་གེ་ཨོཾ་ཡོངས་སུ་བཟླ་བར་བྱའོ། །དེ་ནས་སློབ་མ་འགྲོ་བ་འདུལ་བའི་དམ་ཚིག་གི་ཕྱག་རྒྱས་འགྲོ་བ་འདུལ་བའི་གཟུགས་སུ་བསྐྱེད་ལ། དེ་ཕྱག་རྒྱ་ཆེན་པོ་གནས་པ་ལ། སློབ་མའི་ལུས་ལ་རྣལ་འབྱོར་ཆེན་པོ་ལས་བཤད་པའི་གནས་རྣམས་སུ་དམ་ཚིག་གི་ཕྱག་རྒྱ་རྣམས་ཀྱིས་རྣམ་པར་
[43a.4]སྣང་མཛད་དང་། འགྲོ་བ་འདུལ་བ་ནས་བརྩམས་ནས་པདྨ་འབེབས་པའི་མཐར་ཐུག་པའི་དཀྱིལ་འཁོར་པའི་ལྷའི་ཁྱད་པར་ཐམས་ཅད་བཀོད་ལ། ཡང་དེ་ཉིད་ལ་ཡི་གེ་མ་ལས་རྣམ་པར་སྣང་མཛད་ཀྱི་ཅོད་པན་དང་། ཡི་གེ་ང་ལས་བྲང་དུ་མི་བསྐྱོད་པའི་དཔལ་བེའུ་དང་། ཡི་གེ་ཉ་ལས་
[43a.5]སྨིན་མཚམས་ཀྱི་མཛོད་སྤུར་རིན་ཆེན་འབྱུང་ལྡན་དང་། ཡི་གེ་ཎ་ལས་མཆུ་གཉིས་ཀྱི་བར་དུ་འོད་དཔག་ཏུ་མེད་པ་དང་། ཡི་གེ་ན་ལས་སྤྱི་གཙུག་ཏུ་དོན་ཡོད་གྲུབ་པ་དང་། ཡི་གེ་ཡ་ལས་སྙིང་གར་པདྨས་མཚན་པའི་རྡོ་རྗེ་དང་། ཡི་གེ་ར་ལས་དཔྲལ་བར་པདྨས་མཚན་པའི་ཡིད་བཞིན་
[43a.6]གྱི་ནོར་བུ་གཙང་མ་ཞེས་བྱ་བ་དང་། ཡི་གེ་ལ་ལས་ལྐོག་མའི་ཕྱོགས་སུ་རྡོ་རྗེ་པདྨ་དང་། ཡི་གེ་ཝ་ལས་མགོ་བོར་སྣ་ཚོགས་པདྨ་དང་། ཨ་ཨཱ་ཞེས་བྱ་བས་རྣ་བ་གཡས་གཡོན་དུ་པདྨའི་སངས་རྒྱས་དང་། པདྨའི་རྒྱལ་པོ་དང་། ཨི་ཨཱི་ལས་མིག་གཡས་གཡོན་གཉིས་སུ་པདྨའི་
[43a.7]ཆགས་པ་དང་། པདྨའི་ལེགས་པ་དང་། ཨུ་ཨཱུ་ཞེས་བྱ་བ་ལས་འགྲམ་པ་གཉིས་སུ་པདྨའི་ཁྲོ་གཉེར་དང་པདྨའི་ཉི་མ། རྀ་རཱྀ་ཞེས་བྱ་བ་ལས་རྣ་རྩ་གཉིས་སུ་པདྨའི་དཔལ་དང་། པདྨའི་བཞད་པ། ལྀ་ལཱྀ་ཞེས་བྱ་བ་ལས་མཆུ་གཉིས་ལ་པདྨའི་སྒྲོལ་མ་དང་པདྨའི་རྣོན་བོ། ཨེ་ཨཻ་ཞེས་བྱ་
[43b]
[43b.1]བ་ལས་སྣ་བུག་གཉིས་ལ་པདྨའི་རྒྱུ་དང་པདྨའི་བསྲུང་བའོ། །ཨོ་ཨཽ་ཞེས་བྱ་བ་ལས་ནམ་ཚོང་གཉིས་སུ་པདྨ་གར་གྱི་དབང་ཕྱུག་དང་པདྨའི་བསྲུང་བ། ཨཾ་ཨཱཿཞེས་བྱ་བས་ལྟག་ཁུང་གཡས་གཡོན་དུ་པདྨའི་གནོད་སྦྱིན་དང་པདྨའི་ཁུ་ཚུར་རོ། །ཨོཾ་ཤ་ཥ་ས་ཧ་ཙ་ཚ་ཛ་ཛྷ་ལས་ལྟེ་བ་ལ་
[43b.2]རྡོ་རྗེ་དབྱིངས་ཀྱི་དབང་ཕྱུག་མ་དང་པདྨའི་སྒེག་མོ་དང་། ཕྲེང་བ་མ་དང་། གླུ་མ་དང་། གར་མ་དང་། རྟ་མགྲིན་དང་། དོན་ཡོད་ཞགས་པ་དང་། ལྕགས་སྒྲོག་དང་། འབེབས་པའོ། །ཏྲི་ཀ་ཁ་ག་གྷ་ཞེས་བྱ་བ་ལས་རྒྱབ་ཏུ་རིག་པའི་རྒྱལ་པོ་རྣམས་སོ། །ཊ་ཋ་ཌ་ཌྷ་ཞེས་བྱ་བ་ལས་
[43b.3]དཔུང་པ་གཉིས་དང་ལྷག་པ་གཉིས་ལ་ཁྲོ་བོ་རྣམས་སོ། །ཏ་ཐ་ད་དྷ་ཞེས་བྱ་བ་ལས་རྟགས་དང་མཇུག་ཚོས་གཉིས་དང་རྒྱབ་ཏུ་ཚོགས་ཀྱི་བདག་པོ་རྣམས་སོ། །པ་ཕ་པ་བྷ་ཞེས་བྱ་བ་ལས་བརླ་གཉིས་དང་རྗེ་ངར་གཉིས་ལ་ཕོ་ཉ་རྣམས་སོ། །ཤ་ལཾ་ཀུ་ཀ་ཞེས་བྱ་བ་ལས་རྐང་པའི་ལོང་བུ་
[43b.4]གཉིས་སུ་གཡོག་པོ་རྣམས་སོ། །ཡ་ཧཱུཾ་ར་ཏྲ་ལ་ཧྲི་ཝ་ཨ་ཞེས་བྱ་བ་ལས་ལོང་བུ་གཉིས་དང་རྐང་པ་གཉིས་ལ་པདྨའི་བདུག་པ་མ་དང་། མེ་ཏོག་མ་དང་། མར་མེ་མ་དང་། དྲི་ཆབ་མའོ། །ཙ་ཚ་ཛ་ཛྷ་ཉ་ཞེས་བྱ་བ་ལས་ལག་པ་གཡས་པ་ལ་ལས་བྱེད་ལྔའོ། །ཊ་ཋ་ཌ་ཌྷ་ཎ་ཞེས་བྱ་བ་ལས་
[43b.5]ལག་པ་གཡོན་པ་ལ་ལས་བྱེད་མ་ལྡའོ། །ཀྲཾ་ཀྲི་ཡ་ར་ལ་ཝ་ཀྵ་ཞེས་བྱ་བ་ལས་རྐང་པ་གཡས་པ་ལ་ལས་བྱེད་མ་བདུན་ནོ། །ཤ་ཥ་ས་ཧ་ལཾ་ཞེས་བྱ་བ་ལས་རྐང་པ་གཡོན་པ་ལ་མིང་པོ་གསུམ་དང་། སྲིང་མོ་བཞི་དང་བཅས་པ་དགོད་པར་བྱའོ། །སྔར་ཡིག་འབྲུ་རྣམས་རིམ་གྱིས་བཀོད་
[43b.6]ལ། ཕྱིས་ཕྱག་རྒྱའི་གཟུགས་སུ་བསམས་ཏེ། དེ་ནས་ཡི་གེ་རྣམས་རིམ་པ་ཇི་ལྟ་བ་བཞིན་དུ་བརྗོད་པར་བྱའོ། །དངོས་གྲུབ་ཐམས་ཅད་རྫོགས་པར་བྱ་བའི་ཕྱིར། རིགས་རིགས་སུ་ཡང་རྒྱས་པ་ལ་མངོན་པར་དགའ་བས་ཡིག་འབྲུ་དགོད་པའི་ཆོ་ག་བྱའོ། །དེ་ནས་རྡོ་རྗེ་ཆོས་མས་སློབ་
[43b.7]མའི་སྙིང་གར་བྱིན་གྱིས་བརླབས་ལ། སྨིན་མཚམས་དང་། ལྐོག་མ་དང་སྤྱི་བོར་རྡོ་རྗེ་དང་པདྨ་འབའ་ཞིག་དང་། སྣ་ཚོགས་པདྨ་གསུམ་གྱིས་ཇི་ལྟ་བའི་གནས་སུ་བྱིན་གྱིས་བརླབས་ཏེ། དྲི་ལ་སོགས་པ་རྣམས་ཀྱིས་མཆོད་ལ། གདན་དེ་ལ་འགྲོ་བ་འདུལ་བའི་ཕྱག་རྒྱ་ཆེན་པོས་བཞག་
[44a]
[44a.1]སྟེ། མཆོད་ཡོན་སྔོན་དུ་འགྲོ་བའི་དྲི་ལ་སོགས་པ་རྣམས་དང་། འཇིག་རྟེན་གསུམ་ལས་རྣམ་པར་རྒྱལ་བའི་གཟུགས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པ་ལ་བསྐོར་བའི་རོལ་མོའི་ཕྱག་རྒྱ་རྣམས་ཀྱིས་མཆོད་ལ། དཔལ་མཆོག་དང་པོ་
[44a.2]ལས་གསུངས་པའི་རོལ་མོ་བརྒྱ་ཕྲག་སྙེད་ལས་དུང་དང་། རྔ་བོ་ཆེ་དང་། རྫ་རྔ་དང་། རྔ་རིངས་དང་། རྔ་དྲ་བ་ཅན་དང་། རྔ་ཟླུམ་དང་། པི་ཝང་དང་། གླིང་བུའི་བྱེ་བྲག་ཇི་སྙེད་པ་རྣམས་ལ་བྱིན་གྱིས་བརླབས་ཏེ་དབུལ་བ་དང་། སྒེག་མོ་ལ་སོགས་པ་རོལ་མོའི་ཁྱད་པར་རྣམས་ཀྱིས་ཡང་
[44a.3]དག་པར་མཆོད་ལ། བཀྲ་ཤིས་ཀྱི་ཚིགས་སུ་བཅད་པ་གདོན་པར་བྱའོ། །དེ་ནས་རྟ་མགྲིན་གྱི་བུམ་པ་གང་བའི་དབང་བསྐུར་བ་ནས་བརྩམས་ནས། རྣམ་པར་སྣང་མཛད་ཀྱི་བར་གྱི་བུམ་པ་གང་བ་དང་འགྲོ་བ་འདུལ་བའི་བུམ་པ་གང་བས་དབང་བསྐུར་བར་བྱའོ། །དེ་ནས་བུམ་པས་
[44a.4]དབང་བསྐུར་བའི་ཕྱིས་རྣམ་པར་རྒྱལ་བའི་བུམ་པ་ལས་པདྨ་ཁུ་ཚུར་གྱིས་ཆུ་བླངས་ལ། དབང་བསྐུར་བ་དང་། འཐུང་དུ་ཡང་གཞུག་གོ། །ཨོཾ་ཧ་ཡ་གྲྀ་བ་མ་ཧཱ་པདྨ་ཨཾ་ཀུ་ཤ་ཨཱ་ཀཪྵ་ཡ་ཤཱི་གྷྲཾ་སརྦྦ་པདྨ་ཀུ་ལ་པདྨ་ས་མ་ཡཾ་པདྨ་ཨཾ་ཀུ་ཤ་དྷཱ་ར་ཧཱུཾ་ཛ་ཨོཾ་བཛྲ་ཨ་བྷི་ཥིཉྩ་ཞེས་བྱ་བ་ནས་དེ་
[44a.5]བཞིན་དུ་ཨོཾ་ཧཱུཾ་ཧྲཱིཿ་ཧོཿབཛྲ་ཨ་བྷི་ཥིཉྩ། ཞེས་བྱ་བའི་སྦྱོར་བ་འདིས་དབང་བསྐུར་བར་བྱའོ། །དེ་ནས་རྡོ་རྗེ་རིན་ཆེན་དང་། པདྨའི་གནོད་སྦྱིན་ཡོངས་སུ་བཟླས་པའི་གོས་དཀར་པོ་དང་རྒྱན་གྱི་བྱེ་བྲག་ཐམས་ཅད་བྱིན་ལ་དྲི་ལ་སོགས་པ་དང་། སྒེག་མོ་ལ་སོགས་པ་རྣམས་ཀྱིས་ཡང་དག་
[44a.6]པར་མཆོད་དེ། སྔར་བཤད་པ་བཞིན་དུ་ཆོས་ཀྱི་རྡོ་རྗེ་བཅིངས་ཏེ། །འོད་དཔག་ཏུ་མེད་པའི་དབང་གིས་དབང་བསྐུར་ལ། ཡང་དེ་བཞིན་གཤེགས་པ་འོད་དཔག་ཏུ་མེད་ཕ་དང་ལྡན་པའི་པདྨའི་ཕྲེང་བ་དང་བཅས་པའི་རིན་པོ་ཆེའི་ཅོད་པན་གྱི་དར་དཔྱངས་ཀྱི་དབང་གིས་དབང་བསྐུར་བ་དང་།
[44a.7]ཨོཾ་དྷརྨྨཱ་ས་མ་ཡ་བཛྲ་པདྨེ་ནི་ཧཱུཾ། བཛྲ་རཏྣ་ཞེས་ལན་བརྒྱ་རྩ་བརྒྱད་ཡོངས་སུ་བཟླས་ཏེ་དབང་བསྐུར་བར་བྱའོ། །དེ་ནས་རྡོ་རྗེ་པདྨ་དང་། པདྨའི་དྲིལ་བུ་བླངས་ལ་མཚན་མའི་དབང་བསྐུར་བ་དང་། བདག་པོའི་དབང་བསྐུར་བ་ན། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་
[44b]
[44b.1]བསྐུར་བར་བྱ། །ཞེས་བྱ་བ་ལ་སོགས་པ་སྔ་མ་བཞིན་དུ་སྦྱིན་ནོ། །དེ་ནས་ཨོཾ་པདྨ་མཱ་ལེ་ཨ་བྷི་ཥིཉྩ་ལོ་ཀེ་ཤྭ་ར་ཏེ་སྭ་ར་ཧྲཱིཿ་ཞེས་བྱ་བ་སྟོང་རྩ་བརྒྱད་ཡོངས་སུ་བཟླས་ཏེ། པདྨའི་ཕྲེང་བ་དེ་སྤྱི་བོར་བཅིང་བར་བྱའོ། །དེ་ནས་མིང་གི་དབང་བསྐུར་བྱིན་ལ། མཆོད་པ་རྣམ་པ་ལྔ་དང་པདྨའི་
[44b.2]སྒེག་མོ་ལ་སོགས་པས་ཡང་དག་པར་མཆོད་ལ། ཡི་གེ་པྲས་ཡང་དག་པར་བྱིན་གྱིས་བརླབས་པའི་རིན་པོ་ཆེའི་མིག་ཐུར་རམ། གསེར་ལ་སོགས་པའི་ཐུར་མ་ཐོགས་ལ་མདུན་དུ་འདུག་སྟེ། མིག་འབྱེད་པའི་ཚུལ་དུ་བྱས་ལ་འདི་སྐད་ཅེས་བརྗོད་པར་བྱའོ། །ཇི་ལྟར་མིག་མཁན་
[44b.3]རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནཻ་ཏྲ་ཨ་པ་ཧ་ར་པ་ཏྲ་ལཾ་ཧྲི་དེ་ནས་ཨ་བཛྲ་སཏྭ་ཞེས་བྱ་བས་མེ་ལོང་ལ་ཡོངས་སུ་བཟླས་ལ་ཆོས་ཉིད་ཀྱི་མཚན་ཉིད་བསྟན་པར་བྱའོ། །ཆོས་
[44b.4]རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །ངོ་བོ་ཉིད་མེད་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་རིགས་སུ་སྐྱེ། །
[44b.5]ཡི་གེ་ཧོ་ལས་མདའ་བསྐྱེད་པ། །གཞུ་དང་ལྷན་ཅིག་ཏུ་བྱིན་ནས། འདི་སྐད་ཅེས་བརྗོད་པར་བྱའོ། །འདིས་དེ་བཞིན་གཤེགས་པ་ཐམས་ཅད་རྗེས་སུ་ཆགས་པར་གྱིས་ལ། ཡི་གེ་ཧོས་ཕྱོགས་བཞི་དང་སྟེང་འོག་ཏུ་མདའ་འཕེན་དུ་གཞུག་པར་བྱའོ། །མེ་ལོང་ལ་ཨ་བཛྲ་སཏྭ་ཞེས་
[44b.6]ཡོངས་སུ་བཟླས་ཏེ་བསྟན་ལ་འདི་སྐད་ཅེས་བརྗོད་པར་བྱའོ། །རྡོ་རྗེ་སེམས་དཔའ་མེ་ལོང་བཞིན། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་ཉིད་ནི། །བུ་ཁྱོད་ཀྱི་ནི་སྙིང་ལ་ཞུགས། །འདི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་ཀྱི་སེམས་གང་ཡིན་
[44b.7]པ་དེ་ནི་འདི་ཡིན་ནོ་ཞེས་ཁོང་དུ་ཆུད་པར་གྱིས་ཤིག་ཅེས་བརྗོད་པར་བྱའོ། །བཛྲ་ཧེ་ཏུ་མཾ་ཞེས་བྱ་བས་འཁོར་ལོ་རྩིབས་བརྒྱད་པ་རྐང་པ་གཉིས་ཀྱི་བར་དུ་དེ་གཞག་པར་བྱ་བ་དང་། །བཛྲ་བྷ་ཥ་རཾ་ཞེས་བྱ་བས་ལག་པ་གཡས་བར་དུད་བྱིན་ལ་འདི་སྐད་ཅེས་བརྗོད་པར་བྱ་སྟེ། དེང་ནས་བརྩམས་
[45a]
[45a.1]ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །དེ་རིང་ཕན་ཆད་འཇིག་རྟེན་ལ། །སྐྱོབ་པ་ཆོས་ཀྱི་འཁོར་ལོ་བསྐོར། །ཆོས་ཀྱི་དུང་ནི་བླ་མེད་པ། །མ་ལུས་ཀུན་དུ་གང་བར་གྱིས། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་
[45a.2]སེམས་ཀྱིས་ནི། །གསང་སྔགས་སྐྱོད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ན་སངས་རྒྱས་ལ། །ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཀྱང་། །ཀུན་དུ་ཁྱོད་ལ་སྲུང་བར་བྱེད། །དེ་ནས་དེ་བཞིན་གཤེགས་པ་ཐམས་ཅད་
[45a.3]ཀྱི་ང་རྒྱལ་གྱིས། །འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པའི། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་གསང་སྔགས་ཀྱི་ཐེག་པའི་རྗེས་སུ་གནང་བ་བྱིན་ནས། འགྲོ་བ་འདུལ་བའི་རྣལ་འབྱོར་པས།
[45a.4]སླར་ཡང་དཀྱིལ་འཁོར་བྲི་བའི་རྗེས་སུ་གནང་བ་སྦྱིན་པར་བྱའོ། །འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །པདྨའི་འཁོར་ལོ་རབ་ཏུ་བསྐོར། །ཞེས་བྱ་བ་བརྗོད་ནས། དེ་ནས་དེ་ཉིད་ཀྱིས་པདྨ་གཟུང་
[45a.5]བར་བྱ་སྟེ། དེ་ཉིད་ཀྱིས་ནི་བཅོམ་ལྡན་འདས། །འཇིག་རྟེན་དབང་ཕྱུག་རྫོགས་སངས་རྒྱས། །འདུལ་བར་བྱེད་པའི་ཐབས་ཀྱིས་ནི། །གར་གྱིས་རོལ་པ་རྣམ་པར་དག །འདིས་ཆོས་ཀྱི་དྲིལ་བུ་དཀྲོལ་བར་བྱ་སྟེ། ཇི་ལྟར་པདྨ་རབ་དམར་བ། །ཚོན་གྱི་ཉེས་པས་མི་གོས་བཞིན། །
[45a.6]དེ་བཞིན་ཁམས་གསུམ་དག་པས་ན། །བག་ཆགས་ཉེས་པས་གོས་མི་འགྱུར། །འདིས་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱ་སྟེ། གང་དང་གང་གི་གཟུགས་ཀྱིས་ནི། །འགྲོ་བ་འདུལ་བར་བྱེད་པས་ན། །པདྨ་དག་མཆོག་སྦྱོར་བ་ཡིས། །དེ་དང་དེ་ཉིད་ཀྱིས་
[45a.7]སྦྱང་བྱ། །དེ་ནས་དངོས་གྲུབ་ཀྱི་པདྨའི་བརྟུལ་ཞུགས་སྦྱིན་པར་བྱའོ། །ཨོཾ་པདྨ་ཧ་སྟ་དྷརྨྨ་ཏཾ་པ་ལ་ཡ་དེས་ཀྱང་འདི་སྐད་དུ། རྡོ་རྗེ་ཆོས་ཉིད་ཇི་ལྟ་བུ་ལགས་ཞེས་དྲི་བར་བྱའོ། །དེ་ལ་ཡང་འདི་སྐད་དུ་བརྗོད་པར་བྱ་སྟེ། ཇི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་བཞིན། །
[45b]
[45b.1]ཐམས་ཅད་དག་པར་བསྒོམས་ནས་ནི། །དེ་བཞིན་སྡིག་པས་གོས་མི་འགྱུར། །དེ་ལ་ཆོས་ནི་འདི་ཡིན་ནོ། །དེ་ནས་སྙིང་པོ་བྱིན་ལ། འགྲོ་བ་འདུལ་བའི་ཕྱག་རྒྱ་བཞིའི་ཡེ་ཤེས་བསླབ་པར་བྱའོ། །རིན་ཆེན་འབྱུང་ལྡན་གྱི་རྣལ་འབྱོར་མངོན་དུ་བྱས་ལ། སློབ་མ་ཐམས་ཅད་
[45b.2]གཟེངས་བསྟོད་པ་དང་། ལུང་བསྟན་པར་བྱའོ། །ཨོཾ་འདི་ནི་ངས་ཁྱོད་ལུང་བསྟན་པ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཀུན་དུ་གྲུབ་པའི་ཕྱིར། །སྲིད་པའི་ངན་སོང་རྣམས་ལས་བཏོན། །ཀྱེ་རྡོ་རྗེ་ཆེ་གེ་མོ་ཞེས་བྱ་བ། དེ་བཞིན་གཤེགས་པ་སརྱ་ས་མ་ཡ་སྟྭཾ་
[45b.3]བྷུ་ར་བྷུ་བ་སྭཿ དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ་གཡོན་པ་ཆོས་གོས་འཛིན་པའི་ཚུལ་དུ་བྱས་ལ། གཡས་པ་མཆོག་སྦྱིན་པའི་ཚུལ་དུ་བྱས་པ་འདི་ནི་གཟེངས་བསྟོད་པའི་ཕྱག་རྒྱ་ཡིན་ནོ། །ཆོ་ག་ལྷག་མ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པ་
[45b.4]ལས་ཤེས་པར་བྱའོ། །དེ་ལྟར་སློབ་དཔོན་གྱི་ཆོ་ག་རྒྱས་པ་དང་། སློབ་མ་འཇུག་པ་ལ་སོགས་པ་ཆོ་ག་རྒྱས་པར་བསྟན་ནས། དེ་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་དམ་ཚིག་དང་དབང་བསྐུར་བ་ཐོབ་པའི་སློབ་དཔོན་གྱིས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་
[45b.5]དངོས་གྲུབ་ཀྱི་ཡེ་ཤེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བ་ནི་གཞུག་པའི་ཆོ་ག་རྒྱས་པའི་དུས་ཕྱིས་པདྨའི་རིགས་ཀྱི་དཀྱིལ་འཁོར་ཆེན་པོའི་ཕྱག་རྒྱ་དབང་དུ་བྱ་བ་ལ་སོགས་པ་ནི། དེ་མ་ཐག་ཏུ་བསྟན་པར་བྱ་བ་ཡིན་ནོ། །དེར་ངེས་པའི་
[45b.6]ཡེ་ཤེས་ཀྱི་ངོ་བོ་དེ་བསླབ་ཅིང་བསྟན་པར་བྱའོ། །སྙིང་ལ་པདྨོ་བྲིས་ནས་ཀྱང་། །ཞེས་བྱ་བ་ནི་རང་གི་ལྷའི་རྣལ་འབྱོར་བྱས་ལ་སྙིང་ལ་རྡོ་རྗེ་པདྨ་བྲི་བར་བྱའོ། །གང་གིས་བྲི་ཞེ་ན། པདྨོ་བསྒོམས་ནས་ཞེས་བྱ་བ་སྨོས་སོ། །དེ་བྲིས་པ་ཅི་ཞིག་བྱ་ཞེ་ན། པདྨོའི་དཔལ་ཡང་དབང་དུ་བྱེད་པ་སྟེ།
[45b.7]འགྲོ་བ་འདུལ་བའི་རང་གི་རིག་པ་འགྲུབ་པ་དང་། པདྨའི་རིགས་དབང་དུ་བྱེད་པའོ། །གང་ཞེ་ན། བུད་མེད་ཕལ་པའང་སྨོས་ཅི་དགོས། །ཞེས་བྱའོ། །ཨུ་མ་ལ་སོགས་པའི་བུད་མེད་མཆོག་ཏུ་མཛེས་པ་ངེས་པ་ཁོ་ནར་དབང་དུ་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་
[46a]
[46a.1]བ་ལ་སོགས་པའི་རང་གི་ལྷའི་རྣལ་འབྱོར་བྱས་ལ་ཕྱིས་པདྨ་ཤྲཱི་ཡཾ་བ་ཤ་མ་ནཱ་ཡ་ཧོཿ། ཞེས་བྱ་བ་འདིས་འགྲོ་བ་འདུལ་བ་ལ་སོགས་པར་བདག་ཉིད་བསྐྱེད་ལ། རང་གི་སྙིང་པོ་དང་། སྙིང་པོ་འདིས་རྡོ་རྗེ་པདྨ་བསྒྲུབས་ལ། ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་
[46a.2]མངོན་སུམ་དུ་མཐོང་བར་གྱུར་གྱི་བར་དུ་བསྒོམ་པར་བྱའོ། །དེ་ནས་སྤྲོ་བ་དང་བསྡུ་བའི་སྦྱོར་བས་ཟླ་བ་གཅིག་བསྒོམས་ལ། མཐར་མཚན་ཐོག་ཐག་བསྒོམས་ནས་དེ་འཇིག་རྟེན་དབང་ཕྱུག་དང་མཉམ་པར་འགྱུར་རོ། །བུད་མེད་དབང་དུ་བྱེད་པར་འདོད་ན་ཟླ་བ་གཅིག་བསྒོམས་ལ། དེ་ནས་
[46a.3]སྤྲོ་བ་དང་བསྡུ་བའི་སྦྱོར་བས་ཟླ་བ་གཅིག་བྱས་ལ། མཐར་མཚན་ཐོག་ཐག་བསྒོམས་ནས་དེས་པདྨའི་དཔལ་མོའི་གཟུགས་ཅན་ནམ། ཨུ་མ་ལ་སོགས་པ་གནོད་སྦྱིན་མོའི་གཟུགས་ཅན་རྟ་མགྲིན་ལ་སོགས་པ་རྣམས་ཀྱིས་དགུག་པ་དང་། གཞུག་པ་དང་། བཅིང་བ་དང་། དབང་དུ་
[46a.4]བྱས་ཏེ། དེ་པདྨའི་འོད་ཟེར་གྱི་ཚོགས་ཀྱིས་བཀང་ནས་འཁྱུད་པར་བསམ་ཤིང་། པདྨ་ཤྲཱི་ཡ་བ་ཤ་མ་ནཱ་ཡ་ཧོཿ། །ཆེ་གེ་མོ་བ་ཤ་མ་ནཱ་ཡ་ཧོཿ། །ཞེས་བཟླས་པས་དེ་དབང་དུ་འགྱུར་རོ། །དཔྲལ་བར་སངས་རྒྱས་གཟུགས་བྲིས་ཏེ། །ཞེས་བྱ་བ་ནི་སྔ་མ་བཞིན་དུ་རང་གི་ལྷའི་གཟུགས་བྱས་ལ་
[46a.5]ཕྱི་ནས་བདག་ཉིད་ཨ་བྷི་ཥེ་ཀ་པྲ་ཡཙྪ་བཾ་ཞེས་བརྗོད་པས་དཔྲལ་བའི་ཕྱོགས་སུ་རྡོ་རྗེ་དེ་བཞིན་གཤེགས་པ་འོད་དཔག་ཏུ་མེད་པ་བསམས་ནས་སྔ་མ་བཞིན་དུ་རྟག་ཏུ་བསྒོམས་ནས། མཐར་མཚན་ཐོག་ཐག་བསྒོམས་ན། ཐོ་རངས་ཁ་རང་གི་ལྷའི་དབང་བསྐུར་བ་ཐོབ་པར་འགྱུར་ཞིང་རང་
[46a.6]གི་དངོས་གྲུབ་ཀྱང་འགྲུབ་པར་འགྱུར་རོ། །ཁ་ཡི་ནང་དུ་ལྕེ་སྟེང་དུ། །སངས་རྒྱས་གཟུགས་ནི་རབ་བསྒོམས་ན། །ཞེས་བྱ་བ་ནི། སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ་རྡོ་རྗེ་ལྕེར་བྱིན་གྱིས་བརླབས་ནས། པདྨ་སྭ་ར་སྭ་ཏེ་ཤོ་དྷ་ཡ་ཧཱུཾ། ཞེས་བྱ་བས་དེ་བཞིན་གཤེགས་པ་འོད་
[46a.7]དཔག་ཏུ་མེད་པ་ལྕེ་ལ་བསམས་ཏེ་སྔ་མ་བཞིན་དུ་དེའི་སྙིང་པོ་བཟླ་བ་དང་། བསྒོམ་པ་ཡང་བྱས་ནས། མཐར་མཚན་ཐོག་ཐག་དེ་ཐུན་བཞིར་བསྒོམས་ན་འཇིག་རྟེན་དབང་ཕྱུག་དང་འདྲ་བར་འགྱུར་རོ། །གཙུག་ཏོར་དབུས་སུ་པདྨོ་ནི། །སྙོམས་པར་ཞུགས་ཏེ་བཞག་ནས་ཀྱང་། །
[46b]
[46b.1]ཞེས་བྱ་བ་ནི་རང་གི་ལྷའི་རྣལ་འབྱོར་དེ་བཞིན་དུ་བྱས་ནས། ཨོཾ་པདྨོ་ཨུརྠ་དྷྭཾ་གྲཾ་བ་ཤཾ་ཀུ་རུ་ཛ། ཞེས་བྱ་བས། པདྨའི་གཙུག་ཏོར་ཞལ་བཞི་བསྐྱེད་ནས། ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་སྙིང་པོ་བཟླས་ཤིང་བསྒོམ་པར་བྱའོ། །དེ་ནས་སྤྲོ་བ་དང་བསྡུ་བའི་སྦྱོར་བས་
[46b.2]ཟླ་བ་གཅིག་བྱས་ན་འགྲུབ་པར་འགྱུར་ཞིང་དེ་བཞིན་གཤེགས་པ་ལྟ་བུའི་འཇིག་རྟེན་གསུམ་གྱི་དབང་ཕྱུག་གི་ལྷ་ལྟ་བུའི་གཙུག་ཏོར་གྱིས་མཁའ་འགྲོ་མ་ཐམས་ཅད་དབང་དུ་འགྱུར་རོ། །རྩིག་པའམ་ཡང་ན་ནམ་མཁའ་རུང་། །ཞེས་བྱ་བ་ལ་སོགས་པ་ནི། རང་གི་ལྷའི་རྣལ་འབྱོར་བྱས་ལ།
[46b.3]ཨོཾ་སརྦྦ་ཛ་གད་བ་ཤི་ཏ་ཛྙཱ་ན་པདྨ་ཨ་བྷི་ཥིཉྩ་ཨ་ཞེས་བྱ་བ་རྡོ་རྗེ་པདྨ་བརྩིགས་པ་ལ་སོགས་པ་ལ་སྤྲུལ་པ་སྙིང་པོ་འདི་བཟླས་ཤིང་ཉིན་རེ་ཞིང་ཐུན་བཞིའི་སྦྱོར་བས། ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྤྲོ་བ་དང་བསྡུ་བའི་སྦྱོར་བས་ཟླ་བ་
[46b.4]གཅིག་བྱས་ནས། མཐར་མཚན་ཐོག་ཐག་བསྒོམས་ན་དེས་དེ་བཞིན་གཤེགས་པ་ལ་སོགས་པ་ནས། སེམས་ཅན་ལ་པདྨ་སྤྲོ་བར་བསྒོམས་པས་དེས་རང་གི་རིག་པ་སྣང་བར་འགྱུར་ཏེ། དེ་སྐད་དུ། འདིས་ནི་སེམས་ཅན་ཐམས་ཅད་ཀྱང་། །དབང་དུ་བྱེད་པ་དམ་པའོ། །
[46b.5]ཞེས་སྨོས་སོ། །ནམ་མཁའ་འམ་ནི་ཕྱོགས་གཞན་དུ། །ཞེས་བྱ་བ་ནི། སྔ་མ་བཞིན་དུ་ལྷའི་རྣལ་འབྱོར་བྱས་ལ། ཨོཾ་ཛྙཱ་ན་པདྨ་ཏིཥྛ་ཨྀ་དྲ་ཤྱཾ་ཀུ་རུ་བཾ། ཞེས་བྱ་བའི་སྙིང་པོ་འདི་བརྗོད་ཅིང་ནམ་མཁའ་ལ་སོགས་པའི་ཕྱོགས་སུ་རྡོ་རྗེ་པདྨ་སྤྲུལ་ལ། སྙིང་པོ་འདི་ཉིད་བརྗོད་ཅིང་ཉིན་རེར་ཐུན་
[46b.6]བཞིའི་སྦྱོར་བས་ཇི་སྲིད་མངོན་སུམ་དུ་མཐོང་བར་འགྱུར་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས། གང་ཚེ་མཐོང་བ་དེ་ཚེ་བླངས། །ཅི་དགའ་བར་ནི་སྣང་མི་འགྱུར། །ཞེས་བྱའོ། །རྩིག་པའམ་ཡང་ན་ནམ་མཁའ་ལ། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་རང་གི་ལྷའི་རྣལ་འབྱོར་
[46b.7]བྱས་ལ། ཨོཾ་ས་མ་དྷི་བི་ཤྭ་པདྨ་ཏིཥྛ་བེ་ཤྭ་རུ་པྱཾ་མིདཪྴ་ཡ་བྷ་ག་བཾ། ཞེས་བྱ་བ་ཡོངས་སུ་ཟློས་ཤིང་རྩིག་པའམ། ཡང་ན་ནམ་མཁའ་ལ་པདྨ་འདབ་མ་བཞི་པ་སྤྲུལ་ལ། འདི་ཉིད་ཡོངས་སུ་བཟླས་ཏེ། ཇི་སྲིད་སྔར་བཤད་པ་བཞིན་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །
[47a]
[47a.1]གང་གི་ཚེ་མཐོང་ནས་བླངས་པ་དེའི་ཚེ་བྱང་ཆུབ་སེམས་དཔའ་ཆེན་པོ་འགྲོ་བ་འདུལ་བའི་གཟུགས་སུ་འགྱུར་རོ། །ནམ་མཁའ་འམ་ནི་ཕྱོགས་གཞན་དུ། །ཞེས་བྱ་བ་ལ་སོགས་པ་སྨོས་ཏེ་སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། ཕྱིས་ཨོཾ་ས་མ་དྷི་བཛྲ་པདྨ་ཏིཥྛ་
[47a.2]ཨུ་ཏིཥྛ་ཤཱི་གྷྲཾ་ཧྲཱིཿ། ཞེས་བྱ་བས་རྡོ་རྗེ་པདྨོ་ནམ་མཁའ་ལའམ། རྩིག་པ་ལ་སོགས་པའི་གནས་སུ་སྤྲུལ་ལ་སྙིང་པོ་འདི་ཉིད་ཟློས་ཤིང་སྔ་མ་བཞིན་དུ་བསྒོམས་ཏེ། དེས་མཐོང་བར་གྱུར་པ་དང་བླངས་ནས་པདྨའི་རིག་པ་འཛིན་པར་འགྱུར་རོ། །དཀྱིལ་འཁོར་ལ་སོགས་ཐམས་ཅད་དུ། །
[47a.3]སྤྱན་རས་གཟིགས་དབང་བྲིས་ནས་ནི། །ཞེས་བྱ་བ་ལ་སོགས་པ་ནི་འདིར་འཕགས་པ་རྟ་མགྲིན་དུ་གནས་པའི་སྤྱན་རས་གཟིགས་དབང་ཕྱུག་དེའི་རྣལ་འབྱོར་བྱས་ལ། ཨོཾ་པདྨ་ཨཾ་ཀུ་ཤ་ཨཱ་ཀཪྵ་ཡ་སརྦྦ་མ་ཧཱ་སཏྭཾ་ཧཱུཾ་ཛཿ། ཞེས་བྱ་བའི་སྙིང་པོ་འབུམ་བཟླས་པ་བྱས་ནས་ཕྱིས་མཚན་ཐོག་
[47a.4]ཐག་བཟླས་ན་འགྲུབ་པར་འགྱུར་རོ། །དེ་ནས་དཀྱིལ་འཁོར་རམ་རས་ལ་འཇིག་རྟེན་དབང་ཕྱུག་གི་མདུན་དུ་རྟ་མགྲིན་བྲིས་ལ། དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། དམ་ཚིག་གི་ཕྱག་རྒྱས་བསྒྲུབས་ལ། དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་
[47a.5]ཀྱིས་རྒྱས་བཏབ་ལ་དབང་བསྐུར་ཏེ། མཆོད་པ་རྣམས་ཀྱིས་ཡང་དག་པར་མཆོད་ལ། དེའམ་ཡང་ན་གཞན་གནོད་སྦྱིན་མོ་ལ་སོགས་པའི་གཟུགས་དེའི་མདུན་དུ། རྟ་མགྲིན་གྱི་ལས་ཀྱི་ཕྱག་རྒྱས་བཅིངས་ན་རང་གི་དབང་དུ་བྱེད་པར་འགྱུར་རོ། །དཀྱིལ་འཁོར་ལ་སོགས་ཐམས་
[47a.6]ཅད་དུ། །སྤྱན་རས་གཟིགས་དབང་བྲི་བར་བྱ། །ཞེས་བྱ་བ་ལ་སོགས་པ་ནི། འདིར་རྗེ་བཙུན་དོན་ཡོད་ཞགས་པ་ནི་སྔར་བཤད་པའི་མཚན་ཉིད་དང་ལྡན་པའི་འཇིག་རྟེན་དབང་ཕྱུག་དེའི་རྣལ་འབྱོར་བྱས་ལ། ཨོཾ་ཨ་མོ་གྷ་པཱ་ཤ་ཀྲོ་དྷ་ཧཱུཾ་ཧོཿཞེས་བྱ་བའི་སྙིང་པོ་འབུམ་བཟླས་པ་བྱས་ལ།
[47a.7]མཐར་མཚན་ཐོག་ཐག་བཟླས་ཏེ། དེ་ནས་དཀྱིལ་འཁོར་རམ་རས་ལ་བཅོམ་ལྡན་འདས་དོན་ཡོད་ཞགས་པ་དེ་ཉིད་བྲིས་ལ། བཅོམ་ལྡན་འདས་རྗེ་བཙུན་དོན་ཡོད་ཞགས་པའི་ལས་ཀྱི་ཕྱག་རྒྱ་བཅིངས་ཏེ། དེའམ་སེམས་ཅན་གཞན་དཀྱིལ་འཁོར་དུ་བཅུག་ན་རང་གི་དབང་དུ་བྱེད་པར་
[47b]
[47b.1]འགྱུར་བས་ན། ངེས་པར་ཞགས་པའི་ཕྱག་རྒྱ་ཡིས། །འགྲོ་བ་ཐམས་ཅད་འདྲེན་པར་བྱེད། །ཅེས་བྱའོ། །དཀྱིལ་འཁོར་ལ་སོགས་ཐམས་ཅད་དུ། །སྤྱན་རས་གཟིགས་དབང་བྲི་བར་བྱ། །ཞེས་བྱ་བ་ལ་སོགས་པ་ནི། འདིར་པདྨ་ལྕགས་སྒྲོག་ནི་འཇིག་རྟེན་དབང་ཕྱུག་དེའི་
[47b.2]རྣལ་འབྱོར་བྱས་ལ། ཨོཾ་པདྨོ་སྥོ་ཊ་བཾ་ཞེས་བྱ་བའི་སྙིང་པོ་འབུམ་བཟླས་ཏེ། དེ་ནས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། དེའམ་ཡང་ན་བསྒྲུབ་པར་བྱ་བ་གཞན་པདྨ་ལྕགས་སྒྲོག་གི་ཕྱག་རྒྱ་བཅིང་བར་འགྱུར་རོ། །དཀྱིལ་འཁོར་ལ་སོགས་ཐམས་ཅད་དུ། །སྤྱན་
[47b.3]རས་གཟིགས་དབང་བྲི་དེ་ཡི། །ཞེས་བྱ་བ་ལ་སོགས་པ་ནི། འདིར་པདྨ་འབེབས་པ་ནི་འཇིག་རྟེན་དབང་ཕྱུག་དེའི་རྣལ་འབྱོར་བྱས་ལ། ཨོཾ་པདྨ་གྷཎྜ་ཨཱ་བེ་ཤ་ཨཿ་ཞེས་བྱ་བའི་སྙིང་པོ་འབུམ་བཟླས་ཏེ། མཐར་མཚན་ཐོག་ཐག་བཟླས་པར་བྱའོ། །དེ་ནས་ཕྱིས་དཀྱིལ་འཁོར་དུ་
[47b.4]པདྨ་འབེབས་པ་སྔ་མ་བཞིན་དུ་བྲིས་ལ་ལྷ་ལ་སོགས་པའི་སེམས་ཅན་དགུག་པ་དང་། གཞུག་པ་དང་། བཅིངས་ལ་པདྨ་འབེབས་པའི་ལས་ཀྱི་ཕྱག་རྒྱ་དང་སྙིང་པོ་འདིས་སྣོད་ལ་ཕབ་ན་ཐམས་ཅད་སྨྲ་བར་འགྱུར་རོ། །བདག་ཉིད་ཉིད་ཀྱིས་བདག་ཉིད་ཉིད། །པདྨོ་ཞལ་བཞི་སེམས་
[47b.5]དཔར་ཡང་། །ཞེས་བྱ་བ་ལ་སོགས་པ་ནི། པདྨ་འདབ་མ་བཞི་དང་ལྡན་བཞིན་དུ་པདྨ་དོན་ཡོད་པའི་དབང་ཕྱུག་ཞལ་བཞིའི་སྐུ་མདོག་སྔོན་པོ་དང་སེར་པོ་དང་། དམར་པོ་དང་། ལྗང་གུ་སྣ་ཚོགས་པར་བསྒོམས་ཏེ་གོམས་པར་བྱས་པའོ། །བདག་ཉིད་ཅེས་བྱ་བ་འདི་ཉིད་ཀྱིས་རྒྱས་
[47b.6]པར་བཤད་པ་ནི། བདག་ཉིད་ཉིད་ཅེས་བྱ་བ་ཡིན་ནོ། །སུ་ཞིག་སྒོམ་པ་ཡིན་ཞེ་ན། བདག་ཉིད་ཉིད་ཀྱི་ཞེས་བྱ་བ་སྨོས་ཏེ། མདུན་དུ་ཡང་དེ་བསྒོམ་པར་བྱ་བ་མ་ཡིན་ནོ་ཞེ་ན། བདག་ཉིད་ཉིད་ཅེས་བྱ་བ་སྨོས་སོ། །འདི་སྐད་སྟོན་པ་ཡིན་ཏེ། དོན་ཡོད་པའི་དབང་ཕྱུག་གི་རྣལ་འབྱོར་
[47b.7]བྱས་ལ་པདྨ་བི་ཤ་ཞེས་བརྗོད་ཅིང་། བདག་ཉིད་ཉིད་ཀྱིས་བདག་ཉིད་ཉིད་པདྨ་དོན་ཡོད་པའི་དབང་ཕྱུག་གི་གཟུགས་སུ་ཇི་སྲིད་བདག་ཉིད་མཐོང་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རས་རིས་ལ་སོགས་པ་ལ་བཅོམ་ལྡན་འདས་སྤྱན་དྲངས་མཚན་ཐོག་ཐག་བསྒོམས་ན། དེས་པདྨ་
[48a]
[48a.1]དོན་ཡོད་པའི་དབང་ཕྱུག་ལྟ་བུ་གཟུགས་མང་པོར་འགྱུར་རོ། །རྡོ་རྗེ་ཆོས་ཀྱི་ཏིང་འཛིན་གནས། །པདྨོས་པདྨ་བསྒོམས་ན་ནི། །ཞེས་བྱ་བ་ལ་སོགས་པ་ནི་པདྨ་ཏིང་ངེ་འཛིན་གྱི་རྣལ་འབྱོར་བྱས་ལ་དྷརྨྨ་ཀཱ་ཡ་པདྨ་ཞེས་བརྗོད་ཅིང་། ཇི་སྲིད་མངོན་སུམ་དུ་མཐོང་བར་གྱུར་པ་
[48a.2]དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ན་ཏིང་ངེ་འཛིན་པདྨའི་གཟུགས་སུ་འགྲུབ་པར་འགྱུར་རོ། །སྤྱན་རས་གཟིགས་དབང་ཐོར་ཚུགས་དབུས། །བདག་གི་སངས་རྒྱས་གཟུགས་སུ་ནི། །ཞེས་བྱ་བ་ནི་རང་གི་ལྷའི་རྣལ་འབྱོར་བྱས་ལ། བུདྡྷ་ཨ་བྷི་ཥེ་
[48a.3]ཀ་ཞེས་བརྗོད་ཅིང་སྤྱན་རས་གཟིགས་དབང་ཕྱུག་གི་རལ་པའི་ཐོར་ཚུགས་ཀྱི་དབུས་སུ་དེ་བཞིན་གཤེགས་པ་འོད་དཔག་ཏུ་མེད་པར་བདག་ཉིད་ཀྱིས་བསྒོམས་པ་དེ་དང་སྙིང་པོ་འདི་ཉིད་བརྗོད་ཅིང་ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་སངས་རྒྱས་ཀྱི་གཟུགས་སུ་བདག་ཉིད་མཐོང་བ་དེ་སྲིད་ཀྱི་བར་དུ་
[48a.4]བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ན་ཚེ་དཔག་ཏུ་མེད་པ་དང་མཉམ་པར་འགྱུར་རོ། །སྣ་ཚོགས་གཟུགས་ཀྱི་ཏིང་འཛིན་གནས། །སྣ་ཚོགས་གཟུགས་ཀྱི་ཏིང་འཛིན་དུ། །བདག་ཉིད་ཀྱིས་ནི་བསྒོམས་ན་ནི། །ཞེས་བྱ་བ་ནི་སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ།
[48a.5]ཕྱིས་ལོ་ཀེ་ཤྭ་ར་ཞེས་བརྗོད་ཅིང་། འགྲོ་བ་འདུལ་བར་བདག་ཉིད་བསྒོམས་ཏེ། དེ་ཉིད་བརྗོད་ཅིང་སྔ་མ་བཞིན་དུ་བསྒོམས་ནས་མཐར་མཚན་ཐོག་ཐག་བྱས་ན། འགྲོ་བ་འདུལ་བ་དང་འདྲ་བར་འགྱུར་རོ། །དེ་ལྟར་ཇི་ལྟ་བའི་མངོན་པར་འདོད་པའི་དངོས་གྲུབ་ཀྱི་ཡེ་ཤེས་བསླབ་པ་བསྟན་
[48a.6]ནས། ད་ནི་འདི་ལས་བཤད་པའི་དངོས་གྲུབ་རྣམས་རང་གི་ལྷའི་རྣལ་འབྱོར་བྱས་ལ། རང་གི་ལྷའི་ཕྱག་རྒྱ་བཞིས་རྒྱས་བཏབ་ནས། བསྒྲུབ་པར་བྱ་བ་དང་ཕན་ཡོན་བསྟན་པས་སྒྲུབ་པ་པོ་སྤྲོ་བ་བསྐྱེད་པར་བྱ་བའི་ཕྱིར། དེ་གཉིས་ཀ་བསྟན་པ་ནི། དེ་ནས་ཞེས་བྱ་བ་ལ་སོགས་པ་
[48a.7]གསུངས་ཏེ། དེ་ནས་ཞེས་བྱ་བ་ནི་དངོས་གྲུབ་ཀྱི་ཡེ་ཤེས་བསྟན་པའི་རྗེས་ཐོགས་ལའོ། །དཀྱིལ་འཁོར་ཆེན་པོ་ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོའོ། །ཐམས་ཅད་ཀྱང་ཡིན་ལ་ཕྱག་རྒྱ་ཡང་དེ་ཡིན་པས་ན་ཐམས་ཅད་ཀྱི་ཕྱག་རྒྱ་སྟེ། ཕྱག་རྒྱ་ཆེན་པོ་དང་། དམ་ཚིག་
[48b]
[48b.1]དང་། ཆོས་དང་། ལས་རྣམས་ཀྱི་དེར་ངེས་པའི་ཡེ་ཤེས་དེ་བསླབ་ཅིང་བསྟན་པར་བྱ་བའོ། །དེ་ལ་ཞེས་བྱ་བ་སྨོས་པ་ནི་རྒྱས་པར་འཆད་པའོ། །རེ་ཞིག་ཅེས་སྨོས་པ་ནི་རིམ་པ་ལ་ལྟོས་པའོ། །དང་པོར་ཞེས་བྱ་བ་ནི་ཐོག་མར་རོ། །ཕྱག་རྒྱ་ཡང་ཡིན་ལ་ཆེན་པོ་ཡང་དེ་ཡིན་པས། ཕྱག་
[48b.2]རྒྱ་ཆེན་པོས་ཏེ། སྐུའི་གསང་བའི་ངོ་བོ་ཡེ་ཤེས་སུ་གྱུར་པའོ། །ཇི་ལྟར་རི་མོའི་ཚུལ་དུ་ནི། །ཟླ་བའི་དཀྱིལ་འཁོར་དབུས་གནས་ཤིང་། །པདྨོ་ལ་གནས་སེམས་དཔའ་ནི། །བདག་ཉིད་ཀྱིས་ནི་བདག་ཉིད་བསྒོམ། །ཞེས་བྱ་བ་ལ། ཟླ་བའི་དཀྱིལ་འཁོར་དབུས་གནས་ཤིང་། །ཞེས་
[48b.3]བྱ་བ་ནི་ཟླ་བའི་དཀྱིལ་འཁོར་གྱི་དབུས་སུ་གནས་ལ་ཇི་ལྟར་རི་མོ་བྲི་བར་བསྟན་པ་དེ་བཞིན་དུ་དེ་དག་གིས་རྗེས་སུ་འབྲང་བར་བྱ་བ་ཡིན་པ་དེའི་ཕྱིར། ཇི་ལྟར་རི་མོའི་ཚུལ་དུ་ནི། །པདྨོ་ལ་གནས་སེམས་དཔར་ནི། །བདག་ཉིད་ཀྱིས་ནི་བདག་ཉིད་བསྒོམ། །ཞེས་བྱ་བའོ། །འདི་སྐད་སྟོན་པ་
[48b.4]ཡིན་ཏེ། མཉམ་པའི་ཐལ་མོ་དང་། ཡང་རྡོ་རྗེ་ཐལ་མོ་དང་། དེ་ནས་རྡོ་རྗེ་བསྡམས་པ་བཅིངས་ལ། དེའི་རྗེས་ལ་རྡོ་རྗེ་བསྡམས་པ་སྙིང་གར་དྲལ་ཏེ། རྡོ་རྗེ་འབེབས་པའི་དམ་ཚིག་གི་ཕྱག་རྒྱས་བདག་ཉིད་ལ་དབབ་པར་བྱས་ལ། ཏིཥྛ་བཛྲ་ཞེས་བྱ་བ་ལ་སོགས་པས་དབབ་པ་ཉེ་
[48b.5]བར་བསྡུ་བ་བྱས་ནས། བཛྲ་མུཥྚི་ཞེས་བྱ་བས། རྡོ་རྗེ་དབྱིངས་ལས་གསུངས་པའི་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ལ། ཨོཾ་བཛྲ་སིནྡྷི་བཾ། ཞེས་བརྗོད་པར་བྱའོ། །དེ་ནས་སྡིག་པ་དྲལ་བའི་ཕྱག་རྒྱ་བཅིངས་ལ་སྡིག་པ་དྲལ་ལོ། །དེ་ནས་སྐྱིལ་མོ་ཀྲུང་བཅས་ཏེ། རང་གི་
[48b.6]སྙིང་གའི་ཟླ་བ་རྡོ་རྗེ་པདྨས་མཚན་པའི་སྟེང་དུ། ཨོཾ་ཧཱུཾ་ཧྲཱིཿཧོཿཞེས་བྱ་བ་ཡིད་ཀྱིས་བྲིས་ལ་འདི་ཉིད་རྒྱུན་དུ་བརྗོད་ཅིང་ཆོས་བདག་མེད་པ་བསྒོམ་པར་བྱའོ། །དེ་ནས་དེ་ཉིད་ཟླ་བའི་དཀྱིལ་འཁོར་གྱི་རྣམ་པར་རང་གི་བསམས་ལ། དེའི་སྟེང་དུ་དེ་ཉིད་དང་ཟླ་བའི་དཀྱིལ་འཁོར་གཉིས་པའོ། །
[48b.7]ཟླ་བའི་དཀྱིལ་འཁོར་གཉིས་པ་དེ་ཉིད་ལ་སྔར་བཤད་པའི་ཡི་གེ་བཞི་དང་ལྡན་པ་ལས་པདྨ་རཱ་གའི་རྡོ་རྗེ་རྩེ་ལྔ་པའོ། །དེ་ཉིད་ཀྱི་སྙིང་པོ་ཟློས་ཤིང་རྡོ་རྗེ་ལས་བྱུང་བའི་པདྨ་དེའི་དབུས་སུ་སྙིང་པོའི་ཡི་གེ་བཀོད་ལ། བཛྲ་པདྨ་ཨ་ཧཾ་ཞེས་པདྨའི་ང་རྒྱལ་བསྒོམས་ཏེ་བཛྲ་སཏྭ་ཧཾ་ཞེས་ཡིད་ཀྱིས་བརྗོད་
[49a]
[49a.1]པས། དེ་པདྨའི་སེམས་དཔར་བྱིན་གྱིས་བརླབ་པའི་སྦྱོར་བས་གཡོན་པ་བསྙེམས་པ་དང་བཅས་པས་རྡོ་རྗེ་གསོར་བའི་སེམས་དཔར་བདག་ཉིད་བསྒོམས་ལ། ཡང་བཛྲ་སཏྭ་ཧཾ་ཞེས་བརྗོད་པར་བྱའོ། །རྡོ་རྗེ་སེམས་དཔའ་དེ་ཉིད་ལ། ཨོཾ་ཧཱུཾ་ཧྲཱིཿཧོཿ། ཞེས་བརྗོད་
[49a.2]པས་བདག་ཉིད་འགྲོ་བ་འདུལ་བར་ངེས་པར་བྱས་ལ། མ་ཧཱ་ས་མ་ཡ་སཏྭ་ཧཾ་ཞེས་བརྗོད་པར་བྱའོ། །དེ་ནས་འགྲོ་བ་འདུལ་བའི་དམ་ཚིག་གི་ཕྱག་རྒྱ་བཅིངས་ལ། ས་མ་ཡ་ཧཾ་ཞེས་བརྗོད་དོ། །དེ་ཉིད་དང་ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བྱ་བས་སྙིང་ག་དང་། མཛོད་སྤུ་དང་། ལྐོག་མ་དང་།
[49a.3]སྤྱི་བོར་བྱིན་གྱིས་བརླབ་པར་བྱའོ། །དེ་ནས་པདྨ་བླངས་ལ། འགྲོ་བ་འདུལ་བའི་ཕྱག་རྒྱ་ཆེན་པོ་བཅིང་བར་བྱ་སྟེ། དེ་བཞིན་དུ་པདྨ་འབེབས་པའི་མཐར་ཐུག་གི་བར་དུ་ཆོ་ག་ཐམས་ཅད་རྗེས་སུ་སྤྱད་པར་བྱའོ། །འགྲོ་བ་འདུལ་བ་ལས་བཤད་པའི་ཆོ་གས་རང་གི་སྙིང་གའི་ཟླ་བ་ལ་གནས་པའི་
[49a.4]པདྨར། ཨོཾ་ཤཾ་མུ་ཁ། པདྨ་ཀུ་མཱ་ར། བེ་ཤ་དྷ་ར། པདྨ་གྷཎྜ་ཡ། ཨཱ་བི་ཤ་ཡ། སརྦྦ་ཀུ་ལ་པདྨ་ས་མ་ཡཱཾ། སརྦྦ་མུ་དྲཾ། བནྡྷ་ཡ། སརྦྦ་སིདྡྷི་མྨེ་པྭ་ཡཙྪ། པདྨ་ཨཱ་བེ་ཤ་ཨ་ཨ་ཨ་ཨ་ཞེས་ཡིད་ཀྱིས་བྲིས་ལ། དེ་ཉིད་ཡིད་ཀྱིས་བརྗོད་ཅིང་ཆོས་ཐམས་ཅད་བདག་མེད་པར་བསྒོམ་པར་
[49a.5]བྱའོ། །དེ་ནས་ཟླ་བའི་དཀྱིལ་འཁོར་གྱི་རྣམ་པར་བསམས་ལ། དེའི་སྟེང་དུ་ཟླ་བའི་དཀྱིལ་འཁོར་གཉིས་པ་སྔགས་དེ་ཉིད་དང་བཅས་པའི་རྡོ་རྗེ་རྩེ་ལྔ་པའོ། །པདྨ་འབེབས་པའི་སྔགས་དེ་ཉིད་དང་བཅས་པས་པདྨའི་དྲིལ་བུར་བསྐྱེད་ལ། དྲིལ་བུའི་དབུས་སུ་པདྨ་འབེབས་པའི་སྔགས་
[49a.6]བསམས་ལ་བཛྲ་གྷཎྜ་ཧཾ་ཞེས་བྱ་བས་པདྨ་དྲིལ་བུའི་ང་རྒྱལ་བསྒོམ་པར་བྱའོ། །བཛྲ་སཏྭ་ཞེས་བརྗོད་པས་པདྨའི་དྲིལ་བུ་དེ་རྡོ་རྗེ་སེམས་དཔར་བསམས་ལ། སྔ་མ་བཞིན་དུ་བཛྲ་སཏྭ་ཧཾ་ཞེས་བརྗོད་པར་བྱའོ། །དེ་ནས་དེ་ལ་པདྨ་འབེབས་པའི་སྔགས་བརྗོད་པས་རྡོ་རྗེ་སེམས་དཔའ་དང་
[49a.7]པདྨ་འབེབས་པར་བསམ་པར་བྱའོ། །དེ་ནས་མ་ཧཱ་ས་མ་ཡ་སཏྭ་ཨ་ཧཾ། དེའི་དམ་ཚིག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ་ས་མ་ཡ་ཧཾ། དེ་ནས་དམ་ཚིག་གི་ཕྱག་རྒྱ་དེ་ཉིད་དང་། ས་མ་ཡ་སཏྭཾ་ཨ་དྷི་ཏིཥྛ་སྭ་མཾ་ཞེས་བྱ་བས་སྙིང་ག་དང་། སྨིན་མཚམས་དང་། ལྐོག་
[49b]
[49b.1]མ་དང་། སྤྱི་བོར་བྱིན་གྱིས་བརླབ་པར་བྱའོ། །དེ་ནས་པདྨའི་དྲིལ་བུ་བཟུང་ལ། པདྨ་འབེབས་པའི་གཟུགས་ཀྱིས་འདུག་ལ། དེའི་སྔགས་ཀྱང་བརྗོད་པར་བྱའོ། །མདུན་དུ་འགྲོ་བ་འདུལ་བ་ལ་སོགས་པའི་ཕྱག་རྒྱ་ཆེན་པོ་བསྐྱེད་དེ་བསྒོམ་པ་དང་། བཅིང་བ་ཡང་འདིས་བཤད་
[49b.2]པ་ཡིན་ནོ། །དེ་ནས་མདུན་དུ་ཡེ་ཤེས་སེམས་དཔའ་ཇི་ལྟ་བ་བཞིན་དུ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། རང་གི་དམ་ཚིག་གི་ཕྱག་རྒྱས་བལྟས་ལ་ཡང་རང་གི་ལུས་ལ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། ས་མ་ཡ་
[49b.3]སྟྭཾ་ཞེས་བརྗོད་ཅིང་། རྒྱབ་ཏུ་ཟླ་བའི་དཀྱིལ་འཁོར་ཕབ་ལ། ས་མ་ཡ་སྟྭཾ་ཨ་ཧཾ་ཞེས་བྱ་བས་རང་གི་སྔགས་བརྗོད་ཅིང་དེ་དང་དེའི་རང་བཞིན་དུ་བདག་ཉིད་བསྒོམ་པར་བྱའོ། །དེ་ནས་ཛཿ་ཧཱུཾ་བཾ་ཧོཿཞེས་བརྗོད་ཅིང་ཡིད་ཀྱིས་ལེགས་སོ་ཞེས་སྦྱོར་བ་ཡིས། རང་གི་ལུས་ལ་དེ་བཞིན་
[49b.4]གཤེགས་པ་ཐམས་ཅད་བཅུག་ལ། རང་གི་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །དེ་ནས་རང་འདོད་པའི་ལྷ་དེ་བཞིན་གཤེགས་པ་ཐམས་ཅད་ལ་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། བྱིན་གྱིས་རློབ་པའི་ཕྱག་རྒྱ་རྣམས་ཀྱིས་བྱིན་གྱིས་བརླབས་
[49b.5]ཏེ། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ། སྒེག་མོ་ལ་སོགས་པའི་གསང་བའི་མཆོད་པ་བཞིས་ཡང་དག་པར་མཆོད་ལ། ཕྱག་བྱས་ཏེ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བར་བྱས་ཏེ། དེ་ཉིད་ཀྱིས་ནི་པདྨ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་
[49b.6]ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །བསྒོམ་ཞེས་བྱ་བ་ཡིན་ནོ། །ཕྱག་རྒྱ་ཆེན་པོ་ཐམས་ཅད་ཀྱི་སྤྱིའི་བསྒྲུབ་པའི་ཆོ་གའོ། །དེ་ནས་དེ་དག་གི་ལས་ནི་འདི་དག་ཡིན་ནོ་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས། པདྨ་འབེབས་པའི་བར་གྱི་
[49b.7]ཕྱག་རྒྱ་ཆེན་པོ་རྣམས་ཀྱི་དངོས་གྲུབ་ཀྱི་འབྲས་བུ་ནི་དེའི་ལས་སོ། །སངས་རྒྱས་ཕྱག་རྒྱ་ཆེ་བཅིངས་ན། །ཚེ་དཔག་མེད་དང་མཉམ་པར་འགྱུར། །ཞེས་བྱ་བ་སྨོས་པ་ནི། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སྔགས་ཀྱིས་རྣམ་པར་སྣང་མཛད་ཀྱི་ཕྱག་རྒྱ་
[50a]
[50a.1]ཆེན་པོར་བཅིངས་ནས། གང་གི་ཚེ་སྔ་མ་བཞིན་དུ་བྱས་པས་འགྲུབ་པར་འགྱུར་བ་དེའི་ཚེ་ཚེ་དཔག་ཏུ་མེད་པ་དང་མཉམ་ཞིང་མཚུངས་པར་འགྱུར་རོ། །རྡོ་རྗེ་པདྨོ་བཅིངས་ན་ནི། །སྤྱན་རས་གཟིགས་དབང་མཉམ་པར་འགྱུར། །ཞེས་བྱ་བ་ནི་རྡོ་རྗེ་སེམས་མའི་
[50a.2]གནས་ཀྱི་ཕྱག་རྒྱ་གང་ཡིན་པ་དེ་ནི་རྡོ་རྗེ་པདྨའི་ཡིན་ལ། དེའི་ཕྱག་རྒྱ་ཆེན་པོ་གང་ཡིན་པ་དེ་ནི་སངས་རྒྱས་པདྨའི་གཟུགས་སོ། །གང་གི་ཚེ་དེ་བཅིངས་པས་འགྲུབ་པར་འགྱུར་བ་དེའི་ཚེ་སངས་རྒྱས་པདྨ་དང་མཚུངས་པར་འགྱུར་རོ། །སངས་རྒྱས་དབང་ནི་རྡོ་རྗེ་རིན་ཆེན་མའི་གནས་ཀྱིས་ཏེ། པདྨ་
[50a.3]ཁྲོ་གཉེར་གྱི་ཕྱག་རྒྱ་ཉིད་དེའི་ཕྱག་རྒྱ་ཆེན་པོ་ཡིན་ལ། དེ་བཅིངས་ནས་གང་གི་ཚེ་བསྒོམས་ནས་འགྲུབ་པར་འགྱུར་བ་དེའི་ཚེ་བདེ་བར་གཤེགས་པ་དེ་བཞིན་གཤེགས་པ་དེས་དབང་བསྐུར་བས་དེ་བཞིན་གཤེགས་པ་དང་པདྨ་ཁྲོ་གཉེར་དང་མཚུངས་པར་འགྱུར་རོ་ཞེས་བྱ་བའི་དོན་ཏོ། །པདྨོས་
[50a.4]པདྨའི་ཏིང་འཛིན་ཐོབ། །ཅེས་བྱ་བ་ནི་རྡོ་རྗེ་ཆོས་མའི་གནས་ཏེ། པདྨའི་སྒྲོལ་མའི་ཕྱག་རྒྱ་ཆེན་པོ་ཉིད་དེའི་ཕྱག་རྒྱ་ཆེན་པོ་ཡིན་ཏེ། གང་གི་ཚེ་དེ་བསྒོམས་པས་འགྲུབ་པར་འགྱུར་བ་དེའི་ཚེ། དེའི་སྒྲུབ་པ་པོ་ལ་པདྨ་སྒྲོལ་མའི་ཏིང་ངེ་འཛིན་སྟེར་རོ། །སྣ་ཚོགས་ཀྱིས་ནི་སྣ་ཚོགས་མཆོག །ཅེས་བྱ་
[50a.5]བ་ནི་རྡོ་རྗེ་པས་མའི་གནས་ཀྱི་ཕྱག་རྒྱ་གང་ཡིན་པ་པདྨ་གར་གྱི་དབང་ཕྱུག་གི་ཕྱག་རྒྱ་ཆེན་པོ་ཉིད་ཡིན་པས་དེའི་ཕྱག་རྒྱ་ཆེན་པོ་དེ་བཅིངས་ནས། གང་གིས་བསྒོམས་པས་འགྲུབ་པར་འགྱུར་བ་དེའི་ཚེ། དེས་སྒྲུབ་པ་པོ་ལ་པདྨ་གར་གྱི་དབང་ཕྱུག་གི་གཟུགས་སྣ་ཚོགས་ཀྱི་མཆོག་དེ་སྟེར་བར་འགྱུར་
[50a.6]རོ། །སྣ་ཚོགས་གཟུགས་ཀྱིས་འདུལ་བའོ། །ཞེས་བྱ་བ་ནི་གཟུགས་ཐམས་ཅད་བསྟན་ནས་གདུལ་བྱའི་འགྲོ་བ་རྣམས་ལ་སྣ་ཚོགས་པའི་གཟུགས་འགྲོ་བ་འདུལ་བའི་ཕྱག་རྒྱ་ཆེན་པོ་སྟེར་བའོ། །སངས་རྒྱས་རིན་ཆེན་དབང་བསྐུར་ཏེ། །ཞེས་བྱ་བ་ནི་སངས་རྒྱས་ཐོར་ཚུགས་ཀྱི་ཕྱག་རྒྱ་
[50a.7]ཆེན་པོ་ནི་སངས་རྒྱས་རིན་ཆེན་ཏེ། དེའི་དངོས་གྲུབ་ཀྱི་དབང་བསྐུར་བ་སྒྲུབ་པ་པོ་ལ་སྟེར་བར་འགྱུར་ཏེ། ཐོར་ཚུགས་སངས་རྒྱས་ཉིད་སྟེར་རོ། །ཞེས་བྱ་བའི་དོན་ཏོ། །པདྨའི་སེམས་དཔའི་ཏིང་ངེ་འཛིན་ཞེས་བྱ་བ་ནི་པདྨའི་ཏིང་ངེ་འཛིན་གྱི་ཕྱག་རྒྱ་ཆེན་པོ་སྟེ། པདྨའི་ཏིང་ངེ་འཛིན་གྱི་དངོས་
[50b]
[50b.1]གྲུབ་སྟེར་བའོ། །པདྨའི་ཁྲོ་བོ་དབང་ཕྱུག་དཔལ། །ཞེས་བྱ་བ་ནི་པདྨའི་དོན་ཡོད་པའི་ཕྱག་རྒྱ་ཆེན་པོ་སྟེ། པདྨ་ཁྲོ་བོའི་དབང་ཕྱུག་དེ་ཉིད་ཀྱི་ཕུན་སུམ་ཚོགས་པ་ནི་དཔལ་དེ་འདོད་པར་བྱའོ། །ཇི་ལྟར་དཔལ་དེ་འདོད་པར་བྱ་བ་ཡིན་ཞེ་ན། རྡོ་རྗེ་འཇིག་རྟེན་དབང་ཕྱུག་གིས། །པདྨོ་འདོད་
[50b.2]པའི་དངོས་གྲུབ་མཆོག །ཅེས་བྱ་བ་སྨོས་ཏེ། རྡོ་རྗེ་འཇིག་རྟེན་དབང་ཕྱུག་ནི་རྡོ་རྗེ་ཆོས་སོ། །དོན་ཡོད་གྲུབ་པའི་གནས་ནས་ལྷ་ཆེན་པོའི་གཟུགས་འཛིན་པ་དེའི་ཕྱག་རྒྱ་ཆེན་པོ་གང་ཡིན་པ་དེ་ནི་རྡོ་རྗེ་འཇིག་རྟེན་དབང་ཕྱུག་སྟེ། རྡོ་རྗེ་འཇིག་རྟེན་དབང་ཕྱུག་གི་མཆོག་གི་དངོས་གྲུབ་དམ་པ་ནི།
[50b.3]པདྨོ་འདོད་པ་བྱ་བ་སྤྱན་རས་གཟིགས་དབང་ཕྱུག་སྒྲུབ་པ་པོ་ལ་སྟེར་བས་ན། པདྨ་ཁྲོ་བོའི་དབང་ཕྱུག་དཔལ་སྟེར་བ་ཡིན་ནོ། །སངས་རྒྱས་དབང་གི་སངས་རྒྱས་ཉིད། །ཅེས་བྱ་བ་ནི། པདྨའི་སངས་རྒྱས་ཀྱི་ཕྱག་རྒྱ་ཆེན་པོ་ནི་པདྨའི་དབང་ཕྱུག་སྟེ། དེའི་དངོས་གྲུབ་ཏུ་གྱུར་པའི་སངས་རྒྱས་ཉིད་
[50b.4]སྟེར་བའོ། །རྡོ་རྗེ་པདྨོ་གྲུབ་མཆོག་སྦྱིན། །ཞེས་བྱ་བ་ནི་པདྨོ་རྒྱལ་པོའི་ཕྱག་རྒྱ་ཆེན་པོ་ནི་རྡོ་རྗེ་པདྨོ་སྟེ། དེའི་དངོས་གྲུབ་ཏུ་གྱུར་པ་མཆོག་ཏུ་དགེ་བའི་པདྨོའི་རྒྱལ་པོའི་དངོས་གྲུབ་སྟེར་བའོ། །འདོད་པའི་དབང་པོས་རབ་འདོད་ལྡན་ནི་པདྨ་ཆགས་པའི་ཕྱག་རྒྱ་ཆེན་པོ་སྟེ། པདྨ་ཆགས་པ་
[50b.5]ཉིད་སྟེར་བའོ། །པདྨ་ལེགས་པའི་ཕྱག་རྒྱ་ཆེན་པོ་ནི་ཡང་དག་པའོ། །ལེགས་སྦྱིན་པ་ནི་པདྨ་ལེགས་པའི་ངོ་བོ་དེ་སྟེར་བའོ། །ཁྲོ་གཉེར་གྱིས་ནི་ཁྲོ་ཞིང་མྱུར། །ཞེས་བྱ་བ་ནི་པདྨའི་ཁྲོ་གཉེར་རིག་པའི་རྒྱལ་པོའི་ཕྱག་རྒྱ་ཆེན་པོ་ནི་ཁྲོ་གཉེར་རོ། །ཁྲོ་བ་དང་བཅས་པས་སེམས་ཅན་དང་
[50b.6]སེམས་ཅན་མ་ཡིན་པ་གསོད་པ་དེ་ཞི་བར་བྱེད་པའོ། །པདྨོའི་ཉི་མ་ནི་པདྨའི་གཟི་བརྗིད་ཀྱི་ཕྱག་རྒྱ་ཆེན་པོ་སྟེ། དེ་ཆོས་ཀྱི་དབྱིངས་ཐམས་ཅད་དུ་ཁྱབ་པའི་གཟི་བརྗིད་སྩོལ་བའོ། །པདྨའི་གཟི་བརྗིད་ཉིད་སྟེར་རོ་ཞེས་བྱ་བའི་དོན་ཏོ། །པདྨོའི་ཟླ་བ་ནི་པདྨོ་དཔལ་གྱི་ཕྱག་རྒྱ་ཆེན་པོས་ཁྱབ་པ་དེ་ནི་
[50b.7]མདངས་ཆེན་པོའོ། །བཞད་པས་རབ་ཏུ་བཞད་པ་ཐོབ། །ཅེས་བྱ་བ་ནི་བཞད་པའི་ཕྱག་རྒྱ་ཆེན་པོས་བཞད་པས་རབ་ཏུ་དགའ་ཞིང་བཟང་བའི་བཞད་པ་སྟེ། པདྨ་བཞད་པའི་ངོ་བོ་དེ་སྟེར་བའོ། །སྒྲོལ་བས་ནི་ཆོས་ཀྱི་པདྨའི་ཕྱག་རྒྱ་ཆེན་པོ་དེས་དངོས་གྲུབ་མཆོག་རྡོ་རྗེ་ཆོས་ཀྱི་ཏིང་ངེ་འཛིན་
[51a]
[51a.1]ཐོབ་པར་འགྱུར་རོ། །པདྨོའི་རལ་གྲི་ནི་པདྨ་རྣོན་པོའི་ཕྱག་རྒྱ་ཆེན་པོ་དེས་པདྨ་རྣོན་པོ་ལྟ་བུའི་དངོས་གྲུབ་དམ་པ་སྐལ་བ་བཟང་པོའི་ཤིན་ཏུ་སྲིད་པ་འགྲུབ་པར་འགྱུར་རོ། །སྐལ་བཟང་སངས་རྒྱས་བཅོམ་ལྡན་འདས། །སྲིད་པ་ཤིན་ཏུ་གྲུབ་པ་ཡིན། །ཞེས་གསུངས་སོ། །
[51a.2]མགྲིན་སྔོན་པདྨའི་རྒྱུའི་ཕྱག་རྒྱ་ཆེན་པོ་དེའི་འགུགས་པ་ཆེན་པོས་པདྨའི་རིགས་ཀྱི་དཀྱིལ་འཁོར་ཐམས་ཅད་འགུགས་ཞེས་བྱ་བའི་དོན་ཏོ། །གོས་དཀར་ནི་པདྨ་གསུང་གི་ཕྱག་རྒྱ་ཆེན་པོའོ། །དེའི་དངོས་གྲུབ་ནི་པདྨ་གསུང་གི་དངོས་གྲུབ་སྟེར་བའོ། །པདྨ་གར་གྱི་དབང་ཕྱུག་ནི་པདྨ་
[51a.3]གར་གྱི་དབང་ཕྱུག་གི་ཕྱག་རྒྱ་ཆེན་པོའོ། །དེ་འགྲུབ་པ་ནི་པདྨ་གར་གྱི་དབང་ཕྱུག་གི་དངོས་གྲུབ་སྟེར་བའོ། །མི་འཇིགས་པ་ནི་པདྨ་སྲུང་བའི་ཕྱག་རྒྱ་ཆེན་པོའོ། །དེ་གྲུབ་པར་གྱུར་པས་རྟག་ཏུ་འཇིགས་པ་མེད་པ་པདྨའི་བསྲུང་བ་ཞེས་བྱ་བའི་དོན་ཏོ། །རབ་གཏུམ་གྱིས་ནི་མ་རུངས་འདུལ། །
[51a.4]ཞེས་བྱ་བ་ནི་པདྨའི་གནོད་སྦྱིན་གྱི་ཕྱག་རྒྱ་ཆེན་པོས་བདུད་ཐམས་ཅད་འཇོམས་པའོ། །པདྨའི་ཁུ་ཚུར་ནི་པདྨའི་ཁུ་ཚུར་གྱི་ཕྱག་རྒྱ་ཆེན་པོ་རབ་ཏུ་ལེགས་པར་སྒྲུབ་པར་བྱེད་པ་ནི་རབ་སྒྲུབ་བྱེད་དེ། རང་བཞིན་གྱིས་འོད་གསལ་བའི་རྣམ་པར་ཐར་པ་སྒྲུབ་པར་བྱེད་ཅེས་བྱ་བའི་དོན་ཏོ། །ལྷག་མ་ནི་གོ་སླའོ། །
[51a.5]དེ་ལྟར་ཕྱག་རྒྱ་ཆེན་པོའི་ཡེ་ཤེས་འབྲས་བུ་དང་བཅས་པ་བསྟན་ནས། ད་ནི་དམ་ཚིག་གི་ཕྱག་རྒྱའི་ཡེ་ཤེས་ནི་དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ནས་ཞེས་བྱ་བ་ནི་ཉུཟིཕྱག་རྒྱ་ཆེན་པོའི་ཡེ་ཤེས་བསླབས་པ་དེའི་རྗེས་ཐོགས་ལ་ཞེས་བྱ་བའི་དོན་ཏོ། །པདྨའི་རིགས་ནི་འགྲོ་བ་འདུལ་བའི་
[51a.6]དཀྱིལ་འཁོར་ཆེན་པོའི་དམ་ཚིག་འཛིན་པའི་ཕྱག་རྒྱ་ནི་དམ་ཚིག་གི་ཕྱག་རྒྱའོ། །དེའི་ཡེ་ཤེས་ནི་བསླབ་པའོ། །རྡོ་རྗེ་བསྡམས་པ་བཅིངས་ནས་ནི། །ཞེས་བྱ་བ་ལ་སོགས་པ་ནི་རྡོ་རྗེ་དབྱིངས་སུ་བཤད་པའི་རྡོ་རྗེ་བསྡམས་པ་བཅིངས་ལ། མཐེ་བོ་དང་མཐེ་ཆུང་གཉིས་མཉམ་པར་བསྒྲེང་བ་
[51a.7]དང་། ཡི་གེ་ཧྲཱིཿའི་སྔགས་བརྗོད་པ་དང་བཅས་པ་ནི་རྣམ་པར་སྣང་མཛད་ཀྱི་ཕྱག་རྒྱར་བཤད་དོ། །ཕྱག་རྒྱ་འདི་ནི་ཆོས་དམ་ཚིག་ཅེས་བྱ་བ་ནི་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་ཆོས་སོ། །དེའི་དམ་ཚིག་ནི་རྒྱུར་གྱུར་པ་སྟེ། གང་གི་ཕྱིར། ཆོས་ནི་རབ་ཏུ་ཐོབ་པར་བྱེད། ཅེས་བྱ་བ་
[51b]
[51b.1]སྨོས་ཏེ། རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་སངས་རྒྱས་རྣམས་ཀྱི་ཆོས་ཡིན་ལ། དེ་ཕུལ་དུ་བྱུང་བ་སྟེར་བ་ནི་སངས་རྒྱས་ཆོས་ནི་རབ་ཐོབ་བྱེད་དོ། །འདི་སྐད་སྟོན་པ་ཡིན་ཏེ། གང་གི་ཚེ་ཕྱག་རྒྱ་འདི་བཅིངས་ནས་ཡི་གེ་ཧྲཱིཿབརྗོད་ཅིང་རྣམ་པར་སྣང་མཛད་དུ་བདག་ཉིད་བསྒོམས་
[51b.2]ལ། དེའི་ཚེ་དེའི་རྣལ་འབྱོར་པ་ཕྱག་རྒྱ་འདིས་སངས་རྒྱས་ཀྱི་ཆོས་ཐོབ་པར་འགྱུར་རོ། །རྡོ་རྗེ་བསྡམས་པ་དམ་བཅིངས་ནས། །ཞེས་བྱ་བ་ལ་སོགས་པ་མཛུབ་མོ་དང་གུང་མོ་དང་སྲིན་ལག་བསྙམས་པ་འདི་རྣམ་པར་སྣང་མཛད་ཀྱི་ཕྱག་རྒྱ་གཉིས་པ་སྟེ། སངས་རྒྱས་པདྨ་ཉིད་འགྲུབ་པར་བྱེད་པའོ། །
[51b.3]ཇི་སྐད་སྟོན་པ་ཡིན་ཏེ། ཕྱག་རྒྱ་འདི་བཅིངས་ནས། ཨོཾ་བཛྲ་པདྨ་ཨ་ཏ་མ་ཧྲཱིཿཞེས་བྱ་བས་རྣམ་པར་སྣང་མཛད་དུ་བསྒོམས་ནས། གང་གི་ཚེ་རྣམ་པར་སྣང་མཛད་དུ་བསྒོམས་ཤིང་བཟླས་པ་བྱེད་པ་དེའི་ཚེ་རྣམ་པར་སྣང་མཛད་འགྲུབ་པར་འགྱུར་རོ། །རྡོ་རྗེ་བསྡམས་པ་བཅིངས་ནས་ནི། །ཞེས་
[51b.4]བྱ་བ་ནི་རྡོ་རྗེ་བསྡམས་པ་བཅིངས་ལ་གུང་མོ་གཉིས་སེམས་མ་རྡོ་རྗེ་མ་ལྟར་བསྙམས་པ་འདི་རྡོ་རྗེ་སེམས་མ་དང་། རྡོ་རྗེ་སེམས་དཔའི་གནས་ཀྱི་རྡོ་རྗེ་པདྨའི་དམ་ཚིག་གི་ཕྱག་རྒྱ་བཅིངས་ལ། ཨོཾ་བཛྲ་ཧཱུཾ་ཕཊ། ཅེས་བྱ་བ་གང་གི་ཚེ་ཕྱག་ན་རྡོ་རྗེར་བསྒོམས་པ་དེའི་ཚེ། རྡོ་རྗེ་སེམས་དཔའ་རྡོ་རྗེ་འཛིན་
[51b.5]པའི་དངོས་གྲུབ་ཐོབ་པར་འགྱུར་རོ། །དེའི་ཕྱིར། །འདི་ནི་རིག་པ་དམ་པ་ཡི། །ཕྱག་རྒྱ་ཡིན་ཏེ་རྡོ་རྗེ་འགྲུབ། །ཅེས་གསུངས་སོ། །དེ་ལས་གུང་མོ་རིན་ཆེན་འདྲ། །ཞེས་བྱ་བ་ནི་བཤད་མ་ཐག་པའི་རྡོ་རྗེ་སེམས་མའི་རིག་པ་དམ་པའི་ཕྱག་རྒྱའི་གུང་མོ་གཉིས་ཀྱི་ཚུལ་ལས་རིན་པོ་ཆེའི་དབྱིབས་སུ་བྱས་
[51b.6]པ་ནི། རྡོ་རྗེ་རིན་ཆེན་མའི་གནས་དང་། རྡོ་རྗེ་སྙིང་པོའི་སངས་རྒྱས་ལ་དབང་བསྐུར་བའི་དམ་ཚིག་གི་ཕྱག་རྒྱར་འགྱུར་རོ། །འདི་སྐད་སྟོན་པ་ཡིན་ཏེ། རྡོ་རྗེ་སྙིང་པོའི་རྣལ་འབྱོར་བྱས་ལ། ཨོཾ་བཛྲ་རཏྣ་ཨུཏྟ་མ་ཏྲ་ཞེས་བརྗོད་ཅིང་། གང་གི་ཚེ་རྡོ་རྗེ་སྙིང་པོ་བདག་ཉིད་བསྒོམས་པ་དེའི་ཚེ། རྡོ་རྗེ་སྙིང་པོར་
[51b.7]འགྱུར་རོ། །དེ་བས་ན། རྡོ་རྗེ་རིན་ཆེན་རབ་གྲུབ་བྱེད། །ཅེས་གསུངས་སོ། །གུང་མོ་པདྨའི་ཚུལ་དུ་བྱས། །པདྨའི་དངོས་གྲུབ་རབ་ཐོབ་བྱེད། །ཅེས་བྱ་བ་ནི། རྡོ་རྗེ་སེམས་མའི་རྡོ་རྗེ་རིག་པ་དམ་པའི་ཕྱག་རྒྱའི་གཟུགས་ལས་གུང་མོ་གཉིས་པདྨའི་འདབ་མ་ལྟར་བྱས་པ་ནི་རྡོ་རྗེ་ཆོས་མ་དང་།
[52a]
[52a.1]པདྨའི་པདྨ་རྡོ་རྗེ་སྤྱན་གྱི་དམ་ཚིག་གི་ཕྱག་རྒྱ་སྟེ། རྡོ་རྗེ་དབྱིངས་ལས་བཤད་པའི་ཚུལ་གྱིས་རྡོ་རྗེ་སྤྱན་གྱི་རྣལ་འབྱོར་བྱས་ལ་འདི་བཅིང་སྟེ། ཨོཾ་བཛྲ་བི་ཏོཏྟ་མ་ཧྲཱིཿཞེས་བྱ་བ་བཟླས་ཤིང་། གང་གི་ཚེ་རྡོ་རྗེ་སྤྱན་བསྒོམས་ནས་འགྲུབ་པར་འགྱུར་བ་དེའི་ཚེ་པདྨའི་དངོས་གྲུབ་འདི་རབ་
[52a.2]ཏུ་ཐོབ་པར་བྱེད་དོ། །རྡོ་རྗེ་སྤྱན་སྟེར་བར་འགྱུར་རོ་ཞེས་བྱ་བའི་དོན་ཏོ། །རྡོ་རྗེ་ཐལ་མོ་བསྡམས་བྱས་ནས། །རྡོ་རྗེ་ལས་ནི་བྱེད་པར་འགྱུར། །ཞེས་བྱ་བ་ནི། རྡོ་རྗེ་ཐལ་མོ་བཅིངས་པ་ནི། རྡོ་རྗེ་ལས་མའི་གནས་སུ་སྣ་ཚོགས་པདྨའི་དམ་ཚིག་གི་ཕྱག་རྒྱ་དང་། རྡོ་རྗེ་སྣ་ཚོགས་ཀྱི་དམ་ཚིག་
[52a.3]གི་ཕྱག་རྒྱ་སྟེ། རྡོ་རྗེ་དབྱིངས་ལས་གསུངས་པའི་རྡོ་རྗེ་སྣ་ཚོགས་པའི་རྣལ་འབྱོར་བྱས་ལ། འདི་བཅིངས་ཏེ། ཨོཾ་བཛྲ་བི་ཤ་ཨུཏྟ་མ་ཨ་ཞེས་བྱ་བ་བཟླས་ལ། གང་གི་ཚེ་རྡོ་རྗེ་སྣ་ཚོགས་སུ་བདག་ཉིད་བསྒོམས་ན། དེའི་ཚེ་གྲུབ་པར་འགྱུར་བ་གང་ཡིན་པ་དེས་རྡོ་རྗེ་ལས་ནི་བྱེད་པར་འགྱུར་ཏེ། བྱང་ཆུབ་
[52a.4]སེམས་དཔའ་ཆེན་པོ་རྡོ་རྗེ་ལས་འགྲུབ་པར་འགྱུར་རོ་ཞེས་བྱ་བའི་དོན་ཏོ། །ཆོས་ཀྱི་རྡོ་རྗེ་བཅིངས་ནས་ནི། །སྐད་ཅིག་གིས་ནི་དམ་ཚིག་འགྲུབ། །ཅེས་བྱ་བ་ནི། རྡོ་རྗེ་བསྡམས་པ་དམ་བྱས་ལ། །གུང་མོ་བསྙམས་ལ་རྡོ་རྗེར་བྱ། །ཆོས་ཀྱི་རྡོ་རྗེ་ཞེས་གྲགས་པ། །དཀྱིལ་འཁོར་ཆེན་པོ་སྒྲུབ་བྱེད་པ། །
[52a.5]འདི་དམ་དུ་བཅིངས་པས་དམ་ཚིག་གི་དཀྱིལ་འཁོར་དུ་ཞུགས་ན་སྐད་ཅིག་མ་དེ་ཉིད་ཀྱི་ཚེ་འགྲུབ་ཅིང་རྫོགས་པར་འགྱུར་རོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། གང་གི་ཚེ་སློབ་དཔོན་གྱིས། ཨོཾ་བཛྲ་པདྨ་ས་མ་ཡ་སྟྭཾ་ཞེས་བརྗོད་ཅིང་། ཇི་སྐད་བཤད་པའི་མཚན་ཉིད་ཅན་གྱི་རྡོ་རྗེ་ཆོས་མ་འདི་
[52a.6]ཇི་ལྟ་བ་བཞིན་དུ་བཅིངས་ལ། ཨོཾ་པདྨ་ས་མ་ཡ་ཧཱུཾ་ཞེས་བརྗོད་ཅིང་དཀྱིལ་འཁོར་ཆེན་པོར་ཞུགས་པར་འགྱུར་བ་དེའི་ཚེ་སྐད་ཅིག་མ་དེ་ཉིད་ལ་དཀྱིལ་འཁོར་ཆེན་པོར་ཞུགས་པས་འགྲུབ་པར་འགྱུར་རོ། །དེ་བཞིན་དུ་སློབ་མས་ཀྱང་ཞུགས་པས་འགྲུབ་པར་འགྱུར་རོ། །ཁ་ཅིག་ནི་དཀྱིལ་འཁོར་སྤྲུལ་
[52a.7]པའི་ཕྱག་རྒྱ་ཡིན་ནོ་ཞེས་ཟེར་ཏེ། འདི་ནི་མ་ཡིན་ཏེ། གང་གི་ཕྱིར་རིགས་ཀྱི་དམ་ཚིག་འདི་དང་རིགས་ཀྱི་དམ་ཚིག་གི་ཕྱག་རྒྱ་འདིས་དཀྱིལ་འཁོར་དུ་འཇུག་པ་ཉིད་ཡིན་གྱི་སྤྲུལ་པ་ནི་མ་ཡིན་ནོ། །དམ་ཚིག་གི་ཕྱག་རྒྱས་དཀྱིལ་འཁོར་སྤྲུལ་པར་བྱེད་པ་མ་ཡིན་གྱི་ཕྱག་རྒྱ་ཆེན་པོ་ཉིད་ཀྱིས་དཀྱིལ་འཁོར་
[52b]
[52b.1]སྤྲུལ་པར་གསུངས་པའི་ཕྱིར་རོ། །རྡོ་རྗེ་བསྡམས་ནས་མཛུབ་བསྙམས་པ། །སངས་རྒྱས་དངོས་གྲུབ་རབ་ཐོབ་བྱེད། །ཅེས་བྱ་བ་ནི། རྡོ་རྗེ་བསྡམས་པ་ལས་མཛུབ་མོ་གཉིས་བསྙམས་ལ་ཁབ་ལྟར་བྱས་པ་འདི་དང་། བུདྡྷ་ཧཱུཾ་ཞེས་བྱ་བའི་སྙིང་པོས་དཀྱིལ་འཁོར་རམ་རང་གི་ལུས་སམ་
[52b.2]རས་ལ་སོགས་པ་ལ་བཅོམ་ལྡན་འདས་རྣམ་པར་སྣང་མཛད་སྤྱན་དྲངས་ནས་བསྒྲུབ་པར་བྱས་ན། དེ་ལྟར་སངས་རྒྱས་ཀྱི་དངོས་གྲུབ་རབ་ཏུ་ཐོབ་པར་བྱེད་དོ། །དེ་ནས་རབ་ཏུ་བཤད་བྱ་བ། །ཞེས་པ་ལ་དེ་ལྟར་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་བཅིང་བ་བསྟན་ནས། འགྲོ་བ་འདུལ་བ་
[52b.3]ནས་བརྩམས་ནས། །པདྨ་འབེབས་པའི་བར་ནི་སེམས་དཔའི་ཕྱག་རྒྱ་སྟེ། སེམས་དཔའ་དེ་དག་གི་དམ་ཚིག་འཛིན་པའི་ཕྱག་རྒྱ་ནི་སེམས་དཔའི་ཕྱག་རྒྱའོ། །ཁྱད་པར་ནི་གང་དང་གང་གིས་ཕྱག་རྒྱ་འཆད་པར་འགྱུར་བའི་ཕྱག་རྒྱ་གསལ་བར་སྟོན་པའོ། །རྡོ་རྗེ་ཐལ་མོ་བསྡམས་
[52b.4]ནས་ཀྱང་། །གུང་མོ་མཉམ་བསྙམས་དེ་བཞིན་དུ། །ཞེས་བྱ་བ་ནི། གུང་མོ་གཉིས་པོ་དེ་བསྙམས་པར་བྱས་པ་ནི་གུང་མོ་བསྙམས་པ་སྟེ། གུང་མོ་གཉིས་བསྙམས་ནས་བསྒྲེང་བ་གང་ཡིན་པ་དེ་ནི་གུང་མོ་བསྙམས་ནས་ཕྱེ་བའོ། །དེ་བཞིན་དུ། མཐེ་ཆུང་མཐེ་བོ་ཕྱེ་བ་ནི། །ཞེས་བྱ་བ་ནི་
[52b.5]མཐེའུ་ཆུང་དང་མཐེ་བོ་གཉིས་ཕྱེ་ལ་ཕྱི་རོལ་དུ་བརྐྱང་ནས། པདྨ་འདབ་མ་བཞི་བ་ལྟར་བྱས་པ་གང་ཡིན་པ་དེ་ནི། མཐེ་ཆུང་མཐེ་བོ་ཕྱེ་བ་ནི་སྣ་ཚོགས་པདྨར་བཤད་པ་ཡིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་ཐལ་མོ་ལས་གུང་མོ་གཉིས་བསྙམས་ལ། མཐེ་ཆུང་དང་མཐེ་བོ་སོ་སོར་བརྐྱང་
[52b.6]བ་ནི། འགྲོ་བ་འདུལ་བའི་དམ་ཚིག་ཕྱག་རྒྱའོ། །དེ་ལས་མཐེ་བོ་གཉིས་བསྣོལ་ཏེ། །དབུས་ཀྱི་རྡོ་རྗེ་སྤྱི་གཙུག་ཕུད། །མཛུབ་གཉིས་རྩེ་སྤྲད་བཀུག་པའི་གཟུགས། །ཞེས་བྱ་བ་ནི་རྡོ་རྗེ་ཐལ་མོའི་ཕྱག་རྒྱ་ཉིད་ལས་མཐེ་བོ་གཉིས་བསྣོལ་ཏེ་མཛུབ་མོ་གཉིས་བཀུག་ལ། གུང་མོ་
[52b.7]གཉིས་བསྙམས་ཏེ་བསྒྲེང་བའི་རྒྱབ་ཏུ་བཙུགས་ཏེ། གཙུག་ཕུད་སངས་རྒྱས་ཡིན་པར་བཤད་པ་ནི། གཙུག་ཕུད་སངས་རྒྱས་ཀྱི་དམ་ཚིག་གི་ཕྱག་རྒྱའོ། །རྡོ་རྗེ་བསྡམས་པ་དམ་བཅིངས་ལ། ཞེས་བྱ་བ་ལ་སོགས་པ་ནི་རྡོ་རྗེ་བསྡམས་པ་དམ་པོར་བརྟན་པར་བསྡམས་པའོ། །མཐེ་
[53a]
[53a.1]བོ་གཉིས་བསྙམས་རྩེ་བཏུད་ནས། མཛུབ་མོ་གཉིས་ནི་རྩེ་མོ་སྤྲད་ནས་ཁ་ཐུར་དུ་བསྟན་ནས་བཀན་ཏེ་བཞག་པ་གང་ཡིན་པ་དེ་ནི་ཏིང་ངེ་འཛིན་པདྨའོ། །ཐལ་མོ་པདྨོར་མཉམ་སྦྱར་ལ། །མཛུབ་མོ་རྡོ་རྗེ་བསྙམས་ནས་ནི། །མཛུབ་མོ་གཉིས་བསྙམས་ན་བརྐྱང་བར་
[53a.2]བྱའོ། །མཐེ་བོ་ངོས་ལ་སྦྱར་བ་ནི། །ཞེས་བྱ་བ་ནི་མཐེ་བོ་གཉིས་ཀྱི་ཁ་ཕྱེ་བ་དེ་ནི་ངེས་པའི་དབང་ཕྱུག་གི་ཕྱག་རྒྱའོ། །རྡོ་རྗེ་ཐལ་མོ་མཉམ་པར་སྦྱར་ལ་མཛུབ་མོ་གཉིས་བསྙམས་ཏེ། བསྡམས་ནས་མཐེ་བོ་གཉིས་ཁ་ཕྱེ་བ་ནི་པདྨ་དོན་ཡོད་པའི་དབང་ཕྱུག་གི་ཕྱག་རྒྱར་འགྱུར་རོ། །རྡོ་རྗེ་
[53a.3]བསྡམས་པ་བསྡམས་ནས་ནི། །ཞེས་བྱ་བ་ལ་སོགས་པ་ནི་རྡོ་རྗེ་བསྡམས་པ་བརྟན་པོར་བཅིངས་ལ། ལེགས་པར་བཀན་ཏེ་མཐེ་བོ་གཉིས་པདྨའི་འདབ་མ་ལྟར་བྱས་པ་ནི་སངས་རྒྱས་པདྨོའོ། །མཐེ་བོ་གཉིས་ནི་རྡོ་རྗེར་བསྙམས། །ཞེས་བྱ་བ་ལ་སོགས་པ་ནི་ལག་པ་གཉིས་ཐལ་མོ་སྦྱར་ལ་
[53a.4]གཡས་པའི་མཛུབ་མོ་རལ་གྲི་ལྟར་བྱས་ལ། གཡོན་པའི་མཛུབ་མོ་ལྕགས་ཀྱུ་ལྟར་བྱས་ནས། མཐེ་ཆུང་གཉིས་སོ་སོར་ཕྱེ་ལ་གུང་མོ་དང་སྲིན་ལག་གཉིས་པདྨའི་འདབ་མ་ལྟར་བྱས་པ་ནི་པདྨའི་རྒྱལ་པོའིའོ། །ཐལ་མོ་མཉམ་པར་རབ་སྦྱར་ལ། །ཞེས་བྱ་བ་ལ་སོགས་པ་ནི་ཐལ་མོ་མཉམ་
[53a.5]པར་རབ་ཏུ་སྦྱར་ལ་གཡོན་པའི་མཐེ་བོ་གཡས་པའི་མཐེ་བོས་བཟུང་ནས། དེ་ནས་གཡས་པའི་མཛུབ་མོ་ལྕགས་ཀྱུར་བྱས་པས། གཡོན་པའི་མཛུབ་མོ་བཟུང་ནས། གཡོན་ལོགས་ནས་འདྲེན་པ་ལྟར་བྱེད་པ་ནི་པདྨ་ཆགས་པའིའོ། །ཐལ་མོ་སྦྱར་ནས་མཉམ་པར་བཀན། །ལེགས་པའི་
[53a.6]ཕྱག་རྒྱ་བཅིངས་ནས་ནི། །ཞེས་བྱ་བ་ནི་ཐལ་མོ་སྦྱར་ནས་མཉམ་པར་བཀན་ལ། མཛུབ་མོ་དང་མཐེ་བོ་གཉིས་ཀྱིས་ལེགས་སོ་སྦྱིན་པའི་ཚུལ་དུ་བྱེད་པ་ནི་པདྨོ་ལགས་པའིའོ། །ཐལ་མོ་མཉམ་པར་རབ་སྦྱར་ལ། །ཞེས་བྱ་བ་ལ་སོགས་པ་ནི་ཐལ་མོ་མཉམ་པར་དམ་དུ་སྦྱར་ལ་མཛུབ་མོ་
[53a.7]གཉིས་ཀྱི་ཚིགས་གསུམ་པ་བཀུག་ནས། མིག་ལྟ་བུར་བྱས་ལ་མཐེའུ་ཆུང་གཉིས་ཕྱེ་ལ་མཛོད་སྤུའི་ཕྱོགས་སུ་གཞག་པ་ནི། པདྨའི་ཁྲོ་གཉེར་རིག་པའི་རྒྱལ་པོའི་ཕྱག་རྒྱའོ། །རྡོ་རྗེ་བསྡམས་པ་དམ་བྱས་ལ། །སོར་མོ་ཐམས་ཅད་དཀྱིལ་འཁོར་དུ། །སྙིང་གར་རབ་ཏུ་བརྐྱང་བ་ནི། །
[53b]
[53b.1]པདྨ་ཉི་མ་ཡིན་པར་བཤད། །རྡོ་རྗེ་བསྡམས་པ་དམ་པོར་བྱས་ལ། སོར་མོ་ཐམས་ཅད་དཀྱིལ་འཁོར་གྱི་ཚུལ་དུ་སྙིང་གར་རབ་ཏུ་བརྐྱང་ནས་རབ་ཏུ་བསྐོར་བ་ནི་པདྨ་ཉི་མའོ། །ཐལ་མོ་རབ་ཏུ་དམ་སྦྱར་ལ། །ཞེས་བྱ་བ་ལ་སོགས་པ་ནི་མཉམ་པའི་ཐལ་མོའི་མཛུབ་མོ་གཉིས་རིན་པོ་ཆེ་འདྲ་
[53b.2]བར་བྱས་ནས། དཔུང་པ་སྤྱི་བོར་རབ་ཏུ་བརྐྱང་སྟེ། བཞག་པའི་ཕྱག་རྒྱ་འདི་ནི་པདྨའི་ཟླ་བའིའོ། །རྡོ་རྗེ་བསྡམས་པ་སྤྱི་བོར་གཞག །ཁ་དང་བཅས་པས་རབ་བརྐྱང་ནས། །ཉིད་ཀྱི་ཁ་ནས་དགོད་པ་དང་། །ཁ་ནི་མཆུ་གཅིག་ཉིད་དུ་འགྱུར། །ཞེས་བྱ་བ་ནི་རྡོ་རྗེ་བསྡམས་པ་
[53b.3]བཅིངས་ལ་སྤྱི་བོར་བཞག་སྟེ། སོར་མོའི་རྩེ་མོ་ཐམས་ཅད་བརྐྱང་ནས་དགོད་པའི་ཚུལ་དུ་བྱེད་པ་ནི་པདྨ་བཞད་པའིའོ། །ཏིང་འཛིན་པདྨོ་བཅིངས་ནས་ནི། །ཞེས་བྱ་བ་ནི་སྔ་མ་བཞིན་དུ་ཏིང་ངེ་འཛིན་པདྨའི་ཕྱག་རྒྱ་བཅིངས་ལ། མཐེ་བོ་གཉིས་བསྙམས་ཏེ་ཁ་གྱེན་དུ་བསྟན་
[53b.4]ནས་བཞག་པ་ནི་པདྨ་སྒྲོལ་མའིའོ། །པདྨ་སྒྲོལ་མའི་ཕྱག་རྒྱ་ནི། །མཛུབ་གཉིས་པདྨའི་ཚུལ་དུ་བཅིངས། །རལ་གྲིའི་ཚུལ་དུ་བྱས་པ་འདི། །པདྨོ་རལ་གྲིའི་ཕྱག་རྒྱ་ཡིན། །ཞེས་བྱ་བ་ནི་བཤད་མ་ཐག་པའི་པདྨའི་སྒྲོལ་མའི་དམ་ཚིག་གི་ཕྱག་རྒྱ་དེ་ཉིད་བཅིངས་ཏེ། མཛུབ་མོ་གཉིས་
[53b.5]ཀྱི་ཚིགས་གསུམ་པ་བཀུག་ལ་པདྨ་རལ་གྲིའི་ཚུལ་དུ་བྱས་པ་དེས་དེ་བཞིན་གཤེགས་པ་ཐམས་ཅད་གཅོད་པའི་ཚུལ་དུ་བྱེད་པ་འདི་ནི་པདྨ་རྣོན་པོའིའོ། །མཐེའུ་ཆུང་པདྨ་ཆེན་པོ་བྱ། །ཞེས་བྱ་བ་ལ་སོགས་པ་ནི་ཐལ་མོ་སྦྱར་བའི་མཐེའུ་ཆུང་གཉིས་པདྨར་བྱ་བ་དང་། མཐེ་བོ་གཉིས་
[53b.6]དབྱིག་པ་ལྟར་བསྒྲེང་ལ། མཛུབ་མོ་གཡས་པ་དང་གཡོན་པ་བསྐུམ་སྟེ། གུང་མོ་དང་སྲིན་ལག་གཉིས་ཅུང་ཟད་བརྐྱང་ལ། རྡོ་རྗེ་བསྡམས་པ་བཅིངས་པ་ནི་པདྨ་ཁྱབ་འཇུག་གིའོ། །རྡོ་རྗེ་བསྡམས་པ་ཐལ་མོ་དམ་བྱས་ལ། ཞེས་བྱ་བ་ལ་སོགས་པ་ལ་རྡོ་རྗེ་ཐལ་མོ་དམ་དུ་བཅིངས་ནས་
[53b.7]མཐེ་བོ་གཡས་པས་རྡོ་རྗེ་བསྡམས་པའི་ཚུལ་དུ་ཅི་ནུས་པར་བཅིང་བར་བྱའོ། །གཡས་པའི་ཨོཾ་གྱི་ནང་དུ་གཞུག །གཡོན་པའི་མཛུབ་མཐེབ་བཟླས་པ་བྱ། །ཞེས་བྱ་བ་ནི་གཡོན་པའི་མཐེ་བོ་དང་མཛུབ་མོ་གཉིས་བཟླས་པའི་ཕྲེང་བ་འདྲེན་པའི་ཚུལ་དུ་བྱའོ། །སོར་ཀུན་ཆུ་སྐྱེས་ཁ་བྱེ་
[54a]
[54a.1]འདྲ། །ཞེས་བྱ་བ་ནི་ལྷག་མའི་སོར་མོ་རྣམས་ཅུང་ཟད་ཁ་བྱེ་བའི་ཚུལ་དུ་བྱེད་པ་པདྨ་གསུང་བའིའོ། །རྡོ་རྗེ་ཐལ་མོ་མཉམ་སྦྱར་ལ། །ཞེས་བྱ་བ་ནི། གཡོན་དང་གཡས་ནས་དེ་བཞིན་དུ་འགྱིང་བ་དང་བཅས་པས་གཡས་དང་གཡོན་གྱི་ལོགས་སུ་གར་
[54a.2]བྱེད་པས་བསྐོར་ནས་ཕྱིས་སྤྱི་བོར་འཇོག་པ་ནི་པདྨ་གར་གྱི་དབང་ཕྱུག་གོ། །རྡོ་རྗེ་ཐལ་མོ་དམ་བྱས་ལ། །ཞེས་བྱ་བ་ནི་སྔ་མ་བཞིན་ནོ། །དེ་བཞིན་རྩེ་ཀུན་ཁ་བྱེ་བ། །ཞེས་བྱ་བ་ནི་སོར་མོ་ཐམས་ཅད་བརྐྱང་ནས་ཡོངས་སུ་བསྐོར་ཏེ་པདྨོར་བྱས་ལ། པདྨོའི་ཚུལ་གྱིས་རྡོ་རྗེ་ཐལ་མོ་བཅིང་
[54a.3]བར་བྱའོ། །རྡོ་རྗེ་ཐལ་མོ་ལས་སོར་མོ་ཐམས་ཅད་ཁ་ཕྱེ་ལ་པདྨ་ལྟར་བྱས་ནས། །ཕྱིས་རྡོ་རྗེ་ཐལ་མོ་བཅིངས་ལ། སྙིང་གའི་ཕྱོགས་སུ་གཞག་པར་བྱའོ་ཞེས་བྱ་བ་འདི་ནི་པདྨའི་བསྲུང་བའོ། །རྡོ་རྗེ་ཐལ་མོ་དམ་བྱས་ལ། །གསང་བའི་གནོད་སྦྱིན་ཚུལ་དུ་ནི། །ཞེས་བྱ་བ་ནི་རྡོ་རྗེ་ཐལ་མོའི་
[54a.4]མཛུབ་མོ་གཉིས་བསྐུམ་ལ་གུང་མོ་གཉིས་མཐེ་བོ་གཉིས་ཀྱིས་མནན་ནས། ཞལ་གྱི་མཆེ་བ་གཙིགས་པ་བཞིན་དུ་ཡང་ཁར་བཞག་ལ་གསང་བའི་གནོད་སྦྱིན་གྱི་ཚུལ་དུ་བྱའོ། །གསང་བའི་གནོད་སྦྱིན་གྱི་སྦྱོར་བ་འདི་དང་ལྡན་པས་ན་གསང་བའི་གནོད་སྦྱིན་གྱི་ཚུལ་དུའོ། །ཐལ་མོ་སྦྱར་ཏེ་
[54a.5]བརྐྱང་ནས་ནི། །ཞེས་བྱ་བ་ནི་རྡོ་རྗེ་ཐལ་མོ་བརྐྱང་ལ་རང་གི་ཁར་གཞག་པ་ནི་པདྨའི་གནོད་སྦྱིན་ཞེས་བྱ་བ་པདྨ་གནོད་སྦྱིན་གྱི་ཕྱག་རྒྱའོ། །རྡོ་རྗེ་ཁུ་ཚུར་བཅིངས་ནས་ཀྱང་། །ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་དམ་དུ་བཅིངས་
[54a.6]ལ། གུང་མོ་གཉིས་ནི་ཕྱིར་བཀུག་སྟེ། །རང་གི་མཐེ་བོ་རྒྱབ་མནན་པ། །ཞེས་བྱ་བ་ནི་དམ་ཚིག་གི་ཁུ་ཚུར་དེའི་ཕྱག་རྒྱའི་གུང་མོ་གཉིས་བསྐུམ་པས་རང་གི་མཐེ་བོ་གཉིས་ཀྱི་རྒྱབ་མནན་པ་འདི་ནི་པདྨའི་ཁུ་ཚུར་གྱི་དམ་ཚིག་གི་ཕྱག་རྒྱའོ། །རྡོ་རྗེ་དབྱིངས་ཀྱི་ཚུལ་དུ་ནི། །རྡོ་རྗེ་ཐལ་མོ་ལས་
[54a.7]བྱུང་བ། །མཆོད་པའི་ལྷ་མོ་ཐམས་ཅད་ཀྱི། །དམ་ཚིག་མཆོག་རྣམས་བཅིངས་པའོ། །ཞེས་བྱ་བ་ནི་རྡོ་རྗེ་ཐལ་མོ་ལས། སྙིང་གར་མཐེ་བོ་བསྙམས་ལ་གཞག །རབ་ཏུ་བརྐྱང་བ་ཕྲེང་བའོ། །ཐལ་མོ་སྦྱར་བ་ཁ་ནས་དབྱུང་། །གར་ལ་ཐལ་སྦྱར་སྤྱི་བོར་གཞག །རྡོ་རྗེ་བཅིངས་པ་ཐུར་
[54b]
[54b.1]དུ་བླུགས། །རང་གི་ཐལ་སྦྱར་གྱེན་དུ་གཏོར། །མཐེ་བོ་བཅིང་བ་རབ་ཏུ་བསྡམས། །རབ་ཏུ་བརྐྱང་བ་བྱུགས་པའོ། །ཞེས་བྱ་བ་འདི་དག་པདྨའི་སྒེག་མོ་ལ་སོགས་པ་ནས་པདྨའི་དྲིའི་མཐར་ཐུག་པ་རྣམ་པ་བརྒྱད་ཀྱི་དམ་ཚིག་གི་ཕྱག་རྒྱའོ། །རྡོ་རྗེ་བསྡམས་པ་དམ་བཅས་ལ། །མཛུབ་མོ་
[54b.2]གཉིས་ནི་མཉམ་སྦྱར་ལ། །བཀུག་ནས་རྩེ་མོ་སྦྱར་བ་ནི། །རྟ་མགྲིན་དེ་ནི་ཡིན་པར་བཤད། །ཅེས་བྱ་བ་ནི་རྡོ་རྗེ་བསྡམས་པ་བཅིངས་ལ་མཛུབ་མོ་གཉིས་རྟའི་གདོང་པ་ལྟ་བུར་བྱས་ལ། དེའི་རྩེ་མོ་མདུན་དུ་ཡང་དང་ཡང་བརྐྱང་བསྐུམ་སྟོན་པ་ནི་རྟ་མགྲིན་གྱི་དམ་ཚིག་གི་ཕྱག་རྒྱའོ། །པདྨའི་ཐལ་
[54b.3]མོ་མཉམ་སྦྱར་ལ། །མཛུབ་གཉིས་མདུད་པ་མདུད་བ་ནི། །ཞེས་བྱ་བ་ནི་མཛུབ་མོ་གཉིས་ཕན་ཚུན་ཅུང་ཟད་བཀུག་ནས་ལྕགས་ཀྱུའི་ཚུལ་དུ་བཟུང་ལ་མདུད་པ་མདུད་པ་ནི་དོན་ཡོད་ཞགས་པའི་ཕྱག་རྒྱའོ། །མཐེབ་མཛུབ་ལྕགས་སྒྲོག་འདྲ་བར་བྱ། །ཞེས་བྱ་བ་ནི་ཐལ་མོ་ཅུང་ཟད་ཁ་འབྱེད་
[54b.4]པའི་མཛུབ་མོ་དང་མཐེ་བོ་གཉིས་ལྕགས་སྒྲོག་འཆིང་བའི་ཚུལ་དུ་བྱེད་པ་འདི་ནི་པདྨ་ལྕགས་སྒྲོག་གི་ཕྱག་རྒྱའོ། །རྡོ་རྗེ་འབེབས་པའི་ཚུལ་གྱིས་ནི། །པདྨོ་ཐལ་མོ་མཉམ་སྦྱར་ལ། །སྲིན་ལག་མཐེ་ཆུང་གཉིས་བར་དུ། །མཐེ་བོ་གཉིས་བཅུག་དམ་དུ་བཙིར། །ཞེས་བྱ་བ་ནི་ཐལ་མོ་
[54b.5]ཅུང་ཟད་ཁ་བྱེ་བའི་ནང་དུ་རང་གི་མཐེའུ་ཆུང་གཉིས་ཀྱི་བར་དུ་མཐེ་བོ་གཉིས་བཅུག་ལ་བཙིར་བ་ནི། པདྨ་འབེབས་པའི་དམ་ཚིག་གི་ཕྱག་རྒྱའོ། །བྱམས་པ་ལ་སོགས་པའི་ཕྱག་རྒྱ་ཆེན་པོ་ནི། ཇི་ལྟར་བྲིས་པའི་རྗེས་སུ་འབྲང་བར་ཤེས་པར་བྱའོ། །དམ་ཚིག་གི་ཕྱག་རྒྱ་ཡང་བཤད་ཟིན་ཏོ། །
[54b.6]དེ་ནས་པདྨོའི་རིགས་ནི་འགྲོ་བ་འདུལ་བའི་དཀྱིལ་འཁོར་ཆེན་པོའོ། །ཆོས་ཞེས་བྱ་བ་ནི་མཚོན་པ་སྟེ། ཡི་གེའི་བདག་ཉིད་ཕྱག་རྒྱའི་ཡེ་ཤེས་སུ་འགྱུར་རོ། །ཡེ་ཤེས་ནི་རྣམ་པར་སྣང་མཛད་ལ་སོགས་པའི་ལྗགས་ལ་རྡོ་རྗེ་དགོང་བར་བྱའོ། །འགྲོ་བ་འདུལ་བ་དང་། སངས་རྒྱས་པདྨ་དང་།
[54b.7]རྡོ་རྗེ་ཆོས་མ་རྣམས་ཀྱི་ལྗགས་ལ་ནི་ཧྲཱིའོ། །པདྨ་རྒྱལ་པོ་ལ་གྲིའོ། །པདྨ་ཆགས་པ་ལ་པྲིའོ། །པདྨ་ལེགས་པ་ལ་ཧཱིའོ། །གཙུག་ཕུད་སངས་རྒྱས་དང་སངས་རྒྱས་པདྨ་དབང་བསྐུར་བའི་པདྨའི་རིན་པོ་ཆེ་མ་དང་། པདྨའི་ཁྲོ་གཉེར་རྣམས་ལ་ཤྲཱིའོ། །པདྨའི་ཉི་མ་ལ་ཤྲིའོ། །པདྨའི་ཟླ་བ་
[55a]
[55a.1]ལ་དྷིའོ། །པདྨའི་བཞད་པ་ལ་ཧིའོ། །པདྨའི་ཏིང་ངེ་འཛིན་དང་། པདྨའི་པདྨོ་མ་དང་། པདྨ་སྒྲོལ་མ་རྣམས་ལ་གིའོ། །པདྨའི་རྣོན་པོ་ལ་དྷིའོ། །པདྨའི་རྒྱུ་ལ་ཀྲིའོ། །པདྨའི་གསུང་བ་ལ་བིའོ། །པདྨའི་ངེས་པའི་དབང་ཕྱུག་དང་སྣ་ཚོགས་པདྨ་དང་། པདྨ་གར་གྱི་དབང་
[55a.2]ཕྱུག་མ་རྣམས་ལ་བིའོ། །པདྨ་བསྲུང་བ་རྀའོ། །པདྨའི་གནོད་སྦྱིན་ལ་ནི་ཥྜིའོ། །པདྨའི་ཁུ་ཚུར་ལ་ཨཱའོ། །མ་ཧཱ་ར་ཏེ། རཱུ་པ་ཤྭ་པེ། ཤྭ་ཏྲ་སོའུ་ཁྱེ། སརྦྦ་པུ་ཛེ། ཕ་ལ་ད་ནི། ཕ་ལ་ག་མི། སུ་དེ་ཛ་གྲི། སུ་གནྡྷཱ་གི། ཨ་ཡ་ཧི་ཛཿ། ཨ་ཧི་ཧཱུཾ་ཧཱུཾ། ཧེ་སྦོ་ཊ་བཾ། གཎྜ་ཨ་ཨ་ཞེས་བྱ་
[55a.3]བ་དང་། མཐར་ཡི་གེ་ཧྲཱི་དང་བཅས་པས་སྒེག་མོ་ལ་སོགས་པའི་ལྗགས་ལ་བསམ་པར་བྱའོ། །བྱམས་པ་ལ་སོགས་པ་རྣམས་ལ་ནི་རང་གི་རིག་པ་ཡིན་ནོ། །པདྨའི་ཁུ་ཚུར་གཉིས་བྱས་ལ། །ལས་ཀྱི་ཕྱག་རྒྱ་བསྒྲུབ་པར་བྱ། །ཞེས་བྱ་བ་ནི་པདྨའི་ཁུ་ཚུར་གྱི་དམ་ཚིག་གི་ཁུ་ཚུར་གཉིས་སུ་
[55a.4]བྱས་ལ་ལས་ཀྱི་ཕྱག་རྒྱ་བཅིང་བར་བྱ་སྟེ། དེའི་རིམ་པ་ནི་འདི་ཡིན་ཏེ། གཡོན་པའི་པདྨ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་ཆེ། །སངས་རྒྱས་བྱང་ཆུབ་སྦྱིན་བྱེད་པ། །བཅོམ་ལྡན་འདས་རྣམ་པར་སྣང་མཛད་ཀྱི་ལས་ཀྱི་ཕྱག་རྒྱའོ། །
[55a.5]གཡས་པ་དང་གཡོན་པའི་ཐལ་མོ་ཁ་ཕྱེ་བའི་ཚུལ་དུ་བྱེད་པ་ནི་འགྲོ་བ་འདུལ་བའིའོ། །བསྒྱིངས་བཅས་གསོར་བ་གཉིས་ཀ་ཡིས། །སངས་རྒྱས་པདྨ་དང་རྡོ་རྗེ་ཆོས་མ་གཉིས་ཀྱིའོ། །ལྕགས་ཀྱུ་འཛིན་ལྟར་གནས་པ་ནི། །པདྨའི་རྒྱལ་པོའིའོ། །མདའ་འཕང་བ་ཡི་ཚུལ་དང་ནི། །
[55a.6]པདྨ་ཆགས་པའིའོ། །ལེགས་སོ་ཞེས་པ་སྙིང་གར་གཞག །པདྨ་ལེགས་པའིའོ། །ཏིང་ངེ་འཛིན་མཆོག་ནི། གཙུག་ཕུད་སངས་རྒྱས་ཀྱིའོ། །དབང་བསྐུར་བ་ནི་རྡོ་རྗེ་གཉིས། །པདྨའི་ཁྲོ་གཉེར་རིན་ཆེན་དང་། པདྨའི་དབང་བསྐུར་མ་དང་གཉིས་ཀྱིའོ། །སྙིང་གར་ཉི་མ་བསྟན་པར་
[55a.7]བྱ། །པདྨ་གཟི་བརྗིད་ཀྱིའོ། །གཡོན་པ་ལ་ནི་གྲུ་མོ་གཟུགས། །པདྨ་ཟླ་བའིའོ། །དེ་བཞིན་ཁ་ཕྱོགས་བསྐོར་བར་བྱ། །པདྨ་བཞད་པའིའོ། །ཡང་གཡས་པ་དང་གཡོན་པའི་ཐལ་མོ་ཕྱེ་བ་ནི་པདྨའི་ཏིང་ངེ་འཛིན་དང་། པདྨ་སྒྲོལ་མ་དང་། པདྨའི་པདྨོ་དང་གསུམ་གྱི་ཡིན་ནོ། །སྙིང་གར་
[55b]
[55b.1]གཡོན་པའི་རལ་གྲི་མདུང་། །པདྨ་རྣོན་པོའིའོ། །མགལ་མེའི་འཁོར་ལོ་བསྐོར་བ་དང་། །པདྨའི་རྒྱུའིའོ། །རྡོ་རྗེ་གཉིས་ཀ་ཁ་ནས་དབྱུང་། །པདྨ་གསུང་བའོ། །རྡོ་རྗེ་གར་བསྐོར་བཀྲོལ་བ་ཡིས། །ཐལ་མོ་འགྲམ་པ་སྤྱི་བོར་གཞག །པདྨ་ངེས་པའི་དབང་ཕྱུག་དང་། པདྨ་གར་གྱི་དབང་
[55b.2]ཕྱུག་དང་། སྣ་ཚོགས་པདྨ་དང་གསུམ་གྱི་ཡིན་ནོ། །གོ་ཆ་པདྨའི་བསྲུང་བའིའོ། །མཐེའུ་ཆུང་མཆེ་བ་དང་། པདྨ་གནོད་སྦྱིན་གྱིའོ། །ཁུ་ཚུར་གྱི་ཉིས་ནི་མནན་པའོ། །པདྨ་ཁུ་ཚུར་གྱིའོ། །རྡོ་རྗེ་བསྒྱིང་པའི་ཚུལ་གྱིས་ནི། །བསམ་པ་གཡོས་པས་འདུད་པར་བྱ། །ཕྲེང་བ་བཅིང་
[55b.3]དང་ཁ་ནས་དབྱུང་། །རྡོ་རྗེ་གར་ནི་བསྐུར་བ་ཡིན། །པདྨ་བཅིང་བ་ཐུར་དུ་བླུགས། །པདྨའི་ཁུ་ཚུར་གྱེན་དུ་འཐོར། །མཐེ་བོ་བསྙམས་ཏེ་རབ་ཏུ་བསྡམས། །རབ་ཏུ་བརྐྱང་ནས་བྱུག་པའོ། །མཛུབ་མོ་ལྕགས་ཀྱུ་བཅིང་བ་ནི། །མཐེའུ་ཆུང་ལས་ཏེ་ལྕགས་ཀྱུ་ཆེ། །མཁྲིག་མ་
[55b.4]མདུད་ལ་མཛུབ་གཉིས་མདུད། །རྒྱབ་གཉིས་ཀྱང་ནི་བསྙམས་ཏེ་གནས། །ཞེས་བྱ་བ་དང་། བྱམས་པ་ལ་སོགས་པ་རྣམས་ཀྱི་ནི་ཡི་གེ་ཀྲི་ལས་རང་གི་སྙིང་གར་སྣ་ཚོགས་པདྨ་བསམས་ནས་ཕྱག་རྒྱ་ཆེན་པོ་འཆིང་བའི་ཚུལ་དུ་བྱེད་པ་ཉིད་ལས་ཀྱི་ཕྱག་རྒྱར་འགྱུར་རོ། །དེ་
[55b.5]བཞིན་གཤེགས་པ་ཐམས་ཅད་ཀྱི་ཆོས་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེའི་དམ་ཚིག་ནི་པདྨའི་རིགས་སོ། །དེའི་རྟོག་པ་ལས་བྱུང་བས་ན་རྟོག་པའོ། །གཞན་ལས་ཆེས་ཤིན་ཏུ་ཁྱད་པར་དུ་གྱུར་པའི་གཟུགས་ཐམས་ཅད་སྟོན་པའི་རང་བཞིན་ཡིན་པའི་ཕྱིར་དང་། གསལ་བས་ན་རྒྱལ་
[55b.6]པོ་སྟེ། དེའི་ཕྱིར་རྟོག་པའི་རྒྱལ་པོའོ། །དེ་ལྟར་རྟོག་པའི་རྒྱལ་པོ་ཆེན་པོ་ལས་འགྲོ་བ་འདུལ་བ་ཞེས་བྱ་བའི་དཀྱིལ་འཁོར་ཆེན་པོའི་ཆོ་ག་རྒྱས་པ་རྫོགས་པ་ནི་རྩ་བའི་རྒྱུད་ཀྱི་མཐར་ཐུག་པའོ། །འགྲོ་བ་འདུལ་བའི་དཀྱིལ་འཁོར་ཆེན་པོའི་བཤད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་
[55b.7]བ་རྫོགས་སོ།། །།དེ་ལྟར་འགྲོ་བ་འདུལ་བའི་དཀྱིལ་འཁོར་ཆེན་པོས་འདུལ་བའི་སེམས་ཅན་གྱི་ཁམས་རྣམས་རྗེས་སུ་གཟུང་བའི་ཕྱིར། འགྲོ་བ་འདུལ་བའི་དཀྱིལ་འཁོར་ཆེན་པོ་བསྟན་ནས། ད་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱིས་འདུལ་བའི་སེམས་
[56a]
[56a.1]ཅན་གྱི་ཁམས་རྣམས་རྗེས་སུ་གཟུང་བའི་ཕྱིར། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་དམ་ཚིག་གི་ཕྱག་རྒྱ་གཙོ་བོར་གྱུར་པ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་
[56a.2]ཐོགས་ཉིད་ལའོ། །འདིར་དང་པོར་སྦྱོར་བའི་ཏིང་ངེ་འཛིན་ནི། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པ་གཟུང་བར་བྱའོ། །ཡང་ཞེས་བྱ་བའི་སྒྲ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལ་ལྟོས་པས་ན་ཡང་ཞེས་བྱའོ། །བཅོམ་ལྡན་འདས་ནི་རྣམ་པར་སྣང་མཛད་
[56a.3]དོ། །དེ་བཞིན་གཤེགས་པ་ཐམས་ཅད་ནི། རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པ་ལ་མཐར་ཐུག་པའི་པདྨའི་རིགས་སོ། །དྲན་པ་དང་ཡང་དག་པར་ལྡན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཆོས་སོ། །དེ་ཉིད་ནི་གཟུངས་ཏེ། དེའི་དམ་ཚིག་ནི་རྣམ་པར་སྣང་མཛད་ལ་སོགས་
[56a.4]པའི་པདྨའི་རིགས་དེའི་གཟུངས་ཀྱི་དཀྱིལ་འཁོར་འདིའོ། །དེ་ལས་བྱུང་བ་ནི་འགྲོ་བ་འདུལ་བའི་ཐུགས་ཀའི་རྡོ་རྗེ་པདྨ་ལས་བྱུང་བའོ། །དེ་སྐད་དུ་བཤད་པ་དེས་བྱིན་གྱིས་བརླབས་པའི་གཟུངས་ཀྱི་དཀྱིལ་འཁོར་སྤྲུལ་པར་ནུས་པ་སྟེ། པདྨ་བཞིན་དུ་སྒྲིབ་པ་རྣམས་ཀྱིས་གོས་པ་མེད་པའི་མིང་
[56a.5]འདི་སྐད་ཅེས་བྱ་བའི་ཏིང་ངེ་འཛིན་གང་ཡིན་པ་ལ་སྙོམས་པར་ཞུགས་ནས་རང་གི་རིགས་སྤྲུལ་པར་མཛད་པའི་རྗེས་ཐོགས་ལ་འཆད་པར་འགྱུར་བའི་རང་གི་རིག་པ་དམ་པ་འདི་གསུངས་པ་ནི་རིག་པ་དམ་པ་བཤད་པའོ། །དེ་ལྟར་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་
[56a.6]དང་། འགྲོ་བ་འདུལ་བ་དང་། གཙུག་ཕུད་སངས་རྒྱས་དང་། ཏིང་ངེ་འཛིན་པདྨ་དང་། ངེས་པའི་དབང་ཕྱུག་རྣམས་ཀྱིས་གཟུངས་ཀྱི་དཀྱིལ་འཁོར་སྤྲུལ་པའི་ཕྱིར། རིག་པ་དམ་པ་གསུངས་པའོ། །དེས་ཀྱང་པདྨ་དབྱིངས་ཀྱི་དབང་ཕྱུག་མའི་ལྷ་མོ་ལ་སོགས་པ་ནས། པདྨ་འབེབས་པའི་
[56a.7]མཐར་ཐུག་པའི་བར་གྱི་གཟུངས་རྣམས་འཇིག་རྟེན་དབང་ཕྱུག་གི་ཐུགས་ཀའི་པདྨ་ལས་བྱུང་བས་སེམས་ཅན་གྱི་ཁམས་ཐམས་ཅད་གཟུངས་ཀྱི་ཡེ་ཤེས་ཀྱི་རྣམ་པར་སྦྱངས་ནས་སླར་ལོག་སྟེ། རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་གྱི་ཚུལ་དུ་པདྨ་དབྱིངས་ཀྱི་དབང་ཕྱུག་མ་ལ་སོགས་པའི་
[56b]
[56b.1]གཟུངས་རྣམས་མཆོད་རྟེན་ལ་སོགས་པའི་གཟུངས་ཀྱི་ནང་དུ་ཆུད་ནས་བཞུགས་སོ་ཞེས་ཤེས་པར་བྱའོ། །ཡང་དེ་ནས་ཞེས་བྱ་བ་ལ་སོགས་པ་ནས་བརྩམས་ནས། ཨོཾ་ཀརྨ་ས་མ་ཡ་ཧཱུཾ་ཞེས་བྱ་བའི་བར་གྱི་གཞུང་འདི་ཙམ་གྱིས་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་དཀྱིལ་འཁོར་
[56b.2]རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ལ་སོགས་པ་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་ལས་ཀྱི་རྒྱལ་པོ་མཆོག་ཅེས་བྱ་བ་ནི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །འགྲོ་བ་འདུལ་བའི་
[56b.3]གཟུངས་ཀྱི་དཀྱིལ་འཁོར་དུ་གསུངས་པའི་དངོས་གྲུབ་རྣམས་ནི་དཀྱིལ་འཁོར་དེར་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་སྐབས་སུ་བབ་པ་སྟེ། འཕགས་པ་སྤྱན་
[56b.4]རས་གཟིགས་དབང་ཕྱུག་གིས་འགྲོ་བ་འདུལ་བའི་རང་གི་རིགས་ནི་པདྨའི་རིགས་ཏེ་དམ་ཚིག་གི་ཕྱག་རྒྱའི་མཚན་མའི་ཕྱག་རྒྱའོ། །དཀྱིལ་འཁོར་གསུངས་ཤིང་བཤད་པའོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། རིག་པའི་བརྟུལ་ཞུགས་ཀྱི་རྗེས་ཐོགས་ལའོ། །དེ་ལ་འགྲོ་བ་འདུལ་བའི་
[56b.5]རྣལ་འབྱོར་པས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རྣལ་འབྱོར་ཆེན་པོ་བྱས་ལ། འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་ལས་གསུངས་པའི་སྙིང་པོ་དང་འཆད་པར་འགྱུར་བའི་རང་གི་སྙིང་པོ་རྣམས་ཀྱིས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་བསྐྱེད་
[56b.6]ཅིང་གོ་རིམས་བཞིན་དུ་བཞག་ལ། གཟུངས་ཀྱི་ལྷ་སོ་སོ་དང་བདག་ཉིད་ལྷན་ཅིག་གཉིས་སུ་མེད་པར་བསམས་ནས། གཟུངས་ཀྱི་རིག་པ་རེ་རེ་ཞིང་ཡང་བཟླས་པ་ཁྲི་བྱའོ། །དེ་ནས་དཀྱིལ་འཁོར་གྱི་སའི་དབུས་སུ་འདུག་སྟེ་ཏིང་ངེ་འཛིན་རྣམ་པ་གསུམ་བསྒོམ་པ་ནས་བརྩམས་ནས། དཀྱིལ་
[56b.7]འཁོར་དེ་ཞག་བདུན་བསྒོམ་པའམ། ཡང་ན་གནས་གཞན་དུ་བསྒོམ་པར་བྱ་བ་དེ་ལྟ་བུས་ནི་རིག་པའི་བརྟུལ་ཞུགས་སྤྱོད་པར་གྱུར་པ་ཡིན་ནོ། །དེ་ནས་ཡང་དཀྱིལ་འཁོར་གྱི་སའི་དབུས་སུ་འདུག་ལ། ཏིང་ངེ་འཛིན་རྣམ་པ་གསུམ་བསྒོམ་པའི་ཆོ་ག་ཇི་ལྟ་བ་བཞིན་དུ་བཤད་མ་ཐག་པ་བྱས་
[57a]
[57a.1]ནས་དཀྱིལ་འཁོར་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་གྱི་དོན་ཏོ། །གང་གི་ཕྱིར་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་དུ་འཇུག་པ་མེད་ན་དེས་འདུལ་བའི་སེམས་ཅན་གྱི་ཁམས་རྗེས་སུ་བཟུང་བར་མི་འགྱུར་བའི་རྒྱུ་དེའི་ཕྱིར་རབ་ཏུ་བཤད་པར་བྱའོ། །
[57a.2]ཕྱག་རྒྱའི་དཀྱིལ་འཁོར་དམ་པ་ནི། །མཆོག་ཏུ་གྱུར་པའོ། །དེ་ཅི་འདྲ་བ་ཞིག་ཅེ་ན། རྡོ་རྗེ་དབྱིངས་དང་འདྲ་བ་ལ། །ཞེས་བྱ་བ་སྨྲས་ཏེ། སྤྲུལ་པའི་གཟུགས་ཀྱི་དཀྱིལ་འཁོར་ནི་འདིར་རྡོ་རྗེ་དབྱིངས་ཏེ། དེ་དང་འདྲ་བས་ན་རྡོ་རྗེ་དབྱིངས་དང་འདྲ་བའོ། །པདྨའི་གསང་བ་ཞེས་བཤད་པའོ། །
[57a.3]ཞེས་བྱ་བ་ནི། པདྨ་ནི་པདྨའི་རིགས་རྣམས་སོ། །གསང་བ་ནི་པདྨའི་གསང་བའོ། །དཀྱིལ་འཁོར་ཆེན་པོའི་ཚུལ་དུ་ནི། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོའི་དབྱིངས་སུ་དེའི་རིག་པ་ཟློས་ཤིང་བྲི་བར་བྱའོ། །ནམ་མཁའི་ཕྱོགས་ནས་མཆོད་རྟེན་གྱི་གཟུགས་ཀྱིས་
[57a.4]ཕབ་ལ་བྲིས་པའི་མཆོད་རྟེན་གྱི་གཟུགས་དང་གཅིག་ཏུ་བྱའོ། །དེ་བཞིན་དུ་ཕྱག་རྒྱ་གཞན་ལ་ཡང་རང་གི་མཚན་མ་རྣམས་ཕབ་ནས་གཅིག་ཏུ་བསྲེ་བར་བྱའོ། །དེའི་དབུས་པདྨ་བཟང་པོ་ལ། །ཞེས་བྱ་བ་ནི་རྡོ་རྗེ་དབྱིངས་ཀྱི་དབང་ཕྱུག་མའོ། །དེ་ཡི་ཕྱོགས་རྣམས་ཐམས་ཅད་དུ། །ཞེས་
[57a.5]བྱ་བ་ནི་དེའི་ཕྱོགས་བཞིར་རོ། །དམ་ཚིག་མཆོག་རྣམས་ཞེས་བྱ་བ་ནི། དམ་ཚིག་དེའི་མཆོག་ནི་དམ་ཚིག་མཆོག་སྟེ། རིགས་ཐམས་ཅད་བསྡུས་པ་ན་དམ་པའོ། །གང་གི་ཕྱིར་སོ་སོའི་ཕྱག་རྒྱ་རྣམས་ཀྱིས་རིགས་ཐམས་ཅད་ལ་རྒྱས་འདེབས་པའི་ཕྱིར་རོ། །ལྷག་མ་བཞིན་ཞེས་བྱ་བ་ནི།
[57a.6]ཇི་ལྟར་འགྲོ་བ་འདུལ་བའི་དཀྱིལ་འཁོར་དུ་བྲིས་པ་དེ་བཞིན་དུ་ཞེས་བྱ་བའི་དོན་ཏོ། །རྡོ་རྗེ་ཤུགས་ཀྱིས་བརྒལ་ནས་ནི། །ཞེས་བྱ་བ་ནི་སྔ་མ་བཞིན་ནོ། །སྣ་ཚོགས་གཟུགས་མཆོག་དཀྱིལ་འཁོར་དུ། །ཞེས་བྱ་བ་འགྲོ་བ་འདུལ་བ་སྣ་ཚོགས་ཀྱི་གཟུགས་ཅན་དེ་གཙོ་བོ་མཆོག་གི་དཀྱིལ་འཁོར་
[57a.7]ནི་སྣ་ཚོགས་གཟུགས་མཆོག་དཀྱིལ་འཁོར་རོ། །དེ་ཡི་དབུས་སུ་པདྨ་ཡི། །བསྐོར་བའི་པདྨོ་བྲི་བར་བྱ། །ཞེས་བྱ་བ་ནི། དེ་ལ་དཀྱིལ་འཁོར་དེའི་དབུས་སུ་ནི། དབུས་ཀྱི་ཆའི་པདྨ་ལ་རྡོ་རྗེ་པདྨ་དེ་ལ་ཚད་ཕྲ་མོའི་རྡོ་རྗེ་པདྨ་དེར་སྤྲུལ་པས་ཡོངས་སུ་བསྐོར་བའོ། །དེ་ཡི་ཕྱོགས་རྣམས་ཐམས་ཅད་
[57b]
[57b.1]དུ། །ཞེས་བྱ་བ་ལ་སོགས་པ་ནི་གོ་སླའོ། །འདི་སྐད་སྟོན་པ་ཡིན་ཏེ། ལྷ་ཐམས་ཅད་ཀྱི་གནས་རྣམས་སུ་ཁ་ཁྱེར་གསུམ་པའི་ཁྲི་ལ་གནས་པའི་པདྨ་བྲི་བར་བྱའོ། །དབུས་ཀྱི་དཀྱིལ་འཁོར་དེའི་དབུས་ཀྱི་པདྨ་ལ་རྣམ་པར་སྣང་མཛད་ཀྱི་གནས་སུ་མཆོད་རྟེན་དབུ་ནུབ་ཏུ་བསྟན་པ་འོད་ཟེར་
[57b.2]དང་བཅས་པ་བྲི་བར་བྱའོ། །དེའི་ཤར་ཕྱོགས་ཀྱི་ཆ་ལ་རྡོ་རྗེ་སེམས་མའི་གནས་སུ་རྡོ་རྗེ་རྩེ་ལྔ་པ་དབུ་ཤར་དུ་བསྟན་པ་ཆོས་ཀྱི་རྡོ་རྗེ་མའོ། །ལྷོ་ཕྱོགས་སུ་པདྨས་མཚན་པའི་ཡིད་བཞིན་གྱི་ནོར་བུ་དབུ་ལྷོ་ཕྱོགས་སུ་བསྟན་པ་སངས་རྒྱས་དབང་བསྐུར་མའོ། །ནུབ་ཕྱོགས་སུ་རྡོ་རྗེ་པདྨ་འདབ་མ་བཅུ་དྲུག་པ་
[57b.3]མདོག་དམར་སྐྱ་དབུ་ནུབ་ཏུ་བསྟན་པ་པདྨའི་པདྨ་དང་དམ་ཚིག་སྒྲོལ་མ་ཞེས་བྱ་བའི་མིང་གཉིས་དང་ལྡན་པ། བྱང་ཕྱོགས་སུ་པདྨ་འདབ་མ་བཞི་པ་སྣ་ཚོགས་པའི་མདོག་ཅན་དབུ་བྱང་དུ་བསྟན་པའོ། །འགྲོ་བ་འདུལ་བའི་གནས་སུ་པདྨ་འདབ་མ་བཅུ་དྲུག་པ་མདོག་དམར་སྐྱ་སྔར་བཤད་པའི་མཚན་
[57b.4]ཉིད་ཅན་གྱི་རྡོ་རྗེ་པདྨ་ལ་དེ་ལས་གཞན་པའི་པདྨས་ཡོངས་སུ་བསྐོར་བའོ། །པདྨ་སངས་རྒྱས་ཀྱི་གནས་སུ་པདྨས་མཚན་པའི་རྡོ་རྗེ་རྩེ་ལྔ་པ་དབུ་ཤར་དུ་བལྟས་པའོ། །པདྨོ་རྒྱལ་པོའི་གནས་སུ་པདྨའི་ལྕགས་ཀྱུ་དང་། རལ་གྲི་དང་། རྡོ་རྗེ་དང་། པདྨའོ། །པདྨ་ཆགས་པའི་གནས་སུ་པདྨའི་
[57b.5]མདའ་གཞུ། པདྨ་ལེགས་པའི་གནས་སུ་པདྨ་དང་བཅས་པའི་སེ་གོལ་གཏོགས་པའི་ཁུ་ཚུར་གཉིས་སོ། །གཙུག་ཕུད་སངས་རྒྱས་ཀྱི་གནས་སུ་འཇིག་རྟེན་དབང་ཕྱུག་གི་རལ་པའི་དབུས་སུ་གནས་པའི་རྡོ་རྗེ་པདྨ་འདབ་མ་བཅུ་དྲུག་པའོ། །པདྨ་ཁྲོ་གཉེར་གྱི་གནས་སུ་པདྨས་མཚན་པའི་
[57b.6]ཡིད་བཞིན་གྱི་ནོར་བུ། པདྨ་ཉི་མའི་གནས་སུ་པདྨའི་ལྟེ་བ་ལ་ཉི་མའི་དཀྱིལ་འཁོར་རོ། །པདྨའི་རྒྱལ་མཚན་གྱི་གནས་སུ་ཟླ་བ་ཕྱེད་པ་ལ་བརྟེན་པའི་པདྨས་མཚན་པའི་ཡིད་བཞིན་གྱི་ནོར་བུའི་རྩེ་མོ་ཅན་གྱི་རྒྱལ་མཚན། པདྨ་བཞད་པའི་གནས་སུ་པདྨས་མཚན་པའི་རྡོ་རྗེ་རྩེ་ལྔ་པ་
[57b.7]གཉིས་ཀྱི་བར་དུ་ཆུད་པའི་སོའི་ཕྲེང་བའོ། །པདྨའི་ཏིང་ངེ་འཛིན་གྱི་གནས་སུ་པདྨ་འདབ་མ་བཅུ་དྲུག་པའི་པདྨའི་རྡོ་རྗེ་པདྨའོ། །པདྨ་སྒྲོལ་མའི་གནས་སུ་རྡོ་རྗེ་པདྨ། པདྨ་རྣོན་པོའི་གནས་སུ་པདྨས་མཚན་པའི་རལ་གྲི། པདྨ་རྒྱུའི་གནས་སུ་པདྨའི་ལྟེ་བ་ལ་རྡོ་རྗེ་འཁོར་ལོ་རྩིབས་བརྒྱད་པ་དང་།
[58a]
[58a.1]དུང་དང་བེེ་ཅོན་དང་པདྨའོ། །པདྨ་གསུང་པའི་གནས་སུ་པདྨས་མཚན་པའི་ལྕེ། པདྨ་ངེས་པའི་དབང་ཕྱུག་གི་གནས་སུ་སྣ་ཚོགས་པདྨ་འདབ་མ་བཞི་པ། པདྨ་གར་གྱི་དབང་ཕྱུག་གི་གནས་སུ་གར་བྱེད་པའི་ལག་པ་བཟུང་བའི་སྣ་ཚོགས་པདྨ། པདྨ་སྲུང་བའི་
[58a.2]གནས་སུ་པདྨས་མཚན་པའི་གོ་ཆ། པདྨ་གནོད་སྦྱིན་གྱི་གནས་སུ་མཆེ་བ་གཉིས་ཀྱི་རྩ་བ་པདྨས་མཚན་པ། པདྨ་ཁུ་ཚུར་གྱི་གནས་སུ་པདྨའི་དམ་ཚིག་གི་ཁུ་ཚུར་གྱིས་བཟུང་བའི་པདྨས་མཚན་པའི་རྡོ་རྗེ་རྩེ་ལྔ་པའོ། །པདྨ་སྒེག་མོའི་གནས་སུ་པདྨས་མཚན་པའི་རྡོ་རྗེ་རྩེ་ལྔ་པ་
[58a.3]གཉིས། པདྨའི་ཕྲེང་བའི་གནས་སུ་པདྨས་མཚན་པའི་རིན་པོ་ཆེའི་ཕྲེང་བ། པདྨ་གླུ་མའི་གནས་སུ་པདྨས་མཚན་པའི་པི་ཝང་། པདྨ་གར་མའི་གནས་སུ་པདྨས་མཚན་པའི་རྡོ་རྗེ་རྩེ་གསུམ་པ་དང་བཅས་པའི་ལག་པས་གར་སྐོར་བ། བདུག་པ་མའི་གནས་སུ་པདྨས་
[58a.4]མཚན་པའི་སྤོས་སྣོད། མེ་ཏོག་མའི་གནས་སུ་མེ་ཏོག་གི་ཟ་མ་ཏོག །མར་མེ་མའི་གནས་སུ་པདྨས་མཚན་པའི་མཆོད་སྡོང་། དྲི་མའི་གནས་སུ་དྲིའི་དུང་ཆོས་པདྨས་མཚན་པ། རྟ་མགྲིན་གྱི་གནས་སུ་པདྨས་མཚན་པའི་ལྕགས་ཀྱུ། དོན་ཡོད་ཞགས་པའི་གནས་སུ་པདྨས་
[58a.5]མཚན་པའི་ཞགས་པ། ལྕགས་སྒྲོག་གི་གནས་སུ་པདྨས་མཚན་པའི་ལྕགས་སྒྲོག །པདྨ་འབེབས་པའི་གནས་སུ་པདྨས་མཚན་པའི་དྲིལ་བུ། བྱམས་པ་ལ་སོགས་པ་རྣམས་ནི་དཀྱིལ་འཁོར་ཆེན་པོ་ལས་བཤད་པའི་མཚན་མ་སྔར་བཤད་པའི་རིགས་པས་ཁྱམས་སུ་བྲི་
[58a.6]བར་བྱའོ། །མཚན་མ་ཐམས་ཅད་ཀྱང་འོད་ཟེར་གྱི་ཕྲེང་བ་དང་བཅས་པ་ཤར་དང་། ལྷོ་དང་། ནུབ་དང་། བྱང་དུ་མགོ་བལྟས་པ་གོ་རིམས་བཞིན་དུ་བྲི་བར་བྱའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པའོ། །དེ་ལྟར་དཀྱིལ་འཁོར་བྲིས་ནས་ཇི་ལྟ་བ་བཞིན་དུ་སྒོ་དབྱེ་བ་བྱས་ལ་
[58a.7]བུམ་པ་ཐམས་ཅད་དང་བུམ་པ་གང་བ་ཇི་ལྟ་བའི་གནས་སུ་བཞག་ལ། གཟུངས་ཀྱི་དཀྱིལ་འཁོར་ལས་གསུངས་པའི་རིག་པ་རྣམས་ཀྱིས་སྔ་མ་བཞིན་དུ་བཟླས་ནས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་
[58b]
[58b.1]ལས་བཤད་པའི་རྡོ་རྗེ་ཆོས་མ་བཅིངས་ལ་ཞུགས་ནས། འཇུག་པ་ལ་སོགས་པའི་སྔོན་དུ་འགྲོ་བའི་པདྨ་བརྟུལ་ཞུགས་འཛིན་པའི་བར་དུ་བྱས་ལ། བདག་ལ་བྱིན་གྱིས་བརླབས་པ་ལ་སོགས་པ་ཡང་བྱས་ནས་དཀྱིལ་འཁོར་རྡོ་རྗེས་བསྒྲུབ་པར་བྱའོ། །དེ་ནས་བསྡུ་བ་བྱས་ལ་མཚན་
[58b.2]བརྒྱ་རྩ་བརྒྱད་པས་བསྟོད་པའི་རྗེས་ཐོགས་ཉིད་ལ། འདིར་ཞེས་བྱ་བ་ནི་པདྨ་རིགས་ཀྱི་གཟུངས་ཀྱི་དཀྱིལ་འཁོར་དུའོ། །དགུག་པ་ལ་སོགས་པའི་ཆོ་ག་རྒྱས་པར་བྱས་ནས་ཞེས་བྱ་བ་ལ། དེ་ལ་དགུག་པ་ནི་པདྨའི་རིགས་ཀྱི་གཟུངས་རྣམས་རང་རང་གི་སྒོ་དང་ཉེ་བར་རྟ་མགྲིན་གྱི་ལས་ཀྱི་ཕྱག་
[58b.3]རྒྱས་དགུག་ལ་གཞག་པའོ། །སོགས་པ་སྨོས་པ་ནི་གཞུག་པ་དང་། བཅིང་བ་དང་། དབང་དུ་བྱ་བ་དང་། མཆོད་ཡོན་དབུལ་བ་དང་། ཕྱག་རྒྱ་བཞིས་རྒྱས་གདབ་པ་དང་། དབང་བསྐུར་བ་དང་མཆོད་པ་དང་། ཕྱག་བཞི་བྱས་ལ། གནང་བ་མ་ནོས་པ་ནི་དགུག་པ་ལ་སོགས་པ་དང་པོར་
[58b.4]བྱས་པ་གང་ཡིན་པ་དེ་ནི་དགུག་པ་ལ་སོགས་པའི་ཆོ་ག་རྒྱས་པའོ། །བཤད་མ་ཐག་པ་དེ་བྱས་ནས། པདྨའི་སློབ་མ་ཇི་ལྟ་བ་བཞིན་དུ་བཅུག་སྟེ། འགྲོ་བ་འདུལ་བའི་གཟུགས་སུ་བྱིན་གྱིས་བརླབ་བོ། །སློབ་མ་ནི་པདྨའི་སློབ་མའོ། །འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་
[58b.5]འགྲོ་བ་འདུལ་བའི་སྙིང་པོ་དང་བཅས་པའི་དམ་ཚིག་གི་ཕྱག་རྒྱས་སློབ་དཔོན་གྱིས་བསྒྲུབ་པར་བྱའོ། །འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཇི་ལྟ་བའི་ཆོ་ག་དེ་དང་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཆོས་མ་བཅིངས་ལ་འཇུག་པར་བྱའོ། །འདི་སྐད་དུ་ཁྱོད་ཀྱིས་
[58b.6]གསང་བ་འདི་སུ་ལ་ཡང་མ་སྨྲ་ཤིག་ཅེས་བྱ་བ་ལ་སོགས་པ་དང་། དེ་ནས་ཕབ་ནས་འདི་སྐད་དུ་ཁྱོད་ཀྱི་རྨི་ལམ་དུ་ཅི་སྣང་ཞེས་དྲིས་ནས་ཞེས་བྱ་བ་ནི། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེ་ཆུ་བཏུང་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ལ། དེ་བཞིན་གཤེགས་
[58b.7]པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག །ཅེས་བྱ་བའི་ཆོ་གས་སྔ་མ་བཞིན་དུ་དབབ་པར་བྱས་ལ། དེ་ནས་ཕབ་ལ་འདི་སྐད་དུ། རྡོ་རྗེ་དམ་ཚིག་གིས་ཁྱོད་ཀྱི་རྨི་ལམ་དུ་ཅི་ཞིག་སྣང་ཞེས་དྲིས་པ་ནི། །དཀར་པོ་དང་། སེར་པོ་དང་། དམར་པོ་
[59a]
[59a.1]དང་། ནག་པོ་དང་ལྗང་གུ་རྣམས་སྣ་ཚོགས་པ་ཅི་ཞིག་སྣང་ཞེས་བྱ་བའོ། །ཅི་ལྟ་བ་བཞིན་དུ་གདོང་གཡོགས་བཀྲོལ་ཏེ་ཞེས་བྱ་བ་ནི། མེ་ཏོག་གི་ཕྲེང་བ་དོར་ལ། དེ་ནས་དེ་བླངས་ཏེ་སྤྱི་བོར་བཅིངས་ནས། དེའི་རྗེས་ལ་གདོང་གཡོགས་བཀྲོལ་པའི་སྔགས་ཀྱིས་
[59a.2]གདོང་གཡོགས་བཅིངས་པ་བཀྲོལ་ལོ་ཞེས་བྱ་བ་ནི། ཇི་ལྟ་བ་བཞིན་ཞེས་བྱ་བའི་དོན་ཡིན་ནོ། །ཡང་དེ་ནས་སོར་བཞི་པའི་ཚད་ཀྱི་ཡུ་བ་དང་བཅས་པའི་གསང་བའི་དཀྱིལ་འཁོར་གྱི་པདྨ་འཆད་པས་གཡོགས་ཏེ། སློབ་མ་ལ་དབང་བསྐུར་ནས། མིང་གི་དབང་བསྐུར་བ་ལ་སོགས་
[59a.3]པས་ཀྱང་དབང་བསྐུར་བར་བྱའོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་དང་། སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་པདྨའི་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་ཡེ་ཤེས་རྣམས་ནི་པདྨའི་རིགས་ཀྱི་གཟུངས་ཀྱི་དཀྱིལ་འཁོར་དུ་དམ་ཚིག་དང་
[59a.4]དབང་བསྐུར་བ་ཐོབ་པ་སློབ་དཔོན་རྣམས་ཀྱིས་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ལྟར་རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཐམས་ཅད་དུ་ཡང་སྣོད་ཇི་ལྟ་བ་བཞིན་དུ་ཕྱག་རྒྱའི་ཡེ་ཤེས་བསླབ་པོ་ཞེས་གསུངས་ཏེ། དངོས་གྲུབ་ཀྱང་ཡིན་ལ་དམ་པ་ཡང་ཡིན་པས་ན་དངོས་གྲུབ་
[59a.5]དམ་པའོ། །འཇིག་རྟེན་དབང་ཕྱུག་དང་། གཙུག་ཕུད་སངས་རྒྱས་དང་། པདྨའི་པདྨ་དང་། པདྨའི་དོན་ཡོད་དབང་ཕྱུག་རྣམས་ཀྱི་དངོས་གྲུབ་དེ་ཐོབ་པ་ནི་བསྒྲུབ་པ་སྟེ། དེར་ངེས་པའི་ཡེ་ཤེས་སུ་འགྱུར་བའོ། །སྤྱན་རས་གཟིགས་དབང་སེམས་དཔའ་ཆེ། །ཞེས་བྱ་བ་ནི། རིགས་
[59a.6]ཀྱི་བདག་པོ་ཅི་འདྲ་ཞིག་བསྟན་ཅེ་ན། སྤྱན་རས་གཟིགས་དབང་ཞེས་བྱ་བ་སྨོས་ཏེ། གཟུགས་ཐམས་ཅད་སྟོན་པའི་རང་བཞིན་ནོ་ཞེས་བྱ་བའི་དོན་ཏོ། །བདག་ཉིད་ཅེས་བྱ་བ་ནི་རང་ཉིད་དོ། །རང་ཉིད་ནི་ངོ་བོ་ཞེས་བྱ་བའི་དོན་ཏོ། །བསྒོམས་ནས་ཕྱག་རྒྱ་ཆེན་པོ་ཡིས། །ཞེས་བྱ་བ་ལ་
[59a.7]སོགས་པ་ནི་རྣམ་པ་དེ་ལྟ་བུའི་ཕྱག་རྒྱ་ཆེན་པོ་བསྒོམས་པས་མཆོག་གི་དངོས་གྲུབ་མྱུར་དུ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོའི་ཆོ་གས་རང་གི་ལྷའི་ཆོ་ག་བྱས་ནས། ཕྱིས་གཟུངས་ཀྱི་དཀྱིལ་འཁོར་ལས་གསུངས་པའི་
[59b]
[59b.1]རིག་པ་རྣམས་ཀྱིས་གཟུངས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བའི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་ཨོཾ་པདྨ་སཏྭ་ཨ་ཧཾ་སིདྡྷྱ་ཧི། ཞེས་བྱ་བའི་སྙིང་པོ་དང་ཐུན་བཞིའི་སྦྱོར་བས་གང་གི་ཚེ་རྒྱུན་མི་འཆད་པར་བསྒོམས་པར་གྱུར་པ་དེའི་ཚེ། དེའི་གཟུགས་སུ་བདག་
[59b.2]ཉིད་མཐོང་བར་འགྱུར་རོ། །དེ་བས་ཟླ་བ་ཉ་ལ་མཚན་ཐོག་ཐག་བསྒོམས་པས་འགྲོ་བ་འདུལ་བ་དང་འདྲ་བར་འགྱུར་རོ། །སངས་རྒྱས་དབང་གི་དམ་ཚིག་ནི། །ཞེས་བྱ་བ་ནི་གཟུངས་ཀྱི་དཀྱིལ་འཁོར་ལས་བཤད་པའི་སངས་རྒྱས་གཙུག་ཕུད་ཀྱི་དམ་ཚིག་གི་ཕྱག་རྒྱ་བཅིང་བར་བྱའོ། །
[59b.3]མཉམ་པར་གཞག་པས་བརྟན་བྱས་ཏེ། །ཞེས་བྱ་བ་ལ་མཉམ་པར་གཞག་པ་ནི་གཡེང་བ་མེད་པའོ། །བདག་ཉིད་ཉིད་ཀྱིས་སྒོམ་པ་གོམས་པར་བྱས་ནས་མཆོག་དམ་པ་སངས་རྒྱས་གཙུག་ཕུད་ཀྱི་དངོས་གྲུབ་ཐོབ་པར་འགྱུར་རོ། །དེ་ལྟར་རང་འདོད་པའི་ལྷའི་རྣལ་འབྱོར་བྱས། ཕྱིས་གཟུངས་
[59b.4]ཀྱི་དཀྱིལ་འཁོར་ལས་གསུངས་པའི་སངས་རྒྱས་གཙུག་ཕུད་ཀྱི་དམ་ཚིག་གི་ཕྱག་རྒྱ་བཅིངས་ཏེ། གཙུག་ཕུད་སངས་རྒྱས་ཀྱི་རིག་པ་བརྗོད་ཅིང་། གཙུག་ཕུད་སངས་རྒྱས་ཀྱི་གཟུགས་སུ་བདག་ཉིད་བསམས་ཏེ། ཨོཾ་བུདྡྷ་ཨ་བྷི་ཥེ་ཀ་ཧཾ་སིདྡྷྱ་མཱཾ་ཞེས་བརྗོད་ཅིང་། གང་གི་ཚེ་ཉིན་རེ་ཞིང་ཐུན་
[59b.5]བཞིའི་སྦྱོར་བས་རྒྱུན་མི་འཆད་པར་བསྒོམས་པར་གྱུར་པ་དེའི་ཚེ་གཙུག་ཕུད་སངས་རྒྱས་ཀྱི་གཟུགས་སུ་བདག་ཉིད་མངོན་སུམ་དུ་མཐོང་བར་འགྱུར་རོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམ་པ་བྱས་ན་དེས་གཙུག་ཕུད་སངས་རྒྱས་དང་འདྲ་བར་གྲུབ་པར་འགྱུར་རོ། །པདྨོའི་པདྨོར་
[59b.6]སེམས་དཔའ་ཆེ། །ཞེས་བྱ་བ་ལ་པདྨོའི་པདྨ་ནི་པདྨའི་ཏིང་ངེ་འཛིན་ནོ། །པདྨའི་པདྨོར་སེམས་དཔའ་ཆེན་པོར་བདག་ཉིད་ཀྱིས་བསྒོམས་ན་པདྨའི་པདྨའི་དངོས་གྲུབ་དམ་པ་རྣལ་འབྱོར་པས་ཐོབ་པར་འགྱུར་རོ། །སྔ་མ་བཞིན་དུ་ལྷའི་རྣལ་འབྱོར་བྱས་ལ། ཕྱིས་པདྨ་རིགས་ཀྱི་
[59b.7]གཟུངས་ཀྱི་དཀྱིལ་འཁོར་ལས་གསུངས་པའི་རིག་པ་བརྗོད་ཅིང་། པདྨོ་པདྨའི་ཏིང་ངེ་འཛིན་ལ་མཉམ་པར་གཞག་པས། བདག་ཉིད་ཀྱིས་བསྒོམས་ལ། དེ་ནས། ཨོཾ་དྷརྨྨ་ས་མ་དྷི་ར་ཧཾ་སིདྡྷ་ཧོ་ཞེས་ཟློས་ཤིང་པདྨའི་ཏིང་ངེ་འཛིན་དུ་བདག་ཉིད་བསྒོམས་ནས། གང་གི་ཚེ་ཉིན་རེ་ཞིང་ཐུན་བཞིའི་སྦྱོར་
[60a]
[60a.1]བས་རྒྱུན་མི་འཆད་པར་བསྒོམས་པ་དེའི་ཚེ་དེའི་ངོ་བོར་མངོན་སུམ་དུ་མཐོང་བར་འགྱུར་རོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ན་པདྨའི་ཏིང་ངེ་འཛིན་དང་འདྲ་བར་འགྲུབ་པར་འགྱུར་རོ། །རང་བྱུང་གདོན་མི་ཟ་བའི་ཞེས་བྱ་བ་ནི། གདོན་མི་ཟ་བའི་དབང་ཕྱུག་
[60a.2]ནི་མཆོག་སྟེ། པདྨ་དོན་ཡོད་དབང་ཕྱུག་གི་རང་བཞིན་གྱི་ལས་ཀྱི་ཕྱག་རྒྱ་དེ་ཉིད་ནི་རང་བྱུང་སྟེ། ཆོ་ག་བཞིན་དུ་བསྒྲུབས་ནས་རང་གི་ལྷའི་རྣལ་འབྱོར་བྱས་ནས། མྱུར་ཞིང་མགྱོགས་པར་པདྨ་གདོན་མི་ཟ་བའི་དབང་ཕྱུག་གི་གཟུགས་ཀྱི་མཆོག་གི་དངོས་གྲུབ་ཐོབ་པར་འགྱུར་རོ། །
[60a.3]འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱིས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་པདྨ་གདོན་མི་ཟ་བའི་དབང་ཕྱུག་གི་ཕྱག་རྒྱ་ཆེན་པོ་བཅིངས་ཏེ་དེའི་རིག་པ་བརྗོད་པར་བྱའོ། །
[60a.4]ཨོཾ་ཨ་མོ་གྷ་ཤ་ར་པདྨ་ཧཾ་སིདྡྷྱ་མ་མཾ། ཞེས་བྱ་བ་ཟློས་ཤིང་པདྨ་གདོན་མི་ཟ་བའི་དབང་ཕྱུག་ཏུ་བདག་ཉིད་གང་གི་ཚེ་ཐུན་བཞིའི་སྦྱོར་བས་སྔ་མ་བཞིན་དུ་བསྒོམས་པར་གྱུར་པ། དེའི་ཚེ་དེ་དང་མཚུངས་པར་བདག་ཉིད་མཐོང་བར་འགྱུར་རོ། །སྔ་མ་བཞིན་དུ་མཚན་ཐོག་ཐག་བསྒོམས་ན་པདྨ་
[60a.5]གདོན་མི་ཟ་བའི་དབང་ཕྱུག་དང་འདྲ་བར་འགྲུབ་པོར་འགྱུར་རོ། །དེ་ལྟར་དངོས་གྲུབ་དམ་པའི་ཡེ་ཤེས་ཀྱི་དངོས་གྲུབ་རྣམ་པ་བཞི་བསྟན་ནས། ད་ནི་ནོར་འགྲུབ་པའི་ཡེ་ཤེས་རྣམ་པ་བཞི་གསུངས་པ་ནི། དེ་ནས་ཞེས་བྱ་བ་ལ་སོགས་པ་གསུངས་པ་སྟེ། དེ་ལ་ནོར་ནི་གསེར་ལ་སོགས་པའོ། །
[60a.6]དེ་འགྲུབ་པ་ནི་ཐོབ་པའོ། །ཡེ་ཤེས་ནི་དེར་ངེས་པ་སྟེ། ཁའི་ནང་དུ་དབྱིག་བཅུག་སྟེ། ཞེས་བྱ་བ་ལ། དབྱིག་ནི་ཟོང་རི་མོ་བྲིས་པའོ། །དེ་ཁར་བཅུག་ནས་བདག་ཉིད་བདག་ཉིད་ཀྱིས་བསྒོམས་ན་ནི། ཞེས་བྱ་བ་ནི། བདག་ཉིད་ཀྱིས་བདག་ཉིད་དུ་བསྒོམས་པའོ། །
[60a.7]ཅི་ཞིག་བསྒོམ་ཞེ་ན། སྣ་ཚོགས་དབང་ཕྱུག་ཕྱག་རྒྱ་ཆེ། །ཞེས་བྱ་བ་འགྲོ་བ་འདུལ་བའི་ཕྱག་རྒྱ་ཆེན་པོའོ། །གཅིག་ཏུ་གྱུར་པས་སྟོང་དུ་འགྱུར། །ཞེས་བྱ་བ་ནི་དེ་ལྟར་བསྒོམས་པས་ཟོང་གཅིག་པོ་དེ་དང་དེ་གཞལ་དུ་མེད་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་
[60b]
[60b.1]འདུལ་བའི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་རྣལ་འབྱོར་བྱས་ལ། ཕྱིས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་དེའི་རིག་པ་བརྗོད་ཅིང་བསྒོམས་ཏེ། འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ནས། ཨོཾ་པདྨ་ཧ་རི་བྱ་པྲ་པྱ་ཧཱུཾ་ཛ་
[60b.2]ཞེས་བྱ་བ་ཟློས་ཤིང་གང་གི་ཚེ་ཉིན་རེ་ཞིང་ཐུན་བཞིའི་སྦྱོར་བས་དབྱིག་ཁར་བཅུག་ནས་བསྒོམས་པ་དེའི་ཚེ་ནོར་གྱི་གནང་བ་ཐོབ་པར་འགྱུར་རོ། །དེ་ནས་མཚན་ཐོག་ཐག་བསྒོམ་པར་བྱས་ན་འགྲུབ་པར་འགྱུར་རོ། །དེ་ནས་ཕྱིས་བསྲུང་བ་བྱས་ན། །ཁྱིམ་གང་དུ་དབྱིག་གི་སྣོད་གཞག་པ་དེ་
[60b.3]མི་ཟད་པར་འགྱུར་རོ། །གསེར་སྲང་བརྒྱད་ཆ་བླངས་ནས་ནི། །ཞེས་བྱ་བ་ནི་འོལ་མ་སིའི་སུམ་ཅུ་རྩ་གཉིས་ཀྱི་ཚད་དང་ལྡན་པའི་གསེར་དམ་ཚིག་གི་ཕྱག་རྒྱས་རབ་ཏུ་བརྟན་པོར་བཟུང་ནས། བདག་ཉིད་ཀྱིས་བསྒོམས་པ་བྱས་ན་ནི། འདོད་པའི་ལྷའི་བདག་ཉིད་ཀྱི་གཟུགས་གཅིག་
[60b.4]ལས་དེའི་གཟུགས་དུ་མར་འགྱུར་རོ། །སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རིག་པ་བརྗོད་ཅིང་གཟུངས་ཀྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ནས་ཨོཾ་པདྨ་སུ་བར་ན་པྲ་དེ་ཧཱུཾ་ཛ་ཞེས་བརྗོད་ཅིང་། གསེར་ཞོ་གཅིག་དམ་
[60b.5]ཚིག་གི་ཕྱག་རྒྱས་བླངས་ཏེ་འདི་སྐད་བརྗོད་པར་བྱའོ། །སྔ་མ་བཞིན་དུ་ཇི་སྲིད་དུ་མཚན་མ་ཐོབ་པ་དེ་སྲིད་ཀྱི་བར་དུ་རང་གི་ལྷའི་རྣལ་འབྱོར་བསྒོམ་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བསྒོམས་ན་དེ་བཞིན་དུ་མི་ཟད་པར་འགྱུར་རོ། །མུ་ཏིག་འབྲུམ་བུ་ཁར་བཅུག་ལ། །བདག་ཉིད་
[60b.6]འཇིག་རྟེན་དབང་ཕྱུག་ཏུ། །བདག་ཉིད་ཀྱིས་ནི་བསྒོམས་ན་ནི། །གཅིག་ཏུ་གྱུར་ལས་སྟོང་དུ་འགྱུར། །ཞེས་བྱ་བ་ནི་དེ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རིག་པ་བརྗོད་
[60b.7]ཅིང་རང་གི་ལྷའི་གཟུགས་སུ་བདག་ཉིད་བསྒོམས་ཏེ། ཨོཾ་པདྨ་མུགྟ་པྲ་དི་ཧཱུཾ་ཛ་ཞེས་བརྗོད་ཅིང་མུ་ཏིག་གི་འབྲུམ་བུ་བླངས་ཏེ་ཁར་བཅུག་ནས་ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་རང་གི་ལྷའི་རྣལ་འབྱོར་བསྒོམ་པར་བྱའོ། །དེ་ནས་ཟླ་བ་ཉ་བ་ལ་མཚན་ཐོག་ཐག་བསྒོམས་ན་དེ་མི་
[61a]
[61a.1]ཟད་པར་འགྱུར་རོ། །ལས་ཀྱི་ཕྱག་རྒྱ་ལག་གཉིས་ཀྱིས། །རིན་ཆེན་ཐམས་ཅད་བླངས་ནས་ནི། །བདག་ཉིད་ཉིད་ཀྱིས་བསྒོམས་ན་ཡང་། །གཅིག་ཏུ་གྱུར་ལས་སྟོང་དུ་འགྱུར། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་
[61a.2]བཤད་པའི་རང་གི་ལྷའི་རྣལ་འབྱོར་བྱས་ལ། ཕྱིས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་རིག་པ་བརྗོད་ཅིང་རང་གི་ལྷའི་ལས་ཀྱི་ཕྱག་རྒྱ་བཅིངས་ཏེ། ཨོཾ་པདྨ་སརྦྦ་རཏྣ་པྲ་དྷ་ཧཱུཾ་ཛ་ཞེས་བརྗོད་ཅིང་ཇི་སྐད་བཤད་པའི་རིན་པོ་ཆེ་ཐམས་ཅད་ལས་ཀྱི་ཕྱག་རྒྱས་བླངས་ཏེ།
[61a.3]ཇི་སྲིད་དུ་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ན་དེ་མི་ཟད་པའི་དངོས་གྲུབ་ཏུ་འགྱུར་ཏེ། འདིར་རང་གི་ལྷའི་ཁ་དོག་སེར་པོ་བསྒོམ་ཞིང་དགའ་ཞིང་མགུ་བར་བྱས་ནས་ནོར་གྱི་དངོས་གྲུབ་བསྒྲུབ་པར་བྱའོ། །དེ་ནས་
[61a.4]རྗེས་སུ་དགའ་བར་བྱ་བའི་ཡེ་ཤེས་ནི་དབང་དུ་བྱ་བའི་ཕྱིར་བསྒོམ་པའི་ཡེ་ཤེས་སོ། །སྣ་ཚོགས་དབང་ཕྱུག་ཕྱག་རྒྱ་ཆེ། །ཞེས་བྱ་བ་ནི་འགྲོ་བ་འདུལ་བའི་ཕྱག་རྒྱ་ཆེན་པོ་བསྒོམས་ནས་པདྨ་བླངས་ཏེ། བསྒྲུབ་པར་བྱ་བ་མདུན་དུ་གནས་པ་རྣལ་འབྱོར་པ་གང་ཡིན་པ་དེས་རྣལ་འབྱོར་པ་དེ་
[61a.5]མགུ་བར་བྱེད་དོ། །དེའི་དོན་ནི་འདི་ཡིན་ཏེ། སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་འགྲོ་བ་འདུལ་བའི་རིག་པ་བརྗོད་ཅིང་ཕྱག་རྒྱ་ཆེན་པོ་བཅིངས་ཏེ། ཨོཾ་པཱ་ཎི་ཥྱ་ར་མ་ཧཱ་པདྨ་ཧོ་ཞེས་སྙིང་པོ་བརྗོད་ཅིང་པདྨ་དམར་
[61a.6]པོས་འབྱེད་པ་ལྟར་བྱེད་ཅིང་དེ་ལས་གཞན་པ་འགྲོ་བ་འདུལ་བ་སྐུ་མདོག་དམར་པོ་འོད་ཟེར་དམར་པོ་འཕྲོ་བར་ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཟླ་བ་ཉ་བ་ལ་མཚན་ཐོག་ཐག་བསྒོམས་ན་དངོས་གྲུབ་གྲུབ་པར་འགྱུར་རོ། །གང་གི་ཚེ་གནོད་སྦྱིན་མོ་ལ་
[61a.7]སོགས་པའི་གཟུགས་དབང་དུ་བྱེད་པ་དེའི་ཚེ་དེའི་མདུན་དུ་རྣལ་འབྱོར་གྱི་སྟོབས་ཀྱིས་གནས་པར་བདག་ཉིད་ཀྱིས་བསམས་ནས་ལག་ན་གནས་པའི་པདྨའི་འོད་ཟེར་འབར་བས་བཀང་ནས་མདོག་དམར་པོར་བྱས་ལ་བཀུག་ལ་འཁྱུད་པས་རང་གི་རྐང་པའི་དྲུང་དུ་ལྷུང་བར་བསམ་པར་
[61b]
[61b.1]བྱའོ། །ཨོཾ་བི་ཥེ་ཥ་ཀརྨྨ་ཧཱ་པདྨ་ཧོཿ། ཆེ་གེ་མོ་ཉིད་བ་ཤི་མ་ནཱ་ཡ་ཧོཿཞེས་བྱ་བས་འགྲོ་བ་དབང་དུ་བྱེད་པར་འགྱུར་རོ། །དམ་ཚིག་ཆེན་པོའི་ཕྱག་རྒྱ་ཡིས། །པདྨ་དམར་པོ་དམ་བཟུང་སྟེ། །ཞེས་བྱ་བ་ལ་པདྨ་དེ་བླངས་ནས་དམ་ཚིག་གི་ཕྱག་རྒྱས་དེ་དམར་པོར་བཟུང་ལ། བདག་ཉིད་
[61b.2]ཉིད་ཀྱིས་བསྒོམས་ན་ནི། །བུད་མེད་ཐམས་ཅད་དགའ་བར་འགྱུར། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། དེའི་རིག་པ་བརྗོད་ཅིང་ཕྱི་རོལ་གྱི་རིན་པོ་
[61b.3]ཆེ་པདྨ་དེ་བླངས་ལ། ཨོཾ་ས་མ་ཡ་པདྨོ་ཧཾ་ཞེས་ཟློས་ཤིང་ཇི་སྲིད་དུ་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་རང་གི་ལྷའི་གཟུགས་སུ་བསྒོམ་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བཟླས་ཤིང་བསྒྲུབས་ན་པདྨ་འོད་ཟེར་འབར་བ་དེ་དང་། དེ་ཉིད་ཀྱིས་བསྒྲུབ་པར་བྱ་བ་
[61b.4]དབང་དུ་བྱེད་དོ། །ཆེ་གེ་མོ་ཉིད་བ་ཥི་མ་ནཱ་ཡ་ཧོ། བདག་ཉིད་ཉིད་ཀྱིས་བསྒོམས་ནས་ཀྱང་། །ཞེས་བྱ་བ་ནི་སྔ་མ་བཞིན་ནོ། །པདྨ་བླངས་ཏེ་ཇི་ལྟ་བ་ཞེས་བྱ་བ་ནི། པདྨ་དེ་མེད་ཀྱང་དམ་ཚིག་དང་ཆོས་དང་ལས་དང་། ཕྱག་རྒྱ་ཆེན་པོ་རྣམས་ཀྱི་རྣལ་འབྱོར་ཉིད་ཀྱིས་དེ་མཐོང་བར་འགྱུར་རོ། །རྡོ་རྗེ་
[61b.5]ལྟ་བས་དེ་ལྟར་བལྟས། །འཇིག་རྟེན་ཐམས་ཅད་དེས་མགུར་འགྱུར། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ་ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་རྣལ་འབྱོར་ལ་རིག་པ་རྣམས་བརྗོད་ཅིང་པདྨའི་འདབ་མ་འབྱེད་པའི་ཚུལ་གྱིས་
[61b.6]གནས་པར་བདག་ཉིད་བསམ་པར་བྱའོ། །ཨོཾ་ཡོ་ག་པདྨོ་ཧོཿཞེས་བྱ་བ་བརྗོད་ཅིང་། ཇི་སྲིད་དུ་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་སྤྱན་རས་གཟིགས་དབང་ཕྱུག་གི་གཟུགས་སུ་བདག་ཉིད་བསྒོམ་པར་བྱའོ། །དེ་ནས་དེ་ཉིད་ཀྱིས་མཚན་ཐོག་ཐག་བསྒོམ་པར་བྱས་ལ། དེ་དང་དེ་ཉིད་ཀྱིས་ལས་
[61b.7]ཀྱི་དུས་སུ་ལྷའི་རྣལ་འབྱོར་བྱས་ལ། ཨོཾ་ཡོ་ག་པདྨ་ཧོཿ། ཆེ་གེ་མོ་ཉིད་བ་ཥི་མ་ནཱ་ཡ་ཧོཿཞེས་ཟློས་ཤིང་རྡོ་རྗེ་ལྟ་བས་བསྒྲུབ་པར་བྱ་བ་བལྟས་ལ་རྣལ་འབྱོར་གྱི་སྟོབས་ཀྱིས་བསྒྲུབ་པར་བྱ་བ་མདུན་དུ་བཞག་ལ། དེ་ནས་པདྨའི་འོད་ཟེར་དེ་ཉིད་ཀྱིས་བཀང་ལ་འཁྱུད་པས་རང་གི་རྐང་པའི་དྲུང་དུ་
[62a]
[62a.1]ལྷུང་བར་བསམ་པས་བདག་ཉིད་ནོར་དང་བཅས་པ་ངེས་པར་དབང་དུ་འགྱུར་རོ། །ལས་ཀྱི་ཕྱག་རྒྱའི་ཚུལ་གྱིས་ནི། །ཞེས་བྱ་བ་ནི་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱས་སྣ་ཚོགས་པདྨའི་ཕྱག་རྒྱ་གཟུང་བར་བྱའོ། །ཆོ་ག་བཞིན་
[62a.2]དུ་ཞེས་བྱ་བ་ནི། ལྷའི་རྣལ་འབྱོར་བྱས་ནས་སོ། །ལག་པ་གཉིས་ཀྱིས་བསྐོར་ནས་ནི། །ཞེས་བྱ་བ་ནི་ལས་ཀྱི་ཕྱག་རྒྱ་བཅིངས་པའི་ལག་པ་གཉིས་ཀྱིས་པདྨ་བསྐོར་ནས་བསྒྲུབ་པར་བྱ་བ་དེ་དབང་དུ་བྱེད་པར་འགྱུར་རོ། །བུད་མེད་ཐམས་ཅད་དེས་མགུར་བྱེད། །ཅེས་བྱ་བ་ནི་འགྲོ་
[62a.3]བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་དེ་ཉིད་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་འཇིག་རྟེན་དབང་ཕྱུག་གི་ལས་ཀྱི་ཕྱག་རྒྱ་བཅིངས་ཏེ། དེའི་རིག་པ་བརྗོད་ཅིང་ཡང་ཨོཾ་ཀརྨ་པདྨ་ཧོཿ། ཞེས་ཟློས་ཤིང་
[62a.4]ལས་ཀྱི་ཕྱག་རྒྱས་པདྨ་དམར་པོ་དམ་པོར་བཟུང་ལ། ཐུན་བཞིའི་སྦྱོར་བས་ཇི་སྲིད་མཚན་མའི་འོད་ཟེར་མཐོང་བ་ལ་སོགས་པར་གྱུར་པ་དེ་སྲིད་ཀྱི་བར་དུ་བསྒོམས་ལ། དེ་ནས་ཟླ་བ་ཉ་ལ་མཚན་ཐོག་ཐག་བསྒོམས་ན་འགྲུབ་པར་འགྱུར་རོ། །དེ་ནས་ལས་ཀྱི་དུས་སུ་དེ་ཉིད་ཀྱི་ལྷའི་རྣལ་
[62a.5]འབྱོར་བྱས་ནས། ཡིད་ཀྱིས་བསྒྲུབ་པར་བྱ་བ་བུད་མེད་ཀྱི་གཟུགས་མདུན་དུ་བཞག་ལ་ལས་ཀྱི་ཕྱག་རྒྱས་པདྨ་དེ་བླངས་ཏེ། པདྨའི་འོད་ཟེར་སྤྲོས་པས་བསྒྲུབ་པར་བྱ་བ་བཀང་ལ། པདྨས་བསྐོར་ན་ངེས་པར་དབང་དུ་འགྱུར་རོ། །ཨོཾ་ཀརྨ་པདྨ་ཧོཿ། ཆེ་གེ་མོ་ཉིད་བ་ཤ་མ་ན་ཡ་
[62a.6]ཧོཿ། ཞེས་བརྗོད་དོ། །མ་ལུས་དབང་པོའི་ཕྱག་རྒྱ་ཆེ་ནི་འགྲོ་བ་འདུལ་བའི་ཕྱག་རྒྱ་ཆེན་པོ་སྟེ། སྐུ་མདོག་ནག་པོའོ། །གོམས་པར་བྱ་བ་བདག་རང་ཉིད་ནི་བདག་རང་ཉིད་ཀྱིས་ཁྲོ་བོ་བསྒོམ་པའོ། །གང་གི་མདུན་དུ་དེ་པདྨ། །བཅད་ན་འཆི་འགྱུར་སྐད་ཅིག་གིས། །ཞེས་བྱ་བ་ནི་སྣ་ཚོགས་
[62a.7]དབང་ཕྱུག་གི་ཕྱག་རྒྱ་ཆེན་པོས་ཕྱི་རོལ་གྱི་པདྨ་བླངས་ཏེ། གང་གི་མདུན་དུ་བློས་བཞག་ནས། །དེའི་པདྨ་བཅད་ན་སྐད་ཅིག་མ་དེ་ཉིད་ལ་མགོ་འཆད་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་འགྲོ་བ་འདུལ་བའི་རྣལ་
[62b]
[62b.1]འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་བཅིང་སྟེ། དེའི་རིག་པ་བརྗོད་པར་བྱའོ། །དེ་ནས་ཕྱི་རོལ་གྱི་པདྨ་བླངས་ལ། ཨོཾ་མ་ཧཱ་པདྨ་ཙྪེ་ད་མཱ་ར་ཡ་ཧོཿ་ཕཊ། ཅེས་ཟློས་ཤིང་ཐུན་བཞིའི་སྦྱོར་བས་ཟླ་བ་གཅིག་བསྒོམ་པར་བྱའོ། །ཡང་
[62b.2]དེ་ནས་མཚན་ཐོག་ཐག་བྱ་བའམ། ལས་ལ་སྦྱོར་བའི་དུས་སུ་དེ་ཉིད་ཀྱིས་རྣལ་འབྱོར་བྱས་ལ་ཕྱི་རོལ་གྱི་པདྨ་དངོས་སུ་བླང་བའམ། ཡིད་ཀྱིས་བསྒྲུབ་པར་བྱ་བ་མདུན་དུ་བཞག་ལ་བདག་ཉིད་ཁྲོ་བོར་བྱས་ལ། ཨོཾ་པདྨ་མ་ཧཱ་ཙྪེ་ད་ཆེ་གེ་མོ་མཱ་ར་ཡ་ཧཱུཾ་ཕཊ། ཅེས་ཟློས་ཤིང་བསྒྲུབ་པར་
[62b.3]བྱ་བ་མགོ་བོ་ནས་དྲང་བའི་བསམ་པས་པདྨ་བླངས་ཏེ་བཅད་ན་བསྒྲུབ་པར་བྱ་བ་དེ་མགོ་བོ་འཆད་པར་འགྱུར་རོ། །པདྨ་བརྟེན་བཟུང་ཡང་དག་པར། །ཞེས་བྱ་བ་ལ་སོགས་པ་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་འགྲོ་བ་འདུལ་བའི་དམ་ཚིག་གི་ཕྱག་རྒྱ་དང་།
[62b.4]ཨོཾ་ས་མ་ཡ་པདྨ་སྥོ་ཊ་ནཱ་ཤ་ཡ་རཏྣ་ཕཊ། ཅེས་ཟློས་ཤིང་སྔ་མ་བཞིན་དུ་བསྒོམ་པར་བྱས་ནས། བདག་ཉིད་ཀྱིས་ཕྱི་རོལ་གྱི་པདྨ་བླངས་ལ་མཐར་མཚན་ཐོག་ཐག་བྱ་བའམ། དེ་ལས་ལ་སྦྱོར་བའི་དུས་སུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འགྲོ་བ་འདུལ་བ་དེ་
[62b.5]ཉིད་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་དེའི་དམ་ཚིག་གི་ཕྱག་རྒྱ་བཅིངས་ལ། ཁྲོ་བོ་དང་ལྡན་པས་གང་གི་མདུན་དུ་ཡིད་ཀྱིས་བཞག་ལ་དམ་ཚིག་གི་ཕྱག་རྒྱས་དེས་ཕྱི་རོལ་གྱི་པདྨ་འདབ་མ་བཅུ་དྲུག་བླངས་ལ་བསྒྲུབ་པར་བྱ་བ་རྟོག་པའི་བསམ་
[62b.6]པས་བཤིག་ན་སའི་སྟེང་དུ་ལྟུང་བར་འགྱུར་རོ། །ཨོཾ་ས་མ་ཡ་ཆེ་གེ་མོ་སྥོ་ཊ་ཡ་རཏྣ་ཕཊ། ཅེས་བརྗོད་ཅིང་གང་གི་མིང་ནས་སྨོས་པ་དེ་དེ་འཇིག་པར་འགྱུར་བའམ། ཡང་ན་གཟུགས་བརྙན་བྱས་ལ། དགུག་པ་དང་། གཞུག་པ་དང་། བཅིང་པ་དང་། དབང་དུ་བྱས་ལ་དེའི་སྙིང་
[62b.7]གར་མིང་བྲི་བ་ལ་སོགས་པ་བྱའོ། །ཏིང་འཛིན་ཕྱག་རྒྱ་བཅིངས་པ་ལས། །ཞེས་བྱ་བ་ནི་ཏིང་ངེ་འཛིན་པདྨའི་ཕྱག་རྒྱའོ། །བཅིངས་པ་ནི་མངོན་སུམ་དུ་བྱས་པའོ། །པདྨོ་བསྒྲུབ་པ་ཇི་བཞིན་དུ། །ཞེས་བྱ་བ་ནི་ལག་པ་གཡས་གཡོན་གཉིས་ཀྱིས་ཕྱི་རོལ་གྱི་པདྨ་བླངས་ལ། གང་
[63a]
[63a.1]གི་མིང་ནས་སྨྲོས་ཤིང་པདྨ་དེ་བཅད་ན་བསྒྲུབ་པར་བྱ་བ་དེ་འཇིག་ཅིང་དུམ་བུར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་ཏིང་ངེ་འཛིན་པདྨའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་
[63a.2]འཁོར་ལས་བཤད་པའི་ཕྱག་རྒྱ་ཆེན་པོ་བཅིངས་ཏེ། དེའི་རིག་པ་བརྗོད་ཅིང་། ཡང་ཨོཾ་དྷརྨྨ་པདྨ་ཙྪེ་ད་བི་ནཱ་ཤ་ཡ་ཧྲྀ་ད་ཡ་ཕཊ། ཅེས་བརྗོད་ཅིང་། ཕྱི་རོལ་གྱི་པདྨ་ལག་པ་གཡས་གཡོན་གྱིས་བླངས་ལ་སྔ་མ་བཞིན་དུ་ཟླ་བ་གཅིག་བསྒོམས་ན། མཐར་མཚན་ཐོག་ཐག་བྱ་བའམ།
[63a.3]དེའི་ལས་ལ་སྦྱོར་བའི་དུས་སུ་པདྨ་ཏིང་ངེ་འཛིན་དེ་ཉིད་རྣལ་འབྱོར་བྱས་ལ་པདྨ་དེ་ཉིད་བླངས་ཏེ། བསྒྲུབ་པར་བྱ་བའི་མགོ་བོ་གཅད་པའི་བསམ་པས་གཅོད་ཅིང་། ཨོཾ་དྷརྨྨ་པདྨ་ཙྪེ་ད་ཆེ་གེ་མོ་བི་ནཱ་ཤ་ཡ་ཧྲྀ་ད་ཡ་ཕཊ། ཅེས་བརྗོད་པས་ངེས་པ་ཉིད་དུ་བསྒྲུབ་པར་བྱ་བའི་མགོ་བོ་འཆད་པར་འགྱུར་
[63a.4]རོ། །ལས་ཀྱི་ཕྱག་རྒྱའི་ཚུལ་གྱིས་ནི། །ཞེས་བྱ་བ་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་བཅིངས་ལ། དེས་སྣ་ཚོགས་པདྨ་བཟུང་སྟེ། པད་བཟུང་ཆོ་ག་ཇི་ལྟ་བར། །གང་ལ་ཁྲོས་པས་རྟོགས་བྱ་བ། །ཞེས་བྱ་བ་ནི་དེའི་ལྷའི་རྣལ་འབྱོར་
[63a.5]བྱས་པས་སོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་པདྨ་ངེས་པའི་དབང་ཕྱུག་གི་རྣལ་འབྱོར་བྱས་ལ། ཕྱིས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་པདྨ་ངེས་པའི་དབང་ཕྱུག་གི་ཕྱག་རྒྱ་བཅིངས་ལ། དེའི་
[63a.6]རིག་པ་བརྗོད་པར་བྱའོ། །དེ་ནས་སྣ་ཚོགས་པདྨ་དེ་ཉིད་བླངས་ཏེ། ཨོཾ་ཀརྨྨ་པདྨ་སྥོ་ཊ་ཡ། སྥོ་ཊ་ཡ། ཛི་བི་ཏཾ་ཨ་དྱ་ཀྲིཏྟ་ཕཊ། ཅེས་བརྗོད་ཅིང་ཟླ་བ་གཅིག་སྔ་མ་བཞིན་དུ་བསྒོམས་ལ་མཐར་མཚན་ཐོག་ཐག་བསྒོམ་པར་བྱའོ། །དེ་ནས་ལས་ཀྱི་དུས་སུ་སྔ་མ་བཞིན་དུ་ལྷའི་རྣལ་འབྱོར་
[63a.7]བྱས་ལ། གཟུངས་ཀྱི་དཀྱིལ་འཁོར་ལས་གསུངས་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱ་དེ་བཞིན་དུ་བཅིངས་ཏེ། དེ་ནས་སྣ་ཚོགས་པདྨ་དེ་ཉིད་བླངས་ལ། ཨོཾ་ཀརྨ་པདྨ་སྥོ་ཊ་ཡ་ཆེ་གེ་མོ་སྥོ་ཊ་ཡ་ཛི་བི་ཏཾ་ཨདྱ་ཆེ་གེ་མོ་ཀྲིཏྟ་ཕཊ། ཅེས་བརྗོད་ཅིང་པདྨ་དེས་བསྒྲུབ་པར་བྱ་བ་
[63b]
[63b.1]རྟོག་པའི་བསམ་པས་བསྣུན་པའམ། བསྒྲུབ་པར་བྱ་བའི་གཟུགས་བརྙན་ལ་དེས་བསྣུན་པ་ཡིན་ན་དེ་ངེས་པར་འཆི་བར་འགྱུར་རོ། །གསང་བ་ནི་ལྷ་རྣམས་ཀྱི་རིག་པ་དང་བཅས་པའི་སྦྱོར་བས་སྒོམ་པ་སྟེ། དེ་ཡི་ཡེ་ཤེས་དབབ་པ་ནི། །པདྨ་ལ་ནི་བུད་མེད་བསམ། །ཞེས་བྱ་བ་ནི།
[63b.2]བཅོམ་ལྡན་འདས་འགྲོ་བ་འདུལ་བའི་རྡོ་རྗེ་པདྨ་ལ་འགྲོ་བ་འདུལ་བའི་ལྷ་མོ་བསམས་ཏེ། རྡོ་རྗེ་དེའི་སྟེང་དུ་བདག་ཉིད་ནི་འགྲོ་བ་འདུལ་བའོ། །བརྩེ་བ་ནི་ལོངས་སྤྱོད་པའོ། །རྡོ་རྗེ་པདྨའི་རྩེ་མོར་འགྲོ་བ་འདུལ་བའི་ལྷ་མོའི་གཟུགས་དང་སྙོམས་པར་ཞུགས་པར་བསམས་ལ། སེམས་
[63b.3]རྩེ་གཅིག་པས་བསྒྲུབས་ན་འགྲོ་བ་འདུལ་བར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་སྔ་མ་བཞིན་དུ་བྱས་ལ་ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བའི་ཕྱག་རྒྱ་ཆེན་
[63b.4]པོ་བཅིངས་ཏེ། བདག་ཉིད་འགྲོ་བ་འདུལ་བར་བསམ་མོ། །དེ་ནས་ཡི་གེ་ཧྲཱི་ལས་རང་གི་གདན་གྱི་སྟེང་དུ་པདྨ་ཕྲ་མོས་ཡོངས་སུ་བསྐོར་བའི་རྡོ་རྗེ་པདྨ་དེ་ཡོངས་སུ་གྱུར་པ་ལས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་བསམས་ལ། དེ་ནས་བསྡུ་བ་བྱས་ཏེ། འགྲོ་བ་འདུལ་
[63b.5]བའི་ལྷ་མོ་ལ་མཚན་བརྒྱ་རྩ་བརྒྱད་པས་བསྟོད་ནས། རྟ་མགྲིན་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱིས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ་དམ་ཚིག་གི་ཕྱག་རྒྱས་བསྒྲུབས་ལ། དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་
[63b.6]ལ། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ། པདྨའི་སྒེག་མོ་ལ་སོགས་པ་རྣམས་ཀྱིས་ཡང་དག་པར་མཆོད་ལ་ཕྱག་བྱས་ཏེ། ཨོཾ་བཛྲ་པདྨ་སཾ་ཡོ་ག་སཱ་དྷ་ཡ་ཧྲཱི་ཞེས་ཡོངས་སུ་ཟློས་ཤིང་བཅོམ་ལྡན་འདས་དང་ལྷན་ཅིག་མཉམ་པར་སྦྱོར་བས་ཉིན་རེ་ཞིང་ཐུན་བཞིའི་
[63b.7]སྦྱོར་བས་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བསྒོམས་ན། དེ་ནས་དེ་མངོན་སུམ་དུ་མཐོང་བར་གསལ་བ་དང་། དེ་དང་འཁྱུད་པ་དང་མཉམ་པར་སྦྱོར་བར་བྱེད་ཅིང་སྒྲུབ་པ་པོའི་ལུས་ཀྱི་ནང་དུ་ཞུགས་པར་འགྱུར་རོ། །
[64a]
[64a.1]ཕྱིས་ནི་འགྲོ་བ་འདུལ་བ་དང་མཚུངས་པར་ཡང་འགྱུར་རོ། །པདྨ་ལ་ནི་བུད་མེད་བསམ། །ཞེས་བྱ་བ་ནི་གཟུངས་ཀྱི་དཀྱིལ་འཁོར་ལས་བཤད་པའི་གཙུག་ཕུད་སངས་རྒྱས་ཀྱི་མཚན་མའི་ཕྱག་རྒྱ་ནི་གཙུག་ཕུད་སངས་རྒྱས་དང་མཚུངས་པའི་གཙུག་ཕུད་སངས་རྒྱས་ཀྱི་
[64a.2]གཟུགས་སུ་རྣམ་པར་བསམ་པར་བྱའོ། །དེ་སྟེང་བདག་ཉིད་སངས་རྒྱས་བསྒྱུར། །ཞེས་བྱ་བ་ནི། གཙུག་ཕུད་སངས་རྒྱས་སུའོ། །ལྷག་མ་ནི་གོ་སླའོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་གཙུག་ཕུད་སངས་རྒྱས་ཀྱི་རྣལ་
[64a.3]འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་གཙུག་ཕུད་སངས་རྒྱས་ཀྱི་དམ་ཚིག་གི་ཕྱག་རྒྱ་བཅིངས་ཏེ། བདག་ཉིད་གཙུག་ཕུད་སངས་རྒྱས་སུ་བསམས་ནས། གཙུག་ཕུད་སངས་རྒྱས་ཀྱི་ཕྱག་རྒྱ་ཆེན་པོ་བཅིངས་ལ། རང་གི་གདན་གྱི་མདུན་དུ་ཡི་གེ་ཤྲཱི་
[64a.4]ལས་རལ་པའི་དབུས་ན་པདྨ་ཆེན་པོ་དང་ལྡན་པ་སྤྲུལ་ལ་དེ་ཉིད་ལས་གཙུག་ཕུད་སངས་རྒྱས་ཀྱི་ལྷ་མོའི་གཟུགས་སུ་བསམ་པར་བྱའོ། །དེ་ནས་སྔ་མ་བཞིན་དུ་བསྡུ་བ་བྱས་ལ། ཨོཾ་བུདྡྷ་མ་ཀུ་ཏ་ས་ན་ཡོ་ག་ས་ན་ཡ་ཤྲཱི་ཞེས་བརྗོད་ཅིང་། སྔ་མ་བཞིན་དུ་བཅོམ་ལྡན་འདས་མ་དང་
[64a.5]ལྷན་ཅིག་ཏུ་གྱུར་པར་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་པས་དེས་དེ་འོངས་ནས་དེ་དང་ལྷན་ཅིག་མཉམ་པར་སྦྱོར་བ་བྱས་ནས། དེ་ལུས་ཀྱི་ནང་དུ་ཞུགས་པར་འགྱུར་རོ། །ཕྱིས་གཙུག་ཕུད་སངས་རྒྱས་དང་ཡང་འདྲ་བར་འགྱུར་རོ། །པདྨ་ལ་ནི་བུད་མེད་བསམ། །
[64a.6]ཞེས་བྱ་བ་ནི་པདྨའི་ཏིང་ངེ་འཛིན་གྱི་མཚན་མའི་ཕྱག་རྒྱ་ལ་པདྨའི་ཏིང་ངེ་འཛིན་གྱི་ལྷ་མོར་བསམ་མོ། །དེ་སྟེང་པདྨོར་བདག་བསྒྱུར་ཏེ། །ཞེས་བྱ་བ་ནི་བདག་ཉིད་པདྨའི་ཏིང་ངེ་འཛིན་དེའི་པདྨ་ལ་ཏིང་ངེ་འཛིན་པདྨའི་ལྷ་མོའི་གཟུགས་སྟེང་དུ་བསམ་པར་བྱའོ། །རྩེ་ཞིང་པདྨོ་པདྨོའི་
[64a.7]མཆོག །དག་པའི་དངོས་གྲུབ་ཐོབ་པར་འགྱུར། །ཞེས་བྱ་བ་ནི་བདག་ཉིད་པདྨ་ཏིང་ངེ་འཛིན་གཟུགས་བརྙན་དང་མཚུངས་པར་བསྒོམས་ནས་དེ་ལྟ་བུར་གྱུར་པའི་གཟུགས་བརྙན་དང་མཚུངས་པར་བསྒོམས་པས་དག་པའི་དངོས་གྲུབ་ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་
[64b]
[64b.1]ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པ་ཉིད་ཀྱི་ཏིང་ངེ་འཛིན་པདྨའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་པདྨའི་ཏིང་ངེ་འཛིན་གྱི་ཕྱག་རྒྱ་ཆེན་པོ་བཅིངས་ཏེ། བདག་ཉིད་པདྨའི་ཏིང་ངེ་འཛིན་དུ་བསམ་པར་བྱའོ། །དེ་ནས་ཡི་གེ་
[64b.2]དེ་ཉིད་ལས་པདྨའི་སྟེང་དུ་པདྨའི་ཏིང་ངེ་འཛིན་གྱི་རྡོ་རྗེ་པདྨའི་ཕྱག་རྒྱ་སྤྲུལ་ལ། པདྨོའི་པདྨོ་དེ་ཉིད་ལས། །པདྨའི་ཏིང་ངེ་འཛིན་གྱི་ལྷ་མོའི་གཟུགས་སུ་བསམ་པར་བྱའོ། །དེ་ནས་སྔ་མ་བཞིན་དུ་བསྡུ་བ་ལ་སོགས་པ་བྱས་ཏེ། བཅོམ་ལྡན་འདས་དང་ལྷན་ཅིག་མཉམ་པར་སྦྱོར་བས་བསྒོམས་
[64b.3]ལ་ཨོཾ་པདྨ་པདྨ་སཾ་ཡོ་ག་སཱ་དྷ་མ་ཏི། ཞེས་བརྗོད་ཅིང་ཐུན་བཞིའི་སྦྱོར་བས་ཇི་སྲིད་མངོན་སུམ་དུ་གྱུར་པ་དེ་སྲིད་ཀྱི་བར་དུ་བྱའོ། །དེ་ནས་མཐར་མཚན་ཐོག་ཐག་དེ་ཉིད་བསྒོམས་པ་དང་བྱིན་ནས་དེས་ལྷན་ཅིག་ཏུ་སྦྱོར་བར་བྱེད་ཅིང་དེ་ཉིད་ལུས་ལ་ཞུགས་པར་འགྱུར་རོ། །ཕྱིས་ཏིང་ངེ་འཛིན་པདྨ་
[64b.4]ཉིད་དུ་ཡང་འགྱུར་རོ། །པདྨ་ལ་ནི་བུད་མེད་བསམ། །ཞེས་བྱ་བ་ནི་པདྨ་ངེས་པའི་དབང་ཕྱུག་གི་སྣ་ཚོགས་པདྨ་འདབ་མ་བཞི་པ་ལ་པདྨ་ངེས་པའི་དབང་ཕྱུག་གི་གཟུགས་ཀྱི་ལྷ་མོ་བསམ་མོ། །དེ་སྟེང་སྣ་ཚོགས་བདག་གྱུར་ཏེ། །ཞེས་བྱ་བ་ནི་བཅོམ་ལྡན་འདས་པདྨ་ངེས་པའི་དབང་ཕྱུག་
[64b.5]དེའི་པདྨའི་སྟེང་དུ་བདག་ཉིད་གྱུར་ཏེ་བསྒོམ་པར་བྱའོ། །ཇི་ཞིག་བྱེད་ཅེ་ན། རྩེ་ཞིང་པདྨོ་མཆོག་ཅེས་བྱ་བ་ནི། དབང་པོ་གཉིས་མཉམ་པར་སྦྱོར་བས་སོ། །སྣ་ཚོགས་དངོས་གྲུབ་ཐོབ་པར་འགྱུར། །ཞེས་བྱ་བ་ནི་པདྨ་ངེས་པའི་དབང་ཕྱུག་དེ་ལ་དངོས་གྲུབ་སྣ་ཚོགས་པ་ཞེས་བྱ་བ་
[64b.6]ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་པདྨ་ངེས་པའི་དབང་ཕྱུག་གི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱ་བཅིངས་ཏེ། བདག་ཉིད་པདྨ་
[64b.7]ངེས་པའི་དབང་ཕྱུག་ཏུ་བསྒོམ་མོ། །དེ་ནས་དེ་ཉིད་ཀྱི་ཕྱག་རྒྱ་ཆེན་པོ་བཅིངས་ལ། མདུན་དུ་པདྨའི་དབུས་སུ་སྣ་ཚོགས་པདྨ་འདབ་མ་བཞི་པ་པདྨ་ཕྲ་མོའི་འཁོར་གྱིས་བསྐོར་བར་བསམ་མོ། །དེ་ནས་ཧྲཱིཿཞེས་བྱ་བའི་སྙིང་པོ་འདི་ལས་པདྨ་ངེས་པའི་དབང་ཕྱུག་དེ་ཉིད་ཀྱི་གཟུགས་སུ་
[65a]
[65a.1]བསམ་པར་བྱའོ། །དེ་ནས་སྔ་མ་བཞིན་དུ་བསྡུ་བ་བྱས་ལ་བཅོམ་ལྡན་འདས་དང་ལྷན་ཅིག་པའི་མཉམ་པར་སྦྱོར་བས། ཨོཾ་ཨ་བི་ཤ་པདྨ་སཾ་ཡོ་ག་སཱ་དྷ་ཡ་ཧྲཱིཿཞེས་ཟློས་ཤིང་བསྒོམ་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ནས་དེ་བྱིན་ཏེ། དེ་དང་
[65a.2]ལྷན་ཅིག་མཉམ་པར་སྦྱོར་བ་བྱས་ན། དེ་ཉིད་ལུས་ལ་ཞུགས་ཏེ། ཕྱིས་འདི་པདྨ་ངེས་པའི་དབང་ཕྱུག་དང་ཡང་འདྲ་བར་འགྱུར་རོ། །དེ་ལྟར་དངོས་གྲུབ་ཀྱི་ཡེ་ཤེས་བསྟན་ནས། ད་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་འགྲོ་བ་འདུལ་
[65a.3]བའི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ལ་ཇི་ལྟ་བ་བཞིན་དུ་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་
[65a.4]ཏེ། དེ་ནས་ཞེས་བྱ་བ་ནི་དེའི་ཕྱིར་ཏེ། དངོས་གྲུབ་ཀྱི་ཡེ་ཤེས་བསླབས་པའི་རྗེས་ཐོགས་ལ་ཞེས་བྱ་བའི་དོན་ཏོ། །ཇི་ལྟ་བ་བཞིན་དུ་ཞེས་བྱ་བ་ནི། མནའི་སྙིང་པོ་བྱིན་ལ་པདྨའི་རིགས་ཀྱི་གཟུངས་ཀྱི་དཀྱིལ་འཁོར་གྱི་གསང་བ་དང་དེའི་ཕྱག་རྒྱ་ཆེན་པོ་ནི། གསང་བའི་ཕྱག་རྒྱ་ཆེན་
[65a.5]པོ་སྟེ། དེའི་ཡེ་ཤེས་བསླབ་པར་བྱའོ། །སོར་མོའི་རྩེ་སྤྲད་པདྨོར་བྱ། །ཞེས་བྱ་བ་ནི་ཐལ་མོ་མཉམ་པར་སྦྱོར་བའི་སོར་མོ་ཐམས་ཅད་ཀྱི་རྩེ་མོ་པདྨ་ཁ་བྱེ་བ་ལྟར་བྱས་པའི་རྣམ་པར་སྣང་མཛད་ཀྱི་ཕྱག་རྒྱའོ། །རིག་པ་ནི་འདི་ཡིན་ཏེ། ཨོཾ་སརྦྦ་ཏ་ཐཱ་ག་ཏ་དྷརྨྨ་ས་མ་ཡེ་ཧཱུཾ་ཞེས་པ་རིག་པ་
[65a.6]འདི་ཟློས་ཤིང་བདག་ཉིད་རྣམ་པར་སྣང་མཛད་དུ་བསྒོམས་ན། རྣམ་པར་སྣང་མཛད་དང་འདྲ་བར་འགྲུབ་པར་འགྱུར་རོ། །རྡོ་རྗེ་ཁྲོ་བོ་མཛུབ་གཉིས་སྤྲད། །ཅེས་བྱ་བ་ནི་རྡོ་རྗེ་ཁུ་ཚུར་གཉིས་ཀྱི་མཛུབ་མོ་གཉིས་བརྐྱང་ལ། རྡོ་རྗེ་དབྱིངས་ལས་བཤད་པའི་རྡོ་རྗེ་སེམས་དཔའི་རྣལ་འབྱོར་
[65a.7]བྱས་ལ་འདི་ཉིད་བཅིངས་ཏེ། ཨོཾ་བཛྲ་ས་མ་ཡེ་ཧཱུཾ་ཞེས་ཟློས་ཤིང་བདག་ཉིད་རྡོ་རྗེ་སེམས་དཔར་བསྒོམས་ན། རྡོ་རྗེ་སེམས་དཔའ་ཉིད་དུ་འགྲུབ་པར་འགྱུར་རོ། །རྩེ་གཉིས་ནོར་བུ་ཞེས་བྱ་བ་ནི། རྡོ་རྗེ་ཁུ་ཚུར་གཉིས་ཀྱི་མཛུབ་མོ་གཉིས་ནོར་བུ་ལྟར་བྱས་ཏེ། རྡོ་རྗེ་དབྱིངས་ལས་བཤད་
[65b]
[65b.1]པའི་རྡོ་རྗེ་སྙིང་པོའི་རྣལ་འབྱོར་བྱས་ལ་འདི་ཉིད་བཅིངས་ཏེ། ཨོཾ་མ་ཎི་རཏྣ་ས་མ་ཡེ་ཧཱུཾ་ཞེས་བྱ་བ་དང་། བདག་ཉིད་རྡོ་རྗེ་སྙིང་པོར་བསྒོམས་ན་རྡོ་རྗེ་སྙིང་པོ་དང་འདྲ་བར་འགྲུབ་པར་འགྱུར་རོ། །པདྨོ་ལྟར་ཞེས་བྱ་བ་ནི། རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་ཕན་ཚུན་གདོང་སྦྱར་
[65b.2]ལ་པདྨའི་འདབ་མ་ལྟར་བྱས་པ་འདི་ནི་རྡོ་རྗེ་སྤྱན་གྱིའོ། །རྡོ་རྗེ་དབྱིངས་ལས་གསུངས་པའི་རྡོ་རྗེ་ཆོས་ཀྱི་རྣལ་འབྱོར་བྱས་ལ་འདི་བཅིངས་ཏེ། ཨོཾ་པདྨ་ས་མ་ཡེ་ཧཱུཾ་ཞེས་བྱ་བའི་རིག་པ་བརྗོད་ཅིང་བདག་ཉིད་རྡོ་རྗེ་ཆོས་སུ་བསྒོམས་ན་རྡོ་རྗེ་སྤྱན་དང་འདྲ་བར་འགྲུབ་པར་འགྱུར་རོ། །རྡོ་རྗེ་བསྡམས་
[65b.3]པའང་དེ་བཞིན་ཏེ། །ཞེས་བྱ་བ་ནི། རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་ཇི་ལྟར་གྲགས་པའི་རྡོ་རྗེ་བསྡམས་པ་བཅིངས་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ལས་ཀྱི་རྣལ་འབྱོར་བྱས་ལ་ཕྱིས་ཕྱག་རྒྱ་འདི་བཅིངས་ཏེ། ཨོཾ་བཛྲ་ཀརྨ་ས་མ་
[65b.4]ཡ་ཧཱུཾ་ཞེས་ཟློས་ཤིང་བདག་ཉིད་རྡོ་རྗེ་ལས་སུ་བསྒོམས་ན། དེ་རྡོ་རྗེ་ལས་དང་འདྲ་བར་འགྲུབ་པར་འགྱུར་རོ། །རྡོ་རྗེ་བཅིངས་པ་བསྡམས་ནས་ནི། །གུང་མོ་གཉིས་ནི་མྱུ་གུར་བསྒྲེང་། །མཛུབ་མོ་སྲིན་ལག་གཉིས་བཀུག་པའི། །ཕྱག་རྒྱ་ཤཱཀྱ་ཐུབ་པར་བསྟན། །ཞེས་བྱ་བ་ནི་རྡོ་རྗེ་
[65b.5]བསྡམས་པ་ལས། གུང་མོ་གཉིས་མྱུ་གུ་ལྟར་བསྒྲེང་ལ། མཛུབ་མོ་དང་སྲིན་ལག་གཉིས་པདྨ་ལྟར་བྱས་པ་འདི་ནི་ཤཱཀྱ་ཐུབ་པའི་རྣམ་པར་སྣང་མཛད་དང་། རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱའོ། །ཆོས་ཀྱི་རྡོ་རྗེ་སྙིང་གར་གཞག །བསྒྱུར་ཏེ་དཔྲལ་བར་གཞག་པ་དང་། །
[65b.6]ཏིང་ངེ་འཛིན་ཚུལ་པང་དུ་གཞག །བསྒྱུར་ནས་སྤྱི་བོར་གཞག་པར་བྱ། །ཞེས་བྱ་བ་ནི། རྡོ་རྗེ་བསྡམས་པ་དམ་བྱས་ལ། །གུང་མོ་གཉིས་ནི་མཉམ་སྦྱར་བ། །རྡོ་རྗེ་ཆོས་ཞེས་གྲགས་པ་ཡི། །དངོས་གྲུབ་ཐམས་ཅད་སྒྲུབ་བྱེད་པའོ། །འདི་སྙིང་གར་གཞག་པ་ནི་འགྲོ་བ་
[65b.7]འདུལ་བ་དང་རྡོ་རྗེ་སེམས་མའི་གནས་ན་གནས་པའི་ཆོས་ཀྱི་རྡོ་རྗེ་མའིའོ། །དེ་ཉིད་ཡོངས་སུ་བསྒྱུར་ནས་དཔྲལ་བའི་ཕྱོགས་སུ་གཞག་པ་ནི། བཅོམ་ལྡན་འདས་གཙུག་ཕུད་སངས་རྒྱས་དང་། རྡོ་རྗེ་རིན་ཆེན་མའི་གནས་ཀྱི་སངས་རྒྱས་དབང་བསྐུར་མའིའོ། །དེ་ཉིད་ཁར་བཀན་ནས་
[66a]
[66a.1]གཞག་པ་ནི། པདྨ་ཏིང་ངེ་འཛིན་གྱི་གནས་སུ་པདྨ་ཏིང་ངེ་འཛིན་མར་འགྱུར་ལ། རྡོ་རྗེ་ཆོས་མའི་གནས་སུ་དམ་ཚིག་སྒྲོལ་མར་འགྱུར་རོ། །དེ་ཉིད་བསྒྱུར་ནས་སྤྱི་བོར་གཞག་པ་ནི། །པདྨའི་ངེས་པའི་དབང་ཕྱུག་གི་གནས་སུ་པདྨ་ངེས་པའི་དབང་ཕྱུག་གི་གཟུངས་
[66a.2]མར་འགྱུར་ལ། རྡོ་རྗེ་ལས་མའི་གནས་སུ་སྣ་ཚོགས་ཀྱི་སྒོར་འགྱུར་རོ། །རྡོ་རྗེ་དབྱིངས་ཀྱི་དབང་བཅིངས་ལ། །མཆོད་རྟེན་པདྨོའི་ཚུལ་དུ་ནི། །གུང་མོ་གཉིས་ནི་བཅིངས་གྱུར་ན། །སངས་རྒྱས་པདྨོ་ཡིན་པར་བཤད། །ཅེས་བྱ་བ་ནི། རྡོ་རྗེ་དབྱིངས་ཀྱི་དབང་ཕྱུག་མའི་མིང་ཅན་ཤཱཀྱ་
[66a.3]ཐུབ་པའི་ཕྱག་རྒྱ་སྟེ། གུང་མོ་གཉིས་པདྨ་ལྟར་བྱས་པ་ནི་སངས་རྒྱས་པདྨའི་གཟུངས་ཀྱིའོ། །དེ་ལས་མཐེ་བོ་རྡོ་རྗེ་དང་། །མཛུབ་གཉིས་རལ་གྲི་ལྕགས་ཀྱུར་བྱ། །ཞེས་བྱ་བ་ནི། སངས་རྒྱས་པདྨའི་གཟུངས་ཀྱི་ཕྱག་རྒྱ་ལས་མཐེ་བོང་གཉིས་རྡོ་རྗེར་བྱས་ལ། གཡས་པའི་མཛུབ་
[66a.4]མོ་བསྒྲེང་བ་ནི་རལ་གྲིར་བྱ་བ་དང་། གཡོན་པའི་མཛུབ་མོ་ལྕགས་ཀྱུར་བྱས་པ་ནི་པདྨ་རྒྱལ་པོའི་གཟུངས་ཀྱིའོ། །དེ་ལས་མཐེ་བོ་བསྣོལ་ནས་ཀྱང་། །མཛུབ་མོས་མཛུབ་མོ་རབ་བཟུང་ལ། །དྲངས་ན་རབ་དགའ་ཡིན་པར་བཤད། །ཅེས་བྱ་བ་ནི་པདྨ་རྒྱལ་པོའི་གཟུངས་ཀྱི་ཕྱག་
[66a.5]རྒྱ་དེ་ཉིད་ལས། མཐེ་བོ་གཉིས་རྡོ་རྗེ་བཅིངས་པའི་ཚུལ་གྱིས་བསྣོལ་ལ་མཛུབ་མོ་གཡས་པའི་ལྕགས་ཀྱུས་གཡོན་པའི་ལོགས་ལས་མདའ་འདྲེན་པའི་ཚུལ་དུ་བྱེད་པ་ནི་པདྨ་ཆགས་པའིའོ། །ལེགས་སོ་ཞེས་པའང་དེ་བཞིན་ཏེ། །ཞེས་བྱ་བ་ནི་པདྨ་ཆགས་པའི་གཟུངས་ཀྱི་ཕྱག་རྒྱ་
[66a.6]ལས། མཛུབ་མོ་གཉིས་མཐེ་བོ་གཉིས་ཀྱིས་སེ་གོལ་གཏོགས་པའི་ཚུལ་དུ་བྱེད་པ་ནི་པདྨོ་ལེགས་སོ་ཞེས་བྱ་བའི་ཕྱག་རྒྱ་ཆེན་པོའོ། །རྡོ་རྗེ་བསྡམས་པ་དམ་བྱས་ལ། །མཐེབ་གཉིས་མཉམ་སྟེ་བཅུག་ནས་ཀྱང་། །མཛུབ་གཉིས་རྩེ་བཀུག་རྩེ་མོ་ནི། །དཔྲལ་གཞག་གུང་མོ་པདྨོར་བྱ། །
[66a.7]ཞེས་བྱ་བ་ནི་རྡོ་རྗེ་བསྡམས་པ་ལས་མཐེ་བོ་གཉིས་བཅུག་ནས་གུང་མོ་གཉིས་པདྨ་ལྟར་བྱས་ལ། མཛུབ་མོ་གཉིས་མྱུ་གུ་ལྟར་བསྒྲེང་ནས་ཚིགས་གསུམ་པ་བཀུག་སྟེ། རྩེ་མོ་གཉིས་དཔྲལ་བའི་ཕྱོགས་སུ་གཞག་པ་ནི་པདྨ་ཁྲོ་གཉེར་གྱི་གཟུངས་ཀྱིའོ། །དེ་ཉིད་ལས་ནི་སྙིང་གར་ཡང་། །
[66b]
[66b.1]ཉི་མའི་དཀྱིལ་འཁོར་སྟོན་པ་དང་། །ཞེས་བྱ་བ་ནི། པདྨོ་ཁྲོ་གཉེར་གྱི་གཟུངས་ཀྱི་ཕྱག་རྒྱ་ལས། སྙིང་གར་ཉི་མའི་དཀྱིལ་འཁོར་སྟོན་པའི་ཚུལ་དུ་བྱེད་པ་འདི་ནི་པདྨ་ཉི་མའི་གཟུངས་ཀྱི་ཕྱག་རྒྱའོ། །དེ་ཉིད་ལས་ནི་རྒྱལ་མཚན་བཅིངས། །ཞེས་བྱ་བ་ནི། པདྨ་ཉི་མའི་གཟུངས་ཀྱི་ཕྱག་རྒྱ་ཉིད་ལས་
[66b.2]དཔུང་པ་གཉིས་བརྐྱང་ལ་སྤྱི་བོར་གཞག་པ་ནི་པདྨ་ཟླ་བའི་དཔལ་གྱི་གཟུངས་ཀྱི་ཕྱག་རྒྱའོ། །ལྟག་པར་རབ་ཏུ་བརྐྱང་བར་བྱ། །ཞེས་བྱ་བ་ནི། དེ་ཉིད་མགོ་བོའི་རྒྱབ་ཏུ་བརྐྱང་ནས་སོར་མོའི་རྩེ་མོ་རྣམས་སོ་སོར་གཞག་པ་ནི་ཞལ་བཅུ་གཅིག་པའི་གཟུངས་ཀྱིའོ། །རྡོ་རྗེ་བསྡམས་པ་དམ་བཅས་ལ། མཛུབ་
[66b.3]གཉིས་རྩེ་མོ་པདྨོར་དགུག །ཅེས་བྱ་བ་ནི་རྡོ་རྗེ་བསྡམས་པ་ལས་མཛུབ་མོ་གཉིས་བརྐྱང་ལ་ཅུང་ཟད་བསྐུམ་ནས། ཕན་ཚུན་གདོང་སྦྱར་ནས་གཞག་པ་འདི་ནི་པདྨ་སྒྲོལ་མའི་གཟུངས་ཀྱིའོ། །དེ་བཞིན་པདྨོ་རལ་གྲི་སྟེ། །མཛུབ་མོ་པདྨོར་བྱས་པ་སྦྱར། །ཞེས་བྱ་བ་ནི། པདྨ་སྒྲོལ་མའི་གཟུངས་
[66b.4]ཀྱི་ཕྱག་རྒྱ་ཉིད་ལས་མཛུབ་མོ་གཉིས་ཕན་ཚུན་གདོང་སྦྱར་ལ། ཚིགས་གསུམ་པ་གཉིས་ཅུང་ཟད་བཀུག་པ་ནི་པདྨ་རལ་གྲི་སྟེ་པདྨ་རྣོན་པོའི་གཟུངས་ཀྱིའོ། །རྡོ་རྗེ་བསྡམས་པ་དམ་བྱས་ལ། །མཐེ་བོ་གཡོན་པ་ནང་དུ་གཞུག །དེ་སྟེང་མཐེ་བོ་ཐོ་བར་བསྒྲེང་། །སོར་མོ་ཀུན་ཀྱང་བད་མཐེའུ་ཆུང་། །
[66b.5]ཞེས་བྱ་བ་ནི། རྡོ་རྗེ་བསྡམས་པ་ལས་གཡོན་པའི་མཐེ་བོ་ནང་དུ་བཅུག་ལ། གཡས་པའི་མཐེ་བོ་བསྒྲེང་ལ་མཐེའུ་ཆུང་གཉིས་ཕན་ཚུན་ལྟོ་སྦྱར་ནས་པདྨ་ལྟར་བྱས་ཏེ། སོར་མོ་ལྷག་མ་རྣམས་སྟེང་དུ་བརྐྱང་བར་བྱས་པ་འདི་ནི་པདྨ་རྒྱུའི་གཟུངས་ཀྱིའོ། །དེ་ལས་ཐམས་ཅད་བཀུག་ནས་
[66b.6]ཀྱང་། །མཐེ་ཆུང་པདྨ་ལྟ་བུར་བྱ། །མཐེ་བོས་གཡས་དང་སྦྱོར་བ་ཡིས། །མཛུབ་མོས་ནོར་བུ་བསྒྲེང་བར་བྱ། །ཞེས་བྱ་བ་ནི་པདྨ་རྒྱུའི་གཟུངས་ཀྱི་ཕྱག་རྒྱ་ལས། རྡོ་རྗེ་བསྡམས་པའི་མཐེའུ་ཆུང་གཉིས་པདྨར་བྱས་ལ། གཡས་པའི་མཛུབ་མོ་མཐེ་བོས་ཕྲེང་བ་འདྲེན་པའི་ཚུལ་དུ་བྱེད་པ་
[66b.7]འདི་ནི་པདྨ་བསྲུང་བའི་གཟུངས་ཀྱིའོ། །རྡོ་རྗེ་བསྡམས་པ་དམ་བྱས་ལ། །མཐེའུ་ཆུང་པདྨ་ལྟ་བུར་བྱ། །མཛུབ་མོ་བསྙམས་པ་པདྨའི་སྤྱན། །རབ་ཏུ་གར་བྱེད་བཟློག་པར་བྱ། །ཞེས་བྱ་བ་ནི། རྡོ་རྗེ་བསྡམས་པ་ལས་མཐེའུ་ཆུང་གཉིས་པདྨ་ལྟ་བུ་དང་། མཛུབ་མོ་གཉིས་བརྐྱང་ནས་
[67a]
[67a.1]ཚིགས་གསུམ་པ་བཀུག་ནས་མིག་ལྟ་བུར་བྱས་ཏེ་གར་བྱས་ནས་ལྡོག་སྟེ། དཔྲལ་བའི་ཕྱོགས་སུ་མིག་གི་ཚུལ་དུ་གཞག་པ་འདི་ནི་པདྨ་གར་གྱི་དབང་ཕྱུག་གི་གཟུངས་ཀྱིའོ། །རྡོ་རྗེ་བསྡམས་པ་དམ་བྱ་ལ། །མཐེའུ་ཆུང་པདྨ་ལྟ་བུར་བྱ། །ནང་དུ་མཛུབ་མོ་གཉིས་
[67a.2]བཀུག་སྟེ། །མཐེ་བོ་གཉིས་ནི་གོ་ཆར་བྱ། །ཞེས་བྱ་བ་ནི། རྡོ་རྗེ་བསྡམས་པ་ལས་མཐེའུ་ཆུང་གཉིས་པདྨ་ལྟར་བྱས་ལ་མཛུབ་མོ་གཉིས་བཀུག་སྟེ་མཐེ་བོང་གཉིས་བཀབ་པ་འདི་ནི་པདྨ་བསྲུང་བའི་གཟུངས་ཀྱིའོ། །དེ་ལས་མཐེབ་གཉིས་མཆེ་བར་བྱ། །ཞེས་བྱ་བ་ནི། པདྨ་བསྲུང་བའི་
[67a.3]གཟུངས་ཀྱི་ཕྱག་རྒྱ་ལས་མཐེ་བོ་གཉིས་བརྐྱང་ནས་ཁར་གཞག་པ་འདི་ནི་པདྨ་གནོད་སྦྱིན་གྱི་གཟུངས་ཀྱིའོ། །མཐེབ་གཉིས་ནང་དུ་གཞུག་པར་བྱ། །ཞེས་བྱ་བ་ནི་པདྨ་བསྲུང་བའི་གཟུངས་ཀྱི་ཕྱག་རྒྱ་ལས། མཐེ་བོ་གཉིས་ནང་དུ་བཅུག་ལ། མཛུབ་མོ་གཉིས་ཀྱི་ཁུ་ཚུར་གྱིས་འཛིན་པ་
[67a.4]འདི་ནི་པདྨ་ཁུ་ཚུར་གྱི་གཟུངས་ཀྱི་ཕྱག་རྒྱའོ། །པདྨ་སྒེག་མོ་ལ་སོགས་པ་ནས། པདྨ་འབེབས་པའི་མཐར་ཐུག་པ་རྣམས་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པ་ཉིད་ཀྱི་དམ་ཚིག་གི་ཕྱག་རྒྱ་ནི་འདིར་ཕྱག་རྒྱ་ཆེན་པོར་འགྱུར་བ་ཡིན་ནོ། །དེ་ནས་ཞེས་བྱ་བ་ནི་ཕྱག་རྒྱ་
[67a.5]ཆེན་པོ་བཅིངས་པ་འདི་ལས་དུས་ཕྱིས་ཡིན་ནོ་ཞེས་བྱ་བའི་དོན་ཏོ། །རབ་ཏུ་ཕྱེ་ནས་བཤད་པས་ན་རབ་ཏུ་བཤད་པར་བྱའོ། །དམ་ཚིག་མཆོག་ནི་བླ་མེད་དེ། །ཞེས་བྱ་བ་ནི་ཤིན་ཏུ་ཕུལ་དུ་བྱུང་བའོ། །རྡོ་རྗེ་ནང་དུ་བསྡམས་ནས་ཀྱང་། །མཛུབ་གཉིས་པདྨོ་འདྲར་བྱས་ལ། །མཐེ་བོ་ཕན་
[67a.6]ཚུན་བསྣོལ་བ་ནི། །གསང་བ་སྣ་ཚོགས་དབང་ཕྱུག་བཤད། །ཅེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་ལ། མཛུབ་མོ་གཉིས་པདྨ་ལྟ་བུ་དང་མཐེ་བོ་གཉིས་ཕན་ཚུན་བསྣོལ་བ་འདི་ནི་འགྲོ་བ་འདུལ་བའི་གཟུངས་ཀྱི་དམ་ཚིག་གི་ཕྱག་རྒྱའོ། །དེ་བཞིན་རྡོ་རྗེ་བསྡམས་པ་ལས། །མཐེ་ཆུང་
[67a.7]གུང་མོ་མཉམ་བསྒྲེངས་ལ། །མཐེ་བོས་རྡོ་རྗེ་སྦྱར་བ་ནི། །གཙུག་ཕུད་དབུས་ན་དེ་བཞིན་གཤེགས། །ཞེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་པའི་མཐེ་བོ་དང་། གུང་མོ་དང་། མཐེའུ་ཆུང་དང་གསུམ་མྱུ་གུ་ལྟར་བྱས་པ་འདི་ནི་གཙུག་ཕུད་སངས་རྒྱས་ཀྱི་གཟུངས་ཀྱིའོ། །
[67b]
[67b.1]དེ་བཞིན་རྡོ་རྗེ་བསྡམས་པ་ལ། །མཐེ་བོ་པདྨ་འདྲ་བྱས་ཏེ། །ཁ་ནས་དབྱུང་ལྟར་བྱས་ནས་ཀྱང་། །པང་དུ་ཏིང་ངེ་འཛིན་ལྟར་གཞག །ཅེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་པའི་མཐེ་བོ་གཉིས་པདྨ་ལྟ་བུ་དང་ཁ་ནས་འབྱིན་པའི་ཚུལ་དུ་བྱས་ཏེ། པང་དུ་བཀན་ནས་ཏིང་ངེ་འཛིན་
[67b.2]གྱིས་ཚུལ་དུ་གཞག་པ་ནི་པདྨའི་ཏིང་ངེ་འཛིན་གྱི་གཟུངས་ཀྱིའོ། །དེ་བཞིན་རྡོ་རྗེ་བསྡམས་པ་ལས། །སོར་མོ་ཀུན་གྱི་ངོས་རྣམས་ནི། །མཉམ་པར་རབ་ཏུ་བསྡམས་ནས་ཀྱང་། །མཛུབ་གཉིས་རྡོ་རྗེ་མཉམ་པའོ། །ཞེས་བྱ་བ་ནི་རྡོ་རྗེ་བསྡམས་པ་ནང་དུ་བྱས་ལ་སོར་མོ་ཐམས་ཅད་ཕན་
[67b.3]ཚུན་ལྟོ་སྦྱར་ལ་མཛུབ་མོ་གཉིས་མྱུ་གུ་ལྟར་བྱས་པ་འདི་ནི་པདྨ་ངེས་པའི་དབང་ཕྱུག་གི་གཟུངས་ཀྱིའོ། །དེ་བཞིན་རྡོ་རྗེ་བསྡམས་པ་ལས། །མཛུབ་གཉིས་པདྨོ་འདྲར་བྱས་ལ། །མཐེ་བོང་གཉིས་ཀྱང་བསྣོལ་ནས་ནི། །མཛུབ་མོ་གཉིས་ནི་རྩེ་སྤྲད་དགུག །ཅེས་བྱ་བ་ནི་རྡོ་རྗེ་བསྡམས་པ་
[67b.4]ནང་དུ་བཅིངས་ལ། མཛུབ་མོ་དང་གུང་མོ་གཉིས་པདྨ་ལྟ་བུར་བྱས་ཏེ། མཐེ་བོང་གཉིས་བསྣོལ་བ་འདི་ནི་སངས་རྒྱས་པདྨའི་གཟུངས་ཀྱིའོ། །དེ་བཞིན་རྡོ་རྗེ་བསྡམས་པ་ལས། །མཐེབ་གཉིས་རྡོ་རྗེ་རབ་སྦྱར་ལ། །མཛུབ་མོ་རལ་གྲི་ལྕགས་ཀྱུར་བྱ། །མཐེ་ཆུང་པདྨོ་འདྲར་བྱས་པའོ། །
[67b.5]ཞེས་བྱ་བ་ནི། རྡོ་རྗེ་བསྡམས་པ་ནང་དུ་བཅིངས་ལ། མཐེ་བོང་གཉིས་མྱུ་གུ་ལྟར་བྱས་ནས། གཡས་པའི་མཛུབ་མོ་རལ་གྲི་དང་། གཡོན་པའི་མཛུབ་མོ་ལྕགས་ཀྱུ་ལྟ་བུ་དང་། མཐེའུ་ཆུང་གཉིས་པདྨ་ལྟར་བྱས་པ་འདི་ནི་པདྨའི་རྒྱལ་པོའི་གཟུངས་ཀྱིའོ། །དེ་བཞིན་དུ་ནི་བསྒྱུར་ནས་ཀྱང་། །
[67b.6]མཛུབ་མོ་གཡོན་པ་བསྒྲེངས་ནས་ཀྱང་། །མཛུབ་མོ་མཐེ་བོང་རྩེ་སྦྱར་བས། །དམ་དུ་བཟུང་སྟེ་དགུག་ལྟར་བྱ། །ཞེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་ལ་གཡོན་པ་བསྒྱུར་ནས། གཡོན་པའི་མཛུབ་མོ་བསྒྲེང་ལ། གཡས་པའི་མཐེ་བོ་དང་མཛུབ་མོས་མདའ་འདྲེན་པའི་ཚུལ་དུ་བྱེད་
[67b.7]པ་འདི་ནི་པདྨ་ཆགས་པ་གཟུངས་ཀྱིའོ། །དེ་བཞིན་མཉམ་བྱས་མཛུབ་མོ་གཉིས། །བཀུག་ལ་མཐེ་བོས་མནན་པ་ནི། །པདྨ་དགྱེས་པ་བདག་ཉིད་ཆེ། །ལེགས་སོ་ཞེས་པ་སྦྱིན་བྱེད་པ། །ཞེས་བྱ་བ་ནི་པདྨ་ཆགས་པའི་གཟུངས་ཀྱི་ཕྱག་རྒྱ་ཉིད་ལས། རྡོ་རྗེ་བསྡམས་པ་ནང་དུ་བཅིངས་པའི་མཛུབ་
[68a]
[68a.1]མོ་གཉིས་མཐེ་བོ་གཉིས་ཀྱིས་ལེགས་སོ་ཞེས་བྱ་བ་སྟེར་བའི་ཚུལ་དུ་བྱེད་པ་འདི་ནི་པདྨ་དགྱེས་པའི་གཟུངས་ཀྱིའོ། །དེ་བཞིན་རྡོ་རྗེ་བསྡམས་པ་ལས། །སོར་མོ་རྣམས་ཀྱི་ངོས་སྦྱར་ལ། །མཐེ་བོང་གཉིས་ཀྱིས་མནན་ནས་ནི། །མཛུབ་མོ་མཉམ་པར་སྦྱར་བའོ། །ཞེས་བྱ་
[68a.2]བ་ནི་རྡོ་རྗེ་བསྡམས་པ་ནང་དུ་བཅིངས་ལ། སོར་མོ་ཐམས་ཅད་ཕན་ཚུན་གདོང་སྦྱར་ནས། མཛུབ་མོ་གཉིས་མྱུ་གུ་ལྟར་བྱས་ནས། མཐེ་བོ་གཉིས་ཀྱིས་དམ་དུ་བཟུང་སྟེ། དཔྲལ་བའི་ཕྱོགས་སུ་གཞག་པ་འདི་ནི་པདྨ་ཁྲོ་གཉེར་མའོ། །དེ་ཉིད་སྙིང་གར་ཉི་མ་བྱ། །ཞེས་བྱ་བ་ནི་
[68a.3]ཁྲོ་གཉེར་གྱི་ཕྱག་རྒྱ་ཉིད་སྙིང་གར་ཉི་མའི་དཀྱིལ་འཁོར་གྱི་ཚུལ་དུ་བྱེད་པ་ནི་པདྨ་ཉི་མའི་གཟུངས་ཀྱིའོ། །སྤྱི་བོར་པདྨོ་རྒྱལ་མཚན་བྱ། །ཞེས་བྱ་བ་ནི་པདྨ་ཉི་མའི་གཟུངས་ཀྱི་ཕྱག་རྒྱ་ཉིད་ལས་དཔུང་པ་གཉིས་བརྐྱང་ནས་སྤྱི་བོར་འཇོག་པ་འདི་ནི་པདྨ་ཟླ་བའི་རྒྱལ་མཚན་གྱི་གཟུངས་
[68a.4]ཀྱིའོ། །ཕབ་སྟེ་ཁ་འགྲམ་གཞག་པ་ནི། །པདྨ་ཆེར་དགོད་པ་ཡི་ཚུལ། །ཞེས་བྱ་བ་ནི་པདྨ་ཟླ་བ་རྒྱལ་མཚན་གྱི་གཟུངས་ཀྱི་ཕྱག་རྒྱ་ཉིད་དགོད་པའི་ཚུལ་གྱིས་བསྐོར་ནས་ཁའི་ཕྱོགས་སུ་གཞག་པ་འདི་ནི་པདྨ་བཞད་པའི་གཟུངས་ཀྱིའོ། །རྡོ་རྗེ་ནང་དུ་བསྡམས་བྱས་ནས། །ཆོས་ཀྱི་རྡོ་རྗེ་
[68a.5]ཚུལ་བྱས་ཏེ། །མཐེའུ་ཆུང་སྤྱི་བོར་རབ་མཉམ་པ། །འདི་ནི་སྒྲོལ་མའི་དམ་ཚིག་ཡིན། །ཞེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་ལ་གུང་མོ་གཉིས་མྱུ་གུ་ལྟར་བྱས་ལ། མཐེའུ་ཆུང་དང་མཐེ་བོ་ཡང་མྱུ་གུ་ལྟར་བྱས་པ་འདི་ནི་པདྨ་སྒྲོལ་མའི་གཟུངས་ཀྱིའོ། །དེ་བཞིན་རྡོ་རྗེ་བསྡམས་
[68a.6]པ་ལས། །མཛུབ་གུང་པདྨོ་རལ་གྲིར་བྱ། །ཞེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་ལ་མཛུབ་མོ་གཉིས་པདྨ་རལ་གྲི་ལྟ་བུར་བྱས་པ་འདི་ནི་པདྨ་རྣོན་པོའི་གཟུངས་ཀྱིའོ། །དེ་བཞིན་ནང་དུ་འཁོར་ལོ་བྱ། །ཞེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་ལ། གཡོན་པའི་མཐེ་བོང་ནང་དུ་
[68a.7]བཅུག་སྟེ། གཡས་པའི་མཐེ་བོས་སྟེང་དུ་བརྐྱང་ནས་མཐེའུ་ཆུང་གཉིས་པདྨ་ལྟར་བྱས་ཏེ། རྡོ་རྗེ་བསྡམས་པ་ནང་དུ་བཅིངས་པ་མ་བཀྲོལ་བར་སོར་མོ་ལྷག་མ་རྣམས་འཁོར་ལོའི་ཚུལ་དུ་བརྐྱང་བ་འདི་ནི་རྡོ་རྗེ་རྒྱུའི་གཟུངས་ཀྱིའོ། །བཟླས་པ་ཟིན་པ་དེ་བཞིན་ནོ། །ཞེས་བྱ་བ་ནི་པདྨ་རྒྱུའི་
[68b]
[68b.1]གཟུངས་ཀྱི་ཕྱག་རྒྱ་ལས་རྡོ་རྗེ་བསྡམས་པ་ནང་དུ་བཅིང་བའི་མཐེའུ་ཆུང་གཉིས་པདྨ་ལྟར་བྱས་ལ་གཡས་པའི་མཐེ་བོ་དང་མཛུབ་མོ་གཉིས་ཀྱིས་བགྲང་ཕྲེང་འདྲེན་པའི་ཚུལ་དུ་བྱེད་པ་འདི་ནི་པདྨ་བསྲུང་བའི་གཟུངས་ཀྱིའོ། །དེ་བཞིན་རྡོ་རྗེ་བསྡམས་པ་ལས། །མཐེབ་མཛུབ་སྤྲད་དེ་
[68b.2]གཉིས་སུ་བྱ། །ཞེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་ལ། གཉིས་སུ་བྱས་པའི་སོ་སོའི་མཐེབ་མོ་དང་། མཛུབ་མོའི་ལྟོ་སྦྱར་ལ་གུང་མོ་གཉིས་བསྐུམས་ཏེ། སྲིན་ལག་གཉིས་ཀྱང་ཅུང་ཟད་བསྐུམས་ནས། མཐེའུ་ཆུང་གཉིས་བརྐྱང་སྟེ་ཕྲག་པ་གཉིས་སུ་འཛིན་པའི་ཚུལ་དུ་
[68b.3]བྱེད་པ་ནི་མཐེབ་མཛུབ་སྤྲད་པ་གཉིས་སུ་བྱས་པ་སྟེ་པདྨ་གར་གྱི་དབང་ཕྱུག་གི་གཟུངས་ཀྱིའོ། །དེ་ནས་སྙིང་གར་སྦྱར་བ་ནི། །གསང་བ་བསྲུང་བ་ཡིན་པར་བཤད། །ཅེས་བྱ་བ་ནི་པདྨ་གར་གྱི་དབང་ཕྱུག་གི་གཟུངས་ཀྱི་ཕྱག་རྒྱ་ཉིད་ལས་རྡོ་རྗེ་བསྡམས་པ་ནང་དུ་བཅིངས་ལ་སྙིང་གར་
[68b.4]གཞག་པ་འདི་ནི་པདྨ་བསྲུང་བའི་གཟུངས་ཀྱིའོ། །དེ་བཞིན་རྡོ་རྗེ་བསྡམས་པ་ལས། །མཐེ་ཆུང་པདྨོ་འདྲར་བྱས་ལ། །མཛུབ་གཉིས་ཤིན་ཏུ་བཀུག་ནས་ཀྱང་། །མཐེབ་གཉིས་ཕྱིར་བསྐྱེད་མཆེ་བ་ཅན། །ཞེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་པའི་མཐེ་ཆུང་གཉིས་པདྨ་ལྟར་བྱས་
[68b.5]ལ་མཛུབ་མོ་གཉིས་དགུག་པ་དང་མཐེ་བོ་གཉིས་བཀྱེད་ནས་ཁར་གཞག་པ་འདི་ནི་པདྨ་གནོད་སྦྱིན་གྱི་གཟུངས་ཀྱིའོ། །དེ་ལས་ཁུ་ཚུར་ཚུལ་གྱིས་ནི། །མཐེབ་གཉིས་ངོས་ནི་བཙིར་བ་ནི། །པདྨ་གསང་བ་ཁུ་ཚུར་ཆེ། །དམ་ཚིག་མཆོག་ཏུ་རབ་བརྟགས་པ། །ཞེས་བྱ་བ་ནི་པདྨ་གནོད་སྦྱིན་
[68b.6]གྱི་གཟུངས་ཉིད་ལས་མཐེ་བོང་གཉིས་མཐེའུ་ཆུང་གི་བར་དུ་བཅུག་ལ། མཛུབ་མོ་གཉིས་བསྐུམ་པའི་རྩེ་མོས་བཙིར་བ་ནི་པདྨ་ཁུ་ཚུར་གྱི་གཟུངས་ཀྱི་དམ་ཚིག་གི་ཕྱག་རྒྱའོ། །པདྨ་ལཱ་སྱེ་ལ་སོགས་པ། །དེ་དག་ཐམས་ཅད་ཀུན་གྱི་ནི། །རྡོ་རྗེ་ནང་དུ་བསྡམས་བྱས་ལ། །དེ་འདྲ་བར་ནི་
[68b.7]བཅིང་བར་བྱ། །རྡོ་རྗེ་བསྡམས་པ་ནང་བཅིངས་ལ། །སྙིང་གར་མཉམ་ལ་རབ་ཏུ་གཞག །རབ་ཏུ་བརྐྱང་བ་ཕྲེང་བའོ། །ཐལ་མོ་སྦྱར་བ་ཁ་ནས་དབྱུང་། །གར་ལས་ཐལ་སྦྱར་སྤྱི་བོར་གཞག །རྡོ་རྗེ་བཅིངས་པ་ཐུར་དུ་བླུགས། །རང་གི་ཐལ་སྦྱར་གྱེན་དུ་གཏོར། །མཐེ་བོང་བསྙམས་ཏེ་རབ་
[69a]
[69a.1]ཏུ་བསྡམས། །རབ་ཏུ་བརྐྱང་ནས་བྱུགས་པའོ། །པདྨའི་སྒེག་མོ་ལ་སོགས་པ་ནས། པདྨའི་དྲིའི་མཐར་ཐུག་པའི་དམ་ཚིག་གི་ཕྱག་རྒྱའོ། །རྡོ་རྗེ་བསྡམས་པ་དམ་བྱས་ལ། །མཛུབ་མོ་གཉིས་ནི་མཉམ་སྦྱར་ནས། །བཀུག་ནས་རྩེ་མོ་སྦྱར་བ་ནི། །རྟ་མགྲིན་གྱི་
[69a.2]ནི་ཡིན་པར་བཤད། །རྡོ་རྗེ་ཐལ་མོ་མཉམ་སྦྱར་ལ། །མཛུབ་གཉིས་མདུད་པར་མདུད་ན་ནི། །དོན་ཡོད་ཞགས་པའི་ཕྱག་རྒྱ་ཡིན། །མཐེབ་མཛུབ་ལྕགས་སྒྲོག་འདྲ་བར་བྱ། །རྡོ་རྗེ་དབབ་པའི་ཚུལ་གྱིས་ནི། །པདྨོའི་ཐལ་མོ་མཉམ་སྦྱར་ལ། །སྲིན་ལག་མཐེའུ་ཆུང་གཉིས་སྦྱར་ཏེ། །
[69a.3]མཐེ་བོ་གཉིས་བཅུག་བར་དུ་བཙིར། །ཞེས་བྱ་བ་ནི། རྟ་མགྲིན་ནས་བརྩམས་ནས་པདྨ་འབེབས་པའི་མཐར་ཐུག་པའི་དམ་ཚིག་གི་ཕྱག་རྒྱའོ། །རྡོ་རྗེ་དབྱིངས་ཀྱི་དབང་ཕྱུག་མ་དང་། རྡོ་རྗེ་ཆོས་མ་དང་། སངས་རྒྱས་དབང་བསྐུར་མ་དང་། ཆོས་ཀྱི་དམ་ཚིག་མ་དང་། སྒོ་སྣ་ཚོགས་
[69a.4]མ་རྣམས་ནི་ཕྱག་རྒྱ་ཆེན་པོ་ཉིད་དམ་ཚིག་གི་ཕྱག་རྒྱའི་སྦྱོར་བས་དམ་ཚིག་གི་ཕྱག་རྒྱར་འགྱུར་རོ། །དེ་ནས་པདྨོ་གསང་བའི་པདྨོའི་རིགས་ཀྱི་གཟུངས་ཀྱི་དཀྱིལ་འཁོར་གྱི་ཆོས་ཀྱི་ཕྱག་རྒྱར་འགྱུར་རོ། །དེ་ལ་ཧྲཱི་ནི་སངས་རྒྱས་པདྨའིའོ། །གྲ་ནི་པདྨ་རྒྱལ་པོའི་གཟུངས་ཀྱིའོ། །པྲ་ནི་ཆགས་
[69a.5]མའིའོ། །ཧ་ནི་ལེགས་མའིའོ། །ཤྲཱི་ནི་པདྨ་ཁྲོ་གཉེར་མའིའོ། །ས་ནི་པདྨ་ཉི་མའིའོ། །དཱ་ནི་པདྨ་ཟླ་བའིའོ། །ཧ་ནི་པདྨ་བཞད་པའིའོ། །གཱ་ནི་སྒྲོལ་མའིའོ། །དྷ་ནི་པདྨ་རྣོན་པོ་མའི་འོ། །ཀྲཱ་ནི་པདྨ་རྒྱུའི་གཟུངས་ཀྱིའོ། །པཱ་ནི་པདྨ་གསུང་བའི་འོ། །བ་ནི་གར་གྱི་དབང་ཕྱུག་གིའོ། །ར་
[69a.6]ནི་བསྲུང་བ་མའིའོ། །ཥ་ནི་གནོད་སྦྱིན་མའིའོ། །ཨ་ནི་པདྨའི་ཁུ་ཚུར་གྱི་གཟུངས་ཀྱིའོ། །ཆོས་ཀྱི་ཕྱག་རྒྱ་ནི་ལྗགས་ལ་བསམ་པར་བྱ་སྟེ། རྣམ་པར་སྣང་མཛད་ལ་སོགས་པ་ནས་པདྨ་འབེབས་པའི་མཐར་ཐུག་པ་ནི་འགྲོ་པ་འདུལ་བའི་དཀྱིལ་འཁོར་ཆེན་པོ་ལས་བཤད་པ་ཉིད་གཟུང་བར་
[69a.7]བྱའོ། །ལས་ཀྱི་ཕྱག་རྒྱ་མདོར་བསྡུས་ནས། །གསང་བའི་ཁུ་ཚུར་གཉིས་པའོ། །ཞེས་བྱ་བ་ནི་པདྨའི་ཁུ་ཚུར་གྱི་གཟུངས་ཀྱི་ཕྱག་རྒྱ་ཆེན་པོ་དང་། དམ་ཚིག་གི་ཕྱག་རྒྱ་གཉིས་སུ་བྱས་ནས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སྦྱོར་བས་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་
[69b]
[69b.1]པ་ནས། པདྨ་འབེབས་པའི་ལས་ཀྱི་མཐར་ཐུག་པའི་ལས་ཀྱི་ཕྱག་རྒྱ་བཅིང་བར་བྱའོ་ཞེས་བྱ་བའི་དོན་ཏོ། །དེ་སྐད་དུ་ཡང་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་ལས་དམ་ཚིག་གི་ཕྱག་རྒྱ་ལས་བྱུང་བའི་ལས་ཀྱི་ཕྱག་རྒྱ་ནི་དུས་ཐམས་ཅད་དུ་བཅིང་བར་མི་བྱ་བ་ཉིད་དོ་ཞེས་བྱུང་བས་འདིར་ཡང་པདྨའི་
[69b.2]དམ་ཚིག་གི་ཁུ་ཚུར་གྱི་གཟུངས་ཀྱི་ཕྱག་རྒྱ་ལས་འབྱུང་བ་ནི་དུས་ཐམས་ཅད་དུ་བཅིང་བར་མི་བྱའོ། །དེ་ལ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ལས་ཀྱི་ཕྱག་རྒྱ་འཆིང་བའི་སྦྱོར་བས། གཡོན་པའི་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་
[69b.3]ཕྱག་རྒྱ་ཆེ། །སངས་རྒྱས་བྱང་ཆུབ་སྦྱིན་བྱེད་པའོ། །གཡས་པས་གཡོན་པ་དབྱེ་བར་བྱ། །ཞེས་བྱ་བ་ནི་འགྲོ་བ་འདུལ་བ་དང་། པདྨའི་ཏིང་ངེ་འཛིན་དང་། པདྨའི་སྒྲོལ་མ་དང་། པདྨའི་དམ་ཚིག་སྒྲོལ་མ་རྣམས་ཀྱིའོ། །བསྒྱིངས་བཅས་གསོར་བ་གཉིས་ཀའི་ནི་སངས་རྒྱས་པདྨའི་གཟུངས་
[69b.4]དང་། །རྡོ་རྗེ་ཆོས་མའིའོ། །ལྕགས་ཀྱུ་འཛིན་ལྟར་གནས་པ་ནི། །པདྨའི་དེ་བཞིན་གཤེགས་པའི་ལྕགས་ཀྱུའོ། །མདའ་འཕངས་པའི་ཚུལ་དང་པདྨ་ཆགས་པའིའོ། །ལེགས་སོ་སྦྱིན་པ་སྙིང་གར་གཞག །པདྨ་ལེགས་པའིའོ། །དབང་བསྐུར་བ་ནི་རྡོ་རྗེ་གཉིས། །ཞེས་པ་ནི་པདྨ་ཁྲོ་གཉེར་
[69b.5]དང་། སངས་རྒྱས་དབང་བསྐུར་བའི་ཏིང་ངེ་འཛིན་མཆོག་མ་དང་གཙུག་ཕུད་སངས་རྒྱས་ཀྱིའོ། །སྙིང་གར་ཉི་མ་བསྟན་པར་བྱ་བ་ནི་པདྨ་ཉི་མའིའོ། །གཡོན་པ་ལ་ནི་གྲུ་མོ་གཟུགས་ནི་པདྨ་ཟླ་བའིའོ། །དེ་བཞིན་ཁ་ཕྱོགས་བསྐོར་བ་ནི་པདྨ་བཞད་པའིའོ། །སྙིང་གར་འབྱེད་པ་ལྟ་བུ་ནི་པདྨ་སྒྲོལ་
[69b.6]མའིའོ། །སྙིང་གར་གཡོན་པའི་རལ་གྲི་འདུད་པ་ནི་པདྨ་རྣོན་པོའིའོ། །མགལ་མེའི་འཁོར་ལོ་བསྐོར་བ་ནི་པདྨ་ཁྱབ་འཇུག་གིའོ། །རྡོ་རྗེ་གཉིས་ཀ་ཁ་ནས་དབྱུང་བ་ནི་གསང་བའི་འོ། །རྡོ་རྗེ་གར་བསྐོར་བཀྲོལ་བ་ནི། །ཐལ་མོ་འགྲམ་པ་སྤྱི་བོར་གཞག །ཅེས་པ་ནི། པདྨ་ངེས་པའི་དབང་ཕྱུག་
[69b.7]དང་གར་གྱི་དབང་ཕྱུག་དང་སྣ་ཚོགས་ཀྱི་སྒོའིའོ། །གོ་ཆ་ནི་པདྨ་བསྲུང་བའིའོ། །མཐེ་ཆུང་མཆེ་བ་ནི་པདྨ་གནོད་སྦྱིན་གྱིའོ། །ཁུ་ཚུར་གཉིས་ནི་མནན་པ་ནི་པདྨ་ཁུ་ཚུར་གྱི་གཟུངས་ཀྱིའོ། །པདྨ་འགྱིང་བའི་ཚུལ་གྱིས་ནི། །བསམ་པ་གཡོས་པས་འདུད་པར་བྱ། །ཕྲེང་བ་བཅིང་དང་ཁ་ནས་
[70a]
[70a.1]དབྱུང་། །གར་ལ་ཐལ་སྦྱར་སྤྱི་བོར་གཞག །ཐུར་དུ་བླུགས་དང་གྱེན་དུ་གཏོར། །མཐེ་བོ་བསྙམས་ལ་རབ་ཏུ་བསྡམས། །དྲིས་བྱུགས་པ་ཡི་སྦྱོར་བ་ཡིས། །མཆོད་པའི་ཕྱག་རྒྱ་རབ་ཏུ་བརྟག །མཛུབ་མོའི་ལྕགས་ཀྱུ་བཅིང་བ་ནི། །མཐེའུ་ཆུང་ལས་ཏེ་ལྕགས་ཀྱུ་ཆེ། །མཁྲིག་
[70a.2]མ་མདུད་པ་མཛུབ་གཉིས་གདུབ། །རྒྱབ་གཉིས་ཀྱང་ནི་བསྙམས་ཏེ་མནན། །དེ་ཁོ་ན་ཉིད་སྣང་བར་བྱེད་པ་ལས། པདྨ་རིགས་ཀྱི་གཟུངས་ཀྱི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ལྟར་པདྨའི་རིགས་ཀྱི་གཟུངས་ཀྱི་དཀྱིལ་འཁོར་གྱིས་འདུལ་བའི་སེམས་ཅན་རྗེས་སུ་གཟུང་བའི་
[70a.3]ཕྱིར་དམ་ཚིག་གི་ཕྱག་རྒྱ་གཙོ་བོར་གྱུར་པ་བསྟན་ནས། ད་ནི་པདྨའི་རིགས་ཀྱི་ཆོས་ཀྱི་དཀྱིལ་འཁོར་གྱིས་འདུལ་བའི་སེམས་ཅན་རྗེས་སུ་གཟུང་བའི་ཕྱིར་ཆོས་ཀྱི་ཕྱག་རྒྱ་གཙོ་བོར་གྱུར་པ་བསྟན་པ་ནི། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོ་སྦྱོར་
[70a.4]བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་དོན་ཏོ། །དང་པོ་སྦྱོར་བའི་ཏིང་ངེ་འཛིན་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པ་ཡིན་ནོ། །ཡང་ཞེས་བྱ་བ་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལ་ལྟོས་པའོ། །བཅོམ་ལྡན་འདས་ནི་རྣམ་པར་སྣང་མཛད་དོ། །དེ་བཞིན་
[70a.5]གཤེགས་པ་ཐམས་ཅད་ཀྱི་ཆོས་ཀྱི་ཡེ་ཤེས་ནི་ཆོས་ཐམས་ཅད་སྤྲོས་པ་མེད་པར་བྱས་པའོ། །དེའི་དམ་ཚིག་ནི་བཅོམ་ལྡན་འདས་རྣམ་པར་སྣང་མཛད་ཀྱི་པདྨའི་རིགས་ཀྱི་ཆོས་ཀྱི་དཀྱིལ་འཁོར་རོ། །དེ་ལས་བྱུང་བ་ནི་འཇིག་རྟེན་དབང་ཕྱུག་གི་ཐུགས་ཀ་ན་གནས་པའི་པདྨ་གང་ཡིན་པ་དེ་ལས་བྱུང་བའོ།
[70a.6]དེས་བྱིན་གྱིས་བརླབས་པ་ནི་ནུས་པར་མཛད་པའོ། །གང་གི་ཏིང་ངེ་འཛིན་མིང་འདི་སྐད་ཅེས་བྱ་བའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་པའོ། །འདི་ཞེས་བྱ་བ་ནི་དེ་མ་ཐག་འཆད་པར་འགྱུར་བའི་བློ་ལ་གནས་པའོ། །རང་གི་རིག་པ་དམ་པ་གསུངས་པ་ནི་བཤད་པའོ། །འདི་སྐད་
[70a.7]སྟོན་པ་ཡིན་ཏེ། བཅོམ་ལྡན་འདས་རྣམ་པར་སྣང་མཛད་པདྨའི་རིགས་ཀྱི་རང་བཞིན་གྱི་རང་གི་ཆོས་ཀྱི་དཀྱིལ་འཁོར་སྤྲུལ་པའི་ཕྱིར། འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀ་ན་གནས་པའི་རྡོ་རྗེ་པདྨའི་རྣམ་པར་ཐུགས་རྩེ་གཅིག་ཏུ་མཛད་ནས་རིག་པ་དམ་པ་འདི་གསུངས་པའོ། །
[70b]
[70b.1]དེ་ནས་དཀྱིལ་འཁོར་དེ་འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀའི་པདྨ་ལས་སྤྲུལ་ནས། བཅོམ་ལྡན་འདས་རྣམ་པར་སྣང་མཛད་ལ་སྔ་མ་བཞིན་དུ་ཕུལ་ལོ། །དེ་ལྟར་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་རྣམས་ཀྱི་རང་རང་གི་རིག་པ་དམ་པ་རྣམས་
[70b.2]གསུངས་ནས། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀའི་པདྨ་ལས་འགྲོ་བ་འདུལ་བ་དང་གཙུག་ཕུད་སངས་རྒྱས་དང་། པདྨ་ཏིང་ངེ་འཛིན་དང་། པདྨ་དོན་ཡོད་དབང་ཕྱུག་གི་དཀྱིལ་འཁོར་རྣམས་པདྨའི་རིགས་ཀྱི་ཆོས་ཀྱི་དཀྱིལ་འཁོར་གྱི་གཟུགས་སུ་སྤྲུལ་ནས།
[70b.3]དེ་བཞིན་གཤེགས་པ་ཐམས་ཅད་ལ་ཕུལ་བ་ཡིན་ནོ། །དེ་ལ་རང་གི་རིགས་ཀྱི་ཆོས་འབྱུང་བ་ནི། འགྲོ་བ་འདུལ་བའི་ཆོས་ཀྱི་དཀྱིལ་འཁོར་ལས་འབྱུང་བ་གང་ཡིན་པའི་རིག་པ་དམ་པ་འདི་དེ་བཞིན་དུ་གསུངས་པའོ། །དེ་ལ་དེ་ནས་ཡང་བཅོམ་ལྡན་འདས་ཞེས་བྱ་བ་ནས། ཨོཾ་བཛྲ་ཀརྨ་དྷརྨྨ་
[70b.4]ཧཱུཾ་ཞེས་བསྟན་པའི་བར་གྱི་གཞུང་དེ་ཙམ་གྱིས་འགྲོ་བ་འདུལ་བའི་ཆོས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །སྔ་མ་བཞིན་དུ་བསྡུ་བ་དང་བྱིན་གྱིས་བརླབས་པ་ལ་སོགས་པ་ནི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་
[70b.5]འཛིན་གསུམ་པ་ཡིན་པར་ཤེས་པར་བྱའོ། །དེ་ནས་ཞེས་བྱ་བ་ནི་སྐབས་སུ་བབ་པའོ། །འདི་ཞེས་བྱ་བ་ནི་འཆད་པར་འགྱུར་བའི་བློ་ལ་གནས་པའོ། །རང་གི་ཆོས་ཀྱི་དཀྱིལ་འཁོར་དུ་གསུངས་ཤིང་འཆད་པར་འགྱུར་རོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། སྔོན་དུ་བསྙེན་པའི་རྗེས་ཐོགས་ལ་ཞེས་
[70b.6]བྱ་བའི་དོན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འགྲོ་བ་འདུལ་བའི་རང་གི་ལྷའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ་ཉིན་རེ་ཞིང་ཐུན་བཞིའི་སྦྱོར་བས་ཆོས་ཀྱི་དཀྱིལ་འཁོར་གྱི་སྔགས་རྣམས་རེ་རེ་ཞིང་
[70b.7]བཟླས་བརྗོད་འབུམ་བྱའོ། །དེའི་རྗེས་ཐོགས་ལ་ཉི་མ་བདུན་དཀྱིལ་འཁོར་འདི་བསྒོམས་ལ། དེ་ནས་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་གྱི་དོན་ཏེ། གང་གི་ཕྱིར་འགྲོ་བ་འདུལ་པའི་ཆོས་ཀྱི་དཀྱིལ་འཁོར་དུ་འཇུག་པ་མེད་ན། དེས་འདུལ་བའི་སེམས་ཅན་གྱི་ཁམས་རྣམས་ཀྱི་མངོན་
[71a]
[71a.1]པར་འདོད་པའི་དངོས་གྲུབ་ཀྱི་དོན་འགྲུབ་པར་མི་འགྱུར་བས་རྒྱུ་དེའི་ཕྱིར་རབ་ཏུ་བཤད་པར་བྱའོ། །ཡེ་ཤེས་དཀྱིལ་འཁོར་དམ་པ་སྟེ། །ཞེས་བྱ་བ་ནི་པདྨའི་རིགས་ཀྱི་ཆོས་ཀྱི་དཀྱིལ་འཁོར་གྱི་མཆོག་གོ། །རྡོ་རྗེ་དབྱིངས་དང་འདྲ་བར་ནི། །ཞེས་བྱ་བ་ལས་སྤྲུལ་པའི་ཆོས་ཀྱི་དཀྱིལ་འཁོར་
[71a.2]ནི་འདིར་རྡོ་རྗེ་དབྱིངས་ཡིན་ལ་དེ་དང་མཚུངས་པས་ན། རྡོ་རྗེ་དབྱིངས་དང་འདྲ་བར་ནི། །ཆོས་ཀྱི་ཡེ་ཤེས་ཞེས་བརྗོད་དོ། །ཞེས་བྱ་བ་ནི། དཀྱིལ་འཁོར་ཆེན་པོའི་ཚུལ་དུ་ནི། །དཀྱིལ་འཁོར་ཐམས་ཅད་སྲད་བུ་བྲེ། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོའི་ཚུལ་གྱིས་དཀྱིལ་
[71a.3]འཁོར་ཐམས་ཅད་སྲད་བུ་བྲེ་བར་བྱའོ། །དེ་ཡི་དབུས་སུ་བྲི་བ་ནི། །ཡེ་ཤེས་རྡོ་རྗེ་དེ་བཞིན་གཤེགས། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོའི་སྦྱོར་བ་དེས་དེ་ནས་ཐིག་བཏབ་ལ། ཆོས་ཀྱི་དཀྱིལ་འཁོར་དེའི་དབུས་སུ་ཕྱོགས་དང་མཚམས་མཉམ་པར་པདྨ་འདབ་མ་བརྒྱད་པ་
[71a.4]ཀ་བ་བརྒྱད་དང་ཡང་དག་པར་ལྡན་པའི་པདྨའི་དཀྱིལ་འཁོར་བྲི་བར་བྱའོ། །དེའི་དབུས་སུ་སེང་གེ་དང་། པདྨའི་གདན་གྱི་སྟེང་དུ་ཟླ་བའི་དཀྱིལ་འཁོར་ལ་རྡོ་རྗེ་རྩེ་ལྔ་པ་དེའི་ལྟེ་བར་དེ་བཞིན་གཤེགས་པ་རྣམ་པར་སྣང་མཛད་བྲི་བར་བྱའོ། །རྣམ་པར་སྣང་མཛད་དེའི་ཕྱོགས་དང་། མཚམས་རྣམས་ཐམས་
[71a.5]ཅད་དུ། སེམས་དཔའ་ཆེ་རྣམས་ཆོ་ག་བཞིན། །སྣ་ཚོགས་དབང་ཕྱུག་ལ་སོགས་པ། །ཏིང་ངེ་འཛིན་ལ་སྙོམས་ཞུགས་བྲི། །ཞེས་བྱ་བ་ནི་འགྲོ་བ་འདུལ་བ་ལ་སོགས་པ་བྲི་བར་བྱའོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོའི་ཚུལ་གྱིས་དཀྱིལ་འཁོར་ཐམས་ཅད་
[71a.6]ཐིག་བཏབ་ལ་ཁྲོ་བོའི་ལྟ་བས་བལྟས་ཏེ། དེ་ཉིད་ཀྱི་སྒོ་རྣམས་བྱས་ལ། ཚོན་སྣ་རྣམ་པ་ལྔས་དཀྱིལ་འཁོར་བྲིས་ཏེ། དཀྱིལ་འཁོར་གྱི་ལྟེ་བའི་གནས་སུ་རྣམ་པར་སྣང་མཛད་སྔར་བཤད་པའི་མཚན་ཉིད་དང་ལྡན་པ་ཇི་སྐད་བཤད་པའི་སེང་གེའི་གདན་གྱི་སྟེང་དུ་རྡོ་རྗེ་རྩེ་ལྔ་པ་ཆུར་གནས་པ་ལ།
[71a.7]རྡོ་རྗེ་བསྡམས་པ་བཅིངས་ནས་སྐྱིལ་མོ་ཀྲུང་གི་སྟེང་དུ་བཀན་ནས་སྙིང་གའི་ཕྱི་རོལ་དུ་རྡོ་རྗེ་རྩེ་ལྔ་པ་ནས་འབྲས་ཀྱི་ཚད་ཙམ་བསྣམས་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ་བྲི་བར་བྱའོ། །དེའི་ཕྱོགས་རྣམས་སུ་ཆོས་ཀྱི་རྡོ་རྗེ་མ་ལ་སོགས་པ་རིགས་ཀྱི་ཕྱག་རྒྱ་བཞི་པ་དང་། འགྲོ་བ་འདུལ་བའི་དཀྱིལ་
[71b]
[71b.1]འཁོར་ཆེན་པོ་ལས་བཤད་པའི་ཚུལ་གྱིས་ལྷ་ཐམས་ཅད་ཀྱི་གནས་སུ་པདྨ་དང་ཟླ་བའི་གདན་ལ་དེ་རྣམས་ཀྱི་ཡེ་ཤེས་ཀྱི་རྡོ་རྗེ་རྩེ་ལྔ་པ་ཆུར་གནས་པ་ལ་འགྲོ་བ་འདུལ་བ་ལ་སོགས་པ་ནས། པདྨ་འབེབས་པའི་མཐར་ཐུག་པའི་སྔར་བཤད་པའི་མཚན་ཉིད་དང་ལྡན་པ་དང་། བྱམས་པ་ལ་སོགས་
[71b.2]པ་རྣམས་རང་གི་མཚན་མ་ནས་འབྲས་ཀྱི་ཚད་ཙམ་སྙིང་གའི་ཕྱི་རོལ་དུ་འཇོག་ཅིང་རྡོ་རྗེ་སྐྱིལ་མོ་ཀྲུང་དུ་བཞུགས་པ་བྲི་བར་བྱའོ། །སྔ་མ་བཞིན་དུ། སངས་རྒྱས་རྡོ་རྗེ་འཛིན་ལ་སོགས། །ཐམས་ཅད་སྙོམས་པར་ཞུགས་པ་སྟེ། །ཏིང་ངེ་འཛིན་དུ་བཞུགས་པ་དང་། །ཕྱག་གཉིས་རྡོ་རྗེ་བཅིང་བས་བཅིངས། །
[71b.3]ཞེས་བྱ་བ་ལ་སོགས་པ་སྔར་བཤད་པ་འབའ་ཞིག་ཏུ་ཤེས་པར་བྱའོ། །དེ་ནས་ཞེས་བྱ་བ་ནི་དེ་མ་ཐག་པ་བརྗོད་པ་སྟེ། སློབ་དཔོན་རང་ཉིད་འགྲོ་བ་འདུལ་བའི་དཀྱིལ་འཁོར་དུ་འཇུག་པའི་ཆོ་གས་ཇི་ལྟ་བ་བཞིན་དུ་ཞུགས་ལ་ནས་འབྲས་ཙམ་གྱི་རྡོ་རྗེ་པདྨའི་དབང་བསྐུར་བླངས་ལ་ཆོ་ག་ཐམས་ཅད་རྗེས་སུ་
[71b.4]སྤྱད་པར་བྱའོ། །དེ་ནས་བསྡུ་བ་བྱས་ལ་མཚན་བརྒྱ་རྩ་བརྒྱད་པས་བསྟོད་དེ། དེའི་རྗེས་ཐོགས་ཉིད་ལ་པདྨའི་རིགས་ཀྱི་དཀྱིལ་འཁོར་འདིར་དགུག་པ་ལ་སོགས་པའི་ཆོ་ག་རྒྱས་པར་བྱས་ནས་ཞེས་བྱ་བ་ནི་རྟ་མགྲིན་གྱི་ལྕགས་ཀྱུས་དཀྱིལ་འཁོར་གྱི་ལྷ་ཐམས་ཅད་དགུག་པ་དང་། དོན་ཡོད་ཞགས་པས་
[71b.5]གཞུག་པ་དང་། པདྨའི་ལྕགས་སྒྲོག་གིས་བཅིང་བ་དང་། པདྨ་འབེབས་པས་དབང་དུ་བྱ་བ་དང་། པདྨ་གནོད་སྦྱིན་གྱིས་བགེགས་བསལ་ལ། ར་བ་དང་དྲ་བ་བྱའོ། །དེ་ནས་པདྨའི་ཁུ་ཚུར་གྱིས་སྒོ་བཅད་ལ། པདྨའི་སྲུང་བས་བསྲུང་བ་ཐམས་ཅད་ཡང་དག་པར་བསྲུངས་ལ། འགྲོ་བ་འདུལ་
[71b.6]བའི་ཆོས་ཀྱི་དཀྱིལ་འཁོར་ལས་གསུངས་པའི་ལྷ་ཐམས་ཅད་ལ་མཆོད་ཡོན་དང་ཞབས་བསིལ་ཕུལ་ནས། དམ་ཚིག་གི་ཕྱག་རྒྱས་བསྒྲུབས་ཏེ། དེ་ནས་ཆོས་དང་ལས་དང་། ཕྱག་རྒྱ་ཆེན་པོ་རྣམས་ཀྱིས་ཀྱང་རྒྱས་བཏབ་ལ། དབང་བསྐུར་བའི་ཕྱག་རྒྱ་རྣམས་ཀྱིས་རྣམ་པར་སྣང་མཛད་ལ་སོགས་
[71b.7]པ་དབང་བསྐུར་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། སློབ་མ་འཇུག་པའི་གནང་བ་ནོད་པ་ནི་དགུག་པ་ལ་སོགས་པའི་ཆོ་ག་རྒྱས་པ་ཞེས་བྱའོ། །དེ་ལྟར་བྱས་ནས། ཇི་ལྟ་བ་བཞིན་དུ་བཅུག་སྟེ། འདི་སྐད་དུ་ཁྱོད་ཀྱིས་གཞན་སུ་ལ་ཡང་མ་བརྗོད་ཅིག་ཅེས་བྱ་བ་ནི་འགྲོ་བ་འདུལ་
[72a]
[72a.1]བའི་དཀྱིལ་འཁོར་ཆེན་པོར་འཇུག་པའི་ཆོ་ག་བཞིན་དུ་བྱའོ་ཞེས་བྱ་བའི་དོན་ཏོ། །འདིར་རྡོ་རྗེ་པདྨ་ནས་འབྲས་ཀྱི་ཚད་ཙམ་སློབ་མ་རྣམས་ལ་བྱིན་ནས་ཞེས་བྱ་བ་དང་། ཆོ་ག་ལྷག་མ་རྣམས་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་བཤད་པ་ཉིད་གཟུང་བར་བྱའོ། །དེ་ལྟར་
[72a.2]སློབ་དཔོན་གྱི་ལས་ཀྱི་ཆོ་ག་རྒྱས་པ་དང་སློབ་མ་འཇུག་པའི་ཆོ་ག་བསྟན་ནས། ད་ནི་འགྲོ་བ་འདུལ་བའི་ཆོས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ། དེ་ལས་བཤད་པའི་དངོས་གྲུབ་ཀྱི་ཡེ་ཤེས་རྣམས་སློབ་དཔོན་གྱིས་བསྟན་པར་བྱའོ་ཞེས་བྱ་བའི་དོན་འདི་བསྟན་པའི་ཕྱིར།
[72a.3]དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་དེའི་རྗེས་ཐོགས་ལ་ཞེས་བྱ་བའི་དོན་ཏོ། །དེའི་ཡེ་ཤེས་བསྐྱེད་པར་བྱ་སྟེ། གང་འདོད་ཅེས་དྲི་བར་བྱའོ། །འཇིག་རྟེན་དབང་ཕྱུག་སྙོམས་ཞུགས་ལ། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་
[72a.4]རང་གི་ལྷའི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ལ། སྙིང་གར་པདྨོ་བསྒོམས་ནས་ཀྱང་། །ཞེས་བྱ་བ་ནི། ཨོཾ་པདྨ་ཛྙཱ་ན་ཧྲྀ་ད་ཡ་ཨཱ་བེ་ཤ །ཞེས་བྱ་བའི་སྙིང་པོ་འདིས་སྙིང་གར་ཟླ་བའི་དཀྱིལ་འཁོར་ལ་རྡོ་རྗེ་པདྨ་བསྐྱེད་པ།
[72a.5]དེ་ཉིད་ཟློས་ཤིང་བསྒོམས་ནས། ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམས་ན་མཐོང་བར་འགྱུར་རོ། །དེ་ནས་ཟླ་བ་ཉ་ལ་མཚན་ཐོག་ཐག་བསྒོམས་ན་དེ་འགྲུབ་པར་འགྱུར་རོ། །པདྨའི་ཏིང་ངེ་འཛིན་ཐོབ་པར། །དེ་མ་ཐག་ཏུ་མྱུར་བར་
[72a.6]འདིར། །ཞེས་བྱ་བ་ལ་འདིར་ཞེས་བྱ་བ་ནི། སྐད་ཅིག་མ་དེ་ཉིད་ཀྱི་ཚེའོ། །འཇིག་རྟེན་དབང་ཕྱུག་སྙོམས་ཞུགས་ལ། །ཞེས་བྱ་བ་ནི་སྔ་མ་བཞིན་ནོ། །དཔྲལ་བར་པདྨོ་བསྒོམས་བྱས་ཏེ། ཞེས་བྱ་བ་ནི། ཨོཾ་པདྨ་ཛྙཱ་ན་ཨ་བྷི་ཥེ་ཀ་ཨཱ་བེེ་ཤ་ཞེས་བྱ་བའི་སྙིང་པོ་འདིས་དཔྲལ་བའི་ཕྱོགས་སུ་ཟླ་
[72a.7]བའི་དཀྱིལ་འཁོར་གྱི་སྟེང་དུ་སྔ་མ་བཞིན་དུ་རྡོ་རྗེ་པདྨ་སྤྲུལ་ལ་སྔ་མ་བཞིན་དུ་བསྒོམས་ལ་དེ་ནས་བསྒྲུབ་པར་བྱའོ། །འཇིག་རྟེན་དབང་གི་ཏིང་འཛིན་གྱིས། །ལྕེ་ལ་པདྨོ་བསྒོམས་ནས་ཀྱང་། ཞེས་བྱ་བ་ནི་སྔ་མ་བཞིན་དུ་ཐམས་ཅད་བྱས་ལ། ཨོཾ་པདྨ་ཛྙཱ་ན་བི་ཪྱཱ་ར་ཏ་མ་ཨཱ་བེ་ཤ །ཞེས་བྱ་བ་རང་གི་ལྕེ་
[72b]
[72b.1]ལ་རྡོ་རྗེ་པདྨ་བསྐྱེད་དེ་སྔ་མ་བཞིན་དུ་བསྒོམས་ནས་བསྒྲུབ་པར་བྱའོ། །འཇིག་རྟེན་དབང་གི་ཏིང་འཛིན་གྱིས། །སྤྱི་གཙུག་པདྨོ་བསྒོམས་ནས་ཀྱང་། །ཞེས་བྱ་བ་ནི་རང་གི་ལྷའི་རྣལ་འབྱོར་དེ་ཉིད་བྱས་ནས། ཨོཾ་པདྨ་ཛྙཱ་ན་ཨུཥྞཱི་ཥ་ཨཱ་བེ་ཤ་ཞེས་བྱ་བས་སྤྱི་གཙུག་གི་གནས་སུ་ཟླ་བའི་དཀྱིལ་འཁོར་གྱི་
[72b.2]སྟེང་དུ་རྡོ་རྗེ་པདྨ་བསྐྱེད་ལ་སྔ་མ་བཞིན་དུ་བསྒྲུབ་པར་བྱའོ། །ནམ་མཁའ་འམ་ནི་ཕྱོགས་གཞན་དུ། །པདྨོ་དབྱིབས་ནི་བསྒོམས་ནས་ཀྱང་། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། ཨོཾ་པདྨ་ཨཱ་ཀ་ཤ་ཞེས་བྱ་བའི་སྙིང་པོ་འདིས་ནམ་མཁའ་ལ་སོགས་པའི་གནས་
[72b.3]སུ་རྡོ་རྗེ་པདྨ་བསྐྱེད་ཅིང་བསྒོམ་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ན་ནི་མི་སྣང་བའི་དངོས་གྲུབ་ཏུ་འགྱུར་རོ། །ནམ་མཁའ་འམ་ནི་ཕྱོགས་གཞན་དུ། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། ཨོཾ་པདྨ་ར་ཐ། ཞེས་བྱ་བ་ནམ་མཁའ་ལ་
[72b.4]སོགས་པའི་ཕྱོགས་སུ་པདྨོ་བསྐྱེད་ལ། དེ་ནས་དེ་ཉིད་ཟློས་ཤིང་དེའི་སྟེང་དུ་བདག་ཉིད་འདུག་སྟེ། འཇིག་རྟེན་དབང་ཕྱུག་གི་གཟུགས་སུ་བསྒོམས་ནས་ཕྱིས་སྔ་མ་བཞིན་དུ་བསྒྲུབས་ན་མི་སྣང་བར་འགྱུར་རོ། །ནམ་མཁའ་འམ་ནི་ཕྱོགས་གཞན་དུ། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་རང་
[72b.5]གི་ལྷའི་རྣལ་འབྱོར་བྱས་ལ། ཨོཾ་ཛྙཱ་ན་པདྨ་གྲྀཧྞ། ཞེས་བྱ་བའི་སྙིང་པོ་འདིས་ནམ་མཁའ་ལ་སོགས་པའི་ཕྱོགས་སུ་པདྨ་སྤྲུལ་ལ། དེ་ཉིད་ཟློས་ཤིང་བསྒོམ་པར་བྱའོ། །དེ་ནས་སྔ་མ་བཞིན་དུ་བསྒྲུབས་ན་གང་གི་ཚེ་མཐོང་བ་དེ་བླངས་ན་མི་སྣང་བར་འགྱུར་རོ། །ནམ་མཁའ་འམ་ནི་ཕྱོགས་གཞན་
[72b.6]དུ། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། ཨོཾ་པདྨ་ར་ས་ཡ་ན། ཞེས་བྱ་བའི་སྙིང་པོ་འདིས་ནམ་མཁའ་ལ་སོགས་པའི་ཕྱོགས་སུ་པདྨ་སྤྲུལ་ལ། དེ་ཉིད་ཟློས་ཤིང་ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་
[72b.7]བསྒོམས་ན་མཐོང་བར་འགྱུར་རོ། །དེ་ནས་མཚན་ཐོག་ཐག་བསྒོམས་ན་རང་གི་གཟུགས་ཉིད་པདྨར་མཐོང་བར་འགྱུར་ཏེ། དེ་བས་ན། མཐོང་བའི་པདྨོ་དེ་ཟོས་ན། །དེ་མ་ཐག་ཏུ་མི་སྣང་འགྱུར། །ཞེས་བྱ་བའོ། །ཕྱག་རྒྱ་ཆེ་བཅིངས་པདྨོ་ནི། །ཁ་དོག་དབྱི་བས་རྣམས་སྣ་ཚོགས་པའི། །ཞེས་
[73a]
[73a.1]བྱ་བ་ལ་ཁ་དོག་སྣ་ཚོགས་པ་ནི་སྔོན་པོ་ལ་སོགས་པའོ། །དབྱིབས་སྣ་ཚོགས་པ་ནི་ཟླུམ་པོ་ལ་སོགས་པའོ། །པདྨོ་ནི་རྡོ་རྗེ་སྣ་ཚོགས་པདྨ་ལུགས་མའམ། བརྐོས་པ་འམ་འཇིམ་པ་ལ་སོགས་པ་ལས་བྱས་པ་སྣ་ཚོགས་པ་དེ་བླངས་ལ་བཟུང་ནས་འཇིག་རྟེན་དབང་ཕྱུག་གི་
[73a.2]ཕྱག་རྒྱ་ཆེན་པོ་བསྒོམས་ན། གཟུགས་ཐམས་ཅད་འཆང་བར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་
[73a.3]ཏེ། ཨོཾ་པདྨ་དྷ་ར་བི་ཤྭ་རཱུ་པ་པྲ་བ་ཏ་ཀ་ཨཱ་བེ་ཤ་ཞེས་བརྗོད་ཅིང་། ཇི་སྐད་བཤད་པའི་པདྨ་དེ་བཟུང་ལ་འགྲོ་བ་འདུལ་བའི་གཟུགས་སུ་བདག་ཉིད་བསྒོམས་ལ། སྙིང་པོ་འདི་ཉིད་བརྗོད་ཅིང་ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམས་ན། དེའི་
[73a.4]གཟུགས་སུ་བདག་ཉིད་དུ་མཐོང་བར་འགྱུར་རོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ན་འགྲུབ་པར་འགྱུར་ཏེ། འགྲོ་བ་འདུལ་བ་དང་མཚུངས་པར་འགྱུར་རོ། །པདྨ་ཁ་དོག་དབྱིབས་རྣམས་ནི། །སྣ་ཚོགས་པདྨོའི་དབྱིབས་བྲིས་ལ། །ཞེས་བྱ་བ་ལ་སོགས་པ་ལ་རས་སམ། རྩིག་པའམ་
[73a.5]སྤང་ལེབ་ལ་བཟོ་བོ་མཁས་པས་པདྨ་བྲིས་ལ། དེ་ནས་རང་གི་ལྷའི་རྣལ་འབྱོར་བྱས་ཏེ། ཨོཾ་བི་ཤྭ་པདྨ་པྲ་བརྟ་ཡ་མཱཾ། ཞེས་བརྗོད་ཅིང་འགྲོ་བ་འདུལ་བ་དེའི་ཏིང་ངེ་འཛིན་བསྒོམས་ཏེ། སྔ་མ་བཞིན་དུ་བསྒོམས་ན་འགྲོ་བ་འདུལ་བ་དང་འདྲ་བར་འགྱུར་རོ། །ནམ་མཁའ་འམ་ནི་ཕྱོགས་གཞན་དུ། །པདྨའི་
[73a.6]ཁ་དོག་དབྱིབས་རྣམས་ནི། །ཞེས་བྱ་བ་ནི་སྔ་མ་བཞིན་ནོ། །སྔ་མ་བཞིན་དུ་ལྷའི་རྣལ་འབྱོར་བྱས་ལ། ཨོཾ་ས་མ་དྷི་བི་ཤྭ་པདྨ་ཨཱ་བེ་ཤ་ཞེས་བྱ་བའི་སྙིང་པོ་འདིས་ནམ་མཁའ་ལ་སོགས་པ་ལས་ཇི་སྐད་དུ་བཤད་པའི་ཁ་དོག་དང་དབྱིབས་དང་ལྡན་པའི་པདྨ་སྤྲུལ་ལ་སྙིང་པོ་འདི་ཉིད་བརྗོད་ཅིང་བསྒོམས་ན། སྔ་མ་བཞིན་དུ་
[73a.7]བསྒྲུབ་པར་བྱས་ན་འདོད་པའི་གཟུགས་སུ་འགྱུར་རོ། །པདྨ་ཁ་དོག་དབྱིབས་རྣམས་ནི། །སྣ་ཚོགས་དབྱིབས་སུ་བྱས་ནས་ཀྱང་། །ཞེས་བྱ་བ་ནི་བཟོ་བོ་མཁས་པས་སྔ་མ་བཞིན་དུ་པདྨའི་གཟུགས་བྱས་ལ། རང་གི་ལྷའི་རྣལ་འབྱོར་བྱས་ཏེ། ཨོཾ་བི་ཤྭ་པདྨ་ས་ནོད་ཀྵི་ས་ཨཱ་ཀ་ཤ་པི་ཥི་རཱུ་པཾ་ཨ་དྷི་ཊིཥྛ་མཾ།
[73b]
[73b.1]ཞེས་བརྗོད་ཅིང་དེའི་སྟེང་དུ་འདུག་ལ། དེ་ཉིད་ཟློས་ཤིང་བསྒོམས་ན། རང་ཉིད་འཇིག་རྟེན་དབང་ཕྱུག་གི་གཟུགས་དེས་སྔ་མ་བཞིན་དུ་བསྒྲུབ་པ་བྱས་ན། ནམ་མཁའ་ལ་འགྲོ་ཞིང་ཅི་དགའ་བའི་གཟུགས་སུ་འགྱུར་རོ། །གང་ཡང་རུང་བའི་ཕྱག་རྒྱ་ཆེ། །ཏིང་ངེ་འཛིན་གྱིས་ལེགས་བཅིངས་ལ། །
[73b.2]པདྨོ་བླངས་ལ་རབ་བྱིན་ལ། །རྟག་པ་རུ་ནི་དབང་དུ་འགྱུར། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། ཨོཾ་མ་ཧཱ་པདྨ་ཧོཿ་ཞེས་བྱ་བའི་སྙིང་པོ་
[73b.3]འདིས་པདྨོ་བླངས་ཏེ། འཇིག་རྟེན་དབང་ཕྱུག་འགྲོ་བ་འདུལ་བའམ། རིགས་ཀྱི་རང་བཞིན་དུ་ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་དུ་ཟླ་བ་གཅིག་ཙམ་པ་དེ་སྲིད་དུ་བདག་ཉིད་བསྒོམས་ནས། མཚན་ཐོག་ཐག་བསྒོམ་པ་དང་བཟླས་པ་བྱའོ། །དེ་ནས་ལས་ཀྱི་དུས་སུ་དེ་ཉིད་ཀྱི་ལྷའི་རྣལ་འབྱོར་
[73b.4]བྱས་ལ། ཕྱི་རོལ་གྱི་མེ་ཏོག་པདྨ་བླངས་ཏེ་སྙིང་པོ་འདི་ལན་བརྒྱ་རྩ་བརྒྱད་མངོན་པར་བཟླས་ཏེ། ཕྱག་རྒྱ་ཆེན་པོ་བཅིངས་པ་དེས་པདྨ་བླངས་ལ། ཨོཾ་མ་ཧཱ་པདྨ་ཧོ། ཆེ་གེ་མོ་ཉིད་བ་ཤ་མཱ་ན་ཡ་ཧོ། ཞེས་མངོན་པར་བཟླས་ལ་གང་ལ་བྱིན་པ་དེ་དབང་དུ་འགྱུར་རོ། །གང་ཡང་རུང་བའི་དམ་ཚིག་ནི། །
[73b.5]ཕྱག་རྒྱ་ཞེས་བྱ་ལེགས་བཅིངས་ནས། །ཞེས་བྱ་བ་ནི་དཀྱིལ་འཁོར་ཆེན་པོ་དེ་ཉིད་ལས་བཤད་པའི་གཙུག་ཕུད་སངས་རྒྱས་ཀྱི་རྣལ་འབྱོར་རམ་དེའི་རིགས་ཀྱི་རྣལ་འབྱོར་བྱས་ཏེ། གཙུག་ཕུད་སངས་རྒྱས་ཀྱི་རིགས་ལས་བྱུང་བའི་དམ་ཚིག་གི་ཕྱག་རྒྱ་བཅིངས་ལ། ཕྱིས་ཆོས་ཀྱི་དཀྱིལ་འཁོར་
[73b.6]ལས་བཤད་པའི་དམ་ཚིག་གི་ཕྱག་རྒྱ་བཅིངས་པ་དེས་པདྨ་བླངས་ལ། ཨོཾ་ས་མ་ཡ་པདྨ་ཧོ། ཞེས་ཟློས་ཤིང་སྔ་མ་བཞིན་དུ་བསྒྲུབ་པ་བྱས་ན། གང་ལ་བྱིན་པ་དེ་དབང་དུ་འགྱུར་རོ། །ཏིང་ངེ་འཛིན་སྐྱེས་དགེ་བ་ཡིས། །ཕྱག་རྒྱ་གང་ཡང་རུང་བཅིངས་ལ། །ཡེ་ཤེས་པདྨོ་གང་བྱིན་པ། །དེ་ནི་
[73b.7]དེ་ཡིས་མྱུར་བར་འགྱུར། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་པདྨའི་ཏིང་ངེ་འཛིན་དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པའི་པདྨའི་ཏིང་ངེ་འཛིན་གྱི་ཕྱག་རྒྱ་ཆེན་པོ་དང་། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ།
[74a]
[74a.1]ཕྱི་རོལ་གྱི་པདྨ་བླངས་ལ། ཨོཾ་ཛྙཱ་ན་པདྨ་ཧོ། ཞེས་བརྗོད་ཅིང་དེ་ཉིད་ཟླ་བ་གཅིག་ཙམ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ལ་ཡང་ལས་ལ་སྦྱོར་བའི་དུས་སུ་དེ་ཉིད་ཀྱི་ལྷའི་རྣལ་འབྱོར་བྱས་ལ་ཕྱག་རྒྱ་ཆེན་པོ་དེ་ཉིད་ཀྱིས་པདྨ་དེ་བླངས་ལ། ཨོཾ་ཛྙཱ་ན་པདྨ་ཧོ།
[74a.2]ཆེ་གེ་མོ་བ་ཤ་མཱ་ན་ཡ་ཧོ། །ཞེས་པ་ལན་བརྒྱ་རྩ་བརྒྱད་བཟླས་ནས་སྦྱིན་པར་བྱའོ། །གང་ཡང་རུང་བའི་དམ་ཚིག་ལྡན། །ལས་ཀྱི་ཕྱག་རྒྱ་བཅིངས་ནས་ནི། །ཞེས་བྱ་བ་ལ་སོགས་པ་ལ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་པདྨ་ངེས་པའི་དབང་ཕྱུག་གི་རྣལ་
[74a.3]འབྱོར་རམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱ་དང་། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ལ། ཨོཾ་ཀརྨ་པདྨ་ཧོ། །ཞེས་བྱ་བའི་སྙིང་པོ་འདིས་ཕྱི་རོལ་གྱི་པདྨ་བླངས་ཏེ། དེ་ཉིད་ཀྱི་བསྒོམ་
[74a.4]པ་བྱས་ན། མཚན་ཐོག་ཐག་བསྒོམས་ལ། ཕྱིས་ལས་ཀྱི་དུས་སུ་དེ་ཉིད་ཀྱིས་ལས་ཀྱི་ཕྱག་རྒྱ་པདྨ་བླངས་ཏེ། ཨོཾ་ཀརྨ་པདྨ་ཧོ། ཆེ་གེ་མོ་ཉིད་བ་ཤ་མཱ་ན་ཡ་ཧོ། ཞེས་ལན་བརྒྱ་རྩ་བརྒྱད་པདྨ་ལ་མངོན་པར་བཟླས་ནས་གང་ལ་བྱིན་པ་དེ་དབང་དུ་འགྱུར་རོ། །དེ་ལྟར་དངོས་གྲུབ་ཀྱི་ཡེ་
[74a.5]ཤེས་བསླབ་པ་བསྟན་ནས། ད་ནི་འགྲོ་བ་འདུལ་བའི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞི་པོ་རྣམས་ཀྱིས་དེ་ལས་གསུངས་པའི་རང་གི་ལྷའི་རྣལ་འབྱོར་བྱས་ལ། ཕྱིས་འགྲོ་བ་འདུལ་བའི་ཆོས་
[74a.6]ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་དངོས་གྲུབ་ཀྱི་ཡེ་ཤེས་བསྟན་པའི་དུས་ཕྱིས་སོ། །ཡེ་ཤེས་ཀྱི་དཀྱིལ་འཁོར་ནི་འགྲོ་བ་འདུལ་བའི་
[74a.7]ཆོས་ཀྱི་དཀྱིལ་འཁོར་རོ། །ཕྱག་རྒྱ་ཆེན་པོ་ནི་ལུས་ཀྱི་ཕྱག་རྒྱའོ། །དེའི་ཡེ་ཤེས་བསླབ་པའོ། །ཆོས་ཀྱི་དཀྱིལ་འཁོར་ཚུལ་དུ་ནི། །ཕྱག་རྒྱ་ཆེན་པོ་བསྒྲུབ་པར་བྱ། །ཞེས་བྱ་བ་ནི་རྡོ་རྗེ་དབྱིངས་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་ཚུལ་གྱིས་ཆོས་ཀྱི་དཀྱིལ་འཁོར་གྱི་ཕྱག་རྒྱ་ཆེན་པོ་
[74b]
[74b.1]བཅིང་བར་བྱའོ། །དེའི་རིག་པ་ནི་འདི་ཡིན་ཏེ། སངས་རྒྱས་རྡོ་རྗེ་འཛིན་ལ་སོགས། །ཐམས་ཅད་སྙོམས་པར་ཞུགས་པ་ཉིད། །ཏིང་ངེ་འཛིན་དུ་བཞུགས་པ་དང་། །ཕྱག་གཉིས་རྡོ་རྗེ་བཅིང་བ་བཅིངས། །ཞེས་བྱ་བ་ལ་སོགས་པ་སྔར་རྒྱས་པར་བཤད་པ་ཉིད་གཟུང་བར་བྱའོ། །དེ་ནས་རབ་ཏུ་བཤད་བྱ་
[74b.2]བ། །དམ་ཚིག་མཆོག་ནི་ཞེས་བྱ་བ་ནི། ཆོས་ཀྱི་དཀྱིལ་འཁོར་གྱི་དམ་ཚིག་གི་ཕྱག་རྒྱའོ། །ཅིའི་ཕྱིར་ཞེ་ན། བསྒྲུབ་པར་བྱ་སྟེ་ཞེས་བྱ་བ་སྨོས་ཏེ། ཏིང་ངེ་འཛིན་གྱིས་བསྒྲུབ་པར་བྱའོ་ཞེས་བྱ་བའི་དོན་ཏོ། །ཆོས་ཀྱི་དཀྱིལ་འཁོར་ལས་གསུངས་པའི་ལྷ་ཐམས་ཅད་དམ་ཚིག་གི་ཕྱག་རྒྱས་བསྒྲུབ་
[74b.3]པར་བྱའོ་ཞེས་བྱ་བའི་ཐ་ཚིག་གོ། །ཆོས་ཀྱི་དཀྱིལ་འཁོར་ཚུལ་དུ་ནི། །པདྨོའི་པདྨོ་གཞག་པར་བྱ། །ཞེས་བྱ་བ་ནི་རྡོ་རྗེ་བསྡམས་པ་གུང་མོ་གཉིས་པདྨའི་འདབ་མ་ལྟར་བྱས་པ་འདི་ནི། འགྲོ་བ་འདུལ་བའི་དཀྱིལ་འཁོར་ཆེན་པོའི་ཆོས་ཀྱི་རྡོ་རྗེ་མའི་གནས་ཀྱི་པདྨའི་པདྨ་ཞེས་བྱ་བའི་ཕྱག་རྒྱ་སྟེ།
[74b.4]རྡོ་རྗེ་དབྱིངས་ཀྱི་ཆོས་ཀྱི་དཀྱིལ་འཁོར་གྱི་ཚུལ་གྱིས་པདྨོ་སངས་རྒྱས་ལ་སོགས་པ་ནས་པདྨ་ཁུ་ཚུར་གྱི་མཐར་ཐུག་པའི་གནས་སུ་གཞག་པ་ནི་དམ་ཚིག་གི་ཕྱག་རྒྱར་འགྱུར་རོ། །དེ་ལ་རིག་པ་ནི་འདི་ཡིན་ཏེ། སྐྱིལ་མོ་ཀྲུང་ནས་གན་རྐྱལ་དུ། །གཡས་གཅུས་དེ་བཞིན་སླར་གཅུས་པ། །སྙིང་
[74b.5]གར་གནས་པ་བཞི་པ་སྟེ། །རྡོ་རྗེ་སེམས་སོགས་དཀྱིལ་འཁོར་རོ། །དཔྲལ་བར་གཞག་དང་ལྟག་པ་དང་། །ཕྲག་པ་དག་ནི་དགོད་པར་བྱ། །ཁར་གཞག་སྙིང་གར་རལ་གྲི་དང་། །སྙིང་གར་རྒྱས་དང་ཁ་ནས་དབྱུང་། །སྤྱི་བོ་ཐོང་ཀ་ཁར་བཞག་པ། །མཛུབ་མོ་གཉིས་བཀུག་མདུན་དེ་བཞིན། །
[74b.6]རྣམ་པར་སྣང་མཛད་ལ་སོགས་པ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་དམ་ཚིག་གི་ཕྱག་རྒྱ་ཉིད་ཡིན་པར་ཤེས་པར་བྱའོ། །སངས་རྒྱས་པདྨ་ལ་སོགས་པའི་ཆོས་ཀྱི་ཕྱག་རྒྱ་ནི། རྡོ་རྗེ་དབྱིངས་ཀྱི་ཆོས་ཀྱི་དཀྱིལ་འཁོར་ལས་བཤད་པ་ཉིད་ཡིན་ནོ། །ལྷག་མ་རྣམས་
[74b.7]ཀྱིས་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་བཤད་པ་གཟུང་བར་བྱའོ། །ཆོས་ཀྱི་ཁུ་ཚུར་བསྟན་བྱས་ལ། །ལས་ཀྱི་ཕྱག་རྒྱ་གཉིས་སུ་བྱས། །ཞེས་བྱ་བ་ནི་ཆོས་ཀྱི་དཀྱིལ་འཁོར་ལས་གསུངས་པའི་པདྨའི་ཁུ་ཚུར་གྱི་དམ་ཚིག་གི་ཕྱག་རྒྱ་བསྟན་པར་བྱས་ཏེ། གཉིས་སུ་བྱས་ནས་
[75a]
[75a.1]ཁུ་ཚུར་གཉིས་ཀྱིས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་ལས་ཀྱི་ཕྱག་རྒྱ་བཅིང་བར་བྱའོ། །དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ལས། འགྲོ་བ་འདུལ་བའི་ཆོས་ཀྱི་དཀྱིལ་འཁོར་གྱི་འགྲེལ་པ་རྫོགས་སོ།། །།
[75a.2]དེ་ལྟར་ཆོས་ཀྱི་ཕྱག་རྒྱ་གཙོ་བོར་གྱུར་པའི་འགྲོ་བ་འདུལ་བའི་ཆོས་ཀྱི་དཀྱིལ་འཁོར་བསྟན་ནས། ད་ནི་ལས་ཀྱི་ཕྱག་རྒྱ་གཙོ་བོར་གྱུར་པའི་འགྲོ་བ་འདུལ་བའི་ལས་ཀྱི་དཀྱིལ་འཁོར་གྱིས་འགྲོ་བ་འདུལ་བའི་སེམས་ཅན་རྗེས་སུ་གཟུང་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་
[75a.3]ཏེ། དེ་ནས་ཀྱི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱའོ། །འདིར་དང་པོར་སྦྱོར་བའི་ཏིང་ངེ་འཛིན་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པ་ཉིད་ཡིན་ནོ། །ཡང་ཞེས་བྱ་བ་ནི་ཆོས་ཀྱི་དཀྱིལ་འཁོར་ལ་ལྟོས་ནས་ཡང་ཞེས་བྱ་བ་སྨོས་
[75a.4]སོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པའོ། །དེའི་རང་བཞིན་གྱིས་འོད་གསལ་བའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རྟོགས་པ་ནི་ཆོས་ཀྱི་རིགས་ཀྱི་ལས་སོ། །དེའི་དམ་ཚིག་ནི་བཅོམ་ལྡན་འདས་རྣམ་པར་སྣང་མཛད་ཀྱི་པདྨའི་རིགས་ཀྱི་ནང་དུ་
[75a.5]གཏོགས་པའི་ལས་ཀྱི་དཀྱིལ་འཁོར་རོ། །དེ་ལས་བྱུང་བ་ནི་འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀའི་པདྨ་གང་ལས་བྱུང་བ་དེ་ལ་འདི་སྐད་ཅེས་བྱ་སྟེ། དེས་བྱིན་གྱིས་བརླབས་པ་འདི་ནི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ལས་གང་གིས་དམ་ཚིག་འབྱུང་བར་བྱིན་
[75a.6]གྱིས་རློབ་པའི་པདྨོ་ཞེས་བྱ་བའི་ཏིང་ངེ་འཛིན་མིང་གང་ཡིན་པ་དེ་ལ་སྙོམས་པར་ཞུགས་ནས་རིག་པ་འདི་གསུངས་པ་ནི་བཤད་པའོ། །རང་གི་རིགས་ནི་འགྲོ་བ་འདུལ་བའི་ལས་ཀྱི་དཀྱིལ་འཁོར་རོ། །དེ་ལས་བྱུང་བ་ནི་རང་གི་རིགས་ཀྱི་ལས་ལ་བྱུང་བའི་རང་གི་རིག་པ་དམ་པའོ། །འདི་སྐད་སྟོན་པ་
[75a.7]ཡིན་ཏེ། བཅོམ་ལྡན་འདས་རྣམ་པར་སྣང་མཛད་པདྨའི་རིགས་ཀྱི་རང་གི་དཀྱིལ་འཁོར་སྤྲུལ་པའི་ཕྱིར། འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀ་ན་གནས་པའི་པདྨའི་རྡོ་རྗེ་ལ་མངོན་དུ་དམིགས་ནས་རང་གི་རིག་པ་དམ་པ་འདི་གསུངས་སོ། །དེ་ནས་འཕགས་པ་སྤྱན་རས་
[75b]
[75b.1]གཟིགས་དབང་ཕྱུག་ལ་དེས་བསྐུལ་བས། རང་གི་ཐུགས་ཀའི་པདྨ་ལས་དེའི་དཀྱིལ་འཁོར་སྤྲུལ་ནས་བཅོམ་ལྡན་འདས་རྣམ་པར་སྣང་མཛད་ལ་སྔ་མ་བཞིན་དུ་ཕུལ་ལོ་ཞེས་བྱ་བ་ཡིན་ནོ། །དེ་ལྟར་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་དང་། འགྲོ་བ་འདུལ་བ་དང་།
[75b.2]གཙུག་ཕུད་སངས་རྒྱས་དང་། ཏིང་ངེ་འཛིན་པདྨ་དང་། པདྨ་ངེས་པའི་དབང་ཕྱུག་གིས་འཕགས་པ་སྤྱན་རས་གཟིགས་དབང་ཕྱུག་བསྐུལ་བས། རང་གི་ཐུགས་ཀའི་པདྨ་ལས་སྔ་མ་བཞིན་དུ་དཀྱིལ་འཁོར་སྤྲུལ་ནས་ཕུལ་བ་ཡིན་ནོ་ཞེས་བྱ་བ་ཡིན་ནོ། །དེ་ནས་ཡང་བཅོམ་ལྡན་འདས་ཞེས་
[75b.3]བྱ་བ་ནས་བརྩམས་ནས། ཨོཾ་བི་ཤྭ་ཀརྨྨ་ས་མ་ཡེ་ཧཱུཾ་ཞེས་བྱ་བའི་བར་གྱི་གཞུང་འདི་ནི་འགྲོ་བ་འདུལ་བའི་ལས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ལ་སོགས་པས་ནི་ལས་ཀྱི་
[75b.4]རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དེ་ལྟར་ཏིང་ངེ་འཛིན་རྣམ་པ་གསུམ་བསྟན་ནས། ད་ནི་འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་ནི་འགྲོ་བ་འདུལ་བའི་ལས་ཀྱི་དཀྱིལ་འཁོར་དུ་དམ་ཚིག་དང་དབང་བསྐྱུར་བ་ཐོབ་
[75b.5]པ་རྣམས་ཀྱིས་བསྒྲུབ་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་སྐབས་སུ་བང་བའོ། །འཕགས་པ་སྤྱན་རས་གཟིགས་དབང་ཕྱུག་ནི་འགྲོ་བ་འདུལ་བའོ། །འདི་ཞེས་བྱ་བ་ནི་བློ་ལ་གནས་པའོ། །ལས་ཀྱི་དཀྱིལ་
[75b.6]འཁོར་ནི་རང་གི་པདྨའི་རིགས་ཀྱི་ལས་ཀྱི་དཀྱིལ་འཁོར་རོ། །བཤད་དོ་ཞེས་བྱ་བ་ནི་གསུངས་པའོ། །དེ་ནས་ཞེས་བྱ་བ་ནི་དེ་མ་ཐག་པའོ། །འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ་ཐུན་བཞིའི་སྦྱོར་བས་
[75b.7]ལས་ཀྱི་དཀྱིལ་འཁོར་གྱི་རིག་པ་རྣམས་རེ་རེ་ཞིང་ཡང་བཟླས་པ་ཁྲི་བྱས་ནས། ཕྱིས་ལས་ཀྱི་དཀྱིལ་འཁོར་ལས་གསུངས་པའི་ཏིང་ངེ་འཛིན་རྣམ་པ་གསུམ་བསྒོམ་པ་ནས་བརྩམས་ཏེ། ལས་ཀྱི་དཀྱིལ་འཁོར་ཞག་བདུན་བསྒོམས་པའི་རྗེས་ཐོགས་ལ་ལས་ཀྱི་དཀྱིལ་འཁོར་བྲི་
[76a]
[76a.1]བར་བྱའོ། །དེ་ནས་ནི་རྒྱུ་དེའི་ཕྱིར་ཏེ་གང་གི་ཕྱིར་ལས་ཀྱི་དཀྱིལ་འཁོར་དུ་འཇུག་པ་མེད་ན། ལས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་འགྲུབ་པར་མི་འགྱུར་བ་དེའི་ཕྱིར་རབ་ཏུ་བཤད་བྱ་བ། ལས་ཀྱི་དཀྱིལ་འཁོར་དམ་པ་ཞེས་བྱ་བའོ། །རྡོ་རྗེ་
[76a.2]དབྱིངས་དང་འདྲ་བ་ནི། །ཞེས་བྱ་བ་ནི་སྤྲུལ་པའི་ལས་ཀྱི་དཀྱིལ་འཁོར་དང་འདྲའོ། །པདྨའི་ལས་ནི་བྱ་བ་སྟེ་ཞེས་བྱ་བ་ནི་བཤད་ཟིན་ཏོ། །དཀྱིལ་འཁོར་ཆེན་པོའི་ཚུལ་དུ་ནི། །དཀྱིལ་འཁོར་ཐམས་ཅད་སྲད་བུ་བྲེ། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་བཞིན་
[76a.3]དུ་ཕྱི་དང་ནང་གི་དཀྱིལ་འཁོར་འདི་ཐམས་ཅད་ཐིག་གདབ་པར་བྱའོ། །སངས་རྒྱས་ཕྱོགས་ཀུན་པདྨོ་ནི། །མཚན་མ་འཛིན་པར་ཐམས་ཅད་བྲི། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་བཞིན་དུ་དཀྱིལ་འཁོར་ཐམས་ཅད་བྲི་བར་བྱ་སྟེ། དེ་བཞིན་དུ་རྣམ་པར་
[76a.4]སྣང་མཛད་དང་། འགྲོ་བ་འདུལ་བ་དང་། གཙུག་ཕུད་སངས་རྒྱས་དང་། པདྨའི་ཏིང་ངེ་འཛིན་དང་། པདྨ་དོན་ཡོད་དབང་ཕྱུག་བྲིས་ལ་དེ་དག་གི་ཕྱོགས་ཐམས་ཅད་དུ་སངས་རྒྱས་པདྨ་ལ་སོགས་པའི་གཟུགས་འཛིན་པ། སངས་རྒྱས་པདྨ་ལ་སོགས་པ་ནས་པདྨ་འབེབས་པ་ལ་
[76a.5]མཐར་ཐུག་པའི་བར་དུ་བྲི་བར་བྱའོ། །བྱམས་པ་ལ་སོགས་པའི་གཟུགས་འཛིན་པའི་བྱམས་པ་ལ་སོགས་པའི་ལྷ་མོ་རྣམས་ཀྱི་རིག་པ་ནི་སྔར་བཤད་པའི་རིག་པ་ཉིད་ཀྱིས་བྱའོ། །ཨོཾ་བྷུ་རི་ནི་ཧཱུཾ། ཞེས་བྱ་བ་ནི་རྣམ་པར་སྣང་མཛད་ཀྱི་རིག་པའོ། །ཆོས་ཀྱི་རྡོ་རྗེ་མ་དང་། སངས་རྒྱས་
[76a.6]དབང་བསྐུར་མ་དང་། པདྨའི་པདྨ་དང་། སྣ་ཚོགས་ཀྱི་སྒོ་རྣམས་ཀྱི་ནི། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་རིག་པ་ཡིན་པར་ཤེས་པར་བྱའོ། །གཞན་ནི་འགྲོ་བ་འདུལ་བ་ནས་བརྩམས་ནས། པདྨ་འབེབས་པའི་མཐར་ཐུག་པ་རྣམས་ཀྱི་རིག་པ་ཡིན་ནོ། །
[76a.7]དེ་ནས་ཞེས་བྱ་བ་ནི་དེ་མ་ཐག་པའོ། །དེ་ལྟར་དཀྱིལ་འཁོར་བྲིས་ནས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་ག་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། བསྡུ་བ་བྱས་ནས་མཚན་བརྒྱ་རྩ་བརྒྱད་པས་བསྟོད་པའི་རྗེས་ཐོགས་ལའོ། །ལས་ཀྱི་དཀྱིལ་འཁོར་ལས་འདིར་དགུག་
[76b]
[76b.1]པ་ལ་སོགས་པའི་ཆོ་ག་རྒྱས་པར་བྱས་ནས་ཞེས་བྱ་བ་ཡིན་ནོ། །དེ་ལ་དགུག་པ་ནི། རྟ་མགྲིན་གྱི་ལས་ཀྱི་ཕྱག་རྒྱས་དཀྱིལ་འཁོར་གྱི་ལྷ་ཐམས་ཅད་བཀུག་ནས་རང་རང་གི་སྒོ་དང་ཉེ་བར་གཞག་པར་བྱའོ། །དགུག་པ་དང་པོར་བྱས་པ་གང་ཡིན་པ་དེ་ནི་དགུག་པ་ལ་སོགས་པའི་ཆོ་ག་རྒྱས་པའོ། །དོན་ཡོད་
[76b.2]ཞགས་པ་དང་། ལྕགས་སྒྲོག་དང་། འབེབས་པའི་ལས་ཀྱི་ཕྱག་རྒྱ་རྣམས་ཀྱིས་གཞུག་པ་དང་། བཅིང་བ་དང་། དབང་དུ་བྱས་ལ། པདྨ་གནོད་སྦྱིན་གྱིས་བགེགས་བསྐྲད་ནས། རབ་དང་དྲ་བ་བྱས་ཏེ། པདྨའི་ཁུ་ཚུར་གྱིས་སྒོ་ཐམས་ཅད་ལ་པདྨའི་སྲུང་བས་དཀྱིལ་འཁོར་ཐམས་ཅད་ཀྱི་བསྲུང་
[76b.3]བས་ཡང་དག་པར་བསྲུངས་ལ། ལས་ཀྱི་དཀྱིལ་འཁོར་ལས་གསུངས་པའི་འགྲོ་བ་འདུལ་བའི་རིག་པས་དཀྱིལ་འཁོར་གྱི་ལྷ་ཐམས་ཅད་ལ་མཆོད་ཡོན་དང་ཞབས་བསིལ་ཡང་ཕུལ་ནས་ལས་ཀྱི་དཀྱིལ་འཁོར་ལས་འཆད་པར་འགྱུར་བའི་དམ་ཚིག་གི་ཕྱག་རྒྱ་རྣམས་ཀྱིས་རྣམ་པར་སྣང་མཛད་
[76b.4]ལ་སོགས་པ་ཐམས་ཅད་བསྒྲུབས་ལ། དེ་ནས་ཆོས་དང་ལས་ཀྱི་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ་མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་མཆོད་ནས་ཕྱག་བྱས་ཏེ། སློབ་མ་འཇུག་པའི་གནང་བ་ནོད་པར་བྱའོ་ཞེས་བྱ་བ་འདི་
[76b.5]ནི་དགུག་པ་ལ་སོགས་པའི་ཆོ་ག་རྒྱས་པ་ཡིན་ནོ། །དེ་ལྟར་དགུག་པ་ལ་སོགས་པའི་ཆོ་ག་རྒྱས་པ་དེ་བྱས་ནས། ཇི་ལྟ་བ་བཞིན་དུ་བཅུག་སྟེ། འདི་སྐད་དུ། རིགས་ཀྱི་བུ་ཁྱོད་ཀྱིས་ཚུལ་འདི་སུ་ལ་ཡང་མ་སྨྲ་ཤིག་ཅེས་བྱ་བའོ། །འགྲོ་བ་འདུལ་བའི་དཀྱིལ་འཁོར་ཆེན་པོར་འཇུག་པའི་ཆོ་གས་
[76b.6]ཞུགས་པ་ནི་ཇི་ལྟ་བ་བཞིན་བཅུག་སྟེ་ཞེས་བྱ་བའི་དོན་ཡིན་ནོ། །འདིར་ཇི་སྐད་བཤད་པའི་མཚན་ཉིད་དང་ལྡན་པའི་པདྨ་འདབ་མ་བཞི་པའི་སྣ་ཚོགས་པདྨ་སློབ་མ་ལ་སྦྱིན་པར་བྱ་ཞིང་སློབ་དཔོན་བདག་ཉིད་ཀྱང་སྣ་ཚོགས་པདྨས་དབང་བསྐུར་བར་བྱ་བ་གཞུང་འདིས་བཟུང་བ་ཡིན་ནོ། །ལྷག་མ་
[76b.7]ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པར་ཤེས་པར་བྱའོ། །དེ་ལྟར་སློབ་དཔོན་གྱི་ལས་དང་སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་འགྲོ་བ་འདུལ་བའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་དེ་ལས་བཤད་པའི་དངོས་གྲུབ་ཀྱི་ཡེ་ཤེས་
[77a]
[77a.1]རྣམས་སློབ་དཔོན་གྱིས་བཤད་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་དེའི་ཕྱིར་ཏེ། སློབ་མ་འཇུག་པའི་ཆོ་ག་རྒྱས་པའི་རྗེས་ཐོགས་ལ་ཡེ་ཤེས་བསྐྱེད་ཅིང་བསླབ་པར་བྱའོ། །དེ་ནས་སྡིག་པ་བཤགས་པའི་
[77a.2]ཡེ་ཤེས་བསླབ་པར་བྱའོ་ཞེས་བྱ་བ་ནི་ཅི་འདོད་ཅེས་དྲིས་པ་དང་། སྡིག་པ་བཤགས་པའི་ཡེ་ཤེས་བསླབ་པར་འཚལ་ལོ་ཞེས་སྨྲས་ན། འཇིག་རྟེན་དབང་ཕྱུག་ཕྱག་རྒྱ་ཆེ། །ཤིན་ཏུ་མཉམ་གཞག་བསྒོམས་ནས་ཀྱང་། །སྡིག་རྣམས་བཤགས་ནས་མྱུར་བར་ནི། །སྡིག་པ་ཀུན་ལས་དེ་འདག་
[77a.3]འགྱུར། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་རྣལ་འབྱོར་བྱས་ལ། མདུན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་དང་། གཟུངས་དང་། ཆོས་དང་། ལས་དང་། ཕྱག་རྒྱ་བཞི་པ་དང་། ཕྱག་རྒྱ་གཅིག་པའི་དཀྱིལ་འཁོར་རྣམས་སམ་
[77a.4]གཅིག་ལ་བསྒྲུབ་པར་བྱ་བའི་ལྷ་མདུན་དུ་སྤྱན་དྲངས་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བཞི་བྱས་ནས། ཕྱིས་ལས་ཀྱི་དཀྱིལ་འཁོར་ལས་གསུངས་པའི་འགྲོ་བ་འདུལ་བའི་ཕྱག་རྒྱ་ཆེན་པོའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ལ་དེའི་རིག་པ་བརྗོད་ཅིང་འགྲོ་བ་
[77a.5]འདུལ་བ་ཡང་ཡིན་ནོ་ཞེས་བརྗོད་ལ་པུས་མོའི་ལྷ་ང་གཉིས་ས་ལ་བཙུགས་ཏེ། སྡིག་པ་ཐམས་ཅད་བཤགས་པར་བྱ་སྟེ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་
[77a.6]སུ་བཞུགས་པ་ཐམས་ཅད་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་བདག་ལ་དགོངས་སུ་གསོལ། བདག་མིང་ཆེ་གེ་མོ་ཞེས་བགྱི་བ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་
[77a.7]ཆེ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་ཀྱི་སྤྱན་སྔར་སྡིག་པ་ཐམས་ཅད་སོ་སོར་བཤགས་པར་བགྱིའོ། །ཨོཾ་སརྦྦ་པཱ་པཾ་སཾ་ཤོ་དྷ་ན་མ་ཧཱ་པདྨ་ཞེས་བྱ་བ་དེ་ལྟ་བུས་སྡིག་པ་ཐམས་ཅད་དག་
[77b]
[77b.1]པར་འགྱུར་རོ། །དམ་ཚིག་གི་ནི་མཆོག་བཅིངས་ཏེ། །ཞེས་བྱ་བ་ནི་ལས་ཀྱི་དཀྱིལ་འཁོར་ཐམས་ཅད་ལས་བཤད་པའི་སངས་རྒྱས་གཙུག་ཕུད་ཀྱི་དམ་ཚིག་གི་ཕྱག་རྒྱའམ། དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ལ། དེའི་ང་རྒྱལ་གྱིས་གནས་ཏེ། ཕྱོགས་བཅུ་ན་བཞུགས་པའི་
[77b.2]སངས་རྒྱས་དང་བྱང་ཆུབ་སེམས་དཔའ་ཞེས་བྱ་བ་ནས། སྡིག་པ་ཐམས་ཅད་བཤགས་པར་བགྱི། །ཞེས་བྱ་བའི་བར་དུ་སྔ་མ་བཞིན་དུ་བརྗོད་པ་དང་། ཨོཾ་སརྦྦ་ཨ་ནན་ཏཪྱཱ་ཤོ་དྷ་ན་ས་མ་ཡ་པདྨ་ཞེས་བརྗོད་པ་དེ་ལྟ་བུས་མཚམས་མེད་པ་རྣམས་བྱང་བར་འགྱུར་རོ། །འཇིག་རྟེན་དབང་ཕྱུག་ཏིང་
[77b.3]འཛིན་དུ། །ཞེས་བྱ་བ་ལ་སོགས་པ་ནི་པདྨ་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་པདྨའི་ཏིང་ངེ་འཛིན་ནམ། དེའི་རིགས་ཀྱི་ལྷ་རྣམས་ཀྱི་ཕྱག་རྒྱ་བཅིངས་ཏེ། དེའི་ང་རྒྱལ་གྱིས་གནས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཅེས་བྱ་བ་ལ་སོགས་པ་སྔ་མ་བཞིན་དུ་བརྗོད་
[77b.4]ལ། ཨོཾ་སརྦྦ་པཱ་པཾ་པྲ་ཎ་ཤ་ན་དྷརྨྨ་པདྨ། ཞེས་བྱ་བ་བརྗོད་པ་དེ་ལྟ་བུས་ཀྱང་སྡིག་པ་ཐམས་ཅད་རབ་ཏུ་འཇོམས་པར་འགྱུར་རོ། །མདོར་ན་གང་ཡང་རུང་བ་ཡི། །ལས་ཀྱི་ཕྱག་རྒྱ་ལེགས་བཅིངས་ལ། །ཞེས་བྱ་བ་ལ་སོགས་པ་ནི་ལས་ཀྱི་དཀྱིལ་འཁོར་ལས་གསུངས་པའི་པདྨ་ངེས་པའི་
[77b.5]དབང་ཕྱུག་གམ། དེའི་རིགས་ཀྱི་ལྷ་རྣམས་ཀྱི་ལས་ཀྱི་ཕྱག་རྒྱ་བཅིངས་ལ། དེའི་ང་རྒྱལ་གྱིས་གནས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཅེས་བྱ་བ་ལ་སོགས་པ་སྔ་མ་བཞིན་དུ་བརྗོད་ཅིང་། །ཨོཾསརྦྦ་ཀརྨྨཱ་ཨཱབར་ཎ་བི་ཤོངྷ་ཡངྷ་རྨྨཀརྨྨ་པངྨ་ཞེས་བརྗོད་པ་དེ་ལྟ་བུས་
[77b.6]ལས་ཀྱི་སྒྲིབ་པ་ཀུན་ལས་རྣམ་པར་དག་པར་འགྱུར་རོ། དེ་ནས་སྒྲིབ་པ་ཐམས་ཅད་ཟད་པར་འགྱུར་བའི་ཡེ་ཤེས་བསླབ་པའོ་ཞེས་བྱ་བ་ལ། དེ་ལ་སྒྲིབ་པ་ནི་རྣམ་པ་བཞི་སྟེ། གཟུང་བ་དང་འཛིན་པ་ཐམས་ཅད་ཀྱི་བག་ཆགས་ཀུན་གཞིའི་རྣམ་པར་ཤེས་པ་དང་ལྷན་ཅིག་གནས་པའི་རྣམ་པར་
[77b.7]སྨིན་པའི་སྒྲིབ་པ་དང་། བདག་ཏུ་རྨོངས་པ་དང་། བདག་ཏུ་ང་རྒྱལ་དང་། བདག་ཏུ་ལྟ་བ་དང་། བདག་ཏུ་ཆགས་པ་རྣམས་ཉོན་མོངས་པ་ཅན་གྱི་ཡིད་དང་བཅས་པའི་ཉོན་མོངས་པའི་སྒྲིབ་པ་དང་། འདོད་པ་ལ་འདུན་པ་དང་། གནོད་སེམས་དང་། རྨུགས་པ་དང་། གཉིད་དང་། རྒོད་བ་དང་། འགྱོད་
[78a]
[78a.1]པ་དང་། ཐེ་ཚོམ་རྣམས་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པའི་སྒྲིབ་པ་ལྔ་པོ་དང་། མཚམས་མེད་པ་ལྔ་དང་། དམ་པའི་ཆོས་སྤོང་བ་ལ་སོགས་པ་ལུས་དང་ངག་གི་ལས་རྣམས་མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པ་རྣམས་དང་མཚུངས་
[78a.2]པར་ལྡན་པར་གྱུར་པའི་ལས་ཀྱི་སྒྲིབ་པ་སྟེ་རྣམ་པ་བཞི་ཡིན་ནོ། །སྒྲིབ་པ་རྣམ་པ་བཞི་པོ་དེ་དག་ཡོངས་སུ་ཟད་ཅིང་འཇིག་པར་འགྱུར་བ་དེས་ངེས་པའི་ཡེ་ཤེས་དེ་སློབ་པོ། །འཇིག་རྟེན་དབང་གི་ཕྱག་རྒྱ་ཆེར། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་
[78a.3]པའི་འགྲོ་བ་འདུལ་བའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བའི་ཕྱག་རྒྱ་ཆེན་པོའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། དེའི་ཕྱག་རྒྱ་ཆེན་པོའི་རང་བཞིན་ནམ། དེའི་རིགས་ཀྱི་ལྷའི་རང་བཞིན་བདག་
[78a.4]ཉིད་རྣམ་པར་བསམས་ཏེ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཅེས་བྱ་བ་ལ་སོགས་པ་སྔ་མ་བཞིན་དུ་བརྗོད་ཅིང་། ཤུདྡྷ་ཤུདྡྷ་ཞེས་བརྗོད་ནས། བདག་ཉིད་གཟུགས་བརྙན་དང་མཚུངས་པའི་རྣམ་པར་ཐར་པའི་སྒོ་སྟོང་པ་ཉིད་ཀྱི་རང་བཞིན་དུ་བསམ་པ་དང་། མི་བསྐྱོད་
[78a.5]པ་བསྒོམས་ནས། ཨོཾ་པཱ་པཾ་ཀྵ་ཡ་པདྨ། ཞེས་བྱ་བའི་སྙིང་པོ་བརྗོད་དོ། །དེ་ལྟར་བཟླས་པས་སྟོང་པ་ཉིད་ཀྱི་ཏིང་ངེ་འཛིན་གྱི་གེགས་སུ་གྱུར་པའི་ལས་རྣམས་དང་རྣམ་པར་སྨིན་པའི་སྒྲིབ་པའི་རང་བཞིན་རྣམ་པར་དག་པར་འགྱུར་རོ། །འཇིག་རྟེན་དབང་གི་ཏིང་འཛིན་གྱིས། །ལས་ཀྱི་དམ་ཚིག་བཅིངས་ནས་
[78a.6]ནི། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་གཙུག་ཕུད་སངས་རྒྱས་ཀྱི་རྣལ་འབྱོར་རམ། དེའི་རིགས་ཀྱི་ལྷའི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་གཙུག་ཕུད་སངས་རྒྱས་ཀྱི་དམ་ཚིག་གི་ཕྱག་རྒྱའམ། དེའི་རིགས་
[78a.7]ཀྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་ཕྱག་རྒྱ་ནི་སེམས་དཔའི་གཟུགས་ཀྱི་བདག་ཉིད་དུ་བསྒོམས་ནས། ནམ་མཁའ་དང་མཉམ་པའི་ཡེ་ཤེས་རྣམ་པར་ཐར་པའི་སྒོ་མཚན་མ་མེད་པའི་བདག་ཉིད་བསྒོམ་ཞིང་། བུདྡྷ་བུདྡྷ་ཞེས་བཟླས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཅེས་བྱ་བ་ལ་སོགས་
[78b]
[78b.1]པ་སྔ་མ་བཞིན་དུ་བརྗོད་པ་དང་། ཨོཾ་ཨ་བ་ར་ཎ་ཀྵ་ཡ་པདྨ་ཞེས་ལན་གསུམ་དུ་བཟླས་པ་དེ་ལྟ་བུས་ནི་ཉོན་མོངས་པའི་ཡིད་དང་བཅས་པའི་ཉོན་མོངས་པའི་སྒྲིབ་པ་ཇི་སྐད་དུ་བཤད་པའི་ཆགས་པ་དང་། ང་རྒྱལ་དང་། རྨོངས་པ་དང་། ལྟ་བ་ལ་སོགས་པའི་ལས་ཀྱི་སྒྲིབ་པ་རྣམས་རྣམ་པར་དག་པར་འགྱུར་རོ།
[78b.2]འཇིག་རྟེན་དབང་པོར་སྙོམས་ཞུགས་ལ། །ཞེས་བྱ་བ་ལ་སོགས་པ་ནི། དེ་བཞིན་དུ་ཏིང་ངེ་འཛིན་པདྨའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་བཅིངས་ཏེ། རང་གི་ཕྱག་རྒྱ་སེམས་དཔའི་གཟུགས་ཀྱི་བདག་ཉིད་དུ་བསྒོམས་
[78b.3]ནས་སྔ་མ་བཞིན་དུ་སྡིག་པ་བཤགས་པ་བྱས་ཏེ། དྷི་དྷི་དྷི་དྷི་ཞེས་བྱ་བའི་ཡི་གེ་དྷི་བཞི་བརྗོད་ཅིང་རང་བཞིན་གྱིས་རྣམ་པར་དག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་སྒོ་མངོན་དུ་བྱས་ནས་ནི་བ་ར་ཎ་ཀྵ་ཡ་པདྨ་ཞེས་ལན་གསུམ་བརྗོད་པ་དེ་ལྟ་བུས་འདོད་པ་ལ་འདུན་པ་དང་། གནོད་སེམས་
[78b.4]དང་། རྨུགས་པ་དང་། གཉིད་དང་། རྒོད་པ་དང་། འགྱོད་པ་དང་། ཐེ་ཚོམ་གྱི་མཚན་ཉིད་ཀྱི་སྒྲིབ་པ་རྣམས་རྣམ་པར་ཐར་པའི་སྒོ་སྨོན་པ་མེད་པའི་གེགས་སུ་གྱུར་པའི་སྡིག་པ་རྣམས་སོ་སོར་ཀུན་དུ་རྟོག་པའི་ཡེ་ཤེས་ཀྱིས་སྤོང་བར་འགྱུར་བ་ཡིན་ནོ། །འཇིག་རྟེན་དབང་པོའི་ཏིང་འཛིན་གྱིས། །ལས་
[78b.5]ཀྱི་ཕྱག་རྒྱ་བཅིངས་ནས་ཀྱང་། །ཞེས་བྱ་བ་ལ་སོགས་པ་ལ་སྔ་མ་བཞིན་དུ། འཇིག་རྟེན་དབང་ཕྱུག་གི་རྣལ་འབྱོར་བྱས་ལ་ལས་ཀྱི་དཀྱིལ་འཁོར་ལས་གསུངས་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱ་དང་། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། རང་གི་ཕྱག་རྒྱ་སེམས་དཔའི་གཟུགས་
[78b.6]ཀྱི་བདག་ཉིད་དུ་བསྒོམས་ནས། སྔ་མ་བཞིན་དུ་སྡིག་པ་བཤགས་པ་བྱས་ཏེ། ཡི་གེ་ཧི་བཞི་བརྗོད་དོ། །བདག་ཉིད་རྣམ་པར་ཐར་པའི་སྒོ་འོད་གསལ་བའི་རང་བཞིན་དུ་བསྒོམས་ཏེ། ཨོཾ་ཀརྨྨ་ཀྵ་ཡ་པདྨ། ཞེས་ཟློས་ཤིང་། ཆོས་ཐམས་ཅད་རང་བཞིན་གྱིས་འོད་གསལ་བ་བསྒོམས་ལ། མཚམས་
[78b.7]མེད་པ་ལ་སོགས་པའི་ལས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་བར་དུ་གཅོད་པ་རྣམས་རྣམ་པར་དག་པར་འགྱུར་རོ། །དེ་ལྟར་ལས་ཀྱི་སྒྲིབ་པ་ཐམས་ཅད་སྦྱང་བ་བྱས་ནས། བསོད་ནམས་ཀྱི་ཚོགས་ཡོངས་སུ་རྫོགས་པར་བྱ་བའི་ཕྱིར་མཆོད་པར་བྱ་བ་ཡིན་ནོ། །སྔ་མ་བཞིན་དུ་འཇིག་རྟེན་དབང་ཕྱུག་གི་རྣལ་
[79a]
[79a.1]འབྱོར་གྱིས་ལས་ཀྱི་དཀྱིལ་འཁོར་ལས་གསུངས་པའི་འགྲོ་བ་འདུལ་བའི་ཕྱག་རྒྱ་ཆེན་པོའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་ཕྱག་རྒྱ་སེམས་དཔའི་བདག་ཉིད་དུ་བསམས་ཏེ། ཡི་གེ་ཨོཾ་ལན་བཞི་བརྗོད་ཅིང་རིན་པོ་ཆེ་སྣ་བདུན་ལ་སོགས་པའི་པདྨའི་སྤྲིན་
[79a.2]སྤྲུལ་ལ། ཨོཾ་ཨཾ་ཀརྨ་པདྨ་ཞེས་བརྗོད་ཅིང་དེས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་པར་བྱའོ། །འཇིག་རྟེན་དབང་པོའི་ཏིང་འཛིན་གྱིས། །དམ་ཚིག་མཆོག་ནི་བཅིངས་ནས་ཀྱང་། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འཇིག་རྟེན་དབང་ཕྱུག་གི་རྣལ་འབྱོར་ལ་གནས་ནས།
[79a.3]ལས་ཀྱི་དཀྱིལ་འཁོར་ལས་གསུངས་པའི་གཙུག་ཕུད་སངས་རྒྱས་ཀྱི་དམ་ཚིག་གི་ཕྱག་རྒྱའམ། དེའི་རིགས་ཀྱི་ལྷའི་ཕྱག་རྒྱ་བཅིངས་ལ། ཡི་གེ་བྷུ་རྣམ་པ་བཞི་ལས་རིན་ཆེན་པདྨ་ལ་སོགས་པའི་མཆོད་པའི་སྤྲིན་སྔ་མ་བཞིན་དུ་སྤྲུལ་ལ། ཨོཾ་བྷུ་ཀ་ར་པདྨ་ཞེས་བརྗོད་པས། སངས་རྒྱས་དང་བྱང་
[79a.4]ཆུབ་སེམས་དཔའ་ཐམས་ཅད་དེས་མཆོད་པར་བྱའོ། །འཇིག་རྟེན་དབང་པོར་སྙོམས་ཞུགས་ལ། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་འཇིག་རྟེན་དབང་པོའི་རྣལ་འབྱོར་ལ་གནས་ནས། ལས་ཀྱི་དཀྱིལ་འཁོར་ལས་གསུངས་པའི་པདྨའི་ཏིང་ངེ་འཛིན་གྱི་ཕྱག་རྒྱ་ཆེན་པོའམ། དེའི་རིགས་ཀྱི་ཕྱག་
[79a.5]རྒྱ་ཆེན་པོ་བཅིངས་ཏེ། རང་གི་ཕྱག་རྒྱ་སེམས་དཔའི་གཟུགས་ཀྱི་བདག་ཉིད་དུ་བསྒོམས་ལ། ཡི་གེ་ཧེ་རྣམ་པ་བཞི་ལས་རྡོ་རྗེ་པདྨ་ལ་སོགས་པའི་མཆོད་པའི་སྤྲིན་སྤྲུལ་ལ། ཨོཾ་ཧེ་ཀ་ར་པདྨ་ཞེས་བྱ་བ་འདིས་སངས་རྒྱས་ཐམས་ཅད་ལ་དེས་མཆོད་པར་བྱའོ། །པདྨོ་ལས་ཀྱི་ཕྱག་རྒྱ་ནི། །ཤིན་ཏུ་
[79a.6]མཉམ་པར་གཞག་བཅིངས་ན། །ཞེས་བྱ་བ་ནི་སྔ་མ་བཞིན་དུ་འཇིག་རྟེན་དབང་པོའི་རྣལ་འབྱོར་ལ་གནས་ཏེ། ལས་ཀྱི་དཀྱིལ་འཁོར་ལས་བཤད་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱ་དང་། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ལ། རང་གི་ཕྱག་རྒྱ་སེམས་དཔའི་གཟུགས་
[79a.7]ཀྱི་བདག་ཉིད་དུ་བསྒོམས་ནས། ཡི་གེ་དྷི་རྣམ་པ་བཞི་ལས་སྣ་ཚོགས་པདྨ་ལ་སོགས་པའི་མཆོད་པའི་སྤྲིན་སྤྲུལ་ལ། ཨོཾ་དྷེ་ཀ་ར་ཀ་ར་མ་པདྨ་ཞེས་བརྗོད་ཅིང་། དེ་བཞིན་གཤེགས་པ་ཐམས་ཅད་ལ་མཆོད་པར་བྱའོ། །དེ་ནས་ཞེས་བྱ་བ་ནི་མཆོད་པའི་ཡེ་ཤེས་ཀྱི་རྗེས་ཐོགས་ལའོ། །དངོས་
[79b]
[79b.1]གྲུབ་ཀྱི་དོན་གྱི་ཡེ་ཤེས་ནི་དངོས་གྲུབ་ཀྱི་ཡེ་ཤེས་ཏེ་སློབ་པར་བྱ་བའོ། །འཇིག་རྟེན་དབང་པོའི་ཕྱག་རྒྱ་ཆེར། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འགྲོ་བ་འདུལ་བའི་རྣལ་འབྱོར་དང་ལྡན་པའམ། དེའི་རིགས་ཀྱི་རྣལ་འབྱོར་དང་ལྡན་པས་ལས་ཀྱི་དཀྱིལ་འཁོར་ལས་གསུངས་པའི་འགྲོ་བ་འདུལ་
[79b.2]བའི་ཕྱག་རྒྱ་ཆེན་པོ་དང་། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ལ། རང་གི་ཕྱག་རྒྱ་སེམས་མའི་བདག་ཉིད་དུ་བསྒོམས་ནས། ཡི་གེ་ཧྲི་རྣམ་པ་བཞི་བསམས་ལ། དེ་ནས་ཨོཾ་ཧྲཱི་སིདྡྷྱ་ཞེས་བྱ་བ་བཟླས་པས་དངོས་གྲུབ་འགྲུབ་པར་འགྱུར་རོ། །འཇིག་རྟེན་དབང་པོའི་ཏིང་འཛིན་གྱིས། །དམ་
[79b.3]ཚིག་མཆོག་ནི་བཅིངས་ནས་ནི། །ཞེས་བྱ་བ་ལ་སོགས་པ་སྔ་མ་བཞིན་དུ་འཇིག་རྟེན་དབང་པོའི་རྣལ་འབྱོར་དང་ལྡན་པས་ལས་ཀྱི་དཀྱིལ་འཁོར་ལས་གསུངས་པའི་སངས་རྒྱས་གཙུག་ཕུད་དང་། དེའི་རིགས་ཀྱི་ལྷའི་དམ་ཚིག་གི་ཕྱག་རྒྱ་བཅིངས་ལ། ཡི་གེ་ཤྲི་རྣམ་པ་བཞི་ལས་
[79b.4]བདག་ཉིད་རང་གི་ཕྱག་རྒྱ་སེམས་དཔར་བསྐྱེད་ལ། ཨོཾ་ཤྲི་སིདྡྷྱ་ཞེས་བརྗོད་པས་རང་གི་དངོས་གྲུབ་ཐོབ་པར་འགྱུར་རོ། །འཇིག་རྟེན་དབང་པོ་མཉམ་གཞག་པར། །ཞེས་བྱ་བ་ལ་སོགས་པ་སྔ་མ་བཞིན་དུ་འཇིག་རྟེན་དབང་ཕྱུག་གི་རྣལ་འབྱོར་དང་ལྡན་པས་ལས་ཀྱི་དཀྱིལ་འཁོར་ལས་
[79b.5]གསུངས་པའི་ཏིང་ངེ་འཛིན་པདྨ་དང་། དེའི་རིགས་ཀྱི་ལྷ་རྣམས་ཀྱི་ཕྱག་རྒྱ་ཆེན་པོ་བཅིངས་ལ། ཡི་གེ་དྷི་ཀ་རྣམ་པ་བཞིས་རང་གི་ཕྱག་རྒྱ་སེམས་དཔའི་བདག་ཉིད་དུ་ཁྲོ་བ་དང་ལྡན་པར་བསམས་ལ། དེ་ནས་ཨོཾ་དྷི་ཀ་སིདྡྷྱ་ཞེས་བརྗོད་ཅིང་རང་བཞིན་གྱིས་རྣམ་པར་དག་པ་བསྒོམ་པར་བྱའོ། །
[79b.6]དེ་ལྟར་རང་བཞིན་གྱིས་དག་པའི་ཁྲོ་བོའི་ཏིང་ངེ་འཛིན་གྱིས་དངོས་གྲུབ་འགྲུབ་པར་འགྱུར་རོ། །པདྨ་ཆེན་པོ་དགེ་བ་ཡི། །ལས་ཀྱི་ཕྱག་རྒྱ་བསླབ་པར་བྱ། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་གསུངས་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱའམ། དེའི་རིགས་ཀྱི་ལྷ་རྣམས་ཀྱི་ཕྱག་
[79b.7]རྒྱ་བཅིངས་ཏེ། རང་གི་ཕྱག་རྒྱ་སེམས་དཔའི་བདག་ཉིད་དུ་བྱས་ནས། ཡི་གེ་སི་རྣམ་པ་བཞིས་འོད་གསལ་བའི་རྣམ་པའི་བདག་ཉིད་དུ་བསྒོམས་ལ། ཨོཾ་སི་སིདྡྷྱ་ཞེས་བརྗོད་ཅིང་བདག་ཉིད་དུ་བསྒོམས་ན་དངོས་གྲུབ་ཐོབ་པར་འགྱུར་རོ། །དེ་ནས་གཞན་ཡང་དེ་ནས་ཞེས་བྱ་བ་ལ་སོགས་པས། ལས་ཀྱི་གསང་
[80a]
[80a.1]བའི་ཕྱག་རྒྱའི་ཡེ་ཤེས་བསྟན་པར་བྱའོ། །གསང་བས་ན་གསང་བ་སྟེ། སེམས་ཀྱི་བྱ་བ་གང་ཡིན་པའོ། །འཇིག་རྟེན་དབང་པོ་སྙོམས་ཞུགས་ལ། །ཞེས་བྱ་བ་ནི་པདྨ་རིགས་ཀྱི་ལྷའི་རྣལ་འབྱོར་རོ། །བུད་མེད་ཀུན་དང་རྩེ་བྱེད་ཅིང་། །ཞེས་བྱ་བ་ནི་རང་གི་རིག་པའི་ལྷའོ། །ཨ་
[80a.2]ཧོ་སུ་ཁ་ཞེས་བརྗོད་ཅིང་སངས་རྒྱས་ཐམས་ཅད་འཇིག་རྟེན་དབང་ཕྱུག་གི་རྣལ་འབྱོར་པས་མཆོད་པར་བྱའོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱིས་པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་
[80a.3]ཕྱག་རྒྱ་ཆེན་པོ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་རིག་པ་དང་རང་གི་རིག་པའི་ལྷ་མོ་སྤྲུལ་ལ། བསྡུ་བ་ལ་སོགས་པ་བྱས་ནས། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། བདག་ཉིད་གཟུགས་བརྙན་དང་མཚུངས་པ་དང་། དེ་ཡང་གཟུགས་བརྙན་དང་མཚུངས་
[80a.4]པར་བསྒོམས་ལ་ཨ་ཧོ་སུ་ཁ་ཞེས་བརྗོད་ཅིང་། དེ་དང་ལྷན་ཅིག་པའི་སྦྱོར་བ་བསམས་ཏེ། དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་དེའི་རང་བཞིན་དུ་བསམས་ལ། ཨོཾ་སརྦྦ་པཱུ་ཛ་པྲ་བརྟ་ན་ཡ་མཾ་ཞེས་བྱ་བ་འདི་བརྗོད་དོ། །དེ་ནས་ཇི་སྲིད་དུ་འདི་ཉིད་བརྗོད་ཅིང་ཐུན་བཞིའི་སྦྱོར་བས་
[80a.5]དེ་སྲིད་དུ་བསྒོམས་ནས། དེའི་རང་བཞིན་མངོན་སུམ་ལྟ་བུར་འགྱུར་རོ། །དེ་ནས་ཟླ་བ་ཉ་ལ་མཚན་ཐོག་ཐག་བསྒོམས་ན་འགྲུབ་པར་འགྱུར་རོ། །རིག་པ་དེ་ཡང་མངོན་སུམ་དུ་འོངས་ནས་ལྷན་ཅིག་མཉམ་པར་སྦྱོར་བ་བྱས་ནས། དེའི་ལུས་ལ་འཇུག་པར་འགྱུར་བ་དང་། དེ་ནས་འདི་འཇིག་རྟེན་དབང་
[80a.6]ཕྱུག་དང་འདྲ་བར་འགྱུར་རོ། །འཇིག་རྟེན་དབང་པོར་སྙོམས་ཞུགས་ལ། །བུད་མེད་ཀུན་དང་རྩེ་བྱེད་ཅིང་། །ཞེས་བྱ་བ་ནི་སྔ་མ་བཞིན་དུ་ཐམས་ཅད་བྱས་ནས། རང་གི་རིག་མ་དང་ལྷན་ཅིག་ཏུ་མཉམ་པར་སྦྱོར་བར་བསྒོམས་ལ། པྲི་ཡ་པྲི་ཡ་ཞེས་བརྗོད་ཅིང་། དེ་བཞིན་གཤེགས་པ་ཐམས་
[80a.7]ཅད་ཀྱང་དེའི་རང་བཞིན་དུ་བསམས་ཏེ། ཨོཾ་པྲི་ཏི་ཀ་ར་པདྨ་ཧོ་ཞེས་བརྗོད་ན་སོ། དེ་བཞིན་གཤེགས་པ་ཐམས་ཅད་ནམ་མཁའ་དང་མཉམ་པར་ལྷག་པར་མོས་ཤིང་དགའ་བ་བསྐྱེད་ལ། ཕྱིས་ཇི་སྲིད་དུ་བདག་ཉིད་རིག་པ་དང་ལྷན་ཅིག་པའི་སྦྱོར་བ་དང་ལྡན་པ་དེ་སྲིད་དུ་བསྒོམས་
[80b]
[80b.1]ན། དེའི་བདག་ཉིད་མངོན་སུམ་ལྟ་བུར་མཐོང་བར་འགྱུར་རོ། །དེ་ནས་བསྒྲུབས་པ་དང་དེའི་རིག་པའི་ལྷ་མོ་མངོན་སུམ་དུ་འོངས་ནས་ལྷན་ཅིག་ཏུ་མཉམ་པར་སྦྱོར་བ་བྱས་ནས། དེ་ལུས་ལ་འཇུག་པར་འགྱུར་རོ། །སྐད་ཅིག་མ་དེ་ཉིད་ཀྱི་ཚེ་འདི་འཇིག་རྟེན་དབང་ཕྱུག་དང་འདྲ་བར་འགྱུར་རོ། །འཇིག་རྟེན་
[80b.2]དབང་པོར་སྙོམས་ཞུགས་ལ། །བུད་མེད་ཀུན་དང་རྩེ་བྱེད་ཅིང་། །ཞེས་བྱ་བ་ལ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཨ་ཧོ་ར་ཏི་ཞེས་བརྗོད་ཅིང་ལྷ་མོ་དང་ལྷན་ཅིག་མཉམ་པར་སྦྱོར་བ་བསྒོམས་ལ། དེ་བཞིན་གཤེགས་པ་ཐམས་ཅད་ཀྱང་དེའི་རང་བཞིན་དུ་བསྒོམ་མོ། །དེ་ནས་སྣང་བརྙན་ཙམ་གྱི་
[80b.3]རྣལ་འབྱོར་ལ་གནས་ཏེ། ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བསྒོམས་ལ། ཨོཾ་ར་ཏི་པྲ་བརྟན་པདྨ་ཞེས་བརྗོད་ཅིང་། དེ་ཇི་སྲིད་དུ་བདག་ཉིད་དང་ལྷན་ཅིག་ཏུ་མཉམ་པར་སྦྱོར་བའི་བསྒོམ་པ་དང་ལྡན་པ་དེ་སྲིད་དུ་བསྒོམ་པ་ན། དེའི་རང་བཞིན་དུ་བདག་ཉིད་མཐོང་བར་འགྱུར་རོ། །
[80b.4]དེ་ནས་སྔ་མ་བཞིན་དུ་བསྒྲུབ་པར་བྱའོ། །འཇིག་རྟེན་དབང་པོར་སྙོམས་ཞུགས་ལ། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་ཐམས་ཅད་བྱས་ལ། ཆོས་ཐམས་ཅད་རང་བཞིན་གྱིས་རྣམ་པར་དག་པ་འོད་གསལ་བའོ་ཞེས་བྱ་བ་བསྒོམ་ཞིང་། རིག་པའི་ལྷ་མོ་དང་ལྷན་ཅིག་མཉམ་པར་སྦྱོར་
[80b.5]བར་བསྒོམས་ནས། སུ་ཁ་སུ་ཁ་ཞེས་བརྗོད་ཅིང་། དེ་བཞིན་གཤེགས་པ་ཐམས་ཅད་ཀྱང་དེའི་རང་བཞིན་དུ་བསམ་པར་བྱའོ། །ཨོཾ་མ་ཧཱ་སུ་ཁ་པདྨ་དྷིཌྚ་ཧཾ་ཞེས་ལན་གསུམ་བརྗོད་ཅིང་དེ་བཞིན་གཤེགས་པ་ཐམས་ཅད་ལ་དེའི་བདེ་བས་ཡང་དག་པར་མཆོད་ལ། ཕྱིས་གང་གི་ཚེ་སྔ་མ་བཞིན་དུ་བདག་
[80b.6]ཉིད་དང་ལྷན་ཅིག་པར་བསྒོམ་པ་དེའི་ཚེ་མངོན་སུམ་ལྟ་བུར་དེའི་རང་བཞིན་དུ་བདག་ཉིད་མཐོང་བར་འགྱུར་རོ། །དེ་ནས་སྔ་མ་བཞིན་དུ་བསྒྲུབ་པར་བྱའོ། །འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་ནི། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སྔ་མ་
[80b.7]བཞིན་དུ་རང་གི་ལྷའི་རྣལ་འབྱོར་གྱི་ཕྱག་རྒྱ་བཞི་པོ་རྣམས་བྱས་ལ། ཕྱིས་འགྲོ་བ་འདུལ་བའི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ་བསྒྲུབ་པར་བྱའོ་ཞེས་བྱ་བ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་ཡེ་ཤེས་བསླབ་
[81a]
[81a.1]པ་བསྟན་པའི་རྗེས་ཐོགས་ཉིད་ལའོ། །ལས་ཀྱི་དཀྱིལ་འཁོར་གྱི་ཕྱག་རྒྱ་ཆེན་པོ་ནི། ལས་ཀྱི་ཕྱག་རྒྱ་ཆེན་པོ་དེ་དང་དེ་བཅིང་བའི་མཚན་ཉིད་དོ། །ཇི་ལྟ་བ་བཞིན་དུ་བསླབ་པར་བྱའོ་ཞེས་བྱ་བ་ནི་མནའི་སྙིང་པོ་བྱིན་ནས་སོ། །འདི་སྐད་སྟོན་པ་ཡིན་ཏེ། རང་གི་མཚན་མ་དང་བཅས་པའི་
[81a.2]ཐལ་མོ་སྦྱར་ལ། སྙིང་གར་རྩིབ་ལོགས་རྒྱབ་སྦྱོར་བ། །དཔྲལ་བ་ལ་སོགས་དེ་བཞིན་དུ། །ཁ་དང་རྣ་བ་མགོ་ལྟག་པ། །སྤྱི་བོ་ཕྲག་པ་ཁ་རྐེད་བཞག །རིམ་པ་འདིས་གནས་ཇི་ལྟ་བ་བཞིན་དུ་གཞག་པ་ནི། པདྨ་སངས་རྒྱས་ལ་སོགས་པའི་ལྷ་མོ་ནས། པདྨ་ཁུ་ཚུར་གྱི་ལྷ་མོའི་མཐར་ཐུག་པའི་ལག་པ་
[81a.3]བསྒྱུར་བའི་ཚུལ་གྱིས་མཚོན་པ་ནི། སེམས་མ་བཅུ་དྲུག་གི་ཕྱག་རྒྱ་ཆེན་པོར་འགྱུར་རོ། །ལྷག་མ་རྣམས་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པ་ཉིད་ཡིན་པར་ཤེས་པར་བྱའོ། །དེ་ནས་ཞེས་བྱ་བ་ནི་དམ་ཚིག་གི་ཕྱག་རྒྱ་སྟོན་ཏེ། པདྨའི་ཐལ་མོ་སྦྱར་ཏེ་ཞེས་བྱ་བ་ནི་འགྲོ་བ་འདུལ་བའི་
[81a.4]གཟུགས་ཀྱི་དཀྱིལ་འཁོར་གྱི་རྣམ་པར་སྣང་མཛད་ཀྱི་གནས་ཀྱི་ཕྱག་རྒྱར་བསྟན་པའི་པདྨོའི་ཐལ་མོ་སྦྱར་བ་མཆོག་ཅེས་བྱ་བའི་དེ་ཉིད་འདིར་སངས་རྒྱས་པདྨོ་ལ་སོགས་པའི་ལྷ་མོ་ནས། པདྨའི་ཁུ་ཚུར་གྱི་ལྷ་མོའི་མཐར་ཐུག་པ་རྣམས་ཀྱི་དམ་ཚིག་གི་ཕྱག་རྒྱར་འགྱུར་རོ། །ལས་ཀྱི་དཀྱིལ་འཁོར་ཚུལ་
[81a.5]གྱིས་ནི་ཞེས་བྱ་བ་ནི་ཇི་ལྟར་རྡོ་རྗེ་དབྱིངས་ཀྱི་ལས་ཀྱི་དཀྱིལ་འཁོར་དུ་རྡོ་རྗེ་བསྡམས་པའི་ཕྱག་རྒྱ་བཅིངས་ནས། གནས་རྣམས་ཀུན་དུ་གཞག་པར་བྱས་ན་དམ་ཚིག་གི་ཕྱག་རྒྱར་འགྱུར་བ་དེ་བཞིན་དུ་འདིར་ཡང་། ཐལ་མོ་སྦྱར་བའི་ཕྱག་རྒྱ་གནས་རྣམས་ཀུན་དུ་གཞག་པར་བྱས་ན་ལྷ་མོ་ཐམས་ཅད་ཀྱི་
[81a.6]དམ་ཚིག་གི་ཕྱག་རྒྱར་འགྱུར་རོ། །འདི་སྐད་སྟོན་པ་ཡིན་ཏེ། ཇི་སྐད་བཤད་པའི་ཐལ་མོ་སྦྱར་བ་བཅིངས་ལ། སྙིང་གར་རྩིབ་ལོགས་རྒྱབ་སྦྱོར་བ། །དཔྲལ་བ་ལ་སོགས་དེ་བཞིན་དུ། །ཁ་དང་རྣ་བ་མགོ་ལྟག་པ། །སྤྱི་བོ་ཕྲག་པ་ཁ་རྐེད་བཞག །ཅེས་བྱ་བའི་གོ་རིམས་འདིས་སངས་རྒྱས་པདྨོའི་ལྷ་མོ་
[81a.7]ནས་བརྩམས་ནས། པདྨ་ཁུ་ཚུར་མའི་མཐར་ཐུག་པ་བཅུ་དྲུག་གི་དམ་ཚིག་གི་ཕྱག་རྒྱར་འགྱུར་རོ། །ལྷག་མ་རྣམས་ཀྱི་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་ཉིད་ཡིན་པར་ཤེས་པར་བྱའོ། །གཞན་ཡང་དེ་ནས་ཞེས་བྱ་བ་ལ་སོགས་པ་ནི། པདྨའི་རིགས་ཀྱི་ལས་
[81b]
[81b.1]ཀྱི་དཀྱིལ་འཁོར་གྱི་ཆོས་ཀྱི་ཕྱག་རྒྱ་དེ་ནི། ཏྲ་ཞེས་བྱ་བ་ནི་བརྗོད་པར་བྱའོ། །རྡོ་རྗེ་དབྱིངས་ཀྱི་ལས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་ཉིད་ལ་ཡི་གེ་ཏྲ་ཀུན་གྱི་མཐར་སྦྱར་བར་ཤེས་པར་བྱའོ་ཞེས་བྱ་བའི་དོན་ཏོ། །ལས་ཀྱི་ཕྱག་རྒྱ་གཉིས་བྱས་ལ། །ལས་ཀྱི་ཕྱག་རྒྱ་ཡང་དག་སྦྱར། །ཞེས་
[81b.2]བྱ་བ་ནི་རྐེད་པའི་གནས་སུ་ཐལ་མོ་སྦྱར་བ་གཉིས་སུ་བྱས་ནས། གཡོན་པའི་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་སྟེ། །སངས་རྒྱས་བྱང་ཆུབ་སྦྱིན་པའོ། །ཞེས་བྱ་བ་ལ་སོགས་པའི་ཚུལ་གྱིས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་
[81b.3]གསུངས་པའི་གོ་རིམས་ཀྱི་རྣམ་པར་སྣང་མཛད་ནས་བརྩམས་ནས། པདྨ་འབེབས་པའི་བར་གྱི་མཐར་ཐུག་པའི་ལྷ་མོ་ཐམས་ཅད་ཀྱི་ལས་ཀྱི་ཕྱག་རྒྱར་འགྱུར་རོ། །དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ལས། པདྨའི་རིགས་ཀྱི་ལས་ཀྱི་དཀྱིལ་འཁོར་གྱི་འགྲེལ་པ་རྫོགས་
[81b.4]སོ།། །།དེ་ལྟར་རྒྱས་པ་ལ་དགའ་བའི་སེམས་ཅན་རྗེས་སུ་གཟུང་བར་བྱ་བའི་ཕྱིར། པདྨའི་རིགས་ཀྱི་རང་བཞིན་གྱི་དཀྱིལ་འཁོར་ཆེན་པོ་དང་། གཟུངས་དང་།ཆོས་དང་།ལས་ཀྱི་དཀྱིལ་འཁོར་རྣམས་བསྟན་ནས། ད་ནི་བར་མ་ལ་དགའ་བའི་སེམས་ཅན་རྗེས་སུ་གཟུང་བར་བྱེད་
[81b.5]པའི་འགྲོ་བ་འདུལ་བའི་དཀྱིལ་འཁོར་ཆེན་པོ་ལ་སོགས་པ་རྣམ་པ་བཞི་བསྡུས་པར་གྱུར་བ་འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་ནི། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་
[81b.6]ཞེས་བྱ་བའི་ཐ་ཚིག་གོ། །འདིར་དང་པོར་སྦྱོར་བའི་ཏིང་ངེ་འཛིན་ནི། །འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་དང་པོར་སྦྱོར་བ་ཉིད་ཡིན་ནོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །འགྲོ་བ་འདུལ་བའི་དཀྱིལ་འཁོར་རྣམ་པ་བཞི་ལ་ལྟོས་ནས་ཡང་ཞེས་བྱ་བ་སྨོས་སོ། །
[81b.7]རྡོ་རྗེ་ཆོས་ཀྱི་དམ་ཚིག་གི་ཕྱག་རྒྱ་ཞེས་བྱ་བ་ལ།ཤེས་རབ་ཀྱི་ཕ་རོལ་ཏུ་ཕྱིན་པ་ནི་རྡོ་རྗེ་ཆོས་སོ། །དེའི་དམ་ཚིག་ནི་པདྨའི་རིགས་ཀྱི་རང་བཞིན་ཏེ།པདྨའི་རིགས་ཀྱི་ཕྱག་རྒྱ་བཞི་བའི་དཀྱིལ་འཁོར་རོ། །དེ་ཉིད་ཀྱི་ཕྱག་རྒྱ་ནི་སེམས་ཅན་གྱི་ཁམས་ལ་གཟུགས་བརྙན་གྱི་ཚུལ་གྱིས་རྒྱས་འདེབས་པའི་ཕྱིར་རོ།
[82a]
[82a.1]དེ་གང་གིས་བྱིན་གྱིས་བརླབས་ཤིང་བསྐྱེད་པའི་ཏིང་ངེ་འཛིན་ཏེ། མིང་དེ་སྐད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་ནས་ཕྱིས་འཆད་པར་འགྱུར་བའི་ཕྱག་རྒྱ་ཇི་སྐད་དུ་བཤད་པ་བསྐྱེད་པའི་སྙིང་པོ་འདིས་གསུངས་པ་ནི་བཤད་པའོ། འདི་སྐད་སྟོན་པ་ཡིན་ཏེ། བཅོམ་ལྡན་
[82a.2]འདས་རྣམ་པར་སྣང་མཛད་པདྨའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་སྤྲུལ་པའི་ཕྱིར། འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀ་ན་གནས་པའི་པདྨོའི་རྣམ་པ་ལ་ཐུགས་རྩེ་གཅིག་ཏུ་མཛད་ནས་སྙིང་པོ་འདི་གསུངས་སོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་
[82a.3]ལྡན་འདས་རྣམ་པར་སྣང་མཛད་ཀྱི་པདྨའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་སྤྲུལ་ནས་བཅོམ་ལྡན་འདས་རྣམ་པར་སྣང་མཛད་ལ་ཕུལ་ལོ། །དེ་ལྟར་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་ཀྱི་ཕྱག་རྒྱའི་སྙིང་པོ་རྣམས་གསུངས་པ་དང་། བཅོམ་ལྡན་འདས་འཕགས་པ་
[82a.4]སྤྱན་རས་གཟིགས་དབང་ཕྱུག་གིས་འགྲོ་བ་འདུལ་བ་དང་། གཙུག་ཕུད་སངས་རྒྱས་དང་། པདྨའི་ཏིང་ངེ་འཛིན་དང་། པདྨ་ངེས་པའི་དབང་ཕྱུག་རྣམས་ཀྱི་ཕྱག་རྒྱ་བཞི་པའི་དཀྱིལ་འཁོར་ཐུགས་ཀའི་པདྨ་ལས་སྤྲུལ་ནས། དེ་བཞིན་གཤེགས་པ་ཐམས་ཅད་ལ་ཕུལ་ལོ་ཞེས་ཤེས་པར་བྱའོ། །
[82a.5]དེ་ལ་དེ་ནས་ཡང་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཨོཾ་སརྦྦ་མུ་ཁི་ཧཱུཾ་ཞེས་བྱ་བའི་གཞུང་འདི་ཙམ་གྱིས་ནི། པདྨའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་པ་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ལ་
[82a.6]སོགས་པ་ནི་པདྨའི་རིགས་ཀྱི་ཕྱག་རྒྱ་བཞི་པའི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་སྔ་མ་བཞིན་དུ་ཤེས་པར་བྱའོ། །འགྲོ་བ་འདུལ་བའི་དུམ་བུར་གསུངས་པའི་དངོས་གྲུབ་རྣམས་ནི་པདྨ་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་
[82a.7]བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །འཕགས་པ་སྤྱན་རས་གཟིགས་དབང་པོ་ནི་འགྲོ་བ་འདུལ་བའོ། །འདི་ཞེས་བྱ་བ་ནི་
[82b]
[82b.1]བློ་ལ་གནས་པའོ། །ཕྱག་རྒྱ་བཞི་པའི་དཀྱིལ་འཁོར་ནི་པདྨའི་རིགས་ཀྱི་རང་བཞིན་ཏེ། བཅོམ་ལྡན་འདས་རྣམ་པར་སྣང་མཛད་ཀྱིས་གསུངས་པ་ནི་བཤད་པའོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འགྲོ་བ་འདུལ་བའི་རྣལ་འབྱོར་དང་།
[82b.2]དེ་ལས་བཤད་པའི་རྣལ་འབྱོར་ཆེན་པོ་བྱས་ལ། སྔ་མ་བཞིན་དུ་ཕྱག་རྒྱ་བཞི་པའི་དཀྱིལ་འཁོར་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་དེའི་རྗེས་ལ་དཀྱིལ་འཁོར་འདི་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་ཞེས་བྱ་བའི་དོན་ཏོ། །གང་གི་ཕྱིར་ཕྱག་རྒྱ་བཞི་
[82b.3]པའི་དཀྱིལ་འཁོར་དུ་ཞུགས་པ་མེད་ན་བར་མ་ལ་དགའ་བའི་སེམས་ཅན་རྗེས་སུ་གཟུང་བར་མི་འགྱུར་བ་དེའི་ཕྱིར་རབ་ཏུ་བཤད་བྱ་བ། ཕྱག་རྒྱ་བཞི་མཆོག་དཀྱིལ་འཁོར་ཏེ། །ཞེས་བྱའོ། །རྡོ་རྗེ་དབྱིངས་དང་འདྲ་བ་དང་། །ཞེས་བྱ་བ་ནི་སྤྲུལ་པའི་ཕྱག་རྒྱ་བཞི་པའི་དཀྱིལ་འཁོར་དང་འདྲ་
[82b.4]བའོ། །དཀྱིལ་འཁོར་ཆེན་པོ་འདྲ་བར་བྱ། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་དང་འདྲ་བའོ། །ཕྱག་རྒྱའི་དཀྱིལ་འཁོར་དབུས་སུ་ནི། །སངས་རྒྱས་གཟུགས་ནི་གཞག་པར་བྱ། །དེ་ཡི་ཕྱོགས་རྣམས་ཐམས་ཅད་དུ། །རྡོ་རྗེ་པདྨོ་ལ་སོགས་བྲི། །ཞེས་བྱ་བ་ནི་འགྲོ་བ་
[82b.5]འདུལ་བའི་དཀྱིལ་འཁོར་ཆེན་པོ་ལས་བཤད་པའི་བྲི་བའི་ཆོ་གས་བཅོམ་ལྡན་འདས་རྣམ་པར་སྣང་མཛད་པདྨ་དང་། སེང་གེའི་གདན་ལ་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོས་བྲི་བར་བྱའོ། །དེའི་ཤར་ཕྱོགས་ཀྱི་ཆ་ལ་འགྲོ་བ་འདུལ་བའི་གནས་སུ་པདྨ་དང་ཟླ་བའི་གདན་ལ་
[82b.6]པདྨས་མཚན་པའི་རྡོ་རྗེ་རྩེ་ལྔ་པ། གཙུག་ཕུད་སངས་རྒྱས་ཀྱི་གནས་སུ་པདྨས་མཚན་པའི་ཡིད་བཞིན་གྱི་ནོར་བུ། པདྨ་ཏིང་ངེ་འཛིན་གྱི་གནས་སུ་རྡོ་རྗེ་པདྨ་འདབ་མ་བཅུ་དྲུག་པ། པདྨ་ངེས་པའི་དབང་ཕྱུག་གི་གནས་སུ་སྔོན་པོ་དང་། སེར་པོ་དང་། དམར་པོ་དང་ལྗང་གུའི་ཁ་དོག་དང་ལྡན་པའི་འདབ་མ་
[82b.7]བཞི་པ་ལྟེ་བ་ནི་དཀར་པོ་སྟེ། འདི་ནི་པདྨ་འདབ་མ་བཞི་པ་ཞེས་བརྗོད་དོ། །འདིར་འགྲོ་བ་འདུལ་བ་ལས་བཤད་པའི་སྙིང་པོ་འདི་ཉིད་ཀྱིས་བྲི་བར་བྱ་སྟེ། དེ་སྐད་དུ། སངས་རྒྱས་ཕྱོགས་ཀུན་བྲི་བ་ནི། །པདྨའི་གནས་སུ་གནས་པ་ནི། །རྡོ་རྗེ་རིན་ཆེན་པདྨོ་དང་། །སྣ་ཚོགས་པདྨོ་དེ་བཞིན་ནོ། །ཞེས་
[83a]
[83a.1]གསུངས་སོ། །དེ་ལ་སྙིང་པོ་ནི་འདི་ཡིན་ཏེ། ཨོཾ་ཧཱུཾ་དྷེ་ཀྲེ་ཞེས་བྱ་བ་འདི་ཉིད་གཟུང་བར་བྱའོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སློབ་དཔོན་གྱི་ཆོ་གས་སློབ་དཔོན་ཉིད་འཇུག་པའི་ཆོ་ག་རྗེས་སུ་བཅད་ལ་བསྡུ་བ་བྱས་ཏེ།
[83a.2]དེ་ནས་མཚན་བརྒྱ་རྩ་བརྒྱད་པས་བསྟོད་པའི་རྗེས་ཐོགས་ཉིད་ལ་ཕྱག་རྒྱ་བཞི་པའི་དཀྱིལ་འཁོར་འདིར་དགུག་པ་ལ་སོགས་པའི་ཆོ་ག་རྒྱས་པ་བྱ་བའོ། །དེ་ལ་རྟ་མགྲིན་གྱི་ལྕགས་ཀྱུའི་ལས་ཀྱི་ཕྱག་རྒྱ་སྔ་མ་བཞིན་དུ་དགུག་པ་ལ་སོགས་པ་སྨོས་པ་ནི། དོན་ཡོད་ཞགས་པའི་ལས་ཀྱི་ཕྱག་རྒྱས་
[83a.3]གཞུག་པ་ནས་བརྩམས་ནས། སློབ་མ་གཞུག་པའི་གནང་བ་ནོད་པའི་མཐར་ཐུག་པའི་ཆོ་ག་རྒྱས་པ་ཤེས་པར་བྱའོ། །དགུག་པ་དང་པོར་བྱས་པ་གང་ཡིན་པ་ཉིད་ནི་དགུག་པ་ལ་སོགས་པའི་ཆོ་ག་རྒྱས་པ་བྱའོ། །ཇི་ལྟ་བ་བཞིན་དུ་བཅུག་སྟེ། འདི་སྐད་དུ་ཞེས་བྱ་བ་ནི། འགྲོ་བ་འདུལ་བའི་དཀྱིལ་
[83a.4]འཁོར་ཆེན་པོའི་ཚུལ་གྱིས་སློབ་མ་བཅུག་ལ། འདི་ཁྱོད་ཀྱིས་སུ་ལ་ཡང་མ་བརྗོད་ཅིག་ཅེས་བརྗོད་ལ། ལྷག་མ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་ཤེས་པར་བྱའོ། །དེ་ལྟར་སློབ་དཔོན་གྱི་ལས་དང་། སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་འགྲོ་
[83a.5]བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ་འགྲོ་བ་འདུལ་བའི་དུམ་བུ་ཐམས་ཅད་ལས་བཤད་པའི་དངོས་གྲུབ་རྣམས་སློབ་དཔོན་གྱིས་བསྟན་པར་བྱའོ་ཞེས་བྱ་བའི་དོན་འདི་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་
[83a.6]ཞེས་བྱ་བ་ནི་སློབ་མ་འཇུག་པའི་དུས་ཕྱིས། ཡེ་ཤེས་བསྐྱེད་པར་བྱ་བའི་བསྒོམ་པའི་གདམས་ངག་སྦྱིན་པར་བྱའོ། །ལག་པས་པདྨོ་བཟུང་ནས་ཀྱང་། །ཞེས་བྱ་བ་ནི་ཤིང་ལས་བྱས་པའི་པདྨ་འདབ་མ་བཅུ་དྲུག་པ་དེ་གཟུང་ངོ་། །བསྒོམས་ཏེ་ལེགས་པར་བསྒོམ་པར་བྱ། །ཞེས་བྱ་བ་ནི་ཏིང་
[83a.7]ངེ་འཛིན་གྱི་སྟོབས་ཀྱིས་པདྨའི་དྲི་དེས་དེ་བཞིན་གཤེགས་པ་ཐམས་ཅད་ལ་མཆོད་ན་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་གི་ལྷའི་རྣལ་འབྱོར་བྱས་ལ། ཕྱིས་འགྲོ་བ་འདུལ་བའི་ཕྱག་རྒྱ་ཆེན་པོས་པདྨ་
[83b]
[83b.1]བླངས་ཏེ། ཨོཾ་གནྡྷ་པཱུ་ཛ་གྲ་གྷྱ་སཱ་དྷ་ཡ་ཧྲི། ཞེས་ཟློས་ཤིང་ཇི་སྲིད་དུ་ཉིན་རེ་ཞིང་ཐུན་བཞིའི་སྦྱོར་བས་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམས་ན། པདྨ་དེ་ལས་གདོན་མི་ཟ་བར་ལྷའི་པདྨའི་དྲི་བྲོ་བར་འགྱུར་རོ། །དེ་ནས་པདྨ་དེ་ཏིང་ངེ་འཛིན་གྱི་སྦྱོར་བས་བསྣམས་ན། དེ་བཞིན་
[83b.2]གཤེགས་པ་ཐམས་ཅད་སྤྱན་རས་གཟིགས་དབང་ཕྱུག་ཏུ་གྱུར་ནས། པདྨ་ལ་ཆེད་དུ་ནོན་པར་བསྣམས་ཏེ། གང་གི་ཚེ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམས་ན་དེས་འཇིག་རྟེན་དབང་ཕྱུག་དང་མཚུངས་པའི་དངོས་གྲུབ་ཏུ་འགྱུར་རོ། །མཉམ་པར་གཞག་པས་གཙུག་ཕུད་
[83b.3]དབུས། །སངས་རྒྱས་གཟུགས་ནི་རབ་གཞག་པ། །ཞེས་བྱ་བ་ནི་འཇིག་རྟེན་དབང་ཕྱུག་གི་རལ་པའི་དབུས་སུ་དེ་བཞིན་གཤེགས་པ་འོད་དཔག་ཏུ་མེད་པ་རབ་ཏུ་གཞག་པར་བྱའོ། །མཉམ་པར་གཞག་པ་ནི་སེམས་གཡེང་བ་མེད་པའོ། །འཇིག་རྟེན་ཐམས་ཅད་དབང་དུ་བྱེད། །ཅེས་བྱ་བ་
[83b.4]ནི་འཇིག་རྟེན་གྱི་ཁམས་ཐམས་ཅད་དུའོ། །ཇི་ལྟར་ཞེ་ན། འགྲོ་ཞིང་བསྒྱིངས་པ་བསྟན་ནས་ནི། །ཞེས་བྱ་བ་སྨོས་ཏེ། དེའི་ང་རྒྱལ་བསྒོམ་ཞིང་བསྒྱིངས་པས་ཕྱོགས་བཅུར་རང་གི་གཟུགས་ཀྱི་རྗེས་སུ་འབྲང་བ་དང་བཅས་པས་སྟོན་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དཀྱིལ་
[83b.5]འཁོར་ཆེན་པོ་ལས་བཤད་པའི་ཚུལ་གྱིས་འཕགས་པ་སྤྱན་རས་གཟིགས་དབང་ཕྱུག་གི་རྣལ་འབྱོར་བྱས་ལ། ཕྱིས་ཨོཾ་པདྨ་མུ་ཀུ་ཊ་ཏ་ཐཱ་ག་ཏ་བ་ཤི་ཀུ་རུ་སརྦྦ་ལོ་ཀེ་ཤྭ་ར་ཨཱ་བེ་ཤ་ཀརྨྨཱ་ཡ་ཧོ། ཞེས་ཟློས་ཤིང་པདྨའི་ཅོད་པན་གྱི་དབུས་སུ་གཙུག་ཕུད་སངས་རྒྱས་མངོན་སུམ་དུ་མཐོང་
[83b.6]བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་ངོ་བོར་བསྟན་པར་བྱས་ལ། དེའི་ངོ་བོ་དེས་འཇིག་རྟེན་གྱི་ཁམས་ཐམས་ཅད་དེའི་རང་བཞིན་དུ་བྱའོ། །པདྨོའི་པདྨོ་གཟུགས་ཆེན་པོར། །ཞེས་བྱ་བ་ནི་བཅོམ་ལྡན་འདས་ཏིང་ངེ་འཛིན་པདྨོ་ནི་པདྨོ་ཡིན་ལ། དེའི་པདྨོ་ནི་པདྨའི་པདྨོའོ། །རྡོ་རྗེ་
[83b.7]པདྨ་འདབ་མ་བཅུ་དྲུག་པ་ཁ་དོག་དམར་པོ་པདྨ་དེས་མཚན་པར་བྱས་པ་ནི་བསྐྱེད་པའོ། །གང་གིས་བྱ་ཞེ་ན། ཏིང་ངེ་འཛིན་གྱིས་ཞེས་བྱ་བ་སྨོས་ཏེ་བསྒོམས་པ་སྤྲུལ་པའོ། །ཇི་བཞིན་ཚུལ་དུ་འདུག་ནས་སུ། །ཞེས་བྱ་བ་ནི་ལྷའི་རྣལ་འབྱོར་བྱས་ནས་སོ། །ཡིད་ཀྱིས་དེ་ནི་གསད་པར་བྱ། །ཞེས་བྱ་བ་ནི་ཏིང་
[84a]
[84a.1]ངེ་འཛིན་གྱིས་བསྐྱེད་པའི་པདྨ་དེས་འགྲོ་བ་ཐམས་ཅད་ཡིད་ཀྱིས་གསད་པར་བྱའོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཏིང་ངེ་འཛིན་པདྨའི་རྣལ་འབྱོར་བྱས་ལ། ཨོཾ་པདྨ་པདྨ་མཱ་ར་ཡ་སརྦྦ་པྲ་ཏྱ་ཨརྠི་ཀཱ་ན་ས་མ་དི་ཛྙཱ་ན་དྷྲཱྀཀ། ཅེས་ཟློས་
[84a.2]ཤིང་རང་གི་ལག་པར་རྣལ་འབྱོར་གྱི་པདྨ་བསམས་ལ། དེ་ནས་སྙིང་པོ་འདི་བརྗོད་པར་བྱའོ། །བདག་ཉིད་པདྨ་ཁྲོ་བོའི་ཏིང་ངེ་འཛིན་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམས་ལ། དེ་ནས་གང་གི་ཚེ་རང་གི་ལུས་ཀྱི་མདུན་དུ་དེ་བཞིན་གཤེགས་པ་ལ་སོགས་པ་འཇིག་རྟེན་གྱི་ཁམས་
[84a.3]ཐམས་ཅད་དུ་སྤྲོས་པ་དེའི་ཚེ། ཉིན་རེ་ཞིང་དེའི་རང་བཞིན་དུ་བསྒོམས་པའི་སྟོབས་ཀྱིས་མཐོང་བར་འགྱུར་རོ། །དེ་ནས་མཐར་མཚན་ཐོག་ཐག་པདྨ་ཁྲོ་བོའི་ཏིང་ངེ་འཛིན་བསྒོམས་ན་འགྲུབ་པར་འགྱུར་ཏེ། པདྨའི་ཏིང་ངེ་འཛིན་དང་མཚུངས་པར་འདོད་ཆགས་ལ་སོགས་པ་དང་བྲལ་བར་འགྱུར་རོ། །དེ་
[84a.4]བས་ན་གང་གི་ཚེ་ན་པདྨ་དེས་སེམས་ཅན་འགའ་ཞིག་ལ་རེག་པ་དེའི་ཚེ་ཡང་པདྨའི་ཁྲོ་བོའི་ཏིང་ངེ་འཛིན་གྱི་སྟོབས་ཀྱིས་སྒྲིབ་པ་ཐམས་ཅད་དང་བྲལ་བར་འགྱུར་རོ། །དེ་ལྟར་ན་སྔ་མའི་གནས་སྐབས་ལས་འཕོས་པ་ལས་གསད་པར་བྱ་ཞེས་བྱ་བའི་ཐ་ཚིག་གོ། །པདྨའི་རྒྱ་གྲམ་ཉིད་དང་ནི། །ཞེས་བྱ་བ་ནི།
[84a.5]ཇི་སྐད་བཤད་པའི་མཚན་ཉིད་དང་ལྡན་པའི་སྣ་ཚོགས་པདྨའི་རྒྱ་གྲམ་མོ། །ཤིང་ལ་སོགས་པ་ལ་པདྨ་རྒྱ་གྲམ་གྱི་བཟོ་བྱས་ལ་ལག་པས་བཟུང་ནས། དེ་བསྐོར་བས་དབབ་པ་ལ་སོགས་པའི་ལས་ཐམས་ཅད་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་
[84a.6]པོ་ལས་བཤད་པའི་ཆོ་གས་པདྨ་ངེས་པའི་དབང་ཕྱུག་གི་རྣལ་འབྱོར་བྱས་ལ། ཨོཾ་བི་ཤྭ་པདྨ་སརྦྦ་ཀརྨྨ་ཀ་རོ་བྷ་བ་ལ་ལིའུ་ལེ་ལེ་ལི་ཧཱུཾ་ཕཊ། ཅེས་བརྗོད་ཅིང་ཇི་སྐད་བཤད་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱ་བཟུང་ལ། གང་གི་ཚེ་སྙིང་པོ་འདི་ཟློས་ཤིང་། ཟླ་བ་གཅིག་གམ་ཟླ་བ་དྲུག་གི་བར་
[84a.7]དུ་བྱས་ནས་མཐར་མཚན་ཐོག་ཐག་བསྒོམས་ན། དེ་ནས་དེའི་ཚེ་པདྨ་དེ་འགྲུབ་པར་འགྱུར་རོ། །དེ་ནས་ལས་ཀྱི་དུས་སུ་སྔ་མ་བཞིན་དུ་ལྷའི་རྣལ་འབྱོར་བྱས་ལ། བདེན་པའི་བྱིན་གྱི་རླབས་ཀྱིས་པདྨ་དེ་ལན་གསུམ་མངོན་པར་བཟླས་ནས་བསྐོར་ནས། སྣོད་ལ་གཞུག་པ་ལ་སོགས་པའི་ལས་ཐམས་ཅད་
[84b]
[84b.1]བསམས་པ་ཙམ་གྱིས་འགྲུབ་པར་འགྱུར་རོ། །དེ་ནས་ཕྱག་རྒྱ་གསང་བའི་ཡེ་ཤེས་བསླབ་པོ་ཞེས་བྱ་བ་ལ་གསང་བའི་དམ་ཚིག་དང་ཆོས་དང་ལས་ལ་སོགས་པའི་མཚན་ཉིད་ཀྱིས་བྱ་བའོ། །ཆགས་པས་དགོས་པ་ཐམས་ཅད་ནི། །ཞེས་བྱ་བ་འདི་ནི་འདི་གསང་བའོ། །དེ་ཉིད་ཀྱི་ཕྱག་རྒྱ་དེར་ངེས་པའི་ཡེ་
[84b.2]ཤེས་དེ་བསླབ་པ་ནི་བསྟན་པའོ། །འདི་ཉིད་འཆད་པ་ནི་ཆགས་པ་ཞེས་བྱ་བ་ལ་སོགས་པ་ནི། ཆོས་བདག་མེད་པའི་ཆགས་པས་ཆགས་པ་མངའ་བ་ནི་གསང་བའི་དམ་ཚིག་སྟེ། ཆོས་དང་ལས་ལ་སོགས་པའི་ཕྱག་རྒྱ་ཐམས་ཅད་བསྒྲུབ་ཅིང་སྐྱེད་པར་བྱེད་པའོ། །ཅིའི་ཕྱིར་ཞེ་ན། གང་ཕྱིར་འདའ་
[84b.3]བར་མི་འགྱུར་བ། །ཕྱག་རྒྱ་དམ་ཚིག་ཅེས་སུ་བསྒྲགས། །ཞེས་བྱ་བའོ། །བསྒྲུབ་པར་དཀའ་བའི་ཕྱག་རྒྱ་ཡང་། །རྣལ་འབྱོར་གྱིས་ནི་མྱུར་དུ་འགྲུབ། །ཅེས་བྱ་བ་ནི་ཤིན་ཏུ་ཆགས་པ་བསྒོམ་དགོས་པའི་རྣལ་འབྱོར་འདི་ནི་བསྒྲུབ་པར་དཀའ་བ་སྟེ། གདུལ་བྱ་མ་ཡིན་པའི་རིགས་མེད་པའི་
[84b.4]སྒྲུབ་པ་པོས་ཀྱང་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ཤིན་ཏུ་ཆགས་པའི་རྣལ་འབྱོར་བསྒོམ་པའི་སྟོབས་ཀྱིས་སྐད་ཅིག་གིས་ནི་མྱུར་བ་ཉིད་དུ་འགྲུབ་པའོ། །དེ་ལ་འདིར་ཕྱག་རྒྱ་ཐམས་ཅད་ཀྱི་དམ་ཚིག་ནི་འདི་ཡིན་ཏེ། བདག་ཉིད་ཆེན་པོ་གང་དག་གིས། །
[84b.5]ཕྱག་རྒྱ་གང་དང་གང་བཅིངས་པ། །བཟླས་པའི་སྙིང་པོའི་དོན་དུ་ནི། །དེར་ནི་བདག་ཉིད་བསྒོམ་པར་བྱ། །དེ་ལ་གསང་བ་འདི་ཡིན་ཏེ། །རང་གི་དབང་པོ་བཤིག་ནས་ནི། །རྡོ་རྗེ་བཅིངས་པ་བཟུང་ནས་སུ། །དེ་ཡིས་ཕྱག་རྒྱ་གང་རེ་བ། །དེ་མ་ཐག་ཏུ་དེ་དབང་འགྱུར། །དེ་ལ་ཕྱག་རྒྱ་ཐམས་ཅད་ཀྱི་
[84b.6]ཆོས་ནི་འདི་ཡིན་ཏེ། རྡོ་རྗེ་ཕྲ་མོའི་ཚུལ་སྦྱར་ལ། །ཡེ་ཤེས་ཕྱག་རྒྱ་བཅིང་བར་བྱ། །ཆོ་ག་འདི་ཡི་ཚུལ་གྱིས་ནི། །ཡེ་ཤེས་ཕྱག་རྒྱ་དབང་དུ་འགྱུར། །དེ་ལ་ཕྱག་རྒྱ་ཀུན་གྱི་ལས་ནི་འདི་ཡིན་ཏེ། གླུ་དང་གར་དང་ཟས་དང་བློ། །སྤྱོད་པ་ལ་སོགས་བདེ་བ་རྣམས། །སངས་རྒྱས་རྣམས་ལ་ཕུལ་ན་
[84b.7]ནི། །ལས་ཀྱི་ཕྱག་རྒྱ་དབང་དུ་འགྱུར། །དེ་ནས་དཀྱིལ་འཁོར་ཐམས་ཅད་བསྒྲུབ་པའི་གསང་བའི་ཕྱག་རྒྱ་བསླབ་པར་བྱའོ། །མཚན་མ་བསྟན་པར་རང་གྱུར་ནས། །དཀར་པོར་གྱུར་པའི་རས་ལ་གནས། །མཚན་མ་མཆོད་རྟེན་བྱིན་བརླབས་ཏེ། །བདག་ཉིད་འགྲོ་བ་འདུལ་བར་བསྒོམ། །
[85a]
[85a.1]ཞེས་བྱ་བ་ལ་སོགས་པའོ། །འདི་སྐད་སྟོན་པ་ཡིན་ཏེ། གང་རྒྱ་ཆེ་བས་བསྒྲགས་པའི་འགྲོ་བ་འདུལ་བའི་ཏིང་ངེ་འཛིན་རྣམ་པ་གསུམ་བསྒོམ་པའི་དཀྱིལ་འཁོར་གྱི་བརྟུལ་ཞུགས་སྤྱོད་པ་ལ་སྤྲོ་བ་མེད་པ་གང་ཡིན་པ་དེས། ཉིན་རེ་བཞིན་དུ་ཁྲུས་བྱ་བ་དང་། བདག་ཉིད་
[85a.2]བསྲུང་བ་སྔོན་དུ་འགྲོ་བས་སྡོམ་པ་གཟུང་བ་དང་། ཕྱག་རྒྱ་དགྲོལ་བ་དང་སྡིག་པ་དྲལ་ལ། དེ་ནས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། སྙིང་པོ་བཟླས་ལ་པདྨའི་རྒྱུའི་ལས་ཀྱི་ཕྱག་རྒྱས་འགྲོ་བ་འདུལ་བའི་དཀྱིལ་
[85a.3]འཁོར་ཆེན་པོ་སྤྲུལ་ལ། བདག་ཉིད་འགྲོ་བ་འདུལ་བའི་གཟུགས་སུ་བྱིན་གྱིས་བརླབས་ལ། རང་གི་སྙིང་གར་གནས་པའི་དཀྱིལ་འཁོར་དེར་རྡོ་རྗེ་པདྨའི་དམ་ཚིག་གི་ཕྱག་རྒྱ་བཅིངས་ལ། ཇི་ལྟ་བ་བཞིན་དུ་འཇུག་པར་བྱའོ། །ཞུགས་ནས་མེ་ཏོག་གི་ཕྲེང་བ་རང་གི་སྤྱི་བོར་དོར་རོ། །དེ་ནས་ཕྲེང་བ་
[85a.4]ཇི་ལྟ་བ་བཞིན་དུ་བླངས་ཏེ། རང་གི་མགོ་ལ་ཕྲེང་བའི་དབང་བསྐུར་བའི་སྔགས་ཀྱིས་བཅིངས་ནས་དངོས་གྲུབ་ཀྱི་པདྨའི་བརྟུལ་ཞུགས་བླང་བའི་མཐར་ཐུག་པའི་རང་གི་ཆོ་ག་རྗེས་སུ་སྤྱད་ལ། དེ་ནས་དཀྱིལ་འཁོར་དེའི་སྙིང་གའི་ཟླ་བ་ཞུ་བར་བསམས་ཏེ། རྣལ་འབྱོར་ཆེན་པོ་བྱས་ལ། རང་གི་སྙིང་གར་སྟོང་
[85a.5]གསུམ་གྱི་སྟོང་ཆེན་པོའི་སངས་རྒྱས་ཀྱི་ཞིང་གི་ཚད་དང་མཉམ་པར་ཟླ་བའི་དཀྱིལ་འཁོར་དེའི་སྟེང་དུ། ཨོཾ་བཛྲ་དྷརྨྨ་པདྨ་ཧཱུཾ། ཨོཾ་བཛྲ་ཛྫ། ཨོཾ་བཛྲ་རཏྣ་མུ་ཀུ་ཊ་ཧཱུཾ། ཨོཾ་དྷརྨྨ་པདྨེ་དྷི། ཨོཾ་སརྦྦ་མུ་ཁི་ཧཱུཾ། ཞེས་བྱ་བའི་པདྨ་རིགས་ཀྱི་སྙིང་པོ་འདི་རྣམས་དང་། རྣམ་པར་སྣང་མཛད་དང་། རྡོ་རྗེ་སེམས་དཔའ་
[85a.6]དང་། ནམ་མཁའི་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་ཀྱི་ཕྱག་རྒྱ་ཆེན་པོ་དང་བཅས་པ་རྣམས་ཀྱིས་འགྲོ་བ་འདུལ་བའི་དཀྱིལ་འཁོར་ཆེན་པོ་རྣམ་པར་སྣང་མཛད་ལ་སོགས་པ་ནས། པདྨ་འབེབས་པའི་མཐར་ཐུག་པ་སྤྲུལ་ལ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་
[85a.7]ཚིག་ཙམ་གྱིས་རང་རང་གི་གནས་རྣམས་སུ་བཞག་ལ། རྣམ་པར་སྣང་མཛད་ལ་སོགས་པ་ནས་པདྨ་འབེབས་པའི་མཐར་ཐུག་པ་རྣམས་སྐུ་དང་། གསུང་དང་ཐུགས་རྡོ་རྗེའི་རང་བཞིན་དུ་བདག་ཉིད་ཀྱིས་བསམས་ཏེ། སྙིང་པོ་འདི་ཉིད་ལན་གསུམ་བརྗོད་པར་བྱའོ། །ཨོཾ་བཛྲ་ཨཱཏྨ་ཀོ྅ཧཾ། དེ་ནས་རང་བཞིན་
[85b]
[85b.1]གྱིས་རྣམ་པར་དག་པར་བདག་ཉིད་བསྒོམས་ལ། ཨོཾ་སྭ་བྷཱ་བ་ཤུདྡྷོ྅ཧཾ། དེ་ནས་བདག་མེད་པའི་མཉམ་པ་ཉིད་ཀྱིས་རྣམ་པར་སྣང་མཛད་ལ་སོགས་པ་ནས། པདྨ་འབེབས་པའི་མཐར་ཐུག་པ་དང་། སེམས་ཅན་ཐམས་ཅད་བདག་ཉིད་མཉམ་པ་ཉིད་བསྒོམས་ལ། ཨོཾ་སརྦྦ་ས་མོ་ཧཾ། ཨོཾ་སཱ་དྷ་ཨ་
[85b.2]པདྨ་རཱ་ག་ས་མ་ཡ་ཨ། ཞེས་ལན་གསུམ་བརྗོད་དོ། །དེ་ནས་འགྲོ་བ་འདུལ་བའི་རང་བཞིན་གྱི་དཀྱིལ་འཁོར་ནི་བདག་ཉིད་རང་ཡིན་ནོ་ཞེས་ང་རྒྱལ་བསྐྱེད་ལ། ཨོཾ་ཧཱུཾ་ཧྲི་ཧོ། ཞེས་བརྗོད་ཅིང་། འགྲོ་བ་འདུལ་བའི་དཀྱིལ་འཁོར་ཆེན་པོའི་རང་བཞིན་དུ་ཐུན་བཞིའི་སྦྱོར་བས་ཟླ་བ་གཅིག་གམ་ཟླ་བ་
[85b.3]དྲུག་གམ། ལོ་གཅིག་ཏུ་འགྲོ་བ་འདུལ་བའི་དཀྱིལ་འཁོར་ཆེན་པོའི་གཟུགས་སུ་བདག་ཉིད་མཐོང་བར་གྱུར་པ་དེ་སྲིད་ཀྱི་བར་དུ་བདག་ཉིད་ཀྱིས་བསྒོམ་པར་བྱའོ། །དེ་ལྟར་འགྲོ་བ་འདུལ་བའི་དཀྱིལ་འཁོར་ཆེན་པོ་རབ་ཏུ་བསྒྲུབས་ནས། ཕྱིས་ཏིང་ངེ་འཛིན་རྣམ་པ་གསུམ་སྒོམ་པ། སྔོན་དུ་འགྲེ་
[85b.4]བ་ཞག་བདུན་བྱས་ནས་འགྲོ་བ་འདུལ་བའི་དཀྱིལ་འཁོར་ཆེན་པོ་བསྒོམས་ནས་བྲི་བར་བྱའོ། །གལ་ཏེ་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་བསྒྲུབ་པར་འདོད་ན། དེ་ནས་སྔ་མ་བཞིན་དུ་སྙིང་པོ་ལྔས་གཟུངས་ཀྱི་དཀྱིལ་འཁོར་སྤྲུལ་ལ། གཟུངས་ཀྱི་རིག་པ་རྣམས་ཀྱིས་ཇི་ལྟ་བའི་གནས་
[85b.5]རྣམས་སུ་གཟུངས་རྣམས་བཞག་ལ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་ཤུདྡྷོ་྅ཧཾ། ཨོཾ་སརྦ་ས་མོ་ཧཾ། ཨོཾ་སཱ་དྷ་ཡ་པདྨ་རཱ་ག་ས་མ་ཡ་ཨ། ཞེས་བྱ་བ་སྔ་མ་བཞིན་དུ་བརྗོད་པ་དང་། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་རང་བཞིན་དུ་བདག་ཉིད་བསྒོམས་ལ་འདི་སྐད་ཅེས་བརྗོད་
[85b.6]དོ། །འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་རང་བཞིན་ནི་བདག་རང་ཡིན་ནོ་ཞེས་བྱའོ། །དེ་ནས་བཟུང་ཏེ་རེ་རེ་དང་ཡང་ལྷན་ཅིག་བདག་ཉིད་དང་ཐ་མི་དང་པར་བསམས་ཏེ། རེ་རེ་ཞིང་ཡང་བཟླས་པ་ཁྲི་བྱ་བ་དེ་ལྟ་བུས་ཀྱང་གཟུངས་ཀྱི་དཀྱིལ་འཁོར་འགྲུབ་པར་འགྱུར་རོ། །དེ་ནས་སྔ་
[85b.7]མ་བཞིན་དུ་བྲི་བར་བྱའོ། །གལ་ཏེ་ཆོས་ཀྱི་དཀྱིལ་འཁོར་བསྒྲུབ་པར་འདོད་ན། སྔ་མ་བཞིན་དུ་ཐམས་ཅད་བྱས་ལ། སྔར་བཤད་པའི་སྙིང་པོ་དང་རང་གི་སྙིང་པོས་ཆོས་ཀྱི་དཀྱིལ་འཁོར་སྤྲུལ་ཏེ། རྡོ་རྗེ་ཕྲ་མོའི་སྦྱོར་བས་སྙིང་ག་ནས་བཏེག་ལ་སྣ་བུག་ནས་བྱུང་ནས་སྣའི་རྩེ་མོར་བསམ་པར་བྱའོ། །
[86a]
[86a.1]དེ་ནས་ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་རྣམ་པར་སྣང་མཛད་ལ་སོགས་པ་ནས། པདྨ་འབེབས་པའི་མཐར་ཐུག་པ་རྣམས་རང་རང་གི་གནས་སུ་དགོད་པར་བྱའོ། །སྔ་མ་བཞིན་དུ་སྙིང་པོ་གསུམ་བརྗོད་ཅིང་། དོན་རྣམ་པ་གསུམ་བསྒོམས་ལ། དྷརྨྨ་མཎྜ་
[86a.2]ལ་ཨ་སྭ་བྷཱ་བ་ཧཾ་སྭ་ཡཾ། ཞེས་ཀྱང་དེ་སྐད་དུ་བརྗོད་པར་བྱའོ། །དེ་ནས་ཆོས་ཀྱི་དཀྱིལ་འཁོར་ལས་གསུངས་པའི་འགྲོ་བ་འདུལ་བའི་སྔགས་བརྗོད་ཅིང་། ཟླ་བ་གཉིས་སྣའི་རྩེ་མོར་ཆོས་ཀྱི་དཀྱིལ་འཁོར་བསྒོམ་པར་བྱའོ། །ཉིན་རེ་ཞིང་སྐྱོ་བར་གྱུར་ན་སྣ་བུག་ནས་རང་གི་སྙིང་གར་བཅུག་
[86a.3]ལ། བཛྲ་དྷི་ཌྷ་ཏིཥྛ་ཞེས་བྱ་བས་བརྟན་པར་བྱའོ། །ཡང་ཟླ་བ་གཅིག་སྤྲོ་བ་དང་བསྡུ་བའི་སྦྱོར་བས་བསྒོམ་པ་དེ་ལྟ་བུས་ཆོས་ཀྱི་དཀྱིལ་འཁོར་འགྲུབ་པར་འགྱུར་རོ། །གལ་ཏེ་ལས་ཀྱི་དཀྱིལ་འཁོར་བསྒྲུབ་པར་འདོད་ན། སྔ་མ་བཞིན་དུ་ཐམས་ཅད་བྱས་ལ། རྡོ་རྗེ་དབྱིངས་ཀྱི་ལས་
[86a.4]ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་དང་། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་སྔགས་ཀྱིས་སྣ་ཚོགས་པདྨ་རྒྱ་གྲམ་བླངས་ལ། རང་གི་སྙིང་པོ་དང་སྔར་བཤད་པའི་སྙིང་པོ་ལྔས་ལས་ཀྱི་དཀྱིལ་འཁོར་སྤྲུལ་ལ། ལས་ཀྱི་དཀྱིལ་འཁོར་ལས་བཤད་པའི་
[86a.5]རིག་པ་རྣམས་ཀྱིས་ལྷ་རྣམས་ཇི་ལྟ་བའི་གནས་སུ་བཞག་ལ་ཆོ་ག་ཐམས་ཅད་རྗེས་སུ་སྤྱད་ལ། ལས་ཀྱི་དཀྱིལ་འཁོར་གྱི་རང་བཞིན་ནི་བདག་ཡིན་ནོ་ཞེས་ང་རྒྱལ་བསྐྱེད་ནས། རེ་རེ་ཞིང་ཡང་རིག་པ་ཁྲི་ཟློས་ཤིང་རེ་རེའི་རྣལ་འབྱོར་བྱའོ། །དེ་ལྟ་བུས་ལས་ཀྱི་དཀྱིལ་འཁོར་འགྲུབ་པར་འགྱུར་རོ། །
[86a.6]འགྲོ་བ་འདུལ་བའི་དུམ་བུ་ལས་གསུངས་པའི་དངོས་གྲུབ་རྣམས་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞི་པོ་རྣམས་ཀྱིས། རང་གི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། ཕྱག་རྒྱ་ཆེན་པོ་ལ་
[86a.7]སོགས་པའི་ཕྱག་རྒྱ་ཐམས་ཅད་བཅིང་བ་དང་། འཆིང་བའི་མཚན་ཉིད་ཐམས་ཅད་བསླབ་ཅིང་བསྟན་པར་བྱའོ། །དེ་ལ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བསྟན་པ་ཉིད་ཀྱིས་རྣམ་པར་སྣང་མཛད་དང་། ཆོས་ཀྱི་རྡོ་རྗེ་མ་དང་། སངས་རྒྱས་དབང་བསྐུར་མ་དང་། པདྨའི་པདྨོ་དང་།
[86b]
[86b.1]སྣ་ཚོགས་མཆོག་མ་རྣམས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་འདིའི་ཡང་ཡིན་པར་ཤེས་པར་བྱའོ། །ཇི་ལྟར་རྣམ་པར་སྣང་མཛད་ཀྱི་པདྨའི་རིགས་ཀྱི་ཕྱག་རྒྱ་བཞི་པོའི་དཀྱིལ་འཁོར་བཞིན་དུ་འགྲོ་བ་འདུལ་བའི་ཕྱག་རྒྱ་བཞི་པོའི་
[86b.2]དཀྱིལ་འཁོར་ལ་སོགས་པའི་དཀྱིལ་འཁོར་ཐམས་ཅད་དཀྱིལ་འཁོར་ཆེན་པོའི་ཚུལ་གྱིས་བྲི་བར་བྱའོ། །རང་རང་གི་ཕྱག་རྒྱ་རྣམས་ཀྱིས་དངོས་གྲུབ་ཐམས་ཅད་སྟེར་བར་འགྱུར་རོ་ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དབུས་སུ་བྲིས་ལ། འགྲོ་བ་འདུལ་
[86b.3]བའི་གནས་ཀྱི་ཤར་ཕྱོགས་ཀྱི་པདྨའི་འདབ་མ་ལ་སངས་རྒྱས་པདྨའི་པདྨས་མཚན་པའི་རྡོ་རྗེ་རྩེ་ལྔ་པ་པདྨ་དང་ཟླ་བ་ལ་བྲི་བར་བྱའོ། །གཙུག་ཕུད་སངས་རྒྱས་ཀྱི་གནས་ལྷོ་རུ་པདྨའི་རྒྱལ་པོའི་པདྨའི་ལྕགས་ཀྱུ། པདྨའི་ཏིང་ངེ་འཛིན་གྱི་གནས་ནུབ་ཏུ་པདྨ་ལེགས་པའི་པདྨའི་ཁུ་ཚུར་
[86b.4]གཉིས། པདྨ་ངེས་པའི་དབང་ཕྱུག་གི་གནས་སུ་བྱང་དུ་པདྨ་ཆགས་པའི་པདྨའི་མདའ་གཞུ་བྲི་བར་བྱའོ། །དེ་ལ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་དང་། ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོས་བྲི་བར་བྱའོ། །སངས་རྒྱས་པདྨ་ལ་
[86b.5]སོགས་པའི་ཕྱག་རྒྱ་ནི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་ཉིད་བརྗོད་པར་བྱའོ། །སྔ་མ་བཞིན་དུ་གཙུག་ཕུད་སངས་རྒྱས་ཀྱི་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོ་དང་། དཀྱིལ་འཁོར་ཆེན་པོ་ལས་བཤད་པའི་དབུས་སུ་བྲི་བར་བྱའོ། །འགྲོ་བ་འདུལ་བའི་
[86b.6]གནས་སུ་པདྨའི་ཁྲོ་གཉེར་གྱི་མཚན་མ། པདྨས་མཚན་པའི་ཡིད་བཞིན་གྱི་ནོར་བུའི་ཕྱག་རྒྱའོ། །གཙུག་ཕུད་སངས་རྒྱས་ཀྱི་གནས་སུ་པདྨ་ཉི་མའི་ཕྱག་རྒྱ། པདྨ་ཏིང་ངེ་འཛིན་གྱི་གནས་སུ་པདྨ་བཞད་པའི་ཕྱག་རྒྱ། པདྨ་ངེས་པའི་དབང་ཕྱུག་གི་གནས་སུ་པདྨའི་དཔལ་གྱི་ཕྱག་རྒྱ། དཀྱིལ་
[86b.7]འཁོར་ཆེན་པོ་ལས་བཤད་པའི་སྙིང་པོ་ཉིད་ཀྱིས་བྲི་བར་བྱའོ། །སྔ་མ་བཞིན་དུ་པདྨའི་ཏིང་ངེ་འཛིན་གྱི་དཀྱིལ་འཁོར་ཆེན་པོ་ལས་བཤད་པ་དང་། ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོ་དབུས་སུ་བྲི་བར་བྱའོ། །འགྲོ་བ་འདུལ་བའི་གནས་སུ་པདྨ་སྒྲོལ་མའི་ཕྱག་རྒྱ།
[87a]
[87a.1]གཙུག་ཕུད་སངས་རྒྱས་ཀྱི་གནས་སུ་པདྨ་རྣོན་པོའི་ཕྱག་རྒྱ། པདྨ་ཏིང་ངེ་འཛིན་གྱི་གནས་སུ་པདྨ་གསུང་བའི་ཕྱག་རྒྱ། པདྨ་ངེས་པའི་དབང་ཕྱུག་གི་གནས་སུ་པདྨ་རྒྱུའི་ཕྱག་རྒྱ། དཀྱིལ་འཁོར་ཆེན་པོ་ལས་བཤད་པའི་སྙིང་པོས་བྲི་བར་བྱའོ། །སྔ་མ་བཞིན་དུ་པདྨ་ངེས་པའི་དབང་
[87a.2]ཕྱུག་གི་དཀྱིལ་འཁོར་ཆེན་པོ་ལས་བཤད་པའམ། ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོས་བྲི་བ་དང་། འགྲོ་བ་འདུལ་བའི་གནས་སུ་པདྨ་གར་གྱི་དབང་ཕྱུག་གི་ཕྱག་རྒྱ། གཙུག་ཕུད་སངས་རྒྱས་ཀྱི་གནས་སུ་པདྨ་བསྲུང་བའི་ཕྱག་རྒྱ། པདྨ་ཏིང་ངེ་འཛིན་གྱི་
[87a.3]གནས་སུ་པདྨ་ཁུ་ཚུར་གྱི་ཕྱག་རྒྱ། པདྨ་ངེས་པའི་དབང་ཕྱུག་གི་གནས་སུ་པདྨ་གནོད་སྦྱིན་གྱི་ཕྱག་རྒྱ་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་བྲི་བར་བྱའོ། །འདི་དག་གི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ནི་འགྲོ་བ་འདུལ་བའི་དཀྱིལ་འཁོར་ཆེན་
[87a.4]པོ་ལས་བཤད་པ་ཁོ་ན་ཉིད་གཟུང་བར་བྱའོ། །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་འགྲེལ་པ། དེ་ཁོ་ན་ཉིད་སྣང་བར་བྱེད་པ་ལས་ཕྱག་རྒྱ་བཞི་པའི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ལྟར་བར་མ་ལ་དགའ་བའི་སེམས་ཅན་རྗེས་སུ་གཟུང་བའི་ཕྱིར། ཕྱག་
[87a.5]རྒྱ་བཞི་པའི་དཀྱིལ་འཁོར་བཤད་ནས། མདོར་བསྡུས་པ་ལ་དགའ་བའི་སེམས་ཅན་རྗེས་སུ་གཟུང་བའི་ཕྱིར། འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་ནི། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་
[87a.6]ཐོགས་ཉིད་ལའོ། །འདིར་དང་པོར་སྦྱོར་བའི་ཏིང་ངེ་འཛིན་ནི་འགྲོ་བ་འདུལ་བའི་ཕྱག་རྒྱ་ཆེན་པོ་ཁང་བུ་བརྩེགས་པ་དང་། གདན་བསྐྱེད་པའི་མཐར་ཐུག་པའི་བར་དུ་ཤེས་པར་བྱའོ། །འཕགས་པ་སྤྱན་རས་གཟིགས་དབང་པོ་ནི་འགྲོ་བ་འདུལ་བའོ། །འདི་ཞེས་བྱ་བ་ནི་བློ་ལ་གནས་པའོ། །
[87a.7]འཇིག་རྟེན་གྱི་ཁམས་ཐམས་ཅད་ཀྱི་འགྲོ་བ་དེ་ཐམས་ཅད་གདུལ་བར་བྱ་བ་དང་། དམ་པའི་དོན་གྱི་དངོས་གྲུབ་ཐམས་ཅད་ཐོབ་པར་བྱ་བ་དང་། གང་གིས་ལུང་དང་རྟོགས་པའི་བདག་ཉིད་ལ་རབ་ཏུ་འཇོག་པ་དེ་ནི་འགྲོ་བ་འདུལ་བའི་སྟེ། སྤྱན་རས་གཟིགས་དབང་ཕྱུག་དེར་ངེས་པའི་ཡེ་ཤེས་
[87b]
[87b.1]སོ། །དེ་སྟོན་པར་བྱེད་པའི་སྒྲའི་ཚུལ་ལ་ཡང་རྒྱུ་ལ་འབྲས་བུ་བཏགས་ནས་འགྲོ་བ་ཐམས་ཅད་འདུལ་བའི་རང་གི་སྙིང་པོ་ཞེས་བྱ་བ་སྟེ། བཅོམ་ལྡན་འདས་ཀྱིས་རང་གི་སྙིང་པོ་འདི་གསུངས་པ་ནི་བཤད་པའོ། །ཨོཾ་སརྦྦ་ཛཱ་གད་བི་ན་ཡ་ཞེས་བྱ་བ་ལ་སོགས་པའོ། །འདི་སྐད་སྟོན་པ་ཡིན་ཏེ།
[87b.2]བྱང་ཆུབ་སེམས་དཔའ་གསང་སྔགས་ཀྱི་སྒོའི་སྤྱད་པ་སྤྱོད་པ་རྣམས་ཀྱིས་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་བྲི་བར་འདོད་པ་ན། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་འགྲོ་བ་འདུལ་བའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་
[87b.3]ཆེན་པོ་ཇི་ལྟ་བ་བཞིན་དུ་བྱས་ནས། ཁང་བུ་བརྩེགས་པ་ནས་གདན་རྣམ་པ་གཉིས་བསྐྱེད་ལ། ནམ་མཁའི་ཕྱོགས་ནས་བབས་ཏེ། སྔ་མ་བཞིན་དུ་པདྨ་དང་ཟླ་བའི་སྟེང་དུ་ཕྱག་རྒྱ་ཆེན་པོ་བཅིངས་ཏེ་འདུག་པར་བྱའོ་ཞེས་བྱ་བ་འདི་ཙམ་གྱིས་ནི་དང་པོར་སྦྱོར་བ་མཆོག་གི་ཏིང་ངེ་འཛིན་ཏོ། །
[87b.4]བཤད་མ་ཐག་པའི་འགྲོ་བ་འདུལ་བའི་སྙིང་པོས་མདུན་དུ་གནས་པའི་པདྨ་དང་ཟླ་བ་ལ། རང་གི་སྙིང་པོས་འགྲོ་བ་འདུལ་བ་སྤྲུལ་ལ་གཞག་པར་བྱའོ་ཞེས་བྱ་བ་འདི་ནི་འདིར་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་
[87b.5]གཉིས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ནས་བརྩམས་པ་ནི། ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །འགྲོ་བ་འདུལ་བའི་དུམ་བུ་ལས་གསུངས་པའི་དངོས་གྲུབ་ཐམས་ཅད་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་
[87b.6]འཁོར་དུ་དམ་ཚིག་དང་དབང་བསྐུར་བས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་པོས་ཞེས་བྱ་བ་ལ་སོགས་པས་ཕྱག་རྒྱ་གཅིག་པའི་དཀྱིལ་འཁོར་གྱི་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་
[87b.7]རྒྱས་པ་འདི་གསུངས་ཏེ། དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །འཕགས་པ་སྤྱན་རས་གཟིགས་ཀྱི་དབང་པོ་ནི་འགྲོ་བ་འདུལ་བའོ། །འདི་ཞེས་བྱ་བ་ནི་འཆད་པར་འགྱུར་བའོ། །འགྲོ་བ་ཐམས་ཅད་འདུལ་བས་ན་འཕགས་པ་སྤྱན་རས་གཟིགས་དབང་ཕྱུག་མཚོན་པ་ཡིན་ནོ། །
[88a]
[88a.1]འགྲོ་བ་ཐམས་ཅད་འདུལ་བ་ཞེས་བྱ་བའི་དཀྱིལ་འཁོར་གསུངས་པ་ནི་བཤད་པའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་བརྗོད་པ་སྟེ། སྔོན་དུ་བསྙེན་པའི་རྗེས་ཐོགས་ལ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བས་ནི་ཕྱག་
[88a.2]རྒྱ་གཅིག་པའི་ཏིང་ངེ་འཛིན་གསུམ་བསྒོམ་པ་སྔོན་དུ་འགྲོ་བས་འགྲོ་བ་འདུལ་བའི་དཀྱིལ་འཁོར་ཇི་སྲིད་མངོན་སུམ་དུ་མཐོང་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་རྗེས་ལ་དཀྱིལ་འཁོར་འདི་ཉིད་བྲི་བར་བྱ་བའམ། ཡང་ན་དཀྱིལ་འཁོར་ཆེན་པོའི་ཆོ་གས་རྣལ་འབྱོར་ཆེན་པོ་བྱས་ལ།
[88a.3]རེ་རེ་ཞིང་ཡང་སྔགས་འབུམ་བཟླས་པར་བྱས་ཏེ། དེ་ནས་ཏིང་ངེ་འཛིན་རྣམ་གསུམ་ཞག་བདུན་བསྒོམས་པའི་རྗེས་ཐོགས་ལ་དཀྱིལ་འཁོར་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་གྱི་དོན་ཏེ། གང་གི་ཕྱིར་ཕྱག་རྒྱ་གཅིག་པའི་དཀྱིལ་འཁོར་དུ་འཇུག་པ་མེད་ན་མདོར་བསྡུས་པ་ལ་དགའ་
[88a.4]བའི་སེམས་ཅན་རྗེས་སུ་གཟུང་བར་མི་འགྱུར་བ་དེའི་ཕྱིར། དེ་ནས་རབ་ཏུ་བཤད་བྱ་བ། །འགྲོ་བ་འདུལ་བའི་དཀྱིལ་འཁོར་ཏེ། །ཞེས་བྱའོ། །དཀྱིལ་འཁོར་ཆེན་པོའི་ཚུལ་དུ་ནི། །ཞེས་བྱ་བ་ནི། འགྲོ་བ་འདུལ་བའི་དཀྱིལ་འཁོར་ཆེན་པོའི་ཚུལ་གྱིས་ཡང་དག་པར་བྲི་བའོ། །ཕྱི་ཡི་དཀྱིལ་
[88a.5]འཁོར་བྲི་བར་བྱ། །ཞེས་བྱ་བ་ལ་སོགས་པ་ནི་གོ་སླའོ། །དེར་ནི་འདབ་མ་ཀུན་ཁྱབ་པ། །སྣ་ཚོགས་གཟུགས་ནི་བྲི་བར་བྱ། །ཞེས་བྱ་བ་ནི། དེ་ལ་དཀྱིལ་འཁོར་གྱི་དབུས་སུ་འདབ་མ་ཀུན་ལ་པདྨའི་རིགས་དེས་ཁྱབ་ཅིང་སྤྲུལ་པའི་ངང་ཚུལ་གང་ལ་མངའ་བ་དེ་ནི་འདིར་འདབ་མ་ཀུན་ཁྱབ་པའོ། །རྣམ་
[88a.6]པ་སྣ་ཚོགས་པ་དུ་མ་སངས་རྒྱས་པདྨ་ལ་སོགས་པའི་གཟུགས་གང་ལ་མངའ་བ་འདི་ནི་སྣ་ཚོགས་སོ། །འདབ་མ་ཀུན་ལ་ཁྱབ་པ་ཡང་ཡིན་ལ་སྣ་ཚོགས་པའི་གཟུགས་ཀྱང་འདི་ཡིན་པས་ན། པདྨ་ཀུན་ལ་ཁྱབ་པ་སྣ་ཚོགས་པའི་གཟུགས་ཏེ། འགྲོ་བ་འདུལ་བ་དེ་བྲི་བར་བྱའོ། །དེའི་དོན་ནི་འདི་ཡིན་
[88a.7]ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་བཞིན་དུ་ཕྱི་དང་ནང་གི་དཀྱིལ་འཁོར་དེ་བྲིས་ལ། དཀྱིལ་འཁོར་གྱི་ལྟེ་བར་ཡི་གེ་ཧྲཱི་ལས་པདྨ་དེའི་སྟེང་དུ་ཡི་གེ་ཨ་ལས་ཟླ་བའི་དཀྱིལ་འཁོར་བསྐྱེད་ལ། ཨོཾ་སརྦྦ་ཛ་གང་བི་ན་ཡ་མ་ཧཱ་སཏྭ་ཨཱ་གཙྪ་ཤཱི་གྷྲཾ་བི་ཤྭ་རཱུ་བཾ་དཪྴ་ཡ་མ་མ་ཙ་སརྦྦ་སིདྡྷི་ཡ་པྲ་ཡཙྪ་ཧྲཱི།
[88b]
[88b.1]ཞེས་བརྗོད་པས། བཅོམ་ལྡན་འདས་འགྲོ་བ་འདུལ་བའི་དཀྱིལ་འཁོར་ཆེན་པོ་དང་། གཟུངས་དང་། ཆོས་དང་། ལས་ཀྱི་དཀྱིལ་འཁོར་ལས་གསུངས་པའི་ལྷའི་གཟུགས་ཀྱི་སྤྱི་གཙུག་ནས་བརྩམས་ནས་རྐང་མཐིལ་གྱི་བར་དུ་འོད་ཟེར་གྱི་ཚུལ་གྱིས་འབྱིན་པ་བྲིས་ལ། ནམ་མཁའི་ཕྱོགས་
[88b.2]ནས་ཕབ་སྟེ། གཟུགས་བརྙན་དང་གཅིག་ཏུ་བསྲེ་བར་བྱའོ། །དེ་ནས་ཞེས་བྱ་བ་ནི་རྗེས་ཐོགས་ཉིད་ལའོ། །འགྲོ་བ་འདུལ་བའི་དཀྱིལ་འཁོར་ཆེན་པོའི་ཚུལ་གྱིས་རང་གི་ཆོ་ག་ཐམས་ཅད་རྗེས་སུ་སྤྱད་ལ། རང་ལ་བྱིན་གྱིས་བརླབ་པ་ལ་སོགས་པ་ཡང་བྱས་ལ། པདྨ་ཆེ་གེ་མོ་ཞེས་རང་གི་མིང་ནས་
[88b.3]བརྗོད་ནས། འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། ཨོཾ་སརྦྦ་ཛྫ་གད་བི་ན་ཡ་མ་ཧཱ་ས་ཏྲ་ཨཱ་གྩྪ་ཤཱི་གྷྲཾ་བི་ཤྭ་རཱུ་བཾ་དཪྴ་ཡ་མ་མ་ཙ་སརྦྦ་སིདྡྷི་ཡ་པྲ་ཡཙྪ་ཧྲཱི་ཨ་ཞེས་བརྗོད་པས། འགྲོ་བ་འདུལ་བའི་དཀྱིལ་འཁོར་གྱི་དབུས་སུ་རྡོ་རྗེ་པདྨོ་བསམ་པར་བྱའོ། །དེ་ནས་བཛྲ་པདྨོ་ཨ་ཧཾ་ཞེས་
[88b.4]བརྗོད་ཅིང་། རྡོ་རྗེ་པདྨའི་ང་རྒྱལ་བསྒོམ་པར་བྱའོ། །ཛ་གད་བི་ན་ཡོ་ཨ་ཧཾ་ཞེས་བརྗོད་པས་པདྨ་དེ་ཉིད་འགྲོ་བ་འདུལ་བའི་རང་བཞིན་དུ་བདག་ཉིད་བསྒོམ་པར་བྱའོ། །དེ་ནས་བསྡུ་བ་བྱས་ལ་མཚན་བརྒྱ་རྩ་བརྒྱད་པས་བསྟོད་དེ། རྟ་མགྲིན་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱིས་དགུག་པ་
[88b.5]དང་། གཞུག་པ་དང་། བཅིང་བ་དང་། དབང་དུ་བྱས་ལ། པདྨའི་གནོད་སྦྱིན་གྱིས་བགེགས་བསལ་ལ་ར་བ་དང་དྲ་བ་བྱས་ཏེ། པདྨའི་ཁུ་ཚུར་གྱིས་སྒོ་བཅད་ལ། པདྨ་སྲུང་བའི་ཕྱག་རྒྱས་བསྲུང་བ་ཐམས་ཅད་ཡང་དག་པར་བསྲུངས་ལ། འགྲོ་བ་འདུལ་བའི་སྙིང་པོས་མཆོད་ཡོན་ཕུལ་ནས། ཞལ་
[88b.6]བསིལ་གྱི་སྔགས་དང་། ཕྱག་རྒྱས་ཞལ་བསིལ་དབུལ་ལོ། །དེ་ནས་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་བསྒྲུབས་ཏེ། ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། དབང་བསྐུར་བའི་ཕྱག་རྒྱས་དབང་བསྐུར་ལ། ཡང་མཆོད་ཡོན་ཕུལ་ནས་མཆོད་པ་
[88b.7]ཐམས་ཅད་ཀྱིས་ཡང་དག་པར་མཆོད་དེ་གནང་བ་ནོད་པའི་རྗེས་ཐོགས་ཁོ་ན་ལ། འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་འདིར་ཆོ་ག་རྒྱས་པ་ཐམས་ཅད་ཀྱིས་ཇི་ལྟ་བ་བཞིན་དུ་བཙུད་ནས་ཞེས་བྱ་བ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འཇུག་པའི་ཆོ་
[89a]
[89a.1]གས་པདྨའི་སློབ་མ་གཞུག་པར་བྱའོ་ཞེས་བྱ་བའི་དོན་ཏོ། །དེ་བཞིན་དུ་བསྒོ་སྟེ་ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོའི་ཆོ་ག་རྒྱས་པ་ཐམས་ཅད་ཇི་ལྟ་བ་བཞིན་དུ་བྱས་ནས། པདྨའི་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་དུ་སློབ་མ་ལ་བཤད་པ་བཞིན་དུ་འདིར་ཡང་
[89a.2]བསྒོ་བར་བྱའོ་ཞེས་བྱ་བའི་ཐ་ཚིག་གོ། །གཞུང་འདི་ཙམ་གྱིས་ནི་སློབ་དཔོན་གྱི་ལས་དང་སློབ་མ་འཇུག་པའི་ཆོ་ག་རྒྱས་པ་དེ་ལྟར་བསྟན་ནས། ད་ནི་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་དངོས་གྲུབ་ཀྱི་ཡེ་ཤེས་བསྒྲུབ་པར་བྱའོ་
[89a.3]ཞེས་བསྟན་པའི་ཕྱིར། འགྲོ་བ་འདུལ་བའི་ཡེ་ཤེས་བསླབ་པོ་ཞེས་བྱ་བ་གསུངས་ཏེ། འགྲོ་བ་འདུལ་བ་ནི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གོ། །དེར་ངེས་པའི་ཡེ་ཤེས་དེ་བསླབ་པའོ། །འགྲོ་བ་འདུལ་བའི་ཞེས་བྱ་བ་ནི། དཀྱིལ་འཁོར་ལེགས་པར་བྲིས་
[89a.4]ནས་ཀྱང་། །ཞེས་བྱ་བ་ནི་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་བྲི་བའོ། །ཕྱག་རྒྱ་ཆེན་པོ་བསྒོམས་ན་ནི། །སྣ་ཚོགས་འཆང་དང་འདྲ་བར་འགྱུར། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་འཇུག་པའི་ཆོ་ག་དང་། འདིར་སློབ་དཔོན་རང་ཉིད་ཀྱི་ཆོ་ག་རྗེས་སུ་སྤྱད་
[89a.5]ལ་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ་བསྒོམས་ན། འགྲོ་བ་འདུལ་བ་དང་འདྲ་བར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་འགྲོ་བ་འདུལ་བའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། ཕྱིས་ཕྱག་
[89a.6]རྒྱ་གཅིག་པའི་དཀྱིལ་འཁོར་ལས་བཤད་པའི་སྔགས་དང་བཤད་མ་ཐག་པའི་འགྲོ་བ་འདུལ་བའི་སྙིང་པོས་ཏིང་ངེ་འཛིན་རྣམ་པ་གསུམ་ཇི་ལྟ་བ་བཞིན་དུ་སྒོམ་པ་སྔོན་དུ་འགྲོ་བས་བསྐྱེད་ལ། ཉིན་རེ་ཞིང་ཐུན་བཞིའི་སྦྱོར་བས་ཐུན་རེ་རེ་ཡང་ཇི་སྲིད་མངོན་སུམ་དུ་མཐོང་བ་དེ་སྲིད་ཀྱི་བར་དུ་བསྒོམ་པར་
[89a.7]བྱའོ། །དེ་ནས་ཟླ་བ་ཉ་ལ་དེའི་དཀྱིལ་འཁོར་བྲིས་ནས། ཆོ་ག་ཐམས་ཅད་རྗེས་སུ་སྤྱད་ལ། བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། སློབ་དཔོན་རང་ཉིད་ཀྱི་མིང་ནས་བརྗོད་ནས་རྡོ་རྗེས་བསྒྲུབ་པར་བྱའོ། །པདྨའི་སློབ་དཔོན་སེམས་དཔའ་ཡི། །རྡོ་རྗེ་ལྕགས་ཀྱུ་བཅིངས་ནས་ནི། །
[89b]
[89b.1]སེ་གོལ་མང་པོ་བརྡབ་བགྱིས་ལ། །སངས་རྒྱས་ཐམས་ཅད་བསྡུ་བར་བྱ། །དེ་ནས་པདྨའི་སེམས་དཔའ་ཡི། །མིང་བརྒྱ་རྩ་བརྒྱད་དམ་པ་ནི། །ལན་ཅིག་རབ་ཏུ་བརྗོད་པར་བགྱི། །དེ་ནས་རྟ་མགྲིན་ལ་སོགས་པ་ལས་ཀྱི་ཕྱག་རྒྱས་བཅོམ་ལྡན་འདས་དགུག་པ་དང་། གཞུག་པ་དང་། བཅིང་
[89b.2]བ་དང་། དབང་དུ་བྱ་བ་དང་། སྔ་མ་བཞིན་དུ་མཆོད་པ་དང་ཕྱག་བྱ་བའི་མཐར་ཐུག་པའི་ཆོ་ག་རྗེས་སུ་སྤྱད་ལ། འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། འགྲོ་བ་འདུལ་བའི་ཕྱག་རྒྱ་གཅིག་པའི་སྙིང་པོ་བཟླས་ཤིང་མཚན་ཐོག་ཐག་བསྒོམ་པ་བྱས་ན། དེས་འགྲོ་བ་འདུལ་བ་དང་མཚུངས་པར་
[89b.3]འགྱུར་རོ། །དེ་ནས་འགྲོ་བ་འདུལ་བའི་གསང་བའི་ཕྱག་རྒྱའི་ཡེ་ཤེས་བསླབ་པར་བྱའོ་ཞེས་བྱ་བ་ནི། ཕྱག་རྒྱའི་ཡེ་ཤེས་བསླབ་པའི་དུས་ཕྱིས་འགྲོ་བ་འདུལ་བ་ནི་འཕགས་པ་སྤྱན་རས་གཟིགས་དབང་ཕྱུག་གོ། །ཕྱག་རྒྱ་གཅིག་པ་དང་། ལས་ཀྱི་དཀྱིལ་འཁོར་ལ་གནས་པའི་རྣལ་
[89b.4]འབྱོར་པ་དག་པ་གཅིག་ཏུ་གྱུར་པར་ལྷག་པར་མོས་པའི་ཕྱག་རྒྱ་ནི་གསང་བའི་ཕྱག་རྒྱའོ། །དེར་ངེས་པའི་ཡེ་ཤེས་བསླབ་པ་ནི་བསྟན་པའོ། །སྣ་ཚོགས་གཟུགས་ཀྱི་ཏིང་འཛིན་དང་། །མཉམ་པར་གཞག་པ་བསྒོམས་ནས་ཀྱང་། །ཞེས་བྱ་བ་ནི་འགྲོ་བ་འདུལ་བའི་ཏིང་ངེ་
[89b.5]འཛིན་གྱིས་ཏིང་ངེ་འཛིན་སྣ་ཚོགས་ཀྱི་གཟུགས་སུ་དེ་བསྒོམས་པའོ། །ལེགས་པར་མཉམ་པར་གཞག་པའི་མཚན་མ་ཐོབ་ནས། དང་པོ་གཉིས་ནི་སྦྱར་བར་བྱ། །ཞེས་བྱ་བ་ནི་བཅོམ་ལྡན་འདས་འགྲོ་བ་འདུལ་བའི་དཀྱིལ་འཁོར་གྱི་སྐུ་གང་ཡིན་པ་དང་། རྣལ་འབྱོར་པའི་ལུས་གང་ཡིན་པ་གཅིག་ཏུ་གྱུར་པར་
[89b.6]ལྷག་པར་མོས་པ་ནི་དབང་པོ་གཉིས་མཉམ་པར་སྦྱོར་བའོ། །དཀྱིལ་འཁོར་དེར་སྔར་བཤད་པའི་ཚུལ་གྱིས་བྱས་ན། རྣལ་འབྱོར་པས་མྱུར་དུ་དངོས་གྲུབ་ཐོབ་པར་འགྱུར་རོ་ཞེས་བྱ་བའི་དོན་ཏོ། །འགྲོ་བ་འདུལ་བའི་དུམ་བུ་ལས་བཤད་པའི་དངོས་གྲུབ་ཐམས་ཅད་ནི་འགྲོ་བ་འདུལ་བའི་དཀྱིལ་
[89b.7]འཁོར་ཆེན་པོ་ལས་བཤད་པའི་རང་གི་ལྷའི་ཕྱག་རྒྱ་བཞི་པོ་རྣམས་ཀྱིས་ཇི་ལྟ་བ་བཞིན་དུ་རང་གི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་གསང་བའི་ཡེ་ཤེས་བསྟན་པའི་དུས་ཕྱིས་ཕྱག་རྒྱ་
[90a]
[90a.1]ཆེན་པོ་ལ་སོགས་པ་ཕྱག་རྒྱ་བཅིང་བ་རྣམས་བསླབ་པར་བྱའོ་ཞེས་བྱ་བ་ནི་ཕྱག་རྒྱ་ཆེན་པོ་དང་པོར་བྱས་པའི་ཕྱག་རྒྱ་བཅིང་བ་གང་ཡིན་པ་འདི་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིང་བ་སྟེ། དེ་བསླབ་པར་བྱའོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་
[90a.2]འཁོར་ཆེན་པོ་ལས་བཤད་པའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་ཆོས་དང་། ལས་རྣམས་ཉིད་འདིར་གཟུང་བར་བྱའོ། །དངོས་གྲུབ་རྣམས་ཀྱང་དེ་བཞིན་ནོ་ཞེས་བྱ་བ་ནི་ཇི་ལྟར་དཀྱིལ་འཁོར་ཆེན་པོ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བཤད་པ་དེ་བཞིན་དུ་
[90a.3]འདིར་ཡིན་ནོ་ཞེས་བྱ་བའི་དོན་ཏོ། །ཇི་ལྟར་དཀྱིལ་འཁོར་ལ་དངོས་གྲུབ་ཏུ་འགྱུར་བ་དེ་བཞིན་དུ་རས་སམ། རྩིག་པའམ། སྐུ་གཟུགས་སམ། ནམ་མཁའ་ལ་བརྟགས་པའི་དཀྱིལ་འཁོར་ལ་ཡང་དམ་ཚིག་དང་དབང་བསྐུར་བ་དང་། ཕྱག་རྒྱ་ཆེན་པོའི་དངོས་གྲུབ་ཏུ་འགྱུར་རོ་ཞེས་བསྟན་པའི་
[90a.4]ཕྱིར། དེ་བཞིན་དུ་རས་ལ་སོགས་པ་ཡང་ཞེས་བྱ་བ་སྨོས་སོ། །ཇི་ལྟར་ཕྱག་རྒྱ་གཅིག་པའི་དཀྱིལ་འཁོར་དུ་ཕྱག་རྒྱ་ཆེན་པོ་བྲི་བའི་ཆོ་གའི་ཚུལ་དུ་གསུངས་པ་དེ་བཞིན་དུ་དམ་ཚིག་གི་ཕྱག་རྒྱ་ཆེན་པོ་བྲི་བའི་ཆོ་ག་ཡང་ཤེས་པར་བྱའོ་ཞེས་བསྟན་པའི་ཕྱིར། ཕྱག་རྒྱ་གཞན་རྣམས་ཀྱང་ཕྱག་རྒྱ་གཅིག་
[90a.5]པའི་དཀྱིལ་འཁོར་གྱི་ཚུལ་གྱིས་དེ་བཞིན་དུ་འགྲུབ་པར་འགྱུར་རོ་ཞེས་བྱ་བ་ནི། ཕྱག་རྒྱ་གཅིག་པའི་དཀྱིལ་འཁོར་ལས་བཤད་པའི་དངོས་གྲུབ་ཐམས་ཅད་འགྲུབ་པར་འགྱུར་རོ་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེའི་དམ་ཚིག་
[90a.6]ནི་པདྨའི་རིགས་སྟོན་པར་བྱེད་པའི་སྒྲའི་ཚོགས་ལ་ཡང་མིང་དེ་སྐད་ཅེས་བྱའོ། །བརྟག་པ་ལས་བྱུང་བའི་ཕྱིར་རྟོག་པའོ། །ཆེན་པོ་ཡང་ཡིན་ལ་རྟོག་པ་ཡང་དེ་ཡིན་པས་ན་རྟོག་པ་ཆེན་པོའོ། །དེ་གཞན་ལས་ཁྱད་པར་དུ་གྱུར་པས་རྒྱལ་པོ་སྟེ་མཛེས་ཤིང་འབར་བའི་ཕྱིར་རོ། །རྫོགས་སོ་ཞེས་
[90a.7]བྱ་བ་ནི་རྩ་བའི་རྒྱུད་ཀྱི་མཐར་ཐུག་པའོ། །པདྨའི་རིགས་འདི་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ལས་བྱུང་བས་རྒྱུ་ལ་འབྲས་བུ་བཏགས་ནས་ཆོས་ཀྱི་ཕྱག་རྒྱ་ཞེས་བརྗོད་དོ། །དེ་སྐད་དུ་ཡང་། སོ་སོར་རྟོག་པའི་འགྲོ་བ་ཀུན། །གཏི་མུག་རྒྱ་མཚོ་ལས་བསྒྲལ་ཕྱིར། །བློ་ལྡན་
[90b]
[90b.1]འཇིག་རྟེན་དབང་ཕྱུག་གིས། །རྟོག་པའི་རྒྱལ་པོ་འདི་གསུངས་སོ། །ཞེས་བྱ་བ་འདི་གསུངས་པ་ཡིན་ནོ། །རྣམ་དག་ཆོས་ནི་རྟོགས་བྱའི་ཕྱིར། །དྲི་མ་མེད་པ་དེ་ཉིད་ནི། །སྣང་བྱེད་དགེ་བ་འདི་བཤད་ལས། །བདག་གིས་བསོད་ནམས་གང་བསགས་པ། །དེ་ཡིས་འཇིག་རྟེན་མ་ལུས་པ། །
[90b.2]སྙིང་རྗེ་ལས་བྱུང་ཀུན་དགའ་ཆེ། །སྙིང་པོ་བསམ་མི་ཁྱབ་ཆེན་གཙོ། །པདྨ་ལས་བྱུང་རྒྱལ་གྱུར་ཅིག །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་འགྲེལ་པ། དེ་ཁོ་ན་ཉིད་སྣང་བར་བྱེད་པ་ཞེས་བྱ་བ་པདྨའི་རིགས་ཀྱི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ལྟར་ལོག་
[90b.3]པར་ལྟ་བའི་གཉེན་པོར་གྱུར་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཀྱི་ཕྱག་རྒྱའི་རང་བཞིན་པདྨའི་རིགས་བསྟན་ནས། ད་ནི་སེར་སྣ་ཅན་གྱི་གཉེན་པོར་གྱུར་པ། སེམས་ཅན་ཐམས་ཅད་ཀྱི་བསམ་པའི་ལས་ཡོངས་སུ་རྫོགས་པར་བྱེད་པའི་ནོར་བུའི་རིགས་ནི། དེ་ནས་ཞེས་བྱ་བ་ལ་སོགས་པ་
[90b.4]གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་དོན་ཏོ། །འདིར་དང་པོ་སྦྱོར་བའི་ཏིང་ངེ་འཛིན་ནི། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དང་པོ་སྦྱོར་བའི་ཏིང་ངེ་འཛིན་གྱི་སྟེང་དུ་རྡོ་རྗེ་སེམས་དཔའ་དང་།
[90b.5]རྡོ་རྗེ་རིན་ཆེན་དང་། རྡོ་རྗེ་ཆོས་དང་། རྡོ་རྗེ་ལས་སྤྲུལ་པའི་མཐར་ཐུག་པ་ཡིན་པར་ཤེས་པར་བྱའོ་ཞེས་བྱ་བ་དེ་དག་འདིར་བཤད་པ་ཡིན་ནོ། །དེ་བཞིན་གཤེགས་པ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་
[90b.6]དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པ་ལ་སོགས་པའོ། །ཡང་དེ་བཞིན་གཤེགས་པ་ཐམས་ཅད་གཅིག་ཏུ་འདུས་ནས་ཞེས་བྱ་བ་ལ་ཡང་གི་སྒྲ་ནི་ཟློས་པའི་དོན་ཏོ། །སྔར་ནི་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ནས། གཅིག་ཏུ་འདུས་པར་
[90b.7]མཛད་པ་ཡིན་ལ་དེ་ལྟར་ནི་ནམ་མཁའི་སྙིང་པོ་ལ་མཚན་བརྒྱ་རྩ་བརྒྱད་པས་གསོལ་བ་གདབ་པའི་ཕྱིར། གཅིག་ཏུ་ཚོགས་ཤིང་འདུས་པར་བྱས་པ་ཡིན་ནོ། །དེ་བཞིན་གཤེགས་པ་ཐམས་ཅད་དབང་བསྐུར་བ་ནི་རིན་པོ་ཆེའི་རིགས་སུ་དེའི་རྒྱུ་ཡིན་པས་རིན་པོ་ཆེ་བསྐྱེད་པར་མཛད་པ་ཡིན་ནོ། །གང་གི་ཕྱིར་
[91a]
[91a.1]འཕགས་པ་ནམ་མཁའི་སྙིང་པོའི་ཐུགས་ལས་རིགས་ཐམས་ཅད་འདིར་བསྐྱེད་པར་མཛད་པ་ཡིན་ནོ། །རྡོ་རྗེ་འཛིན་པ་དེ་ཉིད་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་གནས་པའི་སེམས་དཔའ་རྡོ་རྗེའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ནམ་
[91a.2]མཁའི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ནམ་མཁའི་སྙིང་པོའི་གཟུགས་འཛིན་པ་ལ་འཆད་པར་འགྱུར་བའི་མཚན་བརྒྱ་རྩ་བརྒྱད་པ་འདིས་གསོལ་བ་བཏབ་པ་ཅིའི་དོན་དུ་གཉེར་བ་ཡིན་ནོ། །དོན་དུ་གཉེར་བའི་རྒྱུ་ཡོད་པའི་གསོལ་བ་འདེབས་པའི་
[91a.3]ཕྱིར་ལྡན་པར་བཤད་དོ། །ནམ་མཁའི་སྙིང་པོ་ཞེས་བྱ་བ་ནི། དེ་ལ་ནམ་མཁའི་སྒྲས་ནི་འདིར་རྣམ་པར་སྣང་མཛད་ཀྱི་ཕྱག་ན་གནས་པའི་རྡོ་རྗེ་རིན་པོ་ཆེ་ལས་དེ་བཞིན་གཤེགས་པ་ཐམས་ཅད་བསྐྱེད་པར་བརྗོད་པ་ཡིན་ཏེ། ནམ་མཁའ་དང་མཉམ་པ་ཉིད་ཀྱི་ཡེ་ཤེས་ལས་བྱུང་བ་ནམ་མཁའ་
[91a.4]ཡང་ཡིན་ལ་སྙིང་པོ་ཡང་འདི་ཡིན་པས་ན་ནམ་མཁའི་སྙིང་པོས་ཏེ་དེ་བཞིན་གཤེགས་པ་དེ་རྣམས་བྱང་ཆུབ་སེམས་དཔའ་ཆེན་པོ་ནམ་མཁའི་སྙིང་པོས་བསྐྱེད་པ་ཡིན་ནོ། །སེམས་ཅན་དོན་ཞེས་བྱ་བ་ནི་སེམས་ཅན་གྱི་དོན་དུ་གཉེར་བས་ན་སེམས་ཅན་དོན་ནོ། །སེམས་དཔའ་ཆེན་པོ་ཞེས་བྱ་བ་ནི།
[91a.5]སེམས་དཔའ་ཡང་ཡིན་ལ་ཆེན་པོ་ཡང་དེ་ཡིན་པས་སེམས་དཔའ་ཆེན་པོ་སྟེ། བྱང་ཆུབ་ཀྱི་སེམས་ཀྱི་རང་བཞིན་གྱིས་ཐམས་ཅད་དུ་ཁྱབ་པའོ་ཞེས་བྱ་བའི་དོན་ཡིན་ནོ། །གཟི་བརྗིད་ཆེན་པོ་ཞེས་བྱ་བ་ནི། གཟི་བརྗིད་ཆེན་པོ་འདི་ལ་མངའ་བས་ན་གཟི་བརྗིད་ཆེན་པོ་སྟེ། མདངས་དང་ལྡན་པའི་གཟི་
[91a.6]བརྗིད་ཀྱིས་ནམ་མཁའ་ཐམས་ཅད་ཁྱབ་པའོ། །རིན་པོ་ཆེ་ཆེན་པོ་ནི་རྡོ་རྗེ་རིན་ཆེན་གྱི་གཟུགས་ཀྱིས་ནམ་མཁའ་ཁྱབ་པས་ན་རིན་པོ་ཆེའོ། །རིན་ཆེན་མཆོག་ནི་རིན་པོ་ཆེ་བཟང་པོ་རྣམས་ལས་ཀྱང་ཆེས་བཟང་བའི་རིན་པོ་ཆེའོ། །རིན་པོ་ཆེས་མཚན་པ་ལ་སོགས་པའི་མཚན་མའི་རང་བཞིན་དེ་དག་
[91a.7]ལས་གཙོ་བོ་མཆོག་ཡིན་ཏེ། རིགས་ཀྱི་བདག་པོའི་མཚན་མའི་གཟུགས་ཡིན་པའི་ཕྱིར་རོ། །རྡོ་རྗེ་རིན་ཆེན་ཞེས་བྱ་བ་ནི། རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུ་ནི་རྡོ་རྗེ་རིན་ཆེན་ཏེ་མཚན་བདུན་ནོ། །དབང་བསྐུར་བྱིན་ཞེས་བྱ་བ་ནི། རིན་པོ་ཆེའི་རིགས་ཀྱི་རང་བཞིན་ཡིན་པའི་ཕྱིར་རོ། །
[91b]
[91b.1]རིན་ཆེན་ཞེས་བྱ་བ་ནི། རིན་པོ་ཆེའི་རིགས་དེས་ནམ་མཁའ་ཁྱབ་པའོ། །དག་པ་ཆེ་ཞེས་བྱ་བ་ནི། རིན་པོ་ཆེའི་རིགས་ཀྱི་གཟུགས་དེས་བག་ཆགས་དང་བཅས་པའི་ཉོན་མོངས་པའི་དྲི་མ་འཁྲུད་པའི་ཕྱིར་དག་པ་ཆེའོ། །དགེ་བ་ཆེ་ཞེས་བྱ་བ་ནི་རྣམ་པར་ཐར་པའི་རང་བཞིན་ཡིན་པས་ན་དགེ་བ་ཆེའོ། །
[91b.2]སངས་རྒྱས་རིན་ཆེན་ཞེས་བྱ་བ་ནི། རིན་པོ་ཆེའི་རིགས་དེས་དབང་བསྐུར་བའི་ངོ་བོ་ནི་སངས་རྒྱས་བཅོམ་ལྡན་འདས་རྣམས་ལས་གཞན་ན་མེད་པའི་ཕྱིར་སངས་རྒྱས་རིན་ཆེན་ཞེས་བརྗོད་དོ། །རྣམ་དག་སྐུ་ཞེས་བྱ་བ་ནི། ལུས་ལ་དྲི་མ་མི་མངའ་བས་ན་རྣམ་དག་སྐུའོ། །རིན་ཆེན་རིན་ཆེན་ཞེས་བྱ་བ་
[91b.3]ནི། ནམ་མཁའི་སྙིང་པོའི་ཕྱག་ན་གནས་པ་སྟེ་མཚན་བདུན་ཡིན་ནོ། །ནམ་མཁའ་ཞེས་བྱ་བ་ནི། ནམ་མཁའི་འོད་ཟེར་གྱི་གཟུགས་ཀྱིས་སྤྲོ་བའི་ཕྱིར་ནམ་མཁའོ། །ནམ་མཁའ་ལས་བྱུང་ཞེས་བྱ་བ་ནི། ནམ་མཁའི་འོད་ཟེར་དང་གཅིག་ཏུ་གྱུར་ནས། རྡོ་རྗེ་རིན་ཆེན་བསྐྱེད་པའི་ཕྱིར་ནམ་
[91b.4]མཁའ་ལས་བྱུང་བའོ། །ནམ་མཁའི་ཁམས་ཐམས་ཅད་ཅེས་བྱ་བ་ནི། ནམ་མཁའི་ཁམས་ཐམས་ཅད་འོད་ཟེར་གྱི་རང་བཞིན་དུ་གྱུར་ནས་ངེས་པར་འབྱུང་བའི་ཕྱིར་ནམ་མཁའ་ཐམས་ཅད་དོ། །འོད་ཆེ་ཞེས་བྱ་བ་ནི། ནམ་མཁའི་འོད་ཟེར་དེ་རྣམས་ཀྱིས་འཇིག་རྟེན་གྱི་ཁམས་ཐམས་ཅད་དུ་
[91b.5]སྣང་བའོ། །ཀུན་རྫོབ་ཀྱི་བདག་ཉིད་ཀྱིས་ནམ་མཁའི་ཁམས་ཐམས་ཅད་དུ་འོད་ཆེན་པོ་སྣང་བ་དེས་ནམ་མཁའ་ཁྱབ་པའོ་ཞེས་བྱ་བའི་དོན་ཏོ། །ནམ་མཁའི་དབྱིངས་ཞེས་བྱ་བ་ནི། རྡོ་རྗེ་རིན་ཆེན་བསྐྱེད་པའི་རྒྱུ་ཡིན་པའི་ཕྱིར་ནམ་མཁའི་དབྱིངས་སོ། །ཕྱོགས་ཀུན་ཞེས་བྱ་བ་ནི་ཕྱོགས་བཅུའི་རང་
[91b.6]བཞིན་ཡིན་པའི་ཕྱིར་ཕྱོགས་ཀུན་ནོ། །རེ་ཀུན་མཆོག་ཅེས་བྱ་བ་ནི། འདི་ལྟར་ནམ་མཁའི་རང་བཞིན་གྱི་ཕྱོགས་ཐམས་ཅད་དུ་གྱུར་པའི་ཆོས་འདིས་ཕྱོགས་ཐམས་ཅད་ལས་གོང་ན་མེད་པའི་ཕྱིར་རེ་བ་ཀུན་གྱི་མཆོག་སྟེ་མཚན་བདུན་ཡིན་ནོ། །རིན་ཆེན་མཛོད་སྤུ་ཞེས་བྱ་བ་ནི། རིན་པོ་ཆེའི་མཛོད་སྤུ་འདི་ལ་
[91b.7]མངའ་བས་ན་རིན་ཆེན་མཛོད་སྤུའོ། །རིན་ཆེན་འབྱུང་ཞེས་བྱ་བ་ནི། རིན་པོ་ཆེ་ལས་བྱུང་བའི་དེ་བཞིན་གཤེགས་པའི་རང་བཞིན་ཡིན་པའི་ཕྱིར་རིན་ཆེན་འབྱུང་བའོ། །སངས་རྒྱས་མཛོད་སྤུ་ཞེས་བྱ་བ་ནི་སྐྱེས་བུ་ཆེན་པོའི་མཚན་སྨིན་མཚམས་ཀྱི་ཕྱོགས་སུ་གནས་པའི་ཕྱིར་དེ་བཞིན་གཤེགས་པའི་
[92a]
[92a.1]མཛོད་སྤུའོ། །བདེ་གཤེགས་རབ་ཅེས་བྱ་བ་ནི་ཤིན་ཏུ་དགེ་ཞིང་བཟང་བར་དེ་བཞིན་གཤེགས་པའི་སངས་རྒྱས་ནི་བདེར་གཤེགས་རབ་བོ། །རིན་ཆེན་ཐམས་ཅད་ཅེས་བྱ་བ་ནི། རིན་པོ་ཆེའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་གྱི་གཟུགས་ཀྱིས་རིན་པོ་ཆེའི་རིགས་ཐམས་ཅད་
[92a.2]བསྡུས་པའི་རང་བཞིན་ཡིན་པའི་ཕྱིར་རིན་ཆེན་ཐམས་ཅད་དོ། །རབ་ཀུན་མཆོག་ཅེས་བྱ་བ་ནི་རིན་པོ་ཆེའི་རིགས་ཀྱི་ལས་ཀྱི་ཕྱག་རྒྱའི་གཟུགས་ཀྱིས་མཚུངས་པ་མེད་པའི་ཕྱིར་རབ་ཀུན་མཆོག་གོ། །རིན་ཆེན་དགོས་པ་ཞེས་བྱ་བ་ནི། རིན་པོ་ཆེའི་འབྲས་བུ་ནི་རིན་པོ་ཆེའི་དགོས་པ་སྟེ། རིན་པོ་ཆེའི་
[92a.3]རིགས་ཀྱི་ལས་ཀྱི་དཀྱིལ་འཁོར་དེའི་རང་བཞིན་ཡིན་པའི་ཕྱིར། རིན་ཆེན་དགོས་པ་ཁྱོད་དེ་མཚན་བདུན་ཡིན་ནོ། །རིན་ཆེན་ཞེས་བྱ་བ་ནི་རིན་པོ་ཆེའི་རང་བཞིན་ཡིན་པའི་ཕྱིར་རིན་ཆེན་ནོ། །རིན་ཆེན་མཆོག་ཅེས་བྱ་བ་ནི་རིགས་ཀྱི་བདག་པོའི་གཟུགས་འཛིན་པའི་ཕྱིར་རིན་ཆེན་མཆོག་གོ། །རིན་ཆེན་
[92a.4]དྲག་ཅེས་བྱ་བ་ནི། བདག་པོའི་གཟུགས་ཀྱིས་རིན་ཆེན་ཐམས་ཅད་ཟིལ་གྱིས་མནན་ནས་གནས་པའི་ཕྱིར་རིན་ཆེན་དྲག་གོ། །དེ་བཞིན་གཤེགས་པ་ཀུན་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རང་བཞིན་ཡིན་པའི་ཕྱིར་དེ་བཞིན་གཤེགས་པ་ཀུན་ནོ། །རིན་ཆེན་ནི་རིན་པོ་ཆེ་
[92a.5]ཆེའི་སྐུར་གྲུབ་པའོ། །རིན་ཆེན་དམ་པ་ཞེས་བྱ་བ་ནི། འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་ནང་དུ་བྱང་ཆུབ་ཀྱི་སེམས་རིན་པོ་ཆེའི་གཟུགས་ཀྱིས་དམ་པར་གྱུར་པའི་ཕྱིར་རོ། །ནམ་མཁའ་ཆེ་ཞེས་བྱ་བ་ནི། ནམ་མཁའ་ཡང་ཡིན་ལ་ཆེན་པོ་ཡང་ཡིན་པ་དེ་བས་ནམ་མཁའ་ཆེན་པོའོ། །
[92a.6]རྫས་ཐམས་ཅད་ཀྱི་གཟུགས་ནུབ་པ་དེའི་རང་བཞིན་ཡིན་པའི་ཕྱིར་ནམ་མཁའ་ཆེའོ། །མཁའ་མཉམ་ཞེས་བྱ་བ་ནི་མཉམ་པ་ཡིན་ཏེ་ནམ་མཁའ་ཡང་དེ་ཡིན་པས་མཁའ་མཉམ་ནི་རྫས་དང་རྫས་མ་ཡིན་པ་ཐམས་ཅད་ལ་ནམ་མཁས་ཁྱབ་པའི་རང་བཞིན་ཡིན་པའི་ཕྱིར་མཁའ་མཉམ་སྟེ་མཚན་བརྒྱད་
[92a.7]ཡིན་ནོ། །རྒྱན་ཡིན་པས་ན་ཞེས་བྱ་བ་ནི་སྤུད་པའོ། །མཛེས་པ་ཆེ་ཞེས་བྱ་བ་ནི་མཛེས་པ་ཆེན་པོ་འདི་ལ་མངའ་བས་ན་མཛེས་པ་ཆེའོ། །མཛེས་པའི་འབྱུང་གནས་ཞེས་བྱ་བ་ནི། མཛེས་པ་ལས་འབྱུང་བས་ན་མཛེས་པའི་འབྱུང་གནས་ཏེ། སྐྱེ་བའི་གནས་ཞེས་བྱ་བའི་ཐ་ཚིག་གོ། །རབ་མཛེས་
[92b]
[92b.1]མཛད་ཅེས་བྱ་བ་ནི་ཤིན་ཏུ་མཛེས་པར་མཛད་པའོ། །དོན་ཀུན་ཞེས་བྱ་བ་ནི། འཇིག་རྟེན་དང་འཇིག་རྟེན་ལས་འདས་པའི་དོན་ཐམས་ཅད་ཀྱི་རང་བཞིན་ཡིན་པའི་ཕྱིར་དོན་ཀུན་ནོ། །དག་ཅིང་ཞེས་བྱ་བ་ནི་དྲི་མ་ཐམས་ཅད་དང་བྲལ་བའི་ཕྱིར་ན་དག་པའོ། །དག་པའི་དོན་ཞེས་བྱ་བ་ནི། ཆོས་ཀྱི་དབྱིངས་རྣམ་
[92b.2]པར་དག་པའི་དོན་འདི་ལ་མངའ་བས་ན་དག་པའི་དོན་ནོ། །སྦྱིན་སྤྱོད་ཅེས་བྱ་བ་ནི་སྦྱིན་པའི་ཕ་རོལ་ཏུ་ཕྱིན་པ་གྲུབ་པས་ནམ་མཁའ་མཛོད་ཀྱི་སྦྱིན་པའི་སྤྱད་པ་སྤྱོད་པ་སྟེ་མཚན་བརྒྱད་ཡིན་ནོ། །ཆོས་རིན་ཆེན་ཞེས་བྱ་བ་ནི། ཐེག་པ་ཆེན་པོ་ལས་ངེས་པར་འབྱུང་བ་མྱ་ངན་ལས་འདས་པའི་ཆོས་ཀྱི་རང་
[92b.3]བཞིན་ཡིན་པའི་ཕྱིར་ཆོས་རིན་ཆེན་ནོ། །རྣམ་དག་མཆོག་ཅེས་བྱ་བ་ནི་རྣམ་པར་དག་པ་ཞེས་བྱ་བའི་མཆོག་ནི། རྣམ་དག་མཆོག་སྟེ། ཆོས་ཀྱི་སྐུའི་རང་བཞིན་གྱིས་མཚུངས་པའི་ཕྱིར་རོ། །དགེ་འདུན་རིན་ཆེན་ཞེས་བྱ་བ་ནི། ཕྱིར་མི་ལྡོག་པའི་བྱང་ཆུབ་སེམས་དཔའི་དགེ་འདུན་ཆེན་པོའི་རང་བཞིན་ཡིན་པའི་
[92b.4]ཕྱིར་རོ། །དེ་བཞིན་གཤེགས་པ་ཞེས་བྱ་བ་ནི། བྱང་ཆུབ་ཀྱི་མཚན་ཉིད་ཅན་སེམས་ཁོང་དུ་ཆུད་པས། དེ་བཞིན་དུ་གཤེགས་པའི་ཕྱིར་རོ། །དབང་བསྐུར་ཆེན་པོ་ཞེས་བྱ་བ་ནི། ནམ་མཁའ་དང་མཉམ་པའི་ཡེ་ཤེས་ཀྱི་བདུད་རྩིའི་ཆུས་བག་ཆགས་དང་བཅས་པའི་ཉོན་མོངས་པ་ཐམས་ཅད་འཁྲུད་
[92b.5]པར་བྱེད་པའི་ཕྱིར་དབང་བསྐུར་ཆེན་པོའོ། །འཇིག་རྟེན་དོན་ཞེས་བྱ་བ་ནི། འཕྱིག་པས་ན་འཇིག་རྟེན་ཏེ། ཁམས་གསུམ་པ་རྣམས་དེ་ཉིད་ཀྱི་དོན་ལ་དམིགས་པ་གང་ཡིན་པ་དེ་ནི་འཇིག་རྟེན་གྱི་དོན་ནོ། །གནོད་སྦྱིན་ཁྱོད་ཅེས་བྱ་བ་ནི། དོན་ཕུལ་དུ་བྱུང་བ་སྟེར་བས་ན་དོན་སྦྱིན་ནོ། །ཆོས་ཐམས་ཅད་
[92b.6]ཀྱི་མཚན་ཉིད་ལ་མངོན་པར་ཞེན་པ་མེད་པའི་ལམ་གྱི་དོན་དེ་ཉིད་ཀྱི་དགོས་པ་མངའ་བ་འདི་ནི་དོན་སྦྱིན་ཏེ་མཚན་བདུན་ནོ། །སྦྱིན་པ་ཞེས་བྱ་བ་ནི་སྟེར་བས་ན་སྦྱིན་པའོ། །རབ་སྦྱིན་ཞེས་བྱ་བ་ནི་ཇི་སྐད་བཤད་པའི་ཕུལ་དུ་བྱུང་བའི་སྦྱིན་པའོ། །སྦྱིན་པའི་མཆོག་ཅེས་བྱ་བ་ནི། སྦྱིན་པའི་ཕ་རོལ་ཏུ་ཕྱིན་
[92b.7]པའི་ངོ་བོ་ཡིན་པའི་ཕྱིར་རོ། །གཏོང་ཞིང་ཞེས་བྱ་བ་ནི། གཏོང་བ་ནི་སྦྱིན་པ་སྟེ། འདི་ནི་མིང་གི་རྣམ་གྲངས་ཡིན་ནོ། །གཏོང་མཆོག་ཅེས་བྱ་བ་ནི། འདི་ཡང་སྦྱིན་པའི་མཆོག་གི་མིང་གི་རྣམ་གྲངས་ཡིན་ནོ། །སྦྱིན་མཛད་ཅེས་བྱ་བ་ནི་རང་གི་ལག་པས་དཔག་བསམ་གྱི་ཤིང་ལ་སོགས་པ་སྟེར་བའོ། །
[93a]
[93a.1]སེམས་ཅན་དོན་ཀུན་ཞེས་བྱ་བ་ནི། སེམས་ཅན་ཐམས་ཅད་ཀྱི་དོན་བྱེད་པའི་ཕྱིར་རོ། །དེ་ཉིད་དོན་ཞེས་བྱ་བ་ནི། ཇི་སྐད་བཤད་པའི་དེ་ཁོ་ན་ཉིད་བཅུའི་དོན་གྱི་ངོ་བོ་ཡིན་པའི་ཕྱིར་དེ་ཉིད་དོན་ཏོ། །དོན་ཆེན་དོན་ཞེས་བྱ་བ་ནི་དོན་ཡང་ཡིན་ལ་ཆེན་པོ་ཡང་དེ་ཡིན་པས་ན་དོན་ཆེན་ཏེ་ཆོས་ཀྱི་
[93a.2]དབྱིངས་དེའི་དོན་ནི་དེ་བཞིན་ཏེ་མཚན་དགུ་ཡིན་ནོ། །བསམ་པའི་རྒྱལ་པོ་ཞེས་བྱ་བ་ནི། བསམ་པ་འདི་མཛེས་ཤིང་འབར་བས་ན་བསམ་པའི་རྒྱལ་པོ་སྟེ། སེམས་ཅན་ཐམས་ཅད་ཀྱི་བསམ་པ་ཡོངས་སུ་བསྐང་བར་བྱེད་དོ་ཞེས་བྱ་བའི་དོན་ཏོ། །གཟི་བརྗིད་ཆེ་ཞེས་བྱ་བ་ནི། ནམ་མཁའ་ཐམས་ཅད་ཁྱབ་པའི་
[93a.3]གཟི་བརྗིད་འདི་ལ་མངའ་བས་ན་གཟི་བརྗིད་ཆེའོ། །སྦྱིན་པའི་ཕ་རོལ་ཏུ་ཕྱིན་པ་ཞེས་བྱ་བ་ནི་འཁོར་གསུམ་རྣམ་པར་དག་པའི་སྤྱོད་པའི་འབྲས་བུ་ཡིན་པའི་ཕྱིར་རོ། །ཚུལ་ཞེས་བྱ་བ་ནི། ཐེག་པ་ཆེན་པོའི་ཚུལ་གྱིས་རང་བཞིན་ནོ། །དེ་བཞིན་གཤེགས་པ་ཞེས་བྱ་བ་ནི་བདེན་པ་གསུངས་པའི་ཕྱིར་རོ། །
[93a.4]སེམས་དཔའ་ཆེ་ཞེས་བྱ་བ་ནི་ཆོས་བདག་མེད་པའི་ངོ་བོས་ཐམས་ཅད་དེ་བཞིན་དུ་རྟོགས་པའི་ཕྱིར་སེམས་དཔའ་ཆེའོ། །དེ་བཞིན་གཤེགས་པ་ལྔའི་རང་བཞིན་ཡིན་པའི་ཕྱིར་སངས་རྒྱས་ཀུན་ཏེ་མཚན་བདུན་ཡིན་ནོ། །དེ་བཞིན་གཤེགས་པ་རིན་པོ་ཆེ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་
[93a.5]དབང་བསྐུར་བའི་རིན་པོ་ཆེ་ཆེན་པོ་ཡིན་པའི་ཕྱིར། དེ་བཞིན་གཤེགས་པ་རིན་པོ་ཆེའོ། །དེ་བཞིན་གཤེགས་པ་འོད་པོ་ཆེ། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཉི་མའི་དཀྱིལ་འཁོར་གྱི་འོད་ཆེན་པོ་མངའ་བའི་ཕྱིར་དེ་བཞིན་གཤེགས་པའི་འོད་ཆེན་པོའོ། །དེ་བཞིན་གཤེགས་པའི་དཔལ་
[93a.6]ཆེན་པོ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་བསམ་པའི་རྒྱལ་པོའི་དཔལ་ཆེན་པོའི་རང་བཞིན་ཡིན་པའི་ཕྱིར། དེ་བཞིན་གཤེགས་པའི་དཔལ་ཆེན་པོའོ། །བཞད་ཆེན་པོ་ཞེས་བྱ་བ་ནི་རྡོ་རྗེ་བཞད་པས་ནམ་མཁའ་ཐམས་ཅད་ཁྱབ་པར་བཞད་པ་ཆེན་པོ་སྟེ་མཚན་བཞི་ཡིན་ནོ། །དེ་བཞིན་
[93a.7]གཤེགས་པ་དབང་བསྐུར་མཆོག །ཅེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་ཅོད་པན་གྱི་ངོ་བོས་གནས་པའི་ཕྱིར་རོ། །མཆོག་ཅེས་བྱ་བ་ནི་དབང་བསྐུར་བ་དེ་ཉིད་གཞན་ལས་ཁྱད་པར་དུ་གྱུར་པའི་ཕྱིར་མཆོག་གོ། །དབང་ཆེན་ཞེས་བྱ་བ་ནི་དབང་ཡང་ཡིན་ལ་ཆེན་པོ་ཡང་འདི་ཡིན་པས་
[93b]
[93b.1]དབང་ཆེན་ཏེ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའི་ངོ་བོ་ཉིད་ཀྱིས་ས་འོག་མ་རྣམས་ཀྱི་དབང་བསྐུར་ལས་ཁྱད་པར་དུ་གྱུར་པའི་ཕྱིར་རོ། །ཁྱབ་བདག་ཆེན་པོ་སྟེ་ཞེས་བྱ་བ་ནི་ཐམས་ཅད་ལ་ཁྱབ་པའི་ཕྱིར་ཁྱབ་བདག་ཆེའོ། །འཇིག་རྟེན་མགོན་ཞེས་བྱ་བ་ནི་སེམས་ཅན་དང་སྣོད་ཀྱི་འཇིག་རྟེན་
[93b.2]དུ་བསྐལ་བ་སྲེག་པའི་དུས་སུ་སྐྱོབ་པ་མཛད་པས་ན་འཇིག་རྟེན་མགོན་པོའོ། །རབ་འཇིག་རྟེན་ཞེས་བྱ་བ་ནི་འཇིག་རྟེན་བཟང་པོ་ནི་རབ་ཀྱི་འཇིག་རྟེན་ཏེ། རྣམ་པར་དག་པའི་སངས་རྒྱས་ཀྱི་ཞིང་གི་རང་བཞིན་དུ་གནས་པའི་ཕྱིར་རོ། །མཆོག་ཅེས་བྱ་བ་ནི། ཉོན་མོངས་པ་དང་བཅས་པའི་སངས་རྒྱས་ཀྱི་ཞིང་
[93b.3]ཁམས་ལས་དེ་ཉིད་གཙོ་བོར་གྱུར་པས་ན་མཆོག་གོ། །འཇིག་རྟེན་ཉི་མ་ཞེས་བྱ་བ་ནི། ཉོན་མོངས་པ་རྣམ་པར་དག་པའི་སངས་རྒྱས་ཀྱི་ཞིང་དུ་སྣང་བར་བྱེད་པས་ན་འཇིག་རྟེན་ཉི་མ་སྟེ་མཚན་བརྒྱད་ཡིན་ནོ། །རིན་ཆེན་ཕུལ་ཏེ་ཞེས་བྱ་བ་ནི་རིན་པོ་ཆེ་ཐམས་ཅད་ཀྱི་ནང་ན་ཤིན་ཏུ་ཁྱད་པར་དུ་གྱུར་པ་སྟེ་རིན་ཆེན་ཕུལ་
[93b.4]ལོ། །རབ་ཀྱི་མཆོག་ཅེས་བྱ་བ་ནི། གཙོ་བོ་ལས་ཀྱང་ཤིན་ཏུ་གཙོ་བོ་ཡིན་པས་ན་རབ་མཆོག་གོ། །རིན་ཆེན་རྒྱན་ཞེས་བྱ་བ་ནི། རིན་པོ་ཆེའི་རྒྱན་འདི་ལས་མངའ་བས་ན་རིན་ཆེན་རྒྱན་ནོ། །རིན་ཆེན་མཛད་ཅེས་བྱ་བ་ནི་རིན་པོ་ཆེ་འཆང་བའོ། །རིན་ཆེན་སྣང་བ་ཞེས་བྱ་བ་ནི་རིན་པོ་ཆེ་སྣང་བ་འདི་ལ་མངའ་བས་ན་
[93b.5]སྣང་བའོ། །སྣང་བ་ཆེ་ཞེས་བྱ་བ་ནི་ཆོས་ཀྱི་དབྱིངས་ཀྱི་ཡེ་ཤེས་ཀྱིས་འཇིག་རྟེན་ཐམས་ཅད་ལ་ཁྱབ་པས་ན་སྣང་བ་ཆེའོ། །རིན་ཆེན་གྲགས་ཞེས་བྱ་བ་ནི། འཇིག་རྟེན་གྱི་ཁམས་ཐམས་ཅད་དུ་ཁྱབ་པའི་སྙན་པ་དང་། རྙེད་པ་བཟང་པོའི་རིན་པོ་ཆེ་མངའ་བས་རིན་ཆེན་གྲགས་པ་སྟེ་མཚན་བདུན་ནོ། །རིན་
[93b.6]ཆེན་ཕུང་པོ་ཞེས་བྱ་བ་ནི་རིན་པོ་ཆེ་བྱུར་བུར་སྤུངས་པ་དང་འདྲ་བས་ན། རིན་པོ་ཆེ་བཟང་པོ་སྟེ། བྱང་ཆུབ་ཀྱི་ཡན་ལག་བདུན་གྱི་རིན་པོ་ཆེ་དེ་རྣམས་དེ་ལས་སྐྱེས་པའི་ཕྱིར་རིན་པོ་ཆེའི་ཕུང་པོའོ། །རིན་ཆེན་འབྱུང་ལྡན་ཞེས་བྱ་བ་ནི། རིན་པོ་ཆེ་ལས་བྱུང་བས་ན་རིན་ཆེན་འབྱུང་ལྡན་ནོ། །ནོར་བུའི་གཟུགས་
[93b.7]དང་ལྡན་པའི་ཕྱིར་ནོར་བུའོ། །རྡོ་རྗེ་ནོར་བུ་ཞེས་བྱ་བ་ནི་རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུའི་གཟུགས་ཡིན་པའི་རྡོ་རྗེ་ནོར་བུའོ། །ཡོན་ཏན་ཞེས་བྱ་བ་ནི་བསླབ་པར་བྱ་བས་ཡོན་ཏན་ཏེ། དཔལ་དུ་གྱུར་པར་བྱ་བའི་དོན་དུ་གོམས་པར་བྱ་ཞེས་བྱ་བའི་ཐ་ཚིག་གོ། །རིན་ཆེན་འབྱུང་བ་ཞེས་བྱ་
[94a]
[94a.1]བ་ནི་བྱང་ཆུབ་ཀྱི་ཡན་ལག་ལ་སོགས་པ་རིན་པོ་ཆེ་ཐམས་ཅད་དེ་ལས་སྐྱེས་པས་ན། རིན་ཆེན་འབྱུང་བའོ། །སྐུ་རབ་འབར་ཞེས་བྱ་བ་ནི། ཤིན་ཏུ་འབར་བའི་སྐུ་མངའ་བས་ན་སྐུ་འབར་ཏེ། གཟི་བརྗིད་འབར་བས་གསལ་བར་བྱེད་པའི་ཕྱིར་རོ། །རིན་ཆེན་ཀུན་ཞེས་བྱ་བ་ནི་འཇིག་རྟེན་དང་འཇིག་རྟེན་
[94a.2]ལས་འདས་པ་ཐམས་ཅད་ལ་དཀོན་པ་ཡིན་པའི་ཕྱིར་རིན་ཆེན་ཀུན་ཏེ་མཚན་བརྒྱད་ཡིན་ནོ། །ཆེ་ཉིད་ཅེས་བྱ་བ་ནི་བདག་ཉིད་ཆེན་པོའི་རང་བཞིན་ཡིན་པས་ན་ཆེ་ཉིད་དེ། སྐུ་དང་གསུང་དང་ཐུགས་རྡོ་རྗེས་ནམ་མཁའ་ཁྱབ་པའི་ཕྱིར་རོ། །ཤིང་སྡེ་ཞེས་བྱ་བ་ནི་མཆོད་སྡོང་བཞིན་དུ་བྱང་ཆུབ་
[94a.3]སེམས་དཔའ་རྣམས་ཀྱི་དམིགས་པ་ཡིན་པའི་ཕྱིར་ཤིང་ངོ་། །རིན་ཆེན་དབང་ཞེས་བྱ་བ་ནི་རིན་པོ་ཆེ་ཐམས་ཅད་ཀྱི་གཙོ་བོར་གྱུར་པའི་ཕྱིར་རིན་ཆེན་དབང་ངོ་། །རེ་བ་ཐམས་ཅད་སྐོང་མཛད་པ། །ཞེས་བྱ་བ་ནི། སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པས་ན་རེ་བ་ཐམས་
[94a.4]ཅད་སྐོང་མཛད་པའོ། །བསམ་པ་ཐམས་ཅད་ལེགས་པར་བརྙེས། །ཞེས་བྱ་བ་ནི་འདོད་པའི་དངོས་གྲུབ་ཐམས་ཅད་བརྙེས་པའི་ངོ་བོ་ཡིན་པའི་ཕྱིར། བསམ་པ་ཐམས་ཅད་ལེགས་པར་བརྙེས་སོ། །རིན་ཆེན་ཕུང་པོ་ཞེས་བྱ་བ་ནི། གཞལ་དུ་མེད་པའི་རིན་པོ་ཆེ་ཐམས་ཅད་ཀྱི་བྱུར་བུར་གྱུར་
[94a.5]བའི་ཕྱིར་རིན་ཆེན་ཕུང་པོ་སྟེ་མཚན་དྲུག་ཡིན་ནོ། །འོད་མཆོག་ཅེས་བྱ་བ་ནི། འོད་ཟེར་གྱི་མཆོག་དེའི་རྩེ་མོར་གྱུར་བ་ནི་འོད་ཟེར་མཆོག་གོ། །ཁྱབ་པ་ཞེས་བྱ་བ་ནི་དེ་བཞིན་གཤེགས་པའི་སྙིང་པོའི་ངོ་བོས་སེམས་ཅན་ཐམས་ཅད་ཀྱི་རྒྱུད་ཀྱི་རྗེས་སུ་སོང་བའི་ཕྱིར་ཁྱབ་པའོ། །བདག་ཉིད་ཀུན་ཞེས་བྱ་བ་
[94a.6]ནི་སེམས་ཅན་ཐམས་ཅད་ཀྱི་སེམས་དང་སེམས་ལས་ཕྱུང་བའི་རང་བཞིན་ཡིན་པའི་ཕྱིར་བདག་ཉིད་ཀུན་ནོ། །མཆོག་རབ་སྦྱིན་ཞེས་བྱ་བ་ནི། རྣལ་འབྱོར་པ་མངོན་པར་འདོད་པས་བསྒྲུབ་པའི་དུས་སུ་མཆོག་སྟེར་བས་ན་མཆོག་རབ་སྦྱིན་ནོ། །མཆོག་ཆེ་བ་ཞེས་བྱ་བ་ནི། རིན་པོ་ཆེའི་རིག་པ་འཛིན་པ་ལ་སོགས་
[94a.7]པའི་ཁྱད་པར་དུ་ཕུན་སུམ་ཚོགས་པས་ན་མཆོག་ཆེའོ། །ཕུན་སུམ་ཐམས་ཅད་འབྱོར་པའོ། །ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་རིགས་ཐམས་ཅད་མ་ཚང་བ་མེད་པའི་ངོ་བོ་ཡིན་པའི་ཕྱིར་ཕུན་སུམ་ཚོགས་པ་ཐམས་ཅད་འབྱོར་པའོ། །རྡོ་རྗེ་སྙིང་པོ་ནི་རྡོ་རྗེ་རྩེ་ལྔ་པས་མཚན་པའི་
[94b]
[94b.1]ཡིད་བཞིན་ནོར་བུ་རིན་པོ་ཆེའི་སྙིང་པོའི་སྐྱེ་གནས་འདི་ལ་མངའ་བས་ན་རྡོ་རྗེ་སྙིང་པོའོ། །གང་གི་ཕྱིར་དཀྱིལ་འཁོར་བསྒྲུབ་པ་དང་ཕྱག་རྒྱ་ཆེན་པོ་བསྒྲུབ་པས་མངོན་པར་བྱང་ཆུབ་པ་མངོན་སུམ་དུ་བྱེད་པའི་དུས་སུ་འདི་རྡོ་རྗེ་རིན་ཆེན་ལས་སྐྱེ་བར་བཞེད་པ་ཡིན་ནོ། །དེའི་ཕྱིར་རྡོ་རྗེ་རིན་པོ་ཆེའི་སྐྱེ་གནས་ལ་རྡོ་རྗེ་སྙིང་
[94b.2]པོ་ཞེས་བརྗོད་དེ་མཚན་བརྒྱད་ཡིན་ནོ། །ད་ནི་མཚན་བརྒྱ་རྩ་བརྒྱད་འཛིན་པའི་ཕན་ཡོན་བསྟན་པ་ནི། སུ་ཡང་རུང་བས་ཞེས་བྱ་བ་ལ་སོགས་པ་སྨོས་སོ། །ཞི་བ་འདི་ཞེས་བྱ་བ་ནི། མྱ་ངན་ལས་འདས་པ་ཐོབ་པའི་རྒྱུ་ཡིན་པའི་ཕྱིར་རོ། །སངས་རྒྱས་ཀུན་གྱིས་དབང་བསྐུར་བ། །སྐད་ཅིག་ཏུ་ནི་སྡིག་མེད་
[94b.3]ཐོབ། །མིང་བརྒྱ་རྩ་བརྒྱད་ཀྱི་གཞུང་གི་དོན་འཛིན་པ་དང་། རྟོགས་པ་ནི་སངས་རྒྱས་ཐམས་ཅད་ཀྱི་མིང་གི་དབང་བསྐུར་བས་ན་རིན་པོ་ཆེའི་རིགས་ཐོབ་པ་ནི་མངོན་སུམ་དུ་བྱེད་པའོ། །སྡིག་པ་མེད་པ་ནི་སྒྲིབ་པ་དང་བྲལ་བའོ། །གང་གི་ཚེ་སྒྲིབ་པ་དང་བྲལ་བར་གྱུར་པ་དེ་ཉིད་ཀྱི་ཚེ། དེ་ཉིད་སྐད་ཅིག་གཅིག་
[94b.4]ལ་ཐོབ་པོ། །རིན་ཆེན་ཁྱོད་ལ་གསོལ་བ་ནི། །ཞེས་བྱ་བ་ནི་གསོལ་བ་འདེབས་པའི་དོན་དུ་གཉེར་བ་སྟེ། གུས་པས་སྔོན་དུ་འགྲོ་བས་སོ། །རིན་ཆེན་ཁྱོད་ལ་ཞེས་བྱ་བ་ནི་བོད་པའོ། །ནོར་འདུས་པ་ནི་བཤད་པའི་མཛོད་ཅེས་བྱ་བ་ནི་རིན་པོ་ཆེའི་རིགས་སོ། །དེ་ཉིད་ཀྱི་རྣམ་པར་འགྲེལ་པ་ནི། སངས་
[94b.5]རྒྱས་ཀུན་གྱི་དབང་བསྐུར་མཆོག །རང་གི་རིགས་ནི་བསྐྱེད་པར་མཛོད། །ཅེས་བྱ་བ་ནི། སངས་རྒྱས་ཐམས་ཅད་ཀྱི་དབང་བསྐུར་བ་ནི། སངས་རྒྱས་ཉིད་ཀྱིས་དབང་བསྐུར་བའོ། །བག་ཆགས་དང་བཅས་པའི་ཉོན་མོངས་པ་སྤངས་པ་དང་། ཉོན་མོངས་པའི་དྲི་མ་ཐམས་ཅད་དང་བྲལ་བའི་མཚན་ཉིད་ནི་
[94b.6]མཉམ་པ་ཉིད་ཀྱི་ཡེ་ཤེས་ཐོབ་པའོ། །དེའི་རྒྱུ་མཐུན་པ་རིན་པོ་ཆེའི་རིགས་དེ་ཉིད་ནི་མཆོག་སྟེ། འཁོར་བ་མ་སྟོངས་ཀྱི་བར་དུ་མཉམ་པ་ཉིད་ཀྱི་ཡེ་ཤེས་ཀྱི་ནམ་མཁའི་སྙིང་པོའི་རིགས་བསྐྱེད་པར་མཛད་པའོ། །དེ་ནས་ཞེས་བྱ་བ་ནི་དེ་མ་ཐག་པ་བརྗོད་པ་སྟེ། གསོལ་བ་བཏབ་པའི་རྗེས་ཐོགས་ཉིད་
[94b.7]ལ་བྱང་ཆུབ་སེམས་དཔའ་ནམ་མཁའི་སྙིང་པོ་ནི་བྱང་ཆུབ་སེམས་དཔའ་ཆེན་པོའི་རང་བཞིན་གྱི་སེམས་དཔའ་ནི་སེམས་དཔའ་ཆེན་པོའོ། །དེ་བཞིན་གཤེགས་པ་ཐམས་ཅད་ཀྱིས་བཤད་མ་ཐག་པའི་བཀའ་འདི་ཐོས་ཤིང་མཉན་ནས། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་དམ་
[95a]
[95a.1]ཚིག་ཅེས་བྱ་བ་ལ་དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པའོ། །དབང་བསྐུར་བ་ནི་རིན་པོ་ཆེའི་རིགས་སུ་སྤྲུལ་ནས། དེ་དག་གི་མགོ་བོ་ལ་རིན་པོ་ཆེའི་ཅོད་པན་བསྐྱེད་པའོ། །དེའི་དམ་ཚིག་ནི་བསྐྱེད་པའི་རྒྱུའོ། །མིང་དེ་སྐད་ཅེས་བྱ་བའི་སྙིང་པོ་གང་
[95a.2]ཡིན་པ་འདི་གསུངས་པའོ། །ཨོཾ་བཛྲ་རཏྣ་ཧཱུཾ་ཞེས་བྱའོ། །འདི་སྐད་སྟོན་པ་ཡིན་ཏེ། རིན་པོ་ཆེའི་རིགས་བསྐྱེད་པར་གསོལ་བ་འདེབས་པའི་ཚིག་གསན་ནས། བཅོམ་ལྡན་འདས་འཕགས་པ་ནམ་མཁའི་སྙིང་པོས་དེ་བཞིན་གཤེགས་པ་ཐམས་ཅད་ལ་སྙིང་པོ་འདིས་རིན་པོ་ཆེ་ཅོད་པན་གྱིས་དབང་
[95a.3]བསྐུར་བ་བྱིན་པ་ཡིན་ནོ། །དེ་ནས་ཞེས་བྱ་བ་ནི་སྔ་མ་བཞིན་ནོ། །དེ་བཞིན་གཤེགས་པ་ཐམས་ཅད་ཀྱི་ནོར་བུ་ནི་ནོར་བུའི་རིགས་སོ། །དེའི་དམ་ཚིག་ནི་དེ་བསྐྱེད་པའི་རྒྱུ་སྟེ་མིང་དེ་སྐད་ཅེས་བྱ་བ་རིག་པ་དམ་པ་གང་ཡིན་པ་འདི་གསུངས་པ་ནི་བཤད་པའོ། །འདི་སྐད་སྟོན་པ་ཡིན་ཏེ། འཕགས་པ་ནམ་མཁའི་
[95a.4]སྙིང་པོས་དབང་བསྐུར་ནས། བཅོམ་ལྡན་འདས་རྣམ་པར་སྣང་མཛད་ནོར་བུའི་རིགས་ཀྱི་ངོ་བོའི་རང་བཞིན་ལ་འཁོར་བསྐྱེད་པའི་རྒྱུར་གྱུར་པའི་རིག་པ་དམ་པ་འདི་གསུངས་ཤིང་བཤད་པ་ཡིན་ནོ། །དེ་ལྟར་ན་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་རྣམས་ཀྱིས་རྡོ་རྗེ་སྙིང་པོ་
[95a.5]དང་། རིན་ཆེན་ལྟ་བ་དང་། རིན་ཆེན་པདྨ་དང་། རིན་ཆེན་ཆར་འབེབས་ཀྱི་དཀྱིལ་འཁོར་བསྐྱེད་པའི་རྒྱུར་གྱུར་པའི་རིག་པ་དམ་པ་འདི་གསུངས་པའོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དེ་ལྟར་བཅོམ་ལྡན་འདས་རྣམ་པར་སྣང་མཛད་དང་། རྡོ་རྗེ་སེམས་དཔའ་དང་། རྡོ་རྗེ་སྙིང་པོ་དང་།
[95a.6]རྡོ་རྗེ་ལྟ་བ་དང་། རྡོ་རྗེ་སྣ་ཚོགས་ཀྱི་དཀྱིལ་འཁོར་བསྐྱེད་པའི་རྒྱུར་གྱུར་པའི་རིག་པ་དམ་པ་འདི་གསུངས་པའི་རྗེས་ཐོགས་ལ་བྱང་ཆུབ་སེམས་དཔའ་ཆེན་པོ་འཕགས་པ་ནམ་མཁའི་སྙིང་པོ་དོན་ཐམས་ཅད་གྲུབ་པའི་གཟུགས་ཅན་གྱིས་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་རིན་པོ་ཆེ་
[95a.7]ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལ་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའི་རིན་པོ་ཆེ་ནི་རིན་པོ་ཆེའི་རིགས་ཏེ། དེ་ལ་དམིགས་ནས་ཐུགས་རྩེ་གཅིག་ཏུ་མཛད་དེ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་ཞེས་བྱ་བའི་ཏིང་ངེ་འཛིན་དེ་ལ་སྙོམས་པར་
[95b]
[95b.1]ཞུགས་ནས། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་ལྷ་རྣམས་སྤྲུལ་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། འཕགས་པ་ནམ་མཁའི་སྙིང་པོ་སྙོམས་པར་ཞུགས་མ་ཐག་པའི་རྗེས་ཐོགས་ཉིད་ལའོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ནི་རྣམ་པར་
[95b.2]སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་རྣམས་ཀྱི་ཐུགས་ཀ་ལས། རྡོ་རྗེ་ནོར་བུ་རིན་ཆེན་ལྟ་བུའི་འོད་ཟེར་རྣམས་བྱུང་ནས་ཞེས་བྱ་བ་ནི། ཇི་སྐད་དུ་བཤད་པའི་རྡོ་རྗེ་རིན་པོ་ཆེ་དང་འདྲ་བའོ། །དེ་དག་གི་འཇིག་རྟེན་གྱི་ཁམས་ཐམས་ཅད་སྣང་
[95b.3]བར་བྱས་ཏེ་ཞེས་བྱ་བ་ནི། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་རྡོ་རྗེ་རིན་པོ་ཆེའི་རྣམ་པས་རང་རང་གི་གཟུགས་སུ་སྣང་བའོ། །སེམས་ཅན་ཐམས་ཅད་ནི་རིན་པོ་ཆེའི་རིགས་ཀྱི་རྣལ་འབྱོར་ལ་མངོན་པར་དགའ་བའི་མཚན་མ་ཐོབ་པའོ། །དེ་བཞིན་གཤེགས་པ་ཐམས་ཅད་ནི་རིན་པོ་ཆེའི་
[95b.4]རིགས་ཀྱི་དངོས་གྲུབ་སྒྲུབ་པའི་ཡེ་ཤེས་ཀྱི་མཚན་ཉིད་དོ། །དེ་བཞིན་གཤེགས་པ་ཐམས་ཅད་ཀྱི་དབང་གིས་དབང་བསྐུར་ནས། ཡང་གཅིག་ཏུ་གྱུར་པ་ནི་ཐུགས་ཀར་ཞུགས་པའོ། །གང་གི་ཐུགས་ཀར་ཞེ་ན། བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་ནམ་མཁའི་སྙིང་པོའི་ཐུགས་སུ་ཞུགས་སོ། །
[95b.5]དེ་ནས་ཞེས་བྱ་བ་ནི་སྔ་མ་བཞིན་དུ་ཤེས་པར་བྱ་སྟེ། རྡོ་རྗེ་རིན་པོ་ཆེ་འོད་ཟེར་གྱི་རྣམ་པར་ཞུགས་པ་ཉིད་ཀྱི་རྗེས་ཐོགས་ལའོ། །དེ་ནས་ནམ་མཁའི་སྙིང་པོའི་ཐུགས་ལས་བཅོམ་ལྡན་འདས་ཕྱག་ན་རྡོ་རྗེ་ཉིད་དོ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ཀའི་སེམས་དཔའི་རྡོ་རྗེའི་རྣམ་པ་ལས་བྱང་ཆུབ་
[95b.6]སེམས་དཔའ་ཆེན་པོའི་སྐུ་བྱུང་བར་གྱུར་ནས་ཟླ་བའི་དཀྱིལ་འཁོར་ལ་གནས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །ཁྱད་པར་ཇི་ལྟ་བུ་ཞིག་ཅེ་ན། ཀུན་ནས་འོད་ཟེར་འབར་བའི་སྙིང་པོ་ཞེས་བྱ་བ་སྨོས་ཏེ། ཀུན་ནས་འོད་ཟེར་འབར་བ་རིན་པོ་ཆེའི་འོད་དེས་བསྐོར་ཞིང་ནང་དུ་ཞུགས་པར་བྱས་པས་
[95b.7]ན་ཀུན་ནས་འོད་ཟེར་འབར་བའི་སྙིང་པོའོ། །རྡོ་རྗེ་དང་། ནོར་བུ་དང་། རིན་པོ་ཆེ་སྣ་ཚོགས་ཀྱིས་དབང་བསྐུར་བ་ལ་སོགས་པའི་རྒྱན་གྱིས་བརྒྱན་པའི་སྐུ་ཞེས་བྱ་བ་ནི། རྡོ་རྗེ་དང་། ནོར་བུ་དང་། རིན་པོ་ཆེ་སྣ་ཚོགས་པ་དེས་དབང་བསྐུར་བ་ནི། རྡོ་རྗེ་དང་། ནོར་བུ་དང་། རིན་པོ་ཆེ་སྣ་ཚོགས་པས་དབང་བསྐུར་བའོ། །
[96a]
[96a.1]དེ་དང་པོར་བྱས་པའི་རྒྱན་ནི་རྡོ་རྗེ་དང་ནོར་བུ་དང་རིན་པོ་ཆེ་སྣ་ཚོགས་པས་དབང་བསྐུར་བ་ལ་སོགས་པའི་རྒྱན་ནོ། །དེའི་རྒྱན་གྱིས་དེ་རྣམ་པར་བརྒྱན་པའི་སྐུ་ནི་རྡོ་རྗེ་དང་ནོར་བུ་དང་། རིན་པོ་ཆེ་སྣ་ཚོགས་ཀྱིས་དབང་བསྐུར་བ་ལ་སོགས་པའི་རྒྱན་གྱིས་བརྒྱན་པའི་སྐུའོ། །དེའི་ཕྱག་ན་ཅི་ཞིག་
[96a.2]བསྣམས་ཤེ་ན། རྡོ་རྗེ་ནོར་བུ་རིན་པོ་ཆེ་ཆེན་པོའི་མཚན་མ་ཕྱག་ན་བསྣམས་པའོ་ཞེས་བྱ་བ་སྨོས་ཏེ། རྡོ་རྗེ་ནོར་བུ་ཡང་ཡིན་ལ་རིན་པོ་ཆེ་ཆེན་པོ་ཡང་དེ་ཡིན་པས་ན། རྡོ་རྗེ་ནོར་བུའི་རིན་པོ་ཆེ་ཆེན་པོ་དེ་ཉིད་ཀྱིས་མཚན་མའི་རྡོ་རྗེ་རྩེ་ལྔ་པ་ལ་སོགས་པ་ནས། རིན་པོ་ཆེ་དྲིལ་བུའི་མཐར་ཐུག་པའི་ཕྱག་རྒྱ་ནི་རྡོ་རྗེ་ནོར་
[96a.3]བུ་རིན་པོ་ཆེ་ལས་ཕྱག་རྒྱའི་མཚན་མའོ། །དེ་རྣམས་ཀྱི་ཕྱག་མཚན་དང་ལྡན་པ་གང་ཡིན་པ་དེ་ནི་རྡོ་རྗེ་ནོར་བུ་རིན་པོ་ཆེ་ཆེན་པོའི་མཚན་མ་ཕྱག་ན་བསྣམས་པའི་བྱང་ཆུབ་སེམས་དཔའ་ཆེན་པོའི་སྐུ་རྣམས་སུ་གྱུར་ཏེ་བྱུང་བ་ནི་བཅོམ་ལྡན་འདས་རྡོ་རྗེ་འཆང་ལས་བྱུང་བའོ། །ཕྱུང་ནས་དེས་ཅི་ཞིག་བྱེད་ཅེ་ན། འཇིག་
[96a.4]རྟེན་གྱི་ཁམས་ཐམས་ཅད་དུ་ཞེས་བྱ་བ་སྨོས་ཏེ། ཕྱོགས་བཅུའི་འཇིག་རྟེན་གྱི་ཁམས་སྤྲིན་རྒྱ་མཚོ་རབ་འབྱམ་ཐམས་ཅད་དུ་སེམས་ཅན་རྣམ་པར་གནས་པ་དེ་ལ་རིན་པོ་ཆེའི་ཆར་ཕབ་པ་ལ་སོགས་པ་ནོར་བསྐྱེད་པ་རྣམས་ཀྱིས་བསྒོམ་པ་ལ་དགའ་བའི་སྐལ་བ་དང་ལྡན་པ་རྣམས་མགུ་བར་བྱས་ནས་ཤེས་པར་བྱའོ། །
[96a.5]དེ་མགུ་བར་བྱས་ནས་ཅི་ཞིག་བྱེད་ཅེ་ན། སླར་ཡང་བྱོན་ཏེ་ཞེས་བྱ་བ་སྨོས་ཏེ། ཡང་སླར་ལོག་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཕྱོགས་དང་མཚམས་ཐམས་ཅད་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཚུལ་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆ་བྱད་ཀྱི་ཟླ་བའི་དཀྱིལ་འཁོར་
[96a.6]ལ་གནས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མ་ཧོ་ཞེས་བྱ་བ་ནི་ངོ་མཚར་བའོ། །ནི་ཞེས་བྱ་བ་ནི་གང་གི་ཕྱིར་གྱི་དོན་ཏེ། སངས་རྒྱས་ཐམས་ཅད་ཀྱི། །རིན་ཆེན་ཐམས་ཅད་བསྡུས་པ་ནི། །ཞེས་བྱ་བ་ནི་སངས་རྒྱས་ཐམས་ཅད་དང་འབྲེལ་པའི་རིན་པོ་ཆེ་ཐམས་ཅད་བསྡུས་པས་ན་རིན་ཆེན་ཐམས་
[96a.7]ཅད་བསྡུས་པའོ། །དེ་གང་ཞིག་གིས་ཤེ་ན། རྡོ་རྗེ་རིན་ཆེན་རིགས་ཉིད་དུ། །ཞེས་བྱ་བ་སྨོས་ཏེ། རྡོ་རྗེ་རིན་ཆེན་འཕགས་པ་ནམ་མཁའི་སྙིང་པོའི་རིགས་སྟོན་པ་ཡིན་ཏེ། དེའི་ཐུགས་ལས་བྱུང་བའི་ཕྱིར་རོ། །ཅི་ཞིག་ངོ་མཚར་ཞེ་ན། འགྲོ་བའི་དོན་དུ་འདིར་གྱུར་ཏོ། །ཞེས་བྱ་བ་ནི་སེམས་ཅན་གྱི་དོན་
[96b]
[96b.1]དུའོ། །འདི་སྐད་སྟོན་པ་ཡིན་ཏེ། སེམས་ཅན་དེ་བཞིན་གཤེགས་པའི་རིགས་འདི་དོན་དམ་པར་ན་གདོད་མ་ནས་མ་སྐྱེས་པ་ཡིན་ཡང་། དེ་བཞིན་གཤེགས་པ་རྣམས་རྡོ་རྗེ་རིན་པོ་ཆེ་ལས་སྐྱེས་པའི་འགྲོ་བ་འདུལ་བའི་གདུལ་བྱའི་རིགས་རྣམས་ཀྱིས་མཐོང་བ་ནི་ངོ་མཚར་བའོ། །འདི་སྐད་སྟོན་པ་ཡིན་ཏེ།
[96b.2]དེ་སྐད་དུ་ཡང་། ཆོས་རྣམས་རང་བཞིན་འོད་གསལ་བ། །གདོད་ནས་དག་པ་ནམ་མཁའ་བཞིན། །བྱང་ཆུབ་མེད་ཅིང་མངོན་རྟོགས་མེད། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཞེས་བྱ་བ་ནས་བརྩམས་ནས། རྡོ་རྗེ་རིན་ཆེན་བདག་ཉིད་དུ། །འགྲོ་བའི་
[96b.3]དོན་དུ་འདིར་གྱུར་ཏོ། །ཞེས་བྱ་བའི་བར་གྱི་གཞུང་འདི་ཙམ་གྱིས་ནི་དོན་ཐམས་ཅད་གྲུབ་པ་ཞེས་བྱ་བའི་དཀྱིལ་འཁོར་ཆེན་པོའི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བཤད་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ལ་སོགས་པ་ནི། རྡོ་རྗེ་དབྱིངས་ཀྱི་དཀྱིལ་འཁོར་
[96b.4]ཆེན་པོ་ལས་བཤད་པ་བཞིན་དུ་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་དེ་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བསྒྲུབ་པ་ལ་འཇུག་པར་བྱའོ། །
[96b.5]ཞེས་བྱ་བའི་དོན་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ཞེས་བྱ་བ་ལ་སོགས་པ་སྨོས་པས། སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པར་བསྟན་པ་ཡིན་ནོ། །དེ་ནས་ཞེས་བྱ་བ་ནི་སྐབས་སུ་བབ་པ་སྟེ། སློབ་དཔོན་དང་སློབ་མའི་
[96b.6]ཆོ་ག་རྒྱས་པའི་དུས་ལ་བབ་པ་ཞེས་བྱ་བའི་དོན་ཏོ། །རང་གི་རིགས་བསྐྱེད་ནས་ཞེས་བྱ་བ་ནི། བཤད་མ་ཐག་པའི་ཚུལ་གྱིས་རང་གི་རིགས་དེ་རིན་པོ་ཆེའི་རིགས་དེ་བསྐྱེད་པ་ནི་རང་གི་ཐུགས་ལས་ཕྱུང་བའོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་དང་། མི་བསྐྱོད་པ་ལ་སོགས་པའི་དེ་
[96b.7]བཞིན་གཤེགས་པ་རྣམས་འདུལ་བ་ལའོ། །དེ་བཞིན་གཤེགས་པ་ཐམས་ཅད་ལ་སེམས་ཅན་ཐམས་ཅད་ཀྱི་བསམ་པ་འདིས་ཡོངས་སུ་རྫོགས་པར་བྱེད་པ་ནི་རང་གི་རིགས་འདི་བཅོམ་ལྡན་འདས་ལ་ཕུལ་བ་ཡིན་ནོ། །འདི་ཇི་ལྟ་བུ་ཞེ་ན། དོན་ཐམས་ཅད་གྲུབ་པ་ཞེས་སྨོས་ཏེ། དོན་ཡང་ཡིན་ལ་དེ་ཐམས་
[97a]
[97a.1]ཅད་ཀྱང་ཡིན་པས་དོན་ཐམས་ཅད་དེ། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་གང་ཡིན་པ་འདི་འགྲུབ་པའི་དོན་ཐམས་ཅད་འགྲུབ་པ་སྟེ། བཅོམ་ལྡན་འདས་ནམ་མཁའི་སྙིང་པོའམ། དེའི་རིགས་ནི་དོན་ཐམས་ཅད་དོ། །དེ་འགྲུབ་པའི་རྒྱུ་མཚན་གྱི་དཀྱིལ་འཁོར་ནི་དོན་ཐམས་ཅད་
[97a.2]འགྲུབ་པའི་དཀྱིལ་འཁོར་ཆེན་པོ་སྟེ། རིན་པོ་ཆེའི་རིགས་ཀྱི་ཕྱག་རྒྱ་གཙོ་བོར་གྱུར་པའི་དཀྱིལ་འཁོར་གཙོ་བོར་གྱུར་པ་ཞེས་བྱ་བའི་ཐ་ཚིག་གོ། །འདི་ཞེས་བྱ་བ་ནི་འཆད་པར་འགྱུར་བ་ཉིད་དོ། །དེ་གསུངས་པ་ནི་བཤད་པའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། སྔོན་དུ་བསྙེན་པའི་རྗེས་ཐོགས་
[97a.3]ལའོ། །དེ་ནས་ཞེས་བྱ་བ་ནི་དེའི་ཕྱིར་གྱི་དོན་ཏེ། གང་གི་ཕྱིར་དོན་ཐམས་ཅད་གྲུབ་པའི་དཀྱིལ་འཁོར་དུ་འཇུག་པ་མེད་ན་དེ་ལ་བཤད་པ་དངོས་གྲུབ་འགྲུབ་པར་མི་འགྱུར་བ་དེའི་ཕྱིར། རབ་ཏུ་བཤད་པར་བྱ་བ། དཀྱིལ་འཁོར་ཆེན་པོ་དམ་པ་སྟེ། །རྡོ་རྗེ་དབྱིངས་དང་འདྲ་བ་ལ། །ཞེས་བྱ་བ་ནི་སྤྲུལ་པའི་
[97a.4]དོན་ཐམས་ཅད་གྲུབ་པའི་དཀྱིལ་འཁོར་ནི་རྡོ་རྗེ་དབྱིངས་སོ། །དེ་དང་འདྲ་བ་ནི་རྡོ་རྗེ་དབྱིངས་དང་འདྲ་བ་སྟེ། དོན་ཀུན་གྲུབ་པ་ཞེས་བཤད་པ། །ཞེས་གསུངས་སོ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་བརྒྱན་པ་སྟེ། །ཞེས་བྱ་བ་ནས། ཕྱི་རོལ་དཀྱིལ་འཁོར་སྲད་བུ་བྲེ། །ཞེས་བྱ་བའི་བར་དུ་
[97a.5]བཤད་ཟིན་ཏོ། །དེ་ཡི་ནང་དུ་རྡོ་རྗེ་ཡི། །རིན་ཆེན་ལས་བྱུང་གནས་བྱ་ཞིང་། །ཞེས་བྱ་བ་ནི། བཤད་མ་ཐག་པའི་ཕྱིར་དཀྱིལ་འཁོར་དེའི་ནང་ནི་ནང་གི་དབུས་ཞེས་བྱ་བའི་ཐ་ཚིག་གོ། །ཅི་ཞིག་བྱ་ཞེ་ན། རྡོ་རྗེ་རིན་པོ་ཆེ་ལས་བྱུང་བའི་རྡོ་རྗེ་རིན་པོ་ཆེའི་རང་བཞིན་གྱི་གནས་ཀྱི་དཀྱིལ་འཁོར་རོ། །ཇི་ལྟར་
[97a.6]སྲད་བུ་བྲེ་བར་བྱ་ཞེ་ན། ཀ་བ་བརྒྱད་ཀྱི་ཚུལ་དུ་ནི། །རིན་ཆེན་སྣ་ཚོགས་འབར་བ་ཡི། །དཀྱིལ་འཁོར་ལྔས་ནི་བརྒྱན་གྱུར་པ། །དེར་ནི་སྲད་བུ་བྲེ་བར་བྱ། །ཞེས་བྱ་བ་སྨོས་ཏེ། ཀ་བ་བརྒྱད་ཀྱི་ཚུལ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པར་ཤེས་པར་བྱའོ། །རིན་ཆེན་སྣ་ཚོགས་འོད་
[97a.7]འབར་བ། །དཀྱིལ་འཁོར་ལྔས་ནི་བརྒྱན་གྱུར་པ། །ཞེས་བྱ་བ་ནི་རྣམ་པར་སྣང་མཛད་དང་། དོན་ཐམས་ཅད་གྲུབ་པ་དང་། རིན་ཆེན་ལྟ་བ་དང་། རིན་ཆེན་པདྨ་དང་། རིན་ཆེན་ཆར་འབེབས་ཀྱི་དཀྱིལ་འཁོར་ཟླ་བའི་དཀྱིལ་འཁོར་གྱིས་བརྒྱན་པ་རེ་རེ་ཞིང་ཡང་ཟླ་བའི་དཀྱིལ་འཁོར་གྱི་གདན་ལྔ་ལྔས་
[97b]
[97b.1]དེ་ལྟར་བརྒྱན་པར་བྱའོ། །རིན་ཆེན་ཟུར་བརྒྱད་པ། རེའུ་མིག་བརྒྱད་ལས་འོད་ཟེར་གྱི་ཕྱི་རོལ་དུ་འཕྲོས་པའི་རིན་པོ་ཆེ་ལྕུག་མས་ཕྱི་རོལ་ཀུན་ལ་ཡོངས་སུ་བསྐོར་བ་ནི། རྡོ་རྗེ་རིན་པོ་ཆེའི་འོད་ཟེར་འབར་བ་དེས་ན་རིན་ཆེན་སྣ་ཚོགས་འོད་འབར་བའོ། །རང་གི་ཕྱག་རྒྱས་བསྐོར་བ་སྟེ། །དེར་ནི་སངས་
[97b.2]རྒྱས་གཞག་པར་བྱ། །ཞེས་བྱ་བ་ནི། དཀྱིལ་འཁོར་རྣམ་པ་ལྔའི་དབུས་ཀྱི་དཀྱིལ་འཁོར་གང་ཡིན་པ་དེ་ལ་རྣམ་པར་སྣང་མཛད་བྲིས་ལ། རང་གི་སྙིང་པོས་ནམ་མཁའི་ཕྱོགས་བཅུག་ལ་དབབ་པར་བྱའོ། །དེའི་ཤར་གྱི་ཆ་ལ་རྡོ་རྗེ་ནོར་བུ་དང་། ལྷོར་རིན་པོ་ཆེའི་མྱུ་གུ། ནུབ་ཏུ་རྡོ་རྗེ་རིན་ཆེན་པདྨ།
[97b.3]བྱང་དུ་རིན་ཆེན་ཆར་འབེབས་ཀྱི་ཕྱག་རྒྱ་བྲི་བར་བྱའོ། །ཐམས་ཅད་ཀྱང་རང་གི་སྙིང་པོས་ནམ་མཁའི་ཕྱོགས་ནས་བཀུག་ལ་དབབ་པར་བྱའོ་ཞེས་ཤེས་པར་བྱའོ། །དེ་ལ་སྙིང་པོ་འདི་དག་ཡིན་ཏེ། ཨོཾ་བུདྡྷ་རཏྣ་ཧཱུཾ་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་སྙིང་པོ་སྟེ། དགོད་པའི་སྙིང་
[97b.4]པོ་ཡིན་ནོ། །ཨོཾ་བཛྲ་མ་ཎི་ཧཱུཾ། རྡོ་རྗེ་སེམས་མའི་གནས་ཀྱི་རྡོ་རྗེ་ནོར་བུ་མའི་ཕྱག་རྒྱའོ། །ཨོཾ་བཛྲ་རཏྣཾ་ཨཾ་ཀུར་ཧཱུཾ། རྡོ་རྗེ་རིན་ཆེན་མའི་གནས་ཀྱིའོ། །ཨོཾ་བཛྲ་རཏྣ་པདྨ་ཧཱུཾ། རྡོ་རྗེ་ཆོས་མའི་གནས་སུའོ། །ཨོཾ་བཛྲ་རཏྣ་པཱ་ཤ་ཧཱུཾ། རྡོ་རྗེ་ལས་མའི་གནས་སུ་རིན་ཆེན་ཆར་འབེབས་ཀྱི་ཕྱག་
[97b.5]རྒྱའོ། །རེ་བ་ཀུན་གྲུབ་དཀྱིལ་འཁོར་དུ། །རྡོ་རྗེ་ཤུགས་ཀྱིས་བརྒལ་ནས་ནི། །ཞེས་བྱ་བ་ལ་སོགས་པ་ནི། རེ་བ་ཐམས་ཅད་འགྲུབ་པ་མངའ་བས་འདིར་ནི་རེ་བ་ཐམས་ཅད་གྲུབ་པ་སྟེ། བཅོམ་ལྡན་འདས་རྡོ་རྗེ་སྙིང་པོའོ། །དེའི་དཀྱིལ་འཁོར་ནི་རེ་བ་ཐམས་ཅད་འགྲུབ་པའི་དཀྱིལ་འཁོར་
[97b.6]རོ། །རྡོ་རྗེ་སྙིང་པོ་དེར་གནས་ཤིང་། །རིན་ཆེན་མཆོག་ནི་སྦྱིན་པར་བྲི། །ཞེས་བྱ་བ་ནི། དཀྱིལ་འཁོར་གྱི་གནས་དེར་བཞུགས་པས་ན་དེར་གནས་སོ། །གནས་དེ་དང་དེར་རྡོ་རྗེ་སྙིང་པོ་སྟེ། ནམ་མཁའི་སྙིང་པོ་བྲི་བར་བྱའོ། །རིན་ཆེན་མཆོག་ནི་སྦྱིན་པར་བྲི། །ཞེས་བྱ་བ་ནི། རིན་པོ་
[97b.7]ཆེའི་མཆོག་སྟེར་བར་བྱེད་པ་བྲི་བར་བྱའོ། །དེ་ཡི་ཕྱོགས་རྣམས་ཐམས་ཅད་དུ། །ལྟག་འོག་གོ་རིམས་ཇི་བཞིན་དུ། །རིན་ཆེན་ཕྱག་རྒྱ་ལྡན་པའོ། །ཞེས་བྱ་བ་ནི། ཡིད་བཞིན་གྱི་ནོར་བུས་མཚན་པའི་རྡོ་རྗེ་ལ་སོགས་པའི་རང་གི་མཚན་མ་ཕྱག་ན་བསྣམས་པ་དང་། ནོར་བུའི་མཚན་
[98a]
[98a.1]མ་ལ་སོགས་པ་བསྣམས་པའི་སེམས་དཔའ་ཆེན་པོ་རྣམས་བྲི་བར་བྱའོ། །ལྟག་འོག་གོ་རིམས་ཇི་བཞིན་དུ། །ཞེས་བྱ་བ་ནི། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་ག་བྲི་བར་བྱའོ། །དེ་ལ་དེ་དག་གི་སྙིང་པོ་ཞེས་བྱ་བ་ནི་གོ་སླའོ། །རིན་ཆེན་ཕྲེང་བའི་
[98a.2]དཀྱིལ་འཁོར་དུ། །ཞེས་བྱ་བ་ནི་མིག་གཉིས་ཀྱི་སྟེང་དུ་ཡང་དག་པར་ལྡན་པ་ནི་ཉེ་བར་མཚོན་པ་སྟེ། ནམ་མཁའི་སྙིང་པོའི་རིན་པོ་ཆེའི་ཕྲེང་བའི་དཀྱིལ་འཁོར་འདི་ནི་རིན་ཆེན་ཕྲེང་བའི་དཀྱིལ་འཁོར་རོ། །དེ་ཡི་ཕྱོགས་རྣམས་ཐམས་ཅད་དུ། །ཞེས་བྱ་བ་ནི་གོ་སླའོ། །རིན་ཆེན་པདྨའི་དཀྱིལ་འཁོར་དུ། །
[98a.3]རྡོ་རྗེ་ཤུགས་ཀྱིས་བརྒལ་ནས་ནི། །ཞེས་བྱ་བ་ནི་རིན་པོ་ཆེས་མཚན་པའི་པདྨ་སྟེ། རིན་ཆེན་པདྨ་དེའི་དཀྱིལ་འཁོར་རོ། །རིན་ཆེན་པདྨ་འཛིན་ཁྱབ་བདག །དེ་ཡི་དབུས་གནས་བྲི་བར་བྱ། །ཞེས་བྱ་བ་ནི། འོད་དཔག་ཏུ་མེད་པའི་གནས་སུ་རིན་ཆེན་པདྨ་བསྣམས་པ། འཕགས་པ་ནམ་མཁའི་སྙིང་པོ་
[98a.4]ཏིང་ངེ་འཛིན་ལ་སོགས་པར་ཞུགས་པ་བྲི་བར་བྱ་ཞེས་བྱ་བའི་ཐ་ཚིག་གོ། །རིན་ཆེན་ཆར་འབེབས་དཀྱིལ་འཁོར་དུ། །རྡོ་རྗེ་ཤུགས་ཀྱིས་བརྒལ་ནས་ནི། །ཞེས་བྱ་བ་ནི་རིན་ཆེན་ཆར་འབེབས་ནི་ཉེ་བར་མཚོན་པ་སྟེ། རིན་ཆེན་ཆར་འབེབས་ནི་འཕགས་པ་ནམ་མཁའི་སྙིང་པོ་ཡིན་ལ། དེའི་དཀྱིལ་འཁོར་
[98a.5]རོ། །ལྷག་མ་ནི་གོ་སླའོ། །དེ་ནས་ཀྱི་སྒྲ་ནི་དེ་མ་ཐག་པ་སྟེ། དེ་ལྟར་དཀྱིལ་འཁོར་བྲིས་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་ག་ཐམས་ཅད་བྱས་པའི་རྗེས་ལ་དོན་ཐམས་ཅད་གྲུབ་པའི་དཀྱིལ་འཁོར་འདིར་རེ་ཞིག་འཕགས་པ་ནམ་མཁའི་སྙིང་པོའི་རྣལ་འབྱོར་དང་ནོར་བུའི་
[98a.6]རིགས་ཀྱི་རྣལ་འབྱོར་བྱས་ལ། རིན་པོ་ཆེའི་སློབ་དཔོན་རང་ཉིད་འཇུག་པར་བྱའོ། །ཇི་ལྟ་བ་བཞིན་དུ་ཞུགས་ཏེ་ཞེས་བྱ་བ་ནི། འཆད་པར་འགྱུར་བའི་སློབ་མ་འཇུག་པའི་ཆོ་གས་སློབ་དཔོན་བཅོམ་ལྡན་འདས་འཕགས་པ་ནམ་མཁའི་སྙིང་པོར་གྱུར་པས་བདག་ཉིད་འཇུག་པར་བསམ་པ་ནི་ཇི་ལྟ་བ་
[98a.7]བཞིན་དུ་ཞུགས་པའོ། །ཆོ་ག་རྒྱས་པ་བདག་ཉིད་ཀྱིས་བྱས་ལ་ཞེས་བྱ་བ་ནི། རྡོ་རྗེ་དབྱིངས་ལས་བཤད་པའི་ཆོ་ག་བཞིན་དུ་འདིར་སློབ་དཔོན་བདག་ཉིད་སྒྲུབ་པའོ། །དེ་ནས་ཞེས་བྱ་བ་ནི་རང་གི་ཆོ་ག་རྒྱས་པའི་རྗེས་ཐོགས་ལའོ། །རིན་པོ་ཆེས་བྱིན་གྱིས་བརླབས་པའི་བུམ་པའི་ཆུས་ནོར་བུའི་སློབ་
[98b]
[98b.1]མ་ལ་དབང་བསྐུར་ཏེ་ཞེས་བྱ་བ་ནི། འཕགས་པ་ནམ་མཁའི་སྙིང་པོ་མངོན་པར་བཟླས་པའི་འཇུག་པའི་སྒོ་ལ་མངོན་པར་ཕྱོགས་པར་གཞག་པའི་བུམ་པ་ནི་རིན་པོ་ཆེའི་བྱིན་གྱིས་བརླབས་པ་ཞེས་བྱའོ། །དེའི་ཕྱིར་ནོར་བུའི་རིགས་ཀྱི་བདག་པོར་བྱིན་གྱིས་བརླབས་པའི་སློབ་མ་ལ་ཆུ་བླངས་ལ། ནོར་
[98b.2]བུའི་སློབ་མ་དེ་ལ་ཆུ་དེས་བསང་གཏོར་དང་། དབང་བསྐུར་བར་བྱའོ། །ཅི་ཞིག་བྱེད་ཅེ་ན། རྡོ་རྗེ་ནོར་བུའི་དམ་ཚིག་གི་ཕྱག་རྒྱ་བཅིངས་ལ་ཞེས་བྱ་བ་སྨོས་ཏེ། ཨོཾ་བཛྲ་མ་ཎི་རཏྣ་ས་མ་ཡ་བཾ། ཞེས་བརྗོད་ཅིང་། རང་ཉིད་ཀྱི་ཕྱག་རྒྱ་བཅིངས་ལ། དེ་ཡང་འཆིང་དུ་གཞུག་པར་བྱའོ། །གང་གིས་ཤེ་ན།
[98b.3]སྙིང་པོ་འདི་བརྗོད་པས་སོ། །དེ་ནས་ཁ་དོག་ཇི་ལྟ་བ་བཞིན་དུ་རྙེད་པའི་གོས་འདིས་ནི་གོས་གཞན་ཇི་ལྟར་རྙེད་པ་ཐམས་ཅད་གཟུང་བར་བྱའོ་ཞེས་བཅོམ་ལྡན་འདས་ཉིད་ཀྱིས་གནང་བ་སྦྱིན་པར་སྟོན་ཏོ། །སྙིང་པོ་འདིས་རང་དང་གཞན་འཇུག་པར་བྱ་སྟེ། ཨོཾ་ཧཱུཾ་པྲ་བེ་ཤ་མ་ནི་རཱ་ཛ་ཀུ་ལཾ། དམ་ཚིག་གཉིས་
[98b.4]སུ་བྱས་ཏེ་ཞེས་བྱ་བ་ནི། གཡོན་པའི་ཁྲོ་བོའི་ཁུ་ཚུར་གྱིས་གཡས་པའི་རྡོ་རྗེ་ནོར་བུའི་དམ་ཚིག་གི་ཕྱག་རྒྱ་དྲལ་བར་བྱ་ཞེས་བྱ་བའི་དོན་ཏོ། །ཐེག་པ་ཆེན་པོ་མངོན་པར་རྟོགས་པ་བརྗོད་པར་བྱའོ་ཞེས་བྱ་བ་ནི། དོན་ཐམས་ཅད་གྲུབ་པ་རབ་ཏུ་སྦྱིན་པའི་སྔགས་འདིར་ཐེག་པ་ཆེན་པོ་མངོན་པར་རྟོགས་
[98b.5]པ་ཞེས་བརྗོད་དོ། །དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་དམ་ཚིག་གི་དཀྱིལ་འཁོར་དུ་དེ་བརྗོད་ཅིང་སྒོ་སྲུང་ནས་བརྩམས་ནས། བཅོམ་ལྡན་འདས་རྣམ་པར་སྣང་མཛད་ཀྱི་བར་དུ་བལྟ་བར་བྱའོ་ཞེས་བྱ་བའི་དོན་ཏོ། །གང་གི་ཕྱིར་བཅོམ་ལྡན་འདས་དེ་བཞིན་གཤེགས་པ་ལ་ཐུག་
[98b.6]གི་བར་དུ་དཀྱིལ་འཁོར་ཆེན་པོ་བསྟན་པར་བྱའོ་ཞེས་གསུངས་པ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་ནས། ཅི་འབྱོར་པས་མཆོད་པར་བྱས་ནས། དགོས་པ་ཐམས་ཅད་བསྒྲུབ་པར་བྱའོ་ཞེས་བྱ་བའི་བར་གྱི་གཞུང་འདི་ཙམ་གྱིས་ནི་དེའི་ཆོ་ག་རྒྱས་
[98b.7]པའི་དོན་བསྟན་པ་ཡིན་ནོ། །བཅོམ་ལྡན་འདས་ཞེས་བྱ་བ་ནི་སྔར་བཤད་ཟིན་ཏོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་དམ་ཚིག་དང་། དབང་བསྐུར་བ་ཐོབ་པ་དེས་དཀྱིལ་འཁོར་བྲི་བར་འདོད་ན། དང་པོར་རེ་ཞིག་རིམ་པ་འདིས་སྔོན་དུ་བསྙེན་པ་བྱས་ཏེ། ཐོ་རངས་ཀྱི་ཐུན་
[99a]
[99a.1]མཚམས་ལ་མལ་ནས་ལངས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ནས་ལངས་ཏེ། ཨོཾ་བཛྲ་ཡཀྵ་ཧཱུཾ་ཞེས་བཟླས་པས། བདག་ཉིད་རྡོ་རྗེ་གནོད་སྦྱིན་དུ་སྤྲུལ་ལ་འདི་ཉིད་བརྗོད་ཅིང་གདོང་ལ་སོགས་པ་དག་པར་བྱའོ། །ཡང་འདི་ཉིད་
[99a.2]བརྗོད་ཅིང་ལྷའི་ཁང་པར་དབང་ལྡན་གྱི་ཕྱོགས་ནས་བརྩམས་ཏེ། བདག་ཉིད་བསྒྲུབ་པའི་གྲོགས་པོས་གཡས་ནས་བསྐོར་ཞིང་རིམ་གྱིས་སྐྱང་ནུལ་བྱའོ། །དེ་ནས་སློབ་དཔོན་ཁྲུས་ལ་མངོན་པར་ཞེན་ན་ཁྲུས་བྱའོ། །གལ་ཏེ་རྣམ་པར་རྟོག་པ་སྤྱོད་པ་ཡིན་པ་དེའི་ཚེ་ཆུའི་ཁྲུས་ཀྱིས་ཆོ་ག་བྱ་
[99a.3]བའམ། ཆོས་བདག་མེད་པ་ལ་ལྷག་པར་མོས་པ་དང་རང་གི་སྡོམ་པ་བསྲུང་བ་རྣམས་ཀྱིས་ནང་གི་བདག་ཉིད་ཅན་གྱིས་ཁྲུས་རྒྱུན་མི་འཆད་པ་ཉིད་དུ་བྱའོ། །དེ་ལ་རྣམ་པར་རྟོག་པ་ལ་སྤྱོད་པ་དེའི་ཆུའི་ཁྲུས་ཀྱི་ཆོ་ག་ནི་འདི་ཡིན་ཏེ། རེ་ཞིག་ཐོག་མར་ཡི་གེ་ཧཱུཾ་ལས་རྡོ་རྗེ་མེ་ལྟར་འབར་བར་བདག་ཉིད་
[99a.4]བསྐྱེད་ལ། ཨོཾ་དྷུ་པི་དྷུ་པི་ཀ་ཡ་ཧཱུ་བི་པྲ་ཛཱ་ལི་ནི་སྭཱ་ཧཱ། ཞེས་བརྗོད་ལ། ཁྲོ་བོ་ཏི་རཱིནྟི་རིའི་ཕྱག་རྒྱ་བཅིངས་ཏེ། བདག་ཉིད་མེ་ལྟར་འབར་བ་མ་རུངས་པའི་རྡོ་རྗེ་འབར་བ་བཟོད་པར་དཀའ་བར་བྱས་ཏེ། རྡོ་རྗེ་བསྡམས་པ་ནང་བཅིངས་ནས། །སོར་མོ་ནང་དུ་འབར་བྱས་ལ། །མཐེ་བོ་རྡོ་རྗེ་བསྒྲེང་
[99a.5]བ་ནི། །ཁྲོ་བོ་ཏི་རཱིནྟི་རིར་བཤད། །རྡོ་རྗེ་ཉི་མའི་རྡོ་རྗེ་འབར་བའི་དམ་ཚིག་གི་ཕྱག་རྒྱའོ། །དེའི་རྗེས་ལ་བདག་ཉིད་ཨོཾ་ཧཱུཾ་ཞེས་བདག་ཉིད་གོ་ཆའི་ཕྱག་རྒྱས་གོ་ཆ་བཅིང་བར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེ་ཁུ་ཚུར་གཉིས་སུ་བྱས་པས་སྙིང་གར་མདུད་པ་བཅིང་བའི་ཚུལ་དུ་བྱ་བ་དང་། དེ་
[99a.6]བཞིན་དུ་མགྲིན་པ་དང་། ལྟག་པ་དང་། ཡང་སྙིང་ག་དང་། ནུ་མའི་བར་དང་། ཡང་སྙིང་ག་དང་། དེ་ནས་མགྲིན་པ་དང་། རྒྱབ་དང་། དེ་ནས་དབང་བསྐུར་བའི་གནས་སུ་མདུད་པའི་ཚུལ་གྱིས་དར་དཔྱངས་བཅིང་བའི་ཚུལ་དུ་བྱས་ཏེ། སྒེག་པ་དང་བཅས་པས་ལག་པ་གཡས་པ་དང་། གཡོན་པ་
[99a.7]མཐའ་མ་ནས་བཀྲོལ་ཏེ། དར་དཔྱངས་འཕྱང་བའི་ཚུལ་དུ་བྱེད་ཅིང་མཐར་མཉམ་པའི་ཐལ་མོ་དང་བཛྲ་ཏུ་ཥྱ་ཧོ་ཞེས་བྱ་བས་མཉེས་པར་བྱའོ། །དེ་ནས་ཨོཾ་བྷུར་ཛཱ་ལ་ཧཱུཾ་སྭཱ་ཧཱ། ཞེས་བྱ་བས་ས་བླངས་ནས་ཆ་གསུམ་དུ་བྱས་ཏེ། རིག་པ་འདི་ཉིད་མངོན་པར་བཟླས་ལ་ཁྲུས་བྱེད་པའི་ས་ཕྱོགས་སུ་
[99b]
[99b.1]གཞག་པར་བྱའོ། །རྡོ་རྗེ་གནོད་སྦྱིན་གྱི་ཕྱག་རྒྱ་བཅིངས་ལ། ཡི་གེ་ཧཱུཾ་གིས་ཆུ་དང་ཆུའི་གནས་ཐམས་ཅད་ཀྱི་བགེགས་ཐམས་ཅད་བཟའ་བར་བྱའོ། །ཡང་རྡོ་རྗེ་གནོད་སྦྱིན་གྱི་ཕྱག་རྒྱ་བཅིངས་ལ། འཕགས་པ་བདུད་རྩི་ཐབ་སྦྱོར་གྱི་ཆུ་དང་ཆུའི་བགེགས་ཐམས་ཅད་བཟའ་བར་བྱའོ། །ཡི་གེ་ཨ་
[99b.2]ལས་རྡོ་རྗེ་ཐལ་མོའི་མཐེ་བོ་གཉིས་བརྐྱང་ལ། མཛུབ་མོ་གཉིས་མཆེ་བའི་ཚུལ་དུ་བྱ་བ་ནི། རྡོ་རྗེ་གནོད་སྦྱིན་གྱི་ཕྱག་རྒྱའོ། །དེ་ནས་ཨོཾ་བྷུར་ཛཱ་ལ་ཧཱུཾ་སྭཱ་ཧཱ། ཞེས་བརྗོད་ཅིང་། ཆུ་སྙིམ་པ་གསུམ་བླངས་ལ་སྟེང་བཅིང་བའི་ཕྱིར་བསང་གཏོར་བྱ་བ་དང་། རིག་པ་འདི་ཉིད་ཟློས་ཤིང་སྔར་བཤད་པའི་ས་ཆ་
[99b.3]གསུམ་ལས་གཅིག་བླངས་ལ། རྐེད་པའི་ཕྱོགས་བཀྲུ་བ་དང་ལག་པ་བཀྲུས་ལ་ཉེ་རེག་བྱའོ། །དེ་ནས་ཡི་གེ་ཧཱུཾ་བརྗོད་ཅིང་ཆ་གཉིས་པ་བླངས་ལ་ལུས་ལ་ཁྲུས་བྱའོ། །ཆ་གསུམ་པ་དང་བཅས་པ་དང་ཡན་ལག་ཐམས་ཅད་ཁྲུས་བྱས་ལ། ཨོཾ་བྷུར་ཛཱ་ལ་ཧཱུཾ་སྭཱ་ཧཱ། ཞེས་བརྗོད་ཅིང་ཉེ་རེག་བྱས་ནས་
[99b.4]རང་གི་མགོ་ལ་རང་གི་དམ་ཚིག་གི་ཕྱག་རྒྱ་དང་དེའི་སྔགས་ཀྱིས་ཆུ་བླུགས་པར་བྱའོ། །དེ་ཉིད་ཀྱིས་བདས་རང་བྱིན་གྱིས་བརླབས་ཏེ། ལངས་ལ་ཨོཾ་ཤི་ཁ་རེ་རུ་ཊ་ཕཊ། ཅེས་བཟླས་པའི་ཆུས་གོས་ལ་སོགས་པ་བསངས་ཏེ། བཛྲ་སཏྭ་ཞེས་བརྗོད་ཅིང་ཇི་ལྟ་བ་བཞིན་དུ་བགོས་ལ། ཡིད་ཀྱིས་
[99b.5]ཆུའི་གནས་ཀྱི་བསྲུང་བ་བཀྲོལ་ལ། རང་གི་ལྷའི་ང་རྒྱལ་གྱིས་དེའི་སྔགས་བརྗོད་ཅིང་ལྷའི་ཁང་པ་དང་ཉེ་བར་རྐང་པ་བཀྲུས་ཏེ། རིག་པ་འདི་ཉིད་ཀྱིས་ཉེ་རེག་བྱ་བ་དང་། གཡོན་པའི་ཁྲོ་བོའི་ཁུ་ཚུར་དང་ཧཱུཾ་ཕཊ་ཅེས་བྱ་བས་ལྷའི་ཁང་པའི་བགེགས་བསྐྲད་པ་དང་། གཡས་པའི་ཁྲོ་བོའི་ཁུ་ཚུར་གྱིས་
[99b.6]ལྷའི་ཁང་པ་བསྲུང་བ་བྱས་ཏེ་འཇུག་པར་བྱའོ། །ཡང་རྡོ་རྗེ་རྩེ་མོ་བཟླས་པའི་དྲིའི་ཆུ་དང་ནོར་བུའི་གནོད་སྦྱིན་བཟླས་པས་སྟན་དང་ལྷའི་ཁང་པ་བསངས་ཏེ། ས་མ་ཡ་སྟྲཾ། ཞེས་བརྗོད་ལ་འདུག་པར་བྱའོ། །དེ་ནས་ཡི་གེ་ཧྲཱིཿལས་ལྐོག་མའི་ཕྱོགས་པདྨ་འདབ་མ་བརྒྱད་པ། ལྕེའི་པདྨའི་འདབ་མར་ཧཱུཾ་ལས་
[99b.7]རྡོ་རྗེ་རྩེ་ལྔ་པ་དཀར་པོ་བསྐྱེད་ལ། བཛྲ་ཛི་ཧྭ་ཞེས་བྱ་བ་འདིས་བྱིན་གྱིས་བརླབ་པར་བྱའོ། །ལག་པ་གཉིས་སུ་ཡང་ཨ་ལས་ཟླ་བའི་དཀྱིལ་འཁོར་རེ་རེ་བསམས་ལ་དེ་ཉིད་ཀྱི་སྟེང་དུ་ཏྲ་གཉིས་ལས་རྡོ་རྗེ་རིན་པོ་ཆེ་གཉིས་བསམ་ཞིང་སོར་མོའི་རྩེ་མོ་རྣམས་རྡོ་རྗེ་ནོར་བུ་མྱུ་གུ་ལྟ་བུས་བགེགས་
[100a]
[100a.1]གཞོམ་པ་ལ་སོགས་པ་བྱའོ། །དེ་ལ་ཡི་གེ་ཧཱུཾ་ལས་རྡོ་རྗེ་མེ་ལྟར་འབར་བར་བདག་ཉིད་བསམས་ཏེ། ཨོཾ་གྷི་བཛྲ་ས་མ་ཡ་ཧཱུཾ་བཾ་ཞེས་ཟློས་ཤིང་ཁྲོ་བོ་ཏི་རཱིནྟི་རི་བཅིང་བར་བྱའོ། །རྡོ་རྗེ་བསྡམས་པ་ནང་བཅིངས་ལ། །ཡིད་ཀྱིས་ཁྲོས་ནས་དགབ་བྱ་བ། །རྡོ་རྗེ་མཐེ་བོང་དམ་པོ་
[100a.2]སྟེ། །ཁྲོ་བོ་ཏི་རཱནྟི་རིར་བཤད། །ཡི་གེ་ཧཱུཾ་གིས་ཏི་རཱནྟི་རི་བཅིངས་ཏེ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཨ་བྷི་ཥིཉྩ་མཱཾ་ཞེས་བརྗོད་ཅིང་རྡོ་རྗེ་བསྡམས་པ་ནང་དུ་བཅིངས་པའི་མཐེ་བོང་གཉིས་གཞིབས་ཏེ། རྡོ་རྗེ་ཁུ་ཚུར་གྱི་སྟེང་དུ་འཇོག་པ་ནི་རྡོ་རྗེ་ཏི་རིནྟི་རི་སྟེ། འདིས་སྤྱི་བོ་ནས་བརྩམས་ནས། ཕྱོགས་
[100a.3]བཞིར་རྡོ་རྗེ་ཕྲེང་བ་བཅིང་བའི་ཚུལ་གྱིས་བསྐོར་ཏེ། དཕྲལ་བའི་ཕྱོགས་སུ་གཞག་པར་བྱའོ། །སྔ་མ་བཞིན་དུ་གོ་ཆ་བཅིངས་ཏེ། མཐར་མཉམ་པའི་ཐལ་མོས་མཉེས་པར་བྱས་ནས། ཡང་ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཞེས་བརྗོད་ཅིང་། རྡོ་རྗེ་སྐྱིལ་ཀྲུང་ཕྱེད་དུ་འདུག་ལ་གཡོན་པའི་ཁུ་ཚུར་སྙིང་
[100a.4]གར་བཞག་ནས། གཡས་པའི་རྡོ་རྗེ་ཁུ་ཚུར་གསོར་བས་བགེགས་ཐམས་ཅད་ལ་བསྣུན་པར་བྱའོ། །དེ་ནས་ཧཱུཾ་བཛྲ་ཨ་ན་ལ། ཧ་ན་ད་ཧ་པ་ཙ་མ་ཐ་བྷ་ཉྫ་ར་ཎ་ཧཱུཾ་ཕཊ། ཅེས་བྱ་བས་སྔར་བཤད་པའི་རྡོ་རྗེ་མེའི་དམ་ཚིག་གི་ཕྱག་རྒྱ་བཅིངས་ཏེ། བགེགས་ཐམས་ཅད་བསྐྲད་པ་དང་། བཅིང་བ་དང་། བསྲེག་པ་
[100a.5]དང་། འཚོད་པ་དང་གསོད་པ་ལ་སོགས་པ་བྱའོ། །ཡང་རྡོ་རྗེ་བསྡམས་པ་བཅིངས་ལ་མཐེ་བོ་གཉིས་བརྐྱང་སྟེ་སྙོམས་ཏེ་བཞག་ལ། བཛྲ་ཏྲི་བནྡྷ་སརྦྦ་བིགྷྣཱན་ཞེས་བརྗོད་ཅིང་བགེགས་ཐམས་ཅད་བཅིང་བར་བྱའོ། །རྡོ་རྗེ་བསྡམས་པ་བརྐྱང་བ་ས་ལ་བཞག་ལ། ཨོཾ་བཛྲ་དྲྀ་ཌྷོ་མེ་བྷ་བ་རཀྵ་སརྦྦཾ་
[100a.6]སྭཱ་ཧཱ། ཞེས་བྱ་བ་དང་མགོ་བཅིང་བར་བྱའོ། །རྡོ་རྗེ་འཇིགས་བྱེད་སྤྱན་གྱི་ཕྱག་རྒྱ་དང་། ཨོཾ་ཧུ་ལུ་ཧུ་ལུ་ཧཱུཾ་ཕཊ། ཅེས་བྱ་བས་སྟེང་བཅིང་བར་བྱའོ། །རྡོ་རྗེ་ཁུ་ཚུར་གཉིས་བཅིངས་ལ་མགལ་མེའི་འཁོར་ལོ་བཞིན་དུ་བསྐོར་ཏེ། མགོ་བོའི་སྟེང་དུ་མཛུབ་མོ་ལྕགས་ཀྱུའི་ཚུལ་དུ་གཞག་པ་ནི་རྡོ་རྗེ་
[100a.7]འཇིགས་བྱེད་སྤྱན་གྱི་ཕྱག་རྒྱའོ། །སྔར་བཤད་པའི་རྡོ་རྗེ་གནོད་སྦྱིན་གྱི་ཕྱག་རྒྱ་དང་། བཛྲ་ཡཀྵ་ཧཱུཾ་ཞེས་བྱ་བ་དང་བཅས་པས་རྡོ་རྗེ་འཇིགས་བྱེད་སྤྱན་གྱིས་བཅིང་བའི་འོག་ཏུ་ཡང་ནམ་མཁའ་བཅིང་བར་བྱའོ། །རྡོ་རྗེ་གཙུག་ཏོར་གྱི་ཕྱག་རྒྱ་དང་བཅས་པས་ཤར་ཕྱོགས་བཅིང་བར་བྱ་སྟེ། ཨོཾ་དྲུཾ་
[100b]
[100b.1]བནྡྷ་ཧཾ་ཞེས་བྱ་བའམ། དྲུཾ་ཞེས་བྱ་བ་ཡོངས་སུ་བཟླའོ། །རྡོ་རྗེ་ཁུ་ཚུར་གཉིས་ཀྱིས་མཐེའུ་ཆུང་གཉིས་ལུ་གུ་རྒྱུད་དུ་སྦྲེལ་ལ་མཛུབ་མོ་གཉིས་ཀྱི་རྩེ་མོ་སྦྱར་ཏེ་བཟློག་ནས་སྤྱི་གཙུག་ཏུ་གཞག་པ་འདི་ནི་རྡོ་རྗེ་གཙུག་ཏོར་གྱི་ཕྱག་རྒྱའོ། །ཡང་རྡོ་རྗེ་ཞགས་པ་དེ་ཉིད་བཅིང་བར་བྱས་ཏེ། ཨོཾ་བཛྲ་པཱ་ཤ་ཧྲི།
[100b.2]རྡོ་རྗེ་ཁུ་ཚུར་གཉིས་ཀྱིས་མཁྲིག་མ་མདུད་པ་བྱས་པ་འདི་ནི་ཞགས་པའི་ཕྱག་རྒྱའོ། །རྡོ་རྗེ་བ་དན་གྱིས་ནུབ་ཕྱོགས་བཅིང་བར་བྱ་སྟེ། ཨོཾ་བཛྲ་པ་ཏཾ་ཀེ་པ་ཏཾ་གི་ནི་ར་ཊ། རྡོ་རྗེ་བསྡམས་པ་ལས་མཐེ་བོ་གཉིས་སེམས་དཔའི་སྐྱིལ་ཀྲུང་དུ་བྱས་ལ་མཛུབ་མོ་གཉིས་མཉམ་པར་གཞིབས་ཏེ་ཕྱེ་ལ་མཐེའུ་ཆུང་
[100b.3]གཉིས་བརྐྱང་ནས་བ་དན་ལྟར་བྱ་བ་ནི་རྡོ་རྗེ་བ་དན་གྱི་ཕྱག་རྒྱའོ། །བྱང་ཕྱོགས་སུ་རྡོ་རྗེ་ནག་མོས་བཅིང་བར་བྱ་སྟེ། ཧྲི་བཛྲ་ཀ་ལི་རུ་ཊ་མ་ཊ། སྔར་བཤད་པའི་རྡོ་རྗེ་གནོད་སྦྱིན་གྱི་ཕྱག་རྒྱ་སྙིང་གར་བསྟན་པར་བྱས་པ་ནི་རྡོ་རྗེ་ནག་མོའི་ཕྱག་རྒྱའོ། །རྡོ་རྗེ་རྩེ་མོས་ལྟོ་བཅིང་བར་བྱ་སྟེ། སྔར་བཤད་པ་ཉིད་ཀྱི་
[100b.4]སྔགས་དང་། རྡོ་རྗེ་ཁུ་ཚུར་གཉིས་རི་བོ་འདེགས་པའི་ཚུལ་དུ་བྱ་བ་ནི་རྡོ་རྗེ་རྩེ་མོའི་ཕྱག་རྒྱའོ། །རྡོ་རྗེ་ལས་ཀྱི་དཀྱིལ་འཁོར་བཅིང་བར་བྱས་ལ་ར་བར་བརྩིག་པར་བྱའོ། །ཧཱུཾ་བཛྲ་ཀརྨྨ་ཡང་རྡོ་རྗེ་ཧཱུཾ་མཛད་ཀྱི་ནང་དུ་ར་བ་བྱས་ཏེ། ཧཱུཾ་ཞེས་བརྗོད་ཅིང་། རྡོ་རྗེ་ཁུ་ཚུར་གཉིས་བཅིངས་ལ། །ལག་ངར་
[100b.5]རྡོ་རྗེ་བྱས་ནས་སུ། །མཐེའུ་ཆུང་ལྕགས་ཀྱུར་བཅིང་བར་བྱ། །མཛུབ་མོ་གཉིས་ཀྱིས་བསྡིགས་པ་ནི། །འཇིག་རྟེན་གསུམ་རྒྱལ་ཞེས་བྱའོ། །ཞེས་བྱ་བ་ནི་རྡོ་རྗེ་ཧཱུཾ་མཛད་ཀྱི་ཕྱག་རྒྱའོ། །དེ་ཉིད་ལས་གུང་མོ་གཉིས་བརྐྱང་བ་ནི་རྡོ་རྗེ་ལས་ཀྱི་ཕྱག་རྒྱའོ། །རྡོ་རྗེ་བསྡམས་པ་དང་། བཛྲ་བནྡྷ་
[100b.6]བཾ་ཞེས་བྱ་བ་ནི་རྡོ་རྗེ་བླ་རེ་བྱའོ། །དེ་ནས་ནོར་བུའི་གནོད་སྦྱིན་ཡོངས་སུ་བཟླས་པའི་དྲིའི་ཆུའི་སྣོད་ལྷའི་ཁང་པའི་སྒོར་གཞག་པ་ལ་བསང་གཏོར་བྱས་ལ། ནོར་བུའི་གནོད་སྦྱིན་བཟླས་པའི་དྲིའི་ཆུ་ཉིད་ཀྱིས་མཆོད་པའི་ཡན་ལག་ཐམས་ཅད་བསང་བ་དང་། སྔར་བཤད་པའི་རྡོ་རྗེ་མའི་ཕྱག་རྒྱ་
[100b.7]དང་བཅས་པའི་སྔགས་ཀྱིས་ལན་གསུམ་མངོན་པར་བཟླས་ལ། མེ་ཏོག་གི་ཕྱག་རྒྱ་དང་བཛྲ་པུཥྤེ་ཧཱུཾ་ཞེས་ལན་གསུམ་མངོན་པར་བཟླ་བར་བྱ་བ་དང་། ཨོཾ་བཛྲ་གནྡྷེ་ཞེས་དྲིའི་ཕྱག་རྒྱས་དྲིའོ། །ཨོཾ་བཛྲ་དྷཱུ་པེ་ཧཱུཾ་ཞེས་བྱ་བ་དང་། ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ། ཨཱདྱ་ནུཏྤནྣ་ཏྭཱ་ཏ་ཅེས་བྱ་བ་དང་།
[101a]
[101a.1]ལྷ་བཤོས་ལ་ཡོངས་སུ་བཟླའོ། །དེའི་ཕྱག་རྒྱ་ནི་འདི་ཡིན་ཏེ། རྡོ་རྗེ་བསྡམས་པ་ལས་རལ་གྲི་འདྲེན་པའི་ཚུལ་དུ་བྱེད་པའོ། །ཨོཾ་བཛྲ་ཨཱ་ལོ་ཀེ་ཞེས་བྱ་བ་དང་། མར་མེའི་ཕྱག་རྒྱས་མར་མེ་ལའོ། །ཨོཾ་སརྦྦ་ཨརྠ་སི་དྡྷི་པྲ་ཏ་ཧཱུཾ། དྲི་ཆེན་སེར་པོའི་ཆུ་ལ་མེ་ཏོག་སེར་པོ་དང་།
[101a.2]ཞོ་དང་ཏིལ་ནག་པོ་དང་། ཀུ་ཤ་དང་འབྲས་བུ་ལ་སོགས་པ་དུང་ཆོས་ལ་སོགས་པའི་སྣོད་དུ་བཅུག་ལ། རྡོ་རྗེ་ཐལ་མོ་ཁ་ཕྱེ་བའི་མཚན་ཉིད་ཅན་དེའི་ཕྱག་རྒྱ་ལན་གསུམ་བཟླས་ལ་གཞག་པར་བྱའོ། །དེ་ནས་ནོར་བུའི་རྒྱུའི་ལས་ཀྱི་ཕྱག་རྒྱས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་སྤྲུལ་
[101a.3]ལ། ཡོད་ཅིང་འབྱོར་ན་མཆོད་པ་རྣམ་པ་ལྔས་ཡང་དག་པར་མཆོད་ལ། ཕྱག་བྱ་བ་སྔོན་དུ་འགྲོ་བ་དང་། སྡོམ་པ་གཟུང་བ་བྱས་ནས་མཉམ་པའི་ཐལ་མོ་དང་། ཡང་རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིངས་ལ། དེ་ནས་རྡོ་རྗེ་བསྡམས་པ་སྙིང་གར་དྲལ་བར་བྱའོ། །དེ་ནས་རྡོ་རྗེ་འབེབས་པའི་
[101a.4]དམ་ཚིག་གི་ཕྱག་རྒྱ་བཅིངས་ལ། བཛྲ་ཨཱ་བེེ་ཤ་ཞེས་བརྗོད་ཅིང་། ཨ་ཞེས་བྱ་བས་བདག་ཉིད་ལ་དབབ་པར་བྱའོ། །ཏིཥྛ་བཛྲ་དྲྀ་ཌྷོ་མེ་ཞེས་བྱ་བ་ལ་སོགས་པ་དབབ་པ་ཉེ་བར་བསྡུ་བར་བྱས་ལ། བཛྲ་མུཥྚི་ཞེས་བརྗོད་ཅིང་། རྡོ་རྗེ་དབྱིངས་ལས་བཤད་པའི་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་
[101a.5]བཅིངས་ཏེ། ཨོཾ་བཛྲ་སནྡྷི་བཾ་ཞེས་ལན་གསུམ་བརྗོད་པར་བྱའོ། །སྡིག་པ་དྲལ་བའི་ཕྱག་རྒྱས་སྡིག་པ་དྲལ་ཏེ། དེ་ནས་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་བཅིངས་ལ། ཨོཾ་བུདྡྷ་རཏྣ་ཧཱུཾ་ཞེས་ལན་གསུམ་བརྗོད་ཅིང་། བཛྲ་མུཿཞེས་བྱ་བས་རང་གི་སྙིང་གའི་ཟླ་བ་ལ་བཅུག་པས་བཅོམ་
[101a.6]ལྡན་འདས་རྣམ་པར་སྣང་མཛད་དེར་ཞུ་བར་བསམ་པར་བྱའོ། །དེ་ལྟར་ནོར་བུ་འབེབས་པའི་བར་གྱི་དམ་ཚིག་གི་ཕྱག་རྒྱ་བཅིངས་ལ། ཨོཾ་མ་ཎི་རཏྣ་ཨཱ་བེ་ཤ་ཨ། ཞེས་ལན་གསུམ་ཟློས་ཤིང་། ཨོཾ་བཛྲ་མུཿཞེས་ཡོངས་སུ་བཟླས་པས་རང་གི་
[101a.7]སྙིང་གའི་ཟླ་བ་དེར་ཕྱག་རྒྱས་བཅུག་པས། བཅོམ་ལྡན་འདས་རིན་ཆེན་འབེབས་པ་རང་གི་སྙིང་གར་ཞུ་བར་བསམ་པར་བྱའོ། །དེ་ལྟར་ལྷ་ཐམས་ཅད་ཀྱི་རང་བཞིན་གྱིས་བྱང་ཆུབ་སེམས་ཀྱི་ཟླ་བའི་དཀྱིལ་འཁོར་བསྐྱེད་ནས། སྐྱིལ་མོ་ཀྲུང་བཅས་ལ་ཏིང་ངེ་འཛིན་མཆོག་གི་ཕྱག་རྒྱ་བཅིངས་ཏེ། རང་གི་སྙིང་གའི་ཟླ་བ་ལ་རྡོ་རྗེ་རིན་པོ་ཆེ་བསམ་པར་བྱའོ། །རྡོ་རྗེ་རིན་པོ་ཆེའི་དབུས་སུ། །
[101b]
[101b.1]ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་ཞེས་བྱ་བ་ཡིད་ཀྱིས་བྲིས་ལ། འདི་ཉིད་ཡིད་ཀྱིས་བརྗོད་དེ། ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་སྙིང་པོ་དེ་ཉིད་དང་། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿཞེས་བྱ་བ་དབྱངས་ཡིག་བཅུ་དྲུག་དང་བཅས་པས་རང་གི་
[101b.2]སེམས་ཟླ་བའི་དཀྱིལ་འཁོར་གྱི་རྣམ་པར་བསམ་པར་བྱའོ། །དབྱངས་ཡིག་བཅུ་དྲུག་པོ་འདི་ཉིད་ནི་ནོར་བུའི་མཚན་མ་ལ་སོགས་པ་ནས། ནོར་བུའི་ཁུ་ཚུར་གྱི་མཐར་ཐུག་པ་ཡིན་པར་འདིར་ཤེས་པར་བྱའོ། །དེ་ནས་དེའི་སྟེང་དུ་སྙིང་པོ་དེ་ཉིད་དང་། ཡི་གེ་ཀ་ལ་སོགས་པ་དང་བཅས་པ་ལ་ཟླ་བའི་དཀྱིལ་འཁོར་
[101b.3]གཉིས་པར་བསམ་མོ། །ཟླ་བའི་དཀྱིལ་འཁོར་གཉིས་པ་དེ་ཉིད་དང་། ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་ཞེས་བྱ་བའི་སྙིང་པོ་དང་བཅས་པས་རྡོ་རྗེ་རྩེ་ལྔ་པར་བསམ་མོ། །རྡོ་རྗེ་དེ་ཉིད་རྡོ་རྗེ་རིན་པོ་ཆེར་བྱས་ལ་དེའི་དབུས་སུ། ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་ཞེས་ཡིད་ཀྱིས་བྲིས་ལ། བཛྲ་རཏྣ་ཧཾ་ཞེས་བྱ་བས་རྡོ་རྗེ་རིན་པོ་ཆེའི་
[101b.4]ང་རྒྱལ་བསྒོམ་པར་བྱའོ། །དེ་ལྟར་བསམས་ལ་རྡོ་རྗེ་རིན་ཆེན་གྱི་བདག་ཉིད་གང་ཡིན་པ་བཅོམ་ལྡན་འདས་ནམ་མཁའི་སྙིང་པོ་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་དང་། མཆོད་པ་དང་། དམ་ཚིག་གི་དངོས་གྲུབ་ཀྱི་ཚུལ་གྱིས་འབྲས་བུ་བསྒྲུབ་པ་ཡིན་ནོ་ཞེས་ངེས་པ་བསྐྱེད་ལ་སེམས་
[101b.5]བསྐྱེད་པའི་སྦྱོར་བས། རྡོ་རྗེ་རིན་ཆེན་དེ་རྡོ་རྗེ་སེམས་དཔར་བདག་ཉིད་བསྒོམས་ལ། བཛྲ་སཏྭ་ཧཾ་ཞེས་ཟློས་ཤིང་སྙོམས་པ་དང་བཅས་པས་རྡོ་རྗེ་གསོར་ཞིང་། འདི་སྐད་བརྗོད་པར་བྱའོ། །ཨོཾ་བཛྲ་སཏྭ་ཧཾ་རྡོ་རྗེ་སེམས་དཔའ་དེ་ཉིད། ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་ཞེས་བཟླས་པས་ནམ་མཁའི་སྙིང་པོའི་
[101b.6]བདག་ཉིད་དུ་བསམས་ལ་མ་ཧཱ་ས་མ་ཡ་སཏྭ་ཧཾ་ཞེས་བརྗོད་པར་བྱའོ། །དེ་ནས་དོན་ཐམས་ཅད་གྲུབ་པའི་དམ་ཚིག་གི་ཕྱག་རྒྱ་བཅིངས་ལ་ས་མ་ཡ་ཧཾ་ཞེས་བརྗོད་པར་བྱའོ། །དོན་ཐམས་ཅད་གྲུབ་པའི་དམ་ཚིག་གི་ཕྱག་རྒྱ་དེ་ཉིད་ཀྱིས་སྙིང་ག་དང་། དཔྲལ་བ་དང་། ལྐོག་མ་དང་སྤྱི་བོར་བྱིན་གྱིས་བརླབ་
[101b.7]པར་བྱའོ། །ས་མ་ཡ་སཏྭ་ཨ་དྷི་ཏིཥྛ་སྭ་མཾ། དེ་ནས་རིན་པོ་ཆེས་མཚན་པའི་དྲིལ་བུ་ལག་པ་གཡོན་པའི་རིན་པོ་ཆེ་ཁུ་ཚུར་གྱིས་བླངས་ལ་ལག་པ་གཡས་པའི་རྡོ་རྗེ་ནོར་བུ་དང་། བཅོམ་ལྡན་འདས་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་ནམ་མཁའ་དང་མཉམ་པའི་
[102a]
[102a.1]སྦྱོར་བས་སྙིང་གར་ཞུགས་ལ་ནོར་བུ་རྒྱུའི་ལས་ཀྱི་ཕྱག་རྒྱས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་སྤྲུལ་པར་བྱའོ། །རྡོ་རྗེ་ནོར་བུ་ཆེན་པོའི་དམ་ཚིག་གི་ཕྱག་རྒྱས་མེ་ཏོག་གི་ཕྲེང་བ་བླངས་ཏེ། བདག་ཉིད་དེར་ཇི་ལྟ་བ་བཞིན་དུ་ཞུགས་ལ་མེ་ཏོག་དོར་བའི་སྔགས་ཀྱིས་རང་
[102a.2]གི་སྤྱི་བོར་མེ་ཏོག་དོར་བར་བྱའོ། །དེ་ནས་ཕྲེང་བའི་དབང་བསྐུར་བའི་སྔགས་ཀྱིས་ཕྲེང་བ་དེ་སྤྱི་བོར་བཅིང་བར་བྱའོ། །དངོས་གྲུབ་ཀྱི་རིན་པོ་ཆེ་བརྟུལ་ཞུགས་ཀྱི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། དེ་ནས་དཀྱིལ་འཁོར་དེ་ནམ་མཁའི་དང་མཚུངས་པར་བསམ་མོ། །ཡང་བཅོམ་
[102a.3]ལྡན་འདས་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིངས་ལ། རང་གི་ལུས་ལ་ལྷ་ཐམས་ཅད་ཀྱི་གནས་སུ་ས་མ་ཡ་ཨ་ཞེས་བརྗོད་པས་ཟླ་བའི་དཀྱིལ་འཁོར་བསྐྱེད་པར་བྱའོ། །གཞིའི་ལུས་ཀྱི་རང་གི་གནས་སུ་གནས་ཏེ། གཞིའི་ལུས་ལ་ཕྱི་རོལ་གྱི་མདུན་དུ་ཡང་ས་མ་ཡ་ཨ་ཞེས་བྱ་བས་ཟླ་བའི་
[102a.4]དཀྱིལ་འཁོར་སྤྲུལ་པ་དེའི་སྟེང་དུ་ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་ཨ་ཞེས་རྡོ་རྗེ་རིན་པོ་ཆེ་ཕབ་ལ། དེའི་དབུས་སུ་ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་ཞེས་བྱ་བ་ཡིད་ཀྱིས་བྲིས་ལ། བཛྲ་རཏྣ་ཧཾ་ཞེས་བྱ་བས་རྡོ་རྗེ་རིན་པོ་ཆེའི་ང་རྒྱལ་བསྒོམ་པར་བྱའོ། །རྡོ་རྗེ་རིན་པོ་ཆེ་དེ་ཉིད་བཛྲ་གརྦྷ་ཧཾ་ཞེས་བྱ་བས་རྡོ་རྗེ་སྙིང་པོར་
[102a.5]བདག་ཉིད་བསྒོམ་པར་བྱའོ། །དེ་ལ་དེ་ཉིད་དུ་རིན་པོ་ཆེ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། འབེབས་པའི་ལས་ཀྱི་ཕྱག་རྒྱ་རྣམས་ཀྱིས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། ཨོཾ་སརྦྦ་ཨརྠ་སིདྡྷི་པྲ་ཏ་དྲྀ་ཥྱ་ཧཱུཾ། བཅོམ་ལྡན་འདས་རང་གི་དམ་
[102a.6]ཚིག་གི་ཕྱག་རྒྱས་བཅོམ་ལྡན་འདས་དེ་བལྟས་ལ། ཛཿཧཱུཾ་བཾ་ཧོཿས་གཞུག་པ་དང་། རང་གི་ལུས་ལས་ལུས་ཀྱི་གནས་སུ་གནས་པ་དེ་ཉིད་ལ་བཅུག་ལ་ས་མ་ཡ་སྟྭཾ་ཞེས་བརྗོད་པས་འོད་ཀྱི་དཀྱིལ་འཁོར་ཕབ་སྟེ། ས་མ་ཡ་སྟྭཾ་ཨ་ཧཾ། ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་ཞེས་ཟློས་ཤིང་། བཅོམ་
[102a.7]ལྡན་འདས་ལ་ཞུགས་ལ་བདག་ཉིད་དང་ལྷན་ཅིག་ཐ་མི་དད་པར་བསྒོམ་པར་བྱའོ། །དེ་བཞིན་དུ་རིན་ཆེན་འབེབས་པའི་ཕྱག་རྒྱ་བཅིངས་ཏེ། རང་གི་ལུས་ཀྱི་གནས་སུ་ཡིད་ཀྱིས་འདུག་སྟེ། རང་གི་ལུས་ལས་ཕྱི་རོལ་གྱི་མདུན་དུ་ས་མ་ཡ་ཨ་ཞེས་བྱ་བའི་དཀྱིལ་འཁོར་སྤྲུལ་ལ།
[102b]
[102b.1]དེའི་སྟེང་དུ། ཨོཾ་མ་ཎི་རཏྣ་ཨཱ་བེ་ཤ་ཨཿ་ཞེས་བྱ་བས་རིན་པོ་ཆེའི་དྲིལ་བུ་བསྐྱེད་དེ། དེའི་དབུས་སུ་ཨོཾ་མ་ཎི་རཏྣ་ཨཱ་བེ་ཤ་ཞེས་ཡིད་ཀྱིས་བྲིས་ལ་བཛྲ་མ་ཎི་རཏྣ་གྷ་ཎྜེ་ཨ་ཧཾ་ཞེས་བྱ་བས་རྡོ་རྗེ་ནོར་བུ་རིན་པོ་ཆེའི་དྲིལ་བུའི་ང་རྒྱལ་བསྐྱེད་པར་བྱའོ། །ཨོཾ་མ་ཎི་རཏྣ་ཨཱ་བེ་ཤ་ཨཿཞེས་ཟློས་ཤིང་མ་ཎི་རཏྣ་ཨཱ་བེ་
[102b.2]ཤ་ཧཱུཾ་ཞེས་བྱ་བས་དེ་རིན་ཆེན་འབེེབས་པར་བསྒོམ་པར་བྱའོ། །དེ་ལ་དེ་ཉིད་དུ་ནོར་བུ་རིན་པོ་ཆེ་འབེབས་པ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ལ་རང་གི་དམ་ཚིག་གི་ཕྱག་རྒྱ་དང་། ཨོཾ་མ་ཎི་རཏྣ་ཨཱ་བེ་ཤ་ཨ་དྲྀ་ཤྱ་ཞེས་བྱ་བས་བལྟས་ལ། དམ་ཚིག་གི་ཕྱག་རྒྱས་དེ་ཉིད་དུ་ཛཿཧཱུཾ་བཾ་ཧོཿས་
[102b.3]རང་གི་ལུས་ལ་གཞུག་པར་བྱའོ། །ཞུགས་པ་དང་ས་མ་ཡ་སྟྭཾ་ཞེས་བརྗོད་པས། འོད་ཀྱི་དཀྱིལ་འཁོར་ལ་ས་མ་ཡ་སྟྭཾ་ཨ་ཧཾ་ཨོཾ་མ་ཎི་རཏྣ་ཨཱ་བེ་ཤ་ཨཿཞེས་ལན་གསུམ་བརྗོད་པས། བཅོམ་ལྡན་འདས་ནོར་བུ་རིན་པོ་ཆེ་འབེབས་པ་དང་བདག་ཉིད་ལྷན་ཅིག་ཐ་མི་དད་པར་བསམ་པར་བྱའོ། །དེ་ནས་གཞིའི་
[102b.4]ལུས་དང་། དོན་ཐམས་ཅད་གྲུབ་པ་ལ་སོགས་པ་ནས། ནོར་བུ་རིན་ཆེན་འབེེབས་པ་ལ་སོགས་པའི་མཐར་ཐུག་པའི་སྐུ་ལ་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པ་རྣམས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་
[102b.5]མཉམ་པའི་དེ་བཞིན་གཤེགས་པ་ཐམས་ཅད་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་བཅུག་ལ། ཛཿཧཱུཾ་བཾ་ཧོཿཞེས་ཡིད་ཀྱིས་བརྗོད་ཅིང་། དེ་ནས་རྡོ་རྗེ་དབྱིངས་ལས་སྔར་བཤད་པའི་ཚུལ་གྱིས་རང་རང་གི་དམ་ཚིག་གི་ཕྱག་རྒྱས་དེ་སྒྲུབ་པོ། །དེ་ནས་རྣམ་པར་སྣང་མཛད་རིན་ཆེན་འབེབས་པའི་བར་གྱི་
[102b.6]ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱས་དེ་བཞིན་གཤེགས་པ་ཐམས་ཅད་བྱིན་གྱིས་བརླབས་ཏེ། རྡོ་རྗེ་ནོར་བུ་རིན་པོ་ཆེ་བཅིངས་ནས། དོན་ཐམས་ཅད་གྲུབ་པ་ལ་སོགས་པ་རིན་པོ་ཆེའི་རིགས་ཀྱི་ལྷ་ཐམས་ཅད་ཀྱི་སྙིང་གར་བྱིན་
[102b.7]གྱིས་བརླབ་པར་བྱའོ། །ཡང་རྡོ་རྗེ་རིན་པོ་ཆེ་མྱུ་གུ་མ་བཅིངས་ཏེ། ཐམས་ཅད་ཀྱི་དཔྲལ་བའི་ཕྱོགས་སུ་བྱིན་གྱིས་བརླབ་པར་བྱའོ། །རིན་པོ་ཆེ་པདྨ་ལས་ལྐོག་མའི་ཕྱོགས་དང་། རྡོ་རྗེ་རིན་ཆེན་ཆར་འབེེབས་མས་སྤྱི་བོར་བྱིན་གྱིས་བརླབ་པར་བྱའོ། །དེ་ནས་རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་གྱི་
[103a]
[103a.1]ཕྱག་རྒྱས་དེ་བཞིན་གཤེགས་པ་ཐམས་ཅད་ལ་དབང་བསྐུར་བ་དང་། རིན་པོ་ཆེའི་རིགས་ཐམས་ཅད་ལ་རྡོ་རྗེ་རིན་པོ་ཆེའི་མྱུ་གུས་དབང་བསྐུར་བར་བྱའོ། །དེ་ནས་སྔ་མ་བཞིན་དུ་གོ་ཆ་བགོ་བ་དང་ཕྲེང་བ་བཅིང་བ་བྱས་ནས་མཐར་མཉམ་པའི་ཐལ་མོས་མཉེས་པར་བྱའོ། །དེ་ནས་
[103a.2]རྡོ་རྗེ་རིན་ཆེན་གྱི་ཕྱག་རྒྱའི་རྡོ་རྗེ་དང་ནོར་བུའི་དྲིལ་བུའི་ཕྱག་རྒྱས་བདག་པོའི་དབང་བསྐུར་ལ་མིང་གི་དབང་བསྐུར་བ་དང་། དངོས་གྲུབ་ཀྱི་རྡོ་རྗེ་རིན་པོ་ཆེའི་བརྟུལ་ཞུགས་ཀྱང་བླང་བར་བྱའོ། །རིན་པོ་ཆེའི་སྒེག་མོ་ལ་སོགས་པ་མཆོད་པ་བརྒྱད་ཀྱིས་ཡང་དག་པར་མཆོད་ལ། རིན་པོ་ཆེའི་ལས་ཀྱི་དཀྱིལ་འཁོར་
[103a.3]ལས་གསུངས་པའི་མཆོད་པ་བཅུ་དྲུག་གི་ཕྱག་རྒྱས་བདག་ཉིད་ཡང་དག་པར་མཆོད་པར་བྱའོ། །དེ་ཉིད་ཀྱིས་ནི་རིན་ཆེན་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླས། །དེ་ནས་རང་གི་སྙིང་པོ་ལེན་གསུམ་བཟླས་ལ། ཨོཾ་
[103a.4]བཛྲ་ཨཱཏྨ་ཀོ྅ཧཾ་ཞེས་བརྗོད་ཅིང་། ལྷ་ཐམས་ཅད་ཀྱི་སྐུ་དང་། གསུང་དང་ཐུགས་བདག་ཡིན་ནོ་ཞེས་བསྒོམ་པར་བྱའོ། །དེ་ནས་ཨོཾ་སྭ་བྷཱ་བ་ཤུདྡྷོ྅ཧཾ་ཞེས་ཟློས་ཤིང་གཟུགས་བརྙན་དང་མཚུངས་པའི་ཆོས་བདག་མེད་པའི་རང་བཞིན་དུ་བསམ་མོ། །ཨོཾ་སརྦྦ་ས་མོ྅ཧཾ་ཞེས་བརྗོད་ཅིང་། ཆོས་བདག་མེད་པའི་
[103a.5]མཉམ་པ་ཉིད་ཀྱིས་ལྷ་ཐམས་ཅད་བདག་ཉིད་དང་ལྷན་ཅིག་ཐ་མི་དད་པར་ངེས་པར་བྱས་ནས། འཕགས་པ་ནམ་མཁའི་སྙིང་པོའི་སྐུ་དང་། གསུང་དང་ཐུགས་རྡོ་རྗེ་བསྒོམ་པར་བྱའོ། །གཞུང་འདི་ཙམ་གྱིས་རྣལ་འབྱོར་ཆེན་པོ་རྫོགས་པ་ཡིན་ནོ། །ད་ནི་གནས་ཀྱི་ངེས་པ་བཤད་པར་བྱ་སྟེ། དེ་ལ་སྔགས་པའི་
[103a.6]རང་གི་སྙིང་ག་ན་གནས་པའི་ཟླ་བའི་དཀྱིལ་འཁོར་ལ། རིགས་ཀྱི་བདག་པོ་བཅོམ་ལྡན་འདས་ནམ་མཁའི་སྙིང་པོ་དང་། དེའི་མདུན་དུ་ནོར་བུའི་མཚན་མ་དང་། གཡས་ཕྱོགས་སུ་རིན་ཆེན་རྒྱལ་པོ་དང་། གཡོན་ཕྱོགས་སུ་རིན་ཆེན་ཆགས་པ་དང་། རྒྱབ་ཏུ་རིན་ཆེན་ལེགས་པའོ། །ཡང་རྣལ་
[103a.7]འབྱོར་པའི་དཔྲལ་བའི་ཕྱོགས་སུ་རིན་ཆེན་ལྟ་བ་དང་། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའི་ཕྲེང་བ་དང་། མགོ་བོའི་རྒྱབ་ཏུ་རིན་ཆེན་ཉི་མ་དང་། ཕྲག་པ་གཉིས་སུ་རིན་ཆེན་དཔལ། སོའི་ཕྲེང་བ་གཉིས་ལ་རིན་ཆེན་བཞད་པའོ། །ལྐོག་མའི་ཕྱོགས་སུ་རིན་ཆེན་པདྨ་འཛིན་དང་།
[103b]
[103b.1]གཏོང་བ་ཏིང་ངེ་འཛིན་གྱི་ཡེ་ཤེས་ཀྱི་སྙིང་པོའོ། །ནུ་མ་གཉིས་ཀྱི་བར་དུ་རིན་ཆེན་རྣོན་པོ། ལྟེ་བར་རིན་ཆེན་རྒྱུ། ལྕེ་ལ་རིན་ཆེན་གསུང་བའོ། །སྤྱི་བོར་རིན་ཆེན་ཆར་འབེེབས་དང་། རིན་ཆེན་མཆོད་པ། ནམ་ཚོང་གཉིས་སུ་རིན་ཆེན་གོ་ཆ། ཁར་ནོར་བུའི་གནོད་སྦྱིན། དཀུར་ནོར་བུའི་ཁུ་ཚུར་རོ། །ནོར་བུའི་
[103b.2]མཚན་མའི་གཡོན་ཕྱོགས་སུ་ནོར་བུ་སྒེག་མོ། དེ་བཞིན་གཤེགས་པ་ཐམས་ཅད་དབང་བསྐུར་བའི་རིན་པོ་ཆེ་ཕྲེང་བའི་གཡོན་དུ་རིན་ཆེན་ཕྲེང་བ་མ། གཏོང་བ་ཏིང་ངེ་འཛིན་གྱི་ཡེ་ཤེས་ཀྱི་སྙིང་པོ། གཡོན་དུ་རིན་ཆེན་གླུ་མ། ནོར་བུ་མཆོད་པའི་གཡོན་དུ་རིན་ཆེན་གར་མའོ། །ཡང་རྣལ་འབྱོར་
[103b.3]པའི་གསང་བའི་གནས་སུ་རིན་ཆེན་བདུག་པ་མ། མགོ་བོར་རིན་ཆེན་མེ་ཏོག་མ། མིག་གཉིས་ལ་རིན་ཆེན་མར་མེ་མ། ནུ་མ་དང་བྲང་དང་སྙིང་གར་རིན་ཆེན་བྱུག་པ་མ། བརླག་གཡས་པ་ལ་རིན་ཆེན་ལྕགས་ཀྱུ། བརླ་གཡོན་པ་ལ་རིན་ཆེན་ཞགས་པ། བྱིན་པ་གཡས་པ་ལ་རིན་ཆེན་ལྕགས་སྒྲོག།
[103b.4]བྱིན་པ་གཡོན་པ་ལ་རིན་ཆེན་འབེབས་པ་རྣམས་ཡང་དག་པར་བཞུགས་པའོ། །དེ་བཞིན་གཤེགས་པ་རྣམས་ནི་ཡན་ལག་ཐམས་ཅད་ལ་ཆུ་དང་འོ་མ་འདྲེས་པ་བཞིན་དུ་བཞུགས་སོ། །ཉིན་རེ་བཞིན་དུ་རྣལ་འབྱོར་ཆེན་པོ་བྱས་ལ་བསྒྲུབ་པར་བྱའོ། །དེ་ལྟར་རྣལ་འབྱོར་ཆེན་པོ་བྱས་ནས་ཐུན་བཞིའི་
[103b.5]སྤྱོར་བས་ཐམས་ཅད་ཀྱི་སྔགས་འབུམ་བཟླས་ལ་བསྒྲུབ་པར་བྱ་བའམ། ཡང་ན་རང་གི་སྙིང་གར་འཆད་པར་འགྱུར་བའི་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་ཚུལ་གྱིས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་བསྒོམས་ཏེ། ཟླ་བ་གཅིག་གམ། ཟླ་བ་དྲུག་གམ། ལོ་
[103b.6]གཅིག་གི་བར་དུ་ཇི་སྲིད་དཀྱིལ་འཁོར་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱ་བའམ། ཡང་ན་ཇི་སྐད་བཤད་པའི་རྣལ་འབྱོར་ཆེན་པོ་བསྒྲུབས་ནས། འཕགས་པ་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིངས་ལ། ནམ་མཁའི་ཕྱོགས་སུ་གནས་ཏེ། མིག་ནི་གཡོན་དང་
[103b.7]གཡས་པ་ཉིད་དག་ལ། །ཨ་མེད་ཊ་དང་མ་ལས་ཉི་ཟླ་དགོད། །ཧཱུཾ་ལས་མིག་འབྲས་བསྐལ་པའི་མེ་ལྟ་བུ། །ཚུལ་དུ་གནས་པ་རྡོ་རྗེའི་ལྟ་བ་བྱ། །རླུང་གི་དཀྱིལ་འཁོར་ལ་ཡི་གེ་ཧཱུཾ་ལས་འབར་བའི་རྡོ་རྗེ། རྡོ་རྗེའི་ལྟེ་བ་ལ་ཡི་གེའི་ས་བོན་དང་བཅས་པའི་འོད་ཟེར་འབར་བ་འཁྲུག་པར་བསམ་པར་
[104a]
[104a.1]བྱའོ། །འོད་ཟེར་འབར་བ་དེས་སངས་རྒྱས་ཀྱི་ཞིང་འདི་ཐམས་ཅད་ཐལ་བར་བྱས་ལ། དེ་ནས་ནམ་མཁའི་ཕྱོགས་སུ་སྟོང་གསུམ་པའི་སངས་རྒྱས་ཀྱི་ཞིང་གི་ཚད་དང་མཉམ་པའི་ཟླ་བའི་མདོག་ཅན་གྱི་ཡི་གེ་ཁཾ་བྷུརྣམ་པར་སྣང་མཛད་ཀྱི་རང་བཞིན་འོ་མ་ཅན་གྱི་ཆུ་དང་མཚུངས་པའི་བདུད་རྩིའི་
[104a.2]ཆར་གྱི་རྒྱུན་གྱིས་བསྲེགས་པའི་སངས་རྒྱས་ཀྱི་ཞིང་རྣམས་བཀྲུས་ནས་ཚངས་པའི་འཇིག་རྟེན་གྱི་བར་དུ་དབའ་རླབས་འཁྲུག་པའི་ཕྲེང་བ་ཅན་གྱི་རྒྱ་མཚོ་ཆེན་པོའི་དབུས་སུ་ཡི་གེ་རཾ་བསྐལ་པའི་མེ་དང་མཚུངས་པར་བསམ་པར་བྱའོ། །ཡི་གེ་རཾ་དེས་ཆུ་བསྐོལ་བས་རིན་པོ་ཆེ་ཆེན་པོའི་པདྨའི་རྒྱལ་པོ་དཔག་ཚད་
[104a.3]བྱེ་བ་དུ་མའི་ཚད་དང་མཉམ་པའི་གཟུགས་ཡོངས་སུ་གྱུར་པ་དེ་རིན་པོ་ཆེ་པདྨ་མཐའ་ཡས་པས་ཡོངས་སུ་བསྐོར་བའི་པདྨ་དེའི་རྩ་བའི་ཡི་གེ་པྲ་གསེར་གྱི་མདོག་ཅན་ལས་གསེར་གྱི་རུས་སྦལ་ཚད་གཞལ་དུ་མེད་པ་པདྨའི་གཞིར་གྱུར་པའོ། །ཡང་པདྨའི་ལྟེ་བར་ཡི་གེ་པྲ་གསེར་གྱི་མདོག་ཅན་དང་། ཡི་གེ་ཁཾ་
[104a.4]རྣམ་པར་སྣང་མཛད་ཀྱི་རང་བཞིན་ནམ་མཁའི་ཕྱོགས་ནས་འོངས་ནས་གནས་པར་བསམ་པར་བྱའོ། །དེ་ནས་པདྨ་དང་ཡི་གེ་པྲ་དང་ཡི་གེ་ཁཾ་གཅིག་ཏུ་གྱུར་པ་ལས་ཧཱུཾ་སུཾ་ཧཱུཾ་ཞེས་བརྗོད་པས་རིའི་རྒྱལ་པོ་རི་རབ་ཆེན་པོ་ཟུར་བཞི་པ་རིན་པོ་ཆེ་སྣ་བཞིའི་རང་བཞིན་ཅན། རིན་པོ་ཆེ་སྣ་ཚོགས་ཀྱིས་བརྒྱན་
[104a.5]པར་བསམ་པར་བྱའོ། །དེ་ནས་རྡོ་རྗེ་བསྡམས་པ་ས་ལ་རེག་པར་བྱས་ཏེ། སྔ་མ་བཞིན་དུ་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །དེ་ནས་རིན་ཆེན་རྒྱུའི་ལས་ཀྱི་ཕྱག་རྒྱ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་སྤྲུལ་ལ། རྣམ་པར་སྣང་མཛད་ཀྱི་གནས་སུ་ཨ་སཾ་ཨི་ཞེས་བྱ་བས་སེང་
[104a.6]གེ་དང་པདྨའི་གདན་ལ། ཧཱུཾ་གྒ་ཧཱུཾ་ཞེས་བྱ་བས་མི་བསྐྱོད་པའི་གནས་སུ་གླང་པོ་ཆེའི་གདན་དང་། ཏྲ་པཾ་ཏྲ་ཞེས་བྱ་བས་རིན་ཆེན་འབྱུང་ལྡན་གྱི་གནས་སུ་རྟའི་གདན་དང་། ཧྲི་མཾ་ཧྲི་ཞེས་བྱ་བ་ལས་འོད་དཔག་ཏུ་མེད་པའི་གནས་སུ་རྨ་བྱའི་གདན་དང་། ཨཾ་གྒ་ཨ་ཞེས་བྱ་བས་དོན་ཡོད་གྲུབ་པའི་གནས་སུ་
[104a.7]ནམ་མཁའ་ལྡིང་གི་གདན་ཏེ། དེ་རྣམས་ལ་ཨ་ལས་ཟླ་བའི་དཀྱིལ་འཁོར་བསམ་པར་བྱའོ། །དེ་ནས་དབུས་སུ་འདུག་ལ། རྡོ་རྗེ་དབྱིངས་ཀྱི་དུམ་བུ་ལས་བཤད་པའི་ཆོ་གས་མངོན་པར་བྱང་ཆུབ་པ་རྣམ་པ་ལྔའི་རིམ་གྱིས་མངོན་པར་སངས་རྒྱས་ནས་རི་རབ་ཀྱི་སྟེང་དུ་བབས་ཏེ། དེ་བཞིན་གཤེགས་
[104b]
[104b.1]པ་ཐམས་ཅད་ཀྱི་གདན་ལ་དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་བསྐོར་ཏེ་གནས་སོ། །རྡོ་རྗེ་སེམས་དཔའ་དང་། རྡོ་རྗེ་རིན་ཆེན་གཉིས་དང་། རྡོ་རྗེ་ཆོས་དང་། རྡོ་རྗེ་ལས་གཉིས་ཇི་ལྟ་བ་བཞིན་དུ་བསྐྱེད་ནས། དེ་བཞིན་གཤེགས་པ་ཐམས་ཅད་འདུལ་བའི་དབུས་ན་བཞུགས་སོ་
[104b.2]ཞེས་བྱ་བ་ལ་སོགས་པ་ནི་དང་པོར་སྦྱོར་བ་ཞེས་བྱ་བའི་ཏིང་ངེ་འཛིན་དང་པོ་གསུངས་པ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་འདུས་ནས་རིན་པོ་ཆེའི་རིགས་ཀྱི་དོན་ཐམས་ཅད་གྲུབ་པའི་དཀྱིལ་འཁོར་བསྐྱེད་པའི་ཕྱིར་བདག་ཉིད་ལ་གསོལ་བ་བཏབ་པར་བསམ་པར་བྱའོ། །དེ་ནས་དོན་
[104b.3]ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་ཏེ། གསོལ་བ་བཏབ་པའི་ཚིག་གསན་ནས། ཨོཾ་བཛྲ་རཏྣ་ཧཱུཾ་ཞེས་བརྗོད་ཅིང་། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་སྤྲུལ་པའི་ཕྱིར། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་ལ་དབང་བསྐུར་བ་སྦྱིན་
[104b.4]པར་བྱའོ། །དེ་ནས་རྣམ་པར་སྣང་མཛད་དང་། རྡོ་རྗེ་སེམས་དཔའ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་པའི་ཕྱག་རྒྱ་ཆེན་པོ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་ཨཱ་ཤ་པ་རི་པཱུ་ར་ན་མ་ཧཱ་རཏྣ་ཧཱུཾ། ཨོཾ་བཛྲ་དྷཱ་ཏུ་ཏྲཱཾ། ཨོཾ་མ་ཎི་ཧཱུཾ། ཨོཾ་པདྨ་ཧྲཱིཿ། ཨོཾ་བི་ཤྭ་རཏྣ་ཧཱུཾ། ཞེས་བྱ་བའི་རིག་པ་དམ་པ་ལྔ་
[104b.5]པོ་དེ་རྣམས་ཀྱིས་འཕགས་པ་ནམ་མཁའི་སྙིང་པོས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་བསྐྱེད་པའི་རྒྱུར་གྱུར་པ་འདི་བྱིན་གྱིས་བརླབ་པ་ཡིན་ནོ། །དེ་ནས་འཕགས་པ་ནམ་མཁའི་སྙིང་པོ་དང་བདག་ཉིད་ཐ་མི་དད་པར་འཕགས་པ་ནམ་མཁའི་སྙིང་པོའི་རང་བཞིན་དུ་ངེས་པར་བྱས་ནས། རང་གི་སྙིང་
[104b.6]གའི་ཟླ་བ་ལ་གནས་པའི་རྡོ་རྗེ་ནོར་བུ་རིན་པོ་ཆེ་ལས་དོན་ཐམས་ཅད་གྲུབ་པའི་དཀྱིལ་འཁོར་གྱི་ལྷའི་གཟུགས་ཡིད་ཀྱིས་ཕྱུང་ལ་འཇིག་རྟེན་གྱི་ཁམས་རབ་འབྱམ་སྤྲིན་རྒྱ་མཚོ་ཐམས་ཅད་དུ་རིན་པོ་ཆེའི་རིགས་དང་ལྡན་པའི་སེམས་ཅན་གྱི་ཁམས་ཐམས་ཅད་རིན་པོ་ཆེའི་རིགས་ཀྱི་རང་བཞིན་དུ་བསྐྱེད་ནས།
[104b.7]སླར་ལོག་སྟེ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཚུལ་གྱིས་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་མོ་ཀྲུང་གིས་བཞུགས་ཏེ། ལྷ་ཐམས་ཅད་ཀྱི་གཟུགས་ཀྱིས་ཆེད་དུ་བརྗོད་པ་འདི་བརྗོད་དོ། །ཨེ་མའོ་སངས་རྒྱས་ཐམས་ཅད་ཀྱིས། །རིན་ཆེན་ཐམས་ཅད་བསྡུས་པ་ནི། །རྡོ་རྗེ་རིན་ཆེན་
[105a]
[105a.1]རིགས་ཉིད་དུ། །འགྲོ་བའི་དོན་དུ་འདི་གྱུར་ཏོ། །ཨོཾ་བུདྡྷ་རཏྣ་ཧཱུཾ་ཞེས་བྱ་བ་ནས། ཨོཾ་མ་ཎི་རཏྣ་ཨཱ་བེེ་ཤ་ཨཿ། ཞེས་བྱ་བའི་བར་དུ་རྣམ་པར་སྣང་མཛད་ལ་སོགས་པ་ནས་རིན་ཆེན་འབེེབས་པའི་མཐར་ཐུག་པ་རྣམས་ཀྱིས་རང་གི་སྙིང་པོ་འདི་བརྗོད་ཅིང་། དེ་དག་རང་གི་གནས་སུ་
[105a.2]གཞུག་པར་བསྒོམ་པར་བྱའོ་ཞེས་བྱ་བའི་གཞུང་འདི་ཙམ་གྱིས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་ཡིན་ནོ། །དེ་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་བསྡུ་བ་བྱས་ཏེ། དེ་བཞིན་དུ་
[105a.3]རང་ལ་དབང་བསྐུར་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་པ་འདི་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་བཤད་པ་ཡིན་ནོ། །དེ་ལྟར་ཏིང་ངེ་འཛིན་རྣམ་པ་གསུམ་བསྒོམས་ནས་ཡང་དོན་ཐམས་ཅད་གྲུབ་པའི་རྣལ་འབྱོར་
[105a.4]པས། དོན་ཐམས་ཅད་གྲུབ་པའི་གནས་སུ་འདུག་སྟེ་བསྡུ་བ་བྱའོ། །དེ་ནས་དོན་ཀུན་སྒྲུབ་བྱེད་པའི། །ཕྱག་རྒྱ་ཆེན་པོ་ལྷུར་བཅིངས་ནས། །མིང་བརྒྱ་རྩ་བརྒྱད་དམ་པ་འདིས། །ལན་ཅིག་བར་དུ་བརྗོད་པར་བྱ། །དེ་ནས་སྒོ་རྣམས་ཐམས་ཅད་དུ། །ལྕགས་ཀྱུ་ལ་སོགས་ལས་བགྱིས་ནས། །ལས་
[105a.5]ཆེན་མཆོག་གི་ཕྱག་རྒྱ་ཡིས། །དམ་ཚིག་མཆོག་ནི་གཞུག་པར་བྱ། །དམ་ཚིག་མཆོག་གི་ཕྱག་རྒྱ་དང་། །སངས་རྒྱས་རིན་ཆེན་ལ་སོགས་པས། །དེ་ལྟར་སེམས་དཔའ་ཆེན་པོ་བསྒྲུབ། །ཛཿཧཱུཾ་བཾ་ཧོཿཞེས་རབ་བརྗོད། །འདི་སྐད་སྟོན་པ་ཡིན་ཏེ། །སྔ་མ་བཞིན་དུ་དཀྱིལ་འཁོར་གྱི་ལྷ་ཐམས་ཅད་
[105a.6]དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་ཞེས་བྱ་བས། དཀྱིལ་འཁོར་གྱི་ལྷ་ཐམས་ཅད་ལ་མཆོད་ཡོན་ཕུལ་ལ། ཨོཾ་པྲ་བ་ར་སཏྐཱ་ར་པྲ་ཏཱིཙྪ་སྭཱ་ཧཱ། ཞེས་བྱ་བས་སྔ་མ་བཞིན་དུ་ཞབས་བསིལ་དབུལ་བར་བྱའོ། །དེ་ནས་རྣམ་པར་སྣང་མཛད་ཀྱི་
[105a.7]དམ་ཚིག་གི་ཕྱག་རྒྱ་བཅིངས་ལ། ཨོཾ་བུདྡྷ་རཏྣ་ཧཱུཾ་དྲྀ་ཤྱ་ཛཿཧཱུཾ་བཾ་ཧོཿ། ས་མ་ཡ་སྟྭཾ། ཨ་ཧཾ། ཨོཾ་བུདྡྷ་རཏྣ་ཞེས་ལན་གསུམ་བརྗོད་པར་བྱའོ། །དེ་བཞིན་དུ་རིན་ཆེན་འབེབས་པའི་དམ་ཚིག་གི་ཕྱག་རྒྱ་བཅིངས་ལ། ཨོཾ་མ་ཎི་རཏྣ་ཨཱ་བེ་ཤ་ཨ་དྲྀ་ཤྱ་ཛཿཧཱུཾ་བཾ་ཧོཿ། ས་མ་ཡ་སྟྭཾ། ཨ་ཧཾ། ཨོཾ་མ་ཎི་རཏྣ་
[105b]
[105b.1]ཨཱ་བེ་ཤ་ཨ་ཞེས་བྱ་བའི་བར་དུ་ལན་གསུམ་བརྗོད་པས་ཐམས་ཅད་འགྲུབ་པར་འགྱུར་རོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་ཐམས་ཅད་རྒྱས་བཏབ་ལ་དབང་བསྐུར་བའི་ཕྱག་རྒྱ་གཉིས་ཀྱིས་ཇི་ལྟ་བ་བཞིན་དུ་དབང་བསྐུར་ཏེ། ཡང་མཆོད་ཡོན་དབུལ་བ་སྔོན་དུ་འགྲོ་བས་མཆོད་པ་རྣམ་
[105b.2]པ་ལྔ་ལ་སོགས་པའི་མཆོད་པའི་ཆོ་ག་ཐམས་ཅད་རྗེས་སུ་སྤྱད་ལ་ཕྱག་བྱས་ཏེ། བཅོམ་ལྡན་འདས་རྡོ་རྗེ་སྙིང་པོའི་ཕྱག་རྒྱ་ཆེན་པོ་བཅིངས་ལ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་ཤུདྡྷོ྅ཧཾ། ཨོཾ་སརྦྦ་ས་མོ྅ཧཾ། ཞེས་ཟློས་ཤིང་དོན་རྣམ་པ་གསུམ་བསྒོམས་ལ། དོན་ཐམས་ཅད་གྲུབ་པའི་དཀྱིལ་འཁོར་
[105b.3]ཆེན་པོའི་རང་བཞིན་བདག་ཉིད་ཡིན་ནོ་ཞེས་ང་རྒྱལ་བསྐྱེད་པར་བྱའོ། །ཨོཾ་སརྦྦ་ཨ་རྦ་སི་དྡྷི་པྲ་ཏ་ཧཱུཾ་ཞེས་བརྗོད་ཅིང་། དཀྱིལ་འཁོར་གྱི་ལྷ་ཐམས་ཅད་ཀྱི་རང་བཞིན་ནི་བདག་ཉིད་ཡིན་ནོ་ཞེས་བསྒོམ་པར་བྱའོ། །ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་དཀྱིལ་འཁོར་གྱི་ལྷའི་གཟུགས་སུ་བདག་ཉིད་མངོན་
[105b.4]སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་ཉིན་རེ་ཞིང་ཐུན་བཞིའི་སྦྱོར་བས་བསྒོམ་པར་བྱའོ། །དེ་ནས་དཀྱིལ་འཁོར་གྱི་ས་སྦྱང་བ་དང་། ས་ཡོངས་སུ་གཟུང་བར་བྱའོ། །དེ་ནས་བདག་ཉིད་ཁྲུས་བྱ་ཞིང་། །ལུས་དྲིས་བྱུགས་ལ་ཇི་སྙེད་པའི་གོས་དང་རྒྱན་གདགས་ཤིང་གདོང་དྲི་ཞིམ་པར་བྱས་ལ།
[105b.5]དཀྱིལ་འཁོར་གྱི་སའི་དབུས་སུ་འདུག་སྟེ། རིན་པོ་ཆེའི་རྒྱུའི་ཕྱག་རྒྱས་རང་གི་དཀྱིལ་འཁོར་ཆེན་པོ་སྤྲུལ་ལ། མཆོད་པ་དང་། ཕྱག་བྱ་བ་ལ་སོགས་པ་སྔོན་དུ་འགྲོ་བའི་སྡོམ་པ་གཟུང་བ་བྱས་ལ་སྔ་མ་བཞིན་དུ་རྣལ་འབྱོར་ཆེན་པོ་ཡང་དག་པར་བསྒྲུབས་ཏེ། ཁང་བུ་བརྩེགས་པ་དང་གདན་རྣམས་སྤྲུལ་
[105b.6]ལ། དཀྱིལ་འཁོར་གྱི་སའི་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་སྟེ། བདག་ཉིད་སྤྲོ་བ་བསྐྱེད་པར་བྱའོ། །དེང་དུས་བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །ལྷ་དང་དམ་ཚིག་གིས་མཉམ་པས། །གྱུར་པར་བདག་ནི་ཐེ་ཚོམ་མེད། །བྱང་ཆུབ་སེམས་
[105b.7]དང་སེམས་གཅིག་ལས། །མི་ལྡོག་པར་ནི་བདག་གྱུར་ཏེ། །ནོར་བུ་ཆེན་པོའི་རིགས་སུ་ནི། །དེང་བདག་སྐྱེས་པར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གི་མཆོད་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པའི། །དེང་བདག་འདུས་པའི་མཆོག་ཡིན་ནོ། །དེ་ནས་ཡན་
[106a]
[106a.1]ལག་ཐམས་ཅད་ཀྱིས་ཕྱག་བྱས་ལ། སྤོས་སྣོད་ལག་ཏུ་ཐོགས་ཏེ། སངས་རྒྱས་ཐམས་ཅད་སྤྱན་དྲང་བར་བྱའོ། །མ་ལུས་ཕྱོགས་ན་བཞུགས་པ་ཡིས། །སངས་རྒྱས་ཐམས་ཅད་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །རྡོ་རྗེ་ཅན་གྱི་དཀྱིལ་འཁོར་བྲི། །དེང་
[106a.2]འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདི་ནི་རབ་ཏུ་སྩོལ། །ཞེས་བརྗོད་ལ། དང་པོའི་སྦྱོར་བ་དང་། དཀྱིལ་འཁོར་རྒྱལ་མཆོག་དང་། ལས་ཀྱི་རྒྱལ་པོ་མཆོག་བསྒོམ་པར་བྱའོ། །དེ་ནས་ཡང་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་ཏེ། དོན་ཐམས་ཅད་གྲུབ་པ་དེའི་གནས་
[106a.3]ན་འདུག་པ་དེའི་སྙིང་པོ་ཟློས་པ་ལ་བསྒྲུབ་པའི་གྲོགས་མཆོག་དེ་བཞིན་གཤེགས་པའི་ང་རྒྱལ་དང་ལྡན་པས་དཀྱིལ་འཁོར་བྲི་བའི་ཕྱིར་མཚན་བརྒྱ་རྩ་བརྒྱད་པས་གསོལ་བ་གདབ་པར་བྱའོ། །དེ་ནས་ལངས་ལ། ཨོཾ་སརྦྦ་ཏ་ཐཱ་ག་ཏ་པཱ་ད་བནྡ་ནཾ་ཀ་རོ་མི། ཞེས་བྱ་བས་དེ་བཞིན་གཤེགས་པ་ཐམས་ཅད་
[106a.4]ཀྱི་ཞབས་ལ་ཕྱག་བྱས་ལ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའི་ཁམས་ཡོངས་སུ་གང་བར་བསམས་ཏེ། བདག་ནི་རང་ཉིད་རྡོ་རྗེ་ཅན། །རྡོ་རྗེ་སྙིང་པོའང་བདག་རང་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཆེན་རྡོ་རྗེ་ཅན་བདག་ཡིན། །བདག་ནི་རྣལ་འབྱོར་དབང་ཕྱུག་རྒྱལ། །
[106a.5]རྡོ་རྗེ་རིན་ཆེན་བརྟན་བདག་ཡིན། །བདག་པོ་རིན་ཆེན་ཆེན་པོ་བདག །བྱིན་གྱིས་བརླབས་པ་མི་འདོར་རོ། །ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་ཞེས་བརྗོད་ཅིང་། རེ་བ་ཐམས་ཅད་གྲུབ་པའི་དངོས་གྲུབ་ཀྱི་ཕྱིར་ང་རྒྱལ་བརྟན་པར་བྱས་ཏེ། མ་དང་ཊ་ལས་མིག་གཉིས་སུ་ཉི་མ་དང་ཟླ་བ་དེ་བཞིན་དུ་བསྐྱེད་ལ། ཡི་གེ་
[106a.6]ཨཿ་ལས་རྐང་མཐིལ་དུ་སྣ་ཚོགས་རྡོ་རྗེ་བྱའོ། །དེ་ནས་དོན་ཐམས་ཅད་གྲུབ་པའི་དམ་ཚིག་གི་ཕྱག་རྒྱ་བཅིངས་ཏེ། ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ་བཛྲ་ཨུ་ཏིཥྛ། ཞེས་ཟློས་ཤིང་དཀྱིལ་འཁོར་ནམ་མཁའ་ལ་བཏེག་ལ་གཞག་པར་བྱའོ། །ཨོཾ་སརྦྦ་ཨརྠ་སིདྡྷི་པྲ་ཏ་ཧཱུཾ། ཞེས་བྱ་བས་བྱིན་གྱིས་བརླབ་
[106a.7]པ་བྱས་ཏེ། དེ་ཉིད་ཀྱི་ཕྱག་རྒྱས་བདག་ཉིད་ཀྱི་སྙིང་ག་དང་དཔྲལ་བ་དང་། ལྐོག་མ་དང་། སྤྱི་བོར་ལན་ཅིག་བྱིན་གྱིས་བརླབས་ལ། ཡང་བཅོམ་ལྡན་འདས་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་ཏེ། ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །རྡོ་རྗེ་སྙིང་པོ་ཞེས་
[106b]
[106b.1]བརྗོད་ཅིང་། །བསྒྱིངས་པའི་ཚུལ་གྱིས་ཡོངས་སུ་བསྐོར། །སྔར་བཤད་པའི་རྡོ་རྗེ་དྲ་བའི་མཐར་ཐུག་པའི་བསྲུང་བའི་ཆོ་གས་ཐམས་ཅད་རྗེས་སུ་སྤྱད་ལ། སྒོ་དབྱེ་བའི་ཕྱག་རྒྱས་སྒོ་ཕྱེ་ནས། གསང་བའི་གཟུགས་ཅན་གྱི་དཀྱིལ་འཁོར་དགུག་པར་བྱ་སྟེ། ཨོཾ་བཛྲ་མཎྜ་ལ་ཧཱུཾ་ཛཿཞེས་བྱ་བ་ཕྱག་རྒྱ་དང་ལྡན་པས་
[106b.2]གསང་བའི་དཀྱིལ་འཁོར་དགུག་པར་བྱའོ། །དེའི་ཕྱག་རྒྱ་ནི་འདི་ཡིན་ཏེ། རྡོ་རྗེ་ཁུ་ཚུར་གཉིས་ཀྱི་མཛུབ་མོ་དང་མཐེའུ་ཆུང་རྡོ་རྗེར་མདུད་ནས། དཀྱིལ་འཁོར་ཐམས་ཅད་འགུགས་པར་བྱེད་པ་ནི་རྡོ་རྗེ་འཁོར་ལོ་ཞེས་བྱའོ། །དེ་ནས་མ་ཧཱ་བཛྲ་ཙཀྲ་ཨ་དྷི་སིདྡྷི་ཏིཥྛཱ་ཧཱུཾ་ཞེས་བྱ་བའི་ཕྱག་རྒྱ་དང་ལྡན་པ་དེས་ཡང་
[106b.3]དཀྱིལ་འཁོར་བྱིན་གྱིས་བརླབ་པར་བྱ་སྟེ། རྡོ་རྗེ་དབྱིངས་ལས་བཤད་པའི་རྡོ་རྗེ་རྒྱུའི་ལས་ཀྱི་ཕྱག་རྒྱ་ཉིད་འདིའི་ཕྱག་རྒྱ་ཡིན་ནོ། །དེ་ནས་ལག་པ་གཡས་པའི་མཐེ་བོས་མཐེའུ་ཆུང་གི་རྩེ་མོ་མནན་ལ། སོར་མོ་ལྷག་མ་རྣམས་བརྐྱང་ལ། རྡོ་རྗེ་རྩེ་གསུམ་ལྟར་བྱས་ལ། གཡོན་པའི་ཁུ་ཚུར་གྱིས་རྡོ་རྗེ་རྩེ་ལྔ་
[106b.4]པ་བཟུང་སྟེ། དབང་ལྡན་གྱི་ཕྱོགས་ནས་བརྩམས་ནས། གྲྭ་བཞིར་གཡོན་པའི་ཁུ་ཚུར་གྱིས་བཟུང་བའི་རྡོ་རྗེ་དེས་མཐའ་ཡས་དང་། རྣམ་པར་རྒྱལ་བ་དང་། སྤྲིན་སྒྲ་དང་། གསུས་པོ་ཆེ་ཞེས་བྱ་བའི་ཕུར་བུ་བཞི་བསྐྱེད་ལ་ལག་པ་གཡས་པ་རྡོ་རྗེ་རྩེ་གསུམ་པར་བྱས་པ་དང་། ཨོཾ་གྷ་གྷ་གྷཱ་ཏ་ཡ་གྷཱ་ཏ་
[106b.5]ཡ། སརྦྦ་དུ་ཥྚཱ་ན་ཕཊ། ཀཱི་ལ་ཡ་ཀཱི་ལ་ཡ། སརྦྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ་བཛྲ་དྷཱ་རོ་ཨཱ་ཛྙཱ་པ་ཡ་ཏི་སྭཱ་ཧཱ། ཞེས་བྱ་བའི་སྙིང་པོ་འདིས་བརྡུང་བར་བྱའོ། །འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོ་ལས་བཤད་པའི་ཕུར་བུའི་སྔགས་སམ། ཡང་ན་འཇིག་རྟེན་ལས་འདས་
[106b.6]པའི་རྡོ་རྗེ་ལས་བཤད་པའི་ཕུར་བུའི་སྔགས་ཀྱིས་སེང་ལྡེང་གི་ཕུར་བུ་བཞི་ལ་མངོན་པར་བསྔགས་ཏེ། ཇི་ལྟར་བཤད་པའི་དཀྱིལ་འཁོར་གྱི་ཟུར་བཞིར་ཕུར་བུ་གདབ་པར་བྱའོ། །ཧཾ་ཀྲོ་དྷ་ཡ་ཊི་ཊ་ཊི་ཊ་ཊི་ཊ་མ་ཊ་ཕཊ། ཅེས་བྱ་བ་འཇིག་རྟེན་དང་འཇིག་རྟེན་ལས་འདས་པའི་རྡོ་རྗེ་ལས་བཤད་པའི་སྔགས་
[106b.7]ཡིན་ནོ། །དེ་ནས་ནོར་བུའི་གནོད་སྦྱིན་གྱིས་བགེགས་བསྐྲད་ལ་ར་བ་དང་དྲ་བ་བྱས་ཏེ། ནོར་བུ་ཁུ་ཚུར་གྱིས་སྒོ་བཅད་ལ། ནོར་བུའི་བསྲུང་བ་ཐམས་ཅད་ཡང་དག་པར་བསྲུངས་ཏེ། ནོར་བུའི་གནོད་སྦྱིན་ཡོངས་སུ་བཟླས་པས་གསང་བའི་བུམ་པ་དཀྱིལ་འཁོར་གྱི་སྒོར་གཞག་ལ་སྔ་མ་བཞིན་དུ་མཆོད་པ་
[107a]
[107a.1]རྣམས་མངོན་པར་བསྔགས་ཏེ། མཆོད་ཡོན་ལན་ཉི་ཤུ་རྩ་གཅིག་བཟླས་ནས་དཀྱིལ་འཁོར་གྱི་ལྷ་ཐམས་ཅད་ནོར་བུའི་གནོད་སྦྱིན་ཡོངས་སུ་བཟླས་པའི་དྲི་ཆུས་བྱུགས་ལ། དེ་ཡོངས་སུ་བཟླས་པའི་དྲི་ཉིད་ཀྱིས་ལྷ་ཐམས་ཅད་ཀྱི་གནས་སུ་དཀྱིལ་འཁོར་བྱ་བ་ཡིན་ནོ། །དེ་ནས་
[107a.2]ནམ་མཁའི་ཕྱོགས་ན་གནས་པའི་དཀྱིལ་འཁོར་ས་གཞི་ལ་ཡིད་ཀྱིས་ཕབ་ལ། རྣམ་པར་སྣང་མཛད་ལ་སོགས་པའི་སྔགས་དྲིའི་ཐིག་ལེ་ལ་ལན་བདུན་བཟླས་པར་བྱའོ། །རྣམ་པར་སྣང་མཛད་ལ་སོགས་པ་ནས་རིན་ཆེན་འབེེབས་པ་དང་བསྐལ་པ་བཟང་པོའི་མཐར་ཐུག་པ་རྣམས་ནམ་མཁའི་
[107a.3]ཕྱོགས་ནས་ཕབ་སྟེ། རང་རང་གི་སྔགས་ཀྱིས་གཞག་པར་བྱའོ། །རྣམ་པར་སྣང་མཛད་ལ་སོགས་པའི་སྔགས་ནི་བཤད་ཟིན་ཏོ། །ཨོཾ་སརྦྦ་སཾ་སྐཱ་ར་པ་རི་ཤུདྡྷེ་དྷརྨྨ་ཏེ་ག་ག་ན་ས་མུངྒ་ཏེ་སྭ་བྷཱ་བ་བི་ཤུདྡྷེ་མ་ཧཱ་ནཱ་ཡ་པ་རི་བཱ་རེ་སྭཱ་ཧཱ། ཞེས་བྱ་བ་བསྐལ་པ་བཟང་པོའི་སྔགས་ཡིན་ནོ། །དེ་ལྟར་
[107a.4]དཀྱིལ་འཁོར་གྱི་ལྷ་རྣམས་བཞག་ནས་ཆུ་ཅུང་ཟད་ཅིག་བླུགས་པའི་རྣམ་པར་རྒྱལ་བའི་བུམ་པ་ལ་རྡོ་རྗེ་མེ་དང་། ནོར་བུ་གནོད་སྦྱིན་དང་། དོན་ཐམས་ཅད་གྲུབ་པའི་སྔགས་རེ་རེ་ཞིང་ཡང་བརྒྱ་རྩ་བརྒྱད་བཟླས་ལ། སྔགས་མངོན་པར་བཟླས་པའི་མཆོད་ཡོན་གྱིས་སོ་སོར་མཆོད་ཡོན་
[107a.5]ཕུལ་ལ། ལྷ་དེ་རྣམས་ཀྱི་གཟུགས་དང་ལྡན་པའི་བུམ་པ་བསྒོམ་པར་བྱའོ། །མཆོད་པ་ཐམས་ཅད་ཕྱག་རྒྱ་དང་བཅས་པས་ཡང་དག་པར་མཆོད་ལ་རང་གི་དམ་ཚིག་གི་ཕྱག་རྒྱས་རྡོ་རྗེ་རིན་པོ་ཆེའི་མེ་ཏོག་ནི་ལྕུག་མ་ལ་རེ་རེ་ཞིང་ལན་བརྒྱ་རྩ་བརྒྱད་བཟླས་ལ་བདུག་པས་བདུག་པར་བྱའོ། །
[107a.6]ཉིན་ཞག་གཉིས་པ་ལ་ཐུན་གསུམ་དུ་སྔ་མ་བཞིན་དུ་མངོན་པར་བཟླས་ལ། དེ་ནས་ལྷག་པར་གནས་པར་བྱས་པའི་བུམ་པ་དེ་དོན་ཐམས་ཅད་གྲུབ་པའི་མདུན་དུ་གཞག་པར་བྱའོ། །ཇི་ལྟ་བ་བཞིན་དུ་ལྷག་པར་གནས་པའི་ཆོ་ག་ཐམས་ཅད་རྗེས་སུ་སྤྱད་ལ། ཉི་མ་ཤར་བའི་དུས་སུ་དེ་ནས་དཀྱིལ་
[107a.7]འཁོར་དེ་དོན་ཐམས་ཅད་གྲུབ་པའི་དམ་ཚིག་གི་ཕྱག་རྒྱ་དེ་ཉིད་ཀྱིས་ནམ་མཁའི་ཕྱོགས་སུ་བཞག་ལ་ཐིག་གདབ་པར་བྱའོ། །དེ་ལ་དང་པོར་རེ་ཞིག་སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོ་དྲི་ཞིམ་པོ་བསྒོས་པས་སྲད་བུ་སོ་སོར་ཁ་བསྒྱུར་ལ་གོ་རིམས་དེ་ཉིད་ཀྱིས་
[107b]
[107b.1]བཞག་ནས། ཧཱུཾ་ཏྲཱཾ་ཧཱིཿ་ཨཱཾ་ཨ་ཞེས་བྱ་བ་རང་གི་ས་བོན་ལས་མི་བསྐྱོད་པ་ལ་སོགས་པ་དེ་རྣམས་སྲད་བུ་རྣམས་ལ་བཀོད་དེ། དཱིཔྟ་དྲྀཥྚི་ཨཾ་ཀུ་ཤ་ཛཿཞེས་བྱ་བ་མིག་གཉིས་ལ་བཀོད་ལ། རབ་ཏུ་གཡོ་ཞིང་འབར་བའི་མིག །མིག་གི་རྫི་མ་འདྲེན་པ་ནི། །ཞེས་འབར་བའི་ལྟ་བས་མི་བསྐྱོད་
[107b.2]པ་ལ་སོགས་པ་སྤྲུལ་ཞིང་འདི་སྐད་ཅེས་བརྗོད་པར་བྱའོ། །བཅོམ་ལྡན་འདས་དཀྱིལ་འཁོར་ཆེན་པོ་ཐིག་གདབ་པའི་ཕྱིར། རྡོ་རྗེའི་ཐིག་བདག་ལ་སྩོལ་ཅིག་ཅེས་པའོ། །དེ་ནས་རང་གི་ས་བོན་ལས་བྱུང་བའི་འོད་ཟེར་གྱིས་མི་བསྐྱོད་པ་ལ་སོགས་པས་བཏང་བའི་སྲད་བུ་འབར་བའི་ལྕགས་ཀྱུས་བཀུག་
[107b.3]སྟེ། རང་གི་ལག་ན་གནས་པའི་སྲད་བུ་དེས་གང་བར་བྱས་ལ། ཨ་ནྱོ་ནྱ་ཨ་ནུ་ག་ཏཱ་སརྦྦ་དྷརྨྨཱཿཔར་སྤ་ར་ཨ་ནུ་པྲ་བིཥྚ་སརྦྦ་དྷརྨྨཱཿཨ་ཏྱནྟ་ཨ་ནུ་པྲ་བིཥྚ་སརྦྦ་དྷརྨྨཱཿ། ཨོཾ་སརྦྦ་ཨརྠ་སིདྡྷ་ཧཱུཾ་ཞེས་བརྗོད་ཅིང་བསྒྲིལ་བར་བྱའོ། །བསྒྲིལ་ནས་མིག་གཡས་དང་གཡོན་དུ་ཊ་དང་མ་ལས་ཉི་མ་དང་ཟླ་བ་བསྐྱེད་ལ།
[107b.4]བཛྲ་དྲྀཥྚི་མ་ཊ་ཞེས་བྱ་བས་བརྟན་པར་བྱས་ལ། དྲིས་བྱུགས་པའི་གསེར་ལ་སོགས་པའི་སྣོད་དུ་ཐིག་སྐུད་ལེགས་པར་བཞག་ལ། དྲི་དང་མེ་ཏོག་དང་བདུག་སྤོས་ཀྱིས་མཆོད་ལ། ཨོཾ་བཛྲ་ས་མ་ཡ་སཱུ་ཏྲཱཾ་མཱ་ཏི་ཀྲ་མ་ཧཱུཾ་ཞེས་བྱ་བའི་ཐིག་སྐུད་ཀྱི་སྔགས་འདི་དང་རྡོ་རྗེ་བསྡམས་པས་བཟུང་སྟེ་བརྒྱ་རྩ་བརྒྱད་
[107b.5]བཟླས་པར་བྱའོ། །དེ་ནས་བདག་པོ་ལྔ་དང་སེམས་དཔའ་བཅུ་དྲུག་བཟླས་པའི་དྲིས་ས་གཞི་བྱུགས་ལ། ཕྱི་རོལ་ཀུན་མེ་ཏོག་གིས་མཛེས་པར་བྱས་ལ་བར་སྣང་ལ་བཞུགས་པའི་རིགས་ཐམས་ཅད་ལ་མཆོད་ཡོན་ཕུལ་ཏེ། མེ་ཏོག་ལ་སོགས་པ་དང་སྒེག་མོ་ལ་སོགས་པས་ཡང་དག་པར་མཆོད་ལ།
[107b.6]ཕྱག་བྱས་ཏེ། མིག་གཡས་དང་གཡོན་དུ་ཛ་སེར་པོ་བཀོད་ལ། ཉི་མ་དང་ཟླ་བ་སེར་པོའི་སྣང་བ་བསྐྱེད་དེ། ཀླུ་དང་རོལ་མོ་ལ་སོགས་པའི་མཆོད་པ་དང་བཅས་པས་དཀྱིལ་འཁོར་བརྟག་པར་བྱའོ། །དེ་ལ་རེ་ཞིག་སྔར་མངོན་པར་བཟླས་ལ་ཁ་དོག་དཀར་པོ་དྲི་ཞིམ་པས་སྲད་བུ་སྦངས་ལ། དེ་ནས་རྡོ་རྗེ་
[107b.7]སྙིང་པོའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་རྡོ་རྗེ་རིན་པོ་ཆེ་ལས་བསྒྲུབ་པའི་གྲོགས་མཆོག་ནོར་བུ་མཆོད་པའི་རིག་པའི་རྒྱལ་པོའི་སྔགས་ཀྱིས་ཡིད་ལ་སྤྲུལ་ལ། གཡོན་པའི་རྡོ་རྗེ་ཁུ་ཚུར་གྱིས་ཐིག་སྐུད་བླངས་ཏེ། ཛ་ཞེས་བྱ་བས་བསྒྲུབ་པའི་གྲོགས་མཆོག་གི་ལག་ཏུ་སྲད་བུ་དེ་
[108a]
[108a.1]གཏད་ལ། ཕྱོགས་ཐམས་ཅད་མཉམ་པ་ཉིད་དུ་བསྒོམ་ཞིང་ཤར་ཕྱོགས་སུ་བལྟས་ཏེ། སློབ་དཔོན་གྱིས་ཚངས་པའི་ཐིག་གདབ་པར་བྱའོ། །ཛ་ཛ་ཛཿཞེས་ལན་གསུམ་གྱི་བར་དུ་བརྗོད་ཅིང་། བསྒྲུབ་པའི་གྲོགས་མཆོག་གིས་ཐིག་སྐུད་དྲང་བར་བྱའོ། །ཡང་སློབ་དཔོན་ལྷོ་
[108a.2]ཕྱོགས་སུ་འདུག་སྟེ། བྱང་དུ་བལྟས་ཏེ་ཚངས་པའི་ཐིག་གདབ་པར་བྱའོ། །དེ་ནས་ཡང་མེའི་ཕྱོགས་ཀྱི་ཆར་གནས་ཏེ། བྱང་དུ་ཁ་བལྟས་ལ་ཕྱིའི་དཀྱིལ་འཁོར་ཤར་དུ་ཐིག་གདབ་པར་བྱའོ། །རླུང་གི་ཕྱོགས་སུ་གནས་ལ་ལྷོའི་ཕྱོགས་སུ་བལྟས་ཏེ་ནུབ་ཀྱི་ཐིག་གདབ་པར་བྱའོ། །དེ་ཉིད་དུ་འདུག་
[108a.3]སྟེ། ཤར་དུ་བལྟས་ཏེ་བྱང་དུ་ཐིག་གདབ་པར་བྱའོ། །ཡང་མེའི་ཕྱོགས་སུ་འདུག་སྟེ་ནུབ་ཏུ་བལྟས་ཏེ་ལྷོའི་ཐིག་གདབ་པར་བྱའོ། །དེ་ནས་ཁ་ཁྱེར་དང་ལྷའི་སྣམ་བུའི་ཐིག་ཀྱང་གདབ་པར་བྱའོ། །ཡང་མེའི་མཚམས་སུ་གནས་ཏེ་རླུང་གི་བར་གྱི་མཚམས་ཀྱི་ཐིག་གདབ་པ་དང་། ཡང་
[108a.4]བདེན་བྲལ་གྱི་མཚམས་སུ་གནས་ཏེ། དབང་ལྡན་གྱི་མཚམས་ཀྱི་བར་གྱི་ཐིག་གདབ་པར་བྱའོ། །དེ་བཞིན་དུ་སྒོ་དང་། སྒོ་ཁྱུད་ཀྱི་ཐིག་གདབ་པར་བྱ་སྟེ། སྒོ་ནི་དབུས་མའི་ཆ་བརྒྱད་པ། །ཁ་ཁྱེར་ནི་སྒོའི་ཐད་ཀ་སྤངས་པའི་ལྷའི་སྣམ་བུ་དང་བཅས་པའོ། །ཁ་ཁྱེར་ནི་སྒོའི་ཕྱེད་ཀྱི་ཚད་ཡིན་ནོ། །
[108a.5]སྒོ་འགྲམ་གྱི་ཚད་དེ་ཉིད་སྒོ་ཁྱུད་ཀྱི་ཡང་དེ་ཡིན་ནོ། །རྟ་བབས་ནི་སྒོའི་སུམ་འགྱུར་དུ་བྱའོ། །ཚོན་སྣ་ལྔའི་ས་ནི་ཁ་ཁྱེར་གྱི་ཕྱེད་ཀྱི་ཚད་དུ་བྱའོ། །དེ་ལྟར་ཕྱིའི་དཀྱིལ་འཁོར་གྱི་ཐིག་བཏབ་ནས། ནང་གི་དཀྱིལ་འཁོར་གྱི་ཐིག་གདབ་པར་བྱ་སྟེ། ཕྱིའི་དཀྱིལ་འཁོར་གྱི་ཕྱེད་ཚད་ལ། ནོར་བུའི་
[108a.6]ཀ་བ་བརྒྱད་དང་ཡང་དག་པར་ལྡན་པ། །རིན་པོ་ཆེ་ཟུར་བརྒྱད་པའི་དབྱིབས་ལ་རིན་པོ་ཆེ་འབར་བ་དུ་མས་མཛེས་པ། སྒོ་སྦངས་པའི་རི་མོ་གཉིས་ཟླུམ་པོར་བྱས་པ། རི་མོ་གཉིས་ཀྱི་བར་དུ་ལྕུག་མས་མཛེས་པར་བྱས་པ་ཟླུམ་པོ་བྲི་བར་བྱའོ། །རིན་པོ་ཆེ་ཕྲེང་བའི་འོད་ཟེར་ཁ་ཕྱི་
[108a.7]རོལ་དུ་བལྟས་པས་སྣང་བར་བྱེད་པ། བདག་པོ་ལྔའི་གནས་སུ་རིན་པོ་ཆེའི་རི་མོ་ཟླུམ་པོ་ལྔ་བྱས་ལ་ཟླ་བའི་དཀྱིལ་འཁོར་ལྔ་ལྔ་བྲི་བར་བྱའོ། །ཕྱི་དང་ནང་གི་དཀྱིལ་འཁོར་གྱི་ལྷ་ཐམས་ཅད་ཀྱི་གནས་སུ་ཟླ་བའི་དཀྱིལ་འཁོར་རེ་རེ་ལ་ཡང་རིན་པོ་ཆེ་ཆེན་པོའི་རི་མོ་ཟླུམ་པོས་བསྐོར་བ་ཤེས་པར་བྱའོ། །
[108b]
[108b.1]དེ་ལ་སློབ་དཔོན་ལྷོ་ཕྱོགས་སུ་འདུག་ནས། ཤར་ཕྱོགས་ཀྱི་གདུང་དང་ཀ་བ་གཉིས་ཀྱི་ཐིག་གདབ་པར་བྱའོ། །བྱང་ཕྱོགས་སུ་འདུག་ལ་ནུབ་ཀྱི་གདུང་དང་ཀ་བ་གཉིས་ཀྱི་ཐིག་གདབ་པར་བྱའོ། །ནུབ་ཏུ་འདུག་ལ་བྱང་གི་གདུང་དང་ཀ་བ་གཉིས་ཀྱི་ཐིག་གདབ་པར་བྱའོ། །ཤར་ཕྱོགས་སུ་འདུག་
[108b.2]ལ་ལྷོ་ཕྱོགས་ཀྱི་གདུང་དང་ཀ་བ་གཉིས་ཀྱི་ཐིག་གདབ་པར་བྱ་ལ། འདི་ཆ་གསུམ་པ་མཉམ་པའི་ཐིག་གདབ་པར་བྱའོ། །དེ་ནས་དཀྱིལ་འཁོར་གྱི་དབུས་སུ་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ལས་བཤད་པའི་ཚུལ་གྱིས་རྡོ་རྗེ་ཕུར་བུ་བཏབ་ལ། སྐུད་པ་བཏགས་ཏེ་རི་མོ་ཟླུམ་པོ་གཉིས་
[108b.3]ཀྱི་བར་དུ་རིན་པོ་ཆེ་ལྕུག་མའི་ཐིག་གིས་ཐིག་གདབ་པར་བྱའོ། །དེ་ལ་ཐིག་གདབ་པའི་སྔགས་ནི་འདི་ཡིན་ཏེ། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ་ཞེས་བྱའོ། །ཐིག་འདབས་པའི་དུས་སུ་སློབ་དཔོན་དང་། སློབ་མ་རྣམས་རྡོ་རྗེ་ཤུགས་ཀྱིས་བཏེག་སྟེ། སྐོར་ཕྱོགས་སུ་འགྲོ་བར་བྱའོ། །དེ་ནས་རྡོ་རྗེ་ཧཱུཾ་
[108b.4]མཛད་ཀྱི་སྔགས་ཀྱིས་དཀྱིལ་འཁོར་གྱི་ལྟེ་བའི་ཕུར་བུ་བཏོན་ལ། ཚོན་སྣ་ལྔས་ཕུར་བུའི་ཁུང་བུ་མཉམ་པོར་བྱས་ཏེ། རྡོ་རྗེ་ཧཱུཾ་མཛད་ཀྱི་རྣལ་འབྱོར་བྱས་ནས་མིག་གཡས་པ་དང་གཡོན་པར་ཧྲཱི་ལས་ཉི་མ་དང་ཟླ་བ་བསྐྱེད་དེ། ཁྲོ་བོའི་ལྟ་བས་ཀུན་དུ་བལྟས་ནས་སྒོ་རྣམས་དབྱེ་བར་བྱའོ། །དེ་ལྟར་དཀྱིལ་
[108b.5]འཁོར་ཐིག་བཏབ་ལ་ཚོན་དགྱེ་བར་བྱའོ། །དེ་ནས་ཚོན་རྩི་བསྒྲུབ་པར་བྱ་སྟེ། དེ་ལ་ཚོན་དཀར་པོ་ལ་ཨོཾ་ལས་རྣམ་པར་སྣང་མཛད་ཀྱི་གཟུགས་དང་། སྔོན་པོ་ལ་ཧཱུཾ་ལས་མི་བསྐྱོད་པའི་གཟུགས་དང་། སེར་པོ་ལ་ཏྲཱཾ་ལས་རིན་ཆེན་འབྱུང་ལྡན་གྱི་གཟུགས་དང་། དམར་པོ་ལ་ཧྲཱིཿལས་སྣང་བ་མཐའ་
[108b.6]ཡས་ཀྱི་གཟུགས་དང་། ལྗང་གུ་ལ་ཨ་ལས་དོན་ཡོད་གྲུབ་པའི་གཟུགས་སུ་བསྐྱེད་དེ། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བྱ་བ་འདིས་ཕྱག་རྒྱ་དང་ལྡན་པས་རེ་རེ་ཞིང་ཡང་ལན་བདུན་གྱི་བར་དུ་བཟླ་བར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེ་ཁུ་ཚུར་གཉིས་ལས་ནི། །མཛུབ་མོའི་རྩེ་མོ་མཉམ་སྦྱར་བ། །
[108b.7]བྱས་ནས་ཚོན་རྩི་ཐམས་ཅད་ནི། །འབར་བའི་ལྟ་བས་དགུག་པར་བྱ། །ཧི་ཞེས་བྱ་བས་མཐར་སྦར་བར་བྱའོ། །དེ་ནས་སྙིང་པོ་འདི་དང་། དབང་ལྡན་གྱི་ཕྱོགས་ནས་བརྩམས་ཏེ། གཡས་ནས་བསྐོར་བས་གཡོན་པའི་རྡོ་རྗེ་ཁུ་ཚུར་གྱིས་ཚོན་རྩི་རིམ་གྱིས་དགྱེ་བར་བྱའོ། །ཕྱིས་ནི་ཇི་ལྟར་བདེ་བར་
[109a]
[109a.1]བྱའོ། །རིམ་པ་ནི་འདི་ཡིན་ཏེ། སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། ཀུན་གྱི་ནང་དུ་དཀར་པོ་སྟེ། དེ་སྐད་དུ་ཡང་། །སྔོན་པོ་རྡོ་རྗེ་རྩེ་རང་བཞིན། །གཉིས་པ་གསེར་ལ་དམིགས་པ་སྟེ། །པདྨ་རཱ་གའི་རང་བཞིན་གཞན། །དེ་བཞིན་གཞན་དག་མརྒད་
[109a.2]འདྲ། །དཀར་པོ་ནང་དུ་ཤེས་བྱ་སྟེ། །དེ་ནི་ཚོན་གྱི་རིམ་པར་བཤད། །ཅེས་གསུངས་སོ། །ཇི་ལྟ་བ་བཞིན་དུ་ཕྱི་རོལ་གྱི་དཀྱིལ་འཁོར་བྲིས་ནས། དེ་ནས་ནང་གི་དཀྱིལ་འཁོར་རི་མོ་ཟླུམ་པོ་གཉིས་བསྐོར་བའི་ནང་དུ་རིན་པོ་ཆེའི་ལྕུག་མ་བྲི་བར་བྱའོ། །ཕྱི་རོལ་གྱི་རི་མོ་དང་ཉེ་བར་ཁ་ཕྱིར་བལྟས་པའི་རྡོ་རྗེ་
[109a.3]རིན་པོ་ཆེའི་ཕྲེང་བ་འབར་བ་དང་བཅས་པར་བྱའོ། །དེ་ནས་ནོར་བུའི་ཀ་བ་བརྒྱད་བྱས་ལ། ཀ་བ་བརྒྱད་པའི་དབུས་སུ་ཟུར་བརྒྱད་པའི་ནོར་བུ་དང་འདྲ་བ་འབར་བ་དང་བཅས་པའི་ནང་གི་དཀྱིལ་འཁོར་བྲི་བར་བྱའོ། །དེ་ནས་དཀྱིལ་འཁོར་གྱི་ལྟེ་བར་བཅོམ་ལྡན་འདས་རྣམ་པར་སྣང་མཛད་པདྨ་དང་།
[109a.4]སེང་གེའི་གདན་ལ་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས། ཨོཾ་བུདྡྷ་རཏྣ་ཧཱུཾ་ཞེས་བྱ་བའི་སྙིང་པོ་འདི་བྲིས་ལ། སྙིང་པོ་འདི་ནམ་མཁའི་ཕྱོགས་ནས་ཕབ་སྟེ། གཟུགས་བརྙན་དང་གཅིག་ཏུ་བསྲེ་བར་བྱའོ། །དེ་བཞིན་དུ་ཐམས་ཅད་
[109a.5]ཀྱང་ཤེས་པར་བྱའོ། །དེའི་ཕྱོགས་རྣམས་སུ་པདྨ་དང་། ཟླ་བའི་གདན་ལ། ཨོཾ་བཛྲ་མ་ནེེ་ཧཱུཾ། ཨོཾ་བཛྲ་རཏྣ་ཨཾ་ཀུ་ར་ཧཱུཾ། ཨོཾ་བཛྲ་རཏྣ་པདྨ་ཧཱུཾ། ཨོཾ་བཛྲ་རཏྣ་པཱ་ཤ་ཧཱུཾ། ཞེས་བྱ་བའི་སྙིང་པོ་རྣམས་ཀྱིས་ཕྱག་རྒྱ་བཞི་བྲི་བར་བྱའོ། །དེ་ནས་ཤར་ཕྱོགས་ཀྱི་རིན་པོ་ཆེ་རེའུ་མིག་གི་དཀྱིལ་འཁོར་གྱི་དབུས་སུ་
[109a.6]བཅོམ་ལྡན་འདས་རྡོ་རྗེ་སྙིང་པོ་འཁོར་དང་བཅས་པ། ཨོཾ་སརྦྦ་ཨརྠ་སི་དྡྷི་པྲ་དཱ་ཧཱུཾ། ཨོཾ་བཛྲ་མ་ཎི་ཙིནྟཱ་ཨཱ་ཀཱ་ཤ་གརྦྷ་སིདྡྷྱ་སིདྡྷྱ་ཧཱུཾ། ཨོཾ་རཏྣ་ཨཾ་ཀུ་ཤ་ཨཱ་ཀཪྵ་ཡ། སརྦྦ་ཨརྠ་ཨ་ན་ཡ་ཤཱི་གྷྲཾ་སརྦྦ་ཏ་ཐཱ་ག་ཏ་ས་ཏྱ་མ་ནུ་སྨ་ར་ཧཱུཾ། ཨོཾ་མ་ཎི་རཱ་ག་བ་ཤི་ཀུ་རུ་སརྦྦ་ཨརྠཱ་ན་ཡ་ཨཱ་ཀཱ་ཤ་གརྦྷ་ཧཱུཾ། ཨོཾ་རཏྣ་ཏུཥྚི་
[109a.7]ཧཱུཾ། ཞེས་བྱ་བའི་སྙིང་པོ་འདི་རྣམས་ཀྱིས་བྲི་བར་བྱའོ། །ལྷོ་ཕྱོགས་ཀྱི་ནོར་བུའི་རེའུ་མིག་གི་དབུས་སུ། རིན་ཆེན་ཕྲེང་བ་འཁོར་དང་བཅས་པ་རྣམས། ཨོཾ་རཏྣ་ཧྲྀཥྚ་ཏྲཱཾ། ཨོཾ་སརྦྦ་ཏ་ཐཱ་ག་ཏ་ཨ་བྷི་ཥེ་ཀ་རཏྣ་མཱ་ལ་ཧཱུཾ། ཨོཾ་མ་ཎི་སཱུརྱ་ཧཱུཾ། ཨོཾ་ཙིནྟྲཱ་མ་ཎི་དྷྭ་ཛ་སརྦྦ་ཨཱ་ཤཱ་པ་ར་པཱུ་ར་ཀ་ཨཱ་
[109b]
[109b.1]ཀཱ་ཤ་གརྦྷ་ཧཱུཾ། ཨོཾ་རཏྣ་ཨཊྚ་ཧ་ས་ཧ་ས་ཧཱུཾ་ཞེས་བྱ་བའི་སྙིང་པོ་བྲི་བར་བྱའོ། །ནུབ་ཕྱོགས་ཀྱི་ནོར་བུའི་རེའུ་མིག་གི་དཀྱིལ་འཁོར་གྱི་དབུས་སུ་བཅོམ་ལྡན་འདས་རིན་ཆེན་པདྨ་འཁོར་དང་བཅས་པ། ཨོཾ་རཏྣ་པདྨ་ཧཱུཾ། ཨོཾ་ཏྱ་ག་ས་མ་དྷི་ཛྙ་ན་གརྦྷ་ཧཱུཾ། ཨོཾ་རཏྣ་ཀོ་ཥ་ལཱ་ཡ་གྲ་ཧཱུཾ། ཨོཾ་མ་ཎི་ཙཀྲ་པྲ་བརྟ་
[109b.2]ཡ་ཧཱུཾ། ཨོཾ་རཏྣ་དྲྀཥྚ་ཧཱུཾ། ཞེས་བྱ་བའི་སྙིང་པོ་བྲི་བར་བྱའོ། །བྱང་ཕྱོགས་ཀྱི་ནོར་བུའི་རེའུ་མིག་གི་དཀྱིལ་འཁོར་གྱི་དབུས་སུ་རིན་ཆེན་ཆར་འབེེབས་འཁོར་དང་བཅས་པ། ཨོཾ་རཏྣཱ་དྲྀཥྚ་བཪྵཱ་ཡ་སརྦྦ་ཨརྠ་སཾ་བ་དི་བྷ་ག་བཱན་མཎི་ཧསྟ་ཧཱུཾ། ཨོཾ་མ་ཎི་པཱུ་ཛ་ས་མ་ཡ་ཧཱུཾ། ཨོཾ་མ་ཎི་བནྡྷ་ཀ་པ་ཙ་
[109b.3]ཧཱུཾ། ཨོཾ་མ་ཎི་དཾ་ཥྟྲ་ཀ་རཱ་ལ་མ་ཧཱ་ཡཀྵ་ཧ་ར་ཧ་ར་སརྦྦ་ཨརྠཱ་ན་བྷི་ཥཱ་པ་ཡ་ཧཱུཾ། ཨོཾ་མ་ཎི་རཏྣ་བནྡྷ་ས་མ་ཡ་ཧཱུཾ། ཞེས་བྱ་བའི་སྙིང་པོ་འདི་བྲི་བར་བྱའོ། །རྡོ་རྗེ་སྒེག་མོ་ལ་སོགས་པའི་གནས་རྣམས་སུ་རིན་ཆེན་སྒེག་མོ་ལ་སོགས་པ་རྣམས་ནི། ཨོཾ་རཏྣ་ར་ཏི་པྱ་ཧཱུཾ། ཨོཾ་རཏྣ་མཱ་ལ་ཧཱུཾ། ཨོཾ་རཏྣ་གཱི་ཏེ་ཧཱུཾ།
[109b.4]ཨོཾ་རཏྣ་ནྲྀ་ཏྱ་ཧཱུཾ་ཞེས་བྱ་བས་སོ། །ཕྱིའི་དཀྱིལ་འཁོར་གྱི་ཟུར་རྣམས་སུ། རིན་ཆེན་བདུག་པ་མ་ལ་སོགས་པ་རྣམས། ཨོཾ་དྷཱུ་པ་རཏྣི། ཨོཾ་པུཥྤ་མ་ཎི། ཨོཾ་རཏྣ་ཨཱ་ལོ་ཀི །ཨོཾ་མ་ཎི་གནྡྷི་ཞེས་བྱ་བས་སོ། །ཤར་ཕྱོགས་ཀྱི་སྒོ་ལ་སོགས་པ་རྣམས་སུ། རིན་ཆེན་ལྕགས་ཀྱུ་ལ་སོགས་པ། ཨོཾ་སརྦ་
[109b.5]རཏྣ་ཨཱ་ཀཱ་ཤ་ཨཱརྱ་ཨ་རུ་ན། མ་ཧཱ་སཏྭ་བྷ་ག་བཱནྟཾ་ཨཱ་ཀཱ་ཤ་བ་ར་པྲ་ཙོད་ཡ་ཨཱ་ཀཪྵ་ཡ་ཤྲཱི་གྷཾ་ཧོ་ཛཿ། ཨོཾ་སརྦྦ་རཏྣ་པྲ་བེ་ཤ་ས་མ་ཡཾ། མ་ཧཱ་མ་ཎི་རཱ་ཛ་ཀུ་ལ་རཏྣ་པཱ་ཤ་ཧཱུཾ། ཨོཾ་མ་ཎི་བནྡྷ་ཧཱུཾ་བཾ། ཨོཾ་མ་ཎི་རཏྣ་ཨཱ་བེ་ཤ་ཨཿ། ཞེས་བྱ་བའི་སྙིང་པོ་བྲི་བར་བྱའོ། །ཕྱིའི་དཀྱིལ་འཁོར་གྱི་ཁྱམས་སུ་བྱམས་པ་ལ་
[109b.6]སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སྟོང་དུ་བཞིས་མ་ཚང་བ་མཉམ་པ་ཕྱོགས་བཞིར་རིག་པས་བྲི་བར་བྱའོ། །ཨོཾ་སརྦྦ་སཾ་སྐཱ་ར་པ་རི་ཤུདྡྷེ་དྷརྨྨ་ཏེ་ག་ག་ན་ས་མུངྒ་ཏེ་སྭ་བྷཱ་བ་བི་ཤུདྡྷེ་མ་ཧཱ་ནཱ་ཡ་པ་རི་བཱ་རེ་སྭཱ་ཧཱ། ཞེས་བྱ་བས་རྡོ་རྗེ་སྙིང་པོ་ནས་བསྐལ་པ་བཟང་པོའི་མཐར་ཐུག་པའི་བར་
[109b.7]དུ་གཟུགས་བརྙན་ཐམས་ཅད་ཟླ་བ་དང་པདྨའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ་གསེར་གྱི་མདོག་ཅན་དགའ་ཞིང་མགུ་བ་སྟེ། རྡོ་རྗེ་ནོར་བུ་ལ་སོགས་པ་ཀུན་ནས་འོད་ཟེར་འབར་བའི་སྙིང་པོ་སྣ་ཚོགས་པ་རྡོ་རྗེ་ནོར་བུ་རིན་པོ་ཆེའི་ཅོད་པན་གྱིས་དབང་བསྐུར་བ་རྒྱན་ཐམས་ཅད་
[110a]
[110a.1]ཀྱིས་བརྒྱན་པར་བྱས་པའི་སྐུ་རྡོ་རྗེ་ནོར་བུ་རིན་པོ་ཆེ་ཆེན་པོའི་མཚན་མ་བསྣམས་པ་བྲི་བར་བྱའོ། །འདི་དག་ལ་ཁྱད་པར་གྱི་དགག་པ་ནི་མེད་དོ། །དེ་ལ་རྡོ་རྗེ་སེམས་མའི་གནས་སུ་རྡོ་རྗེ་ནོར་བུའི་རྡོ་རྗེ་རྩེ་ལྔ་པས་མཚན་པའོ། །རིན་ཆེན་རྡོ་རྗེ་མའི་གནས་སུ་རྡོ་རྗེ་རིན་པོ་ཆེའི་མྱུ་གུ་མའི་
[110a.2]རིན་པོ་ཆེའི་ཕྲེང་བའོ། །རྡོ་རྗེ་ཆོས་མའི་གནས་སུ་རིན་ཆེན་པདྨའི་འདབ་མ་བཅུ་དྲུག་པ་པདྨའི་གནས་སུ་ཡིད་བཞིན་ནོར་བུ། ལས་ཀྱི་རྡོ་རྗེ་མའི་གནས་སུ་རྡོ་རྗེ་རིན་ཆེན་ཆར་འབེབས་མའི་རིན་པོ་ཆེ་རྒྱ་གྲམ་གྱི་དབུས་སུ་རྡོ་རྗེ་ནོར་བུ་ཆེན་པོའོ། །བཅོམ་ལྡན་འདས་དོན་ཐམས་ཅད་གྲུབ་པ་ནི། ནོར་བུའི་
[110a.3]ཁུ་ཚུར་གྱིས་དྲིལ་བུ་བསྣམས་ཤིང་། དེ་ཉིད་ཀྱིས་བསྙེམས་པ་དང་བཅས་པ་དང་། ཕྱག་གཡས་པ་ན་རྡོ་རྗེ་ནོར་བུ་དང་བཅས་པའི་མཆོག་སྦྱིན་པའི་ཕྱག་རྒྱས་བཞུགས་པའོ། །ནོར་བུའི་མཚན་མ་ནི། གཡོན་པའི་རིན་པོ་ཆེའི་ཁུ་ཚུར་གྱིས་དྲིལ་བུས་བསྙེམས་པ་དང་བཅས་པ་དང་། གཡས་
[110a.4]པས་ཁ་ཊྭཱཾ་གའི་ཕྱག་རྒྱས་ནོར་བུས་མཚན་པའི་རྡོ་རྗེ་རྩེ་ལྔ་པ་སྙིང་གར་འདེབས་པའི་ཚུལ་གྱིས་བསྣམས་པའོ། །རིན་ཆེན་རྒྱལ་པོ་ནི་རྡོ་རྗེ་ནོར་བུས་མཚན་པའི་རིན་པོ་ཆེའི་ལྕགས་ཀྱུས་དེ་བཞིན་གཤེགས་པ་ཐམས་ཅད་སྡུད་པར་མཛད་པའོ། །ནོར་བུའི་ཆགས་པ་ནི་རིན་ཆེན་མདའ་དང་གཞུས་དེ་
[110a.5]བཞིན་གཤེགས་པ་ཐམས་ཅད་འབིགས་པར་མཛད་པའོ། །རིན་ཆེན་ལེགས་པ་ནི་ཕྱག་གཉིས་ཀྱི་ཁུ་ཚུར་ལེགས་པར་སྦྱིན་པའི་ཚུལ་གྱིས་མཉེས་པར་བྱེད་པའོ། །རིན་ཆེན་ལྟ་བ་ནི་མིག་གཉིས་དང་ལྡན་པའི་རིན་པོ་ཆེའི་གཙུག་ཏོར་དང་བཅས་པའི་རིན་པོ་ཆེའི་ཕྲེང་བ་མགོ་ལ་བཅིང་ཞིང་དེ་བཞིན་
[110a.6]གཤེགས་པ་ཐམས་ཅད་ལ་དབང་བསྐུར་བའོ། །རིན་ཆེན་ཕྲེང་བ་ཡང་དེ་བཞིན་དུ་དབང་བསྐུར་བར་བྱེད་པ་ལས། ཁྱད་པར་ནི་འདི་ཡིན་ཏེ། མིག་སྤངས་པའི་ནོར་བུའི་ཕྲེང་བའོ། །ནོར་བུ་ཉི་མ་ནི་ཕྱག་གཡས་ན་རིན་པོ་ཆེས་མཚན་པའི་ཉི་མའི་དཀྱིལ་འཁོར་བསྣམས་ཏེ། འོད་ཀྱིས་སྣང་བར་
[110a.7]མཛད་པ་དང་། ཕྱག་གཡོན་གདན་ལ་བརྟེན་ཅིང་བཞུགས་པའོ། །ནོར་བུའི་དཔལ་གྱི་ཕྱག་གཡས་ན་ཡིད་བཞིན་གྱི་ནོར་བུའི་རྒྱལ་མཚན་བསྣམས་པ། དེ་བཞིན་གཤེགས་པ་ཐམས་ཅད་སྦྱིན་པའི་ཕ་རོལ་ཏུ་ཕྱིན་པ་ལས་ངེས་པར་སྦྱོར་བ་དང་། ཕྱག་གཡོན་པ་གདན་ལ་བརྟེན་ནས་བཞུགས་
[110b]
[110b.1]པའོ། །རིན་ཆེན་བཞད་པ་ནི་ཕྱག་གཡས་ཀྱིས་སོའི་ཕྲེང་བ་གཉིས་ཀྱི་རྩེ་མོ་ན་ནོར་བུས་མཚན་པའི་རྡོ་རྗེ་རིན་པོ་ཆེ་གཉིས་བསྣམས་ཏེ། དེ་བཞིན་གཤེགས་པ་ཐམས་ཅད་འཛུམ་ཞིང་རིན་པོ་ཆེའི་བཞད་པ་རྨད་དུ་བྱུང་བ་ལ་ངེས་པར་སྦྱོར་བ་ཕྱག་གཡོན་པ་གདན་ལ་བརྟེན་ནས་བཞུགས་པའོ། །རིན་ཆེན་
[110b.2]པདྨའི་ཏིང་ངེ་འཛིན་མཆོག་གི་ཕྱག་རྒྱས་པདྨ་འདབ་མ་བཅུ་དྲུག་པ་ཡིད་བཞིན་གྱི་ནོར་བུས་མཚན་པ་བསྣམས་པའོ། །གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོ་ནི་པདྨ་འདབ་མ་བཅུ་དྲུག་པ་ནོར་བུས་མཚན་པ་གཡོན་པ་ནོར་བུའི་ཁུ་ཚུར་བསྙེམས་པའི་ཚུལ་དང་། གཡས་པའི་ཕྱག་གིས་རང་གི་
[110b.3]ཐུགས་ཀར་འབྱེད་པའོ། །རིན་ཆེན་རྣོན་པོ་ནི་གཡོན་པའི་རིན་པོ་ཆེའི་ཁུ་ཚུར་གྱི་ནོར་བུས་མཚན་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་ཐུགས་ཀར་བསྣམས་ནས་ཕྱག་གཡས་པས་ནོར་བུས་མཚན་པའི་རལ་གྲིས་དེ་བཞིན་གཤེགས་པ་ཐམས་ཅད་ལ་འདེབས་པའི་ཚུལ་ཅན་ནོ། །
[110b.4]ནོར་བུའི་འཁོར་ལོ་ནི་ནོར་བུས་མཚན་པའི་འཁོར་ལོ་རྩིབས་བརྒྱད་པ་ཕྱག་གཡས་པའི་གུང་མོ་ལ་བསྐོར་བ་དང་། ཕྱག་གཡོན་པ་གདན་ལ་བརྟེན་ཅིང་བཞུགས་པའོ། །ནོར་བུའི་གསུང་བ་ནི་ཕྱག་གཡས་པས་ནོར་བུས་མཚན་པའི་ལྕེའི་དེ་བཞིན་གཤེགས་པ་ཐམས་ཅད་དང་ཆོས་བདག་མེད་
[110b.5]པའི་གཏམ་སྨྲ་བར་མཛད་པ་དང་། ཕྱག་གཡོན་གདན་ལ་བརྟེན་ནས་བཞུགས་པའོ། །རིན་ཆེན་ཆར་འབེེབས་ནི་ཕྱག་གཡོན་པ་རིན་པོ་ཆེའི་ཁུ་ཚུར་གྱིས་ནོར་བུ་རྒྱ་གྲམ་གྱི་དྲིལ་བུ་བསྣམས་ཤིང་བསྙེམས་པ་དང་བཅས་པའི་ཚུལ་དང་། ཕྱག་གཡས་པས་རིན་པོ་ཆེ་ཆར་འབེབས་པའི་ཚུལ་དུ་
[110b.6]མཛད་པའོ། །རིན་ཆེན་མཆོད་པ་ནི་རིན་ཆེན་ཆར་འབེེབས་བཞིན་དུ་གཡོན་བསྙེམས་པའི་ཚུལ་དང་། ཕྱག་གཡས་པ་ནོར་བུས་མཚན་པའི་སྣ་ཚོགས་རྡོ་རྗེ་རང་གི་ཐུགས་ཀར་བསྟོད་པའི་ཚུལ་གྱིས་བསྣམས་པའོ། །ནོར་བུའི་བསྲུང་བ་ནི་ནོར་བུས་མཚན་པའི་གོ་ཆ་བསྣམས་ཏེ། དེ་
[110b.7]བཞིན་གཤེགས་པ་ཐམས་ཅད་ལ་གོ་བསྐོན་པའི་ཚུལ་དུ་མཛད་པའོ། །ནོར་བུའི་གནོད་སྦྱིན་ནི་སྐུ་མདོག་ནག་པོ་ཞལ་མཆེ་བ་གཙིགས་པས་འཇིགས་པ། ཁུ་ཚུར་གཉིས་ཀྱིས་ནོར་བུས་མཚན་པའི་མཆེ་བ་གཉིས་ཁའི་འགྲམ་དུ་འཛིན་ཅིང་བཞུགས་པས་དེ་བཞིན་གཤེགས་པ་ཐམས་ཅད་
[111a]
[111a.1]འཇིགས་པར་མཛད་པའོ། །ནོར་བུའི་ཁུ་ཚུར་ནི་དམ་ཚིག་གི་ནོར་བུའི་ཁུ་ཚུར་གཉིས་ཀྱི་ནང་དུ་ནོར་བུས་མཚན་པའི་རྡོ་རྗེ་རྩེ་ལྔ་པ་བཙིར་ཞིང་བཞུགས་པའོ། །རིན་ཆེན་སྒེག་མོ་ནི་རིན་པོ་ཆེས་མཚན་པའི་རྡོ་རྗེ་གཉིས་བསྣམས་པས་རིན་པོ་ཆེ་འགྱིང་བའི་ཚུལ་གྱིས་གཡོན་
[111a.2]ནས་གཡས་སུ་མགོ་བོ་འདུད་པའི་ཚུལ་དུ་བྱེད་པའོ། །རིན་ཆེན་ཕྲེང་བ་མ་ནི་རིན་ཆེན་ཕྲེང་བས་དེ་བཞིན་གཤེགས་པ་ཐམས་ཅད་ལ་དབང་བསྐུར་བའོ། །རིན་ཆེན་གླུ་མ་ནི་རིན་པོ་ཆེའི་པི་ཝང་བརྡུང་བའི་ཚུལ་དུ་བྱེད་པའོ། །རིན་ཆེན་གར་མ་ནི་རྡོ་རྗེ་ནོར་བུས་མཚན་པའི་ཕྱག་གཉིས་གར་མཛད་
[111a.3]ཅིང་བཞུགས་པའོ། །རིན་ཆེན་བདུག་པ་མ་ནི་རིན་པོ་ཆེའི་སྤོས་སྣོད་བསྣམས་ནས། རིན་པོ་ཆེའི་བདུག་པས་དེ་བཞིན་གཤེགས་པ་ཐམས་ཅད་ཚིམ་པར་མཛད་པའོ། །རིན་པོ་ཆེའི་མེ་ཏོག་ནི་ཕྱག་གཡོན་གྱིས་རིན་པོ་ཆེའི་མེ་ཏོག་གི་སྣོད་ཐོགས་ཏེ། ཕྱག་གཡས་པས་རིན་པོ་ཆེའི་མེ་ཏོག་གི་
[111a.4]ཆར་འབེེབས་ཤིང་དེ་བཞིན་གཤེགས་པ་ཐམས་ཅད་མཆོད་པར་མཛད་པའོ། །རིན་པོ་ཆེའི་མར་མེ་མ་ནི་རིན་པོ་ཆེའི་མཆོད་སྡོང་བསྣམས་ཏེ། དེ་བཞིན་གཤེགས་པ་ཐམས་ཅད་ལ་སྣང་བར་མཛད་པའོ། །རིན་པོ་ཆེའི་བྱུག་པ་ནི་ཕྱག་གཡོན་པས་རིན་པོ་ཆེའི་དུང་ཆོས་བསྣམས་ཏེ། ཕྱག་གཡས་
[111a.5]ཀྱིས་དྲིའི་སྤྲིན་གྱིས་ཆར་འབེབས་པར་མཛད་པའོ། །རིན་པོ་ཆེའི་ལྕགས་ཀྱུ་ནི་ལྷའི་བུ་སྐྱ་རེངས་ཀྱི་གཟུགས་ཅན་རིན་པོ་ཆེའི་ལྕགས་ཀྱུས་དེ་བཞིན་གཤེགས་པ་ཐམས་ཅད་སྤྱན་དྲངས་ནས་ཐར་པ་ཆེན་པོའི་གྲོང་ཁྱེར་གྱི་སྒོ་དང་ཉེ་བར་སྡུད་པར་མཛད་པའོ། །རིན་པོ་ཆེ་ཞགས་པ་ནི་རིན་པོ་ཆེའི་ཞགས་
[111a.6]པས་དེ་བཞིན་གཤེགས་པ་ཐམས་ཅད་ཐར་པ་ཆེན་པོའི་གྲོང་ཁྱེར་དུ་འཇུག་པར་མཛད་པའོ། །རིན་ཆེན་ལྕགས་སྒྲོག་ནི་དེ་བཞིན་གཤེགས་པ་ཐམས་ཅད་འཆིང་བར་མཛད་པའོ། །རིན་ཆེན་འབེབས་པ་ནི་རིན་པོ་ཆེའི་དྲིལ་བུས་དེ་བཞིན་གཤེགས་པ་ཐམས་ཅད་འབེབས་པར་མཛད་པའོ། །
[111a.7]ཤར་ཕྱོགས་ཀྱི་ལྷའི་སྣམ་བུའི་ནང་དུ་བསྐལ་པ་བཟང་པོ་ནོར་བུས་མཚན་པའི་རྡོ་རྗེ་རྩེ་ལྔ་པ་བསྣམས་པའོ། །ལྷོ་ཕྱོགས་སུ་རིན་ཆེན་ཕྲེང་བ་བསྣམས་པའོ། །ནུབ་ཕྱོགས་སུ་རིན་ཆེན་པདྨ་བསྣམས་པའོ། །བྱང་ཕྱོགས་སུ་ནོར་བུས་མཚན་པར་སྣ་ཚོགས་རྡོ་རྗེ་བསྣམས་པ་རྔུ་གཞག་པར་བྱའོ། །དེ་ལྟར་
[111b]
[111b.1]དཀྱིལ་འཁོར་བྲིས་ནས། ཕྱི་རོལ་ཉེ་འཁོར་ཀུན་དུ་དྲིས་བྱུགས་ནས། མེ་ཏོག་གཏོར་བར་བྱའོ། །དོན་ཐམས་ཅད་གྲུབ་པའི་དམ་ཚིག་གི་ཕྱག་རྒྱ་བཅིངས་ཏེ། མེ་ཏོག་གི་ཕྲེང་བ་བླངས་ལ། རྡོ་རྗེ་ཤུགས་ཀྱིས་དཀྱིལ་འཁོར་དུ་འཇུག་པར་བྱ་ཞིང་། ཨོཾ་སརྦྦ་ཨརྠ་སིདྡྷི་པྲ་དཱ་ཧཱུཾ། ཞེས་བརྗོད་པར་བྱའོ། །ཡང་
[111b.2]དཀྱིལ་འཁོར་ཐམས་ཅད་ཀྱི་ལྷག་པ་དང་མ་ཚང་བ་ཉེ་བར་ཞི་བར་བྱ་བའི་ཕྱིར་བལྟས་ལ་རྡོ་རྗེ་རིན་པོ་ཆེའི་དྲིལ་བུ་དཀྲོལ་ཞིང་། དཀྱིལ་འཁོར་ལན་བདུན་བསྐོར་བ་བྱས་ནས་བཅོམ་ལྡན་འདས་དོན་ཐམས་ཅད་གྲུབ་པ་ལ་ཕྲེང་བ་དེ་ཕུལ་ཏེ། རྡོ་རྗེ་རིན་པོ་ཆེའི་གར་བྱས་ནས་རང་གི་མགོ་ལ་བཅིང་བར་བྱའོ།།
[111b.3]ཨོཾ་སརྦྦ་ཨརྠ་སིདྡྷི་པྲ་དཱ་ཧཱུཾ། ཞེས་ཀྱང་རྒྱུན་མི་འཆད་པ་ཁོ་ནར་བཟླ་བར་བྱའོ། །དེ་སྐད་དུ་ཡང་། རྡོ་རྗེ་དྲིལ་བུ་རབ་བསྐུལ་བས། །མཁས་པས་མ་ཚང་ཡོངས་སུ་བསྐོང་། །ལྷག་པ་ཡང་ནི་དོར་མཛད་པས། །འགྲུབ་འགྱུར་སྨད་པར་མི་བྱའོ། །ཞེས་གསུངས་སོ། །དེའི་རྗེས་ལ་ཡི་གེ་ཧཱུཾ་ལས་བདག་
[111b.4]ཉིད་རྡོ་རྗེ་ཧཱུཾ་མཛད་དུ་བསམ་པར་བྱའོ། །དེ་ནས་དབུས་སུ་འདུག་ནས་ནི། །རྡོ་རྗེ་སློབ་དཔོན་མཉམ་གཞག་པས། །རིན་ཆེན་སྒོ་ནི་རྣམ་བཞི་པོ། །ཡིད་ཀྱིས་སུ་ནི་དབྱེ་བར་བྱ། །ཨོཾ་བཛྲ་ཨུདྒྷ་ཏྲ་ཡ་ས་མ་ཡ་པྲ་བེ་ཤ་ཧཱུཾ། ཞེས་བྱ་བ་དང་། ཕྱག་རྒྱ་དང་བཅས་པས་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེ་
[111b.5]མཛུབ་སོར་གཉིས་ལེགས་པས། །སྦྱར་ལ་བཀན་ཏེ་བཟླས་ནས་སུ། །རབ་ཏུ་ཁྲོས་ནས་དབྱེ་བ་ན། །སྒོ་འབྱེད་པ་ཡི་མཆོག་ཡིན་ནོ། །དེ་ནས་རིན་པོ་ཆེའམ་ས་ལས་བྱས་པའི་བུམ་པ་རྩ་བ་མི་གནག་པ་གསུས་པ་ཆེ་བ་མགྲིན་པ་རིང་བ་མཆུ་འཕྱང་བ། རིན་པོ་ཆེ་ཐམས་ཅད་དང་། སྨན་དང་དྲིའི་ཆུས་ཡོངས་
[111b.6]སུ་བཀང་བ་རྡོ་རྗེ་ནོར་བུས་མཚན་པའི་རྡོ་རྗེ་རིན་པོ་ཆེའི་ནོར་བུའི་སྟེང་དུ་གཞག་པ། མགུལ་བ་རས་བཟང་པོས་བཅིངས་པ། འདབ་མ་དང་འབྲས་བུ་དྲི་ཞིམ་པས་ཁ་བརྒྱན་པ་དྲིས་ཀུན་དུ་བྱུགས་ཏེ། མེ་ཏོག་གི་ཕྲེང་བ་བཏགས་པ་སྔར་བསྙེན་པ་བྱས་པ་རྡོ་རྗེ་ནོར་བུ་ཆེན་པོའི་ཕྱག་རྒྱས་རིན་པོ་ཆེའི་མེ་ཏོག་གི་ལྕུག་
[111b.7]མ་བཟུང་ལ། ཨོཾ་བཛྲ་ཨུ་ད་ཀ་ཧཱུཾ། ཞེས་ལན་སྟོང་རྩ་བརྒྱད་བཟླ་བ་དང་། བཅོམ་ལྡན་འདས་དོན་ཐམས་ཅད་གྲུབ་པ་ལན་བརྒྱ་རྩ་བརྒྱད་བཟླས་པའི་བུམ་པ་བཅོམ་ལྡན་འདས་དོན་ཐམས་ཅད་གྲུབ་པའི་སྤྱན་སྔར་གཞག་པར་བྱའོ། །བུམ་པ་གཉིས་པ་ནི་དོན་ཐམས་ཅད་གྲུབ་པ་ལན་བརྒྱ་རྩ་བརྒྱད་
[112a]
[112a.1]བཟླས་ལ་འཇུག་པའི་སྒོ་མངོན་པར་ཕྱོགས་པར་གཞག་པར་བྱའོ། །དེས་འཇུག་པའི་དུས་སུ་བདག་དང་སློབ་མ་དབང་བསྐུར་བར་བྱའོ། །རྡོ་རྗེ་ནོར་བུ་ཆེན་པོའི་ཕྱག་རྒྱ་བཅིང་བ་དང་། འཆིང་དུ་གཞུག་པར་བྱའོ། །རྣམ་པར་སྣང་མཛད་ལ་སོགས་པའི་བུམ་པ་སོ་སོའི་མཚན་མས་
[112a.2]མཚན་པ་ཕྱིའི་དཀྱིལ་འཁོར་གྱི་ཕྱི་རོལ་དུ་དཀྱིལ་འཁོར་ཀུན་ལ་བསྐོར་ཏེ་བཞག་ལ། བུམ་པ་གང་བ་ལ་ཡང་དེའི་སྔགས་བརྒྱ་རྩ་བརྒྱད་བཟླས་ཏེ་གཞག་པར་བྱའོ། །གལ་ཏེ་མེད་ན་བཅོམ་ལྡན་འདས་རྡོ་རྗེའི་སྙིང་པོའི་བུམ་པ་དང་། རྣམ་པར་སྣང་མཛད་དང་། རིན་ཆེན་ལྟ་བ་དང་། རིན་ཆེན་པདྨ་དང་།
[112a.3]རིན་ཆེན་ཆར་འབེབས་རྣམས་ཀྱི་རང་རང་གི་སྔགས་ཀྱིས་བུམ་པ་ལ་བཟླས་ནས་དབུལ་བར་བྱའོ། །ཨོཾ་བཛྲ་མཱ་ལེ་ཧཱུཾ། ཞེས་བྱ་བ་རིགས་ཀྱི་སྙིང་པོ་འདིས་དོན་ཐམས་ཅད་གྲུབ་པའི་བུམ་པ་ལ་ལན་བརྒྱ་རྩ་བརྒྱད་བཟླས་ནས་དོན་ཐམས་ཅད་གྲུབ་པའི་རིགས་ཀྱི་ལྷ་ཐམས་ཅད་ལ་དབུལ་བར་བྱའོ། །ཨོཾ་མ་ནི་
[112a.4]རཏྣེ་ཧཱུཾ། ཞེས་བྱ་བས་རིན་ཆེན་ལྟ་བའི་རིགས་ཀྱི་བུམ་པ་ལའོ། །ཨོཾ་དྷརྨྨ་རཏྣེ་ཧཱུཾ། ཞེས་བྱ་བས་རིན་ཆེན་པདྨའི་རིགས་ཀྱི་བུམ་པ་ལའོ། །ཨོཾ་དྲྀཥྚ་ཧྲཱི་ཧཱུཾ། ཞེས་བྱ་བས་རིན་ཆེན་ཆར་འབེེབས་ཀྱི་བུམ་པ་ལ་ལན་བརྒྱ་རྩ་བརྒྱད་བཟླས་ཏེ། རིན་ཆེན་ཆར་འབེེབས་ཀྱི་ལྷ་རྣམས་ལ་དབུལ་བར་བྱའོ། །
[112a.5]དེ་ནས་བདག་པོ་ལྔའི་བུམ་པ་གང་བ་དང་། རིགས་བཞིས་གང་བའི་བུམ་པ་བཞིས་དབུལ་བ་དང་། བྱམས་པ་ལ་སོགས་པ་རྣམས་ལ་གང་བའི་བུམ་པ་གཅིག་ལ་དེའི་རིག་པ་བཟླས་ནས་དབུལ་བར་བྱའོ། །གལ་ཏེ་མ་རྙེད་པར་གྱུར་ན་བཅུ་ལས་ཉུང་བར་མི་བྱའོ་ཞེས་བཅོམ་ལྡན་འདས་ཉིད་ཀྱིས་གསུངས་
[112a.6]སོ། །དེ་ནས་སྔ་མ་བཞིན་དུ་ཁྲུས་བྱ་བ་དང་། རྣལ་འབྱོར་ཆེན་པོ་ཡང་དག་པར་བསྒྲུབས་ལ། དོན་ཐམས་ཅད་གྲུབ་པའི་གཟུགས་དང་རྗེས་སུ་མཐུན་པའི་རྒྱན་གདགས་པ་གོས་ཐམས་ཅད་ལ་དྲི་དང་བདུག་པས་ལེགས་པར་བསྒོས་ནས་རིན་ཆེན་གནོད་སྦྱིན་ཡོངས་སུ་བཟླས་ཏེ། ཟེའུ་ཀ་བཅིང་
[112a.7]བ་ལ་སོགས་པ་དང་། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་གྱིས་རྒྱན་ཐམས་ཅད་ལ་མངོན་པར་བསྔགས་ལ། ཇི་ལྟར་རྗེས་སུ་མཐུན་པའི་སློབ་དཔོན་བདག་ཉིད་ལ་རྣམ་པར་བརྒྱན་ཏེ། ཡང་ཅོད་པན་ལ་རིན་པོ་ཆེའི་མྱུ་གུ་དང་། དར་དཕྱངས་ལ་རྡོ་རྗེ་རིན་ཆེན་ཡོངས་སུ་བཟླས་
[112b]
[112b.1]ཏེ། ཅོད་པན་དང་དར་དཔྱངས་ཀྱི་དབང་བསྐུར་བས། བདག་ཉིད་ལ་དབང་བསྐུར་ནས། མཆོད་པ་རྣམ་པ་ལྔས་ཡང་དག་པར་མཆོད་པར་བྱའོ། །དཀྱིལ་འཁོར་ཐམས་ཅད་མངོན་སུམ་ལྟ་བུར་བསམས་ནས། ཕྱག་བྱས་ལ་མཆོད་ཡོན་ཕུལ་མེ་ཏོག་ལ་སོགས་པས་ཡང་དག་པར་མཆོད་དེ། རྡོ་རྗེ་ནོར་བུ་དང་
[112b.2]རིན་པོ་ཆེའི་དྲིལ་བུ་བཟུང་སྟེ། གདོང་གཡོགས་ཀྱི་གོས་ལ་ནོར་བུའི་གནོད་སྦྱིན་དང་སྒོ་སྲུང་ཡོངས་སུ་བཟླས་ཏེ། གདོང་གཡོགས་བཅིངས་ལ་ལག་ན་མེ་ཏོག་ཐོགས་ནས། སློབ་དཔོན་གྱིས་ཕྱག་བཞི་བྱའོ། །དེ་ནས་སྡིག་པ་བཤགས་པ་ལ་སོགས་པ་བྱས་ཏེ། སྡོམ་པ་གཟུང་ལ། བྱང་ཆུབ་སེམས་ནི་
[112b.3]བླ་མེད་པ། །དམ་པ་བདག་གིས་བསྐྱེད་པར་བགྱི། །ཞེས་བྱ་བ་ལ་སོགས་པ་བྱའོ། །དེ་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་ལ་དབང་བསྐུར་ལ། རྡོ་རྗེ་ནོར་བུ་ཆེན་པོའི་དམ་ཚིག་གི་ཕྱག་རྒྱ་བཅིངས་ཏེ། འཇུག་པའི་ཆོ་གས་ཞུགས་པར་བྱའོ། །དེ་ནས་རྡོ་རྗེའི་ཆུ་འཐུངས་ལ་བདག་ཉིད་ལ་
[112b.4]དབབ་པར་བྱས་ཏེ། གཡོན་པའི་ཁྲོ་བོའི་ཁུ་ཚུར་གྱིས་ལག་པ་གཡས་པའི་རྡོ་རྗེ་ནོར་བུ་ཆེན་པོའི་དམ་ཚིག་གི་ཕྱག་རྒྱ་ལ། གཡོན་པའི་ཁྲོ་བོའི་ཁུ་ཚུར་གྱི་མཛུབ་མོས་ཡང་དང་ཡང་དྲལ་བར་བྱ་ཞིང་། ཨ་ཨ་ཞེས་ལན་བརྒྱ་བཟླའོ། །དེ་ནས་ཇི་ལྟ་བ་བཞིན་དུ་མེ་ཏོག་གི་ཕྲེང་བ་དོར་ལ། རང་གི་སྤྱི་བོར་བཅིང་
[112b.5]བ་དང་། གདོང་གཡོགས་བཀྲོལ་ཏེ་དཀྱིལ་འཁོར་བལྟས་ནས་དབབ་པ་ཉེ་བར་བསྡུ་བ་བྱའོ། །སློབ་དཔོན་གྱིས་དབང་བསྐུར་བའི་ཆོ་གས་དབང་བསྐུར་བར་བྱས་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། མིག་དབྱེ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ལ། ཚིགས་སུ་བཅད་
[112b.6]པ་གཉིས་ཀྱིས་རྗེས་སུ་གནང་བ་ནོས་ཏེ། དེ་ཁོ་ན་ཉིད་ཀྱིས་རྡོ་རྗེ་ནོར་བུ་བཟུང་ནས། ཆོས་ཀྱི་རིན་པོ་ཆེའི་དྲིལ་བུ་དཀྲོལ་ཏེ། དེ་ནས་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ཏེ། དོན་ཐམས་ཅད་གྲུབ་པའི་སྙིང་པོ་ཟློས་ཤིང་། དངོས་གྲུབ་ཀྱི་རྡོ་རྗེ་ནོར་བུའི་བརྟུལ་ཞུགས་བླངས་ཏེ། བཅོམ་ལྡན་འདས་
[112b.7]རྡོ་རྗེ་སྙིང་པོ་དང་། ཕྱག་རྒྱ་བཞིའི་ཡེ་ཤེས་བསླབ་པ་དང་། གཟེངས་བསྟོད་པ་དང་། ལུང་བསྟན་པ་ཡང་བླང་ངོ་། །ཡང་བདག་ལ་བྱིན་གྱིས་བརླབས་པ་དང་། ཕྱག་རྒྱ་དང་། ཅོད་པན་དང་། རྡོ་རྗེ་ནོར་བུ་དང་། བདག་པོ་དང་མིང་གི་དབང་བསྐུར་བ་ཡང་བདག་ཉིད་ཀྱིས་བྱས་ལ་བདག་ཉིད་ཡང་དག་པར་
[113a]
[113a.1]མཆོད་དེ། བསྒོམ་པར་བྱས་ནས་དོན་ཐམས་ཅད་གྲུབ་པ་བདག་ཡིན་ནོ་ཞེས་བྱ་བ་ལ་སོགས་པ་བདག་ཉིད་ཀྱི་མིང་གང་ཡང་རུང་བ་ནས་བརྗོད་ཅིང་། རྡོ་རྗེ་ནོར་བུ་དང་། རིན་པོ་ཆེའི་དྲིལ་བུ་གཟུང་བ་ཉིད་ཀྱིས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ཏེ། རྣམ་པར་སྣང་མཛད་
[113a.2]ཀྱི་གནས་སུ། ཨོཾ་བུདྡྷ་རཏྣ་ཧཱུཾ་ཨ་ཞེས་བྱ་བས། རྣམ་པར་སྣང་མཛད་ཀྱི་རྡོ་རྗེ་ནོར་བུས་མཚན་པའི་རྡོ་རྗེ་རྩེ་ལྔ་པ་བསམ་པར་བྱའོ། །དེ་ནས་བཛྲ་ཨ་ཧཾ་ཞེས་བྱ་བས་དེ་བཞིན་གཤེགས་པའི་རྡོ་རྗེའི་ང་རྒྱལ་དུ་བསྒོམ་པར་བྱའོ། །རྡོ་རྗེ་དེ་ཉིད་ཡ་ཐཱ་སརྦྦ་ཏ་ཐཱ་ག་ཏ་ཏ་ཐཱ་ཨ་ཧཾ་ཞེས་བྱ་བས་རྣམ་པར་སྣང་མཛད་
[113a.3]ཀྱི་བདག་ཉིད་བསྒོམ་པར་བྱའོ། །དེ་ལྟར་རྡོ་རྗེ་དྲིལ་བུའི་བར་གྱི་ཕྱག་རྒྱ་ཆེན་པོ་བཅིངས་ཏེ། ཨོཾ་མ་ཎི་རཏྣ་ཨ་ཨཱ་བེ་ཤ་ཞེས་བྱ་བས། རིན་ཆེན་འབེེབས་པའི་གནས་སུ་རིན་ཆེན་འབེེབས་པའི་ངོ་བོ་རིན་པོ་ཆེ་དྲིལ་བུར་བསམ་པར་བྱའོ། །རཏྣ་ཨ་བི་ཤ་གྷཙྜ་ཨ་ཧཾ་ཞེས་བྱ་བས། རིན་པོ་ཆེ་དྲིལ་བུའི་ང་
[113a.4]རྒྱལ་བསྒོམ་པར་བྱའོ། །རིན་པོ་ཆེ་དྲིལ་བུ་དེ། མ་ཎི་རཏྣ་ཨཱ་བེ་ཤ་ཧཾ། ཞེས་བྱ་བས་བྱང་ཆུབ་སེམས་དཔའ་ཆེན་པོ་རིན་ཆེན་ཆར་འབེེབས་པའི་སྐུར་བདག་ཉིད་བསམ་པར་བྱའོ། །དེ་ལྟར་དཀྱིལ་འཁོར་ཐམས་ཅད་རྡོ་རྗེས་བསྒྲུབ་པར་བྱའོ། །དེ་ནས་སྒོ་དབྱེ་བའི་ཕྱག་རྒྱས་དཀྱིལ་འཁོར་གྱི་སྒོ་ཕྱེ་ལ།
[113a.5]བསྡུ་བ་བྱས་ཏེ་མཚན་བརྒྱ་རྩ་བརྒྱད་པས་བསྟོད་དེ། སྒོ་ཐམས་ཅད་དུ་རིན་ཆེན་ལྕགས་ཀྱུ་ལ་སོགས་པ་ཕྱག་རྒྱ་རྣམས་ཀྱིས་ལས་བྱས་ནས་སྔ་མ་བཞིན་དུ་རྡོ་རྗེ་གནོད་སྦྱིན་གྱིས་བགེགས་བསྐྲད་ལ། ར་བ་དང་དྲ་བ་ཡང་བྱས་ནས། ནོར་བུའི་ཁུ་ཚུར་གྱི་དམ་ཚིག་གི་ཕྱག་རྒྱས་སྒོ་རྣམས་བཅད་ལ་ནོར་བུའི་སྲུང་
[113a.6]བས་བསྲུང་བ་ཐམས་ཅད་ཡང་དག་པར་བསྲུངས་ཏེ། དོན་ཐམས་ཅད་གྲུབ་པའི་སྙིང་པོ་འདིས་དཀྱིལ་འཁོར་གྱི་ལྷ་ཐམས་ཅད་ལ་མཆོད་ཡོན་ཕུལ་ནས། སྔ་མ་བཞིན་དུ་ཞལ་བསིལ་གྱི་ཕྱག་རྒྱས་ཀྱང་ཞལ་བསིལ་དབུལ་བར་བྱའོ། །དེ་ནས་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་བཅིངས་ཏེ། ཨོཾ་བུདྡྷ་རཏྣ་དྲྀ་ཤྱ་ཛཿཧཱུཾ་བཾ་ཧོཿ། ས་མ་ཡ་སྟྭཾ།
[113a.7]ས་མ་ཡ་སྟྭཾ་ཨ་ཧཾ། ཨོཾ་བུདྡྷ་རཏྣ་ཧཱུཾ་ཞེས་ལན་གསུམ་བརྗོད་ཅིང་རྣམ་པར་སྣང་མཛད་བསྒྲུབ་པར་བྱའོ། །དེ་བཞིན་དུ་ནོར་བུ་རིན་ཆེན་འབེབས་པའི་བར་དུ་དམ་ཚིག་གི་ཕྱག་རྒྱ་བཅིངས་ཏེ། ཨོཾ་མ་ཎི་རཏྣ་ཨཱ་བེ་ཤ་དྲྀ་ཤྱ་ཛཿཧཱུཾ་བཾ་ཧོཿ། ས་མ་ཡ་སྟྭཾ།
[113b]
[113b.1]ས་མ་ཡ་སྟྭཾ་ཨ་ཧཾ། ཨོཾ་མ་ཎི་རཏྣ་ཨཱ་བེེ་ཤ་ཨཱ། ཞེས་བྱ་བ་ལན་གསུམ་བརྗོད་ཅིང་། ནོར་བུ་རིན་ཆེན་འབེབས་པ་བསྒྲུབ་པར་བྱའོ། །སྔ་མ་བཞིན་དུ་བསྐལ་བ་བཟང་པོའི་དམ་ཚིག་གི་ཕྱག་རྒྱས་བསྐལ་བ་བཟང་པོ་སྔ་མས་བསྒྲུབ་པར་བྱའོ། །དེ་ལྟར་དམ་ཚིག་གི་ཕྱག་རྒྱས་རྣམ་པར་སྣང་མཛད་ལ་
[113b.2]སོགས་པ་ནས། བསྐལ་བ་བཟང་པོའི་མཐར་ཐུག་པ་བསྒྲུབས་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱས་རྣམ་པར་སྣང་མཛད་ལ་སོགས་པ་དབང་བསྐུར་ལ། རིན་པོ་ཆེའི་མྱུ་གུའི་དམ་ཚིག་གི་ཕྱག་རྒྱས་རིན་
[113b.3]པོ་ཆེའི་བསྐལ་པ་བཟང་པོ་ལ་མཐར་ཐུག་པ་ཐམས་ཅད་དབང་བསྐུར་ཏེ། མཆོད་ཡོན་ཕུལ་ནས་མཆོད་པའི་ཁྱད་པར་ཐམས་ཅད་ཀྱིས་ཡང་དག་པར་མཆོད་པར་བྱའོ། །དེ་ལ་དང་པོར་གོས་དང་རྒྱན་ཐམས་ཅད་ལ་ནོར་བུའི་གནོད་སྦྱིན་དང་། དོན་ཐམས་ཅད་གྲུབ་པ་དང་། ཡི་གེ་ཨོཾ་ཡོངས་སུ་བཟླས་
[113b.4]ཏེ། ལྷ་ཐམས་ཅད་ལ་དབུལ་བར་བྱའོ། །གདུགས་དང་རྒྱལ་མཚན་དང་། བླ་རེ་སྣ་ཚོགས་རྣམས་དང་། ཡང་མེ་ཏོག་གི་ཤིང་བརྒྱའམ། མེ་ཏོག་གི་ཤིང་བཞི་ལ། མེ་ཏོག་དང་། དེ་ནས་དྲི་དང་། བདུག་པ་དང་། ལྷ་བཤོས་དང་། མར་མེ་ལ་སྔ་མ་བཞིན་དུ་སྔགས་བཟླས་ལ་དབུལ་བར་བྱའོ། །
[113b.5]རོལ་མོ་བརྡུང་བའི་སྔགས་དང་། ཕྱག་རྒྱ་རྣམས་ཀྱིས་རོལ་མོ་ཐམས་ཅད་སྔར་བཤད་པ་བཞིན་དབུལ་བ་དང་། དར་ཡང་དཔྱང་བར་བྱ་བ་དང་། ཕྲེང་བ་སྔ་མས་རྣམ་པར་བརྒྱན། །དྲ་བ་དྲ་བ་ཕྱེད་པས་སྤྲས། །ཟླ་བ་ཕྱེད་པས་ཉེ་བར་མཛེས། །རྟ་བབས་ཡིད་དུ་འོང་བ་ཡི། །དྲིལ་བུ་ལ་སོགས་བཅད་པ་
[113b.6]དང་། །རྟ་དང་གླང་པོའི་ཁྱུ་རྣམས་དང་། །ཤིན་ཏུ་བརྟགས་ནས་དབུལ་བར་བྱ། །ནོར་བུའི་གནོད་སྦྱིན་དང་། དོན་ཐམས་ཅད་གྲུབ་པ་དང་། ཡི་གེ་ཨོཾ་མངོན་པར་བཟླས་ཏེ། དེ་ལ་མཆོད་པ་ཐམས་ཅད་དབུལ་བའི་སྙིང་པོ་ནི་འདི་ཡིན་ཏེ། བཛྲ་སྥ་ར་ཎ་ཁཾ། དེ་ནས་རིན་པོ་ཆེ་སྒེག་མོ་ལ་སོགས་པའི་
[113b.7]མཆོད་པ་རྣམ་པ་བརྒྱད་ཀྱིས་མཆོད་པ་དང་། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་གིས་དཀྱིལ་འཁོར་ཡང་དག་པར་མཆོད་ལ། ཡི་གེ་ཨོཾ་ལས་བྱུང་བའི་རིན་པོ་ཆེ་ལྔ་བདུན་ལ་སོགས་པས་ནམ་མཁའ་བཀང་ལ། ཨོཾ་སརྦྦ་བིཏྤཱུ་ར་པཱུ་ར་སུ་ར་
[114a]
[114a.1]སུ་ར་ཨཱ་བརྟ་ཨཱ་བརྟ་ཧོ། །ཞེས་བྱ་བ་འདིས་ཐལ་མོ་སྦྱར་ཏེ་ཕྱག་བཙལ་ནས་མཆོད་པའི་སྤྲིན་ཐམས་ཅད་དབུལ་བར་བྱའོ། །ཡང་རིན་ཆེན་སྒེག་མོ་ལ་སོགས་པ་གསང་བའི་མཆོད་པ་རྣམ་པ་བཞིས་ཡང་དག་པར་མཆོད་ལ་དངོས་གྲུབ་ཐམས་ཅད་འགྲུབ་པའི་ཕྱིར། སེམས་
[114a.2]ཅན་ཐམས་ཅད་ཀྱི་དོན་མཛོད་ཅིག་ཅེས་གསོལ་བ་གདབ་པར་བྱའོ། །དེ་ནས་རྡོ་རྗེ་དབྱིངས་ལས་གསུངས་པའི་ཆོ་གས་ཡང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་གསོལ་བ་བཏབ་སྟེ། ཕྱག་འཚལ་ནས་སློབ་མ་གཞུག་པའི་གནང་བ་ནོད་པར་བྱ་སྟེ། བདག་མིང་འདི་ཞེས་
[114a.3]བགྱི་བ་ཡིས། །རིན་ཆེན་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །ཞེས་བྱ་བ་ནི་རིན་པོ་ཆེ་སློབ་དཔོན་གྱི་ཆོ་ག་རྒྱས་པའོ། །དེའི་རྗེས་ལ་སློབ་མ་གཞུག་པར་བྱ་སྟེ། དང་པོར་རེ་ཞིག་ཇི་ལྟ་བ་བཞིན་དུ་ལྷག་པར་གནས་པ་
[114a.4]བྱས་ལ་དབང་བསྐུར་བར་འོས་པ་བསླབ་པའི་གཞི་ལྔ་ཡོངས་སུ་གཟུང་བའམ་དགེ་སྤྱོང་ངམ། དགེ་སློང་གི་སྡོམ་པ་ཡོངས་སུ་གཟུང་བའི་སློབ་མ་ལག་ན་མེ་ཏོག་ཐོགས་པ་སློབ་དཔོན་ལ་མངོན་པར་ཕྱག་ནས་འདི་སྐད་བརྗོད་པར་བྱའོ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་
[114a.5]ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྡོམ་པ་རྣམས་ཀྱང་བདག་ལ་གནང་། །དེ་ནས་ཇི་སྐད་དུ་བཤད་པའི་གོས་ཀྱིས་གདོང་གཡོགས་བཅིང་བ་དང་། སྟོད་གཡོགས་དང་སྨད་གཡོགས་བསྐོན་ཏེ། སྒོ་བཞི་ནས་
[114a.6]སློབ་མ་ཕྱག་བཞི་བྱེད་དུ་གཞུག་གོ། །ཕྱག་བཞི་བྱས་ཟིན་པ་དང་། ཡང་སློབ་དཔོན་ལ་ཕྱག་བྱས་ལ་ལག་ན་མེ་ཏོག་ཐོགས་པའི་ཐལ་མོ་སྙིང་གར་སྦྱར་ཏེ་བཞག་ལ་འདི་སྐད་ཅེས་བརྗོད་པར་བྱའོ། །ཕྱོགས་བཅུ་ན་བཞུགས་པའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་
[114a.7]དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་བདག་ལ་དགོངས་སུ་གསོལ། བདག་རིན་པོ་ཆེ་མིང་འདི་ཞེས་བགྱི་བས། ཕྱོགས་
[114b]
[114b.1]བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་ཀྱི་སྤྱན་སྔར་སྡིག་པ་ཐམས་
[114b.2]ཅད་སོ་སོར་བཤགས་པས་སོ་སོར་བཤགས་པར་བགྱིའོ། །ཕྱོགས་བཅུ་ན་འདས་པ་དང་མ་འོངས་པ་དང་། ད་ལྟར་བྱུང་བའི་སངས་རྒྱས་དང་། བྱང་ཆུབ་སེམས་དཔའ་རྣམས་དང་། རང་སངས་རྒྱས་དང་། འཕགས་པ་ཉན་ཐོས་དང་། ཡང་དག་པར་སོང་བ་དང་། ཡང་དག་པར་
[114b.3]ཞུགས་པ་རྣམས་སེམས་ཅན་གྱི་ཚོགས་ཐམས་ཅད་ཀྱི་བསོད་ནམས་ཐམས་ཅད་ལ་རྒྱ་ཆེར་ཡི་རང་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཆོས་ཀྱི་འཁོར་ལོ་བསྐོར་བར་མི་མཛད་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བྱ་བའི་ཕྱིར་བསྐུལ་བར་བགྱིའོ། །ཕྱོགས་
[114b.4]བཅུའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བར་བཞེད་པ་གང་ཡིན་པ་དེ་དག་ཐམས་ཅད་ལ་མྱ་ངན་ལས་མི་འདའ་བར་གསོལ་བར་འཚལ་ལོ། །དེ་ནས་འདི་སྐད་ཅེས་བརྗོད་པར་བྱ་སྟེ། གཙོ་བོ་བདག་ལ་སྡོམ་པ་སྩོལ། །ཐུབ་པ་ཉི་མ་མ་ལུས་པ། །སངས་རྒྱས་
[114b.5]བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ནི། །སློབ་དཔོན་དབང་དུ་གནས་པ་ལ། སངས་རྒྱས་རོལ་མོ་ལས་བྱུང་བའི། །མི་ལྡོག་འཁོར་ལོའི་འབྱོར་པར་ལྡན། །ཐར་པ་ཆེན་པོའི་གྲོང་ཁྱེར་མཆོག །གསང་བ་ཆེན་པོར་འཇུག་པར་བགྱི། །གསང་བ་རིགས་མཐོ་ཐམས་
[114b.6]ཅད་དུ། །སློབ་དཔོན་ཆེན་པོ་བདག་འཇུག་མཛོད། །མི་ལྡོག་པ་ཡི་དབང་བསྐུར་བ། །སྐལ་བ་ཆེན་པོ་བདག་ལ་སྩོལ། །མཚན་རྣམས་ཀུན་གྱིས་རྒྱས་བཏབ་ཅིང་། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་
[114b.7]བ་ནི་རྨད་པོ་ཆེ། །སེམས་ཅན་ཀུན་གྱི་དོན་བགྱིད་ཅིང་། །བདག་ནི་རྟག་ཏུ་སློབ་དཔོན་འགྱུར། །སློབ་དཔོན་ཆེན་པོ་བདག་ལ་སྩོལ། །དེ་ནས་སློབ་དཔོན་གྱིས་དཀྱིལ་འཁོར་གྱི་ལྷ་ཐམས་ཅད་ལ་གསོལ་བ་གདབ་པར་བྱ་སྟེ། ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་ཅིང་། །
[115a]
[115a.1]དམ་ཚིག་སྡོམ་དང་གསང་བ་ཡི། །འཁོར་ལོ་འདིར་ཡང་འཇུག་པར་འཚལ། །དེ་ནས་སློབ་དཔོན་གྱིས་ཀྱང་འདི་སྐད་ཅེས་བརྗོད་པར་བྱ་སྟེ། གསང་བ་ཆེན་པོ་རིགས་དག་པའི། །གསང་བ་ཡོངས་སུ་འཛིན་པར་ནི། །བདག་ཉིད་ཆེན་པོ་ཁྱོད་འདོད་དམ། །དེས་ཀྱང་འཚལ་ཞེས་
[115a.2]བརྗོད་པར་བྱའོ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་དག་པ་ཡི། །དམ་ཚིག་བརྟན་པར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ཡང་། །བློ་ཆེན་ཁྱོད་ཀྱིས་གཟུང་བར་གྱིས། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་
[115a.3]ཞེས་བཤད་དོ། །སློབ་དཔོན་དག་ཀྱང་གཟུང་བར་བགྱི། །འདི་ནི་སངས་རྒྱས་རིགས་དག་པའི། །སྡོམ་པ་དམ་ཚིག་ཡིན་པར་གསུངས། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རབ་ཏུ་སྦྱིན། །
[115a.4]ཕྱི་ནང་གསང་བའི་ཐེག་པ་གསུམ། །དམ་ཆོས་ཁྱོད་ཀྱིས་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་
[115a.5]བྱ། །དེ་ལས་གཞན་པ་བཅུ་བཞི་འདི། །ཕས་ཕམ་པར་ནི་རབ་ཏུ་བཤད། །སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བ་ཞེས་བཤད་དོ། །ཉིན་དང་མཚན་མོ་ལན་གསུམ་དུ། །ཉིན་རེ་ཞིང་ནི་བཟླ་བར་བྱ། །གང་ཚེ་ཉམས་འགྱུར་རྣལ་འབྱོར་པ། །ཁ་ན་མ་ཐོ་སྦོམ་པོར་འགྱུར། །ཁྱོད་ཀྱིས་
[115a.6]སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་ལོག་པར་མི་སྤྱད་ཅིང་། །བརྫུན་དུ་སྨྲ་བར་མི་བྱའོ། །ཕུང་ཁྲོལ་ཀུན་གྱི་རྩ་བ་ནི། །ཆང་ནི་རྣམ་པར་སྤང་བར་བྱ། །སེམས་ཅན་གདུལ་ཕྱིར་མ་གཏོགས་པ། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྟེན་བྱ་ཞིང་། །
[115a.7]རྣལ་འབྱོར་ཅན་རྣམས་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་རྣམས་དང་། །ཡིད་ཀྱི་རྣམ་པ་གསུམ་དག་ནི། །ཅི་ནུས་པར་ནི་རྗེས་སུ་བསྐྱང་། །ཐེག་པ་དམན་ལ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་པ་དག་ཡོངས་མི་སྤོང་། །
[115b]
[115b.1]རྟག་ཏུ་མྱ་ངན་འདས་མི་ཆགས། །ལྷ་དང་ལྷ་མིན་གསང་བ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་རྒྱ་བཞོན་པ་མཚོན་ཆ་དང་། །མཚན་མ་འགོམ་པར་མི་བྱ་ཞིང་། །འདི་དག་དམ་ཚིག་ཡིན་པར་བཤད། །ཁྱོད་ཀྱིས་རྟག་ཏུ་བསྲུང་བར་བྱ། །དེས་ཀྱང་འདི་སྐད་ཅེས་བརྗོད་པར་བྱ་སྟེ། །སློབ་དཔོན་
[115b.2]འདིར་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་བ། །དེ་ལྟར་བདག་ནི་བགྱི་བར་འཚལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་སེམས་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །
[115b.3]ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་རིགས་
[115b.4]མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལས། ཉིན་རེ་ཞིང་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་
[115b.5]བྱུང་བ། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་
[115b.6]མེད་པ། །དམ་པ་བདག་གིས་བསྐྱེད་བགྱི་ཞིང་། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་གྲོལ་བ་རྣམས་དགྲོལ་བར་བགྱི། །མ་བསྒྲལ་བ་རྣམས་བསྒྲལ་བར་བགྱི། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །
[115b.7]གང་ཞིག་སྡོམ་པ་འཛིན་པར་མི་བྱེད་པ་དེ་ལ་ནི་འཇུག་པ་ཙམ་ཞིག་བྱེད་དུ་གཞུག་གི །སློབ་དཔོན་དུ་རྗེས་སུ་གནང་བ་དང་དབང་བསྐུར་བར་ཡང་མི་བྱའོ། །དེ་ནས་ཨོཾ་སརྦྦ་ཡོ་གྩིཏྟ་ཨུཏྤཱ་ད་ཡཱ་མི་ཞེས་བྱ་བ་འདིས། བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་ནས་སུ། །དེ་ཡི་སྙིང་གར་
[116a]
[116a.1]སྙིང་པོ་ནི། །རྡོ་རྗེ་རབ་ཏུ་གཞག་པར་བྱ། །སུ་ར་ཏེ་ས་མ་ཡ་སྟྭཾ་ཧོ། བཛྲ་སིདྡྷི་ཡ་ཐཱ་སུ་ཁཾ། དེ་ནས་དོན་ཐམས་ཅད་གྲུབ་པའི་དམ་ཚིག་གི་ཕྱག་རྒྱ་དང་། རྡོ་རྗེ་ནོར་བུ་ཆེན་པོ་ལ་སོགས་པ་རྣམ་པ་བཞིས་དེ་དོན་ཐམས་ཅད་གྲུབ་པར་བྱིན་གྱིས་བརླབ་པར་བྱའོ། །དེ་ཕྱི་རོལ་ན་གནས་པའི་
[116a.2]དོན་ཐམས་ཅད་གྲུབ་པའི་བུམ་པས་དབང་བསྐུར་ལ། དྲི་དང་མེ་ཏོག་ལ་སོགས་པས་ཡང་དག་པར་མཆོད་དེ་ཡོན་གྱི་མཆོག་བླངས་ནས། རྡོ་རྗེ་ཤུགས་ཀྱིས་དཀྱིལ་འཁོར་ཆེན་པོར་འཇུག་པར་བྱའོ། །དེ་ལ་དང་པོར་རེ་ཞིག་སློབ་དཔོན་རྡོ་རྗེ་ནོར་བུའི་དམ་ཚིག་གི་ཕྱག་རྒྱ་བཅིངས་ལ། སློབ་མ་ཡང་
[116a.3]འཆིང་དུ་འཇུག་པར་བྱའོ། །སྙིང་པོ་ནི་འདི་ཡིན་ཏེ། ཨོཾ་བཛྲ་མ་ཎི་ས་མ་ཡ་བཾ། དེ་ནས་དེ་ཉིད་ཀྱི་མཛུབ་མོ་གཉིས་ཀྱིས་མེ་ཏོག་གི་ཕྲེང་བ་བླངས་ཏེ། ཨོཾ་ཧཱུཾ་པྲ་བི་ཤ་མ་ཎི་ཛ་ཛ་ཀུ་ལཾ་ཞེས་བྱ་བའི་སྙིང་པོ་འདིས་འཇུག་པར་བྱའོ། །དེ་ནས་རིན་ཆེན་ལྕགས་ཀྱུའི་ལས་ཀྱི་ཕྱག་རྒྱས་དགུག་པ་དང་། ཡང་
[116a.4]ལྷོ་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ། རིན་ཆེན་ཞགས་པའི་ལས་ཀྱི་ཕྱག་རྒྱས་གཞུག་པ་དང་། དེ་ནས་ནུབ་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ། རིན་ཆེན་ལྕགས་སྒྲོག་གིས་བཅིང་བ་དང་། དེ་ནས་བྱང་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ། རིན་ཆེན་ཞགས་པའི་ལས་ཀྱི་ཕྱག་རྒྱས་
[116a.5]དབང་དུ་བྱའོ། །ཡང་ཤར་ཕྱོགས་ཀྱི་སྒོ་ནས་ཞུགས་ལ་འདི་སྐད་ཅེས་བརྗོད་པར་བྱ་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་རིགས་སུ་ཞུགས་ཀྱི་ངས་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་དུ་གྲུབ་པ་ཡང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་
[116a.6]ཏེ། དེ་ལྟ་བུའི་ཡེ་ཤེས་བསྐྱེད་པར་བྱས་ནས། ཕྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་སྨྲ་བར་མ་བྱེད་ཅིག །ཁྱོད་དམ་ཚིག་ཉམས་པར་གྱུར་ཏ་རེ། དེ་ནས་རིན་ཆེན་སློབ་དཔོན་རང་ཉིད་ཀྱིས་རིན་ཆེན་ནོར་བུ་མའི་དམ་ཚིག་གི་ཕྱག་རྒྱ་བཅིངས་ཏེ། ཁ་ཐུར་དུ་བསྟན་པ་དང་གྱེན་དུ་བསྟན་པ་
[116a.7]བཅིངས་ལ། རིན་ཆེན་སློབ་མའི་སྤྱི་བོར་གཞག་སྟེ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་རྡོ་རྗེའི་དམ་ཚིག་ཡིན་གྱི་གལ་ཏེ་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་། མནའི་སྙིང་པོ་འདི་ལན་ཅིག་བཟླས་པའི་ཆུ་རིན་པོ་ཆེའི་སློབ་
[116b]
[116b.1]མ་དེ་འཐུང་དུ་གཞུག་གོ། །དེ་ལ་མནའི་སྙིང་པོ་ནི་འདི་ཡིན་ཏེ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ཨུ་ད་ཀ་ཋ། དེ་ནས་སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེང་ནས་བརྩམས་
[116b.2]ཏེ་ཁྱོད་ཀྱིས་ཕྱག་ན་རྡོ་རྗེ་ང་ཡིན་གྱིས། ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ། དེ་ནས་ཡང་འདི་སྐད་ཅེས་བརྗོད་པར་བྱ་སྟེ། འདི་ཁྱོད་ཀྱིས་སུ་ལ་ཡང་མ་
[116b.3]བརྗོད་ཅིག །ཁྱོད་ཚེ་རབས་ཐམས་ཅད་དུ་དབུལ་པོར་གྱུར་ཏ་རེ། སྡུག་བསྔལ་ལས་མི་འདའ་བར་གྱུར་ཏ་རེ། སེམས་ཅན་དམྱལ་བ་ན་ཡུན་རིང་དུ་གནས་པར་གྱུར་ཏ་རེ་ཞེས་བསྒོའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་རྡོ་རྗེ་སེམས་དཔའ་བདག་ལ་དབབ་པར་གྱུར་
[116b.4]ཅིག་ཅེས་སྨྲོས་ཤིག་ཅེས་བསྒོའོ། །དེ་ནས་རིན་ཆེན་སློབ་དཔོན་གྱིས་མྱུར་དུ་རྡོ་རྗེ་ནོར་བུ་མའི་དམ་ཚིག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དུ་གཞུག་གོ། །འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་འབབ་པར་ཤོག།།
[116b.5]བཛྲ་ཨཱ་བེ་ཤ་ཨཿ་ཞེས་ལན་བརྒྱའི་བར་དུ་བཟླ་བར་བྱའོ། །དེ་ནས་ཁྲོ་བོའི་ཁུ་ཚུར་བཅིངས་ནས། ཨོཾ་སརྦྦ་ཨརྠ་སིདྡྷ་པྲ་དཱ་ཧཱུཾ། ཞེས་བྱ་བའི་སྙིང་པོ་འདིས་རྡོ་རྗེ་ནོར་བུའི་དམ་ཚིག་གི་ཕྱག་རྒྱ་དྲལ་བར་བྱ་ཞིང་། ཨ་ཨཿཨ་ཨཿཞེས་ལན་བརྒྱའི་བར་དུ་བཟླས་ན། བཅོམ་ལྡན་འདས་ནམ་མཁའི་
[116b.6]སྙིང་པོ་ངེས་པར་འབབ་པར་འགྱུར་རོ། །དེ་ལྟར་བབས་པར་གྱུར་ནས་གང་གི་ཚེ་ནོར་བུས་མཚན་པའི་དམ་ཚིག་གི་ཕྱག་རྒྱ་འཆིང་བ་དེའི་ཚེ། སློབ་དཔོན་གྱིས་ནོར་བུ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བར་བྱའོ། །གང་གི་ཚེ་ནོར་བུ་རྒྱལ་པོའི་ཕྱག་རྒྱ་འཆིང་བ་དེའི་ཚེ། སློབ་དཔོན་གྱིས་ནོར་
[116b.7]བུ་གནོད་སྦྱིན་གྱི་ཕྱག་རྒྱ་བཅིང་བར་བྱའོ། །གང་གི་ཚེ་ནོར་བུ་ཆགས་པའི་ཕྱག་རྒྱ་འཆིང་བ་དེའི་ཚེ། ནོར་བུ་བསྲུང་བའི་ཕྱག་རྒྱ་བཅིང་བར་བྱའོ། །གང་གི་ཚེ་ནོར་བུ་ལེགས་པའི་ཕྱག་རྒྱ་འཆིང་བ་དེའི་ཚེ། ནོར་བུ་མཆོད་པའི་ཕྱག་རྒྱ་བཅིང་བར་བྱའོ། །གང་གི་ཚེ་དེ་བཞིན་གཤེགས་པ་ཐམས་
[117a]
[117a.1]ཅད་དབང་བསྐུར་བའི་རིན་པོ་ཆེ་ཕྲེང་བ་འཆིང་བ་དེའི་ཚེ། ནོར་བུ་གསུང་བའི་ཕྱག་རྒྱ་བཅིང་བར་བྱའོ། །གང་གི་ཚེ་ནོར་བུ་ཉི་མའི་ཕྱག་རྒྱ་འཆིང་བ་དེའི་ཚེ། ནོར་བུ་འཁོར་ལོའི་ཕྱག་རྒྱ་བཅིང་བར་བྱའོ། །གང་གི་ཚེ་ནོར་བུ་དཔལ་གྱི་ཕྱག་རྒྱ་འཆིང་བ་དེའི་ཚེ། ནོར་བུ་རྣོན་པོའི་ཕྱག་རྒྱ་
[117a.2]བཅིང་བར་བྱའོ། །གང་གི་ཚེ་རིན་ཆེན་བཞད་པའི་ཕྱག་རྒྱ་འཆིང་བ་དེའི་ཚེ། གཏོང་བ་ཏིང་ངེ་འཛིན་ཡེ་ཤེས་ཀྱི་ཕྱག་རྒྱ་བཅིང་བར་བྱའོ། །དེ་བཞིན་དུ་དཀྱིལ་འཁོར་ཐམས་ཅད་ལ་ཡང་ཉེ་བར་བསྒྲུབ་པར་བྱའོ། །དེ་ནས་བབས་པ་དེའི་ལྕེ་ལ་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་བསམས་ལ། རྡོ་རྗེ་ལྕེར་བྱིན་
[117a.3]གྱིས་བརླབས་ནས། འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་བཤད་པའི་གར་གྱི་ཕྱག་རྒྱ་བཅིངས་ཏེ། བྲུ་ཏི་བཛྲ་ཞེས་བརྗོད་པར་བྱའོ། །དེ་ནས་རྡོ་རྗེ་ཚིག་གིས་དྲི་བར་བྱ་སྟེ། གཏེར་ཆེན་པོ་གང་ན་ཡོད་ཇི་ལྟར་ཐོབ་པར་འགྱུར་ཞེས་དྲིའོ། །དེ་ནས་བཅོམ་ལྡན་
[117a.4]འདས་ནམ་མཁའི་སྙིང་པོས་ཐམས་ཅད་གསུང་བར་འགྱུར་རོ། །དེ་ནས་ཕྲེང་བ་དེ་པྲ་ཏཱིཙྪ་རྔུབཛྲ་ཧོ། ཞེས་བྱ་བའི་སྙིང་པོ་འདིས་དཀྱིལ་འཁོར་ཆེན་པོར་དོར་བར་བྱའོ། །དེ་ནས་ཕྲེང་བ་དེ་བླངས་ལ། ཨོཾ་པྲ་ཏི་གྲྀཧྣ་སྭ་མི་མཾ་སཏྭ་མ་ཧཱ་བ་ལ་ཞེས་བྱ་བའི་སྙིང་པོ་འདིས་དེ་ཉིད་ཀྱི་མགོ་ལ་བཅིང་བར་བྱའོ། །དེ་ནས།
[117a.5]རྡོ་རྗེ་སེམས་དཔའ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །མིག་ནི་ཐམས་ཅད་འབྱེད་མཛད་དེ། །རྡོ་རྗེའི་མིག་ནི་བླ་ན་མེད། །ཧེ་བཛྲ་པཱ་ཤྱ་ཞེས་བྱ་བའི་སྙིང་པོ་འདིས་གདོང་གཡོགས་བཅིང་བ་དེ་བཞིན་དུ་བཀྲོལ་བར་བྱའོ། །དེ་ནས་རིན་ཆེན་ལྕགས་ཀྱུ་ནས་བརྩམས་ནས། རྣམ་པར་སྣང་
[117a.6]མཛད་ཀྱི་བར་དུ་བསྟན་པར་བྱའོ། །དེ་ནས་རྡོ་རྗེ་ནོར་བུའི་ཕྱག་རྒྱ་དེ་ཉིད་བཅིངས་ཏེ། སློབ་མའི་སྙིང་གར་སྙིང་པོ་འདིས་དགྲོལ་དུ་གཞུག་གོ། །ཏིཥྛ་བཛྲ་དྲྀ་ཌྷོ་མེ་བྷ་བ་ཤ་ཤྭ་ཏོ་མེ་བྷ་བ། ཧྲྀ་ད་ཡ་མེ་ཨ་དྷི་ཏིཥྛ་སརྦྦ་སིདྡྷིམྨེ་པྲ་ཡཙྪ་སརྦྦ་ཀརྨྨ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། །དེ་ནས་གང་ལ་
[117a.7]མེ་ཏོག་བབས་པའི་ལྷ་དེའི་ཕྱག་རྒྱ་བཅིངས་ལ། དེའི་གཟུགས་སུ་བསྐྱེད་ནས་རྡོ་རྗེ་ནོར་བུའི་དམ་ཚིག་གི་ཕྱག་རྒྱས་གནས་བཞིན་བྱིན་གྱིས་བརླབས་ལ། སྙིང་གར་རྡོ་རྗེ་རིན་པོ་ཆེ་དང་། ཡང་དཔྲལ་བར་རིན་པོ་ཆེའི་མྱུ་གུ། ལྐོག་མའི་ཕྱོགས་སུ་རྡོ་རྗེ་པདྨ། སྤྱི་གཙུག་ཏུ་རིན་ཆེན་ཆར་འབེེབས་མས་
[117b]
[117b.1]བྱིན་གྱིས་བརླབས་པར་བྱས་ལ། དེ་ནས་རང་གི་ལྷའི་ཕྱག་རྒྱ་ཆེན་པོ་བཅིང་ངོ་། །དེའི་རྗེས་ལ་ཕྱིའི་དཀྱིལ་འཁོར་གྱི་ནང་དུ་ཤར་གྱི་སྒོ་ལ་མངོན་པར་ཕྱོགས་པའམ། ཡང་ན་ཕྱིའི་དཀྱིལ་འཁོར་གྱི་ཕྱི་རོལ་དུ་པདྨ་དང་ཟླ་བའི་གདན་བྲིས་ལ་དེའི་སྟེང་དུ་བཞག་ནས་མཆོད་ཡོན་ཕུལ་ལ་མཆོད་པ་རྣམ་
[117b.2]པ་ལྔས་མཆོད་དེ། རང་གི་ལྷའི་དབང་བསྐུར་ཞིང་། དེའི་སྔགས་ཀྱང་བརྗོད་ལ། ཕྱིས་རྣམ་པར་རྒྱལ་བའི་བུམ་པ་ལས་རིན་པོ་ཆེའི་ཁུ་ཚུར་གྱིས་ཆུ་བླངས་ནས། དབང་བསྐུར་ཞིང་དེ་འཐུང་དུ་གཞུག་པར་བྱའོ། །དེ་ནས་གལ་ཏེ་ཡོད་ཅིང་འབྱོར་ན་སྔར་བཤད་པའི་ཆོ་གས་སྟོད་གཡོགས་
[117b.3]དང་སྨད་གཡོགས་བགོ་བ་དང་། ཟེའུ་ཀ་ཡང་དེ་ལ་བྱིན་ལ་ཟེའུ་ཀ་ལ་སོགས་པ་འཆིང་དུ་གཞུག་གོ། །སློབ་མ་ལ་རྡོ་རྗེ་རིན་པོ་ཆེའི་ཕྱག་རྒྱས་དབང་བསྐུར་བར་བྱའོ། །དེ་ནས་རྡོ་རྗེ་རྩེ་ལྔ་པས་མཚན་པའི་རྡོ་རྗེ་ནོར་བུ་སོར་དྲུག་པའི་ཚད་ཙམ་རིན་པོ་ཆེའི་དྲིལ་བུ་དང་བཅས་པ་སློབ་མའི་ལག་པར་སྦྱིན་པར་བྱའོ། །སྙིང་
[117b.4]པོ་ནི་འདི་ཡིན་ཏེ། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་སྦྱིན་པར་བྱ། །སངས་རྒྱས་ཀུན་དུ་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་དྷི་པ་ཏི་ཏྭཾ་ཨ་བྷི་ཥིཉྩ་མི་ཏིཥྛ་བཛྲ་ས་མ་ཡ་སྟྭཾ། དེ་ནས་བཛྲ་སཏྭ་ཏྭཾ་ཨ་བྷི་ཥིཉྩ་མི་བཛྲ་ནཱ་མ་ཨ་བྷི་ཥེ་ཀ་ཏ། ཞེས་བྱ་བའི་སྙིང་པོ་
[117b.5]འདིས། ཀྱེ་རྡོ་རྗེ་དོན་ཐམས་ཅད་གྲུབ་པ་ཞེས་བྱ་བ་ལ་སོགས་པའི་མིང་གི་དབང་བསྐུར་བར་བྱའོ། །སློབ་མས་རྡོ་རྗེ་ཐལ་མོ་བསྐོར་ནས། རིན་པོ་ཆེ་སློབ་དཔོན་ལ་ཕྱག་བྱས་ནས་ཡོན་གྱི་མཆོད་པ་ཕུལ་ཏེ། མེ་ཏོག་ལ་སོགས་པའི་དབང་བསྐུར་བ་བླང་བར་བྱའོ། །དེ་ནས་དྲི་ཆབ་ལ་སོགས་པ་དང་།
[117b.6]སྒེག་མོ་ལ་སོགས་པས་མཆོད་པར་བྱའོ། །སྡོམ་པ་འཛིན་པར་བྱེད་པ་དང་། སྡོམ་པ་མི་འཛིན་པའི་ཐུན་མོང་གི་དབང་བསྐུར་བའི་ཆོ་གའོ། །སྔོན་དུ་སློབ་དཔོན་དུ་དབང་བསྐུར་བར་འོས་པའི་ཁྱད་པར་བརྗོད་པར་བྱ་སྟེ། རྩ་བའི་དཀྱིལ་འཁོར་ལས་ཁྲུ་གཉིས་ཙམ་ཡོངས་སུ་དོར་བར་དབུ་མའི་
[117b.7]དཀྱིལ་འཁོར་གྱི་ཕྱེད་ཀྱི་ཚད་གྲུ་བཞི་པ། སྒོ་ནུབ་ཏུ་བལྟས་པ། ཤར་གྱི་སྒོ་ལ་མངོན་པར་ཕྱོགས་པའི་དཀྱིལ་འཁོར་ཚོན་སྣ་ལྔས་བྲིས་ལ། དབུས་སུ་པདྨ་འདབ་བརྒྱད་པ། དེའི་དབུས་སུ་རྡོ་རྗེ་ནོར་བུ་སྔར་བཤད་པའི་མཚན་ཉིད་དང་ལྡན་པས་བྲིས་ལ་རྩ་བའི་དཀྱིལ་འཁོར་བཞིན་དུ་དཀྱིལ་
[118a]
[118a.1]འཁོར་ཡང་དག་པར་མཆོད་པར་བྱའོ། །དེ་ལ་སེང་གེའི་ཁྲིའམ། པདྨ་དང་ཟླ་བ་བྲིས་ལ། གོས་ཀྱིས་གཡོགས་པ་ལ་ནོར་བུའི་གནོད་སྦྱིན་ཡོངས་སུ་བཟླས་ཏེ། དེ་བཞག་ནས། དེའི་གདན་གྱི་སྟེང་དུ་བླ་རེ་བྲེ་བ་དང་། གཡོན་ལོགས་སུ་དར་དཔྱངས་དང་མེ་ཏོག་གི་ཕྲེང་བས་བརྒྱན་པར་
[118a.2]བྱའོ། །གདུགས་དཀར་པོ་རིན་པོ་ཆེའི་ཏོག་ཅན་དང་། གཡོན་དུ་གོས་སྣ་ཚོགས་དང་། རྒྱལ་མཚན་དང་། བ་དན་སྣ་ཚོགས་པ་བཟུང་ལ། དོན་ཐམས་ཅད་གྲུབ་པ་དང་། ཡི་གེ་ཨོཾ་ཡོངས་སུ་བཟླ་བར་བྱའོ། །དེ་ནས་སློབ་མ་དོན་ཐམས་ཅད་གྲུབ་པའི་ཕྱག་རྒྱ་དོན་ཐམས་ཅད་གྲུབ་པའི་གཟུགས་སུ་བསྐྱེད་
[118a.3]ལ། དེའི་ཕྱག་རྒྱ་ཆེན་པོས་གཞག་སྟེ། སློབ་མའི་ལུས་ཀྱི་རྣལ་འབྱོར་ཆེན་པོའི་གནས་སུ་དམ་ཚིག་གི་ཕྱག་རྒྱ་རྣམས་ཀྱིས་རྣམ་པར་སྣང་མཛད་དང་དོན་ཐམས་ཅད་གྲུབ་པ་ནས་བརྩམས་ནས། ནོར་བུ་རིན་པོ་ཆེ་འབེབས་པའི་མཐར་ཐུག་པའི་བར་དུ་དགོད་པར་བྱའོ། །རྡོ་རྗེ་ནོར་བུ་མ་དང་། རིན་ཆེན་མྱུ་གུ་མ་
[118a.4]དང་། རྡོ་རྗེ་རིན་ཆེན་པདྨ་དང་། རྡོ་རྗེ་རིན་ཆེན་ཆར་འབེབས་རྣམས་ཀྱིས་བྱིན་གྱིས་བརླབས་ཏེ། དྲི་ལ་སོགས་པས་ཡང་དག་པར་མཆོད་པར་བྱའོ། །གདན་དེ་ལ་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་གཞག་སྟེ། མཆོད་ཡོན་ཕུལ་ལ་དྲི་ལ་སོགས་པས་མཆོད་པ་དང་། འཇིག་རྟེན་གསུམ་ལས་
[118a.5]རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་བཤད་པའི་རིག་པ་རྣམས་དང་། དཔལ་མཆོག་དང་པོ་ལས་བཤད་པའི་རོལ་མོའི་ཕྱག་རྒྱ་རྣམ་པ་བརྒྱས་ཇི་སྙེད་པའི་དུང་དང་རྔ་བོ་ཆེ་ལ་སོགས་པའི་རོལ་མོའི་ཁྱད་པར་རྣམས་ཀྱིས་བྱིན་གྱིས་བརླབས་ཏེ་དབུལ་བར་བྱའོ། །རིན་ཆེན་སྒེག་མོ་ལ་སོགས་
[118a.6]པས་ཡང་དག་པར་མཆོད་ལ། དེ་ནས་བཀྲ་ཤིས་ཀྱི་ཚིགས་སུ་བཅད་པ་གདོན་པར་བྱའོ། །དེ་ནས་རིན་པོ་ཆེ་ལྕགས་ཀྱུས་གང་བའི་བུམ་པ་ནས་བརྩམས་ཏེ། རྣམ་པར་སྣང་མཛད་ཀྱིས་གང་བའི་བུམ་པའི་དབང་བསྐུར་ནས། ཕྱིས་དོན་ཐམས་ཅད་གྲུབ་པས་གང་བའི་བུམ་པས་དབང་བསྐུར་བར་
[118a.7]བྱའོ། །དེ་ནས་སྔ་མ་ལྟར་བུམ་པ་ཐམས་ཅད་ཀྱིས་དབང་བསྐུར་ནས། ཕྱིས་རྣམ་པར་རྒྱལ་བའི་བུམ་པ་ལས་རིན་པོ་ཆེའི་ཁུ་ཚུར་གྱིས་ཆུ་བླངས་ཏེ། དབང་བསྐུར་བ་དང་འཐུང་དུ་གཞུག་པ་ཡང་བྱའོ། །ཨོཾ་སརྦྦ་རཏྣ་ཨཱ་ཀཪྵ་ཨཱརྱ་ཨ་ནུ་ན་མ་ཧཱ་སཏྭ་བྷ་ག་བཱ་ནྟཾ། ཨོཾ་ཨཱརྱ་ཨཱ་ཀཱ་ཤ་གརྦྷ་སྥོ་ཊ་ཡ་
[118b]
[118b.1]ཨཱ་ཀཪྵ་ཡ་ཤཱི་གྷྲཾ་ཧོ་ཛ། ཨོཾ་བཛྲ་ཨ་བྷི་ཥིཉྩ་ཞེས་བྱ་བ་ནས། དེ་བཞིན་དུ། ཨོཾ་སརྦྦ་ཨརྠ་སིདྡྷི་པྲ་དཱ་ཧཱུཾ། ཨོཾ་བཛྲ་ཨ་བྷི་ཥིཉྩ་ཞེས་བྱ་བའི་བར་དུ་བྱ་བ་ཡིན་ནོ། །དེ་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བཅིངས་ལ། སློབ་མ་དབང་བསྐུར་བའི་
[118b.2]གནས་སུ་གཞག་སྟེ། ཨོཾ་བཛྲ་རཏྣ་ཨ་བྷི་ཥིཉྩ་རཏྣ་ཨཱ་དྷི་པ་ཏི་ཏྲེ་པ་བ་ཊ་ཊ། ཞེས་བྱ་བའི་སྙིང་པོ་འདིས་ལན་སྟོང་གི་བར་དུ་བཟླ་བར་བྱའོ། །དེ་ནས་གོས་སེར་པོ་དང་རྒྱན་ཐམས་ཅད་ལ་ནོར་བུའི་གནོད་སྦྱིན་དང་། རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་ཡོངས་སུ་བཟླས་ཏེ་དེ་ལ་སྦྱིན་པར་བྱའོ། །
[118b.3]དྲི་ལ་སོགས་པ་དང་། རིན་ཆེན་སྒེག་མོ་ལ་སོགས་པ་རྣམས་ཀྱིས་མངོན་པར་མཆོད་ལ། རྡོ་རྗེ་རིན་ཆེན་མའི་མྱུ་གུའི་དམ་ཚིག་གི་ཕྱག་རྒྱས་དབང་བསྐུར་ནས་རིན་པོ་ཆེ་ལ་སོགས་པ་ལས་བྱས་པའི་རྡོ་རྗེ་རིན་པོ་ཆེའི་ཅོད་པན་དང་། དར་དཔྱངས་ལ་རྡོ་རྗེ་རིན་པོ་ཆེ་མྱུ་གུ་ཡོངས་སུ་བཟླས་ཏེ་དབང་བསྐུར་
[118b.4]བར་བྱའོ། །དེས་དབང་བསྐུར་ནས་རྡོ་རྗེ་རིན་པོ་ཆེ་དྲིལ་བུ་དང་བཅས་པ་སྔ་མ་བཞིན་དུ་བྱིན་ནས་མིང་གི་དབང་བསྐུར་བ་སྦྱིན་པར་བྱའོ། །དེ་ནས་མཆོད་པ་རྣམ་པ་ལྔ་དང་། རིན་ཆེན་སྒེག་མོ་ལ་སོགས་པ་བརྒྱད་ཀྱིས་ཡང་དག་པར་མཆོད་ལ། ཡི་གེ་པྲས་བྱིན་གྱིས་བརླབས་པའི་རིན་པོ་ཆེའི་མིག་ཐུར་
[118b.5]རམ། གསེར་ལ་སོགས་པའི་ཐུར་མ་ཐོགས་ཏེ། མདུན་དུ་འདུག་ལ་དེའི་མིག་འབྱེད་པ་ལྟར་བྱེད་ཅིང་འདི་སྐད་ཅེས་བརྗོད་པར་བྱ་སྟེ། ཇི་ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནི་ཏྲ་
[118b.6]ཨ་པ་ཧཱ་ར་པཱ་ཏྲ་ལཾ་ཧྲཱིཿཞེས་བྱའོ། །དེ་ནས་ཨཱ་བཛྲ་སཏྭ་ཞེས་བྱ་བ་མེ་ལོང་ལ་ཡོངས་སུ་བཟླས་ཏེ་བསྟན་ལ་ཆོས་ཀྱི་མཚན་ཉིད་བརྗོད་པར་བྱའོ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །ངོ་བོ་ཉིད་
[118b.7]མེད་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །ཧོ་ཞེས་བྱ་བས་མདའ་བསྐྱེད་ལ་གཞུ་དང་བཅས་ཏེ་བྱིན་ནས་འདི་སླད་ཅེས་བརྗོད་པར་བྱའོ། །འདིས་དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་གྱིས་ཤིག་
[119a]
[119a.1]ཅེས་བརྗོད་ཅིང་། ཡི་གེ་ཧོས་ཕྱོགས་བཞི་དང་། སྟེང་དང་། འོག་ཏུ་མདས་འཕེན་པའི་ཚུལ་དུ་བྱེད་དུ་གཞུག་གོ། །ཡང་མེ་ལོང་བླངས་ལ་ཨཱཿབཛྲ་སཏྭ་ཞེས་ཡོངས་སུ་ཟློས་ཤིང་འདི་སྐད་ཅེས་བརྗོད་པར་བྱའོ། །རྡོ་རྗེ་སེམས་དཔའ་མེ་ལོང་བཞིན། །དག་ཅིང་གསལ་ལ་རྙོག་པ་
[119a.2]མེད། །སངས་རྒྱས་ཀུན་བདག་རང་ཉིད་ནི། །བུ་ཁྱོད་ཀྱི་ནི་སྙིང་ལ་ཞུགས། །གང་འདི་དེ་བཞིན་གཤེགས་པ་ཐམས་ཅད་ཀྱི། བདག་པོ་བྱང་ཆུབ་ཀྱི་སེམས་འདི་ཡིན་པར་ཤེས་པར་གྱིས་ཤིག་ཅེས་བརྗོད་པར་བྱའོ། །དེ་ནས་བཛྲ་ཧེ་ཏུ་མཾ། ཞེས་བྱ་བས་འཁོར་ལོ་རྩིབས་བརྒྱད་པ་རྐང་པ་གཉིས་
[119a.3]ཀྱི་བར་དུ་བཞག་ལ་བཛྲ་བྷཱ་ཥ་རཾ་ཞེས་བྱ་བས་ལག་པ་གཡས་སུ་དུང་བྱིན་ནས་འདི་སྐད་ཅེས་བརྗོད་པར་བྱའོ། །དེང་ནས་བརྩམས་ཏེ་བྱང་ཆུབ་སེམས་བསྐྱེད་པ་ཙམ་གྱིས་ཆོས་ཀྱི་འཁོར་ལོ་བསྐོར་ཅིག །དེ་རིང་ཕན་ཆད་འཇིག་རྟེན་ལ། །སྐྱོབ་བ་ཆོས་ཀྱི་འཁོར་ལོ་བསྐོར། །ཆོས་ཀྱི་དུང་ནི་
[119a.4]བླ་མེད་པ། །མ་ལུས་ཀུན་དུ་གང་བར་གྱིས། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱད་པ་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོག །དེ་ལྟར་བྱས་ན་སངས་རྒྱས་ལ། །ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང་། །
[119a.5]ཀུན་དུ་ཁྱོད་ལ་སྲུང་བར་བྱེད། །དེ་ནས་དེ་བཞིན་གཤེགས་པ་ཐམས་ཅད་ཀྱི་ང་རྒྱལ་གྱིས། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བྱ་བས་གསང་སྔགས་ཀྱི་ཐེག་པ་འཆད་པའི་རྗེས་སུ་
[119a.6]གནང་བ་སྦྱིན་པར་བྱའོ། །ཡང་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་ལ། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། ཇི་ལྟར་སྣ་ཚོགས་འདུལ་འགྱུར་བ། །ནོར་བུའི་འཁོར་ལོ་རབ་ཏུ་བསྐོར། །ཞེས་བྱ་བ་དཀྱིལ་འཁོར་བྲི་བའི་རྗེས་སུ་གནང་བ་སྦྱིན་ནོ། །
[119a.7]དེ་ནས་ཡི་གེ་ཏྲཱཾ་ལས་རྡོ་རྗེ་རིན་པོ་ཆེ་དེ་འཕགས་པ་ནམ་མཁའི་སྙིང་པོར་བསམས་ལ། ཉི་མ་འདི་ནི་དམ་པ་སྟེ། །ཀུན་གཟིགས་དེ་བཞིན་གཤེགས་པ་ཡིན། ནམ་མཁའི་སྙིང་པོ་བཅོམ་ལྡན་འདས། །བསམ་པ་ཐམས་ཅད་རྫོགས་མཛད་པའོ། །ཞེས་བྱ་བ་འདིས་དེ་ཁོ་ན་ཉིད་སྦྱིན་པར་བྱའོ། །དེ་ནས་
[119b]
[119b.1]ཡི་གེ་ཨ་ལས་རིན་པོ་ཆེ་དྲིལ་བུ་བཅོམ་ལྡན་འདས་དོན་ཐམས་ཅད་གྲུབ་པར་བསམས་ལ། བསམ་པ་ཐམས་ཅད་གྲུབ་རྣམས་ཀྱིས། །བསམ་པ་གྲུབ་པ་དམ་པ་ཡིན། །དེ་ཡང་འདོད་པ་རབ་གྲུབ་ཕྱིར། །འདོད་དང་ཐར་པ་བདེ་བ་ཆེ། །ཞེས་བྱ་བས་ཆོས་ཀྱི་དྲིལ་བུ་དཀྲོལ་བ་སྦྱིན་པར་བྱའོ། །དེ་ནས་དམ་
[119b.2]ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ཏེ། མི་མཁོ་བ་ཡང་སྦྱིན་བྱ་ཞིང་། །འདོད་དང་བདེ་བ་ཐམས་ཅད་ཀྱིས། །བདག་ཉིད་དང་ནི་གཞན་རྣམས་ཀྱི། །བསམ་པ་ཐམས་ཅད་རྫོགས་པར་བྱ། །ཞེས་བྱ་བ་ནི་དམ་ཚིག་གོ། །སྙིང་པོ་བཟླས་པར་ཡང་བྱའོ། །དེ་སྐད་དུ་ཡང་། དེ་ཉིད་
[119b.3]ཀྱིས་ནི་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །ཞེས་གསུངས་པ་བརླབས་ནས་དངོས་གྲུབ་ཀྱི་རྡོ་རྗེ་རིན་པོ་ཆེའི་བརྟུལ་ཞུགས་སྦྱིན་པར་བྱ་སྟེ། འདི་དེ་སངས་རྒྱས་ཐམས་ཅད་ཀྱི། །ཕྱག་ན་རྡོ་རྗེ་ལག་ན་འདུག །
[119b.4]ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་ཏྭཾ་དྷ་ར་ཡཱ་མི་བཛྲ་སཏྭ་ཧི་ཧི་ཧི་ཧི་ཧཱུཾ་ཞེས་བྱའོ། །དེ་ནས་ཆོ་ག་འདིས་སྙིང་པོ་འདི་སྦྱིན་པར་བྱ་སྟེ། དེ་ལ་དང་པོར་ལག་ན་མེ་ཏོག་ཐོགས་པའི་སློབ་མས་དཀྱིལ་འཁོར་གྱི་
[119b.5]ལྷ་ཐམས་ཅད་ལ་ཕྱག་བྱ་བ་དང་། རྡོ་རྗེ་སློབ་དཔོན་ལ་ཡང་ཕྱག་བྱས་ཡོན་གྱི་མཆོག་ཕུལ་ཏེ། སློབ་དཔོན་ལ་སྙིང་པོ་ལ་སོགས་པ་བླང་བའི་ཕྱིར། ལན་གསུམ་གསོལ་བ་གདབ་པར་བྱའོ། །དེ་ལྟར་སློབ་མ་ལག་ན་མེ་ཏོག་ཐོགས་ཤིང་ཡན་ལག་འདུད་པས་སྙིང་པོ་ལ་སོགས་པ་དོན་དུ་གཉེར་བ་
[119b.6]ཤེས་ནས་སློབ་དཔོན་གྱིས་ཡིད་ཀྱི་སྙིང་པོ་ལ་སོགས་པའི་དོན་དུ་ལྷ་ལ་གསོལ་བ་གདབ་པར་བྱའོ། །སློབ་དཔོན་གྱིས། ཨོཾ་སརྦྦ་ཨརྠ་སིདྡྷི་པྲ་དཱ་ཧཱུཾ། ཞེས་བྱ་བ་ལ་སོགས་པ་ཟློས་ཤིང་། དྲི་དང་མེ་ཏོག་ལ་སོགས་པ་ལ་ལན་བརྒྱ་མངོན་པར་བསྔགས་ནས་འདི་རང་གིས་ཟུང་ཤིག་ཅེས་བརྗོད་ལ་
[119b.7]མངོན་པར་བསྔགས་པའི་མེ་ཏོག་དེ་སློབ་མའི་ལག་ཏུ་སྦྱིན་པར་བྱའོ། །དེ་ནས་སློབ་དཔོན་གྱིས་འདི་སྐད་ཅེས་བརྗོད་པར་བྱ་སྟེ། འདི་ནི་བཅོམ་ལྡན་འདས་དང་བཅོམ་ལྡན་འདས་མའི་སྣོད་དུ་གྱུར་པ་ལགས་ཏེ། བཅོམ་ལྡན་འདས་དང་བཅོམ་ལྡན་འདས་མ་འདི་ལ་བདག་གིས་སྩལ་ལགས་སོ།
[120a]
[120a.1]ཁྱེད་འདི་དང་ཉེ་བར་མཛོད་ཅིག །ཁྱེད་བཅོམ་ལྡན་འདས་མ་འདི་དང་ཉེ་བར་མཛོད་ཅིག །དེ་ནས་སློབ་མས་ཨོཾ་སརྦྦ་ཨརྠ་སིདྡྷི་པྲ་དཱ་ཧཱུཾ་ཞེས་བྱ་བ་གསུངས་པ་འདིས་བཅོམ་ལྡན་འདས་དང་བཅོམ་ལྡན་འདས་མ་བདག་གིས་གཟུང་ལགས་སོ། །དེ་བཞིན་དུ་བཅོམ་ལྡན་འདས་དང་བཅོམ་ལྡན་
[120a.2]འདས་མའི་སྣོད་དུ་གྱུར་པ་བདག་ལགས་སོ། །ཁྱེད་བདག་དང་ཉེ་བར་མཛོད་ཅིག །བཅོམ་ལྡན་འདས་མ་ཁྱེད་བདག་དང་ཉེ་བར་མཛོད་ཅིག་ཅེས་བརྗོད་པར་བྱའོ། །འདིར་སློབ་དཔོན་དང་སློབ་མས་ལན་གསུམ་བརྗོད་དགོས་པར་ཤེས་པར་བྱའོ། །དེ་ནས་མེ་ཏོག་དེ་རང་གི་སྤྱི་བོར་གཞག་སྟེ། སྔ་མ་བཞིན་
[120a.3]དུ་ཇི་ལྟར་ཐོབ་པའི་སྙིང་པོ་ལ་སོགས་པ་ལན་བརྒྱ་རྩ་བརྒྱད་དཀྱིལ་འཁོར་གྱི་མདུན་དུ་བཟླས་པར་བྱའོ། །སྙིང་པོ་ལ་སོགས་པའི་ཡི་གེ་མང་ན་གྲོ་ག་ལ་གི་ཝང་གིས་ཡི་གེ་བྲིས་ལ་ལན་གསུམ་བཟླས་ཏེ་སྔར་བཤད་པ་ཉིད་ཀྱི་ཚུལ་དུ་སྦྱིན་པར་བྱའོ། །བྱིན་ནས་ཡོན་གྱི་མཆོག་དབུལ་བ་དེ་བཤད་པར་བྱ་སྟེ།
[120a.4]དེ་ལ་ཡོན་གྱི་མཆོག་ནི་འདི་ཡིན་ཏེ། ཐམས་ཅད་གྲུབ་འདོད་བླ་མ་ལ། །སྣ་ཚོགས་དམ་པས་ཡོན་ཕུལ་ཏེ། །གང་ཡང་གཏོང་བར་མི་ཕོད་པ། །དེ་དང་དེ་ནི་དམ་པ་བཤད། །ཅུང་ཟད་ཡིད་འོང་གང་དང་གང་། །ཤིན་ཏུ་ཁྱད་པར་གྱུར་དེ་ཉིད། །མི་ཟད་དེ་ཉིད་འདོད་པ་ཡིས། །དེ་དང་དེ་ནི་བླ་མར་དབུལ། །ཡང་
[120a.5]ན་མངོན་པར་འདོད་པའི་རྫས། །ཆུང་ཡང་ཕན་པ་མཆོག་ཡིན་པས། །ཡང་ན་དེ་ཡི་ལས་བྱའོ། །གལ་ཏེ་བཟང་པོ་ཡོད་ན་ཡང་། །མ་བྱིན་ངན་པའི་ཡོན་བདག་དང་། །སློབ་དཔོན་ལ་ནི་སྨོད་པ་སྟེ། །རྟག་ཏུ་སྡུག་བསྔལ་ཐོབ་པར་འགྱུར། །དེ་ལྟར་དེ་བཞིན་གཤེགས་པའི་རིགས་བསྒྲུབ་པའི་ཡོན་ཏན་
[120a.6]བསྟན་ནས་ནི། དེ་བཞིན་གཤེགས་པ་སྒྲུབ་པ་ནི། བུ་མོ་ཤིན་ཏུ་བརྒྱན་པའམ། །ཆུང་མའམ་དེ་བཞིན་ཡིད་འོང་མ། །སངས་རྒྱས་བྱང་ཆུབ་མཆོག་གི་ཡོན། །ཕུལ་ནས་ཡོན་གྱིས་བླུ་བར་བྱ། །ཞེས་གསུངས་སོ། །དེ་བཞིན་གཤེགས་པ་སྒྲུབ་པའི་ཡོན་ཏན་བསྟན་ནས། རྡོ་རྗེ་རིགས་བསྒྲུབ་
[120a.7]པའི་ཕྱིར། ཕྱུགས་ཆེན་རང་ཉིད་ཕུལ་ནས་ནི། །སླར་ཡང་རིན་གྱིས་བླུ་བར་བྱ། །རྡོ་རྗེ་འཛིན་དང་མཉམ་སྦྱོར་བ། །ཡོན་གྱི་མཆོག་ཏུ་བསྔགས་པ་ཡིན། །ཞེས་གསུངས་སོ། །ད་ནི་པདྨའི་རིགས་སྒྲུབ་པ་པོས། །མུ་ཏིག་ཕྲེང་བ་བཅང་བ་དང་། །གོས་ཟུང་ཤིན་ཏུ་དཀར་བའམ། །རྟ་དཀར་
[120b]
[120b.1]བའམ་རྟ་དག་ནི། །པདྨའི་ཡོན་གྱི་མཆོག་ཡིན་ནོ། །ཞེས་གསུངས་སོ། །རིན་པོ་ཆེའི་རིགས་བསྒྲུབ་པའི་ཕྱིར། །རྒྱལ་སྲིད་དང་ནི་ནོར་རྣམས་ནི། །གོས་དང་རྒྱན་རྣམས་བསགས་པ་དང་། །དེ་བཞིན་མཆོད་པ་ཐམས་ཅད་ཉིད། །རྡོ་རྗེ་ཉི་མའི་ཡོན་ཡིན་ནོ། །ཞེས་གསུངས་སོ། །རྟ་མཆོག་
[120b.2]སྒྲུབ་པར་བྱེད་པས་ན། །རྟ་རྣམས་ཤིན་ཏུ་བརྒྱན་པ་དང་། །གླང་པོ་ལེགས་པར་བརྟགས་པ་དང་། །ཤིང་རྟ་རིན་ཆེན་གྱིས་བཀང་བ། །རྟ་མཆོག་གི་ནི་ཡོན་དུ་འགྱུར། །ཞེས་གསུངས་སོ། །དེ་ལྟར་སྙིང་པོ་ལ་སོགས་པ་བྱིན་ནས་རྡོ་རྗེ་དབྱིངས་ལ་སོགས་པའི་རིགས་ཀྱི་དཀྱིལ་འཁོར་ཐམས་
[120b.3]ཅད་ཀྱི་ཕྱག་རྒྱ་བཞིའི་ཡེ་ཤེས་བསླབ་པ་དང་། རིན་ཆེན་འབྱུང་ལྡན་གྱི་རྣལ་འབྱོར་མངོན་དུ་བྱས་ལ་ཕྱག་རྒྱ་བཅིངས་ཏེ་སློབ་མ་ཐམས་ཅད་ལུང་བསྟན་པར་བྱའོ། །ཨོཾ་འདིར་ནི་ངས་ཁྱོད་ལུང་བསྟན་བྱ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཀུན་དུ་གྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་
[120b.4]བཏོན། །ཀྱེ་རྡོ་རྗེ་ཆེ་གེ་མོ་ཞེས་བྱ་བ་དེ་བཞིན་གཤེགས་པ་སིདྡྷི་ས་མ་ཡ་སྟྭཾ་བྷུར་བྷུ་བ་སྭཱ་ཧཱ། དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ། གཡོན་པ་ཆོས་གོས་འཛིན་པའི་ཚུལ་དུ་བྱས་ལ་གཡས་པ་མཆོག་སྦྱིན་པའི་ཚུལ་དུ་བྱས་ལ་འདི་ནི་གཟེངས་བསྟོད་པ་ཞེས་བྱ་བའི་ཕྱག་རྒྱ་སྟེ། ཆོ་ག་ལྷག་
[120b.5]མ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པས་ཤེས་པར་བྱའོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་དམ་ཚིག་དང་དབང་བསྐུར་བའི་སློབ་དཔོན་གྱིས་ཇི་ལྟར་འདོད་པའི་དངོས་གྲུབ་
[120b.6]ཀྱི་ཡེ་ཤེས་བཤད་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི། དེའི་ཕྱིར་འཇུག་པའི་ཆོ་ག་རྒྱས་པའི་རྗེས་ཐོགས་ལའོ། །ཅི་ཡོད་པ་དང་ཅི་འབྱོར་པའི་མི་རྣམས་ཀྱི་ལོངས་སྤྱོད་ཆ་བཅུར་བགོས་ནས་མཆོད་པ་བྱའོ། །
[120b.7]མཆོད་པ་དེ་བྱས་ནས་དགོས་པ་ཐམས་ཅད་ནི་དོན་ཐམས་ཅད་ལ་སོགས་པའོ། །བསྒྲུབ་པར་བྱ་བ་ནི་ཕྱིས་འཆད་པར་འགྱུར་བས་སོ། །དེ་ནས་ཞེས་བྱ་བ་ནི་སྐབས་སུ་བབ་པའོ། །འདི་ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའོ། །ཡེ་ཤེས་ཀྱི་ཕྱག་རྒྱ་སྟེ། གཏེར་ངེས་པའི་ཡེ་ཤེས་ཀྱི་ཕྱག་རྒྱར་
[121a]
[121a.1]འགྱུར་རོ། །རྡོ་རྗེ་སྙིང་པོའི་ཕྱག་རྒྱ་ཆེ། །ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་དང་དེའི་རིགས་ནོར་བུའི་མཚན་མ་ལ་སོགས་པའི་ཕྱག་རྒྱ་ཆེན་པོ་ནི། རྡོ་རྗེ་སྙིང་པོའི་ཕྱག་རྒྱ་ཆེན་པོ་བཅིངས་ནས་ཞེས་
[121a.2]བྱ་བ་ཡིན་པས་ཞེས་བྱ་བ་ནི་ངེས་པར་གཟུང་བ་སྟེ། དེ་བཅིངས་པ་ཉིད་ཅེས་བྱ་བའི་ཐ་ཚིག་གོ། །ཤིན་ཏུ་མཉམ་པར་གཞག་པ་ནི། །རབ་ཏུ་མཉམ་པར་གཞག་པ་སྟེ། །རྣམ་པར་གཡེང་བ་མེད་པའི་སེམས། །གཏེར་བརྐོས་ནས་ནི་གང་དག་ན། །ཞེས་བྱ་བ་ནི། ཕྱོགས་གང་དང་གང་ན་གཏེར་
[121a.3]ཡོད་པར་རེ་བའི་ཕྱོགས་དེར་བརྐོས་ན། ངེས་པར་གཏེར་ཡོད་པ་དེ་མཐོང་བར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་དོན་ཐམས་ཅད་གྲུབ་པའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་བྱས་ཏེ། དེའི་ཕྱག་
[121a.4]རྒྱ་ཆེན་པོ་དང་ནོར་བུའི་མཚན་མ་ལ་སོགས་པ་དེ་དང་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ནས། ཨོཾ་མ་ཧཱ་མ་ཎི་རཏྣ་ཨ་བྷི་ཥ་ཧཱུཾ་ཞེས་བྱ་བས་བདག་ཉིད་གསེར་གྱི་མདོག་ཅན་གྱི་ནམ་མཁའི་སྙིང་པོར་བསྒོམས་ནས་རང་གི་སྙིང་གའི་ཟླ་བ་ལ་ཏྲ་ལས། རྡོ་རྗེ་ནོར་བུ་བསྐྱེད་དེ། དེའི་དབུས་སུ་ཡི་གེ་འདི་
[121a.5]རྣམས་གསེར་གྱི་མདོག་ཅན་ཡིད་ཀྱིས་བྲིས་ལ་སྙིང་པོ་ཟློས་ཤིང་ཉིན་རེ་ཞིང་ཐུན་བཞིའི་སྦྱོར་བས་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་ཏུ་རང་ཉིད་བསྒོམས་ཏེ། མཚན་ཐོག་ཐག་བསྒོམས་ན། དེས་གང་ན་གཏེར་ཡོད་པར་རེ་བ་དེར་སྔར་བཤད་པའི་ཆོ་གས་བདག་དང་གནས་བསྲུང་བ་
[121a.6]བྱས་ལ། རང་གི་ལྷའི་རྣལ་འབྱོར་བསྒོམས་ཏེ། རང་གི་ལྟ་སྤྱན་དྲངས་ནས་མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་ཡང་དག་པར་མཆོད་ལ། ཞིང་དང་ཞིང་སྐྱོང་རྣམས་སྔ་མ་བཞིན་དུ་རིན་པོ་ཆེ་ལྕགས་སྒྲོག་གིས་བཅིངས་ཏེ། བཅོམ་ལྡན་འདས་ཀྱི་བདེན་པ་དང་། སེམས་ཅན་ཐམས་
[121a.7]ཅད་ཀྱི་བསམ་པ་ཡོངས་སུ་རྫོགས་པར་བྱེད་པའི་བདེན་པ་གང་ཡིན་པ་དེས་གཏེར་བདག་གིས་མཐོང་བ་དང་། དངོས་གྲུབ་རབ་ཏུ་སྩལ་དུ་གསོལ། ཞེས་བདེན་པའི་བྱིན་གྱི་རླབས་བདར་བས་གང་གི་ཚེ། བཅོམ་ལྡན་འདས་བསྒོམས་པར་གྱུར་པ་དེའི་ཚེ། དེ་ནས་བརྐོས་ན་ངེས་པ་ཁོ་
[121b]
[121b.1]ནར་རྙེད་པར་འགྱུར་རོ། །དམ་ཚིག་གི་ནི་མཆོག་བཅིངས་ལ། །ཞེས་བྱ་བ་ནི། རིན་ཆེན་ལྟ་བའམ། དེའི་རིགས་ནི་སྔ་མ་བཞིན་དུ་རྣལ་འབྱོར་བྱས་ལ། དེའི་དམ་ཚིག་གི་ཕྱག་རྒྱ་དང་། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་རིན་པོ་ཆེའི་ཕྲེང་བ་ལ་སོགས་པ་རིན་པོ་ཆེའི་
[121b.2]རིགས་རྣམས་ཀྱི་དམ་ཚིག་གི་ཕྱག་རྒྱ་བཅིངས་ཏེ། གང་ན་གཏེར་རྣམས་ཡོད་གྱུར་པ། །ཞེས་བྱ་བ་ནི་སྔ་མ་བཞིན་ནོ། །དེར་ནི་ཕྱག་རྒྱ་བཅིངས་ནས་ནི། ཞེས་བྱ་བ་ནི་དེ་བཞིན་གཤེགས་པ་བསྒྲུབ་པར་བྱས་ནས། གཏེར་གྱི་གནས་སུ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྦྱད་ལ།
[121b.3]དེར་དམ་ཚིག་གི་ཕྱག་རྒྱ་བཙིར་ན་དམ་ཚིག་གི་ཕྱག་རྒྱ་དེའི་བྱིན་གྱི་རླབས་ཀྱིས་ཨ་མྲ་ལ་སོགས་པ་ཡོངས་སུ་སྨིན་པའི་འབྲས་བུ་ཁ་ཕྱེ་བ་བཞིན་དུ་གཏེར་གྱི་ཆར་འབབ་པ་ཐམས་ཅད་བླང་བར་བསམས་ན། ངེས་པ་ཉིད་དུ་གཏེར་རང་གི་སྟེང་དུ་འབྱུང་བར་འགྱུར་རོ། །དེའི་ཚེ་སྔར་བཤད་
[121b.4]པའི་ཚུལ་གྱིས། ཨོཾ་མ་ཎི་རཏྣ་པྲ་ཏ་དྷ་ར་ཤ་ཡ། ཞེས་བྱ་བའི་སྙིང་པོ་འདི་བཟླ་བར་བྱའོ། །རྡོ་རྗེ་སྙིང་པོ་ཏིང་འཛིན་དུ། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཨོཾ་མ་ཎི་རཏྣ་སཾ་དྷི་བྷུ་ཧི། རིན་ཆེན་པདྨའི་ཕྱག་རྒྱ་ཆེན་པོ་དང་། དེའི་
[121b.5]རིགས་ཀྱི་ཕྱག་རྒྱ་ཆེན་པོ་དང་། བདག་ཉིད་གསེར་གྱི་མདོག་ཅན་དུ་བསྐྱེད་ལ། རང་གི་ལྕེ་ལ་སྙིང་པོ་འདི་ཡིད་ཀྱིས་བྲིས་ལ། སྔ་མ་བཞིན་དུ་བསྒོམ་པ་དང་བཟླས་པ་བྱས་ལ། དེ་ནས་བསྒྲུབ་པ་ཡང་དེ་བཞིན་དུ་བྱའོ། །དེ་ནས་གཏེར་གྱི་གནས་སུ་སོང་ལ་སྔ་མ་བཞིན་དུ་ཆོ་ག་རྗེས་སུ་སྤྱད་དེ་
[121b.6]བསྒོམས་ན། གང་གི་ཚེ་བྱིན་གྱིས་བརླབས་པའི་བར་དུ་བྱས་ན་རང་གི་ལྕེས་ཐམས་ཅད་སྨྲ་བར་འགྱུར་རོ། །ལས་ཀྱི་ཕྱག་རྒྱ་བཅིངས་ནས་ནི། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་རིན་ཆེན་ཆར་འབེབས་དང་། དེའི་རིགས་ཀྱི་རྣལ་འབྱོར་བྱས་ལ། ཨོཾ་རཏྣ་ཨ་བྷི་ཤ་དཪྴ་ཡ་ཞེས་སྙིང་པོ་བརྗོད་
[121b.7]ཅིང་། རིན་ཆེན་ཆར་འབེབས་ཀྱི་ལས་ཀྱི་ཕྱག་རྒྱའམ། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། བདག་ཉིད་རིན་ཆེན་ཆར་འབེབས་ཀྱི་གཟུགས་སམ། དེའི་རིགས་ཀྱི་ལྷའི་གཟུགས་སུ་བསྐྱེད་ལ། རང་གི་སྙིང་གར་རྡོ་རྗེ་རིན་ཆེན་ཆར་འབེབས་ཀྱི་ཕྱག་རྒྱའི་དབུས་སུ་སྙིང་པོ་འདི་ཡིད་ཀྱིས་བྲིས་
[122a]
[122a.1]ཏེ། སྔ་མ་བཞིན་དུ་བསྒོམས་ལ། དེ་ནས་དེ་བཞིན་དུ་བསྒྲུབ་པར་བྱའོ། །དེ་ནས་རེ་བའི་གནས་སུ་སྔར་བཤད་པའི་ཆོ་ག་རྗེས་སུ་སྤྱད་ལ། ཇི་སྲིད་དུ་བསྒོམས་པ་དེའི་ཚེ་དབང་དུ་འགྱུར་རོ། །དེ་ནས་བརྐོས་ན་གདོན་མི་ཟ་བར་གཏེར་རྙེད་པར་འགྱུར་རོ། །ཕྱག་རྒྱ་ཆེན་པོ་བསྒོམས་
[122a.2]ནས་ནི། །ཞེས་བྱ་བ་ལ་སོགས་པ་ལ། སྔ་མ་བཞིན་དུ་དོན་ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱས་ལ། དེ་ནས་དོན་ཐམས་ཅད་གྲུབ་པའི་ཕྱག་རྒྱ་ཆེན་པོའམ། དེའི་རིགས་ནོར་བུའི་མཚན་མ་ལ་སོགས་པའི་ཕྱག་རྒྱ་ཆེན་པོ་བཅིངས་ལ། ཨོཾ་མ་ཧཱ་མ་ནི་རཏྣ་ཀ་ཡ་དཪྴ་ཡ་རཏྣ་
[122a.3]ཞེས་བྱ་བའི་སྙིང་པོ་བརྗོད་ཅིང་། ནམ་མཁའི་སྙིང་པོ་དང་ནོར་བུའི་མཚན་མ་ལ་སོགས་པའི་གཟུགས་སུ་གསེར་གྱི་མདོག་ཅན་དུ་བསམས་ལ། ཐུགས་ཀའི་རྡོ་རྗེ་ནོར་བུའི་སྙིང་པོ་བཀོད་ལ་ཟློས་ཤིང་སྔ་མ་བཞིན་དུ་རྣམ་པར་བསྒོམས་ལ་མཚན་ཐོག་ཐག་བསྒྲུབ་པར་བྱའོ། །དེ་ནས་གཏེར་གྱི་གནས་
[122a.4]སུ་སོང་ལ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། དེ་ཇི་སྲིད་དུ་བསྒོམ་པ་དེའི་ཚེ། རང་གི་སྙིང་གའི་རྡོ་རྗེ་རིན་པོ་ཆེའི་འོད་ཟེར་བྱུང་ནས་ལུས་ལ་འཁོར་བར་འགྱུར་རོ། །དེ་ནས་རིན་ཆེན་གཏེར་ཡོད་པར། །དམ་ཚིག་གིས་ནི་ཤེས་པར་འགྱུར། །ཞེས་བྱ་བ་ནི་རིན་པོ་ཆེའི་འོད་ཟེར་གྱིས་བསྐོར་
[122a.5]བའི་ཚེ་ནའོ། །དམ་ཚིག་མཆོག་ནི་བཅིངས་ནས་ཀྱང་། །ཞེས་བྱ་བ་ལ་སོགས་པ་ནི་རིན་ཆེན་ལྟ་བ་དང་། དེའི་རིགས་ཀྱི་ལྷའི་རྣལ་འབྱོར་བྱས་ལ་ཕྱིས་དེའི་དམ་ཚིག་གི་ཕྱག་རྒྱ་བཅིངས་ཏེ། ཨཱ་ཀཱ་ཤ་གརྦྷ་མ་ཎི་རཏྣ་སྤུ་ཏ་སྤུ་ཏ་མ་ཏྲ་ནི་བི་དྷིཿཞེས་བྱ་བའི་སྙིང་པོ་ཟློས་ཤིང་རིན་ཆེན་ལྟ་བའམ།
[122a.6]དེའི་རིགས་ཀྱི་གཟུགས་སུ་བདག་ཉིད་བསྒོམས་ཏེ། དེ་ཉིད་ཀྱི་སྙིང་པོ་ཟློས་ཤིང་སྔ་མ་བཞིན་དུ་བསྒོམས་ལ་ཡང་དག་པར་བསྒྲུབས་ཏེ། གཏེར་གྱི་གནས་སུ་སོང་ལ་ཆོ་ག་ཐམས་ཅད་རྗེས་སུ་སྤྱད་ལ། ཇི་སྲིད་དུ་བསྒོམས་པ་དེ་སྲིད་དུ་རང་གི་སྙིང་གའི་རིན་པོ་ཆེ་ལས་འོད་ཟེར་བྱུང་བས་
[122a.7]ཕྱག་རྒྱ་ལ་ཁྱབ་པར་བབ་པར་འགྱུར་རོ། །དེ་ནས་རིན་པོ་ཆེ་ཆེན་པོའི་གཏེར་ཡོད་པར་ནི་ཤེས་པར་བྱ་ཞེས་བྱའོ། །ཏིང་འཛིན་ཕྱག་རྒྱ་བཅིངས་ནས་ནི། །ཞེས་བྱ་བ་ལ་སོགས་པ་ནི་བཅོམ་ལྡན་འདས་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཨོཾ་མ་ཎི་རཏྣ་ཛྙཱ་ན་ས་ཡཾ་བྲཱུ་ཧི།
[122b]
[122b.1]ཞེས་བྱ་བས་ལྕེ་ལ་བསམས་ནས་སྔ་མ་བཞིན་དུ་བསྒྲུབས་ལ། གཏེར་གྱི་གནས་སུ་སོང་སྟེ་ཆོ་ག་ཐམས་ཅད་རྗེས་སུ་སྤྱད་ལ། དེ་ཇི་སྲིད་དུ་བསྒོམས་པ་དེའི་ཚེ་འབབ་པར་འགྱུར་རོ། །དེ་ནས་རང་གི་ལྕེས་གང་ན་གཏེར་ཡོད་ཅེས་སྨྲ་བར་འགྱུར་རོ། །ལས་ཀྱི་ཕྱག་རྒྱ་བཅིངས་ནས་ཀྱང་། །ཞེས་བྱ་བ་ལ་
[122b.2]སོགས་པ་ནི། རིན་ཆེན་ཆར་འབེེབས་སམ། དེའི་རིགས་ཀྱི་རྣལ་འབྱོར་བྱས་ལ། ཨོཾ་པུ་ར་ས་མ་ཡ་བནྡྷ་དཪྵ་ཡ་སྭཱ་ཧཱ། ཞེས་བྱ་བའི་སྙིང་པོ་བརྗོད་ཅིང་། རིན་ཆེན་ཆར་འབེབས་སམ་དེའི་རིགས་ཀྱི་སྙིང་པོ་འདི་དང་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་གར་རིན་ཆེན་ཆར་འབེབས་ཀྱི་ཕྱག་རྒྱ་བསམས་
[122b.3]ལ་སྔ་མ་བཞིན་དུ་བསྒྲུབས་ཏེ། གཏེར་གྱི་གནས་སུ་སོང་ནས་ཆོ་ག་ཐམས་ཅད་རྗེས་སུ་སྤྱད་ལ། ཇི་སྲིད་དུ་བསྒོམས་པ་དེ་སྲིད་དུ་ལག་པ་གཉིས་ལས་ཡེ་ཤེས་བབས་ནས་ལས་ཀྱི་ཕྱག་རྒྱ་བཅིངས་པ་བཀྲོལ་ལ་དམ་ཚིག་གི་ཕྱག་རྒྱ་བཅིངས་ནས། བབས་ནས་དམ་ཚིག་བཅིངས་གྱུར་
[122b.4]པ། །དེ་ན་གཏེར་ནི་ཡོད་པར་བཤད། །ཅེས་བྱའོ། ཕྱག་རྒྱ་ཆེན་པོ་བསྒོམས་ན་ནི། །དེ་བཞིན་གང་དུ་དེ་འགྱུར་བ། །ཞེས་བྱ་བ་ནི་སྔ་མ་བཞིན་དུ་དོན་ཐམས་ཅད་གྲུབ་པ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་དེ་དང་དེའི་རིགས་ཀྱི་ལྷ་རྣམས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་
[122b.5]སྙིང་གར་རྡོ་རྗེ་རིན་པོ་ཆེ་དེའི་དབུས་སུ་ཡི་གེ་ཏྲ་བསམ་པར་བྱའོ། །ཨོཾ་ནི་དྷི་ཛྙཱ་ན་ཨཱ་བི་ཤ་ཞེས་བྱ་བ་ཡིད་ཀྱིས་བྲིས་ཏེ། སྔ་མ་བཞིན་དུ་བསྒྲུབ་པ་བྱས་ལ། ཇི་སྲིད་དུ་བསྒོམས་པ་དེའི་ཚེ་གཏེར་མཐོང་བར་འགྱུར་རོ། །དེ་ནས་བརྐོས་ནས་བླང་བར་བྱའོ། །གང་དུ་གཏེར་ཡོད་དེར་ཡང་ནི། །ཞེས་
[122b.6]བྱ་བ་ལ་སོགས་པ་ནི་སྔ་མ་བཞིན་དུ་རིན་ཆེན་ལྟ་བའམ། དེའི་རིགས་ཀྱི་རྣལ་འབྱོར་བྱས་ལ། དེའི་དམ་ཚིག་གི་ཕྱག་རྒྱ་དང་དེའི་རིགས་ཀྱི་ལྷའི་དམ་ཚིག་གི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་རིན་པོ་ཆེའི་དབུས་སུ། ཨོཾ་རཏྣ་ས་མ་ཡ་མུ་ཙ་ནི་དྷི་བནྡྷ། ཞེས་བྱ་བ་ཡིད་ཀྱིས་བྲིས་ཏེ་
[122b.7]སྔ་མ་བཞིན་དུ་བསྒྲུབས་ལ་གཏེར་གྱི་གནས་སུ་དམ་ཚིག་གི་ཕྱག་རྒྱ་བཅིངས་ལ། ཇི་སྲིད་དུ་བསྒོམས་པ་དེ་སྲིད་དུ་དམ་ཚིག་གི་ཕྱག་རྒྱ་རང་གྲོལ་བར་འགྱུར་རོ། །དེ་ནས་གཏེར་ཡོད་པ་ཡིན་ནོ་ཞེས་སྟོན་པར་འགྱུར་རོ། །ཏིང་འཛིན་ཕྱག་རྒྱ་བཅིངས་ནས་ནི། །གང་དུ་ངེས་པ་དེར་
[123a]
[123a.1]འགྱུར་བ། །ཞེས་བྱ་བ་ནི་རིན་པོ་ཆེ་པདྨའམ་དེའི་རིགས་ཀྱི་རྣལ་འབྱོར་བྱས་ཏེ། ཨོཾ་དྷརྨྨ་རཏྣ་པྲུ་ཧི་ནི་ཧ་ན་མ་ཞེས་བྱ་བས་ལྕེ་ལ་བཀོད་ལ་སྔ་མ་བཞིན་དུ་བསྒྲུབས་ཏེ། གཏེར་ཡོད་པའི་གནས་སུ་སོང་ནས། ཇི་སྲིད་དུ་བསྒོམས་པར་གྱུར་པ་དེ་སྲིད་དུ་འབབ་པར་འགྱུར་ཏེ།
[123a.2]དེར་ནི་ངེས་པར་གཏེར་ཡོད་པར། །ཡེ་ཤེས་བསྐྱེད་དེ་ཤེས་པར་བྱའོ། །གང་དང་གང་ན་རེ་བ་ཡོད། །ལས་ཀྱི་ཕྱག་རྒྱ་ཆོ་ག་བཞིན། །ཞེས་བྱ་བ་ནི་རིན་ཆེན་ཆར་འབེེབས་པའམ། དེའི་རིགས་ཀྱི་རྣལ་འབྱོར་བྱས་ལ། རང་གི་སྙིང་གར་རྡོ་རྗེ་རིན་ཆེན་ཆར་འབེེབས་དང་དེའི་སྟེང་དུ། ཨོཾ་སརྦྦ་
[123a.3]ཀརྨྨ་ཎི་སྥོ་ཊ་ཡ་དཪྴ་ཡ། ནི་དྷྲི་བྷནྡྷ་ཨོཾ་ཀྵི་པ། ཞེས་བྱ་བ་ཡིད་ཀྱིས་བྲིས་ཏེ། སྔ་མ་བཞིན་དུ་བསྒྲུབ་པ་བྱས་ལ་རིན་ཆེན་ཆར་འབེེབས་དང་། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། གང་དུ་འཇིག་རྟེན་པ་ཕལ་ཆེ་བས་ཐམས་ཅད་གཏེར་རེ་བར་གྱུར་པ་དེར་ཡོད་པར་འགྱུར་རོ། །དེར་ཇི་སྲིད་
[123a.4]བསྒོམས་པ་དེ་སྲིད་ཕྱག་རྒྱ་གཉིས་སུ་གྱུར་པ་དེར་གཏེར་ཡོད་པར་ཤེས་པར་འགྱུར་ཏེ། དེར་བཅིངས་དེ་ནི་གཉིས་འགྱུར་ན། །གཏེར་ནི་ཡོད་པར་ཤེས་པར་བྱ། །ཞེས་བྱའོ། །ཕྱག་རྒྱ་ཆེན་པོ་བསྒོམས་ནས་ནི། །གཏེར་རྣམས་ཀུན་དུ་བཙལ་ནས་ཀྱང་། །ཞེས་བྱ་བ་ནི། སྔ་མ་བཞིན་དུ་དོན་
[123a.5]ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱ་བ་ལ་ཕྱིས་དེའི་ཕྱག་རྒྱ་ཆེན་པོ་དང་། རིན་ཆེན་ནོར་བུ་ལ་སོགས་པ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་རྡོ་རྗེ་ནོར་བུའི་དབུས་སུ། ཨོཾ་མ་ཧཱ་རཏྣ་པ་རི་ཀྵ་བི་ཤུ་དྡྷི་ཡ་བི་ཤ །ཞེས་བྱ་བ་ཡིད་ཀྱིས་བྲིས་ཏེ། སྔ་མ་བཞིན་
[123a.6]དུ་བསྒྲུབ་པ་བྱས་ནས། གང་ལ་རེ་བར་གྱུར་པ་དེ་ན་གཏེར་ཡོད་པར་འགྱུར་རོ། །དེ་ལ་ཇི་སྲིད་དུ་བསྒོམས་པ་དེའི་བབས་པར་གྱུར་པ་དེའི་ཕྱིར། དེ་ན་གཏེར་ནི་ཡོད་པར་བཤད། །ཅེས་བྱའོ། །དམ་ཚིག་མཆོག་ནི་བཅིངས་ནས་ཀྱང་། །གཏེར་རྣམས་ཀུན་དུ་བཙལ་ནས་ཀྱང་། །ཞེས་བྱ་
[123a.7]བ་ནི་རིན་ཆེན་ལྟ་བའམ། དེའི་རིགས་ཀྱི་རྣལ་འབྱོར་བྱས་ལ། དེ་དང་དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་ནོར་བུ་རིན་པོ་ཆེའི་དབུས་སུ། ཨོཾ་རཏྣ་ས་མ་ཡ་ཏྲེ་དྷ་དཪྵ་ཡ་ཞེས་ཡིད་ཀྱིས་བྲིས་ནས་སྔ་མ་བཞིན་དུ་བསྒྲུབས་ཏེ། གཏེར་གྱི་གནས་སུ་ཇི་སྲིད་
[123b]
[123b.1]དུ་བསྒོམས་པ་དེའི་ཚེ་ཕྱག་རྒྱ་དགྲོལ་བར་མི་ནུས་པར་འགྱུར་བ་དེ་ན་གཏེར་ཡོད་པར་ཤེས་པར་བྱའོ། །ཏིང་འཛིན་ཕྱག་རྒྱ་བཅིངས་ནས་ནི། །དེ་རྣམས་ཀུན་ནས་བཙལ་ནས་ཀྱང་། །ཞེས་བྱ་བ་ནི་རིན་ཆེན་པདྨ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་རཏྣ་པ་རི་ཀྵ་ཛྙཱ་ན་ཨཱ་བེ་ཤ །
[123b.2]ཞེས་བྱ་བ་ལྟ་བ་ལ་ཡིད་ཀྱིས་བྲིས་ཏེ། སྔ་མ་བཞིན་དུ་བསྒྲུབས་ནས་ཇི་སྲིད་བསྒོམས་པ་དེའི་ཚེ་གཏེར་རྣམས་མཐོང་བར་འགྱུར་རོ། །ལས་ཀྱི་ཕྱག་རྒྱ་བཅིངས་ནས་ཀྱང་། །གཏེར་རྣམས་ཀུན་དུ་བཙལ་ནས་ཀྱང་། །ཞེས་བྱ་བ་ལ་རིན་ཆེན་ཆར་འབེབས་སམ། རིན་ཆེན་མཆོད་པ་ལ་
[123b.3]སོགས་པ་དེའི་རིགས་ཀྱི་རྣལ་འབྱོར་བྱས་ལ་རིན་ཆེན་ཆར་འབེབས་སམ་དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་ནོར་བུ་རིན་ཆེན་ཆར་འབེབས་བསམ་པར་བྱའོ། །དེའི་སྟེང་དུ། ཨོཾ་མ་ཎི་ཀརྨྨ་བྷྲ་མ་ཡ་ཞེས་བྱ་བ་ཡིད་ཀྱིས་བྲིས་ལ་སྔ་མ་བཞིན་དུ་བསྒྲུབས་ན།
[123b.4]གནས་གང་དུ་གཏེར་ཡོད་པ་ཡིན་ནོ་ཞེས། འཇིག་རྟེན་ཕལ་ཆེར་རེ་བར་འགྱུར་བ་དེར། ཇི་སྲིད་བསྒོམས་པ་དེའི་ཚེ་ལས་ཀྱི་ཕྱག་རྒྱ་འཁོར་བར་འགྱུར་རོ། །དེ་ནས་དེ་ན་གཏེར་ཡོད་པར་ཤེས་པར་འགྱུར་རོ། །དེ་ནས་གསང་བའི་ཕྱག་རྒྱའི་ཡེ་ཤེས་བསླབ་པར་བྱའོ་ཞེས་བྱ་བ་ནི་གཏེར་
[123b.5]གྱི་ལྷ་དང་མཉམ་པར་སྦྱོར་བས། བསྒོམ་པ་གསང་བའི་ཡེ་ཤེས་བསླབ་པར་བྱའོ། །དབང་པོ་གཉིས་ནི་མཉམ་སྦྱར་ལ། །གཏེར་རྣམས་ཀུན་དུ་ཚོལ་བྱེད་ཅིང་། །ཞེས་བྱ་བ་ནི་བཅོམ་ལྡན་འདས་དོན་ཐམས་ཅད་གྲུབ་པའམ། ནོར་བུའི་མཚན་མ་ལ་སོགས་པ་དེའི་རིགས་ཀྱི་རྣལ་འབྱོར་
[123b.6]བྱས་ལ། དེ་ནས་རང་གི་སྙིང་གར་རྡོ་རྗེ་ནོར་བུ་བསམས་ལ་དེའི་དབུས་སུ་ཨོཾ་མ་ཎི་ཡོ་ག་ཨཱ་བེེ་ཤ །ཞེས་བྱ་བ་ཡིད་ཀྱིས་བྲིས་ཏེ། དོན་ཐམས་ཅད་གྲུབ་པ་དང་། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ལ་སྔ་མ་བཞིན་དུ་བསྒྲུབ་པ་དང་། གཏེར་གྱི་གནས་སུ་ཆོ་ག་ཐམས་ཅད་རྗེས་སུ་སྤྱད་
[123b.7]ལ་གཏེར་གྱི་ལྷ་དང་ལྷ་མོའི་གཟུགས་སུ་རྣམ་པར་བསམས་ཏེ། ཇི་སྲིད་དུ་ལྟན་ཅིག་མཉམ་པར་སྦྱོར་བས་བསྒོམས་པ་དེ་སྲིད་བབས་པར་གྱུར་ནས་མངོན་སུམ་མཐོང་བར་འགྱུར་རོ། །དམ་ཚིག་མཆོག་ནི་བཅིངས་ནས་ཀྱང་། །ཞེས་བྱ་བ་ལ་སོགས་པ་རིན་ཆེན་ལྟ་བ་འམ།
[124a]
[124a.1]དེའི་རིགས་ཀྱི་རྣལ་འབྱོར་བྱས་ལ་རིན་ཆེན་ལྟ་བ་དང་དེའི་དམ་ཚིག་གི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་རིན་པོ་ཆེ་ལ། ཨོཾ་ས་མ་ཡ་སན་ཡོ་ག་དྲྀ་ཌྷོ་མེ་བྷ་བ་ཞེས་བྱ་བ་ཡིད་ཀྱིས་བྲིས་ཏེ། སྔ་མ་བཞིན་དུ་བསྒྲུབས་ལ་གཏེར་གྱི་གནས་སུ་ཆོ་ག་ཐམས་ཅད་རྗེས་
[124a.2]སུ་སྤྱད་ལ། ཇི་སྲིད་དུ་གཏེར་གྱི་ལྷ་དང་ལྷན་ཅིག་ཏུ་བསྒོམས་པ་དེ་མངོན་སུམ་ལྟ་བུར་འགྱུར་རོ། །དེ་ལྟར་བསྒོམས་ནས་ཕྱག་རྒྱ་གང་དུ་བསྟན་པར་གྱུར་པ་ན་གཏེར་གྱི་ལྷ་མཐོང་བའི་ཚུལ་གྱིས་གཏེར་ཡོད་པའི་ཕྱོགས་དེར་སྟོན་པར་འགྱུར་རོ། །དབང་པོ་གཉིས་ནི་མཉམ་སྦྱར་ལ། །
[124a.3]གཏེར་རྣམས་ཀུན་དུ་ཚོལ་བྱེད་ཅིང་། །ཞེས་བྱ་བ་ནི་བཅོམ་ལྡན་འདས་རིན་ཆེན་པདྨའམ་དེའི་རིགས་ཀྱི་རྣལ་འབྱོར་བྱས་ལ། ཨོཾ་ཎི་དི་ཛྙཱ་ན་ཨཱ་བེ་ཤ་མཱ་མ་ཡོ་ག །ཞེས་ལྕེ་ལ་ཡིད་ཀྱིས་བྲིས་ཏེ། སྔ་མ་བཞིན་དུ་བསྒྲུབས་པ་བྱས་ལ། གཏེར་ཡོད་པའི་གནས་སུ་སོང་ནས་
[124a.4]ཆོ་ག་ཐམས་ཅད་རྗེས་སུ་སྤྱད་ལ། ཇི་སྲིད་དུ་གཏེར་གྱི་ལྷ་དང་མཉམ་པར་སྦྱོར་བར་བསྒོམས་པ་དེ་སྲིད་དུ་གཏེར་མཐོང་བར་འགྱུར་རོ། །དབང་པོ་གཉིས་ཀྱི་ཏིང་འཛིན་གྱིས། །ལས་ཀྱི་ཕྱག་རྒྱ་བཅིངས་ནས་ནི། །ཞེས་བྱ་བ་ལ་རིན་ཆེན་ཆར་འབེབས་པའམ། དེའི་རིགས་ཀྱི་
[124a.5]རྣལ་འབྱོར་བྱས་ལ། རྡོ་རྗེ་ནོར་བུ་ཆར་འབེེབས་རང་གི་སྙིང་གར་བསམས་ལ། དེའི་སྟེང་དུ། ཨོཾ་སརྦྦ་ཀརྨྨ་སྥོ་ཊ་ས་མ་ཡོ་ག་ཞེས་བྱ་བ་ཡིད་ཀྱིས་བྲིས་ལ་སྔ་མ་བཞིན་དུ་བསྒྲུབས་ཏེ། རིན་ཆེན་ཆར་འབེབས་སམ། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ལ། ཕྱིས་
[124a.6]གཏེར་གྱི་གནས་སུ་སོང་ལ་ཆོ་ག་ཐམས་ཅད་རྗེས་སུ་སྤྱད་ནས། གཏེར་གྱི་ལྷ་དང་ལྷན་ཅིག་མཉམ་པར་སྦྱོར་བས་ཇི་སྲིད་དུ་བསྒོམས་པ་དེའི་ཚེ་ཕྱག་རྒྱ་གཉིས་སུ་འགྱུར་ཏེ། རང་གྲོལ་བར་འགྱུར་རོ་ཞེས་བྱ་བའི་དོན་ཏོ། །དེ་ནས་གཏེར་གྱི་ལྷ་གྲུབ་པར་གྱུར་པ་དེས་གཏེར་སྟོན་
[124a.7]པའི་དངོས་གྲུབ་ཏུ་འགྱུར་རོ། །དེ་ལྟར་དངོས་གྲུབ་ཀྱི་ཡེ་ཤེས་བསྟན་ནས། ད་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་རྣམས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞི་པོ་རྣམས་ཀྱིས་ཇི་ལྟ་བ་བཞིན་
[124b]
[124b.1]དུ་རང་གི་ལྷའི་རྣལ་འབྱོར་བྱས་ལ་བསྒྲུབས་ཏེ། མདུན་དུ་ལྷ་སྤྱན་དྲངས་ནས་རང་གི་ཕྱག་རྒྱ་བཞི་པོ་རྣམས་ཀྱིས་རྒྱས་བཏབ་ལ་བསྒྲུབ་པ་ན། སྒྲུབ་པ་པོ་སྤྲོ་བ་བསྐྱེད་པའི་ཕྱིར་དང་། ཕྱག་རྒྱའི་འབྲས་བུ་བསྟན་པར་བྱའོ་ཞེས་བསྟན་པའི་ཕྱིར། དེ་ནས་ནོར་བུའི་རིགས་ཆེན་པོའི་ཕྱག་རྒྱ་
[124b.2]ཐམས་ཅད་ཀྱི་ཡེ་ཤེས་བསླབ་པོ་ཞེས་བྱ་བ་གསུངས་ལ། དེ་ནས་ཞེས་བྱ་བ་ནི་དེའི་ཕྱིར་ཏེ། དངོས་གྲུབ་ཀྱི་ཡེ་ཤེས་བསྟན་པའི་རྗེས་ཐོགས་ལ་ཞེས་བྱ་བའི་ཐ་ཚིག་གོ། །ཆེན་པོ་ཡང་ཡིན་ལ་ནོར་བུའི་རིགས་ཀྱང་ཡིན་པས་ན། ནོར་བུའི་རིགས་ཆེན་པོ་སྟེ། དོན་ཡོད་པར་གྲུབ་པའི་དཀྱིལ་
[124b.3]འཁོར་ཆེན་པོའོ། །དེ་ལ་ཐམས་ཅད་ནི་ཕྱག་རྒྱ་རྣམ་པ་བཞི་སྟེ། ཕྱག་རྒྱ་ཆེན་པོ་དང་། དམ་ཚིག་དང་ཆོས་དང་ལས་ཀྱི་ཕྱག་རྒྱ་རྣམས་སོ། །དེ་རྣམས་ཀྱི་ཡེ་ཤེས་སུ་ངེས་པ་དེ་བསླབ་པར་བྱའོ། །དེ་ནས་ཕྱག་རྒྱ་ཆེན་པོ་བཅིངས་པ་ནི་འདི་ཡིན་ཏེ་ཞེས་བྱ་བ་ནི། ཕྱག་རྒྱ་ཆེན་པོ་བཅིངས་
[124b.4]པའི་མཚན་ཉིད་བསྟན་པའོ། །ཟླ་བའི་དཀྱིལ་འཁོར་གྱི་དབུས་སུ་འདུག་ནས་སོ། །ཇི་ལྟ་བ་ཡི་རི་མོ་བཞིན། །ཞེས་བྱ་བ་ནི། འདྲི་མཁན་གྱིས་ཇི་ལྟ་བའི་རི་མོའི་རྗེས་སུ་འབྲངས་ནས་ཇི་ལྟ་བ་བཞིན་བྲི་བའོ། །འདི་སྐད་སྟོན་པ་ཡིན་ཏེ། ཇི་ལྟར་རྣམ་
[124b.5]པར་སྣང་མཛད་ལ་སོགས་པ་དང་། ནོར་བུ་རིན་ཆེན་འབེེབས་པའི་མཐར་ཐུག་པའི་སྐུའི་གསང་བའི་མཚན་ཉིད་ཀྱི་དཀྱིལ་འཁོར་བྲི་བའི་ཆོ་གར་གསུངས་པ་དེའི་མཚན་ཉིད་ཀྱི་རྗེས་སུ་འབྲངས་ནས། བདག་ཉིད་ཀྱང་སྐུའི་གསང་བའི་རང་བཞིན་རྩ་བའི་དཀྱིལ་འཁོར་ན་གནས་པ་
[124b.6]བསྒོམས་ཏེ། ཡང་དང་ཡང་དུ་མངོན་དུ་བྱ་བ་ཡིན་ནོ། །དེ་གང་གི་ཡིན་ཞེ་ན། ཕྱག་རྒྱ་ཆེན་པོ་ཞེས་སྨོས་ཏེ། སྐུའི་གསང་བ་བསྒོམ་པའོ། །ཅིའི་ཕྱིར་བསྒོམ་ཞེ་ན། དོན་གྱི་མཆོག་ཀུན་གྲུབ་པར་འགྱུར། །ཞེས་བྱ་བ་།སྨོས་སོ། །དོན་ཡང་ཡིན་ལ་ཀུན་ཀྱང་ཡིན་པས་ན་དོན་
[124b.7]གྱི་མཆོག་ཀུན་ཏེ། རྣམ་པར་སྣང་མཛད་ལ་སོགས་པ་ནས་རིན་ཆེན་འབེེབས་པའི་རང་བཞིན་གྱི་མཐར་ཐུག་པའོ། །དེའི་མཆོག་གི་དངོས་གྲུབ་ནི་ཕྱག་རྒྱ་ཆེན་པོ་མངོན་སུམ་དུ་བྱས་ནས་དེ་རྟོགས་པར་བསྒོམ་པའོ། །རྡོ་རྗེ་ནོར་བུ་དང་། རྡོ་རྗེ་ནོར་བུ་མྱུ་གུ་དང་། རྡོ་རྗེ་རིན་ཆེན་པདྨ་
[125a]
[125a.1]དང་། རྡོ་རྗེ་རིན་ཆེན་ཆར་འབེབས་ཀྱི་ཕྱག་རྒྱ་ཆེན་པོ་ནི། ནོར་བུའི་མཚན་མ་དང་། དེ་བཞིན་གཤེགས་པ་ཐམས་ཅད་དབང་བསྐུར་བའི་ཕྲེང་བ་དང་། གཏོང་བའི་ཏིང་ངེ་འཛིན་གྱི་ཡེ་ཤེས་ཀྱི་སྙིང་པོ་དང་ནོར་བུའི་མཆོད་པ་རྣམས་ཀྱི་ཕྱག་རྒྱ་ཆེན་པོ་ཉིད་ཀྱིས་
[125a.2]ཤེས་པར་བྱའོ། །དེ་ནས་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་རྣམས་ཀྱི་འབྲས་བུ་གསུངས་པ་ཡིན་ནོ། །སངས་རྒྱས་ཕྱག་རྒྱ་སངས་རྒྱས་ཉིད། །ཅེས་བྱ་བ་ལ་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་ནི་སངས་རྒྱས་ཕྱག་རྒྱ་ཆེན་པོ་སྟེ། དེ་སངས་
[125a.3]རྒྱས་ཉིད་འགྲུབ་པ་སྟེར་བའོ། །དངོས་གྲུབ་ཟབ་མོ་འདི་ལ་མངའ་བས་ན་རབ་གྲུབ་བོ། །གང་གི་ཕྱག་རྒྱ་ཡིན་ཞེ་ན། །རྡོ་རྗེ་སྙིང་པོའིའོ། །དོན་ཐམས་ཅད་གྲུབ་པ་དང་། ནོར་བུའི་མཚན་མ་དག་གི་ཕྱག་རྒྱ་ཆེན་པོ་དེ་རྣམས་རབ་ཏུ་འགྲུབ་པར་འགྱུར་ཞེས་བྱ་བའི་ཐ་ཚིག་
[125a.4]གོ། །རིན་ཆེན་ལྕགས་ཀྱུ་ནི། རིན་ཆེན་རྒྱལ་པོའི་ཕྱག་རྒྱ་ཆེན་པོ་སྟེ། དེས་ཕྱོགས་བཅུ་ཀུན་ནས་དེ་བཞིན་གཤེགས་པ་ལ་སོགས་པ་སྤྱན་འདྲེན་པར་བྱེད་པའོ། །ནོར་བུ་དགའ་བ་ནི་ནོར་བུ་ཆགས་པ་ཆེན་པོ་སྟེ། ནོར་བུའི་ཆགས་པས་རྗེས་སུ་དགའ་བར་བྱེད་པས་དེ་བཞིན་
[125a.5]གཤེགས་པ་ལ་སོགས་པ་སེམས་ཅན་གྱི་ཁམས་ལ་རྗེས་སུ་དགའ་བར་བྱེད་པ་དང་། སྒྲུབ་པ་པོའི་བཀའ་བཞིན་བྱེད་པའོ། །ནོར་བུ་ལེགས་པའི་ཕྱག་རྒྱ་ཆེན་པོ་ནི་ནོར་བུའི་མགུ་བའོ། །ཤིན་ཏུ་མགུ་བར་བྱེད་པས་ན་རབ་ཏུ་མགུ་བ་ཕུལ་དུ་བྱུང་བ་བྱེད་ཅེས་བྱ་བའི་ཐ་ཚིག་གོ། །
[125a.6]ནོར་བུ་ལྟ་བའི་ཕྱག་རྒྱ་ཆེན་པོ་ནི་ནོར་བུའི་ལྟ་བའོ། །ནོར་འཕྲོག་པ་ནི་དབང་བསྐུར་བ་ལ་སོགས་པ་བཀུག་ནས། རིན་པོ་ཆེའི་ཕྲེང་བ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་དབང་བསྐུར་བའི་ནོར་བུའི་ཕྲེང་བ་སྟེ། དེའི་ཕྱག་རྒྱ་ཆེན་པོ་གང་ཡིན་པ་དེ་ནི་ནོར་བུའི་
[125a.7]དབང་བསྐུར་བའམ། སྒྲུབ་པ་པོ་ལ་དབང་བསྐུར་བའོ། །ནོར་བུའི་ཉི་མའི་ཕྱག་རྒྱ་ཆེན་པོ་ནི་ནོར་བུའི་ཉི་མ་སྟེ་གཟི་བརྗིད་བཟང་པོ་མངའ་བས་ན་གཟི་བརྗིད་མཆོག་གོ། །ནམ་མཁའ་མཉམ་པ་ཉིད་ཀྱི་ཡེ་ཤེས་ཀྱི་མེའི་འོད་ཟེར་དེ་འགྱེད་པས་ན་གཟི་བརྗིད་མཆོག་སྟེར་བས་
[125b]
[125b.1]ཏེ། ནོར་བུའི་ཉི་མ་ཉིད་དོ་ཞེས་བྱ་བའི་དོན་ཏོ། །ནོར་བུའི་རྒྱལ་མཚན་གྱི་ཕྱག་རྒྱ་ཆེན་པོ་ནི་ཡིད་བཞིན་ནོར་བུ་སྟེ་དེ་ཅི་དགར་སྟེར་བའོ། །དེས་ཅི་དགར་སྦྱིན་པ་ནི་གང་དང་གང་གིས་མངོན་པར་འདོད་པའི་བསྒྲུབ་པར་བྱ་བ་དེ་དང་དེ་ཉིད་ཡོངས་སུ་རྫོགས་པར་བྱེད་པའོ། །རིན་ཆེན་བཞད་
[125b.2]པའི་ཕྱག་རྒྱ་ཆེན་པོ་ནི་རིན་ཆེན་བཞད་པ་སྟེ། སྟོབས་དང་མི་འཇིགས་པ་ལ་སོགས་པ་འཇིག་རྟེན་ལས་འདས་པའི་དོན་འཕྲོག་ཅིང་སྒྲུབ་པར་བྱེད་པའོ། །རིན་ཆེན་པདྨའི་ཕྱག་རྒྱ་ཆེན་པོ་ནི་རིན་ཆེན་མཆོག་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་དེ་མཚན་ཉིད་ཀྱི་ཆོས་དེ་སྟེར་
[125b.3]བའོ། །གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོའི་ཕྱག་རྒྱ་ཆེན་པོ་ནི་གཏོང་བ་མཆོག་སྟེ། ཟག་པ་མེད་པའི་ཏིང་ངེ་འཛིན་གྱི་རྙེད་པ་དམ་པ་འཐོབ་པའོ། །རིན་ཆེན་རྣོན་པོའི་ཕྱག་རྒྱ་ཆེན་པོ་ནི་རིན་ཆེན་རལ་གྲི་སྟེ། ཤེས་རབ་ཀྱི་ཡེ་ཤེས་ཆེན་པོའི་མཛོད་སྟེར་བའོ། །ནོར་
[125b.4]བུ་འཁོར་ལོའི་ཕྱག་རྒྱ་ཆེན་པོ་ནི་ནོར་བུའི་འཁོར་ལོ་སྟེ། དེའི་བདག་པོ་ནི་ནོར་བུའི་རིགས་ཀྱི་དཀྱིལ་འཁོར་གྱི་བདག་པོ་བྱང་ཆུབ་སེམས་དཔའ་ཆེན་པོ་ནོར་བུའི་འཁོར་ལོ་དེ་སྟེར་བར་འགྱུར་རོ། །རིན་ཆེན་གསུང་བའི་ཕྱག་རྒྱ་ཆེན་པོ་ནི་སྨྲ་བ་སྩལ་བའི་དངོས་གྲུབ་སྟེ་སྤྲོས་པ་མེད་
[125b.5]པའི་ཡེ་ཤེས་ཀྱི་དངོས་གྲུབ་ནོར་བུའི་གསུང་བ་ཉིད་ཐོབ་པ་ཡིན་ནོ་ཞེས་བྱ་བའི་ཐ་ཚིག་གོ། །རིན་ཆེན་ཆར་འབེབས་ཀྱི་ཕྱག་རྒྱ་ཆེན་པོ་ནི་རིན་པོ་ཆེ་ཆར་འབེབས་ཏེ། དེ་ནོར་བུ་ཆེན་པོའི་བྱང་ཆུབ་སེམས་དཔའ་ཆེན་པོ་རིན་པོ་ཆེའི་ཆར་ཉིད་འཐོབ་པར་འགྱུར་རོ། །ནོར་བུ་མཆོད་པའི་ཕྱག་རྒྱ་
[125b.6]ཆེན་པོ་ནི་ནོར་བུ་ཆེན་པོ་སྟེ། དེ་ཤིན་ཏུ་ལེགས་པར་མཆོད་པ་ཐོབ་པར་འགྱུར་རོ། །ནོར་བུ་བསྲུང་བའི་ཕྱག་རྒྱ་ཆེན་པོ་ནི་རིན་ཆེན་གོ་ཆ་བརྟན་པར་བྱེད་པ་སྟེ། ཕྱིར་མི་ལྡོག་པའི་བརྩོན་འགྲུས་ནི་ནོར་བུའི་བསྲུང་བ་ཡིན་ནོ་ཞེས་བྱ་བའི་ཐ་ཚིག་གོ། །ནོར་བུ་གནོད་སྦྱིན་གྱི་ཕྱག་རྒྱ་ཆེན་པོ་ནི་ནོར་བུའི་
[125b.7]མཆེ་བ་གཟུང་བ་དང་། འཛིན་པའི་རྣམ་པར་རྟོག་པ་འཇོམས་པས་ན་དེའི་ནོར་འཕྲོག་པའོ། །ནོར་བུའི་ཁུ་ཚུར་གྱི་ཕྱག་རྒྱ་ཆེན་པོ་ནི་ཁུ་ཚུར་དེས་ནོར་བུའི་དངོས་གྲུབ་ཐོབ་པ་སྟེ། དེ་མངོན་སུམ་དུ་བྱས་པས་དེ་བཞིན་གཤེགས་པའི་དངོས་གྲུབ་འགྲུབ་པར་འགྱུར་རོ་ཞེས་བྱ་བའི་དོན་ཏོ། །
[126a]
[126a.1]དེ་ནས་དཀྱིལ་འཁོར་ཆེན་པོ་འདི་ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་དམ་ཚིག་འཛིན་པའི་ཕྱག་རྒྱ་ནི་དམ་ཚིག་གི་ཕྱག་རྒྱའོ། །རྣམ་པར་སྣང་མཛད་ལ་སོགས་པའི་དམ་ཚིག་གི་ཕྱག་རྒྱ་གང་ཡིན་པ་དེ་ནི་ཡེ་ཤེས་སུ་འགྱུར་བའོ། །རྡོ་རྗེ་རིན་ཆེན་
[126a.2]ཕྱག་རྒྱ་ནི། །སངས་རྒྱས་ཀུན་གྱི་དབང་བསྐུར་ཐོབ། །ཅེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་བཅོམ་ལྡན་འདས་འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱ་གང་ཡིན་པ་དེ་ནི་རྡོ་རྗེ་རིན་ཆེན་གྱི་བདག་ཉིད་ཀྱིས་སངས་རྒྱས་ཐམས་ཅད་ལ་དབང་བསྐུར་བར་གསོལ་
[126a.3]བ་གདབ་སྟེ། དེའི་མཚན་ཉིད་ནི་རྡོ་རྗེ་བསྡམས་པ་ལས་མཐེ་བོང་གཉིས་བསྙམས་ལ་མཛུབ་མོ་གཉིས་བཀུག་པའི་རྩེ་མོ་སྤྲད་པ་ནི་རྡོ་རྗེ་རིན་ཆེན་ཏེ། རྡོ་རྗེ་རིན་ཆེན་དེ་ཉིད་འཆིང་བའི་སྦྱོར་བ་དང་། ཨོཾ་བཛྲ་རཏྣ་ཧཱུཾ་ཞེས་བྱ་བས་དེ་བཞིན་གཤེགས་པ་ཐམས་ཅད་ལ་དབང་བསྐུར་བ་སྦྱིན་
[126a.4]ནོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་འཕགས་པ་ནམ་མཁའི་སྙིང་པོའི་རྣལ་འབྱོར་བྱས་ཏེ། ཕྱིས་ཕྱག་རྒྱ་འདི་བཅིངས་ནས་བདག་ཉིད་འཕགས་པ་ནམ་མཁའི་སྙིང་པོར་བསྒོམས་ཏེ། སྙིང་པོ་འདི་བཟླས་ན། དེ་བཞིན་གཤེགས་པ་ཐམས་ཅད་ཀྱི་དབང་
[126a.5]བསྐུར་བ་རྡོ་རྗེ་རིན་ཆེན་འགྲུབ་པར་འགྱུར་རོ། །རྡོ་རྗེ་ནོར་བུ་ཆེ་བཅིངས་ནས། །རྡོ་རྗེ་རིན་ཆེན་མགུ་བར་འགྱུར། །ཞེས་བྱ་བ་ནི་རྡོ་རྗེ་བསྡམས་པ་བཅིངས་ལ། མཛུབ་མོ་རྒྱབ་ཏུ་བསྐུམས་ནས། རྡོ་རྗེ་མཐེ་བོང་དང་སྦྱར་བ་འདི་ནི་རྡོ་རྗེ་དམ་ཚིག་གི་ཕྱག་རྒྱའོ། །འདི་བཅིངས་ལ་ཨོཾ་སརྦྦ་
[126a.6]ཏ་ཐཱ་ག་ཏ་ཨ་ཤ་པ་རི་པཱུ་ར་ནི་མ་ཧཱ་རཏྣ་ཧཱུཾ། ཞེས་གསུངས་ཏེ་བྱ་བ་གང་གི་ཚེ་རྡོ་རྗེ་དབྱིངས་ལས་བཤད་པའི་རྣམ་པར་སྣང་མཛད་ཀྱི་རྣལ་འབྱོར་བྱས་ལ་བཟླས་པ་དེའི་ཚེ་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་དངོས་གྲུབ་ཐོབ་པར་འགྱུར་བ་དེའི་ཕྱིར། རྡོ་རྗེ་རིན་ཆེན་འགྲུབ་
[126a.7]པར་འགྱུར། །ཞེས་གསུངས་ཏེ། བག་ཆགས་དང་བཅས་པའི་ཉོན་མོངས་པ་སྤངས་པས་ནམ་མཁའ་དང་མཉམ་པའི་ཡེ་ཤེས་ཐོབ་ཅེས་བྱ་བའི་དོན་ཏོ། །རྡོ་རྗེ་གཉིས་ལས་ནོར་བུ་བྱས། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་ཀྱི་མཛུབ་མོ་གཉིས་ནོར་བུར་བྱའོ། །རྡོ་རྗེ་འཛིན་
[126b]
[126b.1]ལས་ནོར་ཐོབ་བོ། །ཞེས་བྱ་བ་ནི་འབྲས་བུ་གསུངས་པ་ཡིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའི་སྦྱོར་བ་བྱས་ལ། དམ་ཚིག་གི་ཕྱག་རྒྱ་གང་ཡིན་པ་འདི་བཅིངས་ཏེ། ཨོཾ་བཛྲ་ཧཱུཾ་ཏྲཱཾ་ཞེས་སྙིང་པོ་ཟློས་ཤིང་། རྡོ་རྗེ་
[126b.2]འཛིན་པའི་བདག་ཉིད་དུ་བསྒོམས་ནས་མཚན་མ་ཐོབ་པ་དང་། མཚན་ཐོག་ཐག་ཟློས་ཤིང་བཅོམ་ལྡན་འདས་མདུན་དུ་བཞག་ལ་བསྒོམས་པ་དེའི་ཚེ་རྡོ་རྗེ་འཛིན་པ་ཉིད་ཐོབ་པར་འགྱུར་རོ། །དེ་ཉིད་མཐེ་བོང་རྡོ་རྗེ་ཡིས། །ཞེས་བྱ་བ་ནི་བཤད་མ་ཐག་པའི་རྡོ་རྗེ་འཛིན་པའི་ཕྱག་རྒྱའི་
[126b.3]མཐེ་བོ་གཉིས་མྱུ་གུ་ལྟར་བྱས་པ་ནི་ནམ་མཁའི་སྙིང་པོའི་ཕྱག་རྒྱའོ། །ནོར་བུ་སྦྱིན་པ་ཞེས་བྱ་བ་ནི་ནམ་མཁའི་སྙིང་པོའི་དངོས་གྲུབ་ཀྱི་འབྲས་བུའོ། །སྙིང་གར་བཞག་ཅེས་བྱ་བ་ནི་ཡིད་ཀྱིས་མངོན་པར་འདོད་པ་ཞེས་བྱ་བའི་དོན་ཏོ། །སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་
[126b.4]ཆེན་པོ་ལས་བཤད་པའི་ནམ་མཁའི་སྙིང་པོའི་རྣལ་འབྱོར་བྱས་ལ། ཕྱིས་ཕྱག་རྒྱ་དེ་བཅིངས་ཏེ། ཨོཾ་མ་ཎི་རཏྣ་ཧཱུཾ། ཞེས་བརྗོད་ཅིང་བསྒོམས་པས་ནམ་མཁའི་སྙིང་པོ་འགྲུབ་པར་འགྱུར་རོ། །མཛུབ་གཉིས་པདྨའི་ནོར་བུ་བཅིངས། །རྡོ་རྗེ་ཁུ་ཚུར་གྱི་མཛུབ་མོ་གཉིས་བསྒྲེང་ནས་
[126b.5]ཕན་ཚུན་ལྟོ་སྦྱར་ཏེ། རྒྱབ་ཅུང་ཟད་བསྐུམས་ནས་རིན་པོ་ཆེ་བྱའོ། །ཅི་ཞིག་ཏུ་འགྱུར་ཞེ་ན། འཇིག་རྟེན་དབང་གིས་ནོར་སྦྱིན་འགྱུར། །ཞེས་བྱ་བ་སྨོས་ཏེ། བཅོམ་ལྡན་འདས་རྡོ་རྗེ་སྤྱན་སྒྲུབ་པ་པོ་རང་ལ་དངོས་གྲུབ་སྟེར་བར་འགྱུར་རོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་
[126b.6]ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སྤྱན་གྱི་རྣལ་འབྱོར་བྱས་ཏེ། ཕྱིས་དེའི་ཕྱག་རྒྱ་བཅིངས་ལ། པདྨ་ཧྲཱིཿཞེས་ཟློས་ཤིང་རྡོ་རྗེ་སྤྱན་བསྒོམས་ཏེ། གང་གི་ཚེ་མཚན་མ་ཐོབ་ནས་དངོས་གྲུབ་ཏུ་གྱུར་པ་དེའི་ཚེ་རྡོ་རྗེ་སྤྱན་ཉིད་དང་འཇིག་རྟེན་དབང་ཕྱུག་
[126b.7]ཉིད་ཐོབ་པར་འགྱུར་རོ། །རྡོ་རྗེ་ལས་ནོར་སྣ་ཚོགས་ཀྱི། །ཞེས་བྱ་བ་ནི་སྔར་བཤད་པའོ། །རྡོ་རྗེ་ནོར་བུ་ཆེ་བཅིངས་ལ། །གར་བྱས་སྤྱི་གཙུག་དབུས་གཞག་སྟེ། །མཆོད་པའི་ཆོ་ག་ཐམས་ཅད་ཀྱིས། །ཀུན་ལ་རིན་ཆེན་མཆོད་པར་བྱ། །ཞེས་བྱ་བ་འདི་ནི་རྡོ་རྗེ་ལས་ཀྱི་
[127a]
[127a.1]ནོར་བུ་སྟེ། ནོར་བུ་མཆོད་པའི་དམ་ཚིག་གི་ཕྱག་རྒྱའོ། །ཅི་ཞིག་སྦྱིན་པར་བྱེད་ཅེ་ན། ནོར་བུ་ཆེན་པོ་རྒྱལ་མཚན་སྦྱིན། །ཞེས་བྱ་བ་སྨོས་ཏེ། བྱང་ཆུབ་སེམས་དཔའ་ཆེན་པོ་རྡོ་རྗེ་ལས་སུ་འགྱུར་རོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། རྡོ་རྗེ་
[127a.2]དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ལས་ཀྱི་རྣལ་འབྱོར་བྱས་ལ། ཕྱིས་དེའི་ཕྱག་རྒྱ་བཅིངས་ཏེ། ཨོཾ་བི་ཤྭ་རཏྣ་ཧཱུཾ་ཞེས་ཟློས་ཤིང་གང་གི་མཚན་མ་ཐོབ་པར་གྱུར་ནས་འགྲུབ་བར་འགྱུར་བ་དེའི་ཚེ་སྣ་ཚོགས་སུ་འགྱུར་རོ། །རྡོ་རྗེ་དབྱིངས་མཛུབ་ནོར་མཆོག་གིས། །
[127a.3]ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་དེའི་ནོར་གྱི་མཆོག་ནི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱའོ། །དེས་སངས་རྒྱས་རིན་ཆེན་དེ་ཉིད་ཐོབ་པར་འགྱུར་རོ་ཞེས་བྱ་བའི་དོན་ཏོ། །ཨོཾ་བུདྡྷ་རཏྣ་ཧཱུཾ་ཞེས་བྱ་བའི་སྙིང་པོ་ནི་ཕྱག་རྒྱའོ། །མཛུབ་མོ་བསྙམས་ཏེ་རྒྱབ་བཀུག་ལ། །
[127a.4]ཞེས་བྱ་བ་ནི་རྡོ་རྗེ་བསྡམས་པའི་མཛུབ་མོ་གཉིས་མྱུ་གུ་ལྟར་བྱས་ནས་རྒྱབ་བསྐུམས་ཏེ། རིན་པོ་ཆེའི་མཐེ་བོང་གཉིས་མྱུ་གུ་ལྟར་བྱས་པ། དེ་ལས་མཐེ་བོང་རྡོ་རྗེ་བཅིངས་པར་འགྱུར་ཏེ། རྡོ་རྗེ་སྙིང་པོའི་ཕྱག་རྒྱ་ལས། །འདི་ནི་རྡོ་རྗེ་ནོར་བུར་གསུངས། །ཞེས་བྱ་བ་ནི་བཤད་པའོ། །གང་ལ་
[127a.5]འབྱུང་བ་ཡིན་ཞེ་ན། རྡོ་རྗེ་སྙིང་པོའི་ཕྱག་རྒྱ་ལས། །ཞེས་བྱ་བ་སྨོས་ཏེ། རྡོ་རྗེ་བསྡམས་པ་གཉིས་དམ་དུ་བྱས་པ་འདི་ནི་རྡོ་རྗེ་སྙིང་པོའི་ཕྱག་རྒྱར་འགྱུར་རོ། །ད་ནི་འདི་སྐད་སྟོན་པ་ཡིན་ཏེ། རྡོ་རྗེ་བསྡམས་པ་ལས་བྱུང་བའི་རྡོ་རྗེ་ནོར་བུ་ཆེན་པོ་དམ་ཚིག་གི་ཕྱག་རྒྱ་འདི་ནི་སེམས་མ་རྡོ་རྗེ་མའི་གནས་
[127a.6]རྡོ་རྗེ་ནོར་བུའི་ཕྱག་རྒྱའི་ནོར་བུའི་རིགས་ཀྱི་དཀྱིལ་འཁོར་དུ་འཇུག་པའི་དམ་ཚིག་གི་ཕྱག་རྒྱ་ཡིན་ནོ། །འདི་ནི་བཅིངས་མ་ཐག་ཏུ་ཡང་། །རྡོ་རྗེ་ནོར་བུ་ཆེན་པོ་ཐོབ། །ཅེས་བྱ་བ་ནི་ནོར་བུ་ཆེན་པོའི་རིགས་ཀྱི་དཀྱིལ་འཁོར་དུ་འཇུག་པ་དང་། རྟོག་པ་ཐོབ་བོ་ཞེས་བྱ་བའི་ཐ་ཚིག་གོ། །རྡོ་རྗེ་དབྱིངས་
[127a.7]ཀྱི་དཀྱིལ་འཁོར་ཆེན་པོ་ལས་བཤད་པའི་འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱ་ནི། མཛུབ་གཉིས་རིན་ཆེན་འདྲར་བཅིངས་པ། །གུང་མོ་མྱུ་གུ་བསྒྲེང་བས་ནི། །ཞེས་བྱ་བ་ནི་གུང་མོ་མྱུ་གུ་ལྟར་བསྒྲེང་བ་འདི་ནི། རྡོ་རྗེ་རིན་ཆེན་མྱུ་གུ་དམ་ཚིག་གི་ཕྱག་རྒྱ་སྟེ། འདི་
[127b]
[127b.1]ནི་བཅིངས་མ་ཐག་ཏུ་ཡང་སྟོབས་དང་མི་འཇིགས་པ་ལ་སོགས་པ་དགེ་བའི་མཚན་ཉིད་ཀྱིས་དབང་བསྐུར་བ་ཐོབ་པར་འགྱུར་བ་དེ་རྙེད་པར་འགྱུར་བའོ། །དེ་ནས་གུང་མོ་སྲིན་ལག་དང་། །མཐེ་ཆུང་རྣམས་ནི་པདྨོར་བྱས། །ཞེས་བྱ་བ་ནི་རྡོ་རྗེ་རིན་པོ་ཆེ་མྱུ་གུའི་ཕྱག་རྒྱ་ཉིད་ལ་གུང་མོ་དང་།
[127b.2]སྲིན་ལག་དང་མཐེའུ་ཆུང་རྣམས་སོར་མོ་ཕན་ཚུན་གདོང་སྦྱར་ཏེ། པདྨ་ཁ་བྱེ་བ་བཞིན་དུ་བྱས་པ་྅འདི་ནི་རྡོ་རྗེ་རིན་ཆེན་པདྨའི་དམ་ཚིག་གི་ཕྱག་རྒྱའོ། །འདི་ནི་གཏོང་བའི་ཏིང་ངེ་འཛིན་ཡེ་ཤེས་ཀྱི་སྙིང་པོ་འགྲུབ་པས། ཀུན་དུ་སྤྱན་རས་གཟིགས་དབང་ཕྱུག་གི་ཕྱག་གིས་ཏིང་ངེ་འཛིན་གྱི་ནོར་བུ་སྒྲུབ་པ་པོ་ལ་
[127b.3]སྦྱིན་པར་འགྱུར་རོ། །མཛུབ་མོ་མཐེ་བོ་མཐེའུ་ཆུང་རྣམས། །རྡོ་རྗེ་རིན་ཆེན་ཚུལ་དུ་བྱ། །ཞེས་བྱ་བ་ནི་ཐལ་མོ་སྦྱར་ལ། སྲིན་ལག་གཉིས་མྱུ་གུ་ལྟ་བུ་དང་། གུང་མོ་དང་མཐེའུ་ཆུང་གཉིས་ནང་དུ་བཅུག་ནས། སེན་མོ་གཉིས་ཕན་ཚུན་སྦྱར་བ་འདི་ནི་རྡོ་རྗེ་རིན་ཆེན་ཆར་འབེེབས་ཀྱི་དམ་ཚིག་གི་ཕྱག་རྒྱའོ། །རྡོ་རྗེ་
[127b.4]བསྡམས་པ་དམ་བྱས་ལ། །ཞེས་བྱ་བ་ལ་སོགས་པ་ནི་རྡོ་རྗེ་བསྡམས་པ་དམ་པོར་བྱས་ནས་མཛུབ་མོ་གཉིས་ནོར་བུ་འདྲ་བར་བྱས་ལ། མཐེ་བོ་གཉིས་བརྐྱང་སྟེ་ཁ་ཕྱེ་ནས་སྙིང་གར་གཞག་པ་འདི་ནི། དོན་ཐམས་ཅད་གྲུབ་པ་ཞེས་བྱ་བའི་དོན་ཐམས་ཅད་གྲུབ་པའི་དམ་ཚིག་གི་ཕྱག་རྒྱའོ། །རྡོ་རྗེ་
[127b.5]བསྡམ་པས་བསྡམས་ནས་ཀྱང་། །ཞེས་བྱ་བ་ལ་སོགས་པ་ལ་གུང་མོ་གཉིས་མྱུ་གུ་ལྟར་བྱས་ཏེ། རྒྱབ་བསྐུམ་པའི་ཚུལ་གྱིས་རིན་པོ་ཆེར་བྱས་པ་འདི་ནི་རྡོ་རྗེ་སེམས་དཔའི་གནས་ཀྱི་རྡོ་རྗེ་ནོར་བུ་མཚན་མའི་དམ་ཚིག་གི་ཕྱག་རྒྱའོ། །ལས་ཅི་ཞིག་བྱེད་ཅེ་ན། ནོར་བུ་རིན་ཆེན་རབ་སྦྱིན་ནོ། །ཞེས་
[127b.6]བྱ་བ་སྨོས་ཏེ། །དེ་ཉིད་ལས་ཞེས་བྱ་བ་ནི། བཤད་མ་ཐག་པའི་ནོར་བུ་མཚན་མའི་དམ་ཚིག་གི་ཕྱག་རྒྱ་ལས་མཛུབ་མོ་གཉིས་ལྕགས་ཀྱུའི་ཚུལ་དུ་བྱས་པ་ནི། རིན་ཆེན་རྒྱལ་པོའི་དམ་ཚིག་གི་ཕྱག་རྒྱ་སྟེ། དེ་བཞིན་གཤེགས་པ་ལ་སོགས་པ་ཐམས་ཅད་ཀྱི་དོན་ཀུན་འགུགས་པའི་ཕྱག་རྒྱའོ། །
[127b.7]མིང་གང་ཡིན་ཞེ་ན། ནོར་བུ་རིན་ཆེན་ལྕགས་ཀྱུར་བཤད། །ཅེས་བྱ་བ་སྨོས་ཏེ་བསྟན་པའོ། །དེ་ཉིད་ལས་ཞེས་བྱ་བ་ནི། བཤད་མ་ཐག་པའི་རིན་ཆེན་རྒྱལ་པོའི་དམ་ཚིག་གི་ཕྱག་རྒྱ་ལས་སོ། །བསྒྱུར་ནས་ཀྱང་ཞེས་བྱ་བ་ནི་གཡོན་པའི་ཕྱོགས་ནས་སོ། །མཛུབ་མོས་མཛུབ་མོ་བཟུང་ནས་
[128a]
[128a.1]ནི། ཞེས་བྱ་བ་ནི་གཡས་པའི་མཛུབ་མོས་གཡོན་པའི་མཛུབ་མོ་བཟུང་སྟེ། མདའ་འཕང་བའི་ཚུལ་དུ་བྱས་ལ་དྲངས་ཤིང་འཐེན་ནས། དགྲོལ་བར་སེམས་ཅན་གྱི་ཁམས་དགའ་བར་བྱེད་ཅིང་དབང་དུ་བྱེད་པའོ། །འདི་སྐད་སྟོན་པ་ཡིན་ཏེ། ནོར་བུ་རྒྱལ་པོའི་
[128a.2]ཕྱག་རྒྱ་ལས། གཡས་པའི་མཛུབ་མོས་གཡོན་ལོགས་ནས་འདྲེན་པའི་ཚུལ་དུ་བྱེད་པ་ནི་ནོར་བུ་ཆགས་པའི་ཕྱག་རྒྱའོ། །དེ་ཉིད་ལས་མཛུབ་མཐེབ་གཉིས་སྦྱར་བ་ལེགས་སོ་ཞེས་བྱའོ་ཞེས་བྱ་བ་ནི་ནོར་བུ་ཆགས་པའི་ཕྱག་རྒྱ་ཉིད་ལས། མཛུབ་མོ་དང་མཐེ་བོ་གཉིས་སེ་གོལ་
[128a.3]བརྡབས་པའི་ཚུལ་དུ་བྱེད་པ་ནི་ནོར་བུ་ལེགས་པའིའོ། །དེ་ལས་མཐེབ་གཉིས་སྦྱར་བ་ཡིས། །མཛུབ་གཉིས་རྩེ་མོར་བཀབ་དེ་བཞིན། །མཐེ་བོ་གཉིས་ནི་དབུས་སྦྱར་ལ། །མཛུབ་གཉིས་ངོས་དང་སྦྱར་བ་ནི། །ཞེས་བྱ་བ་ནི་རིན་ཆེན་ལེགས་པའི་ཕྱག་རྒྱ་ཉིད་ལས། མཛུབ་མོ་གཉིས་
[128a.4]བསྐུམས་ནས་ཚིགས་གསུམ་པ་ཕན་ཚུན་སྦྱར་ལ། མཐེ་བོ་གཉིས་བསྒྲེངས་ནས་བཀབ་ལ་ཅུང་ཟད་ཁ་ཕྱེ་སྟེ། མཐེ་བོང་གི་གདོང་ལྟ་བའི་ཚུལ་དུ་འཛིན་པར་བྱེད་པ་འདི་ནི་ནོར་བུའི་ལྟ་བ་སྟེ། ནོར་བུ་ལྟ་བའི་ཕྱག་རྒྱ་འབར་བའི་ལྟ་བ་དབང་བསྐུར་བ་ལ་སོགས་པ་བྱས་པས་འཇིག་རྟེན་པ་རྣམས་ཀྱིས་
[128a.5]ལྟ་བའི་དོན་རྣམས་འཕྲོག་པར་བྱེད་པའོ། །དོན་ཀུན་གྲུབ་པའི་ཕྲེང་བ་ནི། །ཞེས་བྱ་བ་ལ་དེ་བཞིན་གཤེགས་པ་ཐམས་ཅད་དབང་བསྐུར་བ་སྟེ། འདིར་དོན་ཐམས་ཅད་གྲུབ་པ་དེའི་ཕྲེང་བ་ནི་དབང་བསྐུར་བའི་དམ་ཚིག་གི་ཕྱག་རྒྱའོ། །དེས་ལས་གང་ཞིག་བྱེད་ཅེ་ན། །རང་གི་དབང་ནི་རབ་སྦྱིན་
[128a.6]འགྱུར། །ཞེས་བྱ་བ་སྨོས་ཏེ། དགེ་བའི་དབང་བསྐུར་བ་ནི་རང་གི་དབང་བསྐུར་བའོ། །དེ་བཞིན་གཤེགས་པ་ཐམས་ཅད་ཀྱི་ཕྲེང་བའི་དབང་བསྐུར་བ་དེ་བཀུག་ནས་སྦྱིན་པར་བྱ་བ་ནི་རང་གི་དབང་རབ་ཏུ་སྦྱིན་པར་འགྱུར་རོ། །དོན་ཐམས་ཅད་གྲུབ་པའི་ཕྲེང་བ་འདི་གང་ཞིག་ཡིན་ཞེ་ན། དེ་
[128a.7]ཉིད་སྙིང་གར་མཐེ་བོ་གཉིས། །བསྒྲེང་སྟེ་ངོས་ཀྱིས་སྦྱར་བ་ནི། །ཞེས་བྱ་བ་ལ་རིན་ཆེན་ལྟ་བའི་དམ་ཚིག་གི་ཕྱག་རྒྱ་སྙིང་གའི་ཕྱོགས་སུ་མཛུབ་མོ་གཉིས་དང་མཐེ་བོ་གཉིས་ཕན་ཚུན་ཁ་སྦྱར་ལ་བཅིངས་ཏེ། ཕྱིས་སྙིང་གའི་ཕྱོགས་སུ་གཞག་པ་ལས། དབང་བསྐུར་བའི་གནས་སུ་
[128b]
[128b.1]འཇོག་པ་ནི། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་ཕྲེང་བའི་དམ་ཚིག་གི་ཕྱག་རྒྱར་འགྱུར་རོ་ཞེས་བྱ་བའི་དོན་ཏོ། །ནོར་བུ་ཉི་མའི་སྙིང་གར་གཞག །གཟི་བརྗིད་ཆེན་པོ་རབ་སྦྱིན་འགྱུར། །ཞེས་བྱ་བ་ནི་བཤད་མ་ཐག་པའི་དེ་བཞིན་གཤེགས་པ་ཐམས་ཅད་ཀྱི་
[128b.2]དབང་བསྐུར་བའི་ཕྲེང་བའི་དམ་ཚིག་གི་ཕྱག་རྒྱ་ཉིད་ལས་ཉི་མའི་དཀྱིལ་འཁོར་གྱི་ཚུལ་གྱིས་སྙིང་གར་བསྐོར་བས་ནམ་མཁའི་ཁམས་ཁྱབ་པར་ཉི་མའི་ཏིང་ངེ་འཛིན་རབ་ཏུ་སྟེར་བ་དང་། གཟི་བརྗིད་ཆེན་པོ་རབ་ཏུ་སྦྱིན་པ་འདི་ནི་ནོར་བུ་ཉི་མའི་དམ་ཚིག་གི་ཕྱག་རྒྱའོ། །སྲིན་ལག་བསྙམས་
[128b.3]ཏེ་བསྒྲེངས་ནས་ནི། །ཕྱི་སྟེ་སྤྱི་བོར་གཞག་བྱ་བ། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་ཕྱག་རྒྱ་དེ་ཉིད་སྤྱི་བོར་བཞག་ལ་སྲིན་ལག་གཉིས་བསྙམས་ཏེ་མྱུ་གུ་ལྟར་བྱས་ནས་ཕྱེ་བ་འདི་ནི་ནོར་བུའི་དཔལ་གྱིའོ། །འདི་སྐད་སྟོན་པ་ཡིན་ཏེ། དེ་བཞིན་
[128b.4]གཤེགས་པ་ཐམས་ཅད་ཀྱི་དབང་བསྐུར་བའི་དམ་ཚིག་གི་ཕྱག་རྒྱ་དེ་ཉིད་ལས་སྲིན་ལག་གཉིས་མྱུ་གུ་ལྟར་བྱས་ནས་ཕྱེ་སྟེ་སྤྱི་བོར་གཞག་པར་བྱའོ། །རྡོ་རྗེ་ནོར་བུ་ཆེན་པོ་ཞེས་བྱ་བ་ནི་སྔ་མ་བཞིན་ནོ། །རེ་བ་ཐམས་ཅད་རྫོགས་བྱེད་པ། །ཞེས་བྱ་བ་ནི་ཕྱག་རྒྱ་འདིའི་འབྲས་བུ་གསུངས་པ་ཡིན་
[128b.5]ནོ། །དེ་ཉིད་ལས་ནི་འགྱིང་བྱེད་ཅིང་། །ཁ་འགྲམ་དགོད་པར་བསྐོར་བ་དེ། །ཞེས་བྱ་བ་ནི་ནོར་བུའི་དཔལ་གྱི་དམ་ཚིག་གི་ཕྱག་རྒྱ་ཉིད་འགྱིང་བར་བྱེད་ཅིང་དགོད་པའི་ཚུལ་དུ་བསྐོར་ནས་ཁར་འཇོག་པ་འདི་ནི་རིན་ཆེན་བཞད་པའིའོ། །རིན་ཆེན་ཆེར་དགོད་ཅེས་བྱ་བ་ནི་ཕྱག་རྒྱའི་མིང་བསྟན་
[128b.6]པ་ཡིན་ནོ། །འདིའི་འབྲས་བུ་གང་ཡིན་ཞེ་ན། བཞད་པས་དོན་རྣམས་ཐམས་ཅད་ཐོབ། །ཅེས་བྱ་བ་སྨོས་ཏེ། འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་ཆོས་ཀྱི་སྦྱིན་པའི་དོན་ཐོབ་པར་བྱེད་ཅེས་བྱ་བའི་དོན་ཏོ། །ཀུན་རྩེ་ནོར་བུའི་པདྨ་ནི། །ཏིང་ངེ་འཛིན་གྱིས་ནོར་
[128b.7]འཕྲོགས་པ། །ཞེས་བྱ་བ་ནི་སོར་མོའི་རྩེ་མོ་ཐམས་ཅད་བསྙེམས་ལ་ཚིགས་གསུམ་པ་ཅུང་ཟད་ཅིག་བཀུག་པ་ནི་ནོར་བུའི་པདྨ་ལྟ་བུ་ཡིན་པའི་ཕྱིར་ཤེས་རབ་ཀྱི་ནོར་ཏིང་ངེ་འཛིན་གྱི་སྦྱོར་བས་འགུགས་པར་བྱེད་པ་འདི་ནི་རིན་ཆེན་པདྨའིའོ། །འདི་སྐད་སྟོན་པ་ཡིན་ཏེ། སོར་མོའི་རྩེ་མོ་
[129a]
[129a.1]ཐམས་ཅད་ནོར་བུའི་པདྨ་ལྟ་བུར་བྱས་ནས། མདུན་དུ་ཁ་ཐུར་དུ་བསྟན་ལ་གཞག་པར་བྱའོ། །དེ་ལས་མཐའ་ལས་གྲོལ་བ་ནི། །སྦྱིན་པ་ཆེན་པོ་རབ་སྦྱིན་བྱེད། །རིན་ཆེན་པདྨའི་དམ་ཚིག་གི་ཕྱག་རྒྱ་ཉིད་ལས་མཐེའུ་ཆུང་ནས་བརྩམས་ཏེ། དལ་བུས་དགྲོལ་བའི་ཚུལ་
[129a.2]གྱིས་སོར་མོ་ཐམས་ཅད་བཀྲོལ་བ་ནི་གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོའོ། སྦྱིན་པ་ཆེན་པོ་རབ་སྦྱིན་བྱེད། །ཅེས་སོ། །མཐེ་བོང་གཉིས་ནི་ནང་དུ་དགུག །ཅེས་བྱ་བ་ལ་སོགས་པ་ནི་རིན་ཆེན་པདྨའི་དམ་ཚིག་གི་ཕྱག་རྒྱ་ཉིད་ལས། མཐེ་བོང་ནང་དུ་བཅུག་ལ་མཛུབ་མོ་
[129a.3]གཉིས་ནོར་བུ་ལྟ་བུར་བྱས་ནས་རལ་གྲི་འཛིན་པའི་ཚུལ་དུ་བྱེད་པ་འདི་ནི་ནོར་བུ་རལ་གྲི་ཞེས་བྱ་བ་རིན་ཆེན་རྣོན་པོའིའོ། ལས་ཅི་ཞིག་བྱེད་ཅེ་ན། ནོར་འཕྲོག་པ་ཞེས་བྱ་བ་སྨོས་ཏེ། ཤེས་རབ་དང་ཡེ་ཤེས་ལ་སོགས་པའོ། །སུ་དག་གི་ཞེ་ན། འགྲོ་བ་རྣམས་ཀྱི་སྟེ། སངས་རྒྱས་
[129a.4]ལ་སོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པའི་མཐུས་རྣམ་པར་རྣོན་པའོ། །རྡོ་རྗེ་བསྡམས་ཏེ་འཁོར་ལོ་བྱ། །ཞེས་བྱ་བ་ནི་ནོར་བུའི་རིགས་ཀྱི་དཀྱིལ་འཁོར་གྱི་བདག་པོ་སྟེར་བར་བྱེད་པའི་རྡོ་རྗེ་རབ་ཏུ་སྦྱིན་ནོ་ཞེས་བྱ་བའི་དོན་ཏོ། །དེ་ཉིད་ཐལ་མོའི་ཚུལ་དུ་བྱས། །ཁ་ནས་འདྲེན་
[129a.5]པར་བྱས་པ་ནི། །ཞེས་བྱ་བ་ལ། ནོར་བུ་འཁོར་ལོའི་དམ་ཚིག་གི་ཕྱག་རྒྱ་ཉིད་ལས། ནོར་བུའི་ཐལ་མོ་སྦྱར་ཏེ། ཁ་ནས་འདྲེན་པའི་ཚུལ་དུ་བྱེད་པ་ནི་ནོར་བསྲུང་བའིའོ། །དེ་ཉིད་བཅིངས་པ་ནི་རིན་ཆེན་གསུང་བའི་རྣལ་འབྱོར་པས་དེ་བཅིངས་པའོ། །ངག་ཡིན་ཏེ་ནོར་བུ་གསུང་བའིའོ། །རང་གི་
[129a.6]བཀས་ནི་རང་གི་ཚིག་དེ་ནོར་བུ་གསུང་བའི་བཀའོ། །ང་རྒྱལ་གྱི་ནོར་གསུང་བས་འཕྲོག་ཅིང་འགུགས་པར་བྱེད་པ་སྟེ། རང་གི་རིག་པས་བྱེད་ཅེས་བྱ་བའི་དོན་ཏོ། །རྡོ་རྗེ་ནོར་བུ་ཆེ་བཅིངས་ལ། །ཞེས་བྱ་བ་ནི། མཛུབ་མོ་བསྙམས་ཏེ་རྒྱབ་བཀུག་པ། མཐེ་བོང་རྡོ་རྗེ་བཅིངས་པ་ནི། །རྡོ་རྗེ་བསྡམས་པ་
[129a.7]ལས་བྱུང་བ། །རྡོ་རྗེ་ནོར་བུ་ཆེ་ཞེས་བཤད། །དེ་བཅིངས་ལ་སོར་མོ་ལྷག་མ་རྣམས་གྱེན་དུ་བརྐྱང་ནས། ནོར་བུ་ལྟ་བུའི་ཚུལ་གྱིས་བསྐྱོད་པ་དེ་བཞིན་དུ་སོར་མོ་ཐམས་ཅད་ཀྱང་བསྐྱོད་པར་བྱའོ། །དེའི་ཕྱིར། སོར་མོ་ཐམས་ཅད་བསྒྲེང་ནས་ནི། །ཕྱོགས་བཞི་ནས་ནོར་ཆར་འབེབས། །ཞེས་
[129b]
[129b.1]བྱ་བ་འདི་ནི་རིན་ཆེན་ཆར་འབེེབས་ཀྱི་དམ་ཚིག་གི་ཕྱག་རྒྱའོ། །རྡོ་རྗེ་ནོར་བུ་ཆེ་བཅིངས་ལ། །ཞེས་བྱ་བ་ནི་སྔ་མ་བཞིན་ནོ། །གར་བྱས་གཙུག་ཕུད་དབུས་བཞག་ནས། །ཞེས་བྱ་བ་ནི་གར་བྱེད་ཅིང་སྤྱི་གཙུག་གི་ཕྱོགས་ཀྱི་ཕྱོགས་སུ་མཆོད་པས་ཡང་དག་པར་མཆོད་པར་བྱེད་པའོ། །ཀུན་ལ་
[129b.2]ཆོ་ག་བཞིན་བཅིངས་ནས། །རིན་ཆེན་ཀུན་གྱིས་དེ་མཆོད་འགྱུར། །ཞེས་བྱ་བ་ནི་མཛུབ་མོ་གཉིས་རྡོ་རྗེ་ནོར་བུ་ཆེན་པོར་བྱས་ལ། སོར་མོ་ལྷག་མ་བརྐྱང་གདོང་སྦྱར་ནས། ནོར་བུའི་ཚུལ་དུ་བཏགས་པའི་ནོར་བུ་ཆེན་པོ་ཆོ་ག་བཞིན་དུ་ཡང་དག་པར་མཆོད་པ་དེ་རྣལ་འབྱོར་པས། དེ་བཞིན་
[129b.3]གཤེགས་པ་ཐམས་ཅད་ལ་རིན་པོ་ཆེའི་ནོར་བུ་དངོས་གྲུབ་ཐོབ་པར་བྱེད་པའི་ཕྱིར་མཆོད་པར་བྱའོ། །འདི་སྐད་སྟོན་པ་ཡིན་ཏེ། རིན་ཆེན་ཆར་འབེབས་ཉིད་ཀྱི་ཕྱག་རྒྱ་ཆེན་པོ་བཅིངས་ནས། གར་བྱས་ཏེ་སྤྱི་གཙུག་གི་དབུས་སུ་གཞག་པ་འདི་ནི་ནོར་བུ་མཆོད་པའི་དམ་ཚིག་གི་ཕྱག་རྒྱའོ། །
[129b.4]དོན་ཀུན་གྲུབ་པའི་ཕྱག་རྒྱ་ནི། །མགྲིན་པའི་ཕྱོགས་སུ་འཁྱུད་པར་བྱ། །ནོར་བུ་བཅིང་བ་ཞེས་བྱ་སྟེ། །བསྲུང་བ་ཡི་ནི་ཆོ་གར་གྲགས། །ཞེས་བྱ་བ་ནི་ནོར་བུ་བསྲུང་བའིའོ། །འདི་སྐད་སྟོན་པ་ཡིན་ཏེ། རྡོ་རྗེ་བསྡམས་པ་ལས་མཛུབ་མོ་གཉིས་ནོར་བུར་བྱས་ནས། མཐེ་བོ་གཉིས་
[129b.5]བརྐྱང་སྟེ་ཁ་ཕྱེ་ལ། རང་གི་མགྲིན་པའི་ཕྱོགས་སུ་འཁྱུད་པ་ལྟར་བྱའོ། །དེ་ཉིད་དོན་ཀུན་གྲུབ་པའི་ཕྱིར། །གནོད་སྦྱིན་ཚུལ་དུ་ཁར་གཞག་གོ། །ཞེས་བྱ་བ་ནི་ནོར་བུ་བསྲུང་བའི་ཕྱག་རྒྱ་ཉིད་ལས་མཐེ་བོང་གཉིས་བརྐྱང་ནས་ཁར་གཞག་པ་ནི་ནོར་བུ་མཆེ་བ་ཞེས་བྱ་བའི་གནོད་སྦྱིན་
[129b.6]གྱི་དོན་འཕྲོག་པ་སྟེ། ནོར་བུའི་གནོད་སྦྱིན་ལ་སོགས་པ་དོན་ཐམས་ཅད་འགུགས་པའོ། །རྡོ་རྗེ་བསྡམས་པ་དམ་བྱས་ལ། །མཛུབ་བཀུག་མཐེ་བོ་གཉིས་ཀྱིས་ནི། །ཞེས་བྱ་བ་ནི་མཛུབ་མོ་གཉིས་དང་རང་གི་མཐེ་བོང་གཉིས་གདོང་སྦྱར་ནས་ལེགས་པར་མནན་ཏེ་བཙིར་བ་ནི་ནོར་བུའི་
[129b.7]ཁུ་ཚུར་གྱི་དམ་ཚིག་གི་ཕྱག་རྒྱའོ། །དམ་ཚིག་རྣམས་ཀྱི་མཆོད་མཆོག་རྣམས། །ཞེས་བྱ་བ་ནི་སྒེག་མོ་ལ་སོགས་པའོ། །དེ་དག་གི་ཡང་། རྡོ་རྗེ་དབྱིངས་ཀྱི་ཚུལ་དུ་ནི། །ཇི་བཞིན་ནོར་བུ་ལྡན་པ་ཡི། །འདིར་ནི་དམ་ཚིག་མཆོག་ཏུ་བརྟགས། །དེ་བཞིན་གཤེགས་པ་རྣམས་ཀྱིས་ཇི་
[130a]
[130a.1]ལྟ་བ་བཞིན་དུ། ནོར་བུའི་རིགས་ཀྱི་སྦྱོར་བ་ནི། །གུང་མོ་ནོར་བུའི་ཚུལ་བྱ་བར། །ཞེས་བྱ་བ་སྨོས་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་སྒེག་མོ་མ་ལ་སོགས་པའི་དམ་ཚིག་གི་ཕྱག་རྒྱ་དེ་ཉིད་འདིར་དམ་ཚིག་གི་ཕྱག་རྒྱར་བརྟག་པར་བྱའོ། །འདི་སྐད་
[130a.2]སྟོན་པ་ཡིན་ཏེ། ནོར་བུའི་མཚན་མའི་དམ་ཚིག་གི་ཕྱག་རྒྱ་བཅིངས་ཏེ། མཐེ་བོང་བསྙམས་ལ་སྙིང་གར་གཞག །རབ་ཏུ་བརྐྱང་བས་ཕྲེང་བ་མའི། །ཐལ་མོ་སྦྱར་བ་ཁ་ནས་དབྱུང་། །གར་ལ་ཐལ་སྦྱར་སྤྱི་བོར་གཞག །རྡོ་རྗེ་བཅིང་བ་ཐུར་དུ་བླུགས། །རང་གི་ཐལ་སྦྱར་གྱེན་
[130a.3]དུ་གཏོར། །མཐེ་བོང་བསྙམས་ཏེ་རབ་ཏུ་བསྡམས། །རབ་ཏུ་བསྐྱང་ནས་བྱུག་པའོ། །ཞེས་བྱ་བ་ནི་ནོར་བུ་སྒེག་མོ་ལ་སོགས་པ་ནས། ནོར་བུའི་དྲི་ཆབ་མ་ལ་མཐར་ཐུག་པའི་བར་གྱི་དམ་ཚིག་གི་ཕྱག་རྒྱའོ། །འདིར་རང་གི་ཐལ་མོ་ནི་ཐལ་མོ་སྦྱར་བ་རིན་པོ་ཆེའི་ཐལ་མོར་
[130a.4]གཟུང་བར་བྱའོ། །ལྕགས་ཀྱུ་བཅིང་སོགས་ཚུལ་དུ་ནི། །ལས་རྣམས་ཐམས་ཅད་རབ་གྲུབ་བྱེད། །ཅེས་བྱ་བ་ནི་ནོར་བུ་མཚན་མའི་ཕྱག་རྒྱ་དེ་ཉིད་བཅིངས་ནས། མཛུབ་མོ་གཅིག་ཏུ་བཀུག་པ་དང་། །མཐེ་བོང་གཉིས་ནི་མདུད་པ་དོར། །མཐེ་བོང་མཛུབ་མོ་གདུ་བུར་བཅིང་། །རྡོ་རྗེ་
[130a.5]བཅིང་བ་མཛུབ་མོར་བསྡམས། །ཞེས་བྱ་བ་ནི་སྒོ་སྲུང་རྣམས་ཀྱི་དམ་ཚིག་གི་ཕྱག་རྒྱའོ། །དེ་ནས་ནོར་བུ་ཆེན་པོའི་རིགས་ཀྱི་ཆོས་ཀྱི་ཕྱག་རྒྱ་ནི་འདི་ཡིན་ནོ་ཞེས་བྱ་བ་ནི་ཆོས་ཀྱི་ཕྱག་རྒྱར་ངེས་པ་སྟེ། ཡི་གེ་ཏྲ་ནི་རྡོ་རྗེ་སྙིང་པོ་དང་། ནོར་བུའི་མཚན་མ་དང་། རྡོ་རྗེ་ནོར་བུ་རྣམས་ཀྱི་ཆོས་ཀྱི་ཕྱག་རྒྱའོ། །
[130a.6]གྲྭ་ནི་རིན་ཆེན་རྒྱལ་པོའིའོ། །ཏྲི་ནི་ནོར་བུ་ཆགས་པའིའོ། །ཧྲི་ནི་ནོར་བུ་ལེགས་པའིའོ། །ཡི་གེ་ཤྲི་ནི་རིན་ཆེན་ལྟ་བ་དང་། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་ཕྲེང་བ་དང་། རྡོ་རྗེ་རིན་པོ་ཆེ་མྱུ་གུ་མའི་ཕྱག་རྒྱའོ། །ཨི་ནི་རིན་ཆེན་གཟི་བརྗིད་ཀྱིའོ། །ར་ནི་ནོར་བུ་དཔལ་
[130a.7]གྱིའོ། །ཧ་ནི་ནོར་བུ་བཞད་པའིའོ། །ཧྲི་ནི་རིན་ཆེན་པདྨ་དང་། གཏོང་བ་ཏིང་ངེ་འཛིན་ཡེ་ཤེས་སྙིང་པོ་དང་། རྡོ་རྗེ་རིན་ཆེན་པདྨ་རྣམས་ཀྱི་ཕྱག་རྒྱའོ། །དྷི་ནི་རིན་ཆེན་རྣོན་པོའིའོ། །ཀྲི་ནི་ནོར་བུའི་འཁོར་ལོའིའོ། །བཱ་ནི་ནོར་བུ་གསུང་བའིའོ། །རི་ནི་རིན་ཆེན་ཆར་འབེབས་པ་དང་ནོར་བུའི་
[130b]
[130b.1]མཆོད་པ་དང་། རྡོ་རྗེ་རིན་ཆེན་ཆར་འབེེབས་མའིའོ། །ཧ་ནི་ནོར་བུ་བསྲུང་བའིའོ། །ཡ་ནི་ནོར་བུ་གནོད་སྦྱིན་གྱིའོ། །ཨ་ནི་ནོར་བུ་ཁུ་ཚུར་གྱི་ཆོས་ཀྱི་ཕྱག་རྒྱའོ། །ཡི་གེ་ཧཱུཾ་ཁུརྣམ་པར་སྣང་མཛད་ཀྱིའོ། །རིན་ཆེན་སྒེག་མོ་ལ་སོགས་པ་རྣམས་ཀྱི་ནི། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་
[130b.2]བཤད་པ་ཉིད་ཀྱི་ཆོས་ཀྱི་ཕྱག་རྒྱའོ། །རིན་ཆེན་འབེེབས་པའི་མཐར་ཐུག་པ་རྣམས་ལ་ཁྱད་པར་ནི་འདི་ཡིན་ཏེ། ཡི་གེ་ཏྲཾ་མཐར་སྦྱར་བའོ། །རིན་ཆེན་ཕྱག་རྒྱ་གཉིས་བྱས་ལས། །ལས་ཀྱི་ཕྱག་རྒྱ་བྲི་བར་བྱ། །ཞེས་བྱ་བ་ནི་ནོར་བུ་ཁུ་ཚུར་གྱི་དམ་ཚིག་གི་ཕྱག་རྒྱ་དེ་འདིར་རིན་པོ་ཆེའི་ཁུ་ཚུར་གཉིས་
[130b.3]སུ་བྱས་ནས། རྣམ་པར་སྣང་མཛད་ལ་སོགས་པ་ནས། རིན་ཆེན་འབེེབས་པའི་མཐར་ཐུག་པའི་ལས་ཀྱི་ཕྱག་རྒྱར་འགྱུར་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་བྱས་ཏེ། དེ་ལ་ཚུལ་ནི་འདི་ཡིན་ཏེ། གཡོན་པའི་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་
[130b.4]བྱ། །བྱང་ཆུབ་མཆོག་གི་ཕྱག་རྒྱ་སྟེ། །སངས་རྒྱས་བྱང་ཆུབ་སྦྱིན་པའོ། །རྣམ་པར་སྣང་མཛད་ཀྱི་ལས་ཀྱི་ཕྱག་རྒྱའོ། །བསྒྱིངས་བཅས་གསོར་བ་གཉིས་ཀ་ཡི་ནི། ནོར་བུའི་མཚན་མ་དང་རྡོ་རྗེ་རིན་ཆེན་མ་རྣམས་ཀྱིའོ། །ལྕགས་ཀྱུ་འཛིན་ལྟར་གནས་པ་ནི། རྡོ་རྗེ་རྒྱལ་པོའིའོ། །མདའ་འཕང་
[130b.5]བའི་ཚུལ་དུ་ནི། རིན་ཆེན་ཆགས་པའིའོ། །ལེགས་སོ་སྦྱིན་པ་སྙིང་གར་གཞག་པ་ནི། ནོར་བུ་ལེགས་པའིའོ། །དབང་བསྐུར་བ་ནི་ནོར་བུ་གཉིས་ནི་དོན་ཐམས་ཅད་གྲུབ་པ་དང་རིན་ཆེན་ལྟ་བ་དང་། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའི་ཕྲེང་བ་དང་། རྡོ་རྗེ་རིན་ཆེན་མྱུ་གུ་མའིའོ། །
[130b.6]སྙིང་གར་ཉི་མ་བསྟན་པར་བྱ་བ་ནི། ནོར་བུ་ཉི་མའིའོ། །གཡོན་པ་ལ་ནི་གྲུ་མོ་གཟུགས་པ་ནི་རིན་ཆེན་དཔལ་གྱིའོ། །དེ་བཞིན་ཁ་ཕྱོགས་བསྐོར་བར་བྱ་བ་ནི། རིན་ཆེན་བཞད་པའིའོ། །གཡས་པ་ཡིས་ནི་གཡོན་པ་དབྱེ་བ་ནི། རིན་ཆེན་པདྨ་དང་། གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོ་དང་།
[130b.7]རྡོ་རྗེ་རིན་ཆེན་པདྨའིའོ། །སྙིང་གར་གཡོན་པ་རལ་གྲི་འདུད་ནི་རིན་ཆེན་རྣོན་པོའིའོ། །མགལ་མེའི་འཁོར་ལོ་བསྐོར་བ་ནི་ནོར་བུ་འཁོར་ལོ་བསྐོར་བའིའོ། །རིན་ཆེན་གཉིས་ཀ་ཁ་ནས་དབྱུང་བ་ནི། ནོར་བུ་བསྲུང་བའོ། །རིན་ཆེན་གར་བསྐོར་བཀྲོལ་བ་ཡིས། །ཐལ་མོ་འགྲམ་པ་སྤྱི་བོར་གཞག །
[131a]
[131a.1]རིན་ཆེན་ཆར་འབེབས་དང་། ནོར་བུའི་མཆོད་པ་དང་། རྡོ་རྗེ་རིན་ཆེན་ཆར་འབེབས་མའིའོ། །གོ་ཆ་ནི་ནོར་བུ་བསྲུང་བའིའོ། །མཐེ་ཆུང་མཆེ་བ་ནི་ནོར་བུའི་གནོད་སྦྱིན་གྱིའོ། །ཁུ་ཚུར་གཉིས་ནི་མནན་པ་ནི། ནོར་བུ་ཁུ་ཚུར་གྱིའོ། །རིན་ཆེན་བསྒྱིངས་པའི་ཚུལ་གྱིས་ནི། །
[131a.2]བསམ་པ་གཡོས་པས་འདུད་པར་བྱ། །རིན་ཆེན་སྒེག་མོའིའོ། །ཕྲེང་བ་བཅིངས་དང་ནི་རིན་ཆེན་ཕྲེང་བ་མའིའོ། །ཁ་ནས་དབྱུང་ནི་རིན་ཆེན་གླུ་མའིའོ། །གར་ལ་ཐལ་སྦྱར་སྤྱི་བོར་གཞག་པ་ནི། རིན་ཆེན་གར་མའིའོ། །རིན་ཆེན་ཁུ་ཚུར་ཐུར་དུ་བླུགས་པ་ནི། རིན་ཆེན་བདུག་པ་མའིའོ། །
[131a.3]ཐལ་མོ་སྦྱར་བ་གྱེན་དུ་གཏོར། །རིན་ཆེན་མེ་ཏོག་མའིའོ། །མཐེ་བོང་བསྙམས་ཏེ་རབ་ཏུ་བསྡམས་པ་ནི་རིན་ཆེན་མར་མེ་མའིའོ། །རབ་ཏུ་བརྐྱང་ནས་བྱུག་པ་ནི། རིན་ཆེན་དྲི་ཆབ་མའིའོ། །མཛུབ་མོ་ལྕགས་ཀྱུ་བཅིང་བ་ནི། །མཐེའུ་ཆུང་ལས་ཏེ་ལྕགས་ཀྱུ་ཆེ། །རིན་ཆེན་ལྕགས་
[131a.4]ཀྱུའིའོ། །མཁྲིག་མ་མདུད་པ་ནི་རིན་ཆེན་ཞགས་པའིའོ། །མཛུབ་གཉིས་མདུད་པ་ནི་རིན་ཆེན་ལྕགས་སྒྲོག་གིའོ། །རྒྱབ་གཉིས་ཀྱང་ནི་མཉམ་སྟེ་མནན་ནི་རིན་ཆེན་འབེེབས་པའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་སེམས་ཅན་ཐམས་ཅད་ཀྱི་བསམ་པ་ཡོངས་
[131a.5]སུ་རྫོགས་པར་བྱེད་པ་ནི་མཚན་ཉིད་ཅན་གྱི་ལས་ནི་དེ་བཞིན་གཤེགས་པ་ཐམས་ཅད་ཀྱི་ལས་སོ། །དེའི་དམ་ཚིག་ནི་རྒྱུའོ། །ནོར་བུའི་རིགས་དེ་ཉིད་ཀྱི་རྟོགས་པ་ཆེན་པོ་ནི་རྟོག་པ་ལས་བྱུང་བའི་ཕྱིར། དེ་སྟོན་པར་བྱེད་པའི་ཚིག་གི་ཚོགས་ལ་ཡང་རྟོག་པ་ཆེན་པོ་ཞེས་བྱ་སྟེ། སེམས་ཅན་ཐམས་
[131a.6]ཅད་ཀྱི་བསམ་པ་ཡོངས་སུ་རྫོགས་པར་བྱེད་པའི་ལས་ཀྱི་རྟོག་པ་ཐམས་ཅད་ཟིལ་གྱིས་མནན་ནས་མཛེས་ཤིང་འབར་བར་བྱེད་པས་ན། རྒྱལ་པོ་སྟེ་དེའི་ཕྱིར་རྟོག་པའི་རྒྱལ་པོའོ། །དེ་བས་ན་དོན་ཐམས་ཅད་གྲུབ་པ་ཞེས་བྱ་བའི་དཀྱིལ་འཁོར་ཆེན་པོའི་ཆོ་ག་རྒྱས་པ་རྫོགས་སོ་ཞེས་བྱ་བ་ནི་རྩ་བའི་རྒྱུད་
[131a.7]ཀྱི་དོན་མཐར་ཐུག་པའོ། །འཕགས་པ་དེ་ཁོ་ན་ཉིད་བསྡུས་པའི་འགྲེལ་པ། དེ་ཁོ་ན་ཉིད་སྣང་བར་བྱེད་པ་ལས་དོན་ཐམས་ཅད་གྲུབ་པར་བྱེད་པའི་དཀྱིལ་འཁོར་ཆེན་པོའི་བཤད་པ་རྫོགས་སོ།། །།དེ་ལྟར་ཕྱག་རྒྱ་ཆེན་པོ་གཙོ་བོར་གྱུར་པའི་ནོར་
[131b]
[131b.1]བུའི་རིགས་ཆེན་པོས་འདུལ་བའི་སེམས་ཅན་རྗེས་སུ་གཟུང་བའི་ཕྱིར་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་བསྟན་ནས། ད་ནི་དམ་ཚིག་གི་ཕྱག་རྒྱ་གཙོ་བོར་གྱུར་པའི་ནོར་བུའི་རིགས་ཀྱི་དཀྱིལ་འཁོར་གྱིས་འདུལ་བའི་སེམས་ཅན་རྗེས་སུ་གཟུང་བའི་ཕྱིར། དེ་ནས་ཡང་བཅོམ་ལྡན་
[131b.2]འདས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་རྗེས་ཐོགས་ལའོ། །འདིར་དང་པོར་སྦྱོར་བའི་ཏིང་ངེ་འཛིན་ནི་དོན་ཐམས་ཅད་གྲུབ་པའི་དཀྱིལ་འཁོར་ལས་བཤད་པའི་དང་པོར་སྦྱོར་བ་ཉིད་ཡིན་ནོ། །ཡང་གི་སྒྲ་ནི་ཟློས་པའི་དོན་ཏེ་དོན་
[131b.3]ཐམས་ཅད་གྲུབ་པའི་དཀྱིལ་འཁོར་ཆེན་པོ་ལ་ལྟོས་པའོ། །བཅོམ་ལྡན་འདས་ནི་རྣམ་པར་སྣང་མཛད་དོ། །དེ་བཞིན་གཤེགས་པ་ཐམས་ཅད་དབང་བསྐུར་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་རྟོགས་པ་རྣམ་པར་སྣང་མཛད་ནས་རྡོ་རྗེ་རིན་ཆེན་ཆར་འབེབས་ཀྱི་མཐར་ཐུག་པའོ། །
[131b.4]དེའི་གཟུངས་ནི་དེའི་རིགས་ཏེ། རྣམ་པར་སྣང་མཛད་ལ་སོགས་པ་ནས་རྡོ་རྗེ་རིན་ཆེན་ཆར་འབེེབས་མའི་མཐར་ཐུག་པ་གཉིས་སུ་མེད་པའི་དྲན་པ་དང་། ཤེས་རབ་ཡང་དག་པར་ལྡན་པའི་སེམས་སོ། །དེ་དག་གི་དམ་ཚིག་ནི་བཅོམ་ལྡན་འདས་རྣམ་པར་སྣང་མཛད་ཀྱི་ནོར་བུའི་རིགས་ཆེན་
[131b.5]པོའི་གཟུངས་ཀྱི་དཀྱིལ་འཁོར་རོ། །དེ་ལས་བྱུང་བ་ནི་དོན་ཐམས་ཅད་གྲུབ་པའི་ཐུགས་ཀའི་རྡོ་རྗེ་རིན་པོ་ཆེ་གང་ལས་བྱུང་བ་དེ་ལ་དེ་སྐད་ཅེས་བྱ་སྟེ། དེས་བྱིན་གྱིས་བརླབས་པ་ནི་བརྟན་པར་བྱས་པའོ། །གང་དང་གང་གིས་དོན་གྱི་རྗེས་སུ་སོང་བའི་ཏིང་ངེ་འཛིན་མིང་དེ་སྐད་ཅེས་བྱ་བ་ལ་སྙོམས་
[131b.6]པར་ཞུགས་ནས་རང་གི་ཕྱག་རྒྱ་འཆད་པར་འགྱུར་བ་འདི་དག་གིས་གསུངས་ཤིང་བཤད་པའོ། །ནོར་བུའི་རིགས་ཆེན་པོ་རང་གི་གཟུངས་ཀྱི་དཀྱིལ་འཁོར་སྤྲུལ་པའི་ཕྱིར་འཕགས་པ་ནམ་མཁའི་སྙིང་པོའི་ཐུགས་ཀའི་རྡོ་རྗེ་ནོར་བུའི་རྣམ་པར་ཐུགས་རྩེ་གཅིག་ཏུ་མཛད་ནས་བཅོམ་ལྡན་འདས་རྣམ་
[131b.7]པར་སྣང་མཛད་ཀྱིས་རང་གི་རིག་པ་དམ་པ་འདི་གསུངས་སོ་ཞེས་བྱ་བའི་དོན་ཏོ། །རང་གི་རིགས་ལས་བྱུང་བ་ནི་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་བསྐྱེད་པའི་རྒྱུ་རང་གི་རིགས་ཡང་དག་པར་བྱུང་བ་ནི་འདིར་ཕྱག་ན་རྡོ་རྗེའི་རིག་པ་ལགས་སོ། །དེ་བཞིན་དུ་རྡོ་རྗེ་སྙིང་པོ་དང་། རྡོ་རྗེ་
[132a]
[132a.1]སྤྱན་དང་། རྡོ་རྗེ་སྣ་ཚོགས་རྣམས་ཀྱིས་རང་གི་ཕྱག་རྒྱ་གསུངས་པ་ཡིན་ཏེ། རིན་ཆེན་སྤྱན་དང་། རིན་ཆེན་པདྨ་དང་། རིན་ཆེན་ཆར་འབེབས་རྣམས་གཟུངས་ཀྱི་དཀྱིལ་འཁོར་བསྐྱེད་པའི་རྒྱུར་གྱུར་པའོ། །དེ་ནས་བཅོམ་ལྡན་འདས་དོན་ཐམས་ཅད་གྲུབ་པའི་ཐུགས་ཀའི་
[132a.2]རྡོ་རྗེ་རིན་པོ་ཆེ་ལས་རང་གི་གཟུངས་ཀྱི་དཀྱིལ་འཁོར་ཐམས་ཅད་སྤྲུལ་པའི་ཕྱིར་དེ་བཞིན་གཤེགས་པ་ཐམས་ཅད་ལ་སྔར་བགད་པའི་ཚུལ་གྱིས་དབུལ་བར་བྱའོ་ཞེས་ཤེས་པར་བྱའོ། །དེ་ལ་དེ་ནས་ཡང་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཨོཾ་སརྦྦ་ཨ་བྷི་ཥེ་ཀ་པཱུ་ཛ་ས་མ་ཡ་ཧཱུཾ་ཞེས་བྱ་
[132a.3]བ་ནི་མཐར་ཐུག་པའི་གཞུང་འདི་ཙམ་གྱིས་ནི་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ལ་སོགས་པའི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུངས་པ་ནི་སྔ་མ་བཞིན་
[132a.4]དུ་ཤེས་པར་བྱའོ། །དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་ནི་དཀྱིལ་འཁོར་དེར་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་བཅོམ་ལྡན་འདས་བྱང་ཆུབ་སེམས་དཔའ་
[132a.5]སེམས་དཔའ་ཆེན་པོ་འཕགས་པ་ནམ་མཁའི་སྙིང་པོ་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བ་ནི་སྐབས་སུ་བབ་པ་སྟེ། རང་གི་རིགས་ནི་ནོར་བུ་རིན་པོ་ཆེའི་རིགས་སོ། །དམ་ཚིག་གི་
[132a.6]ཕྱག་རྒྱ་ནི་གཟུངས་ཀྱི་ཕྱག་རྒྱའི་དཀྱིལ་འཁོར་ཆེན་པོ་འདི་གསུངས་པ་བཤད་པའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། སྔོན་དུ་བསྙེན་པའི་རྗེས་ཐོགས་ཉིད་ལའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་དོན་ཐམས་
[132a.7]ཅད་གྲུབ་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། དོན་ཐམས་ཅད་གྲུབ་པའི་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོའི་ཆོ་གས་ནོར་བུ་ཆེན་པོའི་རིགས་ཀྱི་དཀྱིལ་འཁོར་ཆེན་པོ་ཇི་ལྟ་བ་བཞིན་དུ་སྤྲུལ་ནས་གཟུགས་ཐམས་ཅད་ལ་ཡང་རེ་རེ་ཞིང་
[132b]
[132b.1]བཟླས་བརྗོད་ཁྲི་ཁྲི་བྱའོ། །ཕྱིས་ནོར་བུ་རིན་པོ་ཆེའི་གཟུངས་ཀྱི་ཕྱག་རྒྱའི་དཀྱིལ་འཁོར་ཏིང་ངེ་འཛིན་རྣམ་པ་གསུམ་བསྒོམ་པ་སྔོན་དུ་འགྲོ་བས་ནོར་བུ་ཆེན་པོའི་རིགས་ཀྱི་གཟུངས་ཀྱི་དཀྱིལ་འཁོར་ཞག་བདུན་བསྒོམས་ལ། དེའི་རྗེས་ལ་དཀྱིལ་འཁོར་འདི་བྲི་བར་བྱའོ། དེ་ནས་ནི་དེའི་ཕྱིར་ཞེས་བྱ་
[132b.2]བའི་དོན་ཏེ། གང་གི་ཕྱིར་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་དུ་འཇུག་པ་མེད་ན། དེས་འདུལ་བའི་སེམས་ཅན་གྱི་ཁམས་ཀྱི་དོན་འགྲུབ་པར་མི་འགྱུར་བ་དེའི་ཕྱིར་རབ་ཏུ་བཤད་པར་བྱ་བ་སྟེ། ཕྱག་རྒྱའི་གཟུངས་ཀྱི་དཀྱིལ་འཁོར་དམ་པར་མཆོག་ཏུ་གྱུར་པའོ། །རྡོ་རྗེ་དབྱིངས་དང་འདྲ་བ་
[132b.3]ལ། །ཞེས་བྱ་བ་ནི་སྤྲུལ་པའི་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལ་ནི་འདིར་རྡོ་རྗེ་དབྱིངས་དང་འདྲ་བ་ལ་ཞེས་བྱའོ། །རིན་ཆེན་གསང་བ་ཞེས་བཤད་དོ། །ཞེས་བྱ་བ་ནི་རིན་པོ་ཆེའི་རིགས་ཏེ། རིན་པོ་ཆེའི་གསང་བ་ནི་འདིར་སེམས་ཀྱི་གསང་བ་སྟེ། འདི་ནི་གཟུངས་ཀྱི་དཀྱིལ་འཁོར་ཞེས་
[132b.4]བྱ་བའི་དོན་ཏེ་ཞེས་བཤད་པ་ནི་གྲགས་པའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་བཞིན་དུ་དཀྱིལ་འཁོར་འདི་ཐམས་ཅད་སྲད་བུ་བྲེ་བར་བྱའོ། །དེ་ཡི་དབུས་སུ་ཚུལ་བཞིན་དུ། །སངས་རྒྱས་ཕྱག་རྒྱ་བྲི་བར་བྱ། །ཞེས་བྱ་བ་ནི་ཐིག་བཏབ་མ་ཐག་པའི་དཀྱིལ་འཁོར་དེའི་དབུས་སུ་
[132b.5]བཅོམ་ལྡན་འདས་རྣམ་པར་སྣང་མཛད་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་ཨོཾ་ཏྲཾ་ཞེས་བྱ་བ་བརྗོད་ཅིང་། ནམ་མཁའི་ཕྱོགས་ནས་ཕབ་སྟེ་གཞག་པར་བྱའོ་ཞེས་བྱ་བ་འདི་ནི་ཚུལ་བཞིན་དུ་ཞེས་བྱ་བའི་དོན་ཡིན་ནོ། །སངས་རྒྱས་ནི་རྣམ་པར་སྣང་མཛད་དོ། །
[132b.6]ཕྱག་རྒྱ་ནི་སངས་རྒྱས་ཀྱི་ཕྱག་རྒྱ་སྟེ། རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་ཞེས་བྱ་བའི་ཐ་ཚིག་གོ། །ཁྲི་ལ་གནས་པའི་ནོར་བུའི་གཙོ། །རྡོ་རྗེ་དབྱིངས་ཀྱི་མདུན་དུ་བྲི། །ཞེས་བྱ་བ་ནི་བཤད་མ་ཐག་པ་འདི་ཉིད་ཀྱིས་སྐྱེས་པའི་གཟུགས་སུ་བསྟན་པའི་ཕྱིར། སངས་རྒྱས་ཀྱི་ཕྱག་རྒྱ་ནི་འདིར་མཆོད་
[132b.7]རྟེན་གྱི་གཟུགས་ཅན་མ་ཡིན་ནོ། །དེ་ལ་ཁྲི་ནི་རིག་པའི་གདན་ཡིན་ནོ། །དེ་ལ་གནས་པ་ནི་ཁྲི་ལ་བཞུགས་པ་སྟེ། མདུན་དྲང་པོར་བྱས་ནས་ཤར་ཕྱོགས་རྡོ་རྗེ་སེམས་མའི་གནས་སུ་བྲི་བར་བྱའོ། །བཅོམ་ལྡན་འདས་ཀྱི་ལྷོར་རྡོ་རྗེ་རིན་ཆེན་མའི་གནས་སུ་ནོར་བུའི་ཕྲེང་བ། ནུབ་ཕྱོགས་རྡོ་རྗེ་ཆོས་མའི་གནས་
[133a]
[133a.1]སུ་པདྨའི་སྟེང་དུ་ནོར་བུ། བྱང་ཕྱོགས་རྡོ་རྗེ་ལས་མའི་གནས་སུ་ནོར་བུས་ཡོངས་སུ་བསྐོར་བའོ། །རྡོ་རྗེ་རིན་ཆེན་དབུས་སུ་ནི། །རྡོ་རྗེ་ནོར་བུ་ཆེན་པོ་བྲི། །ཞེས་བྱ་བ་ལ་ནོར་བུ་དབྱིབས་རྩིབས་བརྒྱད་པའི་དབུས་སུ་རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུ་བྲིའོ། །ལྷག་
[133a.2]མ་ནི་གོ་སླའོ། །འདི་སྐད་སྟོན་པ་ཡིན་ཏེ། ཕྱག་རྒྱ་ཐམས་ཅད་ཀྱི་གནས་སུ་ཁ་ཁྱེར་གསུམ་པའི་རིག་པའི་ཁྲི་དེའི་སྟེང་དུ་ཟླ་བའི་དཀྱིལ་འཁོར་བྲི་བར་བྱའོ། །དེ་ནས་རྡོ་རྗེ་སེམས་དཔའི་གནས་སུ་ཨོཾ་མ་ཎི་ས་མ་ཡ་ཧཱུཾ་ཞེས་བརྗོད་ཅིང་རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུ་མགོ་ཤར་དུ་
[133a.3]བལྟས་པ་འབར་བ་དང་བཅས་པ་བྲི་བར་བྱའོ། །རྡོ་རྗེ་རིན་ཆེན་མའི་གནས་སུ་ནོར་བུ་རིན་པོ་ཆེའི་ཕྲེང་བ། ཨོཾ་མ་ཎི་རཏྣ་ཨ་བྷི་ཥེ་ཀ་མཱ་ལ་ཧཱུཾ་ཞེས་བྱ་བའི་སྙིང་པོ་འདིས་བྲི་བ་དང་། ཆོས་ཀྱི་རྡོ་རྗེ་མའི་གནས་སུ་པདྨ་འདབ་མ་བཅུ་དྲུག་པའི་དབུས་སུ་ཡིད་བཞིན་གྱི་ནོར་བུ། ཨོཾ་མ་ཎི་རཏྣ་པདྨེ་ཧཱུཾ།
[133a.4]ཞེས་བྱ་བས་བྲིའོ། །ལས་ཀྱི་རྡོ་རྗེ་མའི་གནས་སུ་ཡིད་བཞིན་གྱི་ནོར་བུ་དེ་ནོར་བུ་ཤིན་ཏུ་ཚད་ཕྲ་མོས་བསྐོར་བ། ཨོཾ་མ་ཎི་རཏྣ་པྲ་བེེ་ཤ་ས་མ་ཡ་ཧཱུཾ་ཞེས་བྱ་བས་བྲིའོ། །དོན་ཐམས་ཅད་གྲུབ་པའི་གནས་སུ་རྡོ་རྗེ་ནོར་བུ་རྩིབས་བརྒྱད་པའི་དབུས་སུ་རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུ།
[133a.5]ཨོཾ་སརྦྦ་ཨརྠ་སིདྡྷི་པྲ་ཏི་མ་ཧཱ་བཛྲ་རཏྣ་ས་མ་ཡ་མ་ཎི་སརྦྦ་ཨརྠ་ནེ་སཱ་དྷ་ཡ་དྷ་ར་ཎི་ཧཱུཾ། ནོར་བུ་མཚན་མའི་གནས་སུ་ནོར་བུས་མཚན་པའི་རྡོ་རྗེ་རྩེ་ལྔ་པ། ཨོཾ་མ་ཎི་རཏྣ་ཨཱ་ཀཪྵ་ཧཱུཾ། རིན་ཆེན་རྒྱལ་པོའི་གནས་སུ་ནོར་བུས་མཚན་པའི་ལྕགས་ཀྱུ། ཨོཾ་མ་ཎི་རཏྣ་ས་མ་ཡ་ཨཾ་ཀུ་ཤ །ཨཱ་ཀཪྵ་ཡ་མ་ཎི་
[133a.6]ཀུ་ལཾ་ཛ། ནོར་བུ་ཆགས་པའི་གནས་སུ་རིན་པོ་ཆེའི་མདའ་གཞུ། ཨོཾ་མ་ཎི་རཱ་ག་ས་མ་ཡ་ཧཱུཾ། ནོར་བུ་ལེགས་པའི་གནས་སུ་མཁྲིག་མའི་མཐར་ཐུག་པའི་ནོར་བུ་དང་བཅས་པའི་ཁུ་ཚུར་གཉིས་ཀྱིས་ལེགས་སོ་ཞེས་བྱེད་པ། ཨོཾ་མ་ཎི་སཱ་དྷུ་ཧཱུཾ། རིན་ཆེན་ལྟ་བའི་གནས་སུ་མིག་གཉིས་
[133a.7]ཀྱི་དབུས་སུ་ཡིད་བཞིན་གྱི་ནོར་བུ་དང་ལྡན་པ། ཨོཾ་མ་ཎི་རཏྣ་ནེེ་ཏྲ་ཨ་ན་ཡ་བ་ཤི་ཀུ་རུ་སརྦྦ་ཨརྠ་སཾ་བྷ་རཾ་ཤྲཱི་གྷྲཾ་དྲྀ་ཤྱ་ཨཾ་ཀུ་ཤ་ཧཱུཾ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའི་ཕྲེང་བའི་གནས་སུ་ཡིད་བཞིན་གྱི་ནོར་བུའི་ཕྲེང་བ། ཨོཾ་རཏྣ་མཱ་ལེ་ཨ་བྷི་ཥིཉྩ་ཧཱུཾ། ནོར་བུ་ཉི་མའི་གནས་སུ་
[133b]
[133b.1]ཉི་མའི་དཀྱིལ་འཁོར་གྱི་ལྟེ་བར་ནོར་བུས་མཚན་པའོ། །ཨོཾ་མ་ཎི་རཏྣ་སཱུ་ཪྱ་ཙ་ལ་ཡ་སརྦྦ་མ་ཧཱ་ཏེ་ཛ་ནི་ཧཱུཾ། ནོར་བུ་དཔལ་གྱི་གནས་སུ་རིན་པོ་ཆེའི་ཡུ་བ་ཅན་གྱི་ཡིད་བཞིན་གྱི་ནོར་བུའི་རྒྱལ་མཚན་ཟླ་བ་ཕྱེད་པ་དང་བཅས་པ། ཨོཾ་མ་ཎི་ཙ་ར་དྷྭ་ཛ་ཨ་གྲེ་ཧཱུཾ། ནོར་བུ་བཞད་པའི་གནས་སུ་སོའི་ཕྲེང་བ་གཉིས་ཀྱི་
[133b.2]མཐའ་རུ་རྡོ་རྗེས་མཚན་པ། ཨོཾ་མ་ཎི་ཧཱ་སེ་ཧཱ་ས་ཧཱུཾ། ནོར་བུ་པདྨའི་གནས་སུ་པདྨ་འདབ་མ་བཅུ་དྲུག་པ་ཡིད་བཞིན་ནོར་བུ་ཅན། ཨོཾ་མ་ཎི་ས་ལ་དྷེ་པདྨ་ནི་ཧཱུཾ། གཏོང་བ་ཏིང་ངེ་འཛིན་ཡེ་ཤེས་སྙིང་པོའི་གནས་སུ་པདྨ་འདབ་མ་བཅུ་དྲུག་པ་ཡིད་བཞིན་གྱི་ནོར་བུ་ཅན། ཨོཾ་མ་ཎི་རཏྣ་ཏྱ་ག་ས་མ་ཡ་ཧཱུཾ། རིན་ཆེན་
[133b.3]རྣོན་པོའི་གནས་སུ་ནོར་བུས་མཚན་པའི་རལ་གྲི། ཨོཾ་མ་ཎི་ས་མ་ཡ་ཀོ་ཥ་ཧཱུཾ། ནོར་བུ་འཁོར་ལོའི་གནས་སུ་འཁོར་ལོ་རྩིབས་བརྒྱད་པའི་ལྟེ་བར་ནོར་བུ་དང་ལྡན་པ། ཨོཾ་མ་ཎི་ས་མ་ཡ་ཙཀྲེ་ཧཱུཾ། ནོར་བུ་སྲུང་བའི་གནས་སུ་ནོར་བུས་མཚན་པའི་ལྕེ། ཨོཾ་མ་ཎི་བྷཱ་ཥ་ཨ་གྲེ་ཧཱུཾ། ནོར་བུ་རིན་ཆེན་ཆར་འབེབས་ཀྱི་
[133b.4]གནས་སུ་ཡིད་བཞིན་གྱི་ནོར་བུ་རིན་པོ་ཆེ་ཆར་འབེེབས་པས་ནོར་བུ་ཤིན་ཏུ་ཕྲ་མོ་དེ་རྣམས་ཀྱིས་དེ་བསྐོར་བ། ཨོཾ་རཏྣ་བྲིཥྚ་སྭཱ་དྷ་ཡ་མ་ཧཱ་མ་ཎི་ཧཱུཾ། ནོར་བུ་མཆོད་པའི་གནས་སུ་ནོར་བུས་མཚན་པའི་སྣ་ཚོགས་རྡོ་རྗེ། ཨོཾ་པཱུ་ཛ་ས་མ་ཡེ་ནྲེཾ་ཏྱ་ཨ། ནོར་བུ་བསྲུང་བའི་གནས་སུ་ནོར་བུས་མཚན་པའི་གོ་ཆ།
[133b.5]ཨོཾ་མ་ཎི་ས་མ་ཡ་རཀྵ་ཧཱུཾ། ནོར་བུ་གནོད་སྦྱིན་གྱི་གནས་སུ་ནོར་བུས་མཚན་པའི་མཆེ་བ་གཉིས། ཨོཾ་བཛྲ་མ་ཎི་རཏྣ་དཾཥྚ་ཀཱ་ར་ལེ་ཧཱ་ར་ཧཱ་ར་ཧཱུཾ། ནོར་བུ་ཁུ་ཚུར་གྱི་གནས་སུ་ནོར་བུས་མཚན་པའི་རྡོ་རྗེ་རྩེ་ལྔ་པ། དམ་ཚིག་གི་ཁུ་ཚུར་གྱིས་ནོར་བུ་ཡོངས་སུ་འཛིན་པ། ཨོཾ་མ་ཎི་ས་མ་ཡ་མུཥྚི་ཧཱུཾ། རིན་ཆེན་
[133b.6]སྒེག་མོའི་གནས་སུ་ནོར་བུས་མཚན་པའི་རྡོ་རྗེ་རྩེ་ལྔ་པ་གཉིས། རིན་ཆེན་ཕྲེང་བ་མའི་གནས་སུ་ནོར་བུའི་ཕྲེང་བ། ནོར་བུ་གླུ་མའི་གནས་སུ་ནོར་བུའི་མཚན་མ་ཅན་གྱི་པི་ཝང་། ནོར་བུ་གར་མའི་གནས་སུ་མཁྲིག་མའི་མཐར་ཐུག་པའི་ལག་པ་གཉིས་ནོར་བུས་མཚན་པའི་གར་བྱེད་པའོ། །རིན་ཆེན་
[133b.7]བདུག་པ་མའི་གནས་སུ་ནོར་བུས་མཚན་པའི་སྤོས་ཁང་མ་བདུག་པའི་ཟ་མ་ཏོག་དབུལ་བར་བྱའོ། །རིན་ཆེན་མེ་ཏོག་མའི་གནས་སུ་རིན་པོ་ཆེའི་མེ་ཏོག་གིས་ཀུན་དུ་བཀང་བའི་ལོ་མའི་སྣོད། རིན་ཆེན་མར་མེའི་གནས་སུ་ནོར་བུས་མཚན་པའི་མར་མེའི་མཆོད་སྡོང་། རིན་ཆེན་དྲི་ཆབ་མའི་གནས་སུ་ནོར་
[134a]
[134a.1]བུས་མཚན་པའི་དྲིའི་དུང་ཆོས། རིན་ཆེན་ལྕགས་ཀྱུའི་གནས་སུ་ནོར་བུས་མཚན་པའི་ལྕགས་ཀྱུ། རིན་ཆེན་ཞགས་པ་མའི་གནས་སུ་རིན་པོ་ཆེས་མཚན་པའི་ཞགས་པ། རིན་ཆེན་ལྕགས་སྒྲོག་གི་གནས་སུ་ནོར་བུས་མཚན་པའི་ལྕགས་སྒྲོག་རིན་ཆེན་འབེབས་པའི་གནས་སུ་ནོར་
[134a.2]བུས་མཚན་པའི་དྲིལ་བུ། བྱམས་པ་ལ་སོགས་པ་རྣམས་ནི་ཇི་ལྟ་བའི་ཁྱམས་ཀྱི་གནས་རྣམས་སུ་སྔར་བཤད་པའི་མཚན་མ་བྲི་བར་བྱའོ། །དེ་ལ་རིན་ཆེན་སྒེག་མོ་ལ་སོགས་པ་ནས་རིན་པོ་ཆེ་འབེེབས་པའི་མཐར་ཐུག་པ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་བྲི་
[134a.3]བར་བྱའོ། །བྱམས་པ་ལ་སོགས་པ་རྣམས་ཀྱང་སྔར་བཤད་པའི་རང་གི་རིག་པས་བྱའོ། །དེ་ནས་ཞེས་བྱ་བ་ནི་རྗེས་ཐོགས་ཉིད་ལའོ། །འདིར་ནོར་བུ་གསང་བའི་དཀྱིལ་འཁོར་ནི་ནོར་བུའི་རིགས་ཀྱི་དཀྱིལ་འཁོར་རོ། །ལས་རྣམས་ཇི་ལྟ་བ་བཞིན་དུ་བྱས་ནས་ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་
[134a.4]ཆེན་པོ་ལས་བཤད་པའི་ཆོ་གས་སློབ་དཔོན་གྱིས་རང་གི་ཆོ་ག་ཐམས་ཅད་རྗེས་སུ་སྤྱད་ལ། གཟུངས་ཀྱི་དཀྱིལ་འཁོར་ཐམས་ཅད་ཇི་ལྟ་བ་བཞིན་དུ་བཀུག་ལ་བཅུག་སྟེ། བཅིངས་ལ་དབང་དུ་བྱས་ནས་དམ་ཚིག་གི་ཕྱག་རྒྱ་རྣམས་ཀྱིས་ཆོ་ག་བཞིན་དུ་གཟུགས་ཐམས་ཅད་རབ་ཏུ་བསྒྲུབས་ནས། ཆོས་དང་
[134a.5]ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། རྡོ་རྗེ་རིན་པོ་ཆེའི་མྱུ་གུས་དབང་བསྐུར་ལ། མཆོད་པ་རྣམས་ཀྱིས་ཡང་དག་པར་མཆོད་ནས། ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་རིན་པོ་ཆེའི་ཕྱག་རྒྱས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་
[134a.6]བཤད་པའི་ནོར་བུའི་སློབ་མ་འཇུག་པའི་ཆོ་གས་བཅུག་ལ། འདི་སྐད་བསྒོ་བར་བྱ་བ་ལ་སོགས་པའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་ལ་ཆུའི་དབང་བསྐུར་བ་དང་། ཕྱག་རྒྱ་དང་། ཅོད་པན་གྱིས་དབང་བསྐུར་བས་བསྐུར་བ་དང་། སོར་བཞི་པའི་ཚད་ཀྱི་རྡོ་རྗེ་རྩེ་ལྔ་པས་མཚན་པའི་ནོར་བུ་དང་།
[134a.7]རིན་པོ་ཆེའི་དྲིལ་བུ་དང་། མིང་གི་དབང་བསྐུར་བ་བྱིན་ལ། སྔར་བཤད་པའི་ཆོ་ག་ཐམས་ཅད་བྱས་ལ། དེ་ལྟར་སློབ་དཔོན་གྱི་ལས་ཀྱི་ཆོ་ག་དང་། སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་དོན་ཐམས་ཅད་གྲུབ་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་
[134b]
[134b.1]དཔོན་གྱིས་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་ཡེ་ཤེས་རྣམས་བསྟན་པར་བྱའོ་ཞེས་བྱ་བའི་དོན་བསྟན་པའི་ཕྱིར་རང་གི་ནོར་བུའི་དམ་ཚིག་གི་ཡེ་ཤེས་བསྐྱེད་པར་བྱའོ་ཞེས་གསུངས་སོ། །ནོར་བུའི་དམ་ཚིག་གི་གཟུངས་ཀྱི་དཀྱིལ་འཁོར་གྱི་ནོར་བུའི་
[134b.2]དམ་ཚིག་གི་ཡེ་ཤེས་སོ། །དེ་བསྐྱེད་པར་བྱ་བ་ནི་རྡོ་རྗེ་རིན་པོ་ཆེ་ལ་སོགས་པ་བསྒོམ་པར་ངེས་པའི་ཡེ་ཤེས་དང་། ཐོས་པ་དང་བསམ་པའི་རང་བཞིན་ཅན་སློབ་མའི་རྒྱུད་ལ་བསྐྱེད་པའོ། །རྡོ་རྗེ་རིན་ཆེན་ཏིང་འཛིན་གྱིས། །ཞེས་བྱ་བ་ནི་རང་གི་ལྷའི་རྣལ་འབྱོར་གྱིས་སོ། །མཁའ་ལ་རང་བཞིན་བྲི་བར་
[134b.3]བྱ། །ཞེས་བྱ་བ་ནི་སེམས་ཀྱིས་ཀུན་བརྟགས་པའོ། །ལྷག་མ་ནི་གོ་སླའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་རྣལ་འབྱོར་རམ། དེའི་རིགས་ཀྱི་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ཆེན་པོ་
[134b.4]ལས་བཤད་པའི་དོན་ཐམས་ཅད་གྲུབ་པའི་རྣལ་འབྱོར་ཆེན་པོའམ། ནོར་བུ་མཚན་མ་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། གཟུངས་ཀྱི་དཀྱིལ་འཁོར་ཆེན་པོ་ལས་བཤད་པའི་མ་ཧཱ་རཏྣ་ཨ་བྷི་ཥིཉྩ་མཱཾ། ཞེས་བརྗོད་པའི་སྙིང་པོ་འདིས་ནམ་མཁའི་ཕྱོགས་སུ་རྡོ་རྗེ་རྩེ་ལྔ་པས་མཚན་པའི་ཡིད་
[134b.5]བཞིན་གྱི་ནོར་བུ་ཆེན་པོར་བསྐྱེད་ལ། མིང་བརྗོད་ཅིང་ཉིན་རེ་བཞིན་དུ་ཐུན་བཞི་སྦྱོར་བས་བསྒོམས་པས་ནི་ཇི་སྲིད་རྒྱུན་མི་འཆད་པར་ཐུན་བཞི་མངོན་སུམ་ལྟ་བུར་མཐོང་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ན་རྡོ་རྗེ་རིན་ཆེན་དེ་མངོན་སུམ་དུ་གྱུར་པས་དེ་འགྲུབ་པར་
[134b.6]འགྱུར་རོ། །དེ་ནས་ཕྱག་རྒྱ་ཆེན་པོ་བཟུང་ནས་དཔྲལ་བར་བཞག་ན་རང་དབང་ཅན་གྱི་རྒྱལ་པོར་འགྱུར་རོ། །རྡོ་རྗེ་རིན་ཆེན་བཅིངས་ནས་ནི། །རྡོ་རྗེ་རིན་ཆེན་མཁའ་ལ་བྲི། །ཞེས་བྱ་བ་ནི། དམ་ཚིག་མཆོག་ནི་བཅིངས་པ་ལ། །ཞེས་བྱ་བ་སྔར་བཤད་པ་བཞིན་ནོ། །གཟུངས་ཀྱི་དཀྱིལ་འཁོར་ལས་བཤད་པའི་
[134b.7]རིན་ཆེན་ལྟ་བའམ། དེའི་རིགས་ཀྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེས་དེ་བཅིངས་ནས་དབང་བསྐུར་བའི་གནས་སུ་གཞག་གོ། །ངེས་པར་རྒྱལ་པོ་ཉིད་དུ་འགྱུར། །ཞེས་བྱ་བ་ནི་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ལྟ་བ་དང་།
[135a]
[135a.1]དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རིན་ཆེན་སྤྱན་ནམ། དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ལ། ས་མ་ཡ་རཏྣ་ཨ་བྷི་ཥིཉྩ་མཱཾ། ཞེས་བརྗོད་ཅིང་། རྡོ་རྗེ་དྲིལ་བུ་རིན་པོ་ཆེའི་དབང་བསྐུར་བ་བསམ་མོ། །
[135a.2]དེ་ནས་སྔ་མ་བཞིན་དུ་བསྒྲུབ་པར་བྱས་ལ། དེས་དམ་ཚིག་གི་ཕྱག་རྒྱ་བཟུང་སྟེ། དཔྲལ་བའི་གནས་སུ་བཞག་ནས་ནི། །ངེས་པར་རྒྱལ་སྲིད་ཐོབ་པར་འགྱུར། །ཞེས་བྱའོ། །རྡོ་རྗེ་རིན་ཆེན་ཏིང་འཛིན་གྱིས། །རྡོ་རྗེ་རིན་ཆེན་མཁའ་ལ་བྲི། །ཞེས་བྱ་བ་ནི་སྔ་མ་བཞིན་དུ་ཆོས་ཀྱི་རིན་ཆེན་
[135a.3]གྱི་ཏིང་ངེ་འཛིན་བྱའོ། །རིན་ཆེན་པདྨའམ། དེའི་རིགས་གཏོང་བའི་ཏིང་ངེ་འཛིན་ཡེ་ཤེས་ཀྱི་སྙིང་པོ་ལ་སོགས་པའི་རྣལ་འབྱོར་ནི་ཆོས་ཀྱི་རིན་ཆེན་གྱི་ཏིང་ངེ་འཛིན་ཏེ། དེའི་ཏིང་ངེ་འཛིན་བསྐྱེད་ལ་ཡེ་ཤེས་རིན་པོ་ཆེས་དབང་བསྐུར་བའི་གནས་སུ་བཞག་ན་རང་དབང་ཅན་གྱི་རྒྱལ་པོར་རང་ཉིད་
[135a.4]བྱས་པར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ནོར་བུ་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་དེའི་ཕྱག་རྒྱ་ཆེན་པོའམ། དེའི་རིགས་ཀྱི་ཕྱག་རྒྱ་ཆེན་
[135a.5]པོ་བཅིངས་ཏེ། དྷརྨྨ་རཏྣ་ཨ་བྷི་ཥིཉྩ་མཱཾ། ཞེས་བརྗོད་ཅིང་། ནམ་མཁའ་ལ་རྡོ་རྗེ་རིན་པོ་ཆེ་སྤྲུལ་ལ་སྔ་མ་བཞིན་དུ་བསྒྲུབ་པར་བྱས་ཏེ། རང་གིས་དབང་བསྐུར་བའི་གནས་སུ་བཞག་ན་རྒྱལ་པོར་འགྱུར་རོ། །ལས་ཀྱི་ཕྱག་རྒྱ་བཅིངས་ནས་ནི། །མཁའ་ལ་རྡོ་རྗེ་རིན་ཆེན་བྲི། །ཞེས་བྱ་བ་སྔ་མ་
[135a.6]བཞིན་ནོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ཆར་འབེབས་སམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ནོར་བུ་མཆོད་པ་ལ་སོགས་པའི་ལས་ཀྱི་ཕྱག་རྒྱ་བཅིངས་ལ། ཀརྨྨ་རཏྣ་
[135a.7]ཨ་བྷི་ཥིཉྩ་མཱཾ། ཞེས་བརྗོད་ཅིང་ནམ་མཁའ་ལ་རྡོ་རྗེ་རིན་ཆེན་སྤྲུལ་ལ་སྔ་མ་བཞིན་དུ་བསྒྲུབ་པར་བྱས་ཏེ། རང་གི་དབང་བསྐུར་བའི་གནས་སུ་དེ་བཞག་ན། རང་ཉིད་ཀྱིས་གྲུབ་པའི་རྒྱལ་པོར་འགྱུར་རོ། །ཕྱག་རྒྱ་ཆེན་པོ་སྙིང་གར་ནི། །རྡོ་རྗེ་རིན་ཆེན་བསྒོམ་པར་བྱ། །ཞེས་བྱ་
[135b]
[135b.1]བ་ལ་རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུ་ཕྱག་རྒྱ་ཆེན་པོའི་རང་གི་སྙིང་གའི་ཟླ་བ་ལ་བསྒོམ་པར་བྱའོ། །དེ་ལྟར་རྡོ་རྗེ་རིན་ཆེན་རང་གི་སྙིང་གའི་ཟླ་བ་ལ་ཡིད་ཀྱིས་བྲིས་ནས་ཕྱག་རྒྱ་ཆེན་པོ་བསྒོམ་པར་བྱའོ། །བསྒོམ་པས་ཅི་ཞིག་བྱེད་པར་འགྱུར་ཞེ་ན། །བསྒོམས་ན་མངོན་པར་
[135b.2]དབང་བསྐུར་བ། །མཆོག་ཏུ་རྨད་དུ་བྱུང་བ་ཐོབ། །ཅེས་བྱ་བ་སྨོས་སོ། །འདི་སྐད་སྟོན་པ་ཡིན་ཏེ། དཀྱིལ་འཁོར་ཆེན་པོ་ལས་བཤད་པའི་སྔ་མ་བཞིན་དུ་དོན་ཐམས་ཅད་གྲུབ་པ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་ནོར་
[135b.3]བུའི་མཚན་མ་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། ཨོཾ་བཛྲ་རཏྣ་ཧྲྀ་ད་ཡ་ཨ་བྷི་ཥིཉྩ་ཧོ། ཞེས་བརྗོད་ཅིང་རང་གི་སྙིང་གའི་ཟླ་བར་རྡོ་རྗེ་རིན་པོ་ཆེ་སྤྲུལ་ལ་སྔ་མ་བཞིན་དུ་བསྒྲུབས་ན་དོན་ཐམས་ཅད་གྲུབ་པའི་དབང་བསྐུར་བ་ལ་སོགས་པ་ཐོབ་པར་འགྱུར་རོ། །རབ་མཉམ་གཞག་པས་རྡོ་རྗེ་ཡི། །དཔྲལ་
[135b.4]བར་རིན་ཆེན་བསྒོམས་ནས་ནི། །ཞེས་བྱ་བ་ལ་སོགས་པ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་སྔ་མ་བཞིན་དུ་རིན་ཆེན་ལྟ་བའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་དམ་ཚིག་གི་ཕྱག་རྒྱ་བཅིང་
[135b.5]བར་བྱའོ། །དེ་ནས་རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བཅིངས་ལ། ཨོཾ་བཛྲ་རཏྣ་ཨ་བྷི་ཥེ་ཀ་ཏ་ཞེས་བྱ་བ་སྙིང་པོ་འདི་བརྗོད་ཅིང་། དབང་བསྐུར་བའི་གནས་སུ་རྡོ་རྗེ་རིན་ཆེན་སྤྲུལ་ལ་སྔ་མ་བཞིན་དུ་བསྒྲུབས་ཏེ། ཇི་ལྟར་མངོན་པར་འདོད་པའི་རྒྱལ་སྲིད་ཐོབ་པར་འགྱུར་
[135b.6]རོ། །རྡོ་རྗེ་རིན་ཆེན་ཏིང་འཛིན་གྱིས། །ལྕེ་ལ་རྡོ་རྗེ་བསྒོམས་ནས་ནི། །ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པ་བཞིན་དུ་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་བཅིངས་ཏེ།
[135b.7]ཨོཾ་རཏྣ་ཨུ་ཤ་ཨ་དྷི་ཏིཥྛ་མཱཾ་ཞེས་བྱ་བའི་སྙིང་པོ་འདིས་ལྕེ་ལ་རྡོ་རྗེ་རིན་པོ་ཆེ་སྤྲུལ་ལ། སྔ་མ་བཞིན་དུ་བསྒྲུབ་པ་བྱས་ན་ཆོས་ཀྱི་རྒྱལ་པོ་ཐོབ་པར་འགྱུར་རོ། །རབ་མཉམ་གཞག་པ་རྡོ་རྗེ་ཡི། །རྡོ་རྗེ་གཙུག་ཏོར་བསྒོམས་ན་ནི། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་
[136a]
[136a.1]འཁོར་ཆེན་པོ་ལས་བཤད་པའི་རིན་ཆེན་ཆར་འབེེབས་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ་དེའི་རིགས་ནོར་བུའི་མཆོད་པ་ལ་སོགས་པའི་ལས་ཀྱི་ཕྱག་རྒྱ་བཅིངས་ཏེ། ཨོཾ་རཏྣ་ཨུཥྞཱི་ཥ་ཨ་བྷི་ཏིཥྛ་མཱཾ།
[136a.2]ཞེས་བརྗོད་པས། སྤྱི་གཙུག་གི་གནས་སུ་རྡོ་རྗེ་རིན་པོ་ཆེ་སྤྲུལ་ལ་རྣམ་པར་བསྒོམས་ཏེ་སྔ་མ་བཞིན་དུ་བསྒྲུབས་ན་ལས་ལེགས་པར་བྱེད་པའི་རྒྱལ་པོར་འགྱུར་རོ། །ཕྱག་རྒྱ་ཆེན་པོ་བདག་ཉིད་ཀྱིས། །བསྒོམས་ན་རྡོ་རྗེ་རིན་ཆེན་ལས། །རས་ལ་སོགས་པར་བྲིས་ནས་ནི། །
[136a.3]ཞེས་བྱ་བ་ལ་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ། ནོར་བུའི་མཚན་མ་ལ་སོགས་པ་དེའི་རིགས་ཀྱི་ཕྱག་རྒྱ་ཆེན་
[136a.4]པོ་བཅིངས་ཏེ། རས་སམ་རྩིག་པ་ལ་སོགས་པ་ལ་རྡོ་རྗེ་རིན་ཆེན་བྲིས་ལ། ཨོཾ་བཛྲ་བིམྤ་ཡ་དྷི་ཤ་པ་པད་བིམྤ་ཞེས་བྱ་བའི་སྙིང་པོ་འདིས་རྡོ་རྗེ་རིན་ཆེན་དང་བདག་ཉིད་ཐ་མི་དད་པར་བསམ་པར་བྱའོ། །དེ་ནས་སྔ་མ་བཞིན་དུ་བསྒྲུབས་ན་རྒྱལ་པོར་སྒྲུབ་པ་པོ་དེ་འགྱུར་རོ། །རྡོ་རྗེ་རིན་ཆེན་བླ་ན་
[136a.5]མེད། །རས་ལ་སོགས་པར་བྲིས་ནས་ཀྱང་། །ཞེས་བྱ་བ་ལ་སོགས་པ་ནི་རས་སམ་རྩིག་པའམ་སྤང་ལེབ་ལ་རྡོ་རྗེ་རིན་ཆེན་བྲིས་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་སྤྱན་དང་། དེའི་རིགས་ཀྱི་རྣལ་འབྱོར་བྱས་ལ། ཕྱི་ཕྱིས་གཟུངས་ཀྱི་
[136a.6]དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ། དེས་རས་སམ་རྩིག་པ་ལ་བྲིས་ལ་རྡོ་རྗེ་རིན་ཆེན་དང་བདག་ཉིད་ཐ་མི་དད་པར་བསམ་མོ། །དེ་ནས་ཡང་བཛྲ་རཏྣ་བིམྦ་པྲ་ཏིཥྛ། ཞེས་བྱ་བ་ལ་སོགས་པ་འདིས་ཟླ་བའི་དཀྱིལ་འཁོར་ལ་རྡོ་རྗེ་ས་ཟུགས་
[136a.7]སུ་བདག་ཉིད་བསྒོམ་པར་བྱའོ། །དེ་ནས་སྔ་མ་བཞིན་དུ་བྱས་ཏེ་བསྒྲུབས་ན་གཟུགས་ཐམས་ཅད་ཀྱི་དམ་ཚིག་གི་ཕྱག་རྒྱ་རྣམས་ཀྱི་བདག་པོ་རྡོ་རྗེ་སྙིང་པོར་འགྱུར་རོ། རྡོ་རྗེ་རིན་ཆེན་བདག་ཉིད་ཀྱིས། །རས་ལ་སོགས་ལ་བྲིས་ནས་ཀྱང་། །ཞེས་བྱ་བ་ལ་སོགས་པ་ནི་དེ་
[136b]
[136b.1]བཞིན་དུ་རས་ལ་སོགས་པ་ལ་རྡོ་རྗེ་རིན་ཆེན་བྲིས་ལ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། དེ་རས་ལ་
[136b.2]སོགས་པ་ལ་བྲིས་ནས། བཛྲ་རཏྣ་བིམྤ་ཨ་བྷིཥ། ཞེས་བྱ་བའི་སྙིང་པོ་འདིས་རྡོ་རྗེ་རིན་ཆེན་དང་བདག་ཉིད་ལྷན་ཅིག་ཐ་མི་དད་པར་བྱས་པས་དེའི་རིགས་ཀྱི་གཟུགས་སུ་བདག་ཉིད་གྲུབ་པར་འགྱུར་རོ། །དེ་ནས་སྔ་མ་བཞིན་དུ་ཐམས་ཅད་བྱས་ལ་བསྒྲུབ་པ་བྱས་ན་ངེས་པར་ཆོས་ཀྱི་བདག་པོར་འགྱུར་རོ། །རས་ལ་
[136b.3]སོགས་ལ་རྡོ་རྗེ་ཡིས། །རིན་ཆེན་བྲིས་ནས་ལྷ་རྣམས་ཀྱིས། །ཞེས་བྱ་བ་ལ་དེ་བཞིན་དུ་རས་ལ་སོགས་པ་ལ་རྡོ་རྗེ་རིན་ཆེན་བྲིས་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ཆར་འབེབས་སམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་
[136b.4]འཁོར་ལས་བཤད་པ་དེའམ། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། བཛྲ་རཏྣ་བིམྤ་ཀུ་རུ་ཞེས་ཟློས་ཤིང་། དེས་རས་ལ་བྲིས་ནས་རྡོ་རྗེ་རིན་ཆེན་དང་ལྷན་ཅིག་བདག་ཉིད་ཐ་མི་དད་པས་རིན་ཆེན་ཆར་འབེེབས་སམ། དེའི་རིགས་ནོར་བུའི་མཆོད་པའི་རང་བཞིན་དུ་བསྒོམ་པར་བྱའོ། །དེ་ནས་སྔ་མ་
[136b.5]བཞིན་དུ་བསྒྲུབ་པ་བྱས་ན་རིན་ཆེན་ཆར་འབེབས་མ་དེའི་རིགས་ཀྱི་ངོ་བོའི་ལས་ཀྱི་བདག་པོར་འགྱུར་རོ། །གསེར་རམ་ཡང་ན་དངུལ་ཡང་རུང་། །རྡོ་རྗེ་རིན་ཆེན་བཅང་གྱུར་ཏམ། །ཞེས་བྱ་བ་ལ་སོགས་པ་ནི་བཟོ་བོ་མཁས་པས་གསེར་ལ་སོགས་པ་ལས་བྱས་པའི་རྡོ་རྗེ་རྩེ་ལྔ་པས་མཚན་པའི་ཡིད་བཞིན་
[136b.6]གྱི་ནོར་བུ་རིན་པོ་ཆེ་བྱས་ཏེ། དེ་ནས་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱས་ལ་ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པ་དང་། དེའི་རིགས་ཀྱི་ཕྱག་རྒྱ་ཆེན་པོ་
[136b.7]བཅིངས་པ་དེ་དང་། ཨོཾ་བཛྲ་རཏྣ་ཧྲྀ་ད་ཡ་མ་བྷཱ་ར་ཎི་ཧཱུཾ། ཞེས་བྱ་བའི་སྙིང་པོ་འདིས་རིན་པོ་ཆེ་དེ་བླང་བར་བྱའོ། །རང་གི་སྙིང་གའི་ཟླ་བ་ལ་རིན་པོ་ཆེ་དེ་དེ་བཞིན་དུ་བསམས་ནས་བསྒོམ་པར་བྱའོ། །དེ་ནས་སྔ་མ་བཞིན་དུ་བསྒྲུབ་པ་བྱས་ན་དོན་ཐམས་ཅད་གྲུབ་པས་དབང་བསྐུར་བ་དང་། དེའི་རིགས་ཀྱི་
[137a]
[137a.1]དབང་བསྐུར་བས་བཅོམ་ལྡན་འདས་དབང་བསྐུར་བར་འགྱུར་རོ། །རྡོ་རྗེ་རིན་ཆེན་བླ་ན་མེད། །གསེར་རམ་རིན་ཆེན་གཞན་ལས་བྱ། །ཞེས་བྱ་བ་ལ་སོགས་པ་ནི་དེ་བཞིན་དུ་གསེར་ལ་སོགས་པ་ལས་བྱས་པའི་རྡོ་རྗེ་རིན་པོ་ཆེ་བྱས་ལ། དོན་ཐམས་ཅད་གྲུབ་པའི་དཀྱིལ་འཁོར་
[137a.2]ཆེན་པོ་ལས་བཤད་པའི་རིན་ཆེན་ལྟ་བའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ། དེ་དང་ཨོཾ་བཛྲ་རཏྣ་ཨ་བྷི་ཥེ་ཀ་མ་ཧཱ་སརྦྦ་པྲ་དྷ་ཞེས་བྱ་བའི་སྙིང་པོ་འདིས་རིན་པོ་ཆེ་བླང་བར་བྱའོ། །དེ་ནས་
[137a.3]ཕྱག་རྒྱ་དེ་ཉིད་དཔྲལ་བའི་བར་དུ་འཇོག་ཅིང་དབང་བསྐུར་བའི་གནས་སུ་ཟླ་བའི་དཀྱིལ་འཁོར་བསམས་ཏེ། བསྒོམས་ན་དེ་ནས་སྔ་མ་བཞིན་དུ་བསྒྲུབས་ན་ནོར་ཆེན་པོའི་རྒྱལ་པོར་འགྱུར་རོ། །གསེར་རམ་རིན་ཆེན་གཞན་དག་གིས། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་དོན་ཐམས་ཅད་གྲུབ་
[137a.4]པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་དེའམ་དེའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་བཅིངས་ཏེ། ཨོཾ་བཛྲ་རཏྣ་ཝ་ཙཱ་ཡ་སྟེ། ཞེས་བྱ་བས་ནི་རིན་པོ་ཆེ་བསྐྱེད་དེ། རང་གི་ཁར་བཅུག་ནས་བསྒོམ་
[137a.5]པར་བྱའོ། །དེ་ནས་སྔ་མ་བཞིན་དུ་བསྒྲུབ་པ་བྱས་ཏེ་བསྒོམས་ན་ཚིག་ལ་དབང་བར་འགྱུར་རོ། །གསེར་རམ་རིན་ཆེན་གཞན་དག་གིས། །ཞེས་བྱ་བ་ལ་སོགས་པ་ནི་དེ་བཞིན་དུ་བཟོ་བོ་མཁས་པས་རྡོ་རྗེ་རིན་པོ་ཆེ་བྱས་ལ། དེ་ནས་སྔ་མ་བཞིན་དུ་རིན་ཆེན་ཆར་འབེེབས་སམ། དེའི་རིགས་ཀྱི་རྣལ་
[137a.6]འབྱོར་བྱས་ཏེ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། ཨོཾ་བཛྲ་རཏྣ་གརྦྷ་མ་ཧཱ་ཀརྨྨ་པ་ཏེ། ཞེས་བྱ་བའི་སྙིང་པོ་འདིས་ཕྱག་རྒྱ་དེ་བསྐྱེད་ལ་ལས་ཀྱི་ཕྱག་རྒྱས་གཟུགས་ཏེ། གཙུག་ཏོར་གྱི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་
[137a.7]བསམས་ནས་བསྒོམ་པར་བྱའོ། །དེ་ནས་སྔ་མ་བཞིན་དུ་བསྒྲུབས་ན་ལས་རྣམས་ཀུན་གྱི་བདག་པོ་རིན་ཆེན་ཆར་འབེབས་ཀྱི་ཏིང་ངེ་འཛིན་ཐོབ་པའམ། དེའི་རིགས་ཀྱི་ཏིང་ངེ་འཛིན་ཐོབ་པར་འགྱུར་རོ། །དེ་ནས་ཞེས་བྱ་བ་ནི་དངོས་གྲུབ་ཀྱི་ཡེ་ཤེས་བསྟན་པའི་དུས་ཕྱིས་སོ། །ནོར་བུའི་
[137b]
[137b.1]རིགས་ཀྱི་གཟུངས་ཀྱི་དཀྱིལ་འཁོར་གྱི་དམ་ཚིག་གི་ཕྱག་རྒྱ་རྣམས་ནི་གཟུངས་ཀྱི་ཕྱག་རྒྱ་སྟེ། གསང་བའི་ཡེ་ཤེས་ལ་ཡང་དག་པར་བསྐོར་བའི་བསྒོམ་པར་ངེས་པ་དེ་བསླབ་ཅིང་བསྟན་པའོ། །ཕྱག་རྒྱ་ཆེན་པོ་བསྒོམས་ནས་ནི། །རྡོ་རྗེ་ནོར་བུ་ཆེ་བཅིངས་ལ། །ཞེས་བྱ་བ་ནི་ནོར་བུའི་རིགས་ཀྱི་གཟུངས་ཀྱི་
[137b.2]དཀྱིལ་འཁོར་ལས་བཤད་པའི་སེམས་མ་རྡོ་རྗེ་མའི་གནས་ཀྱི་རྡོ་རྗེ་ནོར་བུ་ཆེན་མོའི་དམ་ཚིག་གི་ཕྱག་རྒྱ་དེ་འདིར་བཅིངས་ལ། དེས་ནོར་བུ་བུད་མེད་ཀྱི་བུ་གར་དེ་བཞིན་དུ་ཞུགས་ཏེ། རྡོ་རྗེ་ནོར་བུ་ཆེན་མོ་ཡིས། །ནོར་བུ་དེ་ནི་དེའི་ནོར་བུ་སྟེ། སྒྲུབ་པ་པོའི་མཚན་མའི་ནོར་བུ་དེའི་རིག་པའི་ལྷ་མོའི་མཚན་
[137b.3]མར་ཡིད་ཀྱིས་གཞུག་ཅིང་ཕྱག་རྒྱ་ཆེན་པོ་བསྒོམས་ན་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་
[137b.4]བཤད་པ་དེའམ། དེའི་རིགས་ཀྱི་ཕྱག་རྒྱ་བཅིངས་ཏེ། དེ་ནས་སྟན་གཅིག་ལ་རང་གི་གཟུགས་སྦྲུལ་ལ་བསྡུ་བ་སྔོན་དུ་འགྲོ་བ་དང་། ཕྱག་རྒྱ་བཞིས་རྒྱས་བཏབ་སྟེ། རྡོ་རྗེ་རིན་པོ་ཆེ་མྱུ་གུས་དབང་བསྐུར་བའི་རིན་པོ་ཆེ་སྒེག་མོ་ལ་སོགས་པ་རྣམས་ཀྱིས་ཡང་དག་པར་མཆོད་ནས་ཕྱག་བྱས་ཏེ། རྡོ་རྗེ་
[137b.5]རིན་པོ་ཆེ་དམ་ཚིག་གི་ཕྱག་རྒྱ་བཅིངས་ནས། ཨོཾ་མ་ཧཱ་སིདྡྷཿཞེས་བྱ་བ་ཟློས་ཤིང་། དེ་ནས་ལྷན་ཅིག་ཏུ་མཉམ་པར་སྦྱོར་བ་བསྒོམས་ནས་ཇི་སྲིད་ཉིན་རེ་ཞིང་ཐུན་བཞིའི་སྦྱོར་བས་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བྱའོ། །དེ་ནས་མཚན་ཐོག་ཐག་བསྒོམ་པ་ན་དེའི་རྗེས་ལ་དེ་འོངས་
[137b.6]བ་དང་ལྷན་ཅིག་མཉམ་པར་སྦྱོར་བ་བྱས་ནས་དེའི་ལུས་ལ་ཞུགས་པར་བྱའོ། །ཡང་དེ་ནས་དོན་ཐམས་ཅད་གྲུབ་པ་དེ་དང་འདྲ་བར་འགྱུར་རོ། །དམ་ཚིག་མཆོག་ནི་རང་གི་ལྷའི་རྣལ་འབྱོར་རོ། །ནོར་བུ་ནི་རང་གི་མཚན་མའོ། །བཅུ་པ་ནི་བཞག་པའོ། །དེ་སྐད་དུ་ཡང་། བཅུ་པས་བཞག་ལ་ཞེས་
[137b.7]སུ་བརྗོད། །ཅེས་གསུངས་སོ། །གང་དུ་གཞག་ཅེ་ན། བུད་མེད་བུ་གར་ཞེས་བྱ་བ་སྨོས་ཏེ། རང་གི་རིག་པའི་ལྷ་མོའི་མཚན་མར་རོ། །དམ་ཚིག་མཆོག་ནི་རང་གི་དམ་ཚིག་ཕྱག་རྒྱའོ། །བཅིང་བ་ནི་ལྷན་ཅིག་ཏུ་གྱུར་པའོ། །དབང་བསྐུར་བའི་དངོས་གྲུབ་ཏུ་འགྱུར་བ་ནི་དབང་བསྐུར་
[138a]
[138a.1]བའི་མཚན་མ་ཐོབ་པའོ། །ཐམས་ཅད་ནི་རིན་ཆེན་ལྟ་བའི་རིགས་ལ་སོགས་པ་ཐམས་ཅད་དོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ལྟ་བའམ། དེའི་རིགས་དེ་བཞིན་གཤེགས་པ་ཐམས་ཅད་ཀྱིས་དབང་
[138a.2]བསྐུར་བའི་ཕྲེང་བ་ལ་སོགས་པའི་རྣལ་འབྱོར་བྱས་ལ། དེ་ནས་གཟུངས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་རིན་ཆེན་སྤྱན་ནས་དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ནས་ཕྱིས་སྟན་གཅིག་ལ་རང་གི་གཟུགས་སྤྲུལ་ལ་བསྡུ་བ་ལ་སོགས་པ་སྔོན་དུ་འགྲོ་བའི་ཆོ་ག་ཐམས་
[138a.3]ཅད་རྗེས་སུ་སྦྱད་ལ། ཨོཾ་མ་ཧཱ་ས་མ་ཡ་ཨ་བྷི་ཥེ་ཀ་སིདྡྷིཿཞེས་བྱ་བ་ཟློས་ཤིང་། གཟུངས་ཀྱི་དཀྱིལ་འཁོར་ལས་བཤད་པའི་རང་གི་དམ་ཚིག་གི་ཕྱག་རྒྱ་བཅིངས་ཏེ། དེ་དང་ལྷན་ཅིག་ཏུ་མཉམ་པར་སྦྱོར་བས་དེ་བཞིན་དུ་བསྒོམ་པར་བྱའོ། །དེ་ནས་མཚན་ཐོག་ཐག་བྱས་པ་དང་། དེའི་རྗེས་ལ་
[138a.4]དེ་འོངས་པ་དང་། དེ་དང་ལྷན་ཅིག་མཉམ་པར་སྦྱོར་བ་བྱས་ཏེ། དེའི་ལུས་ལ་འཇུག་པར་བྱའོ། །དེ་ནས་རིན་ཆེན་སྤྱན་ལ་སོགས་པ་དང་འདྲ་བར་འགྱུར་རོ། །རྡོ་རྗེ་ནོར་བུ་ཆེ་བཅིངས་ལ། །ཞེས་བྱ་བ་ནི་སྔ་མ་བཞིན་ནོ། །ཆོས་ཀྱི་ཕྱག་རྒྱ་བསྒོམ་ཞེས་བྱ་བ་ནི་རིན་ཆེན་པདྨའམ། དེའི་
[138a.5]རིགས་ཀྱི་ཕྱག་རྒྱ་ཆེན་པོ་བསྒོམས་པའོ། །དེའི་ནོར་བུ་ཞེས་བྱ་བ་ནི་རང་གི་མཚན་མའོ། །དེ་ནི་བུད་མེད་བུ་གར་བཅུག །ཅེས་བྱ་བ་ནི་སྔ་མ་བཞིན་ནོ། །བླ་ན་མེད་པའི་དངོས་གྲུབ་འགྱུར། །ཞེས་བྱ་བ་ནི་རིན་ཆེན་པདྨའམ། དེའི་རིགས་ཀྱི་ཕྱག་རྒྱ་ཆེན་པོ་འགྲུབ་པ་སྟེ། བླ་ན་མེད་པའི་དངོས་གྲུབ་
[138a.6]འགྱུར། །ཞེས་བྱའོ། །འདི་སྐད་སྟོན་པ་ཡིན་ཏེ། དེ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་གསུངས་པ་དེའམ། དེའི་རིགས་ཀྱི་
[138a.7]ལས་ཀྱི་ཕྱག་རྒྱ་བཅིངས་ཏེ། གདན་གཅིག་ལ་རང་གི་གཟུགས་སྤྲུལ་ནས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། རྡོ་རྗེ་ནོར་བུ་ཆེན་པོའི་དམ་ཚིག་གི་ཕྱག་རྒྱ་བཅིངས་ལ། ཨོཾ་དྷརྨྨ་སིདྡྷིཿཞེས་ཟློས་ཤིང་། རང་གི་གཟུགས་དང་ལྷན་ཅིག་མཉམ་པར་སྦྱོར་བ་བསྒོམ་མོ། །
[138b]
[138b.1]དེ་ནས་དེ་བཞིན་དུ་མཚན་ཐོག་ཐག་བསྒོམས་ལ། དེའི་རྗེས་ལ་དེ་འོངས་པ་དང་། དེ་དང་ལྷན་ཅིག་ཏུ་མཉམ་པར་སྦྱོར་བ་བྱས་ནས་དེའི་ལུས་ལ་འཇུག་པར་བྱའོ། །དེ་ནས་དེ་རིན་པོ་ཆེ་པདྨ་ལ་སོགས་པ་དང་འདྲ་བར་འགྱུར་རོ། ལས་ཀྱི་ཕྱག་རྒྱའི་ནོར་བུ་ནི་ལས་ཀྱི་ཕྱག་རྒྱའི་ནོར་བུ་སྟེ། རིན་
[138b.2]ཆེན་ཆར་འབེབས་དང་། དེའི་རིགས་ཀྱི་ཕྱག་རྒྱ་ཆེན་པོའོ། །ནོར་བུ་ནི་ཇི་སྐད་བཤད་པའི་ནོར་བུའི་མཚན་མ་དེ་བཅིངས་པའོ། །བུད་མེད་བུ་གར་རིན་ཆེན་ཆར་འབེབས་ཀྱི་ལས་ཀྱི་ཕྱག་རྒྱ་བཅིངས་པའམ། དེའི་རིགས་ཀྱི་ཕྱག་རྒྱ་བཅིངས་ན་དངོས་གྲུབ་ཏུ་འགྱུར་རོ། །ལས་ཀུན་ནི་རིན་ཆེན་
[138b.3]ཆར་འབེེབས་ལ་སོགས་པའི་ལས་ཐམས་ཅད་ཀྱི་མཚན་མ་བསྐྱེད་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ཆར་འབེེབས་དང་དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་
[138b.4]པའི་རིན་ཆེན་ཆར་འབེབས་དང་། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། སྟོང་གསུམ་པའི་སངས་རྒྱས་ཀྱི་ཞིང་དང་མཉམ་པའི་ཟླ་བའི་དཀྱིལ་འཁོར་ལ་རང་གི་གཟུགས་སྤྲུལ་ལ་ཆོ་ག་ཐམས་ཅད་རྗེས་སུ་སྤྱད་དེ། གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་
[138b.5]ཀྱི་ཕྱག་རྒྱ་བཅིངས་ཏེ། ཨོཾ་ཀརྨྨ་སིདྡྷི་ཞེས་ཟློས་ཤིང་ལྷན་ཅིག་མཉམ་པར་སྦྱོར་བར་བསྒོམས་ལ། དེ་ནས་བསྒྲུབ་པ་བྱའོ། །དེའི་རྗེས་ལ་ལྷ་མོ་དེ་དང་མཉམ་པར་སྦྱོར་བ་བྱས་ནས་དེའི་ལུས་ལ་འཇུག་པར་བྱའོ། །དེ་ནས་སྒྲུབ་པ་པོ་དེ་རིན་ཆེན་ཆར་འབེེབས་ལ་སོགས་པ་དང་འདྲ་བར་
[138b.6]འགྱུར་རོ། །རིག་པའི་བུད་མེད་ཐམས་ཅད་ཀྱི་བདག་པོ་དང་འདོད་པ་ཐམས་ཅད་ཀྱི་དབང་ཕྱུག་ཏུ་འགྱུར་རོ་ཞེས་གསུངས་སོ། །དེ་ལྟར་ནོར་བུའི་ཡེ་ཤེས་བསྟན་ནས། ད་ནི་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་དོན་ཐམས་ཅད་གྲུབ་པའི་དཀྱིལ་
[138b.7]འཁོར་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྒྲུབ་པ་དང་དཀྱིལ་འཁོར་ལ་སོགས་པའི་གཟུངས་རྣམས་སྤྱན་དྲངས་ཏེ། ཕྱག་རྒྱ་བཞིས་རྒྱས་བཏབ་པོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བའི་སྒྲས་ནི་དེ་མ་ཐག་
[139a]
[139a.1]པ་སྟེ་དངོས་གྲུབ་ཀྱི་ཡེ་ཤེས་བསླབ་པའི་རྗེས་ཐོགས་ལའོ། །དཀྱིལ་འཁོར་འདིར་ཞེས་བྱ་བ་ནི་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་དུ་ཕྱག་རྒྱ་ཆེན་པོ་བཅིངས་པ་འབྱུང་སྟེ། སྐུ་སྟོན་པར་བྱེད་པའི་ཕྱག་རྒྱ་རྣམས་འཆིང་བའི་མཚན་ཉིད་ཡིན་ནོ་ཞེས་བྱ་བའི་ཐ་ཚིག་
[139a.2]གོ། །རིན་ཆེན་རྡོ་རྗེ་མྱུ་གུ་བཅིང་། །གུང་མོ་སྲིན་ལག་མཐེ་ཆུང་རྣམས། །སོར་མོ་བརྐྱང་བ་བྱས་ནས་ནི། །སྤྱི་བོར་བཞག་པ་གྲུབ་མཆོག་སྦྱིན། །ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་པོ་ཆེ་མྱུ་གུའི་གུང་མོ་དང་། སྲིན་ལག་དང་། མཐེའུ་
[139a.3]ཆུང་རྣམས་སོ་སོར་བརྐྱང་སྟེ། སྤྱི་བོར་གཞག་པ་ནི་རྣམ་པར་སྣང་མཛད་ཀྱི་ཕྱག་རྒྱ་ཆེན་པོའོ། །རིག་པ་ནི་འདི་ཡིན་ཏེ། ཨོཾ་བཛྲ་རཏྣ་དྷཱུ་པེ་ཧཱུཾ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྣམ་པར་སྣང་མཛད་ཀྱི་རྣལ་འབྱོར་བྱས་ལ་ཕྱིས་ཕྱག་རྒྱ་བཅིང་བ་དང་རིག་པ་འདིས་རྣམ་པར་སྣང་
[139a.4]མཛད་རབ་ཏུ་བསྒྲུབས་ན་རྣམ་པར་སྣང་མཛད་དང་འདྲ་བར་འགྱུར་རོ། །རྡོ་རྗེ་བསྡམས་པ་བྱས་ནས་ཀྱང་། །མཛུབ་མོ་གཉིས་མདུད་མཐེབ་གཉིས་དང་། །སྲིན་ལག་རྡོ་རྗེ་བསྒྱུར་ནས་ནི། །མཛོད་སྤུར་བཞག་པ་དབང་བསྐུར་ཐོབ། །ཅེས་བྱ་བ་ནི་རྡོ་རྗེ་བསྡམས་པ་ལས་མཛུབ་མོ་གཉིས་ཕན་ཚུན་
[139a.5]ལྕགས་སྒྲོག་ཏུ་སྦྲེལ་ལ། མཐེ་བོ་དང་སྲིན་ལག་གཉིས་ལུ་གུ་རྒྱུད་ལྟར་བྱས་ནས་ཡོངས་སུ་བསྒྱུར་ཏེ་མཛོད་སྤུར་གཞག་པ་ནི་ཕྱག་ན་རྡོ་རྗེའི་ཕྱག་རྒྱའོ། །རྡོ་རྗེ་དབྱིངས་ལས་བཤད་པའི་རྡོ་རྗེ་སེམས་དཔའི་རྣལ་འབྱོར་བྱས་ལ་འདི་ཉིད་བཅིངས་ཏེ། ཨོཾ་ཨ་བྷི་ཥེ་ཀ་མ་ལེ་ཨ་བྷི་ཥིཉྩ་ས་མ་ཡ་ཧཱུཾ།
[139a.6]ཞེས་ཟློས་ཤིང་རྡོ་རྗེ་སེམས་དཔའ་བདག་ཉིད་ཇི་ལྟ་བ་བཞིན་དུ་བསྒོམས་ནས་བསྒྲུབས་ན་དེ་ནས་རྡོ་རྗེ་སེམས་དཔའ་དང་འདྲ་བར་འགྲུབ་པར་འགྱུར་རོ། །རྡོ་རྗེ་རིན་ཆེན་ཚུལ་བྱས་ལ། །དེ་ཉིད་ཡོངས་སུ་བསྒྱུར་ནས་ནི། །མཛུབ་མོ་གཉིས་རྩེ་གདོང་སྤྲད་པ། །འདི་ནི་དབང་བསྐུར་ཐམས་ཅད་བྱེད། །
[139a.7]ཅེས་བྱ་བ་ནི་བཤད་མ་ཐག་པའི་ཕྱག་ན་རྡོ་རྗེའི་ཕྱག་རྒྱ་ཉིད་ལས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བྱས་ཏེ། མཛོད་སྤུར་གཞག་པ་འདི་ནི་རྡོ་རྗེ་སྙིང་པོའོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སྙིང་པོའི་རྣལ་
[139b]
[139b.1]འབྱོར་བྱས་ལ་འདི་ཉིད་བཅིངས་ཏེ། ཨོཾ་བཛྲ་རཏྣ་ཨ་བྷིཥེ་ཀ་ཧཱུཾ་ཞེས་བརྗོད་ཅིང་སྔ་མ་བཞིན་དུ་རྡོ་རྗེ་སྙིང་པོར་བདག་ཉིད་བསྒོམས་ནས་བསྒྲུབ་པར་བྱའོ། །དེ་ནས་རྡོ་རྗེ་སྙིང་པོ་དང་འདྲ་བར་འགྱུར་རོ། །དེ་ཉིད་མཐེབ་གཉིས་མཛུབ་གཉིས་ནི། །ཆོས་ཀྱི་རྡོ་རྗེའི་ཚུལ་དུ་ཡང་། །བཅིངས་ནས་དཔྲལ་
[139b.2]བར་བཞག་ནས་ནི། །ཆོས་སྤྱན་གྱི་ནི་དབང་བསྐུར་སྦྱིན། །ཞེས་བྱ་བ་ལ་བཤད་མ་ཐག་པ་ཉིད་ཀྱི་རྡོ་རྗེ་སྙིང་པོའི་ཕྱག་རྒྱ་ལས་མཐེ་བོ་དང་མཛུབ་མོ་གཉིས་པདྨར་བྱས་པ་དཔྲལ་བར་གཞག་པ་འདི་ནི་རྡོ་རྗེ་སྤྱན་གྱིའོ། །རྡོ་རྗེ་དབྱིངས་ལས་བཤད་པའི་རྡོ་རྗེ་སྤྱན་གྱི་རྣལ་འབྱོར་བྱས་ལ། འདི་
[139b.3]ཉིད་བཅིངས་ཏེ། ཨོཾ་བཛྲ་དྷརྨ་ཨ་བྷི་ཥིཉྩ་མཱཾ་ཞེས་བརྗོད་ཅིང་བདག་ཉིད་རྡོ་རྗེ་སྤྱན་དུ་བསྒོམས་ནས་སྔ་མ་བཞིན་དུ་བསྒྲུབ་པར་བྱའོ། །དེ་ནས་རྡོ་རྗེ་སྤྱན་དང་འདྲ་བར་འགྲུབ་པར་འགྱུར་རོ། །རིན་ཆེན་འབྱུང་བའི་ཕྱག་རྒྱ་ནི། །རྡོ་རྗེ་དབྱིངས་སྐྱེས་དམ་ཚིག་ཀྱང་། །བསྒྱུར་བས་དཔྲལ་བ་ཉིད་དུ་
[139b.4]ཡང་། །བཞག་ན་དབང་ནི་བསྐུར་བར་འགྱུར། །ཞེས་བྱ་བ་ནི་སེམས་མ་རྡོ་རྗེ་མ་བསྟན་པར་བྱས་ཏེ། གུང་མོ་གཉིས་བསྒྲེང་བ་ནི་རྒྱབ་ཏུ་མཛུབ་མོ་གཉིས་བསྐུམ་ལ་རྡོ་རྗེའི་རྣམ་པ་ལྟར་གཞག་པ་འདི་ནི་ལས་ཀྱི་རྡོ་རྗེ་སྟེ་སྣ་ཚོགས་ཀྱིའོ། །རྡོ་རྗེ་དབྱིངས་ལས་བཤད་པའི་རྡོ་རྗེ་སྣ་ཚོགས་ཀྱི་རྣལ་འབྱོར་
[139b.5]བྱས་ཏེ། འདི་ཉིད་བཅིངས་ལ། ཨོཾ་སརྦྦ་ཨ་བྷི་ཥེ་ཀ་པཱུ་ཛ་ས་མ་ཡེ་ཧཱུཾ། ཞེས་ཟློས་ཤིང་བདག་ཉིད་རྡོ་རྗེ་སྣ་ཚོགས་སུ་བསྒོམས་ལ་སྔ་མ་བཞིན་དུ་བསྒྲུབ་བོ། །དེ་ནས་རྡོ་རྗེ་སྣ་ཚོགས་དང་འདྲ་བར་འགྲུབ་པར་འགྱུར་རོ། །རིན་ཆེན་འབྱུང་བའི་ཕྱག་རྒྱ་ནི། །རྡོ་རྗེ་དབྱིངས་སྐྱེས་དམ་ཚིག་ཀྱང་། །
[139b.6]བཅིངས་ནས་རིན་ཆེན་གནས་དག་གི །དཔྲལ་བར་བཞག་ན་དབང་བསྐུར་འགྱུར། །ཞེས་བྱ་བ་ལ་རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་མ་བཅིངས་ཏེ། དཔྲལ་བའི་ཕྱོགས་སུ་གཞག་པ་འདི་ནི་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་གཉིས་པའོ། །འདིའི་རིག་པ་
[139b.7]ནི་འདི་ཡིན་ཏེ། ཨོཾ་ཏྲཱཾ་ཞེས་བྱ་བ་འདིས་དཀྱིལ་འཁོར་དུ་བཅོམ་ལྡན་འདས་ལ་རྒྱས་གདབ་པར་བྱའོ། །མཐེབ་གཉིས་ཕན་ཚུན་བསྣོལ་ནས་ནི། །མཛུབ་མོ་གཉིས་ཀྱི་རྩེ་མོ་ཡང་། །ནོར་བུ་འདྲ་བར་དགུག་པ་ནི། །རྡོ་རྗེ་ནོར་བུ་ཆེན་པོ་ཐོབ། །ཅེས་བྱ་བ་ནི་ལག་པ་གཉིས་ཀྱི་མཐེ་བོང་
[140a]
[140a.1]གཉིས་ཕན་ཚུན་བསྣོལ་ནས་མཛུབ་མོ་གཉིས་ནོར་བུར་བྱས་པ་ནི་སེམས་མ་རྡོ་རྗེ་མའི་གནས་ཀྱི་ནོར་བུར་བྱས་པའི་ཕྱག་རྒྱ་དང་། དཔྲལ་བའི་གནས་སུ་བཞག་པ་འདི་ནི་རྡོ་རྗེ་རིན་ཆེན་མའི་གནས་ཀྱི་ནོར་བུ་ཕྲེང་བ་མའི་ཕྱག་རྒྱའོ། །རྡོ་རྗེ་བསྡམས་པ་བྱས་ནས་ནི། །གུང་
[140a.2]མོ་ནོར་བུ་འདྲར་བྱས་ལ། །མཛུབ་མོ་སྲིན་ལག་གཉིས་པདྨོ། །ཁ་དབྱེ་འདྲ་བར་བྱས་པས་འགྲུབ། །ཅེས་བྱ་བ་ནི་རྡོ་རྗེ་བསྡམས་པ་ལས་གུང་མོ་གཉིས་ནོར་བུར་བྱས་ལ་མཛུབ་མོ་དང་སྲིན་ལག་གཉིས་སོ་སོར་པདྨ་ལྟར་བྱས་པ་ནི་ཆོས་ཀྱི་རྡོ་རྗེ་མའི་གནས་ཀྱི་ནོར་བུ་རིན་ཆེན་པདྨའིའོ། །གུང་
[140a.3]མོ་གཉིས་ནི་ནོར་བུ་བཅིང་། །སོར་མོ་ཐམས་ཅད་བསྒྲེང་བ་རྣམས། །ནོར་བུ་ཉིད་དུ་བསྒོམས་ན་ནི། །འཁོར་རྣམས་མཆོག་དང་ལྡན་པར་འགྱུར། །ཞེས་བྱ་བ་ནི་ལག་པ་གཉིས་གཅིག་ཏུ་སྦྱར་ཏེ། གུང་མོ་གཉིས་རིན་པོ་ཆེར་བྱས་ནས་སོར་མོ་ལྷག་མ་རྣམས་བརྐྱང་བའི་ཕྱག་རྒྱ་སྤྱི་བོར་
[140a.4]བཞག་སྟེ། སོར་མོ་ཐམས་ཅད་ཀྱི་རྩེ་མོ་རིན་པོ་ཆེའི་གཟུགས་སུ་བསྒོམས་པ་འདི་ནི་རྡོ་རྗེ་ལས་མའི་གནས་ཀྱི་རྡོ་རྗེ་རིན་ཆེན་ཆར་འབེེབས་མའིའོ། །རྡོ་རྗེ་རིན་ཆེན་ཚུལ་བཅིངས་ནས། །གུང་མོ་མཐེ་བོ་སྦྱར་བ་དང་། །སྲིན་ལག་མཐེ་ཆུང་བསྙམས་པ་རྣམས། །ཁར་བཞག་ལྕེ་སྟེང་ནོར་རབ་
[140a.5]སྟེར། །ཞེས་བྱ་བ་ནི་ལག་པ་གཉིས་བརྐྱང་ནས་གུང་མོ་གཉིས་དང་མཐེ་བོང་གཉིས་རིན་པོ་ཆེ་ལྟར་བྱས་ལ། །སྲིན་ལག་དང་མཐེའུ་ཆུང་གཉིས་བརྐྱང་སྟེ། ལྕེ་བཞིན་དུ་ཁར་གཞག་པ་འདི་ནི་དོན་ཐམས་ཅད་གྲུབ་པའི་གནས་ཀྱི་དོན་ཀུན་གྲུབ་པ་རབ་ཏུ་སྟེར་བ་མའིའོ། །དེ་ལས་མཛུབ་
[140a.6]གཉིས་རྡོ་རྗེར་བྱ། །ཞེས་བྱ་བ་ནི་ཀུན་གྲུབ་པར་རབ་ཏུ་སྟེར་བའི་ཕྱག་རྒྱ་ཉིད་ལས་མཛུབ་མོ་གཉིས་མྱུ་གུ་ལྟར་བྱས་ནས་སྙིང་གར་གཞག་པ་ནི་ནོར་བུ་མཚན་མའི་གནས་ཀྱི་ནོར་བུ་རིན་ཆེན་འདྲེན་མའིའོ། །དེ་གཉིས་དེ་བཞིན་ལྕགས་ཀྱུར་བྱ། །ཞེས་བྱ་བ་ནི་ནོར་བུ་རིན་ཆེན་འདྲེན་པའི་ཕྱག་རྒྱ་
[140a.7]ཉིད་ལས་མཛུབ་མོ་གཉིས་ལྕགས་ཀྱུ་ལྟར་བྱས་པ་འདི་ནི་རིན་ཆེན་རྒྱལ་པོའི་གནས་ཀྱི་རིན་ཆེན་དམ་ཚིག་ལྕགས་ཀྱུ་མའིའོ། །མཛུབ་མོས་མཛུབ་མོ་དྲང་བར་བྱ། །ཞེས་བྱ་བ་ནི་དོན་ཀུན་གྲུབ་པ་སྟེར་བའི་ཕྱག་རྒྱ་ཉིད་ལས་གཡས་པས་གཡོན་པའི་མཛུབ་མོ་འདྲེན་པའི་ཕྱག་རྒྱ་ཉིད་
[140b]
[140b.1]ལས་མཛུབ་མོ་གཉིས་ལྕགས་ཀྱུ་ལྟ་བུའི་ཚུལ་དུ་བྱེད་པ་འདི་ནི་ནོར་བུ་ཆགས་པའི་གནས་ཀྱི་ནོར་བུ་ཆགས་པའི་དམ་ཚིག་མའིའོ། །དེ་ཉིད་མགོ་ལ་རབ་སྦྱིན་པའོ། །ཞེས་བྱ་བ་ནི་ནོར་བུ་ཆགས་པའི་དམ་ཚིག་གི་ཕྱག་རྒྱ་ཉིད་ཀྱིས་མཛུབ་མོ་དང་མཐེ་བོ་གཉིས་ལེགས་སོ་སྦྱིན་པའི་
[140b.2]ཚུལ་དུ་བྱེད་པ་འདི་ནི་ནོར་བུ་ལེགས་པའི་གནས་ཀྱི་ནོར་བུ་ལེགས་པ་མའིའོ། །གུང་མོ་གཉིས་ནི་ནོར་བུར་བཅིང་། །མཛུབ་གཉིས་ངོས་ལ་བཀུག་པ་ཡི། །ཞེས་བྱ་བ་ནི་ལག་པ་གཉིས་བརྐྱང་ལ་གུང་མོ་གཉིས་ནོར་བུར་བྱས་ནས་མཛུབ་མོ་གཉིས་ལྕགས་ཀྱུ་ལྟར་བྱས་ཏེ། མཐེ་བོང་གི་
[140b.3]རྩེ་མོ་ལ་སྦྱར་ནས་བཞག་པ་འདི་ནི་རིན་ཆེན་ལྟ་བའི་གནས་སུ་རྡོ་རྗེ་ནོར་བུ་རིན་ཆེན་སྤྱན་མའིའོ། །སྲིན་ལག་ངོས་གཉིས་མདུད་པ་ལ། །མཐེ་བོང་གཉིས་ནི་བཀབ་པ་སྟེ། །ཞེས་བྱ་བ་ནི་རྡོ་རྗེ་ནོར་བུ་རིན་ཆེན་སྤྱན་གྱི་ཕྱག་རྒྱ་ཉིད་ལས་སྲིན་ལག་གཉིས་ནང་དུ་བཅུག་ནས་ཕན་ཚུན་མདུད་ལ་
[140b.4]མཛུབ་མོ་གཉིས་ལྕགས་ཀྱུར་བྱས་པ་མཐེ་བོ་གཉིས་ཀྱིས་བཀབ་སྟེ། དཔྲལ་བའི་གནས་སུ་འཇོག་པ་འདི་ནི་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་ཕྲེང་བའི་གནས་སུ་རྡོ་རྗེ་རིན་ཆེན་ཕྲེང་བ་མའིའོ། །དེ་ཉིད་རྡོ་རྗེ་ཉི་མ་བསྐོར། །ཞེས་བྱ་བ་ནི་རྡོ་རྗེ་རིན་ཆེན་ཕྲེང་བ་མའི་ཕྱག་རྒྱ་ཉིད་
[140b.5]སྙིང་གར་ཉི་མའི་ཚུལ་གྱིས་བསྐོར་བ་འདི་ནི་ནོར་བུ་ཉི་མའི་གནས་ཀྱི་ནོར་བུ་རིན་ཆེན་ཉི་མའིའོ། །དཔུང་པ་སྤྱི་བོར་བརྐྱང་བར་བྱ། །ཞེས་བྱ་བ་ནི་རིན་ཆེན་ཕྲེང་བ་མའི་ཕྱག་རྒྱ་ཉིད་ལས་དཔུང་པ་བརྐྱང་ནས་སྤྱི་བོར་གཞག་པ་འདི་ནི་ནོར་བུ་དང་ལས་ཀྱི་གནས་སུ་ནོར་བུའི་རྒྱལ་མཚན་གྱི་རྩེ་མོའི་དཔུང་
[140b.6]རྒྱན་གྱི་ནོར་བུ་ཟླ་བའི་རྒྱལ་མཚན་མཆོག་མའིའོ། །བཞད་པའི་ཚུལ་དུ་ཞེས་བྱ་བ་ནི་རྡོ་རྗེ་རིན་ཆེན་ཕྲེང་བ་མའི་ཕྱག་རྒྱ་ཉིད་ལས་བཞད་པའི་ཚུལ་དུ་ཡོངས་སུ་བསྐོར་བ་ནི་ནོར་བུ་རིན་ཆེན་བཞད་པའི་གནས་སུ་ནོར་བུ་རིན་ཆེན་བཞད་པ་མའིའོ། །རྡོ་རྗེ་བསྡམས་པ་བྱས་ནས་ཀྱང་། །མཛུབ་མོ་
[140b.7]སྲིན་ལག་གྱེན་དུ་བསྒྲེང་། །དེ་དག་པདྨ་འདྲ་བར་བྱས། །གུང་མོ་གཉིས་ནི་ནོར་བུར་བྱས། །རྡོ་རྗེ་བསྡམས་པ་ལས་མཛུབ་མོ་གཉིས་དང་སྲིན་ལག་གཉིས་པདྨ་འདྲ་བར་བྱས་ལ་གུང་མོ་གཉིས་ནོར་བུར་བྱས་པ་འདི་ནི་རིན་ཆེན་པདྨའི་གནས་སུ་ནོར་བུ་ཏིང་ངེ་འཛིན་པདྨའིའོ། །དེ་ལས་ཐ་མ་
[141a]
[141a.1]རབ་སྦྱིན་བྱ། །ཞེས་བྱ་བ་ནི་ནོར་བུའི་ཏིང་ངེ་འཛིན་པདྨའི་ཕྱག་རྒྱ་ཉིད་ལའང་ཐ་མ་སྦྱིན་པ་གཏོང་བའི་ཚུལ་དུ་བྱེད་པ་འདི་ནི་གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོའི་གནས་ཀྱི་ནོར་བུ་རིན་ཆེན་གཏོང་བའི་དམ་ཚིག་མའིའོ། །རྡོ་རྗེ་རལ་གྲི་སྦྱར་བ་དང་། །ཞེས་བྱ་བ་ནི་ནོར་བུའི་ཏིང་
[141a.2]ངེ་འཛིན་པདྨའི་ཕྱག་རྒྱ་ཉིད་ལས་རལ་གྲིས་གཅོད་པའི་ཚུལ་དུ་བྱེད་པ་འདི་ནི་རིན་ཆེན་རྣོན་པོའི་གནས་སུ་རིན་ཆེན་དམ་ཚིག་རལ་གྲི་མའིའོ། །རྡོ་རྗེ་འཁོར་ལོའི་ཚུལ་དུ་བྱ། །ཞེས་བྱ་བ་ནི་ནོར་བུ་ཏིང་ངེ་འཛིན་པདྨའི་ཕྱག་རྒྱ་ཉིད་ལས་མགལ་མེའི་འཁོར་ལོ་བཞིན་བསྐོར་བ་འདི་ནི་ནོར་བུ་འཁོར་ལོ་
[141a.3]མའི་གནས་སུ་ནོར་བུ་དམ་ཚིག་གི་འཁོར་ལོ་མའིའོ། །དེ་ཉིད་ཁ་ནས་དབྱུང་བར་བྱ། །ཞེས་བྱ་བ་ནི་ནོར་བུ་ཏིང་ངེ་འཛིན་པདྨའི་ཕྱག་རྒྱ་ཉིད་ལས་ཚིག་འབྱིན་པའི་ཚུལ་གྱིས་ཁ་གྱེན་དུ་འདྲེན་པ་ནི་ནོར་བུ་གསུང་བའི་གནས་ཀྱི་ནོར་བུ་གསུང་མཆོག་མའིའོ། །རྡོ་རྗེ་རིན་ཆེན་མྱུ་གུར་བཅིང་། །སོར་མོ་
[141a.4]ཐམས་ཅད་བརྐྱང་བ་དང་། །དེ་དག་སྤྱི་བོར་བཞག་པ་ནི། །རིན་ཆེན་ཆར་གྱི་ཆར་འབེབས་སོ། །ཞེས་བྱ་བ་ནི་རྡོ་རྗེ་སེམས་མ་བཅིངས་ལ། རྡོ་རྗེ་རིན་ཆེན་གྱི་མཐེ་བོང་དང་། མཛུབ་མོ་གཉིས་ཁ་སྦྱར་བ་འདི་ནི་རྡོ་རྗེ་རིན་པོ་ཆེའི་མྱུ་གུ་སྟེ། དེ་བཅིངས་པ་ལས་མཐེ་བོང་དང་། གུང་མོ་དང་། སྲིན་ལག་
[141a.5]དང་། མཐེའུ་ཆུང་རྣམས་བརྐྱང་བའི་ཕྱག་རྒྱ་སྤྱི་བོར་བཞག་ལ་སོར་མོའི་རྩེ་མོ་ནོར་བུའི་གཟུགས་སུ་བསྒོམས་ནས་རིན་པོ་ཆེའི་ཆར་འབེབས་པའི་ལྷ་མོ་བསམས་པ་འདི་ནི་རིན་ཆེན་ཆར་འབེེབས་ཀྱི་གནས་སུ་རིན་ཆེན་ཆར་རྒྱུན་མའི་ཕྱག་རྒྱའོ། །དེ་ཉིད་འཁོར་ལོའི་ཚུལ་དུ་ནི། །ཞེས་བྱ་བ་ནི་རིན་
[141a.6]ཆེན་ཆར་རྒྱུན་མའི་ཕྱག་རྒྱ་ཉིད་མགལ་མེའི་འཁོར་ལོ་བཞིན་དུ་གར་གྱི་ཚུལ་བསྟན་པ་འདི་ནི་ནོར་བུ་མཆོད་པའི་གནས་སུ་ནོར་བུ་མཆོད་པའི་དམ་ཚིག་མའིའོ། །སྙིང་གར་རིན་ཆེན་གཉིས་བྱས་པ། །ཞེས་བྱ་བ་ནི་རིན་ཆེན་ཆར་རྒྱུན་མའི་ཕྱག་རྒྱ་ཉིད་ཁ་གཉིས་སུ་བྱས་པ་འདི་ནི་ནོར་བུ་ཆོ་ག་མའི་
[141a.7]གནས་སུ་ནོར་བུ་དམ་ཚིག་བསྲུང་བ་མའིའོ། །ནོར་བུ་འཛིན་རྩེ་མཆེ་བ་ཡིན། །ཞེས་བྱ་བ་འདི་ནི་རིན་ཆེན་ཆར་འབེེབས་མའི་ཕྱག་རྒྱ་ལས་མཛུབ་མོ་གཉིས་བསྐུམ་ལ་མཆེ་བ་བཞིན་དུ་ཁར་འཇོག་པ་འདི་ནི་ནོར་བུ་གནོད་སྦྱིན་གྱི་གནས་སུ་ནོར་བུ་མཆེ་བ་གཙིགས་མའིའོ། །དབུས་སུ་མཉམ་པ་
[141b]
[141b.1]ཁུ་ཚུར་རོ། །ཞེས་བྱ་བ་ནི་རིན་ཆེན་ཆར་རྒྱུན་མའི་ཕྱག་རྒྱའི་དབུས་སུ་མཛུབ་མོ་གཉིས་དང་། རང་གི་མཐེ་བོ་གཉིས་ཁ་སྦྱར་བར་བྱས་པ་འདི་ནི་ནོར་བུའི་ཁུ་ཚུར་གྱི་གནས་སུ་ནོར་བུ་དམ་ཚིག་ཁུ་ཚུར་འཛིན་མའི་ཕྱག་རྒྱ་ཆེན་པོའོ། །རིན་ཆེན་སྒེག་མོ་ལ་སོགས་པ་ནས་རིན་ཆེན་འབེབས་པའི་
[141b.2]མཐར་ཐུག་པ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དམ་ཚིག་གི་ཕྱག་རྒྱ་ཉིད་འདིར་ཕྱག་རྒྱ་ཆེན་པོར་འགྱུར་རོ། །དེ་ནས་ཞེས་བྱ་བ་ནི་ཕྱག་རྒྱ་ཆེན་པོ་ལས་བཤད་པའི་རྗེས་ཐོགས་ཉིད་ལ་དམ་ཚིག་གི་ཕྱག་རྒྱའི་ཡེ་ཤེས་ཏེ། དམ་ཚིག་གི་ཕྱག་རྒྱ་འཆིང་
[141b.3]བའི་མཚན་ཉིད་ངེས་པར་བསླབ་ཅིང་བསྟན་པར་བྱའོ། །ཕྱག་རྒྱ་ཆེན་པོ་དེ་དག་ཉིད། །སྙིམ་སྦྱར་བྱས་ཏེ་བཅིངས་ནས་ནི། །ཞེས་བྱ་བ་ལ་ཐལ་མོ་སྦྱར་ལ་མཐེ་བོ་གཉིས་དང་གུང་མོ་གཉིས་བརྐྱང་མཛུབ་མོ་གཉིས་བཀུག་ནས་རིན་པོ་ཆེ་ལྟ་བུར་བྱས་པའི་ཕྱག་རྒྱ་དཔྲལ་བར་གཞག་པ་འདི་ནི་རྣམ་པར་
[141b.4]སྣང་མཛད་ཀྱི་ཕྱག་རྒྱའོ། །ཐལ་མོ་སྦྱར་བ་མཐེ་བོ་གཉིས་བསྣོལ་ལ་མཛུབ་མོ་གཉིས་ནོར་བུར་བྱས་པ་འདི་ནི་རྡོ་རྗེ་ནོར་བུ་ཆེན་པོའི་དམ་ཚིག་གི་ཕྱག་རྒྱ་ཡང་འདི་ཡིན་ནོ། །སྙིམ་པ་སྦྱར་ཏེ་མཛུབ་མོ་གཉིས་དང་མཐེ་བོ་གཉིས་ཀྱི་གདོང་སྦྱར་ནས་གུང་མོ་གཉིས་ནོར་བུ་འདྲ་བར་བྱས་པ་ཕྱག་རྒྱ་དཔྲལ་བར་
[141b.5]གཞག་པ་འདི་ནི་རིན་ཆེན་ཕྲེང་བ་མའིའོ། །སྙིམ་པ་སྦྱར་ལ་གུང་མོ་ནོར་བུར་བྱས་ནས་མཛུབ་མོ་དང་སྲིན་ལག་བརྐྱང་སྟེ་པདྨ་འདྲ་བར་བྱས་པ་འདི་ནི་ནོར་བུའི་རིན་ཆེན་པདྨའིའོ། །སྙིམ་པ་སྦྱར་ལ་གུང་མོ་གཉིས་རིན་པོ་ཆེ་འདྲ་བར་བྱས་ནས་སོར་མོ་ལྷག་མ་བརྐྱང་བའི་ཕྱག་རྒྱ་སྤྱི་གཙུག་ཏུ་བཞག་ལ་སོར་མོ་
[141b.6]ཐམས་ཅད་ཀྱི་རྩེ་མོ་ནོར་བུའི་གཟུགས་སུ་བསྒོམ་པ་འདི་ནི་རྡོ་རྗེ་རིན་ཆེན་ཆར་འབེབས་མའིའོ། །སྙིམ་པ་སྦྱར་ལ་གུང་མོ་གཉིས་དང་མཐེ་བོ་གཉིས་རིན་པོ་ཆེ་ལྟར་བྱས་ཏེ། སྲིན་ལག་གཉིས་དང་མཐེ་ཆུང་གཉིས་བརྐྱང་སྟེ། ལྕེ་བཞིན་དུ་ཁར་གཞག་པ་འདི་ནི་དོན་ཀུན་གྲུབ་པར་རབ་སྦྱིན་མའིའོ། །དོན་
[141b.7]ཀུན་གྲུབ་པར་རབ་སྦྱིན་མའི་ཕྱག་རྒྱ་ཉིད་ལས་མཛུབ་མོ་གཉིས་མྱུ་གུ་ལྟར་བྱས་ཏེ། སྙིང་གར་གཞག་པ་འདི་ནི་ནོར་བུ་རིན་ཆེན་འགུགས་མའིའོ། །ནོར་བུ་རིན་ཆེན་འགུགས་པ་མའི་ཕྱག་རྒྱ་ཉིད་ལས་མཛུབ་མོ་གཉིས་ལྕགས་ཀྱུར་བྱས་པ་འདི་ནི་རིན་ཆེན་དམ་ཚིག་ལྕགས་ཀྱུ་མའིའོ། །དོན་
[142a]
[142a.1]ཀུན་གྲུབ་པར་རབ་ཏུ་སྟེར་མའི་ཕྱག་རྒྱ་ལས་གཡས་པའི་མཛུབ་མོས་གཡོན་པའི་མཛུབ་མོ་བཟུང་བྷུསྟེ་འཕེན་པའི་ཚུལ་དུ་བྱེད་པ་འདི་ནི་ནོར་བུ་ཆགས་པའི་དམ་ཚིག་མའིའོ། །ནོར་བུ་ཆགས་པའི་དམ་ཚིག་གི་ཕྱག་རྒྱ་ལས་མཛུབ་མོ་དང་མཐེ་བོ་ལེགས་སོ་སྦྱིན་པའི་ཚུལ་དུ་བྱེད་པ་
[142a.2]འདི་ནི་ནོར་བུ་ལེགས་པ་མའིའོ། །སྙིམ་པ་སྦྱར་ལ་གུང་མོ་གཉིས་ནོར་བུར་བྱས་ནས་མཐེ་བོའི་ལོགས་སུ་བྱས་ནས་གཞག་པ་འདི་ནི་རྡོ་རྗེ་ནོར་བུ་རིན་ཆེན་ལྟ་བའིའོ། །རྡོ་རྗེ་ནོར་བུ་རིན་ཆེན་ལྟ་བའི་ཕྱག་རྒྱ་ཉིད་ལས་སྲིན་ལག་དང་། མཐེའུ་ཆུང་གཉིས་ནང་དུ་བཅུག་ནས་ཕན་ཚུན་ནང་དུ་ཁ་སྦྱར་
[142a.3]ཏེ་བཅིངས་ལ་མཛུབ་མོའི་ལྕགས་ཀྱུ་གཉིས་མཐེ་བོ་གཉིས་ཀྱིས་བཀན་ཏེ་དཔྲལ་བར་གཞག་པ་འདི་ནི་རྡོ་རྗེ་རིན་ཆེན་ཕྲེང་བ་མའིའོ། །རྡོ་རྗེ་རིན་ཆེན་ཕྲེང་བ་མའི་ཕྱག་རྒྱ་ཉིད་སྙིང་གར་ཉི་མའི་ཚུལ་གྱིས་བསྐོར་བ་ནི་ནོར་བུ་ཉི་མའིའོ། །རྡོ་རྗེ་ནོར་བུ་ཕྲེང་བ་མའི་ཕྱག་རྒྱ་ཉིད་ལས་དཔུང་པ་བརྐྱང་ནས་སྤྱི་བོར་
[142a.4]གཞག་པ་འདི་ནི་ནོར་བུ་ཟླ་བ་རྒྱལ་མཚན་གྱི་རྩེ་མོའིའོ། །ནོར་བུ་རིན་ཆེན་ཕྲེང་བ་མའི་ཕྱག་རྒྱ་ཉིད་བཞད་པའི་ཚུལ་གྱིས་ཡོངས་སུ་བསྐོར་བ་འདི་ནི་ནོར་བུ་བཞད་པ་མའིའོ། །སྙིམ་པ་སྦྱར་ནས་མཛུབ་མོ་གཉིས་དང་སྲིན་ལག་གཉིས་པདྨར་བྱས་ལ་གུང་མོ་གཉིས་རིན་པོ་ཆེར་བྱེད་པ་འདི་ནི་ནོར་བུ་
[142a.5]ཏིང་ངེ་འཛིན་པདྨའིའོ། །ནོར་བུ་ཏིང་ངེ་འཛིན་གྱི་ཕྱག་རྒྱ་ཉིད་ལས་མཐེའུ་ཆུང་སྦྱིན་པ་གཏོང་བའི་ཚུལ་དུ་བྱེད་པ་འདི་ནི་གཏོང་བ་དམ་ཚིག་མའིའོ། །ནོར་བུ་ཏིང་ངེ་འཛིན་པདྨའི་ཕྱག་རྒྱ་ཉིད་ལས་རལ་གྲིས་གཅོད་པའི་ཚུལ་དུ་སྦྱོར་བ་འདི་ནི་ནོར་བུ་དམ་ཚིག་གི་རལ་གྲི་མའིའོ། །ནོར་བུ་ཏིང་ངེ་འཛིན་
[142a.6]པདྨའི་ཕྱག་རྒྱ་ཉིད་མགལ་མེའི་འཁོར་ལོ་བཞིན་དུ་བསྐོར་བ་འདི་ནི་ནོར་བུ་དམ་ཚིག་གི་འཁོར་ལོ་མའིའོ། །ནོར་བུའི་ཏིང་ངེ་འཛིན་པདྨའི་ཕྱག་རྒྱ་ཉིད་ཚིག་འབྱིན་པའི་ཚུལ་གྱིས་ཁ་ནས་འདྲེན་པར་བྱེད་པ། འདི་ནི་ནོར་བུ་གསུང་བ་མཆོག་མའིའོ། །སྙིམ་པ་སྦྱར་ལ་གུང་མོ་གཉིས་མྱུ་གུ་ལྟར་བརྟན་པར་
[142a.7]བྱས་ལ་མཐེ་བོ་གཉིས་གཤིབས་ཏེ། མཛུབ་མོའི་རྩེ་མོ་དང་སྦྱར་ནས་རིན་པོ་ཆེར་བྱས་ལ་མཐེ་བོ་དང་གུང་མོ་དང་། སྲིན་ལག་དང་། མཐེའུ་ཆུང་གི་སོར་མོ་རྣམས་བརྐྱང་སྟེ་སོར་མོ་ཐམས་ཅད་ཀྱི་རྩེ་མོ་ནོར་བུའི་གཟུགས་སུ་བསམས་ཏེ། རིན་པོ་ཆེ་ཆར་འབེེབས་མའི་ལྷ་མོ་བསྒོམ་པ་འདི་ནི་རིན་ཆེན་
[142b]
[142b.1]ཆར་རྒྱུན་མའིའོ། །རིན་ཆེན་ཆར་རྒྱུན་མའི་ཕྱག་རྒྱ་ཉིད་མགལ་མེའི་འཁོར་ལོ་བཞིན་དུ་གར་གྱི་སྤྱོར་བས་སྟོན་པ་ནི་ནོར་བུ་མཆོད་པའི་དམ་ཚིག་མའིའོ། །རིན་ཆེན་ཆར་རྒྱུན་མའི་ཕྱག་རྒྱ་ཉིད་གཉིས་སུ་བྱས་ནས་སྙིང་གར་འཛིན་པ་ནི་ནོར་བུ་དམ་ཚིག་བསྲུང་བ་མའིའོ། །རིན་ཆེན་ཆར་རྒྱུན་མའི་ཕྱག་
[142b.2]རྒྱ་ལས་མཛུབ་མོ་གཉིས་བསྐུམ་སྟེ་མཆེ་བ་བཞིན་དུ་ཁར་འཇོག་པ་འདི་ནི་ནོར་བུ་མཆེ་བ་གཙིགས་པ་མའིའོ། །རིན་ཆེན་ཆར་རྒྱུན་མའི་ཕྱག་རྒྱའི་དབུས་སུ་མཛུབ་མོ་གཉིས་དང་རང་གི་མཐེ་བོ་གཉིས་ཀྱི་རྩེ་མོར་སྦྱར་བར་བྱས་པ་འདི་ནི་ནོར་བུ་དམ་ཚིག་གི་ཁུ་ཚུར་གྱི་གཟུངས་ཀྱི་དམ་ཚིག་གི་ཕྱག་རྒྱའོ།
[142b.3]རིན་ཆེན་སྒེག་མོ་ལ་སོགས་པ་ནས་རིན་ཆེན་འདེབས་པའི་གཟུངས་ཀྱི་མཐར་ཐུག་པ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དམ་ཚིག་གི་ཕྱག་རྒྱ་ཉིད་གཟུང་བར་བྱའོ། །མདོར་བསྡུས་གསང་བའི་གསང་བ་སྟེ། །དངོས་གྲུབ་བཞི་འགྱུར་སྦྱིན་པར་བྱ། །ཞེས་བྱ་བ་ནི་
[142b.4]ནོར་བུའི་རིགས་ཀྱི་གསང་བའི་དཀྱིལ་འཁོར་ནི་གསང་བ་སྟེ། དམ་ཚིག་གི་ཕྱག་རྒྱ་ནི་གསང་བའི་གསང་བའོ། །མདོར་བསྡུས་ནས་ཕྱི་རོལ་གྱི་བྱ་བ་ལ་མི་ལྟོས་པ་བསྒོམ་པ་གཙོ་བོར་གྱུར་པ་ཡིན་ནོ་ཞེས་བྱ་བར་དགོངས་སོ། །སྒྲུབ་པ་པོ་མངོན་པར་འདོད་པའི་འབྲས་བུ་སྟེར་བས་ན་དངོས་གྲུབ་སྟེར་
[142b.5]བའོ། །གལ་ཏེ་ཕྱག་རྒྱ་གཞན་ཟླ་བ་བཞིས་དངོས་གྲུབ་སྟེར་ན་འདི་ནི་ཟླ་བ་གཅིག་གིས་འགྱུར་རོ། །གཞན་ཞག་བཞིས་འགྲུབ་ན་འདི་ཞག་གཅིག་གིས་འགྲུབ་ཅེས་བྱ་བ་དེའི་ཕྱིར་དངོས་གྲུབ་བཞི་འགྱུར་སྦྱིན་པར་བྱེད་དེ། གསང་བའི་གསང་བ་དམ་ཚིག་གི་ཕྱག་རྒྱས་སོ། །དེ་ལྟར་རྡོ་རྗེ་གསང་
[142b.6]བ་བཞིན། །དུས་ཀུན་དུ་ནི་སྦྱོར་མི་བྱ། །ཞེས་བྱ་བ་ནི་ཇི་ལྟར་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་དུ་གསང་བའི་དམ་ཚིག་གི་ཕྱག་རྒྱ་ལས་བྱུང་བའི་ལས་ཀྱི་ཕྱག་རྒྱ་དུས་ཀུན་དུ་བཅིང་བར་མི་བྱ་བ་དེ་བཞིན་དུ་འདིར་ཡང་གསང་བའི་གསང་བ་ཁུ་ཚུར་ལས་བྱུང་བའི་ལས་ཀྱི་ཕྱག་
[142b.7]རྒྱ་དུས་ཐམས་ཅད་དུ་བཅིང་བར་མི་བྱ་སྟེ། གསང་བའི་གསང་བ་དམ་ཚིག་གི་ཕྱག་རྒྱ་མི་བཅིང་ངོ་། །དགག་པ་དེས་དམ་ཚིག་གི་ཕྱག་རྒྱ་མེད་ན་དམ་ཚིག་གི་ཕྱག་རྒྱ་དེས་ལྷ་བསྒྲུབ་པར་མི་བྱའོ་ཞེས་སྔར་བསྟན་ཟིན་ཏོ། །དེ་ནས་ཞེས་བྱ་བ་ནི་དེའི་རྗེས་ལ་ཞེས་བྱ་བའི་དོན་ཏོ། །ཧཱུཾ་ནི་རྣམ་པར་སྣང་
[143a]
[143a.1]མཛད་ཀྱི་ལྕགས་ཀྱུ་ལ་ཆོས་ཀྱི་ཕྱག་རྒྱར་བསམ་པར་བྱའོ། །ཏྲེ་ནི་དོན་ཀུན་གྲུབ་པ་སྦྱིན་པ་དང་། ནོར་བུ་རིན་ཆེན་འགུགས་མ་དང་། ནོར་བུ་དམ་ཚིག་གི་གཟུངས་ཀྱིའོ། །གྷེ་ནི་ནོར་བུའི་དམ་ཚིག་གི་རིན་ཆེན་ལྕགས་ཀྱུ་མའིའོ། །ཧྲེ་ནི་ནོར་བུ་ཆགས་པའི་དམ་ཚིག་མའིའོ། །སྭེ་ནི་
[143a.2]ནོར་བུ་ལེགས་པ་མའིའོ། །ཀྱེ་ནི་རྡོ་རྗེ་ནོར་བུ་རིན་ཆེན་སྤྱན་དང་། རྡོ་རྗེ་རིན་ཆེན་ཕྲེང་བ་མ་དང་། ནོར་བུ་རིན་ཆེན་ཕྲེང་བའི་དབང་བསྐུར་བའི་གཟུངས་རྣམས་ཀྱིའོ། །ཁཾ་ནི་ནོར་བུ་རིན་ཆེན་ཉི་མའིའོ། །དྷྲེ་ནི་ནོར་བུ་ཟླ་བ་རྒྱལ་མཚན་གྱི་རྩེ་མོ་མའིའོ། །ཧྱེ་ནི་ནོར་བུ་བཞད་པ་མའིའོ། །དྲཻ་ནི་ནོར་བུ་རིན་ཆེན་
[143a.3]པདྨ་མོ་དང་། ནོར་བུ་རིན་ཆེན་གཏོང་བའི་དམ་ཚིག་མ་དང་། ནོར་བུ་ཏིང་ངེ་འཛིན་པདྨ་རྣམས་ཀྱིའོ། །བྱཻ་ནི་ནོར་བུ་དམ་ཚིག་རལ་གྲི་མའིའོ། །ཀཻ་ནི་ནོར་བུ་དམ་ཚིག་འཁོར་ལོ་མའིའོ། །བཻ་ནི་ནོར་བུ་གསུང་བ་མཆོག་མའིའོ། །ཀྲུ་ནི་ནོར་བུ་རིན་ཆེན་ཆར་འབེེབས་མ་དང་། མཆོད་པ་ཆེན་མོའི་དམ་
[143a.4]ཚིག་མ་དང་། ནོར་བུ་རིན་ཆེན་ཆར་གྱི་རྒྱུན་མ་རྣམས་སོ། །རཻ་ནི་ནོར་བུ་དམ་ཚིག་བསྲུང་བའིའོ། །ཡྱ་ནི་ནོར་བུ་མཆེ་བ་གཙིགས་མའིའོ། །མཱི་ནི་ནོར་བུ་དམ་ཚིག་ཁུ་ཚུར་གྱི་གཟུངས་ཏེ། ལྕེ་རྣམས་ལ་བསམ་པར་བྱའོ། །རིན་ཆེན་སྒེག་མོ་ལ་སོགས་པ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་
[143a.5]ལས་བཤད་པ་ཡིན་ནོ། །གསང་བ་གཟུངས་ཀྱི་དཀྱིལ་འཁོར་རོ། །མཆོག་ནི་དམ་པའོ། །གསང་བ་གསང་བའི་ཁུ་ཚུར་མའིའོ། །ནོར་བུའི་དམ་ཚིག་གི་གཟུངས་ཀྱི་ཕྱག་རྒྱ་ཆེན་པོ་དང་། དམ་ཚིག་གི་ཕྱག་རྒྱ་དེ་རྣམས་ཁུ་ཚུར་གཉིས་སུ་བྱིན་ནས་ལས་ཀུན་བྱེད་པ་སྟེ་ལས་ཀྱི་ཕྱག་རྒྱ་ཞེས་བྱ་བའི་དོན་
[143a.6]ཏོ། །འདི་སྐད་སྟོན་པ་ཡིན་ཏེ། ནོར་བུའི་དམ་ཚིག་གི་ཁུ་ཚུར་གྱི་གཟུངས་ཀྱི་ཕྱག་རྒྱ་ཆེན་པོ་གཉིས་སུ་བྱས་ནས་རྡོ་རྗེ་དབྱིངས་ཀྱི་ཚུལ་གྱིས་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་གཟུངས་ཀྱི་མཐར་ཐུག་པ་རྣམས་ཀྱི་ལས་ཀྱི་ཕྱག་རྒྱ་བཅིང་བར་བྱའོ། །གཞན་ཡང་ནོར་བུའི་
[143a.7]དམ་ཚིག་གི་ཁུ་ཚུར་གྱི་གཟུངས་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ནས་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་གཟུངས་ཀྱི་མཐར་ཐུག་པ་རྣམས་རྡོ་རྗེ་དབྱིངས་ཀྱི་ཚུལ་གྱིས་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་འདིར་རྡོ་རྗེ་དབྱིངས་ཀྱི་སྦྱོར་བས། གཡོན་པའི་རྡོ་རྗེ་མཛུབ་མོ་
[143b]
[143b.1]ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་ཆེ། །སངས་རྒྱས་བྱང་ཆུབ་སྦྱིན་བྱེད་པའོ། །བསྒྱིངས་བཅས་གསོར་བ་གཉིས་ཀ་ཡིས་ནི་ནོར་བུ་རིན་ཆེན་འདྲེན་པ་དང་ནོར་བུ་དམ་ཚིག་གི་གཟུངས་ཀྱི་ལས་ཀྱི་ཕྱག་རྒྱའོ། །ལྕགས་ཀྱུ་འཛིན་ལྟར་གནས་པ་ནི་ནོར་བུ་
[143b.2]རིན་ཆེན་དམ་ཚིག་གི་ལྕགས་ཀྱུའོ། །མདའ་འཕང་བའི་ཚུལ་ནི་ནོར་བུ་ཆགས་པའི་དམ་ཚིག་མའིའོ། །ལེགས་སོ་སྦྱིན་པ་སྙིང་གར་གཞག་པ་ནི་ནོར་བུ་ལེགས་པ་མའིའོ། །དབང་བསྐུར་བའི་རིན་ཆེན་གཉིས་ནི་དོན་ཡོད་གྲུབ་པ་རབ་ཏུ་སྟེར་མ་དང་། རྡོ་རྗེ་ནོར་བུ་རིན་པོ་ཆེའི་སྤྱན་མ་དང་། རྡོ་རྗེ་རིན་
[143b.3]ཆེན་ཕྲེང་བ་མ་དང་། ནོར་བུ་རིན་ཆེན་ཕྲེང་བ་མ་རྣམས་ཀྱིའོ། །སྙིང་གར་ཉི་མ་བསྟན་པ་ནི་ནོར་བུ་རིན་ཆེན་ཉི་མའིའོ། །གཡོན་པ་ལ་ནི་གྲུ་མོ་གཟུགས་ནི་ནོར་བུ་ཟླ་བའི་རྒྱལ་མཚན་གྱི་རྩེ་མོ་མའིའོ། །དེ་བཞིན་ཁ་ཕྱོགས་བསྐོར་བར་བྱ་བ་ནི་ནོར་བུ་བཞད་པ་མའིའོ། །གཡས་པའི་ནི་གཡོན་པ་དབྱེ་བ་ནི་
[143b.4]ནོར་བུ་ཏིང་ངེ་འཛིན་པདྨ་དང་། ནོར་བུ་རིན་ཆེན་གཏོང་བའི་དམ་ཚིག་མ་དང་། ནོར་བུ་རིན་ཆེན་པདྨ་རྣམས་ཀྱིའོ། །སྙིང་གར་གཡོན་པ་རལ་གྲི་མདུང་ནི་ནོར་བུ་དམ་ཚིག་མའི་རལ་གྲི་མའིའོ། །མགལ་མེའི་འཁོར་ལོ་བསྐོར་བ་ནི་ནོར་བུ་དམ་ཚིག་གི་འཁོར་ལོ་མའིའོ། །ནོར་བུ་གཉིས་ཀ་ཁ་ནས་དབྱུང་
[143b.5]བ་ནི་ནོར་བུ་གསུང་བའི་མཆོག་མའིའོ། །རྡོ་རྗེ་གར་བསྐོར་བཀྲོལ་བ་ཡིས། །ཐལ་མོ་འགྲམ་པ་སྤྱི་བོར་གཞག་པ་ནི་རིན་ཆེན་ཆར་འབེབས་མ་དང་། མཆོད་པ་ཆེན་པོ་དམ་ཚིག་མ་དང་། ནོར་བུ་རིན་ཆེན་ཆར་འབེབས་ཀྱི་དམ་ཚིག་མ་རྣམས་ཀྱིའོ། །གོ་ཆ་ནི་ནོར་བུ་དམ་ཚིག་བསྲུང་མའིའོ། །
[143b.6]མཐེ་ཆུང་མཆེ་བ་ནི་རྡོ་རྗེ་ནོར་བུ་མཆེ་བ་གཙིགས་པ་མའིའོ། །ཁུ་ཚུར་གཉིས་ནི་མནན་པའོ་ནི་ནོར་བུ་དམ་ཚིག་གི་ཁུ་ཚུར་གྱི་གཟུངས་ཀྱི་ལས་ཀྱི་ཕྱག་རྒྱའོ། །རིན་ཆེན་འགྱིང་བའི་ཚུལ་གྱིས་ནི། །བསམ་པ་གཡོན་པས་མདུད་པར་བྱ་བ་ནི་རིན་ཆེན་སྒེག་མོའི་གཟུངས་ཀྱིའོ། །ཕྲེང་བ་བཅིང་དང་ནི་
[143b.7]རིན་ཆེན་ཕྲེང་བའི་གཟུངས་ཀྱིའོ། །ཁ་ནས་དབྱུང་བ་ནི་རིན་ཆེན་གླུ་མའི་གཟུངས་ཀྱིའོ། །རིན་ཆེན་གར་ནི་བསྐོར་བ་ཡིན་ནི་རིན་ཆེན་གར་མའི་གཟུངས་ཀྱིའོ། །རིན་ཆེན་ཁུ་ཚུར་ཚུལ་གྱིས་ནི། །བདུག་པ་ལ་སོགས་དེ་བཞིན་སྦྱིན། །སངས་རྒྱས་ཀུན་ལ་མཆོད་པ་ནི། །ཕྱག་རྒྱའི་མཆོད་པ་བྱེད་
[144a]
[144a.1]པའོ། །མཛུབ་མོའི་ལྕགས་ཀྱུ་བཅིང་བ་ནི། །མཐེ་ཆུང་ལས་ཏེ་ལྕགས་ཀྱུ་ཆེ། །མཁྲིག་མ་མདུད་ལ་མཛུབ་གཉིས་མདུད། །རྒྱབ་གཉིས་ཀྱང་ནི་བསྙམས་ཏེ་མནན། །རིན་པོ་ཆེ་ནི་ནོར་བུའི་རིགས་སོ། །གསང་བའི་ཕྱག་རྒྱ་ནི་གཟུངས་ཀྱི་ཕྱག་རྒྱ་སྟེ། དེའི་དཀྱིལ་འཁོར་གྱི་ཆོ་གའི་
[144a.2]བྱེ་བྲག་རྒྱས་པ་དེ་རྫོགས་པ་ནི་མཐར་ཐུག་པའོ། །ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་དམ་ཚིག་གི་ཕྱག་རྒྱ་གཙོ་བོར་གྱུར་པ་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་དེས་འདུལ་བའི་སེམས་ཅན་རྗེས་སུ་གཟུང་བའི་ཕྱིར་བསྟན་ནས། ད་ནི་
[144a.3]ཆོས་ཀྱི་ཕྱག་རྒྱ་གཙོ་བོར་གྱུར་པའི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་གྱིས་འདུལ་བའི་སེམས་ཅན་གྱི་དོན་གྱི་ཕྱིར་དེ་ནས་ཡང་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་དེ་མ་ཐག་པ་སྟེ། དང་པོ་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལའོ། །འདིར་དང་པོར་སྦྱོར་བའི་
[144a.4]ཏིང་ངེ་འཛིན་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དང་པོར་སྦྱོར་བ་ལྟ་བུ་ཉིད་ཡིན་ནོ། །ཡང་ཞེས་བྱ་བ་ནི་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལ་ལྟོས་པས་ཡང་ཞེས་བྱ་བ་སྨོས་སོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །དེ་བཞིན་གཤེགས་པ་
[144a.5]ཐམས་ཅད་ཀྱི་དབང་བསྐུར་བ་ཞེས་བྱ་བ་ནི་ནོར་བུ་རིན་པོ་ཆེའི་རིགས་སོ། །དེའི་ཡེ་ཤེས་ནི་རྣམ་པར་སྣང་མཛད་ལ་སོགས་པ་ནས་རིན་ཆེན་འབེེབས་པའི་མཐར་ཐུག་པ་སྟེ། རང་བཞིན་གྱིས་ནི་འོད་གསལ་བ། །གདོད་ནས་དག་པ་མཁའ་དང་མཚུངས། །བྱང་ཆུབ་མེད་ཅིང་མངོན་རྟོགས་མེད། །བྱང་ཆུབ་ཚུལ་
[144a.6]འདི་བསྟན་པའོ། །ཞེས་བྱ་བར་ངེས་པའོ། །དེའི་དམ་ཚིག་ནི་བཅོམ་ལྡན་འདས་རྣམ་པར་སྣང་མཛད་ཀྱི་ནོར་བུ་རིན་ཆེན་གྱི་ནང་དུ་གཏོགས་པའི་ཆོས་ཀྱི་དཀྱིལ་འཁོར་རོ། །དེ་ལས་བྱུང་བའི་འཕགས་པ་ནམ་མཁའི་སྙིང་པོའི་ཐུགས་ཀའི་རྡོ་རྗེ་ནོར་བུ་རིན་པོ་ཆེ་གང་ཡིན་པ་དེ་ལས་བྱུང་བ་དེ་ལ་དེ་སྐད་ཅེས་
[144a.7]བྱའོ། །དེས་བྱིན་གྱིས་བརླབས་པ་ནི་དཀྱིལ་འཁོར་བསྐྱེད་པའི་ནུས་པ་དང་ལྡན་པའི་བྱ་བ་གང་གིས་དེ་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལ་མིང་དེ་སྐད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་ནས་རང་གི་བདག་ཉིད་ཀྱི་རིགས་དམ་པ་འདི་ཞེས་བྱ་བ་བློ་ལ་གནས་པ་གསུངས་
[144b]
[144b.1]ཤིང་བཤད་པའོ། །དེ་ནས་ཕྱག་ན་རྡོ་རྗེས་དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་སྤྲུལ་པའི་ཕྱིར་དང་། རྡོ་རྗེ་སྙིང་པོས་རིན་ཆེན་ལྟ་བའི་ཆོས་ཀྱི་དཀྱིལ་འཁོར་སྤྲུལ་པའི་ཕྱིར་དང་། རྡོ་རྗེ་སྤྱན་གྱིས་རིན་ཆེན་པདྨའི་ཆོས་ཀྱི་དཀྱིལ་འཁོར་སྤྲུལ་པའི་ཕྱིར་དང་། རྡོ་རྗེ་སྣ་ཚོགས་ཀྱིས་རིན་ཆེན་ཆར་
[144b.2]འབེབས་ཀྱི་ཆོས་ཀྱི་དཀྱིལ་འཁོར་སྤྲུལ་པའི་ཕྱིར་རང་གི་རིག་པ་དམ་པ་འདི་རྣམས་སསུངས་སོ། །དེ་ནས་བཅོམ་ལྡན་འདས་དོན་ཐམས་ཅད་གྲུབ་པས་རང་གི་སྙིང་གའི་རྡོ་རྗེ་རིན་པོ་ཆེ་ལས་ཆོས་ཀྱི་དཀྱིལ་འཁོར་སྤྲུལ་ནས། དེ་བཞིན་གཤེགས་པ་ཐམས་ཅད་ལ་སྔ་མ་བཞིན་ཡིན་ནོ་ཞེས་ཤེས་པར་བྱའོ། །
[144b.3]དེ་ལ་དེ་ནས་ཡང་བཅོམ་ལྡན་འདས་ཞེས་བྱ་བ་ནས་བརྩམས་ནས། ཨོཾ་སརྦྦ་ཨ་བྷི་ཥེ་ཀ་ཛྙཱ་ན་ཧཱུཾ་ཞེས་བྱ་བའི་བར་གྱི་གཞུང་འདི་ཙམ་གྱིས་ནི་ནོར་བུ་ཆེན་པོའི་རིགས་ཀྱི་ཆོས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་སྔ་མ་བཞིན་དུ་བསྡུ་བ་
[144b.4]དང་བྱིན་གྱིས་བརླབ་པ་ལ་སོགས་པ་ནི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་གྱི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་
[144b.5]དུ་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ཞེས་བྱ་བ་ལ་སོགས་པའི་གཞུང་གིས་སློབ་དཔོན་དང་སློབ་མ་འཇུག་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་
[144b.6]བྱ་བའི་སྒྲ་ནི་སྔ་མ་བཞིན་ནོ། །འདི་ཞེས་བྱ་བ་ནི་བློ་ལ་གནས་པའོ། །རང་གི་རིགས་ནི་ནོར་བུ་ཆེན་པོའི་རིགས་སོ། །ཡེ་ཤེས་ཀྱི་དཀྱིལ་འཁོར་ནི་ཆོས་ཀྱི་ཕྱག་རྒྱའི་དཀྱིལ་འཁོར་ཏེ་དེ་གསུངས་པའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པའི་དོན་བརྗོད་པ་སྟེ། སྔོན་དུ་བསྙེན་པའི་རྗེས་ཐོགས་ལའོ། །
[144b.7]འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ་ཕྱིས་ཆོས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་
[145a]
[145a.1]ཏེ། །སྔ་མ་བཞིན་དུ་སྣའི་རྩེ་མོར་འཆད་པར་འགྱུར་བའི་དོན་ཐམས་ཅད་གྲུབ་པའི་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་ཆོ་གས་ཆོས་ཀྱི་འཁོར་ལོ་བསྒོམ་པར་བྱའོ། །དེ་ནས་ཆོས་ཀྱི་འཁོར་ལོ་ལས་བཤད་པའི་ཏིང་ངེ་འཛིན་རྣམ་པ་གསུམ་བསྒོམ་པའི་ཕྱིར་ཞེས་བྱ་
[145a.2]བས་ཞག་བདུན་ཆོས་ཀྱི་དཀྱིལ་འཁོར་བསྒོམ་པར་བྱའོ། །དེ་ནས་དེའི་རྗེས་ལ་དཀྱིལ་འཁོར་འདི་བྲི་བར་བྱའོ། །དེ་ནས་ཞེས་བྱ་བ་ནི་གཏན་ཚིགས་སྟོན་པ་སྟེ། གང་གི་ཕྱིར་ཆོས་ཀྱི་དཀྱིལ་འཁོར་དུ་འཇུག་པ་མེད་ན་དེས་འདུལ་བའི་སེམས་ཅན་གྱི་ཁམས་རྣམས་ཀྱི་མངོན་པར་འདོད་པའི་དངོས་གྲུབ་ཏུ་མི་
[145a.3]འགྱུར་བ་དེ་ལྟ་བས་ན། དེ་ནས་རབ་ཏུ་བཤད་བྱ་བ། །ཡེ་ཤེས་དཀྱིལ་འཁོར་དམ་པ་སྟེ། །ཞེས་བྱའོ། །རྡོ་རྗེ་དབྱིངས་དང་འདྲ་བ་ལ། །ཞེས་བྱ་བ་ནི་སྤྲུལ་པའི་ཆོས་ཀྱི་དཀྱིལ་འཁོར་དང་འདྲ་བའོ། །རིན་ཆེན་ཡེ་ཤེས་ཞེས་བཤད་དོ། །ཞེས་བྱ་བ་ནི་བཤད་ཟིན་ཏོ། །དཀྱིལ་འཁོར་ཆེན་པོའི་ཚུལ་དུ་ནི། །
[145a.4]ཞེས་བྱ་བ་ལ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་དབྱིངས་སུའོ། །དཀྱིལ་འཁོར་ཐམས་ཅད་སྲད་བུ་བྲེ། །ཞེས་བྱ་བ་ནི་དེའི་ཕྱི་རོལ་དང་ནང་བཞིན་དུ་འདིའི་ཡང་ཕྱི་རོལ་དང་ནང་གི་དཀྱིལ་འཁོར་བྱའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་ཇི་ལྟར་རྣམ་པར་སྣང་མཛད་ལ་སོགས་
[145a.5]པ་བྲིས་པ་དེ་བཞིན་དུ་འདིར་ཡང་བྲི་བར་བྱའོ་ཞེས་དེ་ལྟར་བསྟན་པའི་ཕྱིར། ཆོས་ཀྱི་དཀྱིལ་འཁོར་དམ་པ་སྟེ། །སྙིང་གའི་མཚན་མ་བྲི་བར་བྱ། །ཞེས་བྱ་བའོ། །འདི་ལྟར་རྡོ་རྗེ་དབྱིངས་ཀྱི་ཆོས་ཀྱི་དཀྱིལ་འཁོར་དུ་ཟླ་བའི་དཀྱིལ་འཁོར་གྱི་སྟེང་དུ། རྡོ་རྗེ་རྩེ་ལྔ་པ་དེའི་ལྟེ་བར་བཅོམ་ལྡན་འདས་རྣམ་
[145a.6]པར་སྣང་མཛད་ལ་སོགས་པ་ནས་བསྐལ་པ་བཟང་པོའི་མཐར་ཐུག་པ་རྡོ་རྗེ་སྐྱིལ་མོ་ཀྲུང་གིས་བཞུགས་པ། རང་གི་མཚན་མ་ནས་འབྲས་ཙམ་གྱི་སྙིང་གའི་ཕྱི་རོལ་དུ་བསྣམས་ནས་རྡོ་རྗེ་བསྡམས་པ་བཀན་ཏེ། སྐྱིལ་མོ་ཀྲུང་གི་སྟེང་དུ་གཞག་པ་དེ་བཞིན་དུ་འདིར་ཡང་བྲི་བར་བྱའོ། །དེ་ནས་དཀྱིལ་
[145a.7]འཁོར་འདིའི་ཡེ་ཤེས་ཀྱི་སྙིང་པོ་ནི་འདི་རྣམས་སོ་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་ཡེ་ཤེས་ཀྱི་སྙིང་པོ་ནི་འདི་དག་ཡིན་ཏེ། ཡེ་ཤེས་ཀྱི་སྙིང་པོ་དེ་སྟོན་པར་བྱེད་པའི་སྒྲའི་གཟུགས་སུ་བཞུགས་པ་དེ་དག་བསྒྲུབས་པས་ལས་ཐམས་ཅད་སྒྲུབ་པར་བྱེད་པའི་སྔགས་ཡིན་ནོ་ཞེས་བྱ་བའི་དོན་ཏོ། །
[145b]
[145b.1]འདི་སྐད་སྟོན་པ་ཡིན་ཏེ། ཨོཾ་སརྦྦ་ཏ་ཐཱ་ག་ཏ་ཨ་བྷི་ཥེ་ཀ་ཛྙཱ་ན་ཨུཏྟ་མ་ཧཱུཾ། ཞེས་བྱ་བའི་སྔགས་འདིས་རྣམ་པར་སྣང་མཛད་ལ་སོགས་པ་ནམ་མཁའི་ཕྱོགས་ནས་ཕབ་སྟེ་གཟུགས་བརྙན་ལ་གཞུག་པའམ། ཡང་ན་འདིས་བཅོམ་ལྡན་འདས་བྲི་བར་བྱའོ། །ཨོཾ་བཛྲ་མ་ཎི་ཧཱུཾ། ཞེས་བྱ་བ་ནི་རྡོ་རྗེ་ནོར་
[145b.2]བུ་ཆེན་མོའིའོ། །ཨོཾ་བཛྲ་རཏྣ་ཨཾ་ཀུ་ར་ཧཱུཾ། ཞེས་བྱ་བ་ནི་རྡོ་རྗེ་རིན་ཆེན་མྱུ་གུ་མའིའོ། །ཨོཾ་བཛྲ་བཛྲ་རཏྣ་པདྨ་ཧཱུཾ། ཞེས་བྱ་བ་ནི་རྡོ་རྗེ་རིན་ཆེན་པདྨའིའོ། །ཨོཾ་བཛྲ་རཏྣ་བཪྵ་ཧཱུཾ། ཞེས་བྱ་བ་ནི་རིན་ཆེན་ཆར་འབེབས་མའིའོ། །ཨོཾ་སརྦྦ་ཨརྠ་སིདྡྷི་ཛྙཱ་ན་ཧཱུཾ། ཞེས་བྱ་བ་ནི་དོན་ཐམས་ཅད་གྲུབ་པའིའོ། །ཨོཾ་མ་ཎི་
[145b.3]ཛྙཱ་ན་ཧཱུཾ། ཞེས་བྱ་བ་ནི་ནོར་བུའི་མཚན་མའིའོ། །ཨོཾ་མ་ཎི་ཙིནྟཱ་ཨཾ་ཀུ་ཤ་ཞེས་བྱ་བ་ནི་རིན་ཆེན་རྒྱལ་པོ་སྟེ། དེ་ནས་བརྩམས་ནས། ཨོཾ་མ་ཎི་ཛྙཱ་ན་མུ་ཥི་ཧཱུཾ། ཞེས་བྱ་བའི་བར་དུ་བྲིས་ལ་ནམ་མཁའི་ཕྱོགས་ནས་ཕབ་སྟེ་རང་གི་ཕྱོགས་སུ་གཞག་པར་བྱའོ། །དེ་ནས་དོན་ཐམས་ཅད་གྲུབ་པའི་དཀྱིལ་
[145b.4]འཁོར་ཆེན་པོ་ལས་བཤད་པའི་རིན་ཆེན་སྒེག་མོ་ལ་སོགས་པ་ནས་རིན་ཆེན་ཆར་འབེེབས་མའི་བར་གྱི་སྔགས་ཀྱིས་གཞག་པར་བྱའོ། །དེའི་རྗེས་ལ་བསྐལ་པ་བཟང་པོ་རྣམས་ནི་རང་གི་རིག་པས་སོ། །དེ་ནས་དཀྱིལ་འཁོར་འདིར་ཆོ་ག་རྒྱས་པ་ཇི་ལྟ་བ་བཞིན་བྱས་ནས་ཞེས་བྱ་བ་ནི་དོན་ཐམས་
[145b.5]ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་ག་ཐམས་ཅད་དང་། རང་གི་ཆོ་ག་རྗེས་སུ་སྤྱད་ལ། སློབ་དཔོན་གྱིས་རང་ལ་བྱིན་གྱིས་བརླབ་པ་ལ་སོགས་པ་བྱའོ། །དེ་ནས་རང་གི་མིང་ནས་བརྗོད་པར་བྱས་ལ། དཀྱིལ་འཁོར་ཐམས་ཅད་རྡོ་རྗེར་བསྒྲུབས་ཏེ། དེ་ནས་བསྡུ་བ་བྱས་ནས་མཚན་
[145b.6]བརྒྱ་རྩ་བརྒྱད་པས་བསྟོད་དེ་བསྒོ་ཞིང་ལས་བྱ་བ་དང་། བགེགས་བསྐྲད་པ་ལ་སོགས་པ་དང་། མཆོད་ཡོན་དང་། ཞབས་བསིལ་དབུལ་བ་བྱས་ནས་དམ་ཚིག་གི་ཕྱག་རྒྱ་རྣམས་ཀྱིས་རྣམ་པར་སྣང་མཛད་ལ་སོགས་པ་བསྒྲུབས་ཏེ། དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་
[145b.7]བཏབ་ལ། རྡོ་རྗེ་རིན་ཆེན་གྱི་ཕྱག་རྒྱས་རྣམ་པར་སྣང་མཛད་ལ་སོགས་པ་དབང་བསྐུར་ཏེ། རྡོ་རྗེ་རིན་པོ་ཆེ་མྱུ་གུ་དོན་ཐམས་ཅད་གྲུབ་པ་ལ་སོགས་པ་ནོར་བུའི་རིགས་ཐམས་ཅད་གྲུབ་པའི་དབང་བསྐུར་བར་བྱའོ། །དེ་ནས་ཕྱག་བྱ་བ་དང་། མཆོད་ཡོན་ཕུལ་ལ། མཆོད་པ་ཐམས་ཅད་ཀྱིས་དེ་བཞིན་
[146a]
[146a.1]གཤེགས་པ་ལ་སོགས་པ་ཐམས་ཅད་ཡང་དག་པར་མཆོད་ལ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་འཇུག་པའི་ཆོ་ག་ཇི་ལྟ་བ་བཞིན་སློབ་མ་འཇུག་པར་བྱའོ་ཞེས་བྱ་བ་འདི་ནི་ཆོ་ག་རྒྱས་པ་ཇི་ལྟ་བ་བཞིན་དུ་བྱས་ནས་ཞེས་བྱ་བའི་སྒྲའི་དོན་ཡིན་ནོ། །སློབ་མ་ལ་འདི་
[146a.2]སྐད་བསྒོ་བར་བྱ་སྟེ་ཞེས་བྱ་བ་ནི་གོ་སླའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་ལ་ནས་འབྲས་ཙམ་གྱིས་རྡོ་རྗེ་ནོར་བུ་དང་། རྡོ་རྗེ་ནོར་བུ་རིན་པོ་ཆེའི་དྲིལ་བུ་བྱིན་ནས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་སློབ་མའི་ཆོ་ག་ཐམས་ཅད་བྱ་བ་ཡིན་ནོ། །སློབ་དཔོན་གྱི་ལས་དང་སློབ་མ་
[146a.3]འཇུག་པའི་ཆོ་ག་རྒྱས་པའི་གཞུང་ཙམ་ཉིད་ཀྱིས་བཤད་པ་ཡིན་ནོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་དོན་ཐམས་ཅད་གྲུབ་པའི་ཆོ་གའི་དཀྱིལ་འཁོར་དུ་དམ་ཚིག་དབང་བསྐུར་བ་ཐོབ་པ་རྣམས་ལ་ཇི་ལྟར་མངོན་པར་འདོད་པའི་དེ་ལས་གསུངས་
[146a.4]པའི་དངོས་གྲུབ་རྣམས་སློབ་དཔོན་གྱིས་བཤད་པར་བྱའོ་ཞེས་བྱ་བའི་དོན་བསྟན་པའི་ཕྱིར་ནོར་བུའི་རིགས་ཀྱི་ཆོས་ཀྱི་ཡེ་ཤེས་བསྐྱེད་པར་བྱའོ་ཞེས་བྱ་བ་གསུངས་སོ། །ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་གྱི་ཡེ་ཤེས་ནི་ནོར་བུའི་ཆོས་ཀྱི་ཡེ་ཤེས་སོ། །ནོར་བུ་དོན་དུ་གཉེར་བ་ལ་སོགས་པའི་
[146a.5]ངོ་བོ་དེ་བསྐྱེད་པར་བྱའོ། །རྡོ་རྗེ་སྙིང་པོ་ཞེས་བྱ་བ་ནི་དོན་ཐམས་ཅད་གྲུབ་པ་དང་དེའི་རིགས་ཀྱི་གཟུགས་སོ། །ཏིང་ངེ་འཛིན་གྱིས་རས་སམ། རྩིག་པའམ། སྤང་ལེབ་ལ་སོགས་པ་ལ་དེ་བྲིས་ནས་སོ། །རྩེ་གཅིག་པའི་སེམས་ཀྱིས་བསྒོམས་ནས་ཡང་དང་ཡང་མངོན་དུ་བྱེད་པའོ། །དོན་ནི་སླར་བྱས་
[146a.6]ན་ཞེས་བྱ་བ་ནི་དོན་ཐམས་ཅད་གྲུབ་པ་ལ་སོགས་པ་འཇིག་རྟེན་ལས་འདས་པའམ་འཇིག་རྟེན་པ་སྟེ། ཇི་ལྟར་མངོན་པར་འདོད་པའོ། །ཇི་ལྟར་བྱ་ཞེ་ན་བྱིན་ཅིག་བྱིན་ཅིག་ཅེས་བརྗོད་ཅེས་བྱ་བ་སྨོས་ཏེ་ཚིག་གིས་བརྗོད་ཅིང་ངོ་། །འདི་སྐད་སྟོན་པ་ཡིན་ཏེ། རས་སམ་རྩིག་པའམ། སྤང་ལེབ་ལ་སོགས་
[146a.7]པ་ཐམས་ཅད་ལ། ཆོས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་གཟུགས་དེའམ། ནོར་བུའི་མཚན་མ་ལ་སོགས་པ་དེའི་རིགས་ཀྱི་གཟུགས་བྲི་བར་བྱའོ། །དེ་ནས་དེའི་མདུན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་
[146b]
[146b.1]གྲུབ་པའི་རྣལ་འབྱོར་དང་། དེའི་རིགས་ཀྱི་རྣལ་འབྱོར་བྱས་ལ་ཕྱིས་ཆོས་ཀྱི་དཀྱིལ་འཁོར་ལས་བཤད་པ་དེའམ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་དེ་རས་ལ་སོགས་པ་ལ་བྲིས་ལ། རྡོ་རྗེ་སྙིང་པོ་སྤྲུལ་ཏེ་བསྡུ་བ་བྱས་ལ་མཚན་བརྒྱ་རྩ་བརྒྱད་པས་
[146b.2]བསྟོད་དེ། རིན་ཆེན་ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། ཕྱག་རྒྱ་བཞིས་རྒྱས་བཏབ་ནས་དབང་བསྐུར་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བཞི་བྱས་ཏེ། ཕྱིས་ཆོས་ཀྱི་དཀྱིལ་འཁོར་ལས་གསུངས་པ་དེའམ་དེའི་རིགས་
[146b.3]ཀྱི་ཕྱག་རྒྱ་ཆེན་པོ་བཅིངས་ལ་མངོན་པར་འདོད་པའི་དོན་འགྲུབ་པའི་ཕྱིར། བྱིན་ཅིག་བྱིན་ཅིག་ཅེས་བྱ་བ་ལན་གསུམ་གསོལ་བ་གདབ་པར་བྱའོ། །དེ་ནས་ཨོཾ་དེ་ཧི་སརྦ་ཨརྠ་བྷ་ག་ཝཱན་བཛྲ་གརྦྷ་ཞེས་ཟློས་ཤིང་། ཇི་སྲིད་སྐྱོ་བར་མ་གྱུར་པ་དེ་སྲིད་ཀྱི་བར་དུ་བཟླས་པར་བྱའོ། །དེ་ནས་སྐྱོ་བར་གྱུར་ན། སྔ་མ་བཞིན་
[146b.4]དུ་མཚན་བརྒྱ་རྩ་བརྒྱད་པས་བསྟོད་པ་དང་། མཆོད་པ་དང་། ཕྱག་བྱ་བ་དང་། ཇི་ལྟ་བ་བཞིན་དུ་གཤེགས་སུ་གསོལ་བར་བའོ། །དེ་ལྟར་ཉིན་རེ་ཞིང་ཐུན་བཞིའི་སྦྱོར་བ་བྱས་པས་ཇི་སྲིད་དུ་མངོན་སུམ་ལྟ་བུར་གྱུར་པ་དེ་སྲིད་དུ་བསྒོམས་ན་ཉིན་རེ་བཞིན་དུ་ཐུན་བཞིར་བཅོམ་ལྡན་འདས་མཐོང་བར་འགྱུར་
[146b.5]རོ། །ཟླ་བ་ཉ་ལ་མཚན་ཐོག་ཐག་བསྒོམས་ན་འདོད་པའི་དོན་ཐམས་ཅད་འགྲུབ་པར་འགྱུར་རོ། །ཏིང་ངེ་འཛིན་གྱིས་རས་སོགས་ལ། །རྡོ་རྗེ་སྙིང་པོ་བྲིས་ནས་ནི། །བསྒོམས་ནས་རིན་ཆེན་དོན་འབྱིན་ཞེས། །ཚིག་ཏུ་སྨྲ་ཞིང་གསོལ་བ་གདབ། །ཅེས་བྱ་བ་ནི་ཆོས་ཀྱི་དཀྱིལ་འཁོར་ལས་གསུངས་པའི་རིན་ཆེན་
[146b.6]ལྟ་བའམ་དེའི་རིགས་ཀྱི་ཕྱག་རྒྱ་ཆེན་པོ་རས་ལ་སོགས་པ་ལ་བྲིས་ཏེ། དེའི་མདུན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་སྤྱན་ནམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་ལྟ་བའམ། དེའི་ཕྱག་རྒྱ་ཆེན་པོ་
[146b.7]བཅིངས་ཏེ། ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་ལྟ་བའམ། དེའི་རིགས་ཀྱི་སྔགས་བརྗོད་ཅིང་། ཇི་ལྟར་རས་ལ་བྲིས་པ་ལ་རིན་ཆེན་ལྟ་བའམ། དེའི་རིགས་སྤྲུལ་ནས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ་དབང་བསྐུར་བའི་རིན་པོ་ཆེ་ལ་སོགས་པ་ཇི་ལྟར་འདོད་པ་རྣམས་མངོན་པར་
[147a]
[147a.1]འདོད་པའི་དོན་བྱིན་ཅིག་ཅེས་ལན་གསུམ་གསོལ་བ་གདབ་པར་བྱའོ། །དེ་ནས་ཨོཾ་དེ་ཧི་སརྦྦ་རཏྣ་བྷ་ག་ཝཱན་བཛྲ་གརྦྷ། ཞེས་བྱ་བའི་སྙིང་པོ་འདི་ཟློས་ཤིང་སྔ་མ་བཞིན་དུ་བསྒྲུབས་ནས་དབང་བསྐུར་བ་ལ་སོགས་པའི་རིན་པོ་ཆེ་ཐམས་ཅད་ཐོབ་པར་འགྱུར་རོ། །རྡོ་རྗེ་སྙིང་པོ་རས་
[147a.2]སོགས་ལ། །ཞེས་བྱ་བ་ལ་སོགས་པ་ནི་ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་པདྨའམ། དེའི་རིགས་ཀྱི་ཕྱག་རྒྱ་ཆེན་པོ་རས་ལ་སོགས་པ་རྣམས་ལ་བྲི་བར་བྱའོ། །དེའི་སྤྱན་སྔར་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་རིན་ཆེན་པདྨའམ་
[147a.3]དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་དེའམ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་བཅོམ་ལྡན་འདས་རིན་ཆེན་པདྨའམ། དེའི་རིགས་ཀྱི་རང་གི་སྔགས་ཟློས་ཤིང་སྤྲུལ་པ་སྔ་མ་བཞིན་དུ་ཆོ་ག་ཐམས་ཅད་
[147a.4]རྗེས་སུ་སྤྱད་ལ། ཡང་ཆོས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་རིན་ཆེན་པདྨའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། རིན་པོ་ཆེ་པདྨ་ལ་སོགས་པའི་ཏིངེ་ངེ་འཛིན་གྱི་ཆོས་ཀྱི་ཡེ་ཤེས་བྱིན་ཅིག་ཅེས་ལན་གསུམ་གསོལ་བ་གདབ་པར་བྱའོ། །དེ་ནས་ཨོཾ་དེ་ཧི་སརྦྦ་
[147a.5]དྷརྨྨཱ་བྷ་ག་ཝཱན་བཛྲ་གརྦྷ་ཞེས་ཟློས་ཤིང་། སྔ་མ་བཞིན་དུ་བསྒྲུབས་ན་རིན་ཆེན་པདྨ་ལ་སོགས་པའི་ཏིང་ངེ་འཛིན་ཐོབ་ཅིང་གྲུབ་པར་གྱུར་ནས་རིན་ཆེན་པདྨ་ལ་སོགས་པ་དང་འདྲ་བར་འགྱུར་རོ། །རྡོ་རྗེ་སྙིང་པོ་རས་སོགས་ལ། །མཉམ་པར་གཞག་པས་བྲིས་ནས་ཀྱང་། །ཞེས་བྱ་བ་ནི་ཆོས་ཀྱི་དཀྱིལ་འཁོར་
[147a.6]ལས་གསུངས་པའི་རིན་ཆེན་ཆར་འབེབས་སམ་དེའི་རིགས་ཀྱི་ཕྱག་རྒྱ་ཆེན་པོ་རྣམས་རས་ལ་སོགས་པ་རྣམས་ལ་བྲི་བར་བྱའོ། །དེ་ནས་དེའི་སྤྱན་སྔར་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ཆར་འབེེབས་སམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་
[147a.7]འཁོར་ལས་བཤད་པའི་རིན་ཆེན་ཆར་འབེེབས་དང་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་རང་གི་སྔགས་ཀྱིས་རིན་ཆེན་ཆར་འབེེབས་དང་དེའི་རིགས་རྣམས་ཇི་ལྟར་རས་ལ་བྲིས་པ་ལ་སྤྲུལ་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། རིན་ཆེན་ཆར་
[147b]
[147b.1]འབེབས་དང་དེའི་རིགས་རྣམས་ཡང་དང་ཡང་མངོན་དུ་བྱས་ཏེ། རྩེ་གཅིག་པའི་སྦྱོར་བས་སྙོམས་པར་ཞུགས་པར་རིན་ཆེན་ཆར་འབེབས་ལ་སོགས་པའི་དམ་པའི་ལས་བྱིན་ཅིག་བྱིན་ཅིག་ཅེས་བཅོམ་ལྡན་འདས་ལ་ལན་གསུམ་གྱི་བར་དུ་གསོལ་བ་གདབ་པར་བྱའོ། །དེ་ནས་ཨོཾ་དེ་ཧི་སད་ཀརྨ་བྷ་ག་ཝཱན་བཛྲ་
[147b.2]གརྦྷ་ཞེས་ཟློས་ཤིང་སྔ་མ་བཞིན་དུ་བསྒྲུབ་པར་བྱའོ། །དེ་ནས་རིན་ཆེན་ཆར་འབེེབས་ལ་སོགས་པའི་ལས་དམ་པ་བྱེད་པ་འགྲུབ་པར་འགྱུར་རོ། །ནམ་མཁའི་ཕྱོགས་སམ་ཕྱོགས་གཞན་དུ། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་སྦྱོར་བ་རྣམ་པ་བཞི་པོ་ཉིད་ཀྱིས་བྱའོ། །ཁྱད་པར་ནི་འདི་ཡོད་དེ་འདི་
[147b.3]བྲི་བ་སྤངས་པའོ། །རྡོ་རྗེ་སྙིང་པོ་སྙིང་གར་བྲི། །ཞེས་བྱ་བ་ལ་སོགས་པ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པའི་དོན་ཐམས་ཅད་གྲུབ་པར་སྤྲུལ་པའམ་དེའི་རིགས་
[147b.4]ཀྱི་ཕྱག་རྒྱ་ཆེན་པོ་བཅིངས་ཏེ། ཨོཾ་ཧྲྀ་ད་ཡ་བྷ་ག་བ་ཏཱི་ཧྲི་ད་ནཱ་མ། ཞེས་བྱ་བའི་སྙིང་པོ་འདིས་རང་གི་སྙིང་གའི་ཟླ་བ་ལ་ཆོས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པའམ་དེའི་རིགས་ཀྱི་གཟུགས་སུ་སྤྲུལ་ལ་འདི་བརྗོད་ཅིང་ཉིན་རེ་བཞིན་དུ་ཐུན་བཞིའི་སྦྱོར་བས་ཇི་སྲིད་དུ་སྙིང་ག་འགུལ་བར་
[147b.5]འགྱུར་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་བཅོམ་ལྡན་འདས་རྡོ་རྗེ་སྙིང་པོས་དེའི་རང་གི་ཏིང་ངེ་འཛིན་ལ་སོགས་པའི་ནོར་བུའི་དངོས་གྲུབ་སྟེར་བར་འགྱུར་རོ། །རྡོ་རྗེ་སྙིང་པོ་དཔྲལ་བར་ནི། །བྲིས་ཏེ་རྣམ་པར་བསྒོམས་ནས་ཀྱང་། །ཞེས་བྱ་བ་ལ་སོགས་པ་ནི་དོན་ཐམས་ཅད་གྲུབ་པའི་དཀྱིལ་
[147b.6]འཁོར་ལས་བཤད་པའི་བཅོམ་ལྡན་འདས་རིན་ཆེན་ལྟ་བ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་དེའམ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་དཔྲལ་བར་ཨོཾ་རཏྣ་ཨ་བྷི་ཥེ་ཀ་ཨ་བྷི་ཥིཉྩ། ཞེས་བྱ་བས་བཅོམ་ལྡན་འདས་རིན་ཆེན་ལྟ་བ་དང་།
[147b.7]དེའི་རིགས་རྣམས་སྤྲུལ་ལ། དེ་ཉིད་ཀྱི་སྙིང་པོ་བརྗོད་ཅིང་སྔ་མ་བཞིན་དུ་ཇི་སྲིད་མགོ་བོ་འགུལ་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རིན་ཆེན་ལྟ་བ་ལ་སོགས་པའི་དབང་བསྐུར་བའི་རྣལ་འབྱོར་དེས་འགྲུབ་ཅིང་ཐོབ་པར་འགྱུར་རོ། །རྡོ་རྗེ་སྙིང་པོ་ཁར་བཅུག་ལ། །དེ་ཉིད་དུ་ནི་བསྒོམས་ནས་
[148a]
[148a.1]ཀྱང་། །ཞེས་བྱ་བ་ལ་སོགས་པའི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པ་དེའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་ལྕེ་ལ་རིན་ཆེན་
[148a.2]པདྨ་དང་། དེའི་རིགས་ཀྱི་སྙིང་པོ་འདི་བསམ་པར་བྱའོ། །ཨོཾ་བྷ་ག་རཏྣ་གརྦྷ་སིདྡྷཿ། དེ་ནས་སྙིང་པོ་འདི་བརྗོད་ཅིང་། སྔར་བཤད་པའི་ཚུལ་གྱིས་ཇི་སྲིད་དུ། ཁ་རང་བྱེ་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །ཁ་རང་གི་ངང་གིས་བྱེ་བར་འགྱུར་རོ་ཞེས་བྱ་བའི་དོན་ཏོ། །དེ་ནས་རྣལ་འབྱོར་པ་སོ་སོ་
[148a.3]ཡང་དག་པར་རིག་པ་བཞི་ཐོབ་པར་འགྱུར་རོ། །དེ་ཉིད་ནི། གང་ཚེ་དེ་ཉིད་བྱེད་གྱུར་པ། །དེ་ཚེ་དེ་ནི་ངག་གྲུབ་བོ། །ཞེས་གསུངས་སོ། །རྡོ་རྗེ་སྙིང་པོ་བདག་སྤྱི་བོར། །རབ་ཏུ་བཞག་སྟེ་བསྒོམས་ནས་ཀྱང་། །ཞེས་བྱ་བ་ལ་སོགས་པ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་
[148a.4]པའི་རིན་ཆེན་ཆར་འབེབས་སམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་རིན་ཆེན་ཆར་འབེེབས་སམ་དེའི་རིགས་ཀྱི་གཟུངས། ཨོཾ་རཏྣ་གརྦྷ་ཨུཥྞཱི་ཥ་
[148a.5]ཨཱ་ཀཪྵཱ་གཙྪ་ཞེས་བྱ་བའི་སྙིང་པོ་འདི་རང་གི་སྤྱི་བོར་བསམ་པར་བྱའོ། །དེ་ནས་འདི་ཉིད་ཟློས་ཤིང་སྔར་བཤད་པའི་ཚུལ་གྱིས་ཇི་སྲིད་དུ་འབར་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྐད་ཅིག་མ་དེ་ཉིད་ལ་ནམ་མཁའི་སྙིང་པོར་འགྱུར་རོ། །དེ་ཉིད་ནི། གང་ཚེ་དེ་ཉིད་འབར་གྱུར་པ། །
[148a.6]དེ་ཚེ་འཕང་དུ་ལྡིང་བར་འགྱུར། །ཞེས་གསུངས་སོ། །རྡོ་རྗེ་སྙིང་པོ་ཕྱག་རྒྱ་ཆེ། །མཉམ་པར་གཞག་པ་བསྒོམ་པ་ནི། །ཞེས་བྱ་བ་ལ་སོགས་པ་ལ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་
[148a.7]འཁོར་ལས་བཤད་པ་དེ་ཉིད་དམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་བཤད་པའི་རང་གི་སྔགས་ཀྱི་མདུན་དུ་བཅོམ་ལྡན་འདས་དོན་ཐམས་ཅད་གྲུབ་པའམ། དེའི་རིགས་སྤྲུལ་ལ་སྔ་མ་བཞིན་དུ་བསྡུ་བ་ལ་སོགས་པ་ཆོ་ག་ཐམས་ཅད་རྗེས་སུ་སྤྱད་ལ། ཨ་ལྀ་རཏྣ་ཞེས་
[148b]
[148b.1]བརྗོད་ཅིང་། བཅོམ་ལྡན་འདས་དངོས་གྲུབ་བདག་ལ་སྩོལ་ཅིག་ཅེས་ལན་གསུམ་གསོལ་བ་གདབ་པར་བྱའོ། །དེ་ནས་ཨོཾ་ཨི་ལྀ་ཞེས་བྱ་བའི་སྙིང་པོ་བརྗོད་ཅིང་སྔ་མ་བཞིན་དུ་གང་གི་ཚེ་བསྒོམས་པ་དེའི་ཚེ་དོན་ཐམས་ཅད་གྲུབ་པ་ལ་སོགས་པའི་དངོས་གྲུབ་འགྲུབ་པར་འགྱུར་རོ། །ནམ་མཁའི་སྙིང་པོའི་
[148b.2]དམ་ཚིག་ནི། །མཉམ་པར་གཞག་པས་བཅིངས་ནས་ཀྱང་། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་རིན་ཆེན་ལྟ་བ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པ་དེའམ་དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ། དེ་ནས་བཅོམ་ལྡན་འདས་རིན་ཆེན་
[148b.3]ལྟ་བ་དང་། དེའི་རིགས་རྣམས་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་མདུན་དུ་སྤྲུལ་ལ། སྔ་མ་བཞིན་དུ་བསྡུ་བ་ལ་སོགས་པའི་ཆོ་ག་རྗེས་སུ་སྤྱད་ལ། ཡང་ཆོས་ཀྱི་དཀྱིལ་འཁོར་ལས་གསུངས་པ་དེའམ་དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ། མི་ལྀ་རཏྣ་ཞེས་ལན་
[148b.4]གསུམ་བརྗོད་ཅིང་། རིན་ཆེན་ལྟ་བ་ལ་སོགས་པས་དབང་བསྐུར་བར་གསོལ་བ་གདབ་པར་བྱའོ། །དེ་ནས་ཨོཾ་མི་ལྀ་ཞེས་སྙིང་པོ་བརྗོད་ཅིང་། སྔ་མ་བཞིན་དུ་གང་གི་ཚེ་བསྒོམས་པ་དེའི་ཚེ་རིན་ཆེན་ལྟ་བ་ལ་སོགས་པའི་དབང་བསྐུར་བ་ཐོབ་པར་འགྱུར་རོ། །རྡོ་རྗེ་སྙིང་པོ་ཏིང་འཛིན་དང་། །མཉམ་
[148b.5]པར་གཞག་པར་བསྒོམས་ནས་ནི། །ཞེས་བྱ་བ་ནི་སྔ་མ་བཞིན་དུ་རིན་ཆེན་པདྨ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་ཕྱག་རྒྱ་བཅིངས་ཏེ། ཆོས་ཀྱི་དཀྱིལ་འཁོར་གྱི་སྔགས་ཀྱིས་བཅོམ་ལྡན་འདས་རིན་ཆེན་པདྨའམ། དེའི་རིགས་
[148b.6]རྣམས་མདུན་དུ་སྤྲུལ་ལ། སྔ་མ་བཞིན་དུ་བསྡུ་བ་ལ་སོགས་པའི་ཆོ་ག་བྱས་ནས། ཙི་ལྀ་རཏྣ་ཞེས་ལན་གསུམ་བརྗོད་ཅིང་། རིན་ཆེན་པདྨ་ལ་སོགས་པའི་ཆོས་ཀྱི་ཏིང་ངེ་འཛིན་གྱི་ཆོས་སྩོལ་ཅིག་ཅེས་བཅོམ་ལྡན་འདས་ལ་གསོལ་བ་གདབ་པར་བྱའོ། །དེ་ནས་ཙི་ལ་ཞེས་བྱ་བའི་སྙིང་པོ་བརྗོད་ཅིང་།
[148b.7]སྔ་མ་བཞིན་གང་གི་ཚེ་བསྒོམས་པར་གྱུར་པ་དེའི་ཚེ། །རིན་ཆེན་པདྨ་ལ་སོགས་པའི་ཏིང་ངེ་འཛིན་གྱི་ཆོས་ཐོབ་པར་འགྱུར་རོ། །ནམ་མཁའི་སྙིང་པོ་ལས་ཀྱི་མཆོག །མཉམ་པར་གཞག་པ་བཅིངས་ནས་ནི། །ཞེས་བྱ་བ་ལ་སོགས་པ་ལ། སྔ་མ་བཞིན་རིན་ཆེན་ཆར་
[149a]
[149a.1]འབེབས་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པ་དེའམ། དེའི་རིགས་ཀྱི་ཆོས་ཀྱི་ཕྱག་རྒྱ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་རིན་ཆེན་ཆར་
[149a.2]འབེབས་དང་། རིགས་རྣམས་མདུན་དུ་སྤྲུལ་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས། ཡང་ཆོས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་རིན་ཆེན་ཆར་འབེེབས་སམ། དེའི་རིགས་རྣམས་ཀྱི་ལས་ཀྱི་ཕྱག་རྒྱ་བཅིངས་ལ། བཅོམ་ལྡན་འདས་རིན་ཆེན་ཆར་འབེེབས་ལ་སོགས་
[149a.3]པ་ལ། ཀཱི་ལི་རཏྣ་ཞེས་ལན་གསུམ་བརྗོད་ཅིང་། རིན་པོ་ཆེ་ཐམས་ཅད་སློང་བའི་གསོལ་བ་གདབ་པར་བྱའོ། །དེ་ནས་ཀཱི་ལི་ཞེས་བྱ་བའི་སྙིང་པོ་བརྗོད་ཅིང་། སྔ་མ་བཞིན་དུ་གང་གི་ཚེ་བསྒོམས་པར་གྱུར་པ་དེའི་ཚེ་རིན་ཆེན་ཆར་འབེབས་ལ་སོགས་པའི་རིན་པོ་ཆེ་ཐམས་ཅད་ཐོབ་པར་འགྱུར་རོ། །དེ་ནས་
[149a.4]ཞེས་བྱ་བ་ནི་དེ་མ་ཐག་པ་སྟེ། ནོར་བུའི་ཡེ་ཤེས་ནི་ནོར་བུ་ཆེན་པོའི་རིགས་ཀྱི་ཡེ་ཤེས་ཀྱི་ཆོས་ཀྱི་དཀྱིལ་འཁོར་རོ། །གསང་བའི་ཕྱག་རྒྱ་ནི་རྡོ་རྗེ་སྙིང་པོའི་མདུན་དུ་གནས་པ་དང་ལྷན་ཅིག་ཏུ་གྱུར་པར་ལྷག་པར་མོས་པའོ། །དེའི་ཡེ་ཤེས་ནི་ངེས་པ་སྟེ། དེ་བསླབ་པའོ། །དབང་པོ་གཉིས་ནི་མཉམ་སྤྲད་
[149a.5]ནས། །ཞེས་བྱ་བ་ནི་བཤད་ཟིན་ཏོ། །དེ་ལྟར་བྱས་ནས་རྡོ་རྗེ་སྙིང་པོ་དང་ནམ་མཁའི་སྙིང་པོ་བསྒོམས་ཏེ། ཡང་དང་ཡང་དུ་བྱའོ། །གང་དུ་ཞེ་ན། ནམ་མཁའི་ཕྱོགས་སམ་ཕྱོགས་གཞན་དུ། །ཞེས་བྱ་བ་སྨོས་སོ། །ཅི་ཞིག་ཐོབ་པར་འགྱུར་ཞེ་ན། །དངོས་གྲུབ་མཆོག་ནི་ཐོབ་པར་འགྱུར། །ཞེས་
[149a.6]བྱ་བ་སྨོས་ཏེ། མཆོག་ནམ་མཁའི་སྙིང་པོ་ཐོབ་པར་གྱུར་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའམ། ནོར་བུའི་མཚན་མ་ལ་སོགས་པ་དེའི་རིགས་ཀྱི་རྣལ་འབྱོར་བྱས་ལ་ཕྱིས་ཆོས་ཀྱི་དཀྱིལ་འཁོར་ལས་བཤད་པའི་དོན་
[149a.7]ཐམས་ཅད་གྲུབ་པའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱིས་བཅོམ་ལྡན་འདས་མདུན་དུ་སྤྲུལ་ཏེ་བསྡུ་བ་ལ་སོགས་པའི་ཆོ་ག་སྔ་མ་བཞིན་དུ་རྗེས་སུ་སྤྱད་ལ། ཡང་ཆོས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པའམ་
[149b]
[149b.1]དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཨཱ་ཀཱ་ཤ་གུ་ཧྱ་ཛྙཱ་ན་སཱ་དྷ་ཡ་ཧཱུཾ། ཞེས་བརྗོད་ཅིང་། བཅོམ་ལྡན་འདས་དོན་ཐམས་ཅད་གྲུབ་པའམ་དེའི་རིགས་དང་ལྷན་ཅིག་ཏུ་དབང་པོ་གཉིས་མཉམ་པར་སྦྱོར་བ་རྒྱུན་མི་འཆད་པར་བསྒོམས་ནས་སྔར་བཤད་པའི་ཚུལ་གྱིས་ཇི་སྲིད་མངོན་སུམ་དུ་མངོན་པར་
[149b.2]གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ན་དེའི་རྗེས་ལ་བཅོམ་ལྡན་འདས་ནམ་མཁའི་སྙིང་པོ་མངོན་སུམ་དུ་བྱོན་ནས་སྒྲུབ་པ་པོའི་ལུས་ལ་ཞུགས་པར་གྱུར་པ་དང་། དེ་ནས་སྒྲུབ་པ་པོའི་དེ་དང་འདྲ་བར་འགྱུར་རོ། །དབང་པོ་གཉིས་ནི་མཉམ་སྦྱར་ན། །ཞེས་བྱ་བ་
[149b.3]ནི་སྔ་མ་བཞིན་ནོ། །གཞི་ལ་རི་མོ་བྲིས་པ་བཞིན། །ཞེས་བྱ་བ་ནི་རས་སམ། རྩིག་པའམ། སྤང་ལེབ་ལ་བྲི་བའོ། །འདི་སྐད་སྟོན་པ་ཡིན་ཏེ། ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་ལྟ་བ་དང་། དེའི་རིགས་ཀྱི་ལྷའི་གཟུགས་རྣམས་རས་ལ་སོགས་པ་ལ་བྲིས་ཏེ། མདུན་དུ་བཞག་
[149b.4]ལ་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ལྟ་བའམ་དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པ་དེའམ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་
[149b.5]རིན་ཆེན་ལྟ་བའམ་དེའི་རིགས་རིས་ལ་སོགས་པ་ལ་ཇི་ལྟ་བ་བཞིན་དུ་བྲིས་པའི་གཟུགས་ལ་སྤྲུལ་ཏེ། བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་དེ། ཙི་ཏྲ་གུ་ཧྱ་ཛྙཱ་ན་ཨ་བྷི་ཥིཉྩ་ཧཱུཾ། ཞེས་བརྗོད་ཅིང་སྔ་མ་བཞིན་དུ་དེས་རས་ལ་སོགས་པ་དང་ལྷན་ཅིག་ཏུ་མཉམ་པར་སྦྱོར་བ་བསྒོམས་ལ།
[149b.6]སྔར་བཤད་པའི་ཆོ་གས་ཇི་སྲིད་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་བསྒྲུབས་ན་དེ་བཞིན་དུ་འགྲུབ་པར་འགྱུར་ན། དེའི་རྗེས་ལ་རིན་ཆེན་སྤྱན་ལ་སོགས་པའི་དབང་བསྐུར་བ་ཐོབ་པར་འགྱུར་རོ། །རྡོ་རྗེ་སྙིང་པོ་བསྒོམས་ནས་ནི། །དབང་པོ་གཉིས་ནི་མཉམ་སྦྱར་
[149b.7]ལ། །ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །སྡུག་པ་དེ་དག་གང་རྩེས་པ། །ཞེས་བྱ་བ་ནི་རིན་ཆེན་པདྨ་ལ་སོགས་པ་དང་། རྡོ་རྗེས་སྙིང་པོས་གང་རྩེས་པའོ། །རིན་ཆེན་པདྨ་ལ་སོགས་པ་ཉིད་ཀྱི་ཆོས་ཀྱི་ཕྱག་རྒྱའི་རང་བཞིན་དང་། རྡོ་རྗེ་སྙིང་པོ་གཉིས་རྩེ་ཞིང་སྒྲུབ་པར་བྱེད་པའོ། །དེ་སྐད་དུ་ཡང་། རྩེ་
[150a]
[150a.1]བ་བསྒྲུབ་པར་འདོད་པ་ཡིན། །ཞེས་གསུངས་སོ། །འཇིག་རྟེན་ཀུན་གྱིས་དེ་དགར་བྱེད། །ཅེས་བྱ་བ་ནི་སེམས་ཅན་གྱི་ཁམས་ཐམས་ཅད་རིན་ཆེན་པདྨ་ལ་སོགས་པ་བསྒྲུབ་ཅིང་རང་རིག་པས་དེ་དགའ་བར་བྱེད་པའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་
[150a.2]འཁོར་ཆེན་པོ་ལས་བཤད་པའི་རིན་ཆེན་པདྨ་དང་། གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོ་ལ་སོགས་པ་དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་པདྨ་དང་། དེའི་རིགས་ཀྱི་ཆོས་ཀྱི་ཕྱག་རྒྱ་བཅིངས་ཏེ། དེ་ནས་ཆོས་ཀྱི་དཀྱིལ་འཁོར་ལས་བཤད་པའི་
[150a.3]རང་གི་རིགས་ཀྱི་བཅོམ་ལྡན་འདས་རིན་ཆེན་པདྨ་དང་། དེའི་རིགས་རྣམས་སྤྲུལ་ལ་བསྡུ་བ་ལ་སོགས་པའི་ཆོ་ག་བྱས་ཏེ། བཅོམ་ལྡན་འདས་རིན་ཆེན་པདྨ་དང་། དེའི་རིགས་རྣམས་དང་ལྷན་ཅིག་ཏུ་གྱུར་པར་བསྒོམས་ཤིང་། པྲི་ཡཾ་ཨ་ནུ་སྨྲྀ་ཏེ་ཛྙཱ་ན་གུ་ཧྱ་སརྦྦ་ཀ་ལཾ་མ་ཎི་ར་ཡ་ཧཱུཾ་ཞེས་བྱ་བ་འདིས་བརྗོད་
[150a.4]པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ནས་རིན་ཆེན་པདྨ་ལ་སོགས་པའི་འཇིག་རྟེན་ཀུན་གྱིས་དེ་དགའ་བར་བྱེད་པར་འགྱུར་རོ། །ནམ་མཁའ་ཀུན་གྱི་རྡུལ་དབྱིབས་ཀྱི། །ཞེས་བྱ་བ་ནི་ནམ་མཁའ་ཡིན་ལ་ཐམས་ཅད་ཀྱང་དེ་ཡིན་པས་ཕྱོགས་བཅུའི་ནམ་མཁའི་ཀུན་གྱི་
[150a.5]རྫས་ཀྱི་དངོས་པོའི་རང་བཞིན་ནོ། །དེ་ལ་རྡུལ་ནི་ནམ་མཁའ་ཀུན་གྱི་རྡུལ་གྱི་ཚོགས་ཏེ། དེའི་དབྱིབས་ཅན་ནི་ནམ་མཁའ་ཀུན་གྱི་རྡུལ་གྱི་དབྱིབས་དང་ལྷན་ཅིག་པའོ། །ནམ་མཁའི་ཁམས་ཐམས་ཅད་རྡུལ་ཕྲ་རབ་ཇི་སྙེད་པའི་ཚོགས་དེ་དང་དེ་ནི་ནམ་མཁའི་སྙིང་པོའི་གཟུགས་བརྙན་དུ་བསམས་
[150a.6]ནས། དེ་ནས་དེ་དང་ལྷན་ཅིག་ཏུ་གྱུར་པར་བསྒོམ་པར་བྱའོ། །དེ་ལྟར་གྱུར་བས་ཅི་ཞིག་ཏུ་འགྱུར་ཞེ་ན། ནམ་མཁའི་རྡུལ་ཀུན་གྱི་རྡུལ་གྱི་དབྱིབས་ཀྱི་ཞེས་བྱ་བ་སྨོས་ཏེ། རིན་ཆེན་ཆར་འབེབས་ལ་སོགས་པ་ཐམས་ཅད་གྲུབ་པ་དེའི་སྒྲུབ་པ་པོར་འགྱུར་རོ་ཞེས་བྱ་བའི་དོན་ཏོ། །དེའི་དོན་ནི་འདི་སྐད་སྟོན་
[150a.7]པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རིན་ཆེན་ཆར་འབེེབས་དང་། དེའི་རིགས་ནོར་བུའི་མཆོད་པ་ལ་སོགས་པ་དེ་ལས་བཤད་པའི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པའི་རིན་ཆེན་ཆར་འབེབས་
[150b]
[150b.1]སམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། དེ་ནས་ཆོས་ཀྱི་དཀྱིལ་འཁོར་ལས་བཤད་པའི་རང་གི་སྔགས་ཀྱིས་རིན་ཆེན་ཆར་འབེབས་སམ། དེའི་རིགས་མདུན་དུ་སྤྲུལ་ལ། སྔ་མ་བཞིན་དུ་བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ནས་ཆོས་ཀྱི་དཀྱིལ་འཁོར་ལས་གསུངས་
[150b.2]པའི་རིན་ཆེན་ཆར་འབེབས་སམ། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། སརྦྦ་གུ་ཧྱ་ཛྙཱ་ན་སརྦྦ་སིདྡྷི་མྨ་པྲ་ཡཙྪ་ཧཱུཾ། ཞེས་བརྗོད་ཅིང་། བཅོམ་ལྡན་འདས་རིན་ཆེན་ཆར་འབེེབས་སམ། དེའི་རིགས་རྣམས་དང་ལྷན་ཅིག་ཏུ་གྱུར་པ་ཉིན་རེ་ཞིང་ཐུན་བཞིའི་སྦྱོར་བས་བསྒོམས་ལ་ཇི་སྲིད་དུ་ཉིན་རེ་
[150b.3]ཞིང་ཐུན་བཞིར་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་ཚོགས་དེའི་རང་བཞིན་དུ་རྣམ་པར་བསམས་ཏེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་ཚོགས་དང་མཉམ་པའི་རིན་ཆེན་ཆར་འབེབས་
[150b.4]ཀྱི་དབྱིངས་སམ། དེའི་རིགས་ཀྱི་དབྱིབས་སུ་ལྷན་ཅིག་མཉམ་པར་སྦྱོར་ཞིང་། ཇི་སྲིད་བདག་ཉིད་དེའི་རང་བཞིན་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རིན་ཆེན་ཆར་འབེབས་ལ་སོགས་པ་ཐམས་ཅད་གྲུབ་པར་འགྱུར་རོ། །དེ་ལྟར་དངོས་གྲུབ་ཀྱི་བྱེ་བྲག་རྣམ་པ་ཉི་ཤུ་
[150b.5]བསྟན་ནས་ད་ནི་དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ལ། ཆོས་ཀྱི་
[150b.6]དཀྱིལ་འཁོར་གྱི་ལྷ་རྣམས་ཕྱག་རྒྱ་བཞིས་རྒྱས་བཏབ་ནས་དཀྱིལ་འཁོར་དང་པོར་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བ་ནི་དངོས་གྲུབ་ཀྱི་ཡེ་ཤེས་བསྟན་པའི་རྗེས་ཐོགས་ལའོ། །ཕྱག་རྒྱ་ཆེན་པོ་འདི་ཇི་ལྟ་བ་བཞིན་
[150b.7]བཅིང་བར་བྱའོ་ཞེས་བྱ་བ་ནི་བྲིས་པ་དང་རྗེས་སུ་མཐུན་པར་འགྱུར་རོ། །ཇི་ལྟར་བྲི་བའི་ཆོ་གར་ཕྱག་རྒྱ་ཆེན་པོའི་མཚན་ཉིད་བཤད་པ་དེ་བཞིན་དུ་འདིར་ཡང་རྣམ་པར་སྣང་མཛད་ནས་བརྩམས་ཏེ། བསྐལ་པ་བཟང་པོའི་བར་དུ་ཕྱག་རྒྱ་ཆེན་པོ་བཅིང་བར་བྱའོ་ཞེས་བྱ་བའི་དོན་ཏེ། དངོས་གྲུབ་ཀྱང་
[151a]
[151a.1]དེ་དང་འདྲའོ་ཞེས་བྱ་བ་ནི་རྡོ་རྗེ་དབྱིངས་ཀྱི་ཆོས་ཀྱི་དཀྱིལ་འཁོར་ཅི་འདྲ་བའི་ཕྱག་རྒྱ་ཆེན་པོ་བཤད་པ་དེ་འདྲ་བ་འདིར་ཡང་ཡིན་ནོ། །དེ་ནས་རྡོ་རྗེ་ནོར་བུ་བཅིངས་ལ་རྡོ་རྗེ་ཡེ་ཤེས་ཀྱི་དཀྱིལ་འཁོར་གྱི་ཚུལ་དུ་གཞག་པར་བྱའོ་ཞེས་བྱ་བ་ནི་རྡོ་རྗེ་བསྡམས་པ་ལས་མཛུབ་མོ་གཉིས་ཀྱིས་
[151a.2]རྒྱབ་བསྐུམས་ནས་མཐེ་བོ་གཉིས་རྡོ་རྗེར་བཅིངས་པ་འདི་ནི་རྡོ་རྗེ་ནོར་བུའི་ཕྱག་རྒྱའོ། །འདི་བཅིངས་ནས་རྡོ་རྗེ་དབྱིངས་ཀྱི་དཀྱིལ་འཁོར་གྱི་ཚུལ་གྱིས་ཇི་ལྟ་བ་བཞིན་གྱི་གནས་རྣམས་སུ་གཞག་པར་བྱའོ། །དེ་བཞིན་དུ་ནོར་བུའི་མཚན་མ་ལ་སོགས་པ་ནས་ནོར་བུའི་ཁུ་ཚུར་གྱི་མཐར་
[151a.3]ཐུག་པའི་དམ་ཚིག་གི་ཕྱག་རྒྱར་ཡང་འགྱུར་རོ། །དེ་ལ་རྡོ་རྗེ་ཡེ་ཤེས་ཀྱི་དཀྱིལ་འཁོར་གྱི་ཚུལ་དུ་ཞེས་བྱ་བ་འདི་ཡིན་ཏེ། སྐྱིལ་མོ་ཀྲུང་འདུག་གན་རྐྱལ་དུ། །གཡས་གཅུས་དེ་བཞིན་སླར་གཅུས་པ། །སྙིང་གར་གནས་པ་བཞི་པ་སྟེ། །ཞེས་བྱ་བ་ནི་ནོར་བུའི་མཚན་མ་ལ་སོགས་པའི་དཀྱིལ་
[151a.4]འཁོར་རོ། །དཔྲལ་བར་གཞག་དང་ལྟག་པ་དང་། །ཕྲག་པར་ཡང་ནི་དགོད་པར་བྱ། །ཁར་གཞག་སྙིང་གར་རལ་གྲི་དང་། །སྙིང་གར་རྒྱས་དང་ཁ་ནས་དབྱུང་། །སྤྱི་བོ་ཐོད་པ་ཁར་གཞག་པ། །མཛུབ་མོ་གཉིས་བཀུག་མདུན་དེ་བཞིན། །ཞེས་བྱ་བའོ། །ལྷག་མ་རྣམས་ནི་དཀྱིལ་
[151a.5]འཁོར་ཆེན་པོ་ལས་བཤད་པའི་དམ་ཚིག་གི་ཕྱག་རྒྱ་ཉིད་ཡིན་པར་ཤེས་པར་བྱའོ། །ཧཱུཾ་རྣམ་པར་སྣང་མཛད་ཀྱི་ཆོས་ཀྱི་ཕྱག་རྒྱའོ། །ས་ནི་རྡོ་རྗེ་ནོར་བུ་མ་དང་། ནོར་བུའི་མཚན་མ་དང་། དོན་ཐམས་ཅད་གྲུབ་པའི་གནས་རྣམས་ཀྱིའོ། །ར་ནི་རིན་ཆེན་རྒྱལ་པོའིའོ། །ཡི་གེ་ར་ནི་ཚེག་དྲག་སྤངས་
[151a.6]པ་ནི་རིན་ཆེན་ཆགས་པའིའོ། །ས་ནི་རིན་ཆེན་ལེགས་པའིའོ། །ར་ནི་རིན་ཆེན་སྤྱན་དང་། དེ་བཞིན་གཤེགས་པ་ཐམས་ཅད་ཀྱི་ཕྲེང་བའི་དབང་བསྐུར་བ་དང་རྡོ་རྗེ་རིན་ཆེན་མྱུ་གུ་མའིའོ། །ཏེ་ནི་ནོར་བུ་གཟི་བརྗིད་ཀྱིའོ། །ཀེ་ནི་ནོར་བུ་དཔལ་གྱིའོ། །ཧ་ནི་ནོར་བུ་བཞད་པའིའོ། །དཾ་ནི་
[151a.7]ནོར་བུ་པདྨ་དང་། གཏོང་བའི་ཏིང་ངེ་འཛིན་ཡེ་ཤེས་ཀྱི་སྙིང་པོ་དང་། རྡོ་རྗེ་རིན་ཆེན་པདྨ་རྣམས་ཀྱིའོ། །ཏི་ནི་རིན་ཆེན་མགོན་པོའིའོ། །ཧི་ནི་ནོར་བུ་འཁོར་ལོའིའོ། །བྷ་ནི་ནོར་བུ་གསུང་བའིའོ། །ཀ་ནི་རིན་ཆེན་ཆར་འབེབས་དང་། ནོར་བུའི་མཆོད་པ་དང་། རིན་ཆེན་
[151b]
[151b.1]རྒྱུན་མ་རྣམས་ཀྱིའོ། །ར་ནི་ནོར་བུ་བསྲུང་བའིའོ། །ཡ་ནི་ནོར་བུ་གནོད་སྦྱིན་གྱིའོ། །མ་ནི་ནོར་བུ་ཁུ་ཚུར་གྱི་ཆོས་ཀྱི་ཕྱག་རྒྱའོ། །ལྷག་མ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པ་ཉིད་ཡིན་ནོ། །མདོར་ན་ལས་ཀྱི་ཕྱག་རྒྱ་ནི། །གནས་ཇི་བཞིན་
[151b.2]པར་གཞག་པར་བྱའོ། །ནོར་བུ་ཆེན་པོའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་ནོར་བུའི་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ཏེ། གཉིས་སུ་བྱས་ནས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་རྣམ་པར་སྣང་མཛད་ནས་བརྩམས་ནས་རིན་
[151b.3]ཆེན་ཆར་འབེབས་པའི་མཐར་ཐུག་པའི་ཕྱག་རྒྱ་བཅིང་བར་བྱའོ་ཞེས་བྱ་བའི་དོན་ཏོ། །དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་ཆོས་ཀྱི་ཕྱག་རྒྱ་གཙོ་བོར་གྱུར་པ་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་བསྟན་ནས། ད་ནི་ལས་ཀྱི་ཕྱག་རྒྱ་གཙོ་བོར་གྱུར་པ་
[151b.4]དེས་འདུལ་བའི་སེམས་ཅན་རྗེས་སུ་གཟུང་བའི་ཕྱིར་ནོར་བུ་ཆེན་པོའི་རིགས་ཀྱི་ལས་ཀྱི་དཀྱིལ་འཁོར་ནི། དེ་ནས་ཡང་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། །དང་པོ་སྦྱོར་བའི་ཏིང་ངེ་འཛིན་ཞེས་བྱ་བའི་རྗེས་ཐོགས་ལའོ། །འདིར་དང་པོ་སྦྱོར་བའི་
[151b.5]ཏིང་ངེ་འཛིན་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དང་པོ་སྦྱོར་བ་ཉིད་ཡིན་ནོ། །ཡང་ཞེས་བྱ་བ་ནི་ནོར་བུ་ཆེན་པོའི་རིགས་ཀྱི་ཆོས་ཀྱི་དཀྱིལ་འཁོར་ལ་ལྟོས་པས་ན་ཡང་ཞེས་བྱ་བ་སྨོས་སོ། །བཅོམ་ལྡན་འདས་ནི་རྣམ་པར་སྣང་མཛད་དོ། །དེ་བཞིན་གཤེགས་པ་ཐམས་ཅད་ཀྱི་དབང་
[151b.6]བསྐུར་བའི་ལས་ནི་བཅོམ་ལྡན་འདས་རྣམ་པར་སྣང་མཛད་ཀྱི་ནོར་བུ་ཆེན་པོའི་རིགས་ཀྱི་ལས་ཀྱི་དཀྱིལ་འཁོར་ཏེ། དེ་ཉིད་ཀྱི་དམ་ཚིག་དེ་ལས་བྱུང་བ་ནི་རྡོ་རྗེ་སྙིང་པོའི་ཐུགས་ཀའི་རྡོ་རྗེ་རིན་པོ་ཆེ་གང་ལས་བྱུང་བ་དེ་ལ་དེ་སྐད་ཅེས་བྱའོ། །དེས་བྱིན་གྱིས་བརླབས་པའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་
[151b.7]ཞུགས་ཤིང་མངོན་སུམ་དུ་མཛད་ནས་འདི་བསྟན་པ་ནི་རང་རིག་པ་དམ་པ་འདི་གསུངས་ཤིང་བཤད་པའོ། །དོན་ཐམས་ཅད་གྲུབ་པའི་ལས་ཀྱི་དཀྱིལ་འཁོར་དེ་ལས་བྱུང་ཞིང་བསྐྱེད་པའི་ལས་ཀྱི་རྒྱུར་གསུངས་པའོ། །དེ་ལྟར་ཕྱག་ན་རྡོ་རྗེས་དོན་ཐམས་ཅད་གྲུབ་པའི་རིགས་བསྐྱེད་པའི་རྒྱུར་གྱུར་པ་རིག་པ་
[152a]
[152a.1]དམ་པ་གསུངས་པ་དང་། དེ་བཞིན་དུ་རྡོ་རྗེ་སྙིང་པོས་རིན་ཆེན་སྤྱན་གྱི་རིགས་བསྐྱེད་པའི་རྒྱུར་གྱུར་པའི་རིག་པ་དམ་པ་འདི་གསུངས་པ་དང་། རྡོ་རྗེ་ལྟ་བས་རིན་ཆེན་པདྨའི་རིགས་བསྐྱེད་པའི་རྒྱུར་གྱུར་པའི་རིག་པ་དམ་པ་འདི་གསུངས་པ་དང་། རྡོ་རྗེ་སྣ་ཚོགས་དང་རིན་ཆེན་ཆར་འབེབས་
[152a.2]ཀྱི་རིགས་བསྐྱེད་པའི་རྒྱུར་གྱུར་པའི་རིག་པ་དམ་པ་འདི་གསུངས་སོ། །དེ་དག་འཕགས་པ་ནམ་མཁའི་སྙིང་པོས་རང་གི་ཐུགས་ཀ་ན་གནས་པའི་རྡོ་རྗེ་རིན་པོ་ཆེ་ལས་ལས་ཐམས་ཅད་ཀྱི་བདག་ཉིད་ཀྱི་དཀྱིལ་འཁོར་སྤྲུལ་ནས་སྔ་མ་བཞིན་དུ་དེ་བཞིན་གཤེགས་པ་ཐམས་ཅད་ལ་ཕུལ་བ་ཡིན་པར་ཤེས་པར་
[152a.3]བྱའོ། །དེ་ལ་དེ་ནས་ཡང་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཨོཾ་བི་ཤྭ་ཨ་བྷི་ཥེ་ཀ་ཞེས་བྱ་བའི་གཞུང་འདི་ཙམ་གྱིས་ནོར་བུ་ཆེན་པོའི་རིགས་ཀྱི་ལས་ཀྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་ཏོ། །དེ་ནས་སྔ་མ་བཞིན་དུ་བསྡུ་བ་དང་བྱིན་གྱིས་བརླབ་པ་ནི་ནོར་
[152a.4]བུ་ཆེན་པོའི་རིགས་ཀྱི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་བཤད་ཟིན་ཏོ། །དེ་ནས་རབ་ཏུ་བཤད་བྱ་བ། །ཞེས་བྱ་བ་ནི་སྔོན་དུ་བསྙེན་པའི་རྗེས་ཐོགས་ལ་ལས་ཀྱི་དཀྱིལ་འཁོར་གྱིས་འདུལ་བའི་སེམས་ཅན་རྗེས་སུ་གཟུང་
[152a.5]བའི་ཕྱིར་ལས་ཀྱི་དཀྱིལ་འཁོར་དམ་པའོ། །ནོར་བུ་ཆེན་པོའི་རིགས་ཀྱི་ལས་ཀྱི་དཀྱིལ་འཁོར་དམ་པ་ནི་གཙོ་བོའོ། །རྡོ་རྗེ་དབྱིངས་ནི་འདིར་སྤྲུལ་པའི་ལས་ཀྱི་དཀྱིལ་འཁོར་དང་མཚུངས་པས་ན། རྡོ་རྗེ་དབྱིངས་དང་འདྲ་བའོ། །རིན་ཆེན་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་
[152a.6]པའི་མཐར་ཐུག་པ་ནི་རིན་པོ་ཆེའི་རིགས་སོ། །དགོས་པ་ནི་རིན་པོ་ཆེའི་དགོས་པའོ། །སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པའི་ལས་ནི་སངས་རྒྱས་མཆོད་པའི་ལས་དང་དེ་བཤད་པའི་གྲགས་པའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་
[152a.7]ལས་བཤད་པའི་དོན་ཐམས་ཅད་གྲུབ་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ་ཕྱིས་ལས་ཀྱི་དཀྱིལ་འཁོར་ལས་འཆད་པར་འགྱུར་བའི་ཕྱག་རྒྱས་བཏབ་ལ་དོན་ཐམས་ཅད་གྲུབ་པའི་ཕྱག་རྒྱ་བཞི་པའི་དཀྱིལ་འཁོར་གྱི་རིགས་ཀྱི་སྙིང་པོ་ལྔས་རང་གི་སྙིང་གར་སྤྲུལ་
[152b]
[152b.1]ལ་འཆད་པར་འགྱུར་བའི་རིགས་པས་གོ་རིམས་བཞིན་དུ་གཞག་སྟེ། ལས་ཀྱི་དཀྱིལ་འཁོར་གྱི་ཇི་ལྟ་བའི་རིག་པ་རེ་རེ་ཞིང་ཡང་ཁྲི་བཟླས་པར་བྱའོ། །དེ་ལྟར་བྱས་ནས་ཕྱིས་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་ཏིང་ངེ་འཛིན་གསུམ་ཞག་བདུན་བསྒོམ་པར་བྱའོ། །དེ་ནས་
[152b.2]དཀྱིལ་འཁོར་འདི་བྲི་བར་བྱའོ། །ཇི་ལྟར་སྲད་བུ་བྲི་བར་བྱ་ཞེ་ན། དཀྱིལ་འཁོར་ཆེན་པོའི་ཚུལ་དུ་ནི། །དཀྱིལ་འཁོར་ཐམས་ཅད་སྲད་བུ་བྲེ། །ཞེས་བྱ་བ་སྨོས་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་དབྱིབས་ཀྱི་ཚུལ་གྱིས་འདིའི་ཕྱི་དང་ནང་གི་ཐིག་གདབ་པར་བྱའོ། །དེ་ཡི་དབུས་
[152b.3]སུ་ཚུལ་བཞིན་དུ། །ཞེས་བྱ་བ་ནི་དེ་བྲིས་པའི་རྗེས་ཐོགས་ཉིད་ལ་དོན་ཐམས་ཅད་གྲུབ་པའི་དཀྱིལ་འཁོར་ལས་བཤད་པ་བྲི་བའི་ཆོ་གས་བཅོམ་ལྡན་འདས་རྣམ་པར་སྣང་མཛད་བྲིས་ལ་གཞག་པར་བྱའོ། །སེམས་དཔའ་ཆེན་པོའི་ཚུལ་གྱིས་ནི། །རིན་ཆེན་མཆོད་པ་རྣམས་བྲིའོ། །ཞེས་བྱ་
[152b.4]བ་ནི་ནོར་བུའི་མཚན་མ་ལ་སོགས་པ་ནས་ནོར་བུ་འབེབས་པ་ལ་མཐར་ཐུག་པའི་ནོར་བུའི་སེམས་དཔའ་རྣམས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་བཞིན་དུ་བྲི་བར་བྱའོ། །དེ་ལྟར་ནོར་བུའི་མཚན་མ་འཛིན་པ་ལ་སོགས་པ་ནས་ནོར་བུ་འབེབས་པའི་མཐར་ཐུག་པ་དེ་དག་རིག་པ་རྣམས་
[152b.5]ཀྱིས་བྲི་བར་བྱའོ་ཞེས་བྱ་བའི་ཐ་ཚིག་གོ། །དེའི་དོན་ནི་འདི་སྐད་སྟོན་པ་ཡིན་ཏེ། ཨོཾ་བཛྲ་རཏྣ་པཱུ་ཛ་ཨ་གྷྲ་ཞེས་བྱ་བའི་རིག་པ་འདིས་རྣམ་པར་སྣང་མཛད་རང་གི་གནས་སུ་གཞག་པར་བྱའོ། །ཨོཾ་མ་ཎི་ས་མ་ཡ་ཧཱུཾ། ཞེས་བྱ་བ་ནི་རྡོ་རྗེ་ནོར་བུ་ཆེན་མོའི་ཕྱག་རྒྱའོ། །ཨོཾ་མ་ཎི་རཏྣ་ཨ་བྷི་ཥེ་ཀ་མཱ་ལ་ཧཱུཾ།
[152b.6]ཞེས་བྱ་བ་ནི་རྡོ་རྗེ་རིན་ཆེན་མྱུ་གུ་མའིའོ། །ཨོཾ་མ་ཎི་རཏྣ་པདྨོ་ཧཱུཾ། ཞེས་བྱ་བ་ནི་ནོར་བུ་རིན་ཆེན་པདྨའིའོ། །ཨོཾ་མ་ཎི་པྲ་བེ་ཤ་ས་མ་ཡ་ཧཱུཾ། ཞེས་བྱ་བ་ནི་ནོར་བུ་རིན་ཆེན་ཆར་འབེེབས་མའིའོ། །ཨོཾ་སརྦྦ་ཨརྠ་སིདྡྷི་པྲ་ཀཱ་ར་ཨ་བྷི་ཥེ་ཀ་ཧཱུཾ། ཞེས་བྱ་བ་ནི་བཅོམ་ལྡན་འདས་དོན་ཐམས་ཅད་གྲུབ་པའིའོ། །ཨོཾ་
[152b.7]བཛྲ་མ་ཎི་དྷ་ར་ནི་ས་མ་ཡེ་ཧཱུཾ། ཞེས་བྱ་བ་ནི་ནོར་བུ་མཚན་མའི་རྡོ་རྗེ་ནོར་བུ་གཟུགས་ཀྱི་མཚན་མའི་རིག་པའོ། །ཨོཾ་མ་ཎི་རཏྣ་ཨཱ་ཀཪྵ་ས་མ་ཡ་ཧཱུཾ། ཞེས་བྱ་བ་ནི་རིན་ཆེན་རྒྱལ་པོའི་ནོར་བུའི་རིན་ཆེན་འགུགས་མའིའོ། །ཨོཾ་མ་ཎི་རཏྣ་རཱ་ག་ར་ཏི་ཀརྨ་པཱུ་ཛ་པྲ་མ་ཏ་ཡ་ཧཱུཾ། ཞེས་བྱ་བ་ནི་ནོར་བུ་ཆགས་པའི་ནོར་བུ་
[153a]
[153a.1]རིན་ཆེན་ཆགས་ཤིང་དགའ་མའིའོ། །ཨོཾ་མ་ཎི་རཏྣ་སཱ་དྷུ་ཀ་ར་པཱུ་ཛ་ས་མ་ཡེ་ཧཱུཾ། ཞེས་བྱ་བ་ནི་ནོར་བུ་ལེགས་པའི་ནོར་བུ་རིན་ཆེན་ལེགས་པར་བྱེད་མའིའོ། །ཨོཾ་མ་ཧཱ་མ་ཎི་རཏྣ་དྲྀཥྚ་ཨཱ་ཀ་ཪྵ་ཞེས་བྱ་བ་ནི་བཅོམ་ལྡན་འདས་རིན་ཆེན་ལྟ་བ་མའིའོ། །ཨོཾ་མ་ཎི་རཏྣ་མཱ་ལ་པཱུ་ཛེ། ཞེས་བྱ་བ་ནི་
[153a.2]དེ་བཞིན་གཤེགས་པ་ཐམས་ཅད་ཀྱིས་ཕྲེང་བའི་དབང་བསྐུར་བའི་ནོར་བུ་རིན་ཆེན་ཕྲེང་བ་མའིའོ། །ཨོཾ་མ་ཎི་རཏྣ་སཱུ་ཪྱ་ཨཱ་ལོ་ཀ་པཱུ་ཛ། ཞེས་བྱ་བ་ནི་ནོར་བུ་རིན་ཆེན་ཉི་མ་སྣང་བ་མའིའོ། །ཨོཾ་མ་ཎི་རཏྣ་དྷྭ་ཛ་པཱུ་ཛེ། ཞེས་བྱ་བ་ནི་ནོར་བུ་དཔལ་གྱི་ནོར་བུ་རིན་ཆེན་རྒྱལ་མཚན་དཔལ་གྱིའོ། །ཨོཾ་མ་ཎི་ཨ་
[153a.3]ཏྱ་ཧཱ་སྱ་པཱུ་ཛེ། ཞེས་བྱ་བ་ནི་ནོར་བུ་རིན་ཆེན་བཞད་པ་མའིའོ། །ཨོཾ་པདྨ་མ་ཎི་ས་མ་དྷི་ས་མ་ཡེ་ཧཱུཾ། ཞེས་བྱ་བ་ནི་བཅོམ་ལྡན་འདས་རིན་ཆེན་པདྨའིའོ། །ཨོཾ་སརྦྦ་ཏེ་ཀ་ཨ་ནུ་སྨྲྀ་ཏེ་སཱ་མ་དྷི་ཀརྨ་གི་རི་ཧཱུཾ། ཞེས་བྱ་བ་ནི་གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོ་གཏོང་བ་ཐམས་ཅད་རྗེས་སུ་དྲན་པའི་ཏིང་ངེ་
[153a.4]འཛིན་གྱི་སྤྱོད་པའིའོ། །ཨོཾ་མ་ནི་རཏྣ་ཏཱིཀྵ་ཎ་ས་མ་ཡེ་ཙྪིནྡ་ཙྪིནྡ་ཧཱུཾ། ཞེས་བྱ་བ་ནི་རིན་ཆེན་རྣོན་པོའིའོ། །ཨོཾ་མ་ཎི་རཏྣ་ཙཀྲ་ས་མ་ཡེ་ཧཱུཾ། ཞེས་བྱ་བ་ནི་ནོར་བུ་འཁོར་ལོའི་ནོར་བུ་རིན་ཆེན་འཁོར་ལོའི་དམ་ཚིག་གིའོ། །ཨོཾ་མ་ཎི་རཏྣ་བྷ་ཥ་བ་དྷ་བ་དྷ་ཧཱུཾ། ཞེས་བྱ་བ་ནི་ནོར་བུ་གསུང་བའི་ནོར་བུ་རིན་ཆེན་གསུང་བ་མའིའོ། །
[153a.5]ཨོཾ་མ་ཎི་རཏྣ་ཝཪྵ་ནི་ཧཱུཾ། ཞེས་བྱ་བ་ནི་བཅོམ་ལྡན་འདས་རིན་ཆེན་ཆར་འབེེབས་ཀྱིའོ། །ཨོཾ་མ་ཎི་རཏྣ་ཀརྨྨནི་ཧཱུཾ། ཞེས་བྱ་བ་ནི་ནོར་བུ་མཆོད་པའི་ནོར་བུ་རིན་ཆེན་ལས་མའིའོ། །ཨོཾ་མ་ཎི་རཏྣ་ཀ་བ་ཙེ་རཀྵ་ཧཾ། ཞེས་བྱ་བ་ནི་ནོར་བུ་བསྲུང་བའི་ཆོ་ག་མའིའོ། །
[153a.6]ཨོཾ་མ་ཎི་རཏྣ་དཾཥྚྲཱ་ཁ་ད་ཁ་ད་ཧཱུཾ། ཞེས་བྱ་བ་ནི་ནོར་བུ་གནོད་སྦྱིན་གྱི་ནོར་བུ་མཆེ་བའི་ལྷ་མོའིའོ། །ཨོཾ་མ་ཎི་རཏྣ་ཀརྨྨ་མུཥྚཱི་ཧཱུཾ། ཞེས་བྱ་བ་ནི་ནོར་བུ་ཁུ་ཚུར་གྱི་ནོར་བུ་རིན་ཆེན་ལས་ཀྱི་ཁུ་ཚུར་གྱི་ལྷ་མོ་སྟེ། རིག་པ་རྣམས་ཀྱིས་རང་རང་གི་གནས་སུ་བྲི་བར་བྱའོ། །དེ་བཞིན་དུ། ཨོཾ་མ་ཎི་རཏྣ་ཨཱ་
[153a.7]བེེ་ཤ་ཨ། ཞེས་བྱ་བའི་བར་དུ་ནོར་བུ་རིན་ཆེན་འབེབས་པ་མའི་ལྷ་མོ་རྣམས་ཀྱི་སྐུ་མདོག་དང་། དབྱིབས་དང་། ཕྱག་མཚན་རྣམས་རིག་པས་བྲི་བར་བྱའོ། །བྱམས་པ་ལ་སོགས་པའི་ལྷ་མོ་རྣམས་བྲི་བའི་རིག་པ་ནི་སྔར་བཤད་པའི་རང་གི་རིག་པ་ཉིད་ཡིན་ནོ། །དེ་ནས་ལས་ཀྱི་དཀྱིལ་འཁོར་
[153b]
[153b.1]འདིར། །ཞེས་བྱ་བ་ལ་སོགས་པ་ལ། དེ་ནས་ཞེས་བྱ་བ་ནི་དེ་མ་ཐག་པའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་དོན་ཐམས་ཅད་གྲུབ་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ཏེ་ཇི་ལྟ་བ་བཞིན་དུ་རིན་པོ་ཆེས་མཚན་པའི་སྣ་ཚོགས་རྡོ་རྗེ་དང་དེའི་
[153b.2]བརྟུལ་ཞུགས་བླངས་ལ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་ག་ཉིད་ཀྱིས་དཀྱིལ་འཁོར་དུ་སློབ་དཔོན་འཇུག་པར་བྱའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་ལ། རང་ལ་བྱིན་གྱིས་བརླབ་པ་ལ་སོགས་པ་བྱས་ནས། སརྦྦ་ཨརྠ་སིདྡྷི་རཏྣ་ཨ་ཧཾ། ཞེས་བྱ་བ་ལ་སོགས་
[153b.3]པའི་མིང་གང་ཡང་རུང་བ་ནས་བརྗོད་ནས་དཀྱིལ་འཁོར་ཐམས་ཅད་སྔ་མ་བཞིན་རྡོ་རྗེས་བསྒྲུབས་ཏེ། དེ་ནས་བསྡུ་བ་ལ་སོགས་པ་བྱས་ལ་མཆོད་པ་ཐམས་ཅད་ཀྱིས་དཀྱིལ་འཁོར་གྱི་ལྷ་ལ་ཡང་དག་པར་མཆོད་དེ། སློབ་མ་འཇུག་པའི་ཆོ་གས་གནང་བ་ནོད་པའི་རྗེས་ཐོགས་ཉིད་ལ་དོན་ཐམས་ཅད་
[153b.4]གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རིན་པོ་ཆེའི་སློབ་མ་འཇུག་པ་བཞིན་དུ་ལས་ཀྱི་དཀྱིལ་འཁོར་འདིར་ཡང་འཇུག་པར་བྱའོ། །འདིས་ནི་ལས་ཀྱི་དཀྱིལ་འཁོར་འདིར་ཆོ་ག་ཇི་ལྟ་བ་བཞིན་དུ་རྒྱས་པར་བྱས་ནས་ཞེས་བྱ་བའི་དོན་འདི་བསྟན་པ་ཡིན་ནོ། །བཅུག་སྟེ་
[153b.5]འདི་སྐད་དུ་བསྒོ་བར་བྱའོ་ཞེས་བྱ་བ་ནི་གོ་སླའོ། །དེ་ནས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་ཆུ་དང་། ཕྱག་རྒྱ་དང་། ཅོད་པན་གྱི་དབང་བསྐུར་བ་བྱིན་ནས་ནོར་བུས་མཚན་པའི་སྣ་ཚོགས་རྡོ་རྗེ་དང་། ནོར་བུས་མཚན་པའི་སྣ་ཚོགས་རྡོ་རྗེའི་དྲིལ་བུ་ཇི་ལྟ་བ་
[153b.6]བཞིན་དུ་བྱས་ནས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས། དངོས་གྲུབ་ཀྱི་རྡོ་རྗེ་བརྟུལ་ཞུགས་སློབ་མ་ལ་སྦྱིན་པར་བྱའོ། །དེ་ལྟར་སློབ་དཔོན་གྱི་ལས་དང་སློབ་མ་འཇུག་པ་ཆོ་ག་རྒྱས་པར་བརྗོད་ནས། ད་ནི་ནོར་བུ་ཆེན་པོའི་རིགས་ཀྱི་ལས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་
[153b.7]ལ་སློབ་དཔོན་གྱིས་ནོར་བུའི་རིགས་ཀྱི་ལས་ཀྱི་ཡེ་ཤེས་བཤད་པར་བྱའོ་ཞེས་བྱ་བའི་དོན་བསྟན་པའི་ཕྱིར། ལས་ཀྱི་ཡེ་ཤེས་བསླབ་པར་བྱའོ་ཞེས་བྱ་བ་ལ་སོགས་པ་གསུངས་ཏེ་ནོར་བུའི་རིགས་ཀྱི་ལས་ཀྱི་དཀྱིལ་འཁོར་གྱི་ཡེ་ཤེས་ནི། ནོར་བུའི་ལས་ཀྱི་ཡེ་ཤེས་ཏེ། ཐམས་ཅད་དབང་དུ་བྱེད་པ་
[154a]
[154a.1]ལ་སོགས་པར་ངེས་པ་དེ་བསླབ་པའོ། །རྡོ་རྗེ་སྙིང་པོ་ཕྱག་རྒྱ་ཆེར། །བསྒོམས་ནས་ཀྱང་ནི་རབ་མཉམ་གཞག །མཆོད་པ་ཀུན་གྱིས་མཆོད་ནས་ནི། །སངས་རྒྱས་ཐམས་ཅད་དབང་དུ་འགྱུར། །ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་
[154a.2]བཅོམ་ལྡན་འདས་དོན་ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་གསུངས་པ་དེའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། གཡེང་བ་མེད་པའི་སེམས་ཀྱིས་དེ་བསྒོམ་ཞིང་། ཨོཾ་རཏྣ་པཱུ་ཛ་བ་ཤི་ཀུ་རུ་ཞེས་བརྗོད་པས་རང་གི་སྙིང་གར་
[154a.3]རྡོ་རྗེ་རིན་པོ་ཆེ་ནོར་བུ་གཟུངས་ཀྱི་དམ་ཚིག་གི་ལྷ་མོའི་ཚོགས་སྤྲུལ་ལ། སྙིང་པོ་འདི་ཉིད་བརྗོད་ལ། ཇི་སྲིད་དུ་དོན་ཐམས་ཅད་གྲུབ་པ་ལ་སོགས་པའི་དེ་བཞིན་གཤེགས་པ་ཐམས་ཅད་ལ་ལྷ་མོའི་ཚོགས་ཀྱིས་མཆོད་པ་ཐམས་ཅད་ཀྱིས་མཆོད་པ་དེ་སྲིད་དུ། དོན་ཐམས་ཅད་གྲུབ་པ་ལ་སོགས་
[154a.4]པ་དེ་བཞིན་གཤེགས་པ་ཐམས་ཅད་དེའི་དབང་དུ་འགྱུར་རོ། །ཏིང་ངེ་འཛིན་གྱི་དམ་ཚིག་མཆོག །ཕྱག་རྒྱ་གང་ཡང་དམ་བཅིངས་ལ། །སངས་རྒྱས་ཐམས་ཅད་མཆོད་ན་ནི། །དབང་བསྐུར་དམ་པ་དེ་དག་ཐོབ། །ཅེས་བྱ་བ་ནི་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་
[154a.5]ལས་བཤད་པའི་རིན་ཆེན་ལྟ་བ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་གསུངས་པའི་རིན་ཆེན་ལྟ་བ་དང་། དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ། རྣམ་པར་གཡེང་བ་མེད་པའི་སེམས་ཀྱིས་རིན་ཆེན་ལྟ་བ་དང་། དེའི་རིགས་ཀྱི་དམ་ཚིག་
[154a.6]གི་ཕྱག་རྒྱ་བཅིང་ཞིང་། ཨོཾ་རཏྣ་པཱུ་ཛ་ས་མ་ཡ། ཨ་བྷི་ཥིཉྩ་ཞེས་བརྗོད་པས་ནོར་བུ་ཆེན་མོ་དང་། རིན་ཆེན་ལྟ་བ་འདྲེན་པ་ལ་སོགས་པའི་ལྷ་མོའི་ཚོགས་རང་གི་དཔྲལ་བར་སྤྲུལ་ལ། རིན་ཆེན་ལྟ་བ་ལ་སོགས་པ་རྣམས་ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་དུ་མཆོད་པ་དེའི་ཚེ་རིན་ཆེན་
[154a.7]ལྟ་བ་ལ་སོགས་པ་དེའི་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ཐོབ་པར་འགྱུར་རོ། །རྡོ་རྗེ་སྙིང་པོའི་ཏིང་འཛིན་དུ། །མཉམ་པར་གཞག་པ་བསྒོམས་ནས་ནི། །སངས་རྒྱས་ཐམས་ཅད་རབ་མཆོད་ན། །འགྲོ་བའི་དམ་པ་འཇིག་པར་འགྱུར། །ཞེས་བྱ་བ་ནི་སྔ་མ་བཞིན་དུ་རིན་
[154b]
[154b.1]ཆེན་པདྨ་དང་། དེའི་རིགས་ཀྱི་ལྷའི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་དེའི་རིགས་ཀྱི་ལས་ཀྱི་ཆོས་ཀྱི་ཕྱག་རྒྱ་བཅིངས་ནས། ཨོཾ་རཏྣ་པཱུ་ཛ་དྷརྨྨཱ་ན་ཤ་ཡཾ། ཞེས་བརྗོད་ཅིང་བདག་ཉིད་གཡེང་བ་མེད་པའི་ཡིད་ཀྱིས་རིན་ཆེན་པདྨའམ། དེའི་རིགས་བསྒོམས་ལ་རང་
[154b.2]གི་སྙིང་གར་པདྨ་ནོར་བུའི་ཏིང་ངེ་འཛིན་གྱི་དམ་ཚིག་ལ་སོགས་པ་ལྷ་རྔུཚོགས་སྤྲུལ་ཏེ། རིན་ཆེན་པདྨ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱིས་མཆོད་ལ། དེ་ནས་ཕྱིས་ཇི་སྲིད་དུ་རང་བཞིན་གྱིས་རྣམ་པར་དག་པའི་ཏིང་ངེ་འཛིན་ཐོབ་པར་འགྱུར་རོ། །འགྲོ་བ་དམ་པ་འཇིག་པར་
[154b.3]འགྱུར་བ་ལ་དམིགས་པའི་ཏིང་ངེ་འཛིན་ཡང་ཐོབ་པར་འགྱུར་རོ། །རྡོ་རྗེ་སྙིང་པོའི་ཏིང་འཛིན་གྱིས། །ལས་ཀྱི་ཕྱག་རྒྱ་བཅིངས་ནས་ནི། །སངས་རྒྱས་ཐམས་ཅད་མཆོད་གྱུར་ན། །སྐད་ཅིག་ཏུ་ནི་དོན་ཀུན་ཐོབ། །ཅེས་བྱ་བ་ནི་སྔ་མ་བཞིན་རིན་ཆེན་ཆར་འབེེབས་དང་། དེའི་རིགས་ཀྱི་རྣལ་
[154b.4]འབྱོར་བྱས་ལ་ལས་ཀྱི་དཀྱིལ་འཁོར་ལས་གསུངས་པའི་དེའམ། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། ཨོཾ་རཏྣ་པཱུ་ཛ་ཀརྨྨ་སརྦྦ་ཨརྠ་ན་མེ་དྷ་དེ། ཞེས་བརྗོད་ཅིང་འདིར་རིན་ཆེན་ཆར་འབེེབས་སམ་དེའི་རིགས་སུ་བདག་ཉིད་ངེས་པར་བྱས་ཏེ། རང་གི་སྙིང་གར་ནོར་བུ་རིན་ཆེན་ཆར་འབེེབས་ལ་སོགས་
[154b.5]པ་ལྷ་མོའི་ཚོགས་སྤྲུལ་ལ་རིན་ཆེན་ཆར་འབེེབས་ལ་སོགས་པ་དེ་བཞིན་གཤེགས་པ་ཐམས་ཅད་ཇི་སྲིད་དུ་མཆོད་པ་དེའི་ཚེ་རིན་ཆེན་ཆར་འབེབས་ལ་སོགས་པས་སྐད་ཅིག་ཏུ་དོན་ཀུན་ཐོབ་པར་འགྱུར་རོ། །དེ་ནས་ཞེས་བྱ་བ་ནི་རྗེས་ཐོགས་ཉིད་ལ་བརྗོད་པའོ། །རང་གི་ལྷའི་རྣལ་འབྱོར་གྱིས་དབང་པོ་
[154b.6]གཉིས་སྙོམས་པར་འཇུག་པ་བསྒོམ་པའི་ཕྱག་རྒྱ་ནི། གསང་བའི་ཕྱག་རྒྱ་ཞེས་བྱ་བའི་དོན་ཏོ། །དེ་ཉིད་ཀྱི་ལས་དེར་ངེས་པའི་ཡེ་ཤེས་སུ་འགྱུར་བའོ། །རྡོ་རྗེ་སྙིང་པོའི་ཏིང་འཛིན་གྱིས། །དབང་པོ་གཉིས་ནི་མཉམ་སྦྱར་ནས། །སངས་རྒྱས་ཐམས་ཅད་མཆོད་ན་ནི། །འཇིག་རྟེན་ཐམས་
[154b.7]ཅད་དེས་མ་གུར་འགྱུར། །ཞེས་བྱ་བ་ནི་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་འདོད་པའི་ལྷའི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་རིག་པ་བརྗོད་ཅིང་བདག་ཉིད་རང་
[155a]
[155a.1]གི་ལྷའི་གཟུགས་སུ་བསྒོམས་ཏེ། རང་གི་རིག་པའི་ལྷ་མོ་མདུན་དུ་སྤྲུལ་ལ། བསྡུ་བ་ལ་སོགས་པའི་ཆོ་ག་རྗེས་སུ་སྤྱད་དེ། དེ་དང་ལྷན་ཅིག་པའི་སྦྱོར་བས་ཉིན་རེ་ཞིང་ཐུན་བཞིར་ཇི་སྲིད་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་
[155a.2]སྤྲོ་བ་དང་བསྡུ་བའི་སྦྱོར་བས་ཟླ་བ་གཅིག་བསྒོམས་ལ། མཐར་མཚན་ཐོག་ཐག་བསྒོམས་ན་འཇིག་རྟེན་པ་ཐམས་ཅད་རིན་པོ་ཆེའི་རིགས་ཐམས་ཅད་ཀྱི་རང་བཞིན་དུ་བསྒྲུབས་ནས་རྣལ་འབྱོར་པས་མགུ་བར་བྱས་ན་དབང་དུ་བྱེད་པར་འགྱུར་རོ། །དེ་ནས་དོན་ཐམས་ཅད་གྲུབ་པ་ལ་སོགས་
[155a.3]པའི་ལྷ་མོའི་དེའི་སྐུ་དང་མཉམ་པར་སྦྱར་བར་བྱས་ལ་འཇུག་པར་བྱའོ། །དེའི་རྗེས་ལ་དེ་དོན་ཐམས་ཅད་གྲུབ་པ་དང་འདྲ་བར་འགྱུར་རོ། །དེ་ལྟ་བུའི་གསང་བའི་དམ་ཚིག་གི་ལས་ཀྱི་ཡེ་ཤེས་བསྟན་ནས། ད་ནི་ནོར་བུ་ཆེན་པོའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་
[155a.4]ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། དཀྱིལ་འཁོར་ལ་སོགས་པའི་ལྷ་རྣམས་སྤྱན་དྲངས་ནས། བསྒྲུབ་པར་བྱའོ་ཞེས་བྱ་བའི་དོན་བསྟན་
[155a.5]པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བའི་རྗེས་ཐོགས་ལ་ཞེས་བྱ་བའི་དོན་ཏོ། །ཇི་ལྟ་བའི་ཕྱག་རྒྱ་ཆེན་པོའི་ཡེ་ཤེས་ཀྱི་དངོས་གྲུབ་དམ་པར་འགྱུར་རོ་ཞེས་བྱ་བ་ནི་ཇི་ལྟར་རྡོ་རྗེ་དབྱིངས་ཀྱི་ལས་ཀྱི་དཀྱིལ་འཁོར་དུ་ཕྱག་མཚན་དང་བཅས་པའི་ལག་པ་གཉིས་
[155a.6]ཀྱིས་སྙིང་ག་ལ་སོགས་པའམ། གཞན་དུ་ཕྱག་རྒྱ་ཆེན་པོར་བསྒོམས་པར་རྡོ་རྗེ་སེམས་དཔའ་ལ་སོགས་པའི་དངོས་གྲུབ་སྩོལ་བ་དེ་བཞིན་དུ། འདིར་ཡང་ནོར་བུའི་མཚན་མ་ལ་སོགས་པ་སྟེར་བར་འགྱུར་རོ་ཞེས་བྱ་བ་དེའི་ཕྱག་རྒྱ་ཆེན་པོའི་ཡེ་ཤེས་དེའི་དངོས་གྲུབ་དམ་པར་འགྱུར་རོ་ཞེས་བྱ་བ་
[155a.7]ལ་སོགས་པ་གསུངས་སོ། །དེ་ལ་ཕྱག་རྒྱ་ཆེན་པོའི་མཚན་ཉིད་ནི་འདི་ཡིན་ཏེ། རང་གི་མཚན་མ་དང་བཅས་པའི་ལག་པ་གཉིས་ཀྱིས། སྙིང་ག་རྩིབ་ལོགས་རྒྱབ་སྦྱར་བ། །དཔྲལ་བ་ལ་སོགས་དེ་བཞིན་དུ། །ཁ་དང་རྣ་བ་མགོ་ལྟག་པ། །སྤྱི་བོར་ཕྲག་པ་ཁ་རྐེད་གཞག །ཅེས་བྱ་བ་འདི་ནི་
[155b]
[155b.1]ནོར་བུའི་གཟུགས་མའི་དམ་ཚིག་གི་ལྷ་མོ་ནས་བརྩམས་ཏེ། ནོར་བུ་ཁུ་ཚུར་གྱི་མཐར་ཐུག་པའི་ཕྱག་རྒྱ་ཆེན་པོར་འགྱུར་རོ། །ལྷག་མ་ནི་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་བཤད་པ་ཡིན་པར་ཤེས་པར་བྱའོ། །ད་ནི་དེ་ནས་ཕྱག་རྒྱ་ཆེན་པོ་བཅིངས་པའི་རྗེས་ཐོགས་ཉིད་ལ་
[155b.2]དམ་ཚིག་གི་ཕྱག་རྒྱ་ཡེ་ཤེས་བཅིང་བ་བསླབ་ཅིང་བསྟན་པའོ། །རྡོ་རྗེ་རིན་ཆེན་བཅིངས་ནས་ནི། །ཞེས་བྱ་བ་ནི་རྡོ་རྗེ་དབྱིངས་ལས་གསུངས་པའི་འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱ་བཅིངས་ལ། ཐམས་ཅད་ཀྱི་གནས་ཀུན་དུ་འདི་རྣམས་གཞག་པར་བྱའོ། །ཇི་ལྟར་
[155b.3]གཞག་པར་བྱ་ཞེ་ན། རྡོ་རྗེ་དགེས་པའི་ཚུལ་དུ་ནི། །ལྟག་འོག་གོ་རིམས་ཇི་བཞིན་དུ། །ཞེས་བྱ་བ་སྨོས་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ལས་གསུངས་པའི་ཚུལ་གྱིས་རྡོ་རྗེ་དགེས་མཆོག་གི་སྦྱོར་བ་དེས། སྙིང་གའི་རྩིབ་ལོགས་རྒྱབ་སྦྱོར་བ། །དཔྲལ་བ་ལ་སོགས་དེ་བཞིན
[155b.4]དུ། །ཁ་དང་རྣ་བ་མགོ་ལྟག་པ། །སྤྱི་བོ་ཕྲག་པ་ཁ་རྐེད་གཞག །ཅེས་བྱ་བ་འདི་ནི། །ལྟག་འོག་གོ་རིམས་ཇི་བཞིན་བྱ། །ཞེས་བྱ་བའི་སྒྲའི་དོན་ཡིན་ནོ། །ལྷག་མ་རྣམས་ཀྱི་དམ་ཚིག་གི་ཕྱག་རྒྱ་ནི་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་བཤད་པ་ཉིད་ཡིན་པར་ཤེས་པར་བྱའོ། །
[155b.5]དེ་ནས་ཆོས་ཀྱི་ཕྱག་རྒྱའི་ཡེ་ཤེས་ནི་གོ་སླའོ། །ཏྭ་ཞེས་བྱ་བ་ནི་དོན་ཐམས་ཅད་གྲུབ་པ་དང་། ནོར་བུའི་མཚན་མ་དང་། རྡོ་རྗེ་ནོར་བུ་མའི་གནས་ཀྱི་ལྷ་མོ་རྣམས་ཀྱི་ཆོས་ཀྱི་ཕྱག་རྒྱའོ། །ཛ་ཞེས་བྱ་བ་ནི་རིན་ཆེན་རྒྱལ་པོའི་ལྷ་མོའིའོ། །ག་ཞེས་བྱ་བ་ནི་རིན་ཆེན་ཆགས་པའི་ལྷ་མོའིའོ། །དྷུ་ཞེས་བྱ་བ་ནི་རིན་
[155b.6]ཆེན་ལེགས་པའི་ལྷ་མོའིའོ། །ཏྣ་ཞེས་བྱ་བ་ནི་རིན་ཆེན་ལྟ་བའམ། དེ་བཞིན་གཤེགས་པ་ཐམས་ཅད་ཀྱིས་ཕྲེང་བའི་དབང་བསྐུར་དང་། རིན་ཆེན་མྱུ་གུའི་གནས་རྣམས་ཀྱི་ལྷ་མོའིའོ། །ཛ་ཞེས་བྱ་བ་ནི་ནོར་བུ་ཉི་མའི་ལྷ་མོའིའོ། །ཏུ་ཞེས་བྱ་བ་ནི་ནོར་བུ་དཔལ་གྱི་ལྷ་མོའིའོ། །ས་ཞེས་བྱ་བ་ནི་རིན་ཆེན་བཤད་པའི་ལྷ་མོའིའོ། །ཏྨ་ཞེས་
[155b.7]བྱ་བ་ནི་རིན་ཆེན་པདྨ་གཏོང་བའི་ཏིང་ངེ་འཛིན་ཡེ་ཤེས་ཀྱི་སྙིང་པོ་དང་། རིན་ཆེན་པདྨའི་གནས་རྣམས་ཀྱི་ལྷ་མོའིའོ། །ཀྵྞ་ཞེས་བྱ་བ་ནི་རིན་ཆེན་རྣོན་པོའི་ལྷ་མོའིའོ། །ཏུ་ཞེས་བྱ་བ་ནི་ནོར་བུའི་འཁོར་ལོའིའོ། །ཥ་ཞེས་བྱ་བ་ནི་རིན་ཆེན་གསུང་བའིའོ། །རྨ་ཞེས་བྱ་བ་ནི་རིན་ཆེན་ཆར་འབེབས་དང་། ནོར་བུ་མཆོད་པ་
[156a]
[156a.1]དང་། རིན་ཆེན་ཆར་རྒྱུན་མའི་གནས་རྣམས་ཀྱི་ལྷ་མོའིའོ། །ཀྵ་ཞེས་བྱ་བ་ནི་ནོར་བུ་བསྲུང་བའི་ལྷ་མོའིའོ། །ཀྲི་ཞེས་བྱ་བ་ནི་ནོར་བུ་གནོད་སྦྱིན་གྱི་ལྷ་མོའིའོ། །དྷི་ཞེས་བྱ་བ་ནི་ནོར་བུ་ཁུ་ཚུར་གྱི་ལྷ་མོའིའོ། །ལྷག་མ་ནི་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་
[156a.2]བཤད་པ་ཉིད་ཡིན་པར་ཤེས་པར་བྱའོ། །རྡོ་རྗེ་རིན་ཆེན་གཉིས་བྱས་ལ། །ལས་ཀྱི་ཕྱག་རྒྱ་དེ་བསྒྲུབ་བོ། །ཞེས་བྱ་བ་ནི་ནོར་བུ་ཁུ་ཚུར་གྱི་གནས་སུ་བཞད་པའི་རྡོ་རྗེ་རིན་ཆེན་གྱི་ཕྱག་རྒྱ་གཉིས་སུ་བྱས་ན་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་མཐར་ཐུག་པའི་ལས་ཀྱི་ཕྱག་
[156a.3]རྒྱ་སྟེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་བཅིང་བར་བྱའོ་ཞེས་བྱ་བའི་དོན་ཏོ། །དོན་ཐམས་ཅད་གྲུབ་པའི་ལས་ཀྱི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་ནོར་བུ་ཆེན་པོའི་རིགས་ཀྱིས་འདུལ་བའི་ཕྱག་རྒྱ་ཆེན་པོ་ལ་དགའ་བའི་སེམས་
[156a.4]ཅན་གྱི་ཁམས་ལས་བརྩམས་ནས་ནི། ནོར་བུ་ཆེན་པོའི་རིགས་ཀྱི་དཀྱིལ་འཁོར་རྣམ་བཞིས་ཕྱག་རྒྱ་ཆེན་པོ་བསྟན་ནས། ད་ནི་རྒྱ་ཆེ་བས་སྐྲག་པ་བར་མ་ལ་དགའ་བའི་སེམས་ཅན་གྱི་ཁམས་ལ་བརྩམས་ནས་ནོར་བུ་ཆེན་པོའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་གྱི་རང་གི་རིགས་ཀྱི་དངོས་
[156a.5]གྲུབ་ཐམས་ཅད་ཀྱི་དམ་ཚིག་བསྡུ་བར་གྱུར་པ་ནི། དེ་ནས་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་དོན་ཏོ། །འདིར་དང་པོ་སྦྱོར་བའི་ཏིང་ངེ་འཛིན་ནི་དོན་ཐམས་ཅད་གྲུབ་པའི་དཀྱིལ་འཁོར་
[156a.6]ཆེན་པོ་ལས་བཤད་པའི་དང་པོ་སྦྱོར་བའི་ཏིང་ངེ་འཛིན་ཉིད་ཡིན་ནོ། །བཅོམ་ལྡན་འདས་ནི་རྣམ་པར་སྣང་མཛད་དོ། །དོན་ཐམས་ཅད་གྲུབ་པའི་ཐུགས་ཀའི་ཟླ་བ་ལ་གནས་པའི་རྡོ་རྗེ་རིན་པོ་ཆེའི་རིན་ཆེན་ཕྱག་རྒྱ་དེ་ལ་དམིགས་པའོ། །ཏིང་ངེ་འཛིན་རིན་ཆེན་ཕྱག་རྒྱ་ཞེས་བྱ་བ་དེ་ལ་སྙོམས་པར་
[156a.7]ཞུགས་ཤིང་མངོན་སུམ་དུ་མཛད་ནས་སོ། །འདི་ཞེས་བྱ་བ་ནི་བློ་ལ་གནས་པའོ། །རིག་པ་དམ་པ་འདི་གསུངས་པ་ནི་བཤད་པའོ། །འདི་སྐད་སྟོན་པ་ཡིན་ཏེ། བཅོམ་ལྡན་འདས་རྣམ་པར་སྣང་མཛད་ནོར་བུ་ཆེན་པོའི་རིགས་ཀྱི་གཟུགས་ཅན་རང་གི་ཕྱག་རྒྱ་བཞི་པའི་དཀྱིལ་འཁོར་སྤྲུལ་
[156b]
[156b.1]པའི་ཕྱིར་དོན་ཐམས་ཅད་གྲུབ་པའི་ཐུགས་ཀུ་ན་གནས་པའི་རྡོ་རྗེ་རིན་པོ་ཆེའི་རྣམ་པ་ཐུགས་རྩེ་གཅིག་ཏུ་མཛད་ནས་རིག་པ་དམ་པ་འདི་གསུངས་པས་འཕགས་པ་ནམ་མཁའི་སྙིང་པོ་ལ་བསྐུལ་བ་དང་། དེ་ནས་འཕགས་པ་ནམ་མཁའི་སྙིང་པོས་རང་གི་ཐུགས་ཀ་ན་གནས་པའི་རྡོ་རྗེ་རིན་པོ་ཆེ་ལས་
[156b.2]དཀྱིལ་འཁོར་སྤྲུལ་ནས། དེ་བཞིན་གཤེགས་པ་ཐམས་ཅད་ལ་སྔ་མ་བཞིན་དུ་ཕུལ་ལོ་ཞེས་བྱའོ། །དེ་ལྟར་རེ་ཞིག་རྣམ་པར་སྣང་མཛད་ཀྱི་ནོར་བུའི་གཟུགས་ཅན་ཕྱག་རྒྱ་བཞི་པའི་དཀྱིལ་འཁོར་བྲི་བར་བྱའོ། །དེ་ནས་ཕྱག་ན་རྡོ་རྗེས་རང་གི་ཕྱག་རྒྱ་འདི་གསུངས་པས་དོན་ཐམས་ཅད་གྲུབ་
[156b.3]པའི་ཕྱག་རྒྱ་བཞི་པའི་དཀྱིལ་འཁོར་དུ་འགྱུར་རོ། །དེ་ནས་རྡོ་རྗེ་སྙིང་པོས་རང་གི་ཕྱག་རྒྱ་འདི་གསུངས་པས་རིན་ཆེན་ལྟ་བའི་ཕྱག་རྒྱ་བཞི་པའི་དཀྱིལ་འཁོར་དུ་འགྱུར་རོ། །དེ་ནས་རྡོ་རྗེ་སྤྱན་གྱིས་རང་གི་ཕྱག་རྒྱ་འདི་གསུངས་པས་རིན་ཆེན་པདྨའི་ཕྱག་རྒྱ་བཞི་པའི་དཀྱིལ་འཁོར་དུ་འགྱུར་རོ། །
[156b.4]རྡོ་རྗེ་སྣ་ཚོགས་ཀྱིས་རང་གི་ཕྱག་རྒྱ་འདི་གསུངས་པས་རང་གི་སྙིང་གར་གནས་པའི་རྡོ་རྗེ་རིན་པོ་ཆེ་ལས་རིན་ཆེན་ཆར་འབེེབས་ཀྱི་ཕྱག་རྒྱ་བཞི་པ་སྤྲུལ་ནས། དེ་བཞིན་གཤེགས་པ་ཐམས་ཅད་སྔ་མ་བཞིན་དུ་ཕུལ་བ་ཡིན་ནོ་ཞེས་བྱ་བའི་གཞུང་འདི་ཙམ་གྱིས་ནི་ནོར་བུ་ཆེན་པོའི་རིགས་ཀྱི་ཕྱག་
[156b.5]རྒྱ་བཞི་པའི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་པོ་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ལ་སོགས་པ་ནི་སྔ་མ་བཞིན་དུ་ལས་ཀྱི་ཕྱག་རྒྱ་ཆེན་པོ་མཆོག་ཅེས་བྱ་བའི་ཏིང་ངེ་འཛིན་ལྔ་པོ་གསུངས་པ་ཡིན་ནོ། །དོན་ཐམས་ཅད་གྲུབ་པའི་དུམ་བུ་
[156b.6]ལས་གསུངས་པའི་དངོས་གྲུབ་རྣམས་ནི་དོན་ཐམས་ཅད་གྲུབ་པའི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་རྣམས་ཀྱིས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བ་ནི་དེ་མ་ཐག་པའི་
[156b.7]བརྗོད་པ་སྟེ། སྔོན་དུ་བསྙེན་པའི་རྗེས་ཐོགས་ལའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་དོན་ཐམས་ཅད་གྲུབ་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ཏེ། དེ་ནས་ཕྱག་རྒྱ་བཞི་པའི་
[157a]
[157a.1]ཏིང་ངེ་འཛིན་རྣམ་པ་གསུམ་ནས་བརྩམས་ཏེ་ཉིན་རེ་ཞིང་ཐུན་བཞིའི་སྦྱོར་བས་ཟླ་བ་གཅིག་གམ་ཟླ་བ་དྲུག་གམ་ལོ་གཅིག་གི་བར་དུ་ཇི་སྲིད་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །རྗེས་སུ་གནང་བ་ཐོབ་ནས་རང་གི་དཀྱིལ་འཁོར་བྲིའོ་ཞེས་གསུངས་
[157a.2]པས་ན་དེ་ནས་དེའི་རྗེས་ཐོགས་ལ་དཀྱིལ་འཁོར་འདི་བྲི་བར་བྱའོ། །དེ་ནས་ཞེས་བྱ་བ་ནི་གཏན་ཚིགས་སྟོན་པ་སྟེ། གང་གི་ཕྱིར་ཕྱག་རྒྱ་བཞི་པའི་དཀྱིལ་འཁོར་དུ་འཇུག་པ་མེད་ན་བར་མ་ལ་དགའ་བའི་སེམས་ཅན་གྱི་དོན་རྫོགས་པར་མི་འགྱུར་བ་དེའི་ཕྱིར་རབ་ཏུ་བཤད་པར་བྱའོ། །ཕྱག་རྒྱ་བཞི་པའི་
[157a.3]དཀྱིལ་འཁོར་རོ། །དམ་པ་ནི་གཙོ་བོར་གྱུར་པ་སྟེ། དངོས་གྲུབ་ཐམས་ཅད་ཀྱི་དམ་ཚིག་ཏུ་གྱུར་པ་ན་རིགས་ཐམས་ཅད་ཀྱི་དཀྱིལ་འཁོར་ལས་དམ་པར་གྱུར་པའི་ཕྱིར། ཕྱག་རྒྱ་བཞི་ཡི་ཚུལ་དུ་ན། །དཀྱིལ་འཁོར་ཡོངས་སུ་བརྟག་པར་བྱ། །ཞེས་བྱའོ། །དོན་ཐམས་ཅད་གྲུབ་པའི་དཀྱིལ་འཁོར་
[157a.4]ཆེན་པོ་ལས་བཤད་པ་བཞིན་དུ་ཕྱི་དང་ནང་གི་དཀྱིལ་འཁོར་བྲིས་ནས། དཀྱིལ་འཁོར་གྱི་ལྟེ་བའི་དབུས་སུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་གདན་དང་། སྐུ་མདོག་དང་། དབྱིབས་ལ་སོགས་པ་དང་ལྡན་པའི་རྣམ་པར་སྣང་མཛད་བྲི་བར་བྱའོ། །ཨོཾ་བཛྲ་རཏྣ་ནེེ་ཏྲེ་
[157a.5]ཞེས་བྱ་བ་འདིའི་རིག་པ་འདིའམ། ཨོཾ་པུ་ཧེ་རཏྣ་ཧཱུཾ་ཞེས་བྱ་བའོ། །དོན་ཐམས་ཅད་གྲུབ་པའི་གནས་སུ་པདྨ་དང་ཟླ་བའི་སྟེང་དུ། ཨོཾ་བཛྲ་མ་ཎི་ཧཱུཾ་ཞེས་བྱ་བས་ནི་རྡོ་རྗེ་ནོར་བུའོ། །རིན་ཆེན་ལྟ་བའི་གནས་སུ། ཨོཾ་བཛྲ་རཏྣ་ཨཾ་ཀུ་ར་ཧཱུཾ། ཞེས་བྱ་བས་རྡོ་རྗེ་རིན་ཆེན་མྱུ་གུའོ། །རིན་ཆེན་པདྨའི་གནས་སུ།
[157a.6]ཨོཾ་བཛྲ་རཏྣ་པདྨ་ཧཱུཾ། ཞེས་བྱ་བས་རིན་ཆེན་པདྨའོ། །རིན་ཆེན་ཆར་འབེབས་ཀྱི་གནས་སུ། ཨོཾ་རཏྣ་བཪྵ་ཧཱུཾ། ཞེས་བྱ་བས་རིན་ཆེན་ཆར་འབེབས་ཀྱིའོ། །ཟླ་བ་དང་པདྨའི་སྟེང་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་མཚན་ཉིད་ཅན་བྲིས་ལ། ཕྱག་རྒྱ་བཞི་པའི་ཚུལ་
[157a.7]གྱིས་དཀྱིལ་འཁོར་བརྟག་པར་བྱའོ། །དེ་ནས་ཇི་ལྟ་བ་བཞིན་དུ་བཅུག་སྟེ་བསླབ་པར་བྱའོ། །ཁྱོད་ཀྱིས་སུ་ལ་ཡང་མ་སྨྲ་ཅིག་ཅེས་བསྒོ་བར་བྱའོ་ཞེས་བྱ་བ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་སློབ་དཔོན་རང་ཉིད་འཇུག་པའི་ཆོ་ག་རྗེས་སུ་སྤྱད་ལ། བདག་ལ་
[157b]
[157b.1]བྱིན་གྱིས་བརླབ་པ་ལ་སོགས་པ་དང་། རང་གི་མིང་ནས་བརྗོད་ཅིང་དཀྱིལ་འཁོར་རྡོ་རྗེ་བསྒྲུབས་ལ། བསྡུ་བ་ལ་སོགས་པ་བྱས་ཏེ་མཆོད་པ་ཐམས་ཅད་ཀྱིས་དཀྱིལ་འཁོར་པ་ཐམས་ཅད་ཇི་ལྟ་བ་བཞིན་དུ་མཆོད་ལ་ཕྱག་བྱས་ཏེ་ཞུགས་ནས་གནང་བ་ནོད་པར་བྱའོ། །དེ་ནས་དོན་ཐམས་ཅད་གྲུབ་
[157b.2]པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རིན་པོ་ཆེའི་སློབ་མ་བཅུག་སྟེ། ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པ་ནི་གཞུང་འདིས་གསུངས་པ་ཡིན་ནོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་དང་། སློབ་མ་འཇུག་
[157b.3]པའི་ཆོ་ག་རྒྱས་པར་བསྟན་ནས། ད་ནི་ནོར་བུ་ཆེན་པོའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ། དོན་ཐམས་ཅད་གྲུབ་པའི་དུམ་བུ་ལས་གསུངས་པའི་དངོས་གྲུབ་རྣམས་སློབ་དཔོན་གྱིས་བཤད་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་
[157b.4]ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་སློབ་མ་འཇུག་པའི་ཆོ་ག་བསྟན་པའི་རྗེས་ཐོགས་ལའོ། །ཡེ་ཤེས་བསྐྱེད་པར་བྱ་སྟེ་ཞེས་བྱ་བ་ནི་རྡོ་རྗེ་རིན་ཆེན་སྒྲུབ་པའི་མན་ངག་ཡིན་པས་ཤེས་པར་བྱའོ། །རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུ་རིན་པོ་ཆེའི་རྡོ་རྗེ་རིན་ཆེན་
[157b.5]ཏེ། དེ་བསྒྲུབ་ཅིང་སྤྲུལ་པར་བྱེད་པའོ། །གང་གིས་ཤེ་ན། རྡོ་རྗེ་རིན་ཆེན་ཏིང་འཛིན་གྱིས་སོ། །རྡོ་རྗེ་རིན་པོ་ཆེའི་རྣམ་པར་ཐུགས་རྩེ་གཅིག་ཏུ་མཛད་པའི་རྡོ་རྗེ་རིན་པོ་ཆེའི་ཏིང་ངེ་འཛིན་ཏོ། །རྡོ་རྗེ་རིན་པོ་ཆེའི་ཏིང་ངེ་འཛིན་གང་དུ་བྱ་ཞེ་ན། དཔྲལ་བར་རབ་ཏུ་བཞག་ན་ནི། །ཞེས་བྱ་བ་སྨོས་
[157b.6]ཏེ། དཔྲལ་བའི་དཀྱིལ་འཁོར་གྱི་སྟེང་དུ་ཡི་གེ་ཏྲས་སྤྲུལ་ལ་གཞག་པར་བྱའོ། །དེ་ལྟར་གྱུར་པས་ཅི་ཞིག་བྱ་ཞེ་ན། དངོས་གྲུབ་ཐམས་ཅད་ཐོབ་པར་འགྱུར། །ཞེས་བྱ་བ་སྨོས་ཏེ། དབང་བསྐུར་བའི་དངོས་གྲུབ་ཐོབ་པར་འགྱུར་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། དོན་
[157b.7]ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དེ་འདོད་པའི་ལྷའི་རྣལ་འབྱོར་བྱས་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བྱས་ཏེ། ལྷ་ཐམས་ཅད་ཀྱི་ཕྱག་རྒྱ་དེ་ལས་བཤད་པ་བཅིངས་ཏེ། རང་གི་དཔྲལ་བའི་གནས་སུ་ཟླ་བའི་དཀྱིལ་འཁོར་གྱི་སྟེང་དུ་
[158a]
[158a.1]ཡི་གེ་ཏྲ་ལས་རྡོ་རྗེ་རིན་པོ་ཆེ་གསེར་གྱི་མདོག་ཅན་སྤྲུལ་ལ། ཨོཾ་བཛྲ་རཏྣ་ཨ་བྷི་ཥེ་ཀ་སརྦྦ་སིདྡྷི་ཡོ་མེ་པྲ་ཡཙྪ་ར་ལ་ར་ལ་ཧཱུཾ་ཏྲ། ཞེས་བྱ་བའི་སྙིང་པོ་འདི་བརྗོད་ཅིང་ཉིན་རེ་བཞིན་དུ་ཐུན་བཞིའི་སྦྱོར་བས་ཇི་སྲིད་དུ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་ཐུན་བཞིའི་སྦྱོར་
[158a.2]བས་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བསྒོམས་ན་འདོད་པའི་ལྷའི་དངོས་གྲུབ་ཐོབ་པར་འགྱུར་རོ། །དེ་ནས་དེའི་རྗེས་ལ་མཉམ་པར་སྦྱོར་བ་གསང་བའི་བསྒོམ་པའི་ངོ་བོའི་ཕྱག་རྒྱའི་ཡེ་ཤེས་བསླབ་པར་བྱའོ། །ཁྱོའམ་ཡང་ན་སྡུག་པའམ། །བུད་མེད་དང་ནི་སྐྱེས་པའང་
[158a.3]རུང་། །དཔྲལ་བ་གཉིས་ནི་སྦྱར་བ་དང་། །སྤྲད་པས་གཉིས་ཀ་འགྲུབ་པར་འགྱུར། །ཞེས་བྱ་བ་ལ། དེ་ལ་ཁྱོ་ནི་དོན་ཐམས་ཅད་གྲུབ་པ་ལ་སོགས་པའི་སྐྱེས་བུའོ། །སྡུག་པ་ནི་ལས་ཀྱི་དཀྱིལ་འཁོར་ལས་བཤད་པའི་གཟུངས་ཀྱི་ལྷ་མོ་སྟེ། རིག་པའི་ལྷ་མོ་རིན་ཆེན་ཕྲེང་བ་མ་ལ་
[158a.4]སོགས་པ་དང་། མཆོད་པའི་ལྷ་མོ་ཐམས་ཅད་དོ། །དེ་ལྟར་ཁྱོ་དེའི་གཟུགས་སམ། སྡུག་པའི་གཟུགས་སུ་ཇི་ལྟ་བར་བཤད་པ་དེ་གལ་ཏེ་འགའ་ཞིག་སྒྲུབ་པར་འདོད་ན་སྐྱེས་པའམ། བུད་མེད་དམ། ཁྱོའམ། སྡུག་པའི་དཔྲལ་བ་དང་རང་གི་དཔྲལ་བ་གཉིས་སྦྱར་ནས་དཔྲལ་བ་གཉིས་
[158a.5]མི་ཕྱེད་པར་བྱའོ། །ཇི་ལྟར་ཞེ་ན། སྤྲད་པས་ཞེས་བྱ་བ་སྨོས་ཏེ། ཡང་དག་པར་སྦྱར་བ་ཞེས་བྱ་བའི་ཐ་ཚིག་གོ། །ཅི་ཞིག་ཏུ་འགྱུར་ཞེ་ན། སྐྱེས་པ་དང་བུད་མེད་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། གལ་ཏེ་བུད་མེད་གང་ཞིག་བཅོམ་ལྡན་འདས་སམ་གཞན་གང་ཡང་རུང་བའི་
[158a.6]འཕགས་པ་ནམ་མཁའི་སྙིང་པོ་ཁྱོ་སྒྲུབ་པར་འདོད་པ་དེའི་ཚེ། དེས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ནོར་བུ་མ་ལ་སོགས་པ་རིག་པའི་ལྷ་མོའི་རྣལ་འབྱོར་བྱས་ཏེ། ཕྱིས་འཕགས་པ་ནམ་མཁའི་སྙིང་པོའམ་གཞན་གང་ཡང་རུང་བ་མདུན་དུ་སྤྲུལ་ལ།
[158a.7]བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་དེ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། དེ་ནས་གཞན་གང་ཡང་རུང་བའི་རིག་པའི་ལྷ་མོའི་ཕྱག་རྒྱ་ཡང་དག་པར་བཅིངས་ཏེ། དེས་བཅོམ་ལྡན་འདས་དང་ལྷན་ཅིག་མཉམ་པར་སྦྱར་བར་བསྒོམས་ལ། ཨོཾ་བཛྲ་རཏྣ་ས་
[158b]
[158b.1]ཁྱི་བ་དྷི་དྷ་རཏྭཾ་པྲ་ཡཙྪ་ཤཱི་གྷྲཾ་ཨ་བྷི་ཥིཉྩ་ཧི་ཧ་ཧ་ཧ་ཏྲ་ཞེས་བྱ་བ་འདི་བརྗོད་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ན་བཅོམ་ལྡན་འདས་ནམ་མཁའི་སྙིང་པོ་དང་དེས་ལྷན་ཅིག་མཉམ་པར་སྦྱར་བ་བྱས་ན་རང་གི་ཆུང་མ་དང་འདྲ་བར་འགྱུར་རོ། །སྐྱེས་པ་ཉིད་ཡིན་ན་སྦྱོར་བ་
[158b.2]འདིས་འཕགས་པ་ནམ་མཁའི་སྙིང་པོའི་ལྷ་མོ་མདུན་དུ་གཞག་ལ་བསྒྲུབ་པར་བྱའོ། །དེ་ལྟར་གསང་བའི་ཡེ་ཤེས་བསྐྱེད་པའི་ཕྱག་རྒྱ་བསྟན་ནས། ད་ནི་དོན་ཐམས་ཅད་གྲུབ་པའི་དུམ་བུ་ལས་བཤད་པའི་དངོས་གྲུབ་རྣམས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་
[158b.3]གི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་ནོར་བུ་ཆེན་པོའི་རིགས་ཐམས་ཅད་ཀྱི་ཕྱག་རྒྱ་སྟེ། ཐམས་ཅད་ཀྱི་ཕྱག་རྒྱའི་དམ་ཚིག་དང་། ཕྱག་རྒྱ་ཐམས་ཅད་ཀྱི་གསང་བ་དང་།
[158b.4]ཕྱག་རྒྱ་ཐམས་ཅད་ཀྱི་ཆོས་ཉིད་དང་། ཕྱག་རྒྱ་ཐམས་ཅད་ཀྱི་ལས་ཀྱི་དཀྱིལ་འཁོར་སྒྲུབ་པར་བྱེད་ན་གསང་བའི་ཕྱག་རྒྱ་མཆོག་ཡིན་ནོ་ཞེས་བྱ་བའི་དོན་ཏོ། །དེ་ལ་ཐམས་ཅད་ཀྱི་ཕྱག་རྒྱའི་དམ་ཚིག་ནི་འདི་ཡིན་ཏེ། བདག་ཉིད་ཆེན་པོ་གང་གང་གི། །ཕྱག་རྒྱ་གང་དང་གང་བཅིངས་
[158b.5]པ། །བཟླས་པའི་སྙིང་པོའི་དོན་དུ་ནི། །དེར་ནི་བདག་ཉིད་བསྒོམ་པར་བྱ། །ཞེས་བྱ་བ་དང་། དེ་ལ་ཕྱག་རྒྱ་ཐམས་ཅད་ཀྱི་གསང་བ་ནི་འདི་ཡིན་ཏེ། རང་གི་དབང་པོ་གཞིག་ནས་ནི། །རྡོ་རྗེ་བཅང་བས་བསྲུང་བར་བྱ། །དེ་ཡིས་ཕྱག་རྒྱ་གང་རེག་པ། །དེ་མ་ཐག་ཏུ་དེ་དབང་
[158b.6]འགྱུར། །དེ་ནས་ཕྱག་རྒྱ་ཐམས་ཅད་ཀྱི་ཆོས་ཉིད་ནི་འདི་ཡིན་ཏེ། རྡོ་རྗེ་ཕྲ་མོའི་ཚུལ་སྦྱར་ལ། །ཡེ་ཤེས་ཕྱག་རྒྱ་བཅིང་བར་བྱ། །ཆོ་ག་འདི་ཡི་ཚུལ་གྱིས་ནི། །ཡེ་ཤེས་ཕྱག་རྒྱ་དེ་དབང་འགྱུར། །དེ་ལ་ཕྱག་རྒྱ་ཀུན་གྱི་ལས་ནི་འདི་ཡིན་ཏེ། གླུ་དང་གར་དང་ཟས་དང་བྲོ། །སྤྱོད་
[158b.7]པ་ལ་སོགས་བདེ་བ་རྣམས། །སངས་རྒྱས་རྣམས་ལ་ཕུལ་ན་ནི། །ལས་ཀྱི་ཕྱག་རྒྱ་དབང་དུ་འགྱུར། །དེ་ལ་ནོར་བུ་ཆེན་པོའི་རིགས་ཀྱི་དཀྱིལ་འཁོར་ཐམས་ཅད་སྒྲུབ་པར་བྱེད་པ་ན་གསང་བའི་ཕྱག་རྒྱ་ནི་འདི་ཡིན་ཏེ། ཇི་ལྟར་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་
[159a]
[159a.1]བཤད་པ་དེ་བཞིན་དུ་དོན་ཐམས་ཅད་གྲུབ་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། དེ་ནས་སྟོང་གསུམ་པའི་སངས་རྒྱས་ཀྱི་ཞིང་གི་ཚད་དང་མཉམ་པའི་རང་གི་སྙིང་གའི་ཟླ་བའི་དཀྱིལ་འཁོར་དེའི་སྟེང་དུ་ནོར་བུའི་རྒྱུའི་ལས་ཀྱི་ཕྱག་རྒྱས་
[159a.2]དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་སྤྲུལ་ལ། རྣམ་པར་སྣང་མཛད་དང་། རྡོ་རྗེ་སེམས་དཔའ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་རྣམས་གོ་རིམས་ཇི་ལྟ་བ་བཞིན་དུ་ཕྱག་རྒྱ་ཆེན་པོ་བཅིངས་ཏེ། ཨོཾ་བཛྲ་རཏྣ་ཏྲཾ། ཨོཾ་བཛྲ་མཱ་ལེ་ཧཱུཾ། ཨོཾ་བཛྲ་མ་ཎི་རཏྣེ་ཧཱུཾ།
[159a.3]ཨོཾ་བཛྲ་དྷརྨྨ་རཏྣེ་ཧཱུཾ། ཨོཾ་བི་ཤྭ་བིཥྚ་ཧཱུཾ། ཞེས་བྱ་བའི་རིག་པ་དེ་རྣམས་བརྗོད་པས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་ལྷ་རྣམས་སྤྲུལ་ལ། ཨོཾ་བུདྡྷ་རཏྣ་ཧཱུཾ། ཨོཾ་བཛྲ་མ་ཎི་རཏྣ་ཨོཾ་ཀུ་ར་ཧཱུཾ། ཨོཾ་བཛྲ་རཏྣ་པདྨ་ཧཱུཾ། ཨོཾ་བཛྲ་རཏྣ་པཱ་ཤ་ཧཱུཾ། ཨོཾ་སརྦྦ་ཨརྦྦ་སིདྡྷི་པྲ་དཱ་ཧཱུཾ།
[159a.4]ཨོཾ་བཛྲ་རཏྣ་ཙིནྟཱ་ཨཱ་ཀཱ་ཤ་གརྦྷ་བྷ་ག་ཝཱན་སིདྡྷྱ་སིདྡྷྱ་ཧཱུཾ། ཨོཾ་རཏྣ་ཨོཾ་ཀུ་ཤ་ཡ་སརྦྦ་ཨརྠ་ཨ་ན་ཡེ་ཤཱི་གྷྲཾ་སརྦྦ་ཏ་ཐཱ་ག་ཏཱ་ས་ཏྱ་ཨ་ནུ་སྨཱ་ར་ཧཱུཾ། ཨོཾ་མ་ཎི་རཱ་ག་བ་ཤི་ཀུ་རུ་སརྦྦ་ཨརྠཱ་ན་ཡ་ཨཱ་ཀཱ་ཤ་གརྦྷ་ཧཱུཾ། ཨོཾ་བཛྲ་རཏྣ། ཨོཾ་མ་ཎི་རཏྣ་དུཥྚི་ཧཱུཾ། ཨོཾ་རཏྣ་དྲྀཥྚ་ཏྲཾ། ཨོཾ་སརྦྦ་ཏ་ཐཱ་ག་ཏ་ཨ་བྷི་ཥེ་ཀ་
[159a.5]རཏྣ་མཱ་ལ་ཧཱུཾ། ཨོཾ་མ་ཎི་སཱུཪྱ་ཧཱུཾ། ཨོཾ་ཙིནྟཱ་མ་ཎི་དྷ་ཛ་སརྦྦ་ཨཱ་ཤཱ་པ་རི་པཱུ་ར་ཀ་ཨཱ་ཀཱ་ཤ་གརྦྷ་ཧཱུཾ། ཨོཾ་བཛྲ་རཏྣ་ཨཊྚ་ཧ་ས་ཧ་ས་ཧཱུཾ། ཨོཾ་རཏྣ་པདྨ་ཧཱུཾ། ཨོཾ་ཏྱ་ག་ས་མ་དྷི་ཛྙཱ་ན་གརྦྷ་ཧཱུཾ། ཨོཾ་རཏྣ་གྷོ་ཥཱ་གྱ་ཧཱུཾ། ཨོཾ་མ་ཎི་ཙཀྲ་པྲ་བརྟ་ཡ་ཧཱུཾ། ཨོཾ་རཏྣ་པཱ་ཤ་ཧཱུཾ། ཨོཾ་རཏྣ་དྲྀཥྚི་བཪྵ་ཡ་སརྦྦ་ཨརྠ་སཾ་བྷ་དེ་བྷ་ག་
[159a.6]ཝཱན་མ་ཎི་ཧ་སྟ་ཧཱུཾ། ཨོཾ་མ་ཎི་པཱུ་ཛ་ས་མ་ཡ་ཧཱུཾ། ཨོཾ་མ་ཎི་བྷནྡྷ་ཀ་བ་ཙེ་ཧཱུཾ། ཨོཾ་དཾཥྚྲཱཾ་ཀ་རཱ་ལ་མ་ཧཱ་ཡཀྵ། ཧ་ར་ཧ་ར་སརྦྦ་ཨརྠན་བི་ཥ་པ་ཧཱུཾ། ཨོཾ་མ་ཎི་རཏྣ་བིནྡྷ་ས་མ་ཡོ་ཧཱུཾ། ཨོཾ་རཏྣ་ར་ཏི་ཧཱུཾ། ཨོཾ་རཏྣ་མཱ་ལེ་ཧཱུཾ། ཨོཾ་རཏྣ་གཱི་ཏེ་ཧཱུཾ། ཨོཾ་རཏྣ་ནྲྀ་ཏེ་ཧཱུཾ། ཨོཾ་དྷཱུ་པ་རཏྣེ། ཨོཾ་པུཥྤ་མ་ཎི་ཧཱུཾ། ཨོཾ་རཏྣ་ཨཱ་ལོ་ཀི །ཨོཾ་མ་ཎི་གནྡྷི། ཨོཾ་སརྦྦ་
[159a.7]རཏྣ་ཨཱ་ཀཱ་ཤ །ཨཱཪྻ་ཨ་རུ་ན། མ་ཧཱ་སཏྭ་བྷ་ག་ཝཱནྟཾ་ཨཱ་ཀཱ་ཤ་གརྦྷ་ཙོ་ད་ཡ་ཤཱི་གྷྲཾ་ཧོ་ཛཿ། ཨོཾ་སརྦྦ་རཏྣ་པྲ་བེ་ཤ་ས་མ་ཡ་པྲ་བེ་ཤ་ས་མ་ཡཾ། མ་ཧཱ་མ་ཎི་རཱ་ཛ་ཀུ་ལཾ། རཏྣ་པཱ་ཤ་ཧཱུཾ། ཨོཾ་མ་ཎི་བནྡྷ་ཧཱུཾ། ཨོཾ་མ་ཎི་རཏྣ་ཨཱ་བེ་ཤ་ཨ། ཞེས་བྱ་བའི་སྙིང་པོ་འདི་རྣམས་ཀྱིས་རྣམ་པར་སྣང་
[159b]
[159b.1]མཛད་ལ་སོགས་པ་ནས། ནོར་བུ་རིན་ཆེན་འབེབས་པའི་མཐར་ཐུག་པ་རང་རང་གི་གནས་རྣམས་སུ་གཞག་པར་བྱའོ། །ཨོཾ་བཛྲ་ཨཱཏྨ་ཀོ྅ཧཾ། ཞེས་ལན་གསུམ་བརྗོད་ཅིང་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་བར་གྱི་མཐར་ཐུག་པའི་སྐུ་དང་གསུང་དང་ཐུགས་
[159b.2]རྡོ་རྗེའི་རང་བཞིན་བདག་ཡིན་ནོ་ཞེས་བསམ་པར་བྱ་བ་དང་། དེ་ནས་སྭ་བྷཱ་བ་ཤུདྡྷོ྅ཧཾ་ཞེས་ལན་གསུམ་བརྗོད་ཅིང་རྣམ་པར་སྣང་མཛད་ལ་སོགས་པ་ནས་ནོར་བུ་རིན་ཆེན་འབེབས་པའི་མཐར་ཐུག་པའི་ལྷ་རྣམས་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་གཟུགས་བརྙན་དང་མཚུངས་
[159b.3]བར་བདག་ཉིད་བསམ་པར་བྱའོ། །དེ་ནས་ཨོཾ་སརྦྦ་ས་མོ྅ཧཾ་ཞེས་ལན་གསུམ་བརྗོད་ཅིང་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་མཐར་ཐུག་པའི་ལྷ་ཐམས་ཅད་ཆོས་བདག་མེད་པར་བསམ་པའི་ཕྱིར། བདག་ཉིད་དང་ཡེ་ཤེས་གཅིག་ལས་བྱུང་བ་ནི་བདག་ཡིན་ནོ་ཞེས་
[159b.4]བྱ་བ་བསམ་པར་བྱའོ། །སརྦྦ་ཨརྠ་སིདྡྷི་མ་ཧཱ་མཎྜ་སྭ་བྷཱ་ཝ་ཨ་ཧཾ་སྭ་ཨོཾ། ཞེས་ང་རྒྱལ་བསྐྱེད་ལ། ཡང་བཅོམ་ལྡན་འདས་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་ཏེ། ཨོཾ་སརྦྦ་ཨརྠ་སིདྡྷི་པྲ་དཱ་ཧཱུཾ་ཞེས་བརྗོད་ཅིང་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་རང་བཞིན་
[159b.5]དུ་བདག་ཉིད་བསྒོམས་ཏེ། ལྷ་ཐམས་ཅད་ཀྱི་ཞལ་ནས། ཨོཾ་སརྦྦ་ཨརྠ་སིདྡྷི་པྲ་དཱ་ཧཱུཾ་ཞེས་བརྗོད་ཅིང་ངེས་པར་བརྗོད་ན་དེ་ལྟར་ཐམས་ཅད་འགྲུབ་པར་འགྱུར་རོ། །དེ་ལྟར་ཉིན་རེ་ཞིང་ལན་ཅིག་རྣལ་འབྱོར་ཆེན་པོ་བྱས་ལ། ཐུན་བཞིའི་སྦྱོར་བས་ཇི་སྲིད་དུ་དཀྱིལ་འཁོར་མངོན་སུམ་དུ་
[159b.6]མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཞག་བདུན་ཏིང་ངེ་འཛིན་རྣམ་པ་གསུམ་བསྒོམས་ལ། དཀྱིལ་འཁོར་བྲི་བར་བྱའོ། །དེ་ལྟར་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་རབ་ཏུ་བསྒྲུབས་ནས་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་སྒྲུབ་པ་སྔ་མ་
[159b.7]བཞིན་དུ་རྣལ་འབྱོར་ཆེན་པོ་སྔོན་དུ་འགྲོ་བས་རང་གི་སྙིང་གར་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་སྤྲུལ་ལ། ཨོཾ་མ་ཎི་རཏྣ་ནེ་ཏྲཾ། ཞེས་བྱ་བ་ལ་སོགས་པ་རིག་པ་ལྔ་སྤྲུལ་ལ། ཕྱིས་ཨོཾ་ཏྲཾ་ཞེས་བྱ་བ་ནས། ཨོཾ་མ་ཎི་རཏྣ་ཨཱ་བེ་ཤ་ཨཿཞེས་བྱ་བའི་བར་དུ་གཟུངས་ཀྱི་རིག་པ་
[160a]
[160a.1]རྣམས་ཀྱིས་བཅོམ་ལྡན་འདས་རྣམ་པར་སྣང་མཛད་ནས་བརྩམས་ནས། ནོར་བུ་རིན་ཆེན་འབེབས་པའི་བར་གྱི་གཟུངས་རྣམས་རང་རང་གི་གནས་རྣམས་སུ་བཞག་ལ་སྔ་མ་བཞིན་དུ་སྙིང་པོ་གསུམ་བརྗོད་ཅིང་། བཛྲ་ཨཱཏྨ་ཀོ་ཞེས་བྱ་བ་ལ་སོགས་པའི་དོན་གསུམ་བསྒོམས་
[160a.2]ནས་རིན་ཆེན་གསང་བའི་གཟུངས་ཀྱི་དཀྱིལ་འཁོར་གྱི་རང་བཞིན་བདག་ཡིན་ནོ་ཞེས་ང་རྒྱལ་བསྐྱེད་དེ། དེ་ཉིད་ཉིན་རེ་ཞིང་ཐུན་བཞིའི་སྦྱོར་བས་གཟུངས་ཀྱི་རིག་པ་ཐམས་ཅད་རེ་རེ་ཞིང་ཁྲི་ཁྲི་བཟླས་པར་བྱའོ། །ཕྱིས་ཞག་བདུན་གཟུངས་ཀྱི་དཀྱིལ་འཁོར་གྱི་ཏིང་ངེ་འཛིན་གསུམ་བསྒོམས་
[160a.3]ཏེ། དཀྱིལ་འཁོར་བྲིས་ན་དེ་ལྟར་གཟུངས་ཀྱི་དཀྱིལ་འཁོར་གྲུབ་པར་འགྱུར་རོ། །དེ་ནས་ཆོས་ཀྱི་དཀྱིལ་འཁོར་བསྒྲུབས་པས་སྔ་མ་བཞིན་དུ་རྣལ་འབྱོར་བྱས་ནས། དེ་བཞིན་དུ་རིག་པ་རྣམ་པ་ལྔས་རང་གི་སྙིང་གར་ནོར་བུ་རིན་པོ་ཆེའི་རིགས་ཀྱི་ཆོས་ཀྱི་དཀྱིལ་འཁོར་སྤྲུལ་ལ།
[160a.4]རང་གི་སྙིང་ག་ནས་སྣའི་ཁུང་བུ་ནས་དྲངས་ཏེ་སྣའི་རྩེ་མོར་བཀོད་ལ། ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་རྣམ་པར་སྣང་མཛད་ནས་བརྩམས་ནས། ནོར་བུ་འབེབས་པའི་མཐར་ཐུག་པའི་ཆོས་ཀྱི་དཀྱིལ་འཁོར་ལས་བཤད་པ་རྣམས་ལ་བཀོད་ལ།
[160a.5]བཛྲ་ཨཱཏྨ་ཞེས་བྱ་བ་ལ་སོགས་པའི་དོན་རྣམ་པ་གསུམ་སྔ་མ་བཞིན་དུ་བསྒོམས་ཏེ། རཏྣ་ཛྙཱ་ན་སྭ་བྷཱ་བ་ཨ་ཧོཾ་སྭོཾ་ཡོཾ་ཞེས་བྱ་བས་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་གྱི་ང་རྒྱལ་བསྐྱེད་དེ། ཆོས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་
[160a.6]ཏེ། དེའི་སྔགས་བརྗོད་ཅིང་ཉིན་རེ་ཞིང་ཐུན་བཞིའི་སྦྱོར་བས་ཟླ་བ་གཉིས་བསྒོམས་ཏེ། སྤྲོ་བ་དང་བསྡུ་བའི་སྦྱོར་བས་ཟླ་བ་གཅིག་བསྒོམས་ལ། དེ་ནས་ཞག་བདུན་ཆོས་ཀྱི་དཀྱིལ་འཁོར་གྱི་ཏིང་ངེ་འཛིན་རྣམ་པ་གསུམ་བསྒོམ་པར་བྱའོ། །དེ་ནས་བྲིས་པ་དེ་ལྟ་བུ་ཆོས་ཀྱི་དཀྱིལ་འཁོར་འགྲུབ་
[160a.7]པར་འགྱུར་རོ། །ལྷག་མ་ནི་རྡོ་རྗེ་དབྱིངས་ཀྱི་ཆོས་ཀྱི་དཀྱིལ་འཁོར་ལས་བཤད་པ་བཞིན་དུ་འདིར་ཡང་བསྒྲུབ་པར་ཤེས་པར་བྱའོ། །དེ་ནས་ལས་ཀྱི་དཀྱིལ་འཁོར་སྒྲུབ་པར་འདོད་པས་སྔ་མ་བཞིན་དུ་རྣལ་འབྱོར་ཆེན་པོ་བྱས་ལ། ནོར་བུས་མཚན་པའི་སྣ་ཚོགས་རྡོ་རྗེ་བཟུང་ནས། སངས་
[160b]
[160b.1]རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་རྙི་པ་ཏི་ཏྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ་ཞེས་བྱ་བའི་སྙིང་པོ་འདི་དང་། དེ་ནས་ཕྱག་རྒྱ་ནི་འདི་ཡིན་ཏེ། རྡོ་རྗེའི་ཕྱག་རྒྱ་གཉིས་བཅིངས་ལ། །དེ་
[160b.2]གཉིས་རྡོ་རྗེ་དམ་དུ་བྱ། །མཛུབ་མོས་མཐེ་ཆུང་བསྣོལ་བ་ནི། །རྡོ་རྗེ་དགོས་མཆོག་དཀྱིལ་འཁོར་རོ། །དེ་ནས་དངོས་གྲུབ་ཀྱི་རྡོ་རྗེའི་བརྟུལ་ཞུགས་སྔ་མ་བཞིན་དུ་བཟུང་ལ། རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་རྣམ་པ་ལྔ་བཅིངས་ཏེ། རིག་པ་རྣམ་པ་ལྔས་རང་གི་སྙིང་གར་ནོར་བུའི་
[160b.3]རིགས་ཀྱི་དཀྱིལ་འཁོར་དེ་བཞིན་དུ་སྤྲུལ་ལ། ལས་ཀྱི་དཀྱིལ་འཁོར་ལས་བཤད་པའི་རིག་པ་རྣམས་ཀྱིས་རང་རང་གི་གནས་སུ་ལས་ཀྱི་དཀྱིལ་འཁོར་ལས་བཤད་པའི་ལྷ་ཐམས་ཅད་གཞག་པར་བྱའོ། །ལས་ཀྱི་དཀྱིལ་འཁོར་ལས་གསུངས་པའི་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་
[160b.4]བཅིངས་ཏེ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་ཤུདྡྷོ྅ཧཾ། ཨོཾ་སརྦྦ་ས་མོ྅ཧཾ། ཞེས་བྱ་བའི་སྙིང་པོ་གསུམ་བརྗོད་ཅིང་། དོན་གསུམ་རྣམ་པར་བསྒོམས་ནས། རཏྣ་ཀརྨྨ་མཎྜལ་སྭ་བྷཱ་བ་ཨ་ཧཾ། ཞེས་བྱ་བས་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་རིག་པ་ཐམས་
[160b.5]ཅད་སྔ་མ་བཞིན་དུ་རེ་རེ་ཞིང་ཁྲི་ཁྲི་བཟླས་པར་བྱའོ། །ཡང་ཞག་བདུན་ལས་ཀྱི་དཀྱིལ་འཁོར་ལས་བཤད་པའི་ཏིང་ངེ་འཛིན་གསུམ་རྣམ་པར་བསྒོམས་ནས་ལས་ཀྱི་དཀྱིལ་འཁོར་བྲི་བར་བྱ་སྟེ། དེ་ལྟར་ལས་ཀྱི་དཀྱིལ་འཁོར་འགྲུབ་པར་འགྱུར་རོ། །ནོར་བུ་ཆེན་པོའི་རིགས་སྒྲུབ་པར་བྱེད་པའི་
[160b.6]གསང་བའི་ཕྱག་རྒྱ་ནི་འདི་ཡིན་ཏེ། མནའ་བསྒགས་ལ་ཕྱག་རྒྱ་བཞི་བཅིང་བའི་མཚན་ཉིད་རྣམ་པ་བཞི་བསླབ་ཅིང་བསྟན་པའོ། །ཕྱག་རྒྱ་བཞི་ཇི་ལྟ་བ་བཞིན་དུ་བཅིང་བ་དང་། རྣམ་པ་གཞན་དེ་བཞིན་དུ་བསླབ་པར་བྱའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་
[160b.7]ཆེན་པོ་ལས་བཤད་པའི་ཕྱག་རྒྱ་བཅིང་བ་རྣམ་པ་བཞི་ནི་རྡོ་རྗེ་ནོར་བུ་ཆེན་པོའི་ཕྱག་རྒྱ་དང་། དེ་བཞིན་རྡོ་རྗེ་རིན་ཆེན་མྱུ་གུ་དང་། རྡོ་རྗེ་རིན་ཆེན་པདྨ་དང་། རྡོ་རྗེ་རིན་ཆེན་ཆར་འབེབས་ཀྱི་ཕྱག་རྒྱ་བསླབ་པར་བྱའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་
[161a]
[161a.1]ཆེན་པོ་བཅིང་བའི་མཚན་ཉིད་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་བཅིང་བའི་མཚན་ཉིད་བསླབ་པར་བྱའོ། །དངོས་གྲུབ་ཐམས་ཅད་འདི་བཞིན་ནོ། །ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་དང་། གཟུངས་དང་། ཆོས་དང་། ལས་
[161a.2]ཀྱི་དཀྱིལ་འཁོར་རྣམས་ཀྱི་དངོས་གྲུབ་བཤད་པ་དེ་བཞིན་དུ་འདིར་ཡང་འབྱུང་བ་ཡིན་ནོ་ཞེས་བསྟན་པར་བྱའོ། །བཅོམ་ལྡན་འདས་རྣམ་པར་སྣང་མཛད་ཀྱི་ནོར་བུ་ཆེན་པོའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་རྫོགས་སོ།། །།དེ་ལྟར་བཅོམ་ལྡན་འདས་རྣམ་པར་སྣང་མཛད་
[161a.3]ཀྱི་ཕྱག་རྒྱ་བཞི་པའི་དཀྱིལ་འཁོར་དེ་བཞིན་དུ་དོན་ཐམས་ཅད་གྲུབ་པ་ལ་སོགས་པའི་དངོས་གྲུབ་ཐམས་ཅད་སྒྲུབ་པར་བྱེད་པར་ཤེས་པར་བྱའོ། །སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་བཞིན་དུ་ཕྱི་དང་ནང་གི་དཀྱིལ་འཁོར་ཐམས་ཅད་བྲིས་ནས། དབུས་སུ་བཅོམ་
[161a.4]ལྡན་འདས་དོན་ཐམས་ཅད་གྲུབ་པ། ཨོཾ་བཛྲ་རཏྣ་མཱ་ལེ་ཧཱུཾ་ཞེས་བྱ་བའམ། ཡང་ཨོཾ་སརྦྦ་ཨརྠ་སིདྡྷི་པྲ་དཱ་ཧཱུཾ་ཞེས་བྱ་བའི་སྙིང་པོ་འདིས་བྲི་བར་བྱའོ། །དེ་ནས་དོན་ཐམས་ཅད་གྲུབ་པའི་གནས་སུ་པདྨ་དང་ཟླ་བའི་གདན་གྱི་སྟེང་དུ་ནོར་བུ་མཚན་མའི་ཕྱག་རྒྱ། ཨོཾ་བཛྲ་མ་ཎི་ཙིནྟཱ་ཨཱ་ཀཱ་ཤ་གརྦྷ་
[161a.5]བྷ་ག་ཝཱན་སིདྡྷྱ་སིདྡྷྱ་ཧཱུཾ་ཞེས་བྱ་བའི་སྙིང་པོ་འདིས་བྲི་བར་བྱའོ། །རིན་ཆེན་ལྟ་བའི་གནས་སུ་རིན་ཆེན་རྒྱལ་པོའི་མཚན་མའི་ཕྱག་རྒྱ། ཨོཾ་རཏྣ་ཨཾ་ཀུ་ཤ་ཡ་སརྦྦ་ཨརྠཱ་ནཱ་མ་ན་ཡ་ཤཱི་གྷྲཾ་སརྦྦ་ཏ་ཐཱ་ག་ཏྱ་སཏྱཾ་མ་ནུ་སྨ་ར་ཧཱུཾ། ཞེས་བྱ་བ་འདིས་བྲི་བར་བྱའོ། །རིན་ཆེན་ལྟ་བའི་གནས་སུ་ནོར་བུ་ཆགས་པའི་ཕྱག་རྒྱ་
[161a.6]ནི། ཨོཾ་ཨ་ནུ་རཱ་ག་བ་ཤི་ཀུ་རུ་སརྦྦ་ཨརྦྦཱ་ནཱ་མ་ན་ཡ་ཨཱ་ཀཱ་ཤ་གརྦྷ་ཧཱུཾ་ཞེས་བྱ་བ་འདིས་བྲི་བར་བྱའོ། །ནོར་བུ་པདྨའི་གནས་སུ་ནོར་བུ་ལེགས་པའི་ཕྱག་རྒྱ་ནི། ཨོཾ་རཏྣ་ཧཱུཾ་ཤི་ཧཾ་ཞེས་བྱ་བའི་སྙིང་པོ་འདིས་བྲིའོ། །དོན་ཐམས་ཅད་གྲུབ་པའི་དཀྱིལ་འཁོར་རོ། །སྔ་མ་བཞིན་དུ་ཐམས་ཅད་བྱས་ནས་དབུས་སུ་བཅོམ་
[161a.7]ལྡན་འདས་རིན་ཆེན་ལྟ་བ། ཨོཾ་རཏྣ་དྲྀ་ཤྱ་ཏྲཾ་ཞེས་བྱ་བའི་སྙིང་པོ་འདིའམ། ཕྱག་རྒྱ་བཞི་པའི་སྙིང་པོས་བྲི་བར་བྱའོ། །དོན་ཐམས་ཅད་གྲུབ་པའི་གནས་སུ་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་རིན་པོ་ཆེའི་ཕྲེང་བའི་ཕྱག་རྒྱ་ནི། ཨོཾ་སརྦྦ་ཏ་ཐཱ་ག་ཏ་ཨ་བྷི་ཥེ་ཀཱ་མཱ་ལ་ཧཱུཾ་ཞེས་བྱ་བ་འདིས་
[161b]
[161b.1]བྲི་བར་བྱའོ། །རིན་ཆེན་བཞད་པའི་ཕྱག་རྒྱ་ནི། ཨོཾ་རཏྣ་ཨཊྚ་ཧ་ས་ཧ་ས་ཧཱུཾ་ཞེས་བྱ་བའི་སྙིང་པོ་འདིས་བྲིའོ། །རིན་ཆེན་ལྟ་བའི་དཀྱིལ་འཁོར་རོ། །སྔ་མ་བཞིན་དུ་དཀྱིལ་འཁོར་བྲིས་ལ། དབུས་སུ་བཅོམ་ལྡན་འདས་རིན་ཆེན་པདྨ། ཨོཾ་རཏྣ་པདྨ་ཧཱུཾ། ཞེས་བྱ་བའམ། ཕྱག་རྒྱ་བཞི་པའི་སྙིང་
[161b.2]པོ་འདིས་བྲི་བར་བྱའོ། །དོན་ཐམས་ཅད་གྲུབ་པའི་གནས་སུ་གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོ་ནི། ཨོཾ་ཏྱ་ག་ས་མ་དྷི་ཛྙཱ་ན་གརྦྷ་ཧཱུཾ། ཞེས་བྱ་བ་འདིས་བྲི་བར་བྱའོ། །རིན་ཆེན་ལྟ་བའི་གནས་སུ་རིན་ཆེན་རྣོན་པོའི་ཕྱག་རྒྱ་ནི། ཨོཾ་རཏྣ་ཀོ་ཥ་ལཱ་ཡ་གྲ་ས་ཧཱུཾ་ཞེས་བྱ་བ་འདིས་བྲི་བར་བྱའོ། །
[161b.3]རིན་ཆེན་ཆར་འབེབས་ཀྱི་གནས་སུ་ནོར་བུ་འཁོར་ལོའི་ཕྱག་རྒྱ་ནི། ཨོཾ་མ་ཎི་ཙཀྲ་པྲ་བརྟ་ཡ་ཧཱུཾ་ཞེས་བྱ་བ་འདིས་བྲི་བར་བྱའོ། །རིན་ཆེན་པདྨའི་གནས་སུ་གསུང་བའི་ཕྱག་རྒྱ་ནི། ཨོཾ་རཏྣ་བྷ་ཥ་ཧཱུཾ་ཞེས་བྱ་བ་འདིས་བྲི་བར་བྱའོ། །རིན་ཆེན་པདྨའི་དཀྱིལ་འཁོར་རོ། །སྔ་མ་བཞིན་དུ་
[161b.4]དཀྱིལ་འཁོར་བྲིས་ལ། དབུས་སུ་བཅོམ་ལྡན་འདས་རིན་ཆེན་ཆར་འབེབས་ནི། ཨོཾ་རཏྣཱ་བེ་ཤ་བཪྵཱ་ཡ་སརྦྦ་ཨརྠ་སཾ་བ་དི་བྷ་ག་ཝཱན་མ་ཎི་ཧ་ཥ་ཧཱུཾ་ཞེས་བྱ་བའི་སྙིང་པོ་འདིས་བྲི་བར་བྱའོ། །དོན་ཐམས་ཅད་གྲུབ་པའི་གནས་སུ་ནོར་བུ་མཆོད་པའི་ཕྱག་རྒྱ་ནི། ཨོཾ་མ་ཎི་པཱུ་ཛ་ས་མ་ཡ་ཧཱུཾ་
[161b.5]ཞེས་བྱ་བ་འདིས་བྲི་བར་བྱའོ། །རིན་ཆེན་ལྟ་བའི་གནས་སུ་ནོར་བུ་བསྲུང་བའི་ཕྱག་རྒྱ་ནི། ཨོཾ་མ་ཎི་བནྡྷ་ཀ་བ་ཙ་ཧཱུཾ་ཞེས་བྱ་བ་འདིས་བྲི་བར་བྱའོ། །རིན་ཆེན་ཆར་འབེབས་ཀྱི་གནས་སུ་ནོར་བུ་གནོད་སྦྱིན་གྱི་ཕྱག་རྒྱ་ནི། ཨོཾ་མ་ཎི་དཾཥྚ་ཀ་རཱ་ལ་མ་ཧཱ་ཡཀྵ་ཧ་ར་ཧ་ར་སརྦྦ་ཨརྠཱན་བྷི་ཥཱ་ཡ་ཧཱུཾ།
[161b.6]རིན་ཆེན་པདྨའི་གནས་སུ་ནོར་བུ་ཁུ་ཚུར་གྱི་ཕྱག་རྒྱ་ནི། ཨོཾ་མ་ཎི་རཏྣ་བནྡྷ་ས་མ་ཡ་ཧཱུཾ། ཞེས་བྱ་བའི་སྙིང་པོ་འདིའམ། ཕྱག་རྒྱ་བཞི་པའི་དཀྱིལ་འཁོར་ལས་བཤད་པས་བྲི་བར་བྱའོ། །ནོར་བུའི་རིགས་ཀྱི་སྙིང་པོ་འདིས་ཐམས་ཅད་བྲི་བར་བྱའོ། །རིན་ཆེན་ཆར་འབེེབས་ཀྱི་དཀྱིལ་འཁོར་
[161b.7]རོ། །ཆོ་ག་ལྷག་མ་ནི་རྣམ་པར་སྣང་མཛད་ཀྱི་དཀྱིལ་འཁོར་ལས་བཤད་པ་བཞིན་དུ་ཐམས་ཅད་ཤེས་པར་བྱའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་རང་གི་ཕྱག་རྒྱ་བཞི་འདིར་ལྷ་ཐམས་ཅད་ཀྱིས་གཟུང་བའོ། །ནོར་བུ་ཆེན་པོའི་རིགས་ཀྱི་ཕྱག་རྒྱ་བཞི་པའི་དཀྱིལ་
[162a]
[162a.1]འཁོར་གྱི་བཤད་པ་རྫོགས་སོ།། །།དེ་ལྟར་བར་མ་ལ་དགའ་བའི་སེམས་ཅན་རྗེས་སུ་གཟུང་བའི་ཕྱིར་ནོར་བུ་ཆེན་པོའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་བསྟན་ནས། ད་ནི་མདོར་བསྡུས་པ་ལ་དགའ་བའི་སེམས་ཅན་རྗེས་སུ་གཟུང་བའི་ཕྱིར་ནོར་བུའི་རིགས་
[162a.2]ཐམས་ཅད་ཀྱི་དངོས་གྲུབ་བསྡུས་པར་གྱུར་པའི་དོན་ཐམས་ཅད་གྲུབ་པའི་ཕྱག་རྒྱ་གཅིག་པའི་དཀྱིལ་འཁོར་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་དོན་ཏོ། །དེ་ལ་
[162a.3]འཕགས་པ་ནམ་མཁའི་སྙིང་པོའི་དཀྱིལ་འཁོར་ལས་བཤད་པའི་ཆོ་གས་འཕགས་པ་ནམ་མཁའི་སྙིང་པོའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་འདིར་དང་པོ་སྦྱོར་བ་མཆོག་གི་ཏིང་ངེ་འཛིན་ཏོ། །ནམ་མཁའི་སྙིང་པོའི་སྦྱོར་བ་བཤད་ཟིན་ཏོ། །དེ་ཉིད་ཀྱི་སྙིང་
[162a.4]པོ་བསྐྱེད་པའི་རྒྱུར་གྱུར་པ་འདི་ལ་མངའ་བས་ན། ནམ་མཁའི་སྙིང་པོ་རྡོ་རྗེ་འཆང་། །ཞེས་བྱ་བའི་ངོ་བོ་ཡིན་པའི་ཕྱིར་བྱང་ཆུབ་པའི་རང་བཞིན་གྱིས་སེམས་དཔའ་ནི་བྱང་ཆུབ་སེམས་དཔའོ། །ཆེན་པོ་ནི་སེམས་ཅན་གྱི་བསམ་པ་ཐམས་ཅད་ཡོངས་སུ་རྫོགས་པར་མཛད་པས་ན་
[162a.5]སེམས་དཔའ་ཆེན་པོའམ། ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་ངོ་བོས་ཐམས་ཅད་དུ་སོང་བའི་ཕྱིར་སེམས་དཔའ་ཆེན་པོའོ། །འདི་ཞེས་བྱ་བ་ནི་བློ་ལ་གནས་པའོ། །འདི་གང་ཡིན་ཞེ་ན། དོན་ཐམས་ཅད་གྲུབ་པ་ཞེས་བྱ་བའི་སྙིང་པོ་འདི་གསུངས་སོ་ཞེས་བྱ་བའི་དོན་
[162a.6]ཐམས་ཅད་འདི་ལ་ཡོད་པ་སྒྲུབ་པས་དོན་ཐམས་ཅད་གྲུབ་པ་ཞེས་བྱ་བའི་སྙིང་པོ་དོན་ཐམས་ཅད་གྲུབ་པའི་ཡེ་ཤེས་དེ་སྟོན་པའི་སྙིང་པོ་འདི་གསུངས་སོ་ཞེས་བཤད་དོ། །དེ་ལ་དེ་ནས་ཡེ་ཤེས་ཞེས་བྱ་བ་ནས་བརྩམས་ནས། བཛྲ་རཏྣ་ཧཱུཾ་ཞེས་བྱ་བའི་བར་དུ་སྟོན་པའི་གཞུང་འདི་ཙམ་གྱིས་ནི་
[162a.7]དོན་ཐམས་ཅད་གྲུབ་པའི་ཕྱག་རྒྱ་གཅིག་པའི་དཀྱིལ་འཁོར་རྒྱལ་པོའི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་སྔ་མ་བཞིན་དུ་བསྡུ་བ་ལ་སོགས་པའི་ལས་ཀྱི་རྒྱལ་པོའི་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དོན་ཐམས་
[162b]
[162b.1]ཅད་གྲུབ་པའི་དུམ་བུ་ལས་བཤད་པའི་དངོས་གྲུབ་རྣམས་ནི་དོན་ཐམས་ཅད་གྲུབ་པའི་ཕྱག་རྒྱ་གཅིག་པའོ། །དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། སློབ་དཔོན་གྱི་
[162b.2]ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བ་ནི་གནས་སྐབས་ཏེ། དེ་ནས་ནོར་བུ་ཆེན་པོའི་རིགས་ཀྱི་དཀྱིལ་འཁོར་ནི་འདི་ཡིན་ཏེ་ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་གཅིག་པའི་དཀྱིལ་འཁོར་སྟོན་ཏོ། །དེ་ནས་ཞེས་བྱ་བའི་སྒྲ་ནི་
[162b.3]དེ་མ་ཐག་པ་སྟེ། སྔ་མའི་རྗེས་ཐོགས་ལའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། དོན་ཐམས་ཅད་གྲུབ་པའི་ཕྱག་རྒྱ་གཅིག་པའི་དཀྱིལ་
[162b.4]འཁོར་གྱི་ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ། ཟླ་བ་གཅིག་གམ་ལོ་གཅིག་གི་བར་དུ་བཟླས་ནས་ཇི་སྲིད་དུ་དོན་ཐམས་ཅད་གྲུབ་པའི་ཕྱག་རྒྱ་གཅིག་པའི་དཀྱིལ་འཁོར་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་རྗེས་ཐོགས་ཉིད་ལ་དཀྱིལ་
[162b.5]འཁོར་འདི་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་ཏེ། གང་གི་ཕྱིར་དོན་ཐམས་ཅད་གྲུབ་པའི་ཕྱག་རྒྱ་གཅིག་པའི་དཀྱིལ་འཁོར་དུ་འཇུག་པ་མེད་ན་དེས་འདུལ་བའི་སེམས་ཅན་གྱི་ཁམས་རྣམས་ཀྱིས་མངོན་པར་འདོད་པའི་དངོས་གྲུབ་ཏུ་མི་འགྱུར་བ་དེའི་ཕྱིར་རབ་ཏུ་བཤད་པར་བྱ་བ་
[162b.6]སྟེ། དོན་ཐམས་ཅད་གྲུབ་པའི་ཕྱག་རྒྱ་གཅིག་པའི་དཀྱིལ་འཁོར་ནི་དཀྱིལ་འཁོར་ཆེན་པོ་དམ་པ་སྟེ། དངོས་གྲུབ་ཐམས་ཅད་བསྡུས་པར་གྱུར་པའི་ཕྱིར་གཙོ་བོ་ཡིན་ནོ་ཞེས་བྱ་བའི་ཐ་ཚིག་གོ། །དངོས་གྲུབ་ཀུན་གྱི་དཀྱིལ་འཁོར་ནི། །ཅི་བཞིན་པར་ནི་བྲི་བར་བྱ། །ཞེས་བྱ་བ་ནི་དོན་ཐམས་
[162b.7]ཅད་གྲུབ་པའི་དཀྱིལ་འཁོར་ཆེན་པོ་བཞིན་དུ་ཕྱི་དང་ནང་གི་དཀྱིལ་འཁོར་ཐམས་ཅད་བྲི་བར་བྱའོ། །དབུས་སུ་བཅོམ་ལྡན་འདས་དོན་ཐམས་ཅད་གྲུབ་པ་བཞུགས་སུ་གསོལ་བ་སྔ་མ་བཞིན་དུ་བྲི་བར་བྱའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་བཞིན་
[163a]
[163a.1]དུ་དེའི་ཕྱི་དང་ནང་ཐམས་ཅད་སྔ་མ་བཞིན་དུ་བྲིས་ལ། དཀྱིལ་འཁོར་གྱི་དབུས་སུ་པདྨ་དང་ཟླ་བའི་སྟེང་དུ། ཨོཾ་བཛྲ་མ་ཎི་དྷ་ར་སརྦྦ་ཨརྠ་སིདྡྷ་པྲ་ཡཙྪ་ཧོ་བྷ་ག་ཝཱན་བཛྲ་རཏྣ་ཧཱུཾ། ཞེས་བརྗོད་ཅིང་བཅོམ་ལྡན་འདས་དོན་ཐམས་ཅད་གྲུབ་པ་བྲི་བར་བྱའོ། །དེ་ནས་དོན་
[163a.2]ཐམས་ཅད་གྲུབ་པའི་དཀྱིལ་འཁོར་ཆེན་པོའི་ཆོ་གས་རྡོ་རྗེ་ནོར་བུ་ཆེན་པོ་བཅིངས་ཏེ། ཇི་ལྟ་བ་བཞིན་དུ་དབབ་པ་དང་། ཆོ་ག་ཐམས་ཅད་རྗེས་སུ་སྤྱད་ལ། རིན་ཆེན་སློབ་མ་འཇུག་པ་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པ་དེ་དག་ནི་ཆོ་ག་ཐམས་ཅད་ཅེས་བསྟན་
[163a.3]ཏོ། །དེ་ལྟར་སློབ་དཔོན་གྱི་ལས་དང་སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་ནམ་མཁའི་སྙིང་པོའི་ཕྱག་རྒྱ་གཅིག་པའི་དཀྱིལ་འཁོར་དུ་དབང་བསྐུར་བ་ཐོབ་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསྟན་པར་བྱའོ་ཞེས་བྱ་བའི་ཆོ་ག་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་
[163a.4]པ་གསུངས་ཏེ། དེ་ནས་ཀྱི་སྒྲ་ནི་དེ་མ་ཐག་པར་བརྗོད་པའོ། །སློབ་མ་འཇུག་པའི་ཆོ་ག་རྒྱས་པའི་རྗེས་ཐོགས་ལའོ་ཞེས་བྱ་བའི་ཐ་ཚིག་གོ། །འདི་ཞེས་བྱ་བ་ནི་དོན་ཐམས་ཅད་གྲུབ་པའི་ཕྱག་རྒྱ་གཅིག་པའི་དཀྱིལ་འཁོར་རོ། །ཡེ་ཤེས་ནི་རང་གི་ལྷ་བསྒོམས་པ་ལས་བྱུང་བའི་རང་གི་ལྷར་ངེས་པའོ། །
[163a.5]དེའི་གསང་བའི་ཕྱག་རྒྱ་ནི་དེ་བཞིན་གཤེགས་པ་ལ་སོགས་པ་རང་གི་ལྷར་ངེས་པ་སེམས་ཅན་གྱི་ཁམས་ཀྱི་དེའི་རང་བཞིན་དུ་བྱེད་པར་མོས་པ་ལ་དེར་ངེས་པའི་ཡེ་ཤེས་དེ་བསླབ་པ་སྟེ་བསྟན་པར་བྱའོ། །གཟུགས་ནི་དོན་ཐམས་ཅད་གྲུབ་པའི་དུམ་བུ་ལས་བཤད་པའི་རྣམ་པར་སྣང་མཛད་ཀྱི་རིགས་སོ།
[163a.6]སོགས་པ་སྨོས་པ་ནི་དོན་ཐམས་ཅད་གྲུབ་པ་དང་། རིན་ཆེན་ལྟ་བ་དང་། རིན་ཆེན་པདྨ་དང་། རིན་ཆེན་ཆར་འབེེབས་ཀྱི་གཟུགས་རྣམས་གཟུང་བར་བྱ་བའོ། །གཟུགས་ལ་སོགས་པ་གང་དག་ཡིན་པ་དེ་ལ་གཟུགས་ལ་སོགས་པ་དེས་འདི་སྐད་དུ་བཤད་པའི་དོན་ཐམས་ཅད་གྲུབ་པ་ལ་སོགས་
[163a.7]པའོ། །དེ་ཉིད་ཀྱི་འདོད་པ་རྣམས་ནི་འདྲིས་པར་བྱ་བ་མངོན་པར་འདོད་པ་ཞེས་བྱ་བའི་ཐ་ཚིག་གོ། །ཡང་ཞེས་བྱ་བའི་སྒྲ་ནི་ངེས་པར་གཟུང་བ་སྟེ། གཟུགས་ལ་སོགས་པ་ཁོ་ན་འདོད་པ་རྣམས་ཡིན་ནོ་ཞེས་བྱ་བ་ཡིན་ནོ། །གཟུགས་ལ་སོགས་པའི་འདོད་པ་དང་། གོམས་པར་བྱས་པས་ན། བདེ་
[163b]
[163b.1]བ་སྐྱེ་བར་འགྱུར་བ་གང་ཡིན་པ་དེ་ལ་དེ་སྐད་ཅེས་བྱའོ། །བཤད་མ་ཐག་པ་དེའི་ཆགས་པ་དང་བྲལ་བར་གྱུར་པའི་བདེ་བ་དབུལ་བའོ། །གང་ལ་ཞེ་ན་སངས་རྒྱས་ལའོ། །ཅི་ཞིག་ཐོབ་པར་འགྱུར་ཞེ་ན། ལས་ཀྱི་དངོས་གྲུབ་ཐོབ་པར་འགྱུར། །ཞེས་གསུངས་ཏེ། ནོར་བུ་ཆེན་པོའི་དངོས་
[163b.2]གྲུབ་ཐོབ་པོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། དེ་ལས་བཤད་པ་དང་། གཟུངས་དང་། ཆོས་དང་། ལས་ཀྱི་དཀྱིལ་འཁོར་ལས་བཤད་པ་རང་གི་ལྷ་བསྒོམས་ལ་དེ་བཞིན་གཤེགས་པ་
[163b.3]ལ་སོགས་པ་སེམས་ཅན་གྱི་ཁམས་རང་གི་ལྷའི་རང་བཞིན་དུ་ངེས་པར་བྱས་པ་དེ་ལྟ་བུའི་བདེ་བ་དེ་སངས་རྒྱས་རྣམས་ལ་དེ་དབུལ་བར་བྱ་བ་ཡིན་ནོ། །དེ་ནས་དེ་ལྟར་བསྒོམས་པས་ནོར་བུ་ཆེན་པོའི་རིགས་ལས་བཤད་པའི་དངོས་གྲུབ་ཐོབ་པར་འགྱུར་རོ། །ནོར་བུ་ཆེན་པོའི་རིགས་སུ་གསུངས་པའི་དངོས་
[163b.4]གྲུབ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བྱ་བའི་ཆོ་ག་འདི་བསྟན་པའི་ཕྱིར། དེ་ནས་ཕྱག་རྒྱ་བཞིའི་ཡེ་ཤེས་བསླབ་པར་བྱའོ་ཞེས་བྱ་བ་གསུངས་སོ། །དེ་ལ་དོན་ཐམས་ཅད་གྲུབ་པའི་
[163b.5]དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་དོན་ཐམས་ཅད་གྲུབ་པའམ་གཞན་དག་གི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་ཀྱི་ཕྱག་རྒྱ་དང་། ལས་ཀྱི་ཕྱག་རྒྱ་རྣམས་སོ། །དེ་ལ་ཇི་ལྟར་བསྟན་པའི་རྣམ་པ་བཞིའི་ཡེ་ཤེས་བསླབ་པར་བྱ་བ་ནི་བསྟན་པའོ། །དེ་ལྟར་
[163b.6]རས་ལ་སོགས་པ་ལ་ཡང་སེམས་དཔའ་ནི་རྡོ་རྗེ་སྙིང་པོའོ། །ཕྱག་རྒྱ་ནི་དེའི་མཚན་མའོ། །རས་ལ་སོགས་པ་ལ་དཀྱིལ་འཁོར་བྲིས་ཏེ་བསྒྲུབ་པར་བྱའོ་ཞེས་བྱ་བ་ནི་དོན་ཐམས་ཅད་གྲུབ་པའི་ཕྱག་རྒྱ་གཅིག་པའི་དཀྱིལ་འཁོར་གྱི་འགྲེལ་པའོ། །དེ་ནས་ཡང་ཞེས་བྱ་བ་ལ་སོགས་པ་ནི་རྡོ་རྗེ་དབྱིངས་
[163b.7]ཀྱི་དུམ་བུར་བཤད་ཟིན་ཏོ། །དེ་བཞིན་གཤེགས་པ་ཐམས་ཅད་ཀྱི་ལས་ནི་དེ་བཞིན་གཤེགས་པ་ཐམས་ཅད་ཀྱི་ལས་ཏེ། སེམས་ཅན་གྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་རིན་པོ་ཆེའི་རིགས་རྟོག་པ་བསྐྱེད་པའོ། །དེའི་དམ་ཚིག་ནི་ནོར་བུ་ཆེན་པོའི་རིགས་བསྐྱེད་པའི་རྒྱུར་གྱུར་
[164a]
[164a.1]པ་སྟེ། དེ་ཉིད་ཀྱི་རྟོག་པ་ནི་བརྟག་པ་ལས་བྱུང་བའི་ཕྱིར་རོ། །དེ་སྟོན་པར་བྱེད་པའི་སྒྲའི་ཚོགས་ལ་ཡང་རྟོག་པ་ཆེན་པོ་ཞེས་བྱ་སྟེ། དེ་ཉིད་ཀྱི་རྟོག་པ་ཐམས་ཅད་ཀྱིས་སེམས་ཅན་ཐམས་ཅད་ལ་དབང་བསྐུར་བར་གསོལ་བ་རྣམས་ཟིལ་གྱིས་མནན་ནས་མཛེས་ཤིང་འབར་བར་གྱུར་
[164a.2]པས་ན་རྒྱལ་པོའོ། །རྫོགས་པའི་རྩ་བ་ནི་རྒྱུད་ཀྱི་མཐར་ཐུག་པའོ། །ནོར་བུ་ཆེན་པོའི་རིགས་འདི་ཐམས་ཅད་ཀྱིས་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པའི་ལས་བྱེད་པ་དེའི་ཕྱིར་ལས་ཀྱི་རིགས་ཀྱི་ལས་ཀྱི་ཕྱག་རྒྱ་ཞེས་བརྗོད་དེ། དབང་བསྐུར་བ་ལ་སོགས་པའི་ལས་
[164a.3]ཀྱིས་སེམས་ཅན་གྱི་ཁམས་ལ་རྒྱས་འདེབས་པར་བྱེད་པའི་ཕྱིར་རོ། །དེ་སྐད་དུ་ཡང་། འདིར། ཁམས་གསུམ་པ་ཡི་ཆོས་ཆེན་པོ། །དབང་བསྐུར་སྟེར་བའི་རྒྱལ་པོ་མཆོག །སེར་སྣའི་དྲི་མ་གཞིག་ཕྱིར་དང་། །སེམས་ཅན་བསམ་པ་ཡོངས་རྫོགས་ཕྱིར། །དོན་ཀུན་གྲུབ་པའི་དཔའ་བོ་ནི། །ནམ་མཁའི་
[164a.4]མཐར་ཐུག་གྲགས་པ་ཡི། །རྡོ་རྗེ་རིན་ཆེན་རིགས་བསྐྱེད་ཕྱིར། །རྟོག་པའི་རྒྱལ་པོ་འདི་གསུངས་སོ། །ཞེས་བྱ་བ་གསུངས་པ་ཡིན་ནོ། །སེམས་ཅན་ཁམས་ནི་དཔག་མེད་པ། །རྨོངས་པ་རྣམ་པར་བཟློག་པའི་ཕྱིར། །སྣང་བྱེད་དགེ་བ་འདི་བཤད་ལས། །བདག་གིས་དགེ་བ་འདི་བསགས་
[164a.5]པས། །དེ་ཡིས་འཇིག་རྟེན་མ་ལུས་པ། །ནོར་བུའི་རིགས་ཀྱི་ཀུན་དགའ་ཆེ། །སྙིང་པོ་བསམ་མི་ཁྱབ་ཆེན་གཙོ། །དོན་ཀུན་གྲུབ་པ་རྒྱལ་གྱུར་ཅིག །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ་ལས་ནོར་བུ་ཆེན་པོའི་རིགས་ཀྱི་
[164a.6]འགྲེལ་པ་རྫོགས་སོ།། །།དེ་ལྟར་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་ཀྱི་དེ་ཁོ་ན་ཉིད་ཀྱི་རང་བཞིན་དུ་གྱུར་པ་སེམས་ཅན་ཐམས་ཅད་ཀྱི་ཐུན་མོང་དུ་གྱུར་པའི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཞེས་བྱ་བ་ཐེག་པ་ཆེན་པོའི་མདོ། རྩ་བའི་རྒྱུད་
[164a.7]བསྟན་ནས། ད་ནི་འཇིག་རྟེན་ལས་འདས་པའི་མཆོག་གི་དངོས་གྲུབ་སྒྲུབ་པའི་གོང་མའི་ཡང་གོང་མའི་སེམས་ཅན་རྗེས་སུ་གཟུང་བའི་ཕྱིར། ཐོག་མ་དང་ཐ་མ་མེད་པའི་དམ་ཚིག་ཆེན་པོའི་དེ་ཁོ་ན་ཉིད་སངས་རྒྱས་དང་བྱང་ཆུབ་སེམས་དཔའ་ཐོབ་པའི་རྒྱུར་གྱུར་པ་དེ་བཞིན་གཤེགས་པ་དང་། དེའི་
[164b]
[164b.1]རིགས་དང་། རྡོ་རྗེ་དང་། པདྨ་དང་། ནོར་བུའི་རིགས་ཀྱི་རྒྱུད་ཕྱི་མ་ནི། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ལ་སོགས་པ་གསུངས་སོ། །འདི་སྐད་དུ་བཤད་པ་འདི་ནི་རྩ་བའི་རྒྱུད་དོ། །འདི་ནི་རྒྱུད་ཕྱི་མའིའོ་ཞེས་བྱ་བ་དེ་སྐད་དུ་ཡང་། ཇི་ལྟར་ཤེས་པར་
[164b.2]བྱ་ཞེ་ན། འདི་ནི་འཆད་པར་འགྱུར་བ་ཡིན་ཏེ། དེ་སྐད་དུ་རྒྱུད་ཕྱི་མ་བསྟན་པའི་རྗེས་ཐོགས་ལ། ལྟ་བ་ངན་ཞིང་ཆགས་བྲལ་ལ། །གསང་བ་འདི་ནི་མི་རིགས་ཏེ། །སེམས་ཅན་ཀུན་ལ་ཕན་དོན་དུ། །དེ་བཞིན་ཆོ་ག་བཤད་པར་བྱ། །ཞེས་ཕྱིས་འཆད་པར་འགྱུར་རོ། །གཞན་ཡང་གང་འཇིག་
[164b.3]རྟེན་པ་དང་། འཇིག་རྟེན་ལས་འདས་པའི་སྦྱོར་བའི་ཆོས་ཀྱི་དེ་ཁོ་ན་ཉིད་ལ་སོགས་པ་འང་སྟོན་པ་དེ་ནི་རྩ་བའི་རྒྱུད་དོ། །གང་འཇིག་རྟེན་ལས་འདས་པའི་དམ་ཚིག་ཆེན་པོའི་དེ་ཁོ་ན་ཉིད་སྟོན་པ་དེ་ནི་རྒྱུད་ཕྱི་མའིའོ། །རྒྱུད་ཕྱི་མ་ནི། རྩ་བའི་རྒྱུད་རྣམས་ཐམས་ཅད་ལས། །བླ་མའི་བླ་མ་དོན་གཉེར་བའི། །
[164b.4]སེམས་ཅན་བླ་མེད་སྒྲུབ་པ་རྣམས། །རྡོ་རྗེ་ཅན་རྣམས་བྱིན་རློབ་པའོ། །ཞེས་གསུངས་སོ། །དེ་ནས་ཞེས་བྱ་བ་ནི་སྐབས་སུ་བབ་པ་སྟེ། དངོས་གྲུབ་དམ་པ་སྒྲུབ་པ་སྟོན་པའི་སྐབས་སུ་བབ་ཅེས་བྱ་བའི་དོན་ཏོ། །ཕྱག་ན་རྡོ་རྗེ་ནི་རྡོ་རྗེ་འཆང་ཆེན་པོའོ། །དེ་ཉིད་བྱང་ཆུབ་ཆེན་པོའི་རང་
[164b.5]བཞིན་ཡིན་པའི་ཕྱིར་བྱང་ཆུབ་ཆེན་པོའོ། །དེ་ཡང་གང་གིས་ཡིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ནི་དེ་བཞིན་གཤེགས་པ་ཐམས་ཅད་ཀྱི་རིགས་སོ། །དེ་ལ་རྣམ་པར་སྣང་མཛད་དང་།
[164b.6]མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པའི་རང་བཞིན་ནི་འདིར་དེ་བཞིན་གཤེགས་པ་ཐམས་ཅད་དོ། །རྡོ་རྗེ་སེམས་དཔའ་ནས་བརྩམས་ནས། རྡོ་རྗེ་འབེེབས་པའི་མཐར་ཐུག་པ་རྡོ་རྗེ་དབྱིངས་ཀྱི་དུམ་བུ་ལས་བཤད་པ་ནི། དེ་བཞིན་གཤེགས་
[164b.7]པའི་རིགས་སོ། །འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུ་ལས་བཤད་པའི་རྡོ་རྗེ་ཧཱུཾ་མཛད་ནས་བརྩམས་ནས། ཁྲོ་བོ་རྡོ་རྗེ་འབེེབས་པའི་མཐར་ཐུག་པ་ནི། རྡོ་རྗེའི་རིགས་སོ། །འགྲོ་བ་འདུལ་བའི་དུམ་བུ་ལས་བཤད་པའི་འགྲོ་བ་འདུལ་བ་ལ་སོགས་པ་ནས་པདྨ་འབེབས་པའི་
[165a]
[165a.1]མཐར་ཐུག་པ་ནི་པདྨའི་རིགས་སོ། །ནོར་བུའི་དུམ་བུ་ལས་བཤད་པའི་དོན་ཐམས་ཅད་གྲུབ་པ་ལ་སོགས་པ་ནས། རིན་ཆེན་འབེབས་པའི་མཐར་ཐུག་པའི་སྙིང་པོ་དང་། ཕྱག་རྒྱ་དང་སྔགས་དང་། རིག་པའི་ཆོ་ག་ཐམས་ཅད་ནི་རིན་པོ་ཆེའི་རིགས་སོ། །དེ་དག་ཆེན་པོ་དེ་
[165a.2]ཡང་ཡིན་ལ་དེ་ཁོ་ན་ཉིད་ཀྱང་དེ་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དེ་ཁོ་ན་ཉིད་ཆེན་པོ་སྟེ། དཀྱིལ་འཁོར་ཆེན་པོ་དང་གཟུངས་དང་ཆོས་དང་། ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཆེན་པོ་སྒྲུབ་པར་བྱེད་པ་དེ་དག་གི་ཆོ་ག་རྒྱས་པ་
[165a.3]འདི་ནི་བྱ་བའོ། །འདི་ནི་མི་བྱ་བའོ་ཞེས་ངེས་པར་ནན་ཏན་དུ་བྱ་བའི་ཁྱད་པར་དེ་སྟོན་པའི་སྒྲའི་ཚོགས་ཀྱི་རྒྱུད་ལ་ཡང་དེ་སྐད་ཅེས་སྟོན་ཏོ། །རྒྱུད་ནི་རྒྱུད་པས་ནའོ། །འདི་ཞེས་བྱ་བ་ནི་ཐུགས་ལ་གནས་པའོ། །གསུངས་སོ་ཞེས་བྱ་བ་ནི་དེ་བཀའ་སྩལ་ཅིང་བཤད་པའོ། །དེ་ལ་ཞེས་བྱ་བ་ནི་
[165a.4]དམིགས་ཀྱིས་བཀར་བའོ། །རེ་ཞིག་ཅེས་བྱ་བ་ནི་རིམ་པ་ལ་ལྟོས་པའོ། །དང་པོ་ཞེས་བྱ་བ་ནི་ཐོག་མར་རོ། །ཕྱག་རྒྱ་ཡང་ཡིན་ལ་ཆེན་པོ་ཡང་དེ་ཡིན་པས་ཕྱག་རྒྱ་ཆེན་པོ་སྟེ། སྐུའི་གསང་བའི་ངོ་བོའོ། །དེའི་དམ་པའི་དངོས་གྲུབ་བམ་དེ་རྣམས་ཀྱི་ཕྱག་རྒྱ་ཆེན་པོའི་དངོས་གྲུབ་ནི་དམ་པའི་དངོས་
[165a.5]གྲུབ་བོ། །དེ་སྟོན་པར་བྱེད་པའི་རྒྱུད་ལ་ཡང་དེ་སྐད་ཅེས་བྱ་བ་ཡིན་ནོ། །དང་པོར་རེ་ཞིག་དེ་བཞིན་གཤེགས་པའི་རིགས་ཀྱི་དཀྱིལ་འཁོར་ཆེན་པོར་གསུངས་པའི་ཕྱག་རྒྱ་ཆེན་པོའི་དངོས་གྲུབ་ཀྱི་རྒྱུད་འབྱུང་ལ། ཕྱིས་དམ་ཚིག་གི་ཕྱག་རྒྱ་གཙོ་བོར་གྱུར་པའི་གཟུངས་ཀྱི་དཀྱིལ་འཁོར་ལས་གསུངས་
[165a.6]པའི་ཕྱག་རྒྱ་ཆེན་པོ་ལ་སོགས་པ་ཡང་འབྱུང་བ་ཡིན་ནོ། །ཕྱག་རྒྱ་ཆེན་པོ་དམ་པའི་དངོས་གྲུབ་ཀྱི་རྒྱུད་འདི་གང་ཡིན་ཞེ་ན། དེ་བཞིན་གཤེགས་པའི་ཕྱག་རྒྱ་ཆེ། །ཞེས་བྱ་བ་ལ་སོགས་པ་གསུངས་ཏེ། རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་མེད་
[165a.7]དང་། དོན་ཡོད་གྲུབ་པའི་རང་བཞིན་གྱིས་དེ་བཞིན་གཤེགས་པ་དེ་དག་གི་ཕྱག་རྒྱ་ཆེན་པོའོ། །བཅིངས་ནས་མཁའ་དབྱིངས་ཐམས་ཅད་དུ། །སངས་རྒྱས་སྐུ་གཟུགས་བྱིན་བརླབས་ལ། །ཞེས་བྱ་བ་ལ་མཁའི་ནི་ནམ་མཁའོ། །ནམ་མཁའི་དབྱིངས་ཐམས་ཅད་དུ་རྡུལ་ཕྲ་རབ་ཀྱི་ཚོགས་
[165b]
[165b.1]ནི་དེ་རྣམས་སངས་རྒྱས་ཀྱི་སྐུ་གཟུགས་སུ་བྱིན་གྱིས་བརླབས་ཏེ་རྣམ་པར་བསམ་པའོ། །རང་གི་སྙིང་དུ་བཅུག་ན་ནི། །ཡིད་ཀྱིས་ལེགས་པའི་སྦྱོར་བ་ཡིས། །ཛཿཧཱུཾ་བཾ་ཧོཿབཞི་བརྗོད་ཅིང་། །ལུས་ལ་སངས་རྒྱས་ཀུན་གཞུག་གོ། །ཞེས་གསུངས་སོ། །བསྒོམས་པའི་ལས་ཀྱི་འབྲས་བུ་འདི་གང་
[165b.2]ཡིན་ཞེ་ན། ཅི་སྟེ་འདོད་ན་ཚེ་འདི་ལ། །ཞེས་བྱ་བ་སྨོས་ཏེ། སྒྲུབ་པ་པོ་གང་ཡང་རུང་བ་འགའ་ཞིག་ཚེ་འདི་ལ་ཞི་བ་དམ་པ་མཆོག་ཏུ་གྱུར་པ་གང་གི་ཚེ་འདོད་ན་བག་ཆགས་དང་བཅས་པའི་ཉོན་མོངས་པ་སྤངས་པའི་སངས་རྒྱས་ཉིད་ནི་དེའི་འབྲས་བུ་སྟེ། འདི་ནི་བསྒོམས་པའི་ལས་ཀྱི་འབྲས་བུའོ། །
[165b.3]ཅི་སྟེ་མི་འདོད་གཞན་གྲུབ་བཞིན། །ཞེས་བྱ་བ་ནི་གལ་ཏེ་དེ་ལྟར་མི་བསྒོམ་ན་རྩ་བའི་རྒྱུད་ལས་གསུངས་པའི་སངས་རྒྱས་ཅིག་སྒོམ་པར་བྱེད་ན་དེའི་དངོས་གྲུབ་ཏུ་འགྱུར་རོ། །དེ་ལས་གཞན་དུ་རྣམ་པར་སྣང་མཛད་ལྟ་བུ། ཡང་ན་དོན་ཡོད་གྲུབ་པའི་བར་ལྟ་བུ་གཞན་དག་གོ། །གལ་ཏེ་མི་འདོད་པ་ནི་
[165b.4]གཞན་རྣམ་པར་སྣང་མཛད་ནས་དོན་ཡོད་གྲུབ་པའི་བར་དུ་མི་འདོད་པའོ། །ཇི་སྐད་སྟོན་པ་ཡིན་ཏེ། བྱིན་གྱིས་བརླབས་པ་ལ་སོགས་པས་རྣམ་པར་སྣང་མཛད་དུ་བདག་ཉིད་དུ་བསྐྱེད་པ་ནས། དོན་ཡོད་གྲུབ་པའི་བར་དུ་བསྐྱེད་དེ། རྣལ་འབྱོར་ཆེན་པོ་དང་ལྡན་པས་དེའི་ཕྱག་རྒྱ་ཆེན་པོ་བཅིངས་ཏེ།
[165b.5]བཛྲ་དྷཱ་ཏུ་ཞེས་བྱ་བ་དེ་བཞིན་གཤེགས་པ་རྣམས་ཀྱི་སྤྱིའི་སྙིང་པོའམ། ཨོཾ་སརྦྦ་ཏ་ཐཱ་ག་ཏ་མ་ཧཱ་ཡོ་གི་ཤྭ་ར་ཧཱུཾ། ཨོཾ་བཛྲ་སཏྭ་ཧཱུཾ། ཨོཾ་བཛྲ་རཏྣ་ཧཱུཾ། ཨོཾ་བཛྲ་དྷརྨྨ་ཧཱུཾ། ཨོཾ་བཛྲ་ཀརྨྨ་ཧཱུཾ། ཞེས་བྱ་བ་རང་གི་སྔགས་དེ་དག་བརྗོད་ཅིང་། རྣམ་པར་སྣང་མཛད་ལ་སོགས་པའི་བདག་ཉིད་དུ་ཉིན་
[165b.6]རེ་ཞིང་ཐུན་བཞིའི་སྦྱོར་བ་བྱའོ། །ཇི་སྲིད་དུ་བདག་ཉིད་མངོན་སུམ་ལྟ་བུར་ཉིན་རེ་ཞིང་ཐུན་བཞིར་མཐོང་བར་གྱུར་པ་དེ་སྲིད་དུ་བྱའོ། །དེ་ནས་ནམ་མཁའི་ཁམས་ཐམས་ཅད་དུ་སངས་རྒྱས་ཀྱི་གཟུགས་བསམས་ལ་དེ་ནས་ཅི་ནུས་པས། སརྦྦ་བུདྡྷ་བྷི་བ་སྭ་བྷཱ་བ་ཨ་ཧཾ། ཞེས་ང་རྒྱལ་བསྐྱེད་པར་
[165b.7]བྱའོ། །དེ་ནས་ཇི་སྲིད་དུ་སྐྱོ་བར་མ་གྱུར་པ་དེ་སྲིད་ཀྱི་བར་དུ་བསྒོམས་ལ་དེ་ནས་བསྒོམས་པ་ལས་ལྡང་བའི་དུས་སུ་ཛཿཧཱུཾ་བཾ་ཧོཿབརྗོད་ཅིང་། ཡིད་ཀྱིས་ལེགས་སོ་སྦྱོར་བས་དེ་རྣམས་རང་གི་ལུས་ལ་གཞུག་པར་བྱའོ། །ཡི་གེ་བརྒྱ་པས་ཀྱང་བརྟན་པར་བྱས་ཏེ་ལྡང་བར་བྱའོ། །དེ་ལྟར་ཉིན་རེ་ཞིང་སྔ་
[166a]
[166a.1]མ་བཞིན་བསྒོམས་ནས་ཇི་སྲིད་དུ་སངས་རྒྱས་ཀྱི་གཟུགས་བརྙན་གྱིས་ནམ་མཁའི་ཁམས་ཐམས་ཅད་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ན་དེ་བཞིན་གཤེགས་པ་ཉིད་དུ་འགྱུར་རོ། །ཕྱག་རྒྱ་ཆེན་པོ་བཅིངས་
[166a.2]ནས་ནི། །ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། སྒེག་མོ་ལ་སོགས་པ་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་ཡང་དག་པར་མཆོད་
[166a.3]ལ། དེ་ནས་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནས་རྡོ་རྗེ་འབེབས་པའི་ཕྱག་རྒྱ་ཆེན་པོའི་བར་དུ་བཅིངས་ཏེ་བསྒོམ་པར་བྱའོ། །སྔ་མ་བཞིན་དུ་ཇི་སྲིད་དུ་རང་གི་སེམས་དཔའི་ཕྱག་རྒྱ་བདག་ཉིད་མངོན་སུམ་ལྟ་བུར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །ཕྱག་རྒྱ་ཆེན་པོ་བཅིངས་
[166a.4]ནས་ཇི་ལྟར་སེམས་དཔའི་སྦྱོར་བ་བསྒོམ་པར་བྱ་ཞེ་ན། དེ་ཉིད་ཆེན་པོ་བརྗོད་བྱ་སྟེ། །ཞེས་བྱ་བ་སྨོས་ཏེ། རྡོ་རྗེ་སེམས་དཔའ་ནས་རྡོ་རྗེ་འབེབས་པའི་བར་དུ་ཨོཾ་བཛྲ་སཏྭ་ཧཱུཾ་ཞེས་བྱ་བ་ནས། ཨོཾ་བཛྲ་ཨཱ་བེ་ཤ་ཨཿཞེས་བྱ་བའི་བར་དུ་རྡོ་རྗེ་སེམས་དཔའ་ལ་སོགས་པའི་སྔགས་བརྗོད་པར་བྱའོ་
[166a.5]ཞེས་བྱ་བའི་དོན་ཏོ། །དེ་ནས་རང་གི་ལུས་ལ་ལྷ་ཐམས་ཅད་ཀྱི་རང་བཞིན་བདག་ཡིན་ནོ་ཞེས་བསམ་པར་བྱའོ། །རང་གི་ལུས་ལས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྣམ་པར་སྣང་མཛད་ནས་རྡོ་རྗེ་འབེབས་པའི་བར་དུ་སྤྲུལ་ལ། རིག་པའི་རྒྱལ་པོ་དང་། ཁྲོ་
[166a.6]བོའི་ཚོགས་དང་། ཕོ་ཉ་དང་། བྲན་དང་། བཙུན་མོ་ལ་སོགས་པ་དང་། སེམས་ཅན་དང་། སྣོད་ཀྱི་འཇིག་རྟེན་ཐམས་ཅད་སྤྲུལ་ནས། རྣམ་པར་སྣང་མཛད་ལ་སོགས་པའི་གཟུགས་ནི་བདག་ཡིན་ནོ་ཞེས་ཚིག་རེ་རེར་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་ནས་བསྒོམ་པར་བྱའོ། །
[166a.7]བསྒོམས་པའི་ལས་ཀྱི་འབྲས་བུ་གང་ཡིན་ཞེ་ན། ཅི་སྟེ་འདོད་ན་བདག་ཉིད་དེས། །དེས་བྱ་གཟི་ཅན་དགེ་བ་ཡི། །གོ་འཕང་ཚེ་འདི་ཉིད་ལ་ཐོབ། །མི་འདོད་དངོས་གྲུབ་གོང་མ་བཞིན། །ཞེས་བྱ་བ་སྨོས་ཏེ། སྒྲུབ་པ་པོ་གང་ཡིན་པས་ཚེ་འདི་ཉིད་ལའོ། །གཟི་ཅན་ཞེས་བྱ་བ་ནི་འོད་
[166b]
[166b.1]ཟེར་ཅན་ནོ། །བྱང་ཆུབ་པའི་རང་བཞིན་ཅན་གྱི་སེམས་དཔའ་ལ་སོགས་པའོ། །གོ་འཕང་ནི་རྡོ་རྗེ་འཆང་ཆེན་པོའི་རང་བཞིན་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེ་ལྟར་བསྒོམ་པར་མི་འདོད་ན་གོང་དུ་བཤད་པའི་རྡོ་རྗེ་སེམས་དཔའ་ལ་སོགས་པའི་གཟུགས་ཉིད་འབའ་ཞིག་བསྒོམ་པ་དེའི་ཚེ། དེ་
[166b.2]བསྒོམས་པས་འགྲུབ་པར་འགྱུར་ཏེ། རྫུ་འཕྲུལ་ཆེ་སྟོབས་གཟུགས་མཆོག་རྣམས། །རྡོ་རྗེ་སེམས་སོགས་འདྲ་བར་འགྱུར། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ཉིད་དུ་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ལས་བཤད་པའི་རྡོ་རྗེ་སེམས་དཔའི་
[166b.3]རྣལ་འབྱོར་བྱ་བ་ནས། རྡོ་རྗེ་འབེེབས་པའི་རྣལ་འབྱོར་བྱ་བའི་བར་ཇི་སྲིད་བདག་ཉིད་ཀྱིས་མངོན་སུམ་དུ་མཐོང་བར་གྱུར་གྱི་བར་དུ་བསྒོམ་པར་བྱའོ། །དེ་ནས་བརྟན་པ་དང་གཡོ་བའི་དངོས་པོ་ཐམས་ཅད་རང་གི་ལུས་ལས་སྤྲུལ་ཏེ། དེའི་རང་བཞིན་བདག་ཡིན་ནོ་ཞེས་ང་རྒྱལ་བསྐྱེད་ནས་
[166b.4]ཇི་སྲིད་དུ་བརྟན་པ་དང་གཡོ་བའི་དངོས་པོར་བདག་ཉིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་པར་བསྒོམས་ན་རྡོ་རྗེ་འཆང་ཆེན་པོར་འགྱུར་རོ། །དེ་ལྟར་འགྱུར་བ་ཇི་ལྟར་ཤེས་ཤེ་ན། གཅིག་གི་ངོ་བོ་བརྟན་པར་བྱས་ཏེ། ཕྱི་ནས་ཚིག་རེར་
[166b.5]ཐམས་ཅད་བདག་ཡིན་པར་ཞེས་བྱ་བ་སྨོས་ཏེ་བསྒོམས་པས་སོ། །བརྟན་པར་གྱུར་ནས་སྤྲོ་བར་བྱ། །བརྟན་པར་མ་གྱུར་དེ་མི་སྤྲོ། །ཞེས་གསུངས་སོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དམ་ཚིག་འཛིན་པའི་ཕྱག་རྒྱ་ནི་དམ་ཚིག་གི་ཕྱག་རྒྱ་སྟེ། རྣམ་པར་སྣང་མཛད་ལ་སོགས་
[166b.6]པ་སྟོན་པའོ། །དེའི་དམ་པའི་དངོས་གྲུབ་ནི་དེ་རྣམས་ཀྱི་དམ་ཚིག་གི་ཕྱག་རྒྱ་དང་བྱང་ཆུབ་སེམས་དཔའ་ཉིད་ཐོབ་བོ་ཞེས་བྱ་བའི་དོན་ཏོ། །ཇི་ལྟར་རྡོ་རྗེ་འཛིན་གྲུབ་པ་ནི་རྣམ་པར་སྣང་མཛད་ཆེན་པོ་དང་། དེ་བཞིན་ཉིད་དང་། རྡོ་རྗེ་འཆང་ཆེན་པོའི་རྡོ་རྗེ་འཛིན་ཆེན་པོའོ། །དངོས་གྲུབ་ནི་དེ་བཞིན་ཉིད་
[166b.7]དུ་རོ་གཅིག་པར་གྱུར་པའོ། །དེ་ལྟར་བདག་ཅེས་བསྒོམས་ནས་ནི། །ཞེས་བྱ་བ་ནི་ཡང་དང་ཡང་མངོན་དུ་བྱས་པའོ། །སངས་རྒྱས་དང་ནི་གཟི་ཆེན་ཐོབ། །ཅེས་བྱ་བ་ནི་རྡོ་རྗེ་འཆང་ཆེན་པོ་ཉིད་ཐོབ་པའོ། །མི་འདོད་དངོས་གྲུབ་གོང་མ་བཞིན། །ཞེས་བྱ་བ་ནི་སྔར་བཤད་པ་བཞིན་ནོ། །འདི་སྐད་
[167a]
[167a.1]སྟོན་པ་ཡིན་ཏེ། སྔ་མ་བཞིན་དུ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རྣལ་འབྱོར་རམ། རྡོ་རྗེ་སེམས་དཔའ་ལ་སོགས་པ་རྣམས་ཀྱི་རྣལ་འབྱོར་བྱས་ཏེ། གཟུགས་བརྙན་ལ་སོགས་པ་དང་མཚུངས་པར་བདག་ཉིད་བསྒོམ་པར་བྱའོ། །རང་གི་དམ་ཚིག་གི་ཕྱག་རྒྱ་བཅིངས་ཏེ།
[167a.2]རང་གི་སྙིང་པོ་དང་སྔགས་བརྗོད་ཅིང་སྔ་མ་བཞིན་དུ་དེ་བཞིན་གཤེགས་པའམ། རྡོ་རྗེ་སེམས་དཔའ་ལ་སོགས་པ་གཟུགས་བརྙན་དང་མཚུངས་པར་བདག་ཉིད་མངོན་སུམ་ལྟ་བུར་མཐོང་བ་དེ་སྲིད་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་སྤྲོ་བ་དང་བསྡུ་བའི་སྦྱོར་བས་ཇི་སྲིད་ཐམས་ཅད་ཀྱི་རང་བཞིན་ནམ།
[167a.3]རྡོ་རྗེ་སེམས་དཔའ་ལ་སོགས་པའི་རང་བཞིན་ནམ་མཁའ་ལ་མངོན་སུམ་དུ་མཐོང་བར་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ནས་དེ་བཞིན་གཤེགས་པའམ། རྡོ་རྗེ་འཆང་བར་བདག་ཉིད་འགྱུར་རོ། །ཆོས་ཀྱི་ཕྱག་རྒྱ་དམ་པའི་དངོས་གྲུབ་ནི་སངས་རྒྱས་དང་བྱང་ཆུབ་སེམས་
[167a.4]དཔའ་ཉིད་ཐོབ་པའོ། །ཆོས་རྣམས་ཐམས་ཅད་རང་བཞིན་གྱིས། །དག་ཅེས་བརྗོད་ན་ངེས་པར་ཡང་། །ཞེས་བྱ་བ་ནི་དོན་དམ་པར་ན་དངོས་པོ་མེད་པའི་རང་བཞིན་ཡིན་ནོ་ཞེས་བྱ་བའི་བཛྲ་ཛྙཱ་ན་ནས་གརྦྷ་ཨ་ཨཿཞེས་བྱ་བའི་བར་གྱི་ཆོས་ཀྱི་ཡི་གེའི་ངོ་བོ་བརྗོད་ཅིང་སྨྲས་པའོ། །ཅི་ཙམ་ཞིག་རང་བཞིན་གྱིས་
[167a.5]དག་པར་འགྱུར་ཞེ་ན། ཆོས་ཐམས་ཅད་ཅེས་བྱ་བ་སྨོས་ཏེ། འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་དོ། །རང་བཞིན་གྱིས་དག་པ་ནི་སྟོང་པ་ཉིད་དོ། །ཆོས་ཀྱི་ཡི་གེའི་ངོ་བོ་བརྗོད་པ་ནི་སྨྲས་པའོ། །སངས་རྒྱས་སམ་བྱང་ཆུབ་སེམས་དཔའ་ཐོབ་པར་འགྱུར་རོ། །སྔ་མ་བཞིན་དུ་དེ་བཞིན་གཤེགས་
[167a.6]པའི་རྣལ་འབྱོར་རམ། རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། སྔ་མ་བཞིན་དུ་ལྕེ་ལ་བཛྲ་ཛྙཱ་ན་ལ་སོགས་པ་ཆོས་ཀྱི་ཡི་གེ་རྣམ་པར་བསམ་པར་བྱའོ། །ཕྱིས་རང་གི་སྙིང་གར་རྡོ་རྗེ་རྩེ་ལྔ་པ་དེ་རྣམ་པར་བཀོད་ན། དེ་རྡོ་རྗེའི་ཚིག་གིས་བརྗོད་ཅིང་། དེ་བཞིན་གཤེགས་པ་དང་། རྡོ་རྗེ་
[167a.7]སེམས་དཔའ་ལ་སོགས་པའི་གཟུགས་བརྙན་སྣང་བ་ཙམ་གྱིས་རྣམ་པར་དག་པར་བདག་ཉིད་བསྒོམས་ཏེ། ཇི་སྲིད་དུ་དེའི་ངོ་བོར་བདག་ཉིད་མངོན་སུམ་དུ་མཐོང་བར་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་ཇི་སྲིད་དུ་སྤྲོ་བ་དང་བསྡུ་བའི་སྦྱོར་བས་ནམ་མཁའི་ཁམས་ཐམས་ཅད་
[167b]
[167b.1]དུ་དེ་བཞིན་གཤེགས་པའི་བདག་ཉིད་དམ། རྡོ་རྗེ་སེམས་དཔའ་ལ་སོགས་པའི་བདག་ཉིད་དུ་མཐོང་བར་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་དེ་བཞིན་དུ་བསྒྲུབས་ན་དེ་བཞིན་གཤེགས་པའམ། ལས་ཀྱི་ཕྱག་རྒྱ་རྣམས་ཀྱི་དམ་པའི་དངོས་གྲུབ་ནི་ལས་ཀྱི་ཕྱག་རྒྱ་ནི་དམ་པའི་དངོས་གྲུབ་བོ། །ཐམས་
[167b.2]ཅད་ཀྱི་ནི་ཀུན་དག་པར། །ཞེས་བྱ་བ་ནི་སྦྱོར་བ་དང་། ཡོངས་སུ་སྦྱོང་བ་དང་། སོ་སོར་རྟོག་པ་དང་། སྒྲུབ་པ་ལྷུར་ལེན་པའི་བརྩོན་འགྲུས་ཀྱི་མཚན་ཉིད་དང་། སེམས་ཅན་གྱི་དོན་དུ་སངས་རྒྱས་ཀྱི་སྤྲུལ་པའི་མཛད་པའི་སྒེག་མོ་ལ་སོགས་པའི་མཆོད་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་
[167b.3]པའི་མཆོད་པ་བཅུ་དྲུག་གི་མཚན་ཉིད་དོ། །ལས་རྣམས་ཐམས་ཅད་སྦྱངས་ནས་ནི། །ཞེས་བྱ་བ་ནི་རང་བཞིན་གྱིས་འོད་གསལ་བའི་བརྩོན་འགྲུས་ཀྱི་ཕ་རོལ་ཏུ་ཕྱིན་པས་ཐམས་ཅད་རྣམ་པར་སྦྱངས་པའོ། །དེའི་ཕྱིར་ཀུན་ནས་ཀུན་དུ་རྣམ་པར་དག་པའི་ཕྱིར་ལས་རྣམས་ཐམས་ཅད་ཇི་ལྟ་བ་བཞིན་དུ་ཡོངས་སུ་
[167b.4]སྦྱོར་བའི་ལས་ཐམས་ཅད་རང་བཞིན་གྱིས་འོད་གསལ་བའི་སྒྱུ་མ་དང་མཚུངས་པར་བསྒོམས་པའོ། །བསྒོམས་པས་ཅིར་འགྱུར་ཞེ་ན། སངས་རྒྱས་གཟི་ཆེན་ཐོབ་ཅེས་བྱ་བ་སྨོས་ཏེ། འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་རྣལ་འབྱོར་རམ།
[167b.5]དེའི་རིགས་ཀྱི་རྣལ་འབྱོར་བྱས་ལ། སྒེག་མོ་ལ་སོགས་པ་རྣམས་དང་། ལས་ཀྱི་དཀྱིལ་འཁོར་ལས་གསུངས་པའི་མཆོད་པ་རྣམས་ཀྱིས་ཡང་དག་པར་མཆོད་ལ། དེའི་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་གར་སྣ་ཚོགས་རྡོ་རྗེ་རྣམ་པར་བསམས་ནས། དེའི་སྟེང་དུ་སྙིང་པོའམ་སྔགས་རང་གི་ཡིད་ཀྱིས་
[167b.6]བྲིས་ལ། དེའི་སྙིང་པོའམ་སྔགས་རྡོ་རྗེའི་ཚིག་གིས་བརྗོད་ཅིང་། རང་བཞིན་གྱིས་འོད་གསལ་བའི་སྣང་བརྙན་ཙམ་དུ་དེ་བཞིན་གཤེགས་པའམ། རྡོ་རྗེ་སེམས་དཔའ་ལ་སོགས་པའི་རང་བཞིན་དུ་ཇི་སྲིད་བདག་ཉིད་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་ཐམས་ཅད་
[167b.7]ཀུན་དུ་ཁྱབ་པར་རྣམ་པར་བསམས་ལ། སྔ་མ་བཞིན་དུ་ང་རྒྱལ་བསྐྱེད་དེ། ཇི་སྲིད་དུ་དེའི་གཟུགས་སུ་བདག་ཉིད་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ན་དེ་དེ་བཞིན་གཤེགས་པའམ་རྡོ་རྗེ་འཆང་བར་འགྱུར་རོ། །དེ་བཞིན་གཤེགས་པའི་རིགས་ཀྱི་དམ་པའི་
[168a]
[168a.1]དངོས་གྲུབ་རྣམས་ནི་དེ་བཞིན་གཤེགས་པའི་རིགས་ཀྱི་དངོས་གྲུབ་དམ་པའོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པ་དང་། དེའི་རིགས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་ལས་ཀྱི་ཕྱག་རྒྱ་རྣམས་ཀྱི་དམ་པའི་
[168a.2]དངོས་གྲུབ་ནི་བཤད་མ་ཐག་པ་ཡིན་ནོ་ཞེས་བྱ་བའི་དོན་ཏོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །ཕྱག་ན་རྡོ་རྗེ་ནི་རྡོ་རྗེ་ཧཱུཾ་མཛད་དོ། །རང་གི་རིགས་ནི་རྡོ་རྗེའི་རིགས་སོ། །དམ་པའི་དངོས་གྲུབ་ནི་རང་གི་རིགས་ཀྱི་དམ་པའི་དངོས་གྲུབ་སྟེ་སྔ་མ་བཞིན། དངོས་གྲུབ་ཀུན་སྦྱོར་སངས་རྒྱས་ཀྱི། །
[168a.3]ཞེས་བྱ་བ་ནི་ཁམས་གསུམ་དུ་སྐྱེས་པའི་སེམས་ཅན་ཐམས་ཅད་ཀྱང་འཇིག་པའི་བསྐལ་པའི་མེ་ལ་སོགས་པ་རྣམས་ཀྱིས་གནོད་པར་གྱུར་པའི་གདུལ་བྱའི་དབང་གིས་སངས་རྒྱས་རྣམས་ཀྱི་བཀས་ནི་སངས་རྒྱས་ཀྱིས་རྡོ་རྗེ་ཧཱུཾ་མཛད་ལ་བཀའ་སྩལ་པ་གང་ཡིན་པ་དེ་ནི་སངས་རྒྱས་ཀྱི་བཀའོ། །དེའི་ཕྱིར་
[168a.4]སངས་རྒྱས་ཀྱིས་བཀའ་སྩལ་པའི་རྒྱུ་ཡིས་སོ། །སེམས་ཅན་ཀུན་གྱི་དོན་དུ་ཞེས་བྱ་བ་ནི་སེམས་ཅན་ཡང་ཡིན་ལ་ཀུན་ཡང་ཡིན་པས་ན་སེམས་ཅན་ཀུན་དོན་ནོ། །ལྷ་ཆེན་པོ་ལ་སོགས་པ་བཙན་ཐབས་ཀྱིས་སྒྲུབ་པ་དང་། བཀུག་ནས་གཡུལ་བཤམས་པ་དང་། རྩོད་པས་བསྒྲུབ་པ་སྟེ། དེ་དག་གི་དོན་
[168a.5]ནི་སེམས་ཅན་ཀུན་གྱི་དོན་ཡིན་པ་དེའི་ཕྱིར་སེམས་ཅན་ཀུན་གྱི་དོན་ཏེ། སངས་རྒྱས་དང་བྱང་ཆུབ་སེམས་དཔའི་བསྐྱེད་པའི་དོན་ཏོ་ཞེས་བྱ་བའི་ཐ་ཚིག་གོ། །དངོས་གྲུབ་ཀུན་སྦྱོར་ཞེས་བྱ་བ་ནི་དངོས་གྲུབ་ཀྱང་ཡིན་ལ་ཀུན་སྦྱོར་ཡང་དེ་ཡིན་པས་ན་དངོས་གྲུབ་ཀུན་སྦྱོར་ཏེ། རྡོ་རྗེ་ཧཱུཾ་མཛད་དང་ཁྲོ་བོ་རྡོ་རྗེ་སེམས་
[168a.6]དཔའ་ནས་བརྩམས་ཏེ། རྡོ་རྗེའི་རིགས་ཐམས་ཅད་ཀྱི་དངོས་གྲུབ་པོ། །དེའི་ཀུན་དུ་སྦྱོར་བ་ནི་དངོས་གྲུབ་ཐམས་ཅད་ཀྱི་རབ་ཏུ་སྦྱོར་བའོ། །ཕྱག་རྒྱ་ཆེན་པོ་སོ་སོར་བཅིངས་ནས་སེམས་ཅན་གྱི་ཁམས་ཐམས་ཅད་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེའི་རིགས་ཀྱི་གཟུགས་སུ་སྤྲུལ་ཅིང་བསྐྱེད་ནས་བདག་
[168a.7]ཉིད་བྱ་བ་བྱས་སོ་ཞེས་ལྷག་པར་མོས་པ་དེས་བསྒྲུབས་ལ། རྡོ་རྗེ་ཧཱུཾ་མཛད་དང་། དེའི་རིགས་ཀྱི་ཕྱག་རྒྱ་ཆེན་པོའི་རང་བཞིན་དུ་བདག་ཉིད་བསྐྱེད་པའོ། །དེའི་རང་བཞིན་དུ་ཡང་དང་ཡང་དུ་མོས་པས། ཚེ་འདི་ཉིད་ལ་སངས་རྒྱས་འགྲུབ། །ཅེས་བྱ་བ་ནི་ཚེ་འདི་ཉིད་ནི་མཐོང་བའི་ཆོས་ལ་གདོན་མི་ཟ་བ་
[168b]
[168b.1]ཉིད་དུ་རྡོ་རྗེ་འཆང་ཆེན་པོ་ཐོབ་པོ་ཞེས་བཅོམ་ལྡན་འདས་ཕྱག་ན་རྡོ་རྗེས་གསུངས་སོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་དཔལ་རྡོ་རྗེ་ཧཱུཾ་མཛད་ཀྱི་རྣལ་འབྱོར་རམ། ཁྲོ་བོ་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་དེ་
[168b.2]ཉིད་དང་དེ་ལས་བཤད་པའི་རྣལ་འབྱོར་ཆེན་པོ་བྱས་ལ། སྒེག་མོ་ལ་སོགས་པའི་མཆོད་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་བདག་ཉིད་ཡང་དག་པར་མཆོད་ལ་དེ་བཞིན་གཤེགས་པ་ཐམས་ཅད་ལ་ཕྱག་བཞི་བྱས་ཏེ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་
[168b.3]བཅིངས་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཕྱུང་ནས་ཕྱོགས་བཅུ་ཐམས་ཅད་དུ་རྡོ་རྗེ་ཧཱུཾ་མཛད་སྤྲུལ་པར་ལྟ་སྟེ། ཡན་ལག་ཐམས་ཅད་ལས་ཧཱུཾ་ཞེས་བྱ་བས་སངས་རྒྱས་ཧཱུཾ་མཛད་བསྐུལ་ཏེ། རང་གི་རྡོ་རྗེ་ལས་རང་གི་རྡོ་རྗེའི་རིགས་སྤྲུལ་ནས་བསྐལ་པའི་རླུང་གིས་བསྐྱོད་
[168b.4]པའི་བསྐལ་པའི་མེ་ལྟ་བུ་རྡོ་རྗེ་འབར་བའི་ཀུན་ནས་འཁྲུག་པའི་འོད་ཟེར་གྱིས་གདུག་པ་ཐམས་ཅད་འདུལ་བ་དང་། ཞི་བ་ཐམས་ཅད་རྗེས་སུ་གཟུང་བའི་ཕྱིར་ནམ་མཁའི་ཁམས་ཐམས་ཅད་དུ་ཁྱབ་པའི་སེམས་ཅན་གདུག་པ་ཅན་ཐམས་ཅད་བཏུལ་ནས། ཐམས་ཅད་དེ་བཞིན་གཤེགས་པ་ལ་
[168b.5]སོགས་པར་གྱུར་ནས། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་རང་བཞིན་དུ་རྣམ་པར་བསམས་ཏེ། སརྦྦ་བཛྲ་ཀུ་ལ་སྭ་བྷཱ་བ་ཨ་ཧཾ་ཞེས་ང་རྒྱལ་བསྐྱེད་ནས་བྱ་བ་བྱས་པ་ཉིད་ཀྱིས་རྡོ་རྗེ་ཧཱུཾ་མཛད་བདག་ཉིད་བསྒོམ་པར་བྱ་བའམ། ཡང་ན་ཁྲོ་བོ་རྡོ་རྗེ་སེམས་དཔའི་ཕྱག་
[168b.6]རྒྱ་ཆེན་པོར་བཅིངས་ཏེ། སྒྲུབ་པ་པོ་དེ་ཁྲོ་བོ་རྡོ་རྗེ་སེམས་དཔའ་ལ་སོགས་པའི་བདག་ཉིད་ཀྱིས། སརྦྦ་བཛྲ་ཀུ་ལ་སྭ་བྷཱ་བ་ཨ་ཧཾ་ཞེས་ང་རྒྱལ་བསྐྱེད་ཅིང་བསྒོམ་པར་བྱའོ། །དེ་ལྟར་ན་ཚེ་འདི་ཉིད་ལ་སངས་རྒྱས་སུ་འགྲུབ་པར་འགྱུར་རོ། །སྔ་མ་བཞིན་དུ་གང་ཡང་རུང་བའི་གཟུགས་ཤིག་བསྟན་
[168b.7]པར་བྱས་པས་དེ་བཞིན་གཤེགས་པ་ཐམས་ཅད་ཀྱི་འབྲས་བུར་གྱུར་པ་དེ་བཞིན་དུ་ཐམས་ཅད་དུ་ཡང་ཤེས་པར་བྱའོ། །དམ་ཚིག་གི་ཕྱག་རྒྱ་དམ་པའི་དངོས་གྲུབ་ནི་དམ་ཚིག་གི་ཕྱག་རྒྱ་རྣམས་ཀྱི་དངོས་གྲུབ་སྟེ། དེ་སྟོན་པར་བྱེད་པའི་རྒྱུད་ལ་དེ་སྐད་ཅེས་བྱའོ། །ཕྱག་རྒྱ་ཆེན་པོའི་ཚུལ་དུ་
[169a]
[169a.1]ནི། །ཇི་ལྟར་རྡོ་རྗེ་འཛིན་གྲུབ་པ། །དེ་བཞིན་བདག་ཅེས་བསྒོམས་ནས་ནི། །ཞེས་བྱ་བ་ལ། ཇི་ལྟར་རྡོ་རྗེ་འཛིན་པ་ནི་ཐོག་མ་མེད་པའི་ཆོས་ཀྱི་དབྱིངས་མངོན་སུམ་དུ་བྱས་པའི་གཉིས་སུ་མེད་པའི་ཡེ་ཤེས་ཀྱི་རང་བཞིན་དངོས་གྲུབ་བསྒྲུབ་པ་དེ་ལྟ་བུ་ནི་བདག་ཡིན་ནོ་ཞེས་
[169a.2]བསྒོམ་པར་བྱའོ། །ཇི་ལྟར་བསྒོམ་པར་བྱ་ཞེ་ན། ཕྱག་རྒྱ་ཆེན་པོའི་ཚུལ་དུ་ནི། །ཞེས་བྱ་བ་སྨོས་ཏེ། ཕྱག་རྒྱ་ཆེན་པོ་རྣམས་ལ་རབ་ཏུ་སྦྱོར་བ་ནི་ཕྱག་རྒྱ་ཆེན་པོའི་ཚུལ་ཏེ་དེ་ཡང་སྔར་བཤད་ཟིན་ཏོ། །ཕྱག་རྒྱ་ཆེན་པོའི་ཚུལ་དུ་བསྒོམ་པ་དེས་ཅི་ཞིག་ཏུ་འགྱུར་ཞེ་ན། སྐད་ཅིག་གིས་ནི་གཟི་
[169a.3]ཅན་ཐོབ། །ཅེས་བྱ་བ་སྨོས་ཏེ། འདི་སྐད་དུ་སྟོན་པ་ཡིན་ཏེ། སྔ་མ་བཞིན་དུ་རྣལ་འབྱོར་ཆེན་པོ་བྱས་ལ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། རང་གི་སྙིང་གའི་ཟླ་བ་ལ་གནས་པའི་རྡོ་རྗེ་རྩེ་ལྔ་པའི་དབུས་སུ་སྙིང་པོ་ཡིད་ཀྱིས་བྲིས་ཏེ། དེ་ཉིད་བརྗོད་ཅིང་གཟུགས་བརྙན་དང་མཚུངས་པར་
[169a.4]སྔ་མ་བཞིན་དུ་བདག་ཉིད་བསྒོམ་པར་བྱའོ། །དེ་ནས་དེ་ལྟར་ནམ་མཁའི་ཁམས་ཀྱི་ངོ་བོའི་རྡོ་རྗེའི་རིགས་ཀྱི་ངོ་བོ་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་པ་གང་ཡིན་པ་དེ་མངོན་སུམ་དུ་མཐོང་བར་འགྱུར་ཏེ། དེས་སྐད་ཅིག་དེ་ཉིད་ལ་
[169a.5]རྡོ་རྗེ་འཆང་ཆེན་པོར་འགྱུར་རོ། །དེ་ནས་ཞེས་བྱ་བ་ནི་སྔ་མ་བཞིན་ནོ། །ཡི་གེ་མེད་པའི་ཆོས་རྣམས་ལ། །རབ་ཏུ་སྤྲོ་བ་ཡོད་མིན་ཏེ། །ཞེས་བྱ་བ་ནི་ཡི་གེ་ཨ་ལ་སོགས་པ་དེ་རྣམས་མིང་འདོགས་ན་ཡི་གེ་མེད་པའི་ཆོས་རྣམས་ལའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་རང་བཞིན་གྱིས་རྣམ་པར་དག་
[169a.6]པ་དེའི་སེམས་དང་སེམས་ལས་བྱུང་བའོ། །ཅིའི་ཕྱིར་ཡི་གེ་མེད་པ་ཡིན་ཞེ་ན། བཤད་མ་ཐག་པའི་ཕྱིར་དེ་རྣམས་ཀྱི་རྣམ་པར་རྟོག་པའི་སྤྲོས་པ་ཡོད་པ་མ་ཡིན་པས་གཉིས་སུ་མེད་པའི་ཕྱིར་རོ་ཞེས་བྱ་བའི་དོན་ཏོ། །ཆོས་མཆོག་འདི་ནི་བསྟན་བྱེད་ཅིང་། །ཞེས་བྱ་བ་ནི་འདི་ཉིད་སྨྲས་པ་ཡིན་ཏེ།
[169a.7]སངས་རྒྱས་དང་རྡོ་རྗེ་འཛིན་པ་ལ་སོགས་པའི་ཆོས་ཀྱི་ཡི་གེ་ཧཱུཾ་བརྗོད་པའོ། །གང་གི་ཚེ་བརྗོད་ཅེ་ན། ཆོས་ཀྱི་མཆོག་བསྒོམས་ན་ཞེས་བྱ་བ་སྨོས་ཏེ། ཡི་གེ་ཧཱུཾ་ལ་སོགས་པའི་ཆོས་ཀྱི་ཕྱག་རྒྱ་མཆོག །ཡང་དང་ཡང་མངོན་དུ་བྱས་ན་གཟི་བརྗིད་ཅན་དུ་འགྱུར་རོ་ཞེས་བྱ་བ་ནི་འབྲས་བུ་གསུངས་
[169b]
[169b.1]པའོ། །སྔ་མ་བཞིན་དུ་ཐམས་ཅད་བྱས་ལ། ཆོས་ཀྱི་ཕྱག་རྒྱ་ལྕེ་ལ་ཡིད་ཀྱིས་བྲིས་ནས་རྡོ་རྗེ་རྩེ་ལྔ་པ་དཀར་པོ་ལྕེ་ལ་རྣམ་པར་བསམ་པར་བྱའོ། །རང་གི་སྙིང་གའི་རྡོ་རྗེ་ལ་ཡང་དེ་མངོན་པར་བྲིས་ལ་དེ་ཉིད་བརྗོད་ཅིང་གཟུགས་བརྙན་དང་མཚུངས་པའི་རྡོ་རྗེ་རིགས་ཀྱི་རང་བཞིན་བདག་ཉིད་
[169b.2]ཀྱི་ཕྱག་རྒྱ་ཆེན་པོའི་སྦྱོར་བས་བསྒོམ་པར་བྱའོ། །སྔ་མ་བཞིན་དུ་མཚན་ཐོག་ཐག་བསྒོམས་ན་དེའི་རྗེས་ལ་རྡོ་རྗེ་འཆང་ཆེན་པོར་འགྱུར་རོ་ཞེས་བྱ་བའི་ཐ་ཚིག་གོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དགེ་བའམ་ཡང་ན་མི་དགེ་བ། །གང་གིས་ལས་རྣམས་བྱས་པ་ནི། །ཞེས་
[169b.3]བྱ་བ། སངས་རྒྱས་ལ་སོགས་པ་ལ་ཕུལ་བ་ལ་ཞི་བའི་ལས་ཀྱི་སྦྱོར་བ་འདི་ནི་དགེ་བའི་ལས་སོ། །རྣམ་པར་འཚེ་བ་ནི་མི་དགེ་བའི་ལས་སོ། །ཁྲོ་བ་ནི་མི་དགེ་བའི་ལས་ཉིད་དུ་གྲགས་པའི་ཕྱིར་འཇིག་རྟེན་ལས་གྲགས་པ་དེ་ལྟར་བརྗོད་པར་བྱའོ། །འདི་ལྟར་དགེ་བ་དང་མི་དགེ་བས་ཅུང་ཟད་
[169b.4]བྱེད་པ་དེ་དག་ཐམས་ཅད་རྣལ་འབྱོར་པས་དེ་བཞིན་གཤེགས་པ་རྣམས་ལ་དབུལ་བར་བྱའོ། །ཕུལ་བས་ཅི་ཞིག་ཏུ་འགྱུར་ཞེ་ན། སྐད་ཅིག་གིས་ནི་གཟི་ཅན་འགྱུར། །ཞེས་བྱ་བ་སྨོས་ཏེ། དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་གང་གི་ཁྲོ་བོའི་རྣལ་
[169b.5]འབྱོར་དང་རྣལ་འབྱོར་ཆེན་པོ་བྱས་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། རང་གི་ཁྲོ་བོའི་ལས་ཀྱི་ཕྱག་རྒྱ་ཇི་ལྟ་བ་བཞིན་དུ་བཅིངས་ནས་རང་གི་སྙིང་གར་སྣ་ཚོགས་རྡོ་རྗེ་ལ་སྔགས་ཟློས་ཤིང་ཡིད་ཀྱིས་བཀོད་ལ། དེ་ཉིད་བརྗོད་ཅིང་ནམ་མཁའི་ཁམས་ཐམས་ཅད་དུ་སྔ་མ་བཞིན་དུ་རྡོ་རྗེའི་རིགས་
[169b.6]ཀྱིས་བཀང་ནས་ལྷ་ཆེན་པོ་ལ་སོགས་པའི་གདུག་པ་ཐམས་ཅད་འདུལ་བ་དང་། ཞི་བ་རྣམས་རྗེས་སུ་གཟུང་བ་ལ་སོགས་པ་དེ་རྣམ་པར་བསམས་ཏེ། དེ་རང་རང་གི་དེ་བཞིན་གཤེགས་པ་ཐམས་ཅད་ཀྱི་རང་བཞིན་དུ་བྱས་ནས། བདག་གིས་གདུག་པ་གདུལ་བ་ལ་སོགས་པའི་ལས་འདི་མཛོད་
[169b.7]ཅིག་ཅེས་གསོལ་བ་བཏབ་ནས། དེ་ལྟར་དེ་རྣམས་ལ་དགེ་བ་དང་མི་དགེ་བའི་ལས་རྣམས་ཕུལ་བར་བསྒོམ་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ལ་བསྒྲུབས་ན་ཇི་སྲིད་མངོན་སུམ་དུ་མཐོང་བ་དེ་སྲིད་ཀྱི་བར་དུ་བསྒོམས་ན། དེ་སྐད་ཅིག་གིས་གཟི་བརྗིད་ཅན་དུ་འགྱུར་རོ། །
[170a]
[170a.1]འདོད་ཆགས་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཆོས་ལ་བདག་མེད་མཁས་པ་ཡིས། །འདིར་གོམས་པ་འདི་ཆགས་པའོ། །ཞེས་བཤད་དོ། །དེ་དག་པ་ནི་དྲི་མ་ཐམས་ཅད་དང་བྲལ་བའོ། །འདི་ལྟར་འདི་དག་པ་ཡིན་ཞེ་ན། ངོ་བོ་ཉིད་ཀྱིས་ཞེས་བྱ་བ་སྨོས་ཏེ། ངོ་བོ་ཉིད་ནི་
[170a.2]སྒྲོ་འདོགས་པ་མེད་པ་གཉུག་མའི་བདག་ཉིད་གཟུང་བ་དང་འཛིན་པའི་རྣམ་པར་རྟོག་པ་སྤངས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་ཉིད་དམིགས་པ་མེད་པའི་ཐུགས་རྗེ་ཆེན་པོའོ་ཞེས་བྱ་བའི་ཐ་ཚིག་གོ། །དེ་ལས་བྱུང་བ་ནི་འཕགས་པ་སྤྱན་རས་གཟིགས་དབང་ཕྱུག་ནི་འདོད་ཆགས་
[170a.3]ཏེ། དེ་ལྟར་གྱུར་པའི་འདོད་ཆགས་དེ་ལ་མུ་སྟེགས་ཅན་གྱིས་སྨད་པར་གྱུར་པའོ། །དེ་ལ་མྱ་ངན་ལས་འདས་པའི་རྒྱུད་ལ་འཇུག་པའི་ཐབས་ཀྱིས་ལས་དང་ལྡན་པ་དེ་ལ་སྤྱིར་མུ་སྟེགས་ཞེས་བརྗོད་དོ། །སངས་རྒྱས་པའི་ཐེག་པ་ཆེན་པོ་སྤོང་བའི་ལམ་གཞན་འདི་ནི་མུ་སྟེགས་ཏེ། དེ་གང་ལ་ཡོད་
[170a.4]པ་དེ་ནི་མུ་སྟེགས་ཅན་ནོ། །དེ་ཡོད་པས་ན་ཉན་ཐོས་དང་རང་སངས་རྒྱས་ཀྱི་ཐེག་པའོ། །འཇིག་རྟེན་པའི་ལམ་ལ་ཞུགས་པ་འདི་བདེན་སྙམ་དུ་རྨོངས་པའི་མུ་སྟེགས་ཅན་གྱིས་སྨོད་པའོ། །དེ་ལ་ཆགས་པའི་ཆོས་འདི་ནི། །ཞེས་བྱ་བ་ནི་དེ་ལྟ་བུར་གྱུར་པ་དེ་གཉི་གའི་བདག་ཉིད་དག་པའི་འདོད་
[170a.5]ཆགས་དེ་ལ་ཤིན་ཏུ་ཆགས་པས་ཡང་དང་ཡང་མངོན་དུ་བྱས་པ་འདི་ནི་ཐེག་པ་ཆེན་པོ་སྟེ། རྡོ་རྗེ་ཐེག་པའི་རང་བཞིན་ནོ། །ནི་ཞེས་བྱ་བའི་སྒྲ་ནི་ངེས་པར་གཟུང་བ་སྟེ། འདི་ཁོ་ན་ཐེག་པ་ཆེན་པོའི་ཆོས་ཡིན་ནོ་ཞེས་རིམ་པ་བཞིན་དུ་སྦྱར་བར་བྱའོ། །གང་གི་ཕྱིར་ཆོས་འདི་རྣལ་འབྱོར་པ་སངས་རྒྱས་
[170a.6]དང་བྱང་ཆུབ་སེམས་དཔའ་ཉིད་ཀྱི་དངོས་གྲུབ་འགྲུབ་པའི་ཕྱིར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འགྲོ་བ་འདུལ་བའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་དེ་དང་དེ་ལས་བཤད་པའི་རྣལ་འབྱོར་ཆེན་པོ་བྱས་ལ། པདྨའི་སྒེག་
[170a.7]མོ་ལ་སོགས་པ་དང་། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་བདག་ཉིད་ཡང་དག་པར་མཆོད་ལ། ཕྱག་བཞིས་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ་འགྲོ་བ་འདུལ་བའི་ཕྱག་རྒྱ་ཆེན་པོའམ། སངས་རྒྱས་པདྨ་ལ་སོགས་པ་དེའི་
[170b]
[170b.1]རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་བདག་ལ་ཆགས་པའི་རང་བཞིན་གྱི་སྣང་བརྙན་ཙམ་འཕགས་པ་སྤྱན་རས་གཟིགས་དབང་ཕྱུག་ཏུ་བདག་ཉིད་བསམས་ཏེ། རང་གི་སྙིང་གའི་པདྨ་རྡོ་རྗེ་ལ་སྔགས་བཟླས་ཤིང་བཀོད་དོ། །ནམ་མཁའ་ཐམས་ཅད་པདྨའི་རིགས་ཀྱིས་དགང་བར་
[170b.2]བསམས་ལ་རང་གི་སྔགས་བརྗོད་པར་བྱའོ། །འཇིག་རྟེན་དབང་ཕྱུག་ཏུ་བདག་ཉིད་བསྒོམས་ནས་ཇི་སྲིད་བདག་ཉིད་དེའི་གཟུགས་སུ་མངོན་སུམ་ལྟ་བུར་མཐོང་བར་གྱུར་པ་དེ་ཉིད་ཀྱི་བར་དུ་བསྒོམ་པར་བྱའོ། །དེ་ནས་པདྨའི་རིགས་ཀྱི་ངོ་བོས་ཐམས་ཅད་དུ་ཁྱབ་པར་ཇི་སྲིད་བདག་ཉིད་ཀྱིས་མཐོང་
[170b.3]བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེའི་རྗེས་ལ་སྔ་མ་བཞིན་ཡང་དང་ཡང་དུ་བསྒྲུབས་ན་འཕགས་པ་སྤྱན་རས་གཟིགས་དབང་ཕྱུག་ཉིད་དུ་འགྱུར་རོ། །དེ་ནས་ཞེས་བྱ་བ་ལ་སོགས་པ་ནི་བཤད་ཟིན་ཏོ། །ཏིང་འཛིན་བརྟན་པའི་ཚུལ་གྱིས་ནི། །བྱམས་པ་ཆེན་པོ་བསྒོམས་ནས་
[170b.4]ཀྱང་། །ཞེས་བྱ་བ་ལ། བསྒོམས་པས་ནི་ཡང་དང་ཡང་མངོན་དུ་བྱས་པའོ། །ཅི་ཞིག་གོམས་པར་བྱེད་ཅེ་ན། ཅི་ལྟར་བྱ་ཞེ་ན། ཏིང་འཛིན་བརྟན་པའི་ཚུལ་གྱིས་ནི། །ཞེས་བྱ་བ་སྨོས་ཏེ། ཏིང་ངེ་འཛིན་ནི་སེམས་རྩེ་གཅིག་པའོ། །དེ་ཉིད་བརྟན་པའི་ཚུལ་གྱིས་ནི་མི་ཤིགས་
[170b.5]བའི་སྦྱོར་བའོ། །ཏིང་ངེ་འཛིན་བརྟན་པར་གྱུར་ནས་སྤྲོ་བར་བྱའོ། །བྱམས་པ་ཆེན་པོ་དེ་ཕྱོགས་བཅུར་བཀང་བར་ཇི་ལྟར་བྱ་ཞེ་ན། ཆོ་ག་བཞིན་ལྡན་ཁྱབ་བྱས་ནས། །ཞེས་བྱ་བ་སྨོས་ཏེ། བྱམས་པ་བསྒོམ་པའི་མན་ངག་གིས་ཏེ། སྔར་བཤད་པའི་མན་ངག་གིས་སྤྲོ་བར་བྱའོ་ཞེས་བྱ་
[170b.6]བའི་དོན་ཏོ། །ལྡན་ཞེས་བྱ་བ་ནི་ཏིང་ངེ་འཛིན་བཟང་པོ་དང་ལྡན་པའི་ཐ་ཚིག་གོ། །བསྒོམས་པ་དེས་ཅིར་འགྱུར་ཞེ་ན། སྐད་ཅིག་གིས་ནི་གཟི་ཅན་ཐོབ། །ཅེས་བྱ་བ་སྨོས་སོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འཇིག་རྟེན་དབང་ཕྱུག་གི་སྦྱོར་བས་རྣལ་འབྱོར་ཆེན་པོ་བྱས་ཏེ། མཆོད་
[170b.7]པ་དང་ཕྱག་བྱ་བ་རྗེས་སུ་སྤྱད་ལ། རང་གི་དམ་ཚིག་གི་ཕྱག་རྒྱས་བཅིངས་ཏེ། རང་གི་སྙིང་གའི་ཟླ་བ་ལ་གནས་པའི་རྡོ་རྗེ་པདྨ་ལ་སྙིང་པོ་བཀོད་པ་ཉིད་བརྗོད་ཅིང་། སེམས་ཅན་གྱི་ཁམས་ཐམས་ཅད་ལ་བྱམས་པ་ཆེན་པོ་སྤྲོས་ཏེ། པདྨའི་རིགས་ཀྱི་གཟུགས་སུ་རྣམ་པར་བསམས་ལ། རང་
[171a]
[171a.1]བཞིན་གྱིས་རྣམ་པར་དག་པའི་སྣང་བརྙན་ཙམ་དུ་བདག་ཉིད་སྔ་མ་བཞིན་དུ་བསམ་པར་བྱའོ། །དེ་ནས་མཚན་ཐོག་ཐག་བསྒོམས་ལ་དེའི་རྗེས་ལ་ནམ་མཁའ་ཐམས་ཅད་པདྨའི་རིགས་ཀྱིས་ཡོངས་སུ་གང་བར་མཐོང་བར་འགྱུར་རོ། །དེ་ནས་ཞེས་བྱ་བ་ནི་སྔ་མ་བཞིན་
[171a.2]དུ་ལ་སོགས་པ་བཞིན་ནོ། །འདོད་ཆགས་ངོ་བོ་ཉིད་ཀྱིས་དག །ཅེས་བྱ་བ་ནི་ངོ་བོ་ཉིད་ཀྱིས་དག་པ་ནི་གཟུང་བ་དང་འཛིན་པའི་རྣམ་པར་རྟོག་པ་སྤངས་ནས་ངོ་བོ་ཉིད་ཀྱིས་དག་པའོ། །ངོ་བོ་ཉིད་ཀྱིས་དག་པ་དེ་གང་ཡིན་ཞེ་ན། འདོད་ཆགས་ཞེས་བྱ་བ་སྨོས་ཏེ། འདོད་པ་གང་ཡིན་པ་དེ་ཆགས་པ་
[171a.3]ཡང་ཡིན་པས་ན་དེ་འདོད་ཆགས་སོ། །ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱ་བའི་མཐར་ཐུག་པའི་ཆགས་པ་ཆོས་བདག་མེད་པའི་ཆགས་པ་ཞེས་བྱ་བའི་དོན་ཏོ། །སྨྲ་བར་གྱུར་པ་ཞེས་བྱ་བ་ནི་ཇི་ལྟ་བའི་ཡི་གེ་ཧྲཱིཿལ་སོགས་པ་པདྨའི་རིགས་ཀྱིས་ཆོས་ཀྱི་ཡི་གེ་བརྗོད་པའོ། །
[171a.4]ཅི་ཞིག་སྨྲ་ཞེ་ན། ཚུལ་འདི་ནི་ཞེས་བྱ་བ་སྨོས་ཏེ། ཆོས་བདག་མེད་པ་ལ་ཤིན་ཏུ་ཆགས་པ་ནི་ཡང་དག་པར་རྫོགས་པའི་སངས་རྒྱས་ཐོབ་པའི་རྒྱུ་ཡིན་པའི་ཕྱིར་ཚུལ་ཡིན་ཏེ། སྨྲ་བར་གྱུར་པའི་ཚུལ་འདི་ཞེས་བྱ་བའོ། །དེ་ལྟར་འདི་སྨྲས་པས་ཅི་ཞིག་ཏུ་འགྱུར་ཞེ་ན། འདོད་ཆགས་ཕ་རོལ་ཕྱིན་
[171a.5]རྙེད་དེ། །སྐད་ཅིག་གིས་ནི་གཟི་ཅན་ཐོབ། །ཅེས་བྱ་བ་སྨོས་ཏེ། འདོད་ཆགས་ཀྱི་ཕ་རོལ་ཏུ་སོན་པས་ན་འདོད་ཆགས་ཀྱི་ཕ་རོལ་ཏུ་ཕྱིན་པ་སྟེ། ཆོས་བདག་མེད་པ་མངོན་དུ་བྱ་བ་དེ་ཐོབ་པས་ན་འདོད་ཆགས་ཀྱི་ཕ་རོལ་ཏུ་ཕྱིན་པ་རྙེད་པར་གྱུར་པའོ། །སྐད་ཅིག་མ་དེ་ཉིད་ལ་འཕགས་པ་སྤྱན་རས་
[171a.6]གཟིགས་དབང་ཕྱུག་ཏུ་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་ཉིད་ཀྱིས་འཇིག་རྟེན་དབང་ཕྱུག་གི་རྣལ་འབྱོར་དང་རྣལ་འབྱོར་ཆེན་པོ་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ལྕེ་ལ་རྡོ་རྗེ་དཀར་པོ་རྣམ་
[171a.7]པར་བསམས་ཏེ། ཡི་གེ་ཧི་ལ་སོགས་པའི་ཆོས་ཀྱི་ཡི་གེ་ལྕེའི་དབུས་སུ་དགོད་པར་བྱའོ། །ཡང་སྙིང་གའི་རྡོ་རྗེ་པདྨ་ཉི་མ་ཉིད་ལ་ཆོས་ཀྱི་ཡི་གེ་རྣམ་པར་བསམས་ལ། དེ་བརྗོད་ཅིང་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱ་བས། རང་གི་ལྷའི་གཟུགས་སྣང་
[171b]
[171b.1]བརྙན་ཙམ་དུ་བསམས་ལ། པདྨའི་རིགས་ཀྱིས་ནམ་མཁའི་ཁམས་ཐམས་ཅད་གང་བར་སྔ་མ་བཞིན་དུ་བསྒོམས་ན་གདོན་མི་ཟ་བར་འཇིག་རྟེན་དབང་ཕྱུག་ཏུ་འགྱུར་རོ། །དེ་ནས་ལས་ཀྱི་ཕྱག་རྒྱ་དམ་པའི་དངོས་གྲུབ་ཀྱི་རྒྱུད་ཅེས་བྱ་བ་ལ་སོགས་པ་ནི་སྔ་མ་བཞིན་ནོ། །བདག་གིས་བ་ལྷ་དང་རེག་པ་
[171b.2]དང་། །ཞེས་བྱ་བ་ནི་སེམས་ཅན་འགའ་ཞིག་གིས་འཕགས་པ་སྤྱན་རས་གཟིགས་དབང་ཕྱུག་ཇི་ལྟ་བ་བཞིན་དུ་མཐོང་བ་ཙམ་གྱིས་སྡིག་པ་ཐམས་ཅད་དང་བྲལ་བར་འགྱུར་རོ། །འཕགས་པ་ནོར་བཟངས་བཞིན་དུ་འགའ་ཞིག་གིས་རེག་པ་ཙམ་གྱིས་སམ། འགའ་ཞིག་གིས་མཚན་ཉན་པ་
[171b.3]ཙམ་གྱིས་སམ། དྲན་པ་ཙམ་གྱིས་ཀྱང་གསོད་པ་དང་། འཆིང་བ་ལ་སོགས་པ་སྡུག་བསྔལ་དང་བྲལ་བར་འགྱུར་རོ། །དེ་ནས་བདག་ཉིད་སེམས་ཅན་ཐམས་ཅད་དུ་འགྱུར་བ་ཡིན་ནོ་ཞེས་བསྒོམ་པར་བྱའོ། །བསྒོམས་པས་ཅི་ཞིག་བྱེད་ཅེ་ན། །སྡུག་བསྔལ་ཀུན་གྱི་མཐར་བྱེད་འགྱུར། །
[171b.4]ཞེས་བྱ་བ་སྨོས་ཏེ། སྡུག་བསྔལ་ཡང་ཡིན་ལ་ཀུན་ཡང་དེ་ཡིན་པས་ན་སྡུག་བསྔལ་ཀུན་ཏེ། སེམས་ཅན་རྣམས་ཀྱི་གདུང་བར་བྱེད་པའི་ངོ་བོ་དེ་དག་སེལ་བར་བྱེད་པ་དེའི་ཕྱིར་སྡུག་བསྔལ་ཀུན་གྱིས་མཐར་བྱེད་པ་བཞིན་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་དེ་སྐད་
[171b.5]བཤད་པ་བཞིན་དུ་གནས་པར་འདོད་ན་བདག་དེ་ལྟ་བུར་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རང་ཉིད་སྤྱན་རས་གཟིགས་དབང་ཕྱུག་གི་རྣལ་འབྱོར་གྱིས་ཐམས་ཅད་རྗེས་སུ་སྤྱད་པའི་ཕྱིར་རང་གི་ལས་ཀྱི་ཕྱག་རྒྱ་བཅིངས་ཏེ། སྙིང་གའི་ཟླ་བ་ལ་ཧྲཱིཿ་ལས་སྣ་ཚོགས་པདྨ་རྒྱ་གྲམ་རྣམ་
[171b.6]པར་བསམས་ལ་དེའི་སྟེང་དུ་བཟླས་པའི་སྙིང་པོ་བཀོད་དེ། ཟློས་ཤིང་ཕྱོགས་བཅུར་འཇིག་རྟེན་དབང་པོའི་གཟུགས་ཀྱིས་སེམས་ཅན་གྱི་ཁམས་ཐམས་ཅད་ཀྱི་སྡུག་བསྔལ་བསལ་ནས་པདྨའི་རིགས་ཀྱི་ངོ་བོར་རྣམ་པར་བསམས་ཏེ། སརྦྦ་ཨི་བ་ཨ་ཧཾ་ཞེས་ང་རྒྱལ་བསྐྱེད་ནས་རང་
[171b.7]བཞིན་གྱིས་འོད་གསལ་བའི་སྣང་བརྙན་ཙམ་དེའི་རང་བཞིན་བདག་ཡིན་ནོ་ཞེས་བསྒོམ་པར་བྱས་ལ། སྔ་མ་བཞིན་དུ་བསྒྲུབས་ན་དེའི་རྗེས་ལ་སྐད་ཅིག་དེ་ཉིད་ལ་འཕགས་པ་སྤྱན་རས་གཟིགས་དབང་ཕྱུག་ཏུ་འགྱུར་རོ། །ནོར་བུའི་རིགས་ཀྱི་དོན་ཐམས་ཅད་གྲུབ་པ་ལ་
[172a]
[172a.1]སོགས་པ་ནས་རིན་ཆེན་འབེབས་པའི་མཐར་ཐུག་པའི་དམ་པའི་དངོས་གྲུབ་དེའི་ཕྱག་རྒྱ་ཆེན་པོ་ལ་སོགས་པའི་འབྲས་བུ་འགྲུབ་པ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལ་ཞེས་བྱ་བ་ནི་དམིགས་ཀྱིས་དགར་བའོ། །ཕྱག་རྒྱ་ཆེན་པོའི་དམ་པའི་དངོས་གྲུབ་དེ་སྟོན་པར་
[172a.2]བྱེད་པའི་སྒྲའི་ཚོགས་ལ་ཡང་རྒྱུད་ཅེས་བྱའོ། །སངས་རྒྱས་ཀུན་དབང་བདག་གྱུར་ཞེས་བྱ་བ་ནི་སངས་རྒྱས་ཀུན་གྱིས་དབང་བསྐུར་བའི་ནོར་བུའི་རིགས་སོ། །དེ་བདག་གོ་ཞེས་བྱ་བ་བསྒོམས་པ་ནི་བདག་འགྱུར་ཞེས་བྱ་བའི་དོན་ཏོ། །ཇི་ལྟ་བ་བཞིན་དུ་བྱ་ཞེ་ན། རྡོ་རྗེ་སྙིང་པོ་ཇི་བཞིན་དུ། །ཞེས་
[172a.3]བྱ་བ་སྨོས་ཏེ། ཇི་ལྟར་ནོར་བུའི་རིགས་ཀྱི་སྙིང་པོ་བསྒོམས་པ་དེ་བཞིན་དུ་བདག་ཉིད་ཀྱང་བྱའོ་ཞེས་བྱ་བ་ནི་ཇི་བཞིན་དུའོ། །བསྒོམ་པར་བྱ་བ་རྣམ་བསྒོམས་ན། །ཞེས་བྱ་བ་ནི་ནོར་བུའི་རིགས་དེ་ཡང་དང་ཡང་མངོན་དུ་བྱས་པའོ། །ན་ཞེས་བྱ་བའི་སྒྲ་ནི་ངེས་པར་གཟུང་བ་སྟེ། ཡང་དང་ཡང་མངོན་དུ་
[172a.4]བྱས་པའོ། །ཅི་ཞིག་ཏུ་འགྱུར་ཞེ་ན། སྐད་ཅིག་གིས་ནི་གཟི་ཅན་ཐོབ། །ཅེས་བྱ་བ་སྨོས་སོ། །དེའི་དོན་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་འདོད་པའི་ལྷའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ་
[172a.5]རིན་ཆེན་སྒེག་མོ་ལ་སོགས་པ་རྣམས་དང་། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་བདག་ཉིད་ཡང་དག་པར་མཆོད་དེ། དེ་བཞིན་གཤེགས་པ་ཐམས་ཅད་ལ་ཕྱག་བཞི་བྱས་ཏེ་ལངས་ལ་རང་གི་ལྟ་བའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་པོ་
[172a.6]བརྗོད་ཅིང་དེ་བཞིན་གཤེགས་པ་ལ་སོགས་པས་སེམས་ཅན་གྱི་ཁམས་ཐམས་ཅད་ནོར་བུའི་རིགས་ཀྱི་དབང་བསྐུར་བས་དབང་བསྐུར་ཏེ། ནོར་བུའི་རིགས་ཀྱི་རང་བཞིན་དུ་རྣམ་པར་བསམས་ཏེ། ལྷ་ཐམས་ཅད་ནམ་མཁའ་དང་མཚུངས་པའི་སྣང་བརྙན་ཙམ་ནི་བདག་ཡིན་ནོ་ཞེས་ང་རྒྱལ་བསྐྱེད་
[172a.7]དེ། ཇི་སྲིད་བདག་ཉིད་རང་གི་ལྷའི་རང་བཞིན་དུ་མངོན་སུམ་ལྟ་བུར་གྱུར་པ་དེ་སྲིད་ཀྱི་བར་དུ་བསྒོམས་ན་བདག་ཉིད་དེའི་རང་བཞིན་དུ་མཐོང་བར་འགྱུར་རོ། །དེ་ནས་ནོར་བུའི་རིགས་ཐམས་ཅད་དུ་སོང་བར་ཇི་སྲིད་དུ་མངོན་སུམ་ལྟ་བུར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་
[172b]
[172b.1]ཐོག་ཐག་བསྒོམས་ན་དེའི་རྗེས་ལ་མངོན་སུམ་དུ་མཐོང་བར་གྱུར་པ་དང་། དེ་ནས་སྐད་ཅིག་དེ་ཉིད་ལ་རྡོ་རྗེ་སྙིང་པོར་འགྱུར་རོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །ཡོངས་སུ་རྫོགས་པར་བྱེད་འགྱུར་ཞིང་། །ཞེས་བྱ་བ་ནི་བདག་ཉིད་གྱུར་ཅིང་བསྒོམས་པའོ། །ཅི་ལྟར་འགྱུར་
[172b.2]ཞིང་ཞེ་ན། སེམས་ཅན་ཀུན་གྱི་རེ་བ་ཀུན། །ཡོངས་སུ་རྫོགས་པར་བྱེད་པའོ། །ཞེས་བྱ་བ་སྨོས་སོ། །ཅི་འདྲ་བ་ཞིག་ཅེ་ན། ནམ་མཁའི་སྙིང་པོ་འདྲ་བ་ནི། །ཞེས་བྱ་བ་སྨོས་སོ། །དེ་བཞིན་དུ་འཕགས་པ་ནམ་མཁའི་སྙིང་པོས་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་
[172b.3]པར་བྱེད་པ་དེ་བཞིན་དུ་འདིར་ཡང་འགྱུར་རོ་ཞེས་བྱ་བའི་དོན་ཏོ། །དེ་ལྟར་བསྒྲུབས་པས་ཅི་ཞིག་ཐོབ་པར་འགྱུར་ཞེ་ན། སྐད་ཅིག་གིས་ནི་གཟི་ཅན་ཐོབ། །ཅེས་བྱ་བ་སྨོས་ཏེ། སྐད་ཅིག་མ་དེ་ཉིད་ལ་རྡོ་རྗེ་སྙིང་པོ་ཐོབ་པར་འགྱུར་རོ་ཞེས་བྱ་བའི་དོན་ཏོ། །སྔ་མ་བཞིན་དུ་ཐམས་ཅད་བྱས་ནས་
[172b.4]དམ་ཚིག་གི་ཕྱག་རྒྱ་བཅིངས་ནས། རང་གི་སྙིང་གའི་རྡོ་རྗེ་རྒྱ་གྲམ་གྱི་དབུས་སུ་བཟླས་པའི་སྙིང་པོ་ཡིད་ཀྱིས་བྲིས་ཏེ། དེ་ཉིད་བརྗོད་ཅིང་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱིས་དེ་བཞིན་གཤེགས་པ་ལ་སོགས་པ་ཐམས་ཅད་དང་། སེམས་ཅན་གྱི་ཁམས་ཐམས་ཅད་ལ་དབང་བསྐུར་ནས་
[172b.5]ནོར་བུའི་རིགས་ཀྱི་རང་བཞིན་དུ་བསམས་ཏེ། ནམ་མཁའ་དང་མཚུངས་པའི་སོ་སོར་སྣང་བ་ནི་བདག་ཡིན་ནོ་ཞེས་ནོར་བུའི་རིགས་ཐམས་ཅད་ཀྱིས་ང་རྒྱལ་བསྐྱེད་པར་བྱའོ། །དེ་བཞིན་དུ་རྣམ་པར་བསྒོམས་ནས་དེ་ནས་ནམ་མཁའ་ཐམས་ཅད་ནོར་བུའི་རང་བཞིན་དུ་མཐོང་ན། དེ་ནས་སྐད་ཅིག་དེ་ཉིད་
[172b.6]ལ་རྡོ་རྗེ་སྙིང་པོ་དང་འདྲ་བར་འགྱུར་རོ། །དེ་ནས་ཞེས་བྱ་བ་ལ་སོགས་པ་སྔར་བཤད་ཟིན་ཏོ། །བདག་ཉིད་ཀྱང་ཞེས་བྱ་བ་ནི་ནོར་བུའི་རིགས་ཟློས་པ་ནི་ནོར་བུའི་རིགས་ཀྱི་བདག་ཉིད་ཀྱི་ནོར་སྦྱིན་ནོ། །ཀྱང་ཞེས་བྱ་བ་ནི་ངེས་པར་གཟུང་བ་སྟེ། དེའི་བདག་ཁོ་ནའི་ནོར་སྤངས་ནས་སེམས་ཅན་རྣམས་
[172b.7]ལ་གཏོང་བ་དེ་དང་དེ་དག་གི་རང་བཞིན་དུ་མོས་པ་དེའི་ཕྱིར། ནོར་སྦྱིན་དག་ཏུ་དགའ་བྱེད་ཅིང་། །ཞེས་བྱ་བ་ལ་རབ་ཏུ་དགའ་བྱེད་ནི་ཤིན་ཏུ་དགའ་བར་བྱེད་པའི་རང་བཞིན་ནོ། །ཅི་ཞིག་བྱེད་ཅིང་ཞེ་ན། ཆོས་འབྱུང་བའི་ཆོས་ཀྱི་རང་བཞིན་གྱིས་ཆོས་ཀྱི་ཕྱག་རྒྱ་ནི་ཡི་གེ་ཏྲ་ལ་སོགས་པའི་རང་
[173a]
[173a.1]བཞིན་བརྗོད་པའོ། །གཟི་ཅན་ཚེ་འདི་ཉིད་ལ་ཐོབ། །ཅེས་བྱ་བ་ནི་རྡོ་རྗེ་སྙིང་པོ་ཐོབ་པར་འགྱུར་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་རྣལ་འབྱོར་དང་རྣལ་འབྱོར་ཆེན་པོ་བྱས་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ།
[173a.2]ཕྱག་བྱས་ཏེ་སྔ་མ་བཞིན་དུ་རང་གི་ལྕེ་ལ་ཆོས་ཀྱི་ཡི་གེ་རྣམ་པར་བསམས་ཏེ། དེ་ཉིད་ལས་རང་གི་སྙིང་གར་སྣ་ཚོགས་རྡོ་རྗེ་རྣམ་པར་བསམས་ཏེ། དེ་ཉིད་བརྗོད་ཅིང་ནམ་མཁའ་དང་མཉམ་པའི་སྣང་བརྙན་ཙམ་ནི་བདག་ཡིན་ནོ་ཞེས་བསྒོམས་ནས་སངས་རྒྱས་ཐམས་ཅད་ལ་སོགས་པ་དང་། སེམས་ཅན་གྱི་
[173a.3]ཁམས་ཐམས་ཅད་རང་གི་རང་བཞིན་དུ་བྱས་ནས། །དེའི་རྗེས་ལ་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་པར་བྱའོ། །དེ་ནས་ཡི་གེ་ཏྲ་ལ་སོགས་པའི་རང་གི་ཆོས་ཀྱི་ཕྱག་རྒྱ་ཟློས་ཤིང་སྔ་མ་བཞིན་དུ་བསྒྲུབས་ནས་རྡོ་རྗེ་སྙིང་པོ་ཐོབ་པར་འགྱུར་རོ། །དེ་ནས་ལས་ཀྱི་ཕྱག་རྒྱ་དམ་པའི་དངོས་གྲུབ་ཀྱི་
[173a.4]རྒྱུད་ཅེས་བྱ་བ་ལ་སོགས་པ་ནི་བཤད་ཟིན་ཏོ། །འཇིག་རྟེན་དང་འཇིག་རྟེན་ལས་འདས་པའི་ནོར་སྤངས་པ་ནི་དབུལ་པོའོ། །དེའི་དབུལ་པོ་རྣམས་ལ་ཕན་པའི་ཕྱིར། ནོར་བུའི་རིགས་ཐོབ་པ་ནི་བསམ་པ་ཐམས་ཅད་རྫོགས་པའོ། །ནོར་ནི་ནོར་བུའི་རིགས་ཏེ། དེ་བསྒྲུབ་པ་ནི་དེ་མངོན་དུ་
[173a.5]བྱེད་པའོ། །དེ་བསྒོམས་པས་དེ་ལ་གཞོལ་ཞིང་དེ་ལ་ཕྱོགས་པའོ། །བརྩོན་པ་དང་ལྡན་པ་ནི་བསྒོམ་པའི་འབད་པ་དང་ལྡན་པ་སྟེ། འབད་པ་དང་ལྡན་པ་དེས་གཟི་བརྗིད་ཅན་དུ་གྱུར་པ་ཐོབ་ཅིང་འགྲོ་བའོ། །ཅི་སྟེ་ཡང་། མི་འདོད་དངོས་གྲུབ་གོང་མ་བཞིན། །ཞེས་བྱ་བ་ནི་ཐམས་ཅད་དུ་སྦྱོར་བར་ཤེས་
[173a.6]པར་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་རྣལ་འབྱོར་དང་། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས་རང་གི་སྙིང་གར་སྣ་ཚོགས་རྡོ་རྗེ་རྣམ་པར་བསམས་ཏེ། རང་གི་ལྷའི་ལས་ཀྱི་ཕྱག་རྒྱ་བཅིངས་ནས་སྙིང་པོ་སྣ་ཚོགས་རྡོ་རྗེའི་དབུས་སུ་ཡིད་
[173a.7]ཀྱིས་བྲིས་ལ། དེ་ཉིད་བརྗོད་ཅིང་རང་བཞིན་གྱིས་འོད་གསལ་བ་སྒྱུ་མ་དང་མཚུངས་པར་བདག་ཉིད་བསམས་ཏེ། དེ་བཞིན་གཤེགས་པ་ལ་སོགས་པ་ཐམས་ཅད་དང་སེམས་ཅན་གྱི་ཁམས་ཐམས་ཅད་ལ་ནོར་བུའི་རིགས་ཀྱི་དབང་བསྐུར་བས་དབང་བསྐུར་ཏེ་ནོར་བུའི་རིགས་ཀྱི་ངོ་བོར་བསྒོམ་
[173b]
[173b.1]པར་བྱའོ། །དེའི་རྗེས་ལ་ཐམས་ཅད་ནི་བདག་ཡིན་ནོ་ཞེས་ང་རྒྱལ་བསྐྱེད་ཅིང་བསྒོམས་ལ་དེ་ནས་སྔ་མ་བཞིན་དུ་བསྒྲུབས་ན་ནམ་མཁའི་སྙིང་པོར་འགྱུར་རོ། །རིགས་ཐམས་ཅད་ནི་ཇི་སྐད་དུ་བཤད་པའོ། །དེ་དག་གི་ཕྱག་རྒྱ་རྣམས་ནི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་
[173b.2]ལས་ཀྱི་ཕྱག་རྒྱ་རྣམས་སོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དངོས་གྲུབ་དམ་པ་ཐོབ་པ་ནི་རྙེད་པའོ། །དེའི་ཆོ་ག་རྒྱས་པ་ནི་ཇི་སྐད་དུ་བཤད་པའི་ཕྱག་རྒྱ་ཆེན་པོ་ལ་སོགས་པའི་བསྒྲུབ་པ་བྱེ་བྲག་ཏུ་རྒྱས་པ་དེ་སྟོན་པར་བྱེད་པའི་དམ་ཚིག་ནི་རྒྱུད་དོ། །དེ་ལྟར་དེ་བཞིན་
[173b.3]གཤེགས་པའི་རིགས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་ཆོས་དང་། ལས་ཀྱི་ཕྱག་རྒྱ་རྣམས་ཀྱིས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་དངོས་གྲུབ་ཏུ་འགྱུར་བ་བསྟན་ནས། ད་ནི་དམ་ཚིག་གི་དངོས་གྲུབ་རྣམ་པར་གཞག་པ་ནི་ཕྱག་རྒྱ་ཆེན་པོ་ལ་སོགས་པ་བསྒོམ་པའི་
[173b.4]བྱ་བའི་དོན་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ལ་སོགས་པ་སྟེ། དེ་ནས་ཀྱི་སྒྲ་ནི་དེ་མ་ཐག་པ་བརྗོད་པ་སྟེ། ཡང་ཞེས་བྱ་བ་ནི་ཟློས་པའི་དོན་ཏེ། ཕྱག་རྒྱ་ཆེན་པོ་ལ་སོགས་པ་སྒོམ་པ་ལ་ལྟོས་པའོ། །དེ་བཞིན་གཤེགས་པ་
[173b.5]ཐམས་ཅད་ནི་ཇི་སྐད་དུ་བཤད་པའོ། །དེ་བཞིན་གཤེགས་པ་ནི་ལྔའོ། །དེ་བཞིན་གཤེགས་པའི་རིགས་དང་། རྡོ་རྗེ་དང་། པདྨ་དང་ནོར་བུའི་རིགས་རྣམས་སོ། །དེ་བཞིན་གཤེགས་པ་ཐམས་ཅད་ཀྱང་དེ་ཡིན་ལ། རིགས་ཀྱང་དེ་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་
[173b.6]སོ། །དེའི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་སྟེ། གང་གིས་འདོད་པ་སྙོམས་ཞུགས་པ། །དེ་འདོད་པས་ནི་སྦྱོར་བར་བྱེད། ཅེས་བྱ་བ་ནི་མི་འདའ་བའི་དོན་གྱིས་དམ་ཚིག་སྟེ། དངོས་གྲུབ་དེས་ཕྱག་རྒྱ་ཆེན་པོ་ལ་སོགས་པ་བསྐྱེད་པའོ། །དེ་སྟོན་པར་བྱེད་པའི་རྒྱུད་
[173b.7]ལ་ཡང་དེ་སྐད་ཅེས་བྱའོ། །དེ་ལ་ཞེས་བྱ་བ་ནི་དམིགས་ཀྱིས་དགར་བའོ། །རེ་ཞིག་དེ་བཞིན་གཤེགས་པ་ཐམས་ཅད་ཀྱིས་དམ་ཚིག་གི་དངོས་གྲུབ་ཀྱི་རྒྱུད་གསུངས་པ་སྟེ། འདི་ཞེས་བྱ་བ་ཕྱིས་འཆད་པར་འགྱུར་བ་བློ་ལ་གནས་པའོ། །གང་གིས་ཞེས་བྱ་བ་ནི་དེ་བཞིན་གཤེགས་པའི་རྣལ་
[174a]
[174a.1]འབྱོར་པས་རྡོ་རྗེ་སེམས་དཔའ་ལ་སོགས་པ་བསྒོམ་པའི་འདོད་པ་ལ་སྙོམས་པར་འཇུག་པའོ། །རྡོ་རྗེ་སེམས་དཔའ་ལ་སོགས་པའི་རྣམ་པར་རྩེ་གཅིག་པ་ནི། དེ་ལ་འདོད་པ་སྦྱོར་བར་བྱེད། །ཅེས་བྱའོ། །དེའི་རྣལ་འབྱོར་པས་འདོད་པ་ལ་སྙོམས་པར་འཇུག་པ་ནི་རྡོ་རྗེ་སེམས་དཔའ་ལ་སོགས་པ་ཡིན་
[174a.2]གྱི། རྡོ་རྗེ་ཧཱུཾ་མཛད་ལ་སོགས་པ་ཁྲོ་བོའི་ཡང་མ་ཡིན་ལ། དེ་བཞིན་གཤེགས་པའི་ཡང་མ་ཡིན་ཞིང་འགྲོ་བ་འདུལ་བ་ལ་སོགས་པ་མ་ཡིན་ནོ། །དེ་སྐད་དུ་ཇི་ལྟར་ཤེས་ཤེ་ན། འདོད་པའི་སྒྲས་ནི་རྡོ་རྗེ་སེམས་དཔའ་ལ་སོགས་པ་བརྗོད་པ་ཡིན་ཏེ། ཆོས་ཀྱི་འདོད་པ་ཡིད་འོང་བ། །འདོད་ཆགས་དམ་ཚིག་ཅེས་སུ་བརྗོད། །
[174a.3]ཅེས་འབྱུང་བའི་ཕྱིར། དེ་བཞིན་གཤེགས་པའི་རིགས་ནི་འདོད་ཆགས་ཀྱི་སྒྲས་བསྟན་ཏོ། །དེ་ལྟར་ན། སངས་རྒྱས་ཕྱག་རྒྱ་ཆེན་པོ་ནི། །ཞེས་བྱ་བ་ནི་སངས་རྒྱས་ཀྱི་ཕྱག་རྒྱ་ཆེན་པོ་སྟེ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཞིའོ། །ཡེ་ཤེས་ནི་དེར་ངེས་པའོ། །དེའི་དམ་ཚིག་ནི་བསྐྱེད་པའི་རྒྱུར་གྱུར་པ་ལས་མི་འདའ་བའི་ཕྱིར་རོ་
[174a.4]ཞེས་བྱ་བའི་དོན་ཏོ། །བཤད་པ་ནི་བསྟན་པའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྣམ་པར་སྣང་མཛད་ལ་སོགས་པ་སྔར་བཤད་པའི་ཚུལ་གྱིས་དེ་བཞིན་གཤེགས་པའི་ཕྱག་རྒྱ་བཅིངས་ལ། རང་གི་སྙིང་གར་ཡིད་ཀྱིས་རྡོ་རྗེ་སེམས་དཔའ་ལ་སོགས་པ་ངེས་པར་བྱས་ལ། དེ་བསྒོམ་པ་ལ་དགའ་བའི་སེམས་ཅན་གྱི་ཁམས་རྣམས་བྱང་
[174a.5]ཆུབ་ཏུ་སེམས་བསྐྱེད་དེ་རྣམ་པར་སྦྱངས་ནས་བྱ་བ་བྱས་པ་ནི་བདག་ཡིན་ནོ་ཞེས་བསམས་ནས། རྣམ་པར་སྣང་མཛད་ལ་སོགས་པའི་གཟུགས་སུ་བདག་ཉིད་བསྒོམ་པར་བྱའོ། །དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །དེ་བཞིན་གཤེགས་པ་རྣམས་ཀྱི་རིགས་ནི་དེ་བཞིན་གཤེགས་པ་ལས་སྐྱེས་པའི་རིགས་ཏེ། འདི་རྡོ་རྗེ་སེམས་
[174a.6]དཔའ་ནས་བརྩམས་ནས་རྡོ་རྗེ་འབེབས་པའི་མཐར་ཐུག་པའོ། །དེའི་དམ་ཚིག་གི་དངོས་གྲུབ་ཀྱི་རྒྱུད་བཤད་པ་ནི་སྟོན་པའོ། །འདོད་པ་རྣམས་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པ་ལ་འདོད་པར་བྱ་བ་དེ་སྐད་བཤད་དོ། །འདོད་པ་ནི་བཅོམ་ལྡན་འདས་དེ་ཉིད་སེམས་དཔའ་སྟེ་ཞེས་འབྱུང་བས།
[174a.7]དེ་དག་ལ་ཆགས་པ་དང་མ་བྲལ་བ་དང་། མངོན་དུ་ཕྱོགས་པ་དང་། ཤིན་ཏུ་སྲེད་པའོ། །རྣལ་འབྱོར་པས་དེ་དག་ལ་ཤིན་ཏུ་ཆགས་པ་བསྒོམ་པའོ་ཞེས་བྱ་བའི་དོན་ཏོ། །དམ་ཚིག་ཤིན་ཏུ་ཚུལ་ཆེན་འདི། །ཞེས་བྱ་བ་ནི་ཐམས་ཅད་སོང་བས་ན་ཚུལ་ཆེན་ནོ། །གང་གི་རིགས་ལས་ཤེ་ན། དེ་བཞིན་གཤེགས་པའི་
[174b]
[174b.1]རིགས་ཞེས་བྱ་བ་སྨོས་སོ། །ཅིར་འགྱུར་ཞེ་ན། དག་པ་ཞེས་བྱ་བ་སྨོས་ཏེ། ཆགས་པ་ལ་སོགས་སྤངས་པའོ། །དེ་ཉིད་ཀྱི་ཕྱིར་འདི་ལ། རྒྱལ་བས་ཀྱང་ནི་འདའ་མི་མཛད། །ཅེས་བྱའོ། །དེ་བཞིན་གཤེགས་པ་རྣམས་ཀྱི་རང་བཞིན་དུ་གྱུར་པའི་ཕྱིར་དེ་བཞིན་གཤེགས་པ་ཐམས་ཅད་
[174b.2]ཀྱང་སྒོམ་པ་དང་འདའ་བར་མི་མཛད་དོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པའི་རིགས་ཀྱི་རྣལ་འབྱོར་པ་རྣམས་ཀྱིས་སྔར་བཤད་པའི་ཚུལ་གྱིས་རང་གི་ཕྱག་རྒྱ་བཅིངས་ཏེ། རང་གི་ལྷ་ལ་ཤིན་ཏུ་ཆགས་པའི་སྒོམ་པས་བསྒོམ་པར་བྱའོ། །
[174b.3]དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །རྡོ་རྗེ་ཧཱུཾ་མཛད་ནས་བརྩམས་ནས་ཁྲོ་བོ་རྡོ་རྗེ་འབེེབས་པའི་མཐར་ཐུག་པ་ནི་འདིར་རྡོ་རྗེའི་རིགས་སོ། །དེའི་དམ་ཚིག་ནི་རང་གི་ལྷའི་དེའི་བདག་ཉིད་དུ་བསྒོམ་པར་མོས་པའི་རྣལ་འབྱོར་པ་དེས་དངོས་གྲུབ་ཀྱི་སྦྱོར་བ་དེ་ལ་མངོན་པར་དགའ་བས་རང་གི་
[174b.4]ཁྲོ་བོའི་ཕྱག་རྒྱ་ཆེན་པོར་བསྐྱེད་ལ། དེ་སྟོན་པར་བྱེད་པའི་རྒྱུད་བཤད་པའོ། །སེམས་ཅན་དོན་དུ་ཁྲོ་མིན་ཡང་། །ཞེས་བྱ་བ་ནི་འདི་ལ་ཁྲོ་བ་མི་མངའ་ཡང་ཁྲོ་བོའི་རྣལ་འབྱོར་པས་སེམས་ཅན་དང་སེམས་ཅན་མ་ཡིན་པ་ལ་གནོད་པ་རྣམས་ལ་ཁྲོ་བ་ལྟ་བུར་གྱུར་པ་ཡིན་ཡང་དེ་ལ་
[174b.5]ཉོན་མོངས་པ་མི་མངའོ་ཞེས་བྱ་བའི་དོན་ཏོ། །དེའི་ཁྲོ་བོ་མ་ཡིན་པ་ཡང་རྡོ་རྗེ་ཧཱུཾ་མཛད་ལ་སོགས་པ་ནས་རྡོ་རྗེ་འབེེབས་པའི་མཐར་ཐུག་པའི་ཁྲོ་བོའི་རྣལ་འབྱོར་པའོ། །ཡང་གི་སྒྲ་ནི་ངེས་པར་གཟུང་བའོ། །ཞེ་སྡང་མི་མངའ་བ་ཡིན་ཡང་སེམས་ཅན་གདུག་ཅིང་མ་རུང་བ་རྣམས་
[174b.6]གདུལ་བའི་ཕྱིར། རང་རང་གི་རྒྱུད་ལ་ཡོད་པའི་འདོད་ཆགས་ལ་སོགས་པའི་ཉོན་མོངས་པ་འཇོམས་པའི་སེམས་ཅན་གྱི་དོན་དུའོ། །ཁྲོ་བོ་ཆེན་པོ་རབ་ཏུ་སྟོན། །ཞེས་བྱ་བ་ནི་ཆོས་བདག་མེད་པ་ལས་བྱུང་བས་སེམས་ཅན་དང་སེམས་ཅན་མ་ཡིན་པ་ལ་གནོད་པ་རབ་ཏུ་སྟོན་པ་ནི་ཁྲོ་བོ་ཆེན་པོ་
[174b.7]རབ་ཏུ་སྟོན་པ་སྟེ། རྡོ་རྗེའི་རིགས་ཀྱི་ནམ་མཁའ་ཁྱབ་པར་བསྒོམས་པ་ནི་ཆེན་པོ་ཞེས་བྱ་བའི་དོན་ཏོ། །འདི་གང་གི་རིགས་ལ་དམ་ཚིག་ཡིན་ཞེ་ན། རྡོ་རྗེའི་རིགས་ནི་ཆེན་པོ་ཡིས། །ཞེས་བྱ་བ་སྨོས་ཏེ། རྡོ་རྗེ་ཆེན་པོ་དང་། བྱང་ཆུབ་ཀྱི་སེམས་ཆེན་པོ་བསྐྱེད་པའི་རྡོ་རྗེ་རྩེ་ལྔ་པ་འབར་
[175a]
[175a.1]བའི་རྡོ་རྗེ་ཆེན་པོའི་རིགས་ནི་དེ་ལས་བྱུང་བ་སྟེ། རྡོ་རྗེ་ཧཱུཾ་མཛད་ལ་སོགས་པ་ནས་རྡོ་རྗེ་འབེེབས་པའི་མཐར་ཐུག་པའི་རྡོ་རྗེའི་རིགས་ཐམས་ཅད་ཀྱི་རྡོ་རྗེ་ཆེན་པོའི་རིགས་ཏེ། འདིའི་སྒྲ་ནི་ངེས་པར་གཟུང་བའོ། །དམ་ཚིག་འདི་ནི་འདའ་བར་དཀའ། །ཞེས་བྱ་བའོ། །
[175a.2]འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་ཧཱུཾ་མཛད་ཀྱི་རྣལ་འབྱོར་དང་། རྣལ་འབྱོར་ཆེན་པོའམ། དེའི་རིགས་ཀྱི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཆོས་བདག་མེད་པའི་རྣལ་འབྱོར་ཆེན་པོའི་རིགས་ལས་བྱུང་བའི་རྡོ་རྗེ་རིགས་ཀྱིས་ནམ་མཁའི་ཁམས་ཐམས་ཅད་
[175a.3]བཀང་ལ། སྒྱུ་མ་ལྟ་བུ་ཐམས་ཅད་དུ་ཁྱབ་པའི་རིགས་སུ་བདག་ཉིད་ཀྱིས་ཤིན་ཏུ་རྩེ་གཅིག་པར་བསྒོམ་པར་བྱའོ་ཞེས་བྱ་བའི་སྒྲ་ནི་སྔ་མ་བཞིན་ནོ། །འདི་ཞེས་བྱ་བ་ནི་པདྨའི་རིགས་ཐུགས་ལ་གནས་པ་གསུངས་སོ། །རང་བཞིན་དག་པར་ཤེས་ནས་ཀྱང་། །ཞེས་བྱ་བ་ནི་དེ་བཞིན་
[175a.4]ཉིད་དེ་རྣམ་པར་ཤེས་པའོ། །ཆོས་ཐམས་ཅད་རང་བཞིན་གྱིས་རྣམ་པར་དག་པ་སྣང་བརྙན་ཙམ་སྟེ། གདོད་མ་ནས་མ་སྐྱེས་པའི་ཕྱིར་རོ་ཞེས་ཐོས་པ་དང་། བསམ་པའི་ཤེས་པ་དག་གིས་ངེས་པར་བྱའོ་ཞེས་བྱ་བའི་དོན་ཏོ། །གང་དང་གང་འགྲོ་བ་འདུལ་བ་ནས་པདྨ་འབེབས་པའི་མཐར་ཐུག་
[175a.5]བསྒོམ་པའི་མཚན་ཉིད་ཅན་དེ་དང་དེ་ནི་པདྨའི་རིགས་ཀྱི་དགོས་པ་བྱེད་པ་སྟེ། པདྨའི་རིགས་ཀྱི་རྣལ་འབྱོར་པ་དེས་འགྲོ་བ་འདུལ་བ་སྒོམ་པ་ལ་སོགས་པ་དེ་དང་དེའི་དགོས་པ་འདི་ནི་པདྨའི་རིགས་ཆེན་པོའི་དམ་ཚིག་འདའ་བར་དཀའ་བ་སྟེ། པདྨའི་རིགས་ཆེན་པོ་སྟེ། བསྐྱེད་པའི་རྒྱུར་གྱུར་
[175a.6]པ་ལས་འདའ་བར་དཀའ་བའོ། །ཡང་གི་སྒྲ་ནི་དེ་བཞིན་གཤེགས་པ་ལ་སོགས་པའི་རིགས་ལ་ལྟོས་ནས་བརྗོད་པ་ཡིན་ནོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བ་ལ་སོགས་པ་པདྨའི་རིགས་ཀྱི་རྣལ་འབྱོར་དང་རྣལ་འབྱོར་ཆེན་པོ་བྱས་ལ། མཆོད་པ་
[175a.7]ཐམས་ཅད་ཀྱིས་ཡང་དག་པར་མཆོད་ལ། ཕྱག་བྱས་ནས་རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཆོས་ཐམས་ཅད་བདག་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པདྨ་ལས་བྱུང་བ་ཐམས་ཅད་དུ་ཁྱབ་པའི་རིགས་ཀྱི་རང་བཞིན་སྣང་བརྙན་ཙམ་དུ་བདག་ཉིད་རྣམ་
[175b]
[175b.1]པར་བསམས་ཏེ། སེམས་ཅན་གྱི་ཁམས་ཐམས་ཅད་ཀྱང་རང་གི་རང་བཞིན་དུ་བྱས་ནས་བྱ་བ་བྱས་པ་ཡིན་ནོ་ཞེས་སེམས་རྩེ་གཅིག་པས་རང་གི་ལྷ་བསྒོམ་པར་བྱའོ། །དེ་ལ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །མང་ཡང་རུང་ཞེས་བྱ་བ་ནི་ཕྱི་རོལ་གྱི་རྗས་དང་། བསྒོམས་
[175b.2]པ་ལས་བྱུང་བའི་ནོར་བུའི་རིགས་ཀྱི་རང་བཞིན་དུ་རྫས་རྣམས་སོ། །མང་ཡང་རུང་བ་ཞེས་བྱ་བ་ནི་ཕྱི་རོལ་གྱི་རྫས་སམ་བསྒོམས་པ་ལས་བྱུང་བའི་ནོར་བུའི་རིགས་ཀྱི་རང་བཞིན་ཐམས་ཅད་དུ་སོང་བ་ནི། ཇི་ཙམ་ནུས་པ་ཉིད་དུ་ནི། །བྱིས་པས་ཉི་མ་མ་སྟོངས་པར། །བྱ་བ་འདི་ནི་དམ་ཚིག་
[175b.3]ཡིན། །ཞེས་བྱ་བ་ནི་ནོར་བུའི་རིགས་ཀྱི་རྣལ་འབྱོར་པའི་བྱ་བའོ། །སྦྱིན་པ་ནི་གང་གང་སྦྱིན་པས་ཉི་མ་མ་སྟོངས་པར་ནོར་བུའི་རིགས་ཀྱི་རྣལ་འབྱོར་པས་ཅིའི་ཕྱིར་བྱེད་ཅེ་ན། གང་གི་ཕྱིར་ནོར་བུའི་རིགས་བསྐྱེད་པ་ནི་སྦྱིན་པའི་རིགས་བཞིན་ཡིན་པ་འདིའི་དམ་ཚིག་ཡིན་པས་རྒྱུ་དེའི་ཕྱིར་
[175b.4]རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པ་ལ་སོགས་པ་ནོར་བུའི་རིགས་ཀྱི་རྣལ་འབྱོར་དང་། རྣལ་འབྱོར་ཆེན་པོ་བྱས་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བཞི་བྱས་ཏེ། རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ནོས་ནོར་བུའི་
[175b.5]རིགས་ཀྱི་ལྷ་རྣམས་ཀྱི་གཟུགས་སུ་ཇི་ཙམ་པར་བསྒོམས་ཏེ། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཕྱོགས་གཅིག་གམ་མཐའ་དག་ལ་དབང་སྒྱུར་བ་སྦྱིན་པས་རབ་ཏུ་མགུ་ཞིང་ཚིམ་ནས་ནོར་བུའི་རིགས་ཀྱི་གཟུགས་སུ་བསམ་པར་བྱའོ། །དེ་ནས་ཐམས་
[175b.6]ཅད་ནི་བདག་ཡིན་ནོ་ཞེས་ང་རྒྱལ་བསྐྱེད་དེ། ནམ་མཁའ་དང་མཚུངས་པའི་སྣང་བརྙན་ཙམ་དུ་བདག་ཉིད་དབྱེ་བ་མེད་པའི་སེམས་ཀྱིས་བསྒོམས་ཏེ། ཉིན་རེ་ཞིང་ཐུན་བཞིའི་སྦྱོར་བས་ཉུང་བའམ་ཆེས་ཉུང་བའམ། མང་བ་ལས་ཀྱང་ཆེས་མང་བའི་ཕྱི་རོལ་གྱི་དངོས་པོ་སྦྱིན་པར་བྱའོ། །
[175b.7]དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དམ་ཚིག་ལ་རྗེས་སུ་གནས་པའི་དངོས་གྲུབ་བསྟན་ནས། ད་ནི་དེ་དག་ཉིད་དངོས་པོ་ལ་མངོན་པར་ཞེན་པ་སྤངས་ཏེ། གཟུགས་བརྙན་ཙམ་དུ་ཕྱག་རྒྱ་ཆེན་པོ་ལ་སོགས་པ་བསྒོམ་པར་བྱའོ་ཞེས་བྱ་བའི་དོན་བསྟན་པའི་
[176a]
[176a.1]ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །དེ་བཞིན་གཤེགས་པ་ཐམས་ཅད་ཀྱི་རིགས་རྣམས་ཀྱི་ཆོས་ནི། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཆོས་སོ། །ཐོག་མ་དང་ཐ་མ་མེད་པའི་ཆོས་ཀྱི་
[176a.2]དབྱིངས་དེ་ཉིད་ཀྱི་ཕྱག་རྒྱས་དེ་བསྒོམ་པར་དགའ་བའི་སེམས་ཅན་གྱི་ཁམས་ལ་རྒྱས་འདེབས་པའོ། །དེའི་ཡེ་ཤེས་ཀྱིས་དེའི་དངོས་གྲུབ་ཀྱི་ཕྱག་རྒྱ་ཆེན་པོ་ལ་སོགས་པ་བསྐྱེད་པ་དེ་སྟོན་པར་བྱེད་པའི་རྒྱུད་གསུངས་པར་མཛད་པའོ། །དེ་ལ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །སངས་རྒྱས་
[176a.3]ཆོས་ཞེས་གྲགས་སོ་ཞེས། །བརྗོད་ན་ཆོས་ཉིད་ཡི་གེ་ནི། ཞེས་བྱ་བ་ནི་སངས་རྒྱས་བཅོམ་ལྡན་འདས་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་མཚན་ཉིད་ནི་ཆོས་ཡིན་ནོ་ཞེས་བསྒྲགས་ཤིང་སྟོན་ཏོ། །དེ་སྐད་དུ་ཡང་རྒྱུད་འདི་ལས། །ཐོག་མཐའ་མེད་པའི་སེམས་དཔའ་ནི། །ནམ་མཁའི་
[176a.4]སྐྱེ་བ་མཚན་ལྡན་ཕྱིར། །ཀུན་དུ་བཟང་པོ་ཀུན་བདག་ཉིད། །འདོད་པ་ཀུན་གྱི་འགྲོ་བའི་བདག །དེ་ཉིད་བཅོམ་ལྡན་སེམས་དཔའ་ཡི། །འདོད་པ་ཀུན་གྱི་དེ་བཞིན་གཤེགས། །ཞེས་འཆད་པར་འགྱུར་རོ། །འདི་ནི་ཐོག་མ་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་གྱི་དོན་དམ་པར་སངས་
[176a.5]རྒྱས་ཡིན་གྱི། གཟུགས་ཀྱི་སྐུའི་རང་བཞིན་ནི་མ་ཡིན་ནོ་ཞེས་བཤད་པ་ཡིན་ཏེ། དོན་དམ་པར་གཟུགས་མེད་པའི་ཕྱིར་རོ། །བརྗོད་ན་ཆོས་ཉིད་ཡི་གེ་ནི། །ཞེས་བྱ་བ་ནི་དེ་བཞིན་དུ་ཐོས་པ་དང་། བསམ་པའི་ཤེས་པ་དག་གིས་ངེས་པའོ། །ཁྱད་པར་ཇི་ལྟ་བུ་ཞིག་ཅེ་ན། སངས་རྒྱས་ཆོས་ནི་
[176a.6]ཕྱག་རྒྱ་ཆེར། །ཡེ་ཤེས་མཆོག་གི་ཚུལ་ཡིན་ནོ། །ཞེས་བྱ་བ་སྨོས་ཏེ། སངས་རྒྱས་ཀྱི་ཆོས་ནི་སངས་རྒྱས་ཀྱི་ཆོས་ཏེ་བཤད་མ་ཐག་པའོ། །ཕྱག་རྒྱ་ཡང་ཡིན་ལ་ཆེན་པོ་ཡང་དེ་ཡིན་པས་ན་ཕྱག་རྒྱ་ཆེན་པོ་སྟེ། དམ་ཚིག་དང་། ཆོས་དང་། ལས་དང་ཕྱག་རྒྱ་ཆེན་པོའོ། །དེའི་ཡེ་ཤེས་
[176a.7]ནི་གཟུགས་བརྙན་དང་འདྲ་བར་ངེས་པའོ། །དེའི་མཆོག་ནི་དམ་པའོ། །ཚུལ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་ཡེ་ཤེས་ཐོས་པ་དང་བསམས་པའི་བདག་ཉིད་དོ། །འདི་སྐད་སྟོན་པ་ཡིན་ཏེ། ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་ནི་སངས་རྒྱས་ཡིན་ནོ་ཞེས་
[176b]
[176b.1]ངེས་པར་བསྐྱེད་ནས་གཟུགས་བརྙན་དང་འདྲ་བའི་ཕྱག་རྒྱ་ཆེན་པོ་ལ་སོགས་པ་དེ་བཞིན་གཤེགས་པའི་ཕྱག་རྒྱ་རྣམ་པ་བཞི་རྫས་སུ་མངོན་པར་ཞེན་པ་མེད་པར་བསྒོམ་པའོ། །དེ་བཞིན་གཤེགས་པའི་རིགས་ཀྱི་རྡོ་རྗེ་སེམས་དཔའ་ལ་སོགས་པའི་ཆོས་ཀྱི་དངོས་གྲུབ་ནི་དེ་བཞིན་གཤེགས་
[176b.2]པའི་རིགས་ཀྱི་དངོས་གྲུབ་བོ། །འདོད་ཆགས་ཞེས་བྱ་བ་ནི་དམིགས་པ་མེད་པའི་ཐུགས་རྗེ་ཆེན་པོའི་མཚན་ཉིད་ཅན་གྱི་བྱང་ཆུབ་སེམས་ཀྱི་རང་བཞིན་གྱི་ཆགས་པ་ལས་དངོས་སུ་དག་པའི་ཆོས་གཞན་མེད་པ་ཡིན་ཏེ། བག་ཆགས་དང་བཅས་པའི་ཉོན་མོངས་པ་སྤངས་པའི་གཟུང་བ་དང་འཛིན་པའི་
[176b.3]རྣམ་པར་རྟོག་པ་ཤིན་ཏུ་མེད་པའི་ཕྱིར་རོ། །འདི་ལས་ཅི་ཞིག་བྱེད་ཅེ་ན། བདེ་བ་ཐམས་ཅད་རབ་སྦྱིན་བྱེད། །ཅེས་བྱ་བ་སྨོས་ཏེ། བདེ་བ་ཡང་ཡིན་ལ། ཐམས་ཅད་ཀྱང་ཡིན་པས་ན་འཇིག་རྟེན་དང་འཇིག་རྟེན་ལས་འདས་པའི་བདེ་བ་དེ་ཐམས་ཅད་རབ་ཏུ་སྟེར་བས་ན་བདེ་བ་ཐམས་ཅད་རབ་
[176b.4]སྦྱིན་བྱེད་དོ། །གང་གི་ཕྱིར་དེ་མངོན་དུ་བྱས་པས་འཇིག་རྟེན་པ་དང་རིག་པ་འཛིན་པའི་དངོས་གྲུབ་ལ་སོགས་པའི་བདེ་བ་ཐམས་ཅད་དང་། འཇིག་རྟེན་ལས་འདས་པས་རབ་ཏུ་དགའ་བ་ལ་སོགས་པ་ཐོབ་པ་མངོན་དུ་བྱས་པ་ནི་བདེ་བ་ཐམས་ཅད་རབ་ཏུ་སྦྱིན་པའོ། །འདིར་རང་གི་རིགས་ཀྱི་ཆོས་
[176b.5]ཡིན་ཞེ་ན། དེ་བཞིན་གཤེགས་པའི་རིགས་ཀྱི་ནི། །ཞེས་བྱ་བ་སྨོས་ཏེ། ནའི་སྒྲས་ནི་རིགས་གཞན་གྱི་རྣལ་འབྱོར་པ་རྣམས་ཀྱང་སྟོན་པར་འགྱུར་བ་ཡིན་ནོ། །དངོས་གྲུབ་བྱེད་པ་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བྱེད་པའོ། །ཆོས་ཀྱི་དངོས་ནི་དམ་པའོ། །འདི་
[176b.6]སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེེབས་པའི་མཐར་ཐུག་པ་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིངས་ཏེ། ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་གྱི་དེ་བཞིན་གཤེགས་པའི་རིགས་ཡིན་ནོ་
[176b.7]ཞེས་ངེས་པ་བསྐྱེད་ནས་ཕྱག་རྒྱ་ཆེན་པོ་ལ་སོགས་པའི་བསྒོམ་པའི་གཟུགས་བརྙན་དང་མཚུངས་པའོ། །དེ་ལ་ཞེས་བྱ་བ་ནི་སྔ་མ་བཞིན་ནོ། །ཧཱུཾ་མཛད་ལ་སོགས་པའི་གཟུགས་ནི་སངས་རྒྱས་ཀྱི་བཀའ་འམ་སྦྱོར་བའི་དོན་ཏེ། འདི་ལྟར་ལྷ་ཆེན་པོ་ལ་སོགས་པ་རྣམ་པར་སྦྱོང་བའི་ཕྱིར་རོ། །དང་
[177a]
[177a.1]ཞེས་བྱ་བ་ནི་བསྡུ་བའི་དོན་ཏེ། ཡོངས་སུ་སྦྱོང་བའི་ཕྱིར་རོ། །སེམས་ཅན་དྲང་བར་བྱ་བའི་ཕྱིར། །ཞེས་བྱ་བ་ནི་འདི་ལྟར་ཡོངས་སུ་སྦྱོང་བའི་དོན་གྱི་ཕྱིར་དང་། དེ་བཞིན་དུ་སྲིན་པོ་ལ་སོགས་པ་རྣམས་ཀྱིས་སེམས་ཅན་ལ་རྣམ་པར་རྩེ་བར་བྱེད་པ་ལས་བསྐྱབ་པའི་ཕྱིར་རོ། །
[177a.2]དེ་ལྟར་ཁྲོས་པར་མ་གྱུར་ཀྱང་། །ཞེས་བྱ་བ་ནི་ཁྲོ་བ་མེད་པ་ཉིད་དང་། ཕན་པའི་སེམས་དང་ལྡན་པ་ཉིད་ཡིན་ནོ་ཞེས་བྱ་བའི་དོན་ཏོ། །མ་རུངས་པ་རྣམས་ཇི་སྐད་བཤད་པས་ཐལ་བར་བྱེད་པས་བསྡུས་བྱས་པའོ། །དངོས་གྲུབ་ཐོབ་ཅེས་བྱ་བ་ནི་རྡོ་རྗེ་འཛིན་པ་ཉིད་ཐོབ་པོ་ཞེས་བྱ་བའི་ཐ་ཚིག་
[177a.3]གོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་ཧཱུཾ་མཛད་ཀྱི་རྣལ་འབྱོར་རམ། ཁྲོ་བོ་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་དང་། རྣལ་འབྱོར་ཆེན་པོ་བྱས་ལ་སྔར་བཤད་པའི་ཆོ་ག་ཐམས་ཅད་རྗེས་སུ་སྤྱད་ནས། རྡོ་རྗེའི་རིགས་ཐམས་ཅད་སྤྲུལ་ཏེ། དེ་བཞིན་གཤེགས་པ་
[177a.4]ལ་གསོལ་བ་བཏབ་ནས་ཧཱུཾ་མཛད་ཀྱི་རྡོ་རྗེས་སེམས་ཅན་གྱི་ཁམས་ཐམས་ཅད་སྣང་བ་མེད་པར་བྱས་ནས་རྡོ་རྗེའི་རིགས་ཀྱི་གཟུགས་སུ་བསམས་ཏེ། གཟུགས་བརྙན་དང་མཚུངས་པར་བྱས་ཏེ། དེ་ནས་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་དེ་བསྒོམ་པར་བྱའོ། །དེ་ལ་ཞེས་བྱ་བ་
[177a.5]ལ་སོགས་པ་ནི་བཤད་ཟིན་ཏོ། །པདྨོ་ཆུ་ཡིས་ཆགས་པ་ཞེས་བྱ་བ་ནི་མ་རེག་པའོ། །གང་གིས་མ་ཆགས་པ་ཞེ་ན། ཆུའི་ཉེས་པ་ངེས་སོ། །དེ་གང་ལ་མ་ཆགས་ཤེ་ན། པདྨོ་ཞེས་བྱ་བ་སྨོས་ཏེ། ཇི་ལྟར་པདྨོ་དམར་པོ་ཆུ་ལས་སྐྱེས་ཀྱང་ཆུའི་ཉེས་པའི་སྐྱོན་གྱིས་གོས་པར་མི་འགྱུར་
[177a.6]བའི་རང་བཞིན་ཡིན་པ་དེ་བཞིན་དུ་མི་དམིགས་པའི་ཐུགས་རྗེ་ཆེན་པོས་ཆགས་པས་བྱང་ཆུབ་སེམས་དཔའ་རྣམས་འཁོར་བར་སྐྱེས་ཀྱང་འཁོར་བའི་གཟུང་བ་དང་འཛིན་པའི་རྣམ་པར་རྟོག་པས་གོས་པར་མི་འགྱུར་བའི་ཕྱིར། འདོད་པས་མི་ཆགས་ཞེས་གསུངས་སོ། །སྨྲ་ཞིང་
[177a.7]དགོས་མིན་བྱེད་ཀྱང་ནི་ཐོས་པ་དང་བསམ་པ་ཤེས་པར་ངེས་པར་གཟུང་བའོ། །དགོས་མིན་བྱེད་ཀྱང་ཞེས་བྱ་བ་ནི་བསྒོམ་པའི་ཤེས་པས་ཆོས་ཐམས་ཅད་རང་བཞིན་གྱིས་རྣམ་པར་དག་པའི་གཟུགས་བརྙན་དང་མཚུངས་པའོ་ཞེས་ངེས་པར་བཟུང་ནས། མི་དམིགས་པའི་ཐུགས་རྗེ་
[177b]
[177b.1]ཆེན་པོས་དེ་བཞིན་གཤེགས་པ་དང་། སེམས་ཅན་གྱི་ཁམས་ཐམས་ཅད་ལ་ཆགས་པའི་པདྨ་ཆེན་པོ་ལས་པདྨའི་རིགས་ཀྱི་གཟུགས་སུ་སྤྲུལ་ནས་བྱེད་པའོ། །ཅིའི་ཕྱིར་དགོས་མིན་བྱེད་ཅེ་ན། གང་གི་ཕྱིར་སྔར་བཤད་པ་གང་ཡིན་པ་དང་། འགྲོ་བ་འདུལ་བ་ལ་སོགས་པའི་གཟུགས་
[177b.2]ཀྱི་སྦྱོར་བས་འདིས་རང་དང་གཞན་གྱི་རྒྱུད་ལ་བྱེད་པར་འགྱུར་བ་དང་། སྔར་ཅུང་ཟད་ཀྱང་མ་བྱས་པ་ཞིག་མཛད་པས་ན། དགོས་མིན་བྱེད་པ་ཞེས་བརྗོད་དོ། །སྡིག་པས་གོས་པར་མི་འགྱུར་རོ། །ཞེས་བྱ་བ་ནི་དེ་ལྟར་པདྨའི་རང་བཞིན་རྣམ་པར་དག་པ་གཟུགས་བརྙན་དང་མཚུངས་
[177b.3]པར་ངེས་པ་བཟུང་ནས་བསྒོམས་པས་ངེས་པའི་ཤེས་པས་འདོད་ཆགས་ལ་སོགས་པའི་ཉོན་མོངས་པ་དང་། ཉེ་བའི་ཉོན་མོངས་པའི་དངོས་པོར་གཟུང་བའི་མངོན་པར་ཞེན་པས་གོས་པར་མི་འགྱུར་རོ། །སྔ་མ་བཞིན་དུ་པདྨའི་རིགས་ཀྱི་རྣལ་འབྱོར་བྱས་ནས་ཆོ་ག་ཐམས་ཅད་རྗེས་
[177b.4]སུ་སྤྱད་ལ། གཟུགས་བརྙན་དང་མཚུངས་པའི་ཆོས་བདག་མེད་པའི་ཐུགས་རྗེ་ཆེན་པོའི་ཆགས་པས་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ནམ་མཁའ་དང་མཚུངས་པ་བདག་ཉིད་ཀྱི་རང་བཞིན་དུ་བསམས་ནས་པདྨའི་རིགས་ཀྱི་ངོ་བོ་བསྒོམ་པར་བྱའོ། །
[177b.5]དེ་ནས་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་ནས་བདག་ཡིན་ནོ་ཞེས་བསྒོམ་པར་བྱའོ། །སྦྱིན་པ་དང་ཞེས་བྱ་བ་ནི་སྦྱིན་པའི་ཕ་རོལ་ཏུ་ཕྱིན་པའི་ནོར་བུའི་རིགས་ལས་བྱུང་བ་ནི་ནོར་བུའི་རིགས་ཀྱི་སྦྱིན་པ་ཡིན་པ་དེའི་ཕྱིར་དེ་ལས་གྱུར་པ་ནི། སྦྱིན་དང་མཉམ་པའི་ཆོས་མེད་དེ། །
[177b.6]སྒྲུབ་པར་བྱེད་ཅེས་སྨྲ་བ་ནི། །ཞེས་བྱ་བ་ལ། ཕྱི་རོལ་དང་ནང་དུ་བཅས་པའི་དངོས་པོ་ཡོངས་སུ་གཏོང་བའི་སྒྲུབ་པར་བྱེད་པ་ནི་ཆེས་ཤིན་ཏུ་ཆུང་བ་དང་ཤིན་ཏུ་ཕྱིན་པའི་རིམ་གྱིས་དེ་ལ་ཕྱི་རོལ་གྱི་དངོས་པོ་ཡོངས་སུ་གཏོང་བའི་སྦྱིན་པའི་རང་བཞིན་དང་། ནམ་མཁའ་དང་མཉམ་པའི་ཡེ་
[177b.7]ཤེས་བསྒོམ་པའི་འདུས་བྱས་དང་འདུས་མ་བྱས་ཀྱི་དངོས་པོ་ཐམས་ཅད་ཡོངས་སུ་གཏོང་བས་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་ནོར་བུའི་རིགས་ཀྱི་གཟུགས་སུ་བསྐྱེད་དེ། བདག་ཉིད་ཐམས་ཅད་ཀྱང་གཟུགས་བརྙན་དང་མཚུངས་པའོ་ཞེས་བསྒོམ་པའི་
[178a]
[178a.1]ཡེ་ཤེས་ཀྱིས་ངེས་པར་གཟུང་བ་ནི་ནང་གི་དངོས་པོ་ཡོངས་སུ་གཏོང་བ་ཞེས་བྱའོ། །དེ་ལྟར་སྒྲུབ་པར་བྱེད་ཅིང་ཅིའི་ཕྱིར་སྨྲ་ཞེ་ན། གང་གི་ཕྱིར། ནོར་བུའི་རིགས་ནི་ཆེན་པོའི་ཆོས། །ཞེས་བྱ་བ་སྨོས་ཏེ་ནོར་བུའི་རིགས་ཀྱི་སྒྲུབ་པ་པོས་ཆོས་གཞན་གང་ཡིན་པ་འདི་ཡང་
[178a.2]ནོར་བུའི་རིགས་ཀྱི་ཚུལ་འདིས་བསྐྱེད་པར་བྱའོ། །མི་འདོད་དངོས་གྲུབ་གོང་མ་བཞིན། །ཞེས་བྱ་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ནོར་བུའི་རིགས་ཀྱི་ཆོ་ག་ཐམས་ཅད་རྗེས་སུ་སྤྱད་ལ་ཉིན་རེ་ཞིང་ཐུན་བཞིའི་སྦྱོར་བས་ཕྱི་རོལ་གྱི་དངོས་པོ་ཡོད་ན་ཅི་རིགས་པར་ཡོངས་སུ་གཏང་བར་
[178a.3]བྱ་བ་དང་། དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་ནམ་མཁའ་དང་མཚུངས་པར་བསམས་ཏེ། ནམ་མཁའ་དང་མཉམ་པའི་ཡེ་ཤེས་ནོར་བུ་ཆེན་པོའི་རང་བཞིན་སྤྲུལ་ལ་ཐམས་ཅད་བདག་ཡིན་ནོ་ཞེས་ང་རྒྱལ་བསྐྱེད་དེ། གཟུགས་བརྙན་དང་མཚུངས་པར་བསྒོམ་པར་
[178a.4]བྱའོ། །དེ་ལྟར་དངོས་པོར་འཛིན་པའི་མངོན་པར་ཞེན་པ་སྤངས་ནས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཆོས་ཀྱི་དངོས་གྲུབ་ཀྱི་རྒྱུད་བསྟན་ནས། ད་ནི་ལས་ཀྱི་དཀྱིལ་འཁོར་ལས་གསུངས་པའི་མཆོད་པ་རྣམ་པ་བཅུ་དྲུག་བྱས་ལ། ཕྱག་རྒྱ་ཆེན་པོ་ལ་སོགས་པའི་སྒྲུབ་པ་པོས་
[178a.5]སེམས་ཅན་ཐམས་ཅད་ཀྱི་དོན་བྱེད་པའི་མཚན་ཉིད་དང་། དེ་བཞིན་གཤེགས་པ་ཐམས་ཅད་མཆོད་པའི་མཚན་ཉིད་ཀྱིས་ནམ་མཁའི་ཁམས་ཐམས་ཅད་དུ་སྤྲོས་པའི་ལས་བསྒོམ་པར་བྱའོ་ཞེས་བྱ་བའི་ཆོ་ག་རབ་ཏུ་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་
[178a.6]པོ་ཕྱག་ན་རྡོ་རྗེས་ཞེས་བྱ་བ་ལ་དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །དེ་བཞིན་གཤེགས་པ་ནི་ཐམས་ཅད་ཀྱི་རིགས་དེ་བཞིན་གཤེགས་པ་ཐམས་ཅད་ཀྱི་རིགས་སོ། །དེ་དག་གི་ལས་ནི་མཆོད་པ་བཅུ་དྲུག་བསྒོམས་པས་སེམས་ཅན་གྱི་ཁམས་ཐམས་ཅད་ལས་སངས་རྒྱས་ཐམས་
[178a.7]ཅད་སྟེར་བ་དེའི་དངོས་གྲུབ་བསྐྱེད་པ་སྟེ། དེ་སྟོན་པར་བྱེད་པའི་རྒྱུད་དེ་གསུངས་ཤིང་བཤད་པའོ། །དེ་ལ་ཞེས་བྱ་བ་ནི་བཤད་ཟིན་ཏོ། །དེ་བཞིན་གཤེགས་པའི་རྣལ་འབྱོར་ལས་ཀྱི་དངོས་གྲུབ་ཀྱི་རྒྱུད་ནི་འདི་ཡིན་ཏེ། སེམས་ཅན་ཐམས་ཅད་སངས་རྒྱས་དང་བྱང་ཆུབ་སེམས་དཔའ་འདི་
[178b]
[178b.1]རྣམས་སུ་ཞེས་བྱ་བ་ནི་དེ་བཞིན་གཤེགས་པའི་ཕྱག་རྒྱའི་སྒྲུབ་པ་པོས་མཆོད་པ་རྣམ་པ་བཅུ་དྲུག་སྤྲུལ་ན། འགའ་ཞིག་སངས་རྒྱས་ལ་དབུལ་བ་དང་། འགའ་ཞིག་སེམས་ཅན་རྣམས་དང་། བྱང་ཆུབ་སེམས་དཔའ་ལ་ཡིད་ཀྱིས་དབུལ་བར་བྱའོ། །ཇི་བཞིན་པར་ནི་བཏུལ་ནས་ནི། །
[178b.2]ལས་ཀྱི་ཕྱག་རྒྱ་མཆོག་སྒྲུབ་སྦྱིན། །ཞེས་བྱ་བ་ནི་སངས་རྒྱས་ཉིད་དང་། བྱང་ཆུབ་སེམས་དཔའ་ཉིད་ཀྱི་དངོས་གྲུབ་མི་སྒོམ་པ་གང་ཡིན་པ་དེ་དག་འགའ་ཞིག་སངས་རྒྱས་སུ་འགྱུར་བ་དང་། འགའ་ཞིག་ཉན་ཐོས་ཀྱི་ཐེག་པ་བསྒོམས་པས་རྒྱུན་དུ་ཞུགས་པ་དང་། ལན་ཅིག་ཕྱིར་
[178b.3]འོང་བ་དང་། ཕྱིར་མི་འོང་བ་དང་། དགྲ་བཅོམ་པའི་འབྲས་བུ་ཐོབ་པར་འགྱུར་རོ། །ཐེག་པ་གསུམ་མི་སྒོམ་པ་གང་ཡིན་པ་དེ་དག་ནི་དབང་ཕྱུག་ཆེན་པོ་ལ་སོགས་པའི་འབྲས་བུ་འདི་ཇི་ལྟ་བ་བཞིན་དུ་ཐོབ་པར་འགྱུར་རོ། །ལས་ཀྱི་ཕྱག་རྒྱ་ནི་དེ་བཞིན་གཤེགས་པ་ཐམས་ཅད་ཀྱི་
[178b.4]ཕྱག་རྒྱ་ཆེན་པོ་ལ་སོགས་པའོ། །མཆོག་ནི་ཆོས་ཀྱི་དབྱིངས་བསྒོམ་པ་རྣམས་ནི་མཆོག་གོ། །གྲུབ་པ་ནི་བསྐྱེད་པ་ལ་སོགས་པ་དེའི་ཕྱིར། འདི་ལས་ཀྱི་ཕྱག་རྒྱ་མཆོག་སྒྲུབ་སྦྱིན་ཞེས་བྱའོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་
[178b.5]གས་དེ་བཞིན་གཤེགས་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། སྒེག་མོ་ལ་སོགས་པའི་མཆོད་པ་བརྒྱད་ཀྱིས་བདག་ཉིད་ཡང་དག་པར་མཆོད་དེ། ཕྱག་བྱས་ནས། འོག་མིན་ནས་བབས་ཏེ། རྩེ་མོ་རྡོ་རྗེ་ནོར་བུ་ཆེན་པོ་ལས་བྱས་པའི་ཁང་བུ་
[178b.6]བརྩེགས་པར་དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་བསྐོར་ཞིང་དེ་བཞིན་གཤེགས་པ་ཐམས་ཅད་ཀྱི་སེང་གེའི་གདན་ལ་ཞལ་ཀུན་དུ་བསྟན་ཏེ། བཞུགས་ནས་རྡོ་རྗེ་སེམས་དཔའ་སྤྲུལ་ལ། ཨོཾ་སརྦྦ་ཏ་ཐཱ་ག་ཏ་བཛྲ་དྷཱ་ཏུ་ཨ་ནུཏྟ་ར་པཱུ་ཛ་སྥ་ར་ཎ་ཀརྨྨ་ས་མ་ཡེ་ཧཱུཾ། ཞེས་
[178b.7]བྱ་བ་འདིས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ཏེ་རང་གི་མཆོད་པ་སྤྲུལ་ལ། སེམས་ཅན་ཐམས་ཅད་ཀྱི་དོན་བྱེད་པ་མཐའ་ཡས་པར་རབ་ཏུ་སྤྲུལ་ནས། ནམ་མཁའ་གང་བར་བསམ་པར་བྱའོ། །དེ་ནས་མི་བསྐྱོད་པའི་ཕྱག་རྒྱ་ཆེན་པོ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་
[179a]
[179a.1]བཛྲ་སཏྭ་ཨ་ནུཏྟཱ་ར་པཱུ་ཛ་སྥ་ར་ཎ་ཀརྨྨ་ས་མ་ཡེ་ཧཱུཾ་ཞེས་བྱ་བ་འདིས་རྡོ་རྗེ་སེམས་དཔའ་དང་བཅས་པའི་རང་གི་རིགས་ཀྱི་མཆོད་པ་སྤྲུལ་ནས། དེ་རྣམས་ཀྱིས་སེམས་ཅན་ཐམས་ཅད་ཀྱི་དོན་བྱས་ཏེ། ནམ་མཁའི་ཁམས་གང་བར་བསམ་པར་བྱའོ། །དེ་ནས་
[179a.2]རིན་ཆེན་འབྱུང་ལྡན་གྱི་ཕྱག་རྒྱ་ཆེན་པོ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་རཏྣ་ཨ་ནུཏྟཱ་ར་པཱུ་ཛ་སྥ་ར་ཎ་ཀརྨྨ་ས་མ་ཡེ་ཧཱུཾ། ཞེས་བྱ་བ་འདིས་རྡོ་རྗེ་རིན་ཆེན་དང་བཅས་པས་རང་གི་མཆོད་པ་སྤྲུལ་ནས་སྔ་མ་བཞིན་དུ་ཐམས་ཅད་བསམ་པར་བྱའོ། །དེ་ནས་འོད་དཔག་ཏུ་མེད་པའི་ཕྱག་རྒྱ་ཆེན་པོ་
[179a.3]བཅིངས་ཏེ། ཨོཾ་སརྦྦ་ཏ་ཐཱ་ག་ཏ་བཛྲ་དྷརྨྨ་ཨ་ནུཏྟཱ་ར་པཱུ་ཛ་སྥ་ར་ཎ་ཀརྨྨ་ས་མ་ཡེ་ཧཱུཾ། ཞེས་བྱ་བ་འདིས་རྡོ་རྗེ་ཆོས་དང་བཅས་པའི་ལས་ཀྱི་མཆོད་པ་སྤྲུལ་ནས་སྔ་མ་བཞིན་དུ་ཐམས་ཅད་བསམ་པར་བྱའོ། །ཡང་དོན་ཡོད་གྲུབ་པའི་ཕྱག་རྒྱ་ཆེན་པོ་བཅིངས་ཏེ། དེ་བཞིན་གཤེགས་པ་ཐམས་
[179a.4]ཅད་ཀྱི་སྙིང་པོ་རྣམས་ཀྱིས་བྱང་ཆུབ་སེམས་དཔའ་ཆེན་པོ་རྡོ་རྗེ་ལས་བཤད་པའི་རང་གི་མཆོད་པ་སྤྲུལ་ནས་དེས་སངས་རྒྱས་ཐམས་ཅད་ཀྱི་སྤྲུལ་པ་མཛད་ནས། ནམ་མཁའ་གང་བར་བསམ་པར་བྱའོ། །དེ་ལྟར་མཆོད་པ་སྤྲོ་བ་བྱས་ནས། རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་
[179a.5]བཅིངས་ཏེ། འདི་ལྟར་བསྒོམ་པར་བྱའོ། །བདག་ནི་མགོན་པོ་རྣམ་པར་སྣང་མཛད་དེ། བདག་གི་རྡོ་རྗེ་སེམས་དཔའ་དང་། རྡོ་རྗེ་རིན་ཆེན་དང་། རྡོ་རྗེ་ཆོས་དང་། རྡོ་རྗེ་ལས་རྣམས་ཀྱི་མཆོད་པའི་འཁོར་ལོས་སྒྱུར་བར་བདག་གིས་སྤྲུལ་པར་བྱའོ། །མཆོད་པ་ཐམས་ཅད་དང་བཅས་པ་
[179a.6]ནི་བདག་ཡིན་ནོ་ཞེས་ང་རྒྱལ་བསྐྱེད་པར་བྱས་ནས། རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་བཅིངས་ནས་རང་གི་གནས་སུ་བཞག་སྟེ། བདག་ཉིད་རྡོ་རྗེ་སེམས་དཔའ་བསམས་ཏེ། མཆོད་པ་ཆེན་པོ་རྣམ་པ་བཞིས་བཅོམ་ལྡན་འདས་རྣམ་པར་སྣང་མཛད་ནས་བརྩམས་ནས།
[179a.7]དོན་ཐམས་ཅད་གྲུབ་པའི་བར་དུ་མཆོད་པར་བྱའོ། །ལས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་སརྦྦ་ཨཱཏྨ་ནིརྱ་ཏ་ན་པཱུ་ཛ་སྤ་ར་ཎ་ཀརྨྨཱ་བཛྲི་ཨ། ཞེས་བྱ་བའི་སྙིང་པོ་འདིས་རྡོ་རྗེ་སེམས་དཔའི་བདག་ཉིད་དུ་བསྒོམས་
[179b]
[179b.1]ནས། རབ་ཏུ་དགའ་ཞིང་བདེ་བའི་སྦྱོར་བ་བྱའོ། །དེ་ནས་དེས་བྱང་ཆུབ་ཏུ་སེམས་བསྐྱེད་པ་ལ་སོགས་པའི་མཆོད་པས་བཅོམ་ལྡན་འདས་ལ་མཆོད་པར་བསམ་པར་བྱའོ། །ལས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་རྒྱལ་པོའི་ལས་ཀྱི་ཕྱག་རྒྱ་བཅིངས་ཏེ། རྡོ་རྗེ་རྒྱལ་པོ་བདག་ཡིན་ནོ་
[179b.2]ཞེས་ང་རྒྱལ་བསྐྱེད་ནས། ཨོཾ་སརྦྦ་ཏ་ཐཱ་ག་ཏ་སརྦྦ་ཨཱཏྨ་ནི་ཪྱ་ཏ་ན་ཨཱ་ཀཪྵ་ཎ་པཱུ་ཛ་སྤ་ར་ཎ་ཀརྨ་ཨ་གྲི་ཛཿ་ཞེས་བརྗོད་ཅིང་། དེ་བཞིན་གཤེགས་པ་ཐམས་ཅད་འགུགས་པ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་སྤྱན་འདྲེན་པ་ཞེས་བྱ་བ་དེས་དེ་མཆོད་པར་བྱའོ། །ཡང་རྡོ་རྗེ་
[179b.3]ཆགས་པའི་ཕྱག་རྒྱ་བཅིངས་ཏེ། དེའི་ང་རྒྱལ་མངོན་དུ་བྱས་ནས། ཨོཾ་སརྦྦ་ཏ་ཐཱ་ག་ཏ་སརྦྦ་ཨཱཏྨ་ནི་རྱ་ཏ་ན་ཨ་ནུ་རཱ་ག་ན་པཱུ་ཛ་སྥ་ར་ཎ་ཀརྨྨ་བ་ནི་ཧཱུཾ་ཧོ། ཞེས་བརྗོད་ཅིང་། དེ་བཞིན་གཤེགས་པ་ཐམས་ཅད་རྗེས་སུ་ཆགས་པས་ཐམས་ཅད་དུ་སོང་ནས་དེ་བཞིན་གཤེགས་པ་ཐམས་ཅད་མཉེས་
[179b.4]པར་བྱེད་པ་ཡིན་ནོ། །རྡོ་རྗེ་ལེགས་པའི་ཕྱག་རྒྱ་བཅིངས་ཏེ། དེའི་ང་རྒྱལ་བསྐྱེད་ནས། ཨོཾ་སརྦྦ་ཏ་ཐཱ་ག་ཏ་སརྦྦ་ཨཱཏྨ་ནི་ཪྱ་ཏ་ན་སཱ་དྷཱུ་ཀཱ་ར་པཱུ་ཛ་སྥ་ར་ཎ་ཀརྨྨ་ཏུཥྚི་ཨ། ཞེས་བྱ་བས་དེ་བཞིན་གཤེགས་པ་ཐམས་ཅད་མཉེས་པར་བྱེད་པས་ཐམས་ཅད་དུ་ཁྱབ་པས། དེ་བཞིན་གཤེགས་པ་
[179b.5]ཐམས་ཅད་ཀྱི་ལེགས་པར་བྱེད་པ་མོས་པར་མཉེས་པར་བྱེད་པ་ཡིན་ནོ། །རྡོ་རྗེ་རིན་ཆེན་གྱི་ཕྱག་རྒྱ་བཅིངས་ཏེ། ཨོཾ་ན་མཿསརྦྦ་ཏ་ཐཱ་ག་ཏ་ཀཱ་ཡ་ཨ་བྷི་ཥེ་ཀ་རཏྣ་བྷྱོ་བཛྲ་ནི་ཨོཾ། ཞེས་བྱ་བས་དབང་མོ་ཆེན་མོའི་ཚུལ་གྱིས་ཐམས་ཅད་ཁྱབ་པས། དེ་བཞིན་གཤེགས་པ་ཐམས་ཅད་ལ་
[179b.6]དབང་བསྐུར་བའི་མཆོད་པ་བྱེད་པ་ཡིན་ནོ། །རྡོ་རྗེ་ཉི་མའི་ཕྱག་རྒྱ་བཅིངས་ཏེ། ཨོཾ་ན་མཿསརྦྦ་ཏ་ཐཱ་ག་ཏ་སཱུཪྱ་བྷྱོ་བཛྲ། ཏེ་ཛ་ཛ་ལ་ཧི་ཞེས་བྱ་བས་སྣང་བ་ཆེན་པོ་ཐམས་ཅད་དུ་ཁྱབ་པས་དེ་བཞིན་གཤེགས་པ་ཐམས་ཅད་ལ་འོད་ཀྱི་སྣང་བ་བྱེད་པའོ། །རྡོ་རྗེ་དཔལ་གྱི་ཕྱག་རྒྱ་བཅིངས་ཏེ།
[179b.7]ཨོཾ་ན་མཿསརྦྦ་ཏ་ཐཱ་ག་ཏ་ཨ་ཏ་པ་རི་པུ་ར་ནི་ཙིནྟ་མ་ཎི་དྷྭ་ཙྪ་གྲི་བྷྱོ་བཛྲ་དྷྭ་ཙི་གྲི་ཧཾ། ཞེས་བྱ་བ་རྡོ་རྗེ་རིན་པོ་ཆེའི་ཆར་གྱིས་ཐམས་ཅད་དུ་ཁྱབ་པས་དེ་བཞིན་གཤེགས་པ་ཐམས་ཅད་ལ་སྦྱིན་པའི་ཕ་རོལ་ཏུ་ཕྱིན་པའི་མཆོད་པ་བྱེད་པའོ། །རྡོ་རྗེ་བཞད་པའི་ཕྱག་རྒྱ་བཅིངས་ལ། ཨོཾ་ན་མཿསརྦྦ་
[180a]
[180a.1]ཏ་ཐཱ་ག་ཏ་མ་ཧཱ་པྲ་ཏི་པྲ་མོ་དྷྱ་ཀ་རེ་བྷྱོ་བཛྲ་ཧ་ས་ཧ་ཞེས་བྱ་བས་དགའ་ཞིང་མགུ་བ་ཆེན་པོ་ཐམས་ཅད་དུ་ཁྱབ་པས་དེ་བཞིན་གཤེགས་པ་འཛུམ་པ་རྨད་དུ་བྱུང་བ་ལས་འཇོག་པའོ། །རྡོ་རྗེ་ཆོས་ཀྱི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་བཛྲ་དྷརྨྨཱ་ས་མཱ་དྷི་བྷི་སྟུ་ནོ་ནི་མ་ཧཱ་དྷརྨྨཱ་ཨ་
[180a.2]གྲི་ཧྲི་ཞེས་བྱ་བས་ཆོས་ཀྱི་ཡེ་ཤེས་ཆེན་པོའི་སྲུང་མ་ཐམས་ཅད་དུ་སོང་བས་དེ་བཞིན་གཤེགས་པ་ལ་སོགས་པས་སེམས་ཅན་གྱི་ཁམས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་ལས་འཇོག་པའོ། །རྡོ་རྗེ་རྣོན་པོའི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་པྲཛྙཱ་པཱ་ར་མི་ཏ་
[180a.3]ན་ཧ་རེ་སྟུ་ནོ་མི་མ་ཧཱ་གྷོ་ཥ་ནུ་གྷེ་དྷཾ་ཞེས་བྱ་བས་དབྱངས་ཆེན་པོའི་རྗེས་སུ་འབྲང་བ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ལ་ཉོན་མོངས་པ་དང་། ཉེ་བའི་ཉོན་མོངས་པ་གཅོད་པ་ཡིན་ནོ། །རྡོ་རྗེ་རྒྱུའི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་ཙཀྲ་ཨ་ཀཱ་པ་རི་པུ་ར་ཨ་ཧེ་སརྦྦ་སཱུ་ཏྲ་ན་ཏ་
[180a.4]ཨ་སྟུ་ནོ་མི་སརྦྦ་མཎྜལེ་ཧཱུཾ། ཞེས་བྱ་བས་དཀྱིལ་འཁོར་ཐམས་ཅད་ལ་འཇུག་པ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་འཇུག་པ་ཡིན་ནོ། །རྡོ་རྗེ་གསུངས་པའི་ཕྱག་རྒྱ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་སནྡྷ་བྷི་ཤ་བུདྡྷ་སཾ་གཱི་ཏི་བྷི་ར་གེ་ཡན་སྟུན་ནོ་མི་
[180a.5]བཛྲ་བཱ་ཛེ་བཾ་ཞེས་བྱ་བས་རྗེས་སུ་བརྗོད་པ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ལ་སྤྲོས་པ་མེད་པའི་ཆོས་བརྗོད་པ་ངེས་པར་སྦྱོར་བ་ཡིན་ནོ། །རྡོ་རྗེ་ལས་ཀྱི་ཕྱག་རྒྱ་བཅིངས་ཏེ། དེའི་ང་རྒྱལ་བསྐྱེད་ནས། ཨོཾ་སརྦྦ་ཏ་ཐཱ་ག་ཏ་དྷཱུ་པ་མེ་གྷ་སྥ་ར་ཎ་པཱུ་ཛ་ཀརྨྨཱ་ཀ་ར་ཀ་ར་ཞེས་བྱ་བས་སེམས་
[180a.6]ཅན་ཆེན་མོ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ལ་བདུག་པ་མ་ལུས་ཤིང་ལུས་པ་མེད་པའི་མཆོད་པས་ཡང་དག་པར་མཆོད་པ་བྱེད་དོ། །རྡོ་རྗེ་བསྲུང་བའི་ཕྱག་རྒྱ་བཅིངས་ལ། དེའི་ང་རྒྱལ་བསྐྱེད་དེ། ཨོཾ་སརྦྦ་ཏ་ཐཱ་ག་ཏ་པུཥྤ་པཱུ་ཛ་པྲཱ་ཀ་ར་ཀི་རི་ཀི་རི་ཞེས་བྱ་བས་བྱང་ཆུབ་ཀྱི་ཡན་ལག་
[180a.7]ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་ལ་མེ་ཏོག་ལ་སོགས་པ་གོ་ཆའི་མཆོད་པ་ཐམས་ཅད་ཀྱིས་ཡང་དག་པར་མཆོད་པར་བྱའོ། །རྡོ་རྗེ་གནོད་སྦྱིན་གྱི་ཕྱག་རྒྱ་བཅིངས་ལ། དེའི་ང་རྒྱལ་བསྐྱེད་ནས། ཨོཾ་སརྦྦ་ཏ་ཐཱ་ག་ཏ་ཨཱ་ལོ་ཀེ་ཛྭ་ལ་སྥ་ར་ཎ་པཱུ་ཛ་ཀརྨྨཱ་ཀ་ར་ཀ་ར་ཞེས་བྱ་བས་
[180b]
[180b.1]མིག་ལྡན་མ་ཐམས་ཅད་དུ་སོང་བས་དེ་བཞིན་གཤེགས་པ་ཐམས་ཅད་བསྲུང་བ་ཡོངས་སུ་བསྐྱང་བའི་སོ་སོར་རྟོག་པའི་མར་མེ་ལ་སོགས་པའི་མཆོད་པས་མཆོད་པར་བྱའོ། །རྡོ་རྗེ་ཁུ་ཚུར་གྱི་ལས་ཀྱི་ཕྱག་རྒྱ་བཅིངས་ནས། དེའི་ང་རྒྱལ་གྱིས། ཨོཾ་སརྦྦ་ཏ་ཐཱ་ག་ཏ་གནྡྷ་ས་མུ་དྲ་སྥ་ར་
[180b.2]ཎ་ཀརྨྨཱ་ཀུ་རུ་ཀུ་རུ་ཞེས་བརྗོད་ཅིང་། དྲི་ལྡན་མ་ཐམས་ཅད་དུ་྅སོང་བས་ནམ་མཁའི་ཁམས་ཐམས་ཅད་བཀང་སྟེ། དེ་བཞིན་གཤེགས་པ་ཐམས་ཅད་ལ་སྒྲུབ་པ་ནན་ཏན་དུ་བྱེད་པའི་བརྩོན་འགྲུས་ཀྱི་དྲིས་མཆོད་པར་བྱའོ། །ལས་ཀྱི་དཀྱིལ་འཁོར་ཐམས་ཅད་ལས་གསུངས་པའི་རང་
[180b.3]བཞིན་ལྷའི་ལས་ཀྱི་ཕྱག་རྒྱ་བཅིངས་ཏེ། དེ་ཉིད་ལས་སྐྱེས་པའི་ང་རྒྱལ་བསྐྱེད་པ་ཡིན་པར་ཤེས་པར་བྱའོ། །དེ་ལྟར་མཆོད་པ་ཆེན་པོ་དང་། དབང་བསྐུར་བ་དང་། ཆོས་དང་། ལས་ཀྱི་མཆོད་པ་རྣམས་ཀྱིས་སངས་རྒྱས་ཉིད་ལ་སོགས་པའི་མཆོད་པ་འདིས་སེམས་ཅན་
[180b.4]ཐམས་ཅད་ཀྱི་དོན་བྱེད་པ་དང་། དེ་བཞིན་གཤེགས་པ་ཐམས་ཅད་ཡང་དག་པར་མཆོད་ལ་ཕྱིས་ཕྱག་བྱས་ཏེ། རྣམ་པར་སྣང་མཛད་ལ་སོགས་པའི་ཕྱག་རྒྱ་བཅིངས་ཏེ་བསྒོམ་པར་བྱའོ། །དེ་ལ་ཞེས་བྱ་བ་ལ་སོགས་པ་ནི་གོ་སླའོ། །དུས་བཞི་ཡི་ནི་ཚུལ་དག་ཏུ། །ཞེས་བྱ་
[180b.5]བ་ལ། མཆོད་པ་ཆེན་པོ་དང་། དབང་བསྐུར་བ་དང་། ཆོས་དང་། ལས་ཀྱི་མཆོད་པ་རྣམ་པ་བཞི་པོའི་མཆོད་པ་རྣམས་ཀྱིས་སོ། །རྣམ་པ་བཞི་པོའི་མཆོད་པ་དེ་རྣམས་ཀྱིས་ལས་རྣམས་བསྒྲུབ་པར་བྱའོ་ཞེས་བྱ་བའི་དོན་ཏོ། །ཇི་ལྟར་ཞེ་ན། དུས་བཞི་ཡི་ནི་ཚུལ་དག་ཏུ། །ཞེས་
[180b.6]བྱ་བ་སྨོས་ཏེ། རྡོ་རྗེ་སེམས་དཔའ་དང་། རྡོ་རྗེ་རིན་ཆེན་དང་། རྡོ་རྗེ་ཆོས་དང་། རྡོ་རྗེ་ལས་རྣམ་པ་བཞི་པོའི་ཚུལ་གྱིས་རྣམ་པ་བཞི་པོ་དེ་ལ་སྦྱོར་བ་རྒྱུ་དེའི་ཕྱིར་རོ་ཞེས་བྱ་བའི་དོན་ཏོ། །རྣམ་པ་བཞི་བྱས་ནས་ཞེས་བྱ་བར་སྦྱར་རོ། །ཇི་སྐད་དུ་བཤད་པའི་མཆོད་པ་ཆེན་པོ་ལ་སོགས་པའི་
[180b.7]མཆོད་པ་རྣམ་པ་བཞི་བྱས་ནས་ལས་རྣམས་བྱའོ་ཞེས་བྱ་བའི་དོན་ཏོ། །ཇི་ལྟར་བྱས་ནས་ཤེ་ན། དུས་བཞི་ཡི་ནི་ཚུལ་དག་ཏུ། །ཞེས་བྱ་བ་སྨོས་ཏེ། ནངས་པར་གྱི་ཐུན་མཚམས་དང་། ཉི་མ་ཕྱེད་དང་། དགོངས་ཀ་དང་། མཚན་ཕྱེད་ཀྱི་དུས་སུ་མཆོད་པ་བྱེད་པས་ན་དུས་
[181a]
[181a.1]བཞིའི་ནི་ཚུལ་དག་གོ། །དུས་བཞི་རུ་སྦྱོར་བ་རྣམ་པ་བཞིས་ལས་རྣམས་བྱས་ཏེ། ལས་ནི་མཆོད་པ་ཆེན་པོ་ལ་སོགས་པའོ། །བསྒྲུབ་པར་བྱ་བ་ནི་རྫོགས་པར་བྱ་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པའི་སྦྱོར་བས་རྡོ་རྗེ་དབྱིངས་ཀྱི་
[181a.2]དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་ཆེན་པོ་བྱས་ཏེ། སྒེག་མོ་ལ་སོགས་པ་མཆོད་པ་རྣམ་པ་བརྒྱད་ཀྱིས་བདག་ཉིད་ཡང་དག་པར་མཆོད་ལ། སྔ་མ་བཞིན་དུ་དེ་བཞིན་གཤེགས་པའི་རྣལ་འབྱོར་ཡང་མངོན་དུ་བྱའོ། །རྡོ་རྗེ་སེམས་དཔའ་
[181a.3]དང་། རྡོ་རྗེ་རིན་ཆེན་དང་། རྡོ་རྗེ་ཆོས་དང་། རྡོ་རྗེ་ལས་ཀྱི་རང་བཞིན་འཁོར་ལོས་སྒྱུར་བ་རྣམ་པ་བཞི་དགའ་ཞིང་བདེ་མ་ལ་སོགས་པའི་རིག་པའི་ལྷ་མོར་བསྒྱུར་ཞིང་སྤྲུལ་ནས་བྱང་ཆུབ་ཏུ་སེམས་བསྐྱེད་པ་ལ་སོགས་པའི་ལས་ཀྱི་ནམ་མཁའི་ཁམས་ཐམས་ཅད་གང་བར་གནས་པར་
[181a.4]བསམ་པར་བྱའོ། །དེ་ནས་བཛྲ་སཏྭ་ཞེས་བརྗོད་ཅིང་། རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ། དེ་བཞིན་གཤེགས་པ་ཐམས་ཅད་དགའ་ཞིང་བདེ་བ་དང་། དེ་བཞིན་གཤེགས་པ་ཐམས་ཅད་སྤྱན་འདྲེན་མ་དང་། དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་བྱེད་པ་
[181a.5]མོ་དང་། དེ་བཞིན་གཤེགས་པ་ཐམས་ཅད་མགུ་བར་བྱེད་པ་མོ་རྣམས་ཀྱི་རིག་པ་བརྗོད་པར་བྱ་སྟེ། དེ་ལྟ་བུས་འགྲུབ་པར་འགྱུར་རོ། །དེ་ནས་འདོད་པའི་ལྷའམ་དཀྱིལ་འཁོར་ཡང་རུང་སྟེ་དེའི་ཕྱག་རྒྱ་རྣམ་པ་བཞི་བཅིངས་ནས་སྔ་མ་བཞིན་དུ་མཆོད་པར་བྱའོ། །དེ་ལྟར་ན་འདི་ནི་མཆོད་པ་
[181a.6]ཆེན་པོ་རྣམ་པ་བཞི་ཡིན་ནོ། །བཛྲ་རཏྣ་ཞེས་བརྗོད་ཅིང་། རྡོ་རྗེ་སྙིང་པོའི་ཕྱག་རྒྱ་ཆེན་པོ་བཅིངས་ཏེ། དབང་མོ་ཆེན་མོ་དང་། སྣང་བ་ཆེན་མོ་དང་། རིན་ཆེན་ཆར་འབེབས་ཆེན་མོ་དང་། དགའ་ཞིང་མགུ་བ་ཆེན་མོའི་རིག་པ་བརྗོད་པ་དེ་ལྟ་བུས་རྡོ་རྗེ་རིན་ཆེན་རྣལ་འབྱོར་པས་འགྲུབ་པར་
[181a.7]འགྱུར་རོ། །དེ་བཞིན་དུ་འདོད་པའི་ལྷའམ་དཀྱིལ་འཁོར་ཡང་རུང་། དེའི་ཕྱག་རྒྱ་བཞི་བཅིངས་ཏེ། སྔ་མ་བཞིན་དུ་མཆོད་པ་བྱའོ། །རྣམ་པ་བཞི་པོ་འདི་ནི་དབང་བསྐུར་བའི་མཆོད་པ་ཡིན་ནོ། །དེ་བཞིན་དུ་བཛྲ་དྷརྨྨཱ་ཞེས་བརྗོད་ཅིང་། རྡོ་རྗེ་ཆོས་ཀྱི་ཕྱག་རྒྱ་ཆེན་པོ་བཅིངས་ནས།
[181b]
[181b.1]ཡེ་ཤེས་ཆེན་མོའི་གླུ་མ་དང་། དབྱངས་ཆེན་མོའི་རྗེས་སུ་འབྲང་མ་དང་། དཀྱིལ་འཁོར་ཐམས་ཅད་དུ་འཇུག་མ་དང་། སྔགས་སྟོང་དུ་ཟློས་པ་རྣམས་ཀྱི་རིག་པ་བརྗོད་པ་དེ་ལྟ་བུས་འགྲུབ་པར་འགྱུར་རོ། །དེ་ནས་དེ་བཞིན་དུ་འདོད་པའི་ལྷའམ་དཀྱིལ་འཁོར་པ་ཡང་རུང་། དེ་རྣམས་ཀྱིས་མཆོད་
[181b.2]པ་བྱས་ཏེ། རྣམ་པ་འདི་བཞི་ནི་ཆོས་ཀྱི་མཚོན་པའོ། །དེ་ནས་བཛྲ་ཀརྨྨཱ་ཞེས་བརྗོད་ཅིང་། རྡོ་རྗེ་ལས་ཀྱི་ཕྱག་རྒྱ་ཆེན་པོ་བཅིངས་ཏེ། སེམས་ཅན་ཆེན་མོ་དང་། བྱང་ཆུབ་ཀྱི་ཡན་ལག་མ་དང་། །མིག་ལྡན་མ་དང་། དྲི་ལྡན་མ་རྣམས་ཀྱི་རིག་པ་བརྗོད་པར་བྱའོ། །རྡོ་རྗེ་ལས་ཀྱི་རྣལ་འབྱོར་དེ་
[181b.3]ལྟ་བུས་འགྲུབ་པར་འགྱུར་རོ། །དེ་ནས་དེ་རྣམས་སྔ་མ་བཞིན་རང་འདོད་པའི་ལྷའམ། དཀྱིལ་འཁོར་ལ་མཆོད་པ་བྱའོ། །རྣམ་པ་བཞི་པོ་འདི་ནི་ལས་ཀྱི་མཆོད་པའོ། །དེ་ལྟར་མཆོད་པ་རྣམ་པ་བཞི་པོ་རྣམས་ཀྱིས་རྡོ་རྗེ་སེམས་དཔའ་ལ་སོགས་པའི་སྦྱོར་བ་བཞིས་མཆོད་པ་ཆེན་པོ་ལ་སོགས་པ་
[181b.4]རྣམ་པ་བཞི་རྫོགས་པ་ལས་བྱས་ནས་ཐུན་བཞིའི་སྦྱོར་བས་བྱང་ཆུབ་ཏུ་སེམས་བསྐྱེད་པ་ལ་སོགས་པའི་ལས་བྱས་ཏེ། དེ་བཞིན་གཤེགས་པའི་རིགས་ཀྱི་རྣལ་འབྱོར་པས་དེ་ལྟར་བདག་ཉིད་མཆོད་ནས། དེ་བཞིན་གཤེགས་པ་ཐམས་ཅད་ལ་ཕྱག་བཞི་བྱས་ཏེ། ཕྱག་རྒྱ་ཆེན་པོ་ལ་སོགས་པ་
[181b.5]བསྒོམ་པར་བྱའོ། །དེ་ལ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །མ་རུངས་སེམས་ཅན་ཞེས་བྱ་བ་ནི་སྡིག་པ་ཆེན་པོ་བྱེད་པའོ། །དེ་དག་ལ་གནོད་པར་བྱ་བའི་ཕྱིར། སྡུག་བསྔལ་བ་ལས་བཏོན་ནས་སྡིག་པ་ལས་བཟློག་པའོ། །དེའི་དོན་དུ་ཅུང་ཟད་ཅིག་བྱང་ཆུབ་ཏུ་སེམས་བསྐྱེད་པ་ལ་
[181b.6]སོགས་པ་རྡོ་རྗེའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རྣམ་པ་བཞི་ལས་ཀྱི་མཚན་ཉིད་ཀྱི་དགོས་པའི་བྱ་བ་གང་བྱེད་པ་དེ་ཁྲོ་བོའི་རིགས་ཀྱི་རྣལ་འབྱོར་པས། ལས་ཀྱི་རིགས་ཀྱི་རྣམ་པ་བཞི་པོ་འདི་རྡོ་རྗེའི་རིགས་ཀྱི་དངོས་གྲུབ་ཐམས་ཅད་རབ་ཏུ་སྦྱིན་པར་བྱེད་པ་ཡིན་ནོ། །འདི་
[181b.7]སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། དེ་ནས་རྡོ་རྗེ་ཁྲོ་བོའི་སྒེག་མོ་ལ་སོགས་པའི་མཆོད་པ་རྣམ་པ་བརྒྱད་ཀྱིས་བདག་ཉིད་ཡང་དག་པར་མཆོད་
[182a]
[182a.1]ལ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ལས་བཤད་པའི་མཆོད་པ་རྣམས་དེ་ལས་བཤད་པའི་ཆོ་གས་སྤྲུལ་ལ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་རྣལ་འབྱོར་
[182a.2]ཆེན་པོ་བཅིངས་ཏེ། རང་གི་མཆོད་པ་རྣམ་པ་བཞིའི་རིག་པ་བརྗོད་པར་བྱའོ། །དེ་ལྟར་རིན་ཆེན་ཧཱུཾ་མཛད་དང་། ལས་ཀྱི་ཧཱུཾ་མཛད་རྣམས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་པོ་བཅིངས་ཏེ། ལས་དང་པོ་པ་རྣམས་ཀྱིས་རིག་པ་བརྗོད་ཅིང་
[182a.3]བརྟན་པར་བྱས་ལ། ཕྱིས་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་བཤད་པའི་དེའི་ལས་ཀྱི་ཕྱག་རྒྱ་ཇི་ལྟ་བ་བཞིན་དུ་བཅིངས་ཏེ། ལས་དང་པོ་པ་རྣམས་ཀྱིས་མ་རུངས་པའི་སེམས་ཅན་ལ་གནོད་པ་ལ་སོགས་པ་དེ་རྣམས་ཀྱིས་ནམ་མཁའི་ཁམས་ཐམས་
[182a.4]ཅད་བཀང་ནས་རང་གི་ལྷའམ། དཀྱིལ་འཁོར་པ་སྔ་མ་བཞིན་མཆོད་པར་བྱའོ། །དེ་ལྟར་འདིར་ཡང་མཆོད་པ་རྣམ་པ་བཞིས་ལས་ཀྱི་དཀྱིལ་འཁོར་ཐམས་ཅད་ཡང་དག་པར་མཆོད་ལ་ཕྱག་བཞི་བྱས་ཏེ། རང་གི་ཁྲོ་བོའི་ལྷའི་ཕྱག་རྒྱ་ཆེན་པོ་ལ་སོགས་པ་བསྒོམ་པར་བྱའོ། །དེ་ལ་ཞེས་
[182a.5]བྱ་བ་ལ་སོགས་པ་ནི་སྔ་མ་བཞིན་ནོ། །འཇིགས་པས་གཟིར་ལ་མི་འཇིགས་སྦྱིན། །ཞེས་བྱ་བ་ནི་འཆི་བ་ལ་སོགས་པའི་རིག་པའི་འཇིགས་པས་གཟིར་བ་རྣམས་འཆི་བ་ལ་སོགས་པ་བསལ་ཏེ། དབུགས་འབྱིན་པར་བྱེད་པའོ། །ཇི་བཞིན་པར་ནི་འདུལ་དེ་བཞིན། །ཞེས་བྱ་བ་ནི་འགྲོ་
[182a.6]བ་འདུལ་བ་ལ་སོགས་པའི་ཏིང་ངེ་འཛིན་གྱིས་གདུལ་བྱ་རྣམས་དེའི་ངོ་བོར་བསྐྱེད་པ་ཇི་བཞིན་པའི་འདུལ་བའོ། །འདི་ནི་པདྨོའི་རིགས་ཀྱི་ལས། །ཞེས་བྱ་བ་ནི་མི་འཇིགས་པ་སྦྱིན་པ་ལ་སོགས་པ་གང་ཡིན་པ་དེས་ཇི་ལྟ་བ་བཞིན་དུ་འདུལ་བར་བྱེད་པ་འདི་ནི་པདྨའི་རིགས་ཀྱི་རྣལ་འབྱོར་པའི་ལས་
[182a.7]ཀྱི་བྱ་བ་ཡིན་ནོ། །འདིས་ལས་ཅི་ཞིག་བྱེད་ཅེ་ན། སངས་རྒྱས་དངོས་གྲུབ་རབ་སྦྱིན་བྱའོ། །ཞེས་བྱ་བ་སྨོས་ཏེ། འཇིག་རྟེན་དབང་ཕྱུག་ཉིད་སྟེར་བར་བྱེད་དོ་ཞེས་བྱ་བའི་དོན་ཏོ། །དེ་ཉིད་ཀྱིས་བཅོམ་ལྡན་འདས་བྱང་ཆུབ་སེམས་དཔའ་དེ་བཞིན་གཤེགས་ཞེས་གསུངས་པས་སོ། །
[182b]
[182b.1]དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་ཉིད་འཇིག་རྟེན་དབང་ཕྱུག་གི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། པདྨའི་སྒེག་མོ་ལ་སོགས་པའི་མཆོད་པ་བརྒྱད་ཀྱིས་བདག་ཉིད་ཡང་དག་པར་མཆོད་དེ།
[182b.2]པདྨའི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་ཆོ་གས་དཀྱིལ་འཁོར་གྱི་ལྷ་རྣམས་སྤྲུལ་ལ། འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། རང་གི་མཆོད་པ་རྣམ་པ་བཞིས་རིག་པ་བརྗོད་པར་བྱའོ། །དེ་བཞིན་དུ་གཙུག་ཕུད་སངས་རྒྱས་དང་། ཏིང་ངེ་འཛིན་པདྨ་དང་། པདྨ་དོན་
[182b.3]ཡོད་དབང་ཕྱུག་གི་ཕྱག་རྒྱ་ཆེན་པོ་བཅིངས་ཏེ། ལས་ཀྱི་ཕྱག་རྒྱ་དཀྱིལ་འཁོར་ཆེན་པོ་ལས་བཤད་པའི་རང་གི་རིགས་ཀྱི་ལྷ་མོ་རྣམ་པ་བཞིའི་རིག་པ་བརྗོད་ཅིང་། དེ་ནས་དེ་རྣམས་ཀྱི་ལས་ཀྱི་ཕྱག་རྒྱ་རྣམས་ཀྱིས་རང་གི་ལྷའམ། དཀྱིལ་འཁོར་ལ་མཆོད་པ་བྱས་ནས། མི་འཇིགས་པའི་
[182b.4]སྦྱིན་པ་ལ་སོགས་པས་སེམས་ཅན་གྱི་ཁམས་ཚིམ་པར་བྱའོ། །དེ་ལྟར་མཆོད་པ་རྣམ་པ་བཅུ་དྲུག་གིས་ཡང་དག་པར་མཆོད་དེ། ཕྱག་བཞི་བྱས་ནས། རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། སྔ་མ་བཞིན་དུ་བསྒོམ་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་
[182b.5]ནོ། །དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་ནོར་བུའི་རིགས་ཀྱི་གཟུགས་སུ་བསྐྱེད་དེ་དབང་བསྐུར་ནས། དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་ཐམས་ཅད་སྔ་མ་བཞིན་དུ་རིན་པོ་ཆེ་ལ་སོགས་པ་དང་། གཟུང་བ་དང་འཛིན་པའི་
[182b.6]རྣམ་པར་རྟོག་པ་སྤངས་པའི་ནོར་ནི་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་མངོན་པར་འདོད་པའི་དོན་ཐམས་ཅད་དང་། རེ་བ་ཐམས་ཅད་རྫོགས་པར་བྱེད་པ་ཡིན་ནོ། །དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་རྣམས་ལ་དབང་བསྐུར་བ་ལ་
[182b.7]སོགས་པ་འདི་དག་བསྟན་པ་ནི། སངས་རྒྱས་དབང་བསྐུར་དེ་བཞིན་དུ། ཞེས་བྱ་བ་སྨོས་ཏེ། འདི་ནི་ནོར་བུའི་རིགས་ཀྱི་ལས་སོ། །དེས་ཅི་ཞིག་བྱེད་ཅེ་ན། ལས་ཀྱི་དོན་ཀུན་གྲུབ་བྱེད་པའོ། །ཞེས་བྱ་བ་སྨོས་ཏེ། དོན་ཡང་ཡིན་ལ་ཀུན་ཡང་ཡིན་པས་ན་དོན་ཀུན་ཏེ། ནོར་བུའི་
[183a]
[183a.1]རིགས་ཀྱིའོ། །དེ་རྫོགས་ཤིང་གྲུབ་པར་བྱེད་པ་ནི་ནོར་བུའི་རིགས་ཀྱི་རྣལ་འབྱོར་པས་ནོར་བུའི་རིགས་གྲུབ་པར་བྱེད་དོ་ཞེས་བྱ་བའི་ཐ་ཚིག་གོ། །དེའི་དོན་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་
[183a.2]པ་ལ་སོགས་པའི་རང་གི་ལྷའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། རིན་ཆེན་སྒེག་མོ་ལ་སོགས་པའི་མཆོད་པ་བརྒྱད་ཀྱིས་བདག་ཉིད་ཡང་དག་པར་ཇི་ལྟ་བ་བཞིན་དུ་མཆོད་ལ། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ཆོ་གས་ནོར་བུའི་རིགས་
[183a.3]ཀྱི་ལས་ཀྱི་དཀྱིལ་འཁོར་གྱི་ལྷ་རྣམས་སྤྲུལ་པར་བྱའོ། །དེ་ནས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་རང་གི་ལྷ་མོ་བཞི་རིགས་རྣམ་པ་བཞི་བརྗོད་པར་བྱའོ། །དེ་ལྟར་
[183a.4]རིན་ཆེན་ལྟ་བ་དང་། རིན་ཆེན་པདྨ་དང་། རིན་ཆེན་ཆར་འབེབས་ཀྱི་ཕྱག་རྒྱ་ཆེན་པོ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་ལྷ་མོ་བཞིའི་རིག་པ་རྣམས་བརྗོད་ཅིང་། དེ་རྣམས་ཀྱིས་དེ་བཞིན་དུ་དབང་བསྐུར་བ་བྱིན་པ་ལས་རེ་བ་ཐམས་ཅད་ཡོངས་སུ་རྫོགས་པའི་ལས་ནི་
[183a.5]སངས་རྒྱས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ལ་ནམ་མཁའི་ཁམས་ཐམས་ཅད་ཁྱབ་པར་བསྒྲུབས་ནས་ལས་ཀྱི་ཕྱག་རྒྱ་དེ་རྣམས་ཀྱིས་སྔ་མ་བཞིན་དུ་རང་གི་ལྷའམ། དཀྱིལ་འཁོར་གྱི་ལྷ་རྣམས་མཆོད་པར་བྱའོ། །དེ་ལྟར་མཆོད་པ་རྣམ་པ་བཅུ་དྲུག་གིས་ཡང་དག་
[183a.6]པར་མཆོད་དེ། ཕྱག་བཞི་བྱས་ནས། རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། སྔ་མ་བཞིན་དུ་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་ཀྱི་ཚོགས་ཡོངས་སུ་རྫོགས་པར་བསྟན་ནས།
[183a.7]ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ཐུན་མོང་དུ་བསྒྲུབ་པ་དང་དངོས་གྲུབ་ཀྱི་ཁྱད་པར་དུ་འགྱུར་བ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ལ་
[183b]
[183b.1]སོགས་པ་ནི་གོ་སླའོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། དེ་རྣམས་ཀྱི་ཆོས་ཉིད་བསྐྱེད་པའི་རྒྱུར་གྱུར་པ་ནྱ་གྲོ་དྷ་ལ་སོགས་པའི་ས་བོན་བཞིན་དུ་དེ་ཉིད་ཀྱི་ཕྱག་རྒྱའོ། །དེར་ངེས་པའི་ཡེ་ཤེས་དེའི་དངོས་གྲུབ་ནི་ཕྱག་རྒྱ་ཆེན་པོ་ལ་
[183b.2]སོགས་པའི་སྒྲུབ་པ་སྟོན་པར་བྱེད་པའི་རྒྱུད་དོ། །འདི་གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེའོ། །དེ་ལ་ཞེས་བྱ་བ་ལ་སོགས་པ་ནི་གོ་སླའོ། །རྡོ་རྗེ་སེམས་དཔའི་ཏིང་ངེ་འཛིན། །ཞེས་བྱ་བ་ལ། རང་གི་སྙིང་གའི་སེམས་དཔའི་རྡོ་རྗེ་ལ་དམིགས་པའི་ཐུགས་རྩེ་གཅིག་པའོ། །ནིའི་སྒྲ་ནི་ངེས་
[183b.3]པར་གཟུང་བ་སྟེ། རྡོ་རྗེ་སེམས་དཔའི་ཏིང་ངེ་འཛིན་ནི། །སངས་རྒྱས་རྣམས་ཀྱི་ཆོས་ཉིད་དགོངས། །ཞེས་བྱ་བའོ། །རྣམ་པར་སྣང་མཛད་ལ་སོགས་པ་ནས་དོན་ཡོད་གྲུབ་པའི་མཐར་ཐུག་པ་ནི་དེ་བཞིན་གཤེགས་པ་བསྐྱེད་པའི་རྒྱུར་གྱུར་པར་བཤད་དོ། །ཅིའི་ཕྱིར་ཞེ་ན། འདི་ནི་སངས་རྒྱས་སངས་
[183b.4]རྒྱས་ཉིད། །ཅེས་བྱ་བ་སྨོས་ཏེ། གང་གི་ཕྱིར་སངས་རྒྱས་བཅོམ་ལྡན་འདས་འདི་ནི་སངས་རྒྱས་ཉིད་ཀྱི་རྒྱུ་ཡིན་ནོ་ཞེས་བྱ་བའི་ཐ་ཚིག་གོ། །འདི་ཉིད་ཀྱང་གང་ལས་ཤེ་ན། གཞན་ལས་སངས་རྒྱས་འགྱུར་བ་མེད། །ཅེས་བྱ་བ་སྨོས་ཏེ། གང་གི་ཕྱིར་རྡོ་རྗེ་སེམས་དཔའི་ཏིང་ངེ་འཛིན་ནི་སངས་
[183b.5]རྒྱས་སུ་འགྱུར་གྱི་གཞན་དུ་མི་འགྱུར་བ་དེའི་ཕྱིར། རྡོ་རྗེ་སེམས་དཔའི་ཏིང་འཛིན་ནི། །སངས་རྒྱས་རྣམས་ཀྱི་ཆོས་ཉིད་དགོངས། །ཞེས་བྱའོ། །ཁ་ཅིག་ན་རེ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི། ཕྱག་རྒྱ་ཆེན་པོའི་རྣམ་པར་སེམས་རྩེ་གཅིག་པ་ནི་རྡོ་རྗེ་སེམས་དཔའི་ཏིང་ངེ་འཛིན་ཉིད་དེ། སངས་
[183b.6]རྒྱས་ཉིད་ཀྱི་རྒྱུ་ཡིན་ནོ་ཞེའོ། །གཞན་དག་ནི་འདི་མ་ཡིན་ཏེ། གང་གི་ཕྱིར། བདག་ཉིད་ཆེན་པོ་གང་གང་གི །ཕྱག་རྒྱ་གང་དང་གང་བཅིངས་པའི། །བཟླས་པའི་སྙིང་པོའི་དོན་དུ་ནི། །དེར་ནི་བདག་ཉིད་བསྒོམ་པར་བྱའོ། །ཞེས་བཅོམ་ལྡན་འདས་ཀྱིས་སྔར་གསུངས་པ་ཡིན་ནོ། །ཡང་
[183b.7]དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱི་ཕྱག་རྒྱའི་རྒྱུད་ལས། དེ་བཞིན་གཤེགས་པ་དྲན་བྱེད་ཅིང་། །སངས་རྒྱས་ཕྱག་རྒྱ་བཅིངས་ནས་ནི། །སངས་རྒྱས་བྱང་ཆུབ་བསྟན་པ་ཡང་། །བསྒྲུབས་ན་མྱུར་དུ་འགྲུབ་པར་འགྱུར་རོ། །ཞེས་དེ་མ་ཐག་འཆད་པར་འགྱུར་རོ། །གཞན་ཡང་
[184a]
[184a.1]ཕྱག་རྒྱ་ཆེན་པོ་ལ་སོགས་པའི་རང་གི་ལྷའི་ཕྱག་རྒྱ་བཞིས་རང་གི་ལྷའི་ང་རྒྱལ་ཉིད་ཀྱིས་བསྒྲུབ་པར་བྱའོ་ཞེས་བྱ་བ་ནི། ཕྱག་རྒྱ་ཐམས་ཅད་བཅིངས་ནས་ནི། །བདག་ཉིད་དེ་ཡི་མདུན་དུ་ཡང་། །སངས་རྒྱས་རྗེས་སུ་དྲན་པ་བསྒོམ། །དེ་ནས་དེ་མ་ཐག་ཏུ་འགྲུབ། །ཅེས་
[184a.2]འཆད་པར་འགྱུར་བ་དེ་བས་ན་རང་གི་ལྷའི་ཕྱག་རྒྱ་བཅིངས་ཏེ། རང་གི་ལྷའི་གཟུགས་ཉིད་དུ་བསྒོམ་པར་བྱའོ། །དེས་པ་ཁོ་ནར་རྡོ་རྗེ་སེམས་དཔའི་ཕྱག་རྒྱ་ཆེན་པོའི་རྣམ་པར་སེམས་རྩེ་གཅིག་པར་མི་བྱའོ། །དེ་བཞིན་གཤེགས་པའི་ཕྱག་རྒྱ་བསྒོམ་པ་རྣམས་ཀྱིས་རང་གི་སྙིང་གའི་སེམས་
[184a.3]དཔའི་རྡོ་རྗེ་ལ་རྡོ་རྗེ་སེམས་དཔའ་ཞེས་བྱ་བ་སེམས་དཔའི་རྡོ་རྗེ་རྣམ་པ་ཁོ་ན་ཡིན་པར་ཐེ་ཚོམ་མི་བྱའོ། །འདི་སྐད་དུ་ཡང་། དེ་ཉིད་བཅོམ་ལྡན་སེམས་དཔའ་ཆེ། །ཐམས་ཅད་སེམས་དེ་ཉིད་བདག་གོ། །སྐུ་དང་གསུང་ཐུགས་རྡོ་རྗེ་ནི། །སེམས་དཔའ་བརྟན་པར་རང་བྱུང་གི། །སེམས་དཔའ་
[184a.4]ཀུན་གྱི་མཆོག་སེམས་དཔའ། །རྡོ་རྗེ་སྙིང་གར་རབ་བསྒོམས་ནས། །རྡོ་རྗེ་སེམས་དཔའ་ཞེས་གྲགས་ཏེ། །འདི་ལ་རྡོ་རྗེ་རབ་ཏུ་གནས། །ཞེས་གསུངས་སོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་
[184a.5]ཕྱག་རྒྱ་ཆེན་པོ་བཅིང་བའམ་དམ་ཚིག་དང་ཆོས་དང་ལས་ཀྱི་ཕྱག་རྒྱ་ཆེན་པོ་བཅིངས་ནས། རང་གི་སྙིང་གའི་ཟླ་བར་ཧཱུཾ་ལས་རྡོ་རྗེ་རྩེ་ལྔ་པ་རྣམ་པར་བསམས་ཏེ། དེའི་དབུས་སུ་སྙིང་པོ་བཀོད་ལ། ཐུགས་ཀའི་སེམས་དཔའི་བདག་ཉིད་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་
[184a.6]བསྒོམ་པར་བྱའོ། །ཕྱག་རྒྱ་ཆེན་པོ་བསྒོམས་ནས་ནི། །དངོས་གྲུབ་ཐམས་ཅད་བསྒྲུབ་པར་བྱ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་བསྒྲུབ་པར་འདོད་པའི་རྣལ་འབྱོར་པ་རྣམས་ཀྱིས་ཇི་ལྟ་བ་བཞིན་དུ་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་
[184a.7]ཕྱག་རྒྱ་བཅིངས་ནས་དེ་བསྒྲུབ་པར་བྱའོ། །རྡོ་རྗེ་སེམས་དཔའ་ལ་སོགས་པའི་རང་གི་ལྷའི་སྐུའི་གསང་བ་བསྒོམས་ནས་ཡང་དང་ཡང་མངོན་དུ་བྱས་ཏེ། བཟླས་པ་དོན་དུ་གཉེར་བས་བསྒྲུབ་པར་བྱའོ། །ཅིའི་ཕྱིར་ཞེ་ན། གང་གི་ཕྱིར། འདིར་ནི་དེ་བཞིན་གཤེགས་རིགས་ཀྱི། །ཞེས་བྱ་
[184b]
[184b.1]བ་སྨོས་ཏེ། ཇི་སྐད་དུ་བཤད་པ་དེ་དག་གིའོ། །ཆོས་ཉིད་དངོས་གྲུབ་དམ་པ་ཐོབ། །ཅེས་བྱ་བ་ལ་ཡང་ཞེས་བྱ་བའི་སྒྲ་ནི་དེ་བཞིན་གཤེགས་པ་རྣམས་དང་། རིགས་ཐམས་ཅད་ཀྱང་གི་ཆོས་ཉིད་འདི་ཡིན་ནོ་ཞེས་བཤད་དོ། །ཕྱག་རྒྱ་ཆེན་པོའི་ཚུལ་གྱིས་ནི། །དམ་ཚིག་མཆོག་ནི་
[184b.2]བཅིངས་ནས་ཀྱང་། །ལས་རྣམས་ཐམས་ཅད་བསྒྲུབས་ནས་ནི། །ཞེས་བྱ་བ་ལ། རྡོ་རྗེ་རིགས་སུ་བཤད་པའི་དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོ་ཐམས་ཅད་ནི་དམ་ཚིག་གི་ཕྱག་རྒྱའི་ངོ་བོ་ཡིན་པའི་ཕྱིར་རོ་ཞེས་བཤད་ཟིན་ཏོ། །དེ་རྣམས་ནི་སངས་རྒྱས་རྣམས་
[184b.3]ཀྱི་དམ་ཚིག་མཆོག་སྟེ། དམ་ཚིག་དང་། ཆོས་དང་། ལས་དང་ཕྱག་རྒྱ་ཆེན་པོ་རྣམས་ཀྱིས། སངས་རྒྱས་ལ་སོགས་པའི་ལས་རྣམས་ཐམས་ཅད་བསྒྲུབ་ཅིང་རྫོགས་པར་བྱེད་པའོ། །ཇི་ལྟར་བསྒྲུབ་པ་ཡིན་ཞེ་ན། ཕྱག་རྒྱ་ཆེན་པོའི་ཚུལ་གྱིས་ནི། །ཞེས་བྱ་བ་སྨོས་ཏེ། ཕྱག་རྒྱ་ཆེན་པོའི་
[184b.4]སྦྱོར་བ་ནི་ཕྱག་རྒྱ་ཆེན་པོའི་ཚུལ་ལོ། །དངོས་གྲུབ་ཀུན་སྦྱོར་སངས་རྒྱས་ཀྱི། །བཀས་ནི་སེམས་ཅན་ཀུན་དོན་དུ། །ཕྱག་རྒྱ་ཆེན་པོ་བསྒྲུབས་ན་ནི། །ཚེ་འདི་ཉིད་ལ་སངས་རྒྱས་འགྲུབ། །ཅེས་སྔར་བསྟན་ཟིན་པའི་ཕྱག་རྒྱ་ཆེན་པོའི་རྒྱུར་གྱུར་པ་དེས། རྡོ་རྗེའི་དངོས་གྲུབ་དང་། རྡོ་རྗེའི་རིགས་ཀྱི་
[184b.5]དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། རྡོ་རྗེ་ཆེན་པོའི་རིགས་ཀྱི་སྦྱོར་བས་ཕྱག་རྒྱ་ཆེན་པོའི་དངོས་གྲུབ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་དངོས་གྲུབ་གང་དང་གང་བསྒྲུབ་པར་འདོད་པ་དེ་དང་དེ་ཉིད་ཀྱི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ། ཕྱག་
[184b.6]རྒྱ་ཆེན་པོ་བསྒོམ་པའི་སྦྱོར་བ་ཉིད་ཀྱིས་བསྒོམ་ཞིང་བསྒྲུབ་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་སྟོན་པ་ནི། ཆོས་ཀྱི་ཕྱག་རྒྱའོ། །པདྨའི་རིགས་ཀྱི་ཕྱག་རྒྱ་རྣམ་པ་བཞིའི་ཕྱག་རྒྱར་སྦྱོར་བ་ནི། ཆོས་ཀྱི་ཕྱག་རྒྱའི་ཚུལ་ལོ། །སྔར་བཤད་པའི་འགྲོ་བ་འདུལ་བའི་ཕྱག་རྒྱ་ཆེན་
[184b.7]པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་བསྒོམ་པའི་ཚུལ་གྱིས་དེས་ཆོས་ཀྱི་ཕྱག་རྒྱ་རྗོད་པར་བྱེད་ཅིང་སྒོམ་པར་བྱེད་ཅེས་བྱ་བའི་ཐ་ཚིག་གོ། །གང་གིས་འགྲུབ་པར་འགྱུར་ཞེ་ན། རྡོ་རྗེ་ཆོས་ཀྱི་ལས་རྣམས་ནི། །ཆོས་ཉིད་དུ་ནི་འདིས་གྲུབ་བོ། །ཞེས་བྱ་བ་སྨོས་ཏེ། ཆོས་ཀྱི་
[185a]
[185a.1]ཕྱག་རྒྱ་བསྒོམ་པའི་སྦྱོར་བ་འདི་ཉིད་ཀྱིས་སོ། །གང་གི་ཚེ་ཕྱག་རྒྱ་ཆེན་པོ་ལ་སོགས་པའི་རང་བཞིན་གྱིས་འཕགས་པ་སྤྱན་རས་གཟིགས་དབང་ཕྱུག་གིས་ཆོས་ཀྱི་ཕྱག་རྒྱ་དངོས་སུ་བརྗོད་པ་དེའི་ཚེ། ཅིའི་ཕྱིར་ཆོས་ཀྱི་ཕྱག་རྒྱ་བསྒོམ་པའི་སྦྱོར་བ་དེས་ཆོས་ཀྱི་ཕྱག་རྒྱ་ལ་
[185a.2]འཇུག་པར་འགྱུར་ཞེ་ན། རྡོ་རྗེ་ཆོས་ཀྱི་ཆོས་རྣམས་ནི། །ཆོས་ཉིད་དུ་ནི་འདིས་འགྲུབ་བོ། །ཞེས་བྱ་བ་སྨོས་ཏེ། གང་གི་ཕྱིར་ཆོས་འདི་བསྐྱེད་པའི་རྒྱུ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་ཆོས་ནི་འཕགས་པ་སྤྱན་རས་གཟིགས་དབང་ཕྱུག་ཡིན་པའི་ཕྱིར་རོ། །འདི་སྐད་སྟོན་པ་ཡིན་ཏེ། རྡོ་རྗེ་པདྨའི་རིགས་ཀྱི་ཕྱག་རྒྱ་ཆེན་
[185a.3]པོ་ལ་སོགས་པའི་རྣམ་པ་བཞི་སྒྱུ་མ་ལྟ་བུར་རང་བཞིན་གྱིས་རྣམ་པར་དག་པར་བསྒོམ་པར་བྱ་བ་ཡིན་ནོ། །དབང་བསྐུར་བ་ལ་སོགས་པའི་ངོ་བོས་སེམས་ཅན་ཐམས་ཅད་ཀྱི་རེ་བ་ཡོངས་སུ་རྫོགས་པར་བྱེད་པའི་ལས་སྟོན་པའི་ཕྱག་རྒྱ་ནི་ལས་ཀྱི་ཕྱག་རྒྱ་སྟེ། ནོར་བུའི་རིགས་ཀྱི་ཕྱག་རྒྱ་ཆེན་
[185a.4]པོ་ལ་སོགས་པ་ཕྱག་རྒྱ་ཐམས་ཅད་དོ། །དེའི་སྦྱོར་བས་ནོར་བུའི་རིགས་ཀྱི་ཕྱག་རྒྱ་ཆེན་པོ་ལ་སོགས་པ་བསྒྲུབ་པའི་རྒྱུད་སྟོན་པ་དེ་ནི་ལས་ཀྱི་ཕྱག་རྒྱའི་ཚུལ་གྱིས་ཏེ། རྡོ་རྗེ་ནོར་བུ་ཆེན་པོ་རྩེ་མོ་བཅུ་གཉིས་སྟོན་པའི་ལས་ནི། ལས་ཀྱི་རྡོ་རྗེ་སྙིང་གར་གཞག །ཆོས་ཉིད་འདི་དག་བསྒོམས་ནས་
[185a.5]ནི། །ཞེས་བྱ་བ་ལ་དོན་ཐམས་ཅད་གྲུབ་པ་ལ་སོགས་པ་ཐོབ་པར་འགྱུར་རོ། །ཅི་འདྲ་བ་ཞིག་ཅེ་ན། ལས་རྣམས་ཀུན་ནི་ཐོབ་པར་འགྱུར། །ཞེས་བྱ་བ་སྨོས་ཏེ། ལས་ཐམས་ཅད་པ་ནི་ནོར་བུའི་རིགས་ཀྱི་ཕྱག་རྒྱ་ཆེན་པོ་ལ་སོགས་པ་དངོས་གྲུབ་དེས་ནི་ལས་ཐམས་ཅད་ཐོབ་པར་འགྱུར་བའོ། །
[185a.6]འདི་སྐད་སྟོན་པ་ཡིན་ཏེ། སྔར་བཤད་པའི་ནོར་བུའི་རིགས་ཀྱི་ཕྱག་རྒྱ་ཆེན་པོ་ལ་སོགས་པའི་སྦྱོར་བ་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཡི་གེ་དབྱངས་ཡིག་གསུམ་པ་དང་ལྡན་པས་བཅོམ་ལྡན་འདས་ནོར་བུ་མཆོད་པ་དང་ཆོས་ཀྱི་ཡི་གེ་ལས་རྡོ་རྗེ་ནོར་བུ་མཚན་མའི་སྣ་ཚོགས་རྡོ་རྗེ་
[185a.7]སྙིང་གར་སྤྲུལ་ལ། དེའི་སྟེང་དུ་བཟླས་པའི་ཡི་གེ་རྣམ་པར་བསམས་ནས་དེ་ཉིད་བརྗོད་ཅིང་ནོར་བུའི་རིགས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་སམ་ཕྱག་རྒྱ་ཆེན་པོ་ལ་སོགས་པའི་བསྒྲུབ་པའི་སྦྱོར་བ་བྱའོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་
[185b]
[185b.1]རྒྱ་ནི་ཕྱག་རྒྱ་ཆེན་པོ་རྡོ་རྗེ་རིགས་ཀྱི་ཕྱག་རྒྱ་ནི་དམ་ཚིག་གི་ཕྱག་རྒྱའོ། །པདྨའི་རིགས་ཀྱི་ཕྱག་རྒྱ་ནི་ཆོས་ཀྱི་ཕྱག་རྒྱའོ། །ནོར་བུའི་རིགས་ཐམས་ཅད་ཀྱི་ཕྱག་རྒྱ་ནི་ལས་ཀྱི་ཕྱག་རྒྱའོ་ཞེས་གྲགས་པ་ཉིད་ཡན་ལག་ཏུ་བྱ་བ་ཡིན་ནོ། །དེ་ཡན་ལག་ཏུ་བྱས་པར་གྱུར་པ་ན་ཕྱག་རྒྱ་ལྷག་མ་རྣམས་ནི་ཆོས་ཉིད་
[185b.2]དུ་གྱུར་པས་དངོས་གྲུབ་ཏུ་འགྱུར་བ་ཡིན་ནོ། །དེ་བཞིན་དུ་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཆོས་ཉིད་ཐམས་ཅད་བསྟན་ནས་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་སྒྲུབ་པ་ན། སྒྲུབ་པ་པོ་ལ་ངེས་པ་
[185b.3]བསྐྱེད་ནས་འཇུག་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའི་དངོས་གྲུབ་ཀྱི་རྒྱུད་འདི་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་རྣམས་ནི་ཡེ་ཤེས་
[185b.4]ཀྱི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཡེ་ཤེས་སོ། །དེ་སྒྲུབ་པའི་ཕྱིར་སྒོམ་པའི་ཕྱག་རྒྱ་དེས་དངོས་གྲུབ་ཀྱི་ཡེ་ཤེས་ཀྱི་དངོས་གྲུབ་དེ་སྟོན་པར་བྱེད་པ་ནི་རྒྱུད་དོ། །གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་
[185b.5]རྡོ་རྗེ་སེམས་དཔའི་ཏིང་ངེ་འཛིན་ལ་བརྟེན་པའོ། །སྦྱོར་བ་གང་གིས་ཤེ་ན། ཟླ་བ་རྡོ་རྗེའི་ཚུལ་གྱིས་ཏེ། །ཞེས་བྱ་བ་ལ་སོགས་པ་སྨོས་ཏེ། ཟླ་བ་རྡོ་རྗེའི་ཚུལ་ནི་སེམས་དཔའ་རྡོ་རྗེའི་རྣམ་པར་བསྒོམ་པའོ། །ཟླ་བ་རྡོ་རྗེའི་ཚུལ་གྱིས་ནི། །རྡོ་རྗེ་སེམས་དཔའི་ཏིང་ངེ་འཛིན་ལ་གནས་པའི་རྣལ་འབྱོར་
[185b.6]པས་སོ། །ཇི་ལྟར་དེ་གཉིས་ཁ་དོག་ཤེས། །ཞེས་བྱ་བ་ནི་རྡོ་རྗེ་དང་ཟླ་བ་གཉིས་ཀྱིའོ། །དེ་ལྟར་འཇིག་རྟེན་དེས་ཞེས་བྱ་བ་ནི་རྣལ་འབྱོར་པས་སོ། །ཤེས་ཏེ་ཞེས་བྱ་བ་ནི་བསྒོམ་པའི་ཤེས་པས་སོ། །དེ་ཉིད་བཤད་པ་ནི། དག་ལ་དག་དང་ཞེས་བྱ་བ་ལ་སོགས་པའོ། །དག་པ་ནི་ཤེལ་དང་
[185b.7]འདྲ་བ་དྲི་མ་མེད་པའོ། །ཤེལ་དང་འདྲ་བའི་ཟླ་བ་རྡོ་རྗེ་མཐོང་བ་ནི་དག་པ་སྟེ། རྣལ་འབྱོར་པའི་སེམས་ཀྱིས་ཤེས་བྱ་ཤེས་པའོ། །དཀར་བ་ནི་ཟླ་བ་རྡོ་རྗེ་ཁ་དོག་དཀར་པོ་མཐོང་བའོ། །འོད་གསལ་བ་ནི་ལས་ཀྱི་སྒྲིབ་པ་སྤངས་པ་དང་། སྡིག་པའི་མན་པ་དང་བྲལ་བའི་སྣང་བ་དང་བཅས་
[186a]
[186a.1]པའོ་ཞེས་བྱ་བའི་དོན་ཏོ། །དམར་པོ་ནི་ཆགས་པས་ཟིལ་གྱིས་མནན་པས་ཟླ་བ་རྡོ་རྗེ་དམར་པོ་མཐོང་བའོ། །རབ་དམར་ཁྲོ་ཞེས་བྱ་བ་ནི་ཤིན་ཏུ་དམར་བའོ། །ཤེས་ནས་ཁ་དོག་ཇི་བཞིན་པ། །དེ་ཡི་བདག་ཉིད་ཉིད་དུ་འགྱུར། །ཇི་སྐད་བཤད་པའི་ཁ་དོག་དེ་དག་གི་ནང་ནས་ཅི་འདྲ་
[186a.2]བ་ཟླ་བ་རྡོ་རྗེའི་གཟུགས་སུ་མཐོང་བ་དེ་འདྲ་བ་ཉིད་འགྲོ་བའི་སེམས་སུ་ཤེས་པར་བྱ་བའོ། །རྣམ་པར་སྣང་མཛད་ལ་སོགས་པའི་རྣལ་འབྱོར་པར་གང་གི་ཚེ་རང་དང་གཞན་དག་གི་དགོས་པ་ཤེས་པར་འདོད་པ་དེའི་ཚེ་ཇི་ལྟ་བ་བཞིན་དུ་བདག་དང་གནས་བསྲུང་བ་དང་། སྔ་མ་བཞིན་དུ་དེ་བཞིན་གཤེགས་པ་
[186a.3]ཐམས་ཅད་ཀྱི་རྣལ་འབྱོར་བྱས་ནས། མཆོད་པ་ཐམས་ཅད་ཀྱིས་ཡང་དག་པར་མཆོད་ལ། ཕྱག་བཞི་བྱས་ནས་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་ཟླ་བར་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་རྣམ་པར་བསམས་ཏེ། ཆོས་ཐམས་ཅད་གཟུགས་བརྙན་དང་མཚུངས་པ་བདེན་པ་གང་ཡིན་པ་དང་། སྒྲ་
[186a.4]བརྙན་དང་མཚུངས་པ་བདེན་པ་གང་ཡིན་པ་དེས་བཅོམ་ལྡན་འདས་རྡོ་རྗེ་སེམས་དཔའ་ལ་སོགས་པའི་འབྲས་བུ་ནི་མཐོང་བ་དང་འདི་དག་གི་འབྲས་བུ་གྲུབ་པར་གྱུར་ཅིག་ཅེས་བདེན་པའི་བྱིན་གྱིས་བརླབས་ནས། ཨོཾ་སརྦྦ་ཏ་ཐཱ་ག་ཏ་མ་ཧཱ་ཡོ་གི་ཤྭ་ར་ཧཱུཾ་ཞེས་བྱ་བ་ལ་སོགས་པ་དེ་བཞིན་གཤེགས་པ་རང་རང་གི་
[186a.5]སྔགས་སམ་སྤྱིའི་སྙིང་པོ་རྡོ་རྗེའི་ཚིག་གིས་བརྗོད་ཅིང་། རང་གི་སྙིང་གར་ཟླ་བ་རྡོ་རྗེ་བསྒོམས་ན་ངེས་པར་ཐམས་ཅད་ཀྱིས་མཐོང་ཞིང་ཐོས་པར་འགྱུར་རོ། །ཟླ་བའི་དཀྱིལ་འཁོར་འོད་བཅས་པ། །ཕྱག་རྒྱ་ཆེན་པོ་བཅིངས་ནས་ནི། །ཞེས་བྱ་བ་ལ་སོགས་པ་ནི་རྡོ་རྗེ་སེམས་དཔའ་ལ་སོགས་པ་ནས་
[186a.6]རྡོ་རྗེ་འབེབས་པའི་མཐར་ཐུག་པའི་ཕྱག་རྒྱ་ཆེན་པོ་རྣམས་ཀྱི་ནང་ནས་ཕྱག་རྒྱ་ཆེན་པོ་གང་ཡང་རུང་བ་བཅིངས་ཏེ། དེའི་རྣམ་པར་སེམས་རྩེ་གཅིག་ཏུ་བྱས་ནས་བསྒྲུབ་པར་བྱའོ། །ཟླ་བ་དཀྱིལ་འཁོར་དང་བཅས་པའི། །ཞེས་བྱ་བ་ནི་ཟླ་བའི་དཀྱིལ་འཁོར་དང་མཚུངས་པའི་འོད་གང་ལ་མངའ་བ་
[186a.7]དེ་ནི་ཟླ་བའི་དཀྱིལ་འཁོར་གྱི་འོད་ཅན་ནོ། །རང་གི་ལུས་ལ་ཇི་ལྟར་ཤེས། །ཞེས་བྱ་བ་ནི་ཇི་ལྟར་ཤེས་པ་དེ་ལྟར་འགྲོ་བའི་ཡིད་ཤེས་པའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་ལ། དེ་བཞིན་གཤེགས་པའི་རིགས་ཀྱི་རྣལ་འབྱོར་པས་གང་གི་ཚེ་རང་དང་གཞན་གྱི་
[186b]
[186b.1]དགོས་པ་ཤེས་པར་འདོད་པ་དེའི་ཚེ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རང་གི་སྙིང་གའི་ཟླ་བར་སྔ་མ་བཞིན་དུ་རྡོ་རྗེའི་རྣམ་པར་བསམས་ཏེ། རྡོ་རྗེའི་དབུས་སུ་སྙིང་པོ་བཀོད་ལ་དེ་ཉིད་བརྗོད་ཅིང་སྔ་མ་བཞིན་དུ་བདེན་པའི་བྱིན་རླབས་བྱས་ནས། རང་གི་ལྷའི་གཟུགས་སུ་བསྒོམས་ན་ངེས་པར་ཐམས་ཅད་
[186b.2]ཀྱིས་མཐོང་ཞིང་ཐོས་པར་འགྱུར་རོ། །ཁྲོས་པར་གྱུར་ན་དཀྱིལ་འཁོར་ནི། །ཞེས་བྱ་བ་ནི་དེ་ལ་ནམ་མཁའ་ནི་རབ་ཏུ་གྲགས་པའོ། །རས་སམ་རྩིག་པའམ་ལུགས་སུ་བླུགས་པ་ལ་སོགས་པ་ཕྱོགས་གཞན་དག་ཏུའོ། །དེ་ལ་ཁྲོས་པར་དཀྱིལ་འཁོར་ནི། །ཞེས་བྱ་བ་ནི་ཁྲོ་བའི་ལྷའི་ཉམས་མངོན་དུ་བྱེད་པ་ནི་ཁྲོ་བོ་
[186b.3]སྟེ། ཁྲོ་བོའི་རྣལ་འབྱོར་པས་དེས་ཁྲོ་བོ་དེ་བདག་ཉིད་དུ་གྱུར་པ་ནམ་མཁའ་ལ་སོགས་པ་ལ་དཀྱིལ་འཁོར་དཀར་པོ་ལ་སོགས་པར་མཐོང་བར་གྱུར་ཏེ། ཁྲོ་བའི་ཏིང་ངེ་འཛིན་གྱི་མཐུས་དེ་ལྟ་བུས་ཡིད་ཀྱིས་ཤེས་ཤིང་རང་དང་གཞན་གྱི་ཡིད་ཤེས་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འཇིག་
[186b.4]རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཇི་ལྟ་བ་བཞིན་དུ་མཆོད་པ་དང་ཕྱག་བཞི་བྱས་ཏེ། ཕྱག་རྒྱ་ཆེན་པོ་ལ་སོགས་པ་བཅིངས་ནས། རང་གི་སྙིང་གར་རྡོ་རྗེ་ལ་སྙིང་པོ་བཀོད་ཅིང་དེ་ཉིད་བརྗོད་པར་བྱའོ། །བདེན་པའི་བྱིན་
[186b.5]གྱི་རླབས་ཀྱིས་སྔ་མ་བཞིན་དུ་རང་གི་ལྷའི་ངོ་བོ་ཇི་སྲིད་ནམ་མཁའ་ལ་སོགས་པར་མཚན་མ་སྟོན་པར་གྱུར་པའི་ཟླ་བའི་དཀྱིལ་འཁོར་ལ་སོགས་པའི་གཟུགས་སུ་མཐོང་བ་དང་། སྒྲ་ཐོས་པར་འགྱུར་བ་དེ་སྲིད་ཀྱི་བར་དུ་བསྒོམ་པར་བྱའོ། །ནམ་མཁའི་ས་ཕྱོགས་ཕྲ་མོའམ། །ཞེས་བྱ་བ་ནི་རྡོ་རྗེ་ཕྲ་མོའོ། །ཡི་གེ་
[186b.6]ཕྲེང་བ་མཐོང་གྱུར་ན། །ཞེས་བྱ་བ་ནི་མངོན་པར་འདོད་པའི་དངོས་པོ་སྟོན་པར་བྱེད་པའི་ཡི་གེ་ཕྲེང་བ་བྲིས་པ་ནམ་མཁའ་ལ་སོགས་པར་བསྒོམ་པའི་ཤེས་པས་མཐོང་བར་གྱུར་པས་མདོར་ན་ཁ་དོག་ཅི་འདྲ་བར་ཤེས་པ་དེ་འདྲར་དེ་སེམས་ཤེས་ཞེས་བྱའོ། །འདི་སྐད་དུ་སྟོན་པ་ཡིན་ཏེ། སྔ་མ་བཞིན་དུ་
[186b.7]འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་ཉིད་འཇིག་རྟེན་དབང་ཕྱུག་གི་རྣལ་འབྱོར་བྱས་ཏེ་ཆོ་ག་ཐམས་ཅད་རྗེས་སུ་སྤྱད་ལ་རང་གི་སྙིང་གར་རྡོ་རྗེ་པདྨ་དེའི་སྟེང་དུ་སྙིང་པོ་བཀོད་ལ། དེ་ཉིད་བརྗོད་ཅིང་བདེན་པའི་བྱིན་གྱིས་བརླབས་པར་བྱས་ནས་རང་ཉིད་འཇིག་རྟེན་དབང་ཕྱུག་ཏུ་བསྒོམ་པར་
[187a]
[187a.1]བྱའོ། །དེ་ནས་རྡོ་རྗེ་ཕྲ་མོའམ་ཡི་གེ་ཕྲེང་བ་ཁ་དོག་ཅི་འདྲ་བར་མཐོང་བ་དེ་བཞིན་དུ་དེའི་འབྲས་བུ་ཤེས་པར་འགྱུར་རོ། །འཇིག་རྟེན་ཡང་ཡིན་ལ་ཀུན་ཀྱང་འདི་ཡིན་པས་ན་འཇིག་རྟེན་ཀུན་ཏེ། བཅོམ་ལྡན་འདས་ནམ་མཁའི་སྙིང་པོའོ། །བལྟས་ནས་ཀྱང་ནི་བསྒོམས་ནས་
[187a.2]ཀྱང་ངོ་། །ཅི་འདྲ་བ་ཞིག་ཅེ་ན། ཇི་ལྟ་བུར་ནི་སྣང་འགྱུར་ཞིང་། །ཞེས་བྱ་བ་སྨོས་ཏེ། རང་གི་ལྷའི་སྐུ་མདོག་དང་དབྱིབས་ཅི་འདྲ་བ་དེ་འདྲ་ཉིད་དུ་དེ་བསྒོམ་པར་བྱའོ། །མཐོང་བར་འགྱུར་བ་དེ་འདྲ་བར། །འགྲོ་བའི་སེམས་ནི་ཤེས་པར་བྱ། །ཞེས་བྱ་བ་ནི་རྣལ་འབྱོར་པས་རང་གི་ལྷའི་གཟུགས་
[187a.3]ཁ་དོག་དཀར་པོ་ལ་སོགས་པའི་རང་བཞིན་དུ་ཅི་འདྲ་བར་བསྒོམས་ནས། འགྲོ་བའི་སེམས་ཀྱང་དེ་དང་འདྲ་བ་ཉིད་དུ་བསྒོམས་པའི་སྟོབས་ཀྱིས་མཐོང་བར་འགྱུར་རོ། །དེ་བཞིན་དུ་མཐོང་བ་དེའི་འབྲས་བུ་ཤེས་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། ནོར་བུའི་རིགས་ཀྱི་རྣལ་འབྱོར་
[187a.4]སྔ་མ་བཞིན་དུ་བྱས་ནས་ཆོ་ག་ཐམས་ཅད་རྗེས་སུ་སྤྱད་དེ། རང་གི་སྙིང་གར་རྡོ་རྗེ་ཆེན་པོའི་དབུས་སུ་བཟླས་པའི་སྙིང་པོ་ཡིད་ཀྱིས་བྲིས་ཏེ། ཆོས་ཐམས་ཅད་གཟུགས་བརྙན་དང་མཚུངས་པའི་བདེན་པ་གང་ཡིན་པ་དང་སྒྲ་བརྙན་དང་མཚུངས་པའི་བདེན་པ་གང་ཡིན་པ་དེས་འབྲས་བུ་འདི་བཅོམ་ལྡན་
[187a.5]འདས་ནམ་མཁའི་སྙིང་པོ་དང་འདྲ་བར་གྱུར་ཅིག་ཅེས་བྱ་བའི་བདེན་པའི་བྱིན་རླབས་བྱས་ནས། ཇི་ལྟར་བྲིས་པའི་བཟླས་པ་བརྗོད་ཅིང་རང་གི་ལྷ་བསྒོམ་པ་དེས་ཐམས་ཅད་ཀྱིས་མཐོང་བར་འགྱུར་རོ། །དེ་ཉིད་ནི་སྙོམས་ཞུགས་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས་ནོར་བུའི་རིགས་ཀྱི་
[187a.6]མཐར་ཐུག་པའི་དངོས་གྲུབ་ཀྱི་ཡེ་ཤེས་བསྒོམས་པ་ལས་བྱུང་བའི་ལུས་ཀྱི་སོ་སོར་སྣང་བའི་གཟུགས་ཀྱིས་འགྲོ་བར་བྱེད་པས་འགྲོ་བར་སྟོན་པ་དང་། འོང་བར་བྱེད་པས་འོང་བར་རབ་ཏུ་སྟོན་པའོ། །འཆགས་པ་ལའང་ཞེས་བྱ་བ་ནི་ཇི་ལྟར་མཐོང་བའི་རྣལ་འབྱོར་དེས་དེ་ལྟར་འབྲས་བུ་བརྟགས་
[187a.7]པ་ནི་འབྲས་བུ་ཐོབ་པའོ། །སྙོམས་པར་ཞུགས་ཏེ་བསམས་ན་ནི། །ཞེས་བྱ་བ་ནི་རྣལ་འབྱོར་པས་ཇི་ལྟར་འདོད་པའི་དངོས་པོ་བསྒོམ་པའོ། །སེམས་ཅན་གང་དང་གང་ཡིན་པ། །ཞེས་བྱ་བ་ནི་རྣམ་པར་སྣང་མཛད་ལ་སོགས་པ་མོས་པ་ནི་སེམས་ཅན་དེ་དང་དེ་ནི་རྣམ་པར་སྣང་མཛད་ལ་སོགས་
[187b]
[187b.1]པའོ། །དེ་བཞིན་དུ་བཤད་མ་ཐག་པའི་སྙོམས་པར་འཇུག་པའི་རྣམ་པ་དེས་སེམས་ཅན་ཐམས་ཅད་ཀྱི་སེམས་རྣམས་རྟོགས་ཤིང་ཁོང་དུ་ཆུད་པར་འགྱུར་རོ། །འདི་སྐད་སྟོན་པ་ཡིན་ཏེ། དཀར་པོ་ལ་སོགས་པའི་གཟུགས་འབའ་ཞིག་སྟོན་པ་ནི་མ་ཡིན་གྱི་ཇི་སྐད་བཤད་པའི་སྙོམས་པར་འཇུག་པ་སྔོན་
[187b.2]དུ་བྱས་པས་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་ཀྱང་ཤེས་པར་འགྱུར་རོ། །དེ་ལྟར་རང་དང་གཞན་དག་ཕྱག་རྒྱ་ཆེན་པོ་ལ་སོགས་པ་བསྒྲུབས་ནས་སྐལ་བ་དང་ལྡན་པ་དང་། སྐལ་བ་དང་མི་ལྡན་པ་ཆོས་སུ་བརྟག་པའི་ཡེ་ཤེས་དང་། དངོས་པོ་ཐམས་ཅད་ལ་ཐེ་ཚོམ་སེལ་བའི་
[187b.3]ཡེ་ཤེས་མཁྱེན་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཡེ་ཤེས་ཀྱི་ཕྱག་རྒྱའི་དངོས་གྲུབ་ཀྱི་རྒྱུད་བསྟན་ནས། ད་ནི་ཕྱག་རྒྱ་ཆེན་པོ་ལ་སོགས་པ་བསྒོམས་ནས་ཀྱང་། གང་གི་ཚེ་མཚན་མ་ཐོབ་པར་གྱུར་པ་དེའི་འགྲུབ་པར་འགྱུར་རོ་ཞེས་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་
[187b.4]ཆེན་པོ་ཕྱག་རྒྱ་ཆེན་པོ་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། ཇི་སྐད་དུ་བཤད་པའི་དངོས་གྲུབ་དེ་དག་སྟོན་པའི་ཡེ་ཤེས་ནི་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱི་ཡེ་ཤེས་
[187b.5]སོ། །དེའི་ཆོ་ག་རྒྱས་པ་ནི་དེ་བཞིན་གཤེགས་པ་ལ་སོགས་པ་ཐ་དད་པས་བྱེ་བྲག་རྒྱས་པའོ། །དེ་སྟོན་པར་བྱེད་པའི་རྒྱུད་དོ། །གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །དེ་ལ་ཞེས་བྱ་བ་ལ་སོགས་པ་ནི་གོ་སླའོ། །སེམས་དཔའི་བྱིན་གྱིས་བརླབས་ཚུལ་གྱིས། །ཞེས་བྱ་
[187b.6]བ་ནི་སེམས་དཔའི་རྡོ་རྗེ་རབ་ཏུ་སྣང་བའོ། །དེས་སེམས་དཔར་བྱིན་གྱིས་བརླབས་པའི་སྦྱོར་བས་སངས་རྒྱས་དངོས་གྲུབ་ཐོབ་པར་ཞེས་བྱ་བར་སྦྱར་རོ། །གང་ལས་སྐྱེ་བར་འགྱུར་ཞེ་ན། སངས་རྒྱས་གཟུགས་སུ་བདག་བསྒོམས་ན། །ཞེས་བྱ་བ་ལ་སོགས་པ་སྨོས་ཏེ། རྣམ་པར་སྣང་མཛད་ལ་སོགས་
[187b.7]པ་དེ་བཞིན་གཤེགས་པ་རྣམས་སོ། །བདག་ཉིད་བསྒོམས་པའི་རྣམ་པར་སྣང་མཛད་གང་ཡིན་པ་དེ་བདག་ཡིན་ནོ་ཞེས་བྱ་བ་ནས། དོན་ཡོད་གྲུབ་པ་གང་ཡིན་པ་དེ་བདག་ཡིན་ནོ་ཞེས་ང་རྒྱལ་བསྐྱེད་པར་བྱའོ། །སེམས་དཔར་བྱིན་གྱིས་བརླབས་པའི་སྦྱོར་བ་བསྒོམ་པ་གང་ཡིན་པ་དེ་བསྐྱེད་
[188a]
[188a.1]པའོ། །ཡེ་ཤེས་ནི་ཚུལ་དེ་ཡིས་ཞེས་བྱ་བ་ནི་སེམས་དཔར་སྦྱོར་བའི་བྱིན་གྱིས་རློབ་པའི་སྦྱོར་བ་ཉིད། ཡེ་ཤེས་ཀྱི་ནི་ཚུལ་དེ་ཡིས། །ཞེས་བྱ་བ་སྨོས་ཏེ། ཚུལ་ནི་ཏིང་ངེ་འཛིན་གྱི་ཚུལ་ལོ་ཞེས་བསྟན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དེ་བཞིན་གཤེགས་
[188a.2]པའི་རྣལ་འབྱོར་བསྒོམ་པའི་རྣལ་འབྱོར་པས། བསྒོམ་པའི་བདག་ཉིད་ཀྱི་ཡེ་ཤེས་ཀྱིས་གང་གི་ཚེ་སྙིང་གར་སེམས་དཔའི་རྡོ་རྗེ་ཉིན་རེ་བཞིན་ཐུན་བཞིའི་མཐོང་བར་གྱུར་བ་དེའི་ཚེ། མཚན་ཐོག་ཐག་དེ་བཞིན་གཤེགས་པའི་བདག་ཉིད་དུ་བསྒོམས་ནས་སངས་རྒྱས་ཉིད་མངོན་སུམ་དུ་བྱེད་པར་
[188a.3]འགྱུར་རོ། །དེའི་ཕྱིར། སངས་རྒྱས་དངོས་གྲུབ་ཐོབ་པར་འགྱུར། །ཞེས་བྱ་བ་གསུངས་སོ། །ནམ་མཁའ་ནི་གྲགས་པར་ཟད་དོ། །ཕྱོགས་གཞན་དུ་བཤད་ཟིན་ཏོ། །སེར་སྐྱའི་འོད་ཀྱི་དཀྱིལ་འཁོར་ནི་ཟླ་བའི་དཀྱིལ་འཁོར་སེར་སྐྱར་མཐོང་བ་ཡིན་ཏེ། འབའ་ཞིག་མཐོང་བ་ནི་མ་ཡིན།
[188a.4]ནོ། །ཇི་ལྟ་བུ་ཞེ་ན། སེམས་དཔའ་ཉིད་ཀྱི་ཕྱག་རྒྱ་ཉིད། །མངོན་སུམ་ཉིད་དུ་མཐོང་གྱུར་ནའོ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེེབས་པའི་མཐར་ཐུག་པའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ། རྣལ་འབྱོར་པ་བསྒོམ་པ་ལ་སོགས་པ་ན།
[188a.5]སེམས་དཔའ་རང་ཉིད་ཀྱི་ཕྱག་རྒྱ་སྟེ། རྡོ་རྗེ་སེམས་དཔའ་ལ་སོགས་པ་ཇི་སྐད་དུ་བཤད་པའི་སེམས་དཔའ་དེ་ཉིད་ཀྱི་ཕྱག་རྒྱས་རྡོ་རྗེ་སེམས་དཔའ་ཉིད་ལ་སོགས་པའི་གཟུགས་སུ་རྣལ་འབྱོར་པ་བདག་ཉིད་མངོན་སུམ་དུ་མཐོང་བར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་སེམས་
[188a.6]དཔའ་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། ཇི་སྐད་དུ་བཤད་པའི་ཚུལ་གྱིས་རྡོ་རྗེ་སེམས་དཔའ་ལ་སོགས་པ་བསྒོམས་ནས་ཉིན་རེ་ཞིང་ཐུན་བཞིའི་སྦྱོར་བས་ནམ་མཁའི་ཕྱོགས་སུ་ཟླ་བའི་དཀྱིལ་འཁོར་སེར་སྐྱའི་གཟུགས་སུ་ངོ་བོ་ཇི་སྲིད་བདག་ཉིད་མཐོང་བར་གྱུར་པ་དེའི་ཚེ། ཇི་ལྟ་བ་
[188a.7]བཞིན་དུ་མཚན་ཐོག་ཐག་བཟླས་ཤིང་བསྒོམས་ན་འགྲུབ་པར་འགྱུར་རོ། །དེ་ལྟ་བུ་ཡི་དབྱིབས་གྱུར་པ། ཞེས་བྱ་བ་ནི་སེར་སྐྱའི་འོད་ཀྱིས་དཀྱིལ་འཁོར་དུ་སྣང་བ་གྲུབ་པས་ན་དབུས་སུ་སྔོ་བསངས་ནི་ཨུཏྤ་ལ་སྔོན་པོ་ལྟ་བུའོ། །སྣང་བ་ནི་ཞེས་བྱ་བ་ནི་མངོན་པ་དང་མཐོང་བ་ཞེས་བྱ་བའི་
[188b]
[188b.1]ཐ་ཚིག་གོ། །རྡོ་རྗེ་རིགས་ཀྱི་རྣལ་འབྱོར་པ་འདི་དངོས་གྲུབ་ཀྱི་ཡེ་ཤེས་སོ། །རྡོ་རྗེ་རིགས་ཀྱི་མཆོག་གི་དངོས་གྲུབ་ནི་དམ་ཚིག་གོ། །ཅི་སྟེ་འདོད་ན་མྱུར་དུ་ཐོབ། །ཅེས་བྱ་བ་ནི་གལ་ཏེ་རྡོ་རྗེ་རིགས་ཀྱི་རྣལ་འབྱོར་པ་སྒྲུབ་པར་འདོད་ནས། དེ་སྲིད་པ་ནི་མཁའ་འདྲ་ཡི། །ཞེས་བྱ་བ་ནི་རྡོ་རྗེ་རིགས་ཀྱི་རྣལ་འབྱོར་
[188b.2]པ་བསྒོམས་པའི་སྟོབས་ཀྱིས་ནམ་མཁའ་དང་འདྲ་བའི་ཁ་དོག་སྔོན་པོའི་དཀྱིལ་འཁོར་མཐོང་བ་གང་ཡིན་པ་དེ་ལྟ་བུ་པདྨའི་རིགས་ཀྱི་རྣལ་འབྱོར་པས་གང་གི་ཚེ་ནམ་མཁའ་ལ་པདྨ་སྔོན་པོའི་ཁ་དོག་ཅན་གྱི་དཀྱིལ་འཁོར་བསྒོམས་པའི་སྟོབས་ཀྱིས་མཐོང་བ་དེའི་ཚེ། པདྨ་ཆེན་པོའི་རིགས་རིག་པའི། །དངོས་གྲུབ་
[188b.3]ཏུ་ནི་ལེགས་པར་འགྱུར། །ཞེས་བྱ་བ་དེ་ཤེས་པར་བྱའོ། །ནམ་མཁའ་འམ་ནི་ཕྱོགས་གཞན་ན། །ཞེས་བྱ་བ་ནི་ནོར་བུའི་རིགས་ཀྱི་རྣལ་འབྱོར་པའི་བསྒོམ་པའི་ཡེ་ཤེས་ཀྱིས་སེར་སྐྱའི་དཀྱིལ་འཁོར་དེ་ཉིད་སྟོན་ཀའི་ནམ་མཁའ་དྲི་མ་མེད་པ་ལས་འོད་ཟེར་གྱི་དཀྱིལ་འཁོར་འཕྲོ་ཞིང་གཡོ་བར་མཐོང་བ་ན། མཐོང་
[188b.4]ན་མྱུར་དུ་དངོས་གྲུབ་ཐོབ། །ཅེས་བྱའོ། །ད་ནི་ཇི་སྐད་དུ་བཤད་པའི་དེ་བཞིན་གཤེགས་པ་ལ་སོགས་པའི་རྣལ་འབྱོར་པ་རྣམས་ཀྱིས་དངོས་གྲུབ་ཀྱི་ཡེ་ཤེས་འདི་འབའ་ཞིག་མ་ཡིན་གྱི་གཞན་ཡང་ཡིན་ནོ་ཞེས་བསྟན་པར་བྱ་བའོ་ཞེས། རྡོ་རྗེ་སེམས་སོགས་སེམས་དཔའ་རྣམས། །ཞེས་བྱ་བ་ལ་སོགས་པ་སྨོས་ཏེ།
[188b.5]རྡོ་རྗེ་སེམས་དཔའ་དང་པོར་བྱ་བ་གང་ཡིན་པ་དེ་ནི་རྡོ་རྗེ་སེམས་དཔའ་ལ་སོགས་པའོ། །དེ་གང་ཡིན་ཞེ་ན། རྡོ་རྗེ་རྒྱལ་པོ་ནས་བརྩམས་ནས་རྡོ་རྗེ་འབེེབས་པའི་མཐར་ཐུག་པའི་སེམས་དཔའོ། །ཁྱད་པར་ཇི་ལྟ་བུ་ཞིག་ཅེ་ན། ཟླ་བའི་དཀྱིལ་འཁོར་འོད་བཅས་ཏེ། ཟླ་བའི་དཀྱིལ་འཁོར་དང་མཚུངས་པའི་འོད་ཀྱི་དཀྱིལ་
[188b.6]འཁོར་རོ། །ཟླ་བའི་དཀྱིལ་འཁོར་དང་བཅས་པ་གང་ཡིན་པ་དེ་ནི་སྔར་བསྟན་ཟིན་ཏོ། །ནམ་མཁའ་འམ་ནི་ཕྱོགས་གཞན་དུ་བདག་ཉིད་ཇི་ལྟ་བུ་ཞེ་ན། མི་བརྟན་པའི་གཟུགས་ཀྱི་སྣང་བ་ཙམ་གྲུབ་པའི་དུས་སུ་མདུན་དུ་མཐོང་བ་ཡིན་ལ། དངོས་གྲུབ་ཀྱི་དུས་སུ་ནི་དཀྱིལ་འཁོར་གྲགས་པའི་ཁ་དོག་དང་
[188b.7]དབྱིབས་ཅན་གྱི་རང་བཞིན་གྱི་གཟུགས་བྱོན་ནས་སྒྲུབ་པ་པོ་ལ་བདག་ཉིད་སྟོན་པར་འགྱུར་རོ། །དེ་ནས་སྐད་ཅིག་མ་དེ་ཉིད་ལ་རྣལ་འབྱོར་པ་འདི་རྡོ་རྗེ་འཆང་ཆེན་པོ་ལ་སོགས་པའི་དངོས་གྲུབ་འགྲུབ་པར་འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དངོས་གྲུབ་ཀྱི་ཡེ་ཤེས་ཀྱི་རྒྱུད་བསྟན་ནས།
[189a]
[189a.1]ད་ནི་ཕྱག་རྒྱ་ཆེན་པོ་ལ་སོགས་པའི་བསྒོམས་པ་ནས་མཚན་མ་ཐོབ་པར་གྱུར་པ་མངོན་པར་ཤེས་པ་ལྔ་བསྒྲུབ་པར་བྱའོ་ཞེས་བྱ་བ་ནི། དེ་ནས་ཞེས་བྱ་བ་ལ་སོགས་པ་མངོན་པར་ཤེས་པའི་དངོས་གྲུབ་ཀྱི་ཡེ་ཤེས་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་
[189a.2]རིགས་ཀྱང་ཡིན་པས་ན། དེའི་མངོན་པར་ཤེས་པའི་དངོས་གྲུབ་རྫོགས་པའོ། །དེའི་ཡེ་ཤེས་དེ་སྟོན་པའི་རྒྱུད་དོ། །གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་སྙིང་གའི་ཟླ་བའི་རྡོ་རྗེའི་རྣམ་པར་སེམས་རྩེ་གཅིག་པ་ནི་རྡོ་རྗེ་སེམས་
[189a.3]དཔའི་ཏིང་ངེ་འཛིན་ཏོ། །དེ་ལ་གནས་ཞེས་བྱ་བ་ནི་རྡོ་རྗེ་སེམས་དཔའི་ཏིང་ངེ་འཛིན་ལ་གནས་ནས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ལྔའི་རྣལ་འབྱོར་པས་སྤྱི་གཙུག་ནས་བརྩམས་ཏེ། རྐང་མཐིལ་གྱི་བར་དུ་ལུས་ཐམས་ཅད་ལ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་
[189a.4]པའི་གཟུགས་དང་། རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་རྣམས་ཀྱང་བློས་བསྒོམས་ན་མཐོང་བ་ཡིན་ནོ། །དེ་བཞིན་ལུས་ལས་ཞེས་བྱ་བ་ནི་རང་གི་ལུས་ལ་བྱུང་བ་ཁོ་ནའོ། །འདི་སྐད་སྟོན་པ་ཡིན་ཏེ། མཚན་མ་ཐོབ་པའི་དེ་བཞིན་གཤེགས་པའི་རྣལ་འབྱོར་པས་སེམས་དཔའི་
[189a.5]རྡོ་རྗེ་ཏིང་ངེ་འཛིན་མངོན་དུ་བྱས་ནས། དེ་བཞིན་གཤེགས་པའི་ཕྱག་རྒྱ་ཆེན་པོ་ལ་སོགས་པ་མངོན་དུ་བྱས་ཏེ། དེའི་ཚེ་རང་གི་དེ་བཞིན་གཤེགས་པའི་སྐུ་ལ་དེ་བཞིན་གཤེགས་པའི་གཟུགས་བསྒོམས་ནས། ཡིད་ཀྱིས་ལེགས་པའི་སྦྱོར་བ་སྔ་མ་བཞིན་དུ་བཅུག་ལ་བ་སྤུའི་ཁུང་བུ་རེ་རེར་རྡོ་རྗེ་སེམས་དཔའ་
[189a.6]ལ་སོགས་པ་བྱང་ཆུབ་སེམས་དཔའ་རྣམས་བཞུགས་པར་བསྒོམ་པར་བྱའོ། །དེ་ནས་བརྟན་པར་གྱུར་པ་དང་རང་གི་ལུས་ལས་སྐུ་རྣམས་ཕྱུང་ནས། ནམ་མཁའ་ལ་སོགས་པར་སྤྲོས་པ་དེ་ལྟ་བུས་དེ་བཞིན་གཤེགས་པའི་རྣལ་འབྱོར་པའི་མངོན་པར་ཤེས་པའི་དངོས་གྲུབ་ཏུ་འགྱུར་བ་ཡིན་ནོ། །རྡོ་རྗེ་
[189a.7]སེམས་དཔའ་ཕྱག་རྒྱ་ཆེ། །ཞེས་བྱ་བ་ལ། རྡོ་རྗེ་སེམས་དཔའ་ནི་རྡོ་རྗེ་སེམས་དཔའ་ནས་བརྩམས་ནས། རྡོ་རྗེ་འབེབས་པའི་མཐར་ཐུག་པ་དེ་དག་གི་ཕྱག་རྒྱ་རྣམ་པ་བཞིའི་ཕྱག་རྒྱ་དེ་ཉིད་ཇི་སྐད་བཤད་པའི་ཚུལ་གྱིས་བཅིང་བའོ། །ནི་ཞེས་བྱ་བའི་སྒྲ་ནི་ངེས་པར་གཟུང་བའོ། །རབ་མཉམ་
[189b]
[189b.1]གཞག་པས་བཅིངས་ནས་ནི། །ཞེས་བྱ་བ་ལ། རབ་ཏུ་མཉམ་པར་གཞག་པ་ནི་མཚན་མ་ཐོབ་པས་སེམས་གཡེང་བ་མེད་པའོ། །མངོན་ཤེས་ལྔ་ནི་ཐོབ་པར་འགྱུར། །ཞེས་བྱ་བ་ནི་མངོན་པར་ཤེས་པ་རྣམས་ནི་མངོན་ཤེས་ཏེ། ལྷའི་མིག་ལ་སོགས་པའི་ངོ་བོར་ངེས་པའི་ཡེ་ཤེས་དེ་ཐོབ་
[189b.2]པ་ནི་རྙེད་པའོ། །ཇི་ལྟར་ཐོབ་པར་འགྱུར་ཞེ་ན། སྒྲུབ་པའི་ཆོ་ག་འདི་ཡིས་ནི། །ཞེས་བྱ་བ་སྨོས་ཏེ། དེ་མ་ཐག་ཏུ་འཆད་པར་འགྱུར་བའི་རྣལ་འབྱོར་པ་སྒྲུབ་པ་པོའི་ཆོ་ག་འདིས་སོ། །དེ་ལ་འདི་ནི་འཕྲུལ་གྱི་སྤྱན་གྱི་ཡེ་ཤེས་བཤད་དོ་ཞེས་བྱ་བ་ནི་བློ་ལ་གནས་པས་ན་འདིའོ། །ཕྱག་རྒྱ་ཆེན་པོ་མཉམ་གཞག་
[189b.3]སྟེ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་ཕྱག་རྒྱ་ཇི་སྐད་དུ་བཤད་པ་བཅིངས་ཏེ་བརྟན་པར་བྱས་པའོ། །མིག་གི་རྣམ་ཤེས་བསྐྱེད་ནས་ཀྱང་། །ཞེས་བྱ་བ་ནི་སྒོམ་པ་པོས་སོ། །ཇི་ལྟར་ཞེ་ན། ཡི་གེ་ཨོཾ་གྱིས་དེ་བཞིན་གཤེགས་པ་ཐམས་ཅད་ཀྱི་ལྷའི་
[189b.4]སྤྱན་བཀུག་ནས་རང་གི་མིག་ལ་བཞག་སྟེ། དེ་ནས་དེ་བཞིན་གཤེགས་པའི་ལྷའི་སྤྱན་རང་གི་མིག་དང་གཅིག་ཏུ་གྱུར་པར་བསམ་པར་བྱའོ། །དེ་ནས་ཅིར་འགྱུར་ཞེ་ན། གང་ཡང་རུང་བ་དེ་བསམས་ན། །ཞེས་བྱ་བ་སྨོས་ཏེ། གཟུགས་གང་ཅི་ཡང་རུང་བ་འཇིག་རྟེན་གྱི་ཁམས་གཞན་ན་གནས་པ་
[189b.5]རྣམས་ཤིན་ཏུ་རིང་བ་དང་། དེ་ལས་ཀྱང་ཆེས་ཤིན་ཏུ་རིང་བ་རྣམས་ཀྱང་སྣང་བ་དང་བཅས་པའི་མདུན་ཕྱོགས་ན་གནས་པ་བཞིན་དུ་མཐོང་བར་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ནི་སྔ་མ་བཞིན་ནོ། །ཡི་གེ་ཨས་དེ་བཞིན་གཤེགས་པ་ལ་སོགས་པའི་ལྷའི་སྙན་བཀུག་ནས་རང་
[189b.6]གི་རྣ་བ་དང་ལྷན་ཅིག་ཏུ་གྱུར་པར་བསམ་པར་བྱའོ། །དེས་ཅིར་འགྱུར་ཞེ་ན། དེས་ནི་དགོས་པ་གང་བསམས་པ། །ཤིན་ཏུ་རིང་ན་གནས་པའང་ཐོས། །ཞེས་བྱ་བ་སྨོས་ཏེ། དེས་འཇིག་རྟེན་གྱི་ཁམས་གཞན་ན་གནས་པའི་སྒྲའི་ངོ་བོ་ཅི་ཡང་རུང་བ་ཡང་རྣལ་འབྱོར་པ་ལ་དགོས་པས་ཐོས་པར་འདོད་
[189b.7]ན་ཉེ་བའི་ཡུལ་ན་གནས་པ་བཞིན་དུ་བསམས་ན་དེས་ཐོས་པར་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །ཡིད་ཀྱི་རྣམ་ཤེས་བསྐྱེད་ནས་ཀྱང་། །ཞེས་བྱ་བ་ནི་ཡི་གེ་ཧཱུཾ་གིས་དེ་བཞིན་གཤེགས་པ་ཐམས་ཅད་ཀྱི་ཡིད་ཀྱི་རྣམ་པར་ཤེས་པའི་རང་བཞིན་
[190a]
[190a.1]རྡོ་རྗེ་སེམས་དཔའ་དང་། དེ་བཞིན་གཤེགས་པ་ཐམས་ཅད་ཀྱི་ཐུགས་ལས་སེམས་དཔའི་རྡོ་རྗེའི་གཟུགས་ཅན་གྱི་ཡིད་བཀུག་སྟེ། རང་གི་སྙིང་གར་གནས་པའི་སེམས་དཔའི་རྡོ་རྗེ་ལ་བཅུག་ནས་གཅིག་ཏུ་གྱུར་པར་བསམ་པར་བྱའོ། །དེས་ཅིར་འགྱུར་ཞེ་ན། སེམས་ཅན་གང་ལ་དེས་
[190a.2]བརྟགས་ན། །དེ་ཡི་སེམས་ནི་དེས་ཤེས་འགྱུར། །ཞེས་བྱ་བ་སྨོས་ཏེ། ཡིད་ཀྱི་རྣམ་པར་ཤེས་པ་དེ་སེམས་དཔའ་རྡོ་རྗེའི་གཟུགས་སུ་སེམས་ཅན་གང་གི་སེམས་ཤེས་པར་འདོད་པའི་སེམས་ཅན་དེ་ལ་བསམ་པར་བྱའོ། །དེ་ནས་སེམས་ཅན་དེའི་སེམས་རྣལ་འབྱོར་པས་ཤེས་པར་འགྱུར་རོ། །འདི་
[190a.3]སྐད་སྟོན་པ་ཡིན་ཏེ། ཡེ་ཤེས་ཀྱི་རྡོ་རྗེ་རང་གི་སྙིང་གར་རབ་ཏུ་བཞག་ལ་འདི་སྐད་བརྗོད་པར་བྱའོ། །ཆོས་ཐམས་ཅད་སྒྱུ་མ་ལྟ་བུའི་བདེན་པ་གང་ཡིན་པའི་བདེན་པ་དེས་བཅོམ་ལྡན་འདས་རྡོ་རྗེ་སེམས་དཔའ་དང་མཚུངས་པར་སེམས་ཅན་དེའི་སེམས་ཀྱང་དེ་དང་འདྲ་བ་དེ་ལྟ་བུའི་རྣམ་པར་ཤེས་པ་བདག་
[190a.4]ལ་སྐྱེ་བར་གྱུར་ཅིག་ཅེས་བྱའོ། །དེ་ནས་དེའི་སྙིང་གར་ཡེ་ཤེས་ཀྱི་རྡོ་རྗེ་ཉིད་རྣམ་པར་བསྒོམས་པ་དེས་གཞན་གྱི་སེམས་ཤེས་པ་རྣལ་འབྱོར་པ་ལ་སྐྱེ་བར་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །བདག་གམ་ཡང་ན་གཞན་ཡང་རུང་། །ཞེས་
[190a.5]བྱ་བ་ནི་གོ་སླའོ། །ཡིད་ཀྱིས་བལྟས་ནས་གར་སྐྱེས་པ། །ཞེས་བྱ་བ་ནི་སེམས་དཔྱད་ན་བདག་གང་ནས་འདིར་འོངས་པ་དང་། སེམས་ཅན་གང་ནས་འདིར་འོངས་པ་དང་། གཞན་གྱི་སྐྱེ་བ་ཤེས་པའོ། །དེས་ཅིར་འགྱུར་ཞེ་ན། གར་སྐྱེས་པའི་གཟུགས་ནི་དེའི་ཤེས་པར་འགྱུར། །ཞེས་བྱ་བ་སྨོས་སོ། །
[190a.6]གང་ནས་ཤི་འཕོས་ནས་འདིར་སྐྱེས་པར་གྱུར་པ་དེ་རྣལ་འབྱོར་པས་སྔོན་གྱི་གནས་རྗེས་སུ་དྲན་པའི་ཤེས་པ་བསྒྲུབས་པས་རང་དང་གཞན་གྱི་སྐྱེ་བའི་གནས་གང་ནས་འོངས་པ་ཤེས་པ་ཡིན་ནོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། འགྲོ་བ་དྲུག་གི་འཁོར་ལོའི་དཀྱིལ་འཁོར་སྙིང་གར་
[190a.7]ཡིད་ཀྱིས་བྲིས་ལ་བཅོམ་ལྡན་འདས་ཆོས་ཐམས་ཅད་དང་རྨི་ལམ་མཚུངས་པའི་བདེན་པ་གང་ཡིན་པའི་བདེན་པ་དེས་སྐྱེ་བ་གང་ནས་བདག་གམ་གཞན་འདིར་སྐྱེས་པའི་སེམས་ཅན་སྣང་བར་གྱུར་ཅིག་ཅེས་སྨོན་ལམ་བཏབ་ནས་རང་གི་ལྷ་བསྒོམས་ན་དེའི་རྗེས་ལ་སྔོན་གྱི་གནས་རྗེས་སུ་དྲན་པའི་ཤེས་པ་
[190b]
[190b.1]སྐྱེ་བར་འགྱུར་རོ། །ཕྱག་རྒྱ་ཆེན་པོ་བཅིངས་ནས་ཀྱང་། །ཞེས་བྱ་བ་ནི་སྔ་མ་བཞིན་ནོ། །རྫུ་འཕྲུལ་གང་དང་གང་འདོད་པ། །ཞེས་བྱ་བ་ནི་རྫུ་འཕྲུལ་ནི་རྣམ་པར་འཕྲུལ་ལོ། །སེམས་ཀྱི་རྫུ་འཕྲུལ་ནི་བདག་ཉིད་ཆེན་པོའི་མཐུ་ཡིན་ནོ་ཞེས་བྱ་བའི་དོན་ཏོ། །ནམ་མཁའ་ལ་འགྲོ་བ་དང་། མི་སྣང་བ་དང་།
[190b.2]གཟུགས་སུ་སྟོན་པ་དང་། རིང་ནས་མྱུར་དུ་འོང་བ་ལ་སོགས་པ་དེ་ལྟ་བུ་རྣམས་ཀྱི་ནང་ནས་གང་ཡང་རུང་བའི་རྫུ་འཕྲུལ་ཞིག་མངོན་དུ་བྱས་ཏེ་སྟོན་པར་འདོད་པའམ། ཡུལ་གང་དང་གང་དུ་སྒྲིབ་པ་དང་བཅས་པ་དང་སྒྲིབ་པ་མེད་པའི་ནམ་མཁའ་ལ་སོགས་པ་དེ་དང་དེར་འགྲོ་བ་རྣལ་འབྱོར་པས་སྟོན་པར་
[190b.3]འགྱུར་རོ། །གང་གིས་ཤེ་ན། སེམས་རྩེ་གཅིག་པའི་སྟོབས་ཀྱིས་སོ། །འདི་སྐད་སྟོན་པ་ཡིན་ཏེ། ཇི་སྐད་དུ་བཤད་པའི་ཚུལ་གྱིས་དེ་བཞིན་གཤེགས་པའི་རིགས་ལ་སོགས་པའི་རང་གི་ལྷའི་ཕྱག་རྒྱ་བཅིངས་ཏེ། རྣལ་འབྱོར་པས་མཚན་མ་ཐོབ་ནས་ནམ་མཁའི་ཕྱོགས་ཀྱི་གནས་སུ་ཡི་གེ་ལཾ་
[190b.4]ལས་ཟད་པར་ས་བསྒོམས་ལ་འཆགས་པ་ལ་སོགས་པ་བསྟན་པར་བྱའོ། །ཡི་གེ་བཾ་ལས་རི་བོ་ལ་སོགས་པའི་ཕྱོགས་སུ་ཟད་པར་ཆུ་བསྒོམས་ལ་འོག་ཏུ་འཛུལ་བ་དང་གྱེན་དུ་འབྱུང་བར་བྱའོ། །རཾ་ལས་ཕྱོགས་བཅུར་ཟད་པར་མེ་བསྒོམས་ལ་འབར་བར་བྱའོ། །ཡི་གེ་ཡྂ་ལས་རླུང་གི་ཕུང་པོ་བསྒོམས་
[190b.5]ཏེ་ནམ་མཁའ་ལ་ཁྱེར་བར་བྱའོ། །ཁཾ་ལས་ཟད་པར་ནམ་མཁའ་བསྒོམས་ལ་རྩིག་པ་ལས་ཀྱང་ཐལ། ར་བ་ལས་ཀྱང་ཐལ་ནས་འགྲོ་བ་དང་འོང་བ་ལུས་ཐོགས་པ་མེད་པས་མི་སྣང་བར་འགྱུར་རོ། །ཡི་གེ་ཧྲི་ལས་གཟུགས་ཐམས་ཅད་བསྟན་པར་བྱའོ། །དེ་ལ་དང་པོ་ལས་དང་རྗེས་སུ་མཐུན་པའི་ཡི་གེ་
[190b.6]དང་བཟླས་པའི་སྔགས་དང་ལྷན་ཅིག་སྦྱང་བས་རྫུ་འཕྲུལ་མཐའ་དག་སྟོན་པར་འགྱུར་རོ། །ཁམས་གསུམ་རྣམ་རྒྱལ་མཆོག་ཏུ་ནི། །ཞེས་བྱ་བ་རྡོ་རྗེ་རིགས་ཀྱི་ཕྱག་རྒྱ་རྣམ་པ་བཞི་ཡང་ཁམས་གསུམ་རྣམ་པར་རྒྱལ་བའི་ཕྱག་རྒྱ་མཆོག་ཡིན་ཏེ། རྡོ་རྗེ་རིགས་ཀྱི་ཕྱག་རྒྱ་ཐམས་ཅད་ནི་ཁམས་གསུམ་
[190b.7]རྣམ་པར་རྒྱལ་བ་ཞེས་བཤད་པས། མཉམ་པར་གཞག་པས་བཅིངས་ནས་ཀྱང་། །ཞེས་བྱ་བ་ནི་མཚན་མ་ཐོབ་པ་གཡེང་བ་མེད་པའི་སེམས་སོ། །མངོན་པར་ཤེས་པ་ལྔ་ཐོབ་པོ། །ཞེས་བྱ་བ་ནི་ཇི་སྐད་བཤད་པ་ཉིད་དོ། །ཇི་ལྟར་བྱ་ཞེ་ན། ཆོ་ག་འདིས་ནི་སྒྲུབ་པ་པོ། །ཞེས་བྱ་བ་སྨོས་ཏེ། ཆོ་ག་
[191a]
[191a.1]གང་གིས་ཤེ་ན། ཁྲོས་ནས་དགོས་པ་ཐམས་ཅད་ནི། །ཞེས་བྱ་བ་སྨོས་ཏེ། དེ་བཞིན་གཤེགས་པའི་རིགས་སུ་བཤད་པའི་མངོན་པར་ཤེས་པ་ལྔ་བསྐྱེད་པར་བྱས་ནས་ཞེས་བྱ་བས་ལན་འདེབས་པ་ཡིན་ནོ། །ཇི་ལྟར་ཞེ་ན། ལྟག་འོག་གོ་རིམས་ཇི་བཞིན་བྱ། །ཞེས་བྱ་བ་སྨོས་
[191a.2]ཏེ། འདི་ཉིད་རྣམ་པར་འགྲེལ་པ་ནི། །འཕྲུལ་གྱི་མིག་ལ་སོགས་ཚུལ་གྱིས། །ཞེས་བྱའོ། །དེར་ཅིར་འགྱུར་ཞེ་ན། མངོན་ཤེས་ཀུན་དུ་སྐད་ཅིག་འགྱུར། །ཞེས་བྱ་བ་སྨོས་སོ། །འགྲོ་བ་སེམས་ཅན་གྱི་ཁམས་སོ། །དེ་འདིས་འདུལ་བས་ན་འགྲོ་བ་འདུལ་བ་སྟེ་པདྨའི་རིགས་སོ། །དེའི་ཕྱག་
[191a.3]རྒྱ་ནི་འགྲོ་བ་འདུལ་བ་ལ་སོགས་པ་ནས་པདྨ་འབེེབས་པའི་མཐར་ཐུག་པའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་དོ། །དེའི་མཆོག་ནི་དམ་པར་གྱུར་པ་སྟེ། འགྲོ་བ་འདུལ་བའི་ཕྱག་རྒྱ་མཆོག་དེ་བཅིངས་ནས་ཞེས་བྱ་བར་སྦྱར་རོ། །ཇི་ལྟར་བྱ་ཞེ་ན། རབ་མཉམ་བཞག་པས་ཞེས་
[191a.4]བྱ་བ་སྨོས་ཏེ། དེ་བཅིངས་པས་ཅི་ཞིག་ཐོབ་ཅེ་ན། མངོན་པར་ཤེས་པ་ལྔ་ཐོབ་པོ་ཞེས་བྱ་བ་སྨོས་ཏེ། ཇི་ལྟར་བཤད་པའི་མངོན་པར་ཤེས་པ་ལྔ་ཐོབ་པོ། །ཅི་ལྟར་ཐོབ་ཅེ་ན། ཆོ་ག་འདིས་ནི་སྒྲུབ་པ་པོ། །ཞེས་བྱ་བ་ནི་དེ་མ་ཐག་ཏུ་འཆད་པར་འགྱུར་བའི་དོན་གྱིས་སོ། །དེ་ཉིད་བསྟན་པ་ནི།
[191a.5]ལྟག་འོག་གོ་རིམས་ཇི་བཞིན་དུ། །ཆོ་ག་བཞིན་དུ་འདོད་པས་ཆགས། །ཞེས་བྱ་བ་སྨོས་ཏེ། རང་བཞིན་གྱིས་རྣམ་པར་དག་པའི་ཆོས་རྟོག་པས་སྲིད་པའི་འདོད་པས་དེ་དང་དེ་ལ་ཆགས་ཤིང་ཤིན་ཏུ་ཆགས་པས་བསྒོམས་པ་དེའི་ཕྱིར་འདོད་པས་ཆགས་པ་སྟེ། ཐབས་དང་ཤེས་རབ་ཀྱི་རང་བཞིན་གྱིས་
[191a.6]འཇིག་རྟེན་དབང་ཕྱུག་གི་ཆགས་པ་ཡིན་ནོ་ཞེས་བྱ་བའི་དོན་ཏོ། །ཆོ་ག་བཞིན་དུ་ནི་ཕྱག་རྒྱ་ཆེན་པོ་ལ་སོགས་པའོ། །འདོད་པས་ཆགས་པ་ནི་ཕྱག་རྒྱ་ཆེན་པོ་ལ་སོགས་པའི་སྦྱོར་བ་དེས་སོ། །འཕྲུལ་གྱི་མིག་ནི་ཡེ་ཤེས་ལ་སོགས་པ་སྔར་བཤད་པའི་གོ་རིམས་གང་དང་གང་ཡིན་པ་དེའི་གོ་རིམས་བཞིན་
[191a.7]དུའོ། །འདི་ཉིད་རྣམ་པར་འགྲེལ་པ་ནི། །འཕྲུལ་གྱི་མིག་ལ་སོགས་ཚུལ་གྱིས། །ཞེས་བྱ་བ་སྨོས་ཏེ། དེས་ཅིར་འགྱུར་ཞེ་ན། མངོན་ཤེས་ཐམས་ཅད་ཐོབ་པར་འགྱུར། །ཞེས་བྱ་བ་སྨོས་སོ། །དེའི་དོན་ཀུན་ནི་འཇིག་རྟེན་དང་འཇིག་རྟེན་ལས་འདས་པ་རྣམས་སོ། །གྲུབ་པ་ནི་རྫོགས་པའོ། །
[191b]
[191b.1]འདི་ཡོད་པ་ལས་བྱུང་བ་ནི་དོན་ཐམས་ཅད་གྲུབ་པའི་ནོར་བུའི་རིགས་སོ། །དོན་ཐམས་ཅད་གྲུབ་པར་གྱུར་པས་མཛེས་པ་འདི་ནི་ཕྱག་རྒྱ་ཆེན་པོ་ལ་སོགས་པའི་དོན་ཐམས་ཅད་གྲུབ་པའི་ཕྱག་རྒྱའོ། །ཕྱག་རྒྱ་དེ་རབ་ཏུ་མཉམ་པར་བཞག་པས་བཅིངས་པ་ནི་མཚན་མ་ཐོབ་པའོ། །མངོན་པར་ཤེས་པ་
[191b.2]ལྔ་ཐོབ་བོ། །ཞེས་བྱ་བ་ནི་སྔར་བཤད་ཟིན་ཏོ། །ཆོ་ག་འདི་ནི་སྒྲུབ་པའོ། །ཞེས་བྱ་བ་ནི་དེ་མ་ཐག་ཏུ་འཆང་བར་འགྱུར་བའོ། །ཆོ་ག་དེ་གང་ཡིན་ཞེ་ན། སངས་རྒྱས་རྣམས་ནི་མཆོད་བྱས་ནས། །ཞེས་བྱ་བ་སྨོས་ཏེ། སངས་རྒྱས་རྣམས་ལ་མཆོད་པ་ནི་སངས་རྒྱས་རྣམས་ལ་མཆོད་བ་སྟེ།
[191b.3]ནམ་མཁའི་ཁམས་དང་མཉམ་པར་ནོར་བུའི་རིགས་གཟུགས་བརྙན་ཙམ་དུ་བསྒོམ་པ་འདི་ནི་སངས་རྒྱས་རྣམས་མཆོད་པའོ། །དེ་བྱེད་པ་ནི་ཤིན་ཏུ་མངོན་དུ་བྱེད་པའོ། །ནོར་བུའི་རིགས་ཀྱི་ཕྱག་རྒྱ་ཆེན་པོ་ལ་སོགས་པའི་གོ་རིམས་བཞིན་དུ་བསྒོམས་པའི་ཚུལ་གྱིས་སོ། །དེ་བཞིན་གཤེགས་པའི་རིགས་
[191b.4]སུ་བཤད་པའི་ཚུལ་དེས་ལྷའི་མིག་གིས་ཡེ་ཤེས་ལ་སོགས་པའི་བསྐྱེད་པའི་ཚུལ་གྱིས་ལྷའི་མིག་ལ་སོགས་པ་མངོན་པར་ཤེས་པ་ལྔའི་རང་བཞིན་ནོར་བུའི་རིགས་ཀྱི་རྣལ་འབྱོར་པས་མཐོང་ཞིང་ཐོས་པས་མངོན་དུ་བྱེད་དོ་ཞེས་བྱ་བའི་དོན་ཏོ། །དེ་ལྟར་མཚན་མ་ཐོབ་པས་མངོན་པར་ཤེས་པ་བསྒྲུབ་པ་
[191b.5]བསྟན་ནས། ད་ནི་མནའ་དོར་བའི་བརྟུལ་ཞུགས་ལ་རྗེས་སུ་འཇུག་པའི་ཕྱག་རྒྱ་ཆེན་པོ་ལ་སོགས་པ་འགྲུབ་པར་འགྱུར་རོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བདེན་པའི་དངོས་གྲུབ་ཀྱི་རྒྱུད་འདི་གསུངས་
[191b.6]སོ། །མནའ་དོར་ནས་བདེན་པ་ཡོངས་སུ་སྐྱོང་ཞིང་བསྲུང་བ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་འགྲུབ་པའོ། །དེ་སྟོན་པར་བྱེད་པའི་རྒྱུད་དེ་ཕྱག་ན་རྡོ་རྗེས་གསུངས་པ་ཡིན་ནོ། །བདེན་པ་ནི་ཕྱིན་ཅི་མ་ལོག་པའོ། །རྗེས་སུ་བསྐོར་བའི་ངང་ཚུལ་གང་ལ་མངའ་བ་དེ་ནི་བདེན་པའི་རྗེས་སུ་འཇུག་
[191b.7]པའོ། །དེས་བདེན་པའི་རྗེས་སུ་འཇུག་པ་དང་། ཚིག་གིས་མནའ་ནི་འདོར་བྱེད་ཅིང་། །ཞེས་བྱ་བའི་མནའ་དོར་བའོ། །བདེ་བ་ཆེན་པོ་བསྲུངས་ན་ནི། །ཞེས་བྱ་བ་ལ་སྒྲུབ་ཅིང་ནན་ཏན་དུ་བྱེད་པས་ན་བསྲུང་བའོ། །བདེན་པ་ཡང་ཡིན་ལ་ཆེན་པོ་ཡང་དེ་ཡིན་པས་ན་དེ་ནི་དེ་བཞིན་གཤེགས་པའི་
[192a]
[192a.1]མཐུའོ། །དེས་ཅིར་འགྱུར་ཞེ་ན། མྱུར་དུ་སངས་རྒྱས་ཉིད་དང་དེ་བཞིན་གཤེགས་པ་ཉིད་ཐོབ་པོ་ཞེས་བྱ་བ་སྨོས་སོ། །འདི་སྐད་སྟོན་པ་ཡིན་ཏེ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་ནང་ནས་གང་ཡང་རུང་བའི་དེ་བཞིན་གཤེགས་པ་བསྒྲུབ་པར་འདོད་ན་
[192a.2]དཀྱིལ་འཁོར་དུ་འཇུག་པར་བྱའོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་པའི་ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་དུ་འགྲུབ་པ་ཡང་ཐོབ་ན་དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་རྡོ་རྗེ་ཡེ་ཤེས་བསྐྱེད་པར་བྱས་ཀྱིས། ཁྱོད་ཀྱིས་དཀྱིལ་
[192a.3]འཁོར་ཆེན་པོ་མ་མཐོང་བ་རྣམས་ལམ་སྨྲ་ཤིག །དམ་ཚིག་ཉམས་པར་གྱུར་ཏ་རེ། །འདི་ནི་ཁྱོད་ཀྱི་རྡོ་རྗེའི་དམ་ཚིག་ཡིན་གྱིས། གལ་ཏེ་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །
[192a.4]དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ཨུ་ད་ཀ་ཋ། དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས་ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་སྨྲས་ལ། སློབ་
[192a.5]དཔོན་ནམ་བཅོམ་ལྡན་འདས་ལས་ངེས་པར་མངོན་པར་འདོད་པའམ་དངོས་གྲུབ་བླངས་ལ། དེ་སྔ་མ་བཞིན་དུ་ནན་ཏན་བྱས་ན་དེ་ལྟ་བུས་དམ་ཚིག་གི་དཀྱིལ་འཁོར་དུ་བླངས་པ་དེ་སྔ་མ་བཞིན་ནན་ཏན་བྱས་ན་དེ་ལྟ་བུས་འགྲུབ་པར་འགྱུར་རོ། །དམ་ཚིག་གི་དཀྱིལ་འཁོར་དུ་འཇུག་པའི་མནའ་བསྒགས་པས་
[192a.6]ཅི་ཞིག་བྱེད་ཅེ་ན། དེ་བཞིན་གཤེགས་པའི་རིགས་བྱུང་བ། །ཞེས་བྱ་བ་སྨོས་ཏེ། དེ་བཞིན་གཤེགས་པ་རྣམས་ཀྱི་རིགས་ནི་རྡོ་རྗེ་སེམས་དཔའ་ནས་བརྩམས་ནས། རྡོ་རྗེ་འབེེབས་པའི་མཐར་ཐུག་པ་འབྱུང་ཞིང་བསྐྱེད་པའོ། །སྔ་མ་བཞིན་དུ་དཀྱིལ་འཁོར་དུ་ཞུགས་ཏེ། མངོན་པར་འདོད་
[192a.7]པའི་དོན་གྱིས་དངོས་གྲུབ་བཅོམ་ལྡན་འདས་སམ། སློབ་དཔོན་གྱི་མདུན་དུ་མནའ་དོར་ལ་ཇི་ལྟ་བ་བཞིན་དུ་ནན་ཏན་དུ་བྱའོ། །རྡོ་རྗེ་འཛིན་གྱིས་མནའ་དོར་ཞིང་། །ཞེས་བྱ་བ་ལ་སོགས་པ་ལ། རྡོ་རྗེ་རིགས་ཀྱི་རྣལ་འབྱོར་པས་རྡོ་རྗེའི་རིགས་ལས་གསུངས་པའི་དངོས་གྲུབ་སྒྲུབ་པར་འདོད་པས་
[192b]
[192b.1]སྔ་མ་བཞིན་དུ་རྡོ་རྗེའི་རིགས་ཀྱི་དཀྱིལ་འཁོར་གྱི་རྡོ་རྗེ་གཟུངས་ཀྱི་ཕྱག་རྒྱ་བཅིངས་ནས། མནའ་འདོར་ལ་སྔ་མ་བཞིན་དུ་མངོན་པར་འདོད་པའི་དངོས་གྲུབ་དེ་ལྟ་བུས་རྡོ་རྗེའི་རིགས་ལས་བཤད་པའི་དངོས་གྲུབ་ཐོབ་པར་འགྱུར་རོ། །དམ་པའི་ཆོས་ལ་མནའ་དོར་ཞིང་། །ཞེས་བྱ་བ་ནི་དམ་པའི་ཆོས་
[192b.2]ནི་པདྨའི་རིགས་ཏེ། དེའི་མནའ་དོར་བ་བསྲུང་བར་བྱའོ། །འདི་སྐད་སྟོན་པ་ཡིན་ཏེ། པདྨའི་རིགས་ལས་བཤད་པའི་དངོས་གྲུབ་བསྒྲུབ་པར་འདོད་པས་པདྨ་རིགས་ཀྱི་དཀྱིལ་འཁོར་དུ་ཞུགས་ཏེ། མནའ་དོར་ནས་སྔ་མ་བཞིན་ནོ། །ནན་ཏན་དུ་བྱས་པ་དེ་ལྟ་བུས་པདྨའི་རིགས་ཀྱི་དངོས་གྲུབ་
[192b.3]ཏུ་འགྱུར་རོ། །སངས་རྒྱས་མཆོད་ལ་མནའ་དོར་ཞིང་། །ཞེས་བྱ་བ་ནི་སངས་རྒྱས་མཆོད་པ་ནི་ནོར་བུའི་རིགས་སོ། །དེའི་མནའ་ཤིན་ཏུ་དོར་བས་སངས་རྒྱས་ལ་མཆོད་པའི་མནར་འགྱུར་བས་དེ་བསྲུང་བར་ཡང་བྱའོ། །ཡང་སྔ་མ་བཞིན་དུ་ནོར་བུའི་རིགས་ཀྱི་དཀྱིལ་འཁོར་དུ་ཞུགས་ཏེ། དེ་ལས་
[192b.4]བཤད་པའི་གཟུགས་བྱས་ནས། སྔ་མ་བཞིན་བསྒྲུབ་པར་བྱས་པ་དེ་ལྟ་བུས་ནོར་བུའི་རིགས་ལས་བཤད་པའི་དངོས་གྲུབ་ཐོབ་པར་འགྱུར་རོ། །དེ་བས་ན། དབང་བསྐུར་བ་ནི་ཐོབ་པར་འགྱུར། །ཞེས་བཅོམ་ལྡན་འདས་སངས་རྒྱས་མཆོད་པས་གསུངས་སོ། །སངས་རྒྱས་མཆོད་པ་
[192b.5]ནི་བཅོམ་ལྡན་འདས་ནམ་མཁའི་སྙིང་པོའོ་ཞེས་བྱ་བའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་མནའི་དངོས་གྲུབ་ཀྱི་རྒྱུད་བསྟན་ནས། ད་ནི་ས་མ་ཡ་སྟྭཾ་ཞེས་བྱ་བ་ལ་སོགས་པས་ཕྱག་རྒྱ་ཐམས་ཅད་ཀྱི་དངོས་གྲུབ་དེ་ཁོ་ན་ཉིད་བསྐུལ་བའི་སྙིང་པོ་ཟློས་ཤིང་ཕྱག་རྒྱ་ཆེན་པོ་ལ་སོགས་
[192b.6]པའི་ཕྱག་རྒྱ་ཐམས་ཅད་བཅིང་བར་བྱ་བའི་ཆོ་ག་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་གི་དེ་ཁོ་ན་ཉིད་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ནི་ཇི་སྐད་དུ་བཤད་པའོ། །རིགས་ནི་དེ་
[192b.7]བཞིན་གཤེགས་པ་དང་། རྡོ་རྗེ་དང་པདྨ་དང་། ནོར་བུའི་རིགས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་དེ་དག་གི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་སྟེ། ཕྱག་རྒྱ་ཆེན་པོ་ལ་སོགས་པའི་རྣམ་པ་བཞིའོ། །དེ་སྐད་དུ་ཡང་། ཕྱག་རྒྱ་དམ་ཚིག་
[193a]
[193a.1]ཅེས་སུ་གྲགས། །ཞེས་གསུངས་སོ། །དེ་ཁོ་ན་ཉིད་ནི་ཀུན་རྫོབ་ཀྱི་བདེན་པའི་ངོ་བོའམ་དེ་ཁོ་ན་ཉིད་དེ། དེ་སྟོན་པར་བྱེད་པའི་སྙིང་པོ་ལ་ཡང་དམ་ཚིག་གི་དེ་ཁོ་ན་ཉིད་ཅེས་བྱའོ། །དེའི་དངོས་གྲུབ་ཀྱི་ཕྱག་རྒྱ་བཅིངས་པ་གྲུབ་པའོ། །དེ་སྟོན་པར་བྱེད་པའི་རྒྱུད་ནི་
[193a.2]བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བསྟན་པའོ། །ས་མ་ཡ་སྟྭཾ་ཞེས་བྱ་བ་ནི་བརྗོད་པས་དེ་ཁོ་ན་ཉིད་བསྐུལ་བའི་སྙིང་པོ་གསུངས་པ་ཟློས་པའོ། །ཕྱག་རྒྱ་ཀུན་ནི་དམ་ཚིག་དང་། ཆོས་དང་ལས་དང་། ཕྱག་རྒྱ་ཆེན་པོ་རྣམས་སོ། །རིགས་རྣམས་ལའང་ཞེས་བྱ་བ་ནི་དེ་བཞིན་གཤེགས་
[193a.3]པ་ཐམས་ཅད་ཀྱི་སྟེ། དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། ནོར་བུའི་རིགས་ལ་ཡང་ངོ་། །ཉིད་ཀྱིས་བཅིངས་ནས་བརྟན་པར་འགྱུར། །ཞེས་བྱ་བ་ནི་དེ་ཁོ་ན་ཉིད་བསྐུལ་བས་མཉེས་པར་གྱུར་པས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་རང་ཉིད་ཀྱིས་བཅིངས་པས་ན་དེ་ཁོ་ན་
[193a.4]ཉིད་བསྐུལ་བའི་དུས་སུ་ཇི་ལྟར་མངོན་པར་འདོད་པའི་དངོས་གྲུབ་སྒྲུབ་པ་དབང་དུ་བྱེད་པར་འགྱུར་རོ། །དེ་ནས་ཕྱིས་བསྒྲུབ་པ་བྱའོ། །དེའི་རྗེས་ལ་དེ་ཁོ་ན་ཉིད་བསྐུལ་བའི་དུས་ཕྱིས་དེའི་འོག་ཏུ་མ་བསྒྲུབས་པར་ཡང་དེ་ཁོ་ན་ཉིད་བསྐུལ་བར་གྱུར་ཏོ། །འདི་སྐད་སྟོན་པ་ཡིན་ཏེ། ས་མ་ཡ་སྟྭཾ་བརྗོད་ཅིང་། ཐོག་
[193a.5]མ་ཁོ་ན་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ལ་ཕྱིས་སྔགས་བཟླས་པར་བྱའོ། །དེ་སྐད་དུ་ཡང་དེ་ཁོ་ན་ཉིད་བསྡུས་པའི་རྒྱུད་ཆེན་པོ་སྟོང་ཕྲག་བརྒྱ་པ་ལས་ས་མ་ཡ་སྟྭཾ་ཞེས་བརྗོད་པས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་བཅིང་པར་བྱའོ་ཞེས་གསུངས་སོ། །དེ་ལྟར་དེ་བཞིན་
[193a.6]གཤེགས་པ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་བཅིངས་པའི་སྤྱིའི་སྙིང་པོ་བཤད་ནས། དེ་བཞིན་གཤེགས་པའི་རིགས་ཀྱི་ཕྱག་རྒྱ་རྣམས་ཀྱི་བྱེ་བྲག་གི་སྙིང་པོ་ནི་ཞེས་བྱ་བ་ལ་སོགས་པ་གསུངས་སོ། །སུ་ར་ཏ་སྟྭཾ་ཞེས་བརྗོད་ན་ཞེས་བྱ་བ་ནི་བག་ཆགས་དང་བཅས་པའི་ཉོན་མོངས་
[193a.7]པ་སྤངས་པའི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ལས་བྱུང་བ་ཟག་པ་མེད་པའི་བདེ་བ་ཡང་ཡིད་བདེ་བའི་རང་བཞིན་རྒྱུན་མི་འཆད་པའི་དེ་བཞིན་གཤེགས་པ་ལྔའི་ཡེ་ཤེས་ནི་བདག་ཡིན་ནོ་ཞེས་བྱ་བའི་དོན་ཏོ། །དེ་སྐད་དུ་ཡང་། ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་
[193b]
[193b.1]ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཅེས་གསུངས་སོ། །བརྗོད་ན་ཞེས་བྱ་བ་ནི་གོ་སླའོ། །ཕྱག་རྒྱ་ཀུན་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་དེ། རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་
[193b.2]རྣམས་སོ། །མ་བསྒྲུབས་པར་ཡང་ཞེས་བྱ་བ་ནི། སུ་ར་ཏ་སྟྭཾ་ཞེས་བྱ་བའི་སྙིང་པོས་མ་བསྒྲུབས་ན་ཡང་ཉིད་ཀྱིས་བཅིང་བས་བརྟན་པར་འགྱུར་ཞེས་བྱ་སྟེ། ཅིའི་ཕྱིར་ཞེ་ན། དེ་ཉིད་བསྐུལ་བས་བདག་ཉིད་ཆེའི། །ཞེས་བྱ་བ་སྨོས་ཏེ། རྣམ་པར་སྣང་མཛད་ཆེན་པོའིའོ། །དམ་ཚིག་
[193b.3]ཀྱང་ཡིན་ལ་ཆེན་པོ་ཡང་ཡིན་པས་ན་དམ་ཚིག་ཆེན་པོ་སྟེ། ཐོག་མ་དང་ཐ་མ་མེད་པའི་རྡོ་རྗེ་འཆང་ཆེན་པོ་ནི་རྣམ་པར་སྣང་མཛད་ཆེན་པོ་སྟེ། དེ་ཁོ་ན་ཉིད་ནི་རབ་ཏུ་དགའ་བ་ཉིད་དང་། ཀུན་ཏུ་བཟང་པོ་ཉིད་དོ། །དེ་སྐད་དུ་ཡང་། དམ་ཚིག་ཆེན་པོའི་དེ་ཁོ་ན་ཉིད་སྨྲས་པ། རབ་དགའ་ཀུན་དུ་བཟང་
[193b.4]པོའོ། །ཞེས་གསུངས་སོ། །ཧཱུཾ་ཞེས་བྱ་བ་གཅིག་ཙམ་གྱིས། །ཞེས་བྱ་བ་ནི་རྡོ་རྗེའི་རིགས་ཐམས་ཅད་ཀྱི་ཕྱག་རྒྱ་ཡི་གེ་ཧཱུཾ་བརྗོད་པས་སློབ་དཔོན་རང་ཉིད་ཀྱིས་བཅིངས་པའམ། སློབ་མ་ལ་གདམས་ངག་བྱིན་ནས་ཧཱུཾ་ཞེས་བརྗོད་ཅིང་ཕྱག་རྒྱ་འཆིང་དུ་གཞུག་པར་བྱའོ། །པདྨའི་རིགས་
[193b.5]ལས་སརྦྦ་ཤུདྡྷ་ཞེས་བརྗོད་ཅིང་། སློབ་དཔོན་བདག་ཉིད་ཀྱིས་ཕྱག་རྒྱ་ཆེན་པོ་བཅིངས་པའམ། སློབ་མ་ལ་གདམས་ངག་བྱིན་ནས་འཆིང་དུ་གཞུག་པར་བྱའོ། །དེ་ལྟར་བྱས་པས་ཅི་ཞིག་ཏུ་འགྱུར་ཞེ་ན། བུད་མེད་ཆགས་ལ་སོགས་ལྡན་ལ། །ཐམས་ཅད་དུ་ནི་གྲོལ་མི་འགྱུར། །ཞེས་
[193b.6]བྱ་བ་སྨོས་ཏེ། ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ནི་བུད་མེད་དོ། །དེ་རྣམས་དང་མཉམ་པར་སྦྱོར་ཞིང་རྣལ་འབྱོར་པས་འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་ལ་སོགས་པ་རྣམས་ལ་ཕྱག་རྒྱ་བཅིངས་པ་ལྷག་པར་མོས་པའོ། །སོགས་པ་
[193b.7]སྨོས་པས་ནི་སྟོང་པ་ཉིད་བཅུ་དྲུག་དང་། ཕ་རོལ་ཏུ་ཕྱིན་པ་བཅུ་དྲུག་དང་། བྱང་ཆུབ་སེམས་དཔའི་ས་བཅུ་དང་། སྟོབས་དང་མི་འཇིགས་པ་ལ་སོགས་པའི་ཆོས་ཀྱི་སྐུའི་ངོ་བོ་གཟུང་བར་བྱའོ་ཞེས་བྱ་བའི་དོན་དུ་བུད་མེད་དང་པོར་བྱས་པ་གང་ཡིན་པ་འདི་ནི་བུད་མེད་ལ་ཆགས་པའོ། །
[194a]
[194a.1]ལྡན་པ་ནི་ཤིན་ཏུ་རྣལ་འབྱོར་གྱི་རང་བཞིན་ཆོས་ཀྱི་སྐུའི་ཏིང་ངེ་འཛིན་ཏོ། །དེ་ནི་རྣམ་པར་གྲོལ་བའི་ཏིང་ངེ་འཛིན་དང་ལྡན་པ་དང་བྲལ་བར་མི་འགྱུར་རོ། །དེ་ཉིད་ལ་སེམས་རྩེ་གཅིག་པ་དང་ལྡན་པའི་རྣལ་འབྱོར་པས་ཤིན་ཏུ་རྣལ་འབྱོར་གྱི་ངོ་བོ་ལ་ཉེ་བར་གནས་སོ་ཞེས་བྱ་བའི་
[194a.2]ཐ་ཚིག་གོ། །ནོར་བུ་ཆེན་པོའི་རིགས་ཀྱི་རྣལ་འབྱོར་པས། ཨོཾ་ཞེས་བརྗོད་པས་ཕྱག་རྒྱ་ཐམས་ཅད་བཅིང་བ་འགྲུབ་པར་འགྱུར་ཏེ་མ་ལུས་ཤིང་ལུས་པ་མེད་པའི་ཁམས་གསུམ་པའི་འཇིག་རྟེན་ཐམས་ཅད་ཀྱི་མཆོད་པ་དང་། དབང་བསྐུར་བ་ལ་སོགས་པའི་ངོ་བོ་གང་ཡིན་པ་དེ་མཆོག་ཏུ་གྱུར་པས་ན་དམ་
[194a.3]པའོ། །རང་བྱུང་བ་ཉིད་ནི་སངས་རྒྱས་བཅོམ་ལྡན་འདས་སོ། །མཆོད་པ་ཐམས་ཅད་གྲུབ་ཅིང་རྫོགས་པར་འགྱུར་རོ་ཞེས་བྱ་བའི་དོན་ཏོ། །རིགས་ཐམས་ཅད་ནི་དེ་བཞིན་གཤེགས་པ་ལ་སོགས་པ་ཐམས་ཅད་དོ། །དམ་ཚིག་ནི་དེ་ཁོ་ན་ཉིད་ཀྱི་དངོས་གྲུབ་སྟེ། དེ་ཉིད་ཀྱི་ཕྱག་རྒྱ་དེས་སེམས་
[194a.4]ཅན་གྱི་ཁམས་ལ་རྒྱས་འདེབས་པ་དེའི་ཆོ་ག་རྒྱས་པའོ། །བཤད་མ་ཐག་པ་སྟོན་པར་བྱེད་པའི་སྒྲའི་ཚོགས་ལ་རྒྱུད་ཅེས་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་དེ་ཁོ་ན་ཉིད་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་རང་གི་ལྷའི་རྣལ་འབྱོར་བྱས་ལ་རས་རིས་ལ་སོགས་པ་རྣམས་ལ་
[194a.5]ཡང་རང་གི་ལྷ་སྤྱན་དྲངས་ཏེ། ཟུང་དུ་འཇུག་པའི་རྣལ་འབྱོར་སྒོམ་པར་བྱེད་ཅིང་རང་གི་ལྷ་རྗེས་སུ་དྲན་པས་ཕྱག་རྒྱ་ཆེན་པོ་ལ་སོགས་པ་ཐམས་ཅད་ཉིས་འགྱུར་གྱི་དངོས་གྲུབ་ཏུ་འགྱུར་རོ་ཞེས་བྱ་བའི་ཆོ་ག་འདིས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་ནས། དེ་བཞིན་གཤེགས་པ་ཐམས་
[194a.6]ཅད་ཀྱི་རིགས་ཀྱིས་དངོས་གྲུབ་ཀྱི་ཕྱག་རྒྱའི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པ་ནས། དོན་ཡོད་པར་གྲུབ་པའི་མཐར་ཐུག་པ་ལྔའོ། །རིགས་ནི་དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། ནོར་བུའི་རིགས་སོ། །དེ་དག་གི་དངོས་
[194a.7]གྲུབ་ནི་རྫོགས་པ་སྟེ། དེའི་ཕྱག་རྒྱ་ནི་བསྒོམ་པ་ཡིད་ཀྱི་ཕྱག་རྒྱ་ཞེས་བྱ་བའི་དོན་ཏོ། །སངས་རྒྱས་ཕྱག་རྒྱ་བཅིངས་ནས་ནི། །ཞེས་བྱ་བ་ལ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་ཀྱིས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་པའོ། །དེ་བཞིན་གཤེགས་པ་
[194b]
[194b.1]དྲན་བྱེད་ཅིང་། །ཞེས་བྱ་བ་ནི་རང་གི་དེ་བཞིན་གཤེགས་པའི་མདུན་དུ་བདག་ཉིད་ཀྱིས་བསྒོམས་ན། རྣལ་འབྱོར་པ་འགྲུབ་པར་འགྱུར་རོ། །ཅི་ཞིག་བྱས་ན་འགྲུབ་པར་འགྱུར་ཞེ་ན། བསྒྲུབས་ནས་ཞེས་བྱ་བ་སྨོས་ཏེ། དེ་སྔར་བཤད་པའི་བསྒོམ་པའི་སྦྱོར་བས་མྱུར་དུ་འགྲུབ་པར་འགྱུར་བའོ། །
[194b.2]ཅི་ཞིག་བསྒྲུབས་ནས་ཤེ་ན། སངས་རྒྱས་བྱང་ཆུབ་བརྟན་པ་ཡང་། །ཞེས་བྱ་བ་སྨོས་ཏེ། མི་བརྟན་པའི་དངོས་པོ་ཙམ་གཅོད་པར་ཟད་ཀྱི། རིག་པ་འཛིན་པའི་དངོས་གྲུབ་ལ་སོགས་པ་བསྒྲུབས་ཀྱང་འགྲུབ་པར་འགྱུར་རོ། །མི་འགྱུར་བའི་དངོས་པོས་སངས་རྒྱས་དང་བྱང་ཆུབ་སེམས་དཔའ་རྣམས་
[194b.3]ཀྱང་འགྲུབ་པར་འགྱུར་རོ། །དེའི་ཕྱིར་གདོན་མི་ཟ་བའི་ངོ་བོ་ཉིད་དུ་འགྲུབ་པར་འགྱུར་ཏེ། ངེས་པར་སྐྱེས་པའི་སྒྲུབ་པ་པོས་དངོས་གྲུབ་འགྲུབ་པར་འགྱུར་ཞེས་བསྟན་པ་ཡིན་ནོ་ཞེས་རྡོ་རྗེ་སེམས་དཔའ་ལ་མངའ་བའི་ཕྱག་རྒྱ་ཆེན་པོ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ། དེ་བཞིན་གཤེགས་པའི་
[194b.4]རིགས་ཀྱི་རྡོ་རྗེ་སེམས་དཔའ་ལ་སོགས་པའི་དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོའི་ངོ་བོ་ཕྱག་རྒྱ་རྣམ་པ་བཞིའོ། །དེ་བཅིངས་པ་ནི་སྔར་བཤད་པའི་ཚུལ་གྱིས་རྣམ་པ་ཐམས་ཅད་ཀྱི་མཆོག་དང་ལྡན་པ་ཡོངས་སུ་རྫོགས་པའོ། །ཡང་དང་ཡང་མངོན་དུ་བྱས་ནས་མདུན་དུ་རྡོ་རྗེ་
[194b.5]སེམས་དཔའ་ཡོངས་སུ་བསྒོམས་པས་ཤིན་ཏུ་མྱུར་བར་དངོས་གྲུབ་ཏུ་འགྱུར་རོ་ཞེས་བྱ་བ་ནི། རྣལ་འབྱོར་གཅིག་ལ་ལྟོས་ནས། ཟུང་འཇུག་གི་རྣལ་འབྱོར་གྱིས་མྱུར་དུ་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་
[194b.6]པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་བྱས་ཏེ། ཆོ་ག་ཐམས་ཅད་རྗེས་སུ་སྤྱད་ལ། རས་ལ་སོགས་པ་ལ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་ལྷ་རྣམས་བསྒོམས་ཏེ། བསྡུ་བ་ལ་སོགས་པའི་ཆོ་གས་རབ་ཏུ་བཞག་སྟེ། མཆོད་པ་ཐམས་ཅད་ཀྱིས་
[194b.7]ཆོ་ག་བཞིན་དུ་ཡང་དག་པར་མཆོད་ལ། ཕྱག་རྒྱ་བཞི་བྱས་ནས་བསྒོམས་ལ། དེས་རྣལ་འབྱོར་གཅིག་ལ་ལྟོས་ནས་མྱུར་དུ་འགྲུབ་པར་འགྱུར་རོ་ཞེས་ཐམས་ཅད་དུ་ཤེས་པར་བྱའོ། །རྡོ་རྗེའི་རིགས་ནི་རྡོ་རྗེ་ཧཱུཾ་མཛད་ལ་སོགས་པའི་སྔར་བཤད་པའི་ཚུལ་གྱིས་ཕྱག་རྒྱ་ཆེན་པོ་དང་། དམ་ཚིག་དང་།
[195a]
[195a.1]ཆོས་དང་། ལས་ཀྱི་ཕྱག་རྒྱ་རྣམས་བྲི་བར་བྱའོ། །གང་གི་ཏིང་ངེ་འཛིན་བྱས་ནས་ཤེ་ན། རྡོ་རྗེ་སེམས་དཔའི་ཏིང་ངེ་འཛིན་གྱིས་ཞེས་བྱ་བ་སྨོས་ཏེ། རང་གི་ཁྲོ་བོ་བསྒོམས་པ་ནི། །རྡོ་རྗེ་སེམས་དཔའི་ཏིང་ངེ་འཛིན་ཏེ། རྡོ་རྗེ་སེམས་དཔའི་ཏིང་ངེ་འཛིན་དེས་རང་གི་ལྷའི་ཕྱག་རྒྱ་བཅིངས་ཏེ།
[195a.2]དེ་བཞིན་གཤེགས་པའི་རིགས་ཀྱི་སྔར་བཤད་པའི་ཆོ་གས་རང་གི་ཁྲོ་བོ་བསྡུ་བ་ལ་སོགས་པའི་ཆོ་གས་མདུན་དུ་རབ་ཏུ་བཞག་ལ་རང་གི་ལྷའི་རང་བཞིན་གྱིས་རྡོ་རྗེ་སེམས་དཔའ་བསྒོམ་པར་བྱའོ། །ཉིས་རིམ་དུ་ནི་དངོས་གྲུབ་ཐོབ། །ཅེས་བྱ་བ་ནི་གང་གི་ཚེ་བདག་ཉིད་ཀྱིས་རྣལ་འབྱོར་གཅིག་བསྒོམས་པ་ན་ལོ་གཅིག་
[195a.3]གིས་འགྲུབ་པར་འགྱུར་བ་དེ་ཟུང་གི་རྣལ་འབྱོར་གྱིས་ཟླ་བ་དྲུག་གིས་འགྲུབ་པར་འགྱུར་རོ། །ཆོས་ཀྱི་ཕྱག་རྒྱ་བཅིངས་ནས་ཀྱང་། །ཞེས་བྱ་བ་ལ་སོགས་པ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་ཉིད་འཇིག་རྟེན་དབང་ཕྱུག་གི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་
[195a.4]དེ། སྔ་མ་བཞིན་དུ་བསྡུ་བ་ལ་སོགས་པའི་ཆོ་གས་འཇིག་རྟེན་དབང་ཕྱུག་མདུན་གྱི་རས་རིས་ལ་སོགས་པ་ལ་བཀོད་དེ། དེའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ། དེ་ཉིད་མདུན་དུ་བདག་གིས་བསྒོམས་ལ། དེ་མངོན་དུ་བྱས་ན་དངོས་གྲུབ་ཉིས་འགྱུར་དུ་འགྱུར་རོ། །ནོར་བུའི་རིགས་ཀྱི་
[195a.5]ཕྱག་རྒྱ་རྣམ་པ་བཞི་ནི་ལས་ཀྱི་ཕྱག་རྒྱ་ཞེས་བྱའོ། །དེ་བཅིང་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་བཅིང་བར་བྱའོ། །རྡོ་རྗེ་སྙིང་པོའི་ཏིང་འཛིན་གྱིས། །ཞེས་བྱ་བ་ནི་རང་གི་ལྷ་བསྒོམ་པ་དེ་ནི་རྡོ་རྗེ་སྙིང་པོའི་ཏིང་ངེ་འཛིན་ཡིན་ཏེ། དངོས་གྲུབ་ཉིས་འགྱུར་དུ་
[195a.6]འགྱུར་རོ། །ཇི་ལྟ་བ་ནི་ཞེ་ན། རྡོ་རྗེ་སྙིང་པོ་བསྒོམས་ནས་ནི། ཞེས་བྱ་བ་སྨོས་ཏེ། སྔ་མ་བཞིན་དུ་བསྡུ་བ་ལ་སོགས་པས་བཅོམ་ལྡན་འདས་རྡོ་རྗེ་སྙིང་པོའི་མདུན་དུ་བཞག་ལ་བསྒོམ་པར་བྱའོ། །དེ་ལྟར་ཟུང་གི་རྣལ་འབྱོར་རྒྱས་པ་ལ་དགའ་བའི་སེམས་ཅན་རྗེས་སུ་གཟུང་བའི་ཕྱིར། རང་གི་ལྷ་
[195a.7]རྗེས་སུ་དྲན་པའི་བསྒྲུབ་པ་བཤད་ནས། ད་ནི་ཕྱག་རྒྱ་ཆེན་པོ་ལ་སོགས་པའི་རང་གི་ལྷའི་ཕྱག་རྒྱ་རྣམ་པ་བཞི་པོ་ནི་རང་གི་ལྷའི་ང་རྒྱལ་གྱིས་སྙིང་པོ་བརྗོད་ཅིང་བསྒྲུབ་པར་བྱའོ་ཞེས་བྱ་བའི་ངེས་པ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཐམས་
[195b]
[195b.1]ཅད་ཀྱི་དངོས་གྲུབ་སྒྲུབ་པའི་རྒྱུད་གསུངས་པའོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་སྔ་མ་བཞིན་ནོ། །དེ་དག་ནི་དངོས་གྲུབ་ཐམས་ཅད་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ཀྱི་དངོས་གྲུབ་བོ། །དེ་བསྒྲུབ་པ་ནི་བསྐྱེད་པའོ། །བདག་ཉིད་དམ་
[195b.2]ཚིག་མདུན་དུ་ཡང་། །སངས་རྒྱས་རྗེས་སུ་དྲན་པར་བསྒོམ། །ཞེས་བྱ་བ་ནི་སྔར་བཤད་པའི་ཚུལ་གྱིས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཇི་ལྟ་བ་བཞིན་དུ་བསྡུ་བ་ལ་སོགས་པ་མདུན་དུ་བཞག་ལ་
[195b.3]རང་གི་དེ་བཞིན་གཤེགས་པ་ཕྱག་རྒྱ་ཆེན་པོ་བཅིངས་ཏེ། དེའི་སྔགས་བརྗོད་ཅིང་། བདག་ཉིད་དམ་མདུན་དུ་བཞག་ན་དེ་བཞིན་གཤེགས་པ་བསྒོམ་པར་བྱའོ། །དེ་ནས་དེ་མ་ཐག་ཏུ་འགྲུབ། །ཅེས་བྱ་བ་ནི་གང་གི་ཚེ་དེ་ལྟར་བསྒོམས་ནས་མཚན་མ་ཐོབ་པར་གྱུར་པ་དེའི་ཚེ། སྔར་བཤད་པའི་ཆོ་
[195b.4]གས་མངོན་པར་ཤེས་པ་ལྔར་འགྱུར་རོ། །དེ་ནས་མཚན་ཐོག་ཐག་བསྒོམས་ནས་དེའི་རྗེས་ལ་བདག་ཉིད་དམ་མདུན་དུ་དེ་བཞིན་གཤེགས་པ་མངོན་སུམ་ལྟ་བུར་མཐོང་བར་འགྱུར་རོ། །དེ་ནས་སྐད་ཅིག་དེ་ཉིད་ལ་དེ་བཞིན་གཤེགས་པར་འགྱུར་རོ། །འདོད་པས་བདག་ཅེས་བསྒོམས་ནས་ཀྱང་། །
[195b.5]ཕྱག་རྒྱ་ཐམས་ཅད་བསྒྲུབས་ན་ནི། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་ཕྱག་རྒྱ་རྣམ་པ་བཞི་པོ་བསྒྲུབས་པས་ཀྱང་འདོད་པའི་བདག་ཉིད་བྱང་ཆུབ་ཀྱི་སེམས་ཆེན་པོ་བདག་ཡིན་ནོ་ཞེས་རྣམ་པར་སྣང་མཛད་ཆེན་པོའི་ང་རྒྱལ་བསྐྱེད་པར་བྱའོ། །རྡོ་རྗེ་
[195b.6]སེམས་དཔའི་ཚུལ་གྱིས་ནི། །ཞེས་བྱ་བ་ནི་རྡོ་རྗེ་བཟླས་པའི་ཚིག་གིས་བརྗོད་པའོ། །དེ་ནི་འདི་སྐད་སྟོན་པ་ཡིན་ཏེ། བཟླས་པའི་སྙིང་པོ་མེད་ན་ཕྱག་རྒྱའི་དངོས་གྲུབ་ཏུ་མི་འགྱུར་རོ་ཞེས་བྱ་བ་ཡིན་ནོ། །དངོས་གྲུབ་ཀུན་གྱི་མཆོག་གྲུབ་བོ། །ཞེས་བྱ་བ་ནི་དངོས་གྲུབ་ཀྱང་ཡིན་ལ་ཐམས་ཅད་
[195b.7]ཀྱང་དེ་ཡིན་པས་ན་དངོས་གྲུབ་ཐམས་ཅད་དེ་ཕྱག་རྒྱ་ཆེན་པོ་ལ་སོགས་པའི་ངོ་བོའི་དངོས་གྲུབ་ཐམས་ཅད་དོ། །དེ་འདི་རྣམས་ཀྱི་མཆོག་ཏུ་བསྒྲུབ་པས་ན་དམ་པའི་བསྒྲུབ་པའོ། །བདག་ཉིད་ཀྱིས་ནི་རྡོ་རྗེའི་དབྱིབས། །ཞེས་བྱ་བ་ནི་རྡོ་རྗེ་དག་གི་དབྱིབས་ནི་རྡོ་རྗེའི་དབྱིབས་ཏེ། རྡོ་རྗེ་ཧཱུཾ་མཛད་ལ་སོགས་
[196a]
[196a.1]པ་རྡོ་རྗེ་རིགས་ཀྱི་ངོ་བོའི་བདག་ཉིད་ཀྱིས་ཞེས་བྱ་བ་ནི་བདག་ཉིད་ནི་བདག་ཉིད་རྣམས་ཏེ། རྡོ་རྗེ་ཧཱུཾ་མཛད་ལ་སོགས་པའི་ངོ་བོ་བསྒོམས་པས་ཡང་ནས་ཡང་མངོན་དུ་བྱས་ནས། དེའི་ང་རྒྱལ་བསྐྱེད་དེ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བར་བྱའོ་ཞེས་བྱ་བར་
[196a.2]སྦྱར་རོ། །ཇི་ལྟར་བཅིངས་ཤེ་ན། མཉམ་པར་བཞག་པས་སོ། །དེའི་ཕྱིར། དེ་མ་ཐག་ཏུ་འགྲུབ་པར་འགྱུར། །ཞེས་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེའི་རིགས་ཀྱི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱག་རྒྱ་ཆེན་པོ་ལ་སོགས་པ་དེའི་ང་རྒྱལ་གྱིས་
[196a.3]བཅིངས་ཏེ། རང་གི་སྙིང་པོ་བརྗོད་ཅིང་ཉིན་རེ་བཞིན་ཐུན་བཞིའི་སྦྱོང་བས་ཇི་སྲིད་བདག་ཉིད་རྡོ་རྗེ་ཧཱུཾ་མཛད་ཀྱི་གཟུགས་སུ་ཉིན་རེ་བཞིན་མངོན་སུམ་ལྟ་བུར་བདག་ཉིད་ཀྱིས་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ནས་མངོན་སུམ་ལྟ་
[196a.4]བུར་མཐོང་ནས་དེའི་རྗེས་ལ་སྐད་ཅིག་དེ་ཉིད་ལ་རྡོ་རྗེ་ཧཱུཾ་མཛད་དུ་འགྱུར་རོ། །པདྨའི་དབྱིབས་སུ་བསྒོམས་ནས་ནི། །ཞེས་བྱ་བ་པདྨའི་དབྱིབས་ནི་འགྲོ་བ་འདུལ་བ་ལ་སོགས་པ་ནས། པདྨ་འབེབས་པའི་མཐར་ཐུག་པ་པདྨའི་རིགས་ཀྱི་གཟུགས་སོ། །བདག་ཉིད་ཀྱིས་ནི་འགྲོ་བ་འདུལ་བ་ལ་སོགས་
[196a.5]པའི་གཟུགས་སུ་བསྒོམས་པའོ། །གང་གིས་བསྒོམ་ཞེ་ན། བདག་ཉིད་ཀྱིས་ཞེས་བྱ་སྟེ། བདག་ཉིད་ལ་བདག་ཉིད་ཀྱིས་ཞེས་བྱ་བའི་དོན་ཏོ། །གང་བསྒོམ་པར་བྱ་ཞེ་ན། ཐམས་ཅད་ངེས་པའི་ངོ་བོའི་ཕྱག་རྒྱ་ཆེན་པོ་ལ་སོགས་པའི་ཡེ་ཤེས་ཀྱི་རང་བཞིན་གྱི་དངོས་གྲུབ་བོ། །པདྨའི་རིགས་ཆེན་འགྲུབ་
[196a.6]པར་བཤད། །ཅེས་བྱའོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བ་ལ་སོགས་པའི་པདྨའི་རིགས་ཀྱི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱག་རྒྱ་ཆེན་པོ་ལ་སོགས་པ་བཅིངས་ནས། རང་གི་སྔགས་བརྗོད་ཅིང་འཇིག་རྟེན་དབང་ཕྱུག་གི་
[196a.7]ཕྱག་རྒྱ་ཆེན་པོ་ལ་སོགས་པའི་རང་བཞིན་དུ་བདག་ཉིད་བསྒོམས་ན་འགྲུབ་པར་འགྱུར་རོ། །ནོར་བུ་ཆེན་པོ་འོད་ཟེར་འབར། །བདག་ཉིད་ཀྱིས་ནི་བསྒོམས་ན་ནི། །ཞེས་བྱ་བ་ལ་སོགས་པ་ནི་ནོར་བུའི་རིགས་ཀྱི་རྣལ་འབྱོར་པས་སྔ་མ་བཞིན་དུ་ནོར་བུའི་རིགས་ལས་བཤད་པའི་ཆོ་གས་རང་གི་
[196b]
[196b.1]ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། དོན་ཐམས་ཅད་གྲུབ་པ་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། དོན་ཐམས་ཅད་གྲུབ་པའི་སྔགས་བརྗོད་ཅིང་དོན་ཐམས་ཅད་གྲུབ་པ་ལ་སོགས་པའི་གཟུགས་ཉིད་ནོར་བུ་ཆེན་པོའི་འོད་ཟེར་འབར་བར་བདག་ཉིད་བསྒོམ་པར་བྱའོ། །
[196b.2]ཅི་ཞིག་བསྒོམ་ཞིང་ཞེ་ན། ནོར་བུ་ཆེན་པོའི་རིགས་བཤད་པ། །མཆོད་པ་ཆེན་པོའི་རང་བཞིན་གྲུབ། །ཕྱག་རྒྱ་རྣམ་པ་བཞིའི་རང་བཞིན་གྱི་དངོས་གྲུབ་སྟེ་ནོར་བུ་ཆེན་པོའི་རིགས་བཤད་ཅིང་གྲགས་པ་ནི་བཅོམ་ལྡན་འདས་ནམ་མཁའི་སྙིང་པོའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་
[196b.3]རིགས་ཀྱི་ཕྱག་རྒྱ་དང་སྔགས་ཟློས་ཤིང་རང་གི་ལྷ་བསྒོམས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དངོས་གྲུབ་ཐམས་ཅད་བསྒྲུབ་པའི་རྒྱུད་བསྟན་ནས། ད་ནི་ཕྱག་རྒྱ་ཆེན་པོ་ལ་སོགས་པའི་སྒྲུབ་པ་པོས་དང་པོས་བྱིན་གྱིས་བརླབ་པ་ལ་སོགས་པ་བྱས་ནས་བཟླས་པ་དང་བསྒོམ་པ་
[196b.4]བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་ཐོག་མར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བྱིན་གྱིས་བརླབ་པ་ལ་སོགས་པ་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་
[196b.5]རིགས་སོ། །དེ་དག་གིས་བྱིན་གྱིས་བརླབས་པ་ནི་སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་སྟེ་རང་གི་རིགས་ཀྱི་ཕྱག་རྒྱ་བསྐྱེད་ནས་སྒྲུབ་པ་པོ་རྒྱུད་ལ་སྟོན་པར་བྱེད་པའོ། །དེ་ལ་ཕྱག་རྒྱ་རྡོ་རྗེ་དབྱིངས་ཀྱི་དབང་ཕྱུག་ལ་སོགས་པ་རྣམས་ཀྱིས་སོ། །བྱིན་གྱིས་བརླབས་པའི་དངོས་གྲུབ་
[196b.6]ནི་བསྐྱེད་པའོ། །དེ་སྟོན་པར་བྱེད་པའི་རྒྱུད་ནི་བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་ཀྱིས་སྒྲུབ་པ་པོའི་རྒྱུད་ལ་བྱིན་གྱིས་བརླབས་ནས། ཇི་སྐད་བཤད་པ་བསྟན་པར་བྱས་པ་དེའི་དངོས་གྲུབ་ནི་
[196b.7]བསྐྱེད་པའོ། །རྡོ་རྗེ་དབྱིངས་དང་ཕྱག་རྒྱ་ནི་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་དུ་བསྟན་པའོ། །མཉམ་པར་གཞག་པའི་སེམས་ཀྱིས་སྙིང་ག་དང་། མཛོད་སྤུའི་ཕྱོགས་དང་། ལྐོག་མ་དང་། སྤྱི་བོའི་གནས་སུ་ཨོཾ་བཛྲ་དྷཱ་ཏྭི་ཤྭ་རི་ཧཱུཾ་བཛྲི་ནི་ཨ་དྷི་ཏིཥྛ་མཾ་ཞེས་བརྗོད་ཅིང་དྱ་ནི་གྱིས་བརླབ་
[197a]
[197a.1]པར་བྱའོ། །འདི་སྐད་སྟོན་པར་འགྱུར་ཏེ། སྔ་མ་བཞིན་དུ་སེམས་སོ་སོར་རྟོག་པ་ལས་བརྩམས་ཏེ། ཡ་ཐ་སརྦྦ་ཏསྟ་ཨ་ཧཾ་ཞེས་བྱ་བས་རང་གི་དེ་བཞིན་གཤེགས་པའི་ཕྱག་རྒྱ་ཆེན་པོ་བཅིངས་ཏེ། རང་གི་དེ་བཞིན་གཤེགས་པའི་བདག་ཉིད་དུ་རྣམ་པར་བསྒོམས་ལ་དེ་ནས་
[197a.2]ཡིད་ཀྱིས་ལེགས་སོའི་སྦྱོར་བས་ཛཿཧཱུཾ་བཾ་ཧོཿཞེས་བརྗོད་ཅིང་ལུས་ལ་སངས་རྒྱས་ཀུན་གཞུག་གོ། །དམ་ཚིག་གི་ཕྱག་རྒྱ་བསྒྲུབས་ལ། ཆོས་དང་། ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། རང་གི་སྙིང་གར་སེམས་མ་རྡོ་རྗེ་མའི་རྡོ་རྗེ་བསྐྱེད་ལ་དཔྲལ་བར་རྡོ་རྗེ་རིན་ཆེན་མའི་རིན་པོ་ཆེ་དང་། ལྐོག་མར་
[197a.3]རྡོ་རྗེ་ཆོས་མའི་པདྨ་དང་། སྤྱི་བོར་རྡོ་རྗེ་ལས་མའི་སྣ་ཚོགས་རྡོ་རྗེ་བསྐྱེད་པར་བྱའོ། །རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་ཆེན་པོ་བཅིངས་ཏེ་སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །དེ་ལྟར་བྱས་པས་ཅི་ཞིག་ཏུ་འགྱུར་ཞེ་ན། བཞག་ནས་སངས་རྒྱས་བྱིན་གྱིས་
[197a.4]བརླབ་པའོ་ཞེས་བྱ་བས་སངས་རྒྱས་བཅོམ་ལྡན་འདས་ཀྱིས་གསུངས་པའོ། །སེམས་མ་རྡོ་རྗེ་བརྟན་བྱས་ནས། །ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་བསྡམས་པ་ལས་གུང་མོ་མྱུ་གུ་ལྟར་བྱས་པའི་སེམས་མ་རྡོ་རྗེ་བརྟན་པར་བྱས་པ་བཅིངས་པའི་མཚན་ཉིད་དོ། །ཇི་ལྟར་
[197a.5]བྱ་ཞེ་ན། རྡོ་རྗེ་སེམས་དཔའི་ཏིང་འཛིན་གྱིས། །ཞེས་བྱ་བ་ནི་རང་གི་སྙིང་གར་ཟླ་བར་རྡོ་རྗེ་བསྒོམ་པར་བྱའོ་ཞེས་བྱ་བའི་དོན་ཏེ། དེ་ལྟར་སེམས་དཔའ་རྡོ་རྗེ་བཅིངས་ནས་སྙིང་ག་དང་། མཛོད་སྤུ་དང་། དེ་བཞིན་དུ་ལྐོག་མ་དང་། སྤྱི་བོར་གཞག་སྟེ་བྱིན་གྱིས་བརླབ་པར་བྱའོ། །རྡོ་རྗེ་སེམས་དཔའ་ལ་
[197a.6]སོགས་པ་རྣམས་ལ་བྱིན་གྱིས་བརླབ་པར་བྱའོ་ཞེས་བྱ་བའི་དོན་ཏོ། །སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་རྣལ་འབྱོར་བྱས་ལ་ཡེ་ཤེས་སེམས་དཔའ་བཅུག་ལ། ཡིད་ཀྱིས་ལེགས་སོ་ཞེས་སྦྱོར་བས། དེ་བཞིན་གཤེགས་པ་ལ་སོགས་པ་བཅུག་ལ།
[197a.7]དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབས་ཏེ། ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་ཐམས་ཅད་རྒྱས་བཏབ་ལ་སཏྭ་བཛྲི་ནི་ཨ་དྷི་ཏིཥྛ་མི་ཞེས་བྱ་བ་དང་། སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །དེའི་རྗེས་ལ་རྡོ་རྗེ་རིན་ཆེན་མས་
[197b]
[197b.1]དཔྲལ་བ་དང་། རྡོ་རྗེ་ཆོས་མས་ལྐོག་མ་དང་། རྡོ་རྗེ་ལས་མས་སྤྱི་གཙུག་ཏུ་བྱིན་གྱིས་བརླབ་པར་བྱའོ། །རྡོ་རྗེ་ཧཱུཾ་མཛད་ཕྱག་རྒྱས་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ཏེ། སྙིང་ག་དང་། མཛོད་སྤུ་
[197b.2]དང་། མགྲིན་པ་དང་། སྤྱི་བོར་རྡོ་རྗེའི་རིགས་ཀྱི་རྣལ་འབྱོར་བྱས་པས་བྱིན་གྱིས་བརླབ་པར་བྱའོ། །འདི་སྐད་སྟོན་པ་ཡིན་ཏེ། རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེ་རིགས་ཀྱི་རྣལ་འབྱོར་བྱས་ལ། ཡེ་ཤེས་སེམས་དཔའ་བཅུག་ནས། དེ་བཞིན་གཤེགས་པ་རྣམས་ལུས་ལ་བཅུག་ལ།
[197b.3]དམ་ཚིག་གི་ཕྱག་རྒྱས་བསྒྲུབས་ཏེ། ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཅིངས་ཏེ། ཧཱུཾ་བཞིས་སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །ཡང་ན་རྡོ་རྗེ་
[197b.4]སེམས་དཔའ་རྡོ་རྗེའི་ཕྱག་རྒྱས་སྙིང་ག་དང་། རྡོ་རྗེ་རིན་ཆེན་མའི་ཕྱག་རྒྱས་དཔྲལ་བ་དང་། རྡོ་རྗེ་ཆོས་མའི་ཕྱག་རྒྱས་ལྐོག་མ་དང་། རྡོ་རྗེ་ལས་མའི་ཕྱག་རྒྱས་སྤྱི་བོར་བྱིན་གྱིས་བརླབ་པར་བྱའོ། །རྡོ་རྗེ་པདྨོ་དམ་བྱས་ལ། །ཞེས་བྱ་བ་ནི། རྡོ་རྗེ་བསྡམས་པ་དམ་བྱས་ལ། །གུང་མོ་པདྨོ་རྡོ་རྗེར་
[197b.5]སྦྱར། །རྡོ་རྗེ་པདྨ་ཞེས་གྲགས་ཏེ། །དངོས་གྲུབ་ཐམས་ཅད་སྟེར་བྱེད་པའོ། །དེ་བརྟན་པར་བྱས་ལ། འཇིག་རྟེན་དབང་ཕྱུག་ཏིང་འཛིན་གྱིས། །ཞེས་བྱ་བ་ནི་འཇིག་རྟེན་དབང་ཕྱུག་གི་རྣལ་འབྱོར་གྱིས་སོ། །སྙིང་ག་མཛོད་སྤུ་མགྲིན་སྤྱི་བོ། །ཞེས་བྱའོ། །དེའི་དོན་ནི་འདི་སྐད་སྟོན་པ་ཡིན་
[197b.6]ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་པདྨའི་རིགས་ཀྱི་རང་གི་ལྷའི་རྣལ་འབྱོར་བྱས་ལ། ཡེ་ཤེས་སེམས་དཔའ་བཅུག་ནས། དེ་བཞིན་གཤེགས་པའི་ཁམས་ལུས་ལ་བཅུག་སྟེ། དམ་ཚིག་གི་ཕྱག་རྒྱས་བསྒྲུབས་ནས། ཆོས་
[197b.7]དང་། ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། ཇི་སྐད་དུ་བཤད་པའི་མཚན་ཉིད་ཅན་གྱིས་རྡོ་རྗེ་པདྨའི་ཕྱག་རྒྱ་སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱ་སྟེ། ཨོཾ་དྷརྨྨཱ་ས་མ་ཡེ་བཛྲ་པདྨེ་ནི་ཧཱུཾ། ཨོཾ་ཨ་དྷི་ཏིཥྛ་མཾ། རིན་ཆེན་རྡོ་རྗེ་མའི་གནས་
[198a]
[198a.1]སུ་བཤད་པའི་དཔྲལ་བར་རིན་ཆེན་པདྨའི་ཕྱག་རྒྱ་ཧཱུཾ། ཨོཾ་བུདྡྷ་ཨ་བྷི་ཥེ་ཀ་ས་མ་ཡེ། ཨ་དྷི་ཏིཥྛ་སྭ་མཾ། རྡོ་རྗེ་ཆོས་མའི་གནས་སུ་བཤད་པའི་ལྐོག་མར་པདྨའི་པདྨ། ཨོཾ་ཏྲ་ར་ས་མ་ཡེ་ཧཱུཾ་དྷི་ཨ་དྷི་ཏིཥྛ་མཾ། ལས་ཀྱི་རྡོ་རྗེ་མའི་གནས་སུ་བཤད་པའི་སྤྱི་བོར་སྣ་ཚོགས་པདྨའི་ཕྱག་རྒྱས་བྱིན་
[198a.2]གྱིས་བརླབ་པར་བྱའོ། །ཨོཾ་བྷི་ཥ་མུ་ཁེ་ཀྲོ་དྷ་ཨ་དྷི་ཏིཥྛ་མཾ། རྡོ་རྗེ་ནོར་བུ་ཆེ་བཅིངས་ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་དུ་སེམས་མའི་རྡོ་རྗེ་མའི་གནས་སུ་བཤད་པའི་རྡོ་རྗེ་ནོར་བུ་ཆེན་མོ་དེའི་དམ་ཚིག་གི་ཕྱག་རྒྱ་བཅིང་ངོ་། །རྡོ་རྗེ་སྙིང་པོའི་ཏིང་འཛིན་གྱི། །ཞེས་བྱ་བ་ནི་ནོར་བུའི་
[198a.3]རིགས་ཀྱི་ལྷའི་རྣལ་འབྱོར་བྱས་པའི་སྙིང་གའི་ཟླ་བ་ལ་རྡོ་རྗེ་རིན་པོ་ཆེ་ཡོད་པ་ལ་དམིགས་པའི་སེམས་ནི་རྡོ་རྗེ་སྙིང་པོའི་ཏིང་ངེ་འཛིན་ཏོ། །ལྷག་མ་ནི་གོ་སླའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ། ཡེ་ཤེས་སེམས་
[198a.4]དཔའ་ལུས་ལ་བཅུག་ནས། ཡིད་ཀྱིས་ལེགས་སོའི་སྦྱོར་བས་དེ་བཞིན་གཤེགས་པ་རང་གི་ལུས་ལ་བཅུག་ནས། དམ་ཚིག་གི་ཕྱག་རྒྱ་རྣམས་ཀྱིས་ཐམས་ཅད་བསྒྲུབས་ཏེ། དེ་ནས་ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་རྒྱས་གདབ་པར་བྱའོ། །ཨོཾ་བཛྲ་མ་ཎི་ས་མ་ཡེ་ཞེས་དེ་སྐད་
[198a.5]དུ་བརྗོད་ཅིང་རྡོ་རྗེ་ནོར་བུ་ཆེན་མོའི་དམ་ཚིག་གི་ཕྱག་རྒྱ་བཅིངས་ནས་སྙིང་གར་རྡོ་རྗེ་རིན་པོ་ཆེ་བསྒོམ་པར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེ་བསྡམས་པ་ལས་མཛུབ་མོ་གཉིས་ཀྱི་རྒྱབ་བསྐུམས་ཏེ་རྡོ་རྗེ་མཐེ་བོ་གཉིས་དང་སྤྲད་པ་འདི་ནི་རྡོ་རྗེ་ནོར་བུ་ཆེན་མོའི་དམ་ཚིག་གི་ཕྱག་རྒྱ་སྟེ། འདི་དང་ཨོཾ་
[198a.6]བཛྲ་མ་ཎི་ཧཱུཾ། ཨ་དྷི་ཏིཥྛ་མཾ་ཞེས་བྱ་བས་སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །དེའི་རྗེས་ལ་མཛོད་སྤུའི་ཕྱོགས་སུ་རྡོ་རྗེ་རིན་ཆེན་གྱི་མྱུ་གུ་སྙིང་གར་རྡོ་རྗེ་རིན་ཆེན། ལྐོག་མར་རྡོ་རྗེ་རིན་ཆེན་པདྨ། སྤྱི་བོར་རྡོ་རྗེ་རིན་ཆེན་ཆར་འབེབས་མས་བྱིན་གྱིས་བརླབ་
[198a.7]པར་བྱའོ། །གང་གི་ཕྱིར་རིགས་ཀྱི་ཕྱག་རྒྱ་རྣམ་པ་བཞིས་རིགས་སུ་བྱིན་གྱིས་རློབ་པར་བཅོམ་ལྡན་འདས་ཀྱིས་བཤད་པ་དེ་བས་ན་ཐེ་ཚོམ་མི་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བྱིན་གྱིས་བརླབས་པའི་རྒྱུད་བཤད་ནས། ད་ནི་དབང་བསྐུར་བའི་རྒྱུད་ལས་ཞེས་བྱ་བ་གསུངས་
[198b]
[198b.1]ཏེ། དེ་བཞིན་གཤེགས་པ་ཐམས་ཅད་ཀྱི་རིགས་རྣམས་ཀྱིས་དབང་བསྐུར་བ་ནི་རིན་པོ་ཆེའི་ཅོད་པན་ལ་སོགས་པ་བསྐྱེད་པ་ན་ཕྱག་རྒྱ་དེས་ཅོད་པན་བསྐྱེད་པའི་དངོས་གྲུབ་ཀྱི་རྒྱུད་དོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱའི་
[198b.2]རིན་ཆེན་རྡོ་རྗེ་བཅིངས་པ་དཔྲལ་བའི་ཕྱོགས་སུ་བཞག་སྟེ་བསྒྲུབ་པར་བྱའོ། །དཔྲལ་བའི་སྟེང་དུ་རྡོ་རྗེ་རིན་པོ་ཆེ་རབ་ཏུ་གཞག་པར་བཤད་པས་ཅིར་འགྱུར་ཞེ་ན། རྒྱལ་བའི་རྡོ་རྗེ་རིན་ཆེན་གྱིས། །དབང་བསྐུར་བར་ནི་དེར་འགྱུར་རོ། །ཞེས་སངས་རྒྱས་བཅོམ་ལྡན་འདས་ཀྱིས་གསུངས་སོ། །
[198b.3]དེ་ལྟར་དེ་བཞིན་གཤེགས་པ་ལྔའི་དབང་བསྐུར་བ་བསྟན་ནས། ད་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་དབང་བསྐུར་བ་ནི། རྡོ་རྗེ་དབྱིངས་དབང་ལ་སོགས་པ། །ཞེས་བྱ་བ་ལ་སོགས་པ་སྨོས་ཏེ། དེ་ལ་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་
[198b.4]རྡོ་རྗེ་དབྱིངས་ཀྱི་དབང་ཕྱུག་མ་བཅིངས་ལ། ཨོཾ་བཛྲ་དྷཱ་ཏྭི་ཤྭ་རི་ཧཱུཾ། བཛྲ་ནི་ཨ་བྷི་ཥིཉྩཱ་མི་ཞེས་བྱ་བས་སྤྱི་གཙུག་ཏུ་བསམ་པར་བྱའོ། །རྡོ་རྗེ་ཐུགས་བཅིངས་ལ་བཛྲ་བཛྲི་ནི་ཧཱུཾ། ཞེས་བྱ་བས་དཔྲལ་བའི་སྟེང་དུ་མི་བསྐྱོད་པ་བྱའོ། །དབང་བསྐུར་བ་བཅིངས་ལ། ཨོཾ་རཏྣ་བཛྲི་ནི་ཧཱུཾ། ཞེས་བྱ་བས་
[198b.5]རྣ་བ་གཡས་པའི་སྟེང་དུ་རིན་ཆེན་འབྱུང་ལྡན་བསམ་པར་བྱའོ། །རྡོ་རྗེ་མཚོན་ཆ་བཅིངས་ལ། ཨོཾ་དྷརྨྨ་བཛྲི་ནི་ཧཱུཾ། ཞེས་བྱ་བས་སྤྱི་བོའི་རྒྱབ་ཏུ་འོད་དཔག་ཏུ་མེད་པའོ། །རྡོ་རྗེ་ཀུན་མ་བཅིངས་ལ། རྣ་བ་གཡོན་པའི་སྟེང་དུ་བཅོམ་ལྡན་འདས་དོན་ཡོད་གྲུབ་པ། ཨོཾ་ཀརྨྨཱ་བཛྲི་ནི་ཧཱུཾ། ཞེས་བྱ་བ་
[198b.6]འདིས་བསམ་པར་བྱའོ། །དེ་ལྟར་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་ཕྱག་རྒྱ་རྣམས་ཀྱིས། རྣམ་པར་སྣང་མཛད་ལ་སོགས་པ་རྣམས་སྤྱི་གཙུག་ནས་བརྩམས་ཏེ། ཕྱོགས་བཞིར་སངས་རྒྱས་ཀྱི་ཕྲེང་བའི་དབང་བསྐུར་བར་
[198b.7]འགྱུར་རོ། །དེ་ལྟར་དེ་བཞིན་གཤེགས་པའི་རིགས་ཀྱི་དབང་བསྐུར་བཤད་ནས། ད་ནི་རྡོ་རྗེ་རིགས་ཀྱི་དབང་བསྐུར་བ་ནི། རྡོ་རྗེ་དབང་གི་ཕྲེང་བ་ནི། ཞེས་བྱ་བ་ལ་སོགས་པ་གསུངས་པ་ནི་རྡོ་རྗེ་རྩེ་ལྔ་པ་འབར་བ་ནི་ཕྲེང་བས་མཚན་པའི་ཅོད་པན་བསྐྱེད་པའི་ཕྱག་རྒྱས་རྡོ་རྗེའི་དབང་གི་ཕྲེང་བ་ནི་སྔར་བཤད་
[199a]
[199a.1]པའི་རྡོ་རྗེ་ཏི་རཱིནྟི་རིའི་ཕྱག་རྒྱས་བྱའོ། །དེ་སྐད་དུ་ཡང་། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཞེས་བྱ་བ་འདི་དང་། རྡོ་རྗེ་ཏི་རཱིནྟི་རིའི་ཕྱག་རྒྱས་བདག་ཉིད་དབང་བསྐུར་བར་བྱའོ་ཞེས་བྱ་བ་ནི་བཤད་ཟིན་ཏོ། །རྡོ་རྗེ་རིགས་ཀྱི་དབང་བསྐུར་བའི་དབང་དུ་བྱས་ནས་རྡོ་རྗེ་དབང་གི་ཕྲེང་བ་དེ་བྱའོ། །
[199a.2]ནི་ཞེས་བྱ་བ་ནི་ངེས་པར་གཟུང་བ་སྟེ། དེ་ནི་ཞེས་བྱ་བ་ནི་ཕྱག་རྒྱ་བཅིང་བའོ། །དཔྲལ་བར་བཞག་ན་ཡང་ཞེས་བྱ་བ་ནི་དཔྲལ་བར་བཅིང་བའོ། །བཅིངས་ནས་དཔྲལ་བར་བཞག་པས་ཅི་ཞིག་ཏུ་འགྱུར་ཞེ་ན། ཕྲེང་བའི་དབང་བསྐུར་དེ་ཡིས་ནི། །རྡོ་རྗེ་རྣམས་ཀྱིས་དེ་དབང་བསྐུར། །ཞེས་བྱ་
[199a.3]བ་སྨོས་ཏེ། དེས་སྔགས་པའི་དཔྲལ་བའི་སྟེང་དུ་བཅིངས་ཏེ་བཞག་ན། རྡོ་རྗེ་ཕྲེང་བའི་ཅོད་པན་གྱིས་དབང་བསྐུར་བ་ནི་རྡོ་རྗེ་འཛིན་མས་རྡོ་རྗེ་ཧཱུཾ་མཛད་ཀྱིས་སྒྲུབ་པ་པོ་ལ་དབང་བསྐུར་བར་བྱའོ། །སངས་རྒྱས་ལྔའི་ཅོད་པན་གྱིས་དབང་བསྐུར་བ་ཡང་བྱས་ན། རྡོ་རྗེའི་རིགས་ཐམས་ཅད་ལ་
[199a.4]རྡོ་རྗེ་ཕྲེང་བའི་དབང་བསྐུར་བར་བྱའོ་ཞེས་བཤད་པའི་རྒྱུད་ལས་བསྟན་པ་ཡིན་ནོ། །དེ་ལྟར་རྡོ་རྗེའི་རིགས་ཀྱི་དབང་བསྐུར་བ་བསྟན་ནས། ད་ནི་པདྨའི་རིགས་ཀྱི་དབང་བསྐུར་བ་ནི། ཆོས་ཀྱི་རྡོ་རྗེ་བཅིངས་ནས་ཀྱང་། །ཞེས་བྱ་བ་ལ་སོགས་པ་གསུངས་ཏེ། དེ་ལ་ཆོས་ཀྱི་རྡོ་རྗེ་ནི་རྡོ་རྗེ་བསྡམས་པ་
[199a.5]ལས་གུང་མོ་གཉིས་མྱུ་གུ་ལྟར་བྱས་པའི་མཚན་ཉིད་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་བསྟན་པའི་ཆོས་ཀྱི་རྡོ་རྗེ་མ་བཅིངས་ནས་ཀྱང་། མགོ་བོར་བཞག་སྟེ་དབང་བསྐུར་ཞེས་བྱ་བ་ནི། དེ་ལ་དཔྲལ་བའི་སྟེང་དུ་དེ་རབ་ཏུ་བཞག་ནས་ཅོད་པན་གྱི་དབུས་སུ་གཙོ་བོ་སངས་རྒྱས་འོད་
[199a.6]དཔག་ཏུ་མེད་པ་ཨོཾ་གྱིས་བསྐྱེད་པར་བྱའོ། །ཨོཾ་དྷརྨྨ་ས་མ་ཡེ་བཛྲ་པདྨ་ནི་ཧཱུཾ། ཨ་བྷི་ཥིཉྩ་མཱཾ་ཞེས་བརྗོད་པར་བྱའོ། །དེ་ལྟར་ཅིར་འགྱུར་ཞེ་ན། སངས་རྒྱས་ཀྱིས་ནི་འཇིག་རྟེན་གྱི་དབང་ཕྱུག་དེ་ནི་དབང་བསྐུར་རོ་ཞེས་བྱ་བ་སྨོས་ཏེ། འཇིག་རྟེན་དབང་ཕྱུག་ནི་སྤྱན་རས་གཟིགས་དབང་ཕྱུག་
[199a.7]གིས་དབང་བསྐུར་བའོ། །ད་ནི་ནོར་བུའི་རིགས་ཀྱི་དབང་བསྐུར་བ་ནི། རྡོ་རྗེ་རིན་ཆེན་མྱུ་གུར་བཅིངས། །ཞེས་བྱ་བ་ལ་སོགས་པ་སྨོས་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་མའི་གནས་ཀྱི་ཕྱག་རྒྱ་གང་ཡིན་པ་དེ་ནི་རྡོ་རྗེ་རིན་ཆེན་མྱུ་གུའོ། །དེའི་མཚན་
[199b]
[199b.1]ཉིད་ནི་འདི་ཡིན་ཏེ། རྡོ་རྗེ་རིན་ཆེན་བཅིངས་ལ་གུང་མོ་གཉིས་མྱུ་གུ་ལྟར་བྱས་པ་ནི་རྡོ་རྗེ་རིན་ཆེན་མྱུ་གུའོ། །དེ་བཅིངས་ནས་དཔྲལ་བར་བཞག་སྟེ་ཞེས་བྱ་བ་ནི་དཔྲལ་བའི་སྟེང་དུ། ཨོཾ་བཛྲ་རཏྣ་ཨ་གུ་རུ་ཧཱུཾ། ཨ་བྷི་ཥིཉྩ་མི་ཞེས་བརྗོད་ཅིང་གཞན་པ་ནི་རྣལ་འབྱོར་པས་རབ་ཏུ་གཞག་པའོ། །དེ་དཔྲལ་བར་རབ་
[199b.2]ཏུ་བཞག་པས་ཅི་ཞིག་ཏུ་འགྱུར་ཞེ་ན། དཔྲལ་བར་བཞག་སྟེ་དབང་བསྐུར་ཞེས་བྱ་བ་སྨོས་ཏེ། རྡོ་རྗེ་རིན་པོ་ཆེའི་གཟུགས་ཀྱིས་སངས་རྒྱས་ཀྱི་དབང་བསྐུར་བའོ། །ཁྱད་པར་ཅི་ལྟ་བུ་ཞིག་ཅེ་ན། མཆོད་པ་ཡིས་ཞེས་བྱ་བ་སྨོས་ཏེ། ནོར་བུའི་རིགས་ཀྱི་བདག་པོར་འགྱུར་རོ་ཞེས་བྱ་བའི་དོན་ཏོ། །དེ་ལྟར་དེ་
[199b.3]བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཏིང་ངེ་འཛིན་གྱི་དངོས་གྲུབ་ཀྱི་རྒྱུད་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་དེ་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། དེ་དག་གི་ཏིང་ངེ་འཛིན་ནི་རང་གི་ལྷའི་
[199b.4]དངོས་གྲུབ་སྒྲུབ་པའི་རྣམ་པར་སེམས་རྩེ་གཅིག་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བསྒྲུབ་པའོ། །དེ་སྟོན་པར་བྱེད་པའི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །རྒྱལ་བ་ཀུན་གྱི་རྣམ་པ་ནི། །ཞེས་བྱ་བ་ལ་སོགས་པའམ། སྐྱེས་བུ་ཆེན་པོའི་
[199b.5]མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ནི་རྣམ་པ་སྟེ། རྣམ་པ་དེ་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པ་རྣམས་ནི་རྒྱལ་བ་ཀུན་ནོ། །ཕྱག་རྒྱ་ནི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་།
[199b.6]ལས་ཀྱི་ཕྱག་རྒྱའོ། །མཉམ་པར་བཞག་པས་བཅིངས་ཞེས་བྱ་བ་ནི་སེམས་ཡིད་རྩེ་གཅིག་པས་སོ། །མྱུར་དུ་དངོས་གྲུབ་ཐོབ་པར་འགྱུར་པའོ། །ཅི་ཞིག་བྱས་ཤེ་ན། སྔགས་ཀྱི་རིག་པ་བཟླས་ནས་ནི། །ཞེས་བྱ་བ་སྨོས་ཏེ། དཀྱིལ་འཁོར་ཆེན་པོ་ལས་བཤད་པ་དང་། ཆོས་ཀྱི་དཀྱིལ་འཁོར་ལས་
[199b.7]བཤད་པ་དང་། གཟུངས་དང་ལས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་ནང་ནས་འདིར་དེ་བཞིན་གཤེགས་པའི་དབང་དུ་བྱས་པའི་རིག་པ་བརྗོད་པ་ཡིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་གི་དེ་བཞིན་གཤེགས་པའི་རྣལ་
[200a]
[200a.1]འབྱོར་བྱས་ལ། ཇི་ལྟ་བ་བཞིན་དུ་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཕྱག་རྒྱ་བཞི་བྱས་ནས་རང་གི་དེ་བཞིན་གཤེགས་པའི་ཕྱག་རྒྱ་བཅིངས་ལ། དེའི་ངོ་བོར་བདག་ཉིད་རྣམ་པར་བསམས་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་སྙིང་པོ
[200a.2]འམ། ཆོས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པའི་སྔགས་བཟླ་བར་བྱའོ། །གཟུངས་ཀྱི་དཀྱིལ་འཁོར་ལས་བཤད་པའི་རིག་པའམ། ལས་ཀྱི་དཀྱིལ་འཁོར་ལས་བཤད་པའི་རང་གི་དེ་བཞིན་གཤེགས་པའི་རིག་པ་ཡང་བཟླ་བར་བྱའོ། །དེའི་དོན་ནི་འདི་སྐད་སྟོན་
[200a.3]པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་ལ་བྱིན་གྱིས་བརླབས་པ་ལ་སོགས་པ་བྱས་ནས། དུམ་བུ་ཐམས་ཅད་ལས་བཤད་པའི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་ཟློས་པས་དེ་བཞིན་གཤེགས་པ་རྣམས་སྤྲུལ་པར་བྱེད་པ་ནི་བྱིན་གྱིས་
[200a.4]བརླབ་པ་ལ་སོགས་པ་དེ་དག་སོ་སོར་མི་བྱའོ། །ཏིང་ངེ་འཛིན་གྱི་རྡོ་རྗེ་ཆོས་ཀྱིས་ཀྱང་། །ཞེས་བྱ་བ་ནི་རྡོ་རྗེ་ཡང་ཡིན་ལ་ཆོས་ཀྱང་དེ་ཡིན་པས་རྡོ་རྗེ་ཆོས་ཏེ། རྡོ་རྗེ་རྩེ་ལྔ་པའི་ཏིང་ངེ་འཛིན་དེས་དེ་ལ་དམིགས་པ་ཡིན་ནོ་ཞེས་བྱ་བའི་དོན་ཏོ། །སེམས་དཔར་བྱིན་རླབས་ཚུལ་གྱིས་
[200a.5]ནི། །ཞེས་བྱ་བ་ནི་སེམས་དཔའ་ནི་དེ་བཞིན་གཤེགས་པའི་རིགས་ཀྱི་རྣལ་འབྱོར་པའི་སྙིང་གའི་ཟླ་བ་དེ་ལ་བྱིན་གྱིས་བརླབས་པ་ནི་དངོས་པོར་འཛིན་པ་ཉེ་བར་སྤངས་པ་མཚོན་པ་རྡོ་རྗེ་རྩེ་ལྔ་པ་སྟེ། སྟོང་པ་ཉིད་ཀྱི་རྡོ་རྗེ་ཡོངས་སུ་གཟུང་ངོ་། །དེ་བསྒོམ་པའི་ཚུལ་ནི་དེ་བསྒོམ་པའི་སྦྱོར་བ་དང་
[200a.6]ལྡན་པའོ། །སེམས་དཔར་བྱིན་གྱིས་བརླབས་པའི་ཚུལ་གྱིས་ཏིང་ངེ་འཛིན་དེ་ལྟར་གྱུར་པས་དེས་ཅིར་འགྱུར་ཞེ་ན། སྙིང་པོ་ཕྱག་རྒྱ་སྔགས་རིག་རྣམས། །ཞེས་བྱ་བ་སྨོས་ཏེ། དེ་ལ་སྙིང་པོ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་སྙིང་པོའོ། །ཕྱག་རྒྱ་ནི་གཟུངས་ཀྱི་དཀྱིལ་
[200a.7]འཁོར་ལས་བཤད་པའི་རིག་པ་རྣམས་སོ། །སྔགས་ནི་ཆོས་ཀྱི་དཀྱིལ་འཁོར་ལས་བཤད་པའོ། །རིག་པ་ནི་ལས་ཀྱི་དཀྱིལ་འཁོར་ལས་བཤད་པའི་རིག་པའོ། །འདིས་མྱུར་དུ་འགྲུབ་པར་འགྱུར་ཏེ། ཏིང་ངེ་འཛིན་དང་དེ་བཞིན་གཤེགས་པའི་རིག་སྔགས་བཟླས་པར་བྱའོ། །སངས་རྒྱས་ཀྱི་ཏིང་
[200b]
[200b.1]ངེ་འཛིན་རྡོ་རྗེ་འཛིན་པ་ཆེན་པོ་ཉིད་ཀྱིས་གསུངས་པའོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་པ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་ལ་བྱིན་གྱིས་བརླབས་པ་ལ་
[200b.2]སོགས་པ་བྱས་ནས། རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་རྩེ་ལྔ་པ་འགྲེང་བ་བསམས་ལ། ལྟེ་བའི་དབུས་སུ་གཟུགས་བརྙན་གྱི་སྦྱོར་བ་བྱས་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་སྙིང་པོའམ། གཟུངས་ཀྱི་དཀྱིལ་འཁོར་ལས་བཤད་པའི་
[200b.3]རང་གི་རིག་པའམ། ཆོས་ཀྱི་དཀྱིལ་འཁོར་ལས་བཤད་པའི་སྔགས་སམ། ཡང་ན་ལས་ཀྱི་དཀྱིལ་འཁོར་ལས་བཤད་པའི་རང་གི་རིག་པའི་ཡི་གེའི་ཕྲེང་བ་མགོ་གྱེན་དུ་བསྟན་པ་བྲི་བར་བྱའོ། །རྡོ་རྗེ་དབྱིངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་རང་གི་ཕྱག་རྒྱ་བཅིངས་
[200b.4]ལ། སེམས་དཔའ་རྡོ་རྗེ་མངོན་སུམ་ལྟ་བུར་བསྒོམས་ནས་བཟླས་པ་བྱའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་བྱིན་གྱིས་བརླབ་པ་ལ་སོགས་པ་བྱས་ནས། རྡོ་རྗེ་དབྱིངས་ཀྱི་དུམ་བུ་ལས་བཤད་པའི་དངོས་གྲུབ་རྣམས་བསྒྲུབ་པར་བྱའོ། །ད་ནི་
[200b.5]རྡོ་རྗེ་རིགས་ཀྱི་ཏིང་འཛིན་ནི། །འདོད་ཆགས་ལས་ནི་ཁྱོད་བྱུང་སྟེ། །ཞེས་བྱ་བ་ལ་སོགས་པ་སྨོས་ཏེ། དེ་ལ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་མཚན་ཉིད་ཀྱི་ཐུགས་རྗེ་ཆེན་པོ་ནི་འདོད་ཆགས་སོ། །དེའི་ཕྱིར་དེ་ལྟར་གྱུར་པའི་མི་དམིགས་པ་ལ་ཐུགས་རྗེ་ཆེན་པོའི་འདོད་ཆགས་ལས་ཡང་
[200b.6]དག་པར་བྱུང་བའི་ཁྲོ་བོ་སྟེ། འདོད་ཆགས་ལས་བྱུང་བའི་ཁྲོ་བོ་གང་ཡིན་པ་དེ་བདག་ཡིན་ཏེ། ཁྱེད་གང་ཡིན་པ་དེ་བདག་ཡིན་ནོ་ཞེས་དེ་ལྟར་ཆུ་དང་འོ་མ་བཞིན་གཅིག་ཏུ་གྱུར་པར་མོས་པར་བྱའོ། །དེ་ལྟར་བསྒོམས་པར་གྱུར་པ་དེས་ཅི་ཞིག་ཏུ་འགྱུར་ཞེ་ན། སྙིང་པོ་ཕྱག་རྒྱ་སྔགས་རིག་རྣམས། །
[200b.7]ཞེས་བྱ་བ་སྨོས་ཏེ། རྡོ་རྗེའི་རིགས་ལས་བཤད་པ་རྣམས་སོ། །མྱུར་དུ་དངོས་གྲུབ་ཐོབ་པར་འགྱུར། །དེ་བསྒྲུབས་ན་ཞེས་བྱ་བ་ཚིག་ལྷག་མའོ། །དེ་ལྟར་རྡོ་རྗེ་རིགས་ཀྱི་ཏིང་ངེ་འཛིན་བསྟན་ནས། ད་ནི་པདྨའི་རིགས་ཀྱི་ཏིང་ངེ་འཛིན་ནི། བྱམས་པ་འགེངས་པའི་ཚུལ་གྱིས་ནི། །ཞེས་བྱ་བ་སྨོས་
[201a]
[201a.1]ཏེ། དེ་ལ་ཕྱོགས་བཅུའི་སེམས་ཅན་གྱི་ཁམས་ཐམས་ཅད་པདྨའི་རིགས་ཀྱི་ངོ་བོས་ཕན་པ་དང་། བདེ་བ་བསྡུས་པའི་ཕན་པའི་རིགས་ཀྱི་ངོ་བོར་བསྒྲུབས་ནས་བསྒོམ་པར་བྱའོ། །བྱམས་པས་འགེངས་པའི་ཚུལ་ཅན་ཏེ། པདྨའི་རིགས་ཀྱི་ཏིང་ངེ་འཛིན་ཏོ། །དེ་ལྟར་བྱས་པས་
[201a.2]འགྱུར་ཞེ་ན། སྙིང་པོ་ལ་སོགས་བསྒྲུབས་ན་ཡང་། །ཞེས་བྱ་བ་སྨོས་ཏེ། པདྨའི་རིགས་ལས་བཤད་པའི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་སོ། །བསྒྲུབ་པ་ནི་ནན་ཏན་བྱེད་པ་སྟེ། སྒྲུབ་པ་པོ་ཡི་ཏིང་ངེ་འཛིན་འདི་ཡིས། །ཞེས་བྱ་བའི་ཐ་ཚིག་གོ། །དེ་ཅིའི་ཕྱིར་འཇིག་
[201a.3]རྟེན་དབང་ཕྱུག་གི་རིགས་ནི་པདྨའི་རིགས་ཏེ། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་པ་ཟློས་པའོ། །ཇི་ལྟར་མངོན་པར་འདོད་པའི་སྒྲུབ་པ་པོ་ལ་དངོས་གྲུབ་མྱུར་དུ་ཐོབ་པར་འགྱུར་རོ། །ད་ནི་ནོར་བུའི་རིགས་ཀྱི་ཏིང་ངེ་འཛིན་ལ་ནམ་མཁའ་ཀུན་གྱི་ཏིང་ངེ་འཛིན་ནི་ཞེས་བྱ་བ་ལ་སོགས་
[201a.4]པ་སྨོས་ཏེ། ནམ་མཁའ་ཡང་དེ་ཡིན་ལ་ཀུན་ཀྱང་དེ་ཡིན་པས་ན་ནམ་མཁའ་ཀུན་ཏེ། ནོར་བུའི་རིགས་དེ་ལ་དམིགས་པའི་ཏིང་ངེ་འཛིན་ནི་ནམ་མཁའ་ཀུན་གྱི་ཏིང་ངེ་འཛིན་ཏེ། ཡང་དང་ཡང་མངོན་དུ་བྱས་ནས་བསྒོམས་ན་ཡང་ངོ་། །ཇི་ལྟར་ཞེ་ན།
[201a.5]རབ་མཉམ་གཞག་ཅེས་བྱ་བ་སྨོས་ཏེ། གཡེང་བ་མེད་པའི་སེམས་ཀྱིས་ཡིད་གཞན་དུ་མ་གྱུར་པའོ། །ནོར་བུ་ཆེན་པོའི་རིགས་ཀྱི་རྣལ་འབྱོར་པས་དེ་ལྟར་བསྒོམས་ན། སྙིང་པོ་ཕྱག་རྒྱ་སྔགས་རིག་རྣམས་བསྒྲུབ་པར་བྱའོ། །བསྒྲུབས་ནས་ཅིར་འགྱུར་ཞེ་ན། ཀུན་ཏུ་འགྲོ་བར་འགྱུར་ཞེས་བྱ་བ་སྨོས་
[201a.6]ཏེ། འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་ནོར་བུའི་རིགས་ཀྱི་ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། རང་གི་སྙིང་གའི་ཟླ་བར་རྡོ་རྗེ་རིན་ཆེན་ཏྲཾ་ལས་བསྐྱེད་ནས། དེ་ལ་བཟླས་པའི་ཡི་གེ་རྣམ་པར་བཀོད་
[201a.7]དེ། ཕྱག་རྒྱ་ཆེན་པོ་བཅིངས་ལ། དེ་ཉིད་བརྗོད་ཅིང་དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ལ་ནོར་བུའི་རིགས་ཀྱི་དབང་བསྐུར་བས་དབང་བསྐུར་ལ། ནོར་བུའི་རིགས་ཀྱི་རང་བཞིན་དུ་བསྒྲུབས་ཏེ་བསྒོམ་པར་བྱའོ། །དེ་ལྟར་རང་གི་རིགས་ཀྱི་མཚན་མ་
[201b]
[201b.1]རྣམས་ཀྱི་རིག་པའི་ཡི་གེ་བསྒོམ་པ་ནི་ཐམས་ཅད་ལ་ཡང་ཤེས་པར་བྱའོ། །དེ་ལྟར་རིགས་ཐམས་ཅད་ཀྱི་ཏིང་ངེ་འཛིན་བསྒྲུབ་པ་བསྟན་ནས། དེ་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་མཆོད་པའི་ཕྱག་རྒྱའི་དངོས་གྲུབ་ཀྱི་རྒྱུད་གསུངས་པ་ནི། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་
[201b.2]བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་རིགས་ཏེ། ཇི་སྐད་བཤད་པ་བཞིན་ནོ། །དེ་དག་མཆོད་པའི་རྣལ་འབྱོར་གྱི་ཕྱག་རྒྱར་འགྱུར་བ་གང་ཡིན་པ་དེ་ནི་མཆོད་པའི་ཕྱག་རྒྱ་སྟེ། དེ་རྣམས་གྲུབ་པ་ནི་མཆོད་པའི་ཕྱག་རྒྱའི་དངོས་གྲུབ་སྟེ།
[201b.3]ཕྱག་རྒྱ་ཆེན་པོ་ལ་སོགས་སྒྲུབ་པོ། །མཉམ་པར་གཞག་པ་དང་པོར་ནི། །བདུག་པ་ལ་སོགས་མཆོད་བྱས་ལ། །ཞེས་བྱ་བ་ལ་སོགས་པ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་རྣལ་འབྱོར་པ་དཔའ་བོ་གཅིག་པུར་བདག་ཉིད་བྱས་ནས་ཕྱག་རྒྱ་ཆེན་པོ་བཅིངས་ཏེ། ཛཿ་ཧཱུཾ་བཾ་ཧོཿཞེས་
[201b.4]བརྗོད་ཅིང་། ཇི་ལྟ་བ་བཞིན་དུ་དེ་བཞིན་གཤེགས་པ་རང་གི་ལུས་ལ་བཅུག་པ་ཕྱག་རྒྱ་བཞིས་རྒྱས་བཏབ་ནས་བྱིན་གྱིས་བརླབ་པ་དང་དབང་བསྐུར་ལ། དེ་ནས་དེ་དག་གི་སྙིང་གར་སྣ་ཚོགས་རྡོ་རྗེ་བསམས་ནས། གར་ལས་བྱུང་བ་བདུག་པ་ལ་སོགས་པའི་ཕྱག་རྒྱ་རྣམ་པ་བཞིས་བདག་ལ་མཆོད་པར་བྱའོ། །
[201b.5]དེ་ནས་སྔ་མ་བཞིན་དུ་བདུག་པ་ལ་སོགས་པའི་མཆོད་པ་དང་ཕྱག་བཞི་བྱའོ། །དེ་ནས་ཡི་གེ་ཨ་ལས་རྒྱལ་བ་ཐམས་ཅད་ཀྱི་ཕྱག་རྒྱ་བཅིངས་ཏེ་མཉམ་པར་བཞག་པས་བསྒོམ་མོ། །བསྒྲུབས་ན་དངོས་གྲུབ་ཐོབ་པར་འགྱུར། །ཞེས་བྱ་བ་ནི་སློབ་མའི་དབང་དུ་བྱས་ནས་མཆོད་པའི་ཆོ་ག་ཤེས་པར་བྱ་བ་དང་། བདག་ཉིད་
[201b.6]ཀྱི་རྣལ་འབྱོར་ཙམ་དང་། མདུན་གྱི་རྣལ་འབྱོར་གྱི་དབང་དུ་བྱས་ནས་ཀྱང་མཆོད་པའི་ཆོ་ག་ཐམས་ཅད་ཤེས་པར་བྱའོ། །སློབ་དཔོན་རྣལ་འབྱོར་ཆེན་པོ་དང་ལྡན་པ་རྣམས་རང་གི་ལྷའི་རྣལ་འབྱོར་ལས་བཤད་པའི་མཆོད་པ་ཐམས་ཅད་རིགས་ཐམས་ཅད་ལ་ཡང་ཤེས་པར་བྱ་བ་ཡིན་ནོ། །གསང་བའི་མཆོད་པ་རྣམ་བཞི་
[201b.7]ཡིས། །ཞེས་བྱ་བ་ལ་སོགས་པའི་མཆོད་པ་རྣམ་པ་བཞི་ནི་སྒེག་མོ་ལ་སོགས་པའི་མཆོད་པ་རྣམ་པ་བཞི་ཡིན་ནོ་ཞེས་བྱ་བའི་དོན་ཏོ། །གསང་བའི་མཆོད་པ་རྣམ་པ་བཞི་པོ་འདི་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་གསང་བ་སྟེ་དེ་བརྗོད་པའོ། །ཨོཾ་རྡོ་རྗེ་སེམས་དཔའ་བསྡུས་པས་ན། །རྡོ་རྗེ་
[202a]
[202a.1]རིན་ཆེན་བླ་ན་མེད། །རྡོ་རྗེ་ཆོས་ནི་གླུར་བླངས་པས། །རྡོ་རྗེ་ལས་རྣམས་བྱེད་པར་འགྱུར། །ཞེས་བརྗོད་ཅིང་། རྡོ་རྗེ་སྒེག་མོ་ལ་སོགས་པས་གར་བྱེད་ཅིང་སྒེག་མོ་ལ་སོགས་པའི་སྙིང་པོ་འདི་ཡང་བརྗོད་པར་བྱའོ་ཞེས་བྱ་བའི་དོན་ཏོ། །དེ་ལྟར་སྒེག་མོ་ལ་སོགས་པའི་གསང་བའི་མཆོད་པ་རྣམ་པ་
[202a.2]བཞིས་བདག་ཉིད་ཡང་དག་པར་མཆོད་ནས་ལས་ཀྱི་དཀྱིལ་འཁོར་ལས་གསུངས་པའི་མཆོད་པ་རྣམ་པ་བཅུ་དྲུག་གིས་བདག་ཉིད་མཆོད་པར་བྱས་ནས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། བདག་དབུལ་བའི་ཞེས་བྱ་བ་སྨོས་ཏེ། འམ་ཞེས་བྱ་བའི་སྒྲ་ནི་བསྡུ་བའོ། །བདག་དབུལ་བ་ལ་སོགས་པ་ཡང་། །
[202a.3]ཞེས་བྱ་བའོ། །དེ་ལྟར་དེ་བཞིན་གཤེགས་པའི་རིགས་ཀྱི་མཆོད་པ་བསྟན་ནས། ད་ནི་རྡོ་རྗེའི་རིགས་ཀྱི་མཆོད་པ་ནི། །ཁྲོ་བོ་རྡོ་རྗེ་མཆོད་ཆེན་པོ། །ཞེས་བྱ་བ་ལ་སོགས་པ་སྨོས་ཏེ། ཁྲོ་བོ་རྡོ་རྗེ་ནི་རྡོ་རྗེའི་རིགས་སོ། །དེའི་མཆོད་པ་ཆེན་པོ་ནི་སྒེག་མོ་ལ་སོགས་པའི་གསང་བའི་གསང་བ་རྣམ་པ་བཞིའོ། །ཁྲོ་
[202a.4]བོའི་གསང་བ་རྗོད་བྱེད་ཅིང་། །ཞེས་བྱ་བ་ནི་སྔ་མ་བཞིན་དུ་རྡོ་རྗེའི་གླུ་བརྗོད་ཅིང་རྡོ་རྗེའི་ཁུ་ཚུར་གཉིས་སུ་བྱས་ནས་ཡང་དང་ཡང་དུ་གར་བྱས་ཏེ། ཁྲོ་བོའི་རྡོ་རྗེ་ཁུ་ཚུར་གཉིས་སུ་བྱས་པ་ལས་རྡོ་རྗེ་སྒེག་མོ་ལ་སོགས་པའི་ལས་ཀྱི་ཕྱག་རྒྱ་རྣམ་པ་བཞི་བཅིངས་ནས། ཨོཾ་བཛྲ་ལཱ་སྱ་རཱ་ག་ཡ་ཧཱུཾ་ཕཊ་ཅེས་བྱ་བ་ལ་སོགས་
[202a.5]སྒེག་མོ་ལ་སོགས་པའི་གསང་བའི་མཆོད་པ་རྣམ་པ་བཞིའི་སྙིང་པོ་བརྗོད་ཅིང་ཁྲོ་བོའི་གསང་བ་ཡང་བརྗོད་ནས། ཁྲོ་བོའི་ཁུ་ཚུར་གྱིས་གར་བྱེད་ཅིང་བརྗོད་པས་སོ། །ཅིར་འགྱུར་ཞེ་ན། རྡོ་རྗེ་ཁུ་ཚུར་རབ་བྱས་ནས། །ཞེས་བྱ་བ་སྨོས་ཏེ། རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་སྡིགས་མཛུབ་ཏུ་བྱས་
[202a.6]ཏེ། བསྐྱེད་པ་ནི་ཁྲོ་བོའི་ཁུ་ཚུར་རོ། །དེ་བྱས་ནས་མཆོད་པའི་དངོས་གྲུབ་མྱུར་དུ་རྣལ་འབྱོར་པས་འགྲུབ་པར་འགྱུར་རོ། །དེ་བས་ན། མྱུར་དུ་བདག་གི་རིགས་སྒྲུབ་བོ། །ཞེས་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །ད་ནི་པདྨའི་རིགས་ཀྱི་མཆོད་པའི་དངོས་གྲུབ་ནི། མདོ་སྡེ་ཟབ་མོ་རྒྱ་ཆེ་བའི། །ཞེས་
[202a.7]བྱ་བ་ལ་སོགས་པ་སྨོས་ཏེ། དེ་ལ་ཟབ་པ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བསྟན་པའི་ཕྱིར་རོ། །རྒྱ་ཆེ་བ་ནི་ནམ་མཁའི་ཁམས་ཁྱབ་པའི་གཟུགས་དུ་མ་སྟོན་པའི་ཕྱིར་རོ། །མདོར་བསྟན་པས་ན་མདོ་སྡེ་སྟེ། དེའི་དོན་མདོར་བསྟན་པ་བརྗོད་པའི་སྟོབས་ཀྱིས་སེམས་ལ་ངེས་པ་བསྐྱེད་
[202b]
[202b.1]པའོ། །པདྨའི་སྒེག་མོ་ལ་སོགས་པ་གསང་བའི་མཆོད་པ་རྣམ་པ་བཞིས་མདོར་བསྡུས་པ་སྟོན་པའི་མདོ་སྡེ་བརྗོད་པ་དང་། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་གིས་ཀྱང་མདོར་བསྡུས་པ་བརྗོད་པའོ། །ཟབ་པ་ཡང་ཡིན་ལ་རྒྱ་ཆེ་བ་ཡང་དེ་ཡིན་པས་ན་མདོ་སྡེ་སྟེ།
[202b.2]མདོ་སྡེ་ཟབ་ཅིང་རྒྱ་ཆེ་བའོ། །དེ་དག་གི་རྒྱུད་འབུམ་པ་ལ་སོགས་པ་རྒྱ་ཆེར་བསྟན་པ་དེ་ལས་མདོར་བསྡུས་ནས་བརྗོད་ཅིང་། རབ་ཏུ་སྟོན་པའི་མཆོད་པ་དེ་དེ་བཞིན་གཤེགས་པ་ལ་སོགས་པ་པདྨའི་རིགས་ཐམས་ཅད་ལ་དབུལ་ཞིང་རབ་ཏུ་མཆོད་པའོ། །དབུལ་བ་དེ་གང་ཡིན་ཞེ་ན། ཡིད་དང་ངག་གིས་ཕུལ་ནས་
[202b.3]ནི། །ཞེས་བྱ་བ་སྨོས་ཏེ། ཡིད་ཀྱི་ཐབས་དང་ཤེས་རབ་ཀྱི་གཟུགས་ཀྱིས་ནམ་མཁའི་ཁམས་ཐམས་ཅད་མཐའ་ཡས་པ་བཀང་བའི་གླུ་དང་། སྒེག་མོ་ལ་སོགས་པའི་སྙིང་པོ་ཕུལ་བས། །དངོས་གྲུབ་མྱུར་དུ་ཐོབ་པར་འགྱུར། །ཞེས་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་
[202b.4]སྦྱོར་བས་རང་གི་འཇིག་རྟེན་དབང་ཕྱུག་གི་རྣལ་འབྱོར་བྱས་ལ། ཡེ་ཤེས་སེམས་དཔའ་དང་དེ་བཞིན་གཤེགས་པ་ཐམས་ཅད་རང་གི་ལུས་ལ་བཅུག་ལ། ཆོ་ག་ཐམས་ཅད་རྗེས་སུ་སྤྱད་དེ། པདྨའི་སྒེག་མོ་ལ་སོགས་པའི་གསང་བའི་མཆོད་པ་གར་ལས་བྱུང་བ་
[202b.5]རྣམས་ཀྱིས་བདག་ཉིད་མཆོད་ལ། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་ལས་ཀྱི་ཕྱག་རྒྱ་དེ་རྣམས་དང་། ཐམས་ཅད་ཤེས་རབ་ཀྱི་རང་བཞིན་གྱིས་ཐམས་ཅད་དུ་ཁྱབ་པར་བསམ་པར་བྱའོ། །དེ་ལྟར་པདྨའི་རིགས་ཀྱི་མཆོད་པ་བསྟན་ནས། ད་ནི་ནོར་བུའི་རིགས་ཀྱི་མཆོད་
[202b.6]པ་ནི། །གདུགས་དང་རྒྱལ་མཚན་འཕན་རྣམས་ཀྱིས། །ཞེས་བྱ་བ་ལ་སོགས་པ་སྨོས་ཏེ། གདུགས་དང་། རྒྱལ་མཚན་དང་། འཕན་རྣམས་ནི་གདུགས་དང་། རྒྱལ་མཚན་དང་། འཕན་དེ་རྣམས་ཀྱིས་མཆོད་ན་འགྲུབ་པར་འགྱུར་རོ། །གདུགས་ལ་སོགས་པ་ནི་ཉེ་བར་མཚོན་པ་སྟེ། གདུ་
[202b.7]བུ་དང་། རྣ་ཆ་དང་། དཔུང་རྒྱན་དང་། རིན་པོ་ཆེ་སྣ་བདུན་ལ་སོགས་པའི་གཟུགས་དེ་རྣམས་ཀྱིས་མཆོད་ན་རྣལ་འབྱོར་པས་འགྲུབ་པར་འགྱུར་རོ། །མཆོད་པ་གང་ཡིན་ཞེ་ན། སྦྱིན་པ་ཐམས་ཅད་སྦྱིན་ན་ནི། །ནོར་བུའི་རིགས་ནི་འགྲུབ་པར་འགྱུར། །ཞེས་བྱ་བ་སྨོས་ཏེ། སངས་རྒྱས་རྣམས་
[203a]
[203a.1]ཀྱིས་སྦྱིན་པ་མ་ལུས་པ་སྦྱིན་ན་འགྲུབ་པར་འགྱུར་བའོ། །འདི་སྐད་སྟོན་པ་ཡིན་ཏེ། ནོར་བུའི་རིགས་ཀྱི་རྣལ་འབྱོར་བྱས་ལ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པའི་ཆོ་ག་ཐམས་ཅད་རྗེས་
[203a.2]སུ་སྤྱད་ལ་རིན་ཆེན་སྒེག་མོ་ལ་སོགས་པ་མཆོད་པ་རྣམ་པ་བཞི་དང་། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་དང་། ནོར་བུའི་རིགས་ཀྱི་མཆོད་པ་ཐམས་ཅད་ཀྱིས་བདག་ཉིད་མཆོད་ལ། གདུགས་དང་། རྒྱལ་མཚན་དང་། བ་དན་རྣམས་ཀྱིས་མཆོད་པ་རེ་
[203a.3]རེ་ཞིང་ཡང་ཕྱག་རྒྱ་བཅིངས་ལ། རྒྱལ་བའི་མཆོད་པ་རྣམས་སྤྲུལ་ལ་དེ་བཞིན་གཤེགས་པ་ལ་སོགས་པས་སེམས་ཅན་ཐམས་ཅད་ཀྱི་ཁམས་ཐམས་ཅད་ལ་ནོར་བུའི་རིགས་སུ་བསྐྱེད་ལ། དབང་བསྐུར་བ་ལ་སོགས་པ་སྦྱིན་པས་མཆོད་པར་བྱའོ། །ད་ནི་རང་ལ་བྱིན་གྱིས་བརླབ་པ་ལ་སོགས་
[203a.4]པའི་ཕན་ཡོན་ནི། རང་ལ་བྱིན་གྱིས་བརླབ་སོགས་ལྡན། །རྡོ་རྗེ་སེམས་དཔར་མཉམ་པར་འགྱུར། །ཞེས་བྱ་བ་གསུངས་ཏེ། རང་ལ་བྱིན་གྱིས་བརླབ་པ་ལ་སོགས་པ་བྱས་ནས་གྲུབ་པར་མ་གྱུར་ཀྱང་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ནས། རིན་ཆེན་འབེབས་པའི་མཐར་
[203a.5]ཐུག་པའི་དེ་བཞིན་གཤེགས་པའི་རིགས་ཐམས་ཅད་དང་འདྲ་བར་རིགས་ངེས་པར་གནས་པར་གྱུར་ནས། རྣལ་འབྱོར་པ་མངོན་པར་བྱང་ཆུབ་པའི་མཐར་ཐུག་པར་འགྱུར་རོ་ཞེས་བྱ་བའི་དོན་ཏོ། །ཆོ་འཕྲུལ་རྣམ་པ་བཞི་ཡིས་ནི། །རྡོ་རྗེ་སྣ་ཚོགས་འགྲུབ་བྱེད་ཅིང་། །ཞེས་བྱ་བ་ནི་ཆོ་འཕྲུལ་གྱི་ཕན་
[203a.6]ཡོན་བསྟན་པས་བྱིན་གྱིས་བརླབ་པ་ལ་སོགས་པའི་ཆོ་འཕྲུལ་རྣམ་པ་བཞིས་བཤད་པས་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱའི་རང་བཞིན་གྱི་ལྷའི་གཟུགས་ཀྱི་རྣལ་འབྱོར་པར་བདག་ཉིད་བྱིན་གྱིས་བརླབ་པ་ལ་སོགས་པས་སྣ་ཚོགས་རྡོ་རྗེར་བསྒྲུབས་ན་འགྲུབ་པར་
[203a.7]འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བྱིན་གྱིས་བརླབ་པ་དང་། དབང་བསྐུར་བ་དང་། ཏིང་ངེ་འཛིན་དང་མཆོད་པ་བསྟན་ནས། ད་ནི་སྔར་བཤད་པའི་ཚུལ་གྱིས་མངོན་པར་ཤེས་པ་སྒྲུབ་པར་བྱེད་པའི་དཀྱིལ་འཁོར་ལ་སོགས་པར་རང་གི་ལྷའི་ཕྱག་རྒྱ་ཆེན་པོ་ལ་སོགས་པས།
[203b]
[203b.1]མཚན་ཐོག་ཐག་ཡང་བཟླས་ཤིང་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་མངོན་པར་ཤེས་པའི་ཡེ་ཤེས་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་སྔ་མ་བཞིན་ནོ།
[203b.2]དེ་དག་གི་མངོན་པར་ཤེས་པ་ནི་ལྔའོ། །དེའི་ཡེ་ཤེས་ནི་ཁོང་དུ་ཆུད་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་གྲུབ་པའོ། །དེ་སྟོན་པར་བྱེད་པའི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །ལུས་ལ་སངས་རྒྱས་ཏིང་འཛིན་ནི། །སངས་རྒྱས་ཀྱི་རྣམ་པར་སེམས་རྩེ་གཅིག་པའོ། །
[203b.3]ན་ཞེས་བྱ་བའི་སྒྲ་ནི་ངེས་པར་གཟུང་བའོ། །སངས་རྒྱས་ཀྱི་རྣམ་པ་ཁོ་ནར་སེམས་རྩེ་གཅིག་པའོ། །མཛེས་པར་གཤེགས་པའི་མངོན་པར་ཤེས་པ་ནི་བདེ་གཤེགས་ཉིད་མངོན་པར་ཤེས་ཏེ། མཛེས་པར་གཤེགས་པ་འདི་ནི་བདེ་བར་གཤེགས་པའོ། །འདི་ནི་ཞེས་བྱ་བ་ནི་བཤད་མ་ཐག་པའི་སེམས་
[203b.4]རྩེ་གཅིག་པའོ། །དེས་དེ་ཅིར་འགྱུར་ཞེ་ན། འདི་ལ་རབ་ཏུ་རྟོགས་ན་ནི། །སངས་རྒྱས་པ་ཡི་དངོས་གྲུབ་ཐོབ། །ཅེས་བྱ་བ་སྨོས་ཏེ། དེའི་སངས་རྒྱས་ནི་མངོན་པར་ཤེས་པའོ། །རབ་ཏུ་རྟོགས་པར་གྱུར་པ་དེ་ནི་རབ་ཏུ་རྟོགས་པར་གྱུར་པ་ཉིད་དེ། དེའི་ཕྱིར་རབ་ཏུ་རྟོགས་པ་ཉིད་ཀྱིས་དེ་རྣམས་ཀྱི་དེ་ཁོ་ན་ཉིད་དོ་
[203b.5]ཞེས་བྱ་བའི་དོན་ཏོ། །དེ་སྐད་དུ། སངས་རྒྱས་གཟུགས་བརྙན་རྟོགས་པ་ནི། །མངོན་སུམ་ལྟ་བུར་མཐོང་བར་འགྱུར། །བདག་ཉིད་ཀྱང་ནི་མི་ཤེས་ཤིང་། །དེ་འདྲའི་སྒྲ་ཡང་ཐོས་མི་འགྱུར། །ཞེས་གསུངས་སོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་དེ་བཞིན་
[203b.6]གཤེགས་པའི་རྣལ་འབྱོར་བསྒོམས་ལ། གང་གི་ཚེ་མཚན་མ་ཐོབ་པར་གྱུར་པ་དེའི་ཚེ་མངོན་པར་ཤེས་པ་བསྒྲུབ་པར་བྱའོ། །རྡོ་རྗེ་སེམས་དཔའི་ཏིང་འཛིན་གནས། །ལུས་ཀུན་དེ་བཞིན་གཤེགས་རྣམས་དང་། །བྱང་ཆུབ་སེམས་དཔའ་རྣམས་བསྒོམས་ལ། །དེ་བཞིན་ལུས་ལ་
[203b.7]བྱུང་མཐོང་ན། །ཞེས་བྱ་བ་ཇི་སྲིད་དུ་རྣམ་པར་སྣང་མཛད་ལ་སོགས་པའི་གཟུགས་སུ་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ལྟ་བུས་མངོན་པར་ཤེས་པ་འགྲུབ་པར་འགྱུར་རོ། །དེ་ནས་སྔ་མ་བཞིན་དུ་མཚན་ཐོག་ཐག་དེ་བཞིན་གཤེགས་པའི་བདག་
[204a]
[204a.1]ཉིད་དུ་བསྒོམས་ན་འགྲུབ་པར་འགྱུར་ན་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐོབ་པར་འགྱུར་རོ། །དེ་ལྟར་དེ་བཞིན་འགྲུབ་པའི་དེ་བཞིན་གཤེགས་པའི་མངོན་པར་ཤེས་པ་ཐོབ་པའི་སྒྲུབ་པ་བསྟན་ནས། ད་ནི་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་
[204a.2]སྔར་བཤད་པའི་ཚུལ་གྱིས་དེ་བཞིན་གཤེགས་པའི་རིགས་ཀྱི་མངོན་པར་ཤེས་པ་བསྐྱེད་ནས། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ལ་ཞེས་བྱ་བ་ལ་སོགས་པ་གསུངས་ཏེ། འཕྲུལ་གྱི་མིག་སོགས་མངོན་ཤེས་ནི། །
[204a.3]ཞེས་བྱ་བ་ལ་སོགས་པ་ལ་ལྷའི་མིག་དང་། ལྷའི་རྣ་བ་དང་། གཞན་གྱི་སེམས་ཤེས་པ་དང་། སྔོན་གྱི་གནས་རྗེས་སུ་དྲན་པ་ཤེས་པ་དང་རྫུ་འཕྲུལ་གྱི་ཡུལ་མངོན་པར་ཤེས་པ་ལྔའོ། །རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་སྔར་བཤད་པའི་
[204a.4]ཚུལ་གྱིས་ཇི་སྲིད་དུ་གྲུབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཕྱིས་དཀྱིལ་འཁོར་བྲིས་ལ་མཚན་ཐོག་ཐག་བསྒོམས་ན་རྡོ་རྗེ་འཆང་ཆེན་པོར་འགྱུར་རོ། །དེ་བས་ན། མངོན་ཤེས་ལྡར་ནི་བདག་གྱུར་ནས། །རྡོ་རྗེ་སེམས་དཔའ་ཉིད་ཐོབ་འགྱུར། །ཞེས་གསུངས་སོ། །
[204a.5]དེ་བཞིན་དུ་རྡོ་རྗེ་རིགས་ཀྱི་རྣལ་འབྱོར་པས་སྔར་བཤད་པའི་ཚུལ་གྱིས་ཁྲོ་བོའི་མངོན་པར་ཤེས་པ་བསྐྱེད་པར་བྱའོ། །དེ་ནས་མངོན་པར་ཤེས་པ་ལྔ་ཐོབ་པའི་དཀྱིལ་འཁོར་བྲིས་ཏེ། མཚན་ཐོག་ཐག་རང་གི་ལྷའི་ཁྲོ་བོ་བསྒོམ་པར་བྱའོ། །དེའི་རྗེས་ལ་རྡོ་རྗེ་རིགས་ཀྱི་དངོས་གྲུབ་འགྲུབ་
[204a.6]པར་འགྱུར་རོ། །དེ་བས་ན། མངོན་ཤེས་ལྔར་ནི་བདག་གྱུར་ནས། །དངོས་གྲུབ་མཆོག་ནི་ཐོབ་པར་འགྱུར། །ཞེས་གསུངས་སོ། །འདོད་ཆགས་མངོན་ཤེས་བསྐྱེད་ནས་ཀྱང་། །ཞེས་བྱ་བ་ནི་འདོད་ཆགས་ནི་པདྨའི་རིགས་ཏེ། དེའི་མངོན་པར་ཤེས་པ་ལྔ་ནི་སྔ་མ་བཞིན་ནོ། །
[204a.7]དེ་བསྐྱེད་པ་ནི་མཚན་ཐོག་ཐག་སྔར་བཤད་པའི་ཚུལ་གྱིས་བསྒོམ་པར་བྱའོ། །དེ་ནས། དག་པའི་དངོས་གྲུབ་ཐོབ་པར་འགྱུར། །ཞེས་བྱ་བ་ནི་རང་བཞིན་གྱིས་དག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ནས་མངོན་སུམ་དུ་བྱེད་པའི་མཚན་ཉིད་དངོས་གྲུབ་ཐོབ་པར་འགྱུར་ཏེ། འཇིག་རྟེན་
[204b]
[204b.1]དབང་ཕྱུག་ཉིད་དུ་འགྱུར། །ཞེས་བྱ་བའི་དོན་ཏོ། །མཆོད་པ་ནི་ནོར་བུའི་རིགས་སོ། །དེའི་མངོན་ཤེས་ནི་སྔ་མ་བཞིན་ནོ། །དེ་བསྐྱེད་པ་ནི་སྔར་བཤད་པ་ཉིད་ཀྱི་ཆོ་གས་མངོན་སུམ་དུ་བྱས་པའོ། །མཉམ་པར་བཞག་པས་བསྒོམས་ན་ནི། །ཞེས་བྱ་བ་ལ་ནོར་བུའི་རིགས་ཀྱི་དཀྱིལ་འཁོར་
[204b.2]བྲིས་ལ། རང་གི་ལྷའི་མཚན་ཐོག་ཐག་བསྒོམ་མོ། །མངོན་ཤེས་ལྔར་ཡང་བདག་གྱུར་ནས། །ཞེས་བྱ་བ་ནི་མངོན་པར་ཤེས་པ་ལྔ་དང་ལྡན་པ་ཉིད་དུ་འགྱུར་རོ་ཞེས་བྱ་བའི་དོན་ཏོ། །དངོས་གྲུབ་ཀུན་གྱི་མཆོག་ཏུ་འགྱུར། །ཞེས་བྱ་བ་ནི་ནོར་བུའི་རིགས་ཀྱི་རང་བཞིན་གྱི་དོན་
[204b.3]ཐམས་ཅད་གྲུབ་པའི་དངོས་གྲུབ་ཐམས་ཅད་ཀྱི་དམ་པ་ཉིད་དུ་དེ་འགྱུར་རོ་ཞེས་བྱ་བའི་དོན་ཏོ། །དེ་ལྟར་མངོན་པར་ཤེས་པ་ལྔ་བསྐྱེད་པའི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དངོས་གྲུབ་བསྒྲུབ་པ་བསྟན་ནས། ད་ནི་སྔོན་དུ་བསྙེན་པ་ལ་སོགས་པའི་དུས་སུ་ཡང་བྱང་ཆུབ་
[204b.4]ཆེན་པོའི་ཡེ་ཤེས་ཀྱི་ཕྱག་རྒྱ་ཆེན་པོ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རྣལ་འབྱོར་པས་བསྒྲུབ་པར་བྱའོ་ཞེས་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བྱང་ཆུབ་ཀྱི་ཡེ་ཤེས་ཀྱི་དངོས་གྲུབ་ཀྱི་རྒྱུད་ནི། དེ་ནས་ཞེས་བྱ་བ་ལ་སོགས་
[204b.5]པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ཏེ། ཇི་སྐད་དུ་བཤད་པའི་རང་གི་ལྷའི་རྗེས་སུ་དྲན་པས་རྡོ་རྗེ་ལ་སོགས་པའི་ངེས་པའི་བྱང་ཆུབ་ཀྱི་ཡེ་ཤེས་སོ། །དེའི་དངོས་གྲུབ་ཀྱི་ཕྱག་རྒྱ་ཆེན་པོ་ལ་སོགས་པ་སྒྲུབ་པའོ། །དེ་སྟོན་པར་
[204b.6]བྱེད་པ་ནི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་ཟླ་བ་རྡོ་རྗེའི་རྣམ་པར་རྩེ་གཅིག་པས་ན་རྡོ་རྗེ་སེམས་དཔའི་ཏིང་ངེ་འཛིན་ཏོ། །དེ་ལ་གནས་པ་ནི་རྡོ་རྗེ་སེམས་དཔའི་ཏིང་ངེ་འཛིན་ལ་གནས་པའོ། །
[204b.7]སྦྱོར་བ་གང་གིས་རྡོ་རྗེ་སེམས་དཔའི་ཏིང་ངེ་འཛིན་ལ་གནས་ཤེ་ན། བདག་གིས་སངས་རྒྱས་དྲན་བྱེད་ཅིང་། །ཞེས་བྱ་བ་སྨོས་ཏེ། བདག་ཉིད་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་སྒོམ་པ་པོས་སངས་རྒྱས་རྗེས་སུ་དྲན་པར་བྱེད་ཅིང་
[205a]
[205a.1]ངོ་། །སངས་རྒྱས་བྱང་ཆུབ་ཅེས་བྱ་བ་ནི་སྙིང་གའི་ཟླ་བའི་རྡོ་རྗེར་དེ་བཞིན་གཤེགས་པ་དྲན་པ་དང་བཅས་པ་གང་ཡིན་པ་འདི་ནི་སངས་རྒྱས་བྱང་ཆུབ་བོ། །དེ་ཉིད་ཀྱི་ཡེ་ཤེས་ནི་དོན་ངེས་པ་སྟེ། གང་གིས་དོན་ཤེས་པ་འདིས་ཅིར་འགྱུར་ཞེ་ན། ཡེ་ཤེས་
[205a.2]འདི་བསྒོམས་ན་དངོས་གྲུབ་ཐོབ་པར་འགྱུར་ཞེས་བྱ་བ་སྨོས་སོ། །དེའི་ཕྱིར་སྔར་བསྙེན་པ་ལ་སོགས་པའི་དུས་སུ་དེ་བཞིན་གཤེགས་པའི་སྒྲུབ་པ་པོས་རྒྱུད་ཕྱི་མ་ལ་སོགས་པའི་དངོས་གྲུབ་སྒྲུབ་པར་འདོད་ན། རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་རྣམ་པར་བསམས་ཏེ།
[205a.3]རྡོ་རྗེའི་དབུས་སུ་རིག་པའི་ཡི་གེ་བཀོད་ལ། དེ་བཞིན་གཤེགས་པའི་ཕྱག་རྒྱ་ཆེན་པོ་ལ་སོགས་པ་སྒོམ་ཞིང་བཟླས་པ་བརྗོད་ན་རྡོ་རྗེ་སེམས་དཔའི་ཏིང་ངེ་འཛིན་གྱི་འབྲས་བུ་ཡིན་ནོ་ཞེས་གསུངས་པ་ཡིན་ནོ། །རྡོ་རྗེ་སེམས་དཔའ་ཏིང་འཛིན་གནས། །ཞེས་བྱ་བ་ནི་སྔ་མ་
[205a.4]བཞིན་ནོ། །ཕྱག་རྒྱ་ཆེན་པོ་སྒོམ་བྱེད་ཅིང་། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེེབས་པའི་མཐར་ཐུག་པ་དེའི་སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་པ་རྣམས་དང་། ཕྱག་རྒྱ་བཞི་པོ་རྣམས་དང་། དེའི་ཕྱག་རྒྱ་ཆེན་
[205a.5]པོ་ཡང་དང་ཡང་མངོན་དུ་བྱེད་ཅིང་བསྒོམ་པའོ། །བྱང་ཆུབ་ཆེན་པོའི་ཡེ་ཤེས་འདི། །ཞེས་བྱ་བ་ནི་སེམས་དཔའི་རྡོ་རྗེ་འདི་དང་བཅས་པའི་རྡོ་རྗེ་སེམས་དཔའ་ལ་སོགས་པ་བསྒོམ་པ་གང་ཡིན་པ་འདི་ནི་བྱང་ཆུབ་ཆེན་པོ་འདིའོ། །དེ་ཉིད་ཀྱི་ཡེ་ཤེས་ཞེས་བྱ་བ་ལ་སོགས་པ་ནི་
[205a.6]སྔ་མ་བཞིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་ཀྱང་རྒྱུད་ཕྱི་མ་ལས་བཤད་པའི་དངོས་གྲུབ་སྒྲུབ་པར་འདོད་ན་རང་གི་ལྷའི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་ལས་རྣམས་ཇི་ལྟ་བ་བཞིན་
[205a.7]དུ་བཅིངས་ལ་རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་རྩེ་ལྔ་པ་བསྐྱེད་དེ། རྡོ་རྗེའི་ལྟེ་བའི་དབུས་སུ་བཟླས་པའི་ཡི་གེ་རྣམ་པར་བསམས་ལ། དེ་ཉིད་བརྗོད་ཅིང་སེམས་དཔའི་རྡོ་རྗེའི་ཏིང་ངེ་འཛིན་གྱི་ཕྱག་རྒྱ་ཆེན་པོ་བསྒོམ་པར་བྱའོ། །ཁྲོ་བོའི་རྒྱལ་པོ་ཏིང་འཛིན་
[205b]
[205b.1]གནས། །ཞེས་བྱ་བ་ནི། འདོད་ཆགས་ལས་ནི་ཁྱོད་བྱུང་སྟེ། །བདག་ནི་ཁྲོ་བོའི་ཡིད་བསྒོམས་ན། །ཞེས་བྱ་བ་ནི་ཁྲོ་བོའི་ཏིང་ངེ་འཛིན་ཏེ། སྙིང་གར་ཟླ་བ་ལ་རྡོ་རྗེ་འབར་བ་བསྒོམ་ཞེས་བྱ་བའི་དོན་ཏོ། །ལག་པས་དམ་ཚིག་མཆོག་བཅིངས་ལ། །ཞེས་བྱ་བ་ནི་རྡོ་རྗེའི་རིགས་
[205b.2]ཐམས་ཅད་ཀྱི་ཕྱག་རྒྱ་ལ་དམ་ཚིག་མཆོག་ཅེས་བཤད་དོ། །རེ་ཞིག་ལག་པས་བཅིངས་པ་གང་ཡིན་པ་འདི་ནི་སྒྲུབ་པ་པོའི་ལག་པས་དམ་ཚིག་མཆོག་བཅིངས་པའོ། །བྱང་ཆུབ་ཆེན་པོའི་ཡེ་ཤེས་འདི། །ཞེས་བྱ་བ་ནི་སྔ་མ་བཞིན་ནོ། །འདི་སྐད་སྟོན་པ་ཡིན་ཏེ། སྔ་མ་
[205b.3]བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་ལ་བྱིན་གྱིས་བརླབ་པ་ལ་སོགས་པ་བྱས་ནས། རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་ཟླ་བར་ཧཱུཾ་ལས་རྡོ་རྗེ་འབར་བ་བསམ་པར་
[205b.4]བྱའོ། །དེའི་དབུས་སུ་བཟླས་པའི་སྙིང་པོ་བཀོད་དེ། དེ་ཉིད་བརྗོད་ཅིང་སེམས་དཔའི་ང་རྒྱལ་བསྐྱེད་ལ་མངོན་དུ་བྱས་ཏེ། དེ་ལ་དམིགས་ཏེ་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ། །འཇིག་རྟེན་དབང་ཕྱུག་ཏིང་འཛིན་གནས་ནི་འཇིག་རྟེན་དབང་ཕྱུག་གི་སྙིང་གའི་ཟླ་
[205b.5]བར་རྡོ་རྗེ་པདྨའི་རྣམ་པར་སེམས་རྩེ་གཅིག་པར་བྱའོ། །དེ་བཞིན་ཆོས་ཀྱི་ཕྱག་རྒྱར་བཟླས། །ཞེས་བྱ་བ་ནི་པདྨའི་རིགས་ཀྱི་ཕྱག་རྒྱ་ཐམས་ཅད་ལ་ཆོས་ཀྱི་ཕྱག་རྒྱ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་
[205b.6]འཁོར་ཆེན་པོ་ལས་བཤད་པའི་རང་གི་འཇིག་རྟེན་དབང་ཕྱུག་གི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ནས། རང་གི་ལྷའི་སྙིང་གར་ཟླ་བ་ལ་ཡི་གེ་ཧྲི་ལས་རྡོ་རྗེ་པདྨ། དེའི་དབུས་སུ་སྙིང་པོ་བཀོད་དེ། དེ་ཉིད་
[205b.7]བརྗོད་ཅིང་པདྨ་ལ་དམིགས་པའི་ཏིང་ངེ་འཛིན་གྱིས་ཕྱག་རྒྱ་ཆེན་པོ་ལ་སོགས་པ་བསྒོམ་པར་བྱའོ། །རྡོ་རྗེ་སྙིང་པོའི་ཏིང་འཛིན་གནས། །ཞེས་བྱ་བ་ནི་རྡོ་རྗེ་སྙིང་པོའི་སྙིང་གར་ཟླ་བའི་ནོར་བུ་དེའི་རྣམ་པར་སེམས་རྩེ་གཅིག་པའོ་ཞེས་བྱ་བའི་ཐ་ཚིག་གོ། །ལས་ཀྱི་ཕྱག་རྒྱ་ལས་ལེགས་
[206a]
[206a.1]བྱེད། །ཅེས་བྱ་བ་ནི་ནོར་བུའི་རིགས་ཀྱི་ཕྱག་རྒྱ་ཐམས་ཅད་ནི་ལས་ཀྱི་ཕྱག་རྒྱ་ཞེས་བཤད་དེ་སྔ་མ་བཞིན་ནོ། །དེའི་ལེགས་པ་ནི་དབང་བསྐུར་བ་ལ་སོགས་པ་ནོར་བུ་ཆེན་པོའི་རིགས་ཀྱི་གཟུགས་ཀྱི་དེ་བཞིན་གཤེགས་པ་ལ་སོགས་པ་སེམས་ཅན་ཐམས་ཅད་ཀྱི་ཁམས་ཐམས་
[206a.2]ཅད་བསྐྱེད་པའི་མཚན་ཉིད་ཅན་གྱི་ལས་བྱེད་པ་ནི། ལས་ཀྱི་ཕྱག་རྒྱ་ལས་ལེགས་བྱེད། །ཅེས་བྱའོ། །བྱང་ཆུབ་ཆེན་པོའི་ཡེ་ཤེས་འདི། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་
[206a.3]ལས་བཤད་པའི་ཆོ་གས་ནོར་བུའི་རིགས་ཀྱི་རང་གི་ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། རང་གི་སྙིང་གའི་ཟླ་བ་ལ་ཡི་གེ་ཏྲཾ་ལས་ནོར་བུ་ཆེན་པོ་རྣམ་པར་བསམས་ཏེ། དེའི་དབུས་སུ་བཟླས་པའི་ཡི་གེ་རྣམ་པར་བཀོད་ནས། དེ་ཉིད་བརྗོད་ཅིང་ལྷའི་ཕྱག་རྒྱ་ཆེན་
[206a.4]པོ་བཅིངས་ཏེ། རྡོ་རྗེ་ནོར་བུའི་ཏིང་ངེ་འཛིན་བསྒོམ་པར་བྱའོ། །རང་གི་ལྷའི་རྣལ་འབྱོར་བྱས་ལ་སྙིང་གའི་ཟླ་བའི་དཀྱིལ་འཁོར་ལ་རྡོ་རྗེ་དང་། རིན་ཆེན་དང་། པདྨ་དང་། སྣ་ཚོགས་རྡོ་རྗེ་དེ་རྣམས་ལ། དེ་རྣམས་ཀྱི་རིག་པའི་ཡི་གེ་བསྒོམ་པར་བྱའོ་ཞེས་བྱ་བའི་དོན་འདི་བཤད་པའི་
[206a.5]རྒྱུད་ལས་བཅོམ་ལྡན་འདས་ཀྱིས་བཤད་པ་ཡིན་ནོ། །ཁ་ཅིག་ནི་དེ་ལྟར་གྱུར་ན་ནོར་བུའི་རིགས་ཀྱི་ཆོས་ཉིད་ཀྱི་རྒྱུད་ལས་ཀྱང་འགལ་བར་འགྱུར་ཏེ། གང་གི་ཕྱིར་ཐམས་ཅད་ཀྱི་རྡོ་རྗེའི་བདག་ཉིད་ཀྱི་རྡོ་རྗེ་སྙིང་གར་བསྒོམ་པར་བྱའོ་ཞེས་བྱ་བ་དེས་ནི་འདིར་ནི་ནོར་བུ་ཆེན་པོར་བསྒོམས་
[206a.6]ནས་རྡོ་རྗེ་ནོར་བུའི་རིགས་ཐམས་ཅད་ཀྱི་ཕྱག་རྒྱ་བསྒྲུབ་པར་བྱ་བ་དང་འགལ་བར་འགྱུར་རོ་ཞེས་ཟེར་རོ། །གཞན་ནི་འགལ་བ་མེད་དེ། ཅིའི་ཕྱིར་ཞེ་ན། སྨྲས་པ། འདི་ནི་རིགས་པའི་ཁྱད་པར་གཞན་སྒྲུབ་པའི་ངོ་བོ་ཡིན་པའི་ཕྱིར་རོ། །གལ་ཏེ་དེ་ལྟར་ཁས་མི་ལེན་ན་རྩ་བའི་རྒྱུད་
[206a.7]དང་ཆོས་ཉིད་ལ་སོགས་པའི་རྒྱུད་དང་འགལ་བར་འགྱུར་ཏེ། དེ་ལ་དམ་ཚིག་གི་ཕྱག་རྒྱ་དང་། ཆོས་དང་ལས་དང་། ཕྱག་རྒྱ་ཆེན་པོ་རྣམས་སོ་སོར་སྒྲུབ་པར་བཤད་པས། ལས་ལེགས་བྱེད་པའི་རྡོ་རྗེ་ནི་རྡོ་རྗེ་སྣ་ཚོགས་པ་བསྒོམ་པའི་མཚན་ཉིད་མ་ཡིན་པས་འདིར་ཆོས་ཉིད་
[206b]
[206b.1]ཀྱི་བྱང་ཆུབ་ཆེན་པོའི་ཡེ་ཤེས་ཀྱི་དངོས་གྲུབ་ཀྱི་རྒྱུད་ནི་སྙིང་གར་ཟླ་བ་རྡོ་རྗེ་བསྒོམ་པའི་མཚན་ཉིད་ཅན་དུ་འདི་འདོད་པ་ཡིན་ནོ། །གང་གི་ཕྱིར་སྒྲུབ་པ་བྱེད་པའི་ཁྱད་པར་བསྟན་པའི་ཕྱིར། རྒྱུད་ཕྱི་མ་ལ་སྒྲུབ་པ་རྣམ་པ་དུ་མ་གསུངས་པ་ཡིན་ནོ། །དེ་ལྟར་དེ་བཞིན་གཤེགས་པའི་
[206b.2]རིགས་ཀྱི་བྱང་ཆུབ་ཆེན་པོ་ཡེ་ཤེས་ཀྱི་དངོས་གྲུབ་ཀྱི་རྒྱུད་བསྟན་ནས། ད་ནི་མཚན་མ་ཐོབ་པ་རྣམས་ཀྱིས་སྔར་བཤད་པའི་ཚུལ་གྱིས་མངོན་པར་ཤེས་པ་སྐྱེས་པར་གྱུར་ནས། དེ་བཞིན་གཤེགས་པ་ཐམས་ཅད་ལ་སོགས་པའི་ཆ་ལུགས་ཀྱིས་དེའི་བརྟུལ་ཞུགས་སྤྱོད་པས་
[206b.3]དེ་བཞིན་གཤེགས་པ་ལ་སོགས་པའི་རིགས་ཐམས་ཅད་རྗེས་སུ་མཉེས་པར་བྱ་བ་དང་། དབང་དུ་བྱས་ནས་དེ་བཞིན་གཤེགས་པ་ཐམས་ཅད་ལ་སོགས་པ་ཐམས་ཅད་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་
[206b.4]པའི་རིགས་ཐམས་ཅད་རྗེས་སུ་མཉེས་པ་དང་། དབང་དུ་བྱེད་པའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པའི་རིགས་ཐམས་ཅད་ནི་སྔར་བཤད་ཟིན་ཏོ། །ཇི་སྐད་བཤད་པ་དེ་དག་གི་སྔོན་དུ་བསྙེན་པས་མངོན་པར་ཤེས་པར་བསྐྱེད་པ་ལ་ཆགས་པ་མེད་
[206b.5]པ་དེ་ལ་རྗེས་སུ་ཆགས་པ་ནི་བརྟུལ་ཞུགས་སོ། །དེའི་དངོས་གྲུབ་ནི་དེ་བཞིན་གཤེགས་པ་ལ་སོགས་པའི་ཕྱག་རྒྱ་ཆེན་པོ་ལ་སོགས་པ་བསྐྱེད་པའོ། །དེ་སྟོན་པར་བྱེད་པའི་རྒྱུད་ནི་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །ཉིད་ཀྱི་སངས་རྒྱས་བྱང་ཆུབ་ཕྱིར། །སེམས་
[206b.6]ཅན་དོན་རྣམས་རབ་བྱེད་ཅིང་། །ཞེས་བྱ་བ་ནི་མངོན་པར་ཤེས་པ་ལྔ་ཐོབ་ནས་རྫུ་འཕྲུལ་གྱི་སྟོབས་ཀྱིས་སེམས་ཅན་གྱི་དོན་ཅི་ནུས་པ་བྱེད་པའམ། རང་བཞིན་གྱི་ནུས་པས་སྟོབས་སྟོན་པར་བྱེད་པ་ལ་སོགས་པ་བྱེད་ཅིང་། སེམས་ཅན་གྱི་དོན་ནི་ཕན་པ་དང་བདེ་བ་དམ་པ་འགྲུབ་པའི་ཕྱིར། སངས་
[206b.7]རྒྱས་སུ་འགྱུར་བར་བྱའོ་ཞེས་བྱ་བ་མངོན་དུ་བྱས་ལ་ཐུན་བཞིའི་དེ་བཞིན་གཤེགས་པ་བསྒོམ་པ་ཇི་སྐད་བཤད་པ་བཞིན་དུ་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་སྒྲུབ་པ་པོས་སངས་རྒྱས་ཐམས་ཅད་རྗེས་སུ་མཉེས་པར་འགྱུར་རོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་རྣལ་
[207a]
[207a.1]འབྱོར་པས་སྔར་བཤད་པའི་ཚུལ་གྱིས་དེ་བཞིན་གཤེགས་པའི་མངོན་པར་ཤེས་པ་བསྐྱེད་ལ། ཟླ་བ་གཅིག་རབ་ཏུ་བྱུང་ནས་བསླབ་པ་ཐམས་ཅད་ཀྱི་སྡོམ་པ་ཡང་དག་པར་བསྲུངས་ལ། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་ཆ་ལུགས་འཛིན་པས་ཏིང་ངེ་འཛིན་རྣམ་པ་གསུམ་
[207a.2]བསྒོམ་པ་བརྩམ་པར་བྱའོ། །རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་གྱི་སྒྲུབ་པ་པོས་རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཕྱི་དང་ནང་གི་མཆོད་པ་ཐམས་ཅད་ཀྱིས་ཡང་དག་པར་མཆོད་ལ། ཉིན་རེ་ཞིང་ཐུན་བཞིའི་སྦྱོར་བས་བསྒོམ་པར་བྱའོ། །སེམས་ཅན་ཐམས་ཅད་སངས་རྒྱས་དང་། །ཀུན་གྱི་གཟི་བརྗིད་
[207a.3]ཅན་ཉིད་དོ། །ཇི་བཞིན་པ་ནི་འདུལ་བ་ཉིད། །ལས་ཀྱི་སེམས་དཔའི་དངོས་གྲུབ་བྱེད། །ཅེས་བཤད་པ་གང་ཡིན་པ་དེ་རྗེས་སུ་སྤྱད་པར་བྱའོ། །ཇི་སྐད་དུ་བཤད་པའི་བསམས་པས་དེ་བཞིན་གཤེགས་པ་ཐམས་ཅད་བསམ་པར་བྱའོ། །དེ་ལྟ་བུ་ཟླ་བ་གཅིག་གི་སྦྱོར་བས་དེ་བཞིན་གཤེགས་པ་ཐམས་ཅད་རྗེས་སུ་ཆགས་པའི་དངོས་གྲུབ་ཏུ་འགྱུར་
[207a.4]རོ། །ཇི་ལྟར་ཡུལ་དང་ལྡན་གྱུར་ནས། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་རྣམས་ལ་སངས་རྒྱས་ཀྱི་པདྨ་ལ་སོགས་པ་ཐམས་ཅད་ཀྱིས་བརྒྱན་པའི་ཡུལ་དེས་ཡུལ་དང་ལྡན་པར་བྱས་པའོ། །ཇི་ལྟ་བུའི་ཡུལ་དང་ལྡན་པར་འགྱུར་བའི་རྣལ་འབྱོར་པས་རྡོ་རྗེ་སེམས་དཔའ་ལ་སོགས་པ་
[207a.5]དེ་བཞིན་གཤེགས་པའི་རིགས་ཏེ། རྡོ་རྗེ་སེམས་དཔའ་ནས་བརྩམས་ཏེ་རྡོ་རྗེ་འབེེབས་པའི་མཐར་ཐུག་པའི་བདག་ཉིད་བསྒོམ་ཞིང་བསྒྲུབ་པར་བྱ་སྟེ་བཛྲ་སཏྭ་སུ་ར་ཏ་སྟྭཾ་ཞེས་བྱ་བ་ནས། བཛྲ་ཨཱ་བེེ་ཤ་སུ་ར་ཏ་སྟྭཾ་ཞེས་བྱ་བའི་བར་དུ་ཟློས་ཤིང་། དེ་ཁོ་ན་ཉིད་བསྐུལ་བ་ཉིད་འདིས་མྱུར་དུ་མཉེས་པར་གྱུར་ནས་དེ་
[207a.6]བཞིན་གཤེགས་པའི་རིགས་ཀྱི་རང་བཞིན་རྡོ་རྗེ་སེམས་དཔའ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་མངོན་པར་ཤེས་པ་ལྔ་བསྐྱེད་དེ། དེ་བཞིན་གཤེགས་པ་ལྔའི་ཅོད་པན་དང་། ལག་གདུབ་དང་། རྣ་ཆ་དང་། དཔུང་རྒྱན་
[207a.7]ལ་སོགས་པའི་རྡོ་རྗེ་སེམས་དཔའི་རྒྱན་གྱིས་བདག་ཉིད་བརྒྱན་པར་བྱས་ལ་རྡོ་རྗེ་སེམས་དཔའི་ཆ་ལུགས་སུ་བདག་ཉིད་བསྐྱེད་ལ། མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་ཡང་དག་པར་མཆོད་ལ། རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཟླ་བ་ཕྱེད་དུ་བསྒོམ་པར་བྱའོ། །ཕྱིས་གནང་བ་མནོས་ལ་ཇི་
[207b]
[207b.1]སྐད་བཤད་པའི་དེ་ཁོ་ན་ཉིད་ཀྱིས་བསྐུལ་བར་བྱ་སྟེ། དེ་ལྟར་ན་ཟླ་བ་ཕྱེད་ཀྱི་སྦྱོར་བས་དེ་བཞིན་གཤེགས་པའི་རིགས་མཉེས་པར་འགྱུར་རོ། །སངས་རྒྱས་བཀའ་ནི་བསྲུང་བ་དང་། །ཞེས་བྱ་བ་ནི་ཇི་སྐད་བཤད་པའི་གནང་བ་དེ་ལྟར་བྱེད་དོ་ཞེས་བྱ་བའི་དོན་ཏོ། །མ་རུངས་པ་རྣམས་ལ་མངོན་སྤྱོད་བྱས་ཤིང་བསད་
[207b.2]པས་དགེ་བ་བཅུ་ལ་སོགས་པའི་ལས་ཀྱི་ལམ་འཇུག་པའོ། །གང་གིས་གསོད་པར་བྱེད་ཅེ་ན། ཁྲོས་པ་ཡི་ནི་ཞེས་བྱ་བ་སྨོས་ཏེ་རྡོ་རྗེ་ཧཱུཾ་མཛད་ལ་སོགས་པའི་བྱེད་པ་པོར་འགྱུར་བའི་ཁྲོ་བོས་མ་རུངས་པའི་སེམས་ཅན་རྣམས་སྦྱོང་ཞིང་བསད་པར་བྱས་པར་གྱུར་པས་རྡོ་རྗེའི་རིགས་སུ་མཉེས་པར་འགྱུར་རོ། །འདི་སྐད་
[207b.3]སྟོན་པ་ཡིན་ཏེ། སྔར་བཤད་པའི་ཚུལ་གྱིས་རྡོ་རྗེ་རིགས་ཀྱི་རྣལ་འབྱོར་པས་མངོན་པར་ཤེས་པ་བསྐྱེད་དེ། ཁྲོས་པར་གྱུར་པའི་རྣལ་འབྱོར་ཆེན་པོ་དང་ལྡན་པས་དེ་བཞིན་གཤེགས་པ་ཐམས་ཅད་དང་། རྡོ་རྗེའི་རིགས་རྣམས་ཀྱིས་ནམ་མཁའི་ཁམས་ཀུན་དུ་བཀང་ལ་དེ་ནས་དེ་རྣམས་ཕྱག་བྱ་སྟེ། ཕྱག་ན་རྡོ་རྗེ་མཆོད་
[207b.4]ནས་མགོ་བསྒྱུར་བ་དང་། མགོ་གསིག་པ་དང་། གོས་མེད་པའམ་གོས་དང་བཅས་པས་འཇིག་རྟེན་པ་ཐམས་ཅད་ལ་ཁྲོས་ཏེ་ཁྲོ་བོའི་ཚིག་བརྗོད་ཅིང་། སྒེག་མོ་ལ་སོགས་པའི་ཕྱག་རྒྱས་གར་བྱས་ནས། དེ་བཞིན་གཤེགས་པ་ཐམས་ཅད་ཡིད་ཀྱིས་བྲིས་ཏེ། མཚམས་བཅིང་བ་ལ་སོགས་པ་བྱས་ནས། སྲོད་ཀྱི་དུས་
[207b.5]སུ་ཁྲུས་བྱས་ཏེ། དཔལ་རྡོ་རྗེ་ཧཱུཾ་མཛད་ལ་སོགས་པའི་ཆ་ལུགས་ཀྱིས་གདུ་བུ་དང་། རྣ་ཆ་དང་། ཅོད་པན་དང་། སངས་རྒྱས་ཀྱི་ཕྲེང་བས་བདག་ཉིད་བརྒྱན་པར་བྱས་ཏེ། འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པའི་དཀྱིལ་འཁོར་གྱི་ཁང་པར་ཏིང་ངེ་འཛིན་རྣམ་པ་གསུམ་བསྒོམ་པ་ནས་བརྩམས་ཏེ། བསྒྲུབས་ལ་
[207b.6]མཆོད་པ་ཐམས་ཅད་ཀྱིས་ཡང་དག་པར་མཆོད་ལ། དཀྱིལ་འཁོར་པའི་སྔགས་བརྒྱ་རྩ་བརྒྱད་བཟླས་ཏེ། གདུག་པའི་སེམས་ཅན་རྣམས་ལ་དེ་བཞིན་གཤེགས་པའི་བཀའ་ཡིས་རྣམ་པར་སྦྱངས་ཏེ། ཐུགས་རྗེ་ཆེན་པོའི་ཁྲོ་བོས་བསད་པ་དེ་ལྟ་བུ་ཟླ་བ་ཕྱེད་ཙམ་གྱི་སྦྱོར་བས་རྡོ་རྗེའི་རིགས་མཉེས་པར་བྱེད་དོ། །ཆགས་པའང་
[207b.7]ཀུན་དུ་བལྟས་པ་དང་། །ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བདག་མེད་པའི་མཚན་ཉིད་ཅན་གྱི་པདྨའི་རིགས་ཀྱི་ལྟ་བས་སོ་སོར་བལྟ་བ་ཡིན་ནོ་ཞེས་བྱ་བའི་དོན་ཏོ། །དེ་བཞིན་གཤེགས་པ་དང་པདྨའི་རིགས་ཀྱིས་ཕྱོགས་བཅུའི་དེ་བཞིན་གཤེགས་པ་ལ་སོགས་པ་དང་། སེམས་
[208a]
[208a.1]ཅན་གྱི་ཁམས་རྣམས་པདྨའི་རིགས་སུ་བྱེད་པ་འདི་ནི་འདིར་བྱས་པའོ། །སེམས་ཅན་ཐམས་ཅད་ལ་ཕན་པ་དང་བདེ་བས་སྡུད་པའི་མཚན་ཉིད་ཅན་འདི་བསྒོམ་པའོ། །སྙིང་རྗེས་ཞེས་བྱ་བ་ནི་སྙིང་བརྩེ་བ་ཉིད་ཀྱིས་ནི་སྙིང་རྗེ་སྟེ། པདྨའི་རིགས་དེ་ཉིད་ཀྱིས་སེམས་ཅན་
[208a.2]གྱི་ཁམས་ཐམས་ཅད་པདྨའི་རིགས་ཀྱི་རང་བཞིན་དུ་བསྐྱེད་ཅིང་བསྒོམས་ཏེ་དམྱལ་བ་ལ་སོགས་པའི་སྡུག་བསྔལ་རྫུ་འཕྲུལ་གྱི་སྟོབས་ཀྱིས་བསལ་ནས། བཅིང་བ་ལ་སོགས་པ་དང་བྲལ་བར་བྱ། །ཞེས་བྱ་བའི་དོན་ཏོ། །ཆོས་སྨྲ་དང་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་
[208a.3]པར་དག་པའོ་ཞེས་བརྗོད་པའི་ངང་ཚུལ་གྱིས་ཆོས་སྨྲའོ། །མི་འཇིགས་ཀུན་ལ་སྦྱིན་བྱེད་རྣམས། །ཞེས་བྱ་བ་ནི་འཇིགས་པའི་སེམས་ཅན་ཀུན་ལ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་བསྟན་པས་དམྱལ་བ་ལ་སོགས་པའི་འཇིགས་པ་སེལ་བ་འདི་ནི་མི་འཇིགས་པའི་སྦྱིན་པའོ། །
[208a.4]སྔགས་ཀྱི་དངོས་གྲུབ་ཀྱི་སྟོབས་ཀྱིས་གསོད་པ་དང་འཆིང་བ་ལ་སོགས་པའི་འཇིགས་པ་སེལ་བ་འདི་ནི་པདྨའི་རིགས་ཀྱི་རྣལ་འབྱོར་པས་སངས་རྒྱས་མཉེས་པར་བྱེད་པའོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་སྔ་མ་བཞིན་དུ་
[208a.5]འཇིག་རྟེན་དབང་ཕྱུག་གི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ་མངོན་པར་ཤེས་པ་ལྔ་བསྐྱེད་ནས། རང་གི་ལྷའི་རྣལ་འབྱོར་པའམ། པདྨའི་རིགས་ཀྱི་རྣལ་འབྱོར་པས་རང་གི་སྙིང་གའི་ཟླ་བ་ལ་ཡི་གེ་ཧྲི་དང་། དེའི་སྟེང་དུ་ཧཱུཾ་བཀོད་ལ། དེའི་སྟེང་དུ་ཟླ་བའི་དཀྱིལ་འཁོར།
[208a.6]དེ་ནས་རང་གི་སྔགས་བརྗོད་ཅིང་། བྱང་ཆུབ་སེམས་ཀྱི་ཡི་གེ་ཧཱུཾ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་ཡི་གེ་ཧྲི་རྣམ་པར་བསམས་ཏེ། བྱང་ཆུབ་ཀྱི་སེམས་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་རང་གི་ལྷའི་གཟུགས་སམ། རིགས་ཀྱི་རང་བཞིན་དུ་བསྒོམ་པར་བྱའོ། །
[208a.7]དེ་ནས་དགོངས་ཀའི་དུས་ནས་བརྩམས་ཏེ། སྟོང་རྩ་བརྒྱད་བཟླས་པར་བྱའོ། །པདྨའི་རིགས་དང་རྗེས་སུ་མཐུན་པའི་ཅོད་པན་ལ་སོགས་པའི་རྒྱན་ཐམས་ཅད་ཀྱིས་བདག་ཉིད་བརྒྱན་པར་བྱས་ལ། ཆགས་པ་ཀུན་དུ་ལྟ་བ་དང་། བྱམས་པ་དང་སྙིང་རྗེ་ཆོས་སྨྲ་བ་དང་། སེམས་
[208b]
[208b.1]ཅན་ཀུན་ལ་མི་འཇིགས་པ་སྦྱིན་པར་བྱེད་པ་རྣམས་རྗེས་སུ་སྤྱད་ལ་བཟླས་པ་བྱའོ། །དེ་ལྟ་བུའི་སྦྱོར་བ་འདིས་ཞག་བདུན་ནི་པདྨའི་རིགས་རྗེས་སུ་མཉེས་པར་འགྱུར་རོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་གྱི་ཕྱག་རྒྱས། དེ་བཞིན་གཤེགས་པ་ཐམས་ཅད་
[208b.2]ལ་དབང་བསྐུར་བ་རབ་ཏུ་སྦྱིན་པ་དང་། ནམ་མཁའ་ཐམས་ཅད་མཉམ་པའི་ཏིང་ངེ་འཛིན་གྱི་གཟུང་བ་དང་འཛིན་པའི་རྣམ་པར་རྟོག་པ་སྤངས་ཏེ། ཕུལ་དུ་བྱུང་བའི་སྦྱིན་པ་ནི་རབ་ཏུ་སྦྱིན་པའོ། །ནོར་བུའི་རིགས་ཀྱི་རང་བཞིན་གྱི་བདག་ཉིད་དུ་བསྒོམས་ལ། ནོར་བུའི་རིགས་ཀྱི་ངོ་བོའི་ནོར་བུ་
[208b.3]བསྡུས་པས་སྦྱིན་པ་བསགས་པའོ། །ཐམས་ཅད་ལ་དབང་བསྐུར་བ་ལ་སོགས་པ་བྱིན་པས་སངས་རྒྱས་ཉིད་ཐོབ་པའི་རྒྱུ་མཚན་རྗེས་སུ་སྒྲུབ་པ་ཡིན་པ་དེའི་ཕྱིར། དེ་ཡང་སངས་རྒྱས་དོན་དུ་སྦྱོར། །ཞེས་གསུངས་སོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ནོར་བུའི་
[208b.4]རིགས་ཀྱི་རྣལ་འབྱོར་པས་ནོར་བུའི་རིགས་ཀྱི་མངོན་པར་ཤེས་པ་བསྐྱེད་དེ། ནོར་བུའི་རིགས་ཀྱི་རྣལ་འབྱོར་བྱས་ལ་དེ་བཞིན་གཤེགས་པ་དང་ནོར་བུའི་རིགས་ཀྱིས་ནམ་མཁའི་ཁམས་གང་བར་བསམ་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་དང་། ནོར་བུའི་རིགས་ཀྱི་རྡོ་རྗེའི་
[208b.5]ནོར་བུའི་ཕྱག་རྒྱས་དབང་བསྐུར་བ་ཐམས་ཅད་གཟུགས་བརྙན་ཙམ་དུ་ངེས་པར་བསྒོམ་སྟེ། ཕྱི་རོལ་གྱི་མཆོད་པའམ་ཡིད་ཀྱིས་མཆོད་ལ། བཅོམ་ལྡན་འདས་ནམ་མཁའི་སྙིང་པོ་མདུན་དུ་བཞག་ལ། བརྒྱ་རྩ་བརྒྱད་བཟླས་ཤིང་བཅོམ་ལྡན་འདས་ཐམས་ཅད་ཀྱི་རྒྱལ་པོའི་བདག་པོ་ནམ་
[208b.6]མཁའི་སྙིང་པོ་ནི་བདག་ཡིན་ནོ་ཞེས་རྒྱལ་པོར་བསྒོམ་པར་བྱའོ། །རིམ་པ་འདི་ཉིད་ཀྱིས་ཞག་བརྒྱད་བཟླས་པ་དེ་ལྟ་བུས་ནོར་བུའི་རིགས་རྗེས་སུ་མཉེས་པར་འགྱུར་རོ། །ནོར་བུའི་རིགས་དང་མཐུན་པའི་རྒྱན་ཐམས་ཅད་ཀྱིས་བདག་ཉིད་བརྒྱན་པར་བྱས་ནས་ཆོ་ག་ཐམས་ཅད་རྗེས་
[208b.7]སུ་སྤྱད་པར་བྱའོ། །དེ་ལྟར་དེ་བཞིན་གཤེགས་པའི་རིགས་ཐམས་ཅད་རྗེས་སུ་མཉེས་པར་བྱེད་པ་བཤད་ནས། ད་ནི་དེ་དག་དབང་དུ་བྱེད་པ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ་དེ་ལ་དབང་དུ་བྱེད་པ་ནི་རང་ཉིད་དང་། ནོར་དང་བཅས་པ་དབང་དུ་བྱེད་པ་སྟེ། རྗེས་སུ་
[209a]
[209a.1]ཆགས་པས་མངོན་པར་བྱེད་པ་དང་། དགའ་བ་སྐྱེད་པར་བྱེད་དོ་ཞེས་བྱ་བའི་དོན་ཏོ། །འདོད་ཆགས་ལ་ནི་བརྙས་མི་བྱ། །ཞེས་བྱ་བ་ནི་དེ་ལ་འདོད་ཆགས་ནི་ཆོས་བདག་མེད་པའི་ཆགས་པའོ། །སེམས་ཅན་སྨིན་ཅིང་གྲོལ་བར་བྱེད་པའི་ཆགས་པ་ནི་བཅོམ་
[209a.2]ལྡན་འདས་རྡོ་རྗེ་འཛིན་པ་ཆེན་པོ་དེ། དེ་བཞིན་གཤེགས་པའི་རིགས་ཀྱི་ངོ་བོ་རྡོ་རྗེ་སེམས་དཔའ་དེ་ལ་བརྙས་པར་མི་བྱ་སྟེ། སངས་རྒྱས་བྱང་ཆུབ་དོན་དུ་གཉེར་བས་བསྒོམ་པར་བྱ་ཞིང་རྒྱུན་མི་འཆད་པར་མངོན་དུ་བྱའོ། །ཅིའི་ཕྱིར་བརྙས་པར་མི་བྱ་ཞེ་ན། གང་གི་ཕྱིར་ཆོས་བདག་མེད་
[209a.3]པའི་ཆགས་པ་གཟུང་བ་དང་འཛིན་པའི་དྲི་མ་དང་བྲལ་བས་སེམས་ཅན་སྨིན་ཅིང་གྲོལ་བར་བྱེད་པའི་ཆགས་པས་མི་དགེ་བ་བཅུའི་ལས་ཀྱི་ལམ་ལས་སློང་བར་བྱེད་པ་དེ་ཉིད་ཀྱི་ཕྱིར་རོ། །དེ་ལྟར་རྣམ་པར་དག་པ་དེ་སྦྱིན་པའོ། །འདི་ལྟར་རྣམ་པར་དག་པའི་སྦྱོར་བ་དང་ལྡན་པ་ལ་སྨད་
[209a.4]པར་མི་བྱ་བ་དེ་བཞིན་དུ་བདེ་བ་སྦྱིན་པ་ལ་ཡང་ཡིན་ནོ། །གང་གི་ཕྱིར་ཡོན་ཏན་དེ་དང་ལྡན་པས་མངོན་དུ་བྱེད་པའི་རྣལ་འབྱོར་པ་འདི་ནི་འཇིག་རྟེན་དང་འཇིག་རྟེན་ལས་འདས་པའི་བདེ་བ་སྐྱེད་པར་བྱེད་པས་ན་འདི་བདེ་བ་སྦྱིན་པའོ། །སེམས་ཅན་ཀུན་གྱི་དོན་དུ་སྤྱོར། །ཞེས་བྱ་བ་ནི་སེམས་ཅན་ཐམས་ཅད་
[209a.5]ལ་སངས་རྒྱས་ལ་སོགས་པའི་བསྒོམ་པ་ནི་སེམས་ཅན་ཐམས་ཅད་ཀྱི་དོན་ཏོ། །རྒྱུའི་སྦྱོར་བ་དེས། འདི་ནི་སངས་རྒྱས་དབང་དུ་བྱེད། །ཅེས་བྱ་བ་ནི་འདིར་འདོད་ཆགས་ཀྱི་བདག་ཉིད་བསྒོམས་པའི་བསོད་ནམས་དང་ཡེ་ཤེས་དག་སེམས་ཅན་ཐམས་ཅད་ཀྱི་དོན་དུ་བསྒོམ་པ་གང་ཡིན་པ་
[209a.6]དེ་ནི་སངས་རྒྱས་དབང་དུ་བྱེད་པ་སྟེ། སྦྱོར་བ་དེས་སངས་རྒྱས་རང་དབང་དུ་བྱེད་དོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་རྣལ་འབྱོར་བྱས་ལ། རྗེས་སུ་ཆགས་པའི་ཏིང་ངེ་འཛིན་ལ་གནས་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་
[209a.7]འབེེབས་པའི་མཐར་ཐུག་པའི་རྡོ་རྗེ་དབྱིངས་ལ་སོགས་པའི་དཀྱིལ་འཁོར་གཟུགས་བརྙན་ཙམ་གྱི་སྦྱོར་བས་བསྒོམ་པར་བྱའོ། །སེམས་ཅན་ཐམས་ཅད་སངས་རྒྱས་ལ་སོགས་པའི་གཟུགས་ཀྱི་བདག་ཉིད་དུ་བསྐྱེད་པར་བྱའོ། །དེ་ལྟར་ན་དེ་བཞིན་གཤེགས་པ་དེས་དབང་དུ་བྱེད་
[209b]
[209b.1]པར་འགྱུར་རོ། །འདོད་བསྟན་བདེ་བའི་བདག་ཉིད་ཀྱིས། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་འདོད་པ་སྟེ། བཅོམ་ལྡན་འདས་འདོད་པ་སེམས་དཔའ་ནི་ཞེས་གསུངས་པའི་ཕྱིར་དེ་ནི་དེ་བཞིན་གཤེགས་པའི་རིགས་ཀྱི་རང་བཞིན་བཅོམ་ལྡན་འདས་རྡོ་རྗེ་
[209b.2]སེམས་དཔའ་བསྟན་པ་ནི་བསྒོམས་པའོ། །བདེ་བའི་བདག་ཉིད་ནི་སེམས་བདེ་བའོ། །སུ་ར་ཏ་སྟྭཾ་ཞེས་བྱ་བ་ནི་དེ་ཁོ་ན་ཉིད་བསྐུལ་བའི་སྙིང་པོ་ཟློས་ཤིང་བསྒྲུབས་ནས་སོ། །ཇི་ལྟར་སྒྲུབ་ཅེ་ན། དེ་ཉིད་བསྐུལ་ན་དབང་བསྐུར་འགྱུར། །ཞེས་བྱ་བ་སྨོས་ཏེ། སུ་ར་ཏ་སྟྭཾ་ཞེས་བྱ་བའི་དེ་ཁོ་
[209b.3]ན་ཉིད་བརྗོད་པས་རྡོ་རྗེ་སེམས་དཔའ་དབང་དུ་བྱེད་ཅེས་བྱ་བའི་དོན་ཏོ། །དེའི་དོན་འདི་སྐད་སྟོན་པ་ཡིན་ཏེ། སྔར་བཤད་པའི་རྗེས་སུ་ཆགས་པའི་སྦྱོར་བས་རྗེས་སུ་ཆགས་པར་བྱེད་པ་ཉིད་བསྒོམ་ཞིང་སེམས་ཀྱིས་མངོན་དུ་བྱེད་པ་ལ། སུ་ར་ཏ་སྟྭཾ་ཞེས་བྱ་བས་ཇི་སྲིད་བཅོམ་ལྡན་འདས་མངོན་
[209b.4]སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྐུལ་བར་བྱའོ། །དེ་ནས་དཀྱིལ་འཁོར་ལ་སོགས་པ་རྣམས་ལ་མཚན་ཐོག་ཐག་བསྒོམས་ན་ངེས་པར་འགྲུབ་པར་འགྱུར་རོ། །སངས་རྒྱས་བཀའ་ནི་ཐོབ་པར་འགྱུར། །སངས་རྒྱས་བཀའ་ཡིས་སེམས་ཅན་རྣམས། །དག་བྱ་ཞེས་
[209b.5]བྱ་བ་ནི་བཤད་ཟིན་ཏོ། །ལུས་ཅན་སྐྱབས་སྦྱིན་དང་ཞེས་བྱ་བ་ནི་ལྷ་ལ་སོགས་པའི་སེམས་ཅན་ཆོས་དང་མི་ལྡན་པ་རྣམས་དང་། ལྷ་མ་ཡིན་ལ་སོགས་པ་གདུག་ཅིང་མ་རུངས་པའི་སེམས་ཅན་རྣམས་གསོད་པ་ནི་སྐྱབས་སྦྱིན་པའི་དོན་ཏོ། །སངས་རྒྱས་བསྟན་པ་བསྲུང་བའི་ཕྱིར། །
[209b.6]ཞེས་བྱ་བ་ནི་སངས་རྒྱས་རྣམས་ཀྱི་བསྟན་པའི་བཀའ་དེ་སེམས་ཅན་གང་གིས་ཁྱད་དུ་གསོད་པར་བྱེད་ཅིང་བསླབ་པར་མི་བྱའོ་ཞེས་འགོག་པར་བྱེད་ཅིང་། འཇིག་རྟེན་རྒྱང་ཕན་ལ་སོགས་པའི་བསྟན་བཅོས་ལ་རབ་ཏུ་འཇོག་པར་བྱེད་པ་དང་། གཙུག་ལག་ཁང་དང་དགེ་སློང་དང་དགེ་
[209b.7]སློང་མ་དང་། དམ་པའི་ཆོས་ལ་སོགས་པ་འཇིག་པར་བྱེད་པ་དེ་ལྟ་བུ་ལ་སོགས་པ་གདུག་ཅིང་མ་རུངས་པ་རྣམས་བསད་པ་ནི་སངས་རྒྱས་ཀྱི་བསྟན་པ་བསྲུང་བའོ། །བསད་ན་ཡང་ནི་དབང་དུ་འགྱུར། །ཞེས་བྱ་བ་ནི་དེ་ལྟར་རྡོ་རྗེ་རིགས་ཀྱི་རྣལ་འབྱོར་པས་ཞེ་སྡང་མེད་པ་དང་ཕན་
[210a]
[210a.1]པའི་དོན་དུ་བསད་ན་རྡོ་རྗེའི་རིགས་དབང་དུ་བྱེད་ཅིང་རང་དབང་དུ་འགྱུར་རོ། །འདི་སྐད་སྟོན་པ་ཡིན་ཏེ། ཇི་སྐད་བཤད་པའི་ཚུལ་གྱིས་རྡོ་རྗེའི་རིགས་ཀྱི་རྗེས་སུ་ཆགས་པའི་ཏིང་ངེ་འཛིན་བསྒོམས་ནས་ཕྱག་རྒྱ་དང་སྔགས་ཀྱིས་གདུག་པ་བསད་ན་རང་གི་རྡོ་རྗེའི་རིགས་
[210a.2]དབང་དུ་བྱེད་པར་འགྱུར་རོ། །པདྨའི་རིགས་ནི་རང་བཞིན་གྱིས་རྣམ་པར་དག་པ་སྟེ། འདོད་ཆགས་དག་པ་ཀུན་རྟོག་ལ། །ཞེས་བྱ་བ་ནི་བསྒོམ་པའོ། །ཇི་ལྟར་ཞེ་ན། པདྨའི་འདབ་མ་ཁ་འབྱེད་ཅིང་། །ཞེས་བྱ་བ་ལ་སོགས་པ་སྨོས་ཏེ། ལག་པ་གཡོན་པ་སྙེམས་པས་པདྨ་བླངས་
[210a.3]ལ་ལག་པ་གཡོན་པའི་མཛུབ་མོ་དང་། མཐེ་བོ་དག་གིས་སྙིང་གར་པདྨའི་འདབ་མ་ཁ་འབྱེད་ཅིང་བསྒོམས་ནའོ། །ཇི་ལྟར་པདྨ་དམར་པོ་ཡང་། །ཚོན་གྱི་ཉེས་པས་མི་གོས་བཞིན། །ཐམས་ཅད་དག་པར་བསྒོམས་ན་ནི། །སྡིག་པའི་ཉེས་པས་གོས་མི་འགྱུར། །ཞེས་བྱའོ། །དེ་ལྟར་
[210a.4]འདོད་ཆགས་རྣམ་པར་དག་པ་པདྨའི་འདབ་མ་ཁ་འབྱེད་ཅིང་བསྒོམས་པས་ཅི་ཞིག་བྱེད་ཅེ་ན། རྣལ་འབྱོར་པ་རང་ཉིད་པདྨའི་རིགས་ཀྱི་ཆགས་པ་བསྒོམས་ན་སངས་རྒྱས་ལ་སོགས་པ་སེམས་ཅན་གྱི་ཁམས་ལ་ཆགས་པར་བྱེད་དོ། །དེ་ཅིའི་ཕྱིར་ཞེ་ན། གདུལ་བའི་ཕྱིར་ཞེས་བྱ་བ་སྨོས་ཏེ།
[210a.5]པདྨའི་རིགས་ཀྱི་ཏིང་ངེ་འཛིན་གྲུབ་པས་རང་དང་གཞན་དག་དེས་འདུལ་བར་བྱེད་དོ། །འདོད་ན་དབང་དུ་བྱེད་པར་འགྱུར། །ཞེས་བྱ་བ་ནི་རང་ངམ་གཞན་འདི་རྣམ་པར་དག་པའི་བསྒོམ་པའི་ཆགས་པ་གང་ཡིན་པ་འདི་ནི་པདྨའི་རིགས་དབང་དུ་བྱེད་པ་ཡིན་ནོ། །དེའི་དོན་ནི་འདི་སྐད་སྟོན་པ་
[210a.6]ཡིན་ཏེ། སྔར་བཤད་པའི་ཆོ་གས་པདྨའི་རིགས་ལ་རྗེས་སུ་ཆགས་པའི་ཏིང་ངེ་འཛིན་བསྒོམ་ཞིང་། པདྨའི་འདབ་མ་ཁ་འབྱེད་པའི་སྦྱོར་བས་དེ་བཞིན་གཤེགས་པ་ལ་སོགས་པས་སེམས་ཅན་གྱི་ཁམས་འཇིག་རྟེན་དབང་ཕྱུག་ཏུ་བསྐྱེད་ནས་ཇི་སྲིད་དུ་དེའི་རྣམ་པར་སྣང་བ་ཐོབ་པར་འགྱུར་
[210a.7]བ་དེ་སྲིད་ཀྱི་བར་དུ་བྱའོ། །དེ་ནས་བསྒྲུབ་པའི་ཆོ་གས་མཚན་ཐོག་ཐག་བསྒོམས་ན་འགྲུབ་པར་འགྱུར་རོ། །སངས་རྒྱས་ཐམས་ཅད་དབང་བསྐུར་ཕྱིར། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་ནོར་བུའི་རིགས་ལ་རྗེས་སུ་ཆགས་པའི་ཏིང་ངེ་འཛིན་རྣམ་པར་བསྒོམས་པས་ཉིན་རེ་ཞིང་རྡོ་རྗེ་
[210b]
[210b.1]རིན་ཆེན་གྱི་ཕྱག་རྒྱས་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ལ་རིན་པོ་ཆེ་མྱུ་གུའི་དབང་བསྐུར་བ་བྱིན་ན་དེ་ནས་ནོར་བུའི་རིགས་སུ་ཡོངས་སུ་བསམ་པར་བྱའོ། །དེ་ལྟར་ན་ནོར་བུའི་རིགས་རྣམས་དབང་དུ་གྱུར་པ་དང་། དེ་ནས་སྔ་མ་བཞིན་དུ་མཚན་ཐོག་ཐག་
[210b.2]བསྒོམས་ན་ནོར་བུའི་རིགས་ཀྱི་དངོས་གྲུབ་ཐོབ་པར་འགྱུར་རོ། །དེ་ལྟར་རྗེས་སུ་ཆགས་པ་དང་། དབང་དུ་བྱེད་པའི་དངོས་གྲུབ་ཀྱི་རྒྱུད་བཤད་ནས། ད་ནི་གང་གི་ཚེ་འདི་སྐད་དུ་བཤད་པའི་ཆོ་གས་ལན་བདུན་བསྒྲུབས་ན་ཡང་དངོས་གྲུབ་དམ་པ་ཐོབ་པར་མ་གྱུར་ན། དེའི་ཚེ་རྣལ་འབྱོར་པས་
[210b.3]མངོན་སྤྱོད་བྱ་བའི་རིགས་པའི་ཆོ་གས་རང་གི་ལྷ་ལ་མངོན་སྤྱོད་བྱས་ན་དེས་འགྲུབ་པར་འགྱུར་རོ་ཞེས་བྱ་བའི་དོན་འདི་བསྟན་པའི་ཕྱིར་རོ། །དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་གསང་བའི་ལས་ཀྱི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་
[210b.4]ཐམས་ཅད་ཀྱི་རིགས་པ་རྣམས་གསོད་པ་ནི་མངོན་སྤྱོད་ཀྱི་ཆོ་གས་བསད་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་གྲུབ་པའོ། །དེ་སྟོན་པར་བྱེད་པའི་རྒྱུད་ནི་ཕྱག་ན་རྡོ་རྗེས་གསུངས་པའོ། །སེམས་ཅན་ཀུན་དོན་མ་མཐོང་ཞིང་། །ཞེས་བྱ་བ་ནི་དེ་བཞིན་གཤེགས་པའི་
[210b.5]རྣལ་འབྱོར་པས་སྒྲུབ་པ་ལ་འཇུག་པ་ནི་ལན་བདུན་གྱི་བར་དུ་བསྒྲུབས་ན་ཡང་དེ་བཞིན་གཤེགས་པ་ལ་སོགས་པའི་དངོས་གྲུབ་ཐོབ་པ་དང་། སེམས་ཅན་ཐམས་ཅད་ཀྱི་དོན་བྱེད་པར་གང་གི་ཚེ་མི་གུས་པ་དེའི་ཚེ། སེམས་ཅན་ཀུན་དོན་མ་མཐོང་བའོ། །སངས་རྒྱས་རྣམས་ཀྱིས་དེ་ཉིད་
[210b.6]དེ་སྐད་དུ་བཤད་པའི་ཕྱག་རྒྱ་ཆེན་པོ་ལ་སོགས་དབང་དུ་བྱེད་པའི་མཐར་ཐུག་པའི་དེ་བཞིན་གཤེགས་པའི་དངོས་གྲུབ་ཀྱི་རྒྱུ་དང་འབྲས་བུའི་ངོ་བོ་དེ་མ་སྦྱངས་པ་ནི་དམིགས་པ་ལྟ་བར་གསལ་བའོ། །ཡིད་ལ་སེམས་གོམས་པའོ། །ལུས་ནི་ཕྱག་རྒྱ་སྤོང་བ་ལ་སོགས་པ་ལ་ཕྱག་རྒྱ་འབེེབས་པ་ལ་
[210b.7]སོགས་པའི་སྦྱོར་བའོ། །ངག་ནི་བརྗོད་པའི་སྦྱོར་བས་སྔགས་བརྗོད་པའོ། །བསད་པ་ནི་སངས་རྒྱས་བཅོམ་ལྡན་འདས་བསད་པའོ། །ཅིར་འགྱུར་ཞེ་ན། དངོས་གྲུབ་ཐོབ་པར་འགྱུར་ཞེས་བྱ་བ་སྨོས་ཏེ། དེ་ལྟར་མངོན་སྤྱོད་བྱ་བའི་རིགས་པའི་ཆོ་གས་དེ་བཞིན་གཤེགས་པ་གསད་
[211a]
[211a.1]ལ། ཕྱིས་སྔོན་དུ་བསྙེན་པ་བྱས་ནས་བསྒྲུབ་པ་བྱས་ན་ངེས་པར་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། རས་རིས་ལ་སོགས་པའི་དེ་བཞིན་གཤེགས་པ་རྣམས་གསད་པར་བྱ་བ་ལ་བསྡུ་བ་ལ་སོགས་པའི་ཆོ་གས་མདུན་དུ་གཞག་པ་རྡོ་རྗེ་ཧཱུཾ་མཛད་ལ་སོགས་
[211a.2]པའི་སྦྱོར་བ་བྱས་ནས་ཡིད་ཀྱིས་གསད་པར་བྱའོ། །སྦྱོར་བ་ནི་འདི་ཡིན་ཏེ། རྡོ་རྗེ་ཕྲ་མོ་བརྟན་བྱས་ལ། །རྡོ་རྗེ་ཧཱུཾ་མཛད་སྦྱོར་བ་ཡིས། །ཧཱུཾ་ཞེས་བྱ་བ་གང་ལ་བཟླས། །དེ་ཡི་སྲོག་ནི་འཇིག་པར་འགྱུར། །ཞེས་བྱ་བའོ། །དེའི་དོན་ནི་འདི་སྐད་སྟོན་པ་ཡིན་ཏེ། སྣའི་རྩེ་མོར་ཡི་གེ་ཧཱུཾ་
[211a.3]ལས་རྡོ་རྗེ་འབར་བ་དེའི་དབུས་སུ་དེ་བཞིན་གཤེགས་པ་བསྒོམས་ཏེ། ཇི་སྲིད་ཐལ་བ་ལྟ་བུར་མཐོང་བ་དེ་སྲིད་ཀྱི་བར་དུ་བསྒོམས་ནས་མངོན་སྤྱོད་ཀྱི་སྦྱིན་སྲེག་གིས་བསྒྲུབས་ཏེ་གསད་པར་བྱའོ། །དེ་ལྟར་ན་རྒྱུད་དེ་དང་དེ་རྣམས་ལ་བསད་པའི་ཆོ་ག་གཞན་ལ་ཡང་ཤེས་པར་བྱའོ། །དེ་ལྟར་
[211a.4]དེ་བཞིན་གཤེགས་པ་བསད་པའི་དངོས་གྲུབ་ཀྱི་རྒྱུད་བཤད་ནས་ད་ནི་དེ་བཞིན་གཤེགས་པའི་རིགས་ཀྱི་དངོས་གྲུབ་གསུངས་པ་ནི། དངོས་གྲུབ་ཐམས་ཅད་ཐོབ་པ་ལས། །ཞེས་བྱ་བ་ལ་སོགས་པ་སྨོས་ཏེ། ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྣམས་ལན་བདུན་བསྒྲུབས་
[211a.5]ཀྱང་མངོན་སུམ་དུ་མཐོང་བར་མ་གྱུར་ནའོ། །རིགས་རྣམས་ཀྱང་ནི་མི་བརྩོན་ཞིང་། །ཞེས་བྱ་བ་ནི་འདིར་སྦྱོར་བའི་བརྩོན་འགྲུས་སོ། །མི་བརྩོན་པ་ནི་མི་འབད་པ་སྟེ། བསྒོམ་པའི་སྦྱོར་བ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །གང་དང་འབྲེལ་བའི་བསྒོམ་པ་མེད་པ་ཡིན་ཞེ་ན།
[211a.6]རིགས་རྣམས་དང་ཞེས་བྱ་བ་སྨོས་ཏེ། དེ་བཞིན་གཤེགས་པའི་རིགས་དང་འབྲེལ་པའི་བསྒོམས་པ་རྣལ་འབྱོར་པ་ལ་མེད་དོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། ཡོ་ཛིར་ཡོ་ག་ཞེས་བྱ་བ་ཁམས་སོ། །བརྩོན་པ་ནི་འབད་པ་ཞེས་བྱ་བའི་དོན་ཏོ། །གང་ལ་བརྩོན་ཞེ་ན།
[211a.7]གང་གི་ལྷ་རྗེས་སུ་དྲན་པ་བརྩོན་པ་ཞེས་བྱའོ། །རྡོ་རྗེ་ཀུན་དུ་བརྡེག་ན་ནི། །ཞེས་བྱ་བ་ནི་རྡོ་རྗེ་དང་འབྲེལ་པའི་བརྡེག་པ་ནི་བསྣུན་པ་སྟེ། རྡོ་རྗེ་དེས་བསྒྲུབ་པར་བྱ་བ་ལ་བསྣུན་པར་བྱའོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ནས་དེ་
[211b]
[211b.1]བཞིན་གཤེགས་པ་ཐམས་ཅད་འདུས་པའི་ནང་དུ་གནས་ཏེ། བསྒྲུབ་པར་བྱ་བའི་ལྷ་མདུན་དུ་ཇི་སྐད་བཤད་པའི་ཆོ་གས་སྤྱན་དྲངས་ལ་ཆོ་ག་ཐམས་ཅད་རྗེས་སུ་སྤྱད་ནས། ཁྲོ་བོའི་གནས་པས་བསྙེམས་པ་དང་བཅས་པས་རྡོ་རྗེ་གསོར་ཞིང་བསྒྲུབ་པར་བྱ་བའི་སྟེང་དུ་ཡིད་ཀྱིས་
[211b.2]འཕངས་པས་བསྐལ་པའི་མེ་དང་མཚུངས་པའི་རྡོ་རྗེ་ལྷུང་བས་བསྒྲུབ་པར་བྱ་བ་ལ་བསྣུན་པར་བསམ་པར་བྱའོ། །ཨོཾ་བཛྲ་སཏྭ་ཧཱུཾ། ཨ་མུ་ཀཾ་ག་ཏ་ཡ་ཧཱུཾ། དེ་ནས་བསྒྲུབ་པར་བྱ་བ་དེ་ཕྱི་རོལ་གྱི་ཐོག་གིས་བརྒྱབ་པའི་རི་བོ་བཞིན་དུ་བརྡེག་བར་བསྣུན་ཞིང་གསོད་པར་འགྱུར་རོ། །བསད་
[211b.3]ན་དངོས་གྲུབ་ཐོབ་པར་འགྱུར། །ཞེས་བྱ་བ་ནི་དེ་ལྟ་བུའི་སྦྱོར་བ་འདིས་བསྒྲུབ་པར་བྱ་བའི་ལྷ་སྣང་བ་མེད་པར་བྱས་ཤིང་དངོས་པོར་འཛིན་པ་མེད་པར་བྱས་པའོ། །སྒྲུབ་པོས་སྟོང་པ་ཉིད་ཀྱི་ཏིང་ངེ་འཛིན་གྱི་དངོས་གྲུབ་ཐོབ་པས་ཕྱག་རྒྱ་ཆེན་པོ་ལ་སོགས་པ་མྱུར་དུ་འགྲུབ་པར་འགྱུར་རོ། །དེ་
[211b.4]ལྟར་དེ་བཞིན་གཤེགས་པའི་རིགས་ཀྱི་དངོས་གྲུབ་བསྟན་ནས། ད་ནི་རྡོ་རྗེའི་རིགས་གསུངས་པ་ནི། དེ་ལ་ཞེས་བྱ་བ་ལ་སོགས་པ་སྨོས་ཏེ། མ་རུང་མི་འདུལ་ཁྲོ་མེད་ཅིང་། །ཞེས་བྱ་བ་ནི་ཇི་སྐད་བཤད་པའི་ལྷ་ཆེན་པོ་ལ་སོགས་པ་འདུལ་བར་བྱེད་པ་སྟེ། ཆོས་དང་ལྡན་པའི་སེམས་
[211b.5]ཅན་ཅུང་ཟད་ཅིག་ཀྱང་གནོད་པ་མི་བྱེད་པས་མི་འདུལ་ཁྲོ་མེད་པའོ། །དེའི་ཕྱིར་དེ་ལྟར་གྱུར་པའི་ཁྲོ་བ་མེད་པའི་ཁྲོ་བོ་མངོན་དུ་བྱེད་པས་ཉོན་མོངས་པ་ལ་ཁྲོ་བ་མངོན་དུ་བྱས་ཞེས་བྱ་བའི་དོན་ཏོ། །དེ་བཞིན་སེམས་ཅན་མི་འདུལ་ལ། །ཞེས་བྱ་བ་ནི་སེམས་ཅན་ནི་གྲགས་པར་ཟད་དོ། །དེ་
[211b.6]དག་འདུལ་བའི་ཁྲོ་བས་བསྒྲག་པར་བྱས་ནས་སྡིག་པ་དང་བྲལ་ཏེ། ལུང་དང་རྟོགས་པའི་བདག་ཉིད་ལ་སྦྱོར་བའོ། །སེམས་ཅན་མི་འདུལ་བ་ནི་གདུལ་བྱ་མ་ཡིན་པའི་སེམས་ཅན་གདུལ་བར་མི་ནུས་པའོ། །བདག་ཉིད་འདུལ་ལ་ཐོབ་བྱེད་ན། །ཞེས་བྱ་བ་ནི་ནད་ལ་སོགས་པའི་
[211b.7]སྡུག་བསྔལ་སྒྲུབ་པ་པོ་ལ་སྐྱེས་པ་ནི་དེ་དག་དངོས་གྲུབ་མི་ཐོབ་པའི་རྒྱུ་ཡིན་པའི་ཕྱིར་རོ། །རྡོ་རྗེ་ཧཱུཾ་མཛད་ཀྱི་བསྒྲུབ་པར་བྱ་བའི་ལྷའི་སྟེང་དུ་ཡི་གེ་ཧཱུཾ་ལས་རྡོ་རྗེ་འབར་བ་ལྷུང་བས་དེས་བསད་པར་གྱུར་པར་བསམ་པར་བྱའོ། །ད་ནི་པདྨའི་རིགས་ཀྱི་དངོས་གྲུབ་ཀྱི་བསད་པ་ནི། དེ་ལ་ཞེས་
[212a]
[212a.1]བྱ་བ་ལ་སོགས་པ་གསུངས་ཏེ། སྙིང་རྗེ་མེད་ཅིང་སྙིང་རྗེ་མི་སྲིད་པའོ། །སྙིང་རྗེ་མི་འདོགས་པ་སྟེ། སེམས་ཅན་རྣམས་བསྒྲལ་བར་མི་འདོད་པའོ། །མཛའ་བོ་ཡོད་པ་དེ་བས་ན་བྱམས་པ་སྟེ་སེམས་ཅན་ལ་ཕན་པ་དང་བདེ་བ་བསྡུས་པའོ། །བྱམས་
[212a.2]པ་མེད་པ་ནི་བྱམས་པ་མི་འདོགས་པ་སྟེ། དེ་བས་ན་སེམས་ཅན་ངན་པ་དམིགས་པ་ལ་སྤྱོད་པ་དང་། འཇིག་རྟེན་རྒྱང་ཕན་པ་དང་། མ་སྦྱངས་པ་དེ་དག་གི་རྗེས་སུ་འཛིན་པ་མ་བསལ་བས་ཡང་དག་པའི་ལྟ་བ་ལ་ངེས་པར་མི་སྦྱོར་བའོ། །བདག་ཉིད་ལ་ནི་བསླུས་ནས་ནི། །
[212a.3]ཞེས་བྱ་བ་ལ། ལོག་པར་ལྟ་བ་བསྐྱེད་པས་ན་སྔགས་དང་། ལྷ་རྣམས་དང་སྔགས་ཀྱི་དངོས་གྲུབ་རྣམས་དོན་མེད་པས་འཇིག་རྟེན་པ་ལ་གནོད་པར་བྱེད་པའོ་ཞེས་བྱ་བ་ལ་སོགས་པའོ། །དེ་ལྟར་དངོས་གྲུབ་མི་ཐོབ་པའི་རྒྱུར་ཤེས་ནས་སྔ་མ་བཞིན་དུ་བསྒྲུབ་པར་བྱ་བའི་ལྷ་སྤྱན་
[212a.4]དྲངས་ཏེ། མངོན་སྤྱོད་ཀྱི་སྦྱོར་བས་གསད་པར་བྱའོ། །ད་ནི་ནོར་བུའི་རིགས་ཀྱི་གསད་པའི་དངོས་གྲུབ་ནི། དེ་ལ་འདི་ནི་ཞེས་བྱ་བ་སྨོས་ཏེ། མི་གཏོང་བདག་ལ་ནོར་མེད་ཅིང་། །ཞེས་བྱ་བ་ནི་གཏོང་བ་ནི་ཕྱི་རོལ་གྱི་རྒྱལ་སྲིད་ལ་སོགས་པ་ཆོས་ཐམས་ཅད་མཉམ་པ་ཉིད་ཀྱི་
[212a.5]ཡེ་ཤེས་ཀྱིས་སྤངས་པ་ནི་བཏང་བའོ། །མི་གཏོང་བ་ནི་གཏོང་བ་མེད་པ་སྟེ། །དེའི་ཕྱིར་ནོར་བུའི་རིགས་ཀྱི་རྣལ་འབྱོར་པས་ནོར་བུའི་རིགས་ཀྱི་ཏིང་ངེ་འཛིན་ཐོབ་པ་བདག་ཉིད་ཀྱིས་མི་གཏོང་ངོ་ཞེས་བྱ་བའི་དོན་ཏོ། །བདག་ལ་ནོར་མི་བདོག་པས་ན་བདག་ལ་ནོར་མེད་ཅིང་ངོ་། །ནོར་
[212a.6]བུའི་རིགས་ཀྱི་ཏིང་ངེ་འཛིན་ཐོབ་པའི་ནོར་འདི་བདག་ལ་མེད་པའོ། །ནོར་སྟེར་བ་ནི་ནོར་བུའི་རིགས་ཀྱི་ཏིང་ངེ་འཛིན་ཐོབ་པ་དེ་ལས་ཉམས་པའོ། །ཅིའི་ཕྱིར་ཞེ་ན། གནོད་བྱེད་ལ་ཞེས་བྱ་བ་སྨོས་ཏེ། དམ་ཚིག་ཉམས་པས་གནོད་པ་དེའི་ཕྱིར་ན་ནོར་མེད་པས་གནོད་པའོ། །
[212a.7]སེམས་ཅན་རྣམས་ནི་དབུལ་གྱུར་ན། །ཞེས་བྱ་བ་ནི་སེམས་ཅན་རྣམས་ནོར་ལ་སོགས་པ་དང་། འབྱོར་པས་དབུལ་བ་བསལ་བར་མི་ནུས་པའི་དབུལ་པོ་དེ་དག་དངོས་གྲུབ་མི་ཐོབ་པའི་རྒྱུ་ཉིད་དུ་ཤེས་ནས་ནོར་བུའི་རིགས་ཀྱི་རྣལ་འབྱོར་པས་བསྒྲུབ་པར་བྱ་བའི་ལྷ་སྤྱན་དྲངས་ཏེ།
[212b]
[212b.1]མངོན་སྤྱོད་ཀྱི་སྦྱོར་བས་འདི་གསད་པར་བྱའོ། །དེ་ཅིའི་ཕྱིར་དེ་ལྟར་བཅོམ་ལྡན་འདས་ཀྱིས་གསད་པའི་ལས་གསུངས་ཞེས་ཕྱོགས་སྔ་མ་སེམས་པས་ཁ་ཅིག་ནི་སངས་རྒྱས་ཀྱི་ཞེས་བྱ་བ་སྨོས་ཏེ། ཁ་ཅིག་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་འདོད་པ་རྣམས་རྣལ་འབྱོར་པས་
[212b.2]མ་ཐོབ་ན་ཇི་སྐད་གསུངས་པའི་སངས་རྒྱས་དང་། དེ་བཞིན་གཤེགས་པ་རྣམས་དང་། རིགས་ཐམས་ཅད་དངོས་སུ་གསོད་པ་ནི་བདག་ཏུ་འཛིན་པའི་སེམས་ཅན་དེ་ལ་གནོད་པ་མེད་དོ་ཞེས་བྱ་བའི་དོན་ཏོ། །གསོད་པའི་སེམས་དེ་དག་དང་བྲལ་བར་བྱ་བའི་ཕྱིར་གསོད་པའི་སེམས་
[212b.3]ཀྱིས་བསད་ནས་ཐབས་ཀྱིས་དྲང་བར་བྱ་བའི་ཕྱིར་རོ། །ཁོ་བོ་ཅག་གིས་བསྟན་པའི་བསད་པའི་དངོས་གྲུབ་ཀྱི་སྦྱོར་བ་འདིས་མྱུར་དུ་འདི་དངོས་གྲུབ་སྦྱིན་པར་བྱའོ་ཞེས་བཅོམ་ལྡན་འདས་འཕགས་པ་ཀུན་དུ་བཟང་པོས་གསུངས་སོ། །དེ་ལྟར་བསད་པའི་དངོས་གྲུབ་ཀྱི་རྒྱུད་བསྟན་ནས།
[212b.4]ད་ནི་དེ་བཞིན་གཤེགས་པའི་རིགས་ཀྱི་རྣལ་འབྱོར་པ་རྣམས་ཀྱིས་སྔོན་དུ་བསྙེན་པ་ལ་སོགས་པའི་དུས་སུ་རང་དང་གཞན་དག་བསྲུང་བར་བྱའོ་ཞེས་བྱ་བའི་དོན་བསྟན་པའི་ཕྱིར་དེ་ནས་ཞེས་བྱ་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱུའི་བསྲུང་བའི་དངོས་གྲུབ་
[212b.5]ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་དང་རིགས་རྣམས་ནི་དེ་བཞིན་གཤེགས་པ་ཐམས་ཅད་དེ། དེ་དག་བསྲུང་བའི་ཕྱག་རྒྱ་ནི་འདོད་ཆགས་ལ་སོགས་པའི་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང་། རྣལ་འབྱོར་པའི་སེམས་བྲལ་བ་དང་། རྒྱུད་
[212b.6]གཞན་ལ་གནོད་པ་སེལ་བའི་ཕྱག་རྒྱ་གང་དང་གང་བྱེད་པ་དེ་དང་དེ་ལ་དེ་སྐད་ཅེས་བྱའོ། །དངོས་གྲུབ་དེས་ཕྱག་རྒྱ་ཆེན་པོ་ལ་སོགས་པ་གྲུབ་པ་དེ་སྟོན་པའི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །སེམས་ཅན་ཐམས་ཅད་མི་གཏོང་ཞིང་། །ཞེས་
[212b.7]བྱ་བ་ནི་སེམས་ཅན་ཡང་ཡིན་ལ་ཐམས་ཅད་ཀྱང་དེ་ཡིན་པས་སེམས་ཅན་ཐམས་ཅད་དེ། མ་ལུས་ཤིང་ལུས་པ་མེད་པའི་ཁམས་གསུམ་པ་ན་སྤྱོད་པའི་ལྷ་ལ་སོགས་པའི་སེམས་ཅན་དེ་དག་ཡོངས་སུ་མི་གཏོང་ཞིང་། བདག་གིས་འདི་ཐམས་ཅད་བླ་ན་མེད་པ་ཡང་དག་པར་རྫོགས་
[213a]
[213a.1]པའི་བྱང་ཆུབ་ལ་གཞག་པར་བྱའོ་ཞེས་བྱང་ཆུབ་ཏུ་སེམས་བསྐྱེད་ནས་དེ་དག་སངས་རྒྱས་སུ་བསྒོམས་པས་སངས་རྒྱས་ཉིད་འཐོབ་པར་འགྱུར་རོ། །རྟག་ཏུ་སངས་རྒྱས་མཆོད་བདག་ཉིད། །ཅེས་བྱ་བ་ནི་སངས་རྒྱས་རྣམས་ཀྱི་མཆོད་པ་ནི་སངས་རྒྱས་ཀྱི་མཆོད་པ་སྟེ། ལས་ཀྱི་དཀྱིལ་
[213a.2]འཁོར་ལས་གསུངས་པའི་མཆོད་པ་བཅུ་དྲུག་དང་། སྒེག་མོ་ལ་སོགས་པའི་མཆོད་པ་དེའི་བདག་ཉིད་ནི་དེའི་རང་བཞིན་ཏེ། དེ་བཞིན་གཤེགས་པ་ཐམས་ཅད་ལ་མཆོད་པའི་བདག་ཉིད་དུ་རྟག་ཏུ་ལྷག་པར་མོས་པར་བསམ་པར་བྱའོ། །རྟག་པར་སངས་རྒྱས་ཡིད་ལ་བྱེད། ཅེས་བྱ་
[213a.3]བ་ནི་སྤྱོད་ལམ་རྣམ་པ་བཞི་ལས་སངས་རྒྱས་རྗེས་སུ་དྲན་པ་བསྒོམ་པར་བྱའོ། །དེ་ལྟར་དེ་བཞིན་གཤེགས་པས་བསྲུང་བའི་དངོས་གྲུབ་བསྟན་ནས། ད་ནི་དེ་བཞིན་གཤེགས་པའི་རིགས་བསྲུང་བ་ནི། དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་སེམས་དཔའི་མཚན་
[213a.4]ཙམ་ཞིག །ལན་ཅིག་ཙམ་ཡང་བརྗོད་གྱུར་ན། །ཞེས་བྱ་བ་ནི་དེ་བཞིན་གཤེགས་པའི་རྣལ་འབྱོར་པས་རྡོ་རྗེ་སེམས་དཔའ་དང་རྡོ་རྗེ་སེམས་དཔའི་ཞེས་བྱ་བ་དྲུག་པ་དང་བདུན་པ་ལ་ཁྱད་པར་མེད་དོ། །མིང་ཙམ་བརྗོད་པར་གྱུར་པ་ནི་གྲགས་པར་ཟད་དོ། །བྱང་ཆུབ་ཀྱི་མཐར་
[213a.5]ཐུག་པ་ནས་རྟག་པ་ཡིན་ལ། མཆོག་ཏུ་གྱུར་པས་ན་ཆེན་པོ་སྟེ། བདག་ཉིད་བསྲུང་བར་གྱུར་པའོ། །སྐད་ཅིག་གིས་ནི་དངོས་གྲུབ་ཐོབ། །ཅེས་བྱ་བ་ནི་གང་དང་གང་གིས་དངོས་གྲུབ་སྒྲུབ་པར་འདོད་པའི་རྣལ་འབྱོར་པ་དེ་དང་། དེ་ལ་སྐད་ཅིག་གིས་དངོས་གྲུབ་སྟེར་བར་
[213a.6]འགྱུར་རོ། །ད་ནི་རྡོ་རྗེའི་རིགས་ཀྱི་བསྲུང་བ་ནི། དེ་ལ་འདི་ནི་ཞེས་བྱ་བ་ལ་སོགས་པ་སྨོས་ཏེ། རིགས་དང་རྒྱུད་ཀྱིས་ཆོག་མི་ཤེས། །ཞེས་བྱ་བ་ལ། དེ་ལ་རིག་པའི་སྒྲས་སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་པ་རྣམས་གཟུང་ངོ་། །དེ་དག་གི་རྒྱུད་ནི་སྟོང་
[213a.7]ཕྲག་བརྒྱ་པ་ལ་སོགས་པ་རྒྱས་པར་བསྟན་པའོ། །དེ་རྣམས་ཆོག་མི་ཤེས་པ་ནི་རྟག་ཏུ་ཐོས་པ་དང་། བསམས་པ་དང་། བསྒོམས་པའོ། །འཇིག་རྟེན་གསུམ་རྒྱལ་བདག་ཉིད་ཀྱིས། །ཞེས་བྱ་བ་ནི་རང་གི་ཁྲོ་བོའི་རྣལ་འབྱོར་བསྒོམ་པ་ཉིད་དོ། །རྡོ་རྗེ་ཧཱུཾ་ལ་མོས་བྱེད་པ། །
[213b]
[213b.1]ཞེས་བྱ་བ་ནི་ཤེས་པར་ཟད་དོ། །ད་ནི་པདྨའི་རིགས་ཀྱི་བསྲུང་བའི་དངོས་གྲུབ་ཀྱི་རྒྱུད་ནི། དེ་ལ་འདི་ནི་ཞེས་བྱ་བ་ལ་སོགས་པ་སྨོས་ཏེ། འདོད་ཆགས་དག་ཅིང་བྱམས་པ་ཆེ། །ཞེས་བྱ་བ་ནི་བཤད་ཟིན་ཏོ། །ཐམས་ཅད་ལ་ནི་མི་འཇིགས་སྦྱིན། །ཞེས་བྱ་བ་ནི་སེམས་ཅན་རྣམས་ལའོ། །
[213b.2]པདྨའི་རིགས་ཀྱི་དེ་བཞིན་གཤེགས་པ་ཐམས་ཅད་ཀྱི་སེམས་ཅན་ཐམས་ཅད་དང་། ཕྱི་རོལ་གྱི་ཉེ་བར་འཚེ་བ་ཞི་བ་དང་། སྲོག་གཅོད་པ་ལ་སོགས་སྤོང་བ་ནི་མི་འཇིགས་པ་སྦྱིན་པའོ། །བདག་ཉིད་འཇིགས་ཤིང་སྐྲག་པ་ལས་ཅི་ནུས་ཀྱིས་བསྲུང་བའོ། །འཇིག་རྟེན་དབང་ཕྱུག་གི་མཚན་
[213b.3]ཟློས་པའོ། །མཚན་བརྒྱ་རྩ་བརྒྱད་ཟློས་པའོ། །དེ་ནི་ནོར་བུའི་རིགས་ཀྱི་བསྲུང་བའི་དངོས་གྲུབ་ཀྱི་རྒྱུད་ནི། དེ་ལ་འདི་ནི་ཞེས་བྱ་བ་ལ་སོགས་པ་སྨོས་ཏེ། ཉི་མ་སྟོང་པར་མི་བྱ་ལ། །ཞེས་བྱ་བ་ལ། སྟོང་པ་ནི་འབྲས་བུ་མེད་པ་ཡིན་ལ། མ་སྟོང་པ་ནི་སྟོང་པ་མེད་པས་འབྲས་བུ་དང་
[213b.4]བཅས་པའོ། །ཅི་ནུས་པར་མི་ནུས་ཚད་ལས་མི་འདའོ། །སྦྱོར་བྱེད་ཅིང་རབ་ཏུ་སྦྱོར་བས་སོ། །གང་གིས་སྦྱོར་བར་བྱེད་ཅིང་ཞེ་ན། གཏོང་བྱེད་པར་ཞེས་བྱ་བ་སྨོས་ཏེ། སྦྱིན་པར་བྱེད་ཅེས་བྱ་བའི་ཐ་ཚིག་གོ། །གང་གི་སྦྱོར་སྦྱིན་པར་བྱེད་པ་ཡིན་ཞེ་ན། སངས་རྒྱས་སེམས་ཅན་ཞེས་བྱ་བ་སྨོས་
[213b.5]ཏེ། དེ་བཞིན་གཤེགས་པའི་དབང་བསྐུར་བ་ཐོག་མར་བྱས་ནས། སེམས་ཅན་རྣམས་ལ་སྟེར་བར་བྱེད་པའོ། །འདི་སྐད་སྟོན་པ་ཡིན་ཏེ། ཉིན་རེ་ཞིང་དུས་དྲུག་ཏུ་དེ་བཞིན་གཤེགས་པ་ཐམས་ཅད་ལ་སོགས་པ་དང་། སེམས་ཅན་ཐམས་ཅད་ལ་ནོར་བུའི་རིགས་ཀྱི་རྣལ་འབྱོར་པས་
[213b.6]ཟང་ཟིང་དང་། མི་འཇིགས་པ་དང་། ཆོས་དང་བྱམས་པའི་སྦྱིན་པ་སྦྱིན་པར་བྱེད་པའོ། །རྡོ་རྗེ་བསྲུང་བར་ཞེས་བྱ་བ་ནི་བསྲུང་བ་བསྟན་པའི་དབང་དུ་བྱས་ནས་རྡོ་རྗེ་འཆང་བ་ཉིད་ཀྱིས་བསྲུང་བ་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བསྲུང་བའི་དངོས་
[213b.7]གྲུབ་ཀྱི་རྒྱུད་ཀྱི་འགྲེལ་པའོ། །དེ་ལྟར་རིགས་རྣམ་པ་བཞིའི་དཀྱིལ་འཁོར་ཆེན་པོར་བཤད་པའི་ཕྱག་རྒྱ་ཆེན་པོ་ལ་སོགས་པ་སྒྲུབ་པ་པོའི་བསྲུང་བའི་དངོས་གྲུབ་ཀྱི་མཐར་ཐུག་པའི་རྒྱུད་ཕྱི་མ་བསྟན་ནས། བཅོམ་ལྡན་འདས་རྡོ་རྗེ་འཆང་ཆེན་པོ་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་
[214a]
[214a.1]ཅད་ཀྱིས་གསུངས་པ་ཤེས་པར་བྱ་བ་མི་སྤང་བའི་ཕྱིར་བཅོམ་ལྡན་འདས་ཞེས་བྱ་བ་ལ་སོགས་པ་ནས། འདི་བཞེས་པར་གསོལ་ཞེས་བྱ་བས་བཅོམ་ལྡན་འདས་རྣམ་པར་སྣང་མཛད་ལ་དབུལ་བ་ཡིན་ནོ། །བཅོམ་ལྡན་འདས་རྣམ་པར་སྣང་མཛད་ཀྱིས་སངས་རྒྱས་ཀྱི་
[214a.2]བཀའ་ཉིད་དུ་བསྒྲུབ་པའི་ཕྱིར། ལེགས་སོ་ཞེས་བྱ་བ་ཡིན་ནོ། །རྒྱུ་དེའི་ཕྱིར་ཇི་སྐད་དུ་བཤད་པའི་དེ་ཁོ་ན་ཉིད་ཀྱི་རང་བཞིན་དེ་དག་ཐམས་ཅད་ངེད་ཀྱིས་བླངས་པ་ཡིན་ནོ་ཞེས་བྱ་སྟེ། ཕྱག་རྒྱ་ཆེན་པོ་ལ་སོགས་པ་བསྒྲུབ་པའི་ཕྱིར། གདུལ་བྱ་རྣམས་ལ་ཁྱེད་ཀྱིས་རྒྱུད་ཕྱི་མའི་ཆོ་ག་འདི་ཇི་ལྟར་
[214a.3]གསུངས་པ་དེ་བཞིན་དུ་ཁོ་བོ་ཅག་གི་གཞུང་དང་རྟོགས་པའི་བདག་ཉིད་བློ་ལ་བཞག་ནས་ཕྱི་མའི་མཐར་ཐུག་གི་བར་དུ་རྒྱུན་མི་འཆད་པར་གནས་པར་བྱ་བའི་ཕྱིར་བྱིན་གྱིས་བརླབས་སོ། །དེ་བཞིན་གཤེགས་པ་རྣམ་པར་སྣང་མཛད་ནས་བརྩམས་ནས། རིན་ཆེན་འབེབས་པ་ལ་མཐར་ཐུག་
[214a.4]པའི་བར་དུ་རིགས་ཐམས་ཅད་ཀྱི་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་ཀྱི་རྟོགས་པ་དེ་དག་ཕྱག་རྒྱ་ཆེན་པོ་སྒྲུབ་པའི་དེ་ཁོ་ན་ཉིད་ཀྱི་ཐམས་ཅད་ཀྱིས་ཇི་སྐད་བཤད་པའི་ཕྱག་རྒྱ་ཆེན་པོ་ལ་སོགས་པ་ཐོབ་པའི་རྒྱུ་ཡིན་ནོ་ཞེས་བྱ་བའི་ཐ་ཚིག་གོ། །དེའི་ཆོ་ག་རྒྱས་པ་ནི་རྣམ་པ་སྣ་ཚོགས་
[214a.5]པའི་ཇི་སྐད་དུ་བཤད་པའོ། །རྫོགས་པ་ནི་རྒྱུད་ཕྱི་མའི་ངོ་བོ་མཐར་ཐུག་པའོ། །འཕགས་པ་དེ་ཁོ་ན་ཉིད་བསྡུས་པའི་འགྲེལ་བ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ་ལས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་དང་། འཇིག་རྟེན་གསུམ་ལས་རྣམ་པར་རྒྱལ་བ་དང་། འགྲོ་བ་འདུལ་བ་དང་།
[214a.6]དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་རྒྱུད་ཕྱི་མའི་བཤད་པ་རྫོགས་སོ།། །།དེ་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་དང་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་དང་། འགྲོ་བ་འདུལ་བའི་དཀྱིལ་འཁོར་ཆེན་པོ་དང་། དོན་ཐམས་ཅད་
[214a.7]གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་རྟོག་པ་ཐམས་ཅད་ཀྱི་ཐབས་ཀྱི་ཆོ་ག་རྒྱས་པར་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་ཕྱག་རྒྱ་རྣམ་པ་བཞི་སྒོམ་པ་ནི་རང་གི་རིགས་ཀྱི་
[214b]
[214b.1]དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞི་ཇི་ལྟ་བ་བཞིན་དུ་རང་རང་གི་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། རྒྱུད་ཕྱི་མའི་ཆོ་ག་ཡང་བྱའོ་ཞེས་བྱ་བའི་ཆོ་ག་འདིས་བསྟན་པའི་ཕྱིར། དེ་ནས་ཞེས་བྱ་བ་ལ་
[214b.2]སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བ་དམ་པ་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། ཅི་སྐད་དུ་བཤད་པའོ། །དེ་དག་གི་དངོས་གྲུབ་
[214b.3]དམ་པའི་གསང་བ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བོ། །དེ་སྟོན་པར་བྱེད་པའི་རྒྱུད་ནི་བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །དེ་ལ་ཞེས་བྱ་བའི་སྒྲ་ནི་དམིགས་ཀྱིས་དགར་བའོ། །དང་པོ་ཉིད་ནི་ཐམས་
[214b.4]ཅད་ཀྱི་ཐོག་མ་ཉིད་དོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་རྣམས་ཀྱི་རང་བཞིན་ནོ། །དངོས་གྲུབ་དམ་པའི་གསང་བ་ནི་གཟུངས་ཀྱི་དཀྱིལ་འཁོར་ལས་བཤད་
[214b.5]པའི་དེ་བཞིན་གཤེགས་པའི་ཕྱག་རྒྱ་ཆེན་པོ་མངོན་སུམ་དུ་མ་བྱས་པ་དེ་ཉིད་ཀྱིས་སྐྱེ་བོ་ཐམས་ཅད་ཀྱི་ལྐོག་ཏུ་གྱུར་པས་ན་གསང་བའི་སྟེ། དེ་སྟོན་པར་བྱེད་པ་ནི་རྒྱུད་དོ། །སངས་རྒྱས་རྣམས་ཀྱི་བྱང་ཆུབ་ནི་སངས་རྒྱས་བྱང་ཆུབ་སྟེ། རྣམ་པར་སྣང་མཛད་ལ་སོགས་པ་དེ་བཞིན་
[214b.6]གཤེགས་པའི་ངོ་བོའི་ཐབས་དང་ཤེས་རབ་ཀྱི་རང་བཞིན་ནོ། །དེ་ལ་སེམས་རྩེ་གཅིག་ཏུ་དམིགས་པས་ན་སངས་རྒྱས་བྱང་ཆུབ་ཏིང་ངེ་འཛིན་ཏོ། །དེའི་སངས་རྒྱས་དང་། བྱང་ཆུབ་ཀྱི་ཏིང་ངེ་འཛིན་བསྒོམ་པ་ནི་ཡང་དང་ཡང་མངོན་དུ་བྱས་ཤིང་བསྒོམས་པའོ། །རབ་མཉམ་གཞག་
[214b.7]ནི་ཤིན་ཏུ་མཉམ་པར་གཞག་པ་སྟེ། སེམས་གཡེང་བ་མེད་པའོ། །བྱང་ཆུབ་བདེ་བ་ཐོབ་པར་འགྱུར། །ཞེ་ན། བསམ་གཏན་ཀྱང་ནི་རྟོགས་པར་བྱ། །ཞེས་བྱ་བ་ནི་དཀའ་ཐུབ་དང་། དཀའ་བར་སྤྱོད་པ་མི་དགོས་པས་སངས་རྒྱས་ཀྱི་བྱང་ཆུབ་བདེ་བའི་ཏིང་ངེ་འཛིན་གྱིས་ཐོབ་པར་
[215a]
[215a.1]འགྱུར་རོ་ཞེས་རྣམ་པར་བསམས་ནས། བསམ་གཏན་དང་རྗེས་སུ་མཐུན་པའི་བཟའ་བ་དང་བཏུང་བ་ལ་སོགས་པ་བསྟན་ནས། བསྒོམ་པར་བྱས་ན་སངས་རྒྱས་ཀྱི་བྱང་ཆུབ་ཁོང་དུ་ཆུད་པར་འགྱུར་རོ། །དེ་ལྟ་མ་ཡིན་ཏེ། དཀའ་ཐུབ་དཀའ་སྤྱད་མི་བཟད་
[215a.2]པས། །ལུས་སྐམས་འགྱུར་ཞིང་སྡུག་བསྔལ་ལ། །སྡུག་བསྔལ་གྱིས་ནི་སེམས་གཡེངས་པས། །དེ་ནི་རྒྱུན་ཆད་འགྱུར་པ་ཡིན། །ཞེས་བཅོམ་ལྡན་འདས་ཀྱིས་གསུངས་སོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཆེན་པོ་
[215a.3]ལས་བཤད་པའི་རྡོ་རྗེ་སེམས་དཔའ་ལ་སོགས་པའམ། དེ་བཞིན་གཤེགས་པའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་ནས་ཕྱག་རྒྱ་བཞི་བྱས་ཏེ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རང་གི་དེ་བཞིན་གཤེགས་པའི་ཕྱག་རྒྱ་ཆེན་པོ་
[215a.4]བཅིངས་ལ། རང་གི་སྙིང་གའི་ཟླ་བ་ལ་རྡོ་རྗེ་རྣམ་པར་བསམས་པ་སྟེ། དེའི་དབུས་སུ་ཨོཾ་བཛྲ་དྷཱ་ཏྭཱི་ཤྭ་རི་ཧཱུཾ་བཛྲི་ནི་ཞེས་བྱ་བ་ལ་སོགས་པས་རང་གི་རིག་པ་རྣམ་པར་བསམས་ཏེ། དེ་ཉིད་བརྗོད་ཅིང་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་བདག་ཉིད་དུ་བསྒོམས་
[215a.5]པས་སྡུག་བསྔལ་དང་ཡིད་མི་བདེ་བ་ཐམས་ཅད་ཀྱི་སྐབས་མེད་པར་འགྱུར་རོ། །དེ་ལྟར་དེ་བཞིན་གཤེགས་པའི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོའི་དངོས་གྲུབ་བཤད་ནས། ད་ནི་རྡོ་རྗེ་སེམས་དཔའ་ལ་སོགས་པའི་དེ་ལ་འདི་ཞེས་བྱ་བ་ལ་སོགས་པ་གསུངས་ཏེ།
[215a.6]དེ་བཞིན་གཤེགས་པའི་རིགས་ནི་རྡོ་རྗེ་སེམས་དཔའ་ལ་སོགས་པའོ། །དམ་པའི་དངོས་གྲུབ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོའི་དངོས་གྲུབ་བོ། །དེ་ཉིད་ཀྱི་གསང་བ་དེ་སྟོན་པར་བྱེད་པའི་རྒྱུད་དོ། །སྙིང་གར་བཅིང་ཞེས་བྱ་བ་ནི་གཟུངས་ཀྱི་དཀྱིལ་འཁོར་
[215a.7]ལས་བཤད་པའི་སེམས་མ་རྡོ་རྗེ་མའི་ཕྱག་རྒྱ་བཅིངས་ཏེ། ང་ཡི་ཆུང་མ་ཁྱོད་སྡུག་པ། །ཞེས་བྱ་སྟེ། བྱང་ཆུབ་ཀྱི་སེམས་བསྡུས་པར་གྱུར་པ་ཉིད་ཀྱིས་འགེངས་པས་ན་ཆུང་མ་སྟེ། བདག་ཉིད་སྐྱེད་པར་བྱེད་པས་ན་ངའི་ཆུང་མ་དེ་བོད་པའོ། །ཇི་ལྟར་བསྒོམ་པར་བྱ་ཞེ་ན། གང་
[215b]
[215b.1]གིས་བྱང་ཆུབ་སེམས་སྡུད་པར་བྱེད་པ་རྒྱུད་དེ་རྡོ་རྗེ་སེམས་དཔའ་ལ་སོགས་པའི་སྒྲུབ་པ་པོ་ལ་སྡུག་པའོ། །བརྟན་པར་གྱུར་ཅིག་ཅེས་སྨྲས་ནས་ཞེས་བྱ་བ་ནི་རང་གི་ཡན་ལག་ཐམས་ཅད་ཀྱིས་འཁྱུད་ནས་ཆུ་དང་འོ་མ་བཞིན་དུ་བདག་ཉིད་ཀྱི་ལུས་དང་། ངག་དང་། ཡིད་ཀྱིས་ལྷན་
[215b.2]ཅིག་ཏུ་གྱུར་པ་ན་སྒྲུབ་པ་པོས་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་དེ་བཞིན་གཤེགས་པའི་རིགས་ཀྱིས་བཤད་ཟིན་པའི་ལྷ་རྣམས་ལ་དྷྲེ་སྟི་བྷ་ཞེས་དེ་སྐད་དུ་བརྗོད་པར་བྱའོ། །ཕྱག་རྒྱ་ཐམས་ཅད་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་
[215b.3]རྒྱ་ཆེན་པོ་རྣམས་སོ་ཞེས་བྱ་བ་ནི་ངེས་པར་གཟུང་བའོ། །དེ་བཞིན་གཤེགས་པའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ཐམས་ཅད་བསྒོམ་པར་བྱ་བ་ཁོ་ནའོ་ཞེས་ཤེས་པར་བྱའོ། །ཆོ་ག་འདི་ཡི་ཚུལ་གྱིས་ནི། །ཞེས་བྱ་བ་ནི། བཤད་མ་ཐག་
[215b.4]པའི་ཚུལ་གྱིས་སོ། །རང་གི་ལས་རྣམས་མ་གྲུབ་ཀྱང་། །ཞེས་བྱ་བ་ནི། བཛྲ་ཧཱུཾ་བྷནྡྷ་ས་མ་ཡ་སྟྭཾ་ཞེས་བྱ་བ་འདིས་དངོས་གྲུབ་མ་གྲུབ་ནའོ། །ཀྱང་གི་སྒྲས་ནི་ཡིན་ཡང་ཞེས་བཤད་པས་སོ། །དེ་ལྟར་བྱང་ཆུབ་ཀྱི་སེམས་བསྐྱེད་ནས། དེ་བཞིན་གཤེགས་པ་ཐམས་ཅད་
[215b.5]དགུག་པ་དང་། དེ་བཞིན་གཤེགས་པ་ཐམས་ཅད་རྗེས་སུ་ཆགས་པ་དང་། ཡང་དག་པར་མཉེས་པ་ལ་སོགས་པ་རང་གི་ལས་རྣམས་ཀྱང་དངོས་གྲུབ་མ་གྲུབ་ཀྱང་བསྒྲུབ་པར་བྱའོ། །གང་གི་ཕྱིར་དེ་ལྟ་བུའི་ཆོ་ག་འདིའི་ཚུལ་གྱིས་གསང་བའི་ཆུང་མ་ཞེས་སྒྲུབ་པ་པོ་སྨྲ་ཞིང་ངོ་། །
[215b.6]ཤིན་ཏུ་ནི་མྱུར་བའི་དོན་ཏེ། དངོས་གྲུབ་ཐོབ་པར་འགྱུར་ཞེས་བྱ་བའོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རྡོ་རྗེ་སེམས་དཔའ་ལ་སོགས་པ་རང་གི་ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ་ཕྱག་བཞི་བྱས་
[215b.7]ནས་རང་གི་སྙིང་གའི་ཟླ་བ་ལ་རྡོ་རྗེ་སེམས་དཔའི་རྡོ་རྗེ་རྣམ་པར་བསམས་ཏེ། གཟུངས་ཀྱི་དཀྱིལ་འཁོར་ལས་བཤད་པའི་སེམས་མ་རྡོ་རྗེ་མའི་ཕྱག་རྒྱ་བཅིངས་ཏེ། ཨོཾ་བཛྲེ་བཛྲེ་ཎི་ཧཱུཾ་ཞེས་བརྗོད་ཅིང་བཅོམ་ལྡན་འདས་སེམས་མ་རྡོ་རྗེ་སེམས་དཔའ་རྡོ་རྗེ་དང་འདྲ་བ་མདུན་དུ་རྣམ་པར་
[216a]
[216a.1]བསམས་ཏེ། འདི་སྐད་ཅེས་བརྗོད་པར་བྱ་སྟེ། ང་ཡི་ཆུང་མ་ཁྱོད་སྡུག་པས། །བརྟན་པར་གྱུར་ཅིག་ཅེས་སྨྲས་ལ། །དེ་ནས་སྒྲུབ་པ་པོ་དང་འཁྱུད་པར་བྱའོ། །དེའི་ཡན་ལག་ཐམས་ཅད་ཆུ་དང་འོ་མ་བཞིན་དུ་ཁྱབ་པ་གཅིག་ཏུ་གྱུར་པར་གནས་ཏེ། དེའི་རྗེས་
[216a.2]ལ་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ནས། རང་གི་སྙིང་གའི་རྡོ་རྗེའི་དབུས་སུ་བཟླས་པའི་ཡི་གེ་རྣམ་པར་བསམས་ལ། དེ་ཉིད་བརྗོད་དེ། རང་གི་ལྷའི་ཕྱག་རྒྱ་ཆེན་པོ་བསྒོམ་པར་བྱའོ། །རྡོ་རྗེ་རིགས་ཀྱི་དངོས་གྲུབ་དམ་པ་གསང་བའི་
[216a.3]རྒྱུད་ནི། དེ་ལྟ་དེ་ལྟར་ཁྲོས་པ་དང་། །ཞེས་བྱ་བ་ལ་སོགས་པ་སྨོས་ཏེ། ཇི་ལྟར་བཅོམ་ལྡན་འདས་རྡོ་རྗེ་ཧཱུཾ་མཛད་ཐུགས་རྗེ་ཐབས་ཀྱིས་ཁྲོ་བོ་ཁྲོས་པ་ཡིན་གྱི། ཉོན་མོངས་པའི་ཁྲོ་བས་དེ་བཞིན་དུ་ཁྲོ་བ་ནི་མ་ཡིན་ནོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་ནི་འཇིག་རྟེན་གསུམ་ལས་རྣམ་པར་
[216a.4]རྒྱལ་བའི་ཕྱག་རྒྱར་གྱུར་པའི་རྡོ་རྗེ་ཧཱུཾ་མཛད་ཀྱིས་གསོད་པར་མཛད་པས་ནའོ། །དེ་བཞིན་གཤེགས་པ་ཐམས་ཅད་སྐྲག་སྟེ་དངོས་གྲུབ་སྦྱིན་པར་འགྱུར་རོ་ཞེས་བྱ་བ་ནི་དེ་ལྟར་གསོད་པས་འཇིགས་ཤིང་སྐྲག་ནས་དེ་བཞིན་གཤེགས་པས་དངོས་གྲུབ་སྩོལ་པར་འགྱུར་རོ། །འདི་སྐད་སྟོན་
[216a.5]པ་ཡིན་ཏེ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེ་རིགས་ཀྱི་རྣལ་འབྱོར་བྱས་ལ་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་ཆེན་པོ་བཅིངས་ནས། རང་གི་སྙིང་གའི་ཟླ་བ་ལ་ཧཱུཾ་ལས་འབར་བའི་རྡོ་རྗེ་རྣམ་
[216a.6]པར་བསམས་ཏེ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིང་བར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་མཐུན་པའི་རྡོ་རྗེ་ཧཱུཾ་མཛད་ཀྱི་ལྷ་མོས་ནམ་མཁའི་ཁམས་བཀང་ལ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་དེ་
[216a.7]རྣམས་རྡོ་རྗེ་ཧཱུཾ་མཛད་ནས། རྡོ་རྗེ་འབེབས་པའི་བར་གྱི་རྡོ་རྗེ་ཧཱུཾ་མཛད་ལ་སོགས་པའི་ངོ་བོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། སྙིང་གའི་རྡོ་རྗེ་ལ་རིག་པའི་ཡི་གེ་རྣམ་པར་བསམས་ལ། དེ་ཉིད་
[216b]
[216b.1]བརྗོད་ཅིང་རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་ཆེན་པོའི་གཟུགས་སུ་བདག་ཉིད་བསྒོམ་པར་བྱའོ། །པདྨའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བ་ལ་སོགས་པ་ནས། པདྨ་འབེེབས་པའི་མཐར་ཐུག་པའི་ཏིང་ངེ་འཛིན་གྱི་ཕྱག་རྒྱ་ཆེན་པོ་བཅིངས་ཏེ།
[216b.2]སྒྲུབ་པ་ནི་ཤིན་ཏུ་མཉམ་པར་གཞག་པའི་རྣལ་འབྱོར་པས་རྡོ་རྗེ་ལྟ་བས་བལྟ་བར་བྱའོ། །གང་ཞེ་ན། བདག་གི་ཆུང་མའམ་གཞན་ཆུང་མ། །ཞེས་བྱ་བ་ནི་རང་གི་གཟུགས་སམ་རིགས་ཀྱི་ལྷ་ལ་སོགས་པའི་ལྷ་མོ་སྡུག་པས་ནི་ཇི་ལྟར་མངོན་པར་འདོད་པའི་དངོས་གྲུབ་ཐོབ་པར་འགྱུར་
[216b.3]རོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། ཕྱག་བཞི་བྱས་ནས། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རང་གི་གཟུངས་ཀྱི་རིགས་
[216b.4]པ་བརྗོད་ཅིང་། རང་གི་གཟུངས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་པདྨ་ལ་རིག་པ་བཀོད་ལ། དེ་ཉིད་བརྗོད་ཅིང་པདྨའི་རིགས་ཀྱི་གཟུངས་ཀྱི་ལྷ་མོ་རྣམས་ཀྱིས་ནམ་མཁའི་ཁམས་གང་བར་བྱས་ནས། ཕྱིས་རང་གི་གཟུངས་ལ་ལྟ་བས་བལྟ་ཞིང་བསྒོམས་ན་དེ་
[216b.5]ལྟ་བུས་འགྲུབ་པར་འགྱུར་རོ། །བསྒྲུབ་པར་བྱ་བའི་གཟུངས་ཀྱི་ལྷ་མོའི་ལུས་དང་སྒྲུབ་པ་པོའི་ལུས་ཀྱི་དབང་པོ་གཉིས་མཉམ་པར་སྦྱོར་བ་དེས་སྙོམས་པར་འཇུག་ཅིང་འདྲེས་པས་གཅིག་ཏུ་གྱུར་པར་བསྒོམས་པའི་བདག་ཉིད་དེ་ལས་བྱུང་བ་ལ། བདེ་བ་མཆོག་དམ་པ་ནམ་
[216b.6]མཁའ་དང་མཉམ་པའི་ཡེ་ཤེས་བསྐྱེད་པའི་རྒྱུ་ནི་དེ་ཡིན་པའི་ཕྱིར་རོ། །བདེ་མཆོག་ཅེས་སྨྲ་བར་བྱེད་ཅིང་ཡིད་ཀྱིས་བསམ་མོ། །ཉིད་ཀྱི་དབང་པོ་ནི་རང་གི་ལུས་ཐམས་ཅད་ཕུལ་ནས་འགྲུབ་པར་འགྱུར་རོ། །འདིའི་དོན་ནི་འདི་ལྟར་ཤེས་པར་བྱ་སྟེ། དོན་ཐམས་ཅད་གྲུབ་པའི་
[216b.7]དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱག་བཞི་བྱས་ནས། ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་ཟླ་བ་ལ་
[217a]
[217a.1]རྡོ་རྗེ་རིན་པོ་ཆེའི་དབུས་སུ་རིག་པའི་ཡི་གེ་རྣམ་པར་བསམས་ཏེ། དེ་ཉིད་ཟློས་ཤིང་། མདུན་དུ་གཟུངས་ཀྱི་ཕྱག་རྒྱའི་ལྷ་མོའི་གཟུགས་སུ་སྣང་བར་བསམས་ཏེ། དེ་དང་ལྷན་ཅིག་ཏུ་མཉམ་པར་སྦྱོར་བས་བསམ་མོ། །དེ་དང་མཉམ་པར་
[217a.2]སྦྱོར་བའི་རྗེས་ལ་སེམས་ཚིམ་པ་དང་། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་གཟུངས་ཀྱི་ལྷ་མོ་རང་གི་སྙིང་ག་ན་གནས་པའི་རྡོ་རྗེ་རིན་པོ་ཆེ་ལས་སྤྲུལ་ནས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་དང་མཉམ་
[217a.3]པར་སྦྱོར་བས་ཚིམ་པས་རང་གི་ངོ་བོར་བསྒོམ་པར་བྱའོ། །དེ་ལྟ་བུའི་དབང་པོ་གཉིས་དེ་བཞིན་གཤེགས་པ་ཐམས་ཅད་ལ་དབུལ་བར་བྱའོ། །འཁྲིག་པ་སྤངས་པའི་ཕྱིར་བསླབ་པ་ཡོངས་སུ་གཟུང་བ་རྣམས་དོན་དམ་པར་ན་ཆོས་ཐམས་ཅད་གཟུགས་བརྙན་དང་མཚུངས་སོ་
[217a.4]ཞེས་ལྷག་པར་མི་མོས་ཤིང་། དམིགས་པ་ལ་ཀུན་དུ་སྤྱོད་པ་ལ་ཐམས་ཅད་མཉམ་པར་སྦྱོར་བའི་སྒོམ་པ་དེ་སྦྱིན་པར་བྱའོ། །དེ་སྐད་དུ་ཡང་གསང་བ་སྲ་ཞིང་མཐོ་བའི་འཁྲིག་པ་སྤོང་བའི་བསླབ་པ་ཡོངས་སུ་གཟུང་བའི་མདོར་བསྟན་པ་ལས། བུད་མེད་ཐམས་ཅད་བཀུག་ནས་
[217a.5]སུ། །འཁྲིག་པའི་མདུན་ནི་སྤང་བར་བྱ། །ཞེས་གསུངས་སོ། །དེ་ལྟར་དེ་བཞིན་གཤེགས་པའི་རིགས་ཀྱི་གསང་བའི་དངོས་གྲུབ་དམ་པའི་རྒྱུད་བསྟན་ནས། ད་ནི་དེ་ནས་ཞེས་བྱ་བ་ལ་སོགས་པས་རིགས་ཐམས་ཅད་ཀྱི་དམ་ཚིག་གི་གསང་བའི་དངོས་གྲུབ་ཀྱི་རྒྱུད་གསུངས་
[217a.6]སོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་གི་དངོས་གྲུབ་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་བོ། །དེ་ཉིད་ཀྱི་གསང་བ་དེ་སྟོན་པར་བྱེད་པའི་རྒྱུད་ནི་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །ས་མ་
[217a.7]ཡ་སྟྭཾ་ཞེས་བརྗོད་ཅིང་། །བུད་མེད་ཀུན་ལ་ཆགས་སྤྱད་ལ། །ཞེས་བྱ་བ་ནི་རིགས་བཞིའི་གསུང་གི་དཀྱིལ་འཁོར་ལས་བཤད་པའི་གཟུངས་ཀྱི་དམ་ཚིག་གི་ཕྱག་རྒྱ་དེ་བཞིན་གཤེགས་པ་རྣམས་ལ་ཆགས་པར་བྱའོ་ཞེས་བྱ་བའི་དོན་ཏོ། །སེམས་ཅན་དོན་གྱིས་སྐྱོབ་
[217b]
[217b.1]མཛད་ཅེས་བརྗོད་ལ་ཕྱིས་དེ་བཞིན་གཤེགས་པ་དང་། རང་གི་རིགས་པ་ལ་ཆགས་པར་བྱའོ། །དེ་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས། རྣམ་པར་སྣང་མཛད་ལ་སོགས་པའི་རང་བཞིན་ཤེས་པའི་རྣལ་འབྱོར་
[217b.2]པས་སེམས་སོ་སོར་རྟོགས་པའི་རིམ་པ་ནས་བརྩམས་ཏེ། དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བའི་བར་དང་རང་ལ་བྱིན་གྱིས་བརླབ་པ་ལ་སོགས་པ་བྱས་ནས་ཕྱག་བཞི་བྱས་ཏེ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི། ཨོཾ་བཛྲ་དྷཱ་ཏྭི་ཤྭ་རི་ཧཱུཾ་བཛྲི་ཎི་ཞེས་བྱ་བ་
[217b.3]ལ་སོགས་པའི་རང་གི་རིག་པ་བརྗོད་ནས། ཇི་ལྟ་བ་བཞིན་དུ་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་དམ་ཚིག་གི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་ལ་རིག་པའི་ཡི་གེ་རྣམ་པར་བཀོད་དེ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་རིག་པའི་ལྷ་མོ་དེ་
[217b.4]རྣམས་མདུན་དུ་རྣམ་པར་བསམས་ཏེ། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་བསྒོམ་ཞིང་འདི་སྐད་བརྗོད་པར་བྱའོ། །ས་མ་ཡ་སྟྭཾ་མ་བི་རཱ་ག་སཏྭ་ཨརྠཾ། དེའི་རྗེས་ལ་དེ་དང་བདག་ཉིད་འཁྱུད་ནས་དབང་པོ་གཉིས་མཉམ་པར་སྦྱོར་བས་མི་བྱེད་པར་རྣམ་པར་
[217b.5]བསམས་ཏེ། དེའི་རིག་པ་ཇི་ལྟ་བ་བཞིན་དུ་བཀོད་ལ། བཟླས་པ་དང་བསྒོམ་པར་བྱའོ། །འདོད་ཆགས་ལ་ནི་ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེེབས་པའི་མཐར་ཐུག་པའི་དེ་བཞིན་གཤེགས་པའི་རིགས་དེ་བརྙས་པར་མི་བྱ་སྟེ།
[217b.6]འདི་ཁྱད་དུ་གསད་པར་མི་བྱའོ། །འདི་བྱས་ན་ཅིར་འགྱུར། ཅིའི་ཕྱིར་སྨད་པར་མི་བྱ་ཞེ་ན། གང་གི་ཕྱིར། བུད་མེད་ཀུན་དང་རྩེ་བྱེད་པ། །ཞེས་བྱ་བ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ལྷ་
[217b.7]ལ་ཆགས་ཤིང་རང་གིས་རིག་པར་བྱའོ། །རྡོ་རྗེ་རྣམས་ཀྱི་གསང་དམ་ཚིག །ཅེས་བྱ་བ་ནི་བཅོམ་ལྡན་འདས་རྡོ་རྗེ་འཆང་ཆེན་པོའི་གསང་བའི་དམ་ཚིག་འདི་སེམས་ཤིང་བསྒྲུབ་པའི་ཕྱིར་རོ། །སྐྱེ་བ་ཐམས་ཅད་དང་ཐུན་མོང་མ་ཡིན་པའི་གསང་བའི་དམ་ཚིག་གི་ངོ་བོའི་དངོས་པོ་
[218a]
[218a.1]སྲུང་ཤིང་བསྒོམས་ན་རྣལ་འབྱོར་པས་འགྲུབ་པར་འགྱུར་རོ་ཞེས་བྱ་བ་ནི་དེ་བཞིན་གཤེགས་པའི་རིགས་འགྲུབ་པའོ། །དེའི་དོན་ནི་འདི་ལྟར་ཤེས་པར་བྱ་སྟེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རྡོ་རྗེ་སེམས་དཔའི་རྣལ་འབྱོར་དང་རང་
[218a.2]ལ་བྱིན་གྱིས་བརླབ་པ་ལ་སོགས་པ་བྱས་ལ། དེ་ནས་ཕྱག་བཞི་བྱས་ཏེ། དེའི་རྗེས་ལ་སྙིང་གར་རྡོ་རྗེ་སེམས་དཔའི་རྡོ་རྗེ་རྣམ་པར་བསམས་ནས་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ཕྱག་རྒྱ་བཅིངས་ཏེ། རྡོ་རྗེ་དབུས་སུ་རང་གི་རིག་པ་བསམས་ལ། དེ་ཉིད་བརྗོད་ཅིང་
[218a.3]རང་གི་གཟུགས་ཀྱི་དམ་ཚིག་གིས་ཕྱག་རྒྱའི་རང་གི་རིག་པའི་ལྷ་མོ་མདུན་དུ་བསམས་ཏེ། དེ་ནས་དེ་དང་ལྷན་ཅིག་དུ་མཉམ་པར་སྦྱོར་བར་བསྒོམ་པར་བྱའོ། །གསོད་པས་འཇིག་རྟེན་བསད་བྱས་ནས། །ཞེས་བྱ་བ་ནི་བདག་ཉིད་དམ་འཁོར་བའི་དངོས་པོར་སྣང་བ་མེད་པ་བྱས་
[218a.4]ནས། རྡོ་རྗེ་ཧཱུཾ་མཛད་ལ་སོགས་པ་རྡོ་རྗེ་རིགས་ཀྱི་རང་བཞིན་དུ་བསྐྱེད་པར་བྱའོ། །དེ་ལྟར་བདག་ཉིད་བསད་ནས་འཇིག་རྟེན་གསད་པར་བྱ་བའི་ཕྱིར་དེ་བཞིན་གཤེགས་པ་དང་། སེམས་ཅན་གྱི་ཁམས་ཐམས་ཅད་རྡོ་རྗེ་རིགས་ཀྱི་རང་བཞིན་དུ་ཤེས་པར་བྱའོ། །བསད་པར་བྱས་པས་
[218a.5]ཅི་ཞིག་ཏུ་འགྱུར་ཞེ་ན། ལུས་ངག་ལས་བཟང་འགྱེད་པ་དང་། །ཞེས་བྱ་བ་སྨོས་ཏེ། ལུས་དང་ངག་གི་ལས་ནི་ལུས་ངག་གི་ལས་ཏེ། ལུས་དང་ངག་དང་ཡིད་རྣམས་སོ་ཞེས་བྱ་བའི་དོན་ཏོ། །དེ་ཉིད་ཐུགས་རྗེ་ཆེན་པོ་ལས་བྱུང་བའི་ཕྱིར་ལས་བཟང་པོའོ། །དེ་དག་གི་དོན་ལ་
[218a.6]དགྱེས་པ་ནི་ལུས་དང་ངག་གི་ལས་དགེ་བ་སྟེ། ཧཱུཾ་མཛད་རྣམ་པ་བཞིའོ། །མ་ཆགས་པ་དང་མ་སྡང་བ་དང་མ་རྨོངས་པའི་ཐུགས་རྗེ་ཆེན་པོ་ལས་བྱུང་བའི་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེའི་རིགས་ཀྱི་ལུས་དང་། ངག་དང་ཡིད་དང་། རྗེས་སུ་མཐུན་པ་ཞེས་བྱ་བའི་དོན་ཏོ། །
[218a.7]དེ་ལྟར་གྱུར་པའི་ཧཱུཾ་མཛད་དེས་གསོད་པར་བྱེད་པའི་དོན་ཅི་ཡིན་ཞེ་ན། རྣམ་དག་ཕྱིར་ཞེས་བྱ་བ་སྨོས་ཏེ། རང་དང་གཞན་གྱི་རྒྱུད་རྣམ་པར་སྦྱོང་བ་ཡིན་ནོ་ཞེས་བྱ་བའི་དོན་ཏོ། །དམ་ཚིག་དོན་ནི་གྲུབ་སྦྱིན་པའོ། །ཞེས་བྱ་བ་ནི་དེ་ལྟར་གྱུར་པའི་གསོད་པའི་མཚན་ཉིད་འདི་དམ་
[218b]
[218b.1]ཚིག་སྟེ་མི་འདའ་བའི་དོན་ཏོ། །དོན་གྱི་གྲུབ་པ་སྦྱིན་པ་ནི་རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་རབ་ཏུ་སྟེར་རོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་
[218b.2]བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་སྔོན་དུ་འགྲོ་བས་ཆོ་ག་ཐམས་ཅད་རྗེས་སུ་སྤྱད་ལ། ཕྱག་བཞི་བྱས་ཏེ། འཇིག་རྟེན་གསུམ་ལས་རྣམ་པར་རྒྱལ་བ་བཅིངས་ཏེ། ཧཱུཾ་ཧཱུཾ་ཧཱུཾ་ཧཱུཾ། ཞེས་བྱ་བ་བརྗོད་ཅིང་། རྡོ་རྗེ་ཧཱུཾ་མཛད་ཀྱི་བདག་ཉིད་དུ་བསྒོམ་པར་བྱའོ། །དམ་
[218b.3]ཚིག་གི་ཕྱག་རྒྱ་བཅིངས་ནས་རྡོ་རྗེ་ཧཱུཾ་མཛད་ཀྱིས་ལྷ་མོའི་གཟུགས་སུ་སྤྲུལ་ནས། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ཁྲོ་བོ་འབེབས་པས་ཕབ་སྟེ། འཁྱུད་ཅིང་རྡོ་རྗེའི་རིགས་ཀྱི་རང་བཞིན་དུ་བསམ་པར་བྱའོ། །དེ་ནས་
[218b.4]རང་གི་སྙིང་གར་འབར་བའི་རྡོ་རྗེ་ལ་རང་གི་གཟུངས་ཀྱི་རིག་པའི་ཡི་གེ་བཀོད་ལ་དེ་ཉིད་བརྗོད་ཅིང་རང་གི་གཟུངས་ཀྱི་ཕྱག་རྒྱ་བཅིངས་ཏེ། རྡོ་རྗེ་ཧཱུཾ་མཛད་ལ་སོགས་པའི་སྐུ་དང་། གསུང་དང་། ཐུགས་རྡོ་རྗེའི་རང་བཞིན་དུ་བདག་ཉིད་བསྒོམ་པར་བྱའོ། །དེ་ལྟར་གཟུངས་ཀྱི་
[218b.5]ལྷ་མོ་དང་མཉམ་པར་སྦྱོར་བ་བསྒོམས་པས་ཆགས་པའི་མཚན་ཉིད་བསྟན་ནས། ད་ནི་པདྨ་རིགས་ཀྱི་རྣལ་འབྱོར་པའི་ཆགས་པ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པ་སྒྱུ་མ་ལྟ་བུ་དང་། མཉམ་པར་སྦྱོར་བའི་བསྒོམ་པ་ལ་འཇུག་པའོ། །དག་པའི་བདག་ཉིད་
[218b.6]ནི་དེ་དག་པའི་བདག་ཉིད་དེ། ཐབས་དང་ཤེས་རབ་ཀྱི་ཏིང་ངེ་འཛིན་རྫོགས་པའི་ཕྱིར་དང་། འདོད་ཆགས་ལ་སོགས་པ་ཉོན་མོངས་པ་དང་། ཉེ་བའི་ཉོན་མོངས་པ་སྤང་བའི་ཕྱིར། དག་པ་ཞེས་བྱ་བའི་དོན་ཏོ། །མུ་སྟེགས་རྣལ་འབྱོར་ཅན་མ་དག །ཅེས་བྱ་བ་དངོས་
[218b.7]པོར་འཛིན་པས་མངོན་པར་ཞེན་པའི་མུ་སྟེགས་ཅན་རྣམས་དང་། ཉན་ཐོས་དང་། རང་རྒྱལ་བའི་རྣལ་འབྱོར་པ་རྣམས་ནི་མ་དག་པ་སྟེ། དངོས་པོར་འཛིན་པའི་མངོན་པར་ཞེན་པ་ལས་འདོད་ཆགས་ལ་སོགས་པ་སྐྱེའོ་ཞེས་བྱ་བའི་དོན་ཏོ། །དག་པའི་བདག་
[219a]
[219a.1]ཉིད་དམ་ཚིག་ནི། །བསྲུངས་ན་དངོས་གྲུབ་ཐོབ་པར་འགྱུར། །ཞེས་བྱ་བ་ནི་དེ་ལྟར་གྱུར་པའི་འདོད་ཆགས་ཀྱི་དམ་ཚིག་དེ་ནི་སྒྱུ་མ་ལྟ་བུའི་མཉམ་པར་སྦྱོར་བའི་བསྒོམ་པ་དང་ལྡན་པ་དེ་རྣམས་སྒྱུ་མ་དང་མཚུངས་པ་མཉམ་པར་སྦྱོར་བའི་མཚན་ཉིད་ཀྱི་དམ་
[219a.2]ཚིག་བསྲུངས་ན་དངོས་གྲུབ་ཐོབ་པར་གྱུར་པ་ནི་པདྨའི་རིགས་ཀྱི་གཟུངས་ཀྱི་དམ་ཚིག་གི་ཕྱག་རྒྱའི་དངོས་གྲུབ་ཐོབ་པའོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འགྲོ་བ་འདུལ་བ་ལ་སོགས་པ་པདྨའི་རིགས་ཀྱི་རྣལ་འབྱོར་བྱས་ལ།
[219a.3]ཆོ་ག་ཐམས་ཅད་རྗེས་སུ་སྤྱད་དེ། ཕྱག་བཞི་བྱས་ནས་ཕྱིས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་རང་གི་གཟུངས་ཀྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་པདྨའི་སྟེང་དུ་རང་གི་གཟུངས་ཀྱི་རིག་པའི་ཡི་གེ་རྣམ་པར་བཀོད་ལ་དེ་ཉིད་བརྗོད་
[219a.4]ཅིང་རང་གི་གཟུངས་ཀྱི་ལྷ་མོ་མདུན་དུ་བསམ་པར་བྱའོ། །དེ་ནས་དེ་དང་ལྷན་ཅིག་ཏུ་མཉམ་པར་སྦྱོར་བ་བསྒོམས་ཏེ། ཆོས་ཐམས་ཅད་རང་བཞིན་གྱིས་རྣམ་པར་དག་པ་སྒྱུ་མ་དང་མཚུངས་སོ་ཞེས་ངེས་པར་བྱའོ། །རྡོ་རྗེ་ནོར་བུ་སྔར་བཅིངས་ལ། །ཞེས་བྱ་བ་
[219a.5]ནི་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ནོར་བུ་ཆེན་པོའི་དམ་ཚིག་གི་ཕྱག་རྒྱ་རྡོ་རྗེ་ནོར་བུ་སྔར་བཅིང་བར་བྱའོ། །རྡོ་རྗེ་སྙིང་པོའི་ཏིང་འཛིན་གྱིས། །ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་
[219a.6]ལུས་འཕགས་པ་ནམ་མཁའི་སྙིང་པོའི་ང་རྒྱལ་བྱའོ། །མ་རུངས་རྣམས་ཀྱི་ནོར་འཕྲོགས་ན། །ཞེས་བྱ་བ་ནི་གདུག་པ་ཅན་གྱི་རྒྱལ་པོ་ལ་སོགས་པ་གང་ཡིན་པ་རྣམས་རྩར་འདུག་ནས་དཀོན་མཆོག་གསུམ་ལ་གནོད་པ་བྱེད་ཅིང་དེ་རྣམས་ཀྱི་འབྱོར་པ་དང་ནོར་
[219a.7]ཡོད་པ་གང་ཡིན་པ་མི་སྟེར་བ་དང་། ནམ་མཁའ་དང་མཉམ་པའི་ཆོས་གང་ཡིན་པ་ལ་མི་འཇུག་པའི་རྒྱལ་པོ་ལ་སོགས་པ་མ་རུངས་པ་དེ་དག་ལས་བདག་པོ་འཕྲོགས་ནས། སེར་སྣས་ནོར་རྫས་ཀྱི་རྫས་སུ་འཛིན་པའི་མངོན་པར་ཞེན་པ་རྣམས་ནམ་མཁའ་དང་
[219b]
[219b.1]མཉམ་པའི་ཡེ་ཤེས་བསྐྱེད་པས་རྫས་སུ་འཛིན་པའི་མངོན་པར་ཞན་པའི་མཚན་ཉིད་ཀྱི་ནོར་བུ་ཕྲོགས་པའོ། །དམ་ཚིག་དངོས་གྲུབ་སྦྱིན་པར་བྱེད། །ཅེས་བྱ་བ་ནི་དེ་ལྟར་གྱུར་པའི་རྣལ་འབྱོར་པ་དེས་ནོར་འཕྲོག་པར་བྱེད་པའི་ནོར་བུའི་རིགས་ཀྱི་གཟུངས་ཀྱི་
[219b.2]དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་མཚན་ཉིད་ཀྱི་དམ་ཚིག་དེ་ལས་མི་འདའ་བའི་དོན་ཏེ། དངོས་གྲུབ་སྦྱིན་པ་ནི་དངོས་གྲུབ་རབ་ཏུ་སྟེར་བར་འགྱུར་བའོ། །དེའི་དོན་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་
[219b.3]ཆེན་པོ་ལས་བཤད་པའི་དོན་ཐམས་ཅད་གྲུབ་པ་ལ་སོགས་པའི་རྣལ་འབྱོར་བྱས་ནས། ཆོ་ག་ཐམས་ཅད་རྗེས་སུ་སྤྱད་ལ། ཕྱག་བཞི་བྱས་ཏེ། རང་གི་སྙིང་གའི་ཟླ་བ་ལ་རྡོ་རྗེ་རིན་པོ་ཆེ་བསམས་ནས། རྡོ་རྗེ་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་
[219b.4]དམ་ཚིག་གི་ཕྱག་རྒྱ་བཅིངས་ཏེ། བཅོམ་ལྡན་འདས་མ་རྡོ་རྗེ་ནོར་བུ་ཆེན་པོའི་བཙུན་མོ་དོན་ཐམས་ཅད་གྲུབ་པ་ལ་སོགས་པའི་གཟུངས་འཛིན་པར་བདག་ཉིད་བསམས་ནས་རང་གི་སྙིང་ག་ལས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་རྡུལ་ཕྲ་རབ་དང་མཉམ་པ་བསྐྱེད་
[219b.5]ལ། མགུ་བར་བྱས་ནས། དེ་ནས་དེས་རྒྱལ་པོ་ལ་སོགས་པ་མ་རུངས་པ་ཐམས་ཅད་ཀྱི་ལོངས་སྤྱོད་དང་བྲལ་བར་བྱའོ། །ནམ་མཁའ་དང་མཉམ་པའི་ཡེ་ཤེས་ཀྱིས་ནོར་བུའི་རིགས་ཀྱི་རང་བཞིན་དུ་བསྐྱེད་ལ། ཡང་དེས་དེ་དང་འཁྱུད་ཅིང་། དེ་ཡང་སྒྱུ་མ་དང་མཚུངས་
[219b.6]པས་ལྷན་ཅིག་ཏུ་མཉམ་པར་སྦྱོར་བར་བསྒོམ་པར་བྱའོ། །དེ་ནས་དེ་དང་གཅིག་ཏུ་གྱུར་བས་འཕགས་པ་ནམ་མཁའི་སྙིང་པོའི་བདག་ཉིད་དུ་བསམས་ཏེ། ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རང་གི་གཟུངས་ཀྱི་དམ་ཚིག་གི་ཕྱག་རྒྱ་བཅིངས་ལ་རང་གི་
[219b.7]སྙིང་གའི་རྡོ་རྗེ་རིན་པོ་ཆེ་ལ་རང་གི་གཟུངས་ཀྱི་རིགས་པའི་ཡི་གེ་བཀོད་དེ། དེ་ཉིད་ཟློས་ཤིང་འཕགས་པ་ནམ་མཁའི་སྙིང་པོ་རང་གི་དམ་ཚིག་གི་ཕྱག་རྒྱའི་ལྷ་མོ་དང་མཉམ་པར་སྦྱོར་བས་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་གི་
[220a]
[220a.1]དངོས་གྲུབ་ཀྱི་གསང་བའི་རྒྱུད་བསྟན་ནས། ད་ནི་དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཆོས་ཀྱི་དངོས་གྲུབ་ཀྱི་གསང་བའི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་སྔ་མ་བཞིན་ནོ། །
[220a.2]དེ་དག་གི་ཆོས་ཀྱི་དངོས་གྲུབ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱའི་དངོས་གྲུབ་བོ། །དེ་ཉིད་ཀྱི་གསང་བ་སྟོན་པ་ནི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །ཆོས་རྣམས་རང་བཞིན་དག་པར་ནི། །ཞེས་བྱ་བ་ལ་སོགས་པ་རྣམས་བཤད་
[220a.3]ཟིན་ཏོ། །དགོས་པ་ཐམས་ཅད་བྱས་ནས་ནི། །སངས་རྒྱས་པ་ཡི་དངོས་གྲུབ་ཐོབ། །ཅེས་བྱ་བ་ནི་ཕྱག་འཚལ་བ་ལ་སོགས་པའི་དགོས་པ་ཐམས་ཅད་བྱས་པའོ། །སངས་རྒྱས་ཀྱི་དངོས་གྲུབ་ནི་སངས་རྒྱས་རྣམས་ཀྱིས་བྱས་པའོ། །དེའི་དངོས་གྲུབ་ཐོབ་པ་ནི་གཟུངས་ཀྱི་དཀྱིལ་འཁོར་
[220a.4]ལས་བཤད་པའི་ཆོས་ཀྱི་ཕྱག་རྒྱའི་དངོས་གྲུབ་ཅེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་དེ་བཞིན་གཤེགས་པའི་རྣལ་འབྱོར་བྱས་ལ། ཆོས་ཐམས་ཅད་སྒྱུ་མ་དང་མཚུངས་པ་ཡིན་ནོ་ཞེས་བསྒོམས་ནས་
[220a.5]ཕྱག་བཞི་བྱ་བའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། གཟུངས་ཀྱི་དཀྱིལ་འཁོར་ལས་བཤད་པའི་རང་གི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བཀོད་དེ། རང་གི་སྙིང་གའི་ཟླ་བ་ལ་གནས་པའི་རྡོ་རྗེ་ལ་ཆོས་ཀྱི་ཕྱག་རྒྱའང་དེ་ཉིད་དུ་བཀོད་ལ། དེ་ཉིད་བརྗོད་ལ་རང་གི་གཟུངས་ཀྱི་
[220a.6]ལྷ་མོའི་གཟུགས་སུ་སྤྲུལ་ནས་འཇིག་རྟེན་གྱི་ཁམས་རྡུལ་ཕྲ་རབ་དང་མཉམ་པའི་སེམས་ཅན་གྱི་ཁམས་དང་ཡང་དག་པར་སྦྱོར་བའི་བསྒོམས་པ་སྔོན་དུ་འགྲོ་བས་སངས་རྒྱས་ཉིད་ལ་རབ་ཏུ་འཇོག་པ་བསམ་པར་བྱའོ། །དེའི་རྗེས་ལ་རང་ཉིད་དང་མཉམ་པར་སྦྱོར་བ་བསྒོམ་པར་བྱའོ། །
[220a.7]དེ་ལྟར་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བསྒོམས་ན་བྱ་བ་བྱས་པར་འགྱུར་རོ། །དེ་བཞིན་གཤེགས་པའི་རིགས་ཀྱིས་ནི་སེམས་ཅན་དེ་དག་དང་ཀུན་ལ་ཆགས་པ་བསྒོམས་པས་ཆོས་ཀྱི་ཕྱག་རྒྱའི་རང་བཞིན་གྱིས་གཟུངས་ཀྱི་ཡུལ་དེ་རྣམས་ལ་སྐྱོ་བར་མ་
[220b]
[220b.1]གྱུར་ཅིང་། མངོན་པར་དགའ་བའི་མཉམ་པར་སྦྱོར་བ་ལ་ཆགས་པ་དང་མ་བྲལ་བར་བསྒོམ་པའོ། །བུད་མེད་ནི་གཟུངས་ཀྱི་ལྷ་མོ་རྣམས་སོ། །དེ་དག་ལ་དགའ་བའི་དག་པ་ནི་གཟུགས་བརྙན་དང་མཚུངས་པའི་རྣལ་འབྱོར་བསྒོམས་པས་སོ། །གསང་ཆོས་དངོས་གྲུབ་
[220b.2]མཆོག་སྦྱིན་ནོ། །ཞེས་བྱ་བ་ནི་གཟུགས་བརྙན་དང་མཚུངས་པའི་རྣལ་འབྱོར་བསྒོམས་པས་ཉིད་ཀྱི་གསང་བའི་ཆོས་ལ་སེམས་པར་བྱེད་པ་ཡིན་ནོ། །གང་གི་ཕྱིར་དེ་ལྟར་གྱུར་པའི་གསང་བའི་ཆོས་དམ་པའི་དངོས་གྲུབ་དམ་པ་བཟང་པོ་ཡིན་པའི་ཕྱིར། རྡོ་རྗེ་འཛིན་པ་ཆེན་
[220b.3]པོ་ཉིད་ཀྱིས་མཆོག་གི་དངོས་གྲུབ་འདི་གསུངས་སོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པ་དང་། དེའི་རིགས་ཀྱི་ལྷའི་རྣལ་འབྱོར་བྱས་ལ། ཕྱག་རྒྱ་བཞི་བྱ་བའི་
[220b.4]མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་སྔོན་དུ་འགྲོ་བས། དེ་བཞིན་གཤེགས་པའི་རིགས་ཐམས་ཅད་སྤྲུལ་ལ་
[220b.5]གཟུངས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ཏེ། ཡང་སྙིང་གའི་རྡོ་རྗེ་ལ་དེ་ཉིད་རྣམ་པར་བཀོད་ནས། དེ་ཉིད་བརྗོད་ཅིང་རང་གི་སྙིང་ག་ལས་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་ནས། རྡོ་རྗེ་འབེབས་པའི་མཐར་ཐུག་པའི་གཟུངས་ཀྱི་
[220b.6]ལྷ་མོའི་ཚོགས་ཕྱུང་ལ་དེ་བཞིན་གཤེགས་པ་རྣམ་པར་སྣང་མཛད་ལ་སོགས་པ་ནས་བརྩམས་ནས། རྡོ་རྗེ་འབེབས་པའི་མཐར་ཐུག་པའི་དེ་བཞིན་གཤེགས་པའི་རིགས་རྣམས་དང་། རང་གི་གཟུངས་ཀྱི་ལྷ་མོ་དང་མཉམ་པར་སྦྱོར་བ་བསམས་ཏེ། རང་གི་གཟུངས་ཀྱི་ལྷ་མོ་དང་
[220b.7]གཅིག་ཏུ་སྒྱུ་མ་ལྟ་བུར་མཉམ་པར་སྦྱོར་བར་བསྒོམ་པར་བྱའོ། །སྣ་ཡི་ཧཱུཾ་གི་སྦྱོར་བ་ཡིས། །ཞེས་བྱ་བ་ནི་རྣལ་འབྱོར་པས་ཧཱུཾ་ཞེས་བརྗོད་པས་སྣའི་ཧཱུཾ་གི་སྦྱོར་བ་དེ་ཉིད་ནི་སྣའི་ཧཱུཾ་གི་སྦྱོར་བའོ། །གདུག་པ་ཐམས་ཅད་བསད་ན་ནི། །ཞེས་བྱ་བ་ནི་མི་དགེ་བ་ལ་འཇུག་པ་ཐམས་ཅད་
[221a]
[221a.1]ནི་གདུག་པ་ཐམས་ཅད་དེ། སྣའི་ཧཱུཾ་གི་སྦྱོར་བ་འདིས་རྣམ་པར་སྦྱངས་པ་ནི་བསད་པའོ། །འཁོར་བའི་བདག་ཉིད་ཀྱི་དངོས་པོ་དེ་དག་བསད་ནས་དེས་རྡོ་རྗེ་རིགས་ཀྱི་རང་བཞིན་དུ་བྱས་པའོ། །ཇི་ལྟར་ཡིན་ཞེ་ན། ཕྲ་མོ་རྡོ་རྗེ་ལ་གནས་ནས། །ཞེས་བྱ་བ་སྨོས་ཏེ། རྡོ་རྗེ་རིགས་
[221a.2]ཀྱི་ཆོས་ཀྱི་དཀྱིལ་འཁོར་གྱི་ཁྲོ་བོའི་ཏིང་ངེ་འཛིན་ལ་སྙོམས་པར་ཞུགས་པ་ཞེས་བྱ་བའི་དོན་ཏོ། །ཆོས་ཀྱི་དངོས་གྲུབ་ཐོབ་པར་འགྱུར། །ཞེས་བྱ་བ་ནི་དེ་ལྟར་སྣའི་ཧཱུཾ་གི་སྦྱོར་བས་རྡོ་རྗེ་ཁྲོ་བོའི་ཏིང་ངེ་འཛིན་ལ་གནས་ཏེ། གདུག་པ་ཐམས་ཅད་བསད་ནས། རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་
[221a.3]ལས་བཤད་པའི་ཆོས་ཀྱི་ཕྱག་རྒྱའི་དངོས་གྲུབ་ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། དངོས་གྲུབ་ཀྱི་ཆོ་ག་ཐམས་ཅད་རྗེས་སུ་སྤྱད་ནས། འཇིག་རྟེན་
[221a.4]གསུམ་ལས་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ཁྲོ་བོའི་ཕྱག་རྒྱ་ཆེན་པོ་བཅིངས་ཏེ། སྣའི་རྩེ་མོ་ཧཱུཾ་ལས་རྡོ་རྗེ་ཕྲ་མོ་བསྒོམས་ཏེ། ཐུན་བཞིའི་སྦྱོར་བ་བྱའོ། །དེ་ལ་སྤྲོ་བ་དང་བསྡུ་བའི་སྦྱོར་བས་ཀྱང་ཟླ་བ་གཅིག་བྱའོ། །དེའི་རྗེས་ལ་ཡང་མཚན་ཐོག་ཐག་
[221a.5]བསྒོམས་ན་དེ་ནས་སེམས་བརྟན་པར་འགྱུར་རོ། །དེ་ནས་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པར་འདོད་ན་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྣའི་ཧཱུཾ་གི་སྦྱོར་བས་རྡོ་རྗེ་ཕྲ་མོ་སྤྲུལ་ཏེ། འཇིག་རྟེན་
[221a.6]གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སེམས་ཅན་གྱི་ཁམས་རྣམས་ཡིད་ཀྱིས་ཐལ་བར་བྱས་ཏེ། རྡོ་རྗེ་རིགས་ཀྱི་ངོ་བོར་བསྐྱེད་ལ། ཕྱིས་རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རང་གི་གཟུངས་ཀྱི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ཏེ་ཡང་སྙིང་
[221a.7]གའི་རྡོ་རྗེ་དེ་ལ་ཡང་རྣམ་པར་བསམས་ཏེ་དེ་ཉིད་ཟློས་ཤིང་རང་གི་ཁྲོ་བོའི་གཟུགས་ཀྱི་རང་བཞིན་རྣམ་པར་དག་པ་གཟུགས་བརྙན་དང་མཚུངས་པར་བྱའོ། །རྡོ་རྗེ་ཕྲ་མོའི་ཚུལ་གྱིས་ནི། །རྡོ་རྗེ་ཆོས་ཀྱི་ཏིང་འཛིན་གྱིས། །བུད་མེད་ཀུན་དང་རྩེ་བྱེད་ན། །ཞེས་བྱ་བ་ནི་རྣལ་འབྱོར་གཅིག་བརྟན་
[221b]
[221b.1]པར་བྱས་ནས། ཕྱིས་ཐམས་ཅད་དུ་ཁྱབ་པའི་སྦྱོར་བ་བསྒོམས་པ་ནི་རྡོ་རྗེ་ཕྲ་མོའི་ཚུལ་གྱིས་སོ། །རྡོ་རྗེ་ཕྲ་མོའི་ཚུལ་དེས་ཆོས་ཀྱི་ཕྱག་རྒྱའི་ལྷའི་བུད་མེད་ཀུན། བདག་ཉིད་ཀྱིས་རྩེ་བར་བྱེད་པས་ཐམས་ཅད་དུ་སྤྲོས་པའི་མཉམ་པར་སྦྱོར་བར་བྱའོ། །ཆོས་ཀྱི་དངོས་གྲུབ་ཐོབ་པར་འགྱུར། །ཞེས་
[221b.2]བྱ་བ་ནི་པདྨའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱའི་དངོས་གྲུབ་ནི་ཆོས་ཀྱི་དངོས་གྲུབ་སྟེ་དེ་ཐོབ་པའོ། །ཏིང་ངེ་འཛིན་གང་གིས་ཤེ་ན། རྡོ་རྗེ་ཆོས་ཀྱི་ཏིང་འཛིན་གྱིས། །ཞེས་བྱ་བ་སྨོས་ཏེ། འགྲོ་བ་འདུལ་བའི་ཆོས་ཀྱི་དཀྱིལ་འཁོར་ཆེན་པོ་ལས་
[221b.3]བཤད་པའི་རང་གི་འཇིག་རྟེན་དབང་ཕྱུག་གི་རྣལ་འབྱོར་བྱས་ནས་ཞེས་བྱ་བའི་དོན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་རྣལ་འབྱོར་བྱས་ནས་ཕྱག་བཞི་བྱས་པའི་མཐར་ཐུག་པའི་ཆོ་ག་རྗེས་སུ་སྤྱད་ལ། ཕྱིས་
[221b.4]གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམ་པར་བྱའོ། །དེ་ནས་རང་གི་སྙིང་གའི་ཟླ་བ་ལ་གནས་པའི་རྡོ་རྗེ་པདྨ་ཉིད་ཀྱང་བསམ་པར་བྱའོ། །དེ་ཉིད་ཟློས་ཤིང་མདུན་དུ་རང་གི་ཆོས་ཀྱི་ཕྱག་རྒྱའི་གཟུངས་ཀྱི་ལྷ་མོ་བསམས་ནས་དེ་
[221b.5]ནས་དེ་དང་ལྷན་ཅིག་ཏུ་མཉམ་པར་སྦྱོར་བས་བསྒོམས་ལ་ཇི་སྲིད་སྣང་བ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྤྲོ་བ་དང་བསྡུ་བའི་སྒོ་ནས་ཇི་སྲིད་དུ་ནམ་མཁའི་ཁམས་ཡོངས་སུ་གང་བར་མཐོང་བ་དེ་སྲིད་ཀྱི་བར་དུའང་བསྒོམ་པར་བྱས་ནས། དེའི་རྗེས་ལ་
[221b.6]མཚན་ཐོག་ཐག་བསྒོམས་ན་འཕགས་པ་སྤྱན་རས་གཟིགས་དབང་ཕྱུག་ཏུ་འགྱུར་རོ། །དབང་པོ་གཉིས་ནི་སྒྲུབ་པ་པོའི་དབང་པོའི་དབང་པོ་དང་། བསྒྲུབ་པར་བྱ་བའི་ལྷའི་ལུས་ཀྱི་དབང་པོ་དེ་གཉིས་གཅིག་ཏུ་གྱུར་པ་ནི། དབང་པོ་གཉིས་ནི་མཉམ་སྦྱོར་བའོ། །དབང་པོ་དེ་
[221b.7]གཉིས་ཀྱི་མཉམ་པར་སྦྱོར་བས་ནི་རེ་བ་ཐམས་ཅད་དེ། བདག་ཉིད་ཀྱིས་ནོར་བུའི་རིགས་ཐོབ་པར་འདོད་པ་དེ་ཡོངས་སུ་བསྐངས་པའོ། །གཞན་ནོར་བུའི་རིགས་དང་མཉམ་པར་སྦྱོར་བ་བསྒོམ་པ་སྟེ། དེ་དག་ཀྱང་དེ་ལྟར་ཐམས་ཅད་དུ་སོང་བས་ན་བྱ་བ་ཡིན་ནོ། །གང་བསྒོམས་
[222a]
[222a.1]པས་ཤེ་ན། བུད་མེད་དམ་ནི་སྡུག་པ་ཡིས། །དངོས་གྲུབ་བླ་མེད་ཐོབ་པར་འགྱུར། །ཞེས་བྱ་བ་སྨོས་ཏེ། གཟུངས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱའི་གཟུངས་ཀྱི་ལྷ་མོ་ནི་བུད་མེད་དོ། །སྡུག་པ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་
[222a.2]བཤད་པའི་དོན་ཐམས་ཅད་གྲུབ་པ་ལ་སོགས་པའི་སེམས་དཔའ་ཆེན་པོ་རྣམས་སོ། །དེ་དག་དང་འབྲེལ་པའི་དངོས་གྲུབ་ཐོབ་པར་གྱུར་པའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ་ཕྱག་བཞི་བྱ་བའི་
[222a.3]མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས། ཕྱིས་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ཏེ། ཡང་རང་གི་སྙིང་གར་ཏྲཱཾ་ལས་རྡོ་རྗེ་རིན་པོ་ཆེ་བསྐྱེད་ལ། དབུས་སུ་རང་གི་གཟུངས་ཀྱི་ཆོས་ཀྱི་ཕྱག་རྒྱ་
[222a.4]རྣམ་པར་བསམས་ཏེ། དེ་ཉིད་བརྗོད་ཅིང་རིན་པོ་ཆེའི་གཟུངས་ཀྱི་ལྷ་ཐམས་ཅད་རང་གི་སྙིང་གའི་རྡོ་རྗེ་རིན་པོ་ཆེ་ལས་ཕྱུང་ལ། དེ་ཐམས་ཅད་དུ་སོང་བ་དང་མཉམ་པར་སྦྱོར་བ་བསྒོམ་པར་བྱའོ། །དེ་ལྟར་རིགས་ཐམས་ཅད་ཀྱི་གཟུངས་ཀྱི་དཀྱིལ་འཁོར་ཕྱག་རྒྱའི་དངོས་གྲུབ་ཀྱི་ཆོ་ག་
[222a.5]རྒྱས་པར་བསྟན་ནས། ད་ནི་དེ་ནས་ཞེས་བྱ་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་ལས་ཀྱི་དངོས་གྲུབ་ཀྱི་གསང་བའི་རྒྱུད་གསུངས་སོ། །དེ་བཞིན་གཤེགས་པའི་རིགས་ཐམས་ཅད་ནི་བཤད་ཟིན་ཏོ། །དེ་དག་གི་ལས་ཀྱི་དངོས་གྲུབ་ནི་གཟུངས་ཀྱི་དཀྱིལ་འཁོར་ལས་
[222a.6]བཤད་པའི་ལས་ཀྱི་ཕྱག་རྒྱའི་དངོས་གྲུབ་རྣམས་སོ། །དེ་ཉིད་ཀྱི་གསང་བ་དེ་སྟོན་པར་བྱེད་པའི་རྒྱུད་ནི་ལས་ཀྱི་དངོས་གྲུབ་ཀྱི་རྒྱུད་གསང་བ་གསུངས་སོ། །བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་རང་གི་སྙིང་
[222a.7]གའི་རྡོ་རྗེ་སེམས་དཔའ་དེ་ལ་དམིགས་པའི་སེམས་ནི་རྡོ་རྗེ་སེམས་དཔའི་ཏིང་ངེ་འཛིན་ཏོ། །སངས་རྒྱས་རྗེས་སུ་དྲན་བསྒོམས་ལ། །ཞེས་བྱ་བ་ནི་སྒྲུབ་པ་པོ་རང་ཉིད་ཀྱི་ལུས་དེར་གནས་པའི་རྣམ་པར་སྣང་མཛད་ལ་སོགས་པའི་གཟུངས་སུ་བྱའོ། །བུད་མེད་ལུས་ཀྱི་བུ་གར་ཞུགས། །
[222b]
[222b.1]ཞེས་བྱ་བ་ནི་བུད་མེད་ཀྱི་བྷ་གའི་ལམ་ནས་ཞུགས་པས་བུད་མེད་རྣམས་དབང་དུ་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཆེན་པོ་ལས་བཤད་པའི་རང་གི་དེ་བཞིན་གཤེགས་པའི་རྣལ་འབྱོར་བྱས་ལ། ཕྱག་བཞི་ལ་མཐར་ཐུག་པའི་རང་གི་ཆོ་ག་
[222b.2]ཐམས་ཅད་རྗེས་སུ་སྤྱད་ནས། ཕྱིས་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་གའི་ཟླ་བའི་རྡོ་རྗེ་རྩེ་ལྔ་པ་ལ་གཟུངས་ཀྱི་རིག་པའི་ཡི་གེ་བསམ་པར་བྱས་ནས། དེ་ཉིད་བརྗོད་ཅིང་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་བདག་ཉིད་ངེས་པར་ཕྱུང་ལ། མདུན་དུ་རང་གི་
[222b.3]གཟུངས་ཀྱི་ལྷ་མོ་བསམ་པར་བྱའོ། །དེ་ནས་དེ་ནི་ལུས་ཀྱི་བུ་གར་ཇི་སྐད་བཤད་པ་བཞིན་དུ་ཡིད་ཀྱིས་ཞུགས་ནས། དེའི་རྗེས་ལ་དེའི་སྙིང་གར་གནས་ཏེ། དེའི་ལུས་ཐམས་ཅད་ལ་ཁྱབ་པར་བསྒོམ་པར་བྱའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་སྔ་མ་བཞིན་
[222b.4]ནོ། །བུ་ག་ནས་ནི་དེ་བཞིན་ཞུགས། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །དེའི་དོན་ནི་འདི་སྐད་བསྟན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་རྣལ་འབྱོར་བྱས་ལ་ཕྱག་བཞི་མཐར་
[222b.5]ཐུག་པའི་ཆོ་ག་རྗེས་སུ་སྤྱད་ནས། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་སེམས་དཔའ་ལ་རང་གི་གཟུངས་ཀྱི་རིག་པ་རྣམ་པར་བསམས་ཏེ། དེ་ཉིད་ཟློས་ཤིང་སེམས་དཔའ་ཆེན་པོ་ནི་བདག་རང་ཡིན་ནོ་ཞེས་རྣམ་པར་
[222b.6]བསམས་ལ། མདུན་དུ་གཟུངས་ཀྱི་ལྷ་མོ་རྣམ་པར་བསམས་ནས། ཇི་སྐད་དུ་བཤད་པའི་ལམ་ནས་ཡིད་ཀྱིས་ཞུགས་ཏེ། དེ་དང་དེའི་སྙིང་གར་གནས་ནས་ཡན་ལག་ཐམས་ཅད་ལ་ཁྱབ་པར་བསྒོམ་པར་བྱའོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་ནི་འཇིག་རྟེན་གསུམ་ལས་རྣམ་པར་
[222b.7]རྒྱལ་བའི་ཕྱག་རྒྱ་དེ་བཅིངས་པའོ། །རྣམ་པར་གཡེང་བ་སྤངས་པའི་སེམས་ཀྱིས་ཇི་སྐད་དུ་བཤད་པའི་བུ་ག་ནས་ཁྲོ་བ་དང་བཅས་པས་ཞུགས་ནས་རང་གི་གཟུངས་ཀྱི་ལྷ་མོའི་ལུས་དང་སེམས་བརྒྱལ་ཞིང་དབང་དུ་བྱེད་པར་འགྱུར་རོ། །དེ་ནི་འདི་སྐད་སྟོན་པ་ཡིན་ཏེ། འཇིག་རྟེན་
[223a]
[223a.1]གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་རྣལ་འབྱོར་བྱས་ལ། ཕྱག་བཞི་ལ་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་དེ། རང་གི་སྙིང་གའི་རྡོ་རྗེ་འབར་བའི་དབུས་སུ་ཡི་གེ་ཧཱུཾ་རྣམ་པར་བསམས་ནས། འཇིག་རྟེན་གསུམ་
[223a.2]ལས་རྣམ་པར་རྒྱལ་བའི་ལས་ཀྱི་ཕྱག་རྒྱ་རྣམ་པར་བཅིངས་ཏེ། ཧཱུཾ་དེ་ཉིད་བརྗོད་ཅིང་མདུན་དུ་ལྷ་མོའི་ལུས་ཀྱི་ཇི་སྐད་བཤད་པའི་བུ་ག་ནས་ཁྲོ་བ་དང་བཅས་པའི་ཡིད་ཀྱིས་ཞུགས་ཏེ། དེ་ནས་དེའི་སྙིང་གར་གནས་ནས་ཡན་ལག་ཐམས་ཅད་ཁྱབ་པར་བྱས་ནས། གཟུངས་ཀྱི་དཀྱིལ་འཁོར་ལས་
[223a.3]བཤད་པའི་ལས་ཀྱི་ཕྱག་རྒྱ་བཅིངས་ཏེ། རང་གི་གཟུངས་ཀྱི་རིག་པ་ཟློས་ཤིང་བསྒོམ་པར་བྱའོ། །དེ་ལྟར་ན་དེའི་གཟུངས་སུ་གྱུར་པ་ཡིན་ནོ། །པདྨའི་རིགས་ཀྱི་གཟུངས་ཀྱི་དཀྱིལ་འཁོར་གྱི་གཟུངས་ཀྱི་ལས་ཀྱི་ཕྱག་རྒྱ་ནི་ཆོས་ཀྱི་ལས་ཀྱི་ཕྱག་རྒྱ་དེ་བཅིངས་ནས། པདྨའི་རིགས་ཀྱི་ཏིང་འཛིན་
[223a.4]གྱིས། །ཞེས་བྱ་བ་ནི་རང་གི་སྙིང་གའི་རྡོ་རྗེ་པདྨ་ལ་དམིགས་པའི་སེམས་ནི་པདྨ་ལ་དམིགས་པའི་ཏིང་ངེ་འཛིན་ཏོ། །པདྨའི་ཏིང་ངེ་འཛིན་དེས་ཇི་སྐད་བཤད་པའི་གཟུངས་ཀྱི་ལུས་ཀྱི་བུ་ག་ནས་ཡིད་ཀྱིས་ཞུགས་པའི་རྣལ་འབྱོར་པས་བུད་མེད་རྣམས། ཐམས་ཅད་ཀྱང་ནི་བསྲུང་བར་འགྱུར། །
[223a.5]ཞེས་བྱ་བ་ནི་གཟུངས་ཀྱི་ལྷ་མོ་ཐམས་ཅད་བསྲུངས་པས་རང་གི་བཀས་དབང་དུ་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འགྲོ་བ་འདུལ་བའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས། རང་གི་སྙིང་
[223a.6]གའི་ཟླ་བའི་རྡོ་རྗེ་པདྨའི་སྟེང་དུ་རང་གི་གཟུངས་ཀྱི་རིག་པའི་ཡི་གེ་རྣམ་པར་བཀོད་ལ། རང་གི་གཟུངས་ཀྱི་ལྷའི་ལས་ཀྱི་ཕྱག་རྒྱ་བཅིངས་ཏེ། འཇིག་རྟེན་དབང་ཕྱུག་ཏུ་བདག་ཉིད་རྣམ་པར་བསམས་ནས། མདུན་དུ་གཟུངས་ཀྱི་ལྷ་མོ་གཅིག་གམ་པདྨའི་རིགས་ཀྱི་གཟུངས་ཀྱི་ལྷ་མོ་ཐམས་ཅད་
[223a.7]རང་གི་གཟུངས་ཀྱི་རིག་པ་ཟློས་ཤིང་སྤྲུལ་ལ། རང་གི་གཟུངས་དེའི་ཇི་སྐད་བཤད་པའི་ལུས་ཀྱི་བུ་ག་ནས་ཡིད་ཀྱིས་ཞུགས་ལ་ལུས་ཐམས་ཅད་ཁྱབ་པར་བྱས་ནས། དེ་ནས་དེའི་སྙིང་གའམ་ཐམས་ཅད་ཀྱི་སྙིང་གར་བཞག་སྟེ་ཡན་ལག་ཐམས་ཅད་བཀང་ནས་བསྒོམ་ཞིང་བཟླས་པའོ། །
[223b]
[223b.1]དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ནོར་བུ་མཆོད་པའི་དམ་ཚིག་གི་ཕྱག་རྒྱའི་ལས་ཀྱི་རྡོ་རྗེ་ནོར་བུ་དེ་བཅིངས་ཏེ། ནོར་བུ་མཆོད་པའི་སྔགས་བརྗོད་པར་བྱའོ། །རྡོ་རྗེ་རིན་ཆེན་ཏིང་འཛིན་གྱིས། །ཞེས་བྱ་བ་ནི་རང་གི་སྙིང་གའི་རྡོ་རྗེ་རིན་པོ་ཆེ་ལ་དམིགས་པའི་སེམས་ནི་
[223b.2]རྡོ་རྗེ་རིན་པོ་ཆེའི་ཏིང་ངེ་འཛིན་ཏོ། །ཏིང་ངེ་འཛིན་དེས་ཇི་སྐད་བཤད་པའི་ལུས་ཀྱི་བུ་ག་ནས་ཡིད་ཀྱིས་ཞུགས་པའོ། །བུད་མེད་རྣམས་ནི་གཟུངས་རྣམས་སོ། །སྐད་ཅིག་གིས་ཕབ་གར་བྱེད་འགྱུར། །ཞེས་བྱ་བ་ནི་ལྷ་མོ་དེ་དག་གི་ལུས་ཀྱི་རྣལ་འབྱོར་པས་རང་གི་དབང་དུ་བྱས་ནས། དེ་
[223b.3]ཉིད་ལ་གནས་ནས་གར་བྱེད་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། དེ་བཞིན་དུ་ཆོ་ག་ཐམས་ཅད་རྗེས་སུ་ལྐུསྤྱད་ནས། རང་གི་སྙིང་གའི་རྡོ་རྗེ་རིན་པོ་ཆེ་རྣམ་པར་བསམས་ཏེ།
[223b.4]རང་གི་གཟུངས་ཀྱི་རིག་པའི་ཡི་གེ་དེའི་དབུས་སུ་རྣམ་པར་བསམས་ནས་དེ་ཉིད་ཟློས་ཤིང་རང་གི་གཟུངས་ཀྱི་ལས་ཀྱི་ཕྱག་རྒྱ་བཅིངས་ཏེ། དོན་ཐམས་ཅད་གྲུབ་པ་ལ་སོགས་པ་སེམས་དཔའ་ཆེན་པོ་བདག་ཉིད་རང་ཡིན་ནོ་ཞེས་བསམ་པར་བྱའོ། །རང་གི་སྙིང་གར་གནས་པའི་རྡོ་རྗེ་རིན་
[223b.5]པོ་ཆེ་ལས་རང་གི་གཟུགས་ཀྱི་ལྷ་མོ་སྤྲུལ་པ་མདུན་དུ་བཞག་སྟེ། དཀྱིལ་འཁོར་ཆེན་པོ་ལས་བཤད་པའི་ནོར་བུའི་མཆོད་པའི་ལས་ཀྱི་རྡོ་རྗེ་ནོར་བུ་མ་བཅིངས་ཏེ། དེའི་སྔགས་བརྗོད་ཅིང་ཇི་སྐད་དུ་བཤད་པའི་ལུས་དེའི་ལམ་ལས་འཇུག་པར་བྱའོ། །དེ་ནས་དེའི་སྙིང་གར་འདུག་ནས་
[223b.6]ཡན་ལག་ཐམས་ཅད་ལ་ཁྱབ་པར་བྱས་ནས་བདག་ཉིད་ཀྱིས་ནོར་བུ་མཆོད་པའི་གར་བྱའོ། །གཟུངས་ཀྱི་ལས་ཀྱི་ཕྱག་རྒྱ་བཅིངས་ཏེ། རང་གི་གཟུངས་ཀྱི་རིག་པ་ཟློས་ཤིང་བསྒོམ་པར་བྱའོ། །དེ་ལྟར་རིགས་ཐམས་ཅད་ཀྱི་ལས་ཀྱི་ཆོ་ག་རྒྱས་པའི་གསང་བའི་དངོས་གྲུབ་ཀྱི་རྒྱུད་བཤད་ནས།
[223b.7]ད་ནི་དཀྱིལ་འཁོར་ཆེན་པོའི་དབང་དུ་བྱས་ནས་གསུངས་པའི་རྒྱུད་ཕྱི་མ་ལས་བཤད་པའི་ཆོ་གས་མཚན་མ་ཐོབ་པ་དང་། མངོན་པར་ཤེས་པ་སྐྱེས་པའི་སྒྲུབ་པ་པོས་དཀྱིལ་འཁོར་བྲིས་ནས་གཟུངས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་
[224a]
[224a.1]པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དཀྱིལ་འཁོར་དག་པའི་དངོས་གྲུབ་ཀྱི་གསང་བའི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་ཇི་སྐད་དུ་བཤད་པའོ། །དེ་དག་གི་དཀྱིལ་འཁོར་ནི་གཟུངས་ཀྱི་སྒྲུབ་པ་པོས། དེ་ཉིད་ཀྱི་འཁོར་ལོ་ནི་
[224a.2]སྒྲུབ་བྱེ་པའི་དཀྱིལ་འཁོར་རོ། །དེ་སྐད་དུ་ཡང་། འཁོར་ལོའི་དཀྱིལ་འཁོར་ཞེས་བྱ་སྟེ། །དེ་ཉིད་དམ་ཚིག་ཅེས་སུ་བསྒྲགས། །ཞེས་བྱ་བ་ནི་ལྷ་རྣམས་ཐམས་ཅད་འདུས་པའི་ཕྱིར་སྐྱེའོ། །དམ་པ་ཀུན་འདུས་པའོ་ཞེས་སོ། །དེའི་དངོས་གྲུབ་ནི་གཟུངས་བསླབ་པར་བྱའོ། །དེ་ཉིད་ཀྱི་
[224a.3]དོན་གསང་བ་དེ་སྟོན་པར་བྱེད་པ་ནི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །ཆོས་ཀྱི་འཁོར་ལོ་འདྲ་བར་ནི། །ཞེས་བྱ་བ་ནི་གསང་བའི་དཀྱིལ་འཁོར་ཟླུམ་པོ་བྱ་བའམ། རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་ལྟར་བྲི་བར་བྱའོ། །ཡང་ཞེས་བྱ་བའི་སྒྲས་
[224a.4]ནི་ཕྱོགས་གཞན་སྟོན་པའོ། །ཡང་ན་གྲུ་བཞིར་བྲི་ཞེས་བྱ་བའི་དོན་ཏོ། །ཕྱག་རྒྱ་བུད་མེད་རྣམས་ཀྱིས་བསྐོར། །དེར་ནི་སངས་རྒྱས་གཞག་པར་བྱ། །ཞེས་བྱ་བ་ནི་དེ་བཞིན་གཤེགས་པའི་དཀྱིལ་འཁོར་གྱི་དབུས་སུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་
[224a.5]པོ་གཟུངས་ཀྱི་རིག་པ་བརྗོད་ཅིང་གཞག་པར་བྱའོ། །ལྷག་མ་ནི་གཟུངས་ཀྱི་ཕྱག་རྒྱའི་གཟུགས་ཉིད་ཡིན་ནོ། །དེ་ནས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། གཟུངས་ཀྱི་དཀྱིལ་འཁོར་ལས་བཤད་པའི་འཇུག་པའི་ཆོ་གས་གཟུངས་ཀྱི་དཀྱིལ་འཁོར་ལས་བཤད་པའི་
[224a.6]རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ་འཇུག་པར་བྱའོ། །གསང་བ་དེར་ནི་ཞུགས་ནས་ཀྱང་། །ཞེས་བྱ་བ་ནི་གཟུངས་ཀྱི་སྒྲུབ་པ་པོ་དཀྱིལ་འཁོར་དེར་རོ། །སངས་རྒྱས་ལ་ནི་ཉིད་དུ་སྨྲ། །ཞེས་བྱ་བ་འདིས་གཞན་རབ་ཏུ་བཀག་པ་ཡིན་ནོ། །ཅི་ཞིག་སྨྲ་ཞེ་ན། ཁྱབ་པའི་བཙུན་
[224a.7]མོ་སྟེ། ཀུན་གཏོང་བ་ནི་བདག་སྩོལ་ཅིག །ཅེས་བྱ་བ་གསུངས་ཏེ། རྡོ་རྗེ་སེམས་དཔའ་ནས་བརྩམས་ནས་རྡོ་རྗེ་འབེེབས་པ་ལ་མཐར་ཐུག་པའི་གཟུངས་འདི་ནི་བཅོམ་ལྡན་འདས་ཐབས་སུ་སོང་བའི་ཁྱོད་ཀྱི་བཙུན་མོ་ལགས་ཏེ། སྲིང་མོ་འདི་བདག་ལ་སྩོལ་ཅིག །བདག་ལ་ཁྱོད་ཀྱི་བཙུན་
[224b]
[224b.1]མོ་འདིར་རབ་ཏུ་སྩོལ་ཅིག །ཅིའི་ཕྱིར་བདག་ལ་སྩོལ་ཞེས་སྨྲ་ཞེ་ན། གང་ཕྱིར་ཁྱོད་ནི་ཀུན་གཏོང་བ། །ཞེས་བྱ་བ་སྨོས་ཏེ། དེ་སྐད་དུ་སྨོས་པས་ཅིར་འགྱུར་ཞེ་ན། ཞེས་ནི་རིགས་ཀུན་ཕྱག་རྒྱ་ཡི། །ཚུལ་ལ་ཡང་ནི་དེ་སྐད་བརྗོད། །ཅེས་བྱ་བ་སྨོས་ཏེ། ཇི་ལྟར་རྡོ་རྗེ་དབྱིངས་ཀྱི་གཟུངས་ཀྱི་
[224b.2]དཀྱིལ་འཁོར་གྱི་དབུས་སུ་བཅོམ་ལྡན་འདས་བྲིས་ཏེ། རྡོ་རྗེ་དབྱིངས་གཟུངས་ཀྱི་རྣལ་འབྱོར་པས་སངས་རྒྱས་ཀྱི་དངོས་གྲུབ་ཐོབ་པར་འགྱུར་རོ། །དེ་བཞིན་དུ་རྡོ་རྗེའི་རིགས་དང་། པདྨ་དང་། ནོར་བུའི་རིགས་དང་འབྲེལ་བའི་དེ་བཞིན་གཤེགས་པའི་རིགས་ཀྱི་གཟུངས་དང་། པདྨ་དང་། ནོར་
[224b.3]བུའི་རིགས་ཀྱི་རྣལ་འབྱོར་པས་གཟུངས་ཀྱི་དཀྱིལ་འཁོར་གྱི་དབུས་སུ་རྣམ་པར་སྣང་མཛད་བྲིས་ནས་ཇི་ལྟ་བ་བཞིན་དུ་གསང་བའི་དངོས་གྲུབ་ཐོབ་པར་འགྱུར་རོ། །གསང་བའི་ཞགཟུངས་རྣམས་ཀྱི་དངོས་གྲུབ་ནི་གསང་བའི་དངོས་གྲུབ་ཀྱི་ཕྱག་རྒྱ་ཆེན་པོའི་ཞེས་བྱ་བའི་དོན་ཏོ། །སངས་
[224b.4]རྒྱས་མཉམ་མེད་འོད་མངའ་བ། །ཞེས་བྱ་བ་ནི་མཉམ་པ་མེད་པ་ཉིད་ཐོབ་ཅེས་བྱའོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་རྣལ་འབྱོར་པས་གཟུངས་བསྒོམ་པའི་མཚན་མ་ཐོབ་ནས་དེས་མངོན་པར་ཤེས་པ་ཐོབ་པས་དེའི་རྗེས་ལ་སྒྲུབ་པ་ནི་སྔ་མ་བཞིན་དུ་རྣལ་འབྱོར་
[224b.5]ཆེན་པོ་བྱས་ལ། ཇི་ལྟ་བ་བཞིན་དུ་གཟུངས་ཀྱི་དཀྱིལ་འཁོར་ལས་བཤད་པའི་ཏིང་ངེ་འཛིན་རྣམ་པ་གསུམ་བསྒོམས་ལ། དེ་ནས་ཇི་སྲིད་དུ་རྡོ་རྗེ་སེམས་དཔའི་བདག་ཉིད་དུ་རྣམ་པར་བསྒོམས་ཏེ། གསང་བའི་རྡོ་རྗེ་བླངས་ཏེ། གཟུངས་ཀྱི་དཀྱིལ་འཁོར་བྲིས་ལ། དབུས་སུ་རྣམ་པར་སྣང་མཛད་
[224b.6]བྲིས་ལ། རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་མཚན་མའི་ཕྱག་རྒྱ་དང་། བསྐལ་པ་བཟང་པོའི་མཚན་མའི་ཕྱག་རྒྱའི་མཐར་ཐུག་པའི་རྩ་བའི་རྒྱུད་དང་། རྒྱུད་ཕྱི་མ་ལས་བཤད་པའི་ཚུལ་གྱིས་བྲི་བར་བྱའོ། །གང་གི་ཚེ་མི་བསྐྱོད་པ་དབུས་སུ་བྲི་བ་དེའི་ཚེ་རྡོ་
[224b.7]རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་ཉིད་བྱ་བ་དང་། གང་གི་ཚེ་རིན་ཆེན་འབྱུང་ལྡན་བྲི་བ་དེའི་ཚེ་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་དུ། དེ་ཉིད་ལ་མི་བསྐྱོད་པའི་གནས་སུ་དབང་བསྐུར་བ་མ་ཞེས་བྱ་བ་རིན་ཆེན་འབྱུང་ལྡན་གྱི་ཕྱག་རྒྱ། རིན་ཆེན་འབྱུང་ལྡན་གྱི་གནས་སུ་
[225a]
[225a.1]ཐུགས་རྡོ་རྗེ་མ་མི་བསྐྱོད་པའི་ཕྱག་རྒྱ། གང་གི་ཚེ་འོད་དཔག་ཏུ་མེད་པ་དབུས་སུ་བྲི་བ་དེའི་ཚེ། མི་བསྐྱོད་པའི་གནས་སུ་མཚོན་ཆ་མ་ཞེས་བྱ་བ་འོད་དཔག་ཏུ་མེད་པའི་ཕྱག་རྒྱ། འོད་དཔག་ཏུ་མེད་པའི་གནས་སུ་ཐུགས་རྡོ་རྗེ་མ་ཞེས་བྱ་བ་མི་བསྐྱོད་པའི་ཕྱག་རྒྱ། གང་གི་ཚེ་དོན་ཡོད་
[225a.2]པར་གྲུབ་པ་དཀྱིལ་འཁོར་གྱི་དབུས་སུ་འདྲི་བ་དེའི་ཚེ། མི་བསྐྱོད་པའི་གནས་སུ་རྡོ་རྗེ་ཀུན་མ་ཞེས་བྱ་བ་དོན་ཡོད་གྲུབ་པའི་ཕྱག་རྒྱ། དོན་ཡོད་གྲུབ་པའི་གནས་སུ་ཐུགས་རྡོ་རྗེ་མ་མི་བསྐྱོད་པའི་ཕྱག་རྒྱ་བྲི་བར་བྱའོ། །དེ་ལྟར་དེ་བཞིན་གཤེགས་པ་རྣམས་ཀྱི་རྡོ་རྗེ་དབྱིངས་ཀྱི་གཟུངས་སྒྲུབ་པའི་
[225a.3]དཀྱིལ་འཁོར་ནི་ལྔར་འགྱུར་རོ། །ཡང་རྣམ་པར་སྣང་མཛད་ཀྱི་རྡོ་རྗེ་དང་། པདྨ་དང་། རིན་པོ་ཆེའི་རིགས་ཐ་དད་པས་གཞན་དཀྱིལ་འཁོར་རྣམ་པ་གསུམ་དུ་འགྱུར་ཏེ། དེ་ལྟར་དཀྱིལ་འཁོར་བྲིས་ལ་ཇི་ལྟ་བ་བཞིན་དུ་ཞུགས་ཏེ། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པ་ཆོ་ག་
[225a.4]ཐམས་ཅད་རྗེས་སུ་སྤྱད་ལ། དེ་ཉིད་ཀྱིས་ནི་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླས། །དེ་ནས་སྒྲུབ་པའི་གནང་བ་མནོས་ལ་ཇི་ལྟ་བ་བཞིན་དུ་བདག་ལ་བྱིན་གྱིས་བརླབ་པ་ལ་སོགས་པ་དེ་བཞིན་བྱས་ལ། རང་
[225a.5]གི་མིང་ནས་བརྗོད་ཅིང་རྡོ་རྗེ་སྒྲུབ་པ་ལ་སོགས་པ་ཆོ་ག་རྣམས་ཀྱིས་རྗེས་སུ་སྤྱད་ལ། གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་དང་། དམ་ཚིག་དང་ཆོས་དང་ལས་ཀྱི་ཕྱག་རྒྱ་རྣམས་བསྒྲུབ་པར་བྱའོ། །རྡོ་རྗེའི་རིགས་དང་། པདྨ་དང་། ནོར་བུའི་རིགས་ཀྱི་གཟུངས་ཀྱི་དཀྱིལ་
[225a.6]འཁོར་གཞན་རྣམས་ཀྱང་འཁོར་ལོས་སྒྱུར་བའི་རྣལ་འབྱོར་གྱིས། དེ་ལས་བཤད་པའི་རྣལ་འབྱོར་ཆེན་པོ་དེས་བྲི་བར་བྱའོ། །དེ་བཞིན་གཤེགས་པའི་གཟུངས་ཀྱི་སྒྲུབ་པ་པོས་ཀྱང་དེ་བཞིན་དུ་བྱའོ། །རྡོ་རྗེ་དབྱིངས་དང་འདྲ་བར་ནི། །ཞེས་བྱ་བ་ལ། རྡོ་རྗེ་དབྱིངས་ཀྱི་དཀྱིལ་འཁོར་
[225a.7]དང་འདྲ་བའི་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་གཟུངས་གྲུབ་པ་པོས་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་དང་འདྲ་བའི་སྒྲུབ་པའི་དཀྱིལ་འཁོར་བྲི་བར་བྱའོ། །རྡོ་རྗེ་སེམས་དཔའ་དང་། །རྡོ་རྗེ་རྒྱལ་པོ་དང་། རྡོ་རྗེ་ཆགས་པ་དང་། རྡོ་རྗེ་ལེགས་པ་དང་།
[225b]
[225b.1]རྡོ་རྗེ་རིན་ཆེན་ནས་རྡོ་རྗེ་འབེེབས་པའི་མཐར་ཐུག་པའི་དེ་བཞིན་གཤེགས་པའི་རིགས་དེ་དག་ཐམས་ཅད་ཀྱི་གཟུངས་ཀྱི་དངོས་གྲུབ་སྒྲུབ་པ་པོས་དེ་དག་ཐམས་ཅད་ནི་མཆོག་གི་ཚུལ་གྱིས་དཀྱིལ་འཁོར་བྲི་བར་བྱའོ། །དེ་ནས་དཀྱིལ་འཁོར་བྲིས་ཏེ། དཀྱིལ་འཁོར་དུ་གཞུག་པའི་ཆོ་གས་ཞུགས་
[225b.2]ལ། དེའི་རྗེས་ལ་ཞུགས་ལ། དངོས་གྲུབ་འདོད་པ་དོན་དུ་གཉེར་བས་མྱུར་དུ་བརྗོད་དོ། །དབབ་པ་ལ་སོགས་པ་མ་བྱས་པར་འདི་སྐད་བརྗོད་པར་བྱ་སྟེ། སུ་ར་ཏེ་ས་མ་ཡ་སྟྭཾ་ཧོ་བཛྲ་སཏྭ་ཨཱ་དྱ་སིདྡྷི་མཾ་ཞེས་བྱ་བ་སྨོས་ཏེ། ཤིན་ཏུ་དགའ་བས་ན་སུ་ར་ཏའོ། །ཐོག་མ་དང་ཐ་མ་མེད་པའི་
[225b.3]ཆོས་ཉིད་དང་སེམས་ཅན་གྱི་དོན་ལ་ཕྱི་མའི་མཐར་ཐུག་གི་བར་དུ་དགའ་བའོ། །དམ་ཚིག་ནི་ཀུན་རྫོབ་བོ། །ཆོས་ཀྱི་དབྱིངས་ལས་བྱུང་བས་ན་ནམ་མཁའི་ཁམས་ཐམས་ཅད་དུ་སྐུ་དང་གསུང་དང་། ཐུགས་རྡོ་རྗེས་བཞུགས་པ་ཡིན་ནོ་ཞེས་བྱ་བའི་དོན་ཏོ། །རྡོ་རྗེ་སེམས་དཔའ་དང་པོར་
[225b.4]བྱས་པ་ནི། བཛྲ་སཏྭ་ཨཱ་དྱ་སྟེ་ཐོག་མར་སྐྱེ་བས་ན་དང་པོའོ་ཞེས་བརྗོད་སྙིང་པོ་འདི་བཟླས་ཏེ། བསྒྲུབས་ན་ཐམས་ཅད་འགྲུབ་པར་འགྱུར། །ཞེས་བྱ་བ་ནི་དེ་བཞིན་གཤེགས་པའི་རིགས་ཀྱི་གཟུངས་ཀྱི་དངོས་གྲུབ་ཐམས་ཅད་བསྒྲུབ་པར་བྱའོ། །དེ་ཉིད་བསྐུལ་བའི་ཚུལ་གྱིས་ནི། །མགུ་
[225b.5]ནས་མྱུར་དུ་འགྲུབ་པར་འགྱུར། །ཞེས་བྱ་བ་ནི་ཅིའི་ཕྱིར་འདི་ཟློས་ཤིང་། གཟུངས་ཀྱི་དངོས་གྲུབ་ཐམས་ཅད་འགྲུབ་པར་བྱ་སྙམ་ན། གང་གི་ཕྱིར་དེ་ཁོ་ན་ཉིད་བསྐུལ་བས་མགུ་ནས་རྡོ་རྗེ་འཆང་དུ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་
[225b.6]འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་ནས། རང་གི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མངོན་
[225b.7]པར་ཤེས་པ་ལྔ་བསྐྱེད་དེ། དེའི་རྗེས་ལ་རྡོ་རྗེ་དབྱིངས་ལས་བཤད་པའི་རྡོ་རྗེ་སེམས་དཔའི་རྣལ་འབྱོར་བས་རྣལ་འབྱོར་ཆེན་པོ་བྱས་ལ་སྔ་མ་བཞིན་དུ་གཟུངས་ཀྱི་དཀྱིལ་འཁོར་ལས་སྤྲུལ་ལ། གཟུངས་ཀྱི་དཀྱིལ་འཁོར་གྱི་ཏིང་ངེ་འཛིན་གསུམ་བསྒོམ་པ་ལས་སོ། །དེའི་རྗེས་ལ་གཟུངས་
[226a]
[226a.1]ཀྱི་དཀྱིལ་འཁོར་ཇི་ལྟ་བ་བཞིན་དུ་བྲིས་ཏེ། དཀྱིལ་འཁོར་གྱི་ལྟེ་བར་རྣམ་པར་སྣང་མཛད་ཀྱི་གནས་སུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའི་ཕྱག་རྒྱ་ཆེན་པོའི་གཟུགས་བྲིས་ལ་གཟུངས་ཀྱི་རྡོ་རྗེ་སེམས་དཔའི་རིག་པ་ཟློས་ཤིང་། བསྐལ་
[226a.2]པ་བཟང་པོ་ལ་མཐར་ཐུག་པའི་མཚན་མ་རྣམས་རྡོ་རྗེ་དབྱིངས་ཀྱི་གཟུངས་ཀྱི་ཚུལ་གྱི་ཆོ་གས་ཐམས་ཅད་མཚན་མའི་ཕྱག་རྒྱའི་ཚོགས་སུ་བྲི་བར་བྱའོ། །རྡོ་རྗེ་སེམས་དཔའི་གཟུངས་སྒྲུབ་པའི་དཀྱིལ་འཁོར། བཅོམ་ལྡན་འདས་རྡོ་རྗེ་རྒྱལ་པོའི་གཟུངས་ཀྱི་རིག་པས་དབུས་སུ་བྲི་བར་བྱའོ། །
[226a.3]རྡོ་རྗེ་སེམས་དཔའི་གནས་སུ་རྡོ་རྗེ་རྒྱལ་པོའི་ཕྱག་རྒྱ། རྡོ་རྗེ་རྒྱལ་པོའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་རྒྱལ་པོའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ཆགས་པ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་རྡོ་རྗེ་ཆགས་པའི་ཕྱག་རྒྱ། རྡོ་རྗེ་ཆགས་པའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །
[226a.4]རྡོ་རྗེ་ཆགས་པའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ལེགས་པ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་རྡོ་རྗེ་ལེགས་པའི་ཕྱག་རྒྱ། རྡོ་རྗེ་ལེགས་པའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་ལེགས་པའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་སྙིང་པོ་
[226a.5]དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་རྡོ་རྗེ་སྙིང་པོའི་ཕྱག་རྒྱ། རྡོ་རྗེ་སྙིང་པོའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་སྙིང་པོའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ཉི་མ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་རྡོ་རྗེ་ཉི་མའི་ཕྱག་རྒྱ།
[226a.6]རྡོ་རྗེ་ཉི་མའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །འདི་ནི་རྡོ་རྗེ་ཉི་མའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་དཔལ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་དཔལ་གྱི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་དཔལ་གྱི་
[226a.7]དཀྱིལ་འཁོར་རོ། །བཅོམ་ལྡན་འདས་རྡོ་རྗེ་བཞད་པ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་བཞད་པའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་བཞད་པའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ཆོས་དབུས་སུ་བྲིས་ལ། རྡོ་རྗེ་
[226b]
[226b.1]སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་ཆོས་ཀྱི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་ཆོས་ཀྱི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་རྣོན་པོ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་རྣོན་པོའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་
[226b.2]བར་བྱའོ། །རྡོ་རྗེ་རྣོན་པོའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་འཁོར་ལོ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ་རྡོ་རྗེ་འཁོར་ལོའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་འཁོར་ལོའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་གསུང་བ་དབུས་སུ་བྲིས་ལ། རྡོ་རྗེ་སེམས་དཔའི་
[226b.3]གནས་སུ་དེའི་ཕྱག་རྒྱ། རྡོ་རྗེ་གསུང་བའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་གསུང་བའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ལས་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་ལས་ཀྱི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་
[226b.4]བྱའོ། །རྡོ་རྗེ་ལས་ཀྱི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་བསྲུང་བ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་བསྲུང་བའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་བསྲུང་བའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་གནོད་
[226b.5]སྦྱིན་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་གནོད་སྦྱིན་གྱི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་གནོད་སྦྱིན་གྱི་དཀྱིལ་འཁོར་རོ། །རྡོ་རྗེ་དབྱིངས་ཀྱི་དཀྱིལ་འཁོར་དེ་ཉིད་ཀྱི་དབུས་སུ། །བཅོམ་ལྡན་འདས་རྡོ་རྗེ་ཁུ་ཚུར་རང་གི་གཟུངས་
[226b.6]ཀྱི་རིགས་པས་བྲི་བར་བྱའོ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་ཁུ་ཚུར་གྱི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་ཁུ་ཚུར་གྱི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ཆོས་ཀྱི་གཟུངས་འཛིན་པའི་ཆོས་མ་དབུས་སུ་བྲིས་ལ། འདི་ནི་རྡོ་རྗེ་
[226b.7]སེམས་མའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་རིན་ཆེན་ནམ་རྡོ་རྗེ་སྙིང་པོའི་གཟུངས་འཛིན་པ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་རིན་ཆེན་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་རིན་ཆེན་མའི་དཀྱིལ་འཁོར་རོ། །བཅོམ་
[227a]
[227a.1]ལྡན་འདས་མ་རྡོ་རྗེ་སྒེག་མོ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། སྒེག་མོའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་སྒེག་མོའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་ལས་ཀྱི་གཟུངས་འཛིན་
[227a.2]པའི་རྡོ་རྗེ་ལས་མ་དབུས་སུ་བྲིད་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་ལས་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་ཕྲེང་བ་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་སྒེག་མོ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། སྒེག་
[227a.3]མོའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་སྒེག་མའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་གར་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་གར་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་གར་མའི་དཀྱིལ་
[227a.4]འཁོར་རོ། །བཅོམ་ལྡན་འདས་མ་རྡོ་རྗེ་གླུ་མ་དབུས་སུ་བྲིས་ལ། རྡོ་རྗེ་འབེབས་མའི་གནས་སུ་དེའི་ཕྱག་རྒྱ། རྡོ་རྗེ་གླུ་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་གླུ་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་གར་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་
[227a.5]དེའི་ཕྱག་རྒྱ། རྡོ་རྗེ་མེ་ཏོག་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་མེ་ཏོག་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་མར་མེ་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་མར་མེ་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །
[227a.6]རྡོ་རྗེ་བདུག་པ་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་དྲི་ཆབ་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། །རྡོ་རྗེ་མེ་ཏོག་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་མེ་ཏོག་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་མར་མེ་མ་
[227a.7]དབུས་སུ་བྲིས་ལ། །རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་མར་མེ་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་མར་མེ་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་དྲི་ཆབའམ་དབུས་སུ་བྲིས་ལ། རྡེ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་དྲི་ཆབ་
[227b]
[227b.1]མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་དྲི་ཆབ་མའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ལྕགས་ཀྱུ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་ལྕགས་ཀྱུའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་ལྕགས་ཀྱུའི་དཀྱིལ་
[227b.2]འཁོར་རོ། །བཅོམ་ལྡན་འདས་རྡོ་རྗེ་ཞགས་པ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་ཞགས་པའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་ཞགས་པའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ལྕགས་སྒྲོག་དབུས་སུ་བྲིས་ལ། རྡོ་རྗེ་
[227b.3]སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་ལྕགས་སྒྲོག་གི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་ལྕགས་སྒྲོག་གི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་འབེབས་པ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་འབེབས་པའི་གནས་སུ་རྡོ་རྗེ་
[227b.4]སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་འབེེབས་པའི་དཀྱིལ་འཁོར་རོ། །དེ་ལྟར་དེ་བཞིན་གཤེགས་པའི་རིགས་ཀྱི་གཟུངས་ཀྱི་དཀྱིལ་འཁོར་སྒྲུབ་པ་པོས་དཀྱིལ་འཁོར་བྲིས་ལ། རྩ་བའི་རྒྱུད་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་འཇུག་པ་ལ་སོགས་པའི་ཆོ་ག་རྗེས་སུ་
[227b.5]སྤྱད་ལ། གཟུངས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་བཅིངས་ཏེ། གཟུངས་ཀྱི་དཀྱིལ་འཁོར་གྱི་རིག་པ་ཟློས་ཤིང་བསྒྲུབ་པར་བྱའོ། །ཁམས་གསུམ་རྣམ་རྒྱལ་འདྲ་བ་ནི། །ཞེས་བྱ་བ་ལ་སོགས་པ་ནི་འཇིག་རྟེན་གསུམ་ལས་
[227b.6]རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་དང་འདྲ་བའོ། །རྡོ་རྗེ་ཀུན་གྱི་རིགས་རྣམས་ནི། །ཞེས་བྱ་བ་ནི་རྡོ་རྗེ་རིན་པོ་ཆེའི་རིགས་དང་། ཕྱི་རོལ་གྱི་རྡོ་རྗེའི་རིགས་རྣམས་སོ། །དཀྱིལ་འཁོར་ཐམས་ཅད་ཚུལ་དུ་ཡང་། །ཞེས་བྱ་བ་ནི་རྩ་བའི་རྒྱུད་ལས་བཤད་པ་ཉིད་ཀྱི་ཚུལ་
[227b.7]གྱིས་འཁོར་ལོ་ལྔ་དང་ལྡན་པས་སོ། །མཁས་པས་རབ་ཏུ་བྲི་བར་བྱ། །ཞེས་བྱ་བ་ནི་མཁས་པས་ཡང་དག་པར་ཕྱིན་ཅི་མ་ལོག་པར་བྲི་བར་བྱའོ། །དེར་ཞུགས་ནས་ཞེས་བྱ་བ་ལ་སོགས་པ་ནི་གོ་སླའོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་
[228a]
[228a.1]བའི་དཀྱིལ་འཁོར་ལས་བཤད་པའི་རྡོ་རྗེ་རིགས་ཀྱི་རྣལ་འབྱོར་བྱས་ཏེ། བསྒོམས་ནས་རང་གི་གཟུངས་ཀྱི་ཚུལ་གྱིས་ཕྱག་རྒྱ་ཆེན་པོ་ལ་སོགས་པ་ཇི་སྲིད་མཚན་མ་ཐོབ་པར་གྱུར་པའི་བར་དུ་བསྒོམ་པར་བྱའོ། །དེ་ནས་མངོན་པར་ཤེས་པ་ལྔ་བསྐྱེད་ལ། དེའི་རྗེས་ལ་
[228a.2]འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་རྡོ་རྗེ་ཧཱུཾ་མཛད་ཀྱི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཏིང་ངེ་འཛིན་རྣམ་པ་གསུམ་ཇི་ལྟ་བ་བཞིན་
[228a.3]དུ་བསྒོམས་ཏེ། རྩ་བའི་རྒྱུད་ཀྱི་གཟུངས་ཀྱི་དཀྱིལ་འཁོར་ལས་ཇི་ལྟ་བ་བཞིན་དུ་བཤད་པའི་ཚུལ་གྱིས་བྲིས་ལ། དཀྱིལ་འཁོར་དབུས་ཀྱི་ལྟེ་བ་ལ་བཅོམ་ལྡན་འདས་རྡོ་རྗེ་ཧཱུཾ་མཛད་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་
[228a.4]པོའི་གཟུངས་ཀྱིས་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་རིག་པ་བྲི་བར་བྱའོ། །ལྷག་མ་ནི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་བཤད་པའི་ཆོ་གས་བསྐལ་པ་བཟང་པོའི་མཚན་མའི་ཕྱག་རྒྱའི་
[228a.5]ཚོགས་ཀྱི་མཐར་ཐུག་པའི་ཕྱག་རྒྱའི་ཚོགས་ཐམས་ཅད་ཇི་ལྟ་བའི་གནས་རྣམས་སུ་བྲི་བར་བྱའོ། །འདི་ནི་རྡོ་རྗེ་ཧཱུཾ་མཛད་ཀྱི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་རིན་ཆེན་ཧཱུཾ་མཛད་འདི་ཉིད་དཀྱིལ་འཁོར་གྱི་དབུས་སུ་རང་གི་གཟུངས་ཀྱི་རིགས་པས་བྲི་བར་བྱའོ། །རྡོ་རྗེ་ཧཱུཾ་མཛད་ཀྱི་གནས་སུ་དེའི་ཕྱག་རྒྱ་རིན་ཆེན་ཧཱུཾ་
[228a.6]མཛད་ཀྱི་གནས་སུ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བྲི་བར་བྱའོ། །རིན་ཆེན་ཧཱུཾ་མཛད་ཀྱི་དཀྱིལ་འཁོར་རོ། །བཅོམ་ལྡན་འདས་ཆོས་ཀྱི་ཧཱུཾ་མཛད་དབུས་སུ་བྲིས་ལ། རྡོ་རྗེ་ཧཱུཾ་མཛད་ཀྱི་གནས་སུ་དེའི་ཕྱག་རྒྱ། ཆོས་ཀྱི་ཧཱུཾ་མཛད་ཀྱི་གནས་སུ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བྲིའོ། །ཆོས་ཀྱི་ཧཱུཾ་མཛད་
[228a.7]ཀྱི་དཀྱིལ་འཁོར་རོ། །བཅོམ་ལྡན་འདས་ལས་ཀྱི་ཧཱུཾ་མཛད་དབུས་སུ་བྲིས་ལ། རྡོ་རྗེ་ཧཱུཾ་མཛད་ཀྱི་གནས་སུ་དེའི་ཕྱག་རྒྱ། ལས་ཀྱི་ཧཱུཾ་མཛད་ཀྱི་གནས་སུ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བྲི་བར་བྱའོ། །ལས་ཀྱི་ཧཱུཾ་མཛད་ཀྱི་དཀྱིལ་འཁོར་རོ། །བཅོམ་ལྡན་འདས་ཁྲོ་བོ་རྡོ་རྗེ་སེམས་དཔའ་
[228b]
[228b.1]དབུས་སུ་བྲི་བར་བྱའོ། །ཁྲོ་བོ་རྡོ་རྗེ་སེམས་དཔའི་དཀྱིལ་འཁོར་རོ། །བཅོམ་ལྡན་འདས་ཁྲོ་བོ་རྡོ་རྗེ་རྒྱལ་པོ་དབུས་སུ་བྲིས་ལ། ཁྲོ་བོ་རྡོ་རྗེ་རྒྱལ་པོའི་གནས་སུ་ཁྲོ་བོ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །ཁྲོ་བོ་རྡོ་རྗེ་རྒྱལ་པོའི་གཟུངས་སྒྲུབ་པའི་དཀྱིལ་འཁོར་རོ། །ཁྲོ་བོ་རྡོ་རྗེ་ཆགས་
[228b.2]པ་ལ་སོགས་པ་ལྷག་མ་རྣམས་ཀྱི་དཀྱིལ་འཁོར་ནི་རྡོ་རྗེ་ཆགས་པ་ལ་སོགས་པའི་དཀྱིལ་འཁོར་གྱི་རྗེས་སུ་འབྲང་བར་ཤེས་པར་བྱའོ། །ཕྱིའི་རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་རྣམས་ལ་ཡང་རྡོ་རྗེ་རིག་པ་མཆོག་ཆུང་མ་དང་བཅས་པ་དབུས་སུ་བྲི་བར་བྱའོ། །དེ་བཞིན་དུ་
[228b.3]དཀྱིལ་འཁོར་གཞན་ཐམས་ཅད་ཀྱང་ཤེས་པར་བྱའོ། །དཀྱིལ་འཁོར་དེ་ཉིད་ཀྱི་དབུས་སུ་སྒྱུ་མ་རྡོ་རྗེ་བྲིས་པ་ནི་སྒྱུ་མ་རྡོ་རྗེའི་དཀྱིལ་འཁོར་རོ། །དཀྱིལ་འཁོར་དེ་ཉིད་ཀྱི་དབུས་སུ་རྡོ་རྗེ་དྲིལ་བུ་བྲིས་ལ། སྒྱུ་མ་རྡོ་རྗེའི་གནས་སུ་དེའི་ཕྱག་རྒྱ། རྡོ་རྗེ་དྲིལ་བུའི་གནས་སུ་སྒྱུ་མ་རྡོ་རྗེའི་
[228b.4]ཕྱག་རྒྱ་བྲི་བར་བྱའོ། །རྡོ་རྗེ་དྲིལ་བུའི་དཀྱིལ་འཁོར་རོ། །དཀྱིལ་འཁོར་དེ་ཉིད་ཀྱི་དབུས་སུ་ཐུབ་པ་རྡོ་རྗེ་བྲིས་ལ། སྒྱུ་མ་རྡོ་རྗེའི་གནས་སུ་དེའི་ཕྱག་རྒྱ། ཐུབ་པ་རྡོ་རྗེའི་གནས་སུ་སྒྱུ་མ་རྡོ་རྗེའི་ཕྱག་རྒྱ་བྲི་བར་བྱའོ། །ཐུབ་པ་རྡོ་རྗེའི་དཀྱིལ་འཁོར་རོ། །དཀྱིལ་འཁོར་དེ་ཉིད་ཀྱི་དབུས་སུ་རྡོ་
[228b.5]རྗེ་མཚོན་ཆ་བྲིས་ལ་སྒྱུ་མ་རྡོ་རྗེའི་གནས་སུ་དེའི་ཕྱག་རྒྱ། རྡོ་རྗེ་མཚོན་ཆའི་གནས་སུ་སྒྱུ་མ་རྡོ་རྗེའི་ཕྱག་རྒྱ་བྲི་བར་བྱའོ། །རྡོ་རྗེ་མཚོན་ཆའི་དཀྱིལ་འཁོར་དེ་ཉིད་བཞིན་དུ་གཞན་ཡང་ཞེས་བྱ་བ་ཡིན་ནོ། །དེ་ལྟར་རྡོ་རྗེ་ཧཱུཾ་མཛད་ལ་སོགས་པའི་སྒྲུབ་པའི་དཀྱིལ་འཁོར་བྲིས་ནས་འཇིག་རྟེན་
[228b.6]གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་དུ་འཇུག་པའི་ཆོ་གས་ཞུགས་ལ་འདི་སྐད་ཅེས་བརྗོད་པར་བྱའོ། །འདོད་ཆགས་ལས་ནི་ཁྱོད་བྱུང་ཞེས་བྱ་བ་དང་། དེ་ནས་དེའི་རྗེས་ལ། ཆོ་ག་ཐམས་ཅད་རྗེས་སུ་སྤྱད་ནས་བསྒྲུབས་ཏེ། གནང་བ་མནོས་ནས་གཟུངས་ཀྱི་
[228b.7]རིག་པ་ཇི་ལྟ་བ་བཞིན་དུ་ཟློས་ཤིང་། ཕྱག་རྒྱ་ཆེན་པོ་ལ་སོགས་པ་བཅིངས་ཏེ་བསྒོམས་ལ་རང་གི་གཟུངས་བསྒྲུབ་པར་བྱའོ། །འགྲོ་བ་འདུལ་བའི་ཚུལ་དུ་ནི། །ཞེས་བྱ་བ་ལ་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་རྣམ་པས་སོ། །པདྨོའི་རིགས་ནི་ཐམས་ཅད་ཀྱི། །
[229a]
[229a.1]ཞེས་བྱ་བ་ནི་འགྲོ་བ་འདུལ་བ་ནས་བརྩམས་ནས་པདྨ་འབེབས་པའི་མཐར་ཐུག་པའི་བར་དུ་པདྨའི་རིགས་རྣམས་ཀྱི་མཚན་མ་ཐོབ་པས་སྒྲུབ་པའི་དཀྱིལ་འཁོར་བྲི་བར་བྱའོ། །དེར་ཞུགས་ནས་ཞེས་བྱ་བ་ལ་སོགས་པ་ནི་གོ་སླའོ། །དེའི་ནི་འདི་སྐད་སྟོན་པ་ཡིན་ཏེ། འགྲོ་བ་
[229a.2]འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ནས་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་གཟུངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་དང་། ཕྱག་རྒྱ་རྣམས་བཅིངས་ཏེ་ཇི་སྲིད་
[229a.3]དུ་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མངོན་པར་ཤེས་པ་ལྔ་བསྐྱེད་དེ། འགྲོ་བ་འདུལ་བའི་རྣལ་འབྱོར་པས་སྔ་མ་བཞིན་དུ་རྣལ་འབྱོར་ཆེན་པོ་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་ཏིང་
[229a.4]ངེ་འཛིན་རྣམ་པ་གསུམ་བསྒོམས་ཏེ། དེ་ནས་རྩ་བའི་རྒྱུད་ལས་བཤད་པའི་ཆོ་ག་ཇི་ལྟ་བས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་བྲི་བར་བྱའོ། །དེ་ནས་བཅོམ་ལྡན་འདས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་པོའི་གཟུངས་ཀྱི་
[229a.5]ཚུལ་གྱིས་གཟུངས་ཀྱི་རིག་པ་བརྗོད་ཅིང་བྲི་བར་བྱའོ། །བསྐལ་པ་བཟང་པོའི་མཚན་མའི་ཕྱག་རྒྱའི་ཚོགས་ཀྱི་མཐར་ཐུག་པའི་ཕྱག་རྒྱའི་ཚོགས་ལྷག་མ་ཐམས་ཅད་ནི་རྩ་བའི་རྒྱུད་ལས་བཤད་པ་ཉིད་ཀྱི་ཕྱོགས་བྲི་བར་བྱའོ། །འདི་ནི་འགྲོ་བ་འདུལ་བའི་གཟུངས་བསྒྲུབས་པའི་དཀྱིལ་འཁོར་རོ། །དཀྱིལ་
[229a.6]འཁོར་དེ་ཉིད་ཀྱི་དབུས་སུ་བཅོམ་ལྡན་འདས་སངས་རྒྱས་པདྨ་རང་གི་གཟུངས་ཀྱི་ཕྱག་རྒྱ་བརྗོད་པར་བྱའོ། །ལྷག་མ་ནི་སྔ་མ་བཞིན་ཏེ། སངས་རྒྱས་པདྨའི་དཀྱིལ་འཁོར་རོ། །དེ་ལྟར་དེ་བཞིན་གཤེགས་པའི་རིགས་ཀྱི་རྗེས་སུ་འབྲངས་ནས་པདྨ་འབེེབས་པའི་མཐར་ཐུག་པའི་པདྨའི་རིགས་
[229a.7]ཐམས་ཅད་ཀྱི་དཀྱིལ་འཁོར་ཡང་ཤེས་པར་བྱ་བ་ཡིན་ནོ། །དེ་ལྟར་དཀྱིལ་འཁོར་བྲིས་ནས། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་ཆོ་གས་ཞུགས་ནས་འདི་སྐད་བརྗོད་པར་བྱའོ། །འདོད་ཆགས་ཆོས་དེ་པདྨོ་ཆེ། །ཁྱབ་པས་བདག་ཉིད་དངོས་གྲུབ་ཐོབ། །
[229b]
[229b.1]ཅེས་བྱ་བ་ནི་དེ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ་བསྒྲུབ་པའི་གནང་བ་ནོས་ཏེ། རང་གི་ལྷའི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། གཟུངས་ཀྱི་རིག་པ་ཟློས་ཤིང་བསྒྲུབ་པར་བྱའོ། །དོན་ཀུན་གྲུབ་པའི་ཚུལ་དུ་ཡང་། །ཞེས་བྱ་བ་ནི་དོན་ཐམས་ཅད་གྲུབ་པའི་གཟུངས་
[229b.2]ཀྱི་དཀྱིལ་འཁོར་གྱི་གནས་རྣམས་སུའོ། །དཀྱིལ་འཁོར་ལེགས་པར་བྲིས་ནས་ནི། །ཞེས་བྱ་བ་ལ། དོན་ཐམས་ཅད་གྲུབ་པ་ལ་སོགས་པ་ནས་ནོར་བུ་འབེེབས་པའི་སྒྲུབ་པའི་དཀྱིལ་འཁོར་བྲི་བར་བྱའོ། །འདོད་ཆགས་ནི་ནོར་བུའི་རིགས་སོ། །དེ་ལ་བསམས་པའི་དངོས་གྲུབ་ནི་
[229b.3]ནོར་བུའི་རིགས་ཀྱི་གཟུངས་ཀྱི་དངོས་གྲུབ་བོ། །དངོས་གྲུབ་མཆོག་ཅེས་བྱ་བ་ནི། གཟུངས་ཀྱི་དངོས་གྲུབ་སྒྲུབ་པའོ། །དེ་ཉིད་ཀྱི་གསང་བའི་མཆོད་པ་བླ་ན་མེད་པ་ནི་མཆོག་སྟེ། ནོར་བུའི་རིགས་ཀྱི་གཟུངས་ཀྱི་ངོ་བོར་གྲུབ་པའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་
[229b.4]པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་བཅིངས་ཏེ། རང་གི་གཟུངས་
[229b.5]ཀྱི་རིག་པ་བཟླས་ཤིང་སྔ་མ་བཞིན་དུ་མཚན་མ་ཐོབ་པས་མངོན་པར་ཤེས་པ་ལྔ་ཇི་ལྟ་བ་བཞིན་དུ་བསྐྱེད་དེ། དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་བཤད་པའི་ཆོ་གས་དོན་ཐམས་ཅད་གྲུབ་པའི་རྣལ་འབྱོར་པས་གཟུངས་ཀྱི་དཀྱིལ་འཁོར་ལས་བཤད་པའི་ཏིང་ངེ་འཛིན་
[229b.6]གསུམ་བསྒོམས་ཏེ། གཟུངས་ཀྱི་དཀྱིལ་འཁོར་ཇི་ལྟ་བ་བཞིན་བྲིས་པ། བཅོམ་ལྡན་འདས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་པོའི་གཟུངས་ཀྱི་ཚུལ་གྱིས་དཀྱིལ་འཁོར་གྱི་དབུས་སུ་རང་གི་གཟུངས་ཀྱི་རིག་པ་བརྗོད་ཅིང་བྲི་བར་བྱའོ། །
[229b.7]ལྷག་མ་ཐམས་ཅད་བྲི་བའི་ཆོ་ག་ནི་དོན་ཐམས་ཅད་གྲུབ་པའི་དཀྱིལ་འཁོར་ཉིད་གཟུང་བར་བྱའོ། །འདི་ནི་དོན་ཐམས་ཅད་གྲུབ་པའི་གཟུངས་སྒྲུབ་པའི་དཀྱིལ་འཁོར་དེ་ཉིད་ཀྱི་དབུས་སུ་བཅོམ་ལྡན་འདས་རིན་ཆེན་ལྟ་བ་རང་གི་གཟུངས་ཀྱི་རིག་པས་བྲིས་ལ། དོན་ཐམས་
[230a]
[230a.1]ཅད་གྲུབ་པའི་གནས་སུ་དེའི་ཕྱག་རྒྱ། རིན་ཆེན་ལྟ་བའི་གནས་སུ་དོན་ཐམས་ཅད་གྲུབ་པའི་ཕྱག་རྒྱ་བྲི་བར་བྱའོ། །རིན་ཆེན་ལྟ་བའི་དཀྱིལ་འཁོར་དུ་སྔ་མའི་རྗེས་སུ་འབྲངས་ནས་རིན་ཆེན་འབེེབས་པའི་མཐར་ཐུག་པའི་ནོར་བུའི་རིགས་ཀྱི་དཀྱིལ་འཁོར་རྣམས་ཤེས་པར་བྱའོ། །
[230a.2]དེ་ལྟར་དཀྱིལ་འཁོར་བྲིས་ནས་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་འཇུག་པའི་ཆོ་གས་ཞུགས་ལ་འདི་སྐད་ཅེས་སྨྲ་བར་བྱ་སྟེ། བསམ་པ་ཀུན་གྱི་དངོས་གྲུབ་པ། །འདོད་ཆགས་བསམ་པ་དངོས་གྲུབ་མཆོག །བཀྲ་ཤིས་གྲུབ་ཅིག་སེམས་དཔའ་ཆེ། །བཅོམ་
[230a.3]ལྡན་ཐམས་ཅད་གྲུབ་པ་པོ། །དེ་ནས་སྔ་མ་བཞིན་དུ་རང་གི་ཆོ་གས་ཐམས་ཅད་རྗེས་སུ་སྤྱད་ལ། གཟུངས་སྒྲུབ་པའི་གནང་བ་ནོད་པར་བྱའོ། །རང་གི་གཟུངས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་བཅིངས་ཏེ། གཟུངས་ཀྱི་རིག་པ་ཟློས་ཤིང་། དེ་ནས་
[230a.4]ཐམས་ཅད་དུ་ནི་ཞུགས་གྱུར་ན། །ཞེས་བྱ་བ་ལ་སོགས་པ་ནི་ཕན་ཡོན་གསུངས་པ་ཡིན་ནོ། །ཇི་སྐད་དུ་བཤད་པའི་བསྐུལ་བའི་དུས་སུ་གནང་བ་ནོས་པའི་དངོས་གྲུབ་ཀྱི་བདག་ཉིད་ཀྱི་རྣལ་འབྱོར་པས་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་རང་བཞིན་
[230a.5]ཞེས་བྱ་བའི་དོན་ཏོ། །ཇི་ལྟར་བསྒྲུབ་པར་བྱ་ཞེ་ན། ཡང་དང་ཡང་དུ་བསྒོམ་ཞིང་། ཕྱག་རྒྱ་ཆེན་པོ་ལ་སོགས་པ་རྟག་ཏུ་རྣལ་འབྱོར་པ་བདག་ཉིད་ཀྱིས་འགྲུབ་པར་འགྱུར་རོ། །དུས་ནམ་གྱི་ཚེ་བསྐུལ་བར་བྱ་ཞེ་ན། གང་ཚེ་མྱུར་དུ་མི་འགྲུབ་ན་གང་གི་ཚེ་རྣལ་འབྱོར་པ་མཚན་མ་
[230a.6]ཐོབ་པའམ། མངོན་པར་ཤེས་པས་མཚན་ཐོག་ཐག་བསྒོམས་པ་ཙམ་གྱིས་མྱུར་དུ་དངོས་གྲུབ་ཐོབ་པར་མ་གྱུར་པ་དེའི་ཚེ་བསྒྲུབ་པའི་དཀྱིལ་འཁོར་བྲིས་ལ། ཇི་སྐད་བཤད་པའི་དེ་ཁོ་ན་ཉིད་བསྐུལ་བའི་ཚུལ་གྱིས་ཡང་དག་པར་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་
[230a.7]ཀྱི་རིགས་ཀྱི་དཀྱིལ་འཁོར་གྱི་འཁོར་ལོ་ཡོངས་སུ་སྦྱངས་པའི་གསང་བའི་དངོས་གྲུབ་ཀྱི་རྒྱུད་བསྟན་ནས། ད་ནི་སྒྲུབ་པ་དང་པོས་མ་གྲུབ་ན་སྒྲུབ་པ་གཉིས་པ་ལ་ཡང་དེ་ཁོ་ན་ཉིད་བསྐུལ་བས་ཡང་དག་པར་བསྐུལ་ལ། གཟུངས་ཀྱི་དཀྱིལ་འཁོར་བསྒྲུབ་པར་བྱའོ་ཞེས་བྱ་བའི་དོན་
[230b]
[230b.1]བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་ཐམས་ཅད་གསང་བའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་ཐམས་ཅད་ནི་གཟུངས་ཀྱི་ཕྱག་རྒྱ་ཐམས་ཅད་དོ། །
[230b.2]དེའི་གསང་བ་ནི། དེ་ཡི་གསང་བའི་ལྷ་མོ་ཆེ། །ཞེས་བྱ་བ་ལ་སོགས་པ་སྦ་བར་བྱ་བའི་དོན་ཏོ། །དེའི་དངོས་གྲུབ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་ཐོབ་པའོ། །དེ་སྟོན་པར་བྱེད་པའི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་
[230b.3]ཤིང་བཤད་པའོ། །དེ་བཞིན་གཤེགས་པའི་ལྷ་མོ་ཆེ། །ཞེས་བྱ་བ་ནི་དེ་བཞིན་གཤེགས་པ་རྣམ་པར་སྣང་མཛད་ལ་སོགས་པ་དེ་ལྷ་མོ་ཆེན་མོ་སྟེ། རྡོ་རྗེ་སེམས་མ་དང་། རྡོ་རྗེ་རིན་ཆེན་མ་དང་། རྡོ་རྗེ་ཆོས་མ་དང་། ལས་ཀྱི་རྡོ་རྗེ་མ་རྣམས་སོ། །དེའི་ཁྱད་པར་ཅི་ལྟ་བུ་ཞིག་ཅེ་ན།
[230b.4]སྡུག་ཅིང་ཞེས་བྱ་བ་སྨོས་ཏེ། ཟག་པ་མེད་པའི་བདེ་བ་དང་། ཡིད་བདེ་བའི་ངོ་བོ་རྒྱུན་མི་འཆད་པར་བདེ་བ་སྟེར་བའོ། །འདི་ཉིད་བཤད་པ། བདེ་བ་ཀུན་སྦྱིན་པ་ཞེས་བྱ་བ་སྟེ། དེ་བཞིན་གཤེགས་པ་ཐམས་ཅད་ཀྱི་བདེ་བ་སྟེ། ཡིད་བདེ་བ་རབ་ཏུ་སྟེར་བའོ། །བདེ་བ་
[230b.5]ལས་བྱུང་བའི་ཚོགས་བདེན་པས་ཞེས་བྱ་བ་ནི་དེ་བཞིན་གཤེགས་པའི་ལྷ་མོ་གང་ཡིན་པ་འདི། སྡུག་ཅིང་བདེ་བ་ཀུན་སྦྱིན་པ། །ཞེས་བྱ་བ་བཤད་མ་ཐག་པའི་བདེན་པ་ལས་བྱུང་བའི་ཚིག་གིས་རྗེས་སུ་འཇུག་པའི་དབྱིངས་སོ། །བདེན་པ་ནི་ཕྱིན་ཅི་མ་ལོག་པ་དང་།
[230b.6]མི་བརྫུན་པས་ན་དེ་ལས་བྱུང་བ་ནི་དེའི་རྗེས་སུ་འཇུག་པ་སྟེ། བདེན་པའི་ཚིག་ཉིད་ཅེས་བྱ་བའི་ཐ་ཚིག་གོ། །བདེན་པས་ནི་མི་མངའ་བའོ། །དེ་བཞིན་གཤེགས་པའི་ལྷ་མོ་ཆེན་མོ་སྡུག་ཅིང་བདེ་བ་ཐམས་ཅད་སྦྱིན་པ་ཞེས་བྱ་བ་རྣམ་པ་གསུམ་གྱི་བདེན་པ་དང་། གཟུངས་ཀྱི་ལྷ་
[230b.7]མོ་ཐམས་ཅད་བསྒྲུབ་པའོ། །ཅིའི་ཕྱིར་བསྐུལ་ཞེ་ན། བསྒྲུབས་ཀྱང་དེས་ནི་མ་གྲུབ་ནའོ། །ཞེས་བྱ་བ་སྨོས་ཏེ། སྒྲུབ་པ་པོ་གང་གིས་དེ་ཁོ་ན་ཉིད་བསྐུལ་བ་མེད་ན་འགྲུབ་པར་མི་འགྱུར་བ་དེས་ན་ཇི་སྐད་དུ་བཤད་པའི་རྣམ་པ་གསུམ་གྱི་བདེན་པས་བསྐུལ་ཞིང་བསྒྲུབ་
[231a]
[231a.1]པར་བྱ་སྟེ། ཇི་སྐད་བཤད་པའི་གཟུངས་དེ་རྣམས་བསྒྲུབ་པར་བྱའོ་ཞེས་ཤེས་པར་བྱའོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་གཟུངས་ཀྱི་སྒྲུབ་པ་པོའི་རྣལ་འབྱོར་པས་སྒྲུབ་པའི་དཀྱིལ་འཁོར་བྲིས་ལ། གང་གི་ཚེ་གཟུངས་བསྒྲུབ་པར་འདོད་པ་
[231a.2]ན་གྲུབ་པར་མ་གྱུར་པ་དེའི་ཚེ། དེ་ཁོ་ན་ཉིད་བསྐུལ་བས་ཡང་དག་པར་བསྐུལ་ཏེ་དེས་བསྒྲུབ་པར་བྱའོ། །ཕྱག་རྒྱ་ཆེན་པོ་བཅིངས་ནས་ནི། །ཞེས་བྱ་བ་ནི་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའི་དེ་བཞིན་གཤེགས་པའི་རིགས་ཀྱི་གཟུངས་རྣམས་ཀྱི་ཕྱག་
[231a.3]རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་ནི་ཕྱག་རྒྱ་ཆེན་པོ་སྟེ། དེ་བཅིངས་པའོ། །ལྟག་འོག་གོ་རིམས་ཇི་བཞིན་དུ། །ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་ནས། སྔོན་དུ་
[231a.4]བསྙེན་པ་བྱས་ཏེ། སྔ་མ་བཞིན་དུ་མངོན་པར་ཤེས་པ་བསྐྱེད་ལ། ཡང་རྡོ་རྗེ་སེམས་དཔའི་རྣལ་འབྱོར་བྱས་ནས། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྣལ་འབྱོར་ཆེན་པོ་བྱས་ཏེ། གཟུངས་ཀྱི་དཀྱིལ་འཁོར་ལས་བཤད་པའི་ཏིང་ངེ་འཛིན་རྣམ་པ་གསུམ་ཇི་ལྟ་
[231a.5]བ་བཞིན་དུ་བསྒོམས་ལ། སྒྲུབ་པའི་དཀྱིལ་འཁོར་བྲིས་ཏེ། སྔར་བཤད་པའི་སྒྲུབ་པའི་ཆོ་གས་ཐམས་ཅད་བྱས་ནས་གང་གི་ཚེ་འགྲུབ་པར་མ་གྱུར་པ་དེའི་ཚེ་སླར་ལ་གཟུངས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་བཅིང་བར་བྱ་བ་འདི་ནི། ལྟག་
[231a.6]འོག་གོ་རིམས་ཇི་བཞིན་དུ། །ཞེས་བྱ་བའི་སྒྲའི་དོན་ཡིན་ནོ། །ཕྱག་རྒྱ་ཆེན་པོ་བཅིངས་ནས་ཅི་བྱེད་ཅེ་ན། འདི་ནི་དེ་ཉིད་གསང་བ་ཡི། །ཞེས་བྱ་བ་ལ་སོགས་པ་སྨོས་ཏེ། འདི་ཞེས་བྱ་བ་ནི་བློ་ལ་གནས་པའི་རྡོ་རྗེ་སེམས་དཔའ་ནི་བདག་རང་ཡིན་ནོ་ཞེས་བྱ་བ་ལ་སོགས་པའོ། །དེ་
[231a.7]ཉིད་ནི་ཕྱིན་ཅི་མ་ལོག་པའི་རབ་ཏུ་དགའ་བ་ཉིད་དང་། ཀུན་དུ་བཟང་པོ་ཉིད་དོ། །གསང་བའི་ཞེས་བྱ་བ་ནི་གསང་བར་གྱུར་པས་ན་གསང་བ་སྟེ། རང་གི་ལྷ་དང་ལྷན་ཅིག་ཏུ་མཉམ་པར་སྦྱོར་བ་གང་ཡིན་པ་དེས། བདག་ནི་རྡོ་རྗེ་སེམས་དཔའ་ཉིད། །ཅེས་བྱ་བ་ཐབས་དང་ཤེས་རབ་ཀྱི་
[231b]
[231b.1]རང་བཞིན་གྱི་སེམས་དཔའ་ནི་རྡོ་རྗེ་སེམས་དཔའོ། །དེ་བདག་རང་ཡིན་པ་ནི་རྣལ་འབྱོར་པས་ང་རྒྱལ་བསྐྱེད་པར་བྱའོ། །ཁྱོད་ཀྱི་ཆུང་མ་སྙིང་ལ་གནས། །ཞེས་བྱ་བ་ནི་ཐ་མི་དད་པའི་སེམས་དེས་བདག་ཉིད་ཀྱི་བློ་ལ་གནས་པའི་རྡོ་རྗེ་སྙིང་པོའི་གཟུངས་སོ། །ལུས་ཀུན་ལས་ནི་འཁྱུད་
[231b.2]ནས་ཀྱང་། །ཞེས་བྱ་བ་ནི་ཀྱེའི་རྡོ་རྗེ་འགྱིང་བ་ལས་འཁྱུད་པས། བསྒྱིངས་པ་དང་བཅས་ནམ་མཁའ་ལ་ཞུགས་ཤིག་པའོ། །རྡོ་རྗེ་འགྱིང་བ་ལྷ་མོ་ཆེ། །ཞེས་བྱ་བ་ལ་སོགས་པ་ནི་གོ་སླའོ། །ལུས་ཀུན་ལ་ནི་བརྟེན་གྱུར་ན། །ཞེས་བྱ་བ་ནི་སྒྲུབ་པ་པོའི་ལུས་དང་ཆུ་དང་འོ་མ་བཞིན་དུ་
[231b.3]གཅིག་ཏུ་འདྲེས་པར་གྱུར་པས་ཅི་ཞིག་མྱུར་དུ་འགྲུབ་པར་འགྱུར་ཞེས་བྱའོ། །དེ་ཉིད་བསྐུལ་བ་ནི་ཡང་དག་པར་བསྐུལ་བའོ། །ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་བཅིངས་ནས་ཕྱག་རྒྱའི་རིག་པ་ཟློས་ཤིང་བསྒོམས་པ་འདི་ནི་ཇི་བཞིན་ཞེས་
[231b.4]བྱ་བའི་སྒྲ་ནི་དོན་ཡིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་རྣལ་འབྱོར་པས་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ་ཕྱག་བཞི་བྱས་ཏེ། གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཇི་སྲིད་དུ་མཚན་མ་ཐོབ་པར་གྱུར་
[231b.5]པ་དེ་སྲིད་ཀྱི་བར་དུ་བཟླས་པར་བྱའོ། །དེ་ནས་མངོན་པར་ཤེས་པ་བསྐྱེད་ནས་རྡོ་རྗེ་སེམས་དཔའི་རྣལ་འབྱོར་ཆེན་པོ་བྱས་ནས་བསྒྲུབ་པའི་དཀྱིལ་འཁོར་ཇི་ལྟ་བ་བཞིན་དུ་བྲིས་ཏེ། འཇུག་པའི་ཆོ་ག་རྗེས་སུ་སྤྱད་ལ། སྔ་མ་བཞིན་དུ་བསྒོམ་པར་བྱའོ། །གལ་ཏེ་མ་གྲུབ་པར་ཤེས་
[231b.6]ན་གཟུངས་ཀྱི་ལྷ་མོ་མདུན་དུ་རྣམ་པར་བསམས་ལ་དེའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། བདག་ནི་རྡོ་རྗེ་སེམས་དཔའ་ཉིད། །ཁྱོད་ངའི་ཆུང་མ་སྙིང་ལ་གནས། །ལུས་ཀུན་ལ་ནི་འཁྱུད་པ་དང་། །རྡོ་རྗེ་འགྱིངས་པས་འགྱིངས་པར་བརྗོད། །ཅེས་བརྗོད་ལ། དེ་ནས་དེའི་
[231b.7]རིག་པ་ཟློས་ཤིང་དེ་དང་བདག་ཉིད་འཁྱུད་པས་བུད་མེད་ཀྱི་ལོངས་སྤྱོད་དང་ལྡན་པར་བསམས་ཏེ་བསྒོམ་པར་བྱའོ། །དེ་ནས་དེའི་རྗེས་ལ་མངོན་སུམ་དུ་འོངས་ནས་སྒྲུབ་པ་པོ་དང་ལྷན་ཅིག་ཏུ་མཉམ་པར་སྦྱོར་བ་བྱས་ཏེ། སྒྲུབ་པ་པོའི་ལུས་ལ་འཇུག་པར་བྱའོ། །དེ་ནས་འདི་
[232a]
[232a.1]རྡོ་རྗེ་འཛིན་པ་ཆེན་པོ་ཉིད་དུ་འགྱུར་རོ། །སིདྡྷྱ་སིདྡྷྱ་ས་མ་ཡེ་ཞེས་བྱ་བ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་རྡོ་རྗེ་རིགས་ཀྱི་ཕྱག་རྒྱ་ཐམས་ཅད་དོ། །དམ་ཚིག་དེ་འཆིང་བའི་དང་པོར། སིདྡྷྱ་སིདྡྷྱ་ས་མ་ཡེ་ས་མ་ཡོ྅ཧཾ། ཏྲཾ་པྲཾ་ཡ་མཾ་ཞེས་
[232a.2]བརྗོད་ཅིང་། རྡོ་རྗེ་ཧཱུཾ་མཛད་ལ་སོགས་པ་རྡོ་རྗེའི་རིགས་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་དམ་ཚིག་གིས་གསུངས་སོ། །དེའི་རང་བཞིན་བདག་ཡིན་ནོ་ཞེས་ང་རྒྱལ་བསྐྱེད་ལ། ཁྱོད་སྡུག་བདག་གི་ཆུང་མའོ། །ཞེས་བརྗོད་པར་བྱའོ། །དེ་ལྟར་གཟུངས་ཀྱི་རྣལ་འབྱོར་བ་དེ་ཁོ་
[232a.3]ན་ཉིད་བརྗོད་ཅིང་། བསྐུལ་བར་གྱུར་པས་མྱུར་དུ་རྗེས་སུ་ཆགས་པས་འགྲུབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཕྱག་བཞི་བྱས་
[232a.4]པའི་མཐར་ཐུག་པའི་ཆོ་ག་རྗེས་སུ་སྤྱད་ལ། རང་གི་རིགས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མངོན་པར་ཤེས་པ་ལྔ་བསྐྱེད་དེ། སྔ་མ་བཞིན་དུ་གཟུངས་སྒྲུབ་པའི་དཀྱིལ་འཁོར་བྲིས་ཏེ།
[232a.5]འཇུག་པ་ལ་སོགས་པ་ཆོ་ག་རྗེས་སུ་སྤྱད་དེ་བསྒྲུབ་པར་བྱའོ། །གང་གི་ཚེ་བསྒྲུབས་ཀྱང་དངོས་གྲུབ་ཀྱི་མཚན་མ་མཐོང་བ་དེའི་ཚེ་མདུན་དུ་རང་གི་གཟུངས་ཀྱི་ལྷ་མོ་རྣམ་པར་བསམས་ཏེ། དེ་ཁོ་ན་ཉིད་བསྐུལ་བས་བསྐུལ་བར་བྱའོ། །ཞེས་སིདྡྷྱ་སིདྡྷྱ་ས་མ་ཡོ྅ཧཾ་ཏྲཾ་པྲཾ་ཡ་མཾ། དེའི་རྗེས་ལ་
[232a.6]དེས་རྗེས་སུ་ཆགས་པའི་སྒྲུབ་པ་པོས་ལྷན་ཅིག་མཉམ་པར་སྦྱོར་བར་བྱའོ། །དེས་བུད་མེད་ལ་ལོངས་སྤྱོད་པ་བཞིན་དུ་ཡན་ལག་ཐམས་ཅད་ཀྱིས་འཁྱུད་པའི་བདེ་བ་བསྒོམ་པར་བྱའོ། །དེ་ནས་མངོན་སུམ་དུ་འོངས་ནས་སྒྲུབ་པ་པོ་དང་ལྷན་ཅིག་མཉམ་པར་སྦྱོར་བར་བྱས་པས་
[232a.7]སྒྲུབ་པ་པོའི་ལུས་ལ་ཞུགས་པར་འགྱུར་རོ། །དེ་ནས་འདི་རྡོ་རྗེ་ཧཱུཾ་མཛད་ལ་སོགས་པ་རྡོ་རྗེ་རིགས་ཀྱི་རང་བཞིན་དུ་འགྱུར་རོ། །བུདྡྷ་བུདྡྷ་མ་ཧཱ་ས་ཏི་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ཁོང་དུ་ཆུད་ནས། ང་ཡི་ཆུང་མ་ཁྱོད་སྡུག་པ། །ཞེས་བྱ་བ་ལ་
[232b]
[232b.1]སོགས་པ་ནི་བཤད་ཟིན་ཏོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། རང་གི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཇི་སྲིད་མཚན་མ་
[232b.2]ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མངོན་པར་ཤེས་པ་ལྔ་བསྐྱེད་དེ། སྔར་བཤད་པའི་ཚུལ་གྱིས་གཟུངས་སྒྲུབ་པའི་དཀྱིལ་འཁོར་བྲིས་ལ། འཇུག་པ་ལ་སོགས་པའི་ཆོ་ག་རྗེས་སུ་སྤྱད་ལ་བསྒོམ་པར་བྱའོ། །གང་གི་ཚེ་དངོས་གྲུབ་ཀྱི་མཚན་མ་ཐོབ་པར་
[232b.3]མ་གྱུར་པ་དེའི་ཚེ་མདུན་དུ་རང་ལྷ་མོ་བུད་མེད་ཀྱི་རྣམ་པར་བསམ་པར་བྱའོ། །བུདྡྷ་བུདྡྷ་མ་ཧཱ་སད་ཏི་བྷརྱ་ཏྭ་མེ་ཨ་ཏི་པྲི་ཡ། དེ་ནས་སྒྲུབ་པ་པོ་དང་ལྷན་ཅིག་ཏུ་མཉམ་པར་སྦྱོར་བར་བསྒོམ་པར་བྱའོ། །དེའི་རྗེས་ལ་དེ་འོངས་ནས་སྒྲུབ་པ་པོའི་ལུས་ལ་ཞུགས་པར་གྱུར་ཏེ། དེ་ནས་སྐད་ཅིག་
[232b.4]དེ་ཉིད་ལ་སྒྲུབ་པ་པོ་འཇིག་རྟེན་དབང་ཕྱུག་ཏུ་འགྱུར་རོ། །སརྦྦ་ཀརྨྨཱ་ནི་ནོར་བུའི་རིགས་ཀྱི་གཟུངས་རྣམས་ཀྱི་ཕྱག་རྒྱ་ཆེན་པོ་ལ་སོགས་པའི་ལས་དེ་རྣམས་སྒྲུབ་པར་བྱེད་པའོ། །ཀ་རི་ནི་ལས་བྱེད་པའི་གཟུངས་ཀྱི་རིག་པའི་ལྷ་མོའི་གཟུགས་ཅན་ནི་བྷརྱའོ། །རྟག་ཏུ་སྐྱེ་བའམ་དེ་བཞིན་
[232b.5]གཤེགས་པ་རྣམས་སྐྱེ་བ་མེད་པར་ཞུགས་པས་ན་ཨ་དྷེ་བཛྲ་ནི་བཅད་དུ་མེད་ཅིང་དབྱེར་མེད་པའི་ཕྱིར་རོ། །དེ་ལྟ་བུའི་དེ་ཁོ་ན་ཉིད་བསྐུལ་བས་རྗེས་སུ་ཆགས་པས་འགྲུབ་པར་འགྱུར་ཞེས་བྱའོ། །དེ་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་
[232b.6]ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས། རང་གི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མངོན་
[232b.7]པར་ཤེས་པ་ལྔ་བསྐྱེད་དེ། སྔར་བཤད་པའི་ཚུལ་གྱིས་རང་གི་གཟུངས་ཀྱི་སྒྲུབ་པའི་དཀྱིལ་འཁོར་བྲིས་ཏེ། ཇི་ལྟ་བ་བཞིན་དུ་བསྒྲུབ་པར་བྱའོ། །དེས་གལ་ཏེ་དངོས་གྲུབ་ཀྱི་མཚན་མ་ཐོབ་པར་མ་གྱུར་ན། མདུན་དུ་རང་གི་གཟུངས་བུད་མེད་ཀྱི་རྣམ་པར་བསམས་ལ་སརྦྦ་
[233a]
[233a.1]ཀརྨྨཱ་ཀ་རི་བྷཪྱ་ཏྲཾ་མེ་སིདྡྷྱཪྱ་བཛྲི་ནི་ཞེས་བྱ་བས་བསྐུལ་བར་བྱའོ། །དེ་ནས་དེ་དང་ལྷན་ཅིག་ཏུ་མཉམ་པར་སྦྱོར་བར་བསྒོམ་པར་བྱའོ། །དེའི་རྗེས་ལ་དེ་འོངས་ནས་སྒྲུབ་པ་པོ་དང་ལྷན་ཅིག་མཉམ་པར་སྦྱོར་བ་བྱས་ཏེ། སྒྲུབ་པའི་ལུས་ལ་ཞུགས་པར་འགྱུར་ཏེ། དེ་ནས་
[233a.2]སྒྲུབ་པ་པོ་ནམ་མཁའི་སྙིང་པོར་འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་ཀྱི་གསང་བའི་དངོས་གྲུབ་ཀྱི་རྒྱུད་བསྟན་ནས། ད་ནི་སྔོན་དུ་བསྙེན་པ་ལ་སོགས་པའི་དུས་སུ་ཡང་། མུ་སྟེགས་རྣམས་ལ་ཕན་བཏགས་ཕྱིར། །རི་མོའི་ཕྱག་རྒྱའི་ཚུལ་དུ་
[233a.3]ནི། །སངས་རྒྱས་བཙུན་མོ་རབ་སྦས་པར། །ཞེས་བྱ་བ་ལ་སོགས་པར་གསང་བའི་ཡེ་ཤེས་ཀྱི་གཟུངས་ཀྱི་ཕྱག་རྒྱ་བསྐྱེད་དེ་བསྒོམ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་གསང་བའི་དངོས་
[233a.4]གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་རྣམས་ཀྱི་དམ་ཚིག་གི་གཟུངས་ཀྱི་ཕྱག་རྒྱའོ། །དེའི་གསང་བ་ནི་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་ལྷའི་གཟུངས་དང་། བྱང་ཆུབ་ཀྱི་སེམས་ལ་སོགས་པའི་རང་བཞིན་མཆོད་རྟེན་གྱི་ནང་དུ་ཆུད་པའོ། །
[233a.5]དེའི་དངོས་གྲུབ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་མངོན་སུམ་དུ་བྱེད་པའོ། །དེ་སྟོན་པར་བྱེད་པའི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །མུ་སྟེགས་ཅན་ནི་ཉན་ཐོས་དང་། རང་རྒྱལ་པ་དང་། སངས་རྒྱས་ཀྱི་
[233a.6]ཐེག་པ་ལ་མོས་པ་མདོ་སྡེ་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་ཐེག་པ་ཙམ་ལ་ཞུགས་པ་ནི་གཞན་མུ་སྟེགས་ཅན་ཏེ། རྡོ་རྗེ་ཐེག་པའི་མུ་ལ་མི་བསྟེན་པའི་ཕྱིར་རོ། །དེ་དག་ལ་ཕན་འདོགས་པའི་ཕྱིར་ནི་དམ་པའི་ཆོས་སྤངས་པས་དམྱལ་བར་ལྟུང་བར་མ་གྱུར་ཅིག་སྙམ་དུ་སེམས་
[233a.7]པའོ། །གལ་ཏེ་དེ་བཞིན་གཤེགས་པ་ལ་བཙུན་མོ་མངའ་བ་དེ་ལྟ་ན་ནི་དེ་བཞིན་གཤེགས་པ་ལ་འདོད་ཆགས་མངའ་བར་གྱུར་པས་སོ། །དེས་ན་འདི་ནི་བདུད་ཀྱིས་གསུངས་པ་ཡིན་ནོ་ཞེས་པས་རབ་ཏུ་སྤངས་ན་དམྱལ་བར་ལྟུང་བར་འགྱུར་བས། དེ་ལྟའི་ཉེས་པར་མ་གྱུར་ཅིག་སྙམ་པས། དེ་བཞིན་
[233b]
[233b.1]གཤེགས་པའི་རིག་པའི་ལྷ་མོས་འདུལ་བའི་སེམས་ཅན་གྱི་ཁམས་འདུལ་བར་བྱེད་པ་ལ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་ལྷ་མོའི་གཟུངས་རྣམས་སྦས་ཏེ། མཆོད་རྟེན་ལ་སོགས་པའི་གཟུགས་ཀྱིས་བཞུགས་པའོ། །དེའི་ཕྱིར་རི་མོའི་ཕྱག་རྒྱའི་ཚུལ་དུ་ནི་མཆོད་རྟེན་ལ་སོགས་པའི་གཟུགས་ཀྱི་དཀྱིལ་
[233b.2]འཁོར་རམ། རས་སམ། རྩིག་པ་ལ་སོགས་པ་ལ་བྲི་བའམ། སྐལ་བ་དང་ལྡན་པ་ལ་རིག་པའི་ལྷ་མོའི་གཟུངས་སུ་བྱའོ། །དེ་ལྟར་ཤེས་པ་ནི་ངེས་པ་བསྐྱེད་པའོ། །ཕྱག་རྒྱ་ཆེན་པོ་ལ་སོགས་པ་དེ་བསྒོམས་ན་མྱུར་དུ་འགྲུབ་པར་འགྱུར་གྱི་གཞན་དུ་མ་ཡིན་ནོ། །དེ་ལྟར་དེ་བཞིན་
[233b.3]གཤེགས་པའམ་གཟུངས་ཀྱི་སྒྲུབ་པ་པོས་ཕྱག་རྒྱ་རིག་པའི་ལྷ་མོས་ངེས་པར་བྱས་ནས། ད་ནི་དེ་བཞིན་གཤེགས་པའི་རིགས་ཀྱི་གཟུངས་ཀྱི་རྣལ་འབྱོར་པ་རྣམས་ཀྱིས་ཀྱང་ཕྱག་རྒྱ་རྣམས་རིག་པའི་ལྷ་མོར་ངེས་པར་བསྐྱེད་ནས། དོན་འདི་བསྒོམ་པར་བྱ་བ་ནི། སེམས་ཅན་
[233b.4]ཀུན་གྱི་ཡིད་ཁྱབ་པ། །ཞེས་བྱ་བ་ལ་སོགས་པ་སྨོས་ཏེ། དེ་ལ་འཁོར་བའི་སེམས་ནི་སེམས་ཅན་ཀུན་གྱི་ཡིད་ཅེས་བརྗོད་པ་དེ་དེས་ཁྱབ་པའི་ངང་ཚུལ་མངའ་བ་འདི་ནི་སེམས་ཅན་ཀུན་གྱི་ཡིད་ལ་ཁྱབ་པ་སྟེ། རྡོ་རྗེ་འཛིན་པ་ཆེན་པོ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་
[233b.5]ཀྱི་རང་བཞིན་ནོ། །ཇི་ལྟར་སེམས་ཅན་ཀུན་གྱི་ཡིད་ལ་ཁྱབ་པ་ཡིན་ཞེ་ན། གང་གི་ཕྱིར་དེ་དག་སེམས་ཅན་ཀུན་གྱི་སེམས་དང་ཡིད་ལ་སོགས་པ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་སོ། །སེམས་ཅན་ཀུན་ལ་བདེ་སྦྱིན་པ། །ཞེས་བྱ་བ་ནི་དེས་ན་ཆོས་ཀྱི་དབྱིངས་ཀྱི་རང་བཞིན་ཐོས་
[233b.6]པ་དང་། བསམ་པ་དང་། བསྒོམ་པའི་ཤེས་པ་གོམས་པའི་ཡིད་ཀྱིས་འཇིག་རྟེན་དང་འཇིག་རྟེན་ལས་འདས་པའི་བདེ་བ་སེམས་ཅན་ཐམས་ཅད་ལ་ཉེ་བར་བསྐྱེད་པ་དེ་ནི་འདིར། སེམས་ཅན་ཀུན་ལ་བདེ་སྦྱིན་ཞིང་། །སེམས་ཅན་ཀུན་གྱི་ཡབ་ཉིད་དེ། །ཞེས་བྱ་བ་ནི་བྱང་
[233b.7]ཆུབ་ཀྱི་མཚན་ཉིད་ཅན་གྱི་སེམས་སམ། དེ་བཞིན་གཤེགས་པའི་སེམས་རྣམས་བསྐྱེད་པ་དེའི་ཕྱིར། སེམས་ཅན་ཀུན་གྱི་ཡབ་ཉིད་དོ། །དམ་ཚིག་མཆོག་གི་འདོད་པ་མཆོག །ཅེས་བྱ་བ་ནི་འདོད་པར་བྱ་བ་ཡིན་པས་ན་འདོད་པ་སྟེ། སྨོན་པ་དང་འཇུག་པའི་བྱང་
[234a]
[234a.1]ཆུབ་སེམས་ཀྱི་མཚན་ཉིད་དོ། །དེ་ཉིད་ཀྱི་མཆོག་ཡིན་པ་དེའི་ཕྱིར་བར་ཆད་མེད་པའི་ལམ་གྱི་ངོ་བོས་ཆགས་པ་དང་བཅས་པའི་ཉོན་མོངས་པ་སྤངས་པ་ནི་རྡོ་རྗེ་འཛིན་པ་ཆེན་པོའི་རང་བཞིན་བྱང་ཆུབ་ཆེན་པོའི་མཚན་ཉིད་ཅན་གྱི་སེམས་གང་ཡིན་པ་དེ་ནི་མཆོག་ཏུ་གྱུར་
[234a.2]པས་ན་དམ་པའོ། །དེ་ཇི་ལྟ་བུ་ཞེ་ན། དེ་བཞིན་གཤེགས་པ་རྣམས་ལས་གཞན་མ་ཡིན་པས་ན་དམ་ཚིག་མཆོག་གོ། །འདི་སྟོན་པ་ཡིན་ཏེ། རྡོ་རྗེ་ལ་སོགས་པའི་མཚན་མའི་ཕྱག་རྒྱའི་གཟུགས་གང་ཡིན་པ་དེ་དང་། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་རིག་པའི་ལྷ་
[234a.3]མོའི་གཟུགས་གང་ཡིན་པ་དང་། གཞན་ཡང་རྣམ་པར་སྣང་མཛད་ལ་སོགས་པའི་གཟུགས་གང་ཡིན་པ་དེ་དག་རང་བཞིན་གྱིས་གདོད་མ་ནས་མ་སྐྱེས་པས། སྒྱུ་མ་ལྟ་བུར་ཤེས་ནས་མཉམ་པར་སྦྱོར་བ་ལ་སོགས་པ་སྒོམ་པར་བྱེད་པ་དེ་ལྟ་བུས་ཐབས་དང་ཤེས་རབ་ཟུང་དུ་འཇུག་
[234a.4]པའི་བྱང་ཆུབ་སེམས་དཔའི་ལམ་ལ་བཞོན་པར་བསྒོམ་པར་བྱའི། གཞན་དུ་ནི་མ་ཡིན་ནོ། །འདོད་ཆགས་ནི་སེམས་ཅན་སྨིན་ཅིང་གྲོལ་བར་བྱེད་པའི་མཚན་ཉིད་དོ། །དེའི་དག་པ་ནི་གཟུང་བ་དང་འཛིན་པའི་ངོ་བོས་དམིགས་པ་མེད་པའི་ཐུགས་རྗེ་ཆེན་པོའོ། །དེ་དག་པ་ནི་དག་
[234a.5]པའི་དོན་ཏེ། མི་དམིགས་པའི་ཐུགས་རྗེ་ཆེན་པོ་མངོན་སུམ་དུ་བྱས་ཞེས་བྱ་བའི་དོན་ཏོ། །ཉན་ཐོས་དང་། རང་རྒྱལ་བ་ཆགས་པ་དང་བྲལ་བ་དེ་དག་ཅིའི་ཕྱིར་གཞན་ཞིག་ཏུ་འགྱུར་ཞེ་ན། མུ་སྟེགས་ལྟ་བར་བྱས་བདག་ལ། །ཞེས་བྱ་བ་སྨོས་ཏེ། བདག་དང་། བདག་གི་དང་། རྟག་
[234a.6]པ་དང་། ཆད་པ་ལ་སོགས་པ་དེས་མུ་སྟེགས་ཅན་གྱི་ལྟ་བ་དེས་བྱས་ཏེ། མངོན་པར་འདུས་བྱས་པའོ། །བདག་ལ་ནི་མུ་སྟེགས་ཅན་གྱི་ལྟ་བ་ཅན་གྱིས་བྱས་པའི་བདག་ཉིད་ཁོ་ན་བདེན་པ་ཡིན་གྱི་གཞན་ནི་མ་ཡིན་ནོ་ཞེས་ངེས་པར་སེམས་པ་ནི། རྨོངས་པ་ཞེས་བྱ་བའི་ཐ་ཚིག་
[234a.7]གོ། །དེ་ལྟར་གྱུར་པ་དེ་རྣམས་སྦྱངས་ནས་མི་དམིགས་པའི་ཐུགས་རྗེ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཇོག་པ་ནི་གསོད་པའི་དམ་ཚིག་མཆོག་ཡིན་ནོ། །དེ་ལྟར་གྱུར་པ་དེ་སྒྲུབ་པ་པོས་ཤེས་པས་ཅི་ཞིག་ཏུ་འགྱུར་ཞེ་ན། དེ་ལྟར་ཤེས་ནས་
[234b]
[234b.1]འགྲུབ་པར་འགྱུར། །ཞེས་བྱ་བ་སྨོས་ཏེ། ཐུགས་རྗེ་ཆེན་པོས་གཞན་གྱི་དབང་གིས་དེ་ལྟར་ངེས་པ་བསྐྱེད་ནས་ཞེ་སྡང་མེད་པའི་ཁྲོ་བོས་སེམས་ཅན་གྱི་ཁམས་ཐམས་ཅད་ཐལ་བར་བྱས་ཏེ། རྡོ་རྗེ་རིགས་ཀྱི་རང་བཞིན་དུ་བསྐྱེད་ནས་གང་གི་ཚེ་གཟུངས་ཀྱི་ཕྱག་རྒྱས་བསྒྲུབ་པ་དེའི་ཚེ་
[234b.2]འགྲུབ་པར་འགྱུར་རོ། །འབྱུང་བ་ཡང་ཡིན་ལ་ཆེན་པོ་ཡང་དེ་ཡིན་པས་ན་འབྱུང་བ་ཆེན་པོ་སྟེ། ཁམས་གསུམ་པའི་རྣམ་པར་དག་པ་གང་ཡིན་པའི་ཀུན་དུ་རྟོག་པ་དེ་ལས་བྱུང་བ་ནི་འབྱུང་བ་ཆེན་པོ་ལས་བྱུང་བའོ། །ཐམས་ཅད་ནི་ཁམས་གསུམ་པའོ། །མི་གཙང་
[234b.3]ཞེས་ནི་ཅིའི་ཕྱིར་བརྗོད། །ཅེས་བྱ་བ་ནི། ཅིའི་ཕྱིར་ཞེས་བྱ་བ་ནི་སྤོང་བའི་དོན་ཏོ། །འདི་སྐད་སྟོན་པ་ཡིན་ཏེ། ཁམས་གསུམ་པའི་རྣམ་པ་ནི་ཡང་དག་པ་མ་ཡིན་པའི་ཀུན་དུ་རྟོག་པ་ནི་དོན་དམ་པར་ན་མ་སྐྱེས་པ་སྟེ། དེ་ལས་བྱུང་བས་ན་ཁམས་གསུམ་པའོ། །གདོན་མི་ཟ་
[234b.4]བར་མ་སྐྱེས་པ་དེའི་ཕྱིར་ཆོས་ཅན་མེད་པས་ཆོས་མི་གཙང་བའི་མཚན་ཉིད་དང་། གཙང་བའི་དངོས་པོ་ཡང་མེད་པ་དེའི་ཕྱིར་ཆོས་ཅན་རང་བཞིན་གྱིས་རྣམ་པར་དག་པའོ་ཞེས་ངེས་པ་བསྐྱེད་ནས། མཉམ་པར་སྦྱོར་བ་ལ་སོགས་པའི་བསྒོམ་པ་ནི་གཟུགས་བརྙན་དང་མཚུངས་
[234b.5]པར་བྱའོ། །དངོས་པོ་མངོན་པར་ཞེན་པ་མེད་པས་འཇུག་པར་བྱའོ་ཞེས་བྱ་བའི་དོན་ཏོ། །མུ་སྟེགས་ཅན་རྣམས་གཞོམ་པའི་ཕྱིར། །ཞེས་བྱ་བ་ནི་མུ་སྟེགས་ཅན་དངོས་པོར་འཛིན་པའི་མངོན་པར་ཞེན་པའོ། །རང་དང་གཞན་གྱི་རྒྱུད་དུ་རྟོགས་པའི་སེམས་དང་སེམས་
[234b.6]ལས་བྱུང་བ་དེ་དག་གཞོམ་པ་ནི་དངོས་པོར་འཛིན་པ་འདི་སྤངས་པའོ། །དེའི་དོན་བརྗོད་པ་ནི་བཤད་མ་ཐག་པའི་དོན་བརྗོད་པས་ངེས་པར་དངོས་གྲུབ་ཐོབ་པར་འགྱུར་བའོ། །བུད་མེད་ནི་ནོར་བུ་ཆེན་པོའི་རིགས་དེའི་གཟུངས་རྣམས་སོ། །ཆགས་པ་ནི་ཕུལ་དུ་བྱུང་བའི་
[234b.7]ཆགས་པའོ། །རྣལ་འབྱོར་དང་། རྗེས་སུ་རྣལ་འབྱོར་དང་། ཤིན་ཏུ་རྣལ་འབྱོར་དང་། སེམས་ཅན་གྱི་རྣལ་འབྱོར་བསྒོམ་པ་དེ་རྣམས་སོ། །བུད་མེད་ལ་ཆགས་པ་དེའི་ཕྱིར་ལྷན་ཅིག་ཏུ་གྱུར་པའི་རྒྱུས་སོ། །རིན་ཆེན་རྣམས་ནི་ནོར་བུ་ཆེན་པོའི་རིགས་ཀྱི་རང་བཞིན་རྣམས་སོ། །རྟག་ཏུ་ལེགས་
[235a]
[235a.1]པར་བསགས་པར་བྱ། །ཞེས་བྱ་བ་ནི་ནོར་བུ་ཆེན་པོའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོའི་དངོས་གྲུབ་ཀྱི་རིན་པོ་ཆེ་རྣམས་བསགས་པ་ནི་རྟོགས་པའོ། །བྱམས་པ་ནི་བསྐྱེད་པའོ། །གང་གི་ཕྱིར། བུད་མེད་བླ་མེད་རིན་ཆེན་
[235a.2]རྣམས། །ཞེས་བྱ་བ་ཡིན་པ་དེའི་ཕྱིར་བསམ་པ་ནི་ངེས་པ་བསྐྱེད་པའོ། །ནོར་བུ་ཆེན་པོའི་རིགས་ཀྱི་གཟུངས་ཀྱི་དཀྱིལ་འཁོར་གྱི་རྣལ་འབྱོར་བསྒོམས་ན་འགྲུབ་པར་འགྱུར་ཏེ། ཕྱག་རྒྱ་ཆེན་པོ་ལ་སོགས་པ་འགྲུབ་པར་འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་
[235a.3]དམ་ཚིག་གི་རིགས་ཀྱི་གསང་བའི་དངོས་གྲུབ་ཀྱི་རྒྱུད་བསྟན་ནས། ད་ནི་གཟུངས་ཀྱི་མཉམ་པར་སྦྱོར་བའི་བསྒོམས་པ་ལས་བྱུང་བའི་བདེ་བ་ཕུལ་བའི་ཡང་དག་པར་སྦྱོར་བ་བསྒོམ་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་
[235a.4]ཀྱི་རིགས་ཀྱི་མཆོད་པའི་གསང་བའི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་ལྷ་མོ་དང་མཉམ་པར་སྦྱོར་བ་བསྒོམས་པ་ལས་བྱུང་བའི་བདེ་བས་མཆོད་པར་བྱ་སྟེ། དེ་ཉིད་ནི་གསང་བའོ། །དེའི་དངོས་གྲུབ་ནི་དེ་བཞིན་གཤེགས་པ་རྣམས་
[235a.5]ལ་ཕུལ་བས་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་དང་། ཕྱག་རྒྱ་ཐམས་ཅད་རྫོགས་ཤིང་མངོན་སུམ་དུ་བྱེད་པའོ། །བུད་མེད་རྣམས་ཀྱིས་ཡོངས་བསྐོར་ལ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་གཟུངས་ཀྱི་བུད་མེད་དེ་རྣམས་ཀྱིས་
[235a.6]ཡོངས་སུ་བསྐོར་བར་གྱུར་པའོ། །ཀུན་ནས་བརྩེ་བའི་བདེ་བ་ཡིས། །ཞེས་བྱ་བ་ནི་གཟུངས་ཀྱི་ལྷ་མོ་དང་མཉམ་པར་སྦྱོར་བའི་བསྒོམས་པ་ལས་བྱུང་བའི་བདེ་བ་ནི་ཀུན་ནས་བརྩེ་བའི་བདེ་བའོ། །སངས་རྒྱས་མཆོད་ཕྱིར་ཕུལ་ན་ཡང་། །ཞེས་བྱ་བ་ནི་གཟུངས་ཀྱི་ལྷ་མོ་
[235a.7]དང་མཉམ་པར་སྦྱོར་བའི་བསྒོམས་པ་ལས་བྱུང་བའི་བདེ་བ་དེ་བཞིན་གཤེགས་པ་རྣམས་ལ་ཕུལ་བ་ནི་སངས་རྒྱས་ལ་ཕུལ་བའི་རྒྱུས་སངས་རྒྱས་ཉིད་ཐོབ་བོ། །རྒྱུར་འགྱུར་རོ་ཞེས་བྱ་བའི་དོན་ཏོ། །དེ་ཅི་ཞིག་ཏུ་འགྱུར་ཞེ་ན། མཆོད་པའི་དངོས་གྲུབ་ཐོབ་པར་འགྱུར། །ཞེས་
[235b]
[235b.1]བྱ་བ་སྨོས་ཏེ། མཆོད་པར་གྱུར་པ་ནི་མཆོད་པའི་དངོས་གྲུབ་སྟེ། གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་རྣམས་རྟོགས་པ་ཡིན་ནོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་རྣལ་འབྱོར་བ་གཟུངས་ཀྱི་སྒྲུབ་པ་པོས་སྔ་མ་བཞིན་དུ་ཆོ་ག་
[235b.2]ཐམས་ཅད་རྗེས་སུ་སྤྱད་ལ། གཟུངས་ཀྱི་སྙིང་པོ་བརྗོད་ཅིང་རིག་པའི་ལྷ་མོའི་གཟུགས་ཀྱིས་བདག་ཉིད་ཡོངས་སུ་བསྐོར་ཞིང་བཞག་ལ། མཉམ་པར་སྦྱོར་བ་བསྒོམ་པས་ལོངས་སྤྱད་ལ་དེ་ནས་དེ་བསྒོམས་ཏེ། དེ་དང་དེ་བསྒོམས་པ་ལས་སྐྱེས་པའི་བདེ་བ་གང་ཡིན་ལ་དེས་
[235b.3]སེམས་ཅན་གྱི་ཁམས་ཐམས་ཅད་བདག་ཉིད་དང་མཚུངས་པར་བསྒོམས་ལ་དེ་ལྟ་བུའི་བདེ་བ་དེ་སངས་རྒྱས་ལ་མཆོད་པའི་ཕྱིར་དབུལ་བར་བྱའོ། །རབ་དགའ་གང་དེ་སྐྱེས་པ་ན། །རབ་དགའ་ལས་བྱུང་བདེ་བ་དེ། །ཕྱག་བཞི་པོས་ནི་མཆོད་པའི་ཕྱིར། །ཕུལ་ན་མྱུར་དུ་
[235b.4]འགྲུབ་པར་འགྱུར། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་པས་རང་གི་གཟུངས་དང་། མཉམ་པར་སྦྱོར་བར་བསྒོམས་པ་ལས་བྱུང་བའི་དགའ་བས་ངལ་ཞིང་སྐྱོ་ན་དེའི་བདེ་བ་དེས་ངལ་ཞིང་སྐྱོ་བའོ། །དེ་བསྒོམས་པ་ལས་བྱུང་བའི་བདེ་བ་ནི་རབ་ཏུ་
[235b.5]དགའ་བའི་བདེ་བ་ཉིད་དེ། ཕྱག་བཞི་པོ་ཡིས་མཆོད་པའི་ཕྱིར་ངེས་པར་ཕུལ་ནས། དེ་བཞིན་གཤེགས་པ་ཐམས་ཅད་མྱུར་དུ་འགྲུབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་
[235b.6]ཀྱི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་དེ། རང་གི་གཟུངས་ཀྱི་ཕྱག་རྒྱ་བཅིངས་ནས་རང་གི་གཟུངས་ཀྱི་དཀྱིལ་འཁོར་སྤྲུལ་པ་ཐམས་ཅད་དང་ལྷན་ཅིག་མཉམ་པར་སྦྱོར་བར་བསྒོམས་ལ། ཇི་སྲིད་དུ་སྐྱོ་ཞིང་ངལ་བར་མ་གྱུར་པ་དེ་སྲིད་ཀྱི་
[235b.7]བར་དུ་བྱའོ། །སྐྱོ་བར་གྱུར་ན་ཕྱག་བཞི་བྱས་ལ་དེ་ནས་ངལ་བསོ་བར་བྱའོ། །དེ་ལྟར་ཡང་དང་ཡང་དུ་བསྒོམས་ནས་ཡང་དང་ཡང་དུ་བསྒོམ་ཞིང་ཕྱག་བྱ་སྟེ་བསྙེན་པ་སྔོན་དུ་འགྲོ་བས་བསྒྲུབ་པར་བྱའོ། །རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་
[236a]
[236a.1]ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་ནི་ཧཱུཾ་གི་དམ་ཚིག་གོ། །དེ་བཅིངས་ནས། སྐྱེ་བོ་བུད་མེད་འཁྱུད་ནས་ཀྱང་། །ཞེས་བྱ་བ་ནི་རང་གི་གཟུངས་ཀྱི་ལྷ་མོ་དང་མཉམ་པར་སྦྱོར་བར་བསྒོམས་ལ། དེ་དང་འཁྱུད་པར་གྱུར་བའི་བདེ་བ་དེ། ཕུལ་ནས་དེ་ནི་འགྲུབ་པར་
[236a.2]འགྱུར། །ཞེས་བྱ་བ་ནི་སེམས་ཅན་ཐམས་ཅད་ཀྱི་ཁམས་ཐམས་ཅད་རང་གི་རང་བཞིན་དུ་བྱས་ལ། དེ་ལྟ་བུའི་བདེ་བ་དེ་ཕུལ་ན་དེ་འགྲུབ་པར་འགྱུར་རོ། །འཇིག་རྟེན་དབང་པོར་བདག་བསྒོམས་ལ། །ཞེས་བྱ་བ་ལ་སོགས་པ་ནི་འགྲོ་བ་འདུལ་བ་ལ་སོགས་པ་རྣལ་འབྱོར་སྔ་མ་བཞིན་དུ་བྱས་
[236a.3]ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། འཇིག་རྟེན་དབང་ཕྱུག་བདག་ཡིན་ནོ་ཞེས་བྱ་བའི་ང་རྒྱལ་བསྐྱེད་བར་བྱའོ། །པདྨའི་རིགས་ཀྱི་གཟུངས་ཀྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་གཟུངས་ཀྱི་ལྷ་ལ་སྔ་མ་བཞིན་དུ་རྡོ་རྗེ་ལྟ་བས་བལྟས་པ་དེ་
[236a.4]བསྒོམས་པ་ལས་བྱུང་བའི་བདེ་བས་ཚིམ་པ་དེས་སེམས་ཅན་གྱི་ཁམས་ཐམས་ཅད་ཡིད་ཀྱིས་འཇིག་རྟེན་དབང་ཕྱུག་ཏུ་བྱས་ཏེ། སྡུག་པའི་གདོང་དུ་བལྟས་ཤིང་ངེས་པར་བསམས་ལ། ཕྱིས་ལྷན་ཅིག་ཏུ་མཉམ་པར་སྦྱོར་བར་བསྒོམ་པར་བྱའོ། །ནོར་བུའི་རིགས་ཆེན་པོའི་ཕྱག་རྒྱ་
[236a.5]ཐམས་ཅད་ཀྱང་གཟུངས་ཀྱི་ཕྱག་རྒྱ་ཐམས་ཅད་ནི་ལས་ཀྱི་ཕྱག་རྒྱའོ། །དེའི་ཕྱག་རྒྱ་ཆེན་པོ་ལ་སོགས་པ་གཟུངས་ཀྱི་ཕྱག་རྒྱ་བཅིངས་པ་ནི་ལས་ཀྱི་ཕྱག་རྒྱ་འཛིན་པར་གྱུར་པའོ། །རྒྱན་རྣམས་ཀུན་གྱིས་ནི་དོན་ཐམས་ཅད་གྲུབ་པ་ལ་སོགས་པའི་རྒྱན་གང་ཡིན་པ་དེ་རྣམས་
[236a.6]ཀྱིས་བདག་ཉིད་ལ་ཡིད་ལས་བྱུང་བའོ། །ཡོད་ན་ཕྱི་རོལ་གྱི་རྒྱན་ཀུན་གྱིས་རྣམ་པར་བརྒྱན་པའོ། །བུད་མེད་འཁྱུད་པའི་ལོངས་སྤྱོད་ནི། །ཞེས་བྱ་བ་ལ། རང་གི་གཟུངས་ཀྱི་ལྷ་མོ་དང་མཉམ་པར་སྦྱོར་བས་འཁྱུད་པར་བསྒོམ་པར་བྱའོ། །མཆོད་པའི་ཕྱིར་ནི་མཆོད་
[236a.7]པའི་རྒྱུ་མཚན་ནོ། །དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་རྣམས་རང་གི་ངོ་བོར་བསྐྱེད་ལ། དེ་ཉིད་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ལ་ཕུལ་ན་ནོར་བུ་ཆེན་པོའི་རིགས་ཀྱི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་
[236b]
[236b.1]བསྒྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ནོར་བུ་ཆེན་པོའི་རིགས་ཀྱི་རྣལ་འབྱོར་བྱས་ནས། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་
[236b.2]པ་བཅིངས་ལ། རང་གི་གཟུངས་ཀྱི་ལྷ་མོ་མདུན་དུ་བསམས་ཏེ། ཇི་ལྟ་བ་བཞིན་དུ་འཁྱུད་པས་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་རང་གི་རང་བཞིན་དུ་བྱའོ། །དེ་ལྟར་དེ་བཞིན་གཤེགས་པའི་རིགས་ཐམས་ཅད་ཀྱི་མཆོད་པའི་གསང་
[236b.3]བའི་དངོས་གྲུབ་ཀྱི་རྒྱུད་བཤད་ནས། ད་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བའི་མཆོད་པའི་དངོས་གྲུབ་ཀྱི་རྒྱུད་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བའི་མཆོད་པ་ནི་སྒེག་མོ་ལ་སོགས་པའི་
[236b.4]མཆོད་པའོ། །དེ་རྣམས་ཀྱི་དངོས་གྲུབ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་ཐོབ་པའོ། །ཅི་ནས་སུས་ཀྱང་མི་ཚོར་བར། །གཞན་གྱི་བུད་མེད་རྩེ་བྱེད་ན། །ཞེས་བྱ་བ་ལ་སོགས་པ་ནི་གཞན་གྱི་བུད་མེད་ནི། གཞན་མཆོག་ཏུ་
[236b.5]གྱུར་པའི་བུ་མོ་ནི་གཞན་གྱི་བུད་མེད་དེ། གཟུངས་ཀྱི་ལྷ་མོ་དེ་དེ་དང་རྩེ་བར་བྱེད་པ་ནི་མཉམ་པར་སྦྱོར་བ་སྒོམ་པའི་སྦྱོར་བས་དེ་བསྟེན་པའོ། །ཅི་ནས་སུས་ཀྱང་མི་ཚོར་བ་ནི་རང་གི་རྒྱུད་དང་རྗེས་སུ་མཐུན་པའི་ཡུལ་ནི་སྐྱེ་བོ་ཐམས་ཅད་ཀྱི་མངོན་སུམ་མ་ཡིན་པའོ། །འདི་སྐད་
[236b.6]སྟོན་པ་ཡིན་ཏེ། གཟུངས་ཀྱི་སྒྲུབ་པ་པོ་སློབ་དཔོན་འབའ་ཞིག་གམ། ཡིད་ཆེས་པ་དང་བྱ་བ་ཡིན་གྱིས། གཞན་དང་ནི་མ་ཡིན་ནོ། །སངས་རྒྱས་སུ་ནི་བདག་བསྒོམས་ལ། །ཞེས་བྱ་བ་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པར་བདག་ཉིད་བསྒོམ་
[236b.7]པར་བྱའོ། །མཆོད་པའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་ནི་མཆོད་པའི་དངོས་གྲུབ་དེ་ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་དེ་བཞིན་གཤེགས་པའི་རྣལ་འབྱོར་བྱས་ལ། དཀྱིལ་འཁོར་ཆེན་པོ་ལས་བཤད་པའི་
[237a]
[237a.1]བདུག་པ་མ་ལ་སོགས་པའི་ཕྱག་རྒྱ་རྣམས་ཀྱིས་ཡང་དག་པར་མཆོད་ལ་ཕྱག་བཞི་བྱའོ། །ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། གཟུངས་ཐམས་ཅད་སྤྲུལ་ལ། གཟུངས་ཀྱི་དཀྱིལ་འཁོར་ལས་བཤད་པའི་
[237a.2]སྒེག་མོ་ལ་སོགས་པའི་མཆོད་པ་རྣམ་པ་བཞིས་བདག་ཉིད་ཡང་དག་པར་མཆོད་ལ། གཟུངས་ཀྱི་ལྷ་མོ་ཐམས་ཅད་དང་མཉམ་པར་སྦྱོར་བར་བསྒོམ་པར་བྱའོ། །རྡོ་རྗེ་འཇོམས་བྱས་ནས་ཀྱང་ཞེས་བྱ་བ་ལ་སོགས་པ་ནི་སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་
[237a.3]པའི་ཆོ་གས་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་གའི་རྗེས་སུ་སྤྱད་ནས། གཟུངས་ཀྱི་དཀྱིལ་འཁོར་ལས་བཤད་པའི་རང་གི་གཟུངས་ཀྱི་ཕྱག་རྒྱ་ཆེན་པོའམ། དམ་ཚིག་དང་ཆོས་དང་ལས་ཀྱི་ཕྱག་རྒྱ་རྣམས་བཅིངས་
[237a.4]ཏེ། །རང་གི་སྙིང་པོས་རང་གི་གཟུངས་ཀྱི་དཀྱིལ་འཁོར་སྤྲུལ་ལ། གཟུངས་ཀྱི་དཀྱིལ་འཁོར་ལས་གསུངས་པའི་སྒེག་མོ་ལ་སོགས་པའི་གསང་བའི་མཆོད་པ་བཞི་ལས་ཀྱི་ཕྱག་རྒྱའི་གར་ལས་བྱུང་བའི་བདག་ཉིད་ཡང་དག་པར་མཆོད་པར་བྱའོ། །དེ་ནས་འདོད་
[237a.5]པ་ནི་དེ་བཞིན་གཤེགས་པའི་རིགས་ཀྱི་རྒྱུད་ལ་ཆགས་པའོ། །དགའ་བ་ནི་དེ་བཞིན་གཤེགས་པའི་རིགས་ཀྱི་ཐབས་དང་ཤེས་རབ་བསྒོམས་པ་ལས་བྱུང་བ་མགུ་བའོ། །འདི་ཉིད་བསྒོམ་པའི་རྣལ་འབྱོར་པས་ནམ་མཁའ་དང་མཉམ་པའི་དེ་བཞིན་གཤེགས་པའི་རིགས་
[237a.6]རྟོགས་པས་དབང་བསྐུར་བའོ། །དེ་ཉིད་བསྒོམ་པའི་རྣལ་འབྱོར་པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་སྒྲ་བརྙན་དང་མཚུངས་པའི་སྒྲ་ལ་བཟོད་པ་གང་ཡིན་པ་འདི་ནི་གླུ་མའོ། །དེ་ཉིད་བསྒོམས་པས་རང་བཞིན་གྱིས་འོད་གསལ་བའི་ཆོས་གདོད་
[237a.7]མ་ནས་དག་པ་ནི་ནམ་མཁའ་དང་མཚུངས་པ་ཡིན་ནོ་སྙམ་པའི་བརྩོན་འགྲུས་ནི་གར་མའོ། །དེ་རྣམས་གོམས་པའི་སྟོབས་ལས་བྱུང་བའི་བདེ་བ་ནི་འདོད་པ་དགའ་བས་དབང་བསྐུར་བ་མཆོག་གླུའི་གར་གྱིས་བདེ་བའོ། །དེ་ལས་ནི་དེ་ལྟར་གྱུར་པ་དེ་ལས་སོ། །
[237b]
[237b.1]བདེ་བ་གཞན་ནི་ཡོད་མིན་ཏེ། །ཞེས་བྱ་བ་ནི་གསང་བའི་མཆོད་པ་བཞིར་བརྗོད་པ་དེ་ལས་སོ། །དེ་ལྟར་བདག་ཉིད་ཡང་དག་པར་མཆོད་ལ། གཟུངས་ཀྱི་ལྷ་མོ་ཐམས་ཅད་དང་མཉམ་པར་སྦྱོར་བར་བསྒོམ་པར་བྱའོ། །ཆོ་ག་ཇི་བཞིན་ཚུལ་དུ་ཡང་། །ཞེས་བྱ་བ་ལ་སོགས་པ་སྔ་མ་
[237b.2]བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་གཟུངས་ཀྱི་དཀྱིལ་འཁོར་ལས་གསུངས་པའི་རང་གི་ཕྱག་རྒྱ་
[237b.3]བཅིངས་ཏེ། རང་གི་སྙིང་པོས་གཟུངས་ཀྱི་དཀྱིལ་འཁོར་སྤྲུལ་ནས། གཟུངས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པའི་གསང་བའི་མཆོད་པ་བཞིས་བདག་ཉིད་ཡང་དག་པར་མཆོད་ལ། རྡོ་རྗེ་ཧཱུཾ་མཛད་ཀྱི་དམ་ཚིག་གི་ཕྱག་རྒྱ་བཅིངས་ཏེ། འཁྱུད་པས་
[237b.4]གཟུངས་ཀྱི་སྐྱེ་བོ་སྡུག་པ་ཐམས་ཅད་དང་མཉམ་པར་སྦྱོར་བ་བསྒོམ་པར་བྱའོ། །གསང་བའི་ཚུལ་ནི་ཇི་བཞིན་པར། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞི་བྱ་
[237b.5]བའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བ་ལ་སོགས་པའི་ཕྱག་རྒྱ་བཅིངས་ཏེ། རང་གི་གཟུངས་ཀྱི་དཀྱིལ་འཁོར་སྤྲུལ་ལ། གཟུངས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པའི་
[237b.6]གསང་བའི་མཆོད་པ་རྣམ་པ་བཞིས་བདག་ཉིད་ཡང་དག་པར་མཆོད་ལ། གཟུངས་ཐམས་ཅད་དང་མཉམ་པར་སྦྱོར་བར་བསྒོམ་པར་བྱའོ། །གསང་བའི་ཚུལ་ནི་ཇི་བཞིན་པར། །ཞེས་བྱ་བ་ལ་སོགས་པ་ལ། སྔ་མ་བཞིན་དུ་ནོར་བུའི་རིགས་ཀྱི་རྣལ་འབྱོར་བྱས་ལ།
[237b.7]ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་རང་གི་གཟུངས་ཀྱི་ཕྱག་རྒྱ་བཅིངས་ལ་རང་གི་གཟུངས་ཀྱི་དཀྱིལ་འཁོར་ལ་རང་གི་སྙིང་གའི་རིན་པོ་ཆེ་ལས་སྤྲུལ་ནས་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རིན་ཆེན་སྒེག་མོ་
[238a]
[238a.1]ལ་སོགས་པའི་ཕྱག་རྒྱ་རྣམ་པ་བཞིས་བདག་ཉིད་ཡང་དག་པར་མཆོད་པར་བྱའོ། །དེ་ལྟར་ལས་ཀྱི་ཕྱག་རྒྱ་རྣམས་ཀྱིས་རབ་ཏུ་མཆོད་ལ། དོན་ཐམས་ཅད་གྲུབ་པའི་རྣལ་འབྱོར་དང་། ནམ་མཁའི་སྙིང་པོའི་རྣལ་འབྱོར་པས་གཟུངས་ཀྱི་དཀྱིལ་འཁོར་ལས་བཤད་པའི་
[238a.2]སྒེག་མོ་ལ་སོགས་པའི་གསང་བའི་མཆོད་པ་རྣམས་ཀྱིས་མཆོད་པར་བྱས་ནས། ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐོབ་པར་འགྱུར་རོ། །སྔར་བཤད་པའི་ཚུལ་གྱིས་གཟུངས་ཐམས་ཅད་དང་མཉམ་པར་སྦྱོར་བར་བསྒོམས་ཏེ། ཡང་ན་རང་གི་གཟུངས་ཀྱི་དཀྱིལ་
[238a.3]འཁོར་སྤྲུལ་ལ་རང་གི་གཟུངས་རེ་རེ་ཞིང་མདུན་དུ་བཞག་ལ། བསྡུ་བ་ལ་སོགས་པའི་ཆོ་ག་རྗེས་སུ་སྤྱད་དེ། ཕྱག་རྒྱ་བཞིས་རྒྱས་བཏབ་ལ། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ། གཟུངས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པ་རྣམས་བརྒྱད་ཀྱི་ཕྱག་
[238a.4]རྒྱ་དང་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་བཅུ་དྲུག་གིས་ཡང་དག་པར་མཆོད་ལ་ཕྱག་བཞི་བྱས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་གསང་བའི་མཆོད་པའི་དངོས་གྲུབ་ཀྱི་ཆོ་ག་
[238a.5]རྒྱས་པའི་རྒྱུད་བསྟན་ནས། ད་ནི་སེམས་ཡོངས་སུ་སྦྱོང་བའི་ལས་ཀྱི་ཡེ་ཤེས་དང་། གཟུངས་ཀྱི་ཡེ་ཤེས་ཉིད་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རྣལ་འབྱོར་པས་དཀྱིལ་འཁོར་ཆེན་པོ་ལས་བཤད་པའི་ལྷ་བསྐྱེད་པའི་རྒྱུར་གྱུར་པའི་དེ་བཞིན་གཤེགས་
[238a.6]པ་ཐམས་ཅད་ཀྱི་རིགས་ཀྱི་དེ་ཁོ་ན་ཉིད་བརྗོད་པའི་རྒྱུ་ནི། དེ་ནས་སངས་རྒྱས་བྱང་ཆུབ་སེམས་དཔའ་ཕྱག་ན་རྡོ་རྗེས་ཞེས་བྱ་བ་ལ་སོགས་པ་གསུངས་སོ། །དེ་བཞིན་གཤེགས་པ་ཐམས་ཅད་དང་། རིགས་ཐམས་ཅད་ཀྱི་དེ་ཁོ་ན་ཉིད་ནི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་
[238a.7]དོ། །དེ་དག་བརྗོད་པ་ནི་གསལ་བར་བྱེད་པའོ། །དེ་ཉིད་ནི་གསང་བ་སྟེ། དེའི་དངོས་གྲུབ་ནི་དཀྱིལ་འཁོར་ཆེན་པོར་བཤད་པའི་ལུས་ཀྱི་ཕྱག་རྒྱ་ཐམས་ཅད་བསྐྱེད་པའོ། །དེ་སྟོན་པར་བྱེད་པ་ནི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །མདོར་ན་ཏིང་
[238b]
[238b.1]འཛིན་ཡེ་ཤེས་གནས། །ཞེས་བྱ་བ་ནི་ཏིང་ངེ་འཛིན་ཡེ་ཤེས་སུ་གྱུར་པ་ནི་སངས་རྒྱས་སོ། །ཏིང་ངེ་འཛིན་ནི་སེམས་རྩེ་གཅིག་པའོ། །དེ་ལྟར་གྱུར་པའི་ཏིང་ངེ་འཛིན་ངེས་པ་ནི་ཡེ་ཤེས་དེ་ལས་བྱུང་ཞིང་བསྐྱེད་པའོ། །དེ་གང་ཞེ་ན། སངས་རྒྱས་ཉིད་དོ། །སངས་རྒྱས་ཉིད་ནི་ཡང་
[238b.2]དག་པར་རྫོགས་པའི་སངས་རྒྱས་སོ། །ནི་ཞེས་བྱ་བའི་སྒྲ་ནི་ངེས་པར་གཟུང་བའོ། །ཏིང་ངེ་འཛིན་གྱི་ཡེ་ཤེས་ལས་བྱུང་བ་ཁོ་ན་སངས་རྒྱས་ཉིད་དོ། །མདོར་ན་ནི་མདོར་བསྡུས་པའོ། །མདོར་ན་ཏིང་ངེ་འཛིན་ཡེ་ཤེས་ཀྱི་གནས་དེ་གང་ཡིན་ཞེ་ན། འོན་ཀྱང་སེམས་ཅན་རྣམས་ལ་
[238b.3]ཆགས་ཚུལ་གྱིས། །ཞེས་བྱ་བ་སྨོས་ཏེ། སངས་རྒྱས་རྣམས་ཀྱིས་སེམས་ཅན་ཀུན། །ཐམས་ཅད་གཟི་ཅན་ཉིད་དུ་ནི། །ཇི་ལྟ་བ་བཞིན་འདུལ་བ་ཡིས། །ལས་རྣམས་ཐམས་ཅད་གྲུབ་པར་བྱེད། །ཅེས་བྱ་བ་བསྒོམས་པ་འདི་ནི་སེམས་ཅན་ལ་ཆགས་པའི་རྣལ་འབྱོར་
[238b.4]རོ། །སེམས་ཅན་ལ་ཆགས་པའི་སྦྱོར་བ་དེས་མྱུར་ཞིང་མགྱོགས་པར་བླ་ན་མེད་པ་ཐོབ་པར་འགྱུར་རོ་ཞེས་བཅོམ་ལྡན་འདས་དེ་བཞིན་གཤེགས་པས་གསུངས་སོ། །འདི་སྐད་སྟོན་པ་ཡིན་ཏེ། ཨོཾ་ཙིཏྟ་པྲ་ཏི་བེ་དྷཾ་ཀཱ་རོ་མི་ཞེས་བརྗོད་ཅིང་། ཆོས་ཐམས་ཅད་བདག་མེད་པར་
[238b.5]བསྒོམས་པས་གཟུང་བ་དང་འཛིན་པའི་རྣམ་པར་རྟོག་པ་སྤངས་ཏེ། སེམས་རྩེ་གཅིག་པའི་ཏིང་ངེ་འཛིན་དེར་འགྱུར་རོ། །དེའི་རྗེས་ལ་ཟླ་བའི་དཀྱིལ་འཁོར་གྱི་རྣམ་པར་བསྐྱེད་ནས་བརྩམས་ཏེ། ཨོཾ་བོ་དྷི་ཙིཏྟ་ཨུཏྤཱ་ད་ཡ་མི། ཨོཾ་ཏིཥྛ་བཛྲ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་ཡ་ཐ་
[238b.6]སརྦྦ་ཏ་ཐཱ་ག་ཏ་ཏིཥྛ་ཧཾ། ཞེས་བྱ་བའི་སྙིང་པོ་བཞི་བརྗོད་ཅིང་། དེའི་དོན་བཞི་ལ་ངེས་པའི་ཡེ་ཤེས་དེ་ལྟ་བུར་གྱུར་པའི་ཏིང་ངེ་འཛིན་གྱི་ཡེ་ཤེས་དག་ལས་བྱུང་བའི་སངས་རྒྱས་སུ་ངེས་པར་བྱས་ཏེ། ཕྱག་བཞི་པའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས་དེ་བཞིན་
[238b.7]གཤེགས་པའི་ལས་ཀྱི་ཕྱག་རྒྱ་བཅིངས་ཏེ། སེམས་ཅན་གྱི་ཁམས་ཐམས་ཅད་ལ་དེ་བཞིན་གཤེགས་པ་ཉིད་ལ་སོགས་པ་སྟེར་བར་རྣམ་པར་བསམས་ལ། ཕྱག་རྒྱ་ཆེན་པོ་ལ་སོགས་པ་བསྒོམས་པ་དེ་ལྟ་བུས་དེ་བཞིན་གཤེགས་པ་ཉིད་ཐོབ་པར་འགྱུར་རོ། །སེམས་ཅན་ཐོག་
[239a]
[239a.1]མ་ཐ་མ་མེད། །ཅེས་བྱ་བ་ལ། ཐོག་མ་ནི་དང་པོ་སྐྱེ་བ་སྟེ། ཐ་མ་ནི་ཉིང་མཚམས་སྦྱོར་བ་དང་འཇོག་པའོ། །དེ་མེད་པས་ཐོག་མ་དང་ཐ་མ་མེད་པ་གང་ཡིན་པ་འདི་ནི་ཐོག་མ་དང་ཐ་མ་མེད་པའོ། །དེ་གང་ཡིན་ཞེ་ན། སེམས་ཅན་ནོ་ཞེས་བྱ་བ་སྨོས་ཏེ། རྡོ་རྗེ་སེམས་
[239a.2]དཔའ་ཞེས་བྱ་བའི་དོན་ཏོ། །གང་ལ་ཐོག་མ་ཐ་མ་འདི་མེད་ན། ཇི་ལྟར་དེ་ནི་སྐྱེ་བ་རྣམ་པར་འཇོག་པར་བྱེད་ཅེ་ན། ནམ་མཁའ་ལས་བྱུང་མཚན་ཉིད་དེ། །ཞེས་བྱ་བ་སྨོས་ཏེ། དཔེར་ན་རྩིག་པ་འགའ་ཞིག་པས་ནམ་མཁའ་བྱའོ་ཞེས་བྱ་བ་བཞིན་དུ་རྩིག་པ་བཤིག་པར་
[239a.3]བཤད་པ་ནི། རྩིག་པ་བསལ་བས་ནམ་མཁའ་བྱ། །ཞེས་བྱ་བ་བཤད་དོ། །དེ་ལྟར་ཡང་དག་པ་མ་ཡིན་པའི་ཀུན་དུ་རྟོག་པ་ནི་རྩིག་པའི་དབྱིབས་དང་མཚུངས་པ་བཤིག་ནས། ཆོས་བདག་མེད་པའི་ཡེ་ཤེས་ཀྱིས་སྐྱེས་བུའི་དབྱིབས་ཀྱི་ཚུལ་དུ་སྐྱེས་པས་ན་སེམས་ཅན་ནི་
[239a.4]རྡོ་རྗེ་སེམས་དཔའོ་ཞེས་ཤེས་པར་བྱའོ། །ཀུན་དུ་བཟང་པོ་ནི་བྱང་ཆུབ་ཀྱི་སེམས་ནམ་མཁའི་ཁམས་ཐམས་ཅད་དུ་རྟག་ཏུ་གནས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་དང་མཚུངས་པར་གྱུར་པ་ནི་ཀུན་དུ་བཟང་པོའོ། །དེ་སྐད་དུ་ཡང་།
[239a.5]ཐོག་མ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཞེས་བཤད་དོ། །ཀུན་བདག་ཉིད་ཅེས་བྱ་བ་ནི་ཁམས་གསུམ་པོ་ཐམས་ཅད་ན་ཀུན་དུ་སྤྱོད་པའི་སེམས་ཅན་གྱི་རང་བཞིན་གྱི་བདག་ཉིད་ནི། ཀུན་བདག་ཉིད་དེ་ཁམས་གསུམ་པ་རྡོ་རྗེ་སེམས་དཔའི་
[239a.6]གཟུགས་དང་ཆོས་ཉིད་ཀྱིས་སོ། །འདོད་པ་ནི་འདོད་པར་བྱ་བས་ན་འདོད་པ་སྟེ། བྱང་ཆུབ་ཆེན་པོའི་མཚན་ཉིད་ཅན་གྱི་རྡོ་རྗེ་སེམས་དཔའོ། །བྱང་ཆུབ་མངོན་དུ་གཉེར་བའི་རྣལ་འབྱོར་པ་རྣམས་ཀྱིས་ཐོས་པ་དང་། བསམ་པ་དང་། བསྒོམ་པའི་ཤེས་པ་བསྟན་པ་ཡིན་ནོ་ཞེས་
[239a.7]བྱ་བའི་དོན་ཏོ། །འགྲོ་བ་ཀུན་བདག་པོ་ཞེས་བྱ་བ་ནི་སེམས་ཅན་དང་སྣོད་ཀྱི་འཇིག་རྟེན་གྱི་འགྲོ་བ་ཐམས་ཅད་རྡོ་རྗེ་རྒྱལ་པོ་ལ་སོགས་པའི་རིགས་བརྒྱའི་དབྱེ་བས་ཕྱེ་བའོ། །སེམས་ཅན་དང་སྣོད་ཀྱི་འཇིག་རྟེན་དེ་ཡང་རྡོ་རྗེ་རྒྱལ་པོ་ལ་སོགས་པའི་དེ་དང་དེར་སྐྱེས་པའོ། །
[239b]
[239b.1]དེ་ལྟར་རྡོ་རྗེ་འཛིན་པ་ཆེན་པོའི་རང་བཞིན་བཤད་ན། ད་ནི་དེ་ཐོབ་པར་བྱེད་པའི་ཐབས་ཀྱི་སེམས་ཡོངས་སུ་སྦྱོང་བའི་ལས་ཀྱི་ཡེ་ཤེས་གསུངས་པ་ནི། སེམས་ཅན་ཀུན་གྱི་སེམས་གང་ཡིན། །ཞེས་བྱ་བ་ལ་སོགས་པ་སྨོས་པའོ། །ཇི་སྐད་བཤད་པའི་མཚན་ཉིད་ཅན་གྱི་དེ་ལྟ་བུའི་
[239b.2]རང་བཞིན་དེ་གང་ཡིན་ཞེ་ན། སེམས་ཅན་ཀུན་གྱི་སེམས་གང་ཡིན། །ཞེས་བྱ་བ་སྨོས་ཏེ། ཀུན་གཞིའི་རྣམ་པར་ཤེས་པ་ལ་སོགས་པའི་རང་བཞིན་སེམས་ཅན་ཀུན་གྱི་སེམས་གང་ཡིན་པ་དེ་ཉིད་ནི་བསྟན་པའི་ཕྱིར་ནི་སེམས་དཔའ་ཞེས་བརྗོད་དོ། །ཆོས་བདག་མེད་པ་བསྒོམས་
[239b.3]པས་གཟུང་བ་དང་འཛིན་པའི་རྣམ་པར་རྟོག་པ་སྤངས་པ་ནི་སྲོག་ཆགས་དང་སྲོག་ཆགས་མ་ཡིན་པ་དང་། གཟུང་བ་དང་། འཛིན་པའི་རྣམ་པར་རྟོག་པ་རྣམས་ཀྱིས་མི་གཡོ་བའི་ཕྱིར་རོ་ཞེས་བྱ་བའི་དོན་ཏོ། །རྡོ་རྗེ་མཉམ་པར་མཉམ་བཞག་ནས། །ཞེས་བྱ་བ་ནི་མཉམ་པར་
[239b.4]གཞག་པའི་སེམས་རྩེ་གཅིག་པའི་ཏིང་ངེ་འཛིན་ཏོ། །དེའི་རྩེ་གཅིག་པའི་རྣལ་འབྱོར་གྱིས་རྡོ་རྗེ་དང་མཉམ་པར་སྦྱོར་བ་ནི་དེ་བཞིན་ཉིད་དེ། དེ་བཞིན་ཉིད་དང་རྣམ་པར་མཚུངས་པའོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། སེམས་ཅན་གྱི་རང་བཞིན་ཀུན་རྫོབ་ཏུ་བསྟན་པར་གྱུར་
[239b.5]པ་གང་ཡིན་པ་དེ་ཉིད་དེ་བཞིན་ཉིད་དང་། རོ་གཅིག་པར་སེམས་རྩེ་གཅིག་པའི་ངོ་བོ་ཉིད་ཡིན་པས་ན་རྡོ་རྗེ་དང་མཉམ་པ་ནི་དེ་བཞིན་ཉིད་དང་མཚུངས་པའོ། །འདི་ལྟར་དེ་བཞིན་ཉིད་ནི་དོན་གྱི་དངོས་པོ་ཐམས་ཅད་ཀྱི་རང་བཞིན་ཏེ། དེ་བཞིན་གཤེགས་པ་རྣམས་བྱུང་ཡང་
[239b.6]རུང་མ་བྱུང་ཡང་རུང་སྟེ། མ་སྐྱེས་ཤིང་མི་སྐྱེ་བར་ཡང་མི་འགྱུར་རོ། །ཆོས་གང་ཡང་སྐྱེ་བ་མེད་པ་དེ་ལ་རེས་འགའ་ཞིག་ཀྱང་འགག་པར་མི་འགྱུར་བ་དེའི་ཕྱིར་དེ་རྡོ་རྗེའོ། །དེ་བཞིན་ཉིད་དང་རོ་གཅིག་པའི་ཡེ་ཤེས་ནི་རྣམ་པར་རྟོག་པ་ཐམས་ཅད་ཀྱིས་མི་བསྐྱོད་པ་དེ་བས་ན་རྡོ་རྗེ་དང་མཚུངས་
[239b.7]པས་ན་རྡོ་རྗེ་ཞེས་བྱ་སྟེ། དེ་བས་ན་རྡོ་རྗེ་དང་མཉམ་པའོ། །ངེས་པར་རྡོ་རྗེ་ཉིད་འགྱུར་ཏེ། །ཞེས་བྱ་བ་ནི་ཟླ་བའི་དཀྱིལ་འཁོར་གྱི་རྣམ་པར་ངེས་པ་དེའི་སྟེང་དུ་ཟླ་བ་གཉིས་པ་དང་བཅས་པའི་རང་གི་ལྷའི་སྙིང་པོ་ལས་རྡོ་རྗེ་རྩེ་ལྔ་པར་ངེས་པར་བྱའོ། །དེ་ནས་རྡོ་རྗེའི་ང་རྒྱལ་བསྒོམས་ནས།
[240a]
[240a.1]ཨོཾ་བཛྲ་ཨ་ཧཾ་ཞེས་བྱ་བ་ལན་གསུམ་ངེས་པར་བྱའོ། །དེ་ལྟར་ལན་གསུམ་ངེས་པ་ལས་རྡོ་རྗེ་བསྒོམས་པས་ནི་རྡོ་རྗེ་ཉིད་དུ་འགྱུར། རྡོ་རྗེ་རྩེ་ལྔ་པའི་གཟུགས་བརྙན་ཉིད་ཀྱིས་བཤད་མ་ཐག་པ་གང་ཡིན་པ་ནི་རྡོ་རྗེ་དང་མཚུངས་པའི་སེམས་ཀྱི་ཁྱད་པར་ཐོབ་པར་འགྱུར་རོ། །
[240a.2]སེམས་དཔའི་བྱིན་རླབས་ཚུལ་གྱིས་ནི། །རྡོ་རྗེ་སེམས་དཔའ་ཉིད་དུ་འགྱུར། །ཞེས་བྱ་བ་ལ། རྡོ་རྗེ་སེམས་དཔའ་ནི་རྡོ་རྗེ་སེམས་དཔའོ། །དེས་བྱིན་གྱིས་བརླབས་པ་ནི་བསྐྱེད་པའོ། །སེམས་དཔའ་བྱིན་གྱིས་བརླབས་པའི་སྦྱོར་བ་དེ་དག་ནི་ཚུལ་ལོ། །དེའི་དོན་ནི་འདི་སྐད་སྟོན་
[240a.3]པ་ཡིན་ཏེ། བཤད་མ་ཐག་པའི་དེ་ཉིད་ཀྱིས་རྡོ་རྗེར་གྱུར་པའི་སེམས་ཀྱི་ཁྱད་པར་གྱིས་རྡོ་རྗེ་སེམས་དཔའི་ཕྱག་རྒྱ་ཆེན་པོའི་གཟུགས་སུ་བསྐྱེད་ལ། བཛྲ་སཏྭ་ཨ་ཧཾ་ཞེས་ཡིད་ཀྱིས་བརྗོད་ཅིང་། རྣལ་འབྱོར་པས་རྡོ་རྗེ་སེམས་དཔར་མོས་པ་གང་ཡིན་པ་དེ་ནི། སེམས་དཔར་
[240a.4]བྱིན་རླབས་ཚུལ་གྱིས་ནི། །ཞེས་བྱའོ། །སེམས་དཔར་བྱིན་གྱིས་བརླབས་པའི་སྦྱོར་བ་དེས་རྡོ་རྗེར་གྱུར་པའི་རྣལ་འབྱོར་པས་རྡོ་རྗེ་དང་དྲིལ་བུ་བསྣམས་པ་རྡོ་རྗེ་སེམས་དཔའ་ཉིད་དུ་རྫོགས་པར་འགྱུར་རོ་ཞེས་བྱ་བའི་དོན་ཏོ། །ཡང་གི་སྒྲ་ནི་རྡོ་རྗེའི་བདག་ཉིད་ཀྱི་གཟུགས་ལ་
[240a.5]ལྟོས་པའོ། །དེ་ལྟར་ན་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོའི་གཟུགས་ཡོངས་སུ་བརྟག་ཅིང་། སངས་རྒྱས་སུ་བྱས་པ་ནི་ཆོས་ཀྱི་དབྱིངས་ཀྱི་ངོ་བོ་ཉིད་དོ། །དེ་ལྟར་རྣལ་འབྱོར་པས་རིགས་ཐམས་ཅད་ཀྱི་ལྷའི་སྐུའི་གསང་བ་
[240a.6]བསྐྱེད་པའི་རྒྱུར་གྱུར་པ་སེམས་དཔར་བྱིན་གྱིས་བརླབས་པའི་སྦྱོར་བ་བཤད་ནས། ད་ནི་དེ་བཞིན་གཤེགས་པ་བསྒོམས་པས་ཀྱང་དེ་བཞིན་གཤེགས་པའི་གཟུགས་སུ་ཡོངས་སུ་བརྟགས་ཤིང་བསྒྲུབས་པས་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་བསྒོམ་པར་བྱའོ་ཞེས་བྱ་བའི་
[240a.7]དོན་བསྟན་པའི་ཕྱིར། དེ་ཉིད་ཅེས་བྱ་བ་ལ་སོགས་པ་གསུངས་ཏེ། བཅོམ་ལྡན་སེམས་དཔའ་དེ་ཉིད་ནི། །ཞེས་བྱ་བ་ནི་ཐོག་མ་དང་ཐ་མ་མེད་པའི་སེམས་དཔའོ། །བདུད་བཞི་བཅོམ་པས་ན་བཅོམ་ལྡན་འདས་སོ། །འདི་ལྟར་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་
[240b]
[240b.1]མཚན་ཉིད་དེ་ནི་བཅོམ་ལྡན་འདས་རྡོ་རྗེ་འཆང་ཆེན་པོས་ཐམས་ཅད་དུས་ཐམས་ཅད་ཀྱི་རྣམ་པ་ཐམས་ཅད་དུ་ཉོན་མོངས་པ་དང་ལྷའི་བུ་དང་། ཕུང་པོ་དང་། འཆི་བདག་གི་བདུད་ཐམས་ཅད་འཇོམས་པས་ཐོག་མ་དང་ཐ་མ་མེད་པའི་གཟུགས་ཉིད་ཀྱིས་དེ་དང་དེ་དག་གི་སྐབས་མི་དབྱེ་བའི་ཕྱིར་རོ། །
[240b.2]སེམས་དཔའ་ཞེས་བྱ་བ་ནི་རྡོ་རྗེ་སེམས་དཔའ་ཉིད་རྡོ་རྗེ་འཆང་ཆེན་པོའོ། །རྡོ་རྗེ་འདོད་པ་ཞེས་བྱ་བ་ནི་རྡོ་རྗེ་ཡང་ཡིན་ལ་འདོད་པ་ཡང་དེ་ཡིན་པས་ན་རྡོ་རྗེ་འདོད་པ་སྟེ། བྱང་ཆུབ་ཆེན་པོ་ཞེས་བྱ་བའི་དོན་ཏོ། །འདོད་པ་དེ་དག་གང་ཡིན་ཞེ་ན། དེ་བཞིན་གཤེགས་ཞེས་བྱ་བ་སྨོས་ཏེ།
[240b.3]དོན་ཅི་ལྟ་བ་བཞིན་དུ་རྣམ་པར་གནས་པའི་དངོས་པོ་དང་དངོས་པོ་མེད་པའི་ངོ་བོ་ཉིད་ཇི་ལྟ་བ་བཞིན་དུ་རྟོགས་པའི་སངས་རྒྱས་ནི་དེ་བཞིན་གཤེགས་པའོ། །གཤེགས་པའི་དོན་ནི་མཁྱེན་པའི་དོན་ཏོ། །དེ་ཇི་ལྟར་དེ་བཞིན་གཤེགས་པ་ཡིན་ཞེ་ན། རང་སེམས་སོ་སོར་རྟོགས་ལ་སོགས། །
[240b.4]སངས་རྒྱས་བྱང་ཆུབ་ཆོ་ག་བཞིན། །ཞེས་བྱ་བ་ནི་རང་གི་སེམས་ཀྱི་བདག་ཉིད་ནི་རང་གི་སེམས་ཏེ། རང་གི་རྣམ་པར་ཤེས་པ་དེ་སོ་སོར་རྟོགས་པས་སྒྱུ་མ་ལྟ་བུ་ཉིད་དུ་མངོན་སུམ་དུ་མཛད་པའོ། །དེ་ཉིད་དང་པོར་བྱས་པ་གང་ཡིན་པ་དེ་ནི་སངས་རྒྱས་བྱང་ཆུབ་སྟེ། རང་སེམས་
[240b.5]སོ་སོར་རྟོགས་པའི་བྱང་ཆུབ་བོ། །རང་གི་སོ་སོར་རྟོགས་པ་ལ་སོགས་པའི་བྱང་ཆུབ་དེ་ཇི་ལྟ་བ་ཡིན་ཞེ་ན། སངས་རྒྱས་བྱང་ཆུབ་ཆོ་ག་བཞིན། །ཞེས་བྱ་བ་སྨོས་ཏེ། ཨོཾ་ཙིཏྟ་པྲ་ཏི་བེ་དྷཾ་ཀཱ་རོ་མི། ཨོཾ་བོ་དྷི་ཙིཏྟ་ཨུཏྤཱ་ད་ཡ་མི། ཨོཾ་ཏིཥྛ་བཛྲ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་ཡ་ཐ་སརྦྦ་ཏ་ཐཱ་ག་ཏ་ཏ་སྠ་ཨ་ཧཾ། ཞེས་བྱ་
[240b.6]བའི་སྙིང་པོ་ལྔ་བརྗོད་ཅིང་། དོན་རྣམ་པ་ལྔ་བསྒོམས་པས་སངས་རྒྱས་ཀྱི་རྣམ་པར་རྟོག་པ་ནི་ཆོ་ག་ཇི་བཞིན་ཞེས་བྱ་བ་ནི་སྒྲའི་དོན་བརྗོད་པ་ཡིན་ནོ། །གང་གི་ཕྱིར་དེ་ལྟར་སངས་རྒྱས་ཀྱིས་རྣམ་པ་ལྔ་བསྒོམས་པའི་འབྲས་བུའི་ངོ་བོ་ནི་དེ་ཉིད་བཅོམ་ལྡན་འདས་དེ་བཞིན་གཤེགས་པ་
[240b.7]ཞེས་བྱ་བ་ཡིན་ནོ། །མངོན་པར་བྱང་ཆུབ་པ་ལྔའི་རིམ་པ་འདི་ཉིད་ཀྱིས་རྡོ་རྗེ་ཆེན་པོ་སེམས་དཔར་བྱིན་གྱིས་བརླབས་པའི་སྦྱོར་བས། རྡོ་རྗེ་སེམས་དཔའ་ལ་སོགས་པ་དེ་བཞིན་དུ་སྤྱོད་པར་མི་བྱའོ་ཞེས་བཤད་པར་བྱའོ། །དེ་ཉིད་བཅོམ་ལྡན་དེ་བཞིན་གཤེགས། །ཐམས་
[241a]
[241a.1]ཅད་ཀྱི་ནི་རིགས་སུ་འགྱུར། །ཞེས་བྱ་བ་ནི་མངོན་པར་བྱང་ཆུབ་པ་རྣམ་པ་ལྔ་བསྒོམས་པའི་འབྲས་བུའི་དེ་བཞིན་གཤེགས་པ་ཐམས་ཅད་དོ། །བཤད་མ་ཐག་པ་དེ་དག་དང་འབྲེལ་པའི་དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། ནོར་བུའི་རིགས་ཀྱི་ངོ་བོར་བསྐྱེད་
[241a.2]པའི་ཕྱིར་རིགས་སུ་གྱུར་པའོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་དེ་བཞིན་གཤེགས་པ་རྣམས་ཀྱི་རིགས་སོ་ཞེས་ཤེས་པར་བྱའོ། །གང་གི་ཕྱིར་དེ་ལྟར་རིགས་ཐམས་ཅད་ཀྱི་གཟུགས་སུ་བསྐྱེད་པ་འདི་ནི་རྡོ་རྗེ་འཆང་ཆེན་པོ་ཡིན་པ་དེའི་ཕྱིར། དེ་བཞིན་གཤེགས་པའི་
[241a.3]རིགས་དེ་ཉིད་རྒྱུད་གཞན་ཡིན་ནོ། །དེ་ལྟར་རྡོ་རྗེ་དང་། པདྨ་དང་། ནོར་བུའི་རིགས་དེ་ཉིད་ཀྱིས་བསྡུས་པ་ཡིན་ནོ། །དེ་ལྟར་གང་གིས་གསུངས་ཤེ་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་འཁོར་ལོས་གསུངས་སོ། །དེ་བཞིན་གཤེགས་པ་ཐམས་ཅད་ཀྱང་ཡིན་
[241a.4]ལ་འཁོར་ལོས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་འཁོར་ལོ་སྟེ། རྡོ་རྗེ་འཆང་ཆེན་པོའི་འཁོར་ལོ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་འཁོར་གྱི་དཀྱིལ་འཁོར་རོ། །རྡོ་རྗེ་འཆང་ཆེན་པོ་དེའི་ངོ་བོ་ཡིན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་
[241a.5]ཞེས་བརྗོད་དོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རྒྱུ་དང་འབྲས་བུའི་དོན་དམ་པའི་དེ་ཁོ་ན་ཉིད་ཇི་སྐད་གསུངས་པ་དེ་དག་རབ་ཏུ་གསལ་བར་བཤད་དོ། །དེ་ཉིད་ནི་གསང་བ་སྟེ། དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བོ། །དེའི་ཆོ་ག་རྒྱས་
[241a.6]པ་ནི་བསྒོམ་པའི་བྱེ་བྲག་སྣ་ཚོགས་པའོ། །འདི་སྐད་སྟོན་པ་ཡིན་ཏེ། རྡོ་རྗེ་ཐལ་མོ་དང་། རྡོ་རྗེ་བསྡམས་པ་ལ་སོགས་པ་ཉིད་ཇི་ལྟ་བ་བཞིན་དུ་བཅིངས་ཏེ། རྡོ་རྗེ་བསྡམས་པ་དྲལ་ལ། དེ་ནས་རྡོ་རྗེ་འབེབས་པ་བསྐྱེད་ལ། དམ་ཚིག་གི་རྡོ་རྗེ་ཁུ་ཚུར་བཅིང་བར་བྱའོ། །དེའི་རྗེས་ལ་
[241a.7]སྡིག་པ་ཐམས་ཅད་དྲལ་ཞིང་དེ་ནས་དེ་བཞིན་གཤེགས་པ་དང་། རྡོ་རྗེའི་རིགས་དག་ནི་རྣལ་འབྱོར་པས་རང་གི་སྙིང་གའི་ཟླ་བ་ལ་རྡོ་རྗེ་བསམ་པར་བྱའོ། །པདྨའི་རིགས་ཀྱི་རྣལ་འབྱོར་པས་པདྨ་དང་ནོར་བུའི་རིགས་ཀྱི་རྣལ་འབྱོར་པས་རྡོ་རྗེ་རིན་པོ་ཆེ་བསམ་པར་བྱའོ། །རང་གི་
[241b]
[241b.1]མཚན་མ་དེ་རྣམས་ཀྱི་དབུས་སུ་རང་གི་བཟླས་པའི་ཡི་གེ་དེ་རྣམས་བཀོད་ལ་བརྗོད་ཅིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨཾ་ཨཿཞེས་བྱ་བས་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་ཁུ་ཚུར་གྱི་མཐར་ཐུག་པའི་
[241b.2]སེམས་དཔའ་ཆེན་པོ་རྣམས་ཀྱིས་དབྱངས་ཡིག་བཅུ་དྲུག་གི་ས་བོན་གྱི་ཡི་གེ་རྣམས་བཟླས་པའི་ཡི་གེ་དང་བཅས་པ་ལས་རང་གི་སེམས་ཟླ་བའི་དཀྱིལ་འཁོར་གྱི་རྣམ་པར་བསམ་པར་བྱའོ། །དེའི་སྟེང་དུ་ཡང་བཟླས་པའི་ཡི་གེ་དང་། ཡི་གེ་ཀ་ལ་སོགས་པ་སྐར་མའི་རྣམ་པ་ལྟ་བུ་
[241b.3]གཅིག་ཏུ་གྱུར་པ་ལས་ཟླ་བའི་དཀྱིལ་འཁོར་ཡོངས་སུ་གང་བ་གཉིས་པ་རྣམ་པར་སྣང་མཛད་ལ་སོགས་པའི་དགེ་བའི་ཆོས་རྣམ་པར་སྣང་མཛད་ལ་སོགས་པ་ནས། རྡོ་རྗེ་འབེེབས་པའི་མཐར་ཐུག་པའི་དགེ་བའི་སྨན་འཕེལ་བར་བྱེད་པ་དེ་དག་སྒྲུབ་པའི་རྒྱུར་གྱུར་པར་བསམ་པར་བྱའོ། །ཡང་
[241b.4]ན་ཡི་གེ་མ་ནི་རྣམ་པར་སྣང་མཛད་བསྐྱེད་པའི་རྒྱུར་གྱུར་པའི་ས་བོན་ནོ། །ང་ཉ་ཎ་ན་ནི་མི་བསྐྱོད་པ་ལ་སོགས་པའོ། །ཡ་ར་ལ་ཝ་ནི་རྡོ་རྗེ་སེམས་མ་ལ་སོགས་པ་རྣམས་ཀྱིའོ། །ཤ་ཥ་ས་ཧ་ནི་སྒེག་མོ་ལ་སོགས་པ་རྣམས་ཀྱིའོ། །ཡང་ཡ་ར་ལ་ཝ་ནི་བདུག་པ་མ་ལ་སོགས་པ་
[241b.5]རྣམས་ཀྱིའོ། །ཙ་ཚ་ཛ་ཛྷ་ནི་རྡོ་རྗེ་ལྕགས་ཀྱུ་མ་ལ་སོགས་པ་རྣམས་ཀྱིའོ། །ཀ་ཁ་ག་གྷ་ནི་སྒྱུ་མ་རྡོ་རྗེ་ལ་སོགས་པ་ནས་དབང་པོའི་མཐར་ཐུག་པ་རྣམས་ཀྱིའོ། །ཌ་ཋ་ཌ་ཌྷ་ནི་ཁྲོ་བོ་རྣམས་ཀྱིའོ། །ཏ་ཐ་ད་དྷ་ནི་ཚོགས་ཀྱི་བདག་པོ་རྣམས་ཀྱིའོ། །པ་ཕ་བ་བྷ་ནི་ཕོ་ཉ་རྣམས་ཀྱིའོ། །
[241b.6]ལ་མ་ཀྵ་ཨ་རྣམས་ནི་བྲན་རྣམས་ཀྱི་སྟེ། ཀླུ་མཐར་ཐུག་པའི་བསྐྱེད་པའི་རྒྱུར་གྱུར་པའི་ས་བོན་ནོ། །དེ་ཉིད་ཀྱི་ཕྱིར་ཟླ་བའི་དཀྱིལ་འཁོར་གཉིས་པ་འདི་ནི་འཇིག་རྟེན་པ་དང་འཇིག་རྟེན་ལས་འདས་པའི་ལྷ་ཐམས་ཅད་བསྐྱེད་པའི་རྒྱུར་གྱུར་བའི་ཕྱིར་དགེ་བའི་ཆོས་ཡོངས་
[241b.7]སུ་རྫོགས་པ་ཡིན་ནོ་ཞེས་བཅོམ་ལྡན་འདས་ཀྱིས་གསུངས་སོ། །ཡང་ཟླ་བའི་དཀྱིལ་འཁོར་གཉིས་པ་དེ་ཉིད་བཟླས་པའི་ཡི་གེ་དང་བཅས་པ་ལས་རྡོ་རྗེ་རྩེ་ལྔ་པ་བསམ་པར་བྱའོ། །རྡོ་རྗེ་དེ་ཉིད་རྡོ་རྗེ་རྒྱལ་པོ་ལ་སོགས་པའི་མཚན་མའི་གཟུགས་སུ་གྱུར་པར་བྱའོ། །
[242a]
[242a.1]རྡོ་རྗེ་སེམས་དཔའི་རྣལ་འབྱོར་པས་རྡོ་རྗེ་ཉིད་ཇི་ལྟར་བསམ་ཞིང་བསྒོམས་པ་དེ་བཞིན་དུ་ཁྲོ་བོ་རྡོ་རྗེ་ཧཱུཾ་མཛད་ཀྱི་རྣལ་འབྱོར་པས་རྡོ་རྗེ་ཉིད་བསྒོམ་པར་བྱའོ། །དེ་ནས་རང་གི་མཚན་མ་དེའི་དབུས་སུ་བཟླས་པའི་ཡི་གེ་རྣམ་པར་བཀོད་པ་འདི་ཉིད་བརྗོད་ཅིང་། རང་
[242a.2]གི་མཚན་མའི་ཕྱག་རྒྱ་བསྒོམ་པར་བྱའོ། །རང་གི་མཚན་མ་ལས་བྱུང་བའི་རང་གི་རིགས་སྤྲུལ་ལ། ཕྱོགས་བཅུའི་སེམས་ཅན་གྱི་ཁམས་ཐམས་ཅད་ཀྱི་དེའི་རང་བཞིན་དུ་བསྐྱེད་ལ། དེ་ནས་དེ་རང་གི་མཚན་མ་ལ་གཞུག་པར་བྱའོ། །རང་གི་མཚན་མ་དེ་ལ་
[242a.3]རང་གི་རིགས་ཀྱི་ལྷའི་རྡུལ་ཕྲ་རབ་བསགས་པ་ལས་བདག་ཉིད་བསྐྱེད་དེ། སེམས་དཔར་བྱིན་གྱིས་བརླབས་པའི་སྦྱོར་བས། བཛྲ་སཏྭ་ཨ་ཧཾ་ཞེས་བརྗོད་ཅིང་། རང་གི་མཚན་མ་རྡོ་རྗེ་སེམས་དཔར་བདག་ཉིད་བསྐྱེད་ལ་བསྙེམས་པ་དང་བཅས་པས་རྡོ་རྗེ་གསོར་ཞིང་ཡང་འདི་
[242a.4]སྐད་ཅེས་བརྗོད་པར་བྱའོ། །བཛྲ་སཏྭ་ཨ་ཧཾ། དེ་བཞིན་བཛྲ་རཱ་ཛ་ཨ་ཧཾ་ཞེས་བྱ་བ་ལ་སོགས་པ་རང་གི་སྙིང་པོ་བརྗོད་ཅིང་། རྡོ་རྗེ་སེམས་དཔའ་འམ། རྡོ་རྗེ་རྒྱལ་པོ་ལ་སོགས་པའི་གཟུགས་སུ་བདག་ཉིད་བསྒོམ་པར་བྱའོ། །རྡོ་རྗེ་སེམས་དཔའི་རྣལ་འབྱོར་པས་རྡོ་རྗེ་
[242a.5]གསོར་བ་ལ་མཐར་ཐུག་པ་ཉིད་ཀྱི་རྡོ་རྗེ་ལས་བྱུང་བའི་རྡོ་རྗེ་སེམས་དཔའ་བདག་ཉིད་བསྒོམ་པར་བྱའོ། །དེ་ལྟར་བདག་ཉིད་ང་རྒྱལ་བསྐྱེད་དེ། མ་ཧཱ་ས་མ་ཡ་སཏྭ་ཨ་ཧཾ་ཞེས་བྱ་བ་སྤྱིའི་སྙིང་པོ་བརྗོད་ཅིང་། རིགས་ཐམས་ཅད་ཀྱི་རྣལ་འབྱོར་པས་དམ་ཚིག་ཆེན་པོའི་སེམས་
[242a.6]དཔའི་ང་རྒྱལ་བསྐྱེད་པར་བྱའོ། །དེ་ནས་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ་ས་མ་ཡོ྅ཧཾ་ཞེས་བརྗོད་ཅིང་། དམ་ཚིག་གི་སེམས་དཔའི་ང་རྒྱལ་བསྐྱེད་ལ། དེ་ཉིད་རང་གི་ལྷའི་དམ་ཚིག་གི་ཕྱག་རྒྱས་སྙིང་ག་དང་། མཛོད་སྦུ་དང་། ལྐོག་མ་དང་། སྤྱི་བོར་ས་མ་
[242a.7]ཡ་སཏྭ་ཨ་དྷི་ཏིཥྛ་སྭ་མཾ་ཞེས་བརྗོད་ཅིང་བྱིན་གྱིས་བརླབ་པར་བྱའོ། །རང་གི་རིགས་ཀྱི་དམ་ཚིག་གི་ཕྱག་རྒྱས་སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་ཟླ་བའི་དཀྱིལ་འཁོར་ལ་གནས་པའི་མཚན་མ་བཞི་བསྐྱེད་པས་བསམ་པར་བྱའོ། །དེ་ནས་རང་གི་ལྷའི་ཕྱག་རྒྱ་ཆེན་པོ་
[242b]
[242b.1]བཅིང་བར་བྱའོ། །དེ་བཞིན་གཤེགས་པ་ལ་སོགས་པའི་རིགས་ཐམས་ཅད་པའི་རྣལ་འབྱོར་རྣམས་ཀྱི་རང་གི་སེམས་ཡོངས་སུ་སྦྱོང་བའི་ཡེ་ཤེས་ནི་འདི་ཡིན་ནོ་ཞེས་བཅོམ་ལྡན་འདས་ཀྱིས་གསུངས་པས་ཐེ་ཚོམ་མི་བྱའོ། །དེ་བཞིན་གཤེགས་པའི་རྣལ་འབྱོར་པས་སྔ་མ་བཞིན་དུ་
[242b.2]སྡིག་པ་དྲལ་ཞིང་མཐར་ཐུག་པའི་ཆོ་ག་རྗེས་སུ་སྤྱད་ལ། རྡོ་རྗེ་སྐྱིལ་མོ་ཀྲུང་བཅས་ཏེ། ལག་པ་གཉིས་རྡོ་རྗེ་བསྡམས་པ་བཅིངས་ལ་པང་བར་བཀན་ཏེ། རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་བསམས་ཏེ། རྡོ་རྗེ་དབུས་སུ། ཨོཾ་ཙིཏྟ་པྲ་ཏི་བེ་དྟཾ་ཀཱ་རོ་མི་ཞེས་བྱ་བ་ཡིད་ཀྱིས་བྲིས་
[242b.3]ཏེ། མངོན་པར་བྱང་ཆུབ་པ་ལྔའི་རིམ་པ་ཇི་ལྟ་བ་བཞིན་དུ་བསྒོམ་པར་བྱའོ། །དེ་ནས་རང་གི་དེ་བཞིན་གཤེགས་པའི་དམ་ཚིག་གི་ཕྱག་རྒྱ་བཅིངས་ཏེ། ས་མ་ཡ་ཧཾ་ཞེས་བྱ་བས་དམ་ཚིག་གི་སེམས་དཔའི་ང་རྒྱལ་བསྒོམ་པར་བྱའོ། །དེ་ནས་དེ་བཞིན་གཤེགས་པའི་དམ་
[242b.4]ཚིག་གི་ཕྱག་རྒྱ་དེ་ཉིད་སྙིང་ག་དང་མཛོད་སྤུ་དང་། ལྐོག་མ་དང་། སྤྱི་བོར་ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བརྗོད་ཅིང་བྱིན་གྱིས་བརླབ་པར་བྱའོ། །དེའི་རྗེས་ལ་རང་གི་དེ་བཞིན་གཤེགས་པའི་ཕྱག་རྒྱ་ཆེན་པོ་བཅིང་བར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་
[242b.5]རིགས་ཐམས་ཅད་ཀྱི་ཕྱག་རྒྱ་ཆེན་པོ་སྒྲུབ་པའི་ཕྱིར་དང་དེ་བཞིན་གཤེགས་པ་ལ་སོགས་པ་ཐམས་ཅད་ཀྱི་རྣལ་འབྱོར་པ་ལ་བསྒོམ་པའི་གདམས་ངག་སྦྱིན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དེ་ཁོ་ན་ཉིད་གསལ་བར་བྱེད་པའི་གསང་བའི་དངོས་གྲུབ་ཀྱི་རྒྱུད་བཤད་ནས།
[242b.6]ད་ནི་རྣལ་འབྱོར་པའི་རང་གི་སེམས་ཡོངས་སུ་སྦྱང་བར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་ནས། དེ་བཞིན་གཤེགས་པའི་རིགས་ཐམས་ཅད་ཀྱི་ཕྱག་རྒྱ་མངོན་པར་བརྗོད་པའི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་ཇི་སྐད་དུ་
[242b.7]བཤད་པ་དེ་དག་གོ། །མཚན་མ་ནི་རྡོ་རྗེ་ལ་སོགས་པའི་གཟུགས་སོ། །དེ་མངོན་པར་འདོད་པ་ནི་དོན་དེའི་མིང་མངོན་པར་བརྗོད་པས་ན་མངོན་པར་བརྗོད་པ་ཞེས་བྱ་བའི་དོན་ཏོ། །དེའི་དངོས་གྲུབ་ནི་བསྐྱེད་པའོ། །མཚན་མ་ནི་ཕྱག་རྒྱའི་མིང་གི་དོན་གྱི་ངེས་པ་ནི་རྡོ་རྗེ་
[243a]
[243a.1]དབྱིངས་ཀྱི་དབང་ཕྱུག་མ་ལ་སོགས་པ་གཟུངས་རྣམས་རྟོགས་པ་ཡིན་ནོ་ཞེས་བྱ་བའི་དོན་ཏོ། །བཅོམ་ལྡན་སེམས་དཔའ་དེ་ཉིད་ནི། །ཞེས་བྱ་བ་ནི་རིགས་ཐམས་ཅད་ཀྱི་དེ་ཁོ་ན་ཉིད་བསྐྱེད་པ་གསང་བའི་དངོས་གྲུབ་ཀྱི་ཆོ་ག་རྒྱས་པའི་རྒྱུད་ཉིད་དུ་བཤད་ཟིན་པ་
[243a.2]གང་ཡིན་པའོ། །བཅོམ་ལྡན་འདས་རྡོ་རྗེ་སེམས་དཔའ་དེ་ཉིད་ནི་དེ་བཞིན་གཤེགས་པའི་མཚན་མ་མངོན་པར་བརྗོད་པའི་གསང་བའི་དངོས་གྲུབ་བོ། །ཇི་ལྟར་གྱུར་པ་ཡིན་ཞེ་ན། རྡོ་རྗེ་སེམས་དཔའ་སྟེ་ཟླ་བ་ཞེས་བྱ་བའི་དོན་ཏོ། །གང་དུ་གནས་པ་ཡིན་ཞེ་ན། ཐུགས་ལ་གནས་ཞེས་
[243a.3]བྱ་བ་སྨོས་ཏེ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་ཐུགས་ལ་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་རྩེ་ལྔ་པའི་གཟུགས་ཀྱིས་གནས་པ་ནི་ཐུགས་ལ་གནས་པའོ། །མཉམ་པར་གཞག་པས་ཏིང་འཛིན་ཏེ། །ཞེས་བྱ་བ་ནི་མཉམ་པར་གཞག་པའི་ཏིང་ངེ་འཛིན་
[243a.4]རྩེ་གཅིག་པ་ཡིན་པ་དེའི་ཕྱིར་ཏིང་ངེ་འཛིན་དེའི་རྒྱུ་ནི་མཉམ་པར་གཞག་པར་བྱའོ། །འདི་ལས་ཅི་ཞིག་བྱེད་ཅེ་ན། སངས་རྒྱས་བྱང་ཆུབ་རབ་སྒྲུབ་བྱེད། །ཅེས་བྱ་བ་སྨོས་ཏེ། སངས་རྒྱས་རྣམས་ཀྱི་བྱང་ཆུབ་ནི་སངས་རྒྱས་ཀྱི་བྱང་ཆུབ་སྟེ། དེ་རབ་ཏུ་སྒྲུབ་ཅིང་སྐྱེད་པར་བྱེད་དོ། །
[243a.5]འདི་སྐད་སྟོན་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གནས་པའི་བཅོམ་ལྡན་འདས་རྡོ་རྗེ་འཛིན་པའོ། །ཐབས་དང་ཤེས་རབ་ཀྱི་རང་བཞིན་གྱི་ཟླ་བ་རྡོ་རྗེའི་རང་བཞིན་དུ་རྗེས་སུ་དྲན་པའི་ཏིང་ངེ་འཛིན་གྱིས་སྐྱེད་པར་བྱེད་པ་ནི། རྡོ་རྗེ་དབྱིངས་ཀྱི་
[243a.6]དབང་ཕྱུག་མ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་མཚན་མའི་སྒྲའི་དོན་ཡིན་ཏེ། དེ་ལྟར་དེ་བཞིན་གཤེགས་པའི་སྒྲའི་མཚན་མའི་མངོན་པར་བརྗོད་པ་བསྟན་ནས། དེ་བཞིན་གཤེགས་པའི་རིགས་ཀྱི་རབ་ཏུ་རྟོགས་ཕྱིར་རྡོ་རྗེ་ཞེས་བྱ་བ་ལ་སོགས་པ་གསུངས་ཏེ།
[243a.7]རྡོ་རྗེ་ཞེས་བྱ་བའི་ཐ་ཚིག་གོ། །ཅིའི་ཕྱིར་རྡོ་རྗེ་སེམས་དཔའི་མཚན་མ་ཡིན་ཞེ་ན། རབ་ཏུ་རྟོགས་ཕྱིར་ཞེས་བྱ་བ་སྨོས་ཏེ། ཤིན་ཏུ་རབ་ཏུ་རྟོགས་པས་ན་རབ་ཏུ་རྟོགས་པ་སྟེ། བྱང་ཆུབ་པའི་མཚན་ཉིད་ཅན་གྱི་སེམས་ཁོང་དུ་ཆུད་པས་ན་རབ་ཏུ་རྟོགས་པའོ། །དེའི་ངོ་བོ་ཉིད་རབ་ཏུ་
[243b]
[243b.1]རྟོགས་པ་ཉིད་ཡིན་པ་དེ་བས་ན་རབ་ཏུ་རྟོགས་ཕྱིར་རོ། །ལྕགས་ཀྱུ་ཡིན་ཞེས་བྱ་བ་ནི་རྡོ་རྗེ་རྒྱལ་པོའི་མཚན་མའོ། །ཅིའི་ཕྱིར་ལྕགས་ཀྱུར་བརྗོད་ཅེ་ན། གཟུང་བའི་ཚུལ་གྱིས་ཞེས་བྱ་བ་སྨོས་ཏེ། གཟུང་བའི་ཚུལ་གྱིས་བསྡུ་བའི་དངོས་པོས་སེམས་ཅན་རྣམས་བསྡུ་བའི་དངོས་པོར་སྦྱར་
[243b.2]བ་དང་། དེ་བཞིན་གཤེགས་པ་རྣམས་སྤྱན་འདྲེན་པའི་ཚུལ་གྱིས་སོ། །མདའ་ཡིན་ལ་ཞེས་བྱ་བ་ནི་རྡོ་རྗེ་ཆགས་པའི་མཚན་མའོ། །རྒྱུད་གང་ཡིན་ཞེ་ན། ཕྲ་མོ་རྟོགས་ཕྱིར་ཞེས་བྱ་བ་སྨོས་ཏེ། ཕྲ་བ་ནི་ཆོས་ཀྱི་དབྱིངས་དེ་རྟོགས་པའི་ཕྱིར་ཕྲ་མོ་རྟོགས་པའོ། །དེའི་དངོས་པོ་ཕྲ་
[243b.3]མོ་རྟོགས་པ་དེའི་རྒྱུད་ཆོས་ཀྱི་དབྱིངས་མངོན་སུམ་དུ་བྱེད་དོ་ཞེས་བྱ་བའི་དོན་ཏོ། །ལེགས་ཞེས་བྱ་བ་ནི་རྡོ་རྗེ་ལེགས་པའི་མཚན་མའོ། །ཅིའི་ཕྱིར་ཞེ་ན་མགུ་བར་གྱུར་ཕྱིར་ཞེས་བྱ་བ་སྨོས་ཏེ། ཡོངས་སུ་མགུ་བ་ཞེས་བྱ་བའི་དོན་ཏོ། །ཆོས་ཀྱི་དབྱིངས་མངོན་སུམ་དུ་བྱེད་པའི་
[243b.4]རབ་ཏུ་དགའ་བ་གང་ཡིན་པ་དེ་ནི་ཡོངས་སུ་མགུ་པས་ན་ལེགས་པར་བྱེད་པ་ཞེས་བྱའོ། །རིན་ཆེན་གསུངས་ཞེས་བྱ་བ་ནི་རྡོ་རྗེ་རིན་ཆེན་གྱི་མཚན་མའོ། །ཅིའི་ཕྱིར་ཞེ་ན། སྤྲས་པའི་ཕྱིར་ཞེས་བྱ་བ་སྨོས་ཏེ། ནམ་མཁའ་དང་མཉམ་པའི་ཡེ་ཤེས་ཀྱིས་སེམས་ཅན་ཐམས་ཅད་ཀྱི་
[243b.5]བསམ་པ་ཐམས་ཅད་དེ་ཡོངས་སུ་རྫོགས་པའོ། །དེ་སྐད་དུ་ཡང་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བས་རིགས་རྣམས་སྤྲོས་པ་བསྐྱེད་པར་བྱའོ་ཞེས་གསུངས་པ་ཡིན་ནོ། །ཉི་མ་སྟེ་ཞེས་བྱ་བ་ནི་རྡོ་རྗེ་གཟི་བརྗིད་ཀྱི་མཚན་མའོ། །ཅིའི་ཕྱིར་ཞེ་ན། གཟི་བརྗིད་
[243b.6]ཚུལ་གྱིས་ཞེས་བྱ་བ་སྨོས་ཏེ། གཟི་བརྗིད་ནི་གཟི་བརྗིད་ཀྱི་ཚུལ་གྱིས་སོ། །གཟི་བརྗིད་ཀྱི་ཚུལ་གྱིས་གཟི་བརྗིད་རབ་ཏུ་རྟོགས་པ་དེ་དང་དེ་ནི་གཟི་བརྗིད་ཀྱི་ཚུལ་ཅན་ནོ། །འདི་སྐད་སྟོན་པ་ཡིན་ཏེ། ཇི་ལྟར་ཉི་མའི་དཀྱིལ་འཁོར་གྱིས་མུན་པ་ཐམས་ཅད་འོད་ཟེར་གྱི་སྣང་བས་ཟིལ་
[243b.7]གྱིས་གནོན་པར་བྱེད་པ་དེ་བཞིན་དུ་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་ཉི་མས་བག་ཆགས་དང་བཅས་པའི་ཉོན་མོངས་པ་སྤངས་ནས་ཕྱི་དང་ནང་གི་མུན་པ་ཟིལ་གྱིས་མནན་ཏེ། མི་འཇིགས་པ་སྦྱིན་པའི་འོད་ཟེར་གྱིས་རང་དང་གཞན་གྱི་མུན་པ་སེལ་བར་བྱེད་པའོ། །རྒྱལ་
[244a]
[244a.1]མཚན་ཞེས་བྱ་བས་ཅི་ཞིག་སྟོན་པར་འགྱུར་ཞེ་ན། རྒྱལ་མཚན་ལེགས་པར་གསུངས་ཞེས་བྱ་བ་སྨོས་ཏེ། ཉེས་པའི་དྲི་མ་ཐམས་ཅད་སྤངས་པ་ཉིད་དང་། དམིགས་པ་མེད་པའི་བྱམས་པའི་སྦྱིན་པས་ཁམས་གསུམ་པོ་མ་ལུས་པ་ཟིལ་གྱིས་གནོན་པར་བྱེད་
[244a.2]ཅེས་བྱ་བའི་དོན་ཏོ། །འཛུམ་པ་ཞེས་བརྗོད་པས་ཅི་ཞིག་བརྗོད་པ་ཡིན་ཞེ་ན། འཛུམ་པ་བཞད་པར་གྲགས་པ་ཡིན། །ཞེས་བྱ་བ་སྨོས་ཏེ། བཞད་པ་རྣམས་ནི་བཞད་པའོ། །འདི་སྐད་སྟོན་པ་ཡིན་ཏེ། མི་དམིགས་པའི་བྱམས་པའི་ཆོས་སྦྱིན་པའི་མཐུས་དེ་བཞིན་གཤེགས་པའི་སྟོབས་
[244a.3]དང་། མི་འཇིགས་པ་ལ་སོགས་པ་ཆོས་ཀྱི་སྦྱིན་པས་སེམས་ཅན་གྱི་ཁམས་རྣམས་ཚིམ་པར་བྱེད་པའི་མགུ་བ་ཐོབ་པ་ནི་འཛུམ་པ་ཞེས་བྱ་བའི་དོན་ཏོ། །ཅིའི་ཕྱིར་པདྨོ་ཡིན་ཞེས་བྱ་བར་བརྗོད་ཅེ་ན། འདོད་ཆགས་དག་ཕྱིར་ཞེས་བྱ་བ་སྨོས་ཏེ། ཐུགས་རྗེ་ཆེན་པོས་དེའི་འདོད་ཆགས་
[244a.4]དག་པས་ན་འདོད་ཆགས་དག་པའོ། །འདོད་ཆགས་དག་པའི་དངོས་པོ་ནི་འདོད་ཆགས་དག་པའི་ཕྱིར་རོ། །འདོད་ཆགས་དག་པའི་པདྨོ་ཡིས། །ཞེས་བྱ་བ་དེས་དྲི་མ་མེད་པར་ཆོས་མཐུན་པའོ། །རལ་གྲི་ཞེས་བརྗོད་པ་ནི་རྡོ་རྗེ་རྣོན་པོའི་མཚན་མའོ། །ཅིའི་ཕྱིར་ཞེ་ན། ཉོན་མོངས་
[244a.5]དགྲ་གཅོད་ཕྱིར་ཞེས་བྱ་བ་སྨོས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་རལ་གྲིས་ཆོས་ཐམས་ཅད་མ་སྐྱེས་པའོ་ཞེས་བསྒོམས་པའི་སྟོབས་ཀྱིས་རྟོགས་པས་ཉོན་མོངས་པ་ཉིད་ཀྱི་དགྲ་དེ་དག་གཅོད་པས་ན་དེ་དག་དགྲ་གཅོད་ཕྱིར་རོ། །འཁོར་ལོ་སྟེ་ཞེས་བྱ་བ་ནི་རྡོ་རྗེ་རྒྱུའི་མཚན་མའོ། །
[244a.6]ཅིའི་ཕྱིར་ཞེ་ན། དཀྱིལ་འཁོར་གྱི་ཚུལ་གྱིས་ཞེས་བྱ་བ་སྨོས་ཏེ། དཀྱིལ་འཁོར་གྱི་ཚུལ་ནི་དཀྱིལ་འཁོར་གྱི་སྦྱོར་བ་ཡིན་པ་དེའི་ཕྱིར་དཀྱིལ་འཁོར་གྱི་སྦྱོར་བའི་རྒྱུ་ནི་འཁོར་ལོའི་མཚན་མ་ཡིན་ནོ་ཞེས་བྱ་བའི་དོན་ཏོ། །གང་གི་ཚེ་རྡོ་རྗེ་དབྱིངས་ཀྱི་དཀྱིལ་འཁོར་དང་འབྲེལ་པ་དེའི་ཚེ་
[244a.7]དེ་དང་དེ་ལ་བརྟེན་པའི་འཁོར་ལོའི་ཚུལ་ནི་འཁོར་ལོའོ། །སྨྲ་ཞེས་བྱ་བ་ནི་རྡོ་རྗེ་གསུངས་པའི་མཚན་མའི་ཕྱག་རྒྱའོ། །ཅིའི་ཕྱིར་ཞེ་ན། ཚིག་གི་བརྗོད་པས་ཞེས་བྱ་བ་སྨོས་ཏེ། སྒྲ་འདོན་ཅིང་ངག་གི་ལམ་དེ་ལས་ཆོས་བརྗོད་པ་དག་གི་ཆོས་བརྗོད་པའི་ཐ་ཚིག་གོ། །ཀུན་རྡོ་རྗེ་ནི་རྩེ་
[244b]
[244b.1]མོ་བཅུ་གཉིས་པའི་རྡོ་རྗེ་སྟེ། རྡོ་རྗེ་ལས་ཀྱི་མཚན་མའོ། །ཅིའི་ཕྱིར་རྡོ་རྗེ་ཀུན་ཞེས་བརྗོད་ཅེ་ན། སྣ་ཚོགས་ཕྱིར་ཞེས་བྱ་བ་སྨོས་ཏེ། སངས་རྒྱས་ཀྱི་སྤྲུལ་པ་དང་། སེམས་ཅན་གྱི་དོན་བྱེད་པའི་ཕྱིར་ཐམས་ཅད་དུ་སོང་བ་ཡིན་ནོ་ཞེས་བྱ་བའི་དོན་ཏོ། །གོ་ཆ་ཞེས་བྱ་བ་ནི་རྡོ་རྗེ་གོ་ཆ་མའི་མཚན་མ་ལ་
[244b.2]བྱ་སྟེ། ཅིའི་ཕྱིར་ཞེ་ན། མི་ཚུགས་ཚུལ་གྱིས་ཞེས་བྱ་བ་སྨོས་ཏེ། སྡུག་བསྔལ་གྱིས་དུབ་པར་མི་ནུས་པས་ན་མི་ཚུགས་པའོ། །དེའི་སྦྱོར་བ་ནི་མི་ཚུགས་པའི་སྦྱིན་པ་སྟེ། དེའི་ཕྱིར་མི་ཚུགས་པའི་ཚུལ་ནི་ཡོངས་སུ་སྦྱོང་བའི་བརྩོན་འགྲུས་ཀྱི་ངོ་བས་བླ་ན་མེད་པ་ཡང་དག་པར་རྫོགས་
[244b.3]པའི་བྱང་ཆུབ་ལས་ཕྱིར་མི་ལྡོག་པའི་དོན་ཏོ། །མཆེ་བ་ནི་རྡོ་རྗེ་གནོད་སྦྱིན་གྱི་མཚན་མ་སྟེ། ཅིའི་ཕྱིར་ཞེ་ན། འཇིགས་བྱེད་ཚུལ་གྱིས་ཞེས་བྱ་བ་སྨོས་ཏེ། འཇིགས་པར་བྱེད་པ་འཇིགས་པ་བསྐྱེད་པའི་ཚུལ་ནི་སོ་སོར་རྟོག་པའི་བརྩོན་འགྲུས་ཀྱི་ཆོས་ཐམས་ཅད་རང་བཞིན་གྱིས་འོད་གསལ་བ་
[244b.4]ཡོངས་སུ་ཤེས་པས་སྣང་བ་མེད་པར་དམིགས་པ་ནི་འཇིགས་པའོ། །དེ་ལས་སྐྱེས་པའི་ཁྲོ་བོ་ཐམས་ཅད་ཀྱི་ངོ་བོ་བདུད་ལ་སོགས་པ་གདུག་པ་རྣམས་ལ་འཇིགས་པ་བསྐྱེད་པའོ། །བསྡམས་པ་ནི་རྡོ་རྗེ་ཁུ་ཚུར་གྱི་མཚན་མའོ། །ཅིའི་ཕྱིར་ཞེ་ན། ཕྱག་རྒྱའི་ཚུལ་གྱིས་ཞེས་བྱ་བ་སྨོས་ཏེ། ཕྱག་རྒྱ་རྣམས་
[244b.5]འདྲེན་པའི་ཕྱག་རྒྱ་སྦྱོར་ཚུལ་ལོ། །དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་ཕྱག་རྒྱ་སྒྲུབ་པ་ནན་ཏན་དུ་བྱེད་པའི་བརྩོན་འགྲུས་ཀྱི་ཆོས་ཐམས་ཅད་རང་བཞིན་གྱིས་འོད་གསལ་བར་བྱེད་པའི་ཕྱག་རྒྱའི་སྦྱོར་བ་དེས་འཆིང་བ་བརྗོད་པ་ནི་དེའི་མཚན་མའོ། །དེ་ལྟར་མཚན་མའི་ཕྱག་རྒྱའི་སྒྲས་མངོན་
[244b.6]པར་བརྗོད་པའི་དོན་ངེས་པར་བྱེད་པའི་རྣལ་འབྱོར་པ་རྣམས་ཀྱིས་ཕྱག་རྒྱ་ཆེན་པོ་ལ་སོགས་པ་འགྲུབ་པར་འགྱུར་རོ། །ཇི་ལྟར་བཅོམ་ལྡན་འདས་རྟག་པ། །ཞེས་བྱ་བ་ནི་མི་འགྱུར་བའོ། །དེ་གང་ཡིན་ཞེ་ན། རྡོ་རྗེ་སེམས་དཔའ་ཀུན་འགྲོ་བ། །ཞེས་བྱ་བ་སྨོས་ཏེ། རྡོ་རྗེ་རྒྱལ་པོ་ལ་སོགས་པའི་
[244b.7]གདུལ་བྱ་རྣམས་ལ་སྔ་མའི་བསྒོམ་པའི་ཚུལ་གྱིས་ཐམས་ཅད་དུ་འགྲོ་བས་ན་ཀུན་འགྲོ་བའོ། །ཇི་ལྟར་རྡོ་རྗེ་རྒྱལ་པོ་ལ་སོགས་པའི་རྒྱུས་འདི་ཐམས་ཅད་དུ་འགྲོ་བ་དེ་བཞིན་དུ། རྡོ་རྗེ་མཚན་མ་ལ་སོགས་ཞེས་བྱའོ། །ལྕགས་ཀྱུ་ལ་སོགས་པའི་མཚན་མ་ལས་དང་པོར་བྱས་པའི་མཚན་མ་ལ་
[245a]
[245a.1]སོགས་པའོ། །དེའི་བསྒོམ་པ་ནི་བདག་གི་རྣལ་འབྱོར་གྱི་དུས་སུ་དེ་ལྟར་ངེས་པ་བསྐྱེད་པས་རྣལ་འབྱོར་པ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་རྡོ་རྗེ་རྒྱལ་པོ་ལ་སོགས་པའི་སྙིང་པོ་བརྗོད་ཅིང་ཆོས་ཐམས་ཅད་བདག་མེད་པར་བསྒོམས་
[245a.2]ཏེ། ཟླ་བའི་དཀྱིལ་འཁོར་གྱི་སྟེང་དུ་སྙིང་པོ་དེ་ཉིད་ཀྱིས་རྡོ་རྗེ་རྩེ་ལྔ་པ་ཇི་ལྟ་བ་བཞིན་དུ་རྣམ་པར་བསམས་ཏེ། དེ་ཉིད་ལས་རྡོ་རྗེ་ལྕགས་ཀྱུ་ལ་སོགས་པའི་གཟུགས་སུ་རྣམ་པར་བསྒོམ་པའོ། །དེ་ལྟར་ན་རྡོ་རྗེ་དང་པོར་བྱས་པའི་མཚན་མ་ཐམས་ཅད་ནི་ཀུན་དུ་འགྲོ་བ་ཞེས་བྱ་བ་ཡིན་ནོ། །སེམས་
[245a.3]དཔའ་བྱིན་གྱིས་བརླབས་པའི་སྦྱོར་བ་དེས་རྡོ་རྗེ་སེམས་དཔའི་གཟུགས་སུ་བསྒོམས་ལ་རྡོ་རྗེ་སེམས་དཔའི་གཟུགས་དེ་ལས་རང་གི་ལྷའི་ཕྱག་རྒྱ་ཆེན་པོའི་གཟུགས་སུ་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་མཚན་མ་མངོན་པར་བརྗོད་པའི་
[245a.4]གསང་བའི་དངོས་གྲུབ་ཀྱི་རྒྱུད་བསྟན་ནས། ད་ནི་རང་གི་སེམས་ཡོངས་སུ་སྦྱོང་བའི་དོན་ནི། དེ་ནས་ཞེས་བྱ་བ་ལ་སོགས་པ་སྟེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་བསྐྱེད་པའི་གསང་བའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་
[245a.5]ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། དེ་དག་གི་ཕྱག་རྒྱ་ཆེན་པོ་ལ་སོགས་པ་ཐམས་ཅད་བཅིང་བའོ། །དེ་སྐྱེ་བ་ནི་གཟུགས་བརྙན་གྱི་སྦྱོར་བ་ལ་སོགས་པས་སྒྲུབ་པ་པོའི་རྒྱུད་ལ་དེ་བཞིན་གཤེགས་པ་ལ་སོགས་པའི་རྣམ་པར་
[245a.6]བསྐྱེད་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་རྫོགས་པའོ། །དེ་ཉིད་ཀྱི་གསང་བ་དེ་སྟོན་པར་བྱེད་པའི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །རྡོ་རྗེ་སྐྱིལ་མོ་ཀྲུང་བཅས་ལ། །ཞེས་བྱ་བ་ནི་བཅས་པ་ནི་བཅིངས་པའོ། །ལག་གཉིས་
[245a.7]རྡོ་རྗེ་བསྡམས་པ་ལས། །ཞེས་བྱ་བ་ནི་རྡོ་རྗེ་བསྡམས་པ་བཅིངས་ལ་པང་བར་དེ་གཞག་པའི་རྣམ་པ་དེ་ལྟ་བུས་རྡོ་རྗེ་བསྡམས་པ་དང་། རྡོ་རྗེ་སྐྱིལ་མོ་ཀྲུང་བཅིངས་པ་དང་བཅས་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་རང་གི་སྙིང་གར་སེམས་དཔའི་
[245b]
[245b.1]རྡོ་རྗེར་བསྒོམས་པ་ནི་རྡོ་རྗེ་སེམས་དཔའི་ཏིང་ངེ་འཛིན་ཏོ། །དེ་ལ་རབ་ཏུ་གནས་པ་ནི་རྡོ་རྗེ་སེམས་དཔའི་ཏིང་ངེ་འཛིན་ལ་གནས་པའོ། །མྱུར་དུ་སངས་རྒྱས་ཉིད་དུ་འགྲུབ། །ཅེས་བྱ་བ་ནི་སེམས་དཔའི་ཏིང་ངེ་འཛིན་དེས་ཕྱག་རྒྱ་ཐམས་ཅད་བཅིངས་ཤིང་བསྐྱེད་པས་མྱུར་ཞིང་རིངས་པར་
[245b.2]སངས་རྒྱས་ཉིད་ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ནོ། སྔ་མ་བཞིན་དུ་སྡིག་པ་དྲལ་བའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། དེ་བཞིན་གཤེགས་པའི་རྣལ་འབྱོར་པ་རྡོ་རྗེ་སྐྱིལ་ཀྲུང་བཅས་ཏེ། དེའི་སྟེང་དུ་རྡོ་རྗེ་བསྡམས་པ་བཀན་ཏེ་བཞག་ལ་རང་
[245b.3]གི་སྙིང་གར་སེམས་དཔའི་རྡོ་རྗེ་ཇི་ལྟ་བ་བཞིན་དུ་རྣམ་པར་བསམས་ཏེ། རྡོ་རྗེའི་དབུས་སུ། ཨོཾ་ཙིཏྟ་པྲ་ཏེ་བེ་དྷཾ་ཀཱ་རོ་མི་ཞེས་བྱ་བ་མངོན་པར་བརྗོད་ཅིང་། མངོན་པར་བྱང་ཆུབ་ལྔ་ཇི་ལྟ་བ་བཞིན་བསྒོམ་པར་བྱའོ། །དེ་ལྟར་དེ་བཞིན་གཤེགས་པའི་ཕྱག་རྒྱ་བཅིངས་པ་བསྐྱེད་པ་
[245b.4]བསྟན་ནས། ད་ནི་དེ་བཞིན་གཤེགས་པའི་རིགས་ནི་དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་རྒྱལ་པོ་ཞེས་བྱ་བ་ལ་སོགས་པ་སྨོས་ཏེ། དཔེར་ན་འཁོར་ལོས་སྒྱུར་བའི་རྒྱལ་པོ་གསེར་གྱི་བྱང་བུ་ལ་སོགས་པ་ལ་བྲིས་པའི་རང་གི་ཕྱག་རྒྱའི་ཁྲིམས་ལ་དེ་
[245b.5]དག་གིས་རྒྱས་འདེབས་པ་དེ་བཞིན་དུ་རྡོ་རྗེ་སེམས་དཔའ་ལ་སོགས་པའི་འཁོར་ལོས་སྒྱུར་བའི་ཕྱག་རྒྱ་ཆེན་པོ་ལ་སོགས་པའི་གཟུངས་ཀྱི་སྒྲུབ་པ་པོའི་སྐྱེ་བོ་ལ་རྒྱས་འདེབས་པར་བྱེད་པའོ། །ཇི་ལྟར་རྒྱས་འདེབས་པར་བྱེད་ཅེ་ན། སྐུ་གསུང་ཐུགས་ཀྱི་རྡོ་རྗེ་ཡིས། །
[245b.6]གཟུགས་བརྙན་གྱི་ནི་ཚུལ་དུ་ཡང་། །ཞེས་བྱ་བ་སྨོས་ཏེ། རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་གཟུགས་བརྙན་གྱི་རྣམ་པར་བསྒོམ་པའི་སྦྱོར་བ་དེས་གཟུགས་བརྙན་གྱི་རྣམ་པར་ཚུལ་དུ་བྱེད་པའོ། །ཇི་ལྟར་ལུས་དང་ངག་དང་ཡིད་རྡོ་རྗེའི་གཟུགས་བརྙན་གྱི་
[245b.7]ཚུལ་དུ་བྱེད་ཅེ་ན། བདག་ཉིད་ཆེ་ཞེས་བྱ་བ་སྨོས་ཏེ། རྡོ་རྗེ་སེམས་དཔའ་ལ་སོགས་པར། ཕྱག་རྒྱ་ཆེར་ཞེས་བྱ་བ་དེ་ལྟ་བུའི་དོན་ནི་ཆེན་པོ་ཡང་ཡིན་ལ་ཕྱག་རྒྱ་ཆེར་རོ། །ཐོག་མ་དང་ཐ་མ་མེད་པ་ཀུན་དུ་འགྲོ་བའི་ཆོས་ཀྱི་དབྱིངས་སུ་གྱུར་པ་ཉིད་ཀྱིས་ཕྱག་རྒྱ་ཆེན་པོ་ལ་སོགས་པ་ནི་ཐམས་ཅད་
[246a]
[246a.1]དུ་སོང་བའོ། །དེ་ལྟར་ན། རྣམ་པར་རིག་ཅིང་བསྐྱེད་པས་ན། །གང་ཤེས་ནས་དངོས་གྲུབ་ཐོབ་པར་འགྱུར་ཞེས་བྱ་བའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པའི་སྐུ་དང་། གསུང་དང་། ཐུགས་རྡོ་རྗེ་ལྷག་པར་མོས་པས་རྣལ་འབྱོར་པས་
[246a.2]གཞན་གང་ཡང་རུང་བའི་ལུས་དང་། ངག་དང་། ཡིད་ལ་རྡོ་རྗེའི་ཕྱག་རྒྱ་བཅིངས་ཏེ། ངེས་པ་བསྐྱེད་ནས་གང་གི་ཚེ་ཕྱག་རྒྱ་བཅིང་བར་བྱེད་པ་རང་ངམ་གཞན་ལ་རྒྱས་བཏབ་པར་འགྱུར་རོ། །ཇི་ལྟར་དམ་ཚིག་དམ་པ་ཡི། །ཞེས་བྱ་བ་ལ་སོགས་པ་ལ་སྐྱེས་བུ་གང་ཞིག་ལ། དམ་ཚིག་ནི་
[246a.3]མནའི་དངོས་གྲུབ་འདི་ལས་ཁྱེད་འདའ་བར་མ་བྱེད་ཅིག །འདས་ན་མྱུར་དུ་འཆི་བའི་དུས་བྱེད་པར་འགྱུར་རོ་ཞེས་བྱ་བས་བཅིང་བར་བྱའོ། །ཇི་ལྟར་མནའི་རྗེས་སུ་འབྲང་བར་བྱས་པ་ལས་འདས་པའི་འཇིག་རྟེན་པ་དེས་དེ་རང་རྒྱུན་དུ་སྤྱད་པར་བྱའོ། །དེ་ལྟར་དེ་བཞིན་གཤེགས་
[246a.4]ཀུན་གྱི། །ཞེས་བྱ་བ་ནི་རྡོ་རྗེ་ཧཱུཾ་མཛད་ལ་སོགས་པའི་ཁྲོ་བོའི་དམ་ཚིག་གི་ཕྱག་རྒྱ་བཅིངས་པའི་མཆོག་བཅིངས་པ་ལས་མནའི་བར་དུ་སྒྲུབ་པ་པོས་འདའ་བར་མི་བྱའོ། །སྒྲུབ་པ་པོས་ཕྱག་རྒྱ་བཅིང་བ་ལས་ངེས་པ་བསྐྱེད་ནས་རང་དང་གཞན་གྱི་རྒྱུད་ལ་རྡོ་རྗེ་རིགས་ཀྱི་ཕྱག་རྒྱ་ཆེན་
[246a.5]པོ་ལ་སོགས་པ་གདོན་མི་ཟ་བར་རྒྱས་གདབ་པར་བྱའོ། །འདའ་བར་བྱ་བ་མ་ཡིན་ཏེ། །ཞེས་བྱ་བ་ལ་སོགས་པ་ལ། རྒྱས་པ་ལ་ནི་ཨོཾ་པུཥྚི་ཀུ་རུ་ཧཱུཾ། བདེ་བ་དང་ཡིད་དགའ་བ་ལ་ནི་ཧྲིཿགཟུགས་སྣ་ཚོགས་སྟོན་པ་ལ་ནི་ཧོ། །དབང་དུ་བྱེད་པ་ལ་སོགས་རྡོ་རྗེའི་བཀའ་ལས་རྣམ་
[246a.6]པ་ཐམས་ཅད་ནས་ཐམས་ཅད་དུ་འདའ་བར་མི་བྱའོ། །ཅིའི་ཕྱིར་འདའ་བར་མི་བྱ་བ་ཞེ་ན། མདོར་ན་རྒྱལ་བས་རྡོ་རྗེ་གསང་། །ཞེས་བྱ་བ་སྨོས་ཏེ། དེ་བཞིན་གཤེགས་པའིའོ། །འདི་ནི་བཅིངས་པར་ཤེས་ནས་ཀྱང་། །དེས་ནི་ཆོས་ཀྱི་དངོས་གྲུབ་འགྱུར། །ཞེས་བྱ་བ་ནི་
[246a.7]རྒྱལ་བ་ཐམས་ཅད་ཀྱི་རྡོ་རྗེ་བཀའ་གང་ཡིན་པ་འདི་ལས་མི་འདའ་བར་བྱའོ་ཞེས་དོན་ངེས་པར་བྱས་ནས་དེ་བཞིན་གཤེགས་པ་རྣམས་ཀྱི་བཅིངས་པ་ལས་འགལ་བར་མི་བྱའོ། །པདྨའི་རིགས་ཀྱི་རྣལ་འབྱོར་པས་དེ་བཞིན་གཤེགས་པ་དང་འབྲེལ་བའི་སྔགས་ཀྱི་ཡི་གེས་དོན་གྱི་དངོས་གྲུབ་
[246b]
[246b.1]ཏུ་སྟེར་བ་ཡིན་ནོ་ཞེས་པ་བསྐྱེད་ནས། གང་གི་ཚེ་པདྨའི་རིགས་ཀྱི་རྣལ་འབྱོར་པས་ཕྱག་རྒྱ་འཆིང་བར་བྱེད་པ་དེའི་ཚེ་པདྨའི་རིགས་ཀྱི་ལྷ་དེ་རྣམས་ཀྱི་ཕྱག་རྒྱ་ཆེན་པོ་ལ་སོགས་པའི་གཟུགས་བརྙན་དུ་བསྐྱེད་པ་དང་། དེས་པདྨའི་རིགས་ཀྱི་ཕྱག་རྒྱ་ཆེན་པོ་ལ་སོགས་པ་ཆོས་ཀྱི་དངོས་
[246b.2]གྲུབ་ཏུ་འགྱུར་རོ་ཞེས་བྱའོ། །འདི་ལས་འདའ་བར་དཀའ་བས་ན་རྡོ་རྗེའི་བཀའ་སྟེ། འཕགས་པ་ནམ་མཁའི་སྙིང་པོས་ཁྱེད་རྣམས་ལ་དབང་བསྐུར་བའི་རིགས་ཀྱི་རང་བཞིན་དུ་བྱའོ་ཞེས་བཀའ་སྩལ་པ་ལས་སོ། །འདི་ལྟར་སེམས་ཅན་གྱི་ཁམས་ཐམས་ཅད་ཀྱི་བསམ་པ་ཐམས་ཅད་ཡོངས་སུ་
[246b.3]རྫོགས་པར་བྱེད་པའི་ལས་དེ་ཉིད་ནི་ལས་མང་རྣམས་སོ། །ནམ་མཁའ་ཐམས་ཅད་ཁྱབ་པའི་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་ལས་ནི་མང་པོ་སྟེ། རབ་ཏུ་རྒྱས་པའོ། །དེ་སུའི་ལས་སུ་འགྱུར་ཞེ་ན། བཀའ་དང་ལྡན་པའི་ཞེས་བྱ་བ་སྨོས་ཏེ།
[246b.4]བཀའ་དང་ལྡན་པའི་བཀའ་ལ་གནས་པའམ། ནོར་བུ་ཆེན་པོའི་རིགས་ཀྱི་རྣལ་འབྱོར་བསྒོམ་པ་ཞེས་བྱ་བའི་དོན་ཏོ། །དེའི་བཀའ་དང་ལྡན་པའི་སྒྲུབ་པ་པོས་ནམ་མཁའ་ཐམས་ཅད་ཁྱབ་པའི་ནོར་བུའི་རིགས་ཀྱི་ལས་དེ་བྱེད་པར་ངེས་པ་བསྐྱེད་པའོ། །དེ་ནས་མྱུར་དུ་འགྲུབ་པར་འགྱུར། །
[246b.5]ཞེས་བྱ་བ་ནི་ནོར་བུའི་རིགས་ཀྱི་ཕྱག་རྒྱ་བཅིངས་པས་དངོས་གྲུབ་བསྐྱེད་པའོ། །འདི་ཡང་བདག་གིས་ཡོངས་སུ་གཟུང་ཞིང་བྱིན་གྱིས་བརླབས་སོ་ཞེས་བྱ་བ་ནི་དཀྱིལ་འཁོར་ཆེན་པོས་བྱིན་གྱི་རླབས་ཀྱིས་དབང་དུ་བྱས་ནས་བཤད་པ་འབའ་ཞིག་ཏུ་མ་ཟད་ཀྱི་རྒྱུད་ཕྱི་མ་ལས་བདག་གིས་ཡོངས་སུ་གཟུང་ཞིང་སློབ་
[246b.6]དཔོན་བརྒྱུད་པས་གཏད་པའི་ཡུན་རིང་དུ་གནས་པ་ནི་བྱིན་གྱིས་བརླབས་པས་བདག་གིས་ཡོངས་སུ་བཟུང་ཞིང་བྱིན་གྱིས་བརླབས་སོ་ཞེས་བྱའོ། །ཡང་ཞེས་བྱ་བ་ནི་གསུངས་པ་སྡུད་པའོ། །སེམས་ཀྱི་གསང་བ་གཙོ་བོར་གྱུར་པ་གཟུངས་ཀྱི་དཀྱིལ་འཁོར་གྱི་དབང་དུ་བྱས་པས་རྡོ་རྗེ་འཆང་བས་གསོལ་བ་མ་བཏབ་ཀྱང་བཅོམ་
[246b.7]ལྡན་འདས་རྣམ་པར་སྣང་མཛད་རང་ཉིད་ཀྱིས་ཡོངས་སུ་བཟུང་ཞིང་བྱིན་གྱིས་བརླབས་པས། སངས་རྒྱས་ཀྱི་བཀའ་རབ་ཏུ་བསྟན་པ་ཡིན་ནོ་ཞེས་བྱ་བའི་དོན་ཏོ། །འཕགས་པ་དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ལས་གཟུངས་ཀྱི་དཀྱིལ་འཁོར་གྱི་དབང་དུ་བྱས་པའི་བཤད་པ་རྫོགས་སོ།། །།
[247a]
[247a.1]དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་རྟོག་པ་གསང་བའི་ཆོ་ག་རྒྱས་པའི་དངོས་གྲུབ་ཀྱི་ཆོ་གའི་རྒྱུད་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་
[247a.2]ཕྱག་རྒྱ་བཞི་བསྒོམས་ན་རང་གི་རིགས་ཀྱི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞི་མཐར་ཐུག་པ་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱད་ནས་ཕྱིས་རང་གི་ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བཅིང་
[247a.3]བ་ནི་རྒྱུད་ཕྱི་མ་ཡང་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པའི་རིགས་ཐམས་ཅད་ཀྱི་ཆོས། དམ་པའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་དེ་བཞིན་
[247a.4]གཤེགས་པ་ཐམས་ཅད་ཀྱི་རིགས་ཏེ། དེ་དག་དང་འབྲེལ་བའི་ཆོས་ཀྱི་དཀྱིལ་འཁོར་ལ་རག་ལས་པ་སྟེ། དམ་པའི་དངོས་གྲུབ་ནི་ཕྱག་རྒྱ་ཆེན་པོའི་དངོས་གྲུབ་བོ། །དེ་སྟོན་པར་བྱེད་པ་ནི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །སངས་རྒྱས་རྣམས་
[247a.5]ནི་ཆོས་ཀྱི་སངས་རྒྱས་སོ། །ཆོས་ནི་ཆོས་ཀྱི་དཀྱིལ་འཁོར་རོ། །དེའི་ཏིང་ངེ་འཛིན་ནི་དེ་བཞིན་གཤེགས་པའི་ཕྱག་རྒྱ་ཆེན་པོའོ། །དེ་བསྒོམས་པ་ནི་ཡང་དང་ཡང་མངོན་དུ་བྱས་པའོ། །ཇི་ལྟར་བྱེད་ཅེ་ན། མཉམ་པར་བཞག་པས་ཞེས་བྱ་བ་སྟེ། སེམས་རྣམ་པར་གཡེང་བ་མེད་པའོ། །
[247a.6]ཚུལ་གང་གིས་ཤེ་ན། སངས་རྒྱས་རྗེས་དྲན་ཚུལ་གྱིས་ཞེས་བྱ་བ་སྨོས་ཏེ། རང་གི་དེ་བཞིན་གཤེགས་པ་བསྒོམས་པའི་སངས་རྒྱས་རྗེས་སུ་དྲན་པའི་ཚུལ་དེས་དངོས་གྲུབ་དམ་པ་ཐོབ་པར་འགྱུར་པ་དེས་སངས་རྒྱས་ཐོབ་ཅེས་བྱ་བའི་དོན་ཏོ། །རྡོ་རྗེ་དབྱིངས་ལ་སོགས་པའི་དཀྱིལ་
[247a.7]འཁོར་ཆེན་པོ་ལས་བཤད་པའི་ཚུལ་གྱིས་དེ་བཞིན་གཤེགས་པའི་རྣལ་འབྱོར་བྱས་ལ། ཕྱག་བཞི་བྱ་བའི་ཆོ་ག་མཐར་ཐུག་པའི་ཆོ་ག་རྗེས་སུ་སྤྱད་དེ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་དེ་བཞིན་གཤེགས་པའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་རྡོ་རྗེ་
[247b]
[247b.1]ལ་རང་གི་སྔགས་བཀོད་ནས། དེ་བཟླས་ཤིང་རང་གི་དེ་བཞིན་གཤེགས་པའི་བདག་ཉིད་བསྒོམ་པར་བྱའོ། །སེམས་དཔའ་ཡང་ཡིན་ལ་ཀུན་ཡང་དེ་ཡིན་པས་ན་སེམས་དཔའ་ཀུན་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་ཁུ་ཚུར་གྱི་མཐར་ཐུག་པའི་ཆོས་ཀྱི་དཀྱིལ་འཁོར་ལས་བཤད་པའི་
[247b.2]སེམས་དཔའ་བཅུ་དྲུག་གོ། །དེའི་ཏིང་ངེ་འཛིན་ནི་དེ་དག་གི་ཕྱག་རྒྱ་ཆེན་པོའོ། །དེ་རྣམས་ལ་གནས་པ་ནི་སེམས་ཅན་ཀུན་གྱི་ཏིང་ངེ་འཛིན་ལ་གནས་པའོ། །རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་ལ་དམིགས་པ་ནི་གནས་པ་ཞེས་བྱ་བའི་དོན་ཡིན་ནོ། །བསྒོམས་པས་ནི་གོམས་པའོ། །ཇི་ལྟར་བྱ་
[247b.3]ཞེ་ན། མཉམ་པར་གཞག་པ་ཞེས་བྱ་བ་སྨོས་པ་ནི་གོ་སླའོ། །གང་གི་ཚུལ་གྱིས་ཤེ་ན། ཆགས་པ་རྗེས་སུ་དྲན་ཚུལ་གྱིས། །ཞེས་བྱ་བ་སྨོས་ཏེ། དེ་ལ་ཆགས་པ་ནི་མི་དམིགས་པའི་ཐུགས་རྗེ་ཆེན་པོའི་ངོ་བོ་རྡོ་རྗེ་སེམས་དཔའ་ལ་སོགས་པ་རྗེས་སུ་དྲན་པའོ། །ཆོས་ཐམས་ཅད་རང་
[247b.4]བཞིན་གྱིས་རྣམ་པར་དག་པས་གཟུགས་བརྙན་དང་མཚུངས་པའི་ཕྱིར་རོ་ཞེས་བསྒོམས་པ་དེ་ཉིད་ཀྱི་སྦྱོར་བ་དེ་ནི་ཆགས་པ་རྗེས་སུ་དྲན་པའི་ཚུལ་གྱིས་སོ། །དེས་ཅིར་འགྱུར་ཞེ་ན། དངོས་གྲུབ་དམ་པ་ཐོབ་པར་འགྱུར། །ཞེས་བྱ་བ་སྨོས་ཏེ། ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་
[247b.5]སེམས་དཔའ་ལ་སོགས་པའི་ཕྱག་རྒྱ་ཆེན་པོ་ཐོབ་པོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། ཕྱིས་
[247b.6]ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་ཟླ་བ་ལ་གནས་པའི་རྡོ་རྗེ་ལ་རང་གི་སྔགས་རྣམ་པར་བསམས་ཏེ། རང་གི་སྔགས་ལན་གསུམ་བརྗོད་ཅིང་ཆོས་ཐམས་ཅད་རང་བཞིན་གྱིས་རྣམ་པར་དག་པའི་གཟུགས་བརྙན་དང་
[247b.7]མཚུངས་པའི་ཕྱིར་རོ་ཞེས་རྣམ་པར་བསྒོམས་ནས་ཕྱིས་རང་གི་ལྷའི་ཕྱག་རྒྱ་ཆེན་པོ་བསྒོམ་པར་བྱའོ། །འཇིག་རྟེན་གསུམ་རྒྱལ་ཆ་ལུགས་སུ་ནི་ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེའི་རིགས་ཀྱི་ལྷའི་ཕྱག་རྒྱ་ཆེན་པོའི་རང་བཞིན་ནོ། །དེ་
[248a]
[248a.1]བསྒོམ་པ་ནི་ཁམས་གསུམ་རྣམ་པར་རྒྱལ་བའི་བསྒོམ་པའོ། །ཅི་བདག་ཉིད་ནས། །གཞན་དང་ལྷན་ཅིག་ཏུ་བསྒོམ་ཞེ་ན། འོན་ཀྱང་དྲན་བྱེད་མདུན་དུའང་དེ་བཞིན་ཏེ། །ཞེས་བྱ་བ་སྨོས་ཏེ། ཇི་ལྟར་བདག་ཉིད་ཆོས་ཀྱི་དཀྱིལ་འཁོར་ལས་བཤད་པའི་འཇིག་
[248a.2]རྟེན་གསུམ་ལས་རྣམ་པར་རྒྱལ་བའི་ཆ་ལུགས་སུ་བསྒོམ་པ་དེ་བཞིན་དུ་མདུན་དུ་ཡང་བསྒོམ་པ་དེ་ཉིད་བསྒོམ་པར་བྱའོ། །ཕྱག་ན་རྡོ་རྗེའི་མཐུར་གྱུར་ནས། །ཐམས་ཅད་རྣམ་པར་རྒྱལ་བར་འགྱུར། །ཞེས་བྱ་བ་ནི་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེ་རིགས་ཀྱི་རང་བཞིན་དུའོ། །
[248a.3]དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་ལྷའི་རྣལ་འབྱོར་བྱས་ལ། སྒེག་མོ་ལ་སོགས་པའི་གསང་བའི་མཆོད་པ་བཞིས་བདག་ཉིད་ཡང་དག་པར་མཆོད་ལ་སྔ་མ་བཞིན་དུ།
[248a.4]དེ་ཉིད་ཀྱིས་ནི་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ནས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ཁྲོ་བོའི་ཕྱག་རྒྱ་ཆེན་པོ་བཅིངས་ཏེ། རས་ལ་སོགས་པ་ལ་རང་གི་ཁྲོ་བོ་སྤྲུལ་ལ་བསྡུས་པ་ལ་
[248a.5]སོགས་པའི་ཆོ་ག་རྗེས་སུ་སྤྱད་ནས། ཆོས་ཀྱི་དཀྱིལ་འཁོར་ལས་གསུངས་པའི་རང་གི་ཕྱག་རྒྱ་བཞི་པོ་རྣམས་ཀྱིས་རྒྱས་བཏབ་སྟེ། དབང་བསྐུར་བའི་ཕྱག་རྒྱས་དབང་བསྐུར་ལ། ཆོས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པ་ལས་ཀྱི་ཕྱག་རྒྱ་རྣམ་པ་བརྒྱད་དང་། ལས་ཀྱི་དཀྱིལ་
[248a.6]འཁོར་ལས་གསུངས་པའི་ལས་ཀྱི་ཕྱག་རྒྱ་བཅུ་དྲུག་གིས་ཡང་དག་པར་མཆོད་ལ་ཕྱག་བཞི་བྱས་ཏེ། སྔ་མ་བཞིན་དུ་རང་གི་ཁྲོ་བོའི་ཕྱག་རྒྱ་ཆེན་པོ་བཅིངས་ནས་སྔ་མ་བཞིན་དུ་རང་གི་སྔགས་རྡོ་རྗེའི་དབུས་སུ་བསམས་ལ། དེ་ཉིད་ཟློས་པ་འདི་ནི་རྣལ་འབྱོར་ཉིས་ལྡབ་ཏུ་འགྱུར་རོ། །འགྲོ་བ་འདུལ་བའི་
[248a.7]ཆོས་སུ་ནི། །ཞེས་བྱ་བ་ནི་པདྨ་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་འགྲོ་བ་ལ་སོགས་པའི་ཕྱག་རྒྱ་ཆེན་པོ་ལ་སོགས་པ་འགྲོ་བ་འདུལ་བའི་ཆོས་དེ་བསྒོམ་པ་ནི་བདག་ཉིད་དམ་མདུན་དུ་རྣམ་པ་ཐམས་ཅད་ཀྱི་མཆོག་དང་ལྡན་པའི་པདྨའི་རིགས་ཀྱི་གདུལ་བྱ་རྣམས་ཀྱིས་མངོན་
[248b]
[248b.1]སུམ་དུ་བྱེད་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྔ་མ་བཞིན་དུ་པདྨའི་སྒེག་མོ་ལ་སོགས་པའི་གསང་བའི་མཆོད་པ་རྣམ་བཞིས་བདག་ཉིད་ཡང་དག་པར་མཆོད་ལ། དེ་ཁོ་ན་ཉིད་དང་།
[248b.2]ཆོས་དང་། དམ་ཚིག་གི་རྡོ་རྗེ་པདྨ་དང་། དྲིལ་བུ་ཕྱག་རྒྱ་ཆེན་པོས་བླངས་ཏེ། ཕྱིས་པདྨའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་སྔགས་བརྗོད་ཅིང་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷ་སྤྲུལ་ལ། བསྡུ་བ་ལ་སོགས་
[248b.3]པའི་ཆོ་ག་རྗེས་སུ་སྤྱད་ནས། ཕྱག་བཞི་བྱས་ནས། རང་གི་ཕྱག་རྒྱ་ཆེན་པོ་ཡང་བཅིངས་ལ་དེའི་སྔགས་བརྗོད་ཅིང་ཟུང་གི་རྣལ་འབྱོར་བསྒོམ་པར་བྱའོ། །དེ་ལྟར། །རྣམ་པ་ཀུན་གྱི་མཆོག་ལྡན་པར། །གདུལ་བྱ་དེ་ནི་རབ་བྱེད་དོ། །ཞེས་བྱའོ། །དོན་ཀུན་གྲུབ་པའི་སྐུར་ཡང་ནི། །ཞེས་བྱ་བ་ནི་
[248b.4]ནོར་བུ་ཆེན་པོའི་རིགས་བཤད་པའི་རང་གི་ལྷའི་ཕྱག་རྒྱ་ཆེན་པོའི་གཟུགས་སུ་བྱའོ། །བསྒོམས་ནས་མདུན་དུའང་དེ་བཞིན་ཏེ། །ཞེས་བྱ་བ་ནི་བཤད་ཟིན་ཏོ། །རྣམ་པ་ཀུན་གྱི་མཆོག་ལྡན་པའི། །ཕུན་སུམ་ཆོགས་དོན་དེ་ཐོབ་བོ། །ཞེས་བྱ་བ་ནི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་
[248b.5]བཤད་པའི་རང་གི་ལྷའི་ཕྱག་རྒྱ་ཆེན་པོའི་དངོས་གྲུབ་བོ། །དེའི་དོན་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་ཆེན་པོ་བྱས་ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ནོར་བུའི་རིགས་ཀྱི་ཆོས་ཀྱི་དཀྱིལ་
[248b.6]འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ལ། །དེའི་སྔགས་བརྗོད་ཅིང་། དེའི་མདུན་དུ་སྤྲུལ་ལ། བསྡུ་བ་ལ་སོགས་པའི་ཆོ་ག་བྱས་ནས། ཕྱག་བཞི་བྱས་ཏེ། ཡང་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་བཅིངས་ལ། དེ་ཉིད་ཀྱི་སྔགས་བརྗོད་
[248b.7]ཅིང་ཟུང་གི་རྣལ་འབྱོར་བསྒོམ་པར་བྱའོ། །ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་
[249a]
[249a.1]འཁོར་ལས་བཤད་པའི་ཆོས་ཀྱི་དཀྱིལ་འཁོར་གྱི་དམ་ཚིག་ནི་དམ་ཚིག་གི་ཕྱག་རྒྱའོ། །དེའི་དངོས་གྲུབ་ནི་བསྐྱེད་པའོ། །དེའི་རྒྱུད་ནི་བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །སངས་རྒྱས་རྗེས་སུ་འགྱུར་ལ་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་
[249a.2]ཆེན་པོ་ལ་སོགས་པ་ལས་བཤད་པའི་ཆོ་གས་དེ་བཞིན་གཤེགས་པའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། དེའི་རྗེས་ལ་ཆོས་ཀྱི་དཀྱིལ་འཁོར་ལས་བཤད་པའི་རང་གི་དེ་བཞིན་གཤེགས་པའི་དམ་ཚིག་གི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་ལ་རང་གི་
[249a.3]སྔགས་རྣམ་པར་བསམས་ལ་དེ་ཉིད་བརྗོད་ཅིང་དེ་བཞིན་གཤེགས་པའི་བདག་ཉིད་དུ་བསྒོམས་ཏེ། བཛྲ་བཛྲ་ཞེས་བརྗོད་པར་བྱའོ། །དེ་ལྟར། སངས་རྒྱས་རྗེས་སུ་དྲན་པའི་ཕྱིར། །བཛྲ་བཛྲ་ཞེས་བརྗོད་ན། །སངས་རྒྱས་དངོས་གྲུབ་ཐོབ་པར་འགྱུར། །སྦྱོར་བ་གང་གིས་ཤེ་ན། རྡོ་རྗེ་ཕྲ་མོའི་ཚུལ་གྱིས་
[249a.4]ནི། །ཞེས་བྱ་བ་སྨོས་ཏེ། རྡོ་རྗེ་ཕྲ་མོ་བསྒོམས་པ་དེས་སངས་རྒྱས་ཀྱི་དངོས་གྲུབ་ནི་ཆོས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་ཅིང་རྙེད་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོས་ཀྱི་དཀྱིལ་འཁོར་
[249a.5]ལས་བཤད་པའི་དམ་ཚིག་གི་ཕྱག་རྒྱ་བཅིངས་ཏེ། དེ་བཞིན་གཤེགས་པའི་བདག་ཉིད་དུ་རྣམ་པར་བསྒོམས་ནས། བཛྲ་བཛྲ་ཞེས་བྱ་བའི་སྔགས་ཀྱི་ཡི་གེ་མདུན་དུ་རྣམ་པར་བསམས་ལ། རང་གི་ལུས་ཀྱི་ནང་དུ་ཞུགས་པས་ལུས་དང་ངག་དང་ཡིད་རྣམས་ཆུ་དང་འོ་མ་བཞིན་གཅིག་ཏུ་
[249a.6]ངེས་པར་བྱས་ལ། ཆོས་ཀྱི་དཀྱིལ་འཁོར་ལས་བཤད་པའི་རང་གི་དེ་བཞིན་གཤེགས་པའི་སྔགས་བརྗོད་ཅིང་ཇི་སྲིད་དུ་དེ་བཞིན་གཤེགས་པ་དང་། བདག་ཉིད་གཅིག་ཏུ་གྱུར་པ་དེ་སྲིད་ཀྱི་བར་དུ་ཟླ་བ་གཉིས་བསྒོམས་ལ། དེ་ནས་གཞན་ཡང་ཟླ་བ་གཅིག་སྤྲོ་བ་དང་བསྡུ་བ་བསྒོམ་
[249a.7]པར་བྱའོ། །དེ་ནས་མཚན་ཐོག་ཐག་དེ་བཞིན་གཤེགས་པ་ནམ་མཁའི་ཁམས་གང་བར་བསྒོམས་ན་དེ་བཞིན་གཤེགས་པར་འགྱུར་རོ། །རྡོ་རྗེ་སེམས་དཔའི་ཏིང་འཛིན་དུ། །རྡོ་རྗེ་ཕྲ་མོ་སྒོམ་བྱེད་ཅིང་། །ཞེས་བྱ་བ་ནི་དེ་བཞིན་གཤེགས་པའི་རིགས་ཀྱི་ཆོས་ཀྱི་དཀྱིལ་འཁོར་ལས་
[249b]
[249b.1]བཤད་པའི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་མཐར་ཐུག་པ་ནི་རྡོ་རྗེ་སེམས་དཔའིའོ། །དེ་དག་གི་ཏིང་འཛིན་ནི་དམ་ཚིག་གི་ཕྱག་རྒྱའོ། །ཇི་ལྟར་དེ་བསྒོམ་ཞེ་ན། རྡོ་རྗེ་ཕྲ་མོ་བསྒོམ་པར་བྱའོ། །རྡོ་རྗེ་སེམས་དཔའ་ཉིད་འགྲུབ་བོ། །ཞེས་བྱ་བ་ནི་ཆོས་ཀྱི་དཀྱིལ་འཁོར་
[249b.2]ལས་བཤད་པའི་རྡོ་རྗེ་སེམས་དཔའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་བོ་ཞེས་བྱ་བའི་དོན་ཏོ། །ཅི་ཞིག་བརྗོད་ཅིང་ཞེ་ན། བཛྲ་ཏྭ་ཞེས་བརྗོད་ན། །ཞེས་བྱ་བ་སྨོས་ཏེ། རྡོ་རྗེ་སེམས་དཔའ་ཞེས་བྱ་བ་ནི་བཤད་ཟིན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་
[249b.3]གས་རྡོ་རྗེ་སེམས་དཔའ་ལ་སོགས་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིང་སྟེ། རང་གི་སྙིང་གའི་རྡོ་རྗེ་ལ་རང་གི་སྔགས་རྣམ་པར་བསམས་
[249b.4]ཏེ། དེ་ཉིད་བརྗོད་ཅིང་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ། །བཛྲ་སཏྭ་ཞེས་བྱ་བའི་ཡི་གེ་མདུན་དུ་བསམས་ལ། དེ་ཉིད་བརྗོད་ཅིང་རང་གི་ལུས་ལ་དེ་བཅུག་སྟེ། སྔ་མ་བཞིན་དུ་རང་གི་ལུས་དང་ངག་དང་། སེམས་བྱིན་གྱིས་བརླབས་ལ། རྩ་བའི་རྒྱུད་
[249b.5]ལས་བཤད་པའི་ཆོ་གས་རྡོ་རྗེ་ཕྲ་མོ་ཟླ་བ་གསུམ་བསྒོམ་པར་བྱའོ། །དེ་ནས་མཐར་མཚན་ཐོག་ཐག་བྱའོ། །དེ་ལྟར་ན་ཡང་ཉིན་རེ་ཞིང་རང་ལ་བྱིན་གྱིས་བརླབས་པ་ལ་སོགས་པ་བྱས་ནས། ཆོས་ཀྱི་དཀྱིལ་འཁོར་ལས་བཤད་པའི་སྔགས་ཟློས་ཤིང་། རང་གི་ལྷའི་དམ་ཚིག་གི་ཕྱག་རྒྱ་
[249b.6]བཅིངས་ལ། རང་གི་ལྷའི་གཟུགས་སུ་བསམ་པར་བྱའོ། །བཛྲ་སཏྭ་ཞེས་བྱ་བས་སྔ་མ་བཞིན་དུ་བྱིན་གྱིས་བརླབས་ཏེ། ཆོས་ཀྱི་དཀྱིལ་འཁོར་ལས་བཤད་པའི་སྔགས་བཟླས་ལ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། བསྒྲུབ་པར་བྱའོ། །འཇིག་རྟེན་གསུམ་རྒྱལ་ཆ་ལུགས་སུ། །
[249b.7]དྲན་བྱེད་མདུན་དུ་དེ་བཞིན་དུ། །ཞེས་བྱ་བ་ནི་རྡོ་རྗེའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ཁྲོ་བོའི་ལྷའི་གཟུགས་ཅན་འཇིག་རྟེན་གསུམ་ལས་རྣམ་པར་རྒྱལ་བའི་ཆ་ལུགས་ནི་འཇིག་རྟེན་གསུམ་ལས་རྣམ་པར་རྒྱལ་བའི་ཆ་ལུགས་སུ་བྱས་ནས། ཡང་དག་པར་དྲན་ཞིང་བསྒོམ་
[250a]
[250a.1]པར་བྱའོ། །མདུན་དུ་ནི་རང་གི་རྒྱུད་དུ་གཏོགས་པ་ཇི་ལྟ་བ་དེ་བཞིན་དུ་མདུན་དུ་ཡང་བསྒོམ་པར་བྱའོ། །ཅི་ཞིག་ཟློས་ཤིང་ཞེ་ན། ཧཱུཾ་ཧཱུཾ་ཧཱུཾ་ཧཱུཾ་ཞེས་ཡི་གེ་ཧཱུཾ་བཞི་ཟློས་ཤིང་། རྡོ་རྗེའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་ཆོས་ཀྱི་དཀྱིལ་འཁོར་ལས་
[250a.2]བཤད་པའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་ལྷའི་རྣལ་འབྱོར་བྱས་ཏེ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས། དེ་ཁོ་ན་ཉིད་དང་། དམ་
[250a.3]ཚིག་དང་། ཆོས་དང་། བདག་ཉིད་དུ་བསྐྱེད་དེ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས། དེའི་སྔགས་སྙིང་གར་བསམས་ཏེ། དེ་ཉིད་བརྗོད་ཅིང་མདུན་དུ་རང་གི་ལྷ་སྤྲུལ་ལ། བསྡུ་བ་ལ་སོགས་པའི་ཆོ་ག་རྗེས་སུ་སྤྱད་ནས།
[250a.4]ཆོས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་རྣམ་པ་བརྒྱད་དང་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་ཇི་ལྟ་བ་བཞིན་དུ་ཡང་དག་པར་མཆོད་ལ། ཕྱག་བཞི་བྱས་ཏེ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། ཧཱུཾ་བཞི་མདུན་དུ་སྤྲུལ་ལ། དེ་ཉིད་བརྗོད་ཅིང་
[250a.5]དེས་རང་གི་ལུས་དང་། ངག་དང་། ཡིད་རྣམས་བྱིན་གྱིས་བརླབས་ནས་རང་གིས་སྔགས་བརྗོད་ནས་རྣལ་འབྱོར་ཉིས་ལྡབ་ཏུ་འགྱུར་བ་ཡིན་ནོ། །འགྲོ་བ་འདུལ་བའི་གཟུངས་ཀྱིས་ནི། །ཞེས་བྱ་བ་ལ་པདྨའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷ་དེའི་གཟུགས་སུ་བསྒོམ་
[250a.6]པར་བྱའོ། །ཇི་ལྟར་བྱ་ཞེ་ན། རྡོ་རྗེ་ཕྲ་མོས་ཞེས་བྱ་བ་སྨོས་ཏེ། རྡོ་རྗེ་ཕྲ་མོ་བསྒོམ་པར་བྱས་ནས་ཞེས་བྱ་བའི་དོན་ཏོ། །ཅི་ཞིག་བརྗོད་ཅིང་ཞེ་ན། ཤུདྡྷ་ཤུདྡྷ་ཞེས་བརྗོད་ན། །ཞེས་བྱ་བ་སྨོས་སོ། །ཅིར་འགྱུར་ཞེ་ན། དངོས་གྲུབ་དམ་པ་ཐོབ་པར་འགྱུར་རོ་ཞེས་བྱ་བ་སྨོས་ཏེ། པདྨའི་
[250a.7]རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་པར་འགྱུར་རོ་ཞེས་བྱ་བའི་དོན་ཏོ། །དེའི་དོན་ནི་འདི་ལྟར་ཤེས་པར་བྱ་སྟེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་
[250b]
[250b.1]ཐུག་པའི་ཆོ་ག་རྗེས་སུ་སྤྱད་ནས། དེ་ཁོ་ན་ཉིད་དང་། ཆོས་དང་། དམ་ཚིག་གི་བདག་ཉིད་དུ་བསྐྱེད་དེ། དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས། སྙིང་གའི་རྡོ་རྗེ་པདྨ་ལ་སྔགས་རྣམ་པར་བསམས་ཏེ། དེ་ཉིད་ཟློས་ཤིང་རང་གི་ལྷའི་ང་རྒྱལ་བསྐྱེད་དེ།
[250b.2]བུདྡྷ་བུདྡྷ་ཞེས་བརྗོད་པས་སྔ་མ་བཞིན་དུ་རང་གི་ལུས་དང་། ངག་དང་། ཡིད་རྣམས་བྱིན་གྱིས་བརླབས་ཏེ། རང་གི་སྔགས་བརྗོད་པར་བྱའོ། །སྔར་བཤད་པའི་ཆོ་གས་རྡོ་རྗེ་ཕྲ་མོ་ཟླ་བ་གསུམ་བསྒོམས་ལ། དེ་ནས་མཚན་ཐོག་ཐག་བསྒོམ་པར་བྱའོ། །དེའི་རྗེས་ལ་ཡང་དེ་བཞིན་དུ་རང་
[250b.3]གི་ལུས་དང་། ངག་དང་། ཡིད་བྱིན་གྱིས་བརླབས་ཏེ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས། སྔགས་བརྗོད་ཅིང་བསྒོམ་པར་བྱའོ། །དོན་ཀུན་གྲུབ་པའི་གཟུངས་ཀྱིས་ནི། །རྡོ་རྗེ་ཕྲ་མོ་བསྒོམས་ནས་ཀྱང་། །ཞེས་བྱ་བ་ནི་ནོར་བུ་ཆེན་པོའི་རིགས་ཀྱི་ཆོས་ཀྱི་དཀྱིལ་
[250b.4]འཁོར་ལས་བཤད་པའི་དོན་ཐམས་ཅད་གྲུབ་པ་ལ་སོགས་པ་ནས། རིན་ཆེན་འབེབས་པའི་མཐར་ཐུག་པའི་གཟུགས་ནི་དོན་ཐམས་ཅད་གྲུབ་པའི་གཟུགས་སོ། །དེ་བསྒོམ་པ་ནི་ཕྲ་མོའི་རྡོ་རྗེ་སྒོམ་པར་བྱེད་པའོ། །ཅི་ཞིག་བརྗོད་ཅིང་ཞེ་ན། སིདྡྷྱ་སིདྡྷྱ་ཞེས་བརྗོད་ན། །ཞེས་བྱ་བ་སྨོས་
[250b.5]སོ། །ཅི་ཞིག་ཏུ་འགྱུར་ཞེ་ན། དོན་གྱི་དངོས་གྲུབ་མཆོག་ཏུ་འགྱུར། །ཞེས་བྱ་བ་སྨོས་ཏེ། ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་ནི་དོན་གྱི་དངོས་གྲུབ་སྟེ། དེ་ནི་མཆོག་དམ་པར་གྱུར་པའོ། །འདི་སྐད་སྟོན་པ་ཡིན་ཏེ།
[250b.6]དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། ཕྱིས་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ལ། སིདྡྷྱ་སིདྡྷྱ་ཞེས་བརྗོད་ཅིང་རང་གི་ལུས་དང་། ངག་དང་།
[250b.7]ཡིད་རྣམས་བྱིན་གྱིས་བརླབས་ལ། སྔར་བཤད་པའི་ཆོ་གས་ཟླ་བ་གསུམ་རྡོ་རྗེ་བསྒོམས་ནས། མཐར་མཚན་ཐོག་ཐག་བསྒོམ་པར་བྱའོ། །དེ་ལྟར་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས། ལུས་དང་། ངག་
[251a]
[251a.1]དང་། ཡིད་རྣམས་བྱིན་གྱིས་བརླབས་ཏེ། རང་གི་སྔགས་སྙིང་གའི་རྡོ་རྗེ་རིན་པོ་ཆེའི་དབུས་སུ་རྣམ་པར་བསམས་ལ། དེ་ཉིད་བཟླས་ཤིང་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་ཆོས་ཀྱི་དཀྱིལ་འཁོར་ལས་བཤད་པའི་རིགས་
[251a.2]ཀྱི་དམ་ཚིག་གི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་དམ་པའི་ཆོས་ཀྱི་ཡེ་ཤེས་ཀྱི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་རྣམས་སོ། །དམ་པའི་
[251a.3]ཆོས་ནི་དམ་པའི་ཆོས་ཏེ། ཆོས་ཀྱི་དཀྱིལ་འཁོར་གྱི་ཆོས་ཀྱི་ཕྱག་རྒྱའོ། །དེའི་ཡེ་ཤེས་ནི་ངེས་པའོ། །དེའི་དངོས་གྲུབ་ནི་སངས་རྒྱས་དང་བྱང་ཆུབ་སེམས་དཔའ་ཐོབ་པའོ། །དེ་སྟོན་པར་བྱེད་པ་ནི་རྒྱུད་དོ། །བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །ཨ་ལ་
[251a.4]སོགས་པ་ཡི་གེ་དེ་མེད་པའོ། །དམ་པའི་ཆོས་ནི་བདག་མེད་པའི་ངོ་བོ་རང་བཞིན་གྱིས་རྣམ་པར་དག་པའོ། །དེ་སྟོན་པར་བྱེད་པ་ཆོས་ཀྱི་ཕྱག་རྒྱའི་ངོ་བོ་ཡང་ཡི་གེ་མེད་པའོ། །ཡི་གེ་མེད་པར་སྟོན་པ་ཉིད་ཡིན་ནོ། །ཏིང་འཛིན་ཡེ་ཤེས་འབྱུང་བ་སྟེ། །ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་
[251a.5]རྣམ་པར་དག་པའོ་ཞེས་སེམས་རྩེ་གཅིག་པའི་ཏིང་ངེ་འཛིན་ཏོ། །དེ་ལ་ཡེ་ཤེས་ནི་ཏིང་ངེ་འཛིན་གྱི་ཡེ་ཤེས་ལས་བྱུང་བ་གང་ཡིན་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །ཨ་ཞེས་པ་དེས་ཆོས་རྣམས་ཀྱི། །སྐྱེ་བ་མེད་པར་བཤད་པ་ཡིན། །ཞེས་བྱ་བ་ནི་ཨ་ཀཱ་རོ་མུ་ཁཾ་སརྦྦ་དྷརྨྨཱ་
[251a.6]ཎཱཾ་ཨཱདྱ་ནུཏྤ་ནྣ་ཏྭཱཏ་ཅེས་བྱ་བས་གཏན་ཚིགས་སྟོན་པའི་རྒྱུ་དེས་ཡི་གེ་ཨ་ཉིད་ཀྱིས་སྐྱེ་བ་མེད་པར་བཤད་པ་ཡིན་ནོ་ཞེས་སྒྲའི་དོན་ཡིན་ནོ། །དེ་ལྟར་བཤད་པ་ནི་བསྟན་པའོ། །ཕྱག་རྒྱ་འདི་ཡིས་ཚུལ་གྱིས་ནི། །ཤེས་རབ་ཀྱིས་བསྒོམས་དེ་ནི་གང་། །ཞེས་བྱ་བ་ལ་སོགས་པ་ཆོས་ཐམས་ཅད་མ་སྐྱེས་
[251a.7]པའོ་ཞེས་བྱ་བ་དེས་ཆོས་ཀྱི་དབྱིངས་ཀྱི་ཕྱག་རྒྱ་དེའི་ཚུལ་བསྒོམས་པ་ནི། ཕྱག་རྒྱ་འདིའི་ཚུལ་གྱིས་བསྒོམས་པས་དེས་ཡང་དང་ཡང་མངོན་དུ་བྱས་པ་ནི་བསྒོམས་པའོ། །ཤེས་རབ་ཀྱིས་ནི་ཆོས་ཐམས་ཅད་གདོད་མ་ནས་མ་སྐྱེས་པར་རང་བཞིན་གྱིས་རྣམ་པར་དག་པའོ་ཞེས་ལྷག་
[251b]
[251b.1]པར་མོས་པའི་ཤེས་རབ་འདིས་བསྒོམས་པའོ། །ཡི་གེ་ཀུན་གྱི་ཡེ་ཤེས་དངོས། །བདེ་གཤེགས་སྐད་ཀྱིས་འགྲུབ་པར་འགྱུར། །ཞེས་བྱ་བ་ནི་མི་ཟད་པས་ན་ཡི་གེའོ། །དེ་བཞིན་གཤེགས་པ་ཐམས་ཅད་རྟག་ཏུ་མི་འཇིགས་པས་ན་ཐམས་ཅད་མི་ཟད་པའོ། །རང་བཞིན་གྱིས་རྣམ་པར་དག་པའི་
[251b.2]ཆོས་ཀྱི་ཡེ་ཤེས་ནི་དེ་བཞིན་གཤེགས་པ་ལྔའོ། །དེའི་དངོས་པོ་ནི་དེའི་རང་བཞིན་གྱིས་ཡེ་ཤེས་སུ་འགྲུབ་པ་སྟེ་དེ་ཉིད་བསྟན་པའོ། །བདེ་བར་གཤེགས་པ་བྱ་ཞེས་བྱ་བ་ནི་མཛེས་པར་གཤེགས་པ་སྟེ། བག་ཆགས་དང་བཅས་པའི་ཉོན་མོངས་པ་སྤངས་པའི་ཕྱིར། བདེ་བར་གཤེགས་པ་ནི་
[251b.3]སངས་རྒྱས་བཅོམ་ལྡན་འདས་ཏེ། དེ་དག་ནི་འདིར་མཛེས་པར་གཤེགས་པའོ། །དེས་དུས་ཅི་ཞིག་གིས་འགྲུབ་ཅེ་ན། སྐད་ཅིག་གིས་ཞེས་བྱ་བ་སྨོས་ཏེ། མཚན་མ་ཐོབ་པར་གྱུར་པ་གང་ཞིག་གིས་མངོན་པར་ཤེས་པ་ལྔ་བསྐྱེད་དེ། དཀྱིལ་འཁོར་བྲིས་ལ་ཆོ་གས་ཐམས་ཅད་རྗེས་སུ་སྤྱད་དེ།
[251b.4]བསྒོམས་ན་སྐད་ཅིག་མ་དེ་ཉིད་ལ་འགྲུབ་པར་འགྱུར་རོ། །ལུས་གཞན་ལ་མི་ལྟོས་པའི་ཕྱིར་རོ། །དེ་ལྟར་གང་ཞིག་གིས་གསུངས་ཤེ་ན། བཅོམ་ལྡན་འདས་འཇམ་དཔལ་དེ་བཞིན་གཤེགས་པ་ཐམས་ཅད་ཀྱིས་གསུངས་པ་ནི། རྡོ་རྗེ་འཆང་ཆེན་པོ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་རང་
[251b.5]བཞིན་གྱི་འཇམ་དཔལ་དེ་བཞིན་གཤེགས་པ་ཐམས་ཅད་ཀྱིས་གསུངས་སོ། །དེ་སྐད་དུ་ཡང་། དེ་བཞིན་གཤེགས་པ་ཐམས་ཅད་ནི། །ཤེས་རབ་དབྱངས་ཀྱི་རྗེས་འགྲོར་བཤད། །ཅེས་གསུངས་སོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་དེ་བཞིན་གཤེགས་པའི་རྣལ་
[251b.6]འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་གའོ། །དེ་ཁོ་ན་ཉིད་དང་། ཆོས་དང་། དམ་ཚིག་ཀྱང་བླངས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ཏེ། སྙིང་གར་རྡོ་རྗེ་ལ་ཆོས་ཀྱི་ཡི་གེ་ཡང་བསམ་པར་བྱའོ། །ཨ་
[251b.7]ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ་ཨཱ་དྱ་ནུཏྤ་ནྣ་ཏྭཱ་ཏ་ཅེས་བྱ་བ་སྒྱུ་མ་ལྟ་བུར་ངེས་པར་བྱས་ནས། དེ་བཞིན་གཤེགས་པའི་བདག་ཉིད་ཆོས་ཀྱི་ཡི་གེ་ཟློས་ཤིང་བསྒོམ་པར་བྱའོ། །དེ་བཞིན་གཤེགས་པ་ཐམས་ཅད་ནི་དེ་བཞིན་གཤེགས་པ་འདི་ཐམས་ཅད་དོ། །འདི་གང་ཡིན་ཞེ་ན། དེ་ཉིད་ཀྱིས་
[252a]
[252a.1]ཞེས་བྱ་བ་སྨོས་ཏེ། དོན་དམ་པར་རྒྱུ་དང་འབྲས་བུའི་དེ་ཁོ་ན་ཉིད་སྟོན་པའི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་མདོ་སྡེ་འདི་འདོད་པས་སོ། །དད་པས་གཞུང་གི་དོན་བཅིངས་པ་ནི་ཁོང་དུ་ཆུད་པའོ། །ཀླགས་པ་ནི་དད་པས་གླེགས་
[252a.2]བམ་འདོན་པའོ། །དེ་བཞིན་གཤེགས་པའི་ཡོན་ཏན་ལ་དད་པས་ལྷག་པར་མོས་པ་དང་ལྡན་པའི་ཕྱིར་རོ། །དེ་སྐད་དུ་ཡང་། དེ་བཞིན་གཤེགས་པའི་ཡོན་ཏན་ལ་དད་པས་ལྷག་པར་མོས་པའི་ཕྱིར་རོ་ཞེས་གསུངས་སོ། །དངོས་གྲུབ་བླ་མེད་ཐོབ་པར་འགྱུར། །ཞེས་བྱ་བ་ནི་དེ་
[252a.3]བཞིན་གཤེགས་པའི་རིགས་ཀྱི་ཕྱག་རྒྱའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་དེ་བཞིན་གཤེགས་པ་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་སྒྲུབ་པར་
[252a.4]འདོད་པས། །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་མདོ་སྡེ་འདི་ལ་དད་པར་བྱའོ། །དེའི་གཞུང་གི་དོན་བཅང་བར་བྱའོ། །དོན་དྲན་ཞིང་གླེགས་བམ་བཀླག་པར་ཡང་བྱའོ། །དེ་ནས་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱའོ། །
[252a.5]ཐོས་པ་དང་བསམ་པ་དག་གིས་ངེས་པ་བསྐྱེད་ནས། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་ཡི་
[252a.6]གེ་ཧཱུཾ་ལས་རྡོ་རྗེ་དཀར་པོ་བསམས་ལ་བསྒོམ་པར་བྱའོ། །དེ་ནས་སྙིང་གའི་རྡོ་རྗེ་ལ་རང་གི་ལྷའི་ཆོས་ཀྱི་ཡི་གེ་རྣམ་པར་བསམས་ཏེ། དེ་ཉིད་བརྗོད་ཅིང་གཟུགས་བརྙན་དང་མཚུངས་པའི་རང་བཞིན་གྱིས་རྣམ་པར་དག་པའི་རང་གི་ལྷའི་གཟུགས་སུ་བསྒོམ་པར་བྱའོ། །སྡིག་པའི་སེམས་
[252a.7]ཅན་ཕན་གདགས་ཕྱིར། །སངས་རྒྱས་ཡེ་ཤེས་བྱེད་འདོད་པས། །ཞེས་བྱ་བ་ནི་བཤད་ཟིན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་
[252b]
[252b.1]ཐུག་པའི་ཆོ་ག་རྗེས་སུ་སྤྱད་ནས། དེ་ཁོ་ན་ཉིད་དང་། ཆོས་དང་། དམ་ཚིག་གི་ཕྱག་རྒྱ་རྣམས་ཀྱིས་བདག་ཉིད་བྱིན་གྱིས་བརླབས་ཏེ། ཆོས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ཏེ། ཡང་ཐུགས་ཀ་ལ་རང་གི་ལྷའི་ཆོས་ཀྱི་ཡི་གེ་བཀོད་ལ། དེ་ཉིད་
[252b.2]བརྗོད་ཅིང་སེམས་ཅན་གྱི་ཁམས་ཐམས་ཅད་རྡོ་རྗེའི་རིགས་ཀྱི་རང་བཞིན་དུ་བྱས་ཏེ། གཟུགས་བརྙན་དང་མཚུངས་པའི་རང་བཞིན་གྱིས་རྣམ་པར་དག་པ་བསྒོམ་པར་བྱའོ། །རང་བཞིན་དག་པར་ཤེས་ནས་ནི། །ཞེས་བྱ་བ་ནི་རྟོགས་པ་ཉིད་དོ། །ཇི་ལྟར་ཤེས་ཤེ་ན། དམ་པའི་ཆོས་ནི་ཡིན་
[252b.3]པར་བཤད། །ཅེས་བྱ་བ་སྨོས་ཏེ། རང་བཞིན་གྱིས་རྣམ་པར་དག་པའི་མཚན་ཉིད་ཀྱི་དོན་གང་ཡིན་པ་འདི་ནི་དོན་དམ་པ་ཡིན་ནོ་ཞེས་བཅོམ་ལྡན་འདས་ཀྱིས་གསུངས་སོ། །ཤེས་ནས་འདི་བསྒོམས་པ་ནི་རང་བཞིན་གྱིས་རྣམ་པར་དག་པའི་མཚན་ཉིད་ཀྱི་དངོས་པོ་ཐོག་མ་དང་ཐ་མ་མེད་
[252b.4]པར་རྣམ་པར་དག་པའི་མཚན་ཉིད་ཀྱིས་དངོས་པོ་འདི་གོམས་པར་བྱས་པའོ། །ཐོག་མ་ཞེས་བྱ་བ་ནི་དེ་བཞིན་གཤེགས་པ་རྣམས་བྱུང་ཡང་རུང་དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། རང་བཞིན་གྱིས་གནས་པའི་ཕྱིར་རོ། །རང་བཞིན་གྱིས་རྣམ་པར་དག་པའི་མཚན་ཉིད་ཀྱི།
[252b.5]ཆོས་དེ་ལྟ་བུར་གྱུར་པ་གདུལ་བྱ་རྣམས་ལ། དངོས་གྲུབ་མྱུར་ཞིང་རིང་བར་ཐོབ་ཅིང་རྣལ་འབྱོར་པས་ཆོས་ཀྱི་ཕྱག་རྒྱ་འགྲུབ་བོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་འཇིག་རྟེན་དབང་ཕྱུག་གི་རྣལ་འབྱོར་བྱས་
[252b.6]ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རང་གི་ལྕེ་ལ་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་རྣམ་པར་བསམས་ཏེ། དེ་ཉིད་ཟློས་ཤིང་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ངེས་པ་བསྐྱེད་ནས། གཟུགས་བརྙན་
[252b.7]དང་མཚུངས་པའི་ལྷའི་ངོ་བོ་བདག་ཉིད་དུ་བསྒོམ་པར་བྱའོ། །སེམས་ཅན་ཡང་ཡིན་ལ་ཀུན་ཡང་ཡིན་པས་ན་སེམས་ཅན་ཀུན་ཏེ། དེ་བཞིན་གཤེགས་པ་ལ་སོགས་པ་དེ་དག་ཐམས་ཅད་ཀྱི་དོན་སྦྱིན་པར་བྱེད་པ་ན་རིན་པོ་ཆེའི་རིགས་ཀྱི་རྟོག་པ་བསྐྱེད་པ་དང་། རིན་པོ་ཆེའི་
[253a]
[253a.1]རིགས་ཀྱི་གཟུགས་སུ་བསྐྱེད་པའོ། །ཅིའི་ཕྱིར་ཞེ་ན། བསམ་པ་ཐམས་ཅད་རྫོགས་བྱེད་ཅིང་། །ཞེས་བྱ་བ་སྨོས་ཏེ། ནོར་བུ་ཆེན་པོའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱའི་དངོས་གྲུབ་ནི་རང་དང་གཞན་གྱི་བསམ་པ་ཐམས་ཅད་
[253a.2]ཡོངས་སུ་རྫོགས་པར་བྱེད་པའོ། །དེའི་དོན་ནི་སེམས་ཅན་ཀུན་གྱི་དོན་ཏེ། དེ་ནི་སེམས་ཅན་ཀུན་གྱི་དོན་སྦྱིན་བྱེད་དོ། །ཆོས་གོམས་འདི་ནི་ནོར་བུ་ཡི། །ཞེས་བྱ་བ་ནི་སེམས་ཅན་ཀུན་ལ་དོན་སྦྱིན་པའི་ནོར་བུའི་རིགས་ཀྱི་ཆོས་ཀྱི་ཚུལ་ལོ། །ཇི་ལྟར་འདིའི་ཆོས་ཡིན་ཡང་རྣལ་
[253a.3]འབྱོར་པ་ལ་འདི་ཅི་ཞིག་ཏུ་འགྱུར་ཞེ་ན། རིགས་ཀྱི་ཡང་ནི་དངོས་གྲུབ་འགྱུར། །ཞེས་བྱ་བ་སྨོས་ཏེ། ཆོས་འདི་བསྒོམས་པས་ཆོས་ཀྱི་ཕྱག་རྒྱའི་དངོས་གྲུབ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་
[253a.4]པའི་རང་གི་ལྷའི་རྣལ་འབྱོར་བྱས་ལ། ཆོས་ཐམས་ཅད་རྗེས་སུ་སྤྱད་དེ། དེ་ཕྱིས་ནོར་བུའི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་ཇི་ལྟ་བ་བཞིན་དུ་བསམས་ཏེ། དེ་ཉིད་སྙིང་གའི་དབུས་སུ་མིང་བཀོད་ལ། དེ་ཉིད་བརྗོད་ཅིང་དེ་བཞིན་གཤེགས་
[253a.5]པ་ལ་སོགས་པའི་སེམས་ཅན་གྱི་ཁམས་ཐམས་ཅད་ནོར་བུ་ཆེན་པོའི་རིགས་ཀྱི་ལྷའི་དབང་བསྐུར་ཏེ། ནོར་བུའི་རིགས་ཀྱི་རང་བཞིན་དུ་བསམས་ལ་སྤྲུལ་པ་དང་མཚུངས་པའི་རང་བཞིན་གྱིས་རྣམ་པར་དག་པའི་རང་གི་ལྷའི་ངོ་བོ་བདག་ཉིད་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་
[253a.6]ཐམས་ཅད་ལ་སོགས་པའི་རིགས་ཐམས་ཅད་ཀྱི་དམ་པའི་ཆོས་ཀྱི་ཡེ་ཤེས་དངོས་གྲུབ་ཀྱི་ཆོ་ག་ཐམས་ཅད་རྒྱས་པའི་རྒྱུད་བསྟན་ནས། །ད་ནི་དེ་ནས་ཞེས་བྱ་བ་ལ་སོགས་པ་ནས། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱི་ལས་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་
[253a.7]ནོ། །དེ་བཞིན་གཤེགས་པ་ཐམས་ཅད་ནི་རིགས་སོ། །ཏིང་ངེ་འཛིན་གྱི་ལས་ནི་བསྒོམ་པའོ། །དེའི་དངོས་གྲུབ་ནི་ཆོས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་རྣམས་བསྐྱེད་པའོ། །དེ་སྟོན་པར་བྱེད་པ་ནི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་
[253b]
[253b.1]པའོ། །ཏིང་ངེ་འཛིན་གྱི་ལས་ནི་ཏིང་ངེ་འཛིན་གྱི་ལས་ཏེ། ཏིང་ངེ་འཛིན་བསྒོམ་པའོ། །གང་དང་སྦྱར་ཞེ་ན། སངས་རྒྱས་ཞེས་བྱ་བ་སྨོས་ཏེ། ཅིར་འགྱུར་ཞེ་ན། སངས་རྒྱས་བྱང་ཆུབ་རབ་བསྒྲུབ་པ། །ཞེས་བྱ་བ་སྨོས་ཏེ། སངས་རྒྱས་རྣམས་ཀྱི་བྱང་ཆུབ་ནི་སངས་རྒྱས་བྱང་ཆུབ་
[253b.2]སྟེ། དེ་རབ་ཏུ་སྒྲུབ་པར་བྱེད་པའོ། །གང་གིས་ཤེ་ན། འདི་ནི་བསྒོམ་པར་བྱ་ན་ཡང་། །ཞེས་བྱ་བ་སྨོས་ཏེ། གང་གི་ཕྱིར་ཏིང་ངེ་འཛིན་གྱི་ལས་འདི་རྣལ་འབྱོར་པས་བསྒོམས་ནས་དངོས་གྲུབ་ཀྱི་མཆོག་དམ་པ་ཆོས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱའི་དངོས་གྲུབ་ཐོབ་པར་
[253b.3]འགྱུར་ཏེ། དེའི་དོན་ནི་འདི་ལྟར་ཤེས་པར་བྱ་སྟེ། སྔ་མ་བཞིན་དུ་དེ་བཞིན་གཤེགས་པའི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པའི་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་གར་རྡོ་རྗེ་རྩེ་ལྔ་པ་ལ་
[253b.4]སྔགས་རྣམ་པར་བཀོད་ནས། དེ་ཟློས་ཤིང་དེ་བཞིན་གཤེགས་པའི་བདག་ཉིད་དུ་བསམ་པར་བྱའོ། །སེམས་ཅན་གྱི་ཁམས་ཐམས་ཅད་སངས་རྒྱས་ཀྱི་བྱང་ཆུབ་ལ་རབ་ཏུ་བཞག་ནས་རང་བཞིན་གྱིས་འོད་གསལ་བར་སྤྲུལ་བ་དང་མཚུངས་པའི་དེ་བཞིན་གཤེགས་པའི་བདག་ཉིད་དུ་བསྒོམ་
[253b.5]པར་བྱའོ། །རྡོ་རྗེ་སེམས་དཔའ་ནི་ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་མཐར་ཐུག་པའི་དེ་བཞིན་གཤེགས་པའི་རིགས་ཀྱི་རང་བཞིན་ནོ། །དེ་དག་གི་ཏིང་ངེ་འཛིན་ནི་ཆོས་ཀྱི་དཀྱིལ་འཁོར་ལས་བཤད་པའི་ལས་བསྒོམ་
[253b.6]པའོ། །རྡོ་རྗེ་སེམས་དཔའི་ཏིང་ངེ་འཛིན་དེ་དག་གི་བླ་ན་མེད་པའི་ལས་ནི་བྱང་ཆུབ་ཀྱི་སེམས་བསྐྱེད་པའོ། །མང་པོ་ནི་ནམ་མཁའ་ཁྱབ་པའོ། །སེམས་དཔའ་ཀུན་འགྱུར་ཐམས་ཅད་ཀྱང་། །ཞེས་བྱ་བ་ལ་སེམས་དཔའ་ནི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་
[253b.7]པའི་མཐར་ཐུག་པ་དེ་དག་བསྐྱེད་པ་ནི། སེམས་དཔའ་ཀུན་གྱི་རྣམ་པར་བརྟན་པ་དང་གཡོ་བ་སྣ་ཚོགས་པ་ཐམས་ཅད་ཀྱི་དངོས་པོའི་རང་གི་ངོ་བོ་ཐམས་ཅད་དུ་སོང་བས་ན་རྡོ་རྗེ་སེམས་དཔའ་ལ་སོགས་པ་བསྐྱེད་པའོ། །དེ་ལྟར་སྐྱེ་བ་དང་འཇིག་པ་ཤེས་པ་ཕུན་སུམ་ཚོགས་པ་འགྲུབ་པར་
[254a]
[254a.1]འགྱུར་རོ། །ཆོས་ཀྱི་དཀྱིལ་འཁོར་ལས་གསུངས་པའི་ལས་ཀྱི་ཕྱག་རྒྱའི་དངོས་གྲུབ་ཏུ་འགྱུར་རོ། །དེའི་དོན་ནི་འདི་ལྟར་ཤེས་པར་བྱ་སྟེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་ནས། ཕྱིས་ཆོས་ཀྱི་
[254a.2]དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་ལ་རང་གི་ལྷའི་སྔགས་རྣམ་པར་བསམས་ནས། དེ་ཉིད་བརྗོད་ཅིང་དངོས་པོ་ཐམས་ཅད་བདག་ཡིན་ནོ་ཞེས་བསྒོམས་ནས། བརྟན་པ་དང་གཡོ་བའི་དངོས་པོའི་བདག་ཉིད་ཐམས་ཅད་རང་ཡིན་ནོ་ཞེས་
[254a.3]ངེས་པར་བྱས་ནས་སྤྲུལ་པ་དང་མཚུངས་པའི་རང་བཞིན་གྱིས་འོད་གསལ་བའི་ལྷའི་ངོ་བོ་ནི་བདག་ཡིན་ནོ་ཞེས་བསྒོམ་པར་བྱའོ། །སྡིག་པ་དག་པའི་རྒྱུ་ཡི་ཕྱིར། །ཞེས་བྱ་བ་ནི་ཇི་ལྟར་ངན་སོང་གསུམ་གྱི་སྡིག་པ་དག་པའི་རྒྱུའི་ཕྱིར་རོ། །སྡིག་ཀུན་རབ་ཏུ་འདུལ་བྱེད་པ་ནི་བསད་
[254a.4]པས་འདུལ་བར་བཅོམ་ལྡན་འདས་ཀྱིས་གསུངས་པས་ན། དེ་བཞིན་དུ་མཚམས་མེད་པ་ལ་སོགས་པ་ལ་འཇུག་པའི་སེམས་ཅན་ཐམས་ཅད་སྡིག་པ་དག་པའི་རྒྱུ་མཚན་གྱིས་བསད་པའོ། །དད་པར་གྱུར་ན་འགྲུབ་པར་འགྱུར། །ཞེས་བྱ་བ་ནི་དད་པར་གྱུར་པས་སོ། །འདི་སྐད་
[254a.5]སྟོན་པ་ཡིན་ཏེ། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ནས། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་
[254a.6]བཅིངས་ཏེ། སྙིང་གའི་རྡོ་རྗེ་ལ་སྔགས་ཀྱི་ཡི་གེ་རྣམ་པར་བཀོད་ནས། དེ་བརྗོད་ཅིང་ཡིད་ཀྱིས་སེམས་ཅན་ཐམས་ཅད་ཀྱི་ཁམས་ཐམས་ཅད་རྣམ་པར་སྦྱངས་ཏེ། ཐུགས་རྗེ་ཆེན་པོ་ཐབས་ཀྱི་ཁྲོ་བོས་བཅོམ་ནས་རྡོ་རྗེའི་རིགས་ཀྱི་རང་བཞིན་དུ་བསྐྱེད་པར་བྱའོ། །སྡིག་ཀུན་རྣམ་པར་
[254a.7]དག་པའི་བདག །ཅེས་བྱ་བ་ནི་ལས་དང་ཉོན་མོངས་པ་ལ་སྡིག་པ་ཀུན་ཞེས་བྱ་བའི་སྒྲ་ནི་བརྗོད་པ་ཡིན་ནོ། །སྡིག་པ་ཐམས་ཅད་རྣམ་པར་དག་པའི་བདག་ཉིད་དུ་བསམས་པ་གང་ཡིན་པ་དེ་ནི་སྡིག་པ་ཀུན་རྣམ་པར་དག་པའི་བདག་ཉིད་དེ། ལས་དང་ཉོན་མོངས་པ་སྤངས་པའོ། །ལས་ཀུན་
[254b]
[254b.1]དག་པས་དགོས་པ་ཀུན། །ཞེས་བྱ་བ་ནི་སྐྱེས་བུ་གང་ཞིག་སྡིག་པ་ཐམས་ཅད་སྤངས་པས་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ངེས་པ་བསྐྱེད་པའོ། །དགོས་པ་ཀུན་དོན་ཐམས་ཅད་གྲུབ་པར་མཛད་པ་ལ་སོགས་པ་གཟུགས་དུ་མར་མཛད་པའོ། །རྣལ་འབྱོར་པ་དེའི་ལས་
[254b.2]ནི་འདི་ཡིན་ནོ་ཞེས་ལས་འདི་ཉིད་རང་བཞིན་གྱིས་རྣམ་པར་དག་པར་ལྷག་པར་མོས་པ་བྱེད་པ་ཡིན་གྱི། གཞན་གྱི་ནི་མ་ཡིན་ནོ་ཞེས་དེ་ལྟར་ངེས་པ་བསྐྱེད་པའི་བསམ་པས་བསྒོམས་ན་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་
[254b.3]ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་པདྨའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིང་སྟེ། སྙིང་གའི་རྡོ་རྗེ་པདྨ་ལ་རང་གི་སྔགས་རྣམ་པར་བསམས་ཏེ། དེ་ཉིད་བརྗོད་ཅིང་ཆོས་ཐམས་ཅད་
[254b.4]རང་བཞིན་གྱིས་རྣམ་པར་དག་པའོ་ཞེས་ངེས་པ་བསྐྱེད་པས། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་པདྨའི་རིགས་ཀྱི་ངོ་བོར་ཡིད་ཀྱིས་སྤྲུལ་ཏེ་རང་བཞིན་གྱིས་རྣམ་པར་དག་ཅིང་གཟུགས་བརྙན་དང་མཚུངས་པའི་རང་གི་ལྷའི་གཟུགས་
[254b.5]སུ་བདག་ཉིད་བསྒོམ་པར་བྱའོ། །ནོར་བུ་ཆེན་པོའི་རིགས་ཀྱི་རིགས་དེ་ལ་སྲེད་པ་ནི་དེ་ཐོབ་པར་འདོད་པའོ། །དེ་གང་ལ་ཡོད་པ་དེ་དག་ཐམས་ཅད་ནི་སྲེད་ལྡན་ནོ། །དེ་དག་ཐམས་ཅད་ལ་སྲེད་པས་ཅི་ཞིག་ཏུ་འགྱུར་ཞེ་ན། དབུལ་བ་ཞེས་བྱ་བ་སྨོས་ཏེ། ནོར་བུའི་རིགས་ཀྱི་དབུལ་བའི་སྡུག་
[254b.6]བསྔལ་དེ་དག་བསལ་ནས་ནོར་བུའི་རིགས་ལ་མངོན་པར་དད་པས་དེ་བསྒོམ་པ་དང་རབ་ཏུ་ལྡན་པར་དེ་རྟོགས་པས་སྤངས་པ་ཡིན་ནོ། །བསམ་པ་ཀུན་བསྐང་བ་ནི་ནོར་བུའི་རིགས་ཀྱི་འདོད་པ་གྲུབ་པའོ། །རྟག་ཏུ་ནི་དུས་ཐམས་ཅད་དུའོ། །དོན་ཀུན་གྲུབ་པས་ཀུན་བདག་ནི་ནོར་
[254b.7]བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་རྣལ་འབྱོར་བསྒོམ་པ་དང་རབ་ཏུ་ལྡན་པས་ན་དོན་ཀུན་གྲུབ་ཅིང་ཀུན་གྱི་བདག་ཉིད་དོ། །དེ་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ།
[255a]
[255a.1]ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་རིན་པོ་ཆེ་ལས་སྔགས་རྣམ་པར་བསམས་ནས་དེ་ཉིད་ཟློས་ཤིང་། ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་
[255a.2]བཤད་པའི་ལྷའི་ངོ་བོར་བདག་ཉིད་ངེས་པ་བསྐྱེད་ནས། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ནོར་བུའི་རིགས་ཀྱིས་དབང་བསྐུར་ནས། ནོར་བུའི་རིགས་ཀྱི་ངོ་བོ་བསྐྱེད་དེ། དེའི་རྗེས་ལ་རང་བཞིན་གྱིས་འོད་གསལ་བ་སྤྲུལ་
[255a.3]པ་དང་མཚུངས་པར་བདག་ཉིད་རྣམ་པར་བསམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པ་ནོར་བུའི་རིགས་ཐམས་ཅད་ཀྱི་ཏིང་ངེ་འཛིན་གྱི་ལས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་
[255a.4]སོགས་པ་བསྒོམས་པས་གང་གི་ཚེ་མཚན་མ་ཐོབ་པར་གྱུར་པ་དེའི་ཚེ་རྡོ་རྗེ་ཕྲ་མོ་བསྒོམས་པས་མངོན་པར་ཤེས་པ་ལྔ་བསྐྱེད་པར་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པའི་རིགས་ཐམས་ཅད་ཕྲ་མོའི་ཡེ་ཤེས་ཀྱི་དངོས་གྲུབ་ཀྱི་
[255a.5]རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ནི་རིགས་སོ། །ཕྲ་མོའི་ཡེ་ཤེས་ནི་རྡོ་རྗེ་ཕྲ་མོའི་ཏིང་ངེ་འཛིན་ཏེ། མངོན་པར་ཤེས་པ་ལྔ་བསྐྱེད་པའོ། །དེའི་དངོས་གྲུབ་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་མངོན་སུམ་དུ་བྱེད་པའོ། །
[255a.6]དེ་སྟོན་པར་བྱེད་པའི་རྒྱུད་གསུངས་པ་ནི། བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །རྡོ་རྗེ་ཕྲ་མོའི་ཚུལ་གྱིས་ནི། །རྡོ་རྗེ་ཕྲ་མོ་བསྒོམ་པའོ། །རྟག་ཏུ་ནི་གཏན་དུའོ། །སྦྱོར་བ་ནི་བསྒོམ་པའོ། །འབད་པ་ཀུན་གྱིས་ནི་བྱ་བ་ཐམས་ཅད་སྤངས་ཏེ། དེ་ལ་གཞོལ་བའི་སེམས་ཀྱིས་
[255a.7]ཀུན་དུ་བསྒོམ་པའོ། །རྣམ་པའི་མཆོག་ནི་ཀུན་ལྡན་པ། །ཞེས་ཇི་ལྟར་བཤད་པའི་མངོན་ཤེས་ལྔ་ནི་ཐོབ་པར་འགྱུར་ཞས་བྱའོ། །འདི་སྐད་སྟོན་པ་ཡིན་ཏེ། གང་གི་ཆོས་ཀྱི་དཀྱིལ་འཁོར་གྱི་རྣལ་འབྱོར་པས་མཚན་མ་ཐོབ་པར་གྱུར་པ་དེའི་ཚེ་མངོན་པར་ཤེས་པ་བསྐྱེད་པའི་ཕྱིར། རྡོ་རྗེ་
[255b]
[255b.1]ཕྲ་མོ་བསྒོམ་པ་བྱས་ན་སྔ་མ་བཞིན་དུ་མངོན་པར་ཤེས་པ་ལྔར་འགྱུར་རོ། །སློབ་དཔོན་མ་ཡིན་གཞན་དང་ནི། །ཞེས་བྱ་བ་ལ་སོགས་པ་ནི་དེ་ལ་དེ་བཞིན་གཤེགས་པ་ཐམས་ཅད་ཀྱི་དེ་བཞིན་གཤེགས་པ་དང་། རྡོ་རྗེའི་རིགས་ལ་སོགས་པ་རྣམས་ཀྱི་དམ་ཚིག་ལ་སྤྱོད་པས་ན་སློབ་དཔོན་ནོ། །
[255b.2]དེ་ཉིད་དམ་གཞན་པའི་ལུགས་རྣམས་ལ་སློབ་པས་ན་སློབ་དཔོན་ནོ། །དེའི་སློབ་དཔོན་མ་ཡིན་པ་ནི། སློབ་དཔོན་མ་ཡིན་གཞན་དང་ནི། །ཞེས་བྱ་སྟེ། མདོ་སྡེ་པ་དང་། མུ་སྟེགས་ཅན་རྣལ་འབྱོར་གྱི་རྒྱུད་ཀྱི་སློབ་དཔོན་དུ་མི་འགྱུར་བ་གང་ཡིན་པ་དེ་ནི་གཞན་ཡིན་ནོ། །གཞན་གྱི་མདུན་
[255b.3]དུ་ཕྱག་རྒྱ་མི་བརྗོད་དེ། རྣལ་འབྱོར་གྱི་རྒྱུད་འདིར་དབང་བསྐུར་བའམ། སློབ་དཔོན་གྱི་མདུན་དུ་བསྟན་པར་བྱའོ། །སློབ་མིན་ལ་ཞེས་བྱ་བ་ནི། རབ་ཏུ་བྱུང་བ་ལ་སོགས་པ་དང་འབྲེལ་བའི་སློབ་མ་དེ་ལ་བསྟན་པར་བྱ་བ་ཐོབ་པར་འགྱུར་རོ་སྙམ་ནས་བུ་མིན་པ་ཞེས་བྱ་བ་སྨོས་ཏེ། རྣལ་
[255b.4]འབྱོར་གྱི་རྒྱུད་ཀྱི་ཆོ་གས་འདིར་བཅུག་པའི་བུའོ། །བུ་མ་ཡིན་པ་ནི་དེའི་བུ་མ་ཡིན་པའོ། །དེ་ནི་འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་རིགས་ཀྱི་ཆོས་ཀྱི་དཀྱིལ་འཁོར་གྱི་རྣལ་འབྱོར་པས་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་སྒྲུབ་པར་འདོད་པས་
[255b.5]རྣལ་འབྱོར་གྱི་རྒྱུད་ཀྱི་དཀྱིལ་འཁོར་ཆེན་པོར་འཇུག་པའི་སློབ་མ་རྣམས་དང་། རྣལ་འབྱོར་གྱི་རྒྱུད་དུ་དབང་བསྐུར་བ་ཐོབ་པའི་སློབ་དཔོན་རྣམས་ལ་ཕྱག་རྒྱ་དང་སྔགས་བསྟན་པར་བྱའོ། །དེ་ལས་གཞན་པ་རྣམས་ལས་ནི་མ་ཡིན་ནོ། །དེ་ལྟར་གདམས་ངག་ཐོབ་པས་ཆོས་ཀྱི་དཀྱིལ་
[255b.6]འཁོར་གྱི་རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བསྒོམ་པར་བྱེད་པ་ནི་ཇི་སྲིད་དུ་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རྡོ་རྗེ་ཕྲ་མོ་བསྒོམས་པས་མངོན་པར་ཤེས་པ་ལྔ་བསྐྱེད་ལ། ཕྱིས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་རྣམས་མཚན་ཐོག་
[255b.7]ཐག་བསྒོམས་ན་འགྲུབ་པར་འགྱུར་རོ། །རྡོ་རྗེ་ཕྲ་མོའི་ཚུལ་གྱིས་ནི། །རྡོ་རྗེ་ཕྲ་མོ་བསྒོམས་པའོ། །རྡོ་རྗེ་ཕྲ་མོའི་སྦྱོར་བ་དེས། །སྣ་ནས་ཧཱུཾ་བྱུང་ལྡན་གྱུར་ན། །ཞེས་བྱ་བ་ནི་སྣ་རྩེ་ལས་འབྱུང་བ་ནི་ཧཱུཾ་ནི་སྣ་ནས་ཧཱུཾ་བྱུང་ངོ་། །སྣ་ལས་བྱུང་བའི་ཧཱུཾ་གང་ཡིན་པ་དེ་ནི་ལྡན་གྱུར་པའོ། །དེའི་རྗེས་
[256a]
[256a.1]ལ་ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པ་རྡོ་རྗེ་ཁྲོ་བོ་དེ་དག་གི་ཏིང་ངེ་འཛིན་ཏོ། །དེ་ལ་གནས་པ་ནི་ཕྱག་རྒྱ་ཆེན་པོ་དང་། ཆོས་དང་ལས་དང་དམ་ཚིག་གི་ཕྱག་རྒྱ་ལ་གནས་པའི་རང་གི་ཁྲོ་བོའི་ཏིང་ངེ་འཛིན་ལ་གནས་ནས་ལས་ཐམས་ཅད་
[256a.2]བསྒྲུབས་ལ། རྡོ་རྗེ་རིགས་ཀྱི་མངོན་པར་ཤེས་པ་ལྔ་བསྐྱེད་པར་བྱའོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པ་རང་གི་ལྷའི་སྒྲུབ་པ་པོས་རང་གི་ལྷའི་ཕྱག་རྒྱ་ཆེན་པོ་བསྒོམས་ཏེ། ཇི་སྲིད་མཚན་
[256a.3]མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྣའི་རྩེ་མོར་སྣ་ནས་བྱུང་བའི་ཧཱུཾ་ལས་ཕྲ་མོའི་རྡོ་རྗེ་རྣམ་པར་བསམས་ཏེ། ཧཱུཾ་ཟློས་ཤིང་ཇི་སྲིད་དུ་མངོན་པར་ཤེས་པ་ལྔ་བསྐྱེད་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེའི་རྗེས་ལ་ཕྱག་རྒྱ་ཆེན་པོ་ལ་སོགས་པ་བསྒྲུབས་པས་མཚན་
[256a.4]ཐོག་ཐག་བསྒོམ་པར་བྱའོ། །རྡོ་རྗེ་ལྟ་བས་བལྟས་ན་ནི། །ཞེས་བྱ་བ་ནི་བཤད་ཟིན་ཏོ། །དེའི་ཏིང་ངེ་འཛིན་ནི་རྡོ་རྗེ་ལྟ་བའི་སྙིང་པོས་བསྐྱེད་པའོ། །རྡོ་རྗེ་ཕྲ་མོའི་ཚུལ་གྱིས་ནི། །རྡོ་རྗེ་ཕྲ་མོ་བསྒོམས་པའོ། །དེ་བས་ན་དེ་ནི་པདྨ་ཆེན་པོའི་ཏིང་ངེ་འཛིན་གནས་ཞེས་བྱའོ། །པདྨའི་
[256a.5]རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བ་ལ་སོགས་པ་དེ་དག་ནི་པདྨ་ཆེན་པོ་སྟེ། དེ་ལས་བཤད་པའི་ཕྱག་རྒྱ་ཆེན་པོ་ནི་པདྨའི་ཏིང་ངེ་འཛིན་ཏོ། །དེ་ལ་གནས་པ་ནི་པདྨ་ཆེན་པོའི་ཏིང་ངེ་འཛིན་ལ་གནས་པའོ། །འདོད་ཆགས་དངོས་གྲུབ་ཐོབ་པར་འགྱུར། །ཞེས་བྱ་
[256a.6]བ་ལ་འདོད་ཆགས་ནི་པདྨའི་རིགས་སོ། །དེའི་དངོས་གྲུབ་ནི་པདྨའི་རིགས་ཀྱི་མངོན་པར་ཤེས་པ་ལྔ་བསྐྱེད་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། པདྨའི་རིགས་སུ་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། གང་གི་ཚེ་མཚན་མ་ཐོབ་
[256a.7]པར་གྱུར་པ་དེའི་ཚེ་ཕྲ་མོའི་རྡོ་རྗེ་བསྒོམས་ལ་ཇི་སྲིད་པདྨའི་རིགས་ཀྱི་མངོན་པར་ཤེས་པ་ལྔ་བསྐྱེད་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་ཕྱག་རྒྱ་ཆེན་པོ་ལ་སོགས་པ་བསྒོམས་ཏེ། ཇི་སྲིད་དུ་པདྨའི་རིགས་ཀྱི་ཆོས་ཀྱི་དཀྱིལ་འཁོར་ལས་
[256b]
[256b.1]བཤད་པའི་ཕྱག་རྒྱ་ཆེན་པོ་ལ་སོགས་པ་དངོས་གྲུབ་འགྲུབ་པར་འགྱུར་བ་དེ་སྲིད་ཀྱི་བར་དུ་བྱའོ། །ཤིན་ཏུ་ཕྲ་བའི་འབར་ལྟ་བས། །ཞེས་བྱའོ། །འབར་བའི་ལྟ་བ་གང་ལ་ཡོད་པ་ནི་འབར་བའི་ལྟ་བའི་རྣམ་པའོ། །དེས་དོན་ཐམས་ཅད་འདྲེན་པར་འགྱུར་རོ། །འབར་བའི་ལྟ་བ་
[256b.2]དང་ལྡན་པ་གང་ཡིན་པ་དེས་དོན་ཐམས་ཅད་འདྲེན་པའི་ཁྱད་པར་ཇི་ལྟ་བ་ཞིག་བསྒོམ་པར་བྱ་ཞེ་ན། ཤིན་ཏུ་ཕྲ་བའི་འབར་བའི་ལྟ་བས་ཞེས་བྱ་བ་སྨོས་ཏེ། ཤིན་ཏུ་ཕྲ་བ་ནི་རབ་ཏུ་ཕྲ་བའོ། །ཏིང་ངེ་འཛིན་གང་གིས་འགྲུབ་པར་འགྱུར་ཞེ་ན། རྡོ་རྗེ་རིན་ཆེན་ཏིང་འཛིན་གྱིས། །ཞེས་བྱ་བ་སྨོས་ཏེ། ནོར་
[256b.3]བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པ་ལ་སོགས་པ་དེ་དག་ནི་རྡོ་རྗེ་རིན་ཆེན་ནོ། །དེའི་ཏིང་ངེ་འཛིན་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་རྡོ་རྗེ་རིན་པོ་ཆེའི་ཏིང་ངེ་འཛིན་དེ་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་
[256b.4]རྒྱ་ཆེན་པོ་ལ་སོགས་པའི་རྣལ་འབྱོར་གྱིས་ཞེས་བྱ་བའི་དོན་ཏོ། །རྡོ་རྗེ་ཕྲ་མོའི་ཚུལ་གྱིས་ནི། །ཞེས་བཤད་ཟིན་ཏོ། །རྡོ་རྗེ་ཕྲ་མོའི་ཚུལ་གྱིས་ནི། །དོན་ནི་ཐམས་ཅད་འདྲེན་པར་འགྱུར། །ཞེས་བྱ་བ་སྟེ། དོན་ཡང་ཡིན་ལ་ཐམས་ཅད་ཀྱང་དེ་ཡིན་པས་ན་དོན་ཐམས་ཅད་དེ། ནོར་བུའི་
[256b.5]རིགས་ཀྱི་མངོན་པར་ཤེས་པ་ལྔའོ། །དེའི་འདྲེན་པ་ནི་རྟོགས་པའོ། །དེ་ནི་འདི་སྐད་སྟོན་པ་ཡིན་ཏེ། ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བསྒོམས་ནས་གང་གི་ཚེ་མཚན་མ་ཐོབ་པར་གྱུར་པ་དེའི་ཚེ། རྡོ་རྗེ་ཕྲ་མོ་བསྒོམས་
[256b.6]ལ་ཇི་སྲིད་མངོན་པར་ཤེས་པ་ལྔ་ཐོབ་པར་གྱུར་པ་དེ་སྲིད་ཀྱི་བར་དུ་བྱའོ། །དེ་ལྟར་དེ་བཞིན་གཤེགས་པ་ལ་སོགས་པས་རིགས་ཐམས་ཅད་ཀྱི་ཕྲ་མོའི་ཡེ་ཤེས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་
[256b.7]སོགས་པ་བསྒོམ་པ་ན་མཚན་མ་འདི་དག་བྱུང་བར་གྱུར་ན་མངོན་པར་ཤེས་པ་ལྔ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་སྤྱན་གྱི་ཡེ་ཤེས་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །
[257a]
[257a.1]དེ་བཞིན་གཤེགས་པ་ཐམས་ཅད་ནི་རིགས་སོ། །སྤྱན་གྱི་ཡེ་ཤེས་ནི་སྐར་མའི་རྣམ་པ་ལ་སོགས་པ་མཐོང་བའོ། །དེའི་དངོས་གྲུབ་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བསྐྱེད་པའོ། །རྒྱུད་ནས་སྟོན་པས་ན་རྒྱུད་དེ། བཅོམ་
[257a.2]ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །གང་གི་ཚེ་ཕྱག་རྒྱའམ་ཏིང་ངེ་འཛིན་ཞེས་བྱ་བ་ལ་སོགས་པ་གང་གི་ཚེ་ནི། དུས་གང་ཞིག་གི་ཚེ་ནའོ། །ཕྱག་རྒྱ་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པའོ། །ཏིང་ངེ་འཛིན་ནི་རྡོ་རྗེ་ཕྲ་མོའི་དབྱེ་བ་
[257a.3]རྣམ་པ་ཉི་ཤུའོ། །སྒྲུབ་པའི་རྩོལ་བར་གྱུར་པ་དེ། །ཞེས་བྱ་བ་ནི་བསྒྲུབ་པའི་དོན་མངོན་སུམ་དུ་བྱེད་པའི་དོན་ཏོ། །རྩོལ་བར་གྱུར་པ་ནི་ཉེ་བར་མཁོ་བའོ། །གང་གི་ཚེ་ན་དུས་དེའི་ཚེའོ། །མཁའ་ནི་ནམ་མཁའོ། །མཁའ་ནི་རྡུལ་ཕྲ་རབ་བོ། །དཀར་པོར་གྱུར་པ་དེ་མཐོང་བ་ནི་འོད་ཟེར་
[257a.4]དཀར་པོའོ། །རྣམ་པ་ཅི་འདྲ་བ་ཞིག་ཅེ་ན། སྐར་མ་དང་འདྲ་ཞེས་བྱ་བ་སྨོས་ཏེ། རྣལ་འབྱོར་པ་དེས་མཐོང་བའོ། །དེའི་ཚེ་ནི་དུས་དེ་ནའོ། །བློ་ལྡན་ནི་ཤེས་པ་དང་ལྡན་པའམ། ཤེས་ཤིང་བློ་གྲོས་དང་ལྡན་པའོ། །ཅི་ཞིག་ཤེས་ཤེ་ན་སངས་རྒྱས་ཀྱི། སྤྱན་ནི་བདག་གིས་ཐོབ་པར་ཤེས། །
[257a.5]ཞེས་བྱ་བ་སྨོས་ཏེ། སངས་རྒྱས་རྣམས་ཀྱི་སྤྱན་ནི་སངས་རྒྱས་ཀྱི་སྤྱན་ཏེ། ཐམས་ཅད་མཁྱེན་པའི་ཡེ་ཤེས་སོ། །དེ་ཐོབ་པར་བྱེད་པའི་རྒྱུ་མཚན་ཡིན་པའི་ཕྱིར་འདི་ལས་ཀྱང་སངས་རྒྱས་ཀྱི་སྤྱན་ཞེས་བཤད་དོ། །དེ་ཕྱིན་ཆད་ནི་སངས་རྒྱས་ཀྱི། རྟོག་པ་ཀུན་ལས་བསྒྲུབ་པར་བྱ། །ཞེས་བྱ་བ་
[257a.6]ནི་མངོན་པར་ཤེས་པ་ལ་སོགས་པ་བསྐྱེད་པའོ། །ཇི་སྙེད་དངོས་པོ་ཡོད་གྱུར་པ། །ཞེས་བྱ་བ་ལ་སོགས་པ་ལ། ཇི་སྙེད་པ་ནི་བརྟན་པ་དང་གཡོ་བའི་དངོས་པོའོ། །ཡོད་པ་ནི་བདག་པོ་སྟེ། ཁམས་གསུམ་པ་དེ་སྙེད་པ་ཐམས་ཅད་དེ་བཞིན་གཤེགས་པའི་གཟུགས་བརྙན་གྱི་རྣམ་པ་
[257a.7]རྣལ་འབྱོར་པས་མཁའ་ལ་རྒྱུག་པ་མཐོང་བར་འགྱུར་རོ། །ཇི་ལྟར་རྒྱུག་ཅེ་ན། འགྲོ་བ་དང་ནི་འོང་བའང་རུང་། །ཞེས་བྱ་བ་སྨོས་ཏེ། གཟུགས་བརྙན་དེ་དང་དེ་དག་མཐོང་ཞིང་ཤེས་པའོ། །རྡོ་རྗེ་སྤྱན་ནི་རྣམ་པར་དག །ཅེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་བྱང་ཆུབ་ཀྱི་
[257b]
[257b.1]སེམས་ལ་སོགས་པའི་ངོ་བོར་བསྐྱེད་པ་ནི་རྡོ་རྗེའི་སྤྱན་རྣམ་པར་དག་པའོ། །དེ་དང་ལྡན་པ་ནི་རྡོ་རྗེའི་སྤྱན་རྣམ་པར་དག་པ་དང་ལྡན་པ་སྟེ། དེའི་རྡོ་རྗེ་སྤྱན་རྣམ་པར་དག་པའོ། །རྡོ་རྗེ་སྤྱན་རྣམ་པར་དག་པ་སྟེ། ཐོབ་པའི་རྒྱུར་གྱུར་པ་ཤེས་པའི་རྣལ་འབྱོར་བ་ནི་རྡོ་རྗེ་སེམས་དཔའ་ལ་སོགས་
[257b.2]པའི་མཆོད་པ་སོ་སོར་སྣང་བ་ཐོབ་པར་གྱུར་པ་དེས། མཆོད་པའི་དངོས་གྲུབ་ཐོབ་པར་གྱུར། །ཞེས་བྱའོ། །གཡས་པའམ་ནི་གཡོན་ཕྱོགས་ཀྱི། །ཞེས་བྱ་བ་ནི་གཡས་ཕྱོགས་དང་གཡས་ཕྱོགས་མ་ཡིན་པ་ཐམས་ཅད་དེ། ལ་ལར་ནི་གཡས་པ་ནི་གཡས་ཡིན་ལ་གཡས་པ་མ་ཡིན་པ་
[257b.3]རྣམས་གཡོན་ཞེས་བརྗོད་དོ། །གཡས་ཕྱོགས་དང་གཡས་ཕྱོགས་མ་ཡིན་པའི་ལོགས་སུ་གནས་པའི་ངང་ཚུལ་གང་ལ་ཡོད་པ་ནི་གཡས་དང་གཡོན་གྱི་ཕྱོགས་ཀྱི་ནམ་མཁའ་ལ་དེ་མིག་གིས་མཐོང་བར་འགྱུར་རོ། །ནམ་མཁའ་དབྱིངས་ཉིད་ནི་རྡུལ་ཕྲ་རབ་ཀྱི་ཆ་ཤས་
[257b.4]སོ། །ཁྱད་པར་ཇི་ལྟ་བུ་ཞེ་ན། སྤྲིན་འདྲ་མྱུར་དུ་འཁོར་བ་ནི། །ཞེས་བྱ་བ་ཡིན་ཏེ། །སྤྲིན་སྔོན་པོ་དང་མཚུངས་པར་དེ་མཐོང་ཡང་རྣལ་འབྱོར་པས་འཇིགས་པར་མི་འགྱུར་བས་ན་འཇིགས་པར་མི་འགྱུར་བའོ། །རྒྱུ་ཅིའི་ཕྱིར་ཞེ་ན། རྡོ་རྗེ་ལས་བྱུང་ཕྱག་རྒྱ་དེ། །ཞེས་
[257b.5]བྱ་བ་སྨོས་ཏེ། ཕྱག་ན་དེ་ཡང་བཟུང་ན་ནི། །ཕྱག་རྒྱའི་མིག་ནི་འགྲུབ་པར་འགྱུར། །ཞེས་བྱ་སྟེ། མིག་གི་རྣམ་པར་ཤེས་པ་དེས་ཡོངས་སུ་དཔྱད་པས་ན་བཟུང་བའོ། །ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་དེ་བཟུང་ན་ཕྱག་རྒྱ་
[257b.6]འགྲུབ་པར་འགྱུར་རོ། །གང་འགྲུབ་པར་འགྱུར་ཞེ་ན། མིག་གི་ཕྱག་རྒྱ་ཞེས་བྱ་བ་སྨོས་ཏེ། ནམ་མཁའི་སྤྲིན་སྔོན་པོ་དང་མཚུངས་པ་ནི་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་གྱི་ཕྱག་རྒྱའོ། །དེར་སྣང་བའི་མིག་ནི་མིག་གི་རྣམ་པར་ཤེས་པ་སྟེ། མིག་གི་ཕྱག་རྒྱ་དེ་གང་ལ་ཡོད་
[257b.7]པའི་རྣལ་འབྱོར་པ་དེ་ནི་མིག་གི་ཕྱག་རྒྱ་ཅན་ནོ། །དེ་ལྟར་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་གྱི་རྣལ་འབྱོར་པའི་མིག་གི་ཤེས་པ་བསྟན་ནས། ད་ནི་པདྨའི་རིགས་ཀྱི་རྣལ་འབྱོར་བསྟན་པ་ནི། གང་ཚེ་སྐྱ་དམར་དཀར་བ་དང་། །ཞེས་བྱ་བ་ལ་སོགས་པ་སྟེ། པདྨའི་རིགས་
[258a]
[258a.1]ཀྱི་རྣལ་འབྱོར་བས་གང་གི་ཚེ་སྐྱེ་བ་ནི་ཁ་དོག་དཀར་བའོ། །དམར་བ་ནི་ཁ་དོག་དམར་བའོ། །དཀར་བ་ནི་དྲི་མ་མེད་པའོ། །སྣ་ཚོགས་ནི་ཁ་དོག་ལྔ་པ་སྟེ། དཀྱིལ་འཁོར་ནི་ཆོས་ཀྱི་དཀྱིལ་འཁོར་རོ། །མཐོ་བ་ནི་མཁའ་ལའོ། །དེའི་ཚེ་ནི་དུས་དེར་རོ། །དགོས་པ་ཉིད་
[258a.2]འགྱུར་ཞིང་ནི་པདྨའི་རིགས་ཀྱི་ཆོས་ཀྱི་དཀྱིལ་འཁོར་གྱི་གཟུགས་ཀྱིས་སོ། །འགྲུབ་པར་འགྱུར་བ་ནི་རྣལ་འབྱོར་པས་སོ། །མངོན་པར་ཤེས་པ་ལྔ་བསྐྱེད་ཅིང་བསྒྲུབ་པས་ཅིར་འགྱུར་ཞེ་ན། འཁོར་ལོའི་སྤྱན་ནི་ཞེས་བྱ་བ་སྨོས་ཏེ། འཁོར་ལོ་ནི་དཀྱིལ་འཁོར་རོ། །སྤྱན་ནི་དེའི་རྣམ་
[258a.3]པ་ཅན་གྱི་མིག་གི་རྣམ་པར་ཤེས་པ་སྟེ། འཁོར་ལོའི་སྤྱན་རྣལ་འབྱོར་པ་གང་ལ་ཡོད་པ་འདི་ནི་སྤྱན་ནོ། །འགྲུབ་པ་ནི་དེའི་དཀྱིལ་འཁོར་ཇི་ལྟ་བ་བཞིན་དུ་མཐོང་བའོ། །དེ་ལྟར་པདྨའི་རིགས་ཀྱི་སྤྱན་གྱི་ཡེ་ཤེས་ཀྱི་དངོས་གྲུབ་བསྟན་ནས། ད་ནི་ནོར་བུའི་རིགས་ཀྱི། མཁའ་ལ་
[258a.4]རིན་ཆེན་འདྲ་བ་དང་། །ཞེས་བྱ་བ་ལ་སོགས་པ་སྨོས་ཏེ། ནམ་མཁའ་ནི་གྲགས་པར་ཟད་དོ། །ནམ་མཁའ་དེ་ལ་པདྨ་རཱ་ག་ལ་སོགས་པ་ནོར་བུ་དང་འདྲ་བ་དང་། དབྱིག་ལ་སོགས་དང་འདྲ་བར་ནི། །ཞེས་བྱ་བ་ནི་དབྱིག་ནི་དོང་ཚེ་ལ་སོགས་པའི་ཟོང་སྟེ་དེ་དང་འདྲ་བའོ། །གང་གི་ཚེ་
[258a.5]ནི་དུས་གང་གི་ཆེའོ། །ནོར་བུའི་རིགས་ཀྱི་རྣལ་འབྱོར་པས་ནམ་མཁའ་ལ་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་མཐོང་བར་འགྱུར་རོ། །དེའི་ཚེ་མཁའ་མིག་འགྲུབ་པར་འགྱུར། །ཞེས་བྱ་བ་ནི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ནི་རྣམ་པར་དག་པའོ། །མིག་ནི་
[258a.6]མིག་གི་རྣམ་པར་ཤེས་པ་སྟེ། རྣལ་འབྱོར་པ་གང་ལ་ནམ་མཁའི་མིག་ཡོད་པ་དེས་འགྲུབ་པར་འགྱུར་ཏེ། ནོར་བུའི་རིགས་ཀྱི་དངོས་གྲུབ་ཏུ་འགྱུར་ཞིང་ནོར་བུའི་རིགས་ཀྱི་དཀྱིལ་འཁོར་ཐུན་མཚམས་ཐམས་ཅད་ཀྱི་ཚེ་ལན་ཅིག་མ་ཡིན་པར་མཐོང་བར་འགྱུར་རོ། །འཕགས་པ་
[258a.7]དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ལ་དེ་བཞིན་གཤེགས་པ་ཐམས་ཅད་ལ་སོགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་གྱི་རྒྱུད་ཕྱི་མའི་བཤད་པ་རྫོགས་སོ།། །།དེ་ལྟར་དེ་བཞིན་གཤེགས་པ་ལ་སོགས་
[258b]
[258b.1]པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་གྱི་རྒྱུད་ཕྱི་མ་བཤད་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་ནི་རང་གི་རིགས་ཀྱི་དཀྱིལ་འཁོར་ཆེན་པོ་གསུངས་པའི་རང་གི་ལྷའི་རྣལ་འབྱོར་
[258b.2]བྱས་ལ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་རང་གི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིང་བ་ནི་རྒྱུད་ཕྱི་མ་བསྒྲུབ་པའི་ཚེ་ཡང་བྱའོ་ཞེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་
[258b.3]གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལས་ཀྱི་དམ་པའི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་སོ། །དེ་དག་གི་ལས་ནི་ལས་ཀྱི་དཀྱིལ་
[258b.4]འཁོར་རོ། །དམ་པའི་དངོས་གྲུབ་ནི་ཕྱག་རྒྱ་ཆེན་པོའི་དངོས་གྲུབ་བོ། །དེ་སྟོན་པར་བྱེད་པ་ནི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །ཆོས་ཀྱི་དཀྱིལ་འཁོར་ཚུལ་དུ་ནི། །འདོད་ཆགས་བདེ་བ་རྣམ་སྨིན་ཕྱིར། །གཙོ་བོ་ཐམས་ཅད་མཆོད་བྱས་
[258b.5]ནས། །ཞེས་བྱ་བ་ནི་ལས་ཀྱི་དཀྱིལ་འཁོར་ལ་སྤྲུལ་ལ། ལས་ཀྱི་དཀྱིལ་འཁོར་གྱི་རྣལ་འབྱོར་པས་དེས་དེ་བཞིན་གཤེགས་པ་ཐམས་ཅད་མཆོད་ན། སངས་རྒྱས་དངོས་གྲུབ་ཐོབ་པར་འགྱུར། །ཞེས་བྱའོ། །དོན་གང་གི་ཕྱིར་ཞེ་ན། འདོད་ཆགས་བདེ་བ་རྣམ་སྨིན་ཕྱིར། །ཞེས་བྱ་བ་སྨོས་
[258b.6]ཏེ། ཆོས་བདག་མེད་པའི་ཆགས་པས་འདོད་ཆགས་བདེ་བའོ། །དེའི་རྣམ་པར་སྨིན་པ་ནི་རང་གི་རིགས་འབྱུང་བའོ། །དེའི་ཕྱིར་ནི་རྣལ་འབྱོར་པས་གཙོ་བོ་ཐམས་ཅད་མཆོད་པའི་ཕྱིར། སངས་རྒྱས་དངོས་གྲུབ་ནི་དེ་བཞིན་གཤེགས་པ་ལྔའི་ལས་ཀྱི་དཀྱིལ་འཁོར་ལས་བཤད་པའི་
[258b.7]ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐོབ་པའོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པ་ཐམས་ཅད་ཀྱི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས། ཕྱིས་ལས་ཀྱི་དཀྱིལ་འཁོར་
[259a]
[259a.1]ལས་བཤད་པའི་རང་གི་ལྷའི་སྙིང་པོ་བརྗོད་ཅིང་སྤྲོས་ལ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་བྱང་ཆུབ་ཏུ་སེམས་བསྐྱེད་པ་ལ་སོགས་པའི་མཆོད་པ་རྣམས་ཀྱིས་ཡང་
[259a.2]དག་པར་མཆོད་ལ། སྔར་བཤད་པའི་ཚུལ་གྱིས་བདག་ཉིད་ཡོངས་སུ་བསྐོར་ནས་ཡིད་ཀྱིས་གཞག་པར་བྱའོ། །དེ་ནས་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་རྣམ་པ་བཅུ་དྲུག་གིས་བདག་ཉིད་ཡང་དག་པར་མཆོད་ལ། དེའི་རྗེས་ལ་ཕྱག་རྒྱ་ཆེན་པོ་བཅིངས་ཏེ། དེ་
[259a.3]བཞིན་གཤེགས་པའི་བདག་ཉིད་དུ་བསྒོམ་པར་བྱའོ། །ལས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པ་ལས་ཀྱི་ཕྱག་རྒྱ་བཞིས་གསང་བའི་མཆོད་པ་རབ་ཏུ་མཆོད་པར་བྱ་སྟེ། འདོད་ཆགས་བདག་ཅེས་སྒོམ་བྱེད་ཅིང་། །ཆོས་བདག་མེད་པའི་ཆགས་པའི་རང་བཞིན་
[259a.4]དུ་གཟུགས་བརྙན་དང་མཚུངས་པའི་རྡོ་རྗེ་སེམས་དཔའ་ལ་སོགས་པ་ཕྱག་རྒྱ་ཆེན་པོའི་བདག་ཉིད་ཡིན་ནོ་ཞེས་བསྒོམ་པར་བྱའོ། །དངོས་གྲུབ་དམ་པ་ཐོབ་པར་འགྱུར། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བོ། །
[259a.5]ཅི་ཞིག་ཏུ་འགྱུར་ཞེ་ན། རྡོ་རྗེ་འདོད་པས་གཟི་ཅན་འགྱུར། །ཞེས་བྱ་བ་སྨོས་ཏེ། རྡོ་རྗེ་འདོད་པ་ནི་ཆོས་བདག་མེད་པའི་འདོད་ཆགས་སོ། །གཟི་ཅན་མཉམ་ཞེས་བྱ་བ་ནི་འོད་ཅན་དེ་དང་མཉམ་པ་སྟེ། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའི་གཟུགས་སོ། །འདི་
[259a.6]སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྣལ་འབྱོར་ཆེན་པོ་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས་ཕྱིས་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་ལས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་
[259a.7]ག་ལས་སྒེག་མོ་ལ་སོགས་པའི་གསང་བའི་མཆོད་པ་བཞི་སྤྲུལ་ལ་བདག་ཉིད་མཆོད་དེ། ཡང་དེའི་རྗེས་ལ་ཕྱག་རྒྱ་ཆེན་པོ་བསྒོམ་པར་བྱའོ། །གསང་བའི་མཆོད་པ་རབ་བྱས་ན། །ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །ཁྲོ་བོ་བདག་ཅེས་སྒོམ་བྱེད་ཅིང་། །ཞེས་བྱ་བ་ནི་ཁྲོ་བོ་རྡོ་རྗེ་
[259b]
[259b.1]ཧཱུཾ་མཛད་ནས་ཁྲོ་བོ་རྡོ་རྗེ་འབེེབས་པའི་བར་གྱི་ཁྲོ་བོ་ནི་བདག་ཡིན་ནོ་ཞེས་ཡང་དང་ཡང་དུ་མངོན་དུ་བྱེད་པའོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཆོ་ག་ཐམས་ཅད་སྔ་མ་
[259b.2]བཞིན་དུ་རྗེས་སུ་སྤྱད་ནས། ཕྱིས་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་ག་ནས་སྒེག་མོ་ལ་སོགས་པའི་གསང་བའི་མཆོད་པ་བཞི་སྤྲུལ་ལ། བདག་ཉིད་མཆོད་པར་བྱས་ནས་དེའི་རྗེས་ལ་བསྒོམ་པར་བྱའོ། །ནང་དུ་སོང་བའི་
[259b.3]ཡིད་ཀྱིས་ནི། །འདོད་པ་དག་པར་སྒོམ་བྱེད་ཅིང་། །ཞེས་བྱ་བ་ནི་ཤིན་ཏུ་མཉམ་པར་གཞག་པའི་སེམས་ཀྱིས་རང་གི་ལྷའི་རྣལ་འབྱོར་རང་བཞིན་གྱིས་དག་པའི་གཟུགས་བརྙན་དང་མཚུངས་པར་བསྒོམ་པར་བྱའོ། །དབྱངས་ལྡན་ཐིག་ལེ་སངས་རྒྱས་རྣམས། །མཆོད་ན་དངོས་གྲུབ་
[259b.4]ཐོབ་པར་འགྱུར། །ཞེས་བྱ་བ་ནི་དེའི་འདོད་པ་རྣམ་པར་དག་པ་ནི་རང་གི་ལྷ་དང་མཉམ་པར་སྦྱོར་བས་རང་བཞིན་གྱིས་རྣམ་པར་དག་པ་སེམས་ཀྱིས་བསྒོམ་མོ། །དེ་དང་མཉམ་པར་སྦྱོར་བའི་རྩའི་ཐིག་ལེ་བྱུང་ནས་ནམ་མཁའི་ཁམས་བཀང་སྟེ། སེམས་ཅན་གྱི་ཁམས་ཐམས་ཅད་ཀྱི་འཇིག་རྟེན་
[259b.5]དབང་ཕྱུག་གི་རང་བཞིན་གྱི་ཕྱག་རྒྱ་ཆེན་པོ་རྫས་ཀྱི་ཐིག་ལེའི་ནང་དུ་ཚུད་པར་བྱས་ལ། ཐིག་ལེ་དེས་རེག་པར་གྱུར་པ་དེའི་ཚེ་འཇིག་རྟེན་དབང་ཕྱུག་ཏུ་གྱུར་པར་བསམ་པར་བྱའོ། །དེ་ལྟར་སེམས་ཅན་ཐམས་ཅད་ཀྱི་རང་བཞིན་དུ་སངས་རྒྱས་ཐམས་ཅད་ལ་མཆོད་པས། ལས་ཀྱི་
[259b.6]དཀྱིལ་འཁོར་ལས་བཤད་པའི་རང་གི་འཇིག་རྟེན་གསུམ་དབང་ཕྱུག་གི་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་འཇིག་རྟེན་དབང་ཕྱུག་གི་རྣལ་འབྱོར་ཆེན་པོ་བྱས་ལ། ཆོ་ག་ཐམས་ཅད་རྗེས་སུ་
[259b.7]སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་པདྨའི་སྒེག་མོ་ལ་སོགས་པའི་ལྷ་མོ་བཞི་སྤྲུལ་ལ། བདག་ཉིད་མཆོད་ནས་རང་གི་ལྷ་དང་མཉམ་པར་སྦྱོར་ཞིང་རང་བཞིན་གྱིས་རྣམ་པར་དག་པའི་གཟུགས་བརྙན་དང་མཚུངས་པར་
[260a]
[260a.1]བསྒོམས་ན་རྫས་ཀྱི་ཐིག་ལེ་ཕྱུང་སྟེ། སེམས་ཅན་གྱི་ཁམས་ཐམས་ཅད་ལ་རེག་པས་འཇིག་རྟེན་དབང་ཕྱུག་གི་གཟུགས་སུ་བསྐྱེད་ནས། རང་གི་ལྷ་མོ་དང་མཉམ་པར་སྦྱོར་བའི་འཇིག་རྟེན་དབང་ཕྱུག་གི་བདག་ཉིད་དུ་བསྒོམ་པར་བྱའོ། །བསམ་པ་གཡོས་པས་
[260a.2]འདུད་ནས་ནི། །ཞེས་བྱ་བ་ལ་སོགས་པ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པ་ལ་སོགས་པའི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ནོར་བུའི་རིགས་ཀྱི་
[260a.3]རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་ག་ལས་རིན་ཆེན་སྒེག་མོ་ལ་སོགས་པ་གསང་བའི་མཆོད་པ་རྣམ་པ་བཞི་སྤྲུལ་ལ་བདག་ཉིད་ཡང་དག་པར་མཆོད་པར་བྱའོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་
[260a.4]ཏེ། དོན་ཐམས་ཅད་གྲུབ་པ་ལ་སོགས་པའི་དེ་བཞིན་གཤེགས་པ་ཐམས་ཅད་ལ་དད་པ་ཁྱད་པར་ཕུལ་དུ་བྱུང་བས་ཕྱག་བྱའོ། །དེ་ལྟར་རྡོ་རྗེ་སྙིང་པོར་མཉམ་བཞག་ལ། བསམ་པ་གཡོས་པས་འདུད་པར་བྱས་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་
[260a.5]ཆེན་པོ་བཅིངས་ཏེ། མཆོག་ཏུ་ཕྱག་འཚལ་བར་བསྒོམ་པར་བྱའོ། །དེ་ལྟར་བྱས་པས་ཅིར་འགྱུར་ཞེ་ན། དབང་བསྐུར་བ་ནི་ཐོབ་པར་འགྱུར། །ཞེས་བྱ་བ་སྨོས་ཏེ། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་
[260a.6]རོ་ཞེས་བྱ་བའི་དོན་ཏོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བཤད་ནས། ད་ནི་དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་ལས་ཀྱི་དམ་ཚིག་གི་གསང་བའི་རྒྱུད་གསུངས་པ་
[260a.7]ཡིན་ནོ། །དེ་བཞིན་གཤེགས་པ་ཐམས་ཅད་ནི་རིགས་རྣམས་སོ། །ལས་ཀྱི་དཀྱིལ་འཁོར་གྱི་དམ་ཚིག་གི་རྒྱུད་ནི་དམ་ཚིག་གི་ཕྱག་རྒྱའོ། །དེའི་གསང་བ་ནི། འདོད་ལ་སོགས་པའི་བདེ་བ་ཀུན། །རྟག་ཏུ་བདག་ནི་སྙིང་ལ་གནས། །ཞེས་བྱ་བ་ལ་སོགས་པའི་བསྒོམས་པ་དེས་འགྲུབ་པའོ། །ལས་
[260b]
[260b.1]ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་མངོན་སུམ་དུ་བྱེད་པ་ནི། དེའི་སྟོན་པར་བྱེད་པའི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །འདོད་ལ་སོགས་པ་ཞེས་བྱ་བ་ནི་དེ་ལ་འདོད་པ་ནི་བཅོམ་ལྡན་འདས་བྱང་ཆུབ་ཀྱི་མཚན་ཉིད་ཀྱི་རྡོ་རྗེ་སེམས་དཔའོ། །དེ་
[260b.2]ཉིད་དང་པོར་བྱས་པའི་འདོད་པ་ལ་སོགས་པ་གང་ཡིན་པ་ནི་རྡོ་རྗེ་རྒྱལ་པོ་ལ་སོགས་པ་ནས་རྡོ་རྗེ་འབེེབས་པའི་མཐར་ཐུག་པའོ། །དེ་སྐད་དུ་ཡང་། བཅོམ་ལྡན་འདས་རྡོ་རྗེ་སེམས་དཔའ་ནི་འདོད་པ་ཡིན་ཞེས་བྱ་བ་གསུངས་སོ། །དེ་ཉིད་བདེ་བ་ཀུན་ཏེ། རྟག་ཏུ་བདག་གི་སྙིང་ལ་གནས། །ཞེས་བྱ་
[260b.3]བ་ནི་ནམ་མཁའི་དབྱིངས་ཐམས་ཅད་སྐུ་དང་། གསུང་དང་ཐུགས་རྡོ་རྗེས་རྟག་ཏུ་བཞུགས་པའི་རྣམ་པར་སྣང་མཛད་ཆེན་པོའི་རང་བཞིན་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་འཁོར་བ་ཇི་སྲིད་ཀྱི་བར་དུ་བཞུགས་པ་ནི་དེ་ཉིད་ཀྱི་སྙིང་ལ་གནས་པའོ། །ཨེ་མའོ་ཞེས་བྱ་བ་ནི་ངོ་
[260b.4]མཚར་བའོ། །སེམས་ཅན་གྱི་དོན་གྱི་སྙིང་པོ་ནི་སེམས་ཅན་གྱི་དོན་ཏེ། ཉན་ཐོས་དང་རང་རྒྱལ་བའི་ཐེག་པར་མོས་པའི་སེམས་ཅན་རྣམས་གདུལ་བའི་ཕྱིར་ཉན་ཐོས་དང་། རང་རྒྱལ་བའི་ཐེག་པ་སྟོན་པ་དང་། སེམས་ཅན་གྱི་དོན་བྱེད་པ་ཞེས་གང་ཡིན་པའོ། །དེ་ལ་འདིར་ངོ་མཚར་བ་ཅི་ཞིག་
[260b.5]ཡོད་ཅེ་ན། སྐྱོ་བར་གྱུར་པས་གང་འདོད་སྨད། །ཅེས་བྱ་བ་སྟེ། བྱང་ཆུབ་ཀྱི་སེམས་ཆེན་པོ་ལ་སོགས་པ་མངར་ཟིན་ཡང་སྦས་ནས་བྱང་ཆུབ་ཀྱི་སེམས་ཆེན་པོ་ལ་སོགས་པ་ཆགས་པ་དང་བྲལ་བ་མི་མངའ་བའི་ངོ་བོ་ལ་ཡོངས་སུ་བརྟགས་ནས། ཉན་ཐོས་དང་རང་རྒྱལ་གྱི་རིགས་ཅན་
[260b.6]ནི་སེམས་ཅན་གྱི་ཁམས་ལ་ཉན་ཐོས་དང་། རང་རྒྱལ་བའི་ལམ་གྱི་རང་བཞིན་ཆགས་པ་དང་བྲལ་བར་སྟོན་པ་དེ་ནི་ངོ་མཚར་གང་ཡིན་འདི་ནི་ཞེས་བྱ་བ་ནི་བྱང་ཆུབ་སེམས་ལ་རྟོག་པ་སྟོན་པའོ། །ནི་ཞེས་བྱ་བ་ནི་གང་གི་ཕྱིར་གྱི་དོན་ཏེ་ལས་ཀྱི་དཀྱིལ་འཁོར་གྱི་དམ་ཚིག་ནི་ལས་ཀྱི་དམ་ཚིག་
[260b.7]སྟེ། མི་མངའ་བ་ཞེས་བྱ་བའི་དོན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། གང་གི་ཕྱིར་བྱང་ཆུབ་སེམས་ལ་སོགས་པའི་རང་གི་རང་བཞིན་འདི་ནི་ལས་ཀྱི་དཀྱིལ་འཁོར་གྱི་དེ་བཞིན་གཤེགས་པའི་དམ་ཚིག་གི་ཕྱག་རྒྱ་སྒྲུབ་པར་བྱེད་པ་ལས་མི་འདའ་བ་ཡིན་པ་དེའི་ཕྱིར་འདིའི་ངོ་
[261a]
[261a.1]བོ་བསྒོམ་པར་བྱའོ། །བསྒོམ་པར་བྱ་བའི་ཏིང་ངེ་འཛིན་དེ་གང་ཡིན་ཞེ་ན། དེ་བཞིན་གཤེགས་པའི་ཏིང་ངེ་འཛིན་དུ་ཞེས་བྱ་བ་སྨོས་ཏེ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་རྣལ་འབྱོར་ནི་དེ་བཞིན་གཤེགས་པའི་ཏིང་ངེ་འཛིན་ཏེ། དེ་བཞིན་
[261a.2]གཤེགས་པའི་ཏིང་ངེ་འཛིན་དེ་འདིར་བསྒོམས་པའོ། །བསྒོམས་ནས་སངས་རྒྱས་མཆོད་པ་ནི། །ཞེས་བྱ་བ་ནི་ལས་ཀྱི་དམ་ཚིག་དེ་བསྒོམ་པའི་རྣལ་འབྱོར་པས་མཆོད་པ་ནི་རྟོགས་པའི་སངས་རྒྱས་ལ་མཆོད་པའོ། །དངོས་གྲུབ་དམ་ཚིག་ཐོབ་པར་འགྱུར། །ཞེས་བྱ་བ་ནི་མཆོད་པ་
[261a.3]འདིས་སངས་རྒྱས་ལ་མཆོད་ན་ལས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་དེ་བཞིན་གཤེགས་
[261a.4]པའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་དམ་ཚིག་གི་ཕྱག་རྒྱ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་མཆོད་པ་ཐམས་ཅད་ཀྱིས་སྔ་མ་བཞིན་དུ་བདག་ཉིད་ཡང་དག་པར་མཆོད་ལ། ཡང་དེ་ཉིད་
[261a.5]ཀྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་ལ་རང་གི་རིག་པའི་ཡི་གེ་རྣམ་པར་བཀོད་ནས། རྡོ་རྗེ་སེམས་དཔའ་ལ་སོགས་པའི་རང་བཞིན་གྱི་རྡོ་རྗེ་སྙིང་གར་རྣམ་པར་བསམས་ཏེ་བསྒོམ་པར་བྱའོ། །ཀུན་དུ་བཟང་པོ་བདག་ཡིན་ཏེ། །ཞེས་བྱ་བ་ནི་བཤད་ཟིན་ཏོ། །དེ་ཉིད་
[261a.6]འདོད་པ་ནི་མངོན་པར་འདོད་པའོ། །སེམས་ཅན་ཀུན་ལ་བདེ་སྦྱིན་པ། །ཞེས་བྱ་བ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་གྱི་ཀུན་དུ་བཟང་པོ་འདོད་པའི་སྐལ་བ་དང་ལྡན་པའི་རྣལ་འབྱོར་པ་ལ་འཇིག་རྟེན་དང་འཇིག་རྟེན་ལས་འདས་པའི་བདེ་བ་དེ་བསྐྱེད་པའི་ཕྱིར། སེམས་
[261a.7]ཅན་ཀུན་ལ་བདེ་སྦྱིན་བའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེེབས་པའི་མཐར་ཐུག་པ་དེ་དག་ནི་རྡོ་རྗེ་སེམས་དཔའི་ཏིང་ངེ་འཛིན་ཏེ། ལས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་བསྒོམས་པ་དེ་ལ་རབ་ཏུ་གནས་
[261b]
[261b.1]པ་ན། རྡོ་རྗེ་སེམས་དཔའི་ཏིང་ངེ་འཛིན་གནས་སོ། །མཆོད་ན་དངོས་གྲུབ་ཐོབ་འགྱུར་ཞེས་བྱ་བ་ལ། རྡོ་རྗེ་སེམས་དཔའི་ཏིང་ངེ་འཛིན་ནི། ཀུན་དུ་བཟང་པོ་འདོད་པའི་བདག །སེམས་ཅན་ཀུན་ལ་བདེ་བ་སོགས། །ཞེས་བྱ་བ་བསྒོམ་པའི་མཚན་ཉིད་ཅན་གྱི་རྟོགས་པའི་མཆོད་པས་མཆོད་ན།
[261b.2]ལས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་སེམས་དཔའ་ལ་སོགས་པའི་དམ་ཚིག་གི་ཕྱག་རྒྱ་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། ཆོ་ག་ཐམས་
[261b.3]ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། ཇི་ལྟ་བ་བཞིན་དུ་ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམས་ཀྱིས་ཡང་དག་པར་མཆོད་དེ། ཀུན་དུ་བཟང་པོའི་མཆོད་པའི་བདག །སེམས་ཅན་ཀུན་ལ་བདེ་
[261b.4]སྩོལ་བ། །ཞེས་བསྒོམས་ན་སེམས་ཅན་གྱི་ཁམས་ལ་བྱང་ཆུབ་ཀྱི་སེམས་ལ་སོགས་པ་བསྐྱེད་ཅིང་བསྒྲུབས་ཏེ། རང་གི་སྙིང་གའི་རྡོ་རྗེ་ལ་རིག་པའི་ཡི་གེ་རྣམ་པར་བཀོད་ལ་དེ་ཉིད་བརྗོད་ཅིང་བསྒོམ་པར་བྱའོ། །ཀུན་དུ་བཟང་པོ་ཞེས་བྱ་བ་ནི་སྔ་མ་བཞིན་ནོ། །ཀུན་དུ་བཟང་པོ་དེ་ཉིད་ཁྲོ་བོའོ། །
[261b.5]ཅིའི་ཕྱིར་ཀུན་དུ་བཟང་པོའི་རང་བཞིན་ཁྲོ་བོ་ཡིན་ཞེ་ན། གང་གི་ཕྱིར། སེམས་ཅན་ཀུན་ལ་ཕན་བྱེད་པ། །ཞེས་བྱ་བ་ལ་སོགས་པ་སྨོས་ཏེ། ལས་དང་རྣམ་པར་སྨིན་པ་བདེ་བ་བསྐྱེད་པ་ནི་སེམས་ཅན་ཀུན་ལ་བདེ་བས་ཕན་པའོ། །ཕན་པ་ནི་སེམས་ཅན་ཀུན་ལ་ཕན་འདོགས་པར་བྱེད་པའོ། །རྡོ་རྗེ་
[261b.6]ཧཱུཾ་མཛད་རྣལ་འབྱོར་གྱིས། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱ་བསྒོམ་པ་ནི་རྡོ་རྗེ་ཧཱུཾ་མཛད་ཀྱི་རྣལ་འབྱོར་རོ། །རྡོ་རྗེ་ཧཱུཾ་མཛད་ཀྱི་རྣལ་འབྱོར་གྱི་རྣལ་འབྱོར་དེས་མཆོད་ཅིང་།
[261b.7]སེམས་ཅན་ཀུན་ལ་ཕན་བྱེད་པ། །ཀུན་བཟང་ཁྲོ་བོ་བདག་ཡིན་ཏེ། །ཞེས་བསྒོམས་པས་དངོས་གྲུབ་ཐོབ་པར་འགྱུར་རོ། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་པར་
[262a]
[262a.1]འགྱུར་རོ། །འདི་སྐད་སྟོན་པ་ནི། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་རྣལ་འབྱོར་བྱས་ལ། སྔར་བཤད་པའི་ཆོ་ག་ཐམས་ཅད་རྗེས་སུ་སྤྱད་ནས། ཕྱིས་འཇིག་རྟེན་གསུམ་ལས་
[262a.2]རྣམ་པར་རྒྱལ་བའི་ལས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་ལ་རང་གི་རིག་པའི་ཡི་གེ་རྣམ་པར་བསམས་ལ། སེམས་ཅན་གྱི་ཁམས་ཐམས་ཅད་ཁྲོ་བོས་བཅོམ་ནས་རྡོ་རྗེ་རིགས་ཀྱི་རང་བཞིན་དུ་
[262a.3]རྣམ་པར་བསམས་ཏེ། སེམས་ཅན་ཀུན་ལ་ཕན་བྱེད་པའི། །ཀུན་བཟང་ཁྲོ་བོ་བདག་ཡིན་ཏེ། །ཞེས་ང་རྒྱལ་བསྐྱེད་དེ་བསྒོམ་པར་བྱའོ། །ཀུན་བཟང་འདོད་པ་བདག་ཡིན་ཏེ། །ཞེས་བྱ་བ་ནི་དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་ནི་འདོད་པའོ། །འགྲོ་བ་འདུལ་
[262a.4]བ་ལ་སོགས་པ་ནས་པདྨ་འབེབས་པའི་མཐར་ཐུག་པའི་བདེ་བ་གང་ཡིན་པ་དེ་ནི་བདེ་བ་ཐམས་ཅད་དོ། །དེ་སྟེར་བར་བྱེད་པས་ན་བདེ་བ་ཐམས་ཅད་རབ་སྦྱིན་པའོ། །རྣལ་འབྱོར་པས་བདག་ཉིད་འགྲོ་བ་འདུལ་བའི་སྐུར་གནས་པས་འགྲོ་བ་འདུལ་བའི་སྐུར་གནས་པའོ། །པདྨའི་རིགས་
[262a.5]ཀྱི་ལས་ཀྱི་དཀྱིལ་འཁོར་གྱི་དམ་ཚིག་གི་ཏིང་ངེ་འཛིན་ལ་གནས་པའོ། །མཆོད་ན་དངོས་གྲུབ་ཐོབ་པར་འགྱུར། །ཞེས་བྱ་བ་ནི་དམ་ཚིག་གི་ཕྱག་རྒྱའི་ཏིང་ངེ་འཛིན་འདིས། བདེ་བ་ཐིམ་ནས་རབ་སྦྱིན་པའི། །ཀུན་བཟང་འདོད་པ་བདག་ཡིན་ཏེ། །ཞེས་བྱ་བ་བསྒོམ་པའི་མཆོད་པས་
[262a.6]མཆོད་ནས་པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་འཇིག་རྟེན་དབང་ཕྱུག་གི་རྣལ་འབྱོར་བྱས་ཏེ། ཆོ་ག་
[262a.7]ཐམས་ཅད་རྗེས་སུ་སྤྱད་ལ་ཕྱིས་འགྲོ་བ་འདུལ་བའི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་པདྨ་ལ་བཟླས་པའི་ཡི་གེ་རྣམ་པར་བཀོད་ནས། དེ་ཉིད་བརྗོད་ཅིང་། ཐམས་ཅད་དུ་པདྨའི་རིགས་ཀྱི་ལས་ཀྱི་དཀྱིལ་འཁོར་སྤྲོས་པས་སེམས་
[262b]
[262b.1]ཅན་གྱི་ཁམས་ཐམས་ཅད་པདྨའི་རིགས་ཀྱི་རང་བཞིན་དུ་བསྐྱེད་དེ། བདེ་བ་ཐམས་ཅད་རབ་སྦྱིན་པའི། །ཀུན་བཟང་འདོད་པ་བདག་ཡིན་ཏེ། །ཞེས་ང་རྒྱལ་བསྐྱེད་དེ་བསྒོམ་པར་བྱའོ། །ཀུན་བཟང་རྒྱལ་པོ་བདག་ཡིན་ཏེ། །ཞེས་བྱ་བ་ནི་ནོར་བུ་ཆེན་པོའི་རིགས་ཀྱི་གཟུགས་ཀྱི་ཁམས་
[262b.2]གསུམ་པ་ཐམས་ཅད་ཀྱི་ཆོས་ཀྱི་རྒྱལ་སྲིད་ཐོབ་པས་ན་རྒྱལ་པོའོ། །སེམས་ཅན་ཀུན་ལ་དོན་ཆེན་སྦྱིན། །ཞེས་བྱ་བ་ནི་དེ་བཞིན་གཤེགས་པ་ལ་སོགས་པ་དང་། སེམས་ཅན་ཐམས་ཅད་ནོར་བུའི་རིགས་ཀྱིས་དབང་བསྐུར་བ་དང་། ནོར་བུ་ཆེན་པོའི་རིགས་ཀྱི་གཟུགས་སུ་ཏིང་ངེ་
[262b.3]འཛིན་གྱིས་བསྐྱེད་པ་ནི། །དོན་ཀུན་གྲུབ་པའི་གཟུགས་ཀྱིས་ནི། །ཞེས་བྱ་བ་ནི་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ལྷ་རྣམས་ཀྱི་དམ་ཚིག་གི་ཕྱག་རྒྱ་བསྒོམ་པ་ནི་དོན་ཐམས་ཅད་གྲུབ་པའི་གཟུགས་ཀྱིས་སོ། །མཆོད་པ་དངོས་གྲུབ་ཐོབ་པར་འགྱུར། །ཞེས་བྱ་བ་ནི་
[262b.4]སེམས་ཅན་ཀུན་ལ་དོན་ཆེན་སྦྱིན། །ཀུན་བཟང་རྒྱལ་པོ་བདག་ཡིན་ཏེ། །ཞེས་བྱ་བ་ནི་དོན་ཐམས་ཅད་གྲུབ་པའི་གཟུགས་སུ་དེ་བསྒོམས་ཏེ། མཆོད་པས་མཆོད་ན་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱའི་དངོས་
[262b.5]གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་
[262b.6]ཚིག་གི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་རིན་པོ་ཆེ་ལ་རིག་པའི་ཡི་གེ་རྣམ་པར་བསམས་ནས། དེ་ཉིད་ཟློས་ཤིང་ནོར་བུའི་རིགས་ཀྱི་དཀྱིལ་འཁོར་ཐམས་ཅད་དུ་སྤྲོས་པས་དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་དབང་བསྐུར་བས་ནོར་བུའི་རིགས་ཀྱི་རང་
[262b.7]བཞིན་དུ་བསྐྱེད་པར་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དམ་ཚིག་གི་གསང་བའི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བཤད་ནས། ད་ནི་དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པའི་རིགས་ཐམས་
[263a]
[263a.1]ཅད་ཀྱི་ལས་ཀྱི་ཆོས་ཀྱི་དམ་པའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལས་ནི་ལས་ཀྱི་དཀྱིལ་འཁོར་རོ། །དེ་ལ་ཆོས་ནི་བསྲུང་བ་ལ་སོགས་པ་བསྐྱེད་པའོ། །དེའི་དམ་པའི་དངོས་གྲུབ་ནི་ལས་ཀྱི་
[263a.2]དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་རྣམས་མངོན་སུམ་དུ་བྱེད་པའོ། །དེ་སྟོན་པར་བྱེད་པ་ན་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། གཡས་པའི་མཛུབ་མོ་མདུད་ནས་ནི། །ཞེས་བྱ་བ་ལ་སོགས་པ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་
[263a.3]བཤད་པའི་རང་གི་དེ་བཞིན་གཤེགས་པའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། རང་གི་ལྷའི་ལྗགས་ལ་ལས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་རྣམ་པར་བསམས་ཏེ། གཡས་པའི་ཁྲོ་བོའི་ཁུ་ཚུར་གྱི་རྩེ་མོས་སྙིང་ག་དང་།
[263a.4]མགྲིན་པ་དང་། རྒྱབ་དང་། ཡང་སྙིང་ག་དང་།ནུ་མ་གཉིས་དང་། ཡང་སྙིང་ག་དང་། མགྲིན་པ་དང་། རྒྱབ་དང་། དབང་བསྐུར་བའི་གནས་སུ་གོ་ཆ་བཅིངས་པའི་ཚུལ་གྱིས་སྤྱི་གཙུག་ཏུ་བཀོད་ལ། རང་གི་དེ་བཞིན་གཤེགས་པའི་ཆོས་ཀྱི་ཡི་གེ་བསྐྱེད་ལ། དེ་ནས་
[263a.5]རང་གི་སྙིང་གའི་རྡོ་རྗེ་ལ་ཆོས་ཀྱི་ཡི་གེ་རྣམ་པར་བསམས་ནས། དེ་ཉིད་བརྗོད་ཅིང་བསྒོམ་པར་བྱའོ། །དེ་ལྟར་དེ་བཞིན་གཤེགས་པའི་ལས་ཀྱི་ཆོས་བསྟན་ནས། དེ་བཞིན་གཤེགས་པའི་རིགས་ཀྱི་དཀྱིལ་འཁོར་གསུངས་པ་ནི། རྩིག་པ་ལ་ནི་ལྡན་འདྲ་བ། །ཞེས་བྱ་བ་ལ་
[263a.6]སོགས་པ་ལ་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་ལས་ཀྱི་དཀྱིལ་འཁོར་ལས་བཤད་པའི་རང་གི་བསྒྲུབ་བྱའི་རིག་པའི་ལྷ་མོ་གཅེར་བུའི་གཟུགས་ཀྱིས་ས་ལ་བྲི་བར་བྱའོ། །རི་མོ་བྲིས་ནས་མཚན་བསྒྲེང་སྟེ། ཞེས་བྱ་བ་ནི་བདག་
[263a.7]ཉིད་ཀྱི་མཚན་མས་བུད་མེད་བསམས་པ་གང་ཡིན་པ་ལ་མཚན་མ་བསྒྲེངས་ཏེ་གཞུག་པར་བྱའོ། །ལས་ཀྱི་དཀྱིལ་འཁོར་ལས་བཤད་པའི་རིག་པའི་ལྷ་མོ་གང་ཡིན་པ་ཆུང་མའི་གཟུགས་སུ་བསམ་ཞིང་བསྒོམས་ན་རང་གི་མཚན་མ་བསྒྲེང་སྟེ། བུད་མེད་གཅེར་བུ་གཟུགས་བརྙན་རྩིག་
[263b]
[263b.1]པ་ལ་བྲིས་ལ་དེའི་བྷ་གར་ཞུགས་པར་བསྒོམས་ལ། སེན་མོ་བཙུགས་ན་སྒྲུབ་པ་པོ་དེའི་འདི་ཆུང་མར་འགྱུར་རོ། །དེ་བས་ན་དེ་འདིར་དབང་དུ་བྱེད་པར་འགྱུར་རོ་ཞེས་གསུངས་སོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་
[263b.2]སོགས་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བཀོད་དེ། རང་གི་རིག་པ་དང་ལྷ་མོའི་ཆོས་ཀྱི་ཕྱག་རྒྱས་རྩིག་པ་ལ་གཟུགས་
[263b.3]བརྙན་བྲིས་ཏེ་སྤྲུལ་པ་བསྡུ་བ་ལ་སོགས་པ་བྱས་ཏེ། དེ་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་ལ། ཕྱག་བཞི་བྱས་ཏེ། ཉིན་རེ་ཞིང་ཐུན་བཞིའི་སྦྱོར་བས་ཆོས་ཀྱི་ཕྱག་རྒྱར་བརྗོད་ཅིང་། དེ་དང་ལྷན་ཅིག་ཏུ་མཉམ་པར་སྦྱོར་བས་ཇི་སྲིད་མངོན་སུམ་མཐོང་བར་གྱུར་པ་དེ་སྲིད་
[263b.4]ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་དང་ལྷན་ཅིག་ཏུ་མཚན་མ་བསྒྲེང་བར་བྱས་ནས། མཉམ་པར་སྦྱོར་བ་བྱས་ལ་ཆོས་ཀྱི་ཕྱག་རྒྱའི་ཡི་གེ་ཧོ་བཟླ་བར་བྱའོ། །དེ་ནས་མངོན་སུམ་དུ་སོང་ནས་སྒྲུབ་པ་པོ་དང་ལྷན་ཅིག་མཉམ་པར་སྦྱོར་ཞིང་སྒྲུབ་པ་པོའི་ཆུང་མར་
[263b.5]འགྱུར་རོ། །སྦྱོར་བ་འདིས་གནོད་སྦྱིན་མོ་ལ་སོགས་པ་སྒྲུབ་པ་དེ་དོན་དུ་གཉེར་བར་བྱེད་པ་ན་ས་ལ་གནོད་སྦྱིན་གྱི་གདོང་བྲིས་ལ་ཞེས་བྱ་བ་སྨོས་ཏེ། རས་སམ་སྤང་ལེབ་བམ་རྩིག་པ་ལ་རྡོ་རྗེ་ཧཱུཾ་མཛད་ལ་སོགས་པ་ནས་ཁྲོ་བོ་རྡོ་རྗེ་འབེབས་པའི་མཐར་ཐུག་པའི་རྣལ་འབྱོར་བྱས་ལ། གནོད་
[263b.6]སྦྱིན་གྱི་གདོང་གི་ཚད་ཙམ་དུ་བྲི་བར་བྱའོ། །མཛུབ་མོའི་སེན་མོས་བཙུགས་ན་ཡང་། །ཞེས་བྱ་བ་ནི་གནོད་སྦྱིན་གྱི་གདོང་དེ་ལ་གཡོན་པའི་སྡིགས་མཛུབ་བམ་གཡས་པའི་སྡིགས་མཛུབ་ཀྱི་སེན་མོ་བཙུགས་ནས་བསྒྲུབ་པར་བྱའོ། །གནས་གང་དུ་ཞེ་ན། མིག་གི་ཕྱོགས་སུའོ། །ཅི་ཞིག་ཏུ་འགྱུར་ཞེ་ན། བུད་
[263b.7]མེད་མཆོག་ནི་འདྲེན་པར་འགྱུར། །ཞེས་བྱ་བ་སྨོས་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་བཤད་པའི་རིག་པའི་ལྷ་མོ་རྣམས་འདྲེན་པར་བྱེད་ཅེས་བྱ་བའི་དོན་ཏོ། །དེ་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་
[264a]
[264a.1]བཤད་པའི་རང་གི་ཁྲོ་བོའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ནས། རྡོ་རྗེ་ཧཱུཾ་མཛད་ལ་སོགས་པའི་ང་རྒྱལ་བསྐྱེད་དེ། ཆོས་ཀྱི་
[264a.2]དཀྱིལ་འཁོར་ལས་བཤད་པའི་རིག་པས་རྡོ་རྗེ་ཧཱུཾ་མཛད་ལ་སོགས་པ་རང་གི་ལྷ་མོའི་གཟུགས་ཇི་ལྟ་བ་བཞིན་དུ་བྲིས་ཏེ། སྤྲུལ་པ་བསྡུ་བ་ལ་སོགས་པ་སྔོན་དུ་འགྲོ་བ་ལས་ཀྱི་དཀྱིལ་འཁོར་ལས་བཤད་པའི་ཆོ་ག་ཐམས་ཅད་རྗེས་སུ་སྤྱད་ནས། མཆོད་པ་ཐམས་ཅད་
[264a.3]ཀྱིས་རང་གི་ཁྲོ་བོ་ལ་ཡང་དག་པར་མཆོད་དེ། ཕྱག་བཞི་བྱས་ནས། ཇི་སྲིད་དུ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །ལས་ཀྱི་དཀྱིལ་འཁོར་ལས་བཤད་པའི་རང་གི་ཁྲོ་བོའི་ལས་ཀྱི་རྣལ་འབྱོར་བྱས་ལ་ཕྱག་རྒྱ་བཅིངས་ཏེ། ཡང་བྱིན་གྱིས་བརླབས་པ་ལ་
[264a.4]སོགས་པའི་ཆོ་ག་ཐམས་ཅད་རྗེས་སུ་སྤྱད་ནས། བསྡུ་བ་ལ་སོགས་པ་སྔ་མ་བཞིན་དུ་བྱས་ལ། གནོད་སྦྱིན་གྱི་གདོང་དེའི་མིག་གི་ཕྱོགས་སུ་མཛུབ་མོའི་སེན་མོ་བཙུགས་ཏེ། ལས་ཀྱི་དཀྱིལ་འཁོར་ལས་བཤད་པའི་རང་གི་ཁྲོ་བོའི་ཡི་གེ་ཛཿདང་། ཆོས་ཀྱི་ཕྱག་རྒྱ་བརྗོད་
[264a.5]ཅིང་ཇི་སྲིད་དུ་རྡོ་རྗེའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷ་དགུག་པ་དང་། གནོད་སྦྱིན་མོ་འགུགས་པ་དེ་སྲིད་ཀྱི་བར་དུ་བྱའོ། །དེ་ནས་སྒྲུབ་པ་པོའི་ཆུང་མར་འགྱུར་རོ། །ཆོས་ཀྱི་ཕྱག་རྒྱ་བརྗོད་ཅིང་ཆེ་གེ་མོ། ཨཱ་ཀཪྵ་ཛཿཞེས་བྱ་བས་གནོད་སྦྱིན་གྱི་གདོང་ལ་
[264a.6]རབ་ཏུ་སྦྱར་ལ། གནོད་སྦྱིན་མོ་འགུགས་པར་འགྱུར་རོ། །ལག་པ་གཉིས་སུ་པདྨོ་བླངས། །ཞེས་བྱ་བ་ལ་སོགས་པ་ལ། ཇི་སྐད་དུ་བཤད་པའི་རྡོ་རྗེ་པདྨ་གཡོན་བསྙེམས་པས་བླངས་ལ། ལག་པ་གཡས་པ་སྙིང་གར་དེའི་པདྨ་ཁ་འབྱེད་པར་བྱེད་པའོ། །ཇི་ལྟར་པདྨ་དམར་བ་
[264a.7]ཡང་། །ཚོན་གྱི་ཉེས་པས་མི་གོས་བཞིན། །ཐམས་ཅད་རྣམ་དག་བསྒོམས་པས་ན། །དེ་བཞིན་སྡིག་པས་གོས་མི་འགྱུར། །ཞེས་བྱ་བ་ལ་བལྟས་ནས་ཀྱང་ནི་འདོད་ཆགས་དགག་པར་འགྱུར་རོ། །ལྟ་བ་གང་ཡིན་ཞེ་ན། རྡོ་རྗེ་ལྟ་བས་ཞེས་བྱ་བ་སྨོས་ཏེ། རྡོ་རྗེ་ལྟ་བའི་མཚན་ཉིད་ནི་བཤད་
[264b]
[264b.1]ཟིན་ཏོ། །དེས་བུད་མེད་རྣམས་དང་སྦྱོར་ཞིང་ཆགས་པར་བྱེད་ན་དེ་བཞིན་དུ་འགྱུར་རོ། །པདྨའི་རིགས་ཀྱི་ལས་ཀྱི་དཀྱིལ་འཁོར་གྱི་རྣལ་འབྱོར་པས་པདྨའི་རིགས་ཀྱི་ལས་ཀྱི་དཀྱིལ་འཁོར་གྱི་རིག་པའི་ལྷ་མོའི་བུད་མེད་ལ་བལྟས་ན་འདོད་ཆགས་རྣམ་པར་དག་པར་འགྱུར་རོ། །པདྨའི་རིག་
[264b.2]པའི་ལྷ་མོའི་བུད་མེད་ཀྱི་གཟུགས་ལ་ཆགས་ཤིང་མངོན་པར་དགའ་བས་དེ་ལ་མངོན་དུ་ཕྱོགས་པ་ཉིད་ནི་དེ་བཞིན་གཤེགས་པའི་བསྒྲུབ་པའི་བྱེ་བྲག་གོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་འཇིག་རྟེན་དབང་ཕྱུག་གི་
[264b.3]རྣལ་འབྱོར་སྔ་མ་བཞིན་དུ་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་པདྨའི་རིགས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ལ། རང་གི་ལས་ཀྱི་དཀྱིལ་འཁོར་ལས་བཤད་པའི་ལྷ་མོའི་རིག་པའི་དེ་ཉིད་བརྗོད་ཅིང་སྤྲུལ་ལ། བསྡུ་བ་ལ་སོགས་པ་བྱས་ནས་
[264b.4]མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཕྱག་བཞི་བྱས་ནས། ཕྱག་ན་གནས་པའི་གསང་བའི་པདྨ་ལ་བལྟས་ན་འདོད་ཆགས་རྣམ་པར་དག་པར་འགྱུར་རོ། །རྡོ་རྗེ་ལྟ་བུས་བུད་མེད་ལ། །བལྟས་ན་ཡང་ནི་དགའ་བར་འགྱུར། །ཞེས་བྱ་བས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་
[264b.5]རྒྱ་ཡི་གེ་ཧོ་བཟླས་པ་ཡིན་པར་ཤེས་པར་བྱའོ། །རྡོ་རྗེ་རིན་ཆེན་ཏིང་འཛིན་གནས། །ཞེས་བྱ་བ་ནི་ནོར་བུའི་རིགས་ཀྱི་རང་གི་ལྷའི་ཏིང་ངེ་འཛིན་ལ་གནས་པའོ། །ལག་པ་གཉིས་ཀྱིས་ནོར་བུ་བཟུང་། །ཞེས་བྱ་བ་ནི་མིག་གཉིས་ཀྱི་ལྟ་བ་དང་ལྡན་པས་ཡིད་བཞིན་གྱི་ནོར་བུ་རྡོ་རྗེ་རྩེ་ལྔ་པས་མཚན་པ་བཟུང་ལ།
[264b.6]འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ཧཱུཾ་མཛད་ཀྱི་རྣལ་འབྱོར་པས་བུད་མེད་ཀུན་ལ་འདུད་བྱེད་དོ་ཞེས་བྱའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པ་ལ་སོགས་པ་རང་གི་ལྷའི་
[264b.7]རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་ནོར་བུའི་རིགས་ཀྱི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་བསམས་ཏེ། དེ་ཉིད་བརྗོད་ཅིང་དོན་ཐམས་ཅད་གྲུབ་པ་ལ་སོགས་པ་རང་གི་སེམས་དཔའ་ཆེན་པོ་ཉིད་དུ་ངེས་པར་བྱས་ནས་ལས་ཀྱི་དཀྱིལ་འཁོར་ལས་
[265a]
[265a.1]བཤད་པའི་རང་གི་རིག་པའི་ལྷ་མོ་མདུན་དུ་སྤྲུལ་ལ། བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ནས། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཕྱག་བཞི་བྱས་ནས། ཡང་རང་གི་ལྷའི་ཆོས་ཀྱི་ཕྱག་རྒྱའི་སྙིང་གའི་རྡོ་རྗེ་རིན་པོ་ཆེ་ལ་རྣམ་
[265a.2]པར་བཀོད་དེ། དེ་ཉིད་བརྗོད་ཅིང་ཇི་སྲིད་དུ་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ན་འགྲུབ་པར་འགྱུར་རོ། །ལན་གཅིག་ལན་གཉིས་ལན་གསུམ་མམ། ལན་བཞིའམ། ལན་ལྔའམ། ལན་དྲུག་གམ། ལན་བདུན་གྱི་བར་དུ་
[265a.3]བསྒྲུབས་ཀྱང་མ་གྲུབ་ན་རིན་ཆེན་ཧཱུཾ་མཛད་ཀྱི་རྣལ་འབྱོར་པས་འཇིག་རྟེན་གསུམ་ལས་རྣམ་པར་རྒྱལ་བའི་འཇིག་རྟེན་གསུམ་གྱི་འཁོར་ལོར་བཤད་པའི་ཡི་གེ་ཧཱུཾ་གི་སྔགས་དེས་དེ་ལ་འདུད་བྱས་ན་དེ་ལྟར་འཇིགས་པ་དང་བཅས་པའི་དངོས་གྲུབ་སྩོལ་བར་འགྱུར་རོ། །དེ་ལྟར་དེ་
[265a.4]བཞིན་གཤེགས་པ་ལ་སོགས་པའི་དཀྱིལ་འཁོར་ལས་བཤད་པའི་རིགས་ཐམས་ཅད་ཀྱི་ཆོས་ཀྱི་ཕྱག་རྒྱའི་དངོས་གྲུབ་བསྟན་ནས། ད་ནི་དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལས་ཀྱི་དངོས་པོའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་
[265a.5]གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་དེ་བཞིན་གཤེགས་པ་ཐམས་ཅད་ཀྱི་རིགས་སོ། །དེའི་ལས་ནི་ལས་ཀྱི་དཀྱིལ་འཁོར་རོ། །དེའི་དགོས་པ་ནི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་རྒྱུད་དེ་གྲུབ་པའོ། །དེ་སྟོན་པར་བྱེད་པ་ནི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་
[265a.6]གསུངས་ཤིང་བཤད་པའོ། །མཆོད་པའི་ལས་ཀྱི་ཆོ་ག་སྦྱར། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་ལས་ཀྱི་མཆོད་པའི་ཕྱག་རྒྱ་རྣམ་པ་བཅུ་དྲུག་བྱེད་པའོ། །གང་དང་གང་གིས་དགོས་བསམས་པ། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པ་
[265a.7]རྣམས་ཀྱི་ལས་ཀྱི་ཕྱག་རྒྱའི་དངོས་གྲུབ་གང་ཡིན་པ་དེ་ཡིན་ནོ་ཞེས་བྱ་བའི་དོན་ཏོ། །དེ་དང་དེ་ནི་གསོལ་བཏབ་སྟེ། །མཁས་པས་ཕྱག་རྒྱ་བསྒྲུབ་པར་བྱ། །ཞེས་བྱ་བ་ནི་དེ་དང་དེའི་ལས་ཀྱི་ཕྱག་རྒྱའི་དངོས་གྲུབ་ཀྱི་མཚན་ཉིད་ཀྱི་དགོས་པའོ། །ཆོས་ཐམས་ཅད་རང་བཞིན་གྱིས་འོད་གསལ་བར་སྤྲུལ་པ་
[265b]
[265b.1]དང་མཚུངས་པ་གང་ཡིན་པའི་བདེན་པ་དེ་དང་། བདེན་པ་དེས་དགོས་པ་འདི་དག་གྲུབ་པར་གྱུར་ཅིག་ཅེས་གསོལ་བ་བཏབ་ནས། ལས་ཀྱི་ཕྱག་རྒྱ་བསྒྲུབ་པར་བྱའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བྱས་ལ། སྔ་མ་བཞིན་དུ་
[265b.2]ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་ལ་རིག་པའི་ཡི་གེ་རྣམ་པར་བསམས་ནས། དེ་ཉིད་བརྗོད་ཅིང་དེ་བཞིན་གཤེགས་པའི་བདག་ཉིད་དུ་རྣམ་པར་བསམས་ཏེ། ལས་ཀྱི་དཀྱིལ་འཁོར་ལས་བཤད་པའི་ལྷ་མོ་བཅུ་དྲུག་སྤྲུལ་ལ།
[265b.3]ལས་ཀྱི་ཕྱག་རྒྱ་རྣམས་ཀྱིས་བདག་ཉིད་ཡང་དག་པར་མཆོད་ལ། ཕྱག་བཞི་བྱས་ནས། སྔ་མ་བཞིན་དུ་གསོལ་བ་གདབ་པར་བྱའོ། །དེ་ནས་ལས་ཀྱི་ཕྱག་རྒྱ་བཅིངས་ལ། རང་གི་རིག་པ་བཟླས་ཤིང་བསྒོམ་པར་བྱའོ། །གསང་བའི་མཆོད་པ་ཆོ་ག་སྦྱར། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་སྒེག་མོ་
[265b.4]ལ་སོགས་པ་ལས་ཀྱི་ཕྱག་རྒྱ་རྣམ་པ་བཞིས་མཆོད་པར་བྱའོ། །རྡོ་རྗེ་སེམས་དཔའི་ཏིང་འཛིན་གྱིས། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་བར་གྱི་ལས་ཀྱི་ཕྱག་རྒྱ་བསྒོམ་པ་ནི་རྡོ་རྗེ་སེམས་དཔའི་ཏིང་ངེ་འཛིན་ཏོ། །རྡོ་རྗེ་སེམས་དཔའ་ལ་
[265b.5]སོགས་པའི་ཏིང་ངེ་འཛིན་གྱི་དགོས་པ་གང་ཡིན་སྨྲས་པ་དེ། མྱུར་དུ་དངོས་གྲུབ་ཐོབ་པར་འགྱུར། །ཞེས་བྱ་བས་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་ལས་ཀྱི་དངོས་གྲུབ་ཀྱི་དགོས་པ་རྣམ་པ་དེ་ལྟ་བུ་ཆེ་གེ་མོའི་ལས་ཀྱི་ཕྱག་རྒྱའི་དགོས་པ་གྲུབ་པར་གྱུར་ཅིག་ཅེས་རྣལ་
[265b.6]འབྱོར་པས་བརྗོད་པ་གང་ཡིན་པ་དེ་ཉིད་ཀྱི་དགོས་པའི་དངོས་གྲུབ་མྱུར་དུ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་
[265b.7]ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པའི་མཆོད་པ་བཞིས་རང་གི་སྙིང་གའི་སེམས་དཔའི་རྡོ་རྗེ་ལས་སྤྲུལ་ལ། དེའི་ལས་ཀྱི་ཕྱག་རྒྱ་རྣམ་པ་བཞིས་བདག་ཉིད་ཡང་དག་པར་
[266a]
[266a.1]མཆོད་ལ་ཕྱག་བཞི་བྱས་ཏེ། མངོན་པར་འདོད་པའི་ལས་ཀྱི་ཕྱག་རྒྱའི་དངོས་གྲུབ་དོན་དུ་གཉེར་བ་ཉིད་ཀྱིས་སླར་ཡང་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་བཅིངས་ཏེ། རང་གི་རིག་པ་ཟློས་ཤིང་བསྒོམ་པར་བྱའོ། །རིགས་ཀྱི་གསང་
[266a.2]བའི་མཆོད་ཆེན་བྱས། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པའི་གསང་བའི་མཆོད་ཆེན་ཏེ་ཞེས་བྱས་པའོ། །ཏིང་ངེ་འཛིན་གང་གིས་བྱེད་ཅེ་ན། ཁྲོ་བོའི་ཏིང་ངེ་འཛིན་ཞེས་བྱ་བ་སྨོས་ཏེ། ལས་ཀྱི་
[266a.3]དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་ལས་ཀྱི་ཕྱག་རྒྱའི་སྦྱོར་བ་ནི་ཁྲོ་བོའི་ཏིང་ངེ་འཛིན་ཏོ། །མཁས་པས་ཅུང་ཟད་གང་བསམས་པ། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་ལས་ཀྱི་ཕྱག་རྒྱའི་དངོས་གྲུབ་ཀྱི་མཚན་ཉིད་
[266a.4]དགོས་པ་ཅུང་ཟད་བསམས་པ་སྟེ། ཐམས་ཅད་མྱུར་དུ་འགྲུབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས།
[266a.5]ཕྱིས་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་ག་ལས་སྒེག་མོ་ལ་སོགས་པའི་ལྷ་མོ་བཞི་སྤྲུལ་ལ། དེའི་ལས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་རྣམ་པ་བཞིས་བདག་
[266a.6]ཉིད་ཡང་དག་པར་མཆོད་ནས། ཕྱག་བཞི་བྱས་ཏེ། ཡང་སྙིང་གའི་རྡོ་རྗེ་འབར་བའི་དབུས་སུ་རིག་པའི་ཡི་གེ་རྣམ་པར་བསམས་ཏེ། དངོས་གྲུབ་དོན་དུ་གཉེར་བས་དེ་ཉིད་ཟློས་ཤིང་བསྒོམ་པར་བྱའོ། །འགྲོ་བ་འདུལ་བ་ལ་སོགས་པའི་རྣལ་འབྱོར་པས་སེམས་ཅན་ཐམས་ཅད་ཀྱི་
[266a.7]དོན་དང་སངས་རྒྱས་མཆོད་པའི་ཡིད་ཀྱིས་མཆོད་པ་མ་ལུས་པར་བྱས་ལ། འཇིག་རྟེན་དབང་པོའི་ཏིང་འཛིན་གྱིས། །ཞེས་བྱ་བ་ལ། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱའི་རྣལ་འབྱོར་པས་འཇིག་རྟེན་དབང་ཕྱུག་གི་ཏིང་ངེ་འཛིན་དེས་བྱའོ། །
[266b]
[266b.1]ཡིད་ཀྱིས་མཆོད་པ་བྱས་ནས་ཀྱང་། །མཁས་པས་དགོས་པ་གང་བསམས་པ། །དེ་ཡིས་དངོས་གྲུབ་ཐམས་ཅད་འཐོབ། །ཅེས་བྱ་བ་ནི་པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་དངོས་གྲུབ་དགོས་པ་གང་བསམས་པ་དེས། དངོས་གྲུབ་ཐམས་ཅད་
[266b.2]ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གིས་འཇིག་རྟེན་དབང་ཕྱུག་གི་རྣལ་འབྱོར་བྱས་ལ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་
[266b.3]ཕྱག་རྒྱ་བཅིངས་ཏེ། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ལྷ་མོ་རྣམས་རང་གི་སྙིང་གའི་པདྨ་ལ་སྤྲུལ་ལ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ལ་མཆོད་པ་བྱས་ནས། ཕྱིས་སྒེག་མོ་ལ་སོགས་པ་རྣམ་པ་བཞིས་མཆོད་
[266b.4]ལ། ཕྱག་བཞི་བྱས་ཏེ། ཡང་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་པདྨ་ལ་རང་གི་རིག་པའི་ཡི་གེ་རྣམ་པར་བཀོད་ནས། དེ་ཉིད་བརྗོད་ཅིང་བསྒོམ་པར་བྱའོ། །བདུག་པ་ལ་སོགས་མཆོད་བྱས་ན། ཞེས་བྱ་བ་ནི་ནོར་བུའི་རིགས་
[266b.5]ཀྱི་དཀྱིལ་འཁོར་ལས་བཤད་པའི་བདུག་པ་ལ་སོགས་པའི་ལས་ཀྱི་ཕྱག་རྒྱ་བཞིས་བདག་ཉིད་མཆོད་པར་བྱའོ། །རྡོ་རྗེ་སྙིང་པོའི་ཏིང་འཛིན་གྱིས། །ཞེས་བྱ་བ་ནི་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱའི་རྣལ་འབྱོར་ནི་རྡོ་རྗེ་སྙིང་པོའི་
[266b.6]ཏིང་ངེ་འཛིན་ཏོ། །རྡོ་རྗེ་སྙིང་པོའི་ཏིང་ངེ་འཛིན་དེས། །ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་མཚན་ཉིད་བསམ་ཞིང་། མངོན་པར་འདོད་པའི་དངོས་གྲུབ་གང་ཡིན་པ་དེ་ཐམས་ཅད་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་
[266b.7]ཅད་གྲུབ་པའི་ལས་ཀྱི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པ་ལ་སོགས་པའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ནོར་བུའི་རིགས་ཀྱི་རང་གི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་
[267a]
[267a.1]བཅིངས་ཏེ། རིན་ཆེན་བདུག་པ་མ་ལ་སོགས་པའི་རྣམ་པ་བཞི་སྙིང་གའི་རྡོ་རྗེ་རིན་པོ་ཆེ་ལས་རྣམ་པར་སྤྲུལ་ལ། བདག་ཉིད་ཡང་དག་པར་མཆོད་དེ། ཕྱག་བཞི་བྱས་ནས། ཡང་ནོར་བུའི་རིགས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་
[267a.2]བཅིངས་ཏེ། སྙིང་གའི་རྡོ་རྗེ་རིན་པོ་ཆེ་ལ་རང་གི་རིག་པའི་ཡི་གེ་རྣམ་པར་བཀོད་དེ། དེ་ཉིད་ཟློས་ཤིང་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་གསུངས་པའི་ལས་ཀྱི་ཕྱག་རྒྱ་བསྒྲུབ་པ་བཤད་ནས། ད་ནི་དེ་བཞིན་
[267a.3]གཤེགས་པ་ལ་སོགས་པ་རིགས་ཐམས་ཅད་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཡང་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱིས་བྱིན་གྱིས་བརླབས་པའི་རྣལ་འབྱོར་གྱིས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་
[267a.4]པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་བསྒོམ་པའི་དངོས་གྲུབ་ཀྱི་རྒྱུད་གསུངས་པ། དེ་བཞིན་གཤེགས་པ་ཐམས་ཅད་དང་རིགས་རྣམས་ཀྱི་ཕྱག་རྒྱ་ནི་ཕྱག་རྒྱ་ཆེན་པོའོ། །དེ་བསྒོམ་པ་ནི་ཡང་དང་ཡང་མངོན་དུ་བྱེད་པའོ། །དེའི་དངོས་གྲུབ་ཕྱག་རྒྱ་ཆེན་པོ་འགྲུབ་
[267a.5]པའོ། །དེ་སྟོན་པར་བྱེད་པའི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་ནི་བརྟན་པར་བྱའོ། །རྣལ་འབྱོར་ནི་བསྒོམ་པར་བྱས་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་མངོན་དུ་བྱེད་པའོ། །རྡོ་རྗེ་ཕྲ་མོའི་ཚུལ་
[267a.6]གྱིས་ནི། །རྡོ་རྗེ་ཕྲ་མོ་བསྒོམས་པའོ། །དེ་སྔར་བཤད་པའི་ཚུལ་གྱིས་ཟླ་བ་གསུམ་བསྒོམས་ལ། ཕྱིས་སེམས་སོ་སོར་རྟོག་པ་ལ་སོགས་པའི་རིགས་ཀྱིས་ཡ་ཐ་སརྦ་ཏ་ཐཱ་ག་ཏ་ཏ་སྠ་ཨ་ཧཾ། ཞེས་བྱ་བའི་ང་རྒྱལ་བསྒོམ་པར་བྱའོ། །སངས་རྒྱས་རྣལ་འབྱོར་ཏིང་འཛིན་གྱིས། །ཞེས་
[267a.7]བྱ་བ་ནི་སེམས་རྣམ་པར་གཡེང་བ་མེད་པའོ། །དངོས་གྲུབ་དམ་པ་ཐོབ་པར་འགྱུར། །ཞེས་བྱ་བ་ནི་སངས་རྒྱས་ཉིད་ཀྱིའོ། །གང་གིས་ཤེ་ན། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་སྟེ། རྣལ་འབྱོར་པས། སངས་རྒྱས་ཕྱག་རྒྱ་རབ་བསྒྲུབ་པའོ། །སེམས་དཔའ་
[267b]
[267b.1]ཞེས་གྲགས་ཀུན་བདག་ཉིད། །ཅེས་བྱ་བ་ནི་རྡོ་རྗེ་སེམས་དཔའོ། །ཞེས་ཀྱི་སྒྲ་ནི་གང་གི་ཕྱིར་གྱི་དོན་ཏོ། །གང་གི་ཕྱིར་རྡོ་རྗེ་སེམས་དཔའ་ནི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་རང་བཞིན་ཡིན་པའི་ཕྱིར་དང་། སེམས་ཅན་ཐམས་ཅད་ཀྱི་རྒྱུད་ཀྱི་རྗེས་སུ་སོང་བ་ཡིན་
[267b.2]པ་དེའི་ཕྱིར་རོ། །གྲགས་པའི་སྒྲ་ནི་ལྐོག་ཏུ་མ་གྱུར་པའོ། །ཀུན་ཞེས་བྱ་བ་ནི་སེམས་ཅན་ཐམས་ཅད་ཀྱི་ཁམས་དང་སེམས་ལས་བྱུང་བའི་རང་བཞིན་ནི། །བདག་གི་ལུས་ལ་གནས་པ་སྟེ། །ཞེས་བྱ་བ་ནི་བདག་ཉིད་ཀྱང་བདག་ཉིད་ཀྱིས་དེའི་བདག་ཉིད་དུ་རབ་ཏུ་ཞུགས་པའི་སྦྱོར་བས་
[267b.3]ཡང་དག་པར་གནས་པའོ། །དེ་ལྟར། སེམས་དཔའ་བདག་ཅེས་བྱིན་བརླབས་པས། །ཞེས་བྱ་བ་ནི་མངོན་དུ་བྱས་པའོ། །རྡོ་རྗེ་སེམས་དཔའ་བདག་ཡིན་ནོ། །ཞེས་ང་རྒྱལ་བསྐྱེད་ནས། རྡོ་རྗེ་སེམས་དཔའི་བདག་ཉིད་དུ་བསྒོམས་ན་འགྲུབ་པར་འགྱུར་ཞེས་བྱ་བ་ནི་རྣལ་འབྱོར་པས་དངོས་
[267b.4]གྲུབ་འགྲུབ་པར་འགྱུར་རོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་མཉམ་པའི་ཐལ་མོ་དང་། རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིངས་པ་དང་། རྡོ་རྗེ་བསྡམས་པ་དྲལ་བ་དང་། དེ་ནས་དབབ་པ་བསྐྱེད་པ་དང་། རྡོ་རྗེ་ཁུ་ཚུར་གྱིས་དམ་ཚིག་གི་ཕྱག་རྒྱ་
[267b.5]བཅིངས་པ་དང་སྡིག་པ་དྲལ་བའི་ཕྱག་རྒྱ་བཅིངས་པ་དང་། རང་གི་སྙིང་གའི་རྡོ་རྗེ་ལ་རང་གི་ལྷའི་སྙིང་པོ་ཡིད་ཀྱིས་བྲིས་ལ། དེ་ཉིད་བརྗོད་ཅིང་ཆོས་བདག་མེད་པར་བསྒོམས་ཏེ། དེ་ནས་རང་གི་ལྷའི་སྙིང་པོ་དེ་ཉིད་དང་དབྱངས་ཀྱི་ཡི་གེ་བཅུ་དྲུག་ལས་སྙིང་གར་ཟླ་བའི་དཀྱིལ་འཁོར་གྱི་རྣམ་
[267b.6]པར་བསམ་པར་བྱ་སྟེ། དེ་ནས་དེའི་སྟེང་དུ་སྙིང་པོ་དེ་ཉིད་དང་། ཡི་གེ་ཀ་ལ་སོགས་པ་དང་བཅས་པ་ལ་སྔ་མ་བཞིན་དུ་ཟླ་བའི་དཀྱིལ་འཁོར་གཉིས་པ་བསམ་མོ། །ཟླ་བའི་དཀྱིལ་འཁོར་གཉིས་པ་དེ་ཉིད་རང་གི་ལྷའི་སྙིང་པོ་དང་བཅས་པ་ལ་རྡོ་རྗེ་རྩེ་ལྔ་པ་ཉིད་རང་གི་ལྷའི་མཚན་མའི་
[267b.7]གཟུགས་སུ་བསྒོམ་པར་བྱའོ། །དེ་ནས་རང་གི་ལྷའི་མཚན་མའི་དབུས་སུ་རང་གི་ལྷའི་སྙིང་པོ་རྣམ་པར་བསམས་ཏེ། རང་གི་ལྷའི་ཕྱག་རྒྱའི་ང་རྒྱལ་ཇི་ལྟ་བ་བཞིན་དུ་བསྒོམ་པར་བྱའོ། །དེ་ཉིད་བཛྲ་སཏྭ་ཨ་ཧཾ་ཞེས་བརྗོད་པས་རྡོ་རྗེ་སེམས་དཔའི་གཟུགས་སུ་བདག་ཉིད་བསྒོམ་པར་བྱའོ། །དེ་ནས་
[268a]
[268a.1]བསྙེམས་པ་དང་བཅས་པས་རྡོ་རྗེ་གསོར་ཞིང་། ཡང་བཛྲ་སཏྭ་ཨ་ཧཾ་ཞེས་བསྒོམས་ལ། དེ་ནས་དེ་ཉིད་རྡོ་རྗེ་སེམས་དཔའི་ལྷའི་ངོ་བོར་བདག་ཉིད་སྔ་མ་བཞིན་དུ་བསྒོམ་པར་བྱའོ། །རྡོ་རྗེ་སེམས་དཔའི་རྣལ་འབྱོར་པའི་བསྒོམས་པ་ནི་སྔར་དེ་ཁོ་ན་ཉིད་སྟོན་པའི་རྒྱུད་དུ་བཤད་
[268a.2]ཟིན་ཏོ། །སེམས་དཔའ་ཇི་བཞིན་རྒྱ་དེ་བཞིན། །ཞེས་བྱ་བ་ནི་ཇི་ལྟར་རྡོ་རྗེ་ཧཱུཾ་མཛད་ལ་སོགས་པ་ནས་རྡོ་རྗེ་སེམས་དཔར་གྱུར་པ་དེ་བཞིན་དུ་རྡོ་རྗེ་ཧཱུཾ་མཛད་ལ་སོགས་པའི་མཚན་མའི་ཕྱག་རྒྱ་ཡང་བྱའོ། །ཇི་ལྟར་ཕྱག་རྒྱ་དེ་བཞིན་བདག །ཅེས་བྱ་བ་ནི་ཇི་ལྟར་རྡོ་རྗེ་ཧཱུཾ་མཛད་ལ་སོགས་པ་དང་
[268a.3]རྡོ་རྗེ་འབར་བ་ལ་སོགས་པའི་ཕྱག་རྒྱ་རྡོ་རྗེ་ཧཱུཾ་མཛད་ལ་སོགས་པའི་རང་བཞིན་དུ་བདག་ཡིན་ཞེས་གཟུགས་དང་ཐ་མི་དད་པར་ང་རྒྱལ་བསྐྱེད་ཅིང་བསྒོམ་པར་བྱའོ། །བསྒོམ་པ་འདི་ཡི་ཚུལ་གྱིས་ནི། །རྡོ་རྗེ་རིགས་ཀྱི་ཕྱག་རྒྱ་བསྒྲུབ་པར་བྱའོ་ཞེས་བྱ་བ་ཡིན་ནོ། །དེའི་ཆོ་ག་འདི་སྐད་
[268a.4]སྟོན་པ་ཡིན་ཏེ། སྔ་མ་བཞིན་དུ་སྡིག་པ་དྲལ་བའི་མཐར་ཐུག་པའི་ཆོ་ག་རྗེས་སུ་སྤྱད་ལ། སྙིང་གའི་རྡོ་རྗེ་འབར་བ་ལ་རང་གི་ཁྲོ་བོའི་ལྷའི་སྙིང་པོ་རྣམ་པར་བསམས་ཏེ། དེ་ཉིད་བརྗོད་ཅིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །སྔ་མ་བཞིན་དུ་ཟླ་བའི་དཀྱིལ་འཁོར་ལ་སོགས་པའི་
[268a.5]རིམ་པས་ཟླ་བའི་དཀྱིལ་འཁོར་གྱི་སྟེང་དུ་རང་གི་ལྷའི་མཚན་མ་བསྐྱོད་ལ། དེའི་དབུས་སུ་སྙིང་པོ་བཀོད་ནས། སེམས་དཔའ་ཇི་བཞིན་རྒྱ་དེ་བཞིན། །ཕྱག་རྒྱ་ཇི་བཞིན་དེ་བཞིན་བདག །ཅེས་བྱ་བས་ཕྱག་རྒྱ་དང་ལྷན་ཅིག་ཏུ་ཐ་མི་དད་པའི་བདག་ཉིད་དུ་ཟླ་བའི་དཀྱིལ་འཁོར་ལ་སོགས་པ་བསྒོམས་ཏེ།
[268a.6]དེའི་རིགས་ཐམས་ཅད་ཕྱག་རྒྱ་དེ་ལས་སྤྲུལ་ལ། གདུག་པ་ཐམས་ཅད་བཏུལ་ནས་དེ་ཐམས་ཅད་ཀྱི་ཕྱག་རྒྱའི་གཟུགས་དེ་ལས་བསམ་པར་བྱའོ། །ཆོས་ཀྱི་ཕྱག་རྒྱ་ནི་པདྨའི་རིགས་ཀྱི་ཕྱག་རྒྱ་ཆེན་པོའོ། །དེའི་ཚུལ་ནི་རང་གི་ལྷའི་མཚན་མའི་ང་རྒྱལ་བསྒོམ་པར་བྱའོ། །ཇི་ལྟར་བྱ་ཞེ་ན། རྡོ་རྗེ་
[268a.7]ཕྲ་མོ་བསྒོམ་བྱས་ལ། ཞེས་བྱ་བ་སྨོས་ཏེ། སྔར་བཤད་པའི་ཚུལ་གྱིས་རྡོ་རྗེ་ཕྲ་མོ་ཟླ་བ་གསུམ་བསྒོམས་ལ།ཕྱིས་ཆོས་ཀྱི་ཕྱག་རྒྱའི་སྦྱོར་བ་བསྒོམ་པར་བྱའོ། །གང་གི་ཕྱག་རྒྱ་དེ་དག་ཀུན། །སེམས་དཔའ་ཆེན་པོའི་ཏིང་ངེ་འཛིན། །ཞེས་བྱ་བ་ནི་སྙིང་པོའི་ཕྱག་རྒྱའི་སྔགས་ཀྱི་རིག་པ་
[268b]
[268b.1]ཐམས་ཅད་ཀྱིས་རང་གི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བསྒོམ་པར་བྱའོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་གཟུགས་སུ་བདག་ཉིད་བསྒོམས་ལ་སྙིང་གའི་ཕྱག་རྒྱ་ལ་
[268b.2]སྔགས་ཀྱི་རིག་པ་བཟླ་བར་བྱའོ། །སངས་རྒྱས་ཀུན་ལ་དབང་བསྐུར་དང་། །ཞེས་བྱ་བ་ནི། རིན་པོ་ཆེའི་ཅོད་པན་གྱིས། །སངས་རྒྱས་ཀུན་ལ་དབང་བསྐུར་རོ། །མཆོད་པའི་གདུགས་དང་། རྒྱལ་མཚན་དང་། བ་དན་དང་། རིན་པོ་ཆེ་སྣ་བདུན་པོ་དེ་དག་ཉིད་ཀྱིས་སངས་རྒྱས་ཐམས་ཅད་
[268b.3]ལ་མཆོད་པའོ། །དམ་ཚིག་གི་དངོས་གྲུབ་རྣམས་ནི་ནོར་བུའི་རིགས་ཀྱི་དཀྱིལ་འཁོར་ཐམས་ཅད་ཀྱི་དངོས་གྲུབ་བོ། །རྡོ་རྗེ་ལས་རྣམས་འགྲུབ་པར་བྱེད། །ཅེས་བྱ་བ་ནི་སངས་རྒྱས་ཀུན་ལ་དབང་བསྐུར་བ་དང་། མཆོད་པའི་དམ་ཚིག་གི་ལས་རྣམས་ཐ་མི་དད་པར་བསྒྲུབས་པས།
[268b.4]བཅོམ་ལྡན་འདས་འཕགས་པ་ནམ་མཁའི་སྙིང་པོའི་བདག་ཡིན་ནོ་ཞེས་ངེས་པར་བསྒོམ་པར་བྱའོ། །དེ་ནས་ནོར་བུའི་རིགས་ཀྱི་ལྷ་མོའི་དངོས་གྲུབ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཟླ་བའི་དཀྱིལ་འཁོར་གྱི་སྟེང་དུ་ལྷའི་ཕྱག་
[268b.5]རྒྱའི་མཚན་མ་རྣམ་པར་བསམས་ལ། ཕྱག་རྒྱའི་དབུས་སུ་བཟླས་པའི་ཡི་གེ་བཀོད་ནས་སྙིང་པོ་བརྗོད་ཅིང་། བདག་གི་མཚན་མའི་ཕྱག་རྒྱའི་གཟུགས་སུ་བསྒོམས་ལ། མཚན་མའི་ཕྱག་རྒྱ་དེ་ལས་ནོར་བུའི་རིགས་ཐམས་ཅད་སྤྲུལ་ཏེ། དེས་དེ་བཞིན་གཤེགས་པ་ལ་སོགས་
[268b.6]པ་སེམས་ཅན་གྱི་ཁམས་ཐམས་ཅད་དབང་བསྐུར་བས་དབང་བསྐུར་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ནོར་བུ་ཆེན་པོའི་རིགས་ཀྱི་རང་བཞིན་དུ་བྱས་ནས། ཕྱག་རྒྱ་དེ་ལ་གཞུག་པར་བྱའོ། །དེ་ནས་ཕྱག་རྒྱའི་གཟུགས་དེ་སེམས་དཔར་བྱིན་གྱིས་བརླབས་
[268b.7]བའི་སྦྱོར་བས་རྡོ་རྗེ་སེམས་དཔར་བསྒོམས་ལ། གང་གི་ལྷའི་ཕྱག་རྒྱ་ཆེན་པོའི་གཟུགས་སུ་ཡང་བསྒོམ་པར་བྱའོ་ཞེས་བྱ་བ་འདི་ནི་དེ་ཁོ་ན་ཉིད་མ་ཡིན་པ་ལ་མོས་པའི་རྣལ་འབྱོར་པའི་རིམ་པ་ཡིན་ནོ། །གང་ཞིག་ཤིན་ཏུ་དེ་ཁོ་ན་ཉིད་ལ་མོས་པའི་རྣལ་འབྱོར་པ་ནི། དེའི་ཕྱག་རྒྱ་
[269a]
[269a.1]བཅིངས་ལ། སེམས་དཔའ་བྱིན་གྱིས་བརླབ་པའི་སྦྱོར་བ་ཙམ་སྔོན་དུ་བྱས་ལ། རང་གི་ལྷའི་ང་རྒྱལ་བསྐྱེད་ཅིང་བསྒོམ་པར་བྱའོ། །དེ་ལ་དེ་ཁོ་ན་ཉིད་ལ་མོས་པའི་རྣལ་འབྱོར་པའི་མཚན་ཉིད་ཡིན་ཏེ། གང་གི་ཚེ་ལས་དང་པོ་པའི་རྣལ་འབྱོར་བས་རང་ལ་བྱིན་གྱིས་
[269a.2]བརླབ་པ་ལ་སོགས་པའི་ཆོ་ག་རྒྱས་པ་ནས་བརྩམ་པར་བྱ་བའི་ཚོགས་ཐམས་ཅད་ཐུན་བཞིའི་སྦྱོར་བས་ཉིན་རེ་ཞིང་མཚན་མ་ཐོབ་པར་འགྱུར་བའམ། སྐྱེ་བ་གཞན་ལས་གོམས་པའི་མཐུས་སྐྱེས་བུའམ་འགའ་ཞིག་དགེ་བའི་བཤེས་གཉེན་ལས་ཐོབ་པའི་རྣལ་འབྱོར་པ་གདམས་ངག་བསྒོམས་
[269a.3]ནས། ཐོག་མ་བརྩམས་པ་ནས་བཟུང་ནས་རྒྱུན་མི་འཆད་པ་ཉིད་དུ་མཚན་མ་ཉེ་བར་སྐྱེ་བར་འགྱུར་རོ། །དེ་དག་གི་སྟོབས་ཀྱིས་ཕྱག་རྒྱ་བཅིངས་པ་ལ་སོགས་པ་རྣམས་ལ་མངོན་པར་ཞེན་པ་མེད་པར་བསྒོམས་པས་འགྱུར་བ་འདི་ནི་དེ་ཁོ་ན་ཉིད་ལ་གོམས་པའི་རྣལ་འབྱོར་པ་ཡིན་ཏེ། དང་པོར་ལྷག་པར་
[269a.4]མོས་པ་ཙམ་གྱིས་ནི་མ་ཡིན་ནོ། །དེ་སྐད་དུ་ཡང་། དེ་ཉིད་དམན་པའི་རྣལ་འབྱོར་པས། །ལྷ་ལ་དམིགས་པར་འགྱུར་བས་ན། །ལུགས་མ་ལ་སོགས་དག་པ་ལ། །གཟུགས་བརྙན་རྣལ་འབྱོར་ཉེ་བར་བསྐྱེད། །སྐུའམ་རས་རིས་མཆོད་རྟེན་རྣམས། །ཤིན་ཏུ་མཉམ་གཞག་རྣལ་འབྱོར་པས། །མངོན་
[269a.5]སུམ་དུ་ནི་མཐོང་བ་ན། །དེ་ནི་རྫོགས་པ་ཡིན་པར་བཤད། །དཀར་དང་སེར་པོའི་དཀྱིལ་འཁོར་ནི། །འོད་ཟེར་ཕྲེང་བ་འཁྲིགས་པ་ཡི། །ངོ་མཚར་བར་ནི་འགྱུར་བ་དེ། །བློ་ལྡན་གྱིས་ནི་མཁའ་ལ་མཐོང་། །བློ་ལྡན་ཁ་དོག་སྣ་ཚོགས་དེས། །གང་གིས་ཡིད་ནི་མཚོན་པར་བྱ། །
[269a.6]དཀར་པོ་དགེ་བར་ཤེས་པར་བྱ། །མི་ཤེས་པ་ལ་ནག་པོར་སྣང་། །ཆགས་ཅན་ཤིན་ཏུ་དམན་པར་བཤད། །ཤིན་ཏུ་དགའ་ལ་དེ་བཞིན་སེར། །སྤྲིན་གྱིས་ནོན་པ་ལྟ་བུ་ནི། །མཁས་པས་རྨོངས་པར་ཤེས་པར་བྱ། །བདག་ཉིད་ཡོངས་སུ་དག་པའི་ཆོ་གའོ། །མཚན་མ་འབྱུང་བར་འགྱུར་བ་
[269a.7]ན། །སེམས་ནི་བརྟན་པར་ཤེས་པར་བྱ། །དེ་ལྟར་མཚན་མ་ཉིད་རྣམས་ནི། །སངས་རྒྱས་རྒྱལ་བའི་བདེ་མཆོག་གི། །རྡོ་རྗེ་རིན་ཆེན་ཆུ་སྐྱེས་དང་། །སྣ་ཚོགས་ལྕགས་ཀྱུ་ཉི་མ་དང་། །རལ་གྲི་གོ་ཆ་མདའ་གཞུ་དང་། །རིན་ཆེན་རྒྱལ་མཚན་རྣམས་ཀྱིས་བརྒྱན། །འཁོར་ལོ་མཆེ་བ་དེ་བཞིན་མགུ། །
[269b]
[269b.1]བཞད་པས་གསུངས་པ་ཁུ་ཚུར་བཅངས། །སྒེག་མོ་དེ་བཞིན་ཕྲེང་བ་མོ། །གླུ་མ་དང་ནི་གར་མ་བདག །མེ་ཏོག་བདུག་པ་མར་མེ་དང་། །དེ་བཞིན་དྲི་ཆབ་ལ་སོགས་ཚོགས། །མེ་ཏོག་ཀུན་དགའ་དྲི་གཙང་ཁང་། །དགེ་སློང་དེ་བཞིན་དགེ་སློང་མ། །དངོས་གྲུབ་དྲང་སྲོང་གཉེན་རྣམས་དང་། །རྒྱལ་
[269b.2]རིགས་སྐྱེ་བོས་བསྔགས་པ་དང་། །བུ་མོ་གཞོན་ནུས་བརྒྱན་པ་དང་། །ཆུ་བོ་རྒྱ་མཚོ་ནིའུ་སིང་དང་། །གདུགས་དང་རྒྱལ་མཚན་བ་དན་དང་། །རོལ་མོ་སྣ་ཚོགས་བརྡུང་བ་དང་། །ཤེས་རབ་ཕ་རོལ་ཕྱིན་ལ་སོགས། །ཤེས་པའི་སྒྲ་ནི་དྲི་མ་མེད། །ཉི་ཟླའི་དབྱིབས་དང་འདྲ་བ་ནི། །པདྨ་ས་གཞི་འོད་
[269b.3]དང་བཅས། །ནམ་མཁའི་གློག་ནི་སྣ་ཚོགས་མཚུངས། །རྣལ་འབྱོར་པ་ལ་རྟག་ཏུ་སྐྱེ། །དེ་དག་ཐམས་ཅད་རྣམ་སྤངས་པས། །མཚན་མ་མེད་ཅིང་འགྲིབ་པ་མེད། །རྟོག་པ་ཐམས་ཅད་རྣམ་སྤངས་ནས། །རྣལ་འབྱོར་རྟོག་པ་མེད་ལ་གནས། །དེ་ནས་རྣལ་འབྱོར་པ་དེ་ལ། །དགའ་བ་རྣམ་པ་ལྔ་
[269b.4]བསྐྱེད་དེ། །སྐད་ཅིག་ཐང་ཅིག་རྒྱུན་དག་ལ། །དེ་བཞིན་མཐར་ཐུག་འགྱུར་བ་དང་། །ཆོས་རྣམས་ཐམས་ཅད་ངེས་པས་ནི། །སངས་རྒྱས་ཀུན་ཞེས་རབ་ཏུ་གྲགས། །དེ་ལ་སྐད་ཅིག་མའི་དགའ་བ་ནི། །གང་ཚེ་སྐད་ཅིག་རེ་རེ་སེམས། །དམིགས་པ་ལ་ནི་གནས་པ་ན། །གཡེང་བ་འགོག་
[269b.5]པ་མེད་པས་ན། །དེ་ཕྱིར་སྐད་ཅིག་ཅེས་གྲགས་སོ། །དེ་ལ་ཐང་ཅིག་ཅེས་བྱ་བའི་བར་དུ་དགའ་བ་ནི། །གང་ཚེ་སྦྲང་མའི་ཁ་དག་ནས། །སྦྲང་རྩི་འབྱུང་བ་མྱངས་པ་ཡིས། །རྐང་པ་སྤྱི་བོའི་མཐར་ཐུག་པའི། །ལུས་ལ་ཁྱབ་པར་མཉམ་གཞག་པར། །བཀྲེས་དང་ནང་འབྱུང་བསལ་
[269b.6]ནས་ནི། །དེ་བཞིན་ལུས་ནི་ལས་རུང་དང་། །སེམས་ནི་དམིགས་པ་ལ་ཆགས་ནས། །རྟག་ཏུ་བརྟན་པར་གནས་པར་འགྱུར། །དེ་ལ་རྒྱུན་དུ་དགའ་བ་ནི། །དགའ་བས་མཆི་མ་འབྱུང་བ་དག། །མ་བསམས་ལུས་ལ་འབྱུང་བར་འགྱུར། །མགུ་བ་ཡི་ནི་ཏིང་ངེ་འཛིན། །དེ་ནི་རྒྱུན་ཞེས་བྱ་
[269b.7]བར་བཤད། །དེ་ནས་མཐར་ཐུག་པའི་དགའ་བ་ནི། གང་ཚེ་དམིགས་པ་ལ་ཆགས་པའི། །རྣལ་འབྱོར་པ་ལ་སེམས་འབྱུང་བ། །དེ་ཚེ་དགའ་བའི་ཁྱད་པར་ནི། །དོན་གཞན་ཉེ་བར་སྐྱེ་བར་འགྱུར། །གང་ཚེ་ལུས་ལ་སྐྱེས་པའི་རླུང་། །ལྷག་པར་རབ་ཏུ་ཞུགས་གྱུར་ན། །སེམས་ནི་རྣམ་པར་འཁྲུལ་
[270a]
[270a.1]བ་དང་། །གཡེང་བ་སྐྱེ་བར་མི་འགྱུར་བ། །དེ་ཚེ་རྣལ་འབྱོར་སེམས་རིག་པས། །སྲང་མདའི་ཚུལ་དུ་སྦྱང་བར་བྱ། །དགེ་བ་སྲུང་བའི་ཚུལ་དུ་ནི། །ཇི་ལྟ་བ་བཞིན་ངེས་པར་སྦྱར། །དེ་ལ་ཆོས་ཐམས་ཅད་དུ་ངེས་པའི་དགའ་བ་ནི། སོས་ཀའི་ཚ་བས་གདུངས་པ་ཡི། །
[270a.2]ཇི་ལྟར་ལམ་དུ་འཇུག་པའི་མི། །གངས་ཀྱི་ཆུ་ནི་ལེན་པའི་ཚེ། །ཚ་བའི་དུས་ཀྱིས་སྡུག་བསྔལ་ཏེ། །གང་ཞིག་འགོག་པར་བྱེད་པ་ན། །ཐམས་ཅད་རྣམ་པར་འཇིགས་པར་འགྱུར། །དགའ་ཞིང་བདེ་བའི་ཁྱད་པར་ནི། །ཡང་དང་ཡང་དུ་འཕེལ་བར་གཞག །རྣམ་པ་ཐམས་ཅད་ངེས་པ་ན། །
[270a.3]ཆོས་རྣམས་བླ་ན་མེད་པ་འཐོབ། །ལུས་ནི་ཤིན་ཏུ་སྤངས་པ་དང་། །ཉོན་མོངས་གསུམ་ནི་རྣམ་དག་པས། །བསམ་གཏན་དགའ་བའི་ཏིང་ངེ་འཛིན། །གཟུགས་རྣམས་ཀྱང་ནི་བསགས་པ་དང་། །ས་དང་ཕ་རོལ་ཕྱིན་པ་དང་། །མངོན་ཤེས་རྣམས་ནི་འབྱུང་བ་དང་། །འདོད་ཆགས་
[270a.4]ལ་སོགས་ཉེས་པ་ཆེ། །ཞིག་འགྱུར་དེ་ཚེ་རྣལ་འབྱོར་པས། །དང་པོའི་སྤྱོད་པ་ལ་ཞུགས་པས། །འགྲུབ་འགྱུར་འདི་ནི་ཐེ་ཚོམ་མེད། །ཉོན་མོངས་དགྲ་རྣམས་ཞི་ཕྱིར་དང་། །ཏིང་འཛིན་འཕེལ་བར་བྱ་བའི་ཕྱིར། །རང་ལྷའི་རྣལ་འབྱོར་ལ་གནས་ནས། །དེ་ནས་སྦྱིན་སྲེག་བརྩམ་
[270a.5]པར་བྱ། །ཟླ་བའི་དཀྱིལ་འཁོར་དབུས་སུ་ནི། །བདག་ཉིད་རྟག་ཏུ་བསམ་པར་བྱ། །དེ་ཡི་ལུས་ཀྱི་སྙིང་ག་ལས། །འོད་ཟེར་འབར་བའི་ཚོགས་གསལ་བའི། །འོད་ཀྱི་དཀྱིལ་འཁོར་ཕྲེང་བ་ཡིས། །ཕྱོགས་བཅུར་བཞུགས་པའི་རྒྱལ་བ་དང་། །སྟོང་གསུམ་རྡུལ་དང་མཚུངས་པ་
[270a.6]ཡི། །ཁ་དོག་དཀར་པོ་ལ་སོགས་པ། །བསྡུས་ནས་ལུས་ལ་གཞུག་པར་བྱ། །ཞི་བའི་སྦྱིན་སྲེག་ཅེས་སུ་བཤད། །རྒྱས་པའི་ཆོ་ག་སེམས་ཅན་རྣམས། །མགུ་བའི་གཟུགས་སུ་བསམ་པར་བྱ། །ཤིན་ཏུ་ཉོན་མོངས་ཞི་བའི་ཕྱིར། །ཁྲོ་བོའི་གཟུགས་ཀྱི་ཁྱད་པར་བྱ། །རྗེས་སུ་ཆགས་པ་
[270a.7]བུད་མེད་ནི། །སྣ་ཚོགས་གཟུགས་ཅན་བསམ་པར་བྱ། །ལས་དང་པོ་པའི་སྦྱིན་སྲེག་འདི། །གཙོ་བོས་སྔར་ནི་བསྟན་པ་ཡིན། །དེ་ལྟར་བརྟན་པར་བྱས་ནས་ནི། །ཏིང་འཛིན་ཉམས་པར་མི་འགྱུར་རོ། །གཞན་ཡང་བཤད་པ། དེ་ཉིད་བསམས་པའི་རྣལ་འབྱོར་པས། །ལྷ་ལ་དམིགས་པར་
[270b]
[270b.1]འགྱུར་བ་ན། །རྣལ་འབྱོར་རང་གི་དམ་ཚིག་བདག །དམ་པའི་ཡི་གེ་འགྲུབ་པར་འགྱུར། །ལུགས་མ་ལ་སོགས་གཟུགས་བརྙན་ལ། །རྣལ་འབྱོར་སྐྱེ་བར་མི་འགྱུར་གྱི། །བྱང་ཆུབ་སེམས་ལ་རབ་བརྩོན་པས། །དེ་ལས་རྣལ་འབྱོར་ལྷར་འགྱུར་རོ། །བྱང་ཆུབ་སེམས་ཀྱི་རྡོ་རྗེ་འདི། །སངས་རྒྱས་
[270b.2]ཀུན་གྱི་བདག་ཉིད་དེ། །དེ་ཕྱིར་རྣལ་འབྱོར་ཀུན་བདག་གིས། །སངས་རྒྱས་ཐམས་ཅད་ཐོབ་པར་འགྱུར། །བདག་ཉིད་སངས་རྒྱས་ཀུན་དང་ནི། །གཟི་ཅན་ཀུན་དུ་ངེས་འགྱུར་བས། །རང་གི་ལྷ་ཡི་སྦྱོར་བ་ཡིས། །དེ་ཕྱིར་བདག་ཉིད་བསྒྲུབ་པར་བྱ། །འདི་ནི་སངས་རྒྱས་ཐམས་ཅད་
[270b.3]དང་། །གཟི་ཅན་ཐམས་ཅད་ཉིད་དང་ནི། །རྡོ་རྗེ་འཛིན་པ་ཐམས་ཅད་དུ། །ཚེ་འདི་ཉིད་ལ་འགྲུབ་པར་འགྱུར། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་གསུངས་སོ། །དེ་བཞིན་གཤེགས་པའི་རིགས་ལ་སོགས་པའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་གྱི་
[270b.4]བཤད་པ་རྫོགས་སོ།། །།འཕགས་པ་དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བའི་རྒྱུད་ཕྱི་མའི་བཤད་པའོ། །དེ་ལྟར་མཆོག་ཏུ་གྱུར་པའི་སེམས་ཅན་རྣམས་རྗེས་སུ་གཟུང་བའི་ཕྱིར་རྒྱུད་ཕྱི་མ་བཤད་ནས། ད་ནི་བསྒོམས་པས་འཇིགས་ཤིང་
[270b.5]སྐྲག་པའི་བྱ་བ་ལ་མངོན་པར་ཞེན་པའི་སེམས་ཅན་ཐམས་ཅད་རྗེས་སུ་གཟུང་བའི་ཕྱིར། རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མ་གསུངས་པ་ཡིན་ནོ། །འདིར་ཡང་རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མར་ནི་རང་གི་རིགས་ཀྱི་དཀྱིལ་འཁོར་ཆེན་པོ་མཐོང་བ་ཙམ་གྱིས་རང་གི་རིགས་ལས་མཐོང་
[270b.6]བའི་སྙིང་པོ་དང་། ཕྱག་རྒྱ་དང་། སྔགས་དང་། རིག་སྔགས་བསྒྲུབ་པ་ནི་ཕྱག་རྒྱ་ཆེན་པོས་འཇིགས་ཤིང་སྐྲག་པ་བསོད་ནམས་ཆུང་བའི་སེམས་ཅན་རྗེས་སུ་གཟུང་བའི་ཕྱིར། བཅོམ་ལྡན་འདས་ཀྱིས་རྗེས་སུ་གནང་བར་མཛད་པ་ཡིན་ནོ། །རང་གི་རིགས་ཀྱི་དཀྱིལ་འཁོར་ཆེན་པོ་ལས་
[270b.7]གསུངས་པའི་བསྒྲུབ་པར་བྱ་བའི་དངོས་པོ་ཐམས་ཅད་ཀྱི་སྒྲ་ནི་སྙིང་པོ་ཞེས་བྱ་བའོ། །རང་གི་རིགས་ཀྱི་གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ཐམས་ཅད་ཀྱི་སྒྲ་ནི་ཕྱག་རྒྱའོ། །རང་གི་རིགས་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་བསྒྲུབ་པར་བྱ་བའི་དངོས་
[271a]
[271a.1]གྲུབ་ཐམས་ཅད་ཀྱི་སྒྲ་ནི་སྔགས་སོ། །རང་གི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་བསྒྲུབ་པར་བྱ་བའི་དངོས་གྲུབ་ཐམས་ཅད་ཀྱི་སྒྲ་ནི་རིགས་པ་ཡིན་ཞེས་བཅོམ་ལྡན་འདས་ཀྱིས་བསྟན་ཏོ། །དེ་ལ་དཀྱིལ་འཁོར་ཆེན་པོ་མཐོང་བའི་དུས་
[271a.2]ངེས་པ་དང་། བཟླས་པའི་གྲངས་དང་། རས་རིས་དང་། ཕྱིའི་མཆོད་པ་རྣམ་པ་ལྔ་ལ་སོགས་པའི་མཆོད་པ་དང་། ཕྱག་རྒྱའི་མཆོད་པ་དང་། སྐྱིལ་མོ་ཀྲུང་ལ་སོགས་པའི་ངེས་པ་ནི་ཡོ་བྱད་དེ། དེ་ལ་མངོན་པར་ཞེན་པ་རྣམས་ཀྱི་དོན་བསྟན་པའི་ཕྱིར། དེ་ནས་ཞེས་བྱ་བ་
[271a.3]ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་སྐབས་སུ་བབ་པ་སྟེ། ལྟ་བ་ངན་པ་ལ་སོགས་པའི་སེམས་ཅན་རྗེས་སུ་གཟུང་བའི་སྐབས་སུ་བབ་པ་ཡིན་ནོ་ཞེས་བྱ་བའི་དོན་ཏོ། །དེ་ལ་ལྟ་བ་ངན་པ་ནི་བྱ་བ་ཙམ་གྱིས་ཀུན་ལ་སྨད་པ་ཟབ་མོའི་ཆོས་ལ་མི་མོས་པའོ། །ཆགས་
[271a.4]བྲལ་ནི་གསང་བ་བསྒོམ་པ་རབ་ཏུ་སྤོང་བར་བྱེད་པ་དེ་ལྟ་བུར་གྱུར་པ་དེ་དག་རྒྱུད་ཕྱི་མ་ལས་བཤད་པའི་གསང་བ་འདི་ནི་མི་རིགས་ཏེ། ལྷག་པར་མོས་པའི་དོན་མི་འགྲུབ་པའི་ཕྱིར་རོ། །དེ་དག་སེམས་ཅན་ཀུན་ལ་ཕན་དོན་དུ་ནི་དེ་བཞིན་དུ་བདེ་བའི་འབྲས་བུ་ཐོབ་པའི་ཕྱིར་རོ། །དེ་བཞིན་ཆོ་ག་
[271a.5]བཤད་པར་བྱའོ་ཞེས་བྱ་བ་ནི། ཇི་ལྟར་མཆོག་ཏུ་གྱུར་པའི་སེམས་ཅན་རྗེས་སུ་གཟུང་བའི་ཕྱིར། མཆོག་ཏུ་གྱུར་པའི་སེམས་ཅན་དང་མཐུན་པའི་ཆོ་ག་བྱ་བ་བསྟན་ནས། དེ་ནས་ཡོངས་སུ་མ་སྨིན་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར། ལས་དང་པོ་པའི་སེམས་ཅན་དང་
[271a.6]རྗེས་སུ་མཐུན་པའི་ཆོ་ག་བཤད་པར་བྱའོ་ཞེས་བྱ་བའི་ཐ་ཚིག་གོ། །དེ་ནས་ཡང་ཞེས་བྱ་བའི་སྒྲ་ནི་དེ་མ་ཐག་པའོ། །ཕྱག་ན་རྡོ་རྗེ་ནི་རྡོ་རྗེ་སེམས་དཔའོ། །ཡང་གི་སྒྲ་ནི་རྒྱུད་ཕྱི་མ་ལ་ལྟོས་པའོ། །དེ་བཞིན་གཤེགས་པ་ཐམས་ཅད་ཀྱི་སྒྲ་ནི་བཤད་ཟིན་ཏོ། །རིགས་ནི་ཇི་སྐད་དུ་བཤད་པའི་
[271a.7]རིགས་རྣམས་སོ། །ཡོ་བྱད་ནི་དཀྱིལ་འཁོར་ཆེན་པོར་བསྟན་པའི་མཆོད་པ་ལ་སོགས་པ་དེ་དག་སྒྲུབ་པར་བྱེད་པའོ། །དེའི་ཆོ་ག་རྒྱས་པ་ནི་རྣམ་པ་སྣ་ཚོགས་པ་སྟེ། འདི་གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །དེ་ལ་ཞེས་བྱ་བའི་སྒྲ་ནི་ངག་ཉེ་བར་དགོད་པའོ། །འདི་
[271b]
[271b.1]ཞེས་བྱ་བ་ནི་འཆད་པར་འགྱུར་བའི་བློ་ལ་གནས་པ་སྟེ། དཀྱིལ་འཁོར་ཆེན་པོར་བཤད་པའི་མཆོད་པ་ལ་སོགས་པའི་ཡོ་བྱད་དོ། །དེ་བཞིན་གཤེགས་པ་ཐམས་ཅད་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། དེ་དག་གི་ཡོ་བྱད་དང་། ཆོ་ག་ཐམས་ཅད་རྒྱས་པར་གྱུར་
[271b.2]བ་ནི་བསྟན་པའོ། །དེ་ནས་ཞེས་བྱ་བ་ནི་དམིགས་ཀྱིས་དགར་བའོ། །དེ་བཞིན་གཤེགས་པ་ལ་སོགས་པའི་རིགས་ཀྱི་སྙིང་པོ་དང་། ཕྱག་རྒྱ་དང་། སྔགས་དང་། རིགས་རྣམས་ཀྱི་ནང་ནས་རེ་ཞིག་དེ་བཞིན་གཤེགས་པ་རྣམས་དེའི་རིགས་ཀྱི་སྙིང་པོའི་ཡོ་བྱད་འབྱུང་བ་ཡིན་ནོ། །དཀྱིལ་འཁོར་
[271b.3]ཆེན་པོ་མཐོང་ནས་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་སྔར་བཤད་པའི་ཆོ་ག་མཐོང་ནས་བདུག་པ་དང་མེ་ཏོག་དང་། མར་མེ་དང་། དྲིའི་ཕྱག་རྒྱ་རྣམས་ཀྱིས་མཆོད་པར་བྱ་སྟེ་ཞེས་བྱ་བ་ནི་རྡོ་རྗེ་བདུག་པ་མ་ལ་སོགས་པའི་ལས་ཀྱི་ཕྱག་རྒྱ་རྣམ་པ་བཞི་གང་ལས་བྱུང་བས་བདག་ཉིད་ཡང་
[271b.4]དག་པར་མཆོད་ལ། རྡོ་རྗེ་བཟླས་པས་བརྩམ་པར་བྱའོ་ཞེས་ཤེས་པར་བྱའོ། །ཇི་ལྟར་འདུག་སྟེ་ཞས་བྱ་བ་ནི་དེ་བཞིན་གཤེགས་པའི་ཟློས་པ་པོས་བྱང་ཆུབ་ཀྱི་སྙིང་པོ་ལ་སོགས་པར་འདུག་པ་དང་། རྡོ་རྗེ་སེམས་དཔའ་ལ་སོགས་པ་ནི་ཀུན་དགའ་ར་བ་ལ་སོགས་པ་སྟེ། དེ་སྐད་དུ་ཡང་།
[271b.5]དེ་བཞིན་གཤེགས་པ་ཐམས་ཅད་འདུས་ནས་ཞེས་བྱ་བ་ལ་སོགས་པ་རྒྱུད་ལས་བཤད་པས་སོ། །དེ་ལ་ཇི་སྐད་བསྟན་པའི་གནས་སུ་གནས་པ་ནི་ཇི་ལྟ་བ་བཞིན་དུ་གནས་པའོ། །དུས་ཇི་ཙམ་ཞིག་ཏུ་གནས་ཤེ་ན། ཟླ་བ་བཞིར་ཞེས་བྱ་བ་སྨོས་ཏེ། ཟླ་བ་བཞིར་གནས་ཇི་ལྟ་བ་བཞིན་དུ་
[271b.6]འདུག་ཅིང་། དེ་ཟློས་ཤིང་གནས་ཏེ། དུས་བཞིར་བདུག་པ་ལ་སོགས་པས་མཆོད་པ་བྱའོ་ཞེས་བྱ་བ་ནི་སྔ་དྲོ་དང་། ཉི་མ་ཕྱེད་དང་། དགོངས་ཀ་དང་། མཚན་ཕྱེད་ཀྱི་དུས་སུ་བདུག་པ་ལ་སོགས་པའི་ཕྱག་རྒྱ་བཞིས་བདག་ཉིད་དང་། དེ་བཞིན་གཤེགས་པ་ཐམས་ཅད་ལ་ཡང་དག་པར་མཆོད་
[271b.7]པར་བྱའོ། །དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པའི་མཚན་བརྒྱ་རྩ་བརྒྱད་པ་ཕྱིས་འཆད་པར་འགྱུར་བའི་དེ་བཞིན་གཤེགས་པའི་མཚན་བརྒྱ་རྩ་བརྒྱད་པས་དེ་བཞིན་གཤེགས་པའི་རྣལ་འབྱོར་པས་དེ་བཞིན་གཤེགས་པ་ཐམས་ཅད་ལ་བསྟོད་པར་བྱའོ། །
[272a]
[272a.1]རྡོ་རྗེ་སེམས་དཔའ་ལ་སོགས་པའི་ཟློས་པ་པོས་ནི་སྔར་བཤད་པའི། རྡོ་རྗེ་སེམས་དཔའ་སེམས་དཔའ་ཆེ། །ཞེས་བྱ་བ་ལ་སོགས་པ་རྡོ་རྗེ་སེམས་དཔའི་མཚན་བརྒྱ་རྩ་བརྒྱད་པས་བསྟོད་པར་བྱའོ། །ཕྱག་བཞིས་ཕྱག་བྱ་བའི་ཚུལ་གྱིས་ཕྱག་བྱས་ལ་ལུས་འབུལ་
[272a.2]བའི་མཆོད་པ་ཡང་བྱའོ་ཞེས་བཤད་པ་ཡིན་ནོ། །དེ་ལྟར་ཕྱག་རྣམ་པ་བཞི་བྱས་ནས། བཟླས་པའི་ཕྲེང་བ་བླངས་ཏེ་འདོད་པའི་ཡོན་ཏན་ཐམས་ཅད་ལ་ཆགས་པ་དང་བྲལ་བས་ཇི་ལྟ་བ་བཞིན་དུ་བཟླས་ན་མྱུར་དུ་དངོས་གྲུབ་ཏུ་འགྱུར་རོ་ཞེས་བྱ་བར་སྦྱར་རོ། །དེ་ནས་སྒེག་མོ་ལ་སོགས་པ་མཆོད་
[272a.3]པ་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་ནི་འདོད་པའི་ཡོན་ཏན་ཐམས་ཅད་དོ། །ཁ་ཟས་ཀུན་དང་ཞེས་བྱ་བ་ནི་ཉ་ཤ་དང་། ཤ་དང་། སྒོག་པ་དང་། བཙོང་དང་། ལྷག་མ་དང་། ལོག་སྲིད་ཀྱི་ལྷ་བཤོས་དང་། དཀོན་མཆོག་གསུམ་གྱི་
[272a.4]བཤོས་གཙང་སྤངས་པ་དང་། ཁ་ན་མ་ཐོ་བ་མེད་པ་ནི་བཟའ་བ་ཐམས་ཅད་དོ། །དེ་བཞིན་དུ་འདོད་པ་ཀུན་ལ་ཉེ་བར་སྤྱོད་ཀྱང་གང་ལ་ཡོང་ཁ་ན་མ་ཐོ་བའི་ཉེས་པར་མི་འགྱུར་རོ། །རང་གི་ལྷ་ནས་བརྩམས་ནས་སྒེག་མོ་ལ་སོགས་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་
[272a.5]པ་བཅུ་དྲུག་གིས་མཆོད་ལ་བསྒོམ་པ་ནི། ཀུན་ལ་ཉེ་བར་ལོངས་སྤྱོད་ཅིང་ངོ་། །སྙིང་པོའི་དོན་དུ་ཞེས་བྱ་བ་ནི། བཛྲ་དྷཱ་ཏུ་ཞེས་བྱ་བ་དེ་བཞིན་གཤེགས་པ་ལྔའི་སྙིང་པོའི་དོན་འདི་ལ་ལྷག་པར་མོས་པའོ། །བདག་ཉིད་དང་སངས་རྒྱས་ཀྱི་མདུན་དུ་ཚིག་ཙམ་གྱིས་ཀྱང་བསྒོམས་ལ་ཞེས་བྱ་བ་ནི་
[272a.6]བདག་ཉིད་དམ་རང་གི་དེ་བཞིན་གཤེགས་པ་དེ་མདུན་དུ་བསྒོམས་པའམ། རང་ཉིད་དེ་བཞིན་གཤེགས་པར་བསྒོམས་ནས་བཟླས་ན་མྱུར་བར་དངོས་གྲུབ་ཏུ་འགྱུར་རོ། །གང་ཞིག་དེ་བཞིན་གཤེགས་པ་རྣམ་པར་སེམས་རྩེ་གཅིག་པར་མི་ནུས་པ་དེ་ནི་ཚིག་ཙམ་གྱིས་ཀྱང་བདག་ཉིད་དེ་
[272a.7]བཞིན་གཤེགས་པར་བསྒོམས་པའམ་མདུན་དུ་བྱས་ལ། ཅི་དགར་བྱེད་ཅིང་ཞེས་བྱ་བ་ནི་སྟན་མི་འདྲ་བ་དང་། བཀྲེས་པ་མེད་པ་དང་། སྐོམ་པ་མེད་པ་དང་། སྐྱིགས་བུ་དང་། སྒྲེགས་པ་ལ་སོགས་པ་དང་། ཉེས་པར་མི་འགྱུར་རོ་ཞེས་བསྟན་པའི་ཕྱིར་རོ། །རྡོ་རྗེའི་ཚིག་གིས་ལེན་
[272b]
[272b.1]བརྒྱ་རྩ་བརྒྱད་བཟླས་ནས། མྱུར་དུ་དངོས་གྲུབ་ཏུ་འགྱུར་ཞེས་བྱ་བ་ནི་བརྒྱ་རྩ་བརྒྱད་ནི་བརྒྱ་ལས་བརྒྱད་ལྷག་པའོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པའི་རྣལ་འབྱོར་པས་རང་ལ་བྱིན་གྱིས་བརླབས་པ་ལ་སོགས་པ་བྱས་
[272b.2]ནས། དེ་བཞིན་དུ་བདུག་པ་ལ་སོགས་པའི་ཕྱག་རྒྱ་རྣམ་པ་བཞིས་བདག་ཉིད་ཡང་དག་པར་མཆོད་ལ། གཞལ་ཡས་ཁང་དང་གདན་ཇི་ལྟ་བ་བཞིན་དུ་སྤྲུལ་ལ། རང་གི་གདན་ལ་སྔ་མ་བཞིན་དུ་ཕྱག་རྒྱ་ཆེན་པོས་འདུག་སྟེ། རང་གི་དེ་བཞིན་གཤེགས་པའི་མདུན་དུ་ཡོངས་སུ་
[272b.3]བརྟགས་ནས་རྣལ་འབྱོར་གྱི་གནས་ལ་བཛྲ་དྷཱ་ཏུ་ཞེས་བརྗོད་ཅིང་སྤྲུལ་ལ། བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ལ་ཕྱིའི་མཆོད་པ་རྣམ་པ་ལྔ་དང་། སྒེག་མོ་ལ་སོགས་པའི་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་དག་ཅིང་བདེ་བ་མ་ལ་སོགས་པ་མཆོད་
[272b.4]པ་རྣམ་པ་བཅུ་དྲུག་གིས་ཡང་དག་པར་མཆོད་ལ་ཕྱག་བཞི་བྱས་ཏེ། གཡོན་པའི་ཁུ་ཚུར་གྱིས་ཆོས་གོས་འཛིན་པའི་ཚུལ་ཅན་གྱིས་དེ་བཞིན་གཤེགས་པའི་རྡོ་རྗེ་བླངས་ལ། ལག་པ་གཡས་པས་བགྲང་ཕྲེང་སྙིང་གར་བཟུང་ནས་བཟླས་པའི་དོན་གྱི་དེ་བཞིན་གཤེགས་པ་ཐམས་ཅད་ཀྱི་
[272b.5]བདག་ཉིད་དུ་བསྒོམས་ནས་བརྒྱ་རྩ་བརྒྱད་དམ་སྟོང་རྩ་བརྒྱད་ཟློས་ཤིང་དེ་བཞིན་གཤེགས་པ་མདུན་དུ་བསྒོམ་པར་བྱའོ། །ཆོ་ག་འདི་ནི་དེའི་གཟུགས་བརྙན་ལ་གུས་པས་གསོལ་བ་འདེབས་པར་འཇུག་པའམ། ལྟ་བའམ་ཐུན་བཞི་རུ་བཟླས་ན་རིང་པོ་མི་ཐོགས་ཞེས་བྱའོ། །ལྷག་
[272b.6]མ་ནི་ཕྱིས་འཆད་པར་འགྱུར་བས་ཤེས་པར་བྱའོ། །རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེེབས་པའི་མཐར་ཐུག་པའམ། དེ་བཞིན་གཤེགས་པའི་རིགས་རྣམས་ནི་རང་ཉིད་ཀྱི་གཡོན་པའི་ཁུ་ཚུར་གྱིས་དང་པོའི་རྡོ་རྗེ་བླངས་ལ། ལག་པ་གཡས་པས་བགྲང་ཕྲེང་བགྲང་
[272b.7]ཞིང་བཟླས་པར་བྱའོ། །ཁྱད་པར་འདི་ཡིན་ཏེ། འདི་ལྟར་དེའི་རྣལ་འབྱོར་པས་སྒེག་མོ་ལ་སོགས་པའི་མཆོད་པ་རྣམ་པ་བཞིས་བདག་ཉིད་མཆོད་པར་བྱའོ། །དེ་ལྟར་ཟླ་བ་བཞི་བསྙེན་པ་བྱས་ནས། མཚན་ཐོག་ཐག་བསྒྲུབས་ན་དེའི་རྗེས་ལ་ལས་ཀྱི་དངོས་གྲུབ་འགྲུབ་པར་
[273a]
[273a.1]འགྱུར་རོ། །དེ་ལ་དེའི་ལས་ནི་འདི་ཡིན་ཏེ། །སངས་རྒྱས་རྗེས་སུ་དྲན་འགྲུབ་ན། །སངས་རྒྱས་ཉིད་དུ་མྱུར་དུ་འགྱུར། །སེམས་དཔའི་རྡོ་རྗེ་མ་གྲུབ་ན། །ཕྱག་རྒྱ་ཀུན་གྱི་བདག་པོར་འགྱུར། །རྡོ་རྗེ་རིན་ཆེན་མའི་ཕྱག་རྒྱས། །དེའི་ནི་རྡོ་རྗེ་ཀུན་
[273a.2]དབང་འགྱུར། །ཆོས་ཀྱི་རྡོ་རྗེ་མ་གྲུབ་ན། །སངས་རྒྱས་ཆོས་ནི་འཛིན་པར་འགྱུར། །ལས་ཀྱི་རྡོ་རྗེ་མའི་ཕྱག་རྒྱས། །རྡོ་རྗེ་ལས་ནི་བྱེད་པར་འགྱུར། །སེམས་དཔའི་ཕྱག་རྒྱ་བཅིངས་པ་ཡིས། །རྡོ་རྗེ་སེམས་དཔའ་འགྲུབ་པར་འགྱུར། །རྡོ་རྗེ་འདྲེན་པའི་ཆོ་ག་ཡིས། །རྡོ་རྗེ་
[273a.3]འཛིན་པ་སྤྱན་འདྲེན་འགྱུར། །རྡོ་རྗེ་འདོད་པའི་ཕྱག་རྒྱ་ཡིས། །སངས་རྒྱས་ཐམས་ཅད་རྗེས་མཉེས་བྱེད། །རྡོ་རྗེ་ལེགས་པའི་ཆོ་ག་ཡིས། །སངས་རྒྱས་ཐམས་ཅད་དགྱེས་པར་བྱེད། །རིན་ཆེན་ཕྱག་རྒྱའི་ཆོ་ག་ཡིས། །སངས་རྒྱས་དབང་བསྐུར་སྦྱིན་པར་བྱེད། །རྡོ་རྗེ་གཟི་
[273a.4]བརྗིད་ཆོ་ག་ཡིས། །རྡོ་རྗེ་གཟི་བརྗིད་མྱུར་དུ་འགྲུབ། །རྡོ་རྗེ་དཔལ་འཛིན་བསྟེན་པས་ན། །རེ་བ་རྣམས་ནི་ཡོངས་སུ་སྐོང་། །རྡོ་རྗེ་བཞད་པའི་ཆོ་ག་ཡིས། །སངས་རྒྱས་ཀུན་དང་མཉམ་པར་བཞད། །རྡོ་རྗེ་ཆོས་ཀྱི་ཆོ་ག་ཡིས། །རྡོ་རྗེ་ཆོས་ནི་འཛིན་པར་འགྱུར། །རྡོ་རྗེ་རྣོན་པོའི་
[273a.5]ཆོ་ག་ཡིས། །སངས་རྒྱས་ཀུན་གྱི་ཤེས་རབ་མཆོག །རྡོ་རྗེ་འཁོར་ལོ་འཛིན་བསྟེན་ནས། །ཆོས་ཀྱི་འཁོར་ལོ་བསྐོར་བར་འགྱུར། །རྡོ་རྗེ་གསུངས་པའི་ཆོ་ག་ཡིས། །སངས་རྒྱས་གསུང་གི་དངོས་གྲུབ་ཐོབ། །རྡོ་རྗེ་ལས་མཆོག་བསྒྲུབས་པས་ན། །རྡོ་རྗེའི་ལས་
[273a.6]སུ་མྱུར་དུ་འགྲུབ། །རྡོ་རྗེ་གོ་ཆ་བསྐོན་པས་ན། །རྡོ་རྗེ་སྐུ་ནི་ཐོབ་པར་འགྱུར། །རྡོ་རྗེ་གནོད་སྦྱིན་བསྒྲུབས་པས་ན། །རྡོ་རྗེ་གནོད་སྦྱིན་མཉམ་པར་འགྱུར། །རྡོ་རྗེ་ཁུ་ཚུར་བཅིངས་པས་ན། །ཕྱག་རྒྱ་ཐམས་ཅད་འགྲུབ་པར་འགྱུར། །རྡོ་རྗེ་འཛིན་མ་བསྒྲུབས་པས་ན། །
[273a.7]རྡོ་རྗེ་ཆེན་མོའི་དགའ་བ་ཐོབ། །རྡོ་རྗེ་ཕྲེང་བ་བཅིངས་པས་ན། །སངས་རྒྱས་ཀུན་གྱིས་དབང་བསྐུར་འགྱུར། །རྡོ་རྗེ་གླུ་ཡི་ཆོ་ག་ཡིས། །རྡོ་རྗེ་གླུ་ནི་ལེན་པར་འགྱུར། །རྡོ་རྗེ་གར་ནི་སྦྱར་བ་ཡིས། །སངས་རྒྱས་ཀུན་གྱིས་དེ་མཆོད་དོ། །རྡོ་རྗེ་བདུག་པའི་ཆོ་ག་ཡིས། །འགྲོ་བ་ཐམས་ཅད་
[273b]
[273b.1]ཚིམ་པར་བྱེད། །རྡོ་རྗེ་མེ་ཏོག་སྦྱོར་བྱེད་པས། །དེས་ནི་འགྲོ་བ་དབང་དུ་བྱེད། །རྡོ་རྗེ་སྣང་བ་ཕྱག་རྒྱ་ཆེས། །རབ་མཆོག་མིག་ནི་སྦྱིན་པར་བྱེད། །རྡོ་རྗེ་དྲི་ཡི་ཆོ་ག་ཡིས། །སྡུག་བསྔལ་ཐམས་ཅད་སེལ་བར་བྱེད། །རྡོ་རྗེ་ལྕགས་ཀྱུས་དྲངས་པས་ན། །འདྲེན་པ་ཀུན་གྱི་མཆོག་ཏུ་འགྱུར། །
[273b.2]རྡོ་རྗེ་ཞགས་པའི་ཆོ་ག་ཡིས། །ཐམས་ཅད་རབ་ཏུ་འཇུག་པར་འགྱུར། །རྡོ་རྗེ་ལྕགས་སྒྲོག་སྦྱོར་བ་ཡིས། །ཐམས་ཅད་འཆིང་བར་ནུས་པར་འགྱུར། །རྡོ་རྗེ་འབེེབས་པའི་ཆོ་ག་ཡིས། །ཐམས་ཅད་འབབ་པར་རབ་ཏུ་འགྱུར། །སླར་ཡང་རྡོ་རྗེ་སེམས་དཔའ་ལ་སོགས་
[273b.3]པའི་ལས་ཀྱི་ཁྱད་པར་དུ་འགྱུར་བ་ནི། ལན་ཅིག་བཟླས་ན་བདག་ཉིད་བསྲུང་བར་འགྱུར། ལན་གཉིས་བཟླས་པས་གཞན་བསྲུང་བར་འགྱུར་རོ། །ལན་གསུམ་བཟླས་པས་འགྲོ་བ་ཐམས་ཅད་བསྲུང་བར་འགྱུར་རོ། །ལན་བཞི་བཟླས་པས་གྲོང་ཁྱེར་བསྲུང་བར་འགྱུར་རོ། །ལན་ལྔ་བཟླས་པས་རྒྱལ་སྲིད་བསྲུང་
[273b.4]བར་འགྱུར་རོ། །ལན་དྲུག་བཟླས་པས་གླིང་བཞིར་བསྲུང་བར་འགྱུར་རོ། །ལན་བདུན་བཟླས་པས་འཇིག་རྟེན་གྱི་ཁམས་ཐམས་ཅད་ཀྱི་མཐར་ཐུག་པའི་སེམས་ཅན་སྲུང་བར་བྱེད་དོ། །ཐོག་མར་བརྗོད་
[273b.5]པའི་བསྲུང་བའི་རིག་པ་ནི། གྲོ་ག་ལ་རིག་པའི་ཡི་གེ་བྲིས་ནས། བཛྲ་སཏྭ་ཕཊ་ཅེས་ལན་གཉིས་བརྗོད་པས་རིག་པ་གཅད་པར་བྱ་སྟེ། ཀུ་ཤ་འམ། སྲུང་སྐུད་བླངས་ལ་རིག་པས་བསྲུང་བར་བྱའོ། །ཨོཾ་བཛྲ་སཏྭ་ཞེས་ལན་གསུམ་བརྗོད་པའི་
[273b.6]རིག་པས་རྒྱལ་བར་འགྱུར་རོ། །ལན་བཞི་བརྗོད་པས་ག་ཕུར་དང་། ཙནྡན་དང་། ཨ་ཀ་རུ་རྣམས་ཀྱི་བདུག་པ་ཕུལ་ནས། མགོ་ལ་མེ་ཏོག་གི་ཕྲེང་བ་བཏགས་ཏེ། དཔྲལ་བར་ཙནྡན་གྱིས་ཐིག་ལེ་བྱས་ཏེ། ཆོས་ཐམས་ཅད་རྨི་ལམ་དང་
[273b.7]མཚུངས་པའི་བདེན་པ་འདིས་རྡོ་རྗེ་སེམས་དཔའ་བདག་ལ་རྨི་ལམ་སྟོན་ཅིག་ཅེས་བྱས་ན། དགེ་བ་དང་། མི་དགེ་བའི་རྨི་ལམ་ཐམས་ཅད་སྟོན་པར་འགྱུར་རོ། །མངོན་པར་འདོད་པའི་དངོས་པོ་ཤེས་པར་འདོད་ན། བཅོམ་ལྡན་
[274a]
[274a.1]འདས་ཐང་ཅིག་བསྒོམས་ལ་སྙིང་པོ་ལན་ལྔ་བཟླས་ན་མཚན་མ་དགོས་པ་སྟོན་པར་འགྱུར་རོ། །སྟོང་ཕྲག་བརྒྱ་བཟླས་ན་ལས་ཐམས་ཅད་བྱེད་པར་འགྱུར་རོ། །ཡར་ངོའི་ཚེས་བརྒྱད་ལ་དཀྱིལ་འཁོར་བྲིས་ཏེ། ཞག་གསུམ་སྨྱུང་བ་བྱས་
[274a.2]པའམ། འོ་མ་དང་བུ་རམ་ཟོས་ནས་དེར་ཞུགས་ཏེ། སྟོང་ཕྲག་བརྒྱད་བཟླས་པར་བྱའོ། །དེ་ནས་བསམ་གཏན་དེ་ཐེ་ཚོམ་མེད་པར་འགྱུར་རོ། །ནད་པའི་སྟེང་དུ་ཡི་གེ་བ་ལས་ཟླ་བའི་དཀྱིལ་འཁོར་དཀར་པོ་རྣམ་པར་བསམས་ན་དུག་ཞི་བར་འགྱུར་རོ། །ལྟེ་བའི་སྟེང་དུ་ཡི་གེ་ཛ་ལས་
[274a.3]རིན་པོ་ཆེའི་དཀྱིལ་འཁོར་སེར་པོ་བསམས་པས་དུག་རེངས་པར་འགྱུར་རོ། །རིན་པོ་ཆེའི་རྒྱ་གྲམ་གྱི་སྟེང་དུ་རིན་པོ་ཆེ་དམར་སེར་གྱི་དཀྱིལ་འཁོར་དང་ཡི་གེ་ཛ་སེར་པོ་བསམས་པས་གཞན་གྱི་དུག་ཐེ་ཚོམ་མེད་པར་རེངས་པར་འགྱུར་རོ། །ཐོག་ཟློག་པར་བྱེད་དོ། །ཆར་གཅོད་པར་བྱེད་
[274a.4]དོ། །ཡི་གེ་བ་ལས་ཟླ་བའི་དཀྱིལ་འཁོར་དཀར་པོ་བསམས་ན་མཁྲིས་པའི་རིམས་སེལ་བར་བྱེད་དོ། །ཚ་བའི་རིམས་སེལ་བར་བྱེད་དོ། །ཁར་བསྒོམས་ན་མངག་གཞུག་བྱེད་དོ། །རིན་པོ་ཆེ་ཐམས་ཅད་ཀྱི་སྟེང་དུ་བསྒོམས་ན་མངག་གཞུག་བྱེད་དོ། །ཡན་ལག་ཉམས་པ་ལ་
[274a.5]བསྒོམས་ན་ཡོངས་སུ་རྫོགས་པར་འགྱུར་རོ། །མེའི་སྟེང་དུ་བསྒོམས་ན་མེའི་ཚ་བ་ཞི་བར་འགྱུར་རོ། །ཞི་བའི་ལས་ཐམས་ཅད་སྒྲུབ་པར་བྱེད་དོ། །ཡི་གེ་ཛས་རྒྱས་པའི་ལས་ཐམས་ཅད་སྐྱེད་པར་བྱེད་དོ། །དབང་བསྐུར་བའི་ཏིང་ངེ་འཛིན་གྱིས་དཔྲལ་བའི་ཕྱོགས་སུ་བསམས་ན་
[274a.6]དོན་ཆེན་པོ་བྱ་བར་བྱེད་པའོ། །མེ་ལྷའི་སྟེང་དུ་བསྒོམས་ན་ནོར་བུའི་ཕུང་པོ་སྐྱེད་པར་བྱེད་དོ། །བདག་གི་ལུས་ལ་བསྒོམས་ན་རྒྱས་པའི་ལས་ཐམས་ཅད་བྱེད་པར་འགྱུར་རོ། །ཡི་གེ་ས་ལས་ཉི་མའི་དཀྱིལ་འཁོར་དམར་པོ་བསམས་ན་འབེབས་པར་བྱེད་དོ། །སྣ་ཚོགས་རྡོ་རྗེ་བསམས་
[274a.7]ན་སྡུད་པར་བྱེད་དོ། །སྐྱེས་པ་དང་བུད་མེད་ཀྱི་སྙིང་གར་པདྨ་དམར་པོའི་སྟེང་དུ་པདྨ་བསྒོམས་ན་དབང་དུ་བྱེད་དོ། །ལྷའི་སྙིང་པོ་གང་དང་གང་བསམས་པ་དེ་དབང་དུ་བྱེད་པར་འགྱུར་རོ། །གདོང་ལ་བསམས་ན་ཆགས་ཤིང་སྐལ་བ་དང་ལྡན་པར་འགྱུར་རོ། །ལས་ཐམས་ཅད་བྱེད་
[274b]
[274b.1]པས་ཡི་གེ་ས་ལས་དཀྱིལ་འཁོར་ལས་ཐམས་ཅད་དང་རྗེས་སུ་མཐུན་པར་བསྒོམ་པར་བྱའོ། །ནད་པའི་སྙིང་གར་བསམས་ན་སྲུང་བར་བྱེད་པར་འགྱུར་རོ། །བསམས་པ་ཤེས་པའི་ཆོ་གས་བསྒྲུབ་པར་བྱ་བའི་ཡིད་ཀྱི་ལས་ཐམས་ཅད་སྒྲུབ་པར་བྱེད་དོ། །ཡི་གེ་ཏས་མཉེས་པར་
[274b.2]བྱེད་དོ། །རྡོ་རྗེ་དཀྱིལ་འཁོར་ཐམས་ཅད་བསྒྲུབས་ན་སྲུང་བར་བྱེད་དོ། །དབྱིག་པར་བྱས་ནས་བསྒོམས་ན་སྣུན་པར་བྱེད་དོ། །རྡོ་རྗེའི་དཀྱིལ་འཁོར་ལྗང་གུར་བསྒོམས་ན་སྲུང་བར་བྱེད་དོ། །ཐལ་མོའི་སྒྲས་དུག་གིས་བརྒྱལ་བ་ལས་སད་པར་བྱེད་དོ། །ཡི་གེ་ཏ་ཁ་དོག་ལྔ་
[274b.3]པ་རྟག་ཏུ་བསྒོམས་ན་ལས་ཐམས་ཅད་བྱེད་དོ། །ཡི་གེ་བས་འཆིང་བར་བྱེད་དོ། །ཡི་གེ་ཛས་འགུགས་པར་བྱེད་དོ། །ཡི་གེ་མས་འབེབས་པར་བྱེད་དོ། །ཡི་གེ་ཏས་སྣུན་པར་བྱེད་དོ། །དེ་ཐམས་ཅད་ཚར་གཅོད་པར་བྱེད་དོ། །གདུག་པ་ཐམས་ཅད་ཡི་གེ་ཨའི་ལྕགས་
[274b.4]ཀྱུས་འགུགས་པར་བྱེད་དོ། །རྡོ་རྗེ་བསྒོམས་ན་གསལ་བར་བྱེད་དོ། །ཟླ་བའི་དཀྱིལ་འཁོར་གྱིས་ནི་མགུ་བར་བྱེད་དོ། །ལས་ཀྱི་དཀྱིལ་འཁོར་གྱིས་ནི་སྡུད་པར་བྱེད་དོ། །ཡི་གེ་ཨ་ལས་ཟླ་བའི་དཀྱིལ་འཁོར་བསམས་ན་དུག་ཞི་བར་བྱེད་དོ། །བཛྲ་སཏྭ་ཨཿཞེས་བྱ་བས་
[274b.5]རྟོག་པ་ཐམས་ཅད་ཀྱི་བྱེ་བྲག་ལས་སྦྱོར་བ་དང་ལས་ཐམས་ཅད་བྱེད་པར་འགྱུར་རོ། །དེ་ལྟར་བཟླས་པའི་ཆོ་གས་བསྒྲུབ་པ་བཤད་ནས། ད་ནི་རས་རིས་བསྒྲུབ་པའི་བླ་ན་མེད་པའི་དངོས་གྲུབ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་
[274b.6]ཐག་པ་སྟེ། ཟླ་བ་བཞིའི་བར་དུ་སྔར་བཤད་པ་བཞིན་དུ་བསྙེན་པ་བྱས་པའི་རྗེས་ཐོགས་ཉིད་ལའོ། །དེའི་ཕྱག་རྒྱ་བཞི་པའི་བླ་ན་མེད་པའི་དངོས་གྲུབ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིའོ། །དེ་འདོད་པ་ནི་གལ་ཏེ་རྣལ་འབྱོར་པ་འདོད་ན་ཇི་སྐད་བཤད་པའི་རས་
[274b.7]ལ་བཅོམ་ལྡན་འདས་རྣམ་པར་སྣང་མཛད་ལ་སོགས་པ་ནས་དོན་ཡོད་པར་གྲུབ་པའི་བར་བྲི་བར་བྱ་སྟེ། དེའི་ཕྱག་རྒྱ་བཞི་པའི་དཀྱིལ་འཁོར་གྱི་ཚུལ་དུ་ཞེས་བྱ་བ་ནི་ཕྱག་རྒྱ་ཆེན་པོའི་དཀྱིལ་འཁོར་གྱི་དབྱིབས་དང་ཇི་ལྟར་འདོད་པའི་ཁ་དོག་དང་རྒྱན་དང་རྡོ་རྗེ་སེམས་དཔའ་ལ་
[275a]
[275a.1]སོགས་པའི་སེམས་དཔའ་ཆེན་པོ་རྣམས་དང་། རྡོ་རྗེ་སྒེག་མོ་ལ་སོགས་པའི་ལྷ་མོ་རྣམ་པ་བརྒྱད་བྲི་བར་བྱའོ། །འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་སྔོན་དུ་བསྙེན་པ་ཟླ་བ་བཞི་བྱས་ལ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་
[275a.2]རྣལ་འབྱོར་པའམ། དེ་བཞིན་དུ་རྡོ་རྗེ་སེམས་དཔའ་ལ་སོགས་པ་དང་། རྡོ་རྗེ་འབེེབས་པའི་མཐར་ཐུག་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་རང་གི་ལྷར་བསྒོམས་ལ། དེའི་རྗེས་ལ་རས་མ་ཉམས་པ་ལ། དེ་བཞིན་གཤེགས་པ་ཟློས་ཤིང་སྲོག་ཆགས་ཀྱི་ཡན་ལག་རྣམས་
[275a.3]བསལ་ནས། རྡོ་རྗེའི་ཐིག་ཟླུམ་པོར་བཏབ་པའི་དབུས་ཀྱི་ཟུར་བཞིའི་དབུས་སུ་བཅོམ་ལྡན་འདས་རྣམ་པར་སྣང་མཛད་དཀར་པོ་ཟངས་མ་ག་བུར་དང་བསྲེས་ལ་བསྙེན་གནས་དང་ལྡན་པ་དམ་ཚིག་ཤེས་པའི་རི་མོ་མཁན་གྱིས་བཛྲ་དྷཱ་ཏུ་ཞེས་བྱ་བའི་སྙིང་པོ་འདི་བྲི་བར་བྱའོ། །དེའི་འོག་གི་ཆ་
[275a.4]ལ་མི་བསྐྱོད་པའི་གནས་སུ་རྡོ་རྗེ་སེམས་དཔའ། གཡས་ལོགས་སུ་རིན་ཆེན་འབྱུང་ལྡན་གྱི་གནས་སུ་རྡོ་རྗེ་རིན་ཆེན། སྟེང་དུ་འོད་དཔག་ཏུ་མེད་པའི་གནས་སུ་རྡོ་རྗེ་ཆོས། གཡས་ཕྱོགས་སུ་དོན་ཡོད་གྲུབ་པའི་གནས་སུ་རྡོ་རྗེ་ལས། མཚམས་ཀྱི་ཆ་རྣམས་སུ་སྒེག་མོ་ལ་སོགས་པའི་
[275a.5]ལྷ་མོ་བརྒྱད་རང་གི་སྙིང་པོ་བྲི་བར་བྱའོ། །རྣམ་པར་སྣང་མཛད་ཀྱི་རས་རིས་ཀྱི་ཆོ་གའོ། །རས་དེ་ཉིད་ཀྱི་དབུས་སུ་བཅོམ་ལྡན་འདས་མི་བསྐྱོད་པ་བྲིས་པའི་ཚེ་མི་བསྐྱོད་པའི་གནས་སུ་རྡོ་རྗེ་སེམས་དཔའ། རིན་ཆེན་འབྱུང་ལྡན་གྱི་གནས་སུ་རྡོ་རྗེ་རྒྱལ་པོ། དོན་ཡོད་གྲུབ་པའི་གནས་
[275a.6]སུ་རྡོ་རྗེ་ཆགས་པ། འོད་དཔག་ཏུ་མེད་པའི་གནས་སུ་རྡོ་རྗེ་ལེགས་པ། མཆོད་པའི་ལྷ་མོ་རྣམས་ཀྱང་སྔ་མ་བཞིན་དུ་བྱ་བ་ནི་མི་བསྐྱོད་པའི་རིགས་ཀྱི་ཆོ་གའོ། །དབུས་སུ་བཅོམ་ལྡན་འདས་རིན་ཆེན་འབྱུང་ལྡན་འདྲི་བའི་ཚེ་མི་བསྐྱོད་པའི་གནས་སུ་རྡོ་རྗེ་རིན་ཆེན། རིན་ཆེན་འབྱུང་ལྡན་གྱི་གནས་
[275a.7]གཟི་བརྗིད། དོན་ཡོད་གྲུབ་པའི་གནས་སུ་དཔལ། འོད་དཔག་ཏུ་མེད་པའི་གནས་སུ་རྡོ་རྗེ་བཞད་པ་བྲིས་ལ། ལྷག་མ་ནི་སྔ་མ་བཞིན་ཏེ། རིན་ཆེན་འབྱུང་ལྡན་གྱི་རས་རིས་ཀྱི་ཆོ་གའོ། །བཅོམ་ལྡན་འདས་འོད་དཔག་ཏུ་མེད་པ་དབུས་སུ་བྲི་བ་དེའི་ཚེ་མི་བསྐྱོད་པའི་གནས་སུ་རྡོ་རྗེ་ཆོས།
[275b]
[275b.1]རིན་ཆེན་འབྱུང་ལྡན་གྱི་གནས་སུ་རྡོ་རྗེ་རྣོན་པོ། དོན་ཡོད་པར་གྲུབ་པའི་གནས་སུ་རྡོ་རྗེ་རྒྱུ། འོད་དཔག་ཏུ་མེད་པའི་གནས་སུ་རྡོ་རྗེ་གསུང་བ་བྲིས་ལ། ལྷག་མ་ནི་སྔ་མ་བཞིན་ཏེ། འོད་དཔག་ཏུ་མེད་པའི་རས་རིས་ཀྱི་ཆོ་གའོ། །དབུས་སུ་བཅོམ་ལྡན་འདས་དོན་ཡོད་གྲུབ་པ་འདྲི་བ་དེའི་
[275b.2]ཚེ་མི་བསྐྱོད་པའི་གནས་སུ་རྡོ་རྗེ་ལས། རིན་ཆེན་འབྱུང་ལྡན་གྱི་གནས་སུ་རྡོ་རྗེ་བསྲུང་བ། དོན་ཡོད་གྲུབ་པའི་གནས་སུ་རྡོ་རྗེ་གནོད་སྦྱིན། འོད་དཔག་ཏུ་མེད་པའི་གནས་སུ་རྡོ་རྗེ་ཁུ་ཚུར་རང་གི་སྙིང་པོས་བྲིས་ལ། ལྷག་མ་ནི་སྔ་མ་བཞིན་ཏེ། དོན་ཡོད་པར་གྲུབ་པའི་རས་རིས་
[275b.3]ཀྱི་ཆོ་གའོ། །རས་གང་ལ་རི་མོ་འདྲི་བ་དེའི་ཚེ་འབྲུ་དང་། རིན་པོ་ཆེ་དང་། སྨན་ཐམས་ཅད་ཀྱིས་ཡོངས་སུ་གང་བའི་བུམ་པ་གཅིག་དང་། ཟུར་བཞིར་བུམ་པ་བཞི་གཞག་པར་བྱའོ། །དེའི་སྟེང་དུ་བླ་རེ་བྲེས་པ་དང་། དེའི་འོག་ཏུ་གདུགས་དཀར་པོ་ལ་གཙུག་ཏོར་དཀར་མོ་
[275b.4]བཟླས་པ་དང་། དེ་ནས་རྩི་མར་གྱི་མར་སེར་དང་། སྤོས་ཀྱི་སྣོད་རྣམ་པ་བཞི་བཞག་ནས་རྒྱུན་མི་འཆད་པར་དབུལ་བར་བྱའོ། །དེ་ནས་ཙནྡན་དཀར་པོའི་ཆུ་ཡིས་མཆོད་ཡོན་ཕུལ་ལ། རྣམ་པར་སྣང་མཛད་ལ་སོགས་པའི་གཟུགས་བརྙན་གྱི་སྦྱོར་བ་བྱས་པའི་རས་རིས་དེ་ལ་བཞུགས་སུ་
[275b.5]གསོལ་བར་བྱའོ། །ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་རྡོ་རྗེ་སྙིང་པོ་དང་། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་སྙིང་པོས་དེ་རྣམས་ཀྱི་ཇི་ལྟ་བ་བཞིན་དུ་བྲི་བར་བྱའོ། །རྡོ་རྗེ་དབྱིངས་ཀྱི་ཁང་བུ་བརྩེགས་པ་དེའི་སྟེང་དུ་
[275b.6]གདུགས་དཀར་པོ་བྲི་བར་བྱའོ། །དེ་ལྟར་རས་ལ་ཇི་ལྟར་མངོན་པར་འདོད་པ་བཞིན་དུ་བྲིས་ནས། དེ་ནས་རི་མོའི་སྐུ་གཟུགས་ལ་མཆོད་པ་རྒྱ་ཆེར་བྱས་ལ། འཛབ་ཀྱི་ཚུལ་ཇི་ལྟ་བ་བཞིན་དུ་ཟླ་བ་བཞིའི་བར་དུ་བཟླས་པར་བྱའོ། །སྔ་མ་བཞིན་དུ་རང་ལ་བྱིན་གྱིས་བརླབས་པ་ལ་སོགས་
[275b.7]པ་བྱས་ནས། ཁང་བུ་བརྩེགས་པའི་གནས་དེ་རྫོགས་པ་དང་། རས་ལ་དེ་བཞིན་གཤེགས་པའི་སྙིང་པོ་སྤྲུལ་ལ། བསྡུ་བ་ལ་སོགས་པའི་ཆོ་ག་རྗེས་སུ་སྤྱད་ནས། ཕྱིའི་མཆོད་པ་རྣམ་པ་ལྔ་ལ་སོགས་པའི་མཆོད་པ་རྒྱ་ཆེ་བའི་ཁྱད་པར་རྣམས་ཀྱིས་ཡང་དག་པར་མཆོད་ལ། སྒེག་མོ་
[276a]
[276a.1]ལ་སོགས་པ་མཆོད་པ་བརྒྱད་ཀྱི་ཕྱག་རྒྱ་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་གིས་ཡང་དག་པར་མཆོད་དེ། ཕྱག་བཞི་བྱས་ནས། སྔར་བཤད་པའི་བཟླས་པའི་ཆོ་གས་ཟླ་བ་བཞིར་ཐུན་བཞིའི་སྦྱོར་བས་བཟླས་ཏེ། མཚན་ཐོག་
[276a.2]ཐག་བཟླས་པར་བྱའོ། །དེ་ནས་ནམ་ལངས་པ་དང་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་འགྲུབ་པའམ། རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་དངོས་གྲུབ་རྣམས་ཇི་ལྟར་བྲི་བ་བཞིན་དུ་འགྲུབ་པར་འགྱུར་རོ། །
[276a.3]དེ་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་རྣམས་བཤད་ནས། ད་ནི་གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་དེ་ནས་ཕྱག་རྒྱ་བསྒྲུབ་པར་འདོད་ན་ཞེས་བྱ་བ་ལ་སོགས་པ་གསུངས་ཏེ། དེ་ལ་ཕྱག་རྒྱ་ནི་གཟུངས་ཀྱི་དཀྱིལ་འཁོར་གྱི་རིག་པ་
[276a.4]བརྗོད་པ་རྣམས་སོ། །དེ་ལ་བསྒྲུབ་པར་འདོད་པ་ནི་ཐོག་མར་སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་གཟུངས་ཟློས་ཤིང་སྔ་མ་བཞིན་དུ་ཟླ་བ་བཞི་
[276a.5]བསྙེན་པ་བྱས་ལ། རས་ལ་དེ་བཞིན་དུ་བྲི་བར་བྱའོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་ག་ཐམས་ཅད་རྗེས་སུ་སྤྱད་ལ། རྡོ་རྗེ་སེམས་དཔའ་བཅིངས་ཏེ། ཐུན་བཞིའི་སྦྱོར་བས་སྟོང་ཕྲག་བརྒྱ་བཟླ་བར་བྱའོ། །དེ་ནས་མཚན་ཐོག་ཐག་རྡོ་རྗེ་སེམས་དཔའ་
[276a.6]བཅིངས་ཤིང་བཟླས་ལ། སྐྱོ་ན་ཕྱག་རྒྱ་བར་བར་དུ་དགྲོལ་བར་བྱའོ། །དེ་ནས་ཕྱག་རྒྱ་བཅིངས་ན་འབར་བ་ལ་སོགས་པའི་དངོས་གྲུབ་ཀྱི་རྟགས་འབྱུང་བ་དང་། དེ་ནས་ཕྱག་རྒྱ་བཅིངས་བཞིན་དུ། །ཞེས་བྱ་བ་འབྲས་བུ་གསུངས་སོ། །དེ་ལྟར་གཟུངས་ཀྱི་དངོས་གྲུབ་བཤད་ནས།
[276a.7]ཆོས་ཀྱི་དཀྱིལ་འཁོར་གྱི་དངོས་གྲུབ་ནི། དེ་ནས་ཏིང་ངེ་འཛིན་བསྒྲུབ་པར་འདོད་ན་ནི་ཞེས་བྱ་བ་ལ་སོགས་པ་སྨོས་ཏེ། དེ་ནས་བྱ་བའི་སྒྲ་ནི་སྐབས་སུ་བབས་པ་སྟེ། ཆོས་ཀྱི་དཀྱིལ་འཁོར་ལ་དངོས་གྲུབ་ཀྱི་གནས་སྐབས་སོ་ཞེས་བྱ་བའི་དོན་ཏོ། །རྣམ་པར་སྣང་མཛད་ལ་སོགས་
[276b]
[276b.1]པའི་རྣམ་པར་སེམས་རྩེ་གཅིག་པ་ནི་ཏིང་ངེ་འཛིན་ཏོ། །ཏིང་ངེ་འཛིན་དེ་ཡང་རྣམ་པ་སུམ་ཅུ་རྩ་བདུན་ནོ། །དེའི་ཕྱིར་ཏིང་ངེ་འཛིན་གང་ལ་དགའ་བ་ཞེས་གསུངས་སོ། །གལ་ཏེ་འགའ་ཞིག་དེ་བསྒྲུབ་པར་འདོད་ན་རྡོ་རྗེ་ཕྲ་མོ་ནས་བརྩམས་ཏེ། རྡོ་རྗེ་ཕྲ་མོ་བསྒོམ་པར་བྱ་བའི་ཏིང་ངེ་འཛིན་གང་ལ་
[276b.2]དགའ་བ་དེ་ལའོ། །རྣམ་པར་སྣང་མཛད་ལ་སོགས་པ་གང་བསྒོམ་པར་འདོད་པས་སྙིང་པོ་རྣལ་འབྱོར་གོམས་པར་བྱའོ། །སྔ་མ་བཞིན་དུ་བཟླས་པའི་སྦྱོར་བས་ཉིན་རེ་ཞིང་ཐུན་བཞིའི་རང་གི་སྙིང་པོ་བརྗོད་ཅིང་རབ་ཏུ་སྦྱོར་བ་བྱས་ལ། བདག་ཉིད་དམ་མདུན་དུ་རང་གི་ལྷའི་གཟུགས་སུ་
[276b.3]བསྒོམ་པར་བྱའོ། །ཟླ་བ་བཞིར་བསྙེན་པ་བྱས་ལ། དེ་ནས་སྔ་མ་བཞིན་དུ་རས་ལ་བྲིས་ཏེ། ཆོ་ག་ཐམས་ཅད་ཇི་ལྟ་བ་བཞིན་དུ་རྗེས་སུ་སྤྱད་ལ། རས་རིས་ཀྱི་མདུན་དུ་ཟླ་བ་བཞིར་རང་གི་ཏིང་ངེ་འཛིན་བསྒོམ་པར་བྱའོ། །དེ་ནས་མཐར་མཚན་ཐོག་ཐག་བསྒོམས་ན། ཐོ་རངས་
[276b.4]བཀའ་དམ་ཚིག་གི་ཏིང་ངེ་འཛིན་ཐོབ་པར་འགྱུར་རོ། །དེ་ལྟར་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྟན་ནས། ད་ནི་ལས་ཀྱི་དཀྱིལ་འཁོར་ལས་བཤད་པའི། དེ་ནས་ལས་བསྒྲུབ་པར་འདོད་ན་ནི་ཞེས་བྱ་བ་ལ་སོགས་པ་གསུངས་ཏེ། ལས་ཀྱི་དཀྱིལ་འཁོར་ལས་
[276b.5]བཤད་པའི་རིག་པ་རྣམས་བསྒྲུབ་པ་ནི་ལས་བསྒྲུབ་པར་འདོད་པའོ། །དེ་བཞིན་དུ་བཟླས་ཤིང་ཟླ་བ་གཅིག་གི་བར་དུ་བསྒྲུབས་ན་ཞེས་བྱ་བ་ནི་ལས་ཀྱི་དཀྱིལ་འཁོར་གྱི་རིག་པ་རྣམས་ཀྱི་ཕྱིར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་གི་ལྷའི་རྣལ་འབྱོར་བྱས་ལ།
[276b.6]སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཐུན་བཞིའི་སྦྱོར་བས་ཟླ་བ་བཞིར་སྔ་མ་བཞིན་དུ་བཟླས་པ་བྱས་ནས་བྲི་བར་བྱའོ། །དེ་ནས་སྔ་མ་བཞིན་དུ་རས་ལ་ཆོ་ག་ཐམས་ཅད་རྗེས་སུ་སྤྱད་ལ། རས་རིས་ཀྱི་རང་གི་རིག་པའི་མདུན་དུ་སྟོང་ཕྲག་བརྒྱ་བཟླས་པར་བྱའོ། །ཟླ་བའི་མཐར་
[276b.7]མཚན་ཐོག་ཐག་བཟླས་པ་བྱས་ན་ལས་ཐམས་ཅད་འགྲུབ་པར་འགྱུར་རོ། །ལན་ཅིག་བརྗོད་པ་ཙམ་གྱིས་ཞེས་བྱ་བ་ལ་སོགས་པས་ནི་རང་གི་རིག་པ་ཇི་ལྟ་བ་བཞིན་དུ་བསྒྲུབས་ལ། ལན་ཅིག་བཟླས་པ་བྱས་ནས་བདག་ཉིད་ལ་སོགས་པས་བསྲུང་བར་འགྱུར་རོ། །ཇི་ལྟར་འགྱུར་ཞེ་ན། གྲོང་དང་།
[277a]
[277a.1]གྲོང་ཁྱེར་རྣམས་གོ་ཆ་བཅིངས་པས་ཞེས་བྱ་བ་ལ་སོགས་པ་སྨོས་ཏེ། གོ་ཆ་བཅིངས་པའི་ཚུལ་གྱིས་རང་ངམ་གཞན་བསྲུང་བར་བྱའོ། །མཚམས་དང་། ཕྱོགས་དང་། དཀྱིལ་འཁོར་དང་། ནམ་མཁའ་དང་། ཕུར་བུ་དང་། ར་བ་དང་། དྲ་བ་རྣམས་ནི་སོགས་
[277a.2]པ་བྱུགས་ཤིང་དབབ་པར་བྱའོ། །ཁྱད་པར་ཇི་ལྟ་བུ་དབབ་པར་བྱ་སྟེ། ཙནྡན་དྲི་ཞིམ་པས་ཞེས་བྱ་བས་ཙནྡན་ནི་དཀར་པོའམ་ཤྲི་ཁཎྜ་ནི་ཙནྡན་དྲི་ཞིམ་པའོ། །དེས་བྱུགས་ནས་རང་གི་རིག་པ་མངོན་པར་བཟླས་ལ། རིག་པའི་ལྷའི་གཟུགས་སུ་བརྟགས་ལ། རྡོ་རྗེ་ལ་སོགས་པ་བྱུགས་ཤིང་དབབ་པར་
[277a.3]བྱའོ། །ཁྱད་པར་ཇི་ལྟ་བུ་ཞེ་ན། གཟུང་དུ་ཡོད་པ་དང་གཟུང་དུ་མེད་པའི་རྡོ་རྗེ་དང་ལྕགས་ཀྱུ་ལ་སོགས་པ་ཞེས་བྱ་བ་ལ། གཟུང་དུ་ཡོད་པ་ནི་ལག་པས་གཟུང་དུ་ཡོད་པའོ། །གཟུང་དུ་མེད་པ་ནི་ཡིད་ཀྱིས་དམིགས་པའོ། །ལན་ཅིག་བརྗོད་པས་ཞེས་བྱ་བ་ནི་རང་གི་རིག་པ་ཇི་ལྟ་བ་བཞིན་དུ་
[277a.4]བསྒྲུབས་པའོ། །སྒྱུ་མའི་ལས་ཀྱང་བྱེད་དེ་ཞེས་བྱ་བ་ལ་སོགས་པ་ནི་སྔ་མ་བཞིན་དུ་རིག་པ་བཟླས་ན། རྨ་བྱའི་མཇུག་སྒྲོའི་ནང་དུ་རྡོ་རྗེ་རྩེ་ལྔ་པ་བཅུག་སྟེ་བཅིངས་ནས། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའི་ཕྱག་རྒྱས་མནན་ལ། རས་རིས་ཀྱི་མདུན་དུ་བདག་
[277a.5]ལ་བྱིན་གྱིས་བརླབ་པ་ལ་སོགས་པའི་ཆོ་ག་ཐམས་ཅད་བྱས་ནས། ཇི་ལྟ་བ་བཞིན་དུ་བསྒྲུབས་ལ་རིག་པ་བཟླས་ཏེ། ཇི་སྲིད་དུ་དེ་བཞིན་གཤེགས་པའི་ཕྱག་རྒྱ་འབེབས་པར་འགྱུར་བ་དེ་སྲིད་ཀྱི་བར་དུ་བྱའོ། དེ་ནས་མཇུག་སྒྲོ་འགྲུབ་པར་འགྱུར་རོ། །དེ་ནས་རྨ་བྱའི་མཇུག་མ་བསྒྲུབ་པ་དང་།
[277a.6]གཟུགས་སྣ་ཚོགས་ལ་སྣང་བར་འགྱུར་ཏེ་ཞེས་བྱའོ། །ལྷག་མ་ནི་གོ་སླའོ། །དེ་ནས་དབང་དུ་བྱེད་པར་འདོད་ན་ཞེས་བྱ་བ་ལ་སོགས་པ་སྔ་མ་བཞིན་དུ་རང་གི་རིག་པ་བསྒྲུབས་ན། དེ་བཞིན་གཤེགས་པ་ལ་སོགས་པའི་རང་གི་རིག་པའི་ཐམས་ཅད་དབང་དུ་བྱེད་པར་འདོད་ན། རྡོ་རྗེ་དབྱིངས་ཀྱི་
[277a.7]དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་མ་བཅིངས་ཏེ། ཇི་ལྟ་བ་བཞིན་དུ་རིག་པ་ཟློས་ཤིང་བསྒྲུབས་ན་ཇི་སྲིད་དུ་སེམས་དཔའ་རྡོ་རྗེ་འབར་བར་འགྱུར་བ་དེ་སྲིད་ཀྱི་བར་དུའོ། །དེ་ནས་དེ་བཞིན་གཤེགས་པ་ལ་སོགས་པ་ལ་དབང་དུ་བྱེད་པར་འགྱུར་རོ། །ཅི་སྟེ་འཇིག་རྟེན་དང་
[277b]
[277b.1]འཇིག་རྟེན་ལས་འདས་པའི་དངོས་གྲུབ་འགྲུབ་པར་འདོད་ན་ཡང་ཞེས་བྱ་བ་ལ་སོགས་པ་ལ། སྔ་མ་བཞིན་དུ་རིག་པ་ཟློས་ཤིང་བསྒྲུབས་ན་ཕྱིས་རང་གི་རིག་པའི་རས་རིས་ཀྱི་མདུན་དུ་ཐུན་བཞིར་ཟླ་བ་གཅིག་སྟོང་རྩ་བརྒྱད་བཟླས་པ་བྱས་ནས། དེ་ནས་མཐར་རྡོ་རྗེ་སེམས་མའི་ཕྱག་རྒྱ་
[277b.2]བཅིངས་ཏེ། མཐར་མཚན་ཐོག་ཐག་བཟླས་པ་བྱས་པས་རྡོ་རྗེ་འབབ་པར་འགྱུར་རོ། །དེ་ཕྱིན་ཆང་ཅེས་བྱ་བ་ནི་དེ་བརྩོན་ན་ཕྱག་རྒྱ་འཆིང་བའི་རྡོ་རྗེ་སེམས་དཔའི་ཕྱག་རྒྱ་ཇི་ལྟ་བ་བཞིན་དུ་བསྒྲུབས་ཏེ། རིག་པ་བརྗོད་ན་འཇིག་རྟེན་གྱི་དངོས་གྲུབ་ཀྱི་རིག་པ་འཛིན་པའི་དངོས་གྲུབ་གང་ཡང་རུང་
[277b.3]བ་ཅིག་འགྲུབ་པར་འགྱུར་རོ། །དེ་ལ་འཇིག་རྟེན་གྱི་དངོས་གྲུབ་ནི་རྐང་མགྱོགས་ཏེ། མི་སྣང་བ་དང་ནམ་མཁའ་ལ་འགྲོ་བ་དང་། རོ་ལངས་བསླང་བ་དང་། ས་འོག་ཏུ་འགྲོ་བ་དང་། གཏེར་ཆེན་པོ་འདོན་པ་དང་། ཆར་འབེེབས་པ་དང་། སའི་དབང་ཕྱུག་ཉིད་ལ་སོགས་པའི་གཟུགས་
[277b.4]སོ། །རིག་པ་འཛིན་པའི་དངོས་གྲུབ་ནི་རྡོ་རྗེ་དང་། རིན་པོ་ཆེ་དང་། པདྨ་དང་། ལས་འཛིན་པ་དང་ཐ་དད་པ་དེ་ལྟ་བུར་གྱུར་པའི་དངོས་གྲུབ་ནི་དེའི་ནང་ནས། ཇི་ལྟར་མངོན་པར་འདོད་པ་གང་ཡང་རུང་བ་ཅིག་འགྲུབ་པར་འགྱུར་རོ། །དེ་ལྟར་དེ་བཞིན་གཤེགས་པའི་རིགས་ཀྱི་ཡོ་བྱད་ཀྱི་ཆོ་
[277b.5]ག་རྒྱས་པ་བསྟན་ནས། ད་ནི་རྡོ་རྗེ་རིགས་ཀྱི་དེ་ནས་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ནས་ཞེས་བྱ་བ་ནི་བཤད་ཟིན་ཏོ། །དེ་ལ་ཞེས་བྱ་བ་ནི་ངག་ཉེ་བར་དགོད་པའོ། །དང་པོ་ནི་ཐོག་མ་ཉིད་དུའོ། །བསྙེན་པ་བྱ་བ་ནི་ཇི་ལྟར་ཞེ་ན། དེ་ལྟར་ཞེས་བྱ་བ་སྨོས་ཏེ། ཇི་ལྟར་རྡོ་རྗེ་
[277b.6]དབྱིངས་ཀྱི་དུམ་བུའི་དཀྱིལ་འཁོར་ཆེན་པོ་ལས་བཤད་པའི་བཟླས་པའི་ཆོ་ག་མཐོང་བ་དེ་བཞིན་དུ་འདིར་ཡང་ཤེས་པར་བྱའོ། །ཇི་ལྟར་འདོད་པ་བཞིན་དུ་ཞེས་བྱ་བ་ནི་ལངས་པའམ་འདུག་པའི་ཡི་གེ་འབུམ་བཟླས་པར་བྱའོ། །དེ་ནས་ཕྱག་རྒྱ་བཅིངས་པ་དེ་མེད་ཀྱང་མཚན་ཐོག་ཐག་བཟླས་
[277b.7]ནས་དེ་ཕྱིན་ཆད་སེམས་ཅན་ཐམས་ཅད་ལ་ཕན་གདགས་པ་དང་ཆད་པས་བཅད་ནུས་པར་འགྱུར་རོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་
[278a]
[278a.1]ཅད་རྗེས་སུ་སྤྱད་དེ། བཅོམ་ལྡན་འདས་ཇི་ལྟ་བ་བཞིན་དུ་མདུན་དུ་བཞུགས་སུ་གསོལ་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བཞི་བྱའོ། །གཡོན་པའི་ཁྲོ་བོའི་ཁུ་ཚུར་གྱིས་ཁྲོ་བོའི་རྡོ་རྗེ་བླངས་ལ། ལག་པ་གཡས་པས་བཟླས་པའི་ཕྲེང་བ་རང་ཉིད་
[278a.2]ཀྱི་སྙིང་གར་བཟུང་ནས། བཟླས་པའི་དོན་གྱི་བདག་ཉིད་དམ་མདུན་དུ་བཅོམ་ལྡན་འདས་བསྒོམས་ཏེ་ཁྲི་བཟླས་པར་བྱའོ། །ཉིན་རེ་ཞིང་ཐུན་བཞིའི་སྦྱོར་བས་ཡི་གེ་འབུམ་གྱི་བཟླས་པ་རྫོགས་ཀྱི་བར་དུ་བྱའོ། །དེ་ནས་མཚན་ཐོག་ཐག་བཟླས་ཏེ། དེ་ཕྱིན་ཆད་ཧཱུཾ་ཞེས་བྱ་བས་རི་བོ་ཡང་འགེགས་
[278a.3]པར་བྱེད་དོ། །ཆུ་བོ་ཡང་སྐེམས་པར་བྱེད་དོ། །བརྡེག་ཅིང་འབར་བར་བྱེད་པ་དང་། བྱ་རྣམས་ཀྱང་ལྟུང་བར་བྱེད་དོ། །བསྡམས་པས་གསོད་པར་བྱེད་དོ། །སོར་མོས་སྤྲིན་རྣམས་འཇིག་པར་བྱེད་དོ། །འབྲུ་རྣམས་འདོན་པར་བྱེད་དོ། །ཀླུ་རྣམས་རེངས་པར་བྱེད་དོ། །སྐྱེས་པ་དང་བུད་མེད་རྣམས་རེངས་
[278a.4]པར་བྱེད་དོ། །བྱིས་པ་རྣམས་རེངས་པར་བྱེད་དོ། །ཐོག་འཕེན་པ་ཟློག་པར་བྱེད་དོ། །ཐོག་འབེབས་པར་བྱེད་དོ། །སྡིགས་མཛུབ་ཙམ་གྱིས་འགྲོ་བ་རེངས་པ་དང་གླང་པོ་ཆེ་གསོད་པར་བྱེད་དོ། །དུག་གིས་བརྒྱལ་བ་ལས་སློང་བར་བྱེད་དོ། །དེ་ལྟ་བུ་ལ་སོགས་པས་སེམས་ཅན་ཐམས་ཅད་ལ་ཕན་འདོགས་པ་དང་། ཚར་
[278a.5]གཅོད་པར་བྱེད་དོ། །འོན་ཏེ་བསྒྲུབ་པར་འདོད་ན་ཡང་ཞེས་བྱ་བ་ལ། འཇིག་རྟེན་གསུམ་གྱི་དངོས་གྲུབ་གལ་ཏེ་བསྒྲུབ་པར་འདོད་ན་སྔར་བཤད་པའི་ཆོ་གས་ཡི་གེ་འབྲུ་འབུམ་རྣལ་འབྱོར་པས་བཟླས་ལ། རྡོ་རྗེ་ཧཱུཾ་མཛད་ལ་སོགས་པ་རང་གི་ཁྲོ་བོའི་སྔགས་ཇི་ལྟ་བ་བཞིན་དུ་བྱས་ནས་རས་ལ་རི་མོ་
[278a.6]བྲི་བར་བྱའོ། །འདི་སྐད་སྟོན་པ་ཡིན་ཏེ། སྤུ་དང་སྲོག་ཆགས་ཀྱི་ཡན་ལག་རྣམས་རས་བལ་ལ་རྣམ་པར་བསལ་ཏེ། རས་ལ་རྡོ་རྗེ་རི་མོ་གྲུ་བཞིར་བྲིས་ནས་བསྙེན་གནས་དང་ལྡན་པའི་རི་མོ་མཁན་གྱིས་དཀྱིལ་འཁོར་དུ་ཞུགས་པས། ཚོན་གཞན་དང་མ་འདྲེས་པར་སྣོད་རངས་པར་བཞག་
[278a.7]ལ་ཡི་གེ་འབུམ་བཟླས་ཏེ། བཅོམ་ལྡན་འདས་རྡོ་རྗེ་ཧཱུཾ་མཛད་རས་ཀྱི་དབུས་སུ་བྲི་བར་བྱའོ། །མི་བསྐྱོད་པའི་གནས་སུ་ཁྲོ་བོ་རྡོ་རྗེ་སེམས་དཔའ། རིན་ཆེན་འབྱུང་ལྡན་གྱི་གནས་སུ་ཁྲོ་བོ་རྒྱལ་པོ། དོན་ཡོད་པར་གྲུབ་པའི་གནས་སུ་ཁྲོ་བོ་རྡོ་རྗེ་ལེགས། འོད་དཔག་ཏུ་མེད་པའི་གནས་
[278b]
[278b.1]སུ་ཁྲོ་བོ་རྡོ་རྗེ་ཆགས་པ། མཚམས་རྣམས་སུ་སྒེག་མོ་ལ་སོགས་པ་མཆོད་པའི་ལྷ་མོ་བརྒྱད་བྲི་བར་བྱའོ། །དཔལ་རྡོ་རྗེ་ཧཱུཾ་མཛད་ཀྱི་རས་ཀྱི་ཆོ་གའོ། །རས་ཀྱི་དབུས་སུ་རིན་ཆེན་ཧཱུཾ་མཛད་བྲི་བ་དེའི་ཚེ་མི་བསྐྱོད་པའི་གནས་སུ་ཁྲོ་བོ་རྡོ་རྗེ། ཁྲོ་གཉེར་རིན་ཆེན་འབྱུང་ལྡན་གྱི་གནས་སུ་ཁྲོ་
[278b.2]བོ་རྡོ་རྗེ་ཉི་མ། དོན་ཡོད་གྲུབ་པའི་གནས་སུ་ཁྲོ་བོ་རྡོ་རྗེ་དཔལ། འོད་དཔག་ཏུ་མེད་པའི་གནས་སུ་ཁྲོ་བོ་རྡོ་རྗེ་བཞད་པ་བྲིས་ལ། ལྷག་མ་ནི་སྔ་མ་བཞིན་ཏེ། རིན་ཆེན་ཧཱུཾ་མཛད་ཀྱི་རས་ཀྱི་ཆོ་གའོ། །དབུས་སུ་ཆོས་ཀྱི་ཧཱུཾ་མཛད་འདྲི་བའི་ཚེ་མི་བསྐྱོད་པའི་གནས་སུ་ཁྲོ་བོ་རྡོ་རྗེ་ཆོས། རིན་ཆེན་
[278b.3]འབྱུང་ལྡན་གྱི་གནས་སུ་ཁྲོ་བོ་རྡོ་རྗེ་རྣོན་པོ། དོན་ཡོད་གྲུབ་པའི་གནས་སུ་ཁྲོ་བོ་རྡོ་རྗེ་རྒྱུ། འོད་དཔག་ཏུ་མེད་པའི་གནས་སུ་ཁྲོ་བོ་རྡོ་རྗེ་གསུངས་ལ། ལྷག་མ་ནི་སྔ་མ་བཞིན་ཏེ། ཆོས་ཀྱི་ཧཱུཾ་མཛད་ཀྱི་རས་ཀྱི་ཆོ་གའོ། །ལས་ཀྱི་ཧཱུཾ་མཛད་ཀྱི་དབུས་སུ་ཆོས་ཀྱི་ཧཱུཾ་མཛད་འདྲི་བ་དེའི་ཚེ་མཆོད་
[278b.4]པའི་མཐར་ཐུག་པའི་ཆོ་གས་མི་བསྐྱོད་པའི་གནས་སུ་ཁྲོ་བོ་རྡོ་རྗེ་ལས། རིན་ཆེན་འབྱུང་ལྡན་གྱི་གནས་སུ་ཁྲོ་བོ་རྡོ་རྗེ་བསྲུང་བ། དོན་ཡོད་གྲུབ་པའི་གནས་སུ་ཁྲོ་བོ་རྡོ་རྗེ་གནོད་སྦྱིན། འོད་དཔག་ཏུ་མེད་པའི་གནས་སུ་ཁྲོ་བོ་རྡོ་རྗེ་ཁུ་ཚུར། ལྷག་མ་ནི་སྔ་མ་བཞིན་ནོ། །ལས་ཀྱི་ཧཱུཾ་མཛད་ཀྱི་
[278b.5]རས་ཀྱི་ཆོ་གའོ། །དེ་ལ་རྡོ་རྗེ་ཧཱུཾ་མཛད་ལ་སོགས་པ་རྣམ་པ་བཞིའི་དཀྱིལ་འཁོར་ལས་བཤད་པའི་རིགས་པས་སམ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་སྔགས་ཀྱིས་རས་ལ་བྲིས་ལ་ལས་རྣམས་ཀྱི་ཆོ་ག་ལྷག་
[278b.6]མ་ཡང་གཟུང་བར་བྱའོ། །དེ་བཞིན་གཤེགས་པའི་རས་ལ་བྲིས་པའི་ཆོ་ག་ལྟར་ནི་མ་སྨོས་སུ་ཟིན་ཡང་སྔ་མ་བཞིན་དུ་གཟུང་བར་བྱའོ། །དེ་ལྟར་མཆོད་པ་བྱས་ནས་ཞེས་བྱ་བ་ནི་དེ་བཞིན་དུ་རས་ལ་བྲིས་ལ་རང་བྱིན་གྱིས་བརླབས་པ་ལ་སོགས་པའི་ཆོ་ག་བྱས་ལ། སྔ་མ་བཞིན་དུ་
[278b.7]ཁང་བུ་བརྩེགས་པ་གདན་དང་བཅས་པ་སྤྲུལ་ལ། ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་རིག་པ་རྣམས་ཀྱིས་རྡོ་རྗེ་ཧཱུཾ་མཛད་ལ་སོགས་པ་བསྐྱེད་ལ། དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་སྙིང་པོས་ཧཱུཾ་གིས་རྡོ་རྗེ་སེམས་དཔའ་ལ་སོགས་
[279a]
[279a.1]པ་རང་གི་གནས་སུ་བཞུགས་སུ་གསོལ་བ་ལ་བསྡུ་བ་ལ་སོགས་པ་བྱས་ཏེ། མཆོད་པ་རྣམ་པ་ལྔས་མཆོད་ནས། སྒེག་མོ་ལ་སོགས་པ་མཆོད་པ་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པའི་ཕྱག་རྒྱ་རྣམ་པ་བཅུ་དྲུག་གིས་མཆོད་པར་བྱའོ། །
[279a.2]དེ་བཞིན་དུ་མཆོད་པ་བྱས་ནས་ཞེས་བྱ་བའི་དོན་འདི་ཡིན་པར་ཤེས་པར་བྱ་སྟེ། ཟླ་བ་གཅིག་འདོད་པ་ཀུན་ལ་ལོངས་སྤྱོད་ཅིང་། སྒེག་མོ་ལ་སོགས་པས་མཆོད་པ་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་བསྒོམ་པ་ནི་འདོད་པ་ཀུན་ལ་ལོངས་སྤྱོད་པའོ། །
[279a.3]ཅི་དགའ་བ་བཞིན་དུ་ཞེས་བྱ་བ་ནི་བཤད་ཟིན་ཏོ། །བརྒྱ་སྟོང་དུ་མ་ཀྱེབཟླས་པ་ཞེས་བྱ་བ་སྟོང་རྩ་བརྒྱད་བཟླས་པ་སྟེ། སྟོང་རྩ་བརྒྱད་པ་དེ་ནི་བརྒྱ་སྟོང་དུ་བཟླས་སོ། །དུས་བཞིར་ཞེས་བྱ་བ་ལ་སོགས་པ་ནི་གོ་སླའོ། །དེའི་དོན་ནི་འདི་སྐད་སྟོན་པ་ཡིན་ཏེ། མཆོད་པའི་མཐར་ཐུག་པའི་ཆོ་ག་ཐམས་
[279a.4]ཅད་རྗེས་སུ་སྤྱད་ལ། ཕྱག་བཞི་བྱས་ནས། ཉིན་རེ་ཞིང་ཐུན་བཞི་རུ་སྟོང་བཟླས་ཤིང་ཟླ་བ་གཅིག་གི་མཐར་ཐུག་པ་དེ་སྲིད་ཀྱི་བར་དུ་བྱའོ། །དེ་མཐར་ཟླ་བ་ཉ་ལ་འཇིག་རྟེན་གསུམ་ལས་རྣམ་པར་རྒྱལ་བས་བཅིངས་ཏེ། ཆོ་ག་ཐམས་ཅད་རྗེས་སུ་སྤྱད་ནས། ཇི་སྲིད་དུ་རང་གི་ཁྲོ་བོའི་སྔགས་ཟློས་
[279a.5]ཤིང་ཕྱག་རྒྱ་བཅིངས་པ་དེ་ལ་ཧཱུཾ་ཞེས་བྱ་བའི་སྒྲ་བྱུང་གི་བར་དུ་བཟླས་པར་བྱའོ། །ལྷག་མ་ནི་གོ་སླའོ། །དེ་ལྟར་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་བསྒྲུབ་པ་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་འཇིག་རྟེན་གསུམ་ལས་རྣམ་པར་རྒྱལ་བའི་
[279a.6]གཟུངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་ག་དངོས་གྲུབ་པའི་ཡོ་བྱད་ཀྱི་ཆོ་ག་ནི། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྐབས་སུ་བབ་པ་སྟེ། ཕྱག་རྒྱ་ནི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་བཤད་
[279a.7]པའི་གཟུངས་རྣམས་སོ། །དེ་བསྒྲུབ་པ་ནི་ཕྱག་རྒྱ་བསྒྲུབ་པའོ། །དེ་ལ་གལ་ཏེ་འགའ་ཞིག་བཟླས་པའི་ཕྱག་རྒྱ་རྣམས་བསྒྲུབ་པར་འདོད་ན་ཡང་དེ་ནས་དེས་ཇི་ལྟ་བ་བཞིན་དུ་བཟླས་པ་བྱས་ལ་ཞེས་བྱ་བ་ནི་དེ་བཟླས་པའི་ཆོ་གས། རང་གི་གཟུངས་ཀྱི་རིག་པའི་ཡི་གེ་འབུམ་བཟླས་པར་བྱའོ། །
[279b]
[279b.1]དེ་ནས་རྡོ་རྗེ་ཧཱུཾ་ཞེས་བྱ་བ་ལ་སོགས་པ་ཇི་ལྟ་བ་བཞིན་དུ་བཤད་པས་གཟུངས་ཀྱི་རིག་པའི་རས་ཀྱི་མདུན་དུ་སྔ་མ་བཞིན་དུ་སྟོང་རྩ་བརྒྱད་བཟླས་ལ་ཐུན་བཞིའི་སྦྱོར་བ་བྱས་ཏེ། ཇི་སྲིད་དུ་ཟླ་བ་གཅིག་གི་མཐར་ཐུག་པའི་བར་དུ་བྱས་ལ་མཐར་ཟླ་བ་ཉ་ལ། འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་
[279b.2]རྒྱ་བཅིངས་ཏེ། གཟུངས་ཀྱི་རིག་པ་མཚན་ཐོག་ཐག་བཟླས་ན་དེ་ལྟ་བུ་དེས་ཕྱག་རྒྱ་བྱས་པ་འགྲུབ་པར་འགྱུར་རོ། །དེ་ནས་གཟུངས་ཐམས་ཅད་འགྲུབ་པར་འགྱུར་རོ། །དེ་ལྟར་རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་བསྒྲུབ་པ་བསྟན་ནས། ད་ནི་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་ལས་
[279b.3]བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་རྒྱས་པར་བཤད་པ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ལ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། སྔོན་དུ་བསྙེན་པ་ཉིད་ཀྱི་རྗེས་ཐོགས་ལའོ། །རྡོ་རྗེ་ཧཱུཾ་ཞེས་བྱ་བའི་ཏིང་ངེ་འཛིན་ནས་བརྩམས་ཏེ། བསྒོམ་ཞིང་ཞེས་བྱ་བ་ནི་
[279b.4]རྡོ་རྗེ་ཧཱུཾ་མཛད་ནས་བརྩམས་ནས་ཇི་སྲིད་དུ་རྡོ་རྗེ་འབེབས་པའི་མཐར་ཐུག་པའི་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་ཁྲོ་བོ་རྣམས་ཀྱི་ནང་ནས། ཁྲོ་བོ་གང་ཡང་རུང་བ་མངོན་པར་འདོད་པ་དེ་ཏིང་ངེ་འཛིན་བསྒོམ་པར་བྱའོ། །ཇི་ལྟར་ཞེ་ན། དེ་བཞིན་དུ་བཟླས་པའི་ཚུལ་གྱིས་
[279b.5]ཞེས་བྱ་བ་སྨོས་ཏེ། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་བཅིངས་ཏེ། དེའི་རྗེས་ལ་
[279b.6]གཡོན་པའི་ཁྲོ་བོའི་ཁུ་ཚུར་གྱིས་རྡོ་རྗེ་བླངས་ཏེ། ལག་པ་གཡས་པས་བཟླས་པའི་ཕྲེང་བ་བཟུང་ནས་སྔ་མ་བཞིན་དུ་ཆོས་ཀྱི་དཀྱིལ་འཁོར་ལས་བཤད་པའི་རང་གི་རིག་པའི་ཡི་གེ་འབུམ་བཟླས་པར་བྱའོ། །དེ་ནས་ཇི་ལྟ་བ་བཞིན་དུ་རས་ལ་བྲིས་ཏེ། ཟླ་བ་གཅིག་ཐུན་བཞིའི་སྦྱོར་བས་རང་
[279b.7]གི་ཏིང་ངེ་འཛིན་བསྒོམ་པར་བྱའོ། །སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། དེ་ནས་ཟླ་བ་ཉ་ལ་ཏིང་ངེ་འཛིན་ཉིད་ཀྱིས་མཚན་ཐོག་ཐག་བཟླས་པ་བྱས་ན་མངོན་པར་ཤེས་པ་ལྔ་སྐྱེ་བར་འགྱུར་རོ། །དེ་ལྟར་ཆོས་ཀྱི་དཀྱིལ་འཁོར་གྱི་ཡོ་བྱད་ཀྱི་ཆོ་ག་བསྟན་ནས། ད་ནི་རྡོ་རྗེ་
[280a]
[280a.1]རིགས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ།
[280a.2]སྔ་མ་བཞིན་དུ་བསྡུ་བ་ལ་སོགས་པ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། གཡོན་པའི་ཁྲོ་བོའི་ཁུ་ཚུར་གྱིས་ཁྲོ་བོའི་རྡོ་རྗེ་བླངས་ཏེ། ལག་པ་གཡས་པས་སྔ་མ་བཞིན་དུ་བཟླས་པའི་ཕྲེང་བ་བཟུང་ལ་སྔར་བཤད་པའི་ཆོ་ག་ལས་བཤད་པའི་ཡི་གེ་འབུམ་བཟླ་བར་བྱའོ། །
[280a.3]དེ་ནས་སྔར་བཤད་པའི་རས་རིས་ཀྱི་མདུན་དུ་རྡོ་རྗེའི་ཚིག་གིས་རང་གི་རིག་པ་སྟོང་རྩ་བརྒྱད་བཟླ་བར་བྱའོ། །ཉིན་རེ་བཞིན་དུ་ཐུན་བཞི་སྦྱོར་བ་བྱས་ལ། དེ་ནས་ཟླ་བ་ཉ་ལ་མཚན་ཐོག་ཐག་བཟླས་པ་བྱས་ནས་ལས་ཐམས་ཅད་ལ་རིག་པའི་ཡི་གེ་ལན་ཅིག་བརྗོད་པས་འགྲུབ་པར་འགྱུར་རོ། །
[280a.4]དེ་ལྟར་རྡོ་རྗེ་རིགས་ཀྱི་ཡོ་བྱད་ཀྱི་རྒྱུད་བསྟན་ནས། ད་ནི་པདྨའི་རིགས་ཀྱི་ཡོ་བྱད་ནི་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་དང་པོ་འབུམ་བཟླས་པ་བྱས་ནས་ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། བསྡུ་བ་ལ་སོགས་
[280a.5]པའི་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། གཡོན་པའི་པདྨའི་ཁུ་ཚུར་གྱིས་རྡོ་རྗེ་པདྨ་བླངས་ཏེ། ལག་པ་གཡས་པས་བཟླས་པའི་ཕྲེང་པ་བཟུང་ནས། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ན་སྔོན་དུ་བསྙེན་པ་བྱས་པར་
[280a.6]འགྱུར་རོ། །དེ་ནས་པདྨའི་དཀྱིལ་འཁོར་ཟུར་བཞི་པའི་ཐིག་བཏབ་ལ། རས་ཀྱི་དབུས་སུ་བཅོམ་ལྡན་འདས་འགྲོ་བ་འདུལ་བ། མི་བསྐྱོད་པའི་གནས་སུ་སངས་རྒྱས་པདྨ། རིན་ཆེན་འབྱུང་ལྡན་གྱི་གནས་སུ་པདྨའི་རྒྱལ་པོ། དོན་ཡོད་པར་གྲུབ་པའི་གནས་སུ་པདྨའི་ཆགས་པ། འོད་
[280a.7]དཔག་ཏུ་མེད་པའི་གནས་སུ་པདྨའི་ལེགས་པ། མཚམས་ཀྱི་ཆར་པདྨའི་སྒེག་མོ་ལ་སོགས་པ་མཆོད་པའི་ལྷ་མོ་རྣམ་པ་བརྒྱད་སྔར་བཤད་པའི་ཆོ་གས་བྲི་བར་བྱའོ། །འགྲོ་བ་འདུལ་བའི་རས་ཀྱི་ཆོ་གའོ། །རས་ཀྱི་དབུས་སུ་ཐོར་ཚུགས་སངས་རྒྱས་བྲི་བ་དེ་ཉིད་ཀྱི་ཚེ་མི་བསྐྱོད་པའི་
[280b]
[280b.1]གནས་སུ་པདྨའི་ཁྲོ་གཉེར། རིན་ཆེན་འབྱུང་ལྡན་གྱི་གནས་སུ་པདྨའི་ཉི་མ། དོན་ཡོད་པར་གྲུབ་པའི་གནས་སུ་པདྨའི་དཔལ། འོད་དཔག་ཏུ་མེད་པའི་གནས་སུ་པདྨའི་བཞད་པ། ལྷག་མ་ནི་སྔ་མ་བཞིན་ཏེ། ཏིང་ངེ་འཛིན་གཙུག་ཕུད་སངས་རྒྱས་ཀྱི་རས་ཀྱི་ཆོ་གའོ། །ཏིང་ངེ་འཛིན་པདྨའི་
[280b.2]དབུས་སུ་འདྲི་བའི་ཚེ་མི་བསྐྱོད་པའི་གནས་སུ་པདྨ་སྒྲོལ་མ། རིན་ཆེན་འབྱུང་ལྡན་གྱི་གནས་སུ་པདྨ་རྣོན་པོ། དོན་ཡོད་པར་གྲུབ་པའི་གནས་སུ་པདྨ་རྒྱུ། འོད་དཔག་ཏུ་མེད་པའི་གནས་སུ་པདྨའི་གཟུངས་བྲིས་ལ། ལྷག་མ་ནི་སྔ་མ་བཞིན་དུ་བྱས་ཏེ། ཏིང་ངེ་འཛིན་པདྨའི་རས་ཀྱི་ཆོ་གའོ། །
[280b.3]དབུས་སུ་བཅོམ་ལྡན་འདས་པདྨ་ངེས་པའི་དབང་ཕྱུག་འདྲི་བའི་ཚེ་མི་བསྐྱོད་པའི་གནས་སུ་པདྨ་གར་གྱི་དབང་ཕྱུག།རིན་ཆེན་འབྱུང་ལྡན་གྱི་གནས་སུ་པདྨ་བསྲུང་བ། དོན་ཡོད་པར་གྲུབ་པའི་གནས་སུ་པདྨ་གནོད་སྦྱིན། འོད་དཔག་ཏུ་མེད་པའི་གནས་སུ་པདྨའི་ཁུ་ཚུར་བྲིས་ལ་ལྷག་མ་ནི་སྔ་
[280b.4]མ་བཞིན་ཏེ། པདྨ་ངེས་པའི་དབང་ཕྱུག་གི་རས་ཀྱི་ཆོ་གའོ། །དེ་ལྟར་རས་ལ་བྲིས་ནས་སྔ་མ་བཞིན་དུ་རང་ལ་བྱིན་གྱིས་བརླབ་པ་ལ་སོགས་པ་བྱས་ལ། བསྡུ་བ་ལ་སོགས་པ་ཆོ་ག་རྗེས་སུ་སྤྱད་ནས། མཆོད་པ་རྣམ་པ་ལྔ་དང་། སྒེག་མོ་ལ་སོགས་པའི་མཆོད་པ་རྣམ་པ་བརྒྱད་དང་། པདྨའི་
[280b.5]རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་གིས་རས་རིས་ཀྱི་བཅོམ་ལྡན་འདས་འཁོར་དང་བཅས་པ་ལ་ཡང་དག་པར་མཆོད་ལ་ཕྱག་བཞི་བྱས་ཏེ། ཟླ་བ་གཅིག་ཉིན་རེ་ཞིང་ཐུན་བཞིའི་སྦྱོར་བས་སྟོང་རྩ་བརྒྱད་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་
[280b.6]ཏུ་བཟླས་པར་བྱའོ། །དེ་ནས་བཅོམ་ལྡན་འདས་འགྲོ་བ་ཐམས་ཅད་འདུལ་བ་བྱོན་ནས་ཅི་འདོད་པའི་མཆོག་གི་སྐབས་འབྱེད་པར་འགྱུར་རོ། །དེ་ལྟར་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་བསྟན་ནས། ད་ནི་འགྲོ་བ་འདུལ་བའི་
[280b.7]གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་ནི། ཅི་སྟེ་ཕྱག་རྒྱ་བསྒྲུབ་པར་འདོད་ན་ཡང་། །ཞེས་བྱ་བ་ལ་སོགས་པ་གསུངས་པ་ཡིན་ནོ། །སྔ་མ་བཞིན་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ།
[281a]
[281a.1]ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། གཡོན་པའི་པདྨའི་ཁུ་ཚུར་གྱིས་རྡོ་རྗེ་པདྨ་བླངས་ཏེ། གཡས་པས་བགྲང་ཕྲེང་སྙིང་གར་བཟུང་ནས། གཟུངས་ཀྱི་དཀྱིལ་འཁོར་གྱི་རིག་པ་འབུམ་བཟླས་པར་བྱའོ། །དེ་ནས་ཇི་སྐད་དུ་བཤད་པའི་རས་རིས་ལ་
[281a.2]ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས། རྡོ་རྗེ་ཆོས་མ་བཅིངས་ཏེ་རིག་པ་སྟོང་རྩ་བརྒྱད་དུ་བརྗོད་ཅིང་ཉིན་རེ་ཞིང་ཐུན་བཞིའི་སྦྱོར་བས་ཟླ་བ་གཅིག་སྔ་མ་བཞིན་དུ་བཟླས་པར་བྱའོ། །དེ་ནས་ཟླ་བ་ཉ་ལ་མཐར་མཚན་ཐོག་ཐག་ཆོས་ཀྱི་རྡོ་རྗེ་མའི་ཕྱག་རྒྱ་བཅིངས་ཏེ། བཟླས་
[281a.3]པ་བྱས་ལ་ནམ་ལངས་པ་ན་ཕྱག་རྒྱའི་དངོས་གྲུབ་ཏུ་འགྱུར་རོ། །དེ་ནས་ཕྱག་རྒྱ་བཅིངས་ལ་ཇི་ལྟ་བ་བཞིན་དུ་འགྲོ་བ་འདུལ་བར་བྱེད་དོ། །དེ་ལྟར་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་བསྟན་ནས། ད་ནི་འགྲོ་བ་འདུལ་བའི་
[281a.4]ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པར་འདོད་ན་ཡང་ཞེས་བྱ་བ་གསུངས་སོ། །དེ་བཞིན་དུ་ཞེས་བྱ་བ་ལ་སོགས་པ་སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞི་པའི་རང་གི་ལྷའི་ཆོ་ག་རྗེས་སུ་སྤྱད་ནས། གཡོན་པའི་པདྨའི་ཁུ་ཚུར་
[281a.5]གྱིས་རྡོ་རྗེ་པདྨ་བླངས་ཏེ། ལག་པ་གཡས་པས་བགྲང་ཕྲེང་བཟུང་ནས། སྔ་མ་བཞིན་དུ་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་སྔགས་འབུམ་བཟླས་པར་བྱའོ། །དེ་ནས་ཇི་སྐད་བཤད་པའི་རས་རིས་ཀྱི་མདུན་དུ་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་བཅིངས་ཏེ།
[281a.6]ཉིན་རེ་ཞིང་ཐུན་བཞིའི་སྦྱོར་བས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་སྔགས་ཟླ་བ་གཅིག་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་པ་བྱ་སྟེ། ནམ་ལངས་པ་དང་ཏིང་ངེ་འཛིན་ཐམས་ཅད་མངོན་དུ་བྱེད་པར་འགྱུར་རོ་ཞེས་རྡོ་རྗེ་ཆོས་ཀྱིས་གསུངས་སོ། །དེ་ལྟར་
[281a.7]ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་སྔགས་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་བསྟན་ནས། ད་ནི་འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་རྒྱས་པ་ནི། ཅི་སྟེ་ལས་བསྒྲུབ་པར་འདོད་ན་ཡང་ཞེས་བྱ་བ་གསུངས་སོ། །
[281b]
[281b.1]དེ་བཞིན་དུ་བཟླས་པ་ཞེས་བྱ་བ་ལ་སོགས་པ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས་འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་བཤད་པའི་རང་གི་རིག་པ་སྔར་
[281b.2]བཤད་པའི་ཆོ་ག་སྟོང་རྩ་བརྒྱད་བཟླས་པ་བྱས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་རས་རིས་ཀྱི་མདུན་དུ་ཆོས་ཀྱི་རྡོ་རྗེ་མ་བཅིངས་ཏེ། ཐུན་བཞིའི་སྦྱོར་བས་སྟོང་རྩ་བརྒྱད་བཟླས་ལ་ཟླ་བ་གཅིག་ཏུ་བཟླས་པར་བྱའོ། །མཐར་མཚན་ཐོག་ཐག་བཟླས་ལ་དེའི་རྗེས་ལ་ནམ་
[281b.3]ལངས་པ་ན་ལས་ཐམས་ཅད་འགྲུབ་པར་འགྱུར་རོ། །དེ་ལྟར་པདྨའི་རིགས་ཀྱི་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་རིགས་ཀྱི་ཡོ་བྱད་དང་ཆོ་ག་རྒྱས་པ་ནི་འདི་ཡིན་ཏེ་ཞེས་བྱ་བ་གསུངས་སོ། །དེ་ལ་དང་པོ་ཁོ་ནར་ཞེས་བྱ་བ་ནི་སྔ་མ་བཞིན་དུ་དོན་ཐམས་ཅད་གྲུབ་པའི་
[281b.4]དཀྱིལ་འཁོར་ཆེན་པོར་བཤད་པའི་རང་གི་ལྷའི་རྣལ་འབྱོར་བྱས་ལ་ཕྱག་བཞིའི་མཐར་ཐུག་པའི་ཆོ་ག་བསྡུ་བ་ལ་སོགས་པའི་རྗེས་སུ་སྤྱད་ནས། གཡོན་པའི་རིན་པོ་ཆེའི་ཁུ་ཚུར་གྱིས་རྡོ་རྗེ་རིན་པོ་ཆེ་བླངས་ལ། ལག་པ་གཡས་པས་བཟླས་པའི་བགྲང་ཕྲེང་སྙིང་གར་བཟུང་སྟེ། དོན་
[281b.5]ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་སྔགས་སྔ་མ་བཞིན་དུ་འབུམ་བཟླས་པར་བྱའོ། །དེ་ནས་རིན་པོ་ཆེ་ཟུར་བཞི་པའི་ཐིག་བཏབ་ལ། རས་རིས་ཀྱི་དབུས་སུ་བཅོམ་ལྡན་འདས་དོན་ཐམས་ཅད་གྲུབ་པ། མི་བསྐྱོད་པའི་གནས་སུ་ནོར་བུའི་
[281b.6]མཚན་མ། རིན་ཆེན་འབྱུང་ལྡན་གྱི་གནས་སུ་རིན་ཆེན་རྒྱལ་པོ། དོན་ཡོད་གྲུབ་པའི་གནས་སུ་རིན་ཆེན་ཆགས་པ། འོད་དཔག་ཏུ་མེད་པའི་གནས་སུ་རིན་ཆེན་ལེགས་པ། མཚམས་ཀྱི་ཆ་རྣམས་སུ་སྒེག་མོ་ལ་སོགས་པའི་མཆོད་པའི་ལྷ་མོ་བརྒྱད་སྔར་བཤད་པའི་ཆོ་གས་བྲི་བར་
[281b.7]བྱའོ། །དོན་ཐམས་ཅད་གྲུབ་པའི་རས་ཀྱི་ཆོ་གའོ། །རས་ཀྱི་དབུས་སུ་བཅོམ་ལྡན་འདས་རིན་ཆེན་ལྟ་བ་བྲི་བ་དེའི་ཚེ་མི་བསྐྱོད་པའི་གནས་སུ་རིན་ཆེན་ཕྲེང་བ། རིན་ཆེན་འབྱུང་ལྡན་གྱི་གནས་སུ་རིན་ཆེན་ཉི་མ། དོན་ཡོད་གྲུབ་པའི་གནས་སུ་རིན་ཆེན་དཔལ། འོད་དཔག་ཏུ་
[282a]
[282a.1]མེད་པའི་གནས་སུ་རིན་ཆེན་བཞད་པ་བྲིས་ལ་ལྷག་མ་ནི་སྔ་མ་བཞིན་ནོ། །རིན་ཆེན་ལྟ་བའི་རས་ཀྱི་ཆོ་གའོ། །བཅོམ་ལྡན་འདས་རིན་ཆེན་པདྨ་དབུས་སུ་འདྲི་བ་དེའི་ཚེ། མི་བསྐྱོད་པའི་གནས་སུ་གཏོང་བའི་ཏིང་ངེ་འཛིན་གྱི་ཡེ་ཤེས་ཀྱི་སྙིང་པོ། རིན་ཆེན་
[282a.2]འབྱུང་ལྡན་གྱི་གནས་སུ་རིན་ཆེན་རྣོན་པོའོ། །དོན་ཡོད་གྲུབ་པའི་གནས་སུ་རིན་ཆེན་འཁོར་ལོ། འོད་དཔག་ཏུ་མེད་པའི་གནས་སུ་ནོར་བུ་གསུང་བ་བྲིས་ལ། ལྷག་མ་ནི་སྔ་མ་བཞིན་ཏེ་རིན་ཆེན་པདྨའི་རས་ཀྱི་ཆོ་གའོ། །དབུས་སུ་བཅོམ་ལྡན་འདས་རིན་ཆེན་ཆར་འབེེབས་འདྲི་བའི་ཚེ་
[282a.3]མི་བསྐྱོད་པའི་གནས་སུ་ནོར་བུ་མཆོད་པ། རིན་ཆེན་འབྱུང་ལྡན་གྱི་གནས་སུ་ནོར་བུ་བསྲུང་བ། དོན་ཡོད་གྲུབ་པའི་གནས་སུ་ནོར་བུ་གནོད་སྦྱིན། འོད་དཔག་ཏུ་མེད་པའི་གནས་སུ་ནོར་བུ་ཁུ་ཚུར་བྲིས་ལ་ལྷག་མ་ནི་སྔ་མ་བཞིན་ཏེ། རིན་ཆེན་ཆར་འབེབས་ཀྱི་རས་ཀྱི་ཆོ་གའོ། །དེ་
[282a.4]ལྟར་རས་རིས་བྲིས་ནས་དེ་ནས་བསྡུ་བ་ལ་སོགས་པའི་ཆོ་ག་བྱས་ལ། རས་རིས་བཅོམ་ལྡན་འདས་ལ་མཆོད་པ་རྣམ་པ་ལྔ་དང་། རིན་ཆེན་སྒེག་མོ་ལ་སོགས་པ་མཆོད་པ་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་རིག་མ་བཅུ་དྲུག་གིས་ཡང་དག་པར་མཆོད་ལ་ཕྱག་
[282a.5]བཞི་བྱས་ནས། ཉིན་རེ་ཞིང་ཐུན་བཞིའི་རྣལ་འབྱོར་གྱིས་སྟོང་རྩ་བརྒྱད་ཟླ་བ་གཅིག་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་ལ། ནམ་ལངས་པ་དང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའི་རིན་པོ་ཆེའི་བྱང་ཆུབ་སེམས་དཔའ་
[282a.6]ནམ་མཁའི་སྙིང་པོ་བྱོན་ནས་དབང་བསྐུར་བ་བྱིན་པར་མཛད་དོ། །དབང་བསྐུར་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེར་རིག་འཛིན་གྱི་འཁོར་ལོས་སྒྱུར་བར་འགྱུར་རོ། །དེ་ལྟར་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་ཀྱི་ཡོ་
[282a.7]བྱད་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་གྱི་ཡོ་བྱད་ཀྱི་ཆོ་ག་རྒྱས་པ་ནི། ཅི་སྟེ་ཕྱག་རྒྱ་བསྒྲུབ་པར་འདོད་ན་ཡང་། །ཞེས་བྱ་བ་གསུངས་སོ། །དེ་བཞིན་དུ་ཞེས་བྱ་བ་ལ་སོགས་པ་ལ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་
[282b]
[282b.1]ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས་གཡོན་པའི་ཁུ་ཚུར་གྱིས་རྡོ་རྗེ་རིན་པོ་ཆེ་བླངས་ལ། ལག་པ་གཡས་པས་བཟླས་པའི་ཕྲེང་བ་སྙིང་གར་བཟུང་སྟེ། ནོར་བུའི་རིགས་སུ་བཤད་པའི་གཟུངས་ཀྱི་རིག་པ་སྔ་
[282b.2]མ་བཞིན་དུ་འབུམ་བཟླས་པར་བྱའོ། །དེ་ནས་བཤད་མ་ཐག་པའི་རས་ལ་བསྡུ་བ་ལ་སོགས་པའི་ཆོ་ག་བྱས་ལ་མཆོད་པ་རྣམ་པ་ལྔ་དང་། རིན་ཆེན་སྒེག་མོ་ལ་སོགས་པ་རྣམས་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་གི་ཕྱག་རྒྱ་རྣམས་ཀྱིས་
[282b.3]མཆོད་ལ་ཕྱག་བཞི་བྱའོ། །དེ་ནས་རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་གཟུངས་ཀྱི་རིག་པ་སྟོང་རྩ་བརྒྱད་བཟླས་ཤིང་། ཉིན་རེ་ཞིང་ཐུན་བཞིའི་སྦྱོར་བས་ཟླ་བ་གཅིག་གི་བར་དུ་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་
[282b.4]ཐག་བཟླས་པས་དེའི་རྗེས་ལ་གང་བསམ་པ་ཐམས་ཅད་ཀྱི་ལས་བྱེད་པར་འགྱུར་རོ། །དེ་ལྟར་ནོར་བུའི་རིགས་ཀྱི་གཟུངས་བསྒྲུབ་པའི་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་རྒྱས་
[282b.5]པ་ནི། ཅི་སྟེ་ནོར་བུའི་ཡེ་ཤེས་བསྒྲུབ་པར་འདོད་ན་ཡང་། །ཞེས་གསུངས་པ་ཡིན་ནོ། །ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་དངོས་གྲུབ་ནི་ནོར་བུ་ཡེ་ཤེས་སོ། །གལ་ཏེ་བསྒྲུབ་པར་འདོད་ན་ཡང་སྒྲུབ་པ་པོ་དེས་དེ་བཞིན་དུ་རྡོ་རྗེ་རིན་པོ་ཆེ་
[282b.6]ལས་བྱུང་བའི་ཏིང་ངེ་འཛིན་ཇི་ལྟ་བར་རིམ་བཞིན་དུ་བསྒོམ་པར་བྱ་སྟེ། པདྨའི་རིགས་ཀྱི་ཏིང་ངེ་འཛིན་སྒྲུབ་པ་པོ་རྣལ་འབྱོར་པས་སྔ་མ་བཞིན་དུ་འཕགས་པ་ནམ་མཁའི་སྙིང་པོའི་ཐུགས་ཀའི་རྡོ་རྗེ་རིན་པོ་ཆེ་ལས་འབྱུང་བའོ། །ཏིང་ངེ་འཛིན་ནི་དོན་ཐམས་ཅད་གྲུབ་པ་ལ་སོགས་
[282b.7]པའི་ནོར་བུ་རིན་ཆེན་འབེེབས་པའི་མཐར་ཐུག་པའི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོའི་གཟུགས་ཀྱིས་གོ་རིམས་ཇི་ལྟ་བ་བཞིན་དུ་བསྒོམ་པ་ནི་ཡང་ནས་ཡང་དུ་མངོན་དུ་བྱེད་པའོ། །ཇི་ལྟར་བསྒོམ་པར་བྱ་ཞེ་ན། དངོས་པོ་མེད་པའི་ནམ་མཁའ་ལས། །
[283a]
[283a.1]ཞེས་བྱ་བ་སྨོས་ཏེ། ཇི་ལྟར་རིན་པོ་ཆེ་འབྱུང་ཞེ་ན། ནམ་མཁའ་དང་མཉམ་པ་ཉིད་ཀྱི་ཡེ་ཤེས་ལས་སོ། །ནམ་མཁའ་དེ་ཡང་གཟུང་བ་དང་འཛིན་པའི་རྣམ་པར་རྟོག་པ་སྤངས་པའི་ཕྱིར་དངོས་པོ་མེད་པའོ། །དེ་བས་ན་དངོས་པོ་མེད་པའི་ནམ་མཁའ་རྟོག་
[283a.2]པ་ཐམས་ཅད་སྤངས་པ་ལས་རིན་པོ་ཆེ་ཇི་ལྟར་འབྱུང་བར་འགྱུར། ཅིའི་ཕྱིར་ཞེ་ན། རྣམ་པར་རྟོག་པ་ལས་འབྱུང་བ་མེད་པར་འདོད་པའི་ཕྱིར་རོ། །ནམ་མཁའ་དང་མཉམ་པའི་ཡེ་ཤེས་དེ་ཡང་བག་ཆགས་དང་བཅས་པའི་ཉོན་མོངས་པ་སྤངས་ཤིང་། ཤིན་ཏུ་རྣམ་པར་རྟོག་
[283a.3]པ་མེད་པ་དེའི་ཕྱིར། རྡོ་རྗེ་རིན་པོ་ཆེ་དེ་ལས་སྐྱེས་པ་དོན་དམ་པར་ཡོད་པ་མ་ཡིན་ནོ་ཞེས་བསྟན་ཏོ། །རིན་པོ་ཆེ་ལས་བྱང་ཆུབ་སེམས་དཔའི་སྐུ་ཇི་ལྟར་འབྱུང་ཞེས་བྱ་བ་ནི། གདོད་མ་ནས་མ་སྐྱེས་པའི་ཕྱིར་ན་རིན་པོ་ཆེའི་རྒྱུ་ལས་བྱུང་བའི་དོན་ཐམས་ཅད་གྲུབ་པ་ལ་སོགས་
[283a.4]པའི་བྱང་ཆུབ་སེམས་དཔའི་སྐུ་ཇི་ལྟར་འབྱུང་ཞིང་སྐྱེ་བ་ཡིན་ཞེས་བྱ་བའི་དོན་ཏོ། །མཚན་ཐོག་ཐག་བཟླས་པར་བྱའོ། །རྡོ་རྗེ་རིན་པོ་ཆེ་ནི་དོན་དམ་པར་མ་སྐྱེས་ཤིང་དེ་ཡང་མེད་པའི་ཕྱིར་དེའི་རིགས་ཀྱང་དོན་དམ་པར་མ་སྐྱེས་པ་དེའི་ཕྱིར་ནོར་བུའི་རིགས་རྣམས་སྒྱུ་མ་དང་མཚུངས་པར་
[283a.5]བསྒོམ་ཞིང་བཟླས་པར་བྱའོ། །ཇི་ལྟ་བའི་རིམ་པ་བཞིན་དུ་ཞེས་བྱ་བའི་དོན་བཤད་པ་ནི་འདི་ཉིད་ཀྱིས་སྟོན་པ་ཡིན་ཏེ། ཏིང་ངེ་འཛིན་འདིའི་དུས་བཞིར་བསྒོམས་ལ། ཇི་ལྟར་གོང་དུ་སྨོས་པ་བཞིན་དུ་ཞེས་བྱ་བ་ནི་ཕྱག་བཞི་བྱས་ལ་སྟོང་ཕྲག་བརྒྱ་བཟླས་པར་བྱའོ་ཞེས་བྱ་བའི་དོན་
[283a.6]ཏོ། །གོང་དུ་སྨོས་པ་བཞིན་དུ་ཞེས་བྱ་བ་ནི་སྔ་མ་བཞིན་དུ་ཞེས་བྱ་བའི་དོན་ཡིན་ནོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། སྟོང་ཕྲག་བརྒྱ་བཟླས་པ་བྱས་པའི་རྗེས་ཐོགས་ཉིད་ལའོ། །མདུན་གྱི་རས་རིས་ལ་སྔ་མ་བཞིན་དུ་ཟླ་བ་གཅིག་ཙམ་བཟླས་པ་བྱས་ལ། དེ་ནི་འདི་
[283a.7]སྐད་སྟོན་པ་ཡིན་ཏེ། དེ་ནས་ནམ་ལངས་པ་དང་བཅོམ་ལྡན་འདས་རྣམས་ཀྱིས་དབང་བསྐུར་པར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ནས། ཕྱག་བཞིའི་མཐར་ཐུག་པའི་
[283b]
[283b.1]ཆོ་ག་རྗེས་སུ་སྤྱད་དེ། རང་གི་ལྷའི་ཕྱག་རྒྱ་ཆེན་པོ་བཅིངས་ནས། དེའི་སྔགས་བརྗོད་ཅིང་འདི་ལྟར་བསྒོམ་པར་བྱ་སྟེ། དངོས་པོ་མེད་པའི་ནམ་མཁའ་ལས་རིན་པོ་ཆེ་ཇི་ལྟར་འབྱུང་བར་འགྱུར། རིན་པོ་ཆེ་ལས་བྱང་ཆུབ་སེམས་དཔའི་སྐུ་ཇི་ལྟར་འབྱུང་ཞེས་དེ་ལྟར་བསྒོམས་ནས།
[283b.2]སྔར་བཤད་པའི་ཚུལ་གྱིས་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་སྔགས་སྟོང་ཕྲག་བརྒྱད་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྔར་བཤད་པའི་ཚུལ་གྱིས་རང་གི་ལྷའི་ཏིང་ངེ་འཛིན་བསྒོམས་ཏེ། ཉིན་རེ་ཞིང་ཐུན་བཞིའི་སྦྱོར་
[283b.3]བས་ཟླ་བ་གཅིག་བཟླས་པར་བྱའོ། །དེ་ནས་ཟླ་བ་ཉ་ལ་མཐར་མཚན་ཐོག་ཐག་བཟླས་ན་ནམ་ལངས་པ་དང་། དེ་བཞིན་གཤེགས་པ་ཐམས་ཅད་བྱོན་ནས། ཅི་དགའ་བ་བཞིན་དུ་དབང་བསྐུར་བར་བྱའོ་ཞེས་དེ་བཞིན་གཤེགས་པ་ནམ་མཁའི་སྙིང་པོས་གསུངས་
[283b.4]སོ། །དེ་ལྟར་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པ་ནི་དེ་ནས་ལས་ཀྱི་བསྒྲུབ་པ་བཤད་དེ་ཞེས་བྱ་བ་གསུངས་སོ། །
[283b.5]དེ་བཞིན་དུ་བཟླས་ལ་ཞེས་བྱ་བ་ནི་སྔ་མ་བཞིན་དུ་ནོར་བུའི་རིགས་སུ་བཤད་པའི་ཕྱག་བཞིའི་མཐར་ཐུག་པ་ཁོ་ན་རྗེས་སུ་སྤྱད་ལ། གཡོན་པའི་རིན་པོ་ཆེའི་ཁུ་ཚུར་གྱིས་རྡོ་རྗེ་རིན་པོ་ཆེ་བླངས་ལ། ལག་པ་གཡས་པས་བཟླས་པའི་ཕྲེང་བ་སྙིང་གར་བཟུང་ལ། ནོར་
[283b.6]བུའི་རིགས་ཀྱི་དཀྱིལ་འཁོར་དུ་བཤད་པའི་རིག་པ་འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ།ཐུན་བཞིའི་སྦྱོར་བས་ཉིན་རེ་ཞིང་སྟོང་རྩ་བརྒྱད་ཟླ་བ་གཅིག་བཟླས་པར་བྱའོ། །དེ་བཞིན་དུ་བཟླས་ལ།
[283b.7]ཟླ་བ་ཉ་ལ་མཐར་མཚན་ཐོག་ཐག་བཟླས་པར་བྱའོ། །དེ་ནས་ནམ་ལངས་པ་དང་བཅོམ་ལྡན་འདས་ནམ་མཁའི་སྙིང་པོ་དོན་ཐམས་ཅད་འགྲུབ་པར་འགྱུར་ཏེ། དེའི་རྗེས་ལ་རིག་པ་རྣམས་ལན་ཅིག་བརྗོད་པས་ལས་ཐམས་ཅད་བྱེད་པར་འགྱུར་རོ། །དེ་ལྟར་དེ་བཞིན་
[284a]
[284a.1]གཤེགས་པ་ལ་སོགས་པ་རིགས་ཐམས་ཅད་ཀྱི་ཡོ་བྱད་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་སྙིང་པོ་ཐམས་ཅད་བསྒྲུབ་པར་འདོད་ན་ཡང་ཞེས་བྱ་བ་ལ་སོགས་པ། རིགས་ཐམས་ཅད་ཀྱི་ཟློས་པ་པོས་ཞེས་པའི་སྒྲ་བརྗོད་ལ། རང་གི་སྙིང་
[284a.2]པོ་དང་། ཕྱག་རྒྱ་དང་། སྔགས་དང་། རིག་པ་བཟླས་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་རིགས་ཐམས་ཅད་ཀྱི་ཐུན་མོང་དུ་འགྱུར་བའི་ཡོ་བྱད་ཀྱི་ཆོ་ག་རྒྱས་པར་གསུངས་པ་ཡིན་ནོ། །དེ་བཞིན་གཤེགས་པ་ལ་སོགས་པའི་
[284a.3]རིགས་རྣམས་ཀྱི་ཐུན་མོང་ནི་སྤྱིར་རོ། །ཡོ་བྱད་ཀྱི་ཆོ་ག་རྒྱས་པ་ནི་ཤིས་པའི་སྒྲ་ལ་སོགས་པའི་མཚན་ཉིད་དོ། །གྲུབ་པར་གྱུར་ཅིག་ཅེས་བརྗོད་ལ། སྙིང་པོ་ཅི་དགར་ཟློས་ཤིང་ཞེས་བྱ་བ་ནི་སྙིང་པོ་ནི་སེམས་སོ། །དེ་ཅི་དགའ་བ་ནི་མངོན་པར་འདོད་པའོ། །དེ་བཞིན་གཤེགས་
[284a.4]པ་ཐམས་ཅད་ཅེས་བྱ་བ་ནི་ཡང་སྙིང་པོ་བསྒྲུབ་པར་འདོད་ན་དེ་བཞིན་གཤེགས་པ་ཐམས་ཅད་འགྲུབ་པར་གྱུར་ཅིག་ཅེས་བརྗོད་ལ། སྙིང་པོ་ཅི་དགར་ཟློས་ཤིང་བསྒྲུབ་པའི་ཆོ་ག་བྱའོ། །འདི་སྐད་དུ་སྟོན་པ་ཡིན་ཏེ། རིགས་སུ་ཡང་དཀྱིལ་འཁོར་ཆེན་པོ་ལས་བཤད་
[284a.5]པའི་དངོས་གྲུབ་བསྒྲུབ་པར་འདོད་ན། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། སེམས་ཅན་ཐམས་ཅད་སངས་རྒྱས་དང་། བྱང་ཆུབ་སེམས་དཔའ་ཉིད་དུ་གྱུར་ནས་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་ལས་ཀྱིས་ཚིམ་ཞིང་སྙིང་པོ་
[284a.6]འདོད་པས་དེ་བཞིན་གཤེགས་པ་ཐམས་ཅད་འགྲུབ་པར་གྱུར་ཅིག་ཅེས་བརྗོད་པར་བྱའོ། །དེ་ནས་རང་གི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་སྔགས་བཟླ་བར་བྱའོ། །དེ་ལྟར་སྤྱིའི་སྙིང་པོའི་ཡོ་བྱད་བཤད་ནས། རིགས་ཐམས་ཅད་ཀྱི་ཐུན་མོང་བ་ཉིད་ཀྱི་ཕྱག་རྒྱའི་
[284a.7]ཡོ་བྱད་གསུངས་པ་ནི། དེ་ལ་འདི་ནི་ཕྱག་རྒྱའི་ཡོ་བྱད་ཆོ་ག་སྟེ་ཞེས་བྱ་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རང་གི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་གྱི་ཆོ་ག་དང་། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། རང་གི་རིགས་ཀྱི་
[284b]
[284b.1]གཟུངས་ཀྱི་ཕྱག་རྒྱ་བཅིང་སྟེ་འདི་སྐད་བརྗོད་པར་བྱའོ། །ཕྱག་རྒྱ་ཐམས་ཅད་བདག་ལ་དགའ་བར་གྱུར་ཅིག་ཅེས་སྨྲས་ལ། དེ་ནས་རང་གི་རིགས་ཀྱི་གཟུངས་ཀྱི་རིག་པ་བཟླ་བར་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་གཟུངས་ཀྱི་དཀྱིལ་འཁོར་གྱི་ཡོ་བྱད་བསྟན་ནས། ད་ནི་
[284b.2]དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ལས་བཤད་པའི་ཡོ་བྱད་གསུངས་པ་ནི། སྤྲོས་པ་མེད་པའི་ཚིག་གྲུབ་པར་གྱུར་ཅིག་ཅེས་བྱ་བ་ལ་སོགས་པའོ། །རང་གི་རིགས་ཀྱི་དེ་ལ་སྤྲོས་པ་ནི་རྣམ་པར་རྟོག་པ་ལས་བྱུང་བས་ན་སྤྲོས་པ་སྟེ། ངག་གི་རྣམ་པར་
[284b.3]རྟོག་པའི་སྤྲོས་པ་མེད་ཅེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱིས་ཆོས་ཐམས་ཅད་རང་བཞིན་གྱིས་རྣམ་པར་རྟོག་པར་སེམས་རྩེ་གཅིག་པའོ། །འདི་སྐད་སྟོན་པ་ཡིན་ཏེ། རང་གི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་
[284b.4]བྱས་ལ། སྔ་མ་བཞིན་དུ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། རང་གི་རིགས་ཀྱི་ཆོས་ཀྱི་དཀྱིལ་འཁོར་ལ་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། སྤྲོས་པ་མེད་པའི་ཚིག་འགྲུབ་པར་གྱུར་ཅིག་ཅེས་བརྗོད་ཅིང་། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་
[284b.5]བདག་ལ་བསྐྱེད་པར་གྱུར་ཅིག་ཅེས་སྨྲས་ལ། དེ་ནས་ཆོས་ཀྱི་དཀྱིལ་འཁོར་ལས་སྨྲས་པའི་རང་གི་ལྷའི་སྔགས་སྔར་བཤད་པའི་ཚུལ་གྱིས་བཟླས་པར་བྱའོ། །དེ་ལྟར་དེ་བཞིན་གཤེགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་སྤྱིའི་ཡོ་བྱད་ཀྱི་ཆོ་ག་རྒྱས་
[284b.6]པར་བསྟན་ནས། ད་ནི་དེ་བཞིན་གཤེགས་པ་ལ་སོགས་པ་ལ་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་བཤད་པའི་རིགས་གསུངས་པ་ནི། དེ་ལ་འདི་ནི་རིག་པའི་ཡོ་བྱད་ཀྱི་ཆོ་ག་སྟེ་ཞེས་བྱའོ། །དེ་ལ་མ་རིག་པའི་ཆོས་ཀྱི་མཚན་ཉིད་ནི་མངོན་པར་ཞེན་པ་དེས་མདོངས་པར་འགྱུར་
[284b.7]བའོ། །ཀྱེ་མ་ཞེས་བྱ་བ་ནི་སྙིང་བརྩེ་བའོ། །ཁམས་གསུམ་པ་ནི་གནས་པའི་སེམས་ཅན་དེ་དག་བློ་ལ་བཞག་ནས། ཀྱེ་མ་སེམས་ཅན་འདི་དག་ཅེས་བྱ་བ་སྨོས་སོ། །དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་དེ་ཡིན་པས་ན་དེ་བཞིན་གཤེགས་པ་ཐམས་ཅད་ནི་རང་བཞིན་གྱིས་
[285a]
[285a.1]འོད་གསལ་བའི་སེམས་དང་སེམས་ལས་བྱུང་བའོ། །དེ་ནི་རིགས་པ་ཐུགས་སུ་ཆུད་ཅིང་སྡོམ་པར་གྱུར་ཏོ་ཞེས་བྱ་བ་ནི། དེ་ལ་རིག་པ་ནི་རྣམ་པར་ཐར་པའི་སྒོ་སུམ་ཅུ་རྩ་བདུན་གྱི་རིགས་ཀྱི་དཀྱིལ་འཁོར་ལས་བཤད་པའི་རང་བཞིན་གྱིས་འོད་གསལ་བ་རྣམ་པར་ཐར་པའི་
[285a.2]སྒོའི་རང་བཞིན་དེ་ལས་འབྱུང་བའི་རིག་པས་དཀྱིལ་འཁོར་ཡང་དག་པར་ཐུགས་སུ་ཆུད་ཅིང་མངོན་སུམ་དུ་མཛད་པའོ། །དེ་སྡོམ་པར་གྱུར་པ་ནི་མངོན་སུམ་དུ་བྱེད་པའི་རྒྱུར་གྱུར་པའོ། །དེ་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རང་གི་རིགས་ཀྱི་དཀྱིལ་འཁོར་ཆེན་པོ་ལས་
[285a.3]བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས་ཕྱག་རྒྱ་ཆེན་པོ་བཅིངས་ཏེ། ཐུགས་རྗེ་ཆེན་པོ་དང་བྱམས་པའི་སྤྱན་གྱིས་སེམས་ཅན་གྱི་ཁམས་ཐམས་ཅད་ལ་གཟིགས་ནས། སེམས་ཅན་མགོན་མེད་པ་འདི་དག་ཐམས་ཅད་མ་རིག་
[285a.4]པས་མདོངས་པར་གྱུར་པའི་ཁམས་གསུམ་ཟོ་ཆུན་གྱི་རྒྱུན་མ་ལྟ་བུར་འཁོར་བ་དེས་ཇི་ལྟ་བ་བཞིན་གྱི་འོད་གསལ་བ་དེ་བཞིན་དུ་རང་བཞིན་གྱིས་འོད་གསལ་བའི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུའི་ལམ་གྱི་རིག་པ་ཁོང་དུ་ཆུད་ཅིང་སྡོམ་པར་འགྱུར་བ་མ་མཐོང་བ་རྣམས་ལ་
[285a.5]བདག་གིས་དེ་བཞིན་གཤེགས་པ་ཐམས་ཅད་ཀྱི་རིག་པ་ཁོང་དུ་ཆུད་ཅིང་སྡོམ་པར་གྱུར་པར་བྱའོ་ཞེས་བསམས་ནས་འདི་སྐད་ཅེས་བརྗོད་པར་བྱའོ། །སེམས་ཅན་འདི་དག་ཐམས་ཅད་མ་རིག་པས་མདོངས་པར་འགྱུར་བ་ལ། དེ་བཞིན་གཤེགས་པ་ཐམས་ཅད་ཀྱི་རིག་པ་ཐུགས་
[285a.6]སུ་ཆུད་ཅིང་སྡོམ་པར་འགྱུར་བ་ལ་བྱའོ་ཞེས་སྨྲས་ལ། དེ་ནས་རང་གི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་སྙིང་པོས་ལྷ་མོའི་ཚོགས་རྣམས་སྤྲུལ་ལ། སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པ་ལ་སོགས་པའི་རིགས་ཀྱི་རང་བཞིན་དུ་བསྐྱེད་ལ། སྔར་
[285a.7]བཤད་པའི་ཚུལ་གྱིས་རིག་པ་བཟླ་བར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་ཐམས་ཅད་ཀྱི་སྤྱིའི་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་རྡོ་རྗེ་སེམས་དཔའ་ལ་སོགས་པའི་སྒྲ་བརྗོད་ཅིང་།
[285b]
[285b.1]དེའི་དོན་གྱིས་བདག་ཉིད་རང་གི་ལྷའི་སྐུར་བསྒོམ་པའམ་མདུན་དུ་བསྒོམས་ལ་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་བཟླས་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བས་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་སྙིང་པོ་དང་། ཕྱག་རྒྱ་
[285b.2]དང་། སྔགས་དང་། རིག་པ་རྣམས་ཀྱི་ཐུན་མོང་དུ་རྡོ་རྗེ་བཟླས་པའོ། །རྒྱས་པར་གསུངས་པ་ནི་ཅི་དགའ་བ་ཉིད་དུ་ཞེས་བྱ་བ་ལ་སོགས་པའོ། །སྦྲིད་པ་དང་སྐྱིགས་བུ་དང་སྒྲེགས་པ་དང་། སྐྱིལ་ཀྲུང་ཐ་དད་ཅི་དགའ་བ་ཉིད་དུ་བྱའོ། །སེམས་དཔའ་གང་གི་སྙིང་པོ་དང་། ཞེས་བྱ་བ་ལ་
[285b.3]སོགས་པ་གོ་སླའོ། །བཟླས་པའི་དོན་དུ་བསྒྲུབ་པར་བྱ་བ་དེ་ནི་བདག་གམ་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས་རིན་ཆེན་འབེེབས་པའི་མཐར་ཐུག་པ་དེ་ཟློས་ཤིང་། སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་རང་ཉིད་ཟློས་ཤིང་། རྣམ་པར་སྣང་མཛད་ལ་སོགས་
[285b.4]པ་ལ། བཛྲ་དྷཱ་ཏུ་ཞེས་བྱ་བའི་དོན་ལ་སོགས་པས་བཟླས་པའི་དོན་ཤས་ནས་བསྒྲུབས་ལ་མངོན་པར་བྱ་བའམ། མདུན་དུ་བསྒོམ་པར་བྱ་བའི་དོན་ཏོ། །དེ་ལྟར་བྱས་ན་ཅིར་འགྱུར་ཞེ་ན། བསྒྲུབ་པར་བྱ་བ་འགྲུབ་པར་འགྱུར། །ཞེས་བྱ་བ་སྨོས་ཏེ། སྙིང་པོ་དང་། ཕྱག་རྒྱ་དང་། གསང་
[285b.5]སྔགས་དང་། རིག་སྔགས་རྣམས་ཀྱིས་བསྒྲུབ་པའི་བྱ་བ་འགྲུབ་པར་འགྱུར་རོ་ཞེས་བྱ་བའི་དོན་ཏོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཐུན་མོང་གི་བཟླས་པའི་ཆོ་ག་རྒྱས་པར་བསྟན་ནས། དེ་ནི་ཟློས་པ་པོ་རྣམས་སྤྲོ་བ་བསྐྱེད་པར་བྱ་བའི་ཕྱིར་བཟླས་བརྗོད་ཀྱི་འབྲས་བུ་བརྗོད་
[285b.6]པར་བྱའོ་ཞེས་བྱ་བའི་ཆོ་ག་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཐུན་མོང་གི་དངོས་གྲུབ་ཀྱི་ཆོ་ག་རྒྱས་པར་གསུངས་སོ། །དེ་ལ་ཞེས་བྱ་བ་ལ་སོགས་པ་ནི་གོ་སླའོ། །གང་ན་གཏེར་ཡོད་པ་དེ་ཞེས་བྱ་བ་ལ་
[285b.7]སོགས་པ་སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མ་ལས་བཤད་པའི་ཚུལ་གྱིས་ཟླ་བ་བཞིར་སྔོན་དུ་བསྙེན་པ་བྱས་ལ། མཐར་མཚན་ཐོག་
[286a]
[286a.1]ཐག་བཟླས་པ་བྱས་ནས་རྡོ་རྗེ་གཏེར་ལ་སོགས་པའི་སྦྱོར་བས་བསྒྲུབ་པར་བྱའོ། །ཤིང་སྐྱེས་དེ་ལྟ་བུར་མཐོང་ན་དེ་ན་གཏེར་ཡོད་པར་ཤེས་པར་བྱའོ། །གཏེར་དང་གཏེར་གྱི་ལྷ་དང་ཞིང་སྐྱོང་དང་ཕྱོགས་སྐྱོང་རྣམས་བཅིངས་ལ་གནས་དེར་སོང་སྟེ། བདག་ཉིད་གནས་
[286a.2]དེར་བཅས་པ་བསྲུང་བར་བྱས་ནས། ཇི་ལྟ་བ་བཞིན་དུ་རང་གི་ལྷ་དེ་ལ་ཕྱིའི་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཕྱག་བཞི་བྱས་ནས་རྡོ་རྗེ་ལྕགས་སྒྲོག་གི་དམ་ཚིག་གི་ཕྱག་རྒྱ་བཅིང་བར་བྱའོ། །རྡོ་རྗེ་གཏེར་ཡོད་པས་ཞེས་བྱ་བ་ལ་སོགས་པ་ནི་བསྒྲུབ་པའི་སྙིང་པོ་བརྗོད་
[286a.3]ཅིང་གཏེར་གྱི་གནས་དེར་རྡོ་རྗེ་ལྟ་བས་བལྟས་ལ། རྡོ་རྗེ་འབར་བ་ལྟ་བུ་མཐོང་ན་དེ་ན་གཏེར་ཡོད་པར་ཤེས་པར་བྱའོ། །དེ་ནས་ལངས་ལ་བླང་བར་བྱ་བའོ། །དེ་ལ་འདི་ནི་ཞེས་བྱ་བ་ལ་སོགས་པ་ནི། རྫུ་འཕྲུལ་གྱི་དངོས་གྲུབ་གསུངས་པ་ཡིན་ཏེ། ཡང་རྡོ་རྗེ་དབྱིངས་ལས་བཤད་
[286a.4]པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། རྫུ་འཕྲུལ་གྱི་དངོས་གྲུབ་བསྒྲུབ་པར་འདོད་ན་ཆུའི་སྟེང་ནས་ཕར་འགྲོ་བ་ལ་སོགས་པ་ཡིད་ཀྱིས་བྱས་པས། དེ་ལྟར་ན་རྡོ་རྗེ་དངོས་གྲུབ་ཏུ་འགྱུར་རོ། །དེ་ལ་རྡོ་རྗེ་ཆུ་ཞེས་བྱ་བ་ལ་སོགས་པ་ནི་ཐུན་
[286a.5]བཞིའི་སྦྱོར་བས་ཟླ་བ་བཞིར་དེ་བཞིན་གཤེགས་པའི་རིགས་ཀྱི་ཡོ་བྱད་ཆོ་ག་བཞིན་དུ་བཟླས་ལ། དེ་ནས་དེ་བཞིན་གཤེགས་པའི་རས་རིས་ཀྱི་མདུན་དུ་ཡང་ཟླ་བ་བཞི་སྔ་མ་བཞིན་དུ་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བསྒོམས་ན་དེའི་རྗེས་ལ་འགྲུབ་པར་འགྱུར་རོ། །བཛྲ་སིདྡྷི་
[286a.6]ཞེས་ལན་གསུམ་བརྗོད་ཅིང་། བཛྲ་ཛྭ་ལ་ཞེས་ཀྱང་བརྗོད་ལ་ཆུའི་སྟེང་དུ་འཆགས་པ་ལ་སོགས་པའི་རྫུ་འཕྲུལ་བྱས་ལ། ཇི་ལྟ་བ་བཞིན་དུ་བསྒྲུབ་པར་བྱའོ། །ལྷག་མ་ནི་གོ་སླའོ། །དེ་ལ་འདི་ནི་ཞེས་བྱ་བ་ལ་སོགས་པ་ལ་རིག་པ་འཛིན་པའི་དངོས་གྲུབ་གསུངས་པ་ཡིན་ནོ། །ཕྱག་རྒྱ་བསྒྲུབས་ན་
[286a.7]ཞེས་བྱ་བ་སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། རྡོ་རྗེ་འཛིན་པ་ལ་སོགས་པའི་རྡོ་རྗེ་རིག་པ་འཛིན་པའི་གཟུགས་སུ་བདག་ཉིད་བསམས་ལ། བཛྲ་བི་དྷ་ར་ཞེས་དེ་སྐད་དུ་
[286b]
[286b.1]ལན་གསུམ་བརྗོད་པར་བྱའོ། །དེ་ནས་རྡོ་རྗེ་འཛིན་པ་ལ་སོགས་པའི་རིག་པ་འཛིན་པའི་དངོས་གྲུབ་ཀྱི་སྙིང་པོ་འདི་དེ་བཞིན་གཤེགས་པའི་རིགས་ཀྱི་ཡོ་བྱད་ཀྱི་ཆོ་གས་ཟླ་བ་བཞིར་བཟླས་པ་བྱས་ལ་དེ་ནས་དེ་བཞིན་གཤེགས་པའི་རིགས་ཀྱི་རས་རིས་ཀྱི་མདུན་དུ་སླར་ཡང་ཟླ་བ་བཞིར་སྔ་
[286b.2]མ་བཞིན་དུ་བཟླས་པ་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་ན་དེའི་རྗེས་ལ་རྡོ་རྗེ་རིག་འཛིན་གྱི་འཁོར་ལོས་སྒྱུར་བའི་དངོས་གྲུབ་ཏུ་འགྱུར་རོ། །ལྷག་མ་ནི་གོ་སླའོ། །དེ་ནི་དངོས་གྲུབ་ཆེན་པོ་བསྒྲུབ་པ་ནི། དེ་ལ་འདི་ནི་ཞེས་བྱ་བ་ལ་སོགས་པ་སྨོས་ཏེ། སྔ་མ་བཞིན་དུ་རྡོ་རྗེ་དབྱིངས་
[286b.3]ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། བཛྲ་སཏྭ་ཞེས་བྱ་བ་ལ་སོགས་པ་རང་གི་ལྷའི་ཕྱག་རྒྱའི་སྙིང་པོ་ལན་གསུམ་བརྗོད་ཅིང་། བཛྲ་བཛྲ་ཞེས་ཀྱང་བརྗོད་ལ་ཐམས་ཅད་རྡོ་རྗེ་ལ་སོགས་པའི་
[286b.4]གཟུགས་སུ་ཏིང་ངེ་འཛིན་གྱི་བདག་ཉིད་རྣམ་པར་བསམས་ལ། བཛྲ་བཛྲ་ཞེས་བརྗོད་ཅིང་དངོས་གྲུབ་སྒྲུབ་པའི་སྙིང་པོ་དང་། དེ་བཞིན་གཤེགས་པའི་རིགས་ཀྱི་ཡོ་བྱད་ཀྱི་ཆོ་གས་ཟླ་བ་བཞིར་བཟླས་པར་བྱའོ། །དེ་ནས་དེ་བཞིན་གཤེགས་པའི་རིགས་ཀྱི་རས་རིས་ཀྱི་མདུན་དུ་ཡང་ཟླ་བ་
[286b.5]བཞིར་ཟློས་ཤིང་། དེའི་རྗེས་ལ་ཟླ་བ་ཉལ་མཚན་ཐོག་ཐག་བཟླས་ན་ནམ་ལངས་པ་དང་སེམས་ཅན་ཕྱག་རྒྱའི་གཟུགས་སུ་འགྱུར་རོ། །ལྷག་མ་ནི་གོ་སླའོ། །དེ་བཞིན་གཤེགས་པའི་རིགས་ཀྱི་དངོས་གྲུབ་ཀྱི་ཆོ་ག་རྒྱས་པར་བསྟན་ནས། ད་ནི་རྡོ་རྗེ་རིགས་ཀྱི་གསུངས་པ་ནི། དེ་ལ་འདི་ནི་
[286b.6]རྡོ་རྗེ་རིགས་ཀྱི་དངོས་གྲུབ་སྟེ་ཞེས་བྱ་བའོ། །འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་ཞེས་བྱ་བ་ལ་སོགས་པ་ནི་སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་
[286b.7]ག་ཐམས་ཅད་རྗེས་སུ་སྤྱད་ནས། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་སྔགས་ཀྱི་ཡི་གེ་འབུམ་བཟླས་ལ། དེ་ནས་དབང་ཕྱུག་ཆེན་པོའི་གཟུགས་བརྙན་བཟོ་བོ་མཁས་པས་བྱེད་དུ་བཅུག་ལ། དེའི་ལྟོ་བར་སྔགས་དེ་བཅུག་སྟེ། སྔ་མ་བཞིན་དུ་འ
[287a]
[287a.1]ཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་འདོད་པའི་རྒྱལ་པོས་ལྷ་ཆེན་ཇི་ལྟ་བ་བཞིན་དུ་བཀུག་སྟེ། ཁྲོ་བོ་རྡོ་རྗེ་ལྕགས་ཀྱུ་ལ་སོགས་པ་རྣམས་ཀྱིས་ཀྱང་གཟུགས་བརྙན་ལ་ཇི་ལྟ་བ་བཞིན་དུ་དགུག་པ་དང་། གཞུག་པ་དང་། བཅིང་བ་
[287a.2]དང་། དབང་དུ་བྱས་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཅིངས་ལ། རས་རིས་ཀྱི་མདུན་དུ་ཐུན་བཞིའི་སྦྱོར་བས་ཟླ་བ་གཅིག་ཙམ་གྱི་བར་དུ་སྟོང་རྩ་བརྒྱད་ཟློས་ཤིང་། རྐང་པ་གཡོན་པས་མནན་པར་བྱའོ། །དེ་ནས་ཇི་སྲིད་དུ་ཟླ་བ་ཉ་ལ་
[287a.3]གཟུགས་བརྙན་དེ་སྐད་འབྱིན་པར་འགྱུར་བ་དེ་སྲིད་ཀྱི་བར་དུ་བཟླ་བར་བྱའོ། །ལྷག་མ་ནི་གོ་སླའོ། །ཕྱག་རྒྱ་བསྒྲུབ་པ་ན་ཞེས་བྱ་བ་ལ་སོགས་པ་ལ། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ།
[287a.4]ཆོ་ག་ཐམས་ཅད་རྗེས་སུ་སྤྱོད་དེ། རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་གྱི་ཕྱག་རྒྱས་བདག་ཉིད་དབང་བསྐུར་ལ། སྔ་མ་བཞིན་དུ་ཡི་གེ་འབྲུ་འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་ཆེན་པོ་བཅིངས་ཏེ།
[287a.5]ཉིན་རེ་ཞིང་ཐུན་བཞིའི་སྦྱོར་བས། སྟོང་རྩ་བརྒྱད་ཟློས་ཤིང་ཟླ་བ་གཅིག་གི་བར་དུ་བྱའོ། །དེའི་རྗེས་ལ་ཟླ་བ་ཉ་ལ་མཚན་ཐོག་ཐག་བཟླས་ན་འགྲུབ་པར་འགྱུར་ཏེ། །དེ་ནས་གྲུབ་པ་དང་དབང་བཞིར་གྱུར་ཏེ་ཞེས་བྱ་བ་ལ་སོགས་པ་ནི་གོ་སླའོ། །དེ་ལ་འདི་ནི་ཞེས་བྱ་བ་ལ་སོགས་པ་ལ།
[287a.6]སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཡི་གེ་འབྲུ་འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྒེག་མོ་ལ་སོགས་པ་གསང་བའི་མཆོད་པ་བཞིས་དེ་བཞིན་གཤེགས་པ་ཐམས་ཅད་ལ་ཐུན་བཞིའི་སྦྱོར་བས། ཇི་སྲིད་དུ་རྟག་ཏུ་མཆོད་པ་ཟླ་བ་གཅིག་གམ་གསུམ་
[287a.7]གྱི་བར་དུ་བྱས་ལ། དེ་ནས་མཚན་ཐོག་ཐག་མཆོད་ན་བདེ་བ་དང་ཡིད་བདེ་བ་ཐམས་ཅད་ཀྱི་དངོས་གྲུབ་ཐོབ་པར་འགྱུར་རོ། །དེ་ལ། འདི་ནི་དངོས་གྲུབ་དམ་པ་སྟེ། །ཞེས་བྱ་བ་ལ་སོགས་པ་ལ། སྔ་མ་བཞིན་དུ་རང་ལ་བྱིན་གྱིས་བརླབ་པ་ལ་སོགས་པ་བྱས་ནས། ཡིག་འབྲུ་
[287b]
[287b.1]འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྟོང་རྩ་བརྒྱད་ཟློས་ཤིང་། རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། ཐུན་བཞིའི་སྦྱོར་བས་སྔ་མ་བཞིན་དུ་ཟླ་བ་གཅིག་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བྱས་ན། ནམ་ལངས་པ་དང་། རྡོ་རྗེ་ཧཱུཾ་མཛད་
[287b.2]ལ་སོགས་པ་དང་འདྲ་བར་འགྱུར་རོ། །དེ་ལྟར་རྡོ་རྗེ་རིགས་ཀྱི་དངོས་གྲུབ་ཀྱི་ཆོ་ག་རྒྱས་པར་བསྟན་ནས། ད་ནི་པདྨའི་རིགས་ཀྱི་དེ་ལ་འདི་དག་ནི་པདྨའི་དངོས་གྲུབ་སྟེ་ཞེས་བྱ་བ་ལ་སོགས་པ་གསུངས་ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་
[287b.3]ཆོ་གས་རང་གི་ལྷའི་རྣལ་འབྱོར་བྱས་ལ། ཕྱག་བཞི་པའི་མཐར་ཐུག་པའི་རྗེས་སུ་སྤྱད་ནས་ནང་གི་སྔགས་སྔ་མ་བཞིན་དུ་སྟོང་རྩ་བརྒྱད་བཟླས་པར་བྱའོ། །དེ་ནས་རས་རིས་ཀྱི་མདུན་དུ་རང་གི་ལྷའི་ཏིང་ངེ་འཛིན་གྱིས་གཡོན་པའི་བསྙེམས་པ་དང་བཅས་པས་པདྨ་བླངས་ལ་ལག་
[287b.4]པ་གཡས་པས་པདྨ་བཟུང་ལ། པདྨ་འབྱེད་ཅིང་པདྨ་རབ་ཏུ་དམར་བ་བསྒོམས་ནས་ཉིན་རེ་བཞིན་ཐུན་བཞིའི་སྦྱོར་བས་ཟླ་བ་གཅིག་ཙམ་གྱི་བར་དུ་སྟོང་རྩ་བརྒྱད་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་ན་དེ་བཞིན་གཤེགས་པ་ལ་སོགས་པ་དང་། སེམས་ཅན་
[287b.5]མཉེས་པར་བྱེད་ནུས་པར་འགྱུར་རོ། །སྔ་མ་བཞིན་དུ་དབང་བྱེད་པས་པདྨ་འདོད་པ་བསྒོམས་ཤིང་ཟླ་བ་ཉ་ལ་མཚན་ཐོག་ཐག་བསྒོམས་ན། ནམ་ལངས་པ་དང་། དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་བདག་ཉིད་ཀྱིས་ནོར་དང་བཅས་པ་དབང་དུ་བྱེད་པར་འགྱུར་
[287b.6]རོ། །བྱམས་པས་བསྒོམས་པའི་ཏིང་ངེ་འཛིན་གྱིས་ཞེས་བྱ་བ་ནི། སྔོན་དུ་བསྙེན་པ་ལ་སོགས་པ་དང་བསྒྲུབ་པའི་ཆོ་ག་རྗེས་སུ་སྤྱད་ལ། དེ་ནས་མཚན་ཐོག་ཐག་བཟླས་ནས། ནམ་ལངས་པ་དང་། ཐམས་ཅད་བསྲུང་བ་ནུས་པར་འགྱུར་རོ། །སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་
[287b.7]ལ། པདྨའི་འདབ་མ་འབྱེད་པའི་ཚུལ་གྱིས་བདག་ཉིད་འཇིག་རྟེན་དབང་ཕྱུག་ཏུ་བསྒོམས་ལ། རས་རིས་ཀྱི་མདུན་དུ་མཚན་ཐོག་ཐག་བཟླས་ན་འཇིག་རྟེན་དབང་ཕྱུག་གི་གཟུགས་དང་ལྡན་པར་འགྱུར་རོ། །དེ་ལྟར་པདྨའི་རིགས་ཀྱི་དངོས་གྲུབ་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་
[288a]
[288a.1]རིགས་ཀྱི་རྣལ་འབྱོར་དེ་ལ་འདི་དག་ནི་ནོར་བུའི་རིགས་ཀྱི་དངོས་གྲུབ་རྣམས་ཏེ་ཞེས་བྱ་བ་ལ་སོགས་པ་གསུངས་སོ། །དེ་ལ་ཞེས་བྱ་བ་ལ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་
[288a.2]བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བས་དབང་བསྐུར་བ་སྟེ། རང་རང་གིས་བསྒོམ་པར་བྱའོ། །དེ་ནས་ཐུན་བཞིའི་སྦྱོར་བས་བཟླས་པ་འབུམ་བྱས་ལ། རས་རིས་ཀྱི་མདུན་དུ་ཡང་ཟླ་བ་གཅིག་བཟླས་པ་བྱའོ། །ཟླ་བ་ཉ་ལ་མཚན་
[288a.3]ཐོག་ཐག་བཟླས་ན་དབང་བསྐུར་བ་ཐམས་ཅད་ཐོབ་པར་འགྱུར་རོ། །སྔ་མ་བཞིན་དུ་ཆོ་ག་ཐམས་ཅད་སྤྱད་ནས་ཐུན་བཞིའི་སྦྱོར་བས་མར་མེའི་སྣང་བ་དེ་བཞིན་གཤེགས་པ་ལ་ཕུལ་ནས་བཟླས་པ་འབུམ་བྱའོ། །དེ་ནས་རས་རིས་ཀྱི་མདུན་དུ་སྔ་མ་བཞིན་དུ་ཐུན་བཞིའི་སྦྱོར་བས་སྟོང་རྩ་བརྒྱད་
[288a.4]བཟླས་ཏེ། ཇི་སྲིད་དུ་ཟླ་བ་གཅིག་བརྩམ་པ་དེ་སྲིད་ཀྱི་བར་དུ་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་པས་ནམ་ལངས་པ་དང་རིན་ཆེན་ཉི་མ་དང་གཟི་བརྗིད་མཉམ་པར་འགྱུར་རོ། །སྔ་མ་བཞིན་དུ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། ཐུན་བཞིར་དེ་བཞིན་གཤེགས་པ་
[288a.5]ཐམས་ཅད་ལ་ཕྱི་རོལ་གྱི་མཆོད་པ་དང་། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ཆེན་པོ་ལས་བཤད་པའི་མཆོད་པ་བཅུ་དྲུག་གིས་ནམ་མཁའི་ཁམས་བཀང་ལ། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ལ་དེ་རྣམས་ཀྱི་ནོར་བུའི་རིགས་ཀྱི་
[288a.6]བསམ་པ་ཐམས་ཅད་ཡོངས་སུ་རྫོགས་པར་ཚིམ་པར་བྱའོ། །ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་འབུམ་ཡོངས་སུ་རྫོགས་པ་དེ་སྲིད་ཀྱི་བར་དུ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྔ་མ་བཞིན་དུ་ཟླ་བ་གཅིག་བཟླས་ལ། མཐར་མཚན་ཐོག་ཐག་བཟླས་ན་བསམ་པ་ཐམས་
[288a.7]ཅད་ཡོངས་སུ་རྫོགས་པའི་དངོས་གྲུབ་ཏུ་འགྱུར་རོ། །སྔ་མ་བཞིན་དུ་ཕྱག་བཞི་བྱ་བའི་མཐར་ཐུག་པའི་ཆོ་ག་རྗེས་སུ་སྤྱད་ནས། རྡོ་རྗེ་རིན་པོ་ཆེ་བླངས་ཏེ། རང་གི་ལྷའི་སྦྱོར་བས་འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྔ་མ་བཞིན་ཟླ་བ་གཅིག་ཙམ་བྱས་ལ། མཐར་
[288b]
[288b.1]མཚན་ཐོག་ཐག་བཟླས་ན་ཐོ་རངས་ཁ་རྡོ་རྗེ་སྙིང་པོ་དང་འདྲ་བར་འགྱུར་རོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་ཐབས་མེད་པར་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་བསྒྲུབ་པར་མི་
[288b.2]འགྱུར་རོ་ཞེས་བྱ་བའི་དོན་འདི་བསྟན་པའི་ཕྱིར་རོ། །དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ཀྱི་དངོས་གྲུབ་ཐབས་ཀྱི་རྒྱུད་གསུངས་པ་ཡིན་ནོ། །རྟོག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་རྟོག་པ་ཐམས་ཅད་ཅེས་
[288b.3]རྣམ་པར་སྣང་མཛད་ལ་སོགས་པ་ནས། རྡོ་རྗེ་འབེབས་པའི་མཐར་ཐུག་པའི་ཕྱག་རྒྱ་ཐམས་ཅད་ནི་དེ་དག་གི་ཐབས་ཏེ། མངོན་སུམ་དུ་བྱེད་པའི་རྒྱུ་ཡིན་པའི་ཕྱིར་རོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་མངོན་སུམ་དུ་བྱེད་པའོ། །དེ་སྟོན་པར་བྱེད་པའི་རྒྱུད་དེ་བཅོམ་ལྡན་འདས་རྡོ་རྗེ་
[288b.4]སེམས་དཔས་བཤད་པའོ། །འཇིག་རྟེན་འདུལ་བ་ཇི་ལྟ་བ། །ཞེས་བྱ་བ་ནི་རྣམ་པ་གང་དང་གང་གིས་འདུལ་བར་འགྱུར་བའི་སེམས་ཅན་གྱི་ཁམས་ཀྱི་འཇིག་རྟེན་གྱི་ཁམས་དེ་དང་དེ་འདྲ་བའི་དོན་གྲུབ་པ་ལ་སོགས་པའི་དངོས་གྲུབ་འདོད་པའོ། །གང་དུ་ཞེ་ན། རྒྱུད་འདིར་ཏེ། དེའི་དངོས་གྲུབ་
[288b.5]ཐོབ་པའི་ཐབས་སོ། །གང་ཞེ་ན། དེ་ཡི་ཐབས་ནི་ཕྱག་རྒྱ་སྟེ། །ཞེས་བྱ་བ་སྨོས་ཏེ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱའོ། །དེའི་དངོས་གྲུབ་ཆེན་པོ་ཀུན་གྱི་རྒྱུར་གྱུར་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་
[288b.6]འཁོར་ཆེན་པོ་ལས་བཤད་པའི་དངོས་གྲུབ་ཀྱི་ཐབས་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་ཐབས་ནི། འཇིག་རྟེན་ཆགས་དང་བྲལ་བས་འདུལ། །ཞེས་བྱ་བ་ལ་སོགས་པ་གསུངས་པ་
[288b.7]ཡིན་ཏེ། དེ་ལ་གཟུངས་ཀྱི་དཀྱིལ་འཁོར་ལ་ཆགས་པ་དང་བྲལ་བ་ནི་སེམས་ཕྱིར་ཕྱོགས་པ་སྟེ། ཉན་ཐོས་དང་། རང་སངས་རྒྱས་ལ་མོས་པ་དང་། ཐེག་པ་ཆེན་པོ་ལ་མོས་པ་མདོ་སྡེ་སྤྱོད་པ་ལ་སོགས་པ་འཇིག་རྟེན་ནོ། །དེ་ལྟར་གྱུར་པའི་འཇིག་རྟེན་ཆགས་པ་དང་བྲལ་བ་དེ་ནི་འདུལ་
[289a]
[289a.1]བའོ། །ཉན་ཐོས་དང་རང་རྒྱལ་བའི་ལམ་བསྒོམ་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་རྣམས་ཀྱང་དེའི་མངོན་པར་འདོད་པའི་དོན་འགྲུབ་པར་འགྱུར་རོ་ཞེས་བྱ་བའི་དོན་ཏོ། །གཟུངས་ཀྱིས་འདུལ་བའི་འཇིག་རྟེན་རྣམས་གཟུངས་རྣམས་ལ་ཆགས་
[289a.2]ཤིང་འདོད་པ་དེ་ལས་སྐྱེས་པའི་ཕྱག་རྒྱའི་དངོས་གྲུབ་ནི་ཆགས་པ་ལས་སྐྱེས་པའོ། །ཆགས་པ་ལས་སྐྱེས་པའི་དངོས་གྲུབ་དེའི་ཐབས་གང་ཡིན་ཞེ་ན། དེ་ཡི་ཐབས་ནི་བསྒོམ་པ་དེ། །ཞེས་བྱ་བ་སྨོས་སོ། །གཟུངས་ཀྱི་དངོས་གྲུབ་ཐོབ་པ་ནི་གཟུངས་སྒོམ་པ་པོ་ཞེས་བྱ་བའི་དོན་ཏོ། །དེ་ལྟར་གཟུངས་ཀྱི་དངོས་
[289a.3]གྲུབ་ཀྱི་ཐབས་བསྟན་ནས། ད་ནི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་གྱི་དངོས་གྲུབ་ཀྱི་ཐབས་གསུངས་པ་ནི། བདེན་པས་འཇིག་རྟེན་འདི་ཉམས་པས། །ཞེས་བྱ་བ་ལ་སོགས་པའོ། །འཇིག་རྟེན་གསུམ་ན་སྤྱོད་པའི་སེམས་ཅན་གྱི་ཁམས་འདི་དག་བདེན་པ་ལས་ཉམས་པའོ། །
[289a.4]ཆོས་ཐམས་ཅད་རང་བཞིན་གྱིས་རྣམ་པར་དག་པའི་དོན་དམ་པའི་བདེན་པ་དེ་ལྟ་བུར་གྱུར་པ་ལས་དངོས་པོར་འཛིན་པའི་མངོན་པར་ཞེན་པའི་འཇིག་རྟེན་སྔགས་ཀྱི་དངོས་གྲུབ་མི་འདོད་དོ། །ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱ་བའི་བདེན་པས་བསྒོམ་པ་ནི་རིག་པས་
[289a.5]འདོད་པ་ཡིན་ནོ་ཞེས་བྱ་བའི་དོན་ཏོ། །དེ་བས་ན། །སྤྲོས་པ་མེད་པའི་ཐབས་ཀྱིས་ནི། །དངོས་གྲུབ་ཀུན་གྱི་མཆོག་ཏུ་འགྱུར། །ཞེས་གསུངས་སོ། །ཆོས་ཀྱི་དཀྱིལ་འཁོར་ལས་བཤད་པའི་རིགས་ཐམས་ཅད་ཀྱི་དངོས་གྲུབ་ཀྱི་ཐབས་ནི་གཉིས་སུ་མེད་པ་བསྒོམ་པས་ཐོབ་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་
[289a.6]རིགས་ཐམས་ཅད་ཀྱི་སྔགས་ཀྱི་དངོས་གྲུབ་ཀྱི་ཐབས་བཤད་ནས། ད་ནི་དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་ཐབས་ནི། མ་རིག་མངོན་ཆགས་འདི་ལ་ནི། །ཞེས་བྱ་བ་ལ་སོགས་པ་གསུངས་ཏེ། གཟུང་བ་དང་
[289a.7]འཛིན་པའི་རྣམ་པར་རྟོག་པ་ནི་མ་རིག་པའོ། །དེ་ལ་མངོན་པར་ཞེན་པ་ནི་འཇིག་རྟེན་པའོ། །རིག་པའི་དངོས་གྲུབ་ཡོད་མིན་ཏེ། །ཞེས་བྱ་བ་ནི་གཟུང་བ་དང་འཛིན་པའི་མངོན་པར་ཞེན་པ་ནི་འཇིག་རྟེན་པ་དེ་ལ་ཆོས་ཐམས་ཅད་རང་བཞིན་གྱིས་སོ། །གསང་བའི་ཞེས་བྱ་བ་རྟོག་པ་མ་སྐྱེས་པའི་ཕྱིར་
[289b]
[289b.1]ཞེས་བྱ་བའི་ཐ་ཚིག་གོ། །དེ་ཡི་ཐབས་ནི་རྒྱ་ཆེ་ལས། །དངོས་གྲུབ་ཀྱི་ནི་མཆོག་ཐོབ་བོ། །ཞེས་བྱ་བ་ནི་དེ་ལ་ཆོས་ཐམས་ཅད་རང་བཞིན་གྱིས་འོད་གསལ་བ་ཁོང་དུ་ཆུད་པར་གྱུར་པས་ཆོས་ཐམས་ཅད་རང་བཞིན་གྱིས་འོད་གསལ་བ་བསྒོམ་པའི་ཐབས་ནི་རྒྱ་ཆེ་བ་ཡིན་ནོ་ཞེས་བྱ་བའི་ཐ་ཚིག་
[289b.2]གོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ཐབས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་པ་རྣམས་ཀྱི་བསོད་ནམས་མེད་པ་མ་ཡིན་ནོ་ཞེས་བྱ་བའི་དོན་བསྟན་པའི་ཕྱིར། དེ་ནས་
[289b.3]ཞེས་བྱ་བ་ལ་སོགས་པ་ལ་རྟོག་པ་ཐམས་ཅད་ཀྱི་རྒྱུད་གསུངས་པ་ཡིན་ནོ། །རྟོག་པ་ཐམས་ཅད་ནི་ཇི་སྐད་བཤད་པའོ། །བསོད་ནམས་ཀྱི་དངོས་གྲུབ་ཀྱི་རྒྱུད་ནི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་མངོན་དུ་བྱེད་ཅེས་བྱ་བའི་དོན་ཏོ། །མཆོད་པ་རྣམ་བཞི་བྱས་ནས་ནི། །
[289b.4]ཞེས་བྱ་བ་ལ་སོགས་པ་ལ། རིགས་ཐམས་ཅད་ཀྱི་དཀྱིལ་འཁོར་ཆེན་པོ་རྣལ་འབྱོར་པས་རང་ལ་བྱིན་གྱིས་བརླབ་པ་ལ་སོགས་པ་བྱས་ནས་མཆོད་པ་ཆེན་པོ་དང་། དབང་བསྐུར་བ་དང་། ཆོས་དང་། ལས་ཀྱི་མཚན་ཉིད་ནི། མཆོད་པ་རྣམ་པ་བཞི་སྟེ་རང་གི་རིགས་ཀྱི་ལས་ཀྱི་དཀྱིལ་
[289b.5]འཁོར་ལས་བཤད་པའི་མཆོད་པ་བཅུ་དྲུག་གིས་མཆོད་པ་བྱས་ན་བསོད་ནམས་ཆེན་པོ་ཐོབ་པར་འགྱུར་རོ། །ལུས་དང་། ངག་དང་། སེམས་རྣམ་པར་དག་པ་ཐོབ་པར་འགྱུར་ཞེས་བྱ་བའི་ཐ་ཚིག་གོ། །དེ་བས་ན། བསོད་ནམས་མེད་ཀྱང་སངས་རྒྱས་མཆོད། །འགྲུབ་འགྱུར་འདི་ལ་ཐེ་
[289b.6]ཚོམ་མེད། །ཅེས་བྱ་བ་སྨོས་སོ། །སངས་རྒྱས་རྣམས་ཀྱི་མཆོད་པ་ནི་སངས་རྒྱས་མཆོད་པའོ། །ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གི་ཕྱག་རྒྱས་མཆོད་ན་སྐྱེ་བ་གཞན་དུ་བསོད་ནམས་བསགས་པ་མེད་ཀྱང་། རིགས་ཐམས་ཅད་ཀྱི་དཀྱིལ་འཁོར་ཆེན་
[289b.7]པོ་ལས་བཤད་པའི་ཕྱག་རྒྱ་ཆེན་པོའི་དངོས་གྲུབ་འགྲུབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། བདག་ནི་བསོད་ནམས་མེད་པའོ། །ཞེས་བདག་ཉིད་ལ་བརྙས་ཤིང་སྨད་པར་མི་བྱའོ། །ཕྱག་རྒྱ་བཅུ་དྲུག་པོ་རྣམས་ཀྱིས་བསོད་ནམས་ཐམས་ཅད་ཐོབ་པར་འགྱུར་རོ། །དེ་
[290a]
[290a.1]ལྟར་རིགས་ཐམས་ཅད་ཀྱི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐོབ་པའི་བསོད་ནམས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་དཀྱིལ་འཁོར་ལས་བཤད་
[290a.2]པའི་དངོས་གྲུབ་ཐོབ་པའི་བསོད་ནམས་ཀྱི་དངོས་གྲུབ་ཀྱི་རྒྱུད་གསུངས་པ་ནི། དེ་ལ་འདིའི་ཕྱག་རྒྱའི་བསོད་ནམས་ཀྱི་རྒྱུད་དེ་ཞེས་བྱ་བའོ། །གསང་བ་བསྲུངས་ནས་ཞེས་བྱ་བ་ནི་ཡོངས་སུ་བསྐྱེད་པའོ། །ཅི་ཞིག་བསྲུངས་ཤེ་ན། དམ་ཚིག་ཅེས་བྱ་བ་ནི་སྐུ་དང་། གསུང་དང་། ཐུགས་རྡོ་རྗེ་
[290a.3]གཟུངས་ཀྱི་དཀྱིལ་འཁོར་དུ་ཞུགས་པ་རྣམས་སོ། །དེ་ཉིད་འཆད་པ་ནི་གསང་བ་ཞེས་བྱ་བ་བྲིས་པའི་ཕྱག་རྒྱའི་གཟུགས་ཅན་མཆོད་པར་འོས་པའི་རིག་པའི་ལྷ་མོའི་གཟུངས་འདི་དག་ནི་གསང་བའོ། །བསོད་ནམས་ཆེན་པོ་ཐོབ་པར་འགྱུར་རོ་ཞེས་བྱ་བ་ནི་གཟུངས་ཀྱི་དངོས་གྲུབ་བསྒྲུབ་པ་ན་སྐུ་
[290a.4]དང་། གསུང་དང་། ཐུགས་རྣམ་པར་དག་པ་ཐོབ་པར་འགྱུར་རོ་ཞེས་བྱ་བའི་དོན་ཏོ། །དེ་ནས། བསོད་ནམས་མེད་ཀྱང་མྱུར་བར་ནི། །དམ་ཚིག་བསྲུངས་ན་འགྲུབ་པར་འགྱུར། །ཞེས་གསུངས་སོ། །དེས་ལུས་དང་། ངག་དང་། ཡིད་རྣམ་པར་དག་པའི་བསོད་ནམས་སྐྱེ་བ་གཞན་
[290a.5]དུ་བསགས་པ་མེད་ཀྱང་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་མྱུར་དུ་འགྲུབ་པར་འགྱུར་བས་བསྟན་པར་མི་བྱའོ། །དེ་ནི་འདི་སྐད་སྟོན་པ་ཡིན་ཏེ། གཟུངས་ཀྱི་སྒྲུབ་པ་པོས་སློབ་དཔོན་གྱིས་བཤད་པ་གཞན་ལ་བསྟན་པར་མི་བྱ་ཞིང་བདག་གཟུངས་བསྒྲུབས་པ་ཡིན་ནོ་
[290a.6]ཞེས་ཀྱང་སྨྲ་བར་མི་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་དངོས་གྲུབ་ཀྱི་བསོད་ནམས་ཀྱི་རྒྱུད་བཤད་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པ་ནི།
[290a.7]དེ་ལ་ཞེས་བྱ་བ་ལ་སོགས་པ་སྔགས་ཀྱི་དངོས་གྲུབ་ཀྱི་བསོད་ནམས་ཀྱི་རྒྱུད་གསུངས་པ་ཡིན་ནོ། །སངས་རྒྱས་མཚན་ལ་སོགས་བརྗོད་ན། །ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པའི་མདོ་སྡེ་ལས་བཤད་པའི། བསོད་ནམས་ཆེན་པོ་ཐོབ་པར་འགྱུར། །ཞེས་བྱ་བ་ནི་སྔ་མ་བཞིན་ནོ། །འདི་
[290b]
[290b.1]གང་གིས་ཤེ་ན། ཆོས་སྦྱིན་པས་ན་དངོས་གྲུབ་ཐོབ། །ཅེས་བྱ་བ་སྨོས་ཏེ། སེམས་ཅན་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་སྟོན་པ་ཞེས་བྱ་བའི་ཐ་ཚིག་གོ། །དེ་ལྟར་སྔགས་ཀྱི་བསོད་ནམས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་དེ་བཞིན་གཤེགས་པ་ལ་སོགས་པའི་ལས་ཀྱི་
[290b.2]དཀྱིལ་འཁོར་ལས་བཤད་པའི་རིག་པ་རྣམས་ཀྱི་བསོད་ནམས་ཀྱི་དངོས་གྲུབ་ནི་དེ་ལ་འདི་ནི་རིག་པའི་བསོད་ནམས་ཀྱི་རྒྱུད་གསུངས་པ་ཡིན་ནོ། །བསོད་ནམས་ང་ནི་སྦྱིན་པའི་མཆོག །ཅེས་བྱ་བ་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རིག་པས་སྒྲུབ་པ་པོས་ཆོས་
[290b.3]ཐམས་ཅད་རང་བཞིན་གྱིས་འོད་གསལ་བར་བསྒོམས་པས་ཆོས་ཀྱི་མཚན་ཉིད་ལ་མངོན་པར་ཞེན་པ་ཡོངས་སུ་སྤང་བར་བྱའོ། །དེ་སྐད་དུ་ཡང་། ཆོས་ཐམས་ཅད་ཀྱི་མཚན་ཉིད་ལ་མངོན་པར་ཞེན་པ་སྤང་བར་བྱའོ་ཞེས་གསུངས་སོ། །སྦྱིན་པའི་ཕ་རོལ་ཕྱིན་རྫོགས་ན། །ཞེས་བྱ་བ་
[290b.4]གསུངས་པ་འདི་ནི་ཕྱིའི་དངོས་པོ་མེ་ཏོག་དང་བདུག་པ་ལ་སོགས་པ་ཅི་འབྱོར་བས་དེ་བཞིན་གཤེགས་པ་རྣམས་དང་སེམས་ཅན་རྣམས་ལ་སྦྱིན་པར་བྱའོ། །དེ་སྐད་དུ་ཡང་། སངས་རྒྱས་སེམས་ཅན་རྣམས་ལ་སྦྱིན། ཉིན་ཞག་དོན་མེད་མི་བྱའོ། །ཞེས་གསུངས་སོ། །དེའི་ནང་ན་སྦྱིན་པ་མཆོག་
[290b.5]ཡིན་ནོ། །གང་གིས་ཤེ་ན། བསོད་ནམས་ཀྱི་ནང་ནའོ། །ཅི་ཞིག་འགྱུར་ཞེ་ན། བྱིན་ན་བསོད་ནམས་ཐོབ་པར་འགྱུར། །ཞེས་བྱ་བ་སྨོས་ཏེ། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་ཞེས་བྱ་བའི་དོན་ཏོ། །དེས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པས་ཅིར་
[290b.6]འགྱུར་ཞེ་ན། སྦྱིན་པའི་ཕ་རོལ་ཕྱིན་རྫོགས་ན། །མྱུར་དུ་སངས་རྒྱས་ཉིད་དུ་འགྱུར། །ཞེས་བྱ་བ་སྨོས་སོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་བསོད་ནམས་ཀྱི་དངོས་གྲུབ་ཀྱི་རྒྱུད་གསུངས་ནས། ད་ནི་གདུལ་བྱ་དེ་རྣམས་དེ་ཉིད་ལ་ཤེས་རབ་མེད་
[290b.7]ན་སྙིང་པོ་དང་། ཕྱག་རྒྱ་དང་། སྔགས་དང་། རིག་པར་འགྲུབ་པར་མི་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་རྟོག་པ་ཐམས་ཅད་ཀྱི་ཤེས་རབ་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །རྟོག་པ་ཐམས་ཅད་ཀྱི་ལས་ཀྱི་དངོས་གྲུབ་
[291a]
[291a.1]བསྒྲུབ་པ་སྟེ། སྔགས་ཀྱི་ཡི་གེ་རྣམས་སྐྱེ་བ་མེད་པར་ཞུགས་པས་ན་ཡི་གེ་ཨ་ལས་རབ་ཏུ་འཇུག་པ་ཡིན་ནོ། །དེས་ན་ཡི་གེ་ཐམས་ཅད་རྣམ་པར་བསྒོམས་ལ། སྔགས་ཀྱི་ཡི་གེ་རྣམས་གཅིག་ཏུ་འགྱུར་བ་ཞེས་བྱ་བ་རྣམ་པར་ཐར་པའི་སྒོ། རང་གི་ཁ་ནས་
[291a.2]གཞན་ཞལ་དུ། །ཞེས་བྱ་བ་ནི་རང་གི་ཁ་ནས་གཞན་གྱི་ཞལ་དུ་འཇུག་པར་བསྒོམས་ན་དངོས་གྲུབ་ཐོབ་པར་འགྱུར་རོ་ཞེས་བྱའོ། །དེ་ལྟར་རང་གི་ཁ་ནས་གཞན་གྱི་ཞལ་དུ་བསྒོམས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། རང་གི་
[291a.3]རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་ཟློས་ཤིང་། ཆོས་ཐམས་ཅད་གདོད་མ་ནས་མ་སྐྱེས་པའོ་ཞེས་པ་བསྒོམས་ཏེ། བདག་ཉིད་ལྷའི་སྐུ་གཟུགས་བརྙན་དང་མཚུངས་པ་དང་། མདུན་དུ་ཡང་ལྷའི་གཟུགས་བཞག་ལ། དེ་ཡང་གཟུགས་བརྙན་དང་མཚུངས་པར་
[291a.4]བསམས་ཏེ། དངོས་པོ་ལ་མ་ཞེན་པར་འགྲུབ་པར་འགྱུར་རོ། །ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་ཤེས་རབ་ཀྱི་དངོས་གྲུབ་ནི་ཤེས་རབ་དེས་འབིགས་ཞེས་བྱ་བ་ལ་སོགས་པ་གསུངས་པ་ཡིན་ནོ། །ངེས་པར་འབིགས་པ་ནི་ངེས་འབིགས་
[291a.5]སོ། །ཆོས་ཐམས་ཅད་བདག་མེད་པའི་ཡེ་ཤེས་ཀྱི་ལམ་གྱི་ཡི་གེ་ཨ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ་ཞེས་བྱ་བའི་དོན་ཏོ། །ངེས་པར་འབིགས་པས་ན་ངེས་འབིགས་ཏེ་ཤེས་རབ་བོ། །འཇིག་རྟེན་གསུམ་ན་སྤྱོད་པའི་བག་ཆགས་དང་བཅས་པའི་ཉོན་མོངས་པ་སྤངས་ནས་བླ་ན་མེད་
[291a.6]པ་ཡང་དག་པར་རྫོགས་པའི་བྱང་ཆུབ་ཀྱི་རང་བཞིན་གྱི་དེ་བཞིན་གཤེགས་པའི་ཡེ་ཤེས་སོ་ཞེས་བྱ་བ་ནི་བཤད་པ་ཡིན་ནོ་ཞེས་བྱ་བའི་སྒྲ་ནི་ངེས་པར་གཟུང་བའོ། །ཏིང་ངེ་འཛིན་ཞེས་གྲགས་པ་སྟེ། །ཞེས་བྱ་བ་ནི་ངེས་པར་འབིགས་པའི་ཤེས་རབ་ལ་ཏིང་ངེ་འཛིན་ཞེས་བཤད་དེ། དེ་
[291a.7]བཞིན་གཤེགས་པ་དེ་ལ་རྣམ་པར་གཡེང་བ་མི་མངའ་བའི་ཕྱིར་རོ། །དེ་ནས་ཕྱག་རྒྱ་མྱུར་འགྲུབ་པར། །ཞེས་བྱ་བ་ནི་དེས་དེ་ལྟ་བུའི་ངོ་བོ་ལ་ངེས་པར་འབིགས་པའི་ཤེས་རབ་ཀྱི་སྐལ་བ་དང་ལྡན་པ་ལ་ཕྱག་རྒྱའི་གཟུངས་ཐམས་ཅད་འགྲུབ་པར་འགྱུར་ཏེ། སྒྲུབ་པ་པོའི་རྒྱུད་ལ་མངོན་
[291b]
[291b.1]སུམ་དུ་འགྱུར་ཞེས་བྱ་བའི་ཐ་ཚིག་གོ། །གང་གི་ཕྱིར་རྣལ་འབྱོར་པ་དེས་དེ་ལྟར་བསྒོམས་ན་འགྲུབ་པར་འགྱུར་རོ། །དེ་ལྟར་དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་གཟུངས་ཀྱི་ཤེས་རབ་ཀྱི་དངོས་གྲུབ་བསྟན་ནས། ད་ནི་དེ་བཞིན་གཤེགས་པ་
[291b.2]ལ་སོགས་པ་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་ཤེས་རབ་ཀྱི་དངོས་གྲུབ་གསུངས་པ་ནི། དེ་ལ་འདི་ནི་སྔགས་ཀྱི་ཤེས་རབ་ཀྱི་དངོས་གྲུབ་ཀྱི་རྒྱུད་དེ་ཞེས་བྱའོ། །ཤེས་རབ་སྒྲ་ཡི་རྗེས་འབྲངས་ལ། །ཞེས་བྱ་བ་ནི་ཆོས་དང་དོན་དང་ངེས་པའི་ཚིག་དང་སྤོབས་
[291b.3]པ་སོ་སོ་ཡང་དག་པར་རིག་པ་རྣམ་པར་ཤེས་པར་བྱའོ། །དེ་ཉིད་ཀྱི་ངོ་བོ་ཉིད་ནི་ཏིང་ངེ་འཛིན་ཏོ། །དེ་ཅིའི་ཕྱིར་ཞེ་ན། ཚིག་ནི་རབ་ཏུ་སྤྲོས་པས་ན། །ཞེས་བྱ་བ་སྨོས་ཏེ། ངག་གི་རྣམ་པར་རྟོག་པའི་སྤྲོས་པ་སྟེ། རྣམ་པར་རྟོག་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་
[291b.4]ཞེས་བྱ་བའི་དོན་ཏོ། །དེས་ན་དངོས་པོའི་ཁྱད་པར་དེ་ལྟ་བུ་དང་། ངག་གི་རྣམ་པར་རྟོག་པ་ལ་དངོས་པོར་མངོན་པར་ཞེན་པ་མེད་པས། ཤེས་རབ་སྒྲ་ཡི་རྗེས་འབྲངས་ལ། །ཏིང་ངེ་འཛིན་ཞེས་རབ་ཏུ་གྲགས། །དེ་བསྒོམ་པར་ནི་མྱུར་བར་ཡང་། །སྔགས་ཀྱི་དངོས་གྲུབ་ཐོབ་པར་
[291b.5]འགྱུར། །ཞེས་བྱ་བའོ། །དེ་ནས་ཤེས་རབ་སྒྲའི་རྗེས་སུ་འབྲང་བ་བསྒོམས་པ་དེས་དེ་ལྟར་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཐོབ་པར་འགྱུར་རོ། །ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་བཤད་པའི་རིགས་རྣམས་ཀྱི་
[291b.6]ཤེས་རབ་ཀྱི་དངོས་གྲུབ་གསུངས་པ་ནི། དེ་ལ་འདི་ནི་རིག་པའི་ཤེས་རབ་ཀྱི་དངོས་གྲུབ་ཀྱི་རྒྱུད་དོ་ཞེས་བྱའོ། །རིག་པ་ནི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་བཤད་པའི་རིག་པའི་ལྷའི་གཟུགས་སོ། །སྔགས་ནི་ཆོས་ཀྱི་དཀྱིལ་འཁོར་ལས་བཤད་པ་དང་ལས་ཀྱི་དཀྱིལ་འཁོར་ལས་བཤད་
[291b.7]པའི་རིག་པའི་སྔགས་དེ་རིག་པ་དང་སྔགས་དེ་གཉིས་ལ་ཁྱད་པར་དུ་མ་དེ་དག་ལ་ཡོད་པ་མ་ཡིན་ཏེ། ཆོས་ཐམས་ཅད་རང་བཞིན་གྱིས་འོད་གསལ་བས་ཐམས་ཅད་རོ་གཅིག་པའི་ཕྱིར་རོ། །ཤེས་རབ་བསྒོམས་ན་མྱུར་བར་ནི། །ངེས་པར་དངོས་གྲུབ་ཐོབ་པར་འགྱུར། །ཞེས་བྱ་བ་ལ།
[292a]
[292a.1]དེ་ལྟར་ཆོས་ཐམས་ཅད་རང་བཞིན་གྱིས་འོད་གསལ་བའོ་ཞེས་ཆོས་ཐམས་ཅད་རང་བཞིན་གྱིས་འོད་གསལ་བའི་མཚན་ཉིད་དུ་ཤེས་རབ་ཀྱིས་རྣམ་པར་དཔྱད་ནས། ཡང་ནས་ཡང་དུ་མངོན་དུ་བྱས་ནས་རྣལ་འབྱོར་
[292a.2]པ་ལས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རིག་པའི་དངོས་གྲུབ་ཐོབ་པར་འགྱུར་རོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ཀྱི་ཤེས་རབ་ཡེ་ཤེས་ཀྱི་
[292a.3]དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་རྟོག་པ་ཐམས་ཅད་ཀྱི་ཚོགས་ཀྱི་དངོས་གྲུབ་ཀྱི་རྒྱུད་ནི། དེ་ནས་ཞེས་བྱ་བ་ལ་སོགས་པས་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་ཀྱི་ཚོགས་
[292a.4]ཀྱི་དངོས་གྲུབ་ཏུ་འགྱུར་བ་ནི། ཚོགས་མེད་པར་མ་ཡིན་ནོ་ཞེས་བྱ་བའི་དོན་བསྟན་པའི་ཕྱིར། རྟོག་པ་ཐམས་ཅད་ཀྱི་ཚོགས་ཀྱི་དངོས་གྲུབ་ཀྱི་རྒྱུད་བསྟན་ཞིང་མངོན་སུམ་དུ་བྱེད་དོ་ཞེས་བྱ་བའི་དོན་ཏེ། མཆོད་པ་ཐམས་ཅད་རབ་བྱས་ན། །ཞེས་བྱ་བ་ནི་ཕྱི་རོལ་གྱི་མཆོད་པ་ལྔ་ལ་སོགས་པ་དང་།
[292a.5]སྒེག་མོ་ལ་སོགས་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་ལ་སོགས་པའི་མཆོད་པ་ཐམས་ཅད་ཀྱིས་རབ་ཏུ་སེམས་རྩེ་གཅིག་པས་བྱས་ན་བཟླས་པ་དང་བཅས་པས་ཚོགས་རྣམས་འཕེལ་བར་འགྱུར་རོ། །གང་དག་ཅེ་ན། དག་པ་ནི་
[292a.6]ཆོས་རྣམས་ཀྱི་ཞེས་བྱ་བ་སྨོས་ཏེ། རྣམ་པར་སྣང་མཛད་ལ་སོགས་པ་ནས་རིན་ཆེན་འབེེབས་པའི་མཐར་ཐུག་པའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་རྣམས་ཐབས་དང་། ཤེས་རབ་ཡོངས་སུ་རྫོགས་པའི་རྣལ་འབྱོར་པས་བསྒྲུབ་པར་འགྱུར་རོ་ཞེས་བྱ་བའི་
[292a.7]དོན་དོ། །དེ་བས་ན་རྣལ་འབྱོར་པས་ཚོགས་ནི་འགྲུབ་པར་འགྱུར་རོ་ཞེས་བྱ་བའི་དོན་ཏོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་བསྒྲུབ་པའི་ཚོགས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་དེ་
[292b]
[292b.1]བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་དངོས་གྲུབ་བསྒྲུབ་པའི་ཚོགས་གསུངས་པ་ནི། དེ་ལ་འདི་ནི་ཕྱག་རྒྱའི་ཚོགས་ཀྱི་དངོས་གྲུབ་ཀྱི་རྒྱུད་དེ་ཞེས་བྱའོ། །དཀྱིལ་འཁོར་མང་པོ་ཞུགས་པ་དང་། །ཞེས་བྱ་བ་ནི་མང་པོ་དེ་རྣམས་སུ་ཞུགས་པ་
[292b.2]ནི་དཀྱིལ་འཁོར་གྱི་འཁོར་ལོ་མང་པོར་བཞུགས་པའོ། །དེ་སྐད་དུ་ཡང་། འཁོར་ལོ་དཀྱིལ་འཁོར་ཞེས་བཤད་དེ། །དེ་ཉིད་དམ་ཚིག་ཅེས་གྲགས་པའོ། །ཞེས་བྱ་བ་གསུངས་སོ། །དཀྱིལ་འཁོར་མང་པོ་བྲིས་པའི་ཕྱིར། །ཞེས་བྱ་བ་ནི་དཀྱིལ་འཁོར་ཡང་ཡིན་ལ་མང་
[292b.3]པོ་ཡང་ཡིན་པས་ན་དཀྱིལ་འཁོར་མང་པོ་སྟེ། དེ་དག་བརྟགས་ཤིང་བྲིས་པའི་ཕྱིར་ཚོགས་ཡོངས་སུ་རྫོགས་པར་འགྱུར་རོ་ཞེས་བྱའོ། །དེ་ལྟར་གྱུར་པས་ན་ཅིར་འགྱུར་ཞེ་ན། ཚོགས་ནི་རྫོགས་པར་བྱ་བ་གསུངས་ཏེ། ཚོགས་ཐམས་ཅད་རྫོགས་པས་ན་ཕྱག་རྒྱ་རྣམས་ཀྱི་དངོས་གྲུབ་
[292b.4]ཆེན་པོ་སངས་རྒྱས་ཉིད་དང་། བྱང་ཆུབ་སེམས་དཔའ་ཉིད་ཐོབ་པའི་རྒྱུ་རབ་ཏུ་འཕེལ་བར་འགྱུར་རོ། །ད་ནི་ཆོས་ཀྱི་དཀྱིལ་འཁོར་ལས་བཤད་པའི་རིགས་ཐམས་ཅད་ཀྱི་རྗེས་སུ་ཡི་རང་བ་ལ་སོགས་པའི་ཚུལ་དུ་ཞེས་བྱ་བ་གསུངས་པ་ནི་སངས་རྒྱས་དང་། བྱང་ཆུབ་
[292b.5]སེམས་དཔའ་ཐམས་ཅད་དང་། རང་སངས་རྒྱས་དང་། འཕགས་པ་ཉན་ཐོས་ཡང་དག་པར་སོང་བ་དང་། ཡང་དག་པར་ཞུགས་པ་དང་། སེམས་ཅན་ཐམས་ཅད་ཀྱི་དུས་གསུམ་དུ་ལུས་དང་ངག་དང་། ཡིད་ལས་བྱུང་བའི་བསོད་ནམས་གང་ཅི་ཡང་རུང་བ་དེ་ཐམས་ཅད་ལ་རྗེས་སུ་
[292b.6]ཡི་རང་བར་བགྱིད་དོ་ཞེས་ངག་ཏུ་བརྗོད་ཅིང་རྗེས་སུ་ཡི་རང་བ་དེ་དང་པོར་བྱས་པའི་ལྷག་མ་ནི་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་ཡིན་པས་རྗེས་སུ་ཡི་རང་བ་ལ་སོགས་པའི་སྒྲ་བརྗོད་དོ། །དེའི་ཚུལ་ནི་དེ་བཞིན་དུ་བརྗོད་དོ། །དེ་བཞིན་དུ་དམ་པའི་ཆོས་བཀླག་པ་དང་ཞེས་
[292b.7]བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་ཟབ་མོའི་མདོ་སྡེ་འདོན་པའོ། །ད་ནི་ལས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ལ་རིག་པའི་ཚོགས་ཀྱི་དངོས་གྲུབ་གསུངས་པ་ནི། མ་རིག་རབ་ཏུ་སྤངས་པ་དང་། །ཞེས་བྱ་བ་ལ་
[293a]
[293a.1]སོགས་པ་ལ། དངོས་པོར་འཛིན་པའི་མངོན་པར་ཞེན་པ་ནི་མ་རིག་པའོ། །ཆོས་ཐམས་ཅད་རང་བཞིན་གྱིས་འོད་གསལ་བ་དེ་བསྒོམས་པས་ཤིན་ཏུ་ཕུལ་དུ་བྱུང་བས་ངེས་པར་གསལ་བ་ནི་རབ་ཏུ་སྤངས་པའོ། །དེའི་དངོས་པོ་ནི་དེ་ཁོ་ན་ཉིད་དེ། དེ་གང་
[293a.2]ལས་ཡིན་ཞེ་ན། སྦྱིན་པའི་ཕ་རོལ་ཕྱིན་ཚུལ་ལས། །ཞེས་བྱ་བ་སྨོས་ཏེ། ཤེས་རབ་ཀྱི་སྟོབས་ཀྱིས་ལེན་པ་པོ་དང་གཏོང་བ་པོ་དང་། གཏང་བར་བྱ་བ་མི་དམིགས་པ་དང་། མངོན་སུམ་དུ་བྱེད་པ་ནི་སྦྱིན་པའི་ཕ་རོལ་ཏུ་ཕྱིན་པའོ། །ཆོས་ཐམས་ཅད་ཀྱི་མཚན་ཉིད་ལ་མངོན་པར་
[293a.3]ཞེན་པ་སྤངས་པས་དེ་ཉིད་ཀྱི་ཚུལ་ནི་ཐོབ་པའི་ཐབས་སོ། །དེའི་ཕྱིར་སྦྱིན་པའི་ཕ་རོལ་ཏུ་ཕྱིན་པའི་ཚུལ་ལས། ཚོགས་ནི་ཡོངས་སུ་རྫོགས་ནས་ཀྱང་། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་རིག་པ་རྣམས་བཟླས་པས་དངོས་གྲུབ་ཐོབ་པོ་ཞེས་བྱའོ། །དེ་ལྟར་དེ་བཞིན་གཤེགས་པ་
[293a.4]ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ཀྱི་ཚོགས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་དེ་རྣམས་ཀྱི་མཚན་མ་འབྱུང་བ་མེད་ན། ཡེ་ཤེས་ཀྱི་དངོས་གྲུབ་ཏུ་མི་འགྱུར་རོ་ཞེས་བསྟན་པའི་ཕྱིར། །དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ལ་སོགས་
[293a.5]པའི་རིགས་ཐམས་ཅད་ཀྱི་མཚན་མ་འབྱུང་བ་ཡེ་ཤེས་ཀྱི་དངོས་གྲུབ་ཀྱི་རྒྱུད་གསུངས་པ་ནི། དེ་བཞིན་གཤེགས་པ་ལ་སོགས་པའི་རིགས་རྣམས་དང་། རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་ལ་སོགས་པ་དེ་དག་ཡེ་ཤེས་གང་ལས་འབྱུང་བ་དེ་ནི་རིགས་ཐམས་ཅད་ཀྱི་
[293a.6]མཚན་མ་འབྱུང་བའི་ཡེ་ཤེས་སོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་མངོན་སུམ་དུ་བྱེད་པའོ། །དེ་ཇི་ལྟར་རྡོ་རྗེ་འབྱུང་ཞེ་ན་ཞེས་བྱ་བ་ནི་ཡེ་ཤེས་གང་གིས་རྡོ་རྗེ་ལ་སོགས་པ་བསྐྱེད་པ་ཡིན་ཞེས་བྱ་བའི་དོན་ཏོ། །དེ་ཉིད་བཅོམ་ལྡན་སེམས་དཔའ་སྟེ། །ཞེས་བྱ་བ་ནི་རྣམ་པར་སྣང་
[293a.7]མཛད་ཆེན་པོ་སྟེ། བཅོམ་ལྡན་འདས་ཀུན་དུ་བཟང་པོའི་བྱང་ཆུབ་ཆེན་པོའི་སེམས་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་བཞུགས་སོ་ཞེས་བྱ་བ་གང་ཡིན་པ་སྔར་བཤད་པའོ། །དེ་ཉིད་རྡོ་རྗེ་ལས་སྐྱེས་པས་ན་རྒྱུ་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལྟར་འགྱུར་
[293b]
[293b.1]བ་གང་ཡིན་ཞེ་ན། ཐམས་ཅད་སེམས་ཞེས་བྱ་བ་སྨོས་ཏེ། དེ་བཞིན་གཤེགས་པ་ལ་སོགས་པ་ནས། །སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་རང་བཞིན་ཡིན་ནོ་ཞེས་བྱ་བའི་དོན་ཏོ། །འདིར་གང་ཡིན་ཞེ་ན། ཉིད་བདག་ཅེས་བྱ་བ་སྨོས་ཏེ། གཟུང་བ་དང་འཛིན་པའི་
[293b.2]རྣམ་པར་རྟོག་པ་གཞན་གྱི་དབང་མེད་པའི་ཕྱིར་རོ། །ཅིའི་ཕྱིར་གཟུང་བ་དང་འཛིན་པའི་རྣམ་པར་རྟོག་པ་གཞན་གྱི་དབང་མེད་པ་ཡིན་ཞེ་ན་གང་གི་ཕྱིར། སྐུ་གསུང་ཐུགས་ཀྱི་རྡོ་རྗེ་ནི། །ཞེས་བྱ་བ་ལ་སོགས་པ་སྨོས་ཏེ། དེ་ལ་སྐུ་དང་གསུང་དང་། ཐུགས་རྡོ་རྗེ་ནི་བཤད་ཟིན་ཏོ། །
[293b.3]དེའི་རང་བཞིན་གྱི་སེམས་བརྟན་པ་ནི་རྡོ་རྗེ་སེམས་དཔའ་ཡིན་ནོ་ཞེས་བྱ་བའི་དོན་ཏོ། །ཏིང་ངེ་འཛིན་དེ་གང་ཡིན་ཞེ་ན། རང་བྱུང་གི་ཞེས་བྱ་བ་སྨོས་ཏེ། སངས་རྒྱས་བཅོམ་ལྡན་འདས་ཀྱིའོ། །སེམས་དཔའ་ཀུན་གྱི་མཆོག་སེམས་དཔའ། །ཞེས་བྱ་བ་ནི་རྡོ་རྗེ་རྒྱལ་པོ་ལ་སོགས་
[293b.4]པ་གཞན་དག་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་ངོ་བོ་རྡོ་རྗེ་སེམས་དཔའ་ལས་བྱུང་བ་དེའི་ཕྱིར་དེ་དག་གི་མཆོག་གོ། །རྡོ་རྗེ་སྙིང་གར་རབ་བསྒོམས་ན། །རྡོ་རྗེ་སེམས་དཔའ་ཞེས་གྲགས་ཏེ། །ཞེས་བྱ་བ་ནི་གང་གི་ཚེ་དེ་བཞིན་གཤེགས་པ་ལ་སོགས་པའི་རྣལ་འབྱོར་
[293b.5]པས་སྙིང་གའི་ཟླ་བ་ལ་རྡོ་རྗེ་རྩེ་ལྔ་པའི་རྣམ་པར་སྒོམ་པར་བྱེད་པ་དེའི་ཚེ། རྡོ་རྗེ་སེམས་དཔའ་ཞེས་གྲགས་སོ། །རྣལ་འབྱོར་གྱི་རྒྱུད་དུ་གྲགས་པ་ལ་ཕྱི་རོལ་དུ་ནི་སྐྱེས་བུའི་གཟུགས་སུ་ཡིན་ནོ་ཞེས་སེམས་ནི་འདི་ལ་རྡོ་རྗེ་རབ་ཏུ་གནས་ཞེས་བྱ་བ་སྟེ། སྙིང་གའི་སེམས་དཔའ་རྡོ་རྗེ་དེ་ལ་
[293b.6]ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ཀུན་རྫོབ་ཀྱི་གཟུགས་ཀྱིས་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་ངོ་བོ་དངོས་པོ་ཐམས་ཅད་གཟུགས་བརྙན་ཙམ་དུ་རབ་ཏུ་གནས་པ་སྟོན་པར་བྱེད་པ་ཡིན་ནོ། །གཞུང་འདི་ཙམ་གྱིས་ནི་ཐོག་མ་དང་ཐ་མ་མེད་པའི་རྡོ་རྗེ་སེམས་དཔའི་རྡོ་རྗེ་
[293b.7]རྩེ་ལྔ་པའི་རྣམ་པར་བསྐྱེད་པ་བསྟན་ཏེ། དེ་ཉིད་སངས་རྒྱས་རྣམས་ཀྱི་ནི། །ཡེ་ཤེས་ཚུལ་དེ་མཉམ་མེད་དོ། །ཞེས་བྱ་བ་ནི་སེམས་དཔའ་རྡོ་རྗེར་གྱུར་པའི་རྡོ་རྗེ་སེམས་དཔའ་ཟླ་བའི་དཀྱིལ་འཁོར་དུ་བསྒོམ་པའི་ཡེ་ཤེས་ཀྱི་ཚུལ་ལོ། །ཡེ་ཤེས་ཀྱི་ཚུལ་དེ་གང་གི་ཡིན་ཞེ་ན། སངས་
[294a]
[294a.1]རྒྱས་རྣམས་ཀྱི་ཞེས་བྱ་བ་སྨོས་ཏེ། སངས་རྒྱས་བཅོམ་ལྡན་འདས་རྣམས་ཀྱི་མཉམ་པ་མེད་པའི་འོད་ཅན་སེམས་དཔའི་རྡོ་རྗེར་ངེས་པར་འབྱུང་བ་བསྟན་པ་དང་། གཡོ་བའི་དངོས་པོ་ཐམས་ཅད་ཀྱི་རང་བཞིན་རྡོ་རྗེ་སེམས་དཔའ་སྣ་ཚོགས་པའི་གཟུགས་སུ་
[294a.2]འགྱུར་བའོ། །ཁམས་གསུམ་ཀུན་གྱི་རྡུལ་སྙེད་དུ། །དེ་ཉིད་ཀྱི་ནི་རྒྱལ་བ་ཡིན། །ཞེས་བྱ་བ་ནི་སེམས་དཔའ་འབྱུང་བའི་དུས་སུ་བཛྲ་སཏྭ་ཞེས་བྱ་བ་ལ་སོགས་པའི་སྒྲས་བསྐུལ་ནས། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་
[294a.3]རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་གཟུགས་བརྙན་ཏིང་ངེ་འཛིན་ལས་འབྱུང་བའོ། །དེ་དག་ཉིད་ཀྱི་རྒྱལ་བའི་རྡོ་རྗེའི་སྐུ་ནི་དེ་རྣམས་ལས། རྡོ་རྗེ་སེམས་དཔའ་ཡང་དག་འགྱུར། །ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་
[294a.4]པར་སྣང་མཛད་ལ་སོགས་པའི་གཟུགས་བརྙན་གཅིག་ཏུ་འགྱུར་བ་དེ་ལ་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེེབས་པའི་མཐར་ཐུག་པའི་བྱང་ཆུབ་སེམས་དཔའ་ཐམས་ཅད་ཀྱི་སྐུའི་ངོ་བོ་བསྐྱེད་པ་ཡིན་པ་དེའི་ཕྱིར། དེ་རྣམས་ལས་རྡོ་རྗེ་སེམས་དཔའ་ཡང་དག་པར་འགྱུར་རོ། །
[294a.5]སེམས་དཔའ་དང་པོ་དེ་ཉིད་ལས། །མཚན་མ་ཐམས་ཅད་ཡང་དག་འབྱུང་། །ཞེས་བྱ་བ་ནི་སེམས་དཔའི་རྡོ་རྗེར་འགྱུར་བ་ལས་རྡོ་རྗེ་སེམས་དཔའི་ངོ་བོ་དང་། རྡོ་རྗེ་ལྕགས་ཀྱུ་ལ་སོགས་པའི་ཕྱག་རྒྱ་ལས་རྡོ་རྗེ་རྒྱལ་པོ་ལ་སོགས་པ་སྐྱེ་བ་ཡིན་ནོ་ཞེས་བྱ་བའི་དོན་ཏོ། །དེ་སྐད་དུ་
[294a.6]ཡང་། ཇི་ལྟར་བཅོམ་ལྡན་རྟག་པ་ལས། །རྡོ་རྗེ་སེམས་དཔའ་ཀུན་འབྱུང་ལྟར། །རྡོ་རྗེའི་མཚན་མ་ལ་སོགས་ལས། །འབྱུང་བར་འགྱུར་བ་འགྲུབ་པ་ཡིན། །ཞེས་གསུངས་སོ། །མཚན་མ་ལས་ནི་སེམས་དཔའ་ཆེ། །ཞེས་བྱ་བ་ནི་རྡོ་རྗེ་སེམས་དཔའ་ནས་དྲིལ་བུའི་མཐར་ཐུག་པའི་
[294a.7]རང་གི་མཚན་མ་རྣམས་ཀྱིས་དཀྱིལ་འཁོར་རྡོ་རྗེར་བསྒྲུབས་ནས་ཡེ་ཤེས་སེམས་དཔའ་འཇུག་པའི་དུས་སམ། འོག་མིན་དུ་མངོན་པར་བྱང་ཆུབ་པ་མངོན་སུམ་དུ་བྱེད་པའི་དུས་སུ་རྡོ་རྗེ་སེམས་དཔའི་སྐུ་བསྐྱེད་པ་ཡིན་ནོ་ཞེས་བྱ་བའི་དོན་ཏོ། །དེ་ཉིད་གང་ལས་ཤེས་ཤེ་ན། །རང་གི་སེམས་
[294b]
[294b.1]ཡོངས་སུ་སྦྱོང་བའི་དུས་སུ་སེམས་དཔའ་བྱིན་གྱིས་བརླབས་པའི་སྦྱོར་བས་རྡོ་རྗེ་སེམས་དཔའ་བསྐྱེད་ལ། རྡོ་རྗེ་སེམས་དཔའ་ལས་བྱུང་བ་ནི། རྡོ་རྗེ་རྒྱལ་པོ་ལ་སོགས་པ་བྱའོ་ཞེས་གསུངས་སོ། །དེའི་ཕྱིར་བདག་ཉིད་ཀྱི་རྣལ་འབྱོར་གྱི་དུས་སུ་རྡོ་རྗེ་རྒྱལ་པོ་ལ་སོགས་པ་རྣམས་རང་
[294b.2]གི་མཚན་མ་ལས་བསྐྱེད་པ་མ་ཡིན་ལ། སེམས་དཔའ་བསྐྱེད་པའི་དུས་སུ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པ་ལས་འབྱུང་བ་ཡིན་པར་ཐེ་ཚོམ་མི་བྱའོ། །དེ་ལས་ཚུལ་འདི་ཐམས་ཅད་འབྱུང་། །ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་
[294b.3]པའི་ཐུགས་ཀའི་མཚན་མ་ལས་རྡོ་རྗེ་སེམས་དཔའ་ལ་སོགས་པ་བྱུང་ནས། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་མདོ་འདི་གསུངས་པ་ཡིན་ནོ་ཞེས་བྱ་བའི་དོན་ཏོ། །ད་ནི་ཕན་ཡོན་གསུངས་པ་ནི། །གང་ཞིག་གིས་ནི་ཐོས་འགྱུར་བ། །ཞེས་བྱ་བ་ལ་སོགས་པ་སྨོས་ཏེ།
[294b.4]ཐོས་འགྱུར་ཞེས་བྱ་བ་ནི་ཐོས་པ་བསྟན་ཏོ། །དད་ཅིང་ཞེས་བྱ་བ་ནི་དད་པ་སྐྱེས་པས་ལྷག་པར་སེམས་པ་ཡིན་ནོ་ཞེས་བྱ་བའི་ཐ་ཚིག་གོ། །འཛིན་བྱེད་ཅེས་བྱ་བ་ནི། ཇི་ལྟར་ཐོས་པའི་མདོ་མ་བརྗོད་པར་སེམས་ལ་བཞག་ནས་དེ་སྟོན་པའོ། །སྙིང་གར་ཡང་། རྟག་ཏུ་དགའ་བ་བསྒོམས་ནས་ནི། །ཞེས་བྱ་བ་ནི་
[294b.5]ཇི་ལྟར་ཐོས་པ་དང་། བསམ་པ་དང་། ཤེས་པས་ངེས་པར་བྱས་ནས། ཡང་དང་ཡང་མངོན་དུ་བྱེད་ཅིང་། རྟག་ཏུ་དགའ་བ་དང་ཡིད་མགུ་བར་སྦྱོར་བས་ན། དེ་ནི་མྱུར་དུ་གྲུབ་པ་ཐོབ། །ཅེས་བྱ་བ་ནི་སྒྲུབ་པ་པོས་མདོ་ཇི་ལྟར་ཐོས་པ་བསམ་པའི་ཤེས་པས་ངེས་པར་བྱས་ནས། ཡང་དང་ཡང་མངོན་
[294b.6]དུ་བྱས་པ་ཉིད་ཀྱིས་སངས་རྒྱས་ཀྱི་དངོས་གྲུབ་ཐོབ་པར་འགྱུར་རོ། །དེ་ལྟར་དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་འབྱུང་བའི་ཡེ་ཤེས་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་སྙིང་པོ་དང་། ཕྱག་རྒྱ་དང་། གསང་སྔགས་དང་རིག་
[294b.7]སྔགས་རྣམས་ཀྱི་རྟོག་པ་འབྱུང་བའི་ཡེ་ཤེས་མེད་ན་དངོས་གྲུབ་ཏུ་མི་འགྱུར་རོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་རྟོག་པ་ཐམས་ཅད་འབྱུང་བའི་ཡེ་ཤེས་ཀྱི་ཆོ་ག་རྒྱས་པའི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ནི་ཇི་
[295a]
[295a.1]སྐད་དུ་བཤད་པའོ། །དེ་དག་འབྱུང་བ་ནི་ཡེ་ཤེས་སྐྱེས་པ་སྟེ། གང་འབྱུང་བའི་ཡེ་ཤེས་དེ་ནི་རྟོག་པ་ཐམས་ཅད་འབྱུང་བའི་ཆོ་ག་ཡེ་ཤེས་སོ། །དེའི་ཆོ་ག་རྒྱས་པ་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་བྱེ་བྲག་རྣམ་པ་སྣ་ཚོགས་པའོ། །སངས་
[295a.2]རྒྱས་རྣམས་ཞེས་བྱ་བ་ལ་སོགས་པ་ལ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སངས་རྒྱས་བཅོམ་ལྡན་འདས་རྣམས་ནི་གཟུང་བ་དང་འཛིན་པའི་རྣམ་པར་རྟོག་པ་སྤངས་པས་གཉིས་སུ་མེད་པའི་ཡེ་ཤེས་ཐོག་མ་དང་ཐ་མ་མེད་པ་ཆོས་ཀྱི་དབྱིངས་ཀྱི་རང་བཞིན་དུ་ཡོད་
[295a.3]པར་འགྱུར་བས་ན་རྟག་ཅིང་ཐེར་ཟུག་པའོ། །མི་རྟོག་པ་ནི་རྣམ་པར་རྟོག་པ་སྤངས་པའོ། །ཡེ་ཤེས་དེ་ལས་ཕྱག་རྒྱ་ཆེན་པོ་རྣམ་པར་རྟོག་པའི་གཟུགས་སུ་རྟོགས་པས་ན་རྟོག་པ་ཞེས་བརྗོད་དོ། །རྟོག་པ་མེད་པའི་ཡེ་ཤེས་ལས་ཕྱག་རྒྱ་ཆེན་པོ་ལ་སོགས་པར་རྟོགས་པ་གདུལ་བྱའི་དབང་
[295a.4]གིས་སྐྱེ་བ་དེ་ལ་དེ་ལྟར་དེ་བཞིན་གཤེགས་པས་གསུངས་པ་ཡིན་ནོ། །དེ་ལྟར་དེ་བཞིན་གཤེགས་པ་རྣམས་ཀྱིས་རྟོག་པ་འབྱུང་བའི་ཡེ་ཤེས་བཤད་ནས། ད་ནི་དེ་བཞིན་གཤེགས་པའི་རིགས་ཀྱིས། མི་རྟོག་གང་ལ་རྟོག་བདག་མེད། །ཅེས་བྱ་བ་ལ་སོགས་པ་གསུངས་ཏེ། གང་
[295a.5]ལ་གང་གི་ཚེ་རྣམ་པར་རྟོག་པའི་རྟོག་པ་མེད་པ་ནི་ཆོས་ཀྱི་དབྱིངས་ཀྱི་ངོ་བོ་ཡིན་ལ། རྟོག་པའི་བདག་ཉིད་ནི་དཀྱིལ་འཁོར་ལ་སོགས་པ་ཀུན་རྫོབ་ཀྱི་བདེན་པའི་རང་བཞིན་ནོ། །དཀྱིལ་འཁོར་ལ་སོགས་པའི་ངོ་བོ་གདུལ་བྱའི་དབང་གིས་བརྟགས་པ་ལས་འབྱུང་བ་ཞེས་བྱ་སྟེ། དཀྱིལ་འཁོར་ལ་སོགས་
[295a.6]པ་རྟོག་པ་ལས་བྱུང་བ་ནི་སྐྱེས་པའོ། །དཀྱིལ་འཁོར་ལ་སོགས་པའི་ངོ་བོ་དེ་གང་ཡིན་ཞེ་ན། རྡོ་རྗེ་སེམས་དཔའ་སེམས་དཔའ་ཆེ། །ཞེས་བྱ་བ་སྨོས་ཏེ། ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཡིན་ནོ་ཞེས་བྱ་བའི་ཐ་ཚིག་གོ། །དེ་ཕྱིར་རྟོགས་པ་ཞེས་བརྗོད་དོ། །ཞེས་བྱ་བ་ནི་གང་གི་ངོ་
[295a.7]བོས་བརྟགས་པའི་རང་བཞིན་གྱི་རྟོག་པ་ནི་དེ་བཞིན་གཤེགས་པའི་རྟོག་པས་ཞེས་གསུངས་སོ། །དེ་བཞིན་གཤེགས་པའི་རིགས་ཀྱི་རྟོག་པའི་ངོ་བོའི་རང་བཞིན་དེ་ཉིད་ཀྱིས་གདུལ་བྱ་རྣམས་རྣམ་པར་རྟོག་པ་བརྟགས་པ་ཞེས་བརྗོད་དོ། །ད་ནི་རྡོ་རྗེ་རིགས་ཀྱི་ཆོ་ག་བཞིན་དུ་རི་མོ་བྲིས་ཞེས་བྱ་བ་ལ་སོགས་
[295b]
[295b.1]པ་སྨོས་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་རྡོ་རྗེ་རིགས་ཀྱི་རང་བཞིན་གང་ཞིག་སེམས་ཀྱིས་བྲིས་ནས་སྒྲོ་བཏགས་པ་ནི་རྣམ་པར་བརྟགས་པའོ། །ནིའི་སྒྲ་ནི་ངེས་པར་གཟུང་པའོ། །རི་མོ་བྲིས་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་གཟུགས་སུ་རྣམ་པར་རྟོག་པས་
[295b.2]བརྟགས་པའོ། །ངོ་བོ་ནི་གང་ཞིག་ཅི་ཞིག་སྟེར་བར་བྱེད་ཅེ་ན། རྟོག་པ་གྲུབ་བཞིན་ཞེས་རྟོག་པ། །ཞེས་བྱ་བ་སྨོས་ཏེ། རྡོ་རྗེ་རིགས་ཀྱི་དཀྱིལ་འཁོར་ལ་སོགས་པའི་དངོས་གྲུབ་སྟེར་རོ་ཞེས་བྱ་བའི་ཐ་ཚིག་གོ། །དེའི་ཕྱིར་རྟོག་པ་ཞེས་གསུངས་སོ་ཞེས་བྱ་བ་ནི་རྡོ་རྗེ་རིགས་ཀྱི་རྣམ་པར་འདུལ་
[295b.3]བའི་རྟོག་པའི་མཚན་ཉིད་ཡིན་པ་དེའི་ཕྱིར། དེ་བཞིན་གཤེགས་པ་རྟོག་པ་དང་བྲལ་བའི་བདག་ཉིད་བཅོམ་ལྡན་འདས་ཀྱིས་རྟོག་པ་ཞེས་བསྟན་ཏོ། །དེ་ལྟར་རྡོ་རྗེ་རིགས་ཀྱི་རྟོག་པ་འབྱུང་བའི་ཡེ་ཤེས་བསྟན་ནས། ད་ནི་པདྨའི་རིགས་ཀྱི་ནི། རྟོག་པ་ལས་ནི་འདོད་ཆགས་འབྱུང་། །ཞེས་བྱ་
[295b.4]བ་ལ་སོགས་ཏེ། སེམས་ཅན་སྨིན་ཅིང་གྲོལ་བར་བྱེད་པའི་འདོད་ཆགས་ནི་པདྨའི་རིགས་ཀྱི་ངོ་བོ་བཅོམ་ལྡན་འདས་རྡོ་རྗེ་འཆང་ཆེན་པོའི་ཆགས་པའོ། །རྟོག་པ་དང་བཅས་པ་ལས་འབྱུང་བའི་པདྨའི་རིགས་སྤྲུལ་པའི་སེམས་བསྐྱེད་པའོ། །པདྨ་ལ་གནས་ཏེ་ཞེས་བྱ་བ་ནི་པདྨའི་རིགས་
[295b.5]ཀྱི་རང་བཞིན་གྱི་ཆགས་པ་དེ་ནི་རང་བཞིན་གྱིས་རྣམ་པར་དག་པའི་ཆོས་ཀྱི་ཡེ་ཤེས་ཀྱི་ངོ་བོས་པདྨའི་བསྐྱེད་པའི་ཚུལ་ཉིད་ཀྱིས་རྟག་ཏུ་གནས་པ་སྟེ། དེ་སྐད་ཅིག་རེ་རེ་ཞིང་པདྨའི་རིགས་བསྐྱེད་པའི་རྒྱུར་གྱུར་པར་གནས་པའི་ཕྱིར་རོ། །དེའི་ཕྱིར་རྟོག་པ་གནས་པ་ནི་གྲུབ་པ་ཉིད་དེ་འགྱུར་རོ་ཞེས་
[295b.6]བྱ་བ་ལ། དེའི་ཕྱིར་རང་བཞིན་གྱིས་དག་པའི་ཆོས་ཉིད་ཀྱི་ངོ་བོའི་ཡེ་ཤེས་ནི་པདྨའི་གདུལ་བྱའི་རྣམ་པར་རྟོག་པ་ལ་བརྟེན་ནས། ཕྱག་རྒྱ་ཆེན་པོ་ལ་སོགས་པའི་དངོས་གྲུབ་འབྱུང་ཞིང་སྐྱེ་བར་འགྱུར་རོ། །འདི་ལས་ཀྱང་པདྨའི་རིགས་ཀྱི་རྟོག་པ་འབྱུང་བའི་རྟོག་པ་གསུངས་ཤིང་བཤད་པ་ཡིན་
[295b.7]ནོ། །ད་ནི་ནོར་བུའི་རིགས་ནི་དེ་ལ་འདི་ནི་ནོར་བུའི་རིགས་ཀྱི་རྟོག་པ་འབྱུང་བའི་རྒྱུད་ཅེས་བྱ་བ་གསུངས་ཏེ། ནོར་བུ་ནི་ཡིད་བཞིན་གྱི་ནོར་བུ་སྟེ། དེ་ལ་སེམས་མེད་པས་ནི་རྟོག་པ་མེད་པའོ། །མཐུ་ཡིས་ཤིན་ཏུ་མཆོག་གྱུར་པ། །ཞེས་བྱ་བ་ནི་སེམས་ཅན་གང་དང་གང་གིས་ཡིད་བཞིན་གྱི་ནོར་
[296a]
[296a.1]བུ་ལག་ཏུ་འཐོབ་པར་འགྱུར་བ་དེ་དང་དེ་དག་གི་བསམ་པ་ཐམས་ཅད་ཡོངས་སུ་རྫོགས་པར་བྱེད་དེ། བསམ་པ་ཙམ་ཁོ་ནས་སངས་རྒྱས་ཀྱི་ཆོས་མ་འདྲེས་པ་དང་ལྡན་པར་འགྱུར་བའི་ཕྱིར་རོ། །དེ་དང་དེ་དག་གི་རྣམ་པར་རྟོག་པ་མེད་ཀྱང་ཡིད་ལ་བསམ་པས་སེམས་
[296a.2]ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པའི་ལས་ཀྱི་མཚན་ཉིད་མཐུ་ཤིན་ཏུ་མཆོག་ཏུ་གྱུར་པས་མངོན་པར་འཐོབ་པའོ། །དེ་ལྟར་རྣམ་པར་མི་རྟོག་པ་ལས། ལྷ་རྫས་དངོས་གྲུབ་འབྱུང་བར་འགྱུར། །ཞེས་བྱ་བ་ནི་ཇི་ལྟར་ཡིད་བཞིན་གྱི་ནོར་བུ་ནི་རྣམ་པར་མི་རྟོག་
[296a.3]པ་ལས་བསམས་པ་ཙམ་གྱིས་སེམས་ཅན་རྣམས་ལ་འཇིག་རྟེན་པའི་དངོས་གྲུབ་འབྱུང་བར་འགྱུར་རོ། །རྟོག་པ་མེད་པ་རྣམ་པར་རྟོག་པར་འགྱུར་བ་ཡིན་ནམ་ཞེ་ན་མ་ཡིན་ཏེ། རྟོག་པ་གཏན་མེད་པའི་ཕྱིར་རོ། །དེ་ལྟར་མཉམ་པ་ཉིད་ཀྱི་ཡེ་ཤེས་རྣམ་
[296a.4]པར་རྟོག་པ་ནི་ནོར་བུ་དང་མཚུངས་པས་ན་རྣམ་པར་མི་རྟོག་པ་ལས་ནོར་བུའི་རིགས་ཀྱི་དངོས་གྲུབ་ཐམས་ཅད་འབྱུང་བ་ཡིན་ནོ། །རྣམ་པར་རྟོག་པ་ལས་འདུལ་བ་གང་ཡིན་པ་དེ་ལ་རིན་པོ་ཆེའི་རིགས་བསྐྱེད་པའི་རྒྱུར་འགྱུར་བ་ནི་རྣམ་པར་མི་རྟོག་པ་ལ་རྟོག་པ་ཞེས་བརྗོད་དོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་
[296a.5]ཅད་ཀྱི་རྟོག་པ་འབྱུང་བའི་ཡེ་ཤེས་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་སྙིང་པོ་དང་ཕྱག་རྒྱ་དང་སྔགས་དང་རིག་པ་རྣམས་མེད་ན་སྙིང་པོ་དང་ཕྱག་རྒྱ་དང་སྔགས་དང་རིག་པ་འབྱུང་བའི་ཡེ་ཤེས་ཀྱི་དངོས་གྲུབ་ཏུ་མི་འགྱུར་རོ་ཞེས་བྱ་བའི་དོན་བསྟན་པའི་
[296a.6]ཕྱིར། དེ་ནས་ཞེས་བྱ་བ་ལ་སོགས་པས་རྟོག་པ་ཐམས་ཅད་ཀྱི་སྙིང་པོ་ལ་སོགས་པས་འབྱུང་བའི་ཡེ་ཤེས་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ལ་སོགས་པའི་རྟོག་པ་ཐམས་ཅད་ཀྱི་རིགས་རྣམ་པ་བཞིའི་དཀྱིལ་འཁོར་ཆེན་པོ་ལས་བཤད་པའི་རྣམ་པར་སྣང་མཛད་
[296a.7]ལ་སོགས་པ་ནས་རིན་ཆེན་འབེེབས་པའི་མཐར་ཐུག་པའི་ཕྱག་རྒྱ་ཆེན་པོའི་ངོ་བོ་ཉིད་ཀྱིས་སྟོན་པར་བྱེད་པའི་སྒྲ་ལ་སྙིང་པོ་ཞེས་བྱའོ། །དེ་འབྱུང་བའི་ཡེ་ཤེས་ལ་དེ་སྐད་ཅེས་བྱའོ། །ཡིད་ལ་འདོད་པའི་ཆོ་ག་ཡིས། །ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བསྒྲུབ་
[296b]
[296b.1]པའི་སྒྲུབ་པ་པོས་བཅོམ་ལྡན་འདས་ཀྱིས་གསུངས་པའི་ཆོ་ག་གང་ཡིན་པ་དེ་ནི་ཡིད་ལ་འདོད་པའི་ཆོ་གའོ། །དེ་ལ་ཆོ་ག་ཉིད་ཀྱིས་ཕྱག་རྒྱ་ཆེན་པོ་ལ་སོགས་པ་དང་། བཟླས་པ་ལ་མངོན་པར་དགའ་བ་གང་ཡིན་པ་དེས་འགྲུབ་པར་འགྱུར་གྱི་གཞན་གྱིས་ནི་མ་ཡིན་ནོ། །ཏིང་འཛིན་བསྒྲུབ་
[296b.2]པའི་སྙིང་ལ་གནས། །ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་གཟུགས་ལ་སེམས་རྩེ་གཅིག་པའི་ཏིང་ངེ་འཛིན་ནོ། །དེ་སྒྲུབ་པ་པོས་ཡོངས་སུ་རྫོགས་ཤིང་མཐར་ཐུག་པར་བྱེད་པའོ། །དེ་ཁྱད་པར་ཇི་ལྟ་བུ་ཞེ་ན། སྙིང་ལ་གནས་པ་ནི་བློ་ལ་གནས་པ་སྟེ། རྟོགས་པར་བྱ་བའི་ངོ་བོ་ཞེས་
[296b.3]བྱ་བའི་དོན་ཏོ། །དེའི་ཕྱིར་སྙིང་པོ་ཞེས་བརྗོད་དོ་ཞེས་བྱ་བ་ནི་རྟོགས་པར་བྱ་བའི་ངོ་བོ་ཡིན་པ་དེས་ན་སེམས་དཔའ་ནི་སྙིང་པོ་སྟེ། གཟུང་བར་བྱ་བའི་ཆོ་གའི་ངོ་བོ་གནས་པའི་ཕྱིར་རོ། །རྟོགས་པར་བྱ་བ་དོན་དུ་གཉེར་བ་ཐ་མི་དད་པར་ཉེ་བར་བརྟགས་ནས་ཕྱག་རྒྱ་ཆེན་པོ་ལ་སོགས་པ་ངོ་བོ་དེ་སྟོན་པར་
[296b.4]བྱེད་པའི་སྒྲ་ལ་ཡང་སྙིང་པོ་ཞེས་བརྗོད་དོ། །དེ་ལྟར་དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་འབྱུང་བའི་ཡེ་ཤེས་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་གཟུགས་འབྱུང་བའི་ཡེ་ཤེས་ནི་དེ་ནས་རྟོག་པ་ཐམས་
[296b.5]ཅད་ཀྱི་ཕྱག་རྒྱ་འབྱུང་བའི་ཡེ་ཤེས་ཀྱི་རྒྱུད་གསུངས་ཏེ། དེ་ལྟར་འཁོར་ལོས་སྒྱུར་བའི་རྒྱལ་པོའི་ཕྱག་རྒྱ་མཆོག་ཏུ་བསྟན་པ་ནི་འདའ་བར་དཀའ་ཞིང་མི་ཕྱེད་པས་འཁོར་ལོས་སྒྱུར་བའི་རྒྱལ་པོའི་ཕྱག་རྒྱ་མཆོག་གི་ཡོངས་སུ་གཟུང་བའི་ཁྲིམས་ཏེ། ཚིག་གིས་བཅས་པ་ཡིན་ནོ་ཞེས་
[296b.6]བྱ་བའི་དོན་ཏོ། །ཇི་ལྟར་དེའི་ཁྲིམས་ལ་གནས་པ་རྣམས་ཀྱིས་འདའ་བར་དཀའ་ཞིང་མི་ཕྱེད་པ་བཞིན་དུ་བདག་ཉིད་ཆེན་པོའི་གཟུགས་བརྙན་ནི་དེ་བཞིན་གཤེགས་པ་དང་། རྡོ་རྗེ་སེམས་དཔའ་ལ་སོགས་པའི་བདག་ཉིད་ཆེན་པོ་རྣམས་ཀྱིས་རྡོ་རྗེ་སེམས་དཔའ་ལ་སོགས་པ་ལ་འདའ་བར་དཀའ་ཞིང་
[296b.7]མི་ཕྱེད་པས་གདུལ་བྱ་རྣམས་ཀྱི་རྒྱུད་ལ་རྒྱས་བཏབ་པས། ཕྱག་རྒྱ་ཞེས་བྱ་བས་གྲགས་པར་དེ་བཞིན་གཤེགས་པས་བསྟན་པའོ། །དེ་ལྟར་ཕྱག་རྒྱ་འབྱུང་བའི་ཡེ་ཤེས་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་བཤད་
[297a]
[297a.1]པའི་སྔགས་འབྱུང་བའི་ཡེ་ཤེས་ནི། དེ་ནས་རྟོག་པ་ཐམས་ཅད་ཀྱི་སྔགས་འབྱུང་བའི་ཡེ་ཤེས་ཀྱི་རྒྱུད་དེ་ཞེས་བྱ་བ་གསུངས་ཏེ། འདའ་བར་བྱ་བ་མ་ཡིན་ཞིང་། །ཞེས་བྱ་བ་ལ་སོགས་པ་ལ། འདའ་བར་བྱ་བ་མ་ཡིན་པ་ནི་ཁྱད་དུ་མི་གསོད་པའོ། །
[297a.2]དབྱེ་བར་དཀའ་བ་ནི་བསྟན་པར་བྱ་བ་མ་ཡིན་ནོ། །གསང་བ་ཉིད་ཅེས་བྱ་བ་ནི་མི་བསྟན་པའོ། །གསང་བ་འགྲུབ་ཕྱིར་བརྗོད་པས་ན། །ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བཟླས་པ་སོ་སོར་རང་རིག་པའི་དོན་བསྟན་པ་ཡིན་ནོ་ཞེས་བྱ་བའི་ཐ་ཚིག་
[297a.3]གོ་ཞེས་ཆོས་ཐམས་ཅད་རང་བཞིན་གྱིས་རྣམ་པར་དག་པའི་རྣམ་པར་སྣང་མཛད་ལ་སོགས་པ་ལ་གཟུགས་བརྙན་དང་མཚུངས་པ་མངོན་པར་འདུ་མི་བྱེད་པ་ནི་གསང་བའི་དངོས་གྲུབ་སྟེ། དེའི་དོན་བརྗོད་པ་ལ་སྔགས་ཞེས་གསུངས་པ་ཡིན་ནོ། །དེ་ཡི་ཕྱིར་ན་སྔགས་ཞེས་བརྗོད། །
[297a.4]ཅེས་བྱ་བ་ནི་གསང་བ་ལ་སོགས་པ་སྔགས་ཀྱི་ཚུལ་མ་ཡིན་པ་དེ་ན་སྔགས་ཕྱི་མ་རྣམས་ལ་ཡང་ཆོས་མཐུན་པས་སྔགས་ཞེས་བརྗོད་དེ། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ལས་བཤད་པའི་རིག་པ་ནི། དེ་ནས་ཞེས་བྱ་བ་ལ་སོགས་པ་
[297a.5]རིག་པ་འབྱུང་བའི་ཡེ་ཤེས་གསུངས་པ་ཡིན་ནོ། །མ་རིག་པ་ནི་གྲགས་པར་ཟད་པའོ། །དེ་རབ་ཏུ་གཞག་ཅིང་འཇིགས་པས་ན་གཞག་པའོ། །ངག་གི་རིག་པ་མཆོག་གྲུབ་ཅིང་། །ཞེས་བྱ་བ་ནི་སོ་སོ་ཡང་དག་པར་རིག་པ་བཞི་ཐོབ་པས་ན་གང་གི་རིག་པ་མཆོག་གྲུབ་པའོ། །
[297a.6]རྟོགས་ཤིང་རིག་པའི་དངོས་གྲུབ་སྟེ། །དེ་ཕྱིར་རིག་པ་ཞེས་བརྗོད་དོ། །ཞེས་བྱ་བ་ནི་སོ་སོ་ཡང་དག་པར་རིག་པ་བཞིའི་ཡེ་ཤེས་ཐོབ་པའི་དངོས་གྲུབ་སྟེ། སོ་སོ་ཡང་དག་པར་རིག་པ་རྟོགས་པ་ཐོབ་ཅིང་རྙེད་པ་ནི་རིག་པའི་དངོས་གྲུབ་བམ། རིག་པའི་ཐབས་ཞེས་བྱ་བ་ཁམས་
[297a.7]ཀྱི་དོན་ཐ་དད་པས་དངོས་གྲུབ་ཐོབ་པ་ནི་གྲུབ་པའོ། །གང་གིས་དེ་ལྟར་མ་རིག་བཅོམ། །རང་གི་རིག་པ་མཆོག་གྲུབ་སྟེ། །སོ་སོ་ཡང་དག་པར་རིག་པ་བཞི་རྟོགས་ཤིང་ཁོང་དུ་ཆུད་པའི་རང་བཞིན་གྱི་དངོས་གྲུབ་ཀྱི་ངོ་བོ་ཡིན་པ་དེའི་ཕྱིར། རིག་པ་ཞེས་དེ་བཞིན་གཤེགས་པས་
[297b]
[297b.1]གསུངས་སོ། །གང་གི་ཚེ་ཡེ་ཤེས་འདི་སྒྲུབ་པ་པོའི་རྒྱུད་ལ་བསྐྱེད་པའི་རྒྱུར་གྱུར་པ་ནི་རིགས་སོ། །དེ་ལྟར་དེ་བཞིན་གཤེགས་པའི་རིགས་ཐམས་ཅད་ཀྱི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་འབྱུང་བའི་ཡེ་ཤེས་ཀྱི་རྒྱུད་བསྟན་ནས། ད་ནི་དེ་བཞིན་གཤེགས་
[297b.2]པའི་རིགས་ཐམས་ཅད་ཀྱི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་ཟློས་པ་པོ་རང་དང་གཞན་གྱི་སྐལ་བ་དང་ལྡན་པ་དང་།སྐལ་བ་དང་མི་ལྡན་པ་བརྟག་པར་བྱས་ནས་འཇུག་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་རྟོག་
[297b.3]པ་ཐམས་ཅད་ཀྱི་ཡེ་ཤེས་འབྱུང་བའི་རྒྱུད་གསུངས་པ་ཡིན་ནོ། །རྟོག་པ་ཐམས་ཅད་ནི་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་མཐར་ཐུག་པའི་ཡེ་ཤེས་འདས་པ་དང་མ་འོངས་པ་དང་། ད་ལྟར་བྱུང་བའི་དངོས་པོ་ཚིག་དེ་ལ་ངེས་པ་ཡིན་ནོ་ཞེས་གསུངས་སོ། །
[297b.4]རིགས་ཐམས་ཅད་ཀྱི་དཀྱིལ་འཁོར་ཆེན་པོར་བཤད་པའི་སྔགས་ཀྱི་སྙིང་པོ་དེ་བཟླ་བར་བྱའོ། །གང་གི་ཡིན་པར་རིག་པར་བྱ་ཞེ་ན། བདག་གམ་གཞན་ཡང་རུང་བའོ། །གང་ལ་རིག་པར་བྱ་ཞེ་ན། །འདས་པ་དང་བྱུང་བ་དང་འབྱུང་བར་འགྱུར་བའོ། །གང་གིས་མཐོང་བ་ནི་
[297b.5]མིག་གི་རྣམ་པར་ཤེས་པའོ། །ཐོས་པ་ནི་རྣ་བའི་རྣམ་པར་ཤེས་པའོ། །ཐམས་ཅད་དེ་བཞིན་དུ་དེ་ཤེས་པར་བྱའོ། །འདི་སྐད་སྟོན་པ་ཡིན་ཏེ། བདག་དང་གནས་བསྲུང་བ་ཇི་ལྟ་བ་བཞིན་དུ་བྱས་ན། རང་གི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་ཕྱག་
[297b.6]བཞིའི་མཐར་ཐུག་པ་རྗེས་སུ་སྤྱད་ལ། རང་གི་སྙིང་གའི་ཟླ་བ་ལ་རང་གི་ཕྱག་རྒྱའང་དེའི་དབུས་སུ་བཟླས་པའི་ཡི་གེ་རྣམ་པར་བསམས་ཏེ། དེ་ཉིད་བརྗོད་པར་བྱའོ། །ཆོས་ཐམས་ཅད་གཟུགས་བརྙན་དང་མཚུངས་པའི་བདེན་པ་གང་ཡིན་པ་དེའི་བདེན་པས་དེ་འདས་པ་དང་
[297b.7]མ་འོངས་པ་དང་། ད་ལྟར་བྱུང་བའི་སེམས་ཀྱི་བདག་ཉིད་ཇི་ལྟ་བ་དེས་ཐམས་ཅད་བདག་ལ་སོ་སོར་སྣང་བར་གྱུར་ཅིག་ཅེས་བདེན་པའི་བྱིན་གྱི་རླབས་བྱས་ལ། ཇི་སྲིད་ཐམས་ཅད་དུ་མཐོང་བ་དང་ཐོས་པར་འགྱུར་བ་དེ་སྲིད་ཀྱི་བར་དུ་གནས་པར་བྱའོ། །ད་ནི་
[298a]
[298a.1]ཕྱག་རྒྱའི་ཡེ་ཤེས་འབྱུང་བ་ནི། །གང་ཡང་རུང་བའི་ཕྱག་རྒྱ་བཅིངས། །ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པའི་རིགས་ཐམས་ཅད་ཀྱི་གཟུངས་ཀྱི་ཕྱག་རྒྱ་དེ་ལས་གང་ཡང་རུང་བའི་ཕྱག་རྒྱ་གཅིག་བཅིང་བའོ། །བདག་གིས་ཆོ་ག་
[298a.2]ཇི་བཞིན་དུ། །ཞེས་བྱ་བ་ནི་སྔར་བཤད་པའི་ཚུལ་གྱིས་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ་སྙིང་གར་རང་གི་རིགས་ཀྱི་མཚན་མ་ལ་གཟུངས་ཀྱི་རིག་པ་རྣམ་པར་བཀོད་དེ། དེ་ཉིད་བརྗོད་ཅིང་། རང་གི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ནས། སྔ་
[298a.3]མ་བཞིན་དུ་བྱུང་ཟིན་པ་དང་། འབྱུང་བ་དང་། འབྱུང་བར་འགྱུར་བའི་སྐྱེ་བོ་ཐམས་ཅད་ཡོངས་སུ་བརྟག་པར་བྱའོ། །དེ་བས་ན། འཇིག་རྟེན་པ་ལ་བལྟས་ན་ནི། །གོང་མ་བཞིན་དུ་ཀུན་དུ་འབྱུང་། །ཞེས་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་དངོས་པོ་སོ་སོར་
[298a.4]བརྟགས་ནས་འཇིག་རྟེན་པ་ཐམས་ཅད་བརྟག་པར་བྱའོ། །ད་ནི་དེ་བཞིན་གཤེགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་ཡེ་ཤེས་ནི་དེ་ལ་འདི་ནི་ཞེས་བྱ་བ་ལ་སོགས་པ་སྨོས་སོ། །ལན་ཅིག་ཙམ་ཡང་སྔགས་བརྗོད་ན། །ཞེས་བྱ་བ་ནི་ཆོས་
[298a.5]ཀྱི་དཀྱིལ་འཁོར་ལས་བཤད་པའི་རང་གི་ལྷའི་སྔགས་བརྗོད་པའོ། །རང་གི་ལྕེ་ལ་སྨྲར་གྱུར་པ། །ཞེས་བྱ་བ་ནི་དེ་བཟླས་པས་རང་གི་ལྕེ་ལ་གང་ཡང་རུང་བ་སྨྲ་བར་འགྱུར་རོ། །དེ་གང་ཡིན་ཞེ་ན། འདས་དང་བྱུང་དང་འབྱུང་གང་ཡིན། །ཞེས་བྱ་བ་ནི་གོ་སླའོ། །འདི་སྐད་
[298a.6]སྟོན་པ་ཡིན་ཏེ། སྔ་མ་བཞིན་དུ་རང་གི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། རང་གི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་བཅིངས་ཏེ། ལྕེ་ལ་རྡོ་རྗེ་དཀར་པོ་རྩེ་ལྔ་པ་
[298a.7]བསམས་ནས། རང་གི་ལྷའི་ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་ཡི་གེ་རྣམ་པར་བཀོད་ལ། དེ་ཉིད་བརྗོད་ཅིང་བདེན་པའི་བྱིན་གྱིས་བརླབས་པ་སྔོན་དུ་འགྲོ་བས་ཇི་སྲིད་དུ་རང་རང་གི་ལྷའི་ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་ཡི་གེ་རྣམ་པར་
[298b]
[298b.1]བཀོད་པ་དེ་ཉིད་བརྗོད་ཅིང་། བདེན་པའི་བྱིན་གྱིས་བརླབས་པ་དང་བཅས་པས་རང་ཉིད་སྔགས་ལན་ཅིག་བརྗོད་ན་ཐམས་ཅད་སྨྲ་བར་འགྱུར་རོ། །ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ལས་བཤད་པའི་རིག་པ་རྣམས་ནི། དེ་ལ་
[298b.2]འདི་ནི་ཞེས་བྱ་བ་ལ་སོགས་པས་རིག་པའི་ཡེ་ཤེས་སྐྱེ་བ་ཡིན་ནོ། །རིག་པ་ལན་ཅིག་བརྗོད་ན་ནི། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་རང་གི་དཀྱིལ་འཁོར་ཆེན་པོ་ལས་བཤད་པའི་རང་གི་རིག་པའི་ལས་ཀྱི་ཕྱག་རྒྱ་ཆེན་པོ་བཅིངས་ཏེ། བདེན་པའི་བྱིན་གྱི་བརླབས་བདར་ནས།
[298b.3]རང་གི་སྙིང་གའི་རྡོ་རྗེ་ལ་རིག་པའི་ཡི་གེ་རྣམས་བཀོད་ནས། ལན་ཅིག་བརྗོད་ནས་ཇི་སྲིད་དུ་རང་གི་ལྷའི་གཟུགས་ཀྱིས་བདག་ཉིད་དུ་གྱུར་བ་དེ་སྲིད་དུ་བསྒོམས་ན་མངོན་པར་འདོད་པའི་དངོས་པོ་ཡོངས་སུ་ཤེས་པར་འགྱུར་རོ། །དེ་ལྟར་དེ་བཞིན་གཤེགས་པའི་རིགས་ཐམས་ཅད་ཀྱི་རྟོག་
[298b.4]པ་ཐམས་ཅད་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱིས་ཟློས་པ་པོས་ཐུན་མོང་དང་། ཁྱད་པར་གྱི་སྐུ་དང་། གསུང་དང་། ཐུགས་རྡོ་རྗེའི་ཕྱག་རྒྱའི་སྒྲུབ་པ་ཉམས་སུ་བླང་བར་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་
[298b.5]བ་ལ་སོགས་པ་རིགས་ཐམས་ཅད་ཀྱི་ཐུན་མོང་བ་ནི་སྤྱིའོ། །དེ་གང་ཞེ་ན། གསང་བའི་སྐུ་དང་། གསུང་དང་། ཐུགས་ཀྱི་རྡོ་རྗེ་ཕྱག་རྒྱའོ། །དེ་བསྒྲུབ་པ་ནི་དེ་རྫོགས་པའི་རྒྱུར་གྱུར་པའོ། །ཇི་ལྟར་དེ་ལྟར་འདུག་ནས་ཀྱང་། །ཞེས་བྱ་བ་ལ་སོགས་པ་ལ། དེ་བཞིན་གཤེགས་
[298b.6]པའི་ཟློས་པ་པོ་དང་། རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་ཟློས་པ་པོས་སྔོན་དུ་བསྙེན་པའི་དུས་སམ། བསྒྲུབ་པའི་དུས་སུ་སྐྱིལ་མོ་ཀྲུང་གང་རུང་བ་དེས་འདུག་ལ་བསྒྲུབ་པ་དང་བཟླས་པ་བྱའོ། །ཇི་ལྟར་བྲིས་པའི་རྗེས་འབྲངས་ནས། །བདག་ཉིད་
[298b.7]ལྷའི་གཟུགས་སམ་མདུན་དུ་བསྒོམ་པར་བྱ་བ་ཡིན་ནོ། །ཇི་ལྟར་རི་མོའི་ཚུལ་དུ་ནི། །བརྐྱང་བསྐུམ་ལ་སོགས་རབ་གནས་པ། །ཞེས་བྱ་བ་ལ་སོགས་པ་ལ། རྡོ་རྗེ་རིགས་ཀྱི་ཟློས་པ་པོས་དེ་ལས་བཤད་པའི་དཀྱིལ་འཁོར་ཆེན་པོ་དང་། གཟུངས་དང་། ལས་ཀྱི་དཀྱིལ་
[299a]
[299a.1]འཁོར་གྱི་སྒྲུབ་པོས་བསྒྲུབ་པའི་ཚེ། ཇི་ལྟར་བྲིས་པ་དང་རྗེས་སུ་མཐུན་པར་བརྐྱང་བསྐུམ་གྱི་ཚུལ་དུ་གནས་པས་གནས་པར་བྱའོ། །རང་གི་ལྷའི་གཟུགས་སུ་བདག་ཉིད་མདུན་དུ་བསྒོམས་ལ། ཤིན་ཏུ་ཁྲོས་པས་མཚན་ཐོག་ཐག་བཟླས་ཤིང་བསྒྲུབ་པར་བྱའོ། །
[299a.2]ཆོས་ཀྱི་དཀྱིལ་འཁོར་གྱི་རྣལ་འབྱོར་པས་ཀྱང་སྐྱིལ་མོ་ཀྲུང་གིས་འདུག་སྟེ། དེ་ལས་བཤད་པའི་ཆོས་ཀྱི་དཀྱིལ་འཁོར་བསྒྲུབ་པར་བྱའོ། །རྡོ་རྗེ་སྐྱིལ་མོ་ཀྲུང་བཅས་ལ། །ཞེས་བྱ་བ་ལ། པདྨའི་རིགས་ཀྱི་སྒྲུབ་པ་པོས་བསྒྲུབ་པའི་ཚེ་རང་གི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་
[299a.3]ཕྱག་རྒྱ་ཆེན་པོ་བཅིངས་ཏེ། ཇི་ལྟར་བྲིས་པ་དང་རྗེས་སུ་མཐུན་པར་རང་གི་ལྷའི་གཟུགས་ཀྱི་བདག་ཉིད་དམ། མདུན་དུ་མཚན་ཐོག་ཐག་ཟློས་ཤིང་བསྒོམ་པར་བྱའོ། །ཇི་ལྟར་འདུག་གམ་ཉལ་བའམ། །ཞེས་བྱ་བ་ལ་སོགས་པ་ལ། ནོར་བུའི་རིགས་ཀྱི་ཟློས་པ་པོས་སྔོན་དུ་བསྙེན་
[299a.4]པའི་དུས་སམ། བསྒྲུབ་པའི་དུས་སུ་ལྡང་བ་དང་། འདུག་པ་དང་། འཆགས་ཀྱང་རུང་སྟེ། བསྒྲུབ་པའམ་བཟླས་པ་བྱའོ། །རྡོ་རྗེ་རིན་ཆེན་དབང་བསྒྱུར་ན། །ཞེས་བྱ་བ་ནི་རིན་པོ་ཆེའི་རིགས་ཟློས་པའམ། བསྒོམ་པ་ལ་རྡོ་རྗེ་རིན་ཆེན་གྱིས་དབང་བསྐུར་བར་བྱའོ། །དེ་ལྟར་དེ་
[299a.5]བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་སྐུའི་གསང་བའི་ཕྱག་རྒྱའི་སྒྲུབ་པ་བཤད་ནས། ད་ནི་དེ་བཞིན་གཤེགས་པ་ཐམས་ཅད་ཀྱི་གསུང་གི་གསང་བའི་ཕྱག་རྒྱ་བསྒྲུབ་པ་གསུངས་པ་ནི། དེ་ལ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ལྕེ་རྩེ་ཤིན་ཏུ་མི་
[299a.6]བསྒུལ་ཞིང་། །ཞེས་བྱ་བ་ནི་ལྕེའི་རྩེ་མོ་ནི་མི་བསྐྱོད་པ་ཡིན་ནོ་ཞེས་བྱ་བའི་དོན་ཏེ། ཤིན་ཏུ་མི་བསྐྱོད་པ་ཡིན་ནོ། །ཞེས་བྱ་བའི་དོན་ཏོ། །སོ་དང་མཆུ་གཉིས་སྦྱར་ནས་ནི། །ཞེས་བྱ་བ་ནི་ཤིན་ཏུ་སོ་དང་མཆུ་སྦྱར་བ་མ་ཡིན་ཏེ། རྣམ་པ་དེ་ལྟ་བུའི་སྒྲ་དང་བྲལ་བའི་རྡོ་རྗེའི་ཚིག་ནི་སྒྲ་སྤངས་
[299a.7]པའོ། །རྟོག་པ་ཐམས་ཅད་བསྒྲུབ་བྱ་ཞིང་། །ཞེས་བྱ་བ་ནི་དེ་བཞིན་གཤེགས་པ་ལ་སོགས་པ་ནས། རིན་པོ་ཆེའི་རིགས་ཀྱི་མཐར་ཐུག་པའི་རྟོག་པ་ཐམས་ཅད་བསྒྲུབ་པའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཐུན་མོང་གི་ཕྱག་རྒྱ་བསྒྲུབ་པའི་རྒྱུད་
[299b]
[299b.1]བསྟན་ནས། ད་ནི་རྡོ་རྗེ་རིགས་ཀྱི་ཁྱད་པར་བསྒྲུབ་པ་ནི། །ཧཱུཾ་ཞེས་བྱ་བའི་འབྲུག་སྒྲ་སྒྲོགས། །ཞེས་བྱ་བ་ལ་སོགས་པ་སྨོས་ཏེ། བསྒྲགས་པ་གཞན་དུ་ཧཱུཾ་ཞེས་བྱ་བ་གང་ཡིན་པ་ཁྲོ་བོ་གང་གིས་ཡི་གེ་འབྲུག་སྒྲ་ལྟར་སྒྲོགས་པའོ། །ཧཱུཾ་ཞེས་བྱ་བ་འབྲུག་སྒྲ་ལྟར་ས་འོག་གི་
[299b.2]མཐར་ཐུག་པར་ཐོས་པས་ན་ཟབ་པའོ། །བརྟན་པ་ནི་དུས་ཡུན་རིང་དུ་གནས་པའོ། །རྡོ་རྗེ་ཆེན་པོ་ཁྲོ་བོས་གསལ། །རྡོ་རྗེ་ཁྲོ་བོའི་གསུང་འགྲུབ་བོ། །ཞེས་བྱ་བ་ནི་རྡོ་རྗེ་ཆེན་པོ་ཡང་ཡིན་ལ་ཁྲོ་བོ་ཡང་ཡིན་པས་རྡོ་རྗེ་ཆེན་པོའི་ཁྲོ་བོ་སྟེ། དམིགས་པའི་ཐུགས་རྗེ་ཆེན་པོ་ལས་འབྱུང་བའི་
[299b.3]རྡོ་རྗེ་ཆེན་པོའི་རིགས་ཀྱི་རང་བཞིན་གྱི་ཁྲོ་བོ་དེའི་གསུང་གི་དེ་ཡིན་ནོ་ཞེས་ངེས་པ་བསྐྱེད་ནས། བཟླས་པ་བྱས་པ་འདིས་རྡོ་རྗེ་རིགས་ཀྱི་དངོས་གྲུབ་ཐོབ་པར་འགྱུར་རོ། །དེ་ལྟར་རྡོ་རྗེ་རིགས་ཀྱི་ཁྱད་པར་གྱི་བསྒྲུབ་པ་བརྗོད་ནས། ད་ནི་པདྨའི་རིགས་ནི། དབུགས་མི་འབྱིན་ལྟར་
[299b.4]དབུགས་འབྱིན་ཅིང་། །ཞེས་བྱ་བ་སྨོས་ཏེ། དབུགས་མི་འབྱིན་པའི་དོན་ནི་ཅུང་ཟད་ཅིག་དབུགས་མི་འབྱིན་པ་ལྟར་དབུགས་ཕྱུང་ནས། ཕྲ་བའི་ཚིག་ཤིན་ཏུ་གསལ་ཞིང་ཐོས་པར་འགྱུར་བ་དེ་ལྟ་བུར་དེས་པདྨའི་རིགས་ཀྱི་སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་
[299b.5]སྔགས་རྣམས་བསྒྲུབ་པ་ནས། །སྒྲུབ་པ་པོ་རྣམས་བསྒྲུབ་པར་འགྱུར། །ཞེས་བྱའོ། །ཁྱད་པར་ཅི་ལྟ་བུ་ཞེ་ན། ཏིང་འཛིན་ཡེ་ཤེས་སྙིང་པོ་ཡིས། །ཞེས་བྱ་བ་སྨོས་ཏེ། ཏིང་ངེ་འཛིན་ཡེ་ཤེས་རྣམས་ནི་ཏིང་ངེ་འཛིན་ཡེ་ཤེས་སོ། །དེའི་སྙིང་པོ་ནི་དེའི་བསྐྱེད་པའི་གནས་སུ་འགྱུར་བ་གང་
[299b.6]ཡིན་པ་དེ་ལ་ཏིང་ངེ་འཛིན་ཡེ་ཤེས་སྙིང་པོ་ཞེས་བྱའོ། །དེ་ནི་འདི་སྐད་སྟོན་པ་ཡིན་ཏེ། མཉམ་པར་བཞག་པའི་སེམས་ཀྱིས་བཟླས་པར་བྱས་པ་ཡིན་ནོ། །ད་ནི་ནོར་བུའི་རིགས་ནི། དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། ཤིན་ཏུ་ཡོངས་སུ་གསལ་ཚིག་གིས། །ཞེས་
[299b.7]བྱ་བ་ལ། ཤིན་ཏུ་ཡོངས་སུ་གསལ་བ་ནི་ཤིན་ཏུ་ཡོངས་སུ་གསལ་ཞིང་འདོན་པ་ཡིན་ནོ་ཞེས་བྱ་བའི་ཐ་ཚིག་གོ། །རྟག་ཏུ་འདུད་ལ་བརྩོན་བྱེད་ཅིང་། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ལ་དམིགས་ཤིང་ཕྱག་བཙལ་བས་གོམས་པས་ཕུལ་དུ་བྱུང་བ་ཉིད་དོ། །ཚུལ་འདི་བཟླས་
[300a]
[300a.1]པར་གྱུར་ན་ནི། །ཞེས་བྱ་བ་ལ་ནོར་བུའི་རིགས་ཀྱི་ཟློས་པ་པོས་ངག་གི་བཟླས་པ་དེ་ལྟ་བུ་བྱས་པར་འགྱུར་བ་དེ་སེར་སྣ་ཡོངས་སུ་སྤངས་པའི་ཚུལ་གྱིས་སྙིང་པོ་དང་། ཕྱག་རྒྱ་དང་། སྔགས་དང་། རིག་པའི་དངོས་གྲུབ་ཀྱི་མཚན་ཉིད་མྱུར་དུ་ཐམས་ཅད་འགྲུབ་
[300a.2]པར་འགྱུར་རོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གསང་བའི་ངག་གི་ཕྱག་རྒྱ་བསྒྲུབ་པ་བསྟན་ནས། ད་ནི་དེ་ལ་འདི་ནི་ཞེས་བྱ་བ་ལ་སོགས་པས་དེ་བཞིན་གཤེགས་པའི་རིགས་ཐམས་ཅད་ཀྱི་སེམས་ཀྱི་གསང་བའི་ཕྱག་རྒྱ་བསྒྲུབ་པ་གསུངས་པ་
[300a.3]ཡིན་ནོ། །གང་གིས་ཤེ་ན། རྟག་ཏུ་འདོད་པ་བཅོམ་ལྡན་འདས། །ཞེས་བྱ་བ་སྨོས་ཏེ། ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ཡིན་ནོ་ཞེས་བྱ་བའི་དོན་ཏོ། །སེམས་ཅན་ཐམས་ཅད་བདེ་སྦྱིན་པ། །ཞེས་བྱ་བ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ལ་དམིགས་པའི་རྣལ་འབྱོར་
[300a.4]འདིས་འཇིག་རྟེན་དང་འཇིག་རྟེན་ལས་འདས་པའི་བདེ་བ་བསྐྱེད་པས་ན་བདེ་བ་སྦྱིན་ནོ། །རྡོ་རྗེ་སེམས་དཔའ་བདག་ཉིད་དུ། །ཞེས་བྱ་བ་ལ་སོགས་པ་ནི་གོ་སླའོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པ་དང་དེ་བཞིན་གཤེགས་པའི་རིགས་ཀྱི་ཟློས་པ་པོ་རྣམས་ཀྱིས་བདག་ཉིད་
[300a.5]གཟུགས་བརྙན་དང་མཚུངས་པ་དང་། རང་གི་ལྷའི་གཟུགས་གདོད་མ་ནས་མ་སྐྱེས་པ་ཡིན་ནོ་ཞེས་བསྒོམ་ཞིང་བཟླས་པ་བྱའོ། །ད་ནི་རྡོ་རྗེའི་རིགས་ཀྱི་དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། སེམས་ཅན་ཀུན་ལ་ཕན་པ་དང་། ཞེས་བྱ་བ་ལ་སོགས་པ་ནི་གོ་སླའོ། །ཕན་པ་དེའི་
[300a.6]དོན་ནི་འདི་སྐད་སྟོན་པ་ཡིན་ཏེ། རྡོ་རྗེའི་རིགས་ཀྱི་ཟློས་པ་པོས་མ་རུངས་པ་ཐམས་ཅད་ཁྲོ་བོས་འདུལ་བའི་ཕྱིར་རོ། །སེམས་ཅན་ཐམས་ཅད་རྡོ་རྗེའི་རིགས་ཀྱི་རང་བཞིན་དུ་བསམས་ལ། རང་གི་ལྷའི་ང་རྒྱལ་དུ་བསྐྱེད་ནས་བཟླས་པར་བྱའོ། །ད་ནི་པདྨའི་རིགས་ཀྱི་དེ་ལ་འདི་ནི།
[300a.7]ཞེས་བྱ་བ་ལ་སོགས་པ་གསུངས་ཏེ། ཇི་ལྟར་པདྨ་རབ་ཆགས་པ། །ཞེས་བྱ་བ་ལ་སོགས་པ་ནི་གོ་སླའོ། །སྲིད་པའི་ཆགས་པས་དེ་འགྲུབ་འགྱུར། །ཞེས་བྱ་བ་ནི་འདོད་པ་དང་གཟུགས་དང་གཟུགས་མེད་པའི་སེམས་ཅན་གྱི་སྲིད་པ་སྨིན་ཞིང་གྲོལ་བར་ནུས་པའོ། །འདི་སྐད་སྟོན་པ་ཡིན་
[300b]
[300b.1]ཏེ། པདྨའི་རིགས་ཀྱི་ཟློས་པ་པོས་སེམས་ཅན་གྱི་ཁམས་མ་ལུས་པ་པདྨའི་རིགས་ཀྱི་རང་བཞིན་དུ་བསྐྱེད་ནས། ཐམས་ཅད་བདག་ཡིན་ནོ་ཞེས་ནུས་པ་བསྐྱེད་ལ་བཟླས་པ་བྱའོ། །ནོར་བུའི་རིགས་ཀྱི་དེ་ལ། འདི་ནི་ནོར་བུའི་རིགས་ཀྱི་གསང་བ་ཞེས་བྱ་བ་ལ་སོགས་པ་གསུངས་སོ། །ནམ་
[300b.2]ཞིག་སེམས་ཅན་ཐམས་ཅད་ཀྱི། །ཞེས་བྱ་བ་ལ་སོགས་པ་ནི་གོ་སླའོ། །དེ་ནི་འདི་སྐད་སྟོན་པ་ཡིན་ཏེ། ནོར་བུའི་རིགས་ཀྱི་ཟློས་པ་པོས་སེམས་ཅན་གྱི་ཁམས་ཐམས་ཅད་ཀྱི་བྱམས་པ་དང་། སྙིང་རྗེའི་ཚུལ་དུ་བལྟས་ལ་རིན་པོ་ཆེའི་རིགས་ཀྱིས་དབང་བསྐུར་བས་དབང་བསྐུར་ལ།
[300b.3]བསམ་པ་ཡོངས་སུ་རྫོགས་པའི་རིན་པོ་ཆེའི་རིགས་སུ་བསྐྱེད་ནས། །རང་གི་ལྷའི་ང་རྒྱལ་བསྐྱེད་པར་བྱའོ། །ཇི་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གསང་བའི་ཕྱག་རྒྱའི་སེམས་ཅན་གྱི་བསྒྲུབ་པ་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིག་པ་ཐམས་
[300b.4]ཅད་ཀྱི་གསང་བའི་རྡོ་རྗེ་ཕྱག་རྒྱ་བསྒྲུབ་པ་ནི། དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་ལངས་པའམ་འདུག་པའམ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པའི་རྣལ་འབྱོར་རམ་དེ་བཞིན་གཤེགས་པའི་རིགས་ཀྱི་རྣལ་འབྱོར་ཉིན་རེ་ཞིང་ལན་ཅིག་བྱ་བའམ། དེ་
[300b.5]བཞིན་གཤེགས་པའི་རྣལ་འབྱོར་གྱིས་ལག་པ་གཡོན་པ་ཆོས་གོས་འཛིན་པའི་ཁུ་ཚུར་གྱིས་གཡོགས་ཏེ། སྤྱོད་ལམ་རྣམ་པ་བཞིར་རང་གི་ལྷའི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་གང་ཡང་རུང་བ་དེ་ཟློས་ཤིང་། རྟག་ཏུ་རང་གི་ལྷའི་གཟུགས་སུ་བདག་ཉིད་བསྒོམ་པར་བྱའོ། །དེ་
[300b.6]བཞིན་གཤེགས་པའི་རིགས་ཀྱི་རྣལ་འབྱོར་པས་ཀྱང་གཡོན་པའི་རྡོ་རྗེ་ཁུ་ཚུར་གྱིས་བྱའོ། །ད་ནི་རྡོ་རྗེའི་རིགས་གསུངས་པ་ནི། དེ་ལྟ་དེ་ལྟར་གནས་ནས་ཀྱང་། །ཇི་ལྟ་ཇི་ལྟར་བྱེད་ཀྱང་རུང་། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་རྡོ་རྗེ་རིགས་ཀྱི་རྣལ་འབྱོར་བྱས་ལ། ཕྱག་བཞིའི་མཐར་
[300b.7]ཐུག་པའི་ཆོ་ག་རྗེས་སུ་སྤྱད་ནས། གཡོན་པའི་ཁྲོ་བོ་ཁུ་ཚུར་གྱི་མཛུབ་མོ་ཆོས་གོས་ཀྱིས་གཡོགས་ལ། །སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་ལས་གང་ཡང་རུང་བའི་ཟློས་པ་བྱེད་ཅིང་རྟག་ཏུ་རྣལ་འབྱོར་པས་བསྒོམ་པར་བྱའོ། །པདྨའི་རིགས་ཀྱི་དེ་ལ་འདི་ནི་ཞེས་བྱ་བ་ལ་
[301a]
[301a.1]སོགས་པ་གསུངས་ཏེ། ལག་པ་གཡོན་པས་པདྨའི་ཁུ་ཚུར་བཅིངས་ཏེ། སྦས་ནས་ནི་ཞེས་བྱ་བ་ལ་སོགས་པ་ལ། སྔ་མ་བཞིན་དུ་པདྨའི་རིགས་ཀྱི་རྣལ་འབྱོར་བྱས་ནས། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། གཡོན་པའི་པདྨ་ཁུ་
[301a.2]ཚུར་གོས་ཀྱིས་གཡོགས་ཏེ། སྔ་མ་བཞིན་དུ་རྣལ་འབྱོར་བྱའོ། །ནོར་བུའི་རིགས་ཀྱི་དེ་ལ་ཞེས་བྱ་བ་ལ་སོགས་པ་གསུངས་ཏེ། གཡོན་པའི་རིན་ཆེན་ཁུ་ཚུར་ནི། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་ཉིན་རེ་ཞིང་ལན་ཅིག་ནོར་བུའི་རིགས་ཀྱི་རྣལ་འབྱོར་བྱས་ལ་ཕྱག་བཞིའི་མཐར་
[301a.3]ཐུག་པའི་ཆོ་ག་རྗེས་སུ་སྤྱད་དེ། རྫོགས་པར་གྱུར་བ་དང་། གཡོན་པའི་རིན་པོ་ཆེའི་ཁུ་ཚུར་གོས་ཀྱིས་གཡོགས་ཏེ། སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་ལས་གང་ཡང་རུང་བ་ཟློས་ཤིང་རང་གི་ལྷའི་གཟུགས་སུ་རྟག་ཏུ་བསྒོམ་པར་བྱའོ། །ད་ནི་རིགས་ཐམས་
[301a.4]ཅད་ཀྱི་རྡོ་རྗེའི་ཕྱག་རྒྱའི་ཐུན་མོང་དུ་བསྒྲུབ་པའི་ཆོ་ག་ནི་དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། ཕྱག་རྒྱ་ཆེན་པོའི་ཚུལ་དུ་ནི། །ཞེས་བྱ་བ་ལས་ལྷའི་ཁྱད་པར་གང་གིས་སྐུའི་གསང་བ་གང་ཡིན་པ་འདི་ནི་ཕྱག་རྒྱ་ཆེན་པོ་སྟེ། དེ་དང་དེའི་ངོ་བོར་བདག་ཉིད་བསྒོམ་པའི་སྦྱོར་བ་བྱའོ། །དེ་
[301a.5]ཉིད་ཀྱི་དོན་ནི། རང་གི་སེམས་དཔའི་ཏིང་ངེ་འཛིན། །ཞེས་བྱ་བ་སྨོས་ཏེ། ལྷག་མ་ནི་གོ་སླའོ། །དཔལ་དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ལས། རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མ་བཤད་པ་རྫོགས་སོ།། །།དེ་ལྟར་རྩ་བའི་རྒྱུད་དང་།
[301a.6]ཕྱི་མ་དང་། རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མ་བཤད་ནས། ད་ནི་ཇི་སྐད་དུ་བཤད་པའི་དཀྱིལ་འཁོར་རྣམས་སུ་སློབ་མ་བཅུག་ལ། དབང་བསྐུར་བ་ཐམས་ཅད་ཀྱིས་དབང་བསྐུར་ནས། སྔ་མ་བཞིན་དུ་ལྷ་ཐམས་ཅད་གཤེགས་སུ་གསོལ་བ་སྤྲུལ་པ་རྣམས་རང་གི་ལུས་ལ་གཞུག་
[301a.7]པར་བྱས་ནས། མིའི་འཇིག་རྟེན་དུ་མངོན་པར་བྱང་ཆུབ་པའི་ཕྱིར། རང་གི་སྙིང་གའི་སེམས་དཔའི་རྡོ་རྗེ་ལ་མཚན་བརྒྱ་རྩ་བརྒྱད་པས་ཡང་དག་པར་བསྟོད་ནས། སློབ་དཔོན་ཅི་བདེ་བར་གནས་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་
[301b]
[301b.1]ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དབང་བསྐུར་བའི་རྗེས་ཐོགས་ཉིད་ལ། རྗེས་སུ་གནང་བའི་དབང་བསྐུར་བར་བྱའོ་ཞེས་བྱ་བའི་དོན་ཏོ། །ཕྱག་ན་རྡོ་རྗེ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །མཚན་བརྒྱ་རྩ་བརྒྱད་པ་འདིས་གསོལ་བ་གདབ་བོ་ཞེས་བྱ་བ་ནི་བཤད་
[301b.2]མ་ཐག་པའི་རྡོ་རྗེ་སེམས་དཔའ་ལ་གསོལ་བ་འདེབས་པ་ནི་ཆོས་ཀྱི་འཁོར་ལོ་བསྐོར་བའི་དོན་དུ་གཉེར་བའོ། །བཅོམ་ལྡན་འདས་ནི་རྣམ་པར་སྣང་མཛད་དོ། །རྡོ་རྗེ་དབྱིངས་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་ཀྱི་རྡོ་རྗེ་དབྱིངས་ཉིད་ནི་རྒྱུད་
[301b.3]ཡིན་པའི་ཕྱིར་རྡོ་རྗེ་དབྱིངས་སོ། །སེམས་དཔའ་ཆེ་ཞེས་བྱ་བ་ནི་སེམས་དཔའ་ཆེན་པོ་འདི་ལ་མངའ་བས་ན་སེམས་དཔའ་ཆེན་པོའོ། །དེ་བཞིན་གཤེགས་པ་ཐམས་ཅད་ཀྱི་ཆོས་བདག་མེད་པའི་ཡེ་ཤེས་ནི་འདི་ཡིན་ནོ་ཞེས་བྱ་བའི་དོན་ཏོ། །སེམས་ཅན་དོན་ཞེས་བྱ་བ་ནི་སེམས་ཅན་
[301b.4]གྱི་དོན་འདི་ལ་མངའ་བས་ན་སེམས་ཅན་གྱི་དོན་ཏེ། རིན་པོ་ཆེའི་རིགས་ཀྱི་ངོ་བོས་སེམས་ཅན་གྱི་དོན་མཛད་པའི་ཕྱིར་རོ། །མཆོག་བདག་ཉིད་ཅེས་བྱ་བ་ལ། མཆོག་ནི་ཆོས་ཀྱི་དབྱིངས་སོ། །དེ་ཉིད་ཀྱི་བདག་ཏུ་གྱུར་པ་འདི་ལ་མངའ་བས་ན་མཆོག་བདག་ཉིད་དོ། །ཤཱཀྱའི་
[301b.5]རྒྱལ་པོ་ཞེས་བྱ་བ་ནི་ཤཱཀྱ་རྣམས་ཀྱི་རྒྱལ་པོར་འགྱུར་བས་ན་ཤཱཀྱའི་རྒྱལ་པོའོ། །ཡེ་ཤེས་ཆེ་ཞེས་བྱ་བ་ནི་ཡེ་ཤེས་ཆེན་པོ་འདི་ལ་མངའ་བས་ན་ཡེ་ཤེས་ཆེའོ། །ཐམས་ཅད་མཁྱེན་པའི་ཡེ་ཤེས་ཀྱི་དོན་ཐམས་ཅད་ཁོང་དུ་ཆུད་པའི་ངོ་བོ་ནི་དེ་བཞིན་གཤེགས་པ་ཡིན་ནོ་ཞེས་བྱ་བའི་
[301b.6]དོན་ཏོ། །རྡོ་རྗེ་བདག་ཉིད་ཅེས་བྱ་བ་ནི་སྐུ་དང་། གསུང་དང་། ཐུགས་རྡོ་རྗེའི་རང་བཞིན་གྱི་བདག་ཉིད་གང་ཡིན་པ་དེ་ནི་རྡོ་རྗེ་བདག་ཉིད་དེ་མཚན་བདུན་ཡིན་ནོ། །སེམས་དཔའ་འབྱུང་བ་ཞེས་པ་ནི་རྡོ་རྗེ་སེམས་དཔའ་ལ་སོགས་པ་དེ་ལས་སྐྱེ་བའོ། །དེའི་དོན་ཞེས་བྱ་བ་ནི་ཀུན་རྫོབ་
[301b.7]དང་། དོན་དམ་པའི་དེ་ཁོ་ན་ཉིད་ཀྱི་ཡིན་ནོ། །སེམས་ཅན་རྒྱུ་ཞེས་བྱ་བ་ནི། ཁམས་གསུམ་པ་ན་སྤྱོད་པའི་སེམས་ཅན་བསྐྱེད་པའི་རྒྱུ་ཡིན་པའི་ཕྱིར་རོ། །ཚུལ་ཆེན་པོ་ཞེས་བྱ་བ་ནི་ཚུལ་ཡང་ཡིན་ལ་ཆེན་པོ་ཡང་ཡིན་པས་ན་ཚུལ་ཆེན་པོ་སྟེ། ཐར་པ་ཐམས་ཅད་
[302a]
[302a.1]ཐོབ་པའི་ལམ་ཡིན་པས་སོ། །སེམས་ཅན་དོན་ཆེན་ཞེས་བྱ་བ་ནི་རིན་པོ་ཆེའི་རིགས་ཀྱི་རང་བཞིན་གྱི་སེམས་ཅན་གྱི་དོན་འདི་ལ་མངའ་བས་ན་དོན་ཆེན་ནོ། །དགོས་པའི་དོན་འདི་ལས་ཀྱི་དཀྱིལ་འཁོར་གྱི་མཆོད་པའི་ངོ་བོའི་དགོས་པ་ལས་བྱ་བ་ཞེས་བྱ་བ་སྟེ། དེ་ཉིད་ཀྱི་དོན་
[302a.2]འདི་ལ་མངའ་བས་ན་དགོས་པའོ། །སེམས་དཔའ་སེམས་དཔའ་ཞེས་བྱ་བ་ནི་སེམས་དཔའ་ནི་ཟླ་བའི་དཀྱིལ་འཁོར་ཡིན་ལ། དེའི་སྟེང་གི་ཟླ་བའི་དཀྱིལ་འཁོར་གཉིས་པ་ལ་སེམས་དཔའ་སེམས་དཔའ་ཞེས་བརྗོད་དེ་མཚན་བདུན་ཡིན་ནོ། །སངས་རྒྱས་ཆོས་ཞེས་བྱ་བ་ནི་སངས་རྒྱས་རྣམས་
[302a.3]ཀྱི་ཆོས་ནི་སངས་རྒྱས་ཆོས་ཏེ། རང་བཞིན་གྱིས་རྣམ་པར་དག་པའི་ཏིང་ངེ་འཛིན་ཏོ། །ཆོས་ཆེན་པོ་ཞེས་བྱ་བ་ནི་ཤེས་རབ་ཡེ་ཤེས་ཀྱི་ངོ་བོས་ཐམས་ཅད་དུ་སོང་བས་ན་ཆོས་ཆེན་པོའོ། །ཆོས་ཀྱི་འཁོར་ལོ་ཞེས་བྱ་བ་ནི་དཀྱིལ་འཁོར་ཐམས་ཅད་ཀྱི་ངོ་བོ་ཡིན་པའི་ཕྱིར་ཆོས་ཀྱི་འཁོར་ལོའོ། །
[302a.4]རབ་བསྐོར་བ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་ཕྱོགས་བཅུ་རབ་ཏུ་བསྐོར་བས་ན་རབ་བསྐོར་བའོ། །སྨྲ་བ་ཆེ་ཞེས་བྱ་བ་ནི་རྡོ་རྗེ་གསུང་བའི་ངོ་བོས་ཐམས་ཅད་སོང་བས་ན་སྨྲ་བ་ཆེའོ། རང་རིག་མཆོག་ཅེས་བྱ་བ་ནི་རྡོ་རྗེ་གསུང་བའི་ངོ་བོས་དེ་བཞིན་གཤེགས་པ་ཐམས་
[302a.5]ཅད་སྤྲོས་པ་མེད་པའི་ཆོས་ལ་ངེས་པར་སྦྱོར་ཞིང་མཆོག་ཡིན་པའི་ཕྱིར་རང་རིག་མཆོག་གོ། །སེམས་དཔའ་ཆེན་པོ་ཞེས་བྱ་བ་ནི་ངག་གི་སྤྲོས་པ་ཐམས་ཅད་དང་བྲལ་བའི་ཡེ་ཤེས་ཀྱིས་ཐམས་ཅད་སོང་བའི་ཕྱིར་རྡོ་རྗེ་གསུངས་བའི་ངོ་བོ་ཉིད་ནི་སེམས་དཔའ་ཆེན་པོའོ། །མཚན་བདུན་ཡིན་
[302a.6]ནོ། །ལས་ཆེན་ཞེས་བྱ་བ་ནི་རྡོ་རྗེ་ལས་ཀྱི་ངོ་བོས་སངས་རྒྱས་ཀྱི་སྤྲུལ་པའི་ལས་དང་། སེམས་ཅན་གྱི་དོན་གྱི་ལས་ཀྱིས་ཐམས་ཅད་དུ་སོང་བས་ན་ལས་ཆེན་པོའོ། །བསྲུང་བ་ཆེ་ཞེས་བྱ་བ་ནི་ཕྱིར་མི་ལྡོག་པའི་ངོ་བོའི་རྡོ་རྗེ་བསྲུང་བས་ཕྱིར་མི་ལྡོག་པའི་བརྩོན་འགྲུས་ཀྱི་ངོ་བོ་རྡོ་རྗེ་བསྲུང་
[302a.7]བ་ཡིན་པས་ན་བསྲུང་བ་ཆེའོ། །ལས་རྣམས་ཐམས་ཅད་ཅེས་བྱ་བ་ནི་སོ་སོར་རྟོག་པའི་བརྩོན་འགྲུས་ཀྱི་ངོ་བོ་ཐམས་ཅད་བསྲུང་ཞིང་སྐྱོང་བར་བྱེད་པ་ནི་རྡོ་རྗེ་གནོད་སྦྱིན་ནོ། །ལས་རྣམས་ཐམས་ཅད་རབ་སྒྲུབ་བྱེད། །ཅེས་བྱ་བ་ནི་རྡོ་རྗེ་གནོད་སྦྱིན་གྱི་གཟུགས་ཀྱིས་སེམས་ཅན་
[302b]
[302b.1]གདུག་པ་ཅན་རྣམས་འདུལ་བར་བྱེད་པས་ན་རབ་བསྒྲུབ་པའོ། །བདག་ཉིད་ཆེན་པོ་ཞེས་བྱ་བ་ནི་འཁོར་གསུམ་རྣམ་པར་དག་པའི་མཚན་ཉིད་ཅན་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་བདག་ཉིད་རང་བཞིན་འདི་ལ་མངའ་བས་ན་བདག་ཉིད་ཆེན་པོའོ། །འགྲོ་བ་རྟེསྤྱོད་མཆོག་ཅེས་བྱ་བ་
[302b.2]ནི་འགྲོ་བ་རྣམས་ཀྱི་སྤྱོད་པ་ནི་སེམས་དཔའི་སྤྱོད་པ་སྟེ། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་ལ་སྤྱོད་པ་དེ་རྣམས་ལས་མཆོག་ཏུ་གྱུར་པས་འགྲོ་བ་སྤྱོད་མཆོག་སྟེ། སེམས་དཔའི་ཕྱག་རྒྱ་བཅིང་བའི་བརྩོན་འགྲུས་ཀྱི་སྤྱོད་པ་དེ་རྣམས་ལས་མཆོག་ཏུ་གྱུར་པས་ནི་
[302b.3]རྡོ་རྗེ་ཁུ་ཚུར་རོ། །སེམས་དཔའི་རྒྱུ་ཁྱོད་ཅེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་སེམས་དཔའ་དེ་དག་གི་རྒྱུ་ནི་རྡོ་རྗེ་ཁུ་ཚུར་ཏེ། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་འཆིང་བའི་དངོས་གྲུབ་བསྐྱེད་པའི་ཕྱིར་རོ། །ཕ་རོལ་ཕྱིན་པ་ཀུན་བརྙེས་པ། །ཞེས་བྱ་བ་ལ་ཕ་རོལ་ཏུ་ཕྱིན་པ་
[302b.4]ཀུན་ནི་བཅུ་དྲུག་གོ། །ཐོབ་པ་ནི་ཕ་རོལ་ཏུ་ཕྱིན་པ་ཐོབ་པའོ། །ཐམས་ཅད་མཁྱེན་པ་ཀུན་མཁྱེན་ཏོ། །དུས་གསུམ་གྱི་དོན་ཐམས་ཅད་ཡོངས་སུ་མཁྱེན་པའི་ཕྱིར་རོ། །སེམས་སོ་སོར་རྟོག་པ་ལས་རྟོག་པའི་ཕྱིར་ན་ཡེ་ཤེས་སོ། །མཁྱེན་པ་ནི་དོན་ཐམས་ཅད་ཡང་དག་པར་
[302b.5]མཁྱེན་པས་ན་ཀུན་མཁྱེན་པའོ། །སེམས་དཔའ་ཀུན་ཞེས་བྱ་བ་ནི་ཁམས་གསུམ་པ་ན་སྤྱོད་པའི་སེམས་ཅན་ཐམས་ཅད་ཀྱི་རང་བཞིན་ནོ། །ཡིན་པའི་ཕྱིར་རོ་ཞེས་བྱ་བའི་དོན་ཏོ། །ཆོས་ལུགས་སུ་སྤྲུལ་པ་མཛད་པའི་ཕྱིར་ནི་སེམས་ཅན་ཀུན་ནོ། །ཐབས་ཆེན་པོ་འདི་ལ་མངའ་བས་
[302b.6]ན་ཐབས་ཆེན་པོའོ། །ཕྱག་རྒྱ་ཆེན་པོ་ལ་སོགས་པའི་ངོ་བོས་ཐ་དད་དུ་སོང་བའི་ཕྱིར་རོ། །ཤེས་རབ་ཆེན་པོ་ཁྱོད་ཅེས་བྱ་བ་ནི་ཤེས་རབ་ཀྱི་ཆེན་པོ་འདི་ལ་མངའ་བས་ན་ཤེས་རབ་ཆེན་པོ་སྟེ། རང་བཞིན་གྱིས་རྣམ་པར་དག་པའི་ཆོས་མངོན་སུམ་དུ་མཛད་པའི་ཤེས་རབ་ཀྱི་ཕ་རོལ་ཏུ་ཕྱིན་
[302b.7]པའི་ངོ་བོས་ཐ་དད་དུ་སོང་བའི་ཕྱིར་ཐུགས་རྗེ་ཆེན་པོ་ཞེས་བྱ་བ་ནི་ཆེན་པོ་ཡང་ཡིན་ལ་ཐུགས་རྗེ་ཡང་ཡིན་པས་ན་ཐུགས་རྗེ་ཆེན་པོ་སྟེ། དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པའི་ཕྱིར་རོ། །མཆོག་གི་མཆོག་ཅེས་བྱ་བ་ནི་མཆོག་རྣམས་ཀྱི་མཆོག་གོ། །ཐུགས་རྗེ་དང་
[303a]
[303a.1]ལྡན་པ་རྣམས་ཀྱི་ནང་ན་ཐུགས་རྗེ་ཆེན་པོ་མཆོག་ཡིན་ནོ་ཞེས་བྱ་བའི་དོན་ཏོ། །ཐུགས་རྗེས་ཞེས་བྱ་བ་ནི་སྙིང་རྗེའི་ཡོན་ཏན་གྱི་རང་བཞིན་ཡིན་པའི་ཕྱིར་ཐུགས་རྗེའོ། །ཐུགས་རྗེའི་རང་བཞིན་བདག་ཉིད་འདི་ལ་མངའ་བས་ན་ཐུགས་རྗེའི་བདག་ཉིད་ཅན་ཡིན་
[303a.2]ནོ། །ཐམས་ཅད་གཏོང་བ་ཞེས་བྱ་བ་ནི། ཕྱི་དང་ནང་གི་དངོས་པོ་ཡོངས་སུ་གཏོང་བས་ན་ཐམས་ཅད་གཏོང་བའོ། །བྱམས་པ་ཆེན་ཞེས་བྱ་བ་ནི། དམིགས་པ་མེད་པའི་བྱམས་པ་ཆེན་པོ་འདི་ལ་མངའ་བས་ན་བྱམས་པ་ཆེན་པོའོ། །ཀུན་མཛད་ཅེས་བྱ་བ་ནི་སེམས་ཅན་གྱི་དོན་ཀུན་མཛད་
[303a.3]པས་ན་ཀུན་མཛད་དོ། །ཤཱཀྱ་སེང་གེ་ཞེས་བྱ་བ་ནི་མི་འཇིགས་པ་བཞི་དང་ལྡན་པས་ན་སེང་གེས་འཇིགས་པ་ལྟ་བུ་མི་མངའ་བས་ན་སེང་གེའོ། །ཤཱཀྱ་ཆེ་ཞེས་བྱ་བ་ནི་ཤཱཀྱའི་རིགས་ཀྱི་སྐྱེ་བ་ཡོངས་སུ་བཟུང་བས་ན་ཤཱཀྱའོ། །ཤཱཀྱ་ཐུབ་པ་ཞེས་བྱ་བ་ནི་ཤཱཀྱ་རྣམས་ཐུབ་པས་ན་ཤཱཀྱ་ཐུབ་པ་
[303a.4]སྟེ། ལུས་དང་ངག་དང་ཡིད་ཐུབ་པ་དང་ལྡན་པས་ན་ཐུབ་པ་ཆེའོ། །འདུལ་ཆེན་པོ་ཞེས་བྱ་བ་ནི་འདིས་སེམས་ཅན་འདུལ་བྱེད་པས་ན་འདུལ་བ་སྟེ། འདུལ་བ་ཡང་ཡིན་ལ་ཆེན་པོ་ཡིན་པས་ན་འདུལ་བ་ཆེའོ། །སེམས་ཅན་འདུལ་བར་བྱེད་པས་ན་ཐམས་ཅད་དུ་ཁྱབ་པ་ཡིན་ཞེས་བྱ་བའི་
[303a.5]ཐ་ཚིག་གོ། །ཁྱབ་པ་པོ་ཞེས་བྱ་བ་ནི་བརྟན་པ་དང་གཡོ་བའི་དངོས་པོ་ནི་བདག་ཉིད་དུ་འགྱུར་བའི་ཕྱིར་ཁྱབ་བདག་གོ། །འགྲོ་དོན་ཞེས་བྱ་བ་ནི་དྲང་བའི་དོན་དུ་གསུངས་པས་ན་འགྲོ་དོན་ནོ། །འདུལ་བྱེད་དུ་ངེས་པ་དེ་རྣམས་ལ་མཆོག་ཏུ་གྱུར་པས་ན་འདུལ་མཆོག་གོ། །བརྒྱད་ཆོས་དབྱིངས་ཞེས་
[303a.6]བྱ་བ་ནི་གཟུང་བ་དང་འཛིན་པ་སྤངས་པའི་སེམས་ནི་ཆོས་ཀྱི་དབྱིངས་སོ། །མཉམ་བརྙེས་ཞེས་བྱ་བ་ལ་དེ་བཞིན་གཤེགས་པ་དང་མཉམ་པ་སྟེ། དེ་བཞིན་གཤེགས་པ་མངོན་སུམ་སྟེ། བྱེད་པ་ནི་མཉམ་པར་བརྙེས་པའོ། །ཆོས་ཀྱི་དབྱིངས་ཞེས་བྱ་བ་ནི་དེ་བཞིན་གཤེགས་པའི་
[303a.7]རང་བཞིན་ཉིད་ཆོས་ཀྱི་དབྱིངས་སོ། །དེ་བཞིན་གཤེགས་པ་ཞེས་བྱ་བ་ནི་ཆོས་ཐམས་ཅད་ཀྱི་དེ་བཞིན་ཉིད་རྟོགས་པ་ནི་དེ་བཞིན་གཤེགས་པའོ། །རྡོ་རྗེ་མགོན་པོ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་དེ་དག་གི་བདག་གི་བདེ་བ་ཆེན་པོའོ། །ཆེན་པོ་ཡང་ཡིན་ལ་མགོན་པོ་ཡང་
[303b]
[303b.1]ཡིན་པས་ན་མགོན་པོ་ཆེན་པོ་སྟེ། རྣམ་པར་སྣང་མཛད་ཆེན་པོའི་རང་བཞིན་ཆོས་ཀྱི་དབྱིངས་སོ། །སེམས་ཅན་ཚོགས་ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་སེམས་ཅན་གྱི་གཟུགས་སུ་བཟུང་ནས་བཞུགས་པའི་ཕྱིར་རོ། །འོད་ཆེན་པོ་འདི་ལ་མངའ་བས་ན་འོད་ཆེན་ཏེ།
[303b.2]ནམ་མཁའ་ཐམས་ཅད་འོད་ཀྱིས་ཁྱབ་པའི་ཕྱིར་རོ། །སྣང་བ་ཆེ་ཞེས་བྱ་བ་ནི་སྣང་བ་ཆེན་པོ་འདི་ལ་མངའ་བས་ན་སྣང་བ་ཆེ་སྟེ། རྡོ་རྗེ་ཉི་མ་ཡེ་ཤེས་ཀྱི་ཉི་མའི་སྣང་བས་ཕྱི་ནང་གི་མུན་པ་དང་བཅས་པ་བསལ་བར་བྱེད་པའི་ཕྱིར་རོ། །བརྩོན་འགྲུས་ཆེན་པོ་ཞེས་བྱ་བ་ནི་བརྩོན་འགྲུས་ཆེན་པོ་འདི་
[303b.3]ལ་མངའ་བས་ན་བརྩོན་འགྲུས་ཆེན་པོ་སྟེ། བྱང་ཆུབ་ཆེན་པོ་ཡོངས་སུ་སྦྱོང་བའི་བརྩོན་འགྲུས་དེ་ཐམས་ཅད་དུ་ཁྱབ་པའི་ཕྱིར་རོ། །སྟོབས་ཆེ་ཞེས་བྱ་བ་ནི་དེ་བཞིན་གཤེགས་པའི་སྟོབས་བཅུའི་ཆེན་པོ་འདི་ལ་མངའ་བས་ན་སྟོབས་ཆེན་པོའོ། །དཔའ་ཆེན་པོ་ནི་ཡིན་པས་ན་དཔའ་ཆེན་པོ་སྟེ།
[303b.4]སོ་སོར་རྟོག་པའི་བརྩོན་འགྲུས་ཀྱི་རང་བཞིན་རྡོ་རྗེ་གནོད་སྦྱིན་གྱི་གཟུགས་བདུད་བཞི་ལས་རྒྱལ་བའི་ཕྱིར་རོ། །རབ་དཔའ་མཆོག་ཅེས་བྱ་བ་ནི་ཤིན་ཏུ་དཔའ་བས་ན་རབ་ཏུ་དཔའ་བ་སྟེ། དེ་དག་གི་རབ་དགའ་མཆོག་གོ། །རང་བཞིན་གྱིས་འོད་གསལ་བའི་སྐུ་ནན་ཏན་དུ་བྱེད་པའི་བརྩོན་
[303b.5]འགྲུས་ཀྱི་རང་བཞིན་རྡོ་རྗེ་ཁུ་ཚུར་གཟུགས་ཀྱི་ཁམས་ན་སྤྱོད་པའི་བག་ཆགས་དང་བཅས་པའི་ཉོན་མོངས་པ་རྩད་ནས་འདོན་པའི་ཕྱིར་བདེ་སྤྱོད་ཅེས་བྱ་བ་ལ། བདེ་བ་ནི་སངས་རྒྱས་ཐམས་ཅད་ཀྱི་བདེ་ཆེན་པོའོ། །དེའི་བདག་ཉིད་དུ་མྱོང་ཞིང་སྤྱོད་པས་ན་བདེ་སྤྱོད་དེ། །དཔའ་བ་ཁྱེད་ཅེས་བྱ་
[303b.6]བ་ནི་དཔའ་བ་གཟི་བརྗིད་ཅན་ཏེ། བཅོམ་ལྡན་འདས་རྡོ་རྗེ་ཉི་མ་རྒྱལ་པོས་ཐམས་ཅད་ཟིལ་གྱིས་གནོན་པའོ། །ཚངས་པ་ཞེས་བྱ་བ་ནི་ཚངས་པས་འདུལ་བ་རྣམས་ལ་དེའི་གཟུགས་སྟོན་པའི་ཕྱིར་རོ། །རང་བྱུང་ཞེས་བྱ་བ་ནི་སློབ་དཔོན་མེད་པར་ཐམས་ཅད་མཁྱེན་པས་མཁྱེན་ཞིང་རྟོགས་པའི་
[303b.7]ཕྱིར་བསོད་ནམས་ཡེ་ཤེས་ཀྱི་ཚོགས་དང་ལྡན་པས་བཅོམ་ལྡན་འདས་ཞེས་བརྗོད་ལ། དེ་འདི་ལ་མངའ་བས་ན་བཅོམ་ལྡན་འདས་སོ། །ཤཱཀྱའི་དཔའ་བོ་ཐུབ་ཆེན་པོ། །ཞེས་བྱ་བ་ནི་ཤཱཀྱ་རྣམས་ལ་དཔའ་བས་ན་ཤཱཀྱའི་དཔའ་བོ་སྟེ། ཕྱིར་མི་ལྡོག་པའི་བརྩོན་འགྲུས་ཀྱི་ཆོས་སོ། །
[304a]
[304a.1]དེ་ཉིད་ཉན་ཐོས་དང་། རང་རྒྱལ་བ་དང་། བྱང་ཆུབ་སེམས་དཔའ་རྣམས་ལས་ཁྱད་པར་དུ་གྱུར་པས་ན་ཐུབ་པ་ཆེའོ། །ཀུན་བདག་ཆེ་ཞེས་བྱ་བ་ནི་དངོས་པོ་ཐམས་ཅད་ཀྱི་ཆོས་ཀྱི་རང་བཞིན་ཡིན་པའི་ཕྱིར་ཀུན་བདག་གོ། །ཐུབ་པ་ཞེས་བྱ་བ་ནི་གདུལ་བྱ་རྣམས་ལ་
[304a.2]ཐུབ་པའི་གཟུགས་བསྟན་པས་ཐུབ་པའོ། །དག་པ་ཞེས་བྱ་བ་ནི་ལས་དང་ཉོན་མོངས་པའི་སྒྲིབ་པ་སྤངས་པས་དག་པའོ། །ཆོས་རྒྱལ་ཁྱོད་ལ་ཞེས་བྱ་བ་ནི་འཇིག་རྟེན་གསུམ་གྱི་ཆོས་ཀྱི་རྒྱལ་སྲིད་ཐོབ་པའི་ཕྱིར་ན། ཆོས་རྒྱལ་ལོ། །མཚན་བརྒྱད་ཡིན་ནོ། །ནམ་མཁའ་སྐུ་
[304a.3]སྟེ་ཞེས་བྱ་བ་ནི་དོན་དམ་པར་གཟུགས་ཀྱི་སྐུ་མེད་པས་ན་དེ་དེ་བཞིན་ཉིད་ཀྱིས་གཟུགས་དང་སེམས་ཅན་མེད་པའི་སྐུ་ལ་ནམ་མཁའི་སྐུ་ཞེས་བྱ་སྟེ་སྐུ་མེད་པའོ། །སྐུའི་མཆོག་ཅེས་བྱ་བ་ནི་དེ་བཞིན་ཉིད་ཀྱི་ངོ་བོའི་སྐུ་ལ་མཆོག་ཏུ་གྱུར་པས་ན་སྐུ་གསུམ་ཞེས་བྱ་བ་ནི་ལོངས་སྤྱོད་རྫོགས་པ་
[304a.4]དང་། སྤྲུལ་པ་དང་། ཆོས་ཀྱི་སྐུ་དང་ལྡན་པའི་ཕྱིར་སྐུ་གསུམ་མོ། །སྐུ་མིན་བསྒོམ་པའི་ཞེས་བྱ་བ་ནི་ཇི་སྐད་དུ་བཤད་པའི་སྐུ་གསུམ་ཆོས་བདག་མེད་པའི་ལམ་གྱིས་བསྒོམས་པས་སྣང་བ་མེད་པའི་ཕྱིར་ན་སྐུ་མིན་བསྒོམས་པའོ། །ཀུན་གྱི་སྐུ་ཞེས་བྱ་བ་ནི་ངོ་བོ་ཉིད་དུ་རྣམ་པར་
[304a.5]སྨིན་པ་དང་། ལོངས་སྤྱོད་རྫོགས་པ་དང་། སྤྲུལ་པའི་སྐུའི་གཟུགས་ཀྱི་སྐུ་ཡིན་པའི་ཕྱིར་ཀུན་གྱི་སྐུའོ། །སྐུ་ཆེ་བ་ཞེས་བྱ་བ་ནི་སྐུས་ནམ་མཁའ་ཁྱབ་པས་ན་སྐུ་ཆེའོ། །རྡོ་རྗེ་སྐུ་ཞེས་བྱ་བ་ནི་རྡོ་རྗེ་རྩེ་ལྔ་པ་ལ་སོགས་པ་གཟུགས་སུ་གནས་པའི་ཕྱིར་རྡོ་རྗེ་སྐུའོ། །མཚན་བདུན་
[304a.6]ཡིན་ནོ། །གསུང་མིན་གསུང་སྟེ་ཞེས་བྱ་བ་ནི་སྒྲ་བརྙན་དང་མཚུངས་པར་གསུངས་པར་མཛད་པས་ན་གསུང་མིན་གསུང་ངོ་། །གསུང་གི་མཆོག་ཅེས་བྱ་བ་ནི་ངག་གི་སྤྲོས་པ་ཐམས་ཅད་དང་བྲལ་བའི་ཡེ་ཤེས་ནི་གསུང་གི་མཆོག་གོ། །གསུང་གསུམ་གསུང་མིན་སྟོན་པ་པོ། །ཞེས་
[304a.7]བྱ་བ་ནི་སྐུ་དང་། གསུང་དང་། ཐུགས་ཀྱི་གསང་བ་རྣམ་པ་གསུམ་སྒྲ་བརྙན་དང་མཚུངས་པའི་གསུང་སྟོན་པའོ། །སྒྲ་ཡིས་གསུམ་གསུང་མེད་པར་སྟོན་པ་པོ་ནི་འཆད་པའོ། །ཀུན་གསུང་ཞེས་བྱ་བ་ནི་ཇི་ལྟར་སྨོས་པའི་སེམས་ཅན་གྱི་ཁམས་ལ་སྐད་སྣ་ཚོགས་པས་སྐད་
[304b]
[304b.1]རེ་རེས་ཆོས་སྟོན་པ་ནི་ཀུན་གསུང་པའོ། །ཤིན་ཏུ་གསུང་བ་ཆེ་བ་ཞེས་བྱ་བ་ནི་གསུང་གིས་ནམ་མཁའི་ཁམས་ཐམས་ཅད་ཁྱབ་པའི་ཕྱིར་ན་ཤིན་ཏུ་གསུང་ཆེའོ། །རྡོ་རྗེ་གསུང་ཞེས་བྱ་བ་ནི་ཨོཾ་དང་སྭཱ་ཧཱ་གསུང་ལས་མ་འདས་པའི་ཕྱིར་དང་། ལྷ་དང་བཅས་པའི་འཇིག་རྟེན་ལ་དེ་གསུངས་
[304b.2]པའི་ཕྱིར་རྡོ་རྗེ་གསུང་སྟེ། མཚན་དྲུག་ཡིན་ནོ། །སེམས་མིན་སེམས་ཞེས་བྱ་བ་སེམས་མིན་ཆོས་ཀྱི་དབྱིངས་ཏེ། དེ་ཉིད་ཀྱི་སེམས་འདི་ལ་མངའ་བས་སེམས་ཅན་སེམས་སོ། །སེམས་ཅན་གྱི་མཆོག་ཅེས་བྱ་བ་ནི་སེམས་དེ་ཉིད་སེམས་ཀྱི་ངོ་བོས་སེམས་ཐམས་ཅད་ལས་
[304b.3]ཕུལ་དུ་བྱུང་བས་ན་སེམས་ཀྱི་མཆོག་གོ། །སེམས་གསུམ་སེམས་མིན་སྟོན་པ་པོ། །ཞེས་བྱ་བ་ལ། སེམས་རྩེ་གཅིག་ནི་ཀུན་གཞིའི་རྣམ་པར་ཤེས་པ་དང་། གཉིས་པ་ནི་ཉོན་མོངས་པ་ཅན་གྱི་ཡིད་དང་། སེམས་གསུམ་པ་ནི་མིག་དང་། རྣ་བ་དང་། སྣ་དང་། ལྕེ་དང་།
[304b.4]ལུས་དང་། ཡིད་ཀྱི་རྣམ་པར་ཤེས་པའོ། །དེ་དག་བདག་མེད་པ་བསྟན་པའི་ཕྱིར། སེམས་གསུམ་སེམས་མིན་སྟོན་པའོ། །ཐམས་ཅད་སེམས་ཞེས་བྱ་བ་ནི་ཇི་སྐད་དུ་བཤད་པའི་སེམས་ཅན་ཐམས་ཅད་དེ། བདག་ཉིད་ཀྱི་རང་བཞིན་དུ་གསལ་བས་ན་ཐམས་ཅད་དེ། སེམས་སོ། །སེམས་དཔའ་
[304b.5]ཆེ་ཞེས་བྱ་བ་ནི་རྡོ་རྗེ་ཕྲ་མོའི་གཟུགས་སུ་ཡོངས་སུ་བརྟགས་པའི་སེམས་ཅན་གྱི་ཁམས་ཐམས་ཅད་ཁྱབ་པས་ན་སེམས་ཆེའོ། །རྡོ་རྗེ་སེམས་ཞེས་བྱ་བ་ནི་རྡོ་རྗེ་རྩེ་ལྔ་པར་ཡོངས་སུ་བརྟགས་པའི་སེམས་ཀྱི་རང་བཞིན་ཡིན་པའི་ཕྱིར་རྡོ་རྗེ་སེམས་སོ། །དེ་སྐད་དུ་ཡང་། བྱང་ཆུབ་སེམས་གང་དེ་
[304b.6]རྡོ་རྗེ། །མཚན་དྲུག་ཡིན་ནོ་ཞེས་གསུངས་སོ། །རྡོར་མིན་རྡོར་ཞེས་བྱ་བ་ནི་རྡོ་རྗེ་རྩེ་ལྔ་པའི་རྡོ་རྗེ་མེད་པས་ན་རྡོ་རྗེ་ཡིན་ཏེ། སྟོང་པ་ཉིད་ཀྱི་རྡོ་རྗེ་འདི་ལ་མངའ་བས་ན་དགོས་མིན་རྡོ་རྗེ་རྡོ་རྗེ་མཆོག །ཅེས་བྱ་བ་ལ། རྡོ་རྗེ་མཆོག་ཅེས་བྱ་བ་ནི་རྡོ་རྗེ་ཡིན་པའི་རྡོ་རྗེ་ངོ་བོ་ཉིད་ནི་རྡོ་རྗེའི་གཟུགས་ཐམས་ཅད་ལ་ཁྱད་པར་དུ་
[304b.7]གྱུར་པའི་ཕྱིར་རྡོ་རྗེ་མཆོག་གོ། །རྡོ་རྗེ་གསུམ་ཞེས་བྱ་བ་ནི་སྐུ་དང་། གསུང་དང་། ཐུགས་ཀྱི་རྡོ་རྗེ་དེའི་རྡོ་རྗེ་གསུམ་སྟོན་པའི་ཕྱིར་ན་རྡོ་རྗེ་གསུམ་མོ། །རྡོ་རྗེ་ལ་ནི་སྦྱོར་ཞེས་བྱ་བ་ནི་སོ་སོའི་སྐྱེ་བོའི་རྣལ་འབྱོར་པའི་ལུས་དང་། ངག་དང་། ཡིད་རྡོ་རྗེ་མ་ཡིན་པ་དེ་དག་རྡོ་རྗེ་འཛིན་པས་ན་རྡོར་མིན་
[305a]
[305a.1]སྦྱོར་རོ། །རྡོ་རྗེ་ཐམས་ཅད་ཅེས་བྱ་བ་ནི་རྡོ་རྗེའི་སྒོ་ཐམས་ཅད་དུ་བལྟས་པའི་ཕྱིར་རྡོ་རྗེ་མཆོད་དོ། །རྡོ་རྗེ་ཆེ་ཞེས་བྱ་བ་ནི་ཆོས་ཀྱི་དཀྱིལ་འཁོར་གྱི་རྡོ་རྗེས་ནམ་མཁའ་ཁྱབ་པས་ན་རྡོ་རྗེ་ནམ་མཁའ་ཆེའོ། །རྡོ་རྗེ་རྡོ་རྗེ་ཞེས་བྱ་བ་ནི་རྡོ་རྗེ་སེམས་དཔའི་ཕྱག་ན་གནས་པའི་རྡོ་རྗེ་
[305a.2]ནི་རྡོ་རྗེ་སྟེ། མཚན་བདུན་ཡིན་ནོ། །ཀུན་ཁྱབ་ཅེས་བྱ་བ་ནི། ཆོས་བདག་མེད་པའི་ངོ་བོས་ཆོས་ཐམས་ཅད་དུ་སོང་བའི་ཕྱིར་ཀུན་དུ་ཁྱབ་པའོ། །སྲིད་པའི་རྩེ་མོ་མཆོག་ཅེས་བྱ་བ་ནི། འདོད་པ་དང་གཟུགས་དང་། གཟུགས་མེད་པ་རྣམས་ལས་རབ་ཏུ་མི་གནས་པའི་མྱ་ངན་ལས་འདས་
[305a.3]པའི་སྲིད་པའི་ངོ་བོ་ནི་རྩེ་མོ་ཡིན་པའི་ཕྱིར་སྲིད་པའི་རྩེ་མོ་མཆོག་གོ། །བདེ་བར་གཤེགས་པའི་བདག་པོ་ཞེས་བྱ་བ་ནི་རྣམ་པར་སྣང་མཛད་ཆེན་པོ་གཟུགས་ཀྱིས་རྣམ་པར་སྣང་མཛད་ལ་སོགས་པ་སྟེ། དེ་བཞིན་གཤེགས་པ་རྣམས་ཀྱིས་བདག་པོ་མཛད་པས་ན་བདེ་གཤེགས་བདག་པོའོ། །
[305a.4]རྒྱལ་བ་ཞེས་བྱ་བ་ནི་ཉོན་མོངས་པ་ལས་རྒྱལ་བར་མཛད་པས་ན་རྒྱལ་བའོ། །ཁམས་གསུམ་ཞེས་བྱ་བ་ནི་འདོད་པ་དང་། གཟུགས་དང་། གཟུགས་མེད་པའི་ཁམས་སྤྲུལ་པས་སྤྲུལ་པ་ན་ཁམས་གསུམ་མོ། །རྒྱལ་པོ་ཞེས་བྱ་བ་ནི་རྒྱལ་པོ་ཆེན་པོ་བཞིའི་གཟུགས་སུ་སྟོན་པས་རྒྱལ་པོ་
[305a.5]ཆེའོ། །སྣང་མཛད་ཁྱོད་ཅེས་བྱ་བ་ནི་ཕྱོགས་བཅུར་གཟུགས་ཁམས་ཀྱི་སྣང་བ་སྟོན་པས་ན་རྣམ་པར་སྣང་མཛད་དོ། །དེ་ལྟར་ན་མཚན་བདུན་ཡིན་ནོ། །ཀུན་གྱིས་སངས་རྒྱས་ཐོབ་པར་བྱེད། །ཅེས་བྱ་བའོ། །ཕྱིར་མི་ལྡོག་པའི་ས་བོན་བསགས་པས་སངས་རྒྱས་ཉིད་དུ་ངེས་པར་འགྱུར་བ་
[305a.6]ཡིན་ནོ་ཞེས་བྱ་བའི་དོན་ཏོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བས་ཚེ་འདི་ཉིད་ལ་དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པར་འགྱུར་རོ་ཞེས་བྱ་བ་བསྟན་པ་ཡིན་པར་རྟོགས་པར་བྱའོ། །མགོན་
[305a.7]པོ་ཁྱོད་ལ་གསོལ་བ་ནི་གོ་སླའོ། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བྱ་བ་ནི་གསང་སྔགས་ཀྱི་ཐེག་པ་གསུངས་ཤིག་ཅེས་བྱ་བའི་ཐ་ཚིག་གོ། །དེ་ནས་འདི་གསུངས་མ་ཐག་ཅེས་བྱ་བ་ནི་གོ་སླའོ། །སངས་རྒྱས་ཀྱི་ཞིང་ཐམས་ཅད་ན་བཞུགས་པའི་སངས་རྒྱས་ཐམས་ཅད་དང་།
[305b]
[305b.1]འཇིག་རྟེན་གྱི་ཁམས་ན་བཞུགས་པའི་སངས་རྒྱས་རྣམས་འཇིག་རྟེན་གྱི་ཁམས་ཐམས་ཅད་ན་བཞུགས་པའི་སངས་རྒྱས་དང་བཅས་པའི་སངས་རྒྱས་ཀྱི་ཞིང་ཁམས་རྣམས། དེ་རྣམས་ཉིད་ནི་ས་བླ་ས་སྟེངས་ནི་མཐོ་རིས་ཀྱི་མཚན་ཉིད་ཅན་རྣམས་ནའོ། །ཕྱོགས་བཅུའི་འཇིག་རྟེན་གྱི་ནམ་
[305b.2]མཁའི་ཁམས་ཐམས་ཅད་ཁྱབ་པའི་སེམས་ཅན་ཐམས་ཅད་ཀྱི་མདུན་དུ་རྡུལ་ཕྲ་རབ་ཐམས་ཅད་ཉིད་ཇི་སྙེད་པའི་དཀྱིལ་འཁོར་ཞེས་བྱ་བ་ནི་རྣམ་པར་སྣང་མཛད་ཀྱིས་ཤཱཀྱ་ཐུབ་པ་ལས་ཆོས་ཀྱི་འཁོར་ལོ་འཇུག་པ་ནི་སྔགས་ཀྱི་ཐེག་པ་སེམས་ཅན་རྣམས་ལ་སྟོན་པར་མཛད་དོ་
[305b.3]ཞེས་བྱ་བའི་ཐ་ཚིག་གོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །ཇི་ལྟར་སྣ་ཚོགས་འདུལ་གྱུར་པ། །ཞེས་བྱ་བ་ནི་རྡོ་རྗེ་དབྱིངས་ལ་སོགས་པའི་དཀྱིལ་འཁོར་དུ་འཇུག་པའི་སྐལ་བ་དང་ལྡན་པའི་སེམས་ཅན་རྣམས་ལ་རྣམ་པ་སྣ་ཚོགས་པའོ། །རྡོ་རྗེའི་འཁོར་ལོ་རབ་ཏུ་
[305b.4]བསྐོར། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་དཀྱིལ་འཁོར་ཕྱོགས་བཅུར་སྤྲུལ་ནས་འཇུག་པ་སྔོན་དུ་འགྲོ་བས་སེམས་ཅན་རྣམས་ལ་སྟོན་པ་ཡིན་ནོ་ཞེས་བྱ་བའི་ཐ་ཚིག་གོ། །ད་ནི་འདི་གསུངས་མ་ཐག་ཏུ་ཞེས་བྱ་བ་ལ་སོགས་པ་
[305b.5]ནི་གོ་སླའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གསུམ་ལས་རྣམ་པར་རྒྱལ་བ་ཞེས་བྱ་བ་ལ་སོགས་པ་ཐམས་ཅད་གོ་སླའོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ལ་སོགས་པ་དེ་བཞིན་གཤེགས་པའི་རིགས་ཀྱི་དཀྱིལ་འཁོར་བྲིས་ལ། སློབ་མ་བཅུག་
[305b.6]ནས། དབང་བསྐུར་བ་ཐམས་ཅད་ཀྱིས་དབང་བསྐུར་ཏེ། དེ་བཞིན་གཤེགས་པའི་དབང་བསྐུར་བར་འོས་པ་ལ་རྣམ་པར་སྣང་མཛད་ཀྱི་ཕྱག་རྒྱ་ཆེན་པོས་བཞག་སྟེ། བདག་ཉིད་རྡོ་རྗེ་སེམས་དཔའི་ང་རྒྱལ་བསྐྱེད་ནས། རྡོ་རྗེ་དབྱིངས་ཀྱི་སེམས་དཔའ་ཆེ། །ཞེས་བྱ་བ་ལ་སོགས་
[305b.7]པ་མཚན་བརྒྱ་རྩ་བརྒྱད་པས་བསྟོད་ནས། མགོན་པོ་ཁྱོད་ལ་གསོལ་བ་ནི། །སེམས་ཅན་ཀུན་ལ་ཕན་པའི་ཕྱིར། །སྙིང་རྗེ་ཆེན་པོ་བསྐྱེད་ནས་ཀྱང་། །ཆོས་ཀྱི་འཁོར་ལོ་སྐོར་བར་མཛད། །ཅེས་སྔགས་ཀྱི་ཐེག་པ་འཆད་པའི་དེ་རྣམས་ལ་རྗེས་སུ་གནང་བ་སྦྱིན་པར་བྱའོ། །དེ་ནས་
[306a]
[306a.1]དེས་རྗེས་སུ་གནང་བ་ཐོབ་པ་དང་། དེ་བཞིན་གཤེགས་པ་ཐམས་ཅད་ལ་བོས་ཏེ། འདི་སྐད་ཅེས་བརྗོད་པར་བྱ་སྟེ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་འདུས་ནས་བྱོན་པར་མཛད་དུ་གསོལ་ཞེས་བྱའོ། །ད་ནི་སློབ་དཔོན་གྱིས་དེ་བཞིན་
[306a.2]གཤེགས་པ་ཐམས་ཅད་ཀྱི་ང་རྒྱལ་མངོན་དུ་བྱས་ནས། འཇིག་རྟེན་ཀུན་ལས་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བྱ་བ་གང་གནང་བ་ནོད་པར་བྱའོ། །ཡང་སློབ་དཔོན་
[306a.3]གྱིས་རྡོ་རྗེ་སེམས་དཔའི་ཕྱག་རྒྱ་བཅིངས་ཏེ། དཀྱིལ་འཁོར་བྲི་བའི་གནང་བ་སྦྱིན་པར་བྱའོ། །འཇིག་རྟེན་ཀུན་ལས་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །རྡོ་རྗེའི་འཁོར་ལོ་རབ་ཏུ་བསྐོར། །ཞེས་བྱ་བ་བརྗོད་པར་བྱའོ། །གང་
[306a.4]ཞིག་རྡོ་རྗེ་སེམས་དཔའ་དབང་བསྐུར་བར་འོས་ལ། རྡོ་རྗེ་སེམས་དཔའི་མཚན་བརྒྱ་རྩ་བརྒྱད་པས་བསྟོད་ལ། དཀྱིལ་འཁོར་བྲི་བའི་ཆོས་ཀྱི་འཁོར་ལོ་བསྐོར་བའི་ཕྱིར། བཤད་མ་ཐག་པའི་ཚིགས་སུ་བཤད་པ་གཉིས་ཀྱིས་རྗེས་སུ་གནང་བ་སྦྱིན་པར་བྱའོ། །དེ་ལྟར་རྡོ་རྗེའི་རིགས་ཀྱི་
[306a.5]དཀྱིལ་འཁོར་བྲིས་ལ། སློབ་མ་དབང་བསྐུར་བ་ཐམས་ཅད་ཀྱིས་དབང་བསྐུར་ཏེ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོས་བཞག་ལ་འཇིག་རྟེན་གསུམ་ལས་རྣམ་པར་རྒྱལ་བའི་མཚན་བརྒྱ་རྩ་བརྒྱད་པས་བསྟོད་ལ། དེའི་ང་རྒྱལ་བསྐྱེད་དེ། སྔར་བཤད་པའི་ཚིགས་སུ་བཅད་པའི་སྔར་
[306a.6]བཤད་པའི་རྗེས་སུ་གནང་བ་བྱིན་ལ། འཇིག་རྟེན་ཀུན་ལས་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཁྲོ་བོའི་འཁོར་ལོ་རབ་ཏུ་བསྐོར། །ཞེས་བྱ་བས་རྡོ་རྗེའི་རིགས་ཀྱི་དཀྱིལ་འཁོར་བྲི་བའི་རྗེས་སུ་གནང་བ་སྦྱིན་
[306a.7]པར་བྱའོ། །པདྨའི་རིགས་ཀྱི་དཀྱིལ་འཁོར་བྲིས་ལ། འགྲོ་བ་འདུལ་བའི་ང་རྒྱལ་གྱིས་འདུག་སྟེ། སློབ་མ་དབང་བསྐུར་བ་ཐམས་ཅད་ཀྱིས་དབང་བསྐུར་ནས། འགྲོ་བ་འདུལ་བའི་ཕྱག་རྒྱ་ཆེན་པོས་བཞག་ལ། འགྲོ་བ་འདུལ་བའི་མཚན་བརྒྱ་རྩ་བརྒྱད་པས་བསྟོད་ལ། དེ་ཉིད་
[306b]
[306b.1]ཀྱི་ཆོས་ཀྱི་འཁོར་ལོ་བསྐོར་བའི་རྗེས་སུ་གནང་བ་སྦྱིན་པར་བྱ་སྟེ། འཇིག་རྟེན་ཀུན་ལས་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །པདྨའི་འཁོར་ལོ་རབ་ཏུ་བསྐོར། །ཞེས་བྱ་བས་པདྨའི་རིགས་ཀྱི་དཀྱིལ་འཁོར་བྲི་བའི་རྗེས་སུ་
[306b.2]གནང་བ་སྦྱིན་པར་བྱའོ། །དེ་ལྟར་ནོར་བུའི་རིགས་ཀྱི་དཀྱིལ་འཁོར་བྲིས་ལ། སྔ་མ་བཞིན་དུ་དབང་བསྐུར་བ་ཐམས་ཅད་ཀྱིས་སློབ་མ་དབང་བསྐུར་ནས། དོན་ཐམས་ཅད་གྲུབ་པའི་རྣལ་འབྱོར་མངོན་དུ་བྱས་ལ། དོན་ཐམས་ཅད་གྲུབ་པའི་ཕྱག་རྒྱ་ཆེན་པོས་སློབ་མ་བཞག་སྟེ། དེ་
[306b.3]ཉིད་མཚན་བརྒྱ་རྩ་བརྒྱད་པས་བསྟོད་ནས། དེ་ཉིད་ཀྱི་ཆོས་ཀྱི་འཁོར་ལོ་བསྐོར་བའི་རྗེས་སུ་གནང་བ་སྦྱིན་པར་བྱའོ། །འཇིག་རྟེན་ཀུན་ལས་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ནོར་བུའི་འཁོར་ལོ་རབ་ཏུ་བསྐོར། །ཞེས་བྱ་
[306b.4]བས་ནོར་བུའི་རིགས་ཐམས་ཅད་ཀྱི་དཀྱིལ་འཁོར་བྲི་བའི་རྗེས་སུ་གནང་བ་སྦྱིན་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ལ་སོགས་པ་ལ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དེ་ལྟར་སློབ་མ་ལ་བཤད་མ་ཐག་པའི་རྗེས་སུ་གནང་བས་
[306b.5]དབང་བསྐུར་ནས་དཀྱིལ་འཁོར་ཇི་ལྟ་བ་བཞིན་དུ་གཤེགས་སུ་གསོལ་བའི་རྗེས་ཐོགས་ལ། བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེའི་སྤྲུལ་པ་ཉེ་བར་བསྡུ་བའི་ཚིགས་སུ་བཅད་པ་རྣམ་པ་འདི་བརྗོད་པར་བྱའོ། །མི་ཡི་ནང་ནས་བབས་ནས་ཀྱང་། །ཞེས་བྱ་བ་ནི་མི་ལ་སོགས་
[306b.6]པའི་སེམས་ཅན་རྣམས་ཀྱི་མངོན་པར་འདོད་པའི་དགོས་པ་བསྒྲུབ་པའི་དོན་དུའོ། །མགོན་པོས་རབ་ཏུ་བསྒྲུབ་པར་མཛོད། །ཅེས་བྱ་བ་ནི་དཀྱིལ་འཁོར་སྤྲུལ་ཞིང་ང་རྒྱལ་བསྐྱེད་པ་ནས་བརྩམས་ནས། རྣམ་པར་འཕྲུལ་བ་ཆེན་པོའི་རབ་ཏུ་བསྟན་པར་བྱའོ་ཞེས་བྱ་བའི་ཐ་ཚིག་གོ། །
[306b.7]མི་རྣམས་ཀྱི་ནང་དུ་བབས་ནས་ཞེས་བྱ་བ་ནི་མི་རྣམས་ཀྱི་དོན་མཛད་པ་ཡིན་ནོ་ཞེས་བྱ་བའི་དོན་ཏོ། །རྡོ་རྗེ་འཁོར་ལོ་མཆོག་བསྐོར་ཞིང་། །ཞེས་བྱ་བ་ལ། མཆོག་ནི་དམ་པ་སྟེ། ཐེག་པ་གསུམ་གྱིས་འདུལ་བ་ཡིན་ནོ་ཞེས་བྱ་བའི་དོན་ཏོ། །དེ་ལྟར་བཅོམ་ལྡན་འདས་རྡོ་རྗེ་
[307a]
[307a.1]སེམས་དཔས་གསོལ་བ་བཏབ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་དཀྱིལ་འཁོར་བསྡུ་བ་མཛད་པའི་ཕྱིར། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་གཅིག་ཏུ་འདུས་ནས་ཞེས་བྱ་བ་ནི་དེ་བཞིན་གཤེགས་པ་ཐམས་
[307a.2]ཅད་ལ་བསྐུལ་བས་འདུས་པ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་སྤྲོ་བ་དང་བསྡུ་བ་མཛད་ནས། གཅིག་ཏུ་འདུས་ཏེ་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་སོ། །དེ་ནས་ཞེས་བྱ་བ་ལ་སོགས་པ་ལ། དེ་ལྟར་དེ་བཞིན་གཤེགས་པ་རྣམས་
[307a.3]བཅོམ་ལྡན་འདས་རྣམ་པར་སྣང་མཛད་ལ་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་རང་བཞིན་གྱི་བདག་ཉིད་དུ་ཆུ་དང་འོ་མ་བཞིན་དུ་བསྒོམས་པའི་སྟོབས་ཀྱིས་གཅིག་ཏུ་གྱུར་པར་མཁྱེན་ནས་སོ། །ཇི་ལྟར་རྟོག་པ་ཡིན་ཞེ་ན། ཕྱག་ན་རྡོ་
[307a.4]རྗེ་ལ་འདི་སྐད་ཅེས་གསུངས་སོ་ཞེས་བྱ་བ་སྨོས་ཏེ། ཕྱག་ན་རྡོ་རྗེ་ནི་རྡོ་རྗེ་སེམས་དཔའོ། །ཅི་ཞིག་གསུངས་ཤེ་ན། རིགས་ཀྱི་བུ་ཁྱོད་ཀྱང་ཞེས་བྱ་བ་སྨོས་སོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་རང་བཞིན་ནོ། །
[307a.5]རྡོ་རྗེ་ནི་བྱང་ཆུབ་ཏུ་སེམས་བསྐྱེད་པའི་རྡོ་རྗེ་སྟེ། དེ་བཞིན་གཤེགས་པ་ལྔའི་རིགས་ཀྱི་རྡོ་རྗེའོ། །དེ་སྐད་དུ་ཡང་། བྱང་ཆུབ་སེམས་གང་དེ་རྡོ་རྗེ། །ཞེས་གསུངས་སོ། །རིགས་ནི་རྡོ་རྗེ་དང་། པདྨ་དང་། ནོར་བུའི་རིགས་རྣམས་སོ། །རྡོ་རྗེ་ཆེན་པོའི་རིགས་ནི་རྡོ་རྗེ་སེམས་དཔའི་རིགས་སོ། །
[307a.6]དཀྱིལ་འཁོར་ཐམས་ཅད་ནི་རྡོ་རྗེའི་དབྱིངས་ལ་སོགས་པའི་ཁང་བུ་བརྩེགས་པའི་རང་བཞིན་ནོ། །དེ་ལྟར་དེ་བཞིན་གཤེགས་པ་ཐམས་ཅད་དང་རྡོ་རྗེའི་རིགས་ཐམས་ཅད་དང་། རྡོ་རྗེའི་རིགས་ཐམས་ཅད་ཀྱི་དཀྱིལ་འཁོར་གྱི་རང་བཞིན་དེ་དག་ངའི་ཐུགས་སུ་ཞུགས་ཤིག་པའོ། །
[307a.7]དེ་བཞིན་གཤེགས་པ་ཐམས་ཅད་ཐུགས་སུ་ཞུགས་པར་མཁྱེན་ནས་ནན་ཏན་དུ་བྱས་པའི་ཕྱིར། བཅོམ་ལྡན་འདས་རྣམ་པར་སྣང་མཛད་ལ་གསོལ་བ་བཏབ་ནས། བཅོམ་ལྡན་འདས་རྡོ་རྗེ་སེམས་དཔའ་འཆད་པར་འགྱུར་བའི་དེ་བཞིན་གཤེགས་པའི་རྗེས་སུ་གནང་བ་ནན་ཏན་དུ་
[307b]
[307b.1]བྱས་པའི་ཚིགས་སུ་བཅད་པ་གསུངས་པ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེ་སེམས་དཔའ་བྱིན་གྱིས་བརླབས་ནས། འདུལ་བ་མཛད་དེ་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ཏེ། དེ་ནས་བྱང་ཆུབ་སེམས་དཔའ་ཆེན་པོ་
[307b.2]ཕྱག་ན་རྡོ་རྗེ་ཞེས་བྱ་བ་ལ་སོགས་པ་ལ། དེ་ལྟར་དེ་བཞིན་གཤེགས་པ་རྣམས་བཞུགས་པའི་རྗེས་ཐོགས་ཉིད་ལས་རྡོ་རྗེ་སེམས་དཔའ་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ནས། དེ་བཞིན་གཤེགས་པ་ཐམས་ཅད་དང་། བཅོམ་ལྡན་འདས་རྣམ་
[307b.3]པར་སྣང་མཛད་ཀྱི་སྐུ་ཐམས་ཅད་དང་ཞེས་བྱ་བ་ནི་ངོ་བོ་ཉིད་ཀྱི་སྐུ་རྣམས་སོ། །གསུང་ཐམས་ཅད་ལ་འཇུག་པའི་གནས་དང་ཞེས་བྱ་བ་ནི་ཡི་གེའི་གནས་རྣམ་པ་བརྒྱད་དེ། སྙིང་ག་མགྲིན་པ་མགོ་བོ་དང་། དེ་བཞིན་ལྕེ་ཡི་རྩ་བ་དང་། །སོ་དང་སྣ་ཡི་རྗེས་དང་ནི། །མཆུ་དང་
[307b.4]རྐན་དང་བཅས་པའོ། །ཞེས་བྱ་བ་འདི་དག་ནི་སྔགས་ཐམས་ཅད་འཇུག་པའི་གནས་བསྟན་ཏེ། འདི་རྣམས་ནི་གསུང་ཐམས་ཅད་འཇུག་པའི་གནས་སུ་འགྱུར་རོ། །སེམས་ཀྱི་རྒྱུད་འབྱུང་བ་ཐམས་ཅད་དང་ཞེས་བྱ་བ་ནི་ཇི་སྐད་དུ་བཤད་པའི་ཀུན་གཞིའི་རྣམ་པར་ཤེས་པ་ལ་
[307b.5]སོགས་པའོ། །དེ་དག་རྒྱུ་དང་འབྲས་བུར་གྱུར་པ་དུས་གསུམ་པའི་སངས་རྒྱས་རྣམས་འབྱུང་བའོ། །རྒྱུད་ནི་རྒྱུན་མ་ཆད་པར་རྒྱུན་ཆགས་པའོ། །དེ་རྣམས་ཀྱི་སེམས་ཀྱི་རྒྱུན་ཆགས་པ་ཡིན་ནོ། །རྡོ་རྗེའི་ཚུལ་ཐམས་ཅད་ནི་དེ་བཞིན་གཤེགས་པ་ཐམས་ཅད་ཀྱིའོ། །ཚུལ་ནི་
[307b.6]ཐོས་པ་དང་བསམ་པ་དང་། བསྒོམ་པའི་ཤེས་རབ་ཀྱིས་སློབ་པའི་ངང་ཚུལ་ལོ། །ཡན་ལག་དང་། ཉིད་ལག་ཐམས་ཅད་ཅེས་བྱ་བ་ནི་ལག་པ་དང་རྐང་པ་ལ་སོགས་པའོ། །གནས་ཐམས་ཅད་ཅེས་བྱ་བ་ནི་ཚོགས་ཀྱི་གནས་རྣམས་སོ། །མཚན་ཐམས་ཅད་ཅེས་བྱ་བ་ནི།
[307b.7]སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་སོ། །དཔེ་བྱད་བཟང་པོ་ཐམས་ཅད་ཅེས་བྱ་བ་ནི་དཔེ་བྱད་བཟང་པོ་བརྒྱད་ཅུའོ། །བ་སྤུའི་བུ་ག་ཐམས་ཅད་དང་། རྡུལ་ཕྲ་མོ་སྙེད་ཀྱི་དཀྱིལ་འཁོར་ཐམས་ཅད་ཅེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་མངའ་བའི་
[308a]
[308a.1]ཐུགས་ཀར་དེ་རྣམས་བཞུགས་སོ་ཞེས་བྱ་བ་ཡིན་ནོ། །དེ་ནི་འདི་སྐད་སྟོན་པ་ཡིན་ཏེ། སློབ་དཔོན་གྱིས་དཀྱིལ་འཁོར་གྱི་ལྷ་གཤེགས་སུ་གསོལ་བའི་རྗེས་ཐོགས་ཉིད་ལ་རྡོ་རྗེ་སེམས་དཔའི་ང་རྒྱལ་མངོན་དུ་བྱས་ནས། བཅོམ་ལྡན་འདས་རྣམ་པར་སྣང་མཛད་
[308a.2]སྤྲུལ་པའི་སྐུས་རིའི་རྒྱལ་པོ་རི་རབ་ཀྱི་སྟེང་དུ་ན། རྡོ་རྗེ་དབྱིངས་ལ་སོགས་པའི་དཀྱིལ་འཁོར་གྱི་དབུས་སུ་བཞུགས་པ་ལ། མི་ཡི་ནང་དུ་བབས་ནས་ཀྱང་། །དགོས་ཕྱིར་སེམས་ཅན་ཀུན་གྱི་དོན། །རྡོ་རྗེ་འཁོར་ལོ་མཆོག་བསྐོར་ཞིང་། །མགོན་པོ་རབ་ཏུ་བསྒྲུབ་པར་མཛོད། །
[308a.3]ཅེས་བྱ་བ་ལ་སོགས་པ་གསོལ་བ་གདབ་པར་བྱའོ། །དེ་ནས་རྣམ་པར་སྣང་མཛད་ཀྱི་ང་རྒྱལ་བསྐྱེད་ལ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་གཅིག་ཏུ་འདུ་བར་མཛད་དུ་གསོལ་ཞེས་བརྗོད་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་གཅིག་ཏུ་འདུས་ནས་
[308a.4]རྣམ་པར་སྣང་མཛད་ཀྱི་ཐུགས་སུ་ཞུགས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་ང་རྒྱལ་བསྐྱེད་ནས། དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་བདག་ཉིད་དུ་གྱུར་པར་ལྷག་པར་མོས་པར་བྱའོ། །རིགས་ཀྱི་བུ་ཁྱོད་ཀྱང་དེ་བཞིན་
[308a.5]གཤེགས་པ་ཐམས་ཅད་དང་། རྡོ་རྗེའི་རིགས་ཐམས་ཅད་དང་། དེ་བཞིན་གཤེགས་པ་ཐམས་ཅད་ཀྱི་ཐུགས་དང་དའི་ཐུགས་སུ་ཞུགས་ཤིག་ཅེས་བྱའོ། །མདུན་ན་གནས་པའི་རྡོ་རྗེ་སེམས་དཔའ་ལ་གསོལ་བ་གདབ་པར་བྱའོ། །དེ་ནས་རྡོ་རྗེ་སེམས་དཔའི་ང་རྒྱལ་བསྐྱེད་ནས། མདོར་ན་
[308a.6]སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ལ། །བཞུགས་ནས་སེམས་ཅན་ཐམས་ཅད་ལ། །ཕན་པའི་དོན་ནི་བསྒྲུབ་པར་བྱ། །ཞེས་བྱ་བའི་ཚིགས་སུ་བཅད་པ་བརྗོད་ནས། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པའི་
[308a.7]གཟུགས་རྣམས་བདག་ཉིད་ཀྱིས་བསམ་མོ། །དེ་བཞིན་གཤེགས་པའི་གཟུགས་དེ་རྣམས་ཀྱང་རྣམ་པར་སྣང་མཛད་ཀྱི་ཐུགས་སུ་ཞུགས་སོ། །དེ་ནས་རྡོ་རྗེ་སེམས་དཔའི་ང་རྒྱལ་བསྐྱེད་ལ། རྣམ་པར་སྣང་མཛད་ཀྱི་ཐུགས་ཀར་གནས་ནས་དེ་བཞིན་གཤེགས་པ་ཐམས་
[308b]
[308b.1]ཅད་རྣམ་པར་སྣང་མཛད་ཀྱི་སྐུ་ཐམས་ཅད་དང་། གསུང་ཐམས་ཅད་འཇུག་པའི་གནས་དང་། སེམས་ཀྱི་རྒྱུད་འབྱུང་བ་ཐམས་ཅད་དང་། ཡན་ལག་དང་ཉིད་ལག་ཐམས་ཅད་དང་། མཚན་མ་ཐམས་ཅད་དང་། དཔེ་བྱད་བཟང་པོ་ཐམས་ཅད་དང་། བ་སྤུའི་ཁུང་བུ་ཐམས་ཅད་དང་།
[308b.2]རྡུལ་ཤིན་ཏུ་ཕྲ་མོ་སྙེད་ཀྱི་སྐུ་དང་། གསུང་དང་། ཐུགས་ལ་ཞུགས་ནས་རྣམ་པར་སྣང་མཛད་ཀྱི་རང་བཞིན་དུ་བསམ་པར་བྱའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པའོ། །སངས་རྒྱས་ནས་རིང་པོ་མ་ལོན་པ་ཞིག་ཅེས་བྱ་བ་ནི་དེ་བཞིན་གཤེགས་པ་ལ་སོགས་པའི་
[308b.3]རིགས་ཐམས་ཅད་ཀྱི་དཀྱིལ་འཁོར་ཐམས་ཅད་བཅུག་པའི་རྗེས་ཐོགས་ཉིད་ལ་དེ་ལྟར་རྣམ་པར་སྣང་མཛད་ཀྱི་བདག་ཉིད་དུ་རྟོག་པར་བྱའོ་ཞེས་བྱ་བའི་དོན་ཏོ། །དེ་བཞིན་གཤེགས་པ་ལ་སོགས་པ། །ཞེས་བྱ་བ་ནི་གོ་སླའོ། །དེ་ནས་རི་རབ་རིའི་རྩེ་མོ་ནས་སྙིང་པོ་བྱང་
[308b.4]ཆུབ་གང་ན་བར་གཤེགས་ནས་ཞེས་བྱ་བ་ནི་མི་རྣམས་ཀྱི་འཇིག་རྟེན་དེས་རི་རབ་ཀྱི་སྟེང་གི་བྱང་ཆུབ་ཀྱི་སྙིང་པོར་འགྲོ་བར་མི་ནུས་པས་ནའོ། །དེའི་ཆེད་དུ་བཅོམ་ལྡན་འདས་ཀྱིས་བྱང་ཆུབ་ཀྱི་ཤིང་དྲུང་དུ་ཞེས་བྱ་བ་ནི་སྤྲུལ་པའི་སྐུས་ཤཱཀྱའི་རིགས་སུ་སྐྱེ་བ་བཞེས་ནས། བཅོམ་
[308b.5]ལྡན་འདས་ཤཱཀྱ་ཐུབ་པ་བྱང་ཆུབ་ཀྱི་ཤིང་དྲུང་དུ་བཞུགས་པའོ། །རང་ཉིད་བྱང་ཆུབ་ཀྱི་ཤིང་དྲུང་དུ་བཞུགས་སོ་ཞེས་བྱ་བའི་དོན་ཏོ། །འཇིག་རྟེན་པ་དང་མཐུན་པར་བྱ་བའི་ཕྱིར། །ཞེས་བྱ་བ་ནི་དོན་དམ་པར་འོག་མིན་དུ་མངོན་པར་རྫོགས་པར་སངས་རྒྱས་ནས། འཇིག་རྟེན་པ་དང་
[308b.6]མཐུན་པའི་ཕྱིར། རྩྭ་འཚོང་བཀྲ་ཤིས་ལ་ཞེས་པ་ལ་སོགས་པ་ལ་རྩྭ་གདན་གྱི་ཕྱིར་བླངས་ནས་ཆེད་དུ་བརྗོད་དོ། །ཨེ་མའོ་ཞེས་བྱ་བ་ལ་སོགས་པ་ལ། ཨེ་མའོ་ཞེས་བྱ་བ་ནི་བཤད་ཟིན་ཏོ། །དོན་མཆོག་ཅེས་བྱ་བ་ནི་དམ་པ་ཕུལ་དུ་བྱུང་བའི་དོན་ཏོ། །དེ་གང་ཡིན་ཞེ་ན། སེམས་
[308b.7]ཅན་དོན་ཞེས་བྱ་བ་སྨོས་ཏེ། དེ་གང་ཞིག་ཡིན་ཞེ་ན། སེམས་ཅན་ཀུན་བསྟན་པ་ཞེས་བྱ་བ་སྨོས་ཏེ། ཀུན་ལ་དེ་བསྟན་པས་ན་ཀུན་བསྟན་པ་སྟེ། དེ་བཞིན་དུ་རྟོགས་པར་བྱའོ། །དེ་དག་ཀུན་ལ་བསྟན་པས་ངོ་མཚར་བ་ཅི་ཞིག་ཡོད་ཅེ་ན། གང་ཕྱིར་འདུལ་དབང་བརྟན་པ་རྣམས། །
[309a]
[309a.1]ཞེས་བྱ་བ་སྨོས་ཏེ། སེམས་ཅན་འདུལ་བའི་དབང་གིས་སོ། །བརྟན་པ་རྣམས་ཞེས་བྱ་བ་ནི་དམིགས་པ་ཐམས་ཅད་ཀྱིས་མི་གཡོ་བའི་ཕྱིར་དེ་བཞིན་གཤེགས་པའོ། །མུ་སྟེགས་ལྟ་ལ་གནས་པར་མཛད། །ཅེས་བྱ་བ་ནི་མུ་སྟེགས་ཀྱི་སྤྱོད་པ་ངན་པ་ལ་མོས་པ་དང་།
[309a.2]དཀའ་ཐུབ་ལ་མོས་པའི་མི་ལ་སོགས་པའོ། །དེ་དག་གི་ལྟ་བ་ནི་དཀའ་བ་སྤྱོད་པ་དང་། མི་ཞིམ་པའི་ཟས་ལ་མོས་པར་འགྱུར་བའི་ཤེས་པ་གང་ཡིན་པ་དེ་ལ་གནས་པར་མཛད་དོ། །དེ་དག་འདུལ་བའི་ཕྱིར་དེའི་ངོ་བོ་སྤྱོད་པར་རབ་ཏུ་བསྟན་ནས། སྤྲོ་བ་མཛད་པ་ནི་ངོ་མཚར་བའོ། །མདོར་
[309a.3]ན་མི་འདུལ་འཇིག་རྟེན་པ། །ཞེས་བྱ་བ་ནི་ཆོས་བདག་མེད་པའི་ཕན་ཡོན་རབ་ཏུ་བསྟན་པའོ། །ལྟ་བ་ངན་པས་ལྡོངས་པ་རྣམས། །ཞེས་བྱ་བ་ནི་ཆད་པར་ལྟ་བས་ཇི་སྐད་དུ་བཤད་པའི་ཡེ་ཤེས་ལ་དེ་ལྡོངས་པས་ན་ལྟ་བ་ངན་པ་རྣམས་ལ་ཐམས་ཅད་ནས་ལྡོངས་པའོ། །དེ་ནི་འདི་སྐད་སྟོན་
[309a.4]པ་ཡིན་ཏེ། ལྟ་བ་ངན་པ་ཅན་གྱི་འཇིག་རྟེན་མི་འདུལ་བ་རྣམས་ཐབས་སྣ་ཚོགས་པའི་སྒོ་ནས་འདུལ་བར་མི་ནུས་པ་ལ་རབ་ཏུ་བཞག་ནས། དཀའ་བ་སྤྱོད་པ་དང་། སྤྱོད་པ་ངན་པ་ལ་གནས་པར་བྱ་སྟེ། དེའི་རྗེས་ལ་དཀའ་བ་སྤྱོད་པ་དང་། ལྟ་བ་ངན་པ་ལ་སྤྱོད་པ་མི་འདུལ་བའི་འཇིག་རྟེན་
[309a.5]རྣམས་ཆོས་བདག་མེད་པའི་ཡེ་ཤེས་ཀྱི་སྣང་བས་རྣམ་པར་དག་པར་བྱ་བའི་ཕྱིར་དང་། ས་དང་པོ་ལ་སོགས་པ་རྟོགས་ན་སངས་རྒྱས་དང་བྱང་ཆུབ་སེམས་དཔའ་ཐོབ་པར་འགྱུར་བའི་ཕྱིར། མངོན་པར་རྫོགས་པར་སངས་རྒྱས་ནས། མངོན་པར་བྱང་ཆུབ་པ་སྟོན་པར་བྱེད་པ་
[309a.6]ཡིན་ནོ་ཞེས་བྱ་བའི་ཐ་ཚིག་གོ། །དེ་ནས་འདོད་པ་ན་སྤྱོད་པའི་ལྷ་རྣམས་ཀྱིས་བཅོམ་ལྡན་འདས་ཀྱི་དེ་ཁོ་ན་ཉིད་མི་ཤེས་ནས་ཞེས་བྱ་བ་ནི་བཅོམ་ལྡན་འདས་འོག་མིན་དུ་མངོན་པར་རྫོགས་པར་སངས་རྒྱས་ནས། ཡང་འཇིག་རྟེན་པ་དང་རྗེས་སུ་མཐུན་པའི་ཕྱིར་སྤྲུལ་པའི་སྐུས་མངོན་
[309a.7]པར་རྫོགས་པར་སངས་རྒྱས་པ་སྟོན་པར་བྱེད་པ་དེ་ཁོ་ན་ཉིད་མི་ཤེས་པ་བརྗོད་ཅིང་སྨྲ་བ་ཡིན་ནོ། །ཅི་ཞིག་སྨྲ་ཞེ་ན། ཇི་སྐད་དུ། ཀྱེ་དགེ་སྦྱོང་ཅི་བྱང་ཆུབ་ཀྱི་ཕྱིར་འདི་ལྟ་བུའི་སྡུག་བསྔལ་བ། མི་བཟད་པ་ཞེས་བྱ་བ་ལ་སོགས་པ་སྨོས་ཏེ། དཀའ་བ་ལས་བྱུང་
[309b]
[309b.1]བས་ན་དྲག་པོའོ། །མི་མཐུན་པར་གྱུར་པས་ན་མི་བཟད་པའོ། །གྲོགས་པོ་རྣམས་ཁོ་བོ་ལ་བྱང་ཆུབ་ཐོབ་པར་སྒྲུབས་ཤིག་ཅེས་བྱ་བ་ནི་བསྒྲུབ་པ་དོན་དུ་གཉེར་རོ་ཞེས་བྱ་བའི་དོན་ཏོ། །ཅིའི་ཕྱིར་དེ་སྐད་དུ་གསུངས་ཤེ་ན། མཆོག་སྦྱིན་པའི་མངོན་པར་ཞེན་པ་སྤངས་
[309b.2]པའི་ཕྱིར་རོ། །དེ་ནས་འདོད་པ་ན་སྤྱོད་པའི་ལྷ་རྣམས་ཞེས་པ་ནས་བརྩམས་ཏེ། དེའི་གཏམ་རྒྱུད་བྱས་པ་ལ་ཐུག་པའི་གཞུང་གིས་ལྷ་རྣམས་ཀྱང་བྱང་ཆུབ་པ་ཡོངས་སུ་ཤེས་པ་མེད་པ་དང་། མཆོག་སྦྱིན་པར་མི་ནུས་པར་བསྟན་པ་ཡིན་ནོ། །ད་ནི་འདི་སྐད་སྟོན་
[309b.3]པ་ཡིན་ཏེ། བྱང་ཆུབ་སེམས་དཔའ་ཞེས་བྱ་བའི་སྒྲའི་དོན་ཡང་ལྷ་རྣམས་ཀྱིས་མི་ཤེས་ན། ཅིའི་ཕྱིར་བྱང་ཆུབ་སྟེར་བར་ནུས། ཞེས་བྱའོ། །དེ་ནས་འཇིག་རྟེན་གསུམ་པོ་མཐའ་དག་གི་བདག་པོ་དབང་ཕྱུག་ཆེན་པོ་ཞེས་བྱ་བ་ལ་སོགས་པ་ནི་གོ་སླའོ། །གྲོགས་
[309b.4]པོ་རྣམས་ཁོ་བོ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྨིན་པར་སྒྲུབས་ཤིག་ཅེས་བྱ་བ་ལ་སོགས་པ་ནི་ལྷའི་བདག་པོ་རྣམས་ཀྱིས་ཀྱང་མཆོག་སྟེར་བར་མི་ནུས་པར་བསྟན་ཏོ། །བཅོམ་ལྡན་འདས་བདག་གིས་བྱང་ཆུབ་སྩོལ་བར་མི་ནུས་སོ་ཞེས་བྱ་བ་ནི་བྱང་ཆུབ་
[309b.5]ཀྱི་དོན་ཡོངས་སུ་མི་ཤེས་སོ་ཞེས་བྱ་བའི་དོན་ཏོ། །གང་ཐོས་པ་དང་བསམ་པའི་ཤེས་པ་གང་གིས་བྱང་ཆུབ་ཤེས་པ་ཡིན་ནོ་ཞེས་བྱ་བའི་ཐ་ཚིག་གོ། །བདག་ཅག་ཉིད་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བྱ་བ་ནི་ལྷ་རྣམས་ཀྱང་མངོན་པར་འདོད་པའོ། །དེ་ལྟར་
[309b.6]ལྷ་རྣམས་ལ་བརྟག་པར་མཛད་ནས། བཅོམ་ལྡན་འདས་ཀྱིས་བདེན་པར་གསུངས་པ་ནི། དེ་ནི་གཟུགས་མིན་གཟུགས་ལ་མིན། །ཞེས་བྱ་བ་ལ་སོགས་པ་ལ། བྱང་ཆུབ་ནི་གཟུགས་ཀྱི་ཕུང་པོའི་རང་བཞིན་མ་ཡིན་པ་དང་། ཚོར་བ་དང་། འདུ་ཤེས་དང་། འདུ་
[309b.7]བྱེད་དང་། རྣམ་པར་ཤེས་པའི་ཕུང་པོའི་རང་བཞིན་གཟུགས་མེད་པ་ནི་བྱང་ཆུབ་མ་ཡིན་ནོ། །བདེན་མིན་ཞེས་བྱ་བ་ནི་འཕགས་པའི་བདེན་པ་བཞིའི་རང་བཞིན་ཡང་མ་ཡིན་ནོ། །བརྫུན་མིན་ཞེས་བྱ་བ་ནི་མགལ་མེའི་འཁོར་ལོ་ལ་སོགས་པའི་བརྫུན་པའི་རང་བཞིན་
[310a]
[310a.1]མ་ཡིན་ནོ། །གལ་ཏེ་དེ་ལྟར་གཟུགས་ཀྱི་ཕུང་པོ་ལ་སོགས་པའི་རང་བཞིན་བྱང་ཆུབ་མ་ཡིན་ན། དེ་ལྟར་འོན་ཏེ་ཅི་འདྲ་བ་ཞིག་ཡིན་ཞེ་ན། གཙང་མ་ཞེས་བྱ་བ་སྨོས་ཏེ། གཟུང་བ་དང་འཛིན་པའི་རྣམ་པར་རྟོག་པ་སྤངས་པ་གཉིས་སུ་མེད་
[310a.2]པའི་སེམས་དང་། སེམས་ལས་བྱུང་བའི་རང་བཞིན་ནི་ཞེས་བྱ་བའི་དོན་ཏོ། །སངས་རྒྱས་བྱང་ཆུབ་ཅེས་བྱ་བ་ནི་སངས་རྒྱས་ཀྱི་བྱང་ཆུབ་ནི་སངས་རྒྱས་ཀྱི་བྱང་ཆུབ་སྟེ། དག་པའི་ངོ་བོ་གང་ཡིན་པ་དེ་ནི་སངས་རྒྱས་ཀྱི་བྱང་ཆུབ་ཡིན་ནོ་ཞེས་གསུངས་སོ། །ཡེ་
[310a.3]ཤེས་འདི་རྟོགས་ན་རྒྱལ་བ་ཉིད་དུ་གྱུར་ཞེས་བྱ་བ་ནི་ཆོས་ཐམས་ཅད་དངོས་པོ་མེད་པར་ངེས་པའི་ཕྱིར་དེ་ཉིད་ནི་ཡེ་ཤེས་ཏེ་ཡེ་ཤེས་འདི་ཞེས་བྱའོ། །མངོན་སུམ་དུ་བྱས་ནས་རྟོགས་པས་ཉོན་མོངས་པ་ཐམས་ཅད་སྤངས་ནས་རྣལ་འབྱོར་པ་དེ་བཞིན་གཤེགས་པར་འགྱུར་རོ། །དེ་ནས་
[310a.4]ལྷའི་དབང་པོ་ཞེས་བྱ་བ་ལ་སོགས་པ་ནི་དེ་ལྟར་བྱང་ཆུབ་ཀྱི་དོན་བསྟན་པས་ལྷའི་བདག་པོ་བྱང་ཆུབ་ཀྱི་དོན་ནི་སེམས་དངོས་པོ་མེད་པར་ཤེས་པ་མངོན་པར་རྫོགས་པར་བྱང་ཆུབ་པ་མངོན་སུམ་དུ་བྱེད་པར་འདོད་པས་ཡང་དང་ཡང་མངོན་སུམ་དུ་བྱས་ནས་ཅང་མི་སྨྲ་བར་གནས་པར་འགྱུར་རོ། །
[310a.5]དེ་ནས་ཞེས་བྱ་བ་ལ་སོགས་པ་ལ། དེ་ལྟར་བྱང་ཆུབ་ཀྱི་དོན་མངོན་སུམ་དུ་བྱས་ཤིང་གནས་པའི་ལྷའི་བདག་པོ་རྣམས་ལ། བྱང་ཆུབ་ཀྱི་དོན་ཤེས་པ་མེད་ན། བྱང་ཆུབ་སྙིང་པོ་རྩྭའི་གདན་ལ་འདུག་ནས་བྱང་ཆུབ་པར་མི་འགྱུར་རོ་ཞེས་རྣམ་པར་རྟོག་པ་བསྐྱེད་པའི་ཕྱིར་རྩྭའི་
[310a.6]གདན་དེ་ལས་བཞེངས་ཏེ། དེ་དག་གི་མངོན་པའི་ང་རྒྱལ་གཞོམ་པའི་ཕྱིར། བཅོམ་ལྡན་འདས་ཀྱིས་ལྷ་རྣམས་ལ་འདི་སྐད་ཅེས་བཀའ་སྩལ་ཏོ། །གྲོགས་པོ་རྣམས་སངས་རྒྱས་ཀྱི་ཡེ་ཤེས་འདི་ལྟ་བུ་སྒྲུབ་པར་གྱིས་ཤིག །དེ་དག་གིས་གསོལ་བ། བཅོམ་
[310a.7]ལྡན་འདས་བྱང་ཆུབ་སྟེར་བར་རྔོ་མི་ཐོགས་ལགས་སོ། །གལ་ཏེ་ཁོ་བོ་ཅག་གིས་བྱང་ཆུབ་ཀྱི་དོན་ཤེས་ན་གདན་བཏིང་བ་ལ་དེ་བཞིན་དུ་འདུག་ནས། རིམ་པ་བཞིན་དུ་ཁོང་དུ་ཆུད་ཅིང་ཡོངས་སུ་ཤེས་པར་གྱུར་ནས་ཁོ་བོས་མི་ནུས་ཞེས་བྱ་བར་བསམ་མོ། །
[310b]
[310b.1]གོ་རིམས་བཞིན་དུ་རྟོགས་ཤིང་ཡོངས་སུ་ཤེས་པར་ཁོང་དུ་ཆུད་པར་འགྱུར་བ་ཡིན་ནོ་སྙམ་པའི་མངོན་པའི་ང་རྒྱལ་སྤང་བའི་ཕྱིར། བཅོམ་ལྡན་འདས་ཀྱི་ཡིད་ཀྱིས་རབ་ཏུ་རྟོགས་པས་ན་ཞེས་བྱ་བ་ལ་སོགས་པས་གསུངས་སོ། །ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི་ཞེས་
[310b.2]བརྗོད་ཅིང་། སེམས་སོ་སོར་རྟོག་པ་བསྒོམ་པའི་ཕྱིར། བྱང་ཆུབ་སེམས་ཞེས་བྱ་བ་ནི། ཨོཾ་བོདྷི་ཙིཏྟ་ཨུཏྤཱ་ད་ཡ་མི་ཞེས་བྱ་བ་བྱང་ཆུབ་ཀྱི་སེམས་བསྒོམ་པར་བྱའོ། །བརྟན་པར་བྱ་ཞེས་བྱ་བ་ནི། ཨོཾ་ཏིཥྛ་བཛྲ་ཞེས་བྱ་བ་དེ་ཁོ་ན་ཉིད་ཀྱི་བྱང་ཆུབ་ཀྱི་སེམས་བརྟན་པར་བྱེད་
[310b.3]པའོ། །སེམས་དཔའི་རྡོ་རྗེ་བརྟན་བྱས་ནས། །ཞེས་བྱ་བ་ནི། ཨོཾ་བཛྲ་ཨཱཏྨ་ཀོ྅ཧཾ་ཞེས་བྱ་བས་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེའི་བདག་ཉིད་བརྟན་པར་བྱའོ། །སངས་རྒྱས་སུ་ནི་བདག་སྒོམས་ཤིག །ཅེས་བྱ་བ་ནི་རྡོ་རྗེར་འགྱུར་བའི་རང་བཞིན་གྱི་སེམས་ཏེ།
[310b.4]ཨོཾ་ཡ་ཐ་སརྦྦ་ཏ་ཐཱ་ག་ཏ་སྟ་ཐ་ཨ་ཧཾ་ཞེས་བརྗོད་ཅིང་། སངས་རྒྱས་ཀྱི་གཟུགས་སུ་བདག་ཉིད་བསྒོམ་པར་བྱའོ། །དེ་དག་གིས་དེ་ལྟ་བུ་ལགས་ཞེས་སྨྲས་ནས་དང་ངོ་། །དེ་ལྟར་བྱས་པ་ཉིད་ད་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བྱེད་པར་ཁྱེད་ཀྱིས་
[310b.5]ནུས་པར་འགྱུར་རོ། །བསོད་ནམས་དང་ཡེ་ཤེས་ཀྱི་ཚོགས་བསྒོམ་པ་ཁོ་ནས་མངོན་པར་བྱང་ཆུབ་པར་འགྱུར་རོ། །ཡོན་ཏན་ཐམས་ཅད་དང་ལྡན་པའི་ཕྱིར་རོ་ཞེས་བྱ་བར་དགོངས་སོ། །དེ་ནས་ཞེས་བྱ་བ་ལ་སོགས་པ་ལ། དེ་ནས་ནི་སྐབས་སུ་བབས་
[310b.6]པའོ། །དེ་ལྟར་ལྷའི་བདག་པོ་རྣམས་ལ། སངས་རྒྱས་པའི་གདམས་ངག་བསྟན་ནས། འཇིག་རྟེན་དང་མཐུན་པར་བྱ་བའི་ཕྱིར་རང་གི་བསྒོམ་པའི་མཐུས་བདུད་ཕམ་པར་བྱས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་
[310b.7]རྒྱས་སོ། །དེ་ལྟར་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རང་གི་སྙིང་གར་ཟླ་བ་རྡོ་རྗེའི་གཟུགས་ལ། རྡོ་རྗེ་སེམས་དཔའ་སེམས་དཔའ་ཆེ། །ཞེས་བྱ་བ་ལ་སོགས་པས་བསྟོད་པ་ཡིན་ཏེ། རྡོ་རྗེ་སེམས་དཔའ་ཞེས་བྱ་བ་ནི་སྙིང་པོའི་རང་
[311a]
[311a.1]བཞིན་ཁྱོད་ཡིན་ནོ་ཞེས་གསུངས་པ་ཡིན་ནོ། །སེམས་དཔའ་ཆེ་ཞེས་བྱ་བ་ནི་སྤྲོ་བ་དང་བསྡུ་བའི་སྒོ་ནས་སོ། །ཐེག་པ་ཆེ་ཞེས་བྱ་བ་ནི་བྱང་ཆུབ་སེམས་དཔའི་རང་བཞིན་ལམ་འབྲས་བུ་དང་བཅས་པ་ཡིན་ནོ། །བདག་ཉིད་ཆེ་ཞེས་
[311a.2]བྱ་བ་ནི་བདག་ཉིད་ཆེན་པོ་འདི་ལ་མངའ་བས་ན་བདག་ཉིད་ཆེའོ། །སྣང་བ་ཆེ་ཞེས་བྱ་བ་ནི་སྤྲོ་བ་དང་བསྡུ་བའི་སྒོ་ནས་སོ། །མགོན་པོ་ཆེ་ཞེས་བྱ་བ་ནི་རྣམ་པར་སྣང་མཛད་ཆེན་པོའི་ངོ་བོས་སངས་རྒྱས་དང་བྱང་ཆུབ་སེམས་དཔའ་རྣམས་ལ་མགོན་པོས་མཛད་པས་ན་མགོན་པོ་
[311a.3]ཆེའོ། །མཚན་བདུན་ཡིན་ནོ། །རྡོ་རྗེ་རྒྱལ་པོ་ཞེས་བྱ་བ་ནི་རྡོ་རྗེ་རྒྱལ་པོ་སྙིང་པོའི་སྒོ་ནས་སོ། །རྡོ་རྗེ་ཆེ་ཞེས་བྱ་བ་ནི་རྡོ་རྗེ་ལྕགས་ཀྱུ་ལ་སོགས་པ་སྤྲོ་བ་དང་བསྡུ་བའི་སྒོ་ནས་སོ། །རྡོ་རྗེ་ཞེས་བྱ་བ་ནི་ཐུགས་ཀའི་སེམས་དཔའི་རྡོ་རྗེའི་སྒོ་ནས་སོ། །དེ་བཞིན་གཤེགས་
[311a.4]པ་ཀུན་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་རང་བཞིན་གྱི་སྒོ་ནས་སོ། །སེམས་དཔའ་ཆེན་པོ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་འདྲེན་པའི་ལས་ཀྱིས་ཐམས་ཅད་དུ་ཁྱབ་པའི་ཕྱིར་རོ། །བརྩོན་འགྲུས་ཆེ་ཞེས་བྱ་བ་ནི་བསྡུ་བའི་དངོས་
[311a.5]པོ་བཞི་དང་བཅས་པའི་ལས་ཐམས་ཅད་ཁྱབ་པའི་ཕྱིར་བརྩོན་འགྲུས་ཆེའོ། །ཐབས་ཆེན་པོ་ཞེས་བྱ་བ་ནི་གཞལ་དུ་མེད་པ་འགུགས་པའི་རང་བཞིན་ཡིན་པའི་ཕྱིར་ཐབས་ཆེན་པོ་སྟེ་མཚན་བདུན་ནོ། །རྡོ་རྗེ་འདོད་པ་འདོད་པ་ཞེས་བྱ་བ་ནི་རྡོ་རྗེ་ཆགས་པའི་སྙིང་པོའི་སྒོ་ནས་སོ། །དག་
[311a.6]པ་ཆེ་ཞེས་བྱ་བ་ནི་ཆོས་བདག་མེད་པའི་ཆགས་པའི་ངོ་བོས་བག་ཆགས་དང་བཅས་པ་ཉོན་མོངས་པ་སྤངས་པའི་ཕྱིར་དག་པ་ཆེའོ། །ཀུན་གྱི་བདེ་བ་ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་རང་བཞིན་ཡིན་པའི་ཕྱིར་ཀུན་གྱི་བདེ་བའོ། །བདེ་
[311a.7]བ་ཆེ་ཞེས་བྱ་བ་ནི་དངོས་པོ་དང་དངོས་པོ་མེད་པའི་དཔྱད་པ་དང་བྲལ་བས་བདེ་བ་ཆེན་པོའི་རྣམ་པར་ཐར་པའོ། །བདེ་མཆོག་ཅེས་བྱ་བ་ནི་བདེ་བ་ཆེན་པོའི་ངོ་བོས་ཐམས་ཅད་མཆོག་ཏུ་གྱུར་པའི་ཕྱིར་རོ། །ཐོག་མ་དང་ཐ་མ་མེད་པ་ཞེས་བྱ་བ་ནི་བཤད་ཟིན་ཏོ། །བཞད་ཆེན་ཞེས་བྱ་བ་ནི་
[311b]
[311b.1]བཅོམ་ལྡན་འདས་རྡོ་རྗེ་སེམས་དཔའོ་ཞེས་གསུངས་པས་ན་མཚན་བདུན་ནོ། །རྡོ་རྗེ་ལེགས་པ་ཞེས་བྱ་བ་ནི་སྙིང་པོའི་སྒོ་ནས་སོ། །དགྱེས་པ་ཆེ་ཞེས་བྱ་བ་ནི་སྤྲོ་བ་དང་བསྡུ་བའི་སྒོ་ནས་སོ། །ལེགས་ཞེས་བྱ་བ་ནི་ལེགས་པར་བྱེད་པའི་རང་བཞིན་ནོ། །རབ་དགྱེས་པ་ཞེས་བྱ་
[311b.2]བ་ནི་དེ་བཞིན་གཤེགས་པ་ལ་སོགས་པ་དང་། སེམས་ཅན་རྣམས་ཡིད་བདེ་བ་བསྐྱེད་པར་མཛད་པའི་ཕྱིར་རབ་དགྱེས་པའོ། །མཉེས་པ་ཆེ་ཞེས་བྱ་བ་ནི་ཡིད་བདེ་བའི་རང་བཞིན་གྱིས་ཐམས་ཅད་དུ་ཁྱབ་པའི་ཕྱིར་མཉེས་པ་ཆེའོ། །དགྱེས་པ་ཆེ་ཞེས་བྱ་བ་ནི་ཡིད་བདེ་བའི་རང་
[311b.3]བཞིན་གྱིས་ཐམས་ཅད་དུ་ཁྱབ་པའི་ཕྱིར་མཉེས་པ་ཆེའོ། །དགྱེས་པ་ཆེ་ཞེས་བྱ་བ་ནི་ཡིད་བདེ་བ་བསྐྱེད་པས་ཐམས་ཅད་ཁྱབ་པའི་ཕྱིར་དགྱེས་པ་ཆེའོ། །རབ་དགྱེས་ཁྱོད་ཅེས་བྱ་བ་ནི་སེམས་ཅན་རྣམས་ལ་རབ་ཏུ་དགྱེས་པ་ཤིན་ཏུ་བསྐྱེད་པའི་ཕྱིར་ན་རབ་དགྱེས་ཁྱོད་
[311b.4]དེ་མཚན་བདུན་ཡིན་ནོ། །རྡོ་རྗེ་རིན་ཆེན་ཞེས་བྱ་བ་ནི་སྙིང་པོའི་སྒོ་ནས་སོ། །རྒྱལ་པོ་ཆེ་ཞེས་བྱ་བ་ནི་ཁམས་གསུམ་པའི་ཆོས་ཀྱི་རྒྱལ་སྲིད་ཐོབ་པས་ན་རྒྱལ་པོ་ཆེའོ། །དབང་བསྐུར་བཟང་པོ་ཞེས་བྱ་བ་ནི་དབང་བསྐུར་བ་བཟང་པོ་འདི་ལ་མངའ་བས་ན་དབང་བསྐུར་
[311b.5]བཟང་པོའོ། །ནམ་མཁའ་དང་མཉམ་པའི་ཡེ་ཤེས་ཀྱི་བདུད་རྩིའི་ཆུས་ཁམས་གསུམ་པ་ན་སྤྱོད་པའི་བག་ཆགས་དང་བཅས་པའི་ཉོན་མོངས་པའི་དྲི་མ་འཁྲུད་པར་བྱེད་དོ་ཞེས་བྱ་བའི་དོན་ཏོ། །བདག་པོ་ཞེས་བྱ་བ་ནི་རིན་པོ་ཆེའི་རིགས་ཀྱི་རང་བཞིན་གྱི་སྦྱིན་པའི་
[311b.6]བདག་པོ་ནི་སྦྱིན་བདག་ཆེན་པོ་སྟེ། འཁོར་ལོས་སྒྱུར་བ་ཆེན་པོ་ཡིན་པའི་ཕྱིར་རོ། །རིན་ཆེན་ཐམས་ཅད་ཅེས་བྱ་བ་ནི་ནོར་བུའི་རིགས་ཐམས་ཅད་ཀྱི་རིན་པོ་ཆེའི་རང་བཞིན་ཡིན་པའི་ཕྱིར་རིན་ཆེན་ཐམས་ཅད་དོ། །མཛེས་པ་ཆེ་ཞེས་བྱ་བ་ནི་རིན་པོ་ཆེའི་རིགས་ཀྱི་
[311b.7]རང་བཞིན་གྱིས་སེམས་ཅན་ཐམས་ཅད་ལ་མཛེས་པ་ཆེན་པོར་བྱེད་པས་ན་མཛེས་པ་ཆེའོ། །རྣམ་རྒྱན་ཁྱོད་ཅེས་བྱ་བ་ནི་རིན་པོ་ཆེའི་ཅོད་པན་ལ་སོགས་པའི་རྒྱན་ཐམས་ཅད་ཀྱིས་སེམས་ཅན་ཐམས་ཅད་རྣམ་པར་བརྒྱན་པར་བྱེད་པའི་ཕྱིར་ན་རྣམ་བརྒྱན་དེ་མཚན་བདུན་
[312a]
[312a.1]ཡིན་ནོ། །རྡོ་རྗེ་གཟི་བརྗིད་ཆེ་ཞེས་བྱ་བ་ནི་སྙིང་པོའི་སྒོ་ནས་སོ། །གཟི་བརྗིད་ཆེ་ཞེས་བྱ་བ་ནི་སྤྲོ་པ་དང་བསྡུ་བའི་སྒོ་ནས་སོ། །འོད་ཆེ་ཞེས་བྱ་བ་ནི་འོད་ཀྱིས་ནམ་མཁའི་ཁམས་ཐམས་ཅད་ཁྱབ་པས་ན་འོད་ཆེའོ། །ལྷམ་མེ་ཆེན་པོ་སྟེ་ཞེས་བྱ་
[312a.2]བ་ནི་དེ་བཞིན་གཤེགས་པ་ལ་སོགས་པ་ཐམས་ཅད་གསལ་བ་འདི་ལ་མངའ་བས་ན་ལྷམ་མེ་ཆེན་པོའོ། །རྒྱལ་པོའི་འོད་ཅེས་བྱ་བ་ནི་དེ་བཞིན་གཤེགས་པའི་འོད་ཀྱི་ངོ་བོ་ཡིན་པའི་ཕྱིར་རོ། །འབར་བ་ཆེན་པོ་འདི་ལ་མངའ་བས་ན་འབར་བ་ཆེའོ། །སངས་རྒྱས་འོད་
[312a.3]ཅེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་སངས་རྒྱས་དེ་དག་གི་འོད་ཀྱི་ངོ་བོ་ཡིན་པའི་ཕྱིར་ཏེ་མཚན་བདུན་ཡིན་ནོ། །རྡོ་རྗེ་རྒྱལ་མཚན་ཞེས་བྱ་བ་ནི་སྙིང་པོའི་སྒོ་ནས་སོ། །རྡོ་རྗེ་དཔལ་ཞེས་བྱ་བ་ནི་སྤྲོ་བ་དང་བསྡུ་པའི་སྒོ་ནས་སོ། །རྒྱལ་མཚན་ཆེ་ཞེས་བྱ་བ་ནི་
[312a.4]སངས་རྒྱས་རྣམས་ཀྱི་རྒྱལ་མཚན་ཆེན་པོ་ཡིན་པའི་ཕྱིར་རྒྱལ་མཚན་ཆེའོ། །ནོར་རབ་གཏོང་ཞེས་བྱ་བ་ནི་སེམས་ཅན་ཐམས་ཅད་ལ་ཡིད་བཞིན་གྱི་ནོར་བུའི་རྒྱལ་མཚན་བཙུགས་ནས་རིན་པོ་ཆེ་སྣ་བདུན་ལ་སོགས་པའི་ནོར་སྟེར་བས་ན་ནོར་རབ་གཏོང་ངོ་། །ནམ་མཁའི་རྒྱལ་
[312a.5]མཚན་ཞེས་བྱ་བ་ནི་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ལས་བྱུང་བས་ན་ནམ་མཁའ་རྒྱལ་མཚན་ནོ། །ཡུ་བ་ཆེ་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའི་མཆོད་སྡོང་ཆེན་པོ་ནི་ཡུ་བ་ཆེ་སྟེ། བྱང་ཆུབ་སེམས་དཔའ་ཆེན་པོ་རྡོ་རྗེ་དཔལ་གྱི་སྐུའོ།།
[312a.6]གཏོང་བའི་རྒྱལ་མཚན་ཞེས་བྱ་བ་ནི་ཡིད་བཞིན་གྱི་ནོར་བུའི་རྒྱལ་མཚན་གྱིས་དོན་ཐམས་ཅད་གཏོང་བས་ན་གཏོང་བའི་རྒྱལ་མཚན་ཏེ་མཚན་བདུན་ནོ། །རྡོ་རྗེ་བཞད་པ་ཞེས་བྱ་བ་ནི་སྙིང་པོའི་སྒོ་ནས་སོ། །བཞད་པ་ཆེ་ཞེས་བྱ་བ་ནི་སྤྲོ་བ་དང་བསྡུ་བའི་
[312a.7]སྒོ་ནས་སོ། །དགྱེས་པ་ཆེ་ཞེས་བྱ་བ་ནི་ཡིད་བདེ་བ་དཔག་ཏུ་མེད་པའི་རྒྱུར་གྱུར་པས་ན་དགྱེས་པ་ཆེའོ། །རབ་དགྱེས་ཆེ་ཞེས་བྱ་བ་ནི་ཡིད་བདེ་བ་སྐྱེད་པར་བྱེད་པས་རབ་དགྱེས་མའོ། །དགྱེས་པའི་ཤུགས་ཞེས་བྱ་བ་ནི་རྟོག་པ་མེད་པ་དགའ་བའི་རྒྱུན་
[312b]
[312b.1]འབྱུང་བ་ཡིན་པའི་ཕྱིར་དགྱེས་པའི་ཤུགས་སོ། །རོལ་ཞིང་དགྱེས་ཞེས་བྱ་བ་ནི་བྱང་ཆུབ་སེམས་ལ་དགའ་ཞིང་མགུ་བས་ན་རོལ་ཞིང་དགྱེས་སོ། །ཆོས་དགྱེས་ཁྱོད་ཅེས་བྱ་བ་ནི་སངས་རྒྱས་ཀྱི་ཆོས་སྟོབས་དང་། མི་འཇིགས་པའི་ཡུལ་ལ་ཆོས་ཀྱིས་མགུ་བས་ན་
[312b.2]ཆོས་ཀྱིས་དགྱེས་པ་སྟེ་མཚན་བདུན་ཡིན་ནོ། །རྡོ་རྗེ་ཆོས་ཞེས་བྱ་བ་ནི་སྙིང་པོའི་སྒོ་ནས་སོ། །ཆོས་ཆེ་བ་ཞེས་བྱ་བ་ནི་སྤྲོ་བ་དང་བསྡུ་བའི་སྒོ་ནས་སོ། །ཐམས་ཅད་ཆོས་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་ངོ་བོ་ཡིན་
[312b.3]པའི་ཕྱིར་ཐམས་ཅད་ཆོས་སོ། །རབ་སྦྱོར་བ་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་དེ་ཉིད་ཀྱིས་སེམས་ཅན་གྱི་ཁམས་ཤིན་ཏུ་སྦྱོང་བས་ན་སྦྱོང་བའོ། །སངས་རྒྱས་ཆོས་ཞེས་བྱ་བ་ནི་སངས་རྒྱས་རྣམས་ཆོས་ཏེ། ཆོས་ཐམས་
[312b.4]ཅད་རང་བཞིན་གྱིས་རྣམ་པར་དག་པའི་དེ་བཞིན་གཤེགས་པའི་ཏིང་ངེ་འཛིན་གྱི་ངོ་བོས་སོ། །ཆོས་རབ་མཆོག་ཅེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་ངོ་བོ་ཉིད་ཀྱིས་ཆོས་ཐམས་ཅད་ལས་ཕུལ་དུ་བྱུང་བ་ཡིན་པས་ན་ཆོས་རབ་མཆོག་གོ། །
[312b.5]འདོད་ཆོས་ཞེས་བྱ་བ་ནི་དམིགས་པ་མེད་པའི་ཐུགས་རྗེ་ཆེན་པོའི་འདོད་པ་དེའི་ཆོས་ནི་པདྨའི་རིགས་ཏེ་མཚན་བདུན་ནོ། །རྡོ་རྗེ་རྣོན་པོ་ཞེས་བྱ་བ་ནི་སྙིང་པོའི་སྒོ་ནས་སོ། །རལ་གྲི་ཞེས་བྱ་བ་ནི་སྤྲོ་བ་དང་བསྡུ་བའི་སྒོ་ནས་སོ། །ཤེས་རབ་ཡེ་ཤེས་ཞེས་བྱ་བ་ནི་ཆོས་
[312b.6]ཐམས་ཅད་བདག་མེད་པར་ངེས་པའི་ངོ་བོ་ཡིན་པའི་ཕྱིར་ན་ཤེས་རབ་ཡེ་ཤེས་སོ། །བློ་གྲོས་ཆེ་ཞེས་བྱ་བ་ནི་དེ་ཉིད་ཀྱི་ཡེ་ཤེས་ཆེན་པོས་ཐམས་ཅད་དུ་སོང་བའི་ཕྱིར་བློ་གྲོས་ཆེའོ། །སྡིག་གཅོད་ཅེས་བྱ་བ་ནི་ཤེས་རབ་ཡེ་ཤེས་ཀྱིས་སེམས་ཅན་ཐམས་ཅད་ཀྱི་འདོད་ཆགས་
[312b.7]ལ་སོགས་པའི་ཉོན་མོངས་པའི་འཆིང་བ་གཅོད་པར་མཛད་པས་ན་སྡིག་གཅོད་དོ། །རལ་གྲི་ཆེན་པོ་ཞེས་བྱ་བ་ནི་ཤེས་རབ་ཡེ་ཤེས་ཀྱི་རལ་གྲིས་ཐམས་ཅད་དུ་སོང་བའི་ཕྱིར་རལ་གྲི་ཆེའོ། །སངས་རྒྱས་མཚོན་ཁྱོད་ཅེས་བྱ་བ་ནི་ཤེས་རབ་ཡེ་ཤེས་ཀྱི་རལ་གྲི་ཆེན་པོའི་ངོ་བོ་དེ་ཡང་
[313a]
[313a.1]སངས་རྒྱས་བཅོམ་ལྡན་འདས་རྣམས་ཀྱི་མཚོན་ཆ་ཡིན་པས་ན་སངས་རྒྱས་མཚོན་ཆ་སྟེ་མཚན་བདུན་ཡིན་ནོ། །རྡོ་རྗེ་རྒྱུ་ཞེས་བྱ་བ་ནི་སྙིང་པོའི་སྒོ་ནས་སོ། །འཁོར་ལོ་ཆེ་ཞེས་བྱ་བ་ནི་འཁོར་ལོའི་ཕྱག་རྒྱས་སྤྲོ་བ་དང་བསྡུ་བའི་སྒོ་ནས་སོ། །
[313a.2]སངས་རྒྱས་འཁོར་ལོ་ཞེས་བྱ་བ་ནི་འཁོར་ལོའི་ཕྱག་རྒྱའི་ངོ་བོ་དེ་སངས་རྒྱས་རྣམས་ཀྱི་ཡིན་པས་ན་སངས་རྒྱས་འཁོར་ལོའོ། །གཏེར་ཆེན་པོ་ཞེས་བྱ་བ་ནི་རྡོ་རྗེ་དབྱིངས་ལ་སོགས་པའི་དཀྱིལ་འཁོར་གྱི་ངོ་བོས་ཟད་མི་ཤེས་པའི་ཕྱིར་ན་གཏེར་ཆེན་པོའོ། །དཀྱིལ་
[313a.3]འཁོར་ཀུན་ཞེས་བྱ་བ་ནི་རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཐམས་ཅད་ཀྱི་ངོ་བོ་ཡིན་པས་ན་དཀྱིལ་འཁོར་ཀུན་ནོ། །ཆོས་ཀྱི་མཆོག་ཅེས་བྱ་བ་ནི་མདོ་སྡེ་ཐམས་ཅད་ཀྱི་ཆོས་ཀྱི་ཚུལ་ལས་དཀྱིལ་འཁོར་གྱི་ངོ་བོས་མཆོག་ཏུ་གྱུར་པའི་ཕྱིར་ཆོས་ཀྱི་མཆོག་གོ། །
[313a.4]ཆོས་ཀྱི་འཁོར་ལོ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་གྱི་གཟུངས་ཀྱི་གདུལ་བྱའི་སྐྱེ་བོའི་རྒྱུད་ལ་འཕོ་བར་བྱེད་པས་ན་ཆོས་ཀྱི་འཁོར་ལོ་སྟེ་མཚན་བདུན་ཡིན་ནོ། །རྡོ་རྗེ་གསུང་བ་ཞེས་བྱ་བ་ནི་སྙིང་པོའི་སྒོ་ནས་སོ། །གསུང་བ་ཆེ་ཞེས་བྱ་བ་ནི་
[313a.5]སྤྲོ་བ་དང་བསྡུ་བའི་སྒོ་ནས་སོ། །སྤྲོས་མེད་ཅེས་བྱ་བ་ནི་སེམས་ཅན་ཐམས་ཅད་ཀྱི་ངག་གི་རྣམ་པར་རྟོག་པ་དང་བྲལ་བའི་ཡེ་ཤེས་ཀྱི་ངོ་བོ་ཡིན་པའི་ཕྱིར་ན་སྤྲོས་པ་མེད་དོ། །ཡི་གེ་ཆེན་པོ་ཞེས་བྱ་བ་ནི་སྤྲོས་པ་མེད་པའི་ཡེ་ཤེས་ཀྱི་ངོ་བོ་གསུངས་པའི་ཕྱིར་ན་ཡེ་ཤེས་
[313a.6]ཆེན་པོའོ། །ཡི་གེ་མེད་ཅེས་བྱ་བ་ནི་སྤྲོས་པ་མེད་པའི་ཡེ་ཤེས་ཀྱི་ངོ་བོས་ཨ་ལ་སོགས་པའི་ཡི་གེ་རྣམས་སྤངས་པའི་ཕྱིར་ཡི་གེ་མེད་པའོ། །བཟླས་པ་ཆེ་ཞེས་བྱ་བ་ནི་ལྕེའི་ཕྱག་རྒྱས་ནམ་མཁའ་ཐམས་ཅད་ཁྱབ་པའི་ཕྱིར་བཟླས་པ་ཆེའོ། །སངས་རྒྱས་
[313a.7]གསུང་ཞེས་བྱ་བ་ནི་ལྕེའི་ཕྱག་རྒྱ་དེ་ཡང་སངས་རྒྱས་རྣམས་ཀྱིས་གསུངས་པ་ཡིན་པས་ན་སངས་རྒྱས་གསུང་སྟེ། མཚན་བདུན་ཡིན་ནོ། །རྡོ་རྗེ་ལས་ཞེས་བྱ་བ་ནི་སྙིང་པོའི་སྒོ་ནས་སོ། །ལས་རབ་མཆོག་ཅེས་བྱ་བ་ནི་དགེ་བ་རྣམས་ཀྱི་ལས་ཡིན་
[313b]
[313b.1]པས་ན་རབ་སྟེ། སངས་རྒྱས་ཀྱི་སྤྲུལ་པ་དང་། སེམས་ཅན་གྱི་དོན་བྱེད་པའི་མཚན་ཉིད་དེ་ནི་མཆོག་ཡིན་པས་ན་ལས་མཆོག་གོ། །ལས་ཆེན་ཞེས་བྱ་བ་ནི་སྤྲོ་བ་དང་བསྡུ་བའི་སྒོ་ནས་སོ། །ལས་རབ་བྱེད་པ་སྟེ་ཞེས་བྱ་བ་ནི་མ་ལུས་ཤིང་ལུས་པ་མེད་
[313b.2]པའི་སངས་རྒྱས་མཆོད་པའི་མཚན་ཉིད་ཀྱི་དགེ་བའི་ལས་བྱེད་པས་ན་ལས་རབ་བྱེད་དོ། །གསང་བའི་མཆོད་པ་ཞེས་བྱ་བ་ནི་རྩོམ་པའི་བརྩོན་འགྲུས་ཀྱིས་བསྒྲུབ་པའི་རང་གི་མཆོད་པ་ཡིན་པའི་ཕྱིར་གསང་བའི་མཆོད་པའོ། །མཆོད་པ་ཆེ་ཞེས་བྱ་
[313b.3]བ་ནི། རྩོམ་པའི་བརྩོན་འགྲུས་ཀྱི་ལས་ཐམས་ཅད་དུ་ཁྱབ་པའི་ཕྱིར་ན་མཆོད་པ་ཆེའོ། །སངས་རྒྱས་མཆོད་པ་ཞེས་བྱ་བ་ནི་རྩོམ་པའི་བརྩོན་འགྲུས་ཀྱི་མཆོད་པའི་ལས་ཀྱི་ངོ་བོ་དེ་ཡང་སངས་རྒྱས་རྣམས་ཀྱི་ཡིན་པ་དེ་བས་སངས་རྒྱས་མཆོད་ཁྱོད་ཅེས་བྱ་བ་སྟེ་
[313b.4]མཚན་བདུན་ཡིན་ནོ། །རྡོ་རྗེ་སྲུང་བ་ཞེས་བྱ་བ་ནི་སྙིང་པོའི་སྒོ་ནས་སོ། །གོ་ཆ་ཆེ་ཞེས་བྱ་བ་ནི་གོ་ཆའི་ཕྱག་རྒྱས་སྤྲོ་བ་དང་བསྡུ་བའི་སྒོ་ནས་སོ། །གོ་ཆ་མཆོག་ཅེས་བྱ་བ་ནི་དབྱེར་མི་ཕྱེད་པའི་གོ་ཆའི་ངོ་བོ་ནི་གོ་ཆའི་ཕྱག་རྒྱ་རྣམས་ལས་མཆོག་ཏུ་གྱུར་པས་ན་
[313b.5]གོ་ཆ་མཆོག་ཅེས་བྱའོ། །བརྟན་པ་ཆེ་ཞེས་བྱ་བ་ནི་བརྟན་པ་ཡང་ཡིན་ལ་ཆེན་པོ་ཡང་ཡིན་པས་ན་ཡོངས་སུ་སྦྱོང་བའི་བརྩོན་འགྲུས་ཀྱི་ངོ་བོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ཕྱིར་ན་བརྟན་པ་ཆེའོ། །སྲུང་བ་ཆེ་ཞེས་བྱ་བ་
[313b.6]ནི་ཡོངས་སུ་སྦྱོང་བའི་བརྩོན་འགྲུས་ཀྱི་ངོ་བོས་ཐམས་ཅད་དུ་ཁྱབ་པའི་ཕྱིར་ན་བསྲུང་བ་ཆེའོ། །བདུད་ཆེན་པོ་ཞེས་བྱ་བ་ནི་ཡོངས་སུ་སྦྱོང་བའི་བརྩོན་འགྲུས་ཀྱི་ངོ་བོ་ཉིད་ཀྱིས་སེམས་ཅན་ཐམས་ཅད་ཀྱི་རྒྱུད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་
[313b.7]སེམས་ཀྱིས་ཕྱིར་ཕྱོགས་པས་བསད་པས་ན་བདུད་ཆེན་པོའོ། །སངས་རྒྱས་བརྩོན་འགྲུས་ཞེས་བྱ་བ་ནི་སངས་རྒྱས་བཅོམ་ལྡན་འདས་རྣམས་ཀྱིས་དགོངས་པས་དེའི་ཡང་བདུད་ཆེན་པོའི་ངོ་བོར་གྱུར་པས་ན་སངས་རྒྱས་བརྩོན་འགྲུས་ཏེ། མཚན་བདུན་ཡིན་ནོ། །རྡོ་རྗེ་
[314a]
[314a.1]གནོད་སྦྱིན་ཞེས་བྱ་བ་ནི་སྙིང་པོའི་སྒོ་ནས་སོ། །ཁྲོ་བོ་ཆེ་ཞེས་བྱ་བ་ནི་སྤྲོ་བ་དང་། བསྡུ་བའི་སྒོ་ནས་སོ། །མ་རུངས་པའི་བདུད་སྐྲག་པར་བྱེད་པའི་ཕྱིར་དང་། མ་རུངས་པ་ཐམས་ཅད་ཅེས་བྱ་བ་ནི། སྟོན་པའི་ཕྱིར་ན་
[314a.2]མ་རུངས་པ་ཐམས་ཅད་དོ། །སྐྲག་བྱེད་པ་ཞེས་བྱ་བ་ནི་དེ་བཞིན་གཤེགས་པ་ལ་སོགས་པས་སེམས་ཅན་གྱི་ཁམས་ཐམས་ཅད་ཀྱི་རྡོ་རྗེ་གནོད་སྦྱིན་གྱི་འཇིགས་པ་ཆེན་པོའི་གཟུགས་ཟློག་པར་བྱེད་པའི་ཕྱིར་སྐྲག་བྱེད་པའོ། །སངས་རྒྱས་ཀུན་ཞེས་བྱ་བ་ནི་སངས་
[314a.3]རྒྱས་བདག་ཉིད་ཡིན་པའི་ཕྱིར་ན་སངས་རྒྱས་ཀུན་ནོ། །ཐབས་ཆེན་པོ་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་འོད་གསལ་བ་ཡིན་ནོ་ཞེས་སོ་སོར་རྟོག་པའི་བརྩོན་འགྲུས་ཀྱིས་བདུད་བཞི་འཇོམས་པར་བྱེད་པས་ན་ཐབས་ཆེན་པོའོ། །མཆོག་ཅེས་བྱ་བ་ནི་བཤད་
[314a.4]མ་ཐག་པའི་སོ་སོར་རྟོག་པའི་བརྩོན་འགྲུས་ནི་གཞན་ལ་མཆོག་ཏུ་གྱུར་པའི་ཕྱིར་ན་མཆོག་གོ། །གནོད་སྦྱིན་ཞེས་བྱ་བ་ནི་རང་བཞིན་གྱིས་འོད་གསལ་བའི་སོ་སོར་རྟོག་པའི་བརྩོན་འགྲུས་ཀྱིས་བདུད་བཞི་ཟ་བས་གནོད་སྦྱིན་ཏེ་མཚན་བདུན་ནོ། །རྡོ་རྗེ་མཚམས་སྦྱོར་ཞེས་
[314a.5]བྱ་བ་ནི་སྙིང་པོའི་སྒོ་ནས་སོ། །ཕྱག་རྒྱ་ཞེས་བྱ་བ་ནི་འོད་གསལ་བསྒྲུབས་པའི་བརྩོན་འགྲུས་ཀྱིས་མངོན་སུམ་དུ་བྱས་པའི་ངོ་བོས་སེམས་ཅན་རྣམས་ལ་རྒྱས་འདེབས་པས་ན་ཕྱག་རྒྱ་ཆེའོ། །དམ་ཚིག་ཆེན་པོ་ཞེས་བྱ་བ་ནི་བཤད་མ་ཐག་པའི་ཕྱག་རྒྱ་ཆེན་
[314a.6]པོའི་གཟུགས་ཉིད་ཀྱིས་ཐམས་ཅད་དུ་ཁྱབ་པའི་ཕྱིར་དམ་ཚིག་ཆེའོ། །བཅིང་བ་ཆེ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་ཕྱག་རྒྱ་རྣམས་དམ་ཚིག་ཆེན་པོའི་ངོ་བོ་གཅིག་ཏུ་བྱེད་པས་ན་འཆིང་བ་ཆེའོ། །ཁུ་ཚུར་ཆེན་པོ་
[314a.7]ཞེས་བྱ་བ་ནི་བཤད་མ་ཐག་པའི་ངོ་བོས་ཐམས་ཅད་དུ་ཁྱབ་པའི་ཕྱིར་ཁུ་ཚུར་ཆེན་པོའོ། །ཕྱག་རྒྱ་མཆོག་ཅེས་བྱ་བ་ནི་དགེ་བའི་ཕྱག་རྒྱ་ནི་བཟང་པོའི་ཕྱག་རྒྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་དང་། གསུང་དང་།
[314b]
[314b.1]ཐུགས་ཀྱི་ཕྱག་རྒྱའོ། །རྡོ་རྗེ་ཁུ་ཚུར་གྱི་ངོ་བོས་དེ་རྣམས་ལ་ཁྱད་པར་དུ་གྱུར་པས་ན་མཆོག་གོ། །རྡོ་རྗེ་ཁུ་ཚུར་ཞེས་བྱ་བ་ནི་མིང་གི་དབང་བསྐུར་བའི་སྒོ་ནས་ཏེ་མཚན་བདུན་ཡིན་ནོ། །དེ་བཞིན་གཤེགས་པས་ཕྱག་བྱ་ཞིང་། །ཞེས་བྱ་བ་ལ་སོགས་པ་
[314b.2]ནི་གོ་སླའོ། །བརྗོད་དེ་མཆོད་དེ་བསྟི་སྟང་བྱ། །ཞེས་བྱ་བ་ནི་བསྟི་སྟང་དུ་བྱ་བ་བཟང་པོ་འདི་ལ་མངའ་བས་ན་བསྟི་སྟང་བྱ་བའོ། །འདིར་བསྟི་སྟང་དུ་བྱ་བ་ནི་ཤིན་ཏུ་གུས་ཤིང་བསྟི་སྟང་བྱ་བ་དེ་དག་ཕུལ་དུ་བྱུང་བར་གནས་པའི་ཕྱིར་མཆོད་དེ་བསྟི་སྟང་དུ་བྱའོ། །
[314b.3]ལྷག་མ་ནི་གོ་སླའོ། །འདི་སྐད་སྟོན་པ་ཡིན་ཏེ། དེ་ལྟར་དཀྱིལ་འཁོར་གྱི་ལྷའི་སྤྲུལ་པ་ཐམས་ཅད་བསྡུ་བ་མཛད་ནས་རི་རབ་ཀྱི་རྩེ་མོ་ཡོངས་སུ་བཏང་ནས། འོག་མིན་གྱི་གནས་སུ་ལོངས་སྤྱོད་རྫོགས་པའི་སྐུ་རྣམ་པར་སྣང་མཛད་དང་ལྷན་ཅིག་ཏུ་གྱུར་པར་
[314b.4]བདག་ཉིད་བསམ་པར་བྱའོ། །སློབ་དཔོན་གྱིས་དེ་ནས་དགའ་ལྡན་གྱི་གནས་སུ་དམ་པ་ཏོག་དཀར་པོ་སྤྲུལ་ནས་ཆོས་སྟོན་པར་མཛད་པ་ཡིན་ནོ། །དེ་ནས་ཤཱཀྱའི་རིགས་སུ་དགའ་ལྡན་ན་སྤྱོད་པའི་ལྷའི་བུ་ཤི་འཕོས་ནས་ཤཱཀྱའི་རིགས་སུ་སྐྱེས་པར་མཛད་ནས། །དཀའ་
[314b.5]བ་སྤྱོད་པའི་མཐར་ཐུག་པ་དང་། དོན་ཐམས་ཅད་གྲུབ་པའི་སྤྱོད་པ་བཏང་ནས་བྱང་ཆུབ་ཆེན་པོའི་དྲུང་དུ་གཤེགས་པ་ཡིན་ནོ། །ཤིས་པ་ལ་སོགས་པའི་རྩྭའི་གདན་བླངས་ནས། ཨེ་མའོ་སེམས་ཅན་བསྟན་པ་ཡི། །སེམས་ཅན་དོན་ནི་བདག་དོན་མཆོག །
[314b.6]གང་ཕྱིར་འདུལ་དབང་བསྟན་པ་རྣམས། །མུ་སྟེགས་ལྟ་ལ་གནས་པར་མཛད། །མདོར་ན་མི་འདུལ་འཇིག་རྟེན་པ། །ལྟ་བ་ངན་པས་ལྡོངས་པ་རྣམས། །ཡེ་ཤེས་སྣང་བས་དག་བྱའི་ཕྱིར། །སངས་རྒྱས་བྱང་ཆུབ་ཐོབ་པར་འགྱུར། །དེ་ནས་
[314b.7]འདོད་པའི་ལྷ་རྣམས་ལ། །འདི་སྐད་དུ། ཀྱེ་དགེ་སྦྱོང་གི་བྱང་ཆུབ་ཀྱི་ཕྱིར་འདི་ལྟ་བུའི་སྡུག་བསྔལ་དྲག་ཅིང་མི་བཟད་པའི་སྡུག་བསྔལ་རྣམས་ཀྱིས་དགའ་བ་སྐྱེད་པར་མཛད་དམ་ཞེས་གསོལ་ནས་བདག་ཉིད་ལ་བསྐུལ་བར་བསམ་པར་བྱའོ། །དེ་ནས་
[315a]
[315a.1]རྩྭའི་གདན་བཏིང་སྟེ། སྟེང་དུ་བཞུགས་ནས་ལྷ་རྣམས་ལ་འདི་སྐད་ཅེས་བཀའ་སྩལ་ཏོ། །གྲོགས་པོ་རྣམས་ཁོ་བོས་བྱང་ཆུབ་ཐོབ་པར་སྒྲུབས་ཤིག་ཡང་དབང་ཕྱུག་ཆེན་པོ་ལ་སོགས་པའི་ལྷ་རྣམས་ཀྱིས་སྙིང་པོ་བྱང་ཆུབ་ག་ན་བ་
[315a.2]དེར་སོང་ནས། ཞབས་ལ་སྤྱི་བོས་ཕྱག་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བར་དགོངས་ཏེ། རང་གི་གདན་འདི་ལས་བཞེངས་ལ་ལྷ་རྫས་ཀྱི་གདན་ལ་བཞུགས་ཏེ། བླ་ན་མེད་པ་ཡང་དག་པར་རྫོགས་པའི་
[315a.3]བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་མཛད་དུ་གསོལ་ཞེས་སྨྲ་བར་བསམ་པར་བྱའོ། །དེ་ནས་དེ་དག་ལ་འདི་སྐད་ཅེས་བཀའ་སྩལ་ཏོ། །གྲོགས་པོ་རྣམས་ཁོ་བོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྨིན་པར་སྒྲུབས་ཤིག །
[315a.4]དེ་ནས་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བྱང་ཆུབ་སྩོལ་བར་མི་ནུས་སོ། །ཅི་སྟེ་བདག་ཅག་གིས་ནུས་པར་མི་འགྱུར་ན། ད་ལྟ་བདག་ཉིད་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་སྨྲ་བར་བསམ་པར་
[315a.5]བྱའོ། །དེ་ནས་དེ་དག་གི་དོན་དེ་ཉིད་གསལ་བར་མཛད་པ་ནི། དེ་ནི་གཟུགས་མིན་གཟུགས་མེད་མིན། །བདེན་མིན་བརྫུན་མིན་གཙང་བ་ཡིས། །སངས་རྒྱས་བྱང་ཆུབ་ཡེ་ཤེས་འདི། །རྟོགས་ན་རྒྱལ་བ་ཉིད་དུ་འགྱུར། །དེ་ནས་ལྷའི་བདག་པོ་རྣམས་
[315a.6]ཀྱིས་བྱང་ཆུབ་པའི་དོན་མངོན་སུམ་དུ་བྱས་པར་བསམ་པར་བྱའོ། །རྩྭའི་གདན་དེ་ལས་བཞེངས་ཏེ་གྲོགས་པོ་རྣམས་སངས་རྒྱས་ཀྱི་ཡེ་ཤེས་འདི་ལྟ་བུ་རྟོགས་པར་བྱ་བའི་ཕྱིར་སྒྲུབས་ཤིག །དེ་དག་གིས་གསོལ་པ། བཅོམ་ལྡན་འདས་དེ་སྐད་ཅེས་བཀའ་
[315a.7]སྩལ་པ་དེ་བསམ་པར་རྔོ་མི་ཐོགས་ལགས་སོ། །དེ་ཡང་གདན་དེ་ཉིད་ལས་བཞུགས་པ་བཞིན་དུ་ཚིགས་སུ་བཅད་པས་མངོན་པར་བྱང་ཆུབ་པ་ལྔ་བསྒོམས་པའི་གདམས་ངག་དེ་དག་རབ་ཏུ་བསྟན་ཏེ། ཡིད་ཀྱིས་རབ་ཏུ་བརྟགས་པས་ན། །བྱང་ཆུབ་སེམས་
[315b]
[315b.1]ནི་བརྟན་པར་བྱས། །སེམས་དཔའ་རྡོ་རྗེ་བརྟན་བྱས་ལ། །སངས་རྒྱས་སུ་ནི་བདག་བསྒོམས་ཤིང་། །དེ་ནས་དེ་དག་གིས་དེ་ལྟ་བུ་ལེགས་སོ་ཞེས་ཁས་བླངས་ནས་དོང་བར་བསམ་མོ། །མཚན་མོ་དེ་ཉིད་ཀྱི་ཐོ་རངས་བདུད་ཕམ་པར་བྱས་ནས། བླ་ན་མེད་
[315b.2]པ་ཡང་དག་པར་རྫོགས་པའི་བྱང་ཆུབ་ཏུ་བདག་ཉིད་མངོན་པར་རྫོགས་པར་སངས་རྒྱས་པར་བསམ་པར་བྱའོ། །སྙིང་ག་ན་གནས་པའི་རྡོ་རྗེ་སེམས་དཔའ་ལ། རྡོ་རྗེ་སེམས་དཔའ་སེམས་དཔའ་ཆེ། །ཞེས་བྱ་བ་ལ་སོགས་པའི་མཚན་བརྒྱ་རྩ་བརྒྱད་
[315b.3]པ་འདིས་བསྟོད་པར་བསམ་པར་བྱའོ། །དེ་ནས་ཕྱག་ན་རྡོ་རྗེ་ཞེས་བྱ་བ་ནི། རྣམ་པར་སྣང་མཛད་ཀྱི་ཐུགས་ཀ་ན་གནས་པའི་རྡོ་རྗེ་སེམས་དཔའོ། །དེ་བཞིན་གཤེགས་པ་ཐམས་ཅད་གཅིག་ཏུ་འདུས་ཏེ་ཞེས་བྱ་བ་ནི། འོག་མིན་གྱི་གནས་ན་ལོངས་སྤྱོད་
[315b.4]རྫོགས་པའི་སྐུ་སྟོན་པའི་དེ་བཞིན་གཤེགས་པ་གང་ཡིན་པ་དེ་ཐམས་ཅད་ཀྱིས་བཅོམ་ལྡན་འདས་རྣམ་པར་སྣང་མཛད་དང་གསུང་གཅིག་ཏུ་ལེགས་སོ་ཞེས་བྱ་བ་རབ་ཏུ་བྱིན་ནོ། །ལག་གཉིས་ལེགས་པར་བྱེད་པའི་ཕྱག་རྒྱ་བཅིངས་ཏེ། རྡོ་རྗེ་
[315b.5]སེམས་དཔའ་ཁྱོད་ཕྱག་འཚལ། །ཞེས་བྱ་བ་ལ་སོགས་པས་ལེགས་སོ་ཞེས་གསུངས་སོ། །དེའི་དོན་འདི་སྐད་སྟོན་པ་ཡིན་ཏེ། དེ་ལ་མི་རྣམས་ཀྱིས་མངོན་པར་བྱང་ཆུབ་པ་ནི་འདི་ལྟར་རྣམ་པར་བསམས་ཏེ། རྣལ་འབྱོར་པ་སྤྲུལ་པའི་སྐུས་མི་
[315b.6]རྣམས་ཀྱི་ཤཱཀྱ་ཐུབ་པའི་ཤུགས་ཀྱིས་རབ་ཏུ་ཞུགས་པ་ཡིན་ལ། འོག་མིན་དུ་རྣམ་པར་སྣང་མཛད་དང་བདག་ཉིད་ལྷན་ཅིག་ཐ་མི་དད་པར་བསམས་ནས་སྙིང་ག་ག་གནས་པའི་རྡོ་རྗེ་སེམས་དཔའ་ལ་མཚན་བརྒྱ་རྩ་བརྒྱད་པས་བསྟོད་ནས། ཡང་ལེགས་
[315b.7]སོ་ཞེས་བྱ་བའི་ཕྱག་རྒྱ་བཅིངས་ནས། རྡོ་རྗེ་ཐེག་པ་བླ་ན་མེད། །དེ་བཞིན་གཤེགས་པ་ཀུན་གྱི་གསང་། །ཐེག་པ་ཆེན་པོ་མངོན་འདུལ་བའི། །མདོ་སྡེ་ལེགས་པར་བཤད་པས་ན། །རྡོ་རྗེ་སེམས་དཔའ་ཁྱོད་ལེགས་སོ། །རྡོ་རྗེ་རིན་
[316a]
[316a.1]ཆེན་ཁྱོད་ལེགས་སོ། །རྡོ་རྗེ་ཆོས་ནི་ཁྱོད་ལེགས་སོ། །རྡོ་རྗེ་ལས་ནི་ཁྱོད་ལེགས་སོ། །དེ་བཞིན་གཤེགས་པ་ཐམས་ཅད་དང་བཅས་པ་དགྱེས་པར་འགྱུར་རོ། །དེ་ནས། རྡོ་རྗེ་སེམས་དཔའི་གཙུག་ཏོར་དང་། །
[316a.2]རྡོ་རྗེ་བསྲུང་བ་དང་། རྡོ་རྗེ་གནོད་སྦྱིན་དང་། རྡོ་རྗེ་ཁུ་ཚུར་གྱི་ཕྱག་རྒྱ་རྣམས་ཀྱིས་བདག་ཉིད་ཡང་དག་པར་བསྲུངས་ལ། རྡོ་རྗེ་སེམས་དཔའ་སེམས་དཔའ་ཆེ། །ཞེས་ཡང་དང་ཡང་དུ་བརྗོད་ཅིང་ཇི་ལྟར་མངོན་པར་འདོད་པའི་དགེ་བའི་ཕྱོགས་བྱེད་
[316a.3]ཅིང་གནས་པར་བྱེད་པའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དེ་ནས་རྡོ་རྗེ་སེམས་དཔའ་ཐམས་ཅད་ཀྱིས་སངས་རྒྱས་ཀྱི་ཞིང་འདི་དག་ཐམས་ཅད་དཔེར་ན་ཏིལ་གྱི་གང་བུ་བཞིན་དུ་ཡོངས་སུ་གང་བར་གྱུར་ཏོ་ཞེས་བྱ་བ་ནས་བརྩམས་
[316a.4]ནས། རྡོ་རྗེ་ཐེག་པ་བླ་ན་མེད། །དེ་བཞིན་གཤེགས་པ་ཀུན་གྱི་གསང་། །ཐེག་པ་ཆེན་པོ་མངོན་བསྡུས་པ། །མདོ་འདི་ལེགས་པར་བཤད་པའོ། །ཞེས་བྱ་བའི་བར་དུའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཞེས་བྱ་བ་
[316a.5]ཐེག་པ་ཆེན་པོའི་མདོ་གང་ཡིན་པ་དེ་སྡུད་པ་པོ་བདག་གིས་འོག་མིན་ལྷའི་རྒྱལ་པོའི་གནས་ན་བཅོམ་ལྡན་འདས་རྣམ་པར་སྣང་མཛད་བཞུགས་ཏེ་བཀའ་སྩལ་ཞིང་། གསུངས་པ་དེ་ལས་མངོན་སུམ་དུ། །འདི་སྐད་བདག་གིས་ཐོས་པ་དེ་ནི་འདི་ཡིན་ནོ་
[316a.6]ཞེས་བདག་ཉིད་ཀྱིས་ཁས་བླངས་པ་ཡིན་ནོ། །བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོ་ལ་སོགས་པ་རྣམས་ཀྱིས་སྡུད་པ་པོ་ཡོངས་སུ་རྫོགས་པའི་དུས་སུ་ལྕང་ལོ་ཅན་གྱི་ཕོ་བྲང་ན་གནས་པའི་སྡུད་པར་བྱེད་པ་ས་བཅུའི་དབང་ཕྱུག་ཕྱག་ན་རྡོ་རྗེས་གསུངས་
[316a.7]པ་མཐར་རྗེས་སུ་ཡི་རང་ཞིང་མངོན་པར་བསྟོད་དོ། །དེ་ལྟར་བཅོམ་ལྡན་འདས་རྣམ་པར་སྣང་མཛད་ཀྱིས། དེ་བཞིན་གཤེགས་པ་དེ་ཁོ་ན་ཉིད་བསྡུས་པ་ཐེག་པ་ཆེན་པོའི་མདོ་གསུངས་པ་ཡང་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་
[316b]
[316b.1]དཔའ་དང་བཅས་པ་རྣམས་རྗེས་སུ་ཡི་རང་ཞིང་མངོན་པར་བསྟོད་དོ། །གང་ན་གནས་ཤེ་ན། རང་གི་ཐུགས་ཀ་ན་ཞེས་བྱ་བ་སྨོས་ཏེ། རང་གི་ཐུགས་ལ་ཞུགས་པས་ན་རང་གི་ཐུགས་ཀ་ན་གནས་པའོ། །བཅོམ་ལྡན་འདས་རྣམ་པར་སྣང་མཛད་ཀྱི་
[316b.2]ཐུགས་ཀ་ན་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་དང་བཅས་པ་བཞུགས་པ་གང་ཡིན་པ་དེ་ནི། འོག་མིན་གྱི་གནས་ན། དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་དང་མཉམ་པར་བཞུགས་པ་གང་ཡིན་པ་དེ་དག་
[316b.3]ཐམས་ཅད་དགྱེས་ཤིང་མཉེས་ནས་གསུངས་པ་ལ་མངོན་པར་དགྱེས་པར་གྱུར་ཏོ་ཞེས་བྱ་བར་སྦྱར་རོ། །གང་གིས་གསུངས་པ་ཡིན་ཞེ་ན། བཅོམ་ལྡན་འདས་རྡོ་རྗེ་སེམས་དཔའ་ཞེས་བྱ་བ་སྨོས་ཏེ། བཅོམ་ལྡན་འདས་རྡོ་རྗེ་སེམས་དཔའ་ནི། འཁོར་
[316b.4]ལོས་སྒྱུར་བ་བཞིའི་རང་བཞིན་དུ་སྟོན་པ་གང་ཡིན་པ་དང་། བཅོམ་ལྡན་འདས་རྣམ་པར་སྣང་མཛད་ཀྱིས་འོག་མིན་གྱི་གནས་སུ་མངོན་པར་བྱང་ཆུབ་པ་མངོན་སུམ་དུ་མཛད་པའི་རྗེས་ཐོགས་ཉིད་ལ་གསུངས་པ་འདི་དང་། རྡོ་རྗེ་སེམས་དཔའ་རི་རབ་ཀྱི་རྩེ་མོ་ན་
[316b.5]བཞུགས་ནས་འདི་རྒྱ་ཆེ་བར་གསུངས་པ་ཡིན་ནོ། །དེའི་དོན་འདི་སྐད་སྟོན་པ་ཡིན་ཏེ། འདི་ལྟར་རི་རབ་ཀྱི་སྟེང་དུ་འཁོར་ལོས་སྒྱུར་བ་བཞིའི་རང་བཞིན་གྱིས། བཅོམ་ལྡན་འདས་རྡོ་རྗེ་སེམས་དཔའ་དེ་ཁོ་ན་ཉིད་བསྡུས་པ་གསུངས་པ་དང་། བཅོམ་ལྡན་
[316b.6]འདས་རྣམ་པར་སྣང་མཛད་ཀྱི་འོག་མིན་གྱི་གནས་སུ་མངོན་པར་བྱང་ཆུབ་པ་མངོན་སུམ་དུ་རྗེས་ཐོགས་ཉིད་ལ། བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོ་ལ་སོགས་པ་ཐོག་མར་གསུངས་པ་ཡིན་ནོ། །མངོན་པར་དགྱེས་ཞེས་བྱ་བ་ནི། མངོན་པར་
[316b.7]དགའ་བའི་གྱུར་པ་ཞེས་བྱ་བའི་ཐ་ཚིག་གོ། །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཞེས་བྱ་བ་ཐེག་པ་ཆེན་པོའི་མདོའི་འགྲེལ་པའོ། །དེ་སྐད་དུ་ཡང་། ཆོས་བདག་མེད་པའི་ཆགས་པ་ཡིས། །སྐྱེ་དགུ་ཆགས་པས་བསྒོས་པ་ཡིས། །
[317a]
[317a.1]དེ་བཞིན་གཤེགས་རིགས་སྣ་ཚོགས་པའི། །ཕྱོགས་རྣམས་ཀུན་དུ་ཡང་དག་བཞུགས། །ཐུགས་རྗེ་ཆེན་པོ་ལས་བྱུང་བའི། །གདུག་ཅིང་མ་རུངས་འདུལ་མཛད་པ། །རྡོ་རྗེ་རིགས་ཆེན་སྣ་ཚོགས་པའི། །ཞེ་སྡང་མཚན་མ་རབ་ཞི་ཞིང་། །
[317a.2]མེད་པའི་ལྟ་བ་ཆེས་རྨོངས་པའི། །ཁམས་གསུམ་འདམ་གྱི་ཉེས་པ་ལས། །པདྨ་ཆེན་པོའི་རིགས་དག་པ། །ཀུན་དུ་དགའ་བས་རྣམ་པར་བཞུགས། །སེར་སྣའི་དྲི་མ་འཇིག་བྱེད་ཅིང་། །སེམས་ཅན་བསམ་པ་ཡོངས་རྫོགས་བྱེད། །ནོར་བུ་
[317a.3]ཆེན་པོའི་རིགས་ཀྱི་ལྷ། །ནམ་མཁའ་བཞིན་དུ་ཡང་དག་བཞུགས། །ཐམས་ཅད་གཟུགས་བརྙན་དང་མཚུངས་པ། །སྐྱེ་བ་མེད་ཅིང་གནས་མེད་པས། །སྒྱུ་མ་སོགས་བཞིན་རྣམ་རིག་པའི། །བྱང་ཆུབ་སྙིང་པོ་རབ་བསྒྲུབ་ཕྱིར། །སྙིང་རྗེས་ཁྱབ་པའི་སེམས་
[317a.4]ཀྱིས་ནི། །བློ་ལྡན་རྡོ་རྗེ་སེམས་དཔའ་ཡིས། །ནམ་མཁའི་མཐར་ཐུག་གྲགས་པ་ཡིས། །དེ་ཉིད་བསྡུས་རྒྱུད་འདི་གསུངས་སོ། །ཞེས་གསུངས་པ་ཡིན་ནོ། །ཨོཾ་ཛ་ཡ་ན་གཙུག་ནོར་བུ། འཇིག་རྟེན་གསུམ་པོ་དགའ་བྱེད་པའི། །བྱང་ཆུབ་སེམས་དཔའི་ཚོགས་གནས་པ། །
[317a.5]དཔལ་ལྡན་གཙུག་ལག་ཁང་ཆེན་དུ། །རྒྱུད་ཀྱི་འགྲེལ་པ་དེ་ཉིད་ནི། །སྣང་བྱེད་དགེ་བ་འདི་བཤད་པས། །བདག་གིས་བསོད་ནམས་གང་བསགས་པ། །བྱང་ཆུབ་སེམས་ཀྱི་འབྲས་བསྐྱེད་ནས། །དེ་ཡིས་འཇིག་རྟེན་མ་ལུས་པའི། །རྡོ་རྗེ་འཛིན་པ་ཀུན་དགའ་ཆེ། །སྙིང་པོ་
[317a.6]བསམ་གྱིས་མི་ཁྱབ་གཙོ། །རྡོ་རྗེ་འཛིན་ཆེན་རྒྱལ་གྱུར་ཅིག །འཕགས་པ་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་ཐེག་པ་ཆེན་པོའི་མདོའི་བཤད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ་རྫོགས་སོ།། །།གྲངས་ལ་རྨོངས་པ་གཞིག་པའི་ཕྱིར། །གཞུང་འདིའི་
[317a.7]གྲངས་ཀྱི་ཚད་དག་ནི། །སྟོང་ཕྲག་དག་ནི་བཅོ་བརྒྱད་དུ། །འགྲོ་ལ་ཕན་པ་བསྐྱེད་ཕྱིར་བྱས། །སློབ་དཔོན་ཀུན་དགའ་སྙིང་པོའི་ཞལ་སྔ་ནས་ཀྱིས་མཛད་པའོ། །རྒྱ་གར་གྱི་མཁས་པ་པཎྜི་ཏ་ཆེན་པོ་ཐུགས་རྗེ་ཆེན་པོ་དང་ཞུ་ཆེན་གྱི་ལོ་ཙཱ་བ་དགེ་སློང་འཕགས་པ་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།