[1a] [1b] [1b.1]{T2543}༄༅༅། །རྒྱ་གར་སྐད་དུ། ནཱ་མ་སངྒཱི་ཏི་ཨཱ་ཀཱ་ཤ་བི་མ་ལ་ནཱ་མ། བོད་སྐད་དུ། མཚན་ཡང་དག་པར་བརྗོད་པའི་དཀྱིལ་འཁོར་ཆོ་ག་ནམ་མཁའ་དྲི་མེད་ཅེས་བྱ་བ། འཇམ་དཔལ་ [1b.2]གཞོན་ནུར་གྱུར་པ་ལ་ཕྱག་འཚལ་ལོ། །དུས་གསུམ་བདེ་གཤེགས་ཤེས་རབ་ངོ་བོ་ཅན། །མ་རིག་མུན་ནང་སེམས་ཅན་ཉམ་ཐག་ལ། །ཡེ་ཤེས་ཉི་ཟེར་སྦྱིན་མཛད་ཐུགས་རྗེའི་བདག །འཇམ་ [1b.3]དཔལ་དེ་ལ་བཏུད་དེ་ཕྱག་འཚལ་ནས། །སྒྱུ་འཕྲུལ་རྒྱ་ཆེན་ནམ་མཁའ་ལྟ་བུ་ནས། །དབུགས་དབྱུང་དྲུག་བསྡུས་ཟབ་པ་ཡང་དག་ནི། །དཀྱིལ་འཁོར་ཆོ་ག་དགེ་བ་འདི་ཕྱོགས་ཙམ། །བསྡུས་ [1b.4]ལ་མོས་པའི་དོན་དུ་བཤད་པར་བྱ། །དེ་ལ་འདིར་རྡོ་རྗེ་སློབ་དཔོན་སྡོམ་པ་དང་ལྡན་ཞིང་དབང་ཐོབ་པ་གཞན་ལ་ཕན་པའི་བློ་ཅན་ཞིག་གིས། ཉོན་མོངས་པ་རགས་པའི་གང་ཟག་ལ་མ་སྨིན་པ་སྨིན་པར་ [1b.5]བྱ་བའམ། སེམས་ཅན་ཐམས་ཅད་བདེ་བ་ལ་དགོད་པར་བྱ་བའི་ཕྱིར། སངས་རྒྱས་ཐམས་ཅད་མཉེས་པར་བྱ་སྟེ། གཟའ་དང་ཉི་མ་དང་སྐར་མ་བཟང་པོ་ལ། མཁོ་བའི་ཡོ་བྱད་ཅི་འབྱོར་པ་ [2a] [2a.1]བསོགས་ལ། ནགས་ཚལ་ལམ། རི་བོའམ། ཆུ་ཀླུང་ངམ། ཚང་ཚིང་ལ་སོགས་པ་ཉམས་དགའ་བའི་གནས་སུ་གནས་པར་བྱས་ལ་སྟན་བདེ་བ་ལ་འདུག་སྟེ། རང་གི་སྒོ་དག་པར་བྱས་ནས་མོས་པའི་ [2a.2]སློབ་མ་མ་རུངས་པ་འདུལ་བའི་རྒྱལ་པོར་གནས་པར་བྱ་སྟེ། ཧཱུཾ་གི་མཚན་མ་ལས་བྱུང་བའི་ཁྲོ་བོ་གཤིན་རྗེ་གཤེད་དུ་སྐད་ཅིག་གིས་བདག་ཉིད་གྱུར་ཏེ། སྐུ་མདོག་མཐིང་ནག་ཧ་ལ་པ། ཞལ་བརྒྱ་ལྗགས་འདྲིལ་ཞིང་ཧ་ཧ་ [2a.3]ཧི་ཧིའི་གད་རྒྱངས་ཕྱོགས་བཅུར་སྒྲོགས་པ། སྤྱན་མིག་དམར་པོ་རྡོ་རྗེའི་མིག་ཅན། ལག་པ་བརྒྱ་པོ་ཀུན་བསྐྱོད་མཚོན་ཆ་སྣ་ཚོགས་བསྣམས་པ། གོམ་པའི་སྟབས་ཀྱིས་གདུག་པ་མནན་པ། ཐོད་པ་དང་སྦྲུལ་དང་སྟག་ [2a.4]ལྤགས་ཀྱིས་བརྒྱན་པ། ཞིང་ཆེན་དང་གླང་ཆེན་གྱི་ཀོ་རློན་གྱོན་པ། གཤིན་རྗེ་གཤེད་པོ་བགེགས་ཐམས་ཅད་ཀྱི་རྒྱལ་པོར་བསྐྱེད་ལ། མིག་ཏུ་མ་དང་ཀ་བཀོད་དེ། ཉི་མ་དང་ཟླ་བའི་དཀྱིལ་གྱི་རྡོ་རྗེ་སྔོན་པོ་མིག་འབྲས་སུ་ [2a.5]བསམས་ལ། ཁྲོ་བོའི་སྡང་མིག་གཡོན་ནས་བསྐོར་བས་བགེགས་ཐམས་ཅད་སྐྲག་པར་བྱའོ། །གཡས་ནས་བསྐོར་བས་རྡོ་རྗེའི་ར་བའོ། །འོག་ཏུ་བལྟས་པས་རྡོ་རྗེའི་ས་གཞིའོ། །སྟེང་དུ་བལྟས་པས་རྡོ་རྗེའི་གུར་དུ་བྱའོ། ། [2b] [2b.1]དེའི་རྗེས་ལ་གནས་དེར་ཕྱག་དར་དང་སྐྱོང་ནུལ་བྱ་ཞིང་། ཨ་ཀ་རུ་ནག་པོས་ཀྱང་ཕྱོགས་བཅུར་བདུགས་ལ་ས་གཞི་ཙནྡན་ལ་སོགས་པའི་དྲིས་བྱུགས་ཏེ། དེའི་དབུས་སུ་མཎྜལ་ཁྲུ་གང་པ་གསུམ་བྱ་སྟེ། ས་དེ་ལ་རིན་པོ་ཆེ་བདར་ཞིང་འཐས་པར་བྱས་ལ། རྡོ་རྒྱུས་ཀྱིས་དཀར་པོར་བྱ་ཞིང་འོ་མ་དང་ཙནྡན་དང་ [2b.2]གུར་གུམ་ལ་སོགས་པ་སྲོག་ཆགས་ལ་གནོད་པ་མ་བྱས་པ་ལས་བྱུང་བའི་དྲིས་བྱུགས་ལ། ཡི་གེ་སྭཱ་ལས་བྱུང་བའི་རིན་པོ་ཆེ་བཀྲམ་པ་ནི། བླ་མའི་མཎྜལ་རི་རབ་གླིང་བཞིས་བརྒྱན་པ་བཀོད་ལ། རང་ཉིད་དཀོན་མཆོག་གསུམ་ལ་རིན་པོ་ཆེ་སྣ་བདུན་གྱི་མེ་ཏོག་གི་ཚོམ་བུ་དགོད་པ་དང་། ཡི་དམ་ལྷའི་མཎྜལ་གྱི་ [2b.3]དཀྱིལ་འཁོར་ལྷ་གྲངས་དང་མཉམ་པའི་མེ་ཏོག་གི་ཚོམ་བུ་བཀོད་ལ། རང་ཉིད་ཡི་དམ་ལྷའི་ང་རྒྱལ་གྱི་སྙིང་ག་ནས་ས་བོན་གྱི་འོད་ཟེར་གྱིས་གཙུག་ཏོར་འཁོར་ལོས་སྒྱུར་བ་བཀུག་ལ་མཎྜལ་ལ་བཅུག་སྟེ། བཞུགས་པའི་རྟེན་དང་། མཁོ་བའི་ཡོན་དུ་བྱིན་གྱིས་བརླབ་བོ། །དེའི་རྗེས་ལ་མཆོད་པ་ལྔ་དང་། [2b.4]ཡན་ལག་གི་མཆོད་པ་གཡས་དང་གཡོན་དུ་བཀྲམ་ལ། གཙང་ཞིང་དག་པར་བཤམས་ཏེ། ཚུལ་བཞིན་དུ་བྱིན་གྱིས་བརླབས་ལ་གཞག་པར་བྱའོ། །དེ་ནས་ཚོགས་བསགས་པའི་ཡུལ་དཀྱིལ་འཁོར་གྱི་འཁོར་ལོ་མདུན་དུ་མངོན་པར་སྤྲུལ་ཏེ་མཎྜལ་ཕུལ་ལ་མཆོད་པར་བྱའོ། །འཇམ་དཔལ་རྡོ་རྗེ་ལ་ [2b.5]སོགས་པ། །རྒྱལ་བ་སྲས་དང་བཅས་པ་ལ། །ལུས་དང་ངག་ཡིད་གུས་ལྡན་ནས། །ཀུན་ནས་བཏུད་དེ་ཕྱག་འཚལ་ལོ། །སངས་རྒྱས་ཞིང་དུ་གང་བསྔགས་དང་། །འཇིག་རྟེན་དག་པ་མཆོག་གྱུར་པ། །རིན་ཆེན་མེ་ཏོག་བདུག་སྤོས་སོགས། །ཀུན་ནས་སྤྲུལ་ཏེ་མཆོད་པར་བགྱི། །བདག་གིས་སྔོན་ཆད་ [2b.6]བྱས་པའི་སྡིག །ཀུན་ནས་བསགས་པར་གང་གྱུར་ལ། །རང་བཞིན་མེད་དང་ཡོད་ཚུལ་གྱིས། །རྒྱལ་བ་ཀུན་གྱི་སྤྱན་སྔར་བཤགས། །འགྲོ་བ་གང་གིས་བསོད་ནམས་གང་། །དམན་པའི་དགེ་བ་ཐམས་ཅད་ལ། །དེ་བཞིན་མཐུན་པའི་ལྷག་སེམས་ཀྱིས། །དད་པས་རྗེས་སུ་ཡི་རང་ངོ་། །བདེ་གཤེགས་ [2b.7]བྱང་ཆུབ་མཆོག་བསྐྱེད་ནས། །འགྲོ་བ་ཐུགས་རྗེས་གདུལ་སླད་དུ། །ཆོས་ཀྱི་འཁོར་ལོ་བསྐོར་བ་ལ། །ཚངས་པ་བཞིན་དུ་གསོལ་བ་འདེབས། །ཡོངས་སུ་མྱ་ངན་འདའ་བཞེད་ལ། །འགྲོ་ཀུན་ཡུན་དུ་བདེ་བའི་ཕྱིར། །ཇི་སྲིད་འཚོ་བ་དེ་སྲིད་དུ། །མྱ་ངན་མི་འདའ་བཞུགས་སུ་གསོལ། །ཇི་སྲིད་ [3a] [3a.1]འཁོར་བ་གནས་པར་དུ། །བདག་གི་དགེ་བ་དེ་བཞིན་དུ། །ཀུན་ནས་ཟད་པར་མ་གྱུར་པར། །སེམས་ཅན་ཡོངས་སུ་སྨིན་པར་ཤོག །དཀོན་མཆོག་གསུམ་ལ་སྐྱབས་སུ་མཆི། །སངས་རྒྱས་བྱང་ཆུབ་ཡིད་ཀྱིས་གཟུང་། །བྱང་ཆུབ་སེམས་ནི་བསྐྱེད་པར་བགྱི། །འགྲོ་ལ་ཕན་ཕྱིར་སངས་ [3a.2]རྒྱས་ཤོག །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། ། [3a.3]བདག་གིས་བརྟན་པོར་གཟུང་བར་བགྱི། །སངས་རྒྱས་རྣལ་འབྱོར་སྡོམ་པ་ལ། །སངས་རྒྱས་ཆོས་དང་དགེ་འདུན་ལ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་དང་། །རྡོ་རྗེ་སློབ་དཔོན་དམ་པ་དག །ཡང་དག་ [3a.4]ཉིད་དུ་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམས་ནི་རབ་ཏུ་སྦྱིན། །པདྨའི་རིགས་མཆོག་ཆེན་པོ་ལ། །སངས་རྒྱས་ཞལ་ནས་གསུངས་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་ཅི་ནུས་གཟུང་། ། [3a.5]ལས་ཀྱི་རིགས་མཆོག་ཆེན་པོ་ལ། །མཆོད་པའི་ལས་རྣམས་བྱ་བ་དང་། །སྡོམ་པ་རྒྱ་མཚོ་མ་ལུས་པ། །ཤིན་ཏུ་དམ་པ་བདག་གིས་གཟུང་། །དེ་ལྟར་སྡོམ་པ་མ་ལུས་པ། །དམ་པ་བདག་གིས་གཟུང་བགྱིས་ནས། །བྱང་ཆུབ་མཆོག་སེམས་བསྐྱེད་བགྱིས་ནས། །སེམས་ཅན་མ་རིག་ལྡོངས་པ་རྣམས། །བདག་ [3a.6]གིས་ཡང་དག་དགེ་ལ་གཟུང་། །སེམས་ཅན་ཉོན་མོངས་བཅིངས་པ་ཡི། །མ་གྲོལ་བ་རྣམས་གྲོལ་བར་བགྱི། །སེམས་ཅན་འཁོར་བའི་རྒྱ་མཚོ་ལས། །མ་བསྒྲལ་བ་རྣམས་བསྒྲལ་བར་བགྱི། །སྡུག་བསྔལ་ཆེན་པོའི་ནང་སེམས་ཅན། །དབུགས་མ་ཕྱུང་བ་དབུགས་དབྱུང་ཞིང་། །འཁོར་བ་དག་ན་གནས་ [3a.7]པ་ཡི། །སེམས་ཅན་མྱ་ངན་འདས་ལ་དགོད། །དུས་འདི་ནས་ནི་བཟུང་ནས་སུ། །བྱང་ཆུབ་སྙིང་པོ་མཆིས་ཀྱི་བར། །འཇམ་མགོན་འབངས་སུ་བདག་འབུལ་ལགས། །ཐུགས་རྗེས་ཡོངས་སུ་གཟུང་བར་མཛོད། །དུས་འདི་ནས་ནི་བཟུང་ནས་སུ། །བདེར་གཤེགས་ཁྱེད་ཀྱི་བཀའ་བཞིན་དུ། །སེམས་ [3b] [3b.1]ཅན་དོན་དུ་བསྒྲུབ་ལགས་ཀྱིས། །བྱིན་གྱིས་བརླབ་པར་མཛད་དུ་གསོལ། །དེ་ལྟར་བསོད་ནམས་ཀྱི་ཚོགས་བསགས་པས། །བྱམས་པ་ཆེན་པོ་དང་། སྙིང་རྗེ་དང་དགའ་བ་དང་། བཏང་སྙོམས་ཚད་མེད་པ་བཞི་རྗེས་སུ་དྲན་ནས། སེམས་བསྐྱེད་ཅིང་སྡོམ་པ་བཟུང་ནས། ད་ནི་ཡེ་ཤེས་ཀྱི་ཚོགས་ཡོངས་སུ་ [3b.2]དག་པའི་ཏིང་ངེ་འཛིན་བསྒོམ་པ་སྟོང་པ་ཉིད་ལ་བློ་གཏད་ལ། དེ་སྒྲུབ་པར་བྱེད་པའི་ཚིག་འདི་བརྗོད་དེ་སྒྲའི་དོན་ལ་མོས་པར་བྱའོ། །རྣམ་པར་མི་རྟོག་དབྱིངས་མི་ཟད། །ཡང་དག་བདག་མེད་དེ་བཞིན་ཉིད། །ཡང་དག་མཐའ་ལ་ཡི་གེ་མེད། །ཆོས་དབྱིངས་དམ་པ་ཟད་མི་ཤེས། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་ [3b.3]སྭ་བྷཱ་བ་ཨཱཏྨ་ཀོ྅ཧཾ། ཞེས་བརྗོད་པས་ཕྱི་ནང་གིས་བསྡུས་པའི་ཆོས་ཐམས་ཅད་སྟོང་ཞིང་བདག་མེད་པར་གྱུར་ཏེ། ཡེ་ཤེས་ཀྱིས་སྦྱངས་ནས། ཆོས་ཐམས་ཅད་ནམ་མཁའི་དཀྱིལ་ལྟ་བུར་རང་གི་སེམས་ཀྱི་སྣང་བ་ཤར་བ་ལས་ཨཱ་ལི་དང་། ཀཱ་ལིའི་ཕྲེང་བ་བསམས་ལ། ཨཱ་ལི་ལས་ནི་པདྨ་དཀར་པོའི་སྟེང་། ཀཱ་ལི་ལས་ [3b.4]ཆོས་ཀྱི་འབྱུང་གནས་ནམ་མཁའི་མཐའ་དང་མཉམ་པ། དེའི་ཐ་མ་འོད་ཟེར་གྱི་ཕྲེང་བ་ལྔས་བསྐོར་བའི་ནང་དུ་འོད་ཟེར་གྱི་ཕྲེང་བ་ལྔ་འཕྲོས་ཤིང་འདུས་པ་ལས། འོད་ལྗང་གུ་ལས་རླུང་གི་དཀྱིལ་འཁོར་རྡོ་རྗེ་རྒྱ་གྲམ་གྱིས་མཚན་པ། འོད་དམར་པོ་ལས་མེའི་དཀྱིལ་འཁོར་པདྨ་དམར་པོས་མཚན་པ། འོད་དཀར་པོ་ [3b.5]ལས་ཆུའི་དཀྱིལ་འཁོར་རིན་པོ་ཆེས་མཚན་པ། འོད་སེར་པོ་ལས་གསེར་གྱི་ས་གཞི་འཁོར་ལོས་མཚན་པ། འོད་སྔོན་པོ་ལས་རི་རབ་རྡོ་རྗེས་མཚན་པ། དེ་ཡང་ཤར་ཤེལ། ལྷོ་བཻཌཱུཪྻ། ནུབ་པདྨ་རཱ་ག །བྱང་གསེར་རྡོ་རྗེས་མཚན་པའོ། །དེའི་སྟེང་དུ་འོད་ཟེར་གྱི་ཕྲེང་བ་ལྔ་ཀ་རིལ་གྱིས་འདུས་པ་ལས། ལྷའི་ [3b.6]གཞལ་ཡས་ཁང་གྲུ་བཞི་པ་ལ་སྒོ་བཞི་པ་སྒོ་ཁྱུད་རིན་པོ་ཆེའི་པ་ཏྲས་མཛེས་པར་བརྒྱན་པ། ཕྱི་རོལ་ན་མུ་ཏིག་གི་ཟ་ར་ཚགས་དང་དྲིལ་བུ་གཡེར་ཁ་གྲྭ་བཞི་ནས་འཕྱང་བ། རིན་པོ་ཆེ་སྣ་ཚོགས་ཀྱི་ཆུན་འཕྱང་ཀྱང་རྟ་བབས་ཀྱི་ཀ་བ་ལ་འཕྱང་བ། རྟ་བབས་ཀྱང་ཏྭ་ར་ཎ་ལ་སོགས་པས་བརྒྱན་ཅིང་། རི་དགས་ [3b.7]དང་ཆོས་ཀྱི་འཁོར་ལོ་དང་། འཕན་དང་རྒྱལ་མཚན་དང་། གདུགས་དང་རིན་པོ་ཆེ་འོད་དུ་འབར་བའི་ཏོག་གིས་མཛེས་པར་བྱས་ཏེ། གཞལ་ཡས་ཁང་གི་ནང་དུ་སེང་གེ་དང་གླང་པོ་ཆེ་དང་། རྟ་མཆོག་དང་། རྨ་བྱ་དང་། ནམ་མཁའ་ལྡིང་གི་སྟེང་དུ་པདྨ་དང་ཟླ་བ་དང་། ཉི་མའི་གདན་མཛེས་པར་བཀྲམ་པ་ [4a] [4a.1]དང་། འཁོར་རྣམས་ཀྱང་གོ་རིམས་སུ་པདྨ་དང་། ཟླ་བའི་གདན་བཀྲམ་པར་བསམས་ལ། དཀྱིལ་འཁོར་གྱི་དབུས་ཀྱི་གདན་ཐོག་ཏུ་རང་གི་སེམས་ཀྱི་ཆོ་འཕྲུལ་ལས་ཨཱ་ལི་ཀཱ་ལིའི་ཕྲེང་བ་བྱུང་བ་ལས། དེའི་སྤྲོ་བསྡུའི་བྱིན་རླབས་ལས་ཟླ་བ་དང་ཉི་མ་ལ་དེ་དང་དེས་མཚན་པར་གྱུར། དེའི་ནང་དུ་ [4a.2]ཨ་ལས་བྱུང་བའི་རྡོ་རྗེ་དཀར་པོ་ཨས་མཚན་པར་གྱུར། དེ་རྣམས་སྤྲོ་ཞིང་བསྡུས་ནས་འོད་འབར་བ་ལས། བཅོམ་ལྡན་འདས་རྣམ་པར་སྣང་མཛད་ཆེན་པོ་ཞལ་བཞི་པ་ཞལ་དང་པོ་ཤར་དུ་གཟིགས་པ། གཉིས་པ་ལྷོ། གསུམ་པ་ནུབ། བཞི་པ་བྱང་ངོ་། །ཕྱོགས་བཞི་ཀ་ན་ཕྱག་གཉིས་གཉིས་པ། བྱང་ཆུབ་ [4a.3]མཆོག་གི་ཕྱག་རྒྱའི་སྟེང་ན་རྡོ་རྗེ་དཀར་པོ་རྩེ་ལྔ་པ་སྐྱེས་པ། རྒྱན་ཐམས་ཅད་ཀྱིས་བརྒྱན་པ། དེའི་ཐུགས་ཀར་ཡི་གེ་དྷཱིཿལས། དང་པོའི་སངས་རྒྱས་ཞལ་ལྔ་པ། ཕྱག་བརྒྱད་པ། གཡས་བཞིན་ཤེས་རབ་ཀྱི་རལ་གྲི །གཡོན་བཞིན་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་ཡོད་པ། ཞལ་བཞི་ཕྱོགས་དང་ [4a.4]མཐུན་པ། དབུས་དམར་སེར་རོ། །དེའི་ཐུགས་ཀར་ཤེས་རབ་ཀྱི་འཁོར་ལོ་རྩིབས་དྲུག་པ་ལ། གསང་སྔགས་རྒྱལ་པོ་དྲུག་གིས་མཚན་པ། དེའི་དཀྱིལ་དུ་འཇམ་དཔལ་ཡེ་ཤེས་སེམས་དཔའ་ཞལ་དྲུག་ཕྱག་གཉིས་པ། གཡས་རལ་གྲི་གཡོན་པོ་ཏི་འཛིན་པ། དེའི་སྟེང་དུ་ཟླ་བ་དང་། ཨ་བསྒོམ་ [4a.5]པར་བྱའོ། །དེ་ལྟར་ན་དེ་ནི་སྦྱོར་བ་དང་པོའི་ཏིང་ངེ་འཛིན་ཏོ། །དེ་ནས་དཀྱིལ་འཁོར་གྱི་འཁོར་ལོ་དྲུག་བསྐྱེད་པར་འདོད་པས། དེ་བཞིན་གཤེགས་པ་ཐམས་ཅད་སྒྲུབ་པར་བྱེད་པའི་སྔགས་ཀྱི་ཕྲེང་བ་འདི་ཨ་ལས་སྤྲོ་བར་བྱའོ། །ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ སྠི་ཏོ་ཧྲཾ་དི་ཛྙྰ་ན་མཱུཪྟི་ར་ཧཾ། [4a.6]བུདྡྷོ་བུདྡྷྰ་ནཱཾ། ཏྲྱ་དྷྭ་བརྟཱི་ནཱཾ། ཨོཾ་བཛྲ་ཏཱི་ཀྵྞ་ཡ་ཏེ་ན་མཿ ཨོཾ་དུཿ ཁཙྪེ་ད་ཡ་ཏེ་ན་མཿ ཨོཾ་པྲཛྙཱ་ཛྙཱ་ན་མཱུཪྷ་ཡེ་ཡ་ཏེ་ན་མཿ། ཨོཾ་ཛྙཱ་ན་ཀཱ་ཡཱ་ཡ་ཏེ་ན་མཿ ཨོཾ་ཝཱ་གཱི་ཤྭ་རཱ་ཡ་ཏེ་ན་མཿ། ཨོཾ་ཨ་ར་པ་ཙ་ནཱ་ཡ་ཏེ་ན་མཿ། ཨོཾ་སརྦ་དྷ་རྨྨ་ཨ་བྷཱ་བ། སྭ་བྷཱ་ཝ་བི་ཤུདྡྷ། ཙཀྵུ་བཛྲ། ཨ་ཨཱ་ཨཾ་ཨཿ པྲ་ཀྲྀ་ཏི། པ་རི་ཤུདྡྷ། སརྦ་དྷ་རྨྨཱ་ [4a.7]ཡ་དུ་ཏ། སརྦ་ཏ་ཐཱ་ག་ཏ། ཛྙཱ་ན་ཀཱ་ཡ། མཉྫུ་ཤྲཱི། པ་རི་ཤུདྡྷི་ཏཱ། མུ་པཱ་དཱ་ཡེ་ཏ། ཨོཾ་ཨ་ཨཱཿ། སརྦ་ཏ་ཐཱ་ག་ཏཱ་ཧྲྀད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ བྷ་ག་ཝཱན་ཛྙཱ་ན་མཱུ་རྟྟི། ཝཱ་གཱི་ཤྭ་ར། མ་ཧཱ་བཱ་ཙ། སརྦ་དྷ་རྨ་ག་ག་ན། ཨ་མ་ལ་སུ་པ་རི་ཤུདྡྷ། དྷ་རྨྨ་དྷཱ་ཏུ་ཛྙཱ་ན་གརྦྷ་ཨཱཿ ཞེས་བརྗོད་པས་ཡི་གེའི་ཕྲེང་ [4b] [4b.1]བ་དེ་རྣམས་འོད་ཟེར་དང་བཅས་ནས་དཀྱིལ་འཁོར་གྱི་སྒོ་བཞི་ནས་ཕར་འཕྲོས་པས། རབ་ཏུ་དགའ་བ་ལ་སོགས་པའི་ཞིང་ཁམས་སུ་སངས་རྒྱས་མཆོད་ནས། སླར་འོད་ཟེར་དུ་འདུས་ཏེ་དཀྱིལ་འཁོར་གྱི་སྒོ་ནས་ཚུར་འདུས་པ་ལས། གདན་རྣམས་ཀྱིས་སེང་དུ་ཡི་གེ་ཨ་འབའ་ཞིག་ཏུ་གྱུར་པ་དེ་གནས་པ་ལས། དེ་ [4b.2]རྣམས་ལས་བྱུང་བའི་སངས་རྒྱས་འདི་ལྟ་སྟེ། ཤར་ཕྱོགས་ཀྱི་གླིང་གི་ཉི་མ་ལ་སངས་རྒྱས་མི་བསྐྱོད་པ་སྔོན་པོ་ཞལ་གཅིག་ཕྱག་གཉིས་པ། ས་གནོན་གྱིས་རྡོ་རྗེ་རྩེ་ལྔ་པ་འཛིན་པ་རྒྱན་ཐམས་ཅད་ཀྱིས་བརྒྱན་པའོ། །མདུན་དུ་རྡོ་རྗེ་སེམས་དཔའ་དཀར་པོ་གཡས་རྡོ་རྗེ་ཐུགས་ཀར་བསྟོད་པ། གཡོན་དྲིལ་ [4b.3]བུ་དཀུ་ལ་གཏད་པའོ། །གཡས་ངོས་སུ་རྡོ་རྗེ་རྒྱལ་པོ་མདོག་སེར་པོ་ཐོ་བ་ཐོགས་པའོ། །རྒྱབ་ཏུ་རྡོ་རྗེ་ཆགས་པ་དམར་པོ་མདའ་འགེངས་པའོ། །གཡོན་དུ་རྡོ་རྗེ་ལེགས་པ་ལྗང་གུ་རྡོ་རྗེ་འཛིན་པ། སེ་གོལ་གྱིས་ལེགས་པ་སྟེར་བའོ། །ལྷོ་ཕྱོགས་ཀྱི་གླིང་གི་ཉི་མ་ལ། སངས་རྒྱས་རིན་ཆེན་འབྱུང་ལྡན་ [4b.4]སེར་པོ་ཞལ་གཅིག་ཕྱག་གཉིས་པ། མཆོག་སྦྱིན་རིན་པོ་ཆེ་བསྣམས་པ། རྒྱན་ཐམས་ཅད་ཀྱིས་བརྒྱན་པའོ། །མདུན་དུ་རྡོ་རྗེ་རིན་ཆེན་སེར་པོ་གཡས་རིན་པོ་ཆེ་རྡོ་རྗེ་དཔྲལ་བར་བསྟོད་པ་གཡོན་དྲིལ་བུ་དཀུར་བསྟེན་པའོ། །གཡས་སུ་རྡོ་རྗེ་ཉི་མ་སྔོན་པོ་ཉི་མ་འཛིན་པའོ། །རྒྱབ་ཏུ་རྡོ་རྗེ་དབང་པོ་དམར་ [4b.5]པོ་རྒྱལ་མཚན་བསྣམས་པའོ། །གཡོན་དུ་རྡོ་རྗེ་བཞད་པ་དཀར་པོ་སོ་ཤིང་གི་ཕྲེང་བ་ཐོགས་པའོ། །ནུབ་ཕྱོགས་ཀྱི་གླིང་གི་ཉི་མ་ལ་སངས་རྒྱས་སྣང་བ་མཐའ་ཡས་དམར་པོ་ཞལ་གཅིག་ཕྱག་གཉིས་པ། མཉམ་གཞག་གི་ཐོག་ན་པདྨ་དམར་པོ་འཛིན་པ་རྒྱན་ཐམས་ཅད་ཀྱིས་བརྒྱན་པའོ། །མདུན་དུ་ [4b.6]རྡོ་རྗེ་ཆོས་དམར་པོ་པདྨའི་སྡོང་བུ་སྙིང་གར་ཁ་བྱེ་བ་འཛིན་པའོ། །གཡས་སུ་རྡོ་རྗེ་རྣོན་པོ་སྔོན་པོ་རལ་གྲི་ཐོགས་པའོ། །རྒྱབ་ཏུ་རྡོ་རྗེ་རྒྱུ་སེར་པོ་འཁོར་ལོ་ཅན་ནོ། །གཡོན་དུ་རྡོ་རྗེ་སྨྲ་བ་སྔོན་པོ་ལྕེ་ཐོགས་པའོ། །བྱང་ཕྱོགས་ཀྱི་གླིང་གི་ནི་མ་ལ་སངས་རྒྱས་དོན་ཡོད་གྲུབ་པ་ལྗང་གུ་ཞལ་གཅིག་ཕྱག་གཉིས་པ་ [4b.7]སྐྱབས་སྦྱིན་མཛད་ཅིང་རྒྱ་གྲམ་ཅན་རྒྱན་ཐམས་ཅད་ཀྱིས་བརྒྱན་པའོ། །མདུན་དུ་རྡོ་རྗེ་ལས་ལྗང་གུ་སྣ་ཚོགས་རྡོ་རྗེ་དང་དྲིལ་བུ་ཐོགས་པའོ། །གཡས་སུ་རྡོ་རྗེ་སྲུང་བ་སེར་པོ་རྡོ་རྗེའི་ཁྲབ་ཐོགས་པའོ། །རྒྱབ་ཏུ་རྡོ་རྗེ་གནོད་སྦྱིན་ནག་པོ་མཆེ་བ་ཐོགས་པའོ། །གཡོན་དུ་རྡོ་རྗེ་ཁུ་ཚུར་སེར་པོ་རྡོ་རྗེ་ཐོགས་ [5a] [5a.1]པའོ། །དེ་ནས་གཙོ་བོའི་དཀྱིལ་འཁོར་གྱི་མཚམས་བཞི་ནས་རྡོ་རྗེ་སེམས་དཔའ་དང་། རིན་ཆེན་སེམས་དཔའ་དང་། པདྨ་སེམས་དཔའ་དང་། ལས་ཀྱི་སེམས་དཔའ་དང་། རིགས་བཞིའི་སེམས་དཔའ་བསྒོམ་མོ། །དེའི་ཕྱི་རོལ་མཚམས་བཞིན་སྒེག་མོ་དཀར་མོ་རྡོ་རྗེ་ཉི་མ་འཛིན་ [5a.2]པ་དང་། ཕྲེང་བ་མ་སེར་མོ་རིན་པོ་ཆེའི་ཕྲེང་བ་འཛིན་པ་དང་། གླུ་མ་སྔོན་མོ་པི་བང་འཛིན་པ་དང་། གར་མ་ལྗང་གུ་རྡོ་རྗེ་རྩེ་གསུམ་འཛིན་པ་དང་། དེ་རྣམས་ཤར་ལྷོ་ནས་བརྩམས་ཏེ་བསྒོམ་མོ། །གྲུ་ཆད་བཞི་ལ་སྤོས་མེ་མ་དཀར་མོ་སྤོས་ཕོར་ཐོགས་པ་དང་། མེ་ཏོག་མཐིང་ག་མེ་ཏོག་འཛིན་པ་དང་། [5a.3]མར་མེ་མ་དམར་མོ་མར་མེ་ཐོགས་པ་དང་། དྲི་ཆབ་མ་ལྗང་གུ་དྲིའི་ལྡེ་གུ་ཐོགས་པ་དང་། དེ་རྣམས་ཀྱང་ཤར་ལྷོ་མཚམས་ནས་རིམ་བཞིན་ནོ། །དེའི་ཕྱི་རོལ་གྱི་ཁྱམས་རྣམས་སུ་བྱམས་པ་དང་། མཐོང་བ་དོན་ཡོད་དང་། ངན་སོང་ཀུན་འདྲེན་དང་། མྱ་ངན་ཀུན་འཇོམས་རྣམས་མདོག་དཀར་ [5a.4]པོ་རྡོ་རྗེ་ཐོགས་པ་རྣམས་ནི་ཤར་དུའོ། །སྤོས་ཀྱི་བློ་གྲོས་དང་། དཔའ་བར་འགྲོ་བ་དང་། ནམ་མཁའ་མཛོད་དང་། ཡེ་ཤེས་ཏོག་དང་། དེ་རྣམས་མདོག་སེར་པོ་རིན་པོ་ཆེའི་སྙེ་མ་ཐོགས་པ་རྣམས་ནི་ལྷོ་རུའོ། །འོད་དཔག་མེད་དང་ཟླ་བའི་འོད་དང་། བཟང་སྐྱོང་དང་། དྲ་བ་ཅན་གྱི་འོད་རྣམས་མདོག་ [5a.5]དམར་པོ་པདྨའི་སྡོང་བུ་ཐོགས་པ་རྣམས་ནི་ནུབ་ཏུའོ། །རྡོ་རྗེ་སྙིང་པོ་དང་བློ་གྲོས་མི་ཟད་པ་དང་། སྤོབས་པ་བརྩེགས་པ་དང་། ཀུན་དུ་བཟང་པོ་རྣམས་མདོག་ལྗང་གུ་རྒྱ་གྲམ་ཐོགས་པ་རྣམས་ནི་བྱང་དུའོ། །བྱང་ཆུབ་སེམས་དཔའི་དེ་རྣམས་ཀྱང་ཞལ་གཅིག་ཕྱག་གཉིས་པ་རྒྱན་ཐམས་ཅད་ཀྱིས་བརྒྱན་ [5a.6]པའོ། །ཤར་གྱི་སྒོར་ནི་རྡོ་རྗེ་ལྕགས་ཀྱུ་སྔོན་པོ་ལྕགས་ཀྱུ་ཐོགས་པའོ། །ལྷོའི་སྒོར་ནི་རྡོ་རྗེ་ཞགས་པ་སེར་པོ་ཞགས་པ་ཐོགས་པའོ། །ནུབ་ཀྱི་སྒོར་ནི་རྡོ་རྗེ་ལྕགས་སྒྲོག་དམར་པོ་ལྕགས་སྒྲོག་ཐོགས་པའོ། །བྱང་གི་སྒོར་ནི་རྡོ་རྗེ་འབེབས་པ་ལྗང་ནག་དྲིལ་བུ་ཐོགས་པའོ། །སྒོ་བ་དེ་རྣམས་ [5a.7]ཀྱང་ཅུང་ཟད་ཁྲོ་བ། ཞལ་མཆེ་བ་ལྷག་གེ་བརྒྱན་ཐམས་ཅད་ཀྱིས་བརྒྱན་པའོ། །དེ་ལྟར་དཀྱིལ་འཁོར་དྲུག་པ་ཀུན་དུ་བསྒོམས་པ་ལ་མཆོད་པའི་ལྷ་མོ་དང་བསྐལ་བཟང་ཆ་མཐུན་པའི་འཁོར་ལ་དབུས་ཀྱི་རྣམ་སྣང་ཆེན་པོའི་དཀྱིལ་འཁོར་ལ་རྣམ་སྣང་དང་བྱང་ཆུབ་སེམས་དཔའ་རྡོ་རྗེ་ཞེས་པ་ [5b] [5b.1]གནས་པའི་ཚུལ་ལོ། །དེ་ལྟར་དཀྱིལ་འཁོར་བསྐྱེད་ལ་ཡེ་ཤེས་ཀྱི་དཀྱིལ་འཁོར་གྱི་ལྷ་ཚོགས་བར་སྣང་ལ་བསྡུས་པ་སྤྱན་དྲང་བར་བྱ་སྟེ། ཨོཾ་ཨ་ཨཱཿསརྦ་ཏ་ཐཱ་ག་ཏཱ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ བྷ་ག་ཝཱན་ཛྙཱ་ན་མཱུརྟྟི་བཱ་གཱི་ཤྭ་ར། མ་ཧཱ་པཱ་ཙ་སརྦ་དྷ་རྨྨ་ག་ག་ན་ཨ་མ་ལ་སུ་པ་རི་ཤུདྡྷ། དྷ་རྨྨ་དྷཱ་ཏུ་ཛྙཱ་ན་ [5b.2]གརྦྷ་ཨཱཿ མཎྜ་ལ། བཛྲ་ས་མ་ཡ་ཛཿ། ཞེས་ལན་གསུམ་བརྗོད་ཅིང་། སྔགས་མཇུག་བཛྲ་དྲྀ་ཤྱ་ཞེས་བྱ་བས་ཡེ་ཤེས་ཀྱི་དཀྱིལ་འཁོར་ལེགས་པར་བལྟ་བར་བྱའོ། །དེའི་རྗེས་ལ་ཕྱག་བཙལ་ཏེ། སྒེག་མོ་ལ་སོགས་པ་བརྒྱད་ཀྱིས་མཆོད་དེ། ཡིད་ཀྱིས་སྒོ་ཕྱེ་ལ་ཛཿཧཱུཾ་བཾ་ཧོཿ ཞེས་བརྗོད་ཅིང་སྒོ་ [5b.3]བཞི་ནས་ཚུར་སྤྱན་དྲངས་ལ་བགེགས་བསྐྲད་ཅིང་ཡིད་ཀྱིས་སྒོ་བཅད་ལ། རྡོ་རྗེའི་གོ་ཆས་བསྲུང་ལ་ལྷ་སོ་སོ་ལ་བསྟིམས་ཏེ་དབང་བསྐུར་བ་ཐོབ་པར་བྱ་བའི་ཕྱིར། རིགས་ཀྱི་ཡུམ་བཞི་ནམ་མཁའ་ལ་བསྡུ་བར་བྱའོ། །ཡེ་ཤེས་ཀྱི་བདུད་རྩིས་དབང་བསྐུར་ཏེ་དབང་རྟགས་སྤྱི་བོར་མཚན་པ་བསྒོམ་ [5b.4]པར་བྱའོ། །དེ་ནས་ཕྱག་རྒྱ་བཞིས་རྒྱས་གདབ་པ་ནི་ཤར་དུ་བརྟན་པར་བསྒོམས་ལ་བདག་ཉིད་ལུས་གཉིས་ཀྱི་ཚུལ་དུ་བཟུང་སྟེ། ལྷ་སྣམ་ལ་གནས་ཏེ་རྫས་མཆོད་པ་ལྔ་ཕུལ་ལ་སྒེག་མོ་ལ་སོགས་པ་བརྒྱད་ཀྱིས་མཆོད་དེ། རྡོ་རྗེ་སེམས་དཔའ་བསྡུས་པ་ན། རྡོ་རྗེ་རིན་ཆེན་བླ་ན་མེད། ། [5b.5]རྡོ་རྗེ་ཆོས་ཀྱི་གླུ་བླངས་པ། །རྡོ་རྗེ་ལས་ཀུན་མཛད་པའོ། །ཨོཾ་བཛྲ་སཏྭ་སུ་སཾ་གྲ་ཧ་ཞེས་བྱ་བ་ལ་སོགས་པའི་སྔགས་དང་གར་དང་གླུ་དང་བཅས་པས་དབུལ་ལོ། །བྱང་ཆུབ་ཡན་ལག་མེ་ཏོག་སྤོས། །མར་མེ་སྣང་བ་བྱུག་པ་དྲི། །བདེ་བར་གཤེགས་པ་རྣམས་ལ་དབུལ། །ཅི་བདེ་བར་ནི་བཞེས་སུ་ [5b.6]གསོལ། །ཨོཾ་བཛྲ་དྷཱུ་པེ་དྷུ། ཨོཾ་བཛྲ་པུཥྤེ་པུ། ཨོཾ་བཛྲ་ཨཱ་ལོ་ཀེ་ཨཱཿཨོཾ་བཛྲ་གནྡྷེ་གན་ཞེས་པས་མཆོད་དོ། །གཞན་ཡང་གསང་བའི་ཡུམ་བཞིས་མཆོད་དེ། མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །མཆོད་པ་ཆེན་པོ་ཞེ་སྡང་ཆེ། །ཉོན་མོངས་ [5b.7]ཀུན་གྱི་དགྲ་ཆེ་བ། །མཆོད་པ་ཆེན་པོ་ཁྲོ་བ་ཆེ། །ཁྲོ་བ་ཆེན་པོ་དགྲ་ཆེ་བ། །མཆོད་པ་ཆེན་པོ་ཆགས་པ་ཆེ། །ཆགས་པ་ཐམས་ཅད་སེལ་བར་བྱེད། །འདོད་པ་ཆེན་པོ་བདེ་བ་ཆེ། །དགའ་བ་ཆེན་པོ་མགུ་བ་ཆེ། །སཏྭ་བཛྲ་ཧཱུཾ། རཏྩ་བཛྲ་ཧཱུཾ། དྷརྨྨ་བཛྲ་ཧཱུཾ། ཀརྨ་བཛྲ་ཧཱུཾ། ཞེས་མཆོད་ [6a] [6a.1]ལ་བསྟོད་དེ། མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་ནས། ཡེ་ཤེས་སྐུ་ཉིད་ཁྱོད་ལ་འདུད། །ཅེས་པའི་བར་གྱིས་བསྟོད་པའི་རྒྱལ་པོ་དེས་བསྟོད་ལ། །ཤེས་རབ་ཀྱི་འཁོར་ལོ་ལ་སེམས་གཏད་པའི་ཡིད་ཀྱིས་གསང་སྔགས་རྒྱལ་པོ་འདི་དྲུག་བཟླས་པར་བྱའོ། [6a.2]ཨོཾ་བཛྲ་ཏཱི་ཀཥྞ་དུཿ་ཁཙྪེ་ད་པྲཛྙཱ་ཛྙཱན་མཱུརྟྟ་ཡེ། ཛྙཱ་ན་ཀཱ་ཡ། ཝཱ་གཱི་ཤྭ་ར་ཨ་ར་པ་ཙ་ནཱ་ཡ་ཏེ་ན་མཿ ཞེས་བཟླས་པར་བྱའོ། །དེ་ལྟར་ལྷ་བསྐྱེད་ཅིང་གསོལ་བ་བཏབ་ལ་གནས་པ་དེ་དཀྱིལ་འཁོར་རྒྱལ་བ་མཆོག་ཅེས་བྱ་བའི་ཏིང་ངེ་འཛིན་ཏོ། །ད་ནི་དེ་བཞིན་གཤེགས་པ་ཐམས་ཅད་ཀྱི་མཚན་ [6a.3]ཡང་དག་པར་བརྗོད་པ་གདོན་པར་བྱ་སྟེ། དཀྱིལ་འཁོར་གྱི་ལྷ་ལ་བསྟོད་ལ་འགྲོ་བའི་དོན་དུ་ཕྲིན་ལས་ལ་སྦྱར་ཏེ། དཀྱིལ་འཁོར་ཆེན་པོ་དྲུག་འཇིག་རྟེན་དུ་སྤྲོ་སྟེ་ཕྱོགས་བཅུར་སྤྲུལ་པ་སྣ་ཚོགས་བསྐྱེད་ནས་ཉོན་མོངས་པ་དྲུག་སྦྱངས་འགྲོ་བ་དྲུག་དབུགས་ཕྱུང་དཀྱིལ་འཁོར་དྲུག་གིས་འགྲོ་ [6a.4]བའི་དོན་མཛད་ནས་སླར་སྔ་མ་ཉིད་ལ་བསྡུ་ཞིང་སྤྲོས་ནས་འགྲོ་བའི་དོན་བྱའོ། །དེ་ཙམ་གྱིས་ནི་ལས་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །དེ་ལྟ་བུའི་ཆོ་ག་རྫོགས་ནས་མཆོད་ཅིང་བསྟོད་དེ་ལྷག་པ་དང་མ་ཚང་བ་བཤགས་ནས་དམ་ཚིག་གི་འཁོར་ལོ་བསྡུ་ཞིང་ཆོས་ཐམས་ཅད་སྟོང་ [6a.5]པ་ཉིད་དུ་རྒྱས་གདབ་ཅིང་བདེ་བའི་སྤྱོད་པ་བྱའོ། །དེ་ལྟ་བུའི་སྦྱོར་བས་མཚན་མ་བརྟན་པོ་བྱུང་བ་དེ་སྲིད་ཀྱི་བར་དུ་བྱ་སྟེ། དེ་ཡང་སེམས་རྩེ་གཅིག་ཏུ་བསྒོམ་ཞིང་ཟློས་པ་དེ་ལ་ནི་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འདུས་ཏེ་གཤེགས་ནས་ཆོས་ཀྱི་སྒོ་ཐམས་ཅད་སྟོན་ [6a.6]པར་མཛད་དེ་སྐུ་ཡང་སྟོན་ཏོ་ཞེས་གསུངས་པས། ཞལ་མཐོང་བའམ་རྨི་ལམ་དུ་ལུང་བསྟན་པ་ལ་སོགས་པ་མ་བྱུང་གི་བར་དུ་བདེ་བར་གཤེགས་པ་རྣམས་བསྙེན་པ་ནི་བསྙེན་པའི་ཆོ་གའོ། །དེ་ལྟར་བསྙེན་པའི་སྒོ་ནས་དཀྱིལ་འཁོར་གྱི་ལྷ་ལ་གནང་བ་ཐོབ་ནས་གཞན་གྱི་དོན་དུ་དཀྱིལ་ [6a.7]འཁོར་ཆེན་པའི་ཆོ་ག་བྱེད་པར་འདོད་པས། རི་དང་ཆུ་ཀླུང་དང་ནགས་ཚལ་ལ་སོགས་པའི་གནས་སུ་སློབ་དཔོན་ལ་སློབ་མས་དཀྱིལ་འཁོར་འདྲི་བའི་དོན་དུ་གསོལ་བ་གདབ་པར་བྱའོ། །དེ་ནས་དཀྱིལ་འཁོར་བྱ་བའི་གོ་སྐབས་ཕྱེ་སྟེ། དང་པོ་སའི་ཆོ་གར་ཡང་དེ་བཞིན་དུ་མཉམ་པ་ཡིན་ [6b] [6b.1]ན་དབུས་མཐོ་བྱང་ཤར་གཞོལ་ཏེ་དམའ་བ། ས་གཞི་འཇམ་པ་ཉམས་དགའ་བའི་གནས་སུ་ངམ་གྲོག་དང་བྱ་སྐྱིབས་དང་། བོང་བ་ལ་སོགས་པ་མེད་པ་འཇམ་ཞིང་ལྷུན་སྟུག་པ་དེར་དཀྱིལ་འཁོར་བརྩིག་པའམ་བྲི་བའི་དོན་དུ་སའི་བདག་པོ་ལ་གནང་བ་ཐོབ་པར་བྱས་ལ། སའི་ལྷ་མོ་ [6b.2]ལ་གཏོར་མ་ཕུལ་ལ། དངོས་གྲུབ་རབ་འབྲིང་ཐོབ་པས་བརྐོས་ནས་ལྟས་བརྟགས་ལ་མི་ཤིས་པ་ཡིན་ན་བར་ཆད་བྱུང་བས་དོར་བར་བྱའོ། །ཤིས་པ་ཡིན་ན་དེའི་ཕྱོགས་ཐམས་ཅད་བྱི་དོར་བྱ་སྟེ་སྤོས་ཆུས་ཆག་ཆག་བཏབ་ལ་ཤིན་ཏུ་བ་ལང་གི་ལྕི་བས་བྱུགས་ལ་འཐས་པར་བཅགས་ [6b.3]ཏེ་མཉམ་པར་མེ་ལོང་གི་ངོས་ལྟར་བྱས་ལ་རྡོ་རྗེ་རྩེ་ལྔ་པའི་ཕྱག་རྒྱས་ས་ལ་གཏུགས་ཏེ། ཨོཾ་བཛྲ་མེ་དི་ནཱི་བཛྲཱི་བྷ་བ་མ་ཧཱ་བཛྲ་ཧཱུཾ། ཞེས་པས་རྡོ་རྗེའི་ས་གཞིར་བྱིན་གྱིས་བརླབ་པོ། །དེའི་ཕྱོགས་ཀུན་ཀྱང་ཨ་ག་རུ་ནག་པོ་གཏུལ་ཞིང་དུ་བས་བདུག་གོ། །དེ་ལྟར་ན་ལྷག་པར་གནས་ [6b.4]པའི་ཡན་ལག་སའི་ཆོ་ག་བསྟན་ཏོ། །དེ་ནས་དཀྱིལ་འཁོར་བརྩིགས་ལ། བསྲུང་བའི་འཁོར་ལོ་སྔོན་དུ་འགྲོ་བས་ཚོགས་བསགས་ལ། ཏིང་ངེ་འཛིན་གྱིས་རྣམ་པར་བསྒོམས་ཏེ། མཆོད་པ་རྒྱས་པར་ཕུལ་ནས་བཟླས་པ་བྱ་སྟེ། མཆོད་པའམ་བསྟོད་པའི་རྒྱལ་པོས་བསྟོད་ལ། [6b.5]དེ་ནས་མདུན་དུ་མཎྜལ་བྱ་སྟེ། མེ་ཏོག་བཀྲམ་ནས་སའི་ལྷ་མོ་ལ་མཆོད་ཡོན་སྔོན་དུ་འགྲོ་བའི་མཆོད་པ་བཤམས་ཏེ་གཏོར་མ་ཡང་བཤམས་དམ་ཚིག་གི་ཕྱག་རྒྱ་བསྟན་ཏེ། འདི་སྐད་བསྒོའོ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ [6b.6]ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཇི་ལྟར་ཤཱཀྱ་སེང་གེ་ཡིས། །བདུད་ཀྱི་སྡེ་རྣམས་བཅོམ་པ་ལྟར། །དེ་བཞིན་བདག་གིས་བདུད་ཀྱི་སྡེ། །ཕམ་པར་བྱས་ཏེ་དཀྱིལ་འཁོར་འདྲི། ཞེས་བརྗོད་དེ། མཆོད་ཡོན་སྔོན་དུ་འགྲོ་བའི་མཆོད་པ་ལྔ་དང་གཏོར་མ་ཕུལ་ལ་ཡེ་ཤེས་པ་ [6b.7]གཤེགས་སུ་གསོལ་ལོ། །དེ་ནས་སྒྲུབ་པའི་གྲོགས་པོས་བསྟོད་པའི་རྒྱལ་བོས་བསྟོད་ལ། སློབ་དཔོན་གྱིས་ཕུར་བུ་བཅུ་གཤིན་རྗེ་གཤེད་དུ་བསྐྱེད་ལ། དར་གྱི་ཅོད་པན་གྱིས་དབང་བསྐུར་ལ་ཨོཾ་བཛྲ་ཀཱི་ལི་ཀཱི་ལ་ཧཱུཾ་ཕཊ་ཅེས་གཟི་བརྗིད་བསྐྱེད་ལ་གཞག་གོ། །དེའི་རྗེས་ལ་དཀྱིལ་འཁོར་གྱི་ [7a] [7a.1]ལྷ་རྣམས་རང་གི་སྙིང་གར་བཅུག་ལ་ལངས་ཏེ། རྡོ་རྗེ་གསོར་ཤིང་དྲིལ་བུ་དཀྲོལ་ལ་འདི་སྐད་ཅེས་བསྒོའོ། །ཧཱུཾ་ཡེ་ཤེས་ཞི་བའི་ངང་ལས་མ་གཡོས་ཀྱང་། །སྐུ་ཡི་ཆ་བྱད་ཟ་བྱེད་རྔམ་པའི་སྟབས། །གསུང་གི་ང་རོ་འབྲུག་སྟོང་ལྡིར་བ་ཡིས། །ཁམས་གསུམ་དབང་དུ་ [7a.2]སྡུད་ལ་ཕྱག་འཚལ་ལོ། །ཧཱུཾ་བསྐལ་བའི་མེ་ལྟར་འབར་བའི་དཀྱིལ་འཁོར་ནས། །ཁྲོ་བོའི་རྒྱལ་པོ་བརྐྱང་བསྐུམ་ཚུལ་དུ་བཞུགས། །ཉི་ཟླ་འབར་བའི་སྤྱན་གྱི་སྡང་མིག་གིས། །བགེགས་ཀུན་སྲེག་པར་མཛད་ལ་ཕྱག་འཚལ་བསྟོད། །ཧཱུཾ་རང་བཞིན་རྣམ་དག་དབྱིངས་ལས་ཐུགས་རྗེ་ [7a.3]ཆེན་པོར་སྤྲུལ། །སྐྱེ་མེད་ངང་ལས་འཇིགས་བྱེད་ཆེན་པོའི་སྐུར་བསྟན་ཏེ། །གདུག་པ་འདུལ་ཕྱིར་ཐུགས་དམ་མི་འགྱུར་ཞིང་། ཁྲོ་རྒྱལ་གཤིན་རྗེ་གཤེད་ལ་ཕྱག་འཚལ་བསྟོད། །ཧཱུཾ་དཀྱིལ་འཁོར་ཆེན་པོའི་ས་གཞི་ལ་གནས་པའི། །ལྷ་ལ་སོགས་པའི་བགེགས་ཚོགས་ཀུན་ཉོན་ [7a.4]ཅིག །གནས་འདིར་བདེ་གཤེགས་དཀྱིལ་འཁོར་ཕོ་བྲང་བྲི། །བགེགས་ཀྱི་རིགས་ཚོགས་གང་ཡིན་བྱེར་བར་གྱིས། །གལ་ཏེ་ང་ཡིས་བསྒོ་བ་ལས་འདས་ནས། །ཡེ་ཤེས་ཅན་གྱི་རྡོ་རྗེ་རབ་འབར་བས། །མགོ་བོ་ཚལ་པ་བརྒྱར་ནི་འགས་འགྱུར་ཞིང་། །རྣམ་པར་འཇིག་པར་ [7a.5]འགྱུར་བར་གདོན་མི་ཟ། །ཧེ་ས་ཕྱོགས་བགེགས་གནས་ཆེ་གེ་མོ་འདི་རུ། བདག་རྡོ་རྗེ་སློབ་དཔོན་ཆེ་གེ་མོ་ཞེས་བྱ་བས། སློབ་མ་ཆེ་གེ་མོ་ཞེས་བྱ་བ་རྫོགས་པའི་བྱང་ཆུབ་ཐོབ་པར་བྱ་བའི་ཕྱིར་དང་། སེམས་ཅན་ཐམས་ཅད་བདེ་བ་ལ་དགོད་པར་བྱ་བའི་ཕྱིར་ནམ་མཁའ་དྲི་མ་ [7a.6]མེད་པའི་དཀྱིལ་འཁོར་ཆེན་པོའི་རིགས་ཐམས་ཅད་བསྡུས་པ་ཞིག་བདག་གིས་བྲི་བས། དུས་དེ་རིང་བགེགས་ཀྱི་ཚོགས་སུ་གྱུར་པ་ལྷའི་གདོན་དང་ཀླུའི་གདོན་དང་། ལྷ་མ་ཡིན་གྱི་གདོན་དང་། གནོད་སྦྱིན་དང་། ནམ་མཁའ་ལྡིང་རྒན་པོ་དང་རྒན་མོ་ལ་སོགས་པ་ཐམས་ཅད་ [7a.7]དེངས་ཤིག །བྱེར་ཤིག་སོང་ཤིག །གང་མི་འགྲོ་བ་དེ་ནི་རྡོ་རྗེ་ཡེ་ཤེས་རབ་ཏུ་འབར་བ་འདིས། མགོ་བོ་ཚལ་པ་བརྒྱར་འགས་པར་གྱུར་ཏ་རེ། རྡོ་རྗེ་ཧཱུཾ་སྟེ་ཧཱུཾ་ཧཱུཾ་ཧཱུཾ་ཞེས་པ་དང་། ཧྲཱིཿཥྚྲཱིཿ །བི་ཀྲྀ་ཏཱ་ན་ན་སརྦ་བི་གྷྣཾ་ཨུཙྪ་ཊཱ་ཡ་ཧཱུཾ་ཕཊ་ཅེས་བགེགས་བསྐྲད་དོ། །སྤྱན་མིག་བསྐལ་ [7b] [7b.1]པའི་མེ་ལྟར་འབར་བའི་འོད་ཟེར་གྱིས་ཀྱང་བསྲེག་པར་བྱའོ། །ཁྲོ་བོའི་སྟངས་སྟབས་གོམ་པའི་སྟབས་ཀྱིས་གར་བྱེད་པས་ཀྱང་བགེགས་བསྐྲད་པར་བྱའོ། །དེ་བཞིན་དུ་རྡོ་རྗེ་འགྲོས་ཀྱིས་དཀྱིལ་འཁོར་གྱི་མཐའ་མ་ལན་གསུམ་བསྐོར་བར་བྱའོ། །དེ་ནས་རྡོ་རྗེའི་ས་གཞི་དང་། ར་བ་དང་ [7b.2]གུར་དང་། དྲ་བ་རྣམས་བྱས་ལ་ཕུར་བུས་བཏབ་ལ་གཞག་གོ། །དེ་ནས་ཙནྡན་དང་བའི་རྣམ་ལྔས་དཀྱིལ་འཁོར་བྱུགས་ལ། ལྷ་རྣམས་ཀྱི་རྟེན་དྲིའི་ཐིག་ལེ་དང་། མེ་ཏོག་གི་ཚོམ་བུ་རྣམས་བཀོད་ལ། །རྣམ་སྣང་གི་ང་རྒྱལ་དང་ལྡན་པའི་སྙིང་ག་ནས་དཀྱིལ་འཁོར་བཏོན་ལ་མདུན་ [7b.3]དུ་དགོད་པར་བྱའོ། །དེ་རྣམས་ལ་ཡེ་ཤེས་སེམས་དཔའ་སྤྱན་དྲངས་ལ་མཆོད་པ་དང་། སྒེག་མོ་ལ་སོགས་པ་བརྒྱད་ཀྱིས་མཆོད་ལ་གཞུག་པར་བྱའོ། །དེ་ནས་དབང་བསྐུར་བའི་ཕྱིར་ལྷ་མོ་བཞིས་བསྡུས་ལ་དབང་བསྐུར་ཏེ། རྒྱས་བཏབ་ལ་མཆོད་པ་བྱས་ཏེ། བསྒོམ་བཟླས་བརྩམ་མོ། ། [7b.4]དེ་ལྟར་རྫོགས་པ་དང་མཆོད་པ་དང་བསྟོད་པ་རྒྱས་པར་བྱས་ལ། སྙན་གསན་དབབ་པ་ནི། རྣམ་པར་སྣང་མཛད་བཅོམ་ལྡན་འདས། རིག་སྔགས་རྒྱལ་ལ་ཕྱག་འཚལ་ལོ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་ཅན་དག་འདི་ཞེས་པས། [7b.5]ནང་པར་དཀྱིལ་འཁོར་བཟང་པོའི་མཚན། །འདི་ཞེས་བྱ་བ་བྲི་ལགས་ན། །རྗེས་སུ་བརྩེ་བས་ཉེར་དགོངས་ནས། །ཀུན་གྱིས་བྱིན་གྱིས་བརླབ་ཏུ་གསོལ། །ལྷ་ལྷག་པར་གནས་པའོ། །དེ་ནས་བུམ་པ་བཟང་པོ་ནག་ནོག་མེད་པའི་ཚུལ་དང་མཐུན་པ་ལྷ་གྲངས་དང་མཉམ་པའམ། [7b.6]ཡང་ན་བུམ་པ་བདུན་གུ་གུལ་གྱིས་བདུག་ཅིང་། བགེགས་བསྐྲད་ཅིང་བསངས་ཏེ། དྲིའི་ཐིག་ལེ་དང་མཚན་མ་བཀོད་ལ། །རིན་པོ་ཆེ་ལྔ་དང་། སྨན་ལྔ་དང་། འབྲུ་ལྔ་དང་། སྙིང་པོ་ལྔ་དང་། སྤོས་ལྔ་དང་། བ་དམར་སེར་གྱི་འོ་མ་དང་། སྲོག་ཆགས་མེད་པའི་ཆུས་ [7b.7]བཀང་ལ། རས་ཁ་ཚར་མ་ཉམས་པས་མགུལ་བཅིངས་ཏེ། འབྲས་བུ་ཅན་གྱི་ཤིང་གིས་ཁ་བརྒྱན་ལ་བཞག་སྟེ། ནང་དུ་ལྷ་ཐམས་ཅད་བསྐྱེད་པ་དང་། ལས་ཐམས་ཅད་པར་གཤིན་རྗེ་གཤེད་པོ་བསྐྱེད་ཅིང་ཡེ་ཤེས་སེམས་དཔའ་སྤྱན་དྲངས་ལ། མཆོད་ [8a] [8a.1]ཅིང་དབང་བསྐུར་ལ་ཕྲེང་སྔགས་དང་། གསང་སྔགས་རྒྱལ་པོ་དྲུག་བཟླས་ལ་གཞག་གོ། །བུམ་པ་ལྷག་པར་གནས་པའོ། །དེ་ནས་སྒྲུབ་པ་པོའི་གཡས་ངོས་སུ་གཞུང་དང་མཐུན་པའི་ཐབ་ཁུང་བྱས་ལ། ལས་དང་མཐུན་ [8a.2]པའི་ཤིང་དང་རྫས་བསགས་ཏེ། མེ་ལྷ་སྔོན་དུ་མཆོད་ལ་དེའི་སྙིང་གར་དཀྱིལ་འཁོར་གྱི་ལྷ་རྣམས་སྤྱན་དྲངས་མཆོད་རྫས་ཕུལ་ལ་ཐུན་མོང་དུ་མཆོད་ནས། དཀྱིལ་འཁོར་གྱི་ལྷ་རྣམས་སྔར་གྱི་གནས་སུ་གཤེགས་ཏེ། བརྟན་པར་བྱས་ལ། སྔར་མེ་ལྷ་ལ་རྫས་ལྷག་མས་ [8a.3]མཆོད་ལ། འདོད་པའི་དོན་གསོལ་བ་བཏབ་ནས་མེ་ལྷ་གཤེགས་སུ་གསོལ་བར་བྱའོ། །དེ་ནས་ཅི་འབྱོར་པའི་གཏོར་མས་ཆོས་སྐྱོང་རྣམས་ལ་ཚིམ་པར་བྱས་ལ། འདོད་པའི་དོན་ལ་ཕྲིན་ལས་བཅོལ་ལ་སླར་གནས་སུ་བཏང་ངོ་། །གཏོར་མ་དང་སྦྱིན་སྲེག་ལྷག་པར་གནས་པའོ། ། [8a.4]དེ་ནས་སྣོད་དུ་རུང་བའི་སློབ་མས་མཎྜལ་བྱས་ལ། མེ་ཏོག་བཀྲམ་ནས་མེ་ཏོག་གིས་སྙིམ་པ་བཀང་ནས། སློབ་དཔོན་ལ་གསོལ་བ་གདབ་པར་བྱ་སྟེ། དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ [8a.5]ཆེན་པོ་བདག་འཚལ་ལོ། །དམ་ཚིག་དེ་ནི་སྩལ་དུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་ཁྱེར་དུ། །མགོན་པོ་བདག་ནི་འཇུག་པར་འཚལ། །ཞེས་བརྗོད་ [8a.6]དོ། །སློབ་དཔོན་གྱིས་དེ་ལ་འདི་སྐད་ཅེས་བསྒོ་སྟེ། འདས་པའི་སངས་རྒྱས་ཐམས་ཅད་དང་། །དེ་བཞིན་གང་དུ་མ་བྱོན་དང་། །ད་ལྟར་བཞུགས་པའི་བདེ་གཤེགས་རྣམས། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོ་བྱང་ཆུབ་ཤིང་ [8a.7]དྲུང་དུ། །ཐམས་ཅད་མཁྱེན་པ་ཚད་མེད་ཉིད། །གསང་སྔགས་སྤྱོད་པ་བླ་མེད་དེ། །སྐྱོབ་པ་རྣམ་པར་སྣང་མཛད་ཀྱིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག ། [8b] [8b.1]ཅེས་བརྗོད་དོ། །དེ་ནས་ཕྱག་འཚལ་བ་དང་། སྡིག་པ་བཤགས་པ་ཀུན་བྱ་བ་དང་། སེམས་བསྐྱེད་ཅིང་སྡོམ་པ་སྲུང་དུ་བཅུག་ལ། ཡི་དམ་གང་འདོད་ལྷར་བསྐྱེད་བྱིན་གྱིས་བརླབས་ཏེ་མཆོད་པ་ལྔས་མཆོད་ལ། །སོ་ཤིང་དོར་བ་དང་། སྲུང་སྐུད་བཅིང་བ་དང་། བྱམས་པའི་གོ་ [8b.2]ཆ་བསྐོན་ལ། དབུའི་གཙུག་ཏོར་བསྐྱེད་དེ། རྨི་ལམ་བརྟག་པའི་ཕྱིར་ཀུ་ཤ་བྱིན་ལ། །ཟབ་ཅིང་རྒྱ་ཆེ་བའི་ཆོས་བཤད་ལ། །སློབ་དཔོན་གྱི་ལས་རྣམས་རྫོགས་པར་བྱའོ། །སློབ་མ་ལྷག་པར་གནས་པའོ། །དེ་ནས་དཀྱིལ་འཁོར་བསྡུས་ཏེ། གོ་བསྐོན་ལ་བསྲུངས་ཏེ་ཅི་བདེར་གནས་ [8b.3]པར་བྱའོ། །དེ་ནས་ནང་པར་ཉི་མ་འཆར་ཁར་རྡུལ་ཚོན་གྱི་དཀྱིལ་འཁོར་བྱེད་པར་འདོད་པས། བའི་རྣམ་ལྔས་དཀྱིལ་འཁོར་བྱུགས་ཏེ། ཙནྡན་གྱི་ལྡེ་གུ་དྲི་དང་ལྡན་པར་བྱས་ལ། ཐིག་སྐུད་སར་པ་ཉིས་འགྱུར་ཚད་སྒོའི་ཉི་ཤུ་ཆ་ཁ་དོག་ལྔ་པ་རིན་པོ་ཆེའི་སྣོད་དུ་བཅུག་ལ། བྱིན་གྱིས་ [8b.4]བརླབས་ལ་མཆོད་ལ། སྣ་སློབ་མའི་ལག་ཏུ་གཏད་ལ་བསྒྲིལ་ནས། འཇིག་རྟེན་ཁམས་འདི་མ་ལུས་པའི། །སངས་རྒྱས་ལ་སོགས་འགྲོ་མགོན་གྱི། །ཁྱེད་ཀྱི་དུས་ནི་འདི་ལགས་ཀྱིས། །བཅོམ་ལྡན་རྡོ་རྗེའི་ཐིག་གདབ་གསོལ། །ཞེས་བརྗོད་ལ། །བདག་དང་སློབ་མ་ [8b.5]གཡས་ནས་བསྐོར་བས་ཐིག་གདབ་པར་བྱའོ། །ཚངས་ཐིག་དང་པོ་ཤར་ནས་ནུབ་ཏུ་གདབ། གཉིས་པ་བྱང་ནས་ལྷོ་རུ་གདབ། སློབ་དཔོན་མེ་ལྷར་གནས་སློབ་མ་དབང་ལྡན་དུ་གནས་ཏེ། ཤར་གྱི་ཐིག་དང་དེ་བཞིན་དུ་ལོགས་གསུམ་དུ་གདབ། དེ་རྗེས་ཚངས་ཐིག་དང་། ཟུར་ཐིག་དང་ [8b.6]ཐིག་ཆེན་དང་། ཐིག་ཕྲན་གྱི་བྱེ་བྲག་མན་ངག་ཇི་ལྟ་བ་བཞིན་དུ་དཀྱིལ་འཁོར་གྱི་གླིང་ངམ་ལྔར་ཐིག་གདབ་པོ། །དེ་ཡང་སྟེང་དུ་ཡེ་ཤེས་ཀྱི་ཐིག་དང་། འོག་ཏུ་དམ་ཚིག་གི་ཐིག་སྟེ། ས་ཐིག་རླན་གྱིས་སྤངས་ལ་ཚུལ་ཇི་ལྟ་བ་བཞིན་དུ་མཁས་པས་དཔྱད་ལ་གདབ་པར་བྱའོ། ། [8b.7]དེའི་རྗེས་ལ་གསེར་ལས་བྱས་པའི་རིན་པོ་ཆེ་ལྔའི་ཕྱེ་མ་ཇི་ལྟར་བྱིན་གྱིས་བརླབས་ལ། མཆོད་པ་ཕུལ་ལ་བསྟིམས་ཏེ། ཚོན་དགྱེ་བ་ནི་དཀར་པོ་ཆོས་ཀྱི་དབྱིངས་ཀྱི་ཡེ་ཤེས་ཏེ། སྔོན་པོ་མེ་ལོང་ལྟ་བུའི་ཡེ་ཤེས་ཉིད། །སེར་པོ་སོ་སོར་རྟོག་པའི་ཡེ་ཤེས་ལ། །དམར་པོ་མཉམ་པ་ [9a] [9a.1]ཉིད་ཀྱི་ཡེ་ཤེས་ཉིད། །ལྗང་གུ་བྱ་བ་གྲུབ་པའི་ཡེ་ཤེས་སོ། །ཡེ་ཤེས་ལྔ་ལྡན་དཀྱིལ་འཁོར་འགྲུབ། །ཅེས་བརྗོད་ལ། སྔོན་ལ་སློབ་དཔོན་གྱིས་བྱང་ཤར་མཚམས་ཀྱི་རྩིག་པ་བརྩིགས་ལ། ཕྱི་ནས་སློབ་མས་བསྐོར་ཕྱོགས་མ་ལོག་པའི་ཅི་བདེ་བར་ཚོན་དགྱེ་བར་ [9a.2]བྱའོ། །དེ་ལ་དང་པོ་གཙོ་བོའི་གནས་རྣམས་ནི། ཉི་མའི་འོད་ལ་ཟླ་བས་བརྒྱན་པའོ། །གཞན་དག་ནི་ཕྱོགས་ཀྱི་ཁ་དོག་གོ། །འདོད་ཡོན་པདྨ་རཱ་གའི་ས་གཞི། རིན་ཆེན་ཕ་གུ་གསེར་ལས་བྱས་པ། རིན་པོ་ཆེའི་ཕྲེང་བ་བཀྱེ་བ་ལ། དྲ་བ་དྲ་ཕྱེད་ནམ་མཁའི་མདོག་ཅན་མུ་ཏིག་གི་ཧ་ར་འཕྱང་བ། [9a.3]དེའི་ཕྱི་རོལ་དུ་ནམ་མཁའི་མདོག་ལ་ཀ་བ་དང་རྟ་བབས་དང་རི་དགས་དང་། ཆོས་ཀྱི་འཁོར་ལོ་དང་། གདུགས་དང་། རྒྱན་རྣམས་ཅི་མཛེས་པར་བྲི་བར་བྱའོ། །དེ་དག་གི་རྒྱབ་ཏུ་རྡོ་རྗེ་དང་། མེ་འོད་ཀྱི་ཕྲེང་བ་བྲི་བར་བྱའོ། །དཀྱིལ་འཁོར་ལྔའི་བར་བར་ནི། གསེར་གྱི་ས་གཞི་ལ་རིན་པོ་ [9a.4]ཆེ་གཅལ་དུ་བཀྲམ་པར་བྱའོ། །དེའི་ཕྱི་རོལ་གྲུ་བཞིར་བྱས་ལ་གྲྭ་བཞི་ལ་དཔག་བསམ་གྱི་ཤིང་དང་། བུམ་པ་བཟང་པོ་མཛེས་པ་བྲི་བར་བྱའོ། །དེ་ལྟར་དཀྱིལ་འཁོར་ལེགས་པར་བྲིས་ཟིན་ནས། ལྷག་པ་དང་ཆད་པ་བསྐང་བའི་ཕྱིར་དྲིལ་བུ་དཀྲོལ་ཞིང་ཡི་གེ་བརྒྱ་པ་བཟླས་ལ། [9a.5]ཐ་མ་ལན་གསུམ་བསྐོར་བར་བྱའོ། །དེ་ནས་དཔལ་དང་འབྱོར་བ་ཕུན་སུམ་ཚོགས་པར་བྱས་ལ་མཆོད་པའི་བྱེ་བྲག་མེ་ཏོག་གི་སྣོད་དང་། སྤོས་ཕོར་དང་དྲིའི་སྣོད་དང་མར་མེའི་ཕྲེང་བ་དང་། ཞལ་ཟས་ཀྱི་སྣོད་སྟོང་ངམ་བརྒྱའམ་བཅུ་ལ་སོགས་པ་ཅི་འབྱོར་བ་དང་། ན་བཟའ་དང་། [9a.6]གདུགས་དང་རྒྱལ་མཚན་ལ་སོགས་པ་ཅི་འབྱོར་བ་བསགས་ནས། སློབ་དཔོན་དཀྱིལ་འཁོར་གྱི་ཤར་དུ་སྟན་བདེ་བ་ལ་གནས་ཏེ། ཅོད་པན་ལ་སོགས་པའི་རྒྱན་ཐམས་ཅད་བསགས་ཏེ། མཆོད་པ་བྱིན་གྱིས་བརླབས་ནས། དེ་བཞིན་གཤེགས་པའི་སྐུའི་ཕྲེང་བའི་སྔགས་ཀྱིས་ [9a.7]ལྷག་པར་གནས་པའི་དཀྱིལ་འཁོར་སྙིང་ག་ནས་སྤྲུལ་ནས། རྡུལ་ཚོན་གྱི་དཀྱིལ་འཁོར་དང་བསྲེས་ནས་ཚོགས་བསགས་པ་སྔོན་དུ་འགྲོ་བས་སྲུང་བའི་འཁོར་ལོའི་སྐབས་སུ་ཕུར་པ་དང་། མདའ་དང་རལ་གྲི་ལ་སོགས་པའི་ར་བས་བསྐོར་ཏེ། སྔོན་དུ་གསུངས་པའི་ཚལ་དུ་རྒྱས་ [9b] [9b.1]པར་བསྒོམས་ནས་མཆོད་དེ། བུམ་པ་ཡང་བཀོད་ལ་དབང་བསྐུར་ཞིང་རྒྱས་བཏབ་ལ། རྫས་ཀྱི་མཆོད་པ་ལྔ་དང་། ཕྱི་ནང་གི་མཆོད་པ་ལྔ་དང་། གསང་བའི་ཡུམ་བཞིས་ཀྱང་ལེགས་པར་མཆོད་ལ། གཞན་ཡང་བསམ་གྱིས་མི་ཁྱབ་པའི་རོལ་མོའི་བྱེ་བྲག་ཐམས་ཅད་ཀྱང་དབུལ་ [9b.2]བར་བྱ་སྟེ། དབུགས་འབྱིན་ཆེན་པོ་དགའ་སྟོན་ཆེ། །དགའ་ཆེན་རོལ་མོ་ཆེན་པོ་སྟེ། །བཀུར་སྟི་རིམ་གྲོ་ཕུན་སུམ་ཚོགས། །མཆོག་ཏུ་དགའ་བ་གྲགས་པའི་དཔལ། །བདེ་བར་གཤེགས་པ་རྣམས་ལ་དབུལ། ཅི་བདེ་བར་ནི་བཞེས་སུ་གསོལ། །དེ་བཞིན་གཤེགས་པའི་སྐུའི་ཕྲེང་ [9b.3]སྔགས་དང་། ཨོཾ་དང་ཧཱུཾ་བཟླས་པའམ། ལྷ་རེ་རེ་ཞིང་རེ་རེ་དབུལ་བར་བྱའོ། །བསམ་གཏན་ཆེན་པོའི་ཏིང་འཛིན་གནས། །ཤེས་རབ་ཆེན་པོའི་ལུས་འཆང་བ། །སྟོབས་པོ་ཆེ་ལ་ཐབས་ཆེ་བ། །སྨོན་ལམ་ཡེ་ཤེས་རྒྱ་མཚོ་འདི། །བདེ་བར་གཤེགས་པ་རྣམས་ལ་དབུལ། །བདུག་ [9b.4]པའི་སྣོད་དུ་མ་དང་། མེ་ཏོག་གི་སྣོད་དུ་མ་དང་། བྱུག་པའི་སྣོད་དུ་མ་དང་། མར་མེའི་ཕྲེང་བ་བསམ་གྱིས་མི་ཁྱབ་པས་སོ་སོའི་སྔགས་དང་། གར་དང་བཅས་པས་དབུལ་ལོ། །ཡིད་བཞིན་ནོར་བུ་ཆེན་པོ་དང་། །ཁྱབ་བདག་རིན་ཆེན་ཀུན་གྱི་བདག །དཔག་བསམ་ཤིང་ཆེན་རྒྱས་པ་ [9b.5]དང་། བུམ་པ་བཟང་པོ་ཆེ་བའི་མཆོག །བདེ་བར་གཤེགས་པ་རྣམས་ལ་དབུལ། །ཅི་བདེ་བར་ནི་བཞེས་སུ་གསོལ། །ཨོཾ་དང་ཧཱུཾ་བཟླས་ཏེ། སོ་སོའི་མིང་སྤེལ་ཏེ། ཨོཾ་རཏྣ་ཡེ་ཧཱུཾ་སྭཱ་ཧཱ། ཞེས་བྱ་བ་ལ་སོགས་པས་རིན་པོ་ཆེ་དང་ནོར་བུའི་བྱེ་བྲག་མང་པོ་དང་། དཔག་བསམ་གྱི་ [9b.6]ཤིང་ལ་སོགས་པ་མང་པོ་དང་། བུམ་པ་བཟང་པོ་འབྲས་བུ་ཅན་གྱི་ཤིང་གིས་བརྒྱན་པ་ལ་སོགས་པ་རིན་པོ་ཆེའི་བྱེ་བྲག་ཐམས་ཅད་ཀྱང་ལྷ་རེ་རེ་ཞིང་དབུལ་ལོ། །སྨན་རྣམས་མ་ལུས་ལྗོན་པའི་ཤིང་། །ནད་དོ་ཅོག་གི་དགྲ་ཆེ་བ། །འགྲོ་བའི་སྡུག་བསྔལ་གཟིགས་པ་ཡི། ། [9b.7]ཟུག་རྔུ་འབྱིན་པ་བླ་ན་མེད། །བདེ་བར་གཤེགས་པ་རྣམས་ལ་དབུལ། །འགྲོ་བའི་དོན་དུ་བཞེས་སུ་གསོལ། །ཨོཾ་ཧཱུཾ་ཞེས་ཟློས་ཤིང་འབྲས་བུ་གསུམ་དང་། ཙནྡན་དང་། གུར་གུམ་དང་། ག་པུར་དང་། ཛཱ་ཏི་ལ་སོགས་པ་སྲོག་ཆགས་ལས་མ་བྱུང་བའི་སྨན་ཇི་སྙེད་ཡོད་པ་དེ་ [10a] [10a.1]རྣམས་ལྷ་རེ་རེ་ཞིང་སོ་སོའི་མིང་དང་སྤེལ་ལ་དབུལ་བར་བྱའོ། །ཕྱོགས་བཅུ་ནམ་མཁའི་མཐར་ཐུག་པའི། །ཆོས་ཀྱི་རྒྱལ་མཚན་བཙུགས་པ་དང་། །ཁྱབ་བདག་ཆེན་པོ་རིན་ཆེན་གདུགས། །སངས་རྒྱས་ཀུན་གྱི་གཟི་བརྗིད་འདི། །བདེ་བར་གཤེགས་པ་རྣམས་ལ་ [10a.2]དབུལ། །འགྲོ་བའི་དོན་དུ་བཞེས་སུ་གསོལ། །ཞེས་བརྗོད་ཅིང་། རྒྱལ་མཚན་དང་བ་དན་དང་། འཕན་དང་གདུགས་ལ་སོགས་པ་རས་སམ་འཕན་གྱི་ལྔ་ལྡི་བསམ་གྱིས་མི་ཁྱབ་པ་ལྷ་རེ་རེ་ཞིང་དབུལ་ལོ། །ལག་པ་བརྒྱ་པོ་ཀུན་བསྐྱོད་ཅིང་། །གོམ་པའི་སྟབས་ཀྱིས་གར་བྱེད་པ། །དཔལ་ལྡན་ལག་པ་ [10a.3]བརྒྱས་གང་ལ། །ནམ་མཁའ་ཁྱབ་པར་གར་བྱེད་པ། །བདེ་བར་གཤེགས་པ་རྣམས་ལ་དབུལ། །འགྲོ་བའི་དོན་དུ་བཞེས་སུ་གསོལ། །ཞེས་བརྗོད་ཅིང་གར་གྱི་རྣམ་པ་གློག་ལྟར་བསྒྱུར་ཅིང་གཟུགས་བརྒྱ་སྟོང་དུ་མ་སྙེད་དུ་སྤྲུལ་ལ། གར་བྱེད་ཅིང་དཀྱིལ་འཁོར་ལ་དབུལ་ལོ། །དེའི་རྗེས་ལ་སྦྱིན་སྲེག་གི་ [10a.4]ཆོ་གས་མཆོད་ཅིང་། མཆོད་པས་ཀྱང་ལྷ་ཚོགས་མཉེས་པར་བྱ་བར་གསུངས་སོ། །དེ་ནས་དཀྱིལ་འཁོར་ལ་གནང་བ་ཐོབ་པའི་སློབ་དཔོན་གྱིས་སློབ་མ་དཀྱིལ་འཁོར་དུ་གཞུག་པར་བྱ་སྟེ། སྔར་སྡོམ་པ་བླངས་པའི་སློབ་མ་དེས་སློབ་དཔོན་ལ་གསོལ་བ་བཏབ་ནས། དེ་ནས་སློབ་མ་དེ་ལ་བགེགས་ [10a.5]བསྐྲད་ནས། ཨ་ག་རུ་ནག་པོས་བདུག་ལ། ཨོཾ་བཛྲ་རཀྵ་ཧཱུཾ། ཞེས་པའི་དོན་བཟླས་པའི་སྟོད་གཡོགས་དང་། ཨོཾ་བཛྲ་ལཀྵ་ཧཱུཾ་ཞེས་བཟླས་པས་གདོང་པ་བཀབ་ལ། སྒོ་བཞིའི་ཕྱོགས་ནས་རིགས་ལྔ་ལ་ཕྱག་འཚལ་དུ་གཞུག་གོ། །དེའི་རྗེས་ལ་ལག་ན་མེ་ཏོག་ཐོགས་པའི་སློབ་མས་ཕྱག་འཚལ་ [10a.6]བ་སྔོན་དུ་འགྲོ་བས་རྒྱུན་བཤགས་བྱའོ། །དེ་ནས་སློབ་དཔོན་ལ་གསོལ་བ་འདི་སྐད་གདབ་པར་བྱའོ། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་ཕྱག་འཚལ། །བདེ་བར་གཤེགས་པའི་གྲོང་ཁྱེར་མཆོག། །འཇམ་དཔལ་དཀྱིལ་འཁོར་འདི་རུ་ནི། །སློབ་དཔོན་བདག་ནི་འཇུག་པར་ [10a.7]འཚལ། །ཞེས་བརྗོད་པར་བྱའོ། །སློབ་དཔོན་གྱིས་འདི་སྐད་ཅེས་བྱའོ། །བདེ་བར་གཤེགས་པ་ཐམས་ཅད་ཀྱི། །གསང་བ་ཆེན་པོའི་རིགས་དག་པས། །གསང་བ་ཡོངས་སུ་འཛིན་པ་ནི། །བདག་ཉིད་ཆེན་པོ་ཁྱོད་འདོད་དམ། །དེས་ཀྱང་འཚལ་ལོ་ཞེས་བརྗོད་པར་བྱའོ། །དེ་ལ་སློབ་དཔོན་ [10b] [10b.1]གྱིས་རིགས་ལྔའི་སྡོམ་པ་རིག་པའི་དབང་ལྔའི་རྟེན་དུ་རུང་བར་བྱ་བའི་ཕྱིར་ཕོག་ལ། །གཞན་ཡང་མི་དགེ་བ་བཅུ་དང་། ཉེ་བའི་ལས་ཀྱང་སྤང་བའི་སྡོམ་པ་སྦྱིན་ནོ། །དེས་ཀྱང་སློབ་དཔོན་གྱིས་སྡོམ་པ་གསུངས་པ་ལྟར། ཁོ་བོ་ཡང་བསྲུང་ཞིང་སྡོམ་པར་བགྱིད་དོ་ཞེས་ཁས་བླངས་ལ། དེ་དང་ [10b.2]མཐུན་པར་སྔར་གསུངས་པ་ལྟར་ཁས་བླང་བར་བྱའོ། །དེ་ནས་དབང་བསྐུར་བའི་གསོལ་བ་སློབ་མས་གདབ་པ་ནི། །རྡོ་རྗེ་སློབ་དཔོན་བློ་གྲོས་ཆེ། །སངས་རྒྱས་རྣམས་ནི་བདག་ལ་དགོངས། །བདག་མིང་འདི་ཞེས་བྱ་བས་ནི། །སློབ་དཔོན་དཔང་དུ་གནས་པ་ལ། །སངས་རྒྱས་རོལ་མོ་ལས་བྱུང་བ། །མི་ [10b.3]ལྡོག་འཁོར་ལོ་སྦྱིན་པར་ལྡན། །ཐར་པ་ཆེན་པོའི་གྲོང་ཁྱེར་མཆོག །དཀྱིལ་འཁོར་ཆེན་པོར་ཞུགས་ནས་ཀྱང་། །སངས་རྒྱས་ཀུན་གྱིས་དབང་བསྐུར་ཏེ། །སྐལ་བ་ཆེན་པོ་བདག་ལ་སྩོལ། །མཚན་རྣམས་ཀུན་གྱིས་རྒྱས་གདབ་ཅིང་། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་ [10b.4]བ། །སློབ་དཔོན་ཆེན་པོ་བདག་ལ་སྩོལ། །ཞེས་གསོལ་བ་གདབ་པའོ། །སློབ་དཔོན་གྱིས་ཀྱང་དཀྱིལ་འཁོར་གྱི་ལྷ་ལ་གསོལ་བ་གདབ་པ་ནི། ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་ཅིང་། །དམ་ཚིག་སྡོམ་དང་གསང་བ་ཡི། །དཀྱིལ་འཁོར་འདིར་ཡང་འཇུག་པར་ [10b.5]འཚལ། །ཞེས་བརྗོད་དོ། །དེ་ནས་ལྷ་ལ་གནང་བ་ཐོབ་པ་དང་། སྙིང་གར་རྡོ་རྗེ་བཞག་ལ། ཨོཾ་སརྦ་ཡོ་ག་བོ་དྷི་ཅི་ཏྟ་ཨུཏྤཱ་ད་ཡཱ་མི། སུ་ར་ཏ་ས་མ་ཡ་སྟྭཾ་བཛྲ་སིདྡྷི་ཡ་ཐཱ་སུ་ཁཾ་ཞེས་སྙིང་གར་ཟླ་བ་རྡོ་རྗེ་བསམས་ལ། ལག་པ་ནས་ཁྲིད་དེ། ཛཿཧཱུཾ་བཾ་ཧོཿཞེས་བྱ་བས་སྒོ་བཞི་ནས་གཞུག་གོ། །དེ་ནས་ [10b.6]ཤར་གྱི་སྒོར་ཕྱོགས་པར་བཞག་ལ། རྡོ་རྗེ་སློབ་དཔོན་གྱིས་འདི་སྐད་ཅེས་བརྗོད་པར་བྱའོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། ངས་ཁྱོད་ལ་ཡེ་ཤེས་གང་ཡིན་གྱི་དེ་བཞིན་གཤེགས་པ་ཐམས་ཅད་དུ་ཡང་འགྲུབ་པ་ཐོབ་ན་དངོས་གྲུབ་གཞན་ལྟ་སྨོས་ཀྱང་ཅི་དགོས་ [10b.7]དེ་ལྟ་བུའི་ཡེ་ཤེས་བསྐྱེད་པར་བྱ་ཡིས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་སྨྲ་བར་མ་བྱེད་ཅིག །དམ་ཚིག་ཉམས་པར་གྱུར་ཏེ་རེ་ཞེས་བརྗོད་དེ། དེ་ནས་སློབ་མའི་སྙིང་གར་རྡོ་རྗེ་བཞག་ལ། རྡོ་རྗེ་སེམས་དཔའ་དེང་ཁྱོད་ཀྱི། སྙིང་ལ་ཡང་དག་གཞུག་པར་མཛད། ། [11a] [11a.1]གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲོད་ཀ་ཋ་ཧཱུཾ། འདི་དེ་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་ཨ་མྲྀ་ཏ་ཧཱུཾ་བཛྲ་ཨ་གཏྟ་ཧྲི་ཐ་ཧཱུཾ། དེ་ནས་སློབ་དཔོན་གྱིས་ [11a.2]དམ་ཚིག་བསྒྲགས་ཏེ། དེང་ནས་བརྩམས་ཏེ་ཁྱོད་ཀྱི་རྡོ་རྗེ་སློབ་དཔོན་ང་ཡིན་གྱི། ངས་འདི་བྱོས་ཤིག་ཅེས་བསྒོ་བྱ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་གྱུར་ཏ་རེ། དེ་ནས་ཡེ་ཤེས་སེམས་དཔའ་དབབ་པར་བྱ་ [11a.3]སྟེ། འདི་སྐད་བརྗོད་དུ་གཞུག་གོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། འཇམ་དཔལ་ཡེ་ཤེས་སེམས་དཔའ་བདག་ལ་དབབ་པར་གྱུར་ཅིག་ཅེས་སྨྲོས་ཤིག་པའོ། །རྡོ་རྗེ་དྲིས་བསྒོས་པ་སྙིང་གར་བཞག་ལ། འདི་དེ་རྡོ་རྗེའི་དམ་ཚིག་སྟེ། འཇམ་དཔལ་རྡོ་རྗེ་ཡིན་པར་གྲགས། ། [11a.4]རྡོ་རྗེ་ཡེ་ཤེས་བླ་མེད་ནི། །དེང་འདིར་ཁྱོད་ལ་འབབ་པར་ཤོག །ཨོཾ་མཉྫུ་ཤྲཱི་བཛྲ་ཨཱ་བེ་ཤ་ཡ་ཨ་ཨ་ཨ་ཨ་ཞེས་ཉི་ཤུ་རྩ་གཅིག་བརྗོད་དོ། །རྡོ་རྗེ་དམར་པོ་མཚོན་གང་པ་ཆར་ལྟར་དུ་འབེབས་པར་བསམ་མོ། །གལ་ཏེ་འབབ་པར་མ་གྱུར་ན་སྡིག་པ་བྱང་བའི་ཆོ་གས་དབབ་པར་བྱའོ། །དེ་ནས་བབ་པ་དང་ཡི་གེ་བརྒྱ་ [11a.5]པས་བརྟན་པར་བྱའོ། །དེ་ནས་མེ་ཏོག་གི་ཕྲེང་བ་དོར་ཏེ། པྲ་ཏཱི་ཙྪ་བཛྲ་ཧོ་ཞེས་པས་དཀྱིལ་འཁོར་ལ་གཏོར་ལ་གང་དུ་བབས་པའི་ལྷ་དེ་ཡི་དམ་དུ་དབོག་གོ། །ཨོཾ་པྲ་ཏི་གྲྀ་ཧྞ་ཏྭཾ་ཨི་མཾ་སཏྭ་མ་ཧཱ་བ་ལེ་ཞེས་བྱ་བས་ཕྲེང་བ་དེ་མགོ་ལ་བཅིང་བར་བྱའོ། །དེ་ནས་གདོང་གཡོགས་བཀྲོལ་ཏེ་མིག་ལྕགས་ཀྱུའི་ཕྱག་རྒྱས་དབྱེ་ [11a.6]ཞིང་སྔགས་འདི་བརྗོད་དོ། །ཨོཾ་འཇམ་དཔལ་རྡོ་རྗེ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །མིག་ནི་ཐམས་ཅད་འབྱེད་མཛད་དེ། །རྡོ་རྗེའི་མིག་ནི་བླ་ན་མེད། །དེ་རིང་ཉིད་དུ་འབྱེད་པར་ཤོག །ཧེ་བཛྲ་པ་ཤྱ་ཧཱུཾ་ཞེས་བརྗོད་ལ། །མིག་གཡོགས་ཀྱང་དགྲོལ་ཏེ་འདི་སྐད་བརྗོད་དོ། །ལེགས་པར་ལྟོས་ཤིག་ [11a.7]སེམས་དཔའ་ཆེ། །ཐར་པ་ཆེན་པོའི་དཀྱིལ་འཁོར་དུ། །མེ་ཏོག་གང་ལ་ཕོག་པ་ནི། །འདི་དེ་ཁྱོད་ཀྱི་རིགས་ཀྱི་ལྷ། །རང་གི་ལྷ་རུ་ཤེས་པར་གྱིས། །ཞེས་བརྗོད་ལ་རྡོ་རྗེ་ལྕགས་ཀྱུ་ནས་བརྩམས་ཏེ། བཅོམ་ལྡན་འདས་རྣམ་པར་སྣང་མཛད་ཆེན་པོའི་བར་དུ་དཀྱིལ་འཁོར་དྲུག་བསྟན་པར་བྱའོ། །དེ་ནས་ [11b] [11b.1]དཀྱིལ་འཁོར་གྱི་ཤར་ངོས་སུ་མཎྜལ་ལ་པདྨ་འདབ་བརྒྱད་བྲིས་ལ། ཡི་དམ་ལྷའི་གཟུགས་སུ་བསམས་ལ་དབང་བསྐུར་བར་བྱ་སྟེ། དེ་ཡང་དང་པོར་རེ་ཞིག་ཆུའི་དབང་བསྐུར་བར་བྱ་སྟེ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །དེ་བཞིན་བདག་གིས་ལྷ་ཡི་ཆུ། །དག་པ་ [11b.2]ཡིས་ནི་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་བཛྲ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། རྣམ་ཤེས་ [11b.3]ཕུང་པོ་རྣམ་དག་པའི། །མེ་ལོང་ལྟ་བུའི་ཡེ་ཤེས་ཀྱི། །ཞེ་སྡང་ཆེན་པོ་མི་བསྐྱོད་པའི། །དཔལ་ལྡན་ཆུ་ཡིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་བཛྲ་ཨ་བྷི་ཥིཉྩ་ཧཱུཾ། དེ་ནས་ཅོད་པན་གྱི་དབང་བསྐུར་ཏེ། །ཕལ་བའི་ས་ནི་གཞོམ་པ་དང་། །ཡོན་ཏན་གཟི་བརྗིད་བསྐྱེད་པའི་ཕྱིར། །ང་རྒྱལ་རིན་ [11b.4]ཆེན་འབྱུང་ལྡན་གྱི། །ཅོད་པན་གྱིས་ནི་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་མུ་ཀུ་ཊ་ཨ་བྷི་ཥིཉྩ་ཧཱུཾ། ཞེས་བརྗོད་པ་དང་། དཔལ་ལྡན་རིན་ཆེན་ཅོད་པན་དབང་། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་རིན་ཆེན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་རཏྣ་སྭ་བྷཱ་བ་ཨཱཏྨ་ [11b.5]ཀོ྅ཧཾ། །ཚོར་བའི་ཕུང་པོ་རྣམ་དག་པའི། །མཉམ་པ་ཉིད་ཀྱི་ཡེ་ཤེས་ཀྱི། །ང་རྒྱལ་རིན་ཆེན་འབྱུང་ལྡན་གྱི། །ཅོད་པན་གྱིས་ནི་དབང་བསྐུར་རོ། །དེ་ནས་རྡོ་རྗེའི་དབང་བསྐུར་ཏེ། །སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་གྱིས་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ [11b.6]ལོང་། །ཨོཾ་སརྦ་ཏ་ཐཱ་ག་ཏ་བཛྲ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། ཆོས་ཀྱི་གསུང་རབ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་དུ་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་བཱཀ་བཛྲ་སྭ་བྷཱ་བ་ཨཱཏྨ་ཀོ྅ཧཾ། འདུ་ཤེས་ཕུང་པོ་རྣམ་དག་པའི། ། [11b.7]སོ་སོར་རྟོག་པའི་ཡེ་ཤེས་ཀྱི། །འདོད་ཆགས་སྣང་བ་མཐའ་ཡས་ཀྱི། །རྡོ་རྗེ་ཡིས་ནི་དབང་བསྐུར་རོ། །དེ་ནས་དྲིལ་བུའི་དབང་བསྐུར་ཏེ། །འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། །རྒྱལ་བ་རྒྱ་མཚོའི་མཆོག་ཏུ་བཤད། །ཨོཾ་སརྦ་ཏ་ [12a] [12a.1]ཐཱ་ག་ཏ་ཨ་དྷི་བ་ཏི་སྟྭཾ་ཨ་བྷི་ཥི་ཉྩ་མི་ཏིཥྛ་ས་མ་ཡ་སྟྭཾ། དཔལ་ལྡན་རྡོ་རྗེ་དྲིལ་བུ་འཆང་། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ལས་སུ་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཨ་མོ་གྷ་བཛྲ་སྭ་བྷཱ་བ་ཨཱཏྨ་ཀོ྅ཧཾ། འདུ་བྱེད་ཕུང་པོ་རྣམ་དག་ [12a.2]པའི། །བྱ་བ་ནན་ཏན་ཡེ་ཤེས་ཀྱི། །ཕྲག་དོག་དོན་ཡོད་གྲུབ་པ་ཡི། །དྲིལ་བུ་ཡིས་ནི་དབང་བསྐུར་རོ། །དེ་ནས་མིང་གི་དབང་བསྐུར་ཏེ། །སྲིད་པའི་བདེ་བ་ཤིན་ཏུ་ཆུང་། །སྡུག་བསྔལ་ཆེན་པོ་བསལ་བའི་ཕྱིར། །ཤིན་ཏུ་བདེ་བ་དམ་པའི་ཐབས། །རྣམ་པར་སྣང་མཛད་རྟག་ཏུ་བསྐྱེད། །ཨོཾ་སརྦ་ཏ་ཐཱ་ [12a.3]ག་ཏ་ཨ་བྷི་ཥིཉྩཱ་མི་ཆེ་གེ་མོ་ནཱ་མ་ཨ་བྷི་ཥེ་ཀ་ཏ་ཧཱུཾ། དཔལ་ལྡན་རྡོ་རྗེ་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་ནི། །རྡོ་རྗེ་སྐུ་ནི་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅ཧཾ། གཟུགས་ཀྱི་ཕུང་པོ་རྣམ་དག་པའི། །ཆོས་ཀྱི་དབྱིངས་ཀྱི་ [12a.4]ཡེ་ཤེས་ཀྱི། །གཏི་མུག་རྣམ་པར་སྣང་མཛད་ཀྱི། །དཔལ་ལྡན་མི་བསྐྱོད་དབང་བསྐུར་རོ། །དེ་དང་ལྡན་ན་དེ་ལྔ་ནི་རིག་པའི་དབང་ལྔ་སྟེ། ཕུང་པོ་ལྔ་དག་ནས་ཉོན་མོངས་པ་ལྔ་སྤངས་ནས། ཡེ་ཤེས་ལྔ་དང་ལྡན་ཏེ། མ་རིག་པ་རིག་པས་ན་རིག་པའི་དབང་ལྔ་ཞེས་བྱའོ། །དེ་ནས་བརྟུལ་ཞུགས་ཀྱི་དབང་ཞེས་བྱ་བ་ནི། [12a.5]འདི་དེ་སངས་རྒྱས་ཐམས་ཅད་ཀྱི། །འཇམ་དབྱངས་རྡོ་རྗེའི་ལག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །འཇམ་དཔལ་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་མཉྫུ་ཤྲཱི་ཙིཏྟ་བཛྲ་ས་མ་ཡ་ཏིཥྛ་ཨ་བྷི་ཥེ་ཀ་ཏ་ཡ་མི་ཧཱུཾ་ཧ་ཧ་ཧ་ཧི་ཧི་ཧི། དེ་ནས་ཕྲེང་བ་སྦྱིན་ཏེ། སངས་རྒྱས་ཀུན་གྱི་མི་ཕྱེད་པའི། །གསང་སྔགས་ [12a.6]བླ་ན་མེད་པ་ཡི། །སྙིང་པོ་ཡིད་བཞིན་ནོར་བུ་འདི། །སྐྱོབ་པ་སྔགས་ཀྱིས་དབང་བསྐུར་རོ། །དེ་ནས་ཕྱིར་མི་ལྡོག་པའི་དབང་བསྐུར་བར་བྱ་བའི་ཕྱིར། ཡོན་བདག་གིས་ཡོན་གྱི་མཆོག་ཕུལ་ལ་གསོལ་བ་བཏབ་ལ། བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་སྩོལ་བགྱིས་པ་ལྟར། །བདག་ཀྱང་བསྲུང་བའི་དོན་ [12a.7]གྱི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །དེ་བཞིན་གཤེགས་པའི་དབང་བསྐུར་བ། །འགྲོ་བ་བསྐྱབ་པའི་གཟི་བརྗིད་ཅན། །ཇི་ལྟར་ཡོན་ཏན་འབྱུང་གནས་སྩོལ། །སློབ་དཔོན་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་གྱུར། ། [12b] [12b.1]སློབ་དཔོན་ཆེན་པོ་བདག་ལ་སྩོལ། །དེ་ལྟར་གསོལ་བ་བཏབ་རྗེས་ལ་སྡོམ་པ་སྦྱིན་ཏེ། །ཇི་བཞིན་དོན་ལྡན་དམ་ཚིག་ནི། །རྩ་བ་ཡན་ལག་བཅས་པ་ཀུན། །ཕས་ཕམ་པར་ནི་རབ་ཏུ་གྲགས། །སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བར་ཤེས་པར་བྱ། །སྲོག་གཅོད་རྐུ་དང་འཕྲོག་པ་དང་། །བརྫུན་ [12b.2]དང་ཆང་ནི་ཅུང་ཟད་སྤང་། །མི་དགེ་བ་ནི་བཅུ་པོ་དག །ཁྱོད་ཀྱིས་ནམ་ཡང་མ་སྤྱོད་ཅིག །ཐེག་པ་དམན་ལ་མོས་པ་དང་། །སེམས་ཅན་འཁོར་བ་མི་སྤང་ཞིང་། །མྱ་ངན་འདས་ལ་མ་ཆགས་ཤིང་། །ལྷ་དང་ལྷ་མིན་བརྙས་མི་བྱ། །དེ་བཞིན་གཤེགས་པའི་ཕྱག་རྒྱ་རྣམས། །འགོམ་པར་བྱ་བ་མ་ཡིན་ཏེ། །དམ་ [12b.3]ཚིག་འདི་དག་ཉམས་པ་ན། །རྡོ་རྗེ་དམྱལ་བར་འཚེད་པར་འགྱུར། །དེ་བས་དམ་ཚིག་བསྲུང་བར་གྱིས། །དེས་ཀྱང་སློབ་དཔོན་གྱི་བཀའ་བཞིན་བགྱིད་པར་འཚལ་ལོ་ཞེས་ཁས་བླངས་སོ། །དེ་ནས་སློབ་མ་དམ་པ་དེའི་ལུས་ལ་ལྷ་བཀོད་ལ། རྣམ་རྒྱལ་བུམ་པ་ཐོགས་ཏེ། ཁམས་གསུམ་ཀུན་གྱིས་ཕྱག་ [12b.4]བྱས་པ། །གསང་བ་གསུམ་གྱི་གནས་ལས་བྱུང་། །དབང་བསྐུར་བ་ནི་རྡོ་རྗེ་ཆེ། །སངས་རྒྱས་ཀུན་གྱིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་པ་ཡ། པ་ར་ཏི་ག་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། དེ་ནས་གསེར་ལ་སོགས་པ་ལས་བྱས་པའི་མིག་ཐུར་ཐོགས་ལ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ [12b.5]ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནཻ་ཏྲ་ཨ་པ་ཧ་ར་བ་ཊ་ལཾ་ཧྲི་ཞེས་ཉོན་མོངས་པ་སྤོང་བའི་དབང་ངོ་། །དེ་ནས་མེ་ལོང་བསྟན་ལ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། [12b.6]རྒྱུ་དང་ལས་ལས་ཀུན་དུ་འབྱུང་། །ངོ་བོ་མེད་ཅིང་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །ཡེ་ཤེས་ཀྱི་དབང་ངོ་། །དེ་ནས་མདའ་གཞུ་བླངས་ལ་མིའི་དྲུང་དུ་འཕེན་བཅུག་ལ། །ཐབས་དང་ཤེས་རབ་གཉིས་མེད་དེ། །བསྐལ་ [12b.7]པའི་ཆོ་འཕྲུལ་ཅིར་ཡང་སྟོན། །བདུད་གྱི་རིགས་རྣམས་ཕམ་བྱེད་པའི། །ཡེ་ཤེས་ཀྱི་ནི་མདའ་འཕོངས་ཤིག །ཧོ་ཞེས་མདའ་འཇིག་རྟེན་གྱི་ཁམས་དྲུག་ཏུ་འཕེན་དུ་གཞུག་གོ། །སྐུའི་དབང་ངོ་། །དེ་ནས་དྲིལ་བུ་བླངས་ལ་དཀྲོལ་ཏེ། ཆོས་རྣམས་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་ [13a] [13a.1]མེད། །མཁའ་དང་མཉམ་པར་སྦྱོར་བ་ཡིས། །སྐུ་མཆོག་མཉམ་པ་ཉིད་དུ་གསལ། །ཨཱཿ ཞེས་གསུང་གི་དབང་ངོ་། །མེ་ལོང་བླངས་ལ། འཇམ་དབྱངས་རྡོ་རྗེ་མེ་ལོང་བཞིན། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་བཞིན་ནི། །བུ་ཁྱོད་ཀྱི་ནི་སྙིང་ལ་ཞུགས། ། [13a.2]མཉྫུ་ཤྲཱི་ཙིཏྟ་ཨ། ཐུགས་ཀྱི་དབང་ངོ་། །དེ་ནས་རྐང་པའི་བར་དུ་ཆོས་ཀྱི་འཁོར་ལོ་གཞག །ལག་པར་དུང་དང་ལྕེ་ལ་པོ་ཏི་གཏད། མགོ་ལ་གདུགས་གཏད་དེ། དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །དེ་རིང་ཕན་ཆད་འཇིག་རྟེན་ལ། །ཆོས་ཀྱི་འཁོར་ལོ་རབ་ཏུ་བསྐོར། ། [13a.3]ཆོས་ཀྱི་དུང་ནི་བླ་མེད་པས། །ཀུན་དུ་མ་ལུས་གང་བར་གྱིས། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱོད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ན་སངས་རྒྱས་ལ། །ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ [13a.4]ཀྱང་། །ཀུན་ཏུ་ཁྱོད་ལ་སྲུང་བར་བྱེད། །ཅེས་བརྗོད་དོ། །ཡང་། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བའི། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བརྗོད་དོ། །དེ་ནས་ཐམས་ཅད་གཟེངས་བསྟོད་དེ། །ཀུན་བདག་སངས་རྒྱས་སྒོམ་པ་པོ། ། [13a.5]རྡོ་རྗེའི་མིང་དབང་བསྐུར་བས་ཀྱང་། །དེ་བཞིན་གཤེགས་པར་ལུང་བསྟན་ཉིད། །ཨོཾ་འདི་དེ་ངས་ཁྱོད་ལུང་བསྟན་ཡིན། །འཇམ་དཔལ་རྡོ་རྗེ་དེ་བཞིན་གཤེགས། །སྲིད་པ་ཀུན་དུ་བསྒྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཀྱེ་དེ་བཞིན་གཤེགས་པ་ཆེ་གེ་མོ་ཞེས་བྱ་བ། །སིདྡྷི་ས་མ་ཡ་སྟྭཾ་ [13a.6]བྷུར་བྷུ་བ་སྭཿ དེ་ནས་གནང་བ་སྦྱིན་པ། ངོ་བོ་ཉིད་ཀྱིས་སེམས་ཅན་རྣམས། །ཇི་ལྟ་ཇི་ལྟར་འདུལ་འགྱུར་བ། །དེ་ལྟ་དེ་ལྟར་ཆགས་ལ་སོགས། །གཙང་མས་སེམས་ཅན་དོན་བྱའོ། །དེ་ནས་དབུགས་དབྱུང་བ། གསང་བ་མཆོག་གི་དཀྱིལ་འཁོར་འདིར། །དེ་རིང་ཕན་ཆད་ཁྱེད་ཞུགས་ཀྱིས། ། [13a.7]སྡིག་པ་ཀུན་ལས་ངེས་གྲོལ་བར། །ཁྱེད་རྣམས་དེང་ནི་ལེགས་པར་གནས། །བདེ་ཆེན་ཐོབ་པ་འདི་ལས་ནི། །སླར་ཁྱོད་འཆི་བ་ཡོད་མིན་ཏེ། །མི་ཚུགས་པ་དང་མི་སྨོད་པ། །ཅིས་ཀྱང་མི་འཇིགས་དགའ་བར་གྱིས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་སྡུག་བསྔལ་ལས་ཁྱོད་འདས། ། [13b] [13b.1]ཁྱེད་རྣམས་ཀྱིས་ནི་སངས་རྒྱས་ཉིད། །དེ་ཉིད་ཐེ་ཚོམ་མེད་པར་འཐོབ། །དེ་ནས་བདག་ཉིད་ཐར་བསམས་ལ། །ཆོས་གོས་བཟུང་སྟེ། ཨོཾ་འདི་ལྟར་ང་ཡིས་ལུང་བསྟན་པར། །མགྲིན་གཅིག་ཏུ་ནི་རྫོགས་པའི་ཕྱིར། །བྱང་ཆུབ་ཏུ་ནི་ལུང་བསྟན་མཛད། །སངས་རྒྱས་རྡོ་རྗེ་འཛིན་བཅས་པས། ། [13b.2]ཀུན་གྱིས་དེང་ཁྱོད་དབང་བསྐུར་བས། །ཁམས་གསུམ་གྱི་ནི་རྒྱལ་པོ་ཆེ། །རྒྱལ་བའི་བདག་པོ་སྟོན་པ་ཡིན། །དེང་ནི་བདུད་ལས་རྣམ་རྒྱལ་ཏེ། །གྲོང་ཁྱེར་མཆོག་ཏུ་རབ་ཏུ་ཞུགས། །ཁྱེད་རྣམས་ཀྱིས་ནི་སངས་རྒྱས་ཉིད། །དེང་ཉིད་ཐེ་ཚོམ་མེད་པར་འཐོབ། །དེ་ལྟར་གཟེངས་བསྟོད་པ་དང་། །དབུགས་ [13b.3]དབྱུང་བ་དང་། ལུང་བསྟན་པའོ། །དེ་ནས་སློབ་མ་དེ་ལ་མཆོད་པ་ལྔ་དང་། སྒེག་མོ་ལ་སོགས་པ་བརྒྱད་ཀྱིས་ཡང་དག་པར་མཆོད་དེ། ཁྱེད་རྣམས་ཀྱིས་ཀྱང་དུས་གསུམ་བདེ་བར་གཤེགས་པ་རྣམས་ཡང་དག་པར་མཆོད་ཅིག་པར་བཀའ་བསྒོའོ། །དེ་ནས་དེ་རྣམས་ཀྱིས་ཡོ་བྱད་ཀྱིས་དཀྱིལ་ [13b.4]འཁོར་གྱི་ལྷ་མཆོད་ལ། ལྷག་མས་དེར་ཚོགས་ཚིམ་པར་བྱས་ལ་དཀྱིལ་འཁོར་གྱི་ལྷ་ལ་བསྟོད་དེ། །སྒེག་མོ་ལ་སོགས་པས་མཆོད་ལ་བསྟོད་དོ། །དེ་ནས་སློབ་དཔོན་ལ་ཡོན་གྱིས་མཉེས་པར་བྱས་ལ། འདོད་པའི་དོན་གསོལ་བ་གདབ་པོ། །དགེ་བའི་རྩ་བ་བསྔོ་སྟེ། དཀྱིལ་འཁོར་ལ་བསྐོར་བ་བྱས་ལ་ལྷ་ [13b.5]གཤེགས་སུ་གསོལ་ཏེ། དམ་ཚིག་བསྡུས་ལ་ཅི་བདེ་བའི་སྤྱོད་ལམ་བྱའོ། །སློབ་མ་རྣམས་ཀྱི་དོན་གྱི་ཕྱིར། །དཀྱིལ་འཁོར་ཆོ་ག་བྱས་པ་ལ། །དགེ་བ་བསགས་པ་གང་གྱུར་པ། །ཐམས་ཅད་རྫོགས་པའི་བྱང་ཆུབ་ཐོབ། །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་ཆོ་ག་ [13b.6]ནམ་མཁའ་དྲི་མ་མེད་པ་ཞེས་བྱ་བ། འཇམ་དཔལ་བཤེས་གཉེན་གྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་སུ་བཛྲ་བ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་བའོ། །{T2544}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་ [13b.7]སཱ་དྷ་ན། བོད་སྐད་དུ། འཕགས་པ་འཇམ་དཔལ་ཞེས་བྱ་བའི་སྒྲུབ་པའི་ཐབས། འཇམ་པའི་མགོན་ལ་ཕྱག་འཚལ་ལོ། །ཐམས་ཅད་མཁྱེན་ཅིང་ཐུགས་སུ་ཆུད། །སྨྲ་བའི་སྐྱེས་མཆོག་སྨྲ་བའི་རྒྱལ། །སྨྲ་བའི་སེང་གེ་ཚུགས་པ་མེད། །རྣམ་ཀུན་མཁྱེན་ལ་ཕྱག་འཚལ་ལོ། །སྤྱོད་དང་ལྡན་པ་ [14a] [14a.1]ཤེས་པ་པོ། །འཇམ་པའི་མགོན་ལ་དགའ་བ་དང་། །དེ་ཡི་དོན་དུ་སྒྲུབ་པའི་ཐབས། །མདོ་རུ་བསྡུས་ཏེ་བཤད་པར་བྱ། །རྣམ་པར་སྨིན་པའི་ལུས་དག་ལ། །ལྷ་ཡི་ང་རྒྱལ་དྲན་བྱས་ཏེ། །མདུན་དུ་འཇམ་མགོན་བསམས་ནས་སུ། །ཕྱག་འཚལ་བ་དང་མཆོད་པ་དང་། བཤགས་ [14a.2]དང་རྗེས་སུ་ཡི་རང་བ། །བསྔོ་དང་སྐྱབས་སུ་འགྲོ་བ་དང་། །སེམས་བསྐྱེད་དེ་ནི་ཡིད་ཀྱིས་བྱ། །ཨོཾ་སྭ་བྷཱ་བ་ཤུདྡྷཿསརྦ་དྷརྨྨཱཿསྭ་བྷཱ་བ་ཤུདྡྷོ྅ཧཾ།། བརྗོད་པས་ཆོས་ཀུན་དམིགས་མེད་པར། །སྟོང་པ་ཉིད་དུ་བསྒོམ་པར་བྱ། །སེམས་ཉིད་ཨ་རུ་གྱུར་ནས་སུ། །ཟླ་དཀྱིལ་དྷཱིཿརུ་བསྒོམ་པར་བྱ། དེ་ལས་ [14a.3]འཕྲོ་འདུས་མཚན་མར་གྱུར། །མཚན་མ་འཇམ་དཔལ་གཞོན་ནུའི་སྐུ། །སྐུ་གསེར་མེ་ཏོག་ཟུར་ཕུད་ཅན། །ཤེས་རབ་རལ་གྲི་པོ་ཏིས་མཚན། །ཞི་བའི་ཚུལ་འཆང་གཞོན་ནུ་བསྒོམ། །ལྕགས་ཀྱུའི་ཕྱག་རྒྱ་བཅིངས་ནས་སུ། །ཨེ་ཧྱེ་ཧི་མཉྫུ་ཤྲཱི་ཀུ་མཱ་ར། ཨཱ་ཀཔྵཨཱ་བེེ་ཤ་ཡ་ཨ་ཨ། [14a.4]སྤྱན་དྲང་མདུན་དུ་བསམ་པར་བྱ། །དེ་ནས་མཆོད་པ་དབུལ་བྱས་ཏེ། །མཉྫུ་ཤྲཱི་གནྡྷེ་པཱུ་ཛ་སྭཱ་ཧཱ། ཨོཾ་མཉྫུ་ཤྲཱི་པུཥྤེ་པཱུ་ཛ་སྭཱ་ཧཱ། ཨོཾ་མཉྫུ་ཤྲཱི་དྷཱུ་པེ་པཱུ་ཛ་སྭཱ་ཧཱ། ཨོཾ་མཉྫུ་ཤྲཱི་ཨཱ་ལོ་ཀེ་པཱུ་ཛ་སྭཱ་ཧཱ། ཨོཾ་མཉྫུ་ཤྲཱི་ནཻ་བི་དྱེ་པཱུ་ཛ་སྭཱ་ཧཱ། ཨོཾ་མཉྫུ་ཤྲཱི་ག་སྭཱ་ཧཱ། །དེ་ནས་བསྟོད་པའི་ཚིག་འདི་བརྗོད། །ཤེས་རབ་ཆེན་པོ་ [14a.5]སྐད་ཅིག་གིས། །ཆོས་ཀུན་ཁོང་དུ་ཆུད་པར་མཁྱེན། །མི་ཤེས་གཡུལ་ངོ་ཐམས་ཅད་སེལ། །སེམས་ཅན་ཀུན་ལ་བྱམས་ཐུགས་ལྡན། །འཇམ་མགོན་བྱམས་ཐུགས་ལྡན་ལ་འདུད། །མི་ཤེས་གཡུལ་སེལ་རལ་གྲི་དང་། །ཤེས་རབ་པོ་ཏི་ཐུགས་རྟགས་ཅན། །ཆོས་རྣམས་ཐམས་ཅད་སྟོན་པ་པོ། ། [14a.6]སྐྱེ་མཆེད་དབྱིངས་སྟོན་ཟུག་རྔུ་སྤངས། །འཇམ་མགོན་ཆོས་སྐུ་ཉིད་ལ་བསྟོད། །ཡང་ན་འདོད་ཡོན་ལྔ་སོགས་ཀྱིས། །མངོན་པར་མཆོད་ནས་བསྟོད་པ་བྱ། །ཡང་ན་མཚན་ཉིད་བསྟོད་པར་བྱ། །ཡོན་ཏན་མཚན་གྱིས་བསྟོད་ཅེའོ། །དེ་ནས་ལུས་ལས་བསྡུས་བྱས་ནས། བཟླས་པ་དག་ནི་བྱ་བར་བཤད་ [14a.7]གཉིས་སུ་མེད་པའི་ཐུགས་ཀ་རུ། །རང་འདྲའི་ཡེ་ཤེས་སེམས་དཔའ་བསམས། །དེ་ཡི་སྙིང་དུ་ཏིང་འཛིན་སེམས། །ཉི་མའི་མཎྜལ་སྟེང་དུ་ནི། །རལ་གྲི་དྷཱིཿཡིས་མཚན་པར་བསམ། དེ་ལ་བཟླས་པའི་སྔགས་ཀྱིས་བསྐོར། །ཨོཾ་བཛྲ་ཏཱི་ཀཥྞ་དུཿཁཙྪེ་ད། པྲཛྙཱ་ཛྙཱ་མཱུ་རྟྟ་ཡེ། ཛྙཱ་ན་ཀཱ་ཡ་ཝཱ་གཱི་ [14b] [14b.1]ཤྭ་ར་ཨ་ར་པ་ཙ་ནཱ་ཡ་ཏེ་ན་མཿ སྭཱ་ཧཱ། མི་སྐྱོའི་སེམས་ཀྱིས་བཟླས་པར་བྱ། །སྐྱོ་བ་དག་ནི་བྱུང་བ་ན། །འཛིན་པ་མེད་པ་བསྒོམ་པར་བྱ། །ཐུན་བཞི་དག་ཏུ་ཉམས་སུ་བླང་། །ཡང་ན་ཉིན་མཚན་རེ་རེའོ། །ཐ་མར་གཤེགས་སུ་གསོལ་བ་བྱ། །རང་ཉིད་ལྷ་ཡི་ང་རྒྱལ་གནས། །འཇམ་མགོན་སྒྲུབ་ཐབས་ [14b.2]ལེགས་སྦྱར་བས། །བདག་གིས་དགེ་བ་གང་བསགས་པ། །དེས་ནི་ཁམས་གསུམ་སེམས་ཅན་ཀུན། །འཇམ་མགོན་གོ་འཕང་ཐོབ་པར་ཤོག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ། །༄༅༅། །རྒྱ་གར་སྐད་དུ། [14b.3]ཨཱརྱ་མཉྫུ་ཤྲཱི་ནཱ་མ་སངྒཱི་ཏི་བི་དྷི་མཎྜལ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་ཆོ་ག་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བག་ཆགས་སྐྱོན་གྱི་དྲི་མའི་ཐ་བ་ལ། །ཤེས་རབ་བདུད་རྩིའི་ཆར་པ་འབེབས་མཛད་པའི། ། [14b.4]ཨ་ར་པ་ཙ་ན་ལ་གུས་བཏུད་དེ། །བྱང་སེམས་རྡོ་རྗེའི་དཀྱིལ་འཁོར་ཆོ་ག་བཤད། དེ་ལ་འདིར་དུས་གསུམ་ཆ་མཉམ་པ་བཅོམ་ལྡན་འདས་བྱང་སེམས་རྡོ་རྗེའི་དཀྱིལ་འཁོར་བྱེད་པར་འདོད་པས། བླ་མ་གསང་སྔགས་ལ་མཁས་པ། ཐེག་པ་ཆེན་པོའི་ཚུལ་ལ་གནས་པས། སློབ་མ་ཇི་སྐད་སྨྲས་ [14b.5]པ་དེ་བཞིན་བྱེད་པ་མ་སྨིན་པ་སྨིན་པར་བྱ་བའི་ཕྱིར་རི་བོ་ལ་སོགས་པ་དགོན་པའི་གནས་སུ་མཎྜལ་བྱས་ཏེ། སྟན་བདེ་བ་ལ་འདུག་སྟེ་མཆོད་པ་བཤམས་ནས། བདག་ཉིད་དྲག་པོ་ཆེན་པོ་དྲག་ཤུལ་ཆེ་བ་བདུད་ལ་སོགས་པ་འཇིགས་པ་ཆེན་པོ་ཡང་འཇིགས་པར་བྱེད་པར་བསམས་ལ། རྫུ་འཕྲུལ་ [14b.6]ཆེན་པོའི་སྟོབས་དང་ལྡན་པས་བགེགས་ཐམས་ཅད་བསྐྲད་དེ། སྲིད་པའི་རི་བོའི་བགེགས་ཐམས་ཅད་བཅོམ་ལ་མཁྲེགས་ཤིང་རྡོ་རྗེ་ཆེན་པོའི་རི་བོས་བསྐོར་ཏེ། རྫུ་འཕྲུལ་ཆེན་པོའི་ལྷ་ཚོགས་སུ་སྤྲུལ་ཏེ་མཆོད་པ་ཆེན་པོ་ཕུལ་ལ་བསམ་གཏན་ཆེན་པོའི་ཏིང་ངེ་འཛིན་ལ་གནས་ནས། ནམ་མཁའི་ [14b.7]ཁམས་སུ་ཡི་གེའི་ཕྲེང་བ་སྣང་བ་ཆེན་པོས་གསལ་བར་བྱས་ལ། མཁས་པ་བྱང་སེམས་རྡོ་རྗེ་ཞེས་བྱ་བའི་སངས་རྒྱས་འགྲུབ་པར་བྱ་བའི་དང་པོའི་སྦྱོར་བ་དང་། དེའི་བྱིན་རླབས་ལས་དཀྱིལ་འཁོར་གྱི་ལྷ་ཚོགས་སྤྲུལ་པ་ཞེས་བྱ་བའི་དཀྱིལ་འཁོར་རྒྱལ་མཆོག་དང་། སྒྱུ་འཕྲུལ་ཆེན་པོའི་ལྷ་ཚོགས་ [15a] [15a.1]ཀྱི་དོན་གྲུབ་པར་བྱ་བའི་ཕྱིར་ལས་རྒྱལ་མཆོག་དང་དེ་རྣམས་བསྒོམ་པར་བྱའོ། །དེ་ལྟར་ལྷ་ཉེ་བར་གྱུར་ནས་དཀྱིལ་འཁོར་བྱར་རུང་བའི་སའི་ཆོ་ག་དང་། སློབ་མ་སྣོད་དང་ལྡན་པ་ལ་སྡོམ་པ་ཕོག་ལ་དཀྱིལ་འཁོར་བྲིས་ཏེ་རྒྱན་རྣམས་དགྲམ་སྟེ། ལྷ་དགོད་པ་ནི་དབུས་སུ་བཅོམ་ [15a.2]ལྡན་འདས་བྱང་སེམས་རྡོ་རྗེ་ཞལ་གཅིག་ཕྱག་གཉིས་པ། རྡོ་རྗེ་དང་དྲིལ་བུ་ཅན། མདུན་དུ་རྡོ་རྗེ་སེམས་དཔའ། གཡས་སུ་རྡོ་རྗེ་རིན་ཆེན། ནུབ་ཏུ་རྡོ་རྗེ་ཆོས། བྱང་དུ་རྡོ་རྗེ་ལས་རྣམས་བྲི། སྒེག་མོ་ལ་སོགས་པ་བརྒྱད་དང་། །ཁྱམས་རྣམས་སུ་བསྐལ་བ་བཟང་པོའི་བྱང་ཆུབ་སེམས་དཔའ་རྣམས་དང་། སྒོ་ [15a.3]རྣམས་སུ་རྡོ་རྗེ་ལྕགས་ཀྱུ་ལ་སོགས་པ་གཞག་གོ། །དཀྱིལ་འཁོར་དེ་ལ་མཆོད་པ་རྣམས་ཀྱིས་ཡང་དག་པར་མཆོད་ལ་སྐལ་བ་དང་ལྡན་པའི་སློབ་མ་བཅུག་ལ་དེ་ལ་དབང་རྣམས་བསྐུར་བར་བྱའོ། །རིགས་ཀྱི་བུ་དེ་ལས་ཡོན་གྱི་མཆོག་བླངས་ཏེ་ལྷ་དང་སློབ་དཔོན་ལ་མཆོད་ནས་དཀྱིལ་འཁོར་ལ་བཟོད་པར་གསོལ་ [15a.4]ནས་གཤེགས་པར་བྱའོ། །དེའི་རྗེས་ལ་དཀྱིལ་འཁོར་བསྡུས་ལ་ཅི་བདེ་བར་གནས་པར་བྱའོ། །བྱང་སེམས་རྡོ་རྗེའི་དཀྱིལ་འཁོར་གྱི། །དགེ་བ་གང་དེས་འགྲོ་བ་ཀུན། །སྲིད་པའི་དགོན་པོ་ལས་བརྒལ་ནས། །རྡོ་རྗེ་སེམས་དཔའ་ཐོབ་པར་ཤོག །བྱང་སེམས་རྡོ་རྗེ་དབུགས་དབྱུང་བའི་དཀྱིལ་ [15a.5]འཁོར་གྱི་ཆོ་ག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ། །༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སིངྒཱ་ཏི་མཎྜ་ལ་བི་དྷི་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་ [15a.6]ཆོ་ག་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གཞོན་ནུར་སྐུ་སྤྲུལ་མེ་ཏོག་ཐོད། །སྐུ་མདོག་གསེར་ཅན་ཤེས་རབ་ལྷ། མི་ཤེས་རྒྱུན་གཅོད་རལ་གྲི་འཛིན། །ཤེས་རབ་ཡེ་ཤེས་ཕྱག་འཚལ་ཏེ། །འཇམ་དཔལ་རང་བཞིན་ཆོས་སྐུ་ནི། །ནམ་མཁའ་ལྟ་ [15a.7]བུར་ཁྱབ་པ་ལ། །གདུལ་བྱའི་དབང་གིས་དཀྱིལ་འཁོར་དྲུག །བདེ་གཤེགས་རིགས་ཀྱི་དཀྱིལ་འཁོར་བཤད། དེ་ལ་འདིར་སེམས་ཅན་གཏི་མུག་ཅན་འདུལ་བའི་གཉེན་པོར་བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་འདི་གསུངས་པ་ཡིན་ཏེ། དེ་ཡང་གཟའ་སྐར་བཟང་པོ་ [15b] [15b.1]ལ་བསྙེན་པའི་ཁང་པ་བཀྲ་ཤིས་པར་འཇུག་པར་བྱ་སྟེ། དཔལ་ལྡན་འབྱོར་པ་ཕུན་སུམ་ཚོགས་པར་བྱས་ལ། སྒྲུབ་པའི་གནས་དེ་ཡང་བྱི་དོར་ལེགས་པར་བྱས་ཏེ་སྤོས་བཟང་པོ་ཡང་ཕྱོགས་བཞི་རབ་བཏུལ་ནས་མཎྜལ་ལ་ཚུལ་དང་མཐུན་པའི་མེ་ཏོག་བཀོད་དེ་མཆོད་པ་བཀྲམ་ནས་བདེ་བར་ [15b.2]གཤེགས་པའི་སྐུ་གཟུགས་རྣམས་ཀྱང་བཀྲམ་ལ་སྟན་འབོལ་བའི་སྟེང་དུ་སེམས་ཅན་ལ་ཕན་པའི་བློས་འདུག་སྟེ། མ་རུངས་པ་འདུལ་བའི་རྒྱལ་པོ་གཤིན་རྗེ་གཤེད་པོ་ནི་སྐད་ཅིག་གིས་རྫོགས་པར་བྱས་ལ། ཁྲོ་བོའི་རྒྱལ་པོ་གདོང་དྲུག་པ་ཕྱག་བཅུ་གཉིས་པ། འཁོར་ལོ་དང་། རྡོ་རྗེ་དང་། [15b.3]རལ་གྲི་དང་། མདའ་དང་། དགྲ་སྟ་དང་། ལྕགས་ཀྱུ་རྣམས་གཡས་པའི་ཕྱག་ན་ཐོགས་པའོ། །ཐོད་པ་དང་། སྡིགས་མཛུབ་དང་། ཞགས་པ་དང་། གཞུ་དང་། ཁ་ཊྭཱཾ་ག་དང་། དབྱུག་ཏོ་རྣམས་གཡོན་དུ་ཐོགས་པའོ། །སྤྱན་དམར་བ་བཅོ་བརྒྱད་སྡང་མིག་བགྲད་པ། ལྗགས་དྲུག་ [15b.4]གློག་ལྟར་འགྱུ་བའི་ཞལ་ནས་ཧཱུཾ་ཧཱུཾ་སྒྲོགས་པ། ཞབས་དྲུག་གིས་འགྲོ་བ་རིགས་དྲུག་བརྫིས་པ། ཆར་སྤྲིན་གྱི་མདོག་ལྟ་བུར་བསམས་ལ་བགེགས་ཐམས་ཅད་བསྐྲད་ལ་ཇི་ལྟར་འདོད་པའི་སྲུང་བའི་འཁོར་ལོ་བྱའོ། །དེ་ནས་བསོད་ནམས་དང་ཡེ་ཤེས་ཀྱི་ཚོགས་རྫོགས་པར་བྱས་ལ་བདག་ཉིད་རྣམ་པར་སྣང་ [15b.5]མཛད་དུ་གྱུར་པ་ནི་དང་པོའི་སྦྱོར་བའོ། །གཞིའི་སངས་རྒྱས་ཨ་ལས་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ། དེའི་ཐུགས་ཀར་དང་པོའི་སངས་རྒྱས། དེའི་ཐུགས་ཀར་ཤེས་རབ་འཁོར་ལོ་རྩིབས་བཅུ་གཉིས་པ་ཨས་མཚན་པ། དེའི་སྟེང་དུ་ཨ་ལས་བཅོམ་ལྡན་འདས་ཤེས་རབ་ཡེ་ཤེས་དཀར་ [15b.6]པོ་གཡོན་འཁོར་ལོ་གཡས་རལ་གྲི་ཐུགས་ཀར་ཨ་ལས་ཟླ་བའི་སྟེང་ན་ཨ། སངས་རྒྱས་དེའི་ཐུགས་ཀ་ནས་དཀྱིལ་འཁོར་གྱི་འཁོར་ལོའི་ལྷ་རྣམས་སྤྲོ་བར་བཞེད་པས་སྔགས་འདི་བརྗོད་པར་བྱའོ། །ཨོཾ་ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ བྷ་ག་ཝཱན་ཛྙཱ་ན་མཱུརྟྟི། ཝཱ་གཱི་ཤྭ་ར་ [15b.7]མ་ཧཱ་པཱ་ཙ་སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿཞེས་བརྗོད་པས། དེ་འཕྲོས་ཤིང་འདུས་པ་ལས་ལྷ་རྣམས་ཀྱི་གནས་སུ་ཡི་གེ་ཨ་ཤ་སྟག་ཏུ་གྱུར་ཏོ། །ཨ་དེ་ལས་རྫོགས་པའི་སངས་རྒྱས་རྣམས་བསྐྱེད་པ་ནི་དཀྱིལ་འཁོར་རྒྱལ་མཆོག་གོ། །དེའི་རྗེས་ལ་མཚན་བརྗོད་ [16a] [16a.1]ཅིང་བསྟོད་དེ་སྤྲུལ་པའི་སྐུ་དཔག་ཏུ་མེད་པས་གཏི་མུག་གི་གནས་སྦྱོང་བའི་ཕྲིན་ལས་མཛད་པ་ནི་ལས་རྒྱལ་མཆོག་གོ། །དེ་ལྟ་བུའི་བསྙེན་པ་བྱས་ནས་དཀྱིལ་འཁོར་བརྩམ་སྟེ། ལེགས་པར་བྲིས་ནས་ལྷ་དགོད་པ་ནི་དབུས་སུ་རྣམ་པར་སྣང་མཛད་ཞལ་གཅིག་ཕྱག་གཉིས་པ། ཤར་ [16a.2]དུ་སེམས་མ་རྡོ་རྗེ། ལྷོ་རུ་རིན་ཆེན་སེམས་མ། ནུབ་ཏུ་པདྨ་སེམས་མ། བྱང་དུ་ལས་ཀྱི་སེམས་མའོ། །གྲུ་ཆད་བཞི་ལ་སྒེག་མོ་ལ་སོགས་པ་བཞིའོ། །ཁྱམས་ཀྱི་གྲུ་བཞིར་ནི་བདུག་པ་མ་ལ་སོགས་པ་བཞིའོ། །དེ་ཉིད་དུ་བསྐལ་བ་བཟང་པོའི་བྱང་ཆུབ་སེམས་དཔའ་ཡང་ཚུལ་དང་མཐུན་པར་དགོད་དོ། ། [16a.3]སྒོ་བཞིར་ནི་སྒོ་མ་བཞི་གཞག་གོ། །དེ་ལྟ་བུའི་དཀྱིལ་འཁོར་མཛེས་པ་བྲིས་ཏེ། སེམས་ཅན་སྐལ་པ་ཅན་དག་ཀྱང་དེར་གཞུག་པར་བྱས་ལ་དབང་བསྐུར་བ་ཐོབ་པ་དང་སློབ་དཔོན་དང་དཀྱིལ་འཁོར་གྱི་ལྷ་ལ་ཡང་ཅི་འབྱོར་པའི་ཡོན་ཕུལ་ལ་སློབ་དཔོན་གྱིས་ཀྱང་དབུགས་དབྱུང་བ་དང་། གཟེངས་བསྟོད་དེ་ལུང་ [16a.4]བསྟན་པར་བྱའོ། །བདེ་གཤེགས་རིགས་མཆོག་དམ་པ་ནི། །གཏི་མུག་རྣམ་པར་སྣང་མཛད་དཔལ། །དཀྱིལ་འཁོར་ཆོ་ག་གསུངས་པ་ཡིས། །དགེ་བས་རྫོགས་པའི་བྱང་ཆུབ་ཤོག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ། རྣམ་པར་སྣང་མཛད་དབུགས་དབྱུང་བའི་དཀྱིལ་འཁོར་གྱི་ཆོ་ [16a.5]ག་རྫོགས་སོ། །{T2545}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སིངྒཱ་ཏི་མཎྜལ་བི་དྷི་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་ཆོ་ག་ཞེས་བྱ་བ། འཇམ་དཔལ་གཞོན་ནུར་གྱུར་བ་ལ་ཕྱག་འཚལ་ལོ། །སྡུག་ [16a.6]བསྔལ་ཚ་བས་གདུངས་པའི་སེམས་ཅན་ལ། །ཐུགས་རྗེས་ཟླ་ལྟར་བསིལ་མཛད་འཇམ་དབྱངས་མགོན། །རྡོ་རྗེ་རལ་གྲི་འཛིན་པའི་སངས་རྒྱས་ལ། །དེ་ལ་བཏུད་དེ་མི་བསྐྱོད་དཀྱིལ་འཁོར་བཤད། དེ་ལ་འདིར་ཞེ་སྡང་གི་གཉེན་པོར་མི་བསྐྱོད་པའི་དཀྱིལ་འཁོར་གྱི་ཆོ་ག་བྱེད་པར་འདོད་པས། [16a.7]དབང་བསྐུར་ཐོབ་ཅིང་སྡོམ་པ་དང་ལྡན་པས། ཡོ་བྱད་ཕུན་སུམ་ཚོགས་པར་བྱས་ལ། དུས་བཟང་པོ་ལ་དགོན་པའམ་ནགས་འདབས་སུ་བདེ་བར་གཤེགས་པ་བསྙེན་པར་བྱ་སྟེ། ས་ཕྱོགས་དེར་མཎྜལ་སྔོན་དུ་འགྲོ་བས་མཆོད་པ་བཤགས་ལ། སྒོ་དག་པ་སྔོན་དུ་འགྲོ་བས་གཤིན་རྗེ་གཤེད་ [16b] [16b.1]པོར་བསྐྱེད་ལ་བགེགས་ཐམས་ཅད་ཚར་བཅད་ལ། སྲུང་བའི་འཁོར་ལོའི་ནང་དུ་སངས་རྒྱས་མི་བསྐྱོད་པ་བྱང་ཆུབ་སེམས་དཔའ་དང་བཅས་པ་སྤྱན་དྲང་ཞིང་མཉེས་པར་བྱས་ལ། དེའི་མདུན་དུ་སྡིག་པའི་དྲི་མ་བཀྲུ་བ་ལ་སོགས་པ་དགེ་བའི་རྩ་བ་ཆེར་བསྐྱེད་དོ། །དེ་ནས་སྡོམ་པ་མ་ལུས་པ་བཟུང་ལ་སྟོང་ཞིང་ [16b.2]བདག་མེད་པ་ལ་མོས་ཤིང་ཁང་པ་ཡང་གཞལ་ཞིང་བརྗོད་དུ་མེད་པ་ལས་ཡེ་ཤེས་ཀྱི་ཕྲེང་བ་འཁྲུག་པ་ལས་གྲུབ་པའི་ནང་དུ་གཞི་ཧཾ་ལས་དང་པོའི་སངས་རྒྱས་མི་བསྐྱོད་པ་ལ་འཇམ་དཔལ་ཡེ་ཤེས་སེམས་དཔའ་སྙིང་གར་རྫོགས་པའི་ཚུལ་གྱིས་སྦྱོར་བ་དང་པོ་དང་རིགས་མཐུན་པའི་སེམས་དཔའ་ཐམས་ཅད་ [16b.3]དང་། ཨ་ལས་བྱུང་བའི་སངས་རྒྱས་འཁོར་དུ་བལྟས་ཏེ། ཡེ་ཤེས་ཀྱི་དཀྱིལ་འཁོར་དགུག་པ་རྣམས་དཀྱིལ་འཁོར་རྒྱལ་མཆོག་ཅེས་བྱ་བ་དང་། དེ་དང་མཐུན་པའི་མཚན་བརྗོད་པའི་བྱིན་རླབས་གྱིས་དེའི་དཀྱིལ་འཁོར་དང་མཐུན་པའི་སངས་རྒྱས་བྱེ་བ་དཔག་ཏུ་མེད་པས་འཇིག་རྟེན་གསུམ་པོ་ཀུན་ [16b.4]བཀང་སྟེ། རང་གི་ལས་ལ་སྦྱར་བས་ལས་རྒྱལ་མཆོག་བསྒོམ་པ་ནི་བསྙེན་པ་ཞེས་བྱའོ། །དེ་ལྟར་ལྷ་ཉེ་བར་གྱུར་ནས་དཀྱིལ་འཁོར་བྲིས་ཏེ་ལྷ་དགོད་པ་ནི་དབུས་སུ་བཅོམ་ལྡན་འདས་མི་བསྐྱོད་པ། དེ་ལ་རིགས་དང་མཐུན་པའི་སེམས་དཔའ་བཞི་ནི་རྡོ་རྗེ་སེམས་དཔའ་ལ་སོགས་པས་བསྐོར་བར་བཀོད་ནས། [16b.5]དེའི་ཕྱི་རོལ་དུ་སྒེག་མོ་ལ་སོགས་པ་བརྒྱད་དང་། ཁྱམས་སུ་ཡང་བྱམས་པ་དང་། མཐོང་བ་དོན་ཡོད་དང་། ངན་སོང་ཀུན་འདྲེན་དང་། མྱ་ངན་དང་མུན་ངས་པར་འཇོམས་པའི་བློ་གྲོས་ལ་སོགས་པ་རྣམས་བྲིའོ། །སྒོ་བཞིར་ནི་སྒོ་སྲུང་གི་ཚུལ་དང་མཐུན་པར་གཞག་གོ། །དེ་ལྟར་ལེགས་པར་བྲིས་ [16b.6]ལ་མཆོད་པའི་བྱེ་བྲག་གིས་ཡང་དག་པར་མཆོད་ནས་སྐལ་བ་དང་ལྡན་པའི་སློབ་མ་གཞུག་ཅིང་དབང་ཡང་སྦྱིན་པར་བྱའོ། །དེའི་སླར་ཡང་ངེས་པར་མཆོད་ནས་རིགས་དེ་ཉིད་ཀྱི་མཚན་ནས་བརྗོད་པས་ཡང་དག་པར་བསྟོད་ལ། དཀྱིལ་འཁོར་ལ་བསྐོར་བ་བྱས་ནས་ལྷ་རྣམས་ལ་བཟོད་པར་གསོལ་ཏེ་དཀྱིལ་འཁོར་ [16b.7]བསྡུ་བར་བྱའོ། །མི་བསྐྱོད་རྡོ་རྗེའི་དཀྱིལ་འཁོར་འདིར། །ཞེ་སྡང་གཉེན་པོར་གྱུར་ནས་ཀྱང་། །འདི་ལ་གནས་པའི་འགྲོ་བ་རྣམས། །མངོན་དགའི་ཞིང་དུ་སྐྱེ་བར་ཤོག །མི་བསྐྱོད་པ་དབུགས་དབྱུང་བའི་དཀྱིལ་འཁོར་གྱི་ཆོ་ག །སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས་མཛད་པ་རྫོགས་སོ། ། [17a] [17a.1]༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སངྒཱི་ཏི་བིདྷི་མཎྜ་ལ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་ཆོ་ག་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མ་ཆགས་སྤྱན་མངའ་ཆོས་ཀྱི་དབྱིངས་ [17a.2]ལ་མཁས། །ཆགས་མེད་དོན་རྟོགས་འདོད་ཆགས་གནས་ནས་དག །འཇམ་དཔལ་རྣོན་པོ་དེ་ལ་གུས་བཏུད་དེ། འདོད་ཆགས་པདྨའི་རིགས་ཀྱི་དཀྱིལ་འཁོར་བཤད། །དེ་ལ་འདོད་ཆགས་ཀྱི་གཉེན་པོར་སངས་རྒྱས་སྣང་བ་མཐའ་ཡས་ཀྱི་དཀྱིལ་འཁོར་བྱེད་པར་འདོད་པས། སྙིང་རྗེ་ཆེན་པོའི་ན བློ་དང་ [17a.3]ལྡན་པའི་གང་ཟག་གིས། སློབ་མ་ཇི་སྐད་སྨྲས་པ་དེ་བཞིན་བྱེད་པ་རྫོགས་པར་བྱ་བའི་ཕྱིར་གྲོང་ཁྱེར་ལ་སོགས་པའི་གནས་སུ་ཉམ་ང་བ་དང་བག་ཚ་བ་སྤངས་ཏེ་ཐེ་ཚོམ་དང་དོགས་པ་ཐམས་ཅད་སྤངས་ནས་སྟན་བདེ་བ་ལ་འདུག་སྟེ། མཎྜལ་དང་མཆོད་པ་བཤམས་ནས་སྲུང་བའི་འཁོར་ལོ་སྔོན་དུ་འགྲོ་ [17a.4]བས་ཚོགས་བསགས་ལ་ཆོས་ཐམས་ཅད་ནམ་མཁའི་དཀྱིལ་ལྟར་བལྟས་ཏེ། སེམས་ཀྱི་སྣང་བ་ཨཱ་ལི་དང་ཀཱ་ལིའི་ཕྲེང་བ་སྐར་མའི་རྣམ་པ་ལྟ་བུའི་འོད་ཟེར་ལྔ་ཡང་གློག་བཞིན་འགྱུ་བ་ལས་འབྱུང་བ་ཆེན་པོ་བཞིས་བཏེགས་པའི་ཁང་པའི་ནང་ན་རང་གི་གདན་ཡང་རྨ་བྱ་ལས་གྲུབ་པའི་སྟེང་དུ་རྫོགས་པའི་ [17a.5]སངས་རྒྱས་སྣང་བ་མཐའ་ཡས་ངེས་པར་དྷཱིཿལས་བྱུང་བའི་སྦྱོར་བ་ཡེ་ཤེས་སེམས་དཔའི་བར་དུ་རྫོགས་པ་དང་། དེའི་བྱིན་ཀྱིས་རླབས་ཀྱིས་དཀྱིལ་འཁོར་རྒྱལ་མཆོག་ཅེས་བྱ་བ་རང་གི་རིགས་དང་མཐུན་པའི་དཀྱིལ་འཁོར་སྡོགས་པ་དང་འདོད་ཆགས་ཅན་གྱི་གདུལ་བྱའི་ངོར་གང་ལ་སངས་རྒྱས་ཀྱི་སྐུ་ཕྲ་མོ་མང་པོ་ཡང་ [17a.6]མཚན་བརྗོད་པའི་བྱིན་རླབས་ལས་བྱུང་བའི་ལས་རྒྱལ་མཆོག་བསྒོམ་པར་བྱའོ། །དེ་ལྟར་པདྨའི་རིགས་ཀྱི་དཀྱིལ་འཁོར་དང་ཉེ་བར་གྱུར་ནས་འདོད་ཆགས་ཅན་གྱི་སེམས་ཅན་རྣམས་དཀྱིལ་འཁོར་དུ་གཞུག་པའི་ཕྱིར་དཀྱིལ་འཁོར་ཡང་རྩིག་པའམ་རྡུལ་ཚོན་ལས་བྲིས་ཏེ། ལྷ་དགོད་པ་ནི་དབུས་སུ་སངས་རྒྱས་སྣང་བ་མཐའ་ [17a.7]ཡས་དེ་ལ་རིགས་མཐུན་པའི་སེམས་དཔའ་བཞི་དགོད། གཞན་ཡང་སྒེག་མོ་ལ་སོགས་པ་བརྒྱད་ཀྱང་མཛེས་པར་དགྲམ་མོ། །ཁྱམས་སུ་ཡང་བསྐལ་པ་བཟང་པོའི་བྱང་ཆུབ་སེམས་དཔའ་རྣམས་དགྲམ་མོ། །སྒོ་བཞིར་སྒོ་མ་བཞི་གཞག་གོ། །དེ་ལྟར་ལེགས་པར་བྲིས་ནས་དཀྱིལ་འཁོར་གྱི་ལྷ་ལ་སྣང་བ་ཐོབ་པ་དང་། སྐལ་ [17b] [17b.1]བ་དང་མཐུན་པའི་མེ་ཏོག་གིས་སྙིམ་པ་བཀང་བའི་སློབ་མ་དེར་བཅུག་ལ་ལྷ་རྣམས་བསྟན་ཅིང་དབང་བསྐུར་ནས། དེ་ནས་ཡོན་གྱི་མཆོག་བླངས་ཏེ་དཀྱིལ་འཁོར་ལ་ཕུལ་ལ་ལྷག་མ་རྡོ་རྗེ་སློབ་དཔོན་གྱིས་ལོངས་སྤྱད་པར་བྱའོ། །འདོད་ཆགས་སྣང་བ་མཐའ་ཡས་ཀྱི། །དཀྱིལ་འཁོར་ཆོ་ག་བསྡུས་པ་ལས། །དགེ་བ་ [17b.2]བསགས་པར་གྱུར་པ་དེས། །སྣང་བ་མཐའ་ཡས་ཉིད་དུ་ཤོག །སྣང་བ་མཐའ་ཡས་དབུགས་དབྱུང་བའི་དཀྱིལ་འཁོར་གྱི་ཆོ་ག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། །།{T2546}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སདྷཱི་ཏི་མཎྜ་ལ་བི་དྷི་ནཱ་མ། [17b.3]བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་ཆོ་ག་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཉོན་མོངས་ནད་ཀྱིས་གཟིར་བའི་འགྲོ་བ་ལ། །ཟུག་རྔུ་འབྱིན་མཛད་སྨན་པའི་རྒྱལ་པོ་མཆོག །འཇམ་དཔལ་ཡེ་ཤེས་སེམས་དཔའ་ [17b.4]དེ་བཏུད་ནས། །རིན་ཆེན་རིགས་ཀྱི་དཀྱིལ་འཁོར་ཆོ་ག་བཤད། དེ་ལ་འདིར་སེར་སྣའི་གཉེན་པོར་སངས་རྒྱས་རིན་ཆེན་འབྱུང་ལྡན་གྱི་དཀྱིལ་འཁོར་བྱེད་པར་འདོད་པས། ཇི་ལྟར་སྨྲས་པ་དེ་བཞིན་བྱེད་པའི་སྐྱེས་བུ་དབང་བསྐུར་བ་ཐོབ་པས་རི་བོའམ་ཆུ་ཀླུང་དུ་འབྱོར་པ་དང་ལྡན་པར་བྱས་ཏེ། དུས་ཚོད་བཟང་པོ་ [17b.5]ལ་བསྙེན་པའི་ཁང་པར་ཞུགས་ལ་ཤེས་རབ་དང་སྙིང་རྗེ་དང་ལྡན་པའི་བློ་བསྐྱེད་དེ། །གདན་འབོལ་བ་ལ་འདུག་ཅིང་མདུན་གྱི་བྱ་བ་བྱས་ནས་དེ་ཐག་ཏུ་མ་རུངས་པ་འདུལ་བའི་རྒྱལ་པོ་དྲན་པར་བྱས་ལ་བར་ཆོད་བསལ་ཏེ། ནམ་མཁའི་དབྱིངས་སུ་དཀྱིལ་འཁོར་ལ་བལྟས་ལ། དེའི་མདུན་དུ་ལུས་ངག་གི་དྲི་མ་བསལ་ལ་ [17b.6]སེམས་བསྐྱེད་ཅིང་སྡོམ་པ་བླངས་ནས་སྟོང་པ་ཉིད་དྲན་པའི་དབྱིངས་སུ་སྐར་མ་ལྟ་བུའི་ཡི་གེའི་ཕྲེང་བ་བལྟས་ཏེ། དེ་ལས་བྱུང་བའི་ཁང་པ་དང་། གཞིའི་སངས་རྒྱས་རིན་ཆེན་འབྱུང་ལྡན་བསྐྱེད་པ་དང་། སྦྱོར་བ་དང་པོ་དང་། དེ་དང་ཆ་མཐུན་པའི་སེམས་དཔས་བསྐོར་བ་ནི་ཨ་ལས་ངེས་པར་བྱུང་བའི་དཀྱིལ་འཁོར་ [17b.7]རྒྱལ་མཆོག་དང་། དེ་རྣམས་ཀྱི་མཚན་བརྗོད་པའི་བྱིན་རླབས་ལས་བྱུང་བའི་སངས་རྒྱས་ཀྱི་སྐུ་སྤྲོ་བའི་ལས་རྒྱལ་མཆོག་བསྒོམ་པར་བྱའོ། །དེ་ལྟར་དཀྱིལ་འཁོར་ཉེ་བར་གྱུར་ནས་གཞན་གྱི་དོན་དུ་ཐུགས་རྗེ་ཤར་ཏེ། དཀྱིལ་འཁོར་བར་ཆད་མེད་པའི་གནས་སུ་བྱས་ལ། རྡུལ་ཚོན་ཡེ་ཤེས་ཀྱི་ [18a] [18a.1]རང་བཞིན་དུ་མོས་ལ། ལྷ་དགོད་པ་ནི་གཞིའི་སངས་རྒྱས་གཙོ་བོ་རིན་ཆེན་འབྱུང་ལྡན་ལས། དེ་དང་ཆ་མཐུན་པའི་སེམས་དཔའ་བཞི་དང་། སྒེག་མོ་ལ་སོགས་པ་བརྒྱད་ཀྱིས་བསྐོར་བ་བཀོད་ལ། ཁྱམས་སུ་བསྐལ་པ་བཟང་པོའི་བྱང་ཆུབ་སེམས་དཔའ་རྣམས་དགོད། སྒོ་མ་ [18a.2]བཞི་སྒོ་བཞིར་བྲིས་ཏེ། ལེགས་པར་ཟིན་པ་དང་མཆོད་པ་ཡང་རྒྱས་པར་ཕུལ་ཏེ། བསྟོད་པས་བསྟོད་ནས་བུམ་པ་གཞུག་ཅིང་ལྷ་རྣམས་དབང་བསྐུར་བས་བདག་ཉིད་བསྒྲུབས་ལ། གཞན་གྱི་དོན་དུ་སློབ་མ་མེ་ཏོག་ཐོགས་པས་སྡོམ་པ་འཛིན་པར་ནུས་པ་ལ་དཀྱིལ་འཁོར་བསྟན་ཏེ། དེ་ནས་དབང་བསྐུར་ [18a.3]ནས་སླར་ཡང་དཀྱིལ་འཁོར་ལ་མཆོད་དེ། བཟོད་པར་གསོལ་ཞིང་བཤགས་པ་བྱ་བ་དང་། ལྷ་རྣམས་བསྡུ་ཞིང་སྤྱོད་ལམ་ཅི་བདེར་བྱའོ། །སེར་སྣ་རྣམ་དག་རིན་ཆེན་འབྱུང་། །དཀྱིལ་འཁོར་ཆོ་ག་བསྡུས་པ་ལས། །དགེ་བ་བསགས་པར་གང་གྱུར་པ། །རིན་ཆེན་འབྱུང་ལྡན་ཉིད་ཐོབ་ཤོག། ། [18a.4]སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས་མཛད་པ། རིན་ཆེན་འབྱུང་ལྡན་དབུགས་དབྱུང་བའི་དཀྱིལ་འཁོར་གྱི་ཆོ་ག་རྫོགས་སོ། །{T2547}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སངྒཱི་ཏི་བི་དྷི་མཎྜ་ལ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་ [18a.5]མཚན་ཡང་དག་པར་བརྗོད་པའི་དཀྱིལ་འཁོར་གྱི་ཆོ་ག་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དུག་གསུམ་ཞེན་པའི་འཁོར་བའི་གཅོད་རྙིང་ལ། །འཚོ་བྱེད་སྨན་པའི་རྒྱལ་པོ་ལས་ཀྱི་མཆོག །ཡེ་ཤེས་སྐུ་ཅན་འཇམ་དཔལ་དེ་བཏུད་ནས། །ལས་ཀྱི་རིགས་ཀྱི་དཀྱིལ་འཁོར་ཆོ་ག་ [18a.6]བཤད། །དེ་ལ་སྤྱིར་ཕྲག་དོག་གི་གཉེན་པོར་སངས་རྒྱས་དོན་ཡོད་གྲུབ་པའི་དཀྱིལ་འཁོར་གྱི་ཆོ་ག་བྱེད་པར་འདོད་པས། ཇི་ལྟར་འགྲོ་བའི་དོན་བྱེད་པའི་རྡོ་རྗེ་སློབ་དཔོན་གྱིས་སྲིད་པའི་གྲོང་ཁྱེར་ལས་བརྒལ་བའི་དགོན་པའི་གནས་སུ་རྫས་དང་མཁོ་བའི་ཡོ་བྱད་ཚོགས་པར་བྱས་ལ། སྟན་བདེ་བ་ལ་བྱམས་པའི་གོ་ [18a.7]བགོས་ལ་འདུག་སྟེ། མཎྜལ་དང་མཆོད་པ་བཤམས་ནས་སྙིང་རྗེའི་ཡ་ལད་བགོས་ཏེ། བདུད་བཞིའི་འཇིགས་པ་བསལ་ནས་བདུད་ཀྱི་དཔུང་རྣམས་ཕམ་པར་བྱས་ནས། རྫོགས་པའི་སངས་རྒྱས་མགྲོན་དུ་སྤྱན་དྲངས་ལ། ཕྱག་བྱ་བ་དང་། མཆོད་པ་དང་། ལུས་དབུལ་བ་དང་། [18b] [18b.1]བསྟོད་པ་བྱས་ལ་རྣམ་པ་ཐམས་ཅད་དང་ལྡན་པའི་རྒྱུ་བ་ཐམས་ཅད་སྣང་བ་མེད་པར་མོས་པ་ལས། ནམ་མཁའི་ཁམས་སུ་ཡི་གེ་སྤྲོ་ཞིང་འདུས་པ་ལས་བྱུང་བའི་ཁང་པ་བརྩེགས་པའི་ནང་དུ། རྫོགས་པའི་སངས་རྒྱས་གདོན་མི་ཟ་བར་གྲུབ་པའི་ཡེ་ཤེས་སེམས་དཔའ་དང་། རྫོགས་པར་བྱུང་བའི་དང་ [18b.2]པོའི་སྦྱོར་བ་དང་། དེ་དང་ཆ་མཐུན་པའི་དཀྱིལ་འཁོར་བསྐྱེད་པའི་དཀྱིལ་འཁོར་རྒྱལ་མཆོག་དང་། མཚན་གྱི་བྱིན་རླབས་ལས་བྱུང་བའི་ཕྱོགས་བཅུར་སྤྲུལ་པ་སྣ་ཚོགས་འགྱེད་པའི་ལས་རྒྱལ་མཆོག་བསྒོམ་པར་བྱའོ། །དེ་ནས་དཀྱིལ་འཁོར་བྱེད་པར་འདོད་པས། བརྩིག་པ་འམ་བྲིས་ཏེ། [18b.3]ལྷ་དགོད་པ་ནི་དབུས་སུ་བཅོམ་ལྡན་འདས་དོན་ཡོད་གྲུབ་པའོ། །དེ་ལ་སེམས་དཔའ་རིགས་དང་མཐུན་པ་བཞིས་བསྐོར་བ། སྒེག་མོ་ལ་སོགས་པ་བརྒྱད་དང་། བསྐལ་པ་བཟང་པོ་ལ་སོགས་པའི་བྱང་ཆུབ་སེམས་དཔའ་དང་། སྒོ་བ་རྣམས་མཛེས་པར་བྲིས་ལ། དེ་རྣམས་ལ་ཡང་དག་པར་ [18b.4]མཆོད་དེ། ལྷའི་སྣང་བ་ཐོབ་པའི་རྡོ་རྗེ་སློབ་དཔོན་གྱིས་སློབ་མ་སྐལ་པ་དང་ལྡན་པ་བཅུག་ལ་དབང་བསྐུར་ཏེ། ཡོན་གྱི་མཆོག་བླངས་ནས་ཚུལ་དང་མཐུན་པའི་གནང་བ་བྱིན་ཏེ། དཀྱིལ་འཁོར་ལྷ་ལ་ཡང་དག་པར་མཆོད་ནས་གཤེགས་སུ་གསོལ་ཏེ། དཀྱིལ་འཁོར་བསྡུའོ། །ཕྲག་དོག་དོན་ [18b.5]ཡོད་གྲུབ་པ་ཡི། །དཀྱིལ་འཁོར་ཆོ་ག་བྲིས་པ་ལས། །བསགས་པའི་དགེ་དེས་འགྲོ་བ་ཀུན། །དོན་ཡོད་གྲུབ་པ་ཉིད་འགྲུབ་ཤོག །དོན་ཡོད་གྲུབ་པ་དབུགས་དབྱུང་བའི་དཀྱིལ་འཁོར་གྱི་ཆོ་ག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། །། [18b.6]རྒྱ་གར་གྱི་མཁན་པོ་སུ་བཛྲ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་བའོ། །{T2548}།༄༅༅། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་ཁྲུས་ཀྱི་ཆོ་ག་ནི་དང་པོར་བུམ་པ་བྷྲཱུཾ་ལས་ཡེ་ཤེས་ཀྱི་གཞལ་ཡས་ཁང་དུ་བསམས་ལ། དེའི་ [18b.7]ནང་དུ་བཾ་ལས་འོ་མ་ཅན་གྱི་རྒྱ་མཚོ་བསམས་ཏེ། དེའི་སྟེང་དུ་ཧྲཱིཿལས་པདྨ་དཀར་པོ་འདབ་མ་དང་བཅས་པར་བསམས་ལ། དེའི་སྟེང་དུ་མུྃ་བསམ། དེ་འོད་དུ་ཞུ་བར་གྱུར་པ་ལས་ཨུཏྤ་ལ་དཀར་པོ་ཅིག་བསམ། དེ་ཞུ་བ་ལས་འཇམ་དཔལ་གཞོན་ནུར་གྱུར་པ་སྐུ་མདོག་སྟོན་ཀའི་ཟླ་བ་ལྟར་དཀར་བ། [19a] [19a.1]གཡས་ན་ཨུཏྤལ་སྔོན་པོ་རལ་གྲིས་མཚན་པ། གཡོན་ན་ཨུཏྤལ་སྔོན་པོ་པོ་ཏིས་མཚན་པ་བསྒོམ། དེའི་སྙིང་གར་ཟླ་བ་ལ་མུཾ་བསམ། དེའི་འོད་ཟེར་གྱིས་དེ་དང་འདྲ་བ་སྤྱན་དྲངས་ལ་བསྟིམ། སྔགས་འདི་བརྗོད་པས་ཡེ་ཤེས་ཀྱི་ཆུར་ཞུ་བར་བསམ། ཨོཾ་སརྦ་དྷརྨཱ་ཨ་བྷཱ་བ་སྭ་ [19a.2]བྷཱ་བ་བི་ཤུདྡྷ་བཛྲ་ཙཀྵུ་ཨ་ཨཱ་ཨཾ་ཨཿ། ཞེས་བརྗོད་པས་ཡེ་ཤེས་ཀྱི་ཆུས་ཁྲུས་བྱས་པས་རང་གི་སྒོ་གསུམ་དག་པར་བྱའོ། །འདུད་ཀྱིས་བསྟོད་དོ། །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་ཁྲུས་ཀྱི་ཆོ་ག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ་ [19a.3]རྫོགས་སོ།། {T2549}༄༅༅ །འཕགས་པ་འཇམ་དཔལ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་ཆུ་སྦྱིན་བྱ་བར་འདོད་པས། ཁྲུས་ཆུའི་ལྷག་མ་དེ་ལ་རང་གི་སྙིང་གའི་འོད་ཟེར་གྱི་སྣང་བས་དག་པར་བྱས་ཏེ། མོས་པ་བསྒྱུར་ལ་ཡེ་ཤེས་སེམས་དཔའི་སྐུའི་ཕྲེང་སྔགས་ [19a.4]བརྗོད་ལ། དེའི་རྗེས་ལ་འདི་སྐད་དུ་ཆུ་སྦྱིན་ནོ། །ཨོཾ་ཛྭ་ལ་མི་དཾ་སརྦ་པྲེ་ཏེ་བྷྱཿསྭཱ་ཧཱ། ཞེས་ཡི་དགས་རྣམས་ལ་སྦྱིན་པས་འཐུངས་ཏེ། ཉོན་མོངས་པ་བྱང་བར་གྱུར་ཅིག་ཅེས་བརྗོད་དོ། །དགེ་བ་སེམས་ཅན་ཐམས་ཅད་དང་ཐུན་མོང་དུ་བྱའོ། །མཚན་ཡང་དག་པར་བརྗོད་པའི་ཆུ་སྦྱིན་སློབ་ [19a.5]དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། །།{T2550}༄༅༅། །འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་རྣལ་འབྱོར་པས་ཅི་ཟ་བའི་ཟས་ཀྱི་རྣལ་འབྱོར་འདི་ལྟར་བྱའོ། །གང་ཡང་ཟས་ཀྱི་དངོས་པོ་སྟོང་པར་ [19a.6]བསམས་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུ་ཏྤནྣ་ཏྭཱ་ཏ་སྭཱ་ཧཱ། ཞེས་པས་དག་པར་བསམས་ལ། ཨཱཿཡོངས་སུ་གྱུར་པ་ལས་བདུད་རྩི་དཀར་པོ་དྲི་མ་མེད་པ་དང་། ཨོཾ་ཡོངས་སུ་གྱུར་པ་ལས་མང་ཞིང་སྤེལ་བ་དང་། ཧཱུཾ་གིས་ཡེ་ཤེས་ཀྱི་བདུད་རྩི་དྲངས་ཏེ། བདག་གི་ལྕེ་རྡོ་རྗེར་བསམས་ལ། [19a.7]ལུས་ངག་ཡིད་གསུམ་བྱིན་གྱིས་བརླབས་ཏེ། སྙིང་གར་ལྷ་ཚོགས་གསལ་བཏབ་ལ་དང་པོར་དཀོན་མཆོག་མཆོད། དེ་ནས་ལྷ་ཚོགས་ཅི་རིགས་པར་མཆོད་ལ། རང་གི་ལུས་ཀྱི་ལྷ་ཚོགས་ཚིམ་པར་བྱས་ལ། ལྷག་མ་འབྱུང་པོ་ཀུན་ལ་སྦྱིན་ནོ། །མཚན་ཡང་དག་པར་བརྗོད་པའི་ཟས་ཀྱི་ [19b] [19b.1]རྣལ་འབྱོར་སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། {T2551}༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་རྣལ་འབྱོར་བས་འབྱུང་པོའི་གཏོར་མ་སྦྱིན་པ་ནི་གཏོར་མའི་དངོས་པོ་དཔག་བསམ་གྱི་ཤིང་ཆེན་པོར་མོས་པ་བྱས་ [19b.2]ལ། དེ་ལས་འབྱུང་པོ་ཐམས་ཅད་ལ་ཅི་དང་ཅི་འདོད་པའི་མཁོ་བའི་ཡོ་བྱད་དང་། ཞལ་ཟས་དེ་དང་དེ་བྱུང་པར་བསམས་ཏེ། དགའ་སྟོན་ཆེན་པོས་ཁྱེད་པར་བྱས་ཏེ། འཇམ་དཔལ་སྐུའི་ཕྲེང་སྔགས་བརྗོད་དོ། །སྔགས་འདིས་སྦྱིན་ནོ། །ཨི་དཾ་ཏོ་ཏད་ཏྲཱ་མ་ཤཾ་སནྟཱི་ཏ་པྲེ་ཏ་སརྦ་ག་ཏི་མ་ག་ [19b.3]ཏ་དེ་ཤ་མ་ནི་ནེེ་ན་ཧེ་ཏུ་མ་ནི་ཤ་སདྷུ་མཱཾ་བཱ་དྷཱ་སྭཱ་ཧཱ། ཞེས་ལན་གསུམ་བརྗོད་པས། འབྱུང་པོ་ཐམས་ཅད་ངོམས་ཤིང་ཚིམ་པར་གྱུར་པས་སྡུག་བསྔལ་ལས་དབུགས་འབྱིན་དགའ་སྟོན་ཆེན་པོར་གྱུར་པས་དུས་མ་ཡིན་པར་འཆི་བ་བཟློག་སྟེ། འབྱུང་པོའི་འཚེ་བ་ལས་ཤིན་ཏུ་གྲོལ་བར་ [19b.4]འགྱུར་ཞིང་སྦྱིན་པའི་འབྲས་བུ་ཡང་མངོན་དུ་འགྱུར་རོ། །མཚན་ཡང་དག་པར་བརྗོད་པའི་འབྱུང་པོའི་གཏོར་མ་སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། {T2552}༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། །མཚན་ཡང་ [19b.5]དག་པར་བརྗོད་པའི་མཎྜལ་གྱི་ཆོ་གའི་རིམ་པ། ས་འཇམ་པོ་ལ་རིན་པོ་ཆེ་སྣ་ལྔ་བདར་ཏེ་ཙནྡན་གྱི་ཆུས་སྤྲུས་པ་ལ་སྲོག་ཆགས་བསལ་ཏེ་འཐས་པར་བཅགས་ལ་ཁྲུ་གང་གི་ཚད་དུ་བརྐོས་ལ་དངུལ་ལམ་རྡོ་རྒྱུས་ལ་སོགས་པས་བྱུགས་ཏེ། དབྱིབས་མེ་ལོང་གི་གསལ་ངོས་ལྟར་བྱས་ལ། སྭ་རཏྣ་མཎྜ་ [19b.6]ལ་ཡེ་ཤེས་མེ་ཏོག་གི་ཚོམ་བུ་ཡང་ཚུལ་དང་མཐུན་པར་མཛེས་པར་བཀྲམ་སྟེ། དྲི་དང་ལྡན་པར་བྱས་ནས་གང་མཁོ་བའི་ཡོ་བྱད་དང་། མེ་ཏོག་གི་ཚོམ་བུ་དང་། པདྨའི་གདན་ལ་སོགས་པར་བྱིན་གྱིས་བརླབས་ཏེ། གདན་དང་བཅས་པར་དབུལ་བར་བྱའོ། །མཚན་ཡང་དག་པར་བརྗོད་ [19b.7]པའི་མཎྜལ་གྱི་ཆོ་ག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། {T2553}༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། །སྒྲུབ་པ་པོ་དད་པ་དང་ལྡན་པའི་གང་ཟག་གིས་མཚན་ཡང་དག་པར་བརྗོད་པའི་སྒོ་ནས་བསྐོར་བ་བྱེད་པར་འདོད་ [20a] [20a.1]པས། བདག་ཉིད་འཇམ་དཔལ་གྱི་ང་རྒྱལ་དང་ལྡན་པས་ས་ཕྱོགས་དེ་སྐྱང་ནུལ་བྱས་ཏེ་དྲི་ཞིམ་པོས་ཆག་ཆག་བཏབ་ལ། སྐུ་གཟུགས་ལ་སོགས་པ་དམིགས་པའི་རྟེན་མངོན་པར་བཞག་སྟེ། ས་ཕྱོགས་དེ་ཉིད་དུ་ཡི་གེ་ཧྲཱིཿལས་ངེས་པར་བྱུང་བའི་པདྨ་དཀར་པོ་འདབ་མ་ [20a.2]སྣ་ཚོགས་པ་ཡལ་ག་དང་བཅས་པ་བསམས་ལ་དབུས་སུ་སེང་གེའི་ཁྲི་ལ་ཟླ་བའི་སྟེང་དུ་སྤྲུལ་པའི་སྐུ་རྣམ་པར་སྣང་མཛད་ཤཱཀྱ་ཐུབ་པ་ཆོས་འཆད་པའི་ཕྱག་རྒྱ་ཅན་གསེར་གྱི་ཁ་དོག་ཅན་མཚན་དང་དཔེ་བྱད་ཀྱིས་བརྒྱན་པར་བལྟས་ལ། དེའི་གཡས་ན་འཇམ་དཔལ་ཁ་དོག་ཁ་བ་ལ་གུར་གུམ་གཏོར་ [20a.3]བ་ལྟ་བུ། མཆོག་སྦྱིན་པའི་ཚུལ་གྱིས་གནས་པ། གཡོན་ན་སྤྱན་རས་གཟིགས་དབང་ཕྱུག་གངས་ལ་ཉི་མ་ཤར་བ་ལྟ་བུ། ངག་གི་དབང་ཕྱུག་འགྱིང་བའི་ཚུལ་དུ་གནས་ཏེ་སེམས་ཅན་ལ་བདུད་རྩི་སྦྱིན་པར་མཛད་པ་དང་། མདུན་དུ་ཕྱག་ན་རྡོ་རྗེ་བཻཌཱུརྱའི་མདོག་ཅན་ [20a.4]གཡས་རྡོ་རྗེ་ཐུགས་ཀར་བསྟོད་དེ། གཡོན་པ་ཞི་བའི་ཕྱག་རྒྱ་ཅན། དེའི་ཕྱི་རོལ་ན་ཕྱོགས་བཅུའི་སངས་རྒྱས་ཀྱིས་བསྐོར་བ། དེའི་ཕྱི་རོལ་ན་བྱང་ཆུབ་སེམས་དཔའ་སྟོང་དུ་བཞིས་མ་ཚང་བས་བསྐོར་བ། དེ་ལ་ཕྱི་རིམ་ན་འཕགས་པ་དགྲ་བཅོམ་པ་རྣམས་ཀྱིས་བསྐོར་ [20a.5]བ་བལྟས་ཏེ། དེ་ལ་དད་པ་བསྐྱེད་ཅིང་ཕྱག་འཚལ་ནས་བསྐོར་བ་བྱ་བ་ནི་མཚན་གདོན་པའམ་ཡེ་ཤེས་སེམས་དཔའི་སྐུའི་ཕྲེང་སྔགས་བརྗོད་པར་བྱའོ། །དེ་ལྟ་བུའི་བསྐོར་བ་ཇི་སྲིད་ནུས་པ་དེ་སྲིད་དུ་བྱས་ཏེ། བདེ་བར་གཤེགས་པ་དེ་རྣམས་ཀྱི་དྲུང་དུ་འདུག་ལ། སངས་རྒྱས་རྗེས་སུ་དྲན་པ་དང་། ། [20a.6]ཆོས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པར་བྱས་ལ། སྙིང་ག་ནས་སྤྲུལ་པའི་མཆོད་པས་མཆོད་དེ། འདུད་ཉི་ཤུས་ཡང་དག་པར་བསྟོད་ལ། སྡིག་པ་བཤགས་པ་དང་རྗེས་སུ་ཡི་རང་བ་ལ་སོགས་པའི་དགེ་བའི་རྩ་བ་ཆེར་བསྐྱེད་དོ། །དེ་ནས་དེ་རྣམས་ཀྱི་ཐུགས་ཀ་ནས་འོད་ཟེར་བྱུང་ནས་ [20a.7]བདག་ལ་གཡས་སུ་བསྐོར་ཏེ། བདག་གི་སྙིང་གར་ཐིམ་པར་བསམས་པའི་བྱིན་རླབས་ཀྱིས་ལས་དང་ཉོན་མོངས་པའི་སྒྲིབ་པ་དག་ནས་ལུས་ཀྱང་ཆུ་ཟླ་ལྟ་བུར་བསམ་མོ། །དེ་ལྟར་དགེ་བ་བྱས་པའི་བསོད་ནམས་རྫོགས་པའི་བྱང་ཆུབ་ཆེན་པོར་བསྔོས་ལ་དེ་རྣམས་ཀྱང་མི་སྣང་བར་བསྒོམ་ [20b] [20b.1]མོ། །མཚན་ཡང་དག་པར་བརྗོད་པའི་བསྐོར་བ་བྱ་བའི་ཐབས་སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། {T2554}༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་ཡན་ལག་བདུན་པས་ཚོགས་བསགས་པའི་ [20b.2]ཐབས་ལ། འཇམ་དཔལ་རྡོ་རྗེ་ལ་སོགས་པ། །རྒྱལ་བ་སྲས་དང་བཅས་པ་ལ། །ལུས་ངག་ཡིད་གསུམ་གུས་ལྡན་པས། །ཀུན་ནས་བཏུད་དེ་ཕྱག་འཚལ་ལོ། །སངས་རྒྱས་ཞིང་དུ་གང་བསྔགས་དང་། །འཇིག་རྟེན་དག་ན་མཆོག་གྱུར་པ། །རིན་ཆེན་མེ་ཏོག་བདུག་སྤོས་ [20b.3]སོགས། །ཀུན་ནས་སྤྲུལ་ཏེ་མཆོད་པར་བགྱི། །བདག་གིས་སྔོན་ཆད་བྱས་པའི་སྡིག །ཀུན་ནས་བསགས་པར་གང་གྱུར་པ། །རང་བཞིན་མེད་དང་ཡོད་ཚུལ་གྱིས། །རྒྱལ་བ་ཀུན་གྱི་སྤྱན་སྔར་བཤགས། །མགོན་པོ་རྣམས་ཀྱི་བསོད་ནམས་དང་། དམན་པའི་དགེ་བ་ཐམས་ཅད་ལ། ། [20b.4]དེ་བཞིན་མཐུན་པར་ལྷག་སེམས་ཀྱིས། །དད་པས་རྗེས་སུ་ཡི་རང་ངོ་། །བདེ་གཤེགས་བྱང་ཆུབ་སེམས་བསྐྱེད་ནས། །འགྲོ་བ་ཐུགས་རྗེས་འདུལ་སླད་དུ། །ཆོས་ཀྱི་འཁོར་ལོ་བསྐོར་བ་ལ། །ཚངས་པ་བཞིན་དུ་གསོལ་བ་འདེབས། །ཡོངས་སུ་མྱ་ངན་འདའ་བཞེད་ལ། །འགྲོ་བ་ [20b.5]ཡུན་དུ་བདེ་བའི་ཕྱིར། །ཇི་སྲིད་འཁོར་བ་དེ་སྲིད་དུ། །མྱ་ངན་མི་འདའ་བཞུགས་སུ་གསོལ། །ཇི་སྲིད་འཁོར་བར་གནས་བར་དུ། །བདག་གི་དགེ་བའང་དེ་བཞིན་དུ། །ཀུན་ནས་ཟད་པར་མི་འགྱུར་བར། །སེམས་ཅན་ཡོངས་སུ་སྨིན་པར་ཤོག །དུས་འདི་ནས་ནི་བཟུང་ནས་སུ། ། [20b.6]བྱང་ཆུབ་སྙིང་པོར་མཆིས་ཀྱི་བར། །མགོན་པོའི་འབངས་སུ་འབུལ་ལགས་ཀྱིས། །ཐུགས་རྗེས་ཡོངས་སུ་གཟུང་བར་མཛོད། །དུས་འདི་ནས་ནི་བཟུང་ནས་སུ། །བདེ་གཤེགས་ཁྱེད་ཀྱི་བཀའ་བཞིན་དུ། །སེམས་ཅན་ཀུན་དོན་སྒྲུབ་ལགས་ཀྱིས། །བྱིན་གྱིས་བརླབ་ [20b.7]པར་མཛད་དུ་གསོལ། །རྒྱལ་བ་མཉེས་ཕྱིར་བཟླས་བརྗོད་རིན་པོ་ཆེ། །དད་པས་སྤྱན་སྔར་རྟག་ཏུ་མཆོད་བགྱིད་པས། །ལུས་ངག་དུབ་དང་བསམ་པ་ཡེངས་པ་ཡིས། །ཅུང་ཟད་བདེ་བར་གནས་འཚལ་བཟོད་པར་བཞེས། །དད་པས་བསྐྱེད་པའི་བསོད་ནམས་ཕྲ་མོ་ [21a] [21a.1]ཡང་། །འགའ་ཡང་ཆུད་ཟོས་མི་འགྱུར་དོན་གྱི་ཕྱིར། །གསང་སྔགས་རིན་ཆེན་རྣམ་གྲངས་ཇི་ཙམ་ཞིག །མགོན་པོ་བདག་ཉིད་ལ་ནི་གདམས་པར་བགྱི། །ནད་དང་སྡུག་བསྔལ་ལ་སོགས་དགྲ་བགེགས་དང་། །འཁོར་བའི་རྒྱ་མཚོར་གནས་པ་སྣ་ [21a.2]ཚོགས་དག །འདི་དང་ཕ་རོལ་གཉི་གར་རྟག་ཏུ་འབྱུང་། །གསང་སྔགས་རིན་ཆེན་འབྲས་བུ་མཆིས་པར་མཛོད། །འཇམ་དཔལ་གྱི་མཚན་ཡང་དག་པར་བརྗོད་པའི་ཡན་ལག་བདུན་པས་ཚོགས་བསགས་པའི་ཐབས། སློབ་དཔོན་འཇམ་དཔལ་བཤེས་གཉེན་གྱིས་ [21a.3]མཛད་པ་རྫོགས་སོ།། {T2555}༄༅༅། །འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་ནི། དང་པོ་བདག་ཉིད་ཀྱིས་སེམས་ཅན་གྱི་དོན་དུ་སངས་རྒྱས་ཐོབ་པར་བྱའོ་ཞེས་བསམ། [21a.4]དེ་ནས་ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ ཞེས་པས་སྟོང་པའི་རང་བཞིན་ལས་རང་གི་སེམས་ཀྱི་སྣང་བ་ཨཱ་ལི་ཀཱ་ལིར་བསམ་པའི་འོད་ཟེར་གྱིས་རྟེན་གྱི་དཀྱིལ་འཁོར་མངོན་པར་བསྒྲུབ་པར་བྱའོ། །དེའི་དབུས་སུ་སེང་གེའི་ཁྲི་ཉི་མའི་དཀྱིལ་འཁོར་གྱི་སྟེང་དུ་བསམ་པ་ནི། སྠི་ཏོ་ཧྲྀ་དི་ཛྙཱ་ [21a.5]ན་མ་མཱུ་རྟྟི་ར་ཧཾ་བུ་དྡྷོ་བུ་དྡྷཱ་ནཱཾ། ཏྲྱ་དྷྭ་བརྟྟི་ནཱཾ་ཞེས་བརྗོད་པས་རྣམ་སྣང་ཆེན་པོ་ཀུན་དུ་ཞལ་བསམ་མོ། །དེའི་ཐུགས་ཀར་དང་པོའི་སངས་རྒྱས་བསམ། དེའི་ཐུགས་ཀར་ཤེས་རབ་འཁོར་ལོ་བསྒོམས་ཏེ། ཨོཾ་བཛྲ་ཏཱི་ཀཥྞ་ཡ་ཏེ་ན་མཿཨོཾ་དུཿཁཙྪེ་ད་ཡ་ཏེ་ན་མཿ། ཨོཾ་པྲཛྙཱ་ཛྙཱ་ན་མཱུ་རྟྟཱ་ཡ་ཏེ་ན་མཿ [21a.6]ཨོཾ་ཛྙཱ་ན་ཀཱ་ཡ་ཏེ་ན་མཿཨོཾ་ཝ་གཱི་ཤྭ་རཱ་ཡ་ཏེ་ན་མཱཿ། ཨོཾ་ཨ་ར་པ་ཙ་ནཱ་ཡ་ཏེ་ན་མཿཞེས་བརྗོད་བས་ཤེས་རབ་འཁོར་ལོ་རྩིབས་དྲུག་པ་བསྒོམ། དེའི་སྟེང་དུ་ཡེ་ཤེས་སེམས་དཔའ་ཟླ་བ་དང་ཨ་བསྒོམ་པར་བྱའོ། །ཨའི་འོད་ཟེར་གྱིས་ཡེ་ཤེས་ཀྱི་དཀྱིལ་འཁོར་དྲུག་བདག་ལ་ཞུགས་པར་ [21a.7]བསམ་མོ། །དེ་ལ་མཚན་བརྗོད་པར་བྱའོ། །དེ་ལ་དང་པོར་བྱང་སེམས་རྡོ་རྗེའི་དཀྱིལ་འཁོར་གྱི་མཚན་བརྗོད་པར་བྱ་སྟེ། འདི་ལྟར་སངས་རྒྱས་བཅོམ་ལྡན་འདས། །ཞེས་པ་ནས། ཐེག་པ་ཆེན་པོའི་ཚུལ་གྱི་མཆོག། །ཅེས་པའི་བར་དུ་ཚིགས་བཅད་བཅུ་བཞི་བརྗོད་པས། ཡེ་ཤེས་སེམས་ [21b] [21b.1]དཔའི་ཡི་གེ་ཨ་ལས་མཚན་དོན་བྱུང་སྟེ། དེ་དག་གིས་བཅོམ་ལྡན་འདས་བྱང་སེམས་རྡོ་རྗེའི་དཀྱིལ་འཁོར་གྱི་ལྷ་ཚོགས་སུ་གྱུར་ཏེ། སྤྲོས་ནས་འགྲོ་བ་སེམས་ཅན་གྱི་དོན་བྱས་ནས་སླར་འདུས་ཏེ། རྣམ་སྣང་ཆེན་པོའི་ཕྱི་རིམ་དུ་གནས་པར་བསམ་མོ། །དེ་ནས། སངས་རྒྱས་རྣམ་པར་མཛད་ཆེ། །ཞེས་པ་ [21b.2]ནས་རྡོ་རྗེ་ལྕགས་ཀྱུ་ཞགས་པ་ཆེ། །ཞེས་བྱ་བའི་བར་དུ་ཚིགས་བཅད་ཉི་ཤུ་རྩ་ལྔར་རྐང་པ་གཅིག་གིས་མ་ཚང་བ་བརྗོད་པས། ཐུགས་ཀའི་ཡེ་ཤེས་སེམས་དཔའི་ཨ་ལས་མཚན་དོན་གྱི་ཡི་གེ་བརྒྱ་བརྒྱད་ཅུ་རྩ་གཅིག་འཕྲོས་ཏེ། དེ་དག་ཀྱང་རྣམ་པར་སྣང་མཛད་ཀྱི་དཀྱིལ་འཁོར་གྱི་ལྷ་ [21b.3]ཚོགས་སུ་གྱུར་ཏེ། འགྲོ་བའི་དོན་བྱས་རྣམ་པར་སྣང་མཛད་ཆེན་པོ་ལ་བསྐོར་བར་བསམ་མོ། དེ་ནས། རྡོ་རྗེ་འཇིགས་བྱེད་འཇིགས་པར་བྱེད་ནས། སྒྲ་དང་ལྡན་པ་རྣམས་ཀྱི་མཆོག །ཅེས་པའི་བར་དུ་ཚིགས་བཅད་བཅུར་རྐང་པ་གཅིག་གིས་ལྷག་པ་བརྗོད་པས། ཡེ་ཤེས་ [21b.4]སེམས་དཔའི་ཐུགས་ཀའི་ཨ་ལས་མཚན་དོན་གྱི་ཡི་གེ་རྣམས་སྤྲོས་པས་འཇིག་རྟེན་གྱི་གདུག་པ་ཅན་རྣམས་བཏུལ་ནས་དཀྱིལ་འཁོར་ཆེན་པོའི་ཤར་ཕྱོགས་སུ་འཁོར་པར་བཞུགས་པར་བསམ་མོ། །དེ་ནས། ཡང་དག་བདག་མེད་དེ་བཞིན་ཉིད་ནས། །ཡེ་ཤེས་མེ་ལྕེ་འོད་ [21b.5]རབ་གསལ། །ཞེས་པའི་བར་དུ་ཚིགས་བཅད་བཞི་བཅུ་རྩ་གཉིས་བརྗོད་པས། ཡེ་ཤེས་སེམས་དཔའི་ཐུགས་ཀའི་ཡི་གེ་ཨ་ལས་མཚན་དོན་གྱི་ཡི་གེ་ཉིས་བརྒྱ་སུམ་ཅུ་རྩ་ལྔ་བྱུང་སྟེ་སྤྲོས་པས། སངས་རྒྱས་སྣང་བ་མཐའ་ཡས་ཀྱི་དཀྱིལ་འཁོར་གྱི་སྤྲུལ་པས་འགྲོ་དོན་ [21b.6]བྱས་ནས་དཀྱིལ་འཁོར་ཆེན་པོའི་ནུབ་ཕྱོགས་སུ་བཞུགས་པར་བསམ་མོ། །དེ་ནས། འདོད་པའི་དོན་གྲུབ་དམ་པ་སྟེ། །ཞེས་པ་ནས། ནོར་བུ་ཆེན་པོ་རིན་ཆེན་ཏོག །ཅེས་པའི་བར་གྱིས་ཚིགས་སུ་བཅད་པ་ཉི་ཤུ་རྩ་བཞི་བརྗོད་པས། ཡེ་ཤེས་སེམས་དཔའི་ཐུགས་ [21b.7]ཀའི་ཨ་ལས་མཚན་དོན་གྱི་ཡི་གེ་བརྒྱ་ཉི་ཤུ་རྩ་བཞི་སྤྲོས་ཏེ། སངས་རྒྱས་རིན་ཆེན་འབྱུང་ལྡན་གྱི་དཀྱིལ་འཁོར་གྱི་སྤྲུལ་པས་འགྲོ་བའི་དོན་བྱས་ནས་དཀྱིལ་འཁོར་ཆེན་པོའི་ལྷོ་ཕྱོགས་སུ་བཞུགས་པར་བསམ་མོ། །དེ་ནས། སངས་རྒྱས་ཀུན་གྱི་རྟོགས་བྱ་བ། །ཞེས་པ་ [22a] [22a.1]ནས། །འཇམ་དཔལ་དཔལ་དང་ལྡན་པའི་མཆོག །ཅེས་པའི་བར་དུ་ཚིགས་སུ་བཅད་པ་བཅོ་ལྔ་བརྗོད་པས། ཡེ་ཤེས་སེམས་དཔའི་ཐུགས་ཀའི་ཨ་ལས་མཚན་དོན་དགུ་བཅུ་རྩ་དགུ་སྤྲོས་ཏེ། སངས་རྒྱས་དོན་ཡོད་གྲུབ་པའི་དཀྱིལ་འཁོར་གྱི་སྤྲུལ་ [22a.2]པས་སེམས་ཅན་གྱི་བསམ་པ་ཡོངས་སུ་གྲུབ་པར་བྱས་ནས་སླར་འདུས་ཏེ་དཀྱིལ་འཁོར་ཆེན་པོའི་བྱང་ཕྱོགས་སུ་བཞུགས་པར་བསྒོམ་མོ། །དེ་ལྟར་དཀྱིལ་འཁོར་ཆེན་པོ་དྲུག་པོ་དེ་ལས། འདི་ལྟར་སངས་རྒྱས་བཅོམ་ལྡན་འདས། །འཇམ་དཔལ་དཔལ་དང་ལྡན་ [22a.3]པའི་མཆོག །ཅེས་པ་ལ་སོགས་པས་བསྟོད་ཅིང་མཆོད་པར་བསམས་ལ་གདོན་ཏོ། །དེ་ལྟར་དཀྱིལ་འཁོར་ཆེན་པོ་དེ་ལ་སྤྱིར་འདུད་ཉི་ཤུས་ཡང་དག་པར་བསྟོད་དོ། །དེ་ནས་འདོད་པའི་དོན་ལ་གསོལ་བ་གདབ་སྟེ། དགེ་བའི་རྩ་བ་བླ་ན་མེད་པའི་བྱང་ཆུབ་ཏུ་ [22a.4]བསྔོས་ཏེ། ཨོཾ་སྭ་བྷཱ་བའི་སྔགས་ཀྱིས་ཆོས་ཐམས་ཅད་རང་བཞིན་གྱིས་རྣམ་པར་དག་ཅིང་སྤྲོས་པ་དང་བྲལ་བར་འཇམ་པའི་དབྱངས་ཀྱི་ངོ་བོ་ནམ་མཁའ་ལྟར་དྲི་མ་མེད་པར་ཡོངས་སུ་དག་པར་བསྒོམས་ཏེ་སྤྱོད་ལམ་གྱི་བྱ་བ་གཞན་བྱའོ། །དེ་ལྟར་རིགས་བསྡུས་པའི་དབང་ [22a.5]དུ་བྱས་ནས་མཚན་བརྗོད་ཅིང་བསྡུས་པ་ལ་ཚིགས་བཅད་ཉིས་བརྒྱ་དྲུག་ཅུ་རྩ་གཉིས་ཀྱིས་བསྟན་ཏོ། །དེའི་ཡོན་ཏན་གྱི་གཞུང་ཚིགས་བཅད་བརྒྱ་ལྔ་བཅུའོ། །དེ་ལྟར་ན་སངས་རྒྱས་ཀྱི་མཚན་བརྗོད་པ་ཡོན་ཏན་དང་བཅས་པའོ། །འཇམ་དཔལ་གྱི་མཚན་གདོན་པའི་མན་ངག ། [22a.6]སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། {T2556}༄༅༅། །འཕགས་འཇམ་དཔལ་ལ་ཕྱག་འཚལ་ལོ། །འཇམ་དཔལ་གྱི་མཚན་ཡང་དག་པར་བརྗོད་པའི་དགེ་བའི་རྩ་བ་བསྔོ་བ། མཁས་པ་རང་གི་བསྔོ་བ་དང་། མི་མཁས་པ་ [22a.7]གཞན་གྱི་བསྔོ་བའོ། །དེ་ལ་མཁས་པ་རང་གི་བསྔོ་བ་ནི་མི་དམིགས་པ་གསུམ་གྱིས་ཟིན་པས་འཁོར་གསུམ་ཡོངས་སུ་དག་པའི་བསྔོ་བའོ། །མི་མཁས་པ་གཞན་གྱི་བསྔོ་བ་ནི་དུས་གསུམ་གྱི་དེ་བཞིན་གཤེགས་པ་ཇི་ལྟར་བསྔོ་བ་ལྟར་བདག་གིས་ཀྱང་བསྔོ་བའོ། ། [22b] [22b.1]མཚན་ཡང་དག་པར་བརྗོད་པའི་དགེ་བའི་རྩ་བ་བསྔོ་བ། སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། {T2557}༄༅༅། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་རྣལ་འབྱོར་པས་མི་རྟག་པ་ལ་ [22b.2]སོགས་པ་བསྒོམ་པ་སྟེ། ཀྱེ་མ་འདི་ལྟར་སྣང་བའི་ཕྱི་སྣོད་ཀྱི་འཇིག་རྟེན་འབྱུང་བ་ཆེན་པོ་བཞིས་འདུས་བྱས་པ་འདི་རྡུལ་ཕྲ་མོ་འདུས་པ་ལས་གྲུབ་པས། རྡུལ་ཕྲ་མོ་དེ་ཡང་རང་བཞིན་མི་རྟག་པ། ཐེར་ཟུག་པ་དང་། གློ་བུར་བ་དང་། ཡིད་བརྟན་དུ་མི་རུང་བ་དང་། ཡང་ [22b.3]དག་པའི་དོན་བྱེད་མི་ནུས་པས་བརྟགས་ན་དབེན་པ་སླུ་བའི་ཆོས་ཅན། འགྱུར་བའི་རྣམ་པའོ། །ངེས་པ་མེད་པ་བདག་གི་མེད་པ། འཇིག་པའི་ཆོས་ཅན། སྒྱུ་མ་ལྟ་བུ། སྨིག་རྒྱུ་ལྟ་བུ། སྤྲུལ་པ་ལྟ་བུ། དྲི་ཟའི་གྲོང་ཁྱེར་ལྟ་བུ། ཆུ་ཟླ་ལྟ་བུ། གཟུགས་ [22b.4]བརྙན་ལྟ་བུ། ན་བུན་ལྟ་བུ། འཇའ་ཚོན་ལྟ་བུ་སྡུག་བསྔལ་བ་བདག་མེད་པ། སྟོང་པའོ། དེ་ལྟར་ན་ཕྱི་གཟུང་བའི་ཡུལ་ལ་བདག་མེད་པའོ། །མཚན་ཡང་དག་པར་བརྗོད་པའི་མི་རྟག་པ་བསྒོམ་པ། སློབ་དཔོན་འཇམ་དཔལ་བཤེས་གཉེན་གྱིས། [22b.5]མཛད་པ་རྫོགས་སོ།། {T2558}༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། འཁོར་བ་ལས་ཡིད་བྱུང་བ་ནི་དེ་བཞིན་དུ་ནང་བཅུད་ཀྱི་སེམས་ཅན་དང་། བདག་གི་གཟུགས་ཀྱི་ཕུང་པོ་ཡང་སྤྱི་བོ་ནས་རྐང་པའི་མཐིལ་ཡན་ཆད་དུ་བརྟགས་ [22b.6]པས་མི་གཙང་བའི་ངོ་བོ་ཡིན་ཏེ། ཆུ་སེར་དང་། བད་ཀན་དང་། ཀླད་པ་དང་། བཤང་གཅི་དང་། རྣག་ཁྲག་དང་། སྣབས་ལུད་དང་། ཀེང་རུས་ལ་སོགས་པས་ཡོངས་སུ་གང་བ། དེ་ཡང་འགྱུར་བའི་ཆོས་ཅན། དེ་ཡང་ཡིད་བརྟན་དུ་མི་རུང་བ། [22b.7]སྡུག་བསྔལ་བ། མི་རྟག་པ་བདག་མེད་པ། སྟོང་པའོ། །དེ་ལྟ་བུར་ཤེས་པར་བྱས་ནས་གཟུང་འཛིན་གཉིས་ལས་ལོག་སྟེ། སེམས་ཀྱི་མཚན་ཉིད་ཀྱང་གཟུགས་མེད་པ། ཁ་དོག་མེད་པ་ངོ་བོ་མེད་པ། རྣམ་པ་མེད་པ་བལྟར་མེད་པ། གཟུང་དུ་མེད་པ་རྟོག་པ་ [23a] [23a.1]མེད་པ། སྤྲོས་པ་མེད་པ། ཀུན་ནས་ཉོན་མོངས་པ་མེད་པ། རང་རིག་པ་རང་གསལ་བ་ཙམ་དུ་ཡང་གྲུབ་པ་ཡིན་ཏེ། དེ་ལྟར་ན་འཁོར་བ་ན་འདོད་པའི་ཡོན་ཏན་ལྔ་ལ་ཆགས་པ་ནི་སླུ་བའི་ཆོས་ཅན་ཡིན་ནོ། །འཁོར་བ་ལས་ཡིད་བྱུང་བ་འདི་ཡང་རང་བཟོ་མ་ཡིན་ཏེ། ལུས་མེད་ [23a.2]ལུས་ཏེ་ལུས་ཀྱི་མཆོག། །ལུས་ཀྱི་མཐའ་ནི་རྟོགས་པ་པོ། །ཞེས་པ་དང་། འཁོར་བའི་ཕ་རོལ་མཐར་སོན་པ། །བྱ་བ་བྱས་པ་སྐམ་སར་གནས། །ཞེས་པའི་བཀའ་རྒྱུད་ལ་བརྟེན་ནས་བྱས་སོ། །མཚན་ཡང་དག་པར་བརྗོད་པའི་མི་རྟག་པ་འཁོར་བ་ལས་ཡིད་བྱུང་བ། སློབ་དཔོན་འཇམ་དཔལ་ [23a.3]བཤེས་གཉེན་གྱིས་མཛད་པ་རྫོགས་སོ།། {T2559}༄༅༅། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་རྣལ་འབྱོར་པས་ཤེས་པ་དུག་གསུམ་ལས་བཟློག་པའི་མན་ངག་ནི། དེ་ཡང་རིག་པ་བྱང་ཆུབ་ཀྱི་སེམས་འོད་གསལ་སྟོང་པ་གཉིས་ [23a.4]མེད་དེ་མ་རིག་སྟེ་མ་ཤེས་པའོ། །སེམས་ཅན་སངས་རྒྱས་ཀྱི་སྙིང་པོ་ཅན་ཡིན་པ་ལ་སངས་རྒྱས་ཀྱི་རྒྱུ་བོར་ཏེ་ངན་སོང་གི་རྒྱུ་བསགས་པ་ནི་གཏི་མུག་གོ། །དེ་ལྟར་ཁམས་གསུམ་གྱི་འཁོར་བ་སྡུག་བསྔལ་ཡིན་པར་མ་ཤེས་པས། སྡུག་བསྔལ་དེ་ལ་མངོན་པར་སྲེད་ཅིང་ཆགས་པ་ནི་ [23a.5]འདོད་ཆགས་སོ། །དེ་ལྟར་ཆགས་པའི་དབང་གིས་སེམས་ཅན་རྣམས་ཀྱི་ཉིང་སྲོག་ཉིང་གིས་བཅད་དེ་ཉིང་ཤ་ཉིང་གིས་ཟོས་ནས་གནོད་པ་བྱས་པ་ནི་ཞེ་སྡང་ངོ་། །དེ་ལྟར་རྒྱུ་དུག་གསུམ་ལས་འབྲས་བུ་ངན་སོང་གསུམ་དུ་སྨིན་ནོ། །དེའི་དབང་གིས་ཉོན་མོངས་པའི་ཆུ་བོ་བཞི་འཁོར་ [23a.6]བའི་རྒྱ་མཚོར་འབབ་པ་ནི་འདི་ལྟ་སྟེ། རྟོག་པའི་ཆུ་བོ་དང་། ལས་ཀྱི་ཆུ་བོ་དང་། འཁོར་བའི་ཆུ་བོ་དང་། སྡུག་བསྔལ་གྱི་ཆུ་བོའོ། །དེ་ལ་རྟོག་པའི་ཆུ་བོ་གང་ཞེ་ན། རྟོག་པའི་ཆུ་བོ་སྔ་མ་ལ་བརྟེན་ནས། ཕྱི་མ་བྱེད་པ་འཆད་པའོ། །ལས་ཀྱི་ཆུ་བོ་གང་ཞེ་ན། རྟོག་པ་སྔ་མ་ [23a.7]དེའི་དབང་གིས་ལས་དགེ་སྡིག་ཡོད་པས་སྡིག་པ་སྤྱད་པའི་དབང་གིས་ལས་ཀྱི་རྣམ་སྨིན་གྱི་འབྲས་བུ་ཟད་པ་མེད་པར་འབྱུང་བའོ། །འཁོར་བའི་ཆུ་བོ་གང་ཞེ་ན། ལས་དེ་མ་ཟད་པའི་བར་དུ་སྲེག་པ་ཡང་རྒྱུན་མི་ཆད་པར་འབྱུང་བས་སོ། །སྡུག་བསྔལ་གྱི་ཆུ་བོ་གང་ཞེ་ན། དེ་ལྟར་སྲིད་ [23b] [23b.1]པ་གསུམ་དུ་འཁོར་བས་འབྲས་བུ་སྡུག་བསྔལ་གསུམ་དང་རྒྱུན་མི་འཆད་པར་ཉམས་སུ་མྱོང་བའོ། །དེ་བས་ན་དེ་ལྟར་སྨིན་པར་བྱེད་པའི་རྒྱུ་དུག་གསུམ་ལས་བཟློག་ན་ཆུ་བོ་བཞི་ཡང་རང་ལོག་ཏུ་འགྱུར་རོ། །མཚན་ཡང་དག་པར་བརྗོད་པའི་ཤེས་པ་དུག་གསུམ་ལས་བཟློག་པའི་མན་ངག་སློབ་དཔོན་ [23b.2]འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། {T2560}༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། །དེ་ལ་སྐྱབས་སུ་འགྲོ་བ་ནི་མཎྜལ་དང་མཆོད་པ་བཤམས་ཏེ། བླ་མ་དང་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་རང་གི་མདུན་དུ་དམིགས་ལ་འདི་སྐད་ [23b.3]བརྗོད་དོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་པ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དམ་པའི་ཆོས་དང་། རང་སངས་རྒྱས་དང་། འཕགས་པ་ཉན་ཐོས་ཀྱི་དགེ་ [23b.4]འདུན་དང་བཅས་པ་ཐམས་ཅད་ལ་ཕྱག་འཚལ་ལོ། །མཆོད་པའི་ལས་བྱ་བའི་ཕྱིར་ཡོན་ཆབ་དང་། མེ་ཏོག་དང་། བདུག་སྤོས་དང་། མར་མེ་དང་། དྲི་ཆབ་དང་། བཤོས་གཙང་དང་། སིལ་སྙན་ལ་སོགས་པ་དངོས་སུ་འབྱོར་པ་དང་། ཡིད་ཀྱིས་སྤྲུལ་ཏེ་དབུལ་བར་བགྱིའོ། །དེ་ནས་ [23b.5]འདི་སྐད་བརྗོད་དོ། །བདག་མིང་འདི་ཞེས་བགྱི་བ་སངས་རྒྱས་ཀུན་གྱི་གདུང་རྒྱུན་མི་འཆད་པར་བགྱི་བའི་སླད་དུ་དུས་འདི་ནས་བཟུང་ནས་སྙིང་པོ་བྱང་ཆུབ་མ་ཐོབ་ཀྱི་བར་དུ་ཡང་དག་པར་རྫོགས་པའི་སངས་རྒྱས་རྐང་གཉིས་རྣམས་ཀྱི་མཆོག་ལ་སྐྱབས་སུ་མཆི་སྟེ། ཐུགས་རྗེ་ཆེན་པོ་དང་ལྡན་པ་ཐམས་ [23b.6]ཅད་མཁྱེན་པ། གཟིགས་པ་སྐྱེས་བུའི་ཁྱུ་མཆོག་སྐུ་བསམ་གྱིས་མི་ཁྱབ་པ། བླ་ན་མེད་པའི་སྐུ་མངའ་བ་ལ་སྐྱབས་སུ་མཆིའོ། །ཆོས་འདོད་ཆགས་དང་བྲལ་བ་ལ་སྐྱབས་སུ་མཆི་སྟེ། བླ་ན་མེད་པ་དེ་བཞིན་གཤེགས་པ་ལ་མངའ་བ། ཞི་བ་ཆོས་ཀྱི་སྐུ་སོ་སོར་ཡང་དག་པར་རིག་པ་ལ་ [23b.7]སྐྱབས་སུ་མཆིའོ། །དགེ་འདུན་འདུས་པའི་གཙོ་བོ་ལ་སྐྱབས་སུ་མཆི་སྟེ། ཕྱོགས་བཅུའི་བྱང་ཆུབ་སེམས་དཔའི་དགེ་འདུན་ས་ཆེན་པོར་ཆུད་པའི་ཕྱིར་མི་ལྡོག་པ་རྣམས་ལ་སྐྱབས་སུ་མཆིའོ་ཞེས་ལན་གསུམ་བརྗོད་དོ། །སྐྱབས་སུ་འགྲོ་བའི་ཆོ་ག་རྫོགས་སོ།། །། [24a] [24a.1]{T2561}༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། །དེ་ལྟར་སྐྱབས་འགྲོ་ཁྱད་པར་ཅན་བྱས་ནས་སེམས་བསྐྱེད་པ་ནི། ཐལ་མོ་སྦྱར་ལ་ཕྱག་འཚལ་བ་དང་མཆོད་པའི་ལས་བྱས་ལ་པུས་མོ་གཡས་པའི་ལྷ་ང་ས་ལ་བཙུགས་ཏེ་འདི་སྐད་བརྗོད་དོ། །ཇི་ལྟར་སྔོན་གྱི་དེ་བཞིན་ [24a.2]གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་དང་། ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་རྣམས་ཀྱིས་ཐུགས་བླ་ན་མེད་པའི་བྱང་ཆུབ་མཆོག་ཏུ་རིན་པོ་ཆེར་བསྐྱེད་པ་ལྟར་བདག་མིང་འདི་ཞེས་བགྱི་བས་བྱང་ཆུབ་མཆོག་ཏུ་སེམས་བསྐྱེད་ [24a.3]པའི་སྦྱིན་པ་རིན་པོ་ཆེར་གཟུང་དུ་གསོལ་ཞེས་ལན་གསུམ་དུ་གསོལ་བ་གདབ་པོ། །དེ་ནས་འདི་སྐད་བརྗོད་དོ། །ཕྱོགས་བཅུ་ན་བཞུག་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དགོངས་སུ་གསོལ། བདག་མིང་འདི་ཞེས་བགྱི་བ་ཐོག་མ་དང་། སྐྱེ་བ་འདི་དང་སྐྱེ་བ་གཞན་དག་ཏུ་ [24a.4]སྦྱིན་པ་ལས་བྱུང་བ་དང་། ཚུལ་ཁྲིམས་ལས་བྱུང་བ་དང་། བསྒོམས་པ་ལས་བྱུང་བའི་དགེ་བའི་རྩ་བ་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བའི་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ [24a.5]དང་། ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་རྣམས་ཀྱིས་ཐུགས་བླ་ན་མེད་པའི་བྱང་ཆུབ་མཆོག་རིན་པོ་ཆེར་སེམས་བསྐྱེད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་སེམས་ཅན་མ་སྨིན་པ་རྣམས་སྨིན་པར་བྱ་བ་དང་། མ་གྲོལ་བ་རྣམས་གྲོལ་བར་བགྱིད་པ་དང་། དབུགས་མ་ཕྱུང་བ་ [24a.6]རྣམས་དབུགས་དབྱུང་བར་བྱ་བའི་ཕྱིར་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བའི་ཕྱིར། དུས་འདི་ནས་བཟུང་ནས་སྙིང་པོ་བྱང་ཆུབ་ལ་མཆིས་ཀྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ་ཞེས་གསོལ་བ་གདབ་པོ། [24a.7]དེ་ནས་འདི་སྐད་བརྗོད་དེ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །རྒ་ནད་འཆི་བའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་འདྲེན་པར་ཤོག །དགེ་བ་འདི་ཡིས་སྐྱེ་བོ་ཀུན། བསོད་ནམས་ཡེ་ཤེས་ཚོགས་བསགས་ [24b] [24b.1]ཏེ། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་ནི་ཐོབ་པར་ཤོག །སའམ་ཆུའམ་མེའམ་རླུང་། །དགོན་པ་ཤིང་གི་སྨན་ལྟ་བུར། །བདག་ཉིད་སེམས་ཅན་ཐམས་ཅད་ཀྱི། །ནད་དོ་ཅོག་གི་གསོས་སུ་ཤོག །མཐོང་བ་དང་ནི་ཐོས་པ་དང་། །དྲན་པ་དང་ནི་རེག་པས་ཀྱང་། །བདག་ [24b.2]ནི་སེམས་ཅན་ཐམས་ཅད་ཀྱི། །གྲུ་དང་ཟམ་པ་ལྟ་བུར་ཤོག །བྱང་ཆུབ་སེམས་དཔའ་སུ་དག་གང་བཞུགས་པའི། །དེ་དག་ཀུན་གྱི་སྨོན་ལམ་གྲུབ་གྱུར་ནས། །སེམས་ཅན་ཐམས་ཅད་གཏན་དུ་བདེ་བ་དང་། །ངན་སོང་རྣམས་ནི་རྟག་ཏུ་སྟོངས་པར་ཤོག །སངས་རྒྱས་ཆོས་དང་ཚོགས་ཀྱི་ [24b.3]མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པ་འདི་དག་གིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་དགེ་བའི་རྩ་བ་སེམས་ཅན་ཐམས་ཅད་ཀྱི་དོན་དུ་བསྔོའོ། །སེམས་བསྐྱེད་པའི་ཆོ་ག་སློབ་དཔོན་འཇམ་དཔལ་ [24b.4]བཤེས་གཉེན་གྱིས་མཛད་པ་རྫོགས་སོ།། {T2562}༄༅༅། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་རྣལ་འབྱོར་བས་བྱང་ཆུབ་ཀྱི་སེམས་བསྒོམ་པ་ནི་རང་གི་ཡི་དམ་གང་ཡིན་པར་བསམས་ལ། དེའི་སྙིང་གར་ཟླ་བའི་དཀྱིལ་འཁོར་ [24b.5]འཇམ་ཀླས་པ་ཅིག་བསྒོམ། དེའི་ལྟེ་བ་ལ་ཨ་དཀར་པོ་ཅིག་བསམས་ལ་དེ་ལ་དམིགས་པ་གཏད་དེ་སྤྲོས་བྲལ་དུ་བསྒོམ་མོ། །བྱང་ཆུབ་ཀྱི་སེམས་བསྒོམ་པའི་མན་དང་། །སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ། །{T2563}༄༅༅། །འཇམ་དཔལ་གཞོན་ནུར་གྱུར་ [24b.6]པ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་རྣལ་འབྱོར་པས་འབྲས་བུ་ཡེ་ཤེས་ཀྱི་ཚོགས་ཚད་མེད་པ་བཞི་བསྒོམ་པ་ནི། གོང་གི་སྙིང་གའི་ཟླ་བ་དང་རྡོ་རྗེའི་ཨ་དེ་ལས་འཇིག་རྟེན་གྱི་ཁམས་ཁེངས་པར་བྱེད་པའི་འོད་ཟེར་ཁ་དོག་དཀར་པོ་བྱུང་བ་དེས་སེམས་ཅན་ཐམས་ཅད་ལ་རེག་པ་དང་སྡུག་ [24b.7]བསྔལ་དང་བྲལ་ནས་བདེ་བ་དང་ལྡན་པ་དང་། བདེ་བ་ལ་ཡུན་རིང་བར་གནས་པ་དང་། ཆོས་མཉམ་པ་ཉིད་ཀྱི་དོན་དུ་ཡུན་རིང་དུ་བསྒོམ་མོ། །འོད་ཟེར་དེའི་ཕུང་པོ་སླར་སྙིང་གར་ཐིམ་པར་བྱའོ། །ཚད་མེད་པ་བཞི་བསྒོམ་པའི་མན་ངག་རྫོགས་སོ། །{T2564}༄༅༅། །འཕགས་པ་འཇམ་དཔལ་གཞོན་ [25a] [25a.1]ནུར་གྱུར་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་སྒོ་ནས་དུས་གསུམ་སངས་རྒྱས་ལ་བལྟ་བ་ནི། །སྙིང་གའི་ཟླ་བའི་རྡོ་རྗེ་ལས་འོད་ཟེར་ཁ་དོག་ལྔ་འཇའ་ཚོན་ལྟ་བུ་ནམ་མཁའི་མཐར་ཐུག་པ་ཐམས་ཅད་སྣང་བས་ཁྱབ་པས་གསལ་བར་བྱས་ལ་བལྟ་བ་དང་། ། [25a.2]འཇིག་རྟེན་གྱི་ཁམས་ནང་ལ་རྒྱ་ཆེ་བའི་སངས་རྒྱས་ཀྱི་ཞིང་ཁམས་ན་དེ་བཞིན་གཤེགས་པ་དཔག་ཏུ་མེད་པ་མཛད་པ་བཅུ་གཉིས་མཛད་པ་དང་། །ཆོས་ཀྱི་འཁོར་ལོ་བསྐོར་བ་དང་། །མཉམ་པར་གཞག་པ་དང་། །དེ་ལས་ལངས་པ་དང་། །བྱང་ཆུབ་སེམས་དཔས་བསྐོར་བ་དང་། །འཁོར་ [25a.3]རྣམ་བཞིས་བསྐོར་བ་དང་། །དེ་བཞིན་གཤེགས་པའི་མཛད་སྤྱོད་དང་། །བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་སེམས་གཏད་ལ་བལྟ་བར་བྱའོ། །དུས་གསུམ་གྱི་སངས་རྒྱས་ལ་བལྟ་བ་རྫོགས་སོ།། {T2565}༄༅༅། །འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་ [25a.4]འཚལ་ལོ། །དབང་པོ་ཐ་མས་རྗེས་སུ་དྲན་པ་དྲུག་བསྒོམ་པ་ནི། སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པ་དང་། གཏོང་བ་རྗེས་སུ་དྲན་པ་དང་། ཚུལ་ཁྲིམས་རྗེས་སུ་དྲན་པ་དང་། ལྷ་རྗེས་སུ་དྲན་པའོ། །དེ་ཡང་འདི་ལྟ་སྟེ། དེ་རྣམས་ [25a.5]ཀྱི་ཡོན་ཏན་དྲན་པའི་སྒོ་ནས་གུས་པ་བསྐྱེད་ཅིང་བདག་གིས་ཀྱང་དེའི་སྒོ་ནས་འཇུག་པར་བྱའོ། །དེ་ཡང་སངས་རྒྱས་རྗེས་སུ་དྲན་པ་ནི་དེ་བཞིན་གཤེགས་པ་དགྲ་བཅོམ་པ་རིག་པ་དང་ཞབས་སུ་ལྡན་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ། ཡང་དག་པའི་ [25a.6]སངས་རྒྱས་བཅོམ་ལྡན་འདས་སོ་ཞེས་བྱའོ། །དེ་ལྟ་བུའི་སྒོ་ནས་སངས་རྒྱས་ཀྱི་ཡོན་ཏན་རྟོགས་ཤིང་དྲན་པ་ཉིད་ནི་སངས་རྒྱས་རྗེས་སུ་དྲན་པའོ། །ཆོས་རྗེས་སུ་དྲན་པ་ནི་བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ་ཡང་དག་པར་མཐོང་བ། དུས་ཚོད་མཁྱེན་པ། འདི་མཐོང་བ་ལ་ཉེ་བར་ [25a.7]གཏོད་པ། མཁས་པ་སོ་སོར་ཡང་དག་པར་རིག་པ། དོན་བཟང་པོ་ཚིག་འབྲུ་བཟང་པོ། །ཐོག་མར་དགེ་བ། བར་དུ་དགེ་བ། ཐ་མར་དགེ་བ། མ་འདྲེས་པ་ཡོངས་སུ་གསལ་བའོ། །དེ་ལྟ་བུ་ལ་དམིགས་ཤིང་ཡོན་ཏན་དྲན་པར་བྱའོ། །དགེ་འདུན་རྗེས་སུ་དྲན་པ་ནི་བཅོམ་ལྡན་འདས་ཀྱི་ [25b] [25b.1]ཉན་ཐོས་ཀྱི་དགེ་འདུན་ལེགས་པར་ཞུགས་པ། དྲང་པོར་ཞུགས། རིགས་པར་ཞུགས་པ། མཐུན་པར་ཞུགས་པ། ཀུན་དུ་སྦྱིན་པའི་འོས་སུ་གྱུར་པ། རབ་ཏུ་སྦྱིན་པའི་འོས་སུ་གྱུར་པ། སྦྱོར་བའི་འོས་སུ་གྱུར་པ། འཇིག་རྟེན་པའི་བསོད་ནམས་ཀྱི་ཞིང་བླ་ན་མེད་པའོ། །དེའི་ཡོན་ཏན་རྗེས་སུ་དྲན་པར་བྱའོ། །གཏོང་བ་རྗེས་སུ་དྲན་པ་ནི་ [25b.2]ཀྱེ་མ་སྐྱེས་བུ་སེར་སྣའི་དྲི་མ་སྤངས་པའི་ནང་ནས་སེར་སྣ་དང་བྲལ་བའི་སེམས་ཀྱིས་ཆོས་སྦྱིན་འཁོར་མོར་བྱེད་པ། ལག་རྐྱོང་བ་རྣམས་གཏོང་བ་ལ་དགའ་བ། འདི་ནི་བདག་གིས་ལེགས་པར་རྙེད་པ་ཡིན་ནོ། །དེ་ལྟར་རྗེས་སུ་དྲན་པར་བྱའོ། །ཚུལ་ཁྲིམས་རྗེས་སུ་དྲན་པ་ནི་བཅོམ་ལྡན་འདས་ཀྱི་ཉན་ [25b.3]ཐོས་ཀྱི་དགེ་འདུན་ནི་ཚུལ་ཁྲིམས་མ་ཉམས་པ། སྐྱོན་མེད་པ་མ་འདྲེས་པ་མ་གོས་པ། རང་གཙང་ཡོད་པ། མཁས་པས་བསྔགས་པ། ཏིང་ངེ་འཛིན་ཤེས་པའོ་ཞེས་དེ་ལྟ་བུར་དྲན་པར་བྱའོ། །ལྷ་རྗེས་སུ་དྲན་པ་ནི་ལྷ་རྣམས་ནི་ཆེ་བའི་ཡོན་ཏན་དང་ལྡན་པ། ལྷར་སྐྱེ་བའི་རྒྱུར་གྱུར་པ། [25b.4]ཚུལ་ཁྲིམས་དང་ཏིང་ངེ་འཛིན་དང་། ཤེས་རབ་དང་། བདག་ཉིད་དང་། ལྷའི་ཡོན་ཏན་མཚུངས་པར་བྱས་ནས་ལྷའི་ཡོན་ཏན་དང་སྦྱར་ནས་རྗེས་སུ་དྲན་པར་བྱའོ། །སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་མཚན་ཡང་དག་པར་བརྗོད་པའི་རྗེས་སུ་དྲན་པ་དྲུག་བསྒོམ་པའི་ [25b.5]མན་ངག་རྫོགས་སོ།། {T2566}༄༅༅། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་སྒོ་ནས་དབང་པོ་འབྲིང་གིས། རྟེན་འབྲེལ་བཅུ་གཉིས་བསྒོམ་པ་ནི། ཡང་དག་པར་རྫོགས་པའི་སངས་རྒྱས་ཀྱིས་རྟེན་འབྲེལ་བཅུ་གཉིས་གསུངས་ཏེ། ཕྱི་ [25b.6]རྟེན་ཅིང་འབྲེལ་པའི་འབྱུང་བ་ས་བོན་སྐྱེ་བོ་ནད་མེད་པས་འབྲས་བུའི་བར་དུ་ཡན་ལག་བརྒྱད་ཀྱི་ཚུལ་དུ་འབྱུང་བ་འབྲས་བུ་ལྗང་བུ་ལ་གཟིགས་ནས། ནང་རྟེན་ཅིང་འབྲེལ་པར་འབྱུང་བས་མ་རིག་པ་ནས་རྒ་ཤིའི་བར་དུ་ཡན་ལག་བཅུ་གཉིས་གསུངས་ཏེ། ནང་གི་ཆོས་རྣམས་ཇི་ལྟར་སྐྱེ་བའི་རྒྱུ་དང་འབྲས་ [25b.7]བུ་རྣམས་བསྟན་པའོ། །དེ་ལ་མ་རིག་པ་ནི་མི་ཤེས་པ་ལས་བྱུང་སྟེ། དེ་ཁོ་ན་ཉིད་ལ་གཏི་མུག་པ་དང་། ལས་རྒྱུ་དང་འབྲས་བུ་ལ་གཏི་མུག་པའོ། །དེའི་རྐྱེན་གྱིས་མ་རིག་པ་འབྱུང་སྟེ། དེ་ལ་ཅིའི་ཕྱིར་མ་རིག་པ་ཞེས་བྱ་ཞེ་ན། མུན་པ་ཆེན་པོའི་ཕྱིར་ན་མ་རིག་པ་སྟེ། དཔེར་ན་མུན་པས་ [26a] [26a.1]བསྒྲིབས་ནས་རྫས་ཀྱི་དངོས་པོ་མི་མཐོང་བ་དང་འདྲ་བར་མ་རིག་པས་ཀྱང་ལས་དང་ལས་ཀྱི་འབྲས་བུ་ཡོད་པ་དང་། བདེན་པ་དང་དཀོན་མཆོག་ཡོན་ཏན་ཅན་དང་། ཆོས་རྣམས་ཀྱི་ཆོས་ཉིད་སྟོང་པ་ཉིད་དུ་མཐོང་བར་བྱ་བ་བསྒྲིབས་ཏེ་མ་མཐོང་བས་མུན་པ་ཞེས་བྱ་སྟེ། ཁ་ཅིག་ [26a.2]གིས་དགེ་སྡིག་ངོ་མ་ཤེས། ཁ་ཅིག་གིས་དགེ་སྡིག་ཡོད་པར་ཡིད་ཆེས་ཀྱང་དོན་ལ་རྨོངས་པས་མ་རིག་པ་ཞེས་བྱའོ། །དེའི་རྐྱེན་གྱིས་འདུ་བྱེད་འབྱུང་སྟེ། བསོད་ནམས་དང་། བསོད་ནམས་མ་ཡིན་ད་དང་། མི་གཡོ་བ་གསུམ་གྱིས་འདུ་བྱེད་པའོ། །མངོན་པར་འདུ་བྱེད་པའི་ཕྱིར་ [26a.3]ན་འདུ་བྱེད་རྣམས་ཞེས་བྱ་སྟེ། ལས་སུ་མ་བསྟན་པ་རྣམས་པ་སྣ་ཚོགས་པ་འདུ་བྱེད་དོ། །དེས་བྱས་པས་ཀུན་གཞི་ལ་བག་ཆགས་སོགས་ཏེ། རྒྱུ་དེས་རྣམ་པར་ཤེས་པ་འབྱུང་ངོ་། །དེས་ཁམས་གསུམ་དུ་ལས་དགེ་བ་དང་མི་དགེ་བ་དང་། ལུང་དུ་མ་བསྟན་པའི་ལས་ཀྱི་འདུ་ [26a.4]བྱེད་དོ། །མ་རིག་པ་དང་འདུ་བྱེད་གཉིས་ནི་ཚེ་སྔ་མ་དང་སྦྱར་རོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་འབྱུང་སྟེ། ཅིའི་ཕྱིར་རྣམ་པར་ཤེས་པ་ཞེས་བྱ་ཞེ་ན། ཕྱི་ནང་གི་ཆོས་གཟུགས་དང་སྒྲ་དང་དྲི་ལ་སོགས་པ་ཡུལ་ཐ་དད་པ་རྣམས་ལ་མིག་ལ་སོགས་པའི་རྣམ་པར་ཤེས་པས་སོ་སོར་རིག་ [26a.5]ཅིང་ཤེས་པས་ན་རྣམ་པར་ཤེས་པ་ཞེས་བྱ་སྟེ། ཀུན་གཞི་ལ་བག་ཆགས་གཞག་པའི་བག་ཆགས་ཀྱི་རྒྱུ་དེས་འཕངས་ནས། ཕ་རོལ་དུ་སྐད་ཅིག་མའི་ཚུལ་གྱིས་མའི་མངལ་དུ་ཆགས་པ་ལས་མིང་དང་གཟུགས་སུ་གྱུར་བའོ། །རྣམ་པར་ཤེས་པ་མན་ཆད་ད་ལྟའི་ཚེ་སྟེ། དེ་ཡན་ཆད་གསུམ་ནི་ [26a.6]འཕེན་པའི་ཡན་ལག་གོ། །དེའི་རྐྱེན་གྱིས་མིང་དང་གཟུགས་ཏེ་ཅིའི་ཕྱིར་ན། བརྟེན་པས་ན་མིང་དང་གཟུགས་ཞེས་བྱ་སྟེ། དཔེར་ན་ཤིང་གསུམ་རྩེ་སྤྲད་ན་མདུང་ཁྱིམ་དུ་རུང་བ་དང་འདྲ་བའི་མིང་བཞིའི་ཕུང་པོ་དང་གཟུགས་ཀྱི་ཕུང་པོ་གཉིས་ཀྱང་གཅིག་ལ་གཅིག་བརྟེན་པས་ན་མིང་དང་གཟུགས་ཞེས་བྱ་སྟེ། [26a.7]རྣམ་པར་ཤེས་པ་མའི་མངལ་དུ་འོངས་ནས་མིང་བཞིའི་ཕུང་པོ་དང་གཟུགས་ཀྱི་ཕུང་པོ་མེར་མེར་པོ་དང་། ནུར་ནུར་པོ་དང་། གོར་གོར་པོ་དང་། ཡན་ལག་ཏུ་གྱུར། འཕྲད་འགྱུར་ལ་སོགས་པ་མངལ་གྱི་ཆོས་དྲུག་དང་ལྡན་ནོ། །དེའི་རྐྱེན་གྱིས་སྐྱེ་མཆེད་དྲུག་འབྱུང་སྟེ། སེམས་དང་སེམས་ [26b] [26b.1]ལས་བྱུང་བ་རྣམས་སྐྱེ་བའམ་འབྱུང་བའི་སྒོ་བྱེད་པས་སྒོ་ཞེས་བྱ་སྟེ། དངོས་སུ་ན་མིང་དང་གཟུགས་མེར་མེར་པོ་ལ་སོགས་པ་བརྟན་ནས་དེའི་རྐྱེན་གྱིས་ནང་གི་དབང་པོ་དྲུག་དོད་པ་ལས་ཡུལ་དྲུག་ལ་རྣམ་ཤེས་སྐྱེ་ཤིང་མཆེད་པས་སོ། །རྣམ་པར་ཤེས་པའི་རྐྱེན་གྱིས་རེག་པ་ཞེས་བྱ་སྟེ། ཡུལ་དང་དབང་ [26b.2]པོ་དང་རྣམ་པར་ཤེས་པ་འདུས་པས་ཡུལ་ཡིད་དུ་འོང་བ་དང་། མི་འོང་བ་དང་། གཉི་ག་མ་ཡིན་པ་དང་གང་དང་གང་ལ་རེག་པའི་རྒྱུ་ཚོར་བ་ཞེས་བྱ་སྟེ། རེག་པ་འབྱུང་བའི་རྒྱུ་ཚོར་བ་སྟེ་ཉམས་སུ་མྱོང་བའོ། །འདི་མན་ཆད་བཞི་ནི་འཕངས་པའི་ལམ་གྱི་ཡན་ལག་གོ། །ཚོར་བའི་རྐྱེན་གྱིས་ [26b.3]སྲེད་པ་འབྱུང་སྟེ། ཅིའི་ཕྱིར་ན་སྐོམ་པའི་ཕྱིར་ན་སྲེད་པ་ཞེས་བྱ་སྟེ། སྐོམ་གྱིས་གདུངས་པ་དང་འདྲ་བར་ཚོར་བ་སྡུག་བསྔལ་དང་བྲལ་ནས་བདེ་བ་དང་ཕྲད་པར་འདོད་པས་སྲེད་པའོ། །བདེ་བ་ཚོར་བའི་རྐྱེན་གྱིས་སྲེད་པ་ཆང་འཐུང་སྟེ། ཡང་དང་ཡང་དུ་འདོད་པའི་ཕྱིར་སྲེད་པའོ། །འདི་ཀུན་ [26b.4]གྱི་རྩ་བ་ནི་མ་རིག་པ་ལས་བྱུང་བའོ། །སྲིད་པ་སྲེད་པ་ལེན་པ་གསུམ་ད་ལྟར་གྱི་ཚེ་དང་སྦྱར་རོ། །སྲེད་པའི་རྐྱེན་གྱིས་ལེན་པ་འབྱུང་སྟེ། ཅིའི་ཕྱིར་ཞེ་ན། ཉེ་བར་ལེན་པའི་ཕྱིར་ལེན་པ་ཞེས་བྱ་སྟེ། ལེན་པ་ལ་བཞི་སྟེ་འདོད་པའི་ལེན་པ་དང་། ལྟ་བའི་ལེན་པ་དང་ཚུལ་ཁྲིམས་དང་བརྟུལ་ [26b.5]ཞུགས་བསྙེམས་པའི་ལེན་པ་དང་། བདག་ཏུ་ལྟ་བའི་ལེན་པའོ། །སྲིད་པའི་རྒྱུ་ཡང་དང་ཡང་དུ་ལེན་པར་བྱེད་དེ། འདི་ཡང་རྩ་བ་མ་རིག་པའོ། །ལེན་པའི་རྐྱེན་གྱིས་སྲིད་པ་འབྱུང་སྟེ། དེ་ཅིའི་ཕྱིར་ཞེ་ན། སྲིད་པར་སྐྱེ་བའི་ཕྱིར་སྲིད་པ་ཞེས་བྱ་སྟེ། ཁམས་གསུམ་དུ་སྐྱེ་བའི་ཕྱིར་རོ། ། [26b.6]དེར་སྐྱེ་བའི་རྒྱུ་ལས་དང་ཉོན་མོངས་པའི་བག་ཆགས་བརྟས་ནས་ཚེ་ཕྱི་མའི་སྐྱེ་བ་ནི་སྲེད་པ་ཞེས་བྱ་སྟེ། ལེན་པའི་རྒྱུ་ལས་དགེ་བ་དང་། མི་དགེ་བ་བསགས་པས་ཚེ་ཕྱི་མ་ལེན་པས་སྲིད་པའོ། །འདི་མན་ཆད་གསུམ་ནི་གྲུབ་པའི་ཡན་ལག་གོ། །སྲིད་པའི་རྐྱེན་གྱིས་སྐྱེ་བ་སྟེ། ཅིའི་ཕྱིར་ཞེ་ན། ཕུང་པོ་ [26b.7]འབྱུང་བའི་ཕྱིར་སྐྱེ་བ་ཞེས་བྱ་སྟེ། ལམ་རྒྱུད་ལྔ་ཉིད་དུ་ལྟ་དང་མི་ལ་སོགས་པའི་ལུས་ཀྱི་ཕུང་པོ་སྔོན་མེད་པ་འབྱུང་བས་ན་སྐྱེ་བའོ། །དེ་ཡང་སྲིད་པར་སྐྱེ་བའི་ལས་བྱས་པའི་རྒྱུས་སྐྱེ་བའོ། །སྐྱེ་བའི་རྐྱེན་གྱིས་རྒ་ཤི་འབྱུང་སྟེ། ཅིའི་ཕྱིར་རྒས་པ་ཞེ་ན། ཕུང་པོ་སྨིན་པའི་ཕྱིར་རྒས་པ་ཞེས་བྱ་སྟེ། [27a] [27a.1]དཔེར་ན་ཤིང་ཐོག་སྨིན་པ་དེ་རྒས་པ་དང་འདྲ་བར་སྐྲ་དཀར་དང་གཉེར་མ་ཅན་དུ་གྱུར་ཏེ། ལུས་ནི་བཤང་ཁུང་བཞིན་དུ་སོང་། །ཁ་བྲག་ཕུག་སྟོང་པ་དང་འདྲ། སྐྲ་སྤྲ་བའི་མེ་ཏོག་དང་འདྲ། དཔྲལ་བ་དྲས་སྟན་རྙིང་པ་དང་འདྲ་བར་སོང་བ་ནི་རྒས་པའོ། །རྒས་པའི་རྐྱེན་གྱིས་འཆི་བ་འབྱུང་སྟེ། ཅིའི་ [27a.2]ཕྱིར་ཞེ་ན། འཇིག་པའི་ཕྱིར་འཆི་བ་ཞེས་བྱ་སྟེ། ལུས་ཀྱི་ཕུང་པོ་གནས་པའི་དུས་ཟད་དེ་དྲོད་དང་རྣམ་པར་ཤེས་པས་བཏང་བའི་ཕྱིར་ཤི་བའོ། །སྐྱེ་བ་ཡོང་ན་རྒ་ཤི་འབྱུང་ངོ་། །སྐྱེ་བ་དང་རྒ་ཤི་གཉིས་ཏེ་གསུམ་ནི་ཚེ་ཕྱི་མ་དང་སྦྱར་རོ། །རྒས་པ་དང་ཤི་བ་གཉིས་ནི་ཉེས་དམིགས་ཀྱི་ཡན་ལག་ [27a.3]གོ། །རྟེན་འབྲེལ་བཅུ་གཉིས་དུམ་བུ་ལྔས་འཆད་དེ། ཚེ་སྔ་མའི་རྒྱུའི་སྒོ་ནས་གཞག་གོ། །ད་ལྟར་གྱི་ཚེ་ནི་རྒྱུ་དང་འབྲས་བུ་གཉིས་ཀའི་སྒོ་ནས་གཞག་གོ། །དེ་ལྟར་ཅིའི་ཕྱིར་བསྟན་ཅེ་ན། དེ་ཡང་ཚེ་སྔ་མའི་རྒྱུས་འདི་བསྐྱེད། འདིའི་རྒྱུས་ཕྱི་མ་སྐྱེད་པའོ། །དེ་ལྟར་ཡན་ལག་བཅུ་ [27a.4]གཉིས་ལུགས་སུ་འབྱུང་བ་ནི་འཇུག་རྒ་ཤི་འབྱུང་། ཅི་ལས་བྱུང་རྩད་བཅད་པས་སྐྱེ་བ་ལས་བྱུང་། དེ་ནས་ཁད་ཀྱིས་གཅིག་གི་རྐྱེན་གྱིས་གཅིག་བསྐྱེད་དེ། མཇུག་མ་རིག་པ་ལ་རྩ་བ་ཐུག་པ་དང་། མ་རིག་པ་དེ་ཡང་མེད་པར་འགགས་པ་མ་ཡིན་ཏེ། མ་ཡིན་པའམ་མི་དམིགས་པར་ [27a.5]འགགས་པས་འདུ་བྱེད་ནས་རྒ་ཤིའི་བར་དུ་འགགས་ཏེ། ལུགས་ལས་བཟློག་པར་ཤེས་པར་བསྒོམ་པར་བྱའོ། །དེ་ལྟར་བདག་གིས་འདི་བྱས་པ་རང་བཟོ་ལྟ་བུ་མ་ཡིན་ཏེ། ཡན་ལག་བཅུ་གཉིས་སྲིད་རྩ་བཏོན། །དག་པ་རྣམ་པ་བཅུ་གཉིས་འཆང་། །ཞེས་གསུངས་ [27a.6]པ་ལ་བརྟེན་ནས་བྱས་པའོ། །སློབ་དཔོན་འཇམ་དཔལ་བཤེས་གཉེན་གྱིས་མཛད་པ། མཚན་ཡང་དག་པར་བརྗོད་པའི་སྒོ་ནས་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་བསྒོམ་པའི་མན་ངག་རྫོགས་སོ།། {T2567}༄༅༅། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ [27a.7]ལོ། །མཚན་ཡང་དག་པར་བརྗོད་པའི་སྒོ་ནས་དབང་པོ་རབ་ཀྱིས་དེ་ཁོ་ན་ཉིད་བསྒོམ་པ་ནི། ལྷར་བསྐྱེད་པ་སྟོང་པ་ཉིད་བཅུག་ནས་སེམས་རང་བཞིན་གྱིས་རྣམ་པར་དག་པ་འོད་གསལ་བ་རྒྱུ་གང་གིས་ཀྱང་མ་བསྐྱེད་པས། རྐྱེན་གང་གིས་ཀྱང་མི་འཇིག །ཞེ་འདོད་ཐམས་ཅད་དང་ [27b] [27b.1]བྲལ་བའི་སྟོང་པའི་རྒྱས་ཐེབས་པའི་ཤེས་པ་དེ་ཁོ་ན་ལ་གནས་པ་ནི་ཆོས་ཀྱི་སྐུའོ། །ཤེས་པའི་ངོ་བོ་མ་གྲུབ་ཅིང་རིག་པ་རང་གསལ་གྱི་ཉམས་མྱོང་དང་མ་བྲལ་བ་ནི་ལོངས་སྤྱོད་རྫོགས་པའི་སྐུའོ། །ཤེས་པ་གསལ་བ་དེ་ཉིད་སྣང་ལ་རང་བཞིན་མེད་པས་སྤྲུལ་པའི་སྐུའོ། །རྒྱུའི་གནས་སྐབས་སུ་སྐུ་གསུམ་དབྱེར་ [27b.2]མེད་བསྒོམས་པས་འབྲས་བུ་སྐུ་གསུམ་ཐོབ་སྟེ། སྤངས་པ་དང་ཡེ་ཤེས་ཕུན་སུམ་ཚོགས་པ་ཆོས་ཀྱི་སྐུ། ས་བཅུའི་བྱང་ཆུབ་སེམས་དཔའ་ལ་མཚན་དང་དཔེ་བྱད་དུ་ལྡན་པ་ལོངས་སྤྱོད་རྫོགས་པའི་སྐུ། རིགས་དྲུག་གི་སེམས་ཅན་གྱི་སྣང་བ་སྤྲུལ་པའི་སྐུ་ཡིན་ཏེ། འབྲས་བུ་སྐུ་གསུམ་ཐོབ་པའོ། །དབང་པོ་རབ་ཀྱིས་ [27b.3]དེ་ཁོ་ན་ཉིད་བསྒོམ་པ་སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། {T2568}༄༅༅། །རྒྱ་གར་སྐད་དུ། མཉྫུ་ཤྲཱི་ནཱ་མ་སངྒཱི་ཏི་བོ་དྷི་མ་ཧཱ་ཤ་རཱི་རཾ་བི་དྷི་ནཱ་མ། བོད་སྐད་དུ། འཇམ་དཔལ་གྱི་མཚན་ཡང་དག་པར་བརྗོད་པའི་བྱང་ཆུབ་ཆེན་པོའི་སྐུ་གདུང་གི་ཆོ་ག་ཞེས་བྱ་བ། སངས་ [27b.4]རྒྱས་དང་བྱང་ཆུབ་སེམས་དཔའ་ཐམས་ཅད་དང་། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དད་པ་ཅན་གང་ཞིག་གིས་མཆོད་རྟེན་བྱེད་པར་འདོད་པས་ས་ཆོག་ཚུལ་དང་མཐུན་པར་བྱ། སྲོག་ཆགས་མེད་པའི་ས་ལེགས་པར་བླངས་ཏེ། རིན་པོ་ཆེའི་ཕྱེ་མ་ཡང་མང་དུ་བཏབ་ནས། དྲི་ཞིམ་པོའི་ [27b.5]ཆུས་བྲན་ཏེ། བདག་ཉིད་སངས་རྒྱས་ཀྱི་ང་རྒྱལ་དང་ལྡན་པས་འཇིམ་པའི་གོང་བུ་དེ་འོད་ཀྱི་ཕུང་པོར་བྱས་ཏེ། འོད་ཕུང་དེ་ཉིད་དྷཱིཿསེར་པོ་ལས་དང་པོའི་སངས་རྒྱས་ཞལ་ལྔ་ཕྱག་བརྒྱད་པར་བསམས་ཏེ། ཡེ་ཤེས་སེམས་དཔའི་སྐུའི་ཕྲེང་བའི་སྔགས་ལ་རྡོ་རྗེ་བསྡུ་བ་དང་བཅས་པས་རིག་སྔགས་ཀྱིས་སངས་ [27b.6]རྒྱས་འཁོར་དང་བཅས་པ་བསྡུས་ཏེ། བྱོན་པ་ཐམས་ཅད་དང་པོའི་སངས་རྒྱས་ཀྱི་ཞལ་ལྔ་པོ་དེ་ཉིད་དུ་ཐམས་ཅད་ཐིམ་པར་བྱས་ཏེ། དེ་ལ་ཐུགས་ཀ་ནས་སྤྲུལ་པའི་མཆོད་པས་ཡང་དག་པར་མཆོད་ལ། འོད་ཁ་དོག་ལྔའི་ཕུང་པོ་འཇའ་ཚོན་ལྟ་བུར་མོས་པ་བྱས་ལ། དེ་ལ་འབི་འབི་བྱ་ཞིང་སྐོལ་ཕོར་ཆོས་ [27b.7]ཀྱི་འབྱུང་གནས་སུ་བསམས་ཏེ། དེ་བཞིན་གཤེགས་པ་ཐམས་ཅད་འགྲུབ་པར་བྱེད་པའི་ཡེ་ཤེས་སེམས་དཔའི་སྐུའི་ཕྲེང་བའི་སྔགས་འདི་ཟློས་ཤིང་གདབ་བོ། །ཨོཾ་ཨ་ཨཱཿ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་ཝཱན་ཛྙཱ་ན་མཱུརྟྟི། ཝཱ་གཱི་ཤྭ་ར་མ་ཧཱ་ཝ་ཙ། སརྦ་དྷརྨཱ་ག་ག་ན། ཨ་མ་ལ་ [28a] [28a.1]སུ་པ་རི་ཤུདྡྷ་དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿ ཞེས་བཟླས་ཤིང་སྐོལ་ཕོར་ནས་གདོན་པ་དང་། ཕྱི་གཞལ་ཡས་ཁང་དུ་རྫོགས་པ་ལ་ནང་དཀྱིལ་འཁོར་གྱི་འཁོར་ལོ་རིགས་ཐམས་ཅད་བསྡུས་པ་ལ་ལྷ་དྲུག་ཅུ་རྩ་གསུམ་གྲུབ་པར་བྱས་ལ་བཞུགས་པར་བསམས་ཏེ། སྙིང་གའི་འོད་ཟེར་གྱིས་དེ་ [28a.2]དང་མཐུན་པའི་སངས་རྒྱས་སྤྱན་དྲངས་ཏེ་བཅུག་ལ་ཡང་དག་པར་མཆོད་དེ། ལྷག་པ་དང་མ་ཚང་བ་ཁ་བསྐང་པའི་ཕྱིར་ཡི་གེ་བརྒྱ་པ་གདོན་པར་བྱའོ། །སྔགས་འདིས་རབ་ཏུ་གནས་པར་བྱས་ཏེ། ཡེ་དྷརྨཱ་ཧེ་ཏུ་པྲ་བྷཱ་བ་ཧེ་ཏུནྟེ་ཥཱན་ཏཱ་ཐཱ་ག་ཏོ་ཧྱ་བ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མ་ཧཱ་ཤྲ་མ་ཎཿ ། དེ་ཡང་ [28a.3]བཀྲ་ཤིས་པར་བྱ་བའི་ཕྱིར་སྔགས་འདི་བརྗོད་པར་བྱ་སྟེ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སརྦ་ཨརྠ་སིདྡྷ་ལོ་ཙ་ན་ཡེ་སྭཱ་ཧཱ་ཞེས་བཟླས་སོ། །སྔགས་འདིས་ས་དཀར་བྱུག་པར་བྱའོ། །ཨོཾ་ཨ་ར་ཛེ་བི་ར་ཛེ་སྭཱ་ཧཱ། ཞེས་བརྗོད་དོ་ཨོཾ་ཨརྱ་ཡེ་སྭཱ་ཧཱ། ཞེས་པས་བྲེ་གཟུགས་སོ། །ཨོཾ་ཙཀྲ་བརྟ་ན་ཡེ་སྭཱ་ཧཱ། ཞེས་པས་འཁོར་ [28a.4]ལོ་གཟུགས་སོ། །ཨོཾཙྪ་ཏྲ་ནེེ་ར་ཡ་སྭཱ་ཧཱ་ཞེས་པས་གདུགས་དབུལ་ལོ། །ཨོཾ་ཀུཾ་བི་ར་དྷྭ་ཛ་ཡེ་སྭཱ་ཧཱ་ཞེས་པས་རྒྱལ་མཚན་ནམ་ཏོག་གཞག་གོ། །ཨོཾ་བཱ་ཏ་ཀ་ཏ་ཛ་ཡེ་སྭཱ་ཧཱ་ཞེས་པས་བ་དན་ཕྱར་རོ། །ཨོཾ་པ་ཊ་དཱ་མ་ཡེ་སྭཱ་ཧཱཿཞེས་པས་དར་དཔྱངས་གདགས་སོ། །ཨོཾ་པུཥྤ་མཱ་ལ་ཡེ་སྭཱ་ཧཱ་ཞེས་པས་མེ་ཏོག་གི་ཕྲེང་བ་ [28a.5]གདགས་སོ། །དེ་ལྟར་རྫོགས་པར་བྱས་ནས་སླར་ཡང་མཆོད་པས་ཡང་དག་པར་མཆོད་དོ། །བཀྲ་ཤིས་བརྗོད་ལ་བརྟན་པར་བཞུགས་སུ་གསོལ་ལོ། །དད་ཅན་རྣམས་ལ་ཕན་པའི་ཕྱིར། །ཚ་ཚའི་ཆོ་ག་འདི་བྱས་པས། །དེ་ལས་བྱུང་བའི་དགེ་བ་དེས། །འགྲོ་བ་རྫོགས་པའི་སངས་རྒྱས་ཤོག། །སློབ་དཔོན་ [28a.6]འཇམ་དཔལ་བཤེས་གཉེན་གྱིས་མཛད་པ། མཚན་ཡང་དག་པར་བརྗོད་པའི་ཚ་ཚའི་ཆོ་ག་རྫོགས་སོ།། {T2569}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སངྒཱི་ཏི་ཧོ་མ་བི་དྷི་སཾ་གྲ་ཧ་ཏ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྦྱིན་སྲེག་གི་ཆོ་ག་བསྡུས་ [28a.7]པ་ཞེས་བྱ་བ། འཇམ་དཔལ་ཡེ་ཤེས་སེམས་དཔལ་ལ་ཕྱག་འཚལ་ལོ། །དེ་ལ་དང་པོ་སྔགས་པ་ནི། །རང་ལུས་འཇིག་ཀྱང་གཞན་ཕན་བརྩོན། །རྙེད་དང་བཀུར་སྟི་ལ་མ་ཆགས། །སེམས་ཅན་དོན་དུ་སྦྱིན་སྲེག་བྱ། །དང་པོ་སའི་ཆོ་ག་དང་སྟ་གོན་གྱི་ཆོ་ག་བྱས་ལ། ཡིད་དུ་ [28b] [28b.1]འོང་བའི་སའི་ཆར་ཐིག་བཏབ་ལ། དཀྱིལ་འཁོར་གྱི་དབུས་སུ་ཐག་བུང་ཁྲུ་གང་བ། ཟབས་སུ་དེའི་ཕྱེད་ལ། ཁ་ཁྱེར་སོར་བཞི་ཕྱིར་དོར་བ། དེའི་སྟེང་དུ་སོར་བཞི་བའི་ཁ་ཁྱེར་གྱིས་བསྐོར་བ། ནང་དུ་པདྨ་དང་རྡོ་རྗེས་མཚན་པ། བྱུག་པ་དྲི་ཞིམ་པོ་དང་། མེ་ཏོག་དཀར་པོས་བརྒྱན་པ། མཚམས་ [28b.2]སུ་རྡོ་རྗེ་རྩེ་གསུམ་པ་དང་། ཁ་ཁྱེར་ལ་ཀུ་ཤ་དགྲམ་པར་བྱའོ། །ཤིན་ཏུ་སར་པའི་རས་ཀྱིས་གཡོགས་པར་བྱའོ། །དེ་ནས་མཆོད་རྫས་དང་སྲེག་རྫས་དང་། ཡམ་ཤིང་དང་བུད་ཤིང་དང་། དགང་གཟར་དང་བླུགས་གཟར་རྣམས་བཤམས་ཏེ། མཆོད་རྫས་ནི་གཡོན་དུ་གཞག། །སྲེག་རྫས་ནི་ [28b.3]གཡས་སུ་གཞག་གོ། །དེ་ནས་ཁྲུས་དང་བྱུག་པ་བྱས་ལ་སྟོད་གཡོགས་དང་སྨད་གཡོགས་དང་། རྒྱན་ཐམས་ཅད་གོན་ཏེ། སྲོད་ལ་པདྨའི་འདུག་སྟངས་ཀྱིས་ཁ་ཤར་དུ་བལྟས་ཏེ་བློས་བསྒྲུབ་པར་བྱ་བ་དེ་དམིགས་ཏེ། ལས་རྣམས་བརྩམ་པར་བྱའོ། །དེ་ནས་ལྕེ་ལག་བྱིན་གྱིས་བརླབས་ཏེ། [28b.4]སྐད་ཅིག་མའི་ཏིང་ངེ་འཛིན་གྱི་ཧཱུཾ་མཛད་ཀྱི་སྦྱོར་བས་ར་བ་དང་དྲཱ་བ་དང་བགེགས་བསྐྲད་པར་བྱའོ། །རྡོ་རྗེ་འཁོར་ལོའི་ཕྱག་རྒྱ་དང་བཛྲ་ཙཀྲ་བྱ་བ་འདིས་དེ་བཞིན་གཤེགས་པ་ཐམས་ཅད་མངོན་སུམ་ལྟ་བུར་དམིགས་ཏེ། ཕྱག་རྒྱ་བཞི་བྱས་ལ་རང་རང་གི་སྔགས་དང་ཕྱག་རྒྱས་མཆོད་པ་བྱིན་གྱིས་བརླབས་ཏེ། ཐུན་ [28b.5]མོང་གི་མཆོད་པ་ལྔ་དང་། ཁྱད་པར་སྒེག་མོ་ལ་སོགས་པའི་མཆོད་པ་བརྒྱད་དང་། མཆོད་པ་ཉི་ཤུས་ཀྱང་ཡང་དག་པར་མཆོད་དེ། སྡོམ་པ་གཟུང་བའི་བར་དུ་རྫོགས་པར་བྱའོ། །དེ་ནས་གཤེགས་སུ་གསོལ་ལོ། །དེ་ནས་བདག་ཉིད་ཀྱིས་རྡོ་རྗེ་གནོད་སྦྱིན་གྱི་སྔགས། ཨོཾ་ [28b.6]བཛྲ་ཡཀྵ་ཧཱུཾ། ཞེས་བྱ་བས་བགེགས་བསལ་བར་བྱའོ། །བཛྲ་ཤི་ཁ་རེ་རུ་ཊ་མ་ཊ་ཞེས་བྱ་བས་རྡོ་རྗེ་རྩེ་མོའི་སྔགས་ཀྱིས་བདག་དང་ཐབ་དང་རྫས་དང་མཆོད་པ་རྣམས་བསང་བར་བྱའོ། །དེ་ནས་བདག་ཉིད་འདོད་པའི་ལྷར་བསྐྱེད་དེ། སྙིང་གའི་འོད་ཟེར་གྱིས་ཡེ་ཤེས་སེམས་དཔའ་རང་དང་འདྲ་བ་མདུན་དུ་ [28b.7]སྤྱན་དྲངས་ལ་ཕྱག་དང་མཆོད་པ་བྱས་ཏེ། སྙིང་གའི་འོད་ཟེར་གྱིས་བདག་ཉིད་གཉིས་སུ་མེད་པར་བྱས་ཏེ་ཕྱག་རྒྱ་ཆེན་པོ་བཞིས་རྒྱས་བཏབ་ལ་དབང་བསྐུར་བ་ཡང་བླང་ངོ་། །དེ་ནས་སྙིང་གའི་འོད་ཟེར་གྱིས་ཐབ་ཁུང་མི་དམིགས་པར་བྱས་ལ་མུཾ་ལས་དཀར་བ་དང་འཚེར་བ་དང་རྣམ་པ་ཐམས་ [29a] [29a.1]ཅད་དང་ལྡན་པའི་ཤིན་ཏུ་ཆེ་བའི་ཐབ་བསྐྱེད་དོ། །དེ་ཡང་ཕྱི་རོལ་གཞལ་ཡས་ཁང་རྒྱན་དང་ལྡན་པའི་ནང་དུ་ཆུད་པའོ། །དེ་ཡང་འོ་མ་ཅན་གྱི་ཤིང་གི་བུད་ཤིང་ངམ། དགོན་པའི་བ་ལང་གི་ལྕི་བས་ཐབ་བས་ཅུང་ཟད་དམའ་བ་ཙམ་གྱི་བུད་ཤིང་བརྩིགས་ལ་རྒྱུན་བཞག་གི་མེ་འམ། [29a.2]ཡོན་བདག་དཀའ་ཐུབ་ལ་དགའ་བའི་ཁྱིམ་ནས་བླངས་པའི་མེ་ཡམ་ཤིང་གིས་སྤར་ཏེ། རླུང་ཡབ་ཀྱིས་གཡབ་ཅིང་། བཛྲ་ཛྭ་ལ་རཾ་ཞེས་མེའི་སྙིང་པོ་ཡང་བརྗོད་དོ། དེ་ནས་མེའི་སྤྲ་བརྟག་སྟེ། དགང་གཟར་དང་བླུགས་གཟར་ལ་རང་གི་ཆོས་ཀྱི་ཡི་གེར་བཀོད་དེ། ཨོཾ་ཝཱ་གཱི་ཤྭ་རི་མུཾ། ཞེས་སྙིང་པོ་བཟླས་ [29a.3]ཏེ། ཤིན་ཏུ་གང་བའི་མར་གྱིས་དགང་བླུགས་དང་སྲེག་བླུགས་སྦྱིན་ནོ། །དེ་ནས་རྟགས་བཟང་པོ་མཐོང་བ་དང་། དེ་ནས་མེ་ཐབ་ཏུ་རཾ་སུམ་མདོ་རིས་མཚན་ཅན་ལ། ཨ་ལས་པདྨའི་གདན། དེའི་སྟེང་དུ་བཾ་ལས་ཆུའི་དཀྱིལ་འཁོར། ཨ་ལས་འོད་ཀྱི་དཀྱིལ་འཁོར། དེའི་སྟེང་དུ་རཾ་དཀར་པོ་ལས་མེ་ལྷ་ཞི་བ་ [29a.4]དུང་དང་ཀུ་མུ་ད་ལྟར་དཀར་བ། མིག་གཉིས་པ་རལ་བའི་ཐོར་ཚུགས་དང་བཅས་པ་ཕྱག་བཞི་པ་སྐྱབས་སྦྱིན་དང་། དབྱུག་ཏོ་དང་། བགྲང་ཕྲེང་དང་། གུནྡྷེ་རྣམས་གཡས་དང་གཡོན་ན་འཛིན་པའོ། །མཆོད་ཕྱིར་ཐོགས་དང་རྒྱན་ཐམས་ཅད་ཀྱིས་བརྒྱན་པའོ། །རྡོ་རྗེའི་སྐྱིལ་ཀྲུང་གིས་བཞུགས་པ། [29a.5]རིན་པོ་ཆེས་དབུ་བརྒྱན་པ། བ་སྤུའི་བུ་ག་ཐམས་ཅད་ནས་བདུད་རྩིའི་ཆུ་རྒྱུན་འཛག་ཅིང་ཤིན་ཏུ་ཞི་བའོ། །དེ་ནས་ཕྱོགས་སྐྱོང་དང་། སྤྲུལ་པའི་མེ་བདེ་བར་བྱས་ཏེ། ལག་པ་གཡས་སྐྱབས་སྦྱིན་དུ་བཞག་ལ། མཐེ་བོ་སྲིན་ལག་གི་རྩར་གཡབ་ཅིང་། ཨེ་ཧྱེ་ཧི་བྷ་ག་བཱན་ཨགྣི་བྷ་བ་ཨཾ་ཀུ་ཤ་ཛཿ [29a.6]སྙིང་གའི་འོད་ཟེར་གྱིས་སྤྱན་དྲངས་ལ་ཕྱག་བཙལ་བ་དང་། མཆོད་པ་དང་བསྟོད་པ་བྱ་སྟེ། སྙིང་གའི་འོད་ཟེར་གྱིས་གཉིས་སུ་མེད་པར་བྱའོ། །དེ་ནས་ཕྱག་རྒྱ་བཞིས་གདབ་པར་བྱ་སྟེ། རྡོ་རྗེ་རིན་ཆེན་གྱི་ཕྱག་རྒྱ་དང་། བཛྲ་རཏྣ་ཨ་བྷི་ཥིཉྩ་ཞེས་བྱ་བས་དབང་བསྐུར་བར་བྱའོ། །དེ་ནས་རྫས་ཐམས་ཅད་ [29a.7]བསགས་ནས་སྙིང་གའི་འོད་ཟེར་དང་ཡེ་ཤེས་ཀྱི་བདུད་རྩིས་རྫས་ཐམས་ཅད་བྱིན་གྱིས་བརླབས་ཏེ། དགང་གཟར་དང་བླུགས་གཟར་ཐོགས་ཏེ། བྱམས་པའི་སེམས་ཀྱིས་ཨགྣ་ཡེ་བྷ་བ་ཆེ་གེ་མོའི་སྡིག་པ་སརྦ་པཱ་པཾ་ད་ཧ་ན་བཛྲཱ་ཡ་ཤཱནྟིཾ་ཀུ་རུ་ཡེ་སྭཱ་ཧཱ་ཞེས་པས་ཡམ་ཤིང་ནི་འོད་ཀྱི་དཀྱིལ་ [29b] [29b.1]འཁོར་དུའོ། །མར་མེ་ལ་སོགས་པ་ཞུ་བའི་རྫས་ཐམས་ཅད་ནི་ཞལ་ཅུང་ཟད་གདངས་པར་དབུལ་ལོ། །དེ་ནས་ཏིལ་དང་འབྲས་ཆན་ལ་སོགས་པ་ནི་ཕྱག་ཏུའོ། །མེ་ཏོག་ནི་དབུ་ལའོ། །དྲི་དང་བྱུག་པ་ནི་ཐུགས་ཀར་རོ། །ཀུ་ཤ་དང་དཱུར་བའི་མྱུ་གུ་ནི་འོད་ཀྱི་དཀྱིལ་དུའོ། །མཆོད་ཡོན་ནི་མདུན་དུའོ། ། [29b.2]ཞལ་བསིལ་ནི་ཕྱག་ཏུའོ། །དེ་ནས་སྡིག་པ་སྦྱར་བར་འདོད་ན་ལག་པ་གཡོན་པའི་མཐིལ་དུ་ཏིལ་ནག་པོ་ལ་སྡིག་པའི་གཟུགས་སུ་བྱ་སྟེ། འོད་ཟེར་གྱིས་སྡིག་པ་བསྡུས་ཏེ། བསྐུལ་ཚིག་དང་བཅས་པས་ཇི་སྲིད་བདེ་བ་ཐ་མཐོང་གི་བར་དུ་བསྲེག་པར་བྱའོ། །ནད་ཞི་བར་བྱེད་པ་རྣམས་ཀྱིས་ནི་སྙིང་ [29b.3]གའི་བྱ་ནག་པོ་ལ་འོད་ཟེར་བསྡུས་པའི་སྦྱོར་བ་བྱས་ནས་བསྡུས་ཏེ། བསྐུལ་ཚིག་དང་བཅས་པས་བསྲེགས་ན་ཞི་བར་འགྱུར་རོ། །ཡང་ན་སྙིང་གའི་འོད་ཟེར་གྱིས་བསྲེག་བྱ་ལེགས་པར་བསྐུལ་ཏེ། དེའི་འོད་ཟེར་གྱིས་ནད་བླངས་ལ་བདུད་རྩིའི་ཆུས་བཀྲུས་ཏེ་བསྐུལ་ཚིག་དང་བཅས་པས་བསྲེག་གོ། །ཚེ་སྤེལ་ [29b.4]བ་ལ་སོགས་པ་ཡང་ཚུལ་འདི་ཉིད་ཀྱིས་འགྲུབ་པར་བྱའོ། །དེ་ནས་ཞབས་བསིལ་ཕུལ་ལ་བསྟོད་དེ། ལས་དང་རྗེས་སུ་མཐུན་པའི་ཕྲིན་ལས་བཅོལ་ལ། མེ་རང་གི་གཟུགས་ཀྱིས་དེ་ཉིད་དུ་བཞུགས་སུ་གསོལ་ལོ། །དེ་ནས་ལས་ཐམས་ཅད་པའི་སྔགས་ཀྱིས་ཐབ་དང་རྫས་བསངས་ཏེ། མེ་ [29b.5]ཏོག་ཐབ་ཏུ་བོར་ལ་དེ་ལྟ་བུའི་ཐུགས་ཀར་པདྨ་དང་ཟླ་བའི་གདན་བསྐྱེད་ལ། དེའི་སྟེང་དུ་མུཾ་དམར་སྐྱ་དེ་བཞིན་གཤེགས་པ་ཐམས་ཅད་ཀྱི་འཕྲོ་འདུ་དང་བཅས་པ། དེ་ཡོངས་སུ་གྱུར་པ་ལས་རྗེ་བཙུན་འཇམ་དཔལ་སྐུ་མདོག་ཟླ་བ་ཉ་བ་ལྟ་བུ་རྡོ་རྗེའི་སྐྱིལ་ཀྲུང་གིས་བཞུགས་པའོ། །གཡས་ [29b.6]རལ་གྲི་དང་མདའ་བསྣམས་པ། །གཡོན་པོ་ཏི་དང་གཞུ་བསྣམས་པའོ། །སངས་རྒྱས་ལྔ་ཡིས་དབུ་བརྒྱན་པ། དེ་བཞིན་གཤེགས་པ་དང་བྱང་ཆུབ་སེམས་དཔའ་དང་ཁྲོ་བོ་དང་ཁྲོ་མོའི་ཚོགས་རྣམས་འདུས་ཤིང་འཕྲོ་བ་སྟེ། རྡོ་རྗེ་དང་རིན་པོ་ཆེ་དང་པདྨ་དང་། སྣ་ཚོགས་རྡོ་རྗེ་དང་ [29b.7]སྙིང་ག་དང་། མགྲིན་པ་དང་། དཔྲལ་བ་དང་། སྤྱི་བོ་རྣམས་སུ་བཀོད་པའི་ཡུམ་བཞིའི་ཕྱག་རྒྱས་བྱིན་གྱིས་བརླབ་པོ། །མཉྫུ་ཤྲཱི་ས་མ་ཡ་སྟྭཾ་ཧཾ། ཞེས་བརྗོད་དོ། །དེ་ནས་མདུན་གྱི་ནམ་མཁའི་ཕྱོགས་སུ་ཧྲཱིཿདང་ཨ་ལས་ཟླ་བའི་གདན་བསྐྱེད་དེ། སྙིང་གའི་འོད་ཟེར་ [30a] [30a.1]གྱིས་ཡེ་ཤེས་སེམས་དཔའ་དགུག་པ་དང་དབང་དུ་བྱ་བའི་བར་དུ་བྱའོ། །དེ་ནས་མངོན་སུམ་དང་འདྲ་བར་བལྟས་ཏེ། ཕྱག་བྱ་བ་སྔོན་དུ་འགྲོ་བས་མཆོད་པ་དང་བསྟོད་པ་བྱས་ཏེ། སྙིང་གའི་འོད་ཟེར་གྱིས་ཐབ་ཀྱི་གཟུགས་དང་གཉིས་སུ་མེད་པར་བསྲེ། དེ་ནས་རྡོ་རྗེ་བསྡུ་བའི་ཕྱག་ [30a.2]རྒྱ་བཅས་ཏེ། ས་མ་ཡ་ཛཿབསྡུ་བར་བྱའོ། །དེ་ནས་ཕྱག་རྒྱ་བཞིས་རྒྱས་གདབ་པར་བྱའོ། །དེ་ནས་ཨོཾ་ཝཱ་གཱི་ཤྭ་རི་མུཾ་མཉྫུ་ཤྲཱི་ཧཱུཾ། སརྦ་པཱ་བཾ་དཱ་ཧ་ན་བཛྲཱ་ཡ་ཆེ་གེ་མོ་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བྱ་བས་ཡམ་ཤིང་དང་མར་ལ་སོགས་པ་ཐམས་ཅད་དང་ཆོ་ག་གོང་མས་དབུལ་ལོ། །སྡིག་པ་སྦྱང་བ་ [30a.3]དང་ནད་སྦྱང་པ་ཡང་ཆོ་ག་གོང་མས་སོ། །དེ་ནས་གཟི་བརྗིད་བསྐྱེད་པའི་ཕྱིར་མར་གྱི་སྲེག་བླུགས་སྦྱིན་པར་བྱའོ། །ཚུལ་དེས་བརྒྱ་རྩ་ལ་སོགས་པ་དབུལ་བར་བྱའོ། །དེ་ནས་ཞལ་བསིལ་ཏེ། ཡང་དག་པར་མཆོད་པ་དང་། འདུད་ཉི་ཤུས་བསྟོད་དོ། །དེ་ནས་དགེ་བ་བསྔོ་སྟེ། ལས་དང་རྗེས་ [30a.4]སུ་མཐུན་པའི་སྨོན་ལམ་བཏབ་སྟེ། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །ཅེས་པ་ལ་སོགས་པས་ཡེ་ཤེས་སེམས་དཔའ་གཤེགས་སུ་གསོལ། །དམ་ཚིག་སེམས་དཔའ་བདག་ལ་བསྡུའོ། །དེ་ནས་རྫས་ཐམས་ཅད་བསངས་ཏེ་མེ་རང་གི་གཟུགས་སུ་བསམ་པར་བྱས་ཏེ། [30a.5]ཆོ་ག་གོང་མ་ཉིད་ཀྱིས་སྲེག་བླུགས་ལྷག་མ་སྦྱིན་ནོ། །དེ་ནས་མཆོད་པ་དང་བསྟོད་པ་དང་། བསྔོ་བ་དང་། སྨོན་ལམ་བྱ་སྟེ། ཨོཾ་ཨེ་ཧྱེ་ཧི་ཞེས་གཤེགས་སུ་གསོལ། །དམ་ཚིག་པ་བདག་ལ་བསྡུའོ། །ཨོཾ་ཨ་ཀཱ་རོ་མུ་ཁཾ་ཞེས་བྱ་བ་ལ་སོགས་པས་སྲེག་རྫས་ཀྱི་ལྷག་མ་བསྡུས་ཏེ། [30a.6]འབྱུང་པོ་ཐམས་ཅད་ལ་གཏོར་མ་སྦྱིན་ནོ། །ཆོ་ག་ཉམས་པ་དང་མ་ཚང་བ་ཁ་བསྐང་བའི་ཕྱིར་ཡི་གེ་བརྒྱ་བ་བརྗོད་པར་བྱའོ། །སྦྱིན་སྲེག་ལས་རྣམས་གསལ་བསྡུས་པས། །བདག་གིས་དགེ་བ་གང་ཐོབ་དེས། །མ་ལུས་སྡུག་བསྔལ་གྲོལ་གྱུར་ཏེ། །འགྲོ་ཀུན་འཇམ་དཔལ་ཐོབ་པར་ [30a.7]ཤོག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ། རྣལ་འབྱོར་སྤྱོད་པའི་ཚུལ་གྱི་སྤྱོད་པ་བསྡུས་པ་ལས། མཚན་ཡང་དག་པར་བརྗོད་པའི་སྦྱིན་སྲེག་གི་ཆོ་ག་བསྡུས་པ་རྫོགས་སོ།། །།རྒྱ་གར་གྱི་མཁན་པོ་སུ་བཛྲ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་ [30b] [30b.1]གཏན་ལ་ཕབ་པའོ། {T2570}༄། །མཉམ་པར་བཞག་པའི་རིམ་པའི་མན་ངག་བཞུགས། ༄༅༅། །འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་རྣལ་འབྱོར་བས། ནམ་གྱི་ཆ་སྨད་རང་གི་རྒྱུད་ལ་བརྟག་པ་ནི་རང་ཉིད་ལྷའི་ཕྱག་རྒྱ་ཆེན་པོར་ [30b.2]གསལ་བར་བྱས་ལ། སྣང་བ་ཐམས་ཅད་དཀྱིལ་འཁོར་ལ་བསྡུས་ཏེ། དཀྱིལ་འཁོར་ཡང་རིགས་ཀྱི་དཀྱིལ་འཁོར་རྣམས་གཙོ་བོ་ལ་བསྡུས་ཏེ། གཙོ་བོ་ཡང་དང་པོའི་སངས་རྒྱས་ལ་བསྡུ། དེ་ཡང་ཤེས་རབ་འཁོར་ལོ་ལ་བསྡུ། དེ་ཡང་ཟླ་བ་ལ་དེ་ཡང་ཨ་ལ་བསྡུ། ཨ་ཡང་ནམ་མཁའི་ཁམས་སུ་འཕེལ་ཏེ། ཨ་ཨཱ་ཨི་ཨཱི་ཨུ་ཨཱུ། ཨེ་ཨཻ་ [30b.3]ཨོ་ཨཽ་ཨི་ཨཿཧཱུཾ་ཨོཾ་ཧྲཱིཿཨཿདེ་རྣམས་སུ་གྱུར་ཏེ། སྐར་མ་ལྟ་བུར་གསལ་བ་དང་། དེ་རྣམས་ཀྱང་གཅིག་ལ་གཅིག་ཐིམ་སྟེ། སྟོང་པ་ཆེན་པོ་ཡི་གེ་ལྔར་གནས་པ་དང་། དེའི་ངང་ལས་སྟོང་པ་ཆེན་པོ་ཡི་གེ་བརྒྱར་ལངས་པ་དང་། དེའི་ངང་ལས་ཡི་གེའི་ཕྲེང་བ་བཅུ་དྲུག་ཏུ་གྱུར་ཏེ་གནས། དེའི་ངང་ལས་ [30b.4]བརྒྱད་དུ་གནས། དེའི་ངང་ལས་ཡི་གེ་བཞིར་གྱུར་ཏེ་གནས་པ་ལས། བདག་གི་ལུས་སྒྱུ་མ་ལྟ་བུར་ལངས་ཏེ་འཁོར་ལོ་བཞི་དྲན་པར་བྱས་ལ། སྤྱི་བོར་ཨོཾ་དཀར་པོ་ཁ་ཐུར་དུ་འཕྱང་བ་དང་མགྲིན་པར་ཧྲཱིཿདམར་པོ་ཁ་གྱེན་དུ་གདེངས་པ་དང་། སྙིང་གར་ཧཱུཾ་སྔོན་པོ་མགོ་ཐུར་དུ་འཛག་པ་དང་། [30b.5]ལྟེ་བར་ཨ་དཀར་པོ་ཐིག་ལེ་དམར་པོ་འོད་ཟེར་གྱེན་དུ་འཕྲོ་བ་ལ་བལྟས་ལ། ཨ་དཀར་པོ་དེ་ལས་འོད་ཟེར་རྣོ་ལ་མྱུར་བ། དྲག་ལ་གྲིམས་པ། ཕྲ་ཞིང་རིང་བ་ཅིག་ལངས་པས་ཁྲག་གི་ཐིག་ལེ་ལ་འོད་ཟེར་ཕོག་པ་དང་། ཐིག་ལེ་ལས་འོད་ཟེར་ཕྲ་ལ་རིང་བ། རྣོ་ལ་མྱུར་བ། དམར་ལ་དང་བ། [30b.6]དྲང་ལ་གསལ་བ་ཅིག་སྤྱི་བོའི་ཨོཾ་གྱི་ཐིག་ལེ་དཀར་པོ་ལ་རེག་པར་གསལ་བ་དང་། ཨོཾ་དེ་ལས་ཡི་གེ་བརྒྱ་བའི་ཚུལ་དུ་བྱང་ཆུབ་ཀྱི་སེམས་བདེ་བའི་རང་བཞིན་ཐིག་ལེ་དཀར་པོའི་ཚུལ་དུ་ཁུ་འཕང་ལྟ་བུ་དཀར་ཙ་ར་ར་འབབ་པར་བསམས་ལ་རང་གི་ཁྲག་གི་ཐིག་ལེ་ལ་ཕོག་པ་དང་ལུས་ཐམས་ཅད་བདེ་བས་རྒྱས་ [30b.7]ཏེ་ཤིན་ཏུ་བདེ་བས་གང་བར་གྱུར་པ་དང་། དེ་ལ་སེམས་གཏད་པ་ནི་བདེ་བའི་ཏིང་ངེ་འཛིན་ཏེ། བཅུ་དྲུག་ཕྱེད་ཕྱེད་ཐིག་ལེ་ཅན། །ཞེས་བྱའོ། །དེ་ཡང་སྟོང་པ་ཉིད་དུ་ཤེས་པར་བྱས་ནས་བདེ་སྟོང་དབྱེར་མེད་དུ་བསྒོམ་མོ། །ཡན་ལག་མེད་པའི་རྩིས་ལས་འདས། །ཞེས་པ་དང་། ཐིག་ལེ་ [31a] [31a.1]སྟོང་པ་ཡི་གེ་བརྒྱ། །ཞེས་བྱ་སྟེ། དེ་ལྟ་བུའི་ངང་ལས་སྟོང་པ་འོད་གསལ་ཆོས་ཀྱི་སྐུར་ཐིམ་པ་ནི་མཉམ་གཞག་གི་ཚེ་རྣམ་རྟོག་གི་དབའ་རླབས་ཀྱིས་ཀྱང་བསྐྱོད་པ་མེད་པར་ནམ་མཁའ་ལ་སྤྲིན་དེངས་པའམ། མར་མེ་ལ་རླུང་གིས་མ་བསྐྱོད་པའམ་རྒྱ་མཚོ་དང་བ་ལ་རླུང་གིས་མ་བསྐྱོད་པ་ [31a.2]བཞིན་དུ་ཞེ་འདོད་ཐམས་ཅད་དང་བྲལ་བ། སྟོང་པའི་རྒྱས་ཐེབས་པ། འོད་གསལ་ཆོས་ཀྱི་སྐུ་ལ་ཙེན་ནེེ་ཡེར་རེ་ཝ་རེ་ཁྱུག་གེ་ལྡེམ་མེ་མེར་རེ་ཧ་རེ་ཕྱལ་ལེ། ཡིད་ལ་མི་བྱེད་ཐོམ་མེ། ཡོར་རེ་སིམ་མེ་ཏིང་ངེ་མུགས་སེ་ཐིབས་སེ། ཡིད་ལ་མི་བྱེད་སྤྲོས་བྲལ་མི་རྟོག་པ་གང་ཡིན་པ་དེ་འདིའོ་སྙམ་པ་མེད་པ་ [31a.3]ལྟ་བུ་མི་འགྱུར་བ་སོ་མ་རང་ཐག་ལྷུག་པ་ལྟ་བུ་ཡིན་ལ། སེམས་གསལ་ལ་རྟོག་པ་མེད་པ་འདིའོ་སྙམ་པ་དང་བྲལ་བའོ། །གཉིས་འཛིན་དང་གཉིས་འཛིན་མ་ཡིན་པའི་ཤེས་པ་གང་དང་ཡང་བྲལ་བའོ། །ཉོན་མོངས་པ་མཐའ་དག་འཇོམས་པ་རྡོ་རྗེ་ལྟ་བུའི་ཏིང་ངེ་འཛིན་ལ་མཉམ་པར་གཞག་གོ། །དེ་ [31a.4]ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་བརྒྱ་ལ་སྙོམས་པར་ཞུགས་པར་གྱུར་ཏེ། རྫོགས་པའི་སངས་རྒྱས་མངོན་སུམ་དུ་འགྱུར་རོ། །རྗེས་ཐོབ་ཀྱི་ཤེས་པ་ལ་ནི་སྟོང་པ་ཆེན་པོ་ཡི་གེ་ལྔར་གྱུར་པ་དང་། དེའི་ངང་ལས་སྟོང་པ་ཆེན་པོ་ཡི་གེ་བརྒྱར་ལངས་པ་དང་། དེའི་ངང་ལས་ [31a.5]ཡི་གེའི་ཕྲེང་བ་བཅུ་དྲུག་ཏུ་འགྱུར་ཏེ། གནས་པ་ལས་ནི་བར་སྣང་གི་ཁམས་སུ་ཨཱ་ལི་ཀཱ་ལིའི་ཕྲེང་བར་བལྟས་ལ། དེ་ལ་སྒྱུ་མ་ལྟ་བུའི་དཀྱིལ་འཁོར་གྱི་ལྷ་ཚོགས་སྤྲུལ་པར་བྱའོ། །སློབ་དཔོན་འཇམ་དཔལ་བཤེས་གཉེན་གྱིས་མཛད་པའི། འཕགས་པ་འཇམ་དཔལ་གྱི་མཚན་ཡང་ [31a.6]དག་པར་བརྗོད་པའི་མཉམ་པར་གཞག་པའི་རིམ་པའི་མན་ངག་རྫོགས་སོ། །རྒྱ་གར་གྱི་མཁན་པོ་སུ་བཛྲ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་བའོ།། ༄། །འཇམ་དཔལ་དཔའ་བོ་གཅིག་པའི་སྒྲུབ་ཐབས་བཞུགས།། {T2571}༄༅། །འཕགས་པ་འཇམ་དཔལ་ [31a.7]ལ་ཕྱག་འཚལ་ལོ། །སྐྱེ་བ་མི་ལུས་ཐོབ་པ་རྣམས། །མི་ལུས་ཐོབ་པ་ཤིན་ཏུ་དཀའ། །དེ་བས་དམ་ཆོས་རྙེད་པར་དཀའ། །དེས་ན་སྒྲུབ་ལ་བརྩོན་པར་བྱ། །སང་ཙམ་འཆིའམ་སུས་ཤེས་ན། །ད་ལྟ་ཉིད་དུ་བསྣུན་ཏེ་བྱ། །ཡིད་དགའ་བ་ཡི་གནས་དག་ཏུ། །བདེ་བའི་སྟན་ལ་འདུག་ནས་ནི། ། [31b] [31b.1]སྐད་ཅིག་ཙམ་གྱིས་ལྷ་རུ་དམིགས། །སྙིང་གའི་མུཾ་ལས་འོད་ཟེར་འཕྲོས། །བླ་མ་དང་ནི་ཡི་དམ་ལྷ། །མདུན་དུ་བསམ་པར་བྱས་པ་ལས། །དངོས་པོ་ཀུན་གྱིས་ཕྱག་བྱས་པས། །ཕྱི་དང་ནང་གི་མཆོད་པས་མཆོད། །སྡིག་པ་བཤགས་དང་རྗེས་ཡི་རང་། །སྐྱབས་སུ་འགྲོ་དང་སེམས་བསྐྱེད་བྱ། །དགེ་ [31b.2]བ་བསྔོ་དང་གཤེགས་སུ་གསོལ། །དེ་དག་ཡིད་ཀྱིས་བྱ་བར་བཤད། །དེ་ནས་ཚད་མེད་བཞི་བསྒོམས་ལ། །སྟོང་པ་ཉིད་ལ་གོམས་པར་བྱ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱ་ཏྨ་ཀོ྅ཧཾ། སྟོང་ཉིད་བརྟན་པར་བྱ་བའོ། །དེ་ནས་མུཾ་དང་ཨུཏྤལ་ལས། །འཇམ་དཔལ་ཡེ་ཤེས་སེམས་དཔའ་ [31b.3]བསམ། །སྐུ་མདོག་གསེར་མདོག་ལྡེམ་བག་ཅན། །རིན་པོ་ཆེ་ཡི་དབུ་རྒྱན་དང་། །སྙན་ཆ་གདུ་བུ་དཔུང་རྒྱན་དང་། །འོག་བག་དང་ནི་ཞབས་གདུབ་དང་། །རིན་ཆེན་རྣམས་ཀྱིས་མཛེས་པར་བརྒྱན། །སེམས་དཔའི་སྐྱིལ་ཀྲུང་བཞིན་དུ་བཞུགས། །གཡས་ན་ཨུཏྤལ་སྔོན་པོ་བསྣམས། །གཡོན་ནི་ [31b.4]ཆོས་འཆད་ཕྱག་རྒྱའོ། །སྤྱན་དྲངས་བཞུགས་སུ་གསོལ་བ་ལ། །ཕྱི་དང་ནང་གི་མཆོད་པ་བྱ། །གཉིས་སུ་མེད་པར་བདག་ལ་བསྟིམ། །མི་ཕྱེད་པ་རུ་རྒྱས་པར་བསྒོམ། །དེ་ནས་བཟླས་པ་བྱ་བ་ནི། །རང་འདྲའི་ཡེ་ཤེས་སེམས་དཔའ་བསམ། །དེ་ནས་ཏིང་འཛིན་སེམས་དཔའ་སྟེ། །པདྨའི་གདན་ལ་ [31b.5]རབ་བཞུགས་པ། །ཡི་གེ་དྲུག་གིས་བསྐོར་བ་སྟེ། །ཨོཾ་ཝཱ་གཱི་ཤྭ་རི་མུཾ། །དམིགས་པ་གཏད་ལ་བཟླས་པ་བྱ། །སྐྱོ་ཞིང་གཏོང་བར་འདོད་པ་ན། །སྤྱན་དྲངས་གཤེགས་སུ་གསོལ་བ་དང་། །བདག་ཉིད་ལྷ་ཡི་རྣལ་འབྱོར་བྱ། །རྣམ་པ་ཀུན་དང་དུས་ཀུན་དུ། །ལྷ་རུ་གསལ་བས་འགྲུབ་ [31b.6]པར་འགྱུར། །རྫོགས་པའི་རིམ་པ་བསྒོམ་པར་བྱ། །དཀར་ནག་དམར་དང་སེར་དང་ལྗང་། །གསལ་བ་དག་ཏུ་དམིགས་པ་ལས། །ཐུགས་ཀར་ཡི་གེ་ལྔ་བཀོད་དེ། །འོད་ཟེར་འཕྲོས་པས་དགུག་པར་བྱ། །ཕྱི་དང་ནང་གི་མཆོད་པས་མཆོད། །མཚན་གྱི་བསྟོད་པ་དག་བྱའོ། །ཡང་ན་མདུན་ [31b.7]དུ་དམིགས་པར་བྱ། །བསྟོད་པ་རང་བཞིན་མེད་པར་བསམ། །བསྟོད་པ་ཟིན་ནས་གཤེགས་སུ་གསོལ། །དེ་ནས་མཚན་མེད་བསྒོམ་པ་ལ། །ཐ་མ་ནས་བསྡུ་དང་པོར་བསྡུ། །བདག་བསྡུ་ཡེ་ཤེས་སེམས་དཔའ་ལ། །ཡེ་ཤེས་སེམས་དཔའ་ཨ་ལ་བསྡུ། །དེ་ཡང་རང་བཞིན་དམིགས་མེད་དེ། ། [32a] [32a.1]དེ་ལ་བརྟན་པ་ཐོབ་པ་ནི། །ཆོས་སྐུ་སྐྱེ་མེད་ཐོབ་ཅེས་བྱ། །ཚིགས་བཅད་བཅུ་དྲུག་ལྡན་པ་འདི། །ཡེ་ཤེས་ཞལ་མཐོང་གཉིས་མེད་རྟོགས། །འཇམ་མགོན་སྒྲུབ་ཐབས་འདི་བརྩམས་ཏེ། །མཁས་རྣམས་གུས་པར་བླང་བར་བགྱི། །བདག་གིས་སྒྲུབ་ཐབས་འདི་བྱས་པས། ། [32a.2]བདག་དང་སེམས་ཅན་ཐམས་ཅད་ཀྱི། །སྣོད་བཅུད་སྒྲིབ་པ་བྱང་ནས་སུ། །བླ་མེད་བྱང་ཆུབ་ཐོབ་པར་ཤོག །དཔའ་བོ་གཅིག་པའི་སྒྲུབ་ཐབས། སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ། །རྒྱ་གར་གྱི་མཁན་པོ་སུ་བཛྲ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་ [32a.3]རབ་ཀྱིས་བསྒྱུར་བའོ།། {T2572}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི་བི་དྷི་སཱུ་ཏྲ་པི་ཏྲི་ཏྲ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་ཆོ་ག་མདོ་དང་བསྲེས་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཡེ་ཤེས་ [32a.4]ལུས་ཅན་གཙུག་གི་ནོར་བུས་མཚན། །དུས་གསུམ་སངས་རྒྱས་གཟུགས་གནས་ཀུན་ལ་ཁྱབ། །ལམ་མཆོག་དམ་པ་སྟོན་པ་སྨན་པའི་མཆོག །སྡུག་བསྔལ་བདུད་འདུལ་འཇམ་མགོན་ཕྱག་འཚལ་ཏེ། །མཚན་བརྗོད་བདུད་རྩི་གསང་སྤྱོད་རྟོགས་དཀའ་བ། །བདག་བློ་མུན་པས་དགྲོལ་བར་ [32a.5]མི་ནུས་ཀྱང་། །དད་པས་ཕྱོགས་བཟུང་ཐིགས་པར་ནོར་བུ་ཅིག །ལུང་དང་མན་ངག་དག་ལ་བརྟེན་ནས་བཤད། །ཐེག་མཆོག་རྣམས་ཀྱི་གཞིར་གྱུར་པ། །དུས་གསུམ་རྣམས་ཀྱི་ལམ་མཆོག་འདི། །དཀྱིལ་འཁོར་ཆེན་པོའི་ཚུལ་དང་ནི། །སློབ་དཔོན་རྣམས་ཀྱི་དགོངས་པ་ཡིས། །ཐེག་པ་སྣ་ཚོགས་ [32a.6]ཐབས་ཚུལ་གྱིས། །དཔག་བསམ་ཤིང་ཆེན་ཕྱོགས་འདི་བརྩམ། །ཡེ་ཤེས་ལུས་ཅན་འཇམ་དཔལ་གཅིག་པུ་སྒྲུབ། །མདོ་དང་བསྲེས་པའི་ཆོ་གའི་རིམ་པ་སྟེ། དེ་ལ་དང་པོ་སྒྲུབ་པ་པོ་རིགས་དང་མཐུན་པའི་མཚན་ཉིད་བསྟན་པའི་ཕྱིར་ཡོན་ཏན་ལས། གཞན་ཡང་དམ་ཚིག་ཇི་ལྟ་བ་བཞིན་ཞེས་པས་ [32a.7]མཚན་ཉིད་དང་དབང་ཐོབ་པ་སྟོན་ཏོ། །གཞན་ཡང་། གསང་སྔགས་རིག་སྔགས་འཆང་བའི་རིགས། །ཞེས་པ་དང་། བདེན་པར་སྨྲ་ཞིང་ཚིག་མི་འགྱུར། །ཇི་སྐད་སྨྲས་པ་དེ་བཞིན་བྱེད། །ཅེས་པས་སྒྲུབ་པ་པོ་སྣོད་དུ་རུང་བར་སྟོན་ཏོ། །ཡོན་ཏན་ལས་རི་དང་ཀླུང་ནགས་ཚལ་ཚང་ཚིང་ནང་ན་འདུག་ [32b] [32b.1]ཀྱང་རུང་ཞེས་པས་གནས་རིགས་དང་མཐུན་པའམ་ཡིད་དགའ་བ་སྟོན་ཏོ། །བཟང་ངན་ཤེས་ཤིང་དུས་ཤེས་པ། །ཞེས་པས། གཟའ་དང་རྒྱུ་སྐར་དང་ཉི་མ་ཤིས་པ་ལ་བྱ་བའི་རིམ་པ་སྟོན་ཏོ། །དཔལ་ལྡན་འབྱོར་པ་ཀུན་བྱེད་པ། །ཞེས་པ་སྒྲུབ་པ་པོའི་རྫས་དོན་རབ་ཏུ་གནས་པར་བྱ་བ་དང་། མཎྜལ་ [32b.2]གསུམ་དང་། མེ་ཏོག་དང་དྲི་དང་བྱུག་པ་དང་། མཆོད་པའི་ཁྱད་པར་མང་པོ་དང་། གློད་གདན་དང་། ཡོ་བྱད་ཀྱི་ཚོགས་བྱ་བའི་རིམ་པ་སྟོན་ཏོ། །ཡོན་ཏན་ལས་མ་རུངས་པ་འདུལ་བའི་རྒྱལ་པོ་ཞེས་པ་དང་། གཤིན་རྗེ་གཤེད་པོ་བགེགས་ཀྱི་རྒྱལ། །ཞེས་པས་མཚམས་ཀྱི་རིམ་པ་ཧཱུཾ་གིས་ [32b.3]མཚན་པ་ལས་ཁྲོ་བོའི་རྒྱལ་པོ་གཤིན་རྗེ་གཤེད་མདོག་ནག་པོ་ཞལ་གཅིག་ཕྱག་གཉིས་པ་དབྱུག་ཏོ་དང་སྡིགས་མཛུབ་བྱེད་པ། སྦྲུལ་དང་ཐོད་པས་བརྒྱན་པ་བསྐྱེད་ལ། ཡ་མཱནྟ་ཀ་ཧཱུཾ་ཕཊ། ཅེས་པས་མིག་ཏུ་མ་དང་ཊ་བཀོད་དེ། འོད་ཟེར་གྱིས་རྡོ་རྗེའི་རབ་དང་དྲ་བ་བྱ་བར་བསྟན་ཏོ། ། [32b.4]སྙིང་རྗེ་ཆེན་པོ་བློ་ཡི་མཆོག །ཅེས་པ་དང་། ཕན་འདོགས་སེམས་ཅན་མཉེས་གཤིན་པ། །ཞེས་པས་སེམས་ཅན་གྱི་དོན་དུ་བདག་གིས་འཇམ་དཔལ་ཐོབ་པར་བྱའོ་ཞེས་སེམས་བསྐྱེད་པ་བསྟན་ཏོ། །གཉིས་མེད་གཉིས་སུ་མེད་པར་སྟོན། །ཞེས་པ་དང་། ཨ་ནི་ཡིག་འབྲུ་ཀུན་གྱི་མཆོག ། [32b.5]ཅེས་པས་ཐོགས་པ་མེད་པའི་བྱང་ཆུབ་ཀྱི་སེམས་ཐབས་དང་ཤེས་རབ་ཀྱི་བརྡར་གྱུར་པའམ་སྙིང་གར་ཡེ་ཤེས་སེམས་དཔའ་བསམ་པར་བྱ་བ་བསྟན་ཏོ། །བླ་མ་གསང་སྔགས་ཆེ་བའི་མཆོག །ཅེས་པ་དང་། མཆོད་འོས་བསྟོད་འོས་ཕྱག་གི་གནས། །རྟག་ཏུ་རི་མོར་བྱ་བའི་འོས། །བཀུར་འོས་རྗེད་ [32b.6]པར་བྱ་བའི་མཆོག །ཕྱག་བྱར་འོས་པ་བླ་མའི་རབ། །ཅེས་པས་འདི་སྟོན་ཏོ། །བདག་གི་སྙིང་གར་ཨ་འམ་ཧཱུཾ་བསམས་ཏེ། དེ་ལས་འོད་འཕྲོས་པས་བླ་མ་དང་དཀོན་མཆོག་གསུམ་དང་། རྗེ་བཙུན་འཇམ་དཔལ་དང་དཀྱིལ་འཁོར་གྱི་ལྷ་རྣམས་སྤྱན་དྲངས་ནས་བདག་གིས་བལྟས་ཏེ། ལུས་ཀྱི་ [32b.7]བཀོད་པས་ལན་གསུམ་བསྐོར་བ་བྱས་ཏེ་ཕྱག་བྱས་ལ་བསྟོད་དོ། །བུམ་པ་བཟང་པོ་ཆེ་བའི་མཆོག །ཅེས་པ་དང་། དཔག་བསམ་ཤིང་ཆེན་རྒྱས་པ་སྟེ། །ཞེས་པས་མཆོད་པའི་ཁྱད་པར་ནམ་མཁའ་དང་མཉམ་པར་བསྒྲུབས་ལ་སྙིང་གའི་ལྷ་མོས་དབུལ་ལོ་ཞེས་སྟོན་ཏོ། །སྦྱིན་བདག་ཆེན་པོ་གཙོ་ [33a] [33a.1]བོ་སྟེ། །ཚུལ་ཁྲིམས་ཆེན་པོ་འཆང་བའི་མཆོག །བཟོད་ཆེན་འཆང་བ་བརྟན་པ་པོ། །བརྩོན་འགྲུས་ཆེན་པོ་བརྟུལ་བ་ཡིན། །ཞེས་པས་འདི་སྟོན་ཏོ། །སྔགས་དང་ཕྱག་རྒྱ་དང་ལྡན་པས་བདག་གི་སྙིང་ག་ནས་ལྷ་མོ་བཞི་སྤྲོས་ཏེ་གནས་རྣམས་སུ་མཆོད་པར་བྱའོ། །དེ་བས་ན། [33a.2]དབུགས་འབྱིན་ཆེན་པོ་དགའ་སྟོན་ཆེ། །དགའ་ཆེན་རོལ་མོ་ཆེན་པོ་སྟེ། །བཀུར་སྟི་རིམ་གྲོ་ཕུན་སུམ་ཚོགས། །ཞེས་པས་བསྟན་ཏོ། །བསམ་གཏན་ཆེན་པོ་ཏིང་འཛིན་གནས། །ཞེས་པ་ནས། །སྨོན་ལམ་ཡེ་ཤེས་རྒྱ་མཚོ་སྟེ། །ཞེས་པའི་བར་དང་། བྱང་ཆུབ་ཡན་ལག་མེ་ཏོག་སྤོས། [33a.3]ཞེས་བྱ་བས་ཕྱིའི་ལྷ་མོ་བཞི་དང་། སྙིང་ག་ནས་གོང་གི་ཚུལ་དུ་སྔགས་དང་། ཕྱག་རྒྱ་དང་བཅས་པས་གནས་སུ་དབུལ་ལོ། །མཆོད་པ་ཆེན་པོ་འདོད་ཆགས་ཆེ། །ཞེས་པ་ནས། དགའ་བ་ཆེན་པོ་མགུ་བ་ཆེ། །ཞེས་པའི་བར་གྱིས་གསང་བའི་ལྷ་མོ་བཞིས་མཆོད་པར་བསྟན་ཏོ། ། [33a.4]ཨོཾ་རྡོ་རྗེ་སེམས་དཔའ་བསྡུས་པ་ན། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ཀྱི་གླུ་བླངས་པ། །རྡོ་རྗེ་ལས་ཀུན་བྱེད་པར་ཤོག །ཅེས་བྱ་བ་འདི་རྐང་པ་དང་གསང་བའི་མཆོད་པ་བྱེད་པའི་དུས་སུ་སྒེག་མོ་ལ་སོགས་པ་དང་རིམ་པ་ཇི་ལྟ་བ་བཞིན་དུ་རྐང་པ་བཞི་གླུར་བླང་བར་བྱའོ། །གཞན་ཡང་མཆོག་ཏུ་ [33a.5]གསང་བའི་མཆོད་པ་དང་། ཆགས་པ་ལ་སོགས་པས་དབུལ་ཏེ་རྒྱས་པར་མ་ཕྱེའོ་ཞེས་བསྟན་ཏོ། །དེ་ནས་འདུད་ཉི་ཤུས་བསྟོད་དེ། ཡང་ན་ནི་ཐམས་ཅད་ཀྱིས་བསྟོད་པར་ཤེས་པར་བྱའོ། །དེ་ནས་སྡོམ་པ་བཟུང་བའི་བར་དེ་ཉིད་ཀྱིས་ཤེས་པར་བྱའོ། །བྱམས་པ་དང་སྙིང་རྗེ་ནི་ཤིན་ཏུ་གསལ་བར་ [33a.6]སྟོན་པར་ཚད་མེད་པ་བཞི་བསྒོམ་ཞེས་སོ། །རྣམ་པར་མི་རྟོག་དབྱིངས་མི་ཟད། །ཆོས་དབྱིངས་དམ་པ་ཟད་མི་ཤེས། །ཡང་དག་བདག་མེད་དེ་བཞིན་ཉིད། །ཡང་དག་མཐའ་སྟེ་ཡི་གེ་མེད། །ཅེས་པའི་དོན་བསྒོམ་པ་ནི་རང་བཞིན་དག་པའི་སྔགས་བརྗོད་དེ། ཕྱི་དང་ནང་གི་དངོས་པོ་ [33a.7]སྟོང་པར་བསྒོམ་ཞེས་བསྟན་ཏོ། །སྟོང་པ་ཉིད་དགའ་འདོད་ཆགས་བློ། །སྲིད་པའི་འདོད་ཆགས་སྤངས་པ་སྟེ། །ཞེས་པས་པདྨའི་སྟེང་ན་ཆོས་ཀྱི་འབྱུང་གནས། དེའི་མཐའ་འོད་ཟེར་ལྔས་བསྐོར་བའི་ནང་དུ་པདྨ་དང་ཟླ་བའི་སྟེང་དུ་མུཾ་དམར་སྐྱའི་དེ་བཞིན་གཤེགས་པའི་ཕྲེང་བ་དེ་གྱུར་པ་ལས། [33b] [33b.1]སྤྲིན་དཀར་དག་པ་བཞིན་དུ་དཀར། །འོད་བཟང་སྟོན་ཀའི་ཟླ་བའི་འོད། །ཉི་མ་འཆར་ཀའི་དཀྱིལ་ལྟར་མཛེས། །སེན་མོའི་འོད་ནི་ཤས་ཆེར་དམར། །ཅོད་པན་བཟང་པོ་མཐོན་ཀའི་རྩེ། །སྐྲ་མཆོག་མཐོན་ཀ་ཆེན་པོ་པ། །ནོར་བུ་ཆེན་པོ་འོད་ཆགས་དཔལ། །སངས་རྒྱས་སྤྲུལ་པའི་རྒྱན་དང་ལྡན། ། [33b.2]ཟུར་ཕུད་ལྔ་བ་མེ་ཏོག་ཐོད། །སྡུག་གུ་འཇིག་རྟེན་གསུམ་ན་མཛེས། །ཤེས་རབ་རལ་གྲི་མདའ་གཞུ་ཐོགས། །རྡོ་རྗེ་སྐྱིལ་ཀྲུང་རྫོགས་སངས་རྒྱས། །དཔལ་ལྡན་བློ་དང་སྒེག་པར་ལྡན། །སུམ་ཅུ་རྩ་གཉིས་མཚན་འཆང་བ། །ཉོན་མོངས་གཡུལ་དུ་གཅིག་དཔའ་བ། །ཞེས་པ་ལ་སོགས་པ་རྣམས་ [33b.3]ཀྱིས་རྗེ་བཙུན་གྱི་སྐུ་སྤྲུལ་པའི་ཆ་ལུགས་སུ་བསྟན་པ་ཡིན་ནོ། །ཕྱག་རྒྱ་བཞི་ཡི་དོན་སྟོན་པ། །ཞེས་པས་ཡུམ་བཞིའི་ཕྱག་རྒྱ་འཕྲོ་འདུ་དང་བཅས་པའི་བྱིན་བརླབས་བསྟན་པ་ཡིན་ནོ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །ཅེས་པས་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་ཁྲོ་ [33b.4]མོ་དང་ལྷ་མོ་རྣམས་ཐུགས་ཀ་ནས་སྤྲོ་ཞེས་པའོ། །དེ་ནས་མདུན་དུ་པདྨ་དང་ཟླ་བ་ལ་ཡེ་ཤེས་སེམས་དཔའ་སྤྱན་དྲངས་ཏེ། དབང་བསྐུར་བ་དང་མཆོད་པ་དང་། བསྟོད་པ་གོང་བཞིན་བྱས་ཏེ་ཡེ་ཤེས་སེམས་དཔའ་དེ་ལ་བལྟས་ལ། དགུག་ཅིང་རང་ལུས་ལ་གཉིས་སུ་མེད་པར་བསྒོམ་ཞེས་པས་ [33b.5]གཉིས་སུ་མེད་པར་བྱས་ཏེ། རྡོ་རྗེ་རིན་ཆེན་དབང་བསྐུར་དཔལ། །སངས་རྒྱས་མངའ་བདག་ཅོད་པན་ཅན། །ཞེས་པས་སྙིང་གའི་འོད་ཀྱིས་བསྐུལ་ཏེ། བུམ་པའི་ཆུས་དབང་བསྐུར་བས་རིགས་ལྔའི་དབུ་རྒྱན་དང་ལྡན་པ་ཞེས་བསྟན་ཏོ། །སྤྲུལ་པའི་འཁོར་ལོ་སྣ་ཚོགས་འཆང་། །ཞེས་ [33b.6]པས་རྡོ་རྗེ་འཁོར་ལོའི་ཕྱག་རྒྱ་བཅས་ལ་སྔགས་དང་བཅས་པས་དཀྱིལ་འཁོར་གྱི་ཚུལ་དུ་སངས་རྒྱས་ཐམས་ཅད་སྤྲུལ་ལོ་ཞེས་བསྟན་ཏོ། །དེའི་དོན་ནི་འོག་ནས་འཆད་དོ། །བདག་རིག་གཞན་རིག་ཐམས་ཅད་པ། །ཤེས་དང་ཤེས་བྱའི་བདག་པོ་མཆོག །ཅེས་པས་ཐམས་ཅད་སེམས་ཀྱི་ [33b.7]སྤྲུལ་པར་ཤེས་པར་བྱའོ། །དེ་ལྟར་རྫོགས་པ་དང་མཚན་སྔགས་བཟླས་ཤིང་མཚན་བཀླག་པར་བྱའོ། །དེ་ལྟ་བུ་ཡོན་ཏན་ལས་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་གསང་སྔགས་ཀྱི་སྤྱད་པ་སྤྱོད་པ་གང་ལ་ལ། བཅོམ་ལྡན་འདས་ཡེ་ཤེས་སེམས་དཔའ་དེ་བཞིན་གཤེགས་ [34a] [34a.1]པ་ཐམས་ཅད་ཀྱི་སྐུ་དང་གཉིས་སུ་མེད་པའི་དོན་དམ་པའི་མིང་གི་གཙུག་གི་ནོར་བུ་འདི་ཐམས་ཅད་ཡོངས་སུ་རྫོགས་པ་དང་མཉམས་ཤིང་ལྷག་ཆད་མེད་པར་ཚིགས་སུ་བཅད་པའི་ཚིག་དང་། ཡི་གེ་འབྲུ་འདི་དག་ཉིད་ཀྱིས་ཉིན་གཅིག་བཞིན་དུ་དུས་གསུམ་དུ་འཆང་ [34a.2]བ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་དམ་ཚིག་ཇི་ལྟ་བ་བཞིན་དུ་སྟོན་པ་དང་མིང་གི་དོན་གང་ཡང་རུང་བ་རེ་རེ་ནས་ཀྱང་འཇམ་དཔལ་ཡེ་ཤེས་སེམས་དཔའི་སྐུ་ལ་དམིགས་ཏེ་ཞེས་བྱ་བ་དང་། རྩེ་གཅིག་ཏུ་བསྒོམ་པ་དེ་ལ་ནི་ཞེས་བྱ་བ་ལ་སོགས་པ་དང་། གཞན་ཡང་ཡོན་ཏན་ལས། [34a.3]ཉིན་གཅིག་བཞིན་དུ་དུས་གསུམ་དུ་མཉམ་པར་ཡི་དམ་དུ་ལན་གསུམ་དུ་འདོན་ཏམ། གླེགས་བམ་དུ་བྱས་པ་ལ་ཁ་ཏོན་དུ་ཀློག་ཅིང་བརྗོད་པས་བཅོམ་ལྡན་འདས་ཡེ་ཤེས་སེམས་དཔའི་གཟུགས་ལ་དམིགས་ཏེ། གཟུགས་དང་གཉིས་སུ་མཐུན་པར་བསམ་གཏན་དུ་བྱེད་པ་ནི་འདུལ་བའི་ [34a.4]དབང་གི་ཕྱིར་རིང་པོར་མི་ཐོགས་པས་དེ་ཉིད་དུ་སྤྲུལ་པའི་གཟུགས་ཀྱི་ལུས་མཐོང་བར་འགྱུར་རོ་ཞེས་བྱ་བའི་དོན་འདི་ཡིན་ཏེ། མཚན་ཉིད་ཀྱི་ཆོ་ག་རྫོགས་ཤིང་དམིགས་པ་ལ་ཡུན་རིང་དུ་གནས་པ་དེས་རྡོ་རྗེ་འཁོར་ལོའི་ཕྱག་རྒྱ་བཅས་ལ། མཉྫུ་ཤྲཱི་དྷཱིཿཨོཾ་ཝཱ་གཱི་ཤྭ་རི་མུཾ། མཎྜ་ལ་ཙཀྲ་ཧཱུཾ། ཞེས་ [34a.5]པས་དེ་བཞིན་གཤེགས་པ་ཐམས་ཅད་འཕགས་པ་འཇམ་དཔལ་གྱི་རྣམ་པར་སྤྲུལ་ལ། ཕྱག་སྔོན་དུ་འགྲོ་བས་མཆོད་པ་ལ་སོགས་པས་བདག་ཅག་གི་ལུས་དེ་དང་མཉམ་པར་སྤྲུལ་ཏེ། མཚན་གྱི་དོན་རེ་རེ་ནས་བསྟོད་ལ་ཡོན་ཏན་རྣམ་པ་འདི་ལྟར་སྨོས་པས་བདག་དང་གཞན་ལ་དཔག་ཏུ་མེད་པ་འབྱུང་བར་ [34a.6]འགྱུར་རོ། །མདོར་ན་རྣམ་པ་ཐམས་ཅད་མཁྱེན་པ་རིང་པོ་མི་ཐོགས་པར་དམ་པས་བསྔགས་པ་ཐོབ་པར་འགྱུར་རོ། །ཡང་ན་གསང་སྔགས་ཀྱི་རིམ་པ་ཐོབ་པར་འགྱུར་རོ། །དམ་པ་བརྒྱུད་པའི་བླ་མའི་བདུད་རྩི་འཐུངས། །འགྲོ་བའི་སྡུག་བསྔལ་ནད་ཀྱིས་གཟིར་གྱུར་ལ། །དུས་གསུམ་སངས་ [34a.7]རྒྱས་རྣམས་ཀྱི་བསྟོད་ཚིག་འདི། །སྨན་པའི་རྒྱལ་པོ་བཞིན་དུ་བདག་གིས་བཤད། །འཕྲོད་པའི་སྨན་བཞིན་ཀུན་ལ་ཕན་གྱུར་ནས། །མི་རྟོག་ཡེ་ཤེས་འཆི་མེད་ཐོབ་པར་ཤོག། །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་མདོ་དོན་མདོར་བསྡུས་པའི་ཆོ་ག་སྒྱུ་འཕྲུལ་དྲ་བའི་ [34b] [34b.1]རྒྱུད་ལེའུ་ཁྲི་དྲུག་སྟོང་པ་ལས་རྡོ་རྗེ་གླུར་བླངས་པའི་ལེའུའི་སྒྲུབ་ཐབས་མདོ་དང་བསྲེས་པ། སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་སུ་བཛྲ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་བའོ། ། {T2573}༄༅༅། །རྒྱ་གར་སྐད་དུ། [34b.2]ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི་ཙཀྵུ་བི་དྷི་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྤྱན་དབྱེ་བའི་ཆོ་ག་ཞེས་བྱ་བ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འཁོར་བའི་རྒྱ་མཚོ་བརྒལ་དཀའ་ནས། །མྱ་ངན་འདས་པའི་སྐམ་སར་ [34b.3]བྱོན། །སངས་རྒྱས་སྐུ་ལྔའི་བདག་ཉིད་ཅན། །འཇམ་དཔལ་དབྱངས་ལ་ཕྱག་འཚལ་ལོ། །གཞན་ལ་ཕན་པའི་བློ་མཆོག་གིས། །དཀོན་མཆོག་གསུམ་གྱི་གཟུགས་བརྙན་རྣམས། །རབ་ཏུ་གནས་པའི་ཆོ་ག་ནི། །བཟང་ཞིང་དགེ་བ་བཤད་པར་བྱ། །དེ་ནས་རྡོ་རྗེ་སློབ་དཔོན་ [34b.4]བློ་གྲོས་དང་ལྡན་པས་གཙུག་ལག་ཁང་ངམ་སྐུ་གཟུགས་ལ་སོགས་པའི་སངས་རྒྱས་དང་བྱང་ཆུབ་སེམས་དཔའ་ལ་སོགས་པའི་གཟུགས་བརྙན་ནམ་གླེགས་བམ་དང་མཆོད་རྟེན་ལ་སོགས་པ་རབ་ཏུ་གནས་པར་བྱ་བར་འདོད་པས། རི་བོའམ་ནགས་ཚལ་ལ་སོགས་པའི་གནས་སུ་བསྙེན་པ་རྒྱས་པར་ [34b.5]བྱས་ལ། འབད་པ་ཐམས་ཅད་ཀྱིས་བསྒོམ་བཟླས་བྱའོ། །དེ་ལ་འདིར་གང་རབ་ཏུ་གནས་པ་བྱ་བར་འདོད་པ་དེ་རྣམས་སྟ་གོན་དུ་བྱ་སྟེ། བདག་ཏུ་གཟུང་བའི་བགེགས་ཐམས་ཅད་བསྐྲད་དོ། །གུ་གུལ་གྱིས་བདུག་ཅིང་བགེགས་བསྐྲད་པའི་ཆོ་ག་ཤས་ཆེར་བྱའོ། །བདེ་བར་གཤེགས་པ་རྣམས་ལ་འདི་སྐད་ [34b.6]ཅེས་སྙན་གསན་དབབ་པར་བྱ་སྟེ། ཇི་ལྟར་དགའ་ལྡན་གནས་མཆོག་ན། །བདེ་བར་གཤེགས་པ་བཞུགས་པ་དེ། །སྒྱུ་འཕྲུལ་ལྷ་མོའི་ལྷུམས་ཞུགས་ལྟར། །དེང་ནུབ་བདེ་གཤེགས་ཐམས་ཅད་ནི། །དེ་བཞིན་གཟུགས་བརྙན་འདི་ལ་ནི། །འཇུག་པར་ཤིན་ཏུ་མཛད་དུ་གསོལ། །འདི་ལ་སངས་རྒྱས་ [34b.7]རྟག་ཏུ་བཞུགས། །བྱང་ཆུབ་སེམས་ནི་བསྐྱེད་པ་དང་། །ཡོན་བདག་རྣམས་ཀྱི་དོན་བྱའི་ཕྱིར། །བདག་གིས་སྦྱོར་བ་འདི་བགྱིས་ན། །ཅི་འབྱོར་བ་ཡི་མཆོད་པ་རྣམས། །མེ་ཏོག་ལ་སོགས་བཞེས་སུ་གསོལ། །བདག་དང་ཡོན་བདག་བཅས་པ་ལ། །ཐུགས་བརྩེ་བར་ནི་དགོངས་བཅས་ནས། ། [35a] [35a.1]ཀུན་གྱིས་འདི་དེང་བྱིན་རློབ་ཅིང་། །འདི་ཉིད་དུ་ནི་བཞུགས་པར་རིགས། །ཞེས་བརྗོད་ལ། སྐུ་གཟུགས་ལ་སོགས་པ་རབ་ཏུ་གནས་པ་གང་བྱེད་པ་དེ་གཤིན་རྗེ་གཤེད་ཀྱིས་བསྲུང་ཞིང་། ཨཱཿཧཱུཾ་ཨོཾ་ཧྲཱིཿཨ་ཞེས་བྱ་བས་རྒྱས་བཏབ་ལ་གཞག་གོ། །དེ་ནས་བཅོམ་ལྡན་འདས་ [35a.2]འཇམ་དཔལ་ཡེ་ཤེས་སེམས་དཔའི་དཀྱིལ་འཁོར་རིགས་ཐམས་ཅད་བསྡུས་པ་ཞེས་བྱ་བ་བྲིས་ལ། དེར་བུམ་པ་ཐམས་ཅད་བཅུག་ལ་དཀྱིལ་འཁོར་དེའི་བྱང་ངོས་སུ་ཁྲུས་ཀྱི་ཁང་པ་ཤིན་ཏུ་མཛེས་པ་ཡིད་དུ་འོང་བ། གསེར་གྱི་ཀ་བ་བཞི་དང་མུ་ཏིག་གི་ཆུན་འཕྱང་འཕྱང་བ། དྲི་ཞིམ་པོ་ཙནྡན་ལ་ [35a.3]སོགས་པ་སྲོག་ཆགས་ལས་མ་བྱུང་བའི་དྲིས་ཆག་ཆག་བཏབ་ལ། རིན་པོ་ཆེས་སྤྲས་ཤིང་གཅལ་དུ་བཀྲམ་པ་བྱས་ལ། ཁྲུས་ཀྱི་ཁང་པ་གང་ཡིན་པ་དེ་ཉིད་རབ་ཏུ་གནས་པར་འདོད་པའི་ལྷ་རྣམས་གང་ཡིན་པ་སྤྱན་དྲངས་ལ་ཚུལ་དང་མཐུན་པར་གཞག་ལ། སྐུ་ཁྲུས་གསོལ་བ་ནི་བཀྲ་ཤིས་ [35a.4]ཀྱི་ཚིགས་སུ་བཅད་པ་དང་། རོལ་མོའི་སྒྲ་སྣ་ཚོགས་དང་ལྡན་པས་ཁྲུས་བྱས་ཏེ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །དེ་བཞིན་བདག་གིས་ལྷ་ཡི་ཆུ། །དག་པ་ཡིས་ནི་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ [35a.5]ཧཱུཾ། ལུགས་མ་ཡིན་ན་དངོས་སུ་ཁྲུས་བྱ། དེ་ལས་གཞན་པ་གང་ཡིན་ཡང་མེ་ལོང་གི་ངོས་ལ་སྲན་ཕྱེ་དང་། བག་ཕྱེ་དང་། འབྲས་ཡོས་དང་། ཡུངས་ཀར་དང་། ཏིལ་མར་དང་། འོ་མ་དང་། ཙནྡན་དང་། ག་པུར་བཏབ་ལ། མེ་ཏོག་དང་བཅས་ཏེ་ཀུ་ཤའི་པིར་གྱིས་བཀྲུ་ [35a.6]བར་བྱའོ། །དེ་ཡང་འདི་སྐད་དུ། ཇི་ལྟར་དམ་པ་ཏོག་དཀར་དགའ་ལྡན་ནས། །ལྷ་མཛེས་ལྷུམས་ཞུགས་བལྟམས་ལ་ཁྲུས་གསོལ་ལྟར། སྐུ་གདུང་རིང་བསྲེལ་དྲི་མ་མེད་པར་བྱས། །སྤྲུལ་སྐུ་ཡིད་འོང་རྣམས་ལ་སྐུ་ཁྲུས་གསོལ། །ཕྱོགས་བཅུ་བདུད་རྩི་དམ་པའི་ཆར་འབེབས་ [35a.7]པ། །རྒྱལ་བ་དམ་ཆོས་རྣམས་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་པུ་ཪྞྰ་དི་པ་ཀྲོ་དྷ་ཡེ་སྭཱ་ཧཱ། ཞེས་བྱ་བ་དང་། དེ་ནས་སྔར་བསྙེན་པ་བྱས་པའི་བུམ་པ་ལྷའི་ཆུས་བཀང་ལ་སློབ་དཔོན་གྱིས་བཟུང་ནས་མེ་ལོང་ལ་དྲིའི་ཐིག་ལེ་ལྔ་དང་། མེ་ཏོག་གི་ཚོམ་བུ་ལྔ་དང་བཅས་པ་ལ་འདི་སྐད་བརྗོད་ [35b] [35b.1]དེ་སྐུ་ཁྲུས་གསོལ་བ་ནི། གཟུགས་ཀྱི་ཕུང་པོ་རྣམ་དག་པ། །གཏི་མུག་དྲི་མ་སྦྱོང་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །དཔལ་ལྡན་སྐུ་ཡི་སྐུ་ཁྲུས་གསོལ། །ཚོར་བའི་ཕུང་པོ་རྣམ་དག་པའི། །ང་རྒྱལ་དྲི་མ་སྦྱོང་བྱེད་པའི། །མཉམ་པ་ཉིད་ཀྱི་ཡེ་ཤེས་ཀྱིས། །དཔལ་ལྡན་ [35b.2]ཡོན་ཏན་སྐུ་ཁྲུས་གསོལ། །འདུ་ཤེས་ཕུང་པོ་རྣམ་དག་པའི། །འདོད་ཆགས་དྲི་མ་སྦྱོང་བྱེད་པའི། །སོ་སོར་རྟོག་པའི་ཡེ་ཤེས་ཀྱིས། །དཔལ་ལྡན་གསུང་གི་སྐུ་ཁྲུས་གསོལ། །འདུ་བྱེད་ཕུང་པོ་རྣམ་དག་པའི། །ཕྲག་དོག་དྲི་མ་སྦྱོང་མཛད་པའི། །བྱ་བ་ནན་ཏན་ཡེ་ཤེས་ཀྱིས། །དཔལ་ལྡན་ཕྲིན་ [35b.3]ལས་སྐུ་ཁྲུས་གསོལ། །རྣམ་ཤེས་ཕུང་པོ་རྣམ་དག་པའི། །ཞེ་སྡང་དྲི་མ་སྦྱོང་མཛད་པའི། །མེ་ལོང་ལྟ་བུའི་ཡེ་ཤེས་ཀྱིས། །དཔལ་ལྡན་ཐུགས་ཀྱི་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་བུདྡྷ་བཛྲ་རཏྣ་པདྨ་ཀརྨྨ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། དེའི་རྗེས་ལ་རས་གཙང་མ་དྲིས་བསྐུས་པས་སྐུ་ཕྱིས་ཏེ། རྒྱལ་བའི་ [35b.4]སྐུ་ནི་མཁའ་ལ་ཟླ་བཞིན་གསལ། །སངས་རྒྱས་སྐུ་ལ་དྲི་མ་མི་མངའ་ཡང་། །འགྲོ་བའི་བག་ཆགས་མ་ལུས་བསལ་བྱའི་ཕྱིར། །ཁ་ཚར་མ་ཉམས་རས་ཀྱིས་སྐུ་ཕྱིས་པས། །སེམས་ཅན་བག་ཆགས་མ་ལུས་བྱང་གྱུར་ཅིག། །ནི་རྨཱ་ཀཱ་ཡ་ཤུདྡྷོ྅ཧཾ་ཞེས་པས་སྐུ་ཕྱིས་ལ། རིགས་དང་མཐུན་པའི་ན་བཟའ་ [35b.5]རྣམས་ཀྱང་དབུལ་ཞིང་བཀྲ་ཤིས་ཀྱང་བརྗོད་དོ། །ཨོཾ་དཱི་པ་ན་པ་ཡེ་སྭཱ་ཧཱ། དྲིས་བསྒོའོ། །ཨོཾ་གནྡྷཱ་ཡ་སྭཱ་ཧཱ། ཞེས་པས་ན་བཟའ་དབུལ། ཨོཾ་ཨཱ་བྷཱ་ར་ཎི་པི་བྷཱུ་ཥྰ་ཡ་སྭཱ་ཧཱ། ཞེས་བྱ་བས་བྱང་ཆུབ་སེམས་དཔའ་རྣམས་ལ་རྒྱན་དབུལ་ཏེ། འགྲོ་ཀུན་ཡུན་དུ་བསྐྱང་བའི་ཕྱིར། །ལྷ་ཡིན་བཟའ་ [35b.6]དམ་པ་ནི། །བདེ་བར་གཤེགས་པ་རྣམས་ལ་དབུལ། །ཅི་བདེ་བར་ནི་བཞེས་སུ་གསོལ། །ཞེས་པ་དང་། བྱང་ཆུབ་ཡན་ལག་རྒྱན་གྱུར་ཅིང་། །འགྲོ་བས་བསོད་ནམས་ཐོབ་བྱའི་ཕྱིར། །བདེ་གཤེགས་སྲས་ལ་རྒྱན་མཆོག་དབུལ། །ཅེ་བདེ་བར་ནི་བཞེས་སུ་གསོལ། །ཞེས་པས་རྒྱན་གདགས་ [35b.7]སོ། །དེ་ནས་དཀྱིལ་འཁོར་སྤྱན་དྲངས་ལ་བདག་ཉིད་དཀྱིལ་འཁོར་སྒྲུབ་སྟེ། བདག་ཉིད་ཀྱི་འཁོར་ལོ་ལ་མཆོད་པ་རྫོགས་པའི་རྗེས་ལ་རབ་གནས་ཀྱི་ལྷ་ཤིན་ཏུ་གསལ་བར་བྱས་ཏེ། ཡེ་ཤེས་ཀྱི་འཁོར་ལོ་བར་སྣང་ལ་བསྡུས་ཏེ། སྤྱན་དྲངས་ལ་གཉིས་སུ་མེད་པར་བསྟིམས་ཏེ་དབང་ [36a] [36a.1]བསྐུར་རྒྱས་བཏབ་ལ། མཆོད་པ་ཤིན་ཏུ་རྒྱས་པར་དབུལ་བ་ནི་དངོས་སུ་འབྱོར་བའི་མཆོད་པ་ལྔ་དང་། ཡིད་ཀྱིས་སྤྲུལ་པའི་མཆོད་པ་བརྒྱད་ཀྱིས་ཡང་དག་པར་མཆོད་པར་བྱའོ། །གཞན་ཡང་སྒྲ་དང་རོལ་མོའི་བྱེ་བྲག་བསམ་གྱིས་མི་ཁྱབ་པས་ཡང་དག་པར་མཆོད་པར་བྱའོ། ། [36a.2]དེ་ལྟར་ལེགས་པར་མཆོད་ཅིང་སྦྱིན་སྲེག་གི་ལས་ཀྱང་བརྩམ་པར་བྱའོ། །དེའི་རྗེས་ལ་གཏོར་མ་རྒྱ་ཆེན་པོ་ཡང་བཤམས་ལ་གཞག་གོ། །དེ་ལྟར་ཡེ་ཤེས་སེམས་དཔའ་བཅུག་ལ་ནང་བར་ཉི་མ་ཤར་ཀར་སྤྱན་དབྱེ་བར་བྱ་སྟེ། བདག་ཉིད་རྣམ་སྣང་ཆེན་པོའི་ཏིང་ངེ་འཛིན་ལ་གནས་པས་དེས་གསེར་ལས་ [36a.3]བྱས་པའི་ཐུར་མ་ཐོགས་ལ། རྒྱལ་བ་མཁའ་ལ་བྱོན་པའི་ཐུགས་རྗེ་ཅན། །སངས་རྒྱས་སྤྱན་ལ་འགག་པ་མི་མངའ་ཡང་། །སེམས་ཅན་རྣམས་ཀྱི་བག་ཆགས་སྦྱང་སླད་དུ། །བདེར་གཤེགས་རྣམས་ཀྱི་སྤྱན་ནི་དབྱེ་བར་བགྱི། །སེམས་ཅན་ལྡོངས་པ་ཐམས་ཅད་བསལ་གྱུར་ཅིག །ཨོཾ་ [36a.4]ནིརྨཱ་ཀཱ་ཡ་བཛྲ་ཙཀྵུ་པྲ་བེེ་ཤ་བི་ཤོདྷ་ན་སྭཱ་ཧཱ། གསེར་གྱི་སྙན་བྲུད་པ་ཐོགས་ལ། རྒྱལ་བའི་སྙན་ལ་འགག་པ་མི་མངའ་ཡང་། །སེམས་ཅན་ཐོས་པས་ཕོངས་གྱུར་ཏེ། །རྒྱལ་བ་ཆོས་ཀྱི་རྔ་བརྡུངས་ལྟར། །དེ་བཞིན་སེམས་ཅན་ཀུན་དོན་ཕྱིར། །བདེ་གཤེགས་སྙན་ནི་དབྱེ་ [36a.5]བར་བགྱི། །ཆོས་ཀྱི་སྒྲ་རྣམས་ཐོས་གྱུར་ཅིག །ཨོཾ་ནིརྨཱ་ཀཱ་ཡ་རི་བྱ་ཀཪྞ་ཡེ་སྭ་བྷཱ་བ་ཤུདྡྷོ་྅ཧཾ། གསེར་གྱི་ཚེར་གཟུངས་ཐོགས་ལ། །རྒྱལ་བའི་ཤངས་ལ་འགག་པ་མི་མངའ་ཡང་། །འགྲོ་བའི་སེམས་ཅན་དོན་གྱི་ཕྱིར། །ཟག་བཅས་ཕུང་པོའི་དྲི་མ་སྤངས་ནས་ནི། །རྣམ་པར་དག་ [36a.6]པ་དྲི་མེད་སྐྱེད་བྱེད་ལྟར། །རྒྱལ་བའི་ཤངས་ནི་བདག་གིས་དབྱེ་བར་བགྱི། །ཟག་མེད་དྲི་མེད་དམ་པ་ཚོར་གྱུར་ཅིག །ཨོཾ་ནིརྨཱ་ཀཱ་ཡ་དྷ་བྱ་ནཱ་ས་ཡེ་སྭཱ་ཧཱ། །རིན་པོ་ཆེའི་ཐུར་མ་ཐོགས་ལ། །འགྲོ་བ་ཆོས་ཀྱིས་ཕོངས་པ་ལ། །དམ་ཆོས་བསྒྲག་པར་བྱ་བའི་ཕྱིར། །ཆོས་ [36a.7]ཀྱི་རོ་ལྡན་དག་པ་ཡིས། །འགྲོ་བ་ཐམས་ཅད་ཚིམ་མཛད་ལྟར། །རོ་མཆོག་བརྒྱ་ལྡན་ཞལ་ཟས་རྣམས། །དབུལ་ཕྱིར་ཞལ་ནི་དབྱེ་བར་བགྱི། །ཨོཾ་ནིརྨཱ་ཀཱ་ཡ་ཨིད་ནི་བྱ་མུ་ཁ་ཡེ་སྭཱ་ཧཱ། དེ་ནས་རབ་བྱུང་གི་གཟུགས་ཡིན་ན་སྤུ་གྲི་ཐོགས་ལ། ཇི་ལྟར་རང་བྱུང་མཆོད་རྟེན་དུ། ། [36b] [36b.1]སྟོན་པས་ཁྱིམ་པའི་རྟགས་སྤངས་ལྟར། །འགྲོ་བ་སེམས་ཅན་དོན་གྱི་ཕྱིར། །ཁྱིམ་པའི་རྟགས་རྣམས་སྤང་བར་བགྱི། །སྣམ་སྦྱར་དང་བླ་གོས་གསོལ་ནས། །ཇི་ལྟར་སྨན་པའི་རྒྱལ་པོ་འཚོ་བྱེད་ཀྱིས། །རྒྱལ་བའི་སྐུ་ལ་ན་བཟའ་གསོལ་བ་ལྟར། །དེ་བཞིན་འགྲོ་བ་རྣམས་ལ་སྨན་པའི་ཕྱིར། །ངོ་ཚ་ [36b.2]ཁྲེལ་ཡོད་གོས་མཆོག་གསོལ་བར་བགྱི། །ཨོཾ་ནིརྨཱ་ཀཱ་ཡ་ཏོ་བྱོལ་ཏྲ་པྲ་ན་ཡེ་སྭཱ་ཧཱ། ཞེས་བརྗོད་པར་བྱ་ཞིང་དབུལ་ལོ། །ཨོཾ་ཨུ་པ་སུ་ཀཱ་ས་པ་རི་སྲཱ་བ་ཎ་ཡེ་སྭཱ་ཧཱ། ཞེས་པས་ཆུ་ཚགས་དང་ལྷུང་བཟེད་ལ་སོགས་པ་དབུལ་ལོ། །དེ་ནས་ཐུགས་ཀར་རྡོ་རྗེ་དྲིས་བསྒོས་པ་བཟུང་ལ། མཚན་དང་ [36b.3]དཔེ་བྱད་ལ་སོགས་པ་བསྐྱེད་དེ། དུང་དང་དཔལ་བེའུ་གཡུང་དྲུང་འཁྱིལ་པ་འདི། །བཀྲ་ཤིས་རྫས་བརྒྱད་དག་གིས་རྣམ་བརྒྱན་པ། །རྒྱལ་བའི་ཐུགས་ལ་རྣམ་པར་རྒྱལ་གྱུར་ཅིག །ཨོཾ་ནིརྨཱ་ཀཱ་ཡ་ཏྲིཾ་ཤད་མ་ཧཱ་པུ་རུ་ཥ་ལཀྵ་ཎ་ཤོ་དྷ་ཨ་ནུ་བྱཉྫ་ཡེ་སྭཱ་ཧཱ། བདེ་བར་གཤེགས་པའི་གཟུགས་བརྙན་དེ་འཁོར་ [36b.4]ལོས་སྒྱུར་བའི་ཆ་བྱད་ཡིན་ན་དེ་ལྟར་མ་ཡིན་ཏེ། དུང་དང་སོ་མངས་དང་རལ་གྲི་ལ་སོགས་པ་དབུལ་ལོ། །དཔལ་བེའུ་ལ་སོགས་པས་བརྒྱན་པ་ནི་ཤེས་པར་བྱའོ། །གླེགས་བམ་ལ་རབ་ཏུ་གནས་པར་བྱེད་པ་ཡིན་ན། རྡོ་རྗེ་ཆོས་ཀྱི་ངོ་བོ་སངས་རྒྱས་སྣང་བ་མཐའ་ཡས་ངེས་པར་ཨ་ལས་བསྐྱེད་ལ་ཡེ་ཤེས་ [36b.5]སེམས་དཔའ་བཅུག་སྟེ་དབང་བསྐུར་རྒྱས་བཏབ་ནས་གླེགས་བམ་དུ་བྱའོ། །དེ་ལ་ན་བཟའ་དབུལ་བ་ནི། །བྱང་ཆུབ་ཡན་ལག་རྣམ་དག་པའི། །དམ་ཆོས་གསུང་གི་འོད་ཟེར་གྱིས། །ན་བཟའ་དྲི་མ་མེད་པ་འདི། །དམ་པའི་ཆོས་ལ་དབུལ་བར་བགྱི། །ཨོཾ་དྷརྨ་དྷེ་བྷྱ་པྲ་ཏ་སྭཱ་ཧཱ། ཞེས་བྱ་བས་ [36b.6]དབུལ། དེའི་རྗེས་ལ་རྡོ་རྗེ་ཐག་པ་གང་ཡིན་པ་དེས་བསྡམས་ཏེ། མཚལ་ལམ་སིན་དྷུ་རའི་རྒྱ་རིམ་པ་བདུན་དུ་བཏབ་ལ། ཨོཾ་བཛྲ་མུ་དྲ་བནྡྷ་ཡ་ཨ་དྷི་ཏིཥྛ་སྭཱ་ཧཱ། ཞེས་བརྗོད་དོ། །རབ་ཏུ་གནས་པ་དེ་མཆོད་རྟེན་ཡིན་ན་བདེ་བར་གཤེགས་པ་རིགས་ལྔའི་སངས་རྒྱས་སུ་རྫོགས་པར་བྱས་ལ་ཡེ་ཤེས་ [36b.7]སེམས་དཔའ་ཡང་ངེས་པར་བཅུག་ནས་དབང་བསྐུར་རྒྱས་བཏབ་ནས་མཆོད་དེ་བཀྲ་ཤིས་བརྗོད་ལ་དེ་རྣམས་ལས་བྱུང་བའི་བྱང་ཆུབ་སེམས་དཔའ་ཆེན་པོའི་མཆོད་རྟེན་དུ་དམིགས་ལ། ཨོཾ་ཨ་ར་ཛེ་བི་ར་ཛེ་སྭཱ་ཧཱ། ཞེས་པས་ས་དཀར་བྱུག །ཨོཾ་ཨར་མ་ཡེ་སྭཱ་ཧཱ། ཞེས་པས་བྲེ་གཟུགས། ། [37a] [37a.1]ཨོཾ་ཙཀྲ་བརྟ་ན་ཡེ་སྭཱ་ཧཱ། ཞེས་པས་འཁོར་ལོ་གཟུགས་སོ། །ཨོཾ་ཙྪཱ་ཏྲ་ཡེ་སྭཱ་ཧཱ། ཞེས་པས་གདུགས་དབུལ་ལོ། །ཨོཾ་ཀུ་བི་ར་དྷཱ་ཛ་ཡེ་སྭཱ་ཧཱ། ཞེས་པས་རྒྱལ་མཚན་གཟུགས། །ཨོཾ་པཱ་ཏ་ཀ་ཡེ་སྭཱ་ཧཱ། ཞེས་པས་བ་དན་གདགས། ཨོཾ་པ་ཊུ་དཱ་མ་ལཾ་པ་ཡེ་སྭཱ་ཧཱ། ཞེས་ [37a.2]པས་དར་དཔྱངས་གདགས། ཨོཾ་པུཥྤ་མཱ་ལ་ཡེ་སྭཱ་ཧཱ། ཞེས་པས་མེ་ཏོག་གི་ཕྲེང་བ་གདགས་སོ། །བྱང་ཆུབ་སེམས་དཔའ་ཡིན་ན་ཁབ་དང་སྙུང་བུ་དང་སོ་མངས་དབུལ། འགྲོ་བ་སེམས་ཅན་ཀུན་ལ་ཕན་པའི་ཕྱིར། །རིག་པའི་གནས་ལྔ་དག་ལ་བསླབ་བྱ་ཞེས། །ཇི་ལྟར་ཐུགས་ [37a.3]དམ་རྒྱ་ཆེ་བཞེས་པ་བཞིན། །མཁོ་བའི་ཡོ་བྱད་རྣམས་ཀྱང་དབུལ་བར་བགྱི། །ཨོཾ་ཨུ་པ་སུ་ཀ་ལ་ས་པ་རི་སྐཱ་ར་ཡེ་སྭཱ་ཧཱ། དེ་ནས་ཐམས་ཅད་ཐུན་མོང་དུ་ཡང་མཆོད་པ་རྒྱ་ཆེན་པོས་མཆོད་ལ། གདུགས་གསེར་གྱི་ཡུ་བ་ཅན་ལ་སོགས་པས་མཆོད་དེ། འབྱོར་པ་དང་ལྡན་ན་སྦྱིན་སྲེག་ཀྱང་ [37a.4]རྒྱས་པར་བྱའོ། །མ་འབྱོར་ན་ཙཱ་རུ་དབུལ་བར་བྱའོ། །དེ་ནས་རང་གི་དཀྱིལ་འཁོར་གྱི་ལྷ་རྣམས་གཤེགས་སུ་གསོལ་ཏེ། རྫོགས་སངས་རྒྱས་དང་དེ་ཡི་སྲས། །བྱང་ཆུབ་སེམས་དཔའི་ཚོགས་རྣམས་ཀུན། །རིགས་བསྡུས་དཀྱིལ་འཁོར་འཁོར་དང་བཅས། །གང་དག་ཆོ་ག་མ་ [37a.5]ཚང་བ། །དེ་དག་བཟོད་པར་མཛད་དུ་གསོལ། །ཀུན་དུ་ཞི་དང་རྒྱས་པ་ཡི། །ཡོན་བདག་ཆེད་ལ་རབ་མཛད་ནས། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་བྱོན་པར་མཛད་དུ་གསོལ། །ས་དང་ཆུ་དང་མེ་རླུང་གིས། །ཇི་སྲིད་བསྐལ་པ་འཇིག་བར་དུ། །སངས་ [37a.6]རྒྱས་ཀུན་གྱི་སྐུ་གཟུགས་ལ། །དེ་སྲིད་བཅོམ་ལྡན་བསྲུང་བར་མཛོད། །ཐུགས་བཟང་ཡིད་ལས་བྱུང་བ་ཡི། །སློབ་དཔོན་སློབ་མར་བཅས་པ་ལ། །བུ་དང་ཚ་བོ་བསྲུང་མཛད་ནས། །རབ་གནས་དེ་བས་གཤེགས་སུ་གསོལ། །ཨོཾ་བཛྲ་མུཿ། དེ་ནས་དམ་ཚིག་འཁོར་ལོ་རང་ལ་བཅུག་ནས་རབ་ [37a.7]གནས་ཀྱི་ཡེ་ཤེས་སེམས་དཔའ་བརྟན་པར་བཞུགས་སུ་གསོལ་བ་ནི། སློབ་དཔོན་དང་ཡོན་བདག་གཉིས་ཀས་གདན་ཁྲི་ལ་འཇུས་ལ་མེ་ཏོག་གི་ཕྲེང་བ་དབུལ་ཏེ། དེ་སྲིད་མེེ་དང་ཆུ་དང་ནི། །རླུང་གི་བསྐལ་པས་འཇིག་པར་དུ། །སེམས་ཅན་ཀུན་གྱི་དོན་གྱི་ཕྱིར། །བཅོམ་ལྡན་ཁྱོད་ནི་བཞུགས་པར་ [37b] [37b.1]མཛོད། །ཅེས་བརྗོད་ལ། ཕྱག་ན་རྡོ་རྗེ་ལ་མཆོད་པ་དབུལ་ཞིང་། །སྤྲུལ་སྐུ་བསྲུང་བར་མཛད་དུ་གསོལ། །ཞེས་བརྗོད་དོ། །དེ་ནས་ཆོས་སྐྱོང་གི་སྲུང་མའམ་ཕྱོགས་སྐྱོང་ངམ། མ་ཧཱ་ཀཱ་ལའམ། ཡང་ན་གང་ཡང་རུང་བ་ལ་གཏོར་མ་རྒྱ་ཆེན་པོ་དབུལ་ཞིང་། །སེམས་ཅན་ཀུན་གྱི་དོན་གྱི་ཕྱིར། །སྐུ་གཟུགས་ [37b.2]བསྲུང་བའི་ལས་བཅོལ་བར་བྱའོ། །འགྲོ་བ་སེམས་ཅན་དོན་སླད་དུ། །བདེ་གཤེགས་རྣམས་ནི་བཞུགས་བགྱིད་བར། །བདག་དང་གཞན་གྱི་དོན་གྱི་ཕྱིར། །སྤྲུལ་སྐུ་གཟུགས་བརྙན་མཐོང་བར་མཛོད། །ཅེས་བརྗོད་དོ། །གཞན་ཡང་ཡུལ་ཕྱོགས་དེ་ན་གནས་པའི་གནོད་སྦྱིན་ཕོ་མོ་ལ་ཡང་ [37b.3]གཏོར་མ་བཏང་ལ་ཆེད་ཆེར་གཏད་དོ། །གནས་བརྟན་དང་ཁྱིམ་པའི་གཙོ་བོ་རྣམས་ལ་ཡང་སྙིགས་མ་ལྔའི་དུས་སུ་སྤྲུལ་པའི་སྐུ་འདི་ཡིན་གྱིས། ཁྱོད་ཀྱིས་མ་ཉམས་པར་སྲུངས་ཤིག་ཅེས་བརྗོད་ལ། སྐུའམ་གླེགས་བམ་མམ་མཆོད་རྟེན་གང་ཡིན་པ་དེ་ན་བཟའ་གསོལ་ཏེ་འགྲོ་བ་རྣམས་ལ་བསྟན་ཏོ། ། [37b.4]མཐོང་བ་ཙམ་གྱིས་བསྐལ་པ་དཔག་ཏུ་མེད་པའི་སྒྲིབ་པ་མ་ལུས་པར་འབྱུང་བར་འགྱུར་རོ། །ཡོན་བདག་གང་ཡིན་པ་དེས་གླུ་གར་བྱ་ཞིང་བཀྲ་ཤིས་བརྗོད་ལ་སྔགས་ཀྱིས་བཏབ་པའི་ཞལ་ཟས་ལྷག་མ་རྣམས་ལ་ལོངས་སྤྱོད་དོ། །རབ་གནས་དམན་པ་མི་ཤིས་ཕྱིར། །རབ་གནས་བཟང་པོ་འདི་བྱས་པས། ། [37b.5]བྱས་པ་གང་དེས་འགྲོ་བ་ཀུན། །མཐོང་བ་ཙམ་གྱིས་སྡིག་བྱང་ནས། །སྤྲུལ་པའི་སྐུ་ཡི་ཞལ་མཐོང་ཤོག །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་རབ་ཏུ་གནས་པའི་ཆོ་ག་ཞེས་བྱ་བ། སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ། །རྒྱ་གར་གྱི་མཁན་པོ་ [37b.6]སུ་བཛྲ་དང་། །བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་བའོ།། {T2574}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི་ཙཀྲ་མ་ར་མཱ་ར་ཡ་མནྟྲ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་ངན་སྔགས་བྱད་ཀྱི་འཁོར་ལོས་གསད་པ། འཇམ་དཔལ་ [37b.7]གཤིན་རྗེའི་གཤེད་ལ་ཕྱག་འཚལ་ལོ། །རྡོ་རྗེ་འཇིགས་བྱེད་འཇིགས་པར་བྱེད། །ཁྲོ་བོའི་རྒྱལ་པོ་གདོང་དྲུག་པོ། །བཅོ་བརྒྱད་སྤྱན་དམར་གཉིས་ཀྱིས་མཛེས། །གཤིན་རྗེ་གཤེད་ལ་ཕྱག་འཚལ་ཏེ། །འཇམ་དཔལ་མགོན་གྱིས་མི་འདུལ་ཚེ། །ངན་སྔགས་བྱད་ཀྱི་འཁོར་ལོ་བརྩམ། །དེ་ལ་དུར་ [38a] [38a.1]ཁྲོད་ཆེན་པོ་རབ་འཇིགས་པར། །མ་རུངས་འདུལ་བའི་བློན་མཆོག་གིས། །དཔལ་ལྡན་འབྱོར་པ་དྲུག་རྫས་བསོག །སྲིད་པའི་རི་བོ་ཕམ་བྱས་ཏེ། །སེམས་ཅན་ངན་སོང་རྣམ་པར་སྦྱངས། །དོན་ཡོད་འགྲོ་བའི་དོན་བྱས་ཏེ། །གཙོ་བོ་དཀོན་མཆོག་ལྷུར་བླང་ཞིང་། །བླ་མ་ཕྱག་ [38a.2]བྱར་འོས་པ་ལ། །ཚོགས་གཉིས་ཚོགས་ནི་འབད་དེ་བསགས། །སྲིད་པའི་འདོད་ཆགས་རྣམ་སྤངས་ཏེ། །སྟོང་པ་ཉིད་དགའ་སྟོང་བའི་བློས། །ཡང་དག་བདག་མེད་དེ་བཞིན་ཉིད། །ཡང་དག་མཐའ་སྟེ་ཡི་གེ་བྲལ། །ཤེས་རབ་ཆེན་པོའི་སྐད་ཅིག་གིས། །ཆོས་ཀུན་ངོ་བོ་ཉིད་མེད་བྱ། །འོན་ [38a.3]ཀྱང་སྣང་བ་མ་བཀག་པས། །ཆོས་ཀུན་ནམ་མཁའི་མཚན་ཉིད་ལ། །ཡེ་ཤེས་སྐར་མ་ལམ་མེ་པ། །རང་སེམས་ཉམས་སུ་མྱོང་བ་དེ། །དགག་ཏུ་བཏུབ་པ་མ་ཡིན་པས། །རང་རིག་སེམས་ཀྱི་ཆོ་འཕྲུལ་དུ། །ཡི་གེའི་ཕྲེང་བས་ཉེ་བར་མཛེས། །འོད་ཀྱི་ཕུང་པོའི་འཕྲོ་འདུ་ཡིས། །འབྱུང་བ་ཆེན་པོ་རྒྱུ་ [38a.4]གཅིག་པོ། །རིམ་པ་བཞི་ཡིས་དཀྱིལ་འཁོར་བརྩེགས། །འབྱུང་བ་འདུས་པའི་འབྲས་བུ་ལ། །མཐུན་འཇུག་སྤྱོད་ཡུལ་བྱ་བའི་ཕྱིར། །རི་རབ་གཞལ་ཡས་ཁང་ཡང་བརྩེགས། །འཁོར་ལོ་རྩིབས་དྲུག་འབར་བ་སྟེ། །དབུས་སུ་གླང་ཆེན་བསྣོལ་བའི་ཁྲི། །ཉི་ཟླ་པདྨ་མདངས་བསྐྱེད་དེ། །རང་ [38a.5]རིག་སེམས་ཀྱི་ཆོ་འཕྲུལ་འདུས། །སྒྱུ་འཕྲུལ་དྲ་བས་མངོན་བྱང་ཆུབ། །ཡེ་ཤེས་ལྔ་རྫོགས་བཅོམ་ལྡན་འདས། །སངས་རྒྱས་ཀུན་གྱི་སྐུ་ཡི་མཆོག །དང་པོའི་སངས་རྒྱས་ཞལ་མངའ་བ། །རྒྱན་རྣམས་ཀུན་གྱིས་སྤྲས་པ་ནི། །དུང་དང་ཀུན་དེའི་འོད་འཕྲོ་བ། །ཉི་མའི་སྙིང་པོའམ་གསེར་གྱི་ [38a.6]མདོག །ཕྱག་བཞི་བ་ལ་ཞི་བའི་སྐུ། །ཤེས་རབ་རལ་གྲི་མདའ་གཞུ་བསམས། །དེ་ཡི་ཐུགས་ཀར་འཁོར་ལོ་དང་། །འཇམ་དཔལ་ཡེ་ཤེས་སེམས་དཔའ་བསྒོམ། །ཟླ་བ་ཨ་ཡི་འཕྲོ་འདུ་ཡིས། །འོག་མིན་གནས་མཆོག་དམ་པ་ནས། །རྣམ་སྣང་ཆེན་པོ་ལ་སོགས་པའི། །དཀྱིལ་ [38a.7]འཁོར་ཆེན་པོ་དྲུག་བྱོན་ཏེ། །ཐུགས་ཀའི་ཟླ་སྟེང་བཞུགས་པ་ལ། །བཀུར་སྟི་རིམ་གྲོས་མཉེས་པར་བྱ། །ཤེས་རབ་འཁོར་ལོ་ལ་བློ་གཏད། །ཡེ་ཤེས་ཕྲེང་སྔགས་བཟླས་པ་བརྩམ། །ཡེ་ཤེས་ལྔ་ཡི་སྒོ་ནས་བསྟོད། །གལ་ཏེ་ཞི་བས་མ་འདུལ་ཞིང་། །དེ་རྣམས་གཞི་དང་བཅས་པ་ཀུན། །ཆོས་ཀྱི་ [38b] [38b.1]དབྱིངས་སུ་ཐིམ་འགྱུར་ཏེ། །དང་པོའི་སངས་རྒྱས་རྒྱུ་མེད་པའི། །ཡེ་ཤེས་མིག་གཅིག་དྲི་མ་མེད། །ཆོས་ཀྱི་དབྱིངས་ལས་དྲག་པོར་བཞེངས། །ཡི་གེ་དྲུག་པོ་ཡེ་ཤེས་སྒྲས། །འཇམ་དབྱངས་ཆེན་པོ་སྒྲ་ཆེ་བ། །རྡོ་རྗེ་ཧཱུཾ་སྟེ་ཧཱུཾ་ཞེས་སྒྲོག །ནམ་མཁའི་མཐའ་ཡས་སྒྲ་སྒྲོགས་པས། །ཧཱུཾ་ལས་དྲག་ [38b.2]པོར་སྐྱེས་པ་ནི། །གཤིན་རྗེ་གཤེད་པོ་བགེགས་ཀྱི་རྒྱལ། །ཁྲོ་བོའི་རྒྱལ་པོ་གདོང་དྲུག་འཇིགས། །སྤྱན་དམར་བཅོ་བརྒྱད་ཕྱག་བཅུ་གཉིས། །རྡོ་རྗེ་འཁོར་ལོ་རྡོ་རྗེ་དང་། །པདྨ་རིན་ཆེན་རྒྱ་གྲམ་བསྣམས། །གཡས་པའི་ཕྱག་ན་ལེགས་པར་བསྣམས། །མཚོན་དུ་རྡོ་རྗེའི་མདའ་ཐོགས་པ། །གཡོན་ [38b.3]པའི་ཕྱག་རྒྱ་དང་པོ་ནི། །རྡོ་རྗེ་རལ་གྲི་མ་ལུས་གཅོད། །གཡོན་པའི་ཕྱག་རྒྱ་ཕ་རོལ་བསྡིགས། །ལྷག་པའི་ཕྱག་རྒྱ་གཞན་རྣམས་ན། །ཤེས་རབ་རལ་གྲི་མདའ་གཞུ་ཐོགས། །ཧ་ལ་ཧ་ལ་དུག་ལྟར་བཞད། །ཀེང་རུས་མཆེ་བ་གཙིགས་པ་པོ། །རལ་པ་གྱེན་བརྫེས་ཐོད་ཕྲེང་ལ། །སངས་རྒྱས་ [38b.4]ལྔ་ཡི་ཅོད་པན་འཛིན། །སྤྲུལ་དང་ཐོད་རློན་ཕྲེང་བས་ཀླུབས། །དུས་མཐའི་མེ་ལྟར་འབར་བ་འཕྲོ། །འཇམ་དཔལ་གཤིན་རྗེ་གཤེད་པོ་ནི། །རྔམ་པ་ཆེན་པོར་བདག་ཉིད་གྱུར། །ཐུགས་ཀར་ཉི་མའི་སྟེང་ན་ཧཱུཾ། །དེ་ཡི་བྱིན་རླབས་ཡ་མཚན་ནི། །ཨོཾ་ཨ་ར་པ་ཙ་ན་ཡ་མཱནྟ་ཀ་ཧཱུཾ། ཨོཾ་པྲཛྙཱ་ [38b.5]ཛྙཱ་ན་མཱུརྟ་ཡེ་ཡ་མཱནྟ་ཀ་ཧཱུཾ། ཨོཾ་དུཿཁ་ཙྪེ་ད་ཡ་མཱནྟ་ཀ་ཧཱུཾ། ཨོཾ་བཛྲ་ཏཱིཀྵྞ་ཡ་མཱནྟ་ཀ་ཧཱུཾ། ཨོཾ་ཝཱ་གཱི་ཤྭ་ར་ཡ་མཱནྟ་ཀ་ཧཱུཾ། ཨོཾ་ཛྙཱ་ན་ཀཱ་ཡ་ཡ་མཱནྟ་ཀ་ཧཱུཾ། ཨོཾ་ཧཱུཾ་ཧཱུཾ་སརྦ་ཏ་ཐཱ་ག་ཏ་ཧྲི་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ན་མཱུརྟི། བཱ་གཱི་ཤྭ་རི་མ་ཧཱ་པཱ་ཙ་སརྦ་དྷརྨཱ་ག་ག་ན། ཨ་མ་ལ་སུ་བ་ [38b.6]རི་ཤུདྡྷ་དྷརྨཱ་ཏུ་ཛྙཱ་ན་གརྦྷྲ་ཧཱུཾ། ཁྲོ་བོའི་རྒྱལ་པོ་ཧཱུཾ་ལས་བྱུང་། །འཁོར་ལོ་འབར་བའི་རྩིབས་དྲུག་ལས། །རིམ་པ་འདི་ལྟར་ཁྲོས་པས་གནས། །མནར་མེད་གཤིན་རྗེ་གཤེད་པོ་ནི། །ཞལ་གཅིག་ཕྱག་གཉིས་རྡོ་རྗེ་འཛིན། །གཏི་མུག་གཤིན་རྗེ་གཤེད་པོ་ནི། །ཞལ་གཅིག་ཕྱག་གཉིས་ [38b.7]འཁོར་ལོ་འཛིན། །ཞེ་སྡང་གཤིན་རྗེ་གཤེད་པོ་ནི། །ཞལ་གཅིག་ཕྱག་གཉིས་རྡོ་རྗེ་འཛིན། །འདོད་ཆགས་གཤིན་རྗེ་གཤེད་པོ་ནི། །ཞལ་གཅིག་ཕྱག་གཉིས་པདྨ་འཛིན། །ང་རྒྱལ་གཤིན་རྗེ་གཤེད་པོ་ནི། །ཞལ་གཅིག་ཕྱག་གཉིས་རིན་ཆེན་འཛིན། ཕྲག་དོག་གཤིན་རྗེ་གཤེད་པོ་ནི། ། [39a] [39a.1]ཞལ་གཅིག་ཕྱག་གཉིས་འཁོར་ལོ་འཛིན། །གཡོན་པས་ཀུན་ཀྱང་འཁོར་ལོ་བསྐོར། །སྤྲུལ་དང་ཐོད་པའི་ཕྲེང་བས་བརྒྱན། །དུས་མཐའི་མེ་དཔུང་ནང་ན་བཞུགས། །བརྐྱང་བསྐུམ་ཞབས་ཀྱིས་གཤིན་རྗེ་བརྫིས། །རེ་རེའི་སྐུ་ལ་ཁྲོ་བོའི་ཚོགས། །ཁྲོ་གཉེར་རིམ་པར་ལྡན་ལ་ [39a.2]སོགས། །གྲངས་མེད་མཐའ་ཡས་པ་ཡིས་བསྐོར། །ལག་ན་རྡོ་རྗེ་མཐའ་ཡས་པ། །དེ་ལྟར་གསལ་བའི་ཏིང་འཛིན་གྱིས། །ཡེ་ཤེས་ཁྲོ་བོ་ཉེ་བར་བསྡུ། །ཧཱུཾ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ། ཧཱུཾ་བཛྲ་ཀྲོ་དྷ་ས་པ་རི་ཝཱ་རེ་བཛྲ་ས་མནྟ་ཨེ་ཧྱེ་ཧི་དྲྀ་ཤྱ་ཛཿཧཱུཾ་བཾ་ཧོཿཞེས་རིགས་བསྡུས་ཀྱི་དཀྱིལ་འཁོར་ཆེན་པོ་རྣམས། [39a.3]ཁྲོ་བོར་བྱོན་ནས་ཉེ་བར་བྱོན། །རྒྱལ་བ་མཆོད་པས་མཉེས་བྱས་ཏེ། །བདག་དང་གཉིས་སུ་མེད་པར་བཞུགས། །གསང་སྔགས་རྒྱལ་པོས་གཟི་མདངས་བསྐྱེད། །འཇམ་དཔལ་མཚན་ནི་ཁྲོས་པས་བརྗོད། །གསང་སྔགས་རྒྱལ་པོ་ཁྲོས་པས་བཟླས། །སངས་རྒྱས་ཀུན་གྱི་ཁྲོ་བོའི་སྐུ། །དབྱེ་ [39a.4]བ་དཔག་མེད་སྐྱེ་བ་ཡིས། །ཁམས་གསུམ་ཁྲོ་བོས་བཀང་བྱས་ཏེ། །རྡོ་རྗེ་ཁྲོ་བོའི་དམག་ཚོགས་ཀྱིས། །བདུད་ཀྱི་དཔུང་རྣམས་ཕམ་བྱས་ཏེ། །གསད་ཅིང་མནན་པ་ཁོ་ནར་ཟད། །སྤྲུལ་པ་ཉེ་བར་བསྡུ་བྱ་སྟེ། །རྡོ་རྗེ་འཇིགས་བྱེད་སོགས་ཀྱིས་བསྟོད། །དེ་ལྟར་བརྟན་པ་སྟོབས་སུ་འགྱུར། །གལ་ཏེ་ [39a.5]ཏིང་འཛིན་མི་གསལ་ན། །དམིགས་པ་རྩེ་གཅིག་ཆོ་ག་བྱ། །དུས་མཐའི་དགྲ་བོ་གསད་པ་ནི། །མ་རུངས་འདུལ་བའི་སེམས་ཀྱིས་སུ། །དུར་ཁྲོད་ཐོད་པ་མི་སྲུན་གཤགས། །ནང་དུ་གཤིན་རྗེའི་རྒྱལ་པོ་བྲི། །ཁ་གདངས་པར་ནི་ཤིན་ཏུ་གསལ། །འོག་མ་གཤིན་རྗེའི་ཁང་པར་བཅད། །ཡ་གནག་ [39a.6]བཅུ་བདུན་མུན་པའི་སྨག །སྒོ་མེད་སྒོ་ང་ལྟ་བུའི་ནང་། །ཡིད་ཀྱིས་གཟུགས་བརྙན་རྫུ་འཕྲུལ་ལྡན། །དགྲ་བོའི་རྣམ་ཤེས་རླུང་འདྲ་བ། །སྲོག་དང་འགྲོགས་ཏེ་ཆུད་གྱུར་ན། །སླར་ནི་ཐོན་པའི་སྐལ་མེད་དོ། །གཤིན་རྗེས་ཟིན་པས་མི་འཆོར་རོ། །གང་དམིགས་བསྒྲུབ་བྱའི་སྙིང་གི་ [39a.7]དཀྱིལ། །སྲོག་པ་རྩ་ཡི་རང་བཞིན་ལས། །ངན་སྔགས་བྱད་ཀྱི་འཁོར་ལོ་བཅའ། །རྩིབས་དྲུག་ལ་སོགས་གསང་སྔགས་བཅས། །ཀུན་ལ་འཆི་རྐྱེན་སྤེལ་ཏེ་བྲིའོ། །ཨོཾ་ཨ་ར་པ་ཙ་ཤ་ཏྲཱུཾ་ཆེ་གེ་མོ་མཱ་ར་ཡ། ཨོཾ་པྲཛྙཱ་ཛྙཱ་ན་མཱུརྟྟ་ཡ། ཤ་ཏྲཱུཾ་མཱ་ར་ཡ། ཨོཾ་དུཿཁཙྪེ་ད་ཤ་ཏྲཱུཾ་མཱ་ར་ཡ། [39b] [39b.1]ཨོཾ་བཛྲ་ཏཱི་ཀྵྞ་ཤ་ཏྲཱུཾ་མཱ་ར་ཡ། ཨོཾ་བཱ་གཱི་ཤྭ་ར་ཤ་ཏྲཱུ་མཱ་ར་ཡ། ཨོཾ་ཛྙཱ་ན་ཀཱ་ཡ་ཤ་ཏྲཱུཾ་མཱ་ར་ཡ། ཨོཾ་ཧཱུཾ་ཧཱུཾ་ཧཱུཾ་སརྦ་ཏ་ཐཱ་ག་ཏ་ཧྲི་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་ཝཱན་ཛྙ་ན་མཱུརྟི་བཱ་གཱི་ཤྭ་ར་མ་ཧཱ་པཱ་ཙ་སརྦ་དྷརྨྨ་ག་ག་ན་ཨ་མ་ལ་སུ་པ་རི་ཤུདྡྷ། དྷརྨྨ་དྷཱ་ཏུ་ཛྙཱ་ན་གརྦྷ་ཧཱུཾ། ཤ་ཏྲཱུ་མཱ་ར་ཡ་ཧཱུཾ་ཕཊ་ཅེས། གསང་སྔགས་རྒྱལ་པོ་འདི་ [39b.2]དྲན་པས། གང་དམིགས་གདུག་པ་ཉེ་བར་འཇིག། །རང་རྒྱུད་གནས་ནས་གཤིན་རྗེ་བཀུག །ཐོད་པ་རང་བྱུང་དེ་ལ་བསྟིམ། །གདུག་པའི་གནས་ནས་དགྲ་བོ་དགུག །མཐུན་པའི་གཟུགས་བརྙན་དེ་ལ་བསྟིམ། །བདག་ཉིད་སྙིང་གའི་སྔགས་འོད་ཀྱིས། །དགྲ་བོའི་སྙིང་གའི་འཁོར་ལོ་བསྐོར། །ལྟེ་བ་ [39b.3]འཁོར་ཞིང་རྩིབས་ཀྱིས་གཅོད། །གང་དམིགས་བསྒྲུབ་བྱའི་ཚེ་སྲོག་ཕྲལ། །ལུང་སྟོང་མེ་མར་མེ་ལྟར་འགྱུར། །གཟུགས་དེ་འཁོར་ལོས་དུམ་བུར་གཏུབ། །དྲག་པོའི་གཏོར་མར་བཅུག་བྱས་ཏེ། །ཐོད་ནང་གཤིན་རྗེ་དེ་ལ་སྦྱིན། །ཆོས་སྐྱོང་སྲུང་མར་བསྒོ་བྱ་སྟེ། །རང་གི་གནས་སུ་ཅི་བདེར་བཏང་། །གཏོར་ [39b.4]མ་དག་ཀྱང་ལྷོ་ཕྱོགས་བསྐྱལ། །དེ་ནས་རང་ཉིད་བརྟན་བྱས་ཏེ། །ཆོ་ག་མ་ལུས་རྫོགས་པར་བྱ། །སྤྱི་དང་ཁྱད་པར་རིམ་པ་ཡིས། །བསྡུས་རྒྱས་བྱེ་བྲག་ཤེས་པར་བྱ། །ཐ་མའི་རྒྱུད་དྲག་ངང་ཐུང་ཆེ། །འགྲོ་བ་ལོག་ལྟ་འཁྲུལ་གྱུར་ནས། །སངས་རྒྱས་སྒྲུབ་ལ་བར་གཅོད་ཅིང་། །བྱང་ཆུབ་ཚེ་སྲོག་འཕྲོག་ [39b.5]བྱེད་ལ། །འཁོར་ལོ་འདི་ཡིས་གཅོད་གྱུར་ཅིག །དེ་ཡི་ནུས་པ་བསྐྱེད་ནས་ནི། །བདུད་དགྲ་ཐམས་ཅད་ཕམ་བྱས་ནས། །ཕས་ཀྱི་རྒོལ་བ་ཉེར་ཞི་སྟེ། །རྫོགས་པའི་བྱང་ཆུབ་ཐོབ་པར་ཤོག །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་ངན་སྔགས་ཀྱི་བྱད་ཀྱི་འཁོར་ལོའི་སྒྲུབ་ཐབས། སློབ་དཔོན་ཆེན་པོ་འཇམ་དཔལ་ [39b.6]བཤེས་གཉེན་གྱིས་མཛད་པ་རྫོགས་སོ། །རྒྱ་གར་གྱི་མཁན་པོ་སུ་བཛྲ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། {T2575}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི་སརྦ་པཱ་པཾ་བི་ཤོ་དྷ་ན་བི་དྷི་མཎྜ་ལ་ནཱ་མ། བོད་སྐད་དུ། འཕགས་པ་འཇམ་ [39b.7]དཔལ་གྱི་མཚན་ཡང་དག་པར་བརྗོད་པའི་སྡིག་པ་སྦྱོར་བའི་དཀྱིལ་འཁོར་གྱི་ཆོ་ག་ཞེས་བྱ་བ། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །སྲིད་པའི་དྲ་བ་རྣམ་བཅོམ་ནས། །མ་རིག་སྒོ་ངའི་སྦུབས་འབྱེད་དེ། །སེམས་ཅན་ངན་སོང་རྣམ་སྦྱོང་བའི། །འཇམ་དབྱངས་དེ་ལ་གུས་བཏུད་ [40a] [40a.1]ནས། །མ་རིག་འཁྲུལ་པའི་སེམས་ཅན་རྣམས། །འཁོར་བའི་རྒྱ་མཚོ་ལས་བསྒྲལ་བའི། །ཕན་པའི་ཆོ་ག་བཟང་པོ་ཞིག། །གཞན་གྱི་དོན་དུ་བྲི་བར་བྱ། །དེ་ལ་སེམས་ཅན་རྣམས་ནི་གཏི་མུག་གི་མུན་ཁུང་དུ་ཡེ་ཤེས་ཀྱི་སྣང་བ་མ་ཤར་བའི་དབང་གིས་ཉིང་ཤ་ཉིང་གིས་ཟ་ཞིང་ཉིང་ [40a.2]སྲོག་ཉིང་གིས་གཅོད་པ་ལས་དེའི་རྣམ་པར་སྨིན་པ་ཚེ་འཕོ་བ་ལྟ་བུ་ཡང་ནས་ཡང་དུ་འབྱུང་སྟེ། ཉོན་མོངས་པའི་འབྲས་བུ་ངན་སོང་རྣམས་སུ་སྨིན་པ་རྣམས་ལ་རེ་ཞིག་ཕན་པའི་སེམས་ཀྱིས་མ་རིག་པའི་རྒྱ་དྲལ་ཏེ། ཉོན་མོངས་པའི་མདུད་པ་ལས་བཀྲོལ་ནས་ཡང་དག་པའི་ཐར་པ་དང་། ཐམས་ཅད་མཁྱེན་པའི་ [40a.3]ལམ་བསྟན་ཏེ། །ཚེ་འཕོས་པ་ལྟ་བུ་དེ་ཡང་དེའི་གཟུགས་སམ་རུས་སམ་མིང་ངམ། སྟོད་གཡོགས་ལ་སོགས་པ་སྟ་གོན་བྱས་ལ། དང་པོ་ཁོ་ནར་ཞེ་སྡང་གི་གཉེན་པོ་མི་བསྐྱོད་པའི་བསྙེན་པ་བྱས་ལ། རང་ཉིད་མི་བསྐྱོད་པ་བྱང་ཆུབ་སེམས་དཔའི་འཁོར་གྱི་བསྐོར་བའི་སྙིང་གའི་ཟླ་བའི་རྡོ་རྗེ་དང་ཕྲེང་སྔགས་ཀྱི་འོད་ [40a.4]ཟེར་གྱིས་བྱིན་རླབས་དང་། རང་མི་བསྐྱོད་པ་རྡོ་རྗེ་རིགས་ཀྱི་ལྷ་ཚོགས་ཀྱི་མཚན་བརྗོད་པའི་བྱིན་རླབས་ལས་སངས་རྒྱས་ཀུན་གྱི་སྤྲུལ་པའི་སྐུ་བྱེ་བ་དཔག་ཏུ་མེད་པ་སེམས་ཅན་དམྱལ་བའི་གནས་སུ་སྐྱེ་ན། སེམས་ཅན་དམྱལ་བ་དེ་རྣམས་ཐམས་ཅད་ཀྱིས་ཀྱང་སྐད་ཅིག་གིས་ཆོས་ཐམས་ཅད་མངོན་པར་རྟོགས་ནས། [40a.5]སེམས་ཅན་དམྱལ་བ་དེ་དག་གི་ལས་ཀྱི་ཁམས་ཟད་པར་བྱས་ནས་དམྱལ་བའི་སྡུག་བསྔལ་གྱི་རྒྱ་མཚོ་དེ་ལས་བཏོན་ཏེ། ཉོན་མོངས་པ་དང་ཉེ་བའི་ཉོན་མོངས་པའི་བག་ཆགས་དང་བཅས་པ་གཏན་སྤངས་ནས་སེམས་ཅན་དེའི་ཡིད་ཀྱི་ཡུལ་དང་སངས་རྒྱས་ཀྱི་ཐུགས་རིག་པ་ལམ་མཚོན་པའི་ཨ་དཀར་པོ་ [40a.6]ཐུང་ངུ་ལྟ་བུར་བྱས་ཏེ། སེམས་ཅན་དེའི་གཟུགས་ཀྱི་ཕུང་པོ་ལ་ཡིད་གནས་པར་བྱས་ནས། དེ་དག་གི་སྔར་གྱི་གཟུགས་དེའི་སེམས་དང་མཐུན་པར་བཅུག་ལ་དེ་ལ་བདག་ཉིད་གཙོ་བོ་དང་ལྷ་རྣམས་ཀྱི་ཐུགས་ཀའི་སྔགས་ཀྱི་འོད་ཟེར་གྱིས་དེའི་བག་ཆགས་དག་པར་བྱའོ། །དེའི་རྗེས་ལ་བུམ་ [40a.7]པའི་ཆུས་ཀྱང་དྲི་མ་བཀྲུ་བའི་ཕྱིར་ཡེ་ཤེས་སེམས་དཔའི་ཕྲེང་སྔགས་དང་། རིག་སྔགས་དང་། སརྦ་ནཱ་ར་དང་། སརྦ་པཱ་པཾ། སརྦ་ཀརྨྨ་ཨཱ་པ་ར་ཎ་བི་ཤོ་དྷ་ནི་བི་ཤོ་དྷ་ནེ་སྭཱ་ཧཱ། ཞེས་པས་བཀྲུའོ། །དེ་ལྟར་བསྙེན་པ་རྫོགས་པ་དང་མི་བསྐྱོད་པའི་རིགས་ཀྱི་དཀྱིལ་འཁོར་ཆེན་པོར་བཅུག་སྟེ། [40b] [40b.1]སེམས་ཅན་དམྱལ་བ་ལས་གྲོལ་བར་བྱས་ཏེ་དབང་བསྐུར་བར་བྱའོ། །དེ་དང་རྗེས་སུ་མཐུན་པ་རིན་པོ་ཆེའི་རིགས་ཀྱི་ལྷ་ཉེ་བར་བྱས་ལ། སེར་སྣའི་གཉེན་པོ་རིན་ཆེན་འབྱུང་ལྡན་གྱི་དཀྱིལ་འཁོར་དུ་བཅུག་སྟེ། ཡི་དགས་ཀྱི་གནས་ངན་ལས་བསྒྲལ་ཏེ་དབང་བསྐུར་བར་བྱའོ། །དེ་ནས་ཡང་དེ་དང་ [40b.2]རྗེས་སུ་མཐུན་པའི་རིགས་ཀྱི་བུའམ་རིགས་ཀྱི་བུ་མོ་སྐལ་པ་དང་ལྡན་པ་དེ་བྱོལ་སོང་གི་གནས་ནས་ཐར་བར་བྱ་བའི་ཕྱིར་གཏི་མུག་གི་གཉེན་པོར་རྣམ་པར་སྣང་མཛད་ཀྱིས་སྦྱང་སྟེ། དེ་བཞིན་གཤེགས་པའི་རིགས་ཀྱི་མཚན་བརྗོད་ནས་རྣམ་སྣང་གི་དཀྱིལ་འཁོར་དུ་བཅུག་སྟེ་དབང་བསྐུར་བར་བྱའོ། །དེ་ནས་ཡང་དེ་ [40b.3]དང་རྗེས་སུ་མཐུན་པར་ཕྲག་དོག་གི་གཉེན་པོར་དོན་ཐམས་ཅད་གྲུབ་པའི་དཀྱིལ་འཁོར་བྲིས་ཏེ། ལྷ་མ་ཡིན་གྱི་གནས་ནས་ཐར་བར་བྱས་ལ་རིགས་ཀྱི་བུ་དེ་ལ་དབང་བསྐུར་བར་བྱའོ། །དེའི་རྗེས་ལ་འདོད་ཆགས་ཀྱི་གཉེན་པོ་སྣང་བ་མཐའ་ཡས་ཀྱིས་སྦྱང་སྟེ། ལྷ་རྣམས་ཀྱི་གནས་ལས་ཐར་པར་བྱས་ནས་ཚེ་ [40b.4]འདས་པ་རིགས་ཀྱི་བུ་དེ་པདྨའི་རིགས་ཀྱི་དཀྱིལ་འཁོར་ཆེན་པོར་བཅུག་ནས་དབང་བསྐུར་བར་བྱའོ། །དེའི་རྗེས་ལ་དུག་གསུམ་ཆ་མཉམ་པའི་གཉེན་པོས་སྦྱང་སྟེ། ཚེ་ལས་འདས་པ་མིའི་གནས་སུ་བྱང་ཆུབ་སེམས་དཔའ་རྡོ་རྗེའི་དཀྱིལ་འཁོར་དུ་བཅུག་སྟེ་དབང་བསྐུར་ཏེ་ཉོན་མོངས་པ་དེ་ལས་ཐར་བར་བྱའོ། ། [40b.5]དེ་ལྟར་ཉོན་མོངས་པ་ལྔ་དང་བྲལ་ནས་ཁམས་གསུམ་གྱི་འགྲོ་བ་རིགས་དྲུག་གི་གནས་ནས་ཐར་བ་དེ་རིགས་ཐམས་ཅད་བསྡུས་པའི་དཀྱིལ་འཁོར་དུ་བཅུག་སྟེ། དབང་རྣམས་ཡང་དག་པར་བསྐུར་ནས་རྫོགས་པའི་སངས་རྒྱས་ཀྱི་ས་ལ་རིགས་ངེས་པ་ཅན་དུ་བྱའོ། །དེ་ལྟར་ན་འདི་གཞན་གྱི་དོན་དུ་ [40b.6]གསུངས་པའི་ཆོ་ག་ཡིན་ནོ། །སེམས་ཅན་ངན་སོང་རྣམ་སྦྱོང་བ། །ཆོ་ག་མྱུར་དུ་བྱས་པ་ལས། །བསགས་པའི་དགེ་བས་འགྲོ་བ་ཀུན། །འཁོར་བའི་རྒྱ་མཚོ་ལས་བརྒལ་ནས། །སྲིད་པའི་སྡུག་བསྔལ་དང་བྲལ་ཏེ། །དཔལ་ལྡན་སངས་རྒྱས་ཐོབ་པར་ཤོག །འཕགས་པ་འཇམ་དཔལ་ [40b.7]གྱི་མཚན་ཡང་དག་པར་བརྗོད་པའི་ཚེ་འཕོས་པ་ལ་ཕན་པའི་བདུན་ཚིགས་ཀྱི་ཆོ་ག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་སུ་བཛྲ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་བའོ། །{T2576}༄༅༅། །རྒྱ་གར་སྐད་དུ། ཨཱརྱ་ [41a] [41a.1]མཉྫུ་ཤྲཱི་ནཱ་མ་སཾ་གཱི་ཏི་བི་དྷི་ཧོ་མ་པཱ་བཾ་ཤོ་དྷ་ཡ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྡིག་པ་སྦྱོང་བའི་སྦྱིན་སྲེག་གི་ཆོ་ག་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མི་ཤེས་དྲི་མ་སེལ་མཛད་ཅིང་། །ཤེས་རབ་ [41a.2]ཡེ་ཤེས་སྤྱན་འབྱེད་པའི། །འཇམ་དབྱངས་དེ་ལ་ཕྱག་འཚལ་ནས། །སེམས་ཅན་ངན་སོང་རྣམ་སྦྱོང་བའི། །ཆོ་ག་ཚེ་འདས་ལ་ཕན་པ། །གཞན་གྱི་དོན་དུ་བཤད་པར་བྱ། །དེ་ལ་འདིར་གཟའ་དང་སྐར་མ་བཟང་པོ་བཀྲ་ཤིས་པའི་ཉི་མ་ལ་ཚུལ་དང་མཐུན་པའི་དཀྱིལ་འཁོར་དང་འབྲེལ་པའམ་མ་འབྲེལ་ [41a.3]ཀྱང་རུང་སྟེ། ཕྱོགས་དང་མཐུན་པའི་གནས་བཟང་པོར་ས་བསླང་བ་ལ་སོགས་པ་སྔོན་དུ་འགྲོ་བས་སའི་རྒྱར་ཁྲུ་བཅུ་དྲུག་པ་ལ་གྲུ་བཞིར་བྱས་ཏེ། དབུས་སུ་དེའི་ཕྱེད་ཀྱི་ཚད་ཀྱིས་ཟླུམ་པོར་བསྐོར་ལ་ཁྲུ་གང་གྱེན་དུ་མཐོ་བ་དང་། དེའི་ཁ་ཁྱེར་ཡང་དེའི་ཚད་དུ་བྱས་ལ། དེ་ནས་ནང་དུ་ཁྲུ་ཕྱེད་ཀྱི་བར་དུ་ཟབས་སུ་ [41a.4]རྒྱར་ཆུད་པར་བྱས་ལ་ནང་གི་ཟབས་སུ་ཡང་ཁྲུ་གང་ཐབ་ཁུང་བྱའོ། །དེ་ལ་རྡོ་རྗེ་དཀར་པོ་དང་། འཁོར་ལོ་དཀར་པོ་དང་། རྡོ་རྗེ་སྔོན་པོ་དང་། རིན་པོ་ཆེ་སེར་པོ་དང་། པདྨ་དམར་པོ་དང་། རྒྱ་གྲམ་ལྗང་གུས་བསྐོར་བར་བྱའོ། །དེ་ལ་ཙནྡན་དང་རྒྱ་ཤུག་ལ་སོགས་པ་དུག་གི་རྒྱུ་ [41a.5]ལས་མ་བྱུང་མ་སྐྱེས་པའི་ཤིང་སོགས་ཏེ། དེའི་ནང་གང་ཡིན་པ་དེར་སེམས་ཅན་གང་དག་ཚེ་འཕོས་པ་དེའི་གཟུགས་ཀྱི་ཕུང་པོ་ཁྲུས་བྱས་ལ་དྲིས་བསྒོས་ཏེ། རྒྱན་བཏགས་ལ་སྐྱིལ་མོ་ཀྲུང་གི་ཚུལ་དུ་ཁ་ནུབ་ཏུ་ཕྱོགས་པར་བཞག་ལ། སྟེང་དང་ཕྱོགས་མཚམས་སུ་ཀུ་ཤས་གཡོགས་ལ་ [41a.6]གཞག་གོ །དེ་ནས་གཡོན་དུ་བསང་ཆུ་དང་། མཆོད་ཡོན་གཞག་ཅིང་མཆོད་པ་ལྔ་བཀྲམ་ནས། མདུན་དུ་ཡམ་ཤིང་དང་། ཏིལ་དང་། ཡུངས་ཀར་དང་། མར་དང་བའི་འོ་མ་དང་། ཞོ་དང་། འབྲས་ཆན་དང་། ཀུ་ཤ་དང་དཱུར་བ་དང་། ནས་དང་། གྲོ་དང་། སོ་བ་དང་། སྲན་མ་དང་། སྲན་མ་ཤ་དང་། [41a.7]འབྲས་སོ་བ་དང་། བིལ་བ་དང་། སྟར་ག་དང་། ཛཱ་ཏི་དང་། འབྲས་བུ་གསུམ་དང་། ཨུ་དུམ་བཱ་རའི་ཤིང་དང་། ནགས་ཀྱི་ལྕུག་མ་རླན་དང་བཅས་པ་དང་། འབྲས་མ་གྲུགས་པ་དང་། སྤང་སྤོས་དང་། མངར་གསུམ་དང་། ཟས་ཀྱི་རྣམ་པ་སྲོག་ཆགས་ལས་མ་ [41b] [41b.1]བྱུང་བ་དང་། མཆོག་ཏུ་དྲི་དང་བཅས་པའི་སྲེག་རྫས་རྣམས་ཀུ་ཤ་གཅལ་དུ་བཀྲམ་པའི་སྟེང་དུ་ཤིང་ལོ་བཟང་པོའམ་རས་སར་བའི་སྟེང་དུ་གཞག་གོ །མདུན་དུ་དགང་གཟར་བླུགས་གཟར་གཞག་གོ །དེ་ལྟར་རྫས་རྣམས་ཚོགས་པར་བྱས་ལ། བདག་རྡོ་རྗེ་སློབ་དཔོན་གྱི་རྒྱན་རྣམས་བགོ་སྟེ། [41b.2]རྡོ་རྗེ་དྲིལ་བུ་བཟུང་ལ་མ་རུངས་པ་འདུལ་བའི་རྒྱལ་པོ་གཤིན་རྗེ་གཤེད་པོ་དྲན་པའི་བྱིན་རླབས་ཀྱིས་ལོག་འདྲེན་གྱི་ཚོགས་གང་ཡིན་པ་དེ་རྣམས་ཕམ་པར་བྱས་ནས་ཅིས་ཀྱང་མི་ཚུགས་པའི་གུར་དུ་བསམ་མོ། །དེ་ནས་སྡིག་པ་བྱང་ཞིང་དགེ་བ་ལ་འདུན་པ་བཟང་པོ་བསྐྱེད་དེ། སྐལ་བ་དང་ལྡན་པར་བྱ་ [41b.3]བའི་ཕྱིར་ངེས་པར་བྱང་ཆུབ་མཆོག་ཏུ་སེམས་བསྐྱེད་དོ། །དེའི་རྗེས་ལ་བདག་ཉིད་ཤིན་ཏུ་སྦྱངས་པ་དང་ལྡན་པས་སྒྱུ་འཕྲུལ་དྲ་བ་མངོན་པར་བྱང་ཆུབ་པའི་སྙིང་རྗེ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། དཀྱིལ་འཁོར་གྱི་འཁོར་ལོ་མངོན་པར་སྦྲུལ་ནས་སེམས་ཅན་ཐམས་ཅད་ཀྱི་ངན་པ་ [41b.4]སོང་ཡོངས་སུ་སྦྱང་བར་བྱའོ། །དེ་ནས་འབྱུང་བ་བཞི་ལས་ངེས་པར་བྱུང་བའི་དཀྱིལ་འཁོར་བརྩེག་གོ །གཟུགས་ཀྱི་ཁོག་པ་གང་ཡིན་པ་ལས་ངེས་པར་འབྱུང་བའི་མེ་ཐབ་ཀྱི་འཁོར་ལོ། །དེའི་ནང་དུ་མེའི་དཀྱིལ་འཁོར་ཟུར་གསུམ་པ་དབུས་སུ་རཾ་གྱིས་མཚན་ཅིང་ཟུར་གསུམ་ལ་ཁམས་གསུམ་ [41b.5]གྱི་ལས་དང་ཉོན་མོངས་པ་ཞལ་དུ་གསོལ་བའི་རྟགས་ཨོཾ་ཨཱཿཧཱུཾ་གསུམ་ཡིད་ཀྱིས་བྲིས་ཏེ། བྲམ་ཟེ་ཤིན་ཏུ་སྦྱངས་པའི་ཁྱིམ་ནས་མེ་བླངས་ལ། བཛྲ་ཛྭ་ལ་རཾ་ཞེས་བརྗོད་ཅིང་རླུང་ཡབ་ཀྱིས་གཡབས་ཏེ། ཀུ་ཤ་ལ་མེ་སྦར་ནས་དེའི་བྱིན་རླབས་ཀྱིས་གོང་གི་ཡི་གེ་གང་ཡིན་པ་ལས་བསྐྱེད་པའི་མེ་ལྷའི་ [41b.6]རྒྱལ་པོ་བྷ་བ་ཀ་དུང་དང་ཀུན་ད་ལྟ་བུ་བསྐྱེད་དེ། པདྨ་དང་ཟླ་བའི་གདན་ལ་ངེས་པར་རྫོགས་པ་དང་། ཞལ་གཅིག་ཕྱག་བཞི་པ། གུནྡྷེ་དང་དབྱུག་པ་དང་། བགྲང་ཕྲེང་དང་མེ་ཐབ་བསྣམས་པ་བསྒོམ་མོ། །དེ་ནས་སྔགས་པས་མེ་ལྷ་བྷ་བ་ཀ་སྤྱན་དྲངས་ཏེ། ཨོཾ་ཚུར་གཤེགས་ཚུར་གཤེགས་འབྱུང་ [41b.7]པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །སྲེག་བླུགས་ཞལ་ཟས་འདི་བཞེས་ལ། །འབར་བའི་གདན་ལ་བཞུགས་སུ་གསོལ། །ཨོཾ་ཨེ་ཧྱེ་ཧི་མ་ཧཱ་བྷཱུ་ཏ་དེ་བ་རྀ་ཥི་རཱ་ཛ་སཏྭ་མཧཱ་ཀྲོ་དྷི་ཨཱཿཧཱུཾ། མ་ཧཱ་ཡཱ་མ་ན་ནི་ཧི་ཏོ་བྷ་བ་ཨོཾ། བྷ་བ་ཀ་ཨགྣ་ཡེ་སྭཱཧཱ། ཞེས་སྤྱན་དྲངས་ལ་མཆོད་ཡོན་དབུལ་བ་ནི། [42a] [42a.1]ཨོཾ་བྷ་བ་ཀ་ཨགྣ་ཡེ་ག་ག་ན་ཡེ་སྭཱཧཱ། ཞེས་བརྗོད་ལ། ཨོཾ་བྷ་བ་ཀ་ཨགྣི་ཛཿཧཱུཾ་བཾ་ཧོཿ། ཞེས་བྱ་བས་དགུག་པ་དང་གཞུག་པ་དང་། བཅིང་བ་དང་དབང་དུ་བྱ་བ་དང་། དམ་ཚིག་གི་ཕྱག་རྒྱ་བསྟན་ཅིང་། ཨོཾ་བཛྲ་ཨགྣ་ཡེ་མ་ཧཱ་བྷཱུ་ཏ་ཛྭ་ལ་སརྦ་བྷ་སྨིཾ་ཀུ་རུ་སརྦ་དུཥྚཱ་ན་ཀྲོ་དྷ་ཛཿཧཱུཾ་བཾ་ཧོཿས་མ་ [42a.2]ཡ་སྟྭཾ། ཨ་ཧཱུཾ་ཞེས་བརྗོད་པས་ཕྱག་རྒྱ་བཞིས་རྒྱས་བཏབ་ཅིང་། དེ་ལ་དབང་བསྐུར་སྦྱིན་ནོ། །ཡི་གེ་གསུམ་གྱིས་བྱིན་གྱིས་བརླབས་ལ། ཨོཾ་བྷ་བ་ཀ་བཛྲ་ཨགྣ་ཡེ་བཛྲ་པུཥྤཾ་ཞེས་བྱ་བ་ལ་སོགས་པས་མཆོད་པ་ལྔ་དང་། མཆོད་ཡོན་དབུལ་བར་བྱའོ། །དེ་ནས་ཐོག་མར་མེའི་གཟི་བརྗིད་བསྐྱེད་པའི་ཕྱིར་མར་ [42a.3]གྱི་དགང་བླུགས་བདུན་ནམ་ལྔ་དབུལ་ལོ། །ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་སརྦ་བྷསྨིཾ་ཀུ་རུ་སརྦ་དུཥྚཱ་ན་ཧཱུཾ་ཕཊ་ཅེས་བརྗོད་ལ་མེའི་མདོག་ལེགས་པར་བརྟགས་ཏེ། དཀར་སེར་འཁྱིལ་ཞིང་འབར་བ་དང་། །མ་ཆད་མ་བྱེ་མི་འཕྲོ་དང་། །སྒྲ་དང་དུ་བ་ཀུན་དུ་སྤངས། །འཇམ་ལ་རྣོ་ཞིང་གསལ་ན་བཟང་། ། [42a.4]གནག་ཅིང་རྩུབ་པ་ངན་པ་དང་། །ཆད་ཅིང་འུར་འུར་མེ་སྟག་འཕྲོ། །མི་གསལ་མི་འབར་དུ་བས་འཁྲིགས། །ངན་ན་དེའི་བར་ཆད་ཞི་བར་བྱས་ལ། དེ་ནས་ཡམ་ཤིང་དབུལ་ཏེ། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་སརྦ་བྷསྨི་ཀུ་རུ་སརྦ་དུཥྚཱ་ན། བྷ་བ་ཀ་ཨགྣ་ཡེ་བཛྲ་མ་ཏ་ཡེ་སྭཱ་ཧཱ། [42a.5]ཡཾ་ཤིང་གིའོ། །དེ་བཞིན་དུ་ཀུན་ལ་སྦྱར་བར་བྱའོ། །ཚེ་ལས་འདས་པ་ཆེ་གེ་མོ་སརྦ་པཱ་པཾ་ད་ཧ་ན་ཡ་སྭཱ་ཧཱ་ཏིལ་གྱིའོ། །ཚེ་ལས་འདས་པ་ཆེ་གེ་མོ་སརྦ་པཱ་པཾ་ཛྭ་ལ་རཾ་སྭཱ་ཧཱ། ཡུངས་ཀར་གྱིའོ། །མར་དང་འོ་མ་དང་ཞོ་ལ་སོགས་པ་ཞུ་བའི་རྫས་རྣམས་ནི་མེ་ཉིད་ཀྱི་ [42a.6]སྔགས་ཀྱིས་སོ། །སརྦ་སཾ་བ་དེ་སྭཱ་ཧཱ། འབྲས་ཆན་གྱིའོ། །ཨཱ་ཡུ་ཥེ་སྭཱ་ཧཱ། དཱུར་བའི་མྱུ་གུའི་འོ། །ཨོཾ་ཨ་པྲ་ཏི་ཧ་ཏ་ཡེ་སྭཱ་ཧཱ། ཀུ་ཤའི་འོ། །ཨོཾ་མ་ཧཱ་བེེ་ག་ཡེ་སྭཱ་ཧཱ། ནས་ཀྱིའོ། །ཨོཾ་བཛྲ་གྷསྨ་རི་ཡེ་སྭཱ་ཧཱ། གྲོའི་འོ། །ཨོཾ་བཛྲ་བི་ཛ་ཡེ་སྭཱ་ཧཱ། སོ་བའི་འོ། །ཨོཾ་མ་ཧཱ་བ་ [42a.7]ལ་ཡེ་སྭཱ་ཧཱ། སྲན་མའི་འོ། །ཨོཾ་བཛྲ་མུ་ཏ་ཡེ་སྭཱ་ཧཱ། སྲན་མ་མ་ཤའི་འོ། །ཨོཾ་སརྦ་པུཥྚ་ཡེ་སྭཱ་ཧཱ། འབྲས་སོ་བའི་འོ། །ཨོཾ་མཧཱ་ཤོ་པ་ཡེ་སྭཱ་ཧཱ། བིལ་པ་དང་། སྟར་ག་དང་། སྨན་ཐམས་ཅད་ཀྱིའོ། །ཡམ་ཤིང་མེ་འོད་ལའོ། །མར་ཁུ་ཞལ་དུའོ། །འབྲུའི་རྣམ་པ་ [42b] [42b.1]དང་སྨན་གྱི་རྣམ་པ་ཞལ་དུའོ། །ཀུ་ཤ་དང་དཱུར་བ་དབུའི་གཙུག་ཏོར་དུའོ། །མཆོད་པ་ལྔའི་ཚུལ་ཇི་ལྟ་བུ་བཞིན་དུའོ། །གནས་གང་དང་གང་ཡིན་པ་དེར་དབུལ་ལོ། །ཐ་མ་ཡང་མཆོད་པ་ལྔ་ཕུལ་ནས་བསྟོད་པས་བསྟོད་དེ། ཧཱུཾ་འཇིག་རྟེན་དབང་ཕྱུག་ཚངས་པ་མགོན་གྱི་སྲས། །མེ་ལྷའི་རྒྱལ་པོ་ཡོངས་ཀྱིས་ [42b.2]དབང་བསྐུར་བས། །ཤེས་རབ་མེ་ཡིས་ཉོན་མོངས་ཐམས་ཅད་བསྲེག །འཇིགས་བྱེད་མེ་ལྷ་ཉིད་ལ་རྣམ་པར་འདུད། །ཅེས་བསྟོད་དོ། །དེ་ནས་འདོད་པའི་དོན་བསྒྲུབ་པ་ནི། །མེ་ལྷའི་རྒྱལ་པོ་དྲང་སྲོང་ཁྱོད། །བྱོན་པ་ལེགས་ཀྱིས་དོན་སྒྲུབས་ཤིག །སྦྱིན་སྲེག་ལས་ཀྱི་དངོས་ [42b.3]གྲུབ་སྩོལ། །མངོན་པར་ཕྱོགས་པ་དེ་སྲིད་དུ། །ཇི་སྲིད་དགོངས་པ་མཛད་ནས་ཀྱང་། །བྱིན་གྱིས་བརླབ་པར་མཛད་དུ་གསོལ། །ཞེས་བརྗོད་ལ། མེ་འབར་བ་ལ་བསྟིམ་མོ། །དེ་ནས་མེ་འབར་བའི་ནང་དུ་པདྨ་དང་ཉི་མའི་སྟེང་ན་ཚེ་འདས་དབང་པོ་ཤིན་ཏུ་གསལ་བ་ [42b.4]ཅིག་ཏུ་བསམས་ཏེ། རང་གི་གནས་ལ་གནས་པའི་རྣལ་འབྱོར་པས་སྙིང་གའི་འོད་ཟེར་གྱིས་ཚེ་ལས་འདས་པའི་ཤེས་པ་བསྟིམ་ཞིང་ཛཿཧཱུཾ་བཾ་ཧོཿ། ཞེས་པའི་སྔགས་བརྗོད་ལ་རིགས་དྲུག་གི་གནས་ནས་རྣམ་པར་ཤེས་པ་རླུང་དང་འཁྱམས་པ་དེ་སྙིང་གའི་ཨ་ཐུང་ངུ་ལ་ངེས་པར་བཅུག་ནས། [42b.5]སྡིག་པ་ཐམས་ཅད་དང་བྲལ་བར་བྱ་སྟེ། ཨོཾ་ཨ་ཨཱ་སརྦ་ཏ་ཐཱ་ག་ཏ་ཞེས་པ་དང་། ཨོཾ་སརྦ་ན་ར་ག་ཏེ་ཧེ་ཏུ་ཧཱུཾ་ཕཊ། ཨོཾ་སརྦ་པྲེ་ཏ་ག་ཏེ་ཧེ་ཏུ་ཧཱུཾ་ཕཊ། ཨོཾ་སརྦ་ཏིར་ཡ་ག་ཏེ་ཧེ་ཏུ་ཧཱུཾ་ཕཊ། ཨོཾ་སརྦ་པཱ་པཾ་ད་ཧ་ན་པ་ཙ་ག་ཏེ་ཧེ་ཏུ་ཧཱུཾ་ཕཊ་ཏྲ་ཊ་ཞེས་བརྗོད་ལ། ཚོགས་བསགས་པའི་ཐབས་ལ་མོས་པ་ [42b.6]བསྐྱེད་པར་བསམས་ལ་སེམས་བསྐྱེད་དེ། དེའི་སྙིང་གར་ཟླ་བ་ལ་རྡོ་རྗེ་བསམས་ལ་རིགས་ཀྱི་བུ་འམ་རིགས་ཀྱི་བུ་མོ་ཚེ་འདས་པ་དེའི་ལས་དང་ཉོན་མོངས་པའི་རྣམ་པར་སྨིན་པ་ཐམས་ཅད་བུམ་པའི་ཆུས་བཀྲུ་བར་བྱ་སྟེ། ཨོཾ་ཨ་ཨཱ་སརྦ་ཏ་ཐཱ་ག་ཏ་ཞེས་བྱ་བས་འཇམ་དཔལ་ཡེ་ཤེས་ [42b.7]སེམས་དཔའི་སྐུའི་ཕྲེང་སྔགས་དང་། སརྦ་དུརྒ་ཏི་པ་རི་ཤོ་དྷ་ནི་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་བྷྱཿ། སམྱཀྶཾ་བུདྡྷེ་བྷྱཿ། ཏ་དྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནེ། ཤུདྡྷེ་བྷི་ཤུདྡྷེ། སརྦ་ཀརྨྨ་ཨཱ་བ་ར་ཎ་བི་ཤུདྡྷེ་སྭཱ་ཧཱ། ཞེས་བྱ་བས་ཉོན་མོངས་པའི་སྒྲིབ་པ་ཐམས་ཅད་དང་ལས་ཀྱི་སྡིག་པ་ཐམས་ [43a] [43a.1]ཅད་བཀྲུས་ཏེ། དག་པར་བསམས་ལ་དེའི་གཟུགས་ཀྱི་ཕུང་པོ་དེ་ཡང་སྟོང་ཞིང་བདག་མེད་པར་བསམ་མོ། །དེའི་ཤེས་པ་ཨ་དཀར་པོར་གནས་པར་བསམས་ལ། དེ་ལ་དཀྱིལ་འཁོར་རྣམས་སྤྲུལ་པར་བྱའོ། །དེ་ནས་ཡེ་ཤེས་འཁོར་ལོ་བར་སྣང་ལ་བསྡུས་ཏེ། ཡང་དག་པར་ [43a.2]བལྟས་ཏེ་མཆོད་ནས་དམ་ཚིག་གི་འཁོར་ལོ་ལ་གཞུག་ཅིང་མཉེས་པར་བྱས་ནས་དབང་བསྐུར་ཞིང་མི་འདའ་བའི་རྒྱས་གདབ་པར་བྱའོ། །དེའི་དེ་མ་ཐག་ཏུ་དགང་བླུགས་བདུན་ནམ་གསུམ་ཕུལ་ལ་ཡམ་ཤིང་སྔོན་དུ་འགྲོ་བས་ཇི་སྐད་གསུངས་པ་བཞིན་སྲེག་རྫས་རྣམས་དབུལ་བར་བྱའོ། །དེའི་ [43a.3]རྗེས་ལ་སྔར་གྱི་ལྷ་གང་ཡིན་པ་དེའི་སྙིང་གར་ཡེ་ཤེས་ཀྱི་དཀྱིལ་འཁོར་གྱི་ལྷ་རྣམས་གནས་པར་བྱས་ལ་ཐུན་མོང་དུ་སྲེག་རྫས་རྣམས་ཀྱིས་མཆོད་པར་བྱས་ལ། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་སརྦ་བྷསྨི་ཀུ་རུ་སརྦ་དུཥྚཱ་ན་ཧཱུཾ་ཕཊ་ཨོཾ་བྷ་བ་ཀ་ཨགྣ་ཡེ། ཨོཾ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ [43a.4]ཧྲཱིཿ། བྷ་ག་བཱན་ཛྙཱ་ན་མཱུརྟྟི་བཱ་གཱི་ཤྭ་ར་མ་ཧཱ་པཱ་ཙ་སརྦ་དྷརྨྨཱ་ག་ག་ན་ཨ་མ་ལ་སུ་པ་རི་ཤུདྡྷེ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿ ཚེ་ལས་འདས་པ་ཆེ་གེ་མོའི་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ། ཞེས་བྱ་བ་ལ་སོགས་པས་དབུལ་ལོ། །མཐར་ཡང་དགང་བླུགས་ཕུལ་ལ་ཡང་དག་པར་མཆོད་ནས་བསྟོད་པར་བྱའོ། །དེ་ནས་ [43a.5]འདི་སྐད་ཅེས་བརྗོད་དེ། བདེ་བར་གཤེགས་པ་ཐམས་ཅད་ཀྱི། །བསྟན་པའི་གཙོ་ལ་མངའ་མཛད་པ། །འཁོར་བའི་རྒྱ་མཚོར་བྱིང་བ་ཡི། །སེམས་ཅན་ངན་སོང་སྦྱོར་མཛད་པ། །བདེ་བར་གཤེགས་ལ་ཕྱག་འཚལ་བསྟོད། །ཅེས་བརྗོད་ལ། ཡེ་ཤེས་འཁོར་ལོ་གཤེགས་སུ་གསོལ་ [43a.6]བར་བྱའོ། །དམ་ཚིག་རྣམས་གཙོ་བོ་ལ་བསྡུ་ཞིང་གཙོ་བོ་ཉིད་ཀྱང་ཨའི་མཐར་ཐུག་པ་ལ་བསྡུ་སྟེ། རང་གི་ཤེས་པ་ཨའི་རྣམ་པ་དེ་ཆོས་ཀྱི་ཟ་མ་ཏོག་གི་ནང་དུ་བཞག་སྟེ། ཡེ་ཤེས་ཆེན་པོ་བཞིའི་ཤིང་རྟའི་ཁར་བཞག་ལ་རྣམ་སྣང་ཆེན་པོའི་ཡེ་ཤེས་ཀྱི་འོད་ཟེར་རླུང་ལྟ་བུས་བསྐྱོད་དེ། འོག་མིན་ [43a.7]གྱི་གནས་སུ་རིགས་ངེས་པའི་སངས་རྒྱས་སུ་བྱས་ལ་གཞག་གོ། །དེའི་རྗེས་ལ་སྲེག་རྫས་ལྷག་མས་མེ་ལྷ་ཉིད་མཆོད་ལ་བསྟོད་པ་བྱས་ཏེ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །སྡིག་པ་ཐམས་ཅད་སྲེག་པའི་ཕྱིར། །ཐུགས་རྗེའི་དབང་གིས་སྐུ་ [43b] [43b.1]སྤྲུལ་པ། །རིགས་ཀྱི་སྒྲུབ་པའི་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་འོད། །བསྐལ་པའི་མེ་ལྟར་རབ་ཏུ་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པའི་ཐེག་པ་བཅིབས། །བགྲང་ཕྲེང་འཛིན་ཅིང་རིག་སྔགས་བསྲུང་། །བདུད་རྩི་བཅུད་ལྡན་གུནྡྷེ་བསྣམས། ། [43b.2]ཆོས་ཀྱི་བདུད་རྩི་ཡོངས་ལ་སྨིན། །མི་ཤེས་སྐྱོན་བྲལ་ཚངས་པར་སྤྱོད། །ཞི་བས་མཉེས་ཤིང་ཐུགས་རྗེ་ཆེ། །འཇིག་རྟེན་གནས་ཀྱང་མྱ་ངན་འདས། །དེ་ལ་མཉེས་ཤིང་ཕྱག་འཚལ་བསྟོད། །ཅེས་བརྗོད་ལ་གཤེགས་སུ་གསོལ་ཏེ། །སེམས་ཅན་ངན་སོང་སྦྱོང་བ་ཡི། །ཕྲིན་ལས་ཁྱོད་ [43b.3]ཀྱིས་མཛད་ལགས་ཀྱིས། །རང་གི་ཡུལ་དུ་གཤེགས་ནས་ཀྱང་། །སླར་ཡང་བྱོན་པར་མཛད་དུ་གསོལ། །ཨོཾ་བྷ་བ་ཀ་ཨགྣ་ཡེ་ཨེ་ཧྱེ་ཧི་ས་ཧཾ་ད་དཾ་ཙ་ཏི་དྷ་རྨྨ་ཙ་ཡ་བཛྲ་མུཿ། ཞེས་པས་ཡེ་ཤེས་པ་གཤེགས། །དམ་ཚིག་གི་མེ་ལྷ་ཐ་མལ་ལྟར་བསྡུའོ། །ཚེ་འདས་སྒྲིབ་པ་སྲེག་པའི་ཐབས། ། [43b.4]ཆོ་ག་བཟང་པོ་བྱས་པ་ལས། །བསགས་པའི་དགེ་དེས་འགྲོ་བ་ཀུན། །བདེ་བ་ཅན་དུ་སྐྱེ་བར་ཤོག །སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་འཇམ་དཔལ་གྱི་རོ་སྲེག་པའི་ཆོ་ག་རྫོགས་སོ། །རྒྱ་གར་གྱི་མཁན་པོ་སུ་བཛྲ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་ [43b.5]བསྒྱུར་བའོ།། {T2577}༄༅༅། །ངན་སོང་སྦྱོང་བ་འགྲོ་བ་རིགས་དྲུག་གི་ཆོ་ག་བཞུགས།། ༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། །ངན་སོང་སྦྱོང་བ་འགྲོ་བ་རིགས་དྲུག་གི་ཆོ་ག །ངན་སོང་ཐམས་ཅད་རྣམ་སྦྱོང་བ། །ཚེ་འདས་ལས་སུ་བྱ་བ་ནི། །འགྲོ་དྲུག་སོ་སོའི་ [43b.6]མཎྜལ་བྲི། །དྲི་མ་མཎྜལ་སྟེང་དུ་གཞག །ལན་ཆགས་གཏོར་མ་ཆ་གཅིག་བཤམ། །དཀྱིལ་འཁོར་ཆོ་ག་ཀུན་ཟིན་ནས། །གཏོར་མ་ཆ་གསུམ་གཏང་བར་བྱ། །དེ་ནས་ཚེ་ལས་འདས་པ་ཡང་། །འགྲོ་བ་རིགས་དྲུག་དག་ནས་དགུག། །དྲི་མ་དག་ལ་བསྟིམ་པར་བྱ། །ཧཱུཾ་ལྟོས་ཤིག་ལྟོས་ [43b.7]ཤིག་རིགས་ཀྱི་བུ། །ལས་ཀྱི་དབང་གིས་ཚེ་འདས་ཏེ། །འགྲོ་དྲུག་ཀུན་དུ་འཁྱམས་པ་ལ། །ལས་དང་ཐུགས་རྗེའི་དམ་ཚིག་གིས། །ཡེ་ཤེས་ལྕགས་ཀྱུས་དྲང་ཞིང་འགུག །ཨ་ནྲྀ་སུ་དུ་པྲེ་ཛ་ཨཾ་ཀུ་ཤ་ཛཿཛཿ། ཞེས་བརྗོད་པས། ཚེ་ལས་འདས་པའི་ཤེས་པ་དེ་འགྲོ་བ་རིགས་དྲུག་གང་ན་ [44a] [44a.1]གནས་ཀྱང་ལྕགས་ཀྱུའི་ཕྱག་རྒྱས་རབ་ཏུ་བཀུག་ལ་དྲི་མ་དང་མཚན་ལ་བསྟིམས་ལ་དངོས་སུ་གནས་པར་བསམ་མོ། །དེ་ནས་སྡིག་སྒྲིབ་ཐམས་ཅད་དྲལ་ཏེ། ཧཱུཾ་སྟོང་གསུམ་མུན་གནག་འཁྱམས་པ་ལ། །འཇམ་དཔལ་ཤེས་རབ་རྣོན་པོ་ཡིས། །ལོག་རྟོག་རྒྱུན་གཅོད་རལ་གྲི་འདིས། ། [44a.2]ཏིང་འཛིན་ཤུགས་ལྡན་ཕྱག་རྒྱས་དྲལ། །ཨོཾ་མཉྫུ་ཤྲཱི་མུཀྠ་ཏ་ཀ་ཏྲ་ཐ་ཕཊ་ཅེས་པས་སྡིག་པ་ཐམས་ཅད་བཅད་པར་བསམ་མོ། །དེ་ནས་ལས་དང་ཉོན་མོངས་པའི་བག་ཆགས་ཐམས་ཅད་བཀྲུ་སྟེ། ཧཱུཾ་གསུམ་རིག་གཙང་མ་དག་པ་སྟེ། །འཇམ་དཔལ་ཡེ་ཤེས་ཆུ་རྒྱུན་གྱིས། །ཚེ་འདས་ཁྱོད་ལ་ཁྲུས་བྱས་པས། ། [44a.3]ཉོན་མོངས་བག་ཆགས་དག་གྱུར་ཅིག། །ཅེས་ཕྲེང་སྔགས་ཀྱིས་ཁྲུས་བྱའོ། །དེ་ནས་བར་འདིར་བཅུ་གཅིག་རྣམ་པར་དག་པས་ཚོགས་བསགས་པར་བྱའོ། །དེ་ནས་མེ་ཏོག་དོར་བ་ནི། །འདི་ནི་རྡོ་རྗེའི་དམ་ཚིག་སྟེ། །འཇམ་དཔལ་རྡོ་རྗེ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་འདི། །དེ་རིང་ཉིད་དུ་འབབ་ [44a.4]པར་ཤོག །ཨོཾ་བཛྲ་པར་ཏཱིཙྪ་ཧོ། ཞེས་མེ་ཏོག་དོར་བར་བྱའོ། །དེ་ནས་མིག་དབྱེ་བ་ནི། འཇམ་དཔལ་རྡོ་རྗེ་དེང་ཁྱོད་ཀྱིས། །མིག་དབྱེ་བར་ནི་བརྩོན་པར་མཛོད། །རྡོ་རྗེའི་མིག་ནི་བླ་ན་མེད། །ད་ལྟ་ཉིད་དུ་ཕྱེད་པར་ཤོག། །ཧེ་བཛྲ་པཱ་ཤྱ་ཧཱུཾ་ཞེས་དབྱེའོ། །དེ་ནས་དཀྱིལ་འཁོར་ལ་བསྐོར་བ་བྱས་ལ་ཕྱག་ [44a.5]འཚལ་ལོ། །དེ་ནས་རིག་པའི་དབང་ལྔ་བསྐུར་ཏེ། ཧཱུཾ་རྣམ་ཤེས་ཕུང་པོ་རྣམ་དག་པའི། །མེ་ལོང་ལྟ་བུའི་ཡེ་ཤེས་ཀྱིས། །ཞེ་སྡང་རྣམ་དག་མི་བསྐྱོད་པའི། །བུམ་པའི་ཆུ་ཡིས་དབང་བསྐུར་རོ། །ཨོཾ་བཛྲ་ཨ་བྷི་ཥིཉྩ་ཧཱུཾ། ཚོར་བའི་ཕུང་པོ་རྣམ་དག་པའི། །མཉམ་པ་ཉིད་ཀྱི་ཡེ་ཤེས་ཀྱིས། །ང་ [44a.6]རྒྱལ་རིན་ཆེན་འབྱུང་ལྡན་གྱིས། །དབུ་རྒྱན་ཅོད་པན་དབང་བསྐུར་རོ། །ཨོཾ་བཛྲ་མུ་ཀུ་ཊ་རཏྣ་ཏྲཱཾ། འདུ་བྱེད་ཕུང་པོ་རྣམ་དག་པའི། །བྱ་བ་ནན་ཏན་ཡེ་ཤེས་ཀྱིས། །ཕྲག་དོག་དོན་ཡོད་གྲུབ་པ་ཡི། །རྡོ་རྗེ་ཡི་ནི་དབང་བསྐུར་རོ། །ཨོཾ་བཛྲ་ཀརྨྨ་པོ་ཚ་ན་བཛྲ་བཛྲ་ཧཱུཾ། འདུ་ཤེས་ཕུང་པོ་རྣམ་དག་པའི། ། [44a.7]སོ་སོར་རྟོག་པའི་ཡེ་ཤེས་ཀྱིས། །འདོད་ཆགས་སྣང་བ་མཐའ་ཡས་ཀྱི། །ཤེས་རབ་དྲིལ་བུས་དབང་བསྐུར་རོ། །ཨོཾ་བཛྲ་ཨ་ཧཱུཾ་ཨ། གཟུགས་ཀྱི་ཕུང་པོ་རྣམ་དག་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །གཏི་མུག་རྣམ་པར་སྣང་མཛད་ཀྱི། །དཔལ་ལྡན་མིང་གི་དབང་བསྐུར་རོ། ། [44b] [44b.1]ཨོཾ་བཛྲ་ཨ་བྷི་ཥེ་ཀ་ཧཱུཾ། དེ་ནས་ལན་ཆགས་ཀྱི་གཏོར་མ་བཏང་ལ་ལམ་བསྟན་ཅིང་སྨོན་ལམ་གདབ་པ་ནི། ཧེ་རིགས་ཀྱི་བུ་རྡོ་རྗེ་ཆེ་གེ་མོ་ཁྱོད། །སྐྱེ་བ་གར་སྐྱེས་གར་གནས་ཀྱང་། །ཅིས་ཀྱང་འཕོ་བ་མེད་པ་ཡིས། །འདོད་པའི་ཡོན་ཏན་རྣམ་ལྔ་ལ། །ལོངས་སྤྱོད་པ་ཡི་སྐལ་ལྡན་ནས། །རྡོ་རྗེ་འཆང་ [44b.2]གྲལ་འཁོད་གྱུར་ཅིག །སྐྱེ་གནས་གཞན་གྱིས་བར་དུ་མ་ཆོད་པར། །གསང་སྔགས་རྡོ་རྗེའི་ཐེག་པ་སྟོན་པ་ཡིས། །དགེ་བའི་བཤེས་གཉེན་དམ་པ་དང་ཕྲད་ནས། །དེས་བསྟན་པ་ཡི་གསང་སྔགས་མ་ནོར་བར། །རྟོགས་ནས་ཡང་དག་པར་ནི་སངས་རྒྱས་ཏེ། །སེམས་ཅན་ཐམས་ཅད་འཁོར་བའི་ [44b.3]རྒྱ་མཚོ་ལས། །སྒྲོལ་བའི་དེད་དཔོན་ཆེན་པོ་བྱེད་གྱུར་ཅིག །ཅེས་བརྗོད་ལ་ལམ་བསྟན་ཅིང་སྨོན་ལམ་གདབ་པར་བྱའོ། །ཚེ་ལས་འདས་པའི་སྒྲིབ་པ་སྦྱོང་བའི་ཆོ་ག་འགྲོ་བ་རིགས་དྲུག་ནས་འདོན་པ་དང་། དཀྱིལ་འཁོར་དྲུག་ཏུ་གཞུག་ཅིང་དབང་བསྐུར་བ་དང་། ལམ་བསྟན་ཅིང་སྨོན་ལམ་གདབ་ [44b.4]པ། སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ། །རྒྱ་གར་གྱི་མཁན་པོ་སུ་བཛྲ་དང་། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། {T2578}༄༅༅། །རྒྱ་གར་སྐད་དུ། བོ་དྷི་ཙི་ཏྟ་བྷཱ་བ་ཨརྠ་དྭ་ད་ཤ་ནིར་དེ་ཤ། བོད་སྐད་དུ། [44b.5]བྱང་ཆུབ་ཀྱི་སེམས་བསྒོམ་པ་དོན་བཅུ་གཉིས་བསྟན་པ། དཀོན་མཆོག་གསུམ་ལ་ཕྱག་འཚལ་ལོ། འདིར་བྱང་ཆུབ་ཀྱི་སེམས་བསྒོམ་པ་ནི། དོན་བཅུ་གཉིས་ཀྱིས་སྟོན་ཏེ། ཕྱག་འཚལ་བ་དང་། ཅིའི་ཕྱིར་རྟོགས་པར་བྱ་བ་དང་། ཅི་ཞིག་རྟོགས་པར་བྱ་བ་དང་། །གང་གིས་རྟོགས་པར་བྱ་བ་དང་། །གང་ [44b.6]ལ་བརྟགས་ཏེ་རྟོགས་པར་བྱ་བ་དང་། བརྟགས་ནས་ངེས་པའི་དོན་བསྟན་པ་དང་། ངེས་པའི་དོན་ལ་བསྒོམ་པ་དང་། །བརྒྱུད་པའི་ཐབས་ཀྱིས་ངེས་པའི་དོན་རྟོགས་པར་བྱ་བ་དང་། བྱང་ཆུབ་ཀྱི་སེམས་ཀྱིས་མ་ཟིན་ན་རྣམ་པར་གྲོལ་བ་མི་ཐོབ་ཅིང་དགེ་བ་ཆུད་ཟ་བར་བསྟན་པ་དང་། མོས་པ་ཙམ་སྐྱེས་པས་ [44b.7]ཀྱང་ཡོན་ཏན་མང་པོ་ཐོབ་པ་དང་། ལོག་པར་ཞུགས་པ་རྣམས་ལ་སྙིང་རྗེ་སྐྱེ་བའི་གནས་སུ་བསྟན་པ་དང་། དགེ་བའི་རྩ་བ་བསྔོ་བ་རྣམས་སོ། །དེ་ལ་ཕྱག་འཚལ་བ་ལ་ཡང་རྣམ་པ་གསུམ་སྟེ། སངས་རྒྱས་དང་ཆོས་དང་དགེ་འདུན་གསུམ་ལ་ཕྱག་འཚལ་བ་ནི། སློབ་དཔོན་འཇམ་དཔལ་ [45a] [45a.1]བཤེས་གཉེན་གྱིས་བརྩམས་པ་ལ་བགེགས་མི་འཇུག་ཅིང་མཐར་ཕྱིན་པར་བྱ་བའི་ཕྱིར་ཚིགས་སུ་བཅད་པ་གཅིག་གིས་བསྟན་པ་ཡིན་ཏེ། དེ་ལ་སངས་རྒྱས་ལ་ཕྱག་འཚལ་བ་ནི། བདག་མེད་གཉིས་ཉིད་བདེ་གཤེགས་མི་རྟོག་ཡེ་ཤེས་ཆོས་དབྱིངས་སྐུ་བརྙེས་པ། །ཞེས་བྱ་བས་བསྟན་ཏེ། [45a.2]གང་ཟག་དང་ཆོས་ལ་བདག་མེད་པ་གཉིས་ཉིད་མ་ནོར་བར་རྟོགས་པ་ནི་བདེ་བར་གཤེགས་པའི་མི་རྟོག་པའི་ཡེ་ཤེས་ཡིན་ཏེ། ཡེ་ཤེས་དེ་ཐོབ་པས་དེའི་ཤེས་བྱ་དེ་ཆོས་ཀྱི་དབྱིངས་དང་ཐ་མི་དད་པའི་སྐུ་ཡང་བརྙེས་པའོ། །ཆོས་ལ་ཕྱག་འཚལ་བ་ནི། ཀུན་གྱི་རང་བཞིན་ཞི་བ་འདི་ལ་བསལ་ཞིང་བླང་མེད་ [45a.3]ལམ་མཆོག་སྟེ། །ཞེས་བྱ་བ་སྨོས་ཏེ། ཀུན་ནས་ཉོན་མོངས་པ་དང་། རྣམ་པར་བྱང་བ་ཀུན་གྱི་རང་བཞིན་ནི། །སྤྲོས་པའི་མཚན་མ་ཐམས་ཅད་ཞི་བ་སྟེ། འདི་ལ་སྐྱོན་བསལ་ཞིང་ཡོན་ཏན་བླང་དུ་མེད་དེ། བླང་དོར་མེད་པ་ནི་ཐར་བའི་ལམ་གྱི་ནང་ན་མཆོག་ཡིན་ནོ། །དགེ་འདུན་ལ་ཕྱག་ [45a.4]འཚལ་བ་ནི། མི་ལྡོག་ས་ལ་སོགས་པའི་དབང་བཅུ་རྒྱལ་བ་ཀུན་དང་གཅིག་བརྙེས་པ། །ཞེས་པ་སྨོས་པ་ཡིན་ཏེ། ས་དང་པོ་འཁོར་བར་མི་ལྡོག །ས་བརྒྱད་པ་མཚན་མར་མི་ལྡོག་པ་ལ་སོགས་ཏེ། ས་བཅུ་པ་ལ་གནས་པའི་བྱང་ཆུབ་སེམས་དཔའ་ནི་ཚེ་ལ་དབང་བ་དང་ལས་ལ་དབང་བ་དང་། ཡོ་བྱད་ལ་ [45a.5]དབང་བ་ལ་སོགས་ཏེ། དབང་བཅུ་ཐོབ་པས་རྒྱལ་བ་ཀུན་དང་ཆོས་ཀྱི་དབྱིངས་རྟོགས་པར་གཅིག་པས་གཅིག་བརྙེས་པའོ། །གནས་གསུམ་མཉམ་ཉིད་དེ་ལ་མཚན་མེད་ཡིད་ཀྱིས་རབ་ཏུ་དད་པས་མོས། །ཞེས་སྨོས་པ་ལ་ཕྱག་གི་གནས་ནི་དཀོན་མཆོག་གསུམ་མོ། །ཆོས་ཉིད་ནི་མ་ནོར་བའི་ལམ་ཡིན་ཏེ། [45a.6]ཤེས་པར་བྱ་བ་ཡིན་ལ། སངས་རྒྱས་དང་བྱང་ཆུབ་སེམས་དཔའ་ནི་དེ་ཤེས་པར་བྱེད་པ་ཡིན་ཏེ། ཤེས་པ་དང་ཤེས་བྱ་ཁྱད་པར་མེད་ཅེས་འབྱུང་བས་མཉམ་པ་དང་། དོན་དམ་པར་གཉིས་སུ་མེད་པས་མཉམ་པ་དེ་ལ་མཚན་མར་མི་འཛིན་པའི་ཡིད་ཀྱིས་དང་པའི་དད་པ་དང་། [45a.7]དོན་ཇི་ལྟ་བ་བཞིན་དུ་ངེས་པར་བཟུང་བའི་མོས་པས་ཕྱག་འཚལ་བ་ཡིན་ནོ། །དོན་གཉིས་པ་སྟོན་ཏེ། ཅིའི་ཕྱིར། རྟོགས་པར་བྱ་ཞེ་ན། ཕན་ཡོན་ཆེ་བའི་ཕྱིར་ཏེ། ཕན་ཡོན་ཡང་རྣམ་པ་གསུམ་སྟེ། རྒྱུར་གནས་པའི་ཕན་ཡོན་དང་། མངོན་དུ་གྱུར་པ་འབྲས་བུའི་ [45b] [45b.1]ཁྱད་པར་གྱི་ཕན་ཡོན་དང་། རྣམ་པར་གྲོལ་བའི་འབྲས་བུ་ཐམས་ཅད་ཀྱི་གཞི་ལམ་གྱི་མཆོག་ཏུ་བསྟན་པའོ། །དེ་ལ་རྒྱུར་གནས་པའི་ཕན་ཡོན་ནི། སྟོན་པ་འཇིག་རྟེན་སྒྲོན་མར་གྱུར་པ་ཀུན་གྱིས་མཚུངས་པར་རབ་བསྔགས་ལ། །ཞེས་བྱ་བ་ལ་སོགས་པ་སྨོས་ཏེ། ལྷ་དང་མི་ལ་སོགས་པའི་སྟོན་པ་འཇིག་རྟེན་ཕྱི་ནང་གི་ [45b.2]མུན་པ་སེལ་བའི་ཡེ་ཤེས་ཀྱི་སྒྲོན་མར་གྱུར་པ་ཀུན་གྱིས་ཀྱང་འདྲ་ཞིང་མཚུངས་པར་བྱང་ཆུབ་ཀྱི་སེམས་ལ་ཕན་ཡོན་ཆེ་བར་བསྔགས་ཏེ། ཇི་སྐད་དུ་བསྔགས་ཤེ་ན། ཆོས་ལ་ཆོས་ཀྱི་སྙིང་པོར་གྱུར་པ་འཇམ་དཔལ་གཞོན་ནུའི་སྙིང་པོ་འདི། །དེ་ལ་དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་། [45b.3]ཆོས་རྣམས་ཀྱི་ཆོས་ཉིད་ནི་ཡེ་ནས་གནས་པའི་ཆོས་ཀུན་གྱི་སྙིང་པོར་གྱུར་པ་ནི། འཇམ་དཔལ་གཞོན་ནུ་ཞེས་བྱ་སྟེ། ཅིའི་ཕྱིར་འཇམ་ཞེ་ན། ཟུག་རྔུ་མེད་པའི་ཕྱིར་འཇམ་པ་དང་། དེ་རྟོགས་ན་སེམས་ཅན་ཀུན་གྱི་དཔལ་དུ་གྱུར་པ་དང་། གཞོམ་པ་ནི་གཙང་བའི་དོན་ཏེ། སྐྱོན་དང་དྲི་མས་མ་ [45b.4]གོས་པའི་ཕྱིར་རོ། །སྙིང་པོ་གོང་དུ་བསྟན་པ་ཉིད་ཆོས་རྣམས་ཀྱི་སྙིང་པོ་ཡིན་པའི་ཕྱིར་རོ། །འཇམ་དཔལ་ཞེས་བྱ་བ། བྱང་ཆུབ་ཀྱི་སེམས་ཀྱི་མཚན་ཉིད་མ་ནོར་བར་རྟོགས་པ་ནི། སངས་རྒྱས་མ་ལུས་པའི་འབྱུང་གནས་ཡིན་པའི་ཕྱིར། །བདེར་གཤེགས་མ་ལུས་ཡུམ་དུ་གྱུར་ [45b.5]པ་རྒྱལ་བ་ཀུན་གྱི་ལམ་གཅིག་གོ། །ཞེས་སྨོས་ཏེ། ལམ་འདི་མ་རྟོགས་པར་ལམ་གཞན་གྱིས་འཚང་མི་རྒྱ་བའི་ཕྱིར་རོ། །ཚུལ་ཁྲིམས་ལ་སོགས་ཕ་རོལ་ཕྱིན་ལམ་སྤྱོད་པ་རྒྱ་མཚོའི་གཞིར་གྱུར་པ། །ཚུལ་ཁྲིམས་ལ་སོགས་ཏེ་ཕ་རོལ་ཏུ་ཕྱིན་པ་བཅུ་དང་དགེ་བའི་ཆོས་ཐམས་ཅད་ཀྱང་བྱང་ [45b.6]ཆུབ་ཀྱི་སེམས་ཀྱིས་མ་ཟིན་ན། སངས་རྒྱས་འགྲུབ་པའི་ཚོགས་སུ་མི་འགྲུབ་པས། སངས་རྒྱས་སུ་འགྲུབ་པའི་བསོད་ནམས་ཀྱི་ཚོགས་ཐམས་ཅད་ཀྱི་གཞི་ཡིན་པར་ཡང་སྟོན་ཏོ། །མངོན་དུ་གྱུར་ཏེ་འབྲས་བུའི་དུས་ན་ཡང་ཁྱད་པར་དུ་འཕགས་པར་བསྟན་པ་ནི། རྣམ་དག་བྱང་ཆུབ་སེམས་ཀྱི་ [45b.7]ངང་ཚུལ་བསྒོམ་དང་ཡོན་ཏན་ཁྱད་པར་ནི། །ཞེས་བྱ་བ་ལ་སོགས་པ་སྟེ། སྤྲོ་བ་རྣམ་པར་དག་པའི་བྱང་ཆུབ་སེམས་ཀྱི་རང་བཞིན་ནམ། ངང་ཚུལ་མ་ནོར་བར་བསྒོམས་ཏེ། མངོན་དུ་གྱུར་པའི་ཚེ། ཡོན་ཏན་གྱི་ཁྱད་པར་ཇི་ལྟ་བུ་དག་ཐོབ་ཅེ་ན་བློ་དང་ལྡན་ན་ནམ་ཞིག་སེམས་ཀྱི་དམ་པ་དེ་ནི་མངོན་དུ་གྱུར་པ་ན། [46a] [46a.1]དེ་ལ་སྐུ་གསུམ་མཆོག་ཏུ་གྱུར་པ་ཆོས་ཀྱི་སྐུ་ཞེས་རྒྱལ་བས་གསུངས། །ཤེས་རབ་ཀྱི་བློ་དང་ལྡན་པས་བྱང་ཆུབ་ཀྱི་སེམས་མངོན་དུ་གྱུར་པ་དེ་ལ་ལོངས་སྤྱོད་རྫོགས་པའི་སྐུ་ལ་སོགས་ཏེ། སྐུ་གསུམ་གྱི་ནང་ན་མཆོག་ཏུ་གྱུར་པ་ཆོས་ཀྱི་སྐུ་ཞེས་བྱང་ཆུབ་ཀྱི་སེམས་དེ་ལ་བྱ་སྟེ། བྱང་ཆུབ་ཀྱི་ [46a.2]སེམས་དེ་ལ་ཡོན་ཏན་དང་ལེགས་པ་ཐམས་ཅད་ཀྱི་གཞི་ནི་ཆོས་ཀྱི་སྐུ་ཡིན་པས་མཆོག་ཏུ་གྱུར་པ་ཡིན་ནོ། །ཤེས་བྱེད་དམ་པར་གྱུར་པས་ཤེས་རབ་སྤྱན་ཞེས་ཀྱང་ནི་དེ་ལ་བྱ། །ཤེས་བྱ་ཐམས་ཅད་ཤེས་པར་བྱེད་པའི་ནང་ན། དམ་པ་ནི་ཤེས་རབ་ཀྱི་སྤྱན་ཡིན་ཏེ། དེ་ཅིའི་ཕྱིར་ཞེ་ན། ཤེས་བྱ་ཀུན་ [46a.3]གྱི་ནང་ན་ཆོས་ཐམས་ཅད་ཀྱི་སྙིང་པོར་གྱུར་པའི་ཆོས་ཉིད་ནི་དམ་པ་ཡིན་པས། དེ་རྟོགས་པའི་ཤེས་བྱེད་ཀྱང་དམ་པ་ཞེས་བྱ་སྟེ། ཤའི་སྤྱན་དང་ལྷའི་སྤྱན་ལ་སོགས་ཏེ། སྤྱན་ལྔའི་ནང་ན་ཡང་བྱང་ཆུབ་ཀྱི་སེམས་མངོན་དུ་གྱུར་པའི་མཚན་ཉིད་ཤེས་རབ་ཀྱི་སྤྱན་ནི་མཆོག་ཏུ་གྱུར་པ་ཡིན་ནོ། །རྡོ་རྗེ་རྩེ་ [46a.4]མོ་མཆོག་ཉིད་མི་རྟོག་ཡེ་ཤེས་དེ་ཡང་དེ་ཉིད་དོ། །རྡོ་རྗེ་ནི་སྲ་བ་དང་གཅོད་པ་སྟེ། མི་མཐུན་པའི་ཕྱོགས་ཀྱིས་མི་ཤིགས་པའི་ཕྱིར་སྲ་བ་དང་། སྒྲིབ་པ་ཐམས་ཅད་གཅོད་ཅིང་སྤོང་བ་ཡིན་པས་ཡེ་ཤེས་ལ་བྱ་སྟེ། སོ་སོར་ཀུན་དུ་རྟོག་པ་དང་། བྱ་བ་ནན་ཏན་ལ་སོགས་པ་ཡེ་ཤེས་བཞིའི་ནང་ [46a.5]ན་ཡང་མཆོག་གམ་རྩེ་མོར་གྱུར་པ་ནི་རྣམ་པར་མི་རྟོག་པའི་ཡེ་ཤེས་ཡིན་ཏེ། དེ་ཡང་བྱང་ཆུབ་སེམས་མངོན་དུ་གྱུར་པ་དེ་ཉིད་ཡིན་ནོ། །རྣམ་པར་གྲོལ་བའི་འབྲས་བུ་ཐམས་ཅད་ཀྱི་གཞི་ལམ་གྱི་མཆོག་ཏུ་བསྟན་པ་ནི། ཇི་སྙེད་འཕགས་པའི་རྣམ་གྲོལ་ཆོས་སུ་བསྟན་པ་དེ་དག་ཐམས་ཅད་ཀྱང་། ། [46a.6]ཞེས་བྱ་བ་ལ་སོགས་པས་བསྟན་ཏེ། ཇི་སྙེད་དུ་ཉན་ཐོས་དང་རང་སངས་རྒྱས་ལ་སོགས་ཏེ། ཁམས་གསུམ་ལས་རྣམ་པར་གྲོལ་བའི་འབྲས་བུ་ཡོན་ཏན་གྱི་ཆོས་སུ་བསྟན་ཅིང་བསྙད་པ་དེ་དག་ཐམས་ཅད་ཀྱང་། བྱང་ཆུབ་སེམས་ཉིད་རྫོགས་ལས་དེ་ཡི་ཡོན་ཏན་དེ་དག་དེ་ལས་བྱུང་། ། [46a.7]བྱང་ཆུབ་ཀྱི་སེམས་རྫོགས་ཤིང་མཐར་ཕྱིན་པར་རྟོགས་པ་ལས་ཡོན་ཏན་རྫོགས་པར་འབྱུང་ལ། བྱང་ཆུབ་ཀྱི་སེམས་འབྲིང་དང་། ཆུང་ངུ་རྟོགས་ན་ཡང་། ཡོན་ཏན་དེ་ཡང་དེ་བཞིན་དུ་བྱུང་ཞིང་ཐོབ་ལ། བྱང་ཆུབ་ཀྱི་སེམས་མ་རྟོགས་པ་རྣམས་ལ་ནི། གྲོལ་བ་ཐར་པ་ཆུང་ངུ་ཙམ་ཡང་མི་ཐོབ་སྟེ། [46b] [46b.1]དེ་བས་ན་འདི་ནི་གྲོལ་བ་ཐར་བ་ཐམས་ཅད་ཀྱི་གཞི་ཡང་ཡིན། འབྲས་བུ་མཆོག་གྲུབ་པའི་ལམ་ཡིན་པས་ཐར་པའི་ལམ་གྱི་ནང་ན་ཡང་མཆོག་ཡིན་ནོ། །དེ་ཅིའི་ཕྱིར་ཞེ་ན། འཕགས་པའི་རིགས་ཆེན་འཆི་མེད་བྱང་ཆུབ་སེམས་དཔའ་དེ་དག་ཐམས་ཅད་ཀྱང་། །ཉན་ཐོས་ལ་སོགས་འཕགས་པའི་ [46b.2]རིགས་ཀུན་གྱི་ནང་ན། འབྲས་བུ་ཆེ་བའི་ཕྱིར། ཐེག་པ་ཆེན་པོ་ནི་རིགས་ཆེན་ཞེས་བྱ་སྟེ། བླ་ན་མེད་པའི་བྱང་ཆུབ་ཆེན་པོ་ལ་སེམས་པས། བྱང་ཆུབ་སེམས་དཔའ་ཞེས་བྱ་སྟེ། དེ་དག་ཐམས་ཅད་ཀྱང་དེ་མེད་ན་མི་འབྱུང་། །དེ་ཕྱིར་དེ་ནི་རྣམ་གྲོལ་མཆོག་གི་ལམ་ཉིད་དོ། །བྱང་ཆུབ་ཀྱི་སེམས་དེ་ནི་དེ་ [46b.3]མེད་ན་བྱང་ཆུབ་སེམས་དཔའ་དེ་དག་མི་འབྱུང་བས། དེའི་ཕྱིར་བྱང་ཆུབ་ཀྱི་སེམས་དེ་ནི། རྣམ་པར་གྲོལ་བའི་ལམ་ཀུན་གྱི་ནང་ན་མཆོག་ཡིན་ནོ། །དོན་གསུམ་པ་སྟོན་ཏེ། ཅི་ཞིག་རྟོགས་པར་བྱ་ཞེ་ན། བྱང་ཆུབ་ཀྱི་སེམས་སོ། །དེ་ཡང་བསམ་པ་དང་བརྗོད་པ་ལས་འདས་པས་བརྟགས་པའི་ [46b.4]ཡུལ་མ་ཡིན་པར་བསྟན་ཏེ། དེས་ན་ཀུན་དུ་རྡོ་རྗེ་སེམས་དཔའ་ཅི་འདྲར་བསྒོམ་པར་བྱ་བར་འགྱུར། །གོང་དུ་བསྟན་པ་དེ་ལྟར་ཕན་ཡོན་ཆེ་ན། དུས་དང་གནས་ཀུན་དུ་ཅིས་ཀྱང་མི་ཤིགས་ལ། དེ་རྟོགས་ན་སྒྲིབ་པའི་དྲ་བ་གཅོད་པས་རྡོ་རྗེ་སྟེ། སེམས་ཀྱི་ཆོས་ཉིད་མ་ནོར་བར་རིག་པ་ལ་རྡོ་རྗེ་སེམས་ [46b.5]དཔའ་ཞེས་ཀྱང་བྱ། བྱང་ཆུབ་ཀྱི་སེམས་ཞེས་ཀྱང་བྱ་བ་སྟེ། སེམས་ཀྱི་མཚན་ཉིད་མ་རིག་པའི་བླ་ཐབས་ཀྱི་སྒོ་ནས། ཀུན་ནས་ཉོན་མོངས་པའི་ཆོས་ཐམས་ཅད་དུ་སྣང་ལ། སེམས་ཀྱི་རང་བཞིན་མ་ནོར་བའི་རྡོ་རྗེ་ལ་སེམས་པ་དེའི་ཚེ། རྣམ་པར་གྲོལ་བའི་འབྲས་བུ་ཕུན་སུམ་ཚོགས་ [46b.6]པ་རྣམས་སུ་ཡང་སྣང་བས། བསྒོམ་པར་བྱ་གང་གིས་མ་ནོར་བསྒོམ་པར་འགྱུར། ཞེས་དྲིས་པའི་ལན་དུ། ཕྲ་ཤིང་ཤེས་དཀའ་དྲང་སྲོང་ཆེན་པོའི་ལམ་འདི་མི་རྟོག་རྟོག་ལས་འདས། །བློ་རྩིང་ཞིང་ཤེས་རབ་ཞེན་པས་མི་རྟོག་པས་ཕྲ་ཞིང་ཤེས་པར་དཀའ་སྟེ། བདག་དང་གཞན་དང་ [46b.7]པོའི་ལམ་དུ་འཇུག་ཅིང་ཞུགས་པའི་དྲང་སྲོང་ཆེན་པོ་སངས་རྒྱས་ཀྱི་ལམ་འདི་ནི་རྟོག་པའི་ཡུལ་ཡང་མ་ཡིན་ལ། །མི་རྟོག་པའི་ཡུམ་ཡང་མ་ཡིན་པས། རྟོག་པ་དང་མི་རྟོག་པ་ལས་འདས་པ་སྟེ། དེའི་ཕྱིར་བརྟག་པར་དཀའ་ཞིང་བསྟན་པར་དཀའ་ལ་བརྗོད་པའི་ཐ་སྙད་རྣམས་དང་བྲལ་ཏེ། [47a] [47a.1]སེམས་ཀྱིས་བརྟག་པར་དཀའ་ཞིང་ཚིག་གིས་བསྟན་པར་ཡང་དཀའ་ལ། ཚིག་གིས་དོན་ཡང་སྟོན། ཚིག་དེ་དོན་མ་ཡིན་པས་བརྗོད་པའི་ཐ་སྙད་རྣམས་དང་བྲལ་བའི་ཕྱིར་ཚིག་གིས་མི་ཕེབས། གཞན་དང་བྱིས་པ་ཀུན་གྱི་སྤྱོད་ཡུལ་མ་ཡིན་ཡང་། །དོན་ནི་ཐ་སྙད་ [47a.2]ལས་འདས་པ་ཡིན་པས། ཚིག་གིས་མི་ཕེབས་ཤིང་ཐེག་པ་ཆེན་པོ་ལས་གཞན་པ་ཉན་ཐོས་ལ་སོགས་པ་དང་། སོ་སོའི་སྐྱེ་བོ་བྱིས་པ་རྣམས་ཀྱི་སྤྱོད་ཡུལ་མ་ཡིན་ཡང་ཤེས་ཤིང་རྟོགས་པར་བྱ་བའི་ཐབས་ནི་ཡོད་དོ། །དོན་བཞི་པ་སྟོན་ཏེ། དེ་ལྟར་རྟོགས་པར་བྱ་བའི་ཐབས་ཡོད་ན་གང་གིས་ [47a.3]རྟོགས་པར་བྱ་ཞེ་ན། འཁྲུལ་པའི་རྟོག་པ་ནི་ཚད་མ་མ་ཡིན་པས། འཕགས་པ་དང་མཁས་པའི་ལུང་དང་། དངོས་པོ་རྣམས་ཀྱི་དོན་ཇི་ལྟ་བུ་ཡིན་པ། ལོ་རྒྱུས་ཀྱིས་བརྟགས་པས་རྟོགས་པར་བྱ་བ་སྟོན་ཏེ། སྟོན་པའི་ངེས་པའི་ལུང་དང་། བླ་མ་རྣམས་ཀྱི་མན་ངག་དེ་ཉིད་དོན་འདིར་བལྟ། ། [47a.4]སྟོན་པས་བཀྲི་བའི་དོན་དུ་མ་ཡིན་གྱི་ངེས་པའི་དོན་དུ་བསྟན་པའི་ལུང་དང་། བླ་མ་མཁས་པ་རྣམས་ཀྱིས་མ་ནོར་བར་རྟོགས་པའི་ཉམས་ཀྱི་མན་ངག་དང་། དེ་ཉིད་ལ་མ་ནོར་བའི་དོན་དུ་བྱང་ཆུབ་ཀྱི་སེམས་བསྒོམ་པ་སྐབས་འདིར་བལྟའོ། །འཁྲུལ་པའི་རྟོག་པ་ཚད་མ་མ་ཡིན་པར་སྟོན་ཏེ། [47a.5]མངོན་སུམ་ལ་སོགས་རྒྱུ་ཡིས་དངོས་པོ་འཇིག་ཅིང་གྲུབ་པའི་མཐའ་སྤྱོད་པ། །མངོན་སུམ་དང་རྗེས་སུ་དཔག་པ་ལ་སོགས་པའི་གཏན་ཚིགས་ཀྱི་རྒྱུས་ཀུན་ནས་ཉོན་མོངས་པ་དང་། རྣམ་པར་བྱང་བའི་དངོས་པོ་རྣམས་ལ་འཇིག་ཅིང་སྤྱོད་དེ་ཐ་མར་ཡོད་པ་ཞིག་དུ་གྲུབ་བམ། མེད་པ་ཞིག་ཏུ་གྲུབ་ [47a.6]མཐའ་ཅི་ལྟ་བུ་ཞིག་འགྱུར་ཞེས་དཔྱོད་པ་ནི། དེ་ཉིད་རྟོག་པ་རྒྱུན་འབྲངས་སྤྱོད་ཡུལ་ཚད་མར་གཞག་ནས་བློ་ཡིས་འཇིག་བྱེད་དེ། །གོང་མ་ལྟར་དཔྱོད་པ་དེ་ཉིད་ཕྱིན་ཅི་ལོག་ཏུ་རྟོག་པའི་རྒྱུན་གྱི་རྗེས་སུ་འབྲངས་ནས། ནོར་བའི་རྟོག་པས་ལོག་པར་མཐོང་བའི་སྤྱོད་ཡུལ་ཚད་མར་བཟུང་ [47a.7]ནས། ལོག་པའི་བློ་ཡིས་འཇིག་ཅིང་སྤྱོད་དེ། དཔེར་ན་ཐག་པ་ལ་སྦྲུལ་དུ་མཐོང་བའི་ཚེ། བདག་གིས་མངོན་སུམ་དུ་མཐོང་བས་ཅིའི་ཕྱིར་སྦྲུལ་མེད་ཅེས་རང་གི་འཁྲུལ་པ་མངོན་སུམ་ཚད་མར་བཟུང་བ་ནི་ཚད་མར་མི་རུང་བ་དང་འདྲའོ། །ཅིའི་ཕྱིར་ཞེ་ན། རྟོག་མཐའ་མེད་ཕྱིར་དཔྱོད་ [47b] [47b.1]མཐའ་མེད་དེ་སྙིང་པོ་མེད་ན་ཚད་མ་གང་། །རྟག་པའི་སེམས་ཉིད་ཡང་དག་པའི་མཐར་ན་ཇི་ལྟ་བུར་ཡང་མ་གྲུབ་པའི་ཕྱིར། དེས་སྤྱོད་པ་ལྟ་ག་ལ་ཡོད་པས་དཔྱོད་མཐའ་མེད་དེ་སྙིང་པོར་བྱ་བ་ཅི་ཡང་མེད་ན་ཚད་མར་གང་གཞག །དེ་ཕྱིར་འཇིག་རྟེན་བརྟགས་པའི་ཐ་སྙད་རྣལ་འབྱོར་ལམ་འདིར་ [47b.2]མི་དགོས་སོ། །ཚད་མར་མི་རུང་བ་དེའི་ཕྱིར་ཀུན་རྫོབ་འཁྲུལ་པ་སྣང་བའི་དབང་དུ་བྱས་པའི་ཚེ་ནི། འཇིག་རྟེན་གྱིས་བརྟགས་པའི་ཐ་སྙད་ཀྱང་ཚད་མར་འཇོག་པ་ཡང་ཡོད་མོད་ཀྱི་ཡང་དག་པའི་དོན་ལ་རྣལ་འབྱོར་དུ་སྦྱོར་བའི་ལམ་གྱི་སྐབས་འདིར་ནི། འཇིག་རྟེན་འཁྲུལ་པའི་ཐ་སྙད་དག་ [47b.3]མི་དགོས་སོ། །དོན་རྣམ་པ་ལྔ་དངོས་པོ་གང་བརྟགས་ཏེ་རྟོགས་པར་བྱ་ཞེ་ན། རྣམ་པ་གཉིས་ཏེ། ཀུན་ནས་ཉོན་མོངས་པ་དང་། རྣམ་པར་བྱང་བའི་དངོས་པོ་ལ་བརྟག་པར་བྱའོ། །ཀུན་ནས་ཉོན་མོངས་པ་བརྟག་པ་ལ་ཡང་རྣམ་པ་གཉིས་ཏེ། ཀུན་ནས་ཉོན་མོངས་པའི་མཚན་ཉིད་ཡིན་པར་ [47b.4]བརྟག་པ་དང་འཁྲུལ་པ་སྣང་བར་བརྟག་པའོ། །ཀུན་ནས་ཉོན་མོངས་པའི་མཚན་ཉིད་ཡིན་པར་བརྟག་པ་ནི། དངོས་པོ་མཐའ་ཡི་རྒྱུ་ནི་ལོ་རྒྱུས་དག་ལས་ལམ་འདིར་བརྟག་པར་བྱ། །ཞེས་བྱ་བ་ལ་སོགས་པས་སྟོན་ཏེ། དངོས་པོ་རྣམས་ཀྱི་གྲུབ་པའི་མཐའ་བརྟག་པའི་རྒྱུ་ནི་དངོས་པོ་ཉིད་ཀྱི་ལོ་རྒྱུས་ཇི་ [47b.5]ལྟར་གནས་པ་བརྟགས་པ་མ་ནོར་བའི་ལམ་གཏན་ལ་ཕབ་པར་གྱུར་པས། བླ་ན་མེད་པའི་ལམ་ཚོལ་བའི་སྐབས་འདིར་དེ་ལྟར་བརྟག་པར་བྱས་ཏེ། དཔེར་ན་ཆུ་གཤེར་བའི་མཚན་ཉིད་ནི། ཆུའི་རང་གི་མཚན་ཉིད་ཀྱི་ལོ་རྒྱུས་ཀྱིས་སྟོན་ཏེ། ལུང་ལས་ཀྱང་། རྟོག་པའི་བློ་དང་ལྡན་རྣམས་ལ། ། [47b.6]དངོས་པོ་རྣམས་ཀྱི་ཆོས་སྟོན་ཏེ། ཞེས་འབྱུང་བ་དང་ཉོན་མོངས་པ་དང་། རྣམ་པར་བྱང་བའི་དངོས་པོ་རྣམས་ཇི་ལྟ་བ་བཞིན་དུ་རིག་ཅིང་རྟོག་པ་ཉིད་མ་ནོར་བའི་ལམ་ཡིན་པས། དངོས་པོའི་ལོ་རྒྱུས་བརྟག་པའི་སྒོ་ནས་ལམ་བཙལ་བར་དགོས་སོ། །སྐྱེ་བོ་ཀུན་གྱི་སེམས་མངོན་སྣང་ཕྱི་ [47b.7]ནང་གྲགས་པའི་ཆོས་འདི་ནི། སེམས་ཅན་རྣམས་ཀྱི་སེམས་ཀྱིས་རིག་ཅིང་ཡུལ་དུ་སྣང་བའི་ནང་གི་དབང་པོ་དྲུག་དང་། ཕྱིའི་ཡུལ་དྲུག་ཡོད་པར་གྲགས་པའི་ཆོས་འདི་ནི། འཛིན་པ་དྲུག་གིས་ཇི་ལྟར་མཐོང་ཞིང་བརྟག་པ་དེ་ལྟར་མ་ཡིན་འཁྲུལ། །འཇུག་པའི་རྣམ་པར་ཤེས་པ་ [48a] [48a.1]དྲུག་གིས་མཐོང་ཞིང་ཐོས་པ་ལ་སོགས་པ་དམིགས་པའི་ཡུལ་དུ་བརྟག་པ་སྟེ། ཅི་སྣང་བ་རྣམས་དེ་བཞིན་ཡོད་པ་མ་ཡིན་ཏེ་འཁྲུལ་པའི་ཕྱིར་རོ། །རང་གི་རྟོག་པས་མྱོས་པའི་དེ་བཞིན་བཟུང་བ་བདེན་འགྱུར་ན། །མ་རིག་པའི་རྟོག་པས་མྱོས་པའི་ལོག་པར་མཐོང་བ་རྣམས། [48a.2]དེ་བཞིན་བདེན་པར་གྱུར་ན་ནི། དེ་དག་དངོས་པོ་མི་རྟོག་དགྲ་བཅོམ་འདྲ་བར་གྲོལ་བར་འགྱུར་བའི་རིགས། །སྐྱེ་བོ་དེ་དང་དགྲ་བཅོམ་གཉི་གས་ཀྱང་། །བདེན་པ་མཐོང་བར་བྱེ་བྲག་མེད་པས། གཉི་གས་ཀྱང་འདྲ་བར་རྣམ་པར་གྲོལ་བའི་འབྲས་བུ་ཐོབ་པར་འགྱུར་བའི་རིགས་ན། [48a.3]དེ་དག་དུས་དགྲས་འཇོམས་ཤིང་སྡུག་བསྔལ་ཉེན་ལས་དེ་འཁྲུལ་མངོན་པར་འགྱུར། །སེམས་ཅན་དེ་དག་ནི་ན་བ་དང་འཆི་བ་ལ་སོགས་པ་དུས་ཀྱི་དགྲས་འཇོམས་ཤིང་སྡུག་བསྔལ་གསུམ་དང་བརྒྱད་ཀྱིས་ཉེན་པ་དེས་ན། སེམས་ཅན་གྱིས་མཐོང་བ་རྣམས་ནི་འཁྲུལ་པ་ཡིན་པར་མངོན་ནོ། །གཞན་ [48a.4]དུ་སྐྱེ་མཆེད་སྒོ་ནས་རིག་པ་དེ་དག་ཚད་མར་གྱུར་ན་ནི། འཁྲུལ་པས་ལས་གཞན་དུ་འགལ་ཏེ། གལ་ཏེ་མ་འཁྲུལ་ཏེ་སེམས་ཅན་གྱི་སྐྱེ་མཆེད་བཅུ་གཉིས་ཀྱི་སྒོ་ནས་རིག་པ་དེ་དག་ཚད་མ་ཡིན་ན་ནི། དེ་ཉིད་ཚད་མར་གྱུར་པར་འཕགས་པའི་ལམ་དེ་སུ་ལ་དགོས་མི་འགྱུར། །སེམས་ཅན་རྣམས་ལ་ [48a.5]འཕགས་པའི་ལམ་རང་ཆས་སུ་ཡོད་པའི་ཕྱིར་རོ། །ལམ་དེ་རྣམ་གྲོལ་ལམ་དུ་བསྟན་ཅིང་དབང་པོའི་ཤེས་པས་མི་ཐར་ཏེ། །སེམས་ཅན་འཁྲུལ་པས་མཐོང་བ་རྣམ་པར་གྲོལ་བའི་ལམ་དུ་འདོད་པ། དབང་པོ་བེམས་པོ་ལ་བརྟེན་པའི་ཤེས་པས་འཁོར་བའི་སྡུག་བསྔལ་ལས་མི་ཐར་ཏེ། དེ་ཅིའི་ [48a.6]ཕྱིར་ཞེ་ན། སེམས་ཅན་གྱི་མཚན་མ་སྣ་ཚོགས་སུ་མཐོང་བའི་ཤེས་པས་ནི། སྡུག་བསྔལ་འགག་ཡང་མི་འཇིལ་རྣམ་རིག་ཤེས་ཏེ་ཉོན་མོངས་སྐྱེ་བའི་གནས། །སྡུག་བསྔལ་སྤོང་བའི་ལྟ་ག་ལ་ཡོད་ཀྱི་སྡུག་བསྔལ་སྐྱེ་བའི་གནས་ཡིན་པས། དེའི་ཕྱིར་སྐྱེ་བོས་མཐོང་བ་དེ་དག་འཁྲུལ་པར་མངོན་ཞིང་ [48a.7]རྒྱལ་བས་གསུངས། དེ་ལྟར་སེམས་ཅན་གྱིས་མཐོང་བ་རྣམས་ནི་རིག་པས་ཀྱང་འཁྲུལ་པར་མངོན་ཞིང་། སངས་རྒྱས་ཀྱི་ལུང་ལས་ཀྱང་འཁྲུལ་པ་ཡིན་པར་གསུངས་སོ། །ཀུན་ནས་ཉོན་མོངས་པ་བརྟག་པ་ལ་ཡང་རྣམ་པ་གཉིས་སུ་ཕྱེ་བ་ལས། གཉིས་པ་འཁྲུལ་པ་སྣང་བ་ཞེས་བྱ་བ་ཡང་ [48b] [48b.1]རྣམ་པ་དགུས་བསྟན་ཏེ། གང་སྣང་བ་དང་ཅི་ཕྱིར་སྣང་བ་དང་། སྣང་བའི་ཉེས་པ་དང་སྣང་བའི་གཞི་རྣམ་པར་ཤེས་པའི་མཚན་ཉིད་ཡིན་པར་བསྟན་པ་དང་། ཚུལ་ཇི་ལྟར་སྣང་བ་དང་། སྣང་བའི་སེམས་ཀྱི་ནང་དུ་ཐམས་ཅད་འདུས་པས་ཐོབ་པར་བྱ་བ་མེད་པ་དང་། ཐམས་ཅད་སེམས་ཀྱི་མཚན་ [48b.2]ཉིད་ཡིན་ན་རྒྱུ་རྐྱེན་གཞན་ལས་ཅིའི་ཕྱིར་སྐྱེ་བར་སྣང་བར་འགྱུར་ཞེས་དྲིས་པའི་ལན་དང་། སྣང་བའི་དངོས་པོ་མ་གྲུབ་པ་དང་། སྣང་བའི་གཞི་སེམས་ཉིད་ཀྱང་མ་གྲུབ་པར་བསྟན་པ་རྣམས་སོ། །དེ་ལ་གང་སྣང་ཞེ་ན། འཁྲུལ་པའི་དབང་གིས་སེམས་ཉིད་རྣམ་པ་སྣ་ཚོགས་སུ་སྣང་བར་སྟོན་ཏེ། [48b.3]དེ་ན་དེ་ལ་འཁྲུལ་པའི་དབང་གིས་འདི་དག་ཇི་ལྟར་སྣང་བར་འགྱུར། །འཁྲུལ་པ་ཡིན་པར་མངོན་པ་དེས་ན། སེམས་ཅན་དེ་དག་ལ་འཁྲུལ་པའི་དབང་གིས་འདི་དག་ཅི་ལྟར་སྣང་བར་འགྱུར་ཞེ་ན། ཀུན་དུ་རྟོག་ཅན་ཡང་དག་མ་ཡིན་ཀུན་དུ་རྟོག་པས་རྩོམ་མེད་ཉམས། །སེམས་ཅན་ [48b.4]གྱི་སེམས་ནི་རང་བཞིན་གྱིས་ཀུན་དུ་རྟོག་པ་ཅན་ཡིན་ལ། གང་དུ་རྟོག་ཅེ་ན་ཡང་བ་མ་ཡིན་པའི་ལོག་པའི་རྣམ་པར་ཀུན་དུ་རྟོག་པས། ཐོག་མའི་རྩོལ་བ་མེད་པ་ནས་བདེན་པ་མཐོང་བ་ལས་ཉམས་ཤིང་། བློ་གྲོས་ཕྱིན་ཅི་ལོག་ཏུ་གྱུར་ཅིང་མ་རིག་རྐྱེན་གྱི་དབང་སོང་བས། །ཡང་དག་པའི་ [48b.5]དོན་མ་མཐོང་བས། བློ་གྲོས་ཕྱིན་ཅི་ལོག་ཏུ་གྱུར་ཅིང་། བདེན་པ་མཐོང་བའི་སྟོབས་དང་མི་ལྡན་པས། མ་རིག་པའི་དབང་དུ་སོང་བའི་ཕྱིར། སེམས་དང་སེམས་ལས་བྱུང་བ་དེ་ཉིད་ལུས་གསུམ་དོན་དུ་སྣང་བ་ཡིན། །སེམས་ནི་རྣམ་པར་ཤེས་པའི་ཚོགས་བརྒྱད་ལས་སེམས་ལས་བྱུང་བ་ནི་འདུ་བྱེད་ལྔ་ [48b.6]བཅུ་རྩ་གཅིག་ཡིན་ཏེ། རང་གི་སེམས་དག་ཉིད་འོག་ནས་འབྱུང་བའི་ལུས་གསུམ་གྱི་དོན་ལྟར་སྣང་བ་ཡིན་ནོ། །འདུ་བྱེད་སྣ་ཚོགས་དག་གི་བག་ཆགས་བསགས་ལས་གང་གོམས་མཐུ་བརྟས་ཚེ། །དགེ་སྡིག་གི་ལས་ཀྱི་འདུ་བྱེད་སྣ་ཚོགས་ཀྱི་བག་ཆགས་བསགས་པ་གོམས་པས། སྔ་མའི་བག་ [48b.7]ཆགས་སྨིན་ཅིང་བརྟས་ཏེ། འབྲས་བུ་འབྱིན་པའི་མཐུ་དང་ལྡན་པའི་ཚེ། །སེམས་ཉིད་ཡུལ་དང་ལུས་འདྲར་སྣང་བ་རུས་པས་གང་བ་བཞིན་དུ་སྣང་། །རང་གི་སེམས་ཉིད་ཕྱིའི་ཡུལ་དང་། ནང་གི་ལུས་འདྲ་བར་སྣང་བ་ནི། དཔེར་ན་མི་གཙང་བ་བསྒོམས་པས། ས་ཡུལ་ཐམས་ཅད་རུས་པས་གང་ [49a] [49a.1]བར་བསྒོམ་པ་ཡུན་རིང་དུ་བསྒོམས་ཏེ། མཐུ་བརྟས་པའི་ཚེ། ས་ཡུལ་ཐམས་ཅད་རུས་པས་གང་བ་བཞིན་དུ། རང་གི་སེམས་ཉིད་རུས་པར་སྣང་སྟེ། ལུས་གསུམ་ལས་དེ་ཡན་ཆད་དང་པོ་བསྟན་ཏོ། །གཉིས་པ་ནི་བག་ཆགས་བསགས་པའི་རྒྱུན་ལ་དམིགས་སྐྱེས་ཡིད་ལ་བརྟགས་པའི་ [49a.2]བདག་མེད་ཀུན་གཞི་བག་ཆགས་དང་བཅས་པའི་སྐད་ཅིག་མའི་རྒྱུན་ལ་བདག་ཡིན་ནོ་སྙམ་པའི་དམིགས་པ་སྐྱེས་པ་ཡིད་ལས་མ་གཏོགས་པས་བདག་གོ་སྙམ་པའི་ནན་གྱིས་བརྟགས་པའི་བདག་ནི་མེད་དོ། །དཔེར་ན་ཐག་པ་ཁྲ་བོ་ལ་སྦྲུལ་ལོ་སྙམ་པའི་རྟོག་པ་སྐྱེས་ཀྱང་། སྦྲུལ་ལོ་སྙམ་པའི་རྟོག་པ་ [49a.3]ཙམ་ལས་མ་གཏོགས་པར་སྦྲུལ་གྱི་མཚན་ཉིད་ཐག་པ་ལ་མེད་པ་དང་འདྲ། ལུས་གསུམ་པ་ནི། འདུ་བྱེད་མཐུ་ཡིས་བསྒྲིབས་ཤིང་ཕྲ་བ་མ་མཐོང་དེ་ལས་མ་རིག་སྐྱེ། །འདུ་བྱེད་ཀྱི་ཆོས་རགས་པར་སྣང་བས། ཀུན་གཞི་ཕྲ་བ་བསྒྲིབས་ཏེ། མ་མཐོང་བ་དེ་ལས་ཤེས་པ་དང་རིག་པ་སྐྱེ་བས་འདྲ་བར་ [49a.4]སྣང་སྟེ། དཔེར་ན་སྨིག་རྒྱུ་ཡིན་པར་མ་ཤེས་པ་ལས་ཆུའི་རྟོག་པ་སྐྱེ་བ་དང་འདྲ། དགུར་ཕྱེ་བ་ལས་གཉིས་པ་ཅིའི་ཕྱིར་སྣང་ཞེ་ན། ཀུན་གཞི་མཚན་ཉིད་མ་མཐོང་བའི་ཕྱིར་ཏེ། དཔེ་ཐག་པའི་རང་བཞིན་ཇི་ལྟ་བ་བཞིན་དུ་མ་མཐོང་བ་ལས། སྦྲུལ་དུ་འཁྲུལ་པ་འབྱུང་བ་དང་འདྲ་བར། [49a.5]རྒྱུ་དང་བཅས་པའི་སེམས་ཀྱི་མཐུ་ནི་མ་རྟོགས་རྟོག་པའི་རྗེས་འབྲངས་ནས། །ཀུན་གཞི་བག་ཆགས་དང་བཅས་པའི་མཐུ་ལས་རྣམ་པ་སྣ་ཚོགས་སུ་སྣང་བར་ནི་མ་རྟོགས་པས། སྣང་བ་ཐམས་ཅད་རང་གི་ངོ་བོར་ཡོད་པས་ཕྱིན་ཅི་ལོག་ཏུ་རྟོག་པའི་རྗེས་སུ་འབྲངས་ནས། དེ་ལས་ཟག་བཅས་ [49a.6]རང་བཞིན་རྟོག་པས་བདག་དང་ཆོས་རྣམས་རྒྱས་པར་བྱེད། །ལོག་པའི་རྗེས་སུ་འབྲངས་པ་དེ་ལས་ཁམས་གསུམ་དུ་ཟག་ཅིང་འཁོར་བའི་རྒྱུར་གྱུར་པའི་རྟོག་པས་བླ་ཐབས་སུ་བརྟགས་པའི་བདག་དང་། ཕྱི་ནང་གི་ཆོས་སུ་ལོག་པའི་རྟོག་པས་རྒྱས་པར་བྱེད། ལྡན་པར་འབྱུང་བ་ཤིན་ཏུ་ཕྲ་བ་རྒྱུ་བ་ [49a.7]དེ་ནི་མ་མཐོང་ལས། །བདག་ཏུ་ལྟ་བ་ལ་སོགས་མུ་སྟེགས་ལྟ་བ་སྣ་ཚོགས་སྐྱེ་ཞིང་ཐར་བར་རྟོགས། །ཀུན་གཞིའི་ཕྲེང་བ་མ་མཐོང་བ་ལས་མུ་སྟེགས་ཀྱི་ལྟ་བ་སྣ་ཚོགས་མང་པོ་འབྱུང་བར་ཡང་སྟོན་ཏེ། ཅིའི་ཕྱིར་འབྱུང་ཞེ་ན། སེམས་འདི་ལས་རྣམ་པ་མཐའ་ཡས་གནས་གྱུར་བག་ཆགས་མཐའ་མེད་ངེས་ [49b] [49b.1]པ་མེད། སེམས་ཞེས་བྱ་བ་ཀུན་གཞི་ནི་དགེ་སྡིག་གི་ལས་ཀྱི་བག་ཆགས་མཐའ་ཡས་པའི་གནས་སུ་གྱུར་པས། ཀུན་གཞི་ལ་བག་ཆགས་གནས་པ་ཡང་མཐའ་མེད་པས། བག་ཆགས་འདི་དག་མི་གནས་ཞེས་ངེས་པར་བཟུང་དུ་ནི་མེད་དོ། །བག་ཆགས་བརྟས་ཤིང་སད་པར་བྱེད་པའི་རྐྱེན་ཡང་ [49b.2]རྣམ་པ་སྣ་ཚོགས་ཏེ། །ཀུན་གཞི་ལ་བག་ཆགས་གནས་པ། དགེ་བའི་རྐྱེན་གྱིས་ནི་མཐོ་རིས་སུ་སྐྱེ་བའི་བག་ཆགས་སད་པར་བྱེད་ལ། ཉོན་མོངས་ཤིང་མི་དགེ་བའི་རྐྱེན་གྱིས་ནི། །ངན་སོང་དུ་སྐྱེ་བའི་བག་ཆགས་སད་པར་བྱེད་པའི་རྐྱེན་ལ་སོགས་པའི་ཡང་སྣ་ཚོགས་ཏེ། རྐྱེན་འགའ་བག་ཆགས་ [49b.3]འགའ་ཞིག་སྨིན་ནས་མིའི་རྒྱུད་ཀྱི་ལུས་སྣང་ལ། །ཚེ་སྔ་མ་ལ་མིར་སྐྱེ་བར་འགྱུར་བའི་རྐྱེན་འགས་མིར་སྐྱེ་བར་འགྱུར་བའི་བག་ཆགས་ཀུན་གཞི་ལ་སྔ་ནས་གནས་པ་སད་ཅིང་སྨིན་པར་བྱས་ནས། ཚེ་འདི་ལ་མིའི་རྒྱུད་ཀྱི་ལུས་ཐོབ་ཅིང་སྣང་ལ། རྐྱེན་གཞན་དག་གིས་བག་ཆགས་གཞན་སད་བྱས་ཚེ་ [49b.4]འགྱུར་བའི་མཐུ་མཐོང་ནས། །མི་ལས་གཞན་པ་ལྷར་སྐྱེ་བར་འགྱུར་བའི་རྐྱེན་དག་གིས་མི་ལས་གཞན་པའི་ལྷར་སྐྱེ་བའི་རྒྱུ་བག་ཆགས་ཀུན་གཞི་ལ་སྔ་མ་ནས་གནས་པ་སད་ཅིང་སྨིན་པར་བྱས་པའི་ཚེ། མི་ལས་ལྷར་འགྱུར་བ་མཐོང་ནས། །དབང་ཕྱུག་ལ་སོགས་བྱེད་པར་འདོད་དེ་ལམ་དེ་ [49b.5]མི་ཞི་གྲོལ་མི་འགྱུར། །མི་ལས་ལྷར་སྐྱེ་བར་འགྱུར་བ་ནི། འཇིག་རྟེན་གྱི་མངོན་ཤེས་ཀྱིས་མཐོང་ལ། རྒྱུ་རྐྱེན་གང་ཁོ་ནས་དེ་ལྷར་སྐྱེ་བ་ནི་མ་རྟོགས་པའི་སྒོ་ནས་དབང་ཕྱུག་ལ་སོགས་པ་བྱེད་པ་པོ་ཞིག་གིས་བྱ་བར་སེམས་ཏེ། བྱེད་པ་པོ་ལ་བརྟེན་པ་ཉིད་ཐར་པའི་ལམ་དུ་འདོད་པ་ཉིད། [49b.6]སྡུག་བསྔལ་མ་ཞི་བས་ཁམས་གསུམ་གྱི་སྐྱོན་ལས་ཀྱང་གྲོལ་བར་མི་འགྱུར་རོ། །རྣལ་འབྱོར་ལམ་བསླད་ཐེ་ཚོམ་རྒྱུ་ཡང་རྒྱུན་འདི་ཕྲ་བ་མ་རྟོགས་སྐྱེས། །ཡང་དག་པའི་དོན་རྣལ་འབྱོར་པའི་ལམ་ལས་ལོག་པར་གྱུར་ཏེ། བསླད་པ་དང་ཡིད་གཉིས་ཟ་བའི་རྒྱུ་ཡང་ཀུན་གཞི་ཕྲ་རབ་རྒྱུ་བ་ [49b.7]དེ་མ་རྟོགས་པ་ལས་འབྱུང་ཞིང་སྐྱེ་སྟེ། དཔེར་ན་ཐག་པ་ཇི་ལྟ་བ་བཞིན་དུ་མ་རྟོགས་པ་ལས་སྦྲུལ་དུ་འཛིན་པའམ། སྦྲུལ་ཡིན་ནམ་མ་ཡིན་སྙམ་དུ་ཐེ་ཚོམ་ཟ་བ་དང་འདྲའོ། །དེ་ལྟར་འཁྲུལ་པས་རྣམ་པ་སྣ་ཚོགས་སུ་སྣང་ན་ཡང་ཉེས་པ་ཅི་ཡོད་ཅེ་ན། དགུར་ཕྱེ་བའི་གསུམ་ [50a] [50a.1]པ་སྣང་བའི་ཉེས་པ་སྟོན་ཏེ། བདག་ཏུ་བརྟགས་པས་བསྒྲིབས་ཏེ། འཕགས་པའི་རིགས་དང་རྣམ་པར་བྲལ། །འཕགས་པའི་རིགས་སུ་གཏོགས་པ་རྣམས་ནི། བདག་ཏུ་རྟོག་པ་མི་མངའ་བས་བདག་མེད་པ་ལ་བདག་ཏུ་བརྟགས་པས། འཕགས་པའི་རིགས་དང་ [50a.2]བྲལ་ཞིང་འབྲས་བུ་མི་ཐོབ་པའི་ཉེས་པ་ཡོད་དོ། །ཆོས་སུ་བརྟགས་པས་སྡུག་བསྔལ་སྣ་ཚོགས་འབྱུང་ཞིང་ངན་སོང་སྲིད་པར་འགྱུར། །ཆོས་སྣ་ཚོགས་བརྟགས་པས་ལས་སྣ་ཚོགས་སུ་སྤྱད། ལས་སྣ་ཚོགས་པས་སྡུག་བསྔལ་སྣ་ཚོགས་ཀྱང་མྱོང་བར་འགྱུར་ལ། མི་དགེ་ [50a.3]བའི་ལས་ཀྱི་ངན་སོང་གསུམ་ཡང་སྲིད་པར་འགྱུར་རོ། །དགུར་ཕྱེ་བའི་ལས་བཞི་པ་སྣང་བ་ཐམས་ཅད་ཀྱི་གཞི་རྣམ་པར་ཤེས་པའི་མཚན་ཉིད་ཇི་ལྟ་བུ་ཞིག་ཡིན་ཞེ་ན། རྣམ་ཤེས་དེ་དང་འདུ་བྱེད་རྒྱུན་ལ་མཚན་མ་ཐ་དད་འཛིན་པས་ནི་གཟུགས་དང་སྒྲ་ལ་སོགས་པ་འདུ་བྱེད་ཀྱི་མཚན་ཉིད་ཐ་དད་པའི་རྣམ་པར་ [50a.4]ཤེས་པའི་འཛིན་པས་ན། ལས་ཀྱི་ཁྱད་པར་དག་གིས་བརྒྱད་དུ་སྣང་གི་རིགས་ལ་དུ་མ་མེད། །གཟུགས་མཐོང་བར་བྱེད། སྒྲ་ཐོས་པར་བྱེད་པ་ལ་སོགས་པ་འདུ་བྱེད་ཀྱི་མཚན་མ་རྣམ་པར་ཤེས་པར་བྱ་བ་བརྒྱད་ཡོད་པས་ཤེས་པ་ཡང་བརྒྱད་དུ་གཞག་གི །ཤེས་ཤིང་རིག་པའི་རིགས་སུ་ [50a.5]གཅིག་པས་རིགས་ལ་དུ་མ་མེད། །དགུར་ཕྱེ་བ་ལས་ལྔ་པ་དེ་ལྟར་སྣ་ཚོགས་སུ་སྣང་བ་དེ་དག་ཀུན་གཞི་ལ་ཚུལ་ཇི་ལྟར་ཞེ་ན། དེའི་ཕྱིར་སེམས་ཀྱི་སྐད་ཅིག་དང་པོ་དེ་ལ་ལུས་དང་ཆོས་ཀུན་གནས། །གོང་དུ་བསྟན་པ་དེ་ལྟར་སེམས་ལ་ཐ་དད་དུ་མ་མེད་པ་དེའི་ཕྱིར། ཀུན་གཞིའི་སེམས་ཀྱི་སྐད་ཅིག་ [50a.6]མ་ཁོ་ན་ལ་དབང་པོ་དང་བཅས་པའི་ལུས་དང་། མ་ལུས་པའི་ཆོས་ཀུན་གནས་པ་ཡིན་ནོ། །སེམས་ཀྱི་སྐད་ཅིག་མ་ཕྱི་མ་རྣམས་ལ་ཡང་སྔ་མ་དང་མཐུན་པར་ཅི་ཕྱིར་སྣང་ཞེ་ན། དེ་ལ་བསམ་པ་ཞེན་ཕྱིར་ཕྱི་མ་དེ་ལ་དེ་འབྱུང་དེ་ལ་སྣང་། །དངོས་པོར་ཆགས་ཤིང་ཞེན་པའི་དབང་གིས་སྣང་བ་ཡིན་པར་ [50a.7]བསྟན་པས། སྔ་མ་དེ་དག་ལ་བསམ་པ་ཇི་ལྟ་ཇི་ལྟར་ཞེན་པ་ལྟར། ཕྱི་མ་ལ་ཡང་དེ་ལྟར་མཐུན་པར་སྣང་བར་འབྱུང་ངོ་། །དགུར་ཕྱེ་བ་ལས་དྲུག་པ་སྣང་བའི་གཞི་སེམས་ཀྱི་ནང་དུ་ཐམས་ཅད་འདུས་པས་འཐོབ་པར་བྱ་བ་མེད་པར་སྟོན་ཏེ། རང་སེམས་རྒྱུན་ལས་འཕགས་པའི་སྐྱེ་བོའི་ཆོས་ནི་ [50b] [50b.1]གཞན་ཡོད་མ་ཡིན། །གོང་དུ་བསྟན་པ་དེ་ལྟར་སེམས་ཀྱི་སྐད་ཅིག་མ་གཅིག་ལས་མ་ལུས་པའི་ཆོས་ཐམས་ཅད་གནས་པའི་ཕྱིར་རོ། །རྒྱུན་དྲུག་རིགས་ལའང་སྣ་ཚོགས་དེ་དག་རང་གི་ཏིང་ངེ་འཛིན་ཏོ། །ལྷ་དང་མི་ལ་སོགས་པ་སེམས་ཅན་གྱི་རྒྱུད་ཀྱི་རིགས་དྲུག་ཡོད་ལ། རིགས་གཅིག་ [50b.2]པ་ཡང་སྣ་ཚོགས་སུ་གནས་པ་དེ་དག་ཀྱང་། ཐོག་མ་མེད་པའི་དུས་ནས་འདྲིས་ཤིང་གོམས་གོམས་པའི་ཏིང་ངེ་འཛིན་གྱི་མཐུས་སྣང་བ་ཡིན་ནོ། །ཅིའི་ཕྱིར་ཐམས་ཅད་ཀྱི་མཚན་ཉིད་བདག་ཡིན་པས་ཐ་དད་དུ་དབྱེར་མེད་ཅེ་ན། སེམས་རྒྱུན་དེ་ནི་ཕྱོགས་ཀྱང་ཅུང་ཟད་མེད་པས་གཅིག་ལ་རྟེན་ [50b.3]མེད་དེ། །ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་ཐམས་ཅད་ནི་རང་གི་སེམས་ཡིན་ལ། སེམས་སྐད་ཅིག་མའི་རྒྱུན་དེ་ནི་ཡོད་པ་དང་། མེད་པ་དང་། ཡོད་ཀྱང་ཡོད་ལ་མེད་ཀྱང་མེད་ཅེས་བྱ་བ་ལ་སོགས་པའི་ཕྱོགས་དང་ཤར་ནུབ་དང་། བླ་འོག་ལ་སོགས་པའི་ཕྱོགས་ [50b.4]དང་ཤར་ནུབ་དང་། བླ་འོག་ལ་སོགས་པའི་ཕྱོགས་ལ་འདི་འདྲ་བ་འདི་ལྟ་བུ་ཞིག་ཅེས་གཅིག་ཏུ་བསྟན་དུ་མེད་པས། གཅིག་ལ་བསྟན་པ་ཡང་མེད་དེ། །དེ་ལ་ཕྱོགས་མེད་ཕྱིར་ན་མཐའ་ཡས་ཤིང་རྣམས་བདག་གི་ལུས། །ཕྱོགས་གཅིག་ཡོད་ན་ནི་གཅིག་གི་མཚན་ཉིད་དུ་བསྟན་དུ་མི་རུང་ [50b.5]སྟེ། དངོས་པོ་ལྟ་ཅི་སྨོས། དངོས་པོ་མེད་པ་ནམ་མཁའ་ལྟ་བུ་ཞིག་ཡིན་ནོ་ཞེ་ན་ཡང་ནམ་མཁའ་སྟོང་བའི་ཤར་དང་། ནུབ་ལ་སོགས་པའི་ཕྱོགས་དང་དབུས་དང་། མཐའི་བྱེ་བྲག་གིས་ཐ་དད་པས་གཅིག་ཏུ་འདུས་པར་མི་རུང་ངོ་། །སེམས་ཀྱི་རྒྱུན་ནི་ཡང་དག་པར་ན་ཅི་ལྟ་བུའི་ཕྱོགས་ [50b.6]ཀྱང་མ་ཡིན་པས། ཐ་དད་དུ་དབྱེར་མེད་པའི་ཕྱིར་རོ། །དམིགས་སུ་མེད་པར་གཅིག་པས་དག་པ་དང་མ་དག་པའི་ཞིང་རྣམས་ཀྱི་རང་བཞིན་ཡིན་ནོ། །བདག་གི་ལུས་འདི་མཐའ་ཡས་ཞིང་དང་སྐྱེ་བའི་ལུས་སུ་རབ་སྣང་ཡང་། །སེམས་དང་བག་ཆགས་ཐ་དད་མ་ཡིན་གཅིག་མིན་ [50b.7]བརྟག་པར་རབ་ཏུ་དཀའ། །དེ་ལྟར་ཐམས་ཅད་ཀྱང་བདག་ཡིན། བདག་ཀྱང་བདག་ཡིན། །བདག་ཀྱང་ཐམས་ཅད་ཡིན་པས། གདོད་མ་ཐོབ་པ་ཐོབ་པར་བྱ་བའི་ཆོས་ནི་མེད་དོ། །སེམས་དང་བག་ཆགས་ཀྱང་གཅིག་ཅེའམ་ཐ་དད་པ་ཡིན་ཞེས་བརྟག་པར་རབ་ཏུ་དཀའ་སྟེ། [51a] [51a.1]གཅིག་པ་ཡང་མ་ཡིན་ཐ་དད་པ་ཡང་མ་ཡིན་ནོ། །དཔེར་ན་ཁ་དོག་དང་དབྱིབས་གཉིས་གཅིག་ཅེས་བྱ་བར་ཡང་མི་རུང་། ཐ་དད་ཅེས་བྱ་བར་ཡང་མི་རུང་བ་དང་འདྲའོ། །དགུར་ཕྱེ་བ་ལས་བདུན་པ་ཐམས་ཅད་སེམས་ཀྱི་མཚན་ཉིད་ཡིན་ན། རྒྱུ་རྐྱེན་གཞན་ལས་ཅིའི་ཕྱིར་སྐྱེ་བར་སྣང་ [51a.2]ཞེས་དྲིས་པ་དང་། འདི་ཀུན་རྟེན་འབྲེལ་འབྱུང་ཚུལ་ཏེ་སྐྱེ་དང་འགག་པར་འགྱུར་ཞེས་པ་ཚིག་པའི་ས་བོན་བཞིན་ཏེ། མེད་ལས་མེད་པ་མི་འབྱུང་རྒྱུ་འབྲས་མེད། །ཆོས་འདི་ཀུན་རྒྱུ་ལས་བརྟེན་ཏེ་འབྲས་བུ་སྐྱེ་ལ་གནས་པའི་རྟེན་མེད་ན་འགག་པར་འགྱུར་རོ་ཞེས་པ་ཟེར་བ་ནི་དཔེར་ན་ཚིག་པའི་ས་བོན་ལས་ [51a.3]འབྲས་བུ་མི་སྐྱེ་བ་དང་འདྲ་བར་ཆོས་ཐམས་ཅད་རང་བཞིན་གྱིས་མ་གྲུབ་པར། རྒྱུ་མེད་པ་ལས་འབྲས་བུ་མེད་པ་མི་འབྱུང་བས། འདི་ནི་རྒྱུ་འདི་ནི་འབྲས་བུ་ཞེས་གཞག་ཏུ་ཡང་མེད་དོ། །འོ་ན་ཅིའི་ཕྱིར་རྒྱུ་ལ་བརྟེན་ཏེ་འབྲས་བུ་འབྱུང་བར་འདྲ་བར་སེམས་ཅན་ཀུན་ལ་སྣང་ཞེ་ན། དངོས་པོར་ཞེན་ [51a.4]ཅིང་རྒྱུ་དང་འབྲས་བུར་རྟོག་པའི་སེམས་ཉིད་ནི། །རྒྱུ་དང་རྐྱེན་དུ་སྣང་བ་སྟེ། ཐོག་མ་མེད་པའི་དུས་ནས་དངོས་པོ་རྣམས་རྒྱུ་དང་འབྲས་བུའི་ངོ་བོར་ཞེན་ཅིང་རྟོག་པའི་སེམས་ཉིད། རྒྱུ་དང་འབྲས་བུར་སྣང་བར་ཟད་དོ། །རྒྱུ་དང་འབྲས་བུ་མེད་པ་ལས་སེམས་ཉིད་དེ་ལྟར་སྣང་བར་ཅི་ལྟར་བཏུབ་ཅེ་ན། [51a.5]རྨི་ལམ་ན་ཆང་འཐུངས་པའི་རྒྱུ་ལས་ར་རོ་བའི་འབྲས་བུ་སྣང་བ་དང་། ཞིང་རྨོས་པ་ལས་ལོ་ཐོག་སྐྱེ་བར་རྨིས་པ་རྣམས་ཀྱང་། རྒྱུ་འབྲས་ཀྱི་དངོས་པོ་མེད་བཞིན་དུ་ཐོག་མ་མེད་པའི་དུས་ནས་རྒྱུ་འབྲས་སུ་རྟོག་པའི་དབང་གིས་རྨི་ལམ་ན་སྣང་བ་དང་འདྲའོ། །དགུར་ཕྱེ་བ་ལས་བརྒྱད་པ། སྣང་བའི་ [51a.6]དངོས་པོ་མ་གྲུབ་པར་སྟོན་པ་ནི། དེ་གཉིས་མེད་ཕྱིར་སྐྱེ་བ་དང་འཇིག་པ་མེད། རྒྱུ་དང་འབྲས་བུ་དེ་གཉིས་མེད་པའི་ཕྱིར། །རྒྱུ་ལ་བརྟེན་ཏེ་འབྲས་བུ་སྐྱེ་བ་མེད། །མ་སྐྱེད་ན་ཅི་ཞིག་འཇིག་རྟེན་ཏེ། འཇིག་པ་ཡང་མེད་དོ། །སྐྱེ་འཇིག་མེད་ཕྱིར་བདག་གཞན་མེད་དེ་འཆི་འཕོ་མེད་ཕྱིར་རྟག་ཆད་མེད། ། [51a.7]སྐྱེ་བ་མེད་དང་འཇིག་པ་མེད་ན་གང་ལ་བདག་ཅེས་བྱ། །གང་ལ་ནི་གཞན་ཞེས་བྱ། བདག་དང་གཞན་མེད་ན་སུ་ཞིག་འཆི་སུ་ཞིག་ནི་འཕོ། དེ་ལྟར་འཆི་བ་མེད་པས་ཆད་པ་མེད། །འཕོ་བ་མེད་པས་རྟག་པ་མེད། །དེས་ན་འཁྲུལ་འཁོར་མེད་ཅིང་མྱ་ངན་ལས་འདས་པ་མེད་པ་ཉིད་དུ་མངོན་ནོ། ། [51b] [51b.1]སྐྱེ་འཆི་དང་རྟག་ཆད་ལ་སོགས་པ་མེད་པ་དེས་ན། གཅིག་ནས་གཅིག་ཏུ་འཁྲུལ་ཅིང་འཁོར་བ་ཡང་མེད་པས། འཁོར་བ་ལ་བརྟེན་པའི་མྱ་ངན་འདས་པ་ཡང་མེད་པར་མངོན་ནོ། །དགུར་ཕྱེ་བ་ལས་ཐ་མ་སྣང་གཞི་སེམས་ཉིད་ཀྱང་མ་གྲུབ་པར་སྟོན་ཏེ། གནས་ཀྱི་སྐད་ཅིག་ནམ་ཡང་མི་འབྲལ་དེ་ཚེ་མཉམ་ [51b.2]གྱུར་དེ་ཡང་མེད་བག་ཆགས་ཀྱི་གནས་ཀུན་གཞི་སྐད་ཅིག་མ་དང་། བག་ཆགས་གཉིས་ནི་ནམ་ཡང་མི་འབྲལ་ཏེ། ཀུན་གཞི་མེད་བག་ཆགས་ཡོད་པར་མི་རུང་། བག་ཆགས་མེད་པར་ཀུན་ཡོད་པར་མི་རུང་སྟེ། དཔེར་ན་ཁ་དོག་མེད་པ་དང་དབྱིབས་ཡོད་པར་ཡང་མི་རུང་། དབྱིབས་མེད་ [51b.3]པར་ཁ་དོག་ཡོད་པར་ཡང་མི་རུང་བས། ཡོད་ན་ཡང་གཉིས་ཀ་ཡོད་མེད་ན་ཡང་གཉིས་ཀ་མེད་པར་མཉམ་པར་འགྱུར། བག་ཆགས་མེད་པར་ཀུན་གཞི་ཡང་མེད་དོ། །ཅིའི་ཕྱིར་ཞེ་ན། ཡང་དག་མ་ཡིན་རྟོག་པས་བསྐྱེད་ཕྱིར་བག་ཆགས་ཡོད་པ་མ་ཡིན་དང་། །ཕྱིན་ཅི་ལོག་གི་རྟོགས་ [51b.4]པས་བསྐྱེད་པའི་ཕྱིར། །བག་ཆགས་ཡོད་ཅེས་བྱ་བར་མི་རུང་ངོ་། །བག་ཆགས་དེ་མེད་ན། སྤྱོད་ཡུལ་མེད་ཕྱིར་ཀུན་གཞི་མེད་ཅིང་རྣམ་རིག་དེ་ཡང་མེད་པ་ཡིན། །ཀུན་གཞིའི་སྤྱོད་ཡུལ་ནི་བག་ཆགས་ཡིན་ན་བག་ཆགས་མེད་པའི་ཕྱིར་སྤྱོད་ཡུལ་མེད་དེ། ཡུལ་མེད་ན་ཤེས་པ་མི་འབྱུང་ [51b.5]བས། སྤྱོད་ཡུལ་ལ་བརྟེན་པའི་ཀུན་གཞི་ཡང་མེད་ཅིང་རྣམ་པར་རིག་པ་ཐམས་ཅད་ཀྱང་མེད་པ་ཁོ་ན་ཡིན་ནོ། །ཕྱོགས་རྣམས་མེད་ཕྱིར་དམིགས་དང་གནས་མེད་རྣམ་ཤེས་རིག་པ་ཅི་ལྟར་སྐྱེ། །གོང་དུ་གང་གི་ཕྱོགས་ལྟར་ཡང་མ་གྲུབ་པར་བསྟན་པའི་ཕྱིར། དམིགས་པའི་བག་ཆགས་དང་། [51b.6]གནས་པའི་ཀུན་གཞི་གཉི་ག་མེད་ན། དེ་ལ་བརྟེན་པའི་རྣམ་པར་རིག་པ་རྣམས་ཇི་ལྟར་སྐྱེ། དེའི་ཕྱིར་སེམས་འདི་ཡོད་མེད་མཐའ་ལས་འདས་ཤིང་གཅིག་དང་དུ་མར་བྲལ། །སེམས་དང་སེམས་ལས་བྱུང་བ་རྣམས་ནི་ཅི་ལྟ་བུར་ཡང་མ་ཡིན་པ་དེའི་ཕྱིར་ཡོད་པ་དང་མེད་པ་ལས་འདས་པ་ལ་ནི་གཅིག་ཅེས་བྱར་ [51b.7]མི་རུང་། དུ་མ་ཞེས་བྱར་ཡང་མི་རུང་ངོ་། །རྣམ་པར་བྱང་བ་ཅི་ལྟ་བུ་ཡིན་པ་བརྟགས་པ་ལ་ཡང་གཉིས་ཏེ། རྣམ་པར་བྱང་བ་འཁྲུལ་པ་ཉིད་ལ་སྣང་བར་བསྟན་པ་དང་། སྣང་བ་དེ་ཉིད་ཀྱང་མ་གྲུབ་པར་བསྟན་པའོ། །དེ་ལ་འཁྲུལ་པ་ལ་རྣམ་པར་བྱང་བ་སྣང་བ་གང་གིས་བསྟན་ཞེ་ན། བདེར་གཤེགས་བྱང་ [52a] [52a.1]ཆུབ་མེད་ཕྱིར་དེ་ཡི་རྫུ་འཕྲུལ་སྒྱུ་འདྲ་འཁྲུལ་ལ་སྣང་། །ཞེས་བྱ་བས་བསྟན་ཏེ། བདེ་བར་གཤེགས་པའི་སངས་རྒྱས་ཉིད་ཀྱང་ཡང་དག་པར་མ་གྲུབ་པས། དེའི་རྫུ་འཕྲུལ་སྒྱུ་མ་དང་འདྲ་བ་དེར་འཁྲུལ་པ་རྣམས་ལ་སྣང་བར་མངོན་ནོ། །དེ་ལྟ་བས་ན་རྡོ་རྗེ་གཅོད་པ་ལས། གང་གིས་ང་ལ་ [52a.2]གཟུགས་སུ་མཐོང་། །གང་གིས་ང་ལ་སྒྲར་ཤེས་པ། །ལོག་པར་སྤོང་ལ་ཞུགས་པ་སྟེ། །སྐྱེ་བོ་དེ་ཡིས་ང་མི་མཐོང་། །འདྲེན་པ་དག་ནི་ཆོས་ཀྱི་སྐུ། །ཆོས་ཉིད་དུ་ནི་སངས་རྒྱས་བལྟའོ། །ཞེས་འབྱུང་བ་ལྟ་བུའོ། །རྣམ་པར་བྱང་བ་སྣང་བ་མ་གྲུབ་པར་བསྟན་པ་ཡང་རྣམ་པ་གཉིས་ཏེ། རྣམ་པར་མི་རྟོག་པའི་ཡེ་ [52a.3]ཤེས་མ་གྲུབ་པར་བསྟན་པ་དང་། དག་པ་འཇིག་རྟེན་པའི་ཡེ་ཤེས་ཀྱང་གྲུབ་པར་བསྟན་པའོ། །དེ་ལྟར་རྣམ་པར་མི་རྟོག་པའི་ཡེ་ཤེས་ཇི་ལྟར་མ་གྲུབ་ཅེ་ན། དེ་བཞིན་དག་པའི་ཡེ་ཤེས་དག་ཤིན་ཏུ་དགེ་བའི་རྒྱུན་ཉིད་དང་། ཆོས་ཀྱི་དབྱིངས་ཉིད་ལ་ནི་དེ་དག་དམིགས་ཤིང་། དེ་དག་སྐྱེ་བར་བརྟགས་པ་ [52a.4]ཡང་། །སེམས་ཇི་ལྟར་མ་གྲུབ་པ་དེ་བཞིན་དུ་ཡེ་ཤེས་ཀྱང་མ་གྲུབ་སྟེ། ཅི་ལྟ་ཞེ་ན། སངས་རྒྱས་ཀྱིས་སྤྲོས་པའི་མཚན་མ་ཐམས་ཅད་ཡང་དག་པའི་རྣམ་པར་མི་རྟོག་པའི་ཡེ་ཤེས་དེ་དག་ནི། དགེ་བའི་རྩ་བ་ཚད་མེད་པའི་རྒྱུན་དང་། ཆོས་ཀྱི་དབྱིངས་མ་ནོར་བ་ལ་དམིགས་ཤིང་རྟོག་པ་ལས་སྐྱེ་བར་ [52a.5]སེམས་ཤིང་བརྟགས་པ་ཡང་རྡོ་རྗེ་གནས་མེད་པའི་ཕྱིར་ན་མཉམ་གནས་རང་བཞིན་འདྲར་གྱུར་དང་། རྡོ་རྗེ་ཞེས་བྱ་བ་ཡང་རྣམ་པར་མི་རྟོག་པའི་ཡེ་ཤེས་ཀྱི་རྒྱུའམ་གནས་ནི་སེམས་ཅན་གྱི་སེམས་ཡིན་ན། གོང་དུ་སེམས་ཉིད་མ་གྲུབ་ཅིང་མེད་པར་བསྟན་པའི་ཕྱིར་རྒྱུ་མེད་པ་དང་འབྲས་བུ་ཡང་མི་འབྱུང་བས་གཉི་ [52a.6]ག་ཡང་མ་གྲུབ་པའི་ཚུལ་དུ་མཉམ་པར་གནས་པས། སེམས་མ་གྲུབ་པ་དང་འདྲ་བར་ཡེ་ཤེས་ཀྱང་མ་གྲུབ་པར་གྱུར་པ་ཡིན་ནོ། །རྣམ་པར་ཤེས་པས་རྣམ་པར་མི་རྟོག་པའི་ཡེ་ཤེས་སྐད་ཅིག་མ་དོན་དམ་པར་ཡོད་དོ་ཟེར་བ་ཡང་མི་འགྲུབ་སྟེ། ཅིའི་ཕྱིར་ཞེ་ན། ཆོས་དབྱིངས་རྡོ་རྗེ་རྩེ་མོ་དེ་དག་ [52a.7]ཕྱོགས་ཉིད་མེད་པས་སྐད་ཅིག་མིན། །ཆོས་དབྱིངས་རྟོག་པའི་རྣམ་པར་རྡོ་རྗེ་འདྲ་བ་མཆོག་གམ། མི་རྟོག་པའི་ཡེ་ཤེས་རྡོ་རྗེ་དང་འདྲ་བ་མཆོག་གམ། རྩེ་མོར་གྱུར་པ་དེ་དག་ནི། ཅི་ལྟ་བུའི་ཕྱོགས་ཉིད་དུ་ཡང་དམིགས་སུ་མེད་པ་ལ་སྐད་ཅིག་མ་ཞེས་ཇི་སྐད་བྱ། དག་པ་འཇིག་རྟེན་པའི་ཡེ་ [52b] [52b.1]ཤེས་ཅིའི་ཕྱིར་མ་གྲུབ་ཅེ་ན། དག་པའི་དགེ་རྩ་གཟུགས་བརྙན་མེད་པ་འཇིག་རྟེན་ཡེ་ཤེས་ཡོད་མི་འགྱུར། །འཁོར་གསུམ་ཡོངས་སུ་དག་པའི་དགེ་བའི་རྩ་བ་ནི་གཟུགས་བརྙན་དང་འདྲ་སྟེ་མེད་པས། དེ་ལ་བརྟེན་པའི་དག་པ་འཇིག་རྟེན་པའི་ཡེ་ཤེས་ཡང་ཡོད་པར་ག་ལ་འགྱུར། སྤྱི་དོན་བཅུ་གཉིས་ [52b.2]ཀྱིས་བསྟན་པ་ལས། དྲུག་པ་སོ་སོར་བརྟགས་ནས་ངེས་པའི་དོན་བསྟན་པ་ཡང་རྣམ་པ་གསུམ་སྟེ། བསམ་པ་མཉམ་པ་དང་། སྤྱོད་པ་མཉམ་པ་དང་། དོན་སྟོན་ཏེ་བྱང་ཆུབ་ཀྱི་སེམས་ཀྱི་མཚན་ཉིད་དུ་བསྟན་པའོ། །དེ་བསམ་པ་མཉམ་པ་ལ་ཡང་རྣམ་པ་གསུམ་སྟེ། བླང་དོར་མེད་ཅིང་བདེན་པ་གཉིས་སུ་ [52b.3]མི་རྟོག་པས་མཉམ་པ་དང་མཐུན་པའི་ཆོས་ལ་སྲེད་པ་མེད་པ་དང་མི་མཐུན་པའི་ཆོས་ལ་ཞེ་སྡང་མེད་པས་བདེན་བརྫུན་མཉམ་པ་དང་། མཐའ་བཞི་དང་བྲལ་བས་དམིགས་པ་མེད་པས་མཉམ་པའོ། །དེ་ལ་བླང་དོར་མེད་ཅིང་བདེན་པ་གཉིས་སུ་མི་རྟོག་པས་མཉམ་པ་ནི། མཐུན་པའི་ཆོས་ལ་སྲེད་པ་མེད་པ་ [52b.4]དང་མི་མཐུན་པའི་ཆོས་ལ་ཞེ་སྡང་མེད་པས་བདེན་བརྫུན་མཉམ་པ་དང་། མཐའ་བཞི་དང་བྲལ་བས་དམིགས་པ་མེད་པས་མཉམ་པའོ། །དེ་ལ་བླང་དོར་མེད་ཅིང་བདེན་པ་གཉིས་སུ་མི་རྟོག་པས་མཉམ་པ་ནི། དེའི་ཕྱིར་བྱང་ཆུབ་མ་ཆུབ་མཚན་ཉིད་མེད་པར་གཅིག་པས་བླང་དོར་མེད་ཅེས་བྱ་བ་ལ་ [52b.5]སོགས་པས་སྟོན་ཏེ། གོང་དུ་ཀུན་ནས་ཉོན་མོངས་པ་དང་། རྣམ་པར་བྱང་བ་གཉི་ག་མ་གྲུབ་པར་བསྟན་པ་དེའི་ཕྱིར། བྱང་ཆུབ་སྟེ་སངས་རྒྱས་པ་དང་། བྱང་མ་ཆུབ་པ་སྟེ། སེམས་ཅན་གཉི་ག་མཚན་ཉིད་མེད་པར་གཅིག་པས། སངས་རྒྱས་བླང་དུ་མེད་དོ། །སེམས་ཅན་དོར་དུ་མེད་དོ། [52b.6]དོན་དམ་པ་ཞེས་བྱ་བ་ཉིད་ཀྱང་མེད་ན། དོན་དམ་པ་འདི་ལྟ་བུ་ཡིན་ཞེས་བསྟན་པའི་ཚིག་རྣམས་ལྟ་ག་ལ་ཡོད་དེ། དོན་དེ་ཚུལ་གྱིས་དོན་དམ་རྣམ་གྲངས་སྐྱེ་འགག་མེད་དང་མཉམ་ཉིད་དང་། །གཉིས་མེད་བསམ་འདས་སྟོང་ཉིད་ཆོས་དབྱིངས་བརྗོད་དང་ཐ་སྙད་བྲལ་ལ་སོགས། །བསྟན་པ་དེ་ [52b.7]ཀུན་ཐ་སྙད་ཡིན་ཏེ་དོན་དམ་མེད་ཅིང་ཀུན་སྒྲིབ་མེད། །དོན་དམ་པ་ཞེས་བྱ་བ་ཉིད་ཀྱང་མེད་ན། དོན་དམ་པ་འདི་ལྟ་བུ་ཡིན་ཞེས་བསྟན་པའི་ཚིག་རྣམས་ལྟ་ག་ལ་ཡོད། དོན་དེའི་ཚུལ་གོང་དུ་དོན་ཅི་སྐད་བསྟན་པའི་ཚུལ་གྱིས། དོན་དམ་པའི་རྣམ་གྲངས་སུ་བྱ་བ་ལ། སྐྱེ་འགག་མེད་བྱ་བ་དང་། [53a] [53a.1]མཉམ་པ་ཉིད་ཅེས་བྱ་བ་དང་། གཉིས་སུ་མེད་པ་དང་། བསམ་པ་ལས་འདས་པ་དང་། སྟོང་པ་ཉིད་དང་། ཆོས་ཀྱི་དབྱིངས་བརྗོད་པ་དང་། ཐ་སྙད་དང་བྲལ་བ་ལ་སོགས་པར་བསྟན་པ་དེ་དག་ཀུན་བཀྲི་བའི་ཐ་སྙད་ཡིན་ཏེ། ཡང་དག་པར་ངེས་པའི་དོན་ལ་ནི། དོན་དམ་པ་ཞེས་བྱ་བ་ [53a.2]ཡང་མེད་ཅིང་། ཀུན་སྒྲིབ་ཅེས་བྱ་བ་ཡང་མེད་དོ། །དོན་དམ་ཚུལ་ཀྱིས་ལམ་ཉིད་འདི་འདྲ་ཞེས་པ་དེ་ཉིད་ཀུན་སྒྲིབ་ཡིན། །དོན་དམ་པ་ཞེས་བྱ་བ་འམ། ཀུན་སྒྲིབ་ཅེས་བྱ་བ་དང་། ཀུན་རྫོབ་ཏུ་སྒྲིབ་པའི་ཐ་སྙད་ཡིན་ཏེ། ཡང་དག་པར་ན་གཉིས་སུ་མེད་པའི་ངང་ལ་བདེན་པ་གཉིས་སུ་དབྱེར་ག་ལ་ཡོད། [53a.3]མཐུན་པའི་ཆོས་ལ་སྲེད་པ་མེད་པ་དང་། མི་མཐུན་པའི་ཆོས་ལ་ཞེ་སྡང་མེད་པས་བདེན་བརྫུན་མཉམ་པར་སྟོན་པ་ནི། ཐེ་ཚོམ་ཡོད་མེད་ནི་གང་ལ་སྤོང་ཞིང་གནས་པར་མི་བྱེད་དོ། །བདེན་པའི་དོན་མ་མཐོང་སྟེ་ཐེ་ཚོམ་ཡོད་པ་དང་། །བདེན་པ་མཐོང་སྟེ་ཐེ་ཚོམ་མེད་པའི་ཆོས་ནི་གང་ལ་ཡང་བདེན་བརྫུན་གཉིས་ [53a.4]མེད་པས། བརྫུན་པ་སྤོང་ཞིང་བདེན་པ་ལ་གནས་པར་བྱེད་པ་ཡང་མེད་དོ། །ཅིའི་ཕྱིར་ཞེ་ན། སྒོམ་པ་དང་ནི་ཆོས་དབྱིངས་མེད་ཕྱིར་སོམ་ཉི་མེད་ལ་དམ་པར་ལྟ་བའང་མེད། །རྟོགས་པར་བྱེད་པའི་སྒོམ་པ་པོ། །རྟོགས་པར་བྱ་བའི་ཆོས་ཀྱི་དབྱིངས་གཉི་ག་ཡང་དག་པའི་དོན་དུ་མི་གནས་གང་གིས་ཅི་ཞིག་ [53a.5]རྟོགས་ཏེ། སོམ་ཉི་མེད། དེ་བས་སོམ་ཉི་མེད་པ་ལ་ཡང་དག་པར་ལྟ་བ་མེད་དེ། ལུང་ལས་ཀྱང་མཐུན་པའི་ཆོས་ལ་སྲེད་པ་སྤོང་ངོ་ཞེས་བསྟན་པ་དང་མཐུན་ནོ། །མཐའ་བཞི་དང་བྲལ་ཞིང་མི་དམིགས་པར་མཉམ་པ་ནི། དེ་ལྟར་དངོས་པོའི་མཐའ་རྣམས་བརྟགས་པ་དང་རང་བཞིན་སྒྱུ་མའམ་མེད་འགྱུར་ཕྱིར། [53a.6]གོང་དུ་བསྟན་པ་ལྟར། དངོས་པོ་རྣམས་ཀྱི་མཐའ་བརྟགས་ན། །རང་བཞིན་སྒྱུ་མ་ཙམ་དུ་མ་གྲུབ་པའི་ཕྱིར། ཡོད་ལ་ལྟོས་པའི་མེད་པའང་མེད་དེ་མེད་པ་ལའང་མེད་པ་མེད། །དེ་ལྟར་ཡོད་པ་མ་གྲུབ་ན་མེད་པ་ཞིག་ཡིན་ནམ་ཞེ་ན། ཡོད་པ་ཉིད་མ་གྲུབ་ན། མེད་པ་དེ་སུའི་མེད་པ་ཡིན་དེ་བས་ན་ཡོད་པ་ཉིད་མ་གྲུབ་ན་ [53a.7]ཡོད་པ་ཉིད་ལ་ལྟོས་ནས་མེད་པར་གདགས་པར་ཡང་མི་རུང་ངོ་། །འོ་ན་རང་བཞིན་གྱིས་མ་སྐྱེས་ཤིང་ཡོང་གིས་མེད་པ་དེ་ལ་མེད་ཅེས་བྱར་རུང་ངམ་ཞེ་ན། མི་རུང་སྟེ། མཐོང་བ་དང་། ཐོས་པ་ཡང་མེད། གང་གིས་ངོ་བོར་ཡང་མི་གནས་དེ་ལ་སུ་ཡང་མེད་ཅེས་མི་སེམས་མི་བརྗོད་པའི་ཕྱིར། མེད་པ་ལའང་ [53b] [53b.1]མེད་པ་མེད་དོ། །མཐའ་རྣམས་མེད་ཕྱིར་དབུས་ལའང་གནས་པར་མི་བྱེད་དོ། །གོང་དུ་ཡོད་མེད་ལ་སོགས་པའི་མཐའ་རྣམས་མེད་པར་བསྟན་པས་ན། མཐའ་མེད་ན་སུའི་དབུས་ཏེ། དབུས་ཀྱང་མེད་དོ། །དབུས་མེད་པས་དབུས་ལ་ཡང་གནས་པར་མི་བྱེད་དོ། །སྤྱོད་པ་མཉམ་པ་ནི། གང་ [53b.2]ལའང་འཇིག་རྟེན་དབང་ཕྱུག་པདྨོ་ཀུན་ཀྱང་མི་སྤྱོད་འདྲར་གནས། ཆོས་གང་ཡང་རུང་སྟེ། འཇིག་རྟེན་གྱི་འདོད་པའི་ཡོན་ཏན་དུ་བྱ་བ་རྣམས་བདོག་པ་ལ་ནི་དབང་ཞེས་བྱ་བདོག་ཅིང་ཡོད་པ་དེ་སྤྱོད་ཀྱང་ནུས་ཏེ། སེར་སྣ་མེད་པ་ནི་ཕྱུག་ཅེས་བྱ་སྟེ། དངོས་སུ་འདོད་པའི་ཡོན་ཏན་རྣམས་ཀྱིས་ལོངས་སྤྱོད་པ་ལ་ [53b.3]བྱ་སྟེ། ཇི་ལྟར་པདྨོ་དམར་པོ་ཚོན་གྱིས་བསྒོས་པ་ལྟར་སྣང་ན་ཡང་། ཚོན་སར་པས་བྲིས་ཤིང་བསྒོས་པ་ནི་མ་ཡིན་ནོ། །དེ་དང་འདྲ་བར་འཇིག་རྟེན་གྱི་འདོད་པའི་ཡོན་ཏན་ལྔ་སྤྱོད་པ་ཡང་ཉེས་པས་གོས་པ་འདྲ་བར་སྣང་ན་ཡང་། པདྨོ་ལ་ཚོན་གྱིས་མ་གོས་པ་བཞིན་དུ་ཉེས་པས་མ་གོས་པའི་ཕྱིར་ [53b.4]དབང་ཕྱུག་པདྨོ་ཞེས་བྱའོ། །ཡང་ན་ཇི་ལྟར་པདྨོ་ལ་ཆུ་ལ་སོགས་པའི་ཉེས་པས་མི་གོས་པ་ལྟར། གོང་དུ་བསྟན་པའི་དོན་རྟོགས་ན་ཉེས་པས་མི་གོས་པས་དབང་ཕྱུག་པདྨོ་ཞེས་བྱ་སྟེ། པདྨོ་ལྟར་མི་གོས་ན་འདོད་འདོད་པ་ལྔ་ལ་སྤྱོད་ཅིང་མི་སྤོང་ངོ་ཞེས་བྱ་བའི་དོན་ཡང་ཡིན་ནོ། །འདྲར་མཉམ་གནས་ཞེས་བྱ་བ་ [53b.5]ནི་ཡོན་ཏན་དུ་བྱ་བ་དང་སྐྱོན་དུ་བྱ་བ་རྣམས། ཡང་དག་པའི་དོན་དུ་ཁྱད་པར་མེད་དེ་འདྲ་བའི་ཕྱིར། མི་འབྱེད་ཅིང་མཉམ་པས་མི་སྤོང་སྟེ་གནས་པར་བྱེད་དོ། །ཆོས་ལ་འཁྲུལ་པར་མཐོང་བ་དེ་ཉིད་འཁྲུལ་པ་ཡིན་པར་རྟོགས་ཏེ། སེམས་ཅན་ཉིད་ཀྱང་མ་གྲུབ་ན་སུ་ཞིག་འཁྲུལ་པར་འགྱུར་ཏེ། འཁྲུལ་པ་ [53b.6]མེད་པར་འཁྲུལ་བར་མཐོང་བ་དེ་ཉིད་འཁྲུལ་བ་ཡིན་པར་རབ་རྟོགས་ཏེ། དེ་བས་ན་དྲུག་གིས་བསྟན་པ་བདུད་ཀྱི་ལས་ཀྱང་མི་འདོར་ངན་དུ་མི་རྟོག་གོ །མུ་སྟེགས་ཀྱི་སྟོན་པ་དྲུག་གིས་བསྟན་པ་དང་། དགེ་བའི་སྲོག་གི་བར་དུ་གཅོད་པའི་ཉོན་མོངས་པ་དང་། བདུད་ཀྱི་ལས་སོགས་པ་ཡང་མི་དམིགས་པའི་ཕྱིར་ [53b.7]འདོར་ཞིང་ནང་དུ་མི་རྟོག་གོ། །ཤེས་རབ་ཐབས་ཀྱི་སྤྱོད་པ་ཡང་མི་གནས་ཕྱིར་ན་བདུད་ཀྱི་འདྲ་བར་སྤྱོད། ཤེས་རབ་དང་ཐབས་ཀྱི་སྤྱོད་པའང་ཅི་ལྟ་བུའི་མཚན་ཉིད་དུའང་མ་གྲུབ་པར་གནས་པར་བྱ་བའི་གཞི་མེད་དེ། བདུད་ཀྱི་སྤྱོད་པ་དང་། གཉི་ག་ཡང་མ་སྐྱེས་པར་མཉམ་པའི་ཕྱིར་འདྲ་བར་སྤྱོད་དོ། ། [54a] [54a.1]རང་གི་ཤེས་པ་དམ་པར་བྱས་ཤིང་ཀུན་ལས་རྒྱལ་ཏེ་དེ་བསྙེམས་ནས་ཆགས་དང་ཞེ་སྡང་སྐྱེས་ནས་རྩོད་འབྱུང་གཏི་མུག་ཡིན་ཏེ་དོན་མི་མཐོང་ལྟ་བ་ཐམས་ཅད་དང་བྲལ་བ་ནི་ཡང་དག་པའི་དོན་ལ་ལྟ་བའོ་ཞེས་འབྱུང་བ་ལས། ལྟ་བའི་འཛིན་པ་ནི་སྐྱོན་ཏེ། ཡང་དག་པར་ན་བདེན་བརྫུན་གཉི་ག་ [54a.2]ཡང་མ་གྲུབ་ན། རང་གི་ཤེས་རབ་ཀྱིས་བདེན་པ་རྟོགས་སོ་སྙམ་དུ་ང་རྒྱལ་གྱིས་ལྟ་བ་བསྙེམས་ནས་རང་གི་ཕྱོགས་ལ་ནི་ཚིགས་གཞན་གྱི་ཕྱོགས་ལ་ནི་ཞེ་སྡང་སྐྱེས་ནས་བདེན་པ་ཞེས་བྱ་བ་མེད་པ་ལས་རང་གི་ལྟ་བ་ནི་བདེན་པ་ཞེས་ཟེར། བརྫུན་པ་མེད་པ་ལ་གཞན་གྱི་ལྟ་བ་ནི་བརྫུན་ཏེ་ནོར་ཞེས་རྩོད་པ་མེད་པར་བྱེད་ [54a.3]པ་ནི་གཏི་མུག་ཡིན་ཏེ། བདེན་བརྫུན་གཉི་ག་མི་དམིགས་པའི་དོན་མ་མཐོང་ངོ་། །དོན་བསྡུས་ནས་བྱང་ཆུབ་སེམས་ཀྱི་མཚན་ཉིད་དུ་བསྟན་པ་ནི། ཇི་སྲིད་ཡིད་ཀྱི་འཇིག་རྟེན་གཡོ་བ་དེ་སྲིད་བདུད་ཀྱི་ཡུལ་ཏེ་ཕྲ་བའི་ལམ། །གཡོ་དང་མི་གཡོ་ཐ་སྙད་མི་གནས་གནས་ལའང་གནས་པ་མེད། །སྣང་ [54a.4]མེད་དབུ་མའི་ལམ་དེ་བྱང་ཆུབ་སེམས་ཞེས་བདེ་གཤེགས་གསུངས། །རྟོག་པ་དང་མཚན་མ་གཡོ་ཞེའམ་མི་གཡོ་ཞེས་ཐ་སྙད་གང་ལྟར་ཡང་གདགས་སུ་མེད་པའི་གནས་ལ་ཡང་གནས་པར་མི་བྱེད་དོ། དེ་ཉམས་སུ་ཚོར་བ་དང་། ཚོར་བ་འགག་པའི་སྣང་བ་དང་། འདི་ལྟ་བུ་ཡིན་ཞེས་འདུ་ཤེས་ཀྱིས་ [54a.5]གཟུང་བའི་སྣང་བ་མེད་པ་ནི་དབུ་མའི་ལམ་ཡིན་ཏེ། དོན་དེ་ལ་དེ་ལྟ་བུའི་ཚུལ་དུ་སེམས་པས། བླ་ན་མེད་པའི་བྱང་ཆུབ་ཏུ་འགྲུབ་པས་བྱང་ཆུབ་ཀྱི་སེམས་ཞེས་བདེ་བར་གཤེགས་པས་གསུངས་སོ། །བཅུ་གཉིས་སུ་བསྟན་པ་ལས། དོན་བདུན་པ་ངེས་པའི་དོན་ལ་བསྒོམ་པ་ཡང་རྣམ་པ་གཉིས་ [54a.6]ཏེ། བསྒོམ་པའི་མི་མཐུན་པའི་ཕྱོགས་བསྟན་པ་དང་། བསྒོམ་པའི་དོན་མ་ནོར་བར་བསྟན་པའོ། །དེ་ལ་བསྒོམ་པའི་མི་མཐུན་པ་ནི། གཟུགས་དང་མཚན་མ་སྨོན་པར་འཛིན་པ་རབ་ཏུ་སྤངས་ནས་སུ། རྣམ་ཐར་གསུམ་པོ་བསྒོམས་པའང་བདུད་ཀྱི་ལས་ཏེ་གཟུགས་ནི་སྟོང་པའོ། །རྣམ་པར་མི་རྟོག་ [54a.7]པ་བསྒོམ་པ་ནི་བླང་དོར་མེད་པ་ཡིན་ན། གཟུགས་ལ་སོགས་པ་མི་མཐུན་པའི་ཕྱོགས་གསུམ་སྤོང་ཞིང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་རྣམ་པར་ཐར་པའི་སྒོ་གསུམ་ལ་གནས་ཤིང་བསྒོམས་ན། བླང་དོར་གྱི་མཐར་ལྟུང་བས་བདུད་ཀྱི་ལས་ཡིན་ཏེ། གཟུགས་ཉིད་ [54b] [54b.1]སྟོང་པ་ཉིད་ཡིན་ལ། མཚན་མ་ཉིད་མཚན་མ་མེད་པ། སྨོན་པ་ཉིད་སྨོན་པ་ཡིན་པས་སྤོང་དུ་མེད་པའི་ཕྱིར་རོ། །འཁོར་བའི་ལམ་གསུམ་སྤོང་ཞིང་མྱ་ངན་འདས་ལམ་བསྒོམ་པའང་བདུད་ཀྱི་ལས་ཉིད་དོ། །དེ་ཉིད་རང་བཞིན་མ་ཞི་རང་བཞིན་བཙལ་སྤངས་གར་མི་གནས། །འཁོར་བ་འགྲུབ་པར་བྱེད་པ་ནི་ [54b.2]འཁོར་བའི་ལམ་ཞེས་བྱ་སྟེ། འདོད་ཆགས་ཞེ་སྡང་གཏི་མུག་གསུམ་སྤོང་ཞིང་མྱ་ངན་ལས་འདས་པའི་ལམ་ཚོལ་ཞིང་སྒོམ་པར་བྱེད་པ་ཡང་བདུད་ཀྱི་ལས་ཉིད་དེ། དེ་ལྟར་སྤྱོད་པ་དེ་ཉིད་ཆོས་ཐམས་ཅད་རང་བཞིན་ཞི་བའི་མཚན་ཉིད་མ་རྟོགས་པ་སྟེ། མྱ་ངན་ལས་འདས་པའི་ལམ་བཙལ་བ་དང་། འཁོར་ [54b.3]བའི་ལམ་སྤོང་བར་བྱེད་པ་གཉི་ག་ཡང་མ་གྲུབ་ཅིང་མི་གནས་པའི་ཕྱིར་རོ། །འཕགས་པ་ཀུན་གྱི་ཡུལ་དང་གནས་ཀྱང་འདས་སོགས་ལམ་ཉིད་གཞན་ན་མེད། །འཕགས་པ་ཀུན་གྱིས་གཟིགས་པའི་ཡུལ་དང་། གྲུབ་པའི་གནས་ཀྱང་མི་མཐུན་པའི་སྐྱོན་མ་གོས་ནས་སྨོས་པ་རྣམས་ཀྱང་སྤངས་ [54b.4]ནས། མྱ་ངན་ལས་འདས་པ་ལ་སོགས་ཏེ། ཡོན་ཏན་གྱི་ཁྱད་པར་འཐོབ་པའི་ལམ་འདིར་ཅི་སྐད་དུ་བསྟན་པ་ལས་གུད་ན་སངས་རྒྱས་སུ་འགྲུབ་པའི་ལམ་གཞན་མེད་དོ། །བསྒོམ་པའི་དོན་མ་ནོར་བར་བསྟན་པ་ལ་ཡང་རྣམ་པ་བཞི་སྟེ། བསྒོམ་པའི་དོན་མདོར་བསྟན་པ་དང་། དེ་ལྟར་ཅིའི་ཕྱིར་ [54b.5]བསྒོམ་པའི་གཏན་ཚིགས་ཀྱིས་བཤད་པ་དང་། གཏན་ཚིགས་ཀྱིས་གྲུབ་པས་དེ་ལྟར་བསྒོམ་མོ་ཞེས་བྱ་བར་བསྟན་པ་དང་། ཚུལ་བཞིན་དུ་བསྒོམ་པའི་རྟགས་བསྟན་པའོ། །དེ་ལ་བསྒོམ་པའི་དོན་མདོར་བསྟན་པ་ནི། །ལྡང་དང་མི་ལྡང་ཆེད་དུ་མི་སྤོང་སེམས་རྟེན་མི་འཆའ་མངོན་དུ་མིན། ། [54b.6]མཚན་མ་དང་རྟོག་པ་དང་ལྡན་པ་ཆེད་དུ་མི་སྤོང་། །མི་ལྡང་བ་ལ་སེམས་ཀྱི་རྟེན་མི་འཆའ། །འབྲས་བུའི་ཟེར་རམ་བདེན་པའི་དོན་མངོན་དུ་མི་བྱེད་དོ། །གོང་མ་ལྟར་ཅིའི་ཕྱིར་བསྒོམ་ཞེ་ན། འཇམ་དཔལ་མ་ཡིན་རྡུལ་ཙམ་གཡོ་བ་དེ་ཉིད་དེ་ཡིན་དེར་མི་གནས། །ཅིའི་ཕྱིར་མི་སྤོང་མི་གནས་ [54b.7]ཤེ་ན། འཇམ་དཔལ་ནི་ཆོས་ཉིད་ལ་བྱ་སྟེ། ཆོས་ཉིད་ནི་ཟུག་རྔུ་མེད་པས་འཇམ་ལ། དེ་རྟོགས་ན་དཔལ་དུ་འགྱུར་བས་འཇམ་དཔལ་ཏེ། ཆོས་ཉིད་དམ་འཇམ་དཔལ་མ་ཡིན་པ་མཚན་མའི་རྟོག་པའི་སྐྱོན་རྡུལ་ཙམ་ཞིག་གཡོ་བའམ། ཡོད་པར་མཐོང་ན་ཡང་དེ་ཉིད་ཆོས་ཉིད་ [55a] [55a.1]ཀྱང་ཡིན་ལ། འཕགས་པ་འཇམ་དཔལ་གྱི་རང་བཞིན་ཉིད་ཀྱང་དེ་ལས་མི་གཞན་པས་སྤོང་དུ་མེད་དོ། །འོ་ན་ཆོས་ཉིད་དེ་ཅི་ལྟ་བུ་ཞིག་ཡིན་ཞེ་ན། ཅི་ལྟ་བུ་ཡང་མ་ཡིན་པས་ཆོས་ཉིད་དམ་འཇམ་དཔལ་གྱི་རང་བཞིན་ལ་ཡང་གནས་པར་བྱ་བའི་གཞི་མེད་པས་དེར་མི་ [55a.2]གནས་ཞེས་སྨོས་པ་ཡིན་ནོ། །བསྒོམ་པའི་ས་མི་རྙེད་ཕྱིར་བསྒོམ་པས་རྙེད་པར་མི་འགྱུར་ཏེ། སེམས་ཀྱི་སྤྱོད་ཡུལ་ཤེས་པ་དེ་ལ་དེ་དག་ཆོས་རྣམས་ཀྱི་ནི་ཆོས་ཉིད་ཡིན་ཏེ། ཅིའི་ཕྱིར་མངོན་དུ་མི་བྱ་ཞེ་ན། བསྒོམ་པར་བྱ་བའི་ཆོས་ཉིད་དང་། སྒོམ་པར་བྱེད་པའི་སེམས་གཉི་ག་མ་གྲུབ་པས། [55a.3]བསྒོམ་པར་བྱ་བའི་ས་འམ་གཞི་མི་རྙེད་དེ་མེད་པའི་ཕྱིར་སུ་ཞིག་གིས་གང་ཞིག་ལ་བསྒོམས་པས་འབྲས་བུ་ཅི་ཞིག་འཐོབ་པར་འགྱུར་ཏེ། དེ་བས་ན་མངོན་དུ་བྱར་མེད་དོ། །སེམས་ཀྱི་སྤྱོད་ཡུལ་དེ་ལ་དེ་དག་ཆོས་རྣམས་ཀྱི་ཆོས་ཉིད་ཡིན། ཡུལ་གྱི་རྣམ་པ་གང་སྣང་། སེམས་ཀྱི་རྟོག་པ་ [55a.4]ཅི་སྐྱེ་ཡང་ཆོས་ཉིད་ལས་མི་གཞན་པས། སྐྱོན་མེད་པར་སྟོན་པའི་ཕྱིར་སེམས་ཀྱི་སྤྱོད་ཡུལ་དེ་ལ་དམིགས་པའི་ཡུལ་གང་སྣང་བ་དེ་དག་ཆོས་རྣམས་ཀྱི་ཆོས་ཉིད་ཡིན་པའི་ཕྱིར། དམིགས་པའི་ཡུལ་གང་ཡང་སྣང་ཡང་སྐྱོན་མེད་དོ། །སྐྱོན་མེད་ན་སེམས་ཅན་རྣམས་ཅིའི་ཕྱིར་འཁོར་ཞེ་ན། མཚན་མ་རྣམ་པ་སྣ་ཚོགས་ [55a.5]ལ་འཛིན་པའི་ཕྱིར་ཏེ། མཚན་མའི་རྣམ་པ་དང་བྲལ་བ་ནི་མི་འཁོར་བར་བསྟན་པའི་ཕྱིར། རྣམ་བྲལ་གང་ལའང་མཆོག་དང་ཐ་མའང་མེད་པར་ལམ་མཆོག་འདི་བསྒོམ་མོ། །རྣམ་པ་ཉིད་ཇི་ལྟ་བུ་ཞེ་ན། ཡུལ་འགགས་ན་ཡང་དེའི་རྣམ་པ་ཡིད་ལ་བཀྲ་བ་ལ་བྱ་སྟེ། ཡུལ་མངོན་སུམ་ན་ཡང་དེ་ལྟ་བུའི་རྣམ་པ་འབྱུང་བ་ལ་ [55a.6]འཛིན་ཅིང་ཤེས་པ་སྐྱེས་པས་རྣམ་པའི་ཤེས་པ་ཡིན་པས་རྣམ་པར་ཤེས་པ་ལ་བྱ་སྟེ། ཡང་དག་པའི་དོན་བསྒོམ་པ་ནི་ཇི་ལྟ་བུའི་རྣམ་པ་ལ་ཡང་མི་འཛིན་པའི་ཕྱིར་རྣམ་བྲལ་ཞེས་བྱའོ། །དེ་ལྟར་རྣམ་པ་ཅི་ལྟ་བུར་ཡང་མི་འཛིན་པ་ལ་ནི། མཆོག་དང་ཐ་མར་ཡང་མི་དམིགས་པས་དེ་ལྟར་བསྒོམས་པ་ནི་ལམ་གྱི་མཆོག་ [55a.7]ཡིན་ནོ། །སེམས་ཀྱི་རྟོག་པ་ཅི་སྐྱེ་ཡང་སྐྱོན་མེད་པ་ནི། འདུ་བྱེད་མ་སྐྱེས་ཆོས་ཀུན་འབྱུང་མེད་ཤིན་ཏུ་ཆོས་རྣམས་མྱ་ངན་འདས། །དངོས་མེད་དེ་ཚེ་ཀུན་ཀྱང་ཆོས་ཀྱི་དབྱིངས་ཞེས་དགྲ་བཅོམ་རབ་འབྱོར་ཡིན། །ཞེས་བྱ་བ་ཡིན་ཏེ། འདུ་བྱེད་ཀྱི་ཆོས་ཐམས་ཅད་ནི་རང་གི་ངོ་བོས་ཀྱང་མ་སྐྱེས། རྒྱུ་ [55b] [55b.1]རྐྱེན་གཞན་གྱིས་ཀྱང་མི་འབྱུང་བས་མྱ་ངན་ལས་འདས་པའི་མཚན་ཉིད་ཡིན་ནོ། །དེ་ལྟར་རིག་ཅིང་རྟོགས་པའི་ཚེ་ཤེས་པའམ་རྟོག་པ་ཇི་སྙེད་སྐྱེ་བ་ཀུན་ཀྱང་སྐྱོན་མེད་དེ། །ཆོས་ཀྱི་དབྱིངས་རྟོགས་ཤིང་ཤེས་པ་ལ། དགྲ་བཅོམ་རབ་འབྱོར་གྱི་ཡིན་ཞེས་བྱའོ། །ཡང་ནི་མི་ཤེས་པའི་རབ་རིབ་ཀྱི་དགྲ་བཅོམ་པ་ [55b.2]ཡིན་པས། དགྲ་བཅོམ་རབ་འབྱོར་ཡིན་ཞེས་བྱའོ། །ནམ་མཁའ་མི་དམིགས་མིང་ཙམ་དགེ་དང་མི་དགེར་དབྱེར་མེད་སྐྱེ་བ་མེད། །གོང་དུ་བསྟན་པ་རྣམས་ཀྱི་དོན་དཔེར་ན་ནམ་མཁའ་དང་འདྲ་སྟེ། ནམ་མཁའ་ཞེས་མིང་དུ་བརྗོད་པ་ཙམ་དུ་ཟད་ཀྱི་མིང་གིས་མཚོན་པའི་དོན་ནི་ཅི་ལྟ་བུའི་མཚན་ཉིད་དུ་ཡང་མི་ [55b.3]དམིགས་པས། དགེ་དང་མི་དགེ་ལ་སོགས་ཏེ། གཉིས་སུ་མི་འབྱེད་པ་ནི་སྐྱེ་བ་མེད་པའི་ཕྱིར་རོ། །གོང་དུ་བསྟན་པ་ལྟར་གཏན་ཚིགས་ཀྱིས་གྲུབ་པས་དེ་ལྟར་བསྒོམ་མོ་ཞེས་རྒྱས་པར་བསྟན་པ་ནི། རྩོལ་བར་ཡིད་ལ་མི་བྱེད་གང་ལའང་སེམས་མེད་ཤེས་དང་མི་ཤེས་བྲལ། །སྤོང་བའམ་ [55b.4]བསྒྲུབ་པར་བྱ་བའི་རྩོལ་བ་ཡང་ཡིད་ལ་མི་བྱེད། དམིགས་པའི་ཡུལ་གང་ལ་ཡང་སེམས་པ་མེད། སེམས་ཉིད་ཀྱང་མ་གྲུབ་པས་ཤེས་པ་དང་མི་ཤེས་པར་མི་རྟོག་པས་ཤེས་དང་མི་ཤེས་བྲལ་ཞེས་བྱའོ། །དྲན་དང་འབྱེད་མི་སྤོང་ལེན་གང་ལའང་དགའ་དང་མཚུངས་མེད་མི་དམིགས་ཤིང་། ཡང་ [55b.5]དག་པའི་དོན་དུ་མཐུན་པ་དང་། གཉེན་པོ་དབྱེར་མེད་པས། གཉེན་པོ་དྲན་པར་བྱ་བ་མེད་ཅིང་། སྤོང་ལ་དགའ་བའམ། ལེན་པ་ལ་དགའ་བ་ཡང་གང་ཟག་དེ་ལ་མེད་དོ། །མི་མཐུན་པ་དང་གཉེན་པོ་གཉི་ག་མཉམ་ཞིང་མཚུངས་པར་བཞག་པའང་མེད་དེ། ཅིར་ཡང་མི་དམིགས་ཤིང་ [55b.6]མཉམ་ན་གཉིས་སུ་བརྟག་མེད་བརྗོད་བྲལ་བྱ་དང་མི་བྱ་མེད་དེ་སོགས་འབྲི་མེད། འདོད་པ་མེད་མི་འདོད་པ་མེད་པས་མཉམ་པར་གནས་ལ། ཐ་དད་དུ་མི་འབྱེད་པས་གཉིས་སུ་བརྟགས་པ་ཡང་མེད། འདི་ལྟ་བུ་ཡིན་ཞེས་འཛིན་པ་མེད་པས་ཅིར་ཡང་མི་བརྗོད་པའི་ཕྱིར་བརྗོད་པ་དང་བྲལ། དོན་ [55b.7]དུ་གཉེར་བ་མེད་པས་བྱ་བ་མེད། སྒོ་གསུམ་གྱི་ལས་ལས་སྐྱོན་དུ་མི་ལྟ་བས་མི་བྱ་བ་ཡང་མེད་དེ། ཚོགས་རྣམ་གཉིས་རྫོགས་པར་བྱ་བ་ཡང་མེད་དེ། ཆོས་ཉིད་ལ་བྲི་བའམ་འཕེལ་བ་མེད་ཅེས་འབྱུང་བ་ལྟ་བུའོ། །ཚུལ་བཞིན་དུ་བསྒོམས་པའི་རྟགས་ཇི་ལྟ་བུ་དག་འབྱུང་ཞེ་ན། ཆེད་དུ་རྩོལ་ [56a] [56a.1]བྲལ་ཡིད་ལ་མི་བྱེད་ཅེས་ཀྱང་མི་འཁྲུགས་མཉམ་ཤེས་དང་། དེ་ལྟར་གོང་དུ་བསྟན་པ་བཞིན་དུ་མ་ནོར་བར་བསྒོམས་ཏེ། མཉམ་པར་ཤེས་པ་དང་། རྟགས་འདི་ལྟ་བུ་དག་འབྱུང་བ་སྟེ། གང་ལ་ཆགས་དང་ཡུལ་གྱིས་མྱོས། །སྐྲག་མེད་མི་འབྲལ་མི་གནས་ཤིང་། །དངོས་པོ་ [56a.2]གང་ལ་ལང་ཆགས་ཤིང་འདོད། །ཡུལ་གྱི་དངོས་པོ་རྣམས་ཇི་ལྟ་བ་བཞིན་དུ་རིགས་པས་མྱོས་ཤིང་གཏི་མུག་པ་ཡང་མེད། རང་གི་ངོ་བོ་ཉིད་ཀྱང་མ་ཡིན་པས་གང་ལ་ཡང་མི་འདོད་པའང་སྐྲག་པ་མེད་དེ། དེའི་ཕྱིར་གང་དང་ཡང་བྲལ་བར་མི་བྱེད་པ་དང་། གང་ལ་ཡང་དགའ་ཞིང་ཆགས་པ་མེད་པས་ [56a.3]ཆོས་གང་ལ་ཡང་གནས་པར་མི་བྱེད་དོ། །མི་འཕྲོགས་མཉམ་ཤེས་བཞི་པོ་ཕྱོགས་དང་ཕ་རོལ་ཕྱིན་རྣམས་དེར་ཤེས་ཏེ། མི་མཐུན་པའི་ཕྱོགས་ཀྱིས་མི་འཕྲོགས་པའི་ཆོས་ཉིད་ཀྱི་དོན་མཉམ་པའི་ཤེས་པའི་ཡེ་ཤེས་བཞི་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། ཕ་རོལ་ཏུ་ [56a.4]ཕྱིན་པ་བཅུ་ལ་སོགས་ཏེ་རྣམ་པར་དཀའ་བའི་ཕྱོགས་དང་། འབྲས་བུ་ཆེ་བའི་ཡོན་ཏན་ཅི་སྙེད་ཡོད་པ་མ་ལུས་པ་ཐམས་ཅད་ནི། བསྒོམ་པའི་དོན་ཇི་སྐད་དུ་བསྟན་པ་དེར་འདུས་ཤིང་འུབ་པར་རང་གི་རིག་པས་ཤེས་ཏེ། སེམས་ཀྱི་དབྱིངས་སུ་བསྒོམས་པས་ལམ་གྱི་གཞན་དུ་བསྒོམས་པས་འོད་ [56a.5]གསལ་མི་འགྱུར་རོ། །ཆོས་ཐམས་ཅད་ནི་སེམས་ཀྱི་ངང་དུ་འདུས་པས། སེམས་ཉིད་ལ་གོང་དུ་ཇི་སྐད་བསྟན་པའི་དོན་ལྟར་བསྒོམས་པས་མ་ནོར་བའི་ལམ་དུ་འགྱུར་གྱི་གཞན་ཞིག་ཏུ་བསྒོམས་ན་གང་ལྟར་བསྒོམས་ཀྱང་ཡང་དག་པའི་དོན་ལ་གསལ་ཞིང་རིག་པར་མི་འགྱུར་རོ། །བཅུ་གཉིས་ [56a.6]ལས་བརྒྱད་པ། བརྒྱུད་པའི་ཐབས་ཀྱིས་ངེས་པའི་དོན་རྟོགས་པར་བྱ་བའི་ཐབས་ཇི་ལྟ་བུ་ཞེ་ན། བརྡ་ཅན་ཡང་དག་ལེན་པའང་བྱང་ཆུབ་ཡིན་ཞེས་སྟོན་པས་རབ་གསུངས་ཕྱིར། །ཞེས་བྱ་བ་ཡིན་ཏེ། དཔེར་ན་ལག་པ་གཡས་པའི་ལག་བརྡས་ཚུར་འོང་བའི་བརྡ་མཚོན་པའི་དོན་སྟོན་ཅིང་ལེན་པ་ [56a.7]ལྟར། སེམས་རྩེ་གཅིག་པའི་བྱ་བས་བྱ་བ་མེད་པའི་དོན་ཇི་ལྟ་བ་བཞིན་དུ་རྟོགས་པ་དེ་ཡང་བྱང་ཆུབ་ཏུ་སྒྲུབ་པར་བྱེད་པ་ཡིན་པས། བྱང་ཆུབ་ཡིན་ཞེས་སྟོན་པ་སངས་རྒྱས་གསུངས་པའི་ཕྱིར། དེ་ལ་འདི་ནི་བྱང་ཆུབ་སེམས་ཉིད་བསྐྱེད་ཅིང་བསྒོམ་པའི་གནས་ཡིན་ཏེ། འོག་ནས་འབྱུང་བའི་ཏིང་ [56b] [56b.1]ངེ་འཛིན་དང་ཕྱག་རྒྱ་ནི་དོན་དམ་པའི་བྱང་ཆུབ་ཀྱི་སེམས་བསྐྱེད་ཅིང་བསྒོམ་པའི་རྒྱུའམ་གནས་ཡིན་ཏེ། ཏིང་ངེ་འཛིན་གསུམ་པོ་བརྟན་པོར་བྱས་ཤིང་རྟགས་ཀྱི་ཕྱག་རྒྱ་གསུམ་བཅིངས་ནས། བྱ་བ་མེད་པའི་དོན་ཉིད་ལ་མ་བབ་ཅིང་། རྩེ་གཅིག་ཏུ་རྣམ་པར་མི་རྟོག་པས་བསྒོམ་པ་དང་། ཀུན་ཏུ་ [56b.2]སྣང་བ་ནམ་མཁའ་ལྟར་བསྒོམ་པ་དང་། རྒྱུའི་ཏིང་ངེ་འཛིན་ཨའམ་ཨོཾ་ལ་སོགས་པ་བསྒོམ་པ་ལ་ཏིང་ངེ་འཛིན་གསུམ་ཞེས་བྱ། བརྟན་པ་ནི་ཏིང་འཛིན་གསུམ་གྱི་མཚན་ཉིད་གང་ཡིན་པ་ལྟར། མི་མཐུན་པའི་རྐྱེན་གྱི་དབང་དུ་མི་འགྲོ་བ་ལ་བྱ། རྟགས་ཞེས་བྱ་བ་ནི་དཔེར་ན་རྒྱལ་ [56b.3]པོའི་རྟགས་ནི་ཕྱག་རྒྱ་ཡིན་པས། རྒྱལ་པོའི་ལས་ཐམས་ཅད་ནི་ཕྱག་རྒྱས་བྱེད་པ་དང་འདྲ་བར་སངས་རྒྱས་ཀྱི་རྟགས་ཀྱི་ཕྱག་རྒྱས་ནི། སངས་རྒྱས་ཀྱི་ཕྲིན་ལས་ཐམས་ཅད་བྱེད་དེ། སྐུའི་རྟགས་ཀྱི་ཕྱག་རྒྱ་ཆེན་པོའོ། །ཐུགས་ཀྱི་རྟགས་ཀྱི་ཕྱག་རྒྱ་ནི་དམ་ཚིག་གི་ཕྱག་རྒྱའོ། ། [56b.4]ཕྲིན་ལས་ཀྱི་རྟགས་ཀྱི་ཕྱག་རྒྱ་ནི་ལས་ཀྱི་ཕྱག་རྒྱ་སྟེ། རྟགས་ཀྱི་ཕྱག་རྒྱ་དེ་གསུམ་བཅིངས་ཤིང་བསྒོམས་ནས། སངས་རྒྱས་ཀྱི་གསུང་གི་རྟགས་ཀྱི་ཕྱག་རྒྱ་ནི། ཆོས་ཀྱི་ཕྱག་རྒྱ་ཆེན་པོར་སེམས་ཉིད་བསྐྱེད་དེ་དེའི་སྙིང་པོ་བརྗོད་ཅིང་བསྒོམ་ཞེས་བྱ་བས་སྟོན་ཏེ། ཏིང་ངེ་འཛིན་དང་ཕྱག་རྒྱ་ [56b.5]རྣམས་ཆོས་ཉིད་ཡིན་ཏེ། ཐ་མི་དད་པར་སེམས་བསྐྱེད་ཅིང་ལྷ་གང་བསྒོམས་པའི་སྙིང་པོ་བརྗོད་ཅིང་བསྒོམ་པ་ཡང་དོན་དམ་པའི་བྱང་ཆུབ་ཀྱི་སེམས་སྐྱེ་བར་འགྱུར་ཏེ། ཇི་ལྟར་སྐྱེ་བར་འགྱུར་ཞེ་ན། གོང་མ་ལྟར་ཡུན་རིང་དུ་བསྒོམས་ཏེ། ཇི་ལྟར་བསྒོམས་པ་བཞིན་དུ་མངོན་དུ་སྣང་བའི་ཚེ། [56b.6]ཆོས་ཐམས་ཅད་ཀྱང་རང་གི་སེམས་ཁོ་ན་སྣང་བ་ལམ་གཏོགས་པ་གཞན་མེད་པ་ལྟ་ཞིག་ཅེས་རང་གི་རིག་པ་འབྱུང་ཞིང་། དོན་རྟོགས་པར་འགྱུར་བ་དང་། གོང་མ་ལྟར་བསྒོམ་པ་དང་། སྒྲིབ་པ་འབྱང་ཚོགས་སྐྱེ་བའི་སྒོ་ནས་ཀྱང་རྟོགས་པར་འབྱུང་ངོ་། །དོན་དགུ་པ་བྱང་ཆུབ་སེམས་ [56b.7]ཀྱིས་མ་ཟིན་ན། རྣམ་པར་གྲོལ་བ་མི་ཐོབ་ཅིང་དགེ་བ་ཆུང་ཟ་པར་བསྟན་པ་ནི། རྡོ་རྗེ་སེམས་དཔའ་བསྒོམས་པས་ལམ་ཀུན་མ་ནོར་བསྒོམས་པ་ཡིན། །གོང་དུ་བསྟན་པ་དང་འདྲ་སྟེ། །སེམས་ཀྱི་རང་བཞིན་ནི་ཆོས་ཉིད་ཡིན་པས་རྡོ་རྗེའོ། །དེ་ལ་མ་ནོར་བར་སེམས་དཔའ་རྡོ་རྗེ་སེམས་ [57a] [57a.1]དཔའ་སྟེ། ལོག་པར་མཐོང་བའི་སེམས་ཉིད་ནི་ཀུན་ནས་ཉོན་མོངས་པ་རྣམས་སུ་སྣང་ལ། ཇི་ལྟ་བ་བཞིན་དུ་མཐོང་བའི་སེམས་ཉིད་ནི་རྣམ་པར་གྲོལ་བ་རྣམས་སུ་ཡང་སྣང་བའི་ཕྱིར། ལམ་ཀུན་མ་ནོར་བསྒོམས་པ་ཡིན་ཞེས་བསྟན་པ་ཡིན་ནོ། །ཀུན་ཏུ་བཟང་པོའི་སྤྱོད་ [57a.2]པས་མ་ཟིན་དགེ་བའི་ཆོས་ནི་གང་ཡང་རུང་། །གོང་དུ་ཇི་སྐད་བསྟན་པ་བཞིན་དུ་རིག་ཅིང་རྟོགས་ན། སྤྱོད་དོ་ཅོག་ཀུན་ཏུ་བཟང་བའི་ཕྱིར་ཀུན་ཏུ་བཟང་བ་དང་། ཅི་ལྟར་མ་ལས་བུ་འབྱུང་བ་བཞིན་དུ་ཡོན་ཏན་མ་ལུས་པ་ཐམས་ཅད་འབྱུང་བའི་གནས་ཡིན་པའི་ཕྱིར་མོ་སྟེ། གོང་མའི་ [57a.3]དོན་ཉིད་ལྷ་མོར་བྱིན་གྱིས་བརླབས་ཏེ། ཀུན་ཏུ་བཟང་མོ་ཞེས་བྱ་བར་ཡང་འདོགས་པ་ཡང་ཡོད་དེ། དངོས་སུ་ཤེས་རབ་ཀྱི་བདག་ཉིད་ལ་བྱས་ཏེ། ཤེས་རབ་ཀྱིས་མ་ཟིན་ན། ཀུན་ཏུ་བཟང་པོའི་སྤྱོད་པའང་བདུད་ཀྱི་ལས་དེ་ཟད་ཅིང་མཐར་ཐུག་འགྱུར། ཐེག་པ་ཆེན་པོའི་ཐབས་ཀྱི་སྤྱོད་པ་ [57a.4]ནི། །བདག་དང་གཞན་ཀུན་ལ་བཟང་བའི་ཕྱིར། ཀུན་ཏུ་བཟང་པོའི་ཞེས་བགྱི། ཡང་ན་གོང་མ་ལྟ་བུ་ཤེས་རབ་ཀྱིས་ཟིན་པའི་སྒོ་གསུམ་གྱི་སྤྱོད་པ་ཀུན་ཀྱང་བཟང་བས། ཀུན་ཏུ་བཟང་པོ་ཞེས་བྱ་བ་ཡིན་ན། གོང་མ་ལྟ་བུ་ཤེས་རབ་ཀྱིས་མ་ཟིན་ན། སྤྱོད་པ་ཐམས་ཅད་ཀྱང་ཀུན་ཏུ་བཟང་ [57a.5]བར་མི་འགྱུར་བ་དང་། བདག་དང་གཞན་གྱི་དོན་ཐབས་གྱི་སྤྱོད་པ་ཀུན་ཀྱང་། འཇིག་རྟེན་གྱི་འདོད་པའི་འབྲས་བུ་ཙམ་དུ་གྲུབ་པས་ཟད་ཅིང་མཐར་མེད་པར་འགྱུར་རོ། །དེ་དང་ལྡན་པའི་ལམ་ནི་བདུད་ཀྱི་ལས་ཀྱང་བྱང་ཆུབ་སྤྱོད་པར་གསུངས། ཕྱི་ནང་གི་དངོས་པོ་དང་སྒོ་གསུམ་གྱི་སྤྱོད་པ་ལ། [57a.6]གཅིག་ཏུ་ཆད་ཅིང་ངེས་པ་མེད་དེ། ཤེས་པ་དང་མི་ཤེས་པ་ཁོ་ན་ལས། ཀུན་ནས་ཉོན་མོངས་པ་དང་། རྣམ་པར་བྱང་བའི་རྒྱུར་འགྱུར་བའི་ཕྱིར་རོ། །དོན་བཅུ་པ་མོས་པ་ཙམ་སྐྱེས་པས་ཀྱང་། ཡོན་ཏན་མང་པོ་ཐོབ་པར་བསྟན་པ་ནི། དོན་འདིར་མོས་པ་དེ་ཡང་བྱང་ཆུབ་ཆེན་པོ་ཞེས་རྒྱལ་ [57a.7]བས་རབ་ཏུ་བསྔགས། གོང་དུ་ཇི་སྐད་བསྟན་པའི་དོན་འདིར་མོས་ཤིང་ཡིད་ཆེས་པ་དེ་ཡང་བྱང་ཆུབ་ཆེན་པོ་ཡིན་པ་ལ། ཡིན་པ་ཁོ་ནར་ཤེས་ཤིང་མོས་པ་དེ་ཉིད་བྱང་ཆུབ་ཆེན་པོ་ཡིན་ཞེས་བཅོམ་ལྡན་འདས་ཀྱིས་བསྔགས་པ་མཛད་དོ། །གནས་འདིར་བསྐྱེད་པ་ཙམ་གྱིས་འཇིག་རྟེན་ [57b] [57b.1]གསུམ་པོ་བླ་མར་བཅས་པ་ཡི། །མཆོད་གནས་ཉན་ཐོས་བདུད་ཀྱི་སྡེ་རྣམས་ཟིལ་གྱིས་གནོན་ཞེས་སངས་རྒྱས་གསུངས། །ཡོན་ཏན་ཐམས་ཅད་སྐྱེ་བའི་གནས་བྱང་ཆུབ་ཀྱི་སེམས་འདི་བསྐྱེད་པ་ཙམ་གྱིས་འཇིག་རྟེན་གསུམ་གྱི་སེམས་ཅན་ཇི་སྙེད་པའི་གཙོ་བོའམ། །བླ་མ་བརྒྱ་བྱིན་ཚངས་པར་བཅས་ [57b.2]པའི་མཆོད་གནས་ནི་ཉན་ཐོས་རྣམས་ཡིན་པས། དེ་ལྟར་མཆོད་གནས་སུ་གྱུར་པའི་ཉན་ཐོས་རྣམས་དང་བདུད་ཀྱི་སྡེ་རྣམས་ཐམས་ཅད་ཟིལ་གྱིས་གནོན་པར་འགྱུར་རོ་ཞེས་གསུངས་སོ། །ཐབས་ཆེན་བྱང་ཆུབ་སེམས་དཔའ་གསང་བའི་སྤྱོད་པའང་འདི་ཉིད་དེ། །བླ་ན་མེད་པའི་བྱང་ཆུབ་ཏུ་འགྲུབ་པའི་ [57b.3]ཐབས་ཆེན་པོ་ནི་བྱང་ཆུབ་སེམས་དཔའ་རྣམས་ཀྱིས་རིག་ཅིང་སྤྱོད་ཀྱི་ཉན་ཐོས་ལ་སོགས་པས་རིག་པ་ཡིན་པའི་ཕྱིར། རང་བཞིན་གྱིས་གསང་བའི་ཡོན་ཡང་འདི་ཉིད་དོ། །འདི་མེད་རྒྱལ་བས་རྣམ་པར་སྣང་མཛད་ཐེག་པ་གསུམ་སྟོན་མི་སྲིད་དོ། །གོང་དུ་བསྟན་པའི་བྱང་ཆུབ་ཀྱི་སེམས་འདི་མ་རྟོགས་ཤིང་ [57b.4]མེད་ན་སངས་རྒྱས་སུ་མི་འགྲུབ། སངས་རྒྱས་མེད་ན་གཞན་གང་གིས་ཀྱང་ཐེག་པ་གསུམ་སྟོན་མི་སྲིད་དོ། །སྐད་ཅིག་ཙམ་དུ་དད་པའི་ཤུགས་ཀྱིས་དེ་ཡང་མྱུར་དུ་འཇམ་དཔལ་གཞོན་ནུར་འགྱུར། །འཇམ་དཔལ་གྱི་རང་བཞིན་ཡང་དེ་ཡིན་ལ། འདི་རྟོགས་པས་ཀྱང་འགྲུབ་པ་ཡིན་པའི་ཕྱིར་རོ། ། [57b.5]དཀྱིལ་འཁོར་གསང་བར་ཞུགས་ཤིང་ཐེག་ཆེན་དམ་ཚིག་མཆོག་ཀྱང་བསྲུངས་པ་ཡིན། །ཚུལ་ཁྲིམས་སྡོམ་པ་ཀུན་ཀྱང་བསྲུངས་ཤིང་སྦྱིན་གནས་དམ་པར་རབ་ཏུ་བསྔགས། །གོང་དུ་བསྟན་པ་ཡིན་ཏེ་ལེགས་པའི་ཡོན་ཏན་མ་ལུས་པ་རྣམས་བྱང་ཆུབ་ཀྱི་སེམས་ཀྱི་ནང་དུ་མ་འདུས་པ་མེད་པར་བསྟན་ [57b.6]པའི་ཕྱིར་རོ། །དེ་ལྟར་བྱང་ཆུབ་སེམས་ལས་བསོད་ནམས་ཀྱི་ཚོགས་དཔག་ཏུ་མེད་པ་ཐོབ་སྟེ། ཅི་ལྟ་ཞེ་ན། དེ་ཅིའི་ཕྱིར། བྱང་ཆུབ་སེམས་ཀྱི་བསོད་ནམས་དེ་ལ་གལ་ཏེ་གཟུགས་ཡོད་ན། །ནམ་མཁའ་བར་སྣང་དེ་ཡང་སྣོད་དུ་ཆུང་ཞེས་རྒྱལ་བས་མཚུངས་པར་གསུངས། །ཞེས་བྱ་བ་ལྟ་བུའོ། ། [57b.7]དོན་བཅུ་གཅིག་པ་ལོག་པར་ཞུགས་པ་རྣམས་སྙིང་རྗེའི་གནས་སུ་བསྟན་པ་ནི། སྐྱེ་བོ་སྐྱེ་བ་སྣ་ཚོགས་པ་དག་སྐྱེ་ཞིང་སྐྱེ་དང་སྐྱེ་འགྱུར་སྐྱེ་བའི་རྒྱུན་གྱིས་དབང་སོང་བ། ལས་ཀྱི་དབང་གིས་སོ་སོར་སྐྱེ་བས་སོ་སོའི་སྐྱེ་བོ་སྟེ། །རྒྱུད་དྲུག་གི་སྐྱེ་བ་སྣ་ཚོགས་གཅིག་ནས་གཅིག་ཏུ་བརྒྱུད་ཅིང་སྔོན་ཡང་སྐྱེས། [58a] [58a.1]དེ་ཡང་སྐྱེ་ཕྱིས་ཀྱང་སྐྱེ་བར་འགྱུར་ཏེ། སྐྱེ་བའི་རྒྱུན་མི་འཆད་པས་སྐྱེ་བའི་དབང་དུ་སོང་བའོ། །རྟོག་མཐའ་མི་ཤེས་རྟོག་པས་བསླུས་ཤིང་རྟོག་པའི་རྒྱུན་འབྲངས་འཁྲུལ་པའི་རྟོག་ལས་ཕྱིར་ལྡོག་མེད་གྱུར་པ། སེམས་ཀྱི་རྟོག་པ་འདི་ཉིད་ཀྱིས་ང་དག་པའི་མཐའ་མི་ཤེས་པས་ལོག་ [58a.2]པའི་རྟོག་པས་རང་ཉིད་ཀྱིས་རང་བསླུས་ཏེ། ལོག་པའི་རྟོག་པ་རྒྱུན་མི་འཆད་པས། འཁྲུལ་པའི་རྟོག་པ་ལས་ལྡོག་ཅིང་ཡང་དག་པའི་དོན་ཤེས་པའི་དུས་མེད་པར་འགྱུར་བ་ནི། དཔེར་ན་སྒྱུ་མས་བསླུས་པའི་ལྟད་མོ་བ་དང་། རྨི་ལམ་གྱིས་བསླུས་པའི་རྨི་ལམ་དང་འདྲ་བའི་ཕྱིར། སྒྱུ་མའི་སྒྱུ་ཤེས་ [58a.3]དག་གིས་སྒྱུ་མའི་གླང་པོ་འདྲ་བར་སྒྱུ་མས་རྨོངས་པའི་སྒྱུ་མ་རྣམས། རྨི་ལམ་གྱིས་བསླུས་བཞིན་དུ་རྨི་བའི་བདེ་བ་ཉམས་ཤིང་རྨི་ལམ་དབང་དུ་སོང་བར་རྨི་ལམ་འདྲ། ཞེས་སྨོས་པ་ཡིན་ནོ། །ལམ་འདི་སྤོང་ཞིང་ལམ་གཞན་དུ་བལྟས་པས་མ་ནོར་ལམ་ཞེས་སྟོན་པ་དེ། དེ་དག་རྡོ་ལ་གསེར་བཞིན་ [58a.4]ཐུགས་རྗེའི་ཐུགས་རྗེས་ཀྱི་མའོ་འཕྲོགས་པ་ཡིན། གོང་དུ་ཇི་སྐད་བསྟན་པའི་ལམ་འདི་སྤོང་ཞིང་ཐེག་པ་ཆེན་པོའི་ལམ་ཇི་ལྟ་བ་བཞིན་མ་ལྕོགས་ཏེ། མཐར་ལྟུང་བའི་སྐྱོན་དང་ལྡན་པ་དང་། ཐེག་པ་ཆེན་པོའི་ལམ་ལས་གཞན་དུ་འགྱུར་བ་ལྟ་བ་སྣ་ཚོགས་ཀྱིས་ལམ་དུ་བལྟས་པས་མ་ནོར་བའི་ཞེས་སྟོན་པ་དེ་ནི་ [58a.5]དཔེར་ན་རྡོ་ལས་གསེར་ཞེས་ཟེར་བ་དང་འདྲ་སྟེ། ཐུགས་རྗེར་རུང་ཞིང་འཕགས་པ་ཐུགས་རྗེ་མངའ་བ་རྣམས་ཀྱི་ཐུགས་རྗེས་རང་དབང་མེད་པར་གདུང་བ་སྐྱེ་བ་ཡིན་ནོ་ཞེས་བྱ་བའི་དོན་ཏོ། །དཔེར་ན་ཡིད་དུ་འོང་བའི་ཡུལ་ལ་སེམས་ཡེངས་ཏེ། འཇུག་པ་ལ་རང་དབང་མེད་པ་ལས། ཡུལ་གྱིས་ [58a.6]ཡིད་འཕྲོགས་ཞེས་སམ། སེམས་འཕྲོགས་ཞེས་བརྗོད་པ་དང་འདྲ་བར་ཐུགས་རྗེ་མངའ་བ་རྣམས་ཐུགས་རྗེས་སེམས་འཕྲོགས་ཏེ། རང་དབང་མེད་པར་གདུང་བ་སྐྱེ་བ་ལ་ཐུགས་རྗེས་འཕྲོགས་པ་ཞེས་བྱའོ། །ཤིན་ཏུ་མ་སྦྱངས་པའི་དུས་ཀྱིས་མནར་བའི་སྐྱེ་བོ་ལྔ་བརྒྱ་ཐ་མ་ལ། གསུང་རབ་དྲི་མེད་ [58a.7]རྟོགས་དཀའ་དག་ལ་སྒྲ་བཞིན་སྤྱོད་དང་ཚུལ་བཞིན་མེད། །ཤེས་རབ་ཀྱི་བློ་མ་སྦྱངས་པས་དུས་ཀྱིས་མནར་ཏེ་ལྔ་བརྒྱ་ཐ་མ་ལ། ཆོས་ལ་དཔྱོད་པ་རྣམས་ཀྱིས་དེ་བཞིན་གཤེགས་པའི་གསུང་རབ་མ་ནོར་བ་དྲི་མ་མེད་པར་བསྟན་པའི་དོན་རྟོགས་པར་དཀའ་བ་རྣམས་ལ་ཅི་སྐད་བསྟན་པའི་སྒྲ་བཞིན་དུ་དཔྱོད་ཅིང་ [58b] [58b.1]འཛིན་གྱི། དོན་གྱི་ཚུལ་ཇི་ལྟ་བ་བཞིན་དཔྱོད་པར་མི་བྱེད་དེ། དོན་ནི་མུན་ཁུང་ན་གསེར་འདུག་པ་དང་འདི། ཚིག་ནི་སྒྲོན་མ་དང་མཚུངས་ཏེ། ཚིག་གི་སྒྲོན་མས་དོན་གྱི་གསེར་བཙལ་བ་ཡིན་གྱིས་ཀྱང་། ཇི་ལྟར་སྒྲོན་མ་དེ་གསེར་མ་ཡིན་པ་བཞིན་དུ་ཚིག་ནི་དོན་མ་ཡིན་པར་ཤེས་ཏེ། ཚིག་ལ་དོན་གྱི་ངོ་བོར་གཟུང་ [58b.2]བ་དང་། རབ་ཀྱི་བློ་སྟོབས་བཞིན་འཇུག་པ་ལ་སོགས་པ་ལྟ་བ་སྣ་ཚོགས་དག །མི་ཤེས་ཆུ་བསོ་གཡེངས་ཤིང་གསུང་གི་ཉིད་གུ་བདུད་རྩི་རྣལ་འབྱོར་བྲལ། །རང་གི་འཁྲུལ་བའི་བློ་གྲོས་ཀྱི་སྟོབས་ཀྱི་རང་དོན་སྤྱོད་པ་ལ་འཇུག་པ་རྣམས་ཀྱིས་ཕྱིན་ཅི་ལོག་གི་ལྟ་བ་སྣ་ཚོགས་བཟུང་བ་ནི་མི་ཤེས་པའི་ལྟ་ [58b.3]བའི་ཆུ་བོས་གཡེངས་ཏེ་ཁྱེར་བས་དེ་བཞིན་གཤེགས་པས་ངེས་པའི་དོན་དུ་གསུངས་པའི་གསུང་རབ་བདུད་རྩི་དང་འདྲ་བ་ལ་མ་ནོར་བར་རྣལ་འབྱོར་དུ་སྦྱོར་ཞིང་བསྒོམ་པ་དང་བྲལ་བ་ཡིན་ནོ། །དོན་བཅུ་གཉིས་པ་དགེ་བའི་རྩ་བ་བསྔོ་བ་ནི། དེའི་ཕྱིར་རྒྱལ་བས་གསུངས་པའི་ལམ་མཆོག་ཐུགས་ [58b.4]ཀྱི་གསང་བ་དམ་པ་ནི། །ཀུན་ཏུ་རྒྱལ་བ་རྣམས་ཀྱི་སྤྱོད་ཡུལ་ཐུན་མོང་མ་ཡིན་ཡང་། །སངས་རྒྱས་རྣམས་ཀྱིས་ཅི་ལྟར་མཁྱེན་པ་ལྟར། །སློབ་དཔོན་འཇམ་དཔལ་བཤེས་གཉེན་གྱིས་ཀྱང་ཤེས་པ་མ་ཡིན་པས་ཐུན་མོང་མ་ཡིན་ཡང་། གོམས་པའི་མཐུ་ཡིས་མི་འགའ་ཚུལ་དུ་ཚད་མ་དག་ལས་རབ་ [58b.5]བསྒྲུབས་ཏེ། སངས་རྒྱས་རྣམས་ཀྱི་ཐུགས་ཀྱི་གསང་བ་ཡང་དག་པའི་དོན་ལ་སློབ་དཔོན་ཉིད་ཀྱིས་ཡུན་རིང་དུ་གོམས་པར་བྱས་ཏེ། བསྒོམས་པའི་མཐུ་དང་ལུང་དང་མན་ངག་གི་ཚད་མ་དག་གིས་གཏན་ལ་ཕབ་སྟེ། འགྲོ་བའི་དོན་དུ་མི་གཉིས་ལམ་མཆོག་འདི་ནི་རབ་བགྱིས་པས། །སྐྱེ་བའི་ [58b.6]སྐྱེ་གནས་ཐམས་ཅད་དུ་ཡང་སྐད་ཅིག་ཏུ། །མི་མཐུན་ཕྱོགས་ཀྱིས་མི་ཉམས་རྒྱལ་བ་ཀུན་གྱི་ཐུགས་འདིར་རབ་རྒྱས་ཤོག །འགྲོ་བའི་དོན་དུ་གཉིས་སུ་མེད་པ་དུས་གསུམ་གྱི་སངས་རྒྱས་རྣམས་ཀྱི་གཤེགས་ཤུལ། ལམ་གྱི་མཆོག་འདི་མདོར་བསྟན་ཅིང་བགྱིས་པས་སེམས་ཅན་ཐམས་ཅད་ཀྱི་དུས་དང་གནས་ [58b.7]སྐབས་ཐམས་ཅད་དུ་མི་མཐུན་པའི་ཕྱོགས་ཐམས་ཅད་ཀྱིས་ཡང་དག་པའི་བསམ་པ་མི་ཉམས་ཤིང་སངས་རྒྱས་ཐམས་ཅད་ཀྱི་ཐུགས་སུ་ཆུད་པའི་དོན་གྱི་སྙིང་པོ་འདི། སེམས་ཅན་ཐམས་ཅད་ཀྱིས་རྟོགས་ཤིང་རྒྱས་པར་ཤོག་ཅིག་ཅེས་བསྔོ་བ་ཡིན་ནོ། །བྱམས་པའི་ཞལ་བཟང་མངོན་དུ་མ་མཐོང་ཡང་། ཐུགས་རྗེ་ [59a] [59a.1]མན་ངག་བརྒྱུད་པའི་སེར་བུ་ཡིས། །འཁྲུལ་གདོང་གཏིང་ནས་བདག་བློ་ཟེར་བསྐྱེད་པ། །འཇམ་དཔལ་འཇམ་དཔལ་བཤེས་གཉེན་བཅས་ལ་འདུད། །ལོང་བ་ལ་ཡང་དམིགས་སུ་ཚོལ། །མི་མཐོང་བཞིན་དུའང་མཚོན་པར་སྩོལ། །མཐུ་ཆུང་ནན་ལ་བཏབ་པ་བཞིན། །རང་ [59a.2]དབང་མེད་པར་བཙལ་བྱས་པ། །གང་ཡང་འདི་ལ་རྟེན་པར་མི་བྱེད་ངེས་ན་སྒྲིབ་པ་ཉིད་དུའང་མི་འགྱུར་གྲང་། །འོན་ཀྱང་རྒྱུ་མེད་ཕན་པའི་སེམས་ཀྱིས་མི་ཤེས་སྐྱོན་ཡང་ཡང་དུ་བླངས་ནས་སུ། །ལེགས་འདོད་ཕན་སེམས་ཙམ་གྱིས་སྩོལ་བའི་དོན་ངོར་བྱས་པ་ལྟར་ཡང་བརྩམས་པ་ཡིན། །འགྲོ་བ་ [59a.3]ཀུན་ཀྱང་གཞན་དོན་སེམས་ཤིང་དོན་ཡོད་མྱུར་དུ་མཐུ་དང་ལྡན་པར་ཤོག། །བྱང་ཆུབ་ཀྱི་སེམས་བསྒོམ་པ་དོན་བཅུ་གཉིས་བསྟན་པ་ལུང་གི་རྗེས་སུ་འབྲངས་པའི་སིང་ག་གླིང་གི་སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་ཚིགས་བཅད་བཞི་བཅུ་པ་རྫོགས་སོ།། །། [59a.4]{T2579}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི་ནོ་པི་ཀ །བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྒྲུབ་པའི་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་འདི་སྐུ་གསུང་ཐུགས་ལྡན་པའི། །འཇམ་དཔལ་དེ་ལ་ [59a.5]སྤྱི་བོ་ཡིས། །ཀུན་ནས་ལུས་ངག་དང་བའི་ཡིད། །དེ་ལ་བདག་ནི་ཕྱག་འཚལ་ལོ། །ཟབ་ཅིང་རྒྱ་ཆེའི་མཚན་བསྟན་པ། །རྣལ་འབྱོར་རྒྱུད་རྒྱལ་དག་ལ་སྟེ། །སྙིང་རྗེ་དགའ་བའི་སེམས་ཀྱིས་སུ། །ཀུན་ལ་ཕན་ཕྱིར་བཤད་པར་བྱ། །ཐིག་ལེ་བཅུ་དྲུག་མི་ཤིགས་དབུས། །ཡན་ [59a.6]ལག་མེད་ཅིང་རྩིས་ལས་འདས། །དེ་ཉིད་ལྡན་ཞིང་མི་རྟོག་འདས། །ངེས་འབྱུང་ཀུན་གྱི་ལམ་གང་ཡིན། །དོན་གསུམ་ཐེ་ཚོམ་མེད་པའི་བློས། །ལུས་ཀྱི་མཐའ་ནི་ངེས་རྟོག་བྱ། །བྱང་ཆུབ་བླ་ན་མེད་པ་ངོ་། །གསང་སྔགས་དོན་ཀུན་བསྐྱེད་པ་བོ། །ལོངས་སྤྱོད་རྫོགས་སྐུ་ཀུན་གྱི་ [59a.7]མཆོག །སངས་རྒྱས་སྤྲུལ་པའི་རྒྱུད་འཆང་བ། །མཆོད་འོས་བསྟོད་འོས་རིམ་གྲོའི་གནས། །བྱང་ཆུབ་སེམས་དཔའ་རྫུ་འཕྲུལ་ལྡན། །ལག་ན་རྡོ་རྗེ་མཐུ་བོ་ཆེས། །ཉིད་ལ་སྙན་པའི་ཚིག་དག་གིས། །བསྟོད་ནས་མཚན་གྱི་རིམ་པ་ཞུས། །བློ་གཞན་དོན་ཕྱིར་རིམ་པར་གསུངས། །དང་པོར་རྡོ་རྗེ་ [59b] [59b.1]འཆང་ཆེན་པོས། །སློབ་དཔོན་ཆ་ལུགས་ལྡན་བྱས་ཏེ། །བསམ་གཏན་དང་ནི་རྗེས་མཐུན་པའི། །རི་ཡི་ཕུག་གམ་ཆུ་ཡི་འགྲམ། །རྫིང་ངམ་རང་དགའི་གནས་དག་གམ། །ལྷ་ཁང་མཆོད་རྟེན་ལ་སོགས་པར། །བདེ་བའི་སྟན་ལ་འདུག་བྱས་ཏེ། །གྲོགས་བཟང་བཙལ་ནས་བསྙེན་པ་བརྩམ། །བདག་ [59b.2]དང་ས་གཞི་ཡོངས་བསྲུང་ཕྱིར། །དྲ་བ་ར་བ་མཚམས་བཅད་དང་། །ཕྱོགས་དང་སྟེང་འོག་བཅིངས་སོགས་པ། །རབ་ཏུ་འབད་པས་ཁྱེ་བསྒོམ་པར་བྱ། །དེ་ནས་ཤིན་ཏུ་བརྩེར་ལྡན་པས། །སྦྱིན་སྲེག་གིས་ནི་མཉེས་པར་བྱ། །སྔོན་དུ་བསྙེན་པ་རབ་འབད་དེ། །དགྱེས་པ་བསྐྱེད་ཅིང་འཁོར་ལོ་ནི། །ནམ་ [59b.3]མཁར་བསྒོམ་པར་བྱ་བ་ནི། །མཁའ་ལ་འདུས་པ་འཁོར་དང་བཅས། །ལག་པའི་འདུ་བྱེད་བསྒོམ་ཅིང་བྱ། །འབྲུ་ལྔར་ལྡན་པའི་སོར་མོ་ལ། །མཛུབ་མོ་ཆུང་ངུ་མདུད་བྱས་པ། །འདི་ནི་དཀྱིལ་འཁོར་སྒྲུབ་པ་སྟེ། །ཐམས་ཅད་འདུ་བའི་སྦྱོར་བ་ཡིས། །ལྔ་དང་གཅིག་དང་དྲུག་དང་གསུམ། །འཁོར་ [59b.4]ལོའི་གསང་སྔགས་ལས་བསྐྱེད་པ། །བླ་མ་དང་མཉམ་སྦྱོར་བསྡུས་པས། །མཉམ་པ་ཤིན་ཏུ་བསྟོད་པར་བྱ། །ཨེ་མ་ཧོ་ཡན་ལག་འདུས་པ་ཡི། །སྦྱོར་བ་འདི་ནི་གསུམ་ལས་བྱུང་། །དེ་ལྟར་མཁའ་ལ་གསལ་བཀོད་དེ། །དབང་པོའི་མངོན་སུམ་འདྲ་མཐོང་ནས། །དགའ་བ་མཆོད་པ་གླུ་ [59b.5]ཡིས་བསྟོད། །དང་པོར་མཆོད་ཅིང་རྗེས་ཡི་རང་། །བཤགས་དང་གསོལ་གདབ་ཕྱག་འཚལ་སོགས། །བཅུ་ཡི་ཡན་ལག་ཀུན་འདུས་པ། །བདག་ཉིད་རུང་བར་གྱུར་པ་ན། །ཚིགས་བཅད་གླུ་ཡིས་བསྟོད་པར་བྱ། །དགྱེས་ནས་བདག་ལ་ལྷ་རྣམས་ཀྱིས། །སྙན་པའི་ཚིག་གིས་བསྟོད་པར་བསམ། ། [59b.6]དྲིན་གྱི་ཚུལ་གྱིས་སླར་བསྟོད་པ། །བྱང་ཆུབ་སེམས་ནི་རང་བྱུང་བའི། །འདི་ལྟར་སངས་རྒྱས་བཅོམ་ལྡན་འདས། །དོན་ཆེན་ཡི་གེ་དམ་པ་ཡིན། །མཆོག་སྦྱིན་རྡོ་རྗེ་མཆོག་ཁྱོད་འདུད། །སངས་རྒྱས་རྣམ་པར་སྣང་མཛད་དེ། །གཏི་མུག་བློ་སྟེ་གཏི་མུག་སེལ། །མགོན་པོ་ས་བཅུའི་དབང་ཕྱུག་སྟེ། ། [59b.7]རྡོ་རྗེ་ཆགས་པ་ཁྱོད་ལ་འདུད། །རྡོ་རྗེ་འཇིགས་བྱེད་འཇིགས་པར་བྱེད། །གདོང་དྲུག་མིག་དྲུག་ལག་དྲུག་པོ། །མཆེ་གཙིགས་གདོང་བརྒྱ་ཀུན་འདུལ་བ། །སངས་རྒྱས་རོལ་སྟོན་ཁྱོད་ལ་འདུད། །ཡང་དག་བདག་མེད་དེ་བཞིན་ཉིད། །སྟོང་ཉིད་སྨྲ་བའི་ཁྱུ་མཆོག་སྟེ། །སུམ་ཅུ་རྩ་གཉིས་མཚན་ [60a] [60a.1]འཆང་བ། །མེད་པ་ལས་བྱུང་ཁྱོད་ལ་འདུད། །འདོད་པའི་དོན་གྲུབ་ངན་སོང་སྦྱོང་། །མགོན་པོ་ཉོན་མོངས་དྲ་བ་འཇོམས། །ས་གཞི་ཚངས་ནས་རྐང་པས་གནོན། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་ཀུན་གྱི་རྟོགས་བྱ་བ། །ཐིག་ལེ་ཆེན་པོ་ཡི་གེ་མེད། །ལོངས་སྤྱོད་ [60a.2]རྫོགས་སྐུ་ཀུན་གྱི་རྒྱལ། །སངས་རྒྱས་རོལ་སྟོན་ཁྱོད་ལ་འདུད། །མེ་ལོང་ཡེ་ཤེས་ངོ་བོ་ཉིད། །ཨ་ནི་ཡིག་འབྲུ་ཀུན་གྱི་མཆོག །ཁོང་ནས་འབྱུང་བ་སྐྱེ་བ་མེད། །སེམས་མ་རྡོ་རྗེ་མཆོག་ཁྱོད་འདུད། །མཉམ་ཉིད་ཡེ་ཤེས་ངོ་བོ་ཉིད། །ཨ་ནི་འབྱུང་བ་འགོག་པ་སྟེ། །ཚིག་ཏུ་བརྗོད་ [60a.3]པ་རྣམ་སྤངས་པ། །རིན་ཆེན་འབྱུང་བ་ཁྱོད་ལ་འདུད། །སོ་སོར་ཀུན་རྟོག་ངོ་བོ་ཉིད། །ཨ་ནི་བརྗོད་པའི་རྒྱུ་ཡིན་ཏེ། །བརྗོད་པ་ཀུན་གྱི་རྒྱུ་ཡི་མཆོག །ཆོས་ཀྱི་རྡོ་རྗེ་འཛུམ་སྤྱོད་འདུད། །བྱ་བ་ནན་ཏན་ངོ་བོ་ཉིད། །ཨ་ནི་ཚིག་འབྱུང་གསལ་བར་བྱེད། །ཚིག་ཀུན་གསལ་ [60a.4]བར་བྱེད་པ་ཡི། །རྡོ་རྗེ་དྲ་བ་ལས་ཁྱོད་འདུད། །སྟོང་པའི་རང་བཞིན་འདོད་ཆགས་ཆེ། །སངས་རྒྱས་འདོད་ལ་ཕྱག་འཚལ་འདུད། །ཕྱི་ཉིད་མ་གྲུབ་བདེ་བ་ཆེ། །སངས་རྒྱས་རོལ་ལ་ཕྱག་འཚལ་འདུད། །གཉི་ག་མེད་པས་དགའ་བ་ཆེ། །སངས་རྒྱས་ཆགས་པ་ཁྱོད་ལ་འདུད། །བསྟོད་པའི་དོན་ལྡན་མགུ་བ་ཆེ། ། [60a.5]སངས་རྒྱས་དགྱེས་པ་ཁྱོད་ལ་འདུད། །གཟུགས་ཆེན་ལུས་ཀྱང་ལྷ་ཆེ་བ་སྟེ། །སངས་རྒྱས་འཛུམ་པ་ཁྱོད་ལ་འདུད། །ཁ་དོག་ཆེ་ལ་གཟི་བྱིན་ལྡན། །མེད་པ་ལས་བྱུང་ཁྱོད་ལ་འདུད། །མིང་ཆེ་མཚན་བཟང་རྒྱ་ཆེ་བ། །སངས་རྒྱས་ཐུགས་ལ་ཕྱག་འཚལ་འདུད། །བཞད་ཅིང་དཀྱིལ་འཁོར་ཡོངས་ཁྱབ་པ། ། [60a.6]སངས་རྒྱས་བཞད་པ་ཁྱོད་ལ་འདུད། །ཆོས་ཀྱི་ཤེས་རབ་མཚན་འཆང་བ། །སངས་རྒྱས་གསུང་ལ་ཕྱག་འཚལ་འདུད། །ཉོན་མོངས་དྲ་བ་གཅོད་པའི་མཆོག །སངས་རྒྱས་འབྱུང་བ་ཁྱོད་ལ་འདུད། །གྲགས་པ་རྡོ་རྗེ་རྒྱུ་ཡི་བདག །ནམ་མཁའ་ལས་བྱུང་ཁྱོད་ལ་འདུད། །སྣང་བ་ཆེན་པོ་གསལ་བ་ཆེ། ། [60a.7]ཡེ་ཤེས་ལས་བྱུང་ཁྱོད་ལ་འདུད། །མཁས་ཤིང་སྤྲུལ་འཆང་རྡོ་རྗེ་ལས། །སྒྱུ་འཕྲུལ་དྲ་བ་ཁྱོད་ལ་འདུད། །སྒྱུ་འཕྲུལ་ཆེན་པོ་གོ་ཆ་སྲ། །སངས་རྒྱས་རོལ་སྟོན་ཁྱོད་ལ་འདུད། །སྒྱུ་འཕྲུལ་བདག་ཉིད་གནོད་སྦྱིན་གཙོ། །ཐམས་ཅད་ཐམས་ཅད་ཁྱོད་ལ་འདུད། །སྒྱུ་འཕྲུལ་ཁུ་ཚུར་བསྟན་ཞིང་སྡུད། །ཡེ་ཤེས་སྐུ་ [60b] [60b.1]ཉིད་ཁྱོད་ལ་འདུད། །སྦྱིན་བདག་ཆེན་པོ་གཙོ་བོ་སྟེ། །རྡོ་རྗེ་སྒེག་མོ་ཁྱོད་ལ་འདུད། །ཚུལ་ཁྲིམས་ཆེན་པོ་འཆང་བའི་མཆོག །རྡོ་རྗེ་དཔལ་ཕྲེང་སྤྱོད་ལ་འདུད། །བཟོད་ཆེན་འཆང་བ་བརྟན་པ་པོ། །རྡོ་རྗེ་དབྱངས་མཁན་ཁྱོད་ལ་འདུད། །བརྩོན་འགྲུས་ཆེན་པོ་བརྟུལ་བ་ཡི། །རྡོ་རྗེ་གར་མཁན་ཁྲོད་ལ་ [60b.2]འདུད། །བསམ་གཏན་ཆེན་པོ་ཏིང་འཛིན་གནས། །རྡོ་རྗེ་མེ་ཏོག་ཁྱོད་ལ་འདུད། །ཤེས་རབ་ཆེན་པོ་ལུས་འཆང་བ། །རྡོ་རྗེ་བདུག་པ་ཁྱོད་ལ་འདུད། །སྨོན་ལམ་ཡེ་ཤེས་རྒྱ་མཚོ་སྟེ། །རྡོ་རྗེ་མར་མེ་གསལ་ལ་འདུད། །སྟོབས་པོ་ཆེ་ལ་ཐབས་ཆེ་བ། །རྡོ་རྗེ་དག་བྱེད་ཁྱོད་ལ་འདུད། །རྡོ་རྗེ་ལྕགས་ཀྱུ་ [60b.3]འདྲེན་པ་ཆེ། །རྡོ་རྗེ་འགུགས་བྱེད་ཁྱོད་ལ་འདུད། །རྡོ་རྗེ་ཞགས་པ་རྣམ་པར་རྒྱལ། །རྡོ་རྗེ་འདྲེན་བྱེད་ཁྱོད་ལ་འདུད། །རྡོ་རྗེ་ལྕགས་སྒྲོག་འཛིན་པ་ཆེ། །རྡོ་རྗེ་སྡོམ་བྱེད་ཁྱོད་ལ་འདུད། །རྡོ་རྗེ་འབེབས་པ་རྣམ་རྒྱལ་ཞགས། །རྡོ་རྗེ་འབེེབས་པ་ཁྱོད་ལ་འདུད། །བྱམས་ཆེན་རང་བཞིན་དཔག་ཏུ་མེད། །སྙིང་ [60b.4]རྗེ་ཆེན་པོ་བློ་ཡི་མཆོག །ཤེས་རབ་ཆེན་པོ་བློ་ཆེན་ལྡན། །མཁས་པ་ཆེན་པོ་ཐབས་ཆེ་བ། །ཡེ་ཤེས་ཆ་གྲུབ་སེམས་དཔའི་ཚོགས། །སྟོང་པ་ཉིད་ཀྱི་སྒོར་གནས་པ། །བག་ལ་ཉལ་བ་བྱང་སེམས་ལྡན། །ཤེས་རབ་སྙིང་རྗེར་ལྡན་ལ་འདུད། །རྫུ་འཕྲུལ་ཆེན་པོ་སྟོབས་དང་ལྡན། །ཤུགས་ཆེན་ [60b.5]མགྱོགས་པ་ཆེན་པོ་སྟེ། །རྫུ་འཕྲུལ་ཆེན་པོ་ཆེར་གྲགས་པ། །སྟོབས་ཆེན་ཕ་རོལ་གནོན་པ་པོ། །སྟོབས་བཅུ་རྫུ་འཕྲུལ་བཞིར་ལྡན་པའི། །གོམས་ཤུགས་ཡེ་ཤེས་བཞིར་གྲགས་པ། །སྟོབས་པོ་ཆེ་ལ་བདུད་དཔུང་འཇོམས། །ཚོགས་གཉིས་རྫོགས་པ་ཁྱོད་ལ་འདུད། །སྲིད་པའི་ [60b.6]རི་བོ་ཆེན་པོ་འཇོམས། །མཁྲེགས་ཤིང་རྡོ་རྗེ་ཆེན་པོ་འཇོམས། །དྲག་པོ་ཆེན་པོ་མུན་པ་འཇོམས། །འཇིགས་ཆེན་འཇིགས་པར་བྱེད་པ་པོ། །ཕུང་པོ་ལྔ་དག་ལྷ་ཆེན་འདུལ། །མི་ཤེས་རི་འཇོམས་སྲ་བ་པོ། །མྱ་ངན་ཀུན་སེལ་དྲག་པོ་སྟེ། །ཆེ་བས་ཆེ་བ་ཁྱོད་ལ་འདུད། །མགོན་པོ་རིགས་མཆོག་ [60b.7]ཆེན་པོ་ཆེ། །བླ་མ་གསང་སྔགས་ཆེ་བའི་མཆོག །ཐེག་པ་ཆེན་པོའི་ཚུལ་ལ་གནས། །ཐེག་པ་ཆེན་པོའི་ཚུལ་གྱི་མཆོག །འཁོར་བ་མྱ་ངན་སྐྱོབ་པའི་མཆོག །ཐེག་པ་ཚུལ་མཆོག་ལམ་གནས་པའི། །ཕྱག་རྒྱ་མཆོག་ཏུ་གྲུབ་བྱེད་པའི། །ཕ་རོལ་ས་བཅུ་གཙོ་ལ་འདུད། །དེ་ལྟར་ [61a] [61a.1]བསྟོད་པར་བྱེད་པ་དེའི། །འཁོར་ལོ་འདུས་པའི་གཙོ་མཆོག་གྲུབ། །དེ་དག་མཆོག་གི་རྒྱལ་པོའི་སྦྱོར་བའི་འཁོར་ལོ་དང་པོའི་ཏིང་ངེ་འཛིན་ཏོ། །དེ་ནས་རིམ་པ་འདིར་ལྡན་པས། །ཐམས་ཅད་ནམ་མཁའི་འཁོར་ལོའི་ཚོགས། །མ་ལུས་མཉེས་པར་བྱ་བའི་ཕྱིར། །ཕྱག་ལྔས་ཚོམ་བུ་ལྔ་ [61a.2]མཉེས་བྱ། །དེ་ལྟར་མཉེས་བྱས་འོག་ཏུ་ནི། །ཡེས་ཤེས་སེམས་དཔའ་མངོན་འདོད་པས། །སེམས་ཅན་ཡོངས་བསྒྲལ་བསམ་པ་དང་། །བྱང་ཆུབ་དམ་པར་སྨོན་པར་བྱ། །དེ་ནས་འདི་དག་ཚིག་ཏུ་བརྗོད། །སངས་རྒྱས་བྱང་ཆུབ་སེམས་དཔའ་རྣམས། །ཇི་ཙམ་དུ་ནི་གཟུང་ནས་སུ། །མ་ལུས་བདག་ལ་དགོངས་སུ་ [61a.3]གསོལ། །ནམ་ཞིག་བྱང་ཆུབ་སྙིང་པོ་ལ། །ཡོངས་སུ་གནས་གྱི་བར་དག་ཏུ། །བདག་གིས་བྱང་ཆུབ་མཆོག་གི་སེམས། །མ་ལུས་པར་ནི་བསྐྱེད་པར་བྱ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་པའི། །དམ་པ་བདག་ཐུགས་བསྐྱེད་པར་བགྱི། ། [61a.4]སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་དང་། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་ [61a.5]བར་བགྱི། །ནམ་དུ་ཡང་ནི་མི་སྤོང་ངོ་། །རྡོ་རྗེ་རིགས་མཆོག་ཆེན་པོ་ཡིས། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་ཞིང་དུ་དུས་དྲུག་ཏུ། །སྦྱིན་ [61a.6]པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ཡི། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ [61a.7]ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་ལ། །མ་གྲོལ་བ་ནི་དགྲོལ་བར་བགྱི། །མ་བསྒྲལ་བ་ནི་བསྒྲལ་བར་བགྱི། །དབུགས་མ་ཕྱིན་པ་དབུགས་དབྱུང་རྡུ་ཞིང་། ། [61b] [61b.1]སེམས་ཅན་མྱ་ངན་འདས་ལ་དགོད། །དེ་ལྟར་སྡོམ་པ་འཛིན་བྱེད་པ། །ཀུན་རྫོགས་རིམ་པར་དབང་བསྐུར་ནས། །ཐབས་དང་ཤེས་རབ་གཉིས་མེད་པར། །སྤྱི་གཙུག་དོན་དམ་ལྷ་བསྙེན་བྱ། །དེ་ནས་ནམ་མཁའི་འཁོར་ལོའི་ཚོགས། །མ་ལུས་བདག་ལ་བསྡུ་བར་བྱ། །བདག་གི་སྙིང་གའི་དཀྱིལ་ཉིད་ [61b.2]དུ། །ཐིམ་པའི་ཡེ་ཤེས་མེ་འབར་ཏེ། །རྣམ་སྨིན་ཕུང་པོ་བསྲེགས་བྱས་ནས། །སླར་སོས་ཡེ་ཤེས་ལུས་སུ་བྱ། །དེ་ནས་བྱང་ཆུབ་ལྔ་བསྒོམ་པ། །ཇི་ལྟར་ཡོངས་སུ་དག་པ་ཡི། །མེ་ལོང་གསལ་བའི་དཀྱིལ་འཁོར་ལ། །ཡུལ་དང་དངོས་བོའི་རིག་རྣམས་ཀུན། །མ་ལུས་སོ་སོར་སྣང་བ་ [61b.3]བཞིན། །ཐམས་ཅད་ཡོངས་སུ་དག་པ་ཡི། །མེ་ལོང་ལྟ་བུའི་ཡེ་ཤེས་ལ། །འདྲིས་པར་དེ་ལ་བལྟ་བར་བྱ། །དེ་ནས་སྙིང་རྗེ་བསྐྱེད་བྱ་བ། །སེམས་ཅན་རྣམས་ནི་མགོན་སྐྱབས་བྲལ། །དཔུང་གཉེན་མེད་ཅིང་སྡུག་བསྔལ་བ། །འཁོར་བའི་རྒྱ་མཚོར་བྱིང་བ་ཡི། །སེམས་ཅན་རྣམས་ཀྱི་ [61b.4]དོན་དག་ཏུ། །ཐམས་ཅད་སྡུག་བསྔལ་ལས་བསྒྲལ་བསམ། །ཇི་ལྟར་ཆོས་རྣམས་སྟོང་པ་དང་། །མཉམ་པ་ཉིད་དུ་རབ་སྦྱོར་བས། །བདག་ཀྱང་སྟོང་པ་བདག་མེད་ཅིང་། །སེམས་ཅན་རྣམས་ཀྱང་དེ་འདྲ་བར། །ཆོས་རྣམས་ཀུན་ཀྱང་རབ་ཏུ་ཤེས། །ཆོས་ལ་དམིགས་པའི་སྙེང་རྗེ་ཡང་། ། [61b.5]བདག་མེད་རང་བཞིན་རིག་པ་ལས། །མཉམ་ཉིད་ཡེ་ཤེས་བསྐྱེད་པར་བྱ། །དེ་ནས་སྔགས་འདི་ཆེད་དུ་བརྗོད། །ཨོ་ཨ་ཀཱ་རོ་མུ་ཁཾ་སརྦ་དྷརྨྨཱ་ཎཱཾ། ཨཱརྱ་ནུཏ་པནྡ་ཏྭཱ་ཏ། སྔགས་འདི་ཚིག་ཏུ་བརྗོད་བྱས་ནས། །སྔགས་པས་སྔགས་དོན་བསྒོམས་ནས་སུ། །ལྷན་ཅིག་དམིགས་པ་མེད་པ་ [61b.6]དང་། །གཉིས་མེད་ཆོས་ལ་རབ་གཟུང་ཕྱིར། །དེ་ཉིད་ཡུལ་དུ་བྱ་བའི་ཕྱིར། །ཆོས་བདག་མེད་པ་བསྒོམ་པར་བྱ། །དམིགས་མེད་སྙིང་རྗེ་སོ་སོར་བརྟག །དེ་ནས་སྙིང་རྗེའི་རྗེས་འགྲོ་བ། །གཟུང་འཛིན་ཀུན་དང་ཡོངས་བྲལ་བའི། །ངོ་བོ་ཉིད་ཀྱིས་འོད་གསལ་བའི། །ཡན་ལག་ཀུན་ [61b.7]དང་ཡོངས་བྲལ་བའི། །རང་བཞིན་ཡོངས་སུ་དག་པ་ཡི། །ཆོས་དབྱིངས་རྒྱུ་མཐུན་དངོས་བྲལ་དོན། །སྟོང་ཉིད་ངང་ལ་དེ་གནས་ནས། །ཆོས་དབྱིངས་ཡེ་ཤེས་བསྒོམ་པར་བྱ། །དེ་ལྟར་སེམས་ཅན་ཐམས་ཅད་ཀྱི། །དོན་བྱེད་བྲལ་བའི་རྣལ་འབྱོར་པས། །སྔོན་གྱི་སྨོན་ལམ་དབང་ཐོབ་ཅིང་། །སེམས་ [62a] [62a.1]ཀྱི་རྒྱུན་གྱི་དབང་སྒྱུར་བས། །སེམས་ཅན་དོན་ནི་རབ་རྫོགས་ཕྱིར། །ཁམས་གསུམ་འབྱུང་གནས་ཁྱད་པར་གྱིས། །དོན་དམ་ཀུན་རྫོབ་མྱ་ངན་འདས། །ནན་ཏན་ཡེ་ཤེས་མངོན་གསལ་བྱ། །དེ་ལྟར་རྣམ་ལྔའི་ངོ་བོ་ཡི། །སྙིང་རྗེ་ནམ་མཁའི་རང་བཞིན་གྱིས། །ཐམས་ཅད་རང་བཞིན་མེད་ [62a.2]ཤེས་ནས། །འགྲོ་བའི་དོན་ལ་འཇུག་བརྩོན་བྱ། །དེ་དག་ནི་ཡོངས་སུ་དག་པའི་ཏིང་ངེ་འཛིན་ཏོ། །དེ་ནས་དེ་ལ་དངོས་འབྱུང་གཟུགས། །འཕྲུལ་པའི་ཚུལ་ཀྱིས་ནམ་མཁའ་ལས། །རང་བཞིན་གྱིས་ནི་འོད་གསལ་བའི། །སྐར་མའི་ཚོགས་ནི་རབ་བསྒོམས་ཏེ། །དེ་ལས་བྱུང་བའི་ཁྲོ་ཕྲེང་ཚོགས། །སྔོན་པོའི་ [62a.3]མདོག་ཅན་འོད་ཟེར་ནི། །བརྒྱ་ཕྲག་སྟོང་གིས་ཡོངས་བསྐོར་བའི། །ཧཱུཾ་ཞེས་གྲགས་པ་བསྒོམ་པར་བྱ། །དེ་ལས་འོད་ཟེར་རབ་བྱུང་བས། །འོད་ཀྱི་རྩེ་ལྔ་སངས་རྒྱས་སོགས། །རྡུལ་སྙེད་གྲངས་ནི་རབ་སྤྲུལ་ནས། །སྤྲུལ་པ་དེ་དག་ཐམས་ཅད་ཀྱིས། །སངས་རྒྱས་ཞིང་དུ་རབ་གཤེགས་ཏེ། །སེམས་ཅན་ [62a.4]ཁམས་རྣམས་དག་བྱས་ཤིང་། །བྱང་ཆུབ་སེམས་ནི་རབ་བསྐྱེད་དང་། །སྡོམ་པ་གཟུང་དང་རྗེས་ཡི་རང་། །གསོལ་བཏབ་བསྒུལ་བ་སོགས་བྱས་ནས། །སངས་རྒྱས་རྫུ་འཕྲུལ་རབ་བསྟན་ཏེ། །ཕྱིར་ལ་ཧཱུྃ་དེར་འདུ་བྱས་ནས། །ཧཱུྃ་དེ་ཉིད་ལ་ཞུགས་པར་བསམ། །དེ་ལས་ཡོངས་འགྱུར་ཁ་དོག་ནི། ། [62a.5]སྔོན་པོ་ལ་སོགས་དྲུག་ལྡན་ཞིང་། །དེ་ཡི་འོད་ཀྱིས་ཞིང་ཁམས་དྲུག །ཁྱབ་པར་བྱས་ནས་འབར་བ་ཡིས། །བདུད་འཇིགས་མི་ཐུབ་ཞལ་དྲུག་པ། །ཡེ་ཤེས་རྡོ་རྗེ་རྩེ་ལྔ་བསྒོམ། །ཡེ་ཤེས་རྡོ་རྗེའི་བུམ་ནང་དུ། །དཀར་པོའི་ཡི་གེ་བྷྲཱཾ་བསམས་ཏེ། །དེ་ལས་གྱུར་པས་རིན་པོ་ཆེའི། །སྟོང་གསུམ་ཙམ་གྱི་མཆོད་རྟེན་ [62a.6]བསྒོམ། །དེ་ནང་ཧྲཱིཿཡི་ཡི་གེ་ལས། །གྲུ་གསུམ་ཆོས་འབྱུང་བསམ་པར་བྱ། །དེ་ནང་ཡི་གེ་རྫོགས་པ་ལས། །སྣ་ཚོགས་རྡོ་རྗེ་བསྒོམ་པར་བྱ། །དེ་ལས་ཡང་ནི་བྷཱུཾ་ལས་ནི། །རྫོགས་པའི་གཞལ་ཡས་རྣམ་པར་བསྒོམ། །གྲུ་བཞི་པ་ལ་སྒོ་བཞི་པ། །ཏྭ་ར་རྣམ་བཞིས་རྣམ་བརྒྱན་ཅིང་། །དྲིལ་བུ་ [62a.7]དར་དང་འཕན་ལ་སོགས། །མེ་ཏོག་ཕྲེང་དང་རྔ་ཡབ་ཀླུབས། །གྲྭ་རྣམས་དང་ནི་ཐམས་ཅད་དང་། །སྒོ་རྣམས་དང་ནི་ཁྱམས་སུ་ཡང་། །རྡོ་རྗེ་རིན་ཆེན་རྣམས་དང་ནི། །ཟླ་གམ་ཆུན་འཕྱང་རྣམས་ཀྱིས་བརྒྱན། །དྲ་བ་དྲ་ཕྱེད་བཀོད་པ་ལ། །སྣ་ཚོགས་རྒྱན་གྱིས་ཀླུབས་པའོ། །རྡུལ་ཚོན་ཁ་དོག་རྣམ་ [62b] [62b.1]ལྔ་ཡིས། །ཕྱིའི་དཀྱིལ་འཁོར་བྲི་བར་བྱ། །དཀྱིལ་འཁོར་དེ་དང་འདྲ་བ་རུ། །ཞུགས་ནས་ནང་གི་གཞལ་ཡས་ཁང་། །འཁོར་ལོའི་ཚོགས་ཞེས་རབ་བསྟན་ཅིང་།།ཕྲེང་བ་བཞི་དང་ལྡན་པ་ཡི། །རྡོ་རྗེ་དབྱིངས་ཞེས་བརྗོད་པ་ནི། །དེ་ནས་ཕྱི་རོལ་དགོད་པར་བྱ། །རྡོ་རྗེ་ཕྲེང་བས་ཡོངས་བསྐོར་བ། །ཀ་བ་ [62b.2]བརྒྱད་དང་ལྡན་པ་ལ། །རྡུལ་ཚོན་ལྔ་པོ་ཉིད་ཀྱིས་ནི། །དྲ་བ་དྲ་ཕྱེད་ཉིད་ཀྱིས་ཀླུབས། །དཀྱིལ་འཁོར་ཀྱི་ནི་ཕྱི་རོལ་དུ། །ཇི་ལྟར་གསུངས་པའི་རྟགས་ཐམས་ཅད། །ཁྱད་པར་དུ་ནི་མདོར་གསུངས་ནས། །དེ་ཡི་དེ་ཡིས་ཐམས་ཅད་བྱ། །སྒོ་ཡི་མཚམས་དང་ཏྭ་ར་ན། །ཤིན་ཏུ་གཅིག་ཉིད་མི་བྱའོ། ། [62b.3]དེ་ཕྱིར་དེ་ཡི་སྒོ་རྣམས་ནི། །ཏྭ་ར་ན་རྣམས་གདགས་པ་ཡིན། །གོ་རིམས་བཞིན་དུ་ལྷ་རྣམས་ཀྱི། །གདན་ནི་ཕྱི་ནས་དགོད་པར་བྱ། །དེ་ནས་དབུས་སུ་དགོད་པ་ཉིད། །གཙོ་བོ་ཡི་ནི་གདན་ཡིན་ནོ། །ཤར་ལ་སོགས་པའི་ཕྱོགས་ཀུན་ཏུ། །མི་བསྐྱོད་པ་ལ་སོགས་པའི་གདན། །རང་གི་ས་བོན་ [62b.4]གྱིས་བསྐྱེད་པ། །དེ་ནི་སྤྱོར་བས་རིག་པར་བྱ། །གདན་གྱི་ངོ་བོ་བསམ་པ་ནི། །དབུས་སུ་སཾ་ལས་སེང་གེའོ། །ཧཾ་ལས་ཤར་དུ་གླང་པོ་ཆེ། །ལྷོ་རུ་རྟ་ནི་ཨི་ལས་སོ། །རྨ་བྱ་ནུབ་ཏུ་ཡི་ལས་བསམ། །ཁཾ་ལས་མཁའ་ལྡིང་བྱང་དུ་བསྒོམ། །དེ་སྟེང་པཾ་ལས་པདྨ་དང་། །དར་གྱི་གློད་སྟན་དག་དང་ལྡན། །རྡོ་རྗེ་སེམས་ [62b.5]དཔའ་ནས་བརྩམས་ཏེ། །རྡོ་རྗེ་འབེེབས་པའི་མཐར་ཐུག་པར། །གདན་ནི་ཨ་ལས་བསྐྱེད་པ་ཡི། །ཟླ་བའི་དཀྱིལ་འཁོར་ལྟ་བུ་ཡི། །སྟེང་ན་སེམས་དཔའི་སྟབས་སུ་ཞུགས། །དེ་ལྟར་བསྒོམ་པའི་བྱ་བ་ནི། །ཡིད་ཀྱི་ཡུལ་ཏེ་གོམས་པར་བྱ། །དེ་དག་ནི་གཞིའི་ཏིང་ངེ་འཛིན་ཏོ། །དེ་ནས་རྐྱེན་གྱིས་སློང་བ་ནི། ། [62b.6]དེ་དབུས་འཁོར་ལོའི་བདག་པོ་སྟེ། །པདྨ་སེང་གེའི་ཟླ་སྟེང་དུ། །ཨ་ལས་བསྐྱེད་པའི་རྟག་པ་ནི། །གཙོ་བོ་རྣམ་པར་སྣང་མཛད་ཆེ། །རྣམ་ཐར་བཞིར་ལྡན་ཀུན་དུ་ཞལ། །མདོག་དཀར་རལ་པའི་དབུ་རྒྱན་ཅན། །བྱང་ཆུབ་མཆོག་གི་ཕྱག་རྒྱར་ལྡན། །བྱིས་པའི་རྒྱན་གྱིས་མི་བཞུགས་ཤིང་། །འཁོར་ལོ་ [62b.7]བསྐྱེད་པ་རྒྱུ་བསྒོམ་མོ། །རྟག་པའི་སངས་རྒྱས་བསྒོམ་པ་ནི། །ཏིང་འཛིན་འདི་ནི་མཆོག་ཏུའོ། །དེ་ནས་སྣང་མཛད་ཆེན་པོ་ཡི། །ཐུགས་ཀར་ཟླ་བའི་དཀྱིལ་འཁོར་གྱི། །དཀྱིལ་དུ་ཡི་གེ་དྷཱིཿདཀར་ལས། །དང་པོའི་སངས་རྒྱས་ཞལ་ལྔ་པ། །བྱིས་པའི་རྒྱན་གྱིས་རྣམ་བརྒྱན་ཅིང་། །རིན་ཆེན་སྣ་ཚོགས་ན་ [63a] [63a.1]བཟའ་ཅན། །ཕྱག་བརྒྱད་མངའ་བའི་ཕྱག་མཚན་ནི། །གཡས་པ་བཞི་ནི་གོ་རིམས་བཞིན། །ཤེས་རབ་ཀྱི་ནི་རལ་གྲི་བསྣམས། །དེ་བཞིན་གཡོན་པའི་ཕྱག་བཞི་ན། །ཤེས་རབ་ཕ་རོལ་ཕྱིན་པ་ཡི། །པོ་ཏི་རེ་རེ་བསྣམས་པའོ། །དང་པོའི་སངས་རྒྱས་བསྒོམ་པའི་ཏིང་ངེ་འཛིན་ནོ། །དང་པོའི་ [63a.2]སངས་རྒྱས་ཐུགས་ཀ་རུ། །ཤེས་རབ་འཁོར་ལོ་རྣམ་བསྒོམ་པ། །ས་མཆོག་བཅུ་གཉིས་དང་ལྡན་པའི། །འཁོར་ལོ་ལྟེ་བའི་རྩིབས་དང་ལྡན། །རྩིབས་རྣམས་ལྟེ་བ་ལ་གནས་པ། །རྟེན་ཅིང་འབྲེལ་པར་འབྱུང་སྦྱོར་བས། །བཅུ་གཉིས་པ་དང་ལྡན་པ་ཡིན། །འཁོར་ལོ་འདིར་ནི་གྱུར་པའོ། །དེ་ཡང་འཁོར་ལོ་ [63a.3]བསྒོམ་བྱ་བ། །ཡི་གེ་ཨ་ལས་ཡོངས་བསྐྱེད་པའི། །ལྕེ་དྲུག་ཁ་དོག་དྲུག་དང་ལྡན། །མུ་ཁྱུད་བཞི་ཡིས་བསྐོར་བ་ཡི། །འཁོར་ལོ་དེ་ཡི་དབུས་ཉིད་དུ། །ཡི་གེ་ཨ་དཀར་བསམ་བྱ་སྟེ། །དེ་ཉིད་འཕྲོས་པས་ཕྱོགས་བཅུ་ཡི། །དོན་བྱས་སླར་འདུས་གཞི་ལ་ཐིམ། །ཐིམ་པའི་བྱིན་བརླབས་ལས་བསམ་པ། ། [63a.4]བཅོམ་ལྡན་ཡེ་ཤེས་སེམས་དཔའ་ཡི། །རྩ་བའི་སྔགས་སོགས་འཁོར་ལོ་ཡི། །མུ་ཁྱུད་བཞི་ལ་གསལ་བར་བསྒོམ། །དང་བོའི་མུ་ཁྱུད་ལ་བསམ་པ། །ཨོཾ་སརྦ་དྷརྨྨ་ཨ་བྷ་བ་སྭ་བྷ་བ། བི་ཤུདྡྷ་བཛྲ་ཨ་ཨཱ་སཾ་ཨཿ། དེ་ཡི་ཕྱི་རིམ་མུ་ཁྱུད་ནི། །གཉིས་པ་ལ་ནི་བསམ་བྱ་བ། །ས་མཆོག་ [63a.5]བཅུ་གཉིས་རྫོགས་རྟགས་སུ། །སྒྲ་ཡིག་བཅུ་གཉིས་དགོད་པ་ནི། །ཨ་ཨཱ་ཨི་ཡཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ། འཁོར་ལོ་ལྕེ་ལ་བསམ་པ་ནི། །དང་པོ་ལྕེ་ནས་བསམ་བྱས་ཏེ། །སྔགས་ནི་ཇི་ཙམ་བཀོད་པ་ནི། །རིགས་ཀྱི་མདོག་དང་སྦྱར་བར་བྱ། །དང་པོ་ལྕེ་ལ་བསམ་བྱ་བ། །ཨོཾ་བཛྲ་ཏཱིཀྵ་ཡ་ཏེ་ [63a.6]ན་མཿ། གཉིས་པ་ལ་ནི་དགོད་བྱ་བ། །ཨོཾ་དུཿཁཙྪེ་ད་ཡ་ཏེ་ན་མཿ། གསུམ་པ་ངེས་པར་དགོད་པ་ནི། །ཨོཾ་པྲཛྙཱ་ཛྙཱ་ན་རྨཱུརྟྟ་ཡེ་ཏ་ན་མཿ།བཞི་པ་རྟག་ཏུ་རིག་བྱ་བ། །ཨོཾ་ཛྙཱ་ན་ཀཱ་ཡཱ་ཡ་ཏེ་ན་མཿ། ལྔ་པ་ལ་ནི་ངེས་བསྒོམ་པ། །ཨོཾ་བཱ་གཱི་ཤྭ་ར་ཡ་ཏེ་ན་མཿ། དྲུག་ལ་མཐའ་སྟེ་བསམ་པ་ནི། །ཨོཾ་ཨ་ར་ [63a.7]པ་ཙ་ན་ཡ་ཏེ་ན་མཿ། འཁོར་ལོ་མུ་ཁྱུད་གསུམ་པ་ལ། །བཅོམ་ལྡན་བདེ་གཤེགས་ཐམས་ཅད་ཀྱི། །ཡེ་ཤེས་སེམས་དཔའ་སྐུ་ཡི་སྔགས། །ཕྲེང་བ་དགོད་པ་འདི་དག་གོ། །ཨ་ཨཱ་སརྦྦ་ཏ་ཐཱ་ག་ཏ་ཏྲྀ་ད་ཡ། ཧ་ར་ཧ་ར། ཨོཾ་ཧཱུྃ་ཧྲཱིཿབྷ་ག་བཱན། ཛྙཱ་ན་མཱུརྟྟི། བཱ་གཱི་ཤྭ་ར་མ་ཧཱ་པཱ་ཙ། སརྦྦ་དྷ་རྨྨ་ག་ [63b] [63b.1]ག་ན་ཨ་མ་ལ་སུ་པ་རི་ཤུདྡྷ། དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿ། ཕྱི་རོལ་མུ་ཁྱུད་ཐ་མ་ལ། །ཡི་གེ་ཀ་སོགས་ཧ་ཡི་མཐར། །ཐུག་པའི་ཡི་གེ་རྣམས་བཀོད་པ། །འཁོར་ལོ་སྔགས་ཀྱི་རིམ་པའོ། །འཁོར་ལོ་དེ་དག་ཐམས་ཅད་ཀྱང་། །བྲིའམ་བསམ་པ་བྱས་ན་ནི། །ཉེས་པར་མི་འགྱུར་ལེགས་པ་འཐོབ། །དེ་ནི་ [63b.2]ཤེས་རབ་འཁོར་ལོའོ། །ཤེས་རབ་ཀྱི་འཁོར་ལོའི་ཏིང་ངེ་འཛིན་ཏོ། །དེ་ནས་འཁོར་ལོ་དེ་དབུས་སུ། །ཨ་ལས་བསྐྱེད་པའི་བཅོམ་ལྡན་འདས། །ཡེ་ཤེས་སེམས་དཔའ་ཞལ་དྲུག་པ། །སྟོན་ཀའི་ཟླ་བ་ལྟར་གསལ་ཞིང་། །ཨིནྡྲ་ནཱི་ལའི་གཙུག་ཕུད་ཅན། །ཉི་མ་འཆར་ཀའི་འོད་འདྲས་བསྐོར། །ཞི་བའི་ངང་ [63b.3]ཚུལ་དང་ལྡན་ཞིང་། །གཡས་དང་གཡོན་གྱི་ཕྱག་གཉིས་ཀྱིས། །ཨུཏྤལ་དམར་པོ་གཡས་པ་ནི། །གཡོན་པ་ན་ནི་སྔོན་པོ་ཉིད། ཨུཏྤལ་དེ་གཉིས་སྟེང་ཉིད་ན། །ཤེས་རབ་པོ་ཏིས་མཛེས་པའོ། །དེའི་ཐུགས་ཀར་ཟླ་བ་བསམ། །དེ་དབུས་ཐམས་ཅད་ཀུན་ངོ་བོ། །ཡི་གེ་ཨ་ནི་གསལ་བཀོད་དེ། །དེ་ནས་ [63b.4]འཁོར་ལོ་ལ་གནས་སྔགས། །ཇི་ལྟར་བསྟན་པའི་ཁ་དོག་དང་། །དེ་བཞིན་ལྡན་པར་རྣམ་བསམ་སྟེ། །མི་ཤེས་རི་འཇོམས་འོད་དང་ལྡན། །འོད་དེས་རང་གི་ལུས་ཉིད་ལ། །སྣང་བ་བྱེད་པ་བསྒོམ་པར་བྱ། །སྣང་བར་གྱུར་མ་ཐག་ཏུ་ནི། །ཞལ་བཞིའི་སྒོ་ནས་དབྱུང་བྱ་སྟེ། །འཇིག་རྟེན་ཁམས་ཀུན་ [63b.5]སྣང་བར་བྱས། །དེ་ནས་རྡོ་རྗེ་སྒོ་དྲུག་ནས། །ཁ་དོག་དྲུག་ལྡན་འོད་ཕྱུང་སྟེ། །ནམ་མཁའི་ཁམས་ཀུན་ཁྱབ་བྱས་ནས། །སངས་རྒྱས་ཞིང་ཁམས་གསལ་བར་འགྱུར། །ལས་གཉིས་བྱས་ནས་སླར་འདུས་པས། །ཡེ་ཤེས་རྡོ་རྗེ་དེ་ཉིད་ལ། །ལན་གསུམ་བསྐོར་ནས་ཁར་ཞུགས་ཏེ། །ཤེས་རབ་ [63b.6]ཡེ་ཤེས་དེ་བཀུག་ནས། །བདག་མེད་མ་ལ་རབ་བཅུག་ནས། །སྙིང་ག་ཟླ་བ་ལ་གནས་པའི། །སྔགས་དང་གཅིག་ཏུ་འདྲེས་གྱུར་ནས། །དེ་ཉིད་བརྟན་པར་བདག་གིས་བསྒོམ། །དེ་ལྟར་སྤྱོད་པའི་སེམས་དཔའ་ཡིས། །ཡེ་ཤེས་སྐུ་ཡི་རྣམ་པ་དང་། །ཟླ་བའི་སྒོ་ནས་གཟུགས་བསམས་ནས། །ཨ་ཡི་རྣམ་ [63b.7]པས་གཟུགས་བསྒོམ་པ། །གསུམ་པ་སྤྲུལ་པའི་གཟུགས་ཀྱི་སྐུ། །རིང་པོར་མི་ཐོགས་འདུལ་དབང་གིས། །ཉེ་བར་བཟུང་ནས་མངོན་སྣང་ངོ་། །དེ་དག་གིས་ནི་བྱང་ཆུབ་པའི་སྒྱུ་འཕྲུལ་དྲ་བའི་དང་པོ་སྦྱོར་བའི་ཏིང་ངེ་འཛིན་ཏོ། །དེ་ནས་རིགས་ཀྱི་འཁོར་ལོ་དྲུག །རིམ་པ་བཞིན་དུ་བཤད་བྱས་ཏེ། ། [64a] [64a.1]གཙོ་བོའི་གནས་སུ་ཧྲཱིཿལས་ནི། །མཐའ་ཡས་དམར་པོའི་མདོག་ལྡན་པ། །ཏིང་འཛིན་སྦྱོར་བ་ལ་གནས་ཏེ། །དེ་ཡི་སྙིང་གར་དང་པོ་ཡི། །སངས་རྒྱས་གོང་དང་མཐུན་པར་བསྒོམ། །དེའི་ཐུགས་ཀར་འཁོར་ལོ་ནི། །ལྕེ་བརྒྱད་མུ་ཁྱུད་བཞིར་ལྡན་པ། །སྔགས་དང་ལྡན་ [64a.2]པར་བསྒོམ་པར་བྱ། །བརྒྱད་དང་ལྡན་པའི་ས་བོན་ནི། །ཨོཾ་བཛྲ་ཏཱིཀྵ་ཡ་ཏེ་ན་མཿཞེས་པའི་སྔགས་ནི་དགོད་བྱས་ནས། །འཁོར་ལོའི་ལྟེ་བའི་དབུས་ཉིད་དུ། །ཡི་གེ་དྷཱིཿལས་ཡོངས་གྱུར་པའི། །རྡོ་རྗེ་རྣོན་པོ་མདོག་དམར་པོ། །གཙུག་ཕུད་ལྔ་ཡི་དབུ་རྒྱན་ཅན། །གཞོན་པའི་རྒྱན་དང་ལྡན་པ་ཡི། ། [64a.3]སྣ་ཚོགས་དར་གྱི་གོས་དང་ལྡན། །གཡས་ན་ཤེས་རབ་རལ་གྲི་བསྣམས། །དེ་བཞིན་གཡོན་ན་པདྨ་འཛིན། །དེའི་སྙིང་ག་ཟླ་སྟེངས་ན། །ཡི་གེ་དྷཱིཿནི་རྣམ་བསྒོམས་ཏེ། །སྤྲོ་དང་བསྡུ་བ་སྔོན་བཞིན་བྱ། །དེ་བཞིན་དཀྱིལ་འཁོར་དེ་དབུས་སུ། །ཧཱུཾ་གི་ཡི་གེ་ལས་བསྐྱེད་པའི། །མི་བསྐྱོད་ས་གནོན་ [64a.4]ཕྱག་རྒྱ་ཅན། །སྔོན་པོའི་མདོག་ཅན་དེ་བཞིན་བསྒོམ། །དེ་ཡི་སྙིང་གར་དང་པོ་ཡི། །སངས་རྒྱས་བསྒོམ་པ་སྔོན་བཞིན་བྱ། །དེ་ཡི་སྙིང་གར་སྔོན་བཞིན་དུ། །ལྕེ་བརྒྱད་པ་ཡི་འཁོར་ལོ་བསྒོམ། །སྔོན་བཞིན་དེ་བཞིན་སྔགས་དགོད་བྱ། །རིམ་པ་བཞིན་དུ་ལྕེ་ལ་བསྒོམ། །ཨོཾ་དུཿཁཙྪེ་ [64a.5]ད་ཡ་ན་མཿ། ཞེས་པའི་སྔགས་ནི་དགོད་བྱ་སྟེ། །ལྟེ་བའི་དབུས་སུ་བསྒོམ་བྱ་བ། །ཡི་གེ་ཧཱུཾ་ལས་བསྐྱེད་བྱ་བ། །རྡོ་རྗེ་རལ་གྲི་ཞེས་ཀྱང་བྱ། །སྔོན་པོ་གཞོན་ནུའི་གཟུགས་དང་ལྡན། །ཟུར་ཕུད་ལྔ་ལ་ཅོད་པན་ཅན། །གཡས་གཡོན་རྡོ་རྗེ་རལ་གྲི་འཛིན། །དེ་ཡི་སྙིང་ག་ཟླ་སྟེང་ན། །ཡི་གེ་ཧཱུཾ་བསྒོམ་ [64a.6]སྔོན་བཞིན་དུ། །སྤྲོ་དང་བསྡུ་བ་སྔོན་བཞིན་བྱ། །དེ་ནས་སྔོན་གྱི་སྦྱོར་ལྡན་པས། །དེ་བཞིན་འཁོར་ལོའི་དབུས་ཉིད་དུ། །ཨ་ལས་བསྐྱེད་པའི་རྣམ་སྣང་མཛད། །དཀར་པོའི་མདོག་ལྡན་ཕྱག་རྒྱ་ནི། །བྱང་ཆུབ་མཆོག་དང་རབ་ལྡན་པའི། །འཁོར་ལོ་བསྒོམས་ཏེ་དེ་སྙིང་གར། །དང་པོའི་སངས་རྒྱས་ [64a.7]བསྒོམ་བྱ་སྟེ། །སྙིང་གར་ལྕེ་བཅུར་ལྡན་པར་བསམ། །ཨོཾ་པྲཛྙཱ་ཛྙཱ་ན་མཱུརྟྟ་ཡ་ན་མཿ། ཞེས་པའི་སྔགས་ནི་དགོད་བྱས་ཏེ། །དེ་ཡི་ལྟེ་བ་ལ་བསྒོམ་པ། །ཡི་གེ་ཨ་ལས་ཡོངས་གྱུར་པའི། །བཅོམ་ལྡན་ཤེས་རབ་ཡེ་ཤེས་ཅན། །མདོག་དཀར་སྔོན་གྱི་ཆ་ལུགས་ཅན། །གཡོན་ན་འཁོར་ལོ་རབ་འཛིན་ཅིང་། ། [64b] [64b.1]གཡས་ན་རལ་གྲི་དེ་བཞིན་ནོ། །དེ་ཡི་སྙིང་གང་ཟླ་དཀྱིལ་བསྒོམ། །དེ་སྟེང་ཡི་གེ་ཨ་བསྒོམས་ཏེ། །སྤྲོ་དང་བསྡུ་བ་སྔོན་བཞིན་བྱ། །དེ་བཞིན་དཀྱིལ་འཁོར་དབུས་ཉིད་དུ། །ཡི་གེ་ཨ་ལས་རབ་བྱུང་བ། །མདོག་ལྗང་དོན་གྲུབ་མི་འཇིགས་པ། །ཕྱག་རྒྱར་ལྡན་པ་བསྒོམ་བྱས་ཏེ། །དེ་ཡི་སྙིང་གར་དང་ [64b.2]པོ་ཡི། །སངས་རྒྱས་བསྒོམ་པ་སྔོན་བཞིན་ཏེ། །དེ་ཡི་ཐུགས་ཀར་ལྕེ་བརྒྱད་པའི། །འཁོར་ལོ་བསྒོམ་པ་སྔོན་བཞིན་བསྒོམ། །དེ་ཡི་ཐུགས་ཀར་དགོད་བྱ་ཡིས། །སྔགས་ཀྱི་རྒྱལ་པོ་འདི་དག་གོ །ཨོཾ་ཛྙཱ་ན་ཀཱ་ཡ་ཡ་ཏེ་ན་མཿ། ཞེས་པའི་སྔགས་ནི་དགོད་བྱ་སྟེ། །འཁོར་ལོ་ལྟེ་བའི་དབུས་ཉིད་དུ། ། [64b.3]ཨ་ལས་གྱུར་པའི་བཅོམ་ལྡན་འདས། །ཡེ་ཤེས་སྐུ་ཅན་མདོག་ལྗང་བ། །གཞོན་ནུའི་གཟུགས་ཅན་ཟུར་ཕུད་ནི། །ལྔ་པས་རབ་བརྒྱན་དར་གྱིས་ཀླུབས། །གཡོན་གྱིས་སྣ་ཚོགས་རྡོ་རྗེ་འཛིན། །གཡས་ཀྱིས་ཤེས་རབ་རལ་གྲི་འཛིན། །དེ་ཡི་ཐུགས་ཀར་ཟླ་བ་ཡི། །དཀྱིལ་འཁོར་དེ་ཡི་དབུས་སུ་ [64b.4]ནི། །ཡི་གེ་ཨ་ནི་རྣམ་བསྒོམས་ཏེ། །སྔོན་བཞིན་སྤྲོ་དང་བསྡུ་བ་བྱ། །དེ་ནས་སྔོན་བཞིན་དཀྱིལ་འཁོར་གྱི། །དབུས་ཨུ་ཨི་ལས་བྱུང་བ་ཡི། །རིན་ཆེན་འབྱུང་ལྡན་མདོག་སེར་པོ། །མཆོད་སྦྱིན་ཕྱག་རྒྱ་ལྡན་པར་བསྒོམ། །དེ་ཡི་ཐུགས་ཀར་དང་བོ་ཡི། །སངས་རྒྱས་དེ་བཞིན་བསྒོམ་ [64b.5]བྱས་ཏེ། །སྔོན་བཞིན་ལྕེ་བརྒྱད་རྣམས་ལ་ནི། །སྔགས་དང་ལྡན་པར་རྣམ་བསྒོམ་པ། །ཨོཾ་བཱ་གཱི་ཤྭ་ར་ཡ་ཏེ་ན་མཿ། ཞེས་པའི་སྔགས་རྣམས་དགོད་བྱས་ཏེ། །འཁོར་ལོ་དེ་ཡི་ལྟེ་བ་ལ། །ཨོཾ་ལས་བསྐྱེད་པའི་བཅོམ་ལྡན་འདས། །ངག་གི་དབང་ཕྱུག་ཅེས་བྱ་བ། །སྐུ་མདོག་སེར་པོ་རྒྱན་དང་ལྡན། ། [64b.6]ཟུད་ཕུད་ལྔ་པ་སྣ་ཚོགས་ཀྱི། །ན་བཟའ་རྣམས་ཀྱིས་རབ་ཀླུབས་པ། །གཡོན་གྱི་ཕྱག་ན་རིན་པོ་ཆེ། །གཡས་ན་ཤེས་རབ་རལ་གྲི་འཛིན། །དེ་བཞིན་དེ་ཡི་ཐུགས་ཀ་རུ། །ཟླ་བའི་སྟེང་ན་ཡི་གེ་ཨོཾ། །ཞེས་ནི་བྱ་བ་བསྒོམ་བྱས་ཏེ། །འཇོ་སྒེག་ལྡན་པར་རབ་མཛེས་པ། །ཡི་གེ་འབྲུ་དང་ལྡན་པ་དེ། །སྔོན་ [64b.7]བཞིན་སྤྲོ་དང་བསྡུ་བའོ། །དེ་ནས་སྔོན་བཞིན་དཀྱིལ་འཁོར་གྱི། །དབུས་ནས་ཡི་གེ་ལས་གྱུར་པ། །སྐྱེ་མེད་པ་བྱུང་ཨ་བསྒོམས་ཏེ། །དེ་ལས་གྱུར་པའི་བཅོམ་ལྡན་འདས། །བྱང་སེམས་རྡོ་རྗེ་ཞེས་གྲགས་པ། །སྐུ་མདོག་དཀར་པོ་གཞོན་ཚུལ་ཅན། །རིགས་ལྔའི་དབུ་རྒྱན་དག་དང་ལྡན། །རྒྱན་ནི་ [65a] [65a.1]སྐུ་དང་རབ་ལྡན་ཞིང་། །གཡས་དང་གཡོན་གྱི་ཕྱག་གཉིས་ན། །རྡོ་རྗེ་དང་ནི་དྲིལ་བུ་འཛིན། །དེ་ཡི་སྙིང་གར་བཅོམ་ལྡན་འདས། །དང་པོ་སངས་རྒྱས་བསྒོམ་བྱས་ཏེ། །དེ་ཡི་ཐུགས་ཀར་འཁོར་ལོ་ནི། །ལྕེ་བརྒྱད་པ་ནི་བསྒོམ་པར་བྱ། །སྔགས་དགུ་གཅིག་ལ་གཉིས་དགོད་བྱ། །ཨོཾ་ [65a.2]ཨ་ར་པ་ཙ་ན་ཡ་ཏེ་ན་མཿ། ཞེས་པའི་སྔགས་ནི་དགོད་བྱས་ཏེ། །དེ་ཡི་ལྟེ་བའི་དབུས་ཉིད་དུ། །ཨ་ལས་བསྐྱེད་པའི་བཅོམ་ལྡན་འདས། །ཨ་ར་པ་ཙ་ཞེས་བྱ་བ། །མདོག་དཀར་བྱིས་པའི་རྒྱན་གྱིས་ཀླུབས། །ཟུར་ཕུད་ལྔ་དང་རབ་ལྡན་ཞིང་། །སྣ་ཚོགས་དར་གྱི་ན་བཟས་བརྒྱན། །གཡས་དང་གཡོན་ [65a.3]ན་བསྣམས་པ་ནི། །བོ་ཏི་དང་ནི་རལ་གྲི་བསྣམས། །དེ་ཡི་སྙིང་གར་བསམ་བྱ་བ། །ཟླ་བའི་སྟེང་ན་ཡི་གེ་ཨ། །སྔོན་བཞིན་སྤྲོ་དང་བསྡུ་བྱས་ཏེ། །གནས་སུ་བརྟན་པར་དེར་འགྱུར་ནས། །བཟླས་དང་བསྒོམ་པ་གཏང་བར་བྱ། །རིགས་ཕྱེ་བའི་འཁོར་ལོའི་རིམ་པའི་ཏིང་ངེ་འཛིན་ནོ།། །།དེ་དག་ནི་རིགས་ཀྱི་ [65a.4]དབང་གིས་འཁོར་ལོའི་རིམ་པ་བསྟན་པ་ཡིན་ནོ། །དེ་ནས་ད་ནི་དཀྱིལ་འཁོར་གྱི་ལྷ་དག་གི་ངོ་བོ་གསང་སྔགས་ཀྱི་སྒོ་ནས་དེ་དག་གི་རིམ་པ་བསྐྱེད་པར་བྱ་སྟེ། དང་པོའི་སངས་རྒྱས་བསྟན་པ་ཡི། །བདག་ཉིད་གསལ་བའི་ཐུགས་ཀ་རུ། །ཡེ་ཤེས་ཟླ་སྟེང་ཨ་གནས་ལས། །སྤྲོ་དང་བསྡུ་བའི་བྱེ་བྲག་གིས། ། [65a.5]གསང་སྔགས་འདི་ནི་ཆེད་བརྗོད་བྱ། །ཨ་ཨཱ་སརྦྷ་ཏ་ཐཱ་ག་ཏ་ཧྲི་ད་ཡ། ཧ་ར་ཧ་ར། ཨོ་ཧཱུཾ་ཧྲཱིཿབྷ་ག་བཱན། ཛྙཱ་ན་མཱུརྟྟི། བཱ་གཱི་ཤྭ་ར། མ་ཧཱ་པཱ་ཙ། སརྦ་དྷརྨཱ། ག་ག་ན། ཨ་མ་ལ། སུ་པ་རི། ཤུདྡྷཱ་དྷརྨྨཱ་དྷཱ་ཏུ་ཛྙཱ་ན་གརྦྷ་ཨཱཿ། ཞེས་པའི་གསང་སྔགས་བརྗོད་བྱས་པས། །སོ་སོའི་སྐུ་རྣམས་གསལ་བར་བསྒོམ། ། [65a.6]གསང་སྔགས་དེ་ཡི་འོག་ཉིད་དུ། ཨ་ཡི་འཕྲོ་འདུ་གནས་སྐབས་སུ། །བཅུ་གཉིས་མཛད་པ་རྫོགས་བྱས་ཏེ། །སངས་རྒྱས་མཛད་པ་རྫོགས་ནས་སུ། །སླར་ལོག་ཡི་གེའི་མཚན་མ་ཀུན། །རང་གི་མདོག་ལྟར་གསལ་འགྱུར་ཏེ། །སོ་སོའི་གནས་སུ་བཀོད་པ་ལས། །ཟླ་བ་ལ་གནས་ཆོ་ག་གསུམ། །སྐུ་ [65a.7]རྫོགས་ཤར་ལ་སོགས་པ་རུ། །གོ་རིམས་བཞིན་དུ་བཞུགས་པར་བསྒོམ། །དེ་དག་ནི་ལྷ་བསྒོམ་ཞིང་འབྱུང་བའི་ཏིང་ངེ་འཛིན་ཏོ། །དེ་ནས་ལྷ་རྣམས་སོ་སོ་ཡི། །མཚན་མའི་བྱེ་བྲག་བསྟན་པར་བྱ། །དང་པོ་ཤར་གྱི་འཁོར་ལོ་ཡི། །ལྕེ་ལ་ཟླ་གནས་དེ་ཉིད་དུ། །ཡི་གེ་ཧཱུཾ་ལས་གྱུར་པ་ཡི། །མི་བསྐྱོད་པ་ནི་ [65b] [65b.1]བསྒོམ་པར་བྱ། །རབ་ཏུ་དཀར་བའི་དབུ་རྒྱན་ཅན། །འཇིགས་བྱེད་བདུད་གནོན་སྐྱིལ་ཀྲུང་བཞུགས། །ལྷོ་རུ་ཏྲཱཾ་ལས་ཡོངས་བསྐྱེད་པའི་།།རིན་ཆེན་འབྱུང་ལྡན་དེ་བཞིན་གཤེགས། །ཤིན་ཏུ་སེར་བ་མརྒཏ་འདྲ།།ཅོད་པན་དང་ལྡན་མཆོག་སྦྱིན་མཛད། །ནུབ་ཏུ་ཧྲཱིཿལས་བསྐྱེད་པ་ཡི། །བསྐྱེད་པ་བདེ་གཤེགས་ [65b.2]སྣང་མཐའ་ཡས། །རཱ་གའི་མདོག་འདྲ་ཏིང་འཛིན་རྒྱལ། །དབུ་རྒྱན་དང་ལྡན་ཡེ་ཤེས་ལྡན། །བྱང་དུ་མཚན་རྫོགས་དོན་ཡོད་གྲུབ། །ནཱི་ལའི་མདོག་འདྲ་སྐྱབས་དང་ལྡན། །དབུ་རྒྱན་མཉམ་པའི་སྟབས་ཀྱིས་བཞུགས། །སངས་རྒྱས་དེ་དག་ཐམས་ཅད་ཀྱང་། །སྤྱི་དང་ཁྱད་པར་རྒྱན་རྣམས་ཀུན། །འཁོར་ [65b.3]ལོའི་སྐབས་ལས་ཤེས་པར་བྱ། །ཤར་ལྷོ་ཟླ་བའི་གདན་སྟེངས་སུ། །སེམས་མ་རྡོ་རྗེ་ཞེས་པ་དཀར། །ཨ་ལས་བྱུང་སྟེ་རྡོ་རྗེའོ། །ལྷོ་ནུབ་ཟླ་སྟེང་བསམ་བྱ་བ། །ཨ་ལས་བསྐྱེད་པའི་རིན་ཆེན་མ། །སྔོ་བསངས་མཛེས་མའི་ཐབས་ཚུལ་ཅན། །རང་གི་རིགས་ཀྱི་མཚན་མ་འཛིན། །ནུབ་བྱང་ཟླ་དཀྱིལ་ [65b.4]སྟེང་བསྒོམ་པ། །མོས་པ་ཨི་ལས་བྱུང་བ་སྟེ། །དམར་པོའི་མདོག་ལྡན་པདྨ་འཛིན། །བརྗོད་པའི་ཚུལ་ཅན་བསྒོམ་པར་བྱ། །བྱང་ཤར་ཟླ་སྟེང་བསྒོམ་བྱ་བ། །ལས་མཆོག་མ་སྟེ་མདོག་ལྗང་མོ། །གསལ་བའི་བདག་ཉིད་ཆེན་མོ་སྟེ། །སྣ་ཚོགས་རྡོ་རྗེ་འཛིན་པའོ། །སེམས་མ་རྡོ་རྗེ་ལ་སོགས་ཀྱང་། ། [65b.5]རང་གི་རིགས་ཀྱི་མཚན་མ་ཡིས། །དབུ་རྒྱན་སྐུ་ལ་སྣ་ཚོགས་པའི། །བྱིས་པའི་རྒྱན་གྱིས་བརྒྱན་པ་པོ། །དེ་ཡི་ཕྱི་རིམ་འཁོར་ལོ་ནི། །ལྕ་སྟེང་ཟླ་བ་བསྒོམ་བྱ་བ། །དབྱངས་ཀྱི་ཡི་གེ་བྱེ་བྲག་ལས། །སོ་སོའི་སེམས་དཔའ་བཅུ་དྲུག་བསྐྱེད། །དང་པོའི་འཁོར་ལོ་ནས་བརྩམས་ཏེ། །དེ་ལ་ཐུག་ [65b.6]པའི་ཟླ་སྟེངས་སུ། །རིགས་ཀྱི་སེམས་དཔར་ཆེན་པོ་ནི། །རིགས་ལས་སྐྱེས་ཏེ་རིམ་བཞིན་བརྟག །དང་པོའི་འདོད་པ་སེམས་དཔའ་ཆེ། །གཉིས་པ་རྒྱལ་པོ་བདེ་བ་ཆེ། །གསུམ་པ་ཆགས་པ་དགའ་བ་ཆེ། །བཞི་པ་ལེགས་ལ་མགུ་བ་ཆེ། །ཡི་གེ་དྷཱིཿལས་དེ་དག་བསྐྱེད། །ཨ་ཨཱ་ཨི་ཨཱི། [65b.7]སྟོང་བཞི་བདག་ཉིད་ཆེན་པོས་འཇོམས། །རིམ་བཞིན་རྡོ་རྗེ་མདའ་གཞུ་དང་། །ལྕགས་ཀྱུ་ཏོག་པར་ལྡན་པ་སྟེ། །འགྱིང་དང་ལྡན་ཞིང་རིགས་ཀྱིས་བརྒྱན། །ཤར་སྟེང་ཟླ་བ་ལ་གནས་བསྒོམ། །ལྷོ་ཡི་འཁོར་ལོའི་སྟེང་བསམ་པ། །གཟུགས་ཆེ་ལུས་ཆེ་རིན་ཆེན་དཔལ། །ཁ་དོག་ཆེ་གསལ་ཉི་མའི་ [66a] [66a.1]དཔལ། །མིང་ཡང་ཆེ་ལ་ཏོག་གི་དཔལ། །དཀྱིལ་ཡངས་རྡོ་རྗེ་བཞད་པའི་དཔལ། །གསལ་དེ་དོན་ལྡན་འདི་ལས་སྐྱེས། །ཨུ་ཨཱུ་ཨེ་ཨཻ། དེ་ལྟར་སྟོང་ལྡན་དཔལ་མཆོག་རྣམས། །རིན་ཆེན་ཉི་མ་རྒྱལ་མཚན་ཚེམས། །རིམ་བཞིན་ཐོགས་ནས་གཙོ་ལ་བལྟ། །ནུབ་ཀྱི་ [66a.2]འཁོར་ལོའི་སྟེང་ཉིད་དུ། །སེམས་དཔའ་རིམ་བཞིན་བསམ་བྱ་བ། །ཤེས་རབ་མཚོན་ཅན་མ་ཆགས་ཆོས། །ཉོན་མོངས་ཆེ་བ་སེམས་དཔའ་གཅོད། །གྲགས་ལྡན་སེམས་དཔའ་ཀུན་གྱི་རྒྱུད། །སྣང་གསལ་སེམས་དཔའ་གསལ་བར་སྨྲ། །འདོད་ལྡན་ཚོགས་པ་དེ་དག་ཀྱང་།ཆགས་པ་འཇོམས་ [66a.3]རྣམས་འདི་ལས་སྐྱེས། །ཨོ་ཨཽ་ཨཾ་ཨཿ། བདག་ཉིད་དེ་དག་སྟོང་པའི་དཔལ། །འཛིན་ཚུལ་པདྨ་རལ་གྲི་དང་། །འཁོར་ལོ་ལྕེ་དག་སོ་སོ་ཡི །ཕྱག་ཆར་འཛིན་པ་ཟུར་ལ་བལྟ། །བྱང་ཕྱོགས་འཁོར་ལོའི་སྟེང་བསྒོམ་པ། །སྒྱུ་མ་མཁས་པ་རྡོ་རྗེ་ལས། །དོན་གྲུབ་པ་ནི་སེམས་དཔའ་བསྲུང་། །དགའ་བ་ [66a.4]ལ་དགའ་གནོད་སྦྱིན་ཏེ། །མི་འཕྲུལ་ཀུན་ལྡན་སྡུད་པ་པོ། །རིམ་བཞིན་གསང་སྔགས་འདི་ལས་སྐྱེས། །ཨ་ཨཱ་ཨེ་ཨཻ། འདི་ལས་རིམ་བཞིན་བསྐྱེད་པ་ནི། །སྣ་ཚོགས་རྡོ་རྗེ་གོ་ཆ་དང་། །མཆེ་བ་ཁུ་ཚུར་རྣམ་བཟུང་ནས། །ལས་དག་ཡིན་ཏེ་གཙོ་ལ་འདུད། །དེ་དག་མ་ལུས་སེམས་དཔའ་ཡང་། །ཇི་ [66a.5]ལྟར་གསུང་རབ་ལས་བྱུང་བ། །ཨ་ལ་བྱུང་སྟེ་མཚན་གྱི་སྔགས། །ཚིག་དང་ཡན་ལག་ཀུན་ལྡན་ནས། །འཁོར་ལོ་དེ་ཡི་བྱི་ཉིད་དུ། །མཆོད་པའི་ཚོགས་དག་བསྒོམ་བྱ་བ། །སྦྱིན་པ་ཚིམ་བྱེད་རྡོ་རྗེ་འགྱིང་། །སྡོམ་པ་སྲུང་བ་ཚུལ་ཁྲིམས་ཕྲེང་། །བཟོད་པ་འཛིན་པ་དབྱངས་ལེན་མ། །དགེ་བ་ལ་ [66a.6]བརྩོན་གར་མཛད་མ། །ལྷ་མོའི་ཚུལ་ནི་འདི་བཞི་ཡང་། །མིང་གི་ཡི་གེ་དང་པོས་བསྐྱེད། །ལཱ་མཱ་གཱིར་དང་ནཱི་ར་ལས་ཏེ། །འགྱིང་དང་ཕྲེང་ཐོགས་འཛིན་པ་དང་། །དབྱངས་དང་གར་དག་བྱེད་པ་ཡི། །ཚུལ་དང་ལྡན་ཏེ་བྱིས་པའི་ཚུལ། །དེ་འོག་ཕྱི་ཡི་ལྷ་མོ་བཞི། །རིམ་པར་འཐོན་ཏེ་གཞུང་ཚིག་ལྡན། །ཤེས་ [66a.7]རབ་ལུས་ཅན་བདུག་པ་མ། །བསམ་གཏན་དང་ཅན་མེ་ཏོག་འཛིན། །སྨོན་ལམ་ལྡན་པ་གསལ་བ་མེ། །ཐབས་ལྡན་ལྷ་མོ་དག་པའི་ཆུ། །ཡེ་ཤེས་སྟོབས་དང་ལྡན་པ་ཡི། །དད་བརྩོན་དྲན་དང་ཏིང་འཛིན་ལྡན། །འདི་ཡང་མིང་ལས་བསྐྱེད་པར་བྱ། །སྤོས་དང་མེ་ཏོག་གཞོང་པ་དང་། ། [66b] [66b.1]གསལ་བྱེད་དག་པའི་ཆུ་འཛིན་པའི། །ཚུལ་ལྡན་འགྱིང་མཛེས་བསྒོམ་པར་བྱ། །དེ་ཡི་ཕྱི་རིམ་བསྒོམ་བྱ་བ། །བྱམས་པ་འཇམ་དཔལ་སྤོས་གླང་པོ། །ཡེ་ཤེས་ཏོག་ཞེས་གྲགས་པ་བཞི། །བྱམས་པ་དཔག་མེད་སྙིང་རྗེ་ཆེ། །ཤེས་རབ་ཆེ་ཞིང་ཐབས་ཆེ་བ། །སོ་སོའི་རིགས་ལས་སྐྱེས་པ་སྟེ། ། [66b.2]རིམ་བཞིན་ཡི་གེ་ཨ་ལས་སྐྱེ། །ཕྱི་ལྟ་ནང་ལྟ་སེམས་དཔའི་སྟབས། །དེ་ནས་དེ་འོག་བསྒོམ་བྱ་བ། །བཟང་སྐྱོང་བློ་ཡི་རྒྱ་མཚོ་དང་། །བློ་གྲོས་མི་ཟད་སྤོབས་པ་བརྩེགས། །རིམ་པ་འདི་བཞིན་བསྒོམ་པར་བྱ། །རྫུ་འཕྲུལ་སྟོབས་དང་ཤུགས་དང་ལྡན། །རྫུ་འཕྲུལ་ལྡན་ཞིང་སྟོབས་ཀྱིས་གནོན། ། [66b.3]འདི་དག་ཀྱང་ནི་ཨ་ལས་ཏེ། །རིམ་པས་རྒྱན་ཡོད་སེམས་དཔའི་གཞུང་། །དེ་ཡི་འོག་ཏུ་བསྒོམ་བྱ་བ། །མཐུ་ཆེན་ཐོབ་དང་ངན་སོང་འདྲེན། །མྱ་ངན་འཇོམས་པ་དྲ་བའི་འོད། །རིམ་པ་བཞིན་དུ་བསྒོམ་པར་བྱའོ། །ཕུང་པོ་འཇོམས་ཤིང་ཉོན་མོངས་འདྲེན། །ཁྲོ་བོའི་ཚུལ་སྟོན་དྲག་ཤུལ་ [66b.4]ཆེ། །ལྷ་ཆེན་འཇིགས་བྱེད་ལ་སོགས་པའོ། །ཨ་ལས་དེ་དག་རིམ་བཞིན་བསྐྱེད། །འཇོ་སྒེག་ཁྲོ་ཚུལ་ལྡན་པའོ། །དེ་ཡི་འོག་ཏུ་བསྒོམ་བྱ་བ། །ཟླ་འོད་གཞོན་ནུ་འོད་དཔག་མེད། །ནམ་མཁའི་མཛོད་དང་སྒྲིབ་ཀུན་སེལ། །རིམ་བཞིན་ཨ་ལས་བསྐྱེད་པར་བྱ། །དེ་དག་བྱེ་བྲག་རིགས་ [66b.5]ཀྱི་མདོག །སྔགས་ཆེན་ཐེག་པའི་ཚུལ་ལ་གནས། །ཐེག་པ་ཀུན་གྱི་ནང་ན་མཆོག །ལྷ་བྱེད་ལ་སོགས་ལྡན་པའི་མཆོག །རིམ་གྱིས་རྟ་བབས་ཁྱམས་ནང་དུ། །མཁས་པས་རྟག་པར་རིམ་བཞིན་བསྒོམ། །སྒོ་ནས་སྔགས་པས་དགོད་བྱ་བ། །འགུགས་དང་འདྲེན་པ་འཆིང་བ་དང་། །མཉེས་ [66b.6]པ་རྣམས་ནི་རིམ་པ་བཞིན། །ལྕགས་ཀྱུ་ཞགས་པ་ལྕགས་སྒྲོག་དྲིལ། །རིམ་བཞིན་ཐོགས་ནས་ཚད་མེད་ལྡན། །ཨ་ལས་བསྐྱེད་དེ་སྒོ་བཞིར་གནས། །དེ་དག་ནི་རྒྱལ་བ་མཆོག་གི་དཀྱིལ་འཁོར་གྱི་ཏིང་ངེ་འཛིན་ནོ།། །།དེ་ནས་ལས་ཀྱི་ཁྱད་པར་ཡང་། །བསྐྱེད་པའི་ཞར་ལ་བྱུང་བས་ཏེ། །སྒྲ་ [66b.7]ལས་འཕེལ་ཏེ་རྒྱས་བཤད་པས། །འདི་རུ་བདག་གིས་མ་བཤད་དོ། །ལས་ཀྱི་ཁྱད་པར་གྱི་ཏིང་ངེ་འཛིན་ཏོ། །དེ་ནས་སྤོས་ཀྱི་ཆུ་དག་ལ། །སྔགས་བཟླས་པ་ཡིས་བསངས་བྱས་ཏེ། །ཕུང་པོ་བསྡུས་པའི་མཆོད་པ་ལྔས། །རིམ་བཞིན་བྱིན་རླབས་མདུན་གཞག་ནས། །འདི་དག་རིམ་ [67a] [67a.1]པའི་གོ་རིམས་ཀྱིས། །སེ་གོལ་རིམ་པར་ལྡན་བྱས་པས། །རིམ་བཞིན་བསྡུ་བའི་ཕྱག་རྒྱ་ནི། །ཛཿཧཱུཾ་བཾ་ཧོཿལྡན་བྱས་ཏེ། །མདུན་ན་མངོན་སུམ་བཞིན་མཐོང་ནས། །ས་མཱ་ཛཿཞེས་བརྗོད་བྱ་ཞིང་། །འཁོར་ལོའི་ཚོགས་མཆོག་དེ་དག་ལ། །མཉམ་མེད་ལ་སོགས་བསྟོད་ [67a.2]པ་བྱ། །དེ་ནས་གཙོ་བོའི་སྔགས་རིངས་ལ། །དྲྀ་ཤྱ་ཞེས་ཀྱང་བརྗོད་བྱ་ཞིང་། །ཨ་ཧཾ་ཞེས་དང་ལྡན་པ་ནི། །བཞི་ཡིས་རྒྱས་བཏབ་དོན་མཆོག་འགྲུབ། །དེ་ནས་མཆོད་པའི་བྱེ་བྲག་གིས། །མཆོད་ནས་ཕྱག་བཞི་བྱ་བ་ནི། །དང་པོའི་སངས་རྒྱས་ལ་སོགས་པའི། །གནས་སུ་བྱ་བའི་རིམ་པའོ། ། [67a.3]དེ་དག་ནི་སྔོན་དུ་བྱ་བའི་ཆོ་གའི་ཏིང་ངེ་འཛིན་ཏོ། །དེ་ནས་རང་དགའི་གནས་ཉིད་དུ། །གཟུགས་བརྙན་དཀྱིལ་འཁོར་བྲི་བར་བྱ། །ས་དེ་གཞུང་བཞིན་སྤྱོང་བ་དང་། །གཞུང་དང་ལྡན་པར་གཞུང་བཞིན་དུ། །བྱ་བའི་བྱེ་བྲག་གཞན་ནའོ།། །།དེ་ནས་མཆོད་པའི་བྱེ་བྲག་རྣམས། །སྔོན་དུ་བསྟན་པ་བཞིན་བྱས་ [67a.4]ཏེ། །སྤྲོ་བའི་སེམས་ནི་རབ་བསྐྱེད་དེ། །ཚིག་ལྡན་ཕྱག་བྱས་སྤོས་ཐོགས་ལ། །ཚིག་ཏུ་བརྗོད་པའི་སྔགས་ལྡན་པས། །བསྟོད་དེ་ལངས་ལ་འགྱིང་བཅས་པས། །བགེགས་བསལ་དོན་དུ་རབ་ཏུ་བསྐོར། །དེ་ནས་ཕུར་བུས་གདབ་པར་བྱ། །དེ་ནས་ཕྱག་རྒྱ་བཞི་བཀུག་ལ། །མཆོད་དེ་སྦྱིན་ [67a.5]སྲེག་མིང་རུས་ལ། །བཟླས་ཏེ་བྱ་བ་བསྟན་པ་ཡིན། །དེ་ལ་གཟུགས་བརྙན་བཤད་པ་ནི། །འཁོར་ལོ་རིམ་གསུམ་ལྡན་པ་ལ། །སྣམ་བུ་མུ་ཁྱུད་རྣམས་ཀྱིས་བརྒྱན། །རྟ་བབས་དང་ནི་ཏྭ་ར་ན། །ཤིན་ཏུ་མཛེས་པའི་རྒྱན་དང་ལྡན། །བ་དན་གདུགས་དང་རྔ་མས་བརྒྱན། །དྲིལ་བུ་རས་འཕེན་ [67a.6]རྒྱལ་མཚན་ཚོགས། །དེ་ལ་སོགས་པའི་རྒྱན་རྣམས་ནི། །ཤིན་ཏུ་མཛེས་པས་བརྒྱན་པའོ། །ཞེས་པ་ལ་སོགས་རྒྱན་མཆོག་ནི། །འདི་ཡི་སྐབས་སུ་རིམ་པས་བསྟན། །དེ་དག་ནི་གཟུགས་བརྙན་གྱི་ཏིང་ངེ་འཛིན་ཏོ། །གཞན་ཡང་སྦྱིན་སྲེག་བྱེད་པ་ན། །ལས་བཤད་དེ་དག་གཞན་དུ་མེད། །བདག་ [67a.7]གི་ལས་དང་གཞན་དག་སྟེ། །གཤིན་དང་གསོན་པའི་ལས་སུ་བསྟན། །དེ་ལ་བདག་གིས་ལས་བསྟན་པ། །ཤིན་ཏུ་དགེ་བའི་ཤིང་བུ་ནི། །ཙནྡན་ཤུག་པ་ལ་སོགས་ཏེ། །དྲི་ཞིམ་ངད་ལྡན་མཛེས་པའི་ཤིང་། །ཁྲུ་གང་ཁྲུ་དོ་ཞི་བ་ལ། །རྒྱས་དང་དབང་དང་ཟུ་དགུག་པ་དང་། །དྲག་ཤུལ་སྤྱོད་པ་ [67b] [67b.1]ལ་སོགས་ཀྱི། །ཤིང་ནི་རིམ་པས་ཤེས་པར་བྱ། །ཟླུམ་པའི་དབྱིབས་སུ་བརྩིགས་བྱས་ལ། །དང་པོའི་སངས་རྒྱས་བསྒོམ་པར་བྱ། །སངས་རྒྱས་དེ་ཡི་ཐུགས་ཀ་རུ། །ཡེ་ཤེས་ལྔ་ཡི་བདག་ཉིད་གཙོ། །འཇམ་དཔལ་ཡེ་ཤེས་སེམས་དཔའ་ནི། །ཐུགས་ལ་གནས་ཏེ་ཟླ་སྟེང་བསམ། །དེ་ཡི་ [67b.2]ཐུགས་ཀྱི་ཟླ་བ་ལ། །ཨ་ལས་བྱུང་བའི་འོད་འཕྲོས་པས། །ཕྱོགས་བཅུའི་གདུག་པ་བཏུལ་བྱས་ཏེ། །སླར་བསྡུས་བདག་ཉིད་བསྲེག་བྱས་ལ། །ཞུ་བ་དེ་ལས་བསྐྱེད་པ་ནི། །ཐབས་ཤེས་རང་བཞིན་མེད་པའི་གཟུགས། །ཁ་དོག་ལས་དང་མཐུན་པ་ལ། །ཤིན་ཏུ་རིད་པ་བྲང་རུས་ཅན། ། [67b.3]དབུ་ལ་ཡེ་ཤེས་སེམས་དཔས་བརྒྱན། །དེ་ཡི་ཐུགས་ཀར་ཟླ་སྟེང་དུ། །ཨ་ལས་བསྐྱེད་པའི་ཡི་གེ་བྷྲཱུྃ། །ཤིན་ཏུ་ལེགས་པའི་གཞལ་ཡས་ཁང་། །གོང་དུ་བསྟན་དང་མཐུན་པ་ལ། །ཤིན་ཏུ་ལེགས་པ་སྒོ་བཞི་པ། །ཤར་ཕྱོགས་གྲེ་བའི་སྒོ་ཡིན་ཏེ། །དེ་དབུས་གསུམ་ལས་ལྷ་རྣམས་ [67b.4]བསྐྱེད། །དེ་ལ་ཨ་ཡིས་བྱིན་རླབས་ཏེ། །སྐུ་གསུང་ཐུགས་དང་ལྡན་པར་བསྟན། །དེ་ལ་སྲེག་བླུགས་དབུལ་བ་ནི། །མར་དང་ཏིལ་དང་ཡམ་ཤིང་དང་། །མངར་གསུམ་ལྡེ་གུ་དཀར་གསུམ་ནི། །ཞི་བའི་རྫས་ལ་བཤད་པའོ། །རྒྱས་དང་དབང་དང་དྲག་དང་དགུག །འདི་ལས་གསུངས་པའི་རྫས་ [67b.5]རྣམས་ནི། །འདི་ལས་མ་གསུངས་གཞན་དག་ལ། །རྒྱས་པར་བསྟན་ཏེ་དེར་ཤེས་བྱ། །དེ་ནས་གང་དག་ཞི་འདོད་ལ། །སྤྱི་བོར་ཟླ་སྟེངས་ཨ་བསྒོམས་ཏེ། །དེ་ཉིད་ཞུ་བར་གྱུར་པ་ལ། །བྱ་བ་དེ་ཉིད་ཞུ་འགྱུར་ལ། །སླར་སོས་གཞོན་ནུའི་གཟུགས་བྱས་ལ། །དེ་ལ་ལྷག་པར་གནས་པར་བྱ། ། [67b.6]དེ་ནི་བདག་གི་དོན་བྱ་བ་ལ་སོགས་པའི་ཏིང་ངེ་འཛིན་ཏོ། །གཞན་དོན་བྱ་བའི་རིམ་པ་ཡང་། །ན་དང་ཤི་བ་གཉིས་ཡིན་ཏེ། །དེ་ལ་ན་བའི་ལས་བྱ་ན། །གང་དག་ཡིད་ནི་མི་དྲན་པའི། །བགེགས་ཀྱི་སྦྱོར་བ་ཡོད་པ་ན། །ཏིང་འཛིན་འདི་དག་དྲན་པར་བྱ། །དང་པོའི་སངས་རྒྱས་བདག་བསྒོམས་ཏེ། །དེའི་ [67b.7]སྙིང་ལ་ཟླ་བ་བསམ། །དེ་སྟེངས་ཨ་དང་མུཾ་དང་རཾ། །དེ་ལས་གྱུར་ཏེ་རབ་འཕྲོས་པས། །ཕྱོགས་བཅུའི་གདུག་པ་ཀུན་བཏུལ་ཏེ། །མཛད་པའི་ལས་ནི་དྲན་པར་བྱས། །སླར་ལོག་བཞི་ཡི་གནས་སུ་ཐིམ། །ཐིམ་པས་ཡེ་ཤེས་མེ་འབར་ཏེ། །གནོད་པའི་བགེགས་ནི་དྲན་པ་ལས། །ཡུངས་ [68a] [68a.1]ཀར་བརྒྱ་རྩ་བརྒྱད་དུ་བསྲེག །དེས་ཀྱང་སོས་པར་མ་གྱུར་ན། །སྲིན་བུས་ཟོས་པའི་ཤིང་བུ་ལ། །འབར་བའི་མེ་ནི་བུས་བྱས་ཏེ། །བརྒྱ་རྩ་བརྒྱད་དུ་མར་ལས་ནི། །སྦྱིན་སྲེག་འབུམ་མམ་སྟོང་དུ་བྱ། །དེས་ནི་ནད་ལས་ཐར་བར་འགྱུར། །ན་བ་ལས་ཐར་པ་ཞེས་བྱ་བའི་ཏིང་ངེ་ [68a.2]འཛིན་ཏོ། །དེ་ནས་ཤི་ལ་ཕན་གདགས་ན། །དང་པོར་གནོད་པའི་བགེགས་བསལ་ནས།།རོ་ལ་ཕན་པའི་ཆོ་ག་ནི། །ཨ་ཡིག་ཀུན་ཁྱབ་སྤྱི་སྟེང་བསམ། །ལྷར་གྱུར་ལྷ་ནི་སྔོན་བཞིན་བསམ། །ཨ་ལས་ཡེ་ཤེས་ལྔ་ཡིས་གང་། །ཕན་པའི་གནོད་སྦྱིན་ཆུས་བཏབ་པས། །དང་པོར་བཀྲུ་བའི་ [68a.3]ལས་ཡིན་ནོ། །དེ་ནས་ཨ་ཡི་འཕྲོ་འདུ་བྱ། །དེ་ནི་སྔོན་གྱི་ཆོ་གའོ། །དེ་ནས་གནས་པའི་ཆོ་ག་བཤད། །ཤི་བའི་དཀྱིལ་འཁོར་དབུས་བཞག་སྟེ། །ཞག་གསུམ་སློབ་དཔོན་སྨྱུང་གནས་ལ། །བགེགས་བསྐྲད་ལ་སོགས་བྱས་ནས་ནི། །འཁོར་ལོས་ལྷ་རྣམས་མདུན་བསམ་སྟེ། །ཕྱག་ [68a.4]འཚལ་སྤྲོ་བསྐྱེད་ལ་སོགས་བྱ། །དེ་ནས་ཚིག་འདི་ཆེད་བརྗོད་བྱ། །ཚེ་འདི་དང་པོར་འབྲས་བུ་ནི། །བདག་གི་གསོན་འདི་འབྲས་བུར་གཅིག །དམ་ཚིག་ལྷ་དང་མཉམ་པར་ནི། །བདག་ཉིད་གྱུར་པར་སོམ་ཉི་མེད། །བྱང་ཆུབ་སེམས་དང་སེམས་གཅིག་པར། །ཕྱིར་མི་ལྡོག་པར་བདག་འགྱུར་ [68a.5]ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །འདི་ནི་བདག་ཉིད་དམ་པ་སྟེ། །མཆོད་སྦྱིན་འདི་ནི་བླ་ན་མེད། །ཕྱོགས་བཅུའི་སངས་རྒྱས་སྤྱན་འདྲེན་པས། །དིང་འདི་བདག་འདུས་མཆོག་ཡིན་ནོ། །དེ་ནས་ཕྱག་བྱས་སྤྲོས་ཐོགས་ལ། །སྤྱན་དྲང་ཚིག་འདི་ [68a.6]བརྗོད་པར་བྱ། །ཀྱེ་དབང་ནི་ངེས་ཏེ་བླ་ན་མེད། །ཕྱོགས་བཅུར་བཞུགས་པའི་སངས་རྒྱས་ཀུན། །མ་ལུས་བདག་ལ་དགོངས་སུ་གསོལ། །བདག་མིང་འདི་ཞེས་བྱ་བ་ཡིས། །འདི་ལ་ཕན་གདགས་དོན་ཆེད་དུ། །གནས་འདིར་སངས་རྒྱས་ཀུན་གཤེགས་ཏེ། །འདི་ལ་དབང་ནི་སྩལ་དུ་གསོལ། ། [68a.7]དེ་ནས་སྦྱོར་བའི་ཏིང་འཛིན་དང་། །རྒྱལ་མཆོག་ལ་སོགས་བསྒོམ་བྱས་ཏེ། །སྒོ་དབྱེ་ལ་སོགས་གནས་འདིར་བཤད། །དེ་རྗེས་གསང་སྔགས་འདི་བརྗོད་བྱ། །ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་བྱཱཿབྷ་ག་བཱན། ཛྙཱ་ན་མཱུརྟྟི། བཱ་གཱི་ཤྭ་ར་མ་ཧཱ་པཱ་ཙ། སརྦ་དྷརྨྨ་ག་ག་ན། [68b] [68b.1]ཨ་མ་ལ་སུ་པ་རི་ཤུདྷ་དྷནྡྲ་དྷཱ་ཏུ་ཛྙཱ་ན་གརྦྷ་ཨཱཿ། ཞེས་ནི་བརྗོད་པའི་སྔགས་བཟླས་སོ། །དང་པོའི་སངས་རྒྱས་ང་རྒྱལ་དང་། །ལྡན་པས་དཀྱིལ་འཁོར་བྲི་བའི་ཕྱིར། །ཚིགས་བཅད་འདི་ཡིས་བསྟོད་པར་བྱ། །སངས་རྒྱས་ཀུན་ལ་བསྟོད་བྱ་བ། །རང་ལ་བསྟོད་དེ་ངེས་པའི་མཆོག །འབྲས་བུ་ [68b.2]འབྱིན་པའི་སངས་རྒྱས་ཀྱིས། །ཤི་ལ་ཕན་གདགས་དོན་ཆེད་དུ། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཡང་དག་མཐའ་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་ [68b.3]འདོད་ལ་ཕྱག་འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །སངས་རྒྱས་རོལ་ལ་ཕྱག་འཚལ་འདུད། །སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་པ་ཁྱོད་ལ་འདུད། །སངས་རྒྱས་གསུང་ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །མེད་པ་ལས་ [68b.4]བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་འདུད། །ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་ [68b.5]འདུད། །དེ་ནས་གསོལ་བ་བཏབ་བྱས་ནས། །ཕྱོགས་བཅུའི་སངས་རྒྱས་ནམ་མཁའ་ལ། །མངོན་སུམ་འདྲ་བར་གང་བར་བསྒོམ། །དེ་ནས་གང་ཤི་དེ་ཉིད་ལ། །དམིགས་ལ་ཨ་ཨཱ་ཞེས་བཀོད་དེ། །དེ་ལ་ཕྱོགས་བཅུ་རྒྱལ་བ་དང་། །དང་པོའི་སངས་རྒྱས་ལ་སོགས་པ། །ནམ་ [68b.6]མཁའ་གང་བར་འདིར་གཤེགས་པ། །དེང་འདིར་འདུས་པར་བདེ་གཤེགས་ཏེ། །དེང་བདག་འདུས་པའི་མཆོག་ཡིན་ནོ། །དེ་ནས་རྣམ་རྒྱལ་ཆུས་བཀང་བའི། །བུམ་པས་བཀྲུས་ཏེ་བགེགས་བསྐྲད་ལ། །དེ་ནས་དེ་ལ་བསྲུང་བར་བྱ། །དེ་ནས་ཏིལ་གྱིས་དེ་ལ་ནི། །བསྐོར་ཏེ་སྦྱིན་སྲེག་ [68b.7]དབུལ་བར་བྱ། །ཤི་བ་སྟ་གོན་ལ་གནས་པའི་ཏིང་ངེ་འཛིན་ཏོ། །དེ་ནས་སྔོན་གྱི་སྦྱོར་བ་ཡིས། །ཆོ་ག་རྣམས་ནི་སྤྱད་པར་བྱ། །དང་པོའི་ཆོ་ག་རིམ་པ་ནས། །འཁོར་ལོའི་རིམ་པ་འདི་གསུངས་ཏེ། །ཕྱི་རོལ་བྱུང་སྟེ་གཏོར་མ་སྦྱིན། །དེ་ནས་ཁྲུས་བྱས་མཆོད་པའི་ཚོགས། །མ་ [69a] [69a.1]ལུས་པར་ནི་འདིར་བཤད་དོ། །དེ་ནས་ཕྱི་ཡི་རིམ་ལྡན་པས། །སྔགས་པས་ཆས་གོས་ལྡན་པ་ཡི། །ཤིན་ཏུ་འགྱིང་བས་བརྒྱན་བྱས་ཏེ། །ཞག་བདུན་ནང་པར་སྦྱིན་སྲེག་བྱ། །མི་ཉིད་ཤི་བའི་གནས་བྱས་ཏེ། །ཤི་ལ་ཕན་པའི་དཀྱིལ་འཁོར་ལྡན། །གཞལ་ཡས་ཁང་པ་དེ་ [69a.2]འདྲ་བ། །འདི་ལས་གསུངས་ཏེ་གཞན་དུ་མིན། །འདི་ལྟར་གསུངས་པའི་ཆོ་ག་ནི། །བདག་གིས་རང་བཟོར་བྱས་མིན་ཏེ། །འཇམ་དཔལ་སྒྱུ་འཕྲུལ་དྲ་བ་དང་། །ཆོ་ག་འདུས་པའི་རྒྱུད་ལས་ཏེ། །དེ་ནས་འདིར་ནི་འོས་པ་ཡིན། །འདི་ནི་ཤི་བའི་ཆོ་གའོ། །ཤི་བ་ལ་ཕན་གདགས་པའི་ཏིང་ངེ་འཛིན་ [69a.3]ཏོ།། །།དེ་ནས་དེ་ལ་ལམ་བསྟན་བྱ། །ཚོགས་བསགས་དགེ་བའི་དོན་ལ་སྦྱོར། །དེ་མཐར་དེ་ཉིད་རྟག་བསྒོམ་དང་། །དེ་ཉིད་མཉམ་ཤེས་ཅི་མི་ཚུགས། །དེ་ལ་རྟག་གནས་བདེ་ལྡན་ཏེ། །རིམ་པས་ཨ་ཡི་ངང་ཉིད་དོ། །དེ་ཡང་བདག་ལུས་ཨས་ཁྱབ་སྟེ། །དེ་ཉིད་ཨ་ཡིས་བྱིན་ [69a.4]བརླབས་པས། །ཨ་ཉིད་དབྱིངས་ཀྱི་ངང་ཉིད་དུ། །ཐམས་ཅད་ནམ་མཁའ་དང་འདྲའོ། །རིམ་པའི་ཏིང་ངེ་འཛིན་ཏོ།། །།དེ་ནས་འཁོར་ལོ་བསྟན་པར་བྱ། །བཅུ་དྲུག་ཕྱེད་ཕྱེད་ཐིག་ལེ་ཅན། །ཡན་ལག་མེད་པའི་རྩིས་ལས་འདས། །བསམ་གཏན་བཞི་པའི་རྩེ་མོ་ཅན། །ཞེས་པ་འདི་ཡི་དོན་བཤད་ [69a.5]ན། །ལུས་ལ་འཁོར་ལོ་བཞི་གནས་ཏེ། །ལྟེ་བར་ཤེས་རབ་འཁོར་ལོ་སྟེ། །བཅུ་གཉིས་རྩིབས་དང་ལྡན་པ་ལ། །ཨ་ཨཱ་ཨཾ་ཨཱཿརིམ་བཞིན་དགོད། །དབུས་ན་ཡི་གེ་ཨ་མཆོག་གོ། །སྙིང་གར་ཤེས་རབ་འཁོར་ལོ་སྟེ། །བཅུ་གཉིས་རྩིབས་དང་ཡང་དག་ལྡན། །དེ་ལ་སྔགས་རྣམས་དགོད་པ་ནི། ། [69a.6]ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨྃ་ཨཿཞེས་པ་འདི་དག་རིམ་བཞིན་དུ། །འཁོར་ལོའི་ལྕེ་ལ་དགོད་པར་བྱ། །མགྲིན་པར་ཤེས་རབ་འཁོར་ལོ་ནི། །བཅུ་གཉིས་ལྡན་པའི་རྩིབས་ལྡན་ལ། །ཨོཾ་ཨ་ར་པ་ཙ་ན། བཱ་གཱི་ཤྭ་ར་པྲཛྙཱ་ན་མཿཞེས་པ་རྣམས། །རིམ་བཞིན་ཡང་དག་དགོད་པར་ [69a.7]བྱ། །དེ་ནས་མཚོག་མར་བསམ་པ་ནི། །བཅུ་གཉིས་ལྡན་པའི་ལྕེ་ཅན་ལ། །སྐུ་ཡི་སྔགས་ཀྱི་ཕྲེང་བ་དགོད། །ཨོཾ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ན་མཱུརྟྟི་བཱ་གཱི་ཤྭ་ར། མ་ཧཱ་པཱ་ཙ་སརྦ་དྷརྨྨཱ་ག་ག་ན། ཨ་མ་ལ་སུ་པ་རི་ཤུདྡྷ་དྷརྨྨཱ་དྷཱ་ཏུ་ཛྙཱ་ན་གརྦྷ་ཨཱཿ། ཞེས་པའི་སྔགས་ [69b] [69b.1]ཀྱི་ཕྲེང་བ་འདི། །ཤེས་རབ་འཁོར་ལོ་གྲགས་པ་ཡིན། །འདི་ལྟར་རྟག་ཏུ་གང་བསྒོམ་པ། །གཞོན་ནུ་གཟུགས་ཅན་བདེ་བ་འཐོབ། །གྲགས་འཛིན་ལུས་དང་བདེ་ལྡན་ལུས། །དེ་དག་སྤངས་ནས་གཞན་དོན་དུ། །རབ་དགའི་ལུས་སུ་བསྐྱེད་པར་ངེས། །དེ་ནི་བཅུ་གཉིས་ས་རྫོགས་ཏེ། །ཀུན་ཏུ་ [69b.2]འོད་ཀྱི་ས་ཆེན་པོ། །དེ་ནི་ཉི་མའི་དཀྱིལ་འཁོར་འདྲ། །བདུད་རྩི་འོད་ནི་གཉིས་པ་སྟེ། །ཤིན་ཏུ་འོད་གསལ་ཟླ་བ་འདྲ། །ནམ་མཁའི་འོད་ནི་གསུམ་པ་སྟེ། །ནམ་མཁའི་བཞི་བཞིན་སོ་སོར་གསལ། །རྡོ་རྗེའི་འོད་ནི་བཞི་པ་སྟེ། །ས་དེ་ཉིད་ནི་བཞི་པའོ། །བསམ་པ་ནང་གི་བརྟན་སྤྱོར་བས། ། [69b.3]རྡོ་རྗེ་ཞེས་ནི་ཡོངས་སུ་བརྟག །ལྔ་པ་རིན་ཆེན་འོད་ཅེས་པས། །དབང་བསྐུར་བ་ལ་རབ་ཏུ་གནས། །པདྨའི་འོད་ནི་དྲུག་པ་སྟེ། །པདྨ་བཞིན་དུ་རབ་ཏུ་སྐྱེ། །རང་བཞིན་དག་པའི་ཆོས་ཉིད་ཕྱིར། །དྲི་མ་མེད་པས་ཡོངས་སུ་བཟུང་། །བདུན་པ་ལས་ཀྱི་འོད་ཅེས་པས། །སངས་རྒྱས་འཕྲིན་ [69b.4]ལས་བྱེད་པར་འདོད། །བརྒྱད་པ་དཔེ་མེད་བྱེད་པ་ནི། །དེ་ལ་དཔེ་ནི་ཡོད་མ་ཡིན། །དཔེ་ལྡན་ཞེས་པ་དགུ་པ་སྟེ། །ཐམས་ཅད་དཔེ་ནི་སོ་སོར་གཅིག །བཅུ་པ་ཤེས་རབ་འོད་ཅེས་པས། །སངས་རྒྱས་ས་ནི་བླ་ན་མེད། །བཅུ་གཅིག་ཐམས་ཅད་མཁྱེན་པ་ཉིད། །ས་ཆེན་རབ་ཏུ་འོད་གསལ་ [69b.5]བ། །བཅུ་གཉིས་སོ་སོ་རང་རིག་པ། །རྣལ་འབྱོར་ཡེ་ཤེས་རབ་ཏུ་རྫོགས། །ཞེས་པ་འདི་ནི་རང་རིག་པའོ། །འཁོར་ལོ་རྫོགས་པའི་རིམ་པའོ། །དེ་དག་ནི་ཤེས་རབ་ཀྱི་འཁོར་ལོ་བསྒོམ་པའི་ཏིང་ངེ་འཛིན་ཏོ། །དེ་ནས་འདིར་དབང་དམ་པ་གསུངས། །དབང་བསྐུར་མེད་ན་འགྲུབ་པ་མེད། ། [69b.6]ཡོན་ཏན་ལྡན་པའི་སྔགས་པ་ཡིས། །དེ་ལ་དབང་བྱིན་ཡོན་ཏན་གྲུབ། །དང་པོར་ཁྲུས་གསོལ་བརྒྱན་པ་སྟེ། །རྒྱལ་བའི་ཆ་ལུགས་འདྲ་བ་དང་། །བུད་མེད་ལྟ་བུའི་ཚུལ་ལྡན་པ། །སློབ་དཔོན་བླ་མར་གྱུར་པ་ལ། །དབང་རྣམས་ནོད་པ་རབ་ཏུ་གསུངས། །དང་པོར་སྡིག་པ་བསྲེག་བྱས་ [69b.7]ནས། །དེ་ལ་དབང་དང་དྲལ་བར་བྱ། །དེ་དག་ཀུན་གྱི་རིམ་པ་ཡང་། །རྩ་བའི་རྒྱུད་ལས་གསུངས་པ་ལྟར། །འདིར་ཡང་དེ་དག་བྱ་བ་ཡིན། །མཆོད་པའི་ལས་དང་སྦྱིན་པ་དང་།།རིམ་པར་ལྡན་པས་དབང་བསྐུར་ཏེ། །དེ་ནས་དེ་ལ་ཆུ་དབང་བསྐུར། །གཞན་ཡང་ཕྱག་རྒྱའི་དབང་དང་ནི། ། [70a] [70a.1]ཅོད་པན་དར་དཔྱང་རྡོ་རྗེ་དང་། །བདག་པོའི་མིང་ལ་སོགས་པ་དང་། །དབང་རྣམས་རྫོགས་པར་སྦྱིན་པ་དང་། །གསང་བའི་དབང་དང་ངེས་པའི་དབང་། །རིམ་པ་བཞིན་དུ་རབ་ཏུ་བསྐུར། །དེ་ནས་བཀྲ་ཤིས་གདོན་བྱ་ཞིང་། །རྒྱལ་པོ་བཞིན་དུ་འགྱིང་བཅས་པས། །གཡོག་དང་ལྡན་ [70a.2]པའི་སློབ་དཔོན་ལ། །ལན་གསུམ་བསྐོར་བ་ཚིགས་བཅད་ཀྱིས། །བླ་མ་དེ་ནི་གཟེངས་བསྟོད་བྱ། །ཀྱེ་བདག་ཅི་རིམ་པས་དབུགས་ཕྱུང་སྟེ། །མྱ་ངན་འདས་པའི་ལམ་ལ་དགོད། །ས་ལ་ངེས་པའི་དབང་བསྐུར་ཏེ། །ཤིན་ཏུ་གཟི་ལྡན་བཀྲ་ཤིས་མཆོག །ཅེས་ནི་བརྗོད་ལ་གཤེགས་སུ་གསོལ། །དེ་ནས་ [70a.3]རང་ཡང་ཁྱིམ་དུ་འགྲོ། །ཁྱིམ་དུ་ཕྱིན་ནས་འཁོར་དག་ལ། །སློབ་དཔོན་འདིས་ནི་དམ་ཚིག་པས། །བདག་ཀྱང་དམ་ཚིག་མཆོག་དང་ལྡན། །འདི་ལ་རིམ་གྲོ་ཕུན་སུམ་ཚོགས། །རྟ་དང་གླང་པོ་ནོར་དང་འབྲུ། །རིན་པོ་ཆེ་དང་ཅི་བཞེད་པ། །ཁྱེད་ཀྱིས་ང་ལ་མ་འདྲི་བར། །སློབ་དཔོན་འདི་ལ་དེ་ཕྱིར་དབུལ། ། [70a.4]སངས་རྒྱས་ཀུན་དང་ཐབས་ཅིག་པའི། །ཕྱག་ན་རྡོ་རྗེ་བརྟུལ་ཞུགས་བརྟན། །ཤཱཀྱ་ཐུབ་པ་སངས་རྒྱས་ལ། །རིམ་པས་གསུངས་པའི་བཀའ་ལུང་ནི། །མཚན་བརྗོད་པ་ཡི་གསུང་རབ་འདི། །ཤིན་ཏུ་རྟོགས་དཀའ་མངོན་སུམ་མིན། །རང་རྒྱུད་ཙམ་གྱི་རིམ་པ་དང་། །ཐེག་པ་ཆེན་པོ་མངོན་ [70a.5]རྟོགས་པའི། །ཀུན་ལ་ཐུགས་རྗེ་མ་ལྡན་པས། །བརྩེ་བར་ལྡན་པའི་སེམས་ཀྱིས་ནི། །ཡེངས་མེད་གུས་པའི་སེམས་ཀྱིས་བྲིས། །འཇམ་མགོན་དཔལ་ལྡན་ཡེ་ཤེས་སེམས་དཔའི་གནས། །ཐུགས་རྗེ་ལྡན་པ་སྐུ་གསུང་ཐུགས་ལྡན་པ། །བྱ་སྤྱོད་རྣལ་འབྱོར་རྒྱུད་དང་ལྡན་པ་ནི། །མི་དབྱེ་ [70a.6]དད་གཙུག་སེམས་དང་ལྡན་པར་ཤོག །འཕགས་པ་མཚན་ཡང་དག་པར་བརྗོད་པའི་གསང་བ་དང་ལྡན་པའི་སྒྲུབ་ཐབས། སློབ་དཔོན་ཆེན་པོ་དཔལ་ལྡན་བྱང་ཆུབ་མཆོག་གིས་མཛད་པ་རྫོགས་སོ།། །།རྒྱ་གར་གྱི་མཁན་པོ་སྨྲྀ་ཏི་ཛྙཱ་ན་ཤཱིརྟིས་བསྒྱུར་ཞིང་ཞུས་ཏེ་གཏན་ལ་ཕབ་ [70a.7]པའོ།། །།ཐམས་ཅད་འདི་ལས་བྱུང་བའི་ཕྱིར། །གཞི་ཡི་སངས་རྒྱས་སྐྱེ་བ་བཞེས། །མུ་སྟེགས་རྩོད་པ་བཟློག་པའི་ཕྱིར། །སྨྲ་བའི་སེང་གེ་སྐྱེ་བ་བཞེས། །ཐུགས་རྗེ་གནས་ནས་འདྲེན་མཛད་པས། །དོན་ཡོད་པ་ཡི་སྐྱེ་བ་བཞེས། །ཐུགས་རྗེའི་འོད་ཟེར་སྤྲོ་བའི་ཕྱིར། །འོད་ [70b] [70b.1]དཔག་མེད་པའི་སྐྱེ་བ་བཞེས། །སྐྱེ་རྒས་ཆུ་ལས་བསྒྲལ་བའི་ཕྱིར། །འཇམ་དཔལ་གཞོན་ནུའི་སྐྱེ་བ་བཞེས། །གང་གིས་གོང་དུ་མ་ཆོད་པས། །དང་པོ་སངས་རྒྱས་སྐྱེ་བ་བཞེས། །སངས་རྒྱས་ཀུན་ཀྱི་ཐུགས་ཡིན་པས། །ཡེ་ཤེས་སེམས་དཔའི་སྐྱེ་བ་བཞེས། །ཤེས་རབ་གང་ལ་ཐོགས་མེད་པས། ། [70b.2]འཇམ་དཔལ་རྣོན་པོའི་སྐྱེ་བ་བཞེས། །ཞི་བའི་ངང་ལ་ལེགས་གནས་པས། །ཨ་ར་པ་ཙའི་སྐྱེ་བ་བཞེས།། །།{T2580}༄༅༅། །མཚན་ཡང་དག་པར་བརྗོད་པའི་བཀླག་པའི་བསྒོམ་ཁོག་པ་ཞུགས། །༄༅། །འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །བསྒོམ་པ་འདི་ནི་སློབ་དཔོན་གྱི་མན་ངག་ [70b.3]ཏུ་བྱས་པ་ཡིན་ཏེ། འཇམ་དཔལ་ཡེ་ཤེས་སེམས་དཔའ་བསྒོམ་པར་འདོད་པའི་རྣལ་འབྱོར་པས། དང་པོར་འཇུག་པ་བྱང་ཆུབ་ཏུ་སེམས་བསྐྱེད་པར་བྱ་སྟེ། དེ་ལ་ཞུགས་ཏེ་འཇམ་དཔལ་ཡེ་ཤེས་སེམས་དཔའ་མངོན་སུམ་དུ་བྱས་ནས་ཀྱང་། སེམས་ཅན་སྐྱབས་དང་དཔུང་གཉེན་མེད་པ་སྲིད་པར་ [70b.4]ལྷུང་ཞིང་མ་གྲོལ་བ་རྣམས་ཀྱི་དོན་བྱ་བར་བསམ་མོ། །དེ་ལྟར་སེམས་ཅན་གྱི་དོན་བྱ་བའི་ཐབས་ཀྱང་བསྡུ་བའི་དངོས་པོ་བཞིས་བྱས་ཏེ་དེ་ནི་མདོ་སྡེའོ། །དེ་ནས་བསོད་ནམས་ཀྱི་ཚོགས་ཡན་ལག་བཅུ་བསྒོམས་ཏེ། ཕྱག་བཙལ་བ་དང་། མཆོད་པ་དང་། སྡིག་པ་བཤགས་པ་དང་། རྗེས་ [70b.5]སུ་ཡི་རང་བ་དང་། དགེ་བའི་རྩ་བ་བསྔོ་བ་དང་གསུམ་ལ་སྐྱབས་སུ་འགྲོ་བ་དང་། །ལམ་བསྟན་པ་དང་། བྱང་ཆུབ་ཏུ་སེམས་བསྐྱེད་པ་དང་། བཅུ་བསྒོམ་མོ། །དེ་ལ་ཕྱག་བཙལ་བ་ནི་རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཨ་དཀར་པོ་བསྒོམ། །ཨ་དེ་ལས་འོད་ཟེར་ཕྱོགས་བཅུར་ [70b.6]འཕྲོས་པས་ཕྱོགས་བཅུ་ནས་སྔོན་ལྷུན་གྱིས་གྲུབ་པའི་སངས་རྒྱས་དང་། བྱང་ཆུབ་སེམས་དཔའ་ཆེན་མོ་དང་། འཕགས་པ་ཉན་ཐོས་དང་། རང་སངས་རྒྱས་ཐམས་ཅད་སྤྱན་དྲངས་ཏེ། མདུན་གྱི་ནམ་མཁའ་ལ་བཞུགས་སུ་གསོལ་ལ། རང་གི་རྡོ་རྗེ་སློབ་དཔོན་གང་ཡིན་ཡང་དེ་དག་དང་ལྷན་ཅིག་ཏུ་ [70b.7]ཞུགས་པར་བསམས་ལ། དེ་དག་གི་མདུན་དུ་ཐལ་མོ་སྦྱར་ལ་ཕྱག་འཚལ་བར་བྱའོ། །དེ་ལྟར་ཕྱག་བཙལ་ནས་མཆོད་པ་དབུལ་ཏེ། རྣལ་འབྱོར་པ་དག་གི་ཐུགས་ཀར་ཡི་གེ་ཨ་བསྒོམས་ལ་དེ་ལས་ཀྱང་འོད་ཟེར་སྤྲོས་ཏེ། མཆོད་པ་རྣམ་པ་ལྔ་མེ་ཏོག་གི་གདུགས་དང་། བ་དན་དང་། རྒྱན་དང་ཕྲེང་བ་ [71a] [71a.1]ལ་སོགས་པ་དང་། སྤོས་ཀྱང་རང་བཞིན་གྱིས་དྲི་ཞིམ་པོར་སྦྱར་བའི་དྲི་མར་གྱུར་པའི་དྲི་དང་སྤོས་རྒྱ་དང་། མར་མེའི་ཕྲེང་བ་དང་། དྲི་ཆབ་དང་ལྷ་བཤོས་དང་། གདུགས་དང་རྒྱལ་མཚན་ལ་སོགས་པ་ནམ་མཁའི་སྤྲིན་ཕུང་ཙམ་རྒྱ་མཚོ་ལྟར་གཏིབས་པས་མཆོད་པར་བསྒོམ། [71a.2]དེ་ནས་སངས་རྒྱས་དེ་དག་གི་སྤྱན་སྔར་སྡིག་པ་བཤགས་ཏེ། དུས་གསུམ་དུ་བདག་གིས་སྡིག་པ་བྱས་པ་དང་། གཞན་བྱེད་དུ་སྩལ་པ་དང་། བྱེད་པ་ལ་དགའ་བར་སྦྱོར་བ་དང་། དངོས་གཞི་དང་འཇུག་པ་དང་བཅས་པ་ཐམས་ཅད་བཤགས་ཏེ། དྲན་པ་ནི་ཁས་བླངས་མ་དྲན་པ་ནི་བསྡུས་ཏེ། འགྱོད་པ་ [71a.3]སྐྱེས་ནས་ཕྱིས་མི་བྱ་བར་སྡོམ་པ་བླངས་ནས་བཤགས་པའོ། །དེ་ཡང་བཤགས་པའི་གནས་འཕགས་པ་དང་། བཤགས་བྱ་དང་། བཤགས་པ་པོ་རྣམས་མི་དམིགས་པར་བསྒོམ་མོ། །དེ་ནས་སངས་རྒྱས་དང་བྱང་ཆུབ་སེམས་དཔའ་རྣམས་དང་། འཕགས་པ་ཉན་ཐོས་དང་། རང་སངས་རྒྱས་ [71a.4]དང་། རྣལ་འབྱོར་པའི་དགེ་བའི་རྩ་བ་འདོད་ཆགས་དང་ཞེ་སྡང་དང་གཏི་མུག་གསུམ་གྱིས་མ་འདྲེས་པ་ལ། ཕྲག་དོག་མེད་པའི་དགའ་བ་དང་། སྤྲོ་བ་ནི་རྗེས་སུ་ཡི་རང་བར་བསྒོམ་པའོ། །དེ་ནས་དགེ་བའི་རྩ་བ་བསྔོ་བ་ནི། །བདག་གི་དགེ་བའི་རྩ་བ་ཅི་བགྱིས་པའི་བསོད་ནམས་ཀྱིས་སེམས་ཅན་ [71a.5]ཐམས་ཅད་བླ་ན་མེད་པའི་བྱང་ཆུབ་ཐོབ་པར་གྱུར་ཅིག་པར་བསྔོས་ལ་བསྒོམ་མོ། །དེ་ནས་གསུམ་ལ་སྐྱབས་སུ་འགྲོ་བ་བསྒོམ་སྟེ། སངས་རྒྱས་ནི་འཇམ་དཔལ་ཡེ་ཤེས་སེམས་དཔའ་བསྙེན་ཏེ་སྐྱབས་སུ་འགྲོ་བ་བསྒོམ་མོ། །ཆོས་ནི་ཆོས་བསྒོམ་པ་བདག་མེད་པའི་ཆོས་ལ་བརྟེན་ཅིང་བསྒོམས་ [71a.6]ལ་སྐྱབས་སུ་འགྲོའོ། །དགེ་འདུན་ཡང་ཉན་ཐོས་དང་། རང་སངས་རྒྱས་ཀྱི་དགེ་འདུན་ལ་སྐྱབས་སུ་མི་འགྲོ་སྟེ། ས་བཅུ་པའི་བྱང་ཆུབ་སེམས་དཔའ་ལ་བརྟེན་ཅིང་བསྒོམས་ཏེ་སྐྱབས་སུ་འགྲོ་བ་བསྒོམ་མོ། །དེ་ལ་ལམ་བསྟན་པ་ནི། བླ་ན་མེད་པའི་སངས་རྒྱས་གྲུབ་པའི་ལམ་རྡོ་རྗེ་ཐེག་པའི་ [71a.7]དོན་འཇམ་དཔལ་སྒྱུ་འཕྲུལ་དྲ་བའི་ཏིང་ངེ་འཛིན་བསྒོམ་ཞིང་མཚན་བརྗོད་པ་ནི་ལམ་བསྟན་པའོ། །བྱང་ཆུབ་མཆོག་ཏུ་སེམས་བསྐྱེད་པ་ནི་བདག་གིས་སེམས་ཅན་ཐམས་ཅད་ལ་བསྐྱབ་པའི་དོན་དུ་སངས་རྒྱས་པར་བྱའོ། །སེམས་ཅན་ཐམས་ཅད་ཀྱི་དོན་བྱའོ་བར་བསྒོམ་པར་བྱའོ། །སངས་ [71b] [71b.1]རྒྱས་ནས་ཀྱང་སེམས་ཅན་རྣམས་མ་རྒལ་བ་རྣམས་བསྒྲལ་བ་དང་། མ་གྲོལ་བ་རྣམས་དགྲོལ་བ་དང་། །དབུགས་མ་ཕྱུང་བ་རྣམས་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བྱའོ་ཞེས་དེ་ལྟར་བསོད་ནམས་ཀྱི་ཚོགས་ཡན་ལག་བཅུ་བསྒོམས་ནས་ [71b.2]གསོལ་བ་གདབ་པར་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ་ཞེས་བྱའོ། །དེ་ནས་དམ་བཅའ་བར་བྱ་སྟེ། བདག་མིང་འདི་ཞེས་བྱ་བས་བླ་ན་མེད་པའི་བྱང་ཆུབ་ཀྱི་སེམས་དེ་རིང་ཕྱིན་ཆད་བསྐྱེད་པར་བགྱིའོ། །ཇི་ལྟར་དུས་གསུམ་མགོན་རྣམས་ [71b.3]ཀྱིས། །བྱང་ཆུབ་སེམས་ནི་བསྐྱེད་པ་བཞིན། །དེ་བཞིན་བླ་མེད་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །བསླབ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་གྱི་ཚུལ་ཁྲིམས་གསུམ། །བདག་གིས་བརྟན་པོར་སོ་སོར་གཟུང་། །དེ་ནས་ [71b.4]རིགས་ལྔའི་སྡོམ་པ་བཟུང་སྟེ། འདི་ནི་རྣམ་པར་སྣང་མཛད་ཀྱི། །སངས་རྒྱས་ཆོས་དང་དགེ་འདུན་དང་། བླ་ན་མེད་པའི་དཀོན་མཆོག་གསུམ། །སྡོམ་པ་སངས་རྒྱས་སྦྱོར་བསྐྱེད་པ། །འདི་ནི་བདག་གིས་བསྐྱེད་པར་བགྱི། །རྡོ་རྗེ་རིགས་ཀྱི་སྡོམ་པ་གཟུང་། །རྡོ་རྗེ་དྲིལ་བུ་ཕྱག་རྒྱ་གསུམ། །བདག་ [71b.5]གིས་མི་གཏོང་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་པོ་ཆེའི་སྡོམ་པ་གཟུང་། །སྦྱིན་པ་རྣམ་བཞི་དུས་དྲུག་ཏུ། །བརྟན་པོ་ཉིད་དུ་སྦྱིན་པར་བྱ། །པདྨ་རིགས་ཀྱི་སྡོམ་པ་གཟུང་། །ཕྱི་དང་ནང་དང་གསང་བ་གསུམ། །དམ་ཆོས་སོ་སོར་གཟུང་བར་བགྱི། །ལས་ཀྱི་རིགས་ཀྱི་ [71b.6]སྡོམ་པ་གཟུང་། །བདག་གིས་མི་གཏོང་གཟུང་བར་བགྱི། །གོང་དུ་མ་བྱུང་བའི་ལྷག་མ་ཀུན་འདི་སེམས་ཅན་གྱི་དོན་བྱ་བ་དང་། མི་དགེ་བ་བཅུ་སྤང་བ་དང་། །འཁོར་བ་མི་སྤང་བ་དང་། མྱ་ངན་ལས་འདས་པ་དང་དུ་མི་ལེན་པ་དང་། ཐེག་པ་ཆུང་བ་དང་འཇིགས་པའི་ས་སྤངས་པ་དང་། ལྷ་དང་ལྷ་མ་ཡིན་ [71b.7]དང་། གདོན་ལ་སོགས་པའི་ཕྱག་རྒྱ་མི་སྨད་པ་དང་། དེ་རིང་ཕན་ཆད་བླ་ན་མེད་པའི་བྱང་ཆུབ་མ་ཐོབ་ཀྱི་བར་དུ་གཟུང་བར་བྱའོ་ཞེས་དམ་བཅའོ།། །།དེ་ནས་བྱང་ཆུབ་མཆོག་ཏུ་སེམས་བསྐྱེད་དེ། །མ་རྒལ་བ་རྣམས་བསྒྲལ་བ་དང་། །མ་གྲོལ་བ་རྣམས་གྲོལ་བ་དང་། །དབུགས་ [72a] [72a.1]མ་ཕྱུང་བ་རྣམས་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའོ་ཞེས་སེམས་བསྐྱེད་དོ། །དེ་ཡན་ཆོད་བསོད་ནམས་ཀྱི་ཚོགས་བསྒོམ་པའོ། །དོན་དམ་པ་བྱང་ཆུབ་ཀྱི་སེམས་ཡེ་ཤེས་ཀྱི་ཚོགས་བསྒོམ་པ་ནི། །དང་པོ་མངོན་པར་ [72a.2]བྱང་ཆུབ་པ་ལྔ་བསྒོམ་པ་ཡིན་ལ། དེ་ནི་ཡེ་ཤེས་ལྔ་བསྒོམ་པ་ཡིན་ཏེ། དང་པོ་ཆོས་ཐམས་ཅད་མི་དམིགས་ལ་མི་རྟོག་པ། རང་བཞིན་མེད་པ་ནམ་མཁའ་དང་འདྲ་བ་ཐ་སྙད་ཙམ་དུ་ཡོད་ལ། དོན་དམ་པར་རང་བཞིན་མེད་པ་དེ་བཞིན་ཉིད་རང་བཞིན་གྱིས་འོད་གསལ་བར་བསྒོམ། དེ་ནས་མེ་ལོང་ལྟ་བུའི་ཡེ་ [72a.3]ཤེས་བསྒོམ་སྟེ། དཔེར་ན་མེ་ལོང་གཡའ་དག་པའི་ནང་དུ། གཟུགས་བརྙན་སྣང་ཞིང་གསལ་བ་ལྟར་རང་བཞིན་གྱིས་འོད་གསལ་བ། དེ་ལས་ཆོས་ཀྱི་དབྱིངས་རྒྱུ་མཐུན་པའི་རྣམ་པར་སྨིན་པའི་ཡེ་ཤེས་དེ་ལས། འཇིག་རྟེན་གྱི་རང་བཞིན་གྱི་སེམས་ཅན་གྱི་གང་ཟག་ཕུང་པོ་དང་། ཆོས་ [72a.4]ཐམས་ཅད་ཇི་ལྟར་ཡིན་པའི་ཆོས་ཉིད་ཀྱི་ངང་དེ་ལ་ཕྱིན་ཅི་མ་ལོག་པར་སྣང་བ་དང་། སེམས་རྣམ་པར་དག་པ་ལོག་རྟོག་གློ་བུར་གྱི་དྲི་མ་དང་འདྲ་བས་བསྒྲིབས་པ་ཙམ་ཡིན་ལ། སེམས་ཅན་གྱི་སེམས་ཆོས་ཀྱི་རང་བཞིན་དུ་གསལ་བར་བསྒོམ་མོ། །སེམས་ཅན་གྱིས་དེ་ལྟར་མི་རྟོགས་ཏེ། འགྲོ་བ་ [72a.5]ལས་མི་ཐར་བ་ལ་སྙིང་རྗེ་ཆེན་པོ་བསྐྱེད་དེ། འགྲོ་བ་ལས་ཐར་པར་བྱའོ་ཞེས་བསྒོམ་མོ། །དེ་ནས་མཉམ་པ་ཉིད་ཀྱི་ཡེ་ཤེས་ཆོས་ཐམས་ཅད་བདག་མེད་པར་བསྒོམ་སྟེ། ཆོས་ནི་ཕུང་པོ་དང་། ཁམས་དང་སྐྱེ་མཆེད་ལ་བྱ། མུ་སྟེགས་པས་བརྟགས་པའི་གང་ཟག་ཏུ་ལྟ་བ་མེད། ཉན་ཐོས་པའི་ [72a.6]ཆོས་རྡུལ་ཙམ་དུ་ཡོད་པར་ལྟ་བའི་བདག་མེད་པར་ལྟ་བ་དང་། སེམས་ཙམ་པའི་སེམས་ཡོད་པར་ལྟ་བ་དེ་ཡང་བདག་མེད་པར་ལྟ། ཆོས་ཐམས་ཅད་ལ་བདག་མེད་པར་བསྒོམ། དེ་ཡང་བདག་ཏུ་འཛིན་པ་མེད་པ་དང་། གཞན་མེད་པ་དང་། བདག་གཞན་མེད་པ་དང་། ཆོས་ཐམས་ཅད་ [72a.7]བདག་མེད་པར་མཉམ་པའོ། །མདོར་ན་རྣམ་པར་ཐར་པའི་སྒོ་གསུམ་དུ་བསྒོམ་མོ། །ཨོཾ་ཨ་ཀཱ་རོ་མུ་ཁྃ་སརྦ་དྷརྨྨཱ་ཎཱྃ་ཨཱདྱ་ནུཏྤནྡ་ཏྭཱཏ། ཅེས་པས་བྱིན་གྱིས་བརླབ་པོ། །དེ་ལ་ཨ་ནི་ཨ་ཨ་ནུཏྤནྣ་ཏྭཱཏ། ཅེས་པ་སྟེ། ཆོས་ཐམས་ཅད་མ་སྐྱེས་པ་སྟོང་པ་ཉིད་ཅེས་བྱ་སྟེ། བདག་ [72b] [72b.1]གཞན་སྟོང་པ་ཉིད་དུ་མཉམ་པར་བསྒོམ་མོ། །དེའི་འོག་ཏུ་སོ་སོར་ཀུན་ཏུ་རྟོག་པའི་ཡེ་ཤེས་བསྒོམ་སྟེ། དེ་ནི་བདག་དང་གཞན་དུ་ཕྱེ་སྟེ། གང་ཞེ་ན། གཟུང་བ་དང་འཛིན་པ་རྣམ་པར་དག་པའི་མི་རྟོག་པའི་ངང་ལས་བདག་དང་གཞན་དུ་ཡང་དག་པའི་ཀུན་རྫོབ་ཏུ་ཕྱེ་སྟེ། རང་གི་མཚན་ཉིད་དུ་བདག་དོན་བྱ་བའི་ [72b.2]གནས་སེམས་ཅན་གཞན་མཚན་མ་མེད་པའི་སྒོ་ནས། སོ་སོར་ཕྱེ་ཞིང་བརྟག་པར་བྱས་ཏེ་བསྒོམས་ནས། སྤྱིའི་མཚན་ཉིད་དོན་དམ་པར་མཚན་མ་མེད་པར་ཤེས་པའི་སོ་སོར་ཀུན་ཏུ་རྟོག་པའི་ཡེ་ཤེས་སོ། །དེའི་ངང་ལས་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་བསྒོམ་སྟེ། གཟུང་བ་དང་ [72b.3]འཛིན་པ་ལས་འདས་པ་གཅིག་དང་དུ་མ་དང་ཤིན་ཏུ་བྲལ་བ་རྣམ་པར་དག་པ། ཆོས་ཀྱི་དབྱིངས་ཀྱི་ཡེ་ཤེས་སྟོང་པ་ཉིད་བཅོ་བརྒྱད་ཀྱི་རང་བཞིན་ནམ། རྣམ་པར་ཐར་པ་བཞིའི་རང་གི་ངོ་བོ་མི་དམིགས་པར་བསྒོམ་མོ། །དེའི་ངང་ལས་སྨོན་ལམ་དང་ཐུགས་རྗེའི་དབང་གིས། བྱང་ཆུབ་སེམས་དཔའ་དང་། [72b.4]རྣལ་འབྱོར་པ་རྣམས་ཀྱིས་འགྲོ་བའི་དོན་བྱ་བའི་ཕྱིར། བྱ་བ་ནན་ཏན་གྱི་ཡེ་ཤེས་བསྒོམ་སྟེ། དག་པ་འཇིག་རྟེན་པའི་ཡེ་ཤེས་འགྲོ་བའི་དོན་བྱ་བའི་རྒྱུ་བདག་དང་གཞན་མཚན་མ་མེད་བཞིན་དུ་སོ་སོར་དམིགས་ནས། མི་དམིགས་པའི་སྙིང་རྗེ་ཆེན་པོས་འགྲོ་བའི་དོན་བྱ་བར་དྲན་ཏེ། སྤྲུལ་པ་སྣ་ [72b.5]ཚོགས་པས་སྤྲུལ་ཅིང་སྤྲོས་ནས་སེམས་ཅན་སྲིད་པ་ལས་བསྒྲལ་ཏེ། འོད་ཟེར་གྱིས་ངན་སོང་གསུམ་ལ་ཁྱབ་ནས་སྡུག་བསྔལ་ཉེ་བར་ཞི་བར་བྱས་ནས། སེམས་ཅན་རྣམ་པར་གྲོལ་ནས་ལྷ་དང་མི་ལ་བཀོད་དེ། དེ་ནས་སོ་སོའི་དབང་པོ་རིམ་པ་བཞིན་དུ་དམ་པའི་ཆོས་ཀྱི་ཕྱག་རྒྱ་སྟེ། ཐེག་པ་ [72b.6]གསུམ་གྱི་ཆོས་ཀྱིས་གྲོལ་བར་བྱས་ནས། བླ་ན་མེད་པའི་བྱང་ཆུབ་ཐོབ་པར་བྱ་བ་དང་། ཉན་ཐོས་རྣམས་སེམས་ཅན་གྱི་དོན་ལ་བཅུག་ནས། ཐེག་པ་ཆེན་པོ་ལ་བཀོད་པ་དང་། བྱང་ཆུབ་སེམས་དཔའ་རྣམས་སྲིད་པ་ལ་ཆགས་པ་ལ་སྟོང་པ་ཉིད་ཀྱི་དོན་བསྟན་ནས་སངས་རྒྱས་པར་བྱའོ་བར་བསྒོམ་པ་ནི་ [72b.7]བྱ་བ་ནན་ཏན་གྱི་ཡེ་ཤེས་བསྒོམ་པའོ། །དེ་ལྟར་འཇུག་པ་བྱང་ཆུབ་ཀྱི་སེམས་དང་། སྨོན་པ་བྱང་ཆུབ་སེམས་ཀུན་རྫོབ་སྟེ། །དེས་ནི་བསོད་ནམས་ཀྱི་ཚོགས་དང་། །དོན་དམ་བྱང་ཆུབ་ཀྱི་སེམས་ཡེ་ཤེས་ཀྱི་ཚོགས་རྣམ་པ་གཉིས་བསྒོམ་པ་བསྟན་ནས། །ད་ནི་དག་པ་ [73a] [73a.1]འཇིག་རྟེན་པའི་ཡེ་ཤེས་བཞིའི་ཏིང་ངེ་འཛིན་བསྒོམས་ཏེ། བདག་གི་སེམས་གཟུང་འཛིན་རྣམ་པར་དག་པའི་ཡེ་ཤེས་ལས། ཁྲོ་བོའི་ས་བོན་ཧཱུཾ་སྔོ་ནག་སངས་རྒྱས་ཀྱི་ཞིང་དྲུག་ཁྱབ་པ་ཙམ་ཅིག་བསྒོམ་མོ། །དེའི་འཕྲོ་འདུས་སངས་རྒྱས་ཀྱི་ཞིང་དུ་ཁྱབ་ནས་སེམས་ཅན་གྱི་དོན་ [73a.2]བྱས་ཏེ། སླར་ཧཱུཾ་ལ་ཐིམ་པ་ལས་ཁྲོ་བོའི་རྡོ་རྗེ་རྩེ་ལྔ་པ་སངས་རྒྱས་ཀྱི་ཞིང་དྲུག་ཁྱབ་པ་སྟེ། དེ་ནི་ཉོན་མོངས་པ་ཅན་གྱི་འཇིག་རྟེན་པ་དེ་འདུལ་བའི་དོན་དུ་བུམ་པ་ལ་ཁྲོ་བོ་ཞལ་དྲུག་སྟེ། ཤར་གྱི་དབུ་སྔོ། གཡས་གཡོན་དཀར། ལྷོ་སེར་ནུབ་དམར་བྱང་ལྗང་གུའོ། །རྩེ་མོ་ལྔ་ཡར་ལྟ་བ་ཡེ་ཤེས་ [73a.3]ལྔ། མར་ལྟ་བ་རིགས་ལྔའི་རང་བཞིན་ནོ། །རྡོ་རྗེའི་ས་གཞི་དང་། རྡོ་རྗེའི་ར་བ་དང་། རྡོ་རྗེའི་དྲ་བའི་སྦུབས་སུ་གྱུར་པ་ནང་སྟོང་པར་བསྒོམ་མོ། །དེའི་ནང་དུ་བྷྲཱུཾ་དཀར་པོ་ལས་རིན་པོ་ཆེའི་མཆོད་རྟེན་ཁ་དོག་བཞི་དང་ལྡན་པ། ཚད་སྟོང་གསུམ་གྱི་འཇིག་རྟེན་ཁྱབ་པ་ཅིག་བསྒོམ་མོ། །དེའི་བུམ་ [73a.4]པའི་ནང་དུ་ཡི་གེ་ཧྲི་ལས་ཆོས་ཀྱི་འབྱུང་གནས་དབྱིབས་ཟུར་གསུམ་དུ་བསྒོམ་མོ། །དེའི་ནང་དུ་ཡི་གེ་ཨ་ལས་ཁ་དོག་སྣ་ཚོགས་རྡོ་རྗེ་རྒྱ་གྲམ་བསྒོམ་མོ། དེའི་དབུས་སུ་ཡི་གེ་བྷྲཱུཾ་དཀར་པོ་ལས་གཞལ་ཡས་ཁང་གྲུ་བཞི་པ་ཏྭ་ར་ཎ་དང་བཅས་པར་བསྒོམ་མོ། །དེ་ཡང་སངས་རྒྱས་དང་སེམས་ [73a.5]ཅན་ཆོས་ཉིད་དུ་མཉམ་པས་གྲུ་བཞིའོ། །དྲན་པ་ཉེ་བར་གཞག་པའི་རང་བཞིན་གྱིས་ཤར་གྱི་སྒོའོ། །ཡང་དག་པར་སྤོང་བ་བཞིའི་དོན་གྱིས་ལྷོའི་སྒོའོ། །རྫུ་འཕྲུལ་གྱི་རྐང་པ་བཞིའི་དོན་གྱིས་ནུབ་ཀྱི་སྒོའོ། །དབང་པོ་ལྔའི་རང་བཞིན་གྱིས་བྱང་གི་སྒོའོ། །སྟོབས་ལྔའི་རང་བཞིན་གྱིས་ [73a.6]སྒོ་སྲུང་བཞིའོ། །བྱང་ཆུབ་ཀྱི་ཡན་ལག་བདུན་གྱིས་དྲ་བ་དང་དྲ་བ་ཕྱེད་པའོ། །འཕགས་པའི་ལམ་ཡན་ལག་བརྒྱད་པས་གདུགས་དང་མེ་ཏོག་གི་ཕྲེང་བའོ། །མེ་ལོང་ལྟ་བུའི་ཡེ་ཤེས་ཀྱི་རང་བཞིན་གྱིས་མེ་ལོང་དང་རིན་པོ་ཆེའོ། །གསུང་རབ་ཡན་ལག་བཅུ་གཉིས་ཀྱིས་སེམས་ཅན་རྣམས་ [73a.7]ཆོས་སྟོན་པས། འདུལ་བས་འདུལ་བའི་རང་བཞིན་དྲིལ་བུ་དང་དར་གྱི་ཅོད་པན་ནོ། །ཚོགས་གཉིས་རྫོགས་པར་བསམས་པས་སུམ་བརྩེགས་སུ་གྱུར་པའོ། །ཆོས་ཀྱི་དབྱིངས་ཀྱི་རང་བཞིན་གྱི་དབུ་རྩེའི་གཙུག་ཏོར་ཏུ་གྱུར་པའོ། །རྣམ་པར་ཐར་པ་བརྒྱད་ཀྱི་རང་བཞིན་གྱིས་ཏྭ་ར་ཎའོ། །ཏིང་ངེ་འཛིན་ [73b] [73b.1]མུ་མ་ཆོད་པ་བསྒོམས་པས་མུ་ཁྱུད་མ་ཆད་པའོ། །ཆོས་ཀྱི་འཁོར་ལོ་བསྐོར་བའི་རྟགས་རྡོ་རྗེ་ཕྲེང་བའོ། །ཡེ་ཤེས་ལྔའི་རང་བཞིན་གྱི་འོད་ལྔའི་ཁ་དོག་གིས་བརྒྱན་པའོ། །དེའི་ནང་དུ་རེ་མིག་དགུ་སྣམ་བུ་དང་ལྡན་པ་ལ་དབུས་སུ་སེང་གེའི་ཁྲི་མི་འཇིགས་པ་བཞིའི་རང་བཞིན་ནོ། །སྟོབས་བཅུ་དང་ལྡན་ [73b.2]པའི་རྟགས་སུ་ཤར་དུ་གླང་པོ་ཆེའོ། །རྫུ་འཕྲུལ་གྱི་རྐང་པ་བཞིའི་རང་བཞིན་གྱིས་ལྷོར་རྟའོ། །དབང་བཅུའི་རང་བཞིན་གྱིས་ནུབ་ཏུ་རྨ་བྱའོ། །ཕྲིན་ལས་རྣམ་པ་བཞིས་འགྲོ་བའི་དོན་བྱེད་པའི་རང་བཞིན་གྱིས་བྱང་དུ་ནམ་མཁའ་ལྡིང་གི་ཁྲིའོ། །དེ་དག་གི་སྟེང་དུ་རིན་པོ་ཆེའི་ཁྲི་དང་པདྨའི་གདན་དང་ཟླ་བའི་གདན་ [73b.3]བརྩེགས་པའོ། །དེ་དག་གི་ཕྱོགས་བཞི་ཐམས་ཅད་དང་། མཚམས་ཀྱི་རེ་མིག་དང་སྣམ་བུ་དང་གྲུ་ཆད་ལ་ཟླ་བའི་གདན་བསྒོམ་མོ། །དེ་ལ་པདྨ་ནི་ཐབས་སྣ་ཚོགས་ཀྱིས་འགྲོ་བའི་དོན་མཛད་པའོ། །ཟླ་བ་ནི་དགེ་བའི་རྩ་བ་བྱང་ཆུབ་ཀྱི་མྱུ་གུ་བསྐྱེད་པའོ། །དེ་ནས་དབུས་སུ་སེང་གེ་དང་ཟླ་བའི་ [73b.4]གདན་ལ་བདག་གི་སེམས་གཟུང་འཛིན་དག་པའི་ཡེ་ཤེས་དེ་ཉིད་ཡི་གེ་ཨ་དཀར་པོ་ཅིག་ཏུ་བསྒོམས་ལ། དེའི་འཕྲོ་འདུ་ལས་རྣམ་པར་སྣང་མཛད་ཆེན་པོ་བྱང་ཆུབ་སེམས་དང་རང་བཞིན་གཅིག་པ། ཞལ་བཞི་ཕྱག་བརྒྱད་པ་ཞལ་ཕྱོགས་བཞིར་གཟིགས་པ། རྒྱན་མི་མངའ་བ་ཞི་བའི་རང་བཞིན་ [73b.5]དབུ་ལ་རལ་པ་གྱེན་དུ་འཁྱིལ་བ་ཆོས་ཀྱི་དབྱིངས་ཀྱི་ཡེ་ཤེས་དང་དབྱེར་མེད་པའི་དོན་སྐུ་མདོག་དཀར་པོ་ཆོས་ཉིད་ལ་ཉོན་མོངས་པའི་སྐྱོན་གྱིས་མ་གོས་པའི་རྟགས། ཕྱག་བརྒྱད་ཐུགས་ཀ་ན་བྱང་ཆུབ་ཀྱི་མཆོག་གི་ཕྱག་རྒྱ་བཅས་པ་ལ་སྙིང་རྗེ་དང་ཤེས་རབ་གཉིས་སུ་མེད་པའི་རང་བཞིན་དུ་བསྒོམ་མོ། །དེའི་ [73b.6]ཐུགས་ཀར་ཡི་གེ་ཧྲཱིཿལས་དང་པོའི་སངས་རྒྱས་སྐུ་མདོག་དཀར་པོ་ཞལ་བཞི་ཕྱག་བརྒྱད་པ་དབུ་ལྔ་ལ་གཙུག་གི་དབུ་རྟ་མགོ་དཀར་པོ་སྟེ། ཁམས་གསུམ་ཐམས་ཅད་ཟིལ་གྱིས་གནོན་པའམ་དབང་དུ་སྡུད་པའི་རང་བཞིན་ནོ། །ཞལ་ཤར་ཕྱོགས་སུ་གཟིགས་པ་སྔོ། །ལྷོ་སེར་ནུབ་དམར། བྱང་ [73b.7]ལྗང་བ་རིགས་ལྔའི་རང་བཞིན་ནོ། །ཕྱག་གཡས་པ་བཞི་ན་རལ་གྲི་བསྣམས་པ། གཡོན་པ་བཞི་ན་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་དུམ་པ་རེ་རེ་བསྣམས་པའོ། །ཉོན་མོངས་པ་གཅོད་པའི་རྟགས་རལ་གྲི་དམ་པའི་ཆོས་སྟོན་པའི་རང་བཞིན་དང་ལྡན་པས་པོ་ཏི་བསྣམས་པ། ཆོས་ཀྱི་སྐུའི་ [74a] [74a.1]རང་བཞིན་ཡིན་པས་སྐུ་མདོག་དཀར་པོ་ཉི་མའི་དཀྱིལ་འཁོར་དང་ལྡན་པ། སྣ་ཚོགས་ཀྱི་ན་བཟས་བརྒྱན་པ། ཕུད་བུ་ལྔ་དང་ལྡན་པར་བསྒོམ། དེའི་ཐུགས་ཀར་ཤེས་རབ་ཀྱི་འཁོར་ལོ་བསྒོམ། །རྩིབས་དྲུག་ལ་ཤར་གྱི་རྩིབས་ནི་སྔོ་གཡས་གཡོན་ནི་དཀར་ལྷོ་སེར་ནུབ་དམར། བྱང་ [74a.2]ལྗང་། མུ་ཁྱུད་བཞི་ཡང་དཀར། རིགས་དྲུག་གི་རང་བཞིན་ཡིན་པས་རྩིབས་དྲུག་གོ། །རྟེན་ཅིང་འབྲེལ་པའི་རང་བཞིན་ཡིན་པས་འཁོར་ལོ་མུ་ཁྱུད་དང་པོ་ལ། ཨོཾ་སརྦ་དྷརྨྨ་ཨ་བྷ་ས་སྭ་བྷཱ་བ་བི་ཤུདྡྷ་བཛྲ་ཨ་ཨཱ་ཨཾ་ཨཿ། ཞེས་པ་བསྒོམ་མོ། །གཉིས་པ་ལས་སངས་རྒྱས་ཀྱི་ས་བཅུ་གཉིས་ཀྱི་ས་བོན། [74a.3]ཨ་ཨཱ་ཨི་ཨཱི་ཨུ་ཨཱ་ཨེ་ཨཻ་ཨོ་ཨཽ་ཨཾ་ཨཿ། བཅུ་གཉིས་དགོད། རྩིབས་དྲུག་ལ་ཤར་གྱི་རྩིབས་ལ། ཨོཾ་དུཿཁཙྪེ་དཱ་ཡ་ཏེ་ན་མཿ། ལྷོའི་རྩིབས་ལ་ཨོཾ་བཱ་གཱི་ཤྭ་རཱ་ཡ་ཏེ་ན་མཿ ནུབ་ཀྱི་རྩིབས་ལ་ཨོཾ་བཛྲ་ཏཱིཀྵྞཱ་ཡ་ཏེ་ན་མཿ། བྱང་གི་རྩིབས་ལ་ཨོཾ་ཛྙཱ་ན་ཀཱ་ཡཱ་ཏེ་ན་མཿ ཤར་སྟོད་ཀྱི་ [74a.4]རྩིབས་ལ། ཨོཾ་པྲ་ཛྙཱ་ཛྙཱ་ན་མཱུཏྟ་ཡེ་ན་མཿ། ཤར་སྨད་དུ། ཨོཾ་ཨ་ར་པ་ཙ་ནཱ་ཡ་ཏེ་ན་མཿ། དེའི་ཕྱི་རོལ་རྩིབས་མཆན་གྱི་མུ་ཁྱུད་ལ་སྔགས་ཀྱི་ཕྲེང་བ། ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ་ཞེས་པ་དགོད། མུ་ཁྱུད་ཕྱི་མ་ལ་ཀ་ཁ་སུམ་ཅུ་རྩ་གཉིས་དགོད། །དེས་མཚན་བཟང་པོ་སུམ་ཅུ་རྩ་གཉིས་ཀྱི་ས་བོན་ [74a.5]ཡིན་ནོ། །འཁོར་ལོའི་ལྟེ་བའི་ཟླ་བའི་དཀྱིལ་འཁོར་དེའི་སྟེང་དུ་ཡི་གེ་ཨཱཿལས་བསྐྱེད་པའི་འཇམ་དཔལ་ཡེ་ཤེས་སེམས་དཔའ་སྐུ་མདོག་དཀར་པོ་ཞལ་གཅིག །ཕྱག་གཉིས་པ། ཉི་མའི་དཀྱིལ་འཁོར་དང་ལྡན་པ་བྱིས་པའི་རྒྱན་གྱིས་བརྒྱན་པ། གཙུག་ཕུད་ལྔ་དང་ལྡན་པ་ [74a.6]ཕྱག་གཉིས་ན་ཨུཏྤ་ལ་བསྣམས་པ་སྟེ། གཉིས་སུ་མེད་པའི་ཡེ་ཤེས་ཀྱི་རང་བཞིན་དང་ལྡན་པའི་དོན་ཏོ། །དེའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཨ་དཀར་པོ་བསྒོམས་ཏེ། ཐམས་ཅད་མཁྱེན་པ་དང་ལམ་མཁྱེན་པ་དང་རྣམ་པ་ཐམས་ཅད་མཁྱེན་པ་ཉིད་དང་། [74a.7]གསུམ་གྱི་རང་བཞིན་ཅན་ཉན་ཐོས་དང་རང་སངས་རྒྱས་ཐམས་ཅད་བསྐྱེད་པའི་གནས། བྱང་ཆུབ་སེམས་དཔའ་ཐམས་ཅད་བསྐྱེད་པ། དེ་བཞིན་གཤེགས་པ་ཐམས་ཅད་ཀྱི་རང་བཞིན་བསྒོམ་པའོ། །ཨ་དེ་ལས་འོད་ཟེར་ཕྱོགས་བཅུར་འཕྲོས་པས། དང་པོར་བསྐྱེད་པའི་རིམ་པ་ལས་ཕྱིར་འཕྲོས་པའི་ [74b] [74b.1]མཆོད་རྟེན་གྱི་བུམ་པའི་ནང་ནས་ཕྱིར་འཕྲོས་པས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སེམས་ཅན་ཉོན་མོངས་པ་ལྔ་དང་། ཚུལ་ཁྲིམས་འཆལ་པ་ལ་སོགས་པ་དག་པར་བྱས་ཏེ། སངས་རྒྱས་པར་བྱས་ནས། དེ་ལས་ཀྱང་ཕྱིར་འཕྲོས་ནས་རྡོ་རྗེ་ཁྲོ་བོའི་ཞལ་ནས་བྱུང་སྟེ། ཕྱོགས་བཅུའི་ [74b.2]འཇིག་རྟེན་དུ་ཁྱབ་ནས་སེམས་ཅན་གྱི་དོན་བྱས་ཏེ་སླར་འདུས་པས་རིམ་པར་ཡི་གེ་ཨ་ལ་ཐིམ་པར་བྱས། རྡོ་རྗེ་དབྱིངས་ཀྱི་ལྷ་རྣམས་སུ་སྤྲུལ་ལ། སངས་རྒྱས་མཆོད་པ་དང་། སེམས་ཅན་གྱི་དོན་བྱས་ནས། ཡང་སླར་འདུས་པས་སེམས་མ་རྡོ་རྗེ་མ་ལ་སོགས་པ་བཞི་ནི་དབུས་ཀྱི་གཙོ་བོ་ལ་བསྐོར། རིགས་ [74b.3]ལྔ་དེ་བཞིན་གཤེགས་པའི་རིགས་ནི་གཙོ་བོ་ལ་ཐིམ་པར་བྱའོ། །རིགས་བཞི་ནི་གླང་པོ་ཆེའི་ཁྲི་ལ་མི་བསྐྱོད་པ་ལ་འཁོར་སེམས་དཔའ་བཞིས་བསྐོར་བ། རྟའི་ཁྲི་ལ་རིན་ཆེན་འབྱུང་ལྡན་ལ་འཁོར་སེམས་དཔའ་བཞིས་བསྐོར་བ། རྨ་བྱའི་ཁྲི་ལ་སྣང་བ་མཐའ་ཡས་ལ་འཁོར་སེམས་དཔའ་བཞིས་ [74b.4]བསྐོར་བ། ནམ་མཁའ་ལྡིང་གི་ཁྲི་ལ་དོན་ཡོད་གྲུབ་པ་ལ་འཁོར་སེམས་དཔའ་བཞིས་བསྐོར་བར་བསྒོམ་མོ། །མཚམས་ཀྱི་རེ་མིག་བཞི་ལ་སྒེག་མོ་ལ་སོགས་པ་བཞིའོ། །སྣམ་བུ་ལ་མཆོད་པའི་ལྷ་མོ་བཞི་དང་། བྱང་ཆུབ་སེམས་དཔའ་བཅུ་དྲུག་གོ། །སྒོ་བཞིའི་གནས་སུ་སྒོ་བ་བཞིས་ [74b.5]བསྐོར་བར་བསྒོམས་ལ། དེ་ནས། འདི་ལྟར་སངས་རྒྱས་བཅོམ་ལྡན་འདས། །ཞེས་པ་ནས། ཐེག་པ་ཆེན་པོའི་ཚུལ་གྱི་མཆོག །ཅེས་པ་ཡན་ཆད་བཀླག་པར་བྱའོ། །དེ་ནས་མཚན་གྱི་ཡིག་འབྲུ་འོད་ཟེར་དཀར་པོ་སྤྲོས་ཏེ་འོད་ཟེར་གྱིས་སེམས་ཅན་གྱི་ཉོན་མོངས་པ་གཏི་མུག་ལ་སོགས་པ་དག་པར་བྱས་ [74b.6]ནས་ཡང་དག་པའི་དོན་དང་ལྡན་པར་བྱས་ཏེ། སླར་འདུས་པས་མཚན་གྱི་སྔགས་བརྒྱད་ཅུ་རྩ་དྲུག་ཡོད་པ་རིགས་ལྔར་ཕྱེས་ཏེ་ཕྱོགས་བཞི་ནས་དཀྱིལ་འཁོར་གྱི་ལྷ་ལ་ཐིམ་པར་བྱའོ། །དེ་ནས་རྣམ་པར་སྣང་མཛད་ཆེན་པོ་མི་སྣང་བར་བྱས་ནས། དབུས་ཀྱི་གདན་ལ་ཡི་གེ་ཨ་ལས་རྣམ་པར་སྣང་མཛད་སྐུ་ [74b.7]མདོག་དཀར་པོ། ཞལ་གཅིག་ཕྱག་གཉིས་པ་དབུ་ལ་རལ་པ་གྱེན་དུ་འཁྱིལ་བ་རྒྱན་མི་མངའ་བ་ཕྱག་གཉིས་བྱང་ཆུབ་མཆོག་གི་ཕྱག་རྒྱར་མཛད་པ་བསྒོམ་མོ། །དེའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་དྷཱིཿལས་དང་པོའི་སངས་རྒྱས་སྐུ་མདོག་དཀར་ལ་ཕྱག་མཚན་གོང་དང་མཐུན་ [75a] [75a.1]པའོ། །དེའི་ཐུགས་ཀར་ཤེས་རབ་ཀྱི་འཁོར་ལོ་རྩིབས་བཅུ་པ་ལ་མུ་ཁྱུད་བཞི་ལྟེ་བ་དང་བཅས་པར་བསྒོམ་མོ། །རྩིབས་དཀར་པོ་བཅུ་ལ། ཨོཾ་པྲཛྙཱ་ཛྙཱ་ན་མུརྟྟཱ་ཡ་ཏེ་ན་མཿ། ཞེས་པ་རིམ་པར་དགོད་དོ། །གཞན་མ་གོང་མ་དང་མཐུན་ནོ། །དབུས་ཀྱི་ལྟེ་བ་ལ་ཟླ་བའི་སྟེང་དུ་ཡི་ [75a.2]གེ་ཨ་ལས་འཇམ་དཔལ་ཡེ་ཤེས་སེམས་དཔའ་ཡེ་ཤེས་སྤྱི་གཟུགས་ཞེས་བྱ་བ། དེ་བཞིན་གཤེགས་པའི་རིགས་ཀྱི་འཇམ་དཔལ་ཡེ་ཤེས་སེམས་དཔའ་དཀར་པོ་ཕྱག་གཡས་ན་རལ་གྲི་གཡོན་ན་འཁོར་ལོ་བསྣམས་པ་ཟུར་ཕུད་ལྔ་དང་ལྡན་པ། གཞོན་ནུ་རྒྱུན་གྱིས་བརྒྱན་པར་བསྒོམ་མོ། །དེའི་ [75a.3]ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཨ་དཀར་པོ་བསྒོམ། དེ་ལ་འོད་འཕྲོས་པས་གོང་མའི་རིམ་པ་དང་འདྲ་བ་རྣམ་པར་སྣང་མཛད་འཕྲོས་པས་སེམས་ཅན་གྱི་ཉོན་མོངས་པའི་གཏི་མུག་དག་པར་བྱས་ཏེ། སླར་རིམ་པར་འདུས་པས་ཡི་གེ་ཨ་ལ་ཐིམ་སྟེ། མཚན་གྱི་སྔགས་ནི་སངས་རྒྱས་རྣམ་པར་སྣང་མཛད་ཆེ། [75a.4]ཞེས་པ་ནས། རྡོ་རྗེ་ལྕགས་ཀྱུ་ཞགས་པ་ཆེ། །ཞེས་པའི་བར་དུ་བཀླག་པར་བྱའོ། །དེ་ནས་སྔགས་བརྗོད་པ་ཙམ་ན་སྔགས་ལས་འོད་ཟེར་དཀར་པོ་འཕྲོས་པས་རྣམ་པར་སྣང་མཛད་མང་པོ་སྤྲོས་པས་སེམས་ཅན་ཀུན་དེ་བཞིན་གཤེགས་པའི་རིགས་སུ་སངས་རྒྱས་པར་བྱས་ཏེ། སླར་འདུས་པ་ལས་ [75a.5]མཚན་གྱི་སྔགས་བརྒྱད་ཅུ་རྩ་གཅིག་ཡོད་པ་རིགས་ལྔར་ཕྱེ་སྟེ། སུམ་ཅུ་རྩ་བདུན་དེ་བཞིན་གཤེགས་པའི་རིགས་ལ་ཐིམ། རིགས་བཞིའི་སྐུ་ཕྱག་རྒྱ་སུམ་ཅུ་རྩ་དྲུག་ཐིམ་པར་བྱའོ། །དེ་ནས་རྣམ་པར་སྣང་མཛད་བསྡུས་ཏེ་ཤར་དུ་བཀོད་ནས། དབུས་ཀྱི་ཡི་གེ་ཧཱུཾ་ལས་མི་བསྐྱོད་པ་སྐུ་མདོག་སྔོན་པོ་ཞལ་ [75a.6]གཅིག་ཕྱག་གཉིས་པ་རྒྱན་མི་མངའ་བ་རལ་པའི་དབུ་རྒྱན་ཅན་ཕྱག་གཡས་པས་ས་གནོན་པ་བདུད་དང་བགེགས་ཀྱིས་མི་བསྐྱོད་པའི་རྟགས། ཕྱག་གཡོན་ཐུགས་ཀར་ཏིང་ངེ་འཛིན་གྱི་ཚུལ་དུ་བཞུགས་པ། དེའི་ཐུགས་ཁར་ཟླ་བའི་དཀྱིལ་འཁོར་དེའི་སྟེང་དུ་ཡི་གེ་དྷཱིཿལས་དང་པོའི་སངས་རྒྱས་སྐུ་མདོག་དང་ཕྱག་མཚན་ [75a.7]གོང་མ་དང་མཐུན། དེའི་ཐུགས་ཀར་ཤེས་རབ་འཁོར་ལོ། །དེའི་རྩིབས་བརྒྱད་ལ་ཁ་དོག་སྔོན་པོ་མུ་ཁྱུད་ནི་དཀར་པོ། རྩིབས་བརྒྱད་ལ། ཨོཾ་དུཿཁཙྪེ་དཱ་ཡ་ཏེ་ན་མཿ་ཞེས་པའི་ཡིག་འབྲུ་རེ་རེ་དགོད། ཕྱི་མ་གོང་མ་དང་མཐུན་པར་བྱ། དབུས་ཀྱི་ལྟེ་བའི་ཡི་གེ་ཧཱུཾ་ལས་བསྐྱེད་པའི་འཇམ་དཔལ་ཡེ་ཤེས་སེམས་ [75b] [75b.1]དཔའ་སྡུག་བསྔལ་གཅོད་པ་ཞེས་བྱ་བ་སྐུ་མདོག་སྔོན་པོ་རྒྱན་གོང་དང་འདྲ་བ། ཕྱག་གཡས་རལ་གྲི། གཡོན་རྡོ་རྗེ་བསྣམས་པ། ཐུགས་ཀར་ཟླ་བ་ལ་ཧཱུཾ་སྔོན་པོ་བསྒོམ་མོ། །དེ་ལས་འོད་ཟེར་རིམ་པར་ཕྱིར་འཕྲོས་པས་མི་བསྐྱོད་པ་ཁྲོ་བོའི་རིགས་ཀྱི་འོད་འཕྲོས་ཏེ། སེམས་ཅན་ཐམས་ཅད་ཀྱི་ཞེ་སྡང་དག་པར་ [75b.2]བྱས་ཏེ། སླར་འདུས་པ་ལས་ཡི་གེ་ཧཱུཾ་ལ་ཐིམ་པར་བྱས་ལ་མཚན་གྱི་སྔགས་ནི། རྡོ་རྗེ་འཇིགས་བྱེད་འཇིགས་པར་བྱེད། །ཅེས་པ་ནས། སྒྲ་དང་ལྡན་པ་རྣམས་ཀྱི་མཆོག །ཅེས་པའི་བར་དུ་བཀླག་པར་བྱའོ། །འོད་ཟེར་སྔོན་པོ་ཁྲོ་བོར་སྤྲོས་ནས་སེམས་ཅན་གྱི་དོན་བྱས། སླར་འདུས་པ་ལས་མཚན་ [75b.3]གྱི་སྔགས་བདུན་ཅུ་རྩ་གཉིས་ཡོད་པ་རིགས་ལྔར་བསྒོམས་ལ། ཕྱོགས་བཞི་ནས་དཀྱིལ་འཁོར་གྱི་ལྷ་ལ་ཐིམ་པར་བྱའོ། །དེ་ནས་མི་བསྐྱོད་པ་སླར་བསྡུས་ཏེ། རང་གི་གདན་ལ་བཀོད་ནས་རྣམ་པར་སྣང་མཛད་ནུབ་ཀྱི་གདན་ལ་བཀོད་དེ། དབུས་ཀྱི་གཙོ་བོ་ལ་ཧྲཱིཿལས་སྣང་བ་མཐའ་ཡས་བསྐྱེད། ། [75b.4]སྐུ་མདོག་དམར་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ལས་མི་གཡོ་བའི་ཏིང་ངེ་འཛིན་གྱི་ཕྱག་རྒྱ་ཅན་བསྒོམ་མོ། །དེའི་ཐུགས་ཀར་དྷཱིཿལས་དང་པོའི་སངས་རྒྱས་བསྒོམ། །དེའི་ཐུགས་ཀར་ཤེས་རབ་འཁོར་ལོ་རྩིབས་བརྒྱད་པ་ཁ་དོག་དམར་པོ། ཨོཾ་བཛྲ་ཏཱིཀྵྞཱ་ཡ་ཏེ་ན་མཿ ཡིག་འབྲུ་ [75b.5]བརྒྱད་དཀོད། གཞན་འདྲ། དབུས་སུ་ཟླ་བའི་གདན་ལ་ཡི་གེ་ཧྲཱིཿལས་འཇམ་དཔལ་རྡོ་རྗེ་རྣོན་པོ། སྐུ་མདོག་དཀར་པོ་ཕྱག་གཡས་ན་རལ་གྲི་འཕྱར་བ། གཡོན་པདྨ་ཐུགས་ཀར་བསྣམས་པ། ཐུགས་ཀར་ཟླ་བའི་གདན་ལ་ཧྲཱིཿབསྒོམ། དེ་ལས་འོད་ཟེར་སྣང་བ་མཐའ་ཡས་སྤྲོ། སེམས་ཅན་གྱི་ [75b.6]འདོད་ཆགས་ཞི་བར་བྱས་ཏེ། སླར་འདུས་པས་ཡི་གེ་ཧྲཱིཿལ་ཐིམ་པར་བྱས། ཡང་དག་བདག་མེད་དེ་བཞིན་ཉིད། །ཅེས་པ་ནས། ཡེ་ཤེས་མེ་ལྕེ་འོད་རབ་གསལ། །ཡན་ཆད་བརྗོད། འོད་ཟེར་དམར་པོ་སྤྲོ་བར་བྱའོ། །སླར་འདུས་པ་ལས་མཚན་གྱི་སྔགས་ནི་ཉིས་བརྒྱ་བདུན་ཅུ་རྩ་ལྔར་བགོས་ [75b.7]ལ། །དཀྱིལ་འཁོར་ལ་ཐིམ་པར་བྱས་ཏེ། དེ་ནས་སྣང་བ་མཐའ་ཡས་རང་གི་གནས་ལ་བཞུགས་ནས། རྣམ་སྣང་ལྷོར་བཀོད་དེ། དབུས་ཀྱི་གཙོ་བོ་ཡི་གེ་ཨ་ལས་བསྐྱེད་པ་རིན་ཆེན་འབྱུང་ལྡན་སྐུ་མདོག་སེར་པོ་ཕྱག་རྒྱན་མཆོག་སྦྱིན་མཛད་པར་བསྒོམ། །དེའི་ཐུགས་ཀར་དང་པོའི་སངས་རྒྱས། [76a] [76a.1]དེའི་ཐུགས་ཀར་ཤེས་རབ་འཁོར་ལོ་རྩིབས་བརྒྱད་པ། ཨོཾ་བཱ་གཱི་ཤྭ་རཱ་ཡ་ཏེ་ན་མཿཡི་གེ་འབྲུ་བརྒྱད་དགོད། གཞན་གོང་མ་དང་མཐུན། དེའི་ལྟེ་བ་ལ་ཟླ་བའི་སྟེང་དུ་ཡི་གེ་ཨོཾ་ལས་འཇམ་དཔལ་ངག་གི་དབང་ཕྱུག་སྐུ་མདོག་སེར་པོ་ཕྱག་གཡོན་རིན་པོ་ཆེ་ཐུགས་ཀར་བསྣམས་པ། [76a.2]གཡས་པ་རལ་གྲི་འཕྱར་བ། དེའི་ཐུགས་ཀར་ཟླ་བའི་དཀྱིལ་འཁོར་ལ་ཡི་གེ་ཨོཾ། དེ་ལས་རིན་ཆེན་འབྱུང་ལྡན་སྤྲོ། །སླར་འདུས་ཡི་གེ་ཨོཾ་ལ་ཐིམ། །མཚན་གྱི་སྔགས། འདོད་པའི་དོན་གྲུབ་དམ་པ་སྟེ། །ཞེས་པ་ནས། ནོར་བུ་ཆེན་པོ་རིན་ཆེན་ཏོག །ཅེས་པའི་བར་གྱིས་སྔགས་བརྗོད་ [76a.3]ནས། འོད་ཟེར་སེར་པོ་འཕྲོས་ཏེ་སེམས་ཅན་གྱི་དོན་བྱས། སླར་འདུས་པས་མཚན་གྱི་སྔགས་བརྒྱ་རྩ་ལྔ་རིགས་ལྔར་བགོས་ཏེ། དཀྱིལ་འཁོར་གྱི་ལྷ་ལ་ཐིམ་པར་བྱའོ། །དེ་ནས་རིན་ཆེན་འབྱུང་ལྡན་རང་གི་གནས་སུ་བཀོད་ནས། རྣམ་པར་སྣང་མཛད་བྱང་གི་གདན་ལ་བཀོད་དེ། དབུས་སུ་ [76a.4]གཙོ་བོ་ཡི་གེ་ཨ་ལས་བསྐྱེད་པ། དོན་ཡོད་གྲུབ་པ་སྐུ་མདོག་སྣ་ཚོགས་ཏེ་ལྗང་གུ། ཕྱག་གཉིས་སྐྱབས་སྦྱིན་གྱི་ཕྱག་རྒྱ་མཛད་པ། དེའི་ཐུགས་ཀར་དང་པོའི་སངས་རྒྱས། དེའི་ཐུགས་ཀར་ཤེས་རབ་འཁོར་ལོ་ལྗང་གུ་རྩིབས་བརྒྱད་པ། ཨོཾ་ཛྙཱ་ན་ཀཱ་ཡཱ་ཡ་ཏེ་ན་མཿཞེས་འབྲུ་བརྒྱད་དགོད་དོ། ། [76a.5]གཞན་གོང་དང་མཐུན། དེའི་དབུས་སུ་ཟླ་བའི་སྟེང་དུ་གདན་ལ་ཡི་གེ་ཨ་ལས་བསྐྱེད་པའི་འཇམ་དཔལ་ཡེ་ཤེས་ཀྱི་སྤྱི་གཙུག་ཅེས་བྱ་བ། སྐུ་མདོག་ལྗང་གུ་ཕྱག་གཡོན་པ་ན་རྡོ་རྗེ་རྒྱ་གྲམ། གཡས་རལ་གྲི་ཐུགས་ཀར་འཕྱར་བ། དེའི་ཐུགས་ཀ་ན་ཟླ་བའི་དཀྱིལ་འཁོར་ལ་ཡི་གེ་ཨ་དེ་ལས་དོན་ཡོད་ [76a.6]གྲུབ་པ་སྤྲོ་སེམས་ཅན་གྱི་དོན་བྱས། སླར་རིམ་པར་འདུས་པས་ཡི་གེ་ཨ་ལ་ཐིམ་པར་བྱའོ། །དེ་ནས་མཚན་གྱི་སྔགས། སངས་རྒྱས་ཀུན་གྱི་རྟོགས་བྱ་བ། །ཞེས་པ་ནས། འཇམ་དཔལ་དཔལ་དང་ལྡན་པའི་མཆོག །ཅེས་པ་ཡན་ཆད་བཀླག་གོ། །ཡིག་འབྲུ་ལས་འོད་ལྗང་གུ་འཕྲོས་པས་སེམས་ [76a.7]ཅན་གྱི་དོན་བྱས་སླར་འདུས་པ་ལས་མཚན་གྱི་སྔགས་དགུ་བཅུ་རྩ་ལྔ་རིགས་ལྔར་བགོས་ཏེ། དཀྱིལ་འཁོར་ལ་ཐིམ་པར་བྱའོ། །དེ་ནས་དོན་ཡོད་གྲུབ་པ་རང་གི་གནས་སུ་བཀོད་དེ། རྣམ་པར་སྣང་མཛད་མི་སྣང་བར་གྱུར་ནས། དབུས་ཀྱི་གཙོ་བོ་ཡི་གེ་ཨ་ལས་བྱང་སེམས་རྡོ་རྗེ་བསྐྱེད་དེ། སྐུ་མདོག་ [76b] [76b.1]དཀར་པོ་རྡོ་རྗེ་དྲིལ་བུ་བསྣམས་པ། རིགས་ལྔའི་དབུ་རྒྱན་ཅན་བསྒོམ། དེའི་ཐུགས་ཀར་གོང་མ་བཞིན་དུ་དང་པོའི་སངས་རྒྱས། དེའི་ཐུགས་ཀར་ཤེས་རབ་འཁོར་ལོ་རྩིབས་དགུ་པ། ཨོཾ་ཨ་ར་པ་ཙ་ནཱ་ཡ་ཏེ་ན་མཿཡི་གེ་འབྲུ་རེ་རེ་དགོད་དོ། །མུ་ཁྱུད་གོང་མ་དང་མཐུན་ནོ། །ལྟེ་བའི་ཟླ་བའི་གདན་ལ་ཡི་གེ་ཨ་ [76b.2]ལས་བསྐྱེད་པའི་འཇམ་དཔལ་ཨ་ར་པ་ཙ་ན་ཞེས་བྱ་བ། སྐུ་མདོག་དཀར་པོ་གཡོན་པས་གླེགས་བམ་བསྣམས་ནས་ཐུགས་ཀར་བཞག་པ། གཡས་པ་རལ་གྲི་འཕྱར་བ། དེའི་ཐུགས་ཀར་ཟླ་བའི་དཀྱིལ་འཁོར་ལ་ཡི་གེ་ཨ་བསྒོམས་ནས། དེ་ལས་རྡོ་རྗེ་སེམས་དཔའ་སྤྲོ་བར་བྱ། སེམས་ཅན་ [76b.3]གྱི་ཉོན་མོངས་པ་ཐམས་ཅད་ཞི་བར་བྱས་ཏེ། སླར་འདུས་པས་ཐུགས་ཀའི་ཨ་ལ་ཐིམ་པར་བྱས་ནས་རྡོ་རྗེ་དབྱིངས་ཀྱི་དཀྱིལ་འཁོར་གྱི་ཚིགས་བཅད་བརྗོད་པ་ཡིན་ཏེ། རྡོ་རྗེ་སེམས་དཔའ་དང་རྣམ་པར་སྣང་མཛད་ཆེན་པོ་དབྱེར་མེད་པའི་ཕྱིར་རོ། །འདི་ནི་སྤྱིའི་རྣལ་འབྱོར་ཡིན་པས་འདི་ལྟར་བརྗོད་ [76b.4]པར་བྱའོ། །རིགས་དྲུག་ལྷ་རང་གི་ཡི་དམ་བྱེད་པའི་ཚེ་བསྒོམས་ནས་བརྗོད་པར་བྱའོ། །མཚན་ཡང་དག་པར་བརྗོད་པའི་བཀླག་པའི་བསྒོམ་ཁོག །སློབ་དཔོན་དཔལ་ལྡན་བྱང་ཆུབ་མཆོག་གིས་མཛད་པ་རྫོགས་སོ། ། {T2581}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ [76b.5]ནཱ་མ་སཾ་གཱི་ཏི་ནཱ་མ་ཧོ་མ་ཀྲ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་ཞེས་བྱ་བའི་སྦྱིན་སྲེག་གི་རིམ་པ། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །བདེན་པ་གཉིས་ལ་གནས་ཤིང་དྲི་མེད་གཟི་བརྗིད་ལྡན་པ་ཡི། །ཚུལ་མཆོག་དམ་ [76b.6]པ་རིམ་པ་བཞིར་ལྡན་རྣལ་འབྱོར་པ། རིམ་གཉིས་ཚུལ་གྱིས་སྦྱིན་སྲེག་ཆོ་ག་བཤད་པར་བྱ། །ད་ནི་མཚན་ཡང་དག་པར་བརྗོད་པའི་སྔགས་ཀྱིས་དབང་གིས་འདིར་གསུངས་པ་ན་བའི་དོན་དུ་ཞི་བའི་ལས་བྱའོ། །འབྱོར་པའི་དོན་དུ་རྒྱས་པའི་ལས་བྱའོ། །དབང་ནི་དགུག་པའོ། །དྲག་པོ་ནི་ [76b.7]ཚར་གཅོད་པའོ། །དེའི་དོན་རྒྱས་པར་བཤད་པར་བྱ་སྟེ། སྙིང་རྗེ་དང་དགའ་བར་ལྡན་པའི་རྣལ་འབྱོར་པས། བདག་དང་གཞན་ལ་ཕན་གདགས་པའི་ཕྱིར། ཞི་བ་དང་རྒྱས་པ་དང་དབང་དུ་བྱ་བ་ལ་སོགས་པ་གསུངས་ཏེ། དབང་བསྐུར་བའི་ཐོག་མར་ཞི་བའོ། །དེ་ནས་རྒྱས་པའོ། །དེ་ནས་ [77a] [77a.1]དབང་དང་དྲག་པོའོ། །ཐ་མར་ལས་ཐམས་ཅད་པའོ། །ཐབ་དང་ཕྱག་རྒྱ་དགོད་པ་དང་། །དུས་དང་ཁ་ལྟ་མཆོད་རྫས་དང་། །བཞག་ཐབས་དང་ནི་འདུག་སྟངས་དང་། །ཡམ་ཤིང་བུད་ཤིང་གཟར་བུ་དང་། །རྣལ་འབྱོར་ཏིང་འཛིན་རིམ་པ་དང་། །ཀུ་ཤ་མེ་དང་སྲེག་རྫས་དང་། །སྤྱན་ [77a.2]དྲངས་དེ་ལ་མཆོད་པ་དང་། །རྫས་དབུལ་བསྟོད་དེ་ཕྱག་བྱ་བ། །ལྷར་བསྒོམས་སྤྱན་དྲངས་བཞུགས་གསོལ་དང་། །རྒྱས་འདེབས་བཞི་ཡིས་རྒྱས་གདབ་ཅིང་། །མཆོད་བསྟོད་དགང་གཟར་གྱིས་དབུལ་བྱ། །ཕྱི་མ་རིམ་གྱིས་གོང་ལྟར་དབུལ། །དེ་ནས་བསྟོད་པ་ཕྱག་བྱ་དང་། །ཐ་མར་ [77a.3]གཤེགས་སུ་གསོལ་བ་དང་། །དེ་ནས་མེ་ལྷ་དེ་དང་ནི། །གོང་མའི་རིམ་པ་ཇི་བཞིན་པས། །ལྷག་མའི་རྫས་ཀྱིས་མཆོད་བྱ་སྟེ། །ཐ་མར་གཤེགས་སུ་གསོལ་བར་བྱ། །དེ་ནས་གསུངས་ཏེ་རྗེས་སུ་ནི། །ཡི་རང་དབུལ་ཞིང་རྫས་དག་གིས། །རིམ་བཞིན་རྣལ་འབྱོར་གང་ལྡན་པས། །ཚུལ་བཞིན་ [77a.4]དུ་ནི་དབུལ་བར་བྱ། །དེ་ལ་དང་པོ་ཐབ་ཀྱི་རིམ་པ་བསྟན་ཏེ། །ཞི་བའི་ཐབ་ཀྱི་དབྱིབས་ཀྱང་གཉིས་ཏེ་ཟླུམ་པོར་བྱ་བ་དང་། པདྨ་ལྟ་བུར་བྱའོ། །དེ་ཡང་ཁ་ཁྱེར་ནི་སོར་བཞི་པའོ། །ཞེང་དང་དཔངས་སུ་ཡང་དེ་ཉིད་དོ། །ཐུར་དུ་ཡང་ཁྲུ་གང་ངོ་། །སྲིད་དུ་ཡང་ཁྲུ་གང་ངོ་། །དེའི་ཕྱི་རོལ་དུ་སོར་བཞི་བོར་ལ་ [77a.5]པདྨའི་ཕྲེང་བའོ། །ཁ་ཁྱེར་ལ་ནི་རྡོ་རྗེ་ཕྲེང་བ་གཏང་བར་བྱའོ། །དེ་ཡང་ཕྱི་ནི་ཁྲུ་བཞི་ལ། །རྒྱར་ནི་ཁྲུ་ལྔའོ། །དབུས་སུ་འཇིམ་པ་ལ་འབུར་དུ་བརྐོས་ལ། གཙོ་བོའི་ཕྱག་མཚན་ཤར་དུ་རྡོ་རྗེ། །ལྷོར་འཁོར་ལོའོ། །ནུབ་དུ་པདྨའོ། །བྱང་དུ་སྣ་ཚོགས་རྡོ་རྗེའོ། །ཁ་དོག་དཀར་པོ་ས་དཀར་གྱི་ཆུས་བསྐུ་ [77a.6]བར་བྱའོ། །པདྨའི་ཐབ་ཀྱང་དེ་དང་འདྲ་བར་མཐུན་པར་ཤེས་པར་བྱའོ། །ཞི་བའི་ཐབ་ཀྱི་རིམ་པའོ། །རྒྱས་པའི་ཐབ་ཀྱི་དབྱིབས་གྲུ་བཞི་ལ་རྒྱར་གྲུ་བཞིར་གཏང་ངོ་། །དཔངས་སུ་ཡང་ཁྲུ་གང་ལ། གཏིང་དུ་ཡང་ཁྲུ་གང་བརྐོ་བར་བྱའོ། །སོར་བཞི་ནི་ཕྱིར་དགྱེད་པར་བྱའོ། །ཁ་ཁྱེར་ཡང་ཞི་བ་དང་མཐུན་ [77a.7]པར་སོར་བཞིའོ། །དེ་ཞིང་དུ་ཡང་སོར་བཞིར་མཉམ་པར་བྱའོ། །དེའི་ཕྱི་རིམ་དག་ཏུ་ནི་པདྨའི་ཕྲེང་བ་གཏང་བར་བྱའོ། །ཁ་ཁྱེར་ལ་ཡང་གོང་དུ་སྨོས་པ་ལྟར་རྡོ་རྗེ་ཕྲེང་བ་གཏང་བར་བྱའོ། །དེའི་ནང་དུ་ཡང་གཙོ་བོའི་མཚན་མ་འཇིམ་པ་ལ་དཀྱུས་སུ་སོར་བརྒྱད། དཔངས་སུ་སོར་གཅིག་གོ། །རྒྱས་པའི་ཐབ་ཀྱི་ [77b] [77b.1]རིམ་པའོ། །དབང་གི་ཐབ་ནི་རྒྱར་ཁྲུ་གསུམ་ལ་དབྱིབས་ཟླ་གམ་དང་གཞུ་ལྟ་བུའོ། །རྒྱ་ལ་ནི་སོར་བཞི་བཅུའོ། །དྲག་པོ་ལ་ནི་སོར་ཉི་ཤུ་ཐམ་པ་གཏང་ངོ་། །གཏིང་ཟབས་ནི་སོར་བཅུའོ། །ཁ་ཁྱེར་ལ་ནི་སོར་ཕྱེད་དང་གསུམ་མོ། །ཞེང་དང་དཔངས་མཉམ་པར་ཤེས་པར་བྱའོ། །ཁ་ཁྱེར་ལ་ནི་རྡོ་རྗེ་ཕྲེང་བའོ། ། [77b.2]དེའི་ཕྱི་རོལ་དུ་མེ་རི་འབར་བའི་འོད་གཏང་བར་བྱའོ། །ཁ་དོག་ནི་ཙནྡན་ནམ་བཙག་ཡུག་སྨན་གྱིས་བསྐུ་བར་བྱའོ། །དབུས་སུ་ནི་གཙོ་བོའི་ཕྱག་མཚན་པདྨ་ལ་བཞུགས་པ་མཚན་མ་གོང་མ་ལྟར་འབུར་དུ་བརྐོས་ལ་གཞག་གོ། །ཕྱི་མ་ནི་ཞི་བའི་ཐབ་ཀྱི་སྐབས་དང་མཐུན་པར་ཤེས་པར་བྱའོ། །དབང་གི་ཐབ་ [77b.3]ཀྱི་རིམ་པའོ།། །།དྲག་པོའི་ཐབ་ཀྱི་རིམ་པ་ནི། ཐབ་ཁུང་དབྱིབས་གྲུ་གསུམ་པ། དགྲ་བསད་པ་ལྟ་བུ་ལ་རྒྱར་ནི་སོར་ཉི་ཤུའོ། །ཟབས་སུ་ནི་བཅུའོ། །ཁ་ཁྱེར་ནི་སོར་གསུམ་པ་ཞེང་དུ་ཡང་དེ་ཉིད་དོ། །ཕྱི་རོལ་དུ་གཏང་བ་སོར་གསུམ་མོ། ཁ་ཁྱེར་ལ་རྡོ་རྗེ་རྩེ་མོ་གསུམ་པའོ། ། [77b.4]དེའི་ཕྱི་རོལ་དུ་ནི་རལ་གྲི་ལ་སོགས་པ་དྲག་པོའི་མཚན་མ་སྣ་ཚོགས་པའོ། །དབུས་སུ་ཡང་གཙོ་བོའི་མཚན་མ་ལ་རལ་གྲིས་མཚན་པ་འཇིམ་པ་ལ་འབུར་དུ་བརྐོས་པ་གོང་དུ་བསྟན་པ་དང་མཐུན་པར་ཤེས་པར་བྱའོ། །དྲག་པོའི་ཐབ་དང་མཚན་མའི་རིམ་པའོ། །དེའི་འོག་ཏུ་དེས་ཇི་ཙམ་ན་ [77b.5]བྱ་བའི་ཞི་བ་ལ་སྔ་དྲོའོ། །རྒྱས་པ་ལ་ཉི་མ་ཕྱེད་ནའོ། །དབང་ལ་ཉི་མ་བསྙུར་ནའོ། །དྲག་པོ་ལ་ནི་ནམ་ཕྱེད་ན་བྱའོ། །ཞི་བ་ལ་ནམ་ལངས་ནའོ། །རྒྱས་པ་ལ་ནི་ཐོ་རངས་བྱའོ། །དབང་ལ་ནི་དགོངས་ཀ་སྟེ་སྲོད་ལ་བྱའོ། །དྲག་པོ་ལ་ནམ་ཕྱེད་ན་བྱའོ། །ཞི་བ་ལ་ནི་དབྱར་བྱའོ། །རྒྱས་པ་ལ་ནི་ [77b.6]སྟོན་གྱི་དུས་སུ་བྱའོ། །དབང་ནི་དཔྱིད་ཀྱི་དུས་སུ་བྱའོ། །དྲག་པོ་ནི་དགུན་གྱི་དུས་སུ་སྟེ་དུས་ཀྱི་རིམ་པའོ། །མཆོད་པའི་རིམ་པ་ནི་རྣལ་འབྱོར་པ་སྔགས་པའི་གཡོན་དུ་ནི་དྲི་ཆབ་ཀྱི་ཆུ་མེ་ཏོག་ནང་དུ་བླུགས་པའི་དུང་ཕོར་རམ་དངུལ་ཕོར་རོ། །ཡོན་ཆབ་ནི་གསེར་ལ་སོགས་པས་བཀང་བའི་ཆུ་ [77b.7]དག་གཞག་གོ། །རྣལ་འབྱོར་པའི་གཡས་སུ་ནི་ཟངས་གཞོང་ལྟ་བུའི་ནང་དྲིས་བཀང་ལ་ཀུ་ཤ་ཡང་དེར་བཅུག །བསང་གཏོར་གྱི་སྣོད་གཞག་གོ། །ལས་ཀྱི་བུམ་པ་ཡང་གཡོན་དུ་གཞག་གོ །མཆོད་པའི་རིམ་པའོ།། །།རྫས་ཀྱི་རིམ་པ་ཡང་ཞི་བ་ལ་ནི་ཏིལ་ལོ། །རྒྱས་པ་ལ་ནི་ཞོའོ། ། [78a] [78a.1]དབང་ལ་ནི་ཨུཏྤ་ལའོ། །དྲག་པོ་ལ་ནི་ཚེར་མ་ཅན་ནམ་ཁབ་རྩེ་གསུམ་པ་སྟེ། འདི་ནི་ཁྱད་པར་གྱི་རྫས་སོ། །དེ་ཡང་ཐུན་མོང་གི་རྫས་ནི་མར་གྱི་སྙིང་པོ་དང་དཱུར་བ་དང་ཆག་པ་མེད་པའི་འབྲས་དང་ཞོ་ཟན་དང་ཀུ་ཤ་དང་འབྲས་ཐུག་དང་མངར་གསུམ་དང་། དཀར་གསུམ་དང་འབྲས་ས་བ་དང་། ནས་དང་ [78a.2]སྲན་མ་མ་ཤ་དང་། གྲོ་དང་ཨུ་དུམྺཱ་ར་དང་། ཨ་ཤྭཏྠ་དང་པ་ལ་ཤ་དང་། ནྱ་གྲོ་དྷ་དང་ཨ་མྲ་དང་། དེ་ཡང་ཐམས་ཅད་དུ་མི་ལྕོགས་ན། མར་དང་ཏིལ་ནི་ཞི་བའི་དུས་སུ་བྱའོ། །མར་དང་ཞོ་ནི་རྒྱས་པའི་དུས་སུ་བྱའོ། །མར་དང་ཨུཏྤལ་ནི་དབང་གི་དུས་སུ་བྱའོ། །མར་དང་མི་རུས་ཀྱི་ཕྱེ་མའམ་ཚེར་མ་ཅན་གྱི་ཤིང་ [78a.3]ནི་དྲག་པོའི་དུས་སུ་བྱའོ། །དེ་ཡང་ཐམས་ཅད་དུ་ནི་ཏིལ་ཞེས་གསུངས་སོ། །རྫས་ཀྱི་རིམ་པའོ།། །།བཞག་པའི་རིམ་པ་ནི་སྔགས་པའི་མདུན་དུ་ནི་མི་རོ་ཏིལ་དང་ཞོ་དང་ཨུཏྤ་ལ་དང་། མི་རུས་ཀྱི་ཕྱེ་མ་ནི་གཡས་སུ་བཞག་གོ། །དཱུར་བ་ལ་སོགས་པ་ཐུན་མོང་གི་རྫས་ཐམས་ཅད་ནི་གཡོན་དུའོ། །འབྲས་ [78a.4]སོ་བ་དང་ནས་དང་སྲན་མ་ཤ་དང་། གྲོ་དང་ཨུ་དུམྺཱ་ར་དང་། ཨ་ཤྭཏྠ་དང་ནྱ་གྲོ་དྷ་དང་། ཨ་མྲ་རྣམས་གཡས་སུའོ། །དགང་གཟར་དང་བླུགས་གཟར་ནི་མདུན་དུའོ། །རྫས་བཞག་པའི་རིམ་པའོ།། །།རྣལ་འབྱོར་པའི་འདུག་སྟངས་ཞི་བ་ལ་ནི་མཉམ་པའི་སྐྱིལ་ཀྲུང་དུ་སྟན་རས་བལ་གྱི་སྟེང་དུའོ། །རྒྱས་པ་ [78a.5]ལ་ནི་གཡས་རྐྱང་གིས་ཏེ་སེམས་དཔའི་འདུག་སྟངས་སོ། །དབང་ལ་ནི་པདྨའི་འདུག་སྟངས་ཏེ་རྐང་པའི་མཐིལ་སྤྲད་ལ་འདུག་གོ །དྲག་པོ་ལ་ནི་གཡས་བརྐྱང་དང་། གཡོན་བརྐྱང་གིས་སྟན་མེད་པར་མིག་བཟློག་སྟེ་གནས་པར་བྱའོ། །འདུག་སྟངས་ཀྱི་རིམ་པའོ།། །།གཟར་བུའི་རིམ་པ་ནི། །ཞི་བ་ [78a.6]ལ་ནི་དངུལ་ལམ་རྒྱ་ཤུག་གི་ཤིང་ལ་སྲིད་དུ་ཁྲུ་གང་སྦོམས་སུ་ཡུ་བ་ལ་མཐེ་བོའི་ཚད་དོ། །སོར་བཞི་ནི་ཞེང་ངོ་། །སོར་གཉིས་ནི་དཔངས་སུའོ། །ཁུ་བ་འཛག་པའི་བུ་ག་སོར་གཅིག་ཡོད་པ་རྩེ་མོ་ལ་རྡོ་རྗེ་རྩེ་གསུམ་པས་མཚན་པ། །དཀྱིལ་དུ་ནི་ལས་དང་མཐུན་པའི་ཐབ་ཀྱི་སྐབས་སུ་སྨོས་པའི་ཕྱག་རྒྱབ་རྐོ་ [78a.7]བའམ། འབུར་དུ་བྱས་པ་ཁལ་ཡཾ་རཾ་བཀོད་དེ། །ཡུ་བ་ལ་རྡོ་རྗེ་དང་རིན་པོ་ཆེས་མཚན་པ་ནི་དགང་གཟར་གྱི་ཚད་དང་རིམ་པའོ།། །།བླུགས་གཟར་ཡང་ཡུ་བ་ནི་གོང་དང་མཐུན་ལ་དབྱིབས་ནི་པདྨའི་འདབ་མ་འདྲ་བ་ལ་སོར་གཅིག །གཏིང་དུ་བརྐོ་བ་བྱས་པ་སོར་གཉིས་ཞེང་དུ་བཅལ་བའི་བླུགས་གཟར་ཏེ། ཕྱི་ [78b] [78b.1]མ་ནི་དགང་གཟར་དང་མཐུན་ནོ། །རྒྱས་པ་ལ་ནི་གསེར་རམ་ཨ་ཤོ་ཀའི་ཤིང་ལ་བྱས་ཏེ། ཕྱི་མ་ནི་གོང་མ་དང་མཐུན་པར་ཤེས་པར་བྱའོ། །དབང་ནི་ཟངས་མ་དང་ཙནྡན་ལ་བྱའོ། །དྲག་པོ་ནི་ལྕགས་སམ་ཚེར་མ་ཅན་གྱི་ཤིང་ལ་དྲག་པོའི་ལས་ལ་ཤིས་པ་རྣམས་ལ་བྱའོ། །ཚད་དང་དབྱིབས་ནི་སོ་སོའི་བྱེ་བྲག་དང་ [78b.2]མཐུན་པ་ལ་ཞི་བ་ལ་ཡང་ཤེས་པར་བྱ་ཞིང་། དེ་ལ་ལྟོས་པས་མ་བྲིས་སོ། །གཟར་བུའི་རིམ་པའོ།། །།སྔགས་པ་ཁ་ལྟ་ཕྱོགས་ཀྱང་། ཞི་བ་ལ་ནི་སྔགས་པ་ཁ་ཤར་དུ་བལྟའོ། །རྒྱས་པའི་དུས་སུ་སྔགས་པ་ཁ་བྱང་དུ་བལྟའོ། །དབང་གི་དུས་སུ་སྔགས་པ་ཁ་ནུབ་ཏུ་བལྟའོ། །དྲག་པོའི་དུས་སུ་སྔགས་པ་ [78b.3]ཁ་ལྷོར་བལྟའོ། །སྔགས་པ་ཁ་ལྟ་བའི་རིམ་པའོ།། །།རྣལ་འབྱོར་པ་ཏིང་ངེ་འཛིན་གྱི་རིམ་པ་ཡང་། དང་པོ་ཞི་བ་ལ་གནས་ཏེ། །ཐམས་ཅད་སྟོང་པའི་ཏིང་འཛིན་བྱ། །ཞེས་བདག་གི་སྙིང་གའི་དཀྱིལ་འཁོར་དུ་རཾ་ལས་ཡེ་ཤེས་ཀྱི་མེ་བསམས་ཏེ། །སྒྱུ་མའི་ཕུང་པོ་བསྲེག་པར་བྱ། །དེ་ལ་སླར་སོས་ཡེ་ཤེས་ལུས། ། [78b.4]དེ་འོག་རྣམ་པ་ལྔ་པོ་བསྒོམ། །ཡོངས་སུ་དག་པའི་མེ་ལོང་ལ། །དངོས་པོ་སྣང་བ་འདི་དག་ཡུལ། །མ་ལུས་སོ་སོར་སྣང་བ་བཞིན། །མ་ལུས་ཡོངས་སུ་དག་པ་ཡི། །མེ་ལོང་ལྟ་བུའི་ཡེ་ཤེས་ལ། །གོམས་པར་བྱ་སྟེ་བསམ་པར་བྱ། །དེ་འོག་སྙིང་རྗེའི་སེམས་ལྡན་པས། །མགོན་མེད་སྐྱབས་བྲལ་ [78b.5]སེམས་ཅན་རྣམས། །འཁོར་བའི་རྒྱ་མཚོར་རབ་ཏུ་བྱིང་། །དེ་དག་ཀུན་གྱི་དོན་དུ་ནི། །སྡུག་བསྔལ་ཐམས་ཅད་ལས་གདོན་ཕྱིར། །སྟོང་པའི་ཆོས་ལ་མཉམ་སྦྱོར་བས། །མ་ལུས་ཀུན་ཀྱང་དེ་ལྟར་བསྒོམ། །དམ་ཆོས་དེ་ལ་དམིགས་པ་ཡི། །བདག་ཏུ་མ་གྲུབ་དེ་རྟོགས་པས། །མཉམ་ཉིད་ [78b.6]ཡེ་ཤེས་བསྐྱེད་པར་བྱ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨྨ་ཎཱཾ་ཨཱ་དྱ་ནུ་ཏྤན་ན་ཏྭཱ་ཏ། སྔགས་དེ་ཆེད་དུ་བརྗོད་པར་བྱ། །སྔགས་དོན་འདི་རྩོམ་རྣལ་འབྱོར་པས། །དམིགས་མེད་ཆོས་ལ་རབ་གཟུང་ཕྱིར། ཡུལ་དུ་དེ་ཉིད་བྱས་ཏེ་བདག །དམིགས་པ་མེད་པའི་སྙིང་རྗེ་ཡིས། །སོ་སོར་བརྟགས་ཏེ་གནས་པར་བྱ། །དེ་ནས་སྙིང་རྗེའི་ [78b.7]རྗེས་འགྲོ་བས། །གཟུང་དང་འཛིན་པ་ཀུན་བྲལ་བའི། །ངོ་བོ་ཉིད་ཀྱི་འོད་གསལ་བའི། །ཡན་ལག་མེད་ཅིང་ཡོངས་དག་པ། །ཆོས་དབྱིངས་རྒྱུ་མཐུན་ངོ་བོ་མེད། །དེ་དོན་སྟོང་ཉིད་ལ་གནས་པས། །ཆོས་ཀྱི་དབྱིངས་ཀྱི་ཡེ་ཤེས་བསྒོམ། །དེ་ལྟར་སེམས་ཅན་ཐམས་ཅད་ཀྱི། །དོན་དང་བྲལ་བའི་རྣལ་འབྱོར་པས། ། [79a] [79a.1]སྔོན་གྱི་སྨོན་ལམ་རྗེས་དྲན་ཅིང་། །སེམས་ཀྱི་རྒྱུན་གྱི་དབང་ཐོབ་ནས། །སེམས་ཅན་དོན་ནི་རྫོགས་བྱའི་ཕྱིར། །སྲིད་གསུམ་འབྱུང་བའི་ཁྱད་པར་གྱིས། །དོན་དམ་ཀུན་རྫོབ་མྱ་ངན་འདས། །བྱ་བ་ནན་ཏན་དྲན་པར་བྱའོ། །དེ་ལྟར་རྣམ་པ་ལྔ་པོ་བསྒོམ། །ཡོངས་སུ་དག་ [79a.2]པའི་བསམ་གཏན་འདི། །རྣལ་འབྱོར་བ་ལ་རབ་འཇུག་པས། །དངོས་པོ་གཉིས་ལ་ཁྱད་པར་བྱས། །ཡོངས་སུ་དག་པའི་ཏིང་འཛིན་ཏོ།། །།དེ་ནས་མངོན་པར་བྱང་ཆུབ་པ། །རྣམ་པ་ལྔ་པོ་བསྒོམས་ནས་ནི། །ཡི་གེ་ཕྲེང་བའི་ཁྱད་པར་གྱིས། །འབྱུང་འཇུག་དོན་ལ་རབ་གནས་པ། །ཧཱུཾ་ཞེས་པ་ནི་ [79a.3]བསྒོམ་པར་བྱ། །ཧཱུཾ་ལས་འོད་ཟེར་རབ་འཕྲོས་པས། །འོད་ཀྱི་རྩེ་ལས་ལྷ་ཡི་ཚོགས། །གྲངས་ནི་རྡུལ་སྙེད་རབ་སྦྲུལ་ནས། །སངས་རྒྱས་ཞིང་དུ་ཁྱབ་བྱས་ནས། །སེམས་ཅན་མ་ལུས་ཀུན་ལ་ཁྱབ། །དེ་ལྟར་སླར་ནི་འདུས་པ་ལས། །སེམས་བསྐྱེད་སྡོམ་པ་གཟུང་བ་དང་། །རྗེས་སུ་ཡི་རང་གསོལ་བ་ [79a.4]གདབ། །སྐྱབས་སུ་མཆི་ཞིང་སྡིག་པ་བཤགས། །བདག་དབུལ་ལ་སོགས་རྫོགས་པར་བྱ། །དེ་ནས་ཧཱུཾ་གི་བྱིན་བརླབས་ལས། །ཁྲོ་གཏུམ་མི་ཐུབ་ཞལ་དྲུག་པ། །ཞིང་དྲུག་འོད་ཀྱིས་རབ་ཁྱབ་སྟེ། །འདུས་པས་ཡེ་ཤེས་རྩེ་ལྔ་པ། །རྡོ་རྗེ་ཆེན་པོ་བསྒོམ་པར་བྱ། །དེ་ཡི་བུམ་པའི་དཀྱིལ་ཉིད་དུ། །ཡི་གེ་ [79a.5]མདོག་དཀར་བྷྲཱུཾ་བསམ་བྱ། །དེ་འཕྲོས་གྱུར་པས་རིན་པོ་ཆེ། །མཆོད་རྟེན་ལྟ་བུ་རབ་ཏུ་བསྒོམ། །དེ་ནས་ཧྲཱིཿཡི་ཡི་གེ་ལས། །ཆོས་ཀྱི་འབྱུང་གནས་གྲུ་གསུམ་པ། །དེ་ལས་སྣ་ཚོགས་རྡོ་རྗེ་སྟེ། །དེ་འོག་ཧྲཱིཿལས་བསམ་བྱ་བ། །མ་ལུས་རྫོགས་པའི་སངས་རྒྱས་ནི། །བསྒོམ་པར་བྱ་བ་འདི་ལྟ་སྟེ། །དང་པོའི་སངས་ [79a.6]རྒྱས་བསྒོམ་པར་བྱ། །སངས་རྒྱས་དེ་ཡི་སྙིང་ག་རུ། །ཡེ་ཤེས་ལྔ་ཡི་བདག་ཉིད་དེ། །གཙོ་བོ་ཡེ་ཤེས་སེམས་དཔའ་ནི། །འཇམ་དཔལ་སྙིང་གི་ཟླ་སྟེང་བསམ། །དེ་ཡི་སྙིང་གའི་ཟླ་བ་ལ། །ཨ་ནི་ཡིག་འབྲུ་མཆོག་བསྒོམ་བྱ། །དེ་ལས་འོད་ཟེར་རབ་འཕྲོས་པས། །ཕྱོགས་བཅུར་འགྲོ་བའི་དོན་བྱས་ཏེ། །འདུག་པས་བདག་ [79a.7]གི་ཕུང་པོ་བསྲེག །དེ་ཉིད་ཞུ་ལས་བསྐྱེད་པ་ནི། །ཐབས་དང་ཤེས་རབ་རང་བཞིན་ལས། །མེ་ཡི་ལྷ་ནི་བསྒོམ་པར་བྱ། །ཤིན་ཏུ་རིད་པ་བྲང་རུས་ཅན། །དབུ་ལ་ཡེ་ཤེས་སེམས་དཔས་བརྒྱན། །ཕྱག་བཞི་ཐོར་ཚུགས་རྒྱན་གྱིས་བརྒྱན་སོ་སོའི་ལས་དང་མཐུན་པ་ཡི། །ཁ་དོག་མིང་གི་རྣམ་གྲངས་ཀྱང་། །བསྡུས་ [79b] [79b.1]ན་རྣམ་པ་བཞི་རུ་འདུས། །ཞི་བའི་མེ་ལྷ་བྷ་བ་ཀ །རྒྱས་པ་ལ་ནི་མ་ན་སྟེ། །དབང་ལ་དམར་སེར་དུ་ཡང་བསྟན། །དྲག་པོ་ལ་ནི་མངོན་སྤྱོད་དོ། །དེ་ཡི་སྙིང་གར་ཟླ་བ་བསམ། །དེ་ཡི་སྟེང་དུ་ཡི་གེ་ཨ། །དེ་གྱུར་བྷུཾ་ལེགས་བསྒོམ་པར་བྱ། །ཤིན་ཏུ་མཛེས་པ་དེ་ལས་ནི། །ཁྱད་པར་ཆེ་བའི་གཞལ་ཡས་ཁང་། ། [79b.2]གྲུ་བཞི་པ་ལ་སྒོ་བཞི་པ། །ཏྭ་ར་ན་བཞིས་ལེགས་མཛེས་པ། །རིན་ཆེན་འབར་བའི་རྒྱན་གྱིས་བརྒྱན། །རྔ་མ་དྲིལ་བུ་འཕན་ལ་སོགས། །དེ་སོགས་གླང་སེང་རྣམས་དང་ལྡན། །ཤིན་ཏུ་ལེགས་པའི་གཞལ་ཡས་ཁང་། །ཤར་ནི་གྲེ་བའི་སྒོ་རུ་སྟེ། །དེ་ལས་གསུམ་ཡང་ཤེས་པར་བྱ། །དེ་དབུས་ [79b.3]འཁོར་ལོའི་རིམ་པ་ནི། །གསུམ་མམ་བཞིའམ་དྲུག་ཏུ་བཤད། །དེ་ལས་གཞན་པའི་ལྷ་ཡི་ཚོགས། །ཨ་ཡི་བྱིན་བརླབས་དག་པ་སྟེ། །སོ་སོ་སྐུ་གསུང་ཐུགས་ལྡན་བྱ། །དེ་ལྟར་རྫོགས་པའི་དཀྱིལ་འཁོར་དུ། །ལྷ་རྣམས་འཁོར་ལོ་རབ་ལྡན་པས། །བཞུགས་དང་སྤྱན་དྲང་ལ་སོགས་དང་། ། [79b.4]རྒྱས་གདབ་ཆོ་ག་ཕུན་སུམ་ཚོགས། །མ་ལུས་པ་ནི་སྔགས་པས་བྱ། །ཏིང་ངེ་འཛིན་གྱི་རིམ་པའོ།། །།དེ་ནས་ཀུ་ཤའི་རིམ་པ་ཡང་། །ཀུ་ཤ་ལ་སོ་སོའི་སྔགས་བཟླ་ཞིང་། མེ་ཐབ་ཀྱི་ཐ་མ་ཐམས་ཅད་དུ་ཡང་རྩེ་མོས་རྩ་བ་ནོན་པར་བྱས་ལ་བསྐོར། རྣལ་འབྱོར་པའི་གདན་དུ་ཡང་གདིང་། མགོ་དང་ [79b.5]ལུས་དང་ཡན་ལག་ཐམས་ཅད་དུ་ཡང་གཟུགས་པར་བྱའོ། །དེ་ནས་ཀུ་ཤ་ལ་རུ་རུ་སྥུ་རུ་ཛྭ་ལ་ཏི་ཥྛ། སིདྡྷ་ལོ་ཙ་ནེེ་སརྦ་ཨཪྠ་སཱ་དྷ་ནེ་སྭཱ་ཧཱ། ཞེས་བརྗོད་དེ་པྲོ་ཀྵ་ཎཾ་བྱའོ། །ཀུ་ཤའི་རིམ་པའོ།། །།དེ་ནས་མེའི་རིམ་པ་ཡང་ཞི་བའི་མེ་ནི་རྒྱལ་བོ་དང་བྲམ་ཟེའི་ཁྱིམ་ནས་བླང་ངོ་། །རྒྱས་པའི་མེ་ནི་རྗེ་རིགས་ཀྱི་ [79b.6]ཁྱིམ་ནས་བླང་ངོ་། །དབང་གི་མེ་ནི་སྨད་འཚོང་མའི་ཁྱིམ་ནས་བླང་ངོ་། །དྲག་པོའི་མེ་ནི་ཡུགས་ས་མོའམ་གདོལ་བའི་ཁྱིམ་ནས་བླང་ངོ་། །ཡང་ན་ཞི་བའི་མེ་ནི་ཤེལ་ལས་སོ། །རྒྱས་པའི་མེ་ནི་གཙུབས་པ་ལས་སོ། །དབང་གི་མེ་ནི་ཐང་ཤིང་སོ་སོར་སྡུད་པ་ལས་སོ། །དྲག་པོའི་མེ་ནི་ལྕགས་ནག་ལས་སོ། །དེ་དག་ [79b.7]ཀྱང་རླུང་ཡབ་ཀྱིས་ཛྭ་ལ་ཛྭ་ལ་ཞེས་པའི་སྔགས་ཀྱིས་སྦར་རོ། །ཞི་བ་ལ་ཤར་ནས་གཞུག་གོ། །རྒྱས་པ་ལ་ལྷོ་ནས་གཞུག་གོ། །དབང་ནི་ནུབ་ནས་གཞུག་གོ། །དྲག་པོ་ནི་བྱང་ནས་སོ། །དེ་ཡང་རྒྱལ་རིགས་སམ། །བྲམ་ཟེའི་རིགས་ཀྱིས་ཞི་བའི་མེ་གཞུག་གོ། །རྗེ་རིགས་ཀྱིས་རྒྱས་པའི་མེ་གཞུག་གོ། །སྨད་ [80a] [80a.1]འཚོང་མའི་བུའི་འམ་དམངས་ཀྱི་དབང་གིས་མེ་གཞུག་གོ། །ཡུགས་ས་མོའམ་གདོལ་པ་མོས་དྲག་པོའི་མེ་གཞུག་གོ། །མེའི་རིམ་པའོ།། །།སྲེག་རྫས་ཀྱི་རིམ་པ་ཡང་དང་པོར་མར་ལས་དགང་བླུགས་བདུན་དབུལ། དེའི་འོག་ཏུ་མཆོད་པའི་བྱེ་བྲག་གིས་མཆོད། དེ་ནས་རྒྱས་གདབ་ [80a.2]དེ་ནས་པྲོ་ཀྵ་ཎཾ་བྱ། དེ་ནས་ཕྱག་བྱས་ལ་ཕྱག་རྒྱ་བཞི་དང་ལྡན་པས་བསྟིམ་མོ། །དེ་ནས་ཡེ་ཤེས་གནས་པའི་ལྷ་རྣམས་གཉིས་སུ་མེད་པར་བྱས་ལ། དེ་ནས་དྲིལ་བུའི་སྒྲས་མཉེས་པར་བྱས་ལ། དེ་ནས་གཟར་བུ་གཉིས་ཀྱི་ནང་དུ་ཨ་བསམས་ཏེ། དེ་ལས་བདུད་རྩིར་གྱུར་པར་བསམས་ལ་ལག་པའི་གུང་ [80a.3]མོ་སྤྲད་ལ་རྡོ་རྗེ་ཁུ་ཚུར་གྱིས་གཟར་བུ་བཟུང་སྟེ། བསྐོར་ཕྱོགས་སུ་བདུན་མར་ལས་དབུལ་ལོ། །དེ་ནས་ཡང་ལན་ཅིག །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་ཉིད་དག་པའི་སེམས་དཔའ་ནི། །དམ་པའི་སྲིད་པ་བྱེད་པའོ། །ཞེས་བསྟོད་དེ། །དེ་ནས་ཡང་པྲོ་ཀྵ་ཎཾ་བྱ། [80a.4]ཨཉྩ་མ་ན་ཡེ་བྱས་ལ། དེ་ནས་མར་དབུལ་ཏེ། ན་མཿས་མནྟ་བུདྡྷཱ་ནཱཾ། ཨགྣ་ཡེ་སྭཱ་ཧཱ། ཧ་བྱ་ཀ་བྱ་དི་པྱ་ཤཱིནྟཾ་ཀུ་རུ་སྭཱ་ཧཱ། མར་གྱིའོ། །ཨོཾ་སརྦ་པཱ་པཾ་ད་ཧ་ན་བཛྲཱ་ཡེ་སྭཱ་ཧཱ། ཏིལ་གྱིའོ། །ཨོཾ་བཛྲ་སཾ་བ་དེ་སྭཱ་ཧཱ། ཞོའིའོ། །ཨོཾ་བཛྲ་བྷ་སྨི་ཀུ་རུ་སྭཱ་ཧཱ། ཨུཏྤ་ལའིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་བའིའོ། །ཨོཾ་བཛྲ་པུཥྚ་ཡེ་སྭཱ་ཧཱ། [80a.5]ཆགས་པ་མེད་པ་འབྲས་ཀྱིའོ། །ཨོཾ་བཛྲ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའི་འོ། །ཨོཾ་བཛྲ་བི་ཛ་ཡ་སྭཱ་ཧཱ། འབྲས་ཀྱི་ལག་ཕན་གྱིའོ། །ཨོཾ་བཛྲ་མཱ་ལེ་པུཥྚ་ཡེ་སྭཱ་ཧཱ། མངར་གསུམ་དང་དཀར་གསུམ་གྱིའོ། །ཨོཾ་བཛྲ་མ་ཧཱ་བེེ་ག་ཡེ་སྭཱ་ཧཱ། ནས་ཀྱིའོ། །ཨོཾ་བཛྲ་མ་ཧཱ་བ་ལ་ཡེ་སྭཱ་ཧཱ། སྲན་ [80a.6]མ་ཤའི་ཆན་གྱིའོ། །ཨོཾ་བཛྲ་གྷ་སྨ་རེ་སྭཱ་ཧཱ། གྲོའིའོ། །ཨོཾ་བཛྲ་ཡཛྙཱ་ན་སྭཱ་ཧཱ། ཡམ་ཤིང་གི་དང་ཨུ་དུམྺཱ་རའི་འོ། །ཨོཾ་བཛྲ་ཏི་ཏི་པྲི་ཡ་སྭཱ་ཧཱ། བྱང་ཆུབ་ཀྱི་ཤིང་ལ་སོགས་པའིའོ། །ཨོཾ་བཛྲ་སརྦ་ཏཱ་ཡ་སྭཱ་ཧཱ། ནྱ་གྲོ་དྷའི་འོ། །ཨོཾ་བཛྲ་ཧ་ས་ཀ་རཱ་ཡ་སྭཱ་ཧཱ། ཨ་མྲའིའོ། །དེ་ནས་ [80a.7]ཐ་མར་མར་ལ་ཡང་མེ་གཟི་བྱིན་བསྐྱེད་ཅིང་མཆོད་པའི་ཕྱིར་ལན་གྲངས་ནུས་ཚད་དབུལ་ལོ།། །།དེ་ནས་རྡོ་རྗེ་དང་དྲིལ་བུ་གསིལ་བས་བསྟོད་དེ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་ནི། །དམ་པའི་སྲིད་པ་བྱེད་པའོ། །དེ་ནས་མེ་ལྷ་བསྟོད་དེ། ཚངས་པའི་འཇིག་རྟེན་ [80b] [80b.1]མགོན་སྐྱོབ་པ། །གཟི་བརྗིད་ལྡན་པ་མེ་ཡི་ལྷ། །འབར་བཅས་སྐུ་ནི་རྒྱན་གྱིས་བཞག །དངོས་བརྗིད་རྒྱན་ལྡན་ས་ལ་དབང་། །སྲེག་རྫས་དབུལ་ཞིང་ལས་ཀྱང་སྒྲུབ། །ཞི་ལ་སོགས་པའི་ལྷ་དཔལ་ཏེ། །ཇི་ལྟར་འདོད་པའི་དོན་བསྒྲུབ་པ། །གཟི་བརྗིད་རྒྱལ་ལ་ཕྱག་འཚལ་བསྟོད། །ཅེས་བསྟོད་དེ། [80b.2]ཡང་མཆོད་བསྟོད་བྱས་ལ། དེ་ནས་རྡོ་རྗེ་གནོད་སྦྱིན་གྱི་སྔགས་ཀྱིས་བཏབ་པའི་ཀུ་ཤས་ཐབ་བསངས་ལ། མེ་ལྷའི་སྙིང་གར་འཁོར་ལོའི་རིམ་པ་བསྒོམ་པར་བྱའོ། །དེའི་ཁང་པ་ཧོམ་ཁུང་གཞལ་ཡས་ཁང་དུ་བསམས་ལ། དེར་དམ་ཚིག་སེམས་དཔའི་ཚོགས་རྒྱས་གདབ་པོ། །དེ་ནས་ཡེ་ཤེས་སེམས་ [80b.3]དཔའ་དགུག་གཞུག་བཅིང་དབང་དུ་བྱས་ཏེ། མདུན་གྱི་ནམ་མཁའ་ལ་ནང་དུ་མེ་ལྷའི་ཁ་ནས་ཞུགས་ཏེ། ལྟེ་བའི་གཞལ་ཡས་ཁང་དུ་རྒྱས་བཏབ་ལ་གཞག་གོ། །དེ་ནས་པྲོཀྵ་ཎཾ་བྱ། དེ་ནས་དམ་ཚིག་ཕྱག་རྒྱ་བསྟན། ལས་ཀྱི་ཕྱག་རྒྱ་ལས་ལ་བཞག །ཆོས་ཀྱི་ཕྱག་རྒྱ་ཆོས་དང་ལྡན་པར་བྱའོ། །ཡང་དགུག་གཞུག་ [80b.4]བཅིང་དབང་དུ་བྱས་ལ་དེ་ནས་དགའ་བ་བསྐྱེད་དེ་གཉིས་སུ་མེད་པར་བསྟིམས་ནས། དེ་ནས་པྲོཀྵ་ཎཾ་བྱའོ། །དེ་ནས་ཕྱག་བྱས་ཏེ། མར་ལ་གཟར་བུ་ཉི་ཤུ་རྩ་གཅིག་དབུལ་ཏེ། དེའི་འོག་ཏུ་སྲེག་རྫས་རྣམས་རིམ་པ་བཞིན་དུ་འབུལ་ལོ། །དེ་ནས་རྫོགས་པ་དང་། ཡང་སྲིད་པ་རང་བཞིན་ཉིད་ཀྱིས་དག་པ་བརྗོད། །དེ་ནས་ [80b.5]རིགས་བསྡུས་དམ་ཚིག་བསྟན། དབང་དུ་བྱ་བསྟོད་པ་ལ་སོགས་པ་ཀུན་རྫོགས་པར་བྱའོ། །དེ་ནས་དེ་དག་རྫོགས་པ་དང་གཤེགས་སུ་གསོལ་བཟོད་པར་གསོལ་ཏེ། མ་འབྱོར་པ་དང་མ་ཚང་བ། །གང་ཡང་བདག་བློ་གཏི་མུག་པ། །བགྱིས་དང་བགྱིད་དུ་སྩལ་བ་ཀུན། །དེ་ཀུན་མགོན་པོས་བཟོད་བར་མཛོད། [80b.6]ཅེས་པས་སོ། །ཡང་ནས་ཡང་དུ་མར་བསྲེག་ཅིང་། །རིམ་པས་ལྷ་རྣམས་མཉེས་པར་བྱའོ། །དཀྱིལ་འཁོར་གྱི་ལྷའི་རིམ་པའོ། །མེ་ལྷ་ལ་ནི་ཐ་མར་ཡང་། །རྫས་ཀྱི་ལྷག་མ་ཅི་ཡོད་པས། །མེ་ལྷ་ཉིད་ལ་མཆོད་བྱ་སྟེ། །རྫས་ནི་ཐམས་ཅད་བསྲེག་བྱས་ནས། །བརྒྱ་རྩ་བརྒྱད་དུ་སྦྱིན་སྲེག་བྱ། །དེ་ནས་ [80b.7]སློབ་མས་བཟོད་གསོལ་ཏེ། །རྗེས་སུ་ཡི་རང་ཞེས་བརྗོད་དོ། །རྣལ་འབྱོར་སྔགས་པ་བློ་ལྡན་པས། །སློབ་མ་ཤིས་པར་བྱ་བའི་ཕྱིར། །སློབ་དཔོན་གཟར་བུ་མར་ལྡན་དུ། །སློབ་མས་མེ་ཏོག་སྙིང་བཀང་སྟེ། །གཟར་བུ་མར་ལྡན་དེ་རུ་བླུགས། །སློབ་དཔོན་སྔགས་དང་ལྡན་པ་ཡིས། །ཞི་བར་གྱུར་ [81a] [81a.1]ཅིག་ལ་སོགས་བརྗོད། །སྔགས་ཨགྣ་ཡེ་སྭཱ་ཧཱ་ཞེས་པས་སོ། །དེ་ནས། སྙིང་གར་ལག་པ་བྲབ་བྱ་སྟེ། །གཡོན་གྱི་སྲིན་ལག་གཡས་པས་གཟུང་། །དེ་ནས་ཅི་བདེར་ཁྱིམ་དུ་བཏང་། །ཁྱིམ་དུ་ཕྱིན་ནས་བཀྲ་ཤིས་བརྗོད། །སློབ་དཔོན་དེ་ལ་ཡོན་ཡང་དབུལ། ཅི་ལ་དགྱེས་པ་ཕོངས་མེད་ [81a.2]དབུལ། །དེ་ལྟར་བྱས་ན་དངོས་གྲུབ་ཐོབ། །ཐལ་བ་སོལ་ཕྱེ་ས་ཚོན་རྣམས། །གར་དང་སིལ་སྙན་ལྡན་བྱས་ལ། །ཆུ་ཀླུང་ཆེན་པོར་བསྐྱལ་བར་བྱའོ། །སྡིག་པས་མི་གོས་ཡ་ཁ་མེད། །ལས་ཐམས་ཅད་པའི་སྦྱིན་སྲེག་ནི་གཞན་ལས་ཤེས་པར་བྱའོ། །དེ་ནས་གཉིས་པ་བསྟན་བྱས་ཏེ། །སློབ་མ་ [81a.3]ཆེན་པོ་དེ་ལ་བསྟན། །འཁོར་ལོ་རྫོགས་པའི་སྦྱིན་སྲེག་འདི། །ཀུན་དང་ཐུན་མོང་མ་ཡིན་ཏེ། །སློབ་མ་སྙིང་ལ་བརྟན་པའི་ཕྱིར། །ཤིན་ཏུ་མི་བརྟན་ཉམས་པར་འགྱུར། །ཉམས་གྱུར་ཉེས་པ་བརྗོད་མི་ལང་། །དེ་ལས་བསྒྲིབས་ཏེ་སྤྱད་པར་བྱའོ། །དེ་ནས་རིམ་པ་གཉིས་པའི་སྦྱིན་སྲེག་བྱ་བར་ [81a.4]བཤད་པར་བྱ་སྟེ། །ཡེ་ཤེས་རྟག་ནས་སྦྱིན་སྲེག་འདི། །ཡེ་ཤེས་བཞི་ཡི་བདག་ཉིད་གཟུགས། །ཕྲ་མོ་སྦྱོར་ལ་རབ་ལྡན་པས། །སྔགས་པས་རྣལ་འབྱོར་བསམ་གཏན་ནི། །སློབ་མའི་དོན་དུ་འདི་དག་ཀུན། །མ་ལུས་པར་ནི་ཤེས་པར་བྱ། །སྔོན་ནི་མེ་ལྷའི་ཐུགས་ཀ་རུ། །ཤེས་རབ་ཀྱི་ [81a.5]ནི་འཁོར་ལོ་བསྒོམ། །བཅུ་གཉིས་སུ་ལ་རབ་གནས་པ། །འཁོར་ལོའི་ལྟེ་བའི་རྩིབས་དང་ལྡན། །འཁོར་ལོ་དེ་ལ་བསམ་བྱ་བ། །རྟེན་འབྲེལ་བཅུ་གཉིས་སར་ལྡན་པའི། །འཁོར་ལོ་འདིར་ནི་གྱུར་པའོ། །ཨ་ལས་བསྐྱེད་པའི་འཁོར་ལོ་ནི། །རྩིབས་དྲུག་ཁ་དོག་དྲུག་ལྡན་པ། །མུ་ཁྱུད་ [81a.6]བཞི་དང་རབ་ཏུ་ལྡན། །དེ་དབུས་དཀར་པོའི་ཡི་གེ་ཨ། །བསྒོམས་ནས་ཕྱོགས་བཅུར་རབ་འཕྲོས་པས། །ལས་བྱས་སླར་འདུས་གནས་སུ་ཐིམ། །ཐིམ་པས་ཡེ་ཤེས་སེམས་དཔའ་ཡི། །སྔགས་ནི་འཁོར་ལོ་བཞི་ལ་བསྒོམ། །དང་པོའི་འཁོར་ལོའི་རིམ་པ་ལ། ཨོཾ་སརྦ་དྡྷ་རྨྨཿཨ་བྷ་བ་སྭ་ [81a.7]བྷ་བ་བི་ཤུདྡྷ་བཛྲ་ཨ་ཨཱ་ཨཾ་ཨཿམུ་ཁྱུད་གཉིས་ལ་བསམ་བྱ་བ། །དབྱངས་ཀྱི་ཡི་གེ་བཅུ་གཉིས་ཏེ། །ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ། འཁོར་ལོའི་རིམ་པ་གསུམ་བ་ལ། །དང་པོ་རྩིབས་ནས་ར་མི་བཞིན་དུ། །ཨོཾ་བཛྲ་ཏཱིཀྞཱ་ཡ་ཏེ་ན་མཿ། གཉིས་པ་ལ་བཛྲ་དུཿཁཙྪ་དཱ་ཡ་ཏེ་ན་མཿ། གསུམ་པ་ [81b] [81b.1]ལ་ཨོཾ་པྲཛྙཱ་ཛྙཱ་ན་མཱུརྟྟ་ཡེ་ཡ་ཏེ་ན་མཿ། བཞི་པ་ལ་ཨོཾ་ཛྙཱ་ན་ཀཱ་ཡཱ་ཡ་ཏེ་ན་མཿ། ལྔ་པ་ལ་ཨོཾ་བཱ་གཱི་ཤྭ་རཱ་ཡ་ཏེ་ན་མཿ། དྲུག་པ་ལ་ཨོཾ་ཨ་ར་པ་ཙ་ནཱ་ཡ་ཏེ་ན་མཿ། དེ་དག་རིམ་བཞིན་བསམ་བྱ་བ། །དེ་ནས་མུ་ཁྱུད་གསུམ་པ་ལ། །ཡེ་ཤེས་སེམས་དཔའ་སྐུའི་སྔགས། །ཕྲེང་བའི་ཡི་གེ་འདི་དག་གོ། །ཨོཾ་ཨ་ཨཱ་སརྦ་ཏ་ཐཱ་ག་ [81b.2]ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་བཱན། ཛྙཱ་ན་མཱུརྟི་བཱ་གཱི་ཤྭ་ར་མ་ཧཱ་པཱ་ཙ། སརྦྦ་དྷམྨཱ་ག་ག་ན། ཨ་མ་ལ་སུ་པ་རི་ཤུདྡྷ། དྷརྨྨཱ་དྷཱ་ཏུ་ཛྙཱ་ན་གརྦྷ་ཨཱཿ། ཞེས་པའི་ཕྲེང་བ་བསྒོམ་པར་བྱའོ། །ཐ་མའི་འཁོར་ལོའི་མུ་ཁྱུད་ལ། །སྒྲ་ཡི་ཡི་གེ་ཀ་ལ་སོགས། །ཧ་ལ་ཐུག་པ་ཡན་ཆད་དུ། །རིམ་པ་ [81b.3]གསལ་བར་བསྒོམ་པར་བྱ། །ཤེས་རབ་འཁོར་ལོར་རབ་ཏུ་གྲགས། །འདི་ནི་ཤེས་རབ་འཁོར་ལོའོ། །དེ་ནས་ཤེས་རབ་འཁོར་ལོ་ལ། །སྦྱིན་སྲེག་གི་ནི་རྫས་དེ་དག །སྔོན་བཞིན་རིམ་པས་དབུལ་བར་བྱ། །དེས་ནི་སྔགས་ཀྱི་དངོས་གྲུབ་ཐོབ། །སྦྱིན་སྲེག་བྱ་བའི་རིམ་པ་ནི། །དང་པོ་འཁོར་ལོ་རྣམ་ [81b.4]པ་བཞི། །རིམ་བཞིན་སྔོན་ལྟར་བསྒོམ་པར་བྱ། །འཁོར་ལོ་ཐོག་མ་ནས་བརྩམས་ཏེ། །ཡི་གེ་རིམ་བཞིན་པྲོཀྵ་ནཾ། །ཨུ་ཙ་ཏ་དང་པ་ཙ་ལི། །ཤུན་ཏི་སོགས་མ་ལུས་ཏེ། །བདག་གིས་སྦྱིན་སྲེག་དབུལ་བར་བྱ། །དེ་ནས་མར་ནས་རིམ་བཞིན་དུ། །མཁས་པས་སྦྱིན་སྲེག་དབུལ་བར་བྱ། །དེ་ནས་ [81b.5]ཚིག་ཏུ་འདི་ཡང་བརྗོད། །ཨ་ནི་ཡིག་འབྲུ་ཀུན་གྱི་མཆོག། །ཡེ་ཤེས་མེ་སྟེ་སྟོང་རང་བཞིན། །དེ་ལ་སྦྱིན་སྲེག་བདག་བགྱིད་ན། །ལས་ཀྱི་འབྲས་བུ་མཆིས་པར་མཛོད། །ཞེས་པའི་རྗེས་ལ་བསྟོད་ཚིག་བྱ། །སྟོང་པ་ཆེན་པོའི་ཡེ་ཤེས་སྐུ། །དེ་ཁོ་ན་ཉིད་རྣམ་པར་དག། །ངོ་བོ་གཉིས་མེད་ཡི་གེ་ཨ། ། [81b.6]སྟོང་ཉིད་ལས་བྱུང་ཁྱོད་ལ་འདུད། །ཅེས་པ་དང་། །ས་མཆོག་བཅུ་གཉིས་རབ་རྫོགས་པ། །ཡེ་ཤེས་ཆོས་དབྱིངས་བརྗོད་མེད་པ། །ཡེ་ཤེས་ལྔ་ཡི་རང་བཞིན་ཨོཾ། །འཁོར་ལོ་དང་པོ་ལ་བསྟོད་པའོ། །འཁོར་ལོ་གཉིས་པ་ལ་བསྟོད་པ་ནི། །ས་ཡིས་རབ་དབྱེ་སྒྲ་དང་ལྡན། །ཡི་གེ་འཁོར་ལོ་ཉིད་ [81b.7]ལ་རྫོགས། །ཡན་ལག་སྤྲོ་བསྡུ་གསུང་གི་སྐུ། །གསུང་གི་འཁོར་ལོ་ཁྱོད་ཕྱག་འཚལ། །རིགས་དང་མདོག་དང་ཁྱད་པར་གྱིས། །ཉོན་མོངས་གཅོད་པའི་རྩེ་མོ་ཅན། །གཞོན་པའི་ཡི་གེ་འབྲུ་མཆོག་ལ། །རྣོན་པོའི་གསུང་ལ་ཕྱག་འཚལ་བསྟོད། །ཡེ་ཤེས་འཁོར་ལོ་རབ་རྫོགས་པ། །ཡེ་ཤེས་ [82a] [82a.1]སེམས་དཔའ་སྐུ་ཡི་འབྲུ། །ཕྲེང་བའི་སྔགས་ཞེས་རབ་གྲགས་པ། །ཉོན་མོངས་གཅོད་ལ་ཕྱག་འཚལ་བསྟོད། །སྒྲ་ཡི་ཡི་གེ་མཚན་རབ་བརྒྱན། །གསལ་བྱེད་གསུང་གི་འཁོར་ལོ་ལ། །མ་ལུས་སྒྲིབ་པ་སྦྱོང་བྱེད་པ། །འཁོར་ལོ་རྫོགས་ལ་ཕྱག་འཚལ་བསྟོད། །དེ་ལྟར་ [82a.2]བསྟོད་པ་བྱེད་ཙམ་ན། །འཁོར་ལོའི་ཡིག་འབྲུ་དེ་དག་ཀྱང་། །འོད་ཟེར་ལྔ་དང་ཡང་དག་ལྡན། །གཡོ་འགུལ་གཟི་བརྗིད་ཆགས་པར་གནས། །འོད་དེས་འགྲོ་བའི་སྒྲིབ་པ་སྦྱོང་། །གཟི་བརྗིད་ཀྱིས་ནི་བདག་དོན་འགྲུབ། །དེ་ནས་ཡང་ནི་རིམ་བཞིན་དུ། །ཡང་ནས་ཡང་དུ་མི་སྐྱོ་བར། །གྲངས་མེད་ [82a.3]མི་སྐྱོའི་བར་དག་ཏུ། །རིམ་པ་བཞིན་དུ་སྦྱིན་སྲེག་བྱ། །དེ་ལྟར་བྱས་ནས་མཆོག་གྱུར་པའི། །དངོས་གྲུབ་དམ་པ་ཐོབ་པར་འགྱུར། །དེ་ནས་ཤིན་ཏུ་རབ་རྫོགས་པའི། །འཁོར་ལོ་སྦྱིན་སྲེག་བྱས་པས་ན། །ཤེས་རབ་རབ་རྫོགས་རྣལ་འབྱོར་པས། །འཁོར་ལོ་བཞི་ཡི་རིམ་པ་བསྟན། །བཅུ་དྲུག་ [82a.4]ཕྱེད་ཕྱེད་ཐིག་ལེ་ཅན། །ཡན་ལག་མེད་པའི་རྩིས་ལས་འདས། །བསམ་གཏན་བཞི་ཡི་རྩེ་མོ་ཅན། །ཡེ་ཤེས་མེ་ལྕེ་འོད་རབ་གསལ། །ཡང་དག་མཐའ་ལ་རྣམ་པར་གནས། །འདོད་པའི་དོན་གྲུབ་དམ་པའོ། །ཞེས་པས་རིམ་པ་བསྟན་བྱ་སྟེ། །འཁོར་ལོ་བཞི་ཡི་བདག་ཉིད་གཟུགས། །བདག་ [82a.5]ལ་རབ་ཏུ་གནས་པ་སྟེ། །བདག་ཉིད་མེ་ལྷའི་ཐུགས་ཀར་གནས། །གོང་དུ་བསྟན་བཞིན་བསྒོམ་པར་བྱ། །ལྟེ་བར་ཤེས་རབ་འཁོར་ལོ་སྟེ། །རྩིབས་བཅུ་གཉིས་དང་ཡང་དག་ལྡན། །ཨ་ཨཱ་ཨཾ་ཨཿའདི་དག་བསྒོམ། །སྙིང་གར་ཤེས་རབ་འཁོར་ལོ་ཡང་། །རྩིབས་ནི་བཅུ་གཉིས་ཡང་དག་ལྡན། ། [82a.6]དེ་ལ་སྔགས་ཀྱི་ཡིག་འབྲུ་ནི། །ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ། བཅུ་གཉིས་ཡི་གེ་འདི་དག་ཀུན། །རིམ་པ་བཞིན་དུ་བསྒོམ་པར་བྱ། །མགྲིན་པར་ཤེས་རབ་འཁོར་ལོ་འདི། །རྩིབས་ནི་བཅུ་གཉིས་ཡང་དག་ལྡན། །དེ་ལ་ཡིག་འབྲུ་བསམ་བྱ་བ། །ཨོཾ་ཨ་ར་པ་ཙ་ན་བཱ་གཱི་ཤྭ་ར་ [82a.7]པྲཛྙཱ་ན་མཿ། འདི་དག་རིམ་པ་ཇི་བཞིན་ནོ། །མཆོག་མ་ཤེས་རབ་འཁོར་ལོ་ནི། །རྩིབས་ནི་སྔོན་དང་འདྲ་བ་ལ། །ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ན་མཱུ་རྟི་བཱ་གཱི་ཤྭ་ར་མ་ཧཱ་པཱ་ཙ། སརྦྦ་དྷརྨྨ་ག་ག་ན། ཨ་མ་ལ་སུ་པ་རི་ཤུདྡྷ། དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿ། ཞེས་པ་ཡི་ནི་སྔགས་ [82b] [82b.1]འབྲུ་འདིས། །ས་མཆོག་བཅུ་གཉིས་ཐོབ་པར་འགྱུར། །འདི་ཡི་སྦྱིན་སྲེག་རིམ་པ་ཡང་། །དང་པོ་སྔོན་བཞིན་ཤེས་པར་བྱ། །དེ་ནས་ཡང་དག་སྦྱིན་སྲེག་ནི། །ཡེ་ཤེས་མེ་ལྕེ་ཞེས་གསུང་པས། །ལྟེ་བའི་འཁོར་ལོ་འོད་དུ་འབར། །འོད་དེས་རང་གི་དངོས་པོ་བསྲེགས། །དེ་ནས་གྱེན་དུ་འཕྲོས་པ་ལས། ། [82b.2]སྙིང་གའི་གནས་སུ་གནས་ནས་བཞུགས། །ཤིན་ཏུ་འོད་ལྡན་གཟི་བརྗིད་ལྡན། །དེ་ཉིད་ནས་ནི་འདྲིས་ཏེ་ཡང་། །མགྲིན་པའི་འཁོར་ལོའི་དབུས་ན་བཞུགས། །ཨ་ཡང་འོད་དུ་རབ་ཏུ་འབར། །དེས་ནི་ཐམས་ཅད་ཀུན་ཀྱང་བསྲེགས། །དེ་ཀུན་གོང་བུ་གཅིག་ཏུ་གྱུར། །དེ་ནས་རིམ་བཞིན་གཡས་ན་བཞུགས། ། [82b.3]ཨ་ཡིག་ཡི་གེ་ལ་བཞུགས་པས། །ཡི་གེའི་ཚོགས་རྣམས་འོད་དུ་ཞུ། །འོད་ཀྱི་གོང་བུར་གྱུར་པ་ལས། །མར་ཁུ་བཞིན་དུ་མར་ཁུ་དབུལ། །མར་ཡང་འོད་ཀྱི་གོང་བུར་གྱུར། །དེ་ནས་ཡས་མར་རིམ་པས་ཞུགས། །སླར་ཡང་ཤེས་རབ་འཁོར་ལོ་ཚོགས། །སོས་ནས་སྔོན་བཞིན་ཁོ་ནར་གྱུར། །དེ་ལ་ [82b.4]ཡང་ནི་སྦྱིན་སྲེག་དབུལ། །དེ་ནས་ཡང་ནི་རིམ་བཞིན་དུ། །གྱེན་དུ་ཞུགས་ཤིང་འོད་དུ་འབར། །དེ་ལྟར་ཚུལ་བཞིན་མ་ནོར་བར། །ཤིན་ཏུ་གོམས་པས་གསལ་བར་བྱ། །དེ་ལྟར་རྟག་ཏུ་སུ་བསྒོམ་པ། །ས་མཆོག་བཅུ་གཉིས་ཐོབ་པར་འགྱུར། །གཞོན་ནུའི་ལུས་ལ་བཞིན་བཟང་བ། །ཡེ་ཤེས་ [82b.5]ལྔ་ཡི་བདག་ཉིད་ལུས། །ཐོབ་པར་གདོན་མི་ཟ་བར་གསུངས། །བདག་གཞན་དོན་གཉིས་འགྲུབ་པར་འགྱུར། །བདེ་བའི་ལུས་ཀྱང་ཐོབ་པར་འགྱུར། །ཐམས་ཅད་མཁྱེན་པ་འོད་གསལ་བ། །ཡེ་ཤེས་དེ་ཉིད་རྫོགས་པར་འགྱུར། །འདི་དག་རྟག་ཏུ་སུ་བསྒོམ་པ། །ཇི་ལྟར་འདོད་པའི་སྐུ་ཐོབ་འགྱུར། ། [82b.6]སྦྱིན་སྲེག་ཆོ་ག་རབ་རྫོགས་པ། །རིམ་གཉིས་དག་ལ་གནས་པ་འདིར། །རང་གི་ཡེ་ཤེས་འཇིག་བྱེད་པ། །རྒྱུད་འགྲེལ་མི་འགལ་ལུང་དང་ལྡན། བླ་མའི་འདོད་གཞུང་འདི་དག་ཀྱང་། །རང་དགར་མ་བྱས་བཀའ་ལ་བརྟེན། །བློ་ཞན་གྱུར་གྱི་དོན་ལྡན་འབྱུང་། །དེ་བས་སྦྱིན་སྲེག་གསལ་ཕྱེ་བྱས། །འདི་ [82b.7]ལ་དགེ་བ་ཅི་ཡོད་པ། །རྣལ་འབྱོར་འདི་ལ་དད་པ་དང་། །འདི་ཡི་འདོད་ཕྱོགས་བསྒོམ་པ་རྣམས། །འཇམ་པའི་རྡོ་རྗེ་འགྲུབ་པར་ཤོག །རིམ་པ་གཉིས་ཀྱིས་ཕྱེ་བའི་སྦྱིན་སྲེག་གི་ཆོ་ག་རྒྱས་པ་རྫོགས་སོ།། །།སློབ་དཔོན་ཆེན་པོ་རིན་པོ་ཆེའི་གླིང་ན་གནས་པ་དཔལ་ལྡན་བྱང་ཆུབ་ [83a] [83a.1]མཆོག་གིས་མཛད་པ། རྒྱ་གར་གྱི་མཁན་པོ་སྨྲྀ་ཏི་ཛྙཱ་ན་ཀཱི་རྟིས་བསྒྱུར་བའོ། །{T2582}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་མཎྜ་ལ་གུ་ཎ་སཾ་བྷ་བ་བི་དྷི་ནཱ་མ། བོད་སྐད་དུ། འཕགས་པ་འཇམ་དཔལ་གྱི་དཀྱིལ་འཁོར་གྱི་ཆོ་ག་ཡོན་ཏན་འབྱུང་གནས་ཞེས་བྱ་བ། བཅོམ་ལྡན་ [83a.2]འདས་འཇམ་པའི་རྡོ་རྗེ་ལ་ཕྱག་འཚལ་ལོ། །དཔལ་ལྡན་སངས་རྒྱས་ཀུན་བདག་ཉིད། །རིགས་ཀུན་བདག་པོ་ཡེ་ཤེས་སྐུ། །འཇམ་པའི་རྡོ་རྗེ་མགོན་དཔལ་དང་། །བླ་མའི་ཞབས་ལ་རབ་བཏུད་ནས། །འཇམ་པའི་རྡོ་རྗེའི་དཀྱིལ་འཁོར་ནི། །བསྡུས་དང་བྱེ་བའི་བྱེ་བྲག་གིས། །ཐུན་མོང་མ་ཡིན་ཁྱད་འཕགས་ [83a.3]པའི། །ཆོ་གའི་རིམ་པ་བཤད་པར་བྱ། །ཆོས་ཀྱི་དབྱིངས་ཀྱི་ཡེ་ཤེས་ཀྱི་སྙིང་པོ། །མཚན་ཡང་དག་པར་བརྗོད་པའི་དཀྱིལ་འཁོར་དུ་དབང་བསྐུར་ཞིང་། །རྗེས་སུ་གནང་བ་ཐོབ་པའི་སློབ་དཔོན་ལ་སློབ་མ་དམ་ཚིག་དང་ལྡན་པས་གསོལ་བ་ལན་གཉིས་གསུམ་གདབ་པར་བྱའོ། །སློབ་དཔོན་གྱིས་ཀྱང་བླ་ [83a.4]ན་མེད་པའི་བྱང་ཆུབ་ཏུ་དགོད་པར་བྱའོ་ཞེས་བསམ་པ་བཟང་པོ་དང་ལྡན་པར་བྱའོ། །དེ་ནས་སློབ་མ་དེ་ལ་བུ་ཁྱོད་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྙིང་པོ་འདོད་དམ་ཞེས་དྲི་བར་བྱའོ། །བདག་ཅག་འཚལ་ལོ་ཞེས་ཟེར་ན་སྙིང་རྗེ་ཆེན་པོ་དང་ལྡན་པའི་ཡིད་ཀྱིས་སློབ་མ་དེ་ལ་ཁྱོད་ཀྱི་འདོད་ [83a.5]པའི་དོན་དེ་ཡོངས་སུ་སྦྱིན་པར་བྱའོ་ཞེས་གནང་བ་སྦྱིན་པར་བྱའོ། །འདི་ནི་སློབ་མ་ཡོངས་སུ་གཟུང་བའི་ཆོ་གའོ། །དེ་ནས་ཡིད་དང་རྗེས་སུ་མཐུན་པའི་གནས་སུ་སྤོས་ཆུ་ལ་སོགས་པས་ལེགས་པར་བྱུགས་ལ་མེ་ཏོག་སིལ་མ་གཏོར་ལ་བདུག་སྤོས་དྲི་ཞིམ་པོས་བདུག་པ་དང་། ཡོངས་སུ་ [83a.6]འབྱོར་པའི་མཆོད་པ་ལྔ་དང་། །མཆོད་པའི་ཡན་ལག་དང་ལྡན་པ་དག་དང་། །གདན་ནང་ཚངས་ཅན་བཟང་པོ་ལ་འདུག་ལ། གཞན་གྱི་དོན་དུ་བསྙེན་པ་དང་། །སྒྲུབ་པའི་ལས་བརྩམ་པར་བྱའོ། །བསྙེན་པ་ལ་གསུམ་སྟེ། མཚན་མ་དང་གྲངས་དང་། དུས་ཀྱི་བསྙེན་པའོ། །སྒྲུབ་པ་ལ་ནི་གསུམ་སྟེ། དབང་ [83a.7]བསྐུར་བའི་ཆོ་ག་དང་། རབ་ཏུ་གནས་པ་དང་། ཤི་བ་ལ་ཕན་གདགས་པའོ། །དེ་ལ་དང་པོ་བསྙེན་པ་ནི་བདག་ཉིད་ཨོཾ་པྲ་ཀྲྀ་ཏི་པ་རི་ཤུདྡྷཿ། སརྦ་དྷརྨྨཱཿཔྲ་ཀྲྀ་ཏི་པ་རི་ཤུདྡྷོ྅ཧཾ། ཞེས་བྱ་བའི་སྔགས་ཀྱིས་དག་པ་གསུམ་གྱི་ཁྲུས་བྱའོ། །དེའི་རྗེས་ལ་སྐད་ཅིག་མའི་རྣམ་པ་ལས་ཨོཾ་བཛྲ་མ་ཧཱ་ཀྲོ་དྷ་ཧཱུཾ་ཞེས་བརྗོད་པས། [83b] [83b.1]བཅོམ་ལྡན་འདས་དཔལ་གཤིན་རྗེ་གཤེད་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་གཡས་རལ་གྲི་བསྣམས་པ། གཡོན་སྡིགས་མཛུབ་ཀྱིས་བགེགས་ཐམས་ཅད་འཇོམས་པ་ཧཱུྃ་གི་སྒྲ་སྒྲོགས་པ་མིག་གཉིས་སུ་མ་དང་ཊ་ལས་ཉི་མའི་དཀྱིལ་འཁོར་དང་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཤིན་ཏུ་འབར་བའི་འོད་ཟེར་གྱིས་ [83b.2]བགེགས་ཐམས་ཅད་བསྐྲད་ལ། ཨོཾ་ཡ་མཱནྟ་ཀ་ཧཱུཾ་ཕཊ་ཅེས་བྱ་བའི་སྔགས་ཀྱིས་བཀའ་བསྒོ་བར་བྱའོ། །སྙིང་གར་ཉི་མའི་དཀྱིལ་འཁོར་གྱི་སྟེང་དུ་སྤྲིན་སྒྲ་ང་རོ་ཡེ་ཤེས་ལྔའི་བདག་ཉིད་ཅན་ལས་འོད་ཟེར་འཕྲོས་པས་འོག་ཐམས་ཅད་རྡོ་རྗེའི་ས་གཞི། ཕྱོགས་མཚམས་ཐམས་ཅད་རྡོ་རྗེའི་ར་བ། སྟེང་ཐམས་ཅད་རྡོ་རྗེའི་ [83b.3]གུར་དང་། །བླ་བྲེའི་རང་བཞིན་དུ་བསམ་མོ། །རྡོ་རྗེ་ར་བའི་ཕྱི་རོལ་དུ་ཕྱོགས་མཚམས་བཅུར་ཡི་གེ་རཾ་བཅུ་ཨོཾ་བཛྲ་རཀྵ་རཀྵ་ཧཱུཾ་ཞེས་པའི་སྔགས་འདིས་བྱིན་གྱིས་བརླབ་པོ། །འདི་ནི་སྲུང་བའི་འཁོར་ལོའི་རིམ་པའོ།། །།དེ་ནས་ཨོཾ་མཉྫུ་ཤྲཱི་ཛྙཱ་ན་སཏྭ་ཧཱུཾ་ཞེས་བརྗོད་པས་འཇམ་དཔལ་ཞི་བ་སྐུ་མདོག་སེར་པོ་ [83b.4]ཞལ་གཅིག་ཕྱག་གཉིས་པ་གཞོན་ནུ་རྒྱན་གྱིས་བརྒྱན་པར་བསམ་མོ། །དེའི་ལུས་ངག་ཡིད་གསུམ་བྱིན་གྱིས་བརླབ་པར་བྱ་སྟེ། ལྐོག་མའི་གནས་སུ་ཧྲཱིཿལས་པདྨ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ། དེ་ཡོངས་སུ་གྱུར་པ་ལས་ལྕེ་རྡོ་རྗེར་བསམ། སྔགས་ཀྱིས་བྱིན་ [83b.5]གྱིས་བརླབ་པ་ནི། །ཨོཾ་མཉྫུ་ཤྲཱི་བི་མ་ལ་ཛི་ཧྭ་གྷ་སཾ་ཤོ་དྷ་ན་བཛྲ་ཛི་ཧྭ་ཧཱུཾ། དེ་ནས་ལག་པ་བྱིན་གྱིས་བརླབ་པ་ནི། །ལག་པའི་མཐིལ་དུ་ཨ་ལས་ཟླ་བའི་སྟེང་དུ་ཧཱུཾ་ཡོངས་སུ་གྱུར་པ་ལས་ལག་པ་རྡོ་རྗེར་བསམ། སྔགས་ཀྱིས་བྱིན་གྱིས་བརླབ་པ་ནི། །ཨོཾ་མཉྫུ་ཤྲཱི་པདྨ་ཧ་སྟ་པུཪྞ་ག་རེ་དྷི་རི་བི་མ་ལེ་བཛྲ་ཧ་སྟ་ [83b.6]ཧཱུཾ། ཡིད་བྱིན་གྱིས་བརླབ་པ་ནི་བདག་གི་སྙིང་གར་པཾ་ལས་པདྨ་འདབ་མ་བརྒྱད་པ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་གྱི་དབུས་སུ་དྷཱིཿདཀར་སེར་བསམ་སྔགས་ཀྱིས་བྱིན་གྱིས་བརླབ་པ་ནི། ཨོཾ་མཉྫུ་ཤྲཱི་བི་མ་ལེ་བཛྲ་ཙིཏྟ་ཧཱུཾ། དེ་ནས་དཀྱིལ་འཁོར་སྤྲུལ་པར་བྱ་སྟེ། རྡོ་རྗེ་འཁོར་ལོའི་ཕྱག་རྒྱ་ [83b.7]བཅས་ལ། ཨོཾ་མཉྫུ་ཤྲཱི་མཎྜ་ལ་བཛྲ་ཙཀྲ་ཧཱུཾ་ཞེས་བརྒྱ་རྩ་བརྒྱད་བཟླས་སོ། །དེ་ནས་དེའི་སྤྱན་སྔར་སྐྱབས་སུ་འགྲོ་སྟེ། ཕྱོགས་བཅུའི་ཞིང་ཁམས་མ་ལུས་ན། །རྒྱལ་བ་སྲས་བཅས་བཞུགས་པ་རྣམས། །བདག་ལ་དགོངས་པར་བྱ་བའི་ཕྱིར། །ལུས་ངག་ཡིད་ཀྱིས་ཕྱག་འཚལ་ལོ། །བརྩོན་ [84a] [84a.1]འགྲུས་སྟོབས་ཀྱིས་དགེ་བསགས་པ། །ནམ་མཁའི་ཁམས་ཀྱིས་མཐའ་གཏུགས་པ། །མཆོད་སྤྲིན་ཚོགས་ཀྱིས་གང་གྱུར་ཏེ། །སྲས་དང་བཅས་ལ་མཆོད་པར་བགྱི། །ཚེ་རབས་ཐོག་མ་མེད་པ་ནས། །ཉོན་མོངས་དབང་གིས་སྡིག་བསགས་ཤིང་། །ལུས་ངག་ཡིད་ཀྱིས་སྤྱད་ [84a.2]པ་རྣམས། །མགོན་ལ་ལན་གསུམ་བཤགས་པར་བགྱི། །སེམས་བསྐྱེད་མངོན་པར་སངས་རྒྱས་ནས། །རྒྱལ་སྲས་འགྲོ་བའི་དོན་བཞུགས་ལ། །ཉན་ཐོས་རང་རྒྱལ་སྐྱེ་བོ་ཡི། །བསོད་ནམས་བྱེད་ལ་ཡི་རང་ངོ་། །འགྲོ་ཀུན་ལྡོངས་པར་མི་འགྱུར་ཏེ། །བདུད་བཞི་ཟིལ་གྱིས་མནན་པ་དང་། །བྱང་ [84a.3]ཆུབ་རྣམ་གསུམ་ཐོབ་བྱའི་ཕྱིར། །འཁོར་ལོ་བླ་མེད་བསྐོར་བར་བསྐུལ། །འཇིག་རྟེན་བདེ་ལ་དགོད་པར་བྱ། །སྲོག་ཆགས་བྱང་ཆུབ་རྒྱུ་ཡིན་ཕྱིར། །རྒྱལ་སྲས་མྱ་ངན་འདའ་བཞེད་ལ། །མྱ་ངན་མི་འདའ་བཞུགས་སུ་གསོལ། །དུས་གསུམ་སངས་རྒྱས་ཐམས་ཅད་དང་། །རྒྱལ་སྲས་རྣམས་ལ་བདག་དབུལ་ [84a.4]གྱིས། །བདག་ནི་དུས་གསུམ་ཐམས་ཅད་དུ། །སོ་སོར་ཁྱེད་ཀྱིས་བཞེས་སུ་གསོལ། །སངས་རྒྱས་བྱང་ཆུབ་སེམས་དཔའ་རྣམས། །ཇི་ཙམ་དུས་ནས་བཟུང་ནས་སུ། །མ་ལུས་བདག་ལ་དགོངས་སུ་གསོལ། །ནམ་ཞིག་བྱང་ཆུབ་སྙིང་པོ་ལ། །ཡོངས་སུ་གནས་ཀྱི་བར་དག་ཏུ། །བདག་ [84a.5]གིས་བྱང་ཆུབ་མཆོག་གི་སེམས། །མ་ལུས་པར་ནི་བསྐྱེད་པར་བགྱིའོ། །ཐུགས་རྗེ་ཆེ་དང་ལྡན་པ་ཡི། །བླ་ན་མེད་པའི་དཀོན་མཆོག་གསུམ། །འགྲོ་བའི་དོན་ཀུན་མཛད་པ་ལ། །བདག་ནི་གུས་པས་སྐྱབས་སུ་མཆི། །ཇི་ལྟར་འཇིག་རྟེན་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། ། [84a.6]བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ [84a.7]ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱིའོ། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡིས། ། [84b] [84b.1]དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། ། [84b.2]ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་གྲོལ་བ་རྣམས་གྲོལ་བར་བགྱི། །མ་བསྒྲལ་བ་རྣམས་བསྒྲལ་བར་བགྱི། ། [84b.3]དབུགས་མ་ཕྱུང་བ་དབུགས་དབྱུང་བགྱི། །སེམས་ཅན་མྱ་ངན་འདས་ལ་དགོད། །དེ་ནས་ངག་གི་དྲི་མ་དག་པར་བྱ་བའི་ཕྱིར་ལྷ་ལ་བསྟོད་དེ། བདེ་བ་ལས་འཁྲུངས་རྡོ་རྗེ་འཆང་བ་ཡི། །དངོས་དང་དངོས་མེད་འབྱུང་གནས་ཆེན་པོར་མཁྱེན། །དང་པོ་གང་དུ་རྣམ་པར་སྣང་མཛད་ཆེ། །དག་ཅིང་དྲི་མེད་བློས་ནི་ཨོཾ་དུ་སྤྲུལ། ། [84b.4]གཟུགས་མང་ཕྲེང་བའི་ཚུལ་དུ་བསྐོར་བ་ཡི། །སྒྱུ་འཕྲུལ་དྲ་བའི་ཚོགས་ལ་ཕྱག་འཚལ་བསྟོད། །དེ་ནས་ལྷ་རྣམས་དགྱེས་ནས་ལྷ་དེ་དག་གིས་བདག་ལ་བསྟོད་པར་བསམ་མོ། །དེ་ནས་དྲིན་ལན་གྱི་ཚུལ་དུ་མཚན་བརྒྱ་རྩ་བརྒྱད་པས་ཕར་ལ་བསྟོད་པར་བྱའོ། །འདི་ནི་བསོད་ནམས་ཀྱི་ཚོགས་བསགས་པའི་ཡན་ [84b.5]ལག་གོ། །དེ་ནས་ཁྱད་པར་གྱི་ཚོགས་བསག་པར་བྱ་བའི་ཕྱིར་ཕྱག་ལྔས་རིགས་ལྔའི་སངས་རྒྱས་མཉེས་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་པྲ་ཎ་མ་མེ་བཛྲ་བནྡཱ་ནཾ་ཀཱ་རོ་མི། ཞེས་བྱ་བས་རྣམ་པར་སྣང་མཛད་ཀྱི་དཀྱིལ་འཁོར་ལ་ཕྱག་བྱའོ། །ཨོཾ་སརྦ་ཏ་ཐཱ་ག་པཱུ་ཛོ་པསྠཱ་ན་ཡ་ཨཱཏྨ་ནཾ་ནརྱཱི་ཏ་ཡཱ་མི། [84b.6]སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏིཥྛ་སྭ་མཱཾ། ཞེས་བྱ་བ་མི་བསྐྱོད་པ་ལ་ཕྱག་བྱའོ། །ཨོཾ་སརྦ་ཐཱ་ག་ཏ་པཱུ་ཛ་ཨ་བྷི་ཥེ་ཀ་ཨཱཏྨ་ནཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། ཞེས་བྱ་བ་འདིས་རིན་ཆེན་འབྱུང་ལྡན་གྱི་དཀྱིལ་འཁོར་ལ་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨ་ནི། ཨཱཏྨ་ནཾ་ནིརྱ་ཏ་ [84b.7]ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཱཾ། ཞེས་བྱ་བ་འདིས་དོན་ཡོད་གྲུབ་པའི་དཀྱིལ་འཁོར་ལ་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་བརྟ་ན་ཡ་ཨཱཏྨ་ནཾ་ནི་རྱཱ་ཏ་ཡ་མི་སརྦ་ཏ་ཐཱ་ག་ཏ་བཛྲ་དྷརྨྨ་པྲ་བཪྟ་ཡཱ་མཱཾ། ཞེས་བྱ་བ་འདིས་སྣང་བ་མཐའ་ཡས་ཀྱི་དཀྱིལ་འཁོར་ལ་ཕྱག་བྱའོ། །བྱང་ཆུབ་མཆོག་ [85a] [85a.1]ཏུ་སེམས་བསྐྱེད་པ་དང་། སྡོམ་པ་གཟུང་བ་དང་། མངོན་པར་བྱང་ཆུབ་པའང་བསྒོམ་པ་དང་། རྟེན་གྱི་དཀྱིལ་འཁོར་བསྒོམ་པ་དང་། །གངས་ཅན་མཚོ་བསྒོམ་པ་དང་། དང་པོའི་སངས་རྒྱས་བསྒོམ་པ་དང་། ཤེས་རབ་འཁོར་ལོ་དང་། སྦྱོར་བ་དང་པོ་དང་། རིགས་སོ་སོར་ [85a.2]ཕྱེ་བ་དང་། ལྷ་བསྒོམ་ཞིང་དབྱུང་བ་དང་། །དཀྱིལ་འཁོར་རྒྱལ་མཆོག་དང་། །ལས་རྒྱལ་མཆོག་རྣམས་བསྒོམ་པའོ། །ལྷ་རྣམས་གདན་གྱི་སྟེང་དུ་མཚན་གྱི་སྔགས་དང་ཡིག་འབྲུ་ལས་ལྷའི་སྐུར་བསྐྱེད་ལ་ཡེ་ཤེས་སེམས་དཔའ་གཞུག་པར་བྱ་སྟེ། །བདག་བཅོམ་ལྡན་འདས་ཀྱི་ཐུགས་ཀ་ནས་འཕྲིན་ལས་ [85a.3]ཀྱི་འཕགས་པ་འཇམ་དཔལ་སྐུ་མདོག་སེར་པོ་ཞལ་གཅིག་ཕྱག་གཉིས་པ། དང་པོའི་སངས་རྒྱས་ཀྱི་ངོ་བོ་དེ་ཤར་ཕྱོགས་ཀྱི་སྒོར་འདུག་ལ་མཆོད་པ་བྱིན་གྱིས་བརླབ་པར་བྱ་སྟེ། །ཨོཾ་བཛྲ་ཡཀྵ་ཧཱུཾ། ཞེས་པས་མཆོད་པ་ལ་གནོད་པའི་བར་གཅོད་ཀྱི་བགེགས་རྣམས་བསྐྲད་དོ། །ཨོཾ་ཤི་ཁ་རེ་རུ་ཊ་མ་ཊ་ཧཱུཾ། [85a.4]ཞེས་བྱ་བས་བསང་བར་བྱའོ། །མཆོད་ཡོན་དང་ཞལ་བསིལ་ལ་ནི་ཨོཾ་ཨཱཿཧཱུཾ། ཞེས་བྱ་བས་བྱིན་གྱིས་བརླབ་པའོ། །མཆོད་པ་ལྔ་ནི་རང་རང་གི་སྔགས་ཀྱིས་བྱིན་གྱིས་བརླབ་པའོ། །ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་ཨཱ་ལོ་ཀེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ནཻ་ཝི་ཧྱེ་ཧཱུཾ། [85a.5]དེ་ནས་ཨོཾ་བཛྲ་པྲ་བེེ་ཤ་ཡ་ཕཊ། ཅེས་སྒོ་དབྱེ་བར་བྱའོ། །རང་གི་ལྷ་ཡི་སྦྱོར་བ་ཡིས། །ལག་པ་གཉིས་ནི་སྦྱོར་བར་བཅིངས། །སེ་གོལ་བརྡབ་ཅིང་བརྗོད་དོ། །ཨོཾ་བཛྲ་ས་མ་ཡ་ཛཿཧཱུཾ་བཾ་ཧོཿ སངས་རྒྱས་ཐམས་ཅད་བསྡུ་བར་བྱ། །སྤོས་སྣོད་ལག་ཏུ་ཐོགས་ལ། །མ་ལུས་ཕྱོགས་ན་ [85a.6]བཞུགས་པ་ཡི། །འཕགས་པ་འཇམ་དབྱངས་བཅོམ་ལྡན་འདས། །སངས་རྒྱས་ཐམས་ཅད་བཞུགས་སུ་གསོལ། །བདག་མིང་འདི་ཞེས་བགྱི་བ་ནི། །སངས་རྒྱས་ཐམས་ཅད་སྤྱན་འདྲེན་པས། །དེང་འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདི་ནི་སྩལ་དུ་གསོལ། །ཨོཾ་ཨེ་ཧྱེ་ཧི་ [85a.7]བྷ་ག་བཱན་བཛྲ་ཨཾ་ཀུ་ཤ་ཛཿཧཱུཾ་བཾ་ཧོཿ། ས་མ་ཡ་སྟཾ། དེ་ནས་མཆོད་ཡོན་དབུལ་ཏེ། བཅོམ་ལྡན་ཐུགས་རྗེས་བྱོན་པ་ལེགས། །བདག་ནི་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ཨོཾ་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎས་མ་ཡེ་ཧཱུཾ། [85b] [85b.1]དེ་ནས་ཞལ་བསིལ་དབུལ་ཏེ། ཇི་ལྟར་བཅོམ་ལྡན་འཇམ་དབྱངས་ཀྱིས། །རང་བཞིན་དག་པའི་ཡེ་ཤེས་ལ། །གཟུང་འཛིན་དྲི་མ་མི་མངའ་ཡང་། །འགྲོ་བའི་དོན་དུ་སྐུ་ཁྲུས་གསོལ། ཨོཾ་སརྦ་ཏཐཱ་ག་ཏ་པྲ་བ་ར་སཏྐཱ་ར་པྲ་ཏཱིཙྪ་ཧོཿ། དེ་ནས་འདོད་པའི་དོན་ལ་གསོལ་བ་གདབ་པ་དང་། བདག་དང་འགྲོ་ལ་ [85b.2]ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཨོཾ་བཛྲ་ཏཥྛི་ཧཱུཾ། ཞེས་མེ་ཏོག་དབུལ་ལོ། །དེ་ནས་བསྟོད་པ་བྱ་བ་ནི། མཉམ་ཉིད་མི་གཡོ་མཉམ་ཉིད་མཆོག་ཆོས་ཅན། །ཐུགས་རྗེས་རང་བཞིན་འགྲོ་བའི་སྡུག་ [85b.3]བསྔལ་སེལ། །ཡོན་ཏན་ཀུན་མཉམ་མཐའ་ཡས་དངོས་གྲུབ་སྩོལ། །དྲི་མེད་མི་གཡོ་མཉམ་ཉིད་མཆོག་ཆོས་ཅན། །སེམས་ཅན་ཁམས་ལ་དམ་ཆོས་དངོས་གྲུབ་སྩོལ། །དངོས་གྲུབ་མཉམ་དང་མཐའ་མེད་མཐའ་བྲལ་བ། །མི་མཉམ་མཉམ་པའི་དཔེ་ནི་མཁའ་ལ་བདེ། །ཡོན་ཏན་ཕྲ་བའི་ [85b.4]ཆ་ཤས་མཚུངས་པ་མེད། །རྟག་ཏུ་དྲི་མེད་ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་ཅིང་མི་འགག་ཆོས་ཉིད་ཅན། །འགྲོ་བའི་དོན་གྲུབ་ལྷུར་མཛད་མཐའ་ཡས་པ། །ཐུགས་རྗེའི་བདག་ཉིད་དྲུག་ཏུ་རྣམ་པར་སྣང་། །དཔག་མེད་མི་རྫོགས་གནས་ཉིད་ལེགས་རྫོགས་ཏེ། །བདེ་གནས་ [85b.5]གཤེགས་དང་ཐུགས་རྗེ་སྤྱོད་མི་གཡོ། །འཇིག་རྟེན་མཆོག་གི་དངོས་གྲུབ་སྩོལ་མཛད་པ། །བདག་ཉིད་མི་འགྱུར་ཀྱེ་མ་ཆོས་ཉིད་བཟང་། །མཆོག་སྩོལ་མཆོག་ཉིད་ནང་ནས་མཆོག་བརྙེས་པ། །ཁམས་གསུམ་ཀུན་ལ་དངོས་གྲུབ་སྩོལ་མཛད་པ། །མགོན་པོ་དུས་གསུམ་དྲི་མེད་རབ་མཁྱེན་པ། ། [85b.6]ཀུན་གྱི་དངོས་གྲུབ་མཆོག་གསུམ་བདག་ལ་སྩོལ། །ཞེས་བརྗོད་དོ། །ཨོཾ་བཛྲ་ཨཾ་ཀུ་ཤ་ཛཿཞེས་པས་ནང་དུ་གཞུག །ཡ་མཱནྟ་ཀ་ཧཱུཾ་ཕཊ། ཅེས་པས་བགེགས་བསྐྲད། བཛྲ་བནྡྷ་ཧཱུཾ། ཞེས་པས་སྒོ་བཅད། ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ [85b.7]རྣ་མཱུ་རྟི་ཝཱ་གཱི་ཤྭ་ར་མ་ཧཱ་པཱ་ཙ་སརྦ་དྷརྨྨ་ག་ག་ན་ཨ་མ་ལ་སུ་པ་རི་ཤུདྡྷ་བྷརྨྨ་དྷཱ་ཏུ་ཛྙཱ་ན་གརྦྷ་ཨཱཿདྲྀ་ཤྱ་ས་མ་ཡ་སྟྭཾ་ཨ་ཧཾ། ཞེས་བལྟ་བར་བྱའོ། །ཡང་དེ་བཞིན་དུ་དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ་ཨཱཿཧཱཾ། ཞེས་གཉིས་སུ་མེད་པར་བསམ་མོ། །ཡང་རྩ་བའི་སྔགས་དེ་ཉིད་ཀྱི་རྗེས་ལ། ཨོཾ་བཛྲ་ཀ་ར། [86a] [86a.1]ཞེས་པས་ལྷ་ཐམས་ཅད་ཀྱི་ཐུགས་ཀར་ཨ་ལས་འོད་འཕྲོས་ནས་ཡོན་ཏན་དང་འཕྲིན་ལས་ཀྱི་ངོ་བོར་བསྡུས་ནས། སྣ་ཚོགས་རྡོ་རྗེར་གྱུར་པ་ལས་ཨས་མཚན་པའོ། །ཡང་དེ་བཞིན་དུ་ཨོཾ་བཛྲ་དྷརྨྨ་ཧྲཱིཿཨོཾ་བཛྲ་ཙཀྲ་ཨོཾ། ཨོཾ་བཛྲ་སཏྭ་ཧཱུཾ། ཞེས་པས་པདྨ་དང་། འཁོར་ལོ་ [86a.2]དང་། རྡོ་རྗེ་དང་ལྡན་པ་མགྲིན་པ་དང་། སྤྱི་གཙུག་དང་ཐུགས་ཀར་མཚན་པའོ། །སངས་རྒྱས་ཀུན་གྱི་ཐུགས་ཆེ་བ། །སངས་རྒྱས་ཀུན་གྱི་གསུང་ཡང་ཡིན། །སངས་རྒྱས་ཀུན་གྱི་སྐུ་ཆེ་བ། །སངས་རྒྱས་ཀུན་གྱི་ཐུགས་ལ་གནས། །གཙོ་བོ་ཆོས་ཀྱི་སྦྱིན་བདག་སྟེ། །ཕྱག་རྒྱ་བཞི་པོའི་ [86a.3]དོན་སྟོན་པ། ཞེས་པ་ནི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་ངོ་བོ་ཡང་མཚན་པ་ཡིན་ནོ། །དེ་ནས་དབང་བསྐུར་བར་བྱ་ཏེ། ཨོཾ་པྲ་ཀྲྀ་ཏི་པ་རི་ཤུདྡྷ་སརྦ་དྷརྨྨ་ཡ་དུ་ཏ་སརྦ་ཏ་ཐཱ་ག་ཏ་ཛྙཱ་ན་ཀཱ་ཡ་མཉྫུ་ཤྲཱི་པ་རི་ཤུདྡྷི་ཏ་མུ་པ་དཱ་ཡེ་ཏི་ཨ་ཨ། ཨོཾ་སརྦ་ཏ་ཐཱ་ག་ཏ་མུ་ཀུ་ཊ་ཨ་བྷི་ཥིཉྩ་མཱཾ། ཞེས་ [86a.4]པས་རང་རང་གི་བདག་པོས་དབུ་ལ་མཚན་པའོ། །རྡོ་རྗེ་དབྱིངས་ཀྱི་དཀྱིལ་འཁོར་གྱི་ལྷ་རྣམས་ནི་རིགས་ལྔས་དབུ་བརྒྱན་པའོ། །དེ་བཞིན་གཤེགས་པ་ལྔ་དང་། བྱང་ཆུབ་སེམས་དཔའ་བཅུ་དྲུག་རིན་པོ་ཆེའི་ཅོད་པན་ཅན་ནོ། །དེ་ནས་དཀྱིལ་འཁོར་གྱི་ལྷ་དེ་དག་ལ་མཆོད་པར་བྱ་སྟེ། ཐང་དང་ཆུ་ལས་སྐྱེས་པ་ [86a.5]ཡི། །ལྷ་རྫས་དམ་པའི་མེ་ཏོག་འདི། །ཐུབ་དབང་སྲས་དང་བཅས་ལ་འབུལ། །བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ་བར་ནི་བཞེས་སུ་གསོལ། །ཨོཾ་ན་མཿསརྦ་ཏ་ཐཱ་ག་ཏ་བཛྲ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ནགས་ཚལ་བཅུད་ནི་ཡིད་འོང་བ། །ལྷ་རྫས་དམ་པའི་ [86a.6]ཡིད་འོང་འདི། །ཐུབ་དབང་སྲས་དང་བཅས་ལ་འབུལ། །བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ་བར་ནི་བཞེས་སུ་གསོལ། །ཨོཾ་ན་མཿསརྦ་ཏ་ཐཱ་ག་ཏ་བཛྲ་དྷཱུ་པེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། སྣང་བའི་ཁྱད་པར་གང་ཡོད་པ། །ཐུབ་དབང་སྲས་དང་བཅས་ལ་འབུལ། །བདག་དང་ [86a.7]འགྲོ་ལ་ཐུགས་བརྩེའི་ཕྱིར། །ཅི་བདེ་བར་ནི་བཞེས་སུ་གསོལ། །ཨོཾ་ན་མཿསརྦ་ཏ་ཐཱ་ག་ཏ་བཛྲ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨརྒྷ་ལ་སོགས་ཙནྡན་ཆུ། །ལྷ་རྫས་དམ་པའི་དྲི་ཆབ་འདི། །ཐུབ་དབང་སྲས་དང་བཅས་ལ་དབུལ། །བདག་དང་འགྲོ་ལ་ཐུགས་བརྩེའི་ཕྱིར། ། [86b] [86b.1]ཅི་བདེ་བར་ནི་བཞེས་སུ་གསོལ། །ཨོཾ་ན་མཿསརྦ་ཏ་ཐཱ་ག་ཏ་བཛྲ་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། རོ་མཆོག་བརྒྱ་དང་ལྡན་པ་ཡི། །ལྷ་རྫས་དམ་པའི་ཞལ་ཟས་འདི། །ཐུབ་དབང་སྲས་དང་བཅས་ལ་དབུལ། །བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ་བར་ནི་བཞེས་སུ་གསོལ། ། [86b.2]ཨོཾ་ན་མཿསརྦ་ཏ་ཐཱ་ག་ཏ་བཛྲ་ནཻ་བི་དྱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཚངས་པའི་གསུང་ནི་སྙན་པ་ཡི། །ལྷ་རྫས་དམ་པའི་སེལ་སྙན་འདི། །ཐུབ་དབང་སྲས་དང་བཅས་ལ་དབུལ། །བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ་བར་ནི་བཞེས་སུ་གསོལ། །ཨོཾ་ན་མཿསརྦ་ཏ་ [86b.3]ཐཱ་ག་ཏ་བཛྲ་གཱི་ཏི་ར་ག་ཤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ནས་མཆོད་པའི་ལྷ་མོ་བརྒྱད་ཀྱིས་ཀྱང་མཆོད་པར་བྱ་སྟེ། དེང་ནས་བརྩམས་ཏེ་རྫོགས་སངས་རྒྱས། །སྲས་དང་བཅས་རྣམས་རྣམ་རོལ་ཅིང་། །རྡོ་རྗེ་སྙེམས་པའི་རྣལ་འབྱོར་གྱིས། །དགའ་སྟོན་བདེ་བས་མཆོད་པར་བགྱི། །ཨོཾ་བཛྲ་ [86b.4]ལཱ་སྱེ་ཧཱུཾ། སྒེག་དང་བཅས་པས་ཕྲེང་བ་འཕང་། །སངས་རྒྱས་ཐམས་ཅད་མཆོད་པར་བགྱི། །དེ་ནས་བཅོམ་ལྡན་འབྲལ་མི་བྱ། །ཕྲེང་བ་འདི་ནི་རྒྱན་ཡིན་ནོ། །ཨོཾ་བཛྲ་མཱ་ལེ་ཧྲཱཾ། །ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱིས་བླང་བར་གྱིས། །དེ་ཡི་བདེ་གཤེགས་དངོས་གྲུབ་ [86b.5]ནི། །མྱུར་དུ་བདེ་བ་མྱོང་བར་འགྱུར། །ཨོཾ་བཛྲ་གཱི་ཏི་ཧྲཱིཿདེ་ཉིད་ཐལ་མོའི་གར་གྱིས་ནི། །སངས་རྒྱས་ཐམས་ཅད་མཆོད་པར་བྱ། །སངས་རྒྱས་འདུ་བའི་འཕྲིན་ལས་ཀྱིས། །གར་མཁན་ཚུལ་དུ་བསྒྲུབ་པར་གྱིས། །ཨོཾ་བཛྲ་ནཱྀ་ཏི་ཨཿ། རྫོགས་སངས་རྒྱས་ལ་སྦོས་ཕུལ་བས། །བརྟུལ་ཞུགས་བཟང་ [86b.6]པོ་ལེགས་ཚིམ་གྱིས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་པར་གྱིས། །ཨོཾ་བཛྲ་དྷཱུ་པེ་ཧཱུཾ། སངས་རྒྱས་རྣམས་ལ་མེ་ཏོག་གཏོར། །བྱང་ཆུབ་ཡན་ལག་ཚོགས་རྫོགས་པའི། །མཚན་དང་དཔེ་བྱད་ལྡན་པ་ཡི། །བདེ་གཤེགས་སྐུ་ནི་ཐོབ་པར་བགྱི། །ཨོཾ་ [86b.7]བཛྲ་པུཥྤེ་ཧཱུཾ། ཆོས་ཀྱི་མེ་ནི་ལེགས་སྤར་ནས། །རྡོ་རྗེ་ཆོས་དང་འདྲ་བ་རུ། །སེམས་ཅན་མ་རིག་ལྡོངས་པ་ལ། །ཡེ་ཤེས་སྒྲོན་མེ་སྦར་དུ་གསོལ། །ཨོཾ་བཛྲ་ཨཱ་ལོ་ཀེ་ཧཱུཾ། རྒྱལ་བ་རྣམས་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང་། །རྣམ་གྲོལ་ཡེ་ཤེས་ཐོབ་པ་ཡི། ། [87a] [87a.1]བྱང་ཆུབ་ལུས་ཅན་རྣམས་ཀྱི་བསྒོས། །ཨོཾ་བཛྲ་གྷནྡྷེ་ཨཿ། དེ་ནས་འདོད་པའི་ཡོན་ཏན་ལྔས་མཆོད་དེ། ཁ་དོག་དབྱིབས་ལེགས་ཡིད་འོང་རྒྱན་དང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་པ། །ཀུན་ཀྱང་མོས་བློས་མཆོད་གནས་རྣམས་ལ་དབུལ། །བཞེས་ [87a.2]ནས་བླ་མེད་གྲུབ་མཆོག་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་རཱུ་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་སྒྲ་སྙན་ཁྱད་པར་གང་ཡོད་པའི། །ཀུན་ཀྱང་མོས་བློས་མཆོད་གནས་རྣམས་ལ་དབུལ། །བཞེས་ནས་བླ་མེད་གྲུབ་མཆོག་སྩལ་དུ་ [87a.3]གསོལ། །ཨོཾ་སརྦ་ཏ་ཐཱ་ག་ཏ་གནྡེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཕྱོགས་དུས་ཀུན་ནས་ཙནྡན་སྤྲུལ་སྙིང་དང་། །ཨ་ཀར་ལ་སོགས་དྲི་མཆོག་མཆིས་པ་རྣམས། །ཀུན་ཀྱང་མོས་བློས་མཆོད་གནས་རྣམས་ལ་དབུལ། །བཞེས་ནས་བླ་མེད་གྲུབ་མཆོག་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་གནྡེ་པཱུ་ཛ་མེ་གྷ་ [87a.4]ས་མུ་དྲ་སྥ་ར་ཎ་ས་མ་ཡེ་ཧཱུཾ། །ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །ལུས་སེམས་རྟས་བྱེད་རེག་བྱའི་ཁྱད་པར་རྣམས། །ཀུན་ཀྱང་མོས་བློས་མཆོད་གནས་རྣམས་ལ་དབུལ། །བཞེས་ནས་བླ་མེད་གྲུབ་མཆོག་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་སྤཀྵེ་པཱུ་ཛ་མེ་གྷ་ས་མུ་ [87a.5]དྲ་སྥ་ར་ཎ་ས་མ་ཡེ་ཧཱུཾ། ཕྱོགས་དུས་ཀུན་ནས་རོ་དང་བཅུད་ལྡན་པའི། །ལུས་སེམས་རྟས་བྱེད་རོ་མཆོག་ཐམས་ཅད་ཀྱང་། །ཀུན་ཀྱང་མོས་བློས་མཆོད་གནས་རྣམས་ལ་དབུལ། །བཞེས་ནས་བླ་མེད་གྲུབ་མཆོག་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་རཱ་ས་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ [87a.6]ནས་རྡོ་རྗེ་དང་དྲིལ་བུར་ལྡན་པས་བསྟོད་པར་བྱ་སྟེ། མཆོག་སྦྱིན་རྡོ་རྗེ་མཆོག་ཁྱོད་འདུད། །ཡང་དག་མཐར་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་ [87a.7]རྒྱས་དགྱེས་པ་ཁྱོད་ལ་འདུད། །སངས་རྒྱས་རོལ་ལ་ཕྱག་འཚལ་འདུད། །སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་ལ་ཕྱག་འཚལ་འདུད། །སངས་རྒྱས་གསུང་ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །མེད་པ་ལས་བྱུང་ཁྱོད་ལ་འདུད། །སངས་ [87b] [87b.1]རྒྱས་འབྱུང་བ་ཁྱོད་ལ་འདུད། །ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །དེ་ནས་ཕྱག་བཞི་བྱས་ཏེ། ཨོཾ་སྠི་ཏོ་ [87b.2]ཧྲྀ་དི་ཛྙ་ན་མཱུ་རྟི་ར་ཧཾ་བུདྡྷཱ་བུདྡྷཱ་ནཱཾ། ཞེས་བྱ་བའི་སྔགས་ཀྱིས་བཅོམ་ལྡན་འདས་གངས་ཅན་མཚོ་ལ་ཕྱག་བྱའོ། །ཡང་དེ་ཉིད་ཀྱིས་དང་པོའི་སངས་རྒྱས་ལ་ཕྱག་བྱའོ། །ཡང་དེ་ཉིད་ཀྱིས་ཤེས་རབ་འཁོར་ལོ་ལ་ཕྱག་བྱའོ། །ཡང་དེ་ཉིད་ཀྱིས་ཡེ་ཤེས་སེམས་དཔའ་ལ་ཕྱག་བྱའོ། །འདི་ནི་ཟག་པ་ [87b.3]མེད་པའི་ཡེ་ཤེས་སྐྱེད་པར་བྱེད་པ་ཡིན་པས་འདིར་བདག་ཉིད་ཐུགས་ཀར་ཐིམ་པའི་རིམ་པའོ། །དེ་ནས་ཟབ་པ་དང་། བཟང་བ་དང་རྒྱ་ཆེ་བ་ཡངས་པ་དང་། རྒྱ་ཆེ་བའི་ཏིང་ངེ་འཛིན་ལ་གནས་པར་བྱའོ། །སྐྱོ་བར་གྱུར་ན་བཟླས་པའི་རྣལ་འབྱོར་བྱའོ། །དེ་ནས་རིམ་པའི་ཏིང་ངེ་འཛིན་ལ་གནས་པར་བྱའོ། ། [87b.4]དེ་ལྟར་ཐུན་བཞིའི་རྣལ་འབྱོར་གྱིས་སྔོན་དུ་བསྙེན་པ་བྱ་སྟེ། དབང་བསྐུར་བ་ལ་མཚན་མའི་བསྙེན་པ་བྱའོ། །རབ་ཏུ་གནས་པ་ལ་གྲངས་ཀྱི་བསྙེན་པ་བྱའོ། །ཤི་བ་ལ་ཕན་གདགས་པ་ལ་ནི་དུས་ཀྱི་བསྙེན་པ་བྱའོ། །ཡང་ན་གང་ཟག་དབང་པོ་རབ་ཀྱིས་མཚན་མའི་བསྙེན་པ་བྱའོ། །འབྲིང་གིས་ [87b.5]གྲངས་ཀྱི་བསྙེན་པ་བྱའོ། །ཐ་མས་དུས་ཀྱི་བསྙེན་པ་བྱའོ། །འདི་ནི་སྔོན་གྱི་བསྙེན་པའི་ཆོ་གའོ།། །།དེ་ལྟར་བསྙེན་པ་བྱས་ནས་ནི། །གཞན་གྱི་དོན་ལ་བརྩོན་པར་བྱ། །མཚན་མ་བཟང་པོ་ཐོབ་པའམ། །ཏིང་འཛིན་རྩེ་གཅིག་གནས་པ་ཡིས། །དཀྱིལ་འཁོར་ལ་སོགས་ལས་རྣམས་བྱ། ། [87b.6]གྲོང་ལ་སོགས་པའི་ཕྱོགས་མཐུན་ནི། །རྣལ་འབྱོར་པས་ནི་སྤང་བར་བྱ། །ཡོན་ཏན་ཀུན་དང་ཡོངས་ལྡན་པའི། །བྱང་ཤར་མཚམས་ནི་ཡོངས་སུ་བཟུང་། །སེམས་ལ་གུས་པ་དང་ལྡན་ན། །གང་དུ་ཡིད་དང་མཐུན་པར་བྱ། །ཞེས་གསུངས་པས་ན། །ཤར་དང་ལྷོར་གཞོལ་བའི་སར་གཤིན་ [87b.7]རྗེ་གཤེད་ཀྱི་སྔགས་བཟླས་པའི་ཆུས་བསང་གཏོར་བྱའོ། །དེ་ནས་སའི་ལྷ་མོ་ལ་ས་བསླང་བ་ནི་སའི་ལྷ་མོ་མདོག་སེར་མོ་ཞི་བའི་རང་བཞིན་ཅན་ཕྱག་གཉིས་གསེར་གྱི་བུམ་པ་བསྣམས་པ། །རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་ལ་མཆོད་པ་ལྔ་བྱ་སྟེ། སྐྱོབ་པ་སངས་རྒྱས་ཐམས་ཅད་ཀྱི། ། [88a] [88a.1]སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་ལྟར་བདག་གིས་བདུད་བཅོམ་པས། །བདག་ནི་དཀྱིལ་འཁོར་བྲི་བར་བྱེད། །ཅེས་བརྗོད་པས་སའི་ལྷ་མོ་བློས་ནམ་མཁའི་ [88a.2]ཕྱོགས་སུ་བཏེག་ནས་སེམས་ཅན་གྱི་དོན་དུ་དཀྱིལ་འཁོར་བྱེད་པས། བདག་ལ་ས་བྱིན་ཅིག་ཅེས་བརྗོད་པས་ཁྱོད་ཀྱིས་དཀྱིལ་འཁོར་གྱི་བདག་པོ་གྱིས་ཤིག་ཅེས་བརྗོད་པར་བསམ་མོ། །ས་བསླང་བའི་རིམ་པའོ།། །།དེ་ནས་དྲག་པོའི་སྦྱིན་སྲེག་གིས་བགེགས་བཟློག །དེ་ཉིད་བདག་དང་སློབ་མ་ཞི་ [88a.3]བར་བྱ་བའི་སྦྱིན་སྲེག་བྱས་ལ། དེ་ནས་ས་སྦྱང་བར་བྱ་སྟེ། པུས་མོ་ནུབ་ཙམ་བརྐོས་ལ་གྱོ་མོ་ལ་སོགས་པའི་རོ་ལྔ་བསལ་ཏེ་ས་དེ་ཉིད་ཀྱིས་དགང་ངོ་། །འདི་ནི་ཁུང་བུ་དགང་བའི་ཆོ་གའོ།། །།དེ་ནས་དཀྱིལ་འཁོར་ཉིས་འགྱུར་ལ་སྤོས་ཆུས་ཆག་ཆག་བཏབ་སྟེ། རྗེ་བཙུན་གྱི་ཡི་གེ་བརྒྱ་པ་ [88a.4]ལན་གསུམ་བཀླག་པར་བྱ་སྟེ། འདི་ནི་ས་བཟུང་བའི་རིམ་པའོ། །དེ་ནས་རྡོ་རྗེ་སློབ་དཔོན་གྱིས་དཀྱིལ་འཁོར་གྱི་དབུས་སུ་འདུག་སྟེ། སྟོང་པ་ཉིད་སྔོན་དུ་འགྲོ་བས་ལྷའི་ང་རྒྱལ་བྱས་ལ་ས་གཞི་ཐམས་ཅད་སྟོང་པའི་རང་བཞིན་ལས་ཧཱུཾ་ལས་རྡོ་རྗེའི་རང་བཞིན་དུ་བསྒོམས་ནས། དེ་ནས་སྤྲོ་བ་བསྐྱེད་པར་བྱ་ [88a.5]སྟེ། དེང་དུས་བདག་ཚེ་འབྲས་བུ་ཡོད། །བདག་གིས་གསོན་པའང་འབྲས་བུར་བཅས། །ལྷ་དང་དམ་ཚིག་མཉམ་པ་རུ། །གྱུར་པས་བདག་ཉིད་སོམ་ཉི་མེད། །བྱང་ཆུབ་སེམས་དང་སེམས་གཅིག་པར། །མི་ལྡོག་པར་ནི་བདག་འགྱུར་ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ [88a.6]ཐེ་ཚོམ་མེད། །དེང་བདག་ཉི་མ་དམ་པ་སྟེ། །སངས་རྒྱས་ཐམས་ཅད་སྤྱན་འདྲེན་པས། །དེང་བདག་འདུས་པའི་མཆོག་ཡིན་ནོ། །དེ་ནས་སྤོས་ལག་ཏུ་ཐོགས་ལ། །མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། །བདག་མིང་འདི་ཞེས་བྱ་བ་ཡིས། ། [88a.7]འཇམ་པའི་དབྱངས་ཀྱི་དཀྱིལ་འཁོར་འབྲི། །སངས་རྒྱས་ཐམས་ཅད་སྤྱན་འདྲེན་པས། །དེང་འདིར་སངས་རྒྱས་ཀུན་གཤེགས་ལ། །དངོས་གྲུབ་འདིར་ནི་སྩལ་དུ་གསོལ། །ཞེས་བརྗོད་པས། བདག་ཉིད་ལྷག་པའི་ལྷའི་ང་རྒྱལ་དུ་གནས་པར་བྱ། གསང་སྔགས་ཡིད་ཀྱིས་བཟླས་པར་བྱའོ། །སྒྲུབ་པའི་ [88b] [88b.1]གྲོགས་མཆོག་ལྷའི་ང་རྒྱལ་དང་ལྡན་པས་དཀྱིལ་འཁོར་བྲི་བའི་གསོལ་བ་གདབ་པར་བྱས་ཏེ། །སངས་རྒྱས་ཀུན་གྱི་དཀྱིལ་འཁོར་ཆེ། །སྤྲུལ་པའི་འཁོར་ལོ་སྣ་ཚོགས་འཆང་། །སེམས་ཅན་ཀུན་ལ་ཕན་པའི་ཕྱིར། །དཀྱིལ་འཁོར་ཆེན་པོ་བཤད་དུ་གསོལ། །དེ་བཞིན་གཤེགས་པ་ཀུན་ [88b.2]ཞི་བ། །དེ་བཞིན་གཤེགས་པ་ཀུན་གྱི་གནས། །སྒྱུ་འཕྲུལ་དྲ་བ་ལས་བྱུང་བའི། །དཀྱིལ་འཁོར་དམ་པ་བཤད་དུ་གསོལ། །ཞི་བའི་ཆོས་མཆོག་ལས་བྱུང་བ། །ཡེ་ཤེས་སྤྱོད་པ་རྣམ་སྤྱོང་བ། །འཇམ་པའི་རྡོ་རྗེ་གསུང་གི་མཆོག །དཀྱིལ་འཁོར་སྙིང་པོ་བཤད་དུ་གསོལ། །རྒྱུད་ཆེན་སྒྱུ་ [88b.3]འཕྲུལ་དྲ་བ་ལས། །རྡོ་རྗེ་འཆང་ཆེན་གསང་སྔགས་འཆང་། །དཔག་མེད་རྣམས་ཀྱི་དགའ་བཞིན་དུ། །དཀྱིལ་འཁོར་གཙོ་བོ་བཤད་དུ་གསོལ། །ཞེས་གསོལ་བ་བཏབ་ལ། །དེ་ནས་ལངས་ནས་ལྷ་ལ་ཕྱག་བྱས་ལ་གཤིན་རྗེ་གཤེད་ཀྱི་ང་རྒྱལ་དུ་བྱས་ལ་མིག་གཉིས་སུ་མ་དང་ཊ་ལས་ཉི་མ་དང་ཟླ་བའི་ [88b.4]དཀྱིལ་འཁོར་གྱི་སྟེང་དུ་ཧཱུཾ་སྔོན་པོ་འབར་བ་བསམ་པ་དང་། རྐང་བའི་མཐིལ་དུ་ཧཱུཾ་ལས་རྡོ་རྗེ་རྒྱ་གྲམ་འོད་འབར་བ་བསམས་ལ་ལངས་ཏེ། ཁྲོ་བོའི་ལྟ་བས་དཀྱིལ་འཁོར་གྱི་ས་ཐམས་ཅད་དུ་བལྟས་ལ་དབང་ལྡན་གྱི་མཚམས་ནས་བརྩམས་ལ་གཡས་བརྐྱང་བ་དང་། གཡོན་བརྐྱང་བ་ལ་སོགས་པའི་རྡོ་རྗེའི་ [88b.5]འགྲོས་ཀྱིས་གར་གྱི་ཚུལ་དུ་ས་ཀུན་དུ་བཅགས་ལ། ང་ཉིད་རང་ཉིད་རྡོ་རྗེ་ཅན། །འཇམ་པའི་རྡོ་རྗེ་ང་རང་ཉིད། །ང་ནི་སངས་རྒྱས་རྒྱལ་པོ་ཆེ། །སྟོབས་ཆེན་སངས་རྒྱས་ཀུན་བདག་ཉིད། །བདག་པོ་ཆེན་པོ་རྡོ་རྗེ་བདག །བྱིན་གྱིས་བརླབ་པ་མི་འདོར་རོ། །ཧཱུཾ་དཀྱིལ་འཁོར་ཆེན་པོ་ས་གཞི་ [88b.6]ལ་གནས་པའི། །ལྷ་ལ་ཚོགས་པའི་བགེགས་ཚོགས་ཀུན་ཉོན་ཅིག། །གནས་འདིར་འཇམ་དཔལ་ཕོ་བྲང་དཀྱིལ་འཁོར་འདྲི། །བགེགས་ཀྱི་རིགས་ཚོགས་གང་ཡིན་བྱེར་བར་གྱིས། །དེང་ས་ཕྱོགས་ནམ་མཁའ་ལྟར་དྲི་མ་མེད་པ་འདིར་རྣལ་འབྱོར་གྱི་དབང་ཕྱུག་ཆེ་ [88b.7]གེ་མོ་ཞེས་བྱ་བས་སེམས་ཅན་ཐམས་ཅད་རྫོགས་པའི་བྱང་ཆུབ་ལ་དགོད་པར་བྱ་བའི་ཕྱིར། འཇམ་པའི་རྡོ་རྗེའི་དཀྱིལ་འཁོར་བྲི་ཡིས་ལྷ་དང་ཀླུ་དང་དྲི་ཟ་དང་གནོད་སྦྱིན་དང་འབྱུང་པོ་དང་ཤ་ཟ་ལ་སོགས་པ་ཐམས་ཅད་སོང་ཅིག་ཅེས་བརྗོད་དོ། །འོད་ཟེར་མེ་ལྟ་བུའི་ཕྲེང་བས་ [89a] [89a.1]གདུག་པ་ཅན་ཐམས་ཅད་བསྲེག་པར་བསམ་མོ། །དེ་ནས་ཤར་ཕྱོགས་སུ་གཡས་བརྐྱང་བའི་སྟང་སྟབས་ཀྱིས་བགེགས་བསྐྲད་དོ། །ལྷོ་ཕྱོགས་སུ་གཡོན་བརྐྱང་བའི་སྟང་སྟབས་ཀྱིས་བགེགས་བསྐྲད་དོ། །ནུབ་ཕྱོགས་སུ་ཟླུམ་པོའི་སྟང་སྟབས་ཀྱིས་བགེགས་བསྐྲད་དོ། ། [89a.2]བྱང་ཕྱོགས་སུ་ས་གའི་སྟང་སྟབས་ཀྱིས་བགེགས་བསྐྲད་དོ། །དཀྱིལ་འཁོར་དབུས་སུ་ཧཱུཾ་གི་སྒྲ་འབྲུག་དང་འདྲ་བར་བརྗོད་པར་བྱའོ། །དེ་ནས་སེང་ལྡེང་ངམ་ལྕགས་ལས་བྱས་པའི་ཕུར་པ་སྟོད་ཁྲོ་བོ་ལ་སྨད་ལྕགས་ཀྱི་རྡོ་རྗེ་རྩེ་གཅིག་པར་འདུག་པ་ལྔ་ཧཱུཾ་ལས་བསྐྱེད་ལ། གཡོན་པའི་ཁུ་ཚུར་གྱིས་ [89a.3]བཟུང་ལ་གཡས་པས་རྡོ་རྗེ་ཐོགས་ལ་དབུས་དང་གྲྭ་བཞིར་གདབ་པོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུ་ཥྚཱཾ་ཧཱུཾ་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཧཱུཾ་ཧཱུཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ་བཛྲ་དྷ་རོ་ཨཱཛྙཱ་པ་ཡ་ཏི་ཀཱ་ཡ་བཱཀ་ཙིཏྟ་བཛྲ་ཀཱི་ལ་ཡ་ཧཱུཾ། ཞེས་བྱ་བའི་སྔགས་ཀྱིས་ཕུར་བུ་བཏབ་ [89a.4]ལ། ཕུར་བུའི་ཕྱི་རོལ་དུ་རྡོ་རྗེའི་ར་བ་དྲ་བ་དང་བཅས་པ་བསམ། །ཨོཾ་བཛྲ་ཡཀྵ་ཧཱུཾ། ཞེས་བྱ་བའི་སྔགས་ཀྱིས་བསྲུང་བར་བྱའོ། །དེ་ནས་སའི་ལྷ་མོ་ནམ་མཁའ་ལ་ཕབ་ལ་དེ་ལ་གཏོར་མ་བྱིན་ལ་ས་ལ་ཐིམ་པར་བྱའོ། །འདི་ནི་ས་བསླང་བའི་རིམ་པའོ།། །།དེ་ནས་དཀྱིལ་འཁོར་གྱི་ས་ཙནྡན་ལ་ [89a.5]སོགས་པའི་དྲིའི་ཆུས་བྱུགས་ལ་ལྷའི་གྲངས་དང་མཉམ་པའི་དྲིའི་ཐིག་ལེ་ཟླུམ་པོ་བྱས་ལ་དེ་ལ་མེ་ཏོག་གི་ཚོམ་བུ་བཀོད་ལ་སྐད་ཅིག་མས་དཀྱིལ་འཁོར་གྱི་འཁོར་ལོ་བསྐྱེད་ལ། དེ་ལ་མཆོད་པ་དང་བསྟོད་པ་བྱས་ལ། མཁྱེན་པར་གསོལ་བ་ནི་པུས་མོ་གཡས་པའི་ལྷ་ང་ས་ལ་བཙུགས་ཏེ་ [89a.6]འདི་སྐད་ཅེས་བརྗོད་དོ། །འཇམ་དཔལ་དཔའ་བོ་རྡོ་རྗེ་ཆེ། །རིག་པའི་རྒྱལ་པོ་ཁྱོད་ལ་འདུད། །དཀྱིལ་འཁོར་ཐུགས་རྗེའི་བདག་ཉིད་ཅན། །མགོན་པོ་བདག་ཉིད་བྲི་བར་འཚལ། །སློབ་མ་རྣམས་ལ་བརྩེ་བ་དང་། ཁྱོད་ལ་མཆོད་པ་བྱ་བའི་ཕྱིར། །བཅོམ་ལྡན་བདག་ནི་གུས་པ་ལ། །དེ་ [89a.7]ལ་བཀའ་དྲིན་མཛད་པར་འོས། །འགྲོ་བའི་འཁོར་ལོ་དོན་མཛད་པ། །སངས་རྒྱས་བདག་ལ་དགོངས་སུ་གསོལ། །འབྲས་གནས་བྱང་ཆུབ་སེམས་དཔའ་དང་། སྔགས་ཀྱི་ལྷ་གཞན་གང་ལགས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །སངས་ [89b] [89b.1]རྒྱས་བསྟན་ལ་དགའ་བ་རྣམས། །འཇམ་དཔལ་རྡོ་རྗེའི་དཀྱིལ་འཁོར་འདི། །འགྲོ་བ་དག་ཕྱིར་བདག་བྲི་བས། །བདག་དང་སློབ་མར་བཅས་པ་ལ། །དཀྱིལ་འཁོར་བྱིན་བརླབས་དངོས་གྲུབ་སྩོལ། །ཞེས་ལན་གསུམ་བརྗོད་དེ། །འདི་ནི་ལྷ་ལྷག་པར་གནས་པའི་རིམ་པའོ། །དེ་ནས་དངུལ་ [89b.2]ལམ་གསེར་གྱི་བུམ་པ་ཁ་དོག་དཀར་པོར་བསྒྱུར་ལ་ལྷའི་གྲངས་དང་མཉམ་བའམ། །ཡང་ན་རྣམ་པར་རྒྱལ་བའི་བུམ་པ་དང་ལས་ཐམས་ཅད་པའི་བུམ་པའོ། །དེ་ནས་ལས་ཐམས་ཅད་པ་ལ་སྣ་ཚོགས་རྡོ་རྗེ་བྲི། །རྣམ་པར་རྒྱལ་བའི་བུམ་པ་ལ་རིགས་དྲུག་གི་མཚན་མ་བྲི་བར་བྱའོ། །གཙོ་བོའི་ [89b.3]བུམ་པར་སྨན་ལྔ་དང་། འབྲུ་ལྔ་དང་། རིན་པོ་ཆེ་ལྔ་དང་། དྲི་ལྔས་བཀང་ལ་མགུལ་པ་ལ་ཆིངས་ཉིས་རིམ་དུ་བཅིངས་ལ་མེ་ཏོག་གི་ཕྲེང་བ་དང་གདུགས་དཀར་པོས་དེ་གཡོགས་པར་བྱའོ། །གཞན་དག་ཏུ་ཡང་དྲི་ཞིམ་པོའི་ཆུས་དགང་བར་བྱའོ། །ཤིང་བཟང་པོའི་ལོ་མས་ཁ་བརྒྱན་པར་བྱའོ། །ཡང་ [89b.4]ན་བུམ་པ་བརྒྱད་དགོད་པར་བྱའོ། །གཙོ་བོའི་བུམ་པར་སྐད་ཅིག་གིས་ལྷ་ཚང་བར་བསྐྱེད་ལ་དགུག་གཞུག་དང་མཆོད་བསྟོད་དང་བཟླས་པ་བྱའོ། །ལས་ཐམས་ཅད་པའི་བུམ་པར་གཤིན་རྗེ་གཤེད་བསྐྱེད་ལ་དགུག་གཞུག་དང་མཆོད་བསྟོད་དང་བཟླས་པ་བྱའོ། །རྣམ་པར་རྒྱལ་བའི་བུམ་ [89b.5]པར་བཞུ་བར་བྱའོ། །ལས་ཐམས་ཅད་པའི་བུམ་པར་ནི་མི་བཞུའོ། །དེ་ནས་བུམ་པ་རྣམས་རས་གཙང་མའི་སྟེང་དུ་གཞག་གོ ། འདི་ནི་བུམ་པ་ལྷག་པར་གནས་པའི་ཆོ་གའོ།། །།དེ་ནས་བར་ཆོད་ཞི་བར་བྱ་བ་དང་དངོས་གྲུབ་ཉེ་བར་བྱ་བའི་ཕྱིར་གཞུང་གཞན་དུ་བཤད་པའི་སྦྱིན་སྲེག་ [89b.6]བྱའོ། །དེ་ནས་ཕྱི་རོལ་དུ་གཏོར་མ་ཆག་སུམ་གཏང་ངོ་། །དེའི་རྗེས་ལ་སློབ་མ་ལྷག་པར་གནས་པར་བྱའོ། །ཤར་ཕྱོགས་སུ་མཎྜལ་བྱས་ནས་ཕྱག་བྱ་སྟེ། པུས་མོ་ས་ལ་བཙུགས་ལ་ཐལ་མོ་སྦྱར་བར་བྱ་སྟེ། །དགའ་ཆེ་ཁྱོད་བདག་སྟོན་པ་ཡིན། །སློབ་དཔོན་ཁྱོད་ནི་དགོངས་སུ་གསོལ། ། [89b.7]བྱང་ཆུབ་སེམས་དཔའི་ཚུལ་བརྟན་པ། །མགོན་པོ་ཆེན་པོ་བདག་འཚལ་ལོ། །མགོན་པོ་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ཉིད་འཇུག་པར་མཛོད། །ཅེས་གསོལ་བ་གདབ་པོ། །དེ་ནས་སློབ་དཔོན་གྱིས་སློབ་མ་ལ་འདི་སྐད་ཅེས་བརྗོད་པར་བྱ་སྟེ། [90a] [90a.1]བུ་ཚུར་ཐེག་པ་ཆེན་པོ་ཡི། །ཚུལ་ཆེན་སྣོད་ནི་ཁྱོད་ཡིན་ཏེ། གསང་སྔགས་སྤྱོད་པའི་ཚུལ་གྱི་མཆོག །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་ [90a.2]དང་། དེ་དག་ཀུན་གྱི་གསང་སྔགས་ཀྱིས། །ཆོ་ག་ཟབ་མོ་འདི་མཁྱེན་ནས། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །སྐྱོབ་པ་འཇམ་པའི་རྡོ་རྗེ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་ཕྱིར་ཀུན་མཁྱེན་ཐོབ་བྱའི་ཕྱིར། ། [90a.3]བུ་ཡིས་བློ་གྲོས་འདི་གྱིས་ཤིག། །ཅེས་བརྗོད་དོ། །དེ་ནས་ཡང་སློབ་མས་འདི་སྐད་ཅེས་བརྗོད་པར་བྱའོ། །དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང་། །བྱང་ཆུབ་མཆོག་ཏུ་སེམས་ [90a.4]བསྐྱེད་བགྱི། །སེམས་ཅན་ཐམས་ཅད་མགྲོན་དུ་གཉེར། །འགྲོ་ཕན་སངས་རྒྱས་འགྲུབ་པར་ཤོག །ཅེས་བྱ། །དེ་ནས་བུའི་སྙིང་གར་རྡོ་རྗེ་བཟུང་ལ་ས་མ་ཡ་ཨ། སུ་ར་ཏ་སྟྭཾ་བཛྲ་སཏྭ་ས་མ་ཡ་ཧོ། བཛྲ་སཏྭ་ཡ་ཐཱ་སུ་ཁཾ་ཞེས་པས་སློབ་མ་ཡེ་ཤེས་སེམས་དཔར་བསྐྱེད་དོ། །དེ་ནས་སློབ་དཔོན་གྱིས་ [90a.5]སློབ་མ་ལ། །ཨོཾ་ཨཱཿཧཱུཾ་ཞེས་བྱ་བས། སྤྱི་བོ་དང་མགྲིན་པ་དང་། ཐུགས་ཀ་རྣམས་སུ་རྡོ་རྗེ་དང་འཁོར་ལོ་དང་པདྨ་བསམ་མོ། །ཁུ་ཚུར་གཡས་པས་རྡོ་རྗེ་བཟུང་ལ་གནས་གསུམ་དུ་རེག་པར་བྱའོ། །དེ་ནས་སློབ་མ་དེ་ལ་སྤྱི་བོར་མེ་ཏོག །མདུན་དུ་བདུག་སྤོས། སྙིང་གར་བྱུག་པ། མིག་སྔར་ [90a.6]མར་མེ་བྱིན་ལ། སོར་བཅུ་གཉིས་པའི་ཚད་ཀྱིས་སོ། །ཤིང་ཨ་ཤྭད་ཐ་དང་ཨུ་དུ་མྺཱ་ར་ལ་སོགས་པའི་རྒྱུ་ལས་བྱུང་བ། གས་ཆག་མེད་པ་དྲང་པོ་མེ་ཏོག་གི་ཕྲེང་བ་ཅན། ཨོཾ་ཡ་མཱནྟ་ཀ་ཧཱུཾ་ཞེས་པའི་སྔགས་ཀྱིས་མངོན་པར་བཟླས་ཏེ་སྦྱིན་ནོ། །དེ་ནས་སོ་ཤིང་བཅའ་སྟེ། བ་ལང་གི་ཀོ་བ་ཙམ་གྱི་ [90a.7]མཎྜལ་བྱུགས་ལ། ཁ་ཤར་དུ་བལྟས་ལ་དྲང་པོར་དོར་རོ། །དེ་ལ་བདག་ཉིད་ལ་རྩེ་མོ་བལྟས་ན་མཆོག་འགྲུབ་ལ། ཤར་དུ་བལྟས་ན་འབྲིང་དུ་བཤད་ལ། མཚམས་དང་བྱང་ཤར་དུ་བལྟས་ན་འཇིག་རྟེན་པའི་དངོས་གྲུབ་ཐོབ། སོ་ཤིང་བོར་ལ་མཐུར་དུ་བལྟས་ན་འོག་གི་དངོས་གྲུབ་ཐོབ་བོ། ། [90b] [90b.1]དེའི་དྲི་ཆུ་ལ་ཨོཾ་པྲ་ཀྲྀ་ཏི་པ་རི་ཤུདྡྷེ་སརྦ་དྷ་རྨྨ་པྲ་ཀྲྀ་ཏི་པ་རི་ཤུདྡྷོ྅ཧཾ། ཞེས་པས་མངོན་པར་བསྔགས་ཏེ་ཧུབ་གསུམ་བླུད་པར་བྱའོ། །ཨོཾ་ཡ་མཱནྟ་ཀ་ཧཱུཾ་ཕཊ། ཞེས་བྱ་བ་བཟླས་པས་ཀུ་ཤ་སྔས་སུ་སྦྱིན་ཞིང་སྔགས་དེ་ཉིད་བཟླས་པ་སྟན་དུ་ཡང་སྦྱིན་ནོ། །ཨོཾ་ཨཱཿཧཱུཾ་བཟླས་པའི་སྐུད་པ་མདུད་པ་ [90b.2]གསུམ་དང་ལྡན་པ་ཡང་དཔུང་པ་གཡོན་པ་ལ་གདགས་སོ། །དེ་བརྟན་པར་བྱ་བའི་ཕྱིར། །ཨོཾ་མཉྫུ་ཤྲཱི་ས་མ་ཡ་མ་ནུ་པཱ་ལ་ཡ། མཉྫུ་ཤྲཱི་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོཥྱོ་མེ་བྷ་བ། །ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ་སརྦ་ཀརྨྨ་སུ་ཙ་མ། ཙིཏྟཾ་ཤྲེ་ཡཿ [90b.3]ཀུ་རུ་ཧཱུཾ་ཧ་ཧ་ཧ་ཧ་ཧོཿ། །བྷ་ག་བཱན་སརྦ་ཏ་ཐཱ་ག་ཏོ་མཉྫུ་ཤྲཱི་མཱ་མེ་མུཉྩ་བཛྲཱི་བྷ་བ། མ་ཧཱ་ས་མ་ཡ་སཏྭ་ཨཱཿ་དེ་ནས་ཚིགས་སུ་བཅད་པ་འདིས་སྤྲོ་བ་བསྐྱེད་པར་བྱའོ། །འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ཡང་ནི་རེས་འགའ་ཞིག །འབྱུང་འགྱུར་ [90b.4]ཡང་ནི་མི་འབྱུང་ངོ་། །གསང་སྔགས་ཀྱི་ནི་ཆོས་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་དྲི་མེད་སེམས་ཅད་དོན། །མྱ་ངན་མི་འདའ་བྱེད་པར་ནུས། །གང་དག་པ་ཡི་མཆོག་འདི་ལ། །བློ་གྲོས་ཤིན་ཏུ་མི་གཡོ་བས། །དེ་དག་གིས་ནི་འཁོར་བའི་རྒྱུན། །སྡུག་བསྔལ་ཀུན་འབྱུང་བདེ་ [90b.5]བ་ཅན། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་བརྙེས། །གང་ཕྱིར་སངས་རྒྱས་སྲས་བཅས་པའི། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་ནས་སྐྱེ་བཞིན་པས། །དེར་ནི་ཁྱེད་རྣམས་འདོང་བ་ནི། །ཐེག་པ་ཆེན་པོར་ཆེར་འབྱུང་བའི། ། [90b.6]ལམ་མཆོག་འདི་ནི་དཔལ་དང་ལྡན། ཁྱེད་རྣམས་དེར་ནི་འགྲོ་བས་ན། །རང་བྱུང་སྐལ་བ་ཆེན་པོ་ལ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པར་འགྱུར་བ་ཡིན། །ཞེས་བསྟན་པར་བྱའོ། །དེ་ནས་ཐལ་མོ་སྦྱར་ཏེ་ཚིག་འདི་སྐད་བརྗོད་དེ། །ཁྱད་པར་གྱི་སྡོམ་པ་འཛིན་དུ་གཞུག་གོ། ། [90b.7]མི་ལྡོག་པ་ཡི་དབང་བསྐུར་བ། །མགོན་པོས་བདག་ལ་སྩལ་ནས་ཀྱང་། །དཀྱིལ་འཁོར་ལྷ་ཡི་དེ་ཉིད་དང་། །སློབ་དཔོན་འཕྲིན་ལས་ཡོངས་སུ་གསུངས། །སངས་རྒྱས་ཀུན་གྱི་དམ་ཚིག་དང་། །སྡོམ་པ་བླ་ན་མེད་པ་གསུངས། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་བགྱིད། །དེ་ [91a] [91a.1]ནས་རྨི་ལམ་དུ་ཅི་བྱུང་བ་ནང་པར་ང་ལ་སྨྲོས་ཤིག་ཅེས་བརྗོད་ལ་གཏོང་ངོ་། །དེ་ནས་ནང་པར་རྨི་ལམ་འཛེམ་པ་མེད་པར་བཟླས་སོ། །རྨི་ལམ་སངས་རྒྱས་མཐོང་ན་ནི། །ཡོན་ཏན་རྒྱ་མཚོ་མངོན་སུམ་བཞིན། །མཆོད་རྟེན་དང་ནི་སྐུ་གཟུགས་མཐོང་། །ཞེས་པ་ལ་སོགས་པ་རྨི་ལམ་སྨྲས་ [91a.2]ལ་ངན་པ་མཐོང་ན་སྦྱིན་སྲེག་བྱའོ། །འདི་ནི་སློབ་མ་ལྷག་པར་གནས་པའི་ཆོ་གའོ།། །།དེ་ནས་སྐྱ་རེངས་ཤར་བའི་དུས་སུ་ལྷའི་རྣལ་འབྱོར་དང་ལྡན་པའི་སྙིང་གར་མཎྜལ་གྱི་ལྷ་རྣམས་བསྡུས་ལ་དཀྱིལ་འཁོར་གྱི་ས་གཞི་དྲིས་ཉེ་བར་བྱུགས་ལ། གང་ཟག་དབང་པོ་རབ་ཀྱིས་ནི་དྲིའི་ཐིག་ལེ་དང་མེ་ [91a.3]ཏོག་གི་ཚོམ་བུ་ལྷའི་གྲངས་དང་མཉམ་པར་བྱས་ལ། དེའི་སྟེང་དུ་དཀྱིལ་འཁོར་གྱི་ལྷ་རྣམས་ཏིང་ངེ་འཛིན་གྱིས་བསྐྱེད་ལ། དབང་པོ་རབ་ཀྱིས་ཏིང་ངེ་འཛིན་གྱི་དཀྱིལ་འཁོར་དུ་དབང་བསྐུར་བ་དང་། རབ་ཏུ་གནས་པ་དང་ཤི་བ་ལ་ཕན་གདགས་པ་རྣམས་བྱའོ། །གང་ཟག་དབང་པོ་འབྲིང་གིས་ནི་ [91a.4]བྲིས་སྐུའི་དཀྱིལ་འཁོར་མཎྜལ་དེ་ཉིད་སྟེང་དུ་བཀོད་ལ་དབང་བསྐུར་བ་ལ་སོགས་པ་བྱའོ། །གང་ཟག་དབང་པོ་ཐ་མས་ནི་རྡུལ་ཚོན་གྱི་དཀྱིལ་འཁོར་དེ་ཉིད་དུ་བཀོད་ལ་དབང་བསྐུར་བ་ལ་སོགས་པ་བྱའོ། །གསར་པ་ལེགས་པར་བསྒྲིལ་བ་ནི། །ཁ་དོག་ལྔས་ནི་ལེགས་བསྒྱུར་ལ། །བྱིན་གྱིས་ [91a.5]བརླབ་པར་བྱས་ནས་ནི། །དཀྱིལ་འཁོར་གྱི་ནི་ཐིག་གདབ་པོ། །ཞེས་གསུངས་པ་ནི། ཉི་མ་ཤར་ཁར་བདག་རྒྱན་དང་ལྡན་པར་བྱས་ལ། ཚོན་སྐུད་སྣ་ལྔའི་སྐུད་པ་བཀལ་པ་སྟོང་པ་ཉིད་ལས། ཧཱུཾ་ཏྲཾ་ཧྲཱིཿཨཱཿཨོཾ་ལས་འོད་ཟེར་གྱི་རིགས་ལྔའི་ཐུགས་ཀ་ནས་ཡིག་འབྲུ་ལྔ་སྤྱན་དྲངས་ཏེ་གཉིས་སུ་ [91a.6]མེད་པར་བསྟིམ་པར་བྱས་ལ་ཡེ་ཤེས་ལྔའི་རང་བཞིན་དུ་བསམས་ལ་བསྒྲིལ་པར་བྱའོ། །ཙནྡན་ལ་སོགས་པས་བསྒོས་པའི་སྣོད་དུ་བཞག་ལ་མཆོད་པ་ལྔས་མཆོད་པར་བྱའོ། །འདི་ནི་ཐིག་སྐུད་བཀལ་བའི་རིམ་པའོ།། །།དེ་ནས་རྡོ་རྗེ་སློབ་དཔོན་གྱིས་སྲད་བུ་གཡོན་པའི་རྡོ་རྗེ་ཁུ་ཚུར་ [91a.7]གྱིས་བཟུང་ལ། །ཛྫ་ཞེས་གྲུབ་པའི་གྲོགས་མཆོག་གི་ལག་ཏུ་གཏད་དོ། །ཕྱོགས་ཐམས་ཅད་མཉམ་པ་ཉིད་དུ་བསྒོམ་པར་བྱ་ཞིང་ཅི་བདེ་བར་གདབ་པར་བྱ། ཤར་དུ་བལྟས་ཏེ་ཐིག་དང་པོ་གདབ་པར་བྱའོ། །སློབ་དཔོན་ལྷོར་ཁ་བལྟས་ལ་ཚངས་ཐིག་གཉིས་པ་གདབ་པར་བྱ། དེ་ནས་མེའི་ཕྱོགས་ཀྱི་ [91b] [91b.1]ཆར་གནས་ལ་ཁ་བྱང་དུ་བལྟས་ལ་ཕྱིའི་ཐིག་གདབ་པར་བྱའོ། །རླུང་གི་ཕྱོགས་སུ་འདུག་སྟེ། ལྷོ་ཕྱོགས་སུ་བལྟས་ནས་ནུབ་ཀྱི་ཐིག་གདབ་པར་བྱའོ། །དེ་ཉིད་དུ་འདུག་སྟེ་བྱང་གི་ཐིག་གདབ་པར་བྱའོ། །ཡང་མེའི་མཚམས་སུ་འདུག་སྟེ། ལྷོ་ཕྱོགས་སུ་ཐིག་གདབ་པར་བྱའོ། །ཡང་དེ་ [91b.2]ཉིད་དུ་འདུག་སྟེ། རླུང་གི་ཕྱོགས་ཀྱི་བར་མཚམས་སུ་བར་གྱི་ཐིག་གདབ་པར་བྱའོ། །ཡང་བདེན་བྲལ་གྱི་ཕྱོགས་སུ་གནས་ཏེ་དབང་ལྡན་གྱི་བར་མཚམས་ཀྱི་བར་དུ་ཐིག་གདབ་པར་བྱའོ། །སློབ་དཔོན་གྱིས་ཀྱང་སློབ་མའི་སྐོར་ཕྱོགས་སུ་འགྲོ་བར་བྱའོ། །དེ་ལྟར་ཐིག་ཆེན་བརྒྱད་བཏབ་པས། ། [91b.3]ངོས་བཞི་དཀྱིལ་འཁོར་བཞི་རུ་འགྱུར། །སོ་སོའམ་ཆ་ཆེན་བཅུ་དྲུག་ཏུ། །སོ་སོར་རྣམ་པར་དབྱེ་བར་བྱ། །ཞེས་བྱ་བ་གསུངས་པས། ཆ་ཆེན་པོ་བཅུ་དྲུག་ལ། ཆ་བྲན་སོ་སོར་བགོས་ལ་གདབ་པར་བྱའོ། །ཕྱོགས་རེ་རེ་ནས་ཆ་ཆེན་པོ་བརྒྱད་ཡོད་པ་ལས། ཆ་གསུམ་ལ་ནི་ནང་གི་ [91b.4]དཀྱིལ་འཁོར་བྱའོ། །ཆ་གཉིས་ལ་ནི་དཀྱིལ་འཁོར་བར་མའི་ཐིག་གདབ་པར་བྱའོ། །ཆ་ཆེན་པོ་གསུམ་ལ་ནི་ཕྱིའི་དཀྱིལ་འཁོར་བྱའོ། །དཀྱིལ་འཁོར་གསུམ་ཀ་ཡང་ཟུར་བཞི་པ་སྒོ་བཞི་རྟ་བབས་དང་བཅས་པ་ཏྭ་ར་ཎས་ཡོངས་སུ་བརྒྱན་པའོ། །དེ་ལྟར་དཀྱིལ་འཁོར་གྱི་ཐིག་གདབ་པར་བྱའོ། ། [91b.5]དེ་ནས་སོ་སོར་རྣམ་པར་དབྱེ་བར་བྱ་སྟེ། ཞེས་གསུངས་པས་ན་ཆ་བྲན་སོ་སོར་བགོས་ལ་ཐིག་གདབ་པར་བྱའོ། །དེ་ལ་ནང་གི་དཀྱིལ་འཁོར་གྱི་ཐིག་གདབ་པར་བྱ་སྟེ། ཚངས་པའི་ཐིག་གི་གཡས་གཡོན་ནས། །ཆ་ཆུང་བཅུ་གཉིས་ཡོད་པ་དེ། །གཉིས་གཉིས་སུ་ནི་དབྱེ་བར་བྱའོ། །ཚངས་པའི་ [91b.6]ཐིག་གི་གཡས་གཡོན་ནས། །གསུམ་པ་དང་ནི་ལྔ་པ་དང་། །བཅུ་གསུམ་པ་དང་བཅུ་དྲུག་པ། །དེ་བཞིན་བཅུ་དགུ་པ་དག་ལ། །ཆ་ལྔ་ཕྱོགས་བཞིར་བགོ་བྱས་ལ། །སྒོ་ཁྱུད་ལ་སོགས་རྣམ་ལྔ་ཡིས། །ཚོན་སྣ་ལྔ་ཡིས་ས་གཞིར་བསྒྱུར། །དེ་ནས་ཕོ་བྲང་རིམ་པ་ནི། །ཆ་བྲན་བདུན་ [91b.7]ལས་བསྐོར་བྱས་ཏེ། །དེ་ནས་ཆ་ཆུང་གཅིག་གིས་བསྐོར། །ནང་གི་རྡོ་རྗེ་ར་བར་བཤད། །དེ་ནང་ཆ་བཞི་འཁོར་ལོ་བྱའོ། །དབུས་ཀྱི་ལྟེ་བ་ཆ་གཉིས་ཡིན། །འཁོར་ལོ་རྩིབས་བཞི་ལྟེ་བར་བྱས། །རྩིབས་བཞི་དག་དང་བཅས་པ་ནི། །གཙོ་བོ་ལྔ་དང་ཡུམ་བཞིར་གནས། །དེ་ཡི་ཕྱི་རོལ་ [92a] [92a.1]ཆ་བཞི་ལ། །བསྐོར་ཏེ་འཁོར་ལོ་རྩིབས་བཅུ་དྲུག །སེམས་དཔའ་བཅུ་དྲུག་གནས་སུ་བཤད། །ཆ་གཅིག་རྡོ་རྗེའི་ར་བར་བསྐོར། །དེ་ཡི་གྲུ་ཆང་བཞི་པོ་ལ། །སྒེག་མོ་ལ་སོགས་གནས་སུ་བཤད། །སྒོ་བཞི་དག་ཏུ་སྒོ་བ་དགོད། །ཕྱི་རོལ་ཆ་ལྔ་ཡོད་པ་ལ། ། [92a.2]ཆ་བཞི་ནམ་མཁའ་སྟོང་པར་བྱ། །ཆ་གཉིས་ལ་ནི་རྟ་བབས་བྱ། །གདུགས་དང་འཁོར་ལོ་ཆ་རེ་ཡིན། །དཀྱིལ་འཁོར་བར་མའི་ཐིག་གདབ་པ། །ཆ་ཆེན་གཉིས་པོ་བཞི་རུ་དབྱེ། །ཆ་ཆེན་གཅིག་ལ་ལྷ་སྣམ་བྱ། །ཆ་གསུམ་བཞི་བཞིར་དབྱེ་བར་བྱ། །དེ་ལྟར་བཅུ་གཉིས་ཡོད་པ་ལ། ། [92a.3]དང་པོ་དང་ནི་བཞི་པ་དང་། །དེ་བཞིན་དུ་ནི་བདུན་པ་རྣམས། །ཆ་ལྔ་དག་ཏུ་བགོ་བྱས་ཏེ། །ཚོན་སྣ་ལྔ་ཡིས་ས་གཞི་བསྒྱུར། །ནམ་མཁའ་སྟོང་པ་ཆ་ཆུང་གཅིག །རྟ་བབས་ལ་ནི་ཆ་གཉིས་ཏེ། །གདུགས་དང་འཁོར་ལོ་ཆ་རེ་ཡིན། །ཕྱི་རོལ་དཀྱིལ་འཁོར་ཐིག་གདབ་པ། །ཆ་ཆེན་ [92a.4]གསུམ་ནི་བཞི་བཞིར་དབྱེ། །ཆ་ལྔ་རིགས་ལྔའི་སྣམ་བུ་སྟེ། །ཆ་བདུན་གཉིས་གཉིས་དབྱེ་བར་བྱ། །དེ་ལྟར་བཅུ་བཞི་ཡོད་པ་ལ། །དང་པོ་དང་ནི་ལྔ་པ་དང་། །དེ་བཞིན་དགུ་པ་ཆ་ཆུང་བགོ། །ཚོན་སྣ་ལྔ་ཡིས་ས་གཞི་བསྒྱུར། །ནམ་མཁའ་སྟོང་པ་ཆ་ཆུང་གཅིག །རྟ་བབས་ལ་ནི་ཆ་གཉིས་ [92a.5]ཏེ། །གདུགས་དང་འཁོར་ལོ་ཆ་རེ་ཡིན། །རྡོ་རྗེ་མེ་རི་ཆ་རེ་སྟེ། །དེ་ལྟར་ཕྱོགས་བཞིར་བགོ་བྱས་ལ། །རིགས་བསྡུས་དཀྱིལ་འཁོར་ཐིག་གདབ་པོ། །ད་ནི་རིགས་སོ་སོར་ཕྱེ་བའི་དཀྱིལ་འཁོར་ཐིག་གདབ་པ་ནི། །བྱང་སེམས་རྡོ་རྗེའི་དཀྱིལ་འཁོར་ནི། །རིགས་བསྡུས་དཀྱིལ་འཁོར་ [92a.6]ནང་དང་འདྲ། །རྣམ་པར་སྣང་མཛད་དཀྱིལ་འཁོར་ནི། །གཙོ་བོ་ཆ་གསུམ་གདུང་ཆ་གཅིག། །ནང་གི་ཕྱོགས་བཞིར་ཆ་དྲུག་ཡིན། །ཕྱི་ཡི་ཕྱོགས་བཞིར་ཆ་བདུན་ཏེ། །ཕྱི་ཡི་རྡོ་རྗེ་ཕྲེང་ཆ་གཅིག། །མི་བསྐྱོད་པ་ཡི་དཀྱིལ་འཁོར་ནི། །ཕྱི་རུ་རྡོ་རྗེ་ཕྲེང་ཆ་གཅིག། །ཤར་དུ་ཆ་བཞི་ལྷོ་བྱང་གི་ [92a.7]ཚངས་ཐིག་ཐད་ཀར་ཆ་བཞི་སྟེ། །བོར་ནས་ནུབ་ཀྱི་ཟླ་གམ་ཚད། །ཕྱི་རོལ་ཀ་བ་ནང་གི་ཆ། །ཆ་བྲན་བཅུ་དྲུག་ཟླ་བའི་དབྱིབས། །དེ་ནས་ནང་གི་ཆ་དབྱེ་བ། །གཙོ་བོའི་ཆ་གཉིས་གདུང་ཆ་གཅིག །ལྷག་མ་ལྷ་སྣམ་བཅུ་བཞིའི་གནས། །པདྨ་གར་དབང་ཕོ་བྲང་ནི། །གཙོ་བོའི་ཆ་གསུམ་ [92b] [92b.1]གདུང་ཆ་གཅིག །ནང་གི་ཕྱོགས་བཞིར་ཆ་དྲུག་ཡིན། །ཕྱི་ཡི་ཕྱོགས་བཞིར་ཆ་བདུན་ཏེ། །རྡོ་རྗེ་ར་བ་གོང་དང་མཚུངས། །རྡོ་རྗེ་ཉི་མའི་དཀྱིལ་འཁོར་དང་། །རྟ་མཆོག་དོན་ཡོད་གྲུབ་པ་ཡི། །དཀྱིལ་འཁོར་ཐིག་ཀྱང་གོང་མ་བཞིན། །ཆ་བགོ་བ་ནི་མཐུན་པ་ཡིན། །ཞེས་བསྟན་པ་ཤེས་རབ་ [92b.2]དང་ལྡན་པས་ཐིག་གདབ་པར་བྱའོ། །སེང་ལྡེང་གི་ཕུར་པ་ལ་བརྟོད་པའི་སྲད་བུས་ནང་གི་དཀྱིལ་འཁོར་ཕྱིའི་རྡོ་རྗེའི་ཕྲེང་བ་དབང་ལྡན་གྱི་ཕྱོགས་ནས་བརྩམས་ཏེ། །གཡས་ནས་བསྐོར་བར་བྱའོ། །དཀྱིལ་འཁོར་གྱི་ཚད་ནི་ཉིས་འགྱུར་དུ་བྱའོ། །དེ་ཡང་། །སངས་རྒྱས་དཀྱིལ་འཁོར་ཟླུམ་པོ་སྟེ། རྡོ་རྗེ་ [92b.3]ཅན་གྱི་ཟླ་གམ་ཡིན། །པདྨ་ལ་ཡང་པདྨ་སྟེ། །རིན་ཆེན་ལ་ཡང་རིན་ཆེན་ཉིད། །ལས་ཀྱི་རིགས་ལ་སྣ་ཚོགས་པའི། །རྡོ་རྗེ་ཉིད་ནི་ཡིན་པར་འདོད། །ཐིག་འདེབས་པའི་དུས་སུ་སྔགས་འདི་བརྗོད་ཅིང་གདབ་པར་བྱའོ། །ཨོཾ་བཛྲ་ས་མ་ཡ་མཱ་ཏི་ཀྲ་མ་ཧཱུཾ་འདི་ནི་ཐིག་གདབ་པའི་ཆོ་གའོ། །དེ་ནས་ཚོན་ [92b.4]གྱི་ལས་བཤད་དེ། །སྔོན་པོ་དང་སེར་པོ་དང་དམར་པོ་དང་ལྗང་གུ་དང་དཀར་པོ་རྣམས་རིམ་པ་བཞིན་དུ་ཧཱུཾ་ཏྲཱཾ་ཧྲཱིཿཨཿཨོཾ་ལས་སྟོང་པ་སྔོན་དུ་འགྲོ་བ་ལས་ཡི་གེ་ལྔ་བསྐྱེད་ལ་དེ་ནས་རང་བཞིན་གྱི་གནས་ནས་དེ་བཞིན་གཤེགས་པ་ལྔའི་ཐུགས་ཀ་ནས་ཡི་གེ་འབྲུ་ལྔ་སྤྱན་དྲངས་ནས་གཉིས་སུ་མེད་པར་བསྟིམ་མོ། ། [92b.5]ཨོཾ་བཛྲ་ས་མ་ཡ་ཛཿཙིཏྟ་ཧཱུཾ་ཞེས་པའི་སྔགས་བཟླས་པས་ཡེ་ཤེས་ལྔའི་རང་བཞིན་དུ་སྦྱང་བར་བྱའོ། །དེ་ནས་ཚོན་དགྱེ་བ་བརྩམ་པར་བྱ་སྟེ། གཡོན་པ་རྡོ་རྗེ་ཁུ་ཚུར་གྱིས། །དབང་ལྡན་མཚམས་ནས་དགྱེ་བྱས་ལ། །ཕྱི་ནང་ཀུན་དུ་སློབ་མ་ཡིས། །ཞེས་བྱ་བ་ནི་དཀར་པོ་ནས་དྲངས་ཏེ། མཛུབ་གང་བླ་མའི་ལག་ [92b.6]པ་གཡོན་པས་བྲིས་ནས་ངག་ཏུ་འདི་སྐད་བརྗོད་པར་བྱའོ། །ཆོས་དབྱིངས་དེ་དག་གནས་པས་ན། །སེམས་ཅན་ཁམས་ནི་རབ་གྲོལ་བྱེད། །རྒྱལ་བ་འཇམ་པའི་རྡོ་རྗེ་ཉིད། །དེ་བཞིན་གཤེགས་པ་ཀུན་གྱི་གནས། ཞེས་བརྗོད་པས་ཕུར་བུ་གདོན་པར་བྱའོ། །ཤར་ཕྱོགས་སུ་ནི་སྔོན་པོ་སྟེ། །ལྷོར་ནི་ [92b.7]སེར་པོ་ཡང་དག་ལྡན། །ནུབ་ནི་པདྨ་རཱ་ག་སྟེ། །ལྗང་གུ་བྱང་དུ་ཡིན་པར་འདོད། །དབུས་ཀྱིས་ཡི་ཆ་ཉིད་ནི། །ཤེལ་ལྟར་སྣང་བ་བླ་ན་མེད། །སྔོན་པོ་རྡོ་རྗེ་རྩེ་རང་བཞིན། །གཉིས་པ་གསེར་ལ་དམིགས་པ་སྟེ། །པདྨ་ཆགས་པའི་ངོ་བོ་གཞི། །དེ་བཞིན་གཤེགས་ནི་མར་ཀཏ་འདྲ། ། [93a] [93a.1]དཀར་པོ་ནང་དུ་ཤེས་བྱ་སྟེ། །འདི་ནི་ཚོན་གྱི་རིམ་པར་གྲགས། །ཞེས་གསུངས་པས་ནི། །རྩེ་གཅིག་ཏུ་བྲི་བར་བྱའོ། །དེ་ལྟར་བྲིས་ལ་ལྷ་དགོད་པ་ནི་དབུས་སུ་རྣམ་པར་སྣང་མཛད་དོ། །འཁོར་ལོའི་རྩིབས་བཞི་ལ་ནི་རིགས་བཞིའོ། །གྲུ་ཆད་བཞི་ལ་ཡུམ་བཞིའོ། ། [93a.2]དེའི་ཕྱི་རོལ་ཏུ་འཁོར་ལོ་རྩིབས་བཅུ་དྲུག་ལ་རྡོ་རྗེ་སེམས་དཔའ་སྐུ་མདོག་དཀར་པོ། རྒྱལ་པོ་སེར་པོ། །ཆགས་པ་དམར་པོ། ལེགས་པ་ལྗང་གུ། རིན་ཆེན་སེར་པོ། གཟི་བརྗིད་དམར་པོ།རྒྱལ་མཚན་ནམ་མཁའི་མདོག་ཅན། བཞད་པ་དཀར་པོ། ཆོས་དཀར་དམར། རྣོན་པོ་སྔོ་ [93a.3]བསངས། འཁོར་ལོ་རྒྱུ་སེར་པོ། སྨྲ་བ་ཟངས་ཀྱི་མདོག་ཅན། རྡོ་རྗེ་ལས་སྣ་ཚོགས་པའི་མདོག་ཅན། །རྡོ་རྗེ་སྲུང་བ་སེར་པོ། རྡོ་རྗེ་གནོད་སྦྱིན་ནག་པོ། རྡོ་རྗེ་ཁུ་ཚུར་སེར་ལྗང་། ནང་གི་གྲུ་ཆད་བཞི་ལ་སྒེག་མོ་དཀར་མོ། ཕྲེང་བ་མ་སེར་མོ། གླུ་མ་དཀར་མོ། གར་མ་ལྗང་ཁུའོ། །དེ་ནས་ཕྱིའི་ལྷ་ [93a.4]མོ་བཞི་ནི་བདུག་པ་མ་སྐུ་མདོག་དཀར་མོ། མེ་ཏོག་མ་སེར་མོ། མར་མེ་མ་དམར་སྐྱ། བྱུག་པ་མ་ལྗང་གུ །སྒོ་བཞིར་སྒོ་བ་རྣམས་དགོད་པར་བྱའོ། །དེ་ནས་དཀྱིལ་འཁོར་ཕྱི་མ་ལ་བྱམས་པ་ལ་སོགས་པ་བྱང་ཆུབ་སེམས་དཔའ་བཅུ་དྲུག་ཁྱམས་སུ་དགོད་པར་བྱ་སྟེ། དེའང་ཤར་ཕྱོགས་པ་ [93a.5]རྣམས་ནི་སྐུ་མདོག་དཀར་མོ་རྡོ་རྗེ་རྩེ་ལྔ་པ་བསྣམས་པ། ལྷོ་ཕྱོགས་པ་རྣམས་ནི་སྐུ་མདོག་སེར་པོ་རཏྣ་བསྣམས་པའོ། །ནུབ་ཕྱོགས་པ་རྣམས་ནི་སྐུ་མདོག་དམར་པོ་པདྨ་བསྣམས་པའོ། །བྱང་ཕྱོགས་པ་རྣམས་ནི་སྐུ་མདོག་ལྗང་གུ་སྣ་ཚོགས་རྡོ་རྗེ་རྒྱ་གྲམ་བསྣམས་པའོ། །དེ་ནས་སྒོ་ [93a.6]བཞིར་སྒོ་མ་ལྕགས་ཀྱུ་མ་དཀར་མོ། ཞགས་པ་མ་སེར་མོ། ལྕགས་སྒྲོག་མ་དམར་སྐྱ། དྲིལ་བུ་མ་ལྗང་གུའོ། །དེའི་ཕྱི་རོལ་གྱི་ཁྱམས་ལ་རིམ་པ་དང་པོ་ལ་དེ་བཞིན་གཤེགས་པའི་རིགས་སྐུ་མདོག་དཀར་པོ་འཁོར་ལོ་དང་རལ་གྲི་བསྣམས་པའོ། །རིམ་པ་གཉིས་པ་ལ་རྡོ་རྗེའི་རིགས་སྔོན་པོ་ [93a.7]རྡོ་རྗེ་དང་རལ་གྲི་བསྣམས་པའོ། །རིམ་པ་གསུམ་པ་ལ་པདྨའི་རིགས་དམར་པོ་པདྨ་དང་རལ་གྲི་བསྣམས་པའོ། །རིམ་པ་བཞི་པ་ལ་རིན་པོ་ཆེའི་རིགས་སེར་པོ་རིན་པོ་ཆེ་དང་རལ་གྲི་བསྣམས་པའོ། །རིམ་པ་ལྔ་པ་ལ་ལས་ཀྱི་རིགས་ལྗང་གུ་སྣ་ཚོགས་རྡོ་རྗེ་དང་རལ་གྲི་བསྣམས་པ། ཐམས་ཅད་ [93b] [93b.1]གདན་པདྨ་དང་ཟླ་བ་ལ་བཞུགས་པའོ། །རིགས་སོ་སོར་ཕྱེ་བའི་ལྷ་རྣམས་ལྔ་རུ་ཕྱེ་ལ་དགོད་པར་བྱའོ། །འཁོར་ལོ་རིམ་གསུམ་ལྡན་པ་ལ། །སྣམ་བུ་མུ་ཁྱུད་རྣམས་ཀྱིས་བརྒྱན། །དཀྱིལ་འཁོར་གྱི་ནི་ཕྱི་རིམ་དུ། །ཇི་སྐད་གསུངས་པའི་རྒྱན་རྣམས་བྲི། །དེ་ནི་དཀྱིལ་འཁོར་བྲི་བའི་རིམ་ [93b.2]པའོ། །དེ་ནས་ཕྱི་དྲོའི་དུས་སུ་ཡོ་བྱད་དང་དཀྱིལ་འཁོར་གྱི་རྒྱན་རྣམས་དགྲམ་པར་བྱ་སྟེ། མཆོད་པའི་ཡོ་བྱད་ཐམས་ཅད་དང་། དེ་བཞིན་དུ་ཕུར་པ་དང་མདའ་དང་། རལ་གྲི་དང་། ཚོན་སྐུད་ཀྱི་དྲ་བ་དང་། མེ་ལོང་ལ་སོགས་པས་དཀྱིལ་འཁོར་བརྒྱན་ལ། ཕྱོགས་དང་མཚམས་རྣམས་སུ་བརྒྱད་གཞག་ [93b.3]པར་བྱའོ། །དྲི་ཞིམ་པའི་ཆུས་ཁྲུས་བྱས་ལ་གོས་གཙང་མ་བགོས་ལ་རྡོ་རྗེ་དང་དྲིལ་བུ་རབ་ཏུ་བསྐུལ་ཞིང་རྗེ་བཙུན་གྱི་ཡི་གེ་བརྒྱ་པ་བཟླས་ཤིང་དཀྱིལ་འཁོར་དེ་དབང་ལྡན་གྱི་མཚམས་ནས་བརྩམས་ནས་ལན་བདུན་དུ་བསྐོར་བ་བྱས་པས་ལྷག་པ་དང་མ་ཚང་བ་སྐོང་བར་འགྱུར་རོ། །དེ་ནས་བུམ་པ་རྣམས་གནས་གནས་ [93b.4]སུ་བཞག་སྟེ། །རྣམ་པར་རྒྱལ་བའི་བུམ་པ་ནི་དབུས་སུ་གཞག་གོ། །ལས་ཐམས་ཅད་པའི་བུམ་པ་ནི་བསང་གཏོར་བྱ་བའི་ཕྱིར་དཀྱིལ་འཁོར་གྱི་གཡས་ཕྱོགས་སུ་གཞག་གོ། །གཞན་མ་རྣམས་ནི་མེའི་མཚམས་སུ་གཞག་གོ ། སློབ་དཔོན་སྟན་ནང་ཚངས་ཅན་ལ་འདུག་ལ་དཀྱིལ་འཁོར་བསྒྲུབ་པར་བྱ་སྟེ། [93b.5]འཁོར་ལོ་དང་པོའི་ཏིང་ངེ་འཛིན་གྱི་བར་དུ་བསྒོམས་ལ་བཟླས་པའི་རྣལ་འབྱོར་རྫོགས་པ་དང་རས་ཟུང་དུ་སྦྱར་ལ་ལྷ་རྣམས་ལ་ཨོཾ་ཨཱཿཧཱུཾཿབཛྲ་ཝ་སྟྲ་ཧཱུཾ་ཞེས་བྱ་བས་དབུལ་ལོ། །དེ་ནས་སྒྲུབ་པའི་གྲོགས་མཆོག་དཀྱིལ་འཁོར་དུ་བཞག་ལ་བདག་ཉིད་ཕྱིར་བྱུང་ལ་གཏོར་མ་འཇིག་རྟེན་པའི་འབྱུང་པོ་ལ་གཏང་ངོ་། ། [93b.6]དེ་ནས་དཀྱིལ་འཁོར་གྱི་ཤར་ཕྱོགས་སུ་སྦྱིན་སྲེག་གིས་དཀྱིལ་འཁོར་གྱི་ལྷ་རྣམས་མཉེས་པར་བྱས་ལ། དེ་ནས་བདག་ཉིད་འཇུག་པའི་ཆོ་ག་དང་། སློབ་མ་འཇུག་པའི་ཆོ་ག་ཡང་ཚུལ་བཞིན་དུ་བྱའོ། །དེ་ནི་དཀྱིལ་འཁོར་བསྒྲུབ་པའི་རིམ་པའོ། ། [93b.7]དེ་ནས་དཀྱིལ་འཁོར་གྱི་ལྷ་ལ་ཕྱག་བྱས་ལ་གནང་བ་ནོད་པར་བྱ་སྟེ། །བདག་མིང་འདི་ཞེས་བགྱི་བས་ནི། །རྡོ་རྗེ་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་འཇུག་པར་གསོལ། །དེ་ནས་སློབ་མ་ཡོལ་བའི་ཕྱི་རོལ་དུ་བཞག་ལ་བུམ་པའི་ཆུས་བསང་གཏོར་བྱས་ལ་ཨོཾ་ཡ་མཱནྟ་ཀ་ཧཱུཾ་ཕཊ། ཅེས་ [94a] [94a.1]བྱ་བའི་སྔགས་བཟླས་པས། གདོང་གཡོགས་བཅིངས་ལ་མེ་ཏོག་གི་ཕྲེང་བ་བཟུང་སྟེ། དཀྱིལ་འཁོར་དུ་གཞུག་པའི་ཕྱིར། བུ་ཁྱོད་དངོས་གྲུབ་ཅི་ལ་དགའ། །ཞེས་དྲིའོ། །དེ་ནས་བུས་ཀྱང་། སྐལ་བཟང་བདེ་མཆོག་བདག་དགའོ། །ཞེས་བརྗོད་དོ། །དེ་ནས་སློབ་མ་ཐམས་ [94a.2]ཅད་ཀྱིས། །དགའ་ཆེན་ཁྱོད་བདག་སྟོན་པ་པོ། །སློབ་དཔོན་ཉིད་ནི་བདག་ལ་དགོངས། །བྱང་ཆུབ་སེམས་དཔའི་ལམ་བསྟན་པ། །སྐྱོབ་པ་ཆེན་པོ་བདག་འཚལ་ལོ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་ཡོངས་ལ་སྐྱབས་འགྲོ་བས། །ཐར་པ་ཆེན་པོའི་གྲོང་ [94a.3]མཆོག་ཏུ། །མགོན་པོ་བདག་ནི་འཇུག་པར་མཛོད། །ཅེས་བརྗོད་དེ། །དེ་ནས་སློབ་དཔོན་གྱིས། བུ་ཁྱོད་ཚུར་ཤོག་ཐེག་ཆེན་གྱི། །ལམ་ཆེན་སྣོད་ནི་ཁྱོད་ཡིན་ཏེ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། ། [94a.4]དེ་དག་ཀུན་གྱིས་གསང་སྔགས་ཀྱི། །ཆོ་ག་ཟབ་མོ་འདི་མཁྱེན་པ། །འཇིག་རྟེན་སྤྱོད་པ་རྗེས་འཇུག་ཕྱིར། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །དེ་ནས་རྒྱུན་བཤགས་བྱ་སྟེ། །དཀོན་མཆོག་གསུམ་ལ་ཕྱག་འཚལ་ [94a.5]ལོ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། བྱང་ཆུབ་མཆོག་གི་སེམས་ནི་བདག་གིས་བསྐྱེད། །སེམས་ཅན་རྣམས་ནི་བདག་གིས་མགྲོན་དུ་གཉེར། །འགྲོ་ལ་ [94a.6]ཕན་ཕྱིར་སངས་རྒྱས་འགྲུབ་པར་ཤོག །ཅེས་བརྗོད་དུ་གཞུག་གོ། །དེ་ནས་འདི་སྐད་ཅེས་བརྗོད་པར་བྱ་སྟེ། གཙོ་བོ་བདག་ལ་སྡོམ་པ་སྩོལ། །ཐུབ་པའི་ཉི་མ་མ་ལུས་པ། །མི་ལྡོག་པ་ཡི་དབང་བསྐུར་བ། །སློབ་དཔོན་ཆེན་པོ་བདག་ལ་སྩོལ། །དེ་ནས་སློབ་དཔོན་གྱིས་རིགས་ [94a.7]ཐམས་ཅད་ལ་གསོལ་བ་གདབ་པར་བྱ་སྟེ། ཆེ་གེ་མོ་ཞེས་བྱ་བ་འདི། བྱང་ཆུབ་སེམས་ནི་ཡོངས་འཛིན་པ། །དམ་ཚིག་སྡོམ་པ་གསང་བ་ཡི། །དཀྱིལ་འཁོར་འདིར་ནི་འཇུག་པར་འཚལ། །ཡང་སློབ་དཔོན་གྱིས་འདི་སྐད་ཅེས་བརྗོད་པར་བྱ་སྟེ། གསང་བ་ཆེན་པོའི་རིགས་དག་ལ། ། [94b] [94b.1]གསང་བ་ཡོངས་སུ་འཛིན་པར་ནི། །བདག་ཉིད་ཆེན་པོ་ཁྱོད་འདོད་དམ། །དེས་ཀྱང་འཚལ་ཞེས་བརྗོད་པར་བྱ། །ཡང་སློབ་དཔོན་གྱིས་འདི་སྐད་ཅེས་བརྗོད་པར་བྱ་སྟེ། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་གསོལ། །འདི་ནི་སངས་རྒྱས་རིགས་དག་པའི། ། [94b.2]དམ་ཚིག་བསྟན་པར་གྱུར་པའོ། །རྡོ་རྗེ་དྲིལ་བུའི་ཕྱག་རྒྱ་ཡང་། །བློ་ཆེན་ཁྱོད་ཀྱིས་གཟུང་བར་གྱིས། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བརྗོད་དོ། །སློབ་དཔོན་དག་ཀྱང་གཟུང་བར་གྱིས། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །དམ་ཚིག་ [94b.3]སྡོམ་པ་ཡིན་པར་གསུངས། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་དུ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་ [94b.4]པ་ཡིན་པར་གསུངས། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །དེ་ལས་གཞན་པ་བཅུ་བཞི་ནི། །ཕས་ཕམ་པར་ནི་རབ་ཏུ་བཤད། །སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བ་ཞེས་བཤད་ [94b.5]དོ། །ཉིན་དང་མཚན་མོ་ལན་གསུམ་དུ། །ཉིན་རེ་བཞིན་དུ་བཟླས་པར་བྱ། །གང་ཚེ་ཉམས་འགྱུར་རྣལ་འབྱོར་པ། །ཁ་ན་མ་ཐོ་སྦོམ་པོར་འགྱུར། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་ལོག་པར་མི་སྤྱོད་དོ། །བརྫུན་ནི་སྨྲ་བར་ [94b.6]མི་བྱའོ། །ཕུང་ཁྲོལ་ཀུན་གྱི་རྩ་བ་ནི། །ཆང་ནི་རྣམ་པར་སྤང་བར་བྱ། །སེམས་ཅན་འདུལ་ཕྱིར་མ་གཏོགས་པ། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྟེན་བྱ་ཞིང་། །རྣལ་འབྱོར་པ་རྣམས་བསྙེན་བཀུར་བྱ། །ལུས་ཀྱི་ལས་ནི་རྣམ་པ་གསུམ། །ངག་གི་རྣམ་པ་བཞི་རྣམས་དང་། ། [94b.7]ཡིད་ཀྱི་རྣམ་པ་གསུམ་དག་ནི། །ཅི་ནུས་པར་ནི་རྗེས་སུ་སྲུངས། །ཐེག་པ་དམན་ལ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ཀྱང་ཡོང་མི་སྤང་། །རྟག་ཏུ་མྱ་ངན་འདའ་མི་བྱ། །ལྷ་དང་ལྷ་མིན་གསང་བ་པ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་རྒྱ་ [95a] [95a.1]བཞོན་པ་མཚོན་ཆ་དང་། །མཚན་མ་འགོམ་པར་མི་བྱའོ། །འདི་དག་དམ་ཚིག་ཡིན་པར་བཤད། །ཁྱོད་ཀྱིས་རྟག་ཏུ་བསྲུང་བར་བྱ། །དེས་ཀྱང་འདི་སྐད་བརྗོད་པར་བྱ་སྟེ། །སློབ་དཔོན་འདིར་ནི་བདག་ལ་སྩོལ། །གཙོ་བོས་ཇི་སྐད་བཀའ་སྩལ་པ། །དེ་ལྟར་ [95a.2]བདག་གིས་འཚལ་བར་བགྱི། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །ཞེས་པ་ནས། །སེམས་ཅན་མྱ་ངན་འདས་ལ་དགོད། །ཅེས་པའི་བར་དུ་བརྗོད་དོ། །གང་ཞིག་སྡོམ་པ་འཛིན་པར་མི་བྱེད་པ་དེ་ལ་ནི་སློབ་དཔོན་དུ་རྗེས་སུ་གནང་བ་དང་། དབང་ [95a.3]བསྐུར་བར་མི་བྱའི་འཇུག་པ་ཙམ་ཅིག་བྱེད་དུ་གཞུག་གོ། །དེ་ནས་བོ་དྷི་ཙིཏྟ་ཨུཏྤཱ་ད་ཡཱ་མི་ཞེས་བྱ་བས་བྱང་ཆུབ་ཏུ་སེམས་བསྐྱེད་དེ། །དེ་ནས་མེ་ཏོག་དང་བཅས་པའི་རྡོ་རྗེ་སྙིང་གར་བཞག་ལ། ཨོཾ་སུ་ར་ཏ་ས་མ་ཡ་སྟྭཾ་ཧོ་བཛྲ་སི་དྡྷི་ས་མ་ཡ་སུ་ཁཾ། དུས་འདི་ཉིད་དུ་ཁྱོད་ཉིད་ནི། ། [95a.4]སངས་རྒྱས་རིགས་སུ་ཆུད་པས་ན། །ཚུལ་འདི་གཞན་ལ་མ་བརྗོད་ཅིག །གལ་ཏེ་སྨྲས་པར་གྱུར་ན་ནི། །འཇམ་པའི་རྡོ་རྗེ་རབ་ཁྲོས་ནས། །འགའ་ལ་སྨྲས་ན་གླད་པ་འགེམས། །དེ་ནས་ཙནྡན་དང་གུར་ཀུམ་ལ་སོགས་པའི་ཆུ་ཁྱོར་བར་བླུགས་ཏེ། འདི་ནི་ཁྱོད་ཀྱིས་ [95a.5]དམྱལ་བའི་ཆུ། །དམ་ཚིག་འདས་ན་འཚིག་པར་བྱེད། །གལ་ཏེ་གསང་སྔགས་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་བཛྲ་ཨུ་ད་ཀ་ཋ་ཋ། དེ་ནས་འདི་སྐད་སྨྲས་ཏེ། །དེང་ནས་བརྩམས་ཏེ་བུ་ཁྱོད་ཀྱི། །འཇམ་པའི་རྡོ་རྗེ་ང་ཡིན་གྱིས། །ང་ཡིས་ཇི་ལྟར་ [95a.6]བཀའ་སྩལ་པ། ཁྱོད་ཀྱིས་སྐྱོ་བ་མེད་པར་གྱིས། །གང་ཡང་ང་ལ་མོས་མེད་པ། །དེ་བཞིན་མོས་པར་མ་བྱས་ན། །བདུད་ཀྱིས་བཅོམ་ནས་དམྱལ་བར་འགྲོ། །དེ་བས་དམ་ཚིག་ལ་གནས་ཀྱིས། །འདི་ནི་དམ་ཚིག་ཆུ་བོའི་ཆོ་གའོ། །དེ་ནས་སློབ་མ་ཡོལ་བའི་ནང་དུ་བཀུག་ [95a.7]ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་འཇམ་པའི་རྡོ་རྗེ་བདག་ལ་དབབ་ཏུ་གསོལ་ཞེས་གསོལ་བ་བཏབ་ལ་སློབ་མའི་སྙིང་གར་ཨཿབསམས་ལ་འདི་སྐད་ཅེས་བརྗོད་དེ། སངས་རྒྱས་ཐམས་ཅད་ཀྱིས་བྱིན་གྱིས་རློབས་ལ། ཡེ་ཤེས་འབབ་པར་གྱུར་ཅིག་ཅེས་བརྗོད་དོ། །དེ་ནས་རྐང་པའི་ [95b] [95b.1]མཐིལ་དུ་ཡཾ་ལས་རླུང་གི་དཀྱིལ་འཁོར་བ་དན་གྱིས་མཚན་པ་སྤྱི་བོར་ཨོཾ་ལས་འོད་ཟེར་སྤྲོས་པས་རྐང་པ་གཡོན་པ་གཡས་པས་མནན་ལ། ཀུན་ཏུ་དྲིལ་བུའི་སྒྲ་ཡང་དག་པར་དཀྲོལ་ཞིང་དབབ། བཛྲ་ཨཱ་བེེ་ཤ་ཨ་ཨཱཿ ཞེས་ལན་བརྒྱ་རྩ་བརྒྱད་ལ་སོགས་པ་བརྗོད་ལ་དབབ་པོ། །ཡེ་ཤེས་ [95b.2]བབས་པ་དང་འཕར་ན་ཏིཥྛ་བཛྲ་ཞེས་བརྟན་པར་བྱའོ། །སྐུ་གསུང་ཐུགས་ཀྱི་རྟགས་གསུམ་འབྱུང་སྟེ། སྐུ་བབས་ན་གར་དང་གར་གྱི་ལན་བྱའོ་གསུང་བབས་ན་སྔགས་སྨྲའོ། །ཐུགས་བབས་ན་དེ་ཁོ་ན་ཉིད་ཀྱི་དོན་ཤེས་པར་བྱའོ། །འདི་ནི་ཡེ་ཤེས་དབབ་པའི་ཆོ་གའོ། །དེས་ཕེབས་པར་མ་གྱུར་ན་རྡོ་རྗེ་ [95b.3]བསྡམས་པ་ལས་རྡོ་རྗེ་སེམས་མའི་ཕྱག་རྒྱ་དྲལ་བར་བྱ་ཞིང་། བཛྲ་སཏྭ་ཨ་ཨ་ཨ་ཞེས་བརྗོད་པས་བདག་སུམ་བརྩེགས་པའི་ཐུགས་ཀའི་ཡིག་འབྲུ་ལས་འོད་ཟེར་དཔག་ཏུ་མེད་པ་འཕྲོས་པ་བྱུང་སྟེ་སྡིག་སྒྲིབ་བྱ་སྒྲོ་ལ་མེ་ཕོག་པ་ལྟར་ཆོམས་ཆོམས་བསྲེགས་ཏེ་དག་པར་བསམ་ཞིང་སྒྲ་དྲག་པོ་བརྒྱ་རྩ་ [95b.4]བརྒྱད་བཟླས་སོ། །དེས་ཀྱང་མ་ཕེབས་ན་སྡིག་པ་སྦྱོང་བའི་སྦྱིན་སྲེག་བྱ། དེས་མི་ཕེབས་པ་མི་སྲིད་དོ། །འདི་ལྟར་བདག་གིས་སློབ་མ་འདི། །དཀྱིལ་འཁོར་དུ་ནི་ལེགས་བཅུག་ནས། །ལྷ་ཡི་རིགས་ཀྱི་རིམ་པ་དང་། །འདི་ཡི་བསོད་ནམས་ཅི་འདྲ་བ། །དཀྱིལ་འཁོར་འདིར་ནི་དེ་བཞིན་ [95b.5]གྱུར། །ཞེས་བརྗོད་ལ་མིག་གི་སྣང་བ་དྲི་བར་བྱའོ། །དཀར་པོ་ལ་སོགས་པ་ཞི་བའི་དངོས་གྲུབ་རྣམས་སུ་ཤེས་པར་བྱའོ། །འདིར་ནི་དངོས་གྲུབ་གང་འགྲུབ་པ། །རིགས་ནི་གང་གི་སྣོད་དུ་གྱུར། །བསོད་ནམས་མཐུ་ནི་གང་ཡོད་པ། །དེ་བཞིན་དུ་ནི་འབབ་པར་འགྱུར། །པྲཏཱིཙྪ་བཛྲ་ཧོཿ [95b.6]ཞེས་བྱ་བ་འདིས་མེ་ཏོག་གི་ཕྲེང་བ་དཀྱིལ་འཁོར་དུ་དོར་བར་བྱའོ། །དབུ་ལ་བབས་ན་ནི་མཆོག་གི་དངོས་གྲུབ་ཐོབ་པོ། །ཞབས་ལ་བབས་ན་སྔགས་གྲུབ། སྟོད་དང་སྨད་དང་བར་དང་གསུམ་དུ་བབས་ན། དངོས་གྲུབ་རབ་འབྲིང་ཐ་མ་གསུམ་དུ་ཤེས་པར་བྱའོ། །གལ་ཏེ་རི་མོའི་ནང་དུ་མ་ལྷུང་ན་ནི་བསྐྱར་རོ། །ལན་ [95b.7]གསུམ་བསྐྱར་ནས་ཕྱི་རོལ་དུ་སོང་ན་དངོས་གྲུབ་མེད་པར་ཤེས་པར་བྱའོ། །དེ་ནས་ཕྲེང་བ་བླང་ལ་འདི་སྐད་བརྗོད་དེ། ཨོཾ་པྲ་ཏི་གྲྀཧྞ་ཏྭཾ་ཨི་མཾ་སཏྭ་མ་ཧཱ་བ་ལ་ཞེས་བརྗོད་པས་མགོ་ལ་བཅིང་ངོ་། །དེ་ནི་ཕྲེང་བ་དོར་བའི་ཆོ་གའོ། །དེ་ནས་གདོང་གཡོགས་དགྲོལ་ཏེ། རྡོ་རྗེ་ཆགས་པ་དེང་ཁྱོད་ཀྱི། །མིག་ [96a] [96a.1]དབྱེ་བ་ལ་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་ཏེ། །རྡོ་རྗེའི་མིག་ནི་བླ་ན་མེད། །ཧེ་བཛྲ་པ་ཤྱ་ཞེས་པས་སོ། །གདོང་གཡོགས་བཀྲོལ་ལ་དཀྱིལ་འཁོར་བསྟན་ཏེ། ཐར་པ་ཆེན་པོའི་གྲོང་ཁྱེར་མཆོག། །ལྟོས་ཤིག་ལྟོས་ཤིག་སེམས་དཔའ་ [96a.2]ཆེ། །མེ་ཏོག་གང་ལ་ལྷུང་གྱུར་བ། །དེ་ནི་ཁྱོད་ཀྱི་འཇམ་དབྱངས་ཡིན། །ཞེས་བརྗོད་ལ། དེ་དཀྱིལ་འཁོར་བལྟ་རུ་བཅུག་ལ་སྒོ་སྲུངས་ནས་བརྩམས་ནས་གཙོ་བོའི་བར་དུ་མིང་བརྗོད་ལ་བསྟན་པར་བྱ་སྟེ་དཀྱིལ་འཁོར་དུ་གཞུག་པའི་ཆོ་གའོ།། །།དེ་ནས་དངོས་གྲུབ་ཐོབ་པར་བྱ་བའི་ཕྱིར་རྡོ་རྗེ་ [96a.3]སློབ་དཔོན་ལ་རྗེས་སུ་མཐུན་པའི་ཡོན་ཕུལ་ལ། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩོལ་བ་བཞིན། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའ་རྡོ་རྗེ་དེང་བདག་སྩོལ། །ཞེས་བརྗོད་ལ་ཕྱག་བྱའོ། །སློབ་དཔོན་གྱིས་ཀྱང་དེ་ལ་དབང་བསྐུར་བར་བྱ་བའི་ཕྱིར་སྒྲུབ་ [96a.4]པ་པོ་དང་རྡོ་རྗེ་སློབ་དཔོན་དུ་དབང་བསྐུར་བ་སྦྱིན་པ་ནི་དང་པོ་སྒྲུབ་པ་པོའི་དབང་བསྐུར་ཏེ། ཤར་ངོས་སུ་ཟླ་བའི་དཀྱིལ་འཁོར་གྱི་སྟེང་དུ་སློབ་མ་ཡི་དམ་གྱི་ལྷར་བསྐྱེད་ལ། ཡི་གེ་གསུམ་གྱིས་བྱིན་གྱིས་བརླབས་ལ། སྟེང་དུ་ཡི་གེ་བྲིས་ལ་ལས་ཐམས་ཅད་པའི་བུམ་པས་དབང་བསྐུར་ལ་མཆོད་ [96a.5]པ་ལྔས་དེ་ལ། མཆོད་ལ་གདུགས་དང་རྒྱལ་མཚན་དང་བ་དན་ལ་སོགས་པ་དང་དུང་དང་རོལ་མོ་ལ་སོགས་པའི་སྒྲ་རྣམས་ཀྱིས་མཆོད་པར་བྱའོ། །དེ་ནས་བཀྲ་ཤིས་ཀྱི་ཚིགས་སུ་བཅད་པ་ལ་སོགས་པས་མངོན་པར་དགའ་བར་བྱ་ཞིང་། དང་པོར་རེ་ཞིག་ཆུའི་དབང་བསྐུར་ཏེ། བུམ་པའི་ [96a.6]དབང་བསྐུར་བ་ནི་དཀྱིལ་འཁོར་གྱི་སྟེང་དུ་བུམ་པའི་ཆུ་རྣམས་རྣམ་རྒྱལ་གྱི་བུམ་པར་ཉུང་ཟད་རེ་བླུགས་ལ། དེ་ནས་སློབ་མའི་དབང་བསྐུར་སྦྱིན་ཏེ། ཨོཾ་མཉྫུ་ཤྲཱི་ཨ་པྷི་ཥིཉྩ་ཧཱུཾ། ཞེས་པས་དབང་བསྐུར་ཏེ་རིགས་ཀྱི་བདག་པོས་དབུ་བརྒྱན་པར་བྱའོ། །དེ་ནས་ཅོད་པན་གྱི་དབང་བསྐུར་བར་བྱ་སྟེ། [96a.7]དེ་ནས་དབུ་རྒྱན་སྟོང་པ་ཉིད་སྔོན་དུ་འགྲོ་བས་བྷཱུཾ་ཨོཾ་ཧྲཱིཿཨཱཿཧཱུཾ་ལས་རིགས་ལྔར་བསྐྱེད་ལ་ཡེ་ཤེས་སེམས་དཔའ་དགུག་གཞུག་བྱས་ལ་སློབ་མའི་མགོ་ལ་བསྐོན་ལ། ཨོཾ་རཏྣ་མུ་ཀུ་ཊ་ཨ་བྷི་ཤིཉྩ་ཞེས་པས་དབུ་རྒྱན་དང་། དར་དཔྱངས་དང་བཅས་པས་དབང་བསྐུར་རོ། །དེ་ནས་རྡོ་རྗེ་སྟོང་པ་ཉིད་ [96b] [96b.1]ལས་འོད་དཔག་ཏུ་མེད་པར་བསྐྱེད་ལ་ཡེ་ཤེས་སེམས་དཔའ་བཅུག་ལ་དེ་རྡོ་རྗེར་གྱུར་པར་བསམས་ལ། རྡོ་རྗེ་རྩེ་ལྔ་པ་ཁུ་ཚུར་གཡས་བས་སྙིང་གར་བཟུང་ལ། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་དྷི་ [96b.2]བ་དྷི་སྟྭཾ་ཨ་བྷི་ཥཉྩཱ་མི་ཏིཥྠ་བཛྲ་ས་མ་ཡ་ཧཱུཾ་ཞེས་བྱ་བས་ལག་པ་གཡས་པར་སྦྱིན་ནོ། །སྣང་བ་མཐའ་ཡས་ཀྱི་རང་བཞིན་རྡོ་རྗེའི་དབང་ངོ་། །དེ་ནས་དྲིལ་བུ་དོན་ཡོད་གྲུབ་པར་བསྐྱེད་ལ་ཡེ་ཤེས་སེམས་དཔའ་བཅུག་ལ་དྲིལ་བུར་གྱུར་པར་བསམས་ལ། ལག་པ་གཡོན་པར་བྱིན་ལ། ཨོཾ་ཨ་ཀཱ་རོ་མུ་ཁཾ་སརྦ་ [96b.3]དྡྷ་རྨྨཱ་ཎཱ་ཨཱ་དྱ་ནུཏ་བནྣ་ཏྭཱཏ་ཅེས་པས་སྦྱིན་ནོ། །དྲིལ་བུའི་རང་བཞིན་བདག་པོའི་དབང་ངོ་། །དེ་ནས་རྡོ་རྗེ་དྲིལ་བུ་སློབ་མའི་སྤྱི་བོར་བཞག་ལ་མིང་གི་དབང་རྣམ་པར་སྣང་མཛད་ཆོས་ཀྱི་དབྱིངས་ཀྱི་རང་བཞིན་དུ་སྦྱིན་ནོ། །ཨོཾ་བཛྲ་སཏྭ་སྟྭཾ་ཨ་བྷི་ཤིཉྩཱ་མི་བཛྲ་ནཱ་མ་ཨ་བྷི་ཥེ་ག་ཏ། ཀྱེ་དཔལ་རྡོ་རྗེ་ཆེ་གེ་མོ་ཞེས་སྔར་ལྷ་ [96b.4]གང་ལ་བབས་པའི་ཞབས་ཀྱིས་མཚོན་པའི་མིང་སྦྱིན་ནོ། །འདི་ནི་རྟག་པའི་རང་བཞིན་མིང་གི་དབང་ངོ་། །དེ་ནས་དེ་ལ་པཱུ་ཛ་ལྔས་མཆོད་ལ་དགའ་བ་མཉེས་པར་བྱའོ། །དེ་ནས་དེའི་རྗེས་ལ་སློབ་མས་བླ་མ་ལ་ཡོན་དབུལ་བ་ལ་སོགས་པར་བྱའོ། །དབང་བསྐུར་བ་ལྔ་པོ་དེ་དག་གིས་རྒྱུད་ [96b.5]ལ་སོགས་པ་ཉན་པ་དང་། བཤད་པ་དང་སྒྲུབ་པ་པོའི་སྣོད་དུ་འགྱུར་ཏེ། གོ་རིམས་བཞིན་དུ་མེ་ལོང་ལྟ་བུ་དང་མཉམ་པ་ཉིད་དང་སོ་སོར་རྟོག་པ་དང་། བྱ་བ་གྲུབ་པ་དང་ཆོས་ཀྱི་དབྱིངས་ཀྱི་ཡེ་ཤེས་རྣམས་སོ། །དབང་ལྔ་པོ་འདི་དག་ནི་རིགས་ལྔའི་དབང་ངོ་། །ཡང་ན་དབང་འདི་ཡང་མ་ [96b.6]རིག་པ་ལས་བཟློག་པས་ན་རིག་པའི་དབང་ངོ་། །འདི་ནི་རིག་པའི་དབང་བསྐུར་པའི་ཆོ་གའོ།། །།དེ་ནས་སློབ་དཔོན་དུ་འོས་པའི་སློབ་མས་ཡོན་ཕུལ་ལ་གསོལ་བ་གདབ་པོ། །བདག་དང་གཞན་དོན་བྱེད་པས་ན། །མི་ལྡོག་པ་ཡི་དབང་བསྐུར་བ། །ཐུགས་རྗེའི་བདག་པོ་བདག་ལ་ [96b.7]སྩོལ། །ཞེས་གསོལ་བ་གདབ་པར་བྱའོ། །དེ་ནས་སློབ་མ་རྣམ་པར་སྣང་མཛད་དུ་བསྐྱེད་ལ་ཤར་ངོས་སུ་དབང་སྟེགས་གྲུ་བཞི་པ་སྒོ་ནུབ་ཏུ་བསྟན་བའི་དབུས་སུ་ཚོན་སྣ་ལྔས་པདྨ་འདབ་བརྒྱད་བྲིས་ལ། དེའི་སྟེང་དུ་སེང་གེའི་ཁྲི་ལ་བཞག་ལ། དེའི་སྟེང་དུ་ [97a] [97a.1]བླ་རེ་བྲེས། གཡས་ཕྱོགས་སུ་གདུགས་དཀར་པོ་གསེར་གྱི་ཡུ་བ་ཅན་ཡོངས་སུ་བཟུང་ལ། གཡོན་ཕྱོགས་སུ་རྒྱལ་མཚན་དང་བ་དང་བསྒྲེང་ལ་རྔ་བོ་ཆེ་དང་། ཟངས་ཀྱི་དུང་དང་འབུད་དུང་ལ་སོགས་པའི་སྒྲས་ནམ་མཁའ་གང་བར་བྱས་ལ། རྡོ་རྗེ་དང་དྲིལ་བུ་དཀྲོལ་ [97a.2]ཞིང་། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པ་འདབ་འདྲའི་ཞལ་མངའ་བ། །བཀྲ་ཤིས་དེ་ཡིས་ཁྱོད་ལ་དེང་འདིར་ཞི་བྱེད་ཤོག །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་ [97a.3]རྟེན་གསུམ་དུ་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །དེ་ནི་འཇིག་རྟེན་དགེ་བའི་བཀྲ་ཤིས་གཉིས་པའོ། །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག། །མི་དང་ལྷ་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་དམ་ [97a.4]པ་ངོ་ཚ་ཤེས་དང་དཔལ་གྱི་གཞི། །དེ་ནི་འཇིག་རྟེན་དགེ་བའི་བཀྲ་ཤིས་གསུམ་པའོ། །ཞེས་བྱ་བ་ལ་སོགས་པའི་བཀྲ་ཤིས་ཀྱི་ཀླུ་བླངས་ལ་ནམ་མཁའ་གང་བའི་དེ་བཞིན་གཤེགས་པ་རྣམས་ཀྱིས་དབང་བསྐུར་བར་བསམས་྅ལ། རྣམ་པར་རྒྱལ་བའི་བུམ་པ་ནས་བཟུང་ལ་སྒོ་བའི་ [97a.5]བར་དུ་བསྐུར་ལ། དེ་ནས་འཇམ་དཔལ་གྱི་སྐུ་གཟུགས་སློབ་མའི་སྤྱི་བོར་བཞག་ལ། ཨོཾ་མཉྫུ་ཤྲཱི་མ་ཧཱ་སུ་ཁ་བཛྲ་སཏྭ། ཛཿཧཱུཾ་བཾ་ཧོཿསུ་ར་ཏེ་ས་མ་ཡ་སྟྭཾ། དེ་རིང་རྡོ་རྗེ་སློབ་དཔོན་གྱུར། །སློབ་མའི་ཚོགས་རྣམས་བསྡུ་བར་གྱིས། །ཞེས་བྱ་བ། སློབ་མ་ལ་ [97a.6]གནང་བ་སྦྱིན་ནོ། །དེ་ནས་དམ་ཚིག་གསུམ་གྱི་དབང་སྦྱིན་པར་བྱ་སྟེ། ཧཱུཾ་ལས་རྡོ་རྗེ་བསྒོམས་ལ། འདི་ནི་སངས་རྒྱས་ཐམས་ཅད་ཀྱིས། །འཇམ་པའི་རྡོ་རྗེ་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་ཟུངས། །འཇམ་པའི་རྡོ་རྗེའི་བརྟུལ་ཤུགས་བརྟན། །ཨོཾ་སརྦ་ཏ་ཐཱ་ག་ཏ་སི་དྡྷི་ [97a.7]བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷ་ར་ཡ་མི་ཧི་ཧི་ཧི་ཧི་ཧཱུཾ་ཞེས་བྱ་བ་འདིས་སློབ་མ་ལ་གཏད་ལ། དེ་ཁོ་ན་ཉིད་འདི་བརྗོད་དོ། །ཐོག་མ་མེད་པའི་སེམས་དཔའ་ལ། །འཇམ་པའི་རྡོ་རྗེ་དགའ་བ་ཆེ། །ཀུན་ཏུ་བཟང་པོ་ཐམས་ཅད་བདག །རྡོ་རྗེ་སྙིང་པོའི་བདག་པོའི་གཙོ། །བཅོམ་ལྡན་འདས་དཔལ་ [97b] [97b.1]མཆོག་དང་པོའི་སྐྱེས་བུའོ། །ཨོཾ་མ་ཧཱ་བཛྲ་ཧཱུཾ། དེ་ནས་ཨ་ལས་དྲིའ་བུ་བསྐྱེད་ལ། འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བརྗོད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་བྱ་བ་འདིས་སློབ་མའི་ལག་པ་གཡོན་དུ་དྲིལ་བུ་ [97b.2]བྱིན་ལ། སྲིད་པའི་རང་བཞིན་དག་པའི་ཕྱིར། །རང་བཞིན་གྱིས་ནི་དངོས་བྲལ་བྱས། །རང་བཞིན་དག་པའི་སེམས་ལྡན་པ། །སྲིད་པ་དག་པའི་མཆོག་ཏུ་བྱེད། །ཅེས་བྱ་བ་འདིས་ཆོས་ཀྱི་དྲིལ་བུ་དཀྲོལ་བར་བྱ་སྟེ། ཨོཾ་བཛྲ་གྷཎྚ་ཨཱཿཞེས་བཟླས་སོ། །དེ་ནས་སློབ་མའི་ལག་པ་གཉིས་ཀྱིས་རྡོ་ [97b.3]རྗེ་དང་དྲིལ་བུ་སྙིང་གར་བསྣོལ་ལ། །ལྷའི་སྐུ་ཕྱག་རྒྱ་ཆེན་པོར་བསྒོམས་ལ། །སྲིད་པའི་བདེ་བ་ཤིན་ཏུ་ཆུང་། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དེ་བས་དམ་ཚིག་བསྲུང་བར་གྱིས། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པ་ནི་བསྟེན་བཞིན་དུ། ། [97b.4]རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་གྱིས། །འདི་ནི་སྐུ་ཡི་དམ་ཚིག་གོ། །དེ་ནས་སློབ་མ་ལ་མཆོད་པ་ལྔས་མཆོད་ལ། དེའི་འོག་ཏུ་གསེར་གྱི་ཐུར་མ་བླངས་ལ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་ [97b.5]མི་ཤེས་པའི། །ལིང་ཏོག་རྒྱལ་བ་རྣམས་ཀྱིས་བསལ། །ཨོཾ་བཛྲ་ནེེ་ཏྲ་ཨ་པ་ཧ་ར་པ་ཊ་ལཾ་ཧྲི་ཞེས་བྱ་བས་མིག་ལ་བྱུགས་ཏེ་དག་པར་བྱའོ། །དེ་ནས་མེ་ལོང་བླངས་ལ་ཆོས་ཀྱི་སྙིང་པོ་དེ་ཁོ་ན་ཉིད་བསྟན་ཏེ། ཆོས་རྣམས་གཟུགས་བརྙན་ལྟ་བུ་སྟེ། གསལ་ཞིང་དག་ལ་རྙོག་པ་མེད། །གཟུང་དུ་ [97b.6]མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །རང་བཞིན་མེད་ཅིང་བདག་མེད་པ། །དེ་ལྟར་ཆོས་རྣམས་ཤེས་བྱས་ནས། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །དེ་ནས་ཨཱཿལས་བསྐྱེད་པའི་དྲིལ་བུ་བྱིན་ཏེ། ཆོས་རྣམས་ནམ་མཁའི་མཚན་ཉིད་དེ། ། [97b.7]ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་ནི་མཉམ་སྦྱོར་པས། །ཀུན་མཆོག་མཉམ་པ་ཉིད་དུ་གསལ། །ཞེས་བྱ་བས་དཀྲོལ་བར་བྱའོ། །དེ་ནས་མདའ་གཞུའི་དབང་བསྐུར་སྦྱིན་པར་བྱ་སྟེ། ཧོ་ཞེས་བྱ་བས་མདའ་གཞུ་བྱིན་ལ། དེ་བཞིན་གཤེགས་པ་ཐམས་ཅད་ཀྱི་རྗེས་སུ་ [98a] [98a.1]བྱོས་ཞེས་བྱ་སྟེ། ལོགས་བཞི་སྟེང་འོག་ཏུ་མདའ་རེ་འཕེན་དུ་གཞུག་གོ། །ཡང་མེ་ལོང་གི་དབང་སྦྱིན་པར་བྱ་སྟེ། ཨོཾ་མཉྫུ་ཤྲཱི་ཞེས་བྱ་བས་མེ་ལོང་བསྟན་ལ། འཇམ་པའི་རྡོ་རྗེ་མེ་ལོང་ལྟར། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་དག་རང་བཞིན་ [98a.2]གྱིས། །བུ་ཁྱོད་ཀྱི་ནི་སྙིང་ལ་ཞུགས། །འཇམ་པའི་རྡོ་རྗེ་རང་ཉིད་གཙོ། །འདི་ཉིད་ཡིན་པར་ཤེས་པར་གྱིས། །ཨོཾ་མཉྫུ་ཤཱི་ཨཱཿ།། །།དེ་ནས་རྗེས་གནང་སྦྱིན་པར་བྱ་སྟེ། ཨོཾ་བཛྲ་ཧི་ཏུ་ཞེས་བྱ་བས་འཁོར་ལོ་རྐང་བའི་བར་དུ་བཞག་ལ། ཨོཾ་བཛྲ་བྷཱ་ཥ་རཾ་ཞེས་བྱ་བས་ལག་ [98a.3]པ་གཡས་སུ་དུང་བྱིན་ལ། ལག་པ་གཡོན་པར་ཨཱཿཞེས་བྱ་བས་མཚན་ཡང་དག་པར་བརྗོད་པའི་པོ་ཏི་བྱིན་ལ། དྲིལ་བུ་ཡང་བྱིན་ལ་དཀྲོལ་ཞིང་། དེ་རིང་ཕན་ཆད་འཇིག་རྟེན་ལ། །སྐྱོབ་པ་རྣམས་ཀྱིས་འཁོར་ལོ་བསྐོར། །ཆོས་ཀྱི་དུང་ནི་བླ་མེད་པས། །ཀུན་དུ་མ་ལུས་གང་བར་གྱིས། །སོམ་ [98a.4]ཉི་ཡིད་གཉིས་མི་བྱ་ཞིང་། །དོགས་པ་མེད་པའི་སེམས་ཀྱིས་ནི། །གསང་སྔགས་སྤྱོད་པའི་ཚུལ་གྱི་མཆོག །འཇིག་རྟེན་རྣམས་ལ་རབ་ཏུ་སྒྲོལ། །དེ་ལྟར་བྱས་ན་སངས་རྒྱས་ལ། །ཕན་འདོགས་དྲིན་དུ་གཟོ་བར་འགྱུར། །རྡོ་རྗེ་འཛིན་པ་དེ་ཀུན་ཡང་། །ཁྱོད་ལ་རྟག་ཏུ་སྲུང་བར་ [98a.5]བྱེད། །དེ་ནས་གནང་བ་སྦྱིན་པར་བྱ་སྟེ། །སོ་སོའི་འཁོར་ལོས་སྒྱུར་བའི་རྣལ་འབྱོར་བྱས་ལ། ལོ་ཀ་ཀུན་ལ་ཁྱད་པར་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པ། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བྱ་བ་དང་། ཆོས་ཀྱི་གནས་སུ་ [98a.6]རྡོ་རྗེ་དང་། །རིན་ཆེན་དང་ནི་པདྨ་དང་། །ལས་ཀྱི་འཁོར་ལོ་རབ་ཏུ་བསྐོར། །ཞེས་བྱ་བས་རྗེས་སུ་གནང་བ་སྦྱིན་ནོ། །དེ་ནས་ལུང་བསྟན་ཏེ། སློབ་དཔོན་བདག་ཉིད་ལངས་ལ། སྐྱོབ་པ་ཤཱཀྱ་སེང་གེའི་ཏིང་ངེ་འཛིན་དང་ལྡན་པར་བྱས་ལ། གཡོན་པ་ཁུ་ཚུར་སྙིང་གར་ཆོས་ [98a.7]གོས་འཛིན་པའི་ཚུལ་དུ་བྱས་ལ། གཡས་པ་མི་འཇིགས་པ་སྦྱིན་པའི་ཕྱག་རྒྱ་བཅས་ལ། ཨོཾ་ང་ཡིས་ཁྱོད་ལ་ལུང་བསྟན་ཡིན། །འཇམ་པའི་རྡོ་རྗེ་དེ་བཞིན་གཤེགས། །སྲིད་པ་ཀུན་ཏུ་དག་པས་ན། །སྲིད་དང་ངན་འགྲོ་རྣམས་ལས་བཏོན། །ཀྱེ་རྡོ་རྗེ་ཆེ་གེ་མོ་ཞེས་བྱ་བ་ཡི། །དེ་བཞིན་ [98b] [98b.1]གཤེགས་པ་བྷུར་བྷུ་བ་སྭཿཞེས་གཟེངས་བསྟོད་དོ། །དེ་ནས་གསང་བ་བསྒྲགས་ཏེ། །འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ནི་སྡིག་མེད་དེ། །དེ་བས་འདོད་ལ་ཆགས་བྲལ་བར། །ཁྱོད་ཀྱིས་ནམ་ཡང་མི་བྱའོ། །མ་ཧཱ་ས་མ་ཡ་ཧ་ན་ཧཱུཾ་ཕཊ །དབུགས་དབྱུང་བའོ། །དེ་ནས་ [98b.2]ལྷའི་སྔགས་སྦྱིན་པར་བྱ་སྟེ། སྔགས་ཀྱི་རྗེས་གནང་ངོ་། །དེ་ནས་གདམས་པ་བསྟན་པར་བྱ་སྟེ། ཁྱོད་ཀྱིས་མཁས་པའི་གང་ཟག་ལ། །སྔགས་དང་ཕྱག་རྒྱ་མ་སྟོན་ཅིག །དེ་ཡིས་སྤྱོད་ན་སོམ་ཉི་ཟ། །གཉིས་ཀ་ངན་སོང་ཉིད་དུ་ལྷུང་། །དེ་ནས་སློབ་མའི་སྤྱི་བོར་གདུགས་བཟུང་ལ་བསྐོར་ [98b.3]བ་བྱས་ལ་ཐལ་མོ་སྦྱར་ཏེ། གདུགས་དང་བཅས་པ་དཀྱིལ་འཁོར་གྱི་དྲུང་གི་ས་ལ་ལུས་བཏུད་ལ། སྔགས་རྣམས་འཛིན་པར་གྱུར་པ་ཡི། །སློབ་མ་འདི་ནི་ཕུལ་བ་ལགས། །དེ་ནས་གདུགས་བཞག་ལ་སློབ་མའི་སྙིང་ལ་འབབ་པའི་ཚིག་དག་བརྗོད་དེ། དེ་རིང་དཀྱིལ་འཁོར་སློབ་དཔོན་གྱུར། །སྔགས་ [98b.4]དང་རྒྱུད་ཀྱང་འཛིན་པར་གྱུར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀུན་གྱིས་བཀུར་བར་འགྱུར། །སེམས་ཅན་ཀུན་ལ་ཐུགས་བརྩེ་བས། །དཀྱིལ་འཁོར་ཆོ་ག་བཞིན་དུ་བྲིས། །སྒྲུབ་པ་པོ་ཡང་རྒྱུད་ལ་སྦྱོར། །ཁྱོད་ཀྱིས་ཆོས་ལ་སེར་སྣ་དང་། །སེམས་ཅན་རྣམས་ལ་མི་ [98b.5]ཕན་པ། །བུ་ཁྱོད་ཀྱིས་ནི་མི་བྱའོ། །དེ་ནས་སླར་ཡང་བསྟན་བྱ་སྟེ། །མཆོག་ཏུ་གསང་བའི་དཀྱིལ་འཁོར་འདིར། །བཙུད་པ་དང་ནི་མཐོང་བ་ཡིས། །དེ་རིང་སྡིག་པ་རྣམ་གྲོལ་ནས། །དེ་རིང་ཁྱེད་རྣམས་བདེ་བར་གནས། །བདེ་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཡོང་མེད་ཅིང་། ། [98b.6]མི་ཐུབ་ཚུགས་པ་ཡོང་མེད་པས། །ཅིས་ཀྱང་མི་འཇིགས་དགའ་བར་གྱིས། །སྲིད་པ་ཤིན་ཏུ་དག་པ་ན། །སྲིད་པའི་སྡུག་བསྔལ་ལས་འདས་སོ། །བྱང་ཆུབ་སེམས་ནི་སྤང་མི་བྱ། །དམ་པའི་ཆོས་ནི་སྨད་མི་བྱ། །ནམ་ཡང་བོར་བར་ཡང་མི་རུང་། །མི་ཤེས་པ་དང་རྨོངས་པ་ལ། །དེ་ཉིད་ [98b.7]བསྟན་པར་མི་བྱའོ། །རྡོ་རྗེ་དྲིལ་བུ་མི་སྤང་ཞིང་། །སློབ་དཔོན་ནམ་ཡང་སྨད་མི་བྱ། །སངས་རྒྱས་ཀུན་དང་མཚུངས་པ་ཡིན། །རང་དགའ་ཡོངས་སུ་བོར་ནས་ནི། །དཀའ་ཐུབ་ཀྱིས་ནི་གདུང་མི་བྱ། །ཇི་ལྟར་བདེ་བར་བཟུང་ནས་ནི། །སངས་རྒྱས་དངོས་གྲུབ་ཐོབ་པར་འགྱུར། །ཞེས་བྱ་བས་ [99a] [99a.1]དབུགས་དབྱུང་བའོ། །སློབ་མས་ཀྱང་ཕྱག་བྱས་ཏེ། གཙོ་བོས་ཇི་ལྟར་བཀའ་སྩལ་བ། །དེ་དག་ཐམས་ཅད་བདག་གིས་བགྱི། །ཞེས་ཁས་བླང་ངོ་། །འདི་ནི་སློབ་དཔོན་དུ་དབང་བསྐུར་བའི་ཆོ་གའོ།། །།དེ་ནས་གསང་བའི་དབང་བསྐུར་སྦྱིན་པར་བྱ་སྟེ། སློབ་ [99a.2]མ་ཡེ་ཤེས་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། ཕྱག་གཡས་ན་རལ་གྲི་གཡོན་པ་ན་པོ་ཏི་བསྣམས་པ་བསྐྱེད་ལ། གསེར་རམ་དངུལ་ལམ་ཉ་ཕྱིས་ཀྱི་སྣོད་དུ་ཨ་ཀ་རུ་ནག་པོ་དང་། གླུ་རྩི་དང་། མུ་ཏིག་དཀར་པོ་དང་། ཙནྡན་སྨུག་པོ་དང་། མཚལ་ཆེན་དང་། [99a.3]དེ་རྣམས་ཀྱི་སྟེང་དུ་སྟོང་པ་ཆེན་པོའི་ཡི་གེ་ལྔ་དགོད་པར་བྱ་སྟེ། ཨཱཿཧཱུཾ་ཨོཾ་ཧྲཱིཿཨཿདེ་ལས་འོད་ཟེར་འཕྲོས་པས་ནམ་མཁའི་ཁམས་ནས་ཡེ་ཤེས་ཀྱི་བདུད་རྩི་དྲངས་ནས་གཉིས་སུ་མེད་པར་བསྟིམས་ལ་ཨོཾ་ཨཱཿཧཱུཾ། ཞེས་བྱ་བས་བྱིན་གྱིས་བརླབས་ལ། སྦྲང་རྩིའམ། ཀ་རའམ་བུ་རམ་ལ་རིལ་བུ་ [99a.4]བྱས་ལ། སློབ་མའི་ལྕེ་ཐོག་ཏུ་ཚིགས་སུ་བཅད་པ་འདིས་སྦྱིན་པར་བྱའོ། །ཇི་ལྟར་འཇམ་དབྱངས་རྒྱལ་པོ་ཡིས། །བྱང་ཆུབ་སྲས་ལ་དབང་བསྐུར་བཞིན། །ཁྱོད་ལ་གསང་བའི་དབང་བསྐུར་བས། །བདུད་རྩི་ལྔ་ནི་མཉམ་པའི་སེམས། །ཉོན་མོངས་ལྔ་ནི་དག་པར་བྱེད། །ཡེ་ཤེས་ལྔ་ཡིས་ [99a.5]དབང་བསྐུར་རོ། །ཨོཾ་སརྦ་དྷརྨྨ་ཨ་བྷཱ་བ་སྭཱ་བྷཱ་བ་བི་ཤུདྡྷ། བཛྲ་བཛྲ་ཨ་ཨཱ་ཨཾ་ཨཿའདི་ནི་གསང་བའི་དབང་བསྐུར་བའི་ཆོ་གའོ། །ད་ནི་ངེས་པའི་དབང་བསྐུར་བར་བྱ་སྟེ། འདི་ཁྱོད་གཟུགས་བཟང་སྟོན་པ་ཡིས། །དམ་པའི་བདེ་བ་མྱོང་བར་འགྱུར། །རིག་པའི་རྣལ་འབྱོར་སྡོམ་པ་ཡིས། ། [99a.6]སངས་རྒྱས་དངོས་གྲུབ་ཐོབ་པར་འགྱུར། །རྨོངས་པ་གང་ཞིག་འདི་སྤོང་བ། །དེ་ལ་མཆོག་གི་དངོས་གྲུབ་མེད། །ཅེས་བྱ་བ་སྦྱིན་པར་བྱའོ། །དགེ་སློང་དང་མ་ནིང་དང་། རྒན་པོ་ལ་ནི་ལུས་ཀྱི་གནས་བཞི་རུ་འཁོར་ལོ་བཞི་བསྒོམས་ལ། རྐང་བའི་གནས་སུ་ཡཾ་ལས་རླུང་གི་དཀྱིལ་འཁོར་ [99a.7]གཞུའི་དབྱིབས་ལྟ་བུ་བ་དན་གྱིས་མཚན་པ། སུམ་མདོའི་གནས་སུ་རཾ་ལས་མེའི་དཀྱིལ་འཁོར་གྲུ་གསུམ་འོད་ཟེར་དང་བཅས་པས་མཚན་པའོ། །རླུང་གི་བ་དན་གྱིས་མེ་སྦར་མེ་ལྕེ་གྱེན་དུ་འབར་བའི་འོད་ཀྱིས་རྩ་དབུ་མ་ན་ཡར་ཡེ་ཤེས་ཀྱི་མེ་འབར་བས་སྤྱི་བོ་བདེ་བ་ཆེན་པོ་ལ་རེག་པས། ཐིག་ལེ་བཅུ་དྲུག་ [99b] [99b.1]མགྲིན་པའི་འཁོར་ལོ་རུ་བབས། མགྲིན་པ་ནས་སྙིང་གར་འདབ་བརྒྱད་དུ་བབས། སྙིང་ག་ནས་ལྟོ་བར་ཐིག་ལེ་བཞི་རུ་བབས་ནས། ལུས་མཐའ་དག་ཐིག་ལེ་བྱང་ཆུབ་སེམས་ཀྱིས་གང་ནས་སློབ་མའི་ལུས་ལ་བདེ་གསལ་གྱི་རྣམ་པར་ཤེས་པ་སྤྲོས་བ་དང་བྲལ་བ་བདེ་བ་ཐམས་ཅད་ཀྱིས་ལུས་གང་བར་བསམ་མོ། ། [99b.2]དེ་ནས་ཚིགས་སུ་བཅད་པ་འདི་བརྗོད་པར་བྱའོ། །ས་མཆོག་བཅུ་གཉིས་འཐོབ་པར་འགྱུར། །ཐབས་གཞན་གྱིས་ནི་སངས་མི་རྒྱ། །འཁོར་ལོ་བཞི་པོ་མཉམ་པའི་རོས། །སྲིད་པའི་རོ་ནི་དག་པར་བྱེད། །དེ་བས་ཁྱོད་ཀྱིས་འདི་དང་ནི། །ནམ་ཡང་བྲལ་བར་མི་བྱའོ། །ཨོཾ་བཛྲ་སྠི་ཏོ་ཧྲ་དི་ཛྙཱ་ན་མཱུ་རྟི་ར་ [99b.3]ཧཾ་བུདྡྷོ་བུ་དྡྷཱ་ནཱཾ་ཏྲྱ་དྷྭ་བརྟཱི་ནཱཾ་ཨོཾ་ཨཱཿཧཱུཾ། འདི་ནི་ངེས་པའི་དབང་བསྐུར་བའི་ཆོ་གའོ། །དེ་ལྟར་དབང་རྣམ་པ་གསུམ་རིམ་གྱིས་བསྐུར་བས། །སློབ་དཔོན་གྱི་དབང་གིས་ནི་རྡོས་པ་དང་བཅས་པའི་ལུས་ཤེལ་སྒོང་ལྟར་དག་པར་འགྱུར་རོ། །གསང་བའི་དབང་གིས་ནི་དྲི་མ་དང་བཅས་པའི་ངག་ཚངས་པའི་དབྱངས་ [99b.4]ལྟ་བུར་འགྱུར་རོ། །ངེས་པའི་དབང་གིས་ནི་རྟོག་པ་དང་བཅས་པའི་སེམས་མར་མེ་ལྟ་བུར་འགྱུར་རོ། །དེ་ནས་སློབ་མ་རྣམས་ཀྱིས་སློབ་དཔོན་ལ་མཆོད་པས་མཆོད་ཅིང་ཡོན་དབུལ་བར་བྱའོ། །དངོས་གྲུབ་དམ་པ་མནོས་པ་ཡི། །བླ་མ་གང་བཞེད་དབུལ་བར་བྱ། །དེས་ནི་བསོད་ནམས་ [99b.5]ཚོགས་སུ་འགྱུར། །དེ་ལས་དངོས་གྲུབ་ཆེན་པོ་འབྱུང་། །དེ་ནས་བཟའ་བ་དང་། བཏུང་བ་དང་། བདག་དང་གཞན་གྱི་བདེ་བ་ལ་ལོངས་སྤྱོད་དོ། །དེའི་རྗེས་ལ་ལྷ་རྣམས་ལ་མཆོད་པ་དང་། བསྟོད་པ་དང་བཟོད་པར་གསོལ་བ་དང་། འདོད་པའི་དོན་ལ་གསོལ་པ་གདབ་པ་དང་། དཀྱིལ་ [99b.6]འཁོར་བསྡུས་ལ་རིམ་པའི་ཏིང་ངེ་འཛིན་ལ་འཇུག་པ་དང་། སྨོན་ལམ་གདབ་པ་དང་། ཡི་གེ་བརྒྱ་པས་དག་པར་བྱ་བ་དང་། དགེ་བའི་རྩ་བ་བསྔོ་བར་བྱའོ། །དེ་ནས་ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱཾ་བཛྲ་དྷ་རཱ་ཛྙཱ་ཧཱུཾ་ཧཱུཾ་ཧཱུཾ་ཧཱུཾ་ཕཊ། ཅེས་པས་ཕུར་བུ་བཏོན་ལ་འོ་མས་བཀྲུའོ། །ཨ་ཀཱ་རོ་ [99b.7]མུ་ཁཾ་སརྦ་དྷརྨྨ་ནཱཾ་ཨ་དྱཱ་ནུཏཔནྣ་ཏྭཱ་ཏ་ཅེས་པས་ཚོན་རྩི་བསྡུས་ལ། གར་དང་སིལ་སྙན་ལྡན་བྱས་ལ། །ཆུ་ཀླུང་ཆེན་པོར་བསྐྱལ་བར་བྱ། །སྡིག་པས་མི་གོས་ཡ་ག་མེད། །དེའི་རྗེས་ལ་དཀྱིལ་འཁོར་ལ་བའི་རྣམ་ལྔས་བྱུག་གོ། །ཡོ་བྱད་རྫས་རྣམས་ཐམས་ཅད་ནི། །སློབ་ [100a] [100a.1]དཔོན་ཉིད་ཀྱིས་སྤྱད་པར་བྱ། །བདག་རང་ཡོད་པར་མི་འདོད་ན། །དཀོན་མཆོག་གསུམ་ལ་དབུལ་བར་བྱ། །སེམས་ཅན་ཀུན་ལ་ཕན་པའི་ཕྱིར། །བྱམས་པ་ཆེན་པོ་བསྒོམ་པར་བྱ། །འདི་ནི་དབང་བསྐུར་བའི་ཆོ་གའོ། །སྐུ་གསུང་ཐུགས་ཀྱི་རྟེན་གསུམ་ནི། ། [100a.2]ཟིན་མ་ཐག་ཏུ་རབ་གནས་བྱ། །ཞེས་གསུངས་པས་ན་རབ་ཏུ་གནས་པའི་ཆོ་ག་མྱུར་དུ་བྱས་ན་བཀྲ་ཤིས་པས་རབ་ཏུ་གནས་པའི་ཆོ་ག་བྱའོ། །དེ་ལ་སྐུ་རབ་ཏུ་གནས་པ་དང་། གསུང་རབ་ཏུ་གནས་པ་དང་། ཐུགས་རབ་ཏུ་གནས་པ་དང་། གསུམ་མོ། །དེ་ལ་སྐུ་རབ་ཏུ་གནས་པར་ [100a.3]བྱ་བ་ནི་མཆོད་རྟེན་དང་གཙུག་ལག་ཁང་དང་། རས་རིས་དང་། ལུགས་མ་དང་། འབུར་དུ་བཏོད་པ་ལ་སོགས་ཏེ། སྐུའི་རིགས་སུ་གཏོགས་པ་རྣམས་སོ། །གསུང་རབ་ཏུ་གནས་པ་ནི་གླེགས་བམ་དང་། དྲིལ་བུ་དང་རྔ་དང་དུང་དང་ཆ་ལང་དང་། ཕྲེང་བ་དང་ཌ་མ་རུ་ལ་སོགས་པ་ [100a.4]མཆོད་པའི་སྒྲའི་བྱེ་བྲག་གཎྜི་ལ་སོགས་པ་རྣམས་སོ། །ཐུགས་རབ་ཏུ་གནས་པ་ནི་རྡོ་རྗེ་དང་། ཕུར་པ་དང་། རིན་པོ་ཆེ་དང་། རལ་གྲི་དང་བེ་ཅོན་ལ་སོགས་པའོ། །དེ་ལ་རབ་གནས་བྱེད་པའི་སློབ་དཔོན་གྱིས་གཟའ་སྐར་བཟང་པོ་ལ་གནས་ཡིད་དུ་འོང་བར་བླ་རེ་བྲེས་ལ་སྤོས་ཆུས་ [100a.5]ཆག་ཆག་བཏབ་པ་དང་། མེ་ཏོག་གི་སིལ་མ་བཀྲམ་པ་དང་། བསྙེན་པ་རྫོགས་པར་བྱས་ལ་སའི་ཆོ་ག་དང་། ཐིག་གདབ་ཅིང་གསོལ་བ་གདབ་པ་ལ་སོགས་པ་བྱས་ལ། ཚོན་གྱི་ལས་ལ་སོགས་པས་དཀྱིལ་འཁོར་རྫོགས་པར་བྲིས་ལ། རང་ལྷའི་ང་རྒྱལ་དང་ལྡན་པས། །སྐུ་ [100a.6]གཟུགས་བལྟ་བར་བྱ་སྟེ། དཀྱིལ་འཁོར་གྱི་ཤར་ཕྱོགས་སུ་བའི་རྣམ་ལྔས་མཎྜལ་བྱས་ཏེ། མཎྜལ་དེའི་སྟེང་དུ་རས་དཀར་པོ་བཏིང་ལ། དེའི་སྟེང་དུ་རབ་གནས་བྱེད་པའི་རྟེན་ལུགས་སྐུ་དང་པོ་ཏི་ལ་སོགས་པའི་རབ་གནས་བྱ་བར་འོས་པ་རྣམས་བཞུགས་སུ་གསོལ་ལོ། ། [100a.7]སྐུ་གཟུགས་ལ་དང་པོ་ན་བཟའ་སེར་པོ་གསོལ་ལ་ཡུངས་ཀར་ཁུ་ཚུར་གཡས་གཡོན་གཉིས་ཀྱིས་ལན་གསུམ་བསྐོར་ཏེ། ཁམ་ཕོར་གྱི་མེ་བླུགས་ཤིང་སྔགས་འདིས་བསྲེག་པར་བྱའོ། །ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། དེ་ལྟར་མེའི་ཤིས་པ་ལན་གསུམ་གྱི་བར་དུ་བྱའོ། །དེ་ནས་ཏིལ་ [100b] [100b.1]མར་དཱུར་བའི་པིར་གྱིས་སྐུ་ལ་བྱུག་པར་བྱའོ། །རི་མོ་ལ་སོགས་པ་ནི་མེ་ལོང་གི་གཟུགས་བརྙན་ལ་བྱུག་གོ། །ཏིལ་མར་བསྐུ་བའི་སྔགས་ནི་ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནི་སྭཱ་ཧཱ། དེ་ནས་བུམ་པ་ཆུ་དང་རིན་པོ་ཆེ་ལྔ་དང་འབྲུ་ལྔ་དང་། སྨན་ལྔ་དང་ལྡན་ཞིང་དྲི་ཞིམ་པོའི་ཆུས་ཡོངས་སུ་གང་བའོ། ། [100b.2]མགུལ་པ་རས་བཟང་པོས་དཀྲིས་ལ། ཁ་རྒྱན་བཟང་པོ་དང་ལྡན་པར་བྱས་ལ་དབང་བསྐུར་ཞིང་བཀྲུ་བར་བྱའོ། །ཨོཾ་བི་ཤུདྡྷ་བཛྲོད་ཀ་ཧཱུཾ། ཞེས་བྱ་བའི་ཞབས་ལ་རང་རང་གི་སྙིང་པོ་གང་ཡིན་པའི་སྔགས་བཟླས་པར་བྱའོ། །ཚིགས་བཅད་འདི་དག་བརྗོད་པར་བྱའོ། །ཇི་ལྟར་བལྟམས་པ་ཙམ་གྱིས་ [100b.3]ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཤེ་ཀ་ཏ་ས་མ་ཡ་ཤྲི་ཡེ་ཧཱུཾ། ལུགས་མ་ཁྲུས་ནི་བྱ་བར་གསུངས། །རི་མོ་མེ་ལོང་དག་ལ་བཀྲུ། །རས་དཀར་དག་གིས་སྐུ་ཕྱིས་ལ། །མཎྜལ་ [100b.4]སྟེང་དུ་གཞག་པར་བྱ། །གསང་སྔགས་འདི་ཡིས་དབང་བསྐུར་བྱ། ཨོཾཿཧཱུཾ་ཏྲཱཾ་ཧྲཱིཿ་ཨཱཿ། དེ་ནས་ཡེ་ཤེས་སེམས་དཔའ་དགུག་གཞུག་བྱས་ལ། གཉིས་སུ་མེད་པར་བསྟིམ་མོ། །དེ་ནས་རྣམ་པ་ཐམས་ཅད་མཁྱེན་པའི་མཆོག་དང་ལྡན་པའི་སྐུར་བསམས་ལ། དབུ་ལ་ཡི་གེ་ཨོཾ། །ཞལ་ལ་ཧྲཱིཿ། ཐུགས་ [100b.5]ཀར་ཧཱུཾ་དགོད། །ཡང་ན་ལྷ་གང་དང་གང་ཡིན་པ་དེའི་ས་བོན་ཐུགས་ཀར་དགོད་པར་བྱའོ། །དེའི་རྗེས་ལ་མཆོད་པ་རྣམ་པ་ལྔ་དང་བསྟོད་པ་བྱའོ། །དེ་ནས་ལག་པ་གཡས་པར་སྤོས་སྣོད་ཐོགས་ལ་གཡོན་པར་དྲིལ་བུ་དཀྲོལ་ཞིང་པུས་མོ་ས་ལ་བཙུགས་ཏེ། འདི་སྐད་གསོལ་བ་གདབ་པར་བྱའོ། །བཅོམ་ལྡན་ [100b.6]རྡོ་རྗེ་ཆེ་གེ་མོ། །རིག་པའི་རྒྱལ་པོ་ཕྱག་འཚལ་བསྟོད། །མགོན་པོ་ཐུགས་རྗེའི་བདག་ཉིད་ཀྱི། །རབ་གནས་བདག་གིས་བགྱི་བར་འཚལ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གུས་པ་ལ། །བཀའ་དྲིན་དག་ནི་མཛད་པར་འོས། །འགྲོ་བའི་སྡུག་ [100b.7]བསྔལ་ཞི་མཛད་པའི། །སངས་རྒྱས་བདག་ལ་དགོངས་སུ་གསོལ། །བྱང་ཆུབ་སེམས་དཔའི་ཚོགས་བཅས་དང་། །གསང་སྔགས་ལྷ་རྣམས་ཐམས་ཅད་དང་། །འཇིག་རྟེན་སྐྱོང་བའི་ལྷ་རྣམས་དང་། །སངས་རྒྱས་བསྟན་པ་བསྲུང་མཛད་དང་། །རིག་འཛིན་རྡོ་རྗེ་མིང་ཅན་རྣམས། །ཆེ་གེ་མོ་དག་རྡོ་ [101a] [101a.1]རྗེ་ཅན། །རིག་པའི་རྒྱལ་པོ་འདི་ལ་ནི། །ཇི་ལྟར་གུས་པའི་མཆོད་པ་དང་། །འགྲོ་བའི་དོན་ཕྱིར་རབ་གནས་བགྱིད། །སློབ་མས་མཆོད་དང་བདག་ལ་ནི། །ཁྱེད་ཀྱི་ཐུགས་རྗེས་ངེས་བཟུང་སྟེ། །རབ་གནས་འདི་ལ་བྱིན་རླབས་མཛོད། །ཅེས་བྱ་བ་འདིས་ལྷ་ལ་སྙན་གསན་དབབ་པོ། །དེ་ [101a.2]སྐད་ཅེས་བརྗོད་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བྱོན་ནས་བྱིན་གྱིས་རློབ་པར་བསམ་མོ། །འདི་ནི་ལྷག་པར་གནས་པའི་ཆོ་གའོ། །ཡང་ན་བསྙེན་པ་རྫོགས་པ་དང་སའི་ཆོ་ག་ཟིན་པར་བྱས་ལ། དེ་ནས་ལྷག་པར་གནས་པའི་ཆོ་ག་བྱས་ཏེ། དེ་ནས་ཕྱི་དེའི་དུས་སུ་ [101a.3]ཐིག་གི་ཆོ་ག་ལ་སོགས་པ་དང་། དཀྱིལ་འཁོར་སྒྲུབ་པ་རྫོགས་ནས་རབ་གནས་བྱའོ། །ལྷག་པར་གནས་པའི་ཆོ་ག་རྫོགས་པའི་རྗེས་ལ། རབ་གནས་བྱེད་པའི་སློབ་དཔོན་དེ་བཟའ་བ་དང་བཏུང་བ་ལ་སོགས་པས་ཁམས་རྟས་པར་བྱས་ལ། དྲི་བཟང་པོའི་ཆུས་ཁྲུས་བྱས་ལ་དཀྱིལ་འཁོར་སྒྲུབ་ [101a.4]པའི་ཆོ་གས་ཡོངས་སུ་རྫོགས་པར་བྱའོ། །དེའི་རྗེས་ལ་དཀྱིལ་འཁོར་གྱི་ཕྱི་རོལ་དུ་གཏོར་མ་ཡང་བཏང་ལ་རབ་ཏུ་གནས་པའི་ཆོ་ག་བྱས་ཏེ། ལྷག་པར་གནས་པའི་རྟེན་སྐུ་གཟུགས་ལ་སོགས་པ་མཎྜལ་གྱི་སྟེང་ན་ལྷ་མོ་དེ་དཀྱིལ་འཁོར་གྱི་དབུས་སུ་བཞག་ལ་ལུགས་མ་ལ་སོགས་པ་ [101a.5]རྣམས་སྔོན་དུ་བདག་མེད་པར་བསྒོམས་ཏེ། སྐད་ཅིག་ཙམ་གྱིས་རང་རང་གི་ལྷ་བསྐྱེད་ལ། དེ་དང་འདྲ་བའི་ཡེ་ཤེས་སེམས་དཔའ་སྤྱན་དྲངས་ལ། མདུན་གྱི་ནམ་མཁར་བྱོན་པ་ལ་མཆོད་ཡོན་དང་། ཞལ་བསིལ་དང་འདོད་པའི་དོན་ལ་གསོལ་བ་གདབ་པ་དང་། མཉམ་མེད་མི་གཡོས་བསྟོད་ [101a.6]པ་བྱས་ལ། ཛཿཧཱུཾ་བཾ་ཧོཿ། ཞེས་པས་གཉིས་སུ་མེད་པར་བསྟིམས་ལ། ཕྱག་རྒྱ་བཞིས་རྒྱས་གདབ་པ་དང་། དབང་བསྐུར་ཞིང་རིགས་ཀྱི་བདག་པོས་དབུ་བརྒྱན་ལ། མཆོད་པ་རྣམས་ཀྱིས་ཡང་དག་པར་མཆོད་ལ་རབ་གནས་ཀྱི་ལྷ་དེའི་སྔགས་མང་དུ་བཟླས་སོ། །དེ་ནས་ཡི་གེ་ [101a.7]བརྒྱ་པས་བརྟན་པར་བྱས་ལ་གཞག་གོ། །གང་ལྷག་པར་བྱས་པ་རྣམས་དེ་ལྟར་བྱའོ། །དེ་ནས་གསེར་ལས་བྱས་པའི་ཐུར་མས་སྤྱན་དབྱེ་བར་བྱ་སྟེ། ཨོཾ་བཛྲ་ཙཀྵུ་ས་མནྟ་ཙཀྵུ་བི་ཤོ་དྷ་ནེ་སྭཱ་ཧཱ། དེ་ནས་སྦྱིན་སྲེག་གིས་མཉེས་ཤིང་བསོད་ནམས་སྤེལ་བར་བྱ་སྟེ། ལྷ་ཁང་དང་མཆོད་ [101b] [101b.1]རྟེན་ལ་སོགས་པ་ནི་ཡི་གེ་བྷྲཱུཾ་ལས་སྐད་ཅིག་མ་ཙམ་གྱིས་རྣམ་པར་སྣང་མཛད་དུ་བསྐྱེད་ལ་ཡེ་ཤེས་སེམས་དཔའ་གཞུག་པའི་ཆོ་ག་བྱས་ལ། དེ་ཡོངས་སུ་གྱུར་པ་ལས་མཆོད་རྟེན་གྱི་གཟུགས་སུ་བསྒོམས་ལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་གཞལ་ཡས་ཁང་དུ་བསམས་ལ། [101b.2]མགོན་པོ་སྲས་དང་བཅས་པ་དང་། །གསང་སྔགས་དང་རིག་པའི་ལྷ་ཐམས་ཅད་སྤྱན་དྲངས་ཏེ་བཅུག་ལ། མཆོད་པའི་ཡོ་བྱད་རྣམས་ཀྱིས་ཡང་དག་པར་མཆོད་ལ། ཨོཾ་སརྦ་ཏ་ཐཱ་ག་ཏ་ཨཱ་བེ་ཤ་ཡེ་སྭཱ་ཧཱ། ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཨོཾ་ཧཱུཾ་ཧྲཱིཿབྷྲཱུཾ་ཏྲཱཾ་ཧྲཱིཿ ཧེ་ཞེས་བྱ་བས་རབ་ཏུ་གནས་པར་བྱའོ། །དེ་ [101b.3]ནས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་བསམ་མོ། །གླེགས་བམ་ལ་སོགས་པ་གསུང་རབ་ཏུ་གནས་པ་ནི་པོ་ཏི་ལ་སོགས་པ་མི་དམིགས་པར་བསམས་ལ། ཡི་གེ་ཨཱཿལས་འོད་དཔག་ཏུ་མེད་པར་བསམས་ལ། ཡེ་ཤེས་སེམས་དཔའ་ [101b.4]གཞུག་པའི་ཆོ་ག་རྫོགས་པར་བྱས་ལ། དེ་ཡོངས་སུ་གྱུར་པ་ལས་གླེགས་བམ་གསུང་ཡིག་འབྲུར་བསྒོམ་མོ། །གསུང་གི་བྱེ་བྲག་གཞན་ནི་རང་རང་གི་ངོ་བོར་གྱུར་པར་བསམ་མོ། །དེ་ལ་མཆོད་པའི་ཡོ་བྱད་དེ་དག་གིས་ཡང་དག་པར་མཆོད་ལ། ཨོཾ་ཧཱུཾ་ཧྲཱིཿཞེས་བྱ་བས་རབ་ཏུ་གནས་པར་བྱའོ། །དེ་ [101b.5]ནས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་རྣམས་ཀྱིས་བྱིན་གྱིས་བརླབས་པར་བསམ་མོ། །རྡོ་རྗེ་ལ་སོགས་པའི་རབ་ཏུ་གནས་པ་ནི། རྡོ་རྗེ་ལ་སོགས་པ་མི་དམིགས་པར་བསྒོམས་ལ། ཡི་གེ་ཧཱུཾ་ལས་མི་བསྐྱོད་པར་བསམས་ལ་ཡེ་ཤེས་སེམས་དཔའ་དགུག་གཞུག་ལ་སོགས་པ་ [101b.6]བྱས་ལ། དེ་ཡོངས་སུ་གྱུར་པ་ལས་ཐུགས་ཕྱག་མཚན་དུ་བསྒོམས་ལ། དེ་ལས་མཆོད་པའི་ཡོ་བྱད་ཀྱིས་མཆོད་ལ། ཨོཾ་ཨཱཿཧཱུཾ་ཞེས་བྱ་བས་རབ་ཏུ་གནས་པར་བྱའོ། །དེ་ནས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་བསམ་མོ། །དེ་ལ་སིལ་ [101b.7]སྙན་དང་རོལ་མོ་ལ་སོགས་པས་མཆོད་དོ། །འབྱོར་པ་ཆུང་བ་རྣམས་ཀྱི་དོན་དུ་དཀྱིལ་འཁོར་དང་ལྷག་པར་གནས་པ་མེད་པར་ཉི་མ་གཅིག་ལ་རབ་གནས་རྫོགས་པར་བྱེད་པར་འདོད་ན་བདག་ཉིད་རང་གི་ལྷག་པའི་ལྷར་བསྒོམས་ལ། ཁྲུས་ལ་སོགས་པ་སྔར་བཞིན་དུ་ཀུན་རྫོགས་པར་བྱའོ། །མཆོད་པའི་ཡོ་ [102a] [102a.1]བྱད་རྣམས་བཤམས་ཏེ། བདག་མེད་པའི་བསམ་གཏན་སྔོན་དུ་འགྲོ་བས་ལུགས་མ་ལ་སོགས་པ་སྐད་ཅིག་ཙམ་གྱིས་ལྷར་བསྒོམས་ལ་ཡེ་ཤེས་སེམས་དཔའ་བསྟིམས་ལ། རྒྱས་གདབ་པ་དང་དབང་བསྐུར་བ་བྱས་ལ་མཆོད་པ་དང་བསྟོད་པ་བྱས་ཏེ། དེ་ཉིད་ཀྱི་སྔགས་ [102a.2]བརྒྱ་རྩ་བརྒྱད་བཟླས་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་བསམ་མོ། །དེ་ནས་ཡི་གེ་བརྒྱ་པས་བརྟན་པར་བྱས་ལ་དེ་བཞིན་གཤེགས་པ་ཐམས་ཅད་ལ་གསོལ་བ་གདབ་ཅིང་རྟེན་འབྲེལ་གྱི་སྙིང་པོས་བྱིན་གྱིས་བརླབ་པར་བྱའོ། །འདི་ནི་རབ་ཏུ་གནས་པའི་ཆོ་གའོ།། །། [102a.3]ཤི་བའི་དོན་དུ་གསུངས་པ་ཡི། །རོ་སྤྱོད་དཀྱིལ་འཁོར་ཆོ་ག་ནི། །ཤི་བའི་རོ་ལ་འབད་བྱས་ན། །རྣམ་པར་གྲོལ་བར་ཐེ་ཚོམ་མེད། །དེ་ལ་དང་པོ་རྣལ་འབྱོར་པས། །སྙིང་རྗེ་ཆེན་པོ་དང་ལྡན་པ། །རྟོག་པའི་དྲི་མས་མ་གོས་པ། །སེམས་དཔའ་དང་ནི་ལྡན་པ་ཡིས། །གོང་བཞིན་ཚེ་འཕོས་དོན་དུ་ནི། །རོ་ཡི་ [102a.4]སྦྱིན་སྲེག་དཀྱིལ་འཁོར་ནི། །བྱས་ན་བདེ་འགྲོར་ངེས་པར་སྐྱེ། །རྒྱུ་དེའི་རིམ་གྱིས་བླ་མེད་པའི། །རྫོགས་པའི་བྱང་ཆུབ་ཐོབ་པར་འགྱུར། །སྐྱེས་པའམ་བུད་མེད་ལ་སོགས་པ། །གང་ཡང་རུང་བ་ཤི་བའི་ལུས། །དཀྱིལ་འཁོར་བཅུག་སྟེ་དབང་བསྐུར་ན། །སེམས་ཅན་དམྱལ་བར་སྐྱེས་ན་ཡང་། །དེ་མ་ཐག་ཏུ་ཐར་ནས་ [102a.5]ནི། །ལྷ་ཡི་ནང་དུ་སྐྱེ་འགྱུར་ན། །སྡིག་པ་ཆུང་ངུ་བྱས་པ་རྣམས། །ལྟ་སྨོས་ཀྱང་ནི་ཅི་དགོས་པ། །དེ་ནས་སྔོན་དུ་བསྙེན་པ་བྱས་ནས། །དབེན་པའི་གནས་སུ་རོ་བཞག་ལ། རོ་དེ་ལ་སྲོག་གཅོད་པའི་རོ་ལངས་ཀྱི་བགེགས་ཞུགས་ནས་འོང་བས། དེ་བསྐྲད་པར་བྱ་བའི་ཕྱིར་བདག་ཉིད་ཁྲོ་བོ་གཤིན་ [102a.6]རྗེ་གཤེད་ཀྱི་ང་རྒྱལ་དང་ལྡན་པས། །མིག་གཉིས་སུ་མ་དང་ཊ་ལས་ཉི་མ་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་བསམས་ལ། སྟང་སྟབས་དང་བཅས་པས་བགེགས་བསྐྲད་པར་བྱའོ། །དེ་ནས་བུམ་པ་མགུལ་ཆིངས་ཁ་རྒྱན་སྔོན་པོ་དང་ལྡན་པའི་སྤོས་ཆུས་བཀྲུ་བར་བྱ་སྟེ། བདག་ཉིད་བཅོམ་ལྡན་འདས་ [102a.7]ཕྱག་ན་རྡོ་རྗེར་བསྐྱེད་ལ། ན་མོ་བྷ་ག་བ་ཏེ་སརྦ་དུ་རྒ་ཏི་པ་རི་ཤོ་དྷ་ནི་རཱ་ཛཱ་ཡ། ཏ་ཐཱ་ག་ཏཱ་ཡ། །ཨརྷ་ཏེ་སྨྱ་ཀྶཾ་སཾ་བུདྡྷཱ་ཡ། ཏ་དྱ་ཐཱ། ཨོཾ་ཤོདྡྷ་ནེ་ཤོདྡྷ་ནེ། སརྦ་པཱ་པཾ་བི་ཤོདྡྷ་ནེ། ཤུདྡྷེ་བི་ཤུདྡྷེ། སརྦ་ཀརྨ་ཨཱ་བ་ར་ཎ་བི་ཤུདྡྷེ་སྭཱ་ཧཱ། ཞེས་བྱ་བའི་སྔགས་ཀྱིས་བཀྲུ་བར་བྱའོ། །དེ་ [102b] [102b.1]ནས་ག་པུར་ལ་སོགས་པའི་དྲིས་བྱུགས་ལ། མེ་ཏོག་གི་ཕྲེང་བས་བརྒྱན་ལ། ལག་པ་ཐལ་མོ་སྙིང་གར་སྦྱར་ལ། རང་གི་ཡི་དམ་གྱི་ལྷར་བསྐྱེད་དོ། །ཡི་དམ་གྱི་ལྷ་མེད་པ་རྣམས་ནི། །སྤྱི་བོའི་ཨའི་འཕྲོ་འདུས་དག་པར་བྱས་ལ། སྐད་ཅིག་ཙམ་གྱིས་འཕགས་པ་འཇམ་དཔལ་སྐུ་མདོག་སེར་པོ་ [102b.2]རྒྱན་ཐམས་ཅད་ཀྱིས་བརྒྱན་པར་བསྐྱེད་ལ། དེའི་དབང་པོ་ཡོངས་སུ་དག་པར་བྱ་བའི་ཕྱིར་རོའི་སྤྱི་བོར་ཨོཾ། མགྲིན་པར་ཨཱཿསྙིང་གར་ཧཱུཾ་གྲོ་ག་ལ་བྲིས་ལ་བག་ཟན་གྱིས་བསྐུས་ལ་གླན་པར་བྱའོ། །རས་དཀར་པོ་གཙང་མ་ག་པུར་གྱི་ཆུས་བཀྲུས་པས་རོ་གཡོགས་ལ། ཤིང་ལེབ་ཀྱི་སྟེང་དུ་ [102b.3]བཞག་ལ་རོའི་སྙིང་ག་ན་གཟུངས་ཐག་གིས་བཏགས་ལ། བདག་ཉིད་ལྷའི་དཀྱིལ་འཁོར་དུ་བསྐྱེད་ལ། གཟུངས་ཐག་ནས་བཟུང་ལ་བཟླས་པ་བྱའོ། །བཟླས་པ་བྱེད་པའི་དུས་སུ་དེའི་ཤེས་པ་ཨའམ་མར་མེའི་རྣམ་པ་ལྟ་བུ་བཀུག་ཅིང་ཤེས་པ་དེ་ཕུང་པོ་ལ་བསྟིམ་མོ། །དེ་ནས་སྙིང་གའི་འོད་ཟེར་གྱི་ [102b.4]ཁམས་གསུམ་གྱི་སྡིག་པ་སྦྱང་ངོ་། །སྐབས་སུ་ཙནྡན་ནམ། ག་པུར་གྱི་ཆུས་བྱུག །བཟླས་པས་སྐྱོ་ན། རྫོགས་པའི་སངས་རྒྱས་བཅོམ་ལྡན་འདས། །སྡིག་པ་ཐམས་ཅད་སྦྱང་མཛད་པ། །འདྲེན་པའི་སྟོབས་ལྡན་ཐམས་ཅད་མཁྱེན། །ཐུགས་རྗེ་ཆེན་པོར་བྱིན་རླབས་ཀྱིས། །ཚེ་འདས་འདི་ལ་བྱིན་གྱིས་ [102b.5]རློབས། །ཞེས་གསོལ་བ་བཏབ་ལ། སྤྱོད་ལམ་གྱི་རྣལ་འབྱོར་བྱའོ། །དེ་ལྟར་བསྙེན་པ་འབུམ་ཕྲག་གཅིག་གམ། འབུམ་ཕྲག་གསུམ་མམ། འབུམ་ཕྲག་བརྒྱ་ལ་སོགས་པ་བཟླས་པར་བྱས་ལ། དེ་ནས་ཞི་བའི་སྦྱིན་སྲེག་བརྒྱ་རྩ་བརྒྱད་ཀྱི་བར་དུ་ཏིལ་གྱིས་རོ་ལ་བསྐོར་ཅིང་སྦྱིན་སྲེག་བྱའོ། །དེའི་དུས་ [102b.6]སུ་སྦྱིན་པ་དང་གཏོར་མ་དང་། དགེ་འདུན་ལ་སྟོན་མོ་ལ་སོགས་པ་བྱའོ། །སྔོན་དུ་བསྙེན་པའི་ཆོ་གའོ། །དེ་ནས་དཀྱིལ་འཁོར་བྱ་བའི་གནས་ནི་གཙུག་ལག་ཁང་དང་། སྐྱེད་མོས་ཚལ་དང་། ལྷ་ཁང་དང་། ཀུན་དགའ་ར་བ་དང་། རང་གི་གནས་སམ་གང་ཡང་རུང་བ་རཱུ་བའི་ཆོ་ག་དང་། ཐིག་དང་ཚོན་ [102b.7]གྱི་ཆོ་ག་ལ་སོགས་པས་དཀྱིལ་འཁོར་བྲི་བར་བྱའོ། །དེ་ནས་བུམ་པ་དགྲམ་པ་དང་། མཆོད་པའི་ཡོ་བྱད་ཐམས་ཅད་རྫོགས་པར་བཤམས་ལ། དཀྱིལ་འཁོར་སྒྲུབ་པའི་ཆོ་ག་གཞུང་བཞིན་དུ་བྱས་ཏེ། མཆོད་པ་དང་བསྟོད་པ་ལ་སོགས་པ་ཡོངས་སུ་རྫོགས་པར་བྱའོ། །དེ་ནས་དཀྱིལ་འཁོར་ [103a] [103a.1]ཀྱི་ཕྱོགས་བཞིར་གཏོར་མ་བཞི་བཏང་ལ་དཀྱིལ་འཁོར་གྱི་ལྷོ་ཕྱོགས་སུ་བའི་རྣམ་ལྔས་མཎྜལ་བྱས་ལ་དེའི་སྟེང་དུ་རོ་བཞག་སྟེ། སློབ་མ་དཀྱིལ་འཁོར་དུ་གཞུག་པའི་ཚུལ་དུ་རོ་དེ་དཀྱིལ་འཁོར་དུ་གཞག་པར་བྱའོ། །གསོལ་བ་གདབ་པ་དང་། བསོད་ནམས་ཀྱི་ཚོགས་བསགས་པ་ [103a.2]དང་། ཡེ་ཤེས་དབབ་པ་དང་། དཀྱིལ་འཁོར་དུ་མེ་ཏོག་དོར་ཏེ། གདོང་གཡོགས་དཀྲོལ་བ་དང་། དཀྱིལ་འཁོར་དུ་བཅུག་ལ་ལྷ་ངོ་བསྟན་པ་དང་། རིག་པའི་དབང་དང་གསང་བའི་དབང་བསྐུར་བ་ལ་སོགས་པ་སྟེ་དབང་རྣམས་རྫོགས་པར་བསྐུར་བར་བྱའོ། །དེ་ནས་ཆོ་ག་འདི་བརྩམ་པར་བྱའོ། །དཀྱིལ་ [103a.3]འཁོར་གྱི་ལྷ་ཐམས་ཅད་རོའི་སྙིང་གར་བསྡུས་ལ། རོ་དེ་དཀྱིལ་འཁོར་གྱི་དབུས་སུ་བཞག་སྟེ། ལྷའི་སྲས་པོ་བཞིན་དུ་རྒྱན་དང་གདུགས་དང་རྒྱལ་མཚན་ལ་སོགས་པ་དང་། རོལ་མོ་ལ་སོགས་ཀྱིས་མཆོད་པར་བྱའོ། །དེ་ནས་སྤྲོ་བ་བསྐྱེད་པར་བྱ་བ་ནི་ཚིག་འདི་ཆེད་དུ་བརྗོད་པར་བྱ་སྟེ། དེང་དུས་ [103a.4]བདག་ཚེ་འབྲས་བུ་ཡོད། །བདག་གིས་གསོན་པའང་འབྲས་བུ་བཅས། །དམ་ཚིག་ལྷ་དང་མཉམ་པར་ནི། །བདག་ཉིད་གྱུར་པར་ཐེ་ཚོམ་མེད། །བྱང་ཆུབ་སེམས་དང་སེམས་གཅིག་པས། །ཕྱིར་མི་ལྡོག་པར་བདག་གྱུར་ཏེ། དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། ། [103a.5]འདིར་ནི་བདག་ཉིད་དམ་པ་སྟེ། །མཆོག་སྦྱིན་འདི་ནི་བླ་ན་མེད། །ཕྱོགས་བཅུའི་སངས་རྒྱས་སྤྱན་འདྲེན་པས། །དེང་འདིར་འདུས་པའི་མཆོག་ཡིན་ནོ། །དེ་ནས་ཕྱག་བྱས་སྤོས་སྣོད་ཐོགས་ལ། སྤྱན་འདྲེན་ཚིག་འདི་བརྗོད་པར་བྱ། །ཀྱེ། དབང་ནི་ངེས་ཏེ་བླ་ན་མེད། །ཕྱོགས་བཅུར་བཞུགས་པའི་སངས་རྒྱས་ [103a.6]ཀུན། །མ་ལུས་བདག་ལ་དགོངས་སུ་གསོལ། །བདག་མིང་འདི་ཞེས་བྱ་བ་ཡིས། །ཤི་ལ་ཕན་གདགས་དོན་ཆེད་དུ། །གནས་འདིར་སངས་རྒྱས་ཀུན་གཤེགས་ཏེ། །འདི་ལ་དབང་ནི་སྩལ་དུ་གསོལ། །ཞེས་བྱ་བས་སྤྲོ་བ་བསྐྱེད་པར་བྱའོ། །དེ་ནས་ཞག་གཉིས་པ་མན་ཆོད་ན་བདག་ཉིད་ཏིང་ངེ་འཛིན་ [103a.7]གྱི་དཀྱིལ་འཁོར་བསྒོམ་པ་ནི། །དང་པོ་སྦྱོར་བ་ནས་ཡོངས་སུ་རྫོགས་པའི་ཏིང་ངེ་འཛིན་གྱི་བར་བསྒོམས་ལ་མཆོད་པ་དང་བསྟོད་པ་རྫོགས་པ་དང་། དེའི་རྗེས་ལ་གསང་སྔགས་ཀྱི་བཟླས་པ་འདི་བྱའོ། །ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿ། བྷ་ག་པཱན་ཛྙཱ་ན་མཱུ་རྟྟི་ཝཱ་གཱི་ཤྭ་ར་མ་ཧཱ་ཝཱ་ཙ་སརྦ་ [103b] [103b.1]དྷརྨྨ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿ། དེ་ནས་བཟླས་པ་རྫོགས་པ་དང་ཚིགས་སུ་བཅད་པ་འདི་བརྗོད་པར་བྱ་སྟེ། ཤི་ལ་ཕན་གདགས་དོན་བྱེད་དུ། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཡེ་ཤེས་སྐུ་ཉིད་ཁྱོད་ལ་འདུད། །ཅེས་པའི་བར་དུ་བརྗོད་དེ་དེ་ནས་བསྟོད་པ་རྫོགས་པ་དང་། [103b.2]བདག་གི་ཏིང་ངེ་འཛིན་གྱིས་དཀྱིལ་འཁོར་བདག་ལ་བསྡུས་ཏེ། རོའི་མིག་གཉིས་ལ་ཨ་རེ་བསམས་ལ། དེ་ལས་འོད་འཕྲོས་པས་ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས་ལ། མདུན་གྱི་ནམ་མཁའ་ལ་བྱོན་པར་བསམས་ལ། བུམ་པ་ཟླ་བའི་མདོག་ལྟ་བུས་རོ་ལ་དབང་བསྐུར་བར་ [103b.3]བསམ་མོ། །དེ་ནས་རྣལ་འབྱོར་པ་བདག་གིས་ཀྱང་རྣམ་པར་རྒྱལ་བའི་བུམ་པས་དབང་བསྐུར་ཞིང་བཀྲུ་བར་བྱའོ། །དེ་ནས་བསྲུང་བའི་སྔགས་ནི་ཨོཾ་པྲ་ཀྲྀ་ཏི་པ་རི་ཤུདྡྷཿསརྦ་དྷརྨྨ་པྲ་ཀྲྀ་ཏི་པ་རི་ཤུདྡྷོ྅ཧཾ། ཞེས་པས་བཀྲུ་ཞིང་དབང་བསྐུར་བར་བྱའོ། །དེ་ནས་ཨོཾ་ཡ་མཱནྟ་ཀ་ཧཱུཾ་ཕཊ། ཅེས་བྱ་བས་རོ་ [103b.4]དེ་ལ་བར་དུ་གཅོད་པའི་བགེགས་བསྐྲད་ལ། ཨོཾ་ཨཱཿཧཱུཾ་ཞེས་བྱ་བས་རོའི་ལུས་ངག་ཡིད་གསུམ་གྱི་གནས་གསུམ་དུ་བྱིན་གྱིས་བརླབས་ལ་བསྲུང་བ་བྱས་ལ་གཞག་གོ། །དེ་ནས་ལྷོ་ཕྱོགས་སུ་དཀྱིལ་འཁོར་གྱི་རོ་ལ་བསྐོར་ཞིང་སྦྱིན་སྲེག་བྱས་ལ་སྡིག་པ་སྦྱང་ངོ་། །དེ་ལྟར་ཞག་བདུན་ནམ་ལྔའམ། [103b.5]གསུམ་གྱི་བར་དུ་བྱའོ། །དེ་ནི་རོའི་དཀྱིལ་འཁོར་ཆེན་པོར་གཞག་ཅིང་དབང་བསྐུར་བའི་ཆོ་ག་སྟེ་དེ་ནི་གནས་པའི་ཆོ་གའོ། །ཤི་བ་སྟ་གོན་ལ་གནས་པའི་ཏིང་ངེ་འཛིན་ཏོ། །དུར་ཁྲོད་འཇིགས་པ་སྤངས་པའི་སར། །རོ་ཡི་སྦྱིན་སྲེག་བྱ་བ་ནི། །རྣལ་འབྱོར་ཏིང་འཛིན་ལྡན་པ་ཡིས། །ས་ཡི་ཆོ་ག་ [103b.6]གཞུང་བཞིན་བྱ། །གོང་དུ་ཆོ་ག་རྫོགས་པ་ནས། །སྟ་གོན་ཆོ་ག་བྱ་མི་དགོས། །དེ་ནས་སྟེགས་བུ་རྒྱར་ཁྲུ་ཕྱེད་དང་ཉི་ཤུ་རྩ་བཞི་པ་དཔངས་སུ་ཁྲུ་གང་བརྩིགས་ལ་བའི་རྣམ་ལྔས་བྱུགས་ལ་དེའི་དབུས་སུ་ཐབ་ཁུང་རྒྱར་ཁྲུ་བཞི་པ་ཟབས་སུ་ཁྲུ་དོ་པ་ཁུང་བུ་བྲུས་ལ། དེའི་ཁ་ཁྱེར་ལ་ཞེང་དུ་སོར་བརྒྱད་པ། འཕང་དུ་ [103b.7]སོར་བཞི་དང་ལྡན་པར་བྱའོ། །ས་གཞི་དེ་ཐམས་ཅད་ཙནྡན་དཀར་པོའི་ཆུ་དང་ས་དཀར་གྱི་ཆུས་བྱུགས་ལ། ཐབ་ཁུང་གི་ནང་དུ་པདྨ་འདབ་མ་བརྒྱད་པ་བྲིའོ། །དེའི་ཁ་ཁྱེར་ལ་ཕྱོགས་བཞིར་རྡོ་རྗེ་ཕྲེང་བ་བྲི། མཚམས་བཞིར་འཁོར་ལོ་རྩིབས་བཞི་བྲི། དེའི་མཐའ་མར་ཀ་བ་བཞི་བཙུགས་ལ། [104a] [104a.1]དེའི་སྟེང་དུ་སོ་ཕག་ལས་སྲེག་ཁང་མཆོད་རྟེན་དང་འདྲ་བ་བརྩིག་པར་བྱ་སྟེ། སྐར་ཁུང་བཞི་དང་ལྡན་པར་བྱའོ། །དམངས་ཐ་མལ་པ་ལ་ནི་བང་རིམ་མེད་པ་བྱའོ། །བློན་པོ་དང་རྒྱལ་པོ་ལ་ནི་བང་རིམ་གཅིག་པ་བྱའོ། དགེ་བསྙེན་ལ་ནི་བང་རིམ་གཉིས་པ་བྱའོ། །དགེ་སློང་ལ་ནི་བང་རིམ་གསུམ་ [104a.2]པ་བྱའོ། །རྡོ་རྗེ་འཛིན་པ་ལ་ནི་བང་རིམ་བཞི་པ་བྱའོ། །དེའི་བུམ་པའི་ནང་དུ་རོ་བཞག་ལ། ཙནྡན་དང་ཤུག་པ་ལ་སོགས་པའི་བུད་ཤིང་ལ་སོགས་པ་གཞག་གོ། །ཚེ་འདས་པའི་དོན་དུ་ཕྱོགས་བཞིའི་འཁོར་ལོས་སྒྱུར་བའི་སྦྱིན་སྲེག་བཞི་ཡང་བྱ་སྟེ། དཀྱིལ་འཁོར་དེའི་ཤར་ཕྱོགས་སུ་ཞི་བའི་ཐབ་ཁུང་བྱའོ། ། [104a.3]ལྷོར་རྒྱས་པའི་ཐབ་ཁུང་བྱའོ། །ནུབ་ཏུ་དབང་གི་ཐབ་ཁུང་བྱའོ། །བྱང་དུ་མངོན་སྤྱོད་ཀྱི་ཐབ་ཁུང་བྲི་བར་བྱའོ། །དེ་ནས་སྦྱིན་སྲེག་གི་རྫས་མར་དང་། ཏིལ་དང་མེ་ཏོག་དཀར་པོ་དང་། ཙནྡན་གྱི་ཕྱེ་མ་དང་། ཡུངས་ཀར་དང་། འོ་ཐུག་དང་འབྲས་ཆན་དང་། མངར་གསུམ་གྱི་རིལ་བུ་དང་། དཀར་ [104a.4]གསུམ་དང་དེ་རྣམས་ག་པུར་གྱི་ཆུས་བྱུགས་ལ། གཡས་ཕྱོགས་སུ་གཞག་པར་བྱའོ། །ཡམ་ཤིང་ཙནྡན་ལ་སོགས་པས་བྱས་ལ། དེ་ཡང་སོར་ཉི་ཤུ་རྩ་བཞི་བྱས་ལ། དེའི་རྩ་བ་ཟླུམ་པོར་བྱས་ཏེ་རྩེ་མོ་རལ་གྲི་ལྟ་བུར་བྱས་ལ་གཡོན་ཕྱོགས་སུ་གཞག་པར་བྱའོ། །མདུན་དུ་ [104a.5]ནི་མཆོད་པའི་ཡོ་བྱད་རྣམས་བཤམ་མོ། །དེ་ནས་སྔགས་པ་ཆས་གོས་དང་ལྡན་པས་ཤིན་ཏུ་བསྒྱིངས་པའི་རྒྱན་དང་ལྡན་པར་བྱས་ལ། དཀྱིལ་འཁོར་དེའི་ཕྱོགས་བཞིར་གཏོར་མ་བཏང་ལ། དེའི་རྗེས་ལ་བདག་ཉིད་གནས་སུ་འདུག་ལ། འཇམ་དཔལ་གཤིན་རྗེ་གཤེད་ཀྱི་ང་རྒྱལ་དང་ [104a.6]ལྡན་པས་བསྲུང་བའི་འཁོར་ལོ་བྱའོ། །དེའི་རྗེས་ལ་མཆོད་པ་རྣམས་བྱིན་གྱིས་བརླབས་ལ་སྲེག་རྫས་དང་ཡམ་ཤིང་ལ་ནི། ཨོཾ་ཨཱཿཧཱུཾ་ཞེས་བྱིན་གྱིས་བརླབ་བོ། །དེ་ནས་རླུང་ཡབ་ཀྱིས་མེ་སྦར་ལ། ཨོཾ་ཨགྣ་ཡེ་རཾ་རཾ་ཛྲ་ལ་རཾ་སྭཱ་ཧཱ། ཞེས་བརྗོད་ལ། མར་ཁུ་གཟར་བུ་གསུམ་མེའི་ [104a.7]ནང་དུ་བླུགས་སོ། །དེ་ནས་ཡེ་ཤེས་ཀྱི་སྲེག་ཁང་ཆེན་པོར་ཉོན་མོངས་པའི་དྲི་མ་དང་བག་ཆགས་ཀྱི་དྲི་མ་བསྲེག་པར་བྱ་བ་དང་། ངན་སོང་རྣམ་པ་གསུམ་གྱི་རྒྱུད་སྦྱང་བར་བྱ་བའི་ཕྱིར་རྣལ་འབྱོར་པ་སྙིང་རྗེ་ཆེན་པོ་དང་ལྡན་པས་ཡེ་ཤེས་ཀྱི་མེ་སྦར་བ་ནི། གསོན་ཅིག་དགོངས་ཤིག་ [104b] [104b.1]རིགས་ཀྱི་བུ། །ཕུང་པོ་ལྔ་ཡི་བུད་ཤིང་ལ། །རྒྱལ་བ་རིགས་ལྔའི་མེ་སྤར་རོ། །ཉོན་མོངས་ལྔ་ཡི་བུད་ཤིང་ལ། །ཡེ་ཤེས་ལྔ་ཡི་མེ་སྤར་རོ། །འབྱུང་བ་ལྔ་ཡི་བུད་ཤིང་ལ། །རྣམ་ཐར་བཞི་ཡི་མེ་སྤར་རོ། །ཞེས་བྱ་བས་མེ་སྤར་ལ། །དེ་ནས་མེ་དེའི་ནང་དུ་དང་པོར་བསྒོམ་པར་བྱ་བ་ནི་ཡི་གེ་ [104b.2]ཨ་ལས་ཟླ་བ་བསྒོམས་ལ། དེའི་སྟེང་དུ་ཨ་དཀར་པོ་བསམ་མོ། །ཨ་དེ་ལས་འོད་འཕྲོས་པས་གདུག་པ་ཐམས་ཅད་བཏུལ་ནས་སླར་འདུས་ནས་འོད་དུ་ཞུ་བ་ལས། ཐབས་དང་ཤེས་རབ་རང་བཞིན་གྱི་མེ་ལྷ་ཁ་དོག་དཀར་པོ་ལ་ཤིན་ཏུ་རིད་པའི་བྲང་རུས་ཅན་དབུ་ལ་ཡེ་ཤེས་སེམས་ [104b.3]དཔས་བརྒྱན་པར་བསྒོམ་མོ། །དེ་ལྟར་བསྒོམས་ནས་ཡེ་ཤེས་སེམས་དཔའ་དགུག་གཞུག་བྱ་བ་ནི། ཚུར་བྱོན་ཚུར་གཤེགས་མེ་ལྷའི་ཚོགས། །དྲང་སྲོང་བྲམ་ཟེ་སྤྱན་གསུམ་པ། །སྲེག་བླུགས་ཞལ་ཟས་བཞེས་ནས་ཀྱང་། །འབར་བའི་གདན་ལ་བཞུགས་སུ་གསོལ། །ཞེས་བརྗོད་ལ། [104b.4]ཨེ་ཧྱེ་གི་ཨགྣ་ཡེ་ཛཿཧཱུཾ་བཾ་ཧོཿ། །ཞེས་སྤྱན་དྲངས་ལ། གཉིས་སུ་མེད་པར་བསྟིམས་ལ། སྐུ་གསུང་ཐུགས་སུ་བྱིན་གྱིས་བརླབ་པོ། །མེ་ལྷ་དེ་ལ་མར་གྱི་དགང་བླུགས་བདུན་དབུལ་བར་བྱ་སྟེ། ན་མཿས་མནྟ་བྷཱུ་ཏ་ནཱུཾ། ཨགྣ་ཡེ་སྭཱ་ཧཱ། ཧ་བྱ་ཀ་བྱཱ་ཏི་བྱ་ཤཱནྟིཾ་ཀུ་ར་ཝེ་སྭཱ་ཧཱ། ཞེས་མར་གྱི་དགང་ [104b.5]བླུགས་ཕུལ་ལ་མེ་ལྷའི་བསྟོད་པ་བྱ་སྟེ། འཇིག་རྟེན་དབང་ཕྱུག་ཚངས་པ་མཆོག་གི་སྲས། །མེ་ལྷའི་རྒྱལ་པོ་རིགས་ལྔ་དབང་བསྐུར་བ། །ཡེ་ཤེས་མཆོག་ཉིད་ཉོན་མོངས་ཐམས་ཅད་བསྲེག །འཛིན་མཛད་མེ་ཡི་ལྷ་ལ་ཕྱག་འཚལ་བསྟོད། །ཅེས་བྱ་སྟེ། དེ་ནས་མེ་ལྷའི་ཐུགས་ཀ་ [104b.6]རུ། །ཨ་ལས་བསྐྱེད་པའི་ཟླ་སྟེངས་སུ། །ཡི་གེ་བྷཱུཾ་ལས་ཡོངས་བསྐྱེད་པའི། །ཤིན་ཏུ་ལེགས་པའི་གཞལ་ཡས་ཁང་། །གོང་དུ་བསྟན་དང་མཐུན་པ་ལས། །ཤིན་ཏུ་ལེགས་པའི་སྒོ་བཞི་པ། །དྲ་བའི་སྒོ་ནི་ཤར་ཕྱོགས་ཏེ། །དེ་ནས་གང་ཤི་དེ་ཉིད་ཀྱི། །རྣམ་ཤེས་མཚན་གྱི་སྔགས་སུ་གྱུར། ། [104b.7]དེ་ཡི་ཡིག་འབྲུ་རྣམས་སུ་གྱུར། །ཡིག་འབྲུ་ལས་ནི་ལྷར་བསྐྱེད་ལ། །དེ་ཡི་ཡེ་ཤེས་སེམས་དཔའ་ཡང་། །གོང་བཞིན་བསྡུ་དང་དགུག་གཞུག་བྱ། །དེ་ནས་མཆོད་པའི་བྱེ་བྲག་རྣམས་དང་། བསྟོད་པས་ཡང་དག་པར་མཆོད་ལ། སྲེག་རྫས་དབུལ་བར་བྱ་སྟེ། ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ་ཧ་ར་ [105a] [105a.1]ཧ་ར། ཨོཾ་ཧཱུཾ་ཧྲཱིཿ བྷ་ག་བཱན་ཛྙཱ་ན་མཱུརྟེ་བཱ་གཱི་ཤྭ་ར་མ་ཧཱ་ཝཱ་ཙ་སརྦ་དྡྷརྨྨ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿསརྦ་པཱ་པཾ་ཆེ་གེ་མོའི་སྒྲིབ་པ་ཤཱ་ནྟིཾ་ཀུ་ར་ཝེ་སྭཱ་ཧཱ། ཞེས་བྱ་བས་སྦྱིན་སྲེག་གི་རྫས་ཐམས་ཅད་ལན་བརྒྱ་རྩ་བརྒྱད་ཀྱི་བར་དུ་དབུལ་བར་བྱའོ། །སྲེག་ [105a.2]རྫས་ཐམས་ཅད་བདུད་རྩིར་བྱིན་གྱིས་བརླབས་ཤིང་དབུལ་བར་བྱའོ། །བར་བར་དུ་མིང་འདི་ཞེས་བྱ་བའི་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་དང་། བག་ཆགས་ཀྱི་སྒྲིབ་པ་ཐམས་ཅད་སརྦ་པཱ་པཾ་ད་ཧ་ན་བཛྲ་ཆེ་གེ་མོ་ཤཱནྟིཾ་ཀུ་ར་ཝེ་སྭཱ་ཧཱ། ཞེས་བརྗོད་ཅིང་ཏི་ལ་བསྲེག་གོ །ཡང་ན་སྦྱིན་ [105a.3]སྲེག་གི་རྫས་རྣམས་ལ་སྦྱིན་སྲེག་གི་ཆོ་ག་རིམ་པ་གཉིས་པའི་ཡེ་ཤེས་བརྟག་གནས་དང་མཐུན་པ་རུ། སྲེག་རྫས་རྣམས་ལ་རང་རང་གི་མིང་དང་བཅས་པ་རྣམས་དབུལ་ལོ། །སྦྱིན་སྲེག་རྫོགས་པ་དང་བསྟོད་པ་བྱ་སྟེ། ཤི་ལ་ཕན་གདགས་དོན་ཆེད་དུ། །མཆོག་སྦྱིན་རྡོ་རྗེ་མཆོག་ཁྱོད་འདུད། ། [105a.4]ལ་སོགས་པས་བསྟོད་ལ། །རྗེས་ལ་ལམ་བསྟན་པ་བྱ་བ་ནི། །ཚོགས་གཉིས་བསགས་པའི་གང་ཟག་དེ། །དཀྱིལ་འཁོར་ལྷ་ནི་རྟག་བསྒོམས་ནས། །དཀྱིལ་འཁོར་ལྷ་དང་མཉམ་བྱས་ཏེ། །དེ་ནས་རིམ་བཞིན་བསྡུས་ནས་ནི། །གཙོ་བོའི་ཐུགས་ཀར་ཨ་ལ་ཐིམ། །ཡི་གེ་ཨ་ [105a.5]ཡི་ངོ་བོར་བསྡུ། །ཨ་ལས་འོད་ཟེར་འཕྲོས་པ་ཡིས། །ཕྱོགས་བཅུ་ནམ་མཁའི་མཐས་གཏུགས་པས། །ངན་སོང་གསུམ་དང་མི་ཁོམ་བརྒྱད། །འགྲོ་བ་དྲུག་པོ་རྣམ་སྦྱངས་ནས། །ཀུན་ཀྱང་བདེ་གཤེགས་སྐུ་རུ་བསྒྱུར། །ཡང་ཡང་དབྱིངས་ཀྱི་ངང་དུ་ཐིམ། །ཐམས་ཅད་ནམ་མཁའ་འདྲ་ [105a.6]བར་བསྒོམ། །ཏིང་འཛིན་ཆེན་པོའི་བྱིན་བརླབས་ཀྱིས། །སངས་རྒྱས་ས་ནི་འདི་ཉིད་དེ། །སྲིད་པ་བར་དོ་འདི་ཉིད་ཡིན། །ཁྱོད་ཀྱི་ལམ་ནི་མཐར་ཕྱིན་ཤོག། །ཕུང་པོ་ལྔ་ནི་སངས་རྒྱས་ཉིད། །ཉོན་མོངས་ལྔ་ནི་ཡེ་ཤེས་ལྔ། །འབྱུང་བ་ལྔ་ནི་རྣམ་ཐར་བཞི། །སྲིད་པའི་འཁོར་ལོ་རྒྱུན་བཅད་ནས། ། [105a.7]སངས་རྒྱས་ས་ནི་རྣམ་པར་དག། །འཁོར་བ་བྱ་བའི་མིང་ཡང་མེད། །ཅེས་ལམ་བསྟན་ནོ། །དེ་ནས་སྨོན་ལམ་གདབ་པ་ནི། །ཚེ་འདས་པའི་སྒྲིབ་པ་རྣམ་པར་དག་ནས་ཚོགས་གཉིས་རྫོགས་ཏེ། བླ་ན་མེད་པའི་བྱང་ཆུབ་ཆེན་པོ་ཐོབ་པར་གྱུར་ཅིག། །འདི་ནི་ལམ་བསྟན་པའི་རིམ་པའོ། ། [105b] [105b.1]དེ་ནས་མེ་ལྷ་ལ་རྫས་ཀྱི་ལྷག་མ་ཅི་ཡོད་པ་བསོགས་ལ། དེས་མེ་ལྷ་ལ་སྦྱིན་སྲེག་བྱ་སྟེ། རྫས་རྣམས་བདུད་རྩིར་བྱིན་གྱིས་བརླབས་ལ། བརྒྱ་རྩ་བརྒྱད་ཀྱི་བར་དུ་དབུལ་བར་བྱའོ། །ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལཱ་ཡ་སརྦ་བྷ་སྨི་ཀུ་རུ་སརྦ་པཱ་པཾ་ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་པས་སྲེག་རྫས་ [105b.2]ཐམས་ཅད་སྤྱིའི་སྔགས་འདིས་དབུལ་བར་བྱའོ། །དེ་ནས་མེ་ལྷ་ལ་བསྟོད་པ་བྱ་སྟེ། ཚངས་པ་འཇིག་རྟེན་མགོན་སྐྱོང་བ། །གཟི་བརྗིད་ལྡན་པ་མེ་ཡི་ལྷ། །འབར་བཅས་སྐུ་ནི་རྒྱན་གྱིས་བཞུགས། །རྔམ་བརྗིད་རྒྱན་ལྡན་ལས་ལ་དབང་། །སྲེག་རྫས་ཕུལ་བས་ལས་ཀྱང་འགྲུབ། །ཞི་ལ་སོགས་ [105b.3]པའི་ལྷ་དཔལ་དེས། །ཇི་ལྟར་འདོད་པའི་དོན་གྲུབ་པ། །གཟི་བརྗིད་རྒྱན་ལྡན་ཕྱག་འཚལ་བསྟོད། །ཅེས་བསྟོད་ལ། དེ་དག་རྫོགས་པ་དང་བཟོད་པར་གསོལ་ལ་གཤེགས་སུ་གསོལ་ལོ། །དེ་ནས་མེ་ཏོག་ལག་ཏུ་ཐོགས་ལ་ཡི་གེ་བརྒྱ་པ་ལན་བདུན་བཟླས་ལ་སྲེག་ཁང་དུ་གཏོར་བར་བྱའོ། ། [105b.4]ཚེ་འདས་པའི་སྡིག་པ་བཅོམ་པའི་རྟགས་ནི་མེ་ལྕེ་སྟེང་དུ་དྲང་པོར་འབར་བ་དང་། དུ་བ་ལ་སོགས་པ་ནག་ནོག་མེད་པ་དང་། ཟླུམ་ཞིང་ཕྱོགས་གཞན་དུ་མི་འཕྲོ་བ་དང་། མེ་མདངས་གསལ་བ་དང་། སྒྲ་ཆུང་བས་འབར་བ་དང་། ཡང་མེ་ལྷའི་གཟུགས་སྲེག་ཁང་དུ་སྟོན་པ་དང་། རྟགས་དེ་ནི་ཚེ་འདས་པ་ [105b.5]ངན་སོང་གི་གནས་ནས་གྲོལ་བའི་རྟགས་ཡིན་ནོ། །ཚེ་འདས་པའི་དོན་དུ་ཕྱོགས་བཞི་རིགས་བཞིའི་འཁོར་ལོས་སྒྱུར་བའི་སྦྱིན་སྲེག་ཇི་ལྟ་བ་བཞིན་དུ་བྱ་བ་ནི། དེ་ཉིད་ཀྱི་ཚེ་དང་ལོངས་སྤྱོད་རྒྱས་པར་བྱ་བ་དང་། ནད་ལ་སོགས་པའི་གདོན་ཞི་བར་བྱ་བ་དང་། ལྷ་ལ་སོགས་པའི་འཇིག་རྟེན་གསུམ་དབང་དུ་གྱུར་ [105b.6]པར་བྱ་བ་དང་། དགྲ་དང་མ་རུངས་པ་གཞོམ་པའི་དོན་དུའོ། །དེ་ནས་ཚོགས་བསག་ཅིང་དགེ་བའི་དོན་ལ་སྦྱར་བར་བྱ་སྟེ། རུས་པ་ཐལ་བར་བསྡུས་ནས་ཀྱང་། །མཆོད་རྟེན་ལ་སོགས་ལས་བྱས་ཏེ། །བསོད་ནམས་བསགས་ཤིང་སྨོན་ལམ་གདབ། །འདི་ནི་ཚོགས་བསག་རིམ་པའོ། །འབྱོར་པ་ཆུང་བ་རྣམས་ [105b.7]ཀྱིས་ནི་ཞག་བདུན་གྱི་ནང་དུ་ཐམས་ཅད་རྫོགས་པར་བྱའོ། །འདི་ནི་རོ་སྲེག་པའི་ཆོ་གའོ།། །།འཇམ་དཔལ་དཀྱིལ་འཁོར་ཆོ་ག་ནི། ཡོན་ཏན་ཐམས་ཅད་འབྱུང་བའི་གནས། །ཐུན་མོང་མ་ཡིན་ཁྱད་འཕགས་པའི། །གསང་བར་འོས་པའི་ཆོ་ག་སྟེ། །འདི་བྱས་པ་ཡི་བསོད་ནམས་ཀྱིས། ། [106a] [106a.1]དེས་ནི་འཇིག་རྟེན་ཐམས་ཅད་ཀྱིས། །དྲི་མེད་ཡེ་ཤེས་ཐོབ་ནས་ཀྱང་། །གཟུགས་སྐུས་འགྲོ་བའི་དོན་བྱེད་ཤོག །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་ཆོ་ག་ཡོན་ཏན་འབྱུང་གནས་ཞེས་བྱ་བ། སློབ་དཔོན་དཔལ་ལྡན་ [106a.2]བྱང་ཆུབ་མཆོག་གི་སྐལ་བ་དང་ལྡན་པ་ཞེས་བྱ་བ། གཞན་ཡང་སྐྱེ་བ་གཅིག་ལ་མཚན་ལྔ་ཐོབ་པའི་སློབ་དཔོན་དེའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་སྨྲྀ་ཏི་ཛྙཱ་ན་ཀཱི་རྟིས་བསྒྱུར་ཅིང་གཏན་ལ་ཕབ་པའོ།། །།ཕྱིས་སློབ་དཔོན་འཕགས་པ་མཆོག་ [106a.3]གིས་ཀྱང་ཞུས་ནས་གཏན་ལ་ཕབ་སྟེ་འགྱུར་ཕྱི་མ་ཡང་ཡིན་ནོ། །{T2583}༄༅༅། །རྒྱ་གར་སྐད་དུ། ཨཱ་ཪྻ་མཉྫུ་ཤྲཱི་པྲ་ཏི་ཥཋ་བི་དྷིཿ། བོད་སྐད་དུ། འཕགས་པ་འཇམ་དཔལ་གྱི་རབ་ཏུ་གནས་པའི་ཆོ་ག །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཉེས་པ་ཀུན་དང་རྣམ་ [106a.4]བྲལ་ཞིང་། །འགྲོ་བ་ཀུན་ལ་ཕན་མཛད་པ། །དང་པོ་ཀུན་ལ་ཁྱབ་གྱུར་པ། །འཇམ་པའི་དབྱངས་ལ་ཕྱག་འཚལ་ལོ། །དེ་ལ་དང་པོར་རེ་ཞིག་འཕགས་པ་འཇམ་དཔལ་གྱི་མཚན་མ་ཐོབ་པར་བྱས་ལ། །དང་པོར་ཉི་མ་བཟང་པོ་ལ་ཁྲུས་བྱ་ཞིང་ལུས་དྲི་ཞིམ་པོས་བྱུགས་ལ། རྒྱན་སྣ་ [106a.5]ཚོགས་པས་བརྒྱན་ཏེ། རབ་ཏུ་གནས་པའི་ཡོ་བྱད་ཀུན་པ་སོགས་ཏེ། བདག་ཉིད་འཇམ་པའི་དབྱངས་ཀྱི་རྣལ་འབྱོར་དང་ལྡན་པས་འདུག་ལ། སྟེགས་བུ་གྲུ་བཞི་པ་དཔངས་སུ་ཁྲུ་དོ་པ་བྲིས་ལ་དེའི་སྟེང་དུ་ལུགས་སྐུ་དང་པོ་ཏི་ལ་སོགས་རབ་གནས་བྱ་བར་འོས་པ་བཞུགས་སུ་གསོལ་ཏེ། [106a.6]སོ་སོའི་སྐུ་བསྐྱེད་བྱིན་གྱིས་བརླབས་ལ། བླ་རེ་ལ་སོགས་པ་སྣ་ཚོགས་ཀྱིས་བརྒྱན་ཏེ། དེ་ལ་གླུ་དང་གར་དང་རོལ་མོ་ལ་སོགས་པས་བརྒྱན་ནས་ཕྱི་དྲོའི་དུས་སུ་རིམ་པས་ཁྲུས་བྱས་ཏེ། དེ་འང་སྐུ་གཟུགས་ལ་ན་བཟའ་སེར་པོ་གསོལ་ཏེ་སྦྱང་བར་བྱའོ། །དེ་ནས་ཡང་ཧཱུཾ་ཡོངས་སུ་ [106a.7]གྱུར་པའི་ཡུངས་ཀར་ཁུ་ཚུར་གཉིས་ཀྱིས་བཟུང་ལ་བསྐོར་ཏེ། ཁམ་ཕོར་དང་ཉེ་བའི་ཤིང་སས་བསྐོར་བ་ལན་གསུམ་དུ་བྱས་ནས། དེ་བཞིན་དུ་ཨོཾ་བཟླས་པའི་ཆུས་བསྐོར་བ་ལན་གསུམ་དུ་བྱའོ། །དེ་ནས་བའི་རྣམ་ལྔ་དང་དཱུར་བའི་པྲི་གྱིས་བྱུག་གོ། །གཞན་རྣམས་ནི་མེ་ལོང་ལ་བཀྲུའོ། །དེ་ནས་དྲི་ [106b] [106b.1]ཞིམ་པའི་ཆུས་བྱུགས་ལ། ཨོཾ་སརྦ་ཏ་ཐཱ་ག་ཏ་ཨ་ཙ་ཤི་ཛ་ཡ་བཛྲ་སྭཱ་ཧཱ། ཞེས་པའི་མན་ངག་གིས་བྱུགས་ལ། དེ་ཨུ་དུམྦཱ་ར་ལ་སོགས་པས་ཕྱིའོ། །དེ་ནས་ཡང་འདག་ཆལ་གྱིས་བྱུགས་ལ། དེ་ནས་བུམ་པ་རྣམས་ཀྱིས་ཁྲུས་བྱའོ། །དེ་ནས་ཁྲུས་སའི་སྟེགས་བུ་དཀྱིལ་འཁོར་གྱི་བདག་ཉིད་དུ་ [106b.2]བྱས་ལ། མཆོད་པ་ནས་རྒྱས་གདབ་པའི་བར་དུ་བྱས་ལ། དེ་ནས་བུམ་པ་རྣམས་དང་དབུ་རྒྱན་དང་དར་དཔྱངས་ཀྱི་ཆས་བྱས་ལ་མཆོད་པ་རྣམས་ཀྱིས་མཆོད་ནས་བསྟོད་དེ་བཟླས་པ་བྱའོ། །དེ་ནས་བདག་ཉིད་ཀྱིས་གཏོར་མ་བཏང་སྟེ། ནང་དུ་སྦྱིན་སྲེག་བྱས་ལ། བདག་ཉིད་སྤོས་སྣོད་ལག་ཏུ་ཐོགས་ལ། [106b.3]འཕགས་པ་འཇམ་དཔལ་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །ཐུགས་རྗེའི་བདག་པོ་ཅན་རབ་གནས། །མགོན་པོ་བདག་ནི་བགྱིད་པར་འཚལ། །བཅོམ་ལྡན་བ་དག་ནི་གུས་པ་ལ། ། [106b.4]དེ་བས་གནང་བ་མཛད་པར་རིགས། །བདག་མིད་རྡོ་རྗེ་འདི་ཞེས་བྱ། །རིག་པའི་རྒྱལ་པོ་འདི་ཞེས་བྱ། །ཡོ་བྱད་ཅི་འབྱོར་པ་ཡིས་ནི། །གནང་བས་རབ་གནས་བགྱི་བར་འཚལ། །བདག་དང་སློབ་མར་བཅས་པ་ལ། །ཐུགས་བརྩེ་བར་ནི་ཉེར་དགོངས་ནས། །ཚོགས་པ་ [106b.5]ཐམས་ཅད་རབ་གནས་ལ། །བྱིན་གྱིས་བརླབ་པར་མཛད་དུ་གསོལ། །ཞེས་བརྗོད་ལ། དེ་ནས་མཆོད་དེ་ཡི་གེ་བརྒྱ་པ་དང་། རབ་ཏུ་གནས་པའི་སྔགས་བཟླས་ལ་དགེ་བའི་རྩ་བ་བསྔོ་སྟེ། རབ་གནས་ཀྱི་ལྷ་གཤེགས་སུ་གསོལ་ལ། བདག་ཉིད་བསྲུང་བའི་ཕྱིར་ཡང་ཡི་ [106b.6]གེ་བརྒྱ་པ་བཟླས་སོ། །དེ་ནས་ནང་པར་ལངས་ལ་བདག་ཉིད་ལྷའི་རྣལ་འབྱོར་བྱས་ལ་མཆོད་པའི་ཡོ་བྱད་ཐམས་ཅད་བསགས་ལ་བྱིན་གྱིས་བརླབས་ཏེ། འཕགས་པ་འཇམ་དཔལ་བཅོམ་ལྡན་འདས་ལ་སོགས་པའི་ཚིག་ལ་ཅང་པར་བྱས་ལ་ད་ནི་བྱ་བ་བཅུག་ལ། ལྷ་བསྐུལ། །སྔར་གྱི་ [106b.7]ལྷག་པར་གནས་པའི་གཤེགས་སུ་གསོལ་བ་མ་གཏོགས་པའི་ཆོ་ག་རྣམས་ཇི་ལྟ་བ་བཞིན་དུ་བྱས་ལ། དེ་ནས་རྩ་བའི་དཀྱིལ་འཁོར་དུ་བཅུག་ལ། དམ་ཚིག་བསྒྲག་གོ། དེ་ལྟར་ཆོ་ག་ཀུན་བྱས་ལ། ལྷ་མོ་བརྒྱད་ཀྱིས་མཆོད་ལ་བསྟོད་དེ། ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ནེ་ [107a] [107a.1]སྭཱ་ཧཱ། ཞེས་པའི་སྔགས་དང་། གསེར་གྱི་ཐུར་མས་སྐུ་གཟུགས་ཀྱི་སྤྱན་ཕྱེ་ལ། འཇབ་ཚེས་སྙན་བྲུ་བ་དང་ཐུར་མས་ཤངས་བསལ་བ་དང་། སྤུ་གྲིས་ཕྱག་སེན་བྲེག་པ་དང་། སོ་མངས་ཀྱིས་དབུ་སྐྲ་བཤད་པ་དང་། མེ་ལོང་བསྟན་པ་དང་། ན་བཟའ་དང་བ་ཤོས་ [107a.2]དབུལ་ཏེ། ཨཱཿདྱ་ཨན་ནཾ་ས་མཱ་དྷའི་དྷྱ་ན་པྲི་ཎ་ནེ་སྭཱ་ཧཱ། ཙཱ་རུ་ལ་སོགས་པའི་ཕུད་དབུལ། །དེ་བཞིན་དུ་སོ་རྩི་དང་གོས་ལ་སོགས་པ་དབུལ་ཏེ། ལྷ་ལ་ལོངས་སྤྱོད་དོ། །དེ་ནས་བརྟན་པར་གསོལ་བ་བཏབ་ལ། །ཡི་གེ་བརྒྱ་པས་ཀྱང་། །ནན་ཏན་བྱས་ལ་གཏོར་མ་བཏང་སྟེ། དེ་ནས་ [107a.3]རྒྱས་པའི་སྦྱིན་སྲེག་བྱས་ནས་མཐར་སློབ་མ་གཡོན་དུ་བཞག་ལ་སྦྱིན་སྲེག་བྱའོ། །ཚིགས་བཅད་འདི་ཡིས་ཡོན་བླངས་ཏེ། བླ་མ་ཡོངས་སུ་མཉེས་པ་ཡིས། །ལས་ཀྱི་དངོས་གྲུབ་ཐོབ་འགྱུར་པས། །ཐན་བཀུར་སྟི་ཙམ་གྱིས་ཀྱང་། །བླ་མ་ཡོངས་སུ་མཉེས་པར་བྱའོ། །དེ་ནས་སྐུ་ [107a.4]གཟུགས་ལ་སློབ་མ་བསྐོར་བ་ལན་གསུམ་བྱེད་དུ་བཅུག་ལ། ཕྱག་དང་མཆོད་པ་ལ་སོགས་པ་བྱེད་དུ་བཅུག །སློབ་དཔོན་གྱིས་ཕྱོགས་སྐྱོང་ལ་གཏོར་མ་བྱིན་ལ། སྐུ་གཟུགས་ཡུན་རིང་དུ་གནས་པར་བྱ་བ་དང་། སློབ་མ་ཞི་བར་བྱ་བའི་ཕྱིར་བྱའོ། །བཟོད་པར་གསོལ་ཏེ་སྐུ་གཟུགས་ [107a.5]རབ་ཏུ་གནས་པའོ། །པུ་སྟི་ལ་སོགས་པ་རྣམས་ནི་ཡི་གེ་རྣམས་གསུང་རྡོ་རྗེ་ཆོས་སུ་གྱུར་པའི་ཡི་གེ་བསྐྱེད་པར་བྱའོ། །ལྷ་ཁང་དང་མཆོད་རྟེན་ལ་སོགས་པ་རྣམས་ནི་རྣམ་པར་སྣང་མཛད་དུ་ཡོངས་སུ་གྱུར་པར་བསམས་ལ་ཕྱོགས་བཅུ་ནས་ཡེ་ཤེས་སེམས་དཔའ་བཀུག་སྟེ། སྔར་བསྟན་པ་བཞིན་དུ་ [107a.6]མཆོད་པ་ལ་སོགས་པ་བྱས་ནས་སྔ་མ་བཞིན་དུ་བྱའོ། །རབ་གནས་དེ་ལྟར་མ་ནུས་ན། བདག་ཉིད་ལྷག་པའི་ལྷར་བསྒོམས་ཏེ། །རྟེན་རྣམས་དགུག་སོགས་བྱས་ནས་ནི། །སོ་སོ་རང་གི་སྐུ་བསྐྱེད་དེ། །ཡེ་ཤེས་སེམས་དཔའ་བསྟིམ་བྱས་ལ། དབང་རྣམས་བསྐུར་ཏེ་མཆོད་པ་བྱ། །རྟེན་ [107a.7]ཏེ་བཟླས་པ་ཅི་ནུས་བྱ། །བགྲང་ཕྲེང་རྡོ་རྗེ་ཆོས་སུ་བསྐྱེད། །ཡེ་ཤེས་བཅུག་སྟེ་མཆོད་པ་བྱ། །དེ་ཉིད་གསུང་གི་ཡི་གེར་བསྒྱུར། །བཟླས་པ་བྱས་ལ་བརྟན་པའོ། །དེ་ནས་རྩ་བའི་དཀྱིལ་འཁོར་གྱི་ཆོ་ག་ཅི་རིགས་སུ་བྱའོ། རབ་ཏུ་གནས་པའི་ཆོ་ག་འདི། །བདག་གིས་རང་བཟོར་ [107b] [107b.1]བྱས་མིན་ཏེ། །སྒྱུ་འཕྲུལ་དྲ་བའི་རྒྱུད་ལས་འོངས། །ཀུན་གྱིས་འཇམ་དབྱངས་ཐོབ་པར་ཤོག། །སློབ་དཔོན་ཤཱནྟིཾ་གརྦྷས་མཛད་པ་རྫོགས་སོ།། {T2584}༄༅༅། །རྒྱ་གར་སྐད་དུ། ཨཱཪྻ་མཉྫུ་ཤྲཱི་ནཱ་མ་ཨཾ་གའི་ཏི་གུ་ཧྱ་བཱནྣོ་པོ་ཀ་ཛྙཱ་ན་དཱི་པ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ [107b.2]ཡང་དག་པར་བརྗོད་པའི་གསང་བ་དང་ལྡན་པའི་སྒྲུབ་བའི་ཐབས་ཀྱི་འགྲེལ་པ་ཡེ་ཤེས་གསལ་བ་ཞེས་བྱ་བ། ངག་གི་དབང་ཕྱུག་ལ་ཕྱག་འཚལ་ལོ། །དཔལ་ལྡན་ཁྱབ་བདག་ལྔ་ཡི་དངོས། །ཡེ་ཤེས་སྐུ་ལ་རབ་བཏུད་དེ། །དོན་དམ་ཟབ་མོའི་ངེས་དོན་ལ། །བདག་འདྲས་དཔག་པར་མི་འོས་ [107b.3]ཀྱང་། །བདག་པས་བློ་དམན་དོན་ལ་གཟུང་བ་དང་། །ངེས་དོན་གསུམ་གྱི་མཚན་ཉིད་བསྟན་པ་དང་། །བླ་མའི་གདམས་ངག་མ་ཐོབ་རྣལ་འབྱོར་དོན་ལྟོས་པའི། །གང་ཟག་རྣམས་ལ་ཕན་པར་བྱ་བའི་ཕྱིར། །འཇམ་དཔལ་སྒྱུ་འཕྲུལ་དྲ་བ་ཡི། །རྒྱུད་ལས་ངེས་དོན་བཏུས་ཏེ་བཤད། །དེ་ལ་མདོའི་ [107b.4]དོན་ཞུས་ཤིང་སླར་གསུངས་པའི་ཐབས་བསྟན་པ་དང་། ཉམས་སུ་བླང་བའི་ཐབས་བསྟན་པ་གཉིས་ལས། འདིར་མདོའི་དོན་ཞུས་ཤིང་སླར་གསུངས་པའི་ཚུལ་བསྟན་པ་བཤད་དེ། གསང་སྔགས་ཀྱི་ལུགས་ཀྱིས་ཐིག་ལེ་བྱང་ཆུབ་ཀྱི་སེམས་གཏན་ལ་དབབ་དགོས་ཏེ། དེའི་དོན་ནི་གནས་པ་ [107b.5]བཞི། ངོ་བོ་བཞི། ཉམས་སུ་མྱོང་བའི་ཐབས་བཞི། དེའི་འབྲས་བུ་བཞི་ལ་ཡང་དག་པའི་དོན་འདུས་པས་དེ་བསྟན་པའི་ཕྱིར། ཐིག་ལེ་བཅུ་དྲུག་མི་ཤིགས་དབུས། །ཞེས་གསུངས་སོ། །དེ་ལྟར་གཉིས་མེད་ཀྱི་ཡེ་ཤེས་རྟོགས་པའི་དུས་ན་ཚིག་དང་ཡི་གེའི་སྒྲོས་པའི་མཐའ་དང་བྲལ་བས། ཡན་ [107b.6]ལག་མེད་ཅིང་རྩིས་ལས་འདས། །ཞེས་གསུངས་སོ། །དེ་ལྟར་རྟོག་པ་དང་ཉོན་མོངས་པ་དྲུག་སྦྱང་བའི་གཉེན་པོར་དབུགས་དབྱུང་དྲུག་གི་དཀྱིལ་འཁོར་གྱི་ལྷ་ཚོགས་བསྐྱེད་ལ། དེ་ཡང་མི་རྟོག་པའི་སེམས་ཀྱིས་ཟིན་པར་བྱ་བའི་ཕྱིར། དེ་ཉིད་ལྡན་ཞིང་ཡིད་རྟོག་འདས། །ཞེས་གསུངས་སོ། ། [107b.7]དེ་ལྟ་བུའི་དོན་ནི་བློ་དང་ལྡན་པ་ཀུན་གྱིས་ཡང་དག་པའི་གནས་སུ་འགྲོ་བའི་ལམ་ཡིན་པར་བསྟན་པའི་ཕྱིར། །ངེས་འབྱུང་ཀུན་གྱི་ལམ་གང་ཡིན། །ཞེས་གསུངས་སོ། །དོན་གསུམ་དབྱེར་མེད་དུ་རྟོགས་པར་བྱ་བའི་ཕྱིར། དོན་གསུམ་ཐེ་ཚོམ་མེད་པའི་བློས། །ཞེས་གསུངས་ [108a] [108a.1]སོ། །སྣང་བའི་ཆོས་ཐམས་ཅད་སྐྱེ་མེད་ཀྱི་དོན་རྟོགས་པར་བྱ་བའི་ཕྱིར། ལུས་ཀྱི་མཐའ་ནི་ངེས་རྟོགས་བྱ། །ཞེས་གསུངས་ཏེ། དེ་ལྟ་བུའི་དོན་ལ་གནས་ན་ཕྱིན་ཅི་མ་ལོག་པའི་འབྲས་བུ་འབྱུང་བར་བསྟན་པའི་ཕྱིར། བྱང་ཆུབ་བླ་ན་མེད་པའོ། །ཞེས་གསུངས་སོ། །དེའི་ [108a.2]ངང་ལ་གསང་སྔགས་ཀྱི་དོན་གྱིས་འགྲོ་བའི་བློ་སྦྱང་བར་བྱ་བའི་ཕྱིར། གསང་སྔགས་དོན་ཀུན་སྐྱེད་པ་པོ། །ཞེས་གསུངས་སོ། །དེའི་ངང་ལས་སྐུ་རྣམ་པ་གཉིས་ཀྱིས་འགྲོ་བའི་དོན་བྱེད་པ་བསྟན་པའི་ཕྱིར། །ལོངས་སྤྱོད་རྫོགས་སྐུ་ཀུན་གྱི་མཆོག །སངས་རྒྱས་སྤྲུལ་པའི་རྒྱུད་ [108a.3]འཆང་བ། ཞེས་གསུངས་སོ། །དེ་ལྟ་བུ་ནི་ལྷ་དང་མི་རྣམས་ཀྱིས་མཆོད་ཅིང་བརྗོད་པའི་གནས་ཡིན་པར་བསྟན་པའི་ཕྱིར། མཆོད་འོས་བསྟོད་འོས་རིམ་གྲོའི་གནས། །ཞེས་གསུངས་སོ། །འཁོར་གྱི་གཙོ་བོས་སྟོན་པ་ལ་མཆོད་བསྟོད་བྱས་ནས་འགྲོ་བའི་དོན་ཞུས་པ་བསྟན་པའི་ [108a.4]ཕྱིར། བྱང་ཆུབ་སེམས་དཔའ་རྫུ་འཕྲུལ་ལྡན། །ལག་ན་རྡོ་རྗེ་མཐུ་བོ་ཆེས། །ཉིད་ལ་སྙན་པའི་ཚིག་དག་གིས། །བསྟོད་ནས་མཚན་གྱི་རིམ་པ་ཞུས། །ཞེས་གསུངས་སོ། །སྟོན་པས་འགྲོ་བའི་དོན་དུ་བསྙེན་པ་བྱ་བའི་རིམ་པ་དང་། དཀྱིལ་འཁོར་བྲི་བའི་རིམ་པ་དང་། དེ་ལ་ [108a.5]ཚོགས་བསག་པ་དང་། སྦྱིན་སྲེག་བྱ་བའི་རིམ་པ་དང་། ན་བ་ལ་ཕན་གདགས་པའི་རིམ་པ་དང་། ཤི་བ་ལ་ཕན་གདགས་པའི་རིམ་པ་དང་། ལུས་ཀྱི་རྩ་གནས་ཀྱི་འཁོར་ལོ་བསྟན་པའི་རིམ་པ་དང་། སློབ་མ་དབང་བསྐུར་བའི་རིམ་པ་དང་། དཀྱིལ་འཁོར་གཤེགས་སུ་ [108a.6]གསོལ་བའི་རིམ་པ་དང་། བླ་མ་ལ་ཡོན་དབུལ་བའི་རིམ་པ་དང་བཅུ་གསུངས་པས་ན། བློ་ཞན་དོན་དུ་རིམ་པས་གསུངས། །ཞེས་གསུངས་སོ། །དེའི་ཉམས་སུ་བླང་བའི་ཐབས་ལ་གཉིས་ཏེ། བསྙེན་པ་དང་སྒྲུབ་པ་གཉིས་སོ། །སྔོན་ལ་བསྙེན་པ་སྟོན་ཏེ། དོན་དང་ལྡན་པའི་སློབ་དཔོན་ [108a.7]རྡོ་རྗེ་འཆང་ཆེན་པོའི་ངོ་བོ་ཉིད་ཡིན་པའི་ཕྱིར། །དེ་ལ་རྡོ་རྗེ་འཆང་ཆེན་པོས། །སློབ་དཔོན་ཆ་ལུགས་གནས་བྱས་ཏེ། །ཞེས་གསུངས་སོ། །དེ་ནས་སྒྲུབ་པ་པོས་ཉམས་དང་གར་འཐད་དུ་གནས་པར་བྱ་བའི་ཕྱིར། བསམ་གཏན་དང་ནི་རྗེས་མཐུན་པའི། །ཞེས་བྱ་བ་ལ་སོགས་པ་ཚིག་རྐང་ལྔ་གསུངས་སོ། ། [108b] [108b.1]ལ་སོགས་པ་ཞེས་བྱ་བ་ནི་འོག་པདྨ་འདབ་བརྒྱད་དུ་འདུག་ལ། སྟེང་འཁོར་ལོ་རྩིབས་བརྒྱད་དུ་འདུག་པ། མེ་ཏོག་གི་སྣམ་བུ་ལང་ལིང་དུ་ཆགས་པ། ཤར་རི་གཞོལ་བ། ནུབ་རི་སྐྱོབ་པ། ལྕུག་ཕྲན་གྱི་ཚལ་ཡོད་པ། བཀྲ་ཤིས་ཀྱི་བྱ་སྣ་ཚོགས་སྒྲ་སྒྲོགས་པ་དེ་འདྲའི་གནས་སུ་བསྙེན་པ་བྱ་སྟེ། [108b.2]དབང་བསྐུར་པ་ཐོབ་པ། བླ་མའི་བཀའ་བཞིན་བྱེད་པ། དམ་ཚིག་ལ་གནས་པ་བྱ་བའི་ལས་ལ་མ་རྨོངས་པའི་བརྩེ་བའི་གྲོགས་དང་འགྲོགས་པར་བསྟན་པའི་ཕྱིར། གྲོགས་བཟང་བཙལ་ལ་བསྙེན་པ་བརྩམ། །ཞེས་གསུངས་སོ། །དེ་ནས་དོན་དང་ལྡན་པའི་རྣལ་འབྱོར་པ་དེས་བདེ་བའི་སྟན་ནང་ [108b.3]ཚངས་ཅན་འབོལ་བ་ལ་རྡོ་རྗེའི་སྐྱིལ་མོ་ཀྲུང་ངམ་ཇི་ལྟར་བདེ་བའི་སྟན་ལ་འདུག་སྟེ། ཁ་ཟས་ཀྱི་ཚོད་བཟུང་། གཉིད་ཀྱི་ཆ་མཉམ། ལུས་ཆམ་ལ་ཕབ། སེམས་ཁོག་གློད་དེ་སྒོམ་པ་བརྟན་པའི་ཕྱིར། བདེ་བའི་སྟན་ལ་འདུག་བྱས་ཏེ། །ཞེས་གསུངས་སོ། །དེ་ནས་རྣམ་རྟོག་གི་བགེགས་ [108b.4]བསྲུང་བར་བྱ་བའི་ཕྱིར། བདག་དང་ས་གཞི་ཡོངས་བསྲུང་ཞིང་། །ར་བ་དྲ་བས་མཚམས་བཅད་དང་། །ཕྱོགས་དང་སྟེང་འོག་བཅིང་སོགས་པ། །རབ་ཏུ་འབད་དེ་བསྒོམ་པར་བྱ། །ཞེས་གསུངས་ཏེ། དེའི་དོན་ནི་མགོན་པོ་ཀུན་སྣང་གི་རྒྱུད་ལས་འདི་སྐད་དུ། ཀྱེ་མ་ལྷ་ཡི་བུ་རྣམས་དང་། ། [108b.5]གཞོན་ནུ་རྣམས་ནི་ཚོ་འདོད་དང་། །ཕྱི་རོལ་རྒོལ་བ་ཚར་གཅོད་དང་། །རྣམ་རྟོག་བགེགས་རྣམས་བསྲུང་འདོད་ན། །དང་པོར་སྟོང་པ་ཆེན་པོར་བསྒོམ། །དེ་ཡི་ངང་ལས་རང་གི་དངོས། །སངས་རྒྱས་ཀུན་གྱི་བདག་པོར་བསམ། །ལྕེ་ལ་ཟླ་བ་རྡོ་རྗེ་ནི། །རྩེ་ལྔ་པར་ནི་རྣམ་བསམས་ལ། ། [108b.6]བཛྲ་ཛི་ཧྭ་ཞེས་བརྗོད་དེ། རྡོ་རྗེའི་ལྕེ་རུ་རྣམ་པར་བསམ། །སྔགས་ཟློས་ནུས་པའི་མཐུ་དང་ལྡན། །ལག་པ་གཉིས་སུ་ཨ་དང་ཧཱུཾ། །གོང་མའི་གོ་རིམས་དོན་དང་ལྡན། །བཛྲ་ཧ་ཏ་ཞེས་བརྗོད་དེ། །རྡོ་རྗེ་རྩེ་ལྔ་ལྟ་བུར་བསམ། །ཕྱག་རྒྱ་ནུས་པའི་མཐུ་དང་ལྡན། །དེ་ནས་བདག་ཉིད་ཧཱུཾ་ལས་ནི། ། [108b.7]གྲྀ་ཧྞ་བཛྲ་ས་མ་ཡ་བཾ་ཧཱུཾ། ཞེས་པའི་སྔགས་ནི་བརྗོད་ནས་ཀྱང་། །རྡོ་རྗེ་ཏི་རཱིནྟི་རི་བཅིང་། །ཁྲོ་བོ་ཆེན་པོ་མེ་ལྟར་རབ་ཏུ་འབར་བ་ཆར་སྤྲིན་གྱི་མདོག་ཅན། འོད་ཟེར་གྱི་ཕྲེང་བས་ཀུན་དུ་འཁྲུག་པ། ཞལ་བཞི་པ། ཕྱག་བརྒྱད་པ། ཞལ་སྒེག་པ། དཔའ་བ་འཇིགས་སུ་རུང་བ། སྙིང་རྗེ་ [109a] [109a.1]ཆེ་བ་ལ་སོགས་པའི་ཉམས་དང་ལྡན་པ། ཕྱག་གཡས་པ་རྣམས་ན་རྡོ་རྗེ་དང་། རལ་གྲི་དང་། མདའ་དང་། འཁོར་ལོ་བསྣམས་པ། ཕྱག་གཡོན་པ་རྣམས་ན་དྲིལ་བུ་དང་། ཞགས་པ་དང་། གཞུ་དང་། ཁ་ཊྭཾ་ག་ལ་བཏགས་པའི་བ་དན་སྣ་ཚོགས་བསྣམས་པ། [109a.2]མེ་སེར་སྐྱ་འབར་བ་ལྟ་བུའི་སྐྲའི་ཚོགས་ཤིན་ཏུ་འཇིགས་སུ་རུང་བ། སྦྲུལ་ཆེན་པོས་གདུ་བུ་དང་དབུ་རྒྱན་དང་། སྐ་རགས་དང་ཞབས་གདུབ་དང་། མགུར་ཆུ་དང་། རྣ་རྒྱན་དང་། ཅོད་པན་གྱིས་བརྒྱན་པ། སྒྱུ་འཕྲུལ་ཆེན་པོའི་འཁོར་ལོ་དགོད་པ་ལ་མཁས་པ། གཡོན་བརྐྱང་བས་ཁྱབ་པ་འཇུག་ [109a.3]དང་ཆུང་མར་བཅས་པ་གནོན་པ་བསྒོམ་པར་བྱའོ། །དེ་ནས་སྐྱིལ་ཀྲུང་ཕྱེད་འདུག་ལ། །རྡོ་རྗེ་བསྡམས་པས་ནང་བཅིངས་ཏེ། །མཐེ་བོང་གཉིས་ནི་གཞིབས་བྱས་ལ། །བསྒྲེང་བའི་སོར་མོའི་སྟེང་ནས་དགབ། །ཏི་རཱི་ནྟི་རིའི་ཕྱག་རྒྱ་སྟེ། །ཨོཾ་བཛྲ་ཛྭ་ལ་ཨ་ན་ལཱ་རྐ་ཧུཾ་ཨ་བྷི་ཥི་ཉྩ་མཱཾ། །གསང་ [109a.4]སྔགས་དམ་པ་བརྗོད་ནས་ནི། །སྤྱི་བོ་ནས་བརྩམས་ཕྱོགས་བཞི་ཡི། །རྡོ་རྗེ་ཕྲེང་བའི་དབང་བསྐུར་བླང་། །ཨོཾ་ཊུཾ་ཞེས་པའི་ཡི་གེ་གཉིས། །གོ་ཆ་དམ་པ་བགོས་ནས་ནི། །མཐར་ནི་མཉམ་པའི་ཐལ་མོ་དང་། བཛྲ་ཏུ་ཥྱ་ཧོཿཞེས་བརྗོད། །ལུས་ཀྱི་ཆ་ལུགས་མཉམ་པར་བྱ། །དེ་ཉིད་ [109a.5]ལས་ནི་མ་གཡོས་པར། །གཡོན་པའི་ཁུ་ཚུར་སྙིང་གར་བཞག །གཡས་པའི་རྡོ་རྗེ་ཁུ་ཚུར་ནི། །ལན་གསུམ་དག་ཏུ་གསོར་བྱས་ལ། །བགེགས་རྣམས་ཐམས་ཅད་བསྣུན་པར་བྱ། །ཨོཾ་བཛྲ་ཛྭ་ལ་ཨ་ན་ལཱ་རྐ་ཧཱུཾ། དེ་ནས་སེམས་ཀྱི་ཆོ་འཕྲུལ་གྱི། །སྐད་ཅིག་རེ་ལ་ཏིང་འཛིན་ཏེ། །བསྒྱར་ཏེ་ [109a.6]ལས་རྣམས་རིམ་པར་བྱ། །བདག་ཉིད་ཁྲོ་བོ་རྡོ་རྗེ་མེ། །གཡས་བ་རྡོ་རྗེ་མེ་དབལ་གཡོན་སྡིག་མཛུབ། །མདོག་སེར་ཞིང་འོད་འབར་བ། དེ་ཡི་ཆོ་འཕྲུལ་ལས་བྱུང་བའི། །རྡོ་རྗེ་བསྡམས་པ་ནང་བཅིངས་ཏེ། །སོར་མོ་ནང་དུ་འབར་བར་བྱ། །མཐེ་བོང་རྡོ་རྗེར་བསྒྲེང་བ་ནི། །རྡོ་རྗེ་མེ་ཡི་ཕྱག་རྒྱ་སྟེ། །བགེགས་ [109a.7]རྣམས་ཐམས་ཅད་བསྲེགས་པར་བསམ། །ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐཱ་བྷ་ཉྫ་ར་ཎ་ཧཱུཾ་ཕཊ། རྡོ་རྗེ་བསྡམས་པ་བཅིངས་བྱས་ཏེ། མཐེ་བོང་གཉིས་ནི་རབ་ཏུ་བརྐྱང་། །སྙོམས་ལ་སྟེང་དུ་བཞག་པ་ནི། །རྡོ་རྗེ་སྤྱན་གྱི་ཕྱག་རྒྱ་སྟེ། །བགེགས་རྣམས་ཐམས་ཅད་བཅིང་བར་བྱ། །བཛྲ་ནི་ཏྲི་བནྡྷ་སརྦ་ [109b] [109b.1]བིགྷྣཱཾ། རྡོ་རྗེ་ཁུ་ཚུར་གཉིས་བཅིངས་ལ། །མགལ་མེའི་འཁོར་ལོ་བཞིན་བསྐོར་ཏེ། །མགོ་ཡི་སྟེང་དུ་མཛུབ་མོ་གཉིས། །ལྕགས་ཀྱུའི་ཚུལ་དུ་བཞག་པ་ནི། །རྡོ་རྗེ་འཇིགས་བྱེད་ཕྱག་རྒྱ་སྟེ། །ཨོཾ་ཧུ་ལུ་ཧུ་ལུ་ཧཱུཾ་ཕཊ། གསང་སྔགས་དམ་པ་བརྗོད་པ་ཡིས། །སྐུ་མདོག་དཀར་པོ་ཁྲོ་བོ་ནི། ། [109b.2]གཡས་པ་རྡོ་རྗེ་གཡོན་སྡིགས་མཛུབ། །དཔག་ཏུ་མེད་པས་སྟེང་ཕྱོགས་གཏམས། །རྡོ་རྗེ་ཐལ་མོ་བརྐྱང་བྱས་ཏེ། མཐེ་བོང་གཉིས་བརྐྱང་མཛུབ་མོ་གཉིས། །མཆེ་བ་ལྟ་བུར་བྱས་པ་ནི། །རྡོ་རྗེ་གནོད་སྦྱིན་ཕྱག་རྒྱ་སྟེ། །ཨོཾ་བཛྲ་ཡཀྵ་ཧཱུཾ། གསང་སྔགས་དམ་པ་བརྗོད་པ་ཡིས། །སྐུ་མདོག་སྔོན་ [109b.3]པོ་ཁྲོ་བོ་ནི། །མཆེ་བ་ཐོགས་པ་དཔག་ཏུ་མེད། །དེ་ཉིད་དུ་ནི་རྣམ་པར་གཏམས། །རྡོ་རྗེ་ཁུ་ཚུར་གཉིས་བཅིངས་ཏེ། མཐེ་ཆུང་ལུ་གུ་རྒྱུད་དུ་སྤྲེལ། །མཛུབ་མོ་གཉིས་ནི་རྩེ་སྦྱར་ཏེ། །བཟློག་ནས་སྤྱི་བོར་གཞག་པ་ནི། །རྡོ་རྗེ་གཙུག་ཏོར་ཕྱག་རྒྱ་སྟེ། །ཨོཾ་དྲུཾ་བྣདྷ་ཧཾ། གསང་སྔགས་དམ་པ་ [109b.4]བརྗོད་པ་ཡིས། །སྐུ་མདོག་དམར་པོ་ཁྲོ་བོ་ནི། །གཙུག་ཏོར་དང་ནི་སྡིགས་མཛུབ་བསྣམས། །དཔག་ཏུ་མེད་པས་ཤར་ཕྱོགས་གཏམས། །རྡོ་རྗེ་ཁུ་ཚུར་གཉིས་བཅིངས་ཏེ། མཁྲིག་མ་གཉིས་ནི་མདུད་བྱས་པ། །རྡོ་རྗེ་ཞགས་པའི་ཕྱག་རྒྱའོ། །ཨོཾ་ཧཱུཾ་བཛྲ་པཱ་ཤ་ཧྲཱིཿ། གསངས་སྔགས་དམ་པ་ [109b.5]བརྗོད་པ་ཡིས། །སྐུ་མདོག་སེར་པོ་ཁྲོ་བོ་ནི། །ཞགས་པ་དང་ནི་སྡིགས་མཛུབ་བསྣམས། །དཔག་ཏུ་མེད་པས་དེ་ཉིད་གཏམས། །ལག་པ་རྡོ་རྗེ་བསྡམས་པ་ལས། །མཐེ་བོང་གཉིས་ནི་སེམས་དཔའ་ཡི། །སྐྱིལ་མོ་ཀྲུང་དུ་བཅས་པ་ལས། །མཛུབ་མོ་གཉིས་ནི་མཉམ་པར་གཞིབས། །ཕྱེ་ [109b.6]ལ་མཐེ་ཆུང་གཉིས་པོ་ནི། །བ་དན་ལྟ་བུར་བྱས་པ་ནི། །རྡོ་རྗེ་བ་དན་ཕྱག་རྒྱ་སྟེ། །ཨོཾ་བཛྲ་པ་ཏཾ་གི་པ་ཏཾ་ཀི་ནི་ར་ཊ། གསང་སྔགས་དམ་པ་བརྗོད་པ་ཡིས། །སྐུ་མདོག་དམར་པོ་ཁྲོ་བོ་ནི། །བ་དན་དང་ནི་སྡིགས་མཛུབ་བསྣམས། །ནུབ་ཀྱི་ཕྱོགས་སུ་རྣམ་པར་གཏམས། །རྡོ་རྗེ་གནོད་སྦྱིན་ཕྱག་ [109b.7]རྒྱ་ཉིད། །ཁ་རུ་རྣམ་པར་བསྟན་པ་ནི། །རྡོ་རྗེ་དུས་ཀྱི་ཕྱག་རྒྱ་སྟེ། །ཧྲཱིཿབཛྲ་ཀཱ་ལི་རུ་ཊ་མ་ཊ། གསང་སྔགས་དམ་པ་བརྗོད་པ་ཡིས། །སྐུ་མདོག་ནག་པོ་ཁྲོ་བོ་ནི། །རྡོ་རྗེ་དང་ནི་སྡིགས་མཛུབ་བསྣམས། །བྱང་གི་ཕྱོགས་སུ་རྣམ་པར་གཏམས། །རྡོ་རྗེ་ཁུ་ཚུར་གཉིས་ཀྱིས་ནི། །རི་བོ་འདེགས་ [110a] [110a.1]པའི་ཚུལ་དུ་བྱས། །རྡོ་རྗེ་རྩེ་མོའི་ཕྱག་རྒྱ་སྟེ། །ཨོཾ་བཛྲ་ཤི་ཥ་རེ་རུ་ཊ་མ་ཊ། །གསང་སྔགས་དམ་པ་བརྗོད་པ་ཡིས། །སྐུ་མདོག་སྔོན་པོ་ཁྲོ་བོ་ནི། །རྡོ་རྗེ་དང་ནི་སྡིགས་མཛུབ་བསྣམས། །ལྷོ་ཡི་ཕྱོགས་སུ་རྣམ་པར་གཏམས། །རྡོ་རྗེ་བསྡམས་པས་སྟེང་བཞག །ཨོཾ་བཛྲ་དྲྀ་བྷོ་མེ་བྷ་བར་ཀྵ་སརྦ་སྭཱ་ཧཱ། [110a.2]གསང་སྔགས་དམ་པ་བརྗོད་པ་ཡིས། །སྐུ་མདོག་སྨུག་པོ་ཁྲོ་བོ་ནི། །ཐོ་བ་དང་ནི་སྡིགས་མཛུབ་བསྣམས། །འོག་གི་ཕྱོགས་སུ་རྣམ་པར་གཏམས། །རྡོ་རྗེ་ཁུ་ཚུར་གཉིས་བཅིངས་ལ། །མཁྲིག་མ་གཉིས་བསྣོལ་མཐེ་ཆུང་གཉིས། །ལྕགས་ཀྱུའི་ཚུལ་དུ་སྦྲེལ་བྱས་ལ། །མཛུབ་མོའི་སྡིགས་ [110a.3]མཛུབ་གཉིས་བསྒྲེང་བ། །རྡོ་རྗེ་ཧཱུཾ་མཛད་ཕྱག་རྒྱ་སྟེ། །ཨོཾ་སུམྦྷ་ནི་སུམྦྷ་ཧཱུཾ། གྲྀ་ཧྞ་གྲྀ་ཧྞ་ཧཱུཾ། གྲྀཧྞ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོ། བྷ་ག་བཱན་བིདྱཱ་རཱ་ཛ་ཧཱུཾ་ཕཊ། གསང་སྔགས་དམ་པ་བརྗོད་པ་ཡིས། །ནང་དུ་ཧཱུཾ་མཛད་ར་བར་གྱུར། །དེ་ཉིད་ལས་ནི་མཛུབ་མོ་དང་། གུང་མོ་ [110a.4]གཉིས་ནི་རྡོ་རྗེར་བྱས། །རྡོ་རྗེ་ལས་ཀྱི་ཕྱག་རྒྱ་སྟེ། །ཨོཾ་བཛྲ་ཀརྨ་ཧཱུཾ། གསང་སྔགས་དམ་པ་བརྗོད་པ་ཡིས། །ཕྱི་རོལ་ལས་ཀྱི་ར་བར་གྱུར། །ལག་གཉིས་རྡོ་རྗེ་བསྡམས་པ་དང་། བཛྲ་བནྡྷ་བཾ། ཕྱི་རོལ་རྡོ་རྗེ་དྲ་བར་བསམ། །འདི་འདྲའི་སྦྱོར་བ་རབ་འབད་ན། །ལྷ་ཡི་རྫུ་འཕྲུལ་ [110a.5]དག་ཀྱང་རྡུགས། །ཚངས་དང་བརྒྱ་བྱིན་སྟོབས་ཆེ་བ། །མནན་ཏེ་ཤར་དང་སྟེང་དུ་བཅིངས། །དོན་དམ་གསུམ་གྱི་སྦྱོར་བ་ཡིས། །ཕྱོགས་བཅུ་ཐམས་ཅད་བཅིང་བར་འགྱུར། །ཞེས་གསུངས་སོ། །དེ་ནས་ས་ཕྱོགས་དེའི་ལྷ་དང་ཀླུ་ལ་སོགས་པ་ཐམས་ཅད་ཞི་ཞིང་མཉེས་པར་བྱ་བའི་ཕྱིར། །དེ་ནས་ [110a.6]ཤིན་ཏུ་བརྩེར་ལྡན་པས། །སྦྱིན་སྲེག་གིས་ནི་མཉེས་པར་བྱ། །ཞེས་གསུངས་ཏེ། བདག་ཉིད་དང་པོའི་སངས་རྒྱས་ཀྱི་ང་རྒྱལ་དང་ལྡན་པས་སེམས་ཅན་ཐམས་ཅད་ལ་བརྩེ་བ་དང་ལྡན་པར་བྱ་ཞེས་པའི་དོན་ཏོ། །དེས་འོག་ནས་གསུངས་པའི་དོན་རྣམས་ཀྱིས་སྦྱིན་པའི་ནི་ལྷ་ཀླུ་ལའོ། །སྲེག་པ་ [110a.7]ནི་ས་ཕྱོགས་ཀྱི་སྐྱོན་ནོ། །མཉེས་པ་ནི་དཀྱིལ་འཁོར་གྱི་ལྷའོ། །དེ་ཅིང་འགྱུར་ཞེ་ན། ཚོགས་བསོགས་པའི་ཡན་ལག་གོ། །དེ་ལྟར་བགེགས་བསྲུངས་ཕྱོགས་ཀྱི་སྐྱོན་ཞི་བར་བྱས་ནས་གཟོད་རྟེན་གྱི་དཀྱིལ་འཁོར་སྤྲུལ་པར་བསྟན་པའི་ཕྱིར། །དེ་ནས་བསྙེན་པ་རབ་འབད་དེ། །ཞེས་ [110b] [110b.1]གསུངས་པ་ཁོ་ནའོ། །དགྱེས་པ་བསྐྱེད་ཕྱིར་འཁོར་ལོ་ནི། །ཞེས་གསུངས་ཏེ། དགྱེས་པ་བསྐྱེད་པ་ནི་བདེ་བར་གཤེགས་པའོ། །འཁོར་ལོ་ནི་སྦྲུལ་ཚོགས་དགུའི་ལྷ་ཚོའོ། །དེ་གང་སྤྲུལ་ཞེ་ན། ནམ་མཁར་བསྒོམ་པར་བྱ་བ་ཡིན། །ཞེས་པ་ཁོ་ནའོ། །ཇི་ལྟར་སྦྲུལ་ཞེ་ན། མཁའ་ལ་ [110b.2]འདུས་པའི་འཁོར་ལོ་དང་བཅས་པ་ཞེས་པ་སྟེ་སྤྲུལ་ལོ། །དེའི་རྐྱེན་བསྟན་པའི་ཕྱིར། །ལག་གི་འདུ་བྱེད་བསྒོམ་ཅིང་བྱ། །འབྲུ་ལྔ་གནས་པའི་སོར་མོ་ལ། །ཞེས་གསུངས་པ་སྟེ། ལག་གི་འདུ་བྱེད་ནི་ཕྱག་རྒྱའོ། །སོར་མོ་ནི་ལྔའོ། །འབྲུ་ལྔ་ལྡན་པ་ནི་གུང་མོ་ལ་ཨོཾ། །མཛུབ་མོ་ལ་ཧཱུཾ། སྲིན་ [110b.3]ལག་ལ་ཧྲཱིཿ། མཐེ་བོང་ལ་ཏྲཱཾ། མཐེ་ཆུང་ལ་ཨཿབསམ་པར་བྱའོ། །མཛུབ་མོའི་མཐེ་ཆུང་མདུད་བྱས་ལ། །ཞེས་པ་ནི་རྡོ་རྗེ་འཁོར་ལོའི་ཕྱག་རྒྱ་སྟེ། རྡོ་རྗེ་ཁུ་ཚུར་གཉིས་བཅིངས་ལ། །མཛུབ་མོ་མཐེ་ཆུང་ལུ་གུ་རྒྱུད། །འདི་ནི་རྡོ་རྗེ་འཁོར་ལོ་སྟེ། །དཀྱིལ་འཁོར་ཐམས་ཅད་སྒྲུབ་བྱེད་ཡིན། །ཞེས་པ་ཁོ་ [110b.4]ནའོ། །ཐམས་ཅད་འདུས་པའི་སྦྱོར་བ་ཡིས། །ཞེས་པ་ནི་གསང་སྔགས་དང་ཕྱག་རྒྱ་དང་། ཏིང་ངེ་འཛིན་གསུམ་དགོས་པའི་དོན་ཏོ། །ལྔ་ནི་བདེ་བར་གཤེགས་པ་ལྔའོ། །གཅིག་ནི་དེའི་ངོ་བོ་དབྱེར་མེད་པའོ། །དྲུག་ནི་དབུགས་དབྱུང་དྲུག་གོ། །གསུམ་ནི་སྐུ་གསུང་ཐུགས་སོ། །དཀྱིལ་ [110b.5]འཁོར་འདི་ནི་སྔགས་ལས་བསྐྱེད། །ཅེས་པ་ནི། ཨོཾ་མཉྫུ་ཤྲཱི་བཛྲ་ཙཀྲ་ཧཱུཾ། ཞེས་པའོ། །བླ་མ་དང་མཉམ་སྦྱོར་འདུས་པས། ཞེས་པ་ནི་དཀྱིལ་འཁོར་གྱི་གཙོ་བོ་གང་ཡིན་པའི་དབུ་རྒྱན་དུ་བླ་མ་བཞུགས་པའོ། །མཉམ་པར་ཤིན་ཏུ་བསྟོད་པར་བྱ། །ཞེས་པ་ནི་མཉམ་པ་ནི་བླ་མ་དང་པོ། [110b.6]ཤིན་ཏུ་བསྟོད་པ་ནི་འོག་ནས་འབྱུང་བའི་འདུད་ལ་སོགས་པའོ། །ཨེ་མ་ནི་ནམ་མཁར་སྤྲུལ་པའི་ལྷ་ཚོགས་ལ་ངོ་མཚར་ཆེ་བའོ། །ཨེ་མ་ཡན་ལག་འདུས་པའི་ཞེས་པའི་དོན་དུ་ལུས་ངག་ཡིད་གསུམ་གྱིས་སྤྲུལ་ལོ་ཞེས་པའི་དོན་ཏོ། །སྦྱོར་བ་འདི་ནི་ཞེས་པ། སྦྱོར་བ་ནི་མཆོད་པའི་རྟེན་སྤྲུལ་པའོ། ། [110b.7]འདི་ནི་གསུམ་ལས་འབྱུང་ཞེས་པ་ནི་སྔགས་དང་། ཕྱག་རྒྱ་དང་ཏིང་ངེ་འཛིན་གསུམ་ལས་འབྱུང་ངོ་ཞེས་པའི་དོན་ཏོ། །དེ་ལྟར་སྤྲུལ་པ་དེ་མདུན་གྱི་ནམ་མཁར་དབང་པོའི་མངོན་སུམ་དང་འདྲ་བར་ཡིད་ཀྱིས་མངོན་སུམ་དུ་གསལ་བར་བྱ་བའི་ཕྱིར། དེ་ལྟར་མཁའ་ལ་གསལ་བཀོད་དེ། །དབང་པོའི་ [111a] [111a.1]མངོན་སུམ་འདྲར་མཐོང་ནས། །ཞེས་པ་ཁོ་ནའོ། །དེ་ལྟར་བསམ་པ་དེ་ལ་མཆོད་བསྟོད་བྱ་བའི་ཕྱིར། དགའ་བས་མཆོད་ལ་གླུ་ཡིས་བསྟོད། །ཅེས་གསུངས་ཏེ། དགའ་བས་མཆོད་པ་ནི་མེ་ཏོག་ལ་སོགས་པ་དང་ཡིད་ཀྱིས་མཆོད་པས་སོ། །གླུ་ཡིས་བསྟོད་པ་ནི་མཆོད་པ་དེའི་ [111a.2]རྗེས་ལ་འདུད་ཀྱིས་བསྟོད་པ་སྟེ། མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་ལ་སོགས་པ་ཉི་ཤུས་བསྟོད་པའོ། །དང་པོས་མཆོད་ཅིང་ཞེས་པ་ནི་གོང་མ་ལ་སྙེགས་སོ། །རྗེས་ཡི་རང་དང་བཤགས་པ་དང་། །གསོལ་གདབ་ཕྱག་ལ་སོགས་པ་དང་། །བཅུ་ཡི་ཡན་ལག་ཀུན་འདུས་པས། ། [111a.3]ཞེས་པའི་དོན་ནི་འདི་ལྟ་སྟེ། །གང་དག་ཕྱོགས་རྣམས་ཐམས་ཅད་ན། །དུས་རྣམས་ཐམས་ཅད་རབ་བཞུགས་པའི། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་བཅས་ལ་ཕྱག་འཚལ་ལོ། །འཁོར་བ་ཐོག་མ་མེད་པ་ནས། །སྔོན་ཆད་སྡིག་པ་ཅི་བགྱིས་པ། །སངས་རྒྱས་རྣམས་ཀྱི་ [111a.4]སྤྱན་སྔར་ནི། །དུས་རྣམས་ཀུན་གྱིས་བཤགས་པར་བགྱི། །སེམས་ཅན་ཀུན་ལ་བརྩེ་བའི་ཕྱིར། །སངས་རྒྱས་ཆོས་དང་ཚོགས་མཆོག་སྟེ། །བླ་མེད་དཀོན་མཆོག་གསུམ་པོ་ལ། །བྱང་ཆུབ་བར་དུ་སྐྱབས་སུ་མཆི། །སངས་རྒྱས་ཀུན་དང་དེ་ཡི་སྲས། །ཤེས་རབ་ཅན་ལ་བདག་དབུལ་གྱིས། ། [111a.5]དེ་རྣམས་ཀུན་གྱིས་བདག་བཞེས་ལ། །འབྲས་བུ་རྒྱ་ཆེན་སྩལ་དུ་གསོལ། །སྡུག་བསྔལ་ཆུ་བོའི་ནང་གནས་པ། །སྐྱེ་བོ་ཀུན་ཏུ་སྦྱོང་བ་དང་། །རྒྱལ་བའི་བཞེད་པ་བསྒྲུབ་པའི་ཕྱིར། །བྱང་ཆུབ་ཏུ་ནི་སེམས་བསྐྱེད་ནས། །སངས་རྒྱས་ཀུན་དང་དེ་ཡི་སྲས། །ཤེས་རབ་ཆེ་དང་ཉན་ཐོས་དང་། །རང་ [111a.6]རྒྱལ་རྣམས་དང་སྐྱེ་བོ་ཡི། །དགེ་བ་དེ་ལ་རྗེས་སུ་སྨོན། །བྱང་ཆུབ་སྙིང་པོར་ཉེར་གནས་པའི། །གང་དག་བྱང་ཆུབ་ཕྱོགས་རྟོགས་པའི། །བདག་གིས་གསོལ་བས་རྒྱལ་བ་རྣམས། །འཁོར་ལོ་དམ་པ་བསྐོར་དུ་གསོལ། །བྱ་བ་ཐམས་ཅད་བྱས་ནས་ནི། །སངས་རྒྱས་མྱ་ངན་འདས་གནས་པ། ། [111a.7]བདག་གིས་གསོལ་བས་རྒྱས་པ་ཀུན། །ནམ་ཡང་མྱ་ངན་མི་འདའ་གསོལ། །སྲིད་པའི་བཙོན་རའི་ནང་གནས་པའི། །སེམས་ཅན་ཐམས་ཅད་བདེ་གྱུར་ཅིག །རྣམ་པའི་མཆོག་རྣམས་ཀུན་ལྡན་པའི། །སངས་རྒྱས་སྐལ་དང་ལྡན་པར་འགྱུར། །སངས་རྒྱས་ཀུན་དང་དེ་ཡི་སྲས། །འགྲོ་ལ་ [111b] [111b.1]ཕན་ཕྱིར་གཞེས་རྣམས་ཀྱིས། །ཇི་ལྟར་སྨོན་པ་དེ་བཞིན་དུ། །ལུས་ངག་ཡིད་གསུམ་ལེགས་པར་སྨོན། །ཕྱག་ལ་སོགས་པའི་བསོད་ནམས་གང་། །ཚད་མེད་བདག་གིས་ཅི་བསགས་པ། །ཇི་ལྟར་མགོན་པོས་མཁྱེན་པ་བཞིན། །བྱང་ཆུབ་ཏུ་ནི་དེ་དག་བསྔོ། །ཡན་ལག་བཅུ་པོ་དེ་དག་ལ། ། [111b.2]སྐྱེ་བོ་གང་ཞིག་དད་མོས་པ། །ཉེས་པའི་བག་ཆགས་ཀུན་དག་ནས། །གསང་བ་མཉེས་པའི་སྣོད་དུ་རུང་། །ཞེས་ཆོ་ག་འདུས་པའི་རྒྱུད་ཆེན་པོ་ལས་གསུངས་སོ། །བདག་ཉིད་རུང་བར་འགྱུར་བ་དང་། །ཞེས་པ་ནི། དེ་ལྟར་ཚོགས་བསགས་པས་ཉོན་མོངས་པའི་སྒྲིབ་པ་བྱང་ནས་སྣོད་དུ་རུང་བར་བྱའོ། །དེ་ [111b.3]ལ་དགའ་བའི་མདངས་ཀྱིས་བསྟོད་པར་བྱ་བའི་ཕྱིར། ཚིགས་བཅད་གླུ་ཡིས་བསྟོད་པ་བྱ། །ཞེས་པ་ནས། ཕྱག་ན་རྡོ་རྗེས་ཞུས་པའི་ལེའུ་བཅུ་དགུ་པ་ནས། །འདི་སྐད་དུ། ཉིད་ཀྱི་མདངས་བཟང་ཚོགས་ཀྱིས་ནི། །ཟླ་བ་རྒྱས་པ་ཟིལ་གནོན་ཅིང་། །རིག་པ་རྣམ་པར་གསལ་གྱུར་པ། །འཇམ་ [111b.4]དཔལ་ཁྱེད་ལ་ཕྱག་འཚལ་ལོ། །མ་སྒྲིབས་ཟུར་ཕུད་གསལ་བ་ལ། །ནོར་བུ་འབར་བའི་སྐུ་མངའ་བ། །མི་དམིགས་པ་ནི་ཀུན་གྱི་སྐུ། །འཇམ་དཔལ་ཁྱོད་ལ་ཕྱག་འཚལ་བསྟོད། །བདུད་རྩི་འདྲ་ཞིང་འཇམ་ལ་བཟང་། །ཡིད་འོང་གསུང་གི་སྒྲ་སྒྲོགས་པ། །དམ་པའི་ཆོས་ཀྱི་རིན་ཆེན་མཛོད། ། [111b.5]འཇམ་དཔལ་ཁྱེད་ལ་ཕྱག་འཚལ་བསྟོད། །གང་གཱའི་ཆུ་ཐིགས་ལྟར་གྲངས་མེད། །འཇིག་རྟེན་ཁམས་ན་རྣམ་པར་བཞུགས། །ཉོན་མོངས་དྲི་མ་རབ་སྤངས་པ། །འཇམ་དཔལ་ཁྱེད་ལ་ཕྱག་འཚལ་བསྟོད། །མཆེ་བ་གཙིགས་ཤིང་བསྒྱིངས་པ་ཡི། །འཇིགས་པའི་སྐུ་ཡི་ཚུལ་གྱིས་ནི། ། [111b.6]གཤིན་རྗེའི་དྲེགས་པ་འཇོམས་མཛད་པ། །འཇམ་དཔལ་ཁྱེད་ལ་ཕྱག་འཚལ་བསྟོད། །རང་གི་སྤྱན་དང་མདངས་འདྲ་བའི། །ཨུཏྤལ་སྔོན་པོ་རབ་མཛེས་པའི། །ལྷུང་བཟེད་ཕྱག་མཆོག་རབ་བསྣམས་པའི། །འཇམ་དཔལ་ཁྱེད་ལ་ཕྱག་འཚལ་བསྟོད། །ཕྱོགས་བཅུར་བཞུགས་པའི་ [111b.7]སངས་རྒྱས་ལ། །རྒྱ་ཆེར་བསྟོད་པའི་སྤྱོད་པ་གང་། །འགྲོ་བའི་བླ་མ་སྟོན་པ་པོ། །འཇམ་དཔལ་ཁྱེད་ལ་ཕྱག་འཚལ་བསྟོད། །ཅེས་གསུངས་སོ། །བྱས་པའི་འབྲས་བུ་ཡོད་པར་བྱ་བའི་ཕྱིར། །དགྱེས་པའི་བདག་གི་ལྷ་རྣམས་ཀྱིས། སྙན་པའི་ཚིག་གིས་ལེགས་པར་བསམ། །ཞེས་པ། [112a] [112a.1]དགྱེས་པ་ནི་གོང་དུ་བསྟོད་པའི་ལྷ་རྣམས་སོ། །སྙན་པའི་ཚིག་ནི་ཚོགས་བསོགས་པའི་ལྷ་རྣམས་ཀྱིས་རིགས་ཀྱི་བུ་ལེགས་སོ་ཞེས་གནང་བ་བྱིན་པར་བསམ་མོ། །དེ་ལྟར་གནང་བསྩལ་བས་དོན་དང་ལྡན་ཏེ། དྲིན་ལ་ལན་གྱིས་གླན་པའི་ཕྱིར། །དྲིན་གྱི་ཚུལ་གྱིས་སླར་བསྟོད་པ། ། [112a.2]ཞེས་གསུངས་སོ། །དེ་ཡང་གཙོ་བོ་ལྔའི་སྒོ་ནས་བསྟོད་པའི་ཕྱིར། །བྱང་ཆུབ་སེམས་ནི་རབ་ཏུ་བཟུང་། །ཞེས་པ་དང་པོ་ནས་བརྩམས་ཏེ། སངས་རྒྱས་རོལ་སྟོན་ཁྱོད་ལ་འདུད། །ཅེས་པའི་བར་གྱིས་བསྟོད་དོ། །དེ་ནས་ཡུམ་བཞིའི་སྒོ་ནས་བསྟོད་པའི་ཕྱིར། མེ་ལོང་ཡེ་ཤེས་ངོ་བོ་ཉིད། ། [112a.3]ཅེས་པ་ནས་བརྩམས་ཏེ། རྡོ་རྗེ་དྲ་བའི་ལས་ཁྱོད་འདུད། །ཅེས་པའི་བར་གྱིས་བསྟོད་དོ། །དེ་ནས་ནང་གི་སེམས་དཔའ་བཅུ་དྲུག་ལ་བསྟོད་པའི་ཕྱིར། སྟོང་པའི་རང་བཞིན་འདོད་ཆགས་ཆེ། །ཞེས་པ་ནས་བརྩམས་ཏེ། ཡེ་ཤེས་སྐུ་ཉིད་ཁྱོད་ལ་འདུད། །ཅེས་པའི་བར་གྱིས་བསྟོད་དོ། །དེ་ནས་ལྷ་ [112a.4]མོ་བརྒྱད་ལ་བསྟོད་པའི་ཕྱིར། །སྦྱིན་བདག་ཆེན་པོ་གཙོ་བོ་སྟེ། །ཞེས་པ་ནས། རྡོ་རྗེ་དག་བྱེད་ཁྱོད་ལ་འདུད། །ཅེས་པའི་བར་གྱིས་བསྟོད་དོ། །སྒོ་སྐྱོང་བཞི་པོའི་སྒོ་ནས་བསྟོད་པ་བསྟན་པའི་ཕྱིར། །རྡོ་རྗེ་ལྕགས་ཀྱུ་འདྲེན་པ་ཆེ། །ཞེས་པ་ནས། རྡོ་རྗེ་འབེབས་པ་ཁྱོད་ལ་འདུད། །ཅེས་པའི་ [112a.5]བར་གྱིས་བསྟོད་དོ། །དེ་ནས་བསྐལ་བཟངས་ཀྱི་སེམས་དཔའ་བཅུ་དྲུག་ལ་བསྟོད་པའི་ཕྱིར། བྱམས་ཆེན་རང་བཞིན་དཔག་ཏུ་མེད། །ཅེས་པ་ནས། ཕ་རོལ་ཕྱིན་བཅུའི་གཙོ་ལ་འདུད། །ཅེས་པའི་བར་གྱིས་བསྟོད་དོ། །དེ་ལྟར་བསྟོད་པ་བྱེད་པ་དེ། །ཞེས་པ་ནི། རིགས་ཀྱི་བུ་གང་ལ་ལས་ [112a.6]དཀྱིལ་འཁོར་གྱི་ལྷ་ཚོགས་ལ་དེ་ལྟར་བསྟོད་པ་བྱས་པས་ཕྱིར་རིང་པོ་མི་ཐོགས་པར་འཇམ་དཔལ་ཆོས་ཀྱི་རྒྱལ་པོ་ཐོབ་པར་བྱ་བའི་ཕྱིར། འཁོར་པོ་འདུས་པའི་གཙོ་མཆོག་འགྲུབ། །ཅེས་གསུངས་སོ། །གོང་དུ་གསུངས་པ་དེ་རྣམས་ནི་ཆོས་སྤྱོད་ཐམས་ཅད་ཀྱི་མཆོག་ཀྱང་ཡིན་ལ་ཐམས་ཅད་ཀྱི་ཐོག་ [112a.7]མར་གྱུར་པས། དེ་དག་ནི་མཆོག་གི་རྒྱལ་པོ་ཞེས་པ་གསུངས་སོ། །དེས་ཡང་དག་པའི་དོན་ལ་སྦྱོར་ཞིང་དཀྱིལ་འཁོར་ཐམས་ཅད་ཀྱི་ཐོག་མར་ཡང་འགྲོ་ལ། དེ་ལ་མ་ཡེངས་པར་གསལ་དགོས་པས་ན། སྦྱོར་པའི་འཁོར་ལོ་དང་པོའི་ཏིང་ངེ་འཛིན་ཏོ་ཞེས་གསུངས་སོ། །དེ་ནས་ཕྱག་ལྔས་ [112b] [112b.1]ནམ་མཁའི་འཁོར་ལོ་ལ་མཉེས་པར་བྱ་བའི་ཕྱིར། དེ་ནས་རིམ་པ་འདི་ལྡན་པས། །ཞེས་པ་ནི། དེ་ནས་གོང་དུ་བསྟོད་པ་བྱས་པའི་དེ་མ་ཐག་པའོ། །རིམ་པ་འོག་ནས་འབྱུང་བའི་ཕྱག་རྒྱའོ། །གནས་གང་དུ་ཞེ་ན། ཐམས་ཅད་ནམ་མཁའི་འཁོར་ལོའི་ཚོགས། །ཞེས་གསུངས་སོ། ། [112b.2]བཙལ་ནས་ཅི་བྱེད་ཅེ་ན། མ་ལུས་མཉེས་པར་བྱ་བའི་ཕྱིར། །ཞེས་གསུངས་སོ། །དེ་གང་གིས་བཙལ་ཞེ་ན། ཕྱག་ལྔ་ཞེས་པ་ནི་འདི་ལྟ་སྟེ། །དཔལ་གྱི་འབྱུང་གནས་འཇམ་དཔལ་ཀུན་གྱི་དཔལ། །མཐའ་དག་བྱམས་པས་ཁྱབ་བ་འཇམ་པའི་ངང་། །འཇམ་དང་དཔལ་དུ་གྲགས་པས་དོན་དང་ལྡན། ། [112b.3]འཇམ་དཔལ་ཡང་དག་དཔལ་ལ་ཕྱག་འཚལ་ལོ། །གཞོན་ནུ་སྐུ་མདོག་གསེར་མདངས་འོད་ལམ་ལམ། །རིན་ཆེན་མཆོག་གི་རྒྱན་སྤྲས་ས་ལེར་གསལ། །བྱིན་ཆེ་དང་བའི་ཐུགས་མངའ་འཛུམ་པ་པོ། །གཟི་བརྗིད་མཛེས་དང་ལྡན་ལ་ཕྱག་འཚལ་ལོ། །ཡོན་ཏན་གཏེར་གྱི་ཨུཏྤལ་ཕྱག་ན་བསྣམས། ། [112b.4]པདྨ་རྒྱས་འདྲའི་སྙིང་པོའི་གདན་ལ་བཞུགས། །ལྷ་ཡི་ལྷར་གྱུར་ཆ་ལུགས་ལྷ་ལས་འཕགས། །བལྟ་བས་མི་ངོམས་ཁྱེད་ལ་ཕྱག་འཚལ་ལོ། །གཞོན་ནུ་སྤྲུལ་པའི་མཚན་དང་དཔེ་བྱད་ལ། །གང་ཞིག་ཡུད་ཙམ་མཐོང་བས་འདུན་པ་སྐྱེ། །གང་ལ་ཅི་འདུལ་དེ་ལྟར་སྤྲུལ་མཛད་པ། །ཐབས་ཀྱིས་ [112b.5]འདྲེན་པའི་མགོན་ལ་ཕྱག་འཚལ་ལོ། །རྣམ་རྟོག་སྤྲོས་ལས་མཁྱེན་པའི་ཡེ་ཤེས་བརྙེས། །ཡོད་མེད་རྟག་ཆད་མཐའ་ལ་མི་འཇུག་པ། །དམིགས་མེད་མཉམ་པས་ཆོས་ཀྱི་དབྱིངས་སུ་གནས། །ཡང་དག་དོན་ཆེན་སྟོན་ལ་ཕྱག་འཚལ་ལོ། །ཞེས་པའོ། །ཚོམ་བུ་ལྔ་ཞེས་པ་ནི་རིགས་ལྔའོ། [112b.6]མཉེས་པར་བྱ་ཞེས་པ་ནི་ཕྱག་ལྔའོ། དེ་ལྟར་ཚོགས་བསགས་ནས། ད་ནི་བྱང་ཆུབ་མཆོག་ཏུ་སེམས་བསྐྱེད་པ་བསྟན་པའི་ཕྱིར། དེ་ལྟར་མཉེས་པའི་འོག་ཏུ་ནི། །ཞེས་གསུངས་པ་སྟེ། གོང་མ་ལྟར་ཕྱག་ལྔས་ཡེ་ཤེས་ཀྱི་ལྷའི་དཀྱིལ་འཁོར་མཉེས་པའི་རྗེས་ལ། གཟོད་བྱང་ཆུབ་མཆོག་ཏུ་ [112b.7]སེམས་བསྐྱེད་དོ་ཞེས་པའི་དོན་ཏོ། །ཡེ་ཤེས་སེམས་དཔའ་མངོན་འདོད་པས། །ཞེས་པ་ནི་དེ་ལྟར་ཚོགས་བསགས་ནས། ཡེ་ཤེས་སེམས་དཔའ་ཐོབ་པར་བྱའོ་སྙམ་པའི་བསམ་པས། དེ་གང་གི་སྒོ་ནས་ཐོབ་ཅེ་ན། སེམས་ཅན་ཡོངས་བསྒྲལ་བསམ་པ་དང་། །ཞེས་གསུངས་ཏེ། སེམས་ [113a] [113a.1]ཅན་ཐམས་ཅད་འཁོར་བའི་འདམ་ལས་བྱང་ཆུབ་ཀྱི་སྐམ་སར་བསྒྲལ་བར་བྱའོ་སྙམ་སྟེ། སྨོན་པ་བྱང་ཆུབ་མཆོག་ཏུ་སེམས་བསྐྱེད་པའོ། །དེས་ན། བྱང་ཆུབ་དམ་པར་སྨོན་པར་བྱ། །ཞེས་གསུངས་སོ། །དེ་ནས་འདི་དག་གི་ཚིག་ཏུ་བརྗོད་ཅེས་པ་ནི་འོག་ནས་འབྱུང་བའི་ [113a.2]སངས་རྒྱས་བྱང་ཆུབ་སེམས་དཔའ་རྣམས། །ཞེས་པ་ནས། །མ་ལུས་པར་ནི་སྐྱེ་བར་བགྱི། །ཞེས་པའི་བར་དུ་བསྟན་ཏེ་གོ་སླའོ། །དེ་ནི་འཇུག་པ་བྱང་ཆུབ་ཏུ་སེམས་བསྐྱེད་པའོ། །དེ་ནས་སྡོམ་པ་བཟུང་སྟེ། དེའི་དོན་ནི་རྣམ་པ་དྲུག་སྟེ། དཀྱུས་ཉིད་ན་གསལ་བས་འདིས་མ་བཀྲོལ་ལོ། །དེ་ལྟར་ [113a.3]སྡོམ་པ་བཟུང་ནས་དབང་ནོད་པར་བྱ་བའི་ཕྱིར། །དེ་ལྟར་སྡོམ་པ་བཟུང་བྱས་ལ། །ཞེས་པ་གསུངས་ཏེ། དེ་ལྟར་ནི་གོང་དུ་གསུངས་པ་རྣམས་སོ། །སྡོམ་པ་ནི་ལུས་ངག་ཡིད་གསུམ་གྱིའོ། །འཛིན་པ་ནི་གོང་དུ་གསུངས་པ་དེ་རྣམས་བདག་གིས་བཟུང་ལ། གཟོད་འོག་ནས་འབྱུང་བའི་དབང་ [113a.4]བླང་ཞེས་པའི་དོན་ནོ། །དེ་ཡང་གང་ཞེ་ན། རིམ་པར་ཞེས་གསུངས་ཏེ། དང་པོར་སེམས་བསྐྱེད། །དེ་ནས་འཇུག་པ། དེ་ནས་བུམ་པའི་དབང་། །དེ་ནས་གསང་བའི་དབང་། །དེ་ནས་ཤེས་རབ་ཡེ་ཤེས་ཀྱི་དབང་། །དེ་ནས་བཞི་པའི་དོན་བསྟན། དེ་ལྟར་བརྟུལ་ཞུགས་བཞི་དང་ལྡན་པ་ལ་དབང་དང་དམ་ཚིག་ [113a.5]འབྲེལ་བར་བསྟན་པས་ན་རིམ་པར་ཞེས་གསུངས་སོ། །དེ་ཡང་གང་བསྐུར་ཞེ་ན། དབང་བསྐུར་བཞི་ཞེས་གསུངས་ཏེ། །དེ་ཡང་དོན་དང་ལྡན་པ་ལ་ཐོག་མ་བུམ་པ་ནས་བཞི་པའི་བར་བསྐུར་བ་ནས། ཀུན་རྫོགས་ཞེས་གསུངས་པ་ཁོ་ནའོ། །འོ་ན་དེའི་ངོ་བོ་གང་ཡིན་ཞེ་ན། །སྤྱི་གཙུག་ཅེས་པས་བུམ་ [113a.6]པའི་དབང་དང་། ཐབས་དང་ཤེས་རབ་གཉིས་མེད་པའི། །ཞེས་པས་གསང་བའི་དབང་དང་། ལྷ་བསྙེན་བྱ་ཞེས་པས་ཤེས་རབ་ཡེ་ཤེས་ཀྱི་དབང་དང་། དོན་དམ་ཞེས་པས་བཞི་པའི་དོན་བསྟན་པའོ། །དོན་དེ་ལྟར་ཤེས་པར་བྱས་ལ་སྐབས་འདིར་དབང་བཅུ་པོ་བསྐུར་བར་བྱས་ཏེ། མེ་ཏོག་དོར་བ་ནི། ཧཱུཾ་པྲ་ [113a.7]ཏཱི་ཙྪ་བཛྲ་ཧཱུཾ། དེ་ནས་མནའི་དམ་ཚིག་སྦྱིན་པ་ནི། ཨོཾ་བཛྲ་ས་མ་ཡ་ཧཱུཾ། དེ་ནས་འདིས་གདོང་གཡོགས་དགྲོལ་བར་བྱ། ཨོཾ་བཛྲ་ཧ་སྱ་ཨུངྒྷ་ཏཱ་ཡ་ཧཱུཾ་ཕཊ། ཨོཾ་བཛྲ་པཱ་ཤྱ་ཧོཿ། ཨོཾ་བཛྲ་ས་མ་ཡ་ཧཱུཾ་ཕཊ། ཨོཾ་བཛྲ་ཀ་ལ་ཤ་ཨ་བྷི་ཥིཉྩ་ཧཱུཾ། ཨོཾ་བུདྡྷ་ཀ་ལ་ཤ་ཨ་བྷི་ཥིཉྩ་ཨོཾ། །ཨོཾ་རཏྣ་ཀ་ལ་ཤ་ཨ་བྷི་ཥི་ཉྩ་ཏྲཱཾ། ཨོཾ་པདྨ་ཀ་ལ་ [113b] [113b.1]ཤ་ཨ་བྷི་ཥིཉྩ་ཧྲཱིཿ། ཨོཾ་ཀརྨ་ཀ་ལ་ཤ་ཨ་བྷི་ཥིཉྩ་ཨཿ། ཨོཾ་བཛྲ་ཨ་བྷི་ཥིཉྩ་ཧཱུཾ། ཨོཾ་བུདྡྷ་ཨ་བྷི་ཥིཉྩ་ཨོཾ། ཨོཾ་རཏྣ་ཨ་བྷི་ཥིཉྩ་ཏྲཱཾ། ཨོཾ་པདྨ་ཨ་བྷི་ཥིཉྩ་ཧྲཱིཿ། ཨོཾ་ཀརྨ་ཨ་བྷི་ཥྀཉྩ་ཨཿ། ཨོཾ་རཏྣ་མཱ་ལ་ཨ་བྷི་ཤིན་ཏྲཱཾ། ཨོཾ་བཛྲ་པཊྚ་ཨ་བ་ལོཾ་བ་ན་ཨ་བྷི་ཥིཉྩ་ཏྲཱཾ། ཨོཾ་བཛྲ་མུ་དྲ་ཨ་བྷི་ཥིཉྩ་ཧཱུཾ། ཨོཾ་བུདྡྷ་མུ་དྲ་ཨ་བྷི་ཥིཉྩ་ [113b.2]ཨོཾ། ཨོཾ་རཏྣ་མུ་དྲ་ཨ་བྷི་ཥིཉྩ་ཏྲཱཾ། ཨོཾ་པདྨ་མུ་དྲ་ཨ་བྷི་ཥྀཉྩ་ཧྲཱཾཿ། ཨོཾ་ཀརྨ་མུ་དྲ་ཨ་བྷི་ཥིཉྩ་ཨཿ། ཨོཾ་བཛྲ་ནཱ་མ་ཨ་བྷི་ཥིཉྩ་ཧཱུཾ། ཨོཾ་བུདྡྷ་ནཱ་མ་ཨ་བྷི་ཥིཉྩ་ཨོཾ། ཨོཾ་རཏྣ་ནཱ་མ་ཨ་བྷི་ཥིཉྩ་ཏྲཱཾ། ཨོཾ་པདྨ་ནཱ་མ་ཨ་བྷི་ཥིཉྩ་ཧྲཱཾཿ། ཨོཾ་ཀརྨ་ནཱ་མ་ཨ་བྷི་ཥིཉྩ་ཨཿ། ཨོཾ་བཛྲ་ཙཀྲ་ཨ་བྷི་ཥིཉྩ་ཧཱུཾ་ [113b.3]བྷྲཱུཾ། ཨོཾ་བཛྲ་ཙཀྲ་ཨ་དྷི་བ་ཏི་ཨ་བྷི་ཥིཉྩ་ཨོཾ་ཨོཾ་ཨོཾ། ཨོཾ་བཛྲ་ཙཀྲ་ཨ་དྷི་པ་ཏི་ཨ་བྷི་ཥིཉྩ་ཧཱུཾ་ཧཱུཾ་ཧཱུཾ། ཨོཾ་བཛྲ་ཙཀྲ་ཨ་དྷི་པ་ཏི་ཨ་བྷི་ཥིཉྩ་ཏྲཱཾ་ཏྲཱཾ་ཏྲཱཾ། ཨོཾ་བཛྲ་ཙཀྲ་ཨ་དྷི་པ་ཏི་ཨ་བྷི་ཥིཉྩ་ཧྲཱིཿཧྲཱིཿཧྲཱིཿ ཨོཾ་བཛྲ་ཙཀྲ་ཨ་དྷི་པ་ཏི་ཨ་བྷི་ཥིཉྩ་ཨཿཨཿཨཿ། ཨོཾ་བཛྲ་དྷ་ར་ཎ་ཨ་བྷི་ཥིཉྩ་ཧཱུཾ། ཨོཾ་ [113b.4]བུདྡྷ་དྷ་ར་ཎ་ཨ་བྷི་ཥིཉྩ་ཨོཾ། ཨོཾ་རཏྣ་དྷ་ར་ཎ་ཨ་བྷི་ཥིཉྩ་ཏྲཱཾ། ཨོཾ་པདྨ་དྷ་ར་ཎ་ཨ་བྷི་ཥིཉྩ་ཧྲཱིཿ། ཨོཾ་ཀརྨ་དྷ་ར་ཎ་བྷི་ཥིཉྩ་ཨཿ། ཨོཾ་བཛྲ་གུ་ཧྱ་ཨ་བྷི་ཥིཉྩ་ཧཱུཾ། ཨོཾ་བུདྡྷ་གུ་ཧྱ་ཨ་བྷི་ཥིཉྩ་ཨོཾ། ཨོཾ་རཏྣ་གུ་ཧྱ་ཨ་བྷི་ཥིཉྩ་ཏྲཱཾ། ཨོཾ་པདྨ་གུ་ཧྱ་ཨ་བྷི་ཥིཉྩ་ཧྲཱིཿ། ཨོཾ་ཀརྨ་གུ་ཧྱ་ [113b.5]ཨ་བྷི་ཥིཉྩ་ཨཿ། ཨོཾ་པྲ་ཛྙོ་པ་ཡོ་ས་མ་ཡོ་ག་ཨ་བྷི་ཥིཉྩ་ཧཱུཾ་ཨཱཿཞེས་པས་དབང་བསྐུར་བར་བྱའོ། །དེ་ཡང་མདོ་ལས། །རྣམ་བཅུ་དབང་ལྡན་ཆེ་བ་པོ། །ཞེས་གསུངས་སོ། །དེ་ནས་ཚོགས་སོགས་ཀྱི་དཀྱིལ་འཁོར་རྣམས་བདག་ལ་བསྒྲུབ་པར་བསྟན་པའི་ཕྱིར། དེ་ནས་ནམ་ [113b.6]མཁའི་འཁོར་ལོའི་ཚོགས། །ཞེས་པ་གསུངས་ཏེ། དེ་ནས་ནི་དབང་བསྐུར་བའི་དེ་མ་ཐག་པའོ། །ནམ་མཁའི་འཁོར་ལོའི་ཚོགས་ནི་ཚོགས་མདུན་ན་སྤྲུལ་པའི་ལྷ་རྣམས་སོ། །མ་ལུས་བདག་གིས་བསྡུ་བར་བྱ། །ཞེས་པ་ལ་སོགས་པའི་ཚིག་བཞི་གོ་སླའོ། །སླར་གསོ་ལུས་ [113b.7]དང་ལྡན་པར་བྱ། །ཞེས་པ་རྣམ་སྨིན་གྱི་ཕུང་པོ་སྦྱངས་ནས་ཡེ་ཤེས་ཀྱི་ལུས་སྣང་ལ་རང་བཞིན་མེད་པ་གསལ་ལ་རྙོག་པ་མེད་པ་འཇའ་ཚོན་ལྟ་བུ་བསམ་པར་བྱའོ། །དེ་ཡང་རྡོ་རྗེ་གུར་གྱི་རྒྱུད་ལས། ཇི་ལྟར་ཆུ་ནང་ཟླ་བ་དེ། །བདེན་མིན་བརྫུན་པ་མེད་པ་ལྟར། །དེ་བཞིན་རྣལ་འབྱོར་བསྒོམ་པ་ [114a] [114a.1]ཡི། །ལུས་ཀྱང་རང་བཞིན་རྟོག་པ་མེད། །ཅེས་གསུངས་སོ། །དེ་ནས་མངོན་པར་བྱང་ཆུབ་པ་ལྔ་བསྒོམ་པ་ནི་དཀྱུས་ཉིད་ན་གསལ་ལོ། །དེ་ནས་ཞེས་པ་ནི་མངོན་པར་བྱང་ཆུབ་པ་ལྔ་བསྒོམ་པའི་དེ་མ་ཐག་པའོ། །དངོས་འབྱུང་གཟུགས་ཞེས་པ་ནི། །དང་པོའི་སངས་ [114a.2]རྒྱས་ཀྱི་ང་རྒྱལ་ལོ། །འཁྲུལ་པའི་ཚུལ་དུ་ཞེས་པའི་དམ་ཚིག་གཉིས་ནི་དང་པོའི་སངས་རྒྱས་ཀྱི་ཐུགས་ཀ་ནས་ཨ་ལས་འོད་འཕྲོས། །ཆོས་ཐམས་ཅད་རང་བཞིན་གྱིས་འོད་གསལ་བར་བྱས་པའོ། །སྒྱུ་མའི་ཚུལ་དུ་ནམ་མཁའ་ལ་ཟླ་བའི་དཀྱིལ་འཁོར་གྱི་སྟེང་ན་ཨཱ་ལི་དང་ཀཱ་ལི་སྐར་ [114a.3]མའི་རྣམ་པ་ལྟ་བུར་གྱུར་ཏེ་དེ་ཀ་ལ། སྐར་མའི་ཚོགས་འདྲ་རབ་བསྒོམས་ཏེ། །ཞེས་གསུངས་པའོ། །དེ་ལས་འབྱུང་བའི་ཞེས་པ་ལ་སོགས་པའི་ཚིག་བཅུ་ནི་དཀྱུས་ན་གསལ་ལོ། །བྱང་ཆུབ་སེམས་ནི་རབ་བསྐྱེད་དང་། ཞེས་པའི་གོང་དུ་གསུངས་པ་ལྟར་སེམས་ཅན་རྣམས་ཀྱི་དུག་རྣམ་ [114a.4]པ་ལྔ་འོད་ཟེར་གྱིས་སྦྱངས་ནས། གཟོད་བྱང་ཆུབ་མཆོག་ཏུ་སེམས་བསྐྱེད་དུ་གཞུག་པའོ། །དེ་ཡང་ཇི་ལྟར་གཞུག་ཅེ་ན། སངས་རྒྱས་བྱང་ཆུབ་སེམས་དཔའ་རྣམས། །ཞེས་པས་སོ། །དེ་ནས་སྡོམ་པ་གཟུང་བ་དང་བཅུ་ཡོངས་སུ་དག་པ་ནི་སྔོན་དུ་བསྟན་པས་སོ། །སངས་རྒྱས་རྫུ་འཕྲུལ་ [114a.5]རབ་བསྟན་ཏེ། །ཞེས་པ་ནི་མཛད་པ་བཅུ་གཉིས་སོ། །གཞན་གོ་སླའོ། །འཁོར་ལོའི་ཚོགས་ཞེས་པ་ནི་འཁོར་ལོའི་རིམ་པ་གསུམ་དང་ལྡན་པའོ། །ཕྲེང་བ་བཞི་དང་ལྡན་པའི་ཞེས་པ་ནི་འཁོར་ལོའི་རིམ་པ་གསུམ་སྒོ་བར་མའི་མུ་ཁྱུད་དང་བཞིའོ། །རྡོ་རྗེ་དབྱིངས་དང་ལྷ་ཞེས་པ་ནི་རྡོ་རྗེ་དབྱིངས་ [114a.6]དང་ལྷ་རྣམས་འདྲ་བའི་ཕྱིར་རོ། །དེ་ནས་ཕྱི་རོལ་དགོད་བྱ་བ། །ཞེས་པ་ནི་ཕྱི་མ་མན་ཆད་ཀྱི་རྒྱན་བསྟན་པའོ། །རྡོ་རྗེ་ཕྲེང་བས་ཡོངས་བསྐོར་བའི། །ཞེས་པ་ནི་ཕྱིའི་རྡོ་རྗེའི་ར་བའོ། །ཀ་བ་བརྒྱད་དང་ལྡན་པ་ལ། །ཞེས་པ་ནི། གཞལ་ཡས་ཁང་གི་ནང་དུའོ། །དེ་ཡང་གང་དུ་གཟུགས་ཤེ་ན། ཕྱོགས་རེ་རེ་ [114a.7]ནས་རྩིག་པ་ལ་བརྟེན་པའི་ཀ་བ་གཉིས་ཞེས་གསུངས་སོ། །རྡུལ་ཚོན་ལྔ་པོ་ཉིད་ཀྱིས་ནི། །ཞེས་པ་ནི་རྩིག་པའོ། །དྲ་བ་དྲ་ཕྱེད་དག་གིས་ཀླུབས། །ཞེས་པ་ནི་དབུས་ན་མཆོག་ཡོད་པ་ནི་དྲ་བ་ཡིན་ལ་དབུས་ན་མཆོག་མེད་པ་ནི་དྲ་བ་ཕྱེད་པའོ། །དཀྱིལ་འཁོར་ནི་ཕྱི་རོལ་དུ་ཞེས་པ་ནི་ཕྱིའི་དཀྱིལ་འཁོར་སྒོ་ [114b] [114b.1]རྒྱན་བསྟན་པའོ། །ཇི་ལྟར་གསུངས་པའི་རྟགས་ཐམས་ཅད། །ཁྱད་པར་དུ་ནི་མངོན་བསྡུས་པ། །དེ་ནི་ཐམས་ཅད་བྱ་བ་ཡིན། །ཞེས་པ་ནི་རྟ་བབས་ནི་མཆོད་རྟེན་ལྟ་བུའམ། འོན་ཏེ་ཅི་མཛེས་པར་བྱས་ལ། རིན་པོ་ཆེའི་ཏོག་དང་ཆུན་འཕྱངས་དང་མཛེས་པའི་གཡུ་བྱ་ཁ་སྤྲོད་དང་། དར་ལ་སོགས་པས་ཕྱིའི་ [114b.2]སྐུ་ལ་བརྒྱན་པའོ། །སྒོ་ཡི་རྒྱན་དང་ཏྭ་ར་ན། །ཤིན་ཏུ་གཅིག་ཉིད་མི་བྱའོ། །ཞེས་པ་ནི་ནང་གི་དཀྱིལ་འཁོར་ལ་རྟ་བབས་ལ་སོགས་པའི་རྒྱན་གདགས་པར་བྱ་བ་མ་ཡིན་པའོ། །དེ་ཡང་རྣལ་འབྱོར་གྱི་རྒྱུད་ལས་གསུངས་པ་ནང་གི་དཀྱིལ་འཁོར་ནི་ཕྱིའི་དཀྱིལ་འཁོར་གྱི་ཕྱེད་ཀྱི་ཚད་ལ་གྲུ་བཞི་པ་ [114b.3]ལ་སྒོ་བཞི་པ་རྟ་བབས་མེད་པའོ་ཞེས་གསུངས་སོ། །ནང་གི་སྒོ་ལ་རྒྱན་མེད་ལ་ཕྱིའི་སྐུ་ལ་རྒྱན་ལ་སོགས་པས་བརྒྱན་པ་བསྟན་པའི་ཕྱིར། དེའི་སྒོ་རྣམས་སོ། །ཏྭ་ར་ན་རྣམས་གདགས་པ་ཡིན། །ཞེས་པ་ཁོ་ནའོ། །དེ་ནས་ལྷ་རྣམས་ཀྱི་གདན་བསྐྱེད་པ་ནི་གོ་རིམས་བཞིན་ལྷ་རྣམས་ཀྱི་ཞེས་པ་ནས། ཡིད་ཀྱི་ [114b.4]ཡུལ་དེ་གོམས་པར་བྱ། །ཞེས་པའི་བར་གྱིས་བསྟན་ཏེ་དཀྱུས་ན་གསལ་ལོ། །དེ་དག་ནི་གཞིའི་ཏིང་ངེ་འཛིན་ཏོ་ཞེས་པ་ནི་དེ་དག་གི་གོང་དུ་གསུངས་པའི་ཏིང་ངེ་འཛིན་རྣམས་སོ། །གཞི་ནི་ཡང་དག་པའི་གཞི་ཡིན་པས་གཞིའོ། །དེ་དོན་ནན་ཏན་དུ་མ་གཡེངས་པར་བྱ་དགོས་པས་ཏིང་ངེ་འཛིན་ཏོ། །དེ་ནས་རྐྱེན་གྱིས་ [114b.5]བསྒྲུབ་པ་བསྟན་པའི་ཕྱིར། དེ་ནས་རྐྱེན་གྱིས་བསླང་བ་ནི། །ཞེས་གསུངས་ཏེ། དེ་ནས་དེ་ནི་དེ་མ་ཐག་པའོ། །རྐྱེན་གྱིས་བསླང་བ་ནི་འོག་ནས་འབྱུང་བའི་ལྷ་ཚོགས་བསྐྱེད་པའི་རྐྱེན་ནོ། །དེ་དབུས་འཁོར་ལོ་ནི་འཁོར་ལོ་དྲུག་ཏུ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་བདག་ཉིད་ཅན་ནོ། །དེ་ཡང་དག་པ་སྟེ། [114b.6]ཤེས་པ་ནི་དཀྱིལ་འཁོར་གྱི་གཙོ་བོ་རྣམ་པར་སྣང་མཛད་བསྐྱེད་དོ་ཞེས་པའི་དོན་ཏོ། །དེ་ཡང་ཇི་ལྟར་བསྐྱེད་ཅེ་ན། སྟོང་བའི་ངང་ལས་ཆུ་ལ་ཆུ་བུར་རྡོལ་བའི་ཚུལ་དུ་པཾ་ལས་སེང་གེའི་ཁྲིའི་སྟེང་དུ་པཾ་ལས་སྣ་ཚོགས་པདྨ་ལས་ཉི་མ། ཨ་ལས་ཟླ་བའི་དཀྱིལ་འཁོར་ཉ་གང་བ་ལྟ་བུ། དེ་སྟེང་རིག་པ་ཨ་དཀར་པོར་ [114b.7]གྱུར་པ་ལས་འཁོར་ལོ། དེ་ཡོངས་སུ་གྱུར་པ་ལས་གཙོ་བོ་རྣམ་པར་སྣང་མཛད་དུའོ། །དེ་ཉིད་ལ། པདྨ་སེང་གེའི་ཟླ་སྟེང་དུ། །ཨཱཿལས་བསྐྱེད་པའི་རྟག་པ་པོས། །གཙོ་བོ་རྣམ་པར་སྣང་མཛད་ཆེ། །ཞེས་པ་དེ་སྐད་ཅེས་བྱའོ། །རྣམ་སྣང་དེ་ཡང་ཅི་འདྲ་ཞེ་ན། རྣམ་ཐར་བཞི་ལྡན་ཀུན་དུ་ཞལ། །ཞེས་གསུངས་ཏེ། ། [115a] [115a.1]རྣམ་ཐར་བཞི་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འོད་གསལ་བ་དང་བཞིའོ། །ལྡན་པ་ནི་དེ་མངའ་བའོ། །ཀུན་དུ་ཞལ་ནི་ཞལ་བཞི་བའོ། །དེ་ཡང་ཕྱག་ན་རྡོ་རྗེས་ཞུས་པའི་ལེའུ་བདུན་པ་ནས། ཕྱོགས་བཞིའི་སློབ་དཔོན་ [115a.2]མཉེས་བྱའི་ཕྱིར། །རྣམ་སྣང་ཞལ་བཞི་ཕྱོགས་བཞིར་གཟིགས། །ཞེས་གསུངས་སོ། །ལྷག་མ་ནི་གོ་སླའོ། །དེ་ནས་རྣམ་པར་སྣང་མཛད་ཀྱི་ཐུགས་ཀར་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་དྷཱིཿདཀར་པོ་དྷཱིཿཡོངས་སུ་གྱུར་པ་ལས་དང་པོའི་སངས་རྒྱས་སྟོབས་ལྔ་དང་ལྡན་པའི་རྟགས་སུ་ཞལ་ལྔ་པ་ [115a.3]བསྒོམ་པར་བྱའོ། །དེ་ཀ་ལ་རྣམ་སྣང་ཆེན་པོའི་ཐུགས་ཀར་ཟླ་བའི་དཀྱིལ་འཁོར་གྱི་དཀྱིལ་དུ་ཡི་གེ་དྷཱིཿདཀར་པོ་ལས་དང་པོའི་སངས་རྒྱས་ཞལ་ལྔ་པ་ཞེས་གསུངས་པ་ཁོ་ནའོ། །ལྷག་མ་ནི་གོ་སླའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་བུ་སྟི་རེ་རེ་བསྣམས་པའོ་ཞེས་པ་ནི། ཤེས་རབ་ཀྱི་ཕ་རོལ་ཏུ་ཕྱིན་ [115a.4]པའི་གཞུང་དུམ་བུ་བཞིར་བགོས་ཏེ། དེ་ཡང་གང་ཞེ་ན། གླེང་གཞིའི་དུམ་བུ་དང་། སྟོང་པ་ཉིད་ཀྱི་དུམ་བུ་དང་། རྣམ་དག་གི་དུམ་བུ་དང་། མཚན་དཔེའི་དུམ་བུ་དང་བཞི་རྣམས་སོ། །དེ་ཡང་ཨུཏྤ་ལ་རེའི་སྟེང་ནའོ། །དེའི་ཐུགས་ཀར་ཤེས་རབ་འཁོར་ལོ་བསྒོམ་སྟེ་ཇི་སྐད་དུ། །དང་པོའི་ [115a.5]སངས་རྒྱས་ཐུགས་ཀ་རུ། །ཤེས་རབ་འཁོར་ལོ་བསྒོམ་པར་བྱ། །ཞེས་པ་ལ་སོགས་པའི་དོན་ནི་འདི་ཡིན་ཏེ། རྒྱུ་རྟེན་འབྲེལ་བཅུ་གཉིས་ཀྱི་གཉེན་པར་སྒྲའི་ཡི་གེ་བཅུ་གཉིས་བསྒོམས་པས་འབྲས་བུ་ས་མཆོག་བཅུ་གཉིས་ཐོབ་སྟེ། དེ་ཡང་རྡོ་རྗེ་སྙིང་པོ་རྒྱན་གྱི་རྒྱུད་ལས། ཀུན་དུ་འོད་ཀྱིས་ [115a.6]ཆེན་པོ་ཉོན་མོངས་པ་ཐམས་ཅད་བསྲེགས་ཏེ་ཉི་མ་དང་འདྲའོ། །གཉིས་པ་བདུད་རྩིའི་འོད་དུག་ལ་རྩི་གཏོང་བ་དང་འདྲ་སྟེ། ཟླ་བའི་འོད་གསལ་བ་དང་འདྲའོ། །ས་གསུམ་པ་སྟེ་ནམ་མཁའི་འོད་ནི་ཆོས་ཀྱི་དབྱིངས་ནམ་མཁའ་བཞིན་དུ་སོ་སོར་སྣང་བའོ། །ས་བཞི་པ་རྡོ་རྗེའི་འོད་དེ་ཡིད་བདེ་བ་ [115a.7]སྟེ། བདེ་བ་སྟོང་པ་དབྱེར་མེད་པའོ། །ས་ལྔ་པ་ནི་རིན་པོ་ཆེའི་འོད་དེ་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་སྟེ་དགོས་པ་ཐམས་ཅད་སྐོང་བར་དབང་བསྐུར་བའོ། །ས་དྲུག་པ་སྟེ་པདྨའི་འོད་དེ་འདོད་ཆགས་དང་མཚན་མའི་རྣམ་པར་རྟོག་པ་ཐམས་ཅད་འཇོམས་པའོ། །ས་བདུན་པ་ལས་ཀྱི་འོད་དེ་སངས་རྒྱས་ [115b] [115b.1]ཀྱི་ཕྲིན་ལས་ཐམས་ཅད་རྫོགས་པའོ། །ས་བརྒྱད་པ་དཔེ་མེད་པ་སྟེ་དཔེ་ལས་འདས་པ་དཔེ་རུ་ཡོད་པ་མ་ཡིན་པའོ། །ས་དགུ་པ་དཔེ་དང་ལྡན་ཏེ། ཐམས་ཅད་སོ་སོར་འབིགས་བའོ། །ས་བཅུ་པ་ནི་ཤེས་རབ་ཀྱི་འོད་ཅེས་བྱ་སྟེ། ཤེས་རབ་ཀྱིས་ནི་དོན་ཐམས་ཅད་འབྱེད་པའོ། །ས་བཅུ་གཅིག་པ་ནི་ [115b.2]བླ་ན་མེད་པའི་ས་རབ་ཏུ་འོད་གསལ་བ་ཐམས་ཅད་མཁྱེན་པ་ཉིད་དོ། །ས་བཅུ་གཉིས་པ་ནི་རྣལ་འབྱོར་གྱི་ཡེ་ཤེས་རབ་ཏུ་སོ་སོར་རིག་པ་རྫོགས་པའོ་ཞེས་གསུངས་སོ། །དེ་ལྟར་རྒྱུ་འབྲས་ཀྱི་དོན་བཤད་ནས། །ད་ནི་འཁོར་ལོ་བསྒོམ་པའི་ཐབས་བཤད་དེ། དོན་བྱས་སླར་འདུས་ཞེས་པ་ལ་སོགས་པ་ [115b.3]དཀྱུས་ཉིད་ན་གསལ་ལོ། །ས་མཆོག་བཅུ་གཉིས་རྫོགས་རྟགས་སུ། །ཞེས་པ་ནི། ས་མཆོག་བཅུ་གཉིས་ནི་གོང་དུ་གསུངས་པའོ། །སྒྲ་ཡིག་བཅུ་གཉིས་དགོད་པར་བྱ། །ཞེས་པ་ནི་འོག་ནས་འབྱུང་བ་འདི་ཡིན་ཏེ། ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨཾ་ཨཿཞེས་ [115b.4]གསུངས་ཏེ། དེའི་དོན་ནི་འཇམ་དཔལ་སྒྱུ་འཕྲུལ་དྲ་བའི་རྒྱུད་ཕྱི་མ་ལས་གསལ་བར་གསུངས་ཏེ་དེ་ལ་འཇུག་པར་བྱའོ། །འཇམ་དཔལ་འདི་ནི་དཔལ་གྱི་སྐུ། །ཐུན་མོང་མ་ཡིན་གཉིས་མེད་ཁྱབ་པའི་ཆོས། །དུས་གསུམ་བཏང་སྙོམས་རྒྱལ་བ་ཀུན་གྱི་ཡབ། །ཆོས་དབྱིངས་ཡུམ་ཉིད་སེམས་ [115b.5]དཔའ་སྲས་མཆོག་སྟོན། །བློ་དང་ལྡན་པ་གང་ཞིག་མདོ་འདི་ནི། །མངོན་སུམ་ཚད་མར་བཞག་ནས་མཐོང་འདོད་པ། །སྒྱུ་འཕྲུལ་དྲ་བའི་འཁོར་ལོའི་ཚུལ་བཞིན་དུ། །ཡི་གེ་འཁོར་ལོའི་དོན་གྱིས་འཇམ་དཔལ་ལོ། གདོད་ནས་དག་ཅིང་སྐྱེ་བ་མེད་པ་ཡི། །ཨ་ཨཱ་ཞེས་པ་འདུས་མ་བྱས་པའི་ཆོས། ། [115b.6]རྒྱུ་ཉིད་མེད་པས་འབྲས་བུ་མི་ཚོལ་ཕྱིར། །ཨ་ལྟར་མཉམ་གཞག་ཆོས་ཀྱི་སྐུ་ཉིད་དེ། །དོན་དམ་དབྱིངས་ཉིད་མཁའ་འདྲ་དམིགས་མེད་ཁྱབ། །འབྱུང་བ་རང་བཞིན་མེད་པར་གནས་པ་ལས། །འཇམ་དཔལ་རལ་གྲིས་བཏབ་ནས་གཅོད་པ་ལྟར། །ཨ་ཡི་གུ་གུ་ཐུགས་རྗེ་རང་ཉིད་འཕྱོ། །ཨི་ཨཱི་ [115b.7]ཞེས་པ་ཆོས་ཀྱི་ཡུམ་ཉིད་ལམ། །ཤེས་རབ་ཕ་རོལ་ཕྱིན་པ་བསམ་པའི་དབྱིངས། །ལྷ་དང་མི་ལ་བླང་དོར་མེད་ཚུལ་གྱིས། །ཐུན་མོང་མ་ཡིན་སྟོང་ནས་ཀུན་དུ་བཟང་། །མེད་པའི་ངང་ཉིད་མེད་ལས་འབྱུང་བ་ཡི། །ཨུ་ཨཱུ་ཞེས་པ་མེད་པའི་སྙིང་པོ་འབྱུང་། །ཡེ་ཤེས་ཆེན་པོ་ཡོད་མེད་མཐའ་ལས་འདས། ། [116a] [116a.1]ཆེ་བའི་ངང་གིས་འགྲོ་ཀུན་དགེ་ལ་སྦྱོར། །གཉིས་དང་གཉིས་མེད་གཏན་ནས་བརྗོད་བྲལ་བའི། །གྲུ་གསུམ་ཨེ་ཡི་རང་བཞིན་ཉིད་མི་གཡོ། །ཨེ་ཨཻ་ཞེས་པ་ཐ་སྙད་བསམ་བརྗོད་བྲལ། །སེམས་དང་སེམས་ནི་འཇམ་དཔལ་ཏིང་འཛིན་ཏོ། །ཐབས་དང་ཤེས་རབ་སྒྱུ་འཕྲུལ་དྲ་ [116a.2]བའི་ཚོགས། །ཨོ་ཨཽ་ཞེས་པ་འདུ་འཕྲོ་འཁྲུག་མེད་ཅིང་། །འཇའ་ཚོན་རྣམ་པར་སོ་སོར་ཡིད་བཞིན་སྦྱོར། །འཇམ་དཔལ་རྣམ་པར་རོལ་བའི་བདེ་བ་ཆེ། །རྣལ་འབྱོར་ཆེན་པོ་ཡེ་ཤེས་འབྱོར་བའི་དཔལ། །ནམ་མཁའ་མི་དམིགས་ཨཾ་སྟེ་ཡེ་ཤེས་བརྗོད། །ཡེ་ཤེས་མ་འདྲེས་ཨ་ཡིག་དབྱིངས་སུ་འདྲེས། །སྟོང་ [116a.3]ཉིད་ཅི་ལའང་མ་རེག་ལྷུན་གྱིས་གྲུབ། །དོན་ཀུན་འབྱོར་བས་བླང་དོར་མེད་པ་ཡི། །བདག་ཉིད་རང་བཞིན་གཞན་དང་མཉམ་པས་ན། །བསམ་གྱིས་མི་ཁྱབ་མི་གནས་མི་སེམས་ན། །འཇམ་དཔལ་ཉིད་དང་ཡོན་ཏན་རྫོགས་པར་མཉམ། །ཞེས་གསུངས་ཏེ། ཨ་ནི་གདོད་མ་ནས་སྐྱེ་བ་མེད་ཅིང་འདུས་མ་བྱས་པ། [116a.4]རྒྱུས་མ་བསྒྲུབས་པའི་ཕྱིར་འབྲས་བུ་བཙལ་དུ་མེད་པས་གདོད་མ་ནས་ཆོས་ཉིད་བདེ་བ་ཆེན་པོའོ། །ཨི་ནི་དེ་ཉིད་ནམ་མཁའ་ལྟར་མི་དམིགས་པའི་ཕྱིར་ཤེས་རབ་ཆེན་པོས་དེ་ལྟར་གཅོད་ཅིང་མི་དམིགས་པའི་ཐུགས་རྗེ་ཆེན་པོ་འཕྲོ་བས་ཤེས་རབ་ཀྱི་རང་བཞིན་ནོ། །ཨུ་ནི་དེ་ལྟ་བས་ན་ཀུན་དུ་བཟང་པོ་བྱང་ཆུབ་ [116a.5]སེམས་ཀྱི་རང་བཞིན་ཏེ། མཚན་མ་ལྡང་བ་ལ་མི་དོར། མི་ལྡང་བ་ལ་མི་གནས་ཀུན་དུ་བཟང་པོའི་མཐའ་ལས་འདས་པ་ཆེན་པོའོ། །ངང་གིས་འགྲོ་བ་ཀུན་ཀྱང་བདེ་བ་ཆེན་པོའི་རང་བཞིན་ལ་སྦྱོར་བའོ། །ཨེ་དེ་ལྟར་བསམ་བརྗོད་དང་བྲལ་བས་སེམས་དང་སེམས་ཀྱི་རྣམ་པར་རྟོག་པ་གཡོ་བ་མེད་པ་ [116a.6]སྟེ། འཇམ་དཔལ་གྱི་རང་བཞིན་དུ་གནས་པའོ། །ཨོཾ་ནི་དེ་ལྟར་ཡིན་པས་ཐབས་ཀྱི་ཆོ་འཕྲུལ་སྣ་ཚོགས་སུ་སྣང་བས། ཐམས་ཅད་དུ་ཡང་ཐབས་ཤེས་རབ་སྒྱུ་འཕྲུལ་དྲ་བའི་ཚོགས་ཡིན་ཏེ། ནམ་མཁའི་འཇའ་ཚོན་བཞིན་དུ་འགྲོ་བ་སྣ་ཚོགས་ཀྱི་ཡིད་དང་མཐུན་པར་སྦྱོར་བ་རྣམས་རོལ་བའི་ [116a.7]ཆོ་འཕྲུལ་བདེ་བ་ཆེན་པོར་མཉམ་པའོ། །ཨཾ་ཐམས་ཅད་འབྱུང་གནས་ནམ་མཁའི་མཛོད་དོ། །ཨཿནི་དེ་ལྟར་ན་ཤེས་རབ་དང་ཡེ་ཤེས་ཆོས་ཐམས་ཅད་རག་མ་ལུས་པའི་འདུས་པ་སྟེ། དེ་ལྟར་ཡི་གེ་བཅུ་གཉིས་ཀྱི་ཆོས་ཐམས་ཅད་གདོད་མ་ནས་བླང་དོར་མེད་པར་རང་བཞིན་གྱིས་སངས་རྒྱས་པ་སྟེ། [116b] [116b.1]དེ་ལྟར་ཡིན་པར་བློ་ལ་གསལ་ཞིང་མི་གཡོན་དེས་འཇམ་དཔལ་ཉིད་ཡིན་ནོ། །ཡང་རྒྱུད་དེ་ཉིད་ལས་གསུངས་པ། ཇི་ལྟར་སྒྱུ་འཕྲུལ་དྲ་བ་ལས། །འཇམ་དཔལ་ཆོས་ཀྱི་སྙིང་པོ་འདི། །རྒྱལ་བ་རྣམས་ཀྱི་ཡབ་དང་ཡུམ། །དོན་གྱི་ཤེས་རབ་དབྱིངས་ཀྱི་ཕྱིར། །ཐབས་ཀྱི་ཡེ་ཤེས་ཀུན་འབྱུང་བ། །ཡི་གེ་ [116b.2]འཁོར་ལོ་དོན་རྣམས་ཀྱིས། །སྒྱུ་འཕྲུལ་དྲ་བ་ཉིད་དུ་གསལ། །གྲགས་མ་ཐག་ཏུ་དོན་དེར་གསལ། །ཨ་ཨཱ་ཞེས་པ་འཇམ་དཔལ་ཉིད། །རང་བཞིན་ཆོས་ཉིད་སྐུ་ཡི་དབྱིངས། །ཨི་ཨཱི་ཞེས་པ་གཡོ་བ་མེད། །མི་བསྐྱོད་པ་ལས་ཡུམ་དུ་གསལ། །ཨུ་ཨཱུ་ཞེས་པ་སྐྱེ་བ་མེད། །དག་པའི་ངང་ཉིད་ [116b.3]ཀུན་དུ་བཟང་། །རྒྱུད་ལས་རྒྱལ་བའི་སེམས་དཔའ་ཆེ། །ཡེ་ཤེས་ངང་ཉིད་གཅིག་པའོ། །ཨེ་ཨཻ་ཞེས་པ་མཁའ་ལ་བསྐོར། །འབྲས་བུ་མེད་པས་མཁའ་ལ་གནས། །དེ་མ་ཐག་ལས་གསལ་བའི་རྐྱེན། །འཇམ་དབྱངས་ཕྲ་བའི་དཔལ་གྱུར་པ། །ཨོ་ཨཽ་ཞེས་པ་ཨེ་ལས་འདས། །ཨོཾ་ [116b.4]ཞེས་གསང་སྔགས་ཐབས་ཆེན་བསྟན། །ཨེ་དང་ཨོ་ཡི་རང་བཞིན་དབྱིངས། །མུཾ་ནི་ངོ་བོ་ཉིད་ཀྱི་མཁའ། །ཨ་ལས་རྣམ་པར་རོལ་པས་བསྟན། །ཨོཾ་གྱི་གཉིས་མེད་སྦྱོར་བ་ཡིས། །ཟབ་མོའི་རྡོ་རྗེ་ཏིང་འཛིན་མཐའ། །མ་ཞེས་མཉམ་དང་མི་མཉམ་མེད། །འཇམ་དཔལ་ཡེ་ཤེས་རྡོ་རྗེ་རྫོགས། ། [116b.5]སྒྱུ་འཕྲུལ་དྲ་བའི་འཁོར་ལོ་འདི། །མྱ་ངན་འདས་དང་འཁོར་བ་ལ། །མི་གནས་རྡོ་རྗེ་རྩེ་མོ་ཅན། །བསམ་རྩོལ་སྒྲུབ་པ་མེད་པ་ཡི། །དབྱིངས་ཉིད་གཞན་ན་ཡོངས་སུ་རྫོགས། །ཞེས་གསུངས་ཏེ། ཚུལ་འདི་ཡང་སྔ་མ་བཞིན་དུ་ཤེས་པར་བྱའོ། །དེ་ལ་རེ་ཞིག་ཡང་ཨ་ཨཱ་ཞེས་པ་འཇམ་དཔལ་ཆོས་ཀྱི་ [116b.6]སྐུའོ། །ཨི་ཨཱི་ནི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མའོ། །ཨུ་ཨཱུ་ནི་བྱང་ཆུབ་ཀྱི་སེམས་ཀུན་དུ་བཟང་པོའི་རང་བཞིན་ཏེ། སེམས་ཉིད་སེམས་དཔའ་ཆེན་པོའི་རང་བཞིན་ནོ། །ཨེ་ཨཻ་ནི་འདུ་འབྲལ་མེད་པའི་མཁའ་ལ་སྦྱོར་བའོ། །ཨོ་ཨཽ་ནི་དེ་ལས་འདུས་པའི་ཡེ་ཤེས་འཁོར་ལོ་ [116b.7]ཚོགས་ཆེན་གྱི་ཐབས་མཁས་པའི་འཕྲུལ་པ་རང་བཞིན་གྱིས་འཕྲོ་བའོ། །ཨོ་ལ་ཨཾ་སྦྱར་ན་ཨོཾ་དུ་འགྱུར་ཏེ། དེ་ནི་གསང་སྔགས་ཀྱི་མཐུའོ། །ཨཾ་གི་ཀླད་ཀོར་ནི་མུཾ་སྟེ་ཆོས་ཐམས་ཅད་ངོ་བོ་ཉིད་ཀྱིས་གྲོལ་བའོ། །ཨོཾ་ཨཾ་ནི་ཡོན་ཏན་ཐམས་ཅད་འབྱོར་པ་གཉིས་སུ་མེད་པའི་ཏིང་ངེ་འཛིན་ཏོ། །ཀླད་ [117a] [117a.1]ཀོར་གྱི་མ་ནི་ཆོས་མཉམ་པ་ཉིད་བར་མི་མཉམ་པ་དབྱར་མེད་པ་སྟེ། འདི་ལྟ་བུའི་འཇམ་དཔལ་རྡོ་རྗེ་ནི་མི་གནས་པའི་ཡེ་ཤེས་རྡོ་རྗེ་རྩེ་མོ་སྟེ་འདི་ལྟ་བུའི་དོན་ཁོང་དུ་ཆུད་པར་བྱ་སྟེ། ཅི་སྤྱད་པ་ཐམས་ཅད་ཐབས་ཤེས་རབ་སྒྱུ་འཕྲུལ་དྲ་བ་ཆོས་ཉིད་ཀྱིས་བརྒྱན། ཡེ་ཤེས་ཀྱི་ [117a.2]རོལ་པ་བཀག་པ་མེད་པའི་ཆོས་ཉིད་ལྷུན་གྱིས་གྲུབ་པར་རྟོགས་ནས། གཟོད་ཡེ་ཤེས་ཀྱི་ངོ་བོ་དང་ལྡན་པའོ་ཞེས་འཇམ་དཔལ་སྒྱུ་འཕྲུལ་དྲ་བའི་རྒྱུད་ཕྱི་མ་ལས་གསུངས་སོ། །འཁོར་ལོ་ལྕེ་ལ་བསམ་པ་ནི་ཞེས་པ་དེ་ལྟར་མུ་ཁྱུད་ཀྱི་ཡིག་འབྲུ་བཀོད་ནས་རྩིབས་ལ་འོག་ནས་འབྱུང་བའི་སྔགས་གཙོ་བོ་དྲུག་པོ་འདི་ [117a.3]དགོད་དེ་ཞེས་པའི་དོན་ཏོ། །དང་པོའི་ལྕེ་ཞེས་པ་ནི་གཙོ་བོའི་མདུན་གང་ཡིན་པའོ། །བརྩམས་ནས་ནི་ཞེས་པ་དང་པོའི་ལྕེ་ལ་བཛྲ་ཏཱི་ཀྵཱ་ཡ་ཏེ་ན་མཿཞེས་པ་དགོད་པའི་དོན་ཏོ། །ལྷག་མ་ནི་གོ་སླའོ། །དེ་ནས་ཡེ་ཤེས་སེམས་དཔའ་གསལ་བར་བསྟན་པའི་ཕྱིར། །དེ་ནས་འཁོར་ལོ་དེ་དབུས་སུ། །ཞེས་པ་ [117a.4]དང་པོ་ནས་བརྩམས་ཏེ། ཡི་གེ་ཨ་ནི་གསལ་བཀོད་དེ། །ཞེས་པའི་བར་གསལ་ཏེ་དཀྱུས་ཉིད་གསལ་ལོ། །དེ་ནས་འཕྲོ་འདུའི་སྒོ་ནས་སེམས་གཟུང་བ་བསྟན་པའི་ཕྱིར། དེ་ནས་འཁོར་ལོ་ལ་གནས་སྔགས། །ཞེས་པ་ནས། དེ་ཉིད་བརྟན་པར་བདག་ཉིད་བསྒོམ། །ཞེས་པའི་བར་གྱིས་བསྟན་ཏེ་གོ་སླའོ། ། [117a.5]དེ་ལ་འབྲས་བུ་འབྱུང་བར་བསྟན་པའི་ཕྱིར། དེ་ལྟར་སྤྱོད་པའི་སེམས་དཔའ་ནི། ཞེས་པ་ནས། །ཉེ་བར་བཟུང་ནས་མངོན་སྣང་ངོ་། །ཞེས་པའི་བར་གྱིས་བསྟན་ཏེ་གོ་སླའོ། །དེ་དག་ནི་སྒྱུ་འཕྲུལ་དྲ་བ་མངོན་པར་བྱང་ཆུབ་པའི་རིམ་པ་སྟེ། སྦྱོར་བ་དང་པོའི་ཏིང་ངེ་འཛིན་ཏོ། །དེ་ནས་དཀྱིལ་འཁོར་རྒྱལ་མཆོག་བསྒོམ་པ་ [117a.6]བསྟན་པའི་ཕྱིར། དེ་ནས་ད་ནི་དཀྱིལ་འཁོར་གྱི་ལྷ་དག་གི་ངོ་བོ་གསང་སྔགས་ཀྱི་སྒོ་ནས་ཞེས་པ་ལ་སོགས་པ་གསུངས་པའི་དོན་ནི་འདི་ཡིན་ཏེ། དཀྱིལ་འཁོར་གྱི་ལྷའི་ངོ་བོ་ཨ་ལས་བསྐྱེད་པའི་ཕྱིར་ཏེ། གཙོ་བོ་རྣམ་པར་སྣང་མཛད་དེ་ཡིག་འབྲུ་དང་། ཕྱག་མཚན་དང་། ཏིང་ངེ་འཛིན་གསུམ་ལས་བསྐྱེད་ [117a.7]དོ། །ཡང་ན་ཟླ་བའི་དཀྱིལ་འཁོར་དང་ཨ་དང་ཕྱག་མཚན་གསུམ་ལས་བསྐྱེད་དོ། །ཡང་ན་ལུས་ངག་ཡིད་གསུམ་ལས་བསྐྱེད་དོ། །ལྷ་ཐམས་ཅད་རྡོ་རྗེའི་ཆོ་ག་ཡན་ལག་གསུམ་ལས་བསྐྱེད་དེ་གསལ་བར་བསྒོམ། རྣམ་པར་སྣང་མཛད་ཀྱི་ཐུགས་ཀར་དང་པོའི་སངས་རྒྱས་གདོང་ལྔ་པ་ཕྱག་བརྒྱད་པ་དེའི་ [117b] [117b.1]ཐུགས་ཀར་ཤེས་རབ་ཀྱི་འཁོར་ལོ་གསལ་བར་བསྒོམ། དེའི་ལྟེ་བ་ལ་ཡེ་ཤེས་སེམས་དཔའ་ཞལ་དྲུག་པ་སྐུ་མདོག་དུང་དང་བ་སོ་ལྟར་དཀར་བ། རྒྱན་ཐམས་ཅད་ཀྱིས་བརྒྱན་པ་ཨིནྡྲ་ནཱི་ལའི་རལ་པ་མངའ་བ། ཕྱག་གཉིས་ན་ཨུཏྤ་ལ་སྔོ་དམར་མངའ་བ་ཞི་བའི་ངང་ཚུལ་དང་ལྡན་པའོ། །དེའི་ཐུགས་ཀར་ཟླ་བའི་ [117b.2]དཀྱིལ་འཁོར་ཉ་གང་བ་བསྒོམ། །དེ་ལ་ཡི་གེ་ཨ་གནས་པ་དེ་ལས་འོད་འཕྲོས་པས་ཟླ་བའི་དཀྱིལ་འཁོར་སྣང་བར་བྱས། ཡེ་ཤེས་སེམས་དཔའ་སྣང་བར་བྱས། དང་པོའི་སངས་རྒྱས་སྣང་བར་བྱས། གཙོ་བོ་རྣམ་སྣང་བར་བྱས། གདན་དང་གཞལ་ཡས་ཁང་སྣང་བར་བྱས། རྡོ་རྗེ་རྒྱ་ [117b.3]གྲམ་སྣང་བར་བྱས། །བྱང་ཆུབ་ཆེན་པོའི་མཆོད་རྟེན་སྣང་བར་བྱས། །ཡེ་ཤེས་ཀྱི་རྡོ་རྗེའི་སྒོ་དྲུག་ནས་འཐོན་ཞིང་ཁམས་དྲུག་སྣང་བར་བྱས་ཏེ། པདྨ་ཅན་དང་། མངོན་པར་དགའ་བ་དང་། ཡིད་དུ་འོང་བ་དང་། བདེ་བ་ཅན་དང་། མདོག་སྡུག་པ་དང་། འོད་ཟེར་ཅན་སྣང་བར་བྱས་ [117b.4]སོ། །སངས་རྒྱས་ལ་མཆོད་པའི་ལས་བྱས། སེམས་ཅན་གྱི་དོན་བྱས། སླར་རྡོ་རྗེ་ལ་བསྐོར་བ་ལན་གསུམ་བྱས། ཁ་དོག་དྲུག་དང་ལྡན་པའི་འོད་ཟེར་དེས། བྱང་ཆུབ་ཆེན་པོའི་མཆོད་རྟེན་སྣང་བར་བྱས། རྡོ་རྗེ་རྒྱ་གྲམ་སྣང་བར་བྱས། དཀྱིལ་འཁོར་སྣང་བར་བྱས། གཙོ་བོ་སྣང་བར་བྱས། དང་པོའི་སངས་ [117b.5]རྒྱས་སྣང་བར་བྱས། །ཤེས་རབ་འཁོར་ལོ་སྣང་བར་བྱས། །ཡེ་ཤེས་སེམས་དཔའ་སྣང་བར་བྱས། །ཟླ་བའི་དཀྱིལ་འཁོར་སྣང་བར་བྱས། །ཨ་ལ་ཐིམ་པས་ཨའི་བྱིན་གྱི་རླབས་ཀྱིས་ཤར་ཕྱོགས་ནས་བརྩམས་ཏེ་མི་བསྐྱོད་པའི་ལྷ་རྣམས་དང་། ལྷོ་ནས་རིན་ཆེན་འབྱུང་ལྡན་ལ་སོགས་པའི་ལྷ་ [117b.6]རྣམས་དང་། ནུབ་ནས་སྣང་བ་མཐའ་ཡས་ལ་སོགས་པའི་ལྷ་རྣམས་དང་། བྱང་ནས་དོན་ཡོད་གྲུབ་པ་ལ་སོགས་པའི་ལྷ་རྣམས་རྒྱུའི་ས་བོན་གྱི་ཡིག་འབྲུར་གྱུར་ཏོ། །དེ་ནས་སྔགས་འདི་བཟླས་སོ། །ཨ་ཨཱཿསརྦ་ཏ་ཐཱ་ག་ཏ་ཧྲྀ་ད་ཡ་ཧ་ར་ཧ་ར། ཨོཾ་ཧཱུཾ་ཏྲཱིཿབྷ་ག་བཱན་ཛྙཱ་ན་མཱུ་རྟི་བཱ་གཱི་ཤྭ་ར། མ་ཧཱ་ [117b.7]པཱ་ཙ། སརྦ་དྷརྨཱ། ག་ག་ན་ཨ་མ་ལ་སུ་པ་རི་ཤུདྡྷ་དྷ་རྨ་དྷཱ་ཏུ་ཛྙཱ་ན་གརྦྷ་ཨཱཿསྔགས་དེ་བརྗོད་པས་སོ་སོའི་སྐུ་མདོག་དང་ཕྱག་མཚན་གསལ་བར་བསྒོམ། །རང་རང་གི་ས་བོན་ཨ་ལ་སོགས་པ་འཕྲོས་པས། རང་རང་གི་སྐུ་མདོག་གསལ་བར་བསྒོམ། །སོ་སོའི་གནས་སུ་བཀོད་ལ། རྡོ་རྗེ་ཆོ་ག་ [118a] [118a.1]ཡན་ལག་གསུམ་གྱིས་གོང་དུ་བསྐྱེད་པ་ལྟར་བྱའོ། །འདི་དག་ལྷ་བསྒོམ་ཞིང་དབྱུང་བའི་ཏིང་ངེ་འཛིན་ཏོ། །དེ་ནས་དཀྱིལ་འཁོར་རྒྱལ་མཆོག་གི་ལྷ་རྣམས་དགོད་དེ། ཤར་གྱི་འཁོར་ལོ་ལ་ས་བོན་ཧཱུཾ། མི་བསྐྱོད་པ་གདན་གླང་པོ་ཆེ། ཕྱག་རྒྱ་ས་གནོན། སྐུ་མདོག་སྔོན་ [118a.2]པོ་གཉེན་པོ་ཞེ་སྡང་ངོ་། །ལྷོའི་འཁོར་ལོ་ལ་ས་བོན་ཨོཾ། རིན་ཆེན་འབྱུང་ལྡན། གདན་རྟ། སྐུ་མདོག་སེར་པོ། ཕྱག་རྒྱ་མཆོག་སྦྱིན། གཉེན་པོ་སེར་སྣ། ནུབ་ཀྱི་འཁོར་ལོ་ལ་ས་བོན་ཧྲཱིཿསྣང་བ་མཐའ་ཡས། གདན་རྨ་བྱ། སྐུ་མདོག་དམར་པོ། ཕྱག་རྒྱ་ཏིང་ངེ་འཛིན། གཉེན་པོ་ [118a.3]འདོད་ཆགས། བྱང་ཕྱོགས་ཀྱི་འཁོར་ལོ་ལ་ས་བོན་ཨཿ། དོན་ཡོད་གྲུབ་པ། གདན་ནམ་མཁའ་ལྡིང་། སྐུ་མདོག་ལྗང་གུ། ཕྱག་རྒྱ་སྐྱབས་སྦྱིན། གཉེན་པོ་ཕྲག་དོག་ཕུང་པོ་རྣམ་ལྔ་གནས་སུ་དག་པའོ། །ཤར་ལྷོའི་ཟླ་བའི་སྟེང་དུ་ཨའི་ས་བོན་ལས་བྱུང་བ་སེམས་མ་རྡོ་རྗེ་མ་སྐུ་མདོག་དཀར་ [118a.4]མོ། རྡོ་རྗེ་འཛིན་པ་རྣམ་པར་ཐར་པའི་སྒོ་སྟོང་པའོ། །ལྷོ་ནུབ་ཀྱི་ཟླ་སྟེང་དུ་ཨའི་ས་བོན་ལས་བྱུང་བ་རིན་ཆེན་སེམས་མ། སྐུ་མདོག་སེར་མོ། རིན་པོ་ཆེ་འཛིན་པ་མཚན་མ་མེད་པའི་སྟོང་པའོ། །ནུབ་བྱང་གི་ཟླ་སྟེང་དུ་ཨཾ་གི་ས་བོན་ལས་བྱུང་བ་ཆོས་ཀྱི་སེམས་མ་སྐུ་མདོག་དམར་མོ་པདྨ་འཛིན་པ། [118a.5]རང་བཞིན་གྱིས་འོད་གསལ་བའི་སྒོ་སྨོན་པ་མེད་པ་སྟོང་པ། བྱང་ཤར་གྱི་ཟླ་སྟེང་དུ་ཨའི་ས་བོན་ལས་བྱུང་བ། ལས་ཀྱི་སེམས་མ་སྐུ་མདོག་ལྗང་གུ་སྣ་ཚོགས་རྡོ་རྗེ་འཛིན་པ་འདུས་མ་བྱས་སྟོང་པའོ། །ལྷ་མོ་བཞི་པོ་འདི་དག་ནི་བརྗོད་པའི་ཚུལ་གྱིས་བསྒོམ་པར་བྱའོ། །རྒྱུ་འབྱུང་བ་བཞི་རྣམ་པར་དག་ [118a.6]པའོ། །དེའི་ཕྱི་རོལ་འཁོར་ལོ་རྩིབས་དང་པོའི་སྟེང་དུ་གདན་ཟླ་བ། ས་བོན་ཨ། རྡོ་རྗེ་སེམས་དཔའ་སྐུ་མདོག་དཀར་པོ། ཕྱག་མཚན་རལ་གྲི་དང་རྡོ་རྗེ་བསྣམས་པ། ནང་སྟོང་པ་རྣམ་པར་དག་པའོ། །ས་བོན་ཨཱ། རྡོ་རྗེ་རྒྱལ་པོ། གདན་ཟླ་བ། སྐུ་མདོག་སེར་པོ། ཕྱག་མཚན་རལ་གྲི་དང་ [118a.7]སེ་གོལ། ཆེན་པོ་སྟོང་པ་རྣམ་པར་དག་པའོ། །ས་བོན་ཨི། རྡོ་རྗེ་ཆགས་པ། གདན་ཟླ་བ། སྐུ་མདོག་དམར་པོ། ཕྱག་མཚན་རལ་གྲི་དང་མདའ་གཞུའོ། །ཕྱི་ནང་སྟོང་པ་རྣམ་པར་དག་པའོ། །ས་བོན་ཨཱི། རྡོ་རྗེ་ལེགས་པ་སྐུ་མདོག་དཀར་དམར། ཕྱག་མཚན་རལ་གྲི་དང་སེ་གོལ། [118b] [118b.1]ཆེན་པོ་སྟོང་པ་རྣམ་པར་དག་པ། དམ་ཚིག་གི་སེམས་དཔའ་བཞིའོ། །ས་བོན་ཨུ། རྡོ་རྗེ་རིན་ཆེན་སྐུ་མདོག་སེར་པོ། རལ་གྲི་དང་རིན་པོ་ཆེ་འཛིན་པ། དོར་བ་མེད་པ་སྟོང་པ་ཉིད་རྣམ་པར་དག་པའོ། །ས་བོན་ཨུ། རྡོ་རྗེ་རྒྱལ་མཚན་སྔོ་བསངས་རལ་གྲི་དང་རྒྱལ་མཚན། ཐོག་མ་མེད་པའི་སྟོང་པའོ། ། [118b.2]ས་བོན་ཨེ། རྡོ་རྗེ་ཉི་མ། རལ་གྲི་དང་ཉི་མ་བསྣམས་པ། ཐོག་མ་དང་ཐ་མ་མེད་པ་སྟོང་པ། ས་བོན་ཨཻ། རྡོ་རྗེ་བཞེད་པ། སྐུ་གསེར་མདོག །རལ་གྲི་དང་ཚེམས། མཐའ་ལས་འདས་པ་སྟོང་པ། དབང་གི་སེམས་དཔའ་བཞིའོ། །ས་བོན་ཨོ། རྡོ་རྗེ་ཆོས་དམར་པོ་རལ་གྲི་དང་པདྨ། དོར་བ་མེད་པ་སྟོང་པ་ [118b.3]ཉིད། ཨཽའི་ས་བོན། རྡོ་རྗེ་རྣོན་པོ། ནམ་མཁའ་འདྲ། རལ་གྲི་དང་དགྲ་སྟ། དངོས་པོ་མེད་པའི་སྟོང་པ་ཉིད། ས་བོན་ཨཾ། རྡོ་རྗེ་རྒྱུ། འཁོར་ལོ་དང་རལ་གྲི་བསྣམས་པ། ངོ་བོ་ཉིད་སྟོང་པ། ས་བོན་ཨཿརྡོ་རྗེ་སྨྲ་བ་ཟླ་བའི་མདོག །རལ་གྲི་དང་ལྕེ། དངོས་པོ་མེད་པའི་ངོ་བོ་ཉིད་སྟོང་པ། ཆོས་ཀྱི་སེམས་དཔའ་ [118b.4]བཞིའོ། །ས་བོན་ཨ། རྡོ་རྗེ་ལས་ལྗང་གུ། རལ་གྲི་དང་སྣ་ཚོགས་རྡོ་རྗེ། ཆོས་ཐམས་ཅད་སྟོང་པ་ཉིད། ས་བོན་ཨཱ། བསྲུང་བ་ལྗང་སྔོན། རལ་གྲི་ཆོ་ག་རྒྱུའི་སྟོང་པ་ཉིད། ས་བོན་ཨེ། རྡོ་རྗེ་གནོད་སྦྱིན་ནག་པོ་རལ་གྲི་དང་མཆེ་བ། འབྲས་བུའི་སྟོང་པ་ཉིད། ས་བོན་ཨཻ། རྡོ་རྗེ་ཁུ་ཚུར་ཁྲོ་བོ་རལ་གྲི་དང་ཁུ་ཚུར་ [118b.5]བསྣམས་པ། རྒྱུ་འབྲས་སྟོང་པ་ཉིད་རྣམ་པར་དག་པ། ཕྲིན་ལས་ཀྱི་སེམས་དཔའ་བཞིའོ། །ད་ནི་ལམ་གྱིས་བསྡུས་པའི་ལྷ་མོ་བརྒྱད་དང་། སྒོ་བ་བཞི་དབྱེ་བར་བྱ་སྟེ། ཤར་ལྷོར་ལཱའི་ས་བོན་ལས་བྱུང་བ། ལྷ་མོ་སྒེག་མོ་དཀར་མོ་འགྱིང་བའི་ཚུལ་ཕྱག་མཚན་རལ་གྲི་སྦྱིན་པའི་ཕ་རོལ་ཏུ་ཕྱིན་པ་རྣམ་པར་ [118b.6]དག་པའོ། །ལྷོ་ནུབ་དུ་མཱའི་ས་བོན་ལས་བྱུང་བ་ཕྲེང་བ་མ་སེར་མོ་ཕྲེང་བ་དང་རལ་གྲི་འཛིན་པ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྣམ་པར་དག་པའོ། །ནུབ་བྱང་དུ་གཱིའི་ས་བོན་ལས་བྱུང་བ་གླུ་མ་དམར་མོ་པི་ཝང་དང་རལ་གྲི་འཛིན་པ་བཟོད་པའི་ཕ་རོལ་ཏུ་ཕྱིན་པ་རྣམ་པར་དག་པའོ། །བྱང་ཤར་དུ་ནྲྀའི་ས་བོན་ལས་བྱུང་ [118b.7]བ་གར་མ་ལྗང་གུ་གར་དང་རལ་གྲི་འཛིན་པ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམ་པར་དག་པའོ། །ལྷ་མོ་བཞི་པོ་འདི་དག་ཟླ་བའི་གདན་ལ་སེམས་དཔའི་སྟབས་ཀྱིས་བཞུགས་པའོ། །དྷཱུའི་ས་བོན་ལས་བྱུང་བ་བདུག་སྤོས་མ་དཀར་མོ་སྤོས་ཁང་དང་རལ་གྲི་བསྣམས་པ། ཤེས་རབ་ཀྱི་ཕ་རོལ་ཏུ་ཕྱིན་པ་ [119a] [119a.1]རྣམ་པར་དག་པའོ། །པུའི་ས་བོན་ལས་བྱུང་བ་མེ་ཏོག་མ་སེར་མོ་མེ་ཏོག་དང་རལ་གྲི་བསྣམས་པ། བསམ་གཏན་གྱི་ཕ་རོལ་ཏུ་ཕྱིན་པ་རྣམ་པར་དག་པའོ། །དཱིའི་ས་བོན་ལས་བྱུང་བ་མར་མེ་མ་དམར་མོ་མར་མེ་དང་རལ་གྲི་འཛིན་པ་སྨོན་ལམ་གྱི་ཕ་རོལ་ཏུ་ཕྱིན་པ་རྣམ་པར་དག་པའོ། །གའི་ [119a.2]ས་བོན་ལས་བྱུང་བ་དྲི་ཆབ་མ་ལྗང་གུ་དུང་ཕོར་དང་རལ་གྲི་འཛིན་པ་ཐབས་ཀྱི་ཕ་རོལ་ཏུ་ཕྱིན་པ་རྣམ་པར་དག་པའོ། །ལྷ་མོ་བཞི་པོ་འདི་དག་ཟླ་བའི་གདན་ལ་རིམ་བཞིན་དུ་བཞུགས་སོ། །ཛཿའི་ས་བོན་ལས་སྒོ་བ་ལྕགས་ཀྱུ་མ་དཀར་མོ་ལྕགས་ཀྱུ་དང་རལ་གྲི་འཛིན་པ་ཤེས་རབ་ཀྱི་སྟོབས་རྣམ་པར་དག་པའོ། ། [119a.3]ཧཱུཾ་གི་ས་བོན་ལས་ཞགས་པ་མ་སེར་མོ་ཞགས་པ་དང་རལ་གྲི་འཛིན་པ་དྲན་པའི་སྟོབས་རྣམ་པར་དག་པའོ། །བཾ་གི་ས་བོན་ལས་ལྕགས་སྒྲོག་མ་དམར་མོ་ལྕགས་སྒྲོག་དང་རལ་གྲི་བསྣམས་པ་དད་པའི་སྟོབས་རྣམ་པར་དག་པའོ། །ཧོཿའི་ས་བོན་ལས་དྲིལ་བུ་མ་ལྗང་གུ་དྲིལ་བུ་དང་རལ་གྲི་བསྣམས་པ་ [119a.4]བརྩོན་འགྲུས་ཀྱི་སྟོབས་རྣམ་པར་དག་པའོ། །སྒོ་བ་བཞི་པོ་འདི་དག་ཀྱང་ཟླ་བའི་གདན་ལ་རིམ་བཞིན་དུ་བཞུགས་སོ། །འབྲས་བུའི་སེམས་དཔའ་བཅུ་དྲུག་ནི་ཨའི་ས་བོན་ལས་བྱམས་པ། འཇམ་དཔལ། སྤོས་ཀྱི་གླང་པོ་ཆེ། ཡེ་ཤེས་ཏོག་དང་བཞི་གཡས་རལ་གྲི་གཡོན་རྡོ་རྗེ་བསྣམས་ [119a.5]པའོ། །ཨའི་ས་བོན་ལས་བཟང་སྐྱོང་། བློ་གྲོས་རྒྱ་མཚོ། བློ་གྲོས་མི་ཟད་པ། སྤོབས་པ་བརྩེགས་པ་བཞི་སྐུ་མདོག་སེར་པོ་རིན་པོ་ཆེ་དང་རལ་གྲི་བསྣམས་པའོ། །ཨའི་ས་བོན་ལས་མཐུ་ཆེན་ཐོབ། ངན་སོང་ཀུན་འདྲེན། མྱ་ངན་འཇོམས། དྲ་བའི་འོད། སྐུ་མདོག་དམར་པོ་རལ་གྲི་དང་པདྨ་ [119a.6]བསྣམས་པའོ། །ཨའི་ས་བོན་ལས་ཟླ་འོད་གཞོན་ནུ། འོད་དཔག་མེད། ནམ་མཁའི་མཛོད། སྒྲིབ་པ་སེལ་བ་བཞི། སྐུ་མདོག་ལྗང་གུ། སྣ་ཚོགས་རྡོ་རྗེ་དང་རལ་གྲི་བསྣམས་པའོ། །སེམས་དཔའ་དེ་རྣམས་ཀྱང་དཀྱིལ་འཁོར་གྱི་ཁྱམས་ལ་ཟླ་བའི་གདན་ལ་རིམ་པ་བཞིན་དུ་བཞུགས་པའོ། །འདི་ཡན་ [119a.7]ཆོད་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ཏོ། །དེ་ནས་ལས་རྒྱལ་མཆོག་བསྟན་པའི་ཕྱིར། དེ་ནས་ལས་ཀྱི་ཁྱད་པར་ཡང་། བསྐྱེད་པའི་ཞར་ལས་བྱུང་བ་སྟེ། །སྒྲ་ལས་ཕྱེ་སྟེ་རྒྱས་བཤད་པ། འདིར་ནི་བདག་གིས་མ་བཤད་དོ། །ཞེས་གསུངས་ཏེ། དེ་ནས་ནི་དཀྱིལ་འཁོར་རྒྱལ་མཆོག་ [119b] [119b.1]བསྒོམ་པའི་དེ་མ་ཐག་པའོ། །ལས་ཀྱི་ནི་ལས་གསུམ་སྟེ། འདིར་དགེ་བའི་ལས་སོ། །ཁྱད་པར་ཡང་ནི་སེམས་ཅན་གྱི་དོན་བྱེད་པའོ། །བསྐྱེད་པའི་ཞིར་ལས་བྱུང་བ་ནི་དཀྱིལ་འཁོར་རྒྱལ་མཆོག་བསྐྱེད་བའི་དུས་སུ། བདག་ལས་མི་གཉིས་པའི་གཟུགས་འོད་ཟེར་གྱི་ཚུལ་དུ་འཕྲོས་ཏེ། སངས་རྒྱས་ལ་མཆོད་ [119b.2]པ་ཕུལ་ནས། སེམས་ཅན་གྱི་དོན་ལ་གསོལ་བ་འདེབས་པ་སྟེ། དེའང་ཇི་ལྟར་འདེབས་ཤེ་ན། མི་བསྐྱོད་འཁོར་དང་བཅས་པ་ཡིས། །ཞེ་སྡང་ཅན་གྱི་རྒྱུད་སྦྱོངས་ཤིག །ཅེས་པ་ལ་སོགས་པ་གསུངས་སོ། །དེ་ནས་སྒྲ་ལས་ཕྱེ་སྟེ་རྒྱས་པར་དེར་བཤད་པས། སྐབས་འདིར་སློབ་དཔོན་གྱིས་རྒྱས་པར་ [119b.3]མ་བཤད་དོ། །དེ་ནས་ཡང་གོང་དུ་གསུངས་པ་ལྟར་ཤེས་པར་བྱའོ། །དེ་ཡན་ཆོད་ནི་ལས་ཀྱི་ཁྱད་པར་གྱི་ཏིང་ངེ་འཛིན་ཏོ། །དེ་ནས་དེ་རྫོགས་པར་བྱེད་པའི་ཡན་ལག་བསྟན་པར་བྱེད་པའི་ཕྱིར། དེ་ནས་སྤོས་ཀྱི་ཆུ་དག་ལས། སྔགས་བཟླས་པ་ཡིས་བསང་བྱ་སྟེ། །ཞེས་པ་ལ་སོགས་པ་གསུངས་ཏེ། དེ་ནས་ལས་ [119b.4]བཅོས་པའི་དེ་མ་ཐག་པའོ། །སྤོས་ཀྱི་ཆུ་ནི་བསང་ཆུའོ། །སྔགས་བཟླས་པ་ནི་རྡོ་རྗེ་གནོད་སྦྱིན་གྱི་སྔགས་སོ། །བསང་བ་ནི་མཆོད་པའི་རྫས་རྣམས་སོ། །ཕུང་པོས་བསྡུས་པའི་མཆོད་པ་ལྔ། །ཞེས་པ་ནི། འབྱུང་བ་ལྔ་ཡིས་བསྐྱེད་པའི་མེ་ཏོག་དང་། སྤོས་དང་། མར་མེ་དང་། དྲི་ཆབ་དང་། ཞལ་ [119b.5]ཟས་དང་ལྔའོ། །དེ་ཀ་ལ་རིམ་པ་བཞིན་ཞེས་གསུངས་སོ། །བྱིན་གྱིས་བརླབ་ཅེས་པ་ནི་སོ་སོའི་ཕྱག་རྒྱ་བཅས་ཏེ། ཨོཾ་བཛྲ་པུ་ཥྤེ་ཏྲཱཾ། བཛྲ་དྷཱུ་པེ་ཧཱུཾ། བཛྲ་ཨཱ་ལོ་ཀེ་ཧྲཱིཿ། བཛྲ་ཀནྡྷེ་ཨཿ། བཛྲ་ནཻ་བི་དྱེ་ཧཱུཾ། ཞེས་རེ་རེ་ལའང་ལན་བརྒྱ་འམ་ཉི་ཤུ་རྩ་གཅིག་གམ། འོན་ཏེ་བདུན་བདུན་བཟླས་པས་ཤིན་ [119b.6]ཏུ་མང་ཞིང་རྒྱ་ཆེ་བར་བསམ་མོ། །དེ་ནས་ཡེ་ཤེས་སེམས་དཔའ་སྒྲུབ་པ་བསྟན་པའི་ཕྱིར། འདི་དག་རིམ་པའི་གོ་རིམས་ཀྱིས། །ཞེས་པ་ལ་སོགས་པ་གསུངས་ཏེ། དེའི་དོན་ནི་འདི་ཡིན་ཏེ། དེ་ཡང་རིགས་བསྡུས་པའི་ཕྱག་རྒྱ་ནི། ལག་གི་འདུ་བྱེད་ཆེན་པོ་ཡིན། །གར་ཐབས་གཡས་ [119b.7]གཡོན་བསྐོར་ནས་ནི། །སེ་གོལ་མང་པོ་བརྡབ་བར་བྱ། །བཛྲ་ས་མ་ཡ་ཛཿཛཿཧཱུཾ་བཾ་ཧོཿ། ཞེས་བརྗོད་དེ། སངས་རྒྱས་ཐམས་ཅད་གཤེགས་འགྱུར་ན། །གཞན་ལྟ་སྨོས་ཀྱང་ཅི་ཞིག་དགོས། །འཁོར་ལོའི་ཚོགས་མཆོག་ཐམས་ཅད་ཀུན། །དབང་པོའི་མངོན་སུམ་འདྲར་མཐོང་འགྱུར། །ཞེས་ཆོ་ [120a] [120a.1]ག་འདུས་པའི་རྒྱུད་ལས་གསུངས་སོ། །དེ་ལྟ་བུའི་དོན་ཡིད་ཀྱིས་མངོན་སུམ་དུ་བྱོན་པ་དེ་ལ་མཆོད་པ་ལྔས་མཆོད་ལ། མཉམ་མེད་ལ་སོགས་པས་བསྟོད་པ་བྱ་སྟེ་ཞེས་པའི་དོན་ནི་འདི་ཡིན་ཏེ། མཉམ་མེད་མི་གཡོ་མཉམ་ཉིད་ཆོས་མཆོག་ཅན། །ཐུགས་རྗེའི་བདག་ཉིད་འགྲོ་དྲུག་སྡུག་ [120a.2]བསྔལ་སེལ། །ཡོན་ཏན་མཆོག་གི་དངོས་གྲུབ་སྦྱིན་མཛད་པ། །དྲི་མེད་མཉམ་ཉིད་དམ་པ་ཉིད་ལ་བསྟོད། །ཡོན་ཏན་ཤིན་ཏུ་ཕྲ་བ་ཚད་མེད་དེ། །ནམ་མཁའ་དང་ཡང་བསྐྲུན་དུ་ཡོད་པ་མིན། །དངོས་གྲུབ་མཉམ་མེད་དཔེ་བྲལ་བ། །འགྲོ་ལ་ངེས་པར་སྩོལ་མཛད་བསྟོད། །རྟག་ཏུ་དྲི་མེད་ཐུགས་རྗེ་འབྱུང་། ། [120a.3]སྨོན་ལམ་འགྲུབ་པ་འགག་མེད་ཅན། །འགྲོ་བའི་དོན་སྒྲུབ་མཐའ་ཡས་པ། །བདག་ཉིད་རྟག་ཏུ་སྣང་ལ་བསྟོད། །ཚད་མེད་ཚད་བྲལ་ཡོངས་རྫོགས་པའི། །བདེ་གཤེགས་གོ་འཕང་བདེ་བརྙེས་ཀྱང་། །ཐུགས་རྗེའི་སྤྱོད་པ་འགག་མི་འགྱུར། །བཟང་པོ་ཤིན་ཏུ་མཆོག་ལྡན་བསྟོད། །མཆོག་སྦྱིན་ནང་ན་ [120a.4]མཆོག་བརྙེས་པས། །ཀུན་ལ་དངོས་གྲུབ་མཆོག་ཐོབ་མཛད། །མགོན་པོ་དུས་གསུམ་སྒྲིབ་མེད་པ། །དངོས་གྲུབ་དམ་པ་སྩོལ་ལ་བསྟོད། །དེ་ནས་གཙོ་བོའི་སྔགས་རིང་ལ་ཞེས་བ་ནི། ཨ་ཨཱཿསརྦ་ཏ་ཐཱ་ག་ཏྀ་ཧྲི་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ། བྷ་ག་བཱན་ཛྙཱ་ན་མཱུརྟི་བཱ་གཱི་ཤྭ་ར་མ་ཧཱ་ཝཱ་ཙ། སརྦ་དྷརྨ་ [120a.5]ག་ག་ན། ཨ་མ་ལ་སུ་པ་རི་ཤུདྡྷ། དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿདྲྀ་ཤྱས་བལྟ། ཛཿཧཱུཾ་བཾ་ཧོཿས་གཉིས་མེད་བསྟིམ། ཨ་ཧཾ་གིས་ང་རྒྱལ་བྱ། ཨོཾ་བཛྲ་ཡཀྵ་ཞེས་པས་བགེགས་བསལ་ལོ། །དེ་ནས་ཕྱག་རྒྱ་བཞིས་རྒྱས་བཏབ་པར་བསྟན་པའི་ཕྱིར། བཞི་ཡིས་རྒྱས་གདབ་དོན་མཆོག་སྒྲུབ། །ཅེས་ [120a.6]གསུངས་ཏེ། །བཞི་ནི་ཕྱག་རྒྱ་བཞི་སྟེ། དེ་ཡང་གང་ཞེ་ན། དམ་ཚིག་གི་ཕྱག་རྒྱ་དང་། ལས་དང་ཆོས་དང་། ཕྱག་རྒྱ་ཆེན་པོ་དང་བཞིའོ། །དེ་ལ་དམ་ཚིག་གི་ཕྱག་རྒྱ་ནི། སྙིང་གར་ཟླ་བའི་དཀྱིལ་འཁོར་ལ་རྡོ་རྗེ་རྩེ་ལྔ་པ་བསྒོམས་ལ། ཕྱག་གཡོན་ཐམས་ཅད་ན་རང་རང་གི་མཚན་མ་འཛིན་པ་ནི་དམ་ [120a.7]ཚིག་གི་ཕྱག་རྒྱའོ། །ལྕེ་ལ་ཡི་གེ་ཧྲཱིཿལས་པདྨ་དེའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ཧཱུཾ་ལས་རྡོ་རྗེའི་དབུས་སུ་ཧྲཱིཿལས་བྱུང་བའི་བཅོམ་ལྡན་འདས་འོད་དཔག་ཏུ་མེད་པ་སྐུ་མདོག་དམར་པོར་བསམས་ལ། དེའི་ལྕེ་ལ་ཡི་གེ་ཨ་བསམས་ཏེ་སྔགས་ཀྱི་ཡན་ལག་ཐམས་ཅད་རྫོགས་པ་ནི་ཆོས་ཀྱི་ཕྱག་ [120b] [120b.1]རྒྱའོ། །ཨ་ལས་སྣ་ཚོགས་རྡོ་རྗེ་ལྷ་ཐམས་ཅད་ཀྱི་སྤྱི་བོར་བསམས་ལ། གར་ལས་བྱུང་བའི་གཡས་ཐམས་ཅད་ན་རལ་གྲི་བསམ་པ་ནི་ལས་ཀྱི་ཕྱག་རྒྱའོ། །ཇི་ལྟར་བྲིས་པའི་རྗེས་སུ་མཐུན་པར་གང་དང་གང་གི་གཟུགས་སུ་གསལ་ཞིང་དེའི་ངོ་བོ་རྣམ་པར་དག་པ་ནི་ཕྱག་རྒྱ་ཆེན་པོའོ། །དེ་ལྟར་ཕྱག་རྒྱ་བཞིས་ [120b.2]རྒྱས་བཏབ་པ་དེ་ལ་ཡང་དག་པའི་དོན་བསྒྲུབ་པས་ན། བཞི་ཡིས་རྒྱས་གདབ་དོན་མཆོག་འགྲུབ། །ཅེས་གསུངས་པ་ཡིན་ནོ། །དེ་ཡང་མདོ་ལས། རྡོ་རྗེ་རྣོན་པོ་རལ་གྲི་ཆེ། །ཡི་གེ་མཆོག་སྟེ་རྣམ་པར་དག། །ཅེས་བ་དང་། ཕྱག་རྒྱ་བཞི་ཡི་དོན་སྟོན་པ། །ཞེས་གསུངས་སོ། །དེ་ནས་མཆོད་ [120b.3]བའི་བྱེ་བྲག་གིས། ཞེས་པ་ནི། མཆོད་རྫས་རྣམས་བསངས་ལ་བྱིན་གྱིས་བརླབས་ཏེ། ཡོངས་སུ་རྫོགས་པའི་དཀྱིལ་འཁོར་དེ་ལ་མཆོད་པའི་བྱེ་བྲག་ཐམས་ཅད་ཀྱིས་མཆོད་དོ། །དེ་ཡང་གང་ཞེ་ན། བདག་ལས་མི་གཉིས་པ་དེ་ཡིས་སོ། །དེ་ནས་འདི་ལྟར་སངས་རྒྱས་བཅོམ་ལྡན་འདས་ཞེས་པའི་བསྟོད་པས་ [120b.4]ཀྱང་བསྟོད་དོ། །མཆོད་ནས་ཕྱག་རྒྱ་བཞི་བྱ་བ། །ཞེས་པ་ནི། ཕྱག་རྒྱ་བཞིའི་དོན་དང་ལྡན་པར་བྱའོ་ཞེས་པའི་དོན་ཏོ། །དང་པོ་སངས་རྒྱས་ལ་སོགས་པའི་གནས་སུ་བྱ་བའི་རིམ་པའོ་ཞེས་པའི་དོན་ནི་འདི་ཡིན་ཏེ། ཨ་ལས་འོད་བྱུང་ཟླ་བའི་དཀྱིལ་འཁོར་གསལ་བར་བྱས། དེ་ལས་ཡེ་ཤེས་སེམས་དཔའ་དེ་ལས་ [120b.5]ཤེས་རབ་འཁོར་ལོ། དེ་ལས་དང་པོའི་སངས་རྒྱས་དེ་ལས་གཞིའི་སངས་རྒྱས། དེ་ལས་ལྷ་ཚོགས་དེ་ལས་གཞལ་ཡས་ཁང་དེ་ལས་སྣ་ཚོགས་རྡོ་རྗེ་དེ་ལས་ཆོས་འབྱུང་། དེ་ལས་བྱང་ཆུབ་ཆེན་པོའི་མཆོད་རྟེན། དེ་ལས་རྡོ་རྗེའི་སྒོ་དྲུག་ནས་འཐོན་ཏེ། ཤར་ཕྱོགས་དགེ་བའི་སྒོ་ལ་སོགས་པ་ནས་འོད་ཟེར་འཐོན་ཏེ། [120b.6]སྲིད་པ་གསལ་བར་བྱས། དོན་རྣམ་པ་གཉིས་དང་། སངས་རྒྱས་ཀྱི་མཛད་པ་བྱས་ཏེ། དུས་གསུམ་གྱི་སངས་རྒྱས་ཀྱི་ཐུགས་ཀར་ཞུགས། དཔལ་གྱི་བེའུ་ལ་བསྐོར་བ་ལན་གསུམ་བྱས། ཤེས་རབ་དང་ཡེ་ཤེས་ཀྱི་བཅུད་བསྡུས། སླར་རིམ་གྱིས་བཞི་པོའི་ཨ་ལ་ཐིམ་སྟེ། སྣང་སྟོང་གཉིས་མེད་ [120b.7]ཀྱི་ངོ་བོར་རྟོགས་པར་བྱའོ། །དེ་ལྟར་འཕྲོ་འདུ་བྱ་ཞིང་བསྒོམ་པ་ནི་བསྙེན་པ་བསྡུས་པའོ། །ཨོཾ་སརྦ་དྷརྨ་ཨ་བྷཱ་བ་སྭ་བྷཱ་བ་བི་ཤུ་དྡྷ་བཛྲ་ཨ་ཨཱ་ཨཾ་ཨཿཞེས་རྩ་བའི་སྔགས་བཟླ་ཞིང་འཕྲོ་འདུ་བྱེད་པ་ནི་བསྙེན་པ་འབྲིང་པོའོ། །བསྙེན་པ་རྒྱས་པ་ནི་རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་ཐོབ་པ་ཡིན་ན། འདི་ལྟར་སངས་ [121a] [121a.1]རྒྱས་བཅོམ་ལྡན་འདས། །ཞེས་པ་ནས། ཐེག་པ་ཆེན་པོའི་ཚུལ་གྱི་མཆོག །ཅེས་པའི་བར་དུའོ། །ཚིགས་སུ་བཅད་པ་བཅུ་བཞི་བརྗོད་པས་ཡེ་ཤེས་སེམས་དཔའི་ཐུགས་ཀའི་ཨ་ལས་ཡི་གེ་བརྒྱད་ཅུ་རྩ་དྲུག་འཕྲོས་པས་རྣམ་པར་སྣང་མཛད་མང་པོར་གྱུར་ཏེ། ཞིང་ཁམས་ [121a.2]ཐམས་ཅད་སྣང་ཞིང་མཆོད་གཏི་མུག་ཅན་གྱི་དོན་བྱས། སླར་གཞིའི་ལྷ་རྣམས་ལ་ཐིམ་པར་བྱ་ཞིང་བཀླགས་ན་རིང་པོ་མི་ཐོགས་པར་ཆོས་ཀྱི་རྒྱལ་པོར་འགྱུར་ཏེ། དེ་ནི་བསྙེན་པ་རྒྱས་པའོ། །དེ་ནས་ཐུན་གཏོང་བར་འདོད་ན། མཆོད་པའི་ཡོ་བྱད་རྣམས་ཀྱིས་ཡང་དག་པར་མཆོད་ལ། བདག་ལས་མི་ [121a.3]གཉིས་པའི་གཟུགས་སུ་རིམ་པ་ནས་རིམ་པར་འོད་ཟེར་གྱི་ཚུལ་དུ་འཐོན་ཏེ། ལས་ཀྱི་བྱ་བ་ལ་སོགས་པ་ལ་འཇུག་པར་བྱའོ། །དེ་ནས་ཐུན་གཉིས་པ་ལ་བདག་ལས་མི་གཉིས་པའི་གཟུགས་ཅན་དེ་སངས་རྒྱས་ཀྱི་མཛད་པ་རྫོགས་ནས། འོད་ཟེར་གྱི་ཚུལ་དུ་རིམ་པ་ནས་རིམ་པར་གཞི་ལ་ཐིམ་སྟེ། དེ་ [121a.4]ནས་ཅི་རིགས་པ་རུ་མཆོད་བསྟོད་བྱས་ལ་དོན་གསུམ་པོ་གང་ཡང་རུང་བ་ཅིག་ལ་འཇུག་པར་བྱའོ། །དེ་ནས་ཡང་གཏོང་བར་འདོད་ན་སྔོན་དུ་བསྟན་པ་ལྟ་བུར་བྱའོ། །དེ་ནས་ཐུན་གསུམ་པ་ལ་སྔོན་དུ་བསྟན་པ་ཇི་ལྟ་བ་བཞིན་བྱས་ལ། ཐུན་ཐ་མ་ལ་ཡེ་ཤེས་ཀྱི་དཀྱིལ་འཁོར་དེ་ཨོཾ་མཉྫུ་ཤྲཱི་བཛྲ་མུཿཞེས་ [121a.5]མདུན་གྱི་ནམ་མཁའ་ལ་ཕྱེ་ནས་བཞུགས་པ་དེ་ལ་མཆོད་པ་དང་བསྟོད་པ་དང་། བཤགས་པ་བྱས་ལ་གཤེགས་སུ་གསོལ། བསྐྱེད་པའི་མཚན་རྣམས་བདག་གི་ཐུགས་ཀར་བསྡུས་ལ། དང་པོའི་སངས་རྒྱས་ཀྱི་ང་རྒྱལ་དང་ལྡན་པར་བྱས་ཏེ་ཅི་བདེ་བར་སྤྱོད་ལམ་བྱའོ། །རྣལ་འབྱོར་དོན་དང་ལྡན་པ་ [121a.6]ཡིས། །འབད་ནས་ཐུན་གསུམ་དག་གིས་ནི། །ལྷ་ཡི་རྣལ་འབྱོར་བསྒོམ་པ་ན། །ངེས་པར་ཆོས་ཀྱི་རྒྱལ་པོ་ཐོབ། །ཅེས་ལེའུ་ཁྲི་དྲུག་སྟོང་པ་ལས་གསུངས་སོ། །མདོ་ཉིད་ལས་ཀྱང་། དུས་གསུམ་སངས་རྒྱས་ལས་བྱེད་པ། །ཞེས་གསུངས་སོ། །དེ་ལྟར་རྣལ་འབྱོར་པས་ཟླ་བ་ [121a.7]གསུམ་མམ། ཟླ་བ་གཅིག་གམ། འོན་ཏེ་དུས་རྒྱུན་དུ་མ་ཆད་པར་བསྒོམས་ན་དོན་གྱི་རྟགས་སམ་ལྷའི་སྣང་བ་གསལ་བ་དང་། གཟོད་བསྙེན་པའི་ལས་ལ་འཇུག་པར་བྱའོ། །དེ་ནས་སྣང་བ་མཐའ་ཡས་ལ་མེ་ཏོག་ཕོག་སྟེ། དེའི་རྣལ་འབྱོར་བྱེད་པར་འདོད་ན་སྔོན་དུ་བསྟན་པའི་གནས་ [121b] [121b.1]ཡིད་དང་འཐད་པ་རུ། ཡོ་བྱད་ལ་སོགས་པ་ཚུལ་བཞིན་བཤམས་ལ། སྟན་བདེ་བ་ལ་འདུག་སྟེ། ལྕེ་ལག་བྱིན་གྱིས་བརླབ་པ་ནས་གཞལ་ཡས་ཁང་བསྐྱེད་པ་ཡན་ཆད་རྫོགས་པར་བྱ་སྟེ། གཙོ་བོའི་གནས་སུ་ཧྲཱིཿལས་ནི། ཞེས་པ་ནས། སྤྲོ་དང་བསྡུ་བ་སྔོན་བཞིན་བྱ། །ཞེས་པའི་བར་ [121b.2]གྱིས་སྦྱོར་བ་དང་པོ་རྫོགས་པར་བྱས་ལ་གཟོད་དཀྱིལ་འཁོར་རྒྱལ་མཆོག་བསྒོམས་ཏེ། སྣང་བ་མཐའ་ཡས་ཀྱི་ཐུགས་ཀ་རུ་དང་པོའི་སངས་རྒྱས་དེའི་ལྟེ་བ་ལ་རྡོ་རྗེ་རྣོན་པོ་དེའི་ཐུགས་ཀར་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་ཡི་གེ་ཧྲཱིཿ། དེ་ལས་འོད་འཕྲོས་པས་ཟླ་བའི་དཀྱིལ་འཁོར་ [121b.3]སྣང་བར་བྱས། རྡོ་རྗེ་རྣོན་པོ་སྣང་བར་བྱས། གཙོ་བོ་སྣང་བ་མཐའ་ཡས་སྣང་བར་བྱས། གདན་དང་གཞལ་ཡས་ཁང་སྣང་བར་བྱས། རྡོ་རྗེ་རྒྱ་གྲམ་སྣང་བར་བྱས། ཆོས་འབྱུང་སྣང་བར་བྱས། བྱང་ཆུབ་ཆེན་པོའི་མཆོད་རྟེན་སྣང་བར་བྱས། ཡེ་ཤེས་ཀྱི་རྡོ་རྗེ་སྒོ་དྲུག་ནས་འཐོན་ནས་ཞིང་ [121b.4]ཁམས་དྲུག་སྣང་བར་བྱས། སངས་རྒྱས་ལ་མཆོད་པ་བྱས། སེམས་ཅན་གྱི་དོན་བྱས། དེ་བཞིན་གཤེགས་པའི་བཅུད་བསྡུས། སླར་རྡོ་རྗེ་ལ་བསྐོར་བ་ལན་གསུམ་བྱས་རྡོ་རྗེའི་སྒོ་དྲུག་ནས་ཚུར་རིམ་པ་རིམ་པར་ཧྲཱིཿལ་ཐིམ་སྟེ། ཧྲཱིཿའི་བྱིན་རླབས་ཀྱིས་མཚན་གྱི་ཡི་གེ་ཉིས་བརྒྱ་ཉི་ཤུར་གྱུར་ [121b.5]ཏེ། དེ་ལ་ཡང་གོང་མ་ལྟར་སྤྲོ་བསྡུ་བྱས་པས་ཕྱག་མཚན་དུ་གྱུར་ཏོ། །དེ་ལ་སྤྲོ་བསྡུ་བྱས་ཏེ། སྔགས་རིང་བརྗོད་པས་ལྷ་ཉིས་བརྒྱ་ཉི་ཤུར་གྱུར་ཏེ། དེ་ཡང་ཕོ་བྲང་གི་དབུས་སུ་བདུན་འཁོར་ལོ་བརྒྱད་ལ་དྲུག་དྲུག་ལྷ་རྣམས་ཀྱི་ཕྱོགས་བཞི་ལ་ང་ལྔ་ང་ལྔ་ཤེས་པར་བྱའོ། །དེ་ཡང་ཡེ་ཤེས་ལྔའི་ངོ་བོ་ [121b.6]སྟེ། རིགས་ཆུང་གི་དབྱེ་བས་སོ་སོར་རྟོག་པའི་ཡེ་ཤེས་དང་མེ་ལོང་ལྟ་བུའི་ཡེ་ཤེས་དང་། དེ་བཞིན་དུ་མཉམ་པ་ཉིད་དང་། བྱ་བ་གྲུབ་པ་དང་། ཆོས་ཀྱི་དབྱིངས་དང་ལྔར་ཤེས་པར་བྱའོ། །དེ་ནས་ལས་རྒྱལ་མཆོག་དང་། ཡེ་ཤེས་སེམས་དཔའ་སྒྲུབ་པ་དང་། བསྙེན་པ་འབྲིང་པོ་ཡན་ [121b.7]ཆད་མཐུན་ནོ། །བསྙེན་པ་རྒྱས་པ་བྱེད་ན། ཡང་དག་བདག་མེད་དེ་བཞིན་ཉིད། །ཅེས་བྱ་བ་ནས། ཡེ་ཤེས་མེ་ལྕེ་འོད་རབ་གསལ། །ཞེས་པའི་བར་དུ་ཚིགས་སུ་བཅད་པ་བཞི་བཅུ་ཞེ་གཉིས་བརྗོད་པ། ཡེ་ཤེས་སེམས་དཔའི་ཐུགས་ཀའི་ཧྲཱིཿལས་མཚན་གྱི་ཡི་གེ་ཉིས་བརྒྱ་བདུན་ཅུ་རྩ་ [122a] [122a.1]ལྔ་བྱུང་ལ་འོད་དཔག་ཏུ་མེད་པའི་རང་བཞིན་དུ་འཕྲོས་པས་ལས་གཉིས་བྱས་འདོད་ཆགས་ཅན་གྱི་རྒྱུད་སྦྱངས་ཏེ། སླར་བཞི་པོ་ལ་ཐིམ་པས་བདེ་ཞིང་གསལ་བར་བལྟས་ལ་བཀླག་གོ །དེ་ནས་ཐུན་མཚམས་ལ་སོགས་པ་གོང་དང་མཐུན་ནོ། །དེ་ནས་མི་བསྐྱོད་པ་ལ་མེ་ཏོག་ [122a.2]ཕོག་ནས་དེའི་རྣལ་འབྱོར་བྱེད་པར་འདོད་ན། ཡིད་དང་མཐུན་པའི་གནས་སུ་ཡོ་བྱད་ལ་སོགས་པ་གཞུང་བཞིན་དུ་བཤམས་ལ་བདེ་བའི་སྟན་ལ་འདུག་སྟེ། ལྕེ་ལག་བྱིན་གྱིས་བརླབ་པ་ནས་གཞལ་ཡས་ཁང་བསྐྱེད་པ་ཡན་ཆད་སྔོན་དུ་བསྟན་པ་བཞིན་དུ་བྱས་ལ། ཧཱུཾ་གི་ཡི་གེ་ལས་བསྐྱེད་པའི། ། [122a.3]ཞེས་པ་ནས། སྤྲོ་དང་བསྡུ་བ་སྔོན་བཞིན་བྱ། །ཞེས་པའི་བར་གྱིས་སྦྱོར་བ་དང་པོ་རྫོགས་པར་བྱས་ཏེ། དེ་ནས་དཀྱིལ་འཁོར་རྒྱལ་མཆོག་བསྒོམ་སྟེ། གཙོ་བོ་མི་བསྐྱོད་པའི་ཐུགས་ཀར་ཟླ་བའི་དཀྱིལ་འཁོར། དེའི་སྟེང་དུ་དང་པོའི་སངས་རྒྱས། དེའི་ཐུགས་ཀར་ཤེས་རབ་འཁོར་ལོ། [122a.4]དེའི་ལྟེ་བ་ལ་རྡོ་རྗེ་རལ་གྲི། དེའི་ཐུགས་ཀར་ཟླ་བའི་དཀྱིལ་འཁོར། དེའི་ལྟེ་བ་ལ་ཡི་གེ་ཧཱུཾ་བསྒོམས་ཏེ། དེ་ལས་འོད་འཕྲོས་པས་ཟླ་བའི་དཀྱིལ་འཁོར་སྣང་བར་བྱས། རྡོ་རྗེ་རལ་གྲི་སྣང་བར་བྱས། དང་པོའི་སངས་རྒྱས་སྣང་བར་བྱས། དེ་ནས་གཙོ་བོ་མི་བསྐྱོད་པ། དེ་ནས་གཞལ་ཡས་ [122a.5]ཁང་། དེ་ནས་རྡོ་རྗེ་རྒྱ་གྲམ། དེ་ནས་ཆོས་འབྱུང་། དེ་ནས་མཆོད་རྟེན། དེ་ནས་ཡེ་ཤེས་ཀྱི་རྡོ་རྗེའི་སྒོ་དྲུག་ནས་འཐོན་ཏེ། ཞིང་ཁམས་དྲུག་སྣང་བར་བྱས། ལས་གཉིས་བྱས། དེ་བཞིན་གཤེགས་པའི་བཅུད་བསྡུས་སླར་རྡོ་རྗེ་ལ་བསྐོར་བ་ལན་གསུམ་བྱས། རྡོ་རྗེའི་དྲུག་ནས་ [122a.6]རིམ་པ་རིམ་པས་ཧཱུཾ་ལ་ཐིམ། ཧཱུཾ་གི་བྱིན་གྱི་རླབས་ཀྱིས་མཚན་གྱི་ཡི་གེ་ལྔ་བཅུ་རྩ་གཉིས་རང་རང་གི་གནས་སུ་གྱུར་ཏོ། །དེ་ལས་སྤྲོ་བསྡུས་པས་ཕྱག་མཚན་དུ་གྱུར་ཏོ། །དེ་སྤྲོ་བསྡུས་སྔགས་རིང་བརྗོད་པས་ལྷ་ལྔ་བཅུ་རྩ་གཉིས་སུ་གྱུར་ཏེ། ཕོ་བྲང་གི་དབུས་སུ་བདུན། འཁོར་ལོ་ [122a.7]བརྒྱད་ལ་རེ་རེ། ཕྱོགས་བཞིར་ལྷ་སྣམ་ལ་བཅུ་བཞི་བཅུ་བཞི་དགོད་པར་བྱའོ། །དེ་ཡང་མེ་ལོང་ལྟ་བུའི་ཡེ་ཤེས་ལ་སོགས་པའི་དོན་དུ་ཤེས་པར་བྱའོ། །དེ་ནས་ལས་བཅོལ་བ་དང་བསྙེན་པ་འབྲིང་པོ་ཡན་ཆད་མཐུན་ནོ། །རྒྱས་པར་བྱེད་ན། རྡོ་རྗེ་འཇིགས་བྱེད་འཇིགས་པར་བྱེད། ། [122b] [122b.1]ཅེས་པ་ནས། སྒྲ་དང་ལྡན་པ་རྣམས་ཀྱི་མཆོག །ཅེས་པའི་བར་དུ་ཚིགས་བཅད་བཅུ་དང་། རྐང་པ་གཅིག་ལྷག་པ་བརྗོད་པས་སྔ་མ་བཞིན་དུ་མི་བསྐྱོད་པ་འཕྲོས་འདུས་པས་ཞེ་སྡང་ཅན་གྱི་རྒྱུད་སྦྱང་བ་ལ་སོགས་པ་བྱའོ། །ཐུན་མཚམས་ནི་གོང་དང་མཐུན་ནོ། །དེ་ནས་རྣམ་པར་སྣང་མཛད་ [122b.2]ལ་མེ་ཏོག་ཕོག་ནས་དེའི་རྣལ་འབྱོར་བྱེད་པར་འདོད་ན་ཡིད་དང་མཐུན་པའི་གནས་སུ་ཡོ་བྱད་ལ་སོགས་པ་གཞུང་བཞིན་དུ་བཤམས་ལ་སྟན་བདེ་བ་ལ་འདུག་སྟེ། ལྕེ་ལག་བྱིན་གྱིས་བརླབ་པ་ནས། གཞལ་ཡས་ཁང་བསྐྱེད་པ་ཡན་ཆད་སྔོན་བཞིན་བྱས་ལ། དེ་བཞིན་འཁོར་ལོའི་ [122b.3]དབུས་ཉིད་དུ། །ཞེས་བྱ་བ་ནས། སྤྲོ་དང་བསྡུ་བ་སྔོན་བཞིན་བྱ། །ཞེས་པའི་བར་གྱིས་སྦྱོར་བ་དང་པོ་རྫོགས་པར་བྱས་ལ། དེ་ནས་དཀྱིལ་འཁོར་རྒྱལ་མཆོག་བསྒོམ་སྟེ། རྣམ་སྣང་གི་ཐུགས་ཀར་དང་པོའི་སངས་རྒྱས། དེའི་ཐུགས་ཀར་ཤེས་རབ་འཁོར་ལོ། དེའི་ལྟེ་བ་ལ་ཤེས་རབ་ [122b.4]ཡེ་ཤེས། །དེའི་ཐུགས་ཀར་ཟླ་བའི་དཀྱིལ་འཁོར་དེའི་སྟེང་དུ་ཡི་གེ་ཨ། དེ་འཕྲོས་པས་ཟླ་བའི་དཀྱིལ་འཁོར་སྣང་བར་བྱས། དེ་ནས་ཤེས་རབ་ཡེ་ཤེས། དེ་ནས་ཤེས་རབ་འཁོར་ལོ། །དེ་ནས་དང་པོའི་སངས་རྒྱས། དེ་ནས་གཙོ་བོ་རྣམ་སྣང་། དེ་ནས་གཞལ་ཡས་ཁང་། དེ་ནས་རྡོ་རྗེ་རྒྱ་གྲམ། དེ་ནས་ཆོས་ [122b.5]འབྱུང་། དེ་ནས་མཆོད་རྟེན། དེ་ནས་ཡེ་ཤེས་ཀྱི་སྒོ་རྡོ་རྗེའི་སྒོ་དྲུག་ནས་འཐོན་ཏེ། ཞིང་ཁམས་དྲུག་སྣང་བར་བྱས་ལས་གཉིས་བྱས། དེ་བཞིན་གཤེགས་པའི་བཅུད་བསྡུས། སླར་རྡོ་རྗེ་ལ་བསྐོར་བ་ལན་གསུམ་བྱས་ཏེ། རྡོ་རྗེའི་སྒོ་དྲུག་ནས་རིམ་པ་རིམ་པར་ཨ་ལ་ཐིམ་སྟེ། ཨའི་བྱིན་གྱི་ [122b.6]རླབས་ཀྱིས་མཚན་གྱི་ཡི་གེ་བརྒྱ་བཞི་བཅུ་ཞེ་བཞི་རང་གི་གནས་སུ་སྤྲོས་ལ་དེ་འདུས་པ་ལས་ཕྱག་མཚན་དུ་གྱུར་ཏོ། །དེ་སྤྲོ་བསྡུ་བྱ་ཞིང་སྔགས་རིང་བརྗོད་པས་ལྷ་བཞི་བཅུ་ཞེ་བཞིར་གྱུར་ཏོ། །དེ་ཡང་ཕོ་བྲང་གི་དབུས་སུ་ལྔ། འཁོར་ལོ་བརྒྱད་ལ་བཞི་བཞི་ཕྱོགས་བཞིར་ལྷ་སྣམ་ལ་སོ་ [122b.7]དྲུག་སོ་དྲུག་གོ །དེ་ཡང་མཉམ་པ་ཉིད་ཀྱི་མེ་ལོང་ལ་སོགས་པའི་དོན་དུ་ཤེས་པར་བྱའོ། །དེ་ནས་ལས་བཅོལ་ནས་བསྙེན་པ་འབྲིང་པོ་ཡན་ཆད་མཐུན་ནོ། །རྒྱས་པར་བྱེད་ན། སངས་རྒྱས་རྣམ་པར་སྣང་མཛད་ཆེ། །ཞེས་པ་ནས། རྡོ་རྗེ་ལྕགས་ཀྱུ་ཞབས་པ་ཆེ། །ཞེས་པའི་ [123a] [123a.1]བར་དུ་ཚིགས་སུ་བཅད་པ་ཉི་ཤུ་རྩ་ལྔར་ཚིག་རྐང་གཅིག་གིས་མ་ཚང་བ་བརྗོད་ནས་ཡེ་ཤེས་སེམས་དཔའི་ཐུགས་ཀའི་ཨ་ལས་ཡི་གེ་བརྒྱ་བརྒྱད་ཅུ་རྩ་གཅིག་འཕྲོས་པས་རྣམ་སྣང་མང་པོར་གྱུར་ཏེ། ཞིང་ཁམས་ཐམས་ཅད་སྣང་ཞིང་ལས་གཉིས་བྱས་གཏི་མུག་ཅན་གྱི་དོན་བྱས་ [123a.2]ཏེ་སླར་གཞིའི་ལྷ་རྣམས་ལ་ཐིམ་པར་བྱ་ཞིང་བཀླག་གོ །ཐུན་མཚམས་ནི་གོང་མ་དང་མཐུན་ནོ། །དེ་ནས་དོན་ཡོད་གྲུབ་པ་ལ་མེ་ཏོག་ཕོག་ནས་དེའི་རྣལ་འབྱོར་བྱེད་པར་འདོད་ན། ཡིད་དང་མཐུན་པའི་གནས་སུ་ཡོ་བྱད་ལ་སོགས་པ་གཞུང་བཞིན་དུ་བཤམས་ལ་བདེ་བའི་སྟན་ལ་འདུག་སྟེ། [123a.3]ལྕེ་ལག་བྱིན་གྱིས་བརླབ་པ་ནས། གཞལ་ཡས་ཁང་བསྐྱེད་པ་ཡན་ཆད་སྔོན་བཞིན་དུ་བྱས་ལ། དེ་བཞིན་འཁོར་ལོའི་དབུས་ཉིད་དུ། ཞེས་པ་ནས། སྤྲོ་དང་བསྡུ་བ་སྔོན་བཞིན་བྱ། །ཞེས་པའི་བར་གྱིས་སྦྱོར་བ་དང་པོ་རྫོགས་པར་བྱས་ལ། དེ་ནས་དཀྱིལ་འཁོར་རྒྱལ་མཆོག་བསྒོམས་ [123a.4]ཏེ། གཙོ་བོ་དོན་ཡོད་གྲུབ་པའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་དང་པོའི་སངས་རྒྱས། དེའི་ཐུགས་ཀར་ཤེས་རབ་འཁོར་ལོ་དེའི་ལྟེ་བ་ལ་ཡེ་ཤེས་ཀྱི་སྐུ་ཅན། དེའི་ཐུགས་ཀར་ཨ་ལས་ཟླ་བ་དེའི་སྟེང་དུ་ཡི་གེ་ཨ། དེ་ལས་འཕྲོས་པའི་ཟླ་བའི་དཀྱིལ་འཁོར་སྣང་བར་བྱས། ཡེ་ཤེས་ [123a.5]སྐུ་ཅན་ཤེས་རབ་འཁོར་ལོ། དང་པོའི་སངས་རྒྱས། གཙོ་བོ་དོན་ཡོད་གྲུབ་པ། གཞལ་ཡས་ཁང་། རྡོ་རྗེ་རྒྱ་གྲམ་ཆོས་འབྱུང་མཆོད་རྟེན། དེ་ནས་ཡེ་ཤེས་ཀྱི་རྡོ་རྗེའི་སྒོ་དྲུག་ནས་འཐོན་ནས་ཞིང་ཁམས་དྲུག་སྣང་བར་བྱས། ལས་གཉིས་བྱས། དེ་བཞིན་གཤེགས་པའི་བཅུད་ [123a.6]བསྡུས། སླར་རྡོ་རྗེ་ལ་བསྐོར་བ་ལན་གསུམ་བྱས་ཏེ། ཁ་དོག་དྲུག་དང་ལྡན་པའི་འོད་ཟེར་དེ་རིམ་པ་རིམ་པར་ཨ་ལ་ཐིམ་པས། ཨའི་བྱིན་གྱི་རླབས་ཀྱིས་མཚན་གྱི་ཡི་གེ་བདུན་ཅུ་རྩ་དྲུག་ཏུ་གྱུར། དེ་རང་རང་གནས་སུ་སྤྲོས་སོ། །དེ་ལ་སྤྲོ་བསྡུ་བྱས་པས་ཕྱག་མཚན་དུ་གྱུར་ཏོ། །དེ་ནས་ [123a.7]སྤྲོ་བསྡུ་བྱས་ཏེ་སྔགས་རིང་བརྗོད་པས་ལྷ་བདུན་ཅུ་རྩ་བདུན་དུ་གྱུར་ཏོ། །དེ་ཡང་ཕོ་བྲང་གི་དབུས་སུ་བདུན། ཕྱོགས་བཞིར་འཁོར་ལོ་ལ་གཉིས་གཉིས་མཚམས་བཞིར་རེ་རེ་ཕྱོགས་བཞིའི་ལྷ་རྣམས་ལ་བཅུ་དགུ་བཅུ་དགུ་ཤེས་པར་བྱའོ། །དེ་ཡང་བྱ་བ་གྲུབ་པའི་ཡེ་ཤེས་མེ་ལོང་ལྟ་བུ་ལ་སོགས་པ་ཤེས་པར་ [123b] [123b.1]བྱའོ། །དེ་ནས་ལས་བཅོལ་བ་ནས་བསྙེན་པོ་འབྲིང་པོ་ཡན་ཆད་མཐུན་ནོ། །རྒྱས་པར་བྱེད་ན། སངས་རྒྱས་ཀུན་གྱིས་རྟོགས་བྱ་བ། །ཞེས་པ་ནས། འཇམ་དཔལ་དཔལ་དང་ལྡན་པའི་མཆོག །ཅེས་པའི་བར་གྱིས་ཚིགས་བཅད་བཅོ་ལྔ་བརྗོད་པས་ཡི་གེ་དགུ་བཅུ་རྩ་ལྔར་གྱུར་ཏེ། [123b.2]དོན་ཡོད་གྲུབ་པས་དོན་གཉིས་བྱས། ལེ་ལོ་ཅན་གྱི་རྒྱུད་སྦྱངས་ནས་སླར་རིམ་གྱིས་གཞི་ལ་ཐིམ་པར་བྱ་ཞིང་བཟླས་སོ། །ཐུན་མཚམས་ནི་གོང་དང་མཐུན་ནོ། །དེ་ནས་རིན་ཆེན་འབྱུང་ལྡན་ལ་མེ་ཏོག་ཕོག་ནས་དེའི་རྣལ་འབྱོར་བྱེད་པར་འདོད་ན་ཡིད་དང་མཐུན་པའི་གནས་སུ་ཡོ་བྱད་ལ་ [123b.3]སོགས་པ་གཞུང་བཞིན་དུ་བཤམས་ལ། བདེ་བའི་སྟན་ལ་འདུག་སྟེ། ལྕེ་ལག་བྱིན་གྱིས་བརླབ་པ་ནས་གཞལ་ཡས་ཁང་བསྐྱེད་པ་ཡན་ཆད་སྔོན་བཞིན་བྱས་ལ། དེ་ནས་སྔོན་བཞིན་དཀྱིལ་འཁོར་ཞེས་པ་ནས། སྤྲོ་དང་བསྡུ་བ་སྔོན་བཞིན་བྱ། །ཞེས་པའི་བར་གྱིས་སྦྱོར་བ་དང་པོ་ [123b.4]རྫོགས་པར་བྱས་ལ། དེ་ནས་དཀྱིལ་འཁོར་རྒྱལ་མཆོག་བསྒོམ་སྟེ། རིན་ཆེན་འབྱུང་ལྡན་གྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་དང་པོའི་སངས་རྒྱས། དེའི་ཐུགས་ཀར་ཤེས་རབ་འཁོར་ལོ། །དེའི་ལྟེ་བ་ལ་ངག་གི་དབང་ཕྱུག །དེའི་ཐུགས་ཀར་ཟླ་བའི་དཀྱིལ་འཁོར། དེའི་ལྟེ་བ་ལ་ཡི་གེ་ཨ། དེ་ལས་འོད་འཕྲོས་ [123b.5]པས་ཟླ་བའི་དཀྱིལ་འཁོར་སྣང་བར་བྱས། ངག་གི་དབང་ཕྱུག་ཤེས་རབ་འཁོར་ལོ། དང་པོའི་སངས་རྒྱས། གཙོ་བོ་གཞལ་ཡས་ཁང་རྡོ་རྗེ་རྒྱ་གྲམ། ཆོས་འབྱུང་། བྱང་ཆུབ་ཆེན་པོའི་མཆོད་རྟེན་སྣང་བར་བྱས་ཏེ། ཡེ་ཤེས་ཀྱི་རྡོ་རྗེའི་སྒོ་དྲུག་ནས་འཐོན་ཞིང་ཁམས་དྲུག་སྣང་བར་བྱས་ [123b.6]དོན་གཉིས་བྱས། བདེ་བར་གཤེགས་པའི་བཅུད་བསྡུས། སླར་རྡོ་རྗེ་ལ་བསྐོར་བ་ལན་གསུམ་བྱས། ཁ་དོག་དྲུག་དང་ལྡན་པའི་འོད་ཟེར་དེ་སླར་རིམ་པ་རིམ་པས་ཨ་ལ་ཐིམ་པས་ཨའི་བྱིན་གྱི་རླབས་ཀྱིས་མཚན་གྱི་ཡི་གེ་བརྒྱད་ཅུ་རྩ་བཞི་རང་རང་གི་གནས་སུ་སྤྲོས་ཏེ། དེ་སྤྲོས་བསྡུས་པས་ [123b.7]ཕྱག་མཚན་དུ་གྱུར་ཏོ། །དེ་ནས་སྤྲོ་བསྡུ་བྱས་ནས་སྔགས་རིང་བརྗོད་པས་ལྷ་བརྒྱད་ཅུ་རྩ་བཞིའི་ངོ་བོར་གྱུར་ཏེ། ཕོ་བྲང་གི་དབུས་སུ་བཞི། འཁོར་ལོ་བརྒྱད་ལ་གཉིས་གཉིས། ཕྱོགས་བཞིའི་ལྷ་སྣམ་ལ་ཉི་ཤུ་རྩ་གཅིག་རྩ་གཅིག་འདི་དག་ཀུན་ལ་ལྷ་མོ་བརྒྱད་བརྒྱད། སྒོ་བ་བཞི་ [124a] [124a.1]ཀུན་ལ་བཀོད་པར་ཤེས་པར་བྱའོ། །རིགས་ཁ་ཕྲལ་གྱི་དཀྱིལ་འཁོར་ལྔ་བོ་འདི་ནི་འཁོར་ལོ་རྩིབས་བརྒྱད་པ་སྒོ་རྐྱང་པ་རེ་ལས་མེད་དོ། །དེ་ནས་ལས་བཅོལ་བ་དང་། བསྙེན་པ་འབྲིང་པོ་ཡན་ཆད་མཐུན་ནོ། །རྒྱས་པར་བྱེད་ན། འདོད་པའི་དོན་གྲུབ་དམ་པ་སྟེ། །ཞེས་ [124a.2]པ་ནས། ནོར་བུ་ཆེན་པོ་རིན་ཆེན་ཏོག །ཅེས་པའི་བར་དུ་ཚིགས་བཅད་ཉི་ཤུ་རྩ་བཞི་བརྗོད་པས་སྔགས་ཀྱི་ཡི་གེ་བརྒྱ་རྩ་བཞི་བྱུང་སྟེ། རིན་ཆེན་འབྱུང་ལྡན་མང་པོ་གྱུར་ཏེ། ལས་གཉིས་བྱས་ནས་སེར་སྣ་ཅན་གྱི་རྒྱུད་སྦྱངས་ཏེ། སླར་རིམ་གྱིས་གཞི་པོ་ལ་ཐིམ་མོ། །ཐུན་མཚམས་ནི་གོང་དང་ [124a.3]མཐུན་ནོ། །དེ་རྣམས་ནི་རིགས་ཁ་ཕྲལ་བའི་དཀྱིལ་འཁོར་རོ། །དེ་ནས་རིགས་བསྡུས་པ་བྱང་སེམས་རྡོ་རྗེ་བྱེད་པར་འདོད་ན་ཡིད་དང་མཐུན་པའི་གནས་སུ་ཡོ་བྱད་ལ་སོགས་པ་གཞུང་བཞིན་དུ་བཤམས་ལ། བདེ་བའི་སྟན་ལ་འདུག་སྟེ། ལྕེ་ལག་བྱིན་གྱིས་བརླབ་པ་ནས། སྣ་ཚོགས་རྡོ་རྗེ་ཡན་ཆད་སྔོན་ [124a.4]བཞིན་བསྒོམས་ལ། དེའི་ལྟེ་བ་ལ་ཡི་གེ་བྷྲཱུཾ་ལས་གྱུར་པའི་གཞལ་ཡས་ཁང་། གྲུ་བཞི་པ་ལ་སྒོ་བཞི་པ། དབུས་ན་དཀྱིལ་འཁོར་སྒོ་རྐྱང་པ་ལྔ་ཡོད་པ་ལྷའི་སྣམ་བུ་ལ་སོགས་པ་དང་ལྡན་པ། རྟ་བབས་མེད་པ། རྒྱན་ཐམས་ཅད་ཕྱིའི་སྒོ་ལ་བརྒྱན་པའོ། །དཀྱིལ་འཁོར་དྲུག་པོ་དེ་ལ་ [124a.5]ཇི་ལྟར་གསུངས་པའི་གདན་ཐམས་ཅད་བསམ་པར་བྱའོ། །དེའི་དབུས་སུ་ས་ལས་སེང་གེའི་ཁྲི། དེའི་སྟེང་དུ་པཾ་ལས་སྣ་ཚོགས་པདྨ། དེའི་སྟེང་དུ་ཨ་དཀར་པོ་ཡོངས་སུ་གྱུར་པ་ལས་རྡོ་རྗེ། དེ་ཡོངས་སུ་གྱུར་པ་ལས་བཅོམ་ལྡན་འདས་བྱང་སེམས་རྡོ་རྗེ་སྐུ་མདོག་དཀར་པོ་གཞོན་ནུའི་ཚུལ་ [124a.6]ཅན་དབུ་ལ་རིགས་ལྔའི་སངས་རྒྱས་ཀྱིས་བརྒྱན་པ། རྡོ་རྗེ་དང་དྲིལ་བུ་བསྣམས་པ་བསྐྱེད་ལ། དེའི་ཐུགས་ཀར་ཟླ་བའི་དཀྱིལ་འཁོར། དེའི་སྟེང་དུ་དང་པོའི་སངས་རྒྱས། དེའི་ཐུགས་ཀར་ཤེས་རབ་འཁོར་ལོ་རྩིབས་བརྒྱད་པ་ལ་ཡི་གེ་འབྲུ་དགུ་ལ་བདུན་ལ་རེ་རེ། གཅིག་ལ་ [124a.7]གཉིས་བཀོད་ལ། ཕྲེང་བའི་ཡི་གེ་རྣམས་གཞན་དང་མཐུན། དེའི་ལྟེ་བ་ལ་ཨ་ལས་བསྐྱེད་པའི་ཨ་ར་པ་ཙ་ན་མདོག་དཀར་བ་དེའི་ཐུགས་ཀར་ཟླ་བའི་དཀྱིལ་འཁོར། དེའི་སྟེང་ན་ཡི་གེ་ཨ་དཀར་པོ་དེ་ལས་འོད་ཁ་དོག་རྣམ་པ་དྲུག་དང་ལྡན་པ་བྱུང་སྟེ། འོད་དེས་མི་ཤེས་པའི་ [124b] [124b.1]རི་བོ་བཅོམ་ནས་རང་གི་ལུས་ཉིད་སྣང་བར་བྱེད་པ་བསྒོམ་པར་བྱའོ། །སྣང་བར་གྱུར་མ་ཐག་ཏུ་རིམ་པ་ནས་འོད་རིམ་པར་གསལ་བར་བྱས་ཏེ། འཇིག་རྟེན་གྱི་ཁམས་སྣང་བར་བྱས་སོ། དེ་ནས་རྡོ་རྗེའི་སྒོ་དྲུག་ནས་ཁ་དོག་དྲུག་དང་ལྡན་པའི་འོད་དེ་བྱུང་སྟེ། ནམ་མཁའི་ཁམས་ཀུན་ཁྱབ་པར་བྱས་ནས། [124b.2]སངས་རྒྱས་ཀྱི་ཞིང་ཁམས་གསལ་བར་གྱུར་ཏོ། །ལས་གཉིས་བྱས། དེ་བཞིན་གཤེགས་པའི་བཅུད་བསྡུས། ཐུགས་དཔལ་གྱི་བེའུ་ལ་བསྐོར་བ་ལན་གསུམ་བྱས། ཤེས་རབ་དང་ཡེ་ཤེས་བཀུག་ནས་རིམ་པ་ནས་རིམ་པར་ཐིམ་སྟེ། སྙིང་གའི་ཟླ་བ་ལ་གནས་པའི་སྔགས་དང་གཅིག་ཏུ་ [124b.3]འདྲེས་པར་གྱུར་ནས་དེ་ཉིད་བརྟན་པར་ཡང་དང་ཡང་དུ་བསྒོམ། དེ་ལྟར་བསྒོམས་པས་ཕྱིར་རིང་པོར་མི་ཐོགས་པས་ཡེ་ཤེས་ཀྱི་སྒོ་ནས་སྐུ་དང་། ཨའི་སྒོ་ནས་གསུང་དང་། ཟླ་བའི་སྒོ་ནས་ཐུགས་དང་གསུམ་ཐོབ་སྟེ། སྤྲུལ་པའི་སྐུ་ཡང་ཐོབ་པར་འགྱུར་རོ། །དེ་ལྟར་སྦྱོར་བ་དང་པོ་རྫོགས་ནས་དཀྱིལ་ [124b.4]འཁོར་རྒྱལ་མཆོག་བསྒོམ་སྟེ། གཙོ་བོ་བྱང་སེམས་རྡོ་རྗེའི་ཐུགས་ཀར་གདན་ཟླ་བ་ལ་སོགས་པ་དྲུག་གསལ་བར་བྱས་ལ། དེའི་ཨ་ལས་འོད་འཕྲོས་པས་རིམ་པ་ནས་རིམ་པར་གསལ་བར་བྱས་ཏེ། དོན་གཉིས་བྱས་དེ་བཞིན་གཤེགས་པའི་བཅུད་བསྡུས། སླར་རིམ་པ་ནས་རིམ་པར་ཨ་ལ་ [124b.5]ཐིམ་པས། ཨའི་བྱིན་གྱི་རླབས་ལས་མཚན་གྱི་ཡི་གེ་ལྔ་བཅུ་རྩ་གསུམ་དུ་རྡོ་རྗེ་དབྱིངས་ཀྱི་དཀྱིལ་འཁོར་ལ་སྤྲོས་སོ། །དེ་ལ་སྤྲོ་བ་དང་བསྡུ་བ་བྱས་ནས་ཕྱག་མཚན་དུ་གྱུར་ཏོ། །དེ་ནས་ཡང་སྤྲོ་བསྡུ་བྱས་ནས་སྔགས་རིང་བརྗོད་པས་ལྷ་ལྔ་བཅུ་རྩ་གསུམ་གྱི་ངོ་བོར་གྱུར་ཏོ། །དེ་ནས་རྣམ་པར་ [124b.6]སྣང་མཛད་ཀྱི་ཆོ་འཕྲུལ་གྱིས་ལྷ་བཞི་བཅུ་རྩ་བཞིར་སྤྲུལ་ལོ། །དེ་ནས་མི་བསྐྱོད་པའི་ཆོ་འཕྲུལ་གྱིས་ལྷ་ལྔ་བཅུ་རྩ་གཉིས་སུ་སྤྲུལ་ལོ། །དེ་ནས་སྣང་བ་མཐའ་ཡས་ཀྱི་ཆོ་འཕྲུལ་གྱིས་ལྷ་ཉིས་བརྒྱ་ཉི་ཤུར་སྤྲུལ་ལོ། །དེ་ནས་རིན་ཆེན་འབྱུང་ལྡན་གྱི་ཆོ་འཕྲུལ་གྱིས་ལྷ་ལྔ་བཅུ་རྩ་བཞིར་སྤྲུལ་ [124b.7]ལོ། །དེ་ནས་དོན་ཡོད་པའི་ཆོ་འཕྲུལ་གྱིས་ལྷ་བདུན་ཅུ་རྩ་དྲུག་ཏུ་སྤྲུལ་ལོ། །སྤྱིར་དཀྱིལ་འཁོར་དྲུག་པོ་འདི་ལ་མཚན་བརྒྱད་བརྒྱ་དང་། བཅུ་གཉིས་ཡོད་དེ། རྡོ་རྗེ་དབྱིངས་ཀྱི་དཀྱིལ་འཁོར་ལ་མཚན་སུམ་ཅུ་སོ་གསུམ་ཕྲི་བས་ལྷ་ནི་བདུན་བརྒྱ་བདུན་ཅུ་རྩ་དགུའོ། །རིགས་ [125a] [125a.1]བསྡུས་ཀྱི་དཀྱིལ་འཁོར་ལ་དགོད་ན། དགོད་རྒྱུ་དྲུག་བརྒྱ་སུམ་ཅུ་སོ་གསུམ་མོ། །དེའི་ལྷག་མ་དབུས་སུ་ཐིམ་པ་བརྒྱ་བཞི་བཅུ་ཞེ་དྲུག་ཡོད་པ་ལ་རྣམ་སྣང་གི་དཀྱིལ་འཁོར་དུ་སུམ་ཅུ་སོ་བདུན་ཐིམ། མི་བསྐྱོད་པར་བཅོ་ལྔ། སྣང་བ་མཐའ་ཡས་སུ་ལྔ་བཅུ་རྩ་ལྔ། རིན་ཆེན་ [125a.2]འབྱུང་ལྡན་དུ་ཉི་ཤུ་ཐམ་པ། དོན་ཡོད་གྲུབ་པར་བཅུ་དགུ་སྟེ་བརྒྱ་བཞི་བཅུ་ཞེ་དྲུག་གོ། །དེ་ལྟར་དཀྱིལ་འཁོར་རྒྱལ་མཆོག་བསྐྱེད་པའི་དུས་སུ་རྡོ་རྗེ་དབྱིངས་ནི་བྱང་སེམས་རྡོ་རྗེས་སོ། །ལྷག་མ་ནི་རང་རང་གི་ཆོ་འཕྲུལ་བྱས་ཏེ། དང་པོའི་སངས་རྒྱས་མི་འགྱུར། གཞིའི་སངས་རྒྱས་དང་ཐུགས་ [125a.3]ཀའི་ཡེ་ཤེས་སེམས་དཔའ་བདག་གི་བློ་ཡིས་བསྒྱུར་བར་ཤེས་པར་བྱའོ། །དེ་ཀ་ལ་ཤེས་རབ་འཁོར་ལོ་བདུན་འགྱུར་གྱི་གདམས་ངག་ཅེས་བྱའོ། །དེ་ལྟར་དཀྱིལ་འཁོར་རྒྱལ་མཆོག་བསྒོམས་ནས་དེ་ནས་ལས་བཅོལ་བ་དང་བསྙེན་པ་འབྲིང་པོ་ཡན་ཆད་མཐུན་ནོ། །རྒྱས་པར་ཀློག་ན་སྔགས་ཀྱི་ཚིག་ [125a.4]བརྗོད་པ་དང་མུ་ཁྱུད་དང་། འཁོར་ལོ་ཀུན་ལ་འོད་བྱུང་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གྱུར་པར་སྤྲོས་ཏེ། མཆོད་ཅིང་བསྐུལ་ལ་དོན་བྱས་ནས་སླར་འདུས་ཏེ་དཀྱིལ་འཁོར་ཆེན་པོ་རང་གི་གནས་སུ་བཞུགས་པའམ། མི་ལྕོགས་ན་ཡིག་འབྲུ་རྣམས་ལ་ཐིམ་པའོ། །སངས་རྒྱས་རྣམ་པར་ [125a.5]སྣང་མཛད་ཆེ། །ཞེས་པ་ནས། རྡོ་རྗེ་ལྕགས་ཀྱུ་ཞགས་པ་ཆེ། །ཞེས་པའི་ཚིགས་བཅད་ཉི་ཤུ་རྩ་ལྔར་རྐང་པ་གཅིག་གིས་མ་ཚང་བ་བརྗོད་ནས། ཡེ་ཤེས་སེམས་དཔའི་ཐུགས་ཀའི་ཨ་ལས་སྒྲ་ཡིག་བརྒྱད་ཅུ་རྩ་བཞི་འཕྲོས་པས་རྣམ་པར་སྣང་མཛད་མང་པོར་གྱུར་ཏེ་ཞིང་ཁམས་ཐམས་ཅད་ [125a.6]སྣང་ཞིང་མཆོད། གཏི་མུག་ཅན་བཏུལ་ནས་འཁོར་ལོ་དང་པོའི་ཡི་གེ་ལ་ཐིམ་པའམ་སྐུར་གནས་པའོ། །དེ་ནས་རྡོ་རྗེ་འཇིགས་བྱེད་ཅེས་པ་ནས། སྒྲ་དང་ལྡན་པ་རྣམས་ཀྱི་མཆོག །ཅེས་པའི་བར་དུ་ཚིགས་བཅད་བཅུ་དང་རྐང་པ་གཅིག་གིས་ལྷག་པ་བརྗོད་པས་སྔ་མ་བཞིན་དུ་ཁྲོ་བོ་སྤྲོས་ཏེ། ཞེ་སྡང་ [125a.7]ཅན་བཏུལ་ནས་འཁོར་ལོ་གཉིས་པའོ། །ཡང་དག་བདག་མེད་ཅེས་བྱ་བ་ནས་ཡེ་ཤེས་མེ་ལྕེའི་བར་དུ་ཚིགས་བཅད་བཞི་བཅུ་རྩ་གཉིས་བརྗོད་པས་ཡི་གེ་ཉིས་བརྒྱ་བདུན་ཅུ་རྩ་ལྔ་བྱུང་སྟེ། འོད་དཔག་ཏུ་མེད་པས་འདོད་ཆགས་ཅན་བཏུལ་ནས་འཁོར་ལོ་གསུམ་པའོ། །འདོད་པའི་དོན་གྲུབ་ [125b] [125b.1]ནས། རིན་ཆེན་ཏོག་གི་བར་དུ་ཚིགས་བཅད་ཉི་ཤུ་རྩ་བཞི་བརྗོད་པས་སྔགས་ཀྱི་ཡི་གེ་བརྒྱད་ཅུ་རྩ་བཞི་བྱུང་ནས་ནམ་མཁའི་སྙིང་པོར་གྱུར་ནས་སེར་སྣ་ཅན་བཏུལ་ནས་འཁོར་ལོ་བཞི་པའོ། །སངས་རྒྱས་ཀུན་གྱིས་རྟོགས་བྱ་བ་ནས། འཇམ་དཔལ་དཔལ་དང་ལྡན་པའི་མཆོག་གི་བར་དུ་ཚིགས་བཅད་ [125b.2]བཅོ་ལྔ་བརྗོད་པས་ཡི་གེ་དགུ་བཅུ་རྩ་ལྔ་བྱུང་སྟེ། དོན་ཡོད་གྲུབ་པས་ལེ་ལོ་ཅན་བཏུལ་ནས་སླར་ལྔ་པར་གནས་སོ། །འཁོར་ལོ་དྲུག་ནི་ཐམས་ཅད་སྤྱིའོ། །དེ་ནས་མཆོད་སྦྱིན་ལ་སོགས་པའི་དོན་བསྡུས་པའམ་བསྟོད་པའོ། །སྔགས་ནི་གོང་དུ་བཀོད་པ་ཉིད་དོ། །དེ་ནས་ལ་སོགས་པ་ནི་ཡི་རང་ [125b.3]བའི་བསྟོད་པའོ། །ཕན་ཡོན་ཡང་བརྗོད་པར་བྱ་སྟེ། བདག་དང་གཞན་སྤྲོ་བ་བསྐྱེད་པའོ། །དེ་ནས་ཐུན་མཚམས་ནི་གོང་དང་མཐུན་ནོ། །དེ་ཡན་ཆད་ནི་གོང་དུ་བསྙེན་པའི་རིམ་པའོ། །དེ་ནས་རྡུལ་ཚོན་གྱི་ཆོ་གའི་རིམ་པ་བསྟན་ཏེ། དེ་ནས་རང་དགའི་གནས་ཉིད་དུ། །ཞེས་པ་ནི་ལྷ་ཁང་ངམ། [125b.4]མཆོད་རྟེན་ནམ། ཀུན་དགའ་ར་བའམ། སྐྱེད་མོས་ཚལ་ལམ། ཡིད་དང་མཐུན་པའི་གནས་སུ་བསྙེན་པའི་དཀྱིལ་འཁོར་བྱའོ་ཞེས་པའི་དོན་ཏོ། །དེ་ཀ་ལ་གཟུགས་བརྙན་གྱི་དཀྱིལ་འཁོར་བྲི་བར་བྱ་ཞེས་གསུངས་པ་ཁོ་ནའོ། །ས་དེ་ཡོངས་སུ་གཞུང་བཞིན་སྦྱང་། གཟུང་དང་ལྡན་པས་གཞུང་བཞིན་དུ་བྱ་ [125b.5]བའི་བྱེ་བྲག་གཞན་ནའོ། །ཞེས་གསུངས་པའི་དོན་ནི་འདི་ཡིན་ཏེ། དེའི་འོག་ཏུ་ཉིད་རེའམ། ཟླ་རེ་འམ་ལོ་རེ་ཉིད་དུ་ཇི་ལྟར་མོས་པ་དགའ་བར་བསྒྲུབ་ཅིང་། ཟླ་བ་ཡར་ངོ་ལ་ཆོ་ག་ཇི་ལྟ་བ་བཞིན་དུ་དཀྱིལ་འཁོར་བྲི་བར་བྱའོ། །དེ་ལ་རྒྱལ་པོས་ཁྲུ་བརྒྱའམ། ཁྲུ་ལྔ་བཅུའམ། བློན་པོ་དང་བློན་པོ་ཆེན་པོ་ [125b.6]རྣམས་ཀྱིས་ཁྲུ་ནི་ལྔ་བཅུའམ་ཉི་ཤུ་རྩ་ལྔའོ། །དེད་དཔོན་ནམ་ཚོང་དཔོན་རྣམས་ཀྱིས་ཁྲུ་ཉི་ཤུ་རྩ་ལྔའམ་དེའི་ཕྱེད་དོ། །སྒྲུབ་པ་པོ་རྣམས་ཀྱིས་ཁྲུ་བཅུ་གཉིས་སམ་དྲུག་པའམ་ཅི་ནུས་པ་བྱའོ། །དེ་ལ་དང་པོར་རེ་ཞིག་ཡོ་བྱད་ཐམས་ཅད་ཡང་དག་པར་ལྡན་པའི་མངོན་པར་འདོད་པའི་དཀྱིལ་འཁོར་ [125b.7]གྱི་སའི་དབུས་སུ། མི་རུས་ཀྱི་ཕྱེ་མའི་སྦྱིན་སྲེག་གི་དཀྱིལ་འཁོར་གྱིས་བགེགས་ཉེ་བར་བཟློག་ལ། བདག་དང་སློབ་མ་ལ་ཞི་བའི་སྦྱིན་སྲེག་བྱའོ། །དེ་ནས་ས་སྦྱང་བར་བྱ་སྟེ། འདོམ་གང་ངམ། ཁྲུ་གང་ཙམ་འོག་ཏུ་བརྐོས་ལ། དྲི་ཞིམ་པོའི་ཆུས་གཏོར་བའི་སས་སླར་བཀང་ [126a] [126a.1]ལ། རྡོ་རྗེ་རྩེ་མོས་མངོན་པར་བསྔགས་པའི་སྤོས་ཆུས་ཆག་ཆག་བཏབ་སྟེ། ཀུན་ཏུ་བརྡུངས་ལ་ཤིན་ཏུ་མཉམ་པའི་ཁང་པ་བརྩེགས་མའི་ནང་དུ་ཆུད་པ། རྟ་བབས་བཞིས་མཛེས་པར་བྱས་པ། སྒོ་བཞི་དང་སྐར་ཁུང་ཅན་ལ་སོགས་པས་ཡོངས་སུ་བསྐོར་ལ། [126a.2]མཐའ་མ་རྣམས་སུ་ལེགས་པར་བྲིས་ཤིང་དྲིལ་བུ་བཏགས་པའི་རྒྱལ་མཚན་མང་པོ་གཟུགས་པ་དང་། བླ་རེ་དམ་པ་བྲེས་པ་དང་། སངས་རྒྱས་རིན་པོ་ཆེ་ལ་སོགས་པའི་རས་རིས་ཉེ་བར་མཛེས་པར་བྱས་ལ། བའི་ལྕི་བས་ཡང་དག་པར་སྦྱངས་ཤིང་དྲིས་ཉེ་བར་བྱུག་པ་དང་། མཚམས་ [126a.3]བཞིར་སྤོས་ཁང་བཞག་ལ། མེ་ཏོག་དང་གོས་ལ་སོགས་པས་ཉེ་བར་མཛེས་པར་བྱས་ལ་ལག་པ་ས་ལ་བཞག་སྟེ་ཧཱུཾ་བཞི་དང་ཡི་གེ་བརྒྱ་པ་ལན་བདུན་དུ་བཟླས་པར་བྱའོ། །དེ་ནས་ཁྲུས་དང་དྲིས་བྱུགས་ལ་གོས་དམར་པོའི་སྟོད་གཡོགས་དང་། ཟེའུ་ཀ་བཅིངས་ལ། མེ་ཏོག་གི་ཕྲེང་བ་གདགས་ [126a.4]ཤིང་། གདོང་དྲི་ཞིམ་པོས་བྱུགས་ལ་གདུ་བུ་དང་རྣ་རྒྱན་ལ་སོགས་པས་བདག་ཉིད་ལེགས་པར་བརྒྱན་ཏེ། ཟླ་བ་ཉ་ནས་བརྩམས་ཏེ་ཕྱི་མའི་བར་དུ་དཀྱིལ་འཁོར་གྱི་ལས་བྱ་བའམ། ཡར་གྱི་ངོའི་ཚེས་གཅིག་ནས་བརྩམས་པའམ། དེ་བཞིན་དུ་ཚེས་བརྒྱད་དང་། དགུའམ་བཅུའམ། [126a.5]བཅུ་གསུམ་དང་ཚེས་བཅུ་བཞི་རྣམས་ནས་བརྩམས་ལ་ཉའི་བར་དུའམ། སྔ་དྲོའི་དུས་སུ་བརྩམ་པར་བྱའོ། །དེ་ལ་དང་པོ་དཀྱིལ་འཁོར་གྱི་སའི་དབུས་སུ་གནས་ལ། བགེགས་བསལ་བ་ལ་སོགས་པ་བྱ་སྟེ། སེམས་དཔའི་སྐྱིལ་ཀྲུང་དུ་འདུག་ལ། དེ་ཉིད་ཀྱིས་ནི་རྡོ་རྗེ་གཟུང་། །ཆོས་ [126a.6]ཀྱི་དྲིལ་བུ་དཀྲོལ་བར་བྱ། །དམ་ཚིག་ནི་ཕྱག་རྒྱ་ཆེན་པོར་བྱིན་གྱིས་བརླབས་ལ་སྙིང་པོ་བཟླ་སྟེ། དེ་ལྟར་མཆོག་ཏུ་དམ་ཚིག་གསུམ་ཐོབ་པའི་སློབ་དཔོན་གྱིས་རང་གི་ཕྱག་རྒྱས་རྡོ་རྗེ་དང་དྲིལ་བུ་བཟུང་ལ། སེམས་ཅན་ཐམས་ཅད་ལ་ཕན་པའི་ཆོ་ག་བྱ་སྟེ། རྟོག་པ་ཀུན་ལ་ཡང་དག་འཇུག ། [126a.7]དཀྱིལ་འཁོར་ཐམས་ཅད་འཇུག་པ་ནི། །དམ་ཚིག་ཆེན་པོ་གསུམ་བྱའོ། །རྒྱལ་བའི་གསང་སྔགས་སྒྲུབ་པའོ། །དངོས་གྲུབ་མཆོག་ནི་ཐམས་ཅད་ཀྱིས། །རྡོ་རྗེ་དྲིལ་བུ་རབ་ཏུ་བསྐུལ། །ཆོ་ག་ལྷག་གམ་མ་ཚང་ཡང་། །འགྲུབ་འགྱུར་དམན་པར་མི་བྱའོ། །དེ་ཡང་དང་པོ་སའི་ [126b] [126b.1]ལྷ་མོ་ཡི་གེ་བཾ་ལས་བྱུང་བ། ལག་ན་བུམ་པ་ཐོགས་པ་རྒྱན་ཐམས་ཅད་ཀྱིས་བརྒྱན་པ་བསམས་ལ། འདོད་པའི་རྒྱལ་པོས་བཀུག་སྟེ། མེ་ཏོག་ལ་སོགས་པས་མཆོད་ལ་གསོལ་བ་གདབ་པར་བྱའོ། །དེ་ལ་ཕྱག་རྒྱ་དང་སྔགས་ནི་འདི་ཡིན་ཏེ། རྡོ་རྗེ་ཁུ་ཚུར་གཉིས་རྒྱབ་སྦྱར་ལ། མཛུབ་མོ་ [126b.2]དང་མཐེའུ་ཆུང་གཉིས་མདུད་པ་བྱ་བ་ནི་འདོད་པའི་རྒྱལ་པོའི་ཕྱག་རྒྱ་སྟེ། སྔགས་ལ་ཊཀྐི་ཧཱུཾ་ཛཿཛཿདེ་ནས་འདིས་བསྐུལ། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་ལས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། ། [126b.3]ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ཀྱི་སྟེ། །བཅོམ་པར་བྱ་སྟེ་དཀྱིལ་འཁོར་བྲི། །ཞེས་ལན་གསུམ་བརྗོད་དོ། །དེ་ནས་དེ་ཉིད་དུ་ཐིམ་པར་གྱུར་པར་བསམས་ལ། །དེའི་སྟེང་དུ་རྡོ་རྗེ་བཅིངས་པ་ཁ་ཐུར་དུ་བསྟན་ཏེ་བཅིངས་ལ་གཞག་གོ། །ཨོཾ་ཛི་བཾ་ཧཱུཾ། ཞེས་ [126b.4]ལན་གསུམ་བརྗོད་དོ། །དེ་ནས་རྡོ་རྗེ་བཅིངས་པ་ལས་བྱུང་བའི་ཧཱུཾ་འབར་བའི་ཚོགས་ཀྱིས་ས་གཞི་གཏམས་པ་ལ་ཐུག་གི་བར་དུ་རྡོ་རྗེར་གྱུར་པར་བསམས་ལ། འདི་སྐད་བརྗོད་དོ། །དྲྀ་ཌྷ་བཛྲ་ཏིཥྛ། དེ་ནི་སའི་ཆོ་གའི་རིམ་པའོ། །དེ་ནས་མཆོད་པའི་བྱེ་བྲག་རྣམས་སྔོན་དུ་བསྟན་པ་བཞིན་བྱ་སྟེ་ཞེས་ [126b.5]པ་ནི། མཆོད་པའི་བྱེ་བྲག་མེ་ཏོག་ལ་སོགས་པ་རྣམས་ཇི་ལྟ་བ་བཞིན་དུ་བྱིན་གྱིས་བརླབས་ནས་ཚང་བར་དགྲམ་ཞེས་པའི་དོན་ཏོ། །སྤྲོ་བའི་སེམས་ནི་རབ་བསྐྱེད་དེ། །ཞེས་པའི་དོན་ནི་ལྕེ་ལག་བྱིན་གྱིས་བརླབས་པ་ནས། །སྦྱོར་བའི་དང་པོ་དང་དཀྱིལ་འཁོར་རྒྱལ་མཆོག་དང་། ལས་རྒྱལ་མཆོག་ [126b.6]དང་། རྡོ་རྗེ་སྒྲུབ་པ་དང་མེ་ཏོག་ལ་སོགས་པའི་མཆོད་པ་རྣམས་དང་། །བསྟོད་པ་ལ་སོགས་པ་ཡན་ཆད་བྱའོ། །ཚིག་ལྡན་ཕྱག་བྱས་སྤོས་ཐོགས་ཏེ། །བསྟོད་དེ་ལངས་ལ་འགྱིང་བཅས་པས། །བགེགས་བསལ་དོན་དུ་རབ་ཏུ་བསྐོར། །དེ་ནས་ཕུར་བུས་གདབ་པར་བྱ། །ཞེས་གསུངས་ [126b.7]པའི་དོན་ནི་འདི་ཡིན་ཏེ། དེ་ནས་དོན་དང་ལྡན་པས་ལུས་དྲི་ཞིམ་པོས་བྱུགས་ལ། རྒྱན་སྣ་ཚོགས་ཀྱིས་བརྒྱན་ཏེ། སྟོད་གཡོགས་དང་སྨད་གཡོགས་ཀྱིས་ལེགས་པར་བཀླུབས་ལ། དེ་བཞིན་གཤེགས་པ་ཐམས་ཅད་ལ་ཐལ་མོ་སྦྱར་ནས་ཅུང་ཟད་བཏུད་ལ། དཀྱིལ་འཁོར་བྲི་བར་བྱ་བའི་ཕྱིར་ [127a] [127a.1]གསོལ་བ་གདབ་པར་བྱ་སྟེ། ཚིགས་སུ་བཅད་པ་ཕྱེད་དང་བདུན་གྱིས་བསྟོད་ལ་དེ་ནས་འདི་སྐད་བརྗོད་དོ། །ཚིགས་སུ་བཅད་པ་འདི་དག་གིས། །བདག་ཅག་གིས་ནི་བསྟོད་པ་ཡིས། །ཐེག་པ་ཆེན་པོ་རྟོགས་པ་ཡིས། །ཚུལ་ཆེན་ཡང་ནི་རྒྱས་པར་མཛོད། །མགོན་པོ་ཁྱོད་ [127a.2]ལ་གསོལ་བ་ནི། །སངས་རྒྱས་ཀུན་གྱི་འཁོར་ལོ་ཆེ། །དཀྱིལ་འཁོར་ཆེན་པོ་དམ་པ་ཡི། །ཆོ་ག་འདི་ནི་བཤད་པར་གསོལ། །དེ་ནས་འདི་ལྟར་བདག་ཉིད་སྤྲོ་བ་བསྐྱེད་པར་བྱའོ། །དེང་ནི་བདག་ཚེ་འབྲས་བུ་ཡོད། །བདག་གི་འཚོ་བའང་འབྲས་བུར་བཅས། །ལྷ་དང་དམ་ཚིག་མཉམ་ [127a.3]པར་ནི། །གྱུར་པས་བདག་ནི་སོམ་ཉི་མེད། །བྱང་ཆུབ་སེམས་དང་སེམས་གཅིག་པར། །མི་ལྡོག་པར་ནི་བདག་འགྱུར་ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གི་མཆོད་སྦྱིན་བླ་ན་མེད། །སངས་རྒྱས་ [127a.4]ཐམས་ཅད་སྤྱན་འདྲེན་པས། །དེང་བདག་འདུས་པའི་མཆོག་ཡིན་ནོ། །དེ་ནས་ལུས་ཐམས་ཅད་ཀྱིས་ཕྱག་བྱས་ལ། བདུག་སྤོས་ཕུལ་ལ། །སངས་རྒྱས་ཐམས་ཅད་ལ་གསོལ་བ་གདབ་པར་བྱའོ། །མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། ། [127a.5]བདག་མིང་འདི་ཞེས་བགྱི་བ་ཡིས། །རྡོ་རྗེ་ཅན་གྱི་དཀྱིལ་འཁོར་བྲི། །དེང་འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདིར་ནི་སྩལ་དུ་གསོལ། །ཞེས་བརྗོད་ལ། སྔགས་དང་ཕྱག་རྒྱ་དག་གིས་འཁོར་ལོའི་སྟེང་དུ་ནམ་མཁའ་ལ་བཞག་སྟེ། །རྡོ་རྗེ་སེམས་དཔའི་སྦྱོར་བས་རང་གི་རྐང་ [127a.6]མཐིལ་གཉིས་སུ་ཨ་ལས་སྣ་ཚོགས་རྡོ་རྗེ་བཀོད་ལ། རྐང་པའི་མཐིལ་ནས་ཡོངས་སུ་བཟུང་བ་ནས། རླུང་གི་དཀྱིལ་འཁོར་ནས་བརྩམས་ཏེ། རིའི་རྒྱལ་པོ་རི་རབ་ཀྱི་སྟེང་གི་བར་དུ་རྡོ་རྗེར་གྱུར་པར་ལྷག་པར་མོས་པ་དང་། དབང་ལྡན་ཕྱོགས་ནས་བརྩམས་ཏེ་བསྐོར་ལ་སྣ་ཚོགས་རྡོ་རྗེ་དེ་དག་ [127a.7]ས་ལ་འདྲི་ཞིང་། །ཧཱུཾ་འདོན་ཞིང་བགེགས་ཐམས་ཅད་སྐྲོད་པ་ལ་སོགས་པ་བསྐོར་བར་བྱའོ། །འདིར་བཤད་པ། ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །རྡོ་རྗེ་སེམས་དཔའ་ཞེས་བརྗོད་ནས། །བསྒྱིངས་པའི་ཚུལ་གྱིས་ཡོངས་སུ་བསྐོར། །སྔགས་པ་རྡོ་རྗེ་ [127b] [127b.1]སེམས་ཟློས་ཤིག །རྡོ་རྗེའི་ལྟ་བས་བལྟས་ནས་ནི། །དཀྱིལ་འཁོར་གྱི་ནི་ས་ཡི་ཆར། །ཉེས་པར་ལྡན་པའང་དག་པར་འགྱུར། །ཞེས་གསུངས་པ་ཡིན་ཏེ། དེ་ནས་རྡོ་རྗེ་ཧཱུཾ་མཛད་ཀྱི་སྦྱོར་བ་དང་ལྡན་པས་རྡོ་རྗེ་ཧཱུཾ་མཛད་ཀྱི་ཕྱག་རྒྱས་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོར་བྱིན་ [127b.2]གྱིས་བརླབས་ལ། གཡས་པ་ཁྲོ་བོའི་རྡོ་རྗེ་ཆེན་པོ་གསོར་ཞིང་། །གཡོན་པ་དྲིལ་བུ་གསིལ་ཞིང་། །ཁྲོ་བས་འབར་བའི་ལུས་དང་བསྐོར་བ་ལན་གསུམ་བྱས་ལ་འདི་སྐད་བརྗོད་པར་བྱའོ། །སློབ་དཔོན་མིང་འདི་ཞེས་བྱ་བས་སློབ་མ་ཆེ་གེ་མོ་ཞེས་བྱ་བ་རྫོགས་པའི་བྱང་ཆུབ་ཡོངས་སུ་རྫོགས་པར་ [127b.3]བྱ་བའི་ཕྱིར་དང་། སེམས་ཅན་ཐམས་ཅད་ཡེ་ཤེས་བླ་ན་མེད་པའི་འབྲས་བུ་ཐོབ་པར་བྱ་བའི་ཕྱིར་ས་ཕྱོགས་འདིར་དཔལ་གསང་བ་དང་ལྡན་པ་ཞེས་བྱ་བ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ང་འདྲི་ཡིས། ལྷ་དང་ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། [127b.4]འབྱུང་པོ་དང་། བརྗེད་བྱེད་དང་། མཁའ་འགྲོ་མ་དང་། གནོན་པོ་དང་། ནམ་མཁའ་ལྡིང་དང་། མིའམ་ཅི་དང་། རིག་སྔགས་འཆང་གྲུབ་པ་རྒན་པོ་དང་རྒན་མོ་འཁོར་དང་གཡོག་ཏུ་བཅས་པ་གང་དག་འཁོད་པ་རྣམས་དེངས་ཤིག །གང་དག་མི་འགྲོ་བ་དེ་དག་ངའི་ཡེ་ཤེས་ཀྱི་རྡོ་རྗེས་ [127b.5]མགོ་ཚལ་པ་བརྒྱར་འགགས་པར་བྱའོ། །ཞེས་ལན་གསུམ་བརྗོད་པར་བྱའོ། །དེ་ནས་ལྷ་མོ་ལ་སོགས་པ་དེ་རྣམས་ས་དེ་སྤངས་ནས་སོང་བར་བསམས་ལ། །དེ་ནས་སྔོན་དུ་སོང་བའི་སྲུང་བའི་འཁོར་ལོ་ཡང་རྫོགས་པར་བྱའོ། །དེ་ནས་ཕུར་བུས་གདབ་པའི་རྒྱུ་ནི་འདི་ཡིན་ཏེ། སོར་བརྒྱད་པའི་ཚད་ [127b.6]ཀྱིས་སེང་ལྡེང་གི་ཕུར་བུ་ཙནྡན་དམར་པོས་བྱུགས་ལ། སྲད་བུ་དམར་པོ་དང་། མེ་ཏོག་དམར་པོ་བཅིངས་ལ་སྟོད་ཁྲོ་བོའི་དབྱིབས་ལ་སྨད་རྡོ་རྗེ་རྩེ་གཅིག་པའི་དབྱིབས་སུ་འདུག་པ་ཧཱུཾ་བཞི་ལས་བསྐྱེད་དོ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཾ་བནྡྷ་བནྡྷ་ཧཱུཾ་ཕཊ། ཅེས་བརྒྱ་རྩ་བརྒྱད་བཟླས་པས་མཐའ་ཡས་དང་། [127b.7]རྣམ་པར་རྒྱལ་བ་དང་། འབྲུག་སྒྲ་དང་། གསུས་པོ་ཆེ་དང་རྒྱལ་བ་ཞེས་བྱ་བ་དང་ལྡན་པར་གྱུར་ཏེ། གཡོན་པ་རྡོ་རྗེ་ཁུ་ཚུར་གྱིས་བཟུང་སྟེ། གཡས་པ་རྡོ་རྗེ་ཐོབ་བླངས་ལ། ཨོཾ་ཧ་ན་ཧ་ན། དྷ་མ་དྷ་མ། པི་ཙུརྞ་ཡ་བཛྲ་མུངྒ་ར་ཧཱུཾ་ཕཊ། ཅེས་རྡོ་རྗེ་ཐོ་བ་ལ་བརྒྱ་རྩ་བརྒྱད་བཟླས་ཏེ། མཚམས་ [128a] [128a.1]བཞི་དབུས་དང་ལྔར་གདབ་པར་བྱའོ། །དེ་ལ་གོ་ཆ་ལ་སོགས་པ་བསྐོན་པར་བྱ་སྟེ། འོག་གི་བགེགས་བཟློག་པའོ། །དེ་ནས་ཏིལ་ནག་དང་མི་རུས་ཀྱི་སྦྱིན་སྲེག་གིས་ཞི་བར་བྱའོ། །དེ་ཡན་ཆད་ནི་བགེགས་བཟློག་པའི་ཆོ་གའོ། །དེ་ནས་ལྷག་པར་གནས་པར་བྱ་སྟེ། བཛྲ་ཤི་ཁ་རེ་ [128a.2]རུ་ཊ་མ་ཊ་ཞེས་བྱ་བས་མངོན་པར་བསྔགས་པའི་སྤོས་ཆུས་དཀྱིལ་འཁོར་ཉེ་བར་བྱུགས་ལ། གུར་གུམ་དང་། ཨ་ཀ་རུ་དང་། ཙནྡན་དང་། ག་པུར་དང་། གླ་རྩི་ལ་སོགས་པའི་དྲི་ལ་དཀྱིལ་འཁོར་གྱི་ལྷ་རྣམས་ཀྱི་སྔགས་ཀྱིས་བཏབ་ལ། ལྷ་རྣམས་ཀྱི་རྣམ་གྲངས་ཇི་སྙེད་པའི་དྲིའི་ཐིག་ལེ་བྱའོ། །དེ་ནས་ [128a.3]དཀྱིལ་འཁོར་གྱི་དབུས་སུ་འདུག་ལ་ཡིད་ཀྱིས་དཀྱིལ་འཁོར་ཡོངས་སུ་བརྟགས་ཏེ། དཀྱིལ་འཁོར་དེ་རྣམས་སུ་རྣམ་པར་སྣང་མཛད་ཆེན་པོ་ཡོངས་སུ་གྱུར་ནས་རྗེ་བཙུན་འཇམ་དཔལ་དུ་གྱུར་པ་ལ་སོགས་པ་རང་གི་སྙིང་པོས་གཞུག་ལ། མཆོད་པ་རྣམ་པ་ལྔས་ཡང་དག་པར་མཆོད་དོ། །དེ་ནི་ལྷ་ [128a.4]ལྷག་པར་གནས་པའོ། །དེ་ནས་བུམ་པ་ལྷག་པར་གནས་པར་བྱ་སྟེ། དབང་བསྐུར་བའི་ཕྱིར་རྣམ་པར་རྒྱལ་བའི་བུམ་པ་སྔགས་ཀྱིས་མངོན་པར་གདབ་པོ། །དེའི་ཆོ་ག་ནི་འདི་ཡིན་ཏེ། བྷྲཱུཾ་ལས་རིན་པོ་ཆེའི་རང་བཞིན་གྱི་བུམ་པ། རྩ་བ་ནག་ནོག་མེད་པ།ལྟོ་བ་ཆེ་བ་མགྲིན་པ་རིང་བ། ཁ་དགྱེ་ [128a.5]བ་བསྐྱེད་ལ། དེའི་དབུས་སུ་ཧྲཱིཿལས་བྱུང་བའི་པདྨ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་བསམས་ཏེ། དེར་ལྷ་རྣམས་ཀྱི་འཁོར་ལོ་རང་གི་དམ་ཚིག་གི་གནས་པས་བཞུགས་པར་བསམས་ལ། དེ་ལས་བྱུང་བའི་བྱང་ཆུབ་ཀྱི་སེམས་ཀྱི་ཆུས་ཡོངས་སུ་གང་བར་བསམས་ནས། །སྨན་ལྔ་དང་ [128a.6]རིན་པོ་ཆེ་ལྔ་དང་ལྡན་པ་མེ་ཏོག་ཕྲེང་བས་བཅིངས་པའི་གསང་བའི་རྡོ་རྗེ་སྙིང་པོ་ཅན་ལ་མགུལ་པ་གོས་གཙང་མས་དཀྲིས་ལ། ཨ་མྲའི་ལོ་མ་ལ་སོགས་པས་ཁ་བརྒྱན་པར་བྱས་ལ་དཀྱིལ་འཁོར་གྱི་ལྷའི་སྔགས་ཀྱིས་མངོན་པར་བཟླས་ཞིང་། །ཨོཾ་བཛྲོད་ཀ་ཧཱུཾ་ཧཱུཾ་ཞེས་སྟོང་རྩ་བརྒྱད་བཟླས་བརྗོད་བྱས་ཏེ། [128a.7]སྤོས་ལ་སོགས་པས་མཆོད་ནས་དཀྱིལ་འཁོར་ལ་བསྐོར་ཏེ། བཅོམ་ལྡན་འདས་འཇམ་དཔལ་གྱི་སྤྱན་སྔར་བཞག་ལ། དཀྱིལ་འཁོར་གྱི་ཉིན་མོ་དུས་གསུམ་དུ་བཟླས་བརྗོད་བྱས་ནས་དཀྱིལ་འཁོར་དུ་ཡང་བཟླས་བརྗོད་བྱས་ཏེ་དེས་དབང་བསྐུར་བར་བྱའོ། །སེང་གྲི་བྱ་ཀྲྀ་ཀ་རྞི་ཀ །ཧ་ས་དེ་བ་ཨུཏྤ་ [128b] [128b.1]ལ། སྨན་རྣམས་ཀུན་ཞེས་པ་ལ་ལྔ་པོ་འདི་དག་ཤེས་པར་བྱའོ། །འབྲས་ཀྱི་སོ་བ་མོན་སྲན་གྲེའུ། །ནས་ཏིལ་ལྔ་ལ་འབྲུ་རྣམས་ཀུན། །ཞེས་པ་ལས་རྣམས་ཀུན་ལ་འདི་དག་གཟུང་ངོ་། །བྱི་རུས་ལེ་སྦྲམ་དང་དུང་། །མུ་ཏིག་དང་ནི་ནོར་བུ་སྟེ། རིན་པོ་ཆེ་ཀུན་ཞེས་པ་ལ་ལྔ་པོ་འདི་དག་ཤེས་པར་བྱའོ། །དེ་ནས་རྡོ་རྗེ་ [128b.2]ཧཱུཾ་མཛད་ཀྱི་སྔགས་དང་ཕྱག་རྒྱ་དང་བཅས་པས་ལས་ཐམས་ཅད་པའི་བུམ་པ་ལ་མངོན་པར་བསྔགས་ལ། དེ་བཞིན་དུ་མེ་ཏོག་ལ་སོགས་པས་ཡང་དག་པར་མཆོད་དེ་དཀྱིལ་འཁོར་གྱི་སྒོར་གཞག་པར་བྱའོ། །དེ་ལ་སྔགས་དང་ཕྱག་རྒྱ་ནི་འདི་ཡིན་ཏེ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྣཱ་ [128b.3]པ་ཡ་གྲྀཧྞཱ་ཡ་ཧཱུཾ། ཨཱ་ན་ཡ་ཧོཿ བྷ་ག་བཱན་བཛྲ་བིདྱཱ་རཱ་ཛ་ཧཱུཾ་ཕཊ། ཅེས་པ་དང་། ཁྲོ་བོའི་ཁུ་ཚུར་གཉིས་བཅིངས་ཏེ། །མཐེ་ཆུང་རྩེ་མོ་མདུད་བྱས་ལ། །མཛུབ་མོ་གཉིས་ནི་བསྒྲེང་བ་དག། །རྡོ་རྗེ་ཧཱུཾ་མཛད་ཕྱག་རྒྱའོ། །ཞེས་གསུངས་པས་སོ། །དེ་ནས་གསོལ་བ་འདི་ལྟར་གདབ་པར་བྱ་ [128b.4]སྟེ། ཇི་སྲིད་དཀྱིལ་འཁོར་ཡོངས་སུ་རྫོགས་པ་དེ་སྲིད་དུ་འདིར་འདུག་པ་རྣམས་བཅོམ་ལྡན་འདས་ཀྱིས་བཟློག་ཏུ་གསོལ་ཞེས་བྱའོ། །དེ་ནས་ཕྱི་རོལ་དུ་གཏོར་མ་བྱིན་ལ་ཉེ་རེག་བྱ་སྟེ། དེ་ཡན་ཆད་ནི་བུམ་པ་ལྷག་པར་གནས་པའི་རིམ་པའོ། །དེ་ནས་སློབ་མ་ལྷག་པར་གནས་པར་བྱ་སྟེ། དད་ཅིང་ [128b.5]གུས་པས་ཕྱག་བྱས་ནས་སློབ་མ་རྣམས་ལྷག་པར་གནས་པར་བྱའོ། །དེ་ལ་རེ་ཞིག་སློབ་མ་རྣམས་ཁྲུས་བྱས་ཤིང་གོས་གཙང་མ་གོན་ལ་ལག་ཏུ་མེ་ཏོག་ཐོགས་ལ་སློབ་དཔོན་ལ་ཕྱག་བྱས་ཏེ། འདི་སྐད་བརྗོད་པར་བྱའོ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་ [128b.6]གསོལ། །བྱང་ཆུབ་སེམས་དཔའི་ཚུལ་སྟོན་པ། །མགོན་པོ་ཆེན་པོ་བདག་ལ་སྩོལ། །དམ་ཚིག་དེ་ཉིད་སྩལ་དུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ [128b.7]ནི་འཇུག་པར་གསོལ། །དེ་ནས་སློབ་དཔོན་གྱིས་སློབ་མའི་སྙིང་གར་རྡོ་རྗེ་བཞག་སྟེ། སུ་ར་ཏ་ས་མ་ཡ་སྟྭཾ། ཧོ་བཛྲ་སིདྡྷ་ཡ་ཐཱ་སུ་ཁཾ། དེ་ནས་དེ་བཞིན་གཤེགས་པས་དེའི་སྤྱི་བོར་ལག་པ་བཞག་ལ། རྡོ་རྗེ་ལས་ཀྱི་སྙིང་པོ་བརྗོད་ནས་སྣ་ཚོགས་རྡོ་རྗེ་བསྒོམ་པར་བྱའོ། །དེ་ནས་ཧཱུཾ་བཛྲ་རཀྵ་ཞེས་བྱ་བས་གོ་ [129a] [129a.1]ཆ་བསྐྱེད་ལ། རྐང་པའི་མཐར་ཐུག་པའི་བར་དུ་གོ་བསྐོན་པར་བྱའོ། །དེ་ནས་རྡོ་རྗེ་དྲིས་ལག་པར་དྲི་བྱིན། མེ་ཏོག་གིས་མེ་ཏོག་འཐོར། །བདུག་པས་བདུག་པ་དབུལ་ཏེ། མར་མེས་མར་མེ་ཉེ་བར་བསྟན་ལ། རེ་རེ་ཞིང་འདི་སྐད་བརྗོད་པར་བྱ་སྟེ། དེང་ནས་བརྩམས་ཏེ་བདེ་བ་ [129a.2]ཐམས་ཅད་ལྡན་པར་གྱུར་པས་ཉེ་བར་གནས་པར་གྱིས་ཤིག །དེ་ནས་སློབ་མའི་གཙོ་བོ་ལ་བོས་ཏེ། འདི་སྐད་བརྗོད་པར་བྱ་སྟེ། འཇིག་རྟེན་འདི་ནི་དོན་མེད་དེ། །ཕྱི་མའི་དོན་དུ་གཉེར་བའི་བུ། །ཁྱོད་ནི་ཚུལ་ཆེན་སྣོད་ཡིན་ཏེ། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་འདི། །ཁྱོད་ [129a.3]ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་བཞུགས་པ་དག །དེ་དག་ཀུན་གྱིས་གསང་སྔགས་ཀྱི། ཆོ་ག་ཟབ་མོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། ། [129a.4]ཐམས་ཅད་མཁྱེན་པས་མཚན་མེད་བརྙེས། །གསང་སྔགས་སྤྱོད་པ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །རྟོག་པ་མ་ལུས་ལེགས་པར་བསྡུས་ [129a.5]ནས་ནི། །ཤིན་ཏུ་བསམ་པ་བཟང་པོ་ལྡན་པར་ཉོན། །བརྗོད་ངས་བློ་ལ་རྡོ་རྗེ་སེམས་སོགས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །དེ་ནས་ཆོ་ག་འདིས་སྡིག་པ་བཤགས་པ་ལ་སོགས་པ་བྱེད་དུ་གཞུག་སྟེ། ཕྱོགས་བཅུའི་སངས་རྒྱས་དང་། །བྱང་ཆུབ་སེམས་དཔའ་ [129a.6]རྣམས་དང་། དེ་བཞིན་གཤེགས་པ་དང་། རྡོ་རྗེ་དང་རིན་པོ་ཆེ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་གསང་སྔགས་དང་། རིག་སྔགས་ཀྱི་ལྷ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་ཕྱོགས་བཅུའི་སངས་ [129a.7]རྒྱས་དང་བྱང་ཆུབ་སེམས་དཔའ་ཐམས་ཅད་དང་། རྡོ་རྗེ་དང་རིན་པོ་ཆེ་དང་པདྨ་དང་ལས་ཀྱི་རིགས་སུ་བཞུགས་པ་ཐམས་ཅད་དང་། །སྙིང་པོ་དང་ཕྱག་རྒྱ་དང་གསང་སྔགས་དང་རིག་སྔགས་ཀྱི་ལྷ་ཐམས་ཅད་ཀྱི་སྤྱན་སྔར་སྡིག་པ་ཐམས་ཅད་བླ་ན་མེད་པའི་སོ་སོར་བཤགས་པར་བགྱིའོ། །ཇི་ལྟར་སངས་རྒྱས་བཅོམ་ [129b] [129b.1]ལྡན་འདས་རྣམས་ཀྱིས་ཆོས་ཀྱི་དབྱིངས་མ་ལུས་པར་རྟོགས་པའི་བསོད་ནམས་ཐམས་ཅད་མཁྱེན་ཞིང་རྗེས་སུ་ཡི་རང་བར་མཛད་པའི་རྗེས་སུ་ཡི་རང་བས་རྗེས་སུ་ཡི་རང་བར་བགྱིའོ། །གང་ཡང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན། ཆོས་ཀྱི་འཁོར་ལོ་མི་བསྐོར་བ་དེ་དག་ལ་བླ་ན་མེད་པ་ཐེག་ [129b.2]པ་ཆེན་པོའི་ཆོས་ཀྱི་འཁོར་ལོ་བསྐོར་བར་བྱ་བའི་ཕྱིར་བསྐུལ་བར་བགྱིའོ། །གང་ཡང་ཆོས་ཀྱི་འཁོར་ལོ་བསྐོར་བ་ལ་ནན་ཏན་དུ་ལྷུར་མཛད་པ་དེ་རྣམས་ལ་སེམས་ཅན་གྱི་ཁམས་ཇི་སྲིད་གནས་པ་དེ་སྲིད་དུ་ཡོངས་སུ་མྱ་ངན་ལས་མི་འདའ་བར་བཞུགས་པར་གསོལ་བར་འཚལ་ལོ་ཞེས་ལན་གཉིས་སམ་གསུམ་བརྗོད་དོ། ། [129b.3]དེ་ནས་མཚན་ཉིད་དང་ལྡན་པའི་སློབ་མ་སློབ་དཔོན་དུ་འོས་པ་ཡོངས་སུ་བཟུང་ལ་ཁས་ལེན་པར་བྱ་བའི་ཕྱིར་བཞིན་བཟངས་སྨྲོས་ཤིག་ཅེས་བརྗོད་པར་བྱའོ། །སློབ་མས་ཀྱང་འདི་སྐད་བརྗོད་པར་བྱའོ། །བྱང་ཆུབ་སེམས་ནི་བླ་མེད་པ། །སློབ་དཔོན་བདག་ལ་སྩལ་དུ་གསོལ། །ཚུལ་ཁྲིམས་ཀྱི་ནི་ [129b.4]བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སངས་རྒྱས་ཀུན་གྱི་བརྟུལ་ཞུགས་ཆེ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །རྡོ་རྗེ་དྲིལ་བུའི་ཕྱག་རྒྱ་དང་། །སློབ་དཔོན་ཉིད་ནི་བདག་ལ་སྩོལ། ། [129b.5]རྡོ་རྗེ་རིགས་མཆོག་ཆེན་པོ་ལ། །སློབ་དཔོན་དག་ནི་དག་བགྱིད་དོ། །རིན་ཆེན་རིགས་མཆོག་ཡིད་འོང་བའི། །དམ་ཚིག་དག་ཀྱང་བདག་ལ་སྩོལ། །པདྨའི་རིགས་ནི་དག་པ་དང་། །དེ་བཞིན་ལས་ཀྱི་རིགས་ཆེན་དུ། །སེམས་ཅན་ཀུན་གྱི་དོན་གྱི་ཕྱིར། །མགོན་པོས་དམ་ཚིག་བདག་ལ་ [129b.6]སྩོལ། །ཞེས་ལན་གཉིས་ལན་གསུམ་བརྗོད་དོ། །དེ་ནས་སྡོམ་པ་སྦྱིན་པར་བྱ་སྟེ། །ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ཐམས་ཅད་ན་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་བདག་ལ་དགོངས་སུ་གསོལ། [129b.7]ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ན་བཞུགས་པའི་བཅོམ་ལྡན་འདས་རྣམ་པར་སྣང་མཛད་དང་། །མི་བསྐྱོད་པ་དང་། རིན་ཆེན་མཆོག་དང་། འཇིག་རྟེན་དབང་ཕྱུག་དང་། དོན་ཡོད་གྲུབ་པ་ལ་སོགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་ [130a] [130a.1]སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས། བྱང་ཆུབ་སྙིང་པོ་ལ་གནས་ཀྱི་བར་དུ། ཇི་ལྟར་དུས་གསུམ་མགོན་པོ་རྣམས། །ཡང་དག་བྱང་ཆུབ་ངེས་མཛད་པའི། །དེ་བཞིན་བླ་མེད་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །སངས་ [130a.2]རྒྱས་རྣལ་འབྱོར་སྡོམ་པ་ལ། །སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་ཡོད་ཚུལ་ཁྲིམས་དང་། །དེ་དག་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་ [130a.3]བགྱི། །ནམ་དུ་ཡང་ནི་མི་གཏོང་ངོ་། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་ཞིང་ཡང་ལན་དྲུག་ཏུ། །སྦྱིན་པ་རྣམ་ [130a.4]བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དམ་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ཡི། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ [130a.5]ནུས་བགྱི། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བརྒལ་བ་ནི་བསྒྲལ་བར་བགྱི། །མ་གྲོལ་བར་ནི་དགྲོལ་བར་བགྱི། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་ལན་གཉིས་ལན་གསུམ་དུའོ། །དེ་ནས་གཞན་ཡང་། [130a.6]སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བདག་གཞན་དོན་ནི་རབ་བསྒྲུབ་ཕྱིར། །བྱང་ཆུབ་ཏུ་ནི་སེམས་བསྐྱེད་དོ། །ཞེས་པ་འདིས་གསུམ་ལ་སྐྱབས་སུ་འགྲོ་བ་ལ་སོགས་པ་བྱས་ལ། འདིས་སྨོན་ལམ་འདེབས་སུ་གཞུག་པར་བྱ་སྟེ། བདག་གིས་དགེ་བའི་ [130a.7]ལས་རྣམས་འདི་དག་གིས། །འཇིག་རྟེན་འདི་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་གྲོལ། །ཞེས་བྱའོ། །དེ་ནས་ཆོས་བསྟན་པར་བྱ་སྟེ། ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། ། [130b] [130b.1]ཁྱེད་རྣམས་དེར་ནི་དོང་བས་ན། །རང་བྱུང་སྐལ་པ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཡོད་དང་མེད་ལས་རྣམ་པར་འདས། །ནམ་མཁའ་བཞིན་དུ་དྲི་མ་མེད། །ཟབ་མོ་རྟོག་གེ་ཐམས་ཅད་ཀྱིས། །རབ་ཏུ་མི་རྟོག་གནས་མེད་དེ། །སྤྲོས་པ་ [130b.2]ཀུན་དང་བྲལ་བ་སྟེ། །སྤྲོས་པ་རྣམས་ཀྱིས་མ་སྤྲོས་པ། །ལས་དང་བྱ་བ་སོགས་བྲལ་བ། །བདེན་པ་གཉིས་ལ་གནས་པ་ཡི། །ཐེག་པ་རབ་ཀྱི་མཆོག་འདི་ནི། །ཚུལ་ལ་གནས་པ་ཐོབ་པར་འགྱུར། །དེ་ནས་བཛྲ་ཧ་ས་ཧ་ཞེས་བྱ་བས་མངོན་པར་བསྔགས་པའི་སོ་ཤིང་གི་རྩེ་མོར་དྲིས་བསྐུས་ཤིང་མེ་ [130b.3]ཏོག་གིས་བརྒྱན་པ། ཤིང་མངར་པོ་འོ་མ་ཅན་ལས་བྱུང་བ། ཚད་སོར་བཅུ་གཉིས་པ་འཆའ་རུ་གཞུག་པར་བྱའོ། །སློབ་མ་ཁ་ཤར་ཕྱོགས་སུ་བལྟས་ཏེ། མི་སྨྲ་བར་ནི་སོ་ཤིང་འཆའ། །འཆའ་བ་ཟིན་ནས་མི་ལས་ཤིང་། །ཕན་ཚུན་དུ་ཡང་མི་འདོར་རོ། །སོ་ཤིང་མདུན་དུ་དྲང་པོར་དོར། །དེ་ཚེ་བདག་ [130b.4]ལ་ལྟ་བ་དང་། །རྩེ་མོ་གྱེན་དུ་བསྒྲེང་གྱུར་ན། །དེ་ནི་དངོས་གྲུབ་མཆོག་ཅེས་བྱ། །དེ་བཞིན་ཤར་དུ་ཁ་བལྟས་ན། །དེ་ཡི་དངོས་གྲུབ་འབྲིང་དུ་བཤད། །མཚམས་དང་བྱང་དུ་ཁ་བལྟས་ན། །འཇིག་རྟེན་པ་ཡི་དངོས་གྲུབ་འགྲུབ། །སོ་ཤིང་བོར་བ་བརྒྱ་ཞིག་ལ། །གལ་ཏེ་ཐུར་དུ་ཁ་བལྟས་ན། ། [130b.5]དེ་ནི་ངེས་པར་ས་འོག་གི །དངོས་གྲུབ་དེ་ལ་ཐེ་ཚོམ་མེད། །དེ་ནས་ནཾ་ཞེས་བྱ་བའི་གླུའི་རྡོ་རྗེ་ཡོངས་སུ་བཟླས་པའི་ཆུས་འཐོར་འཐུང་བྱ་བའི་ཕྱིར་བྱིན་ལ། ཨོཾ་ཧྲཱིཿབི་ཤུདྡྷ་ཤུདྡྷ་སརྦ་པཱ་པཾ་ནི་ཙཱ་སྱ་ཤོ་དྷ་ཡ། སརྦ་བི་ཀལྦཱན་ཨ་པ་ན་ཡ་ཧཱུཾ་ཞེས་བྱ་བ་མངོན་པར་བཟླས་ཤིང་ཆུ་ཁྱོར་བ་གསུམ་ [130b.6]འཐུང་དུ་གཞུག་པར་བྱའོ། །དེ་ནས་ཀུ་ཤ་གཅིག་ལ། ཨོཾ་བཛྲ་ཏཱི་ཀྵྞ་དྷཱིཿཞེས་བྱ་བ་མངོན་པར་བཟླས་ལ་བྱིན་ལ་འདི་ལྟར་མགོ་བོའི་སྔས་སུ་ཞོག་ཅིག་ཅེས་བསྒོའོ། །ཡང་ཀུ་ཤ་གཞན་དག་ལ་རྡོ་རྗེ་གནོད་སྦྱིན་གྱི་གསང་སྔགས་མངོན་པར་བཟླས་པས་སྟན་དུ་བྱ་བའི་ཕྱིར་སྦྱིན་པར་བྱའོ། ། [130b.7]རྡོ་རྗེ་གནོད་སྦྱིན་མངོན་པར་བཟླས་པའི་སྲུང་སྐུད་མདུད་པ་གསུམ་དང་ལྡན་པ་ལ་ཡང་ཡི་གེ་བརྒྱ་པ་བཟླས་བརྗོད་བྱ་སྟེ། དཔུང་པ་གཡོན་པ་བསྲུང་བའི་ཕྱིར་དང་བརྟན་པར་བྱ་བའི་ཕྱིར་བཅིང་བར་བྱའོ། །ཨོཾ་བཛྲ་ཡཀྵ་ཞེས་བྱ་བ་ནི་རྡོ་རྗེ་གནོད་སྦྱིན་གྱི་སྔགས་སོ། །ཨོཾ་མཉྫུ་ཤྲཱི་ས་མ་ཡ། མ་ནུ་ [131a] [131a.1]པཱ་ལ་ཡ། མཉྫུ་ཤྲཱི་ཏྭེ་ནོ་པ་ཏིཥྛ་དྲྀཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨྨ་སུ་ཙ་མེ། ཙིཏྟཾ་ཤྲི་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་ཝཱན་སརྦ་ཏ་ཐཱ་ག་ཏ་བཛྲཱ་མཱ་མེ་མུ་ཉྩ་མཉྫུ་ཤྲཱི་བཛྲཱི་བྷ་བ་མ་ཧཱ་ས་མ་ཡ་མཉྫུ་ཤྲཱི་ཨཱཿཞེས་བྱ་ [131a.2]བ་ནི་ཡི་གེ་བརྒྱ་བའི་སྔགས་སོ། །དེ་ནས་བཞིན་བཟངས་རྣམས་ལོངས་ཤིག །སང་གི་ཉིན་མོ་ཁྱེད་རྣམས་ཐར་པ་ཆེན་པོའི་རང་བཞིན་གྱི་གྲོང་ཁྱེར་མཐོང་བར་འགྱུར་གྱིས། ཇི་ལྟར་མཐོང་བའི་རྨི་ལམ་རྣམས་ཀྱང་སྨྲོས་ཤིག་ཅེས་བརྗོད་ལ་སླར་བཏང་ངོ་། །དེ་ནས་ནང་པར་མཚན་མོའི་མཐར་རྨི་ལམ་གང་ [131a.3]དག་མཐོང་བར་དྲི་བར་བྱའོ། །རྨི་ལམ་མཐོང་ནས་རྨི་ལམ་བཟང་པོའམ་ངན་པ་འཛེམ་པ་མེད་པར་བརྗོད་པར་བྱའོ། །རྨི་ལམ་སངས་རྒྱས་མཐོང་བ་ནི། །ཡོན་ཏན་རྒྱ་མཚོ་མངོན་སུམ་བཞིན། །མཆོད་རྟེན་དང་ནི་སྐུ་གཟུགས་མཐོང་། །དེ་ལ་མཆོད་པ་རྩོམ་པ་དང་། །དགེ་སློང་དག་ལས་ཆོས་ [131a.4]ཉན་ཏམ། །ཡང་ན་གཞན་ལས་ཉན་ཀྱང་རུང་། །ཆོས་ནི་རྣམ་པར་སྤྱོད་པ་དང་། དེ་བཞིན་གླེགས་བམ་ཀློག་པ་དང་། རྨི་ལམ་དགེ་འདུན་མཐོང་བ་དང་། །ཡང་ན་དགེ་སློང་གཅིག་ཏུ་མཐོང་། །དེ་དང་འགྲོགས་ཤིང་གཏམ་ཟེར་དང་། །ཡང་ན་དགེ་སློང་དངོས་པོར་མཐོང་། །གཙུག་ལག་ཁང་ [131a.5]དག་མཐོང་བ་དང་། །དེ་བཞིན་དགེ་སློང་མ་དག་མཐོང་། །རྒྱལ་བའི་སྲས་རྣམས་མཐོང་བ་དང་། །དེ་བཞིན་ཕ་མ་བླ་མ་དང་། །མཛའ་བོ་རྣམ་པ་སྣ་ཚོགས་རྣམས། །རྨི་ལམ་དུ་ནི་མཐོང་ན་ཤིས། །རིག་སྔགས་དང་ནི་དངོས་གྲུབ་ཐོབ། །དེ་བཞིན་བསླབ་པ་འཛིན་པ་དང་། །ཀུན་དགའ་རྣམ་ [131a.6]པ་སྣ་ཚོགས་དང་། །འབབ་ཆུ་རྣམས་དང་རྒྱ་མཚོ་དང་། །རི་དང་གླང་པོ་ཆེ་དག་ཀྱང་། །མཐོང་ན་ཡང་ནི་བཟང་བར་གྲགས། །རྒྱལ་པོ་དག་ནི་མཐོང་ན་ཤིས། །བདེ་གཤེགས་སྤྱོད་དང་མཐུན་པ་ཡི། །དགའ་ཐུབ་ཅན་དང་བྲམ་ཟེ་དང་། །ཕྱུག་པོ་སྐྱེས་བུ་དམ་པ་དང་། །བ་དང་རྟ་དང་ངང་པ་དང་། །སེང་ [131a.7]གེ་དང་ནི་རི་དགས་དང་། །རྨི་ལམ་དུ་ནི་མཐོང་ན་ཤིས། །བཀྲ་ཤིས་པ་ཡི་བྱ་རྣམས། །གསེར་དག་དང་ནི་གཏེར་རྣམས་དང་། །རིན་པོ་ཆེ་དང་དངུལ་དག་དང་། །ནོར་ནི་རྣམ་པ་སྣ་ཚོགས་དང་། །མདོར་ན་འབྱུང་ཁུངས་རྣམ་པ་དང་། །མཚོན་ཆ་རྣམས་དང་འབྲུ་རྣམས་དང་། །འབྲས་བུ་ [131b] [131b.1]རྣམས་དང་མེ་ཏོག་དང་། རྒྱན་གྱི་རྣམ་པ་སྣ་ཚོགས་དང་། །ཁ་ཟས་དང་ནི་གོས་རྣམས་དང་། །བྱིས་པ་དང་ནི་གཞོན་ནུ་མ། །བུད་མེད་གཟུགས་ནི་བཟང་མོ་དག །རྨི་ལམ་དུ་ནི་མཐོང་ན་བཟང་། །ཡང་ན་ཐོབ་ཅིང་རེག་སྨྲ་དང་། །རྨི་ལམ་དུ་ནི་དབང་བསྐུར་དང་། །རྒྱལ་པོར་འགྱུར་ཞིང་འབྱོར་པ་དང་། ། [131b.2]དམག་དཔོན་དུ་ནི་གྱུར་པ་དང་། །གཡུལ་ལས་རྒྱལ་ཞིང་དགྲ་གསོད་དང་། །གཉེན་དང་ལྷན་ཅིག་འགྲོགས་པ་དང་། །ལྷ་རྣམས་ཀྱང་ནི་མཐོང་བ་དང་། །ཐེག་པ་དང་ནི་ཤིང་རྟ་ཞོན། །དེ་བཞིན་རི་དང་ཁང་ཐོགས་འཛེགས། །ངོ་མཚར་རྣམ་པ་སྣ་ཚོགས་དག །རྨི་ལམ་དུ་ནི་མཐོང་ན་དགེ། །ཡམ་ཤིང་ [131b.3]མེ་ལ་སྦྱིན་སྲེག་བྱ། །བྱ་བ་བཟང་པོ་དག་ལ་འཇུག །ཆུ་ལས་བརྒལ་ཞིང་རོ་ལས་བརྒལ། །རྐུན་པོ་དག་ནི་ཚར་གཅོད་དང་། །སྟོབས་འགྱེད་པ་ལས་རྒྱལ་བ་དང་། གྱད་སྟོབས་རྡོ་བཅིང་འགྱིང་བ་དང་། །རྩེད་མོ་སྣ་ཚོགས་རྨི་བ་དང་། །དེ་བཞིན་རྩལ་དང་སྟོབས་འགྱེད་དང་། །བཀྲ་ཤིས་ [131b.4]དག་ནི་ཐམས་ཅད་དང་། །མཐོང་ན་རབ་ཏུ་དགེ་བར་བཤད། །གསང་སྔགས་ཆོ་ག་ཉན་པ་དང་། །དགའ་སྟོན་དགེ་བ་མཐོང་བ་དང་། སྒྲུབ་པ་བཟང་པོ་རྩོམ་པ་དང་། དེ་ལ་སོགས་པའི་ལྟས་རྣམས་ནི། །དགེ་བ་རྣམ་པ་དུ་མ་དག །བློ་ཡིས་རྣམ་པར་དཔྱད་བྱ་ཞིང་། །དེ་ལས་བཟློག་ [131b.5]པ་སྤང་བར་བྱ། །དགེ་བ་རྣམས་ནི་འགྲུབ་པར་འགྱུར། །མི་དགེ་རྣམས་ནི་མི་འགྲུབ་པོ། །མི་དགེ་བ་དག་ཤེས་ནས་སུ། །དེ་དག་མཁས་པས་སྤང་བར་བྱ། །དགེ་བ་ཡི་ནི་ལྟས་རྣམས་ནི། །རབ་དང་འབྲིང་དང་ཐ་མ་ལས། །གསང་སྔགས་དངོས་གྲུབ་རྣམ་གསུམ་མོ། །མི་དགེ་བ་ལ་ཞི་ [131b.6]བ་ཡི། །སྦྱིན་སྲེག་ཞི་བའི་གསང་སྔགས་ཀྱིས། །བ་ཡི་མར་ལ་བརྒྱ་རྩ་བརྒྱད། །ཆོ་ག་བཞིན་དུ་ཞི་བ་དང་། །དེ་ནས་སློབ་མ་སྡིག་བྲལ་ཞིང་། །རྣམ་པར་དག་པ་དེ་དག་ལ། །རྗེས་སུ་བརྩེ་བར་བྱ་བའི་ཕྱིར། །ཅི་འདོད་པར་ནི་གཟུང་བར་བྱའོ། །དེ་ནས་དཀྱིལ་འཁོར་ཡང་དག་པར་མཆོད་ [131b.7]ལ་བཟླས་བརྗོད་དང་བསྒོམ་པ་ཇི་ལྟ་བ་བཞིན་དུ་བྱའོ། །དེ་ནས་བདུག་སྤོས་གཏུལ་ལ། ཕྱོགས་བཅུར་བཞུགས་པའི་སངས་རྒྱས་རྣམས། །སྲས་བཅས་འཇིག་རྟེན་རྣམ་གྲངས་དང་། །རྡོ་རྗེ་རིགས་ཆེན་རིགས་དག་དང་། །དེ་བཞིན་པདྨ་ལས་ཀྱི་རིགས། །སྙིང་པོ་སྔགས་དང་རིགས་རྣམས་ [132a] [132a.1]དང་། །གང་ཡང་ལྷ་ཡི་ཚོགས་རྣམས་ཀུན། །ཆོས་ཀྱི་དབྱིངས་ན་ངེས་བཞུགས་པ། །དེ་རྣམས་བདག་ལ་དགོངས་སུ་གསོལ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །བདག་མིང་འདི་ཞེས་བགྱི་བ་ཡིས། །ཡོ་བྱད་ཅི་འབྱོར་པ་ཡིས་ནི། །ཆོས་ [132a.2]དབྱིངས་རང་བཞིན་གྲོང་ཁྱེར་མཆོག །དཀྱིལ་འཁོར་སང་ནི་བྲི་བར་བགྱི། །ཐུགས་བརྩེ་ཉེ་བར་བཞག་ནས་ནི། །བྱིན་གྱིས་བརླབ་པ་མཛད་དུ་གསོལ། །དེ་ནས་རང་གི་སྔགས་དང་ཕྱག་རྒྱ་དག་གིས་འཁོར་ལོ་བཏེག་ལ། དེ་བཞིན་གཤེགས་པ་དེ་རྣམས་ཉིད་དང་བའི་ཤེལ་ལྟ་བུའི་ཁང་པ་ [132a.3]བརྩེགས་པའི་ནང་དུ་ཞུགས་པར་ཁ་སྦྱར་བ་ནི་འདི་ཡིན་ཏེ། ཨོཾ་ཧཱུཾ་ཧྲཱཾ་ཧྲཱིཿཞེས་བྱ་བའི་དབུས་སུ་སྟེང་དང་འོག་དང་བར་དུ་བཀྲ་ཤིས་པར་བྱ་བའི་ཕྱིར། །ཨོཾ་ལྔ་དང་། ཡང་སྟེང་དུ་ཨཱཿལྔ་དང་། འོག་ཏུ་ཧཱུཾ་ལྔ་བསམས་ཏེ། དེ་ལྟར་བདག་དང་དཀྱིལ་འཁོར་བསྒོམ་པར་བྱའོ། །དེ་ནས་དེ་ [132a.4]ཉིད་དུ་སློབ་མའི་གཙོ་བོ་དང་ལྷན་ཅིག་བསམ་གཏན་ལ་མཉམ་པར་གཞག་པའི་བློ་དང་ཉལ་བར་བྱའོ། །དེ་ཡན་ཆད་ནི་སློབ་མ་ལྷག་པར་གནས་པའི་རིམ་པའོ། །དེ་ནས་ནང་པར་སྐྱ་རེངས་ཤར་ཙམ་ན་ཁྲུས་བྱ་བ་སྔོན་དུ་འགྲོ་བ་ནས་ལྷའི་རྣལ་འབྱོར་བྱས་ལ། ཉི་མ་ཤར་ཀར་ཐིག་ [132a.5]གདབ་པ་བརྩམ་པར་བྱ་སྟེ། འཁོར་ལོས་སྒྱུར་བའི་ང་རྒྱལ་བྱ་ལ་སྲད་བུ་སྔོན་པོ་དང་སེར་པོ་དང་དམར་པོ་དང་ལྗང་གུ་དང་དཀར་པོ་དང་དྲི་ཞིམ་པོས་ཁ་བསྒྱུར་ལ་གོ་རིམས་འདི་ཉིད་ཀྱིས་བཞག་ལ། ཧཱུཾ་ཧྲཱཾ་ཧྲཱིཿ་ཨཿཨོཾ་ཞེས་བྱ་བའི་ས་བོན་ལས་མི་བསྐྱོད་པ་ལ་སོགས་པ་སྲད་བུ་ལ་ [132a.6]བཀོད་དེ། ས་བོན་དེ་རྣམས་ལ་རང་རང་གི་ཕྱོགས་ན་བཞུགས་པའི་དེ་བཞིན་གཤེགས་པ་རྣམས་ཀྱི་ཐུགས་ཀར་རང་རང་གི་ཁ་དོག་ཇི་ལྟར་འོད་ཀྱི་སྲད་བུར་བསམས་ལ་མིག་གཉིས་སུ་ཨོཾ་དཱིཔྟ་དྲིཥྚཱ་ཨཾ་ཀུ་ཤི་ཛཿཞེས་བཀོད་ལ་རབ་ཏུ་གཡོ་ཞིང་འབར་བའི་རྫི་མའི་ལྕགས་ཀྱུས་དྲང་བར་བསམ། [132a.7]བཅོམ་ལྡན་འདས་དཀྱིལ་འཁོར་ཆེན་པོའི་ཐིག་གདབ་པའི་ཕྱིར་རྡོ་རྗེའི་ཐིག་བདག་ལ་སྩོལ་ཅིག་ཅེས་བསྐུལ་བར་བྱའོ། །བདག་པོ་རྣམས་ཀྱིས་བཏང་བའི་འོད་ཟེར་ཀྱིས་རང་རང་གི་སྲད་བུར་གང་བར་བསམ་མོ། །ཨ་ནྱོ་ནྱ་ཨ་ནུ་ག་ཏ་སརྦ་དྷ་རྨཱཿསྥ་ར་སྥ་ར་ཨ་ནུ་པྲ་བིཥྚ་སརྦ་དྷ་རྨཱཿ། ཨ་ཏྱནྟ་ཨ་ནུ་པྲ་ [132b] [132b.1]བིཥྚ་སརྦ་དྷརྨཱཿ། ཨོཾ་བཛྲ་སཏྭ་ཧཱུཾ་ཞེས་ཟློས་ཤིང་བསྒྲིལ་བར་བསམ་མོ། །དེ་ནས་མ་དང་ཊ་ལས་ཉི་མ་དང་ཟླ་བ་སེར་པོ་སྣང་བ་མིག་གཉིས་སུ་བསྐྱེད་ལ། བཛྲ་ཏིཥྛ་མ་ཏ་ཞེས་བྱ་བས་བརྟན་པར་བྱས་ནས། གསེར་ལ་སོགས་པའི་སྣོད་དུ་སྲད་བུ་བཞག་དྲི་དང་མེ་ཏོག་ལ་སོགས་པས་མཆོད་ལ། [132b.2]ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་བྱ་བའི་རྡོ་རྗེ་བསྡམས་པས་བཟུང་ལ་བརྒྱ་རྩ་བརྒྱད་བཟླས་པར་བྱའོ། །རིང་ཐུང་ནི་དཀྱིལ་འཁོར་གྱི་ཉིས་ལྡབ་བོ། །ཕྲ་སྦོམ་ནི་སྒོའི་ཉི་ཤུ་ཆའོ། །དེ་ནས་དཀྱིལ་འཁོར་ཐིག་གདབ་པར་བྱ་སྟེ། སློབ་དཔོན་ཤར་དུ་བལྟས་སློབ་མ་ནུབ་ཏུ་བལྟས་ལ། [132b.3]ལག་པ་གཉིས་ཀྱི་རྡོ་རྗེ་ཁུ་ཚུར་གྱིས་སྲད་བུ་ལྟེ་བ་ནས་བཟུང་ལ་ཛཿཞེས་བརྗོད་ལ། །གཡོན་པ་རྡོ་རྗེ་ཁུ་ཚུར་གྱིས་གྲོགས་མཆོག་ལ་གཏད་པར་བྱའོ། །གྲོགས་པོས་ཀྱང་ཛཿགསུམ་གྱིས་བླང་བར་བྱའོ། །དེ་ནས་འདེབས་ཀར་འདི་སྐད་བརྗོད་པར་བྱ་སྟེ། ནམ་མཁའ་གང་བའི་བདེ་གཤེགས་ [132b.4]རྣམས། །ཐིག་གི་སྒྲ་ཡིས་བསྐུལ་ནས་ནི། །ཐམས་ཅད་འདིར་ནི་གཤེགས་སུ་གསོལ། །ཁྱེད་ཀྱིས་འགྲོ་དོན་མཛད་པའི་རིགས། །ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་བརྗོད་དེ། ཇི་ལྟར་གཞན་ནས་གསུངས་པ་ལྟར་གདབ་པར་བྱའོ། །དེ་ཡང་རྡོ་རྗེ་དབྱིངས་ཀྱི་དཀྱིལ་འཁོར་ [132b.5]ནི་དབུས་སུ་ཕུར་བུ་བཙུགས་ལ་དེ་ལ་སྲད་བུ་བཏགས་ཏེ། དབུས་ལ་འཁོར་ལོ་རྩིབས་བརྒྱད་པ། དེའི་ཕྱི་རིམ་རྩིབས་བཅུ་དྲུག་པ་དེའི་ཕྱི་རིམ་དུ་རྒྱན་མེད་པའི་སྒོ་གཞུག་སྟེ། རྩིག་པའི་ཆ་དང་འདོད་ཡོན་དང་། དྲ་བ་ཕྱེད་པས་བརྒྱན་པའོ། །རྟ་བབས་ལ་སོགས་པ་རྒྱན་ [132b.6]གཞན་ནི་མེད་པར་གདབ་བོ། །དེའི་ཕྱི་རོལ་དུ་རྡོ་རྗེ་ཕྲེང་བས་བསྐོར་ལ། འཁོར་ལོ་རྩིབས་བཅུ་དྲུག་པར་གདབ་པོ། །དེའི་ཕྱི་རོལ་དུ་ཕྲེང་བས་བསྐོར་ལ། གྲུ་ཆད་བཞི་ཡིས་བརྒྱན་ཏེ་ལྷ་སྣམ་མེད་པའི་སྒོ་དང་ཐིག་གདབ་པོ། །དེ་ལ་རྒྱན་ལ་སོགས་པ་ཐམས་ཅད་ཀྱིས་བརྒྱན་པར་གདབ་བོ། ། [132b.7]དེའི་ཕྱིར། འཁོར་ལོ་རིམ་གསུམ་ལྡན་པ་ལ། །སྣམ་བུ་མུ་ཁྱུད་རྣམས་ཀྱིས་བརྒྱན། །རྟ་བབས་དང་ནི་ཏྭ་ར་ཎ། ཤིན་ཏུ་མཛེས་པའི་རྒྱན་གྱིས་བརྒྱན། །ཞེས་གསུངས་ཏེ། དེ་ལ་དེ་སྐད་ཅེས་བྱའོ། །དེ་ལྟར་རྡོ་རྗེ་དབྱིངས་ཀྱི་དཀྱིལ་འཁོར་གྱི་ཐིག་བསྟན་ནས། ད་ནི། རིགས་ཁ་ཕྲལ་བའི་ [133a] [133a.1]ཐིག་འདེབས་ན་ཐམས་ཅད་ཀྱི་དབུས་འཁོར་ལོ་རྩིབས་བརྒྱད་པ། ལྷ་སྣམ་གཅིག་པ། སྒོ་རྐྱང་པ། རྒྱན་ཐམས་ཅད་ཀྱིས་བརྒྱན་པར་གདབ་པོ། །དེ་ནས་རིགས་བསྡུས་པའི་ཐིག་འདེབས་ན་དབུས་འཁོར་ལོ་རྩིབས་བཞི་ཕོ་བྲང་དང་བཅས་པར་གདབ་པོ། །སློབ་དཔོན་ཀླུ་སྒྲུབ་ཀྱི་ [133a.2]ཞལ་ནས། ཕོ་བྲང་ཐིག་བཞི་བཏབ་པས་ལེ་ཚེ་དགུ་རུ་ཡོད་པ་ལ། རྡོ་རྗེའི་གདུང་བཞི་བཏང་ལ་ཕྱོགས་བཞི་དབུས་དང་ལྔར་དེ་བཞིན་གཤེགས་པ་ལྔ་འཁོར་དང་བཅས་པའི་ཕོ་བྲང་ལྔ་བྱ་གསུང་ངོ་། །དེ་ཡང་འགལ་བ་མེད་དོ། །དེ་ནས་མདུན་དུ་མི་བསྐྱོད་པའི་དཀྱིལ་འཁོར། གཡས་ [133a.3]སུ་རིན་ཆེན་འབྱུང་ལྡན་གྱི་དཀྱིལ་འཁོར། རྒྱབ་ཏུ་སྣང་བ་མཐའ་ཡས་ཀྱི་དཀྱིལ་འཁོར། གཡོན་དུ་དོན་ཡོད་གྲུབ་པའི་དཀྱིལ་འཁོར་གྱི་ཐིག་གདབ་པོ། །ཕྱིའི་དཀྱིལ་འཁོར་རྣམ་སྣང་གིའོ། །ནང་གི་དཀྱིལ་འཁོར་དེ་དག་ཀྱང་གྲུ་བཞི་པ། སྒོ་བཞི་པ། རྟ་བབས་མེད་པའོ། །ཕྱིའི་ [133a.4]དཀྱིལ་འཁོར་ལ་ནི་རྟ་བབས་ལ་སོགས་པ་ཐམས་ཅད་ཀྱིས་བརྒྱན་པའོ། །དཀྱིལ་འཁོར་འདི་དག་ཐམས་ཅད་ཀྱི་ཕྱི་རོལ་དུ་ཁོར་ཡུག་དང་ཁོར་ཡུག་ཆེན་པོའི་ཐིག་གདབ་པར་བྱའོ། །དེ་དག་ནི་ཐིག་གདབ་པའི་རིམ་པའོ། །དེ་ནས་དཀྱིལ་འཁོར་དེ་ལ་གལ་ཏེ་འགྲན་ཞིང་གེགས་བྱེད་ [133a.5]ན་དེ་བཟློག་པའི་ཆོ་ག་ནི་ནམ་མཁའ་དྲི་མེད་ལས་ཤེས་པར་བྱའོ། །དེ་ནས་ཚོན་དགྱེ་བ་བརྩམ་པར་བྱ་སྟེ། སྲད་བུ་ལ་བཤད་པའི་ཁ་དོག་གི་རིམ་པས་ཚོན་རྩི་རྣམས་བླངས་ལ། ཧཱུཾ་ཏྲཱཾ་ཧྲཱིཿ་ཨཿཨོཾ་ཞེས་བྱ་བ་འདི་རྣམས་ལས་བསྐྱེད་དེ། རང་གི་རིགས་ཀྱི་འཁོར་བསམས་ལ། ཨོཾ་ [133a.6]བཛྲ་ཙི་ཏྲ་ས་མ་ཡ་ཧཱུཾ། ཞེས་བྱ་བ་འདི་དག་ཕྱག་རྒྱ་དང་བཅས་པས་སྟོང་རྩ་བརྒྱད་མངོན་པར་བཟླས་བརྗོད་བྱའོ། །དེ་ལ་འདིའི་ཕྱག་རྒྱ་འདི་ཡིན་ཏེ། རྡོ་རྗེ་ཕྱག་རྒྱ་གཉིས་ཀ་ཡི། །མཛུབ་མོ་རྩེ་མོར་རབ་སྦྱར་ནས། །བྱས་ནས་ཚོན་རྩི་ཐམས་ཅད་ལ། །འབར་བའི་ལྟ་བས་དགུག་པར་བྱ། ། [133a.7]མཐར་ཡི་གེ་ཧྲཱིཿདང་རྡོ་རྗེ་ཉི་མའི་ཕྱག་རྒྱས་སྦར་བར་བྱའོ། །དེ་ཡང་འབར་བའི་ལྟ་བ་ནི་འདི་ཡིན་ཏེ། རབ་ཏུ་མྱུར་བར་གཡོ་བའི་མིག །མིག་གི་རྫི་མ་འདྲེན་མ་ནི། །འབར་བའི་ལྟ་བ་ཞེས་སུ་གསུངས། །འགྲོ་བ་ཐམས་ཅད་འགུགས་པའོ། །དེ་ལ་ཚོན་མང་པོར་བྱ་བའི་ཕྱིར་བདེན་པའི་བྱིན་ [133b] [133b.1]གྱིས་བརླབ་པར་བྱས་ཏེ། བདེན་པ་གང་གིས་སེམས་ཅན་རྣམས་ལ་སངས་རྒྱས་རྣམས་སེམས་ཅན་རྗེས་སུ་དགའ་བས་ཆགས་པར་མཛད་པའི་བདེན་པ་དེས་ཚོན་རྩི་འབར་བར་གྱུར་ཅིག་ཅེས་བྱའོ། །དེ་ནས་དབུས་ཀྱི་ཕུར་བུ་ཧཱུཾ་བཞིས་ཕྱུང་ལ། བུ་ག་ཚོན་སྣ་ལྔས་དགང་སྟེ། དེ་ནས་ [133b.2]ཚོན་དཀར་པོ་བླངས་ལ། ཨོཾ་བཛྲ་རཀྵ་ས་མ་ཡ་ཧཱུཾ་ཞེས་བརྗོད་དེ་དབུས་སུ་བཀྱེ་ལ། དེ་ནས་དབང་ལྡན་ཕྱོགས་སུ་སོང་སྟེ། གཡོན་པ་རྡོ་རྗེ་ཁུ་ཚུར་གྱི་རིམ་པར་མཉམ་ཞིང་རྒྱུན་མ་ཆད་པར་མཛུབ་གང་བར་དྲངས་ལ་དེས་ཚོན་རྩི་བདེ་བར་བྲི་བར་བྱའོ། །དེ་ཡང་དྲུག་སྟོང་པའི་རྒྱུད་ཕྱི་ [133b.3]མའི་ལེའུ་དགུ་པ་ནས། རྡོ་རྗེ་འཆང་ཆེན་པོས་འདི་སྐད་གསུངས་ཏེ། ཀྱེ་མ་འདུས་པའི་བྱང་ཆུབ་སེམས་དཔའ་རྣམས། །བརྙན་མའི་དཀྱིལ་འཁོར་རྡུལ་ཚོན་ནི། །རིན་ཆེན་ལྔ་ལས་གྲུབ་པ་སྟེ། དབུས་ཀྱི་ཕོ་བྲང་ལེ་ཙེ་རྣམས། །ཤར་ཕྱོགས་བཻ་ཌཱུརྱ་ལས་གྲུབ། །ལྷོར་ནི་གསེར་ [133b.4]ལས་གྲུབ་པ་སྟེ། །ནུབ་ནི་པདྨ་རཱ་གའོ། །བྱང་ནི་ཨིནྡྲ་ནཱི་ལ་སྟེ། །དབུས་ནི་དུང་ལས་གྲུབ་པའོ། །ཞེས་གསུངས་ཏེ། དེ་ནི་འབྱོར་པ་རབ་པོ། །འབྱོར་པ་འབྲིང་གིས་འབྲུ་རྣམས་སོ། །འབྱོར་པ་ཐ་མས་ནི་རིན་པོ་ཆེ་གསེར་གྱི་ས་གཞི་ལ་བྱིན་གྱིས་བརླབས་ཏེ་བྲི་བར་བྱའོ། །དེ་ [133b.5]ཡང་ཆོ་ག་བསྡུས་པའི་རྒྱུད་ལས་གསུངས་པ། ཤར་ཕྱོགས་སུ་ནི་སྔོན་པོ་སྟེ། །ལྷོ་ནི་སེར་པོ་ཡིན་པར་ངེས། །ནུབ་ཀྱི་ཆ་ནི་དམར་པོ་སྟེ། །བྱང་དུ་ལྗང་གུ་ཡང་དག་བྲི། །དབུས་ཀྱི་ལྟེ་བ་དཀར་པོ་སྟེ། །གོང་རས་རྣམས་ཀྱང་དེ་ཀ་ལྟར། །རེ་མིག་རྣམས་ནི་ལྗང་གུ་སྟེ། །དེ་ཡི་ཕྱི་ [133b.6]རྒྱབ་འཁོར་ལོ་ནི། །བཻ་ཌཱུརྱ་ཡི་མདོག་འདྲ་ལ། །རྩིབས་མཆན་པདྨ་རཱ་ག་འདྲ། །གྲུ་ཆད་ལྗང་གུ་མཚོ་དང་བཅས། །པཉྩ་རིན་ཆེན་ཕ་གུ་ལྔ། །དཀར་དང་ལྗང་དང་དམར་དང་སེར། །སྔོན་པོ་ཕྱི་ཡི་རྩེ་མོ་ལའོ། སྒོ་ནི་ཕྱོགས་ཀྱི་མདོག་དང་སྦྱར། །ཕྱི་རོལ་འཁོར་ལོ་བཅུ་དྲུག་ནི། །བཙོ་མ་གསེར་ [133b.7]གྱི་མདོག་འདྲ་ལ། །རྩིབས་མཆན་བཻ་ཌཱུརྱ་ཡི་འོད། །ཕྱི་ཡི་རྩིག་པ་ལྔ་པོ་ཡང་། །ཕ་གུ་ལྔ་ཡི་རིམ་པ་བཞིན། །ཁྱམས་ནི་པདྨ་རཱ་གའི་མདོག། །དྲ་བའི་རང་བཞིན་མཐིང་ག་ལ། །མདའ་ཡབ་ཨིནྡྲ་ནཱི་ལའོ། །བཀྲ་ཤིས་བྱ་ཡི་ཚོགས་ཀྱིས་བརྒྱན། །རྟ་བབས་ལ་སོགས་ཅི་མཛེས་པར། ། [134a] [134a.1]མཁས་པས་ཇི་ལྟར་འཚམ་པར་བྲི། །དེ་ནི་ཚོན་གྱི་རིམ་པ་སྟེ། །མི་ཤེས་དྲང་ཕྱིར་ཀུན་རྫོབ་བསྟན། །དོན་གྱི་ངོ་བོ་བརྗོད་དུ་མེད། །ཅེས་གསུངས་སོ། །དེ་ལ་དཔྱད་དེ་བྲི་བ་ནི། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཚོན་ནོ། །དེ་ནས་ཁ་ཕྲལ་བ་རྣམས་ཀྱི་དཀྱིལ་ [134a.2]འཁོར་གྱི་ཚོན་དགྱེ་ན། དཀྱིལ་འཁོར་དབུས་འགྱུར་མཐའ་མི་འགྱུར། །དབུས་ནི་འཁོར་ལོ་རྡོ་རྗེ་དང་། པདྨ་རིན་ཆེན་རྒྱ་གྲམ་མཚན། །ལེ་ཚེ་དགུ་ལ་ཀ་བ་བརྒྱད། །ཐམས་ཅད་ལ་ནི་རབ་ཏུ་གསུངས། །རྣམ་པར་སྣང་མཛད་དཀྱིལ་འཁོར་ནི། །དབུས་དཀར་རེ་མིག་ལྗང་གུ་ལ། །འཁོར་ [134a.3]ལོ་རྩིབས་བརྒྱད་དཀར་པོ་དགྱེ། །རྩིབས་མཆན་རྣམས་ནི་དཀར་པོ་སྟེ། །རྡོ་རྗེ་ཕྲེང་དཀར་གཞི་མ་སེར། །ཤར་སྔོ་ལྷོ་ནི་སེར་པོ་ལ། །ནུབ་ནི་དམར་བྱང་ལྗང་གུའོ། །རྩིག་པ་དཀར་ནས་རིམ་པར་དགྱེ། །ཁྱམས་ལ་སོགས་པ་སྤྱི་དང་མཐུན། །མི་བསྐྱོད་པ་ཡི་དཀྱིལ་འཁོར་ནི། །དབུས་ན་ [134a.4]སྔོ་ཕྲེང་དཀར་པོ་ལ། །འཁོར་ལོ་སྔོན་པོ་རེ་མིག་ལྗང་། །རྩིབས་མཆན་རྣམས་ནི་དམར་པོ་གཏང་། །རྡོ་རྗེ་ཕྲེང་ནག་གཞི་མ་དཀར། །ཤར་དཀར་ལྷོ་ནི་སེར་པོ་ལ། །ནུབ་དམར་བྱང་ནི་ལྗང་གུའོ། །རྩིག་པ་སྔོ་ནས་རིམ་པས་དགྱེ། །ཁྱམས་ལ་སོགས་པ་སྤྱི་དང་མཐུན། །འོད་དཔག་མེད་ [134a.5]པའི་དཀྱིལ་འཁོར་ནི། །དབུས་དམར་ཕྲེང་བ་དཀར་པོ་ལ། འཁོར་ལོ་དམར་ལ་རེ་མིག་ལྗང་། །རྩིབས་མཆན་རྣམས་ནི་དཀར་པོར་བྱ། །རྡོ་རྗེ་ཕྲེང་ལྗང་གཞི་མ་སེར། །ཤར་སྔོ་ལྷོ་ནི་སེར་པོ་ལ། །ནུབ་དཀར་བྱང་ནི་ལྗང་གུ་སྟེ། །རྩིག་པ་དམར་ནས་རིམ་པས་དགྱེ། །རིན་ཆེན་འབྱུང་ [134a.6]ལྡན་དཀྱིལ་འཁོར་ནི། །དབུས་སེར་ཕྲེང་བ་སྔོན་པོ་ལ། །འཁོར་ལོ་སེར་ལ་རེ་མིག་ལྗང་། །རྩིབས་མཆན་རྣམས་ནི་སྔོན་པོ་ལ། །རྡོ་རྗེ་ཕྲེང་དམར་གཞི་མ་ལྗང་། །ཤར་སྔོ་ལྷོ་ནི་སེར་པོ་ལ། །ནུབ་དམར་བྱང་ནི་ལྗང་གུ་སྟེ། །རྩིག་པ་སེར་ནས་རིམ་པས་དགྱེ། །དོན་ཡོད་གྲུབ་པའི་དཀྱིལ་ [134a.7]འཁོར་ནི། །དབུས་ལྗང་ཕྲེང་བ་དམར་པོ་ལ། །འཁོར་ལོ་ལྗང་ལ་རེ་མིག་སེར། །རྩིབས་མཆན་རྣམས་ནི་སེར་པོ་སྟེ། །རྡོ་རྗེ་ཕྲེང་སྔོ་གཞི་མ་སེར། །ཤར་སྔོ་ལྷོ་ནི་སེར་པོ་ལ། །ནུབ་དམར་བྱང་ནི་དཀར་པོ་སྟེ། རྩིག་པ་ལྗང་ནས་རྣམ་པར་དགྱེ། །ཞེས་པ་ནི་ཁྲི་དྲུག་སྟོང་པའི་ [134b] [134b.1]རྒྱུད་ཕྱི་མ་ནས་གསུངས་སོ། །ཁྱམས་ལ་སོགས་པ་ནི་ཐམས་ཅད་ལ་མཐུན་ནོ། །དེ་ནས་རིགས་བསྡུས་པའི་རྡུལ་ཚོན་དགྱེ་ན། དབུས་ནི་རྡོ་རྗེ་དབྱིངས་ཀྱི་དཀྱིལ་འཁོར་ལྟར། །ལྷག་མ་ནི་རང་རང་གི་དཀྱིལ་འཁོར་ལྟ་བུའོ། །ཕྱིའི་རྒྱན་ནི་སྤྱི་དང་མཐུན་ནོ། །ཁོར་ཡུག་དང་ཁོར་ཡུག་ཆེན་ [134b.2]པོ་ནི་དམར་པོ་དང་དཀར་པོ་བྱས་ལ་རྡོ་རྗེ་སེར་པོ་དང་འོད་ཀྱི་ར་བ་བྱའོ། །དེ་ཡན་ཆད་ནི་རྡུལ་ཚོན་བྲི་བའི་རིམ་པའོ། །དེ་ནས་ཕྱི་རོལ་དུ་དྲི་ཞིམ་པོས་ཉེ་བར་བྱུགས་ལ། མེ་ཏོག་གི་སིལ་མ་གཏོར་ཏེ། ཡི་གེ་བརྒྱ་པ་བཟླས་པའི་ཆུས་དབང་ལྡན་གྱི་ཕྱོགས་ནས་བརྩམས་ཏེ། ཕྱི་དང་ནང་དུ་བཅས་པ་ཀུན་ [134b.3]ལ་བསང་གཏོར་བྱའོ། །དེ་ནས་དཀྱིལ་འཁོར་བྱིན་གྱིས་བརླབ་པར་བྱ་བའི་ཕྱིར་རྡོ་རྗེ་འཁོར་ལོའི་ཕྱག་རྒྱ་བཅས་ལ། །ཨོཾ་བཛྲ་ཙཀྲ་ཧཱུཾ་ཞེས་བརྗོད་པར་བྱའོ། །དེ་ནས་ཕྱི་དྲོའི་དུས་སུ་གླུ་དང་རོལ་མོ་དང་མེ་ཏོག་ལ་སོགས་པའི་མཆོད་པ་རྣམས་ཀྱིས་དང་པོའི་འཁོར་ལོ་ཇི་སྙེད་དང་ཅི་འདོད་པ་བཞིན་དུ་ [134b.4]མཆོད་ཅིང་བརྟག་པར་བྱའོ། །དེ་ནས་འཇམ་དཔལ་གཞོན་ནུར་གྱུར་པའི་དམ་ཚིག་སེམས་དཔའི་སྐུ་གཟུགས་ལུགས་མ་ལ་སོགས་པ་ལ་ས་མ་ཡ་སྟྭཾ་ཞེས་གནས་སུ་བཞུགས་སུ་གསོལ་ལོ། །དེ་ནས་ཡི་གེ་ཕྱིན་ཅི་མ་ལོག་པར་ཁ་སྦྱོར་གྱི་སྦྱོར་བ་གསལ་བར་སྣང་ལ་བཞུགས་པའི་ལྷ་རྣམས། [134b.5]ཨོཾ་ཧཱུཾ་ཧྲཱིཿཞེས་པའི་སྙིང་པོས་བཞུགས་སུ་གསོལ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཡིན་པའི་ཕྱིར་ཐམས་ཅད་ཀྱི་ཐུན་མོང་ཡིན་ནོ། །དེ་ལ་ཕྱག་རྒྱ་བཞིའི་དོན་དང་ལྡན་པར་བྱའོ། །དེ་ལ་མཆོད་པ་རྣམས་ཀྱིས་མཆོད་ལ། མཆོག་སྦྱིན་རྡོ་རྗེ་མཆོག་ཁྱོད་ཅེས་པ་ལ་སོགས་པས་ [134b.6]བསྟོད་དེ། བརྟན་པར་བཞུགས་སུ་གསོལ། །དེ་ནས་རྣམ་པར་རྒྱལ་བ་ལ་སོགས་པའི་བུམ་པ་རྣམས་མགོན་པོ་འཇམ་དཔལ་གྱི་སྤྱན་སྔར་གཞག་པར་བྱའོ། །བུམ་པ་གཞན་དག་ཀྱང་མི་བསྐྱོད་པ་ལ་སོགས་པའི་མཚན་མ་དང་ལྡན་པའི་དཀྱིལ་འཁོར་གྱི་ཕྱི་རོལ་དུ། ཨོཾ་བཛྲོ་ད་ཀ་ཧཱུཾ། [134b.7]ཞེས་བརྒྱ་རྩ་བཟླས་ལ་གོས་སྣ་ཚོགས་ཀྱིས་བརྒྱན་པ་འབུམ་མ་མ་ཁྲི་འམ་སྟོང་ངམ་བརྒྱའམ་རིགས་སོ་སོ་ལ་རེ་རེ་གཞག་གོ། །སྤྱི་ལ་དེ་བཞིན་དུ་དབུལ་བར་བྱའོ། །དེ་ནས་དཀྱིལ་འཁོར་པས་ཧ་ཅང་མི་རིང་མི་ཉེ་བར་བཀུར་སྟི་གུས་པ་སྔོན་དུ་འགྲོ་བས་ཤར་ཕྱོགས་སུ་ཡུམ་ཤེས་རབ་ [135a] [135a.1]ཀྱི་ཕ་རོལ་ཏུ་ཕྱིན་པ་བཀླག་པར་བྱ། ལྷོར་ནི་རིན་པོ་ཆེ་ཏོག །ནུབ་ཏུ་སྡོང་པོས་བརྒྱན་པ། བྱང་དུ་ཟླ་བ་སྒྲོན་མའི་མདོ་བཀླག་པར་བྱའོ། །གར་མཁན་དང་རོལ་མོ་ལ་སོགས་པའི་ལྟད་མོ་མང་པོ་ཡང་ཕྱོགས་བཞིར་བྱེད་དུ་གཞུག་གོ། །ཟུར་བཞི་དར་གྱི་རྒྱལ་མཚན་ [135a.2]བཞི་ཡང་བསྒྲེང་བར་བྱའོ། །མེ་ཏོག་ལ་སོགས་པའི་མཆོད་པ་རྣམ་པ་སྣ་ཚོགས་པ་དང་། དཀར་གསུམ་དང་མངར་གསུམ་དང་ཁུར་བ་ལ་སོགས་པའི་བཟའ་བ་དང་བཅའ་བ་ལ་སོགས་པ་རྣམ་པ་མང་པོ་ཡང་ཅི་རིགས་པ་དགོད་པར་བྱའོ། །དེ་ཁོ་ན་ལ། བ་དན་དྲུག་དང་རྔ་མས་བརྒྱན། །དྲིལ་ [135a.3]བུ་དར་མཚོན་རྒྱལ་མཚན་སོགས། །དེ་ལ་སོགས་པའི་རྒྱན་རྣམས་ནི། །ཤིན་ཏུ་མཛེས་པར་བརྒྱན་པའོ། །ཞེས་པ་ལ་སོགས་རྒྱན་མཆོག་ནི། །འདི་ཡི་སྐབས་སུ་རིམ་པས་བསྟན། །ཞེས་གསུངས་པ་དེ་ལ་འདི་སྐད་ཅེས་བྱའོ། །དེ་ཡན་ཆད་ནི་བརྙན་མའི་དཀྱིལ་འཁོར་གྱི་རིམ་པའོ། ། [135a.4]དེ་ནས་དགོངས་མོའི་དུས་སུ་སྔགས་པ་ཁྲུས་བྱས། རྒྱན་ཆ་བགོ །ལུས་ལ་དྲི་ཞིམ་པོས་བྱུགས་ནས་གཡས་པས་རྡོ་རྗེ་ཐོགས་ལ། གཡོན་པས་དྲིལ་བུ་དཀྲོལ་ཞིང་། །མཚང་བའི་ལྷག་མ་ཁ་བསྐང་བའི་ཕྱིར་ལན་བདུན་ནམ་ལྔའམ་གསུམ་དུ་ཡི་གེ་བརྒྱ་པ་བཟླ་ཞིང་བསྐོར་བར་ [135a.5]བྱའོ། །དེ་ནས་བདེ་བའི་སྟན་ལ་ཉེ་བར་འདུག་སྟེ། ལྕེ་ལག་བྱིན་གྱིས་བརླབ་པ་ནས་བཟུང་ལ། སྦྱོར་བ་དང་པོ་དང་དཀྱིལ་འཁོར་རྒྱལ་མཆོག་དང་། ལས་རྒྱལ་མཆོག་དང་། རྡོ་རྗེ་སྒྲུབ་པ་དང་། ཕྱག་རྒྱ་བཞིས་རྒྱས་གདབ་པ་ཡན་ཆད་བྱས་ལ། དེ་ནས་མེ་ཏོག་ལ་སོགས་པའི་ [135a.6]མཆོད་པ་ལྔ་དང་། ལྷ་མོ་བརྒྱད་དང་། དེ་བཞིན་གཞན་དག་གིས་མཆོད་དེ། །དེ་བཞིན་དུ་མཆོད་པ་ཉི་ཤུས་ཀྱང་ཡང་དག་པར་མཆོད་ལ། དེ་ནས་གདུགས་དང་རྒྱལ་མཚན་དང་། བ་དན་སྣ་ཚོགས་པ་རྣམ་པར་བཀྲ་བ་བརྒྱ་སྟོང་ལ་སོགས་པའི་གྲངས་སྙེད་དམ། འབྱོར་པ་ཅི་ཡོད་པ་ [135a.7]ལས་འབུལ་བ་དང་རོ་བརྒྱ་བའི་ལྷའི་ཞལ་ཟས་དང་། སྭསྟི་ཀ་ལ་སོགས་པའི་བཟའ་བ་སྣ་ཚོགས་པ་འབུམ་མམ་བརྒྱ་སྟོང་སྙེད་དུ་དབུལ་བར་བྱ་སྟེ། ཨོཾ་ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཅེས་བརྗོད་ལ་དབུལ་བར་བྱའོ། །རོལ་མོ་བཅུ་ཕྲག་སྟོང་ངམ། །བརྒྱ་ཕྲག་སྟོང་ངམ། [135b] [135b.1]བཅུ་ཨོཾ་ཧཱུཾ་ཧྲཱིཿཞེས་པ་མངོན་པར་བཟླས་ལ་དབུལ་བར་བྱའོ། །རྣམ་པ་བཅུ་ནི་འདི་ལྟ་སྟེ། གླིང་བུ་དང་། པི་ཝང་དང་། རྫ་རྔ་དང་། རྫ་རྔ་ཆུང་ངུ་དང་། ཆ་ལང་དང་། རྔ་བོ་ཆེ་དང་། མྲྀ་ཏཾ་ཀ་དང་། རྔ་རིངས་དང་རྔ་རྐེད་ཉག་དང་ཏི་མི་ལ་ཞེས་བྱ་བ་དང་བཅུའོ། །རས་དཀར་པོ་ཟུང་ཁྲིའམ། སྟོང་ [135b.2]ངམ་བརྒྱ་དབུལ་བར་བྱའོ། །ཤིན་ཏུ་བརྟགས་པའི་རྟ་དང་གླང་པོ་ཆེ་དང་། བ་ལང་གི་ཁྱུ་རྣམས་ཀྱང་། ཨོཾ་བཛྲ་སྥ་ར་ཎ་ཁཾ་ཞེས་བྱ་བ་མངོན་པར་བཟླས་ལ་དབུལ་བར་བྱའོ། །དེ་ནས་སྦྱིན་སྲེག་གིས་ལས་ཕྲན་ཚེགས་ཀྱི་དངོས་གྲུབ་བསྒྲུབ་པར་བྱ་བའི་ཕྱིར། །གཞན་ཡང་སྦྱིན་སྲེག་བྱེད་པ་ན། ། [135b.3]ལས་བཤད་དེ་དག་གཞན་དུ་མེད། །ཅེས་པ་གསུངས་ཏེ། གཞན་གོང་དུ་གསུངས་པའི་རྣལ་འབྱོར་རྣམ་པ་གསུམ་གྱི་དོན་བསྒོམ་པས་འོག་ནས་འབྱུང་བའི་སྦྱིན་སྲེག་འདི་ཡང་བྱའོ་ཞེས་པའི་དོན་ཏོ། །ལས་བཤད་ཅེས་པ་ནི་ལས་ནི་བདག་དང་གཞན་གྱིའོ། །བཤད་པ་ནི་སྒྲུབ་ཐབས་འདི་རུའོ། ། [135b.4]གཞན་དུ་མེད་ན་ནི། །དོན་གཞན་དང་མི་བསྲེ་པར་འོག་ནས་འབྱུང་བའོ། །བདག་གི་ལས་དང་གཞན་གྱི་ལས། །ཞེས་གསུངས་པ་ཁོ་ནའོ། །དེ་ལ་དང་པོ་ལ་བདག་དོན་དང་ལྡན་པར་བྱ་བའི་ཕྱིར། དེ་ལ་བདག་གི་ལས་བསྟན་པ། །ཞེས་གསུངས་ཏེ། བདག་གི་ལས་ལ་ཡང་བཞི་སྟེ། [135b.5]དེ་ཡང་ཕྱི་དང་ནང་དུ་སྣང་བའི་རྣམ་པར་རྟོག་པ་སྦྱང་ཞིང་ཞི་བར་བྱ་བའི་ཕྱིར་ན་ཞི་བའི་སྦྱིན་སྲེག་དང་ཚེ་དང་བསོད་ནམས་རྒྱས་པར་བྱ་བའི་ཕྱིར་རྒྱས་པའི་སྦྱིན་སྲེག་དང་། བསམ་པ་ཡིད་དང་འཐད་པ་ཐམས་ཅད་དབང་དུ་བྱ་བའི་ཕྱིར་དབང་གི་སྦྱིན་སྲེག་དང་། ཕས་ཀྱི་རྒོལ་བ་ངན་པ་དང་། སྦྱོར་བ་ངན་ [135b.6]པ་ཐམས་ཅད་རྒྱུན་གཅད་པར་བྱ་བའི་ཕྱིར་དྲག་པོའི་མངོན་སྤྱོད་དང་བཞིའོ། །དེ་ནས་དེའི་ཡམ་ཤིང་ལ་སོགས་པ་བསྟན་པའི་ཕྱིར། ཤིན་ཏུ་དགེ་བའི་ཤིང་བུ་ནི། །ཞེས་གསུངས་པ་ནི་ཞི་བ་ལ་དགེ་བ་སྟེ། དཀར་པོ་ལ་འོ་མ་ཅན་མངར་བའི་རོ་དང་ལྡན་པའོ། །རྒྱས་པ་ལ་དགེ་བ་སྟེ་སེར་ [135b.7]པོ་ཁ་བའི་རོ་དང་ལྡན་པའོ། །དབང་ལ་དགེ་བ་སྟེ། དམར་བ་སྐྱུར་བའི་རོ་དང་ལྡན་པའོ། །མངོན་སྤྱོད་ལ་དགེ་བ་སྟེ། ནག་པོ་ཚེར་མ་ཅན་གྱི་ཤིང་ཚ་ཞིང་རྩུབ་པའི་རོ་དང་ལྡན་པས་བྱ་ཞེས་པའི་དོན་ཏོ། །དེའི་ངོ་བོ་གང་ཡིན་ཞེ་ན། དེ་བསྟན་པའི་ཕྱིར་ཙནྡན་ཤུག་པ་ཞེས་པ་ནི་ [136a] [136a.1]ཞི་བའོ། །སོགས་ཞེས་པའི་ཁོངས་སུ་རྒྱས་པ་ལ་སྐྱེར་པ། དབང་ལ་པདྨ་དམར་པོའི་ཤིང་། མངོན་སྤྱོད་ལ་གང་ཞིག་ཚེར་མ་ཅན་གྱི་ཤིང་ལ་བྱའོ་ཞེས་པའི་དོན་ཏོ། །དྲི་ཞིམ་དང་ལྡན་མཛེས་པའི་ཤིང་། །ཞེས་པ་ནི། ཞི་ལ་ཁ་དོག་དཀར་པོ་མངར་བའི་རོ་ཡིས་བྱུག་ [136a.2]པའོ། །དབང་ལ་ཁ་དོག་དམར་པོ་རོ་སྐྱུར་བས་བྱུག་པའོ། །རྒྱས་པ་ལ་ཁ་དོག་སེར་པོ་རོ་ཁ་བས་བྱུག་པའོ། །མངོན་སྤྱོད་ལ་ཁ་དོག་ནག་པོར་བྱ་ཞིང་རོ་ཚ་ཞིང་རྩུབ་པས་བྱུག་གོ་ཞེས་པའི་དོན་ཏོ། །དེ་ནས་ཤིང་གི་རིང་ཐུང་གི་ཚད་བསྟན་པའི་ཕྱིར། ཟླུམ་པོ་ལ་སོགས་དབྱིབས་ [136a.3]སུ་བརྩིག །ཅེས་གསུངས་པའི་དོན་ནི་འདི་ཡིན་ཏེ། ཞི་བའི་ཐབ་ཁུང་ནི་ཁ་དོག་དཀར་པོ་དབྱིབས་ཟླུམ་པོ་ཆེ་ཆུང་ནི་ཁྲུ་གང་དུ་བྱའོ། །ཟབས་སུ་ཁྲུ་ཕྱེད་བརྐོས་ལ། ཁ་ཁྱེར་སོར་བཞིས་བསྐོར་བར་བྱ་སྟེ། དབུས་ཀྱི་ཁ་ཁྱེར་ལ་རྡོ་རྗེ་ཕྲེང་བ་གཏང་ངོ་། །དེའི་ཕྱི་རོལ་དུ་འཁོར་ལོ་གཏང་ངོ་། །དེ་ནས་ [136a.4]རྒྱས་པའི་ཐབ་ཁུང་ནི་ཁ་དོག་སེར་པོ། རྒྱར་ཁྲུ་དོ་པ། ཁྲུ་བཞི་པ་ཁྲུ་གང་ཟབས་སུ་བརྐོ། ཁ་ལ་སོར་བཞི་བཅུ་ཡོད་པས་གྲུ་བཞིར་བསྐོར་རོ། །དབུས་ཀྱི་ཁ་ཁྱེར་ལ་རིན་པོ་ཆེའི་ཕྲེང་བ་བཏང་། ནང་དུ་པདྨའི་འབྲས་བུ་ཕྱི་རོལ་གྱི་སོར་བཞི་ལ་པདྨས་བསྐོར་བར་བྱའོ། །དེ་ནས་དབང་གི་ཐབ་ [136a.5]ཁུང་ནི་དབྱིབས་ཟླ་གམ་ལ། ཟླ་གམ་གྱི་ཁ་ལ་སོར་ཉི་ཤུ་ཐམ་པ་ཡོད་པ། རྒྱལ་སོར་བཞི་བཅུ་ཡོད་པ། ཟབས་སུ་སོར་བཅུ་བསྐོར་བར་བྱ་སྟེ། ཁ་དོག་ནི་དམར་པོའོ། །ཁ་ཁྱེར་ལ་སོར་གསུམ་གྱིས་བསྐོར། དབུས་ཀྱི་ཁ་ཁྱེར་ལ་མདའ་གཞུ་དང་ལྕགས་ཀྱུ་བཏང་། དེའི་ཕྱི་རོལ་ [136a.6]དུ་ཞགས་པས་བརྒྱན་པའོ། །དེ་ནས་མངོན་སྤྱོད་ཀྱི་ཐབ་ཁུང་ནི་ཁ་དོག་ནག་པོ། དབྱིབས་ཟུར་གསུམ་པ། ངོས་རེ་ལ་སོར་ཉི་ཤུའོ། །ཟབས་སུ་སོར་བཅུ་བརྐོའོ། །སོར་གསུམ་ཕྱིར་བཀྱེད་ལ་ཁ་ཁྱེར་སོར་གསུམ་གྱིས་བསྐོར། དབུས་ཀྱི་ཁ་ཁྱེར་ལ་རྡོ་རྗེ་རྩེ་གསུམ་པས་བསྐོར། [136a.7]དེའི་ཕྱི་རྒྱབ་ཏུ་མདའ་གཞུ་དང་། མདུང་རྩེ་གསུམ་པ་དང་དགྲ་སྟ་དང་ཁ་ཊྭཱཾ་ག་སྤེལ་ལ་གཏང་ངོ་། །དེ་ལ་རང་རང་གི་མཚན་མ་ཡང་བྲིའོ། །དེ་ནས་མེ་སྦར་བ་ནི་ཞི་བའི་མེ་ནི་དགོན་པའམ། འོན་ཏེ་གཙུབ་ཤིང་ལས་བཏོན་ལ་དངུལ་ལ་སོགས་པའི་སྣོད་དཀར་པོའི་ནང་དུ་རླུང་ཡབ་ཀྱིས་ [136b] [136b.1]སྦར་ལ། ལེགས་པར་འབར་བ་དང་། གཟོད་བུད་ཤིང་གི་ནང་དུ་བླུགས་སོ། །རྒྱས་པའི་མེ་ནི་རྒྱལ་པོའམ། འོན་ཏེ་བུ་མང་པོའི་ཁྱིམ་ནས་བླངས་ཏེ། གསེར་རམ་སེར་པོའི་སྣོད་སར་པར་སྦར་རོ། །དབང་གི་མེ་ནི་སྨད་འཚོང་མའི་ཁྱིམ་ནས་བླངས་ལ་ཟངས་ཀྱི་ཀོང་བུ་སར་པར་སྦར་རོ། ། [136b.2]མངོན་སྤྱོད་ཀྱི་མེ་ནི་ཤན་པ་ནག་པོའི་ཁྱིམ་ནས་བླངས་ལ་ལྕགས་ཀོང་སར་པའི་ནང་དུ་རླུང་ཡབ་ཀྱིས་སྦར་ལ། ལེགས་པར་འབར་བ་དང་། གཟོད་བུད་ཤིང་གི་ནང་དུ་བླུགས་སོ། །དེ་ནས་ཨོཾ་བཛྲ་ཛྭ་ལ་ཛྭ་ལ་ཧཱུཾ་ཞེས་བརྗོད་ཅིང་མར་གྱི་དགང་བླུགས་གསུམ་གྱིས་མེ་གསོ་བར་བྱའོ། ། [136b.3]དེ་ནས་ཐབ་ཁུང་དེ་བསངས་ལ། དམ་ཚིག་གི་མེ་ལྷ་བསྐྱེད་པར་བྱ་བའི་ཕྱིར་ཐབ་ཁུང་དུ་མེ་ཏོག་གཏོར་ལ། པཾ་ལས་སྣ་ཚོགས་པདྨའི་གདན་བསྐྱེད་ལ། །དེ་ནས། དང་པོའི་སངས་རྒྱས་བསྒོམ་པར་བྱ། །ཞེས་པ་ནས། དབུ་ལ་ཡེ་ཤེས་སེམས་དཔས་བརྒྱན། །ཞེས་པའི་ [136b.4]བར་ནི་དཀྱུས་ཉིད་གསལ་ལོ། །དེ་ནས་ཡེ་ཤེས་ཀྱི་མེ་ལྷ་ཤར་ལྷོ་མཚམས་ནས་སྤྱན་དྲང་སྟེ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །སྲེག་བླུགས་ཞལ་ཟས་བཞེས་ནས་ཀྱང་། །འདི་ཉིད་དུ་ནི་བཞུགས་ [136b.5]སུ་གསོལ། །ཨགྣ་ཡེ་རཾ་རཾ་པྲ་བེེ་ཤ་ཡ་ཕཊ། ཨཱ་བེ་ཤ་ཡ་ཨཿཞེས་དམ་ཚིག་དང་གཉིས་སུ་མེད་པར་བསྟིམ་མོ། །དེ་ལ་མཆོད་པས་མཆོད་ནས་གཤེགས་སུ་གསོལ་ལོ། །དེ་ནས་དམ་ཚིག་གི་མེ་ལྷའི་ཐུགས་ཀར་ལྷ་ཚོགས་བསྐྱེད་དེ། དེ་ཡི་ཐུགས་ཀར་ཨ་ལས་ཟླ་སྟེངས་སུ། །ཞེས་ [136b.6]པ་ནས། སྐུ་གསུང་ཐུགས་དང་ལྡན་པར་བསམ། །ཞེས་པའི་བར་གྱིས་བསྟན་ཏེ་གོ་སླའོ། །དེ་ནས་རྫས་ཀྱི་རིམ་པ་བསྟན་པའི་ཕྱིར། དེ་ལ་སྲེག་བླུགས་དབུལ་བ་ནི། ཞེས་གསུངས་པ་ནི་གོང་དུ་བསྐྱེད་པའི་ལྷ་ཚོགས་དེ་ལ་འོག་ནས་འབྱུང་བའི་རྫས་རྣམས་དབུལ་བར་བྱའོ་ཞེས་ [136b.7]པའི་དོན་ཏོ། །མར་དང་ཏིལ་དང་ཡམ་ཤིང་དང་། །མངར་གསུམ་ལྡེ་གུ་དཀར་གསུམ་ནི། །ཞི་བའི་རྫས་ལ་བཤད་པའོ། །ཞེས་གསུངས་པ་ནི་ཞི་བའི་རྫས་སོ། །རྒྱས་དང་དབང་དང་དྲག་པོ་དགུག །དེ་ལས་གསུངས་པའི་རྫས་རྣམས་ནི། །འདི་ལས་མ་གསུངས་གཞན་དག་ [137a] [137a.1]ལས། །རྒྱས་པར་བསྟན་ཏེ་དེར་ཤེས་བྱ། །ཞེས་གསུངས་པའི་དོན་ནི་འདི་ཡིན་ཏེ། ཞོ་ཟན་དང་། ཏིལ་དང་། དཱུ་རྭ་དང་། འབྲས་སོ་བ་དང་། ཀུ་ཤ་དང་། འབྲས་ཀྱི་ལག་པན་དང་། ནས་ཆན་དང་། གྲོ་ཆན་རྣམས་བསོག་གོ་ཞེས་པའི་དོན་ཏོ། །དེ་ཡང་ཁ་ [137a.2]དོག་དང་རོ་དང་ཡམ་ཤིང་གི་སྐབས་སུ་གསུངས་པ་ལྟར་འདིར་ཡང་ངོ་། །རྫས་ཐམས་ཅད་ནི་རྣལ་འབྱོར་པའི་གཡས་སུ་བསྒྲིག་པར་བྱའོ། །མཆོད་རྫས་ཐམས་ཅད་ནི་གཡོན་དུ་བསྒྲིག་པར་བྱའོ། །དེ་ནས་དགང་གཟར་བླུགས་གཟར་ཁ་སྦྱར་ཞིང་དབུལ་བ་ནི་ཞི་བ་ལ་མར། རྒྱས་ [137a.3]པ་ལ་ཞོ། །དབང་ལ་མེ་ཏོག་ཨུཏྤ་ལ། མངོན་སྤྱོད་ལ་ཚེར་མ་དབུལ་ཏེ་སྣ་དྲང་བའོ། །དབུལ་བ་ནི་སྔགས་རིངས་ཀྱི་ཞབས་ལ། ཨོཾ་སརྦ་པཱ་པཾ་ཤཱནྟིཾ་ཀུ་རུ་ཡེ་སྡིག་པ་ལ་སོགས་པ་ཞི་བར་གྱུར་ཅིག་སྭཱ་ཧཱ། །པུཥྚིཾ་ཀུ་རུ་ཡེ་ཚེ་དང་བསོད་ནམས་རྒྱས་པར་གྱུར་ཅིག་སྭཱ་ཧཱ། པ་ཤཾ་ [137a.4]ཀུ་རུ་ཡེ་ཐམས་ཅད་དབང་དུ་གྱུར་ཅིག་སྭཱ་ཧཱ། མཱ་ར་ཡ་ཕཊ་ཐམས་ཅད་བརླག་པར་གྱིས་ཤིག །ཨཱ་ཀཪྵ་ཡ་ཐམས་ཅད་ཁུགས་པར་གྱུར་ཅིག་ཧཱུཾ་ཛཿཞེས་བརྗོད་ཅིང་སྲེག་རྫས་རྣམས་རིམ་པར་དབུལ་བར་བྱའོ། །དེ་ནས་སྤྱི་བོར་ཡི་གེ་ཨ་དཀར་པོ་ཅིག་བསམས་ལ་དེའི་འོད་ཟེར་ [137a.5]གྱིས་སེམས་ཅན་ཐམས་ཅད་ཀྱི་ཉོན་མོངས་པ་དང་། འཐིབས་པ་དང་། རྨུགས་པ་དང་། མ་རིག་པ་དང་། ཞེ་སྡང་ལ་སོགས་པ་རྣམས་ལ་ཕོག་པས་ཡེ་ཤེས་ཀྱི་ཆུས་བཀྲུས་ནས་ཡང་དག་པའི་ཡེ་ཤེས་དང་ལྡན་པར་བྱས་ཏེ། བཀུག་ནས་བཞི་པོའི་ཨ་ལ་ཐིམ་པས་འོད་དུ་ཞུ་སྟེ། [137a.6]ལུས་མགོ་གཞུག་ཏུ་ཐིམ་པས་བག་ཆགས་ཀྱི་ལུས་སྦྱངས་ཏེ། སླར་གསོས་ནས་མཚན་དང་དཔེ་བྱད་དུ་ལྡན་པར་གྱུར་ཏེ། ཡང་དག་པའི་ཡེ་ཤེས་ཀྱི་ངོ་བོ་བདེ་ལ་མི་རྟོག་པ་དེ་ལ་ལྷག་པར་གནས་པས་ལྷག་པར་གནས་པར་བྱའོ། །དེ་ནས་རྒྱས་པའི་ཏིང་ངེ་འཛིན་སྤྱི་བོའི་ཨ་ལས་འོད་ཟེར་སེར་པོ་ [137a.7]འཕྲོས་པས་ཚངས་པ་ལ་སོགས་པའི་ཡང་ཚེ་བཅུད་བསྡུས་ནས་བདག་གི་ཚེའི་གནས་སུ་ཐིམ་ཞིང་རྒྱས་པར་བྱའོ། །ལོངས་སྤྱོད་འཕེལ་བར་འདོད་ན་འཇིག་རྟེན་གྱི་ཁམས་ཁེངས་པའི་ནོར་ཕྱུགས་བཀུག་ཅིང་རང་གི་ནོར་ཕྱུགས་ལ་བསྟིམས་ཏེ་རྒྱས་པར་བྱའོ། །བུ་ཚ་འཕེལ་བར་འདོད་ཚངས་ [137b] [137b.1]རིས་མན་ཆད་ཀྱི་ཕོའི་མཚན་ཀུན་བཀུག་སྟེ། ཕོ་མོའི་སྐྱེ་གནས་ལ་བསྟིམས་པས་བུ་ཚ་འཕེལ་བར་འགྱུར་རོ། །དེ་ནས་དབང་གི་ཏིང་ངེ་འཛིན་ནི་ཡང་ཨ་ལས་འོད་དམར་པོ་འཕྲོས་པས་གང་དབང་དུ་བྱ་བ་དེ་འོད་ཟེར་གྱིས་བཀུག་སྟེ། བདག་གི་མདུན་དུ་མངོན་སུམ་དུ་འོངས་ཤིང་དབང་དུ་འདུས་པར་ [137b.2]བསམས་ན་རྒྱལ་པོའི་བཙུན་མོ་ལྟ་བུ་ཡང་དབང་དུ་འདུས་པར་འགྱུར་རོ། །དེ་ནས་དྲག་པོ་མངོན་སྤྱོད་ཀྱི་ཏིང་ངེ་འཛིན་ནི་ཨ་དེ་ལས་འོད་ཟེར་ནག་པོ་འཕྲོས་པས་བདག་གིས་དགྲ་བགེགས་ལ་སོགས་པའི་གདུག་པ་ཅན་རྣམས་བཀུག་སྟེ་བསྒྲལ་ནས་ཕུང་པོ་མཆོད་ཡོན་དུ་ཕུལ་ཏེ་བརླག་པར་ [137b.3]བསམ་པ་དེའི་ཕྱིར། སྤྱི་བོ་ཟླ་སྟེངས་ཨ་བསྒོམས་ལ། །དེ་ཉིད་ཞུ་བར་གྱུར་པ་ལས། །ཞི་བྱ་དེ་ཉིད་ཞུ་འགྱུར་ཏེ། །སླར་གསོས་གཞོན་ནུའི་གཟུགས་བྱས་ལ། །དེ་ལ་ལྷག་པར་གནས་པར་བྱ། །ཞེས་དེ་ལ་དེ་སྐད་ཅེས་བྱའོ། །དེ་ཡན་ཆད་ནི་བདག་གི་དོན་གྱི་རིམ་པའོ། །དེ་ [137b.4]ནས་ན་བ་ལ་ཕན་གདགས་པའི་ཕྱིར། །དེ་ལ་ན་བའི་ལས་བྱ་བ། །ཞེས་བྱ་བ་ནི་གང་ཞིག་འོག་ནས་འབྱུང་བ་འདི་རྣམས་ཡིན་ནོ་ཞེས་པའི་དོན་ཏོ། །གང་དག་ཡིད་ནི་མི་དྲན་པའི། །ཞེས་པ་ནི། འཐིབས་པ་དང་། རྨུགས་པ་དང་། སྨྱོ་བ་ལ་སོགས་པའོ། །བགེགས་ཀྱི་སྦྱོར་བ་ཡོད་གྱུར་ [137b.5]ན། །ཞེས་པ་ནི་བགེགས་ཀྱི་རྒྱལ་པོ་བ་ནཱི་ཡ་ཀ་ལ་སོགས་པ་བགེགས་རིགས་སྟོང་ཕྲག་བརྒྱད་ཅུ་རྩ་བཞིའོ། །སྦྱོར་བ་ནི་རིམས་དང་ཤུ་བ་དང་གཡན་པ་དང་། མཛེ་ལ་སོགས་པ་ཡོད་ན། འོག་ནས་འབྱུང་བ་འདི་ལྟར་བྱ། །ཞེས་པའི་དོན་ཏོ། །ཏིང་འཛིན་འདི་དག་དྲན་ [137b.6]པར་བྱ། །ཞེས་པ་ནི་བདག་སྟོང་བའི་ངང་ལས་ཡི་གེ་དྷཱིཿདཀར་པོ་ཅིག་ཏུ་བསམས་ལ། དེ་ཡོངས་སུ་གྱུར་པ་ལས་དང་པོའི་སངས་རྒྱས་དེའི་ཐུགས་ཀར་ཨ་ལས་ཟླ་བའི་དཀྱིལ་འཁོར་ཉ་གང་བ་ལྟ་བུ་དེའི་སྟེང་དུ་གཞིའི་སྙིང་པོ་མུཾ་དང་། སྤྲོ་བྱེད་ཀྱི་སྙིང་པོ་རཾ་བསམ། །རཾ་དེ་ལས་འོད་འཕྲོས་པས་ནད་ [137b.7]ལ་སོགས་པ་རྣམ་པ་ཐམས་ཅད་དང་། དེ་གཏོང་བར་བྱེད་པའི་བགེགས་དང་། དེའི་རྐྱེན་ལ་སོགས་པ་རྣམས་ཤིན་ཏུ་འོད་ཟེར་གྱིས་བཞུ་བཏུལ་བྱས་ལ་སླར་ནད་ལ་ཐིམ་པས་ནད་ཀྱི་དངོས་པོ་ཐམས་ཅད་ཞུ་བར་བྱས་ཏེ་སླར་འདུས་པ་ལས་འབྲུ་ནག་པོ་ལས་བགེགས་ཀྱི་གཟུགས་བྱས་ལ། གང་ [138a] [138a.1]གནོད་པའི་མིང་ཤོག་བུ་ལ་བྲིས་ཏེ། གླན་ལ་དེ་ལ་ནད་ཀྱི་དངོས་པོ་བསྟིམས་ལ། ཐིམ་པ་དང་གཟོད་ཞི་བའི་སྐབས་སུ་ཇི་ལྟར་གསུངས་པ་ལྟར་མེ་སྦར་ཏེ། སྔགས་རིངས་ཞབས་ལ་བགེགས་རིགས་སྟོང་ཕྲག་བརྒྱད་ཅུ་དང་ནད་བཞི་བརྒྱ་རྩ་བཞི་ཞི་བར་གྱུར་ཅིག་སྭཱ་ཧཱ་ཞེས་བཟླས་ [138a.2]ཏེ་ཡུངས་ཀར་དང་། ཏིལ་ནག་གིས་བརྒྱ་རྩ་བརྒྱད་དུ་བསྲེག་པར་བྱས་ན་སོས་པར་འགྱུར་བའི་ཕྱིར། དང་པོའི་སངས་རྒྱས་བསྒོམ་བྱ་སྟེ། །ཞེས་པ་ནས། ཡུངས་ཀར་བརྒྱ་རྩ་བརྒྱད་དུ་བསྲེག །ཅེས་པའི་བར་དུ་གསུངས་སོ། །གལ་ཏེ་སེམས་པར་མ་གྱུར་ན། །སྲིན་བུས་ཟོས་པའི་ [138a.3]ཤིང་གདུག་པ་ཅན་ཁྲུ་གང་པ་ལ་ཚ་བ་གསུམ་གྱིས་བསྐུས་ཏེ་དེ་ལ་མེ་སྦར་ལ་གོང་མ་ལྟ་བུར་བགེགས་དང་ནད་དགུག་གཞུག་བྱས་ལ་བསྲེག་པར་བྱ་སྟེ། ལྷག་མ་ནི་དཀྱུས་གསལ་ལོ། །ན་བ་ལ་ཕན་གདགས་པའི་རིམ་པའོ། །དེ་ནས་ཤི་བ་ལ་ཕན་གདགས་པ་བསྟན་པའི་ཕྱིར། །དེ་ནས་ [138a.4]ཤི་ལ་ཕན་གདགས་ན། །ཞེས་པ་ནི། འོག་ནས་འབྱུང་བ་འདི་རྣམས་སོ། །དང་པོ་གནོད་པའི་བགེགས་བསལ་ཏེ། །ཞེས་པ་ནི། རིགས་ཀྱི་བུ་ཕོ་མོ་དོན་དང་ལྡན་པ་གང་རུང་ཅིག་ཚེའི་འདུ་བྱེད་དུ་གྱུར་ན། ཕུང་བོ་དེ་དྲོད་དང་མ་བྲལ་བར་བདག་དང་པོའི་སངས་རྒྱས་ཀྱི་ང་རྒྱལ་དང་ལྡན་པས་རོ་ལ་ [138a.5]གནོད་པའི་བགེགས་ལ་སོགས་པ་ཏིང་ངེ་འཛིན་གྱིས་བཀུག་ལ། །ཤ་ཆང་དང་སྒོག་བཙོང་དང་། ལ་ཕུག་དང་། འབྲས་ཆན་དང་། ཁུར་བ་ལ་སོགས་པའི་གཏོར་མ་ཆ་གཅིག་གིས་བྱིན་གྱིས་བརླབས་ལ་བདུད་རྩི་སྦྱིན་པའི་སྔགས་ཀྱིས་བྱིན་ལ་རྡོ་རྗེའི་ཚིག་ཏུ་འདི་སྐད་བརྗོད། །སུ་དག་ཕྱོགས་བཅུའི་འཇིག་ [138a.6]རྟེན་ན། །ལྷ་དང་ཀླུ་དང་གནོད་སྦྱིན་དང་། །གཤིན་རྗེ་སྲིན་པོ་གང་ཡང་རུང་། །སྔོན་གྱི་ལན་ཆགས་དེད་པ་རྣམས། །མཐུན་པའི་གཏོར་མ་འདི་ལོང་ལ། །ཚེ་འདས་འདི་ལ་མ་མནར་ཅིག །ཅེས་བྱས་ལ་གཏང་ངོ་། །དེ་ནས་ཡུངས་ཀར་གྱི་རྒྱལ་པོས་བྲ་བ་ཅིང་སྔགས་རིངས་བཟླས་ལ་མཚམས་བཅད་དོ། ། [138a.7]དེ་ནི་ཕྱི་རོལ་ལ་ཕན་པའི་ཆོ་ག་ཞེས་པའོ། །དེ་ནས་རོ་དེའི་སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཨ་དཀར་པོ་ཅིག་བསམས་ལ་དེ་འོད་དུ་ཞུ་བ་ལས་ལུས་ཐམས་ཅད་ཁྱབ་པར་བྱས་ཏེ། སྤྱི་བོ་མགྲིན་པ་སྙིང་ག་ལྟེ་བ་སྨིན་མཚམས་དང་ལྔར་རིམ་པར་རྣམ་སྣང་དང་། འོད་དཔག་མེད་དང་། མི་བསྐྱོད་ [138b] [138b.1]པ་དང་། དོན་ཐམས་ཅད་གྲུབ་པ་དང་། རིན་ཆེན་འབྱུང་ལྡན་རྣམས་འཁོར་དང་བཅས་པར་གྱུར་པར་བསམ། །ལྷ་རེ་རེའི་སྤྱི་བོ་ན་ཡང་ཨ་དཀར་པོ་རེ་རེ་ཡོད་པར་བསམ་པ་དེའི་ཕྱིར། ཨ་ཡིས་ཀུན་ཁྱབ་སྤྱི་སྟེང་བསམ། །ལྷར་གྱུར་ལྷ་ནི་སྔོན་བཞིན་བསམ། །ཞེས་གསུངས་སོ། །དེ་ནས་ [138b.2]རང་རང་གི་སྤྱི་བོའི་ཨ་ལས་འོད་འཕྲོས་པས་དུས་གསུམ་གྱི་དེ་བཞིན་གཤེགས་པའི་ཡེ་ཤེས་ཀྱི་བཅུད་བསྡུས་ཏེ་ཁ་དོག་ལྔ་དང་ལྡན་པར་བྱས་ཏེ། རང་རང་གི་སྤྱི་བོར་ཐིམ་པ་ལས་དེ་བཞིན་གཤེགས་པ་ལྔ་ལྔའི་དབུ་རྒྱན་དང་ལྡན་པར་བྱས་ཏེ། ལུས་ཐམས་ཅད་ཡེ་ཤེས་ལྔའི་ངོ་བོར་གནས་ [138b.3]པའོ། །དེའི་ཕྱིར། ཨ་ལས་ཡེ་ཤེས་ལྔས་གང་ནས། །ཞེས་གསུངས་པའོ། །ཕན་པའི་གནོད་སྦྱིན་ཆུས་བཏབ་ལ། །ཞེས་པ་ནི་ཆུ་གཙང་ལ་ཨོཾ་བཛྲ་ཡཀྵ་ཧཱུཾ་ཞེས་བརྒྱ་རྩ་བརྒྱད་བཟླས་ལ། ཕུང་པོ་ལྔའི་རྣམ་པར་རྟོག་པ་སྦྱང་བའི་ཕྱིར་སྔོན་དུ་གསུངས་པའི་ལྷ་ཚོགས་ལ་སྐུ་ [138b.4]ཁྲུས་གསོལ་བར་བྱའོ། །དེའི་ཕྱིར། དང་པོ་བཀྲུ་བ་ལས་ཡིན་ཏེ། །ཞེས་གསུངས་སོ། །དེ་ནས་ཨ་ཡི་འཕྲོ་འདུ་ལས། །ཞེས་པ་ནི་བདག་གི་ཐུགས་ཀར་ཨ་དཀར་པོ་བསམ། དེ་ལས་འོད་ཟེར་འཕྲོས་པས་འགྲོ་དྲུག་གི་བག་ཆགས་སྦྱངས། ཚེ་ལས་འདས་པའི་ཤེས་པ་བཀུག་ [138b.5]ལ། རོ་ལ་བཅུག་ལ། དེ་བཞིན་གཤེགས་པ་འཁོར་དང་བཅས་པ་ལ་ཐིམ་པར་བསམ་མོ། །དེ་ནི་སྔོན་གྱི་ཆོ་གའོ་ཞེས་པ་ནི་དེ་ལྟར་གོང་དུ་གསུངས་ནས་ནི་རོའི་སྔོན་དུ་འགྲོ་བའི་ཆོ་ག་ཡིན་ནོ་ཞེས་པའོ། །དེ་ནས་ཞེས་པ་ནི་གོང་དུ་འགྲོ་བ་བྱས་པའི་དེ་མ་ཐག་པ་ནས་འོག་ནས་འབྱུང་བའི་ལྷག་པར་གནས་པའི་ཆོ་ག་འདི་བཤད་ [138b.6]དོ་ཞེས་པའི་དོན་ཏོ། །ཤི་བ་དཀྱིལ་འཁོར་དབུས་བཞག་སྟེ། །ཞེས་པ་ནི་དེ་བཞིན་གཤེགས་པ་ལྔའི་དཀྱིལ་འཁོར་དང་ལྡན་པའི་རོ་དེ་མཎྜལ་གྱི་དབུས་སུ་སྣ་ཚོགས་པདྨའི་གདན་ལ་གཞག་གོ། །ཞག་གསུམ་སློབ་དཔོན་སྨྱུང་གནས་པ། །ཞེས་པ། ཞག་གསུམ་ཁ་ཟས་ཀྱི་ཚོད་བཟུང་ལ། དཀར་ [138b.7]གསུམ་ལ་སོགས་པ་བཟའ་ཞིང་། ཉིན་རེ་ལ་ཐུན་གསུམ་གསུམ་ལྷའི་རྣལ་འབྱོར་བསྒོམ་པར་བྱའོ་ཞེས་པའི་དོན་ཏོ། །བགེགས་བསྐྲད་ལ་སོགས་བྱས་ནས་ནི། །ཞེས་པ། ཐུན་རེ་རེ་ལ་ལྷོ་སྒོའི་ཆོ་ག་རེ་རེ་ལའོ། །དེ་ཡང་རྒྱུད་ཉིད་ལས། སེམས་ཅན་ཀུན་གྱི་ངན་སོང་གསུམ། །སྦྱོང་བར་བྱེད་པའི་ [139a] [139a.1]འཛུམ་བསྟན་ནས། །ཞེས་པ་དང་། །ངན་སོང་ཐམས་ཅད་རྣམ་སྦྱོང་བ། །མགོན་པོ་སེམས་ཅན་ཀུན་གྱི་མཆོག །ཅེས་གསུངས་སོ། །འཁོར་ལོ་ལྷ་རྣམས་མདུན་བསམ་སྟེ། །ཞེས་པ་ནི་དེ་ལྟར་ཞག་གསུམ་དུ་བྱས་པའི་ནང་པར་འཁོར་ལོའི་ཕྱག་རྒྱ་བཅིངས་ཏེ། ཨོཾ་མཉྫུ་ [139a.2]ཤྲཱི་བཛྲ་ཙཀྲ་ཧཱུཾ་ཞེས་བརྗོད་པས་དཀྱིལ་འཁོར་གྱི་ལྷ་རྣམས་མདུན་གྱི་ནམ་མཁའ་ལ་བསམས་ལ། དེ་ལ་མཆོད་པའི་ཕྱིར། ཕྱག་བཙལ་རྡོ་རྗེ་བསྐྱེད་སོགས་བྱ། །ཞེས་པ་བཅུ་ཡོངས་སུ་དག་པ་དང་སྡོམ་པ་གཟུང་བར་བྱས་ལ་དེ་ནས་འོག་ནས་འབྱུང་བའི། ཚེ་འདིར་དང་པོར་འབྲས་བུ་ [139a.3]ཡོད། །ཅེས་པ་ནས། འདི་ལ་དབང་ནི་སྩལ་དུ་གསོལ། །ཞེས་པ་ཡན་ཆད་བརྗོད་པར་བྱའོ། །དེ་ནས་སྦྱོར་བ་དང་པོ་དང་དཀྱིལ་འཁོར་རྒྱལ་མཆོག་དང་། ལས་རྒྱལ་མཆོག་གི་ཏིང་ངེ་འཛིན་བྱའོ། །དེ་ནས་སྒོ་དབྱེ་བ་བྱ་སྟེ། རྡོ་རྗེ་ཁུ་ཚུར་གཉིས་བཅིངས་ཏེ། །མཛུབ་མོ་གཉིས་ནི་རབ་ཏུ་ [139a.4]བརྐྱང་། །མཐེ་ཆུང་ལུ་གུ་རྒྱུད་དུ་སྦྲེལ། །སྒོ་དབྱེ་བ་ཡི་ཕྱག་རྒྱ་སྟེ། །ཨོཾ་མཉྫུ་ཤྲཱི་བཛྲ་དྷ་རོངྒྷ་ཊ་ཡ་ཧཱུཾ་ཕཊ་ཅེས་བརྗོད་དེ། གཞལ་ཡས་ཁང་སྒོ་དབྱེ་བར་བྱའོ། །དེ་ནས་རྡོ་རྗེར་སྒྲུབ་པ་དང་། ཚོགས་བསགས་པ་ཡན་ཆད་འདིར་ཤེས་པར་བྱའོ། །དེ་ནས་སྔགས་རིངས་ཀྱིས་ལྷ་ཐམས་ [139a.5]ཅད་གསལ་བར་བྱས་ལ། ཐུན་གསུམ་གྱི་རྣལ་འབྱོར་ཞག་བཞི་རུ་བྱའོ། །དེ་ནས་གང་ཞིག་དེ་ཉིད་ལ། །ཞེས་པ་ནས། ཤི་བ་སྟ་གོན་ལ་གནས་པའི་ཏིང་ངེ་འཛིན་ཏོ་ཞེས་པ་ཡན་ཆད་ཀྱིས་དོན་ལ་གནས་པར་བྱ་སྟེ། དཀྱུས་ཉིད་གསལ་ལོ། །དེ་ནས། དཀྱིལ་འཁོར་ཆེན་པོ་འདྲི་བའི་ [139a.6]ཚེ། །དང་པོ་སངས་རྒྱས་ང་རྒྱལ་དང་། །ཞེས་པ་ནས། མངོན་སུམ་འདྲ་བར་གང་བར་བསྒོམ། །ཞེས་པའི་བར་གྱིས་གསོལ་བ་གདབ་པ་སྟེ། དཀྱུས་གསལ་ལོ། །དེ་ནས་བྲི་བ་བསྟན་པའི་ཕྱིར། །ཤི་ལ་ཕན་གདགས་དཀྱིལ་འཁོར་ལྡན། །ཞེས་གསུངས་ཏེ། དེའི་དོན་ནི་རྡོ་རྗེ་དབྱིངས་ [139a.7]ཀྱི་དཀྱིལ་འཁོར་ལྟ་བུ་ལ་དབུས་ཀྱི་ཕོ་བྲང་མེ་ཐབ་ཏུ་བྱས་ལ། གཞལ་ཡས་ཁང་པ་དེ་འདྲ་བ། །ཞེས་པ་རོ་སྦྱོང་བའི་དཀྱིལ་འཁོར་ཡིན་ནོ་ཞེས་པའི་དོན་ཏོ། །འདི་ལས་གསུངས་ཏེ་གཞན་དུ་ཞེས་པ་ནི་གོང་དུ་གསུངས་པའི་དཀྱིལ་འཁོར་དེ་ལྟ་བུ་ནི་རོ་སྦྱོང་བའི་དོན་དུ་ཡིན་གྱི་དབང་བསྐུར་བ་ལ་ [139b] [139b.1]སོགས་པའི་དོན་དུ་ནི་མ་ཡིན་ནོ་ཞེས་པའི་དོན་ཏོ། །ཞག་བདུན་ནང་པར་སྦྱིན་སྲེག་བྱ། །ཞེས་པ་ནི། དེ་ལྟར་རོ་ལ་བསྙེན་པ་ཞག་བདུན་དུ་བྱས་ནས་རྡུལ་ཚོན་གྱི་དཀྱིལ་འཁོར་བཞེངས་པའི་ཚེ་སྦྱིན་སྲེག་བྱའོ་ཞེས་པའི་དོན་ཏོ། །དེ་ཡང་ཇི་ལྟར་བྱ་ཞེ་ན། དེ་ནས་ཕྱི་ཡི་རིམ་ལྡན་པས། །ཞེས་ [139b.2]གསུངས་ཏེ། ཕྱིའི་རིམ་ལྡན་ནི་དཀྱིལ་འཁོར་གྱི་ཕྱི་རོལ་དུ་བགེགས་བསྐྲད་པ་དང་། གར་ལ་སོགས་པའི་རོལ་མོས་མཆོད་པ་དང་ཕུང་པོ་ལ་སོགས་པ་དྲང་བར་བྱའོ་ཞེས་པའི་དོན་ཏོ། །དེ་ཡང་ཇི་ལྟར་ཞེ་ན། སྔགས་པ་ཆས་གོས་ལྡན་པ་ཡིས། །ཤིན་ཏུ་བསྒྱིངས་པ་ལྡན་བྱས་ཏེ། ། [139b.3]ཞེས་གསུངས་ཏེ། ཆས་གོས་ལྡན་པ་ནི་དབུ་རྒྱན་དང་། རྣ་རྒྱན་དང་། མགུལ་རྒྱན་དང་། དོ་ཤལ་དང་། མགུར་ཆུ་དང་། དཔུང་རྒྱན་དང་། གདུ་བུ་དང་། སོར་གདུབ་དང་། རྐང་རྒྱན་དང་། གོས་ནི་སྟོད་གཡོགས་དང་། སྨད་གཡོགས་སོ། །ལྡན་པ་ནི་དེ་རྣམས་འཛོམ་ [139b.4]པའོ། །བསྒྱིངས་པ་ནི་ཤིན་ཏུ་འགྱིང་བག་དང་བཅས་པས་དཀྱིལ་འཁོར་གྱི་མཐའ་མ་བསྐོར་བར་བྱ་ཞེས་པའི་དོན་ཏོ། །དེ་ནས་སྔོན་གྱི་སྦྱོར་བ་ཡིས། །ཆོ་ག་རྣམས་ནི་དཔྱད་པར་བྱ། །དང་པོའི་ཆོ་གའི་རིམ་པ་ནས། །འཁོར་ལོའི་རིམ་པ་འདི་གསུངས་ཏེ། །ཞེས་པ་ནི། ལྕེ་ལག་ [139b.5]བྱིན་གྱིས་བརླབ་པ་ནས། གཞལ་ཡས་ཁང་བསྐྱེད་པ་ཡན་ཆད་བྱ་སྟེ། དེ་ནས་གཟོད་རོ་དེ་མེ་ཐབ་ཏུ་བཞག་སྟེ། དཀྱིལ་འཁོར་རྒྱལ་མཆོག་དང་། ལས་རྒྱལ་མཆོག་དང་། ཕྱག་རྒྱ་བཞིས་རྒྱས་གདབ་པ་ཡན་ཆད་བྱས་ཏེ། གཟོད་མེ་སྦར་བར་བྱའོ། །དེ་ཡང་ཇི་ལྟར་སྦར་ [139b.6]ཞེ་ན། སྔོན་དུ་ཞི་བའི་སྐབས་སུ་ཇི་ལྟར་འདིར་ཡང་རྒྱས་པར་བྱས་ལ་གཟོད་བསྲེག་པའི་ལས་བྱས་ཏེ། དེ་ལ་ཡང་གསུམ་སྟེ། རོ་མཆོད་གནས་སུ་བསྲེག་པ་དང་། རོ་ལྟར་བསྲེག་པ་དང་། རོ་སྲེག་རྫས་སུ་བསྲེག་པ་དང་གསུམ་དུ་ཤེས་པར་བྱས་ལ་བསྲེག་གོ། །རྫས་དབུལ་ལ་སོགས་ [139b.7]པའི་རིམ་པ་སྔོན་དུ་ཤེས་པར་བྱའོ། །དེའི་ཕྱིར། མེ་ཉིད་ཤི་བའི་གནས་སྦྱངས་ཏེ། །ཞེས་གསུངས་པ་ཁོ་ནའོ། །དེ་ནས་ཁྲུས་བྱས་མཆོད་པའི་ཚོགས། །ཞེས་པ་ནི། མཆོད་པའི་ཡོ་བྱད་རྣམས་ལ་རྡོ་རྗེ་གནོད་སྦྱིན་གྱི་ཆུས་བསངས་ལ། མེ་ཏོག་ལ་སོགས་པ་ལྔ་དང་ལྷ་མོ་བརྒྱད་དང་། དེ་ལས་ [140a] [140a.1]གཞན་པའི་མཆོད་པ་དང་། མཆོད་པ་ཉི་ཤུ་པས་ཀྱང་མཆོད་པ་།བསྟོད་པ་རྣམས་ཀྱིས་བསྟོད་དོ། །དེའི་ཕྱིར། མ་ལུས་པར་ནི་འདིར་བཤད་དོ། །ཞེས་གསུངས་སོ། །དེ་ནས་དཔུང་བཟངས་ཀྱིས་ཞུས་པ་ལས་གསུངས་པ་ལྟར་ཕྱོགས་སྐྱོང་ལ་གཏོར་མ་སྦྱིན་ནོ། ། [140a.2]དེ་ནས་དེ་ལ་ལམ་བསྟན་བྱ། །ཚོགས་བསག་དགེ་བའི་དོན་ལ་སྦྱར། །ཞེས་པའི་དོན་ནི་ལྷོ་སྒྲོའི་ཆོ་ག་ལས་ཤེས་པར་བྱའོ། །དེ་མཐར་བདག་ཉིད་རྟོགས་སྒོམ་དང་། །ཞེས་པ་ནི་དེ་ལྟར་བྱས་པའི་རྗེས་ལ་བདག་ཉིད་མི་དམིགས་པར་བྱའོ་ཞེས་པའི་དོན་ཏོ། །དེ་ཉིད་མཉམ་ཤེས་པ་ [140a.3]ནི་བདག་ཉིད་ཡང་དག་པའི་ཐུགས་དང་། ཚེ་ལས་འདས་པའི་ཤེས་པ་གཉིས་མཉམ་ཞིང་དབྱེར་མེད་པར་ཤེས་པར་བྱའོ་ཞེས་པའི་དོན་ཏོ། །ཅིས་མི་ཚུགས་ཞེས་པ་ནི་དེ་ལྟར་རྟོགས་ན་ཉོན་མོངས་པ་གང་གིས་ཀྱང་མི་ཚུགས་སོ་ཞེས་པའི་དོན་ཏོ། །དེ་ལ་རྟག་གནས་བདེ་ལྡན་དང་། [140a.4]ཞེས་པ་ནི། ཐམས་ཅད་མཉམ་པ་ཉིད་ཀྱི་དོན་དེ་ལ་རྟག་པར་གནས་ན་ཡང་དག་པའི་ཡེ་ཤེས་ཕྱིན་ཅི་མ་ལོག་པའི་དོན་བདེ་བ་དང་ལྡན་ནོ་ཞེས་པའི་དོན་ཏོ། །དེ་ལྟར་བསྒོམ་པའི་དོན་བསྟན་ནས་སྐབས་འདིར་ཡེ་ཤེས་སེམས་དཔའ་གཤེགས་སུ་གསོལ་བ་ལ་སོགས་པ་བྱ་སྟེ། [140a.5]སྔོན་དུ་བསྙེན་པའི་སྐབས་སུ་ཇི་ལྟར་གསུངས་པ་བཞིན་དུ་བྱའོ། །དེ་ནས་ཏིང་ངེ་འཛིན་གྱི་དཀྱིལ་འཁོར་བསྡུ་བ་ནི་རིམ་པས། ཨའི་དང་ཉིད་དུ་ཞེས་གསུངས་ཏེ། རིམ་པ་ནི་ཡེ་ཤེས་ཀྱི་རྡོ་རྗེ་མཆོད་རྟེན་ལ་ཐིམ། མཆོད་རྟེན་ཆོས་འབྱུང་ལ་ཐིམ། །རྡོ་རྗེ་རྒྱ་གྲམ་ལ་དེ་གཞལ་ཡས་ཁང་ [140a.6]ལ། དེ་ལྷ་ཚོགས་ལ། དེ་གཞིའི་སངས་རྒྱས་ལ། དེ་དང་པོའི་སངས་རྒྱས་ལ། དེ་ཤེས་རབ་འཁོར་ལོ་ལ། དེ་ཡེ་ཤེས་སེམས་དཔའ་ལ། དེ་ཟླ་བ་ལ། དེ་ཨ་ལ་ཐིམ་མོ། །དེ་ཉིད་ལ་ཨའི་ངང་ཉིད་དུ། །ཞེས་གསུངས་པའོ། །དེ་ལྟར་བདག་གི་ངོ་བོ་ཡི་གེ་ཨ་དཀར་པོའི་ངང་ཉིད་དུ་གནས་ [140a.7]པས། དེ་ཡང་བདག་ལུས་ཨས་ཁྱབ་པའོ། །ཞེས་གསུངས་པའོ། །དེ་ནས་ཨ་དེའི་བྱིན་གྱི་རླབས་ཀྱིས་བདག་གི་ཤེས་པ་འོད་དུ་ཞུ་ནས་ཐིག་ལེ་བྱང་ཆུབ་ཀྱི་སེམས་སྐྱེ་བ་མེད་པའི་ངང་དུ་རྟོགས་ཏེ། ཉེ་བའི་དཔེས་མཚོན་ན་འདུས་མ་བྱས་པའི་ནམ་མཁའ་དང་འདྲ་བར་གནས་ཏེ། དེ་ཁོ་ན་ [140b] [140b.1]ལ། དེ་ཉིད་ཨ་ཡི་བྱིན་རླབས་ལ། །ཨ་ཉིད་དབྱིངས་ཀྱི་ངང་ཉིད་དུ། །ཐམས་ཅད་ནམ་མཁའ་དང་འདྲའོ། །ཞེས་གསུངས་སོ། །དེ་ནས་ཇི་ལྟར་གསུངས་པའི་དོན་གྱི་རྣལ་འབྱོར་བའོ། །དེ་ཡན་ཆད་ཤི་བ་ལ་ཕན་གདགས་པའི་རིམ་པའོ།། །།དེ་ནས་འཁོར་ལོ་རྣམ་པ་བཞིའི་དོན་བསྟན་ [140b.2]པའི་ཕྱིར། དེ་ནས་འཁོར་ལོ་བསྟན་པ་ཞེས་པའི་དོན་ནི་འོག་ནས་འབྱུང་བ་འདི་ཉིད་ཡིན་ནོ། །དེ་ཡང་། བཅུ་དྲུག་ཕྱེད་ཕྱེད་ཐིག་ལེ་ཅན། །ཡན་ལག་མེད་པའི་རྩིས་ལས་འདས། །བསམ་གཏན་བཞི་ཡི་རྩེ་མོ་ཅན། །ཞེས་གསུངས་ཏེ། ལུས་ལ་འཁོར་ལོ་བཞི་གནས་ཏེ། །ལྟེ་བ་ཤེས་རབ་ [140b.3]འཁོར་ལོ་སྟེ། །རྩིབས་ནི་བཅུ་གཉིས་ཡང་དག་ལྡན། །དང་པོའི་རྩིབས་ནས་བརྩམས་ཏེ་དགོད་པ་ནི། ཨ་ཨཱ་ཨཾ་ཨཱཿཨ་ཨཱ་ཨཾ་ཨཱཿཨ་ཨཱ་ཨཾ་ཨཱཿགནས་སོ། །རྟག་པ་ཤེས་རབ་ཡིག་འབྲུའི་འཁོར་ལོའོ། །ཕོ་བྲང་ལྷའི་འཁོར་ལོ་ནི་ལྟེ་བ་ལ་མི་བསྐྱོད་པ། དེ་ནས་རྡོ་རྗེ་སེམས་ [140b.4]དཔའ། རྒྱལ་པོ་ཆགས་པ་ལེགས་པ། སེམས་མ་རྡོ་རྗེ་མ་སྒེག་མོ་དང་། བདུག་སྤོས་མ་དང་། སྒོ་བ་ལྕགས་ཀྱུ་དང་། བྱམས་པ་འཇམ་དཔལ། སྤོས་ཀྱི་གླང་པོ་ཡེ་ཤེས་ཏོག་དང་བཅུ་གཉིས་སོ། །ལྟེ་བར་ཤེས་རབ་འཁོར་ལོ་གྲགས། །སྙིང་གར་ཤེས་རབ་འཁོར་ལོ་ནི་བཅུ་ [140b.5]གཉིས་རྩིབས་དང་ལྡན་པ་ལ། རིམ་པ་བཞིན་དུ་དང་པོར་ཨ་གདོད། ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨཾ་ཨཿདགོད་པར་བྱའོ། །རྟག་པ་ཤེས་རབ་ཡིག་འབྲུའི་འཁོར་ལོའོ། །ཕོ་བྲང་ལྷའི་འཁོར་ལོ་ནི་ལྟེ་བར་རིན་ཆེན་འབྱུང་ལྡན། རྡོ་རྗེ་རིན་ཆེན། ཉི་མ། [140b.6]རྒྱལ་མཚན། བཞད་པ། རིན་ཆེན་སེམས་མ་དང་། མེ་ཏོག་མ་དང་། ཕྲེང་བ་མ་དང་། སྒོ་བ་ཞགས་པ། བཟང་སྐྱོང་། བློ་གྲོས་རྒྱ་མཚོ། བློ་གྲོས་མི་ཟད་པ། སྤོབས་པ་བརྩེགས་པ་དང་བཅུ་གཉིས་སོ། །འདི་ནི་སྙིང་གའི་ཤེས་རབ་འཁོར་ལོའོ། །མགྲིན་པ་ཤེས་རབ་ [140b.7]འཁོར་ལོ་ནི། །བཅུ་གཉིས་རྩིབས་དང་ཡང་དག་ལྡན། །རིམ་བཞིན་རྩིབས་གཅིག་པ་ལ་ཨ། །ཨ་ར་པ་ཙ་ན། ཝཱ་གཱི་ཤྭ་ར་པྲཛྙཱ་ན་མཿདགོད། རྟག་པ་ཤེས་རབ་ཡིག་འབྲུའི་འཁོར་ལོའོ། །ཕོ་བྲང་ལྷའི་འཁོར་ལོ་ནི། །ལྟེ་བ་ལ་སྣང་བ་མཐའ་ཡས། རྡོ་རྗེ་ཆོས་རྒྱུ། སྨྲ་བ། རྣོན་པོ་ [141a] [141a.1]ཆོས་ཀྱི་སེམས་མ་དང་། གླུ་མ། མར་མེ་མ། སྒོ་བ་ལྕགས་སྒྲོག །མཐུ་ཆེན་ཐོབ་དང་། ངན་སོང་ཀུན་འདྲེན་དང་། མྱ་ངན་འཇོམས་དང་། དྲ་བ་ཅན་གྱི་འོད་དང་བཅུ་གཉིས་སོ། །མགྲིན་པ་ཤེས་རབ་འཁོར་ལོར་གྲགས། །སྤྱི་བོ་ཤེས་རབ་འཁོར་ལོ་ནི། །བཅུ་ [141a.2]གཉིས་རྩིབས་དང་ཡང་དག་ལྡན། །རྩིབས་དང་པོར་ཧ་ར་ཧ་ར། ཏ་ཐཱ་ག་ཏ། ཨོཾ་ཧཱུཾ་ཧྲཱིཿབྷ་ག་ཝཱན་ཛྙཱ་ན་མཱུ་རྟི། བཱ་གཱི་ཤྭ་ར་མ་ཧཱ་ཝཱ་ཙ་སརྦ་དྷ་རྨ་ག་ག་ནཱ་མ་ལ་སུ་པ་རི་ཤུདྡྷ་དྷ་རྨ་དྷཱ་ཏུ་ཛྙཱ་ན་གརྦྷ་ཨཱཿ རྟག་པ་ཤེས་རབ་ཡིག་འབྲུའི་འཁོར་ལོའོ། །ཕོ་བྲང་ལྷའི་འཁོར་ལོ་ནི་ལྟེ་བ་ལ་དོན་ཡོད་གྲུབ་པ། [141a.3]རྡོ་རྗེ་ལས་དང་། སྲུང་བ་དང་། གནོད་སྦྱིན་ཁུ་ཚུར། ལས་ཀྱི་སེམས་མ། གར་མ་དྲི་ཆབ་མ། སྒོ་བ་དྲིལ་བུ། ཟླ་འོད། འོད་དཔག་མེད། ནམ་མཁའ་མཛོད། སྒྲིབ་པ་སེལ་བ། མཚོག་མ་ཤེས་རབ་འཁོར་ལོར་གྲགས། །ཡེ་ཤེས་མེ་ལྕེ་འོད་རབ་གསལ། །ཞེས་པ་བཞུ་ [141a.4]བཏུལ་ནི་འཁོར་ལོའི་གདམས་ངག་བླ་མ་ལས་ཤེས་པར་བྱའོ། །དེ་ནི་ཕོ་བྲང་ལྷའི་དཀྱིལ་འཁོར་དང་། ལུས་གནས་རྩའི་འཁོར་ལོ་དང་། ལྷག་པ་ཤེས་རབ་ཀྱི་འཁོར་ལོ་དང་གསུམ་གསལ་བར་བསྟན་ཏོ། །དེ་ལྟར་བསྒོམས་པས་འབྲས་བུ་བསྟན་པའི་ཕྱིར། དེ་ལྟར་རྟག་ཏུ་གང་བསྒོམ་པ། །ཞེས་པ་ནི། རིགས་ [141a.5]ཀྱི་བུ་གང་ལ་ལ་ཞིག་གིས་དེ་ལྟར་བསྒོམས་ན་འོག་ནས་འབྱུང་བའི་གཞོན་ནུའི་གཟུགས་ཅན་བདེ་བ་ཐོབ་ཅེས་གསུངས་པ་སྟེ། གཞོན་ནུ་ནི་འཇམ་དཔལ་ལོ། །གཟུགས་ཅན་ནི་དེའི་སྐུ་ལ་མཚན་དང་དཔེ་བྱད་ཀྱིས་བརྒྱན་པའོ། །བདེ་བ་ཐོབ་པ་ནི་དེའི་ཐུགས་ཡང་དག་པའི་ཡེ་ཤེས་ཐོབ་ [141a.6]པའོ། །དྲག་འཛིན་ལུས་ནི་ངན་འགྲོའོ། །དེ་དག་སྤངས་ནས་ཞེས་པ་ནི། །གོང་དུ་གསུངས་པའི་དོན་དེ་ལྟར་བསྒོམས་པས་ཁམས་གསུམ་གྱི་ཉོན་མོངས་པ་སྤངས་ནས་འོག་ནས་འབྱུང་བའི་གཞན་གྱི་དོན་ཕྱིན་ཅི་མ་ལོག་པ་ཡང་གྲུབ་སྟེ། རྗེ་བཙུན་འཇམ་པའི་དབྱངས་སུ་སྐྱེ་བས་ [141a.7]ན། །རང་དགའི་ལུས་སུ་སྐྱེ་བར་ངེས། །ཞེས་གསུངས་སོ། །དེ་ནས། དེས་ས་བཅུ་ལ་བགྲོད་པར་བསྟན་པ་ནི། དཀྱུས་ཉིད་གསལ་ལོ། །དེ་ནི་ཤེས་རབ་འཁོར་ལོ་བསྒོམ་པའི་རིམ་པའོ། །དེ་ནས་ལྷག་པར་གནས་པའི་སློབ་མ་དེ་དབང་བསྐུར་བར་བྱ་བའི་ཕྱིར། དེ་ནས། [141b] [141b.1]འདི་ནི་དབང་བསྐུར་དམ་པར་གསུངས། །ཞེས་པ་ནི། སྔོན་དུ་ལྷག་པར་གནས་པའི་སློབ་མ་དེ་འདིར་དབང་བསྐུར་བར་བྱའོ་ཞེས་པའི་དོན་ཏོ། །དེ་མ་བསྐུར་ན་ཅིར་འགྱུར་ཞེ་ན། དབང་བསྐུར་མེད་ན་དངོས་གྲུབ་མེད། །ཅེས་གསུངས་ཏེ། དེ་ནས་སློབ་དཔོན་གྱིས་བྱ་བའི་རིམ་པ་བསྟན་པའི་ཕྱིར། [141b.2]ཡོན་ཏན་ལྡན་པའི་སྔགས་པ་ཞེས་གསུངས་ཏེ། ཡོན་ཏན་ལྡན་པའི་སློབ་མ་དབང་བསྐུར་བའི་སྔོན་དུ་སློབ་དཔོན་ཉིད་ཀྱིས་ཡེ་ཤེས་སེམས་དཔའི་དཀྱིལ་འཁོར་དུ་ཞུགས་ལ། དབང་བླང་བ་ལ་སོགས་པ་བྱས་ལ། གཟོད་སློབ་མ་དཀྱིལ་འཁོར་དུ་གཞུག་པར་བྱའོ་ཞེས་པའི་དོན་ཏོ། །དེས་ཅིར་ [141b.3]འགྱུར་ཞེ་ན། དེ་ལ་དབང་བྱིན་ཡོན་ཏན་གྲུབ། །ཅེས་གསུངས་ཏེ། དེ་ནས་སློབ་མ་གཞུག་པར་བསྟན་པའི་ཕྱིར། དང་པོ་ཁྲུས་བྱས་རྒྱན་གོན་ཏེ། ཞེས་པ་ལ་སོགས་པ་གསུངས་པའི་དོན་ནི་འདི་ཡིན་ཏེ་སློབ་དཔོན་དུ་འོས་པའི་བླ་མས་ལས་ཐམས་ཅད་པའི་ཆུས་བསངས་ལ་རྡོ་རྗེ་སེམས་དཔར་ [141b.4]བྱིན་གྱིས་བརླབས་ཏེ། རྒྱན་ཐམས་ཅད་ཀྱིས་བརྒྱན་ལ། རྡོ་རྗེ་གནོད་སྦྱིན་ཡོངས་སུ་བཟླས་པའི་གོས་དམར་པོའི་སྟོད་གཡོགས་དང་སྨད་གཡོགས་གྱོན་ལ། ཨོཾ་བཛྲ་ཏཱི་ཀཥྞ་ཧཱུཾ་ཕཊ་ཅེས་བཟླས་པའི་གདོང་གཡོགས་དམར་པོ་བཅིངས་ལ། ཡོན་གྱི་དམ་པ་དག་ཕུལ་བ་ཡོངས་སུ་བླངས་ཏེ། [141b.5]དེའི་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོ་རྣམས་སུ་རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་ཟླ་བའི་སྟེང་དུ་དེའི་ས་བོན་གྱི་རྣམ་པར་བཀོད་ལ་ཕྱོགས་བཞིའི་དེ་བཞིན་གཤེགས་པ་ཐམས་ཅད་ལ་ཕྱག་བྱེད་དུ་བཅུག་ལ། དེ་ནས་ས་མ་ཡ་སྟྭཾ་ཞེས་པའི་ [141b.6]སྔགས་ཀྱིས་འཇམ་པའི་རྡོ་རྗེའི་དམ་ཚིག་གི་ཕྱག་རྒྱ་འཛིན་དུ་གཞུག་ཅིང་དེ་བཞིན་དུ་ཕྲེང་བ་འཛིན་དུ་གཞུག་གོ། །དེ་ནས་སློབ་དཔོན་གྱིས་འདི་སྐད་ཅེས་བསྒོ་བ་བྱ་སྟེ། སྐལ་དང་ལྡན་པ་རིགས་ཀྱི་བུ། །ཁྱོད་ནི་ཅི་དང་ཅི་ལ་དགའ། །འདོད་དོན་གང་ཡིན་ཁྱོད་ཀྱིས་སྨྲོས། །དེ་ནས་ [141b.7]སློབ་མས་འདི་སྐད་ཅེས། །བདག་ནི་གསང་བའི་དཀྱིལ་འཁོར་ལ། །རབ་ཏུ་བལྟ་བར་བགྱི་བ་དང་། །མྱ་ངན་འདས་པའི་གྲོང་མཆོག་ཏུ། །བདག་ནི་འཇུག་པར་འཚལ་ལགས་སོ། །དེ་རྗེས་སློབ་དཔོན་དམ་པས་ཀྱང་། །འདི་སྐད་ཅེས་ནི་བརྗོད་པར་བྱ། །སྔོན་གྱི་རྒྱལ་བ་ [142a] [142a.1]རྣམས་ཀྱིས་གསུངས། །གསང་བ་བས་ཀྱང་ཆེས་གསང་བའི། །ཡང་གསང་དམ་པའི་དཀྱིལ་འཁོར་འདིར། །བདག་གིས་བུ་ཁྱོད་གཞུག་པར་བགྱི། །གྲོང་ཁྱེར་ལ་ཡང་གྲོང་ཁྱེར་དེ། །མྱ་ངན་འདས་པའི་གྲོང་མཆོག་ཏུ། །བུ་ཁྱོད་རབ་ཏུ་གནས་པར་བགྱི། །སྐལ་དང་། [142a.2]ལྡན་པ་ཁྱོད་ཀྱིས་ཀྱང་། །ལྷ་རྣམས་ལ་ཡང་ཕྱག་འཚོལ་ལ། །སྡིག་པ་མ་ལུས་སྦྱང་བྱས་ནས། །སྡོམ་པ་རྣམས་ནི་ལེགས་པར་ཟུང་། །མཆོག་ཏུ་སེམས་ཀྱང་བསྐྱེད་པར་གྱིས། །ཅེས་བརྗོད་དོ། །དེ་ནས་དོན་དང་ལྡན་པའི་སློབ་མ་འཁོར་དང་བཅས་པས། དཀྱིལ་འཁོར་གྱི་ལྷ་རྣམས་ལ་ཕྱག་བྱས་ལ། [142a.3]བཅུ་ཡོངས་སུ་དག་པ་ནས་སྡོམ་པ་གཟུང་བ་ཡན་ཆད་བྱེད་དུ་གཞུག་གོ། །དེ་ནས་འདི་སྐད་བསྒོའོ། །དིང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་གྲུབ་པ་ཡང་ཐོབ་ན་གཞན་ལྟ་སྨོས་ཀྱང་ཅི་དགོས་ཏེ། [142a.4]དེ་ལྟ་བུའི་ཡེ་ཤེས་བསྐྱེད་པར་བྱས་ཀྱིས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་མ་སྨྲ་ཤིག །དམ་ཚིག་ཉམ་པར་གྱུར་ཏ་རེ། དེ་ནས་རྡོ་རྗེ་སེམས་དཔའི་ཕྱག་རྒྱ་ཁ་ཐུར་དུ་བསྟན་པ་སློབ་མའི་སྤྱི་བོར་བཞག་ལ་འདི་སྐད་བརྗོད་པར་བྱའོ། །འདི་ནི་ཁྱོད་ཀྱི་རྡོ་རྗེ་དམ་ཚིག་ [142a.5]གིས་གལ་ཏེ་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །དེ་ནས་དམ་ཚིག་ཕྱག་རྒྱ་འདི་ཉིད་དང་མནའ་ཆུའི་སྙིང་པོས་སྔགས་ལ་སློབ་མས་འཐུང་དུ་གཞུག་གོ། །དེའི་མནའི་སྙིང་པོ་ནི་འདི་ཡིན་ཏེ། ཧཱུཾ་རྡོ་རྗེ་དམ་ཚིག་དེང་ཁྱོད་ཉིད། །སྙིང་ལ་ཡང་དག་ཞུགས་མཛད་ཀྱིས། །གལ་ [142a.6]ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ཨུ་ད་ཀ་ཋཿ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །རྡོ་རྗེ་དྲིལ་བུ་ཕྱག་རྒྱ་རྣམས། །གལ་ཏེ་དཀྱིལ་འཁོར་ [142a.7]མ་མཐོང་སྨྲས། །སྐྱེ་བོའི་ཚོགས་ན་འདུག་པའམ། །དད་པ་མེད་ལ་བསྟན་མི་བྱ། །དེ་ནས་སློབ་མ་ལ་འདི་སྐད་བསྒོའོ། །དེང་ཕན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས། ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་ཡང་བྱ་དགོས་སོ། །ཁྱོད་ཀྱིས་པ་ལ་བརྙས་པར་མ་བྱེད་ཅིག །མི་བདེ་ [142b] [142b.1]བ་མ་སྤངས་པས་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་སྨྲས་ལ་འདི་སྐད་དུ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་འབབ་པར་གྱུར་ཞེས་སྨོས་ཤིག་པར་བསྒོའོ། །དེ་ནས་རྡོ་རྗེ་སློབ་དཔོན་གྱིས་མྱུར་བ་ཉིད་དུ་རྡོ་རྗེ་སེམས་དཔའི་ཕྱག་རྒྱ་ [142b.2]བཅིངས་ལ་འདི་སྐད་བརྗོད་དོ། །འདི་ནི་ཁྱོད་ཀྱི་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་ན་མེད། །དེ་རིང་ཉིད་དུ་འབབ་པར་ཤོག །ཨོཾ་བཛྲ་ཨཱ་བེེ་ཤ་ཨཿཞེས་བརྗོད་དོ། །དེ་ནས་ཕྱག་རྒྱ་བཅིངས་པ་ལས་བྱུང་ནས་དེའི་སྙིང་གར་ཞུགས་ཏེ་རྡོ་རྗེ་སེམས་དཔའ་ [142b.3]འབབ་པར་གྱུར་པར་བསམས་ན་འབབ་པར་འགྱུར་རོ། །ཡང་ཧོ་ཨ་ཧ་ཞེས་བྱ་བ་ཡང་རང་གི་སྙིང་ག་ལ་བཀོད་ལ། སེའུའི་མེ་ཏོག་དང་འདྲ་བའི་རྡོ་རྗེ་སེམས་དཔའ་རང་གི་དམ་ཚིག་དང་བཅས་པ་རང་གི་སྙིང་གར་ངེས་པར་བྱུང་ལ། །བཛྲ་བནྡྷ་ཏྲཏ་ཅེས་པས་དེའི་སྙིང་ག་ཕྱེ་ལ་དེར་བཅུག་སྟེ་རྡོ་རྗེ་ [142b.4]དབབ་པའི་ཕྱག་རྒྱ་བཅིངས་ལ་སྔགས་བརྗོད་ལ། བཅོམ་ལྡན་འདས་ཀྱིས་གང་བར་གྱུར་པར་བསམས་ན་ཡང་འབབ་པར་འགྱུར་རོ། །ཐེག་པ་ཆེན་པོ་མངོན་པར་རྟོགས་པའི་རྡོ་རྗེའི་ཚིག་གིས་བདུན་ནམ་བརྒྱད་རྫོགས་པས་ཀྱང་འབབ་པར་འགྱུར་རོ། །སློབ་མའི་གཙོ་བོའི་སྙིང་གར་རྡོ་རྗེ་བྱ། །ཡིག་ [142b.5]བརྒྱ་ཕྱེད་པས་མཉམ་གཞག་བརྟན་བྱས་ནས། །བདག་ལུས་གང་ཡིན་སྣོད་ཀྱི་སྒོ་ཕྱེ་ཞིང་། །སྙིང་ལ་གནས་པའི་རྡོ་རྗེའི་དབུས་སུ་བལྟ། །སྔགས་ཀྱི་བདག་པོ་ཡི་གེ་ཨ་དམར་གསུངས། །བརྗོད་པས་ཡང་དག་ཆགས་པས་གཡོ་བར་བལྟ། །སློབ་མའི་ལུས་འདི་སྒོ་ནི་དབྱེ་བྱས་ [142b.6]པར། །ཞུགས་ནས་རྡོ་རྗེ་བྱས་པའི་སྙིང་ལ་གནས། །མ་ལུས་ལུས་པ་ཀུན་དུ་བཀང་ནས་སུ། །རྐང་པ་གཡོན་པས་གཡས་པ་མནན་ནས་ནི། །སྔགས་པས་སློབ་མའི་སྙིང་ག་དེ་ལ་དབབ། །ཀུན་དུ་དྲིལ་བུའི་སྒྲ་ནི་ཡང་དག་དཀྲོལ། །ལག་པ་པདྨ་འདབ་མའི་ཕྱག་རྒྱ་བྱས། །མི་ [142b.7]བསྐྱོད་རིན་ཆེན་ལ་སོགས་བདེ་གཤེགས་རྣམས། །རང་གི་ཕྱོགས་ཕྱོགས་ནས་བྱོན་འོད་ཕབ་པས། །ལེགས་བབས་གྱུར་པས་རང་གི་བུ་ལ་བལྟ། །གང་ཞིག་དེས་ཀྱང་འབབ་པར་མ་གྱུར་ན། །ལག་པ་གཡས་པར་ཏིལ་གྱི་ས་བོན་གཞག། །དབུས་སུ་ཡི་གེ་ཧཱུཾ་ཡང་རྣམ་བཀོད་དེ། ། [143a] [143a.1]རྡོ་རྗེ་འོད་འབར་བ་ནི་རྣམ་པར་བསམ། །གཡོན་པའི་མཐེབ་མཛུབ་ཕྱག་རྒྱར་བྱས་པ་ཡིས། །བླང་བར་བྱས་ལ་མེ་ལ་སྦྱིན་སྲེག་བྱ། །ལུས་ནི་ཐལ་བར་བྱས་ལ་རྣམ་དག་པའི། །བསོད་ནམས་ལུས་ལའང་སྔགས་ཀྱི་འོད་ཀྱིས་དགང་། །ཡེ་ཤེས་བབ་བ་ཉིད་དུ་བསམས་ནས་ནི། །རྫས་ [143a.2]བཞིན་འབབ་པ་ཉིད་དུ་རབ་ཏུ་འགྱུར། །ལ་ལ་དག་གིས་ལེགས་པར་བཤད་པ་ན། །མཆེ་བའི་མྱུ་གུ་ཅུང་ཟད་གཙིགས་པ་ཡིས། །རྩེ་མོ་འོད་དཀར་གཡོ་ཞིང་དགོད་པའི་ཞལ། །སྨིན་མ་གདེངས་པས་ཕྱོགས་བཅུ་མ་ལུས་པ། །འབྲུག་སྒྲ་ལྟ་བུ་ཧཱུཾ་ནི་འཇིགས་པའི་སྒྲ། །སངས་རྒྱས་མེ་ཏོག་ཆུན་ [143a.3]ཕྲེང་གཉིས་བཏགས་པ། །འོད་ཆེན་སྣ་ཚོགས་ལྡན་པར་རང་གི་ལུས་བསྒོམས་ལ། །སྔགས་པས་རང་གི་བུ་ཡི་མིག་ཕྱེ་སྟེ། །འཁོར་ལོ་འདི་དག་མ་ལུས་བསྟན་པར་བྱ། །གང་ཚེ་དེར་ནི་ཅི་ཡང་མ་མཐོང་ན། །རང་ལས་བྱུང་བའི་འོད་ཀྱི་ཕྲེང་བ་ཡིས། །དེ་ཡི་སྙིང་ལ་སྣང་བར་བྱས་ལ་དེ་ནས་ནི། ། [143a.4]འདི་ནི་ཉིས་འགྱུར་མིག་ཏུ་འགྱུར་བར་བསམ། །དེ་ཡི་འོད་ཀྱིས་མིག་གཉིས་བསྐུལ་བས་ན། །དེ་ཚེ་ཅུང་ཟད་ངེས་པར་མཐོང་བར་འགྱུར། །དེས་ཀྱང་དེ་བཞིན་མཚན་མ་མ་མཐོང་ན། །རྗེས་མཐུན་གནས་པས་བདེན་པའི་བྱིན་རླབས་བྱ། །འགྲོ་བའི་དོན་ལ་ཆགས་བྲལ་མ་མཛད་ཅེས། །བརྟུལ་ [143a.5]ཞུགས་ཅན་གྱིས་དེར་སོགས་ཀྱིས་བསྐུལ་ཞིང་། །པུས་མོ་གཉིས་ཀ་ས་ལ་བཙུགས་ནས་ནི། །གཟུགས་མཐོང་ཕྱིར་ནི་མཆོད་པ་དབུལ་བར་བྱ། །དེ་བབས་ཏེ། བབས་མ་ཐག་ཏུ་ལྷའི་ཡེ་ཤེས་སྐྱེ་བར་འགྱུར་ཞིང་། ཡེ་ཤེས་དེས་ནི་ཕ་རོལ་སེམས་སུ་འགྱུར་རོ། །ཞེས་བྱ་བ་ [143a.6]ལ་སོགས་པ་རྒྱ་ཆེར་སྦྱར་རོ། །དེ་ནས་ཏིཥྛ་བཛྲ་ཞེས་བྱ་བ་ལ་སོགས་པས་དེའི་སྙིང་གའི་ཕྱག་རྒྱ་དགྲོལ་བར་བྱའོ། །ཚིགས་སུ་བཅད་པ་འདིས་བདེན་པའི་བྱིན་རླབས་བརྗོད་པར་བྱའོ། །འདི་ལྟར་བདག་གི་སློབ་མ་འདི། །དཀྱིལ་འཁོར་དུ་ནི་ལེགས་བཅུག་ནས། །ལྷ་ཡི་ [143a.7]རིགས་ཀྱི་རིམ་པ་དག །འདི་ཡི་བསོད་ནམས་ཅི་འདྲ་ལས། །དེ་བཞིན་དུ་ནི་འབབ་པར་འགྱུར། །འདི་ནི་དངོས་གྲུབ་གང་གྲུབ་པ། །རིགས་ནི་གང་གི་སྣོད་གྱུར་དང་། །བསོད་ནམས་མཐུ་ནི་གང་ཡོད་པ། །དཀྱིལ་འཁོར་འདིར་ནི་དེ་བཞིན་འགྱུར། །དེ་ནས། སངས་ [143b] [143b.1]རྒྱས་དངོས་གྲུབ་ཐོབ་བྱའི་ཕྱིར། །བདག་ལ་ཐུགས་བརྩེར་དགོངས་ནས་ནི། །འགྲོ་ལ་ཕན་པའི་གཙོ་ཆེན་གྱིས། །སྨན་པར་དགོངས་ཏེ་བཞེས་སུ་གསོལ། །ཧཱུཾ་པྲ་ཏཱིཙྪ་བཛྲ་ཧོ་ཞེས་བྱ་བའི་སྔགས་ཀྱིས་ཕྲེང་བ་དཀྱིལ་འཁོར་དུ་དོར་རོ། །དེ་ནས་དངོས་གྲུབ་རབ་འབྲིང་མེ་ཏོག་འབབ་ [143b.2]པ་ལས་བརྟག་པར་བྱ་སྟེ། ལྷ་རྣམས་ཀྱི་ཁྱད་པར་དང་གནས་ཀྱི་ཁྱད་པར་ལས་བརྟགས་ཏེ། གང་ཚེ་སངས་རྒྱས་བཅོམ་ལྡན་འདས། །དབུ་ལ་མེ་ཏོག་འབབ་འགྱུར་ན། །དེ་ཚེ་གཙུག་ཏོར་མཛོད་སྤུ་དག །འགྲུབ་པར་འགྱུར་བས་གདོན་མི་ཟ། །སྤྱན་ལ་སོགས་པ་རྣམས་ཀྱང་ནི། །ཞལ་དུ་བབས་ [143b.3]པར་གྱུར་པ་ན། །སྟོད་དུ་བབས་ན་མཆོག་རྣམས་གྲུབ། །རྐེད་དུ་བབས་ན་འབྲིང་རྣམས་གྲུབ། །རོ་སྨད་ཕྱོགས་སུ་བབས་ན་ནི། །དངོས་གྲུབ་ཐ་མ་རྣམས་འགྲུབ་འགྱུར། །བར་གྱི་སྐུ་ལ་བབས་ན་ནི། །སྙིང་པོ་ལ་སོགས་གྲུབ་པར་འགྱུར། །སྨད་དུ་བབས་པར་གྱུར་ན་ནི། །མངག་གཞུག་ལ་སོགས་ [143b.4]གྲུབ་པར་འགྱུར། །རིམ་པ་དེ་དག་ཐམས་ཅད་ནི། །རིམ་བཞིན་རྣམ་པར་ཤེས་པར་བྱ། །དེ་བཞིན་ལྷ་རྣམས་གཞན་ལ་ཡང་། །དངོས་གྲུབ་རྣམ་པ་གསུམ་དུ་བཤད། །གལ་ཏེ་ལྷ་ཡི་གཟུགས་དག་ལ། །མེ་ཏོག་རིང་དུ་ལྷུང་གྱུར་ན། །དེ་ཡི་དངོས་གྲུབ་ཡུན་རིངས་འགྲུབ། །ཉེ་ན་དངོས་ [143b.5]གྲུབ་མྱུར་དུ་འགྲུབ། །གསང་སྔགས་རྣམས་ཀྱི་མཆོད་པ་དག །གང་དུ་བཀྲམ་པའི་ཚུལ་ཅན་ནི། །དེ་ཡི་ས་རིས་དེ་ཡིན་ཏེ། །མེ་ཏོག་དེར་ལྷུང་དེ་ཡི་རིགས། །ལྷ་གཉིས་ཀྱི་ནི་བར་དག་ཏུ། །གལ་ཏེ་ངེས་པར་བབས་གྱུར་ན། །གང་དུ་ཉེ་བ་དེ་ཡི་རིགས། །གལ་ཏེ་ལ་ལའི་མེ་ཏོག་ནི། ། [143b.6]དཀྱིལ་འཁོར་མང་པོ་འདས་ནས་བབ། །དེ་ལ་དངོས་གྲུབ་མི་འགྲུབ་ཅིང་། །བསོད་ནམས་དད་པ་རབ་ཏུ་ཆུང་། །གལ་ཏེ་མེ་ཏོག་དོར་བ་དག །ར་བའི་རི་མོ་ལ་བབ་ན། །ཞི་བ་བྱས་ནས་དེ་དག་གདོད། །ནན་ཏན་བསྐྱེད་དེ་འདོར་དུ་གཞུག །དེ་སྟེ་ཐེ་ཚོམ་གྱུར་ན་ནི། །མཁས་པས་ [143b.7]བཟླས་ཏེ་འདོར་མི་གཞུག །དེ་ནི་གང་ཡང་ཉེ་མེད་པས། །དེས་ནི་དངོས་གྲུབ་ཐོབ་མི་འགྱུར། །གཉིས་ཀྱི་བར་དུ་མཉམ་པ་ན། །དོན་མེད་ཕྱི་རོལ་ལྷུང་ན་ནི། །ཞི་བའི་སྦྱིན་སྲེག་བྱས་ནས་སུ། །དེ་ནས་མེ་ཏོག་དོར་དུ་གཞུག །སྙིང་པོར་མེ་ཏོག་བབས་པ་ནི། །རྟག་ཏུ་དོན་མེད་མི་ [144a] [144a.1]འགྱུར་བཤད། །སྲད་བུ་དག་ནི་ཆོ་ག་བཞིན། །དེ་ཡི་ཉེ་འཁོར་ཤེས་པར་བྱ། །དེ་ལ་སོགས་པའི་རྣམ་པ་ཡིས། །མེ་ཏོག་རྣམས་ནི་དོར་བ་ལས། །བདག་གི་མདུན་དུ་གང་ལྷུང་བ། །དེ་ལ་ཞི་བ་བརྩམ་པར་བྱ། །སྦྱིན་སྲེག་གིས་ནི་ཞི་བྱས་ནས། །དེ་ནི་ [144a.2]སླར་ཡང་དོར་དུ་གཞུག །ལན་གསུམ་སྤོགས་ཏེ་འདོར་ན་ཡང་། །གལ་ཏེ་ལེགས་པར་མ་བབ་ན། །རེ་ཐག་བཅད་དེ་སླར་གཏང་བྱ། །དེ་ནས་མེ་ཏོག་བབས་པ་ལས། །ལྷ་ཡང་དག་པར་ཤེས་བྱས་ནས། །ཕྲེང་བ་བླངས་ཏེ་སྔགས་འདི་བརྗོད། །ཨོཾ་པྲ་ཏི་གྲྀ་ཧྞ་རྭ་མི་སཏྭ་མ་ཧཱ་ [144a.3]བ་ལ་ཞེས་བརྗོད་ལ་དེའི་མགོ་ལ་བཅིང་ངོ་ཡེ་ཤེས་སེམས་དཔའི་མཚན་མ་ཉེ་བར་མཚོན་ནས། །དེ་ལ་མིག་གིས་ཇི་ལྟར་མཐོང་ཞེས་དྲིའོ། །དེས་ཇི་ལྟར་མཐོང་བ་བཞིན་དུ་འགྲུབ་པར་འགྱུར་རོ། །གལ་ཏེ་ཁ་དོག་སྣང་བར་མཐོང་ན། །དེ་ལ་དངོས་གྲུབ་ཐམས་ཅད་ཀྱི་ཡེ་ཤེས་ [144a.4]བསླབ་པར་བྱའོ་ཞེས་རྒྱ་ཆེར་སྦྱར་རོ། །དེ་ནས་འདིས་གདོང་གཡོགས་དགྲོལ་ཏེ། ཇི་ལྟར་མིག་མཁན་རྒྱལ་པོ་ཡིས། །མིག་གི་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །བཛྲ་ཙཀྵུ་ཧེ་བཛྲ་པཱ་ཤ་ཞེས་བརྗོད་དོ། །དེ་ནས་གདོང་ [144a.5]གཡོགས་དཀྲོལ་ནས་ནི། །དཀྱིལ་འཁོར་བཟང་པོ་བསྟན་པར་བྱ། །དེ་ནས་བླ་མ་དགའ་འགྱུར་ནས། །སློབ་མ་དེ་ལ་འདི་སྐད་བསྒོ། །དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ནི་སངས་རྒྱས་རིགས་སུ་སྐྱེས། །སྔགས་དང་རིགས་པས་བྱིན་གྱིས་ [144a.6]བརླབས། །འགྲོ་བ་ཕུན་སུམ་དངོས་གྲུབ་ཀྱང་། །ཐམས་ཅད་ཁྱོད་ལ་མངོན་དུ་གྱུར། །དངོས་གྲུབ་ཐོབ་ཕྱིར་དམ་ཚིག་སྐྱོངས། །གསང་སྔགས་ལ་ཡང་བརྩོན་པར་གྱིས། །དེ་ནས་དཀྱིལ་འཁོར་གྱི་དེ་ཁོ་ན་བཤད་པར་བྱ་སྟེ། མི་མཉམ་མེད་པས་ཟུར་བཞིར་སྙོམས། །དྲན་དང་ [144a.7]དབང་པོ་སྒོ་བཞི་སྟེ། །བསམ་གཏན་རྟ་བབས་རྣམ་པ་བཞི། །ཏིང་འཛིན་ཁྱམས་སུ་ཤེས་པར་བྱ། །ཁྱམས་ལ་བརྟེན་པ་རྡོ་རྗེའི་གདན། །གཟུངས་རྣམས་ལྷ་མོས་མཆོད་པ་ཡི། །རྒྱན་རྣམས་ཀུན་གྱིས་བཀྲ་བ་ཡང་། །བསམ་པ་ཐམས་ཅད་རྫོགས་བྱེད་པའོ། །གདུལ་བྱ་ [144b] [144b.1]བསྐྱོད་པ་སྣ་ཚོགས་མཆོག །དར་འཕན་དྲིལ་བུ་སྒྲོགས་པ་ཡིས། །མེ་ལོང་ཡེ་ཤེས་རྟག་མི་རྟོག །བྱང་ཆུབ་ཡན་ལག་མེ་ཏོག་ཕྲེང་། །དྲ་བ་དྲ་ཕྱེད་རིན་ཆེན་མཆོག །ཉི་མ་ཟླ་བར་ཡང་དག་ལྡན། །ཀུན་གྲུབ་མི་ཟད་བདེ་བ་སྟེ། །བདེ་བ་ཆེན་པོ་ཞེས་གྲགས་སོ། །དེ་ཡི་ནང་གི་དཀྱིལ་ [144b.2]འཁོར་གྱི། །ཀ་བ་དཀྱིལ་འཁོར་དྲ་བ་ནི། །དངོས་གྲུབ་བདེ་བ་ཀུན་སྟེར་བའི། །རྣམ་ཐར་བརྒྱད་པོ་དེ་ཉིད་ཡིན། །ཐེག་པ་ཆེན་པོ་བྱང་ཆུབ་སེམས། །མདོ་སྡེའི་འཁོར་ལོ་བསྐོར་བས་ན། །རྡོ་རྗེ་ཐིག་གིས་ཡོངས་བཏབ་ཅིང་། །ཐམས་ཅད་དུ་ཡང་ཡོངས་སུ་རྫོགས། །གང་དུ་འཇུག་པ་དེ་ཙམ་ [144b.3]གྱིས། །མི་ཚུགས་པ་དང་མི་ལོག་པ། །བདེ་བ་ཆེན་པོ་རབ་གྲུབ་ཕྱིར། །དེ་དག་དབང་པོར་ཡང་དག་འགྱུར། །དེ་ནས་ཕྱག་རྒྱ་དང་སྙིང་པོ་ཡང་བཤད་པར་བྱ་སྟེ། །དེ་ནས་རྡོ་རྗེ་ལྕགས་ཀྱུ་ནས་བརྩམས་ཏེ། མགོན་པོ་འཇམ་དབྱངས་ཀྱི་བར་དུ་བསྟན་པར་བྱའོ། །དེ་ནས་མེ་ལོང་བསྟན་པར་བྱ་སྟེ། [144b.4]ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་དྲི་མ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །ངོ་བོ་ཉིད་མེད་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉན་པར་བྱོས། །འོན་ཀྱང་སངས་རྒྱས་སྲས་སུ་ [144b.5]སྐྱེས། །ཞེས་སྒྱུ་མ་ལྟ་བུར་བསྟན་ཏོ། །དེ་ནས་བླ་མ་དེ་ལ་ཡོན་གྱི་མཆོག་ཕུལ་ཏེ། གསོལ་བ་གདབ་པར་བྱ་སྟེ། འདི་ཞེས་བགྱི་བ་རྡོ་རྗེ་ཅན། །བྱང་ཆུབ་སེམས་ནི་རྣམ་བསྒོམ་པ། །སློབ་དཔོན་ཞབས་ཀྱི་པདྨ་ལ། །དབང་བསྐུར་ཕྱིར་ནི་ཕྱག་ཀྱང་འཚལ། །སློབ་དཔོན་རབ་ཏུ་ [144b.6]རྨད་བྱུང་བ། །རྒྱལ་བ་རྣམས་ཀྱིས་དབང་བསྐུར་ཉིད། །སངས་རྒྱས་བྱང་ཆུབ་ཐོབ་བྱེད་པ། །སྐལ་བ་ཆེན་པོ་བདག་ལ་སྩོལ། །ཞེས་བརྗོད་དོ། །དེ་ནས་སློབ་དཔོན་གྱིས་ཧོཿཞེས་བྱ་བས་གཞུ་བྱིན་ལ་དེ་བཞིན་གཤེགས་པ་ཐམས་ཅད་མཉེས་པར་གྱིས་ཤིག་ཅེས་བརྗོད་དེ། [144b.7]ཕྱོགས་བཞིར་མདའ་བཞི་འཕེན་དུ་གཞུག་ཅིང་། སྟེང་དང་འོག་ཏུ་ཡང་རེ་རེ་འཕེན་དུ་གཞུག་གོ། །དེ་ནས་སློབ་མ་དབང་བསྐུར་བར་བྱ་སྟེ། ཤར་ཕྱོགས་ཀྱི་སྒོའི་མཐར་སྣ་ཚོགས་པདྨ་བྲིས་ལ་གང་ཡང་རུང་བའི་སྐུར་བསྐྱེད་དེ། ཟླ་བའི་དཀྱིལ་འཁོར་གྱི་སྟེང་དུ་གནས་པར་བསམས་ལ། [145a] [145a.1]གཡས་ལོགས་སུ་དར་དང་མེ་ཏོག་གི་ཕྲེང་བས་བརྒྱན་པའི་གདུགས་དཀར་པོ་ལ་གཙུག་ཏོར་གདུགས་དཀར་བཟླས་ལ་དབུབ་པོ། །གཡོན་དུ་དར་ཚོན་སྣ་ཚོགས་པ་བཀྲམ་པའི་རྒྱལ་མཚན་དང་། བ་དན་ལ་ཨོཾ་ཡོངས་སུ་བཟླས་པ་ལེགས་པར་བཞག་ལ། །མེ་ཏོག་ལ་ [145a.2]སོགས་པས་མཆོད་ལ་སྒྲ་སྣ་ཚོགས་པས་བསྒྲགས་སོ། །བཀྲ་ཤིས་ཀྱི་གླུ་ལེན་ཅིང་ཕྱི་ནང་གི་གར་སྣ་ཚོགས་པ་ཡང་བྱའོ། །དེ་ནས་རྡོ་རྗེ་འབེབས་བའི་བུམ་པ་ལ་སོགས་པ་ཐམས་ཅད་གཅིག་ཏུ་བསྡོམས་ཏེ་བྱིན་གྱིས་བརླབས་ལ་དབང་བསྐུར་བར་བྱ་སྟེ། །ཆེ་བའི་ཡོན་ཏན་ཀུན་རྫོགས་ཤིང་། ། [145a.3]བདུད་རྩིའི་ཆུ་ཡིས་རབ་བཀང་བ། །རྣམ་པར་དག་པའི་བུམ་པ་འདིས། །བུ་ཁྱོད་ལ་ནི་དབང་བསྐུར་རོ། །ཨོཾ་བཛྲ་ཨ་བྷི་ཥིཉྩ་ཞེས་བརྗོད་དོ། །སློབ་མ་རྣམས་ཀྱི་སྤྱི་བོར་བཞག་པས་མེ་ལོང་ལྟ་བུའི་ཡེ་ཤེས་ལ་མི་བསྐྱོད་པ་ངོ་བོར་གྱུར་ཏོ། །དེ་ནས་དེ་ཁོ་ན་ཉིད་བསྟན་ཏེ། ཐོག་མཐའ་མེད་ [145a.4]པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཐམས་ཅད་བདག། །རྡོ་རྗེ་སྙེམས་ཚུལ་བདག་པོའི་བདག །ཅེས་བྱ་བ། འདི་ནི་འཇམ་དཔལ་ལ་བྱ་བར་བཤད་དེ་མིང་ཐམས་ཅད་ཀྱི་བདག་ཉིད་ཡིན་པའི་ཕྱིར་རོ། །དེ་ནས་ཆོས་བསྟན་ཏེ། སྲིད་པའི་རང་ [145a.5]བཞིན་དག་པའི་ཕྱིར། །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པའི་མཆོག་ནི་བྱེད་པར་འགྱུར། །དེ་ནས་དམ་ཚིག་བསྒྲག་པར་བྱ་སྟེ། སྲིད་པའི་བདེ་བ་ཤིན་ཏུ་ཆུང་། །སྡུག་བསྔལ་ཆེན་པོ་ཞི་བྱའི་ཕྱིར། །ཤིན་ཏུ་བདེ་བ་དམ་ [145a.6]པའི་ཐབས། །དེ་བས་དམ་ཚིག་བསྲུང་བར་གྱིས། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བསྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། ། [145a.7]དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །གསང་བ་མཆོག་གི་དམ་ཚིག་ཐབས། །བསོད་ནམས་བྱིན་རློབ་སྒྲུབ་བྱེད་པ། །དངོས་གྲུབ་ཀུན་གྱི་དབང་ཕྱུག་གྲུབ། །སེམས་ཅན་དོན་ནི་སྟོན་པར་བྱེད། །ཡིད་ཀྱི་གཟུགས་ནི་བརྟན་པའི་ཕྱིར། ། [145b] [145b.1]ཕྱག་རྒྱ་དམ་ཚིག་ཡིན་པར་གྲགས། །གང་གི་ལུས་ཀུན་བསྟན་པས་ན། །དེས་ན་ཕྱག་རྒྱ་ཡིན་པར་གྲགས། །ཞེས་བྱའོ། །དེ་ནས་གསང་བ་བསྒྲགས་ཏེ། འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ནི་སྡིག་མེད་དེ། །དེ་བས་འདོད་པའི་ཆགས་བྲལ་བར། །ཁྱེད་ཀྱིས་ནམ་ [145b.2]ཡང་མ་བྱེད་ཅིག །ཅེས་བྱའོ། །དེ་ནས། མགོན་པོ་ཁྱོད་ལ་གསོལ་བ་ནི། །ཐེག་པ་ཆེན་པོ་རྟོག་པ་ཡི། །ཚུལ་ཆེན་ཡང་ནི་རྒྱས་པར་མཛོད། །ཅེས་བྱའོ། །དེ་ནས། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་པ། །རྡོ་རྗེའི་ [145b.3]འཁོར་ལོ་རབ་ཏུ་བསྐོར། །ཞེས་བརྗོད་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག །རྡོ་རྗེ་རིགས་ཀྱི་བདག་པོ་རྡོ་རྗེ་རིགས་ཀྱི་དཀྱིལ་འཁོར་བསྐོར་ཞེས་བརྗོད་དོ། །དེ་ནས་དབུ་རྒྱན་དང་དར་དཔྱངས་སུ་བཅས་པ་བྱིན་གྱིས་རློབས་ལ། །དེ་བཞིན་གཤེགས་པ་ཀུན་གྱི་རྒྱན། །སངས་རྒྱས་ལྔ་ [145b.4]ཡི་ངོ་བོ་ཉིད། །རིན་པོ་ཆེ་ཡི་དབུ་རྒྱན་དང་། །དར་དཔྱངས་དག་གིས་དབང་བསྐུར་རོ། །ཨོཾ་རཏྣ་ཨ་བྷི་ཥིཉྩ་ཞེས་བརྗོད་པས། །མཉམ་པ་ཉིད་ཀྱི་ཡེ་ཤེས་ལས། །རྡོ་རྗེ་རིན་པོ་ཆེར་གྱུར་ཏོ། །དེ་ནས་དེ་ཁོ་ན་ཉིད་བསྟན། ཉི་མ་འདི་ནི་མཆོག་ཡིན་ཏེ། །དེ་བཞིན་གཤེགས་པ་ [145b.5]ཐམས་ཅད་མཐོང་། །ནམ་མཁའི་སྙིང་པོ་བཅོམ་ལྡན་འདས། །བསམ་པ་ཐམས་ཅད་རྫོགས་མཛད་པའོ། །ཞེས་བརྗོད་དོ། །དེ་ནས་ཆོས་ཀྱི་མཚན་ཉིད་བསྟན་ཏེ། བསམ་པ་ཐམས་ཅད་རབ་གྲུབ་པས། །དོན་འདི་བསམ་འགྲུབ་བླ་ན་མེད། །དེ་ཡང་འདོད་པར་རབ་གྲུབ་ཕྱིར། །འདོད་དང་ཐར་པའི་བདེ་ [145b.6]ཆེན་པོ། །ཞེས་བརྗོད་དོ། །དེ་ནས་དམ་ཚིག་བསྒྲགས་ཏེ། སེམས་ཅན་ཀུན་ལ་ཕན་ཕྱིར་དང་། །སངས་རྒྱས་དོན་དུ་སྦྱོར་བ་ཡིས། །ཕ་རོལ་ནོར་རྣམས་ཕྲོགས་ཀྱང་ནི། །སྡིག་གིས་གོས་པར་མི་འགྱུར་རོ། །ཞེས་བརྗོད་དོ། །དེ་ནས་གསང་བ་བསྒྲགས་ཏེ། འདོད་དང་བདེ་བ་ཐམས་ [145b.7]ཅད་དང་། །མི་མཐུན་པ་ཡང་སྦྱིན་བྱ་ཞིང་། །བདག་ཉིད་ཀྱང་ནི་ཕ་རོལ་གྱི། །བསམ་པ་ཐམས་ཅད་རྫོགས་པར་གྱིས། །དེ་ནས། རིན་ཆེན་ཁྱེད་ལ་གསོལ་བ་ནི། །ནོར་གྱི་ཚོགས་ནི་བཤད་དུ་གསོལ། །རང་གི་རིགས་ནི་བསྐྱེད་པར་མཛོད། །ཅེས་བརྗོད་དེ་ནས། མདོར་ན་འཇིག་རྟེན་ [146a] [146a.1]ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཅི་སྟེ་སྣ་ཚོགས་འདུལ་འགྱུར་བའི། །ནོར་བུའི་འཁོར་ལོ་རབ་ཏུ་བསྐོར། །ཞེས་བརྗོད་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག །རིན་པོ་ཆེའི་རིགས་ཀྱི་བདག་པོ་རིན་པོ་ཆེའི་རིགས་ཀྱི་འཁོར་ལོ་བསྐོར་ཅིག་ཅེས་བརྗོད་ [146a.2]དོ། །དེ་ནས་རྡོ་རྗེ་བྱིན་གྱིས་བརླབས་ལ། སངས་རྒྱས་ཀུན་གྱི་རྡོ་རྗེ་དབང་། །དེ་རིང་ཁྱོད་ལ་དབང་བསྐུར་བྱ། །སངས་རྒྱས་ཀུན་དུ་རབ་གྲུབ་ཕྱིར། །བུ་ཁྱོད་ལ་ནི་བསྐུར་བར་བྱ། །བཛྲ་ཨ་དྷི་པ་ཏི་ཨ་བྷི་ཥིཉྩ་ཞེས་བརྗོད་པས། སོ་སོར་རྟོག་པའི་ཡེ་ཤེས་ལས་རྡོ་རྗེ་ཆོས་ཀྱི་སེམས་དཔར་གྱུར་ཏོ། །དེ་ནས་དེ་ཁོ་ [146a.3]ན་ཉིད་བསྟན་པར་བྱ་སྟེ། འདི་ཉིད་སངས་རྒྱས་བཅོམ་ལྡན་འདས། །སྤྱན་རས་གཟིགས་ཀྱི་དབང་ཕྱུག་སྟེ། །འདུལ་བ་ཐབས་ཀྱིས་མཛད་པ་ནི། །དག་པའི་རོལ་མོར་རབ་ཏུ་འཇུག །ཅེས་བརྗོད་དོ། །དེ་ནས་ཆོས་ཀྱི་མཚན་ཉིད་བསྟན་ཏེ། ཇི་ལྟར་པདྨ་དམར་པོ་འདི། །ཚོན་གྱི་ཉེས་པས་མ་གོས་ [146a.4]ལྟར། །དེ་བཞིན་གནས་པའི་ཉེས་པ་འདིས། །འགྲོ་ཕན་རྣམས་ལ་མི་གོས་སོ། །ཞེས་བརྗོད་དོ། །དེ་ནས་དམ་ཚིག་བསྟན་ཏེ། ཆོ་ག་འདི་དག་གང་གང་གིས། །འགྲོ་བ་རྣམས་ནི་འདུལ་འགྱུར་བ། །པདྨ་དག་པར་སྦྱོར་བའི་བདག། །དེ་དག་དེར་ནི་སྦྱོར་བར་བྱ། །ཞེས་བརྗོད་དོ། ། [146a.5]དེ་ནས་གསང་བ་བསྒྲགས་ཏེ། འདོད་ཆགས་འདྲ་བའི་བདེ་བ་མེད། །རྒྱལ་བ་རྣམས་ལ་དེ་ཕུལ་ལ། །སེམས་ཅན་དོན་དུ་སྦྱིན་མེད་མཆོག །བསྟེན་ན་བསོད་ནམས་ཐོབ་པར་འགྱུར། །ཞེས་བརྗོད་དོ། །དེ་ནས། དཔའ་བོ་ཁྱོད་ལ་གསོལ་བ་ནི། །རང་གི་རིགས་རྣམས་བསྐྱེད་ནས་ནི། །ཆོས་ཀྱི་ [146a.6]འཁོར་ལོ་དམ་པ་འདི། །ཐུབ་པ་ཆེན་པོས་བཤད་དུ་གསོལ། །ཞེས་བརྗོད་དོ། །དེ་ནས། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བའི། །པདྨའི་འཁོར་ལོ་རབ་ཏུ་བསྐོར། །ཞེས་བརྗོད་ལ། །རྒྱལ་བར་གྱུར་ཅིག་རྒྱལ་བར་ [146a.7]གྱུར་ཅིག །པདྨ་རིགས་ཀྱི་བདག་པོ་ཆོས་ཀྱི་འཁོར་ལོ་བསྐོར་ཅིག་ཅེས་བརྗོད་དོ། །དེ་ནས་དྲིལ་བུ་བྱིན་གྱིས་བརླབས་ཏེ། འདི་ནི་ཤེས་རབ་ཉིད་ཀྱི་དངོས། །ཤེས་རབ་དབྱངས་ཀྱི་རྗེས་འགྲོ་བའི། །དེ་རིང་ཁྱོད་ལ་འདིར་དབང་བསྐུར། །ཨོཾ་པྲཛྙཱ་པཱ་ར་མི་ཏཱ་དྷརྨ་ཨ་ཞེས་བརྗོད། བྱ་བ་གྲུབ་ [146b] [146b.1]པའི་ཡེ་ཤེས་ལས་སྣ་ཚོགས་རྡོ་རྗེ་ཅན་དུ་གྱུར་པར་བསམས་ལ་དེ་ཁོ་ན་ཉིད་བསྟན་ཏེ། རྟག་ཏུ་འདོད་ཆགས་ལས་བྱུང་འགྲོ། །རྡོ་རྗེ་མེ་ཡི་ཕུང་པོའི་གཟུགས། །འབར་བའི་རྡོ་རྗེ་སྦྱོར་བ་ཆེ། །མཁའ་འགྲོ་རྣམས་ནི་ཀུན་དུ་འབར། །ཞེས་བརྗོད་དོ། །དེ་ནས་ཆོས་ཀྱི་མཚན་ཉིད་བསྟན་ཏེ། ཆོས་རྣམས་ [146b.2]ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་རྣལ་འབྱོར་པས། །འདི་ཀུན་མྱུར་དུ་འཛིན་པར་འགྱུར། །ཞེས་བརྗོད་དོ། །དེ་ནས་དམ་ཚིག་བསྟན་ཏེ། ཐམས་ཅད་ནམ་མཁའ་སྦྱོར་བ་ཡིས། །ཐམས་ཅད་ནམ་མཁའ་ཞེས་སྨྲ་ཞིང་། །རྡོ་རྗེའི་ཕྱག་རྒྱས་ [146b.3]རྒྱས་བཏབ་ལ། །ཁམས་གསུམ་ཡང་ནི་བཟའ་བར་བྱ། །ཞེས་བརྗོད་དོ། །དེ་ནས་གསང་བ་བསྒྲགས་ཏེ། སེམས་ཅན་ཀུན་ལ་ཕན་ཕྱིར་དང་། །སངས་རྒྱས་བསྟན་པའི་དོན་དུ་ནི། །སེམས་ཅན་ཐམས་ཅད་གསད་ན་ཡང་། །དེ་ནི་སྡིག་པས་གོས་མི་འགྱུར། །ཞེས་བརྗོད་དོ། །མགོན་པོ་ཁྱོད་ལ་ [146b.4]གསོལ་བ་ནི། །སངས་རྒྱས་ཀུན་ལ་དབང་བྱེད་ཅིང་། །སེམས་ཅན་ཀུན་དོན་བྱ་བའི་ཕྱིར། །རང་གི་རིགས་ནི་བསྐྱེད་པར་མཛོད། །ཅེས་བརྗོད་དོ། །དེ་ནས། མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བའི། །ལས་ཀྱི་འཁོར་ [146b.5]ལོ་རབ་ཏུ་བསྐོར། །ཞེས་བརྗོད་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག །ལས་ཀྱི་རིགས་ཀྱི་བདག་པོ་ཆོས་ཀྱི་འཁོར་ལོ་བསྐོར་ཅིག་ཅེས་བརྗོད་དོ། །དེ་ནས་བྱིན་གྱིས་བརླབས་པའི་ལག་པ་དེ་རྣམས་སྤྱི་བོར་བཞག་ལ། ཁྱོད་ནི་སངས་རྒྱས་དངོས་ཡིན་ཏེ། །རབ་ཏུ་གསང་བ་གསང་བའི་མིང་། ། [146b.6]རྡོ་རྗེ་ཆེ་གེ་མོ་ཞེས་པ། །དེ་རིང་ཁྱོད་ལ་དབང་བསྐུར་རོ། །ཨོཾ་བཛྲ་ནཱ་མ་ཨ་བྷི་ཥིཉྩ་ཞེས་པ་ལ་སོགས་པ་བརྗོད་པས་ཆོས་ཀྱི་དབྱིངས་ཀྱི་ཡེ་ཤེས་ལས་རྣམ་པར་སྣང་མཛད་ཀྱི་ངོ་བོར་གྱུར་ཏོ། །དེ་ལ་དེ་ཁོ་ན་ཉིད་བསྟན་ཏེ། །དེ་ཉིད་དུ་ནི་བཅོམ་ལྡན་འདས། །དེ་བཞིན་གཤེགས་དང་བྱང་ཆུབ་སེམས། །ལྟ་ངན་ [146b.7]རྣམས་ལ་ཕན་པའི་ཕྱིར། །མྱ་ངན་འདས་འདི་སྟོན་པར་མཛོད། །སྣ་ཚོགས་འདུལ་བར་བརྩོན་པ་ཡི། །བརྟན་ཞིང་ངེས་པའི་ཆོས་ཉིད་ཅན། །སྲིད་པ་ཤིན་ཏུ་གནས་མཆོག་ཏུ། །གོ་ཆ་ལ་སོགས་ངེས་པར་གོན། །སངས་རྒྱས་ཆོས་དང་ཚོགས་ལ་སོགས། །དཀོན་མཆོག་གསུམ་པོ་ཉིད་དུ་རྟོགས། ། [147a] [147a.1]སྲིད་པ་ཤིན་ཏུ་ལེགས་པར་བསྒྲུབ། །སྣ་ཚོགས་མཁྱེན་པ་དཔལ་བྱེད་མཆོག །ཅེས་བརྗོད་དོ། །དེ་ནས་ཆོས་ཀྱི་མཚན་ཉིད་བསྟན་ཏེ། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་རྣལ་འབྱོར་བས། །ཀུན་མཆོག་ [147a.2]མཉམ་པ་ཉིད་དུ་གསལ། །ཞེས་བརྗོད་དོ། །དེ་ནས་དམ་ཚིག་བསྟན་པར་བྱ་སྟེ། འདོད་པའི་ལོངས་སྤྱོད་ཐམས་ཅད་ལ། །ཅི་བདེ་བར་ནི་བསྟེན་བཞིན་དུ། །དཀོན་མཆོག་གསུམ་ཡང་མཆོད་པར་བགྱི། །རང་ཉིད་དང་ནི་བརྟེན་པར་བྱའོ། །ཞེས་བརྗོད་དོ། །དེ་ནས་གསང་བ་བསྒྲགས་ཏེ། ཇི་ལྟ་ཇི་ལྟར་ [147a.3]སེམས་ཅན་རྣམས། །འདུལ་འགྱུར་དེ་ལྟ་དེ་ལྟ་བུར། །ཆགས་ལ་སོགས་པ་ཡུན་རིངས་སུ། །དེ་བཞིན་འགྲོ་བའི་དོན་རྣམས་ཀྱིས། །ཞེས་བརྗོད་དོ། །དེ་ནས། མགོན་པོ་ཁྱོད་ལ་གསོལ་བ་ནི། །སེམས་ཅན་ཀུན་ལ་ཕན་པའི་ཕྱིར། །ཐུགས་རྗེ་ཆེན་པོ་བསྐྱེད་ནས་ཀྱང་། །ཆོས་ཀྱི་འཁོར་ལོ་རབ་ཏུ་ [147a.4]བསྐོར། །ཞེས་བརྗོད་དོ། །དེ་ནས། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བརྗོད་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག །དེ་བཞིན་གཤེགས་པའི་བདག་པོའི་ཆོས་ཀྱི་འཁོར་ [147a.5]ལོ་བསྐོར་ཅིག་ཅེས་བརྗོད་དེ་ཐ་མ་དེ་རྣམས་ནི་རྗེས་སུ་གནང་བའི་ཆོ་གའོ། །དེ་ནས་རྡོ་རྗེ་རྩེ་ལྔ་པ་བྱིན་གྱིས་བརླབས་ཏེ། འདི་ནི་སངས་རྒྱས་ཐམས་ཅད་ཀྱི། །ཕྱག་ན་རྡོ་རྗེའི་ལག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ [147a.6]ཡ་ཏིཥྛ་ཨེ་ཥ་སྟཾ་དྷ་ར་ཡ་མི། བཛྲ་སཏྭ་ཧི་ཧི་ཧི་ཧི་ཧཱུཾ་ཞེས་བརྗོད་དོ། །འདི་ནི་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོ་བ། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་རྡོ་རྗེ་རྒྱལ་བས་གསུངས། །ཞེས་བརྗོད་ལ། དྲིལ་བུ་སྦྱིན་ནོ། །དེ་ནས་ཆོས་ཀྱི་འཁོར་ལོ་རྐང་པ་གཉིས་ [147a.7]ཀྱི་བར་དུ་བཞག་ལ། དུང་ལག་པ་གཡས་པར་སྦྱིན་ཏེ་འདི་སྐད་བརྗོད་དོ། །དེང་ནས་བརྩམས་ཏེ་དབང་བསྐུར་བ་ཙམ་གྱིས་ཆོས་ཀྱི་འཁོར་ལོ་བསྐོར་ཅིག །ཆོས་ཀྱི་དུང་བུས་ཤིག །འཇིག་རྟེན་ཀུན་ལ་ཟབ་མོའི་ཆོས་ཀྱི་སྒྲ་སྒྲོགས་ཤིག །དེ་ནས་གཟེངས་བསྟོད་དེ། འདི་ལྟར་སྣང་བའི་ [147b] [147b.1]དངོས་པོ་ཀུན། །སངས་རྒྱས་ཀུན་གྱི་བདག་ཉིད་དེ། །འཇམ་པའི་དབྱངས་ཀྱི་དབང་བསྐུར་བས། །དེ་བཞིན་གཤེགས་པར་ཁྱོད་གྱུར་ཏོ། །དེ་ནས་ལུང་བསྟན་ཏེ། ང་ཡིས་འདི་ལྟར་ཁྱོད་ལུང་བསྟན། །འཇམ་དཔལ་གཞོན་ནུ་དེ་བཞིན་གཤེགས། །ཁྱོད་ནི་སངས་རྒྱས་དངོས་ཡིན་གྱིས། །སོམ་ཉི་ [147b.2]ཡིད་གཉིས་མ་ཟ་ཅིག །དེ་ནས་དབུགས་དབྱུང་བར་བྱ་སྟེ། མཆོག་ཏུ་གསང་བའི་དཀྱིལ་འཁོར་འདིར། །མཐོང་བའམ་ནི་ཞུགས་པ་ཡིས། །སྡིག་པ་ཀུན་ལས་རྣམ་གྲོལ་བ། །ཁྱོད་ནི་དེང་ཉིད་གནས་ཡིན་ཏེ། །བདེ་ཆེན་ཐེག་པ་འདི་ལ་ནི། །སླར་ཁྱོད་འཆི་བ་ཡོད་མིན་ཏེ། །ཅིས་ཀྱང་མི་འཇིགས་ [147b.3]དགའ་བར་གྱིས། །ཁྱོད་ནི་མཆོག་ཏུ་གྱུར་པའོ། །ཞེས་བརྗོད་དོ། །དེ་ནས་ཕྱི་ནང་གསང་བ་གསུམ་གྱི་མཆོད་པས་མཆོད་དེ་བཀྲ་ཤིས་བརྗོད་དོ། །སློབ་མའི་ཚོགས་རྣམས་དང་སྒྲའི་རྣམ་པ་མང་པོས་སྣ་དྲངས་ལ་དཀྱིལ་འཁོར་ལན་གསུམ་བསྐོར་བ་བྱའོ། །དེ་ནས་སློབ་མའི་སྤྱི་བོ་ནས་གདུགས་ [147b.4]དང་རྒྱལ་མཚན་ལ་སོགས་པ་རྣམས་དཀྱིལ་འཁོར་ལ་ཕུལ་ཏེ་འདི་སྐད་བསྒོ་བར་བྱའོ། །ད་ནི་དཀྱིལ་འཁོར་སློབ་དཔོན་གྱུར། །གསང་སྔགས་རྒྱུད་ཀྱང་འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀུན་གྱིས་བཀུར་བར་འགྱུར། །སེམས་ཅན་ཀུན་ལ་ [147b.5]སྙིང་བརྩེའི་ཕྱིར། །ཁྱོད་ཀྱིས་དཀྱིལ་འཁོར་ཆོ་ག་བཞིན། །ནན་ཏན་བསྐྱེད་དེ་བྲི་བར་གྱིས། །སྒྲུབ་པ་པོ་རྣམས་རྒྱུད་ལ་སྦྱོར། །ཁྱོད་ཀྱིས་ཆོས་ལ་སེར་སྣ་དང་། །སེམས་ཅན་ཀུན་ལ་མི་ཕན་པ། །ཉམ་ང་ཆེན་པོར་གྱུར་ཀྱང་ནི། །བུ་ཁྱོད་ཀྱིས་ནི་མི་བྱའོ། །དེ་ནས་སློབ་མ་རེ་རེའི་ལག་པ་ [147b.6]གཡོན་པས་གཡས་པའི་མཐེ་ཆུང་ནས་བཟུང་ནས་ཞི་བའི་ཕྱིར་ཞི་བའི་སྦྱིན་སྲེག་བྱའོ། །དེ་ནས་དཀྱིལ་འཁོར་ལ་མཆོད་པ་དང་བསྟོད་པ་དང་བཟོད་པར་གསོལ་བ་བྱ་སྟེ་ཡེ་ཤེས་ཀྱི་ལྷ་གཤེགས་སུ་གསོལ། བསྐྱེད་པའི་མཚན་ཚོ་བདག་གི་ཐུགས་ཀར་བསྡུས་ལ། རྡུལ་ཚོན་ཕྱགས་ཏེ་ཆུ་ [147b.7]བོ་ཆེན་པོར་དོར་བར་བྱའོ། །དེ་ནས་གནས་དེ་ཡང་དྲི་སྣ་ཚོགས་ཀྱི་ཆུས་ལེགས་པར་བྱུག་པར་བྱའོ། །དེ་ནས་སློབ་མ་དམ་པ་དེས། །ཅི་བཞེད་ཡོན་རྣམས་ཕུལ་ནས་སུ། །གསང་དབང་ནོད་ཕྱིར་འདི་སྐད་ཞུ། །བླ་མ་དམ་པ་བདེ་གཤེགས་གཙོ། །ཁྲོ་བོ་འཁོར་དང་བཅས་པ་ལ། ། [148a] [148a.1]ལུས་ངག་ཡིད་ཀྱིས་བདག་ཕྱག་འཚལ། །གསང་གསུམ་དམ་པའི་དབང་མཆོག་འདི། །དི་རིང་བདག་ལ་གནང་བར་སྩོལ། །ཞེས་བརྗོད་དོ། །དེ་ནས་བླ་མ་དམ་པ་དེས། །གསང་བའི་དབང་བསྐུར་བརྩམ་བྱ་སྟེ། །ཤིན་ཏུ་དབེན་པའི་གནས་རྣམས་སུ། །མཎྜལ་དྲི་ [148a.2]ཞིམ་བདུད་རྩིས་བྱུགས། །མེ་ཏོག་བཀྲམ་སྟེ་སྟན་བཟངས་བཏིང་། །དེ་རྗེས་སློབ་མས་ཤེས་རབ་མ། །མཆོག་དང་རབ་དང་འབྲིང་དང་མཐའ། །བླ་མ་ལ་ཕུལ་འདི་སྐད་བརྗོད། །ཁྱོད་ནི་འཇམ་པའི་རྡོ་རྗེ་ནི། །བདེ་གཤེགས་རྣམས་ཀྱིས་བདེ་བ་མཛད། །བྱང་ཆུབ་སེམས་དཔའ་ཆེ་རྣམས་ཀྱིས། ། [148a.3]ཡང་དག་དོན་མཆོག་རྣམ་དག་པ། །ཇི་ལྟར་ཇི་བཞིན་བདུད་རྩི་ཡིས། །མཆོག་གི་དབང་ནི་བསྐུར་བ་བཞིན། །དེ་བཞིན་བདག་ལ་འཁོར་བ་ཡི། །སྡུག་བསྔལ་རྣམས་ནི་སེལ་བར་མཛོད། །རྣལ་འབྱོར་བདུད་རྩི་དྲི་མེད་མཆོག །མ་རིག་ངེས་པར་རབ་རིབ་རྣམས། །གང་ཞིག་བྱང་ཆུབ་བླ་མེད་པ། །དེ་ [148a.4]རིང་བདག་གིས་ཐོབ་པར་མཛོད། །ཅེས་བརྗོད་དོ། །དེ་ནས་བླ་མས་ཤེས་རབ་མ། །མདངས་ལྡན་མ་ནི་རབ་བསྐྱེད་ལ། །ཆོ་ག་ཐམས་ཅད་རྫོགས་པར་བྱ། །ཐབས་དང་ཤེས་རབ་བྱིན་རློབས་ལ། །ཐུགས་ལས་འོད་འཕྲོས་སངས་རྒྱས་བསྡུ། །དགུག་གཞུག་བཅིང་དང་བསྟིམ་པར་བྱ། །ཆགས་པ་ [148a.5]བསྐྱེད་ཕྱིར་སྔགས་འདི་བརྗོད། །ཨོཾ་མཉྫུ་ཤྲཱི་སརྦ་ཏ་ཐཱ་ག་ཏཱ་ནུ་རཱ་ག་བཛྲ་སྭ་བྷཱ་ཝ་ཨཱ་ཏྨ་ཀོ྅ཧཾ་ཞེས་བརྗོད་དེ། བསྲུབ་པ་དང་བསྲུབས་པའི་སྦྱོར་བ་མཛད་པས་བདེ་བར་གཤེགས་པ་འོད་དུ་ཞུ་སྟེ། བྱང་ཆུབ་ཀྱི་སེམས་སུ་ཕབ་པས་ནོར་བུའི་ནང་དུ་བདེ་བ་རྙེད་པ་ཐབས་དང་ཤེས་རབ་ཀྱི་སྒོ་བཀག་སྟེ། སློབ་ [148a.6]མའི་ཁ་རུ་དབབ་པར་བྱའོ། །དེ་ལ་འདི་སྐད་བརྗོད་དེ། བྱང་ཆུབ་སེམས་ཀྱི་རྡོ་རྗེ་འདི། །སེམས་ཀྱི་སྡུག་བསྔལ་རྣམ་བཅོམ་སྟེ། །གསང་བའི་གནས་དང་དམ་པར་བཅས། །དེ་རིང་ཁྱོད་ལ་དབབ་པར་བྱའོ། །ཞེས་བརྗོད་དེ་སློབ་མའི་ཁ་རུའོ། །སློབ་མ་དེས་ཀྱང་ཚུལ་རྣམ་པ་བཞིས་བདུད་ [148a.7]རྩི་སྦྱང་བར་བྱའོ། །དེས་ནི་ངག་གཉིས་པ་དང་རྣམ་པར་རྟོག་པ་དག་པར་བྱེད་པས་གསུང་གི་དབང་ཞེས་བྱའོ། །དེ་ལ་ལུང་བསྟན་པར་བྱ་སྟེ། བླ་མས་ཆོས་གོས་གྱོན་ལ་ལག་པ་གཡོན་པས་ཆོས་གོས་ཀྱི་མཐའ་མ་ཆག་པར་བཅུག་སྟེ། གཡས་པ་མི་འཇིགས་པའི་ཕྱག་རྒྱ་བཅས་ཏེ། [148b] [148b.1]དཀྱིལ་འཁོར་གྱི་ལྷ་རྣམས་གསལ་བར་བྱས་ལ། སྔོན་འཇམ་པའི་རྡོ་རྗེས་ལུང་བསྟན་པ་བཞིན་དུ་མགྲིན་གཅིག་ཏུ་ལུང་སྟོན་པར་བསམས་ལ་འདི་སྐད་བརྗོད་དོ། །འདི་ལྟར་ང་ཡིས་ལུང་བསྟན་ཏེ། །འཇམ་དཔལ་གཞོན་ནུ་དེ་བཞིན་གཤེགས། །དངོས་གྲུབ་མཆོག་ཏུ་བསྒྲུབ་པའི་ཕྱིར། ། [148b.2]སྲིད་པའི་ངན་འགྲོ་རྣམས་ལས་བཏོན། །མཉྫུ་ཤྲཱི་ན་མཿསརྦ་ཏ་ཐཱ་ག་ཏ་ཧྲི་སི་དྡྷི་ས་མ་ཡ་སྟྭཾ་ཞེས་བརྗོད་དེ། དུས་གསུམ་གྱི་རྒྱལ་བ་སྲས་དང་བཅས་པ་རྣམས་ཀྱིས་ལུང་སྟོན་པར་མཛད་དོ། །དེ་ནས་དབུགས་དབྱུང་བ་ནི་ཁམས་གསུམ་གྱི་བདག་པོར་གྱུར་པ་དང་། བདུད་དང་མུ་སྟེགས་ལ་སོགས་པ་ལས་ [148b.3]རྒྱལ་བ་དང་། མྱ་ངན་ལས་འདས་པའི་གྲོང་ཁྱེར་དུ་འཇུག་པ་སྟེ། འདི་ཉིད་ལས་ཐོབ་པར་གྱུར་ཅིག །ཐེ་ཚོམ་དང་ཡིད་གཉིས་ལ་སོགས་པ་མ་བྱེད་ཅིག །གཞན་ཡང་བླ་མ་དམ་པས་དབང་བསྐུར་བ་ཙམ་གྱིས་ཇི་ལྟར་བསམས་པ་ལྟར་སློབ་མ་རྣམས་ཀྱིས་གྲུབ་པར་འགྱུར་རོ་ཞེས་བརྗོད་དོ། །དེ་ནི་སློབ་མ་ [148b.4]གསང་བའི་དབང་བསྐུར་བ་སྟེ། དབང་རྣམས་རྫོགས་པས་རིམ་པར་སྦྱིན། །གསང་བའི་དབང་དང་ཞེས་གསུངས་པ་ལ་དེ་སྐད་ཅེས་བཤད་དོ། །དེ་ནས་ཤེས་རབ་ཡེ་ཤེས་ཀྱི་དབང་བསྐུར་བ་བསྟན་པའི་ཕྱིར། ངེས་པའི་དབང་རིམ་པ་བཞིན་དུ་བསྐུར་བར་བྱ་ཞེས་གསུངས་པའི་དོན་ནི་འདི་ཡིན་ཏེ། [148b.5]དེ་ལྟར་གསང་བའི་དབང་ཐོབ་པའི་སློབ་མ་དེས་ཀྱང་བླ་མ་ལ་འདི་སྐད་ཞུ་སྟེ། སྔོན་གྱི་སངས་རྒྱས་ཐམས་ཅད་ཀྱིས། །ཇི་ལྟར་མཁྱེན་ཅིང་ཐུགས་ཆུད་པ། །དེ་ལྟར་རྗེས་སུ་བདག་དད་ན། །དེ་རིང་བདག་ལ་དབང་བསྐུར་སྩོལ། །ཞེས་བརྗོད་དོ། །དེ་ནས་བླ་མ་དེས་ཤེས་རབ་དང་ཡེ་ཤེས་ཀྱི་དབང་ [148b.6]བསྐུར་བ་བརྩམ་སྟེ། དེ་ཡང་དང་ལ་ཤེས་རབ་ཀྱི་དབང་ནི་བུ་མོ་རིགས་ལྡན་མཚན་རྟགས་ཅན། བཅུ་གཉིས་བཅུ་དྲུག་བཅོ་བརྒྱད་ཉི་ཤུ་ལོན་པ་བླ་མ་ལ་ཕུལ་ལ་བསམ་གཏན་གྱི་དོན་དྲུག་དང་ལྡན་པར་བྱ་སྟེ། བླ་མ་དེས་ཤེས་རབ་མ་བྱིན་གྱིས་བརླབས་ཏེ་འདི་སྐད་ཅེས་བསྒོའོ། །སྔོན་གྱི་རྒྱལ་བ་ [148b.7]རྣམས་ཀྱིས་ཀྱང་། །ཤེས་རབ་འདི་ལ་བརྟེན་པར་འགྲུབ། །རིགས་ཀྱི་བུ་མཆོག་ཁྱོད་ཀྱིས་ཀྱང་། །ཤེས་རབ་སྤང་དུ་མི་རུང་སྟེ། །ཡེ་ཤེས་སྐྱེ་བའི་ཐབས་ཡིན་པས། །ཁྱོད་ཀྱིས་འདོད་ཆགས་མ་སྤང་ཞིག །ཅེས་བརྗོད་དོ། །དེ་ནས་བླ་མས་དྲི་བ་འདི་ཡང་གསུང་ངོ་། །བུ་ཚུར་ [149a] [149a.1]ཤོག་ཅིག་རྡོ་རྗེ་ཅན། །དྲི་ཆེན་དྲི་ཆུ་ཟ་ནུས་སམ། །རཀྟ་ག་པུར་ཐ་ནུས་སམ། །བུད་མེད་དད་པས་བསྟེན་ནུས་སམ། །པདྨར་འོ་བྱེད་མི་རྟོག་གམ། །སྣོད་ལྡན་སྨྲོས་ཤིག་ངང་ཚུལ་ཅན། །དེ་ནས་སློབ་མས་འདི་སྐད་བརྗོད། །ཤེས་རབ་དད་པས་བདག་བསྟེན་ཏོ། །དྲི་ [149a.2]ཆེན་དྲི་ཆུ་ལ་སོགས་བདུད་རྩི་ལྔ། །རྟག་ཏུ་དད་པས་སྟོན་པར་བགྱིད། །པདྨར་བདག་ནི་འོ་བགྱིད་དོ། །དེ་ནས་བླ་མ་དམ་པ་དེས། །ཤེས་རབ་མ་གཅེར་བུར་ཕྱུང་ལ། །ལུས་དྲི་ཞིམ་པོའི་ཆུས་བཀྲུས་ལ། མེ་ཏོག་གི་ཕྲེང་བས་མགོ་བཅིངས་ལ་འདི་སྐད་ཅེས་བསྒོའོ། །སྟོན་པའི་རང་ [149a.3]བཞིན་སྙིང་རྗེའི་བདག །ཁྱོད་ཀྱིས་སེམས་ཅན་དོན་རྣམས་གྱིས། །མཁའ་ཀློང་པདྨ་བསྟེན་པར་གྱིས། །བུ་འདི་བདེ་བ་བསྐྱེད་པར་གྱིས། །ཞེས་བསྐུལ་ལོ། །དེ་ནས་ཤེས་རབ་དམ་པ་དེས་ལག་པ་གཉིས་དྲིལ་བུ་བཟུང་ནས་པདྨ་ཁ་ཕྱེ་སྟེ་འདི་སྐད་བརྗོད་དོ། །རྨད་བྱུང་ང་ཡི་པདྨ་ལ། །བདེ་བ་ཐམས་ [149a.4]ཅད་འདི་ལ་རྙེད། །བདེ་བར་གཤེགས་པ་ཐམས་ཅད་ཀུན། །རྟག་ཏུ་འདི་དག་མི་འབྲལ་ལོ། །པདྨ་འདི་ནི་ཆོས་དབྱིངས་ཡིན། །སངས་རྒྱས་ཐམས་ཅད་འདི་ལས་བྱུང་། །སེམས་ཅན་ཐམས་ཅད་འདི་རུ་གྲོལ། །ནང་གི་རྩ་ཡི་འཁོར་ལོ་ལ། །པདྨ་ཞེས་སུ་རབ་ཏུ་གསུངས། །པདྨའི་ནང་གི་ནམ་ [149a.5]མཁའ་ལ། །འབྱུང་བ་ལྔ་པོ་རང་བཞིན་གནས། །ལྟེ་བ་ལ་ནི་གེ་སར་ཏེ། །པདྨ་བརྒྱད་ཀྱིས་རྣམ་པར་བརྒྱན། །ཟེ་འབྲུའི་དབུས་ནས་འབྱུང་བ་ཡིན། །དེ་ཉིད་བདུད་རྩི་དམ་པ་སྟེ། །སངས་རྒྱས་ཀུན་གྱི་སྙིང་པོའོ། །ཞེས་བརྗོད་དོ། །དེ་ནས་བླ་མས་སློབ་མའི་ལག་པ་གཡས་པ་དང་། ཤེས་ [149a.6]རབ་མའི་གཡོན་པ་འོག་ཏུ་བཞག་ནས་འདི་སྐད་བརྗོད་དོ། །ཤེས་རབ་དམ་པ་འདི་ཡིན་ཏེ། །ཁྱེད་ཀྱི་ཡེ་ཤེས་སྐྱེད་པར་བྱེད། །འདི་དང་ཁྱེད་ཉིད་མ་བྲལ་བར། །དད་པས་རྟག་ཏུ་རོལ་མོ་གྱིས། །ཞེས་བརྗོད་ལ། ཤེས་རབ་མའི་ལུས་ལ་དཀྱིལ་འཁོར་བཀོད་ལ་སློབ་མ་ལ་སྦྱིན་ནོ། ། [149a.7]སློབ་མ་ཡོལ་བ་ནང་དུ་ཤེས་རབ་མ་དང་འདུག་ནས་ཡེ་ཤེས་ཀྱི་དབང་ནོད་པར་བྱའོ། །དེ་ནས་ཤེས་རབ་མ་དང་སློབ་མས་གློ་གཡས་པ་ཕབ་ལ་ཉལ་ལོ། །དགའ་བའི་གཏམ་སྣ་ཚོགས་བྱའོ། །གནས་དགུ་རུ་ནི་སེན་མོ་གདབ། །གཡོན་པ་གླང་པོའི་སྣ་རྩེ་ཡིས། །པདྨ་བྱེའུ་མགོ་འདྲ་བ་ [149b] [149b.1]ལ། །ཚོད་ཟིན་བྱ་སྟེ་བྲུད་པར་བྱ། །ལྕེ་ཡིས་ཀྱང་ནི་རོལ་མོ་བྱའོ། །དེས་ནི་པདྨ་རྒྱས་པར་འགྱུར། །གཟོད་ཉི་མ་དང་ཟླ་བ་མཉམ་པར་བྱ་སྟེ། དལ་ནས་དལ་ནས་བསྐྱོད་པ་ལས། །འབྱུང་བ་བཞིའི་རྐྱེན་གྱིས་བདེ་བ་ཆེན་པོའི་དབུས་ན་བྱང་ཆུབ་སེམས་གནས་པ་ལ་ཡེ་ཤེས་ཀྱི་མེས་བཞུ་ [149b.2]ནས་འཁོར་ལོ་བཞི་ནས་རིམ་པར་འབབ་སྟེ། བོལླའི་རྩ་བར་ཕྱིན་པ་ནི་དགའ་བའོ། །དབུས་སུ་ཕྱིན་པ་ནི་མཆོག་དགའོ། །ནོར་བུའི་རྩེ་མོར་སླེབ་པ་ནི་ལྷན་ཅིག་སྐྱེས་པའི་དགའ་བའོ། །དེ་ཇི་ཙམ་གནས་ཀྱི་བར་དུ་བསྒོམས་པས་མི་རྟོག་པའི་ཡེ་ཤེས་སྐྱེ་སྟེ། དཔེར་ན་རུས་སྦལ་ལྟ་བུའོ། ། [149b.3]གལ་ཏེ་བསྡམས་པས་མ་ཐེམས་ན་འཇིག་རྟེན་པའི་གནས་སུ་གཤེགས་ཏེ་བྲལ་བའི་དགའ་བ་ཞེས་བྱའོ། །དོན་དང་བྲལ་བ་ནི་བྲལ་བའོ། །གོང་མ་མཚོན་པས་དགའ་བའོ། །བྱང་སེམས་དེ་ཡི་རང་བཞིན་ནི། །འཇམ་པའི་དབྱངས་ཀྱི་རང་བཞིན་པས། །དུང་དང་ཉ་ཕྱིས་དག་གིས་མིན། ། [149b.4]ལག་པས་ཀྱང་ནི་མི་བླང་ངོ་། །བདུད་རྩི་ལྕེ་ཡིས་བླང་བར་བྱའོ། །དེ་ཟོས་ཡེ་ཤེས་དབབ་མཆོག་ཐོབ། །དེ་ཡི་དོན་ལ་རྒྱུན་གོམས་པས། །འདི་ལྟར་སྣང་བ་ཐམས་ཅད་ཀུན། །སྐད་ཅིག་གཅིག་ལ་གཉིས་མེད་པའོ། །བརྗོད་པའི་ཐ་སྙད་ཀུན་དང་བྲལ། །ནམ་མཁའི་ལམ་ལ་རབ་གནས་པའི། །ཡེ་ཤེས་ [149b.5]སྣང་བ་ལམ་མེ་བ། །མཐར་ཕྱིན་གདམས་ངག་ཅེས་ཀྱང་བྱ། །དེ་ནས་དམ་པར་གྱུར་པ་དེ་ལ་ནི། །རྩ་བའི་ལྟུང་བ་བཅུ་བཞིར་བསྒྲག་པར་བྱའོ། །དེ་ནས་བཀྲ་ཤིས་གདོན་པའི་དོན་ནི་འཇམ་དཔལ་གྱི་སྐུ་གཟུགས་སྤྱི་བོའི་ཐོག་ཏུ་བཞག་ལ་འདི་སྐད་ཅེས་བརྗོད་པར་བྱའོ། །ཐབས་དང་ཤེས་རབ་ཡན་ [149b.6]ལག་འདུས་པའི་རྡོ་རྗེ་ལས་བྱུང་བའི། །བྱང་ཆུབ་སེམས་ཀྱི་འཇམ་དབྱངས་བྱང་ཆུབ་སེམས་དབང་བསྐུར། །རྒྱལ་མཆོག་སྲས་བཅས་རྣམས་ཀྱིས་ལེགས་གསུངས་བཀྲ་ཤིས་གང་། །དེས་ནི་ཁྱེད་ཀྱི་དབང་བསྐུར་མཆོག་ལ་བཀྲ་ཤིས་ཤོག། །དཔལ་ལྡན་རྡོ་རྗེ་སེམས་སོགས་དཀྱིལ་འཁོར་ [149b.7]ལ་འཇུག་ཅིང་། །སྲིད་པའི་སྙིང་པོར་རྣམ་རོལ་སྒེག་མོ་ལ་སོགས་པས། །བདེ་བྱེད་རབ་མཆོག་ལེགས་པར་གླུར་བླངས་བཀྲ་ཤིས་གང་། །དེས་ནི་ཁྱེད་ཀྱི་དབང་བསྐུར་མཆོག་ལ་བཀྲ་ཤིས་ཤོག །ཤིན་ཏུ་ཞི་བའི་མཛད་པ་ཕུལ་ཕྱུང་མ་ལུས་པས། །སེམས་ཅན་བདེ་གཤེགས་རྟག་མཛད་ [150a] [150a.1]བཅོམ་ལྡན་དབང་བསྐུར་ལ། དཔག་མེད་ལྷ་ཡི་མཆོག་གིས་ལེགས་གསུངས་བཀྲ་ཤིས་གང་། །དེས་ནི་ཁྱོད་ཀྱི་དབང་བསྐུར་མཆོག་ལ་བཀྲ་ཤིས་ཤོག །དཔལ་ལྡན་ཁམས་གསུམ་རྣམ་རྒྱལ་དཀྱིལ་འཁོར་རབ་མཆོག་ལ། །འཇིག་རྟེན་གསུམ་གྱི་རྒྱལ་མཆོག་ [150a.2]རྒྱལ་པོར་དབང་བསྐུར་བས། །ལྷ་ཡི་མཆོག་གིས་བཏུད་དེ་རབ་བཤད་བཀྲ་ཤིས་གང་། །དེས་ནི་ཁྱོད་ཀྱི་དབང་བསྐུར་མཆོག་ལ་བཀྲ་ཤིས་ཤོག །འགྲོ་བ་སྣ་ཚོགས་འདུལ་ཕྱིར་ཕྱག་ན་པདྨོ་ཡིས། །རྫོགས་སངས་རྒྱས་ཀྱི་རིན་ཆེན་བདུད་རྩིའི་ཆུས་དབང་བསྐུར། །པདྨའི་འདོད་ཆགས་རྣམ་ [150a.3]དག་ལེགས་གསུངས་བཀྲ་ཤིས་གང་། །དེས་ནི་ཁྱེད་ཀྱི་དབང་བསྐུར་མཆོག་ལ་བཀྲ་ཤིས་ཤོག །མཁའ་སྙིང་ནོར་བུ་རིན་ཆེན་འབྱོར་པས་ཉམས་དགའ་ཞིང་། །དོན་རྣམས་ཀུན་གྲུབ་བདེ་སྦྱིན་དབང་བསྐུར་ཆེན་པོ་ལ། །དགེ་བ་ཕུན་ཚོགས་མཛད་པས་ལེགས་གསུངས་བཀྲ་ཤིས་གང་། ། [150a.4]དེས་ནི་ཁྱེད་ལ་དབང་བསྐུར་མཆོག་ལ་བཀྲ་ཤིས་ཤོག །འཁོར་ལོས་སྒྱུར་དྲུག་དགེ་བའི་བཀྲ་ཤིས་གླུ་བླངས་པས། །བསོད་ནམས་རིན་ཆེན་དྲི་མེད་མི་མཉམ་གང་ཐོབ་པ། །དེས་ན་ཀུན་གསོན་འབྱོར་བའི་དབང་བསྐུར་ཆེན་པོ་ལ། །འཇམ་དཔལ་གྲགས་པས་འཇིག་རྟེན། [150a.5]རྣམ་པར་ལེགས་གྱུར་ཅིག །ཅེས་བརྗོད་དོ། །དེ་ནས་སྤྱོད་ལམ་བྱ་བ་དང་། བླ་མས་གཟེངས་བསྟོད་པ་དང་། བཀྲ་ཤིས་ཀྱིས་གཤེགས་སུ་གསོལ་བར་བྱ་བ་དང་། བླ་མ་ལ་ཡོན་དབུལ་བ་རྣམས་ནི་དཀྱུས་ཉིད་གསལ་ལོ། །བླ་མ་དམ་པ་སཱུ་ཪྻ་སིདྡྷ་ཤཱ་ནྟིཾ་གརྦྷ་ནི། དམ་པ་ཆོས་ཀྱི་མཛོད་དུ་ [150a.6]གྱུར་པ་ལ། །བདེ་བར་གཤེགས་པའི་ཚོགས་ཀྱི་སྤྱན་སྔ་རུ། །དོན་དམ་ཟབ་མོ་དབང་བསྐུར་ཞལ་གྱི་བདུད་རྩི་འཐུངས་པ་ཡིས། །བློ་གྲོས་བཟང་པོ་དྲན་པའི་ཡེ་ཤེས་ཀྱིས། །སྐྱེ་བོ་བློ་ངན་མུན་པ་བསལ་བའི་ཕྱིར། །དྲུག་སྟོང་ལ་སོགས་རྒྱུད་ཀྱི་དོན་བསྡུས་ནས། །ནོར་བུ་གླིང་བའི་སྒྲུབ་ [150a.7]ཐབས་དོན་དང་སྦྱར་ཏེ་བྲིས་པ་ཡིས། །བདག་གིས་བསོད་ནམས་རྒྱས་པ་ཐོབ་བསྡུས་པས། །གང་དེས་འགྲོ་ཀུན་སྡིག་ལས་རྒྱལ་གྱུར་ཞིང་། །འཇམ་དཔལ་ཆོས་ཀྱི་སྐུ་ཉིད་ཐོབ་པར་ཤོག །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྒྲུབ་ཐབས་གསང་བ་དང་ལྡན་པའི་ [150b] [150b.1]འགྲེལ་པ་ཡེ་ཤེས་གསལ་བ་ཞེས་བྱ་བ། རྒྱ་གར་གྱི་མཁན་པོ་སྨྲྀ་ཏི་ཛྙཱ་ན་ཀཱི་རྟིས་མཛད་ཅིང་དེ་ཉིད་ཀྱིས་བསྒྱུར་བ་རྫོགས་སོ།། {T2585}༄༅༅། །ཐིག་ག་དབ་པའི་རིམ་པ། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །མཚན་ཉིད་ལྡན་པའི་ཐིག་སྐུད་ཀྱིས། །ཡོངས་སུ་རྫོགས་པའི་ས་གཞི་ [150b.2]ལ། །ཚངས་ཐིག་ཟུར་ཐིག་ལོགས་ཐིག་རྣམས། །གཞན་དང་མཐུན་པར་གདབ་བྱས་ནས། །ཕྱི་དང་ནང་དུ་དབྱེ་བར་བྱ། །ཕྱི་ལ་དྲུག་དྲུག་བཅུ་གཉིས་ཏེ། །ནང་དུ་བརྒྱད་བརྒྱད་བཅུ་དྲུག་གདབ། །ཆ་ཆེན་ཉི་ཤུ་བརྒྱད་དུ་འགྱུར། །སོ་སོའི་ཆ་ནི་དབྱེ་བར་བྱ། །ནང་གི་བརྒྱད་པོ་གཉིས་པོ་ཡང་། [150b.3]རེ་རེའང་བཞི་བཞིར་བགོ་བྱ་ཞིང་། །ཕྱི་རོལ་དཀྱིལ་འཁོར་ཐིག་ལ་ནི། །དང་པོ་ཁྱམས་སུ་གཞག་པར་བྱ། །གཉིས་པ་གསུམ་པ་བཞི་པ་དང་། །ལྔ་པོ་རྣམས་ནི་བཞི་བཞིར་བགོ །དྲུག་པ་ལ་ནི་གཉིས་སུ་བྱ། །དྲུག་པོ་གཞན་ཡང་དེ་བཞིན་བགོ །འདི་ལ། །ཕྲེང་བ་རེ་ཡང་རེའུ་མིག་ [150b.4]ནི། །བརྒྱ་དང་ཆ་ཆུང་གཉིས་སུ་འགྱུར། །ཚངས་པའི་ཐིག་གི་ངོས་གཉིས་ལས། །གསུམ་པ་དེ་བཞིན་ལྔ་པ་དང་། །བཅུ་བདུན་པ་དང་ཉི་ཤུ་པ། །དེ་བཞིན་ཉི་ཤུ་རྩ་གསུམ་པ། །ཆ་ལྔར་ནང་དུ་བགོ་བར་བྱ། །ཕྱི་ཡི་གསུམ་པ་ལྔ་པ་རྣམས། །དེ་བཞིན་དུ་ནི་བགོ་བར་བྱ། །གཉིས་ [150b.5]པ་ལྔ་པ་བརྒྱད་པ་རྣམས། །ཆ་ཆུང་ལྔ་ལྔར་གདབ་པར་བྱ། །ཕྱི་སྒོ་སུམ་ཆས་ཆེ་བར་དབྱི། །སྒོ་ནི་འཁོར་ལོའི་བརྒྱད་ཆ་རུ། །ཡ་ཕུགས་བཅས་པ་དབུས་སུ་དབྱི། །རྟ་བབས་ཡ་ཕུབས་དག་ལ་ནི། །ཆ་གཅིག་དོར་བའི་ཆ་ཆེན་ཚད། །སྒྲོ་ཡི་མཚམས་དང་ཏྭ་ར་ཎ། །ཤིན་ཏུ་གཅིག་ [150b.6]ཉིད་མི་བྱའོ། །དེ་སྟེང་འཁོར་ལོ་རྫོགས་པར་བྱ། །ཚངས་ནས་ཆ་ཆུང་བརྒྱད་ལ་ནི། །འཁོར་ལོ་རྩིབས་བརྒྱད་ཐིག་ཏུ་གདབ། །ལྟེ་བ་ཆ་གསུམ་མུ་ཁྱུད་གཅིག །དེ་ནས་རྩིབས་བརྒྱད་ཆ་ཕྲན་བཞི། །མན་ངག་ཐིག་ལ་ཚོད་ཀྱིས་བསྐོར། །དེ་རྒྱབ་ཆ་ཆུང་གཅིག་ལ་ནི། །ནང་གི་མུ་ཁྱུད་ལེགས་པར་བྱ། ། [150b.7]ཆ་ཆུང་གཅིག་ལ་ལྟེ་བར་བྱ། །དེ་བརྟེན་ཆ་ཆུང་ལྔ་ལ་ནི། །རྩིབས་ནི་བཅུ་དྲུག་འཁོར་ལོ་བྱ། །དེ་རྒྱབ་ཆ་ཆུང་མུ་ཁྱུད་འགྱུར། །དེ་རྒྱབ་ནང་སྒོ་ཆ་ཆེན་བཞི། །དཀྱིལ་འཁོར་ཕྱི་རོལ་ཁྱམས་དག་ལ། །རྩིབས་བཅུ་དྲུག་ཏུ་གདབ་པར་བྱ། །དེ་རྗེས་ཆ་ཆེན་བཞི་པོ་ལ། །ཕྱི་ཡི་སྒོ་ནི་རྫོགས་པར་གཞག། ། [151a] [151a.1]མཚན་ཉིད་གོང་མ་བཞིན་དུ་དབྱེ། །ཕྱི་རོལ་རྡོ་རྗེ་ཕྲེང་གསལ་བ། །ཆ་ཆེན་གྱི་ནི་ཕྱེད་ཀྱི་ཚད། །འབར་བའི་ཕྲེང་བའང་དེ་ཡི་ཚད། །སྒྲུབ་ཐབས་གསང་བ་དང་ལྡན་པའི་ཐིག་གི་ཆོ་ག །པཎྜི་ཏ་སྨྲྀ་ཏི་ཛྙཱ་ན་ཀཱི་རྟིས་མཛད་པ་རྫོགས་སོ།། །། [151a.2]{T2586}༄༅༅། །རྒྱ་གར་སྐད་དུ། ནེེ་ཏྲོདྷ་ཊ་བི་དྷིཿ། བོད་སྐད་དུ། སྤྱན་དབྱེ་བའི་ཆོ་ག །ཡེ་ཤེས་སེམས་དཔའ་ལ་ཕྱག་འཚལ་ལོ། །མ་འོངས་རྣམས་ལ་ཕན་སླད་དུ། །ཟབ་ཅིང་རྒྱ་ཆེའི་མཚན་བསྟན་པའི། །སྐུ་གཟུགས་ལ་སོགས་རབ་གནས་པ། །རུང་བར་བྱ་ཕྱིར་བདག་གིས་ [151a.3]བཤད། །དཀྱིལ་འཁོར་དང་ནི་ཏིང་འཛིན་དང་། །ཕྱག་རྒྱ་སྔགས་དང་འདུག་སྟངས་དང་། །བཟླས་བརྗོད་སྦྱིན་སྲེག་མཆོད་པ་དང་། །ལས་ལ་སྦྱར་དང་སླར་བསྡུ་རྣམས། །སློབ་དཔོན་དེ་ཉིད་བཅུ་ཤེས་པས། །ཆོ་ག་རྣམས་ནི་བཤད་པར་བྱ། །ལྷ་ཁང་མཆོད་རྟེན་ལུགས་མ་དང་། །དམ་ཆོས་ [151a.4]གླེགས་བམ་རས་རིས་རྣམས། །ཟིན་ཅིང་ཐམས་ཅད་རྫོགས་པ་དང་། །བདེ་བའི་ཡོན་ཏན་ཀུན་བསྐྱེད་ཅིང་། །བསོད་ནམས་འཕེལ་བར་བྱ་བའི་ཕྱིར། །རབ་ཏུ་གནས་པར་བྱེད་པར་འོས། །སྐུ་གཟུགས་ལ་སོགས་ཟིན་ནས་ནི། །ཡུན་རིངས་གནས་ཀྱང་མ་མཆོད་ན། །ཇི་སྲིད་ [151a.5]མཆོད་གནས་མ་གྱུར་པས། །དེ་ལ་མི་ཤེས་སྐྱེ་བར་འགྱུར། །དེ་ལ་བསྙེན་པ་ལ་སོགས་པའི། །གཞུང་བཞིན་བྱ་བ་རྫོགས་བྱ་སྟེ། །རབ་ཏུ་གནས་པའི་རྒྱུད་དག་ལ། །འབྲས་ཆན་ལ་སོགས་ཀྱིས་སྦྱང་བྱ། །ཆུ་བདུན་གྱིས་ནི་བཀྲུ་བྱས་ཤིང་། །རྣམ་ལྔ་འདག་ཆལ་གྱིས་ཀྱང་ [151a.6]བཀྲུ། །དཱུཪྺས་ཀྱང་ནི་བྲུད་པར་བྱ། །དེ་ནས་གང་ཡིན་ལྷར་བསྐྱེད་དེ། །སྤྱན་དྲངས་བསྟིམས་ལ་མཆོད་པ་བྱ། །བཅུག་སྟེ་དབང་རྣམས་བསྐུར་བ་ནི། །རིག་པའི་དབང་ནི་བསྐུར་བྱ་སྟེ། །འཁོར་བ་མ་སྟོངས་བར་དག་ཏུ། །སེམས་ཅན་དོན་མཛོད་ཅེས་པ་བརྗོད། །ན་བཟའ་དྲི་ཞིམ་ [151a.7]རྒྱན་རྣམས་དབུལ། །མཆོད་པའི་བྱེ་བྲག་རྣམས་ཀྱིས་མཆོད། །ཐུར་མ་ཕྱག་རྒྱས་སྤྱན་ཡང་དབྱེ། །སྙན་འབྲུ་ཞལ་དབྱེ་དབུ་བཤད་ཅིང་། །ཕྱག་ཞབས་སེན་མོ་དྲེག་ཅིང་སྒུ་ཕྱིའོ། །མེ་ལོང་དབུལ་ཞིང་མཆོད་པ་ཀུན་གྱིས་མཆོད། །དེ་ནས་བཞུགས་སུ་གསོལ་བ་ནི། །རྫོགས་སངས་རྒྱས་དང་ [151b] [151b.1]ལྷ་རྣམས་དང་། །དེ་སྲས་ཚངས་ལ་སོགས་པ་ཀུན། །གང་ཞིག་ཆོ་གའི་བྱ་བ་ནི། །ནོངས་གྱུར་དེ་དག་བཟོད་མཛད་རིགས། །སྦྱིན་བདག་རྣམས་ལ་ཞི་བ་དང་། །བདེ་ལེགས་ཆེན་པོ་ཀུན་མཛད་དེ། །སངས་རྒྱས་ཡུལ་དུ་གཤེགས་སུ་གསོལ། །སླར་ཡང་འབྱོན་པར་མཛད་དུ་གསོལ། །གང་འདི་ [151b.2]སྐུ་གཟུགས་བསྐལ་པའམ། །བསྐལ་པ་བརྒྱ་ལས་ལྷག་གནས་ཤིང་། །ས་དང་ཆུ་དང་མེ་དང་ནི། །རླུང་ལས་ལྷ་རྣམས་ཀུན་གྱིས་བསྲུངས། །སློབ་དཔོན་སློབ་མར་བཅས་པ་དང་། །བུ་དང་ཚ་བོ་རྣམས་བསྲུངས་ཏེ། །རང་དགའ་ཡིད་བདེར་གྱུར་ནས་ནི། །རབ་གནས་བཟང་པོ་དག་ཏུ་བཞེད། ། [151b.3]དེ་ནས་དཀྱིལ་འཁོར་དག་གི་ལྷ། །གཤེགས་གསོལ་གཞུང་བཞིན་བྱ་བའོ། །བདག་གིས་ཆོ་ག་འདི་བྱས་པས། །འགྲོ་བ་ཀུན་གྱི་རྒྱུད་ཚིམ་ཤོག །རབ་ཏུ་གནས་པའི་ཆོ་ག་པཎྜ་ཊི་སྨྲ་ཏིས་བསྒྲིགས་ནས་སྒྲ་རང་འགྱུར་དུ་མཛད་པ་རྫོགས་སོ། ། {T2587}༄༅༅། །རྒྱ་གར་སྐད་དུ། [151b.4]ཨཱརྱ་མཉྫུ་ཤྲཱི་སཱ་དྷ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་སྒྲུབ་ཐབས་ཞེས་བྱ་བ། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །སྤྲོས་བྲལ་བདེ་བ་ཆེན་པོའི་དང་། །རྟོག་པའི་རླབས་དང་བྲལ་བ་ལས། །སེམས་ཅན་དོན་དུ་གཟུགས་སྐུར་སྣང་། །ཅིར་ཡང་སྣང་ [151b.5]ལ་ཕྱག་འཚལ་ལོ། །ཐུགས་རྗེ་ཆེ་ཞིང་དོན་མཛད་པ། །འགྲོ་བ་ཀུན་ལ་ཁྱབ་པའི་མགོན། །དེ་ཡི་བསྒྲུབ་ལ་དགའ་བ་ལ། །གཙོ་བོ་དད་པས་བཤད་པར་བྱ། །དབང་ཐོབ་དམ་ཚིག་གནས་པ་དང་། །གཏོང་ལ་དགའ་ཞིང་འཛིན་པ་མེད། །སྲོག་ཕྱིར་རྣལ་འབྱོར་ངང་དུ་བྱེད། །གསོང་ [151b.6]པོར་སྨྲ་ཞིང་རྩེ་དང་བྲལ། །འདུ་འཛི་སྤངས་ཤིང་གཅིག་པོ་དགའ། །ཟླ་བོ་མེད་ཅིང་དད་ལྡན་པས། །ཉམས་དགའ་བ་ཡི་གནས་དག་ཏུ། །བདེ་བའི་སྟན་ལ་གནས་པར་བྱ། །ལྷ་ཡི་ང་རྒྱལ་གནས་པ་ཡིས། །ས་གཞི་དྲ་བ་ར་བར་བསླབ། ཨོཾ་བཛྲ་ཡཀྵ་ཧཱུཾ་ཕཊ་ཅེས་བརྗོད་པས། [151b.7]རྒྱང་གྲགས་གཅིག་ཙམ་བགེགས་ཚར་གཅད། །དེ་ནས་ཤིན་ཏུ་བརྩེར་ལྡན་པས། །སངས་རྒྱས་ལ་སོགས་མདུན་བསམས་ལ། །ཕྱག་འཚལ་མཆོད་པས་སྡིག་པ་སྦྱང་། །ཡི་རང་སྐྱབས་འགྲོ་སེམས་བསྐྱེད་བྱ། །དགེ་བ་བསྔོ་བ་བསྟོད་པ་གུས་པར་བྱ། །མཆོག་སྦྱིན་རྡོ་རྗེ་མཆོག་ [152a] [152a.1]ཁྱོད་འདུད། །ཡང་དག་མཐའ་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །སངས་རྒྱས་རོལ་ལ་ [152a.2]ཕྱག་འཚལ་འདུད། །སངས་རྒྱས་འཛུམ་པ་ཁྱོད་ལ་འདུད། །ནམ་མཁའ་ལས་བྱུང་ཁྱོད་ལ་འདུད། །སངས་རྒྱས་བཞད་པ་ཁྱོད་ལ་འདུད། །སངས་རྒྱས་གསུང་ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །མེད་པ་ལས་བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་ [152a.3]འདུད། །ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །སྡོམ་པ་དག་ནི་གཟུང་བར་བགྱི། །སངས་རྒྱས་བྱང་ཆུབ་ [152a.4]སེམས་དཔའ་རྣམས། །ཇི་ཙམ་དུས་ནས་བཟུང་ནས་ནི། །མ་ལུས་བདག་ལ་དགོངས་སུ་གསོལ། །ནམ་ཞིག་བྱང་ཆུབ་སྙིང་པོ་ལ། །ཡོངས་སུ་གནས་པའི་བར་དག་ཏུ། །བདག་གིས་བྱང་ཆུབ་མཆོག་གི་སེམས། །མ་ལུས་པར་ནི་བསྐྱེད་པར་བགྱི། །དེ་ནས་སངས་རྒྱས་ལ་སོགས་རྣམས། ། [152a.5]མ་ལུས་བདག་གི་ཐུགས་ལ་བསྡུ། །ཐིམ་ཞུ་ཡེ་ཤེས་མེ་འབར་བས། །ཉོན་མོངས་ཕུང་པོ་བསྲེག་པར་བསམ། །སླར་གསོས་ཡེ་ཤེས་ལུས་སུ་བྱས། །བྱང་ཆུབ་ལྔ་བདག་བསྒོམ་པ་ནི། །ཡོངས་དག་མེ་ལོང་གསལ་བ་དཀྱིལ་འཁོར་ལ། །ཡུལ་དངོས་རིགས་ཀུན་མ་ལུས་སོ་སོར་སྣང་། ། [152a.6]ཐམས་ཅད་ཡོངས་དག་མེ་ལོང་ཡེ་ཤེས་ལ། །འདྲིས་པར་དེ་ལ་ཡང་དག་བལྟ་བར་བྱ། །སེམས་ཅན་རྣམས་ལ་སྙིང་རྗེ་བསྐྱེད། །མགོན་སྐྱབས་དཔུང་གཉེན་དང་བྲལ་བས། །སྡུག་བསྔལ་འཁོར་བ་རྒྱ་མཚོར་བྱིང་། །སེམས་ཅན་དོན་དུ་སྡུག་བསྔལ་བྲལ། །སྟོང་པ་མཉམ་པ་ཉིད་དུ་སྦྱར། །བདག་ [152a.7]སྟོང་སེམས་ཅན་དེ་འདྲ་ཡང་། །ཆོས་རྣམས་ཀུན་ཀྱང་རབ་ཏུ་ཤེས། །ཆོས་ལ་དམིགས་པའི་སྙིང་རྗེ་ཡང་། །བདག་མེད་རང་བཞིན་རིགས་པ་ལས། །མཉམ་ཉིད་ཡེ་ཤེས་བསྐྱེད་པར་བྱ། །དེ་ནས་གསང་སྔགས་བརྗོད་པ་ནི། །ཨ་ཀཱ་རོ་མུ་ཁཾ་སརྦ་དྷ་རྨྨཱ་ཎཱཾ་ཨཱ་དྱ་ནུ་ཏྭ་ནྣ་ཏྭཏཱ། སྔགས་དོན་ [152b] [152b.1]སྟོང་པར་བསྒོམས་ནས་ནི། །ལྷན་ཅིག་གཉིས་མེད་ཆོས་རབ་གཟུང་། །དེ་ཉིད་ཡུལ་དུ་བྱས་པ་ཡིས། །ཆོས་བདག་མེད་པར་བསྒོམ་པར་བྱ། །དམིགས་མེད་སྙིང་རྗེ་སོ་སོར་བརྟག །སྙིང་རྗེའི་རྗེས་འགྲོ་གཟུང་འཛིན་ཡོངས་དང་བྲལ། །ངོ་བོ་འོད་གསལ་ཡན་ལག་ཀུན་བྲལ་བ། །རང་བཞིན་ [152b.2]ཡོངས་དག་ཆོས་ཉིད་རྒྱུ་མཐུན་པས། །དངོས་བྲལ་དོན་སྟོང་ངང་ལས་དེ་གནས་པས། །ཆོས་དབྱིངས་ཡེ་ཤེས་བསྒོམ་པའོ། །དེ་ལྟར་སེམས་ཅན་དོན་བྱེད་མ་བྲལ་བའི། །རྣལ་འབྱོར་སྔོན་གྱི་སྨོན་ལམ་དབང་ཐོབ་པས། །སེམས་ཅན་ཀུན་གྱི་དབང་བསྒྱུར་བས། །སེམས་ཀྱི་དོན་ནི་རབ་རྫོགས་ཕྱིར། །ཁམས་ [152b.3]གསུམ་འབྱུང་གནས་ཁྱབ་པར་གྱིས། །དོན་དམ་ཀུན་རྫོབ་མྱ་ངན་འདས། །དེ་ཕྱིར་ནན་ཏན་ཡེ་ཤེས་བསྒོམ། །དེ་ལས་དངོས་པོ་གཟུགས་སུ་བྱུང་། །སྤྲུལ་བའི་ཚུལ་གྱིས་ནམ་མཁའ་ལ། །ཨ་ལས་ཟླ་བའི་གཟུགས་བསམ་པ། །དེ་འོག་པད་དཀར་པདྨ་སྟེ། །སྣ་ཚོགས་འདབ་བརྒྱད་མཛེས་པའོ། ། [152b.4]དེ་སྟེང་དྷཱིཿསེར་གུར་གུམ་མདོག །སྤྲོ་དང་བསྡུ་ལས་མཚན་མ་བསམ། །དེ་ལས་དྷཱིཿམཚན་འཕྲོ་འདུ་ལས། །སྐུ་གསེར་མདོག་ལས་ལྡེམ་བག་ཅན། །བདེ་གཤེགས་དབུ་རྒྱན་ཟུར་ཕུད་ལྡན། །རིན་ཆེན་རྣམ་བརྒྱན་གཞོན་ནུའི་ཚུལ། །ལོ་བརྒྱད་རྡོ་རྗེ་སྐྱིལ་ཀྲུང་བཞུགས། །ཕྱག་གཡས་རལ་གྲི་པུ་སྟེ་ [152b.5]གཡོན། །བཞིན་མཛེས་འཇའ་ཚོན་ལྟ་བུར་བསྒོམ། །གསལ་བས་ཐ་མ་ལ་ཕུང་པོ་སྤོང་། །ཐུགས་ཀར་ཟླ་སྟེང་དྷཱིཿདཀར་བསམ། །དེ་ལས་དང་པོའི་སངས་རྒྱས་ཏེ། །ཞལ་ལྔ་བྱིས་པའི་རྒྱན་གྱིས་བརྒྱན། །རིན་ཆེན་སྣ་ཚོགས་ན་བཟའ་ཅན། །ཟླ་དཀར་མདོག་ལས་སྐྱིལ་ཀྲུང་བཞུགས། ། [152b.6]ཕྱག་གཡས་ཤེས་རབ་རལ་གྲི་བསྣམས། །གཡོན་བཞི་ཤེས་རབ་པོ་ཏི་བསྣམས། །གསལ་བ་དག་ཏུ་ཤེས་པར་བྱ། །དེ་ཡི་ཐུགས་ལ་ཤེས་རབ་འཁོར་ལོ་སྟེ། །གསལ་བར་ཡི་གེ་ཨ་ལས་བསྐྱེད། །ལྟེ་དབུས་རྩིབས་དྲུག་མུ་ཁྱུད་བཞི། །ལྟེ་བར་ཡི་གེ་ཨ་དཀར་བསམ། །རྩིབས་ལ་ [152b.7]ཡི་གེ་སྔགས་དྲུག་དགོད། །ཨོཾ་བཛྲ་ཏཱི་ཀྵྛཱ་ཡ་ཏེ་ན་མཿ ཨོཾ་དྲུཿཁཙྪེ་དཱ་ཡ་ཏེ་ན་མཿ ཨོཾ་པྲཛྙཱ་ཛྙཱ་ན་མཱུ་རྟཱ་ཡ་ཏེ་ན་མཿ ཨོཾ་ཛྙཱ་ན་ཀཱ་ཡཱ་ཡ་ཏེ་ན་མཿ ཨོཾ་ཝཱ་གཱི་ཤྭ་རཱ་ཡ་ཏེ་ན་མཿ ཨོཾ་ཨ་ར་པ་ཙ་ནཱ་ཡ་ཏེ་ན་མཿ དམར་སྔོ་དཀར་དང་ལྗང་གུ་དང་། །སེར་དང་དཀར་ཏེ་རིམ་བཞིན་བསམ། །འཁོར་ལོ་ [153a] [153a.1]རྩིབས་ཀྱི་རིམ་བཞིན་ནོ། །མུ་ཁྱུད་དང་པོ་དག་ལ་ནི། །ཨོཾ་སརྦ་དྷརྨྨཱ་བྷཱ་བ་སྭ་བྷཱ་བ་བི་ཤུདྡྷེ་བཛྲ། ཨ་ཨཱ་ཨཾ་ཨཿམུ་ཁྱུད་གཉིས་པོ་དག་ལ་ནི། །ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿམུ་ཁྱུད་གསུམ་པོ་དག་ནི། །ཡེ་ཤེས་སེམས་དཔའ་སྐུ་ཡི་སྔགས། ། [153a.2]ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་ཝཱན་ཛྙཱ་ན་མཱུརྟི་བཱ་གཱི་ཤྭ་ར་མ་ཧཱ་བཱ་ཙ། སརྦ་དྷརྨྨ་ག་ག་ནཱ་མ་ལ་སུ་པ་རི་ཤུདྡྷ་དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿཕྱི་རོལ་མུ་ཁྱུད་ཐ་མ་ལ། །ཡི་གེ་ཀ་སོགས་ཧ་ཡི་མཐར། །ཐུབ་པའི་ཡི་གེ་རྣམ་བཀོད་པ། །འཁོར་ལོ་སྔགས་ཀྱི་རིམ་པའོ། །དེ་ནས་འཁོར་ [153a.3]ལོའི་ལྟེ་དབུས་ཀྱི། །ཨ་དཀར་ཡོངས་སུ་གྱུར་པ་ལས། །བཅོམ་ལྡན་ཡེ་ཤེས་སེམས་དཔའ་བསྒོམ། །ཞལ་དྲུག་སྟོན་ཀའི་ཟླ་ལྟར་དཀར། །ཨིནྡྲ་ནཱི་ལའི་གཙུག་ཕུད་མཛེས། །ཉི་མ་འཆར་ཀའི་འོད་ཀྱིས་མཛེས། །ཞི་བའི་ཚུལ་འཆད་རིན་ཆེན་བརྒྱན། །རྡོ་རྗེ་སྐྱིལ་ཀྲུང་བཞུགས་པ་སྟེ། །གཡས་ [153a.4]གཡོན་ཨུཏྤལ་སྔོན་པོ་བསྣམས། །སྟེང་ན་ཤེས་རབ་པོ་ཏི་བསྣམས། །མཛེས་པ་གསལ་བར་དམིགས་པའོ། །ཡེ་ཤེས་སེམས་དཔའི་ཐུགས་ཀ་རུ། །ཟླ་མཆོག་གསལ་བར་བསམ་པར་བྱ། །དེ་ཡི་ཐུགས་མཆོག་ངོ་བོ་སྟེ། །དེ་སྟེང་ཡི་གེ་རྣམས་ངོ་བོ། །ཨ་མཆོག་ཨ་དཀར་བསམ་པར་ [153a.5]བྱ། །དུས་གསུམ་སངས་རྒྱས་དེ་ལས་བྱུང་། །སངས་རྒྱས་རྣམས་ཀྱི་གསུང་ཡིན་ནོ། །དེ་ལྟར་འཁོར་ལོ་དྲུག་བརྩེགས་ལ། །ཨོཾ་ཨཿཧཱུཾ་གི་ཡི་གེ་མཆོག། །ཛཿཧཱུཾ་བཾ་ཧོཿདང་ལྡན་པས། །སྤྱན་དྲངས་མདུན་དུ་གསལ་བར་དམིགས། །མཆོད་པ་ལ་སོགས་དབུལ་བར་བྱ། །ཐམས་ཅད་དེ་ [153a.6]ཉིད་གསུམ་ལྡན་པས། །ཨེ་ཧཱ་བི་ར་ཧཱུཾ་པུ་ཥྤེ་སྭཱ་ཧཱ། དྷཱུ་པེ་སྭཱ་ཧཱ། གནྡྷེ་སྭཱ་ཧཱ། ཨཱ་ལོ་ཀེ་སྭཱ་ཧཱ། ནཻ་བི་བྱེ་སྭཱ་ཧཱ། བ་ལིཾ་ཁ་ཁ། ཁཱ་ཧི་ཁཱ་ཧི་སྭཱ་ཧཱ། སྥ་ར་ཎ་ཁཾ་སྭཱ་ཧཱ། ཡོན་ཆབ་མེ་ཏོག་བདུག་སྤོས་དང་། །དྲི་ཆབ་ལྷ་བཤོས་གཏོར་མ་དང་། །སྒྲ་ལ་སོགས་པ་རིམ་བཞིན་དབུལ། ། [153a.7]འདུད་ལ་སོགས་པས་བསྟོད་པར་བྱ། །ཛཿཧཱུཾ་བ་ཧོཿས་བསྟིམ་པའོ། །ཡང་ན་འོད་ཀྱིས་ལྷ་མོ་བཀུག་ལ་དབང་བསྐུར་བར་བྱ། །དེ་ནས་བཟླས་པ་བྱ་བ་སྟེ། །ཡི་གེ་སྦྲུལ་མཐའ་ལྡན་པས་ན། །ལྔ་པོ་ཡ་སྟེ་ན་མ་བོར། །ཡི་གེ་ཚེག་བཅད་སུམ་ཅུ་ལ། །མ་ཡེངས་གཏད་ལ་བཟླས་པ་གསལ། ། [153b] [153b.1]ངག་གི་དངོས་གྲུབ་དྲི་མ་བྲལ། །མཁའ་འགྲོ་རྣམས་ཀྱང་དེ་ལ་དགྱེས། །གྲངས་ནི་བརྒྱ་པ་དག་པར་བྱ། །ཤེས་རབ་འཁོར་ལོ་གོམས་པའོ། །དེ་ནས་མཚན་ནི་བརྗོད་པར་བྱ། །ཡི་གེ་ཨ་ལ་སེམས་གཏད་ལ། །ངག་གི་མཚན་ནི་གསལ་བརྗོད་པའོ། །དེ་ཡང་རང་བཞིན་མེད་ཤེས་བྱ། །ཤེས་ནས་ [153b.2]རྟོག་པ་རྣམས་དང་བྲལ། །འཇིག་རྟེན་པ་ཡི་ལྷ་རྣམས་དང་། །འཇིག་རྟེན་འདས་པའི་ལྷ་རྣམས་ཀུན། །མ་ལུས་ཐམས་ཅད་དགྱེས་ནས་སུ། །ཡོན་ཏན་ཐམས་ཅད་མཐོང་བར་འགྱུར། །དུས་གསུམ་དག་ཏུ་བརྗོད་པ་དང་། །ཡང་ན་དུས་དྲུག་དག་ཏུ་བརྗོད། །ཡང་ན་དུས་ཀྱི་ངེས་མེད་ [153b.3]བས། །ནུས་ཚད་དག་ཏུ་བརྗོད་པའོ། །མཚན་ནི་བརྗོད་པས་སྐྱོ་བ་ན། །ཤེས་རབ་འཁོར་ལོ་སྔགས་དྲུག་ལས། །སྔགས་དང་མཐུན་པའི་འོད་བྱུང་ནས། །ལུས་སྣང་ཐམས་ཅད་གསལ་བར་བྱས། །མི་ཤེས་རི་བོ་ཐམས་ཅད་བཅོམ། །ཕྱི་རོལ་དག་ཏུ་འཕྲོས་པ་ལས། །ནམ་མཁའི་ [153b.4]ཁམས་ཀུན་ཁྱབ་པར་གནས། །སངས་རྒྱས་ཞིང་ཁམས་གསལ་གྱུར་ནས། །ཆོས་སྐུ་ཡེ་ཤེས་ཐོབ་པའི་དོན། །བྱས་ནས་སླར་ནི་བཟླས་པ་ལས། །སྙིང་གར་ཟླ་སྟེངས་ཨ་ལ་ཐིམ། །བརྟན་པས་ཡང་དང་ཡང་དུ་བསྒོམ། །དེ་ལྟར་སྤྱོད་པའི་སེམས་དཔའ་ཡིས། །ཡེ་ཤེས་བསྒོམས་ན་སྤྲུལ་སྐུ་ [153b.5]དང་། །ཟླ་བའི་སྒོ་ནས་ལོངས་སྐུ་དང་། །ཨ་ཡི་སྒོ་ནས་ཆོས་སྐུ་དང་། །རིང་པོ་མི་ཐོགས་པར་འགྱུར་བ། །བརྟན་པས་ཡང་དང་ཡང་དུ་བསྒོམ། །དེ་ལྟར་སྤྱོད་པའི་སེམས་དཔའ་ཡིས། །འདུལ་བའི་དབང་གིས་སེམས་ཅན་ལ། །ཉེ་བར་བཟུང་བར་མངོན་སྣང་བའོ། །དེ་ནས་སྟོང་ཉིད་ལ་ [153b.6]གནས་བྱ། །ཨ་ཉིད་ཐིག་ལེ་བྱང་ཆུབ་སྟེ། །བྱང་སེམས་ཐམས་ཅད་དེ་ལ་འདུས། །བདེ་བ་ཐམས་ཅད་དེར་གནས་ན། །འཇའ་ཚོན་ལྟ་བུའི་ཐིག་ལེ་སྟེ། །ཤེས་པ་བྱིང་རྒོད་མེད་པ་ཡིས། །གསལ་བ་འབད་པས་དད་པར་བྱ། །སེམས་ཉིད་དེ་རང་ཡིན་ཞེ་ན། །ཆོས་ཉིད་ངང་ལ་གནས་ [153b.7]ཞེས་བྱ། །ཐིག་ལེ་ཇེ་ཕྲ་ཤེས་པ་ཕྲ། །རང་བཞིན་མེད་པས་གནས་པའོ། །སེམས་ཉིད་བཏང་སྙོམས་གསལ་བ་ལ། །གསལ་བ་མི་རྟོག་ཐོབ་པའོ། །དེ་ལ་བརྟེན་ནས་གསལ་བ་དེ། །སྣང་ལ་རང་བཞིན་མེད་པ་ཐོབ། །འབྲས་བུ་ཆོས་སུ་ཐོབ་པའོ། །དེ་ནས་སྐྱོ་བ་བྱུང་བ་ནི། ། [154a] [154a.1]ཨོཾ་ཨཱཿཧཱུཾ་མུཿགཤེགས་སུ་གསོལ། །ཐམས་ཅད་བསྡུས་ནས་ལྷ་ཉིད་གནས། །ངག་ཏུ་བཟླས་པ་ནུས་ཚད་བཟླས། །ཞི་ལ་གནས་ཤིང་སྙིང་རྗེ་བསྐྱེད། །སེམས་ཅན་དོན་ལ་དགའ་སེམས་བསྐྱེད། །གཏོར་མ་རྟག་ཏུ་སྦྱིན་པར་བྱ། །སྟན་ལ་གཅིག་པུ་འདུག་ནས་སུ། ། [154a.2]ལམ་ལྔ་ཉམས་སུ་མྱང་བར་བྱ། །ཚོགས་ལམ་བསྐྱེད་པའི་རིམ་པའོ། །སྦྱོར་ལམ་བཟླས་པར་བྱེད་པ་ན། །མཐོང་ལམ་མཚན་ཉིད་བརྗོད་པ་སྟེ། །བསྒོམ་ལམ་འཕྲོ་འདུ་དག་ལ་གནས། །མཐར་ཕྱིན་སྟོང་ཉིད་སེམས་དཔའོ། །དགེ་མས་བརྩམས་པའི་སྒྲུབ་ཐབས་ལ། །འགལ་འཁྲུལ་མཆིས་ [154a.3]ན་མཁས་བཟོད་མཛོད། །བརྩམས་པའི་དགེ་རྩ་ཡོད་སྲིད་ན། །སེམས་ཅན་མོས་དང་ཕྲད་པར་ཤོག །དགེ་བསྙེན་མ་སྙན་གྲགས་དགེ་མས་མཛད་པ། འཕགས་པ་འཇམ་དཔལ་གྱི་སྒྲུབ་པའི་ཐབས་རྫོགས་སོ། ། {T2588}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་རཏྣ་ནོ་བི་ཀ ། [154a.4]བོད་སྐད་དུ། འཕགས་པ་འཇམ་དཔལ་རིན་པོ་ཆེའི་ཆོ་ག །རྡོ་རྗེ་སེམས་དཔའ་ལ་ཕྱག་འཚལ་ལོ། །བདེན་པ་དང་ལྡན་འཛིན་བྲལ་བ། །འཇམ་དཔལ་ཡང་དག་ཀུན་མཁྱེན་པ། །དེ་བཞིན་ཉིད་ཀྱི་ངང་གནས་པ། །སྨྲ་བའི་སེང་གེ་ཕྱག་འཚལ་ལོ། །དེ་ལ་གུས་པས་འདུད་པ་ཡི། །དུས་ནི་ [154a.5]རྟག་ཏུ་བསྒོམ་པ་དང་། །མོས་པ་བྱེད་པའི་རྣལ་འབྱོར་པ། །དེ་ཡི་དོན་དུ་བཤད་པར་བྱ། །སྟོང་པ་ལ་དགའ་དབང་ཐོབ་པ། །དམ་ཚིག་ལྡན་ཞིང་བསྒོམ་པ་དགའ། །རྣལ་འབྱོར་སྲོག་གཏོང་དད་པ་ཆེ། །སེམས་ཅན་དོན་བྱེད་བྱས་ལ་དྲིན། །རྟག་ཏུ་མཚན་བརྗོད་བཟླས་ལ་བརྩོན། །དེ་ལྟར་ [154a.6]ཡོན་ཏན་བཅུ་ལྡན་པས། །ཡིད་དགའ་བ་ཡི་གནས་དག་ཏུ། །བདེ་བའི་སྟན་ལ་གནས་པར་བྱ། །ཐ་མ་ལ་ཡི་དམ་དྲན་པ་ལ། །སྙིང་གར་ཡི་གེ་མུཾ་སེར་དགོད། །ཁ་དོག་ལྔ་ཡི་འོད་འཕྲོས་ནས། །ཕྱོགས་བཅུའི་རྒྱལ་སྲས་བླ་མ་ནི། །སྤྱན་དྲངས་མདུན་དུ་བསམས་པ་ལ། །ཕྱག་ [154a.7]འཚལ་མཆོད་པ་སྡིག་པ་སྦྱང་། །ཡི་རང་སྐྱབས་འགྲོ་སེམས་བསྐྱེད་ལ། །དགེ་བསྔོ་འདུད་ལ་སོགས་པས་བསྟོད། །དེ་ནས་སྟོང་ཉིད་བསམ་པ་ནི། །ཨོཾ་ཨ་ཀཱ་རོ་མུ་ཁཾ་སརྦ་དྷ་རྨྨཱ་ཎཱཾ་ཨཱདྱ་ནུཏྤན་ན་ཏ་ཏྭཱ་སྭཱ་ཧཱ། སྔགས་དོན་དངོས་པོ་མེད་པ་ལ། །ཡུན་རིངས་ངང་ལ་བློ་གནས་པས། ། [154b] [154b.1]དེ་ཉིད་ལ་ནི་གནས་པར་བྱའོ། །དེ་ནས་ནམ་མཁའ་སྟོང་པ་ལ། །དངོས་པོ་ཐམས་ཅད་པཾ་དུ་གནས། །དེ་སྟེང་ཡི་གེ་སཾ་དཀར་ལས། །བྱང་ཆུབ་སེམས་དཔའ་སེང་གེ་གསལ། །དེ་སྟེང་ཨ་ལས་ཟླ་བར་གསལ། །གདན་སྟེང་ཡི་གེ་མུཾ་སེར་ལས། །ཨུཏྤལ་སྔོན་པོ་མཛེས་པར་བསྒོམ། ། [154b.2]དེ་ལས་འཕྲོ་འདུ་བྱ་བ་སྟེ། །སྨྲ་བའི་སེང་གེ་བསྒོམ་པར་བྱ། །སེར་པོ་གསེར་བཙོ་འདྲ་བ་ལ། །གཡས་ན་ཨུཏྤལ་པུ་སྟིས་མཚན། །གཡོན་པ་གཞན་ལ་སྦྱིན་པ་གཏོང་། །དགའ་བའི་སེམས་ཀྱིས་འཛུམ་དང་ལྡན། །ཐུགས་རྗེ་ཆེ་བས་ཉོན་མོངས་སྤོང་། །རིན་ཆེན་རྣམས་ཀྱིས་ [154b.3]ལུས་ལ་བརྒྱན། །དབུ་ལ་ཐོར་ཚུགས་རྣམས་ཀྱིས་མཛེས། །དབུ་སྐྲ་གཙུག་ཕུད་འཁྱིལ་པ་དང་། །སྟོད་གཡོགས་སེར་པོ་རྣམས་ཀྱིས་མཛེས། །སྨད་གཡོགས་དར་དཔྱངས་དཔྱངས་པའོ། །རྨུགས་པའི་རྣམ་པ་མ་ཡིན་པས། །གསལ་བ་རྟག་ཏུ་བསྒོམ་པའོ། །དེ་ནས་ [154b.4]སྤྱན་དྲངས་མཆོད་པའོ། །ཨོཾ་ཝཱ་གཱི་ཤྭ་ར་ཛཿཧཱུཾ་བཾ་ཧོཿཨོཾ་ཨཱཿཧཱུཾ་གིས་མཆོད་ཡོན་དབུལ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷཱུ་པེ་ཨཱ་ཧཱུཾཿ། ཨོཾ་བཛྲ་དཱི་པེ་ཨཱཿཧཱུཾ། ཨོཾ་བཛྲ་ནཻ་བི་ཧྱེ་ཨཱཿཧཱུཾ། བ་ལིཾ་ཏ་ཁ་ཁ། ཁཱ་ཧི་ཁཱ་ཧི་ཨཱཿཧཱུཾ། མཆོག་སྦྱིན་རྡོ་རྗེའི་ [154b.5]མཆོག་ཁྱོད་འདུད། །ཡང་དག་མཐར་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །སངས་རྒྱས་ [154b.6]རོལ་ལ་ཕྱག་འཚལ་འདུད། །སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་པ་ཁྱོད་ལ་འདུད། །སངས་རྒྱས་གསུང་ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །མེད་པ་ལས་བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་འདུད། ། [154b.7]ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །ཞེས་བྱ་བས་བསྟོད་དོ། །གཉིས་མེད་བདག་ [155a] [155a.1]ལ་བསྡུ་བའོ། །སྙིང་གར་པདྨའི་ཟླ་བ་ལ། །སྟེང་ན་ཡེ་ཤེས་སེམས་དཔའ་སྟེ། །ཚོན་གང་དང་འདྲ་གསལ་བར་བསྒོམ། །ཡི་གེ་ཨ་མཆོག་ཟླ་བ་ལ། །ཐུགས་ཀར་བསམ་པར་བྱ་བ་ཡིན། །ཡེ་ཤེས་སྔགས་ཕྲེང་བསྐོར་བར་བྱ། །ཨོཾ་སརྦ་དྷ་རྨྨཱ་བྷཱ་བ། [155a.2]སྭ་བྷཱ་བ་བི་ཤུདྡྷ། བཛྲ་ཙཀྵུ་ཨ་ཨཱ། ཨཾ་ཨཿཔྲ་ཀྲྀ་ཏི་པ་རི་ཤུདྡྷ་སརྦ་དྷརྨྨཱ་ཡ་དུ་ཏ། སརྦ་ཏ་ཐཱ་ག་ཏཱ་ཛྙཱ་ན་ཀཱ་ཡ་མཉྫུ་ཤྲཱི་པ་རི་ཤུདྡྷི་ཏཱ་མུ་པཱ་དཱ་ཡེ་ཏ། ཨ་ཨཱ། སརྦ་ཏ་ཐཱ་ག་ཏཱ་ཧྲཱྀ་ད་ཡ་ཧ་ར་ཧ་ར། ཨོཾ་ཧཱུཾ་ཧཱིཾཿབྷ་ག་ཝཱན་ཛྙཱ་ན་མཱུརྟི་བཱ་གཱི་ཤྭ་ར་མ་ཧཱ་ཝཱ་ཙ། སརྦ་དྷརྨྨ་ག་ག་ནཱ་མ་ [155a.3]ལ་སུ་པ་རི་ཤུདྡྷ་དྷརྨྨཱ་དྷཱ་ཏུ་ཛྙཱ་ན་གརྦྷ་ཨཱཿ གསང་བར་ཕྲེང་བ་སྔགས་ལ་གཏད། །བརྒྱ་རྩ་བརྒྱད་དུ་བཟླས་པར་བྱ། །དེ་ནས་མཚན་རྣམས་བརྗོད་པ་ལ། །ཡེ་ཤེས་སེམས་དཔའ་དག་ལ་ནི། །དམིགས་པ་བརྟན་པ་གཏད་ནས་སུ། །ཡོན་ཏན་དག་ཏུ་བརྗོད་པའོ། །དེ་ཡང་ [155a.4]གལ་ཏེ་མ་བརྟན་ན། །གཡེང་བར་གྱུར་ན་ནུས་པ་ཆུང་། །དེ་ལ་བརྟན་པར་གྱུར་པ་ན། །ཡེ་ཤེས་གཉིས་མེད་སྐྱེ་ཡང་སྲིད། །ཡོན་ཏན་དག་ཏུ་བརྗོད་པ་ཡང་། །ཐེག་པ་མཐའ་ཆོས་སྟོན་མཛད་པས། །ཐམས་ཅད་ངོ་བོ་ཡིན་ཤེས་ལས། །ཐམས་ཅད་དེ་དང་ལྡན་པར་སྟོན། ། [155a.5]དེ་ལྟར་བྱས་ཤིང་བསྟོད་གྱུར་ན། །ཆོས་སྐུ་མཐའ་དག་ཐོབ་པར་འགྱུར། །བསམ་པ་ཅི་འདོད་དེ་ལས་འབྱུང་། །ལྷ་སྲིན་སྡེ་བརྒྱད་དགའ་འགྱུར་ནས། །འདོད་པ་ཐམས་ཅད་འབྱུང་བའོ། །དེ་ནས་འབད་པས་མཚན་བརྗོད་འདོན། །སྐྱོ་བར་མི་འགྱུར་གུས་པར་བྱ། །སྐྱོ་བ་དག་ནི་བྱུང་པ་ན། ། [155a.6]རྣལ་འབྱོར་གཉིས་སུ་མེད་པར་བྱ། །ཨ་ལས་སྟོང་པ་ཙམ་པར་བྱ། །གསལ་བར་རྟོག་མེད་བསྒོམ་པར་བྱ། །དེ་ནས་ཨ་ནི་ཞུ་བ་ལས། །ཐིག་ལེ་དཀར་པོ་ཇེ་ཆུང་ལས། །ཡེ་ཤེས་སྟོང་པ་ཉིད་གསལ་བ། །བྱིང་རྒོད་མེད་པར་གསལ་བའོ། །ཡང་དང་ཡང་དུ་གཏད་ལ་བསྒོམ། ། [155a.7]སྣང་བ་རང་བཞིན་མེད་མཐོང་འགྱུར། །ཡང་ན་ཤེས་རབ་འཁོར་ལོ་སྟེ། །བཅུ་དྲུག་ཕྱེད་ཕྱེད་ཐིག་ལེ་ཅན། །བསམ་གཏན་བཞི་ཡི་རྩེ་མོ་ཅན། །ཡན་ལག་མེད་པའི་རྩིས་ལས་འདས། །ཞེས་གསུངས་པ་ལས། བཅུ་དྲུག་ཕྱེད་བརྒྱད་དེ་ཕྱེད་དེ། །བཞི་ནི་གནས་བཞིའི་འཁོར་ལོ་ [155b] [155b.1]ཡི། །ལྟེ་བ་ཤེས་རབ་འཁོར་ལོ་སྟེ། །བཅུ་གཉིས་རྩིབས་ཅན་འཁོར་ལོ་ལ། །སྔགས་ཀྱི་རྣམ་པར་དགོད་པ་ནི། །ཨ་ཨཱ་ཨཾ་ཨཱ་རིམ་པར་དགོད། །དེ་ནས་ཡང་དང་ཡང་དུ་དགོད། །དབུས་སུ་ཨ་མཆོག་བསམ་པར་བྱ། །དེ་ནས། སྙིང་གར་ཤེས་རབ་འཁོར་ལོ་ནི། །རྩིབས་ [155b.2]བཅུ་གཉིས་དང་ལྡན་པ་ལ། །ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨཾ་ཨཿ དབྱངས་ཡིག་བཅུ་གཉིས་གཡས་ན་བསྐོར་ནས་བཀོད་པར་བྱ། །ལྟེ་བ་ལ་ནི་ཨ་མཆོག་གནས། །མགྲིན་པར་ཤེས་རབ་འཁོར་ལོ་ནི། །བཅུ་གཉིས་རྩིབས་མཆན་གནས་པ་ལ། ། [155b.3]ལྟེ་བ་ཨ་བསྒོམ་རྩིབས་རྣམས་ལ། །ཨ་ར་པ་ཙ་ན། ཝཱ་གཱི་ཤྭ་ར། པྲཛྙཱ་ན་མར་རིམ་པས་དགོད་པར་བྱའོ། །དེ་ནས་སྤྱི་བོའི་འཁོར་ལོ་ལ། །བཅུ་གཉིས་རྩིབས་ལ་དགོད་པར་བྱ་བ་ནི། །སྐུའི་ཕྲེང་སྔགས་ཏེ་ལས་སྔགས་སོ། །ཨ་ཨཱ། སརྦ་ཏ་ཐཱ་ག་ཏ་ཧྲྀ་ད་ཡ་ཧ་ར་ཧ་ར་ཨོཾ་ [155b.4]ཧཱུཾ་ཧྲཱིཿ། བྷ་ག་ཝཱན་ཛྙཱ་ན་མཱུ་རྟྟི། ཝཱ་གཱི་ཤྭ་ར་མ་ཧཱ་ཝཱ་ཙ། སརྦ་དྷ་རྨ་ག་ག་ན། ཨ་མ་ལ་སུ་པ་རི་ཤུདྡྷུ། དྷ་རྨ་དྷཱ་ཏུ་ཛྙཱ་ན་གརྦྷ་ཨཱཿདབུས་སུ་ཨ་དཀར་ཆེན་པོ་གནས། །འོག་ནས་ཧཾ་དཀར་བཟློག་ནས་བསམ། །དབུས་ན་ཡི་གེ་ཡོད་པ་སྟེ། །བསམ་གཏན་བཞི་ཡི་རྩེ་ [155b.5]མོ་དེ་ལ་བྱ། །འཁོར་ལོ་ནང་སྟོང་འོད་ལྟར་འདུག །ཡི་གེ་རྡུལ་ཐིག་གང་ལྟར་བསམ། །དབུས་ཀྱི་ཐིག་ལེའི་རང་བཞིན་ཡིན། །དགའ་བ་དུ་མ་ཡོད་པས་བལྟ། །འཁོར་ལོ་བཞི་ལ་ཤེས་རབ་སྟེ། །ཐིག་ལེ་ཨ་ཝ་དྷཱུ་ཏཱི་ཐབས། །ནོར་བུའི་རྩེ་ནས་ཧཱུཾ་ལ་ཐུག །དཀར་བོ་འོད་དུ་འདུག་ [155b.6]པའོ། །དེ་ནས་བྱང་ཆུབ་རྒྱུ་བའོ། །ནོར་གནས་ཙཎྜ་ལཱི་གནས་པས། །དེ་ལ་གཏད་དེ་བསམ་པའོ། །འཁོར་ལོ་དེ་ལྟར་གནས་པ་ནི། །ཡན་ལག་བྱ་བ་དེ་ཡིན་ནོ། །མེད་པ་རྩིས་ལས་འདས་པ་སྟེ། །ཚད་མེད་བསམ་གཏན་བྱེད་པའོ། །དེ་ཡང་ཙཎྜ་ལཱི་ལ་གཏད་པས་སོ། ། [155b.7]མེ་འབར་དྲོད་ལས་བརྟེན་ནས་བྱུང་། །ཨ་ཝ་དྷཱུ་ཏཱེ་ལམ་ཞུགས་ནས། །ལྟེ་བར་མེ་འབར་ཐམས་ཅད་བསྲེགས། །དེ་ལྟར་འཁོར་ལོ་བཞི་ཀ་ཡི། །སྤྱི་བོའི་བདེ་བ་ངང་གིས་ཞུ། །འོ་མ་ལྟར་དཀར་ཐམས་ཅད་གང་། །ནོར་བུ་ཕེབས་ནས་ལྟེ་གནས་འདྲེན། །རླུང་དང་བསྟུན་ནས་ [156a] [156a.1]ཡང་ཡང་འདྲེན། །དེ་སྟེངས་ལུས་གསོ་བདེ་བ་འབྱུང་། །སྣང་བ་དགའ་བ་བ་སྐྱེ་བའོ། །བཅུ་དྲུག་ལོག་པོ་ལྟ་བུ་འབྱུང་། །ཐ་མལ་ཟག་མེད་ཡེ་ཤེས་སྐྱེ། །སྐྱོའམ་བསམ་གཏན་གཏོང་འདོད་ན། །སྤྱི་བོར་བསྡུ་བར་འདོད་པ་ཡི། །དགའ་བྲལ་སོང་ཡང་ཉེས་ [156a.2]མི་འགྱུར། །ཐ་མལ་ཐབས་ལས་མ་བྱུང་བས། །ཉེས་པ་ཆེན་པོ་འོང་མི་འགྱུར། །དེ་ཡང་རླུང་གི་བརྟན་ཐོབ་པ། །བྱ་བ་རུང་གི་གཞན་ནས་མིན། །ཐ་མལ་ཟག་མེད་ཐོབ་པ་ལ། །མེད་པའི་ཚིག་འདས་དེ་ཡིན་ནོ། །ཐ་མལ་གཤེགས་སུ་གསོལ་བ་དང་། །ལྷ་ཡི་ང་རྒྱལ་གནས་ [156a.3]པར་བྱ། །སྤྱོད་པ་དགེ་བ་གང་མོས་བྱ། །དད་ཡོད་ཁྲོ་མེད་སྦྱིན་པར་བྱ། །ལུས་ངག་ཡིད་ཀྱི་བྱ་བ་ཀུན། །བདེ་བ་ཆེ་ལ་ངང་གནས་བྱ། །མ་བརྗེད་པ་ཡི་བསམ་གཏན་བསྟེན། །དེ་ལྟར་བྱས་ན་བླ་མེད་འགྱུར། །གཞོན་ནུའི་སྐུ་འཆང་ཐོབ་པར་འགྱུར། །ཚེ་འདི་དག་ལ་བདེ་ [156a.4]བར་འགྱུར། །བདག་གིས་བསགས་པའི་ཆོ་ག་ཡིས། །འགལ་བ་མ་མཆིས་ལྷ་ལ་བཤགས། །དགེ་བའི་རྩ་བ་ཡིད་འོང་ཀུན། །ཐམས་ཅད་འཇམ་དཔལ་ཐོབ་པར་ཤོག །འཕགས་པ་འཇམ་དཔལ་རིན་པོ་ཆེའི་སྒྲུབ་ཐབས། དགེ་བསྙེན་མ་གྲགས་སྦྱིན་མས་མཛད་པ། [156a.5]སྨྲྀ་ཏི་ཛྙཱ་ན་ཀཱི་རྟིས་བསྒྱུར་བ་རྫོགས་སོ།། {T2589}༄༅༅། །རྒྱ་གར་སྐད་དུ། ག་ག་ནཱ་མ་ལ་སུ་པ་རི་ཤུདྡྷོ་དྷརྨྨ་དྷཱ་ཏུ་ཛྙཱ་ན་གརྦྷ་ནཱ་མ། བོད་སྐད་དུ། ནམ་མཁའ་དྲི་མ་མེད་པ་ཤིན་ཏུ་ཡོངས་སུ་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་སྙིང་པོ་ཞེས་བྱ་བ། དཀྱིལ་འཁོར་ [156a.6]ཐམས་ཅད་བསྡུས་པར་གྱུར་པ། བཅོམ་ལྡན་འདས་རྗེ་བཙུན་འཇམ་དཔལ་གྱི་དོན་ཐམས་ཅད་སྒྲུབ་པ་ནམ་མཁའ་དྲི་མ་མེད་པ་ཤིན་ཏུ་ཡོངས་སུ་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་སྙིང་པོ་ཞེས་བྱ་བའི་དཀྱིལ་འཁོར་ཆེན་པོའི་དོན་གྱི་དགོངས་བ་སྦས་པ་ཕྱིན་ཅི་མ་ལོག་པའི་མན་ངག་ལས་བརྒྱུད་པ་ [156a.7]བརྗོད་པར་བྱ་སྟེ། དེ་ནས་ཡང་དག་བཤད་བགྱི་བ། །དཀྱིལ་འཁོར་ཆེན་པོ་དམ་པ་སྟེ། །གྲུ་བཞིར་བགྱི་ཞིང་སྒོ་བཞི་དང་། །རྟ་བབས་བཞིས་ནི་རྣམ་པར་བརྒྱན། །ཐིག་བཞི་དང་ནི་ལྡན་གྱུར་པ། །དར་དང་མེ་ཏོག་ཕྲེང་བས་བརྒྱན། །གྲྭ་ཡི་ཕྱོགས་ནི་ཐམས་ཅད་དང་། །སྒོ་ [156b] [156b.1]ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་ཆེན་སྤྲས་བར་ནི། །དཀྱིལ་འཁོར་ཕྱི་རོལ་ཐིག་གདབ་པོ། །དེ་ཡི་རིམ་པའི་ནང་བཞུགས་ལ། །འཁོར་ལོ་འདྲ་བར་རྡོ་རྗེ་ཡི། །ཐིག་གིས་ཡོངས་སུ་བསྐོར་བར་བྱ། །ཀ་བ་བརྒྱད་ཀྱིས་མཛེས་བགྱིས་པར། །རྡོ་རྗེ་ཀ་བའི་ནང་ལོགས་སུ། ། [156b.2]ཟླ་བའི་དཀྱིལ་འཁོར་ལྔས་བརྒྱན་ལ། །དབུས་ཀྱི་དཀྱིལ་འཁོར་དབུས་སུ་ནི། སྣ་ཚོགས་པདྨ་ཡིད་འོང་བ། །འདབ་མ་བརྒྱད་པ་གེ་སར་བཅས། །དག་པ་ཐམས་ཅད་རབ་ཏུ་གནས། །དེ་ཡི་ལྟེ་བའི་དབུས་སུ་ནི། །འོད་བཟང་སྟོན་ཀའི་ཟླ་བའི་འོད། །ཉི་མ་འཆར་ཀའི་དཀྱིལ་ [156b.3]འཁོར་འདྲ། །སེན་མོའི་འོད་ནི་ཤས་ཆེར་དམར། །ཆགས་བྲལ་ལ་སོགས་ཆགས་པ་ཆེ། །ཁ་དོག་སྣ་ཚོགས་འབར་བའི་འོད། །སྐྲ་མཆོག་ཆེན་པོ་མཐོན་ཀའི་རྩེ། །སངས་རྒྱས་རིན་ཆེན་ཅོད་པན་ལྡན། །ཞལ་བཞི་པ་ལ་ཕྱག་བརྒྱད་པ། །སྒེག་པ་ལ་སོགས་ཉམས་དང་ལྡན། ། [156b.4]སྣ་ཚོགས་ན་བཟའ་ཡང་དག་བསྣམས། །བྱིས་པའི་རྒྱན་གྱིས་ཡང་དག་སྤུང་། །མཚན་ནི་སུམ་ཅུ་རྩ་གཉིས་དང་། །དཔེ་བྱད་བརྒྱད་ཅུས་ཡང་དག་བརྒྱན། །ཆོས་ཀྱི་འཁོར་ལོའི་ཕྱག་རྒྱ་ཆེས། །ཕྱག་གཉིས་དག་ནི་རྣམ་པར་བརྒྱན། །རལ་གྲི་མདའ་དང་རྡོ་རྗེ་ཡིས། ། [156b.5]གཡས་པའི་ཕྱག་མཆོག་རྣམ་པར་མཛེས། །ཤེས་རབ་ཕ་རོལ་ཕྱིན་དང་གཞུ། །རྡོ་རྗེ་དྲིལ་མཆོག་གཡོན་པ་ན། །དྲི་མེད་དཔེ་བྲལ་བསམ་མི་ཁྱབ། །ཤེས་རབ་ཡེ་ཤེས་དྲི་མ་མེད། །མགོན་པོ་སངས་རྒྱས་ཀུན་གྱི་དངོས། །དཀྱིལ་འཁོར་མདུན་གྱི་གཙོ་གྱུར་ལ། ། [156b.6]རྫོགས་སངས་རྡོ་རྗེའི་སྐྱིལ་ཀྲུང་བཅས། །འཇམ་པའི་དབྱངས་ནི་ངེས་པར་དགོད། །པདྨའི་འདབ་མ་ཐམས་ཅད་ལ། །སེང་གེའི་གདན་གྱི་སྟེངས་བཞུགས་ཤིང་། །ཐམས་ཅད་རིན་ཆེན་བདུན་བསྐོར་བར། །འཁོར་ལོ་ཅན་ནི་བརྒྱད་བྲིའོ། །གཙུག་ཏོར་ཆེན་པོ་ཡི་གེ་བདག །ཤར་གྱི་འདབ་མར་ཡང་དག་ [156b.7]བྲི། །གཙུག་ཏོར་གདུགས་ནི་དཀར་པོ་དག །ནུབ་ཀྱི་འདབ་མར་དགོད་པར་བྱ། །གཟི་བརྗིད་ཕུང་པོ་ལྷོ་ཕྱོགས་སུ། །གཙུག་ཏོར་རྣམ་རྒྱལ་བྱང་ཕྱོགས་སུ། །རྣམ་པར་འཐོར་བ་དབང་ལྡན་ཕྱོགས། །མེ་ཡི་ཕྱོགས་སུ་གྱེན་འབྱུང་དགོད། །གྱེན་འབྱུང་ཆེན་པོ་བདེན་བྲལ་ཕྱོགས། །རྒྱལ་ [157a] [157a.1]བ་རླུང་གི་ཕྱོགས་སུ་དགོད། །སྔགས་རྣམས་ཀུན་ལའང་སྒྲུབ་པ་པོ། །འཁོར་ལོ་ཅན་ནི་དེ་དག་བྲི། །རྡོ་རྗེ་ཤུགས་ཀྱིས་སོང་ནས་སུ། །དཀྱིལ་འཁོར་བཞི་པོ་དག་ཏུ་ནི། །མི་བསྐྱོད་པ་ལ་སོགས་པ་བཞི། །སངས་རྒྱས་ཐམས་ཅད་དགོད་པར་བྱ། །རྡོ་རྗེ་སེམས་དཔའ་ལ་སོགས་ [157a.2]པའང་། །སྣ་ཚོགས་རྒྱན་དང་གོས་འཆང་བ། །དབང་ལྡན་ཕྱོགས་ནས་བརྩམས་ནས་ནི། །གོ་རིམས་ཇི་བཞིན་བྲི་བར་བྱ། །དེ་ཉིད་ཀྱི་ནི་མཚམས་ཀྱི་ཆར། །སྤྱན་དང་དེ་བཞིན་མཱ་མ་ཀཱི། །གོས་དཀར་དེ་བཞིན་སྒྲོལ་མ་ནི། །རབ་ཏུ་འབད་དེ་བྲི་བར་བྱ། །སྒོ་རྣམས་སུ་ཡང་སྒོ་སྲུང་ནི། །རང་གི་མཚན་མས་ཕྱག་བརྒྱན་པ། །རྡོ་ [157a.3]རྗེ་སློབ་དཔོན་བློ་ལྡན་པས། །རབ་ཏུ་འབད་དེ་བྲི་བར་བྱ། །རྡོ་རྗེ་ཤུགས་ཀྱིས་བྱུང་ནས་ནི། །དཀྱིལ་འཁོར་མཆོག་ནི་གཉིས་པ་རུ། །ཟུར་བཞི་པ་ལ་སྒོ་བཞི་པ། །སྒོ་སྲུང་རྣམས་དང་ཡང་དག་ལྡན། །དག་པའི་གཟུགས་ཀྱི་དཀྱིལ་འཁོར་དུ། །དེར་ནི་ཆོ་ག་བཞིན་བྲི་བྱ། །ཤར་ཕྱོགས་སུ་ནི་ས་རྣམས་བྲི། །དེ་ [157a.4]བཞིན་ལྷོ་ནི་རབ་འབར་བའི། །ཕ་རོལ་ཕྱིན་པ་ཐམས་ཅད་བྲི། །ནུབ་ཏུ་དབང་རྣམས་བཅུ་པོ་སྟེ། །བྱང་དུ་གཟུངས་ནི་ཐམས་ཅད་བྲི། །དེ་བཞིན་མཚམས་སུ་སྒེག་མོ་སོགས། །དངོས་གྲུབ་བདེ་བ་ཀུན་སོགས་པ། །གསང་སྔགས་དོན་དང་ལྡན་པར་བྲི། །རྡོ་རྗེ་ཤུགས་ཀྱིས་བྱུང་ནས་སུ། །དཀྱིལ་འཁོར་ [157a.5]དམ་པ་གསུམ་པར་ནི། །བསྐལ་བ་བཟང་པོ་ཐམས་ཅད་དང་། །དེ་བཞིན་སྒོ་སྲུང་རྣམས་ཀྱང་བྲི། །རྡོ་རྗེ་མེ་ཏོག་ལ་སོགས་པའང་། །གོ་རིམས་ཇི་བཞིན་བྲི་བར་བྱ། །དེ་ཡི་ཕོ་བྲང་ཕྱི་རོལ་བྲི། །ཕྱི་རོལ་རྡོ་རྗེ་རིགས་ཀྱི་གནས། །ཟླུམ་ཞིང་ཀུན་དུ་བཟང་བ་དང་། །སྒོ་བཞི་ཤིན་ཏུ་མཛེས་པར་ཡང་། །དེར་ནི་ [157a.6]ཚངས་པ་ལ་སོགས་པ། །ཆུང་མ་ལ་སོགས་ཚོགས་ཀྱིས་བརྒྱན། །རྒྱན་དང་རང་གི་མཚན་མར་ལྡན། །ཀུན་དུ་རིམ་བཞིན་ལེགས་པར་བྲི། །ཕྱི་སྒོའི་ཤར་གྱི་ཆ་ལ་ནི། །གཤིན་རྗེ་གཤེད་པོའི་ཕྱག་རྒྱ་ཆེ། །ཐམས་ཅད་བསྲུངས་ལ་རབ་བརྩོན་པ། །རྣམ་པ་ཀུན་དུ་ལེགས་པར་གཞག །གཡོན་ [157a.7]བརྐྱང་བས་ནི་ལེགས་བཞུགས་ཤིང་། །ཕྱག་གཡས་དབྱུག་པ་འཕྱར་མཛད་ལ། །ཕྱག་གཡོན་ཐུགས་ཀར་སྡིགས་མཛུབ་བསྒྲེང་། །རབ་ཏུ་དྲག་པོར་བྲི་བར་བྱ། །གཞན་གྱིས་མི་ཐུབ་ཁྲོ་བོ་ཆེ། །ཕྱག་རྒྱ་ཆེན་པོ་ལྷོ་ཕྱོགས་སུ། །ཁྲོ་བོ་ཆེན་པོ་རྟ་མགྲིན་གྱི། །ཕྱག་རྒྱ་ཆེན་པོ་ནུབ་ཕྱོགས་སུ། །རྡོ་ [157b] [157b.1]རྗེ་འཇིགས་བྱེད་སྤྱན་གྱིས་ནི། །ཕྱག་རྒྱ་ཆེན་པོ་བྱང་ཕྱོགས་སུ། །ཕྱི་ཡི་དཀྱིལ་འཁོར་ཕྱི་རོལ་དུ། །བསྲུང་བའི་ཕྱིར་ནི་ཐམས་ཅད་དགོད། །དེ་ཡི་ཕྱི་རོལ་ཁོར་ཡུག་དང་། །ཁོར་ཡུག་ཆེན་པོ་དེ་བཞིན་བྲི། །བློ་ལྡན་ཡང་དག་ཀུན་རྫོགས་པར། །སྔགས་ཞེས་པས་ནི་ལེགས་པར་བྲི། །ད་ནི་སྐུ་མདོག་ལ་ [157b.2]སོགས་པའི་ངེས་པ་བཤད་པར་བྱ་སྟེ། །བཅོམ་ལྡན་འདས་འཇམ་པའི་དབྱངས་ནི་ཟླ་བ་ཉ་བའི་མདངས་ཅན་གྱི་སྐུ་ལ། རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེའི་ཕྲེང་བ་དང་ལྡན་པའི་ཅོད་པན་གྱི་སྟེང་དུ། སངས་རྒྱས་ལྔའི་རིན་པོ་ཆེའི་རྩེ་བྲན་ཅན་དུ་བྱས་ཏེ་ལྷག་མ་ནི་གསལ་བས་ [157b.3]གོ་བར་ཟད་དོ། །འཁོར་ལོས་སྒྱུར་བ་བརྒྱད་ནི་ཀུན་ཀྱང་གསེར་གྱི་མདོག་ཅན། །རྡོ་རྗེའི་སྐྱིལ་མོ་ཀྲུང་གིས་བཞུགས་པ། རིན་པོ་ཆེའི་དབུ་རྒྱན་ཅན། ཕྱག་གཡས་ན་འཁོར་ལོ་བསྟོད་དེ་བསྣམས་པ། ཕྱག་གཡོན་གྱིས་གདན་ལ་མཉེས་པས་བརྟེན་པར་མཛད་པའོ། །ཞེ་སྡང་ཆེན་པོ་བཅོམ་ལྡན་འདས་མི་ [157b.4]བསྐྱོད་པ་ནི། །ཨུཏྤལ་སྔོན་པོའི་མདོག་ཅན་ཞལ་བཞི་པ། ཕྱག་བརྒྱད་པ་རྡོ་རྗེའི་སྐྱིལ་མོ་ཀྲུང་གིས་གླང་པོའི་གདན་ལ་བཞུགས་པ། རིན་པོ་ཆེའི་དབུ་རྒྱན་ཅན། ཞལ་དང་པོ་ཁྲོ་བོ་སྒེག་པ། ཞལ་གཡས་པ་གདངས་ཤིང་དྲག་པོ། ཞལ་གཡོན་པ་ཚེམས་ཀྱི་སྒྲོས་གནོན་པ། ཞལ་རྒྱབ་མ་མཆོག་ཏུ་ [157b.5]གདུག་པ་ཐམས་ཅད་སྐྲག་པར་མཛད་པ། ཕྱག་གཡས་པ་རྣམས་ན་རལ་གྲི་དང་། རྡོ་རྗེ་དང་། མདའ་དང་། ལྕགས་ཀྱུ་བསྣམས་པ། ཕྱག་གཡོན་རྣམས་ནི་སྡིགས་མཛུབ་བསྒྲེང་བ་དང་། དྲིལ་བུ་དང་། གཞུ་དང་ཞགས་པ་བསྣམས་པའོ། །ཆགས་པ་ཆེན་པོ་བཅོམ་ལྡན་འདས་རིན་ཆེན་འབྱུང་ལྡན་ནི་གསེར་གྱི་མདོག་ཅན་རིན་པོ་ [157b.6]ཆེའི་དབུ་རྒྱན་མངའ་བ། ཞལ་སེར་པོ་དང་། ནག་པོ་དང་། དཀར་པོ་དང་། དམར་པོ་དང་ལྡན་པ་ཕྱག་བརྒྱད་པ། རྡོ་རྗེའི་སྐྱིལ་མོ་ཀྲུང་གིས་རྟའི་གདན་ལ་བཞུགས་པ། ཕྱག་གཡས་རྣམས་ན་རྡོ་རྗེ་དང་། རལ་གྲི་དང་། མདའ་དང་། ལྕགས་ཀྱུ་བསྣམས་པ། ཕྱག་གཡོན་རྣམས་ན་ཡིད་བཞིན་གྱི་ནོར་བུའི་རྒྱལ་མཚན་ [157b.7]དང་། དྲིལ་བུ་དང་། གཞུ་དང་ཞགས་པ་བསྣམས་པའོ། །འདོད་ཆགས་ཆེན་པོ་བཅོམ་ལྡན་འདས་འོད་དཔག་ཏུ་མེད་པ་ནི་སྐུ་མདོག་དམར་པོ་རིན་པོ་ཆེའི་དབུ་རྒྱན་ཅན། ཞལ་བཞི་པ། ཕྱག་བརྒྱད་པ། རྡོ་རྗེའི་སྐྱིལ་མོ་ཀྲུང་གིས་རྨ་བྱའི་གདན་ལ་བཞུགས་པ། ཞལ་སྒེག་པ་ལ་སོགས་པ་དང་ལྡན་པ་དམར་པོ་དང་ནག་པོ་དང་། [158a] [158a.1]དཀར་པོ་དང་། སེར་པོ་མངའ་བ། ཕྱག་གཡས་རྣམས་ནི་རྡོ་རྗེ་དང་། མདའ་དང་། རལ་གྲི་དང་། ལྕགས་ཀྱུ་བསྣམས་པ། ཕྱག་གཡོན་ན་པདྨ་དང་། གཞུ་དང་། ཞགས་པ་དང་། དྲིལ་བུ་བསྣམས་པའོ། །ཁྲོ་བོ་ཆེན་པོ་བཅོམ་ལྡན་འདས་དོན་ཡོད་གྲུབ་པ་ནི་སྐུ་མདོག་ནག་པོ་རིན་པོ་ཆེའི་དབུ་ [158a.2]རྒྱན་ཅན། ཞལ་བཞི་པ། ཕྱག་བརྒྱད་པ། རྡོ་རྗེའི་སྐྱིལ་མོ་ཀྲུང་གིས་ནམ་མཁའ་ལྡིང་གི་ཁྲི་ལ་བཞུགས་པ། ཞལ་དང་པོ་མཆེ་བ་གཙིགས་པ། ཁ་དོག་ནག་པོ་གཡས་པ་ཞི་བ། ཁ་དོག་དཀར་པོ་རྒྱབ་སྒེག་པ། ཁ་དོག་དམར་པོ། །གཡོན་པ་ཞི་བའི་ཚུལ་ཅན་མདོག་དཀར་པོ། ཕྱག་གཡས་པ་རྣམས་རལ་ [158a.3]གྲི་དང་རྡོ་རྗེ་དང་། །མདའ་དང་ལྕགས་ཀྱུ་བསྣམས་པ། ཕྱག་གཡོན་རྣམས་ན་དྲིལ་བུ་དང་། །གཞུ་དང་སྡིགས་མཛུབ་བསྒྲེང་བ་དང་། ཞགས་པ་བསྣམས་པའོ། །དེ་བཞིན་གཤེགས་པ་དེ་དག་ཐམས་ཅད་ཀྱང་ཉི་མའི་འོད་མངའ་བ། རང་གི་གདན་གྱི་སྟེང་དུ་ཉི་མའི་དཀྱིལ་འཁོར་ལ་བཞུགས་པར་བྱའོ། །རྡོ་རྗེ་སེམས་ [158a.4]དཔའ་ལ་སོགས་པའང་སྣ་ཚོགས་རྒྱན་དང་གོས་འཆང་བ། དབང་ལྡན་ཕྱོགས་ནས་བརྩམས་ནས་ནི། གོ་རིམས་ཇི་བཞིན་བྲི་བར་བྱ། ཞེས་བྱ་བ་ལ། དེ་བཞིན་གཤེགས་པའི་དཀྱིལ་འཁོར་དེ་ཉིད་དུ། བཅོམ་ལྡན་འདས་མི་བསྐྱོད་པའི་དཀྱིལ་འཁོར་ལ་དབང་ལྡན་གྱི་ཕྱོགས་སུ་རྡོ་རྗེ་སེམས་དཔའ་སྐུ་མདོག་དཀར་པོ། ཕྱག་ [158a.5]གཡས་ཀྱིས་རང་གི་ཐུགས་ཀར་རྡོ་རྗེ་བསྟོད་པའི་ཚུལ་གྱིས་བསྣམས་པ། གཡོན་བསྙེམས་པས་དྲིལ་བུ་བསྣམས་པའོ། །པདྨ་དང་ཟླ་བའི་དཀྱིལ་འཁོར་གྱི་སྟེང་ན་རྡོ་རྗེའི་སྐྱིལ་མོ་ཀྲུང་གིས་བཞུགས་པ། རྡོ་རྗེ་སེམས་དཔའི་གདན་དང་། སྐྱིལ་མོ་ཀྲུང་དང་། དབུ་རྒྱན་གྱི་ངེས་པ་ནི་རྡོ་རྗེ་རྒྱལ་པོ་ལ་སོགས་པ་ [158a.6]དང་། ཐུན་མོང་ཡིན་ལ་ཁྱད་པར་རྣམས་ནི་བྲི་བར་བྱ་སྟེ། རྡོ་རྗེ་རྒྱལ་པོ་སྐུ་མདོག་སེར་པོ་རྡོ་རྗེ་དང་ལྕགས་ཀྱུ་འདྲེན་ཞིང་བཞུགས་པའོ། །རྡོ་རྗེ་ཆགས་པ་སྐུ་མདོག་དམར་པོ་མདའ་དང་གཞུ་བསྣམས་པའོ། །རྡོ་རྗེ་ལེགས་པ་མརྒད་ཀྱི་མདོག་ཅན་ཕྱག་གཉིས་ཀྱིས་ལེགས་སོ་ཞེས་བྱ་བ་སྩོལ་བའོ། །བཅོམ་ལྡན་འདས་རིན་ [158a.7]ཆེན་འབྱུང་ལྡན་གྱི་དཀྱིལ་འཁོར་དུ། རྡོ་རྗེ་རིན་ཆེན་སྐུ་མདོག་སེར་པོ་རང་གི་དབང་བསྐུར་བའི་གནས་སུ། ཕྱག་གཉིས་ཀྱིས་དབང་བསྐུར་བའི་ཕྲེང་བ་འཆིང་ཞིང་བཞུགས་པའོ། །རྡོ་རྗེ་ཉི་མ་སྐུ་མདོག་དམར་པོ། ཕྱག་གཉིས་ཀྱིས་རང་གི་ཐུགས་ཀར་ཉི་མའི་དཀྱིལ་འཁོར་བསྣམས་པའོ། །རྡོ་རྗེ་ [158b] [158b.1]རྒྱལ་མཚན་སྐུ་མདོག་ནམ་མཁའ་ལྟར་སྔོ་བསངས། ཕྱག་གཉིས་ཡིད་བཞིན་ནོར་བུའི་རྒྱལ་མཚན་བསྣམས་པའོ། །རྡོ་རྗེ་བཞད་པ་ནི་སྐུ་མདོག་པདྨའི་རྩ་ལྟར་དཀར་བ། སོའི་ཕྲེང་བ་གཉིས་དང་ལྡན་པའི་རྡོ་རྗེ་གཉིས་པ་བསྣམས་པའོ། །བཅོམ་ལྡན་འདས་འོད་དཔག་ཏུ་མེད་པའི་དཀྱིལ་འཁོར་དུ་རྡོ་རྗེ་ཆོས་ [158b.2]སྐུ་མདོག་དམར་སྐྱ། ཕྱག་གཡོན་པ་བསྙེམས་པས་པདྨའི་སྡོང་བུ་འཛིན་ཅིང་ཕྱག་གཡས་པས་པདྨའི་འདབ་མ་ཁ་འབྱེད་པའོ། །རྡོ་རྗེ་རྣོན་པོ་ནི་འདིར་སྐུ་མདོག་གུར་གུམ་ལྟ་བུ་ཕྱག་གཡས་ཀྱིས་རལ་གྲི་འཕྱར་བ། ཕྱག་གཡོན་པས་ཐུགས་ཀར་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་ [158b.3]བསྣམས་པའོ། །རྡོ་རྗེ་རྒྱུ་སྐུ་མདོག་གསེར་གྱི་མདོག་ཅན་ཆོས་ཀྱི་འཁོར་ལོའི་ཕྱག་རྒྱ་དང་ལྡན་པའོ། །རྡོ་རྗེ་སྨྲ་བ་སྐུ་མདོག་དམར་པོ་ཕྱག་གཡས་པ་ལྕེའི་ཕྱག་དང་ལྡན་པ། ཕྱག་གཡོན་པས་དུང་བསྣམས་པའོ། །བཅོམ་ལྡན་འདས་དོན་ཡོད་གྲུབ་པའི་དཀྱིལ་འཁོར་དུ། རྡོ་རྗེ་ལས་སྐུ་མདོག་ལྗང་ [158b.4]གུ་ཕྱག་གཉིས་ན་རྡོ་རྗེ་རྩེ་གསུམ་པ་བསྣམས་ནས་སྤྱི་བོར་འཇོག་ཅིང་དེ་བཞིན་གཤེགས་པ་རྣམས་ལ་མཆོད་པའི་དོན་དུ་གར་མཛད་ཅིང་བཞུགས་པའོ། །རྡོ་རྗེ་སྲུང་བ་སྐུ་མདོག་སེར་པོ་ཕྱག་གཉིས་ཀྱིས་རྡོ་རྗེ་གོ་ཆ་བསྣམས་པའོ། །རྡོ་རྗེ་གནོད་སྦྱིན་སྐུ་མདོག་ནག་པོ་ཕྱག་གཉིས་ཀྱིས་མཆེ་བ་གཉིས་རང་གི་ཞལ་དུ་འཛིན་ཅིང་གདུག་པ་ཐམས་ [158b.5]ཅད་འཇིགས་པར་མཛད་པས་བཞུགས་པའོ། །རྡོ་རྗེ་ཁུ་ཚུར་སྐུ་མདོག་དཀར་པོ་ཕྱག་གཉིས་ཀྱིས་རྡོ་རྗེ་ཁུ་ཚུར་བསྡམས་ནས་བཞུགས་པའོ། །མཚམས་རྣམས་སུ་སྤྱན་ནི་འཇམ་པའི་དབྱངས་དང་འདྲའོ། །མཱ་མ་ཀཱི་ནི་མི་བསྐྱོད་པ་དང་འདྲའོ། །གོས་དཀར་མོ་ནི་འོད་དཔག་ཏུ་མེད་པ་དང་འདྲའོ། །སྒྲོལ་མ་ནི་དོན་ཡོད་པར་གྲུབ་པ་དོང་ [158b.6]འདྲའོ། །སེམས་མ་བཅུ་དྲུག་ནི་ཀུན་དུ་བཟང་མོ་དང་། དེ་བཞིན་གཤེགས་པའི་ལྕགས་ཀྱུ་མོ་དང་། དགའ་ལ་ཆགས་མ་དང་ལེགས་ལྡན་མ་སྟེ་རྡོ་རྗེ་རིགས་ཀྱིའོ། །རིན་པོ་ཆེའི་གཙོ་མོ་དང་། རཏྣའི་སྒྲོལ་མ་དང་། རྒྱལ་མཚན་རྩེ་མོའི་དཔུང་རྒྱན་དང་། བཀོད་པ་དང་ལྡན་མ་དང་བཞི་ནི་རཏྣའི་རིགས་ཀྱིའོ། །རྡོ་རྗེ་ [158b.7]ས་མོ་དང་ཀུན་དུ་འཁོར་ལོ་མ་དང་རླན་འཛིན་མ་དང་། སྟོང་དུ་ཟློས་མ་བཞི་པདྨོ་རིགས་ཀྱིའོ། །དངོས་གྲུབ་ཀྱི་རྩེ་མོ་དང་། ཐམས་ཅད་བསྲུང་མ་དང་། མདངས་སླར་འཕྲོག་མ་དང་། གཟུངས་ཀྱི་ཕྱག་རྒྱ་རྣམས་དང་བཞི་ནི་ལས་ཀྱི་རིགས་ཀྱིའོ། །སྐུ་མདོག་ཕྱག་མཚན་སེམས་དཔའ་བཅུ་དྲུག་དང་མཐུན་ནོ། ། [159a] [159a.1]འདིའི་ལུགས་ཀྱིས་སྤྱན་མ་ལ་རྡོ་རྗེ་རིགས་ཀྱི་སེམས་དཔས་བསྐོར། མཱ་མ་ཀཱི་ལ་རིན་པོ་ཆེའི་རིགས་ཀྱི་སེམས་དཔའ་བཞིས་བསྐོར། གཞན་གཉིས་པོ་ཡང་རིགས་མཐུན་པས་བསྐོར་བའོ། །འདིར་རྡོ་རྗེ་ཐིག་གི་ནང་ལོགས་སུ་རི་མོ་ཟུར་བཞི་པ་བྱས་པའི་བརྒྱད་ཆའི་སྒོ་སྟེ་རྟ་ [159a.2]བབས་མེད་པའོ། །ལྷག་མ་ནི་ཕྱིའི་དཀྱིལ་འཁོར་རོ། །དེའི་ཤར་གྱི་སྒོར་རྡོ་རྗེ་ལྕགས་ཀྱུ་སྐུ་མདོག་དཀར་པོ་རྡོ་རྗེ་ལྕགས་ཀྱུ་བསྣམས་པ་གཡས་བརྐྱང་བས་བཞུགས་པའོ། །ལྷོའི་སྒོར་རྡོ་རྗེ་ཞགས་པ་སྐུ་མདོག་སེར་པོ་ཕྱག་ན་རྡོ་རྗེ་ཞགས་པ་བསྣམས་པ་གཡོན་བརྐྱང་བས་བཞུགས་པའོ། །ནུབ་ཀྱི་སྒོར་ [159a.3]རྡོ་རྗེ་ལྕགས་སྒྲོག་སྐུ་མདོག་དམར་པོ་ཕྱག་གཉིས་ཀྱིས་རྡོ་རྗེ་ལུ་གུ་རྒྱུད་བསྣམས་པ་ས་གའི་འདུག་སྟངས་ཀྱིས་བཞུགས་པའོ། །བྱང་ཕྱོགས་ཀྱི་སྒོར་རྡོ་རྗེ་འབེབས་པ་སྐུ་མདོག་ལྗང་གུ་ཕྱག་གཉིས་ཀྱིས་རྡོ་རྗེ་བསྡམས་པས་རྡོ་རྗེ་དང་དྲིལ་བུ་བསྣམས་པ་ཟླུམ་པོའི་འདུག་སྟངས་ཀྱིས་བཞུགས་པར་བྲི་བར་བྱ་སྟེ་ནང་གི་དཀྱིལ་འཁོར་རོ། ། [159a.4]གཉིས་པ་ནང་གི་དཀྱིལ་འཁོར་གྱི་ཉིས་འགྱུར་ཏེ་གཟུངས་ཀྱི་དཀྱིལ་འཁོར་རོ། །གཉིས་པ་དེར་ཡང་ཤར་ཕྱོགས་སུ་ས་བཅུ་གཉིས་བྲི་བར་བྱ་སྟེ། ཀུན་ཀྱང་སྣ་ཚོགས་པདྨ་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ། རིན་པོ་ཆེའི་དབུ་རྒྱན་ཅན།ཕྱག་གཡས་ན་རྡོ་རྗེ་བསྣམས་པ། ཕྱག་གཡོན་ན་རང་གི་མཚན་མ་ [159a.5]བསྣམས་པའོ། །དེ་ལ་མོས་པས་སྤྱོད་པའི་ས་ནི་སྐུ་མདོག་པདྨ་ལྟར་དམར་བ་ཕྱག་གཡོན་ན་པདྨ་དམར་པོ་བསྣམས་པའོ། །རབ་ཏུ་དགའ་བའི་ས་ནི་རིན་པོ་ཆེ་པདྨ་རཱི་གའི་མདོག་ཅན། ཕྱག་གཡོན་ན་ཡིད་བཞིན་གྱི་ནོར་བུ་བསྣམས་པའོ། །དྲི་མ་མེད་པའི་ས་ནི་ནོར་བུ་ཚོན་ཤེལ་གྱི་མདོག་ཅན། ཕྱག་གཡོན་གྱིས་ཐམས་ཅད་ [159a.6]དག་པར་སོ་སོར་རྟོག་པའི་པདྨ་དཀར་པོ་བསྣམས་པའོ། །འོད་བྱེད་པའི་ས་ནི་ཉི་མ་འཆར་ཀའི་མདོག་ཅན། ཕྱག་གཡོན་གྱིས་སྣ་ཚོགས་པདྨའི་སྟེང་དུ་ཉི་མའི་དཀྱིལ་འཁོར་བསྣམས་པའོ། །འོད་འཕྲོ་བའི་ས་ནི་མརྒད་ལྟ་བུའི་མདོག་ཅན་ཕྱག་གཡོན་ན་ཨུཏྤ་ལ་བསྣམས་པའོ། །ཤིན་ཏུ་སྦྱངས་ [159a.7]དཀའ་བའི་ས་ནི་སྐུ་མདོག་སེར་པོ་ཕྱག་གཡོན་པ་པང་བར་བཀན་ནས་བཞག་པས་ནོར་བུ་མརྐཏ་བསྣམས་པའོ། །མངོན་དུ་གྱུར་པའི་ས་ནི་གསེར་བཙོ་མ་ལྟ་བུའི་མདོག་ཅན། ཕྱག་གཡོན་གྱིས་པདྨའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པའོ། །རིང་དུ་སོང་བའི་ [159b] [159b.1]ས་ནི་ནམ་མཁའ་ལྟར་སྔོ་བ་སངས་ཕྱག་གཡོན་གྱིས་སྣ་ཚོགས་པདྨའི་སྟེང་དུ་སྣ་ཚོགས་རྡོ་རྗེ་བསྣམས་པའོ། མི་གཡོ་བའི་ས་ནི་སྟོན་ཀའི་ཟླ་བ་ལྟར་དཀར་བ། ཕྱག་གཡོན་པ་བསྙེམས་པས་པདྨའི་སྟེང་དུ་ཟླ་བའི་དཀྱིལ་འཁོར་དེའི་སྟེང་དུ་རྡོ་རྗེ་ལྔ་པ་མདོག་དམར་པོ་སྟེ། པདྨའི་སྡོང་བུ་འཛིན་པའོ། ། [159b.2]ལེགས་པའི་བློ་གྲོས་ཀྱི་ནི་སྐུ་མདོག་དམར་སྐྱ་ཕྱག་གཡོན་གྱིས་ཨུཏྤ་ལའི་སྟེང་དུ་རལ་གྲི་བསྣམས་པའོ། །ཆོས་ཀྱི་སྤྲིན་གྱི་ནི་གསེར་གྱི་མདོག་ཅན་ཕྱག་གཡོན་གྱིས་ཆོས་ཀྱི་སྤྲིན་གྱིས་ཡོངས་སུ་བསྐོར་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པའོ། །སངས་རྒྱས་ཀྱི་ཀུན་དུ་འོད་ནི་ཉི་མ་ [159b.3]གུང་གི་མདོག་ཅན་ཕྱག་གཡོན་པས་པདྨའི་སྟེང་དུ་ཡང་དག་པར་རྫོགས་པའི་སངས་རྒྱས་སྟོན་པར་བྱེད་པའི་སངས་རྒྱས་ཀྱི་སྐུ་གཟུགས་བསྣམས་པའོ། །ལྷོ་ཕྱོགས་སུ་ཕ་རོལ་ཏུ་ཕྱིན་པ་བཅུ་གཉིས་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ། རྒྱན་སྣ་ཚོགས་འཆང་ [159b.4]བ། གཞོན་ཞིང་དར་ལ་བབ་པ་ཞལ་གྱི་པདྨ་སྒེག་པའི་ཉམས་ཀྱིས་རྒྱས་པ། རིན་པོ་ཆེ་སྣ་ཚོགས་པས་སྤྲས་པའི་གསེར་གྱི་གདུ་བུས་ལག་ངར་བཀང་བ། རིན་པོ་ཆེའི་རྒྱན་དང་། རྩེ་བྲན་མངའ་བ། །ཕྱག་གཡས་པས་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་པའི་ཕྱིར་ཡིད་ [159b.5]བཞིན་གྱི་ནོར་བུ་རིན་པོ་ཆེ་བསྣམས་པ། ཕྱག་གཡོན་པས་རང་གི་མཚན་མ་བསྣམས་པ་རིམ་བཞིན་དུ་བྲི་བར་བྱའོ། །དེ་ལ་རིན་པོ་ཆེ་པདྨའི་ཕ་རོལ་ཏུ་ཕྱིན་པ་ནི་པདྨ་དམར་པོ་ལྟར་སྐུ་མདོག་དམར་པོ་ཕྱག་གཡོན་པས་པདྨའི་སྟེང་དུ་ཟླ་བའི་དཀྱིལ་འཁོར་བསྣམས་པའོ། །སྦྱིན་པའི་ཕ་རོལ་ཏུ་ཕྱིན་པ་སྐུ་ [159b.6]མདོག་དམར་སྐྱ། །ཕྱག་གཡོན་པས་འབྲུ་དང་རིན་པོ་ཆེ་སྣ་ཚོགས་པའི་སྙེ་མ་བསྣམས་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྐུ་མདོག་དཀར་པོ་ཕྱག་གཡོན་པས་ཨ་ཤྭ་ཀའི་མེ་ཏོག་གི་མགོ་ལྕོགས་འདབ་མ་དང་བཅས་པ་བསྣམས་པའོ། །བཟོད་པའི་ཕ་རོལ་ཏུ་ཕྱིན་པ་གསེར་གྱི་མདོག་ཅན་ཕྱག་ [159b.7]གཡོན་པས་པདྨ་དཀར་པོ་བསྣམས་པའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་མརྐཏ་ཀྱི་མདོག་ཅན། ཕྱག་གཡོན་པས་ཨུཏྤལ་བསྣམས་པའོ། །བསམ་གཏན་གྱི་ཕ་རོལ་ཏུ་ཕྱིན་པ་ནམ་མཁའ་ལྟར་སྔོ་བསངས་ཕྱག་གཡོན་པས་པདྨ་དཀར་པོ་བསྣམས་པའོ། །ཤེས་རབ་ཀྱི་ཕ་རོལ་ [160a] [160a.1]ཏུ་ཕྱིན་པ་གསེར་གྱི་མདོག་ཅན་ཕྱག་གཡས་ཀྱིས་ཆོས་ཀྱི་འཁོར་ལོའི་ཕྱག་རྒྱ་དང་ལྡན་པའོ། །ཕྱག་གཡོན་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པའོ། །ཐབས་ཀྱི་ཕ་རོལ་ཏུ་ཕྱིན་པ་པྲི་ཡང་ཀུ་ལྟར་སྐུ་མདོག་ལྗང་གུ་ཕྱག་གཡོན་པས་པདྨ་དཀར་ [160a.2]པོའི་སྟེང་དུ་རྡོ་རྗེ་བསྣམས་པའོ། །སྨོན་ལམ་གྱི་ཕ་རོལ་ཏུ་ཕྱིན་པ་ཨུཏྤ་ལ་སྔོན་པོ་ལྟ་བུའི་མདོག་ཅན་ཕྱག་གཡོན་གྱིས་ཨུཏྤ་ལའི་སྟེང་དུ་རལ་གྲི་བསྣམས་པའོ། །སྟོབས་ཀྱི་ཕ་རོལ་ཏུ་ཕྱིན་པ་ཉི་མའི་མདོག་ཅན་ཕྱག་གཡོན་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པའོ། །ཡེ་ཤེས་ [160a.3]ཀྱི་ཕ་རོལ་ཏུ་ཕྱིན་པ་སྟོན་ཀའི་ཟླ་བ་ལྟ་བུའི་མདོག་ཅན་ཕྱག་གཡོན་པས་རིན་པོ་ཆེ་སྣ་ཚོགས་ཀྱི་འབྲས་བུས་བརྒྱན་པའི་བྱང་ཆུབ་ཀྱི་ཤིང་གི་ཡལ་ག་བསྣམས་པའོ། །རྡོ་རྗེ་ལས་ཀྱི་ཕ་རོལ་ཏུ་ཕྱིན་པ་སྐུ་མདོག་སྣ་ཚོགས་པ་ཕྱག་གཡོན་པས་སྣ་ཚོགས་པདྨ་བསྣམས་པའོ། །ནུབ་ཕྱོགས་སུ་དབང་བཅུ་པདྨ་དང་ [160a.4]ཟླ་བའི་དཀྱིལ་འཁོར་ཀྱི་སྟེང་དུ་སེམས་དཔའི་སྐྱིལ་མོ་ཀྲུང་གིས་བཞུགས་པ། རྒྱན་དང་ན་བཟའ་སྣ་ཚོགས་པ་མངའ་བ། གཞོན་ཞིང་དར་ལ་བབ་པ། སྒེག་པའི་ཉམས་དང་ལྡན་པ། ཞལ་གྱི་པདྨ་ཅུང་ཟད་འཛུམ་པ་དང་། སྤྱན་ཨུཏྤ་ལ་སྔོན་པོའི་འདབ་མ་འདྲ་བ། འོད་མཐའ་ཡས་པའི་རིན་པོ་ [160a.5]ཆེའི་དབུ་རྒྱན་ཅན། ཕྱག་གཡས་ན་པདྨ་བསྣམས་པ། གཡོན་ན་བསྙེམས་པས་རང་གི་མཚན་མ་བསྣམས་པར་རིམ་བཞིན་དུ་བྲི་བར་བྱ། །དེ་ལ་ཚེ་ལ་དབང་བ་སྐུ་མདོག་དམར་སྐྱ། ཕྱག་གཡོན་ན་པདྨ་རཱ་གའི་ནོར་བུའི་འདབ་མའི་དབུས་སུ་བཅོམ་ལྡན་འདས་ཚེ་དཔག་ཏུ་མེད་པ་ཏིང་ངེ་འཛིན་ [160a.6]ལ་སྙོམས་པར་བཞུགས་པའི་སྐུ་བསྣམས་པའོ། །སེམས་ལ་དབང་བ་ཟླ་བའི་མདོག་ཅན་ཕྱག་གཡོན་གྱིས་མེ་ཏོག་བནྡུ་ཀ་ལྟར་དམར་བའི་རྡོ་རྗེ་རྩེ་ལྔ་པ་བསྣམས་པའོ། །ཡོ་བྱད་ལ་དབང་བ་སྐུ་མདོག་སེར་པོ་ཕྱག་གཡོན་ན་ཡིད་བཞིན་གྱི་ནོར་བུ་རིན་པོ་ཆེའི་རྒྱལ་མཚན་བསྣམས་པའོ། །ལས་ལ་ [160a.7]དབང་བ་མརྐཏ་ལྟ་བུའི་མདོག་ཅན་ཕྱག་གཡོན་སྣ་ཚོགས་རྡོ་རྗེ་བསྣམས་པའོ། །སྐྱེ་བ་ལ་དབང་བ་སྐུ་མདོག་སྣ་ཚོགས་པ། ཕྱག་གཡོན་ཁ་དོག་སྣ་ཚོགས་པ་ཛཱ་ཏིའི་ཡལ་ག་བསྣམས་པའོ། །རྫུ་འཕྲུལ་ལ་དབང་བ་སྐུ་མདོག་ལྗང་གུ་ཕྱག་གཡོན་ན་པདྨའི་སྟེང་དུ་ཉི་མ་དང་ཟླ་བའི་དཀྱིལ་ [160b] [160b.1]འཁོར་བསྣམས་པའོ། །མོས་པ་ལ་དབང་བ་པདྨའི་རྩ་བ་ལྟར་མདོག་དཀར་བ། ཕྱག་གཡོན་ན་མེ་ཏོག་པྲི་ཡང་ཀུའི་སྙེ་མ་བསྣམས་པའོ། །སྨོན་ལམ་ལ་དབང་བ་གསེར་གྱི་མདོག་ཅན་ཕྱག་གཡོན་ཨུཏྤ་ལ་སྔོན་པོ་བསྣམས་པའོ། །ཡེ་ཤེས་ལ་དབང་བ་མཐོན་ཀ་ཆེན་པོའི་མདོག་ཅན། །ཕྱག་གཡོན་ན་ཨུཏྤ་ལ་སྔོན་ [160b.2]པོའི་སྟེང་དུ་རལ་གྲི་བསྣམས་པའོ། །ཆོས་ལ་དབང་བ་སྐུ་མདོག་དམར་སྐྱ། ཕྱག་གཡོན་ན་པདྨའི་སྟེང་དུ་བུམ་པ་བཟང་པོ་བསྣམས་པའོ། །ཡིད་བཞིན་ནོར་བུའི་ཚོན་ཤེལ་གྱི་མདོག་ཅན། ཕྱག་གཡས་ན་པདྨ་དཀར་པོ་བསྣམས་པའོ། །ཕྱག་གཡོན་ན་རིན་པོ་ཆེའི་ཤིང་གི་ཡལ་ག་བསྣམས་པའོ། །སངས་ [160b.3]རྒྱས་ཀྱི་བྱང་ཆུབ་གསེར་བཙོ་མ་ལྟ་བུའི་མདོག་ཅན་ཕྱག་གཡས་ན་པདྨ་སེར་པོའི་སྟེང་དུ་རྡོ་རྗེ་རྩེ་ལྔ་པ་བསྣམས་པ། ཕྱག་གཡོན་ན་ཡིད་བཞིན་གྱི་ནོར་བུ་རིན་པོ་ཆེའི་རྒྱལ་མཚན་གྱི་སྟེང་དུ་འཁོར་ལོ་བསྣམས་པའོ། །འདི་གཉིས་ཀྱི་གདན་དང་དབུ་རྒྱན་ལ་སོགས་པའི་དབང་རྣམས་དང་འདྲ་བར་བྱའོ། །བྱང་ཕྱོགས་ [160b.4]སུ་གཟུགས་བཅུ་གཉིས་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ། རྒྱན་ཐམས་ཅད་ཀྱིས་བརྒྱན་པ། རིན་པོ་ཆེའི་དབུ་རྒྱན་གྱི་རྩེ་བྲན་ཅན། ཕྱག་གཡས་ན་སྣ་ཚོགས་རྡོ་རྗེ་བསྣམས་པ། ཕྱག་གཡོན་གྱིས་དཀུར་བརྟེན་པས་རང་གི་མཚན་མ་བསྣམས་པར་རིམ་ [160b.5]བཞིན་དུ་བྲི་བར་བྱའོ། །དེ་ལ་ནོར་ལྡན་གྱི་གཟུངས་ནི་གསེར་གྱི་མདོག་ཅན། ཕྱག་གཡོན་ན་འབྲས་ཀྱི་སྙེ་མ་བསྣམས་པའོ། །རིན་ཆེན་སྒྲོལ་མའི་གཟུངས་ནི་པདྨ་རཱ་གའི་མདོག་ཅན། ཕྱག་གཡོན་ན་ཡིད་བཞིན་གྱི་ནོར་བུའི་རྒྱལ་མཚན་བསྣམས་པའོ། །གཙུག་ཏོར་རྣམ་པར་རྒྱལ་བའི་གཟུངས་ནི་སྐུ་མདོག་ [160b.6]དཀར་པོ། ཕྱག་གཡོན་ན་ནོར་བུ་ཆུ་ཤེས་ཀྱི་བུམ་པ་བསྣམས་པའོ། །འོད་ཟེར་ཅན་གྱི་གཟུངས་ནི་སྐུ་མདོག་དམར་སྐྱ། ཕྱག་གཡོན་ན་ཁབ་དང་སྐུད་པ་བསྣམས་པའོ། །རི་ཁྲོད་ལོ་མ་ཅན་གྱི་གཟུངས་ནི། སྐུ་མདོག་ལྗང་གུ་ཕྱག་གཡོན་ན་ལོ་མ་སྦོམ་པ་བསྣམས་པའོ། །དུག་སེལ་མའི་གཟུངས་ནི་སྐུ་མདོག་ [160b.7]དཀར་པོ་ཕྱག་གཡོན་ན་དུག་གི་མེ་ཏོག་གི་སྙེ་མ་བསྣམས་པའོ། །སྒོ་མཐའ་ཡས་པའི་གཟུངས་ནི་སྐུ་མདོག་པྲི་ཡང་ཀུ་ལྟར་ལྗང་སེར། ཕྱག་གཡོན་ན་པདྨ་དམར་པོའི་སྟེང་དུ་མི་ཟད་པའི་གཏེར་ཆེན་པོའི་བུམ་པ་བསྣམས་པའོ། །སྐུ་ལ་བྱེད་མའི་གཟུངས་ནི་སྟོན་ཀའི་ཟླ་བ་ལྟ་བུའི་མདོག་ཅན། ཕྱག་གཡོན་ན་ཕྲེང་ [161a] [161a.1]བ་འཕྱང་བའི་བུམ་པ་བསྣམས་པའོ། །ཤེས་རབ་འཕེལ་བའི་གཟུངས་ནི་སྟོན་ཀའི་ཟླ་བ་ཉ་བ་ལྟ་བུའི་མདོག་ཅན་ཕྱག་གཡོན་ན་ཨུཏྤལ་སྔོན་པོའི་སྟེང་དུ་རལ་གྲི་བསྣམས་པའོ། །ལས་ཀྱི་སྒྲིབ་པ་ཐམས་ཅད་རྣམ་པར་སྦྱོང་བའི་གཟུངས་ནི་ནོར་བུ་མ་རྐང་ལྟ་བུའི་མདོག་ཅན། ཕྱག་གཡོན་པ་ [161a.2]ན་རྡོ་རྗེ་རྩེ་གསུམ་པས་མཚན་པའི་པདྨ་དམར་སྐྱ་བསྣམས་པའོ། །ཡེ་ཤེས་མི་ཟད་པའི་ཟ་མ་ཏོག་གི་གཟུངས་ནི། སྐུ་མདོག་དམར་པོ་ཕྱག་གཡོན་ན་རིན་པོ་ཆེའི་ཟ་མ་ཏོག་བསྣམས་པའོ། །སངས་རྒྱས་ཐམས་ཅད་ཀྱི་ཆོས་ཀྱི་མཛོད་དང་ལྡན་པའི་གཟུངས་ནི་གསེར་བཙོ་མའི་མདོག་ཅན་ཕྱག་གཡོན་ན་ཁ་དོག་ [161a.3]སྣ་ཚོགས་པའི་སྒྲོམ་བུ་བསྣམས་པའོ། །གཟུངས་ཀྱི་དཀྱིལ་འཁོར་འདི་ཉིད་ཀྱི་ཤར་ཕྱོགས་ཀྱི་སྒོར། ཆོས་སོ་སོ་ཡང་དག་པར་རིག་པ་སྐུ་མདོག་དམར་སྐྱ། རྒྱན་ཐམས་ཅད་ཀྱིས་བརྒྱན་པ། རིན་པོ་ཆེའི་ཅོད་པན་ཅན་ཕྱག་ན་རྡོ་རྗེ་ལྕགས་ཀྱུ་དང་ཞགས་པ་བསྣམས་པ་སེམས་དཔའི་སྐྱིལ་མོ་ཀྲུང་གིས་བཞུགས་ [161a.4]པ་བྲིའོ། །ལྷོ་ཕྱོགས་ཀྱི་སྒོར་དོན་སོ་སོ་ཡང་དག་པར་རིག་པ་སྐུ་མདོག་མརྐཏ་ལྟ་བུ་ཕྱག་ན་རིན་པོ་ཆེའི་ཞགས་པ་བསྣམས་པ། །རྒྱན་ཐམས་ཅད་ཀྱིས་བརྒྱན་པ་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །ནུབ་ཕྱོགས་ཀྱི་སྒོར་ངེས་པའི་ཚིག་སོ་སོ་ཡང་དག་པར་རིག་པ་སྐུ་མདོག་དམར་སྐྱ། [161a.5]ཕྱག་ན་མཐའ་གཉིས་སུ་པདྨས་མཚན་པའི་ལྕགས་སྒྲོག་བསྣམས་པ། གདན་དང་རྒྱན་ལ་སོགས་པ་ནི་སྔ་མ་བཞིན་ནོ། །བྱང་ཕྱོགས་ཀྱི་སྒོར་སྤོབས་པ་སོ་སོ་ཡང་དག་པར་རིག་པ་སྐུ་མདོག་མརྐཏ་ལྟར་ལྗང་གུ། ཕྱག་གཉིས་ཀྱིས་རྡོ་རྗེ་རྩེ་གསུམ་པས་མཚན་པའི་དྲིལ་བུ་བསྣམས་པ་སྟེ་ལྷག་མ་རྣམས་ [161a.6]ནི་སྔ་མ་བཞིན་ནོ། །ཤར་ལྷོའི་མཚམས་སུ་ལྷ་མོ་སྒེག་མོ་གསེར་གྱི་མདོག་ཅན་རིན་པོ་ཆེའི་ཅོད་པན་མངའ་བ། རྡོ་རྗེ་སྐྱིལ་མོ་ཀྲུང་གིས་བཞུགས་པ། ཕྱག་གཉིས་ཀ་རྡོ་རྗེ་བསྙེམས་པའི་ཚུལ་འཆང་བའོ། །ལྷོ་ནུབ་མཚམས་སུ་ཕྲེང་བ་མ་སྐུ་མདོག་དམར་སྐྱ། ཕྱག་ན་རིན་པོ་ཆེའི་ཕྲེང་བ་བསྣམས་པ། [161a.7]བཞུགས་ཚུལ་ལ་སོགས་ནི་སྒེག་མོ་དང་འདྲའོ། །ནུབ་བྱང་མཚམས་སུ་གླུ་མ་སྐུ་མདོག་དམར་པོ་པི་ཝང་བརྡུང་བ་ལ་བརྩོན་པ་སྟེ། ལྷག་མ་ནི་སྔ་མ་དང་འདྲའོ། །བྱང་ཤར་མཚམས་སུ་གར་མ་སྐུ་མདོག་ལྗང་གུ། ཕྱག་གིས་མཆོག་གི་རྩེད་མོ་དང་གར་མཛད་པ་སྟེ་ལྷག་མ་ནི་སྒེག་མོ་དང་འདྲའོ། །ནང་གི་ [161b] [161b.1]དཀྱིལ་འཁོར་གྱི་སྒོ་སྲུངས་རྣམས་ནི་ཚངས་པའི་གནས་བཞིའི་ངོ་བོ་ཉིད་དོ། །དཀྱིལ་འཁོར་བར་མ་ནི་སོ་སོ་ཡང་དག་པར་རིག་པ་བཞིའོ། །ཕྱིའི་དཀྱིལ་འཁོར་གྱི་སྒོ་སྲུང་རྣམས་ནི་བསྡུ་བའི་དངོས་པོ་བཞིའི་རང་བཞིན་ཡིན་ནོ། །རིམ་པ་གསུམ་པའི་ཤར་ཕྱོགས་སུ་ཀུན་དུ་བཟང་པོ་གསེར་གྱི་མདོག་ཅན་རྒྱན་ཐམས་ཅད་ཀྱིས་ [161b.2]བརྒྱན་པ། རིན་པོ་ཆེའི་དབུ་རྒྱན་ཅན་ཕྱག་གཡས་ཀྱིས་མཆོག་སྩོལ་བ། ཕྱག་གཡོན་གྱིས་ཨུཏྤ་ལའི་སྟེང་དུ་རལ་གྲི་བསྣམས་པ། པདྨའི་སྟེང་དུ་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །བློ་གྲོས་མི་ཟད་པ་གསེར་གྱི་མདོག་ཅན་ཕྱག་གཡས་ན་རལ་གྲི་བསྣམས་པའོ། ། [161b.3]ཕྱག་གཡོན་གྱིས་ཆོས་སྟོན་པའི་ཚུལ་གྱིས་པདྨ་བསྣམས་པ་སྟེ། རྒྱན་དང་། བཞུགས་ཚུལ་ལ་སོགས་པ་ནི་ཀུན་དུ་བཟང་པོ་དང་འདྲའོ། སའི་སྙིང་པོ་གསེར་བཙོ་མའི་མདོག་ཅན་ཕྱག་གཡས་ཀྱིས་ས་གནོན། ཕྱག་གཡོན་པདྨའི་སྟེང་ན་དཔག་བསམ་གྱི་ཤིང་བསྣམས་པའོ། །ནམ་མཁའི་སྙིང་པོ་ [161b.4]སྐུ་མདོག་མརྐཏ་ལྟར་ལྗང་སེར་ཕྱག་གཡས་ཀྱིས་རིན་པོ་ཆེ་ཐམས་ཅད་ཀྱི་ཆར་འབེབས་པ། ཕྱག་གཡོན་ན་ཡིད་བཞིན་གྱི་ནོར་བུའི་རྒྱལ་མཚན་བསྣམས་པའོ། །ལྷོ་ཕྱོགས་སུ་ནམ་མཁའ་མཛོད་གསེར་གྱི་མདོག་ཅན་ཕྱག་གཡས་ན་ཡིད་བཞིན་གྱི་ནོར་བུ་བསྣམས་པའོ། །ཕྱག་གཡོན་ན་བུམ་པ་བཟང་པོ་ལས་ [161b.5]འཕྱང་བའི་དཔག་བསམ་གྱི་ཤིང་བསྣམས་པ། ཕྱག་ན་རིན་པོ་ཆེ་སྐུ་མདོག་ལྗང་གུ་ཕྱག་གཡས་པ་རིན་པོ་ཆེ་སྦྱིན་པ་ལ་བརྩོན་པ། ཕྱག་གཡོན་པ་ན་པདྨའི་སྟེང་དུ་བྱང་ཆུབ་ཀྱི་ཟླ་བ་བསྣམས་པའོ། །རྒྱ་མཚོའི་བློ་གྲོས་སྟོན་ཀའི་ཟླ་བ་ལྟར་དཀར་བ། ཕྱག་གཡས་ན་དུང་བསྣམས་པ། ཕྱག་གཡོན་ན་རལ་གྲི་ [161b.6]བསྣམས་པའོ། །རྡོ་རྗེ་སྙིང་པོ་སྐུ་མདོག་ཨུཏྤ་ལ་སྔོན་པོའི་འདབ་མ་ལྟ་བུ་ཕྱག་གཡས་ན་རྡོ་རྗེ་བསྣམས་པ། ཕྱག་གཡོན་ན་ས་བཅུ་སྟོན་པའི་གླེགས་བམ་བསྣམས་པའོ། །ནུབ་ཕྱོགས་སུ་སྤྱན་རས་གཟིགས་ཀྱི་དབང་ཕྱུག་སྐུ་མདོག་དཀར་པོ་འོད་དཔག་ཏུ་མེད་པའི་ཅོད་པན་ཅན་ཕྱག་གཡས་ཀྱིས་དམ་པ་ [161b.7]སྦྱིན་པ། ཕྱག་གཡོན་ན་པདྨ་བསྣམས་པའོ། །མཐུ་ཆེན་པོ་ཐོབ་པ་གསེར་གྱི་མདོག་ཅན། ཕྱག་གཡས་ན་རལ་གྲི་བསྣམས་པ། ཕྱག་གཡོན་ན་པདྨ་བསྣམས་པའོ། །ཟླ་བའི་འོད་པདྨའི་རྩ་བ་ལྟར་དཀར་བ། ཕྱག་གཡས་ན་རྡོ་རྗེའི་འཁོར་ལོ་བསྣམས་པ། །ཕྱག་གཡོན་གྱིས་ [162a] [162a.1]པདྨའི་སྟེང་དུ་ཟླ་བའི་དཀྱིལ་འཁོར་བསྣམས་པ། དྲ་བ་ཅན་གྱི་འོད་སྐུ་མདོག་དམར་སྐྱ་ཕྱག་གཡས་ན་རལ་གྲི་བསྣམས་པ། ཕྱག་གཡོན་ན་པདྨའི་སྟེང་དུ་ཉི་མའི་དཀྱིལ་འཁོར་བསྣམས་པའོ། །བྱང་ཕྱོགས་སུ་འོད་དཔག་ཏུ་མེད་པ་སྐུ་མདོག་པདྨའི་རྩ་བ་ལྟར་དཀར་བ། ཕྱག་གཡས་ན་སྣ་ཚོགས་རྡོ་རྗེ་ [162a.2]བསྣམས་པ། ཕྱག་གཡོན་ན་པདྨའི་སྟེང་དུ་བུམ་པ་བསྣམས་པའོ། །སྤོབས་པ་བརྩེགས་པ་གསེར་གྱི་མདོག་ཅན་ཕྱག་གཡས་ཀྱིས་སེ་གོལ་བརྡེབས་པར་བརྩོན་པ་ཕྱག་གཡོན་ན་པདྨའི་སྟེང་དུ་རལ་གྲི་བསྣམས་པའོ། །མྱ་ངན་གྱི་མུན་པ་ཐམས་ཅད་ངེས་པར་འཇོམས་པའི་བློ་གྲོས་གུར་གུམ་གྱི་མདོག་ཅན་ཕྱག་གཡས་ [162a.3]ན་འོད་འཕྲོ་བ་མང་པོ་འཁྲུགས་པའི་རྡོ་རྗེ་རྩེ་ལྔ་པ་བསྣམས་པ། ཕྱག་གཡོན་ན་མདུང་ཐུང་བསྣམས་པའོ། །སྒྲིབ་པ་ཐམས་ཅད་རྣམ་པར་སེལ་བ་ཨུཏྤལ་སྔོན་པོའི་འདབ་མའི་མདོག་ཅན་ཕྱག་གཡས་ན་རལ་གྲི་བསྣམས་པ། ཕྱག་གཡོན་ན་སྣ་ཚོགས་རྡོ་རྗེས་མཚན་པའི་བ་དན་བསྣམས་པ་བྲི་བར་བྱ་སྟེ། དེ་དག་ [162a.4]ཐམས་ཅད་ཀྱི་བཞུགས་ཚུལ་དང་། རྒྱན་དང་ན་བཟའ་དང་། དབུ་རྒྱན་རྣམས་ནི་ཀུན་དུ་བཟང་པོ་དང་འདྲེ་བར་ཤེས་པར་བྱ་སྟེ། སྤྱན་རས་གཟིགས་དབང་ཕྱུག་ནི་འོད་དཔག་ཏུ་མེད་པའི་ཅོད་པན་ཅན་ཏེ་ཁྱད་པར་ནི་དེ་ཡོད་དོ། །བྱང་ཆུབ་སེམས་དཔའི་གནས་དེ་ཉིད་ཀྱི་བྱང་ཤར་མཚམས་སུ་ཁམས་ [162a.5]གསུམ་རྣམ་པར་རྒྱལ་བ་ཨུཏྤལ་སྔོན་པོའི་འདབ་མ་ལྟ་བུའི་མདོག་ཅན། ཞལ་བཞི་པ། ཕྱག་བརྒྱད་པ། ཞལ་དང་པོ་ཁྲོ་བོ་སྒེག་པ་སྟེ། དམར་བ་གཡས་པ། དྲག་པོ་གཡོན་པ། འཇིགས་སུ་རུང་བ། རྒྱབ་དཔའ་བོའི་ཞལ་དང་ལྡན་པ། ཕྱག་གཉིས་རྡོ་རྗེ་དང་དྲིལ་བུ་དང་ལྡན་པ་སྟེ། དེ་གཉིས་ [162a.6]ཀྱི་ཐུགས་ཀར་ཧཱུཾ་མཛད་ཀྱི་ཕྱག་རྒྱ་འཆང་བ། ཕྱག་གཡས་རྣམས་ན་རལ་གྲི་དང་ལྕགས་ཀྱུ་དང་། མདའ་བསྣམས་པ། ཕྱག་གཡོན་རྣམས་ན་གཞུ་དང་། ཞགས་པ་དང་། རྡོ་རྗེ་བསྣམས་པ། གཡོན་བརྐྱང་བར་བཞུགས་པའི་ཞབས་གཡོན་པས་དབང་ཕྱུག་ཆེན་པོའི་སྤྱི་བོར་གནོན་པ། ཞབས་གཡས་པས་ [162a.7]ཨུ་མའི་ནུ་མ་རྒྱས་པ་མནན་པ། སངས་རྒྱས་ཀྱི་མེ་ཏོག་གི་ཕྲེང་བ་བརྒྱུས་པ་ལ་སོགས་པའི་རྒྱན་དང་། ན་བཟའ་སྣ་ཚོགས་མངའ་བ། གདུག་པ་ཅན་ཐམས་ཅད་གདུལ་བར་བྱ་བའི་ཕྱིར་ངེས་པར་གཞག་པར་བྱའོ། །ཤར་ལྷོ་མཚམས་སུ་ཁྲོ་བོ་རྡོ་རྗེ་མེ་ལྟར་འབར་བ་ཆར་སྤྲིན་གྱི་མདོག་ཅན་འོད་ཅན་གྱི་ཕྲེང་བ་ [162b] [162b.1]འབར་བས་ཀུན་དུ་འཁྲུག་པ། ཞལ་བཞི་པ། ཕྱག་བརྒྱད་པ། ཞལ་སྒེག་པ་དང་། དཔའ་བ་དང་། འཇིགས་སུ་རུང་བ་དང་། སྙིང་རྗེ་ཆེན་པོ་ལ་སོགས་པའི་ཉམས་དང་ལྡན་པ། ཕྱག་གཡས་རྣམས་ན་རྡོ་རྗེ་དང་། རལ་གྲི་དང་། མདའ་དང་། འཁོར་ལོ་བསྣམས་པ། ཕྱག་གཡོན་རྣམས་ནི་དྲིལ་བུ་དང་། ཞགས་པ་དང་། [162b.2]གཞུ་དང་། ཁ་ཊྭཱཾ་ག་བཏགས་པའི་བ་དན་སྣ་ཚོགས་པ་བསྣམས་པ། མེ་སེར་སྐྱ་འབར་བའི་སྒྲའི་ཚོགས་ཤིན་ཏུ་འཇིགས་སུ་རུང་བ། སྦྲུལ་ཆེན་པོའི་གདུ་བུ་དང་། དབུ་རྒྱན་དང་སྐ་རགས་དང་། ཞབས་གདུབ་དང་། མགུར་ཆུ་དང་། རྣ་རྒྱན་དང་། ཅོད་པན་གྱིས་བརྒྱན་པ། སྒྱུ་འཕྲུལ་ཆེན་པོའི་འཁོར་ལོ་དགོད་པ་ [162b.3]ལ་མཁས་པ་ལས། གཡོན་བརྐྱང་བས་ཁྱབ་འཇུག་ཆུང་མ་དང་བཅས་པ་གནོན་པ་བྲི་བར་བྱའོ། །ལྷོ་ནུབ་མཚམས་སུ་ཁྲོ་བོ་ཆེན་པོ་རྡོ་རྗེ་ཁྲག་འཐུང་སྐུ་མདོག་མཐིང་ཤུན་ལྟར་སྔོ་བ། ཞལ་བཞི་པ། ཕྱག་བརྒྱད་པ། ཞལ་དང་པོ་དྲག་པོ། ཞལ་གཡས་པ་རབ་ཏུ་རྨོངས་པ་རྣམས་སེམས་རྨོངས་པར་བྱེད་པ། ཞལ་གཡོན་ [162b.4]པ་སྒེག་པ་དང་ལྡན་པ། ཞལ་རྒྱབ་བཾ་ཟ་བར་བྱེད་པ། ཕྱག་གཡས་པས་རྡོ་རྗེ་རྩེ་ལྔ་འབར་བ་བསྣམས་པ། ཕྱག་གཡོན་དྲིལ་བུ་དང་བ་དན་དང་བཅས་པའི་ཁ་ཊྭཱཾ་ག་བསྣམས་པ་དང་གར་མཛད་པ། ཡང་གཉིས་ཀྱིས་འཇིགས་བྱེད་ཆེན་པོའི་པགས་པ་རློན་པ་རླུང་གི་གོས་འཛིན་པའི་ཚུལ་གྱིས་བཟུང་ནས་ [162b.5]བསྣམས་པ། ཡང་གཉིས་ན་མདའ་དང་གཞུ་བསྣམས་པ། ཡང་ཕྱག་གཡས་ན་མ་ཧཱ་རཀྟས་ཡོངས་སུ་བཀང་བའི་ཀ་པཱ་ལའི་ཐོད་ཚལ་ཙ་ཤ་ཀ་བསྣམས་པ། ཡང་ཕྱག་གཡོན་ན་སྙིང་གི་པདྨའི་ནང་ན་མ་ཧཱ་མཱཾ་སས་བཀང་བའི་ཀ་པཱ་ལ་བསྣམས་པ། སངས་རྒྱས་ལྔས་མཚན་པའི་ཐོད་པ་ལྔའི་དབུ་རྒྱན་གྱིས་ [162b.6]སངས་རྒྱས་ཀྱི་གཙུག་གི་ནོར་བུ་ཅན་ཅོད་པན་མངའ་བ། འོད་ཟེར་སྔོན་པོ་འབར་བའི་རང་བཞིན་མངའ་བ། འོད་ཟེར་དམར་པོ་འབར་བའི་དཀྱིལ་འཁོར་ཅན་ཞེས་བྱ་བའི་འོད་ཀྱི་དཀྱིལ་འཁོར་དམར་པོ་མངའ་བ། གཡོན་བརྐྱང་བས་ཚངས་པ་ཆུང་མ་དང་བཅས་པ་མནན་ནས་བཞུགས་པར་བྲིའོ། །ནུབ་བྱང་མཚམས་ [162b.7]སུ་རྟ་མཆོག་སྐུ་མདོག་ལྗང་གུ་ཞལ་བཞི་པ་ཞབས་བཞི་པ་ཕྱག་བརྒྱད་པ། ཞལ་དང་པོ་ཁྲོ་བོ་སྒེག་པའི་ཉམས་དང་ལྡན་པ། སྤྱན་གསུམ་པ། ཞལ་གཡས་དྲག་པོ། ཞལ་གཡོན་ཚངས་པའི་གདོང་དང་ལྡན་པ། སྤྱི་བོའི་ཞལ་ལྗང་གུ་མཆུ་དང་སྤྱི་བོའི་གཙུག་ནས་གྱེན་དུ་འདེགས་པ། [163a] [163a.1]ཕྱག་གཡས་ཀྱིས་བ་དན་གསུམ་པ་ལྟ་བུའི་སྣ་ཚོགས་རྡོ་རྗེ་དང་བཅས་པས་འདེགས་པའི་ཚུལ་དུ་མཛད་པ། ཕྱག་གཡོན་ན་ཁ་ཊྭཱཾ་ག་སྣ་ཚོགས་པདྨ་བསྣམས་པ། ཕྱག་གཡས་པའི་གཉིས་པས་བ་དན་གསུམ་པ་ལྟ་བུས་གྱེན་དུ་སློང་བའི་ཚུལ་དུ་མཛད་པ། ཕྱག་གཡོན་པའི་གཉིས་ [163a.2]པ་ན་མདུང་ཐུང་བསྣམས་པ། ཡང་ཕྱག་གཡས་ཀྱི་གཉིས་ན་རལ་གྲི་དང་མདའ་བསྣམས་པ། གཡོན་གྱི་ཕྱག་གཉིས་ན་དབྱུག་པ་དང་གཞུ་བསྣམས་པ། གཡོན་བརྐྱང་བའི་གནས་པས་བཞུགས་པ། གཡས་པ་གཅིག་གིས་དབང་པོ་དང་དབང་མོ་མནན་པ། གཉིས་པས་དགའ་བ་མོ་དང་མགུ་བ་མོ་མནན་པ། [163a.3]གཡོན་གྱི་དང་པོས་བརྒྱ་བྱིན་དང་ཁྱབ་འཇུག་མནན་པ། གཉིས་པས་རྒྱལ་བར་བྱེད་པ་དང་འདོད་པའི་ལྷ་མནན་ནས་བཞུགས་པར་བྲིའོ། །དེ་ཉིད་ཀྱི་ཤར་ཕྱོགས་ཀྱི་སྒོར་ཁྲོ་བོ་གཤིན་རྗེ་གཤེད་ཆར་སྤྲིན་གྱི་མདོག་ཅན། ཞལ་དྲུག་པ་ཕྱག་དྲུག་པ་ཞབས་དྲུག་པ། ཞལ་དྲུག་པོ་སྒེག་པ་དང་། དཔའ་ [163a.4]བ་དང་། འཇིགས་སུ་རུང་བ་དང་། ཞི་བ་དང་། དྲག་པོ་དང་རྔམ་པ་སྟེ། ཉམས་རྣམ་པ་སྣ་ཚོགས་པས་ཡོངས་སུ་ཁྱབ་ཅིང་རྒྱས་པ། ཕྱག་གཡས་ན་ལྕགས་ཀྱུ་བསྣམས་པ། ཕྱག་གཡོན་པས་ཐུགས་ཀར་སྡིགས་མཛུབ་བསྒྲེང་བ་དང་། ཞགས་པ་བསྣམས་པ། ཡང་ [163a.5]ཕྱག་གཡས་པ་གཉིས་ན་རལ་གྲི་དང་མདའ་བསྣམས་པ། ཕྱག་གཡོན་གཉིས་ན་གཞུ་དང་དྲིལ་བུ་བསྣམས་པ། ཐོད་པའི་ཕྲེང་བའི་ཅོད་པན་ཅན་སྦྲུལ་གྱིས་བརྒྱན་པ་སྟག་གི་པགས་པ་བསྣམས་པས། མ་ཧེའི་སྟེང་དུ་རོལ་པའི་སྟང་སྟབས་ཀྱིས་བཞུགས་པ་བྲིའོ། །ལྷོ་ཕྱོགས་ཀྱི་ [163a.6]སྒོར་ཤེས་རབ་མཐར་བྱེད་གེ་སར་སེར་པོ་ལྟ་བུའི་མདོག་ཅན། ཞལ་བཞི་པ་ཕྱག་བརྒྱད་པ། ཞལ་དང་པོ་སྒེག་པ། ཞལ་གཡས་པ་གདངས་ཤིང་འཇིགས་སུ་རུང་བ། ཞལ་གཡོན་པ་ཞི་བ། ཞལ་རྒྱབ་མ་ཤིན་ཏུ་དྲག་ཅིང་གཏུམ་པ། ཕྱག་གཡས་ན་གཞུག་པར་བྱེད་པའི་ཞགས་པ་ [163a.7]བསྣམས་པ། དེ་ལས་གཞན་པས་རྡོ་རྗེ་དང་རལ་གྲི་དང་མདའ་བསྣམས་པ། ཕྱག་གཡོན་པས་ཐུགས་ཀའི་ཕྱོགས་སུ་ལྕགས་ཀྱུ་དང་བཅས་པའི་སྡིགས་མཛུབ་བསྒྲེང་བ་ལ་བརྩོན་པ་དེ་ལས་གཞན་པར་དྲིལ་བུ་དང་མདུང་ཐུང་དང་གཞུ་བསྣམས་པ། སྦྲུལ་གྱིས་བརྒྱན་པ། མི་བསྐྱོད་ [163b] [163b.1]པའི་ཅོད་པན་ཅན། རོལ་པའི་སྟང་སྟབས་ཀྱིས་ཉི་མའི་དཀྱིལ་འཁོར་ལ་བཞུགས་པར་བྲིའོ། །ནུབ་ཕྱོགས་ཀྱི་སྒོར་པདྨ་མཐར་བྱེད་སྐུ་མདོག་དམར་པོ། ཞལ་བཞི་པ། ཕྱག་བརྒྱད་པ་ཞལ་དང་པོ་དང་། གཡས་པ་དང་གཡོན་པ་དང་། རྒྱབ་མ་སྟེ་བཞི་པོ་གྲངས་ཇི་ལྟ་བ་བཞིན་དུ་སྒེག་པ་དང་། དྲག་པོ་དང་ [163b.2]ཞི་བ་དང་། དགོད་པའི་ཉམས་དང་ལྡན་པ། གཡས་དང་གཡོན་གྱི་ཕྱག་གཉིས་ཀྱིས་རྡོ་རྗེ་ལྕགས་སྒྲོག་བསྣམས་པ། ཕྱག་གཡས་རྣམས་ཀྱིས་རྡོ་རྗེ་དང་རལ་གྲི་དང་མདའ་བསྣམས་པ། ཕྱག་གཡོན་རྣམས་ཀྱིས་སྡིགས་མཛུབ་དང་། ཞགས་པ་དང་གཞུ་བསྣམས་པ། ཀླུའི་རྒྱལ་པོས་བརྒྱན་ཅིང་སྟག་གི་པགས་པ་མནབས་པ། སངས་ [163b.3]རྒྱས་ཀྱི་བྱང་ཆུབ་ལ་བརྟན་པར་ཆགས་ཤིང་། འཆིང་བ་དང་། པདྨ་དང་ཉི་མའི་སྟེང་དུ་རོལ་པའི་སྟང་སྟབས་ཀྱིས་བཞུགས་པར་བྲི་བར་བྱའོ། །བྱང་ཕྱོགས་ཀྱི་སྒོར་ཁྲོ་བོ་བགེགས་མཐར་བྱེད་སྤྲིན་སྔོན་པོའི་མདོག་ཅན། ཞལ་བཞི་པ། ཕྱག་བརྒྱད་པ། ཞལ་སྒེག་པ་ལ་སོགས་པའི་ཉམས་དང་ལྡན་པ། [163b.4]ཕྱག་གཡས་དང་གཡོན་གཉིས་ཀྱིས་རྡོ་རྗེ་བཅིངས་པས་དྲིལ་བུ་བསྣམས་པ། ཕྱག་གཡས་རྣམས་ན་རལ་གྲི་དང་མདའ་དང་ལྕགས་ཀྱུ་བསྣམས་པ། ཕྱག་གཡོན་རྣམས་ན་སྡིགས་མཛུབ་ཞགས་པ་དང་བཅས་པ་དང་། གཞུ་དང་དྲིལ་བུ་བསྣམས་པ། སྐུ་ལ་སྦྲུལ་གྱིས་བརྒྱན་པ། སངས་རྒྱས་ [163b.5]ཀྱི་ཅོད་པན་ཅན་གཡོན་བརྐྱང་བས་ཚོགས་ཀྱི་བདག་པོ་མནན་ནས་བཞུགས་པ་བྲིའོ། །ཕྱིའི་དཀྱིལ་འཁོར་གྱི་མཚམས་སུ་རི་མོ་བྲིས་ལ་མེ་ཏོག་ལ་སོགས་པའི་མཆོད་པ་རྣམས་དགོད་པར་བྱ་སྟེ། མེའི་ཕྱོགས་སུ་མེ་ཏོག་མ་སྐུ་མདོག་སེར་བ་ཕྱག་གཉིས་མེ་ཏོག་གིས་བཀང་བའོ། །བདེན་ [163b.6]བྲལ་གྱི་ཕྱོགས་སུ་བདུག་པ་མ་སྐུ་མདོག་སྔོ་བ། ཕྱག་ན་སྤོས་ཁང་བསྣམས་པའོ། །རླུང་གི་ཕྱོགས་སུ་མར་མེ་མ་སྐུ་མདོག་དམར་བ་ཕྱག་ན་མར་མེའི་སྡོང་བུ་བསྣམས་པའོ། །དབང་ལྡན་གྱི་ཕྱོགས་སུ་བྱུག་པ་མ་སྐུ་མདོག་ལྗང་གུ་ཕྱག་ན་དུང་ཆོས་བསྣམས་པའོ། །ཤར་ཕྱོགས་ཀྱི་ [163b.7]སྒོའི་མཚམས་སུ་རྡོ་རྗེ་གཟུགས་མ་སྐུ་མདོག་སེར་པོ་ཕྱག་གཡས་ན་མེ་ལོང་བསྣམས་པའོ། །ལྷོ་ཕྱོགས་ཀྱི་སྒོའི་མཚམས་སུ་རྡོ་རྗེ་སྒྲོལ་མ་ནམ་མཁའ་ལྟར་སྔོ་བསངས། ཕྱག་ན་རྡོ་རྗེ་པི་ཝང་བསྣམས་པའོ། །ནུབ་ཕྱོགས་ཀྱི་སྒོའི་མཚམས་སུ་རྡོ་རྗེ་དྲི་སྐུ་མདོག་ལྗང་གུ་ཕྱག་ན་དྲིའི་སྣོད་བསྣམས་ [164a] [164a.1]པའོ། །བྱང་ཕྱོགས་ཀྱི་སྒོའི་མཚམས་སུ་རྡོ་རྗེ་རོ་སྐུ་མདོག་སྣ་ཚོགས་པ་ཕྱག་ན་རོའི་སྣོད་བསྣམས་པའོ། །རྡོ་རྗེ་ཤུགས་ཀྱིས་བྱུང་ལ་ཕྱི་རོལ་གྱི་རྡོ་རྗེ་རིགས་ཀྱི་དཀྱིལ་འཁོར་དུ་དབང་ལྡན་གྱི་ཕྱོགས་ནས་བརྩམས་ཏེ། ཡོངས་སུ་བསྐོར་བར་ཚངས་པ་ལ་སོགས་པ་གོ་རིམས་ཇི་ལྟ་བ་ [164a.2]བཞིན་དུ་བྲི་བར་བྱའོ། །དེ་ལ་བྱང་ཤར་མཚམས་སུ་དབང་ལྡན་མདོག་དཀར་པོ་རལ་པ་དང་ཅོད་པན་ཡོད་པ། ཁ་ཊྭཱཾ་ག་རྩེ་གསུམ་པ་ཐོད་པ་འཛིན་པ། ལག་པ་གཉིས་ཀྱིས་ཐལ་མོ་སྦྱར་ནས་མགོར་བཞག་པ་སྟེ། བཅོམ་ལྡན་འདས་ལ་ཕྱག་འཚལ་བ། ཁྱུ་མཆོག་ལ་ཞོན་པ། ལྷ་མོ། [164a.3]ཨུ་མ་དང་བཅས་པ་དཀྱིལ་འཁོར་ལ་མངོན་དུ་ཕྱོགས་པར་བྲིའོ། །དེ་བཞིན་དུ་ཐམས་ཅད་ཀྱང་ཕྱག་འཚལ་བའི་ཐལ་མོས་འདུད་པར་བྱེད་པ་ལ་མཆོག་ཏུ་གཞོལ་བ། དཀྱིལ་འཁོར་ལ་མངོན་པར་ཕྱོགས་པར་བྲིའོ། །དེ་ལ་འཇིག་རྟེན་སྐྱོང་བ་བརྒྱད་ནི་ཕྱོགས་དང་མཚམས་རྣམས་ [164a.4]སུ་བྲི་བར་བྱ་སྟེ། ཤར་དུ་བརྒྱ་བྱིན་མདོག་སེར་པོ་རྡོ་རྗེ་ཐོགས་པ། གླང་པོ་ཆེ་དཀར་པོ་ལ་ཞོན་པ་ཆུང་མ་དང་བཅས་པ་བྲིའོ། །ཤར་ལྷོར་མེ་ལྷ་མདོག་དམར་པོ་ལག་པ་བཞི་པ། གཡས་གཉིས་ན་བླུགས་གཟར་དང་དབྱུག་པ་ཐོགས་པ། གཡོན་གཉིས་ཕྲེང་བ་དང་གུནྡྷེ་ [164a.5]ཐོགས་པར་སྐྱེས་ལ་ཞོན་པ་ཆུང་མ་དང་བཅས་པ་བྲི་བར་བྱའོ། །ཕྱག་འཚལ་བའི་ཐལ་མོ་ནི་ཐམས་ཅད་ཀྱི་ཐུན་མོང་མ་ཡིན་པས་སོ་སོར་མ་སྨྲས་སོ། །ལྷོར་གཤིན་རྗེ་མདོག་ནག་མོ་དབྱུག་པ་དང་མདུང་ཐུང་ཐོགས་པ། མ་ཧེ་ལ་ཞོན་པ་ཆུང་མ་དང་བཅས་པ་བྲིའོ། །ལྷོ་ནུབ་ཏུ་སྲིན་ [164a.6]པོའི་བདག་པོ་མདོག་སྔོན་པོ་ལག་ན་རལ་གྲི་དང་ཕུབ་ཐོགས་པ། མི་རོ་ལ་ཞོན་པ་ཆུང་མ་དང་བཅས་པ་བྲིའོ། །ནུབ་ཏུ་ཆུ་ལྷ་མདོག་དཀར་པོ་གཡས་དང་གཡོན་གཉིས་ན་དུང་དང་སྦྲུལ་གྱི་ཞགས་པ་ཐོགས་པ། ཆུ་སྲིན་ལ་ཞོན་པ་གདེངས་ཀ་བདུན་པ་ཆུང་མ་དང་བཅས་པ་བྲིའོ། །ནུབ་བྱང་ [164a.7]དུ་རླུང་ལྷ་ནམ་མཁའི་མདོག་ཅན་ལག་པ་གཉིས་ན་བ་དན་ཐོགས་པ་རི་དགས་ལ་ཞོན་པ་ཆུང་མ་དང་བཅས་པ་བྲིའོ། །བྱང་དུ་ལུས་ངན་པོ་གསེར་གྱི་མདོག་ཅན་གཡས་ན་ལྕགས་ཀྱུ་ཐོགས་པ། གཡོན་ན་དབྱུག་བ་ཐོགས་པ་མི་ལ་ཞོན་པ་ཆུང་མ་དང་བཅས་པར་བྲིའོ། །འདི་དག་གི་ཆུང་ [164b] [164b.1]མ་རྣམས་ཀྱི་མདོག་ལ་སོགས་པ་ནི་དེ་རང་རང་གི་ཁྱོ་དང་འདྲ་བར་བལྟ་བར་བྱའོ། །དབང་ལྡན་དང་ཉེ་བར་ཚངས་པ་མདོག་སེར་པོ་གདོང་བཞི་པ། ལག་པ་བཞི་པ། ལག་པ་གཉིས་ན་པདྨ་དང་ཕྲེང་བ་ཐོགས་ནས་ཕྱག་འཚལ་བའི་ཐལ་མོ་སྦྱར་ཏེ། འཇོག་པ་དེ་ལས་གཞན་པ་གཉིས་ཀྱིས་དབྱུག་པ་ [164b.2]དང་སྤྱི་བླུགས་འཛིན་པ། ངང་པ་ལ་ཞོན་པ་ཆུང་མ་དང་བཅས་པའི་འཁོར་གྱིས་བསྐོར་བར་བྲིའོ། །དེའི་འོག་ཏུ་ཁྱབ་འཇུག་མདོག་ནག་མོ་ལག་པ་བཞི་པ་གཡས་དང་གཡོན་གཉིས་ཀྱིས་འཁོར་ལོ་དང་མདུང་ཐོགས་ནས་སྤྱི་བོར་ཐལ་མོ་སྦྱར་ཏེ་འཇོག་པ། དེ་ལས་གཞན་པ་གཉིས་ཀྱིས་ཤ་རའི་གཞུ་དང་ [164b.3]དབྱུག་པ་འཛིན་པ་ནམ་མཁའ་ལྡིང་ལ་ཞོན་པ་ཆུང་མ་དང་བཅས་པའི་འཁོར་གྱིས་བསྐོར་བར་བྲིའོ། །དབང་ཕྱུག་ཆེན་པོ་མདོག་དཀར་པོ་ལག་པ་གཉིས་ན་ཐོད་པ་དང་། རྩེ་གསུམ་ཐོགས་ཏེ་ཐལ་མོ་སྦྱར་བ་ཟླ་བའི་རྩེ་བྲན་ཐོགས་པ་ཁྱུ་མཆོག་ལ་ཞོན་པ་ཆུང་མའི་ཚོགས་དང་བཅས་པས་ཡོངས་སུ་བསྐོར་ [164b.4]བར་བྲིའོ། །གཞོན་ནུ་ཀཱརྟི་ཀ་མདོག་དམར་པོ་བྱིས་པའི་གཟུགས་ཅན་གདོང་དྲུག་པ། ལག་པ་དྲུག་པ་ལག་པ་གཉིས་ཀྱིས་ཐལ་མོ་སྦྱར་བ་བྱས་ལ། ཡང་ལག་པ་གཉིས་ན་མདུང་ཐུང་དང་རྡོ་རྗེ་ཐོགས་པ། ཡང་གཉིས་ན་ཁྱིམ་བྱ་དང་། དྲིལ་བུ་ཐོགས་པ་རྨ་བྱ་ལ་ཞོན་པར་བྲིའོ། །ནག་ [164b.5]པོ་ཆེན་པོ་མདོག་ནག་པོ་མདུང་རྩེ་གསུམ་པ་དང་ཐོད་པ་ཐོགས་པའོ། །དགའ་བྱེད་དབང་ཕྱུག་ནི་མདོག་ནག་པོ་རྫ་རྔ་བརྡུང་བ་ལ་བརྩོན་པ་རྫ་རྔ་ལ་ཞོན་པའོ། །ཉི་མ་ནི་མདོག་དམར་པོ་ལག་པ་གཉིས་ན་པདྨ་ལ་གནས་པ། ཉི་མའི་ཀྱིས་འཁོར་ཐོགས་པ་རྟས་དྲངས་པའི་ཤིང་རྟ་ལ་ཞོན་པའོ། ། [164b.6]ཟླ་བ་ནི་མདོག་དཀར་པོ་ལག་པ་གཉིས་ན་པདྨའི་སྟེང་དུ་ཟླ་བའི་དཀྱིལ་འཁོར་ཐོགས་པ་ངང་པ་ལ་ཞོན་པའོ། །མིག་དམར་ནི་མདོག་དམར་པོ་ལ་ལག་པ་གཡས་པ་ན་ཆུ་གྲི་ཐོགས་པ། ལག་པ་གཡོན་པ་ན་མི་མགོ་ཟ་བར་བྱེད་པ་གླང་པོ་ཆེ་ལ་ཞོན་པའོ། །གཟའ་ལག་ནི་མདོག་སེར་པོ་ལག་ན་མདའ་ [164b.7]གཞུ་ཐོགས་པ་པདྨ་ལ་འདུག་པའོ། །ཕུར་བུ་མདོག་དཀར་པོ་ལག་ན་ཕྲེང་བ་དང་སྤྱི་བླུགས་ཐོགས་པ་པདྨ་ལ་གནས་པའོ། །པ་བ་བསངས་མདོག་དཀར་པོ་ཕྲེང་བ་དང་གུ་ནྡྷེ་ཐོགས་པ་བུམ་པ་ལ་འདུག་པའོ། །སྤེན་པ་མདོག་ནག་པོ་དབྱུག་པ་ཐོགས་པ་རུས་སྦལ་ལ་ཞོན་པའོ། །སྒྲ་གཅན་ [165a] [165a.1]མདོག་དམར་ནག་ལག་ན་ཉི་ཟླ་ཐོགས་པའོ། །མཇུག་རིངས་མདོག་ནག་པོ་རལ་གྲི་དང་སྦྲུལ་གྱི་ཞགས་པ་ཐོགས་པའོ། །སྟོབས་བཟང་མདོག་ནག་པོ་རལ་གྲི་དང་གཤོལ་ཐོགས་པ་གླང་པོ་ཆེ་ལ་ཞོན་པའོ། །རྒྱལ་བར་བྱེད་པ་མདོག་ལྗང་གུ་མེ་ཏོག་གི་ཕྲེང་བ་དང་། མདའ་དང་གཞུ་ [165a.2]དང་ཁམ་ཕོར་ཐོགས་པ། ཀོ་ཀི་ལའི་ཤིང་རྟ་ལ་ཞོན་པའོ། །སྦྲང་རྩིར་བྱེད་པ་མདོག་དཀར་པོ་ལག་ན་ཆུ་སྲིན་གྱི་རྒྱལ་མཚན་དང་། མདའ་དང་གཞུ་དང་ཁམ་ཕོར་ཐོགས་པ་ནེེ་ཚོའི་ཁྲི་ལ་ཞོན་པའོ། །དཔྱིད་ཀྱི་ལྷ་མདོག་དཀར་པོ་ལག་ན་མདའ་དང་གཞུ་དང་། ཁམ་ཕོར་དང་རལ་གྲི་ཐོགས་པ་ [165a.3]སྤྲིན་ལ་ཞོན་པའོ། །མཐའ་ཡས་དང་ནོར་རྒྱས་དང་། འཇོག་པོ་དང་། སྟོབས་ཀྱི་རྒྱུ་དང་། པདྨ་དང་། པདྨ་ཆེན་པོ་དང་། དུང་སྐྱོང་དང་། རིགས་ལྡན་ཏེ་ཀླུའི་རྒྱལ་པོ་བརྒྱད་དེ་གདེངས་ཀ་བདུན་བདུན་དང་ལྡན་པ། ཐལ་མོ་སྦྱར་བ་བྱས་པ་བྲིའོ། །དེ་ལ་མཐའ་ཡས་དང་། རིགས་ལྡན་གཉིས་ནི་བྲམ་ [165a.4]ཟེའི་རིགས་ཏེ་མདོག་དམར་པོ་མེ་ལྷའི་བུའོ། །ནོར་རྒྱས་དང་དུང་སྐྱོང་གཉིས་ནི་རྒྱལ་རིགས་ཏེ། མདོག་སེར་པོ་བརྒྱ་བྱིན་གྱི་བུའོ། །འཛོག་པོ་དང་པདྨ་ཆེན་པོ་གཉིས་ནི་དམངས་རིགས་ཏེ་མདོག་ནག་པོ་རླུང་ལྷའི་བུའོ། །སྟོབས་ཀྱི་རྒྱུ་དང་པདྨ་གཉིས་ནི་རྗེའུ་རིགས་ཏེ། མདོག་དཀར་པོ་ཆུ་ལྷའི་བུའོ། །དེ་དག་ཀྱང་ [165a.5]འཁོར་དང་བཅས་པ་བྲིའོ། །ཐགས་བཟངས་རིས་དང་སྟོབས་ལྡན་དང་། རབ་དགའ་དང་། རྣམ་པར་སྣང་བྱེད་ལ་སོགས་པའི་ལྷ་མ་ཡིན་གྱི་དབང་པོ་རྣམས་ནི་མདོག་ནག་པོ་རལ་གྲི་དང་ཕུབ་ལ་སོགས་པ་མཚོན་ཆ་སྣ་ཚོགས་པ་ལག་ན་གོ་ཆ་གོན་ཞིང་ཆས་པ་འཁོར་དང་བཅས་པ་བྲིའོ། །ནམ་མཁའ་ [165a.6]ལྡིང་གི་དབང་པོ་རྣམས་ནི་གཤོག་རྒྱང་རིང་བ་ཁ་དོག་སྣ་ཚོགས་པ་པུས་མོའི་ལྷ་ངའི་བར་དུ་ཁ་བ་ལྟར་དཀར་བ། དེའི་སྟེང་དུ་ལྟེ་བའི་ཁུང་བུ་ལ་ཐུག་གི་བར་དུ་གསེར་གྱི་མདོག་ཅན། དེ་ནས་ལྐོག་མའི་བར་དུ་ཉི་མ་འཆར་མདོག་ཅན། དེ་ནས་ཀླད་པའི་སྟེང་གི་མཐར་ཐུག་པར་མ་ལུས་པར་ཨཉྫཱ་ [165a.7]ན་བཅག་པ་ལྟ་བུའི་མདོག་ཅན། ནམ་མཁའ་ལྡིང་དུ་མས་ཡོངས་སུ་བསྐོར་བར་བྲིའོ། །མིའམ་ཅིའི་རྒྱལ་པོ་ལྗོན་པ་ནི་མདོག་དམར་སྐྱ། ལག་ན་པི་ཝང་ཐོགས་པ་རྒྱན་ཐམས་ཅད་ཀྱིས་བརྒྱན་པ། །མི་འམ་ཅིའི་རྒྱལ་པོ་དུ་མས་ཡོངས་སུ་བསྐོར་བར་བྲིའོ། །དྲི་ཟའི་རྒྱལ་པོ་གཙུག་ཕུད་ལྔ་པ་ [165b] [165b.1]ནི་གསེར་གྱི་མདོག་ཅན་རྒྱན་ཐམས་ཅད་ཀྱིས་བརྒྱན་པ། དྲི་ཟའི་རྒྱལ་པོ་དུ་མས་ཡོངས་སུ་བསྐོར་བར་བྲིའོ། །རིག་པ་འཛིན་པའི་དབང་པོའི་རྒྱལ་པོ་དོན་ཐམས་ཅད་གྲུབ་པ་ནི་གསེར་བཙོ་མ་ལྟ་བུའི་མདོག་ཅན། རྒྱན་ཐམས་ཅད་ཀྱིས་བརྒྱན་པ། རིག་པ་འཛིན་པའི་རྒྱལ་པོ་དུ་མས་ཡོངས་སུ་ [165b.2]བསྐོར་བར་བྲིའོ། །གནོད་སྦྱིན་རྣམས་ཀྱང་ལག་ན་པཉྩ་པུ་ར་དང་ནེའུ་ལེ་ཐོགས་པའོ། །དེ་ལ་གང་བ་བཟང་པོ་ནི་མདོག་སྔོན་པོ། ནོར་བུ་བཟང་པོ་ནི་མདོག་སེར་པོ། ནོར་སྦྱིན་ནི་མདོག་དམར་པོ། རྣམ་ཐོས་སྲས་ནི་མདོག་སེར་པོ་པི་ཙི་གུཎྜ་ལི་མདོག་དམར་པོ་ཀི་ལི་མི་ལི་མདོག་ལྗང་གུ། [165b.3]སྒོའི་དབང་པོ་མདོག་སེར་པོ། སྤྱོད་པའི་དབང་པོ་མདོག་སེར་པོ། འཕྲོག་མ་གསེར་གྱི་མདོག་ཅན་དེ་ལ་བུ་དང་བཅས་པའོ། །དེ་དག་ཐམས་ཅད་ཀྱང་རྒྱན་ཐམས་ཅད་ཀྱིས་བརྒྱན་པར་བྲིའོ། །ཐ་སྐར་སྐུ་མདོག་དཀར་པོ། བྲ་ཉེ་མདོག་ལྗང་གུ། སྨིན་དྲུག་མདོག་ལྗང་སེར། སྣར་མ་མདོག་དམར་སྐྱ། མགོ་མདོག་ [165b.4]ནག་པོ། ལག་མདོག་དཀར་པོ། ནབ་སོ་མདོག་དཀར་པོ། རྒྱལ་མདོག་ལྗང་གུ། སྐག་མདོག་དཀར་པོ། མཆུ་མདོག་དཀར་པོ། བྲེ་མདོག་པྲི་ཡང་ཀུ་ལྟར་ལྗང་སེར། དབོ་མདོག་ལྗང་གུ། མེ་བཞི་མདོག་དཀར་པོ། ནག་པ་མདོག་ལྗང་གུ། ས་རི་མདོག་དཀར་པོ། ས་ག་མདོག་ནག་པོ། ལྷ་མཚམས་ [165b.5]མདོག་ལྗང་གུ། སྨྲོན་མདོག་དཀར་པོ། སྣྲུབས་མདོག་དཀར་པོ། ཆུ་སྟོད་མདོག་ནག་པོ། ཆུ་སྨད་མདོག་སྐྱ་བོ། །གྲོ་བཞིན་མདོག་དམར་སྐྱ། བྱི་བཞིན་མདོག་ལྗང་གུ། མོན་གྲུ་མདོག་ནག་པོ། མོན་གྲི་མདོག་སེར་པོ། ཁྲུམས་སྟོང་མདོག་ལྗང་གུ། ཁྲུམས་སྨད་མདོག་སེར་པོ། ནམ་གྲུ་མདོག་སེར་སྐྱ་སྟེ། རྒྱུ་སྐར་ཉི་ཤུ་ [165b.6]རྩ་བརྒྱད་པོ་དེ་དག་ཐམས་ཅད་ཀྱང་རྒྱན་དང་ལྡན་ཞིང་གོས་གྱོན་པ། ཐལ་མོ་སྦྱར་བ། བུད་མེད་ཀྱི་གཟུགས་སུ་བྲིའོ། །ཚངས་པ་མ་ནི་ཚངས་པ་དང་འདྲ་བར་བྲིའོ། །དྲག་པོ་མ་ནི་དྲག་པོ་ལྟ་བུའོ། །ཁྱབ་འཇུག་མ་ནི་ཁྱབ་འཇུག་ལྟ་བུའོ། །གཞོན་ནུ་མ་ནི་ཀཱརྟི་ཀ་ལྟ་བུའོ། །དབང་པོ་མ་ནི་བརྒྱ་བྱིན་ལྟ་བུའོ། །ཕག་མོ་ནི་མདོག་ [165b.7]ནག་པོ་སྟེ། ཡི་དགས་ལ་ཞོན་པ། ཉ་རློན་པ་དང་། ཐོད་པ་ལག་ན་ཐོགས་པའོ། །དགའ་བྱེད་མ་ནི་མདོག་དམར་པོ་ཡི་དགས་ལ་ཞོན་པ། ཀཱ་ཏི་ར་དང་ཐོད་པ་ལག་ན་ཐོགས་པའོ། །དེ་དང་ཉེ་བ་ཉིད་དུ་བྲི་བྷྲྀངྒི་རི་ཏི་བྲི་སྟེ། མ་མོ་བདུན་བྷྲྀ་ངྒི་རི་ཏི་དང་བཅས་པར་བྲི་བར་བྱའོ། །ཚོགས་ཀྱི་བདག་པོ་ནི་མདོག་དཀར་པོ་ལག་པ་བཞི་པ། [166a] [166a.1]གླང་པོ་ཆེའི་མདོག་ཅན་ལག་པ་གཡས་དང་གཡོན་པ་ན་ལ་དུ་དང་ལ་ཕུག་ཐོགས་པ། དེ་ལས་གཞན་པ་གཉིས་ན་མདུང་རྩེ་གསུམ་དང་དགྲ་སྟ་ཐོགས་པ། སྦྲུལ་སེར་མཁར་ཐོགས་པ། བྱི་ལ་ལ་ཞོན་པ། ཚོགས་དུ་མས་ཡོངས་སུ་བསྐོར་བ་བྲི་བར་བྱའོ། །ལྷ་གཞན་དག་ཀྱང་གཞལ་ཡས་ཁང་ན་ [166a.2]གནས་པར་བྲིའོ། །འདིར་ཡང་སྒོ་སྲུང་རྣམས་ནི་རྡོ་རྗེ་ལྕགས་ཀྱུ་ལ་སོགས་པ་དེ་དག་ཉིད་ཡིན་ནོ། །དེ་ལྟར་ན་ནམ་མཁའ་ལྟར་དྲི་མ་མེད་པ་ཤིན་ཏུ་ཡོངས་སུ་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་སྙིང་པོའི་དཀྱིལ་འཁོར་ཆེན་པོ་སེམས་ཅན་ཐམས་ཅད་ཀྱི་སངས་རྒྱས་ཉིད་ལ་སོགས་པའི་དངོས་གྲུབ་མ་ལུས་ཤིང་། མ་ཚང་བ་མེད་པར་བསྒྲུབ་པ་ལ་ [166a.3]སངས་རྒྱས་ཉིད་ལ་སོགས་པའི་འབྲས་བུ་མངོན་པར་འདོད་པ་རྣམས་ཀྱི་དཀྱིལ་འཁོར་དུ་འཇུག་པ་ལ་སོགས་པས་མངོན་པར་འདོད་པའི་དོན་རྫོགས་པར་འགྱུར་བས་དཀྱིལ་འཁོར་བྲི་བར་བྱ་བའི་ཕྱིར་དཀྱིལ་འཁོར་གྱི་ཆོ་ག་མདོར་བསྡུས་ནས་བྲི་བར་བྱའོ། །དེ་ནས་སྔར་ནམ་མཁའ་དྲི་མ་མེད་པ་ཤིན་ཏུ་ཡོངས་སུ་དག་པ། ཆོས་ཀྱི་དབྱིངས་ [166a.4]ཀྱི་ཡེ་ཤེས་ཀྱི་སྙིང་པོ་ཞེས་བྱ་བའི་དཀྱིལ་འཁོར་ཆེན་པོར་དབང་བསྐུར་ཞིང་རྗེས་སུ་གནང་བ་ཐོབ་པའི་སློབ་དཔོན་གྱིས་གང་གི་ཚེ། སློབ་མས་ལན་གཉིས་ལན་གསུམ་དུ་གསོལ་བ་བཏབ་པར་གྱུར་ན། དེའི་ཚེ་འདི་ལྟར་ཡིད་ལ་བྱ་སྟེ། ངས་ཆོས་ཀྱི་དབྱིངས་ཀྱི་ཡེ་ཤེས་ཀྱིས་བསྡུ་བས་སེམས་ཅན་ཐམས་ཅད་བསྡུ་བར་བྱའོ། །འདི་ལ་ [166a.5]ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྦྱིན་པར་བྱའོ་ཞེས་བསམ་མོ། །དེ་ནས་སློབ་མ་དེ་ལ་ཆེ་གེ་མོ་ཞེས་བྱ་བ་ཁྱོད་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྙིང་པོའི་དཀྱིལ་འཁོར་ཆེན་པོར་འཇུག་པར་འདོད་དམ་ཞེས་དྲི་བར་བྱའོ། །གལ་ཏེ་བདག་འཚལ་ལོ་ཞེས་ཟེར་ན། དེས་ཀྱང་ [166a.6]དཀྱིལ་འཁོར་གྱི་ཡོ་བྱད་ཚོགས་སམ། འོན་ཏེ་མ་ཡིན་ཞེས་དྲི་བར་བྱའོ། །གལ་ཏེ་ཅུང་ཟད་ནི་ཆོགས་སོ་ཟེར་ན། དེ་ནས་དེའི་ལྟེ་བར་ཉི་མའི་དཀྱིལ་འཁོར་དེའི་སྟེང་དུ་འོད་ཟེར་འབར་བའི་ཕྲེང་བ་ཀུན་དུ་འཁྲིགས་པའི་ཡི་གེ་ཧཱུཾ་བསམ་པ་དང་། སྙིང་གར་ཡང་ལས་ཀྱི་སྒྲིབ་པའི་ངོ་བོ་ཡི་གེ་ཀ་ནག་ [166a.7]པོར་བསམས་ལ་ཡི་གེ་ཧཱུཾ་གི་འབར་བའི་འོད་ཀྱིས་གྱེན་དུ་འབྱིན་པར་བྱེད་ཅིང་སྣ་བུག་གཡས་པ་ནས་ངེས་པར་འབྱུང་བ་ནི་གཅེར་བུ་གཟུགས་མི་སྡུག་པ་གསུས་པ་འཕྱང་བ། སྐྲ་གྱེན་དུ་བརྫེས་པ་བྱུང་བ་དང་། ཡི་གེ་ཧཱུཾ་ཡང་སྙིང་གར་ཕྱིན་པ་དང་། རྡོ་རྗེ་གནོད་སྦྱིན་གྱི་གཟུགས་ཀྱི་སྣ་ཁུང་དེ་ཉིད་ནས་བྱུང་ནས་ [166b] [166b.1]གསང་སྔགས་དེ་ཟ་བར་གྱུར་པར་བསམ་པར་བྱའོ། །ཨོཾ་བཛྲ་ཡཀྵ་ཁཱ་ད་ཡ་ཁཱ་ད་ཡ། སརྦ་པཱ་པཾ་ཨཱ་བ་ར་ཎ་ཨཱ་སྱ་ཧཱུཾ་ཕཊ། ཡང་ན་ཧཱུཾ་ལས་བྱུང་བའི་རོ་སྟོད་ཁྲོ་བོའི་གཟུགས་ལ་རོ་སྨད་རྡོ་རྗེ་རྩེ་གཅིག་པའི་དབྱིབས་སུ་གནས་པའི་ཕུར་བུས་གསང་སྔགས་འདི་དང་དེ་ཉིད་དུ་ཕུར་བུས་གདབ་པར་བྱའོ། ། [166b.2]ཨོཾ་བཛྲ་ཀཱི་ལི་ཀཱི་ལ་ཡ། སརྦ་བིགྷཱཾ་བནྡྷ་བནྡྷ་ཧཱུཾ་ཕཊ། དེ་ནས་སློབ་མ་དེ་སཾ་ལས་བྱུང་བའི་ཀུན་དུ་བཟང་པོའི་གཟུགས་སུ་བསམས་ལ། དེའི་སྤྱི་བོར་ཧཾ་ཕྱུང་བའི་སྣ་ཚོགས་རྡོ་རྗེ་བསྲུང་བའི་དོན་དུ་བསམ་པར་བྱ་སྟེ། དེ་ལྟར་བྱས་ན་ནང་གི་བདག་ཉིད་ཅན་གྱི་བགེགས་རྣམས་འབྱུང་བར་ [166b.3]མི་འགྱུར་རོ། །ཡོ་བྱད་མ་ཚོགས་པ་རྣམས་ཀྱང་བདེ་བླག་ཏུ་ཚང་བར་འགྱུར་རོ། །སློབ་མ་ཡོངས་སུ་གཟུང་བའི་ཆོ་གའོ། །དེ་ནས་རྡོ་རྗེ་ཧཱུཾ་མཛད་ཀྱི་སྦྱོར་བ་དང་ལྡན་པས་གྲོག་མཁར་གྱིས་དང་། སྐྲ་དང་ཕུབ་མ་ལ་སོགས་པ་ལས་རང་རང་གི་ཕྱོགས་སྐྱོང་གི་གཟུགས་བརྙན་བྱ་སྟེ། དཀྱིལ་འཁོར་ [166b.4]གྱི་བགེགས་བྱེད་པ་རྣམས་སྔགས་འདིས་བཀུག་ལ་བཅུག་སྟེ། བཅིངས་ལ་ཕུར་བུས་ལེགས་པར་བཏབ་སྟེ། ཧཱུཾ་བཞི་བའི་སྔགས་བཟླས་པའི་ཡུངས་ཀར་གྱིས་བསྣུན་ལ་གཞག་པར་བྱའོ། །ཁྲོ་བོའི་ཁུ་ཚུར་གཉིས་རྒྱབ་སྦྱར་བ་བྱས་ལ་མཐེའུ་ཆུང་གཉིས་ལྕགས་སྒྲོག་ལྟ་བུར་མདུད་དེ། མཛུབ་ [166b.5]མོ་གཡས་པ་ལྕགས་ཀྱུར་བྱས་ལ་བཞག་པ་ནི་རྡོ་རྗེ་ལྕགས་ཀྱུའི་ཕྱག་རྒྱ་སྟེ་སྔགས་ལ། ཨོཾ་བཛྲ་ཨཾ་གུ་ཤ་མ་ཧཱ་ཀྲོ་དྷ་ཨཱ་ཀཪྵ་ཡ་སརྦ་ས་མ་ཡཾ་ཧཱུཾ་ཛཿ། དེ་ཉིད་དང་མཛུབ་མོ་གཉིས་རྩེ་སྤྲད་ནས་ཞགས་པ་དང་འདྲ་བར་བཞག་པ་ནི་རྡོ་རྗེ་ཞགས་པའི་ཕྱག་རྒྱ་སྟེ། སྔགས་ལ་ཨོཾ་བཛྲ་པཱ་ཤ་མ་ཧཱ་ཀྲོ་དྷ་པྲ་བེ་ཤ་ [166b.6]ཡ་སརྦ་ས་མ་ཡ་ཧཱུཾ་ཧཱུཾ། དེ་ཉིད་ལས་མཛུབ་མོ་གཉིས་ལུ་གུ་རྒྱུད་ལྟར་མདུད་པ་ནི་རྡོ་རྗེ་ལྕགས་སྒྲིག་གི་ཕྱག་རྒྱ་སྟེ། སྔགས་ལ། ཨོཾ་བཛྲ་སྥོ་ཊ་མ་ཧཱ་ཀྲོ་དྷ་བནྡྷ་ཡ་སརྦ་ས་མ་ཡ་ཧཱུཾ་བཾ། དེ་ནས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིང་ས་ལ་དེ་རྣམས་ཀྱི་མགོ་ལ་ཡི་གེ་ཧཱུཾ་བཀོད་དེ། སྔ་མ་བཞིན་དུ་རྡོ་རྗེ་ཕུར་བུ་བསྐྱེད་ལ། རྐང་པའི་མཐར་ཐུག་པའི་བར་དུ་ཕུར་ [166b.7]བུས་གདབ་པར་བསམས་ཏེ། བཀའ་བསྒོ་བའི་ཚུལ་གྱིས་སྔགས་འདི་བརྗོད་པར་བྱའོ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣམ་བནྡྷ་ཧཱུཾ་ཕཊ། དེ་ནས་བཛྲ་ཀཱི་ལི་ཀཱི་ལ་རུ་ཊ་མ་ཊ། ཞེས་བྱ་བ་ལན་བདུན་བཟླས་པའི་ཡུངས་ཀར་ཡི་གེ་ཧཱུཾ་འབར་བ་ལྟ་བུས་བརྡེག་པར་བྱ་སྟེ། ཆོ་ག་འདི་ནི་ཇི་སྲིད་དཀྱིལ་འཁོར་ཞག་གི་བར་དུ་ཉིན་རེ་ཞིང་ཉི་མ་གུང་ལ་བྱའོ། །ཕ་རོལ་གྱི་བགེགས་ [167a] [167a.1]གཞོམ་པའི་ཆོ་གའོ།། །།དེ་ནས་ཡིད་དང་རྗེས་སུ་མཐུན་པའི་གནས་སུ་སྤོས་ཆུ་ལ་སོགས་པས་ཉེ་བར་བྱུགས་ཤིང་མེ་ཏོག་སིལ་མ་གཏོར་ལ་བདུག་སྤོས་དྲི་ཞིམ་པོས་བདུག་པ་དང་། ཅི་སྙེད་པའི་མཆོད་པ་རྣམ་པ་ལྔ་དང་ལྡན་པ་དག་ཏུ་སྟན་ནང་ཚངས་ཅན་འཇམ་པ་ལ་འདུག་སྟེ། སྔགས་འདི་དག་ [167a.2]གིས་སྡིག་པ་བཤགས་པ་ལ་སོགས་པ་བྱའོ། །ཨོཾ་སརྦ་པཱ་པཾ་ཀ་པི་ཀ་པི་ཀ་པི་ཅི་ཀ་མ་ན་སོ་བྷཱ་ཏཾ་རཱ་ག་དེ་ཤ་མོ་ཧ་མཱ་ད་མ་ན་ཨ་བྷིཥྛི་ན་ཡ་རྐྲི་ཏཾ་ཏྲེ་ཀཱ་ལི་ཀཾ །ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ། སརྦ་པཱ་པ་སྤོ་ཊ་ཡཱ་མི་སྭཱ་ཧཱ། ཨོཾ་སརྦ་པཱ་པཾ་པྲ་ཏི་དེ་ཤ་མི་སྭཱ་ཧཱ། སརྦ་ཏ་ཐཱ་ག་ཏ་ནཾ། ཨ་ཏྨ་བྷ་བ་ན་ནིརྱཱ་ཏ་ [167a.3]ཡཱ་མི། སརྦ་ཏ་ཐཱ་ག་ཏ་པྲ་ཏི་གྲིཧྞཎ་ཏུ་མཾ་སྭཱ་ཧཱ། ཨོཾ་སརྦ་ཏ་ཐཱ་ག་ཏ་པུ་ཎྱེ་ཛྙ་ན་སཾ་བྷ་རཾ་ཨ་ནུ་མོ་དེ་ཡཱ་མི་སྭཱ་ཧཱ། ཨོཾ་སརྦ་ཏ་ཐཱ་ག་ཏ་ས་མནྟ་བྷ་དྲ་མ་ཧཱ་བཛྲ་ས་མ་ཡ་མ་ཧཱ་བོ་དྷི་ཙི་ཏྟོ་ཏྤཱ་ཏ་མུཏྤ་ད་ཡ་མི་སྭཱ་ཧཱ། དེ་ནས་ཨོཾ་སརྦ་ཏ་ཐཱ་ག་ཏ་ཤྭན་སི་ཏ་སརྦ་ས་ཏ་དྷཱ་ནཾ། སརྦ་སིདྡྷ་ཡ་སཾ་པ་ན་བྱན་ཏཾ་སརྦ་ཏ་ཐཱ་ག་ཏ་ཤྩ་ [167a.4]ཨདྷི་ཥྛ་ནཱ་ཏཾ། སྭ་བྷཱ་བ་ཤུདྡྷཿསརྦ་དྷ་རྨཱཿསྭཱ་བྷཱ་བ་ཤུ་དྡྷོ྅ཧཾ། ཞེས་བྱ་བས་ཕྱི་དེང་ནང་གི་ཆོས་ཐམས་ཅད་གཟོད་མ་ནས་མ་སྐྱེས་པ་རང་བཞིན་གྱིས་ཡོངས་སུ་དག་པ་ནམ་མཁའ་དང་མཉམ་པར་བསྒོམ་པར་བྱའོ། །དེ་ནས་བསོད་ནམས་དང་ཡེ་ཤེས་ཀྱི་ཚོགས་ཀྱིས་བསྒོམ་པའི་སེམས་ཉིད་ནམ་ [167a.5]མཁའི་ངོས་ཀྱི་དབུས་སུ་ཆུད་པ་འོད་ཀྱི་དྲ་བ་ཆེན་པོ་དང་ལྡན་པའི་པདྨ་དང་ཟླ་བའི་དཀྱིལ་འཁོར་དུ་གྱུར་པ་ལ་དེའི་སྟེང་དུ་ཤེས་རབ་དང་ཐབས་ཀྱི་བདག་ཉིད་ཅན་གྱི་ཡི་གེ་མུ་ཁ་དོག་དམར་སྐྱ། དེ་བཞིན་གཤེགས་པ་དཔག་ཏུ་མེད་པའི་འོད་ཟེར་འཕྲོ་བའོ། །དེ་ཡོངས་སུ་གྱུར་པ་ལས་རྗེ་ [167a.6]བཙུན་འཇམ་དཔལ་ཟླ་བ་ལྟ་བུའི་སྐུ་དང་ལྡན་པ། པདྨ་དང་ཟླ་བའི་སྟེང་དུ་རྡོ་རྗེ་སྐྱིལ་མོ་ཀྲུང་གིས་བཞུགས་པ། ཕྱག་གཡས་གཉིས་ན་རལ་གྲི་དང་། མདའ་བསྣམས་པ། ཕྱག་གཡོན་གཉིས་ན་ཤེས་རབ་ཀྱི་ཕ་རོལ་དུ་ཕྱིན་པའི་གླེགས་བམ་དང་གཞུ་བསྣམས་པ་ཉིད་དེ། ཤེས་ [167a.7]རབ་རལ་གྲི་མདའ་གཞུ་ཐོགས། །ཞེས་བྱ་སྟེ། སངས་རྒྱས་ལྔའི་ཅོད་པན་ཅན་མངའ་བ། བྱིས་པའི་རྒྱན་ཐམས་ཅད་ཀྱིས་བརྒྱན་པ། དེ་བཞིན་གཤེགས་པ་རྣམས་དང་། ཁྲོ་བོ་དང་། བྱང་ཆུབ་སེམས་དཔའ་དང་། རིག་པའི་ལྷ་མོ་ཐམས་ཅད་སྤྲོ་བ་དང་། བསྡུ་བའི་བདག་ཉིད་ཅན་དུ་བདག་ཉིད་ [167b] [167b.1]རྣམ་པར་བསམས་ལ། སྙིང་ག་དང་སྨིན་མཚམས་དང་། ལྐོག་མ་དང་སྤྱི་བོ་རྣམས་སུ་རྡོ་རྗེ་དང་རིན་པོ་ཆེ་དང་། པདྨ་དང་སྣ་ཚོགས་རྡོ་རྗེ་དག་ལ་རྡོ་རྗེ་སེམས་མ་དང་། རིན་ཆེན་སེམས་མ་དང་། ཆོས་ཀྱི་སེམས་མ་དང་། ལས་ཀྱི་སེམས་མའི་ངོ་བོ་ཉིད་དེ། ཕྱག་རྒྱ་བཞིས་རྒྱས་བཏབ་པར་ [167b.2]བདག་ཉིད་རྣམ་པར་བསམས་ལ། ས་མ་ཡ་སྟྭཾ་ཧཾ། ཞེས་བརྗོད་དོ། །དེ་ནས་མདུན་དུ་ཡི་གེ་ཧྲཱིཿལས་པདྨ་ཨ་ལས་ཟླ་བའི་དཀྱིལ་འཁོར་བསྐྱེད་ལ་ཡེ་ཤེས་སེམས་དཔའ་རྡོ་རྗེ་ལྕགས་ཀྱུ་ལ་སོགས་པས་བཀུག་ལ་བཅིངས་ཏེ། དབང་དུ་བྱ་བ་ནས་མཆོད་ཡོན་དང་ཞབས་བསིལ་དང་། [167b.3]མེ་ཏོག་དང་། སྤོས་དང་། མར་མེ་དང་། དྲི་ལ་སོགས་པས་ཡང་དག་པར་མཆོད་ལ། ལྟ་བ་ཉིད་དུ་བྱས་ནས་དེ་བཞིན་དུ་མཆོད་ཅིང་དབང་བསྐུར་ལ་རང་གི་ལུས་ལ་གཞུག་པར་བྱ་སྟེ། ཡེ་ཤེས་སེམས་དཔའ་དེ་བལྟས་ནས་རང་གི་ལུས་ལ་རྣམ་པར་བསྒོམ་ཞེས་གསུངས་པའི་ཕྱིར་རོ། །དེ་ནས་ [167b.4]གཅིག་ཏུ་གྱུར་པས་རྣམ་པ་ཐམས་ཅད་ཀྱི་མཆོག་དང་ལྡན་པ་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོས་བརྒྱན་པས་དེ་བཞིན་གཤེགས་པ་ཐམས་ཅད་ལ་སོགས་པའི་འཇིག་རྟེན་ལས་འདས་པའི་དཀྱིལ་འཁོར་གྱི་འཁོར་ལོ་སྤྲུལ་པར་བྱ་བའི་ཕྱིར་སངས་རྒྱས་ཐམས་ཅད་ཀྱི་ [167b.5]དབང་བསྐུར་བས་དབང་བསྐུར་བར་བདག་ཉིད་ཤེས་ནས་རྡོ་རྗེ་འཁོར་ལོའི་ཕྱག་རྒྱ་བཅིངས་ལ། གན་རྐྱལ་དུ་ཁར་བཞག་སྟེ། ཐམས་ཅད་བསྐོར་ལ་སྔགས་འདི་ལན་བདུན་བཟླས་པར་བྱའོ། །ཨོཾ་བཛྲ་ཙ་ཀྲ་ཧཱུཾ་ཕྱག་རྒྱ་ནི་རྡོ་རྗེ་ཁུ་ཚུར་གཉིས་བཅིངས་ལ། མཛུབ་མོ་དང་མཐེའུ་ཆུང་གཉིས་ [167b.6]ལུ་གུ་རྒྱུད་ལྟར་བྱས་པ་ནི་རྡོ་རྗེ་འཁོར་ལོའོ། །དེ་ནས་དཀྱིལ་འཁོར་གྱི་འཁོར་ལོ་མ་ལུས་པ་མངོན་སུམ་བཞིན་དུ་ཡང་དག་པར་བལྟས་ལ། འོག་ནས་བཤད་པའི་མཆོད་པའི་ཁྱད་པར་རྣམས་ཀྱིས་ལེགས་པར་མཆོད་དེ། རྗེ་བཙུན་གྱི་མཚན་ཡང་དག་པར་བརྗོད་པ་ཐུན་བཞིའི་རིམ་ [167b.7]གྱིས་ཇི་སྲིད་དུ་མཐོང་བར་གྱུར་པ་དེ་སྲིད་དུ་བཟླ་བར་བྱ་བའམ། མཚན་མ་བྱུང་བའམ། དཀྱིལ་འཁོར་བྲི་བའི་ཕྱིར་རྨི་ལམ་མཐོང་གི་བར་དུ། ཨོཾ་བཛྲ་ཏཱི་ཀྵ་ཞེས་བྱ་བ་ལ་སོགས་པའམ། གསང་སྔགས་གཞན་དག་བཟླ་བའམ། རྣམ་པ་ཐམས་ཅད་ཀྱི་མཆོག་དང་ལྡན་པ་སྤྲོ་བ་དང་ [168a] [168a.1]བསྡུ་བའི་བདག་ཉིད་ཅན་སྐད་ཅིག་མའི་ཡེ་ཤེས་ལས་བྱུང་བའི་རྗེ་བཙུན་འཇམ་དཔལ་དུ་བདག་ཉིད་བསམས་ལ། དངོས་པོ་ཐམས་ཅད་ཀྱི་ངོ་བོ་ཉིད་སེམས་ཙམ་གྱི་སྤྲུལ་པ་ཁོང་དུ་ཆུད་པས་སེམས་ཀྱི་སྤྲུལ་པའི་དཀྱིལ་འཁོར་གྱི་འཁོར་ལོ་ཡང་དག་པར་བལྟས་ལ་ཇི་སྲིད་ [168a.2]མཚན་མ་བྱུང་བར་གྱུར་པ་དེ་སྲིད་ཀྱི་བར་དུ་མཚན་ཡང་དག་པར་བརྗོད་པ་བཀླག་པར་བྱའོ། །སྔོན་དུ་བསྙེན་པའི་ཆོ་ག་མདོར་བསྡུས་པའོ། །དེའི་འོག་ཏུ་ཉིན་རེའམ། ཟླ་བ་རེའམ། ལོ་རེ་ཉིད་དུ་ཇི་ལྟར་མངོན་པར་དགའ་བར་བསྒྲུབ་ཅིང་ཟླ་བ་ཡར་གྱི་ངོ་ལ་ཆོ་ག་བཞིན་དུ་དཀྱིལ་འཁོར་བྲི་བར་བྱའོ། ། [168a.3]དེ་ལ་རྒྱལ་པོས་ནི་ཁྲུ་བརྒྱའམ། ཁྲུ་ལྔ་བཅུའོ། །བློན་པོའམ་བློན་པོ་ཆེན་པོ་རྣམས་ཀྱིས་ནི་ཁྲུ་ལྔ་བཅུའམ། ཉི་ཤུ་རྩ་ལྔའོ། །དེད་དཔོན་ནམ། ཚོང་དཔོན་ཆེན་པོ་རྣམས་ཀྱིས་ནི་ཉི་ཤུ་རྩ་ལྔའམ། དེའི་ཕྱེད་དོ། །སྒྲུབ་པ་པོ་རྣམས་ཀྱིས་ནི་ཁྲུ་བཅུ་གཉིས་སམ། ཁྲུ་དྲུག་པའམ། ཅི་ནུས་པར་བྱའོ། ། [168a.4]དེ་ལ་དང་པོར་རེ་ཞིག་ཡོ་བྱད་ཐམས་ཅད་ཡང་དག་པར་ལྡན་པས་མངོན་པར་འདོད་པའི་དཀྱིལ་འཁོར་གྱི་སའི་དབུས་སུ་མི་རུས་ཀྱི་ཕྱེ་མའི་སྦྱིན་སྲེག་གིས་དཀྱིལ་འཁོར་གྱི་བགེགས་མངོན་པར་བསལ་ལ། བདག་དང་སློབ་མ་ལ་སོགས་པས་ཞི་བའི་སྦྱིན་སྲེག་བྱའོ། །དེ་ནས་ས་སྦྱང་ [168a.5]བར་བྱ་སྟེ། འདོམ་གང་ཙམ་མམ་ཁྲུ་གང་ཙམ་འོག་ཏུ་བརྐོས་ལ་དྲི་ཞིམ་པོའི་ཆུས་གཏོར་བའི་སས་སླར་བཀང་ལ། རྡོ་རྗེ་རྩེ་མོས་མངོན་པར་བསྔགས་པའི་སྤོས་ཆུས་ཆག་ཆག་བཏབ་སྟེ། ཀུན་དུ་བརྡུངས་ལ་ཤིན་ཏུ་མཉམ་པ་ཁང་པ་བརྩེགས་པའི་ནང་དུ་ཆུད་པ་རྟ་བབས་བཞིས་ [168a.6]མཛེས་པར་བྱས་ལ། སྒོ་བཞི་དང་སྐར་ཁུང་དྲ་བ་ཅན་ལ་སོགས་པས་ཡོངས་སུ་བསྐོར་བ་ལ་མཐའ་མ་རྣམས་སུ་ལེགས་པར་བྲིས་ཤིང་དྲིལ་བུ་བཏགས་པའི་རྒྱལ་མཚན་བཟང་པོ་གཟུགས་པ་དང་། བླ་རེ་དམ་པ་བྲེ་བ་དང་། སངས་རྒྱས་རིན་པོ་ཆེ་ལ་སོགས་པའི་རས་རིས་ཀྱིས་ཉེ་བར་ [168a.7]མཛེས་པར་བྱས་པ་བའི་ལྕི་བས་ཡང་དག་པར་སྦྱངས་ཤིང་དྲིས་ཉེ་བར་བྱུགས་པ་དང་། མཚམས་བཞིར་སྤོས་ཁང་བཞག་པ་དང་། མེ་ཏོག་དང་གོས་ལ་སོགས་པས་ཉེ་བར་མཛེས་པར་བྱས་ལ། །ལག་པ་ས་ལ་བཞག་སྟེ། ཧཱུཾ་བཞི་པ་དང་། ཡི་གེ་བརྒྱ་པ་ལན་བདུན་ཡོངས་སུ་བཟླས་པར་ [168b] [168b.1]བྱའོ། །དེ་ནས་ཁྲུས་བྱས་ཤིང་དྲིས་བྱུགས་ལ་གོས་དམར་པོའི་སྟོད་གཡོགས་དང་། ཟེའུ་ཀ་བཅིངས་ལ་མེ་ཏོག་གི་ཕྲེང་བ་གདགས་ཤིང་གདོང་དྲི་ཞིམ་པོས་བྱུགས་ལ་གདུ་བུ་དང་། རྣ་རྒྱན་ལ་སོགས་པས་བདག་ཉིད་ལེགས་པར་བརྒྱན་ཏེ། ཟླ་བ་ཉ་བ་ནས་བརྩམས་ནས། ཕྱི་མའི་ [168b.2]ཉའི་བར་དུ་དཀྱིལ་འཁོར་གྱི་ལས་བྱས་པའམ། ཡར་གྱི་ངོ་ལ་ཚེས་གཅིག་ནས་བརྩམས་པའམ། དེ་བཞིན་ཉིད་ཚེས་བརྒྱད་དང་། ཚེས་དགུ་དང་། ཚེས་བཅུ་གསུམ་དང་ཚེས་བཅུ་བཞི་རྣམས་ལ་བརྩམས་ནས་ཉའི་བར་དུའམ། སྔ་དྲོའི་དུས་སུ་བརྩམས་ནས་བྱའོ། །དེ་ལ་དང་ [168b.3]པོར་དཀྱིལ་འཁོར་གྱི་སའི་དབུས་སུ་འདུག་ལ་བགེགས་བསལ་བ་ལ་སོགས་པ་བྱ་སྟེ། སེམས་དཔའི་སྐྱིལ་མོ་ཀྲུང་དུ་འདུག་ནས། དེ་ཉིད་ཀྱིས་ན་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ལྟར་ [168b.4]མཆོག་ཏུ་དམ་ཚིག་གསུམ་ཐོབ་པའི་སློབ་དཔོན་གྱིས་རང་གི་ཕྱག་རྒྱས་རྡོ་རྗེ་དང་དྲིལ་བུ་བཟུང་ལ། སེམས་ཅན་ཐམས་ཅད་ལ་ཕན་པའི་ཆོ་གའི་བྱ་བ་བྱས་ཏེ། རྟོག་པ་ཀུན་ལ་ཡང་དག་འཇུག །དཀྱིལ་འཁོར་ཐམས་ཅད་བསྒྲུབ་པ་ནི། །དམ་ཚིག་ཆེན་པོ་གསུམ་ཞེས་བྱ། །རྒྱ་འདི་ [168b.5]གསང་སྔགས་བསྒྲུབ་པའོ། །དངོས་གྲུབ་ཆོ་ག་ཐམས་ཅད་ལ། །རྡོ་རྗེ་དྲིལ་བུ་རབ་བསྐུལ་བས། །ཆོ་ག་ལྷག་གམ་མ་ཚང་ཡང་། །འགྲུབ་འགྱུར་སྨད་པར་མི་བྱའོ། །དེ་ཡང་དང་པོ་སའི་ལྷ་མོ་ཡི་གེ་པཾ་ལས་བྱུང་བ་ལག་ན་བུམ་པ་ཐོགས་པ་རྒྱན་ཐམས་ཅད་ཀྱིས་བརྒྱན་པ་བསམས་ལ། འདོད་ [168b.6]པའི་རྒྱལ་པོས་བཀུག་སྟེ། མེ་ཏོག་ལ་སོགས་པས་མཆོད་ནས་གསོལ་བ་གདབ་པར་བྱའོ། །དེ་ལ་ཕྱག་རྒྱ་དང་སྔགས་འདི་ཡིན་ཏེ། རྡོ་རྗེ་ཁུ་ཚུར་གཉིས་རྒྱབ་སྦྱར་ལ་མཛུབ་མོ་དང་། མཐེའུ་ཆུང་གཉིས་མདུད་པ་བྱ་བ་ནི་འདོད་པའི་རྒྱལ་པོའི་ཕྱག་རྒྱ་སྟེ། སྔགས་ལ་ཊཀྐི་ཧཱུཾ་ཛ། དེ་ནས་ [168b.7]འདི་སྐད་བརྗོད་དོ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་གྱི་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ཀྱི་སྡེ། །བཅོམ་པར་བྱས་ཏེ་དཀྱིལ་འཁོར་ [169a] [169a.1]བྲི། །ཞེས་ལན་གསུམ་བརྗོད་དོ། །དེ་ནས་དེ་ཉིད་དུ་ཐིམ་པར་གྱུར་པར་བསམས་ལ། དེའི་སྟེང་དུ་རྡོ་རྗེ་བཅིང་ག་བ་ཐུར་དུ་བསྟན་ཏེ་བཅིངས་ལ་བཞག་སྟེ། ཨོཾ་བཛྲཱི་བྷ་བ་ཧཱུཾ། ཞེས་ལན་གསུམ་བརྗོད་དོ། །དེ་ནས་རྡོ་རྗེ་བཅིང་བ་ལས་བྱུང་བའི་ཧཱུཾ་འབར་བའི་ཚོགས་ཀྱི་ས་གཞི་ [169a.2]གཏན་པ་ལ་ཐུག་གི་བར་དུ་རྡོ་རྗེར་གྱུར་པར་རྣམ་པར་བསམས་ལ་འདི་སྐད་དོ། །དྲྀ་ཌྷ་བཛྲ་ཏིཥྛ། དེ་ནས་དང་པོའི་སྦྱོར་བ་དང་དཀྱིལ་འཁོར་གྱི་རྒྱལ་མཆོག་དང་ལས་ཀྱི་རྒྱལ་མཆོག་ཅེས་བྱ་བའི་ཏིང་ངེ་འཛིན་གསུམ་བསྒོམ་པར་བྱ་སྟེ། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་ [169a.3]རྫོགས་པའི་བདག་ཉིད་ཅན། བྱང་ཆུབ་སེམས་དཔའ་ཆེན་པོའི་གཟུགས་སུ་འོག་མིན་གྱི་གཞལ་ཡས་ཁང་ན་གནས་ནས་མངོན་པར་བྱང་ཆུབ་མངོན་སུམ་དུ་བྱེད་ཅིང་། མི་གཡོ་བའི་ཏིང་ངེ་འཛིན་ལ་སྙོམས་པར་བཞུགས་པར་རིམ་པ་འདིས་བསམ་པར་བྱ་སྟེ། ཡང་དག་པར་རྫོགས་ [169a.4]པའི་བྱང་ཆུབ་ཅེས་བྱ་བའམ། ཕྱིན་ཅི་མ་ལོག་པར་ཡང་དག་པར་རྫོགས་པའི་བྱང་ཆུབ་པའི་མན་ངག་སྦྱིན་པར་བྱ་བའི་ཕྱིར་དེ་བཞིན་གཤེགས་པ་ཐམས་ཅད་ཡང་དག་པར་འདུས་པར་གྱུར་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཞེས་བྱ་བ་བྱང་ཆུབ་ཀྱི་སྙིང་པོར་ [169a.5]བཞུགས་པ་གང་ན་བ་དེར་གཤེགས་ཏེ། བྱང་ཆུབ་སེམས་དཔའ་དེ་ལ་ཆེད་དུ་བྱ་བ་རྫོགས་པ་ལོངས་སྤྱོད་རྫོགས་པའི་སྐུ་བསྟན་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་གང་གིས་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་མ་རྟོགས་པར་དཀའ་བ་སྤྱད་པ་ [169a.6]ཐམས་ཅད་ལ་སྤྲོ་བ་བསྐྱེད་ཅིང་། །ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱ་སྙམ་ཞེས་གསུང་ཞིང་གན་དུ་བྱོན་ཏེ། བཛྲོད་ཏིཥྛ་ཞེས་བྱ་བའི་སྔགས་དང་། སེ་གོ་ལ་བརྡབས་པས་སློང་བར་མཛད་པར་བསམ་མོ། །དེ་ནས་ལངས་ནས་མཆོག་ཏུ་ [169a.7]དད་པས། ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་བཛྲ་པྲ་ཎ་མྱ་ན་བཛྲ་བནྡྷ་ནཾ་ཀ་རོ་མི་ཞེས་བརྗོད་ལ་ཕྱག་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་བདག་གིས་མ་འཚལ་ན་དེ་ཁོ་ན་ཉིད་ཇི་ལྟ་བུ་ལགས། དེ་ལྟར་ན་བསྒྲུབ་པར་བགྱི། བཀའ་ [169b] [169b.1]སྩལ་དུ་གསོལ། དེ་ནས་རིགས་ཀྱི་བུ་རང་གི་སེམས་ལ་སོ་སོར་རྟོག་ཅིང་མཉམ་པར་ཞོག་ལ། རང་བཞིན་གྱིས་གྲུབ་པའི་སྔགས་འདི་ཅི་དགར་བཟླས་ཤིང་བསྒྲུབ་པར་གྱིས་ཤིག །ཅེས་གསུང་ཞིང་སེམས་སོ་སོར་རྟོགས་པའི་མན་ངག་དེ་སྩོལ་བར་བསམ་པར་བྱ་བ་ནི། ཨོཾ་ཙིཏྟ་པྲ་ [169b.2]ཏི་བེ་དྷི་ཀ་རོ་མི་ཞེས་བྱ་བ་ཕུང་པོ་དང་། ཁམས་དང་སྐྱེ་མཆེད་དང་། གཟུང་བ་དང་འཛིན་པ་ལ་སོགས་པའི་རྣམ་པར་རྟོག་པ་དང་བྲལ་བ། དེ་བཞིན་གཤེགས་པ་ཐམས་ཅད་དང་གཉིས་སུ་མེད་པ་དེ་ཁོ་ན་ཉིད་ཀྱི་ངོ་བོ་ཉིད་རྟོགས་པ་དེའི་བདག་ཉིད་ཀྱི་སེམས་སོ་སོར་རྟོགས་པ་དང་། སེམས་ [169b.3]ཀྱི་རིན་པོ་ཆེ་དེ་ཉིད་སྙིང་རྗེ་ཆེན་པོས་བརྒྱན་པ། དེ་བཞིན་གཤེགས་པ་ཐམས་ཅད་དང་མཉམ་པའི་མཚན་ཉིད་ཅན། ཟླ་བའི་དཀྱིལ་འཁོར་ལྟ་བུ་རང་གི་སྙིང་གར་བསྒོམ་པར་བྱའོ། །དེ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་བདག་གི་ [169b.4]སྙིང་ག་ན་ཟླ་བའི་དཀྱིལ་འཁོར་ལྟ་བུར་གདའ་བ་བདག་གིས་རྟོགས་སོ། །དེ་ནས་རིགས་ཀྱི་བུ་སེམས་དེ་ནི་རང་བཞིན་གྱིས་འོད་གསལ་བས་ན། དེ་ལྟ་བུར་སྦྱངས་པ་དེ་ལྟར་འགྱུར་ཏེ། དཔེར་ན་རས་དཀར་པོ་ལ་ཚོན་གྱིས་བསྒྱུར་བ་བཞིན་ནོ་ཞེས་བཀའ་སྩལ་ནས། [169b.5]སླར་ཡང་བྱང་ཆུབ་ཀྱི་སེམས་ཀྱི་མན་ངག་སྟོན་པར་མཛད་པར་བསམ་པ་ནི། ཨོཾ་བོདྷི་ཙི་ཏྟ་ཨུཏྤའ་ད་ཡཱ་མི་ཞེས་བྱའོ། །དེ་ནས་ཤིན་ཏུ་འོད་གསལ་བའི་སེམས་ཟླ་བའི་དཀྱིལ་འཁོར་གྱི་རྣམ་པར་ཡོངས་སུ་གྱུར་པ་ལས། རིམ་གྱིས་ཉེ་བར་འཕེལ་བར་འགྱུར་བ་དང་། ཟླ་བའི་དཀྱིལ་ [169b.6]འཁོར་ཡོངས་སུ་རྫོགས་པར་གྱུར་ཏོ། །དེ་ནས་འདི་སྐད་ཅེས་གསོལ་ཏོ། །ཟླ་བའི་དཀྱིལ་འཁོར་ལྟ་བུར་མཐོང་བ་གང་ལགས་པ་དེ་ནི་ཟླ་བའི་དཀྱིལ་འཁོར་ཉིད་དུ་མཐོང་ཞེས་བྱ་བ་སྟེ། ཤིན་ཏུ་རྣམ་པར་དག་ཅིང་ནམ་མཁའ་ལྟར་དྲི་མ་མེད་པ་ལ་སྤྲོས་པ་ཐམས་ཅད་པར་བྲལ་བ་མེ་ལོང་ལྟ་བུར་ [169b.7]རྣམ་པར་གནས་སོ། །ཨོཾ་ཛྙཱ་ན་ཤཤྨི་པྲི་སི་ཛ་ཧཱུཾ་ཞེས་བྱ་བའི་སྔགས་ཀྱིས་རྣམ་པར་སྤྲོས་ཏེ། ཟླ་བའི་དཀྱིལ་འཁོར་གང་བ་ལས་འོད་ཟེར་རྣམ་པ་སྣ་ཚོགས་པར་གང་ཞིང་བྱུང་སྟེ། བྱུང་བ་དེ་རྣམས་ཆོས་ཀྱི་དབྱིངས་ཀྱི་གཞལ་ཡས་ཁང་དུ་ཞུགས་ནས་ཤེས་བྱའི་དཀྱིལ་འཁོར་ཐམས་ཅད་ [170a] [170a.1]སྣང་བར་བྱ་སྟེ། སེམས་ཅན་ཐམས་ཅད་ཀྱི་སེམས་ཀྱི་རི་བོའི་རྩེ་མོ་བཅོམ་སྟེ། རྟོགས་པར་བྱས་ནས་རྡོ་རྗེ་ཆེན་པོའི་གཟུགས་གཅིག་ཏུ་གྱུར་ནས་བྱུང་སྟེ། རྩེ་ལྔ་པ་སྤྱི་བོ་ནས་ཐུགས་ཀར་བཞུགས་ཏེ། ཟླ་བའི་དཀྱིལ་འཁོར་ལ་རབ་ཏུ་གནས་སོ། །དེ་ནས་དེ་བཞིན་གཤེགས་ [170a.2]པ་ཐམས་ཅད་ཀྱི་སྙིང་པོ་སེམས་བསྐྱེད་པ་ཀུན་དུ་བཟང་པོ་ཁྱོད་ཀྱིས་མངོན་སུམ་དུ་གྱུར་གྱིས་དེ་ལེགས་པར་སྒྲུབས་ཤིག །དེ་བཞིན་གཤེགས་པ་ཐམས་ཅད་ཀྱི་སེམས་བསྐྱེད་པ་ཀུན་དུ་བཟང་པོ་དེ་བསྟན་པར་བྱ་བའི་ཕྱིར། སྔགས་འདིས་རང་གི་སྙིང་གའི་ཟླ་བའི་དཀྱིལ་འཁོར་ལ་རྡོ་རྗེའི་ [170a.3]དབྱིབས་སུ་སོམས་ཤིག །ཨོཾ་ཏིཥྛ་བཛྲ། ཡང་སྔགས་འདིས་སྤྲོ་བར་བྱའོ། །ཨོཾ་སྥར་བཛྲ། ཨོཾ་སཾ་ཧ་ར་བཛྲ། ཨོཾ་ཨོཾ་ཛྙཱ་ན་བཛྲ། ཨོཾ་སརྦ་ཏ་ཐཱ་ག་ཏ་ཛྙཱ་ན་བཛྲ་ཧཱུཾ་ཧཱུཾ། དེ་ནས་གསོལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་དུ་ཟླ་བའི་དཀྱིལ་འཁོར་གྱི་སྟེང་ན་རྡོ་རྗེར་བདག་ [170a.4]གིས་མཐོང་ངོ་། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཀུན་དུ་བཟང་པོའི་སེམས་རྡོ་རྗེ་འདི། སྔགས་འདིས་བརྟན་པར་བྱའོ། །ཨོཾ་བཛྲ་ཨཱཏྨ་ཀོ྅ཧཱཾ། དེ་ནས་ནམ་མཁའི་དབྱིངས་ཐམས་ཅད་དུ་མཉམ་པར་འཇུག་པའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ [170a.5]རྡོ་རྗེའི་དབྱིངས་ཇི་སྙེད་པ་དེ་དག་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་སེམས་དཔའི་རྡོ་རྗེ་དེར་ཞུགས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེའི་དབྱིངས་ཞེས་རྡོ་རྗེ་མིང་གི་དབང་གིས་དབང་བསྐུར་རོ། །དེ་ནས་བཅོམ་ལྡན་འདས་དེ་བཞིན་གཤེགས་ [170a.6]པ་ཐམས་ཅད་ཀྱི་སྐུ་ནི་བདག་ལགས་པར་མཐོང་ངོ་། །སེམས་དཔའ་ཆེན་པོ་དེ་ལྟ་བས་ན་དེ་བཞིན་གཤེགས་པ་ཐམས་ཅད་ཀྱི་སེམས་དཔའི་རྡོ་རྗེ་དེ་རྣམ་པ་ཐམས་ཅད་ཀྱི་མཆོག་དང་ལྡན་པའི་སངས་རྒྱས་ཀྱི་སྐུར་བདག་ཉིད་རང་བཞིན་གྱིས་གྲུབ་པའི་སྔགས་འདི་ཅི་དགར་ཟློས་ལ་ [170a.7]སྒོམས་ཤིག །ཨོཾ་ཡ་ཐ་སརྦ་ཏ་ཐཱ་ག་ཏ་སྟ་ཐཱ་ཨ་ཧཾ། དེ་ནས་བདག་ཉིད་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ [170b] [170b.1]ཀྱིས་བདག་ལ་བྱིན་གྱིས་རློབས་ལ་མངོན་པར་རྫོགས་པར་བྱང་ཆུབ་པ་འདི་བརྟན་པར་མཛོད་ཅིག། དེ་ནས་དེ་བཞིན་གཤེགས་པ་ཐམས་ཅད་དེ་བཞིན་གཤེགས་པ་རྡོ་རྗེ་དབྱིངས་ཀྱི་སེམས་དཔའི་རྡོ་རྗེ་དེར་ཞུགས་སོ། །དེ་ནས་སྐད་ཅིག་དེ་ཉིད་ཀྱི་ཚེ་ན་དེ་བཞིན་གཤེགས་པ་ཐམས་ཅད་ཀྱི་ [170b.2]མཉམ་པ་ཉིད་ཀྱི་ཡེ་ཤེས་མངོན་པར་རྫོགས་པར་སངས་རྒྱས་སོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་མཉམ་པ་ཉིད་ཀྱི་ཡེ་ཤེས་ཀྱི་ཡེ་ཤེས་ཀྱི་ཕྱག་རྒྱ་གསང་བའི་དམ་ཚིག་ཏུ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་རིན་པོ་ཆེ་དབང་བསྐུར་པ་མཉམ་པ་ཉིད་ཀྱི་ཡེ་ཤེས་ཀྱི་ཕྱག་རྒྱ་གསང་ [170b.3]བའི་དམ་ཚིག་ཏུ་ཞུགས་སོ། །དེ་བཞིན་གཤེགས་པ་ཐམས་ཅད་ཀྱི་ཆོས་མཉམ་པ་ཉིད་ཀྱི་ཡེ་ཤེས་རྟོགས་པས་རང་བཞིན་གྱིས་དག་གོ། །དེ་བཞིན་གཤེགས་པ་ཐམས་ཅད་ཀྱི་ལས་མཉམ་པ་ཉིད་ཀྱི་རང་བཞིན་གྱི་འོད་གསལ་བའི་ཡེ་ཤེས་ཀྱི་འབྱུང་གནས་སུ་གྱུར་པའི་དེ་བཞིན་ [170b.4]གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གྱུར་ཏོ། །དེ་ལྟར་སེམས་སོ་སོར་རྟོགས་པ་ནས་བརྩམས་ཏེ། དཀྱིལ་འཁོར་བ་རྣམས་ཀྱང་རང་རང་གི་བདག་ཉིད་དང་འདྲ་བར་འབྱུང་བར་བསམ་པར་བྱ་སྟེ། རང་གི་སེམས་ལས་ཐ་མི་དད་པའི་ངོ་བོ་ཉིད་ [170b.5]ཡིན་པའི་ཕྱིར་རོ། །ཡང་དེ་བཞིན་གཤེགས་པ་དེ་དག་ཐམས་ཅད་ཀྱི་སེམས་དཔའི་རྡོ་རྗེ་དེ་ལས་དེ་བཞིན་གཤེགས་པ་ཐམས་ཅད་བྱུང་ནས། དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ཀྱི་ཡེ་ཤེས་བསྐྱེད་དེ། ནམ་མཁའ་ལས་བྱུང་བའི་ནོར་བུ་རིན་པོ་ཆེའི་དབང་བསྐུར་ [170b.6]བས་དབང་བསྐུར། ཀུན་དུ་སྤྱན་རས་གཟིགས་དབང་པོས་ཆོས་ཀྱི་ཡེ་ཤེས་བསྐྱེད། དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཐམས་ཅད་ལ་རབ་ཏུ་བཞག་ནས། །དཀྱིལ་འཁོར་བའི་ལྷ་རྣམས་ཀྱིས་ཕྱོགས་བཞི་ནས་ཡོངས་སུ་བསྐོར་ཏེ། ལྷན་ཅིག་ཡང་དག་པར་ [170b.7]གནས་སོ། །དེ་ནས་གཞན་གྱི་དོན་མཛད་པའི་མངོན་པར་རྫོགས་པར་སངས་རྒྱས་པ་ཡིན་པས་བྱམས་པ་དང་སྙིང་རྗེའི་མིག་གིས་སེམས་ཅན་ཐམས་ཅད་ལ་བལྟས་པ་དང་མི་ཤེས་པ་ལས་འདོད་ཆགས་དང་། ཞེས་སྡང་དང་། གཏི་མུག་གིས་དཀྲུགས་པར་ཤེས་ནས་བདག་འདིར་ [171a] [171a.1]བབས་ལ་སྐལ་པ་ཇི་ལྟ་བ་བཞིན་དུ་དཀྱིལ་འཁོར་ལ་སོགས་པར་སྤྲུལ་པས་རྗེས་སུ་གཟུང་བར་བྱའོ་ཞེས་ཡིད་ལ་ངེས་པར་བྱས་ཏེ། རིམ་པ་འདིས་སྣོད་ཀྱི་འཇིག་རྟེན་བསྐྱེད་པར་བྱའོ། །ཧཱུཾ་ཡཾ་ཧཱུཾ། རླུང་གི་དཀྱིལ་འཁོར་རོ། །ཧཱུཾ་བཾ་ཧཱུཾ། ཆུའི་དཀྱིལ་འཁོར་རོ། །ཧཱུཾ་རཾ་ [171a.2]ཧཱུཾ། མེའི་དཀྱིལ་འཁོར་རོ། །དེ་ནས་ནམ་མཁའ་ལས་ཡི་གེ་ཁཾ་ལས་བཅོམ་ལྡན་འདས་རྣམ་པར་སྣང་མཛད་བསམས་ལ། དེའི་སྐུའི་ཡན་ལག་ཐམས་ཅད་ལས་ཆུའི་རྒྱུན་སྦོམ་པོ་བྱུང་བས་སྣོད་ཐམས་ཅད་ཡོངས་སུ་གང་བར་རྣམ་པར་བསྒོམས་ལ། བཅོམ་ལྡན་འདས་ཀྱང་དེ་ཉིད་དུ་ཐིམ་ [171a.3]པར་གྱུར་པར་རྣམ་པར་བསམས་ནས། མེ་དང་ཆུའི་བར་དུ་ཧཱུཾ་ལཾ་ཧཱུཾ་ཞེས་བྱ་བ་རྣམ་པར་བཀོད་ལ། དེ་བཀོད་པ་སྔོན་དུ་འགྲོ་བ་ལས་སྐུ་རྡོ་རྗེའི་ཏིང་ངེ་འཛིན་བརྟན་པར་གྱུར་པ་ལས་གསེར་གྱི་དཀྱིལ་འཁོར་དུ་བསྒོམ། དེའི་སྟེང་དུ་ཧཱུཾ་སུཾ་ཧཱུཾ་ཞེས་བྱ་བ་ལས་རིའི་རྒྱལ་པོ་རི་རབ་བསམ་ [171a.4]མོ། །དེའི་སྟེང་དུ་ཁཾ་ལས་ཁང་པ་བརྩེགས་མ་རྣམ་པར་བསམ་ལ། དེའི་དབུས་སུ་ས་བོན་འདི་རྣམས་ལས་པདྨ་ལ་སོགས་པའི་དཀྱིལ་འཁོར་བའི་ལྷའི་གྲངས་སྙེད་ཀྱི་གདན་རྣམ་པར་བསམ་པར་བྱ་སྟེ། ཡི་གེ་ཧྲཱིཿལས་ཐམས་ཅད་དུ་པདྨ་བསམ། ཨ་སི་ཨ་ཞེས་བྱ་བ་འདིས་ [171a.5]དབུས་སུ་འཁོར་ལོ་ཅན་གྱི་སེང་གེའི་གདན་ཤར་ལ་སོགས་པའི་ཕྱོགས་རྣམས་སུ། ཧཱུཾ་གཾ་ཧཱུཾ། ཏྲཾ་བཾ་ཏྲཾ། ཧྲི་མཾ་ཧྲི། ཨ་གཾ་ཨ། འདི་དག་ལས་གྲངས་ཇི་ལྟ་བ་བཞིན་དུ་གླང་པོ་ཆེ་དང་། རྟ་དང་། རྨ་བྱ་དང་། ནམ་མཁའ་ལྡིང་གི་གདན་རྣམས་བསྐྱེད་པར་བྱའོ། །དེ་ནས་མི་བསྐྱོད་པ་ལ་ [171a.6]སོགས་པ་དང་ལྷན་ཅིག་བབས་ཏེ། སེང་གེའི་གདན་ལ་ལེགས་པར་འདུག་སྟེ། མི་བསྐྱོད་པ་ལ་སོགས་པའི་སངས་རྒྱས་བཞི་གླང་པོ་ཆེའི་གདན་ལ་སོགས་པ་ཉེ་བར་གནས་པར་བསམས་ལ། བདག་ཉིད་ཞལ་བཞི་པ་བྱང་ཆུབ་མཆོག་གི་ཕྱག་རྒྱས་གནས་པར་བསྒོམ་ཞིང་བཅོམ་ [171a.7]ལྡན་འདས་རྡོ་རྗེའི་དབྱིངས་ནི་ང་ཡིན་ནོ་ཞེས་བྱ་བའི་ང་རྒྱལ་ཏེ། འདི་ནི་དང་པོ་སྦྱོར་བ་ཞེས་བྱ་བའི་ཏིང་ངེ་འཛིན་ཏོ།། །།རྗེ་བཙུན་འཇམ་དཔལ་རྣམ་པར་སྣང་མཛད་ཀྱི་ཚུལ་གྱིས་མངོན་པར་སངས་རྒྱས་ཏེ། རྡོ་རྗེ་དབྱིངས་ཞེས་བྱ་བ་ནི་མཚན་ཙམ་གྱིས་གཞན་དུ་གྱུར་པ་ཡིན་ [171b] [171b.1]པས་ན་ལོག་པར་ཁོང་དུ་ཆུད་པར་མི་བྱའོ། །དེ་ནས་དཀྱིལ་འཁོར་བ་རྣམས་རང་རང་གི་གནས་སུ་འོག་ནས་བཤད་པའི་སྙིང་པོས་ཕྱག་རྒྱ་ཆེན་པོའི་ཚུལ་དུ་གཞག་པར་བྱ་སྟེ། འདི་ནི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །དེ་ནས་དེ་བཞིན་གཤེགས་པ་ཐམས་ཅད་བྱིན་ [171b.2]གྱིས་བརླབ་པའི་རྡོ་རྗེ་བསྡུ་བའི་ཕྱག་རྒྱ་བཅིངས་ལ། ཨོཾ་བཛྲ་ས་མ་ཡཱ་ཛ་ཛཿཧཱུཾ་བཾ་ཧོཿཞེས་བརྗོད་ལ། སངས་རྒྱས་ཐམས་ཅད་འཁོར་གྱི་དཀྱིལ་འཁོར་དང་བཅས་པའི་ཚོགས་རྣམས་བྱོན་པ་དང་། ཞབས་ལ་ཕྱག་བྱ་བ་སྔོན་དུ་འགྲོ་བས་ཆེད་དུ་བརྗོད་པའི་ཚིགས་སུ་བཅད་པ་བརྗོད་མ་ [171b.3]ཐག་ཏུ་བདག་ཉིད་ཀྱི་ཕྱག་རྒྱ་བཞི་ལ་ཞུགས་པར་བསམ་མོ། །དེ་ལ་ཕྱག་འཚལ་བ་དང་། ཆེད་དུ་བརྗོད་པ་ནི་འདི་ཡིན་ཏེ། ཨོཾ་སརྦ་ཏ་ཐཱ་ག་ཏ་པཱ་ཏ་བནྡ་ནཾ་ཀ་རོ་མི་ཨེ་མའོ། །བྱང་ཆུབ་སེམས་དཔའ་ནི། ཀུན་དུ་བཟང་པོའི་སྤྱོད་པའི་མཆོག །དེ་བཞིན་གཤེགས་པའི་འཁོར་ལོ་ [171b.4]ཡི། །དབུས་ནས་དེ་བཞིན་གཤེགས་པས་མཛེས། །ཞེས་བྱ་བའོ། །དེ་ནས་ནུས་པ་མ་ལུས་པའི། །ཤུགས་ཀྱིས་བྱིན་གྱིས་བརླབས་ཏེ་བྱུང་ནས། དཀྱིལ་འཁོར་གྱི་ཕྱི་རོལ་ན་གནས་པའི་མི་བསྐྱོད་པ་ལ་སོགས་པའི་ཐུགས་ཀར་ཞུགས་ཏེ་ཆེད་དུ་བརྗོད་པ་འདི་ཆེད་དུ་བརྗོད་ཅིང་། ཆུ་དང་འོ་ [171b.5]མ་བཞིན་དུ་གཅིག་ཏུ་འདྲེས་པར་གྱུར་པས་གནས་པར་བསམ་མོ། །དེ་ལ་ཆེད་དུ་བརྗོད་པ་ནི་འདི་ཡིན་ཏེ། ཨེ་མ་འོ་སངས་རྒྱས་ཐམས་ཅད་ཀྱི། །རྒྱ་ཆེན་གདོད་ནས་སྐྱེ་བ་མིན། །རྡུལ་ཕྲན་ཐམས་ཅད་གྲངས་རྙེད་ཀྱི། །སངས་རྒྱས་རྣམས་ནི་གཅིག་ཏུ་གྱུར། །དེ་ནས་རྣལ་འབྱོར་པས་ [171b.6]དཀྱིལ་འཁོར་པའི་ལྷ་རྣམས་རང་གི་ལས་ལ་ཡང་དག་པར་སྦྱར་ནས། དེ་རྣམས་ཀྱི་ཐུགས་ཀའི་ཟླ་བ་ལ་སྔགས་ཀྱི་ཡི་གེའི་ཕྲེང་བ་བསམས་ལ། ལན་བདུན་ནམ་བརྒྱད་ཀྱིས་བཟླས་བརྗོད་བྱས་ནས། དེ་རྣམས་ཉིད་ཀྱིས་བདག་ཉིད་མཆོད་པར་གྱུར་པར་བསམས་པའམ། དེ་ལྟར་ [171b.7]དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེའི་དབྱིངས་ནི་ང་ཡིན་ནོ་ཞེས་མཆོག་ཏུ་ཡང་ང་རྒྱལ་བྱ་སྟེ། འདི་ནི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །དེ་ནས་དེ་བཞིན་གཤེགས་པ་ཐམས་ཅད་ཐལ་མོ་སྦྱར་ནས་ཅུང་ཟད་བཏུད་དེ། མཚན་བརྒྱ་རྩ་བརྒྱད་ཀྱིས་ [172a] [172a.1]བསྟོད་པ་སྔོན་དུ་འགྲོ་བ་དང་། དཀྱིལ་འཁོར་བྲི་བའི་ཕྱིར་གསོལ་བ་འདེབས་པར་བདག་ཉིད་ཚིགས་སུ་བཅད་པ་འདིས་བརྟག་པར་བྱའོ། །མཚན་བརྒྱ་རྩ་བརྒྱད་འདི་དག་གིས། །བདག་ཅག་གིས་ནི་བསྟོད་པ་ཡིས། །ཐེག་པ་ཆེན་པོ་རྟོགས་པ་ཡིས། །ཚུལ་ [172a.2]ཆེན་ཡང་ནི་རྒྱས་པར་མཛོད། །མགོན་པོ་ཁྱོད་ལ་གསོལ་བ་ནི། །སངས་རྒྱས་ཀུན་གྱི་འཁོར་ལོ་ཆེ། །དཀྱིལ་འཁོར་ཆེན་པོ་དམ་པ་ཡི། །ཆོ་ག་མཆོག་ནི་བཤད་དུ་གསོལ། །དེ་ནས་སྔགས་པས་ཡང་དག་པར་བྱིན་གྱིས་བརླབས་པའི་མཆོད་ཡོན་ལ་སོགས་པ་རང་གི་སྙིང་པོས་ [172a.3]མཆོད་ཡོན་ཕུལ་ལ། ལྷ་རྣམས་ཀྱི་འཁོར་ལོ་ཕྱག་རྒྱ་བཞིས་རྒྱས་གདབ་པར་བྱ་སྟེ། སྤོས་ལ་སོགས་པས་ཡང་དག་པར་མཆོད་ནས། སྙིང་རྗེ་ཆེན་པོས་ཡོངས་སུ་གདུངས་པའི་ཡིད་ཀྱིས་དཀྱིལ་འཁོར་གྱི་སྦྱོར་བས་གནས་ལ། འདི་ལྟར་བདག་ཉིད་སྤྲོ་བ་བསྐྱེད་པར་བྱའོ། །དེང་ནི་ [172a.4]བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །ལྷ་དང་དམ་ཚིག་གིས་མཉམ་པར། །གྱུར་པར་བདག་ནི་སོམ་ཉི་མེད། །བྱང་ཆུབ་སེམས་དང་སེམས་གཅིག་ལས། །མི་ལྡོག་པར་ནི་བདག་གྱུར་ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་ [172a.5]བར་ཐེ་ཚོམ་མེད། །དེང་བདག་ཉིད་མ་དམ་པ་སྟེ། །བདག་གི་མཆོད་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པས། །དེང་བདག་འདུས་པའི་མཆོག་ཡིན་ནོ། །དེ་ནས་ལུས་ཐམས་ཅད་ཀྱིས་ཕྱག་བྱས་ལ་བདུག་སྤོས་ཕུལ་ཏེ། སངས་རྒྱས་ཐམས་ཅད་ལ་གསོལ་བ་ [172a.6]གདབ་པར་བྱའོ། །མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། །བདག་མིང་འདི་ཞེས་བྱ་བ་ཡིས། །རྡོ་རྗེ་ཅན་གྱི་དཀྱིལ་འཁོར་བྲི། །དེང་འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདི་ནི་སྩལ་དུ་གསོལ། །ཞེས་བརྗོད་ལ། རང་ [172a.7]གི་དམ་ཚིག་ཕྱག་རྒྱས་བདག་ཉིད་ལན་ཅིག་བྱིན་གྱིས་བརླབས་ནས། རང་གི་སྔགས་དང་ཕྱག་རྒྱ་དག་གིས་འཁོར་ལོ་སྟེང་དུ་ནམ་མཁའ་ལ་གཞག་སྟེ། རྡོ་རྗེ་སེམས་དཔའི་སྦྱོར་བས་རང་གི་རྐང་མཐིལ་གཉིས་སུ་ཨ་ལས་སྣ་ཚོགས་རྡོ་རྗེ་བཀོད་ལ། རྐང་མཐིལ་ནས་ཡོངས་ [172b] [172b.1]སུ་བཟུང་སྟེ། རླུང་གི་དཀྱིལ་འཁོར་ནས་བརྩམས་ཏེ། རིའི་རྒྱལ་པོ་རི་རབ་ཀྱི་སྟེང་དུ་རྡོ་རྗེར་གྱུར་པར་ལྷག་པར་མོས་ལ། དབང་ལྡན་གྱི་ཕྱོགས་ནས་བརྩམས་ཏེ་བསྐོར་ལ། སྣ་ཚོགས་རྡོ་རྗེ་དེ་དག་ཉིད་ས་ལ་འབྲི་ཞིང་བགེགས་ཐམས་ཅད་སྐྲོད་པ་ལ་བརྩོན་པར་འགྲོ་བར་བྱའོ། ། [172b.2]འདིར་བཤད་པ། ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །བཛྲ་སཏྭ་ཞེས་བརྗོད་ནས། །བསྒྱིངས་པའི་ཚུལ་གྱིས་ཡོངས་སུ་བསྐོར། །སྔགས་པས་རྡོ་རྗེ་སེམས་ཟློས་ཤིང་། །རྡོ་རྗེ་ལྟ་བས་བལྟས་ནས་ནི། །དཀྱིལ་འཁོར་གྱི་ནི་ས་ཡི་ཆར། །ཉེས་ལྡན་ [172b.3]པ་ཡང་དག་པར་འགྱུར། །ཞེས་གསུངས་པས་སོ། །དེ་ནས་རྡོ་རྗེ་ཧཱུཾ་མཛད་ཀྱི་སྦྱོར་བ་དང་ལྡན་པས། རྡོ་རྗེ་ཧཱུཾ་མཛད་ཀྱི་ཕྱག་རྒྱས་སྙིང་ག་དང་། དཔྲལ་བ་དང་། ལྐོག་མ་དང་སྤྱི་བོར་བྱིན་གྱིས་བརླབས་ལ། གཡས་པས་ཁྲོ་བོའི་རྡོ་རྗེ་ཆེན་པོ་གསོར་ཞིང་། །གཡོན་པས་རྡོ་རྗེ་དྲིལ་བུ་གསིལ་ [172b.4]ནས་ཁྲོ་བས་འབར་བའི་ལུས་དང་། བསྐོར་བ་ལན་གསུམ་བྱས་ལ་འདི་སྐད་ཅེས་བརྗོད་པར་བྱའོ། །སློབ་དཔོན་མིང་འདི་ཞེས་བྱ་བས་སློབ་མ་ཆེ་གེ་ཞེས་བྱ་བ་རྫོགས་པའི་བྱང་ཆུབ་ཡོངས་སུ་རྫོགས་པར་བྱ་བའི་ཕྱིར་དང་། སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་འབྲས་ [172b.5]བུ་ཐོབ་པར་བྱ་བའི་ཕྱིར་ས་ཕྱོགས་འདིར་ནམ་མཁའ་ལྟར་དྲི་མ་མེད་པ་ཆོས་ཀྱི་དབྱིངས་ཀྱི་དཀྱིལ་འཁོར་ང་འདྲི་ཡིས། ལྷ་དང་ལྷ་མ་ཡིན་དང་། གནོད་སྦྱིན་དང་སྲིན་པོ་དང་ཡི་དགས་དང་། ཤ་ཟ་དང་། འབྱུང་བོ་དང་བརྗེད་བྱེད་དང་། མཁའ་འགྲོ་མ་དང་། གནོན་པོ་དང་། [172b.6]ནམ་མཁའ་ལྡིང་དང་། མིའམ་ཅི་དང་། རིག་སྔགས་གྲུབ་པ་རྒན་པོ་དང་། རྒན་མོ་གཡོག་དང་འཁོར་དུ་བཅས་པ་གང་དག་འཁོད་པ་རྣམས་དེངས་ཤིག །དེང་འདི་ལྟར་རྡོ་རྗེ་འཆང་གི་བཀའ་ཐོས་ནས་མྱུར་བ་ཉིད་དུ་དེངས་ཤིག །གང་དག་མི་འགྲོ་བ་དེ་དག་ངའི་ཡེ་ཤེས་ [172b.7]ཀྱི་རྡོ་རྗེས་མགོ་བོ་ཚལ་པ་བརྒྱར་རྣམ་པར་འགས་པར་བྱའོ་ཞེས་ལན་གསུམ་བརྗོད་པར་བྱའོ། །དེ་ནས་ལྷ་ལ་སོགས་པ་དེ་རྣམས་ས་དེ་སྤངས་ནས་སོང་བར་བསམས་ལ། རྡོ་རྗེ་ཁུ་ཚུར་བཅིངས་ནས་མཐེའུ་ཆུང་དང་མཛུབ་མོ་གཉིས་མདུད་པ་ལྟར་བྱས་ལ། ཁའི་སྟེང་དུ་ཁ་སྦུབ་སྟེ་ [173a] [173a.1]བཞག་ལ། མཐུན་པའི་རྐང་སྟབས་ལ་སོགས་པས་མཆོངས་ལ། ཧཱུཾ་བཛྲ་བཾ་ཧཱུཾ་ཞེས་བརྗོད་ལ་བྱིས་པ་གཞོན་ནུ་བཞིན་དུ་བདག་པོ་ལྔའི་གནས་སུ་ཡོངས་སུ་བསྐོར། དེ་ནས་སྣ་ཚོགས་རྡོ་རྗེ་བདག་ཉིད་བསམས་ལ། བདག་པོའི་གནས་སུ་རྐང་པ་གཉིས་དང་། ལག་པ་ [173a.2]གཉིས་ཐལ་མོ་སྦྱར་ཏེ། ཤར་ཕྱོགས་སུ་བལྟས་ནས་སྙིང་ག་ལ་རེག་པར་བྱས་ལ། དེ་བཞིན་དུ་གནས་ནས་ལག་པ་གཉིས་ཐད་ཀར་བརྐྱང་སྟེ། བདག་ཉིད་སྣ་ཚོགས་རྡོ་རྗེ་ཆེན་པོ་ཞིག་ཨ་ཞེས་བྱ་བས་བྱིན་གྱིས་བརླབ་བོ། །དེ་ནས་ཁྲོ་བོའི་ལྟ་བས་དཀྱིལ་འཁོར་བཅིང་ [173a.3]བ་དང་། ར་བ་དང་དྲ་བ་རྣམས་བྱའོ། །ཨོཾ་བཛྲ་ཛྭ་ལ་ཨ་ན་ལཱ་རྐ་ཧཱུཾ་ཞེས་བརྗོད་ལ་གཡོན་པའི་རྡོ་རྗེ་ཁུ་ཚུར་སྙིང་གར་བཞག་ནས། གཡས་པས་རྡོ་རྗེ་གསོར་ཏེ་བགེགས་རྣམས་གཞོམ་པར་བྱའོ། །ཡང་རྡོ་རྗེ་མེའི་ཕྱག་རྒྱ་དང་བཅས་པས་ཀྱང་བགེགས་བསྲེག་པ་ལ་སོགས་ [173a.4]པ་བྱ་སྟེ། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷ་ཉྫ་ར་ཎ་ཧཱུཾ་ཕཊ། རྡོ་རྗེ་བཅིང་བ་ནང་དུ་བྱས་པའི་སོར་མོ་རྣམས་ནང་དུ་འབར་བ་ལྟ་བུར་བྱས་ལ། མཐེ་བོ་རྡོ་རྗེ་ལྟར་བསྒྲེང་བ་འདི་ནི་རྡོ་རྗེ་མེའི་ཕྱག་རྒྱའོ། །ཨོཾ་བཛྲ་ནེ་ཏྲི་བནྡྷ་བིགྷྣཱན་ཞེས་བྱ་བས་བགེགས་རྣམས་བཅིང་བར་བྱའོ། ། [173a.5]རྡོ་རྗེ་བསྡམས་པ་ལས་མཐེ་བོ་གཉིས་བརྐྱང་སྟེ། མཉམ་པར་གཞག་པ་ནི་རྡོ་རྗེ་སྤྱན་གྱི་ཕྱག་རྒྱའོ། །རྡོ་རྗེ་བསྡམས་པ་བརྐྱང་བས་ལ་བཞག་ནས་འོག་ཕྱོགས་བཅིང་བར་བྱའོ། །ཨོཾ་བཛྲ་དྲྀ་ཌྷོ་མེ་བྷ་བ་རཀྵ་སརྦཾ་དྭཱ་ཧཱ། རྡོ་རྗེ་གནོད་སྦྱིན་གྱི་ཕྱག་རྒྱ་དང་བཅས་པས་ནམ་མཁའ་བཅིང་བར་ [173a.6]བྱའོ། །ཨོཾ་བཛྲ་ཡཀྵ་ཧཱུཾ། རྡོ་རྗེ་ཐལ་མོ་ལས་མཐེ་བོ་གཉིས་བརྐྱང་ལ། མཛུབ་མོ་གཉིས་མཆེ་བར་བྱས་བར་བྱས་པ་འདི་ནི་ཕྱག་རྒྱའོ། །ཡང་ན་རྡོ་རྗེ་འཇིགས་བྱེད་ཀྱི་སྤྱན་གྱི་སྟེང་དུ་ནམ་མཁའ་བཅིང་བར་བྱའོ། །ཨོཾ་ཧུ་ལུ་ཧཱུཾ་ཕཊ། རྡོ་རྗེ་ཁུ་ཚུར་གཉིས་བཅིངས་ལ་མགལ་མེའི་འཁོར་ལོ་བཞིན་དུ་ [173a.7]བསྐོར་ཏེ། མགོ་བོའི་སྟེང་དུ་མཛུབ་མོ་ལྕགས་ཀྱུ་ལྟ་བུར་བཞག་པ་ནི། རྡོ་རྗེ་འཇིགས་བྱེད་ཀྱི་སྤྱན་གྱི་ཕྱག་རྒྱའོ། །རྡོ་རྗེ་གཙུག་ཏོར་རྡོ་རྗེ་དང་ལྡན་པས་ཤར་ཕྱོགས་བཅིང་བར་བྱ་སྟེ། ཨོཾ་དྲུཾ་བནྡྷ་ཧཱུཾ། རྡོ་རྗེ་ཁུ་ཚུར་གཉིས་ལས་མཐེའུ་ཆུང་གཉིས་ལྕགས་སྒྲོག་ལྟར་མདུད་དེ། མཛུབ་མོ་ [173b] [173b.1]གཉིས་རྩེ་སྤྲད་ལ་ཡོངས་སུ་བཟློག་སྟེ། སྤྱི་བོར་གཞག་གོ། །ཡང་རྡོ་རྗེ་ཞགས་པས་དེ་ཉིད་བཅིང་བར་བྱ་སྟེ། ཨོཾ་བཛྲ་པཱ་ཤ་ཧྲཱིཿ། རྡོ་རྗེ་ཁུ་ཚུར་མཁྲིག་མ་མདུད་པ་བྱ་བ་ནི་ཞགས་པའོ། །རྡོ་རྗེ་བ་དན་གྱིས་ནུབ་ཕྱོགས་བཅིང་བར་བྱ་སྟེ། ཨོཾ་བཛྲ་པྲ་ཏཾ་ཀེ་པཱ་ཏཾ་ཀི་ནི་ར་ཊ། རྡོ་རྗེ་བསྡམས་པ་ [173b.2]ལས་མཐེ་བོང་གཉིས་སེམས་དཔའི་སྐྱིལ་མོ་ཀྲུང་དུ་བྱ། མཛུབ་མོ་གཉིས་མཉམ་པར་སྦྱར་སྲིན་ལག་ཕྱེ་ལ་མཐེའུ་ཆུང་བ་དན་ནོ། །རྡོ་རྗེ་ནག་མོས་བྱང་ཕྱོགས་བསྲུང་བར་བྱ་སྟེ། ཧྲི་བཛྲ་ཀཱ་ལི་རུ་ཊ་མ་ཊ། རྡོ་རྗེ་གནོད་སྦྱིན་གྱི་ཕྱག་རྒྱ་ཉིད་ཁར་བཞག་ལ་བརྟན་པར་བྱས་པས་ནི་རྡོ་རྗེ་ནག་ [173b.3]མོའོ། །རྡོ་རྗེ་རྩེ་མོས་ལྷོ་ཕྱོགས་བཅིང་བར་བྱ་སྟེ། ཨོཾ་བཛྲ་ཤི་ཁ་རེ་རུ་ཊ་མ་ཊ། རྡོ་རྗེ་ཁུ་ཚུར་གཉིས་རི་བོ་འདེགས་པའི་ཚུལ་དུ་བྱས་པ་ནི་རྡོ་རྗེ་རྩེ་མོའི་ཕྱག་རྒྱའོ། །རྡོ་རྗེ་ལས་ཀྱི་དཀྱིལ་འཁོར་བཅིངས་ལ་ར་བ་བྱའོ། །ཧཱུཾ་བཛྲ་ཀརྨ། ཡང་རྡོ་རྗེ་ཧཱུཾ་མཛད་ཀྱིས་ར་བ་བྱ་སྟེ། ཧཱུཾ་རྡོ་རྗེ་བཅིང་ [173b.4]བས་རྡོ་རྗེ་ར་བ་བྱའོ། །སྔགས་ནི་བཛྲ་བནྡྷ་ཞེས་བྱ་བའོ། །ཡང་ཧཱུཾ་ཨ་ནུ་རཱ་ག་ཡཱ་མི་ཧཱུཾ་ཞེས་བྱ་བས་དཀྱིལ་འཁོར་བཅིང་བ་ལ་སོགས་པ་ནི་རྡོ་རྗེ་གར་ལས་བྱུང་བའི་ཕྱག་རྒྱ་རྣམས་ཀྱིས་བྱ་སྟེ། དེ་ལ་ཕྱག་རྒྱ་ནི་འདི་རྣམས་ཡིན་ནོ། །ཁྲོ་བོའི་ཁུ་ཚུར་གཉིས་ཀྱི་ཕྱོགས་ཀྱི་འཁོར་ལོ་བསྐོར་ [173b.5]བས། བསྐོར་བ་འདི་ནི་དཀྱིལ་འཁོར་བཅིང་བའོ། །ཁར་བསྐོར་བ་ནི་མཚམས་བཅིང་བའོ། །སྙིང་ལ་འབར་ལྟར་ཞུགས་གྱུར་ཅིང་། །ཕྱོགས་ཀུན་རྡོ་རྗེ་མེ་འབར་བས། །ང་ཡིའང་ཁྲོ་བོ་ཆེན་པོ་ཡི། །འབར་བའི་རྡོ་རྗེ་ར་བ་བྱ། །ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་ [173b.6]གསུངས་སོ། །ཨོཾ་མ་ཧཱ་བཛྲ་ཙཀྲ་ཨ་དྷི་ཏིཥྛ་སིདྡྷྱ་ཧཱུཾ་ཞེས་བྱ་བ་འདི་ཕྱག་རྒྱ་དང་ལྡན་པ་ཡང་བྱིན་གྱིས་བརླབ་བོ། །རྡོ་རྗེ་ཁུ་ཚུར་གཉིས་ཀྱིས་འཁོར་ལོ་བསྐོར་བ་ནི་འདིའི་ཕྱག་རྒྱའོ། །ཨོཾ་བཛྲ་མཎྜལ་ཧཱུཾ་ཛྫཿཞེས་བྱ་བ་འདིས་གསང་བའི་གཟུགས་ཅན་གྱི་དཀྱིལ་འཁོར་བཀུག་ལ། ཕུར་ [173b.7]བུ་གདབ་བོ། །རྡོ་རྗེ་ཁུ་ཚུར་གཉིས་ཀྱི་མཛུབ་མོ་གཉིས་དང་། མཐེ་བོ་རྡོ་རྗེར་བྱས་པ་ནི་རྡོ་རྗེ་འཁོར་ལོའོ། །འདིས་དཀྱིལ་འཁོར་ཐམས་ཅད་འགུགས་ཤིང་བསྒྲུབ་པར་འགྱུར་ལ། །འཇིག་རྟེན་པ་རྣམས་ཀྱང་ཞུགས་པར་འགྱུར་རོ། །དེ་ལ་ཕུར་བུ་ནི་འདི་ཡིན་ཏེ་སོར་བརྒྱད་པའི་ཚད་ཙམ་ [174a] [174a.1]གྱིས་སེང་ལྡེང་གི་ཕུར་བུ་ཙནྡན་དམར་པོས་བྱུགས་ལ་སྲད་བུ་དམར་པོ་དང་། མེ་ཏོག་དམར་པོས་བཅིངས་ལ། སྟོད་ཁྲོ་བོའི་གཟུགས་ལ་སྨད་རྡོ་རྗེ་རྩེ་གཅིག་པའི་དབྱིབས་སུ་འདུག་པ་ཧཱུཾ་ལས་བསྐྱེད་དོ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བི་གྷྣཾ་བནྡྷ་ཧཱུཾ་ཕཊ་ཅེས་བྱ་བ་ [174a.2]བརྒྱ་རྩ་བརྒྱད་བཟླས་ལ་གཡོན་པའི་རྡོ་རྗེ་ཁུ་ཚུར་གྱིས་བཟུང་སྟེ། གཡས་པས་རྡོ་རྗེ་ཐོ་བ་བཟུང་ནས། དེས་དཀྱིལ་འཁོར་གྱི་མཚམས་བཞིར་བརྡུང་བར་བྱའོ། །ཨོཾ་ཧ་ན་ཧ་ན། ད་མ་ད་མ། སཉྩཱུ་རྞཱ་ཡ་སཉྩཱུ་རྞཱ་ཡ། བཛྲ་བཛྲ་མུངྒ་ར་ཧཱུཾ་ཕཊ་ཅེས་བྱ་བ་རྡོ་རྗེ་ཐོ་བ་ལ་ལན་བརྒྱ་རྩ་བརྒྱད་ [174a.3]བཟླས་ཏེ་མེ་ཏོག་དམར་པོ་དང་། སྲད་བུ་དམར་པོས་བཅིངས་ལ། ཙནྡན་དམར་པོས་བྱུགས་ཏེ། དེས་ཀུན་དུ་བརྡུང་བར་བྱའོ། །ཡང་། བཅིང་བའི་ཆོ་གའི་སྦྱོར་བ་ནི། །རྡོ་རྗེ་ཁུ་ཚུར་རབ་ཏུ་བརྟག །དཀྱིལ་འཁོར་བསྲུང་བ་ཐམས་ཅད་ལ། །རྡོ་རྗེ་གོ་ཆས་གོ་ཆ་བྱ། །དེ་ནས་བཛྲ་ཤི་ཁ་རེ་རུ་ཊ་ [174a.4]མ་ཊ་ཞེས་བྱ་བས་མངོན་པར་བསྔགས་པའི་སྤོས་ཆུས་དཀྱིལ་འཁོར་ཉེ་བར་བྱུགས་ལ་གུར་ཀུམ་དང་། ཨ་ཀ་རུ་དང་ཙནྡན་དང་། ག་པུར་དང་། གླ་རྩི་ལ་སོགས་པའི་དྲི་དང་དཀྱིལ་འཁོར་བའི་ལྷ་རྣམས་ཀྱི་སྔགས་ཀྱིས་བཏབ་ལ་ལྷ་རྣམས་ཀྱི་གྲངས་ཇི་སྙེད་པའི་དཀྱིལ་འཁོར་བྱའོ། ། [174a.5]དེ་ནས་དཀྱིལ་འཁོར་གྱི་དབུས་སུ་འདུག་ལ་ཡིད་ཀྱིས་དཀྱིལ་འཁོར་ཡོངས་སུ་བརྟགས་ཏེ། དཀྱིལ་འཁོར་དེ་རྣམས་སུ་རྣམ་པར་སྣང་མཛད་ཆེན་པོ་ཡོངས་སུ་གྱུར་པས་རྗེ་བཙུན་འཇམ་དཔལ་དུ་གྱུར་པ་ལ་སོགས་རང་གི་སྙིང་པོར་བཞག་ལ། མཆོད་པ་རྣམ་པ་ལྔས་ཡང་དག་ [174a.6]པར་མཆོད་དོ། །དེ་ནས་དབང་བསྐུར་བའི་ཕྱིར་རྣམ་པར་རྒྱལ་བའི་བུམ་པ་སྔགས་ཀྱིས་མངོན་པར་གདབ་བོ། །དེ་ལ་ཆོ་ག་ནི་འདི་ཡིན་ཏེ། བཾ་ལས་རིན་པོ་ཆེའི་རང་བཞིན་གྱི་བུམ་པ་རྩ་བ་ནག་ནོག་མེད་པ། ལྟོ་བ་ཆེ་བ་མགྲིན་པ་རིང་བ། ཁ་དགྱེ་བ་བསྐྱེད་ལ། དེའི་དབུས་སུ་ཧྲཱིཿལས་ [174a.7]བྱུང་བའི་པདྨ་དེའི་སྟེང་དུ་ཨ་ལས་ཟླ་བའི་དཀྱིལ་འཁོར་བསམས་ལ། དེར་ལྷ་རྣམས་ཀྱི་འཁོར་ལོ་རང་གི་དམ་ཚིག་གིས་གནས་པས་བཞུགས་པར་བསམས་ལ། དེ་ལས་བྱུང་བའི་བྱང་ཆུབ་ཀྱི་སེམས་ཀྱི་ཆུས་ཡོངས་སུ་བཀང་བར་བསམས་ལ། སྨན་ལྔ་དང་། འབྲུ་ལྔ་དང་། [174b] [174b.1]རིན་པོ་ཆེ་སྣ་ལྔ་དང་ལྡན་པ་མེ་ཏོག་གི་ཕྲེང་བས་བཅིངས་པའི་གསང་བའི་སྙིང་པོ་ཅན་མགུལ་པ་གོས་གཙང་མས་དཀྲིས་ལ། ཨ་མྲའི་ལོ་མ་ལ་སོགས་པས་ཁ་བཀབ་པ་བྱས་ལ། དཀྱིལ་འཁོར་བའི་སྔགས་ཀྱིས་མངོན་པར་བཟླ་ཞིང་། ཨོཾ་བཛྲོ་ད་ཀ་ཧཱུཾ་ཧཱུཾ་ཞེས་བྱ་བ་སྟོང་རྩ་བརྒྱད་ [174b.2]བཟླས་བརྗོད་བྱ་སྟེ། སྤོས་ལ་སོགས་པས་མཆོད་ནས་དཀྱིལ་འཁོར་བསྐོར་ཏེ། བཅོམ་ལྡན་འདས་རྗེ་བཙུན་འཇམ་དཔལ་གྱི་སྤྱན་སྔར་བཞག་ལ་དཀྱིལ་འཁོར་གྱི་ཉིན་མོ་དུས་གསུམ་དུ་བཟླས་བརྗོད་བྱས་ནས་དཀྱིལ་འཁོར་དུ་ཡང་བཟླས་བརྗོད་བྱ་སྟེ། དེ་ནས་དབང་བསྐུར་བར་བྱའོ། ། [174b.3]སང་གྲི་བྱ་གྷྲྀ་ཀྲིཏ་ཀ་རྞི་ཀ་ཧ་ས་དེ་བ་སྟེ། སྨན་རྣམས་ཀུན་ཞེས་བྱ་བ་ལ། །ལྔ་པོ་འདི་དག་ཤེས་པར་བྱ་སྟེ། འབྲས་ཀྱི་སོ་བ་མོན་སྲན་གྲེའུ་དང་། ནས་དང་གྲོ་དང་ཏིལ་དང་ལྔ། །འབྲུ་རྣམས་ཀུན་ཞེས་བྱ་བ་ནི། །ལས་རྣམས་ཀུན་ལ་འདི་དག་གསུངས། །བྱི་རུ་གསེར་ནི་ས་ལེ་སྦྲམ། །དུང་ [174b.4]དང་མུ་ཏིག་ནོར་བུ་སྟེ། །རིན་ཆེན་ཀུན་ཞེས་བྱ་བ་ལ། །ལྔ་པོ་འདི་དག་ཤེས་པར་བྱ། །དེ་ནས་རྡོ་རྗེ་ཧཱུཾ་མཛད་ཀྱི་སྔགས་དང་ཕྱག་རྒྱ་དང་བཅས་པས། ལས་ཐམས་ཅད་པའི་བུམ་པ་ལ་མངོན་པར་བསྔགས་ལ། དེ་བཞིན་དུ་མེ་ཏོག་ལ་སོགས་པས་ཡང་དག་པར་མཆོད་དེ། དཀྱིལ་འཁོར་གྱི་སྒོར་ [174b.5]གཞག་པར་བྱ། །དེ་ལ་སྔགས་དང་ཕྱག་རྒྱ་ནི་འདི་ཡིན་ཏེ། ཨོཾ་སུཾ་བྷ་ནི་སུཾ་བྷ་ཧཱུཾ། གྲྀ་ཧྞ་གྲྀ་ཧྞ་ཧཱུཾ། གྲྀ་ཧྞཱ་པ་ཡ་གྲྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོཿབྷ་ག་བཱན་བཛྲ་ཧཱུཾ་ཕཊ། ཁྲོ་བོའི་ཁུ་ཚུར་གཉིས་བཅིངས་ཏེ། མཐེའུ་ཆུང་རྩེ་མོ་མདུད་བྱས་ལ། མཛུབ་མོ་གཉིས་ནི་བསྒྲེང་བ་དག། །རྡོ་རྗེ་ཧཱུཾ་མཛད་ [174b.6]ཕྱག་རྒྱ་འདིའོ་ཞེས་བྱ་བ་འདི་ཕྱག་རྒྱའོ། །གསོལ་བ་འདི་ལྟར་གདབ་པར་བྱ་སྟེ། ཇི་སྲིད་དཀྱིལ་འཁོར་ཡོངས་སུ་རྫོགས་པ་དེ་སྲིད་དུ་འདིར་འདུག་པ་རྣམས་བཅོམ་ལྡན་འདས་ཀྱིས་ངེས་པར་བཟློག་ཏུ་གསོལ་ཞེས་བྱའོ། །དེ་ནས་ཕྱི་རོལ་དུ་གཏོར་མ་བྱིན་ལ་ཉེ་རེག་བྱ་སྟེ། དད་ཅིང་ [174b.7]གུས་པར་ཕྱག་འཚལ་ཏེ། སློབ་མ་རྣམས་ལྷག་པར་གནས་པར་བྱའོ། །དེ་ལ་རེ་ཞིག་སློབ་མ་ལེགས་པར་ཁྲུས་བྱས་ཤིང་། །གོས་གཙང་མ་གོན་ལ་ལག་ན་མེ་ཏོག་ཐོགས་པས་སློབ་དཔོན་ལ་ཕྱག་བྱ་སྟེ། འདི་སྐད་ཅེས་བརྗོད་པར་བྱའོ། །དགའ་ཆེན་ཁྱོད་བདག་སྟོན་ [175a] [175a.1]པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་ [175a.2]དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་བགྱི། །དེ་ནས་སློབ་དཔོན་གྱིས་སློབ་མའི་སྙིང་གར་ཧཱུཾ་ལས་རྡོ་རྗེ་བསྐྱེད་ལ། ཁུ་ཚུར་གཡས་པས་བཟུང་ནས། རྡོ་རྗེ་དེ་སྙིང་གར་སྙིང་པོས་བཞག་སྟེ། སུ་ར་ཏེ་ས་མ་ཡ་སྟྭཾ་ཧོ་བཛྲ་སིདྡྷ་ཡ་ཐཱ་སུ་ [175a.3]ཁཾ། དེ་ནས་དེ་བཞིན་དུ་དེའི་མགོ་བོར་ལག་པ་བཞག་ལ་རྡོ་རྗེ་ལས་ཀྱི་སྙིང་པོ་བརྗོད་ནས། སྣ་ཚོགས་རྡོ་རྗེ་བསྒོམ་པར་བྱའོ། །དེ་ནས་ཧཾ་བཛྲ་རཀྵ་ཞེས་བྱ་བ་ལས་གོ་ཆ་བསྐྱེད་ལ། རྐང་པའི་མཐར་ཐུག་གི་བར་དུ་གོ་ཆ་བསྐོན་པར་བྱའོ། །དེ་ནས་རྡོ་རྗེའི་དྲིས་ལག་པར་དྲི་སྦྱིན། མེ་ཏོག་གིས་ [175a.4]མེ་ཏོག་གཏོར་ཞིང་། བདུག་པས་བདུག་པ་གཏུལ་ཏེ། མེ་མར་ཉེ་བར་བསྟན་ལ་རེ་རེ་ཞིང་འདི་སྐད་ཅེས་བརྗོད་པར་བྱ་སྟེ། དེང་ནས་བརྩམས་ཏེ་བདེ་བ་ཐམས་ཅད་དང་ལྡན་པར་གྱུར་པས་ཉེ་བར་གནས་པར་གྱིས་ཤིག། །དེ་ནས་སློབ་མའི་གཙོ་བོ་ལ་བོས་ཏེ། འདི་སྐད་བརྗོད་པར་བྱའོ། །ཁྱོད་ནི་ [175a.5]ཚུལ་ཆེན་སྣོད་ཡིན་གྱིས། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་འདི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་བཞུགས་པ་དག །དེ་ [175a.6]དག་ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་མཁྱེན་ནས། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ [175a.7]ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །རྟོག་པ་མ་ལུས་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངས་བློ་ལ་རྡོ་རྗེ་སེམས་སོགས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །དེ་ནས་ཆོ་ག་ [175b] [175b.1]འདིས་སྡིག་པ་བཤགས་པ་ལ་སོགས་པ་བྱེད་དུ་གཞུག་སྟེ། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་རྣམས་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་།སྙིང་པོ་དང་། ཕྱག་རྒྱ་དང་། གསང་ [175b.2]སྔགས་དང་རིག་སྔགས་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་ལས་ཀྱི་རིགས་སུ་གྱུར་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། [175b.3]གསང་སྔགས་དང་རིག་སྔགས་ཀྱི་ལྷ་ཐམས་ཅད་ཀྱི་སྤྱན་སྔར་སྡིག་པ་ཐམས་ཅད་བླ་ན་མེད་པའི་སོ་སོར་བཤགས་པས་སོ་སོར་བཤགས་པར་བགྱིའོ། །ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་ཆོས་ཀྱི་དབྱིངས་མ་ལུས་པར་གཏོགས་པའི་བསོད་ནམས་ཐམས་ཅད་མཁྱེན་ཅིང་ [175b.4]རྗེས་སུ་ཡི་རང་བར་མཛད་པའི་རྗེས་སུ་ཡི་རང་བས་རྗེས་སུ་ཡི་རང་བར་བགྱིའོ། །གང་ཡང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་ཆོས་ཀྱི་འཁོར་ལོ་མ་བསྐོར་བ་དེ་དག་ལ་བླ་ན་མེད་པའི་ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་བར་བྱ་བའི་ཕྱིར་བསྐུལ་མ་འཚལ་ [175b.5]ལོ། །གང་ཡང་ཆོས་ཀྱི་འཁོར་ལོ་བསྐོར་བ་ལ་ནན་ཏན་ལྷུར་མཛད་པ་དེ་ལ་སེམས་ཅན་གྱི་ཁམས་ཇི་སྲིད་དུ་ཡོངས་སུ་མྱ་ངན་ལས་མི་འདའ་བར་བཞུགས་སུ་གསོལ་ལོ། །དེ་སྐད་ལན་གཉིས་ལན་གསུམ་བརྗོད་དོ། །དེ་ནས་མཚན་ཉིད་དང་ལྡན་པའི་སློབ་མ་སློབ་དཔོན་དུ་འོས་པ་ཡོངས་ [175b.6]སུ་བཟུང་ལ། ཁས་ལེན་པར་བྱ་བའི་ཕྱིར་བཞིན་བཟང་སྨོས་ཤིག་ཅེས་བརྗོད་པར་བྱའོ། །སློབ་མས་ཀྱང་འདི་སྐད་བརྗོད་པར་བྱ་སྟེ། བྱང་ཆུབ་སེམས་ནི་བླ་ན་མེད། །སློབ་དཔོན་བདག་ལ་སྩལ་དུ་གསོལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་བསྡུ་བ་དང་། །སེམས་ [175b.7]ཅན་དོན་བྱེད་ཚུལ་ཁྲིམས་གསུམ། །སངས་རྒྱས་ཀུན་གྱི་བརྟུལ་ཞུགས་ཆེ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །རྡོ་རྗེ་དྲིལ་བུ་ཕྱག་རྒྱ་དང་། །སློབ་དཔོན་ཉིད་ནི་བདག་ལ་སྩོལ། །རྡོ་རྗེ་རིགས་མཆོག་ཆེན་པོ་ལ། །སློབ་དཔོན་དག་ [176a] [176a.1]ནི་བདག་བགྱིད་དོ། །རིན་ཆེན་རིགས་མཆོག་ཡིད་འོང་བའི། །དམ་ཚིག་དག་ཀྱང་བདག་ལ་སྩོལ། །པདྨའི་རིགས་ཆེན་དག་པ་དང་། དེ་བཞིན་ལས་ཀྱི་རིགས་ཆེན་ལ། །སེམས་ཅན་ཀུན་གྱི་དོན་གྱི་ཕྱིར། །མགོན་པོས་བདག་ལ་སྡོམ་པ་སྩོལ། །དེ་ལྟར་ [176a.2]ལན་གཉིས་ལན་གསུམ་མོ། །དེ་ནས་སྡོམ་པ་སྦྱིན་པར་བྱ་སྟེ། ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་ཤིང་མུ་མེད་པ་ཐམས་ཅད་ན་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་ཕྱག་འཚལ་ལོ། །ཕྱོགས་ [176a.3]བཅུའི་འཇིག་རྟེན་གྱི་ཁམས་མཐའ་ཡས་ཤིང་མུ་མེད་པ་ཐམས་ཅད་ན་བཞུགས་པའི་བཅོམ་ལྡན་འདས་རྣམ་པར་སྣང་མཛད་དང་། མི་བསྐྱོད་པ་དང་རིན་ཆེན་མཆོག་དང་། འཇིག་རྟེན་དབང་ཕྱུག་དང་། དོན་ཡོད་གྲུབ་པ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་ཐམས་ [176a.4]ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། བྱང་ཆུབ་ཀྱི་སྙིང་པོ་ལ་གནས་ཀྱི་བར་དུ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་པ་ཡི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་ [176a.5]རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་བསྡུ་བ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །དེ་བཞིན་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་དང་། །བླ་ན་མེད་པའི་དཀོན་མཆོག་གསུམ། །དེང་ནས་ [176a.6]བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་གཏོང་ངོ་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་ [176a.7]བཞིན་དུ་དུས་དྲུག་ཏུ། །སྦྱིན་པ་རྣམ་བཞིར་རབ་ཏུ་སྦྱིན། །བྱང་ཆུབ་ཆེན་པོ་ལས་བྱུང་བ། །པདྨའི་རིགས་མཆོག་དག་པ་ལ། །ཕྱི་དང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། ། [176b] [176b.1]ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གི་སྡོམ་པ་མ་ལུས་གཟུང་། །མ་བརྒལ་བ་ནི་བསྒྲལ་བར་བགྱི། །མ་གྲོལ་བ་ནི་དགྲོལ་བར་ [176b.2]བགྱི། །དབུགས་མ་ཕྱུང་བ་དབུགས་དབྱུང་ཞིང་། །སེམས་ཅན་མྱ་ངན་འདས་གཞག་བགྱི། །དེ་ལྟར་ལན་གཉིས་ལན་གསུམ་དུའོ། །དེ་ནས་གཞན་ཡང་། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །གཞན་དག་དོན་ནི་རབ་བསྒྲུབ་ཕྱིར། ། [176b.3]བྱང་ཆུབ་ཏུ་ནི་སེམས་བསྐྱེད་དོ། །ཞེས་བྱ་བ་འདིས་ལན་གསུམ་ལ་སྐྱབས་སུ་འགྲོ་བ་ལ་སོགས་པ་བྱས་ལ། འདིས་སྨོན་ལམ་འདེབས་སུ་གཞུག་པར་བྱ་སྟེ། བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་མི་རིང་སངས་རྒྱས་གྱུར་པར་ཤོག །འགྲོ་ལ་ཕན་ཕྱིར་ཆོས་ [176b.4]རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་དགྲོལ། །ཞེས་བྱའོ། །དེ་ནས་ཆོས་བསྟན་པར་བྱ་སྟེ། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱོད་རྣམས་འདིར་ནི་དོང་བས་ན། །རང་བྱུང་སྐལ་བ་ཆེན་པོ་པ། །འཇིག་རྟེན་ [176b.5]ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཡོད་དང་མེད་ལས་རྣམ་པར་འདས། །ནམ་མཁའ་བཞིན་དུ་དྲི་མ་མེད། །ཟབ་མོ་རྟོག་གེ་ཐམས་ཅད་ཀྱི། །རབ་ཏུ་མི་རྟོགས་གནས་མེད་པ། །སྤྲོས་པ་ཀུན་དང་བྲལ་བ་སྟེ། །སྤྲོས་པ་རྣམས་ཀྱིས་མ་སྤྲོས་པ། །ལས་ [176b.6]དང་བྱ་བ་ལ་སོགས་བྲལ། །བདེན་པ་གཉིས་ལ་གནས་པ་ཡིས། །ཐེག་པ་རབ་ཀྱི་མཆོག་འདི་ཡི། །ཚུལ་ལ་གནས་ན་ཐོབ་པར་འགྱུར། །དེ་ནས་བཛྲ་ཧ་ས་ཧ་ས་ཞེས་བྱ་བས་མངོན་པར་བསྔགས་པའི་ཤིང་གི་རྩེ་མོ་དྲིས་བསྐུས་ཤིང་མེ་ཏོག་གིས་བརྒྱན་པ། ཤིང་མངར་པོའོ་མ་ [176b.7]ཅན་ལས་བྱུང་བ། ཚད་སོར་བཅུ་གཉིས་པ་འཆའ་རུ་གཞུག་པར་བྱའོ། །སློབ་མ་ཤར་ཕྱོགས་ཁ་བལྟས་ཏེ། །མི་སྨྲ་བར་ནི་སོ་ཤིང་བཅའ། །བཅས་ཟིན་ནས་ནི་མི་དགོས་ཤིང་། །ཕན་ཚུན་དུ་ཡང་མི་དོར་རོ། །སོ་ཤིང་མདུན་དུ་དྲང་པོར་དོར། །དེ་ཚེ་བདག་ལ་བལྟ་བའམ། །རྩེ་མོ་ [177a] [177a.1]གྱེན་དུ་འགྲེང་གྱུར་ན། །དེས་ན་དངོས་གྲུབ་མཆོག་ཅེས་བྱ། །དེ་བཞིན་ཤར་དུ་ཁ་བལྟས་ན། །དེ་ཡི་དངོས་གྲུབ་འབྲིང་དུ་བཤད། །མཚམས་དང་བྱང་དུ་ཁ་བལྟས་ན། །འཇིག་རྟེན་པ་ཡི་དངོས་གྲུབ་འགྲུབ། །སོ་ཤིང་དོར་བ་བརྒྱ་ཞིག་ལས། །གལ་ཏེ་ཐུར་དུ་ [177a.2]ཁ་བལྟས་ན། །དེས་ནི་ངེས་པར་ས་འོག་གི །དངོས་གྲུབ་འདི་ལ་ཐེ་ཚོམ་མེད། །དེ་ནས་ཨོཾ་བཛྲ་ཎཾ་ཞེས་བྱ་བའི་གླུའི་རྡོ་རྗེ་ཡོངས་སུ་བཟླས་པའི་ཆུས་འཐོར་འཐུང་བྱ་བའི་ཕྱིར་བྱིན་ལ། ཡང་ཨོཾ་ཧྲཱིཿབི་ཤུདྡྷ་སརྦ་པཱ་པ་ནི་ཤྩཱ་སྱ་ཤོ་དྷ་ཡ། སརྦ་བི་ཀ་ལ་བ་ན་ཨ་བ་ན་ཡ་ཧཱུཾ་ཞེས་བྱ་བ་མངོན་ [177a.3]པར་བཟླས་པའི་ཆུ་ཁྱོར་བ་གསུམ་འཐུང་དུ་གཞུག་པའི་ཕྱིར་སྦྱིན་པར་བྱའོ། །དེ་ནས་ཀུ་ཤ་གཅིག་ལ་ཨོཾ་བཛྲ་ཏཱི་ཀྵྞ་དྷཾ་ཞེས་བྱ་བ་མངོན་པར་བཟླས་པ་བྱིན་ལ་འདི་ལྟར་མགོ་བོའི་གནས་སུ་ཞོག་ཅིག་ཅེས་བསྒོའོ། །ཡང་ཀུ་ཤ་གཞན་དག་རྡོ་རྗེ་གནོད་སྦྱིན་གྱི་སྔགས་མངོན་པར་བཟླས་པ་ [177a.4]སྟན་དུ་བྱ་བའི་ཕྱིར། སྦྱིན་པར་བྱའོ། །རྡོ་རྗེ་གནོད་སྦྱིན་མངོན་པར་བཟླས་པའི་སྲུང་སྐུད་མདུད་པ་གསུམ་དང་ལྡན་པ་ལ་ཡང་ཡི་གེ་བརྒྱ་པ་ཡང་བཟླས་བརྗོད་བྱ་སྟེ། དཔུང་པ་གཡོན་པ་ལ་བསྲུང་བ་བྱ་བའི་ཕྱིར་དང་། བརྟན་པར་བྱ་བའི་ཕྱིར་བཅིང་བར་བྱའོ། །ཨོཾ་བཛྲ་ཡཀྵ་ཞེས་བྱ་ [177a.5]བས་རྡོ་རྗེ་གནོད་སྦྱིན་གྱི་སྔགས་སོ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་ཝཱན། སརྦ་ཏ་ཐཱ་ག་ཏ་བཛྲ་ [177a.6]མཱ་མེ་མུཉྩ། བཛྲཱི་བྷ་ཝ་མ་ཧཱ་ས་མ་ཡ་ས་ཏྭ་ཨཱཿཞེས་བྱ་བ་ནི་ཡི་གེ་བརྒྱ་པའི་སྔགས་སོ། །དེ་ནས་བཞིན་བཟངས་རྣམས་ལོངས་ཤིག །སང་གི་ཉིན་མོ་ཁྱེད་རྣམས་ཀྱིས་ཐར་པ་ཆེན་པོའི་རང་བཞིན་གྱི་གྲོང་ཁྱེར་མཐོང་བར་འགྱུར་གྱིས། །ཇི་ལྟར་མཐོང་བའི་རྨི་ལམ་རྣམས་ [177a.7]ཀྱང་སྨོས་ཤིག་ཅེས་བརྗོད་ལ་སླར་བཏང་ངོ་། །དེ་ནང་པར་མཚན་མོའི་མཐར་རྨི་ལམ་གང་དག་མཐོང་བ་དྲི་བར་བྱའོ། །དྲི་བ་ཐོས་ནས་རྨི་ལམ་བཟང་པོའམ། །ངན་པ་འཛེམ་པ་མེད་པར་བརྗོད་པར་བྱའོ། །རྨི་ལམ་སངས་རྒྱས་མཐོང་བ་ནི། །ཡོན་ཏན་རྒྱ་མཚོ་མངོན་སུམ་བཞིན། །མཆོད་ [177b] [177b.1]རྟེན་དང་ནི་སྐུ་གཟུགས་མཐོང་། །དེ་ལ་མཆོད་པ་རྩོམ་པ་དང་། །དགེ་སློང་དག་ལ་ཆོས་ཉན་ཏམ། །ཡང་ན་གཞན་ལས་ཉན་ཡང་རུང་། །ཆོས་ནི་རྣམ་པར་དཔྱད་པ་དང་། །དེ་བཞིན་གླེགས་བམ་ཀློག་པ་དང་། །རྨི་ལམ་དགེ་འདུན་མཐོང་བ་དང་། །ཡང་ན་དགེ་སློབ་གཅིག་པོ་མཐོང་། །དེ་དང་ [177b.2]འགྲོགས་ཤིང་གཏམ་ཟེར་དང་། །ཡང་ན་དགེ་སློང་དངོས་པོར་གྱུར། །གཙུག་ལག་ཁང་དག་མཐོང་བ་དང་། །དེ་བཞིན་དགེ་སློང་མ་དག་མཐོང་། །རྒྱལ་བའི་སྲས་རྣམས་མཐོང་བ་དང་། །དེ་བཞིན་ཕ་མ་བླ་མ་དང་། །མཛའ་བོ་རྣམ་པ་སྣ་ཚོགས་རྣམས། །རྨི་ལམ་དུ་ནི་མཐོང་ན་ [177b.3]ཤིས། །རིག་སྔགས་དང་ནི་དངོས་གྲུབ་ཐོབ། །དེ་བཞིན་བསླབ་པ་འཛིན་པ་དང་། །ཀུན་དགའ་རྣམ་པ་སྣ་ཚོགས་དང་། །འབབ་ཆུ་རྣམས་དང་རྒྱ་མཚོ་དང་། །རི་དང་གླང་པོ་ཆེ་དག་ཀྱང་། །མཐོང་ན་ཡང་ནི་བཟང་བར་བསྒྲགས། །རྒྱལ་པོ་དག་ནི་མཐོང་ན་ཤིས། །བདེ་གཤེགས་སྤྱོད་དང་ [177b.4]མཐུན་པ་ཡི། །དཀའ་ཐུབ་ཅན་དང་བྲམ་ཟེ་དང་། །ཕྱུག་པོ་སྐྱེས་བུ་དམ་པ་དང་། །བ་དང་རྟ་དང་ངང་པ་དང་། །སེང་གེ་དང་ནི་རི་དགས་རྣམས། །རྨི་ལམ་དུ་ནི་མཐོང་ན་ཤིས། །བཀྲ་ཤིས་པ་ཡི་བྱ་རྣམས་དང་། །གསེར་དག་དང་ནི་གཏེར་རྣམས་དང་། །རིན་པོ་ཆེ་དང་དངུལ་དག་ [177b.5]དང་། །ནོར་ནི་རྣམ་པ་སྣ་ཚོགས་དང་། །མདོར་ན་འབྱུང་ཁུངས་རྣམ་པ་དང་། །མཚོན་ཆ་རྣམས་དང་འབྲུ་རྣམས་དང་། །འབྲས་བུ་རྣམས་དང་མེ་ཏོག་དང་། །རྒྱན་ནི་རྣམ་པ་སྣ་ཚོགས་དང་། །ཁ་ཟས་དང་ནི་གོས་རྣམས་དང་། །བྱིས་པ་དག་ནི་གཞོན་ནུ་དང་། །བུད་མེད་གཟུགས་ནི་ [177b.6]བཟང་པོ་དག །རྨི་ལམ་དུ་ནི་མཐོང་ན་བཟང་། །ཡང་ན་ཐོབ་ཅིང་རེག་སྨྲ་དང་། །རྨི་ལམ་དུ་ནི་དབང་བསྐུར་དང་། །རྒྱལ་པོར་གྱུར་ཅིང་འབྱོར་བ་དང་། །དམག་དཔོན་དུ་ནི་གྱུར་པ་དང་། །གཡུལ་ལས་རྒྱལ་ཞིང་དགྲ་གསོད་དང་། །གཉེན་དང་ལྷན་ཅིག་འགྲོགས་པ་དང་། །ལྷ་རྣམས་ [177b.7]ཀྱང་ནི་མཐོང་བ་དང་། །ཐེག་པ་དང་ནི་ཤིང་རྟ་ཞོན། །དེ་བཞིན་རི་དང་ཡང་ཐོག་འཛེགས། །ངོ་མཚར་རྣམ་པ་སྣ་ཚོགས་དག །རྨི་ལམ་དུ་ནི་མཐོང་ན་དགེ། །ཡམ་ཤིང་མེ་ལྷ་སྦྱིན་སྲེག་བྱེད། །བྱ་བ་བཟང་པོ་དག་ལ་འཇུག །ཆུ་ལ་རྐྱལ་ཞིང་རོང་ལས་རྒལ། །རྐུན་པོ་དག་ནི་ཚར་གཅོད་ [178a] [178a.1]དང་། །སྟོབས་འགྱེད་པ་ལས་རྒྱལ་བ་དང་། །གྱད་སྟངས་རྡོབ་ཅིང་འགྱིང་བ་དང་། །རྩེད་མོ་སྣ་ཚོགས་རྨི་བ་དང་། །དེ་བཞིན་རྩལ་དང་སྤུངས་བྱེད་དང་། །བཀྲ་ཤིས་དག་ནི་ཐམས་ཅད་ཀྱང་། །མཐོང་ན་རབ་ཏུ་དགེ་བར་བཤད། །གསང་སྔགས་ཆོ་ག་ཉན་པ་དང་། ། [178a.2]དགའ་སྟོན་དགེ་བ་མཐོང་བ་དང་། །སྒྲུབ་པ་བཟང་པོ་རྩོམ་པ་དང་། །དེ་ལ་སོགས་པའི་ལྟས་རྣམས་ནི། །དགེ་བ་རྣམ་པ་དུ་མ་དག །བློ་ཡིས་རྣམ་པར་དཔྱད་བྱ་ཞིང་། །དེ་ལས་ཟློག་པ་སྤང་བར་བྱ། །དགེ་བ་རྣམས་ནི་འགྲུབ་པར་འགྱུར། །མི་དགེ་བ་ནི་མི་འགྲུབ་པོ། །མི་དགེ་བ་དག་ [178a.3]ཤེས་ནས་སུ། །དེ་དག་མཁས་པ་སྤང་བར་བྱ། །དགེ་བ་ཡི་ནི་ལྟས་རྣམས་ནི། །རབ་དང་འབྲིང་དང་ཐ་མ་ལས། །གསང་སྔགས་དངོས་གྲུབ་རྣམ་གསུམ་མོ། །རབ་དང་འབྲིང་དང་ཐ་མ་འགྲུབ། །མི་དགེ་བ་ལ་ཞི་བ་ཡི། །སྦྱིན་སྲེག་ཞི་བའི་གསང་སྔགས་ཀྱིས། །བ་ཡི་མར་ལས་ [178a.4]བརྒྱ་རྩ་བརྒྱད། །ཆོ་ག་བཞིན་དུ་ཞི་བ་བྱ། །དེ་ནས་སློབ་མ་སྡིག་བྲལ་ཞིང་། །རྣམ་པར་དག་པ་དེ་དག་ལ། །རྗེས་སུ་བརྩེ་བ་བྱ་བའི་ཕྱིར། །ཅི་འདོད་པར་ནི་གཟུང་བར་བྱ། །དེ་ནས་དཀྱིལ་འཁོར་ཡང་དག་པར་མཆོད་ལ། བཟླས་བརྗོད་དང་བསྒོམ་པ་དག་ཇི་ལྟ་བ་བཞིན་དུ་བྱའོ། །དེ་ནས་ལྕེ་ལ་ཟླ་ [178a.5]བའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་ལས་རྡོ་རྗེ་བསམས་ལ། དེའི་ལྟེ་བར་ཡི་གེ་ཧྲཱིཿལས་པདྨ་རྣམ་པར་བསམ་མོ། །དེའི་སྟེང་དུ་རཾ་ལས་ཏིང་ངེ་འཛིན་ལ་ངེས་པར་བཞུགས་པའི་འོད་དཔག་ཏུ་མེད་པ་རྣམ་པར་བསམས་ལ། དེའི་ཐུགས་ཀར་ཟླ་བའི་དཀྱིལ་འཁོར་ལ་ཧྲཱིཿརྣམ་པར་ [178a.6]བཀོད་དེ། ཨོཾ་པདྨ་ས་ར་སྭ་ཏི་སཏྟྱི་ཨ་བརྟྟ་ཡ་ཤོ་དྷ་ཡ་ཧཱུཾ་ཧྲཱིཿརཾ་ཛྲཱི་ཞེས་བརྗོད་ལ། ལྕེ་བྱིན་གྱིས་བརླབ་པར་བྱའོ། །དེ་ནས་བདུག་སྤོས་ཕུལ་ལ་སྤྱན་དྲང་སྟེ། ཕྱོགས་བཅུར་བཞུགས་པའི་རྫོགས་སངས་རྒྱས། །སྲས་བཅས་འཇིག་རྟེན་རྣམ་གྲངས་དང་། །རྡོ་རྗེ་རིན་ཆེན་རིགས་དག་ [178a.7]དང་། །དེ་བཞིན་པདྨ་ལས་ཀྱི་རིགས། །སྙིང་པོ་སྔགས་དང་རིགས་རྣམས་དང་། །གང་ཡང་ལྷའི་ཚོགས་རྣམས་ཀུན། །ཆོས་ཀྱི་དབྱིངས་ལ་ངེས་ཞུགས་པ། །དེ་རྣམས་བདག་ལ་དགོངས་སུ་གསོལ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། ། [178b] [178b.1]བདག་མིང་འདི་ཞེས་བགྱི་བ་ཡིས། །ཡོ་བྱད་ཅི་འབྱོར་བ་ཡིས་ནི། །ཆོས་དབྱིངས་རང་བཞིན་གྲོང་ཁྱེར་མཆོག །དཀྱིལ་འཁོར་སང་ནི་འདྲི་བར་བགྱིད། །ཐུགས་བརྩེ་ཉེ་བར་བཞག་ནས་ནི། །བྱིན་གྱིས་བརླབ་པ་མཛད་དུ་གསོལ། །དེ་ནས་རང་གི་སྔགས་དང་ཕྱག་རྒྱ་དག་གིས་འཁོར་ [178b.2]ལོ་བཏེག་ལ། དེ་བཞིན་གཤེགས་པ་དེ་རྣམས་ཉིད་དང་བའི་ཤེལ་ལྟ་བུའི་ཁང་པ་བརྩེགས་མའི་ནང་དུ་བཞུགས་པར་བསམས་ལ། ཁ་སྦྱར་བྱས་ལ་གཞག་པར་བྱའོ། །དེ་ལ་ཁ་སྦྱར་བྱ་བའི་སྦྱོར་བ་ནི་འདི་ཡིན་ཏེ། ཨོཾ་ཧཱུཾ་ཏྲཱཾ་ཧྲཱིཿཨཿཞེས་བྱ་བའི་དབུས་སུ་སྟེང་དང་འོག་དང་བར་དུ་དཀྲི་བར་ [178b.3]བྱ་བའི་ཕྱིར། ཨོཾ་ལྔ་ལྔ་དང་། ཡང་སྟེང་དུ་བཾ་ལྔ་དང་། འོག་ཏུ་ཡང་ཧཱུཾ་ལྔ་བསམ་སྟེ། དེ་ལྟར་བདག་དང་དཀྱིལ་འཁོར་བསྒོམ་པར་བྱའོ། །དེ་ནས་དེ་ཉིད་དུ་སློབ་མའི་གཙོ་བོ་དང་། ལྷན་ཅིག་བསམ་གཏན་ལ་མཉམ་པར་གཞག་པའི་བློ་དང་ལྡན་པས་ཉལ་བར་བྱའོ། །ཉི་མ་གཉིས་པ་ལ་ཉི་མ་ [178b.4]འཆར་ཀར་ལེགས་པར་ཁྲུས་བྱས་ཤིང་རྒྱན་ཐམས་ཅད་ཀྱིས་བརྒྱན་པར་རབ་ཏུ་དགའ་ཞིང་ཡིད་བདེ་བ་དང་ལྡན་པས་དཀྱིལ་འཁོར་གྱི་གནས་སྤོས་ཀྱི་ཆུས་བྱུགས་ལ་མེ་ཏོག་ལ་སོགས་པས་ཉེ་བར་མཛེས་པར་བྱས་ཏེ། སྔོན་པོ་དང་། །སེར་པོ་དང་། དམར་པོ་དང་། །ལྗང་གུ་དང་། །དཀར་པོའི་ [178b.5]ཁ་དོག་དང་ལྡན་པའི་ཚོན་དྲིས་བསྒོས་ལ། སོ་སོའི་སྲད་བུ་བཅོས་ཏེ།རིམ་པ་བཞིན་དུ་ལེགས་པར་བཞག་ལ་ཧཱུཾ་ཏྲཱཾ་ཧྲཱིཿཨ་ཞེས་པའི་རང་གི་ས་བོན་རྣམས་ལས་བྱུང་བའི་སྲད་བུའི་འོད་ཟེར་རྣམས་ཀྱིས་མི་བསྐྱོད་པ་ལ་སོགས་པ་རང་གི་ཕྱོགས་ན་བཞུགས་པ་རྣམས་ཀྱི་གན་དུ་ [178b.6]བཏང་བས་འབར་བར་བལྟ་ཞིང་ལྕགས་ཀྱུ་རང་གི་ལག་པ་ན་གནས་པས་དྲངས་ཏེ། དེ་རྣམས་ཀྱི་སྲད་བུ་རྣམས་ལེགས་པར་བཀལ་ལ། ཨ་ནྱོ་ནྱ་ཨ་ནུ་ག་ཏ། སརྦ་དྷ་རྨྨ་པ་ར་སྥ་ར་ཨ་ནུ་པྲ་བིཥྚ་སརྦ་དྷ་རྨྨ་ཨཏྟྱནྡ་ཨ་ནུ་པྲ་བིཥྚ་སརྦ་དྷརྨྨ་ཧཱུཾ་ཞེས་བརྗོད་ལ་བསྒྲིལ་བར་བྱའོ། །དེ་ནས་ [178b.7]ཙནྡན་བཟང་པོ་ལ་སོགས་པས་བསྐུས་པའི་གསེར་གྱི་སྣོད་ལ་སོགས་པའི་ནང་དུ་ལེགས་པར་བཞག་ལ། མེ་ཏོག་གིས་གཏོར་ཏེ། ཐིག་གདབ་པའི་སྔགས་རྡོ་རྗེ་ཁུ་ཚུར་གྱིས་བཟུང་ནས་ལན་བརྒྱ་རྩ་བརྒྱད་ཡོངས་སུ་བཟླ་བར་བྱའོ། །དེ་ནས་བདག་པོ་རྣམས་ཀྱང་བརྒྱ་རྩ་བརྒྱད་ [179a] [179a.1]བཟླས་ཏེ། ཡང་དེ་བཞིན་གཤེགས་པ་ཐམས་ཅད་ཡང་དག་པར་མཆོད་དེ། ཕྱག་བྱས་ལ་ལངས་ནས་ཡིད་ཀྱིས་རྣམ་པར་སྣང་མཛད་དུ་གྱུར་པའི་རང་གི་སྙིང་ག་ནས་གྲོགས་པོ་རྡོ་རྗེ་ལས་ཧཱུཾ་ཛྫ་ཞེས་བྱ་བ་འདིས་ཕྱུང་ནས། མ་དང་ཊ་ལས་མིག་གཡས་དང་གཡོན་ [179a.2]གཉིས་སུ་ཉི་མ་དང་ཟླ་བ་སེར་པོ་སྣང་བ་བསྐྱེད་ལ། ཡི་གེ་ཛས་གྲོགས་པོའི་ལག་ཏུ་སྲད་བུ་བཏང་། གཡོན་པའི་རྡོ་རྗེ་ཁུ་ཚུར་གྱིས་དང་པོ་སྲད་བུ་བཟུང་ལ་ཕྱི་ནས་ཅི་བདེར་བྱའོ། །མཁས་པས་དཀྱིལ་འཁོར་ཐིག་གདབ་པ། །ཤར་དང་ནུབ་ཀྱི་ཕྱོགས་དག་དང་། །བྱང་དང་ལྷོ་ཡི་ཕྱོགས་ [179a.3]དག་ཏུ། །ཐིག་བཞི་བཏབ་པས་དཀྱིལ་འཁོར་བརྒྱད། །ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་བྱ་བ་འདིས་སངས་རྒྱས་ཀྱི་ཞིང་ཐམས་ཅད་ན་བཞུགས་པའི་དེ་བཞིན་གཤེགས་པ་རྣམས་སེམས་ཅན་གྱི་དོན་གྱི་ཕྱིར་འདིར་གཤེགས་སུ་གསོལ་ཞེས་ཡང་དག་པར་བསྐུལ་ལ། ཟུར་བཞི་ [179a.4]པ་ལ་སོགས་པ་སྔར་བཤད་པའི་རིམ་གྱིས་ཐམས་ཅད་ཐིག་གདབ་པར་བྱ་སྟེ། ཆུར་དཀྱིལ་འཁོར་གྱི་ཉིས་བལྡབ་སྦོམས་སུ་སྒོའི་ཉི་ཤུ་ཆའི་ཚད་ཀྱི་སྲད་བུས་དཀྱིལ་འཁོར་ཐམས་ཅད་རིམ་པ་འདིས་ཐིག་གདབ་བོ། །དེ་ལ་དང་པོར་དེ་བཞིན་གཤེགས་པ་ཐམས་ཅད་ལ་ཕྱག་བྱས་ [179a.5]ལ། ཡི་གེ་ཛྫ་ལས་སྒྲུབ་པ་པོའི་གྲོགས་མཆོག་དེ་རྡོ་རྗེ་ལས་ཀྱི་གཟུགས་སུ་བྱས་པར་བཏང་ལ། ཕྱོགས་ཐམས་ཅད་མཉམ་པ་ཉིད་དུ་བསམས་ནས་ནུབ་ཕྱོགས་ཀྱི་སྒོར་འདུག་སྟེ། ཤར་ཕྱོགས་སུ་མངོན་པར་ཕྱོགས་པར་བྱས་ལ། ལྟེ་བའི་ཕྱོགས་སུ་གཟུང་བར་བྱའོ། །དེ་ [179a.6]ནས་བསྐོར་བའི་ཚུལ་གྱིས་སོང་ལ་བྱང་དུ་མངོན་པར་ཕྱོགས་ཏེ་གཟུང་བར་བྱའོ། །ཡང་སླར་ལོག་སྟེ། དེ་བཞིན་དུ་ཤར་དུ་བལྟ་བ་དང་། བྱང་དུ་བལྟ་བ་བྱ་སྟེ། དབུས་ཀྱིས་གཞིར་ཐིག་བརྐྱང་ལ། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་བརྗོད་དེ་གདབ་པར་བྱའོ། །དེ་ནས་མེའི་ [179a.7]ཕྱོགས་ཆར་འདུག་ལ། བྱང་ཕྱོགས་སུ་མངོན་པར་ཕྱོགས་པར་བྱས་ནས་ཕྱིའི་དཀྱིལ་འཁོར་གྱི་ཤར་གྱི་ངོས་སུ་ཐིག་གདབ་བོ། །རླུང་གི་ཕྱོགས་སུ་གནས་ནས། ལྷོར་མངོན་པར་ཕྱོགས་ཏེ། ནུབ་ཀྱི་ཕྱོགས་ཀྱི་ཐིག་གདབ་བོ། །དེ་བཞིན་དུ་འདུག་ལ་ཤར་དུ་མངོན་པར་ཕྱོགས་ཏེ། [179b] [179b.1]བྱང་ཕྱོགས་ཀྱི་ཐིག་གདབ་བོ། །ཡང་མེའི་ཕྱོགས་ཆར་འདུག་ལ་ནུབ་ཏུ་མངོན་པར་ཕྱོགས་ཏེ། ལྷོའི་ངོས་མངོན་པར་ཐིག་གདབ་པར་བྱའོ། །དེ་བཞིན་དུ་ཁྱམས་ཀྱི་ཐིག་དང་ལྷའི་གནས་ཀྱི་ཐིག་གདབ་པར་ཤེས་པར་བྱ་སྟེ། ཐམས་ཅད་དུའང་སློབ་དཔོན་དང་། སྒྲུབ་པའི་གྲོགས་ [179b.2]མཆོག་གཡས་ནས་བསྐོར་བའི་ཚུལ་གྱི་འགྲོ་བར་བྱའོ། །དེ་ནས་མེའི་མཚམས་སུ་འདུག་ལ་རླུང་གི་ཕྱོགས་ཀྱི་བར་དུ་བྲེ་བར་བྱའོ། །ཡང་བདེན་བྲལ་གྱི་ཕྱོགས་སུ་འདུག་ལ། དབང་ལྡན་གྱི་ཕྱོགས་ཀྱི་བར་དུ་སྲད་བུ་བྲེ་བར་བྱ་སྟེ། ཐམས་ཅད་དུ་ཡང་ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་ [179b.3]མ་ཧཱུཾ་ཞེས་བརྗོད་དོ། །ཛཿཛཿཛཿཞེས་བྱ་བའི་ཛ་གསུམ་དང་། སྒྲུབ་པ་པོའི་གྲོགས་མཆོག་གིས་སྲད་བུ་དྲང་བར་བྱའོ། །དེ་ལ་སྒོ་ཐམས་ཅད་ནི་བརྒྱད་ཆའོ། །སྒོ་ཁྱུད་དང་སྒོ་འགྲམ་དང་། ཁྱམས་དང་། ལྷའི་གནས་ནི་སྒོའི་ཕྱེད་ཀྱི་ཚད་དོ། །ཚོན་སྣ་ལྔའི་ས་ནི་ཁྱམས་ཀྱི་ཕྱེད་ཀྱི་ཚད་དོ། ། [179b.4]དཀྱིལ་འཁོར་ཆེན་པོ་བཀོད་པ་ལས་ཆ་བཅུར་གསུངས་པ་དང་། ཁམས་གསུམ་རྣམ་པར་རྒྱལ་བ་ལས་ཆ་དགུར་གསུངས་པ་དང་། །བཅུ་དྲུག་ཆ་དང་ལྡན་པ་ཡིས། །ཆ་དགུ་དག་ཏུ་བསྔགས་པ་ཡིན། །ཞེས་གསུངས་པས་སོ། །དེ་ལ་སྒོ་ཁྱུད་ནི་སྒོའི་ཚད་དོ། །དེའི་ཕྱེད་ནི་སྒོ་ [179b.5]འགྲམ་དང་སྒོ་ལོགས་ཀྱི་ཚད་དོ། །དེའི་ཕྱེད་ནི་ཚོན་སྣ་ལྔའི་སའོ། །ཁྱམས་དང་ལྷའི་གནས་ནི་སྒོའི་ཕྱེད་དུ་བརྟག་པར་བྱའོ་ཞེས་པ་ནི་རྒྱུད་གཞན་ལས་གསུངས་པའི་རིམ་པས་ཕྱེད་པ་སྟེ་འགལ་བ་མེད་དོ། །རྟ་བབས་ཀྱི་ཚད་ནི་ཐམས་ཅད་དུ་ཡང་སྒོའི་སུམ་པ་ལྔ་བ་ཡིན་ནོ། །ཕྱིའི་ [179b.6]དཀྱིལ་འཁོར་གྱི་ཕྱེད་ནི་གཉིས་པའོ། །དེའི་ཕྱེད་ནི་གསུམ་པའོ། །ནང་གི་དཀྱིལ་འཁོར་ནི་ཟུར་བཞི་སྒོ་བཞི་པ་ལ་རྟ་བབས་མེད་པར་ལེགས་པར་ཐིག་བཏབ་ནས། །དཀྱིལ་འཁོར་གྱི་ལྟེ་བར་སེང་ལྡེང་གི་ཕུར་བུ་སྨད་རྡོ་རྗེ་རྩེ་གཅིག་པའི་དབྱིབས་ལ། སྟོད་རྡོ་རྗེ་རྩེ་ལྔ་པ་ལྟ་བུ་ཧཱུཾ་ [179b.7]ལས་བསྐྱེད་ནས། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བི་གྷྣཱན་བནྡྷ་ཡ་ཧཱུཾ་ཕཊ་ཅེས་བྱ་བ་ལན་བརྒྱ་རྩ་བརྒྱད་བཟླས་ལ་རྡོ་རྗེ་ཐོ་བས་བརྡུང་བར་བྱའོ། །དེ་ནས་དེ་ལ་བཏགས་པའི་སྲད་བུས་ནང་གི་དཀྱིལ་འཁོར་གྱི་ཕྱི་རོལ་རྡོ་རྗེ་ཕྲེང་བའི་ཐིག་བཏབ་ལ། དེར་དཀྱིལ་འཁོར་བརྒྱད་འདྲ་བར་ཀ་ [180a] [180a.1]བ་བརྒྱད་ཀྱི་ཐིག་ཀྱང་དེ་བཞིན་དུ་གདབ་པར་བྱ་སྟེ། ཆ་མཉམ་པ་ལ་ཤར་ཕྱོགས་ཀྱི་ཆའི་ཀ་བའི་ཐིག་ལྷོའི་ཕྱོགས་ཀྱི་ཆར་འདུག་ལ་བྱང་དུ་བལྟས་ཏེ་ཐིག་གདབ་བོ། །ནུབ་ཕྱོགས་ཀྱི་ཆའི་ཀ་བའི་ཐིག་ནི་བྱང་ཕྱོགས་ཀྱི་ཆར་འདུག་ལ་ལྷོ་ཕྱོགས་སུ་བལྟའོ། །བྱང་ [180a.2]ཕྱོགས་ཀྱི་ཆའི་ཀ་བའི་ཐིག་ནི་ནུབ་ཕྱོགས་ཀྱི་ཆར་འདུག་ལ་ཤར་ཕྱོགས་སུ་བལྟའོ། །ལྷོ་ཕྱོགས་ཀྱི་ཆའི་ཀ་བའི་ཐིག་ནི་ཤར་ཕྱོགས་ཀྱི་ཆར་འདུག་ལ། །ནུབ་ཕྱོགས་སུ་མངོན་པར་བལྟས་ཏེ་ཐིག་གདབ་བོ། །དབུས་ཀྱི་ཕུར་བུ་ལ་བཏགས་པའི་སྲད་བུ་ཉིད་ཀྱིས་ཕྱིའི་དཀྱིལ་འཁོར་གྱི་ [180a.3]ཕྱི་རོལ་དུ་འོད་ཀྱི་དཀྱིལ་འཁོར་དང་། བསྐོར་ཕྱོགས་སུ་ཕྱིའི་རྡོ་རྗེ་རིགས་ཀྱི་གནས་ཀྱི་དཀྱིལ་འཁོར་ཟླུམ་པོ་དང་། ཁོར་ཡུག་དང་། ཁོར་ཡུག་ཆེན་པོ་དག་གི་ཐིག་གདབ་པར་བྱའོ། །དཀྱིལ་འཁོར་འདྲི་བར་བྱེད་པ་ན་གལ་ཏེ་འགའ་ཞིག་འགྲན་ཚོལ་ཞིང་བགེགས་སྐྱེད་པར་བྱེད་ [180a.4]དམ། བདག་ཉིད་བགེགས་བྱེད་པར་གྱུར་ན་དཀྱིལ་འཁོར་གྱི་འོད་ཀྱི་དཀྱིལ་འཁོར་དུ་གྲོག་མཁར་གྱི་ས་ལས་ལྷ་ལ་སོགས་པའི་བགེགས་ཀྱི་གཟུགས་བརྙན་བྱ་སྟེ། བརྒྱ་བྱིན་གྱི་གཟུགས་བརྙན་རང་གི་ཕྱོགས་གནས་པ་ལ་ཨི་ལས་བརྒྱ་བྱིན་མདོག་སེར་པོ་དང་། དེ་བཞིན་དུ་མེ་ལྷ་ལ་ [180a.5]སོགས་པའི་གཟུགས་བརྙན་རཾ་ལས་མེ་ལྷ་མདོག་དམར་པོ། ཨོཾ་ཧཱཾ་ལས་གཤིན་རྗེ་ནག་པོ། ཀཾ་ལས་སྲིན་པོ་ནག་པོ། །བཾ་ལས་ཆུ་ལྷ་དཀར་པོ། །ཡཾ་ལས་རླུང་ལྷ་དུད་ཀ།།ཕཊ་ལས་ལུས་ངན་པོ་སེར་པོ། །སུཾ་བྷ་ཞེས་བྱ་བ་ལས་དབང་ལྡན་དཀར་པོ་བསྐྱེད་ལ་རྡོ་རྗེ་ལྕགས་ཀྱུ་ལ་སོགས་པས་ [180a.6]བཀུག་སྟེ་བཅུག་ལ་བཅིངས་ཏེ། དབང་དུ་བྱས་ནས་ཕུར་བུས་གདབ་བོ། །ཤིན་ཏུ་ཡང་ཡུན་རིང་དུ་བགེགས་མེད་པར་བྱེད་འདོད་པས་སས་དགབ་པར་བྱའོ། །དེ་ལྟ་ན་ཡང་གལ་ཏེ་བགེགས་བྱེད་ན། རྡོ་རྗེ་ཧཱུཾ་མཛད་ཀྱི་སྦྱོར་བར་བྱས་ལ། འདོད་པའི་རྒྱལ་པོས་བཀུག་ནས་བཅུག་ལ་བཅིངས་ཏེ། [180a.7]རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ལ། རྐང་པ་གཡོན་པས་མནན་ཏེ། ཧཱུཾ་བཾ་ཧཱུཾ་ཞེས་བྱ་བ་ལ་སོགས་པ་སྤེལ་བའི་ཚུལ་གྱིས་གཡས་བརྐྱང་བའི་གནས་པས་འདུག་ལ། བགེགས་བྱེད་པ་སྤྲིན་ལ་སོགས་པ་ལ་མངོན་པར་བལྟས་ཏེ། དེ་ལ་ཕྱག་རྒྱ་འཕངས་ལ་ནམ་མཁའི་ཁམས་ [180b] [180b.1]ཐམས་ཅད་དུ་སྤྲོས་པས་འོད་ཟེར་འབར་བ་ཀུན་དུ་འཁྲུག་པ་དང་། རྡོ་རྗེ་ཧཱུཾ་མཛད་ཀྱིས་ཀྱང་རྐང་པས་བརྡེག་ཅིང་བསྣུན་པས་སྤྲིན་ལ་སོགས་པ་ཐལ་བར་བྱས་པར་གྱུར་པར་བསམས་ཏེ། དེས་ནི་དེ་དག་བཅོམ་པ་ཉིད་དུ་འགྱུར་རོ། །ཡང་ན་སྟོང་པ་ཉིད་ཀྱི་ཏིང་ངེ་འཛིན་མངོན་དུ་བྱས་ལ། [180b.2]དེའི་འོག་ཏུ་ཨ་ལས་རྣམ་པར་སྣང་མཛད་དུ་གྱུར་ནས། ཧཾ་ལས་འཕགས་པ་མི་གཡོ་བ་ཡིད་ཀྱིས་ཐུགས་ཀ་ནས་ཕྱུང་སྟེ། བཛྲ་ཧཾ་ཤནྡྷ་ཞེས་ཡིད་ལ་བརྗོད་ལ་ཕྱིའི་དཀྱིལ་འཁོར་གྱི་ཕྱི་རོལ་དུ་རླུང་གི་ཕྱོགས་སུ་དྲིས་ཐིག་ལེ་བདུན་བྱས་ཏེ། ཐིག་ལེ་རེ་རེ་ཞིང་ཡཾ་རེ་རེའི་ནང་དུ་ཆུད་པར་བྱས་ [180b.3]ལ། དབུས་མ་ཡང་ཡཾ་དང་ཐིག་ལེ་བདུན་དང་ལྡན་པར་བྱ་སྟེ། ཐིག་ལེ་བདུན་པོ་དེ་དག་ཀྱང་རླུང་ལྷ་བདུན་པོ་རི་དགས་ལ་ཞོན་པ། མདོག་ནག་པོ་འཕགས་པ་མི་གཡོ་བས། ཞགས་པས་བཅིངས་ནས་བཀུག་པར་གྱུར་པར་བསམས་ལ། དེ་རྣམས་ཀྱི་དབུས་མ་གཅིག་ནི་གཙོ་ [180b.4]བོ་ཡིན་ལ། ལྷག་མ་རླུང་ལྷ་དྲུག་པོ་ནི་དེ་ལ་འཁོར་དུ་བསྐོར་ཏེ་ཀུན་ནས་གནས་པར་བསམ་མོ། །དེ་ནས་ཁམ་ཕོར་མ་ལས་རི་རབ་ཏུ་བསམས་ལ། དེའི་སྟེང་དུ་དབང་ཆེན་གྱི་དཀྱིལ་འཁོར་ཡི་གེ་མ་ཉིད་ལས་ཐམས་ཅད་དུ་རྡོ་རྗེས་གཡོགས་པ། དབུས་སུ་ཡང་རྡོ་རྗེ་རྩེ་ལྔ་པ་ཡི་གེ་ཧཱུཾ་བྱུང་ [180b.5]བ་དང་། མཚམས་རྣམས་སུ་མདུང་རྩེ་རྣམ་པར་བསམས་ལ། དེ་བཞིན་དུ་བཛྲ་ཧཾ་བནྡྷ་ཞེས་བརྗོད་དེ་ཁམ་ཕོར་དེ་རྣམས་ཀྱིས་ཇི་སྐད་དུ་བཤད་པའི་ཡཾ་བདུན་དགབ་པར་བྱའོ། །དེ་ནས་ཁམ་ཕོར་དང་རི་རབ་ཀྱི་སྟེང་དུ་ཨོཾ་ལས་བཅོམ་ལྡན་འདས་རྣམ་པར་སྣང་མཛད་བསམས་ཏེ། འཕགས་ [180b.6]པ་མི་གཡོ་བ་ཡང་བཅོམ་ལྡན་འདས་ཀྱི་སྤྱན་སྔར་གཡོན་བརྐྱང་བས་རི་རབ་མནན་ནས་རལ་གྲི་དང་ཞགས་པས་རླུང་རྣམས་ལ་སྡིགས་མཛུབ་མཛད་པར་བསམས་ཏེ། དེ་ལྟ་བུས་ནི་རླུང་ཐམས་ཅད་བཅིང་བ་བྱས་པར་འགྱུར་རོ། །དེ་ནས་ཆུའི་བགེགས་བཟློག་པ་བཤད་པར་བྱ་སྟེ། ཧཾ་ལས་ [180b.7]རླུང་དང་མེའི་དཀྱིལ་འཁོར་ལ་གནས་པའི་འཕགས་པ་མི་གཡོ་བར་བདག་ཉིད་བསྐྱེད་ལ། གྲོག་མཁར་གྱི་སའམ། བ་ལང་གི་ལྕི་བས་ལ་མ་ལྷུང་བས་བགེགས་ཀྱི་གཟུགས་བརྙན་བྱས་ནས། ཁཾ་ལས་རལ་གྲི། །རཾ་ལ་མེའི་སྙིང་པོ་ཡོད་པ་བསྐྱེད་ལ། །ཀྵི་ལས་ཞགས་པ་དང་། [181a] [181a.1]ལྕགས་ཀྱུའི་རང་བཞིན་ཅན་བསྐྱེད་དེ། ལག་པ་གཡོན་པས་བཟུང་ལ། ལག་པ་གཡས་པས་ལྕགས་ཀྱུ་དང་། ཞགས་པས་དྲངས་ནས་བགེགས་ཀྱི་གཟུགས་བརྙན་གྱི་ནང་དུ་བཅུག་སྟེ། གཡོན་བརྐྱང་བའི་གནས་པས་བཙིར་ལ་འདི་སྐད་ཅེས་བརྗོད་དོ། །ན་མཿ [181a.2]ས་མནྟ་བཛྲཱ་ཎཱི། ཙཎྞ་མ་ཧཱ་རོ་ཥ་ཎ་སྥོ་ཊ་ཡ་ཧཱུཾ་ཏྲ་ཊ་ཧོཾ་མོཾ་ཞེས་བརྗོད་ནས་གཟུགས་བརྙན་དེ་རལ་གྲིས་གཏུབ་པར་བྱའོ། །དུག་དང་སྐྱེ་ཚེ་དང་། ལན་ཚྭ་ལ་སོགས་པས་གཟུགས་བརྙན་བསྐུས་ལ་མེས་གདུང་བར་བྱའོ། །དེ་ལྟར་མེས་གདུངས་པས་དེ་ཉིད་གདུངས་པར་འགྱུར་བར་ [181a.3]ཐེ་ཚོམ་མེད་དེ། ཚངས་པའམ་ནི་བརྒྱ་བྱིན་དག །དེ་ཡི་མོད་ལ་མྱུར་དུ་འཚིག །ཅེས་བཅོམ་ལྡན་འདས་རྣམ་པར་སྣང་མཛད་ཀྱིས་གསུངས་སོ། །ལས་འདི་དག་ཀྱང་འཕགས་པ་མི་གཡོ་བའི་རྣལ་འབྱོར་པའི་རྣལ་འབྱོར་གྱིས་འདིའི་གསང་སྔགས་ཁྲི་བཟླས་པའི་སྔོན་དུ་བསྙེན་པ་བྱས་ནས། [181a.4]དེའི་འོག་ཏུ་ལས་བྱའོ། །ཡང་ན་ཨོཾ་ཨཱཿཧཱུཾ་ཞེས་བྱ་བ་འདི་ཡང་གཤིན་རྗེ་གཤེད་སྐུ་མདོག་ནག་པོ་ཞལ་བཞི་པ་ཕྱག་བཞི་པ། ཞབས་དྲུག་པ། ཕྱག་གཉིས་ན་རལ་གྲི་དང་དགྲ་སྟ་བསྣམས་པ། ཕྱག་གཡོན་གཉིས་ན་ཞགས་པ་དང་གཏུན་ཤིང་བསྣམས་པ། ལྷོ་ཕྱོགས་སུ་གཟིགས་པ། ཁྲོ་ [181a.5]བོའི་ཚོགས་རྣམས་ཀྱིས་ནམ་མཁའ་ཀུན་དུ་གང་བར་གནས་པར་རྣམ་པར་བསམས་ལ། མདུང་ཐུང་གི་ཕྱག་རྒྱ་བཅིངས་ཏེ། སྤྲིན་ལ་སོགས་པ་བཟློག་པའི་བསམ་པས་འཁྲུགས་པ་དང་བཅས་པས་རབ་ཏུ་སྦྱར་བར་བྱའོ། །རྡོ་རྗེ་བསྡམས་པ་ནང་དུ་བཅིངས་ལ། མཛུབ་མོ་གཉིས་སྦྱར་ [181a.6]བ་ནི་མདུང་ཐུང་གི་ཕྱག་རྒྱའོ། །དེ་ལྟ་ན་ཡང་གལ་ཏེ་བགེགས་རྣམས་ཞི་བར་མ་གྱུར་ན། ཁམ་ཕོར་སོ་མ་བཏང་བ་གཉིས་ཀྱི་ནང་དུ་ཁྲག་དང་། དུར་ཁྲོད་ཀྱི་སོལ་བ་དང་། དུག་དང་སྐྱེ་ཚེ་དང་། ད་དུ་རའི་ལོ་མའི་ཁུ་བས་གསང་སྔགས་བྲིས་ལ་ཡུངས་ཀར་ལ་བརྒྱ་རྩ་བརྒྱད་བཟླས་བརྗོད་ [181a.7]བྱས་ནས་ཁམ་ཕོར་ཁ་སྦྱར་ཏེ། དེའི་ནང་དུ་བཞག་ལ་མེའི་བགེགས་ལ་སོགས་པ་བསམས་ལ། སྲེག་བླུགས་བརྒྱའམ། སྲེག་བླུགས་བདུན་སྦྱིན་སྲེག་བྱའོ། །དེ་ནས་དེ་དག་འཇིགས་པའམ་འཆི་བའམ་མི་མ་ཡིན་པས་གཟུང་བར་འགྱུར་རོ། །ཡང་ན་རྡོ་རྗེ་ཧཱུཾ་མཛད་ཀྱི་ [181b] [181b.1]སྦྱོར་བས་ཡི་གེ་ཧཱུཾ་བཟླས་བརྗོད་འབུམ་བྱས་ལ། མི་རུས་ཀྱི་རྒྱུ་ལས་བྱས་པའི་ཕུར་བུ་སོར་བཞི་བའི་ཚད་ཙམ་ལ་ལན་བརྒྱ་རྩ་བརྒྱད་བཟླས་ལ་དེ་བཞིན་དུ་རྡོ་རྗེ་ལྕགས་ཀྱུ་ལ་སོགས་པས་བཀུག་ཅིང་བཅུག་ནས་བཅིངས་ཏེ། གཟུགས་བརྙན་ཕུར་བུས་གདབ་པོ། །དེ་ནས་མེའི་ཚ་བཞི་བར་ [181b.2]འདོད་ན། མེའི་སྟེང་དུ་བཾ་ལས་ཆུའི་དཀྱིལ་འཁོར་རོ། །དེའི་སྟེང་དུ་པདྨའི་དབུས་ན་གནས་པའི་འཁོར་ལོ། དེའི་སྟེང་དུ་བཾ་ཉིད་ལས་བཅོམ་ལྡན་འདས་རྣམ་པར་སྣང་མཛད་དུང་དང་། ཀུནྡ་ལྟར་དཀར་བ་བཞུགས་ཏེ། མཚོ་ཆེན་པོ་མ་དྲོས་པ་འདྲ་བའི་རྒྱ་མཚོ་ཆེན་པོ་བཞི་ལས་ཆུ་བོ་བཞི་འབབ་ [181b.3]པའི་ཆར་གྱི་རྒྱུན་དགུས་ཕྱོགས་བཅུར་འགེངས་པར་གྱུར་པར་བསམ་པར་བྱའོ། །རྡོ་རྗེ་སྤྱན་དང་། རྡོ་རྗེ་མེ་ལྟར་འབར་བས་ཁམ་ཕོར་གྱི་རི་རབ་དང་། ཕུར་བུ་ཡང་དག་པར་བསྲུངས་ལ་རྡོ་རྗེ་གནོད་སྦྱིན་དང་། རྡོ་རྗེ་འཇིགས་བྱེད་ཀྱི་སྤྱན་དག་གིས་དེ་རྣམས་ཀྱི་ནམ་མཁའ་བཅིང་བར་ [181b.4]བྱས་ལ། རྡོ་རྗེ་བཅིང་བས་རྡོ་རྗེའི་དྲ་བ་བྱའོ། །ཡང་ན་ཆོས་ཐམས་ཅད་ནི་རྣམ་པར་རིག་པ་ཙམ་ལས་བྱུང་བ་ཡིན་ལ། བགེགས་རྣམས་ཀྱང་དེའི་ངོ་བོ་ཉིད་ཡིན་པས་བདག་མེད་པའི་མེས་ཐལ་བར་བྱས་ནས། དེའི་འོག་ཏུ་ཕྱི་དང་ནང་གི་བགེགས་རྣམས་ཞི་བར་འགྱུར་རོ། །དེ་ནས་དཀྱིལ་ [181b.5]འཁོར་གྱི་ལྟེ་བ་ལ་གནས་པའི་ཕུར་བུ་ཡི་གེ་ཧཱུཾ་བཞིས་ཕྱུང་ལ་ཕུར་བུའི་བུ་ག་ཚོན་སྣ་ལྔས་མཉམ་པོར་བྱའོ། །སྲད་བུ་ནི་ཚོན་དཀར་པོ་དྲི་ཞིམ་པོ་ལ་སྦགས་ནས་གདབ་པར་བྱའོ། །དེ་ལྟར་ལེགས་པར་ཐིག་གདབ་ནས་མིག་གཡས་དང་གཡོན་གཉིས་སུ་ཡི་གེ་ཧྲི་ལས་ཉི་མ་དང་ཟླ་བའི་ [181b.6]དཀྱིལ་འཁོར་བསྐྱེད་ལ། ཁྲོ་བོའི་ལྟ་བས་ཀུན་དུ་བལྟས་ནས་སྒོ་རྣམས་དབྱེའོ། །དེ་ཡང་ཧྲི་ལས་བྱུང་བའི་ཉི་མ་དང་ཟླ་བ་དག །མིག་ལ་རྣམ་པར་བཀོད་དེ་སྒོ་རྣམས་དབྱེའོ། །ཁྲོ་བོའི་ལྟ་བར་གནས་པས་ཀུན་བལྟས་ནས། དེ་ནས་སྒོ་རྣམས་ཐམས་ཅད་འབྱུང་བར་འགྱུར་ཞེས་གསུངས་ [181b.7]པས་སོ། །དེ་ནས་སྲད་བུ་ལ་བཤད་པའི་ཁ་དོག་གི་རིམ་པས་ཚོན་རྩི་རྣམས་བླངས་ལ། ཧཱུཾ་ཧཱཾ་ཧྲཱྀཿཨཿཨ་ཞེས་བྱ་བ་འདི་རྣམས་ལས་བསྐྱེད་དེ། རང་གི་རིགས་ཀྱི་ངོ་བོར་བསམས་ལ། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བྱ་བ་འདི་ཕྱག་རྒྱ་དང་བཅས་པས་སྟོང་རྩ་བརྒྱད་མངོན་པར་བཟླས་བརྗོད་ [182a] [182a.1]བྱའོ། །དེ་ལ་དེའི་ཕྱག་རྒྱ་ནི་འདི་ཡིན་ཏེ། རྡོ་རྗེ་ཕྱག་རྒྱ་གཉི་ག་ཡི། །མཛུབ་མོའི་རྩེ་མོ་རབ་སྦྱར་བ། །བྱས་ནས་ཚོན་རྩི་ཐམས་ཅད་ལ། །འབར་བའི་ལྟ་བས་དགུག་པར་བྱ། །མཐར་ཡི་གེ་ཧྲི་དང་། རྡོ་རྗེ་པདྨའི་ཕྱག་རྒྱས་སྦར་བར་བྱའོ། །དེ་ལ་འབར་བའི་ལྟ་བ་ནི་འདི་ [182a.2]ཡིན་ཏེ། རབ་ཏུ་མྱུར་བར་གཡོ་བའི་མིག །མིག་གི་རྫི་མ་འདྲེན་པ་ནི། །འབར་བའི་ལྟ་བ་ཞེས་སུ་གསུངས། །འགྲོ་བ་ཐམས་ཅད་དགུག་པའོ། །དེ་ནས་ཚོན་མང་པོར་བྱ་བའི་ཕྱིར། བདེན་པའི་བྱིན་གྱི་རླབས་པ་བྱ་སྟེ། བདེན་པ་གང་གིས་སེམས་ཅན་རྣམས་ལ་སངས་རྒྱས་ [182a.3]རྣམས་སེམས་ཅན་རྗེས་སུ་དཔག་པས་ཆགས་པར་མཛད་པའི་བདེན་པ་དེས་ཚོན་རྩི་རྣམས་འབར་བར་གྱུར་ཅིག་ཅེས་བྱའོ། །དེ་ནས་ཡང་དག་པར་མཆོད་ལ། རྡོ་རྗེ་སེམས་དཔའི་སྦྱོར་བ་དང་ལྡན་པས་རྡོ་རྗེ་སེམས་དཔའི་ཕྱག་རྒྱས་ཚོན་དཀར་པོ་བླངས་ལ། ཨོཾ་བཛྲ་རཱ་ག་ས་མ་ཡ་ཧཱུཾ་ [182a.4]ཞེས་བརྗོད་དེ། དབུས་སུ་བཀྱེ་ལ་དབང་ལྡན་གྱི་ཕྱོགས་སུ་སོང་སྟེ། དེ་བཞིན་དུ་སྔགས་ཟློས་ཤིང་ནང་དུ་གནས་ལ། གཡས་ནས་བསྐོར་བའི་རིམ་པས་མཉམ་ཞིང་རྒྱུན་མ་འཆད་པར་གཡོན་པའི་རྡོ་རྗེ་ཁུ་ཚུར་ཆེན་པོས་དང་པོ་ཚོན་བཀྱེ་ལ། དེའི་འོག་ཏུ་ཅི་བདེར་བྱའོ། །དེ་ལ་རིམ་པ་འདིས་ [182a.5]བཀྱེ་བར་བྱ་སྟེ། སྔོན་པོ་རྡོ་རྗེ་རྩེ་རང་བཞིན། །གཉིས་པ་གསེར་ལ་དམིགས་པ་སྟེ། །པདྨ་རཱ་གའི་རང་བཞིན་གཞན། །གཞན་དག་མར་ཀཏ་ལྟ་བུར་བཤད། །དཀར་པོ་ནང་དུ་ཤེས་བྱ་སྟེ། །འདི་ནི་ཚོན་གྱི་རིམ་པར་བཤད། །ཤར་ཕྱོགས་སུ་ནི་སྔོན་པོ་སྟེ། །ལྷོ་ནི་སེར་པོ་ལེགས་སྦྱར་ [182a.6]བ། །ནུབ་ཀྱི་ཆར་ནི་དམར་པོ་སྟེ། བྱང་ནི་ལྗང་གུ་ཡང་དག་ལྡན། །དབུས་ཀྱི་ས་ཡི་ཆ་ཉིད་དེ། །ཤེལ་ལྟར་སྣང་བ་བླ་ན་མེད། །རྡོ་རྗེ་དྲིལ་བུ་རྟག་འཆང་ཞིང་། །ཤིན་ཏུ་མཉམ་བཞག་ལེགས་པར་བྲི། །གསང་སྔགས་དེ་ཉིད་ཡོངས་བཟླས་ཤིང་། །ཚོན་གྱིས་ཐིག་ནི་ཡོངས་སུ་དགང་། ། [182a.7]ནང་གི་འཁོར་ལོ་ཚོན་དཀར་པོས་བྲིའོ། །གཉིས་པ་གཟུངས་ཀྱི་དཀྱིལ་འཁོར་ནི་ཚོན་སྣ་ལྔས་བྲིའོ། །གསུམ་པ་ནི་ཚོན་གྱི་ཕྱེ་མ་ལྔས་བྲིའོ། །ཕྱི་རོལ་རྡོ་རྗེ་རིགས་ཀྱི་དཀྱིལ་འཁོར་ནི་ཚོན་དཀར་པོ་དང་། ནག་པོ་དང་། དམར་པོས་བྲིའོ། །འོད་ལ་སོགས་པ་དང་། ཁོར་ཡུག་དང་། [182b] [182b.1]ཁོར་ཡུག་ཆེན་པོའི་ཐིག་ནི་དཀར་པོའམ། སེར་པོས་དགང་བར་བྱའོ། །དེ་ནས་ཕྱི་རོལ་ཀུན་དུ་དྲི་ཞིམ་པོའི་དྲིས་ཉེ་བར་བྱུགས་ལ། མེ་ཏོག་གི་སིལ་མ་གཏོར་ཏེ། ཡི་གེ་བརྒྱ་པ་བཟླས་པའི་ཆུས་དབང་ལྡན་གྱི་ཕྱོགས་ནས་བརྩམས་ཏེ། ཕྱི་དང་ནང་དུ་བཅས་པ་བསང་གཏོར་བྱའོ། །དེ་ནས་ [182b.2]དཀྱིལ་འཁོར་ཆེན་པོ་བྱིན་གྱིས་བརླབ་པར་བྱ་བའི་ཕྱིར་རྡོ་རྗེ་འཁོར་ལོའི་ཕྱག་རྒྱ་ཁའི་དབུས་སུ་བཞག་ལ། ཨོཾ་བཛྲ་ཙཀྲ་ཧཱུཾ་ཞེས་བཟླས་བརྗོད་བྱའོ། །དེ་ནས་ཕྱི་དྲོའི་དུས་སུ་གླུ་དང་རོལ་མོའི་མཆོད་པ་རྣམས་དང་། མེ་ཏོག་དང་སྤོས་ལ་སོགས་པ་རྣམས་ཀྱིས་དང་པོའི་འཁོར་ལོ་ཇི་སྙེད་པ་ [182b.3]དང་། ཅི་འདོད་པ་དེ་བཞིན་དུ་མཆོད་ཅིང་བརྟག་པར་བྱའོ། །དེ་ནས་འཇམ་དཔལ་གཞོན་ནུར་གྱུར་པའི་དམ་ཚིག་སེམས་དཔའི་སྐུ་གཟུགས་ལུགས་མ་ལ་སོགས་པ་དམར་སྐྱ་ས་མ་ཡ་སྟྭཾ་ཞེས་བརྗོད་ལ་རང་གི་སྙིང་པོས་བཞུགས་སུ་གསོལ་ཏེ། ཡི་གེ་ཕྱིན་ཅི་མ་ལོག་པས་ཁ་སྦྱར་གྱི་ [182b.4]སྡོམ་པ་གསལ་བར་སྣང་ལ་བཞུགས་པའི་བཅོམ་ལྡན་འདས་རང་གི་དམ་ཚིག་ཕྱག་རྒྱས་དགུག་པ་ལ་སོགས་པའི་ཚུལ་གྱིས་བཀུག་ལ་བཅུག་སྟེ་བཅིངས་ནས་དབང་དུ་བྱས་ཏེ། ཕྱག་རྒྱ་བཞིས་རྒྱས་བཏབ་པ་བྱས་ལ། བྱིན་གྱིས་བརླབ་ཅིང་མཉེས་པར་བྱས་ནས་གཞག་པར་བྱ་སྟེ། [182b.5]དེ་བཞིན་དུ་ཐམས་ཅད་ལའང་ཤེས་པར་བྱའོ། །ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ན་མཱུ་རྟི་བཱ་གཱི་ཤྭར། མ་ཧཱ་པ་ཙ་ག་ག་ན། ཨ་མ་ལ་སུ་པ་རི་ཤུདྡྷ་དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿཞེས་བྱ་བ་འདིས་དབུས་སུ་བཅོམ་ལྡན་འདས་བཞུགས་སུ་གསོལ་ཏེ། གཞན་ཡང་། ཨོཾ་ཧཱུཾ་ཧྲཱིཿཞེས་བྱ་བའི་སྙིང་པོས་བཞུགས་ [182b.6]སུ་གསོལ་ཏེ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཡིན་པའི་ཕྱིར་ཐམས་ཅད་ཀྱི་ཐུན་མོང་ཡིན་ནོ། །ཡང་ན་རང་རང་གི་སྔགས་ཀྱིས་བཞུགས་སུ་གསོལ་ཏེ། དེ་ལ་ཨོཾ་བྷྲཱུྃ་ཨུཥྞཱི་ཥ། ཤར་གྱི་ཕྱོགས་ཀྱི་འདབ་མ་ལའོ། །ཨོཾ་ཏེ་ཛོ་ར་ཤི་སྭཱ་ཧཱ། ལྷོར་རོ། །ཨོཾ་མ་མ་མ་མ་ཧཱུཾ། ནུབ་ [182b.7]ཏུའོ། །ཨོཾ་བི་ཛ་ཡ་ཧ། བྱང་དུའོ། །ཨོཾ་ཀླེ་ཤ་ཨཥྚ་ནི་ཧཱུཾ་ཕཊ། དབང་ལྡན་གྱི་ཕྱོགས་སུའོ། །ཨོཾ་ཛྭ་ལ་ཛྭ་ལ། དི་བྱ་དི་བྱ། ཨུདྒྷ་ཊ་ཨཥྞཱི་ཥ་དྷུ་ན་དྷུ་ན་ཧཱུཾ། མེའི་ཕྱོགས་སུའོ། །ཨོཾ་ཏྲཾ་བནྡྷ་ཧཱུཾ། བདེན་བྲལ་གྱི་ཕྱོགས་སུའོ། །ཨོཾ་ཛྭ་ལ་ཛྭ་ལ་ཨུཥྞཱི་ཥ། ཨོཾ་ཛྭ་ལ་ཛྭ་ལ། བནྡྷ་བནྡྷ། ད་མ་ད་མ། [183a] [183a.1]དྲུ་མ་དྲུ་མ། ཧ་ན་ཧ་ན་ཧཱུཾ། རླུང་གི་ཕྱོགས་སུའོ། །ཨོཾ་ཧཱུཾ་ཏྲཱཾ་ཧྲཱིཿཨཿཞེས་བྱ་བའི་སྙིང་པོས་མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པ་སྟེ། དེ་བཞིན་གཤེགས་པ་རྣམས་དགོད་པར་བྱའོ། །ཨ་རྡོ་རྗེ་སེམས་དཔའོ། ། [183a.2]ཛ་རྡོ་རྗེ་རྒྱལ་བའོ། །ཧོཿརྡོ་རྗེ་ཆགས་པའོ། །བ་རྡོ་རྗེ་ལེགས་པའོ། །ཨོཾ་རྡོ་རྗེ་རིན་ཆེན་ནོ། །ཨོཾ་རྡོ་རྗེ་གཟི་བརྗིད་དོ། །ཏྲཾ་རྡོ་རྗེ་རྒྱལ་མཚན་ནོ། །ཧ་རྡོ་རྗེ་བཞད་པའོ། །ཧྲཱིཿརྡོ་རྗེ་ཆོས་སོ། །དྷྭཾ་རྡོ་རྗེ་རྣོན་པོའོ། །སོཾ་རྡོ་རྗེ་རྒྱུའོ། རྃ་རྡོ་རྗེ་སྨྲ་བའོ། །ཀྃ་རྡོ་རྗེ་ལས་སོ། །ཧྃ་རྡོ་རྗེ་སྲུང་བའོ། །ཧཱུཾ་རྡོ་རྗེ་ [183a.3]གནོད་སྦྱིན་ནོ། །བཾ་རྡོ་རྗེ་ཁུ་ཚུར་རོ། །ལཱྃ་མཱྃ་པཱྃ་ཏཱྃ། མཚམས་རྣམས་སུའོ། །སྒོ་རྣམས་སུ་ཛཿརྡོ་རྗེ་ལྕགས་ཀྱུའོ། །ཧཱུཾ་རྡོ་རྗེ་ཞགས་པའོ། །བཾ་རྡོ་རྗེ་ལྕགས་སྒྲོག་གོ། །ཧོཿརྡོ་རྗེ་དྲིལ་བུའོ། །ཨོཾ་བཛྲ་བེེ་ག་ཨ་ཀྲ་མ་ཧཱུཾ་ཞེས་བྱ་བ་དང་། །རྡོ་རྗེ་ཤུགས་ཀྱིས་བྱུང་ལ། གཉིས་པ་གཟུངས་ཀྱི་དཀྱིལ་ [183a.4]འཁོར་དུ། ཨོཾ་བྷཱུ་མི་བི་ཤོ་དྷ་ནི་སརྦ་ཨརྠ་པ་རི་པཱུ་ར་ཎི་བཾ་བྷུ་ཏཾ་ཞེས་བྱ་བས་ཤར་དུ་ས་རྣམས་གཞག་པར་བྱའོ། །ཨོཾ་སརྦ་པཱ་ར་མི་ཏཱ་ཨརྠ་པ་རི་པཱུ་ར་ཎི་ཨོ་པྲ་ཧཱུཾ་ཧཾ་ཞེས་བྱ་བས་ལྷོ་ཕྱོགས་སུ་ཕ་རོལ་ཏུ་ཕྱིན་པ་རྣམས་དགོད་དོ། །ཨོཾ་སརྦ་བ་ཤི་ཏེ་ཧྲཾ་རུ་ཧཱུཾ་ཞེས་བྱ་བས་ནུབ་ཏུ་དབང་ཐམས་ཅད་ [183a.5]དགོད་དོ། །ཨོཾ་ཁ་ས་མཱཿསརྦ་དྷརྨ་ཁཾ་ཞེས་བྱ་བས་བྱང་དུ་གཟུངས་ཐམས་ཅད་དགོད་དོ། །དེ་ཉིད་དུ་སྒོ་རྣམས་སུ་ཛཿརྡོ་རྗེ་ལྕགས་ཀྱུའོ། །ཧཱུཾ་རྡོ་རྗེ་ཞགས་པའོ། །བཾ་རྡོ་རྗེ་ལྕགས་སྒོག་གོ། །ཧོཿརྡོ་རྗེ་དྲོལ་བུའོ། །མཚམས་སུ་ཧོ་རྡོ་རྗེ་སྒེག་མོའོ། །ལཱ་རྡོ་རྗེ་ཕྲེང་བ་མའོ། །གཱི་རྡོ་རྗེ་གླུ་མའོ། །ནྲྀ་རྡོ་རྗེ་གར་མའོ། །རྡོ་རྗེ་ [183a.6]ཤུགས་ཀྱིས་རྒལ་ལ་རིམ་པ་གསུམ་པའི་དཀྱིལ་འཁོར་དུ་ཤར་ནས་ཀུན་དུ་བཟང་པོ་ལ་སོགས་པ་དགོད་པར་བྱ་སྟེ། ཨོཾ་ས་མནྟ་བྷ་དྲ་སྭཱ་ཧཱ། ཨོཾ་ཨཀྵ་ཡེ་ཕུ་ཕུ། ཨོཾ་ཨ་ཀྵ་ཡ་ཀརྨྨ་ཨཱ་བར་ཎ་བི་ཤོ་དྷ་ནི་སྭཱ་ཧཱ། ཀུ་ཀྵི་ཧ་ར་ཛཱ་སྭཱ་ཧཱ། ཨོཾ་ཁ་ཨཱ་ཀཱ་ཤ་གརྦྷ་ཡ་སྭཱ་ཧཱ། ལྷོ་ཕྱོགས་སུ་ཨོཾ་ག་ག་ [183a.7]ནཱ་གཱ་ན་ཛཱ་སྭཱ་ཧཱ། ཨོཾ་རྟན་བཱ་ཎི་སྭཱ་ཧཱ། ཨོཾ་སཱ་ག་ར་མ་ཏི་སཾ་ཧ་ར་སྭཱ་ཧཱ། ཨོཾ་བཛྲ་གརྦྷ་ཧཱུཾ་ཕཊ། ནུབ་ཕྱོགས་སུ། ཨོཾ་ཧྲཱིཿཨོཾ་སྠཱ་མེ་སྠཱ་མེ་མ་ཧཱ་སྠཱེ་མེ་བ་ཏི་སྭཱ་ཧཱ། །ཙནྡྲེ་སུ་ཙ་ནྦྲེ་བྱ་བ་ལོ་ཀི་ཏེ་སྭཱ་ཧཱ། ཨོཾ་ཛྭ་ལ་ནི་མ་ཧཱ་ཛྭ་ལ་ནི་སྭཱ་ཧཱ། བྱང་ཕྱོགས་སུ། ཨོཾ་ཨ་མྲྀ་ཏེ་པྲ་བྷེ་ཨ་མྲྀ་ཏ་བ་ཏི་ཧཱུཾ། ཨོཾ་པྲ་ཏི་ [183b] [183b.1]བྷ་ནེ་བྲ་ཏི་བྷ་ན་ཀུ་ཊེ་ཧཱུཾ། ཨོཾ་སརྦ་ཤོ་ཀ་ཏ་མོ་ནི་ར་ཧ་ཏ་མ་ཧི་ཧཱུཾ། ཨོཾ་སརྦ་ནི་བ་ར་ཎ་བིཥྐཾ་བི་ན་ཧཱུཾ། དེའི་སྒོར་ནི། ཨོཾ་ཡ་མཱནྟ་ཀ་ཧཱུཾ། ཨོཾ་པྲཛྲཱཾ་ཏ་ཀ་ཧཱུཾ། ཨོཾ་པདྨཱཾ་ཏ་ཀ་ཧཱུཾ། ཨོཾ་ཨ་མྲྀ་ཏ་ཀུནྜ་ལི་བིགྷྣ་ནྟ་ཀ་ཧཱུཾ། མཚམས་རྣམས་སུ། །ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ལ་ཡ་གྲྀཧྞཱ་པ་ལ་ཡ་ [183b.2]ཧཱུཾ་ཨཱ་ན་ཡ་ཧོཿབྷ་ག་བཱན་བིདྱ་རཱ་ཛ་ཧཱུཾ་ཕཊ། །ཁམས་གསུམ་རྣམ་པར་རྒྱལ་བའི་འོ། །ཨོཾ་བཛྲ་ཛྭ་ལ་ཨ་ན་ལཱ་རྐ་ཧཱུཾ། རྡོ་རྗེ་མེ་ལྟར་འབར་བའི་འོ། །ཨོཾ་ཧེ་རུ་ཀ་བཛྲ་ས་མ་ཡ་ཧྲཱི་སརྦ་དུཥྚ་ས་མ་ཡ་མུཊྚ་བྲ་བྷ་སྟ་ཙཀྲ་ཧཱུཾ་ཕཊ། །རྡོ་རྗེ་ཁྲག་འཐུང་གིའོ། །ཨོཾ་སུམྦྷ་ནི་སུམྦྷ་ཧཱུཾ། རྟ་མཆོག་གིའོ། །ཨོཾ་ [183b.3]བཛྲ་པུཥྤེ། ཨོཾ་བཛྲ་དྷཱུ་པེ། ཨོཾ་བེཛྲ་དཱི་པེ། ཨོཾ་བཛྲ་གནྡྷེ། ཨོཾ་བཛྲ་རཱུ་པ། ཨོཾ་བཛྲ་ཤབྟ། ཨོཾ་བཛྲ་གནྡྷེ། ཨོཾ་བཛྲ་རཱ་སེ། །ཨོཾ་བཛྲ་སྤརྴེ། དཀྱིལ་འཁོར་གྱི་མཚམས་རྣམས་དང་། སྒོའི་མཚམས་ཀྱི་ལེའུ་ཅོ་རྣམས་སུའོ། །རྡོ་རྗེ་ཤུགས་ཀྱིས་ཕྱུང་ལ། ཕྱི་རོལ་གྱི་རྡོ་རྗེ་རིགས་ཀྱི་དཀྱིལ་ [183b.4]འཁོར་དུ་ཚངས་པ་ལ་སོགས་ཨོཾ་དང་སྭཱ་ཧཱ་གཉིས་པར་དུ་མིང་དང་ལྡན་པར་དགོད་པར་བྱ་སྟེ། ཨོཾ་བྲཧྨ་ཎེ་སྭཱ་ཧཱ། ཨོཾ་བིཥྞུ་བེ་སྭཱ་ཧཱ། ཞེས་ཐམས་ཅད་ལ་སྦྱར་རོ། །དེ་ནས་དཀྱིལ་འཁོར་ཡང་དག་པར་མཆོད་ལ། ལྷའི་འཁོར་ལོ་ཕྱག་རྒྱ་བཞིས་རྒྱས་བཏབ་པར་བསྒོམས་ནས། དེའི་ [183b.5]གསང་སྔགས་བརྗོད་ལ་དཀྱིལ་འཁོར་ལན་བདུན་བསྐོར་བ་བྱ་སྟེ། རྡོ་རྗེ་དྲིལ་བུ་དཀྲོལ་ལ་མེ་ཏོག་སྔོན་པོའི་ཕྲེང་བ་བླངས་ཏེ། རྡོ་རྗེ་ཧཱུཾ་མཛད་ཀྱི་སྦྱོར་བས་བསྐོར་བ་ལན་གསུམ་བྱས་ལ་ཉེས་པ་ཞི་བར་བྱ་བའི་ཕྱིར་བལྟས་ལ། བཅོམ་ལྡན་འདས་ལ་ཕུལ་ཏེ། གར་བྱས་ནས་བླངས་ [183b.6]ལ་རྡོ་རྗེ་ཧཱུཾ་མཛད་ཉིད་ཀྱིས་རང་གི་མགོ་ལ་བཅིང་བར་བྱའོ། །དེའི་འོག་རྡོ་རྗེ་སློབ་དཔོན་མཉམ་པར་གཞག་པས་དབུས་སུ་འདུག་ལ་ཡིད་ཀྱིས་སྒོ་བཞི་དབྱེ་བར་བྱ་སྟེ། ཨོཾ་བཛྲ་ཨུངྒྷ་ཊ་ཡ་ས་མ་ཡ་པྲ་བེེ་ཤ་ཡ་ཧཱུཾ། འདིའི་ཕྱག་རྒྱ་ནི་རྡོ་རྗེ་མཛུབ་མོ་ལེགས་པར་ནི། །སྦྱར་ལ་བཀན་ཏེ་ [183b.7]བསྡམས་ནས་སུ། །རབ་ཏུ་ཁྲོས་ནས་དབྱེ་བ་ནི། །སྒོ་འབྱེད་པ་ཡི་མཆོག་ཡིན་ནོ། །དེའི་འོག་ཏུ་ཕྱག་བཞི་སྔོན་དུ་འགྲོ་བའི་སྡོམ་པ་གཟུང་བར་བྱས་ལ། གོས་དམར་པོ་ལ་རྡོ་རྗེ་སེམས་དཔའ་དང་གཙུག་ཏོར་ཡོངས་སུ་བཟླས་པའི་ཟེའུ་ཀ་བཅིངས་ཏེ། སྒོ་སྲུང་གིས་གདོང་ [184a] [184a.1]གཡོགས་ལ་བཟླས་ལ། རྡོ་རྗེ་གོ་ཆས་གོ་གོན་ཞིང་ཟེའུ་ཀ་ལ་སོགས་པ་བཅིངས་བའི་སློབ་དཔོན་འཇམ་པའི་དབྱངས་ཀྱི་དམ་ཚིག་གི་ཕྱག་རྒྱས་མེ་ཏོག་གི་ཕྲེང་བ་བླངས་ལ། ཨོཾ་བཛྲ་ས་མ་ཡ་པྲ་བེེ་ཤ་མི་ཞེས་བརྗོད་དོ། །དེ་ནས་རྡོ་རྗེའི་ཆུ་འཐུངས་ལ་བདག་ཉིད་ [184a.2]འཇུག་པར་བྱ་སྟེ། ཏིཥྛ་བཛྲ། ཞེས་བྱ་བ་ལ་སོགས་པས་རང་གི་སྙིང་གར་ཕྱག་རྒྱ་དགྲོལ་བ་ལ་སོགས་པ་བྱ་སྟེ། ཕྲེང་བ་དེ་དཀྱིལ་འཁོར་ཆེན་པོར་དོར་ལ། རང་གི་མགོ་ལ་བཅིངས་ཏེ་གདོང་གཡོགས་དགྲོལ་ཆུའི་དབང་བསྐུར་བ་དང་། སངས་རྒྱས་ལྔའི་དབུ་རྒྱན་དང་། དར་དཔྱངས་དང་། རྡོ་རྗེ་ [184a.3]ཕྲེང་བ་དང་། བདག་པོ་དང་། རང་གི་རྡོ་རྗེ་དང་། རྡོ་རྗེ་མིང་གི་དབང་བསྐུར་བ་རྣམས་བཅོམ་ལྡན་འདས་ལ་ཕྱག་བྱས་ལ། བཅོམ་ལྡན་འདས་ལས་བླང་བར་བྱ་ཞིང་། དེ་ཁོ་ན་ཉིད་དང་ཆོས་ཀྱི་སྡོམ་པ་དང་། དངོས་གྲུབ་ཀྱི་རྡོ་རྗེ་བརྟུལ་ཞུགས་རྣམས་ཀྱང་བླངས་ནས་མེ་ཏོག་ལ་སོགས་པ་དང་། [184a.4]སྒེག་མོ་ལ་སོགས་པས་བདག་ཉིད་ཡང་དག་པར་མཆོད་དེ། འཇམ་པའི་དབྱངས་ཀྱི་ཕྱག་རྒྱ་ཆེན་པོར་མཐོང་ན། མཉྫུ་གྷོ་ཥ་ཧཾ་ཞེས་རང་གི་མིང་བརྗོད་པར་བྱའོ། །དེ་བཞིན་དུ་དཀྱིལ་འཁོར་མ་ལུས་པར་བསྒྲུབ་པར་བྱའོ། །བདག་ལ་བྱིན་གྱིས་བརླབ་པ་ལ་སོགས་ཇི་ལྟ་བུར་ནི་བཀའ་ [184a.5]ནོད་དོ། །དེ་ལྟར་བགྱིས་ནས་བདག་མིང་བརྗོད། །དེ་ནས་རྡོ་རྗེ་སྒྲུབ་པར་བགྱི། །ཞེས་བྱ་བས་སྒྲུབ་པར་འགྱུར་རོ། །དེ་ནས་མདུན་དུ་འདུག་ལ། རྡོ་རྗེ་སློབ་དཔོན་མཉམ་པར་གཞག་སྟེ། རྡོ་རྗེ་སློབ་དཔོན་སེམས་དཔའ་ཡི། །རྡོ་རྗེ་ལྕགས་ཀྱུ་བཅིངས་ནས་ནི། །རྡོ་རྗེ་སེ་གོལ་བརྡབ་ [184a.6]བགྱིས་ལ། །སངས་རྒྱས་ཐམས་ཅད་བསྡུ་བར་བགྱི། །ཨོཾ་བཛྲ་ས་མ་ཡ་ཛ་ཛཿཧཱུཾ་བཾ་ཧོཿཞེས་བརྗོད་པར་བྱའོ། །དེ་ནས་མགོན་པོ་འཇམ་དབྱངས་ཀྱི། །ཕྱག་རྒྱ་ཆེན་པོ་སྒོམ་བྱེད་ཅིང་། །མིང་བརྒྱ་རྩ་བརྒྱད་དམ་པ་ནི། །ལན་ཅིག་རབ་ཏུ་བརྗོད་པར་བགྱི། །ཡང་ན། མཆོག་སྦྱིན་རྡོ་ [184a.7]རྗེ་མཆོག་ཁྱོད་འདུད། །ཡང་དག་མཐར་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །སངས་རྒྱས་ [184b] [184b.1]རོལ་ལ་ཕྱག་འཚལ་འདུད། །སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་ལ་ཕྱག་འཚལ་འདུད། །སངས་རྒྱས་གསུང་ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །མེད་པ་ལས་བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་འདུད། ། [184b.2]ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །ཅེས་བྱ་བས་བསྟོད་དོ། །དེ་ནས་རྡོ་རྗེ་ལྕགས་ཀྱུ་ལ་སོགས་པས་རང་རང་གི་སྒོ་ནས་ [184b.3]དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་བྱས་ལ་མཆོད་ཡོན་ཕུལ་ཏེ། རང་གི་སྔགས་བརྗོད་ལ། དྲྀ་ཤྱ་ཧོ་ཞེས་བརྗོད་དོ། །ཛཿཧཱུཾ་བཾ་ཧོཿས་མ་ཡ་སྟྭཾ་ས་མ་ཡ་ཧོ་྅་ཧཾ། དེ་ནས་རང་གི་གསང་སྔགས་བརྗོད་དོ། དེ་ལྟར་ན་གྲུབ་པར་འགྱུར་རོ། །དེ་ནས་དམ་ཚིག་ [184b.4]གི་ཕྱག་རྒྱ་རྣམས་བསྟན་པར་བྱ་སྟེ། དམ་ཚིག་ཕྱག་རྒྱ་ཐམས་ཅད་ནི། །རྡོ་རྗེ་བསྡམས་ལས་བྱུང་བས་ན། །དེ་དག་བསྡམས་པ་རྡོ་རྗེ་ཡི། །བསྡམས་པ་བླ་མེད་བཤད་པར་བྱ། །རྡོ་རྗེ་བསྡམས་པ་ནང་དུ་བཅིངས་པ་ལས་བྱུང་བ་ནི་གཙུག་གཏོར་རྣམས་ཀྱིའོ། །རྡོ་རྗེ་བསྡམས་པ་ལས་གུང་མོ་གཉིས་ [184b.5]ཀྱི་ཚིགས་གསུམ་པ་བཅག་ལ་རལ་གྲི་ལྟ་བུར་བཞག། །མཛུབ་མོ་གཉིས་བསྒྲེངས་ལ་མཐེ་བོའི་སྟེང་དུ་བཅག་ནས་གཞག་པ་ནི་འཇམ་པའི་དབྱངས་ཀྱི་ཕྱག་རྒྱའོ། །མཐེའུ་ཆུང་སྲིན་ལག་ཁུ་ཚུར་བྱ། །གུང་མོ་དག་ནི་རབ་ཏུ་བརྐྱང་། །མཛུབ་མོ་མཐེ་བོ་སྦྱར་བ་ནི། །འཁོར་ལོས་སྒྱུར་ཉིད་ [184b.6]སྟེར་བྱེད་པའོ། །རབ་ཏུ་བརྐྱང་ནས་སྦྱར་བ་ནི། །གཙུག་ཏོར་དཀར་པོ་ཡིན་པར་བཤད། །སྲིན་ལག་མཐེ་བོང་ལེགས་སྦྱར་ཞིང་། །གུང་མོ་གཉིས་ནི་རྣམ་པར་བརྟག། །གཟི་བརྗིད་ཕུང་པོ་དེ་བཞིན་དུ། །རལ་གྲི་སྦྱར་བ་རྣམ་རྒྱལ་ཡིན། །དེ་ཉིད་རྒྱལ་བ་ཞེས་གྲགས་པའི། །རྡོ་རྗེ་དཀྲོལ་ [184b.7]བ་དེ་བཞིན་གཤེགས། །ཁུ་ཚུར་ནང་དུ་ལྡན་བྱས་ལ། །གཙུག་ཏོར་འདྲ་བར་འབྱུང་བ་ནི། །གྱེན་དུ་འབྱུང་དང་ཆེར་འབྱུང་གི །མི་བསྐྱོད་པ་ཡིས་ལ་རེག། །དེ་བཞིན་མཆོག་སྦྱིན་རིན་ཆེན་འབྱུང་། །བསམ་གཏན་ཕྱག་རྒྱ་འོད་དཔག་མེད། །དོན་ཡོད་གྲུབ་ཀྱི་མི་འཇིགས་སྦྱིན། །གུང་ [185a] [185a.1]མོ་གཉིས་ནི་སྦྱར་བ་མཆོག། །མཐེ་བོང་མཐེ་ཆུང་རབ་ཏུ་བརྐྱང་། །ལྕགས་ཀྱུ་མདའ་ཡི་སྦྱོར་བ་དང་། །ལེགས་སོ་ཞེས་ནི་སྦྱིན་པར་བྱ། །དབུས་མ་རིན་ཆེན་རྡོ་རྗེ་མཆོག། །མཛུབ་མོ་རྣམས་ཕྱེ་གཟི་བརྗིད་མཆོག། །རྒྱལ་མཚན་གནས་སུ་ངེས་སྦྱར་དང་། ། [185a.2]བཞད་པའི་དུས་སུ་རབ་སྦྱར་ཏེ། །རྡོ་རྗེ་ཆོས་ཀྱི་ཕྱག་རྒྱ་ཆེ། །གུང་མོ་པདྨ་རབ་བསྐུམ་པའོ། །རལ་གྲི་འདྲ་བ་འཇམ་དབྱངས་ཀྱི། །འཁོར་ལོས་སྒྱུར་བ་འཁོར་ལོ་འདྲ། །ཁ་འབྱེད་གྱུར་པའི་ཕྱག་རྒྱ་ནི། །རྡོ་རྗེ་སྨྲ་བ་འབའ་ཞིག་གི། །ལས་ཀྱི་རྡོ་རྗེའི་ཕྱག་རྒྱ་ནི། །སྣ་ཚོགས་རྡོ་རྗེ་གར་ [185a.3]བྱེད་པའོ། །གོ་ཆ་གོན་པའི་ཚུལ་དག་ནི། །རྡོ་རྗེ་སྲུང་བའི་མཆེ་བ་གཉིས། །རྣམ་གཙིགས་རྡོ་རྗེ་གནོད་སྦྱིན་གྱི། །ཁུ་ཚུར་བསྡུས་པ་ཁུ་ཚུར་གྱི། །ཐལ་མོ་ཁོང་སྟོང་སྦྱར་ནས་ནི། །མཐེ་བོང་གཉིས་ནི་གཞིབས་ནས་སུ། །མཛུབ་གཉིས་མིག་གི་དབྱིབས་འདྲར་བྱས། །སངས་རྒྱས་ [185a.4]སྤྱན་ནི་ཡིན་པར་བཤད། །མཛུབ་མོ་མཐེ་བོ་རྡོ་རྗེ་ཉིད། །མཱ་མ་ཀཱི་ཡི་ཡིན་པར་བཤད། །པདྨའི་ཐལ་མོ་གོས་དཀར་མོ། །རྡོ་རྗེ་ཐལ་མོ་ཁ་ཕྱེ་བ། །ཨུཏྤལ་འདྲ་བ་སྒྲོན་མ་ཡིན། །མཐེའུ་ཆུང་གཉིས་ནི་ལེགས་མདུད་ལ། །མཛུབ་མོ་དག་ནི་ལྕགས་ཀྱུར་སྦྱར། །དེ་ཉིད་ཞགས་པ་ལྟ་བུ་དང་། ། [185a.5]ལྕགས་སྒྲོག་འདྲ་བ་དག་ཏུའང་བརྟག །བཞི་པ་རྡོ་རྗེ་དྲིལ་བུར་ནི། །སྲིན་ལག་ནང་བཅུག་ཁུ་ཚུར་ནི། །མཛུབ་མོ་གཉིས་ནི་ལེགས་སྦྱར་བ། །རྡོ་རྗེ་ཆེན་པོ་ཞེས་གྲགས་ཏེ། རྡོ་རྗེ་དབྱིངས་དང་འདྲ་བར་སྦྱར། །ས་ཐམས་ཅད་ཀྱིའོ། །ཐལ་མོ་ཁོང་སྟོང་དུ་སྦྱར་ལ། མཛུབ་མོ་གཉིས་རྒྱབ་ཏུ་ [185a.6]བཀུག་སྟེ། རིན་པོ་ཆེ་འདྲ་བར་གཞག་པ་ནི། ཕ་རོལ་ཏུ་ཕྱིན་པ་ཐམས་ཅད་ཀྱིའོ། །སོར་མོ་ཐམས་ཅད་བརྐྱང་ལ། པདྨ་ལྟ་བུར་གཞག་པ་ནི་དབང་ཐམས་ཅད་ཀྱིའོ། །སྣ་ཚོགས་རྡོ་རྗེའི་ཕྱག་རྒྱ་ཉིད་ནི་གཟུངས་ཐམས་ཅད་ཀྱིའོ། །རྡོ་རྗེ་ཐལ་མོ་སྙིང་གར་བཞག་ལ། རྡོ་རྗེ་སྒེག་མོ་ [185a.7]ཡིན་པར་བཤད། །སྤྱི་བོའི་གནས་སུ་ཐལ་སྦྱར་བ། །རྡོ་རྗེ་ཕྲེང་བར་རྣམ་པར་བསྒྲགས། །ཐལ་མོ་སྦྱར་བ་ཁར་བུད་པ། །རྡོ་རྗེ་གླུ་མ་ཡིན་པར་བཤད། །གར་བརྡུང་བ་ཡི་ཚུལ་གྱིས་ནི། །བསྐོར་ནས་འཇོག་པར་གར་གྱི་ཡིན། །པདྨོའི་ཐལ་མོ་ཐུར་དུ་ལྡུགས། །བདུག་པའི་འོ། [185b] [185b.1]ཐལ་མོ་སྤྱི་བོར་འཇོག་པ་ནི་མེ་ཏོག་གིའོ། །སྙིང་གར་མཐེ་བོང་བསྙམས་པ་ནི་མར་མེའི་འོ། །རབ་ཏུ་བརྐྱང་ནས་བྱུག་པ་ནི་བྱུག་པའི་འོ། །གཟུགས་ཀྱི་ཕྱག་རྒྱ་ནི་སྟེང་དུ་ལག་པ་གཉིས་རབ་ཏུ་བརྐྱང་བའོ། །རྣ་བའི་ཐད་ཀར་བརྐྱང་པ་ནི་སྒྲའི་ཕྱག་རྒྱའོ། ། [185b.2]དྲི་རྣམ་པར་བཀོད་པའི་ཚུལ་ནི་དྲིའི་ཕྱག་རྒྱའོ། །ཁར་ཐལ་མོ་སྦྱར་བ་ནི་རོའི་ཕྱག་རྒྱའོ། །ནམ་མཁའ་ལ་རེག་པའི་ཚུལ་ནི་རེག་གི་ཕྱག་རྒྱའོ། །ཐལ་མོ་ཁོང་སྟོང་དུ་སྦྱར་ལ་མཛུབ་མོ་གཉིས་བཀུག་སྟེ། རིན་པོ་ཆེ་ལྟར་བྱས་པ་ནི་ཀུན་དུ་བཟང་པོའི་ཕྱག་རྒྱའོ། །ཐལ་མོ་ལེགས་པར་བརྐྱང་ནས་ཡིད་བཞིན་གྱི་ནོར་བུ་ [185b.3]འཛིན་པ་ལྟ་བུ་ནི་བློ་གྲོས་མི་ཟད་པའི་ཕྱག་རྒྱའོ། །ས་གནོན་གྱི་ཕྱག་རྒྱ་ཉིད་ནི་སའི་སྙིང་པོའི་འོ། །མཛུབ་མོ་གཉིས་ནང་དུ་བཅུག་ལ། རལ་གྲི་ལྟར་བྱས་པ་ནི་ནམ་མཁའི་སྙིང་པོའི་འོ། །གར་བརྡུང་བའི་ཚུལ་གྱིས་རིན་པོ་ཆེའི་རྡོ་རྗེ་སྙིང་གར་གཞག་པ་ནི། ནམ་མཁའི་མཛོད་ཀྱིའོ། །ལག་ [185b.4]པ་གཉིས་ལེགས་པར་བརྐྱང་པ་ནི་ཕྱག་ན་རིན་ཆེན་གྱིའོ། །ལག་པ་གཉིས་མཚོའི་རླབས་ལྟར་བྱ་བ་ནི་རྒྱ་མཚོའི་བློ་གྲོས་ཀྱིའོ། །རྡོ་རྗེ་རྩེ་ལྔ་པའི་ཕྱག་རྒྱ་ནི་རྡོ་རྗེ་སྙིང་པོའི་འོ། །གར་བྱེད་པའི་ཚུལ་གྱིས་རྡོ་རྗེ་ཐལ་མོ་བརྐྱང་ལ་པདྨ་ལྟར་བྱ་བ་ནི་ཕྱག་ན་པདྨའི་འོ། །རལ་གྲི་འདེབས་པའི་ཚུལ་དུ་ [185b.5]ལག་པ་གཉིས་བརྐྱང་བ་ནི་མཐུ་ཆེན་ཐོབ་པའི་འོ། །མཐེ་བོ་དང་མཛུབ་མོ་ཟླ་བ་འདྲ་བར་བྱས་པ་ནི་ཟླ་འོད་ཀྱིའོ། །འོད་འཕྲོ་བ་གཏོང་བ་ལྟ་བུ་ནི་དྲ་བ་ཅན་གྱི་འོད་ཀྱིའོ། །དབང་བསྐུར་བ་སྟེར་བའི་ཚུལ་ནི་འོད་དཔག་ཏུ་མེད་པའི་འོ། །སེ་གོལ་བརྡེབས་པའི་ཚུལ་དུ་བྱེད་པ་ནི་སྤོབས་པ་རྣམ་པར་ [185b.6]བརྩེགས་པའི་འོ། །ཐལ་མོ་སྦྱར་བ་འབྱེད་པ་ནི་མྱ་ངན་གྱི་མུན་པ་ཐམས་ཅད་ངེས་པར་འཇོམས་པའི་བློ་གྲོས་ཀྱིའོ། །རལ་གྲི་བརྡེབས་པའི་ཚུལ་དུ་བྱེད་ཅིང་གནས་པ་ནི་སྒྲིབ་པ་ཐམས་ཅད་རྣམ་པར་སེལ་བའི་འོ། །རྡོ་རྗེ་བསྡམས་པ་ལས་གུང་མོ་གཉིས་གཞིབས་ལ་སྲིན་ལག་གཉིས་ཀྱི་ [185b.7]གཡས་པའི་མཛུབ་མོས་གཡོན་པའི་སྲིན་ལག་དང་། གཡོན་པའི་མཛུབ་མོས་གཡས་པའི་སྲིན་ལག་བཟུང་ལ་ཟླུམ་པར་བྱ་སྟེ། མཐེ་བོང་གཉིས་མངོན་པར་ཕྱོགས་པར་བྱས་ལ། ཁའི་ཚུལ་དུ་གཞག་པ་ནི་གཤིན་རྗེ་གཤེད་ཀྱིའོ། །ལག་པ་གཡོན་པ་རྡོ་རྗེ་ཁུ་ཚུར་བཅངས་པ་ [186a] [186a.1]ལས་ཁྲོ་བོའི་མཛུབ་མོ་སྙིང་གར་བཞག་ལ། ལག་པ་གཡས་པ་ཐལ་ལྕག་གི་ཚུལ་དུ་བྱས་པ་ནི་གཞན་གྱིས་མི་ཐུབ་པའི་འོ། །རྡོ་རྗེ་ཁུ་ཚུར་གཉིས་ལས་མཐེའུ་ཆུང་ལུ་གུ་རྒྱུད་ལྟར་མདུད་ནས་མཛུབ་མོ་གཞིབས་ཏེ་བསྒྲེང་བ་ལས་ལྡོག་ནས་དཔྲལ་བར་གཞག་པ་ནི་ [186a.2]རྟ་མགྲིན་གྱི་ཕྱག་རྒྱའོ། །ལག་པ་གཉིས་ཀྱི་མཐེ་བོས་མཐེ་བོ་ཆུང་གི་སེན་མོ་མནན་ནས་དཔུང་མགོའི་དྲུང་དུ་རྡོ་རྗེ་བཅིང་བའི་ཚུལ་དུ་བྱས་ཏེ་གཞག་པ་ནི་བདུད་རྩི་ཐབ་སྦྱོར་གྱི་ཕྱག་རྒྱའོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཉིད་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱའོ། །རྡོ་རྗེ་བསྡམས་ [186a.3]པ་ནང་དུ་བཅིངས་ལ་སོར་མོ་རྣམས་དབུས་སུ་འབར་བ་ལྟར་བྱས་ནས་མཐེ་བོ་གཉིས་བསྒྲེང་བ་ནི་རྡོ་རྗེ་ལྟར་མེ་འབར་བའི་འོ། །རྡོ་རྗེ་བཅིང་བ་ལས་མཛུབ་མོ་གཉིས་དམ་དུ་མདུད་ལ་མཐེ་བོང་གུང་མོ་རྡོ་རྗེ་ལྟར་དཔྲལ་བར་གཞག་པ་ནི་ཁྲག་འཐུང་གི་ཕྱག་རྒྱའོ། །སྣ་ཚོགས་རྡོ་རྗེ་བ་དན་གསུམ་ [186a.4]པ་བསྒྲེང་བ་ནི་རྟ་མཆོག་གི་ཕྱག་རྒྱའོ། །འཇིག་རྟེན་པ་རྣམས་ཀྱི་ཕྱག་རྒྱ་ནི་ལག་པ་གཅིག་མདུང་རྩེ་གསུམ་པ་ལྟར་བྱས་ལ། མཐེ་བོས་མཐེའུ་ཆུང་མནན་པ་དབང་ལྡན་གྱི་ཕྱག་རྒྱའོ། །དེ་ཉིད་ལས་ལག་པ་གཡས་པ་སྟེག་སྟེ། རྡོ་རྗེ་འདྲ་བར་བྱས་ལ་ནི་བརྒྱ་བྱིན་གྱི་ཕྱག་རྒྱའོ། །ཨོཾ་ཞེས་བྱ་ [186a.5]བའི་ལག་པ་ལ་མཐེ་བོས་དབུས་སུ་བཞག་པ་ནི་མེ་ལྷའི་འོ། །མཛུབ་མོ་དང་མཐེ་བོ་སྦྱར་ནས་དབྱིག་པར་བྱས་པ་ནི་གཤིན་རྗེའི་འོ། །དེ་ཉིད་ལས་འཁོར་ལོ་ལྟ་བུར་བྱས་ནས་གཞག་པ་ནི་ཁྱབ་འཇུག་གི་ཕྱག་རྒྱའོ། །ལག་པ་གཅིག་ན་ཐོད་པ་ཐོགས་པ་ལྟ་བུ་ནི་མ་མོ་རྣམས་ཀྱི་ཕྱག་རྒྱའོ། ། [186a.6]སོར་མོ་གཉིས་བསྒྲེང་བ་ནི་སྲིན་པོ་རྣམས་ཀྱིའོ། །མཛུབ་མོ་དང་མཐེ་བོ་སྦྱར་བ་ཞགས་པ་ལྟར་བྱ་བ་ནི་ཆུ་ལྷའི་འོ། །མཛུབ་མོ་དང་གུང་མོ་གཉིས་རྒྱལ་མཚན་ལྟར་བསྒྲེང་པ་ནི་རྒྱལ་མཚན་གྱི་ཕྱག་རྒྱ་སྟེ་རླུང་ལྷའི་འོ། །གུང་མོ་གཅིག་ཏུ་བསྒྲེངས་ནས་དབྱིག་པ་ལྟར་བྱ་བའི་ཕྱག་རྒྱ་ནི་ལུས་ [186a.7]ངན་པོའི་འོ། །མཆོད་སྦྱིན་ཐོགས་ཀྱི་ཕྱག་རྒྱ་ནི་ཚངས་པའི་འོ། །མདུང་གི་ཕྱག་རྒྱ་ནི་དྲག་པོའི་འོ། །གླང་པོའི་སྣ་ནི་ཚོགས་ཀྱི་བདག་པོའི་ཕྱག་རྒྱའོ། །བདུད་རྩིའི་དཀྱིལ་འཁོར་ལྟ་བུ་ནི་ཟླ་བའི་འོ། །འོད་ཟེར་སྟོང་འགྱེད་པ་ལྟ་བུ་ལག་པ་གཉིས་ཀྱིས་བསྟན་པ་ནི་ཉི་མའི་ཕྱག་རྒྱའི་འོ། ། [186b] [186b.1]པི་ཝང་བརྡུང་ཞིང་གླུ་ལེན་པ་ལྟ་བུ་ནི་དྲི་ཟ་རྣམས་ཀྱི་ཕྱག་རྒྱའོ། །རྫ་རྔ་བརྡུང་བ་ལྟ་བུ་ནི་དགའ་བྱེད་དབང་ཕྱུག་གི་ཕྱག་རྒྱའོ། །འཁར་དཀྲོལ་ཐོགས་པ་ལྟ་བུ་ནི་མིའམ་ཅིའི་ཕྱག་རྒྱའོ། །རྟག་པར་རྔ་བརྡུང་བ་ལྟ་བུ་ནི་རིག་པ་འཛིན་པ་རྣམས་ཀྱི་ཕྱག་རྒྱའོ། །ལག་པ་གཉིས་གདེངས་ཀ་ལྟར་ [186b.2]བྱ་བ་ནི་ཀླུ་རྣམས་ཀྱི་ཕྱག་རྒྱའོ། །གཞན་དག་ནི་ཕྱག་རྒྱ་ཆེན་པོ་ཉིད་དམ་ཚིག་གི་ཕྱག་རྒྱ་སྟེ། སྙིང་གར་ཟླ་བའི་དཀྱིལ་འཁོར་རྡོ་རྗེ་བསྒོམས་ནས་ཕྱག་རྒྱ་བཅིང་བར་བྱའོ། །ལྕེ་ལ་ཡི་གེ་ཧྲི་ལས་པདྨ་དེའི་སྟེང་དུ་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་ཧཱུཾ་ལས་རྡོ་རྗེ། དེའི་དབུས་སུ་ཧྲཱིཿལས་ [186b.3]བྱུང་བའི་བཅོམ་ལྡན་འདས་འོད་དཔག་ཏུ་མེད་པ་སྐུ་མདོག་དཀར་པོ་བསམས་ལ། སྔགས་ཀྱི་ཡི་གེ་ཐམས་ཅད་བརྗོད་པ་ནི་ཆོས་ཀྱི་ཕྱག་རྒྱའོ། །ཨ་ལས་སྣ་ཚོགས་རྡོ་རྗེ་སྤྱི་བོར་བསམས་ལ་གར་ལས་བྱུང་བ་ནི་ལས་ཀྱི་ཕྱག་རྒྱ་སྟེ། །དེ་བཞིན་གཤེགས་པ་ཐམས་ཅད་ལ་སོགས་པ་ལ་ [186b.4]མཆོད་པ་ལ་འཇུག་པར་བྱེད་པ་རྡོ་རྗེ་ཁུ་ཚུར་བསྟན་པར་བྱའོ། །ཕྱག་རྒྱ་ཆེན་པོ་ཡང་ཇི་ལྟར་བྲིས་པའི་རྗེས་སུ་མཐུན་པར་ས་བོན་གྱི་ཡི་གེ་རྣམས་ལས་བྱུང་བར་བལྟ་བར་བྱའོ། །དེ་ལྟར་ཕྱག་རྒྱ་བཞིས་རྒྱས་བཏབ་པའི་ལྷའི་འཁོར་ལོ་རྣམས་རྣམ་པར་བསྒོམས་པ་ལ་བུམ་པ་གང་བ་ལ་སོགས་ [186b.5]པས་མངོན་པར་མཆོད་པར་བྱའོ། །དེ་ནས་རྣམ་པར་རྒྱལ་བའི་བུམ་པ་ཇི་སྐད་དུ་བཤད་པའི་མཚན་ཉིད་དང་ལྡན་པ། ཨོཾ་མ་ཧཱ་སུ་ཁ་བཛྲ་ཨ་མོ་གྷ་སམ་ཡོ་ད་ཀ་སིདྡྷྱ་ཨ་བྷིཥིཉྩ་སརྦ་སུ་ག་སོ་མན་སཱུ་ནི་ཨ་དད་ཏུ་ཀུ་རུ་ཀུ་རུ་ཛཿཧཱུཾ་བཾ་ཧོཿཨཿཞེས་བྱ་བས་འཇམ་དཔལ་དབྱངས་ཀྱི་དམ་ཚིག་ཕྱག་རྒྱ་ [186b.6]རྒྱས་བཟུང་ལ། མེ་ཏོག་གི་ཡལ་ག་ལས་ལན་ཉི་ཤུ་རྩ་གཅིག་བཟླས་ལ། མགོན་པོ་འཇམ་པའི་དབྱངས་ཀྱི་སྤྱན་སྔར་གཞག་པར་བྱའོ། །བུམ་པ་གཞན་དག་ཀྱང་མི་བསྐྱོད་པ་ལ་སོགས་པའི་མཚན་མ་དང་ལྡན་པ་དཀྱིལ་འཁོར་གྱི་ཕྱི་རོལ་དུ་ཨོཾ་བཛྲ་ཀྲོ་དྷ་ད་ཀ་ཧཱུཾ་ཞེས་ལན་བརྒྱ་རྩ་བརྒྱད་བཟླས་ལ། [186b.7]གོས་སྣ་ཚོགས་ཀྱིས་བརྒྱན་པ་འབུམ་མམ་ཁྲིའམ། སྟོང་ངམ་བརྒྱའམ། སོ་སོ་ཞིང་རེ་རེ་ཞིག་གམ། སྤྱི་ལ་དེ་བཞིན་དུ་དབུལ་བར་བྱའོ། །དེ་ནས་རིམ་པ་འདིས་མེ་ཏོག་ལ་སོགས་པར་ཡང་དག་པར་མཆོད་པར་བྱ་སྟེ། མེ་ཏོག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་ [187a] [187a.1]བྱའོ། །གང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་མེ་ཏོག་གི་བྱེ་བྲག་ཡིད་ལས་བྱུང་བའམ། ཆུ་ལས་སྐྱེས་པའམ། ཐང་ལས་སྐྱེས་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ [187a.2]ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་གསང་སྔགས་དང་། རིག་སྔགས་ཀྱི་ལྷའི་ཁྱད་པར་ [187a.3]ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་པུཥྤ་པཱུ་ཛ་མེ་གྷ་ས་སུ་དྲ་སྥ་ར་ཎ་ས་མ་ཡེ་ཧཱུཾ། བདུག་པའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་འཇིག་རྟེན་གྱི་ཁམས་འདིའམ་གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་ [187a.4]བདུག་པའི་བྱེ་བྲག་ལྷན་ཅིག་སྐྱེས་པའམ། ཡང་དག་པར་སྦྱར་བའམ། ཡོངས་སུ་གྱུར་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མད་བའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ [187a.5]རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་ཕྱག་རྒྱ་དང་གསང་སྔགས་དང་རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་དྷཱུ་པ་པཱུ་ཛ་མེ་གྷ་ས་མུ་དྲ་སྤ་ར་ཎྣ་ས་མ་ཡེ་ཧཱུཾ། མར་མེའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་ [187a.6]བྱ་སྟེ། གང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་སྣང་བའི་བྱེ་བྲག་ཡིད་ལས་བྱུང་བའམ། རིན་པོ་ཆེའི་འོད་དམ་མར་མེའི་སྣང་བ་ལ་སོགས་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ [187a.7]ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་ཕྱག་རྒྱ་དང་། གསང་སྔགས་དང་རིག་སྔགས་ཀྱི་ལྷའི་ཁྱད་པར་ཐམས་ [187b] [187b.1]ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་ཨཱ་ལོ་ཀ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དྲིའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱའོ། །གང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་དྲིའི་བྱེ་བྲག་ [187b.2]ལྷན་ཅིག་སྐྱེས་པའམ་ཡང་དག་པར་སྦྱར་བའམ། ཡོངས་སུ་གྱུར་པ་གང་དག་ཡོད་པ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་དེ་དག་ཐམས་ཅད་ལ་མཆོད་པའི་ལས་བྱས་པའི་ཕྱིར་ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་རིགས་ [187b.3]ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་གནྡྷ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཐལ་མོ་ཁོང་སྟོང་དུ་སྦྱར་ལ་བཅིངས་ལ། འདི་སྐད་ [187b.4]བརྗོད་པར་བྱ་སྟེ། གང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་རིན་པོ་ཆེའི་རི་བོའམ། རྒྱ་མཚོ་རིན་པོ་ཆེའི་ཚོགས་གང་དག་ཡོད་པ་དེ་དག་ཐམས་ཅད་ཀྱང་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ [187b.5]ཐམས་ཅད་ལ་མཆོད་པའི་ལས་བྱ་བའི་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་བོ་དྷྱཾ་ག་ [187b.6]རཏྣ་ནེེ་ཨ་ལངྐཱ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བཞད་པའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་དགོད་པ་དང་། སྒེག་པ་དང་། དགའ་བ་དང་། རྩེད་མོའི་བདེ་བའི་ [187b.7]བྱེ་བྲག་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ [188a] [188a.1]ཐམས་ཅད་དང་སྙིང་པོ་དང་ཕྱག་རྒྱས་དང་། གསང་སྔགས་དང་རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐའ་ག་ཏ་ཧཱ་སྱ་ལཱ་སྱ་ར་ཏི་ཀྲཱྀ་ཌ་སཽ་ཁྱ་ཨ་ནུཏྟ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བཞད་པའི་ཕྱག་རྒྱ་དེ་ཉིད་རྡོ་རྗེ་ཐལ་མོ་བསྐོར་བ་ [188a.2]འདི་སྤྱི་བོར་བཞག་ལ། །ཡང་ཐལ་མོ་ཁོང་སྟོང་དུ་སྦྱར་བ་བཅིངས་ནས་འདི་སྐད་ཅེས་བརྗོད་པར་བྱ་སྟེ། གང་འཇིག་རྟེན་གྱི་ཁམས་འདིའམ། །གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་དཔག་བསམ་གྱི་ཤིང་ངམ། །གོས་ཀྱི་ཤིང་གང་དག་ཡོད་པ་དེ་རྣམས་འདི་ལྟ་སྟེ། [188a.3]མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། །སྙིང་པོ་དང་། །ཕྱག་རྒྱ་དང་། གསང་ [188a.4]སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་བོ་དྷི་ཨ་ལངྐཱ་ར་བསྟྲ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། དེ་ནས་བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ལ། སེམས་ཅན་ཐམས་ཅད་ཀྱི་འཁོར་ [188a.5]བའི་སྡུག་བསྔལ་རྗེས་སུ་དྲན་པར་བྱས་ལ། སྙིང་རྗེའི་དབང་གིས་སེམས་ཅན་ཐམས་ཅད་བསྒྲལ་བར་བྱ་བའི་ཕྱིར་བྱང་ཆུབ་ཀྱི་སེམས་བསྐྱེད་དེ། མ་རྒལ་བ་རྣམས་བསྒྲལ་བར་བྱ་བའི་ཕྱིར་དང་། མ་གྲོལ་བ་རྣམས་དགྲོལ་བར་བྱ་བའི་ཕྱིར་དང་། དབུགས་མ་ཕྱིན་པ་རྣམས་དབུགས་དབྱུང་བར་ [188a.6]བྱ་བའི་ཕྱིར་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བྱ་བའི་ཕྱིར་དང་། སེམས་ཅན་གྱི་ཁམས་མ་ལུས་པ་འཁོར་བའི་རྒྱ་མཚོ་ལས་ཡང་དག་པར་བསྒྲལ་བར་བྱ་བའི་ཕྱིར་བྱང་ཆུབ་ཏུ་སེམས་བསྐྱེད་པར་བགྱིའོ། །ཨོཾ་སརྦ་ཏ་ཐཱ་ག་ཏ་བོ་དྷཾ་ཙིཏྟ་པཱུ་ཛ་མེ་གྷ་ས་ [188a.7]མུ་དྲ་སྥ་ར་ཎ་ས་མ་ཡེ་ཧཱུཾ། སྒེག་མོའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཡོ་བྱད་ཐམས་ཅད་ཀྱིས་ཡང་དག་པར་འབྱོར་ཅིང་ཕུན་སུམ་ཚོགས་པ་ཐམས་ཅད་འདོད་པ་ཙམ་ལ་རག་ལུས་པར་གྱུར་ཅིག། །ཨོཾ་སརྦ་ཏ་ཐཱ་ག་ཏ་མ་ཧཱ་བཛྲོད་བྷ་བ་དཱ་ན་པཱ་ར་ [188b] [188b.1]མི་ཏཱ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། རྡོ་རྗེ་ཕྲེང་བའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་མི་དགེ་བའི་ལུས་དང་ངག་དང་ཡིད་ཀྱི་ལས་ཀྱི་མཐའ་ཐམས་ཅད་དང་བྲལ་བར་གྱུར་ཅིག །དགེ་བའི་ལུས་དང་ངག་དང་ཡིད་ཀྱི་ལས་ཀྱི་མཐའ་ [188b.2]ཐམས་ཅད་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་བོ་དྷི་ཧ་ར་ཤཱི་ལ་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྤ་ར་ཎྸ་ས་མ་ཡེ་ཧཱུཾ། རྡོ་རྗེ་གླུ་མཁན་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་མཚན་དང་དཔེ་བྱད་ཐམས་ཅད་ཀྱིས་ལུས་ཡང་དག་ [188b.3]པར་བརྒྱན་པར་བྱས་པ་དང་། རྟག་ཏུ་ཕན་ཚུན་འཇིགས་པ་མེད་པ་དང་། ཞེ་འགྲས་པ་མེད་པས་ཞུགས་ཤིང་མིག་དང་ཡིད་མངོན་པར་དགའ་བ་དང་། ཆོས་ཟབ་མོ་ལ་བཟོད་པ་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་དྷ་རྨ་ཨ་བ་བྷི་དྷི་ཀྵཱན་ཏི་པཱ་ར་མི་ཏཱ་པཱུ་ཛ་མེ་གྷ་ས་ [188b.4]མུ་དྲ་སྤ་ར་ཎ་ས་མ་ཡེ་ཧཱུཾ། རྡོ་རྗེ་གར་མཁན་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ལ་མངོན་པར་དགའ་བ་དང་ལྡན་པ་དང་། སངས་རྒྱས་ཉིད་ལ་ཡོངས་སུ་གཞོལ་ཞིང་འཁོར་བ་ཡོངས་སུ་སྤོང་བའི་བརྩོན་ [188b.5]འགྲུས་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་སན་ས་རཱ་པ་རི་ཏྱཾ་ག་ཨ་ནུཏྟ་ར་མ་ཧཱ་བཱིརྱ་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མེ་ཏོག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཉོན་མོངས་པ་དང་། ཉེ་བའི་ཉོན་མོངས་པ་དང་ [188b.6]བྲལ་བར་གྱུར་ཅིག །བསམ་གཏན་དང་ཏིང་ངེ་འཛིན་དང་། རྣམ་པར་ཐར་པ་དང་། སྙོམས་པར་འཇུག་པ་དང་། མངོན་པར་ཤེས་པ་རྣམས་དང་། རིག་པ་ཐམས་ཅད་དབང་དུ་གྱུར་པ་ཕུན་སུམ་ཚོགས་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་སཽ་ཁྱ་བི་ཧཱ་ར་དྷྱཱ་ན་པཱ་ར་མི་ཏཱ་པཱུ་ཛ་མེ་ [188b.7]གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། བདུག་སྤོས་ཀྱི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་འཇིག་རྟེན་ལས་འདས་པའི་ཤེས་རབ་དང་། ཡེ་ཤེས་རྣམས་དང་ཡང་དག་པར་ལྡན་པར་གྱུར་ཅིག། །སོ་སོ་ཡང་དག་པར་རིག་པ་བཞི་ཐོབ་སྟེ། བཟོ་དང་ [189a] [189a.1]བསྟན་བཅོས་ཐམས་ཅད་ཤེས་ཤིང་སྒྱུ་རྩལ་དང་ལྡན་ལ། གསང་བའི་ཆོ་ག་ཤེས་དང་། དེ་ཁོ་ན་ཉིད་མཐོང་སྟེ་ཉོན་མོངས་པ་དང་། ཤེས་བྱའི་སྒྲིབ་པ་ཡང་དག་པར་གཅོད་པའི་ཡེ་ཤེས་ཐོབ་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་ཀླེ་ཤ་ཙྩེ་ད་སརྦ་དྷརྨྨ་ས་མནྟ་ [189a.2]ཛྙཱ་ན་མ་ཧཱ་པྲཛྙཱ་བཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། ལུས་ཀྱི་བསྙེན་བཀུར་བྱ་བའི་ཕྱིར་བདག་ཉིད་ཕྱོགས་བཅུའི་འཇིག་རྟེན་གྱི་ཁམས་མ་ལུས་པའི་དེ་བཞིན་གཤེགས་པ་ཐམས་ཅད་ཀྱི་ཞབས་དྲུང་དུ་མོས་པ་བྱས་ལ་འདི་སྐད་ཅེས་བརྗོད་པར་བྱ་སྟེ། ཨོཾ་སརྦ་ཏ་ཐཱ་ཏ་ཀཱ་ཡ་ [189a.3]ནི་ཪྻྰ་ཏ་ན་པཱུ་ཛ་མེ་གྷ་སམུ་དྲ་སྥ་ར་ཎ་ས་མ་ཡེ་ཧཱུཾ། རྡོ་རྗེ་ཐལ་མོས་བསྐོར་བས་ཤིས་པར་བརྗོད་པའི་ཚུལ་དུ་བཅིངས་ལ། ཐམས་ཅད་དུ་ལྕེ་བརྒྱ་སྟོང་ཕྲག་སྙེད་ཀྱི་སྒོ་ནས་མཉམ་ཉིད་མི་གཡོ་ཞེས་བྱ་བ་ལ་སོགས་པའི་བསྟོད་པས་མཆོད་པར་ལྷག་པར་མོས་པར་བྱས་ལ་འདི་སྐད་ཅེས་ [189a.4]བརྗོད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་བཱཀ་ནིཪྻཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བྱང་ཆུབ་སེམས་དཔའ་ཐམས་ཅད་དང་། བསམ་པ་གཅིག་པའི་སྦྱོར་བས་ཆོས་ཐམས་ཅད་མཉམ་པ་ཉིད་ལས་ལྷག་པར་མོས་པ་བྱས་ལ། ཨོཾ་སརྦ་ཏ་ཐཱ་ག་ཏ་ཙིཏྟ་ནི་ཪྻཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་ [189a.5]མ་ཡེ་ཧཱུཾ། ཆོས་ཐམས་ཅད་ནི་དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་རྣམ་པར་ལྷག་པར་མོས་པ་བྱས་ལ་འདི་སྐད་ཅེས་བརྗོད་པར་བྱའོ། །ཨོཾ་སརྦ་ཏ་ཐཱ་ག་ཏ་གུ་ཧྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ནས་གདུགས་དང་། རྒྱལ་ [189a.6]མཚན་དང་། བ་དན་སྣ་ཚོགས་པས་རྣམ་པར་བཀྲ་བ་བརྒྱ་སྟོང་ལ་སོགས་པའི་གྲངས་སྙེད་དམ། འབྱོར་པ་ཅི་ཡོད་པ་རྣམས་དབུལ་བར་བྱ་བ་དང་། རོ་བརྒྱ་བའི་ལྷའི་ཞལ་ཟས་དང་། སྭ་སྟི་ཀ་ལ་སོགས་པའི་བཟའ་བ་སྣ་ཚོགས་པ་འབུམ་མམ། བརྒྱ་སྟོང་སྙེད་དབུལ་བར་བྱ་སྟེ། ཨོཾ་ཨ་ཀཱ་ [189a.7]རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུ་ཏྤ་ན་ན་ཏྭཱཏ་ཅེས་བརྗོད་ལ་དབུལ་བར་བྱའོ། །རོལ་མོ་བཅུ་ཕྲག་སྟོང་ངམ། རོལ་མོ་བརྒྱ་ཕྲག་སྟོང་ངམ། །རོལ་མོ་བཅུ་འམ། ཨོཾ་ཧཱུཾ་ཧྲཱིཿཞེས་བྱ་བ་མངོན་པར་བཟླས་ལ་དབུལ་བར་བྱའོ། །རྣམ་པ་བཅུ་པོ་འདི་ལྟ་སྟེ། གླིང་བུ་དང་། པི་ཝང་དང་། རྫ་རྔ་དང་། [189b] [189b.1]རྫ་རྔ་ཆུང་ངུ་དང་། ཆ་ལང་དང་། རྔ་བོ་ཆེ་དང་། མི་དང་ག་དང་། རྔ་རིངས་དང་། རྔ་སྐེད་ཉག་དང་། ཏི་མ་ལ་ཞེས་བྱ་བའོ། །ཤིན་ཏུ་བརྟགས་པའི་རྟ་དང་གླང་པོ་ཆེ་དང་། བ་ལང་གི་ཁྱུ་རྣམས་ཀྱང་། ཨོཾ་བཛྲ་སྥ་ར་ཎ་ཁཾ་ཞེས་བྱ་བས་མངོན་པར་བཟླས་ལ་དབུལ་བར་བྱའོ། །དེ་ལྟར་ [189b.2]དཀྱིལ་འཁོར་ཡང་དག་པར་མཆོད་ནས། སྒྲུབ་པའི་གྲོགས་མཆོག་དཀྱིལ་འཁོར་དུ་བཞག་ལ་ཕྱི་རོལ་དུ་གཏོར་མ་སྦྱིན་པར་བྱ་སྟེ། འབྲས་ཡོས་བཅས་ཤིང་ཏིལ་དང་བཅས། །འབྲས་ཆན་མེ་ཏོག་ཆུ་དང་བཅས། །སྲན་ཆན་བཅས་ཤིང་མང་དུ་བྱ། །མར་དང་ཙག་ཙེག་བཅས་ [189b.3]པ་ཡི། །ཞེས་བྱ་བ་ལ་སོགས་པའི་བཟའ་བ་རྣམས་ལ། ཨ་ཀཱ་རོ་ཞེས་བྱ་བ་ལ་སོགས་པ་ཡོངས་སུ་བཟླས་ཏེ། ཨ་ཀཱ་རོ་མུ་ཁཾ་སརྦདྷ་རྨཱ་ཎཱཾ་ཨཱ་དྱ་ནུཏྤན་ན་ཏྭཱ་ཏ། ཨོཾ་བཛྲ་ཤི་ཁ་རེ་རུ་ཊ་མ་ཊ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། །གྲྀཧྞ་པ་ཡ་གྲྀཧྞཱ་བ་ཡ་ཧཱུཾ། ཨཱ་ན་ཡ་ཧོཿབྷ་ག་བཱན་བིདྱཱ་རཱ་ [189b.4]ཛ་ཧཱུཾ་ཕཊ་ཅེས་བྱ་བའི་སྔགས་ཀྱིས་ལན་བདུན་མངོན་པར་བསྔགས་ལ། ཤར་ཕྱོགས་ནས་བརྩམས་ཏེ། ལན་གསུམ་གསུམ་དབུལ་བ་དང་། མཆོད་ཡོན་དང་། དྲི་དང་མེ་ཏོག་དང་། སྤོས་དང་། མར་མེ་དང་ལྡན་པར་དབུལ་བར་བྱའོ། །དེ་ཡང་ཇི་སྲིད་དུ་དཀྱིལ་འཁོར་གྱི་རྣམ་པར་བསམ་པར་ [189b.5]བྱའོ། །དེ་ནས་སྤྱན་དྲང་ངོ་། །དེ་ནས་དམ་ཚིག་གི་ཕྱག་རྒྱ་བསྟན་ལ་མཆོད་ཡོན་དབུལ་ཞིང་སྤོས་ལ་སོགས་པས་ཡང་དག་པར་མཆོད་དེ། གཏོར་མ་དབུལ་བར་བྱའོ། །དེ་ནས་གཤེགས་སུ་གསོལ་ལོ། །དེ་ལ་འདི་དག་གི་ཕྱག་རྒྱ་དང་སྔགས་ནི་འདི་ཡིན་ཏེ། ཤར་ཕྱོགས་སུ་ཁ་བལྟས་ [189b.6]ཏེ། རྐང་པ་གཡས་པ་བརྐྱང་བའི་ཚུལ་གྱིས་འདུག་ནས། ལག་པ་གཡོན་པའི་རྡོ་རྗེ་ཕྱག་རྒྱ་བསྟན་ལ། གཡས་བའི་རྡོ་རྗེ་ཕྱག་རྒྱ་སྟ་ཟུར་ཕྱོགས་སུ་གཞག་སྟེ། གཡས་པའི་རྡོ་རྗེ་མཛུབ་མོ་ལྕགས་ཀྱུས་སྤྱན་དྲང་བ་ནི་བརྒྱ་བྱིན་སྤྱན་དྲང་བའི་ཕྱག་རྒྱའོ། །དེ་ལས་མཛུབ་མོ་ལྕགས་ཀྱུར་བྱས་པ་ནི་ [189b.7]བརྒྱ་བྱིན་གྱི་དམ་ཚིག་གི་ཕྱག་རྒྱའོ། །རྐང་པ་གཡོན་པ་རྐྱང་བའི་ཚུལ་གྱིས་འདུག་ལ་སྤྱན་དྲང་བའི་ཕྱག་རྒྱ་ལས་མཛུབ་མོ་བརྐྱང་བ་ནི། སླར་བཏང་བའི་ཕྱག་རྒྱའོ། །ཡང་དེའི་སྔགས་ནི། ན་མོ་བཛྲ་སྱ་དེ་ཤི་དེ་ཤི་བཛྲ་པཱ་ཎི་རཀྵ་རཀྵ་སྭཱ་ཧཱ། མེའི་ཕྱོགས་སུ་བལྟས་ནས་ལག་ [190a] [190a.1]གཡས་པའི་མཛུབ་མོ་ཟླུམ་པོར་བཀུག་སྟེ། གུང་མོའི་ཚིག་གསུམ་པར་བཙུགས་ལ་མཐེ་བོ་ལག་མཐིལ་དུ་བཞག་པ་ནི་མེ་ལྷ་སྤྱན་དྲང་བའི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཐེ་བོའི་ངོས་ལ་མཛུབ་མོ་བཙུགས་པ་ནི་མེ་ལྷའི་དམ་ཚིག་གི་ཕྱག་ [190a.2]རྒྱའོ། །ཕྱག་རྒྱ་དེ་ཉིད་ལས་མཛུབ་མོ་མཐེ་བོའི་ངོས་ལ་བཙུགས་ཏེ། ཕྱིར་དྲག་ཏུ་བརྐྱང་བ་ནི་སླར་བཏང་བའི་ཕྱག་རྒྱའོ། །དེའི་སྔགས་ནི་ཨ་གྣི་ཨོ་ཧི་ཀ་པི་ལཱ་ཀ་པི་ལཱ། ཛྭ་ལ་ཛྭ་ལ་ཧ་ཧ་ཤི་ཀི་ཏི་ལི་བི་རཱུ་པཀྵ་སྭཱ་ཧཱ། གཤིན་རྗེའི་ཕྱོགས་སུ་བལྟས་ནས་སྙིམ་པ་བདུན་དུ་ [190a.3]གཞག་སྟེ། སོར་མོ་ཕན་ཚུན་བསྣོལ་ལ་ཁུ་ཚུར་བཅངས་ནས་སྲིན་ལག་གཉིས་བསྒྲེངས་པ་གཞིབས་ལ་གཡབས་ཏེ། ཡང་ནང་དུ་བཞག་པ་ནི་གཤིན་རྗེ་སྤྱན་དྲང་བའི་ཕྱག་རྒྱའོ། །སྲིན་ལག་གཉིས་ཡང་ཕྱི་རོལ་དུ་དེ་བཞིན་དུ་གཤིབས་ཏེ་བསྒྲེངས་ལ་སྙིང་གར་གཞག་ [190a.4]པ་ནི་དམ་ཚིག་གི་ཕྱག་རྒྱའོ། །དེ་ཉིད་ལས་སྲིན་ལག་སྦྱར་བ་ནི་སླར་བཏང་བའི་ཕྱག་རྒྱའོ། །སྔགས་ནི་ས་མ་ཡེ་སྭཱ་ཧཱ། བདེན་བྲལ་གྱི་ཕྱོགས་སུ་རྐང་པ་མཉམ་པས་འདུག་ལ་ལག་པ་གཡས་པའི་ཁུ་ཚུར་བཅངས་པ་ལས་མཛུབ་མོ་དང་གུང་མོ་རལ་གྲི་དང་འདྲ་བར་གཞིབས་ལ་ [190a.5]བསྒྲེངས་ཏེ་བཞག། །ལག་པ་གཡོན་པ་ཡང་དེ་ལྟར་བྱ་སྟེ། སྟ་ཟུར་ལོགས་སུ་བཞག་ལ་གཡོན་པའི་མཛུབ་མོ་བཀུག་སྟེ། གཡས་པ་ནི་བདེན་བྲལ་སྤྱན་དྲང་བའི་ཕྱག་རྒྱའོ། །ཕྱག་རྒྱ་དེ་ཉིད་ལས་ལག་པ་གཡོན་པ་སྟ་ཟུར་ཕྱོགས་སུ་རལ་གྲི་དང་འདྲ་བར་གཞག་པ་ནི་བདེན་བྲལ་ [190a.6]གྱི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་བརྐྱང་པ་ནི་སླར་བཏང་བའི་ཕྱག་རྒྱའོ། །སྔགས་ནི་སརྦ་བྷཱུ་ཏ་བྷ་ཡ་ཀ་ར། ཀུ་རུ་ཀུ་རུ་སྭཱ་ཧཱ། ཆུ་ལྷའི་ཕྱོགས་སུ་རྐང་པ་མཉམ་པས་འདུག་ལ་ལག་པ་གཡས་པ་ཁུ་ཚུར་བཅངས་ནས་མཐེ་བོ་དང་མཛུབ་མོ་གཅིག་ཏུ་ [190a.7]སྦྱར་ཏེ། ཞགས་མིག་ལྟར་བྱས་ལ། གཡོན་པའི་ཁུ་ཚུར་ཡང་དེ་ལྟར་བྱས་ཏེ། སྙིང་གར་བཞག་ལ་གཡོན་པའི་མཛུབ་མོ་ལྕགས་ཀྱུས་གཡབས་པ་ནི་ཆུ་ལྷ་སྤྱན་དྲང་བའི་ཕྱག་རྒྱའོ། །ཕྱག་རྒྱ་དེ་ཉིད་ལས་གཡོན་པའི་མཛུབ་མོ་ཁུ་ཚུར་གྱི་ཚུལ་དུ་བཞག་པ་ལས་ཞགས་མིག་ [190b] [190b.1]ལྟར་བྱས་པ་ནི་ཆུ་ལྷའི་དམ་ཚིག་གི་ཕྱག་རྒྱའོ། །གཡོན་པའི་ཕྱག་རྒྱ་ལས་མཛུབ་མོ་བརྐྱང་བ་ནི་སླར་གཏང་བའི་ཕྱག་རྒྱའོ། །སྔགས་ནི་ཏྲི་ཏྲི་པུ་ཊ། ཏྲི་ཏྲི་ཤི་ཁོ་ཏི་བི་སུ་པཱཀྵ་སྭཱ་ཧཱ། རླུང་ལྷའི་ཕྱོགས་སུ་བལྟས་ཏེ་འདུག་ལ་ལག་པ་གཡས་པ་ཁུ་ཚུར་བཅངས་ཏེ་གུང་མོ་བསྒྲེང་བའི་ཚིགས་ [190b.2]དང་པོར་མཛུབ་མོ་བཀུག་པའི་ཐོར་ཏོ་བཙུགས་ལ་ལག་པ་གཡས་པ་ཡང་དེ་བཞིན་དུ་བྱས་ཏེ་སྟ་ཟུར་ལོགས་སུ་བཞག་ཅིང་མཐེ་བོ་བསྐུལ་བ་ནི་རླུང་ལྷ་སྤྱན་དྲང་བའི་ཕྱག་རྒྱའོ། །དེ་ཉིད་ལས་མཐེ་བོ་སྔ་མ་བཞིན་དུ་གཞག་པ་ནི་རླུང་ལྷའི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ [190b.3]ལས་མཐེ་བོ་བརྐྱང་པ་ནི་སླར་གཏང་བའི་ཕྱག་རྒྱའོ། །སྔགས་ནི་ཨོཾ་སྭ་སཾ་ཁ་ཁུ་ཁུ་ཁ་སྭཱ་ཧཱ། ཀུ་བེ་ར་ལ་མངོན་དུ་བལྟས་ཏེ་འདུག་ནས་ལག་པ་གཉིས་ཐལ་མོ་སྦྱར་ལ་རྡོ་རྗེ་བཅིང་བ་ནང་དུ་ལྡོག་སྟེ། མཐེའུ་ཆུང་གཉིས་གཞིབས་ནས་བརྐྱང་ལ་དེའི་རྒྱབ་ཏུ་སྲིན་ལག་གཉིས་སོ་སོར་བཞག་ [190b.4]ནས་གུང་མོ་གཉིས་རྡོ་རྗེ་ལྟར་བཀུག་སྟེ། གཡབས་པ་ནི་ཀུ་བེ་ར་སྤྱན་དྲང་བའི་ཕྱག་རྒྱའོ། །ཕྱག་རྒྱ་དེ་ཉིད་ལས་གུང་མོ་གཉིས་ནང་དུ་རྡོ་རྗེ་བཅིང་བའི་ཚུལ་དུ་གཞག་པ་ནི་ཀུ་བེེ་རའི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་གུང་མོ་གཉིས་བརྐྱང་བ་ནི་སླར་གཏང་བའི་ཕྱག་རྒྱའོ། །སྔགས་ནི་ཨོཾ་ [190b.5]ཀུ་བེ་ར་ཡེ་སྭཱ་ཧཱ། དབང་ལྡན་གྱི་ཕྱོགས་སུ་བལྟས་ཏེ་འདུག་ལ་ལག་པ་གཅིག་ཏུ་སྦྱར་ཏེ་ཐལ་མོ་སྦྱར་བ་བྱས་ལ་སྲིན་ལག་དང་མཐེའུ་ཆུང་ནང་དུ་བཀུག་སྟེ་བསྣོལ་ལ་གུང་མོ་གཉིས་གཞིབས་ཏེ་བསྒྲེང་བའི་རྒྱབ་ལོགས་སུ་མཛུབ་མོ་གཉིས་རྡོ་རྗེ་འདྲ་བར་བྱ། མཐེ་བོ་གཉིས་རབ་ཏུ་གཞིབས་ཏེ་ [190b.6]བཞག་ལ་དེ་ཉིད་ལ་མཛུབ་མོ་གཉིས་ཕན་ཚུན་སེན་མོ་སྤྲད་ནས་ནང་དུ་གཡབས་པ་ནི་དབང་ལྡན་གྱི་སྤྱན་དྲང་བའི་ཕྱག་རྒྱའོ། །དེ་ཉིད་ལས་སྔ་མ་ལྟར་མཛུབ་མོ་རྡོ་རྗེའི་ཚུལ་དུ་གཞག་པ་ནི་དབང་ལྡན་གྱི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་བརྐྱང་བ་ནི་སླར་གཏང་ [190b.7]བའི་ཕྱག་རྒྱའོ། །སྔགས་ནི་ཨོཾ་ཛུཾ་ཛུཾ་ཤཱི་བ་སྭཱ་ཧཱ། གཡོན་བརྐྱང་བའི་གནས་པས་འདུག་ལ་ལག་པ་ཐལ་མོ་ཁོང་སྟོང་དུ་སྦྱར་ཏེ་བཞག་ལ་སྟེང་དུ་བལྟས་ཏེ། མཛུབ་མོ་གཉིས་ཀྱི་ལྕགས་ཀྱུས་ནི་ཚངས་པ་ལ་སོགས་པ་སྤྱན་དྲང་བར་བྱའོ། །དེ་ཉིད་ལས་མཛུབ་མོ་གཉིས་སྔ་མ་ལྟར་ [191a] [191a.1]གཞག་པ་ནི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་གཉིས་བརྐྱང་བ་ནི་སླར་གཏང་བའི་ཕྱག་རྒྱའོ། །སྔགས་ནི་འདི་ཡིན་ཏེ། ཨུར་དྷཾ་བྲཧྨ་ཎེ་སྭཱ་ཧཱ། སཱུ་རྱཱ་གྲ་ཧ་ཨ་དྷི་པ་ཏ་ཡེ་སྭཱ་ཧཱ། ཙནྡྲ་ཡ་ནཀྵ་ཏྲ་ཨདྷི་པ་ཏ་ཡེ་སྭཱ་ཧཱ། རྐང་པ་མཉམ་པར་ [191a.2]གནས་པས་འདུག་ལ་ལག་པ་གཉིས་གཅིག་ཏུ་སྦྱར་ཏེ། སོར་མོ་རྣམས་བར་མཚམས་མེད་པར་རྩེ་མོ་ཕན་ཚུན་སྦྱར། མཐེ་བོ་ཟླུམ་པོ་བྱས་ལ་འོག་ཏུ་བལྟས་ཏེ། སའི་ལྷ་མོ་ལ་སོགས་པ་མཛུབ་མོའི་ལྕགས་ཀྱུས་སྤྱན་དྲང་བ་ནི་འོག་གི་ལྷ་སྤྱན་དྲང་བའི་ཕྱག་རྒྱའོ། །སྤྱན་དྲང་བའི་ཕྱག་ [191a.3]རྒྱ་ལས་སྔ་མ་བཞིན་དུ་མཛུབ་མོ་གཞག་པ་ནི་དམ་ཚིག་གི་ཕྱག་རྒྱའོ། །མཛུབ་མོ་གཉིས་བརྐྱང་བ་ནི་སླར་གཏང་བའི་ཕྱག་རྒྱའོ། །སྔགས་ནི་ཨ་དྷྭ་པྲྀ་ཐྭི་བྷྱཿསྭཱ་ཧཱ། ཨ་སུ་རེ་བྷྱཿསྭཱ་ཧཱ། ནཱ་གེ་བྷྱཿསྭཱ་ཧཱ། དེ་ནས་སྔགས་དེ་ཉིད་ཀྱིས་ཐམས་ཅད་ལ་འཐོར་འཐུང་ཕུལ་ལ། ལས་འདིས་ [191a.4]རང་གི་སློབ་མའི་ཚོགས་དང་བདག་ལ་བགེགས་མེད་པར་མཛོད་ཅིག །དངོས་གྲུབ་དམ་པ་ཡང་སྩོལ་ཅིག་ཅེས་བྱས་ནས་ཐམས་ཅད་སླར་གཏང་བར་བྱའོ། །ཡང་ན་དཔུང་བཟངས་ཀྱིས་ཞུས་པའི་རྒྱུད་ལས་བྱུང་བའི་ཚིགས་སུ་བཅད་པ་རྣམས་ཀྱིས་གཏོར་མ་དབུལ་བར་བྱ་སྟེ། ལྷ་དང་ལྷ་ [191a.5]མིན་གནོད་སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་འདབ་བཟངས་ལུས་སྲུལ་པོ། །དྲི་ཟ་སྲིན་པོ་གདོན་གྱི་རིགས་རྣམས་དང་། །གང་དག་ས་ལ་གནས་པའི་རྫུ་འཕྲུལ་ཅན། །བུ་སྨད་ཚོགས་བཅས་གཡོག་འཁོར་བཅས་པ་ལ། བདག་གིས་པུས་མོ་ས་ལ་བཙུགས་ནས་སུ། ། [191a.6]ཐལ་མོ་སྦྱར་ཏེ་ཁྱེད་ལ་གསོལ་འདེབས་ཀྱིས། །གནས་ནས་ཕན་གདགས་སླད་དུ་འདིར་སྤྱོན་ཅིག །འབྱུང་པོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་རྣམས་དང་། །ཤར་ནུབ་རི་དང་ཉི་ཟླའི་ཁྱིམ་རྣམས་དང་། །རི་བོ་ཀུན་ལ་གང་དག་གནས་པ་དང་། ། [191a.7]ཆུ་བོ་ཀུན་དང་ཆུ་ཡི་མདོ་རྣམས་དང་། །རིན་ཆེན་གནས་ན་ལྷག་པར་གནས་པ་དང་། །མཚོ་དང་རྫིང་དང་ལྟེང་ཀ་ཆུ་ངོགས་དང་། །གཡའ་ཆུ་སིལ་མ་ཅན་ན་གང་གནས་དང་། །གྲོང་དང་ཕྱུགས་ལྷས་གྲོང་ཁྱེར་སྟོང་པ་དང་། །ཁང་སྟོང་དང་ནི་ལྷ་ཡི་ཁང་པ་དང་། །གཙུག་ལག་ཁང་ [191b] [191b.1]ངམ་གྲོང་ཁྱེར་གནས་དག་གམ། །དཀའ་ཐུབ་གནས་དང་གླང་ཆེན་བྲེས་དང་ནི། །རྒྱལ་པོའི་དཀོར་ཁང་དག་ན་གང་གནས་དང་། །ལམ་སྲང་བཞི་མདོ་དག་དང་སུམ་མདོ་དང་། །གང་དག་ལམ་ཆེན་དང་ནི་ཤིང་གཅིག་དྲུང་། །དུར་ཁྲོད་ཆེན་པོའམ་ནགས་ཚལ་ཆེན་པོ་དང་། །སེང་ [191b.2]གེ་དྲེད་དང་གཅན་ཟན་གནས་དག་དང་། །འབྲོག་ཆེན་འཇིགས་སུ་རུང་བར་གང་གནས་དང་། །གང་དག་གླིང་མཆོག་དག་ན་གནས་པ་དང་། །ལྷུན་པོ་དུར་ཁྲོད་དག་ན་གནས་པ་རྣམས། །རབ་ཏུ་དགྱེས་ཤིང་མགུ་བར་གྱུར་ནས་སུ། །ཕྲེང་བ་མེ་ཏོག་དྲི་དང་བདུག་པ་དང་། །བསྟོད་ [191b.3]དང་གཏོར་མ་མར་མེ་གུས་ཕུལ་བ། །འདི་དག་བཞེས་ཏེ་བཏུང་ཞིང་བསྣམས་ནས་སུ། །ལས་འདི་རྣམས་ཀྱི་འབྲས་བུ་མཆིས་པར་མཛོད། །ཅེས་བྱ་བས་སོ། །དེ་ལྟར་གཏོར་མ་སྦྱིན་པ་ཐམས་ཅད་ནི་འཕགས་པ་གཤིན་རྗེ་གཤེད་ཀྱི་སྦྱོར་བའམ། རྡོ་རྗེ་ཧཱུཾ་མཛད་ལ་སོགས་པའི་སྦྱོར་བས་ [191b.4]བྱའོ། །དེ་ནས་ཉེ་རེག་བྱས་ལ་ལྷག་དང་མ་ཚང་བའི་ཆོ་གའི་ཉེས་པ་ཉེ་བར་ཞི་བར་བྱ་བའི་ཕྱིར། སྤྱན་ལ་སོགས་པས་ཞི་བའི་སྦྱིན་སྲེག་བྱས་ལ། ཕྱག་རྒྱ་དང་ཕྱག་རྒྱའི་ལན་རྣམས་ཀྱི་རིགས་ཀྱི་དབྱེ་བས་དཀྱིལ་འཁོར་མཆོད་པར་བྱ་སྟེ། རྡོ་རྗེ་རིགས་ཀྱི་ཕྱག་རྒྱ་ནི་ཕྱག་རྒྱའོ། །ལས་ [191b.5]ཀྱི་རིགས་ཀྱི་ཕྱག་རྒྱ་ནི་ཕྱག་རྒྱའི་ལན་ནོ། །རིན་པོ་ཆེའི་རིགས་ཀྱི་ཕྱག་རྒྱ་ནི་ཕྱག་རྒྱའོ། །པདྨའི་རིགས་ཀྱི་ཕྱག་རྒྱ་ནི་ཕྱག་རྒྱའི་ལན་ཏེ། ཤིན་ཏུ་བྱང་བར་བསླབས་པའི་སློབ་མ་དང་། རང་ཉིད་ཀྱིས་བཅིང་བར་བྱའོ། །གལ་ཏེ་དཀྱིལ་འཁོར་དུ་འཇུག་པའི་ཞག་འབྱོར་པ་ཡོད་ན་ [191b.6]དཀྱིལ་འཁོར་ལས་ཧ་ཅང་མི་རིང་བར་བསྙེན་བཀུར་དང་གུས་པ་སྔོན་དུ་འགྲོ་བས་ཤར་དུ་བཅོམ་ལྡན་འདས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་པར་བྱའོ། །ལྷོར་ནི་རིན་པོ་ཆེ་ཏོག་གི་མདོ། ནུབ་ཏུ་སྡོང་པོས་བརྒྱན་པའོ། །བྱང་དུ་ཟླ་བའི་སྒྲོན་མའི་མདོ་བཀླག་པར་བྱ་ཞིང་། ཕྱི་ [191b.7]རོལ་དུ་གར་བྱེད་དུ་གཞུག་པ་ལ་སོགས་པ་ལྟད་མོ་པ་རྣམས་ཀྱང་ཕྱོགས་བཞིར་བྱེད་དུ་གཞུག་གོ། །དེ་ནས་ལུས་ཁྲུས་བྱས་ཤིང་དྲིས་བསྒོས་པ་མེ་ཏོག་གི་ཕྲེང་བས་བརྒྱན་པ་གདོང་དྲི་ཞིམ་པོས་བྱུགས་ཤིང་བདག་ཉིད་རྒྱན་ཐམས་ཅད་ཀྱིས་བརྒྱན་ནས་མགོ་བོ་འཇམ་པའི་དབྱངས་ [192a] [192a.1]ཀྱི་ཕྱག་རྒྱའི་མཆོག་གིས་མེ་ཏོག་གི་ཕྲེང་བ་བཟུང་ལ་དཀྱིལ་འཁོར་དུ་འཇུག་པར་བྱ་བ་ནི། བྱང་ཆུབ་ཀྱི་སེམས་བསྐྱེད་ཅིང་སྡོམ་པ་གཟུང་བ་ལ་སོགས་པ་བྱས་ནས་འཇུག་པར་བྱའོ། །འཇུག་པའི་ཚེ་སློབ་མ་ལ་སོགས་པས་འདི་ལྟར་གླུ་བླང་ངོ་། །ཨོཾ་པྲ་བི་ཤ་བྷ་ག་བཱན་ [192a.2]མ་ཧཱ་སུ་ཁ་མོ་ཀྵ་བུ་རཾ། སརྦ་སི་དྡྷི་མ་ཧཱ་སུ་ཁཱ་ར་མྱ་པ་ར་སུ་ཁོཏྟ་མ་སི་དྡྷྱ་ཛཿཧཱུཾ་བཾ་ཧོཿཔྲ་སིདྡྷེ་སྭཱ་ཧཱ། ཞུགས་ནས་རོལ་ཅིང་དགའ་བ་དང་། །སྒེག་པས་མགོན་ལ་ཕྱག་བྱའོ། །ཕྱག་བྱས་ནས་ནི་དཀྱིལ་འཁོར་དེར། །ལན་གསུམ་བར་དུ་བསྐོར་བར་བྱ། །མ་ཧཱ་ར་ཏ་སུ་ཊི་དྷ་སུ་སུ་ཏོ་ཥྱ། སུ་ཁུ་ཁོ་ [192a.3]མཉྫུ་ན་ཐ་བྱ་སི་དྡྷ་མཱ་མ་ཞེས་ཀྱང་བརྗོད་དོ། །དེ་ནས་ཡང་མདུན་དུ་འདུག་ལ་དེ་ཁོ་ན་ཉིད་འདི་ལན་ཅིག་བརྗོད་དོ། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་རིན་ཆེ་བ། །ཡེ་ཤེས་ཆེན་པོ་ལས་ཆེ་བ། །འཇམ་པའི་རྡོ་རྗེ་དེ་དག་གྲུབ། །དེ་ནས་རྡོ་རྗེ་ཆུ་འཐུངས་ལ། ཁྲོ་བོའི་ཁུ་ཚུར་རྡོ་རྗེ་ [192a.4]སེམས་མའི་ཁུ་ཚུར་གྱིས་ཕྱེ་ལ་བདག་ཉིད་ལ་དབབ་པར་བྱའོ། །བཛྲ་ཨཱ་བེེ་ཤ་ཨཿཞེས་བྱས་ལ་བཅོམ་ལྡན་འདས་འཇམ་པའི་དབྱངས་དང་མི་བསྐྱོད་པ་ལ་སོགས་པས་བདག་ཉིད་གང་བར་བསམས་ལ། ཡི་གེ་བརྒྱ་པ་བརྗོད་ན་བབས་པར་འགྱུར་རོ། །དེ་ནས་དབབ་པའི་ཕྱག་རྒྱ་སྙིང་ [192a.5]པོ་འདིས་སྙིང་གར་དགྲོལ་ལོ། །ཨོཾ་ཏིཥྛ་བཛྲ་དྲྀ་ཌྷོ་མེ་བྷ་བ། ཤཱ་ཤྭ་ཏོ་མེ་བྷ་བ་ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། ཧྲི་ད་ཡ་མེ། ཨ་དྷི་ཏིཥྛ། སརྦ་སི་དྡྷིཾ་མེ་པྲ་ཡཙྪ། སརྦ་ཀ་རྨྨ་སུ་ཙ་མེ་ཅི་ཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿདེ་ནས་ཕྲེང་བ་དེ་དཀྱིལ་འཁོར་ཆེན་པོར་སྙིང་པོ་འདིས་དོར་བར་བྱའོ། ། [192a.6]ཨོཾ་པ་ར་མ་སུ་ཁཱ་ཤཱ་ཡ་སུ་ལ་ལི་ཏི་བི་ལཱ་ས་ན་མི་ཏེ་ན་མ་མི་བྷ་ག་བཱན་ཛཿཧཱུཾ་བཾ་ཧོཿཧི་ཧི་ཧི་ཧི་པྲ་ཏཱིཙྪ་བཛྲ་ཀུ་སུ་མ་ཨཉྫ་ལིན་ནཱ་ཐ་ཧོ། དེ་ནས་ཕྲེང་བ་བཅིང་བ་ལ་སོགས་པ་དང་། དངོས་གྲུབ་གྱི་རྡོ་རྗེ་བླང་བའི་བར་དུ་བྱས་ལ། རྡོ་རྗེ་ཐལ་མོ་བསྐོར་བས་བཅོམ་ལྡན་འདས་ལ་ཕྱག་བྱས་ནས་འོག་ནས་ [192a.7]བཤད་པའི་ཆོ་གས་སྡོམ་པ་འཛིན་པའི་བར་དུ་བྱས་པ་ཁོ་ནར་ཡང་ལྷག་པར་མོས་པར་བྱའོ། །དེ་ནས་བཟླས་པ་དང་བསྒོམ་པ་ལ་སོགས་པ་ཆོ་ག་རྣམས་བྱས་ནས། ཕྱིར་བྱུང་ལ་སློབ་མ་གཞུག་པར་བྱ་སྟེ། སློབ་དཔོན་དུ་འོས་པའི་སློབ་མ་ལས་ཐམས་ཅད་པའི་ཆུས་བསངས་ལ། རྡོ་རྗེ་ [192b] [192b.1]སེམས་དཔར་བྱིན་གྱིས་བརླབ་ཅིང་རྒྱན་ཐམས་ཅད་ཀྱིས་བརྒྱན་ལ། རྡོ་རྗེ་གནོད་སྦྱིན་ཡོངས་སུ་བཟླས་པའི་གོས་དམར་པོས་སྟོད་གཡོགས་དང་སྨད་གཡོགས་བསྐོན་ལ། ཨོཾ་བཛྲ་ཏིཥྛི་ཧཱུཾ་ཕཊ་ཅེས་མངོན་པར་བསྔགས་པ་གོས་དམར་པོ་ལས་བྱས་པའི་གཙུག་ཏོར་དང་། སྒོ་ [192b.2]སྲུང་བཞིའི་སྙིང་པོ་ཡོངས་སུ་བཟླས་པའི་གོས་དམར་པོའི་གདོང་གཡོགས་བཅིངས་ལ། ཡོན་གྱི་དམ་པ་དག་ཕུལ་བ་ཡོངས་སུ་གཟུང་སྟེ། དེའི་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོ་རྣམས་སུ་རྡོ་རྗེ་དང་། རིན་པོ་ཆེ་དང་པདྨ་དང་། སྣ་ཚོགས་རྡོ་རྗེ་ཟླ་བའི་སྟེང་དུ་དེའི་ས་བོན་ [192b.3]གྱིས་རྣམ་པར་བཀོད་ལ། ཤར་གྱི་སྒོར་རྡོ་རྗེ་ཐལ་མོ་བརྐྱང་ནས་ལུས་ཐམས་ཅད་ཕབ་པས། ཨོཾ་སརྦ་ཏ་ཐཱ་ག་ཏ་པཱུ་ཛོ་པསྠཱ་ནཱ་ཡ་ཨཱ་ཏྨ་ནཾ་ནིཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་སཏྭ། ཨ་དྷི་ཏིཥྛ་སྭ་མཱཾ་ཞེས་བརྗོད་ལ་ཕྱག་བྱེད་དུ་གཞུག་གོ། །དེ་ནས་རང་གི་བདག་པོ་ལས་གནང་བ་ཐོབ་ཅིང་རྡོ་ [192b.4]རྗེ་སེམས་དཔས་རང་གི་རིགས་ཀྱི་བདག་ཉིད་ཅན་དང་འདྲ་བར་སྤྲུལ་ལ། དེའི་སྙིང་གར་བཅུག་ནས་བྱིན་གྱིས་བརླབ་པར་རྣམ་པར་བསམ་མོ། དེ་ནས་ཕྱོགས་ཀྱི་སྒོར་འདུག་ལ་རྡོ་རྗེ་ཐལ་མོ་སྙིང་གར་སྦྱར་ནས། དཔྲལ་བ་ས་ལ་རེག་པར་ཕྱག་བྱེད་དུ་གཞུག་གོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་ [192b.5]བྷི་ཥེ་ཀ་ཡ། ཨཱཏྤ་ནཾ་ནི་ཪྻཱ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། དེ་ནས་རྡོ་རྗེ་རིན་པོ་ཆེས་དེ་བཞིན་དུ་རིན་པོ་ཆེའི་འཁོར་ལོས་སྒྱུར་བའི་ནུས་པ་བསྐྱེད་པ་ཉིད་དུ་དེ་བྱས་པར་བསམ་མོ། །དེ་ནས་ནུབ་ཕྱོགས་ཀྱི་སྒོར་འདུག་ལ་རྡོ་རྗེ་ཐལ་མོ་སྤྱི་བོར་སྦྱོར་དུ་གཅུག་སྟེ། ཁ་ས་ལ་རེག་པའི་ཕྱག་བྱེད་ [192b.6]དུ་གཞུག་གོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བྲ་བར་ཏ་ན་ཡ། ཨཱཏྨ་ནཾ་ནིཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་དྷ་རྨྨ་བྲ་བར་ཏ་ཡ་མཱཾ། དེས་ཀྱང་དེ་བཞིན་དུ་རྡོ་རྗེ་ཆོས་ཀྱིས་ཆོས་ཀྱི་འཁོར་ལོ་བསྐོར་བར་ནུས་པ་བསྐྱེད་པར་བསམ་མོ། །དེ་ནས་བྱང་ཕྱོགས་ཀྱི་སྒོར་འདུག་ལ་རྡོ་རྗེ་ཐལ་མོ་སྙིང་གར་སྦྱོར་དུ་བཅུག་ [192b.7]ལ། མགོ་བོ་ས་ལ་རེག་བར་ཕྱག་བྱེད་དུ་གཞུག་གོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨྨ་ཎི་ཨཱ་ཏྨ་ནཾ་ནི་ཪྻཱ་ཏ་ཡཱ་མི། སརྦ་ཏ་ཐཱ་གཱ་ཏ་བཛྲ་ཀ་རྨྨ་ཀུ་རུ་མཱཾ། དེས་ཀྱང་དེ་བཞིན་དུ་རྡོ་རྗེ་ལས་ཀྱིས་བྱིན་གྱིས་བརླབས་པས། ཕྱི་དང་ནང་དང་གསང་བའི་མཆོད་པ་བྱེད་ནུས་པར་བྱིན་གྱིས་བརླབས་པར་ [193a] [193a.1]བསམ་མོ། །དེ་ནས་ཤར་ཕྱོགས་ཀྱི་སྒོར་བཞག་ལ་དེ་བཞིན་དུ་སྡོམ་པ་སྦྱིན་ནོ། །ཨོཾ་བོ་དྷི་ཙི་ཏྟ་ཨུཏྤཱ་ད་ཡཱ་མི་ཞེས་བརྗོད་དོ། །བྱང་ཆུབ་སེམས་ནི་བླ་མེད་པ། །དམ་པ་དག་གིས་བསྐྱེད་ནས་སུ། །དེ་ཡི་སྙིང་གར་རྡོ་རྗེ་ནི། །སྙིང་པོས་རབ་ཏུ་གཞག་པར་བྱའོ། །དེ་ [193a.2]ནས་སུ་ར་ཏ་ས་མ་ཡ་སྟྭཾ་ཧོ། སིདྡྷི་བཛྲ་ཡ་ཐཱ་སུ་ཁཾ་ཞེས་བསྐུལ་ལོ། །དེ་ནས་ས་མ་ཡ་སྟྭཾ་ཞེས་པའི་སྔགས་ཀྱིས་འཇམ་པའི་རྡོ་རྗེའི་དམ་ཚིག་གི་ཕྱག་རྒྱ་འཆིང་དུ་གཞུག་ཅིང་། དེ་བཞིན་དུ་ཕྲེང་བ་འཛིན་དུ་གཞུག་གོ། །དེ་ནས་སྔ་མ་བཞིན་དུ་རང་ཉིད་འཇུག་པས་ཞུགས་པ་ལ་ཡང་ལན་ [193a.3]གསུམ་བསྐོར་བ་བྱས་ནས། འདོད་ཆགས་ཆེན་པོའི་བདེ་བ་ཆེ། །རྡོ་རྗེ་ཆེན་པོ་རིན་ཆེ་བ། །ཡེ་ཤེས་ཆེན་པོ་ལས་ཆེ་བ། །འགྲོ་ཀུན་བདག་ཉིད་གྲུབ་པར་མཛོད། །ཅེས་བརྗོད་དོ། །དེ་ནས་མདུན་དུ་འདུག་སྟེ། བསྐུལ་བས་མེ་ཏོག་དོར་བ་ལ་སོགས་པ་ཆོ་ག་ཐམས་ཅད་རྗེས་སུ་བསྒྲུབས་ [193a.4]ལ། ཕྱི་ནང་གསང་བའི་མཆོད་པ་རྣམས་ཀྱིས་མངོན་པར་མཆོད་དེ། འདིས་བདེན་པའི་བྱིན་གྱིས་བརླབ་པ་བྱའོ། །སེམས་ཅན་ཀུན་གྱི་ཡིད་ཁྱབ་ཅིང་། །སེམས་ཅན་ཀུན་གྱི་སྙིང་ལ་ཞུགས། །སེམས་ཅན་ཀུན་གྱི་ཡབ་གྱུར་ཉིད། །འདོད་ཆགས་དམ་ཚིག་མཆོག་གྱུར་པའོ། །མགོན་ [193a.5]པོ་བདེན་པ་འདི་ཡིས་ནི། །བདག་ལ་ཁྱེད་ཀྱིས་འདོད་རྫོགས་ཤོག །ཅེས་བྱའོ། །དེ་ནས་ཆོས་ཀྱི་དབྱིངས་ཀྱི་བྱིན་རླབས་དང་། །དམ་ཚིག་ཀྱང་ནི་དགོངས་པ་ཡིས། །དངོས་གྲུབ་ཐམས་ཅད་ཐོབ་པའི་ཕྱིར། །ཐུགས་རྗེས་འགྲོ་ཀུན་དོན་མཛོད་ཅིག །ཅེས་བྱ་བ་འདིས་བཅོམ་ལྡན་འདས་ [193a.6]ལ་གསོལ་བ་བཏབ་ནས། སློབ་མ་གཞུག་པའི་ཕྱིར་བཀའ་ནོད་པར་བྱ་སྟེ། བདག་མིང་འདི་ཞེས་བགྱི་བ་ཡིས། །རྡོ་རྗེ་སློབ་དཔོན་བརྟུལ་ཞུགས་ཆེ། །སེམས་ཅན་ཀུན་ལ་ཕན་པའི་ཕྱིར། །སློབ་མ་འདི་ནི་གཞུག་པར་བགྱི། །རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ [193a.7]ཐམས་ཅད་ཀྱི། །ཕོ་བྲང་དཀྱིལ་འཁོར་ཆེན་པོ་འདིར། །བདག་གིས་སློབ་མ་གཞུག་པར་བགྱི། །ཞེས་བརྗོད་པ་ལ། ས་མ་ཡ་ཧཱུཾ་ཞེས་བརྗོད་དེ་སློབ་མ་བཅུག་ལ་འདི་སྐད་ཅེས་བརྗོད་པར་བྱ་སྟེ། མ་ཧཱ་ར་ཏ་པུ་ཊི་དྷ་སུ་ཏོ་ཥྱ་སུ་སུ་ཁོ་བཛྲ་སཏྭ་དྱ་སིདྡྷྱ་མཾ་ཞེས་སྨྲོས་ཤིག །དེ་ནས་ [193b] [193b.1]འདི་སྐད་ཅེས་ཀྱང་བསྒོའོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་འགྲུབ་པའང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱ་ཡིས་ [193b.2]ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་མ་སྨྲ་ཤིག །དམ་ཚིག་ཉམས་པར་གྱུར་ཏ་རེ། དེ་ནས་རྡོ་རྗེ་སེམས་མའི་ཕྱག་རྒྱ་ཁ་ཐུར་དུ་བསྟན་པ་རྡོ་རྗེ་སློབ་མའི་སྤྱི་བོར་བཞག་ལ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་རྡོ་རྗེ་དམ་ཚིག་ཡིན་གྱིས། གལ་ཏེ་འགའ་ཞིག་ [193b.3]ལ་སྨྲས་ན་ཀླད་པ་འགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་ཀྱང་མནའི་ཆུའི་སྙིང་པོས་ལན་ཅིག་བསྔགས་ལ་སློབ་མ་འཐུང་དུ་གཞུག་གོ། །དེ་ལ་མནའི་སྙིང་པོ་ནི་འདི་ཡིན་ཏེ། རྡོ་རྗེ་སེམས་དཔའ་ཉིད་ཁྱོད་ཀྱི། །སྙིང་ལ་ཡང་དག་ཞུགས་མཛད་ཀྱིས། །གལ་ [193b.4]ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲོད་ཀ་ཋ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་ཡིས་འགྲུབ། །རྡོ་རྗེ་དྲིལ་བུ་ཕྱག་རྒྱ་རྣམས། །གལ་ཏེ་དཀྱིལ་འཁོར་མ་ [193b.5]མཐོང་སྨྲས། །སྐྱེ་བོའི་ཚོགས་ན་འདུག་པའམ། །དད་པ་མེད་ལ་རྟེན་ལ་བསྟན། །དེ་ནས་སློབ་མ་ལ་འདི་སྐད་བསྒོ་ཞིང་། དེང་ཕྱིད་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས། ངས་འདི་གྱིས་ཤིག་ཅེས་བསྒོ་བ་གང་ཡིན་པ་དེ་ཡང་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་ [193b.6]བ་མ་སྤངས་པས་ཁྱོད་འཆི་བའི་དུས་བྱས་ནས་དམྱལ་བར་ལྟུང་བར་གྱུར་ཏ་རེ། འདི་སྐད་དུ་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ལ། རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་སྨྲོས་ཤིག་ཅེས་བསྒོའོ། །དེ་ནས་རྡོ་རྗེ་སློབ་དཔོན་གྱིས་མྱུར་བ་ཉིད་དུ་ [193b.7]སེམས་མ་རྡོ་རྗེའི་ཕྱག་རྒྱ་བཅིངས་ལ་འདི་སྐད་བརྗོད་དུ་གཞུག་གོ། །འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་འབབ་པར་ཤོག །ཨོཾ་བཛྲ་ཨཱ་བེེ་ཤ་ཨཿ་ཞེས་བརྗོད་དོ། །དེ་ནས་ཕྱག་རྒྱ་བཅིངས་པ་ལས་བྱུང་ནས་དེའི་ [194a] [194a.1]སྙིང་གར་ཞུགས་ཏེ། རྡོ་རྗེ་སེམས་མ་བབས་པར་གྱུར་པར་བསམས་ན་བབས་པར་འགྱུར་རོ། །ཡང་ན་ཧོ་ཨ་ཧོ་ཞེས་བྱ་བར་ཡང་རང་གི་སྙིང་གའི་ཟླ་བ་ལ་བཀོད་དེ། སེའུ་འབྲུའི་མེ་ཏོག་དང་འདྲ་བའི་རྡོ་རྗེ་སེམས་དཔའ་རང་གི་དམ་ཚིག་དང་བཅས་པ་རང་གི་སྙིང་ [194a.2]པོ་ལས་ངེས་པར་ཕྱུང་ལ། བཛྲ་བནྡྷ་ཏྲཊ། ཞེས་བྱ་བས་དེའི་སྙིང་ག་ཕྱེ་ལ་དེར་བཅུག་སྟེ། རྡོ་རྗེ་དབབ་པའི་ཕྱག་རྒྱ་བཅིངས་ལ་སྔགས་བརྗོད་དེ། བཅོམ་ལྡན་འདས་ཀྱིས་གང་བར་གྱུར་བར་བསམས་ན་ཡང་བབས་པར་འགྱུར་རོ། །ཁྲོ་བོའི་ཁུ་ཚུར་བཅིངས་ལ་རྡོ་རྗེ་སེམས་མས་ཕྱེ་ན་ཡང་ [194a.3]བབས་པར་འགྱུར་རོ། །ཐེག་པ་ཆེན་པོ་མངོན་པར་རྟོགས་པའི་རྡོ་རྗེའི་ཚིག་བདུན་ནམ་བརྒྱད་བརྗོད་པས་ཀྱང་བབས་པར་འགྱུར་རོ། །སློབ་མའི་གཙོ་བོའི་སྙིང་གར་རྡོ་རྗེ་བྱ། །ཡི་གེ་བརྒྱ་པས་མཉམ་གཞག་སྟན་བྱས་ནས། །བདག་ལུས་གང་ཡིན་སྣོད་ཀྱི་སྒོ་དབྱེ་ཞིང་། །སྙིང་ལ་གནས་པའི་ [194a.4]རྡོ་རྗེའི་དབུས་སུ་བལྟ། །སྔགས་ཀྱི་བདག་པོ་ཡི་གེ་ཨ་དམར་གཟུགས། །བརྗོད་པས་ཡང་དག་ཆགས་པས་གཡོ་བར་བལྟ། །སློབ་མའི་ལུས་འདིར་སྒོ་ནི་དབྱེ་བྱས་པར། །ཞུགས་ནས་རྡོ་རྗེ་བྱས་པའི་སྙིང་ལ་གནས། །མ་ལུས་ལུས་ལ་ཀུན་དུ་བཀང་ནས་སུ། །རྐང་པ་གཡོན་པས་ [194a.5]གཡས་པ་མནན་ནས་ནི། །སྔགས་པས་སློབ་མའི་རྐང་པ་དེ་ལ་དབབ། །ཀུན་དུ་དྲིལ་བུའི་སྒྲ་ནི་ཡང་དག་དཀྲོལ། །ལག་པའི་པདྨ་འབབ་པའི་ཕྱག་རྒྱ་བྱས། །མི་བསྐྱོད་རིན་ཆེན་ལ་སོགས་བདེ་གཤེགས་རྣམས། །རང་གི་ཕྱོགས་རྟོགས་ལས་བྱོན་འོད་བབས་པས། །ལེགས་བབས་ [194a.6]གྱུར་པས་རང་གི་བུ་ལ་བལྟ། །གང་ཞིག་དེས་ཀྱང་བབས་པར་མ་གྱུར་ན། །ལག་པ་གཡས་པས་ཏིལ་གྱི་ས་བོན་གཞག །དབུས་སུ་ཡི་གེ་ཧཱུཾ་ཡང་རབ་བཀོད་དེ། །རྡོ་རྗེ་འོད་འབར་བ་ནི་རྣམ་པར་བསམ། །གཡོན་པའི་མཐེབ་མཛུབ་ཕྱག་རྒྱར་བྱས་པ་ཡིས། །བླངས་པར་བསམས་ལ་ [194a.7]མེ་ལ་སྦྱིན་སྲེག་བྱ། །ལུས་ནི་ཐལ་བར་བྱས་པས་རྣམ་དག་པའི། །བསོད་ནམས་ལུས་ལའང་སྔགས་ཀྱི་འོད་ཀྱིས་དགང་། །ཡེ་ཤེས་བབས་པ་ཉིད་དུ་བསམས་ནས་ནི། །རྫས་བཞིན་འབབ་པ་ཉིད་དུ་རབ་ཏུ་འགྱུར། །ལ་ལ་དག་གིས་བཤད་པ་མཆེ་བའི་མྱུ་གུ་ཅུང་ཟད་ [194b] [194b.1]གཙིགས་པའི་རྩེ་མོའི་འོད་དཀར་གཡོ་ཞིང་དགོད་པའི་ཞལ། སྨིན་མ་འདེབས་པས་རོལ་ཅིང་མ་ལུས་འབྲུག་སྒྲ་ལྟ་བུར་ཧཱུཾ་ནི་འཇིགས་པའི་སྒྲ། །སངས་རྒྱས་མེ་ཏོག་ཆུ་ཕྲེང་གཉིས་བཏགས་འོད་ཆེན་ཚོགས་ལྡན་རང་གི་ལུས་བསྒོམས་ལ། །དེ་ཡིས་རང་གི་སློབ་མའི་རྙོག་པ་རྣམས་སྦྱང་ [194b.2]སྔགས་པའི་མཆོག་གིས་བསྐྱོད་པར་བྱའོ། །དེའི་འོག་ཏུ་རྡོ་རྗེ་རྩེ་ལྔ་པའི་ཕྱག་རྒྱ་བཅིངས་ལ། གསང་སྔགས་འདི་གདོན་པར་བྱའོ། །ཨོཾ་ཏ་ཊ་ཏ་ཊ། དྷ་མ་དྷ་མ། བཛྲ་ཧཱུཾ་ཀ་ར། ཀྲྀ་ཏ་བི་ཀྲྀ་ཏ་བི་དྷུ་ཛི་ཧྭ་དུར་དནྟ་ད་མ་ཀ །ས་དྲཱ་ཧ་སི་ཊ་ལཾ་བོ་དྷ་ར་ཀ་ཧ་ཀ་ཧ། ཙུ་ལ་ཙུ་ལ། མུཉྫ་མུཉྫ། ཨཊྚ་ཧ་ [194b.3]ས། དྷ་ར་བི་དྷ་ར། བཛྲ་བཛྲ་ཨོཾ་ག །བཛྲ་ནེེ་ཏྲ། བཛྲ་ཤྲོ་ཏྲ། བཛྲ་གྷཱ་ཎ། བཛྲ་ཛི་ཧྭཱ། བཛྲ་དནྟ། ཀིཉྩ་ར་ཡ། སི་པྲ་བི་ཤ །བཛྲ་ནེ་ཧྲྀ་ད་ཡཾ། ཨ་བི་ཤ་གྷཱུ་རྞ་གྷཱུ་རྞ། གྷཱུ་རྞཱ་པ་ཡ་གྷཱུ་རྞཱ་བ་ཡ། བྷྲ་མ་བྷྲ་མ། བྷྲ་མ་ཡ། པ་ཊ་ཡ་མོ་ཊ་ཡ། ཨཱ་བེ་ཤ་ཡ། ཛྭ་ལ་པཱ་བ་ཡ། ལ་གྷུ་ལ་གྷུ། སརྦ་ཏ་ཐཱ་ག་ཏ་ [194b.4]ཨཱ་ཛྙཱ་ཀ་ར། པྲ་བ་ར་དྷ་རྨྨ་བ་ལ་ཏ། བི་ཛ་ལ་ཧེ་ཧེ་བྷ་ག་བཱན། བཛྲ་ཧཱུཾ་ཀ་ར། ཧཱུཾ་ཀྲི་ཏ་ཡ་སྭཱ་ཧཱ། སྦྱོར་བ་འདི་ཉིད་ཀྱིས་སྔགས་འདི་ཡང་གདོན་པར་བྱ་སྟེ། བཛྲ་ཧཱུཾ་ཀ་ར་མ་ཧཱ་བ་ལ་པ་ར་ཀྲ་མ། སརྦ་ཡཛྙོ་བ་བི་ཏ། ཨ་ལི་ཏ། ཨཱ་ཀྲནྟ་ཧ་ར་ཤི་ར་ཀ་པཱ་ལ་མཱ་ལཱ་དྷ་ར། མ་ཧཱ་རཽ་དྲ་ཨཊྚ་ཧ་ས་ [194b.5]བི་ཀྲྀ་ཏཱ་ནཱ་ཡ། མོ་ན་ད་ནུ་དྷ་ར། ཀ་ར་ཧ་དྷ་ནཱ་ཧཱུཾ། བྷི་མ་ཧཱུཾ་ཀ་ར། པྲ་ཙ་ལི་ཏ་ནཱ་ཡ་ན། ཀྲོ་དྷ་རཱ་ཛ། ཨ་གྷ་མུག་ཁྱེ་ཏི། བྷུ་བ་བྷུ་བ་ན། ཀཾ་པ་ཀཾ་པ་ཀཾ་པ་ཡ་ཧི། པྲ་བེེ་ཤ་ཡ་པྲ་བེེ་ཤ་ཡ། བ་ར་སྱེ་དེ་ཧེ། ཨཱ་བེ་ཤ་ཡ། སརྦ་ཀིན་ནི་བ་ར་ཤ་བྡ། སུ་མྦྷ་ནི་སུ་མྦྷ། བཛྲ་ཧཱུཾ་ཧཱུཾ་ཧཱུཾ་ཧཱུཾ། ཏྲཱ་ཊ་ཏྲཱ་ཊ་ཏྲཱ་ཊ། [194b.6]ཨོཾ་ཨོཾ་ཨོཾ་ཨོཾ། བྷྲཱུཾ་བྷྲཱུཾ་བྷྲཱུཾ་བྷྲཱུཾ། ཨེ་ཧི་བྷ་ག་བཱན། མ་ཧཱ་བཛྲ་ཧཱུཾ་ཀ་ར། ཀ་ཧ་ཀ་ཧ། ཤབྡ། ན་ད་ཧཱུཾ་ཀ་ར། ཀི་ལི་ཀི་ལི་ཤབྡ་ནར་ཏྭ་བ་ཡ། ཧེ་བྷ་ག་བཱན། ཏྲཻ་ལོ་ཀྱ་བི་ཛ་ཡ། ཨ་ཛི་ཏ་ན་ཛ་ཡ། ནིར་ཛི་ཏ་ཛ་ཡ། ནིར་ཛི་ཏ་ཛ་ཡ། ཧ་ན་ཧ་ན། ཧྲི་ཧྲི། ད་ཧ་ད་ཧ། པ་ཙ་པ་ཙ། [194b.7]ཧུ་ལུ་ཧུ་ལུ། ཧེ་ཧེ། ཨ། ཨོཾ་ཨོཾ་ཨོཾ། བྷ་ག་བཱན། ཏྲཻ་ལོ་ཀྱ་བི་ཛ་ཡ། ཨ་སྨིན་མན་རཱ་མ་དྷྱེ། སརྦ་ཏ་ཐཱ་ག་ཏ་ནཱཾ། ཨཱ་ཀ་ར་ཡ། པྲ་བེེ་ཤ་ཡ། བནྡྷ་ཡ། ཏོ་ཥ་ཡ། བ་ཤི་ཀུ་རུ་ཛཿཧཱུཾ་བཾ་ཧོཿཙ་ཏུར་ཧཱུཾ་ཀ་ར་མ་ཧཱ་བ་ལ། པ་རཱ་ཀྲ་མ་སྭཱ་ཧཱ། མ་ལས་མིག་ནི་ཉི་ཟླར་བྱས་པ་དང་། དཔྲལ་ [195a] [195a.1]བའི་ཕྱོགས་སུ་མཛེས་པའི་ར་གནས་པ། །སྔགས་པས་རང་གི་བུ་ཡི་མིག་ཕྱེ་སྟེ། །འཁོར་ལོ་འདི་དག་མ་ལུས་བསྟན་པར་བྱ། །གང་ཚེ་དེས་དེར་ཅི་ཡང་མ་མཐོང་ན། །ར་ལས་བྱུང་བའི་འོད་ཀྱི་ཕྲེང་བ་ཡིས། །དེ་སྙིང་སྣང་བར་བྱས་ལ་དེ་ནས་ནི། །དེ་ནི་ཉིས་འགྱུར་ [195a.2]མིག་ཏུ་ཞུགས་པར་བསམ། དེ་ཡི་འོད་ཀྱིས་མིག་གཉིས་བསྐུལ་བས་ན། །དེ་ཚེ་ཅུང་ཟད་དེ་ཡིས་མཐོང་བར་འགྱུར། །དེས་ཀྱང་དེ་བཞིན་མཚན་མ་མ་མཐོང་ན། །རྗེས་མཐུན་གནས་ལས་བདེན་པའི་བྱིན་རླབས་བྱ། །འགྲོ་བའི་དོན་ལ་ཆགས་བྲལ་མ་མཛད་ཅེས། །བརྟུལ་ [195a.3]ཞུགས་ཅན་གྱིས་དེ་སོགས་ཀྱིས་བསྐུལ་ཞིང་། །པུས་མོ་གཉིས་ཀ་ས་ལ་བཙུགས་ནས་ནི། །གཟུགས་མཐོང་ཕྱིར་ན་མཆོད་ཡོན་དབུལ་བར་བྱ། །དེ་ནས་བབས་ཏེ་བབས་མ་ཐག་ཏུ་ལྷའི་ཡེ་ཤེས་སྐྱེ་བར་འགྱུར། ཡེ་ཤེས་དེས་ཕ་རོལ་གྱི་སེམས་ཤེས་པར་འགྱུར་རོ་ཞེས་བྱ་བ་ལ་སོགས་ [195a.4]པ་རྒྱ་ཆེར་སྦྱར་རོ། །དེ་ནས་ཏིཥྛ་བཛྲ་ཞེས་བྱ་བ་ལ་སོགས་པས་དེའི་སྙིང་གའི་ཕྱག་རྒྱ་དགྲོལ་ལ། ཚིགས་སུ་བཅད་པ་འདིས་བདེན་པའི་བྱིན་གྱིས་བརླབས་བརྗོད་པར་བྱའོ། །འདི་ལྟར་བདག་གི་སློབ་མ་འདི། །དཀྱིལ་འཁོར་དུ་ནི་ལེགས་བཅུག་ན། །ལྷ་ཡི་རིགས་ཀྱི་རིམ་པ་དག ། [195a.5]འདི་ཡི་བསོད་ནམས་ཅི་འདྲ་ལས། །དེ་བཞིན་དུ་ནི་འབབ་པར་འགྱུར། །འདི་ནི་དངོས་གྲུབ་གང་འགྲུབ་དང་། །རིགས་ནི་གང་གི་སྣོད་འགྱུར་དང་། །བསོད་ནམས་མཐུ་ནི་གང་ཡོད་པ། །དཀྱིལ་འཁོར་འདི་ནི་དེ་བཞིན་གྱུར། །དེ་ནས་ཨོཾ་པ་ར་མ་སུ་ཁཱ་ཤཱ་ཡ་སུ་ལ་ལ་ཏི་བི་ལ་སཱ་ན་མི་ཏི་ན་མཱ་ [195a.6]མི་བྷ་ག་ཝཱན། ཛཿཧཱུཾ་བཾ་ཧོཿཧི་ཧི་ཧི་ཧི། པྲ་ཏཱི་ཙྪ་བཛྲ་ཀུ་སུ་མ་ཨཉྫ་ལི་ནཱ་ཐ་ཧོཿ། ཞེས་བྱ་བའི་སྔགས་འདིས་ཕྲེང་བ་དེ་དཀྱིལ་འཁོར་དུ་དོར་རོ། །དེ་ནས་དངོས་གྲུབ་རབ་འབྲིང་མེ་ཏོག་བབས་པ་ལས་བརྟག་པར་བྱ་སྟེ། ལྷ་རྣམས་ཀྱི་ཁྱད་པར་དང་གནས་ཀྱི་ཁྱད་པར་ལས་བརྟག་སྟེ། གང་ [195a.7]ཚེ་སངས་རྒྱས་བཅོམ་ལྡན་གྱི། །དབུ་ལ་མེ་ཏོག་བབས་གྱུར་ན། །དེ་ཚེ་གཙུག་ཏོར་མཛོད་སྤུ་དག །འགྲུབ་པར་འགྱུར་བ་གདོན་མི་ཟ། །སྤྱན་ལ་སོགས་པའི་སྔགས་རྣམས་ཀྱང་། །ཞལ་དུ་བབས་ན་འགྲུབ་པར་འགྱུར། །སྟོད་དུ་བབས་ན་ཕྱོགས་རྣམས་འགྲུབ། །རྐེད་དུ་བབས་ན་འབྲིང་རྣམས་འགྲུབ། །རོ་སྨད་ཕྱོགས་སུ་ [195b] [195b.1]བབས་ན་ནི། །དངོས་གྲུབ་པ་ལ་རྣམས་འགྲུབ་པར་འགྱུར། །བར་གྱི་སྐུ་ལ་བབས་ན་ནི། །སྙིང་པོ་ལ་སོགས་འགྲུབ་པར་འགྱུར། །སྨད་དུ་བབས་པར་གྱུར་ན་ནི། །མངག་གཞུག་ལ་སོགས་འགྲུབ་པར་འགྱུར། །རིམ་པ་དེ་དག་ཐམས་ཅད་ནི། །རིགས་བཞི་རྣམས་ལས་ཤེས་པར་བྱ། །དེ་བཞིན་ [195b.2]ལྷ་རྣམས་གཞན་ལ་ཡང་། །དངོས་གྲུབ་རྣམ་པ་གསུམ་དུ་བཤད། །གལ་ཏེ་ལྷ་ཡི་གཟུགས་དག་ལས། །མེ་ཏོག་རིང་དུ་ལྷུང་གྱུར་ན། །དེ་ཡི་དངོས་གྲུབ་ཡུན་རིང་འགྱུར། །ཉེ་ན་དངོས་གྲུབ་མྱུར་དུ་འགྲུབ། །གསང་སྔགས་རྣམས་ཀྱི་མཆོད་པ་དག །གང་དུ་བཀྲམ་པ་ཚུན་ཆད་ནི། །དེ་ཡིས་ [195b.3]ས་རིས་དེ་ཡིན་ཏེ། །མེ་ཏོག་དེར་ལྷུང་དེ་ཡི་རིགས། །ལྷ་གཉིས་ཀྱི་ནི་བར་དག་ཏུ། །གལ་ཏེ་མེ་ཏོག་བབས་གྱུར་ན། །གང་དུ་ཉེ་བར་གྱུར་པ་ནི། །དེ་ནི་དེ་ཡི་རིགས་སུ་བཤད། །གལ་ཏེ་ལ་ལའི་མེ་ཏོག་ནི། །དཀྱིལ་འཁོར་མང་པོ་འདས་ནས་བབས། །དེ་ལ་དངོས་གྲུབ་པ་ལ་འགྲུབ་ཅིང་། ། [195b.4]ད་ནི་དད་པའང་རབ་ཏུ་ཆུང་། །གལ་ཏེ་མེ་ཏོག་དོར་བ་དག །ར་བའི་རི་མོ་ལ་བབས་ན། །ཞི་བར་བྱས་ནས་དེ་ནས་གདོད། །ནན་ཏན་བསྐྱེད་དེ་འདོར་དུ་གཞུག །དེ་སྟེ་ཐེ་ཚོམ་གྱུར་ན་ནི། །མཁས་པས་བཟླས་ཏེ་འདོར་མི་གཞུག །དེ་ནི་གར་ཡང་ངེས་མེད་པས། །དེས་ནི་དངོས་གྲུབ་ [195b.5]འཐོབ་མི་འགྱུར། །གཉིས་ཀྱི་བར་དུ་མཉམ་པ་དང་། །དོན་མེད་ཕྱི་རོལ་ལྷུང་ན་ནི། །ཞི་བའི་སྦྱིན་སྲེག་བྱས་ནས་སུ། །དེ་ནས་མེ་ཏོག་འདོར་དུ་གཞུག །སྙིང་པོར་མེ་ཏོག་བབས་ན་ནི། །རྟག་ཏུ་དོན་མེད་མི་འགྱུར་བཤད། །སྲད་བུ་དག་གི་ཆོ་ག་བཞིན། །དེ་ཡི་ཉེ་འཁོར་ཤེས་པར་བྱ། །དེ་ལ་ [195b.6]སོགས་པའི་རྣམ་པ་ཡིས། །མེ་ཏོག་རྣམས་ནི་བོར་བ་ལ། །བདག་གི་མདུན་དུ་གང་ལྷུང་བ། །དེ་ལ་ཞི་བ་བརྩམ་པར་བྱ། །སྦྱིན་སྲེག་གིས་ནི་ཞི་བྱས་ནས། །དེ་ནི་སླར་ཡང་འདོར་དུ་གཞུག །ལན་གསུམ་སྤོགས་ཏེ་བོར་ན་ཡང་། །གལ་ཏེ་ལེགས་པར་མ་བབས་ན། །རེ་ཐག་བཅད་དེ་སླར་གཏད་ [195b.7]དོ། །དེ་ནས་མེ་ཏོག་བབས་པ་ལས། ལྷ་ཡང་དག་པར་ཤེས་པར་བྱས་ནས། ཕྲེང་བ་བླངས་ཏེ། ཨོཾ་པྲ་ཏི་གྲྀ་ཧྞ་ཏ་མི་མི་ས་ཏྭ་བ་ལ་ཞེས་བརྗོད་ནས་དེའི་མགོ་ལ་བཅིང་ངོ་། །ཡེ་ཤེས་བབས་པའི་མཚན་མ་ལས་ཉེ་བར་མཚོན་ནས། དེ་ལ་མིག་གིས་ཇི་ལྟར་མཐོང་བ་ཞེས་དྲིས་ཏེ། [196a] [196a.1]དེས་ཇི་ལྟར་མཐོང་བ་དེ་བཞིན་དུ་འགྲུབ་པར་འགྱུར་རོ། །གལ་ཏེ་དཀར་པོ་རྣམ་པར་མཐོང་ན་ནི། །དེ་ལ་དངོས་གྲུབ་མཆོག་བསླབ་བོ། །གལ་ཏེ་སེར་པོ་མཐོང་ན་དེ་ལ་དོན་འབྱུང་བའི་ཡེ་ཤེས་བསླབ་བོ། །གལ་ཏེ་དམར་པོ་མཐོང་ན་དེ་ལ་རྗེས་སུ་ཆགས་པའི་ཡེ་ཤེས་བསླབ་ [196a.2]བོ། །འོན་ཏེ་ནག་པོར་མཐོང་ན་དེ་ལ་མངོན་སྤྱོད་ཀྱི་ཡེ་ཤེས་བསླབ་བོ། །གལ་ཏེ་སྣ་ཚོགས་པར་མཐོང་ན་དེ་ལ་དངོས་གྲུབ་ཐམས་ཅད་ཀྱི་ཡེ་ཤེས་བསླབ་པར་བྱའོ་ཞེས་རྒྱ་ཆེར་སྦྱར་རོ། །དེ་ནས་སྙིང་པོ་འདིས་གདོང་གཡོགས་བཀྲོལ་ཏེ། ཨོཾ་བཛྲ་སཏྭ་ས་མ་ཡི་ཏེ་དྱ་ཙཀྵཱུ་དྒྷ་ཊ་ཏ་ཏྤ་ར། [196a.3]ཨུདྒྷ་ཊ་ཡ་ཏི་སརྦཱ་ཀྵོ་བཛྲ་ཙཀྵཱུ་ར་ནུ་ཏྟ་རཾ། དེ་ནས་ཧེ་བཛྲ་པ་ཤྱ་ཞེས་བརྗོད་དོ། །དེ་ནས་གདོང་གཡོགས་དགྲོལ་ནས་ནི། །དཀྱིལ་འཁོར་བཟང་པོ་བསྟན་པར་བྱའོ། །དེ་ནས་བླ་མ་དགར་གྱུར་ནས། །སློབ་མ་དེ་ལ་འདི་སྐད་ཅེས་བསྒོའོ། །དཀྱིལ་འཁོར་བཟང་པོ་འདི་ལ་ལྟས། །དེ་ནི་ [196a.4]དད་པ་རབ་ཏུ་བསྐྱེད། །ཁྱོད་ནི་སངས་རྒྱས་རིགས་སུ་སྐྱེས། །སྔགས་དང་རིག་པས་བྱིན་གྱིས་བརླབས། །འགྲོ་བ་ཕུན་སུམ་དངོས་གྲུབ་ཀྱང་། །ཐམས་ཅད་ཁྱོད་ལ་མངོན་དུ་འགྱུར། །དངོས་གྲུབ་ཐོབ་ཕྱིར་དམ་ཚིག་སྐྱོངས། །གསང་སྔགས་ལ་ཡང་བརྩོན་པར་གྱིས། །དེ་ནས་དཀྱིལ་ [196a.5]འཁོར་གྱི་དེ་ཁོ་ན་ཉིད་བཤད་པར་བྱ་སྟེ། མི་མཉམ་མེད་པས་ཟུར་བཞི་སྙོམས། །དྲན་དང་དབང་པོས་སྒོ་བཞི་སྟེ། །བསམ་གཏན་རྣམས་ཀྱི་རྟ་བབས་བཞི། །ཏིང་འཛིན་ཁྱམས་སུ་ཤེས་པར་བྱ། །ཁྱམས་ལ་བརྟེན་པའི་རྡོ་རྗེ་དག །གཟུགས་རྣམས་ལྷ་མོས་མཆོད་པ་ཡིན། །རྒྱན་ [196a.6]རྣམས་ཀུན་གྱིས་བཀྲ་བ་ཡིན། །བསམ་པ་ཐམས་ཅད་རྫོགས་བྱེད་པའོ། །གདུལ་བྱས་བསྐྱོད་པ་སྣ་ཚོགས་མཆོག །དར་འཕན་དྲིལ་བུ་སྒྲོགས་པ་ཡིན། །མེ་ལོང་ཡེ་ཤེས་རྟག་མེ་ཏོག །བྱང་ཆུབ་ཡན་ལག་མེ་ཏོག་ཕྲེང་། །དྲ་བ་དྲ་ཕྱེད་རིན་ཆེན་མཆོག །ཉི་མ་ཟླ་བར་ཡང་དག་ལྡན། ། [196a.7]ཀུན་གྲུབ་མི་ཟད་བདེ་བ་སྟེ། །བདེ་བ་ཆེན་པོ་ཞེས་གྲགས་པའོ། །དེ་ནི་ནང་གི་དཀྱིལ་འཁོར་གྱི། །ཀ་བ་དཀྱིལ་འཁོར་གྱི། །ཀ་བ་དཀྱིལ་འཁོར་འདྲ་བ་ནི། །དངོས་གྲུབ་བདེ་བ་ཀུན་སྟེར་བའི། །རྣམ་ཐར་བརྒྱད་པོ་དེ་ཉིད་ཡིན། །ཐེག་པ་ཆེན་པོའི་བྱང་ཆུབ་སེམས། །མདོ་སྡེའི་འཁོར་ལོ་བསྐོར་བས་ན། །རྡོ་རྗེ་ [196b] [196b.1]ཐིག་གིས་ཡོངས་བཏབ་ཅིང་། །ཐམས་ཅད་དུ་ཡང་ཡོངས་སུ་རྫོགས། །གང་དུ་འཇུག་པ་ཙམ་གྱིས་ནི། །མི་ཚུགས་པ་དང་མི་ལྡོག་དང་། །བདེ་བ་ཆེན་པོར་རབ་གྲུབ་ཕྱིར། །དེ་དག་དག་པར་ཡང་དག་འགྱུར། །དེ་ནས་ཕྱག་རྒྱ་དང་སྙིང་པོ་ཡང་བཤད་པར་བྱའོ། །དེ་ནས་རྡོ་རྗེ་ [196b.2]ལྕགས་ཀྱུ་ནས་བརྩམས་ཏེ། མགོན་པོ་འཇམ་པའི་དབྱངས་ཀྱི་བར་དུ་བསྟན་པར་བྱའོ། །དེ་ནས་ཡོན་བླངས་ལ་གང་དུ་མེ་ཏོག་བབས་པར་གྱུར་པ་དེའི་རིགས་དང་། གཟུགས་སུ་དེ་བསྐྱེད་ལ། དེའི་ཕྱག་རྒྱ་དང་སྔགས་ཀྱིས་བྱིན་གྱིས་བརླབས་ཏེ། སྙིང་པོ་འདི་དང་རྡོ་ [196b.3]རྗེས་བྱིན་གྱིས་བརླབས་པའི་བུམ་པའི་ཆུས་དབང་བསྐུར་རོ། །ཨོཾ་བཛྲ་ཨ་བྷི་ཥིཉྩ། དེ་ནས་དེ་དང་རྗེས་སུ་མཐུན་པའི་ཅོད་པན་དང་དར་དཔྱངས་ཀྱིས་དབང་བསྐུར་ལ། གང་གི་མཚན་མའི་དབང་བསྐུར་བ་ལག་ཏུ་བྱིན་ཏེ། མཚན་མ་དང་རྗེས་སུ་མཐུན་པར་སྔགས་འདི་བརྗོད་པར་ [196b.4]བྱའོ། །སངས་རྒྱས་རྣམས་ཀྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །རང་གི་མཚན་མས་བདག་པོའི་དབང་། །སྙིང་པོ་འདིས་སྦྱིན་པར་བྱ་སྟེ། ཨོཾ་བཛྲ་ཨ་དྷི་པ་ཏི་སྟྭཾ། ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་ [196b.5]སྟྭཾ། དེ་ནས་སྙིང་པོ་འདིས་དྲིལ་བུ་སྦྱིན་ནོ། །ཨ་ཀཱ་རོ་མུ་ཁཾ་སརྦ་དྷ་རྨྨཱ་ཎཱཾ། ཨཱ་དྱ་ནུ་ཏྤནྣ་ཏྭཱཏ། དེ་ནས་སྙིང་པོ་འདིས་རྡོ་རྗེ་མིང་གི་དབང་བསྐུར་རོ། །ཨོཾ་བཛྲ་ས་ཏྭ་སྟྭཾ་ཨ་བྷི་ཥིཉྩཱ་མི། བཛྲ་ནཱ་མ་ཨ་བྷེ་ཥེ་ཀ་ཏ། ཀྱེ་རྡོ་རྗེ་ཞེས་གང་གི་མིང་གང་བརྗོད་བ་དེ་ལ་དེར་སྐྱེ་ཞེས་བརྗོད་པར་བྱའོ། །དེ་ནས་ [196b.6]ཕྱག་རྒྱ་ཆེན་པོའི་ཚུལ་དུ་བཞག་ལ། སྤོས་ལ་སོགས་པ་རྣམས་ཀྱིས་ཡང་དག་པར་མཆོད་ལ། སྔགས་བསྐུལ་བའི་ཚིག་བརྒྱ་རྩ་བརྒྱད་བཟླས་པའི་སྔགས་བྱིན་ལ། ཕྱག་རྒྱ་བཞིའི་ཡེ་ཤེས་རིག་པའི་དབང་བསྐུར་བས། བསླབ་པར་བྱ་བ་ནི་རིག་པའི་དབང་བསྐུར་བའོ། །སློབ་མས་ [196b.7]ཀྱང་རྡོ་རྗེ་ཐལ་མོ་བསྐོར་བ་བྱས་ལ་ཕྱག་བྱ་སྟེ། ཕྲེང་བ་བཅིང་བ་ལ་སོགས་པ་དེ་དག་ཐམས་ཅད་གཟུང་བར་བྱའོ། །རིག་པའི་དབང་བསྐུར་བའི་ཆོ་གའོ། །དེ་ནས་སློབ་དཔོན་དུ་འོས་པའི་སློབ་མས་ཡོན་བཟང་པོ་ཕུལ་ལ་གསོལ་བ་གདབ་པར་བྱ་སྟེ། ཨོཾ་སརྦ་བུདྡྷ་པར་རཏྣ་སཾ་ཛ་ཡ་ [197a] [197a.1]དྷཱུ་པ་དཱི་ཕྱ་མ་ཀུ་ཊ་ཡ་ནཱ་མ། ཨ་བྷི་ཥི་ཉྩ་ཕྲ་བ་ར་བཛྲ་དྷ་ར་ཤྲཱི་བཛྲ་སཏྭ་ས་མ་ཡ་སྟྭཾ་ཨ་ཧཾ། ཞེས་བྱ་བ་འདིས་བཅོམ་ལྡན་འདས་རྣམ་པར་སྣང་མཛད་ཀྱི་རྣལ་འབྱོར་བས་ཡོན་གྱི་མཆོག་བླངས་ལ། སློབ་དཔོན་རྗེ་བཙུན་འཇམ་དཔལ་ཉིད་རྣམ་པར་སྣང་མཛད་ཆེན་པོ་ཉིད་དུ་གྱུར་ [197a.2]པས། ཤར་ཕྱོགས་ཀྱི་སྒོའི་མཐར་སྣ་ཚོགས་པདྨ་བྲིས་ལ། སློབ་དཔོན་རྡོ་རྗེ་འཛིན་ཆེན་པོའི་སྐུར་ཟླ་བའི་དཀྱིལ་འཁོར་གྱི་སྟེང་དུ་གནས་པར་བསམས་ལ། རྡོ་རྗེ་སེམས་མ་ལ་སོགས་པས་བྱིན་གྱིས་བརླབས་ཏེ་དབང་བསྐུར་བར་བྱའོ། །ཡང་ན་དཀྱིལ་འཁོར་ལས་ཁྲུ་གསུམ་ཙམ་ [197a.3]ཡོངས་སུ་དོར་བར་དབང་བསྐུར་བའི་སྒོ་ལ་མངོན་པར་བྱས་པར་ནང་གི་དཀྱིལ་འཁོར་གྱི་ཕྱེད་ཀྱི་ཚད་ཙམ་ལ་ཟུར་བཞི་པ་སྒོ་ནུབ་ཕྱོགས་སུ་བལྟས་པའི་དཀྱིལ་འཁོར་ཚོན་སྣ་ལྔས་བྲིས་ལ། དེའི་དབུས་སུ་པདྨ་འདབ་མ་བརྒྱད་པ་བྲི། དེའི་སྟེང་དུ་སེང་གེའི་གདན་ལ་ཟླ་བའི་དཀྱིལ་འཁོར་རས་ཀྱི་བཀབ་པ་ [197a.4]དང་། སེང་གེའི་གདན་གྱི་སྟེང་དུ་བླ་རེ་བྲེ་ཞིང་གཡས་ལོགས་སུ་དར་དང་མེ་ཏོག་གི་ཕྲེང་བས་བརྒྱན་པའི་གདུགས་རྩེ་མོ་དཀར་བ་དང་། དམར་བ་ལ་གཙུག་ཏོར་གདུགས་དཀར་པོ་ཡོངས་སུ་བཟླས་པ། གཡོན་དུ་དར་དང་རས་སྣ་ཚོགས་པས་བཀྲ་བའི་རྒྱལ་མཚན་དང་བ་དན་ཨོཾ་ [197a.5]ཡོངས་སུ་བཟླས་པའི་ལེགས་པར་བཞག་ལ་མཆོད་ཡོན་ཕུལ་ཏེ། མེ་ཏོག་ལ་སོགས་པས་ཡང་དག་པར་མཆོད་ནས། རྔ་བོ་ཆེ་དང་། རྔ་རིངས་དང་། རུ་དུད་ལ་སོགས་པའི་རོལ་མོ་ཕྱག་རྒྱས་བྱིན་གྱིས་བརླབས་པ་དང་། ཕྱི་རོལ་དུ་གར་དང་གླུ་ལ་སོགས་པ་དང་། སྒེག་མོ་ལ་ [197a.6]སོགས་པ་རྣམས་ཀྱིས་མཆོད་ཅིང་། བཀྲ་ཤིས་ཀྱི་གླུ་ལེན་ཅིང་དྲིལ་བུ་དཀྲོལ་བཞིན་དུ་རྡོ་རྗེ་འབེབས་པ་ལ་སོགས་པའི་བུམ་པའི་ཆུ་རྣམས་ཀྱིས་དེའི་སྔགས་གདོན་པ་སྔོན་དུ་འགྲོ་བ་ཉིད་དང་། རྡོ་རྗེ་སློབ་དཔོན་ཆེན་པོ་ཉིད་དུ་དབང་བསྐུར་བར་བྱ་སྟེ། ཨོཾ་བཛྲ་ཨ་བྷི་ཥིཉྩ་ཞེས་བྱ་བ་དང་། ཇི་ [197a.7]སྲིད་རྣམ་པར་རྒྱལ་བའི་བུམ་པའི་བར་དུ་དབང་བསྐུར་རོ། །དེ་ནས་དེའི་མགོར་ཡང་འཇམ་པའི་སྐུ་གཟུགས་དེའི་དམ་ཚིག་གི་ཕྱག་རྒྱས་བཟུང་ལ། ཨོཾ་མ་ཧཱ་སུ་ཁ་བཛྲ་སཏྭཾ་ཛཿཧཱུཾ་བཾ་ཧོཿསུ་ར་ཏ་སྟྭཾ་ཞེས་བྱ་བའི་སྔགས་བཟླས་ལ་རྡོ་རྗེ་འཛིན་པ་ཆེན་པོའི་སློབ་དཔོན་དུ་འགྱུར་རོ། །ཤེས་རབ་ [197b] [197b.1]ཡན་ལག་འདུས་པའི་རྡོ་རྗེ་ལས་བྱུང་བའི། །བྱང་ཆུབ་སེམས་ཀྱིས་འཇམ་དབྱངས་བྱང་ཆུབ་དེ་དབང་བསྐུར། །རྒྱལ་མཆོག་སྲས་བཅས་རྣམས་ཀྱིས་ལེགས་གསུངས་བཀྲ་ཤིས་གང་། །དེས་ནི་ཁྱེད་ཀྱི་དབང་བསྐུར་མཆོག་ལ་བཀྲ་ཤིས་ཤོག། །དཔལ་ལྡན་རྡོ་རྗེ་སེམས་ཚོགས་དཀྱིལ་ [197b.2]འཁོར་ལ་འཇུག་ཅིང་། །སྲིད་པའི་སྙིང་པོར་རྣམ་རོལ་སྒེག་མོ་ལ་སོགས་པས། །བདེ་བྱེད་རབ་མཆོག་ལེགས་པར་གླུར་བླངས་བཀྲ་ཤིས་གང་། །དེས་ནི་ཁྱེད་ཀྱི་དབང་བསྐུར་མཆོག་ལ་བཀྲ་ཤིས་ཤོག །ཤིན་ཏུ་ཞི་བའི་མཛད་པ་ཕུལ་བྱུང་མ་ལུས་པས། །སེམས་ཅན་བདེ་གཤེགས་རྟོགས་ [197b.3]མཛད་བཅོམ་ལྡན་དབང་བསྐུར་ལ། །དཔག་མེད་ལྷ་ཡི་མཆོག་གིས་ལེགས་གསུངས་བཀྲ་ཤིས་གང་། །དེས་ནི་ཁྱོད་ཀྱི་དབང་བསྐུར་མཆོག་ལ་བཀྲ་ཤིས་ཤོག །དཔལ་ལྡན་ཁམས་གསུམ་རྣམ་རྒྱལ་དཀྱིལ་འཁོར་རབ་མཆོག་ལ། །འཇིག་རྟེན་གསུམ་གྱི་རྒྱལ་པོར་རྒྱལ་མཆོག་ [197b.4]དབང་བསྐུར་བ། །ལྷ་ཡི་མཆོག་གིས་བཏུད་དེ་རབ་བཤད་བཀྲ་ཤིས་གང་། །དེས་ནི་ཁྱོད་ཀྱི་དབང་བསྐུར་མཆོག་ལ་བཀྲ་ཤིས་ཤོག །འགྲོ་བ་སྣ་ཚོགས་འདུལ་ཕྱིར་ཕྱག་ན་པདྨོ་ཡིས། །རྫོགས་སངས་རིན་ཆེན་ཅོད་པན་བདུད་རྩིའི་ཆུས་དབང་བསྐུར། །པདྨའི་འདོད་ཆགས་ [197b.5]རྣམས་ལེགས་པ་ཡི་བཀྲ་ཤིས་གང་། །དེས་ནི་ཁྱོད་ཀྱི་དབང་བསྐུར་མཆོག་ལ་བཀྲ་ཤིས་ཤོག །ནམ་མཁའི་སྙིང་པོ་ནོར་བུ་རིན་ཆེན་འབྱོར་པས་ཉམས་དགའ་ཞིང་། །དོན་རྣམས་ཀུན་གྲུབ་བདེ་སྦྱིན་དབང་བསྐུར་ཆེན་པོ་ལ། །དགེ་བ་ཕུན་ཚོགས་མཛད་པས་ལེགས་གསུངས་བཀྲ་ཤིས་ [197b.6]གང་། །དེས་ནི་ཁྱེད་ཀྱི་དབང་བསྐུར་མཆོག་ལ་བཀྲ་ཤིས་ཤོག །འཁོར་ལོས་སྒྱུར་དྲུག་དགེ་བའི་བཀྲ་ཤིས་གླུ་བླངས་ལས། །བསོད་ནམས་རིན་ཆེན་དྲི་མེད་མི་མཉམ་གང་ཐོབ་པ། །དེས་ནི་ཀུན་སོན་འབྱོར་བའི་དབང་བསྐུར་ཆེན་པོ་ལ། །འཇམ་དཔལ་གྲགས་བཅས་འཇིག་རྟེན་ [197b.7]རྣམ་པར་དག་གྱུར་ཅིག །དེ་ནས་གོས་ལ་སོགས་པས་བརྒྱན་ཏེ། སངས་རྒྱས་ཀྱི་ཅོད་པན་དང་དར་དཔྱངས་ལ་སོགས་པའི་དབང་བསྐུར་བས་དབང་བསྐུར་ལ། མེ་ཏོག་ལ་སོགས་པས་ཡང་དག་པར་མཆོད་དེ། རྡོ་རྗེའི་དབང་བསྐུར་བ་བྱིན་ལ་དེ་ཁོ་ན་ཉིད་བསྟན་པར་བྱ་སྟེ། ཐོག་ [198a] [198a.1]མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཐམས་ཅད་བདག། །རྡོ་རྗེའི་སྙེམས་ཚུལ་བདག་པོའི་བདག། །ཅེས་བྱ་བ་ནི་འཇམ་དཔལ་ལ་བྱ་བར་བཤད་དེ། མིང་ཐམས་ཅད་ཀྱི་བདག་ཉིད་ཅན་ཡིན་པའི་ཕྱིར་རོ། །དེ་ནས་ཧི་ [198a.2]ཞེས་བརྗོད་ལ་དེ་བཞིན་དུ་བདག་པོ་ཉིད་དུ་དབང་བསྐུར་རོ། །ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུ་ཏྤ་ནྣ་ཏྭཱ་ཏ་ཅེས་བརྗོད་ལ་དྲིལ་བུ་བྱིན་ཏེ་ཆོས་བསྟན་པར་བྱའོ། །དངོས་རྣམས་རང་བཞིན་དག་པའི་ཕྱིར། །ངོ་བོ་ཉིད་ཀྱིས་དངོས་མེད་བྱས། །རང་བཞིན་དག་པའི་སེམས་དཔའ་ཡིས། །དམ་ [198a.3]པའི་དངོས་པོ་བྱེད་པར་འགྱུར། །དེ་ནས་ཡི་གེ་དྷཱིཿབརྗོད་ལ། །མིང་གི་དབང་བསྐུར་བ་སྦྱིན་པར་བྱ་སྟེ། ཕྱག་རྒྱ་ཆེན་པོའི་ཚུལ་དུ་བཞག་ལ། དམ་ཚིག་བསྒྲག་པར་བྱའོ། །སྲིད་པའི་བདེ་བ་ཤིན་ཏུ་ཆུང་། །སྡུག་བསྔལ་མང་པོ་ཞི་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དེ་བས་དམ་ [198a.4]ཚིག་བསྲུང་བར་གྱིས། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པ་ནི་བསྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། །དེ་སྲིད་མཚུངས་མེད་སེམས་ཅན་ [198a.5]དོན། །མྱ་ངན་མི་འདའ་བྱེད་པར་ནུས། །གསང་བའི་མཆོག་གི་དམ་ཚིག་ཐབས། །བསོད་ནམས་བྱིན་རློབ་སྒྲུབ་བྱེད་པ། །དངོས་གྲུབ་ཀུན་གྱི་དབང་ཕྱུག་གྲུབ། །སེམས་ཅན་དོན་ནི་སྟོན་པར་བྱེད། །ཅེས་བྱ་བ་དང་། ཡིད་ཀྱི་གཟུགས་ནི་བརྟན་པའི་ཕྱིར། །ཕྱག་རྒྱ་དམ་ཚིག་ཡིན་ [198a.6]པར་གྲགས། །གང་གིས་ལུས་ཀུན་བརྟན་པས་ན། །ཕྱག་རྒྱ་ཡིན་པར་རབ་ཏུ་བསྒྲགས། །ཞེས་བྱའོ། །དེ་ནས་ཤྲཱི་བརྗོད་པར་བྱའོ། །དེ་ནས་སྤོས་ལ་སོགས་པས་ཡང་དག་པར་མཆོད་ནས་ལན་སྟོང་རྩ་བརྒྱད་བཟླས་པ་བྱས་པའི་སྔགས་དང་ཕྱག་རྒྱ་བཞིའི་ཡེ་ཤེས་བསླབ་པར་ [198a.7]བྱའོ། །སློབ་དཔོན་དུ་དབང་བསྐུར་བའི་ཆོ་གའོ། །དེ་ནས་རྡོ་རྗེ་སློབ་དཔོན་ནི། །རྗེས་སུ་གནད་པའི་སྦྱིན་བརྩོན་པས། །སློབ་མ་རྫོགས་པར་ཤེས་ནས་ནི། །གོ་འཕང་འདི་ནི་ཐོབ་པར་བྱ། །ཤིན་ཏུ་གསང་བའི་གཞུང་འདི་ཉིད། །རྡོ་རྗེ་སློབ་མས་གསོལ་བྱས་ཏེ། །དེ་ཉིད་ལ་ནི་ཡོན་གྱི་ [198b] [198b.1]མཆོག །དམ་པ་ཕུལ་ནས་གསོལ་བ་གདབ། །འདི་ཞེས་བྱ་བའི་རྡོ་རྗེ་ཅན། །བྱང་ཆུབ་སེམས་ནི་རྣམ་བསྒོམས་པ། །སློབ་དཔོན་ཞབས་ཀྱི་པདྨོ་ལ། །དབང་བསྐུར་ཕྱིར་ནི་གསོལ་བ་འཚལ། །སློབ་དཔོན་རབ་ཏུ་རྨད་བྱུང་བ། །རྒྱལ་བ་རྣམས་ཀྱི་དབང་བསྐུར་ཉིད། །སངས་རྒྱས་བྱང་ [198b.2]ཆུབ་ཐོབ་བྱེད་པ། །སྐལ་བ་ཆེན་པོས་བདག་ལ་སྩོལ། །གང་གིས་སེམས་ཅན་ཐམས་ཅད་ཀྱི། །རྙོག་མེད་དོན་ནི་བདག་བགྱིད་ཅིང་། །བརྟུལ་ཞུགས་བཟང་ཁྱོད་དྲིན་གྱིས་ནི། །སངས་རྒྱས་ཀུན་དོན་མཛད་པའང་བགྱིད། །སློབ་དཔོན་ཕན་པར་འདོད་པ་ཡིས། །དབང་བསྐུར་ [198b.3]བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་བྱས་པ། །སངས་རྒྱས་ཀུན་གྱིས་སྦྱིན་པར་བྱ། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་ཕྱག་བྱས་ཤིང་། །ཁམས་གསུམ་ཡེ་ཤེས་ལས་བྱུང་བ། །སངས་རྒྱས་ཀུན་གྱི་ང་ཡིས་སྦྱིན། །སངས་རྒྱས་ཀུན་གྱིས་ནམ་མཁའི་ [198b.4]ཁམས། །ཡོངས་སུ་གང་བར་རྣམ་པར་བསྒོམ། །ཕྱི་རོལ་དྲི་སོགས་དམ་ཚིག་གི །སྤྲིན་ལྟར་བརྟུལ་ཞུགས་ཅན་གྱིས་བསྒོམ། །ཡང་ན་རྡོ་རྗེ་དབྱིངས་ཀྱི་ནི། །ཏིང་ངེ་འཛིན་གྱིས་རྡོ་རྗེ་བསྒོམ། །དམ་ཚིག་མཆོག་གི་བུམ་པ་ཡང་། །འཛིན་པར་མཁས་པས་བསྒོམ་པར་བྱ། །རྡོ་ [198b.5]རྗེ་སློབ་དཔོན་བཀའ་དྲིན་གྱིས། །དེ་ཚེ་དེ་ལ་དབང་བསྐུར་བ། །རྫོགས་སངས་རྡོ་རྗེ་ལྷ་མོ་རྣམས། །རང་ཉིད་གསོལ་བར་མཛད་པར་འགྱུར། །དེ་ནས་རྣམ་པར་རྒྱལ་བའི་བུམ་པ་རྡོ་རྗེ་ཁུ་ཚུར་གྱིས་བཟུང་ནས་དབང་བསྐུར་བར་བྱ་སྟེ། ཨོཾ་ཛཿཧཱུཾ་བཾ་ཧོཿམ་ཧཱ་སུ་ཁ་བཛྲ་སཏྭ་ཨ་བྷི་ཥེ་ཀ་སྟྭཾ། [198b.6]ཨ་བྷི་ཥིཉྩ་མི། སརྦ་བཛྲ་ཨ་དྷི་པ་ཏི་སྟྭཾ། དྲྀ་ཌྷོ་མེ་བྷ་པ་སིདྡྷྱ་ན་མཿཏེ་བྷ་ག་ཝཱན་མ་ཧཱ་བཛྲ་ཧ་ར་སུ་ར་ཏ་སྟྭཾ། མ་ཧཱ་བཛྲ་སྭཱ་ཧཱ། ཨོཾ་བྷུར་བྷུ་བ་སྭཿཞེས་བྱ་བ་འདིས་ལག་པ་གཉིས་སུ་རྡོ་རྗེ་བྱིན་ལ་ཕྱི་ནང་གསང་བའི་མཆོད་པ་རྣམས་ཀྱིས་ཡང་དག་པར་མཆོད་དེ་སྔགས་བརྗོད་པར་བྱའོ། །མེ་ [198b.7]ཏོག་མའི་གཟུགས་ཅན་གྱིས་མེ་ཏོག་གིས་གཏོར་ལ། དེང་ཚུན་ཆད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཅེས་པས་མཆོད་ན་ཁྱོད་མཆོད་པའི་ཡན་ལག་བརྩམས་ཀྱིས། སྐྱེས་བུ་ཆེན་པོའི་མཚན་དང་དཔེ་བྱད་རྣམས་ཀྱིས་བརྒྱན་པ་བྱས་པའི་སྐུར་མཐོང་བར་ [199a] [199a.1]འགྱུར་རོ་ཞེས་བརྗོད་དོ། །དེ་ནས་བདུག་པ་མའི་གཟུགས་ཀྱིས་བདུག་པས་བདུགས་ལ་འདི་སྐད་ཅེས་བརྗོད་དོ། །གང་གིས་སེམས་ཅན་ཐམས་ཅད་ཚིམ་པར་གྱུར་པའི་དེ་བཞིན་གཤེགས་པ་ཐམས་ཅད་ཁྱེད་ལ་འཇུག་པར་མཛད་པར་འགྱུར་རོ། །དེ་ནས་མར་མེ་ [199a.2]མའི་གཟུགས་སུ་མར་མེ་ཉེ་བར་བསྟན་ལ་འདི་སྐད་ཅེས་བརྗོད་པར་བྱ་སྟེ། དེང་ནས་བརྩམས་ཏེ་རྡོ་རྗེ་ཆོས་དང་འདྲ་བར་དེ་བཞིན་གཤེགས་པ་ཐམས་ཅད་ཀྱི་སྤྱན་ཡང་དག་པར་འབར་བས། མ་རིག་པས་ཁེབས་པའི་སེམས་ཅན་རྣམས་ལ་ཡེ་ཤེས་ཀྱི་སྣང་བས་སྣང་བར་བྱེད་པར་འགྱུར་ [199a.3]རོ། །དེ་ནས་བྱུག་པ་མའི་གཟུགས་ཅན་གྱིས་བྱུག་པས་བྱུགས་ལ་འདི་སྐད་ཅེས་བརྗོད་པར་བྱ་སྟེ། དེང་ཚུན་ཆད་ཁྱོད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། འཇིག་རྟེན་ཐམས་ཅད་དུ་ཡང་ཚུལ་ཁྲིམས་དང་། ཏིང་ངེ་འཛིན་དང་ཤེས་རབ་ལ་སོགས་པའི་དྲིའི་རྒྱུན་ [199a.4]སྟེར་བར་འགྱུར་རོ། །དེ་ནས་ལྷ་མོ་སྒེག་མོའི་གཟུགས་ཅན་གྱིས་མེ་ཏོག་ཅིག་སྒེག་པ་དང་བཅས་པས་འཕངས་ལ་འདི་སྐད་ཅེས་བརྗོད་དོ། དེང་ནས་བརྩམས་ཏེ་དེ་བཞིན་གཤེགས་པ་བྱང་ཆུབ་སེམས་དཔའ་དང་བཅས་པ་ཐམས་ཅད་འདོད་པས་མཆོད་ཅིང་། དེ་བཞིན་གཤེགས་པ་ [199a.5]ཐམས་ཅད་ཀྱི་བླ་ན་མེད་པའི་དགའ་བ་དང་མགུ་བ་དང་རངས་པའི་རོལ་པས་སྔགས་ཀྱི་སྤྱོད་པའི་རྗེས་སུ་འགྲོ་བས་རོལ་བར་གྱིས་ཤིག །དེ་ནས་ལྷ་མོ་ཕྲེང་བ་མའི་གཟུགས་ཅན་གྱིས་ཕྲེང་བ་བཅིངས་ལ་འདི་སྐད་ཅེས་བརྗོད་པར་བྱ་སྟེ། དེ་བཞིན་གཤེགས་པ་བྱང་ཆུབ་སེམས་དཔའ་དང་ [199a.6]བཅས་པ་འདི་དག་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་ཕྲེང་བས་རྒྱུན་དུ་མཆོད་པ་ལ་སྐྱོ་བ་མེད་པར་གྱིས་ཤིག་འདི་ལྟ་སྟེ། དེ་བཞིན་གཤེགས་པ་ཐམས་ཅད་ཀྱི་ཕྲེང་བ་འདི་ནི། དེ་བཞིན་གཤེགས་པ་ཐམས་ཅད་ཀྱི་ཕྲེང་བརྒྱན་རྣམས་ཀྱི་མཆོག་ནི་འདི་ཡིན་ནོ། །དེ་ནས་ལྷ་མོ་གླུ་ [199a.7]མའི་གཟུགས་ཅན་དང་། ཨོཾ་བཛྲ་སཏྭ་སུ་སཾ་གྲ་ཧཏ་ཅེས་བྱ་བ་ལ་སོགས་པ་དང་། གླུ་བླངས་ལ་འདི་སྐད་བརྗོད་པར་བྱ་སྟེ། དེང་ནས་བརྩམས་ཏེ་ཆོས་ཐམས་ཅད་སྒྲོགས་ཤིང་། རིང་པོར་མི་ཐོགས་པར་སེམས་ཅན་ཐམས་ཅད་ལ་དེ་བཞིན་གཤེགས་པ་ཐམས་ཅད་ཡང་དག་པར་ [199b] [199b.1]སྡུད་པ་ཉམས་སུ་མྱོང་བར་འགྱུར་རོ། །དེ་ནས་ལྷ་མོ་གར་མཁན་མའི་གཟུགས་ཀྱི་གར་གྱི་ལག་པས་སད་པར་བྱས་ལ་འདི་སྐད་ཅེས་བརྗོད་དེ། དེ་བཞིན་གཤེགས་པ་ཐམས་ཅད་ཀྱི་གར་ལ་རབ་ཏུ་འཇུག་ཅིང་དེ་བཞིན་གཤེགས་པ་ཐམས་ཅད་གར་གྱི་རྗེས་སུ་དགྱེས་པར་གྱིས་ཤིག་ [199b.2]དེ་ནས་རིན་པོ་ཆེའམ་གསེར་གྱི་ཐུར་མ་ཐོགས་ལ་མདུན་དུ་འདུག་སྟེ་འདི་སྐད་ཅེས་བརྗོད་པར་བྱ་སྟེ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །དེ་ནས་མིག་ཏུ་པྲ་བཀོད་ལ་མེ་ལོང་ [199b.3]བླངས་ནས། ཆོས་ཀྱི་མཚན་ཉིད་བསྟན་པར་བྱ་སྟེ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་དྲི་མ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །ངོ་བོ་ཉིད་མེད་གནས་མེད་པར། །དེ་ལྟར་ཆོས་རྣམས་ཤེས་ནས་སུ། །སེམས་ཅན་ [199b.4]དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །དེ་ནས་ཧོཿ་ཞེས་བྱ་བས་གཞུ་བྱིན་ལ། །དེ་བཞིན་གཤེགས་པ་ཐམས་ཅད་མཉེས་པར་གྱིས་ཤིག་ཅེས་བརྗོད་དོ། །ཕྱོགས་བཞིར་མདའ་བཞི་འཕན་དུ་གཞུག་ཅིང་། སྟེང་དང་འོག་ཏུ་ཡང་རེ་རེ་འཕེན་དུ་གཞུག་གོ། །དེ་ནས་ [199b.5]ཤ་དྷ་བན་ཛྫ་ཀ་བྱིན་ལ་འདིས་དངོས་གྲུབ་ཐམས་ཅད་དང་ཉེ་བར་སྤྱོད་པ་ཐམས་ཅད་སྤྲུལ་ལ་ཉེ་བར་ལོངས་སྤྱོད་ཅིང་། གཞན་དག་ལ་ཡང་བྱིན་ཅིག །དེ་ནས་རྒྱལ་མཚན་བྱིན་ལ་འདིས་ནི་དགྲ་ཐམས་ཅད་དང་འཐབ་པ་ལས་ཉེ་བར་རྒྱལ་བ་འཐོབ་པར་འགྱུར་རོ་ཞེས་བརྗོད་དོ། །དེ་ནས་ [199b.6]རྡོ་རྗེ་སྙེམས་མའི་ཕྱག་རྒྱ་བྱིན་ལ། འདིས་མ་རུངས་པ་ཐམས་ཅད་སྒྲུབས་ཤིག་ཅེས་བརྗོད་དོ། །གཞན་ཡང་ཨ་བཛྲ་སཏྭ་ཞེས་བྱ་བས་མེ་ལོང་བླངས་ལ་འདི་སྐད་ཅེས་བརྗོད་དོ། །རྡོ་རྗེ་སེམས་དཔའི་རང་བཞིན་ཉིད། །དག་ཅིང་གསལ་ལ་དྲི་མ་མེད། །བུ་ཁྱོད་ཀྱི་ནི་སྙིང་ལ་གནས། ། [199b.7]སངས་རྒྱས་ཀུན་བདག་རང་ཉིད་ཡིན། །ཞེས་བྱ་བ་དང་། འདི་སྐད་ཅེས་ཀྱང་བསྒོ་སྟེ། གང་དེ་བཞིན་གཤེགས་པ་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་རྡོ་རྗེ་ནི་འདི་ཉིད་ཡིན་པར་རྟོགས་ཤིང་། དེ་ནས་ཆོས་ཀྱི་འཁོར་ལོ་རྐང་པ་གཉིས་ཀྱི་དབུས་སུ་བཞག་ཅིང་། དུང་ཡང་ [200a] [200a.1]ལག་པ་གཡས་པར་བྱིན་ཏེ། ཆོས་ཀྱི་འཁོར་ལོ་དང་སྨྲ་བ་གཉིས་ཀྱི་ཆོས་ཀྱི་ཡི་གེ་དང་ལྷན་ཅིག་བྱིན་ལ་འདི་སྐད་ཅེས་བརྗོད་དེ། དེང་ནས་བརྩམས་ཏེ་སེམས་བསྐྱེད་པ་ཙམ་གྱིས་ཆོས་ཀྱི་འཁོར་ལོ་བསྐོར་ཅིག །དེ་རིང་ཕན་ཆད་འཇིག་རྟེན་ལ། །སྐྱོབ་པ་རྣམས་ཀྱི་ [200a.2]འཁོར་ལོ་བསྐོར། །ཆོས་ཀྱི་དུང་ནི་བླ་མེད་པས། །ཀུན་དུ་མ་ལུས་གང་བར་གྱིས། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་ཚུལ་གྱིས་སུ། །གསང་སྔགས་སྤྱོད་པ་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ན་སངས་རྒྱས་ལ། །ཕན་ [200a.3]འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཀྱང་། །ཀུན་དུ་ཁྱོད་ལ་སྲུང་བར་བྱེད། །རང་གི་མཚན་བརྒྱ་རྩ་བརྒྱད་པས་བསྟོད་ལ། དམ་ཚིག་གི་ཕྱག་རྒྱ་བསྟན་ནས། འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ནི་སྡིག་མེད་དེ། །དེ་བས་འདོད་ལ་ཆགས་བྲལ་བ་ [200a.4]ཁྱོད་ཀྱིས་ཀྱང་ནི་མ་བྱེད་ཅིག །གསང་བ་བསྒྲགས་ནས་ཐལ་མོ་དང་བཅས་པས་དང་པོར་འདི་སྐད་བརྗོད་དོ། །རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་མགོན་པོ་རབ་སྒྲུབ་མཛད། །རྡོ་རྗེ་དབང་བསྐུར་རྡོ་རྗེ་འོད། །རྡོ་རྗེ་དཔལ་ཁྱོད་ཕྱག་འཚལ་ལོ། །རྡོ་རྗེ་བཞད་པ་ཆོས་ཆེན་པོ། ། [200a.5]དཔལ་ཀུན་གྱི་ནི་རྒྱལ་པོ་མཆོག །སྤྲོས་མེད་ཁྱོད་ལ་ཕྱག་འཚལ་ལོ། །རྡོ་རྗེ་ལས་དང་རྡུང་བ་ཆེ། །གནོད་སྦྱིན་གཏུམ་པོ་གདོན་ཆེན་པོ། །རྡོ་རྗེ་ཁུ་ཚུར་ཕྱག་རྒྱ་ཆེ། །སངས་རྒྱས་ཀུན་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱང་ཆུབ་ཆེ། །སངས་རྒྱས་ཐམས་ཅད་ [200a.6]དེ་བཞིན་གཤེགས། །རྡོ་རྗེ་ཡེ་ཤེས་ཡེ་ཤེས་ཆེ། །ཐེག་ཆེན་ཁྱོད་ལ་ཕྱག་འཚལ་ལོ། །དོན་ཀུན་གྱི་ནི་དེ་ཉིད་དོན། །སེམས་ཅན་དོན་ཆེན་ཀུན་རིག་པ། །ཀུན་མཁྱེན་ཀུན་བྱས་ཐམས་ཅད་དེ། །ཀུན་གཟིགས་ཁྱོད་ལ་ཕྱག་འཚལ་ལོ། །རྡོ་རྗེ་བདག་རབ་རྡོ་རྗེ་མཆོག །རྡོ་རྗེ་ [200a.7]བརྩོན་རབ་རྡོ་རྗེ་འཆང་། །དམ་ཚིག་ཆེན་པོའི་དེ་ཉིད་དོན། །སེམས་ཅན་ཁྱོད་ལ་ཕྱག་འཚལ་ལོ། །རྡོ་རྗེ་ལྕགས་ཀྱུ་འདོད་པ་ཆེ། །རབ་ཏུ་དགའ་བ་འོད་ཆེན་པོ། །རྡོ་རྗེ་འོད་དང་འོད་ཆེན་པོ། །སངས་རྒྱས་འོད་ལ་ཕྱག་འཚལ་ལོ། །རྡོ་རྗེ་རྒྱལ་མཆོག་རྡོ་རྗེ་དགུ། །རིག་མཆོག་ [200b] [200b.1]མཆོག་དང་མི་ཡི་མཆོག །རྡོ་རྗེ་དམ་པ་མཆོག་ཆེན་པོ། །རིག་མཆོག་ཁྱོད་ལ་ཕྱག་འཚལ་ལོ། །རྡོ་རྗེ་དབྱིངས་དང་གསལ་བ་ཆེ། །རྡོ་རྗེ་གསང་བ་རང་གསང་འཆང་། །རྡོ་རྗེ་ཕྲེང་བ་བསམ་གཏན་ཆེ། །རྡོ་རྗེ་དགོས་ལ་ཕྱག་འཚལ་ལོ། །སངས་རྒྱས་མཆོག་ [200b.2]གསང་རྡོ་རྗེ་མཆོག །སངས་རྒྱས་བྱང་ཆུབ་མཁས་པ་ཆེ། །སངས་རྒྱས་ཡེ་ཤེས་སངས་རྒྱས་ཆེ། །སངས་རྒྱས་སངས་རྒྱས་ཁྱོད་ཕྱག་འཚལ། །སངས་རྒྱས་མཆོད་པ་མཆོད་པ་ཆེ། །སེམས་དཔའ་མཆོད་པ་རབ་མཆོག་པ། །ཐབས་ཆེན་དང་ནི་དངོས་གྲུབ་ཆེ། །རྡོ་རྗེ་གྲུབ་ཁྱོད་ཕྱག་ [200b.3]འཚལ་ལོ། །ཏ་ཐཱ་ག་ཏའི་གླུ་ཆེན་པོ། །ཏ་ཐཱ་ག་ཏའི་གསུང་དབྱངས་ཏེ། །ཏ་ཐཱ་ག་ཏ་སེམས་ཆེན་པོ། །རྡོ་རྗེ་རྡོ་རྗེ་ཕྱག་འཚལ་ཁྱོད། །སངས་རྒྱས་གཙོ་བོ་རྒྱལ་བཀའ་ཉན། །སངས་རྒྱས་བཤེས་གཉེན་རྒྱལ་མཆོག་སྐྱེས། །རྣམ་པར་སྣང་མཛད་ཆེ་དང་ཁྱབ། ། [200b.4]ཞི་ཁྲོ་སྟོན་ལ་ཕྱག་འཚལ་ལོ། །ཏ་ཐཱ་ག་ཏ་དེ་ཉིད་ཆེ། །ཡང་དག་མཐའ་དང་ཆེ་བའི་ཚུལ། །ཕ་རོལ་ཕྱིན་པའི་ཀུན་མཁྱེན་པ། །དོན་དམ་ཁྱོད་ལ་ཕྱག་འཚལ་ལོ། །ཀུན་དུ་བཟང་དང་སྤྱོད་པ་མཆོག། །བདུད་དང་བདུད་ནི་རབ་འདུལ་བ། །ཀུན་གྱི་མཆོག་དང་མཉམ་ཉིད་ [200b.5]མཁྱེན། །ཀུན་དུ་འགྲོ་ཁྱོད་ཕྱག་འཚལ་ལོ། །སངས་རྒྱས་ཧཱུཾ་སྟེ་ཧཱུཾ་ཞེས་པ། །རྡོ་རྗེ་ཧཱུཾ་ཞེས་འདུལ་བའོ། །ཕྱག་ན་རྡོ་རྗེ་ཁྱོད་ཕྱག་འཚལ། །ཕྱག་རྒྱ་བརྗོད་ཅིང་བརྗོད་པ་དང་། །རིམ་གྲོར་ཏ་ཐཱ་ག་ཏས་ཁྱབ། །གང་ཕྱིར་རྡོ་རྗེ་སེམས་བསྟན་པ། །རྡོ་རྗེ་སེམས་དཔའ་ཞེས་བྱ་ཁྱོད། [200b.6]རྫོགས་པའི་བྱང་ཆུབ་ཁྱོད་རག་ལུས། །ཀུན་གཟིགས་ཡབ་ནི་ཁྱོད་ཡིན་ཏེ། །འབྱུང་པོ་དང་ནི་འབྱུང་འགྱུར་བའི། །ཏ་ཐཱ་ག་ཏ་ཁྱོད་ཀྱིས་བསྒྲུབས། །བསྟོད་པའི་རྒྱལ་པོ་འདི་ཡིས་ནི། །གླུ་བླངས་གང་ཞིག་སྟོད་བྱེད་ཅིང་། །དེ་ནི་རྡོ་རྗེ་འཛིན་འདྲར་འགྱུར། །མགོན་པོ་ཁྱོད་ལ་གསོལ་ [200b.7]བ་ནི། །སེམས་ཅན་དོན་ཀུན་མཛད་པའི་ཕྱིར། །རང་གི་རིགས་ནི་སྐྱེད་པར་མཛོད། །མཚན་བརྒྱ་རྩ་བརྒྱད་འདི་དག་གིས། །མགོན་པོ་ཁྱོད་ལ་བསྟོད་བགྱིས་པས། །ཐེག་པ་ཆེན་པོ་རྟོགས་པ་ཡིས། །ཚུལ་ཆེན་ཡང་ནི་རྒྱས་པར་མཛོད། །དེ་ནས། འཇིག་རྟེན་ཀུན་ལ་ཕན་ [201a] [201a.1]པའི་ཕྱིར། །འཇིག་རྟེན་ཁམས་ནི་ཐམས་ཅད་དུ། །ཇི་ལྟར་སྣ་ཚོགས་འདུལ་འགྱུར་བའི། །རྡོ་རྗེ་འཁོར་ལོ་བསྐོར་བར་གྱིས། །ཞེས་བརྗོད་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག །རྡོ་རྗེ་རིགས་ཀྱི་བདག་པོའི་རྡོ་རྗེ་འཁོར་ལོ་བསྐོར་ཅིག་ཅེས་བརྗོད་དོ། །དེ་ནས་རྡོ་རྗེ་ [201a.2]རིན་ཆེན་དུ་བསྒོམས་ནས། དེའི་ཕྱག་རྒྱས་བྱིན་གྱིས་བརླབས་ཏེ། དེ་བཞིན་དུ་ཆུས་དབང་བསྐུར་ལ། །རིན་པོ་ཆེའི་འཁོར་ལོས་སྒྱུར་བ་ཉིད་དུ་རྡོ་རྗེ་རིན་པོ་ཆེའི་མྱུ་གུའི་ཅོད་པན་གྱིས་དབང་བསྐུར་བས་དབང་བསྐུར་ཏེ། རིན་པོ་ཆེའི་རྡོ་རྗེ་ཁུ་ཚུར་མཉམ་པར་བཅིངས་ལ་མཐེ་བོ་དང་ [201a.3]མཛུབ་མོ་རྩེ་སྦྱར་བའི་ཕྱག་རྒྱས་རིན་པོ་ཆེ་བྱིན་ལ། དེ་ཁོ་ན་ཉིད་བསྟན་པར་བྱ་སྟེ། ཉི་མ་འདི་ནི་མཆོག་ཡིན་ཏེ། །དེ་བཞིན་གཤེགས་པ་ཐམས་ཅད་མཐོང་། །ནམ་མཁའི་སྙིང་པོ་བཅོམ་ལྡན་འདས། །བསམ་པ་ཐམས་ཅད་རྫོགས་མཛད་པའོ། །ཧྲི་དེ་ནས་བདག་པོ་ཉིད་དུ་དབང་ [201a.4]བསྐུར་ཏེ། དེ་བཞིན་དུ་ཨ་ཀཱ་རོ་མུ་ཁཾ་སརྦ་དྷརྨྨཱ་ཎཱཾ་ཞེས་བྱ་བས་དྲིལ་བུ་བྱིན་ལ་དེ་ཁོ་ན་ཉིད་བསྟན་པར་བྱ་སྟེ། བསམ་པ་ཐམས་ཅད་གྲུབ་པས་ན། །དོན་གྱི་བསམ་གྲུབ་བླ་ན་མེད། །དེ་ཡང་འདོད་པ་རབ་གྲུབ་ཕྱིར། །འདོད་དང་ཐར་བའི་བདེ་ཆེན་པོ། །དྷཱིཿ དེ་ནས་མིང་གི་དབང་བསྐུར་ [201a.5]བ་བྱིན་ལ། དེ་བཞིན་དུ་བཞག་ནས་དམ་ཚིག་བསྟན་པར་བྱ་སྟེ། འདོད་དང་བདེ་བ་ཐམས་ཅད་དང་། །མི་མཐུན་པ་ཡང་སྦྱིན་བྱ་ཞིང་། །བདག་ཉིད་དང་ནི་ཕ་རོལ་གྱི། །བསམ་པ་ཐམས་ཅད་རྫོགས་པར་གྱིས། །ཤཱི། དེ་ནས་དེ་བཞིན་དུ། ཨོཾ་ཛཿཧཱུཾ་བཾ་ཧོཿམ་ཧཱ་སུ་ཁ་ [201a.6]བཛྲ་རཏྣ་ཨ་བྷི་ཥེ་ཀ་སྟྭཾ། ཨ་བྷེ་ཥི་ཉྩཱ་མི། སརྦ་རཏྣ་ཨ་དྷི་པ་ཏི་སྟྭཾ་དྲྀ་ཌྷོ་མེ་བྷ་བ། །སིདྡྷ་ན་མ་ཏེ། བྷ་ག་ཝཱན། མ་ཧཱ་རཏྣ་ས་མ་ཡ་སྟྭཾ། ཨ་ཧཾ་བཛྲ་རཏྣ། ཨོཾ་བྷུར་བྷུ་བ་སྭཿཞེས་བྱ་བ་འདིས་ལག་པ་གཉིས་ཀྱིས་རིན་པོ་ཆེ་བྱིན་ལ། དེ་བཞིན་དུ་ཡང་དག་པར་མཆོད་དེ། རང་གི་ [201a.7]མཚན་བརྒྱ་རྩ་བརྒྱད་པས་བསྟོད་ལ། དམ་ཚིག་གི་ཕྱག་རྒྱ་ཡང་ཉེ་བར་བསྟན་ནས། སེམས་ཅན་ཀུན་ལ་ཕན་ཕྱིར་དང་། །སངས་རྒྱས་དོན་ལ་སྦྱོར་བ་ཡིས། །ཕ་རོལ་ནོར་རྣམས་ཕྲོགས་ཀྱང་ནི། །སྡིག་གིས་གོས་པར་མི་འགྱུར་ཞེས། །གསང་བ་བརྗོད་ནས་དེ་ [201b] [201b.1]བཞིན་དུ། །རིན་ཆེན་ཁྱོད་ལ་གསོལ་བ་ནི། །ནོར་གྱི་ཚོགས་ནི་བཤད་དུ་གསོལ། །སངས་རྒྱས་ཀུན་གྱི་དབང་གི་མཆོག །མདོར་ན་འཇིག་རྟེན་ཐམས་ཅད་དུ། སེམས་ཅན་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པའི། །ནོར་བུའི་འཁོར་ལོ་རབ་ཏུ་བསྐོར། ། [201b.2]ཞེས་བརྗོད་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག །རིན་པོ་ཆེའི་རིགས་ཀྱི་བདག་པོ་རིན་པོ་ཆེའི་འཁོར་ལོ་བསྐོར་ཅིག་ཅེས་བརྗོད་དོ། །དེ་ནས་རྡོ་རྗེ་ཆོས་སུ་རྣམ་པར་བསམས་ལ། དེའི་ཕྱག་རྒྱས་བྱིན་གྱིས་བརླབས་ནས། དེ་བཞིན་དུ་ཆུས་དབང་བསྐུར་ལ་དམ་པའི་ [201b.3]ཆོས་ཀྱི་འཁོར་ལོ་བསྐོར་བ་དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱི་སྐུའི་དར་དཔྱངས་ཅོད་པན་གྱི་དབང་གིས་དབང་བསྐུར་ཏེ་པདྨ་བྱིན་ལ་དེ་ཁོ་ན་ཉིད་བསྟན་པར་བྱ་སྟེ། དེ་ཉིད་སངས་རྒྱས་བཅོམ་ལྡན་འདས། །སྤྱན་རས་གཟིགས་ཀྱི་དབང་ཕྱུག་སྟེ། །གདུལ་བའི་ [201b.4]ཐབས་ཀྱི་མཛད་པ་ནི། །དགའ་བའི་རོལ་མོར་རབ་ཏུ་འཇུག །ཧྲིཿདེ་ནས་བདག་པོའི་དབང་བསྐུར་བ། །ཨ་ཀཱ་རོ་མུ་ཁཾ་སརྦ་དྷརྨྨཱ་ཎཱཾ་ཨཱདྱ་ནུ་ཏྤནྣ་ཏྭཱཏ། ཅེས་བྱ་བས་དྲིལ་བུ་བྱིན་ནས་ཆོས་ཀྱི་མཚན་ཉིད་བསྟན་པར་བྱ་སྟེ། ཇི་ལྟར་པདྨ་དམར་པོ་ནི། །ཚོན་གྱི་ཉེས་པས་མི་གོས་ལྟར། ། [201b.5]དེ་བཞིན་གནས་པའི་ཉེས་པ་ཡིས། །འགྲོ་ཕན་རྣམས་ལ་མི་གོས་སོ། །དྷཱིཿདེ་ནས་མིང་གི་དབང་གིས་དབང་བསྐུར་བ་བྱིན་ལ། དེ་བཞིན་གཞན་ནས་དམ་ཚིག་བསྟན་པར་བྱ་སྟེ། ཆོ་ག་དག་ནི་གང་དག་གིས། །འགྲོ་བ་རྣམས་ནི་འདུལ་འགྱུར་བ། །པདྨ་དག་པར་སྦྱོར་བའི་ [201b.6]བདག །དེ་དང་དེས་ནི་སྦྱར་བར་བྱ། །ཤྲཱི་དེ་ནས་དེ་བཞིན་དུ་ཨོཾ་ཛཿཧཱུཾ་བཾ་ཧོཿམ་ཧཱ་སུ་ཁཾ་པདྨ་མ་ཧཱ་ཨ་བྷི་ཥེ་ཀ་སྟྭཾ། ཨ་བྷི་ཥི་ཉྩཱ་མི། སརྦ་པདྨ་ཨ་བྷི་ཥིཉྩ་ཡ་ར་ཧ་མེ་བྷ་བ། སིདྡྷ་ན་མ་ཏེ་བྷ་ག་ཝཱན་མ་ཧཱ་པདྨ་སུ་ར་ཏ་སྟྭཾ། ཨ་ཧཾ་བཛྲ་པདྨ་ཨོཾ་བྷུར་བྷུ་བ་སྭཿཞེས་བྱ་བས་ལག་པ་གཉིས་ [201b.7]ཀྱིས་པདྨ་བྱིན་ལ། དེ་བཞིན་དུ་ཡང་དག་པར་མཆོད་དེ། མཚན་བརྒྱ་རྩ་བརྒྱད་ཀྱིས་བསྟོད་ནས། དམ་ཚིག་གི་ཕྱག་རྒྱ་ཉེ་བར་བསྟན་ལ། །འདོད་ཆགས་འདྲ་བའི་བདེ་བ་མེད། །རྒྱལ་བ་རྣམས་ལ་དེ་ཕུལ་ལ། །སེམས་ཅན་དོན་ཕྱིར་གཞན་ཆུང་མ། །བསྟེན་ན་བསོད་ [202a] [202a.1]ནམས་ཐོབ་པར་འགྱུར། །ཞེས་གསང་བ་བརྗོད་ལ། དེ་ནས་འདི་སྐད་ཅེས་བརྗོད་དོ། །དཔའ་བོ་ཁྱོད་ལ་གསོལ་བ་ནི། །རང་གི་རིགས་རྣམས་བསྐྱེད་ནས་ཀྱང་། །ཆོས་ཀྱི་འཁོར་ལོ་དམ་པ་ནི། །ཐུབ་པ་ཆེན་པོས་བཤད་དུ་གསོལ། །དེ་ནས། མདོར་ན་འཇིག་ [202a.2]རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པའི། །པདྨའི་འཁོར་ལོ་རབ་ཏུ་བསྐོར། །ཞེས་བརྗོད་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག །པདྨའི་རིགས་ཀྱི་བདག་པོ་ཡི། །ཆོས་ཀྱི་འཁོར་ལོ་བསྐོར་གྱུར་ཅིག །ཅེས་བརྗོད་དོ། །དེ་ [202a.3]ལ་སྣ་ཚོགས་རྡོ་རྗེ་ཅན་དུ་རྣམ་པར་བསམས་ལ། དེའི་ཕྱག་རྒྱས་བྱིན་གྱིས་བརླབས་ལ་དེ་བཞིན་དུ་ཆུས་དབང་བསྐུར་ཏེ། ལས་ཐམས་ཅད་ཀྱི་འཁོར་ལོ་བསྐོར་བ་ཉིད་དུ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཅོད་བན་གྱི་དབང་གིས་དབང་བསྐུར་ནས། སྣ་ཚོགས་རྡོ་རྗེ་བྱིན་ལ་དེ་ཁོ་ན་ [202a.4]ཉིད་བསྟན་པར་བྱ་སྟེ། རྟག་པའི་འདོད་ཆགས་ལས་བྱུང་ཁྲོ། །རྡོ་རྗེ་མེ་ཡི་ཕུང་པོའི་གཟུགས། །འབར་བའི་རྡོ་རྗེ་སྦྱོར་བ་ཆེ། །མཁའ་འགྲོ་རྣམས་ནི་ཀུན་དུ་འབར། །ཧྲཱིཿདེ་ནས་བདག་པོ་ཉིད་དུ་དབང་བསྐུར་ལ། ཨ་ཀཱ་རོ་མུ་ཁཾ་སརྦ་དྷརྨྨཱ་ཎཱཾ། ཞེས་བྱ་བ་ལ་སོགས་པས་དྲིལ་བུ་བྱིན་ནས་ [202a.5]ཆོས་ཀྱི་མཚན་ཉིད་བསྟན་པར་བྱ་སྟེ། ཆོས་རྣམས་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་རྣལ་འབྱོར་པས། །འདི་ཀུན་མྱུར་དུ་འཛིན་པར་འགྱུར། །དྷཱིཿདེ་ནས་མིང་གི་དབང་བསྐུར་བ་བྱིན་ལ། དེ་བཞིན་དུ་བཞག་ནས་དམ་ [202a.6]ཚིག་བསྟན་པར་བྱ་སྟེ། ཐམས་ཅད་ནམ་མཁར་སྦྱོར་བ་ཡིས། །ཐམས་ཅད་ནམ་མཁའ་ཞེས་སྨྲ་ཞིང་། །རྡོ་རྗེའི་ཕྱག་རྒྱས་རྒྱས་བཏབ་ལ། །ཁམས་གསུམ་ཡང་ནི་བཟའ་བར་བྱ། །ཤྲཱི་དེ་ནས་དེ་བཞིན་དུ། ཨོཾ་ཛཿཧཱུཾ་བཾ་ཧོཿམ་ཧཱ་སུ་ཁ་བཛྲ་ཀརྨྨ་ཨ་བྷི་ཥེ་ཀ་ཏ་སྟྭཾ། ཨ་བྷི་ [202a.7]ཥིཉྩཱ་མི། སརྦ་བཛྲ་ཀརྨྨ་ཨ་དྷི་པ་ཏི་སྟྭཾ། དྲྀ་ཌྷོ་མེ་བྷ་བ། སིདྡྷ་ན་མ་ཏེ་བྷ་ག་ཝཱན་མ་ཧཱ་བཛྲ་བིཤྭ། སུ་ར་ཏ་སྟྭཾ། ཨ་ཧཾ། བཛྲ་ཀརྨྨ་ཨོཾ་བྷུར་བྷུ་བ་སྭཿཞེས་བྱ་བ་འདིས་ལག་པ་གཉིས་ཀྱིས་ལས་ཀྱི་རྡོ་རྗེ་བྱིན་ལ་དེ་བཞིན་དུ་མཆོད་ནས་རང་གི་མིང་བརྒྱ་རྩ་བརྒྱད་པས་བསྟོད་དེ། དམ་ཚིག་གི་ [202b] [202b.1]ཕྱག་རྒྱ་ཉེ་བར་བསྟན་ལ། སེམས་ཅན་ཀུན་ལ་ཕན་པའི་ཕྱིར། །སངས་རྒྱས་བསྟན་པའི་དོན་དུ་ནི། །སེམས་ཅན་ཐམས་ཅད་བསད་ན་ཡང་། །དེ་ཡི་སྡིག་པས་གོས་མི་འགྱུར། །ཞེས་གསང་བ་བརྗོད་ལ་དེ་ནས་འདི་སྐད་ཅེས་བརྗོད་པར་བྱའོ། །མགོན་པོ་ཁྱོད་ལ་གསོལ་ [202b.2]བ་ནི། །སངས་རྒྱས་ཀུན་ལ་དབང་བྱེད་ཅིང་། །སེམས་ཅན་ཀུན་དོན་བྱ་བའི་ཕྱིར། །རང་གི་རིགས་ནི་སྐྱེད་པར་མཛོད། །དེ་ནས། མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པའི། །ལས་ཀྱི་འཁོར་ལོ་རབ་ཏུ་བསྐོར། ། [202b.3]ཞེས་བརྗོད་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག །ལས་ཀྱི་རིགས་ཀྱི་བདག་པོའི་ཆོས་ཀྱི་འཁོར་ལོ་བསྐོར་ཅིག་ཅེས་བརྗོད་དོ། །དེ་ནས་རྡོ་རྗེ་སེམས་དཔའི་རྣལ་འབྱོར་པས། སློབ་མ་རྣམ་པར་སྣང་མཛད་དུ་རྣམ་པར་བསམས་ལ། དེའི་ཕྱག་རྒྱས་བྱིན་གྱིས་བརླབས་ནས་དེ་བཞིན་དུ་ཆུས་དབང་བསྐུར་ [202b.4]བས་དབང་བསྐུར་ལ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བ་ཉིད་དུ་དེ་བཞིན་གཤེགས་པ་ཐམས་ཅད་ཀྱི་ཅོད་པན་དང་དར་དཔྱངས་ཀྱི་དབང་བསྐུར་བས་དབང་བསྐུར་ལ། དེ་བཞིན་གཤེགས་པའི་རྡོ་རྗེ་བྱིན་ནས་དེ་ཁོ་ན་ཉིད་བསྟན་པར་བྱ་སྟེ། དེ་ཉིད་དུ་ [202b.5]ནི་བཅོམ་ལྡན་འདས། །དེ་བཞིན་གཤེགས་དང་བྱང་ཆུབ་སེམས། །ལྟ་ངན་རྣམས་ལ་ཕན་པའི་ཕྱིར། །མྱ་ངན་འདས་འདི་སྟོན་པར་འགྱུར། །སྣ་ཚོགས་འདུལ་བར་སྟོན་པ་ནི། །བརྟན་ཞིང་ངེས་པའི་ཆོས་ཉིད་ཅན། །སྲིད་པ་ཤིན་ཏུ་གནས་མཆོག་པའི། །ཆོ་ག་ལ་སོགས་ [202b.6]ངེས་པར་དགོས། །སངས་རྒྱས་ཆོས་དང་ཚོགས་ལ་སོགས། །དཀོན་མཆོག་གསུམ་པོ་ཉིད་དུ་རྟོགས། །སྲིད་པ་ཤིན་ཏུ་ལེགས་པར་གྲུབ། །སྣ་ཚོགས་མཁྱེན་པ་དཔའ་བྱེད་མཆོག །དྷཱིཿདེ་ནས་བདག་པོ་ཉིད་དུ་དབང་བསྐུར་ལ། ཨ་ཀཱ་རོ་མུ་ཁཾ་ཞེས་བྱ་བ་ལ་སོགས་ [202b.7]པས་དྲིལ་བུ་བྱིན་ཏེ། ཆོས་ཀྱི་མཚན་ཉིད་བསྟན་པར་བྱའོ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་རྣལ་འབྱོར་པས། །ཀུན་མཆོག་མཉམ་པ་ཉིད་དུ་གསལ། །དྷཱིཿདེ་ནས་མིང་གི་དབང་བསྐུར་བས་ [203a] [203a.1]བསྐུར་བ་བྱས་ལ། དེ་བཞིན་དུ་གཞན་ནས་དམ་ཚིག་བསྟན་པར་བྱ་སྟེ། འདོད་པའི་ལོངས་སྤྱོད་ཐམས་ཅད་ལ། །ཅི་འདོད་པར་ནི་བསྟན་བཞིན་དུ། །དཀོན་མཆོག་གསུམ་མཆོག་མཆོད་པ་ནི། །བགྱིའོ་ཞེས་ནི་རབ་ཏུ་བསམ། །ཤྲཱི་དེ་ནས་དེ་བཞིན་དུ། [203a.2]ཨོཾ་ཛཿཧཱུཾ་བཾ་ཧོཿ་མ་ཧཱ་སུ་ཁཾ་བཛྲ་དྷཱ་ཏུ་ཨ་བྷི་ཥེ་ཀ་ཏ་སྟྭཾ། ཨ་བྷི་ཥིཉྩཱ་མི། སརྦ་ཏ་ཐཱ་ག་ཏ་ཨ་དྷི་པ་ཏི་དྲྀ་མེ་བྷ་བ་སིདྡྷ་ན་མ་ཏེ་བྷ་ག་ཝཱན། མ་ཧཱ་བཻ་རོ་ཙ་ན་སུ་ར་ཏ་སྟྭཾ། ཨ་ཧཾ། བཛྲ་དྷཱ་ཏུ་ཨོཾ་བྷུར་བྷུ་བ་སྭཿཞེས་བྱ་བས་ལག་པ་གཉིས་ཀྱིས་དེ་བཞིན་གཤེགས་པའི་རྡོ་རྗེ་བྱིན་ལ། དེ་བཞིན་ [203a.3]དུ་ཡང་དག་པར་མཆོད་དེ། མཚན་བརྒྱ་རྩ་བརྒྱད་པས་བསྟོད་ནས། དམ་ཚིག་གི་ཕྱག་རྒྱ་ཉེ་བར་བསྟན་ལ། ཇི་ལྟ་ཇི་ལྟར་སེམས་ཅན་རྣམས། །འདུལ་གྱུར་དེ་ལྟ་དེ་ལྟ་བུར། །ཆགས་ལ་སོགས་པས་ཡུན་རིང་དུ། །དེ་བཞིན་འགྲོ་བའི་དོན་རྣམས་ཀྱིས། །ཞེས་གསང་བ་ [203a.4]བརྗོད་ལ། དེ་ནས། མགོན་པོ་ཁྱོད་ལ་གསོལ་བ་ནི། །སེམས་ཅན་ཀུན་ལ་ཕན་པའི་ཕྱིར། །ཐུགས་རྗེ་ཆེན་པོ་བསྐྱེད་ནས་ཀྱང་། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བརྗོད་དོ། །དེ་ནས། མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་ [203a.5]འདུལ་བ་སྣ་ཚོགས་པའི། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བརྗོད་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག །དེ་བཞིན་གཤེགས་པ་ཐམས་ཅད་ཀྱི་བདག་པོའི་ཆོས་ཀྱི་འཁོར་ལོ་བསྐོར་ཅིག་ཅེས་བརྗོད་པར་བྱའོ། །འདི་ནི་རྗེས་སུ་གནང་ཞིང་དབང་བསྐུར་བའི་ཆོ་གའོ།། །། [203a.6]དེ་ནས་སློབ་མ་རྡོ་རྗེ་སེམས་དཔར་བསྒོམས་ལ། དེ་བཞིན་བཞག་སྟེ། གཟེངས་བསྟོད་པས་ནི་དངོས་པོ་ཀུན། །སངས་རྒྱས་ཀུན་གྱི་བདག་ཉིད་དེ། །རྡོ་རྗེ་མིང་དབང་བསྐུར་བས་ཀྱང་། །དེ་བཞིན་གཤེགས་པས་ལུང་བསྟན་ཏོ། །ཨོཾ་ང་ཡིས་འདི་ལྟར་ཁྱོད་ལུང་བསྟན། །རྡོ་རྗེ་སེམས་ [203a.7]དཔའ་དེ་བཞིན་གཤེགས། །དངོས་པོ་མཆོག་ཏུ་འགྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཀྱེ་རྡོ་རྗེ་ཆེ་གེ་མོ་ཞེས་བྱ་བའི་དེ་བཞིན་གཤེགས་པ། །སིདྡྷ་ས་མ་ཡ་སྟྭཾ་བྷུར་བྷུ་བ་སྭཿ། དེ་ལ་གཟེངས་བསྟོད་པ་ནི་འདི་ཡིན་ཏེ། གཡོན་པའི་རྡོ་རྗེ་ཁུ་ཚུར་སྙིང་གར་བཞག ། [203b] [203b.1]ལ། གཡས་པ་མི་འཇིགས་པ་སྦྱིན་པར་བྱ་སྟེ། འདིས་ཕྱག་རྒྱ་ཆེན་པོ་མཆོག་ཏུ་གསང་བའི་ཆོ་ག་ལུང་བསྟན་པར་བྱ་སྟེ། དེ་ལ་དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་པ་ཐམས་ཅད་དང་། བྱང་ཆུབ་སེམས་དཔའི་འཁོར་དང་བཅས་པ་ཐམས་ཅད་རང་གི་དམ་ [203b.2]ཚིག་སློབ་དཔོན་དང་མགྲིན་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་མཛད་དེ། འདི་ལྟ་སྟེ། འདི་ཉིད་ཀྱིས་གཟེངས་བསྟོད་པའི་ཕྱག་རྒྱ་ཆེན་པོས་མཆོག་ཏུ་གསང་བའི་དངོས་གྲུབ་མཆོག་གྲུབ་པའི་བྱིན་རླབས་དང་། གསང་བ་འདིའི་ [203b.3]སྟོབས་ལ་དད་པར་བྱའོ་ཞེས་བརྗོད་པར་བྱའོ། །དེ་ནས་ཇི་ལྟར་ཞུགས་པའི་རྣམས་ལ་དེ་བཞིན་གཤེགས་པ་ཐམས་ཅད་བསྡུ་བ་ལ་སོགས་པའི་དབུགས་དབྱུང་བ་སྦྱིན་པར་བྱ་སྟེ། དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་པ་བྱང་ཆུབ་སེམས་དཔའི་འཁོར་གྱི་དཀྱིལ་ [203b.4]འཁོར་དང་བཅས་པ་ཇི་སྙེད་པ་དེ་དག་ཐམས་ཅད་རང་གི་དམ་ཚིག་ལ་རྗེས་སུ་མཉེས་པར་དྲངས་ཏེ། འདིར་ཞུགས་ནས་དབང་དུ་བྱས་ཏེ། སྒྲུབ་པ་དང་རྗེས་སུ་སྒྲུབ་པས། རྡོ་རྗེ་དབྱིངས་ཐམས་ཅད་ཀྱི་བརྟན་པས་བརྟན་པར་གྱུར་ཅིག །ཆོས་ཀྱི་དབྱིངས་ཐམས་ཅད་དང་མཉམ་པར་བྱུང་ [203b.5]ལ་ནམ་མཁའི་ཁམས་ཐམས་ཅད་ལྟར་ཡངས་པ་ཆེན་པོ་འདིར་གནས་ཤིང་རབ་ཏུ་གནས་ལ། དེ་བཞིན་གཤེགས་པ་ཐམས་ཅད་དང་། རང་གི་དམ་ཚིག་གི་སློབ་དཔོན་ལ་རག་ལུས་ཤིང་། དེ་བཞིན་གཤེགས་པ་ཐམས་ཅད་ཀྱི་དབུས་སུ་དམིགས་ལ། དེ་བཞིན་གཤེགས་ [203b.6]ཐམས་ཅད་དང་། རང་གི་སློབ་དཔོན་ཉིད་ཀྱིས་ད་ནི་དེ་བཞིན་གཤེགས་པ་ཐམས་ཅད་དོ་ཞེས་བྱིན་གྱིས་བརླབས་ཏེ་དེ་བཞིན་གཤེགས་པ་ཐམས་ཅད་དང་། རང་གི་དམ་ཚིག་གི་སློབ་དཔོན་དང་མཉམ་པར་མགྲིན་གཅིག་ཏུ་དབུགས་འབྱིན་པར་མཛད་དོ་ཞེས་དད་པར་གྱིས་ [203b.7]ཤིག། མཆོག་ཏུ་གསང་བའི་དཀྱིལ་འཁོར་ལ། །མཐོང་བ་དང་ནི་ཞུགས་པ་ཡིས། །སྲིད་པ་ཀུན་ལས་རྣམ་གྲོལ་བར། །ཁྱོད་ནི་དེང་ཉིད་གནས་པ་ཡིན། །བདེ་ཆེན་ཐེག་པ་འདི་ལས་ནི། །སླར་ཁྱོད་འཆི་བ་ཡོད་མིན་ཏེ། །མི་ཚུགས་པ་དང་མི་སོད་པས། །ཅིས་ཀྱང་མི་ [204a] [204a.1]འཇིགས་དགའ་བར་གྱིས། །དངོས་པོ་མཆོག་ཏུ་གྲུབ་པའི་ཕྱིར། །སྲིད་པའི་སྡུག་བསྔལ་ལས་ཁྱོད་འདས། །སྲིད་པ་ཤིན་ཏུ་གྲུབ་པའི་ཕྱིར། །སྟོན་པའི་མཆོག་ཏུ་འགྱུར་བ་ཡིན། །དམ་ཚིག་སྡོམ་པ་གྲུབ་པ་འདི། །རྟག་ཏུ་ཁྱོད་ཀྱིས་བསྲུང་ [204a.2]བར་བྱ། །སངས་རྒྱས་ཀུན་གྱིས་མཐུན་པར་གསུངས། །དམ་པ་བརྟག་པའི་བཀའ་ཡིན་ནོ། །བྱང་ཆུབ་སེམས་ནི་གཏང་མི་བྱ། །ཕྱག་ན་རྡོ་རྗེ་གང་ཡིན་པའོ། །གང་འདི་སྐྱེས་པ་ཙམ་གྱིས་སུ། །སངས་རྒྱས་ཉིད་དུ་དོགས་པ་མེད། །དམ་པའི་ཆོས་ནི་མི་སྨད་ཅིང་། ། [204a.3]ནམ་ཡང་གཏང་བར་མི་བྱའོ། །མི་ཤེས་པའམ་རྨོངས་པ་ཡིས། །ཚུལ་ཆེན་བསྟན་པར་མི་བྱའོ། །བདག་ཉིད་ཡོངས་སུ་སྤངས་ནས་སུ། །དཀའ་ཐུབ་ཅན་གྱིས་མ་གདུངས་ཤིག །ཅི་བདེ་བར་ནི་བདེ་བར་གཟུང་། །འདི་ནི་མ་བྱོན་རྫོགས་སངས་རྒྱས། །རྡོ་རྗེ་དྲིལ་བུ་ཕྱག་ [204a.4]རྒྱ་རྣམས། །ནམ་ཡང་ཡོངས་སུ་མི་གཏོང་ཞིང་། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་འདྲ། །སངས་རྒྱས་ཀུན་མཚུངས་བླ་མ་ཡི། །སློབ་དཔོན་ལ་ནི་གང་སྨོད་པ། །དེ་ནི་སངས་རྒྱས་སྨད་པས་ན། །རྟག་ཏུ་སྡུག་བསྔལ་ཐོབ་འགྱུར་ཏེ། །རིམས་དང་ [204a.5]དུག་དང་དབྱིག་དུག་ནང་། །མཁའ་འགྲོ་རྣམས་ཀྱིས་གཙོ་བོ་དང་། །གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་དམྱལ་ལྟུང་བར་འགྱུར། །དེ་བས་ནན་ཏན་ཐམས་ཅད་ཀྱིས། །རྡོ་རྗེ་སློབ་དཔོན་བློ་གྲོས་ཆེ། །དགེ་བ་རབ་ཏུ་མི་སྤྱོམས་པ། །ནམ་ཡང་སྨད་ [204a.6]པར་མི་བྱའོ། །བླ་མ་ལ་ནི་གུས་བཅས་ཡོན། །རྗེས་མཐུན་ཁྱོད་ཀྱིས་སྦྱིན་པར་བྱ། །དེས་ནི་རིམས་སོགས་གནོད་པ་རྣམས། །ཕྱིར་ཞིང་དབྱུང་བར་མི་འགྱུར་རོ། །རང་གི་དམ་ཚིག་སློབ་དཔོན་ནི། །སྦྱིན་མིན་བུ་དང་ཆུང་མ་དང་། །རང་སྲོག་གིས་རྟག་བསྟན་བྱ་ན། །ལོངས་སྤྱོད་གཡོ་ [204a.7]བས་སྨོས་ཅི་དགོས། །གང་ཕྱིར་བསྐལ་བ་བྱེ་བ་ནི། །གྲངས་མེད་པར་ནི་རྙེད་དཀའ་བའི། །སངས་རྒྱས་ཉིད་ཀྱང་བརྩོན་ལྡན་ལ། །ཚེ་འདི་ཉིད་ལ་སྟེར་བར་བྱེད། །རྟག་ཏུ་ཁྱོད་ཀྱིས་དམ་ཚིག་སྲུངས། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། ། [204b] [204b.1]འདི་ནི་སངས་རྒྱས་ཀུན་དང་འདྲ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་བྱིན་བསོད་ནམས་མཆོག་དག་གིས། །དངོས་གྲུབ་མཆོག་ནི་ཐོབ་པར་འགྱུར། །དེང་ཁྱོད་སྐྱེ་བ་འབྲས་བཅས་ཏེ། །གང་འདིར་ལེགས་པར་གནས་པས་ན། །དམ་ [204b.2]ཚིག་ལྷ་རྣམས་ཀུན་དང་མཉམ། །རང་བྱུང་དུ་ཡང་དེར་སྐྱེས་སོ། །སངས་རྒྱས་རྡོ་རྗེ་འཛིན་བཅས་པ། །ཀུན་གྱིས་དེང་ཁྱོད་དབང་བསྐུར་བས། །ཁམས་གསུམ་གྱི་ནི་རྒྱལ་པོ་ཆེ། །རྒྱལ་པོའི་བདག་པོར་བསྟན་པ་ཡིན། །དེང་ནི་བདུད་ལས་རྣམ་རྒྱལ་ཏེ། །གྲོང་ཁྱེར་མཆོག་ཏུ་ [204b.3]རབ་ཏུ་ཞུགས། །ཁྱེད་རྣམས་ཀྱི་ནི་སངས་རྒྱས་ཉིད། །དེང་ཉིད་ཐོབ་པར་ཐེ་ཚོམ་མེད། །ཨཿདེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དབུགས་དབྱུང་བ་ཕུལ་དུ་བྱུང་བ་སྟེ། དེ་བཞིན་གཤེགས་པ་ཐམས་ཅད་དང་། དཔལ་རྡོ་རྗེ་སློབ་དཔོན་གྱིས་སློབ་མ་ [204b.4]མཆོག་རྣམས་ལ། །བྱང་ཆུབ་ཀྱི་སེམས་བསྐྱེད་པ་དང་བཅས་པས་ཕྱིར་མི་ལྡོག་པའི་ཕྱག་རྒྱས་སངས་རྒྱས་ཉིད་དུ་གྱུར་ཅིག །མཆོག་ཏུ་རྟག་པ་ཡིན་པར་ཁོང་དུ་ཆུད་པར་བྱའོ། །དེ་ལ་གཏན་ཚིག་ཅི་ཡོད་ཅེ་ན། གང་ཁྱོད་ཀྱིས་ཐམས་ཅད་ཀྱི་བདག་ཉིད་དུ་དེ་བཞིན་གཤེགས་ [204b.5]པ་ཐམས་ཅད་ཀྱི་བྱང་ཆུབ་ཆེན་པོའི་མཆོག་ཏུ་སེམས་བསྐྱེད་པ་ཙམ་གྱི་མཐུ་ཉིད་ཀྱིས། ཕྱིར་མི་ལྡོག་པར་འགྱུར་བ་ཡིན་ལ། ཕྱིར་མི་ལྡོག་པ་ཉིད་ཀྱིས་ན། ངེས་པའི་ཕུང་པོ་ལ་གནས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པའི་ཕྱིར་མ་འོངས་པའི་སངས་རྒྱས་ [204b.6]ཡིན་ལ། དུས་གསུམ་ནི་མཉམ་པ་ཉིད་ཡིན་པས་ན། དེ་ལྟར་བྱུང་བ་ཉིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་མངོན་པར་རྫོགས་པར་སངས་རྒྱས་པར་ཁོང་དུ་ཆུད་པར་བྱའོ་ཞེས་བྱ་བ་ནི་མཆོག་ཏུ་གསང་བའི་དབུགས་དབྱུང་བ་སྟེ། རྡོ་རྗེ་ [204b.7]སེམས་དཔར་བདག་སྦྱོར་ཞིང་། །ཐམས་ཅད་སྦྱོར་བ་རྗེས་སྦྱར་ལྡན། །སངས་རྒྱས་ཉིད་དུ་ཤེས་བྱ་སྟེ། །སངས་རྒྱས་དམ་པ་རྟག་པའོ། །ཞེས་གསུངས་སོ། །དེ་ཡང་ཅིའི་ཕྱིར་ཞེ་ན། ཁྱོད་ཀྱི་བདག་ཉིད་ཐམས་ཅད་དུ། །དེ་བཞིན་གཤེགས་པ་ཐམས་ཅད་ཀྱི། །རང་གི་དམ་ [205a] [205a.1]ཚིག་ཡོངས་སུ་གཟུང་བ་ནི་དོན་ཡོད་པས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་ཉིད་དུ་མངོན་པར་རྟོགས་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་དཔལ་དང་ལྡན་པའི་ [205a.2]དམ་ཚིག་རྗེས་སུ་བསྒྲུབས་པས་མཆོག་ཏུ་གྲུབ་པ་ནི། དེ་བཞིན་གཤེགས་པ་ཐམས་ཅད་ཉིད་དུ་ཤེས་པར་བྱའོ། །དེ་བས་ན་དུས་ཐམས་ཅད་དང་། གནས་སྐབས་ཐམས་ཅད་དུ་ཡང་ཅི་ནུས་པས་སྡུག་བསྔལ་བ་དང་། ཡིད་མི་བདེ་བ་རྣམས་ཀྱི་ལེན་པས་ཁྱེད་རྣམས་ཀྱིས་རྟག་ [205a.3]པ་ཉིད་དུ་རྗེས་སུ་བསྲུང་བར་བྱ་ཞིང་ཞིག་པར་མི་བྱའོ། །ཇི་སྙེད་པའི་ལོངས་སྤྱོད་དང་ཉེ་བར་སྤྱོད་པ་ཐམས་ཅད་དང་། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་བླ་ན་མེད་པའི་ཐེག་པ་ཆེན་པོའི་དམ་ཚིག་སྦྱོར་བས་ལེགས་པར་མཆོད་ལ་བདེ་བར་གཟུང་བར་བྱ་ཞིང་ [205a.4]ཡང་དག་པར་གསོ་བར་བྱའོ། །བདག་ཉིད་ཇི་ལྟ་བ་དེ་བཞིན་དུ་གཞན་རྣམས་ལ་ཡང་རིག་པར་སྦྱར་བར་བྱའོ། །གང་གིས་ན་ཁྱོད་ཕ་རོལ་མུ་སྟེགས་ཀྱི་གཞུང་གིས་ལོག་པའི་ལྟ་བ་ཅན་དུ་མི་འགྱུར་ཞིང་། ཉན་ཐོས་དང་། རང་སངས་རྒྱས་རྣམས་ཀྱིས་ཐམས་ཅད་དུ་ལྟུང་བ་ལ་ [205a.5]སོགས་པ་དང་། ལུས་འདི་ཤིན་ཏུ་ཡང་མི་སྨྲ་བ་ཉིད་དང་། སེམས་ཤིན་ཏུ་ཡང་འགོག་པར་མི་འགྱུར་བར་གང་གིས་སྐུ་གསུང་ཐུགས་རྡོ་རྗེ་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དཔལ་གྱི་རང་གི་དམ་ཚིག་གིས་བླ་ན་མེད་པའི་དངོས་གྲུབ་ [205a.6]མཆོག་ཏུ་རྟག་པར་འགྱུར་བར་ཡང་གྱིས་ཤིག །ཡང་སྨྲས་པ། འདོད་པའི་ལོངས་སྤྱོད་ཐམས་ཅད་དང་། །ཅིས་ཀྱང་མི་འཇིགས་དགའ་བར་གྱིས། །སྡིག་པ་མེད་ཀྱིས་མི་འཇིགས་ཤིག །དམ་ཚིག་འདའ་བར་དཀའ་བའོ། །ཞེས་བཅོམ་ལྡན་འདས་རྡོ་རྗེ་སེམས་དཔས་ [205a.7]བཀའ་སྩལ་ཏེ། དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་པ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ་རྣམས་ལ་མཆོག་ཏུ་གསང་བ་འདི་བཀའ་སྩལ་བ་ཡིན་ནོ། །ཡིད་ནི་རབ་ཏུ་དང་བའི་རྡོ་རྗེ་ཡིས། །རང་གི་དམ་ཚིག་མི་ཟད་བདེ་ལ་ [205b] [205b.1]བརྟེན། །བདེ་བའི་བདེ་བ་ཆུང་ལ་སངས་རྒྱས་ནི། །ཀུན་དང་འདྲ་མཉམ་རྟག་པར་ཁྱོད་གྱུར་ཏོ། །སློབ་མས་གུས་པར་བླ་མ་ཡི། །རྐང་པ་གཉིས་ལ་ཕྱག་བྱ་སྟེ། །དེ་ནས་ཇི་སྐད་གསུངས་པ་ཀུན། །རྗེས་སུ་བསྒྲུབ་པར་ཁས་བླང་ངོ་། །དེ་ལྟར་དམ་བཅའ་བྱས་ནས་ནི། ། [205b.2]ཆོ་ག་འདི་ཡིས་རང་ཉིད་ཀྱིས། །རྡོ་རྗེ་རྩེ་མོ་ལྔ་པ་ནི། །བླངས་ནས་ཀྱང་ནི་དེ་ལ་སྦྱིན། །འདི་ནི་སངས་རྒྱས་ཐམས་ཅད་དེ། །རྡོ་རྗེ་སེམས་དཔའི་ལག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། །དེ་ནས་ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ [205b.3]ཡ་ཏིཥྛ་ཨེ་ཥ་སྟྭཾ། དྷ་ར་ཡ་མི་བཛྲ་སཏྭ་ཧི་ཧི་ཧི་ཧི་ཧཱུཾ་ཞེས་བརྗོད་དེ། དེ་ནས། འདི་ནི་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོ་བ། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་རྡོ་རྗེ་རྒྱལ་བས་གསུངས། །ཞེས་བརྗོད་ལ་དྲིལ་བུ་སྦྱིན་ནོ། །དེ་ལྟར་དབང་བསྐུར་ [205b.4]བྱས་ནས་ནི། །དེ་ནས་སར་པའི་གོས་རྣམས་བསྐོན། །མེ་ཏོག་དྲི་ལ་སོགས་པས་མཆོད། །མཆོད་ཕྱིར་གདུ་བུ་བཅས་པར་བྱ། །དེ་ནས་བླ་མ་བདག་ཉིད་ཀྱིས། །དེ་ཡི་སྤྱི་བོར་གདུགས་ཀྱང་གཟུང་། །ཐལ་མོ་སྦྱོར་བ་བྱས་ནས་ནི། །དཀྱིལ་འཁོར་ལེགས་པར་བསྐོར་དུ་ [205b.5]གཞུག །གདུགས་དང་བཅས་པ་སྒོ་ཕྱོགས་སུ། །སྤྱི་བོར་འདུད་དེ་ཕྱག་འཚལ་གཞུག །སློབ་མ་འདི་ནི་ཕུལ་བ་ལགས། །གསང་སྔགས་རྒྱུད་ནི་འཛིན་པར་འགྱུར། །མཁན་པོས་དེ་སྐད་སྨྲས་ནས་སུ། །གདུགས་བཞག་ནས་ནི་སློབ་མ་དེ། །ལག་པས་ལེགས་པར་ [205b.6]བླངས་ནས་སུ། །དེ་ནས་འདི་སྐད་བསྒོ་བར་བྱ། །ད་ནི་དཀྱིལ་འཁོར་སློབ་དཔོན་འགྱུར། །གསང་སྔགས་རྒྱུད་ཀྱང་འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀུན་གྱིས་བཀུར་བར་འགྱུར། །སེམས་ཅན་ཀུན་ལ་སྙིང་བརྩེའི་ཕྱིར། །ཁྱོད་ཀྱིས་ [205b.7]དཀྱིལ་འཁོར་ཆོ་ག་བཞིན། །ནན་ཏན་བསྐྱེད་དེ་བྲི་བར་བགྱི། །སྒྲུབ་པ་པོ་ཡང་རྒྱུད་ལ་སྦྱོར། །ཁྱོད་ཀྱིས་ཆོས་ལ་སེར་སྣ་དང་། །སེམས་ཅན་རྣམས་ལ་མི་ཕན་པ། །ཉམ་ང་ཆེན་པོར་གྱུར་ཀྱང་ནི། །བུ་ཁྱོད་ཀྱིས་ནི་མི་བྱའོ། དེ་ནས་སློབ་མ་རེ་རེ་ཡིས། །ལག་པ་གཡོན་པས་ [206a] [206a.1]གཡས་པ་ཡི། །མཐེ་བོ་ནས་ནི་བཟུང་ནས་སུ། །ཞི་བ་ཡི་ནི་སྦྱིན་སྲེག་བྱ། །རྡོ་རྗེ་སེམས་དཔའི་ཏིང་འཛིན་གྱིས། །སློབ་མ་གུས་དང་ལྡན་པ་དང་། །རང་གི་རིགས་དང་མཚམས་པ་ཡིས། །སྡིག་པ་ཐམས་ཅད་སྦྱིན་སྲེག་བྱ། །དེ་ལྟར་བྱས་ནས་བདག་བསྲུང་ [206a.2]སྟེ། །སྔགས་པས་སློབ་མ་ལས་ཡོན་བླང་། །སློབ་མ་ཡིས་ཀྱང་དེ་ཉིད་ནི། །ཇི་ལྟར་དགའ་བར་འགྱུར་བར་བྱ། །དེ་ནས་སློབ་མས་འདི་ནི་རྣམ་པར་སྣང་མཛད་དོ་ཞེས་མིང་དུ་བྱས་ལ། བསྐོར་བ་ལན་གསུམ་བྱ་སྟེ། ཕྱག་བྱས་ནས་བདག་ཉིད་དབུལ་བར་བྱ་ཞིང་། །མཆོད་པ་ [206a.3]ཆེན་པོས་མཆོད་པར་བྱའོ། །ཤིན་ཏུ་དགའ་བ་གང་དང་གང་། །ཁྱད་པར་ཅན་ནི་དེ་དང་དེ། །དེ་ཉིད་མི་ཟད་འདོད་པ་ཡིས། །དེ་དང་དེ་ནི་བླ་མ་སྦྱིན། །དེ་ནི་བསོད་ནམས་ཚོགས་སུ་འགྱུར། །ཚོགས་ལས་དངོས་གྲུབ་མཆོག་ཏུ་འགྱུར། །ཡང་ན་དེ་ནི་དགར་འགྱུར་བ། །དེ་ལྟར་ཡང་དག་སྤྱད་པར་བྱ། །དེ་ལྟར་ [206a.4]ཡང་དག་དབང་བསྐུར་བ། །སློབ་དཔོན་ཞེས་ནི་བཤད་པ་ཡིན། །དེ་ཡིས་བསྟན་པའི་གསང་སྔགས་རྣམས། །གྲུབ་པར་འགྱུར་བར་ཐེ་ཚོམ་མེད། །དེ་ནས་གསང་བའི་མཆོད་པ་བཞིས་མཆོད་དེ། ཨོཾ་བཛྲ་སཏྭ་སུ་སཾ་གྲ་ཧཾ། ཨོཾ་བཛྲ་རཏྣ་མ་ནུཏྟ་རཾ། ཨོཾ་བཛྲ་དྷརྨྨ་གཱ་ཡ་ནེ། ཨོཾ་བཛྲ་ [206a.5]ཀརྨ་ཀ་རོ་དྡྷ་བ། ཞེས་བྱ་བ་རྡོ་རྗེ་སྒེག་མོ་ལ་སོགས་པའི་མཆོད་པ་བརྒྱད་ཀྱིས་ཕྱི་དང་ནང་གི་མཆོད་པ་བྱས་ལ། ཐམས་ཅད་ཅི་ནུས་པ་དང་། ཅི་འབྱོར་བ་དང་། རྗེས་སུ་མཐུན་པར་མཆོད་པ་རྣམས་དང་། སློབ་མ་རྣམས་མཆོད་པ་བྱེད་དུ་གཞུག་གོ། །དེའི་འོག་ཏུ་བཟའ་བ་དང་བཏུང་ [206a.6]བ་དང་། གླུ་དང་རོལ་མོ་ལ་སོགས་པའི་མཆོད་པ་རྣམས་ཀྱིས་བདག་དང་གཞན་དགའ་བར་མཆོད་ཅིང་ཅི་འདོད་པ་ཉེ་བར་ལོངས་སྤྱོད་པ་རྣམས་བྱའོ། །དེ་ནས་ཐམས་ཅད་སུ་ལ་ཡང་མ་སྨྲ་ཤིག །ཅེས་མནའི་སྙིང་པོ་བྱིན་ལ་ཇི་ལྟར་ཞུགས་པ་རྣམས་གཏང་བར་བྱའོ། །དེ་ [206a.7]ནས་མེ་ཏོག་ལ་སོགས་པས་ཡང་དག་པར་མཆོད་ལ་ལེགས་པར་བསྟོད་དེ། དེ་བཞིན་གཤེགས་པ་ཐམས་ཅད་ལ་གསོལ་བ་གང་བཅིང་བཟོད་པ་གསོལ་ལ་ཉི་མ་འཆར་ཀའི་དུས་སུ་རྡོ་རྗེ་སེམས་མའི་ཕྱག་རྒྱ་བཅིངས་ལ། གྱེན་དུ་བཀྲོལ་ཏེ། སྙིང་པོ་འདི་བརྗོད་པར་ [206b] [206b.1]བྱའོ། །ཨོཾ་ཀྲྀ་ཏོ་བ་སརྦ་སཏྭཱ་རྠ། །སིདྡྷ་མ་དཏྟཱ་ཡཱ་ནུ་ག །གཙྪ་ཏྭཱཾ་བུདྡྷཱ་བི་ཥ་ཡཾ། །པུ་ན་ར་ག་མ་ན་ཡ་ཙྪ་བཛྲ་ས་ཏྭ་མུཿ། མི་བསྐྱོད་པ་ལ་སོགས་པ་སྤྲུལ་པའི་དཀྱིལ་འཁོར་བ་རྣམས་ནི། ཛཿཧཱུཾ་བཾ་ཧོཿཞེས་བྱ་བས་རང་གི་ལུས་ལ་ཉེ་བར་བསྡུ་བར་བྱའོ། །དེ་ནས་སྙིང་གནས་བྱུང་ [206b.2]བའི་རྡོ་རྗེ་རིན་ཆེན་གྱི་ཕྱག་རྒྱ་རང་གི་དབང་བསྐུར་བའི་གནས་ན་འདུག་པས་དབང་བསྐུར་ལ། མཛུབ་མོ་གཉིས་ཀྱིས་ཕྲེང་བ་བཅིང་བ་དང་། གོ་ཆ་བཅིང་བ་སྙིང་པོ་འདིས་བྱ་སྟེ། ཨོཾ་བཛྲ་རཏྣ་ཨ་བྷི་ཥིཉྩ། སརྦ་མུ་དྲ་མེ་དྲྀ་ཌྷ་ཀུ་རུ་བར་ཀ་བ་ཙེ་ན་བཾ། གོ་ཆའི་མཐར་ཕྲེང་བ་བཅིང་བ་བཀྲོལ་ [206b.3]ལ་ཐལ་མོ་སྦྱར་ཏེ་བདག་ཉིད་མཉམ་པའི་ཐལ་མོས་དགྱེས་པའི་སྙིང་པོ་འདི་བྱའོ། །ཨོཾ་བཛྲ་ཏུ་ཥྱ་ཧོ། ཡི་གེ་བརྒྱ་པ་བརྗོད་ལ་རྡོ་རྗེ་དགའ་བ་ལེགས་སོ་ཞེས་བྱ་བ་བྱིན་ཏེ། ལེགས་སོ་རྡོ་རྗེ་སེམས་དཔའ་ཁྱོད། །རྡོ་རྗེ་རིན་ཆེན་ཁྱོད་ལེགས་སོ། །རྡོ་རྗེ་ཆོས་ཁྱོད་ལེགས་པ་སྟེ། །རྡོ་རྗེ་ལས་ [206b.4]ནི་ཁྱོད་ལེགས་སོ། །ཐེག་པ་ཆེན་པོ་བླ་ན་མེད། །དེ་བཞིན་གཤེགས་པ་ཀུན་གྱི་གསང་། །ཐེག་པ་ཆེན་པོ་མངོན་འདུས་པའི། །མདོ་སྡེ་འདི་ནི་ལེགས་པར་བཤད། །ཨོཾ་བཛྲ་ཀཱི་ལི་ཀཱི་ལི་ཡ། སརྦ་བི་གྷྣཱཾ། བཛྲ་དྷ་ར་ཨཱཛྙཱ་པ་ཡ། ཧཱུཾ་ཧཱུཾ་ཧཱུཾ་ཧཱུཾ་ཕཊ་ཅེས་བྱ་བས་ཕུར་བུ་བཏོན་ལ་འོ་མས་ [206b.5]བཀྲུའོ། །ཨ་ཀཱ་རོ་མུ་ཁཾ་སརྦ་དྷརྨྨཱ་ཎཱཾ་ཨཱདཡ་ནུཏྤ་ཏྭཱ་ཏ་ཅེས་བྱ་བ་འདིས་ཚོ་རྩེ་རྣམས་བསྡུས་ལ་འབད་པས་ཆུ་ཀླུང་ཆེན་པོར་དོར་བར་བྱའོ། །དེ་ནས་གནས་ཀྱང་བ་ལང་གི་ལྕི་བས་ཉེ་བར་བྱུགས་ལ། བཟའ་བ་དང་ནི་བཅའ་བ་རྣམས། །ཅི་དགའ་བར་ནི་སྦྱིན་པར་བྱ། །ཁྱི་དང་བྱ་ [206b.6]རོག་ལ་སོགས་ལ། །ཅུང་ཟད་ཙམ་ཡང་མི་སྦྱིན་ནོ། །ཡོ་བྱད་རྫས་རྣམས་ཐམས་ཅད་ནི། །སློབ་དཔོན་དག་གིས་བསྡུས་ནས་ནི། །བདག་རང་ཉིད་ཀྱིས་སྤྱད་པར་བྱ། །སློབ་མ་རྣམས་ལ་བགོར་མི་རུང་། །དཀྱིལ་འཁོར་གྱི་ནི་ཡོ་བྱད་ཀུན། །སློབ་དཔོན་བདག་ཉིད་དབང་བར་ [206b.7]བཤད། །གལ་ཏེ་སློབ་མས་སྤྱད་ན་ནི། །དམ་ཚིག་ལས་ནི་ཉམས་པར་འགྱུར། །གང་ཞིག་སྤྱད་པར་མི་འདོད་ན། །དེ་ཡི་ཆོ་གའི་རིམ་འདིའོ། །དཀོན་མཆོག་གསུམ་གྱི་ཡོ་བྱད་དུ། །དེ་དག་ཆོ་ག་བཞིན་དུ་དབུལ། །གདུགས་དང་རྔ་ཡབ་དྲི་ལ་སོགས། །སངས་རྒྱས་ཉིད་ [207a] [207a.1]ལ་དབུལ་བར་བྱ། །བ་དན་གདུག་སྤོས་དྲི་ལ་སོགས། །དམ་པའི་ཆོས་ལ་དབུལ་བར་བྱ། །གོས་དང་ཡོ་བྱད་སྣོད་ལ་སོགས། །དགེ་འདུན་རྣམས་ལ་དབུལ་བར་བྱ། །དེ་དག་ལས་ནི་སློབ་མ་ཡིས། །ཅུང་ཟད་ཙམ་ཡང་མི་བསྐུར་རོ། །དགེ་འདུན་མེད་ན་དགེ་སློང་ [207a.2]སྦྱིན། །ཡང་ན་དགེ་སློང་མ་ལ་སྦྱིན། །གལ་ཏེ་བདག་ཉིད་མི་འདོད་ན། །བསྙེན་བཀུར་དག་ལ་སྦྱིན་པར་བྱ། །དེ་ནས་དེ་ཡི་ཕྱི་དེ་ཉིན། །ཉེས་བྱས་ལྷག་མ་ཞི་བའི་ཕྱིར། །མཁས་པ་ཡིས་ནི་ཞི་བ་ཡི། །སྦྱིན་སྲེག་བརྒྱ་རྩ་བརྒྱད་བྱའོ། །སློབ་མས་དག་ཞི་བྱའི་ཕྱིར། །སྤྱན་ལ་ [207a.3]སོགས་པའི་གསང་སྔགས་དང་། །སེམས་ཅན་ཀུན་ལ་ཕན་པའི་ཕྱིར། །བྱམས་པ་ཆེན་པོའང་བསྒོམ་པར་བྱ། །ཉེས་བྱས་ཐམས་ཅད་ཞི་བྱའི་ཕྱིར། །དེ་ནས་ཞི་བ་ཆེན་པོ་བྱའོ། །དད་མེད་དམན་ལ་འཇུག་ལ་མིན། །འདོད་ལ་ཆགས་དང་ཁྲོ་བོའི་དབང་བསྐུར་དང་། །སློབ་ [207a.4]མ་བུ་མིན་བློ་གྲོས་དམན་རྣམས་ལ། །ཆོ་གའི་བསྒྲུབ་པ་འདི་ནི་སྦྱིན་མི་བྱ། །ཞེས་བཅོམ་ལྡན་འདས་རྡོ་རྗེ་ཆེན་པོའི་ཡེ་ཤེས་སྣང་བས་དེ་སྐད་ཅེས་བཀའ་སྩལ་ཏོ། །དེ་ནས་དབང་བསྐུར་ཞིང་གནང་བ་ཐོབ་ནས་དེའི་འོག་ཏུ་བསྒྲུབ་པར་བྱ་སྟེ། དབང་བསྐུར་ཞིང་གནང་བ་ཐོབ་པས་དུས་ [207a.5]མཚམས་གསུམ་མམ་བཞིར་བྱིན་གྱིས་བརླབ་པ་དང་། དབང་བསྐུར་ནས་དངོས་གྲུབ་དང་རྡོ་རྗེ་བླང་བའི་བར་གྱི་ཆོ་ག་རྣམས་རྗེས་སུ་བཅད་པ་དཀྱིལ་འཁོར་གྱི་འཁོར་ལོ་མ་ལུས་པར་མངོན་སུམ་བཞིན་བལྟས་ལ་མཚན་ཡང་དག་པར་བརྗོད་པའི་སྲིད་མཚན་མ་མཐོང་གི་བར་དུ་ཚིག་ [207a.6]གཞན་མི་སྨྲ་བར་བཀླག་པར་བྱའོ། །དེ་ནས་དཔྱིད་ཟླ་ར་བའི་ཟླ་བ་ཉ་བ་ལ་དཀྱིལ་འཁོར་གྱི་སྒྲུབ་པའི་ཐབས་ལས་བཤད་པའི་ཚོགས་དཀྱིལ་འཁོར་བྲིས་ལ་དེར་བཞུགས་ཏེ་ཆོ་ག་ཐམས་ཅད་རྗེས་སུ་སྤྱད་ལ། སྐྱིལ་མོ་ཀྲུང་མ་བཤིག་པར་ཇི་སྲིད་ཉི་མ་ཤར་བའི་དུས་སུ་རྗེ་བཙུན་ [207a.7]འཇམ་དཔལ་ལས་འོད་ཟེར་རྣམས་ངེས་པར་བྱུང་ནས་དཀྱིལ་འཁོར་སྣང་བར་བྱས་ཏེ། སྒྲུབ་པ་པོའི་སྤྱི་བོར་ནུབ་པར་གྱུར་གྱི་བར་དུ་བཟླས་བརྗོད་བྱའོ། །དེའི་འོག་ཏུ་ལོ་བཅུ་དྲུག་ལོན་པ་ལྟ་བུའི་སྐྲ་ཟླུམ་པོར་འཁྱིལ་བ། ལུས་ལ་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོས་བརྒྱན་པ་ [207b] [207b.1]ལྷའི་རྒྱན་ཐམས་ཅད་ཀྱིས་བཞུགས་པ། རྗེ་བཙུན་འཇམ་དཔལ་དང་འདྲ་བར་འགྱུར་རོ། །གལ་ཏེ་བག་མེད་པས་དེ་གྲུབ་པར་མ་གྱུར་ན། དེ་ཚེ་དཔྱིད་ཟླ་ཐ་ཆུངས་ཀྱི་ཉ་ལ་དཀྱིལ་འཁོར་དེ་བཞིན་དུ་བྱས་ནས་དེ་བཞིན་དུ་སྒྲུབ་པ་ལ་ཞུགས་ན། དེ་ལྟར་འཇུག་པར་འགྱུར་རོ། །དེར་ཡང་མ་ [207b.2]གྲུབ་ན་སྟོན་ཟླ་ཐ་ཆུངས་ཀྱི་ཟླ་བ་ཉ་བ་ལ་དེ་བཞིན་དུ་སྒྲུབ་པ་ལ་འཇུག་པར་བྱའོ། །སྒྲུབ་པ་བདུན་པ་ལ་ནི་མཚམས་མེད་པ་ལྔ་བྱས་པ་ཡང་འགྲུབ་པར་འགྱུར་རོ་ཞེས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེ་དེ་བཞིན་གཤེགས་པས་གསུངས་སོ། །དངོས་གྲུབ་མཆོག་ནི་སངས་ [207b.3]རྒྱས་དང་བྱང་ཆུབ་སེམས་དཔའ་ལ་སོགས་པའོ། །དངོས་གྲུབ་འབྲིང་ནི་ཡིད་བཞིན་གྱི་ནོར་བུ་དང་། བུམ་པ་བཟང་པོ་དང་། དཔག་བསམ་གྱི་ཤིང་དང་། རལ་གྲིའི་རིག་པ་འཛིན་པ་ལ་སོགས་པའོ། །དེ་དག་ཀྱང་དེ་ལ་ལྷག་པར་མོས་པས་མཚན་ཡང་དག་པར་བརྗོད་པ་ཀློག་ཅིང་དེའི་སྒྲུབ་ [207b.4]པའི་ཆོ་གས་འགྲུབ་པར་འགྱུར་རོ། །དངོས་གྲུབ་ཐ་མ་ནི་གསད་པ་དང་བསྐྲད་པ་དང་། རྣམ་པར་དབྱེ་བ་དང་། དབང་དུ་བྱ་བ་དང་། དགུག་པ་དང་། རྒྱས་པའི་ལོངས་སྤྱོད་དང་། རྐང་མགྱོགས་ལ་སོགས་པའི་དངོས་གྲུབ་རྣམས་ཏེ། །དེ་དག་ཀྱང་དེ་དང་དེ་ལ་མོས་པས་བཀླགས་ན་ [207b.5]འགྲུབ་པར་འགྱུར་རོ། །དངོས་གྲུབ་མཆོག་སྒྲུབ་པ་ལ་ཞུགས་པ་རྣམས་ཀྱིས་གལ་ཏེ་དངོས་གྲུབ་མཆོག་མ་གྲུབ་ཀྱང་འབྲིང་ངམ་ཐ་མ་འགྲུབ་པར་འགྱུར་རོ། །དངོས་གྲུབ་འབྲིང་སྒྲུབ་པ་ལ་ཞུགས་པ་རྣམས་ཀྱིས་ཀྱང་དེ་མ་གྲུབ་ཀྱང་ཐ་མ་གྲུབ་པར་འགྱུར་གྱི། ཐ་མ་ལ་སྒྲུབ་པར་ཞུགས་ [207b.6]པ་རྣམས་ཀྱི་མཆོག་དང་འབྲིང་ནི་མ་ཡིན་ནོ། །དེ་བས་དངོས་གྲུབ་མཆོག་གི་ཕྱིར་འབད་པར་བྱ་སྟེ། དངོས་གྲུབ་འབྲིང་དང་ཐ་མ་རྣམས་ནི་འབད་པ་མེད་པར་འགྲུབ་པར་འགྱུར་རོ། །གསང་སྔགས་གཞན་དག་བསྒྲུབས་ན་མཚན་གྱི་དོན་གང་ཡང་རུང་བའི་ངོ་བོ་ཉིད་ཀྱི་ལྷའི་གཟུགས་ [207b.7]ཀྱི་རྣལ་འབྱོར་གྱིས་བྱ་སྟེ། དེ་བས་ནི་འདི་ལྟར་དཀྱིལ་འཁོར་གྱི་དེ་ཁོ་ན་ཉིད་ཀྱི་སྒོ་ནས་དངོས་གྲུབ་ཐམས་ཅད་སྒྲུབ་པས་ན། སྔགས་དང་ཕྱག་རྒྱའི་ལྷ་ཐམས་ཅད་ཀྱི་བདག་ཉིད་ཅན་གྱིས་སེམས་ཅན་ཐམས་ཅད་རྗེས་སུ་གཟུང་བར་བྱ་བའི་ཕྱིར། རྗེ་བཙུན་འཇམ་དཔལ་ [208a] [208a.1]གྱི་མཚན་ཡང་དག་པར་བརྗོད་པར་གསུངས་པ་ཡིན་ནོ། །དེ་བས་ན་འདི་ལྟར་གང་ཅི་ཡང་རུང་བ་མ་བརྟགས་པ་དག་ལ་སྔོན་དང་ཕྱི་མའི་དོན་བརྟག་པར་བྱ་བའི་ཕྱིར་དེ་ཁོ་ན་ཉིད་བཤད་པར་བྱའོ། །ཇི་ལྟར་ན་མཚན་ཡང་དག་པར་བརྗོད་པ་ལས་དཀྱིལ་འཁོར་དང་སྔགས་དང་ [208a.2]ཕྱག་རྒྱ་དང་ལྷ་རྣམས་རྣམ་པར་དགོད་པའི་ཁྱད་པར་གྱི་ངེས་པར་བསྟན་པ་བཤད་པ་ནི་མེད་ཀྱི་རང་བཟོར་བརྟགས་པ་ལྟ་བུར་ཤེས་སོ་ཞེ་ན་འདི་ལྟར་བཤད་པར་བྱ་སྟེ། ཐམས་ཅད་ནི་མཚན་ཡང་དག་པར་བརྗོད་པ་ཉིད་དུ་གནས་ལ་དེ་བཞིན་དུ་བཤད་པ་ཡིན་གྱི་རང་ [208a.3]བཟོར་བྱས་པ་ནི་མ་ཡིན་ཏེ། ཉི་མའི་དཀྱིལ་འཁོར་ཤིན་ཏུ་གསལ་བའི་འོད་ཟེར་འགྱེད་པའི་སྣང་བས་དངོས་པོ་རྣམས་ཤིན་ཏུ་གསལ་བར་མངོན་ཡང་། དམུས་ལོང་དང་མིག་མེད་པ་རྣམས་ཀྱིས་ནི་མི་མཐོང་ངོ་། །དེ་བཞིན་དུ་ཤིན་ཏུ་གསལ་བའི་བློ་གྲོས་ཀྱི་མིག་མ་ཚང་བས་གལ་ཏེ་ [208a.4]རྩོད་དུས་ཟིན་ཀྱང་དེའི་ཚེ་ཉེས་པ་ཡོད་པ་མ་ཡིན་ནོ། །དེ་ལྟ་མོད་ཀྱི་བློ་གྲོས་དམན་པ་རྣམས་ཀྱིས་ཁོང་དུ་ཆུད་པར་བྱ་བའི་ཕྱིར་སླར་ཡང་བཤད་པར་བྱ་སྟེ། སྔགས་མཆོག་མངའ་བདག་རིག་སྔགས་རྒྱལ། །གསང་སྔགས་རྒྱལ་པོ་དོན་ཆེན་བྱེད། །གཙུག་ཏོར་ཆེན་པོ་རྨད་བྱུང་ [208a.5]གཙུག །ཅེས་བྱ་བ་ལ་སོགས་པས་ནི། གཙུག་ཏོར་བརྒྱད་བཤད་པ་ཡིན་ནོ། །རིན་ཆེན་ཀུན་བདག་དབང་ཕྱུག་སྟེ། །འཇིག་རྟེན་དབང་ཕྱུག་ཀུན་གྱི་བདག །རྡོ་རྗེ་འཆང་བ་ཀུན་གྱི་རྗེ། །ཞེས་བྱ་བ་ནི་བྱང་ཆུབ་སེམས་དཔའི་འཁོར་དང་བཅས་པའི་དེ་བཞིན་གཤེགས་པ་རྣམས་ [208a.6]བཤད་པ་ཡིན་ནོ། །རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་རྒྱལ་པོ་བདེ་བ་ཆེ། །ཞེས་བྱ་བ་ལ་སོགས་པ་ནི་བྱང་ཆུབ་སེམས་དཔའ་བཅུ་དྲུག་རྣམས་བསྟན་པ་ཡིན་ནོ། །འཛིན་པ་ཆེན་པོ་རྡོ་རྗེ་ཞགས། །རྡོ་རྗེ་ལྕགས་ཀྱུ་ཞགས་པ་ཆེ། །ཞེས་བྱ་བས་ནི་སྒོ་སྲུང་རྣམས་ཀྱང་ [208a.7]གསུངས་པ་ཡིན་ནོ། །ཆེ་བ་སངས་རྒྱས་རིག་སྔགས་འཆང་། །ཞེས་བྱ་བས་ནི་སངས་རྒྱས་སྤྱན་ལ་སོགས་པའི་རིག་པ་བཞི་བཤད་པ་ཡིན་ནོ། །གཟུངས་ཀྱི་དཀྱིལ་འཁོར་དུ་འཁོར་དུ་ཡང་། །མགོན་པོས་ས་བཅུ་དབང་ཕྱུག་སྟེ། །ས་བཅུ་ལ་ནི་རབ་ཏུ་གནས། །ཞེས་བྱ་བས་ནི་ས་ [208b] [208b.1]རྣམས་བཤད་པ་ཡིན་ནོ། །ཕ་རོལ་ཕྱིན་བཅུ་ཐོབ་པ་སྟེ། །ཞེས་བྱ་བས་ནི་ཕ་རོལ་ཏུ་ཕྱིན་པ་རྣམས་སོ། །རྣམ་བཅུ་དབང་ལྡན་ཆེ་བ་པོ། །ཞེས་བྱ་བས་ནི་དབང་རྣམས་སོ། །དེ་ཉིད་དྲན་པ་ཆེན་པོ་འཆང་། །ཞེས་བྱ་བས་ནི་དོན་གྱི་གཟུངས་དང་ཚིག་གི་གཟུངས་དང་། མངོན་པར་རྟོགས་པའི་ [208b.2]གཟུངས་དང་། སྔགས་ཀྱི་གཟུངས་ཏེ་དྲན་པ་ཞེས་བྱ་བ་ནི་གཟུངས་ལ་བྱའོ། །དབུགས་འབྱིན་ཆེན་པོ་དགའ་སྟོན་ཆེ། །དགའ་ཆེན་རོལ་མོ་ཆེན་པོ་སྟེ། །ཞེས་བྱ་བས་ནི་དགའ་བའི་མཆོད་པ་སྟེ། སྒེག་མོ་ལ་སོགས་པའི་མཆོད་པ་ཡང་བཤད་པ་ཡིན་ནོ། །དེ་བཞིན་དུ་རིམ་པ་ [208b.3]གསུམ་པ་ལས། ཀུན་དུ་བཟང་པོ་བློ་གྲོས་བཟང་། །ས་ཡི་སྙིང་པོ་འགྲོ་བ་འཛིན། །ཞེས་བྱ་བ་ལ་སོགས་པས། ཀུན་དུ་བཟང་པོ་ལ་སོགས་པ། །བྱང་ཆུབ་སེམས་དཔའ་བཅུ་དྲུག་བཤད་པ་ཡིན་ནོ། །སྒོར་ནི། གཤིན་རྗེ་གཤེད་པོ་བགེགས་ཀྱི་རྒྱལ། །དོན་ཡོད་ཞགས་པ་རྣམ་ [208b.4]པར་རྒྱལ། །རྡོ་རྗེ་འཇིགས་བྱེད་འཇིགས་པར་བྱེད། །ཅེས་བྱ་བ་ལ་སོགས་པས་ནི། གཤིན་རྗེ་མཐར་བྱེད་དང་། པདྨ་མཐར་བྱེད་དང་། བགེགས་མཐར་བྱེད་རྣམས་དེ་བཞིན་དུ་བཤད་པ་ཡིན་ནོ། །མཚམས་རྣམས་རྡོ་རྗེ་ཧཱུཾ་སྟེ་ཧཱུཾ། ཞེས་སྒྲོགས་ཞེས་བྱ་བས་ནི་ཁམས་གསུམ་ [208b.5]རྣམ་པར་རྒྱལ་བའོ། །རྡོ་རྗེ་འབར་བ་མིག་ནི་བཟད། །ཅེས་བྱ་བས་ནི་རྡོ་རྗེ་མེ་ལྟར་འབར་བའོ། །རྡོ་རྗེ་འཇིགས་བྱེད་འཇིགས་པར་བྱེད། །ཅེས་བྱ་བས་ནི་རྡོ་རྗེ་ཁྲག་འཐུང་ངོ་། །ཧི་ཧི་ཞེས་སྒྲོགས་འཇིགས་པར་བྱེད། །ཅེས་བྱ་བ་ནི་རྟ་མཆོག་གོ །བདུག་པ་མ་ལ་སོགས་རྣམས་ [208b.6]ཀྱང་། །སེམས་ཅན་ཀུན་ཡིད་ཚིམ་པར་བྱེད། །ཅེས་བྱ་བ་ལ་སོགས་པས་བསྟན་པ་ཡིན་ཏེ། དེ་དག་ཐམས་ཅད་ཀྱང་ཡང་དག་པར་སྤྲོས་ནས་སྦྱར་ཞིང་བཤད་ཟིན་པས། འདིར་ཞིབ་ཏུ་མ་སྨོས་སོ། །ཕྱི་རོལ་དུ་རྡོ་རྗེ་རིགས་ཀྱི་དཀྱིལ་འཁོར་དུ་ཡང་ཚངས་པ་དང་དྲག་པོ་དང་། སྲེད་མེད་ [208b.7]ཀྱི་བུ་ལ་སོགས་པ་རྣམས་ཀྱང་རྟག་ཏུ་རྗེས་སུ་འབྲེལ་བ་ཡིན་པས། འཁོར་ཉིད་དུ་བསྟན་པ་ཡིན་ནོ། །ཇི་ལྟར་ན་ནང་དུ་ཁམས་གསུམ་རྣམ་པར་རྒྱལ་བ་ལ་སོགས་པས་མནན་ལ་ཕྱི་རོལ་དུ་གཞག་ཅེ་ན། འདི་ལ་བརྩད་པར་མི་བྱ་སྟེ། དྲེགས་པ་བསལ་བར་མཛད་ནས་ [209a] [209a.1]སྤྲུལ་པའི་གཟུགས་ཀྱིས་མཆོད་པའི་ཕྱིར་རོ། །བཅོམ་ལྡན་འདས་ཀྱིས་འཁོར་གྱི་ཚུལ་དུ་གཞག་པ་ཡིན་པས་མི་མཐུན་པའི་འགལ་བ་ཡོད་པ་མ་ཡིན་ནོ། །གསང་སྔགས་དང་ཕྱག་རྒྱ་རྣམས་ཅི་ཕྱིར་བཞག །ཅེས་ཟེར་ན། གསང་སྔགས་ཐམས་ཅད་སྐྱེད་པ་ [209a.2]པོ། །ཞེས་གསུངས་པས་ན། གསང་སྔགས་ཐམས་ཅད་ཀྱི་དགོས་པའི་ཁྱད་པར་ཉིད་ཡོངས་སུ་ཤེས་པས་ན་ཐམས་ཅད་རྗེས་སུ་མཐུན་པར་སྦྱར་བ་ཡིན་ནོ། །གསང་སྔགས་ཚུལ་ཆེན་ལས་བྱུང་བ། །གསང་སྔགས་ཚུལ་ཆེན་བདག་ཉིད་ཅན། །ཞེས་གསུངས་པ་ན། དཀྱིལ་ [209a.3]འཁོར་དང་ཕྱག་རྒྱ་དང་། གསང་སྔགས་དང་། །རིག་སྔགས་དང་། དངོས་གྲུབ་སྒྲུབ་པ་ལ་སོགས་པ་ལས་རབ་འབྱམ་ཐམས་ཅད་རྗེ་བཙུན་འཇམ་དཔལ་གྱིས་སྦྱོར་བས་ཐམས་ཅད་ནས་ཐམས་ཅད་དུ་སྦྱོར་བར་བྱའོ། །དེ་བས་ན་བཤད་མ་ཐག་པའི་ཕྱག་རྒྱ་དང་། སྔགས་ཀྱི་སྦྱོར་བ་ལ་ [209a.4]ཡང་འགལ་བ་ཡོད་པ་མ་ཡིན་ཏེ། དོན་དམ་པར་དེའི་ངོ་བོ་ཉིད་ཡིན་པའི་ཕྱིར་རོ། །ཕྱག་རྒྱ་བཞི་ཡི་དོན་སྟོན་པ། །ཞེས་བྱ་བ་ནི་ཕྱག་རྒྱ་ཆེན་པོ་དང་དམ་ཚིག་གི་ཕྱག་རྒྱ་དང་། ཆོས་ཀྱི་ཕྱག་རྒྱ་དང་། ལས་ཀྱི་ཕྱག་རྒྱ་ལས་ཐ་དད་པའི་ཕྱག་རྒྱ་མེད་པས་འདི་ཉིད་དུ་ཐམས་ཅད་བསྟན་ [209a.5]པ་ཡིན་ཏེ། ཇི་ལྟར་བདག་གིས་སྦྱར་བ་དེ་བཞིན་དུ་སྔགས་དང་ཕ་རོལ་ཏུ་ཕྱིན་པའི་དོན་ལ་མཁས་པ་རྣམས་ཀྱིས་ངེས་པར་བརྟག་པར་བྱའོ། །དཀྱིལ་འཁོར་གྱི་དུས་དང་སྒྲུབ་པའི་དུས་སུ་སྦྱིན་སྲེག་གི་ཆོ་ག་བྱ་དགོས་ཏེ། གསང་སྔགས་མ་བཟླས་མི་འགྲུབ་ལ། སྦྱིན་སྲེག་ [209a.6]མ་བྱས་འབྲས་མི་འབྱིན། །སྔགས་རྣམས་ཐམས་ཅད་རབ་བསྒྲུབ་ཕྱིར། །སྦྱིན་སྲེག་ལས་རྣམས་བརྩམ་པར་བྱ། །སྦྱིན་སྲེག་མེད་པར་ལས་རྣམས་ལ། །དངོས་གྲུབ་འབྱུང་བར་མི་འགྱུར་ཏེ། །དེ་བས་སྦྱིན་སྲེག་ལས་རྣམས་ལ། །སྔགས་པས་འབད་པ་ཆེན་པོ་བྱ། །དེ་ལ་སྦྱིན་ [209a.7]སྲེག་གི་ཐབ་ཁུང་ནི། སེམས་ཅན་གྱི་དབྱེ་བས་ནི་མཐའ་ཡས་སོ། །རིགས་ཀྱི་དབྱེ་བ་ལས་ནི་རྣམ་པ་ལྔའམ། བཞི་ཐབ་ཁུང་རྣམ་པར་དབྱེ་སྟེ། འདི་ནི་ཐབ་ཁུང་གཏན་ལ་དབབ་པའོ། །རྒྱ་ཆེར་རྡོ་རྗེ་ཁྲོ་བོ་སྙོམས་པར་འཇུག་པའི་གསང་བའི་རྒྱུད་ལས་ཐབ་ཁུང་གི་རྣམ་པ་བརྒྱ་ [209b] [209b.1]རྩ་བཅུར་གསུངས་སོ། །ལས་ཀྱི་དབྱེ་བས་འདི་ལྟ་སྟེ། ཞི་བ་དང་རྒྱས་པ་དང་། དབང་དང་། མངོན་སྤྱོད་དང་། དགུག་པ་དང་། དབང་དུ་བྱ་བ་དང་། བསྐྲད་པ་དང་། བཅིང་བ་དང་། གསད་པ་དང་། བསྒྲུབ་པ་དང་། ཚེ་འཕེལ་བ་དང་། ནོར་དང་འབྲུ་དགུག་པ་དང་། འདོད་པའི་ [209b.2]གཟུགས་ཉིད་དང་། མི་སྣང་བ་དང་། བཀའ་བཞིན་བྱེད་པ་དང་། སྡིག་པར་རབ་ཏུ་གཞིག་པ་དང་། རིག་པ་རྗེས་སུ་ཆགས་པར་བྱ་བ་དང་། ནམ་མཁར་འགྲོ་བ་དང་། རིག་སྔགས་གཟི་བྱིན་བསྐྱེད་པ་དང་། དཀྱིལ་འཁོར་ཆེན་པོ་བསྒྲུབ་པའོ། །དེ་ལ་ཞི་བ་ལ་ཀུན་ནས་ཟླུམ་པོའོ། །རྒྱས་པ་ལ་ནི་ཟུར་བཞིའོ། ། [209b.3]མངོན་སྤྱོད་ལ་ནི་གྲུ་གསུམ་མོ། །དགུག་པ་ལ་ནི་ལྕགས་ཀྱུའོ། །དབང་དུ་བྱ་བ་ལ་ནི་རྡོ་རྗེ་ལྟ་བུའོ། །ནོར་དང་འབྲུ་དགུག་པ་ལ་ནི་རིན་པོ་ཆེ་ལྟ་བུའོ། །འདོད་པའི་གཟུགས་ཀྱི་ནི་མཚན་ལྟ་བུའོ། །མི་སྣང་བར་བྱ་བ་ནི་མདའ་གཞུ་ལྟ་བུའོ། །བཀའ་ [209b.4]བཞིན་བྱེད་པ་ནི་རལ་གྲི་ལྟ་བུའོ། །སྡིག་པ་རབ་ཏུ་གཞིག་པ་ནི་རྟ་བབས་དང་བཅས་པའི་རྩིག་པའམ་འོབས་ལྟ་བུའོ། །རིག་པ་རྗེས་སུ་ཆགས་པར་བྱ་བ་ནི་རང་གི་རིགས་ཀྱི་ཕྱག་རྒྱ་ལྟ་བུའོ། །ནམ་མཁའ་ལ་འགྲོ་བ་ནི་ནམ་མཁའི་དཀྱིལ་འཁོར་ལྟ་བུའོ། །རིག་སྔགས་ཀྱི་གཟི་ [209b.5]བྱིན་བསྐྱེད་པ་ལ་ནི་རབ་ཏུ་འབར་བ་ལྟ་བུའོ། །དཀྱིལ་འཁོར་ཆེན་པོ་བསྒྲུབ་པ་ནི་འཁོར་ལོ་ལྟ་བུ་ཇི་ལྟ་བ་ཉིད་དམ། དེའི་དཀྱིལ་འཁོར་རྣམས་ལྟ་བུ་ཡིན་ནོ། །དེ་བཞིན་དུ་ཐུན་མོང་གི་བརྐོ་བའི་ཆོ་ག་ལས། སྦྱིན་སྲེག་གི་ཆོ་ག་ཐམས་ཅད་ལ་ཕྱིའི་དཀྱིལ་འཁོར་གྱི་ཟུར་བཞི་པ་དང་། [209b.6]སྒོ་བཞི་པར་ཐིག་བཏབ་ལ་ཤར་ཕྱོགས་སུ་རྡོ་རྗེས་སྤྲས་པ་དང་། ལྷོར་རིན་པོ་ཆེས་སྤྲས་པ་དང་། ནུབ་ཏུ་པདྨས་སྤྲས་པ་དང་། བྱང་དུ་པདྨ་རྡོ་རྗེས་སྤྲས་པར་བྱས་ལ། དེར་ཤར་ཕྱོགས་སུ་པདྨ་དང་། ནགས་ཀྱི་ལྕུག་མ་དང་། བགྲང་ཕྲེང་དང་། རིལ་བ་སྤྱི་བླུགས་དང་། རིགས་ཀྱི་ [209b.7]པགས་པ་སྟེ་ཕྱག་རྒྱ་ལྔ་བྲིའོ། །ལྷོ་ཕྱོགས་སུ་མདུང་རྩེ་གསུམ་པ་དང་། ཟླ་བ་ཁམ་པ་དང་། རྒྱལ་མཚན་དང་། ཐོར་ཚུགས་དང་མིག་སྟེ་ཕྱག་རྒྱ་ལྔ་བྲིའོ། །ནུབ་ཕྱོགས་སུ་འཁོར་ལོ་དང་། དུང་དང་། བེེ་ཅོན་དང་། རལ་གྲི་དང་ཕུབ་སྟེ་ཕྱག་རྒྱ་ལྔ་བྲིའོ། །བྱང་ཕྱོགས་སུ་མདུང་ཐུང་ [210a] [210a.1]དང་། དྲིལ་བུ་དང་། བ་དན་དང་། རྨ་བྱ་དང་། ར་སྐྱེས་ཏེ་ཕྱག་རྒྱ་ལྔ་བྲི་བར་བྱའོ། །དཀྱིལ་འཁོར་གྱི་དབུས་སུ་ཐབ་ཁུང་བརྐོས་ལ་ཐབ་ཀྱི་ནང་དུ་འཇིག་རྟེན་ལས་འདས་པའི་དཀྱིལ་འཁོར་གྱི་ལྷ་རྣམས་ཀྱི་ཕྱག་རྒྱའམ། དཀྱིལ་འཁོར་ཡང་དག་པའི་སྦྱོར་བས་དགོད་པར་ [210a.2]བྱའོ། །དཀྱིལ་འཁོར་གྱི་ཆོ་ག་བཞིན་དུ་བསྲུང་བ་ལ་སོགས་པ་ཐམས་ཅད་བྱས་ནས། སྦྱིན་སྲེག་གིས་དཀྱིལ་འཁོར་བའི་ལྷ་རྣམས་ཀྱི་ཁྱད་པར་གྱི་ལས་དང་རྗེས་སུ་མཐུན་པར་ཚིམ་པར་བྱས་ལ། རང་ཉིད་མངོན་པར་འདོད་པའི་དངོས་གྲུབ་རྣམས་བསྒྲུབ་པར་བྱའོ། །ཞི་བ་ལ་ཨོཾ་ [210a.3]སརྦྦ་དུ་ཁོ་བ་ཤ་མི་ནེེ་སྭཱ་ཧཱ་ཞེས་བྱ་བ་དང་། ཡུངས་ཀར་ལ་སོགས་པས་སྦྱིན་སྲེག་བྱའོ། །རྒྱས་པ་ལ་ཨོཾ་བཛྲ་པུཥྚ་ཡེ་སྭཱ་ཧཱ། ཞེས་བྱ་བ་དང་འབྲས་ལ་སོགས་པའི་སྦྱིན་སྲེག་བྱའོ། །མངོན་སྤྱོད་ལ་ནི་ཨོཾ་སུམྦྷ་ནི་སུམྦྷ་ཧཱུཾ། གྲྀ་ཧྞ་གྲྀ་ཧྞ་ཧཱུཾ། གྲྀཧྞཱ་པ་ཡ་ཧཱུཾ་ཨཱ་ན་ཡ་ཧོཿབྷ་ [210a.4]ག་ཝཱན་བིདྱཱ་རཱ་ཛ་མཱ་ར་ཡ་ཧཱུཾ་ཕཊ་ཅེས་བྱ་བ་དང་། མི་རུས་ཀྱི་ཕྱེ་མ་ལ་སོགས་པས་སྦྱིན་སྲེག་བྱའོ། །སྡིག་པ་རབ་ཏུ་གཞིལ་བ་ལ། ཨོཾ་སརྦྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཞེས་བྱ་བ་དང་། ཏིལ་ལ་སོགས་པའི་སྦྱིན་སྲེག་བྱའོ། །ནོར་དང་འབྲུ་ལ་སོགས་པ་དགུག་པ་ལ་ནི། ཨོཾ་སརྦ་ཨཱ་ཀཪྵ་ཡ། དྷ་ན་དྷ་ [210a.5]ན། དིཀཾ་བཛྲ་པུཥྚ་ཡེ་སྭཱ་ཧཱ་ཞེས་བྱ་བ་དང་། འབྲས་ལ་སོགས་པའོ། །བསྲུང་བའི་དོན་དུ་ནི། ཨོཾ་ཨ་པྲ་ཏི་ཧ་ཏ་བཛཱ་ཡ་སྭཱ་ཧཱ་ཞེས་བྱ་བ་དང་། ཀུ་ཤའི་མྱུ་གུ་ཏིལ་མར་ལ་བཏགས་པའི་འོ། །ཚེ་འཕེལ་བ་ལ་ནི། ཨོཾ་བཛྲ་ཨཱ་ཡུ་ཥེ་སྭཱ་ཧཱ་ཞེས་བྱ་བ་དང་། དཱུར་ཝའི་མྱུ་གུ་ལ་སོགས་པའི་འོ། ། [210a.6]དགུག་པ་ལ་ནི། ཨོཾ་བཛྲ་ཨཱ་ཀཪྵ་ཡ་སྭཱ་ཧཱ་ཞེས་བྱ་བ་དང་། ཀུབ་ཙ་ཀའི་ཚེར་མ་ལ་སོགས་པའོ། །དཀྱིལ་འཁོར་བཅིང་བ་ལ་ནི་ཧཱུཾ་བཛྲ་བྷནྡྷ་ཡ་བཾ་ཞེས་བྱ་བ་དང་། ལྕགས་ཀྱི་ཕྱེ་མ་ལ་སོགས་པའི་འོ། །གསད་པ་ལ་ནི། ཨོཾ་བཛྲ་མཱ་ར་ཡ་ཧཱུཾ་ཞེས་བྱ་བ་དང་། དུར་ཁྲོད་ཀྱི་ཐལ་བ་ལ་ [210a.7]སོགས་པའི་འོ། །དབང་དུ་བྱ་བ་ལ་ནི། ཨོཾ་བཛྲ་བ་ཤི་ཀུ་རུ་ཡེ་སྭཱ་ཧཱ་ཞེས་བྱ་བ་དང་། མེ་ཏོག་དམར་པོ་ལ་སོགས་པའི་འོ། །འདོད་པའི་གཟུགས་ལ་ནི། ཨོཾ་བཛྲ་ཀཱ་མ་རཱུ་པེ་ནི་ཨཾ་ཞེས་བྱ་བ་དང་། ཤིང་དྲེགས་པའི་འབྲས་བུ་ལ་སོགས་པའི་འོ། །ཆགས་པར་བྱ་བ་ལ་ནི་ཨོཾ་བཛྲ་ [210b] [210b.1]ཨཱ་རཱ་ག་ཎ་ཡ་ཧོ་ཞེས་བྱ་བ་དང་། མེ་སྐྱུར་པོ་ལ་སོགས་པའོ། །ནམ་མཁར་འགྲོ་བ་ལ་ནི། །ཨོཾ་ཁེ་ཙ་རི་ཎི་ཧ་ཧ་ཧ་ཞེས་བྱ་བ་དང་། མནྡཱ་ར་བའི་མེ་ཏོག་ལ་སོགས་པའི་འོ། །བཀའ་བཞིན་བསྒྲུབ་པ་ལ་ནི། ཧཱུཾ་བཛྲ་ཨཱ་ཛྙཱ་པ་ཡ་ཏི་ཧཱུཾ་ཞེས་བྱ་བ་དང་། རྡོ་རྗེ་ཅན་གྱི་མེ་ཏོག་ལ་ [210b.2]སོགས་པའི་འོ། །མི་སྣང་བར་བྱ་བ་ལ་ནི། ཨོཾ་བཛྲ་ཨཱ་དཪྴ་ན་ཡཱ་ཨཾ་ཞེས་བྱ་བ་དང་། འབྲས་བུ་མི་སྣང་བ་ལ་སོགས་པའི་འོ། །རིག་སྔགས་གཟི་བརྗིད་བསྐྱེད་པ་ལ། ཨོཾ་བཛྲ་རྠ་སིདྡྷ་ཡེ་སྭཱ་ཧཱ་ཞེས་བྱ་བ་དང་། མར་ལ་སོགས་པའི་འོ། །དོན་ཐམས་ཅད་གྲུབ་པའི་ཆོ་ག་ལ་ནི། [210b.3]ཨོཾ་སིདྡྷི་སུ་སིདྡྷི་ཡེ་སྭཱ་ཧཱ། ཡུངས་ཀར་ལ་སོགས་པའི་འོ། །དཀྱིལ་འཁོར་ཆེན་པོ་སྒྲུབ་པ་ལ་ནི། ཨོཾ་མཎྜ་ལ་ཨ་དྷི་པ་ཏ་ཡེ་སྭཱ་ཧཱ། ཨོཾ་མཎྜ་ལ་སིདྡྷི་ཡེ་སྭཱ་ཧཱ། ཨོཾ་བྷྲ་སྭཱ་ཧཱ། ཨོཾ་བྷུ་བྷ་སྭཱ་ཧཱ། ཨོཾ་སྭ་སྭཱ་ཧཱ། ཨོཾ་བྷུར་བྷུ་བ་སྭཿསྭཱ་ཧཱ། ཨོཾ་སྭ་སྟི་སྭཱ་ཧཱ་ཞེས་བྱ་བ་དང་། སྭ་སྟི་ཀའི་མེ་ [210b.4]ཏོག་ལ་སོགས་པའི་འོ། །སྦྱིན་སྲེག་བྱ་སྟེ། ཤིན་ཏུ་རྒྱ་ཆེར་ཆེ་བ་ནི་མ་ཡིན་ནོ། །མདོར་བསྡུས་ན་ནི་འཇིག་རྟེན་ལས་འདས་པའི་མེ་ལྷ་རྣམ་པ་བཅུ་གཉིས་སུ་བསྟན་ཏེ། དེ་དག་ཀྱང་གང་ཞེ་ན། ཡེ་ཤེས་མེ་ཉིད་དང་པོ་སྟེ། དེ་ནི་དབང་ཆེན་ཞེས་སུ་བསྒྲགས། །ཁ་དོག་སེར་པོའི་ [210b.5]མདོག་ཅན་ལ། །མདོག་དང་རྒྱས་དང་སྟོབས་ཀྱང་སྟེར། །འབར་བའི་ཕྲེང་ཆེན་ཏིང་འཛིན་གནས། །ཡེ་ཤེས་རྫོགས་བྱེད་ཤེས་པར་བྱ། །གཉིས་པ་འཛིན་པ་ཞེས་བྱ་སྟེ། །སྟོན་ཀའི་ཟླ་བའི་འོད་དང་མཉམ། །དཔལ་ལྡན་གོས་ཀྱང་དཀར་པོ་གོན། །བགྲང་ཕྲེང་དང་ [210b.6]ནི་གུནྡྷེ་ཐོགས། །གསུམ་པ་རླུང་ཞེས་བྱ་བ་སྟེ། །ཁ་དོག་ནག་པོ་རྩུབ་པའོ། །བཞི་པ་དམར་པོ་ཞེས་བྱ་སྟེ། །ནུབ་ཀའི་མཚམས་ཀྱི་དམར་ཐག་འདྲ། །ལྔ་པ་མི་འདའ་ཞེས་བྱ་བ། །སྤུན་ལ་ཁ་དོག་དམ་པ་སྟེ། །མགྲིན་པ་རིང་ལ་གཟི་བརྗིད་ཆེ། །ཐམས་ཅད་ལ་ནི་ཕན་ [210b.7]འདོགས་པའོ། །དྲུག་པ་ཁྲོ་བོ་ཞེས་བྱ་སྟེ། །མི་གཡོན་དུད་པའི་ཁ་དོག་ཅན། །གྱེན་དུ་སྐྲ་བརྫེས་སྒྲ་ཆེན་འབྱིན། །མཆེ་བ་བཞི་པ་སྟོབས་པོ་ཆེ། །བདུན་པ་ལྟོ་བ་ཞེས་བྱ་སྟེ། །རྣོ་ལ་ཁ་དོག་ཀུན་དང་ལྡན། །བརྒྱད་པ་ཟད་བྱེད་ཅེས་བྱ་སྟེ། །གློག་འགྱུ་བ་ཡི་འོད་འདྲ་ [211a] [211a.1]བ། །དགུག་པ་ཡིད་ལས་སྐྱེས་ཞེས་བྱ། །སྣ་ཚོགས་གཟུགས་ཅན་སྟོབས་པོ་ཆེ། །བཅུ་པ་འཇིག་རྟེན་འབྱིན་པ་སྟེ། །ཤ་ཟའི་མི་ནི་དེ་ལས་གཞན། །བཅུ་གཅིག་བར་ནི་ཤེས་པར་བྱ། །འདོད་མེད་དབང་གི་ལས་ཅན་ནོ། །རྨུགས་བྱེད་ཅེས་པ་བཅུ་ [211a.2]གཉིས་པ། །སེམས་ཅན་རྨོངས་པར་བྱེད་པའོ། །ཏིང་ངེ་འཛིན་གྱི་སྟོབས་ལས་སྐྱེས། །ལས་ཀྱི་རྗེས་མཐུན་གསང་སྔགས་དང་། །ཕྱག་རྒྱའི་སྦྱོར་བར་ལྡན་པ་ཡི། །ཀུན་དང་ལས་དོན་སྒྲུབ་བྱེད་པའོ། །དེ་ནས་ཤིན་ཏུ་བསྡུས་པ་ནི། །རྣམ་པ་བཞི་རུ་ཡོངས་བསྒྲགས་པ། ། [211a.3]སེམས་ཅན་མོས་པའི་དབང་གིས་ནི། །ཆོ་ག་འདི་ནི་བསྡུས་པ་ཡིན། །ཐབ་དང་ལྷ་ཡི་གྲངས་དང་ནི། །མདོར་བསྡུས་འབྲིང་དང་རྒྱས་པ་རུ། །སེམས་ཅན་ཀུན་ལ་ཕན་པའི་ཕྱིར། །འཇིག་རྟེན་མགོན་པོས་གསུངས་པ་ཡིན། །དེ་ལས་ཤིན་ཏུ་བསྡུས་པ་ཟླུམ་པོ་ལ་སོགས་པ་བཤད་ [211a.4]པར་བྱ་སྟེ། ཟླུམ་པོ་དང་། ཟུར་བཞི་དང་། གྲུ་གསུམ་དང་། ཟླ་བ་ཕྱེད་པ་ལྟ་བུ་ལ་ཁྲུ་གཅིག་པ་དང་། ཁྲུ་དོ་པ་དང་། ཁྲུ་བཞི་དང་། ཁྲུ་དྲུག་པ་དང་། ཁྲུ་བརྒྱད་པ་དང་། ཁྲུ་བཅུ་པ་དང་། སོར་བཅུ་དྲུག་པ་དང་། མཐོ་གང་ཙམ་སྟེ། ལས་དང་རྫས་དང་རྗེས་སུ་མཐུན་པར་ཐབ་ཀྱི་ཚད་བྱས་ [211a.5]པ་ཡིན་ནོ། །འདིར་ཐབ་ཁུང་རྣམ་པ་བཞིར་རྫས་དང་ལས་ཀྱི་དབྱེ་བ་ལས་སོ་སོར་ངེས་པ་ཡིན་གྱི་ལས་ཐམས་ཅད་པའི་ཐབ་ཁུང་ནི་མི་སྣང་ངོ་། །ཅི་ལྟར་ཞེ་ན། ཞི་བ་ལ་ཟླུམ་པོའོ། །རྒྱས་པ་ལ་ནི་གྲུ་བཞིའོ། །དབང་བ་ལ་ནི་གྲུ་གསུམ་མོ། །མངོན་སྤྱོད་ལ་ནི་གྲུ་གསུམ་ཟླ་བ་ཕྱེད་པ་དང་ [211a.6]ལྡན་པའོ། །དེ་ལ་གདོན་དང་ཉེ་བར་འཚེ་བ་དང་། རིམས་དང་བགེགས་ཀྱིས་ཟིན་པ་ཞ་བར་བྱ་བའི་ཕྱིར་དང་། མངོན་པར་ཤེས་པ་དང་། ཐར་པ་བསྒྲུབ་པ་དང་། ཉོན་མོངས་པ་དང་། ཉེ་བའི་ཉོན་མོངས་པ་ཞི་བར་བྱེད་པས་ན། ཞི་བའི་ལས་ཞེས་བཤད་དོ། །རལ་གྲི་དང་། འཁོར་ [211a.7]ལོ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། གཏེར་ཆེན་པོ་དང་། རྒྱལ་སྲིད་དང་། བཅུད་ཀྱིས་ལེན་དང་། གསེར་འགྱུར་གྱི་རྩི་ལ་སོགས་པ་གྲུབ་པ་ནི་རྒྱས་པའོ། །ལྷ་དང་ཀླུ་དང་གནོད་སྦྱིན་དང་དྲི་ཟ་དང་མིའམ་ཅི་དང་། སྐྱེས་པ་དང་བུད་མེད་ལ་སོགས་པ་དང་རྒྱལ་པོ་བྲན་གཡོག་ [211b] [211b.1]དང་བཅས་པ་དབང་དུ་བྱེད་པས་ན་དབང་ངོ་། །གསད་པ་དང་བསྐྲད་པ་དང་། དབྱེ་བ་དང་། གནོན་པ་དང་། རྨོངས་པར་བྱས་པ་དང་། ཡན་ལག་བཅད་པ་ནི་མངོན་སྤྱོད་དོ། །ལས་ཀྱི་ཚོགས་དེ་དག་ངེས་པར་ཤེས་པར་བྱས་ལ། །ལས་ཐམས་ཅད་དགུག་པའི་ཐབ་ཁུང་དུ་ཐམས་ [211b.2]ཅད་བྱའོ། །དེ་ནས་ཡང་རྡོ་རྗེ་དང་རིན་པོ་ཆེ་དང་། པདྨ་དང་སྣ་ཚོགས་རྡོ་རྗེ་དང་། འཁོར་ལོས་དབུས་སུ་མཚན་པས་ན།ལས་ཐམས་ཅད་པ་ཞེས་ཟེར་མོད་ཀྱི་དེ་ནི་མི་རིགས་ཏེ། ཕྱག་རྒྱ་གང་ཡིན་པ་ལྷ་ཡིན་ལ། ལྷ་གང་ཡིན་པ་དེ་ཉིད་ཕྱག་རྒྱ་ཡིན་པས་ན། རྡོ་རྗེ་ནི་མི་བསྐྱོད་པ་དང་། [211b.3]མཱ་མ་ཀཱིའི་ངོ་བོ་ཉིད་དོ། །རིན་པོ་ཆེ་ནི་རིན་ཆེན་འབྱུང་དང་། རིན་ཆེན་སྒྲོལ་མའི་ངོ་བོ་ཉིད་དོ། །པདྨ་ནི་འོད་དཔག་ཏུ་མེད་པ་དང་། གོས་དཀར་མོའི་ངོ་བོ་ཉིད་དོ། །སྣ་ཚོགས་རྡོ་རྗེ་ནི་དོན་ཡོད་གྲུབ་པ་དང་། སྒྲོལ་མའི་ངོ་བོ་ཉིད་དོ། །འཁོར་ལོ་ནི་རྣམ་པར་སྣང་མཛད་དང་། སངས་ [211b.4]རྒྱས་སྤྱན་གྱི་ངོ་བོ་ཉིད་དོ། །རིགས་པ་འདིས་ན་ལས་ཐམས་ཅད་པ་ཉིད་དེ། བཅོམ་ལྡན་འདས་ཀྱི་གསུང་ཉིད་ལས། ལས་ཐམས་ཅད་པ་འདི་ཅི་ཞིག་རིགས་ཞེས་ལ་ལ་དག་ཟེར་རོ། །དེ་ཡང་རབ་ཏུ་གྲུབ་པར་བྱེད་པའི་རྒྱུ་ལས་ནི། ཐབ་གྲུ་བཞི་པ་དེ་ཉིད་ལས་ཐམས་ཅད་ [211b.5]པའི་ཐབ་ཁུང་ཡིན་པར་བཤད་དེ། དེ་ཉིད་དཔུང་བཟངས་ཀྱིས་ཞུས་པའི་རྒྱུད་ལས་བཀག་སྟེ། རྫིང་བུའི་དབྱིབས་ལྟ་བུར་གླུ་དང་གསང་བ་རྣམས་ཀྱི་ལུས་བསྲེག་པ་དང་། ཡན་ལག་གཞིག་པའི་དོན་དུ་ཇི་ལྟར་འགྱུར། །ཐབ་ཁུང་གྲུ་བཞི་པ་ནི་རྡོ་རྗེ་ཕྲེང་བའི་རྒྱུད་ལས། བཅོམ་ལྡན་ [211b.6]འདས་ཤཱཀྱ་ཐུབ་པས་རྡོ་རྗེས་བརྒྱན་པའི་ཐབ་ཁུང་ལས་ཐམས་ཅད་པའོ་ཞེས་གསུངས་ཏེ། དེ་ཡང་ཇི་ལྟ་བུ་ཞེ་ན། ཟུར་བཞི་པ་ལ་ཁྲུ་གང་ཙམ། ཟབས་སུ་དེའི་ཕྱེད་ཙམ་བརྐོས་ཏེ། ཐབ་ཁུང་གི་སྟེང་དུ་སོར་བཞི་ཙམ་དོར་བར་དཔངས་དང་རྒྱར་སོར་བཞི་པའི་ཀུན་དུ་མཉམ་པའི་ཁ་ཁྱེར་ [211b.7]ལ། ཕྱོགས་རྣམས་སུ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་དང་། མཚམས་སུ་ཟླ་བ་ཁམ་པ་དང་། རྩེ་གསུམ་པའི་རྡོ་རྗེས་མཚན་ལ་ཐབ་ཀྱི་དབུས་སུ་པདྨ་འདབ་མ་བརྒྱད་པ་ཐབ་བས་ཅུང་ཟད་དམའ་བ་འདབ་མ་བརྒྱད་ལ་རྡོ་རྗེ་བརྒྱད་ལྟེ་བའི་གེ་སར་ལ་རྡོ་རྗེ་རྩེ་ལྔ་པ་ [212a] [212a.1]ཕྱེད་ནུབ་ཕྱེད་བགྲེང་བ་སྟེ། འདི་དག་ནི་རྡོ་རྗེས་བརྒྱན་པའི་ཐབ་ཁུང་ལས་ཐམས་ཅད་པའོ། །ཐབ་ཁུང་དེ་ཉིད་རྗེ་བཙུན་རྣམ་པར་སྣང་མཛད་ཀྱི་རྣམ་པར་སྣང་མཛད་མངོན་པར་བྱང་ཆུབ་པ་རྒྱུད་ཆེན་པོ་དང་དམ་ཚིག་གསུམ་གྱི་རྒྱལ་བའི་རྒྱུད་ཆེན་པོ་དང་། ཀུན་ [212a.2]ནས་དབང་བསྐུར་བསྐྱེད་པ་ཞེས་བྱ་བའི་རྒྱུད་ཆེན་པོ་དང་། ཕྱག་ན་རྡོ་རྗེའི་སྙིང་པོ་ཞེས་བྱ་བའི་རྒྱུད་ཆེན་པོ་ལས་གསུངས་པ་ནི། རྡོ་རྗེ་བརྒྱད་དང་ལྡན་པ་ལ། །དབུས་སུ་རྡོ་རྗེ་ཆེན་པོ་བྱའོ་ཞེས་གསུངས་སོ། །རྗེ་བཙུན་རྡོ་རྗེ་འཛིན་པས་ཀྱང་རྡོ་རྗེ་འབྱུང་བ་ཞེས་བྱ་བའི་རྒྱུད་ཆེན་པོ་ [212a.3]ལས། །དབུས་སུ་རྡོ་རྗེ་རབ་ཏུ་བརྟག །ཅེས་གསུངས་པས། ཐབ་ཁུང་དེ་ཉིད་ལས་ཐམས་ཅད་ཡིན་པར་བཤད་དོ། །དཔུང་བཟངས་ཀྱིས་ཞུས་པ་ལས་ནི་པདྨ་ལྟ་བུའི་དབྱིབས་ཅན་གྱི་ཐབ་ཁུང་ལས་ཐམས་ཅད་པ་ཡིན་པར་བཤད་དོ། །བུད་མེད་དང་རྒྱལ་པོའི་བུ་མོ་དང་། གྲོང་དང་། [212a.4]གྲོང་ཁྱེར་ཐོབ་པ་དང་། དོན་ཐམས་ཅད་ནི་པདྨའི་དབྱིབས་ལྟ་བུས་འགྲུབ་པར་འགྱུར་རོ་ཞེས་གསུངས་སོ། །དཔལ་ཕྱག་ན་པདྨོས་ཀྱང་། པདྨ་འབྱུང་བ་ཞེས་བྱ་བའི་རྒྱུད་ཆེན་པོ་དང་། རབ་ཏུ་གནས་པ་ཞེས་བྱ་བའི་རྒྱུད་ཆེན་པོ་ལས་པདྨའི་དབྱིབས་ཅན་ཐབ་ཁུང་དེ་ཉིད་ལས་ཐམས་ [212a.5]ཅད་པ་ཡིན་པར་གསུངས་ཏེ། ཐབ་ཁུང་འདི་ནི་ཟླུམ་པོ་ལ་ཁོ་ར་ཁོར་ཡུག་ཁྲུ་གང་ཙམ་ལ་འོག་ཏུ་ཁྲུ་ཕྱེད་པར་བརྐོས་པ་དབུས་ཀྱི་འདབ་མ་ལ་པདྨ་བརྒྱད་ཀྱིས་བསྐོར་བ། ཐབ་ཀྱི་སྟེང་དུ་སོར་བཞི་དོར་བ་དཔངས་དང་རྒྱར་སོར་བཞི་པ་ཐབ་ཁུང་ནས་བྱུང་བའི་པདྨ་ཁ་བྱེ་བ་ལྟ་བུའི་ [212a.6]ཁ་ཁྱེར་ལ། །ཁ་ཁྱེར་གྱི་རྒྱབ་ཏུ་པདྨའི་ཕྲེང་བས་བསྐོར་བ། ཐབ་ཀྱི་དབུས་ཀྱི་ཕྱོགས་ཀྱི་པདྨ་རྣམས་ལ་རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེའི་ཕྱག་རྒྱ་དགོད་པར་བྱའོ། །མཚམས་ཀྱི་པདྨ་ལ་མིག་གཉིས་དང་རྡོ་རྗེ་རྩེ་གསུམ་པ་དང་། པདྨ་དང་ཨུཏྤལ་དགོད་དོ། །དབུས་ཀྱི་པདྨ་ [212a.7]ལ་འཁོར་ལོ་རྩིབས་བརྒྱད་པ་དགོད་དོ། །ཐབ་ཁུང་གི་ནང་གི་ཐ་མར་རྡོ་རྗེ་ཕྲེང་བས་ཡོངས་སུ་བསྐོར་བའི་ཐབ་ཁུང་ནི་ལས་ཐམས་ཅད་པའི་ཐབ་བོ། །གཞན་དག་གིས་ཐམས་ཅད་པའི་ཐབ་ཁུང་གཞན་དག་ཏུ་ཡང་འཆད་དོ། །རྗེ་བཙུན་གྱི་མཚན་ཡང་དག་པར་བརྗོད་པ། ། [212b] [212b.1]འདིར་ནི་ཆོས་ཀྱི་དབྱིངས་ཀྱི་ངོ་བོ་ཉིད་བཅོམ་ལྡན་འདས་རྗེ་བཙུན་འཇམ་དཔལ་གཞོན་ནུར་གྱུར་པ་ནི་དོན་ཐམས་ཅད་རྫོགས་པ་ཡིན་པར་བཤད་དེ། ཞལ་བཞི་པ་དང་། ཕྱག་བརྒྱད་པ་དང་། སྐུ་མདོག་དང་དབྱིབས་སྣ་ཚོགས་པའི་ངོ་བོ་ཉིད་ཡིན་པའི་ཕྱིར་རྟེན་དང་བརྟེན་པ་པོའི་ངོ་བོ་ [212b.2]ཉིད་ཡིན་ནོ། །དེ་ལ་ཤར་ཕྱོགས་ཀྱི་ཞལ་ནི་མེ་ལོང་ལྟ་བུའི་ཡེ་ཤེས་ཀྱི་བྱང་ཆུབ་ཀྱི་སེམས་རྡོ་རྗེ་སེམས་དཔའི་ངོ་བོ་ཉིད་དེ་དཀར་པོ་ཞི་བར་མཛད་པའོ། །ལྷོའི་ཞལ་ནི་མཉམ་པ་ཉིད་ཀྱི་ཡེ་ཤེས་རིན་ཆེན་འབྱུང་ལྡན་གྱི་ངོ་བོ་ཉིད་དེ། སེར་པོ་རྒྱས་པ་འཕེལ་བར་མཛད་པའོ། །ནུབ་ཀྱི་ཞལ་ [212b.3]ནི་སོ་སོར་ཀུན་དུ་རྟོག་པའི་ཡེ་ཤེས་འོད་དཔག་ཏུ་མེད་པའི་ངོ་བོ་ཉིད་དེ། དམར་པོ་འགྲོ་བ་རྣམས་དབང་དུ་མཛད་པའོ། །བྱང་གི་ཞལ་ནི་བྱ་བ་བསྒྲུབ་པའི་ཡེ་ཤེས་དོན་ཡོད་གྲུབ་པའི་ངོ་བོ་ཉིད་དེ། ནག་པོ་ཉོན་མོངས་པའི་དགྲ་རྣམས་དང་། བདུད་ཀྱི་དགྲ་བོ་ཐམས་ཅད་ཟད་པར་མཛད་པ་སྟེ་ [212b.4]མངོན་སྤྱོད་དོ། །དེ་ལྟར་ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་ལས་རྣམས་རྫོགས་པར་བྱེད་པས་ན། །ཐབ་གཅིག་ལ་ལས་ཐམས་ཅད་པའི་ཐབ་ཁུང་དུ་བཤད་དོ། །དེ་ལྟ་ན་ནི་ཐབ་ཀྱི་མཚན་ཉིད་དབྱེ་བ་ལ་དོན་མེད་དེ། ཐབ་གཅིག་ཏུ་ལས་ཐམས་ཅད་འགྲུབ་པར་འགྱུར་རོ་ཞེ་ [212b.5]ན། དོན་མེད་པ་མ་ཡིན་ཏེ། དཀྱིལ་འཁོར་གྱི་བདག་པོ་ཉིད་ཀྱིས་ལེགས་པར་ལས་བྱེད་པས་ན། དཀྱིལ་འཁོར་ཐམས་ཅད་ཞི་བའི་ལས་ལ་བསྐུར་ཞིང་བཀའི་འཁོར་ལོའི་སྦྱོར་བས་ཞི་ཞེས་བྱའོ། །དེ་བཞིན་དུ་རྒྱས་པ་དང་། དབང་དང་། མངོན་སྤྱོད་བྱ་སྟེ། དེ་བས་ན་མཚན་ཉིད་ཐ་དད་པའམ། དགོངས་ [212b.6]པའི་དབང་གིས་ཉེ་བར་གཟུང་བ་ཡིན་ནོ། །ཐབ་ཁུང་སོ་སོའི་མཚན་ཉིད་བཤད་པར་བྱ་སྟེ། དེ་ལ་ཞི་བ་ལ་ནི་ས་གཞི་དཀར་པོ་ལ་རྒྱར་ཁྲུ་གང་ཙམ་བརྐོས་ལ་ཟབས་སུ་སོར་བཅུ་གཉིས་པ་དེའི་དབུས་སུ་པདྨའི་སྟེང་དུ་རྡོ་རྗེ་རྩེ་ལྔ་པ་སོར་བརྒྱད་པ་ཐབ་ཀྱི་སྟེང་བར་དུ་སོར་བཞི་དོར་བ་དཔངས་དང་ [212b.7]རྒྱར་སོར་བཞི་པའི་ཁ་ཁྱེར་གྱིས་བསྐོར་བ་ལ་མཚམས་རྣམས་སུ་རྡོ་རྗེ་རྩེ་གསུམ་པས་མཚན་པ། ཐབ་དེ་ས་གཞི་དཀར་པོ་དང་བའི་ལྕི་བས་བྱུགས་ལ། ཡང་དེ་གཉིས་དྲི་དཀར་པོས་ཉེ་བར་བྱུག་ཅིང་མེ་ཏོག་དཀར་པོས་གཏོར་བ་དུས་གསུམ་བྱའོ། །རྒྱས་པ་ལ་ནི་ས་གཞི་སེར་པོ་ལ་རྒྱར་ [213a] [213a.1]ཁྲུ་དོ་ཟབས་སུ་ཁྲུ་གང་ཟུར་བཞི་པའམ། རིན་པོ་ཆེ་ཟུར་བརྒྱད་པ་དང་འདྲ་བར་བརྐོས་ལ་དེའི་སྟེང་དུ་སོར་བརྒྱད་པའི་ཁ་ཁྱེར་དབྱིབས་དེ་དང་འདྲ་བར་བསྐོར་ལ་ཁུང་བུར་འཁོར་ལོ་རྩིབས་བརྒྱད་པའི་ལྟེ་བ་རྡོ་རྗེ་རིན་པོ་ཆེ་སོར་དྲུག་པས་མཚན་པ། ས་སེར་པོ་དང་དྲི་སེར་པོས་ [213a.2]ཐབ་དང་ས་གཞི་དེ་བྱུགས་ལ། མེ་ཏོག་སྣ་ཚོགས་གཏོར་བར་བྱའོ། །མངོན་སྤྱོད་ལ་ནི་རྩུབ་ཅིང་གས་པ་དང་། ཤིན་ཏུ་གནག་པའི་ས་གཞི་ལ་གྲུ་གསུམ་པ་ཟླ་གམ་གཉིས་མཚན་པ་དང་ལྡན་པ་སོར་ཉི་ཤུ་པ་ཟབས་སུ་སོར་བཅུ་པ། ཐབ་ཀྱི་མགོ་བྱང་དུ་བལྟ་བ། འོག་ཏུ་རྩེ་གསུམ་པའི་ [213a.3]སྟེང་དུ་ཁྲོ་བོའི་རྡོ་རྗེ་སོར་བརྒྱད་པས་མཚན་པ། དེའི་སྟེང་དུ་སོར་གསུམ་དོར་བར་དཔངས་དང་རྒྱར་སོར་གསུམ་དོར་བ། ཁ་ཕྱིར་བལྟས་པའི་ཁ་ཁྱེར་གྱིས་བསྐོར་བ། ས་ནག་པོ་དང་རོ་བསྲེགས་པའི་ཐལ་བ་དང་། བོང་བུ་དང་རྔ་མོའི་རྟུག་པ་ལ་སོགས་པ་ཅི་སྙེད་པས་བྱུགས་ལ། དྲི་མི་ཞིམ་ [213a.4]པའི་དྲི་དང་མེ་ཏོག་སྔོན་པོའམ། དམར་པོའམ། ཕུབ་མས་གཏོར་རོ། །དབང་ལ་ནི་ས་གཞི་དམར་པོ་ལ་ཐབ་ཀྱི་དབྱིབས་བྷ་ག་ལྟ་བུ་རྡོ་རྗེ་དང་པདྨས་མཚན་པའོ། །དགུག་པ་ལ་ནི་རྡོ་རྗེ་རྩེ་གཅིག་ལྟ་བུས་དབུས་སུ་རྡོ་རྗེ་དང་རིན་པོ་ཆེས་མཚན་པའོ། །དེ་དང་འདྲ་བའི་ཁ་ཁྱེར་གྱིས་ཡོངས་སུ་བསྐོར་བས་ [213a.5]དམར་པོ་དང་དྲི་དམར་པོས་བྱུགས་པ། མེ་ཏོག་དམར་པོས་ཉེ་བར་མཛེས་པར་བྱས་པའོ། །འདི་གཉིས་ཀྱི་ཟབས་དང་རྒྱའི་ཚད་ལ་སོགས་པ་ནི་ཞི་བའི་ཐབ་ཁུང་དང་འདྲ་བ་ལས་ཐམས་ཅད་པའི་ཐབ་ཁུང་ཀྱང་དེ་བཞིན་ཏེ་འོན་ཀྱང་ཁ་ཁྱེར་ནི་པདྨ་ཁ་བྱེ་བ་ལྟ་བུ་ལ་རྡོ་རྗེ་ཕྲེང་བས་བསྐོར་བ་དབུས་ [213a.6]སུ་རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེའི་དབུས་སུ་འཁོར་ལོ་དང་ལྡན་པས་མཚན་པའོ་ཞེས་པ་ལ་ལ་དག་བརྗོད་དོ། །དཀྱིལ་འཁོར་རམ་ལྷའི་ཁང་པའི་ཤར་ཕྱོགས་སུ་ཞི་བའི་ཐབ་ཁུང་། ལྷོར་རྒྱས་པ། ནུབ་ཏུ་དབང་དུ་བྱ་བ་དང་། དགུག་པ། བྱང་དུ་མངོན་སྤྱོད་ཀྱི་ཐབ་ཁུང་བྱ་ [213a.7]ཞིང་། ཚོན་རྩི་རྣམས་ཀྱང་ལས་དང་རྗེས་སུ་མཐུན་པར་བརྟག་པར་བྱའོ། །ཐབ་ཀྱི་མཚན་ཉིད་དོ། །དེ་ནས་ཐབ་ཁུང་གི་གནས་རབ་ཏུ་ཤིས་པའི་ཆུ་ཤིང་ལོ་མའམ། མཚན་དང་ལྡན་ཞིང་ཤིན་ཏུ་སར་པའི་གོས་དང་། སཱ་ལུའམ། པདྨའི་འདབ་མས་ཐབ་ཀྱི་མཐར་ཐུག་པར་གཡོགས་ [213b] [213b.1]པར་བྱའོ། །དེ་ནས་ཀུ་ཤ་དགྲམ་པར་བྱ་སྟེ། རྩ་བ་ནས་བཏོན་ཞིང་མ་ཉམས་པ་འབུས་མ་ཟོས་པ་ཤིན་ཏུ་གསར་ཞིང་སྔོ་བའི་ཀུ་ཤས་གཡོགས་པར་བྱའོ། །དང་པོ་ཤར་དུ་རྩེ་བསྟན་གཞག །གཉིས་པ་ལྷོ་ཕྱོགས་ཁ་བལྟས་པའོ། །གསུམ་པའི་རྩེ་མོ་ནུབ་ཏུ་སྟེ། །བཞི་པ་རྩེ་མོ་བྱང་དུའོ། ། [213b.2]དོན་ཀུན་བསྒྲུབ་པའི་ཀུ་ཤ་ཡིས། །ཐབ་ཀྱི་ཤར་ནས་དང་པོར་གཡོགས། །འདིར་ཀུ་ཤ་བླང་བའི་སྔགས་ནི་འདི་ཡིན་ཏེ། ཨི་ངཾ་ཀུ་ཤ་ཤུ་བྷ་དྷི་བྷྱ་པཱུ་ཏ་པྲཧྨ་བི་བ་ཏྲེན། བུདྡྷ་དྷརྨྨཱ་སཾ་གྷ་ཏི་པྲྀ་ཐྭིསཉྫ་ཏ་གརྦྷ་ཨ་བི་གྷྣཱན་མ་མ་ཤཱནྣིཾ་ཀུརྦནྡུ་སྭཱ་ཧཱ། གསང་སྔགས་འདི་ཀུ་ཤ་ལ་ལན་བདུན་བཟླས་ [213b.3]ལ་སྔར་བཤད་པའི་ཆོ་གས་དགྲམ་པར་བྱའོ། །འདབ་དང་ཀུ་ཤའི་ཚོགས་དགྲམ་པའི་ཆོ་གའོ། །ཞིབ་ལ་ནི་པ་ལ་ཤ་དང་ཨུ་དུམ་ཝཱ་ར་དང་། ཨ་མྲ་དང་། ཨ་ཤྭདྠ་དང་། པླཀྴ་དང་། སྨི་དྱ་དང་། ཤ་མི་དང་། ནྱ་གྲོ་དྷ་ལ་སོགས་པ་ཤིང་འོ་མ་ཅན་ལས་བྱུང་བ། འདབ་མ་དང་བཅས་པ་ [213b.4]མཉམ་པོར་བཅད་པ། རྩེ་མོའི་ཆ་ལས་བྱུང་བའི་མཐོ་གང་ཙམ་གྱི་ཡམ་ཤིང་ལ་སྦྲང་རྩི་དང་མར་ལ་རྩེ་མོ་གཉིས་བཏགས་ལ། དྲི་དཀར་པོའི་སྤོས་ཆུས་བཀྲུས་པ་རྩེ་མོ་འདབ་མ་གཉིས་དང་བཅས་པ་སྟེ། རྩེ་གཅིག་པས་སྦྱིན་སྲེག་བྱའོ། །རྙིང་པ་དང་ལོ་མ་མེད་པ་དང་། ཁོང་སྟོང་ [213b.5]དང་། ཆག་པ་དང་། ཤུན་ལྤགས་མེད་པ་དང་། ཐུང་ངུ་དང་ཡོན་པོ་དང་། རྩེ་མོ་གས་པ་དང་། ཧ་ཅང་ཕྲ་བ་དང་། ཧ་ཅང་སྦོམ་པ་དང་། རིང་པོ་དང་། འབུས་ཟོས་པ་དང་། སྲོག་ཆགས་དང་བཅས་པ་རྣམས་ནི་སྤང་བར་བྱའོ། །ཞི་བ་ལ་ནི་ནས་དང་། འོ་མ་དང་། སྦྲང་རྩི་དང་། [213b.6]མར་དང་། ཞོ་དང་། འབྲས་དང་། འབྲས་ཡོས་དང་། ཀུ་ཤ་སྔོན་པོ་དང་། དཱུར་ཝ་སྔོན་པོ་དང་། ཨམྲའི་ལོ་མ་དང་། ཙནྡན་དང་། པྲི་ཡང་ཀུའི་མེ་ཏོག་དང་། སཱ་ལུའི་ཆན་དང་། མེ་ཏོག་དཀར་པོ་དང་། གེ་སར་དང་ཐང་ཆུ་དྲི་ཞིམ་པ་ཅི་སྙེད་པ་ལས་སྦྱིན་སྲེག་བྱའོ། །རྒྱས་པ་ [213b.7]ལ་ནི་ཡམ་ཤིང་དེ་རྣམས་དེ་ཉིད་ལས་སྦོམས་སུ་ཆག་གང་ལ་སྲིད་དུ་ཁྲུ་གང་ཙམ་འོ་མ་དང་ཞོ་དང་། མར་ལ་བཏགས་ཏེ་དྲི་ཞིམ་པོའི་སྤོས་ཆུ་ལ་སྦྱངས་ལ། མངར་གསུམ་ལ་བཏགས་པའི་འབྲས་ཆན་བཟང་པོའི་བཤོས་དང་། ཞོ་དང་སྦྲང་རྩི་དང་། མར་དང་བསྲེས་པའི་ཏིལ་ [214a] [214a.1]ནག་པོ་དང་། ཞོ་དང་འབྲས་ཆན་མར་དང་བཅས་པ་དང་། ཤ་ཏ་པུཥྤ་དང་། བིལ་བའི་འབྲས་བུ་དང་། འབྲས་ཤ་ལི་དང་། ནཱ་ག་གེ་སར་དང་། ཀརྞི་ཀའི་མེ་ཏོག་དང་། འབྲུ་རྣམས་ཀྱིས་སྦྱིན་སྲེག་བྱའོ། །མངོན་སྤྱོད་ལ་ནི་ནིམ་པ་དང་། སེང་ལྡེང་དང་། ཀོ་བི་ད་ར་ [214a.2]དང་། བ་ལ་ཏ་ཀ་དང་། མ་ད་ནའམ། དེ་ལས་གཞན་པའི་ཤིང་ཁ་བ་དང་ཚེར་མ་ཅན་དང་། རོབ་བསྲེགས་པའི་ཐལ་བ་ཅན་དང་། མགལ་དུམ་གྱི་ཡམ་ཤིང་རྩ་བའི་ཆ་ལས་བྱུང་བ་གས་པ་སོར་བཅུའི་ཚད་ཙམ། དུག་དང་ཁྲག་དང་ཡུངས་མ་ལ་བཏགས་པའི་རྩེ་མོ་གཉི་ག་རྣོ་བ་ [214a.3]དང་། ཡུངས་ནག་དང་། ཡུངས་མར་དང་། ཁྲག་དང་། ལན་ཚྭ་དང་། སྐྱེ་ཚེ་དང་། ནིམྦའི་ལོ་མ་དང་། རོ་བསྲེགས་པའི་ཐལ་བ་དང་། རྐང་རྗེས་ཀྱི་ས་དང་། བོང་བུ་དང་རྔ་མོ་ལ་སོགས་པའི་རྟུག་པ་དང་། ཁྱིམ་བྱའི་ཞག་དང་། བྱ་རོག་ལ་སོགས་པའི་གཤོག་པ་དང་། གཅིན་དང་། རྟུག་པ་དང་། [214a.4]ཚེར་མ་དང་། མི་རུས་ཀྱི་ཕྱེ་མ་དང་། སྦྲང་རྩི་ལ་སོགས་པ་དང་། ཅི་རྙེད་པའམ། རྫས་རེ་རེ་ཞིང་དུག་དང་། ཁྲག་དང་། ལན་ཚྭ་དང་། སྐྱེ་ཚེ་དང་། ད་དུ་རའི་ལོ་མའི་ཁུ་བ་ལ་བཏགས་པའི་རྫས་དེ་རྣམས་ཐལ་བ་དང་། སོལ་བའམ་ཕུབ་མ་ལས་དགྲ་བོའི་གཟུགས་བརྙན་བྱས་ལ། [214a.5]གཏུབ་ཅིང་གཏུབ་ཅིང་སྦྱིན་སྲེག་བྱའོ། །དབང་གི་ལས་ལ་ནི་ཙམ་པ་ཀ་དང་། ཨ་ཤྭདྠ་དང་། བ་ཀུ་ལ་དང་། པྲི་ཡང་ཀུ་དང་། ལ་ཀུ་ཙ་ལ་སོགས་པའི་ཡམ་ཤིང་སོར་ལྔ་པ་ལ་འདབ་མ་དང་བཅས་པ་དང་། འབྲས་བུ་དང་། མེ་ཏོག་སྐྱུར་པོ་རྣམས་དང་། གཞན་ཡང་རང་གི་ [214a.6]རྟོག་པ་ལས་གསུངས་པའི་རྫས་རྣམས་ཀྱིས་སྦྱིན་སྲེག་བྱའོ། །དགུག་པ་ལ་ནི་དེ་ཉིད་དང་ཚེར་མ་ལྕགས་ཀྱུ་ལྟ་བུའི་སྦྱིན་སྲེག་བྱའོ། །ཨུ་དུམ་ཝཱ་ར་པ་ལ་ཤ། །པླཀྴ་དང་ནི་ནྱ་གྲོ་དྷ། །སེང་ལྡེང་དང་ནི་ཨ་རྐ་དང་། །ཨ་མྲ་བེ་ཏ་ཀ་ཏ་དང་། །ཨ་མ་དྱ་དང་ཤ་མི་དང་། །ཨ་པ་མརྐ་ལས་ [214a.7]བྱུང་དང་། །ཨ་ཤྭདྠ་དང་བཅས་པ་ནི། །ཡམ་སྲེག་ཤིང་ནི་བཅུ་གཉིས་བསྟན། །གསར་ཞིང་དྲང་ལ་མཐོ་གང་ཙམ། །རྩེ་གཉིས་དྲི་ཞིམ་ལེགས་པར་བཏགས། །ཡམ་ཤིང་དག་ནི་རྩེ་གཅིག་ཏུ། །ལས་རྣམས་ཀུན་ལ་བསྲེག་པར་བྱ། །ཞི་བའི་སྦྱིན་སྲེག་གང་ཅུང་ཟད། ། [214b] [214b.1]གང་ཡང་རྒྱས་པའི་བསྲེག་བྱ་དང་། །བདག་གི་ཟངས་ཏེ་དེ་དག་ཀུན། །ཉིན་རེ་སྭཱ་ཧཱའི་མཐར་བཅས་དབུལ། །མར་ལ་བཏགས་པའི་གུ་གུལ་དང་། །སཱ་ལའི་ཐང་ཆུ་ལ་སོགས་པ། །གསང་སྔགས་ལྷ་ཡི་བྱེ་བྲག་གིས། །སྦྱིན་སྲེག་ལ་ནི་དབུལ་བར་བྱ། །དྲི་དང་མེ་ཏོག་ [214b.2]སོགས་མཆོད་པ། །ལས་ཐུན་རང་སྔགས་ཇི་བཞིན་བཟླ། །རྫས་རྣམས་ཀྱི་ནི་མཚན་ཉིད་དོ། །ཞི་བ་ལ་ནི་མཆོད་སྦྱིན་གྱི་ཤིང་སྲོག་ཆགས་མེད་པ་རྣམས་ལ་ཐབ་ཁུང་ལས་ཅུང་ཟད་དམའ་བའམ། དགོན་པའི་བ་ལང་གི་ལྕི་བའི་བུད་ཤིང་བྱའོ། །རྒྱས་པ་ལ་ནི་དགོན་པའི་བ་ལང་གི་ [214b.3]ལྕི་བ་མ་གཏོགས་པ་ཇི་སྐད་དུ་བཤད་པའི་བུད་ཤིང་རྣམས་འབྲས་བུ་དང་བཅས་པའོ། །མངོན་སྤྱོད་ལ་ནི་ཁ་བ་དང་། ཚ་བ་དང་། དྲི་མི་ཞིམ་པའི་བུད་ཤིང་དང་དུར་ཁྲོད་ཀྱི་ཤིང་ངམ། བོང་བུ་དང་རྔ་མོ་ལ་སོགས་པའི་རྟུག་པའམ། ཤིང་ཤིན་ཏུ་སྐམས་པའོ། །དབང་དུ་བྱ་བ་ལ་ནི་ནི་མྦ་དང་། [214b.4]ཨ་མྲའི་ཤིང་དང་གཞན་ཡང་མེ་ཏོག་དང་བཅས་པའི་ཤིང་ངོ་། །དགུག་པ་ལ་ནི་ཚེར་མ་དང་བཅས་པའོ། །ལས་ཐམས་ཅད་པ་ལ་ནི་ལས་དང་རྗེས་སུ་མཐུན་པའི་བུད་ཤིང་གིས་བྱའོ། །བུད་ཤིང་གི་མཚན་ཉིད་དོ། །གསེར་རམ་དངུལ་ལམ་རྡོའམ་ཤིང་ངམ། སའི་རྡུལ་ལས་བྱས་ [214b.5]པའམ། དུང་ཆོས་སམ། ཉ་ཕྱིས་སམ། ཤེལ་ལས་བྱས་པའི་སྣོད་ལེགས་པར་བཀྲུས་པ་དྲི་ཞིམ་པའི་སྤོས་ཀྱིས་ལེགས་པར་བདུགས་པའི་མཆོད་ཡོན་གྱི་སྣོད་དུ་ཆུ་བོའམ། ལྟེང་ཀའམ། རྫིང་བུའམ། ཆུ་མིག་གམ། ཁྲོན་པའམ། གཡའ་ཆུའམ། བཀོད་མ་ལ་སོགས་པའི་ཆུ་ངོགས་ [214b.6]གཙང་མ་སྐྱེ་བོ་མང་པོས་བསྟེན་པ་མ་ཡིན་པ། རྒྱལ་པོ་དང་ཉེ་བ་མ་ཡིན་པ། བ་ལང་དང་། བོང་བུ་དང་། ར་ལུག་དང་། རྟ་དང་། མ་ཧེ་དང་གླང་པོ་ཆེ་རྣམས་ཀྱིས་སྨོས་པར་མ་བྱས་པའི་ཆུ་ངོགས་ལས། ཆུ་ཤིན་ཏུ་དང་བ། སྣོད་གཞན་གྱིས་མ་རེག་པ། རིགས་ངན་དང་། །སྨེ་ཤ་ [214b.7]ཅན་དང་བཅས་པས་བསྟེན་པའམ། ངན་ཅིང་དམན་པ་ལ་འཇུག་པ་དང་། མིའུ་ཐུང་དང་། ཞར་བ་དང་། །ལོང་བ་དང་། མཛེ་ཅན་དང་། ཤ་བཀྲ་ལ་སོགས་པའི་ནད་ཀྱིས་ཡོངས་སུ་གདུངས་པ་རྣམས་ཀྱིས་མ་མཐོང་ཞིང་མ་རེག་པའི་ཆུས་མཆོད་ཡོན་གྱི་སྣོད་བཀང་ལ། ཙནྡན་དང་། [215a] [215a.1]ག་ཕུར་གྱིས་བསྒོས་ཤིང་། །ཛཱ་ཏི་དང་མ་ལི་ཀ་ལ་སོགས་པའི་མེ་ཏོག་གིས་བརྒྱན་པ། སྤོས་དྲི་ཞིམ་པོས་བདུགས་པའི་མཆོད་ཡོན་ལེགས་པར་བརྡུངས་པའི་གསེར་གྱི་གདུ་བུ་དང་། གསང་བྱེད་ལ་སོགས་པ་བཏགས་པའི་ལག་པ་དང་། རང་གི་ལྷའི་སྔགས་ [215a.2]སམ། །རང་གི་རྟོག་པ་ལས་བཤད་པའི་སྔགས་ལན་བདུན་བཟླས་ལ་གཡོན་ཕྱོགས་སུ་གཞག་པར་བྱའོ། །ཞི་བ་ལ་ནི་དྲི་དཀར་པོ་ལ་སོགས་པ་དང་སྦྱར་བའི་ཆུ་རང་གི་ལྷའི་སྔགས་སྭཱ་ཧཱའི་མཐའ་དང་བཅས་པས་བཟླས་པར་བྱའོ། །དེ་བཞིན་དུ་རྒྱས་པ་ལ་ནི་སེར་པོ་ལ་སོགས་པ་དང་སྦྱར་ [215a.3]བའི་ཆུ་ཏིལ་དང་ཞོ་རུ་བཅས་པ་ཨོཾ་གྱི་མཐའ་དང་བཅས་པས་བཟླས་པ་བྱའོ། །མངོན་སྤྱོད་ལ་ནི་དྲི་ནག་པོ་དང་སྦྱར་བའི་ཆུ་ཁྲག་དང་། ཀོ་ཏྲ་པ་དང་། བ་གཅིན་དང་བཅས་པ་ལ་ཕཊ་ཀྱི་མཐའ་དང་བཅས་པས་བཟླས་པ་བྱའོ། །དབང་ལ་ནི་དྲི་དམར་པོ་ལ་སོགས་པ་དང་སྦྱར་བའི་ཆུ་བོའི་ [215a.4]མཐའ་དང་བཅས་པས་བཟླས་པ་བྱའོ། །དགུག་པ་ལ་ནི་ཛའི་མཐའ་དང་བཅས་པས་བཟླས་པ་བྱའོ། །ཐམས་ཅད་དུ་ཡང་དྲི་ལ་སོགས་པ་ནི་ལས་དང་རྗེས་སུ་མཐུན་པར་གཞག་པར་བྱའོ། །མཆོད་ཡོན་གྱི་མཚན་ཉིད་དོ། །དེ་ནས་ཞི་བ་དང་རྒྱས་པ་དང་དབང་དུ་བྱ་བ་ནི་རྡོ་རྗེ་གནོད་ [215a.5]སྦྱིན་དང་། རྡོ་རྗེ་རྩེ་མོ་གཉིས་ཀྱི་སྔགས་ཀྱིས་ལས་ཐམས་ཅད་པའི་ཆུའི་སྣོད་དང་། མཆོད་ཡོན་གྱི་སྣོད་ལ་བཟླས་ལ་རང་གི་གཡོན་ཕྱོགས་སུ་བཞག་ནས་དེ་དག་ཉིད་བཟླས་པའི་ཆུས་བསངས་པའི་བུད་ཤིང་ལ་སོགས་པ་སྦྱིན་སྲེག་གི་རྫས་རྣམས་རང་གི་གཡས་ཕྱོགས་སུ་གཞག་པར་ [215a.6]བྱའོ། །གསད་པ་དང་བསྐྲད་པ་དང་། རྣམ་པར་དབྱེ་བ་ལ་སོགས་པའི་ལས་རྣམས་ལ་ནི་བསད་པ་དང་། དགོད་པ་གོ་བཟློག་སྟེ་བྱའོ། །ཨོཾ་བཛྲ་ཡཀྵ་ཧཱུཾ་རྡོ་རྗེ་གནོད་སྦྱིན་གྱི་སྔགས་སོ། །རྡོ་རྗེ་ཁུ་ཚུར་གཉིས་ལས་མཐེའུ་ཆུང་གི་རྩེ་མོ་གཉིས་མཆེ་བར་བྱ་སྟེ། ཁར་གཞག་པ་འདི་ [215a.7]ནི་འདིའི་ཕྱག་རྒྱའོ། །ཨོཾ་བཛྲ་ཤི་ཁ་རེ་རུ་ཊ་མ་ཊ་ཞེས་བྱ་བ་ནི་རྡོ་རྗེ་རྩེ་མོའི་སྔགས་སོ། །རྡོ་རྗེ་ཁུ་ཚུར་གཉིས་རི་འདེགས་པར་བྱ་བ་ནི་འདིའི་ཕྱག་རྒྱའོ། །རྫས་གཞག་པའི་མཚན་ཉིད་དོ། །ཞི་བ་ལ་ནི་རང་གི་ལྷའི་ཆོས་ཀྱི་ཡི་གེ་ལས་ཐབ་ཁུང་བསྐྱེད་ལ་དེའི་དབུས་སུ་ཡི་གེ་རཾ་སུམ་མདོ་ [215b] [215b.1]རིས་མཚན་དང་བཅས་པས་ཨོཾ་ལས་བྱུང་བའི་པདྨའི་སྟེང་དུ་གནས་པའི་ཨི་ལས་བྱུང་བའི་འོད་ཀྱི་དཀྱིལ་འཁོར་གྱི་ནང་ན་ཆུའི་དཀྱིལ་འཁོར་གྱི་དབུས་སུ་གནས་པ་དུང་དང་། ཀུནྡ་ལྟ་བུའི་པ་པ་ཀཱི་མེ་མིག་གསུམ་པ་རལ་པ་དང་ཅོད་པན་དུ་ལྡན་པ་ལག་པ་བཞི་གཡས་པས་དབྱུག་ [215b.2]པ་དང་། མི་འཇིགས་པ་སྦྱིན་པ། །གཡོན་ན་གུནྡྷེ་དང་ཕྲེང་བ་ཐོགས་པ་རྒྱན་དང་གོས་དང་། མཆོད་ཕྱིར་ཐོགས་པ་དཀར་པོ་དང་ལྡན་པ། ལུས་ཀྱི་ཡན་ལག་ཐམས་ཅད་ནས་བདུད་རྩིའི་རང་བཞིན་གྱི་འོད་ཟེར་དཀར་པོ་འཕྲོ་བར་བསམ་པར་བྱའོ། །རྒྱས་པ་ལ་ནི་དེ་བཞིན་དུ་ [215b.3]འོད་ཀྱི་དཀྱིལ་འཁོར་གྱི་ནང་ན་དབང་ཆེན་གྱི་དཀྱིལ་འཁོར་དེའི་དབུས་ན་རྒྱས་པའི་མེ་དབང་ཆེན་ཞེས་བྱ་བ་རལ་པ་དང་ཅོད་པན་ཐོགས་པ་མིག་གསུམ་པ། ཕྱག་བཞི་པ་གཡས་ན་དབྱུག་པ་ཐོགས་པ་དང་། མི་འཇིགས་པ་སྦྱིན་པ་གཡོན་ན་ཕྲེང་བ་དང་གུནྡྷེ་ཐོགས་པ་རྒྱན་ [215b.4]དང་གོས་དང་། མཆོད་ཕྱིར་ཐོགས་སེར་པོར་ལྡན་པ། འོད་ཟེར་སེར་པོ་གཏོང་བའི་ཚོགས་ཀྱིས་སེམས་ཅན་མ་ལུས་པའི་ཁམས་ཀྱི་སྟོབས་དང་། ཁ་དོག་དང་། དཔལ་རྫོགས་པར་བྱེད་པའི་ཡེ་ཤེས་ཀྱི་མེ་བསམ་པར་བྱའོ། །དབང་དུ་བྱ་བ་ལ་ནི་དེ་བཞིན་དུ་འབར་བའི་ [215b.5]དཀྱིལ་འཁོར་གྱི་ནང་ན་མེའི་དཀྱིལ་འཁོར་གྱི་སྟེང་ཁ་དོག་དམར་ཞིང་ཉི་མ་འཆར་ཀ་ལྟ་བུར་འོད་ཟེར་དམར་པོ་རབ་ཏུ་འགྱེད་པ། ལག་པ་བཞི་པ་གཡས་ན་དབྱུག་པ་དང་། ལྕགས་ཀྱུ་འཛིན་པ། གཡོན་ན་ཞགས་པ་དང་གུནྡྷེ་ཐོགས་པ། རྒྱན་དང་གོས་དང་ཕྲེང་བ་དང་། དྲི་དང་ [215b.6]བྱུག་པ་དང་། མཆོད་ཕྱིར་ཐོགས་པ་དམར་པོ་དང་ལྡན་པ་མིག་གསུམ་པ། རལ་པའི་ཚོགས་དང་། ཅོད་པན་དང་ལྡན་པའི་དབང་གི་མེ་དབང་གི་ལས་ལ་བསྒོམ་པར་བྱའོ། །མངོན་སྤྱོད་ལ་ནི་དེ་བཞིན་དུ་འབར་བའི་དཀྱིལ་འཁོར་གྱི་ནང་དུ་རླུང་གི་དཀྱིལ་འཁོར་གྱི་སྟེང་ [215b.7]དུ་ཧཱུཾ་ལས་བྱུང་བའི་མིག་གསུམ་པ། ལག་པ་བཞི་པ་དུ་བའི་མདོག་ཅན་མི་གཡོ་བ། གཡས་ན་རལ་གྲི་དང་དབྱུག་པ་ཐོགས་པ། གཡོན་ན་ཞགས་པ་དང་གུནྡྷེ་ཐོགས་པ། སྐྲ་ཁམ་པ་གྱེན་དུ་འབར་བ་ཤས་ཆེར་ཁྲོ་ཞིང་མིག་དམར་བ་མཆེ་བ་གཙིགས་པ་ [216a] [216a.1]བཞིན་རྣམ་པར་འགྱུར་བ། ཁྲོས་ཤིང་ཤས་ཆེར་འཇིགས་སུ་རུང་བ་རྒྱན་དང་གོས་དང་། མཆོད་ཕྱིར་ཐོགས་ལ་སོགས་པ་ནག་པོ་དང་ལྡན་པ། འོད་ཟེར་ནག་པོའི་ཕྲེང་བ་རྣམས་ཀྱིས་སྲིད་པ་གསུམ་ཁྱེད་པར་བྱེད་པའི་རླུང་ཞེས་བྱ་བའི་མེ་གསད་པ་ལ་སོགས་པའི་ [216a.2]གདུག་པའི་ལས་རྣམས་ལ་བསྒོམ་པར་བྱའོ། །དེ་ལ་ཞི་བ་ལ་ནི་འོ་མ་ཅན་གྱི་ཤིང་ལས་བྱུང་བའི་མེའམ་རྒྱུན་བཞག་གི་མེའམ། བྲམ་ཟེ་ཐ་མལ་པའི་མེས་བྱའོ། །རྒྱས་པ་ལ་ནི་རྒྱལ་པོའམ། རྒྱལ་རིགས་ཀྱི་ཁྱིམ་ནས་བྱུང་བའི་མེའམ། དགོན་པའི་མེའམ་ནགས་ [216a.3]མཆེད་པའི་མེས་བྱའོ། །མངོན་སྤྱོད་ལ་ནི་དུར་ཁྲོད་ཀྱི་མེའམ། རུས་པའམ་རྡོ་ལས་བྱུང་བའི་མེའམ། གདོལ་པའི་ཁྱིམ་ལས་བྱུང་བའི་མེས་བྱའོ། །དབང་ལ་ནི་སྨད་འཚོང་མའམ། རྗེའུ་རིགས་ཀྱི་ཁྱིམ་ལས་བྱུང་བའི་མེས་བྱའོ། །དགུག་པ་ལ་ནི་གར་མཁན་དང་རོལ་ [216a.4]མོ་པའམ། ལམ་དུ་བུས་པའི་མེས་བྱའོ། །མེའི་མཚན་ཉིད་དོ། །དགང་གཟར་ནི་གསེར་རམ་དངུལ་གྱི་རྒྱུ་ལས་བྱས་པའམ། མཆོད་སྦྱིན་གྱི་ཤིང་ལས་བྱས་པ་པདྨའི་འདབ་མའི་དབྱིབས་ལྟ་བུ་དེའི་ཡུ་བ་སྐྱེས་བུ་ཚད་དང་ལྡན་པའི་མཐེ་བོ་སོར་སུམ་ཅུ་རྩ་བཞི་རྡོ་རྗེ་ཁུ་ཚུར་ [216a.5]ལ་སོགས་པས་གཟུང་དུ་རུང་བ། དེའི་རྩེ་མོའི་ཆར་སོར་བཞི་པ། ཁ་ཟུར་སོར་བཞི་པ། ཟབས་སུ་སོར་གཉིས་པ་དབུས་སུ་རྡོ་རྗེ་རྩེ་ལྔ་པས་མཚན་པ། ཁུ་བ་བྱུང་བའི་བུ་ག་སོར་གཅིག་ཙམ་དེའི་མཆུ་སོར་བཞི་པ་ལ་རྡོ་རྗེ་རྩེ་གསུམ་པས་མཚན་པ། ཡུ་བའི་འོག་ཏུ་རྡོ་རྗེ་དང་རིན་ [216a.6]པོ་ཆེ་སོར་དྲུག་པ་བྱའོ། །བླུགས་གཟར་ནི་ཡུ་བ་ཁྲུ་གང་ཙམ་པདྨའི་དབྱིབས་ལྟ་བུ་ལ་ཁའི་རྒྱར་སོར་གཉིས་པ། ཟབས་སུ་སོར་གཅིག་པ་དབུས་སུ་རྡོ་རྗེ་རྩེ་ལྔ་པས་མཚན་པ་ཡུ་བའི་འོག་ཏུ་རྡོ་རྗེ་དང་རིན་པོ་ཆེ་བྱའོ། །དགང་གཟར་མེད་ན་སོར་མོ་ལྔ་གཞིབས་ནས་དགང་ [216a.7]བླུགས་བྱས་ལ། སྲིན་ལག་དང་གུང་མོ་དང་མཐེ་བོ་གཞིབས་པས་ནི་སྲེག་བླུགས་ཅིག་ཤོས་བྱའོ། །དགང་གཟར་དང་བླུགས་གཟར་གྱི་མཚན་ཉིད་དོ། །དེ་ནས་ལེགས་པར་ཁྲུས་བྱས་ཤིང་ཡན་ལག་དྲིས་བསྒོས་ལ་ཇི་སྐད་དུ་བཤད་པའི་རྒྱན་དང་། གོས་ལ་སོགས་པ་ [216b] [216b.1]དང་ལྡན་པས་ཞི་བ་དང་། རྒྱས་པ་དང་། དབང་དང་མངོན་སྤྱོད་དང་། དགུག་པ་དང་། དབྱེ་བ་དང་། བསྐྲད་པའི་བསམ་པས་སྦྱིན་སྲེག་གི་ལས་བྱ་བ་དང་ལྡན་ཞིང་རང་གི་ལྷའི་སྦྱར་བ་དང་ལྡན་པས་ལས་དང་རྗེས་སུ་མཐུན་པའི་ཡིད་ཀྱིས་འཇིགས་པ་མེད་པར་སེམས་ཅན་ཐམས་ [216b.2]ཅད་ལ་ཕན་པར་བརྩོན་པས་ཇི་སྐད་དུ་གསུངས་པ་ཐམས་ཅད་བྱའོ། །དེ་ལ་ཞི་བ་ལ་ནི་གོས་དང་ཅོད་པན་དང་། རྒྱན་དཀར་པོ་དང་ལྡན་ཞིང་གསང་བྱེད་དང་བཅས་པ་གདུ་བུ་དང་བཅས་པས་ཇི་སྐད་དུ་བཤད་པའི་བསྲུང་བའི་ཆོ་ག་དང་བཟླས་བརྗོད་བྱ་ཞིང་བྱམས་པ་ཆེན་པོ་དང་ལྡན་ [216b.3]པས་མི་སྨྲ་བར་འཇམ་ཞིང་བདེ་པའི་སྟན་ནང་ཚངས་ཅན་ལ་པདྨའི་འདུག་སྟངས་ཀྱིས་འདུག་ནས། ལག་པའི་པདྨ་གཉིས་ཀྱི་གྲུ་མོའི་མཐར་ཐུག་གི་བར་དུ་དྲི་ཞིམ་པོས་ལེགས་པར་བྱུགས་ལ། ཕྱི་དྲོའི་དུས་སུ་ཤར་དུ་བལྟས། བློས་བསྒྲུབ་པར་བྱ་བ་དམིགས་ནས་ཡར་གྱི་ངོའི་ཚེས་ [216b.4]གཅིག་ནས་བརྩམས་ཏེ། ཇི་སྲིད་བདག་གམ་གཞན་ཞི་བར་མངོན་པར་འདོད་པ་ཞི་བར་གྱུར་པ་དེ་སྲིད་དུ་ཞི་བའི་ལས་བྱའོ། །རྒྱས་པ་ལ་ནི་དེ་བཞིན་དུ་ཕྲེང་བ་དང་། བྱུག་པ་དང་གོས་སེར་པོ་དང་། རྒྱན་སྣ་ཚོགས་པ་དང་ལྡན་པས་བཟང་པོའི་འདུག་སྟངས་དང་ཡིད་རབ་ཏུ་ [216b.5]དགའ་བས་ཟླ་བ་ཉ་ནས་བརྩམས་ཏེ། ཕྱི་མའི་ཉའི་བར་དུ་ཇི་སྲིད་དུ་མངོན་པར་འདོད་པ་རྒྱས་པར་གྱུར་པ་དེ་སྲིད་དུ་བྱང་དུ་ཁ་བལྟས་ཏེ། དགའ་བ་དང་ལྡན་པས་སྔ་དྲོའི་དུས་སུ་རྒྱས་པའི་ལས་བྱའོ། །མངོན་སྤྱོད་ལ་ནི་ཁྲོས་ཤིང་རྒྱན་དང་གོས་སྔོན་པོའམ། ཁྲག་གིས་སྦགས་པའི་གོས་ [216b.6]བགོས་ལ་སྟན་སྲ་བ་ལ་ལྷོ་ཕྱོགས་སུ་ཁ་བལྟས་ཏེ། བསྒྲུབ་པར་བྱ་བའི་གཟུགས་བརྙན་གྱི་བྲང་ལ་མནན་པའམ། སྟན་མེད་པར་རྐང་པས་རྐང་པ་མནན་ཞིང་། སོས་སོ་འཆའ་བ་དང་། མིག་མི་འགུལ་བ་དང་། གདོང་གཉེར་མ་བསྙེར་བ་དང་། སྙིང་རྗེ་ཆེན་པོས་དཀོན་ [216b.7]མཆོག་གསུམ་ལ་གནོད་པར་བྱེད་པའི་བདུད་དང་དགྲ་རྣམས་བཟློག་པར་བྱ་བའི་ཕྱིར། ཟླ་བ་མར་ངོའི་ཉིན་ཞག་གང་ཡང་རུང་བ་ལ་ཁྲོ་བོ་ཉིད་ཚད་མར་བྱ་སྟེ། ཉི་མ་གུང་ངམ་མཚན་ཕྱེད་ལ་མངོན་སྤྱོད་ཀྱི་ལས་བྱའོ། །དབང་ལ་ནི་ཁྲོ་བ་མེད་པ་དང་། མངོན་པའི་ང་རྒྱལ་ [217a] [217a.1]མེད་པར་སེམས་ཅན་མ་ལུས་པ་གདོན་པ་ལ་ཆགས་པས་གོས་རྒྱན་དམར་པོ་དང་ལྡན་པས་སྟན་བདེ་བ་ལ་རྡོ་རྗེ་སྐྱིལ་མོ་ཀྲུང་དུ་འདུག་སྟེ། ཁ་ནུབ་བམ་བྱང་དུ་བལྟས་ལ་དགུག་པ་ལ་སོགས་པའི་ལས་བྱའོ། །ལས་དང་རྗེས་སུ་མཐུན་པའི་ཚུལ་གྱིས་ཕྱི་རོལ་ [217a.2]གྱི་སྤྲུལ་པའི་མེ་ལྷ་ལ་བོད་པར་བྱ་སྟེ། རྡོ་རྗེ་གནོད་སྦྱིན་གྱི་སྔགས་དང་ཕྱག་རྒྱས་སྦྱངས་ལ་དེ་བཟླས་པའི་ཆུ་ཀུ་ཤའི་རྩེ་མོས་བླངས་བས་སྐོར་ཕྱོགས་སུ་ལན་གསུམ་བསངས་ལ་གཙང་ཞིང་སྐམ་པའི་རྩྭ་དང་བཅས་པའི་བུད་ཤིང་བཙུག་ལ་རླུང་ཡབ་ཀྱིས་རླུང་དང་། ཨོཾ་ཛྭ་ལ་ཧཱུཾ་ [217a.3]ཞེས་བྱ་བའི་གསང་སྔགས་ཀྱིས་སྦར་ལ། དམ་ཚིག་སེམས་དཔའ་ཐབ་ཀྱི་དབུས་སུ་བསམས་ནས། ཕྱག་རྒྱ་འདི་སྔགས་དང་བཅས་པས་ཡེ་ཤེས་སེམས་དཔའ་སྤྱན་དྲང་བར་བྱའོ། །ལག་པ་གཡས་པ་མི་འཇིགས་པར་བྱས་ལ། མཐེ་བོའི་རྩེ་མོ་སྲིན་ལག་གི་ཚིགས་ [217a.4]ཀྱི་རྩ་བར་བཞག་ལ་དགུག་པའི་ཚུལ་གྱིས་ཡང་དང་ཡང་དུ་བསྐྱོད་ལ་མངོན་པར་འདོད་པའི་མེའི་སྔགས་འདོན་ཞིང་སྤྱན་དྲང་བར་བྱའོ། །ཨེ་ཧྱེ་ཧི་མ་ཧཱ་བྷཱུ་ཏ་དེ་བ་རྀ་ཥི་དཱི་ཛ་ས་ཏ་མ། གྲྀ་ཧི་ཏྭཱ་ཧུ་ཏི་མ་ཧཱ་ར་སྨིན་སནྣི་ཧི་ཏོ་བྷ་བཱ། ཨོཾ་པཱ་པ་ཀ་ཨགྣ་ཡེ་སྭཱ་ཧཱ་ཞི་བ་ལའོ། །རྒྱས་པ་ལ་ [217a.5]ནི་དེ་བཞིན་དུ། ཨོཾ་མ་ཧེ་ནྡྲ་ཨགྣ་ཡེ་སྭཱ་ཧཱ། དབང་ལ་ནི། ཨོཾ་ཀ་མ་ཨགྣ་ཡེ་སྭཱ་ཧཱ། མངོན་སྤྱོད་ལ་ནི། ཨོཾ་ཀྲོ་དྷ་ཨགྣ་ཡེ་ཛ་ཧི་ཏྲོ་ཏྲ་ཡ་ཧཱུཾ། ཆེ་གེ་མོ་མཱ་ར་ཡ་ཧཱུཾ་ཕཊ། མེ་ལྷ་འོངས་པ་དང་། སྔར་བཤད་པའི་བསང་གཏོར་གྱི་ཆོ་གས་བསངས་ལ་མཆོད་ཡོན་དབུལ་ལོ། །ཨི་ཡཾ་ཨ་རྒྷཾ་ [217a.6]མཱ་ཡཾ་ད་ཏྟཾ་གྲྀ་ཧྞ་སིདྡྷི་མྨེ་པྲ་ཡཙྪ་སྭཱ་ཧཱ་ཞེས་བརྗོད་ལ་ལག་པ་གཉིས་ཀྱིས་མདུན་དུ་མཆོད་ཡོན་ཕུལ་ལ། ཞབས་ལ་ཞབས་བསིལ་དབུལ་ལོ། །སྤྱན་དྲང་བ་ལ་སོགས་པའི་ཆོ་གའོ། །དེ་ནས་ཇི་སྐད་དུ་བཤད་པའི་བསྲུང་བ་དང་མཆོད་པ་ལ་སོགས་པ་བྱས་ལ། རིགས་ཐམས་ [217a.7]ཅད་ཀྱི་བདག་པོ་ཉིད་དུ་གྱུར་པས། རྗེ་བཙུན་འཇམ་དཔལ་གྱི་སྙིང་པོ་ལན་བདུན་བཟླས་པའི་མར་གྱིས་ཉེ་བར་གསལ་བར་སྦར་ལ། དེའི་ལྕེ་དང་དགང་གཟར་དང་བླུག་གཟར་གྱི་ཁ་ལ་དེ་ཉིད་ཀྱི་ས་བོན་རྣམ་པར་བཀོད་དེ། བརླ་དང་། པུས་མོ་གཉིས་ཀྱི་བར་དུ་ལག་ [217b] [217b.1]པ་བཅུག་ལ་དང་པོར་བླུགས་གཟར་གྱིས་མར་གྱི་དགང་བླུགས་གསུམ་ཞི་བ་དང་། རྒྱས་པ་དང་དབང་དང་དགུག་པའི་ལས་ལ་ཞལ་ཅུང་ཟད་གདངས་པར་དབུལ་ལོ། །མངོན་སྤྱོད་ལ་ཤིན་ཏུ་གདངས་པར་དུག་དང་བཅས་པའི་ཡུངས་མར་དབུལ་ལོ། །གནས་སྐབས་ [217b.2]འདིར་བཅོམ་ལྡན་འདས་ཀྱིས་ཕྱག་ན་རྡོ་རྗེ་དབང་བསྐུར་བའི་རྒྱུད་ལས་གསུངས་པ། ལ་ལ་ནི་སྤྱན་གཉིས་ལ་དབུལ་བར་བྱ་སྟེ། བལྟས་པ་ཙམ་ཉིད་ཀྱིས་ཚིམ་པར་འགྱུར་བའི་ཕྱིར་རོ། །ལ་ལ་ནི་དཔྲལ་བར་རོ། །ལ་ལ་ནི་མགོ་ལའོ། །ལ་ལ་ནི་ཐུགས་ཀར་རོ། ། [217b.3]ལ་ལ་ནི་ལྟེ་བའི་གནས་སུའོ། །ལ་ལ་ནི་མདུན་དུ་དབུལ་བར་བྱའོ་ཞེས་སྣ་ཚོགས་པར་རྟོག་པར་བྱེད་པའི་གནས་རབ་ཏུ་དགག་པར་བྱ་བའི་ཕྱིར། ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའི་སྡེ་སྣོད་ཤིན་ཏུ་རྒྱས་པ་ཞེས་བྱ་བའི་རྒྱུད་ཆེན་པོ་ལས་གནས་ཀྱི་ [217b.4]ངེས་པ་མཛད་པ་ཡིན་ཏེ། དེ་ལས་གསུངས་པ། ཟས་ནི་ཟོས་པར་གྱུར་པ་ཡིས། །ཡིད་དགའ་བ་ལ་སོགས་པར་འགྱུར། །དེ་བས་འབད་པ་ཆེན་པོ་ཡིས། །སྦྱིན་སྲེག་ལས་ནི་ངེས་པར་བྱ། །ཞེས་གསུངས་ཏེ། དེ་བས་ན་ཟས་ཀྱི་བྱ་བ་བྱེད་པར་བསམ་པར་བྱའོ། ། [217b.5]དེའི་རིམ་པ་ནི་འདི་ཡིན་ཏེ། ཇི་ལྟར་འཁོར་ལོས་སྒྱུར་བ་གླིང་བཞིའི་དབང་ཕྱུག་གི་རྒྱལ་པོ་ནི་རིན་པོ་ཆེ་བདུན་གྱི་རྒྱུ་ལས་བྱས་པའི་སྣོད་ཀྱི་ནང་དུ་ཁ་དོག་དང་དྲི་དང་རོ་རྣམས་དང་ལྡན་པ་ཕན་ཞིང་བདེ་བར་རྣམ་པར་འཇུ་བའི་ཟས་ལ་སྤྱོད་པར་བྱེད་དོ། །དེ་བཞིན་དུ་གསང་སྔགས་ [217b.6]ཀྱི་འཁོར་ལོས་སྒྱུར་བ་ཆེན་པོ་ཡང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་རང་བཞིན་གྱིས་འོད་གསལ་བའི་རྣམ་པར་ཐར་པའི་སྒོ་བཞིའི་ངོ་བོ་ཉིད་ཀྱི་ཕྱག་རྒྱ་བཞི་པའི་གླིང་ཆེན་པོ་བཞིར་གསང་སྔགས་ཀྱི་རྒྱལ་པོ་ཆེན་པོ་མཛད་པ། བྱང་ཆུབ་ཀྱི་ [217b.7]ཡན་ལག་བདུན་གྱི་རིན་པོ་ཆེའི་སྣོད་དུ་གསང་སྔགས་ཀྱི་ཡི་གེ་ཐམས་ཅད་དང་ལྡན་པ་དྲི་ང་བ་ཐམས་ཅད་དང་བྲལ་བའི་ཚུལ་ཁྲིམས་ཀྱི་དྲི་དང་ལྡན་པ་ཞི་བ་དང་། དྲག་པོ་ལ་སོགས་པའི་རོ་ཐམས་ཅད་དང་ལྡན་པ་སེམས་ཅན་ཐམས་ཅད་ལ་ཕན་པ་དང་བདེ་བར་རྣམ་པར་ [218a] [218a.1]སྨིན་པའི་ཡེ་ཤེས་ཀྱི་བདུད་རྩི་ལ་ལོངས་སྤྱོད་དོ། །སྣོད་རྣམས་ནི་ལས་དང་རྗེས་སུ་མཐུན་པར་བྱ་སྟེ། དེ་ལ་སྣོད་ཀྱི་ངེས་པའི་རིམ་པ་འདི་ཡིན་ནོ། །ཞི་བ་ལ་ནི་དངུལ་གྱི་སྣོད་དོ། །རྒྱས་པ་ལ་ནི་གསེར་གྱི་སྣོད་དོ། །དབང་ལ་ནི་ཟངས་ཀྱི་སྣོད་དོ། ། [218a.2]མངོན་སྤྱོད་ལ་ནི་ཁར་བའི་སྣོད་དམ་ལྕགས་ཀྱི་སྣོད་ཀྱི་ཕྱི་རོལ་གྱི་སྦྱིན་སྲེག་གི་ཆོ་ག་ལ་བརྟག་པར་བྱའོ། །ནང་གི་སྦྱིན་སྲེག་གི་རིམ་པ་ནི་འདི་ཡིན་ནོ། །འདི་ལྟར་ཕྱི་རོལ་གྱི་སྦྱིན་སྲེག་ལ་ལས་དང་རྗེས་སུ་མཐུན་པར་སྣོད་རྣམས་བསམས་ལ་ལག་པ་གཡས་པའི་མཐེ་བོ་དང་། [218a.3]མཐེའུ་ཆུང་ལྕགས་སྒྲོག་ཏུ་སྤྲེལ་པས། བླུགས་གཟར་བཟུང་ལ་སོར་མོ་ལྷག་མ་རྣམས་ཡུ་བའི་སྟེང་དུ་བཞག་ལ། ཤིན་ཏུ་སྦྱངས་ཤིང་ལེགས་པར་བཞུ་བའི་མར་གྱི་དགང་བླུགས་ཕུལ་ལ་དགེ་བ་དང་མི་དགེ་པའི་མཚན་མ་བརྟག་པར་བྱའོ། །དབྱིབས་དང་མདོག་དང་མདོག་དང་དྲི་དག་ [218a.4]ལས། །དགེ་དང་མི་དགེ་ཡོངས་བརྟགས་ལ། །དང་པོ་བྱས་ནས་ཤེས་བྱས་ལ། །མཚན་མ་ངན་པ་ཞི་བྱའི་ཕྱིར། །ཞི་བ་ཡི་ནི་ཆོ་ག་ཡིས། །མཉམ་པར་བཞག་ལ་སྦྱིན་སྲེག་བྱ། །ཉེས་པའི་དོགས་པ་ལས་འདས་ན། །ཕྱི་ནས་ལས་རྣམས་བརྩམ་པར་བྱ། །དབྱིབས་ [218a.5]ནི་གླང་པོ་ཆེ་དང་། རྟ་དང་། ཁྱུ་མཆོག་དང་། རྡོ་རྗེ་དང་། དུང་དང་། པདྨ་དང་། ཉ་དང་། དཔལ་བེའུ་དང་། གདུགས་དང་། རྒྱལ་མཚན་དང་། བུམ་པ་དང་། གཡུང་དྲུང་དང་། །དགང་གཟར་དང་། བླུགས་གཟར་ལྟ་བུ་བསྔགས་སོ། །མདོག་ནི་མཐོན་ཀ་དང་། [218a.6]དཀར་པོ་དང་། བྱི་རུ་བཅག་པ་ལྟ་བུ་དང་། ལྷམ་བུ་ཆུ་གཤེར་དང་། ལེ་བརྒན་རྩི་དང་། བཻ་ཌཱུརྱ་དང་། གསེར་ཞུན་མ་ལྟ་བུ་དང་། ཉི་མ་འབར་བ་དང་། གཡས་སུ་འཁྱིལ་ཞིང་ཤིན་ཏུ་སྣུམ་པ་བསྔགས་སོ། །སྒྲ་ནི་ཆར་སྤྲིན་གྱི་འབྲུག་སྒྲ་དང་། རྒྱ་མཚོ་དང་། དུང་དང་། པི་ [218a.7]ཝང་དང་། གླིང་བུ་དང་། རྫ་རྔ་དང་། རྔ་བོ་ཆེ་དང་། རྔ་རིངས་དང་། ཁྱུ་མཆོག་དང་། དཀྱིལ་འཁོར་དང་། ཀ་ལ་པིངྐ་དང་། ངང་པ་དང་རྨ་བྱ་ལ་སོགས་པ་ལྟ་བུར་ཡིད་དུ་འོང་བའི་སྒྲ་དག་བསྔགས་སོ། །དྲི་ནི་པདྨ་དང་། ཨུཏྤལ་དང་། ཀུ་མུ་ཏ་དང་། དྲི་བཟངས་དང་། [218b] [218b.1]ཙམ་པ་ཀ་དང་། བ་ཀུ་ལ་དང་། མ་ལ་ཏི་དང་། པ་ལ་ཡ་དང་། གུར་ཀུམ་དང་། གླ་རྩི་ལ་སོགས་པ་དང་མཚུངས་པའི་དྲི་བསྔགས་སོ། །དེ་དག་ལས་བཟློག་པ་ནི་བསྔགས་པ་མ་ཡིན་ཏེ། དབྱིབས་ནི་མདུང་རྩེ་ལྟ་བུ་དང་། ཞིབ་མ་ལྟ་བུ་དང་། བ་ལང་གི་མགོ་ལྟ་བུ་ལ་སོགས་ [218b.2]པ་ནི་མི་ཤིས་ཤིང་སྨད་པར་བྱ་བ་ཡིན་ནོ། །མདོག་ནི་ཁ་དོག་ངན་པ་དང་། །ལྗང་བ་དང་། སྔོན་པོ་དང་། ནག་པོ་དང་། དུད་ཀ་དང་། ཏིལ་མར་དང་། རྩུབ་པ་དང་། པ་ལ་ཤ་ལ་སོགས་པའི་མདོག་ནི་མི་ཤིས་སོ། །དྲི་ནི་མི་རོའི་དྲི་དང་། དྲི་ངན་པ་སྣ་ཚོགས་པའི་སྨད་པའི་རྡུལ་དང་། [218b.3]བྱི་ལ་དང་། མ་ཧེ་དང་། ཁྱི་དང་། སྦྲུལ་དང་། ཉའི་ཞག་ལ་སོགས་པའི་དྲི་ནི་སྨད་པ་ཡིན་ནོ། །སྒྲ་ནི་བོང་བུ་དང་། ཁྱི་དང་ཅེ་སྦྱང་ལ་སོགས་པ་དང་འདྲ་ཞིང་འུར་འུར་པོ་དང་། སིམ་སིམ་ཟེར་བའི་སྒྲ་ནི་མི་ཤིས་པ་ཡིན་ནོ། །དུ་བ་མང་བ་དང་། རྣམ་པར་འཕྲོ་བ་དང་། རིམ་གྱིས་ [218b.4]ལྡང་བ་དང་། ཅུང་ཟད་ཅུང་ཟད་འབར་བ་དང་། མེ་ལྕེ་འཆད་པ་དང་། གཟི་བརྗིད་མེད་པ་དང་། རྩུབ་ཅིང་གནག་པ་སྤྲིན་དང་། པ་ལ་ཤའི་མདོག་ཅན་ནི་སྨད་པར་བྱ་བ་ཡིན་ནོ། །དེ་ལྟར་བགེགས་དང་བཅས་ཤེས་ནས་རྡོ་རྗེ་གནོད་སྦྱིན་གྱི་སྔགས་དང་ཕྱག་རྒྱས་བསང་ཞིང་ [218b.5]རྣམ་པར་སྦྱངས་ལ་ཡང་དག་པར་གསུངས་ཏེ། མར་གྱི་དགང་བླུགས་བདུན་སྦྱིན་སྲེག་བྱའོ། །ཡང་རང་གི་སྔགས་ཀྱིས་བསངས་ལ། དང་པོར་བླུགས་གཟར་གྱིས་དགང་བླུགས་གསུམ་མམ། བདུན་མེའི་རང་གི་སྔགས་ཀྱིས་སྦྱིན་སྲེག་བྱས་ལ། བླུགས་གཟར་ [218b.6]ལ་སོགས་པས་མར་ལ་སོགས་པའི་དགང་བླུགས་གསུམ་མམ། བདུན་དབུལ་བར་བྱའོ། །འདིར་རིམ་པ་ནི་ཡམ་ཤིང་གིས་མེ་འབར་བ་བྱས་པ་ལ་མར་དང་། དེ་ནས་ཏིལ། དེའི་འོག་ཏུ་འབྲས་ཆན་ལ་སོགས་པ་དེ་ནས་ཞུ་བའི་རྫས་ཐམས་ཅད་ནི་ཞལ་དུ་བྱའོ། །ཡམ་ཤིང་དང་མི་རུས་ [218b.7]ཀྱི་ཕྱེ་མ་ལ་སོགས་པ་ནི་འོད་ཀྱི་དཀྱིལ་འཁོར་དུའོ། །ཞོ་དང་འབྲས་ཆན་ལ་སོགས་པའི་བཟའ་བ་དང་། འཐོར་འཐུང་དང་ཏིལ་ལ་སོགས་པ་ནི་ཕྱག་ཏུའོ། །དྲི་ནི་ཐུགས་ཀར་རོ། །མེ་ཏོག་ནི་དབུ་ལའོ། །བདུག་སྤོས་ནི་འོད་འབར་བ་ལའོ། །ཞབས་བསིལ་ནི་ཞབས་ལའོ། །མཆོད་ [219a] [219a.1]ཡོན་དང་མར་མེ་མདུན་དུ་དབུལ་བར་བྱའོ་ཞེས་ལ་ལ་དག་ཟེར་རོ། །དེ་ནས་འཐོར་འཐུང་དང་བསང་གཏོར་ལ་སོགས་པ་བྱས་ལ། མེ་ལྷ་ཐབ་ཁུང་དུ་འབར་བའི་རྣམ་པའམ། རང་གི་གཟུགས་ཀྱིས་མེའི་ཕྱོགས་སུ་གཞག་པར་བྱའོ། །འདི་ལ་ལོག་པར་ [219a.2]བསྒྲུབ་པ་དག་ཡོད་དེ། ལ་ལ་ནི་ཐབ་ཀྱི་ཕྱི་རོལ་དུ་མེའི་ཕྱོགས་སུ་འཇོག་པར་བྱེད་དོ། །ལ་ལ་ནི་གཤེགས་སུ་གསོལ་བ་དག་བྱེད་དོ། །ལ་ལ་ནི་ཐབ་ཁུང་དེ་ཉིད་ཀྱི་ནང་དུ་མེའི་ཕྱོགས་སུ་འཇོག་པར་བྱེད་དོ། །དེ་ལས་ཐབ་ཀྱི་ཕྱི་རོལ་དུ་འཇོག་པ་དང་གཤེགས་སུ་གསོལ་བ་ནི་ [219a.3]མི་རིགས་ཏེ། ལྷ་རྣམས་ཞལ་ནི་མེ་ཡིན་ཏེ། །སྦྱིན་སྲེག་དེ་ཉིད་མེ་ལ་གནས། །སྦྱིན་སྲེག་གིས་ནི་ཚིམ་བྱས་ནས། །དགྱེས་པས་དངོས་གྲུབ་སྟེར་བར་འགྱུར། །ཞེས་གསུངས་པས་མེས་སྟོང་པར་སྦྱིན་སྲེག་བྱེད་པ་ནི་མི་རོའི་ཁར་ཟན་སྟོབས་པ་དང་འདྲ་བར་དོན་མེད་པར་འགྱུར་ [219a.4]རོ། །བཅོམ་ལྡན་འདས་ཀྱིས་ཀྱང་། མེ་ཡི་གནས་ནི་མི་ཤེས་པར། །གང་ཞིག་སྦྱིན་སྲེག་ལས་བྱེད་པ། །དེ་ནི་སྦྱིན་སྲེག་ལས་བྱས་མིན། །ལས་ཀྱི་འབྲས་བུར་འགྱུར་མ་ཡིན། །ཞེས་གསུངས་སོ། །ཐབ་ཁུང་གི་ཕྱོགས་གཅིག་ཏུ་བཀོད་པ་དང་། འབར་བའི་རྣམ་པར་ [219a.5]ཡོངས་སུ་གྱུར་པར་བྱས་པ་ལ་ཡང་འཇིག་རྟེན་ལས་འདས་པའི་ལྷ་མི་སྣང་བར་འགྱུར་བས་མི་རིགས་སོ། །དེ་བས་ན་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་མེ་ལྕེ་ཡང་དག་པར་འབྱུང་བའི་ཆོས་ཀྱི་དབྱིངས་ཀྱི་ཡི་གེ་ཡོངས་སུ་གྱུར་པ། ཤེས་རབ་ཀྱི་ཕ་རོལ་དུ་ཕྱིན་པའི་ [219a.6]ངོ་བོ་ཉིད་ལས་མ་ལུས་པའི་གཞིར་གྱུར་པ། འཇིག་རྟེན་ལས་འདས་པའི་ཡེ་ཤེས་ཀྱི་མེའི་ཐུགས་ཀའི་ཟླ་བ་དང་། པདྨའི་སྟེང་དུ་རང་གི་ལྷའི་ས་བོན་གྱི་ཡི་གེ་ཡོངས་སུ་གྱུར་པའི་མཚན་མ་ལས་བྱུང་བའི་ལས་དང་རྗེས་སུ་མཐུན་པའི་རྒྱན་དང་ཁ་དོག་ལ་སོགས་པ་བསམས་ལ། [219a.7]ཡང་དག་པར་མཆོད་ཅིང་འཐོར་འཐུང་སྔོན་དུ་འགྲོ་བས་དགང་བླུགས་ལ་སོགས་པ་དབུལ་བར་བྱའོ། །མཆོད་ཡོན་དབུལ་བ་དང་། མེ་གནས་ཀྱི་མཚན་ཉིད་དོ། །དེ་ལ་ཞི་བ་ལ་ནི་རྡོ་རྗེ་རྩེ་མོའི་སྔགས་ཀྱིས་སྦྱིན་སྲེག་གི་ཡོ་བྱད་རྣམས་བསངས་ལ། མེ་ཐབ་ཀྱི་དབུས་སུ་སྐུ་ [219b] [219b.1]མདོག་དཀར་ཞིང་ཞི་བ། ན་བཟའ་དཀར་པོ་བསྣམས་པ། རྒྱན་གྱིས་བརྒྱན་པ། པདྨ་དཀར་པོ་ལ་བཞུགས་པར་ཨོཾ་བཛྲ་དྷཱ་ཏུ་སྭཱ་ཧཱ་ཞེས་བྱ་བ་འདིས་བཅོམ་ལྡན་འདས་རྣམ་པར་སྣང་མཛད་ཕྱག་གཉིས་བྱང་ཆུབ་མཆོག་གི་ཕྱག་རྒྱ་བཅས་པ་དང་ལྡན་པར་བསམ་པར་བྱའོ། ། [219b.2]རྒྱས་པ་ལ་ནི་དེ་བཞིན་དུ་བཅོམ་ལྡན་འདས་རིན་ཆེན་འབྱུང་ལྡན་ཞལ་དགྱེས་ཤིང་མགུ་བ། ན་བཟའ་སེར་པོ་བསྣམས་ཤིང་པདྨ་སེར་པོ་ལ་བཞུགས་པར་བསམ་པར་བྱའོ། །མངོན་སྤྱོད་ལ་ནི་དེ་བཞིན་དུ་གཤིན་རྗེ་གཤེད་དུ་འདུག་པ་རྒྱན་དང་། ན་བཟའ་ནག་པོ་དང་ལྡན་ཞིང་ [219b.3]ཁྲོས་པ་ཡི་གེ་ཧཱུཾ་ལས་བྱུང་བ་སྔར་བཤད་པའི་གདན་ལ་བཞུགས་པར་བསམ་པར་བྱའོ། །དབང་ལ་ནི་ཧོ་ལས་བཅོམ་ལྡན་འདས་རྡོ་རྗེ་ཆགས་པ་རྒྱན་དང་ན་བཟའ་དམར་པོ་དང་ལྡན་པར་བསམ་པར་བྱའོ། །དགུག་པ་ལ་ནི་དེ་བཞིན་དུ་ཡི་གེ་ཛ་ལས་རྡོ་རྗེ་རྒྱལ་པོ་བསམ་པར་བྱའོ། ། [219b.4]ཡང་ན་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཉིད་ཡིན་པས་རྗེ་བཙུན་འཇམ་དཔལ་ཉིད་ཞི་བ་ལ་སོགས་པའི་ལས་རྣམས་ལ་བསྒོམ་པར་བྱའོ། །དེ་ནས་ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་དང་། བུམ་པ་བཟང་པོ་དང་། རལ་གྲི་དང་། རྡོ་རྗེ་དང་རྐང་མགྱོགས་ [219b.5]དང་། ཚངས་པའི་སྐུད་པ་དང་། གསེར་འགྱུར་རྩི་དང་བཅུད་ལེན་ལ་སོགས་པ་དངོས་གྲུབ་ཆེན་པོ་བསྒྲུབ་པར་བྱ་བའི་ཕྱིར་ཆོ་ག་འདིས་གསང་སྔགས་ཚིམ་པར་བྱ་བ་དང་། གཟི་བྱིན་བསྐྱེད་པ་དང་། ཡང་དག་པར་འབར་བར་བྱས་ལ་དེའི་འོག་ཏུ་བསྒྲུབ་པར་བྱའོ། །རྒྱ་མཚོར་ [219b.6]འབབ་པའི་ཆུ་ཀླུང་གི་ངོགས་གཉིས་ཀྱི་ས་ལས་རང་གི་ལྷའི་གཟུགས་བརྙན་བྱས་ལ་པདྨའི་སྦུབས་ཀྱི་ནང་དུ་བཅུག་སྟེ། ཚོན་གྱིས་བྱུགས་ནས་པདྨའི་སྐུད་པས་དཀྲིས་ལ་མར་དང་སྦྲང་རྩིས་ནང་བཀང་སྟེ། ཨ་ཀ་རུ་དང་། ཙནྡན་དང་། པདྨ་གེ་སར་ཕྱེ་མར་བཏགས་ [219b.7]པས་གཏོར་ལ། ག་ཕུར་དང་བདུག་པས་བདུགས་ཏེ་ཞག་གཅིག་སྨྱུང་བར་གནས་ལ་དེའི་འོག་ཏུ་ཞག་གསུམ་གསང་སྔགས་འདི་དང་དྲི་དཀར་པོ་དང་སྦྱར་བའི་ཆུ་རྒྱུན་ཕྲ་བས་དབང་བསྐུར་བར་བྱ་སྟེ། ཨོཾ་སརྦ་དེ་བ་ཨ་ཙིཏ་ཏྱ་ཨ་མྲྀརྟ་དྷ་རེ་སྭཱ་ཧཱ། ཨོཾ་ཧཱུཾ་ཕཊ་ནི་སྭཱ་ཧཱ། རིམ་ [220a] [220a.1]གྱིས་ཐམས་ཅད་ཞུགས་པར་གྱུར་པ་དང་། རྒྱ་མཚོར་འབབ་པའི་ཆུ་བོ་ལ་བསྐྱོན་ཏེ་བསྐུར་བར་བྱའོ། །དེ་ལྟར་གསང་སྔགས་ཀྱི་ལྷ་ཚིམ་པར་བྱས་ན། དངོས་གྲུབ་མྱུར་དུ་སྩོལ་བར་འགྱུར་རོ། །གཟི་བརྗིད་བསྐྱེད་པ་དང་ཚིམ་པར་བྱ་བ་ནི་གསང་སྔགས་ [220a.2]འདིས་བླུགས་གཟར་དང་མར་གྱི་སྲེག་བླུགས་དབུལ་བར་བྱའོ། །ཨོཾ་ཧྲི་ཁཾ་སྭཱ་ཧཱ། དེ་ལྟར་སྦྱིན་སྲེག་དང་ཆུ་ལ་གཤེགས་སུ་གསོལ་བ་དང་། མཆོད་པ་ལ་སོགས་པའི་རིམ་གྱིས་ཐམས་ཅད་འགྲུབ་པར་འགྱུར་རོ། །དེ་ལ་བསྲེག་པར་བྱ་བ་ནི་མར་དང་ཏིལ་དང་། འབྲས་ [220a.3]དང་། ཞོ་དང་། འབྲས་ཆན་ལ་སོགས་པའོ། །གཤེགས་སུ་གསོལ་བའི་རྫས་ནི་པདྨ་དང་། ཨུཏྤ་ལ་དང་། ཙམ་པ་ཀ་དང་། མ་ལི་ཀ་དང་། ཛཱ་ཏིའི་མེ་ཏོག་གི་རིགས་རྣམས་དབུལ་བར་བྱའོ། །མེ་ཏོག་དེ་དག་ཉིད་ཀྱིས་མཆོད་པ་དང་སྲེག་བླུགས་ཀྱང་བྱའོ། །དེ་ [220a.4]ནས་ཇི་ལྟར་མངོན་པར་འདོད་པའི་སྦྱིན་སྲེག་གི་གྲངས་རྫོགས་པ་དང་། མཐའ་མར་ཨོཾ་ཧཱུཾ་ཧྲཱིཿཞེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོས་མར་གྱི་སྲེག་བླུགས་ལན་གསུམ་མམ་བདུན་ནམ་ཉི་ཤུ་རྩ་གཅིག་གིས་གཟི་བརྗིད་བསྐྱེད་པར་བྱའོ། དེའི་མཐར་ [220a.5]དགང་བླུགས་ཕུལ་ལ། མཆོད་ཡོན་དང་། ཞལ་བསིལ་དང་། འཐོར་འཐུང་གསོལ་ཏེ། ཡང་དག་པར་མཆོད་ལ་ལེགས་པར་བསྟོད་དེ། མངོན་པར་འདོད་པའི་དངོས་གྲུབ་ཀྱི་ཕྱིར་གསོལ་བ་བཏབ་ལ་བཟོད་པར་གསོལ་ཏེ། དེ་ནས་སེམས་མ་རྡོ་རྗེ་མའི་ཕྱག་རྒྱ་བཅིངས་ལ། ཨོཾ་ [220a.6]མུཿཞེས་བརྗོད་ནས་གྱེན་དུ་དཀྲོལ་ཏེ། ཨོཾ་ཀྲྀ་ཏོ་བ་སརྦྦ་ས་ཏྭཱ་རྠ། །སིདྡྷི་མ་དཏྟཱ་ཡ་ཐཱ་ནུ་ག། །གཙྪ་ཏྭཱཾ་བུདྡྷཱ་བི་ཥ་ཡཾ། །པུ་ན་ར་ག་མ་ན་ཡཙྪ། །ཞེས་བརྗོད་ལ་ཡེ་ཤེས་སེམས་དཔའ་གཤེགས་སུ་གསོལ་ནས། སྤྲུལ་པའི་མེ་ཐབ་ཀྱི་དབུས་སུ་བསམས་ལ་ཡང་དག་པར་མཆོད་དེ། [220a.7]བསང་གཏོར་དང་འཐོར་འཐུང་ལ་སོགས་པ་སྦྱིན་ལ་སྲེག་རྫས་ཀྱི་ལྷག་མ་རྣམས་སྦྱིན་སྲེག་བྱ་སྟེ། མཐར་དགང་བླུགས་པ་དང་འཐོར་འཐུང་ཡང་བྱིན་ནས་བསང་གཏོར་ཡང་བྱས་ལ་མཆོད་ནས་མངོན་པར་འདོད་པའི་དངོས་གྲུབ་ཀྱི་ཕྱིར་གསོལ་བ་བཏབ་ལ། མེ་ལྷ་སྔར་བཤད་ [220b] [220b.1]པའི་སྔགས་དང་ཕྱག་རྒྱ་དེ་ཉིད་བཅིངས་ལ་མཐེ་བོང་བསྒྲེང་སྟེ། ཡ་ཧི་ཡ་ཧི་ཞེས་བྱ་བ་དང་གཤེགས་སུ་གསོལ་ལོ། །དེ་ནས་སྔར་བཤད་པའི་ཆོ་གས་གནས་བསྲུང་བ་དང་བདག་བསྲུང་བ་བྱས་ལ། ཡི་གེ་བརྒྱ་པ་ལན་བདུན་བཟླས་ནས་རང་གི་དགེ་བའི་རྩ་བ་བླ་ན་མེད་པ་ཡང་ [220b.2]དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ལ་ལེགས་པར་ལྡང་བར་བྱའོ། །དངོས་གྲུབ་མ་ལུས་འབྱུང་གཉིས་མཚོར་གྱུར་ཅིང་། །དཔག་མེད་བདེ་བསྐྱེད་སྦྱིན་སྲེག་དེ་ཉིད་ནི། །འཇམ་བཅས་མི་གནས་གྲགས་པ་ཞེས་བྱ་བ། །སེམས་ཅན་ཕན་ཕྱིར་ཡང་དག་བཤད་པ་ [220b.3]ཡིན། །དེ་ཉིད་དམ་པར་བཤད་པའི་ཀུན་སྟོང་བདག་ཉིད་ཐབ་ཁུང་ནི། །རྣམ་པ་ཀུན་དུ་ཐོག་མཐའ་མེད་པའི་པདྨ་རྡོ་རྗེ་ལྡན། །ནམ་མཁའི་ངོས་ལྟར་ཡངས་ལ་བཏགས་པ་ཙམ་གྱིས་ས་བོན་ལ། །བློ་ངན་བསྲེགས་ནས་ཤིན་ཏུ་འབར་ལ་ཉོན་མོངས་ཞིར་བ་ཞི། །བདེ་གཤེགས་ [220b.4]སྲས་བཅས་སྔགས་ཀྱིས་འབར་བའི་གཟི་བརྗིད་འཕྲོ་བས་འཁྱུད། །སྲིད་པ་གསུམ་གྱིས་ཐབ་ཏུ་འདུས་བྱས་དངོས་པོ་ཐམས་ཅད་བསྲེག །བློ་གྲོས་ངན་པ་ཤིན་ཏུ་བསྲེགས་པས་ཀུན་རྟོག་ཀུན་ལས་གྲོལ། །ཉོན་མོངས་གདུང་བཞི་བར་བཤད་པའི་ཞི་བའི་གདུགས་སུ་བགྱིས། ། [220b.5]ནང་གི་སྦྱིན་སྲེག་དག་ཏུ་རྣམ་རྟོག་དྲ་བ་རྣམས། །བསྲེག་པར་བྱ་ཞེས་ཐུབ་པའི་ཟླ་བ་དག་གིས་གསུངས། །བགེགས་དང་དངོས་གྲུབ་རྣམས་ནི་རྣམ་པར་རྟོག་པ་ཙམ། །གཉིད་མེད་དེ་ཉིད་དུ་ནི་རྣམ་པར་རྟོག་པའང་སྟོང་པ་ཡིན། །ཕྱི་དང་ནང་གི་དབྱེ་བ་ཡིས། །རྣམ་པ་གཉིས་སུ་འདིར་ [220b.6]བཤད་པ། །སྦྱིན་སྲེག་ཆོ་ག་ཤེས་པ་ལ། །རྣམ་པ་ཀུན་དུའང་དགའ་ཕྱིར་རོ། །ནམ་མཁའི་དབྱིངས་དང་མཉམ་པར་རྗེས་འགྲོ་རབ་གནས་ཆོས། །དེ་བཞིན་གཤེགས་པས་གླེགས་བམ་རྡོ་རྗེ་དྲིལ་བུ་དག །འཇིག་རྟེན་དོན་དམ་མི་ཤེས་འདི་ནའང་མགོན་པོ་ཡིས། །འཇིག་ [220b.7]རྟེན་ཕན་པར་བཞེད་པས་རབ་གནས་མཛད་པ་ཡིན། །དཀྱིལ་འཁོར་དང་ཏིང་ངེ་འཛིན་དང་། ཕྱག་རྒྱ་དང་། སྔགས་དང་། སྟང་སྟབས་དང་བཟླས་བརྗོད་དང་། སྦྱིན་སྲེག་དང་། མཆོད་པ་དང་། ལས་ལ་སྦྱར་བ་དང་། སླར་བསྡུ་བ་རྣམས་ནི་གསང་སྔགས་ཀྱི་ཚུལ་ལ་དེ་ཁོ་ [221a] [221a.1]ན་བཅུ་ཡིན་པར་གསུངས་སོ། །སློབ་མ་དེ་ཉིད་བཅུ་ཤེས་ཤིང་། །མཚན་ཉིད་ཐམས་ཅད་ཡང་དག་ལྡན། །སྔགས་དང་ཕྱག་རྒྱ་ཆོ་ག་ཤེས། །ལས་རྣམས་ཀུན་ལ་ཤིན་ཏུ་མཁས། །ལྷ་ཁང་མཆོད་རྟེན་སྐུ་གཟུགས་དང་། །དམ་ཆོས་གླེགས་བམ་རས་ [221a.2]རིས་དག །ཟིན་ཅིང་ཐམས་ཅད་རྫོགས་པ་དང་། །བདེ་བའི་ཡོན་ཏན་ཀུན་བསྐྱེད་པ། །ཤེས་ནས་མཚན་ཉིད་ལ་མཁས་པས། །རབ་ཏུ་གནས་པ་བྱེད་པར་འོས། །བསོད་ནམས་འཕེལ་བར་བྱ་བའི་ཕྱིར། །གཙུག་ལག་ཁང་སོགས་ཁྱད་འཕགས་བྱ། །སྟེང་གཡོགས་མཆོད་རྟེན་ [221a.3]གནས་རྣམས་དང་། །ཁྱིམ་དང་ལྷ་ཡི་ཁང་པར་ཡང་། །སངས་རྒྱས་ལ་སོགས་རབ་གནས་པ། །ཆོ་ག་ལས་གསུངས་བཞིན་དུ་བྱ། །ཆོ་ག་ཉམས་པར་མི་བྱ་སྟེ། །རབ་གནས་རྟག་ཏུ་སྨོད་པ་དང་། །ཚེ་འདིར་སྡུག་བསྔལ་ཆེན་པོ་དང་། །འཇིག་རྟེན་གཞན་དུའང་འཇིགས་ཆེན་ [221a.4]འབྱུང་། །དེ་བས་དངོས་གྲུབ་འདོད་པ་ཡིས། །བདག་ཉིད་ཀྱིས་ནི་ཅི་ནུས་དང་། །དེ་བཞིན་ཆོ་ག་གསུངས་ཚུལ་གྱིས། །ཀུན་ནས་རབ་ཏུ་འབད་དེ་བྱ། །དེ་ལྟར་བྱས་ན་བསོད་ནམས་ཆེ། །མཐོང་དང་མ་མཐོང་སྐྱེ་འགྱུར་ལ། །སྔགས་པ་བཟང་པོས་སྐུ་གཟུགས་ནི། །དགོས་པར་ [221a.5]གྱུར་པ་དེ་ལས་བྱུང་། །གང་དུ་སྐུ་གཟུགས་ཟིན་ནས་ནི། །ཡུན་རིངས་ནས་ཀྱང་མ་མཆོད་ན། །ཇི་སྲིད་མཆོད་གནས་མ་གྱུར་པས། །དེ་ནས་མི་ཤིས་སྐྱེ་བར་འགྱུར། །ཇི་ལྟར་སྐྱེས་བུ་ལ་ལ་ཞིག །རིགས་དང་མཚན་ཉིད་མེད་པ་དག། །འཇིག་རྟེན་ཀུན་གྱིས་བཀུར་མི་བྱེད། །སྐུ་ [221a.6]གཟུགས་དག་ཀྱང་དེ་བཞིན་འགྱུར། །སྐུ་གཟུགས་རབ་གནས་མ་བྱས་པར། །ཕྱག་འཚལ་བ་དང་མཆོད་འགྱུར་བ། །སྔགས་དང་བྲལ་བས་ཐལ་བར་ནི། །སྦྱིན་སྲེག་བྱས་བཞིན་འབྲས་བུ་མེད། །དེ་བཞིན་འདིར་ནི་སྔགས་མེ་གནས། །མཆོད་གནས་མཆོད་པར་བྱེད་པ་གང་། ། [221a.7]ལས་དེ་ཡི་ནི་རྣམ་སྨིན་གྱིས། །སྐྱེ་བ་ཀུན་དུ་མཆོད་མི་འགྱུར། །བྱང་ཆུབ་སེམས་དཔས་གསོལ་པ། བཅོམ་ལྡན་འདས་ཅིའི་ཕྱིར་རབ་ཏུ་གནས་པ་མེད་པའི་ཆོས་རྣམས་ལ་རྒྱལ་བས་རབ་ཏུ་གནས་པར་མཛད། བཅོམ་ལྡན་འདས་ཀྱིས་བཀའ་སྩལ་པ། སངས་རྒྱས་ [221b] [221b.1]ཀུན་དུ་གནས་གྱུར་ཀྱང་། །དེ་ནི་གང་ལའང་གནས་པ་མེད། །ནམ་མཁའ་བཞིན་དུ་ཐམས་ཅད་དུ། །གནས་པ་ཐམས་ཅད་རབ་ཏུ་བརྟག །འཇིག་རྟེན་ཀུན་རྫོབ་ལ་གནས་ནས། །རབ་ཏུ་གནས་པར་ཡོངས་བརྟགས་ཀྱི། །དོན་དམ་ཚུལ་དུ་གང་ཞིག་ལ། །གང་གིས་གང་དུ་ [221b.2]རབ་གནས་བྱ། །གཟོད་ནས་ཞི་ཞིང་སྐྱེ་མེད་ལ། །འདི་ལྟའི་རབ་གནས་ཇི་ལྟར་བྱ། །སེམས་ཅན་དང་པོའི་ལས་ཅན་གྱི། །རྒྱུད་རྣམས་ཡང་དག་སྦྱང་ཕྱིར་བྱས། །དེ་ལ་དང་པོ་རེ་རེ་ཞིག་ཡོངས་སུ་བརྟག་པའི་གནས་ཉེ་བར་སྦྱངས་པར་གདུགས་དང་། རྒྱལ་མཚན་དང་། བླ་རེ་དང་། [221b.3]བ་དན་རྣམས་བསྒྲེངས་ལ། སྤོས་དང་མེ་ཏོག་ལ་སོགས་པ་དང་། མཆོག་ཏུ་གསོལ་བས་གསོལ་བ་བཏབ་པའི་སློབ་དཔོན་གྱི་ཉི་མ་ཤིས་པ་དང་སྐར་མ་བཟང་པོ་ལ་སློབ་དཔོན་ཤིན་ཏུ་མཉམ་པར་བཞག་པས། སྤྱན་འབྱེད་ཀྱི་ནང་དུ་སོང་ན་རིགས་ལྔར་གཏོགས་པའི་སངས་ [221b.4]རྒྱས་དང་བྱང་ཆུབ་སེམས་དཔའ་ལ་སོགས་པ་རྣམས་ལ་ཕྱག་བྱས་ཏེ། དེ་དང་འབྲེལ་པའི་དཀྱིལ་འཁོར་གྱི་ཆོ་ག་བཞིན་དུ་ས་ཡོངས་སུ་བཟུང་བ་དང་། ཐིག་གདབ་ཅིང་གསོལ་བ་གདབ་པ་ལ་སོགས་པ་དང་། ཚོན་གྱི་ལས་ལ་སོགས་པས་དཀྱིལ་འཁོར་རྫོགས་པར་བྱས་ལ་མེ་ [221b.5]ཏོག་ལ་སོགས་པས་ཡང་དག་པར་མཆོད་དེ། མཆོད་ཡོན་ཕུལ་ལ་ས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ། ཞེས་བྱ་བ་སྔགས་འདི་ལན་གསུམ་བརྗོད་དོ། །ཇི་ལྟར་སངས་རྒྱས་ཐམས་ཅད་ནི། །དགའ་ལྡན་ན་ནི་བཞུགས་པ་ལས། །ལྷ་མོ་སྒྱུ་འཕྲུལ་ལྷུམས་འཇུག་པ། །དེ་བཞིན་གཟུགས་ [221b.6]འདིར་ཁྱེད་བཞུགས་མཛོད། །འདིར་ཞུགས་རྟག་ཏུ་མགོན་པོར་ནི། །གྱུར་ནས་མེ་ཏོག་ལ་སོགས་འདི། །བྱང་ཆུབ་སེམས་ནི་འཕེལ་བའི་ཕྱིར། །ཆེ་གེ་མོའི་དོན་དུ་བཞེས་སུ་གསོལ། །སྐུ་གཟུགས་ལྷག་པར་གནས་བྱས་ལ། །དེ་ནས་དབང་བསྐུར་བརྩམ་པར་བྱ། །སློབ་མ་སྨྱུང་ [221b.7]བར་གནས་པ་ཡིས། །བྱ་བ་འདི་དག་ཐམས་ཅད་སྤྱད། །སྔགས་པ་གང་དག་ཅི་སྒོམ་དང་། །ཆོ་ག་མཆོད་ལ་སོགས་པ་བྱ། །གཡོ་མེད་པ་ཡིས་བྱས་གྱུར་ན། །མཆོད་སྦྱིན་ཆེན་པོའི་འབྲས་བུ་ཐོབ། །སྤྱན་དྲངས་གདན་ལ་བཞུགས་གསོལ་དང་། །དེ་བཞིན་མཆོད་ཡོན་མེ་ཏོག་ [222a] [222a.1]དང་། །སྤོས་དང་མར་མེ་ལྷ་བཤོས་ཏེ། །མཆོད་པ་སྔགས་དང་ལྡན་པར་དབུལ། །སྐུ་གཟུགས་ཤར་དུ་ཞལ་བསྟན་ལ། །རས་ནི་སེར་པོས་གཡོགས་པར་བྱ། །སྦྱང་བས་ལེགས་པར་བསལ་བྱ་ཞིང་། །དེ་ནས་སྔགས་འདིས་ཡུངས་ཀར་ནི། །ཆུའམ་ཡང་ན་མེ་ནང་ [222a.2]དུ། །ལན་ཅིག་ཡོངས་སུ་གཏང་བར་བྱ། །ཨོཾ་སརྦྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཞེས་བྱ་བའོ། །དེ་ནས་རྣམ་པ་ཐམས་ཅད་ཀྱི་མཆོག་དང་ལྡན་པའི་སྐུར་བསམས་ལ་དབུ་ལ་ཡི་གེ་ཨོཾ། ཞལ་ལ་ཡི་གེ་ཧྲཱིཿཐུགས་ཀར་ཡི་གེ་ཧཱུཾ་དགོད་དོ། །ཡང་ན་གང་དང་གང་གི་ས་བོན་གང་ཡིན་པ་དེ། དེའི་ [222a.3]ཐུགས་ཀར་དགོད་པར་བྱའོ། །དེ་ནས་དེར་ཡེ་ཤེས་སེམས་དཔའ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ལ་བསྒྲུབ་པོ། །དེ་ནས་ཏིལ་མར་དྲི་ཆེན་གྱིས་བསྐུས་ལ་དཱུར་ཝའི་པིར་གྱིས་སྦྱང་ཞིང་བཀྲུའོ། །ཏིལ་མར་གྱི་སྔགས་ནི་ཨོཾ་སརྦྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ [222a.4]ནེ་སྭཱ་ཧཱ། བུམ་པ་ལྔའམ་བརྒྱད་རིན་པོ་ཆེ་ལྔ་དང་། འབྲུ་ལྔ་སྨན་ལྔ་དང་ལྡན་ཞིང་དྲི་ཞིམ་པོའི་སྤོས་ཆུས་ཡོངས་སུ་གང་བ། མགུལ་པ་རས་བཟང་པོས་བཅིངས་ལ། ཨ་མྲའི་ལོ་མ་ལ་སོགས་པས་ཁ་བཀབ་པ་དབང་བསྐུར་བའི་དོན་དུ་བསྔགས་མངོན་པར་བཟླ་བར་བྱའོ། །ཨོཾ་ [222a.5]བི་ཤུདྡྷ་བཛྲོད་ཀ་ཧཱུཾ། ཨོཾ་ཛིན་ཛི་ཀ་སྭཱ་ཧཱ། ཨོཾ་ཨཱ་རོ་ལྀ་ཀ་སྭཱ་ཧཱ། ཨོཾ་བཛྲ་དྷྲྀཀ་སྭཱ་ཧཱ། ཞེས་རིགས་ཀྱི་དབྱེ་བས་མངོན་པར་བཟླ་བར་བྱའོ། །དབང་བསྐུར་བའི་ཆོ་ག་དང་། དེ་བཞིན་རིག་པ་སྦྱང་དང་ནི། །བཀྲ་ཤིས་ཞེས་གྲགས་ཡིད་འོང་བའི། །ཚིགས་བཅད་འདི་ནི་བརྗོད་པར་བྱ། ། [222a.6]ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀུན་གྱིས་ཁྲུས་གསོལ་བ། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། སྤྱན་གྱི་སྔགས་ནི། ཨོཾ་རུ་རུ་སྥུ་རུ་ཏིཥྛ་སིདྡྷ་ལོ་ཙ་ནེ། །སརྦྦཱ་རྠ་སཱ་དྷ་ནི་སྭཱ་ཧཱ། [222a.7]ལུགས་མ་ཁྲུས་ནི་བྱ་བར་གསུངས། །རི་མོ་མེ་ལོང་དག་ལ་བཀྲུ། །རས་རིས་ཆུ་ནི་མེད་བྱའམ། །ལག་པ་སླར་ཡང་བསང་གཏོར་བྱ། །ག་ཕུར་གུར་ཀུམ་བཅས་པ་ཡི། །རས་དཀར་ཟུང་གིས་དགབ་པར་བྱ། །ཨོཾ་བཛྲ་བྷ་བ་སེ་སྭཱ་ཧཱ། ཨོཾ་བཛྲ་གེནྡྷ་སྭཱ་ཧཱ། ཨོཾ་བཛྲ་ [222b] [222b.1]ཨ་བྷིརྞ་བི་བྷུ་ཥ་ཎེ་སྭཱ་ཧཱ། དཀྱིལ་འཁོར་དབུས་སུ་བཅུག་ནས་ནི། །དེ་ནས་རང་གི་དམ་ཚིག་བསྒྲགས། །སྔགས་དང་ཕྱག་རྒྱས་རབ་བསྐུར་བས། །ཅི་རིགས་པར་ནི་དབང་བསྐུར་བྱ། །ཨོཾ་ཧཱུཾ་ཏྲཱཾ་ཧྲཱིཿཨཿ། དེ་བཞིན་དུ་ནི་ཅོད་པན་དང་དར་དཔྱངས་བཅིང་བ་བྱས་ལ་བཞུགས་སུ་གསོལ་ལོ། །དེ་ [222b.2]ཡང་འོག་ཏུ་ཤིན་ཏུ་དུད་པ་དང་། དེ་ནི་མི་ཡོ་དྲང་པོར་ནི། །སྐུ་གཟུགས་ཡང་དག་གཞག་བྱ་སྟེ། །དེ་ལྟར་མིན་ན་ཉེས་བསྐྱེད་འགྱུར། །མེ་ཏོག་སྤོས་དང་དེ་བཞིན་དྲི། །དེ་བཞིན་མར་མེ་ན་བཟའ་སྟེ། །དེ་ཀུན་གསང་སྔགས་ལྡན་པར་ནི། །ལྷ་རྣམས་ལ་ནི་དབུལ་བར་བྱ། ། [222b.3]ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་གནྡྷེ་ཧཱུཾ། སྔགས་ཀྱིས་བསང་བྱས་བཤོས་བསྔོགས་ཏེ། གསེར་ལས་བྱས་པའི་ཐུར་མ་ཡིས། །སྤྱན་ནི་དབྱེ་བ་བྱས་ནས་ནི། །ཞལ་ཟས་དེ་ནི་མཁས་པས་བསྟབས། །ཨོཾ་བཛྲ་ཙཀྵུ་ས་མནྟ་ཙ་ཀྵུ་བི་ཤོ་དྷ་ནི་སྭཱ་ཧཱ། ཨོཾ་དི་བྱ་ཨན་ས་མཱ་ [222b.4]དཱི་དྷྱ་ན་པྲི་ཎ་ཡེ་སྭཱ་ཧཱ། དེ་ལྟར་བྱས་ནས་དེ་ནས་ཡང་། །ཤེས་རབ་ཅན་གྱི་སློབ་མ་གཞུག། །ཁྱོད་ཀྱིས་ང་ལ་གསོལ་བཏབ་པའི། །སྐུ་གཟུགས་དག་ནི་ཁྱད་པར་དུ། །ཇི་སྐད་གསུངས་བཞིན་རབ་གནས་པ། །དེ་ནི་ངས་བཅས་བྱེད་དུ་བཅུག། །ཁྱེད་ཀྱིས་དེ་ནི་ཀུན་ [222b.5]རྫོགས་པས། །ཅི་བདེ་བར་ནི་མཆོད་པར་གྱིས། །དེ་བས་དབང་བསྐུར་དམ་ཚིག་ལ་གནས་པར་བྱས་ནས། སྦྱིན་བླུགས་སྟོང་ངམ་དེའི་ཕྱེད་དམ་དེའི་ཕྱེད་ཕྱེད་ཀྱི་མངར་གསུམ་དང་བསྲེས་པའི་འབྲུ་ཐམས་ཅད་ཀྱིས་སྦྱིན་སྲེག་བྱའོ། །བདག་ཉིད་དང་ནི་སློབ་མ་ཀུན། །ཞི་དང་ [222b.6]རྒྱས་པ་འཕེལ་བྱའི་ཕྱིར། །ཐབ་ཁུང་ཟུར་ནི་བཞི་པ་ལ། །འོ་མ་ཅན་ཤིང་བུད་ཤིང་བྱ། །དེ་ཡི་ཡམ་ཤིང་འོ་མ་མར། །བཤོས་ཀྱི་ལྷག་མ་དབུལ་བར་བྱ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ་ཞེས་བྱ་བ་ལ་སོགས་པའི་སྦྱིན་སྲེག་གི་ཆོ་ག་ལས་གསུངས་པ་བཞིན་ཞི་བ་ལ་སོགས་པ་བྱའོ། །གཙུག་ [222b.7]ལག་ཁང་ནི་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་བཞུགས་གནས་ཏིང་ངེ་འཛིན་སྣ་ཚོགས་ཀྱི་གཞལ་ཡས་ཁང་ཆོས་ཀྱི་དབྱིངས་ལྟར་ཡངས་པར་ཡིད་ཀྱིས་སྔགས་འདིས་བསྐྱེད་པར་བྱའོ། །ཨོཾ་ཧཱུཾ་ཧྲཱིཿདེ་ནས་ལྷག་པར་ [223a] [223a.1]གནས་དང་། མཆོད་པ་ལ་སོགས་པ་བྱས་ལ། དཀྱིལ་འཁོར་གྱི་ཆོ་ག་ལས་བཤད་པའི་ཆོ་གས་གཏོར་མ་བྱིན་ཏེ། ཡང་མཆོད་པ་བྱས་ནས་རབ་ཏུ་གནས་པ་བྱའོ། །ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཨོཾ་ཧཱུཾ་ཧྲཱིཿབྷུ་ཁཾ་བཛྲཱི་བྷ་བ་དྲྀ་ཌྷ་ཏིཥྛ་བྷུ་ཁཾ་ཞེས་བྱའོ། །དེ་ [223a.2]ནས་སངས་རྒྱས་དང་བྱང་ཆུབ་སེམས་དཔའ་དང་། རྡོ་རྗེ་འཆང་ཆེན་པོ་ལ་སོགས་པས་བྱིན་གྱིས་བརླབས་པས་རྡོ་རྗེ་ལྟར་མི་ཕྱེད་ཅིང་ལེགས་པར་རབ་ཏུ་གནས་པ་བསམས་ལ་བུས་པ་ལྔའམ། བརྒྱད་དམ་བཅུ་དྲུག་སྤོས་ཆུས་ཡོངས་སུ་གང་ཞིང་། མངོན་པར་བསྔགས་པས་གཙུག་ [223a.3]ལག་ཁང་མ་ལུས་པར་བསང་གཏོར་བྱའོ། །དེའི་སྔགས་ནི་ཨོཾ་བཛྲོད་ཀ་ཨ་བྷི་ཥིཉྩ། དེའི་འོག་ཏུ་སངས་རྒྱས་བཅོམ་ལྡན་འདས་སྔར་བསྟན་པའི་ཆོ་གས་རབ་ཏུ་གནས་པར་བྱའོ། །དེ་ནས་གཙུག་ལག་ཁང་སྐྱོང་དུ་ནག་པོ་ཆེན་པོ་དགུག་པ་དང་། གཞུག་པ་དང་། བཅིང་བ་དང་། དབང་ [223a.4]དུ་བྱ་བ་བྱས་ལ་རྡོ་རྗེ་ཧཱུཾ་མཛད་ཀྱི་སྦྱོར་བ་དང་ལྡན་པས་ལུང་བསྒོ་བར་བྱ་སྟེ། ཇི་སྲིད་གཙུག་ལག་ཁང་འདི་གནས་པ་དེ་སྲིད་ཀྱི་བར་དུ་ཁྱོད་ཀྱིས་སྲུངས་ཤིག། །འཕགས་པའི་དགེ་འདུན་གྱི་བཀའ་ཡང་ཁྱོད་ཀྱིས་སྒྲུབས་ཤིག་ཅེས་བསྒོ་བར་བྱའོ། །དེ་བཞིན་དུ་འཕགས་པའི་མཆོད་རྟེན་ [223a.5]ཡང་ལྷག་པར་གནས་པ་དང་། མཆོད་ཡོན་དང་། མཆོད་པ་ལ་སོགས་པ་དང་པོར་བྱས་ལ། ཡི་གེ་བྷྲཱུཾ་ལས་རྣམ་པར་སྣང་མཛད་དང་། རྡོ་རྗེ་དབྱིངས་ཀྱི་དབང་ཕྱུག་མ་ཡོངས་སུ་གྱུར་པ་ལས་མཆོད་རྟེན་གྱི་གཟུགས་སུ་བསྐྱེད་ཅིང་། སངས་རྒྱས་དང་། བྱང་ཆུབ་སེམས་དཔའ་ [223a.6]ཐམས་ཅད་ཀྱི་གཞལ་ཡས་ཁང་དུ་བསམས་ལ། སངས་རྒྱས་དང་བྱང་ཆུབ་སེམས་དཔའ་དང་། གསང་སྔགས་དང་། རིག་པའི་ལྷ་ཐམས་ཅད་སྤྱན་དྲངས་ཏེ། བཅུག་ལ་མཆོད་རྟེན་དུ་བཞག་སྟེ་མཉེས་པར་བྱས་ལ་ཁྲུས་དང་མཆོད་པའི་ཡོ་བྱད་ཐམས་ཅད་ཀྱིས་ཡང་དག་པར་ [223a.7]མཆོད་དེ། ཨོཾ་སརྦྦ་ཏ་ཐཱ་ག་ཏ་ཨ་བྷིཥེ་ཀ་ས་མ་ཡ་ཤྲི་ཡེ་ཧཱུཾ། ཨོཾ་སུ་པྲ་ཏིཥྛ་བཛྲ་སྭཱ་ཧཱ། ཨོཾ་ཧཱུཾ་ཧྲཱིཿབྷཱུཾ་ཏྲི་ཏྲ་ཏིཥྛ་ཞེས་བྱ་བས་རབ་ཏུ་གནས་པར་བྱའོ། །དེ་ནས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་རྣམས་ཀྱིས་བྱིན་གྱིས་བརླབས་པར་བསམ་པར་བྱའོ། །ལྷག་མ་ [223b] [223b.1]ནི་སྔ་མ་བཞིན་ནོ། །དམ་པའི་ཆོས་ཀྱི་གླེགས་བམ་རབ་ཏུ་གནས་པར་བྱ་བ་ནི་འདི་ལྟར་བྱ་སྟེ། གཙུག་ལག་ཁང་དང་མཆོད་རྟེན་དང་། རས་རིས་དང་གླེགས་བམ་དག་ནི་མེ་ལོང་ཉིད་ལ་བཀྲུའོ། །ལྷག་པར་གནས་པ་ལ་སོགས་པ་ཐམས་ཅད་ནི་སྔ་མ་བཞིན་དུ་བྱའོ། །ཤེས་རབ་ཀྱི་ [223b.2]ཕ་རོལ་ཏུ་ཕྱིན་པ་ནི་ཡི་གེའི་རྣམ་པ་ཡོངས་སུ་གྱུར་ནས། ཀུན་རྫོབ་དང་དོན་དམ་པར་སྟོན་པར་བསམས་ལ། ཨོཾ་པྲཛྙེ་ཤྲུ་ཏེ་མ་རྟི་བི་ཛ་ཡེ་སྭཱ་ཧཱ་ཞེས་པ་དང་། ཨོཾ་ཧཱུཾ་ཧྲཱིཿཐཾ་ཞེས་བྱ་བས་ཀྱང་རབ་ཏུ་གནས་པ་དང་དབང་བསྐུར་བར་བྱའོ། །སྔགས་སྟོན་པའི་གླེགས་བམ་ནི་རྡོ་རྗེ་ཆོས་ཡི་ [223b.3]གེའི་གཟུགས་སུ་ཡོངས་སུ་གྱུར་པ་ལས་སྔགས་ཀྱི་གཟུགས་ཀྱི་སྐུས་འཁོར་བ་ན་འགྲོ་བ་མ་ལུས་པའི་དོན་མཛད་པར་བྱིན་གྱིས་བརླབ་པ་དང་། དེ་བཞིན་གཤེགས་པ་ཐམས་ཅད་དང་། རྡོ་རྗེ་འཆང་ཐམས་ཅད་ཀྱིས་ཀྱང་དེ་བཞིན་དུ་བྱིན་གྱིས་བརླབ་པར་བསམ་མོ། །མཆོད་པ་དང་། [223b.4]གཏོར་མ་ལ་སོགས་པ་ནི་སྐུ་གཟུགས་སྤྱན་དབྱེ་བའི་ཆོ་ག་བཞིན་དུ་བྱའོ། །དེ་ནས་སིལ་སྙན་དང་རོལ་མོ་བྱས་ལ་གཤེགས་སུ་གསོལ་ལོ། །རྫོགས་སངས་རྒྱས་དང་ལྷ་རྣམས་དང་། །དེ་སྲས་ཚངས་སོགས་ལྷ་ཚོགས་ཀུན། །གང་ཞིག་ཆོ་གའི་བྱ་བ་ནི། །ནོངས་གྱུར་དེ་དག་བཟོད་ [223b.5]མཛད་རིགས། །སྦྱིན་བདག་རྣམས་ལ་ཞི་བ་དང་། །བདེ་ལེགས་ཆེན་པོ་ཀུན་མཛད་དེ། །སངས་རྒྱས་ཡུལ་དུ་གཤེགས་སུ་གསོལ། །སླར་ཡང་འབྱོན་པར་མཛད་དུ་གསོལ། །གང་འདི་སྐུ་གཟུགས་བསྐལ་པའམ། །བསྐལ་པ་བརྒྱ་ལས་ལྷག་གནས་ཤིང་། །ས་དང་མེ་དང་ [223b.6]ཆུ་དང་ནི། །རླུང་ལས་ལྷ་རྣམས་ཀུན་གྱིས་བསྲུངས། །སློབ་དཔོན་སློབ་མ་བཅས་པ་དང་། །བུ་དང་ཚ་བོ་རྣམས་བསྲུངས་ཏེ། །རབ་དགའ་ཡིད་བདེར་གྱུར་ནས་ནི། །རབ་གནས་བཟང་པོ་དག་ཏུ་བཞུད། །ཤེས་རབ་ཡེ་ཤེས་དྲི་མེད་པའི། །མཉམ་མེད་དེ་ལ་ཕྱག་འཚལ་ནས། ། [223b.7]རྡོ་རྗེ་དྲིལ་བུའི་མཚན་ཉིད་དང་། །བྱེ་བྲག་རྣམས་ནི་བཤད་པར་བྱ། །གསེར་སོགས་ལས་བྱས་རྡོ་རྗེ་ནི། །རྩེ་ལྔ་འོད་ཟེར་བཅས་པ་ལ། །ཆང་གཟུངས་ཆ་གསུམ་མཛེས་པ་དང་། །ར་དང་རྩེ་མོའི་བྱེ་བྲག་ཅན། །ཚད་ནི་སོར་བཞི་དག་དང་ནི། །བརྒྱད་དང་བཅུ་དང་བཅུ་གཉིས་དང་། [224a] [224a.1]བཅུ་དྲུག་དེ་བཞིན་ཉི་ཤུ་སྟེ། །དེ་ལས་ཉུང་དང་ལྷག་པར་མིན། །རྡོ་རྗེ་བརྒྱད་པོ་ངེས་པ་ཡི། །ཚད་ཡིན་པར་ནི་བཤད་པ་ཡིན། །མཛེས་ཤིང་མ་ཆག་འཇམ་པ་དང་། །བརྟན་ཞིང་མ་གས་སྲ་བར་འགྱུར། །སོར་བཞི་པ་ཡི་ཚད་དག་ནི། །དེ་ལས་ཉེས་འགྱུར་ [224a.2]ཐ་མ་ཡིན། །སུམ་འགྱུར་རྡོ་རྗེ་བར་མ་སྟེ། །བཞི་འགྱུར་དག་ནི་མཆོག་ཡིན་ནོ། །ཆུར་ནི་གསུམ་དུ་བྱས་པ་ཡི། །དབུས་མའི་ཆ་ནི་ཟླུམ་པོར་བྱ། །དཀྱིལ་མ་བརྒྱད་ཆས་མཐོ་བར་བྱ། །ཟླུམ་པོ་ར་རྩེ་གསུམ་པ་ལ། །ཆ་གཅིག་དབུས་སུ་གནས་པར་བྱ། །ཁྲོ་གཉེར་སྣ་ཚོགས་ [224a.3]ལྡན་པ་དང་། །རིན་ཆེན་འདབ་མ་མྱུ་གུ་དང་། །པདྨ་དེ་བཞིན་གཉིས་སུ་བྱ། །ར་ནི་ཆ་གསུམ་གནས་པ་ལས། །ཆ་གཅིག་དག་ནི་དཀྱིལ་དུ་གཞག། །སོར་གཅིག་བརྒྱད་ཅར་བྱ་བ་ནི། །དབུས་མའི་ར་ཡི་བར་ཞེས་བྱ། །གཞན་རྣམས་ཆོ་ག་ཇི་བཞིན་བྱ། །ཟུར་བཞི་ཤིན་ཏུ་རྣོ་ [224a.4]བ་དང་། །དཀྱིལ་སྦོམ་རྩེ་མོ་ཕྲ་བ་ལ། །འོག་དཔག་གསུམ་དང་ལྡན་ཞིང་རྫོགས། །དབུས་མ་ལྷག་བཅས་མཛེས་པར་བྱ། །དེ་བཞིན་ཕྱོགས་ཀྱི་ཆར་བཞག་པའི། །ར་གཞན་དག་ནི་ཡན་ལག་བཞི། །ཕྲ་ཞིང་དབུས་སུ་གུག་པ་དང་། །དབུས་མའི་ར་ལ་འདུད་པ་སྟེ། །རྒྱ་ནི་དབུས་ [224a.5]མའི་ར་ཡི་ཕྱེད། །ནས་འབྲུ་ཙམ་གྱིས་མ་རེག་པའོ། །ཆུ་སྲིན་མཆེ་བ་གཙིགས་འདྲ་བའི། །ཆུ་སྲིན་ཁ་ནས་དབྱུང་བར་བྱ། །ཡེ་ཤེས་ལྔ་ཡི་བདག་ཉིད་ར། །པདྨ་འཁོར་ལོ་ལ་གནས་པ། །རྣོ་དང་མི་རྣོ་གྱེས་པ་དང་། །ཞི་བ་དག་དང་རྣམ་པ་བཞི། །ཕྱི་རོལ་ར་ནི་རྒྱར་གྱུར་པ། །གང་ [224a.6]ཞིག་དེ་ཡི་དབུས་མ་མཚུངས། །གསང་བའི་རྡོ་རྗེ་རྡོ་རྗེའི་དབང་། །མཚན་ཉིད་དག་གི་ཁྱད་པར་ནི། །ནང་གི་དབུས་མའི་ར་དག་ནི། །བཞི་ཆ་ཡིས་ནི་བསྐྱེད་པར་བྱ། །ཕྱི་རོལ་གྲི་གུག་དབྱིབས་འདྲ་ལ། །རྣོ་ཞིང་རྩེ་མོ་གྱེས་པར་བྱ། །གཡུལ་དང་འཐབ་པར་འཕེན་ནུས་པ། །ཆུ་སྲིན་ [224a.7]གདོང་གིས་ཟིན་པར་བྱ། །རྡོ་རྗེ་རྩེ་གསུམ་གང་ཡིན་པར། །མཚམས་དག་ཏུ་ནི་གནས་པར་བྱ། །དེ་བཞིན་སྣ་ཚོགས་པར་གྱུར་པ། །རྡོ་རྗེ་རྒྱ་གྲམ་མིན་པར་བཤད། །དེ་ཡང་དཔུང་བཟངས་ཀྱི་རྒྱུད་ལས། སྒྲུབ་པ་པོས་ནི་ངེས་པར་འཆང་བ་ཡི། །རྡོ་རྗེ་གང་ཡིན་དེ་ནི་འདིར་ [224b] [224b.1]བཤད་བྱ། །སོར་བཅུ་བཅུ་གཉིས་བཅུ་དྲུག་བཅོ་བརྒྱད་དང་། །མཆོག་གི་ཚད་ནི་སོར་ཡང་ཉི་ཤུའོ། །གསེར་གྱི་རྡོ་རྗེ་རིག་འཛིན་ཉིད་དང་ནི། །ས་ནི་ཐོབ་པར་བྱ་ཕྱིར་རབ་ཏུ་ཤིས། །རྒྱལ་པོའི་དོན་དུ་དངུལ་ནི་མཆོག་ཡིན་ཏེ། །ཟངས་ཀྱི་རིན་ཆེན་འབྱུང་བའི་གླུ་བསྐུལ་ལ། ། [224b.2]ལྷ་མིན་དབང་པོ་འཁྲུལ་འཁོར་གཞིག་པ་དང་། །ཕུབ་ཏུ་འགྲོ་བ་རྡོ་ཡི་རྡོ་རྗེའོ། །དོན་ཀུན་བསྒྲུབ་པ་ལ་ནི་ལྕགས་གསུམ་གྱི། །གནོད་སྦྱིན་སྡེ་འཇོམས་པ་ལ་ལྕགས་ཀྱིའོ། །དོན་གཞན་ལ་ནི་སེད་ལྡེང་དཔལ་དང་ཚེ། །ནད་མེད་ནོར་རྫས་ལ་ནི་བིལ་བའོ། །གནོད་སྦྱིན་མ་བསྒྲུབ་པ་ [224b.3]ལ་མ་དྷུའི་ཤིང་། །ཆོས་ཀྱི་དོན་དུ་ཨ་ཤྭད་ལས་བྱས་ཤིང་། །གསལ་ཞིང་རྩེ་མོ་དགར་རྣམས་ཞིག་པ་ལ། །མི་རྣམས་པ་སང་པ་ལ་ནི་མི་རུས་ཀྱི། །ཤེལ་ལས་བྱས་པའི་མིག་འཕྲུལ་ཆེན་པོ་ལ། །དབྱེ་ཕྱིར་ནིམ་པ་ལས་བྱས་རབ་ཏུ་ཤིས། །བསད་ཅིང་སྐམ་ལ་བ་རུ་ར་ཡི་ཤིང་། ། [224b.4]ཤ་ཟ་བསྒྲུབ་པ་ལ་ཡང་རྟག་ཏུ་ཤིས། །ལྷ་དང་གནོད་སྦྱིན་དྲི་ཟ་བསྒྲུབ་པ་ལ། །སྒྲོན་ཤིང་ལས་ནི་བྱས་པའི་རྡོ་རྗེའོ། །ཇི་སྟེ་རླུང་ནི་དབང་དུ་བྱེད་འདོད་ན། །དེ་ཚེ་ཀླུ་ཤིང་རྩ་ལས་བྱེད་པའོ། །གཟུགས་བསྒྱུར་པ་ལ་ས་ལས་བྱས་པའོ། །རོ་ལངས་བསྒྲུབ་པ་ལ་ནི་ཀ་དམ་པའི། །བུ་ནན་ [224b.5]ག་དང་ར་ཛ་ཨརྐ་དང་། །ཨ་ཤྭད་ཤིང་གི་རྡོ་རྗེ་ནོར་གྱི་ཕྱིར། །བླ་བ་ཨ་མྲ་ཤྲི་བརྞ་བ། །ཨརྫུ་ལ་སོགས་པ་ལས་བྱས་པ་ནི། །མི་རྣམས་གཡུལ་ལས་རྒྱལ་བར་བྱ་ཕྱིར་རོ། །ཡིད་དུ་འོང་བའི་འདོད་པ་ཐོབ་བྱའི་ཕྱིར། །ཙནྡན་དཀར་པོ་དང་ནི་དམར་པོ་སྟེ། །དབྱིབས་ལེགས་ [224b.6]འཇམ་ཞིང་མ་ཉམས་རྨ་མེད་པའོ། །རྡོ་རྗེ་རྩེ་ལྔ་སྲ་བ་བཅང་བར་བྱ། །དང་པོ་ཟློས་ཚེ་དེ་ནི་ཐོགས་ནས་སུ། །བཟླས་བརྗོད་ཟིན་ན་མྱུར་བ་ཁོ་ནར་ནི། །དད་པའི་སེམས་ཀྱིས་ཕྱག་བྱས་དྲི་སོགས་ཀྱིས། །མཆོད་ནས་རྡོ་རྗེ་རྒྱལ་བའི་ཞབས་དྲུང་གཞག། །ང་ཡི་རིགས་ཀྱི་གསང་ [224b.7]སྔགས་སྒྲུབ་པ་པོས། །རྡོ་རྗེ་མེད་ན་འགྲུབ་པར་མི་འགྱུར་རོ། །དེ་ལས་གཅིག་ཀྱང་རྙེད་པར་མ་གྱུར་ན། །ཁུ་ཚུར་བཅངས་ལ་རྩེ་གཅིག་སེམས་ཀྱིས་བཟླས། །ཞེས་འབྱུང་། ལྕགས་གསུམ་ལས་བྱས་དྲིལ་བུ་མཐར། །ཕྱི་ལ་པདྨ་བ་ལང་ཁ། །རྡོ་རྗེ་པདྨ་བདེ་གཤེགས་རིགས། ། [225a] [225a.1]ལས་མཆོག་དགུ་ནི་སྐྱེད་པར་བྱེད། །རྡོ་རྗེ་ལ་སོགས་མ་ལྡན་དང་། །ཁོང་སྟོང་ལྕེ་དང་བཅས་པ་དང་། །གྲུ་བཞི་མཉམ་པའི་ཁ་ཆེར་དང་། །རྩེ་མོ་མདུང་གི་གནས་དང་བཅས། །ཆ་བཞི་རྣམ་པར་སྤངས་པ་ནི། །བིལ་བ་དཔལ་ནོར་རྒྱས་པ་ཐོབ། །པདྨ་པདྨའི་ [225a.2]དབྱིབས་འདྲ་ཞིང་། །ཁོང་སྟོང་རྐང་པ་དྲུག་དང་ལྡན། །ཨུཏྤལ་འདབ་མ་ཅན་གྱིས་ཀྱང་། །ཞི་དང་རྒྱས་པའི་དོན་སྟོན་ཏེ། །ཆ་གསུམ་ཡོངས་སུ་དོར་བར་ནི། །མཚན་མ་ཕྲེང་བ་སྐ་རགས་བཅས། །སྐྱེ་མེད་དོན་གྱི་ཟབ་པ་དང་། །ཤེས་རབ་སྒྲ་ཡི་རྗེས་འགྲོ་དབྱངས། །འོག་པུ་སྐ་ [225a.3]རགས་ལྡན་པ་ཡི། །བ་ལང་ཁ་ནི་མཆོག་ཏུ་བཤད། །དྲིལ་བུ་ཟུར་བཞི་མཉམ་པ་དང་། །སོར་ནི་བདུན་དང་བརྒྱད་དང་བཅུ། །རིགས་ནི་ལྔ་པོ་ཀུན་ལ་ཡང་། །དངོས་གྲུབ་ཐམས་ཅད་སྟེར་བྱེད་གསུངས། །དེ་ལྟར་དྲིལ་བུ་གསུམ་མཉམ་པར། །རྡོ་རྗེ་པདྨ་སོགས་ཀྱིས་བརྒྱན། །བུམ་ [225a.4]པ་དང་ནི་ལྡན་པ་རུ། །བླུགས་པས་དངོས་གྲུབ་སྟེར་བར་བཤད། །འདི་ནི་དྲིལ་བུའི་མཚན་ཉིད་དོ། །ནམ་མཁའ་དྲི་མེད་དཀྱིལ་འཁོར་ལེགས་བྲིས་པའི། །རྣམ་པར་དཀར་བའི་དགེ་བ་གང་ཡིན་དེས། །འགྲོ་ཀུན་ལྟ་ངན་སྤྲིན་ཚོགས་རྣམས་བསལ་ཏེ། །ཕྱོགས་རྣམས་ཀུན་དུ་ཉི་ཟླ་ལྟར་ [225a.5]གྱུར་ཅིག། {T2590}༄༅༅། །རྒྱ་གར་སྐད་དུ། ཤྲཱི་མཉྫུ་བཛྲ་ཨུ་ད་ཡ་མཎྜ་ལོ་བི་བྱེ་སརྦ་སཏྭ་ཧི་ཏ་བ་ཧ་ནཱ་གམ། བོད་སྐད་དུ། དཔལ་འཇམ་པའི་རྡོ་རྗེ་འབྱུང་བའི་དཀྱིལ་འཁོར་བྱུ་ཆོ་ག་སེམས་ཅན་ཐམས་ཅད་ཀྱི་བདེ་བ་བསྐྱེད་པ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་སེམས་ [225a.6]དཔའ་ལ་ཕྱག་འཚལ་ལོ། །མགོན་པོ་འཇམ་པའི་རྡོ་རྗེ་ལ་ཕྱག་འཚལ་ལོ། །དཔལ་ལྡན་དངོས་གྲུབ་ཐབས་ཆེན་བདག་ཉིད་དྲི་མེད་ཤེས་རབ་བཙུན་མོ་ཡི་ནི་སྒུ་ཡིས་འཁྱུད། །ནམ་མཁའ་ཁྱབ་པའི་ཐུབ་དབང་སྤྲུལ་པའི་ཚོགས་ཀྱིས་འཇིག་རྟེན་གསུམ་གྱི་འདོད་སྩོལ་མཛད། །སྒྱུ་འཕྲུལ་ [225a.7]དྲ་བའི་དགའ་བ་རྒྱུན་མི་འཆད་པའི་བདེ་བའི་རོལ་པའི་ཉམས་ནི་འཕྲོ་མཛད་པ། །འཇམ་པ་ཡི་ནི་མཆོག་ལ་བཏུད་དེ་འགྲོ་བས་དེ་ཡི་དཀྱིལ་འཁོར་མཉེས་བྱ་རབ་བཤད་བྱ། །མི་བརྟན་མི་ཉིད་རྙེད་དཀའ་དེ་བས་ཀྱང་། །བཤེས་གཉེན་མཆོག་ཕྲད་དགའ་སྟོན་རབ་རྙེད་དཀའ། །དེ་ཕྱིར་ [225b] [225b.1]བདག་གཞན་དོན་འབྱུང་སྔགས་ཀྱི་ཚུལ་།།སྲིད་གསུམ་ཕན་བྱེད་ལམ་ལ་བརྟེན་པར་ཀྱིས། །སྡུག་བསྔལ་དུ་མས་བཅོམ་ཞིང་མྱ་ངན་གནས། །འགྲོ་བ་མགོན་མེད་བལྟས་ནས་བརྩེར་ལྡན་པས། །སྔགས་ཚུལ་འདི་ཡི་དོན་ལ་བརྟེན་བྱ་སྟེ། །དམ་པ་རྣམས་ལ་གཞན་དོན་ལས་མཆོག་ [225b.2]མེད། །རང་གི་ལྟོ་བ་ཙམ་ཞིག་འགེངས་འདོད་པ། །འགྲོ་བ་ཀུན་ཀྱི་རང་བཞིན་འདི་ཡིན་གྱི། །རང་ལུས་འཇིག་ནའང་གཞན་དོན་འདོད་གྱུར་པ། །སྔོན་མེད་རྨད་འདི་ས་སྟེང་འགའ་ཡི་ཡིན། །ལུས་ཅན་ཡིད་ཀྱི་རང་དབང་དག་གིས་འཇུག །འདི་དག་ཡོང་ཡེ་ཡིད་ཀྱི་དབང་གྱུར་ [225b.3]ཡིན། །སྲིད་དང་རྣམ་གྲོལ་དེ་ཉིད་རྣམ་རོལ་ན། །བཅོས་བླའང་བློ་གྲོས་ནོར་ལྡན་ཅི་ཕྱིར་ཐོགས། །ཕྱི་རོལ་གནས་ཀྱང་དེ་ཉིད་ག་ལ་འགྲོ། །འོན་ཏེ་གནས་ཀྱང་ཡིད་ནི་རྣམ་པར་གྲོལ། །དེ་ལྟས་དོན་དུ་ཡོངས་འཛིན་དོན་མེད་དེ། །ཡིད་ཉིད་ཀུན་དུ་བྱ་དང་བྱེད་པ་ཡིན། །དཔེར་ན་ད་དུ་ར་ [225b.4]ཡི་མཐུ་ཡིས་ནི། །འགའ་ཡིས་ས་གཞི་གསེར་ཀྱི་རང་བཞིན་མཐོང་། །དེ་བཞིན་ཡིད་ཀྱང་སྔགས་སོགས་སྟོབས་ཀྱིས་ནི། །སྣ་ཚོགས་སྣང་བ་རྣམ་པར་དག་པར་འགྱུར། །དེ་ལ་སློབ་དཔོན་ཐེག་པ་ཆེན་པོ་ཡི། །ཟབ་ཅིང་རྒྱ་ཆེའི་ཆོས་ནི་རྟོགས་པ་དང་། །དེ་ཉིད་ལ་ནི་རྟག་ཏུ་མངོན་ [225b.5]པར་དགའ། །གསང་བའི་དེ་ཉིད་དོན་ནི་སྡུད་པར་བྱེད། །སྣ་ཚོགས་ལས་ཀྱི་རླུང་གིས་བསྐྱོད། །སྡུག་བསྔལ་དབའ་ཀློང་སྲིད་པའི་མཚོར། །འགྲོ་ཀུན་ནུབ་པར་མཐོང་ནས་ནི། །སྡུག་བསྔལ་དེ་ཉིད་དག་གིས་གདུངས། །དེ་ཉིད་གདོན་པར་རབ་དད་ཅིང་། །བྱང་ཆུབ་ཏུ་ནི་ངེས་ [225b.6]བྱས་ལ། །དཔལ་ལྡན་སྒྱུ་འཕྲུལ་དྲ་བ་ཡིས། །རྒྱུད་གསུངས་དམ་ཚིག་རབ་སྲུང་བྱེད། །ཕྱི་དང་གསང་བའི་དབང་ཡང་བསྐུར། །རྣམ་པར་མི་རྟོག་རྣམ་དག་བློ། །དཀྱིལ་འཁོར་དང་ནི་ཏིང་འཛིན་མཆོག །ཕྱག་རྒྱ་སྟང་སྟབས་འདུག་སྟངས་དང་། །བཟླས་དང་སྦྱིན་སྲེག་དེ་བཞིན་ [225b.7]མཆོད། །ལས་ཀྱི་སྤྱོར་དང་ཉེ་བསྡུ་བའོ། །དེ་ལྟར་དེ་ཉིད་བཅུ་ཤེས་ཤིང་། །དམན་པའི་སེམས་ནི་སྨོད་བྱེད་པ། །བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ཞིང་གཡོ་སྒྱུ་མེད། །གསང་སྔགས་རྒྱུད་ཀྱི་སྦྱོར་བ་ཤེས། །དཀྱིལ་འཁོར་འདྲི་བའི་ལས་ལ་མཁས། །དེ་ཉིད་ [226a] [226a.1]བཅུ་ནི་ཡོངས་ཤེས་ཤིང་། །བརྩེར་ལྡན་བསྟན་བཅོས་རྣམས་ལ་མཁས། །སྤྲོ་བ་ཆེ་ཞིང་སྙིང་སྟོབས་ཆེ། །རག་པ་ཟློས་ཤིང་ཤིན་ཏུ་བསྡམས། །བྱམས་དང་སྙིང་རྗེ་དག་པའི་བདག །སེམས་ཅན་ཀུན་ལ་སེར་སྣ་མེད། །སྲིད་པའི་ལོངས་སྤྱོད་ལ་མི་ཆགས། ། [226a.2]སྔགས་ཀྱི་ཚུལ་ལ་ཐེ་ཚོམ་མེད། །རང་གི་ཡིད་ནི་ཉམས་དགའི་གནས། །ཕྱོགས་དགར་རྣམ་པར་གནས་ནས་ནི། །སྒྱུ་མ་རྨི་ལམ་བྲག་ཅ་དང་། །དྲི་ཟའི་གྲོང་ཁྱེར་ལྟ་བུར་ནི། །འགྲོ་བ་ཐམས་ཅད་རྣམ་བསྒོམས་ལ། །འཇམ་པའི་དབྱངས་ནི་རབ་ཏུ་བསྒྲུབ། །ཇི་སྐད་བཤད་ [226a.3]པའི་ཡོན་ཏན་ལྡན། །བློ་དང་ལྡན་པས་དཀྱིལ་འཁོར་བྲི། །དེ་ཉིད་སློབ་མ་སྡུད་པ་དང་། །རྒྱུད་རྣམས་སྟོན་པར་འོས་པ་ཡིན། །དེ་ཉིད་ཀྱིས་ནི་སྔགས་བྱིན་པ། །བྱ་བར་ལྡན་ལ་རབ་ཏུ་འགྲུབ། །སློབ་མའང་ཡོན་ཏན་དེ་འདྲ་བའམ །ཅུང་ཟད་དམན་པས་དཔལ་ལྡན་རྒྱུད། །ཚུལ་ [226a.4]གསུངས་ཐར་རྒྱལ་འབྲས་འདོད་པས། །བླ་མ་ལ་ནི་གསོལ་བ་གདབ། །གཞན་དུ་སློབ་དཔོན་སློབ་མ་དག །ངེས་པར་ཉམས་པ་འབྱུང་འགྱུར་ཞིང་། །འཇིག་རྟེན་གསུམ་གྱེས་དཔྱས་པ་དང་། །དོན་གྲུབ་འབྲས་བུའང་རིང་བར་འགྱུར། །དེ་བས་འབད་པ་ཐམས་ཅད་ཀྱིས། །དེ་བཞིན་ [226a.5]གཤེགས་པ་ཀུན་ཀྱི་མཆོག །དམ་ཚིག་ཤེས་རབ་ཅན་གྱིས་བསྲུང་། །སྲོག་གི་ཕྱིར་ཡང་དོར་མི་བྱ། །མཁས་པས་ལེགས་པར་འཐས་པ་འམ། །ལེགས་པར་བྲིས་པ་ཉིད་རུང་གི། །བར་མ་དོར་གྱུར་དངོས་པོས་ནི། །དོན་མེད་པར་ནི་ལྟུང་བར་འགྱུར། །དེ་ལ་སློབ་དཔོན་སློབ་ [226a.6]མས་གང་གི་ཚེ། དཀྱིལ་འཁོར་བྲི་བའི་ཕྱིར་ལན་གཉིས་ལན་གསུམ་གསོལ་བ་བཏབ་ན། དེའི་ཚེ་བདག་གིས་སེམས་ཅན་གྱི་ཁམས་འདི་དག་ཐམས་ཅད་བླ་ན་མེད་པའི་བདེ་བ་ཆེན་པོའི་གནས་ལ་རབ་ཏུ་དགོད་པར་བྱའོ་ཞེས་ལྷག་པའི་བསམ་པ་བསྐྱེད་ལ། ཁྱེད་ཀྱི་དཀྱིལ་ [226a.7]འཁོར་གྱི་ཡོ་བྱད་ཐམས་ཅད་ཚོགས་པར་གྱུར་ཏམ། འོན་ཏེ་མ་ཡིན་ཞེས་སློབ་མ་ལ་དྲི་བར་བྱའོ། །གལ་ཏེ་ཅུང་ཟད་ནི་ཚོགས་ལ་ཅུང་ཟད་ནི་མ་ཡིན་ནོ་ཞེས་ཟེར་ན། དེའི་ཚེ་དེའི་ལྟེ་བར་ཉི་མའི་དཀྱིལ་འཁོར་ལ་གནས་པའི་ཡི་གེ་ཧཱུཾ་གི་འོད་ཟེར་རྣམས་ཀྱིས་སྙིང་གར་གནས་པའི་ [226b] [226b.1]ཡི་གེ་ཀྃ་ལས་བྱུང་བའི་སྡིག་པ་མདོག་གནག་ཅིང་མི་སྡུག་པ་ཤ་ཟ་ལྟ་བུར་སྣའི་རྩེ་མོར་ཕྱུང་བ་དང་། ཡི་གེ་ཧཱུཾ་དེ་ཡང་སྙིང་གར་ཕྱིན་ཏེ། ཁྲོ་བོ་རྡོ་རྗེ་གནོད་སྦྱིན་གྱི་སྐུ་གཡོན་བརྐྱང་བས་གནས་པ། མཆེ་བ་གཙིགས་པ་གསུས་པ་འཕྱང་བ། སྐུ་མདོག་གནག་པ། ཐུགས་ཀར་མཆེ་ [226b.2]བ་དང་བཅས་པའི་སྡིགས་མཛུབ་སྟོན་པ། ཕྱག་གཡས་ན་མཆེ་བ་བསྣམས་པ་བསམས་ལ་ཕྱུང་སྟེ། ཨོཾ་བཛྲ་ཡཀྵ་ཀྲོ་དྷ་ཁཱ་ད་ཁཱ་ད། སརྦྦ་པཱ་པཾ་ཨ་སྱ་ཧཱུཾ་ཕཊ་ཅེས་བྱ་བས་དེས་སྡིག་པ་ཐམས་ཅད་ཟོས་ནས། སློབ་མ་དེ་ཡང་ཡི་གེ་སཾ་ལས་ཀུན་དུ་བཟང་པོའི་སྐུར་རྣམ་པར་བསམས་ལ། [226b.3]འོག་ནས་བཤད་པའི་བདུད་རྩི་ཐབ་སྦྱོར་གྱི་ཚུལ་གྱིས་དེའི་སེམས་ཀྱི་བགེགས་ཕུར་བུས་བཏབ་ལ། དེའི་འོད་ཟེར་འཇིགས་པ་སྟོང་ཕྲག་གིས་གདུག་པ་ཐམས་ཅད་ཡང་དག་པར་བསྲེགས་ལ། སློབ་པའི་སེམས་མངོན་པར་བསྲུང་བར་བྱ་བའི་ཕྱིར། ཡི་གེ་ཨ་ལས་བྱུང་བའི་ཟླ་བའི་ [226b.4]དཀྱིལ་འཁོར་ལ་དབྱངས་ཀྱི་ཡི་གེ་ཐ་མ་ལས་བྱུང་བའི་ལས་ཀྱི་རྡོ་རྗེ་ཡང་དེར་གནས་པར་བསམ་པར་བྱའོ། །དེ་ནས་དཀྱིལ་འཁོར་ཀྱི་སྔོན་དུ་བྱ་བ་རྣམས་ཀྱི་ཕྱིར་འབད་པར་བྱའོ། །དཀྱིལ་འཁོར་ཡང་དག་ཇི་ལྟ་བར། །ཡང་དག་བརྟག་པར་སུ་ཡིས་ནུས། །རང་གི་ལྷ་ཡི་སྦྱོར་བ་ཡིས། ། [226b.5]དཀྱིལ་འཁོར་རྟག་པར་འགྲུབ་པར་འགྱུར། །ཞེས་གསུངས་པས་ན། དཀྱིལ་འཁོར་བྲི་བར་འདོད་པས་རང་གི་ལྷག་པའི་ལྷའི་སྦྱོར་བ་བྱ་བར་བཤད་དོ། །དེ་ལ་དང་པོར་རེ་ཞིག་བདུད་རྩི་ཐབ་སྤྱོར་གྱི་གསང་སྔགས་རྗེས་སུ་དྲན་པར་བྱས་ལ། མལ་ནས་ལངས་ཏེ་གདོང་བཀྲུ་བ་ལ་སོགས་ [226b.6]པའི་བྱ་བ་ཐམས་ཅད་བྱས་ནས། སྔ་དྲོའི་དུས་སུ་གཡོན་པའི་ཁྲོ་བོའི་ཁུ་ཚུར་དང་ཧཱུཾ་ཕཊ་ཅེས་བྱ་བས་བགེགས་རྣམས་བསྐྲད་ལ། ལྷའི་ཁང་པར་ཞུགས་ཏེ། སྟན་ནང་ཚངས་ཅན་ལ་སོགས་པར་འདུག་ལ། ཡི་གེ་ཨ་དང་ཧཱུཾ་གཉིས་ལས་ཟླ་བ་དང་། རྡོ་རྗེ་རིམ་བཞིན་ལག་པ་གཉིས་ [226b.7]སུ་བསམས་ལ། གུང་མོ་དང་མཛུབ་མོ་དང་སྲིན་ལག་དང་མཐེའུ་ཆུང་དང་མཐེ་བོ་རྣམས་སུ། ཨོཾ་ཧཱུཾ་ཏྲཱཾ་ཨཱཿཁཾ་ཞེས་བྱ་བའི་ཡི་གེ་ལྔ་རིམ་བཞིན་དུ་བཀོད་ལ་རྡོ་རྗེ་ཐལ་མོ་བཅིངས་ཏེ། ཨོཾ་སརྦྦ་ཏཱ་ཐཱ་ག་ཏ་ཤན་སཱི་དཱ། སརྦྦ་སཏྭ་ན་མ་སརྦྦ་སིདྡྷཱ་ཡ། སཾ་པཏྟྱནྟྃ། སརྦྦ་ཏ་ཐཱ་ག་ [227a] [227a.1]ཏཤྩ། ཨ་དྷི་ཏིཥྛ་ན་ཧཾ། ཨོཾ་སྭ་བྷཱ་ཝ་ཤུདྷཿསརྦ་དྷརྨྨཱཿསྭ་བྷཱ་ཤུདྡྷོ྅ཧཾ། །ཞེས་བཞག་ལ་རང་གི་མགོར་དགྲོལ་བར་བྱའོ། །དེ་ཉིད་ཀྱིས་བགེགས་ཐམས་ཅད་ཞི་བར་འགྱུར་རོ་ཞེས་བསམ་པར་བྱ་སྟེ། གང་འདི་ལྟར་ཆོས་ཐམས་ཅད་རང་བཞིན་གྱིས་དག་པར་ལྷག་པར་མོས་ [227a.2]པ་ལ་བགེགས་རྣམས་འབྱུང་བ་འདི་ནི་གནས་མེད་ཅིང་སྐབས་མེད་དེ། བགེགས་ལ་སོགས་པ་ནི་ཐ་མལ་པའི་རྣམ་པར་རྟོག་པ་ལས་བྱུང་བ་ཡིན་པའི་ཕྱིར་རོ། །གལ་ཏེ་དེ་ལྟ་ན་ཡང་ཡིད་མགུ་བར་མ་གྱུར་ན་དེའི་ཚེ་སྐད་ཅིག་གིས་དཔལ་རྣམ་པར་སྣང་མཛད་དུ་བདག་ཉིད་རྣམ་པར་ [227a.3]བསམས་ལ། ཡི་གེ་ཧཱུཾ་ལས་བྱུང་བའི་བདུད་རྩི་ཐབ་སྤྱོར་བགེགས་མ་ལུས་པ་རྣམ་པར་འཇིག་པར་བྱེད་པ། འབར་བ་སྟོང་ཕྲག་གིས་འཇིགས་སུ་རུང་བ། ལྟེ་བ་མན་ཆད་རྩེ་གཅིག་པ་ལྟ་བུ་ལ་སྐུ་སྟོད་ཁྲོ་བོའི་དབྱིབས་ཅན་ལ་འོག་ནས་བཤད་པའི་སྐུ་མདོག་དང་། ཕྱག་མཚན་དང་ལྡན་ [227a.4]པར་བསམས་ལ། ལྷའི་ཁང་པའི་དབུས་སུ་སྔགས་འདི་གདབ་པར་བྱའོ། །ཨོཾ་གྷ་གྷ། གྷཱ་ཏ་ཡ་གྷཱ་ཏ་ཡ། སརྦྦ་དུཥྛཱན་ཕཊ། ཀཱི་ལ་ཡ་ཀཱི་ལ་ཡ། སརྦྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ། བཛྲ་ཀཱི་ལ་ཡ་བཛྲ་དྷ་རཱ་ཛྙཱ་པ་ཡ་ཏི་ཀཱ་ཡ། བཱཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། འོག་ཏུ་ས་གཞིའི་གཏན་པ་ལ་ཐུག་གི་ [227a.5]བར་དུ་བགེགས་ཀྱི་ཚོགས་རྣམས་ཀུན་དུ་ཕུར་བུས་བཏབ་ལ། དེར་གཏོགས་པའི་འོད་ཟེར་གྱི་ཚོགས་ཀུན་ནས་སྲེག་པར་བྱེད་པའི་ཕུར་བུས་བགེགས་རྣམས་བསྐྲད་ནས། དེའི་སྟེང་དུ་ཡི་གེ་ཨཾ་ལས་བྱུང་བའི་ཉི་མའི་དཀྱིལ་འཁོར་བསྐལ་པ་མེ་ལྟར་འབར་བའི་འོད་ཅན་ཉི་མ་བྱེ་ [227a.6]བའི་འོད་དང་མཚུངས་པ་བསམས་ལ། ཤར་དང་ནུབ་དང་བྱང་དང་། ལྷོའི་ཕྱོགས་དང་མཚམས་རྣམས་སུ་སྔར་བཤད་པའི་ཕུར་བུ་རྣམ་པར་བསམས་ནས། དབུས་མའི་ཕུར་བུའི་ཉི་མའི་གཟུགས་ལས་འོད་ཕྱུང་ནས། ངོས་ཀྱི་ཕུར་བུ་རྣམས་ལ་དེ་དག་ཕན་ཚུན་དུ་འོད་ཀྱི་ཚོགས་ [227a.7]རྣམས་འདྲེས་པར་གྱུར་པས་བླ་རེ་བཞིན་དུ་སྟུག་བོར་གྱུར་པ། འོག་ཏུ་ཡང་དེ་བཞིན་དུ་བསམ་པར་བྱའོ། །ཡང་ན་དེ་བཞིན་དུ་དཔལ་རྣམ་པར་སྣང་མཛད་ཀྱི་ཏིང་ངེ་འཛིན་ལ་གནས་ལ། ཧཱུཾ་ལས་དཔལ་རྡོ་རྗེ་ཧཱུཾ་མཛད་མདུན་དུ་འདུག་སྟེ། བཀའ་ནོད་པ་སྤྲུལ་ལ། ཨོཾ་སུམྦྷ་ནི་སུམྦྷ་ཏྲེ་ཞེས་བྱ་བ་ [227b] [227b.1]ལ་སོགས་པའི་སྔགས་ཀྱིས་བཀའ་བསྒོ་བ་དང་། དེ་ལས་ལྷ་ལ་སོགས་པའི་བགེགས་མ་ལུས་པར་བཀུག་པར་གྱུར་ནས། རང་གི་ཕྱོགས་སུ་གནས་པར་རྣམ་པར་བསམས་ལ། ཡི་གེ་ཧཱུཾ་ལས་བྱུང་བའི་བདུད་རྩི་ཐབ་སྦྱོར་ཕྱག་ན་ཐོ་བ་བསྣམས་ནས་ཨོཾ་གྷ་གྷ་ཞེས་བྱ་བ་ལ་ [227b.2]སོགས་པའི་སྔགས་ཀྱིས་བཀའ་བསྒོ་ཞིང་ཁྲོ་བོ་གཞན་གྱིས་མི་ཐུབ་པའི་ཁྲོ་བོའི་ཕུར་བུས་སྤྱི་བོ་ནས་བརྡུངས་པ་དང་། ཤར་ཕྱོགས་སུ་ཁྱབ་འཇུག་དང་བརྒྱ་བྱིན་ཞེས་བྱ་བ་འཁོར་ལོ་དང་རྡོ་རྗེ་ཐོགས་པ། མདོག་སྔོན་པོ་དང་། སེར་པོ་ནམ་མཁའ་ལྡིང་དང་། ས་སྲུང་ལ་ཞོན་པའི་ལྷ་ [227b.3]གཉིས་གཡོག་དང་འཁོར་དུ་བཅས་པ་ཕུར་བུས་བཏབ་པར་བསམ་པར་བྱའོ། །དེ་བཞིན་དུ་བདུད་རྩི་ཐབ་སྤྱོར་ཕྱག་ན་རྡོ་རྗེའི་ཐོ་བ་བསྣམས་པ་དང་། འཕགས་པ་གཤིན་རྗེ་གཤེད་ཀྱིས་ལྷོར་གཤིན་རྗེ་ལག་ན་དབྱུག་པ་ཐོགས་པ། ཁ་དོག་གནག་པ་མ་ཧེ་ལ་ཞོན་པ་འཁོར་དང་ [227b.4]བཅས་པ་ཕུར་བུས་བཏབ་པ་དང་། སྟོབས་པོ་ཆེས་ནུབ་ཏུ་ཆུ་ལྷ་ལག་ན་ཞགས་པ་ཐོགས་པ་ཟླ་བ་ལྟ་བུའི་མདོག་ཅན་སྦྲུལ་ལ་ཞོན་པའོ། །འདོད་པའི་རྒྱལ་བོས་མེའི་ཕྱོགས་སུ་མེ་ལྷ་གུནྡྷེ་དང་བགྲང་ཕྲེང་ཐོགས་པ་ཁ་དོག་དམར་པོ་ར་སྐྱེས་ལ་ཞོན་པ། དྲང་སྲོང་རྣམས་ཀྱིས་བསྐོར་ [227b.5]བའོ། །ཁྲོ་བོ་པདྨ་མཐར་བྱེད་ཀྱིས་བདེན་བྲལ་གྱི་ཕྱོགས་སུ་བདེན་བྲལ་མདོག་ཆར་སྤྲིན་ལྟར་ནག་པོ། རལ་གྲི་ཐོགས་པ་ཡི་དགས་ལ་ཞོན་པ། སྲིན་པོ་རྣམས་ཀྱིས་བསྐོར་བའོ། །ཁྲོ་བོ་ཆེན་པོ་དབྱུག་སྔོན་གྱིས་རླུང་གི་ཕྱོགས་སུ་རླུང་ལྷ་དུ་བའི་མདོག་ཅན་རྒྱལ་མཚན་ཐོགས་པ། [227b.6]རི་དགས་སྔོ་བསངས་ལ་ཞོན་པའོ། །ཁྲོ་བོ་མི་གཡོ་བས་དབང་ལྡན་གྱི་ཕྱོགས་སུ་དབང་ལྡན་མདོག་དཀར་པོ་མདུང་རྩེ་གསུམ་པ་ཐོགས་པ་ཁྱུ་མཆོག་ལ་ཞོན་པ། ཟླ་བ་ཁམ་པས་དབུ་རྒྱན་བྱས་པའོ། །ཁྲོ་བོའི་རྒྱལ་པོ་གནོད་མཛེས་ཀྱི་སྟེང་དུ་ཚངས་པ་དང་། ཉི་མ་དང་ཟླ་བ་ལ་ [227b.7]སོགས་པ་མདོག་སེར་པོ་དང་། དམར་པོ་དང་། དཀར་པོ་དང་། སྤྱི་བླུགས་དང་། པདྨ་དང་། ཀུ་མུ་ད་ཐོགས་པའོ། །ཁྲོ་བོ་རྡོ་རྗེས་འོག་གིས་སའི་འོག་ཏུ་ལྷ་མ་ཡིན་ཀྱི་དབང་པོ་ཐགས་བཟངས་རིས་སྐུ་མདོག་ལྗང་གུ་ལག་ན་རལ་གྲི་ཐོགས་པ་ཤིང་རྟ་ལ་ཞོན་པའོ། །ཁྲོ་བོ་ཆེན་ [228a] [228a.1]པོ་བགེགས་མཐར་བྱེད་རང་ཉིད་ཀྱི་བྱང་དུ་ལུས་ངན་པོ་དང་། ཚོགས་ཀྱི་བདག་པོ་མདོག་དཀར་པོ་དང་། སེར་པོ་བིལ་བ་དང་། ལ་དུ་ལག་ན་ཐོགས་པ་མི་དང་བྱི་ལ་ལ་ཞོན་པ། གནོད་སྦྱིན་དང་། བགེགས་མ་ལུས་པའི་བདག་བོར་གྱུར་པ། ཕུར་བུས་ [228a.2]བཏབ་པ་རབ་ཏུ་བསམ་པར་བྱའོ། །ཁྲོ་བོ་འདི་དག་ཐམས་ཅད་ཀྱང་ལྟེ་བ་མན་ཆད་སྐུ་སྨད་ཀྱི་ཆ་རྡོ་རྗེའི་རྩེ་མོ་ལྟ་བུ་སྐུ་སྟོད་ཁྲོ་བོའི་དབྱིབས་ཅན་ལ། འོག་ནས་བཤད་པའི་སྐུ་མདོག་དང་ཕྱག་མཚན་དང་ལྡན་པས་ཁྱབ་འཇུག་ལ་སོགས་པ་བུ་དང་ཆུང་མ་དང་། འཁོར་དང་བཅས་པ་ [228a.3]ཕུར་བུས་བཏབ་ཅིང་ཁྲོ་བོའི་འོད་ཟེར་རྣམས་ཀྱིས་ལུས་རྣམ་པར་བཅོམ་པར་ཡང་བསམ་པར་བྱའོ། །དེ་ནས་ཡི་གེ་རྃ་ལས་བྱུང་བའི་མེའི་དཀྱིལ་འཁོར་གྱིས་ཀུན་ནས་ཕྱོགས་བཅིང་བ་དང་། ཡི་གེ་ལྃ་ལས་བྱུང་བའི་དབང་ཆེན་གྱི་དཀྱིལ་འཁོར་སེར་པོས་ཕྱོགས་ཀྱི་ནང་དུ་མཚམས་ [228a.4]བཅིང་བ་དང་། ཡི་གེ་ཧཱུཾ་ལས་བྱུང་བའི་རྡོ་རྗེ་བསྐལ་པའི་མེ་ལྟར་སྣང་བ་གཏམས་པས། ཕུར་བུའི་ནང་དུ་ཀུན་ནས་ར་བ་བྱ་བ་དང་ཡི་གེ་རྃ་ལས་བྱུང་བའི་རྡོ་རྗེ་དྲ་བ་རབ་ཏུ་འབར་བའི་མེ་ལྟར་སྣང་ཞིང་འབར་བའི་འོད་ཀྱི་ཕྲེང་བ་ཀུན་དུ་འཁྲུག་པ་ར་བའི་ནང་དུ་བསམ་པར་བྱའོ། །དེ་ལྟར་ [228a.5]མདོར་བསྡུས་པ་དང་། བར་མ་དང་རྒྱ་ཆེན་པོ་སྟེ། བགེགས་བསྐྲད་པའི་ཆོ་ག་རྣམས་ལས་གང་དུ་མངོན་པར་འདོད་པ་དེ་ཉིད་བྱའོ། །དེ་ནས་ཡི་གེ་ཧྲཱིཿལས་ཀློག་མར་པདྨ་འདབ་མ་བརྒྱད་པ་བསམས་ལ། ལྕེའི་པདྨའི་འདབ་མ་ལ་ཧཱུཾ་ལས་བྱུང་བའི་རྡོ་རྗེ་གནས་ངན་ལེན་ཐམས་ཅད་དང་ [228a.6]བྲལ་བས་དཀར་བ་བསམས་ཏེ། བཛྲ་ཛི་ཧྭ་ཞེས་བྱ་བས་བྱིན་གྱིས་བརླབས་ནས་རས་རིས་ལ་སོགས་པར་བཞུགས་པའི་བཅོམ་ལྡན་འདས་འཕགས་པ་འཇམ་དཔལ་དང་། དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་རྣམས་ཕྱོགས་ཐམས་ [228a.7]ཅད་དུ་དམིགས་ལ་མཆོག་ཏུ་གུས་པས་སྙིང་གར་ཐལ་མོ་སྦྱར་བ་བཞག་སྟེ། པུས་མོའི་ལྷ་ང་ས་ལ་བཞག་ནས། ཕྱིའི་མཆོད་པ་ཅི་འབྱོར་པ་རྣམས་དང་། ཨོཾ་སརྦྦ་བིད་པཱུ་ར་པཱུ་ར། ཨ་བརྟ་ཡ་ཨ་བརྟ་ཡ་ཧོ་ཞེས་བྱ་བ་དང་། ཡིད་ཀྱིས་མཆོད་པའི་སྤྲིན་རྣམ་པ་སྣ་ཚོགས་པས་ཀྱང་ [228b] [228b.1]ཡང་དག་པར་མཆོད་ལ་དངོས་པོ་ཐམས་ཅད་ཀྱིས་ཕྱག་བྱས་ནས་སྐྱབས་སུ་འགྲོ་བ་ལ་སོགས་པ་བྱའོ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཇི་ལྟར་དུས་གསུམ་ [228b.2]མགོན་པོ་དག །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་པའི། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་ནི་བྱེད་པ་གསུམ། །བདག་གིས་ [228b.3]བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བཀྱི། །སློབ་དཔོན་དག་ཀྱང་གཟུང་ [228b.4]བར་བཀྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་ཞིང་ནི་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་དང་གསང་བ་ཐེག་པ་གསུམ། །དམ་པའི་ཆོས་ཀྱང་མ་ལུས་གཟུང་ [228b.5]ལས་ཀྱི་རིགས་མཆོག་ཆེན་པོ་ཡི། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་བགྱི་ཞིང་། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་ [228b.6]གཟུང་། །མ་བསྒྲལ་བ་ནི་བསྒྲལ་བར་བགྱི། །མ་གྲོལ་བ་ནི་གྲོལ་བར་བགྱི། །དབུགས་མ་ཕྱིན་པ་དབྱུགས་དབྱུང་ཞིང་། །སེམས་ཅན་མྱ་ངན་འདས་ལ་འགོང་། །བདག་ནི་དགེ་བའི་ལས་འདི་ཡིས། །སངས་རྒྱས་ཉིད་ནི་རྟོགས་གྱུར་ནས། །འཁོར་བའི་རྒྱ་མཚོ་མཐའ་མེད་ [228b.7]ལས། །འགྲོ་བ་ཐམས་ཅད་གདོན་པར་བགྱི། །དེ་ནས་རང་གི་སྙིང་གའི་ཟླ་བ་ལ་རང་གི་སྔགས་དང་ཏིང་ངེ་འཛིན་ལ་སྙོམས་པར་ཞུགས་པའི་རང་གི་ལྷའི་རང་བཞིན་འོད་ཀྱི་ཚོགས་དཔག་ཏུ་མེད་པ་རྣམ་པར་འཕྲོ་བ་བཀོད་ལ། དེ་ཉིད་ཡིད་ལ་ཟློས་ཤིང་སེམས་རྣམ་པར་སྦྱང་བར་ [229a] [229a.1]བྱའོ། །དངོས་པོ་འདི་དག་མ་སྐྱེས་པས། །ཆོས་རྣམས་མེད་ཅིང་ཆོས་ཅན་མེད། །ནམ་མཁའ་ལྟ་བུར་དམིགས་མེད་དེ། །བྱང་ཆུབ་སེམས་འདི་བརྟན་པའོ། །ཞེས་ཀྱང་བརྗོད་ལ། དེའི་དོན་ལ་ལྷག་པར་མོས་པས་ཐོག་མ་མེད་པའི་དུས་ཅན་གྱི་ཕྱིན་ཅི་ལོག་གི་རྟོག་ [229a.2]པའི་བག་ཆགས་ཀྱི་ས་བོན་བསལ་ལ། འགྲོ་བ་འདི་དག་མ་ལུས་པ་དང་། རང་གི་ལུས་དང་རྡུལ་ཕྲ་རབ་ཏུ་རྣམ་པར་བཤིག་ལ། རྡུལ་ཕྲ་རབ་རྣམས་ཀྱང་ཇི་ལྟ་བ་བཞིན་དུ་བརྟགས་པ་ལས་འདས་པས་དངོས་པོ་མེད་པས་རང་བཞིན་མེད་པར་རྣམ་པར་བསྒོམས་ལ། ཨོཾ་སྭ་བྷཱ་ཝ་ཤུདྷཿ [229a.3]སཏྠ་དྷསྠཱཿཞེས་བྱ་བ་དང་ཐལ་མོ་ལན་གསུམ་བརྡབས་ཏེ། རང་བཞིན་གྱིས་དག་པར་མོས་ལ། རང་གི་སེམས་གདོད་མ་ནས་མ་སྐྱེས་པ་རང་བཞིན་གྱིས་འོད་གསལ་བ་ཕུང་པོ་དང་ཁམས་དང་སྐྱེ་མཆེད་ལ་སོགས་པ་ལས་རྣམ་པར་གྲོལ་བ། དེའི་ངོ་བོ་ཉིད་དུ་བདག་ཉིད་རང་གི་ [229a.4]སྔགས་ཙམ་ལ་ཡི་གེ་ཧོ་དང་སྤེལ་བར་བསམས་ལ། ཨོཾ་ལས་བྱུང་བའི་བཅོམ་ལྡན་འདས་རྣམ་པར་སྣང་མཛད་ཇི་སྐད་དུ་བཤད་པའི་གཞལ་ཡས་ཁང་གི་དབུས་ན་བཞུགས་པ་རང་གི་དམ་ཚིག་གི་ཕྱག་རྒྱའི་ཏིང་ངེ་འཛིན་ལ་གནས་པ། མ་ལུས་པའི་ལྷ་རྣམས་ཀྱི་འཁོར་ལོའི་ནང་དུ་ [229a.5]ཆུད་པ་མདུན་དུ་བཞུགས་པར་བསམས་ནས། ཨོཾ་ཙིཏྟ་པྲ་ཏི་བྱ་དྷཱི་ཀཱ་རོ་མི་ཞེས་བརྗོད་དོ། །འདི་དེ་བྱང་ཆུབ་བདེ་མཆོག་སྟེ། །འདི་ལས་གཞན་པའི་བདེ་མཆོག་མེད། །དེ་ཐོབ་པར་ནི་འདོད་བཞིན་དུ། །དེ་ནས་དྲི་ཟའི་སེམས་ཅན་འདྲ། །ཉེ་བར་ལེན་པའི་རྒྱུ་ཡིས་ནི། །ཕྲ་བའི་སྦྱོར་བ་ [229a.6]ཉིད་འཛིན་བཞིན། །རང་བདག་ཞལ་ནས་རྒྱ་པདྨར། །སྐྱེས་པའི་དུས་སུ་བློ་ཡི་ཞུགས། །འདོད་ཆགས་ཆེན་པོའི་མེ་གཟུགས་སུ། །ར་ནི་ཆུ་སྐྱེས་སུ་ལེགས་སམ། །དེ་ཡི་འོད་ཀྱི་མཐུ་ཡིས་ནི། །སྐད་ཅིག་དེ་ལས་མར་བུམ་བཞིན། །བྱང་ཆུབ་སེམས་ཞུ་ཉིད་གྱུར་པ། །སངས་རྒྱས་ [229a.7]སྲས་བཅས་པ་ཡིས་གཟིགས། །ཤིན་ཏུ་མཉམ་གཞག་སེམས་ཅན་བཞིན། །རང་གི་བདག་ཉིད་དེར་དབྱེར་མེད། །སྡུག་པའི་སྙིང་པོ་དག་པ་ཆེ། །ནམ་མཁའ་བཞིན་དུ་དྲི་མ་མེད། །གནས་ངན་ལེན་ནི་ཀུན་ལས་གྲོལ། །རྣམ་པར་རྟོག་པ་སེལ་བའི་མཆོག །ཉོན་མོངས་ [229b] [229b.1]དྲི་མ་ཐམས་ཅད་དག །ཟླ་བ་ལྟ་བུར་སེམས་ཙམ་པ། །སེམས་ཙམ་གྱུར་པའི་སེམས་ཅན་དང་། །རྫོགས་པའི་སངས་རྒྱས་སྲས་བཅས་པ། །དེའི་འོད་ལྕགས་ཀྱུས་བཀུག་པ་ཡིས། །རང་གི་སེམས་ཀྱིས་གཅིག་ཏུ་བྱ། །འདིར་སངས་རྒྱས་ཀུན་ཡོན་ཏན་དང་། །ས་དང་ཕ་རོལ་ [229b.2]ཕྱིན་ལ་སོགས། །ཨ་སོགས་དབྱངས་ཡིག་ལྟ་བུ་ནི། །མཁའ་དང་མཉམ་པར་བསྒོམ་པར་བྱ། །རྒྱུན་ལྟར་རང་ཕྱོགས་ནས་འོངས་ཏེ། །དཀར་བའི་ཚུལ་གྱིས་རྣམ་པར་ཞུགས། །བསོད་ནམས་ཚོགས་ཀྱིས་ནུས་པ་ཉིད། །སེམས་ཙམ་དུ་ནི་རྣམ་པར་བསམ། །འདི་ལྟར་སྙིང་རྗེས་ [229b.3]བསྐུལ་བ་ནི། །ས་འོག་བར་དུ་བསམ་པར་བྱ། །ཀྱེ་མ་སེམས་ཅན་འཁོར་བ་ལ། །དགའ་བས་སྡུག་བསྔལ་ཉིད་དུ་འགྱུར། །ཤེས་རབ་ཐབས་ཀྱིས་བདག་ཉིད་བྲལ། །ཡུན་རིང་དུས་སུ་ཡང་ཡང་འཁོར། །དེ་རྣམས་རྫོགས་པར་བྱང་ཆུབ་ཕྱིར། །འཇམ་གསུང་རང་ཉིད་གྱུར་པར་བྱ། །ཨོཾ་བྷོ་ [229b.4]དྷི་ཙིཏྟ་ཨུཏྤཱ་ད་ཡཱ་མི། དེ་ལས་བྱུང་བའི་འོད་ཚོགས་ལས། །ཀ་སོགས་ཡི་གེ་རྒྱས་པ་ཡིས། །རིམ་གྱིས་ཉེ་བར་འཕེལ་བའི་སེམས། །སེམས་ཅན་རྗེས་སུ་འཛིན་བྱེད་ཅིང་། །སྙིང་རྗེ་རྗེས་ཆགས་ལས་བྱུང་བ། །བྱང་ཆུབ་སེམས་ཀྱི་ཟླ་དཀྱིལ་འཁོར། །དགེ་བའི་ཆོས་ཀྱིས་ཡང་དག་ [229b.5]རྫོགས། །ཉོན་མོངས་ཐམས་ཅད་དེས་འཇོམས་ཡིན། །སངས་རྒྱས་ཀུན་གྱིས་དབང་བསྐུར་སོགས། །སྣ་ཚོགས་གོས་དང་རྒྱན་ལྡན་པའི། །ཀུན་དུ་བཟང་པོའི་བདག་ཉིད་དུ། །མཐོང་ནས་རང་ལ་ཡིག་གསུམ་དགོད། །སྤྱི་བོར་འཁོར་ལོ་ལ་གནས་པའི། །ཡི་གེ་ཨོཾ་ནི་ཁ་དོག་སེར། ། [229b.6]ཁར་ནི་པདྨའི་ལྟེ་བ་ཡི། །དབུས་ནས་ཨ་ནི་ཁ་དོག་དཀར། །སྙིང་གར་རྡོ་རྗེ་དེ་ཡི་ནི། །ལྟེ་བ་ལ་གནས་ཡི་གེ་ཧཱུཾ། །སྔོན་པོ་འོད་ཟེར་ཚོགས་རྣམས་ནི། །རྣམ་པར་འཕྲོ་བ་དགོད་པར་བྱ། །རྡོ་རྗེའི་ཡི་གེ་དེ་རྣམས་ལས། །འོད་ཀྱི་སྤྲིན་རྣམས་སྤྲོས་ནས་ནི། །སེམས་ཅན་ཁམས་ཀུན་སྦྱང་ [229b.7]ལ་སོགས། །སངས་རྒྱས་རྫུ་འཕྲུལ་རྣམ་འཕྲུལ་བསྟན། །ཨོཾ་ལས་བྱུང་བའི་སྐུ་རྡོ་རྗེའི། །སྤྲིན་ལས་སྐུ་ཡི་རྡོ་རྗེ་ནི། །པཾ་བྱུང་པདྨ་ལ་བཞུགས་པ། །དག་པའི་ཤེལ་ལྟར་དྲི་མ་མེད། །ཏིང་ངེ་འཛིན་གནས་སྡིག་པ་འཇོམས། །ཞལ་གསུམ་རྣམ་པའི་མཆོག་ཀུན་ལྡན། །ཨ་ལས་བྱུང་ [230a] [230a.1]བའི་གསུང་རྡོ་རྗེ། །སྤྲིན་ལས་གསུང་གི་རྡོ་རྗེའི་ལྕེར། །ཧཱུཾ་ལས་བྱུང་བའི་ཐུགས་རྡོ་རྗེས། །སྤྲིན་ལས་ཐུགས་ཀྱི་རྡོ་རྗེ་ནི། །ཏིང་འཛིན་བྱིན་རླབས་སྙིང་ག་ཡི། །ཟླ་བར་རྣམ་པར་བསམ་པར་བྱ། །དེ་ལྟར་ཡིག་གསུམ་བྱིན་རླབས་ལུས། །སྙིང་གར་གནས་པའི་ [230a.2]ཟླ་བའི་ཐུགས། །དེར་ནི་ཡེ་ཤེས་ཚོགས་ཀྱི་ནི། །འོད་འབར་མུྃ་ནི་རྣམ་པར་དགོད། །དེ་ལས་བྱུང་བའི་ཨུཏྤལ་ནི། །ཨིནྡྲ་ནཱི་ལའི་འོད་འདྲ་བསམ། །དེ་དབུས་ཡེ་ཤེས་སེམས་དཔའ་ནི། །དགྱེས་བསྐྱེད་བྱ་བ་ལ་བཞུགས་པ། །དེ་ལས་བྱུང་བའི་འོད་སྤྲིན་ལས། །སངས་རྒྱས་ [230a.3]སྤྲིན་ལས་སྔགས་པས་སྤྲོ། །བྱང་ཆུབ་སེམས་ནི་ཡང་དག་བསྐྱེད། །བདེ་བ་ཆེ་ལ་ངེས་སྦྱར་བས། །འཇིག་རྟེན་མ་ལུས་ལེགས་སྦྱངས་ཏེ། །དེ་བསྡུས་ནས་ནི་གཞུག་པར་བྱ། །དེ་ཀུན་ཡོངས་སུ་གྱུར་པ་ལས། །འཇམ་པའི་དབྱངས་ནི་འོད་པོ་ཆེ། །མགོན་པོ་སངས་རྒྱས་ཀུན་ [230a.4]གྱིས་དངོས། །དངོས་པོ་ཀུན་གྱི་རང་བཞིན་ཅན། །སྲིད་པ་སྒྱུ་མ་ལྟར་མཁྱེན་པས། །གཞོན་ནུའི་སྐུ་མདོག་གུར་ཀུམ་འདྲ། །ཞལ་གྱི་པདྨ་ཅུང་ཟད་འཛུམ། །སྒེག་དང་བཅས་པའི་ཉམས་ཀྱིས་རྒྱས། །སེམས་དཔའི་སྐྱིལ་ཀྲུང་བཅས་ནས་ནི། །ཟླ་བའི་དཀྱིལ་འཁོར་དག་ལ་བཞུགས། ། [230a.5]སྣ་ཚོགས་རིན་ཆེན་འདབ་མ་བཟང་། །པདྨའི་རྒྱལ་པོ་གདན་དུ་བྱ། །སྔོ་དང་སེར་དང་དཀར་པོ་ཆེ། །ཞལ་གསུམ་གྱིས་ནི་རྣམ་པར་མཛེས། །དཔའ་བོ་སྤྱན་གསུམ་ཕྱག་དྲུག་པ། །མཆོག་ཏུ་དགའ་བས་ཤིན་ཏུ་མཛེས། །མཆོག་སྦྱིན་རལ་གྲི་མདའ་རྣམས་ནི། །གཡས་པའི་ [230a.6]ཕྱག་ན་བསྣམས་པར་མཛད། །གཡོན་ན་ཤེས་རབ་ཕ་རོལ་ཕྱིན། །ཨུཏྤལ་སྔོ་དང་གཞུ་ཉིད་དོ། །སངས་རྒྱས་སྤྲིན་ཆེན་སྤྲོས་པ་ཡིས། །ནམ་མཁའི་གཏོས་ཀུན་ཁྱབ་པར་མཛད། །སྣ་ཚོགས་མེ་ཏོག་གིས་ཆེར་མཛེས། །ཟུར་ཕུད་གསུམ་གྱིས་རྣམ་པར་བརྒྱན། །ཐོག་མ་ [230a.7]དབུས་དང་མཐའ་ལས་གྲོལ། །བྱིས་པའི་རྒྱན་གྱིས་ཉེ་བར་མཛེས། །བྱམས་དང་ཐུགས་རྗེ་སོགས་རྒྱུ་མཐུན། །ཆོས་ཀྱི་དབྱིངས་ཀྱི་རང་བཞིན་ཅན། །ཤེས་རབ་ཐབས་ཀྱི་ངོ་བོ་ཉིད། །དེ་ལྟར་མཁས་པས་བདག་ཉིད་བསྒོམ། །དེ་ནས་མ་ཧཱ་ས་མ་ཡ་སཏྭ་ཧཾ་ཞེས་བྱ་བ་དང་། ང་ [230b] [230b.1]རྒྱལ་བསྐྱེད་ལ། རང་གི་རྒྱུད་དུ་གཏོགས་པའི་ས་དང་ཆུ་དང་མེ་དང་རླུང་དང་། ནམ་མཁའ་རྣམས་ལ་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་དང་ནམ་མཁའ་རྡོ་རྗེ་ལཾ་མཾ་པཾ་ཏཾ་ཨཾ་ཞེས་བྱ་བའི་ས་བོན་རྣམས་ལས་རིམ་བཞིན་དུ་དགོད་པར་བྱའོ། གཟུགས་དང་། [230b.2]ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་ཕུང་པོ་ལ་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་དང་། མི་བསྐྱོད་པ་བྷྲཱཾ་ཨྃ་ཛྲཱི་ཁཾ་ཧཱུཾ་ཞེས་བྱ་བས་སོ། །མིག་དང་། རྣ་བ་དང་། སྣ་དང་། ལྕེ་དང་། [230b.3]ལུས་དང་། ཡིད་ཀྱི་སྐྱེ་མཆེད་རྣམས་ལ། ཀྵིཾ་ཛཾ་ཁཾ་གཾ་ཥྐཾ་སཾ་ཞེས་བྱ་བ་ལས་སའི་སྙིང་པོ་དང་། རྡོ་རྗེ་འཛིན་པ་དང་། ནམ་མཁའི་སྙིང་པོ་དང་། འཇིག་རྟེན་དབང་ཕྱུག་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ཀུན་དུ་བཟང་པོའོ། །གཟུགས་དང་། སྒྲ་དང་། དྲི་དང་། [230b.4]རོ་དང་། རེག་བྱ་དང་ཆོས་ཀྱི་སྐྱེ་མཆེད་རྣམས་ལ། ཛཿཧཱུཾ་བཾ་ཧོཿཁཾ་རཾ་ཞེས་བྱ་བས་གཟུགས་རྡོ་རྗེ་ལ་སོགས་པ་ལྷ་མོ་རྣམས་སོ། །ཤ་དང་། རྐང་དང་། ཁྲག་དང་། རུས་པ་དང་། རྩ་རྒྱུས་རྣམས་ལ། ཨཾ་ཧཱུཾ་ཏྲཱཾ་ཨཾཿཁཾ་ཞེས་བྱ་བས་རྣམ་པར་སྣང་མཛད་ལ་སོགས་པ་དགོད་དོ། །དེ་ནས་སྤྱི་བོར་ [230b.5]གནས་པའི་ཨོཾ་ལས་བྱུང་བའི་སྐུ་རྡོ་རྗེ་རབ་ཏུ་དགའ་བའི་བདེ་བས་རྣམ་པར་རྨོངས་པར་བསམས་ལ། ལུས་ཐམས་ཅད་ནས་ཡང་དག་པར་སྤྲོས་ཏེ། མདུན་དུ་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་རྣམ་པར་སྣང་མཛད་ཅེས་བྱ་བ་སྲས་དང་བཅས་པར་རྣམ་པར་བསམས་ལ། [230b.6]ཨོཾ་ལས་སྤྱན་སྤྲོས་ཏེ། དེའི་ཕྱག་གི་ཞགས་པས་དྲངས་ལ་རང་གི་ལུས་ལ་བཅུག་སྟེ། དེ་བཞིན་གཤེགས་པ་ཐམས་ཅད་ཞུ་བར་གྱུར་པ་དང་། དེའི་བདག་ཉིད་ཅན་དུ་རང་གི་ལུས་ལ་སྐུ་རྡོ་རྗེའི་ངོ་བོ་ཉིད་དུ་རྣམ་པར་བསམས་ལ། བྱིན་གྱིས་བརླབ་པར་བྱའོ། །ཨོཾ་ན་ཛི་ན་ཛིཀ་ཨདྷི་ [230b.7]ཏིཥྛ་སྭ་མཱཾ། རྡོ་རྗེ་བསྡམས་པ་ལས་མཐེ་བོ་གཉིས་བསྒྲེང་སྟེ། སྤྱི་བོར་གཞག་པ་ནི་སྐུ་བྱིན་གྱིས་རློབ་པར་བྱེད་པའི་ཕྱག་རྒྱའོ། །དེ་ནས་སངས་རྒྱས་ཐམས་ཅད་ཞུགས་ནས་བྱིན་གྱིས་བརླབ་པ་དང་།མཚན་དང་དཔེ་བྱད་ཀྱིས་བདག་ཉིད་རྣམ་པར་བརྒྱན་པར་ལྷག་པར་མོས་པར་ [231a] [231a.1]བྱའོ། །དེ་བཞིན་དུ་ལྐོག་མར་གནས་པའི་ཡི་གེ་ཨཱཿལས་བྱུང་བའི་གསུང་གི་རྡོ་རྗེ་བསམས་ལ། གོས་དཀར་མོ་ཡང་དག་པར་སྤྲོས་ཏེ་སྔ་མ་བཞིན་དུ་དེ་ཞུགས་པས་རང་གི་ལྕེ་གསུང་རྡོ་རྗེའི་ངོ་བོ་ཉིད་དུ་བྱིན་གྱིས་བརླབ་པར་བྱའོ། །ཨོཾ་ཨཱ་རོ་ལྀཀ་ཨ་དྷི་ཏིཥྛ་སྭ་མཱཾ། དེ་ཉིད་ [231a.2]ལས་གཡོན་པའི་མཐེ་བོ་ནང་དུ་བཅུག་སྟེ། གཡས་པ་བསྒྲེང་བ་ནི་གསུང་བྱིན་གྱིས་བརླབ་པའི་ཕྱག་རྒྱའོ། །དེ་ནས་ཟླ་བ་ཁམ་པ་ལྟ་བུ་ཆོས་ཐམས་ཅད་ཀྱི་གནས་སུ་གྱུར་པར་དབྱངས་ཀྱི་ཡན་ལག་རྣམ་པར་དག་པ་ཐམས་ཅད་ཀྱི་ངོ་བོ་ཉིད་ཀྱི་ལྕེ་མོས་པར་བྱའོ། །དེ་བཞིན་དུ་སྙིང་གར་ [231a.3]གནས་པའི་ཡི་གེ་ཧཱུཾ་ལས་བྱུང་བའི་ཐུགས་རྡོ་རྗེར་བསམས་ལ་དེ་བཞིན་དུ་མཱ་མ་ཀཱི་སྤྲོ་བ་སྔོན་དུ་འགྲོ་བས་བཅུག་ལ། རང་གི་སེམས་ཐུགས་རྡོ་རྗེའི་ངོ་བོ་ཉིད་དུ་བྱིན་གྱིས་བརླབ་པར་བྱའོ། །ཨོཾ་བཛྲ་དྷྲིཀ་ཨ་དྷིཏིཥྛ་སྭ་མཱཾ། དེ་ཉིད་ལ་མཐེ་བོ་གཡས་པ་ནང་དུ་བཅུག་ལ། གཡོན་པ་བསྒྲེང་ [231a.4]བ་ནི་ཐུགས་བྱིན་གྱིས་བརླབ་པའི་ཕྱག་རྒྱའོ། །དེ་ནས་ཧཱུཾ་ལས་བྱུང་བའི་སྙིང་གི་པདྨའི་ཟླ་བ་ཆོས་འབྱུང་བའི་ཕྱག་རྒྱས་མཚན་པ་དང་བཅས་པའི་འོད་ཀྱི་ཕྲེང་བ་ཀུན་དུ་འཕྲོ་བར་བསམ་པར་བྱའོ། །དེ་ནས་ས་མ་ཡོ྅ཧཾ་ཞེས་བྱ་བ་དང་། དམ་ཚིག་གི་ཕྱག་རྒྱ་བཅིངས་ལ་སྔ་མ་བཞིན་དུ་སྙིང་ [231a.5]ག་ལ་སོགས་པར་རྡོ་རྗེ་ལ་སོགས་པ་བསམས་ཏེ། དེ་དང་ས་མ་ཡ་སཏྭ་ཨ་བྱེ་ཏིཥྛ་སྭ་མཱཾ་ཞེས་བྱ་བ་དང་བྱིན་གྱིས་བརླབས་ལ་རང་གི་སྔགས་བརྗོད་ནས་སྐུ་དང་གསུང་དང་ཐུགས་རྡོ་རྗེས་ཀྱང་འཇམ་པའི་རྡོ་རྗེར་བདག་ཉིད་བསྒོམ་པར་བྱ་ཞིང་། མཉྫུ་བཛྲོ྅ཧཾ་ཞེས་བྱ་བའི་ང་རྒྱལ་ [231a.6]བྱའོ། །དེ་ནས་དེ་བཞིན་དུ་ཕྱག་རྒྱ་ཆེན་པོས་གནས་ལ། ས་མ་ཡ་ཨཿཞེས་བརྗོད་དེ། མདུན་དུ་པཾ་ལས་བྱུང་བའི་པདྨ་དང་ཟླ་བའི་དཀྱིལ་འཁོར་ལ་གནས་པའི་ཨོཾ་མུཿཨཿཞེས་བྱ་བ་ལས་ཨུཏྤལ་རྣམ་པར་བསམས་ལ། ཆོས་བདག་མེད་པའི་དམ་ཚིག་གི་ནང་དུ་ཞུགས་ཏེ། །མཉྫུ་ [231a.7]བཛྲོ྅ཧཾ་ཞེས་བྱ་བའི་ང་རྒྱལ་སྔོན་དུ་འགྲོ་བ་དང་། འཇམ་པའི་རྡོ་རྗེར་བསྒོམ་པར་བྱའོ། །དེ་ནས་དེའི་འོག་ཏུ་སྔགས་དང་ཕྱག་རྒྱ་འདི་རྣམས་ཀྱིས་ཡེ་ཤེས་སེམས་དཔའ་བཀུག་ཅིང་བཅུག་ལ་བཅིངས་ཏེ་དབང་དུ་བྱའོ། །རྡོ་རྗེ་ཁུ་ཚུར་གཉིས་ལས་མཛུབ་མོ་ལྕགས་ཀྱུ་བཅིང་བ་ནི། མཐེ་ [231b] [231b.1]ཆུང་ལས་ཏེ་ལྕགས་ཀྱུ་ཆེ། །མཁྲིག་མ་མདུད་པ་མཛུབ་གཉིས་གདུབ། །རྒྱབ་གཉིས་ཀྱང་ནི་བསྙམས་ཏེ་མནན། །ཞེས་བྱ་བ་དང་། ཨོཾ་བཛྲ་ཨཾ་གུ་ཤ་ཛཿཧཱུཾ། ཨོཾ་བཛྲ་པཱ་ཤ་ཧཱུཾ་ཧཱུཾ། ཨོཾ་བཛྲ་སྥོ་ཊ་ཧཱུཾ་བཾ། ཨོཾ་བཛྲ་ཨཱ་ཝེ་ཤ་ཧཱུཾ་ཧོཿཞེས་བྱ་བའི་སྔགས་སོ། །ཨོཾ་ཨ་མྲྀ་ཏ་ཀུཎྜ་ལི་བིགྷནྟ་ཀ་ཧཱུཾ། འདིའི་ [231b.2]ཕྱག་རྒྱ་ནི་བདུད་རྩི་ཐབ་སྤྱོར་གྱི་སྐུ་བསམས་ལ། ལག་པ་གཉིས་ཀྱིས་སོར་མོའི་རྩེ་མོ་གསུམ་པ་ལྟ་བུར་བརྐྱང་ལ། དཔུང་པའི་རྩར་ཁྲོས་པས་བཞག་ན། མཚམས་བཅིང་བ་བྱས་པར་འགྱུར་རོ། །དེ་བཞིན་དུ་ཕྱོགས་བཅིང་བ་ལ་སོགས་པ་ཡང་བྱ་སྟེ། སྤེལ་བའི་སྤྱོར་བས་ཕྱོགས་ [231b.3]བཅིང་བ་དང་། ར་བ་དང་དྲ་བ་ལ་སོགས་ཀྱང་བྱ་སྟེ། སྤེལ་བའི་སྦྱོར་བས་ཕྱོགས་བཅིང་བ་དང་། ར་བ་དང་དྲ་བ་ལ་སོགས་པ་ཡང་བསྲུང་བའི་དོན་དུ་བསམ་པར་བྱའོ། །དེ་ནས་བཅོམ་ལྡན་འདས་ལ་པཾ་ལས་བྱུང་བའི་པདྨའི་གདན། ཨོཾ་ཀ་མ་ལ་ཧཱུཾ་ཞེས་བྱ་བའི་སྔགས་ཀྱིས་བསྟབས་ལ། [231b.4]ཐལ་མོ་ཁ་ཕྱེ་བ་དང་། རང་གི་སྔགས་ཀྱིས་མཆོད་ཡོན་ཕུལ་ཏེ། ཨོཾ་པྲ་བ་ར་སཏྐ་རཾ་པྲ་ཏཱིཙྪ་སྭཱ་ཧཱ་ཞེས་བྱ་བའི་སྔགས་དང་། གཡས་པའི་ཁུ་ཚུར་གྱི་མཐེ་བོ་དང་། མཛུབ་མོ་སྦྱར་བས་མེ་ཏོག་བླངས་ལ་ཞབས་བསིལ་དབུལ་ཏེ། སོར་མོ་ལྷག་མ་རྣམས་ཟླུམ་པོའི་རྣམ་པས་ [231b.5]བརྐྱང་པས་ཕྱག་རྒྱས་ཀྱང་ཞབས་བསིལ་ཕུལ་ལ་དམ་ཚིག་བསྟན་པར་བྱའོ། །དེ་ལ་དམ་ཚིག་ནི་འདི་ཡིན་ཏེ། ཐལ་མོ་ཁོང་སྟོང་དུ་སྦྱར་ཏེ་མཛུབ་མོ་གཉིས་ཀྱིས་སྲིན་ལག་གཉིས་ཀྱི་སེན་མོ་མནན་ནས། ཨུཏྤ་ལ་ཁ་ཕྱེ་བ་ལྟ་བུར་བཞག་ལ། མགོན་པོ་འཇམ་པའི་ [231b.6]དབྱངས་ལ་བསྐུལ་བར་བྱ་ཞིང་འདི་བཅིངས་ལ། རྡོ་རྗེ་ལྟ་བས་བལྟ་བར་བྱའོ། །ཨོཾ་མུ་དྲྀ་ཤྱ་ཧོཿཞེས་བྱ་བ་དང་། ཡང་དག་པར་བསྐུལ་ལ་དེ་ཉིད་ལ་ཛཿཧཱུཾ་བཾ་ཧོཿཞེས་བརྗོད་དེ། རང་གི་ལུས་ལ་བཅོམ་ལྡན་འདས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་ [231b.7]བྱས་ལ་ས་མ་ཡ་སྟྭཾ་ཞེས་བརྗོད་དེ། རྒྱབ་ཏུ་ཟླ་བ་བསམས་ལ་ཛཿཧཱུཾ་བཾ་ཧོཿས་མ་ཡ་སྟྭཾ ཨོཾ་མུཿཞེས་ལན་གསུམ་བརྗོད་དེ་ཡེ་ཤེས་སེམས་དཔའ་དང་། ལྷན་ཅིག་གཅིག་ཏུ་བསྒོམས་ལ། རང་གི་དམ་ཚིག་གི་ཕྱག་རྒྱས་གདབ་པར་བྱའོ། །དེ་ནས་ཕྱག་རྒྱ་ཆེན་པོས་གནས་ [232a] [232a.1]ལ་ལྷ་ཐམས་ཅད་ཀྱི་གནས་སུ་ས་མ་ཡ་ཨ་ཞེས་བྱ་བ་དང་། ཅི་རིགས་པར་ཟླ་བའི་དཀྱིལ་འཁོར་དང་། ཉི་མའི་དཀྱིལ་འཁོར་རང་གི་ལུས་ལ་རྣམ་པར་བཀོད་ལ། རང་གི་སྙིང་པོས་སྤྱི་གཙུག་གི་དབུས་སུ་བཅོམ་ལྡན་འདས་རྣམ་པར་སྣང་མཛད། སྙིང་གར་མི་ [232a.2]བསྐྱོད་པ། དཔྲལ་བར་རིན་ཆེན་འབྱུང་ལྡན། ལྐོག་མར་འོད་དཔག་ཏུ་མེད་པ། སྤྱི་བོར་དོན་ཡོད་གྲུབ་པ། མིག་གཉིས་སུ་སྤྱན། མི་བསྐྱོད་པའི་གཡོན་ལོགས་སུ་མཱ་མ་ཏཱི། འོད་དཔག་ཏུ་མེད་པའི་གཡོན་ལོགས་སུ་གོས་དཀར་མོ། དོན་ཡོད་པར་གྲུབ་པའི་གཡོན་ལོགས་སུ་སྒོལ་ [232a.3]མ། མི་བསྐྱོད་པ་ལ་གཡས་ལོགས་སུ་རྡོ་རྗེ་སེམས་མ་ལ་སོགས་པ་བཞིའོ། །མི་བསྐྱོད་པའི་རྒྱབ་ཏུ་སྐུལ་བྱེད་མ། རིན་ཆེན་འབྱུང་ལྡན་གྱི་གཡོན་ལོགས་སུ་རིན་ཆེན་སྒོལ་མ། འོད་དཔག་ཏུ་མེད་པའི་རྒྱབ་ཏུ་ཁྲོ་གཉེར་ཅན། དོན་ཡོད་པར་གྲུབ་པའི་རྒྱབ་ཏུ་རྡོ་རྗེ་ལུ་གུ་རྒྱུད། [232a.4]ལྟེ་བར་གཤིན་རྗེ་གཤེད། སྨིན་མཚམས་སུ་གཞན་གྱིས་མི་ཐུབ་པ། ཁར་རྟ་མགྲིན། གསང་བར་བདུད་རྩི་ཐབ་སྤྱོར། དཔྲལ་བའི་སྟེང་དུ་འཕགས་པ་མི་གཡོ་བ། མི་བསྐྱོད་པའི་མདུན་དུ་འདོད་པའི་རྒྱལ་པོའོ། །དཔུང་པ་གཉིས་ལ་དབྱིག་སྔོན། རྐང་པ་གཉིས་ལ་སྟོབས་པོ་ [232a.5]ཆེ། རྣམ་པར་སྣང་མཛད་ཀྱི་མདུན་དུ་གནོད་མཛེས་རྒྱལ་པོ། རྐང་པ་གཉིས་ཀྱི་འོག་ཏུ་རྡོ་རྗེ་ས་འོག །བ་སྤུའི་བུ་ག་ཐམས་ཅད་ལ་བྱམས་པ་ལ་སོགས། སྤྱི་གཙུག་གི་སྟེང་དུ་འཁོར་ལོས་སྒྱུར་བ། བྲུཾ་ལས་བྱུང་བ་རིན་པོ་ཆེའི་རི་ལ་བཞུགས་པ་པདྨ་དང་། རྡོ་རྗེའི་སྐྱིལ་མོ་ཀྲུང་གིས་ [232a.6]བཞུགས་པ། ཞལ་དང་། སྐུ་མདོག་དང་། ཕྱག་ལ་སོགས་པ་རྣམ་པར་སྣང་མཛད་དང་འདྲ་བ། འོད་ཟེར་ལྔ་པའི་གཙུག་ཏོར་གྱི་འཁོར་ལོའི་ཕྲེང་བ་དང་། འོད་ཀྱི་དཀྱིལ་འཁོར་དམར་པོ་འབར་བ་དང་བཅས་པའི་ཕྲེང་བ་ཅན། རིན་པོ་ཆེའི་ཅོད་པན་མངའ་བ། སྤྱན་ལ་སོགས་པའི་ལྷ་ [232a.7]མོ་རིན་པོ་ཆེ་དང་། མཚན་རྟགས་དང་། རྡོ་རྗེ་དང་། ཨུཏྤ་ལ་རིན་པོ་ཆེ་བཞིན་དུ་བསྣམས་པ། གཉིས་གཉིས་ཀྱིས་ལོགས་གཉིས་སུ་མཛེས་པར་བྱས་པར་རང་གི་སྙིང་པོ་ཉིད་ཀྱིས་བསམ་པར་བྱའོ། །དེ་ནས་རྡོ་རྗེ་ཁུ་ཚུར་གཉིས་བཅིངས་ལ། ལག་ངར་གཉིས་རྡོ་རྗེ་བཅིང་བར་བསྣོལ་ཏེ། [232b] [232b.1]མཛུབ་མོ་གཉིས་ལྕགས་ཀྱུར་བྱས་ལ། མཐེ་བོ་དང་། གུང་མོ་གཉིས་ཀྱིས་སེ་གོལ་བརྡེབས་ཤིང་ཛཿཧཱུཾ་བཾ་ཧོཿཞེས་བརྗོད་ལ། རང་གི་ལུས་ལ་རྣམ་པར་སྣང་མཛད་ལ་སོགས་པར་ཡིད་ཀྱིས་རྣམ་པར་བསམས་པ་ལེགས་སོ་ཞེས་བྱ་བའི་སྤྱོར་བས་རྣམ་པར་སྣང་མཛད་ལ་སོགས་པ་ [232b.2]བཀུག་ནས་བཅུག་སྟེ། བཅིངས་ལ་དབང་དུ་བྱས་ནས་ཨོཾ་ཨཱཿཧཱུཾ་ཞེས་བྱ་བའི་ཡི་གེ་གསུམ་རྣམ་པར་བཀོད་པ་སྔོན་དུ་འགྲོ་བས་སྔ་མ་བཞིན་དུ་རང་གི་ཕྱག་རྒྱ་བྱིན་གྱིས་བརླབས་ལ། ཡི་གེ་བརྒྱ་པས་བརྟན་པར་བྱའོ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་ [232b.3]དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦྦ་ཀརྨྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱན་སརྦྦ་ཏ་ཐཱ་ག་ཏ་བཛྲ་མཱ་མེ་མུཉྩཾ། བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ། དེ་ནས་སྙིང་ག་དང་། ལྐོག་མ་དང་། སྤྱི་བོ་རྣམས་སུ་ [232b.4]རྡོ་རྗེ་སེམས་མ་ལ་སོགས་པས་བྱིན་གྱིས་བརླབ་པར་བྱ་སྟེ། རྡོ་རྗེ་བསྡམས་པ་ལས་གུང་མོ་གཉིས་སྦྱར་ལ། ཨོཾ་སཏྭ་བཛྲི་ཨདྷི་ཏིཥྛ་སྭ་མཱཾ་ཧཱུཾ། དེ་ཉིད་ལས་གུང་མོའི་ཚིགས་དབུས་མ་བཅག་པ་ནི་རིན་པོ་ཆེ་སྟེ། ཨོཾ་རཏྣ་བཛྲི་ཨ་དྷིཏིཥྛ་སྭ་མཱཾ་ཧཱུཾ། དེ་ཉིད་ལས་གུང་མོ་པདྨའི་འདབ་ [232b.5]མ་ལྟར་བྱའོ། །ཨོཾ་དྷརྨྨ་བཛྲི་ཨདྷི་ཏིཥྛ་སྭ་མཱཾ་ཧཱུཾ། དེ་ཉིད་ལས་གུང་མོ་སྦྱར་བའི་རྩེ་མོ་བཅག་པ་ནི་རལ་གྲིའོ། །ཨོཾ་ཀརྨྨ་བཛྲི་ཨདྷི་ཏིཥྛ་སྭ་མཱཾ་ཧཱུཾ། གནས་འདི་དག་ཏུ་རྡོ་རྗེ་དང་རིན་པོ་ཆེ་དང་པདྨ་དང་། རལ་གྲི་ནང་དུ་ཆུད་པའི་རྡོ་རྗེ་སེམས་མ་ལ་སོགས་པའི་ལྷ་མོ་རྣམས་བྱིན་གྱིས་བརླབ་ [232b.6]པར་བསམ་པར་བྱའོ། །དེ་ནས་ཡང་དབང་བསྐུར་བའི་ཕྱིར་གསོལ་བ་གདབ་པར་བྱ་སྟེ། རྡོ་རྗེ་ཅན་གྱིས་འགྲོ་བསྐྱབ་ཕྱིར། །སངས་རྒྱས་རྣམས་ཀྱིས་དབང་བསྐུར་བ། །ཡོན་ཏན་འབྱུང་གནས་ཇི་ལྟར་སྩལ། །དེ་བཞིན་དེང་ནི་བདག་ལ་སྩོལ། །དེ་ནས་ནམ་མཁའི་ཁོངས་ཐམས་ [232b.7]ཅད་ཏིལ་གྱི་གང་བུ་བཞིན་དུ་ཀུན་དུ་གང་བའི་རིག་པའི་ལྷ་མོ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ཤིང་མཆོད་པའི་ཡོ་བྱད་དང་ལྡན་པ་རྣམས་བྱོན་ནས་མི་བསྐྱོད་པའི་ཅོད་པན་གྱི་སྦྱོར་བས་རྩེ་བྲན་གྱི་རྩ་བར་བཞག་པས། དབང་བསྐུར་ [233a] [233a.1]ཞིང་འདི་སྐད་དུ་གསུང་བར་བསམ་པར་བྱའོ། །དབང་བསྐུར་བ་ཡི་རྡོ་རྗེ་ཆེ། །ཁམས་གསུམ་པས་ནི་ཕྱག་བྱས་པ། །གསང་བ་གསུམ་གྱི་གནས་ལས་བྱུང་། །སངས་རྒྱས་ཀུན་གྱིས་སྦྱིན་པར་བྱ། །དེ་ནས་དབང་བསྐུར་བ་དེ་ཕྱག་རྒྱ་འདི་དག་གིས་བརྟན་པར་བྱའོ། །རྡོ་རྗེའི་ [233a.2]ཐལ་མོ་ལས། མཐེ་བོ་གཉིས་ནི་བསྣོལ་བྱས་ལ། །མཛུབ་མོའི་རྩེ་མོ་བཀུག་པས་ནི། །གུང་མོ་མཉམ་པའི་ཚིགས་སུ་སྦྱར། །རྡོ་རྗེ་དབྱིངས་ཀྱི་དབང་མོར་བཤད། །སྔགས་ནི་ཨོཾ་བཛྲ་དྷཱ་ཏྭཱི་ཤྭ་རི་ཧཱུཾ། བཛྲི་ཎི་ཨ་བྷི་ཥིཉྩ་མཱཾ། དེ་ཉིད་གུང་མོ་རྡོ་རྗེར་བྱ། །ཨོཾ་བཛྲེ་བཛྲེ་ཎི་ཧཱུཾ། གུང་མོ་གཉིས་ [233a.3]ནི་ནོར་བུར་བྱ། །ཨོཾ་རཏྣ་བཛྲི་ཎི་ཧཱུཾ། པདྨ་སྲིན་ལག་མཐེའུ་ཆུང་གུང་། ཨོཾ་དྷརྨྨ་བཛྲི་ཎི་ཧཱུཾ། ལག་པའི་སོར་མོ་རབ་ཏུ་བརྐྱང་། །ཨོཾ་ཀརྨྨ་བཛྲི་ཎི་ཧཱུཾ། ཨ་བྷི་ཥིཉྩ་མཱཾ་ཞེས་བྱ་བ་ནི་ཐམས་ཅད་ལ་སྦྱར་བར་བྱའོ། །ཕྱག་རྒྱ་འདི་དག་ཀྱང་སྤྱི་བོ་དང་། དཔྲལ་བ་དང་། རྣ་བ་གཡས་པའི་ལྟག་ [233a.4]དང་མགོའི་རྒྱབ་དང་། རྣ་བ་གཡོན་པའི་ལྟག་གི་གནས་རྣམས་སུ་རིམ་པ་བཞིན་དུ་སྦྱར་ཏེ། དཔག་ཏུ་མེད་པའི་དེ་བཞིན་གཤེགས་པ་ལྔ་པོ་བསྡུས་པའི་ངོ་བོ་ཉིད་བྱང་ཆུབ་ཀྱི་སེམས་དམ་པ་རྣམ་པར་དག་པའི་རང་བཞིན་བཅོམ་ལྡན་འདས་མི་བསྐྱོད་པ་ཉིད་ཅོད་པན་དུ་བསམ་པར་ [233a.5]བྱའོ། །ལ་ལ་ནི་རྡོ་རྗེ་སེམས་མ་ལ་སོགས་པའི་སྔགས་དང་ཕྱག་རྒྱ་དག་གིས་དབང་བསྐུར་བར་འདོད་དོ། །དེ་ནས་རྡོ་རྗེ་ཁུ་ཚུར་གཉིས་མདུན་དུ་མདུད་པ་ལྟ་བུས་བཅིང་བར་བྱ་ཞིང་རྒྱབ་ཏུ་ཡང་དེ་བཞིན་དུ་མདུད་ལ། བསྒྱིངས་པ་དང་བཅས་པས་མཐའ་མ་ལ་སོགས་པ་ནས་དགྲོལ་བས། [233a.6]རྣ་བ་གཉིས་ཀྱི་དར་དཔྱངས་འཕྱང་བ་བྱས་ལ། མཐར་ཐལ་མོ་མཉམ་པས་མཉེས་པར་བྱའོ། །བཛྲ་ཏུ་ཧོཿ། ཡང་ཅོད་པན་གྱི་སྟེང་དུ་ཀཾ་ཧཾ་ཀཾ་ཞེས་བྱ་བ་བཀོད་ལ། ཨོཾ་ཊུཾ་ཞེས་བྱ་བས་གོ་བགོས་ཏེ། རྡོ་རྗེ་ཁ་ཚུར་སྙིང་གར་མདུད་པའི་ཚུལ་གྱིས་ཡོངས་སུ་བསྐོར་ལ། མགྲིན་པ་ [233a.7]དང་རྒྱབ་དང་། ཡང་དེ་བཞིན་དུ་སྙིང་གར་རོ། །དེ་ནས་ནུ་མའི་བར་དང་ཡང་སྙིང་གར་རོ། །ཡང་མགྲིན་པ་དང་། ལྟག་པ་དང་། མགོ་བོར་དེ་བཞིན་དུ་དབང་བསྐུར་བའི་ཕྲེང་བ་བཅིངས་པའི་མདུད་པའི་སྦྱོར་བ་མཐའ་མ་ལ་སོགས་པ་སོར་མོ་ཐམས་ཅད་བཀྲོལ་ལ། དར་དཔྱངས་ [233b] [233b.1]ཀྱི་ཚུལ་དུ་བྱས་ལ་མཐར་མཉམ་པའི་ཐལ་མོས་མཉེས་པར་བྱའོ། །དེ་ནས་རང་གི་དམ་ཚིག་གི་ཕྱག་རྒྱ་ཉིད་སྙིང་ག་ལ་སོགས་པར་བཀྲོལ་བས་རང་གི་སྙིང་པོ་ནི་སྙིང་གར་དགོད་པར་བྱའོ། །ཉེ་བའི་སྙིང་པོ་ལ་སོགས་པར་བསམ་པས་ནི་སྙིང་གའི་གོང་དུའོ། །སྤྱི་བོར་བསམ་པས་ནི་ [233b.2]མགོ་བོར་རོ། །སྤྱི་གཙུག་ལ་སོགས་པར་བསམ་པས་ནི་སྤྱི་གཙུག་ཏུའོ། །གོ་ཆ་ལ་སོགས་པར་བསམ་པས་ནི་ནུ་མའི་བར་དུའོ། །མཚོན་ཆ་ལ་སོགས་པར་བསམ་པས་ནི་ལག་པ་གཡས་པར་རོ། །ཉེ་བའི་སྙིང་པོ་ལ་སོགས་པར་བསམ་པས་ནི་ལག་པ་གཡོན་དུའོ། ། [233b.3]ལྕགས་མདའ་ལ་སོགས་པར་བསམ་པས་ནི་ཕྲག་པ་གཡས་སུའོ། །མདའི་དྲ་བ་ལ་སོགས་པར་བསམ་པས་ནི་ཕྲག་པ་གཡོན་དུའོ། །མཚོན་ཆ་ཐམས་ཅད་དུ་བསམ་པས་ནི་ལུས་ཐམས་ཅད་དུ་དགོད་པར་བྱའོ། །དེ་ནས་སྒེག་མོ་ལ་སོགས་པས་བདག་ཉིད་ཡང་དག་པར་མཆོད་ [233b.4]དེ། རྡོ་རྗེའི་དབང་བསྐུར་བ་དང་། བདག་པོའི་དབང་བསྐུར་བ་དང་། མིང་གི་དབང་བསྐུར་བ་དང་། དངོས་གྲུབ་ཀྱི་རྡོ་རྗེའི་བརྟུལ་ཞུགས་རྣམས་དེའི་སྔགས་ཉིད་ཀྱིས་བླང་བར་བྱ་སྟེ། བཅོམ་ལྡན་འདས་འཇམ་པའི་རྡོ་རྗེ་བདག་གི་སློབ་དཔོན་དུ་གྱུར་ནས། ཐམས་ཅད་མཛད་ [233b.5]དོ་ཞེས་ལྷག་པར་མོས་པར་བྱའོ། །སངས་རྒྱས་རྡོ་རྗེའི་དབང་བསྐུར་བས། །དེང་ཁྱོད་བདག་ནི་བསྐུར་བར་འགྱུར། །འདི་ནི་སངས་རྒྱས་ཐམས་ཅད་ཉིད། །རབ་ཏུ་གྲུབ་ཕྱིར་རྡོ་རྗེ་ལོང་། །ཨོཾ་བཛྲ་ཨ་དྷི་པ་ཏི་སྟྭཾ། ཨ་བྷི་ཥིཉྩ་མི། ཏིཥྛ་བཛྲ་ས་མ་ཡ་སྟྭཾ། དེ་ནས་རྡོ་རྗེ་དྲིལ་བུ་དང་ [233b.6]བཅས་པར་སྤྱི་བོར་བཞག་ལ། མིང་གི་དབང་གིས་དབང་བསྐུར་ཏེ། ཨོཾ་བཛྲ་སཏྭ་སྟྭཾ། ཨ་བྷི་ཥིཉྩ་མི། བཛྲ་ནཱ་མ་ཨ་བྷི་ཥེ་ཀ་ཏ། ཀྱེ་དཔལ་མཆོག་སྦྱིན་རྡོ་རྗེ་ཞེས་བྱ་བ། དེ་ནས་རྡོ་རྗེའི་བརྟུལ་ཞུགས་ནི། །འདི་ནི་སངས་རྒྱས་ཐམས་ཅད་དེ། །རྡོ་རྗེ་སེམས་དཔའི་ལག་ན་གནས། ། [233b.7]ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ། དྷ་ར་མི་བཛྲ་སཏྭ་ཧི་ཧི་ཧི་ཧི་ཧི་ཧཱུཾ་ཞེས་བྱ་བའི་གླུ་བླང་བར་བྱའོ། །དེའི་འོག་ཏུ་དམ་ཚིག་གསུམ་སྦྱིན་པ་བྱ་སྟེ། ཧཱུཾ་ལས་རྡོ་རྗེ་མི་བསྐྱོད་པའི་ངོ་བོ་དེ་བཞིན་ [234a] [234a.1]གཤེགས་པ་ཐམས་ཅད་ཀྱི་མི་ཕྱེད་པའི་ཡེ་ཤེས་ཀྱི་རང་བཞིན་དུ་རྣམ་པར་བསམས་ལ། དེ་ཁོ་ན་ཉིད་ཀྱིས་གཟུང་བར་བྱ་སྟེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ [234a.2]པ་བདག་པོའི་བདག །དང་པོའི་མཆོག་གི་སྐྱེས་བུ་ནི། །བཅོམ་ལྡན་འདས་སོ་ཞེས་བྱ་བ་ནི་དེ་ཁོ་ན་ཉིད་ཀྱིས་ནི་རྡོ་རྗེའོ། །འདི་ནི་སངས་རྒྱས་དེ་ཀུན་གྱི། །ཤེས་རབ་སྒྲ་ཡིས་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། ། [234a.3]ཅེས་བྱ་བ་དང་། ཨཿའི་ས་བོན་ལས་བྱུང་བ་དྲིལ་བུ་དེ་བཞིན་གཤེགས་པ་ཐམས་ཅད་ཀྱི་གསུང་དབྱངས་ཀྱི་བདག་ཉིད་ཅན། ཤེས་རབ་ཀྱི་ངོ་བོ་ཉིད་ཀྱི་དྲིལ་བུ་ཡང་དག་པར་བླངས་ལ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་དངོས་མེད་བྱས། །ངོ་བོ་ཉིད་དག་སེམས་ [234a.4]དཔའ་མཆོག །སྲིད་པ་མཆོག་ནི་བྱེད་པར་འགྱུར། །ཞེས་བྱ་བ་དང་། དེ་དཀྲོལ་བར་བྱའོ། །དེ་ནས་སྲིད་པ་ཡོངས་སུ་དག་པའི་ཐབས་རྟོག་པ་ཐམས་ཅད་ཀྱི་དམ་ཚིག་ཆེན་པོ་རྟག་ཏུ་བསྟེན་པར་བྱ་སྟེ། སྲིད་པའི་བདེ་བ་ཤིན་ཏུ་ཆུང་། །སྡུག་བསྔལ་ཆེན་པོ་དག་བྱའི་ཕྱིར། ། [234a.5]ཤིན་ཏུ་བདེ་བ་དམ་པའི་ཐབས། །དམ་ཚིག་འདི་ནི་རྟག་ཏུ་སྲུངས། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བསྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་ [234a.6]པར་གྱུར་པའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་མདའ་བྱེད་པར་ནུས། །ཤེས་རབ་ཕ་རོལ་ཕྱིན་པའི་ཐབས། །བསོད་ནམས་བྱིན་རླབས་ཀྱིས་བསྒྲུབས་པ། །དངོས་གྲུབ་ཀུན་གྱི་དབང་ཕྱུག་གྲུབ། །སེམས་ཅན་དོན་རྣམས་བརྟན་པར་བྱེད། །ཡིད་ཀྱི་ [234a.7]གཟུགས་ནི་བརྟན་ཕྱིར་རོ། །ཕྱག་རྒྱ་དམ་ཚིག་ཡིན་པར་བཤད། །གང་གིས་གཟུགས་ཀུན་བརྟན་གྱུར་པ། །དེས་ན་ཕྱག་རྒྱ་རབ་ཏུ་བསྒྲགས། །ཞེས་བྱ་བ་དང་། དམ་ཚིག་གིས་སྐུ་ལ་སོགས་པའི་གསང་བའི་བདག་ཉིད་ཅན་གྱི་ཕྱག་རྒྱར་བྱིན་གྱིས་བརླབ་པར་བྱའོ། །དེ་ནས་ [234b] [234b.1]དམ་ཚིག་གསུམ་ཀྱི་གླུའི་མཆོད་པ་བྱ་སྟེ། ཨོཾ་ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔར་བདག་གྲུབ་མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ [234b.2]ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པའང་ཁྱོད། །འདོད་ཆགས་ཀུན་གྱེ་རྗེས་སུ་བརྙེས། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །ཤིན་ཏུ་དག་པ་ཀུན་གྱེ་མཆོག །གདོད་ནས་གྲོལ་ [234b.3]བ་དེ་བཞིན་གཤེགས། །ཀུན་དུ་བཟང་པོའི་ཀུན་བདག་ཉིད། །བྱང་ཆུབ་སེམས་དཔར་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེ་སོགས་ཕྱག་རྒྱ་ཡིས། །གྲུབ་པའི་རྡོ་རྗེ་ཆེར་བསྟོད་པས། །རྡོ་རྗེ་བསྙེམས་བདག་བདག་མཛོད་ཅིག །དེ་ནས་ [234b.4]བཅོམ་ལྡན་འདས་ཀྱིས་ཕྱག་རྒྱ་ཆེན་པོ་བཅིངས་ལ། ཨི་སྭ་བྷཱ་བ་ཤུདྡྷོ྅ཧཾ། ཨོཾ་སརྦྦ་ས་མོ྅ཧཾ་ཞེས་བྱ་བ་དང་། ང་རྒྱལ་བསྐྱེད་ལ། རང་གི་སྙིང་གར་གནས་པའི་རྡོ་རྗེ་ཨཏྤ་ལའི་དབུས་སུ་རང་གི་སྔགས་རྣམ་པར་བསམས་ལ། དེ་ཉིད་ཡིད་ལ་ཟློས་ཤིང་བསམ་པར་བྱའོ། ། [234b.5]དེ་ནས་དེ་བཞིན་དུ་ཕྱག་རྒྱ་ཆེན་པོས་གནས་ལ་གཡོན་པའི་མིག་ཏུ་ཊ་ལས་ཟླ་བ་བྱ། གཡས་པར་མ་བཀོད་ཉི་མའི་དཀྱིལ་འཁོར་བསྐྱེད། །ཧཱུཾ་གིས་མིག་འབྲས་བསྐལ་པའི་མེ་ལྟ་བུ། །ཡིད་ཀྱིས་ནམ་མཁའི་ཕྱོགས་སུ་གནས་པར་བྱའོ། །སྣོད་ཀྱི་འཇིག་རྟེན་ཀྱི་འོག་ཏུ་ཡི་གེ་ཧཱུཾ་དེ་ [234b.6]ལས་བྱུང་བའི་རྡོ་རྗེ་རྩེ་ལྔ་པ་ཡི་གེ་བཾ་དབུས་སུ་བཀོད་པ་རྡོ་རྗེ་མེའི་འོད་དང་མཉམ་པས་དུས་མཐའ་རླུང་གིས་སྦར་བའི་བསྐལ་པ་སྲེག་པའི་གཟུགས་ཅན་ལྟ་བུའི་རྡོ་རྗེ་དེས་སངས་རྒྱས་ཀྱི་ཞིང་ཐམས་ཅད་ཐལ་བར་བྱས་པར་བསམ་པར་བྱའོ། །དེ་ནས་ནམ་མཁའི་ཕྱོགས་སུ་སྟོང་གསུམ་ [234b.7]གྱི་སངས་རྒྱས་ཀྱི་ཞིང་གི་ཚད་ཙམ་གྱི་ཟླ་བའི་དཀྱིལ་འཁོར་ལ་ཡི་གེ་ཁཾ་གནས་པ་དེ་ལས་བཅོམ་ལྡན་འདས་རྣམ་པར་སྣང་མཛད་རྡོ་རྗེ་དབྱིངས་ཀྱི་དབང་ཕྱུག་མས་ཀུན་དུ་འཁྱུད་པ་བྱུང་བས། རྡོ་རྗེ་བདུད་རྩིའི་རྒྱུན་རྣམས་ཀྱིས་ཀུན་དུ་བསྲེག་པའི་སངས་རྒྱས་ཀྱི་ཞིང་བཀྲུས་ནས། དབའ་ [235a] [235a.1]རླབས་འཁྲུག་པ་འོ་མའི་རྒྱ་མཚོ་ལྟ་བུར་ཀུན་དུ་བཀང་ནས་གནས་སོ། །དེ་ནས་དེའི་དབུས་སུ་ཡི་གེ་རས་རང་གི་འོད་ཀྱིས་འོ་མའི་རྒྱ་མཚོ་བསྐོལ་བ་དང་། པདྨ་ཆེན་པོའི་གཟུགས་ལ་པདྨ་མཐའ་ཡས་པས་ཡོངས་སུ་བསྐོར་བར་བསམས་ནས། དེའི་ལྟེ་བར་གསེར་གྱི་ [235a.2]མདོག་ཅན་གྱི་ར་བ་བསམས་ལ། དེར་ཡང་བཅོམ་ལྡན་འདས་རྣམ་པར་སྣང་མཛད་ནམ་མཁའི་ཕྱོགས་ནས་བྱོན་ཏེ་བཞུགས་སོ། །དེ་ནས་ཧཱུཾ་སུྂ་ཧཱུཾ་ཞེས་བྱ་བ་སྟེ། དེ་ཐམས་ཅད་ཡོངས་སུ་གྱུར་པ་ལས་རིའི་རྒྱལ་པོ་རི་རབ་ཟུར་བཞི་པ་རིན་པོ་ཆེ་སྣ་བཞིའི་རང་བཞིན་ཅན། གླིང་དང་ [235a.3]གླིང་ཕྲན་དང་། རོལ་མཚོ་དང་། གསེར་གྱི་རི་བདུན་ལ་སོགས་པས་ཡོངས་སུ་བསྐོར་བར་བསམས་ལ། ཨོཾ་བཛྲ་དྲྀ་ཌྷོ་མེ་བྷ་བ་རཀྵ་སརྦཾ་སྭཱ་ཧཱ་ཞེས་བྱ་བ་དང་། རྡོ་རྗེ་བསྡམས་པ་བརྐྱང་སྟེ། ས་ལ་བཞག་པས་བྱིན་གྱིས་བརླབས་ལ། དེ་ལྟ་བུ་གཙང་མའི་གནས་ཀྱི་གནས་རྣམ་པ་ [235a.4]ཀུན་དུ་རབ་ཏུ་གནས་པ་སངས་རྒྱས་ཐམས་ཅད་ཀྱིས་ངེས་པར་བསྟེན་པ། དེ་ཡང་། ཡི་གེ་ཧཱུཾ་ལས་གཞལ་ཡས་ཁང་། །ཟུར་བཞི་པ་ལ་སྒོ་བཞི་པ། །རྟ་བབས་བཞིས་ནི་རྣམ་པར་བརྒྱན། །དྲིལ་བུ་དང་ནི་ལྐུབ་དན་སོགས། །སྒོ་ཁྱུད་ཀྱིས་ནི་ཉེ་བར་མཛེས། །གྲྭ་དང་མཚམས་རྣམས་ཐམས་ [235a.5]ཅད་དུ། །རྡོ་རྗེ་རིན་ཆེན་དག་གིས་སྤྲས། །དྲ་བ་དྲ་ཕྱེད་ཡང་དག་ལྡན། །ཟླ་བ་ཉི་མ་སོགས་ཀྱིས་བརྒྱན། །སྣ་ཚོགས་པ་ཡི་བླ་རེ་བྲེས། །གོས་དང་ཕྲེང་བ་སྣ་ཚོགས་ལྡན། །མཚམས་སུ་ཟླ་ཕྱེད་རིན་ཆེན་མཆོག །རྡོ་རྗེ་མཛེས་པས་རྣམ་པར་བརྒྱན། །ཐིག་བཞི་ཡོངས་སུ་ [235a.6]བཏབ་པ་དང་། །ཁ་ཁྱེར་ཀྱིས་ནི་ཡོངས་སུ་བསྐོར། །དེ་ཡི་དབུས་སུ་འཁོར་ལོ་གཞན། །དེ་བཞིན་དེ་ཡི་དབུས་སུའང་གཞན། །རྡོ་རྗེ་ཕྲེང་བས་ཡོངས་བསྐོར་ཅིང་། །རྡོ་རྗེ་ཀ་བ་བརྒྱད་ཀྱིས་བརྒྱན། །རྩིག་པ་རིན་ཆེན་སྣ་ལྔ་འབར། །ཡེ་ཤེས་ཀྱིས་སྤྲུལ་གཞལ་ཡས་ཁང་། ། [235a.7]ནམ་མཁའི་གྲངས་མེད་ལྟར་རྒྱ་ཆེ། །འཁོར་ལོ་ཡོངས་རྫོགས་འདི་ལྟ་བུ། །ཁ་བ་ཅན་གྱི་རི་ལྟར་དཀར། །མཆོད་རྟེན་ཆེན་པོའི་ནང་དུ་ཆུད། །ཐུབ་དབང་འོད་ནི་རྣམ་འཕྲོ་བས། །ཕྱོགས་ཀྱི་ཚོགས་རྣམས་ཁྱབ་གྱུར་པ། །ཡིད་ཀྱི་རང་བཞིན་མཆོད་ཆེན་འདི། །ཁྱད་ [235b] [235b.1]པར་འཕགས་པ་རྣམས་ཀྱིས་བརྒྱན། །དེ་ལྟར་བསམ་གྱིས་མི་ཁྱབ་པའི། །བསོད་ནམས་དང་ཡེ་ཤེས་ཀྱི་ཚོགས་དང་། ཆོས་ཀྱི་དབྱིངས་ཀྱི་ངོ་བོ་ཉིད་སྒྱུ་མ་ལྟ་བུ་དང་། མིག་ཡོར་ཙམ་གྱི་ཁང་པ་བརྩེགས་མ་རྣམ་པར་བསྒོམས་ལ། དེའི་དབུས་སུ་ཡང་ཧཱུཾ་སཾ་ཧཱུཾ་ཞེས་བྱ་བ་ [235b.2]ལས་སེང་གེའི་གདན་ཟླ་བའི་དཀྱིལ་འཁོར་གྱིས་མནན་པ་དེར་བབས་ནས་འདུག་སྟེ། རང་གི་ཏིང་ངེ་འཛིན་ལ་སྙོམས་པར་ཞུགས་པར་བདག་ཉིད་བསྒོམ་པར་བྱའོ། །བཟླས་བརྗོད་བྱེད་པར་འདོད་པས་རང་གི་སྙིང་ག་ལས་བདག་པོ་རང་གི་སྔགས་ཀྱིས་བཏོན་ལ། དགུག་ [235b.3]པ་དང་། དབང་བསྒུར་བ་དང་། མཆོད་པ་ལ་སོགས་པ་བྱས་ནས། ཟུང་དུ་གནས་པའི་སྦྱོར་བའམ། གཉིས་སུ་མེད་པའི་སྦྱོར་བས་འོག་ནས་བཤད་པའི་ཚུལ་གྱིས་བཟླས་བརྗོད་དང་གཤེགས་སུ་གསོལ་བ་ལ་སོགས་པ་བྱ་སྟེ། འདི་ནི་རིམ་པ་བར་མའོ། །མདོར་བསྡུས་ [235b.4]པའི་རིམ་པ་ནི། བྱང་ཆུབ་ཀྱི་སེམས་བསྒོམ་པ་སྔོན་དུ་འགྲོ་བ་ཉིད་ཀྱིས་སྤྲོས་པ་ཤུ་དང་། བསྡུ་བ་བྱས་པ་ལས། རྣམ་པའི་མཆོག་རྣམས་ཀུན་ལྡན་པར། །སྐད་ཅིག་ཡེ་ཤེས་ཀྱིས་རྫོགས་པ། །སྡོགས་པའི་རྣལ་འབྱོར་ཞེས་བཤད་དོ། །ཞེས་བྱ་བ་ཡིན་ནོ། །ཡང་ན་རྣལ་འབྱོར་རྒྱ་ཆེན་ [235b.5]པོ་བྱེད་པར་འདོད་ན། དེའི་ཚེ་ལྷ་ཐམས་ཅད་ཀྱི་གནས་སུ་ཡང་པཾ་ལས་སྣ་ཚོགས་པདྨའི་གདན་ལ། ཨ་དང་ཨཾ་ལས་ཟླ་བ་དང་ཉི་མའི་དཀྱིལ་འཁོར་ཅི་རིགས་པར་རྣམ་པར་བསམས་ལ། དེ་བཞིན་དུ་དབུས་མའི་སེང་གེའི་གདན་ལ་དུས་ཡུན་རིང་པོ་ནས་གོམས་པར་བྱས་པའི་ཐུགས་རྗེ་ཆེན་ [235b.6]པོ་མངོན་དུ་བསྒོམས་ལ། འགྲོ་བ་མ་ལུས་པ་འདི་དག་ཐབས་དང་ཤེས་རབ་དང་བྲལ་བས་སྡུག་བསྔལ་གྱིས་གདུངས་པ་ལ་བལྟ་སྟེ། ཐབས་འདིས་དེ་རྣམས་ཀྱི་དོན་བྱའོ་ཞེས་བསམས་ལ། རང་གི་སྙིང་གར་གནས་པའི་ཤེས་རབ་ཀྱི་ཕ་རོལ་དུ་ཕྱིན་པ་དྲི་མ་མེད་པ་ཇི་སྲིད་མདུན་ [235b.7]དུ་སྤྲོས་ལ། ཨོཾ་སརྦྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བས་རྗེས་སུ་མཉེས་པར་བྱས་ལ། ཨོཾ་བཛྲ་ཀོ་ཥ་གུ་ཧྱ་ཧཱུཾ་ཞེས་བྱ་བས་བསྐུལ་བ་དང་། བྱང་ཆུབ་ཀྱི་སེམས་དམ་པ་བསྐྱེད་པ་དེ་ཉིད་ཀྱིས་འགྲོ་བ་མ་ལུས་པའི་དོན་བྱེད་པར་དགའ་བས་མཆོག་ཏུ་དགའ་བ་ [236a] [236a.1]ཐོབ་པར་བདག་ཉིད་ཤེས་ནས་སེམས་ཅན་གྱི་ཁམས་མ་ལུས་པ་དང་། རྫོགས་པའི་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱིས་ཡང་དག་པར་གང་བའི་རང་གི་བྱང་ཆུབ་ཀྱི་སེམས་ཤེས་རབ་ཀྱི་ཕ་རོལ་ཏུ་ཕྱིན་པའི་བདག་ཉིད་དུ་ཞུ་བར་གྱུར་ཅིང་། ནང་ [236a.2]དུ་ཆུད་པར་བྱས་ལ། ལྷའི་འཁོར་ལོ་དབྱུང་བར་བྱའོ། །ཡི་གེ་ཨོཾ་ལས་བྱུང་བ་བཅོམ་ལྡན་འདས་རྣམ་པར་སྣང་མཛད་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཞི་བ་རལ་པ་དང་ཐོར་ཚུགས་འཆང་བ། རིན་པོ་ཆེ་རྣམས་ཀྱིས་བརྒྱན་པ། སྔོ་བ་དང་། སེར་བ་དང་། དཀར་པོ་ཆེན་པོ་ [236a.3]སྟེ། ཞལ་གསུམ་གྱིས་མཛེས་པ། སྐུ་མདོག་སེར་པོ་ཕྱག་དྲུག་པ། ཕྱག་དང་པོ་གཉིས་ཀྱིས་བསམ་གཏན་གྱི་ཕྱག་རྒྱ་མཛད་པ། གཡས་ན་འགྲང་ཕྲེང་དང་མདའ་བསྣམས་པ། གཡོན་གྱིས་ལྷ་མོའི་ནུ་མ་དང་། རྡོ་རྗེའི་གཞུ་བསྣམས་པ། ལྷ་རྣམས་འཇིགས་ཤིང་སྐྲག་ [236a.4]པར་མཛད་པས་ཞབས་ཀྱི་པདྨ་ལ་ཕྱག་འཚལ་བ། སངས་རྒྱས་ཀྱི་སྤྲིན་ཆེན་པོ་འཕྲོ་བ། ཨོཾ་ཨཱཿཞེས་བྱ་བའི་སྔགས་ཀྱིས་ཡང་དག་པར་སྤྲོས་ལ། ནམ་མཁའི་དཀྱིལ་འཁོར་མ་ལུས་པར་ཁྱབ་སྟེ། འགྲོ་བ་མ་ལུས་པའི་དོན་མཛད་ནས། སྔགས་འདི་ཉིད་ཀྱིས་བདག་ཉིད་ལ་ [236a.5]གཞུག་པ་དང་བརྟན་པར་བྱའོ། །ཧཱུཾ་ལས་མི་བསྐྱོད་པ་སྐུ་མདོག་ཨིནྡྲ་ནཱི་ལའི་འོད་དང་མཉམ་པ། ཞལ་གསུམ་པ། སྤྱན་གསུམ་པ་ཅུང་ཟད་བཞད་ཅིང་སྒེག་པ། ཞལ་གཡོན་དམར་བ། ཞལ་གཡས་པ་དཀར་བ། ཞལ་དབུས་མ་སྐུ་དང་འདྲ་བ། རྒྱན་ཐམས་ཅད་ཀྱིས་བརྒྱན་པ། [236a.6]ཕྱག་བརྒྱད་པ་གཡས་ཀྱིས་བ་དན་གསུམ་པའི་གུང་མོའི་དབུས་སུ་རྡོ་རྗེ་ཐུགས་ཀར་འདེགས་པར་བརྩོན་པ། གཡོན་ཀྱི་རྡོ་རྗེ་ཁུ་ཚུར་དཀུར་བརྟེན་པས་དྲིལ་བུ་བསྣམས་པ། ཡང་གཡས་ན་རལ་གྲི་དང་། ལྕགས་ཀྱུ་དང་། མདའ་བསྣམས་པ། གཡོན་ན་ལྷ་མོའི་ནུ་མ་དང་། ཞགས་ [236a.7]པ་དང་། གཞུ་བསྣམས་པ། དཔལ་རྡོ་རྗེ་སེམས་དཔའ་རྣམ་པར་གྱུར་པའི་མི་བསྐྱོད་པའི་ཅོད་པན་ཅན་རོལ་པའི་སྟང་སྟབས་ཀྱིས་ལེགས་པར་བཞུགས་པ། ཨོཾ་ཧཱུཾ། ཞེས་བྱ་བའི་སྔགས་ཀྱིས་སྤྲོས་ལ། སྔ་མ་བཞིན་དུ་འགྲོ་བའི་དོན་བྱས་ནས་སླར་བྱོན་ཏེ། རང་གི་སྔགས་ཉིད་ཀྱིས་ཤར་ཕྱོགས་ཀྱི་རེའུ་ཆ་ [236b] [236b.1]ལ་དགོད་པར་བྱ་ཞིང་བརྟན་པར་བྱའོ། །དེ་བཞིན་དུ་གཞན་དག་ཀྱང་རང་རང་གི་ས་བོན་ལས་བྱུང་བ། རང་རང་གི་སྔགས་ཀྱིས་ཡང་དག་པར་སྤྲོས་ཏེ། རང་རང་གི་སྔགས་ཉིད་ཀྱིས་རང་རང་གི་གནས་སུ་གཞག་པར་བྱ་ཞིང་བརྟན་པར་བྱའོ། །ཞལ་གསུམ་གྱི་དབུས་མ་ནི་སྐུ་དང་འདྲ་བར་བལྟ་བར་བྱའོ། །ཏཾ་ལས་རིན་ [236b.2]ཆེན་འབྱུང་ལྡན་སྤྱན་གསུམ་པ། རིན་པོ་ཆེའི་ཅོད་པན་གྱིས་བརྒྱན་པ། སྐུ་མདོག་དམར་པོ་ཞལ་གཡས་སྔོ། གཡོན་དཀར་བ་ཕྱག་དང་པོ་གཉིས་ཀྱིས་དམ་ཚིག་གི་ཕྱག་རྒྱ་མཛད་པ། གཡས་ན་རྡོ་རྗེ་བསྣམས་པ། གཡོན་ན་རིན་པོ་ཆེ་བསྣམས་པ། སྔ་མ་བཞིན་དུ་ལྷོ་ཕྱོགས་ [236b.3]ཀྱི་རེའུ་ཆ་ལ་དགོད་དོ། །ཨཱཿལས་བྱུང་བའི་འོད་དཔག་ཏུ་མེད་པ་འཇིག་རྟེན་དབང་ཕྱུག་སྐུ་རྣམ་པར་བྱུང་བ། རལ་པ་དང་ཐོར་ཚུགས་འཆང་བ། ཞི་བ་ཐམས་ཅད་མཁྱེན་པས་དབུ་རྒྱན་བྱས་པ། སྤྱན་གསུམ་པ། སྟོན་ཀའི་ཟླ་བའི་མདོག་ཅན། ཞལ་གཡས་སྔོན་པོ། གཡོན་དམར་ [236b.4]པོ། ཕྱག་གཡོན་པས་པདྨའི་རྩ་བ་བཟུང་ནས་དཀུར་བརྟེན་པ། གཡས་པས་རང་གི་ཐུགས་ཀར་པདྨ་རྣམ་པར་འབྱེད་པ། ཡང་གཡས་གཉིས་ན་བགྲང་ཕྲེང་དང་རྡོ་རྗེ་བསྣམས་པ། གཡོན་གཉིས་ན་ནུ་མ་དང་། རིལ་བ་སྤྱི་བླུགས་བསྣམས་པ། ལྷ་མོ་བཞི་དང་། གདན་གཅིག་ [236b.5]པ་ནུབ་ཀྱི་རེའུ་ཆ་ལའོ། །ཁཾ་ལས་བྱུང་བའི་དོན་ཡོད་གྲུབ་པ་མརྐཏ་གྱི་མདོག་ཅན། ཞལ་གཡས་སྔོན་པོ། གཡོན་དཀར་པོ། ཕྱག་དང་པོ་གཉིས་ཀྱིས་བསམ་གཏན་གྱི་ཕྱག་རྒྱ་བཅས་པ། ཡང་གཡས་དང་གཡོན་གཉིས་ཀྱིས་རལ་གྲི་དང་། ལྕགས་ཀྱུ་བསྣམས་པ། [236b.6]རིན་པོ་ཆེའི་ཅོད་པན་ཅན་བྱང་དུའོ། །འདི་དག་ནི་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །ཨོཾ་ཏྲཱཾ་ཨོཾ་ཧྲཱིཿཨོཾ་ཁཾ་ཞེས་བྱ་བས་ནི་རིམ་བཞིན་དུ་འདི་རྣམས་ཀྱི་སྔགས་ཡིན་ནོ། །ལཱཾ་མཱཾ་པཱཾ་ཏཱཾ། ཧཱུཾ་ཏྲཱཾ་ཧྲཱིཿ། ཁཾ་ཙུཾ་རཾ་བྷྲཾྀ་ཧཱུཾ་ཞེས་བྱ་བས་ས་བོན་གྱི་ཡི་གེ་འདི་རྣམས་ལས་སྤྱན་ལ་ [236b.7]སོགས་པའི་ལྷ་མོའི་འཁོར་ལོ་རྣམས་རིམ་བཞིན་དུ་བསྐྱེད་ལ། གནས་ཇི་ལྟ་བ་བཞིན་དུ་བཀོད་པར་བྱའོ། །དེ་ལ་དབང་ལྡན་གྱི་ཕྱོགས་སུ་ལྷ་མོ་སྤྱན་སྐུ་མདོག་སེར་བ། ཕྱག་གཡས་ན་མཆོག་སྦྱིན་དང་། མི་འཇིགས་པ་དང་། རྡོ་རྗེ་དང་། མདའ་བསྣམས་པ། གཡོན་ན་སྡིགས་ [237a] [237a.1]མཛུབ་དང་ལྡན་པའི་ཞགས་པ་དང་། རིན་པོ་ཆེའི་སྙེ་མ་དང་། བགྲང་ཕྲེང་དང་། གཞུ་བསྣམས་པའོ། །མེའི་ཕྱོགས་སུ་མཱ་མ་ཀཱི་ཨུཏྤ་ལ་སྔོན་པོའི་མདོག་ཅན་ཁྲོ་བ་དང་བཅས་པ་བཞད་པའི་ཞལ་དང་ལྡན་པ། ཕྱག་གཡས་མི་འཇིགས་པ་དང་། རྡོ་རྗེ་དང་མདའ་ [237a.2]བསྣམས་པའོ། །གཡོན་ན་སྡིགས་མཛུབ་དང་། ཞགས་པ་དང་། གཞུ་བསྣམས་པའོ། །བདེན་བྲལ་གྱི་ཕྱོགས་སུ་གོས་དཀར་ཅན། ཟླ་བའི་མདོག་ཅན་གཡས་ན་མི་འཇིགས་པ་དང་རྡོ་རྗེ་དང་མདས་བརྒྱན་པ། གཡོན་ན་པདྨ་དང་། བགྲང་ཕྲེང་དང་གཞུ་བསྣམས་པ། རོལ་པའི་སྟང་ [237a.3]སྟབས་ཅན་ནོ། །རླུང་གི་ཕྱོགས་སུ་སྒོལ་མ་མརྐཏ་ཀྱི་མདོག་ཅན་གཡས་ན་མི་འཇིགས་པ་དང་རྡོ་རྗེ་དང་མདའ་བསྣམས་པ། གཡོན་ན་སྡིགས་མཛུབ་དང་། ཨུཏྤ་ལ་དང་། གཞུ་བསྣམས་པའོ། །གསུམ་པོ་འདི་དག་ནི་སེམས་དཔའི་སྐྱིལ་མོ་ཀྲུང་ཅན་ནོ། །དཀྱིལ་འཁོར་གཉིས་ [237a.4]པར་ཤར་ལ་སོགས་པའི་ཕྱོགས་རྣམས་སུ་རྡོ་རྗེ་སེམས་མ་དང་། རིན་ཆེན་སེམས་མ་དང་། ཆོས་ཀྱི་སེམས་མ་དང་། ལས་ཀྱི་སེམས་མ་རིམ་བཞིན་དུ་མི་བསྐྱོད་པ་ལ་སོགས་པ་དང་། སྐུ་མདོག་དང་ཕྱག་མཚན་ལ་སོགས་པ་འདྲ་བ་ཡིན་མོད་ཀྱི། གཞན་དུ་ན་གཡོན་པའི་ [237a.5]གཉིས་པས་ནུ་མ་བསྣམས་པ་མེད་པའི་ཕྱིར། ཅི་རིགས་པར་སྡིགས་མཛུབ་དང་ལྡན་པའི་ཞགས་པ་བསྣམས་པར་ཤེས་པར་བྱའོ། །བྱང་ཤར་མཚམས་སུ་ལྷ་མོ་སྐུལ་བྱེད་མ། ཟླ་བའི་མདོག་ཅན་ཕྱག་དང་པོ་གཉིས་ཀྱིས་འོག་ནས་བཤད་པའི་རྩ་བའི་ཕྱག་རྒྱ་བཅིངས་པས། [237a.6]ཐུགས་ཀའི་གནས་རྣམ་པར་བརྒྱན་པ། གཡས་རྣམས་ན་མི་འཇིགས་པ་དང་། རལ་གྲི་དང་། རིན་པོ་ཆེའི་ཆུན་འཕྱང་དང་། བི་ཛ་པཱུ་ར་དང་། མདའ་དང་། དགྲ་སྟ་དང་། དབྱུག་པ་དང་། ཐོ་བ་དང་། ལྕགས་ཀྱུ་དང་། རྡོ་རྗེ་དང་། བ་དན་གསུམ་པའི་ཚུལ་དང་། བགྲང་ཕྲེང་ [237a.7]བསྣམས་པའོ། །གཡོན་རྣམས་ན་ཡིད་བཞིན་གྱི་ནོར་བུའི་རྒྱལ་མཚན་དང་། པདྨ་དང་། སྤྱི་བླུགས་དང་། ཞགས་པ་དང་། གཞུ་དང་། མདུང་ཐུང་དང་། འཁོར་ལོ་དང་། དུང་དང་། སྡིགས་མཛུབ་དང་། བུམ་པ་བཟང་པོ་དང་། ཐག་མདུང་དང་། ཤེས་རབ་ཀྱི་ཕ་རོལ་ཏུ་ [237b] [237b.1]ཕྱིན་པའི་གླེགས་བམ་བསྣམས་པའོ། །ཤིན་ཏུ་དང་བའི་དར་ལའི་ཞེང་ཆུང་ངུའི་སྟོད་གཡོགས་ལེགས་པར་བགོས་པ། རྒྱན་ཐམས་ཅད་ཀྱིས་བརྒྱན་པ། དར་ལ་བབ་ཅིང་སྐལ་བ་བཟང་པ། སྒེག་པ་དང་། དཔའ་བ་དང་། འཇིགས་སུ་རུང་བ་དང་། དྲག་པོ་དང་། དགོད་ [237b.2]པ་དང་། རྔམ་པ་དང་། སྙིང་རྗེ་དང་། རྨད་དུ་བྱུང་བ་དང་། ཞི་བ་ཞེས་བྱ་བའི་ཉམས་དགུ་དང་ལྡན་པས་སྤྱི་བོ་དང་། དཔྲལ་བ་དང་། སྒོག་མ་དང་། དཔུང་མགོ་གཡས་དང་། གཡོན་དང་། ཐུགས་ཀ་དང་། ལྟེ་བ་དང་། པུས་མོའི་ལྷ་ང་དང་། ཞབས་རྣམས་སུ་དེ་བཞིན་ [237b.3]གཤེགས་པ་རྣམ་པར་སྣང་མཛད་དང་། འཁོར་ལོས་སྒྱུར་བ་དང་། མི་གཡོ་བ་དང་། ཡིད་བཞིན་གྱི་ནོར་བུ་དང་། དོན་ཡོད་ཞགས་པ་དང་། རང་གི་གཟུགས་དང་། ཕྱག་ན་རྡོ་རྗེ་དང་། རལ་པ་གཅིག་མ་དང་། རྡོ་རྗེ་སེན་མོ་ཅན་གྱིས་གནས་སུ་བྱས་པ། འདིའི་ཞལ་དང་པོ་ [237b.4]ཅུང་ཟད་བཞད་པ། སྐུའི་མདོག་ཅན་ཞལ་གཡས་པ་གདེངས་པ། ཨུཏྤ་ལ་སྔོན་པོའི་མདོག་ཅན། མཆེ་བ་ཅུང་ཟད་གཙིགས་པས་རྣམ་པར་བརྒྱན་པ། ལྗགས་བསྐྱོད་པ། ཞལ་གཡོན་པ་སེར་པོ་ཚེམ་གྱིས་སྒོས་གནོན་པའོ། །ཤར་ལྷོ་མཚམས་སུ་རིན་ཆེན་སྒོལ་མ་སྐུ་མདོག་ [237b.5]སེར་པོ། ཕྱག་དང་པོ་གཉིས་ཀྱིས་ཐུགས་ཀར་རིན་པོ་ཆེའི་ཐལ་མོ་སྦྱར་ཏེ་འཇོག་པ། ཡང་གཡས་ཀྱི་གཉིས་པས་མི་འཇིགས་པ་དང་། མདའ་བསྣམས་པ། གཡོན་གྱི་གཉིས་ཀྱིས་སྡིགས་མཛུབ་དང་། ལྕེ་བླུགས་དང་། གཞུ་བསྣམས་པའོ། །ལྷོ་ནུབ་མཚམས་སུ་ཁྲོ་གཉེར་ [237b.6]ཅན་ཟླ་བའི་མདོག་ཅན་གཡས་ན་རྡོ་རྗེ་དང་། དབྱུག་པ་དང་། མདའ་བསམས་པ། གཡོན་ན་སྡིགས་མཛུབ་དང་། སྤྱི་བླུགས་དང་། གཞུ་བསྣམས་པའོ། །ནུབ་བྱང་མཚམས་སུ་རྡོ་རྗེ་ལུ་གུ་རྒྱུད་སྐུ་མདོག་ལྗང་གུ། གཡས་ན་རྡོ་རྗེ་ལྕགས་སྒྲོག་དང་། མདའ་བསྣམས་པ། གཡོན་ [237b.7]ན་སྡིགས་མཛུབ་དང་། ཞགས་པ་དང་། གཞུ་བསྣམས་པ། ཞལ་ཅུང་ཟད་བཞད་པ། གདུག་པ་ཐམས་ཅད་ངེས་པར་འདུལ་བ་སྟེ། འདི་དག་ནི་རོལ་པའི་སྟང་སྟབས་དང་ལྡན་པ་ཡིན་ནོ། །སྤྱན་ལ་སོགས་པའི་ལྷ་མོ་འདི་དག་ཐམས་ཅད་ནི་ཟླ་བའི་གདན་དང་། འོད་ཀྱི་དཀྱིལ་ [238a] [238a.1]འཁོར་དམར་པོ་དང་སྤྱན་གསུམ་དང་རང་གི་ཕྱོགས་ཀྱི་བདག་པོ་དང་འདྲ་བའི་ཞལ་གསུམ་དང་། རང་གི་བདག་པོ་རིན་པོ་ཆེའི་ཅོད་པན་དང་ལྡན་པ། གོས་དང་རྒྱན་ཚོགས་པ་མངའ་བ་ཡིན་ནོ། །ཨོཾ་ག་ག་ན་ལོ་ཙ་ནེེ་སྭཱ་ཧཱ། ཨོཾ་ཀི་རི་ཀི་རི་མཱ་མ་ཀཱི་ཧཱུཾ། ཨོཾ་ཀ་ཊེ་བི་ཀ་ཊེ་ [238a.2]ནི་ཀ་ཊེ་ཀ་ཊཾ་ཀ་ཊེ་ཀ་རོ་ཊ་བི་བྱེ་སྭཱ་ཧཱ། ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། ཨོཾ་སཏྭ་བཛྲི་ཧཱུཾ། ཨོཾ་རཏྣ་བཛྲི་ཧཱུཾ། ཨོཾ་དྷརྨྨ་བཛྲི་ཧཱུཾ། ཨོཾ་ཀརྨྨ་བཛྲི་ཧཱུཾ། ཨོཾ་ཙ་ལེ་ཙུ་ལེ་ཙུནྡ་སྭཱ་ཧཱ། ཨོཾ་རཏྣོ་ལ་ཀེ་རཏྣ་ཛྭ་ལི་ནི་སྭཱ་ཧཱ། ཨོཾ་བྷྲཾ་ཀུ་ཊེ་བྷྲཾྀ། ཨོཾ་བཛྲ་ཤྲི་ཁ་ལ་ཧཱུཾ་ཕཊ་སྭཱ་ཧཱ། འདི་དག་ནི་ཅི་རིགས་པར་འདི་རྣམས་ཀྱི་ [238a.3]སྔགས་ཡིན་ནོ། །དེ་ནས་དཀྱིལ་འཁོར་གསུམ་པར་རིམ་པ་བཞིན་དུ་ཤར་ལ་སོགས་པའི་ཕྱོགས་རྣམས་སུ་བྱམས་པ་ལ་སོགས་པ་རང་རང་གི་ས་བོན་ལས་བྱུང་བ་དགོད་པར་བྱའོ། །དེ་ལ་ཤར་ཕྱོགས་སུ་ཡི་གེ་མཻཾ་ལས་བྱུང་བའི་བྱམས་པ་གསེར་གྱི་མདོག་ཅན་ཕྱག་བཞི་པ། ཕྱག་དང་པོ་གཉིས་ [238a.4]ཀྱིས་ཆོས་འཆད་པའི་ཕྱག་རྒྱར་བྱས་པ། ཡང་གཡས་ཀྱིས་མཆོག་སྦྱིན། གཡོན་གྱིས་མེ་ཏོག་དང་བཅས་པའི་ནཱ་ག་གེ་སར་གྱི་སྙེ་མ་བསྣམས་པའོ། །འཕགས་པ་འཇམ་དཔལ་ནི་སྔར་ཇི་སྐད་བསྟན་པའི་རང་བཞིན་ཅན་ནོ། །གཾ་ལས་བྱུང་བའི་སྤོས་ཀྱི་གླང་པོ་ནི་མདོག་ལྗང་གུ་གཡོན་ [238a.5]ན་བུམ་པ་བསྣམས་པ། གཡས་ཀྱིས་གླང་པོ་ཆེའི་མཆུ་འཛིན་པའོ། །ཛཾ་ལས་བྱུང་བའི་ཡེ་ཤེས་ཏོག་སྐུ་མདོག་སེར་པོ་གཡོན་ན་ཡིད་བཞིན་ཀྱི་ནོར་བུའི་རྒྱལ་མཚན་བསྣམས་པའོ། །ཨོཾ་མེ། ཨོཾ་མུ། ཨོཾ་གནྡྷ་ཧ་སྟི་ནེེ་ཧཱུཾ། ཨོཾ་ཛྙཱ་ན་ཀེ་ཏུ་ཛྙཱ་ན་བ་ཏི་ཨོཾ། འདི་དག་ནི་རིམ་པ་བཞིན་དུ་འདི་ [238a.6]རྣམས་ཀྱི་སྤྲོ་བ་ལ་སོགས་པའི་སྔགས་ཡིན་ནོ། །ཡང་ལྷོ་ཕྱོགས་སུ་བྷ་ལས་བྱུང་བའི་བཟང་སྐྱོང་སྐུ་མདོག་དམར་པོ་ཕྱག་ཐལ་མོ་སྦྱར་བའོ། །ས་ལས་བྱུང་བའི་རྒྱ་མཚོའི་བློ་གོས་ཀྱང་། དུང་དང་ཀུནྡ་ལྟར་དཀར་བ། ཕྱག་གཉིས་བརྐྱང་བའི་སོར་མོ་ཐམས་ཅད་ཀྱིས་རླབས་ལྟར་མཛད་ [238a.7]པའོ། །ཨ་ལས་བྱུང་བའི་བློ་གྲོས་མི་ཟད་པ་ནི་གསེར་གྱི་མདོག་ཅན་ཁུ་ཚུར་ཡོད་པ། ཐུགས་ཀར་འཇོག་པ་གཡས་པས་མཆོག་སྦྱིན་ནོ། །པྲ་ལས་བྱུང་བའི་སྤོབས་པ་བརྩེགས་པ་ནི་སྐུ་མདོག་ལྗང་གུ་གཡོན་གྱི་ཁུ་ཚུར་པང་པར་འཇོག་པ། གཡས་ཀྱི་ཁུ་ཚུར་སེ་གོལ་བརྡེབས་པའོ། ། [238b] [238b.1]ཨོཾ་བྷ་དྲ་བ་ཏི་བྷ་དྲ་བཱ་ལེ་སྭཱ་ཧཱ། ཨོཾ་སྭ་ག་རེ་མ་ཧཱ་སཱ་ག་རེ་ཧཱུཾ། ཨོཾ་ཨཀྵ་ཡ་ཕུ་ཕུ། ཨཀྵ་ཡ་ཀརྨྨ་ཨ་བ་ར་ཎ་བི་ཤོ་དྷ་ནི་སྭཱ་ཧཱ། ཨོཾ་པྲ་ཏི་བྷཱ་ནེ་པྲ་ཏེ་བྷཱ་ན་ཀཱུ་ཊེ་ཧཱུཾ། འདི་དག་ནི་རིམ་བཞིན་དུ་འདི་རྣམས་ཀྱི་སྔགས་ཡིན་ནོ། །ནུབ་ཕྱོགས་སུ་མ་ལས་བྱུང་བའི་མཐུ་ཆེན་ཐོབ་སྐུ་མདོག་དཀར་པོ་གཡོན་ [238b.2]པས་པདྨ་ཅུང་ཟད་ཁ་ཕྱེ་བ་བསྣམས་པའོ། །ས་ལས་བྱུང་བའི་ངན་སོང་ཀུན་འདྲེན་སྐུ་མདོག་དཀར་པོ་ཕྱག་གཉིས་སྡིག་པ་འཐོར་བ་ལྟར་མཛད་པའོ། །ས་ཉིད་ལས་བྱུང་བའི་མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་གསེར་གྱི་མདོག་ཅན། ཕྱག་གཉིས་ཐལ་མོ་ [238b.3]སྦྱར་བ་འཕྱར་བའི་ཚུལ་མཛད་པའོ། །ཛ་ལས་བྱུང་བའི་དྲ་བ་ཅན་གྱི་འོད་སྐུ་མདོག་དཀར་པོ། གཡོན་ན་ཨུཏྤ་ལ་ལ་གནས་པའི་ཉི་མའི་དཀྱིལ་འཁོར་བསྣམས་པའོ། །ཨོཾ་སྠཱ་མེ་སྠཱ་མེེ་མ་ཧཱ་སྠཱ་མེ་བ་ཏི་སྭཱ་ཧཱ། ཨོཾ་སརྦྦ་ཨཱ་བཱ་ཡཱ་ཛ་ཧེ་སརྦྦ་ཨ་བ་ཛ་ཡེ་སརྦྦ་ཨ་པཱ་ཡ་བི་ཤོ་དྷ་ནི་ཧཱུཾ། ཨོཾ་ [238b.4]ཨོཾ་སརྦྦ་ཤོ་ཀ་ཏ་མོ་ནིར་གྷ་ཏེ་ན་མ་ཏི་ཧཱུཾ། ཨོཾ་ཛ་ལི་ནི་མ་ཧཱ་ཛ་ལི་ནི་ཧཱུཾ་ཞེས་བྱ་བ་ནི་འདི་དག་གི་སྔགས་སོ། །བྱང་ཕྱོགས་སུ་ཙ་ལས་བྱུང་བའི་ཟླ་བའི་འོད། ཟླ་བའི་མདོག་ཅན་ཨུཏྤལ་ལ་གནས་པའི་ཟླ་བའི་དཀྱིལ་འཁོར་བསྣམས་པའོ། །ཨ་ལས་བྱུང་བའི་འོད་དཔག་ཏུ་མེད་པ་སྐུ་ [238b.5]མདོག་དམར་པོ་ཕྱག་གཉིས་ཀྱིས་དབང་བསྐུར་བའི་བུམ་པ་བསྣམས་པའོ། །ག་ལས་བྱུང་བའི་ནམ་མཁའ་མཛོད་གསེར་གྱི་མདོག་ཅན། གཞོན་ནུའི་གཟུགས་ཅན། གཡོན་གྱི་རྡོ་རྗེའི་ཁུ་ཚུར་བསྙེམས་པའི་ཚུལ་གྱིས་རྐེད་པར་འཇོག་པ། གཡས་པ་ནམ་མཁར་ཡོངས་སུ་ [238b.6]བསྐོར་བའོ། །སྐཾ་ལས་བྱུང་བའི་སྒྲིབ་པ་ཐམས་ཅད་རྣམ་པར་སེལ་བ་སྐུ་མདོག་སྔོན་པོའམ་དཀར་པོ། གཡོན་ས་ལ་རེག་པ། གཡས་པའི་ཁུ་ཚུར་གྱིས་མཐེ་བོང་དང་། མཛུབ་མོ་སྦྱར་ནས་འདྲི་བའི་ཚུལ་དུ་འཇོག་པའོ། །ཨོཾ་ཙནྡྲ་སུ་ཙནྡྲ་བྱ་བ་ལོ་ཀི་ཏེ་སྭཱ་ཧཱ། ཨོཾ་ཨ་མྲྀ་ཏ་ [238b.7]པྲ་བྷེ་ཨ་མི་ཏ་བ་ཏི་ཧཱུཾ། ཨོཾ་ག་ག་ན་པ་ར་ལོ་ཙ་ནེེ་ཧཱུཾ། ཨོཾ་སརྦྦ་ནི་བ་ར་ཎ་བིསྐཾ་བི་ནི་ཧཱུཾ་ཞེས་བྱ་བ་ནི་འདི་རྣམས་ཀྱི་སྤྲོ་བ་ལ་སོགས་པའི་སྔགས་སོ། །བྱང་ཆུབ་སེམས་དཔའ་འདི་དག་ཐམས་ཅད་ཀྱང་པདྨའི་གདན་ཅན་ཟླ་བའི་འོད་མངའ་བ་སེམས་དཔའི་སྐྱིལ་མོ་ཀྲུང་གིས་གནས་པ། སྤྱན་ [239a] [239a.1]གསུམ་པ་ཞལ་གསུམ་པ་རང་གི་ཕྱོགས་ཀྱི་བདག་པོ་དང་འདྲ་བ་མངའ་ཞིང་དེའི་ཅོད་པན་ཅན། རྒྱན་དང་ན་བཟའ་སྣ་ཚོགས་འཆང་བ། ཕྱག་དང་པོ་གཉིས་ཀྱིས་ཏིང་ངེ་འཛིན་གྱི་ཕྱག་རྒྱ་བཅིངས་པ་ཁྱད་པར་ཀྱི་ཚིག་ཏུ་སྐོས་པ་མ་གཏོགས་པ་གཡས་ན་མཆོག་ [239a.2]སྦྱིན་དང་མདའ་དང་། གཞུ་བསྣམས་པ། ཤར་ལ་སོགས་པའི་སྒོ་རྣམས་ཀྱི་ངོས་གཉིས་གཉིས་ཀྱི་སྣམ་བུ་ལ་གཉིས་གཉིས་བདག་པོ་ལ་མངོན་པར་ཕྱོགས་ནས་བཞུགས་པར་རིམ་པ་བཞིན་བསམ་པར་བྱའོ། །དེ་ནས་ཧཱུཾ་ལས་འཕགས་པ་གཤིན་རྗེ་གཤེད་དུས་མཐའི་སྤྲིན་ལྟ་བུ། [239a.3]ཕྱག་གཡས་ན་རལ་གྲི་དང་། རྡོ་རྗེ་དང་། མདའ་བསྣམས་པ། གཡོན་ན་སྡིགས་མཛུབ་བསྒྲེང་བ། ཞགས་པ་དང་བཅས་པས་བསྡིགས་པར་མཛད་པ། གཡོན་གྱི་གཉིས་པས་པདྨ་དཀར་པོ་ཐོགས་པའི་ལྷ་མོས་གཡས་ཀྱིས་འཁྱུད་པ་ལ་བརྩོན་པའི་ཟླ་བའི་མདོག་ཅན་གྱི་ནུ་མ་ [239a.4]འཛིན་པ། གསུམ་པ་ནི་གཞུ་བདུངས་པ་བསྣམས་པ། གཡས་ལོགས་སུ་ལྷ་མོ་མརྐཏ་ལྟར་ལྗང་བ། ལག་པ་གཡས་ན་ཨུཏྤལ་སྔོན་པོ་ཐོགས་ཤིང་། ལག་པ་གཡོན་པས་མགུལ་ནས་འཁྱུད་པས་ཉེ་བར་མཛེས་པ་བྱས་པ། ཞབས་དྲུག་པ། གསུས་ཁྱིམ་ཆེ་བ། ཞལ་དྲུག་པ། ཞལ་ [239a.5]དང་པོ་ཧ་ཧ་ཞེས་རྣམ་པར་བཞད་པ། གཉིས་པས་འཇིགས་པ་བསྐྱེད་པ། གསུམ་པ་གདངས་པ། བཞི་པ་མི་བཟད་པ་ཆེན་པོ། ལྔ་པ་རྡོ་རྗེ་མཆེ་བ་ཅན། དྲུག་པ་ལྗགས་རྣམ་པར་བསྐྱོད་པ། སྤྱན་དམར་བ་ཁྲོ་བོའི་ལྟ་བ་འཇིགས་སུ་རུང་བ། འཕགས་པ་འཇམ་དཔལ་གྱིས་ [239a.6]ཡང་དག་པར་བརྒྱན་པ། ལྷ་དང་བགེགས་འཇིགས་པས་ཀུན་དུ་ཁྱབ་པར་དུ་མ་འོག་ན་གནས་ཤིང་འདུད་པར་བྱེད་པ་རོལ་པའི་སྟང་སྟབས་ཀྱིས་མ་ཧེའི་སྟེང་ན་བཞུགས་པ་སྔ་མ་བཞིན་དུ་གདུག་པ་འདུལ་བ་ལ་སོགས་པ་མཛད་པའི་ཕྱིར། ཀུན་དུ་སྤྲོས་ལ་ཡང་དག་པར་བསྡུས་ [239a.7]ཏེ། རང་གི་སྔགས་ཀྱིས་རྩ་བའི་ཤར་སྒོར་དགོད་པར་བྱའོ། །དེ་བཞིན་དུ་ལྷོའི་སྒོར་པྲ་ལས་བྱུང་བའི་གཞན་གྱིས་མ་ཐུབ་པ་སྐུ་མདོག་སེར་པོ་ཕྱག་གཡས་པས་རྡོ་རྗེ་དང་། དབྱུག་པ་དང་མདའ་བསྣམས་པ། གཡོན་ན་སྡིགས་མཛུབ་ཞགས་པ་ཅན་དང་། །ནུ་མ་དང་གཞུ་ [239b] [239b.1]བསྣམས་པ། མིའུ་ཐུང་གི་གཟུགས་ཅན་ནོ། །ནུབ་ཀྱི་སྒོར་ཧ་ལས་བྱུང་བའི་རྟ་མགྲིན་སྐུ་མདོག་དམར་པོ་ཕྱག་གཡས་ན་རྡོ་རྗེ་དང་དབྱུག་པ་དང་། མཚོན་རྩེ་གཅིག་པ་དང་མདའ་བསྣམས་པ། གཡོན་པས་སྡིགས་མཛུབ་ཞགས་པ་ཅན་དང་། ནུ་མ་དང་། པདྨ་དང་ [239b.2]གཞུ་བསྣམས་པའོ། །བྱང་གི་སྒོར་ཧཱུཾ་ལས་བྱུང་བའི་བདུད་རྩི་ཐབ་སྤྱོར་སྔོན་པོ་ཞབས་ཀྱིས་བགེགས་རྣམས་གནོན་པ། གཡས་ན་རལ་གྲི་དང་། དགྲ་སྟ་དང་མདའ་གསོར་བ་བསྣམས་པ། གཡོན་ན་སྡིགས་མཛུབ་ཞགས་པ་ཅན་དང་། ནུ་མ་དང་གཞུ་བསྣམས་པའོ། ། [239b.3]དབང་ལྡན་གྱི་ཕྱོགས་སུ་ཧཱུཾ་ལས་བྱུང་བའི་མི་གཡོ་བ་སྐུ་མདོག་སྔོན་པོ། མི་གཡོ་བ་བྱིས་པའི་གཟུགས་ཅན། གཞོན་ནུའི་རྒྱན་གྱིས་བརྒྱན་པ། གཡས་ན་རལ་གྲི་དང་། རྡོ་རྗེ་དང་། མདའ་བསྣམས་པ། གཡོན་ན་སྡིགས་མཛུབ་ཞགས་པ་ཅན་དང་། ནུ་མ་དང་གཞུ་ [239b.4]བསྣམས་པ། བུང་བ་ལྟར་གནག་པའི་ཟུར་ཕུད་གཅིག་གཡོན་དུ་འཕྱང་བ་མངའ་བ། ཞལ་གཡས་པའི་ལྗགས་ཁྲག་གིས་བརླན་པ་བསྒྲིལ་བ། རིན་པོ་ཆེའི་རིའི་སྟེང་ན་པདྨ་ལ་བཞུགས་པའོ། །མེའི་ཕྱོགས་སུ་ཧཱུཾ་ལས་བྱུང་བའི་འདོད་པའི་རྒྱལ་པོ་སྐུ་མདོག་སྔོན་ [239b.5]པོ། ཕྱག་དང་པོ་གཉིས་ཀྱིས་རང་གི་དམ་ཚིག་གི་ཕྱག་རྒྱ་བཅས་པ་ཡང་གཡས་གཉིས་ན་རྡོ་རྗེ་དང་མདའ་བསྣམས་པ། གཡོན་གཉིས་ན་ནུ་མ་དང་གཞུ་བསྣམས་པའོ། །བདེན་བྲལ་ཀྱི་ཕྱོགས་སུ་ཧཱུཾ་ལས་བྱུང་བའི་དབྱུག་སྔོན་ཅན་སྐུ་མདོག་སྔོན་པོ། གཡས་ན་རྡོ་རྗེ་ [239b.6]དང་། དབྱུག་པ་དང་མདའ་བསྣམས་པ། གཡོན་ན་སྡིགས་མཛུབ་ཞགས་པ་ཅན་དང་། ནུ་མ་དང་གཞུ་བསྣམས་པའོ། །རླུང་གི་ཕྱོགས་སུ་ཧཱུཾ་ལས་བྱུང་བའི་སྟོབས་པོ་ཆེ་སྐུ་མདོག་སྔོན་པོ། གཡས་ན་རྡོ་རྗེ་དང་བེེ་ཅོན་དང་། རལ་གྲི་དང་མདའ་བསྣམས་པ། གཡོན་ [239b.7]ན་སྡིགས་མཛུབ་ཞགས་པ་ཅན་དང་། ནུ་མ་དང་ཐོ་བ་དང་། གཞུ་བསྣམས་པའོ། །སྟེང་དུ་ཧཱུཾ་ལས་བྱུང་བའི་གནོད་མཛེས་རྒྱལ་པོ་སྐུ་མདོག་སྔོན་པོ། ཕྱག་དང་པོ་གཉིས་ཀྱིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་པ། ཡང་གཡས་གཉིས་ན་རལ་གྲི་དང་མདའ་བསྣམས་པ། གཡོན་ [240a] [240a.1]གཉིས་ན་ནུ་མ་དང་གཞུ་བསྣམས་པ། ཁམས་གསུམ་མ་ལུས་པ་ལས་རྣམ་པར་རྒྱལ་བར་མཛད་པའོ། །འོག་ཏུ་ཧཱུཾ་ལས་བྱུང་བའི་རྡོ་རྗེ་ས་འོག་ཆར་སྤྲིན་སྔོན་པོ་ལྟ་བུ། ཕྱག་གཡས་རྣམས་ཀྱིས་རྡོ་རྗེ་དང་། ལྕགས་ཀྱུ་དང་མདའ་བསྣམས་པ། གཡོན་སྡིགས་མཛུབ་ [240a.2]ཞགས་པ་ཅན་དང་། ནུ་མ་དང་གཞུ་བསྣམས་པ། ས་འོག་ན་གནས་པའི་ལྷ་མ་ཡིན་མ་ལུས་པའི་ཚོགས་རབ་ཏུ་འཇོམས་པར་བསམ་པར་བྱའོ། །ཁྲོ་བོ་འདི་དག་ཐམས་ཅད་ཀྱང་སྤྱན་གསུམ་པ། སྤྱན་མིག་འབར་བ། ཁྲོ་བོའི་ལྟ་བ་འཇིགས་སུ་རུང་བ། མཐའ་ཡས་དང་རིགས་ལྡན་ [240a.3]ནག་པོས་དབུ་སྐྲ་བཅིངས་པ། འཇོག་པོ་གསེར་གྱི་མདོག་ཅན་གྱིས་རྣ་རྒྱན་དུ་བྱས་པ། པདྨ་ཆེན་པོ་གསེར་བཙོ་མའི་ཁ་དོག་ཅན་གྱིས་གདུ་བུར་བྱས་པ། ཀརྐོ་ཊ་ཁ་དོག་དཀར་པོས་མཆོད་ཕྱིར་ཐོགས་སུ་བྱས་པ། ནོར་རྒྱས་ཁ་དོག་དམར་པོས་འོག་པག་བྱས་པ། དུང་སྐྱོང་དང་ [240a.4]པདྨ་དམར་བ་དང་། དཀར་བས་ཞབས་གདུབ་བྱས་པ། འདི་དག་ཐམས་ཅད་ཀྱང་གདེངས་ཀ་འཇིགས་སུ་རུང་བ་དང་ལྡན་པའོ། །ན་བཟའ་སྟག་གི་པགས་པ་བསྣམས་པ། ཐོད་པའི་ཕྲེང་བ་ཅན། དབུ་སྐྲ་འཁྱིལ་པ་གྱེན་དུ་བསྒྲེང་བ་བཅིངས་པ། མི་བསྐྱོད་པའི་ཅོད་པན་ཅན་ཨག་ཚོམ་དམར་སེར་ [240a.5]ཅན། ཉི་མའི་དཀྱིལ་འཁོར་གྱི་འོད་དང་། གདན་མངའ་བ། ཞལ་དང་པོ་ཅུང་ཟད་བཞད་པ། ཞལ་གཡས་པ་རྣམ་པར་གདངས་པ། གཡོན་གྱི་ཚེམས་ཀྱིས་སྒྲོས་གནོན་པ་དང་། མཆེ་བ་རྣམ་པར་གཙིགས་པ། སྨིན་མ་བསྡུས་པ། རོལ་པའི་སྟང་སྟབས་ཀྱིས་བཞུགས་པར་ཤེས་ [240a.6]པར་བྱའོ། །ཨོཾ་ཡ་མཱནྟ་ཀ་ཧཱུཾ། ཨོཾ་པྲཛྙཱནྟ་ཀ་ཧཱུཾ། ཨོཾ་པདྨཱནྟ་ཀ་ཧཱུཾ། ཨོཾ་ཨ་མྲྀ་ཏ་ཀུཎྜ་ལི་བིགྷྣཱནྟ་ཀ་ཧཱུཾ། ཨོཾ་ཨ་ཙ་ལ་ཧཱུཾ་ཧཾ། ཨོཾ་ཊཀྐི་ཧཱུཾ་ཛཿ ཨོཾ་ནཱི་ལ་དཎྜ་མ་ཧཱ་དཎྜ་ཧཱུཾ། ཨོཾ་ཀྲོ་དྷ་ན་ཧཱུཾ་ཛཿ ཨོཾ་སུམྦྷ་ནི་སུམྦྷ་ཧཱུཾ། གྲིཧྞ་གྲིཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོཿབྷ་ག་ཝཱན་བིཏྱཱ་སྣེ་རཱ་ཛ་ཧཱུཾ་ [240a.7]ཕཊ། ཨོཾ་བཛྲ་པཱ་ཏཱ་ལ་བྷཉྫ་བྷཉྫ་ཧཱུཾ་ཞེས་བྱ་བ་ནི་རིམ་བཞིན་དུ་འདི་དག་གི་སྤྲོ་བ་ལ་སོགས་པའི་སྔགས་ཡིན་ནོ། །དེ་ནས་དེ་བཞིན་གཤེགས་པ་རྣམས་ནི་རྡོ་རྗེ་ལྕགས་ཀྱུའི་ཕྱག་རྒྱས་སོ། །རྡོ་རྗེ་སེམས་མ་ལ་སོགས་པ་བཞི་ནི་སྤྱན་ལ་སོགས་པའི་རིགས་ཀྱི་ཡུམ་གྱི་ཕྱག་རྒྱས་སོ། །སྤྱན་ [240b] [240b.1]ལ་སོགས་པ་ནི་རང་གི་ཕྱག་རྒྱས་སོ། །སྐུལ་བྱེད་མ་ལ་སོགས་པའི་ཕོ་ཉ་མོ་རྣམས་ནི་ལྕགས་ཀྱུའི་ཕྱག་རྒྱས་སོ། །བྱམས་པ་ལ་སོགས་པ་བྱང་ཆུབ་སེམས་དཔའ་རྣམས་ནི་རྡོ་རྗེའི་ཕྱག་རྒྱས་སོ། །གཤིན་རྗེ་གཤེད་ལ་སོགས་པ་ཁྲོ་བོ་རྣམས་ནི་ཞལ་གྱི་ཕྱག་རྒྱས་སོ། །འཕགས་པ་མི་གཡོ་བ་ [240b.2]ལ་སོགས་པའི་བྲན་རྣམས་ནི་ཞགས་པའི་ཕྱག་རྒྱས་སྤྱན་དྲང་བར་བྱའོ། །སངས་རྒྱས་བཅོམ་ལྡན་འདས་ལ་སོགས་པ་དེ་རྣམས་ཀྱང་འཁོར་ལོའི་ཚོགས་དང་བཅས་པ། རྡོ་རྗེ་ལྕགས་ཀྱུ་ལ་སོགས་པས་སྤྱན་དྲངས་པ་ན་འོད་ཟེར་གྱི་ཚོགས་རྣམས་འགྱེད་པར་མཛད་པས། སེམས་ཅན་ [240b.3]ཐམས་ཅད་ལ་སངས་རྒྱས་ཉིད་ལ་སོགས་པས་དངོས་གྲུབ་ཐམས་ཅད་སྩོལ་བར་མཛད་ཅིང་ཞལ་འཛུམ་པ་དང་། དཀྱིལ་འཁོར་གྱི་འཁོར་ལོ་ལ་མངོན་པར་ཕྱོགས་ཏེ། བྱོན་ནས་སྟེང་དུ་བཞུགས་པར་བསམ་པར་བྱའོ། །དེ་ལ་ཁམས་གསུམ་རྣམ་པར་རྒྱལ་བའི་ཕྱག་རྒྱ་ཉིད་ལས་གཡས་ [240b.4]པའི་མཛུབ་མོ་ལྕགས་ཀྱུར་བྱ་བ་ནི་རྡོ་རྗེ་ལྕགས་ཀྱུའི་ཕྱག་རྒྱའོ། །ཨོཾ་བཛྲ་ཨཾ་ཀུ་ཤ །ཨཱ་ཀརྵ་ཡ་ཧཱུཾ་ཛཿཞེས་བྱ་བ་ནི་སྔགས་སོ། །སྤྱན་ལ་སོགས་པའི་ཕྱག་རྒྱ་ནི་འོག་ནས་འཆད་དོ། །ལྕགས་ཀྱུའི་ཕྱག་རྒྱ་ནི་རྡོ་རྗེ་ལྕགས་ཀྱུའི་ཕྱག་རྒྱ་ཉིད་དོ། །ཐལ་མོ་ཁོང་སྟོང་དུ་སྦྱར་ནས་སྲིན་ལག་ [240b.5]གཉིས་ནང་དུ་བཅུག་སྟེ། གུང་མོ་གཉིས་གཤིབས་པའི་ཚིགས་གསུམ་པར་མཛུབ་མོ་གཉིས་རྡོ་རྗེ་ལྟ་བུར་གཞག་པ་ནི་རྡོ་རྗེའི་ཕྱག་རྒྱའོ། །ཧཱུཾ་ཛཿཞེས་བྱ་བ་འདི་དག་ཐམས་ཅད་ཀྱི་སྔགས་སོ། །རྡོ་རྗེ་ལྕགས་ཀྱུའི་ཕྱག་རྒྱ་ཉིད་ལས་མཛུབ་མོ་གཉིས་ཞགས་པར་བྱ་བ་ནི་ཞགས་པའི་ [240b.6]ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱིས་མཐེའུ་ཆུང་གཉིས་མཆེ་བ་ལྟ་བུར་རྣམ་པར་བཟློག་ནས། མཁུར་བ་གཉིས་སུ་བཞག་ལ། ལྕེ་བསྐྱོད་ཅིང་ཁྲོ་བོའི་ལྟ་བས་བལྟ་བ་ནི་ཞལ་གྱི་ཕྱག་རྒྱའོ། །ལ་ལ་ནི་འཕགས་པ་གཤིན་རྗེ་གཤེད་ཀྱི་ཕྱག་རྒྱ་ཉིད་ཞལ་གྱི་ཕྱག་རྒྱ་ཉིད་ཡིན་ཏེ། དེ་ནི་ [240b.7]ཁ་དང་འདྲ་བའི་ཕྱིར་རོ་ཞེས་ཟེར་རོ། །ཛཿཧཱུཾ་བཾ་ཧོཿཞེས་བྱ་བ་ནི་ཐམས་ཅད་ཀྱི་སྔགས་ཡིན་ནོ། །དེ་ནས་སྔ་མ་བཞིན་དུ་ཤར་སྒོར་འཕགས་པ་གཤིན་རྗེ་གཤེད་ཀྱི་ང་རྒྱལ་དང་ལྡན་པས་རྡོ་རྗེ་ལྕགས་ཀྱུས་བཀུག་ལ། བཅོམ་ལྡན་འདས་རྣམ་པར་སྣང་མཛད་ནི་རང་གི་སྙིང་ག་དང་དེ་ལས་ [241a] [241a.1]གཞན་པ་ནས་རང་རང་གི་རྣམ་པ་ལའོ། །འཕགས་པ་གཞན་གྱིས་མི་ཐུབ་པའི་ང་རྒྱལ་གྱིས་ལྷོ་སྒོར་རྡོ་རྗེ་ཞགས་པས་བཅུག་ལ། འཕགས་པ་རྟ་མགྲིན་གྱི་ང་རྒྱལ་གྱིས་ནུབ་སྒོ་ནས་རྡོ་རྗེ་ལྕགས་སྒྲོག་གིས་བཅིངས་ལ། འཕགས་པ་བདུད་རྩི་ཐབ་སྦྱོར་དུ་ང་རྒྱལ་ [241a.2]བྱས་པའི་རྡོ་རྗེ་འབེབས་པས་བྱང་སྒོ་ནས་དབང་དུ་བྱས་ལ། འཕགས་པ་བདུད་རྩི་ཐབ་སྤྱོར་ཉིད་ཀྱིས་བགེགས་བསྐྲད་པ་ལ་སོགས་པ་བྱས་ཏེ། པདྨའི་གདན་དང་། མཆོད་ཡོན་དང་། ཞབས་བསིལ་ལ་སོགས་པ་ཕུལ་ལ། རང་གི་སྔགས་དང་ཕྱག་རྒྱ་རྣམས་ཀྱིས་སྐུ་བྱིན་གྱིས་བརླབ་ [241a.3]པ་ལ་སོགས་པས་བྱིན་གྱིས་བརླབས་ཏེ། རང་གི་སྙིང་གར་ཧཱུཾ་ལས་བྱུང་བའི་རྡོ་རྗེ་བསམས་ལ། དམ་ཚིག་གི་ཕྱག་རྒྱ་བསྟན་པར་བྱའོ། །དེ་ལ་དམ་ཚིག་ནི་འདི་ཡིན་ཏེ། གཡོན་པའི་ཁུ་ཚུར་གྱི་མཛུབ་མོ་བརྐྱང་ལ་གཡས་པའི་ཁུ་ཚུར་གྱིས་བཟུང་བ་ནི་བཅོམ་ལྡན་འདས་དཔལ་རྣམ་ [241a.4]པར་སྣང་མཛད་ཀྱིའོ། །སེམས་དཔའི་སྐྱིལ་མོ་ཀྲུང་བཅས་ནས། ལག་པ་གཡོན་པ་རང་གི་པང་པར་བཞག་སྟེ། གཡས་པས་གནོན་པ་ལྟ་བུ་ནི་མི་བསྐྱོད་པའི་འོ། །དེ་ལས་གཡས་མཆོག་སྦྱིན་པར་བྱ་བ་ནི། རིན་ཆེན་འབྱུང་ལྡན་གྱིའོ། །དེ་ཉིད་ལས་ལག་པ་གཉིས་བསམ་གཏན་གྱི་ [241a.5]ཚུལ་དུ་བྱ་བ་ནི་འོད་དཔག་ཏུ་མེད་པའི་འོ། །དེ་ཉིད་ལས་ལག་པ་གཡས་པ་མི་འཇིགས་པ་སྦྱིན་པར་བྱེད་པ་ནི་དོན་ཡོད་པར་གྲུབ་པའི་འོ། །ཨོཾ་བཻ་རོ་ཙ་ན་དྲྀ་ཤྱ་ཧོ། ས་མ་ཡ་སྟྭཾ། ལྷག་མ་རྣམས་ཀྱི་ནི་རང་གི་མཚན་བརྗོད་པར་བལྟ་བར་བྱའོ། །ལག་པ་གཉིས་ཐལ་མོ་ཁོང་སྟོང་དུ་བྱས་ལ། མཛུབ་ [241a.6]མོ་གཉིས་གདུ་བུ་ལྟ་བུར་བྱས་ཏེ། མཐེ་བོའི་རྩེ་མོར་མིག་གི་ཚུལ་དུ་གཞག་པ་ནི་སྤྱན་གྱི་ཕྱག་རྒྱའོ། །རྡོ་རྗེ་བཅིང་བ་ལས་གུང་མོ་བསྒྲེང་བའི་ཚིགས་གསུམ་པར་མཛུབ་མོ་གཉིས་ནས་གང་ཙམ་གྱིས་མ་རེག་པར་རྡོ་རྗེའི་ཚུལ་དུ་གཞག་པ་ནི་མཱ་མ་ཀཱིའི་འོ། །ལག་པ་གཉིས་ཐལ་མོ་ [241a.7]ཁོང་སྟོང་དུ་བྱས་ཏེ། པདྨ་ཁ་བྱེ་བའི་ཚུལ་དུ་བྱས་པ་ནི་གོས་དཀར་ཅན་གྱིའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་ལ། མཛུབ་མོ་གཉིས་བཀུག་པས་གུང་མོའི་སེན་མོ་མནན་ཏེ།མཐེ་བོ་གཉིས་དབུས་སུ་གཤིབས་ནས་གཞག་པ་ནི་སྒྲོལ་མའི་འོ། །རྡོ་རྗེ་སེམས་མ་ལ་སོགས་ [241b] [241b.1]པའི་ནི་སྔར་བཤད་པའི་རང་གི་ཕྱག་རྒྱ་ཉིད་དོ། །ལག་པ་གཉིས་ཐལ་མོ་སྦྱར་ཏེ། མཛུབ་མོ་གཉིས་གུང་མོའི་ཚིགས་དབུས་མར་གདུ་བུའི་ཚུལ་དུ་བཞག་ལ་མཐེ་བོང་གཉིས་མཛུབ་མོ་གཉིས་ཀྱི་གློའི་རྩ་བར་བཞག་པ་ནི་སྐུལ་བྱེད་མའི་འོ། །རྡོ་རྗེ་བཅིང་བ་བྱས་པ་ལས་མཛུབ་མོ་གཉིས་ [241b.2]མཐེ་བོའི་རྩེ་མོར་བཀུག་སྟེ་སྦྱར་ལ། རིན་པོ་ཆེ་ལྟ་བུར་གཞག་པ་ནི་རིན་ཆེན་སྒྲོན་མའི་འོ། །ལག་པ་གཉིས་ཀྱི་ཐལ་མོ་བརྐྱང་ལ་མཐེ་བོས་རང་རང་གི་མཐེའུ་ཆུང་གི་སེན་མོ་མནན་ནས། སོར་མོ་ལྷག་མ་རྣམས་སོ་སོར་སྦྱར་ཏེ། རྡོ་རྗེ་ལྟ་བུར་གཞག་པ་ནི་ཁྲོ་གཉེར་ཅན་གྱིའོ། །ལག་ [241b.3]པ་གཉིས་སོ་སོར་རྡོ་རྗེ་ཁུ་ཚུར་བཅིངས་ལ་མཛུབ་མོ་དང་མཐེའུ་ཆུང་གཉིས་ལུ་གུ་རྒྱུད་ལྟར་བཅིང་བ་ནི། རྡོ་རྗེ་ལུ་གུ་རྒྱུད་ཀྱིའོ། །རྡོ་རྗེ་ཁུ་ཚུར་གཉིས་བཅིངས་ལ་མཐེ་བོ་དང་མཛུབ་མོ་དང་གུང་མོ་སོ་སོར་ཕན་ཚུན་ཕྱོགས་པར་ནཱ་ག་གེ་སར་གྱི་མེ་ཏོག་ལྟ་བུར་གཞག་པ་ནི་བྱམས་པའི་འོ ། [241b.4]ལག་པ་གཡོན་པ་པང་པར་བཀན་ཏེ་བཞག་ལ། ལག་པ་གཡས་པ་བརྐྱང་ནས་གླང་པོ་ཆེའི་སྣ་ལྟར་བྱས་པ་ནི་སྤོས་ཀྱི་གླང་བོའི་འོ། །གཡོན་པའི་རྡོ་རྗེ་ཁུ་ཚུར་སྤྱི་བོར་བཏེག་ལ། དེའི་འོག་ཏུ་ལག་པ་གཡས་པའི་སོར་མོ་བ་དན་གྱི་ཚུལ་དུ་བསྐྱོད་པ་ནི་ཡེ་ཤེས་ཏོག་གིའོ། །བཟང་ [241b.5]པོའི་འདུག་སྟངས་སུ་འདུག་ལ། ཐལ་མོ་ཁོང་སྟོང་དུ་སྦྱར་ཏེ་སྙིང་གར་གཞག་པ་ནི་བཟང་སྐྱོང་གིའོ། །ལག་པ་གཉིས་བརྐྱང་ལ་སོར་མོ་ཐམས་ཅད་ཀྱིས་ཆུ་རླབས་ལྟར་བྱ་བ་ནི་རྒྱ་མཚོའི་བློ་གྲོས་ཀྱིའོ། །གཡོན་པའི་རྡོ་རྗེ་ཁུ་ཚུར་སྙིང་གར་བཞག་ལ། གཡས་པ་མཆོག་སྦྱིན་དུ་བྱ་བ་ [241b.6]ནི་བློ་གྲོས་མི་ཟད་པའི་འོ། །གཡོན་པའི་རྡོ་རྗེ་ཁུ་ཚུར་པང་པར་བཞག་ལ། ལག་པ་གཡས་པས་རྡོ་རྗེ་ཁུ་ཚུར་བྱས་ནས་མཐེ་བོ་དང་མཛུབ་མོ་གཉིས་ཀྱིས་སེ་གོལ་གཏོགས་པའི་ཚུལ་དུ་བྱེད་པ་ནི་སྤོབས་པ་བརྩེགས་པའི་འོ། །ལག་པ་གཉིས་པདྨ་ཅུང་ཟད་ཁ་བྱེ་བའི་ཚུལ་དུ་བྱས་པ་ནི་མཐུ་ཆེན་ [241b.7]ཐོབ་ཀྱིའོ། །ལག་པ་གཉིས་ཀྱིས་སྡིག་པ་འཐོར་བའི་ཚུལ་དུ་བྱེད་པ་ནི་ངན་སོང་ཐམས་ཅད་སྤོང་བའི་འོ། །ལག་པ་གཉིས་ཐལ་མོ་སྦྱར་བས་བསྣུན་པའི་ཚུལ་དུ་བྱས་པ་ནི་མྱ་ངན་ཐམས་ཅད་ཀྱི་མུན་པ་ངེས་པར་འཇོམས་པའི་བློ་གྲོས་ཀྱིའོ། །ལག་པ་གཉིས་བརྐྱང་ནས་འོད་འཕྲོ་བའི་ཚུལ་ [242a] [242a.1]དུ་བྱེད་པ་ནི་དྲ་བ་ཅན་གྱི་འོད་ཀྱིའོ། །ལག་པ་གཡས་པ་མཆོག་སྦྱིན་པར་བྱས་ལ། གཡོན་པའི་ཁུ་ཚུར་གྱི་མཛུབ་མོ་དང་མཐེ་བོ་ཐད་ཀར་བརྐྱང་བ་ཟླ་བ་ལྟ་བུར་བྱས་པ་ནི་ཟླ་བའི་འོད་ཀྱིའོ། །ལག་པ་གཉིས་བུམ་པའི་ཚུལ་དུ་བྱས་ལ་དབང་བསྐུར་བའི་གནས་སུ་ [242a.2]འཇོག་པ་ནི་འོད་དཔག་ཏུ་མེད་ཀྱིའོ། །གཡོན་པའི་རྡོ་རྗེ་ཁུ་ཚུར་རྐེད་པར་བཞག་ལ་གཡས་པའི་རྡོ་རྗེ་ཁུ་ཚུར་ནམ་མཁའ་ལ་ཡོངས་སུ་བསྐོར་བ་ནི་ནམ་མཁའ་མཛོད་ཀྱིའོ། །ལག་པ་གཡོན་པས་ས་ལ་རེག་པའི་ཚུལ་དུ་བཞག་ལ། གཡས་པའི་རྡོ་རྗེ་ཁུ་ཚུར་གྱི་མཐེ་བོ་དང་། མཛུབ་མོ་སྤྲད་ནས་ [242a.3]ཞུ་བའི་ཚུལ་དུ་འཇོག་པ་ནི་སྒྲིབ་པ་ཐམས་ཅད་རྣམ་པར་སེལ་བའི་འོ། །ལག་པ་གཉིས་ཀྱི་ཁུ་ཚུར་ནང་དུ་བཅངས་ལ། གུང་མོ་གཉིས་གཤིབས་ཏེ་སྲིན་ལག་གཉིས་ཀྱང་དེ་བཞིན་དུ་རྡོ་རྗེ་ཁུ་ཚུར་བཅངས་པ་ལས་བསྒྲེང་ལ། མཛུབ་མོ་གཉིས་གདུ་བུའི་ཚུལ་དུ་བྱས་ནས། མཐེ་བོ་གཉིས་ཀྱི་ [242a.4]མདུན་དུ་བཞག་ལ་ཅུང་ཟད་བཀུག་ནས་ཁའི་ཚུལ་དུ་བྱས་པ་ནི། འཕགས་པ་གཤིན་རྗེ་གཤེད་ཀྱི་ཕྱག་རྒྱའོ། །གཡོན་པའི་ཁུ་ཚུར་སྙིང་གར་བཞག་ལ། ལག་པ་གཡས་པ་ཐལ་ལྕག་གི་ཚུལ་དུ་ཕྱར་བ་ནི་གཞན་གྱིས་མི་ཐུབ་པའི་འོ། །ལག་པ་གཉིས་རྡོ་རྗེ་ཁུ་ཚུར་བཅངས་ལ། མཐེའུ་ [242a.5]ཆུང་གཉིས་ལུ་གུ་རྒྱུད་དུ་མདུད་པ་བྱ་སྟེ། མཛུབ་མོ་གཉིས་གཤིབས་ནས་བཟློག་ལ་སྨིན་མཚམས་སུ་གཞག་པ་ནི་རྟ་མགྲིན་གྱིའོ། །རང་གི་མཐེ་བོས་མཐེའུ་ཆུང་གི་སེན་མོ་མནན་ལ་སོར་མོ་ལྷག་མ་རྣམས་རྡོ་རྗེའི་ཚུལ་དུ་བྱས་ནས་ལག་ངར་གྱི་རྡོ་རྗེ་བཅིངས་པས། མཆན་ཁུང་གི་རྩར་ [242a.6]གཞག་པ་ནི་བདུད་རྩི་ཐབ་སྤྱོར་གྱིའོ། །ལག་པ་གཉིས་བརྐྱང་ལ་མཐེ་བོས་རང་གི་སྲིན་ལག་དང་། མཐེའུ་ཆུང་གི་སེན་མོ་མནན་ནས། ལག་པ་གཡོན་པའི་ནང་དུ་ལག་པ་གཡས་པའི་གུང་མོ་དང་སྲིན་ལག་བཅུག་ལ་སྙིང་གར་བཞག་ནས་ཤུབས་ནས་འདྲེན་པའི་ཚུལ་དུ་དྲངས་ལ། ལག་པ་ [242a.7]གཡས་པ་རལ་གྲིའི་ཚུལ་དུ་གཞག་པ་ནི་འཕགས་པ་མི་གཡོ་བའི་འོ། །རྡོ་རྗེ་ཁུ་ཚུར་གཉིས་ཕན་ཚུན་རྒྱབ་སྤྲད་དེ། མཐེའུ་ཆུང་གཉིས་ལུ་གུ་རྒྱུད་དུ་བཅིངས་ནས་མཛུབ་མོ་གཉིས་བསྒྲེང་བ་ལས་ཞགས་པའི་ཚུལ་དུ་བྱ་བ་ནི་འདོད་པའི་རྒྱལ་པོའི་འོ། །གཡོན་པའི་ཁྲོ་བོའི་མཛུབ་ [242b] [242b.1]མོ་སྙིང་གར་བཞག་ལ། གཡས་པའི་ཁྲོ་བོའི་མཛུབ་མོ་བེེ་ཅོན་གྱི་ཚུལ་དུ་བསྒྲེང་ནས་གཞག་པ་ནི་དབྱུག་སྔོན་ཅན་གྱིའོ། །གཡོན་པའི་རྡོ་རྗེ་ཁུ་ཚུར་སྙིང་གར་བཞག་ལ། གཡས་པའི་རྡོ་རྗེ་ཁུ་ཚུར་བརྡེག་པའི་ཚུལ་དུ་བསྒྲེང་བ་ནི་སྟོབས་པོ་ཆེའི་འོ། །འདོད་པའི་རྒྱལ་པོའི་ཕྱག་རྒྱ་ [242b.2]ཉིད་ལས་མཛུབ་མོ་གཉིས་བསྒྲེང་བ་ནི་གནོད་མཛེས་ཀྱིའོ། །ལག་པ་གཉིས་ཀའི་མཐེའུ་ཆུང་དང་། མཐེ་བོ་གཅིག་ལ་གཅིག་ལུ་གུ་རྒྱུད་དུ་བྱས་ཏེ། སོར་མོ་ལྷག་མ་རྣམས་བ་དན་གསུམ་པའི་ཚུལ་དུ་གྱེན་དུ་བསྒྲེང་ལ། སྟང་སྟབས་དང་བཅས་པའི་ཧཱུཾ་བྱ་བ་ནི་རྡོ་རྗེ་ས་འོག་གི་ [242b.3]སྟེ། དམ་ཚིག་གི་ཕྱག་རྒྱ་རྣམས་སོ། །ཕྱག་རྒྱ་བཞིས་རྒྱས་བཏབ་པའི་བྱ་བ་ནི་རྒྱུད་འདིར་མ་ཐོས་ཏེ། འདི་དག་ཙམ་ཉིད་ཀྱིས་འབྲས་བུ་ཡོངས་སུ་རྫོགས་པར་བཅོམ་ལྡན་འདས་ཀྱིས་ལུང་དང་མན་ངག་གིས་བདག་ཅག་ལ་སོགས་པ་འཇུག་པ་ནི་འབྲས་བུ་དང་འདྲ་བར་མཐོང་སྟེ། མ་ཐོས་ [242b.4]པར་ཡོངས་སུ་བརྟག་པ་དེས་ཅི་ཞིག་བྱ། དེ་ལྟ་ན་ཡང་མགུ་བར་མ་གྱུར་ན། ལྕེ་ལ་ཧཱུཾ་ལས་བྱུང་བའི་རྡོ་རྗེ་བཟང་པོ་རྣམ་པར་བསམས་ལ། རང་གི་སྔགས་ཉིད་ནི་ཆོས་ཀྱི་ཕྱག་རྒྱའོ། །རང་གི་སྙིང་གར་ཨ་ལས་བྱུང་བའི་སྣ་ཚོགས་རྡོ་རྗེ་རྣམ་པར་བསམས་ལ། ཕྱག་རྒྱ་ཆེན་པོ་ལས་རང་ [242b.5]གི་མཚན་མ་མེད་པར་གར་ལས་བྱུང་བ་ནི་ལས་ཀྱི་ཕྱག་རྒྱའོ། །རང་གི་སྙིང་གའི་ཟླ་བ་ལ་ཧཱུཾ་ལས་བྱུང་བའི་རྡོ་རྗེ་རྩེ་ལྔ་པ་བསམས་ལ། སྔར་བཤད་པའི་སྐུ་མདོག་ལ་སོགས་པ་དང་ལྡན་པའི་ཕྱག་རྒྱ་ཆེན་པོ་བསམ་པར་བྱའོ། །ཐལ་མོ་སྦྱར་ལ་སོར་མོའི་རྩེ་མོ་ཕན་ཚུན་བསྣོལ་བ་ནི་ [242b.6]རྡོ་རྗེ་ཐལ་མོའི་འོ། །དེ་བཞིན་དུ་སོར་མོ་རྣམས་ཀྱི་རྩ་བ་ཤིན་ཏུ་བསྡམས་པ་ནི་རྡོ་རྗེ་བསྡམས་པའོ། །མཐེའུ་ཆུང་དང་སྲིན་ལག་གི་བར་དུ་མཐེ་བོ་བཅུག་ལ་མཛུབ་མོ་བཀུག་པས་བསྡམས་པ་ནི་རྡོ་རྗེ་ཁུ་ཚུར་ཞེས་བཤད་དེ་ཕྱག་རྒྱ་བཅིང་བ་ཐམས་ཅད་ལ་སྦྱར་བར་བྱའོ། །དེ་ནས་ [242b.7]སྔར་བཤད་པའི་རིམ་གྱིས་དབང་བསྐུར་བར་གསོལ་བ་བཏབ་པ་སྔོན་དུ་འགྲོ་བས་དཀྱིལ་འཁོར་གྱི་འཁོར་ལོ་མ་ལུས་པ་ཉིད་དབང་བསྐུར་བའི་ཕྱག་རྒྱ་སྔགས་དང་བཅས་པ་དང་གསང་བའི་མཆོད་པ་རྣམས་ཀྱིས་དབང་བསྐུར་བར་བྱའོ། །དེས་ཀྱང་གང་གི་དབང་བསྐུར་བའི་ཅོད་ [243a] [243a.1]པན་གང་ཡིན་པར་གསུངས་པ་དེའི་གཟུགས་སུ་ཡོངས་སུ་གྱུར་པར་བསམ་པར་བྱའོ། །དེ་ལྟར་དབང་བསྐུར་ནས་དར་དཔྱངས་དཔྱང་བ་སྔོན་དུ་འགྲོ་བས་ཐམས་ཅད་ལ་བཛྲ་ཏུ་ཥྱ་ཧོཿཞེས་བྱ་བ་ཉིད་དང་མཉམ་པའི་ཐལ་མོས་མཉེས་པར་བྱའོ། །དེ་ནས་རང་གི་ཕྱག་ [243a.2]རྒྱའི་ཏིང་ངེ་འཛིན་ལ་སྙོམས་པར་ཞུགས་ཤིང་རང་གི་ཐུགས་ཀའི་ཟླ་བ་ལ་བཀོད་པའི་སྔགས་ཀྱི་འོད་ཟེར་རྣམས་ཀྱིས་ཕྱོགས་ཀྱི་ཚོགས་མ་ལུས་པ་སྣང་བར་མཛད་ཅིང་། ལྷའི་འཁོར་ལོ་མ་ལུས་པ་ཕྱོགས་བཅུར་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་སྤྲུལ་པའི་ [243a.3]སྤྲིན་གྱིས་རང་གི་ལས་ལ་བརྩོན་པར་མཛད་དོ། །དེ་ལ་བཅོམ་ལྡན་འདས་དཔལ་འཇམ་པའི་རྡོ་རྗེ་ནི་སེམས་ཅན་ཐམས་ཅད་ལ་ཤེས་རབ་དང་ཡེ་ཤེས་ཀྱི་སྣང་བ་མཛད་དོ། །དཔལ་རྣམ་པར་སྣང་མཛད་ནི་ཏིང་ངེ་འཛིན་ཐམས་ཅད་ཀྱི་སྟོབས་སྡོགས་པར་མཛད་དོ། །མི་བསྐྱོད་པ་ནི་ [243a.4]སེམས་ཀྱི་སྟོབས་མཐའ་ཡས་པ་རྫོགས་པར་བྱེད་པའི་ཏིང་ངེ་འཛིན་གྱི་རྒྱལ་པོ་ཆེན་པོའི་ཤུགས་མཛད་དོ། །རིན་ཆེན་འབྱུང་ལྡན་ནི་རིན་པོ་ཆེ་མངོན་པར་མཐོ་བའི་ཡེ་ཤེས་ཀྱི་རྡོ་རྗེའོ། །འོད་དཔག་ཏུ་མེེད་པ་ནི་རྣམ་པ་ཐམས་ཅད་ཀྱི་མཆོག་ཏུ་རྒྱས་པའི་ཆོས་ཀྱི་མཛོད་དོ། །དོན་ཡོད་ [243a.5]པར་གྲུབ་པ་ནི་ནམ་མཁའ་སྣང་བར་བྱེད་པའི་ཡེ་ཤེས་ཀྱི་རྡོ་རྗེའོ། །སྤྱན་ནི་ཡེ་ཤེས་ཀྱི་སྤྱན་ཀྱིས་སྣང་བར་བྱེད་པའི་རྡོ་རྗེ་འཇོ་ཚུལ་ལོ། །མཱ་མ་ཀཱི་ནི་སྒྱུ་འཕྲུལ་བསྐྱེད་པའི་སྟོབས་ཀྱི་ཡེ་ཤེས་ཟབ་མོ་ཉིད་དོ། །ན་བཟའ་དཀར་མོ་ནི་པདྨའི་གཟུགས་ཀྱི་འཇོ་ཚུལ་དུ་སངས་རྒྱས་ཀྱི་རྒྱལ་ [243a.6]བ་འདྲེན་པའི་ཡེ་ཤེས་ཀྱི་རྡོ་རྗེའོ། །སྒྲོལ་མ་ནི་སེམས་ཅན་ཐམས་ཅད་དབང་དུ་འགྲོ་ཞིང་དགའ་བར་བྱེད་པའི་ཡེ་ཤེས་ཀྱི་རྡོ་རྗེའོ། །རྡོ་རྗེ་སེམས་མ་ལ་སོགས་པ་བཞི་པོ་ནི་མི་བསྐྱོད་པ་ལ་སོགས་པའི་དེ་བཞིན་གཤེགས་པ་རྣམས་རྗེས་སུ་མཉེས་པར་མཛད་དོ། །སྐུལ་བྱེད་མ་ནི་རྒྱལ་བ་ [243a.7]མཐའ་ཡས་པའི་ཡེ་ཤེས་སྐུལ་བར་བྱེད་པའི་སྟོབས་ཀྱིས་རྣམ་པར་རྒྱལ་བའོ། །རིན་ཆེན་སྒྲོལ་མ་ནི་རིན་པོ་ཆེའི་སྤྲིན་གྱི་ཡེ་ཤེས་ཀྱིས་སྣང་བར་བྱེད་པའོ། །ཁྲོ་གཉེར་མ་ནི་འཇིགས་པ་ཐམས་ཅད་འཇིག་པར་བྱེད་པའི་ཡེ་ཤེས་ཀྱི་རྡོ་རྗེའོ། །རྡོ་རྗེ་ལུ་གུ་རྒྱུད་ནི་རྡོ་རྗེ་སྒྲོག་ [243b] [243b.1]འགྲོལ་བའི་ཡེ་ཤེས་སོ། །བྱམས་པ་ནི་བྱམས་པའི་སྟོབས་ཀྱི་ཡེ་ཤེས་ཀྱི་རྣམ་པར་རྒྱལ་བའོ། །འཕགས་པ་འཇམ་དཔལ་ནི་ཉོན་མོངས་པ་སྲ་བ་དང་བྲལ་བའོ། །སྤོས་ཀྱི་གླང་པོ་ནི་མི་ཤེས་པའི་དྲེགས་པ་སེལ་བའོ། །ཡེ་ཤེས་ཏོག་ནི་ཟག་པ་མེད་པའི་ཡེ་ཤེས་ཀྱི་རྒྱལ་ [243b.2]མཚན་བསྒྲེང་བའོ། །བཟང་སྐྱོང་ནི་ཕུན་སུམ་ཚོགས་པ་ཐམས་ཅད་ཀྱིས་དབང་བསྐུར་བའོ། །རྒྱ་མཚོའི་བློ་གྲོས་ནི་མཐའ་ཡས་པའི་ཡེ་ཤེས་ཀྱི་རྒྱ་མཚོར་འདྲེན་པའོ། །བློ་གྲོས་མི་ཟད་པའི་ནི་ཟད་མི་ཤེས་ཤིང་ཚད་མེད་པའི་ཟག་པ་མེད་པའི་ཤེས་རབ་ཐོབ་པའོ། །སྤོབས་ [243b.3]པ་བརྩེགས་པ་ནི་མཐའ་ཡས་ཤིང་སྣ་ཚོགས་པའི་ཆོས་རྣམས་རབ་ཏུ་སྣང་བའོ། །མཐུ་ཆེན་ཐོབ་ནི་མི་སྣང་བའི་སྟོབས་ཆེན་པོ་ཐམས་ཅད་ཐོབ་པའོ། །ངན་སོང་ཐམས་ཅད་སྤོང་བ་ནི་ངན་སོང་གསུམ་པོ་མ་ལུས་པར་རྣམ་པར་སྤྱོང་བའོ།།མྱ་ངན་དང་མུན་པ་ཐམས་ཅད་ངེས་པར་འཇོམས་ [243b.4]པའི་བློ་གྲོས་ནི། མྱ་ངན་དང་སྨྲེ་སྔགས་འདོན་པ་ལ་སོགས་པའི་མུན་པ་མ་ལུས་པར་ངེས་པར་འཇོམས་པའོ། །དྲ་བ་ཅན་གྱི་འོད་ནི་ཉོན་མོངས་པའི་དྲ་བ་མ་ལུས་པར་རྒྱུན་དུ་རབ་ཏུ་འཇིག་པའོ། །ཟླ་བའི་འོད་ནི་མི་ཤེས་པའི་མུན་པ་ཐམས་ཅད་ངེས་པར་འཇིག་པའོ། །འོད་དཔག་ཏུ་མེད་པ་ [243b.5]ནི་དཔག་ཏུ་མེད་པའི་ཡེ་ཤེས་ཀྱི་འོད་ཟེར་སྣང་བའོ། །ནམ་མཁའི་མཛོད་ནི་ཡིད་བཞིན་གྱི་ནོར་བུ་དང་། རིན་པོ་ཆེའི་ཆར་ལ་སོགས་པ་འབེབས་པའོ། །སྒྲིབ་པ་ཐམས་ཅད་རྣམ་པར་སེལ་བ་ནི་སྒྲིབ་པ་རྣམ་པ་ལྔ་སེལ་བའོ། །འདི་དག་ཀྱང་ཐོག་མ་ཉིད་དུ་བྱུང་ཞིང་གདོད་མ་ [243b.6]ནས་དག་པ་ངོ་བོ་ཉིད་དམ། ཡི་གེ་མེད་པའི་ཆོས་ཐུགས་སུ་ཆུད་པར་མཛད་པའོ། །འཕགས་པ་གཤིན་རྗེ་ནི་གཤེད་བྱེད་ཐམས་ཅད་སློང་བར་བྱེད་པའི་ཡེ་ཤེས་ཀྱི་རྡོ་རྗེ་གཤིན་རྗེ་གསོད་པའི་འདུལ་བ་ལ་འཇུག་པར་མཛད་པའོ། །གཞན་གྱིས་མི་ཐུབ་པ་ནི་གཞན་གྱིས་མི་ཐུབ་པའི་ [243b.7]ཡེ་ཤེས་ཀྱི་རྡོ་རྗེའོ། །རྟ་མགྲིན་ནི་རྟ་མཆོག་གི་རྡོ་རྗེ་དྲག་པོ་རྩལ་ལོ། །བདུད་རྩི་ཐབ་སྦྱོར་ནི་བགེགས་ཐམས་ཅད་འཇིག་པའི་རྣམ་པར་རྒྱལ་བའི་རྡོ་རྗེའོ། །འཕགས་པ་མི་གཡོ་བ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་སུ་ཆུད་པའི་མི་གཡོ་བའི་ཡེ་ཤེས་ཀྱིས་རྣམ་པར་རོལ་ [244a] [244a.1]པའོ། །འདོད་པའི་རྒྱལ་པོ་ནི་སྙིང་ཐམས་ཅད་འགུགས་པའི་རྣམ་པར་རྒྱལ་བའི་ཡེ་ཤེས་སོ། །དབྱུག་སྔོན་ཅན་ནི་ཅུང་ཟད་རྡེག་པའི་ཡེ་ཤེས་ཀྱི་རྣམ་པར་རྒྱལ་བའོ། །སྟོབས་པོ་ཆེ་ནི་འཆོལ་བའི་ཡེ་ཤེས་ཀྱི་སྟོབས་ཀྱིས་རྣམ་པར་རྒྱལ་བའོ། །རྡོ་རྗེ་ཧཱུཾ་མཛད་ནི་ [244a.2]ཁམས་གསུམ་མ་ལུས་པ་འདུལ་བའོ། །རྡོ་རྗེ་ས་འོག་ནི་ལྷ་མ་ཡིན་དང་། བདུད་ཐམས་ཅད་ངེས་པར་བསྲེག་པ་ལ་བསམ་པར་བྱའོ། །དེ་ལྟར་དཀྱིལ་འཁོར་ཀྱི་འཁོར་ལོ་རྣམས་རང་རང་གི་ལས་རྣམས་མཛད་ཅིང་བདག་ཉིད་ཀྱང་དེ་དང་ཐ་མི་དད་པར་ཤེས་རབ་དང་ཡེ་ཤེས་ཀྱིས་སྣང་བ་ [244a.3]འཇམ་པའི་རྡོ་རྗེ་འབྱུང་བའི་དཀྱིལ་འཁོར་ཆེན་པོའི་དབུས་ན་གནས་པར་རྣམ་པར་བསྒོམས་ལ། རང་གི་ཏིང་ངེ་འཛིན་ལས་བྱུང་བའི་གཟུགས་དང་སྒྲ་ལ་སོགས་པ་ནམ་མཁའི་ཁོངས་ཐམས་ཅད་ཁྱབ་པའི་གསང་བའི་མཆོད་པ་རྣམས་ཀྱིས་ཡང་དག་པར་མཆོད་ལ། སྒེག་མོ་ལ་ [244a.4]སོགས་པས་ཀྱང་མཆོད་པར་བྱ་སྟེ། ཡི་གེ་ཧཱུཾ་གིས་གླུ་ལེན་ཅིང་གར་བྱེད་པ་སྔོན་དུ་འགྲོ་བས་རྡོ་རྗེ་ཁུ་ཚུར་གཉིས་རྐེད་པའི་ཕྱོགས་ཀྱི་གཡས་དང་གཡོན་དུ་བཞག་ལ། འགྱིང་བག་དང་བཅས་པར་གཡོན་པའི་བརླ་ཅུང་ཟད་ཕབ་ནས་གནས་པ་ནི་རྡོ་རྗེ་སྒེག་མོའོ། །དེ་བཞིན་དུ་ཕྲེང་བ་ [244a.5]བཅིང་བ་ནི་ཕྲེང་བ་མའོ། །གཡོན་པའི་རྡོ་རྗེ་ཁུ་ཚུར་གྱི་མཛུབ་མོ་བསྒྲེང་བའི་ཡུ་བ་ལ་གཡས་པའི་མཛུབ་མོས་གར་བྱེད་པའི་རྣམ་པ་དང་། སྒེག་པས་ལུས་ཅུང་ཟད་བསྒུལ་ཞིང་པི་ཝང་བརྡུང་བ་ནི་གླུ་མའོ། །ལག་པ་གཉིས་བསྒོར་ཏེ་བཀྲོལ་ལ་རྩིབ་ལོགས་གཉིས་སུ་བསྐོར་ལ་སྒེག་ [244a.6]པའི་ཉམས་ཀྱིས་རྒྱས་པ་ཉིད་དང་། སྤྱི་བོར་བཞག་སྟེ་གར་བྱེད་པའི་ཚུལ་ནི་གར་མའོ། །དེ་བཞིན་དུ་གར་སྔོན་དུ་འགྲོ་བས་རྡོ་རྗེ་ཐལ་མོ་སྤྱི་བོར་བཞག་སྟེ། སྙིང་གར་ཕབ་ནས་མེ་ཏོག་འབུལ་བ་ལྟར་བྱེད་པ་ནི་མེ་ཏོག་མའོ། །དེ་བཞིན་དུ་རྡོ་རྗེ་ཁུ་ཚུར་ཕན་ཚུན་རྒྱབ་སྤྲད་ལ་གུང་མོ་བསྒྲེང་ [244a.7]སྟེ། བདུག་སྤོས་འབུལ་བ་ལྟར་བྱེད་ཅིང་ལག་པ་བསྐོར་བ་ནི་བདུག་པ་མའོ། །དེ་བཞིན་དུ་རྡོ་རྗེ་བསྡམས་པ་ལས་བྱུང་བའི་མཐེ་བོ་གཉིས་བསྒྲེང་ལ། མར་མེ་འབུལ་བ་ལྟར་བྱེད་ཅིང་ལག་པ་བསྐོར་བ་ནི་མར་མེ་མའོ། །རྡོ་རྗེ་བསྡམས་པ་ནང་དུ་བཅིངས་ལ། མཐེ་བོ་ཟླུམ་པོར་བྱས་ [244b] [244b.1]ནས་མཛུབ་མོ་བརྐྱང་སྟེ། རྩེ་མོ་སྦྱར་ལ་ཡོངས་སུ་བསྐོར་ཏེ། མཆོད་ཡོན་འབུལ་བ་ལྟར་བྱས་ལ། གར་འགྲོ་སྔོན་དུ་འགོ་བས་ལག་པ་གཉིས་ཀྱིས་བྱུག་པ་ལྟར་བྱེད་པ་ནི་བྱུག་པ་མའོ། །འདི་དག་ཀྱང་རང་གི་ཕྱག་རྒྱ་བཅིང་བ་ལས་བྱུང་བའི་སྒེག་མོ་ལ་སོགས་པའི་ལྷ་མོ་རྣམས་འགྱིང་ [244b.2]བག་དང་བཅས་ཤིང་། རྣམ་པར་སྒེག་པའི་ལག་པ་མཆོག་གིས་གར་བྱེད་པས་ནམ་མཁའི་ངོས་མ་ལུས་པར་ཁྱབ་པ། ཆོས་ཐམས་ཅད་སྒྱུ་མ་ལྟ་བུར་རྟོགས་པ་རེ་ཞིག་རང་གི་གཟུགས་དཔག་ཏུ་མེད་པས་མཆོད་པའི་སྤྲིན་གྱི་དྲ་བ་སྣ་ཚོགས་རྣམ་པར་སྤྲུལ་པས་བདག་ཉིད་དང་། དཀྱིལ་ [244b.3]འཁོར་གྱི་འཁོར་ལོ་མཆོད་པ་བྱེད་པར་རྣམ་པར་བརྟག་པར་བྱའོ། །ཨོཾ་བཛྲ་ལཱ་སྱེ། ཨོཾ་བཛྲ་མཱ་ལེ། ཨོཾ་བཛྲ་གཱི་ཏི། ཨོཾ་བཛྲ་ནྲི་ཏྱེ། ཨོཾ་བཛྲ་པུཥྤེ། ཨོཾ་བཛྲ་དྷཱུ་པེ། ཨོཾ་བཛྲ་ཨཱ་ལོ་ཀེ །ཨོཾ་བཛྲ་གནྦྷེ་ཞེས་བྱ་བ་ནི་རིམ་པ་ཇི་ལྟ་བ་བཞིན་དུ་སྒེག་མོ་ལ་སོགས་པའི་སྔགས་ཡིན་ཏེ། ཧཱུཾ་གི་མཐའ་ [244b.4]ཅན་ནོ། །དེ་ནས་སརྦ་ཏ་ཐཱ་ག་ཏ་པཱུ་ཛ་ཡ་ཧཱུཾ་ཞེས་རེ་རེ་ཞིང་བརྗོད་ལ་རྫ་རྔ་བརྡུང་བའི་ཚུལ་དུ་ལག་པས་བྱའོ། །དེ་བཞིན་དུ་ཟངས་དུང་ལ་སོགས་པའི་རོལ་མོའི་ཚུལ་དང་། གླིང་བུ་དང་དུང་འབུད་པའི་ཚུལ་གྱིས་སྦྱར་བར་བྱའོ། །རྔ་ཡབ་ལྟར་ལག་པ་གཉིས་བྱ་བ་ནི་རྔ་ཡབ་བོ། །ཉི་མ་ལ་འཛིན་ [244b.5]པའི་ཚུལ་དུ་བྱ་བ་ནི་ཉི་མ་འཛིན་པའོ། །བསིལ་ཡབ་ཀྱི་ཚུལ་གྱིས་ལག་པ་བསྐྱོད་པ་ནི་བསིལ་ཡབ་བོ། །ལག་པ་གཉིས་བརྐྱང་ལ་སྲིན་ལག་གཉིས་བ་དན་གསུམ་པའི་ཚུལ་དུ་བྱ་བ་ནི་རྒྱལ་མཚན་ནོ། །ལག་པ་གཉིས་གྱེན་དུ་བརྐྱང་ལ་རླུང་གིས་བཏེག་པ་ལྟར་ཀུན་དུ་བསྐོར་ལ་འོག་ཏུ་ཕབ་ [244b.6]པ་ནི་བ་དན་ནོ། །གཡོན་པའི་རྡོ་རྗེ་ཁུ་ཚུར་རིན་པོ་ཆེའི་ཕྱེ་མ་འགྱེད་པའི་ཚུལ་དུ་བྱ་བ་ནི་ཚོན་གྱི་ཕྲེང་བ་འགྱེད་པའོ། །ལག་པ་གཡོན་པ་སྣོད་ཀྱི་ཚུལ་དུ་བཞག་ལ། གཡས་པས་ལྷ་བཤོས་འབུལ་བའོ། །རྡོ་རྗེ་ཐལ་མོ་བརྐྱང་པས་ནི་ན་བཟའ་དབུལ་བའོ། །རྡོ་རྗེ་ཁུ་ཚུར་གཉིས་ཀྱིས་ན་ [244b.7]བཟའ་བསྐོན་པའི་ཚུལ་དུ་བྱའོ། །ལག་ངར་གཡས་པས་ཟུར་བཞིའི་ཚུལ་དུ་འཇམ་པ་ལྟར་བྱ་བ་ནི་ཁང་པ་བརྩེགས་མའོ། །མཁྲིག་མའི་གོང་དུ་གདུ་བུ་བཅིང་བ་ལྟར་བྱ་བ་ནི་གདུ་བུའོ། །བྲང་དུ་དོ་ཤལ་འདོགས་པ་ལྟར་བྱ་བ་ནི་དོ་ཤལ་ལོ། །དེ་བཞིན་དུ་ཞབས་ལ་ཞབས་གདུབ་ [245a] [245a.1]དང་། སྙན་ལ་སྙན་ཆ་དང་། མགུལ་དུ་མགུར་ཆུ་དང་། དཔུང་མགོར་དཔུང་རྒྱན་དང་། སོར་བཞི་དོར་བར་སྲུང་སྐུད་དང་། འོག་པག་ཏུ་སྐུ་རེགས་དང་། གཡོན་པ་དེ་བཞིན་གཤེགས་པའི་ཁུ་ཚུར་དུ་བྱས་པའི་སྟེང་དུ་ལག་པ་གཡས་པ་ཁ་སྦུབ་སྟེ་བརྒྱད་ [245a.2]བ་ནི་གདུགས་སོ། །ལག་པ་གཡོན་པ་པང་བར་བསམ་གཏན་གྱི་ཚུལ་དུ་བཞག་ལ། ལག་པ་གཡས་པ་ཁ་སྦུབ་སྟེ་ནམ་མཁའ་ལ་བསྐོར་བ་ནི་བླ་རེའོ། །མཚམས་སུ་དྲ་བ་དང་། དྲ་བ་ཕྱེད་པ་དང་། དྲིལ་བུ་གཡེར་ཀའི་དྲ་བས་བརྒྱན་པ་དབུལ་བར་བྱའོ། །དེ་ནས་སྤྱི་བོར་ [245a.3]ཐལ་མོ་ཁོང་སྟོང་དུ་བཞག་ལ། ཡི་གེ་ཨོཾ་ལས་བྱུང་བའི་གཟིམས་མལ་དང་། གདན་ཁྲི་དང་ཁྱམས་དང་། སྐྱེད་མོས་ཚལ་དང་། གླང་པོ་དང་རྟ་ལ་སོགས་པ་དང་། རིན་པོ་ཆེ་དང་། དཔག་བསམ་གྱི་ཤིང་ལ་སོགས་པས་ནམ་མཁའི་ཁམས་ཁྱབ་པ་དང་མཉམ་པས་བདག་ཉིད་ [245a.4]དང་དཀྱིལ་འཁོར་གྱི་འཁོར་ལོ་མཆོད་པར་བསམས་ལ། ལག་པ་གཡོན་དང་གཡས་ཀྱིས་རིམ་བཞིན་དུ་དྲིལ་བུ་དང་། རྡོ་རྗེ་ཨཱཿཧཱུཾ་ཞེས་བྱ་བའི་ས་བོན་གཉིས་ཀྱིས་བླངས་ནས་འདི་བརྗོད་ཅིང་དཀྲོལ་བར་བྱའོ། །ཨོཾ་བཛྲ་གྷཎྚེ་ར་ཎི་ཏ། པྲ་ར་ཎི་ཏ། སརྦྦ་བུདྡྷ་ཀྵེ་ཏྲ་པྲ་ཙ་ལི་ནེེ། པྲཛྙཱ་པཱ་ [245a.5]ར་མི་ཏཱ་ནཱ་ད་སྭ་བྷཱ་བེེ། བཛྲ་དྷརྨ་ཧྲྀ་ད་ཡ། སནྟོ་ཥ་ཎི་ཧཱུཾ་ཧཱུཾ་ཧཱུཾ། དེ་ནས་དེ་བཞིན་དུ་རྡོ་རྗེ་དང་དྲིལ་བུ་འཆང་ཞིང་བསྟོད་པར་བྱའོ། །བདེ་བ་ལས་འཁྲུངས་རྡོ་རྗེ་འཆང་བ་ཡི། །དངོས་དང་དངོས་མིན་འབྱུང་གནས་ཆེན་པོར་མཁྱེན། །གང་དུ་དང་པོ་རྣམ་པར་སྣང་མཛད་ནི། །དག་ [245a.6]ཅིང་དྲི་མེད་བློས་ནི་ཨོཾ་དུ་སྤྲུལ། །གཟུགས་མང་ཚུལ་གྱི་ཕྲེང་བས་བསྐོར་བ་ཡི། །སྒྱུ་འཕྲུལ་དྲ་བ་ཁྱོད་ལ་ཕྱག་འཚལ་ལོ། །གསུང་སྙན་ཡི་གེ་ཀུན་ལ་ཁྱབ་པ་ཡིས། །སྤྲོས་མེད་གསུང་དུ་འཇིག་རྟེན་དབང་ཕྱུག་བཞུགས། །མིག་གསུམ་ལྷ་མོ་དང་བཅས་འདུལ་ [245a.7]མཛད་པ། །རྫུ་འཕྲུལ་ཚུལ་མང་ལྡན་པ་འགའ་མ་མཆིས། །གང་དུ་བདེ་ཆེན་རང་བཞིན་རྗེས་ཆགས་པ། །ལྷ་མོ་དག་དང་ལྷན་ཅིག་བཞད་ཅིང་བཞུགས། །གཡས་པའི་ཕྱག་གིས་རྡོ་རྗེ་གསོར་ནས་སུ། །གཡོན་པའི་ཕྱག་གིས་དྲིལ་བུའི་སྒྲ་སྙན་དཀྲོལ། །ལྷ་མོ་མཐའ་དག་ [245b] [245b.1]བཙུན་མོར་གྱུར་པ་ཡི། །དམ་ཚིག་རྣམས་ཀྱིས་བྱ་བ་བྱས་པར་འགྱུར། །གཅིག་གི་ལག་པ་ཀུན་ནས་འཁྱུད་པ་སྟེ། །གཉིས་པ་རྗེས་སུ་ཆགས་ཕྱིར་བདེ་བའི་མཐུ། །གསུམ་པ་མི་བཟོད་མེ་ཏོག་ཕྲེང་བ་མཐོར། །བཞི་པ་བདེ་བ་ཡི་ནི་མདའ་ཡང་འཕེན། །གང་ཞིག་གླུ་འདི་ལེན་པར་བྱེད་ [245b.2]པ་དག །བདེ་བའི་རྡོ་རྗེ་ཅན་དང་མཉམ་པར་འགྱུར། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཡང་དག་མཐའ་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་ [245b.3]འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །སངས་རྒྱས་རོལ་ལ་ཕྱག་འཚལ་འདུད། །སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་ལ་ཕྱག་འཚལ་འདུད། །སངས་རྒྱས་གསུང་ཉིད་ཁྲོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། ། [245b.4]མེད་པ་ལས་བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་འདུད། །ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ [245b.5]ཤེས་སྐུ་ཉིད་ཁྱོད་ལ་འདུད། །དེ་ནས་མཆོད་པ་འདི་དག་ཐམས་ཅད་བྱིན་གྱིས་བརླབ་པར་བྱ་སྟེ། ཨོཾ་ཨ་ནུཏྟ་ར་སརྦྦ་པཱུ་ཛ་མེ་གྷ་ས་མུངྒ་ཏེ་སྤ་ར་ཎ་ཨི་མཾ་ག་ག་ན་ཁཾ་ཧཱུཾ་ཕཊ་སྭཱ་ཧཱ། དེ་ནས་དཀྱིལ་འཁོར་གྱི་ལྷ་རྣམས་ཀྱི་བདག་ཉིད་ཡང་དག་པར་མཆོད་པར་གྱུར་ཅིང་། ཐམས་ཅད་ [245b.6]ཀྱང་སྒྱུ་མ་ལྟ་བུ་དང་། མིག་ཡོར་ཙམ་དུ་ཤེས་པར་བྱས་ལ། ཨོ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨདྨ་ཀོ྅ཧཾ་ཞེས་བརྗོད་དོ། །དེ་བཞིན་དུ་ཕྱག་རྒྱ་ཆེན་པོས་གནས་ལ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད་འདིས་བསྒོམ་པར་བྱའོ། ། [245b.7]ཨོཾ་བཛྲ་ཨཱཏྨ་ཀོ྅ཧཾ། དེ་ནས་རང་བཞིན་དག་པ་སྟེ། སྭ་བྷཱ་ཝ་ཤུདྡྷོ྅ཧཾ་ཞེས་བྱ་བའོ། །དེ་ནས་ཐམས་ཅད་མཉམ་པ་ཉིད་ཀྱིས་ཀྱང་ལྷ་ཐམས་ཅད་ཀྱི་ངོ་བོ་ཉིད་དུ་བྱ་སྟེ། ཨོཾ་སཏྠ་ས་མོ྅ཧཾ་ཞེས་བྱ་བའོ། །དེ་ནས་རང་གི་སྔགས་བརྗོད་ལ་འདི་དག་ཐམས་ཅད་ནི་བདག་ཡིན་ [246a] [246a.1]ནོ་ཞེས་བརྟན་པ་དང་། གཡོ་བའི་དངོས་པོའི་ངོ་བོ་ཉིད་ལུས་དང་ངག་དང་སེམས་དམིགས་ན། ངོ་བོ་ཉིད་ཀྱིས་དམིགས་སུ་མེད། །སྔགས་ཀྱི་ལུས་སུ་སྦྱོར་བ་ལ། །བྱང་ཆུབ་མེད་ཅིང་བསྒོམ་པ་མེད། །ཅེས་བྱ་བ་འདིས། སྟོང་པ་ཉིད་ཀྱི་བདག་ཉིད་ཅན། །ཐབས་ [246a.2]དང་ཤེས་རབ་རོ་གཅིག་པ། །ཟག་པ་མེད་པ་ཟག་མེད་པ། །ཉམས་པ་མེད་པའི་བདེ་བ་ཆེན་པོ་སྒྲུབ་པའི་ཐབས་སྒྱུ་མ་ལྟ་བུའི་མཐའ་ཡས་པའི་ཏིང་ངེ་འཛིན་གྱི་བདེ་བའི་གནས་ནམ་མཁའ་ཁྱབ་པའི་ཏིང་ངེ་འཛིན་ལས་བྱུང་བའི་དམ་ཚིག་ཆེན་པོའི་དེ་ཁོ་ན་ཉིད་ཀྱི་མཆོད་པའི་སྤྲིན་དང་། [246a.3]སྔར་བཤད་པའི་མཆོད་པའི་ཚོགས་དང་། ཀུན་དུ་སྣང་བར་གནས་པའི་ཡུལ་རྣམས་ཀྱིས་ཡང་དག་པར་མཆོད་ཅིང་དཀྱིལ་འཁོར་པ་ཐམས་ཅད་ཀྱང་རང་གི་སྙིང་པོའི་ཏིང་ངེ་འཛིན་ལ་སྙོམས་པར་ཞུགས་ཤིང་དབྱེར་མི་ཕྱེད་ལ་ཐོག་མ་དང་དབུས་དང་ཐ་མ་དང་བྲལ་བས་སངས་རྒྱས་ [246a.4]དང་། བྱང་ཆུབ་སེམས་དཔའ་ལ་སོགས་པའི་འོད་ཀྱི་སྤྲིན་མཐའ་ཡས་པ་རྣམ་པར་འཕྲོ་བས་འགྲོ་བའི་དོན་མཛད་པའི་ཕྱིར་དང་། ནམ་མཁའི་གཏོས་ཐམས་ཅད་ཁྱབ་པ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རྡུལ་ཕྲ་རབ་ལས་བསྒྲུབས་པ། རྟག་པ་དང་ཆད་པ་ལ་ [246a.5]སོགས་པ་དང་བྲལ་བ། སོ་སོ་རང་རང་གིས་རིག་པ་རང་བཞིན་གྱིས་འོད་གསལ་བ། མཆོག་ཏུ་དགའ་བའི་ངོ་བོ་ཉིད་དཔལ་འཇམ་པའི་རྡོ་རྗེར་བདག་ཉིད་བསྒོམ་པར་བྱའོ། །གལ་ཏེ་སྐྱོ་བར་གྱུར་ན་རང་གི་སྙིང་གའི་ཟླ་བ་ལ་སྔགས་ཀྱི་ཕྲེང་བ་མར་མེ་གསལ་བས་ཁང་པའི་ནང་ [246a.6]སྣང་བར་བྱས་པ་ལྟར། ལུས་ཐམས་ཅད་སྣང་བར་བྱེད་པ་བཀོད་ལ། བློ་དང་ལྡན་པས་བཟླས་བརྗོད་བྱའོ། །མྱུར་ཆེས་པ་དང་བུལ་བ་དང་། །མི་གསལ་གུག་སྐྱེད་ཉམས་པ་དང་། །རྟོག་པ་ངན་པ་རྣམ་སྤངས་ནས། །དེ་ནས་གསང་སྔགས་བཟླས་བརྗོད་བྱ། །ཟློས་པ་ན་ [246a.7]ཡང་ལྷ་ཐམས་ཅད་ཀྱི་ཞལ་ནས་སྔགས་ཀྱི་སྒྲ་བྱུང་བར་གྱུར་པར་བསམས་པར་བྱ་སྟེ། དེ་ལྟ་བུས་ནི་ལྷ་ཐམས་ཅད་ཀྱིས་བཟླས་པར་གྱུར་པ་ཡིན་ནོ། །བཟླས་པར་བྱ་བའི་སྔགས་ནི་འདི་ཡིན་ཏེ། ཨོཾ་མུཾ། ཡང་ན་རྒྱུད་གཞན་ལས་གསུངས་པའི་སྔགས། ཨོཾ་བཱཀྱེ་དཾ་ན་མཿ [246b] [246b.1]ཨོཾ་བཛྲ་ཏིཀྵཱ་ཞེས་བྱ་བ་ལ་སོགས་པ་འཕགས་པ་སྒྱུ་འཕྲུལ་དྲ་བའི་རྒྱུད་སྟོང་ཕྲག་བཅུ་དྲུག་པ་ལས་གསུངས་པའམ། བདག་ཅག་གི་རྨི་ལམ་དུ་རྙེད་པ་འདི་བཟླ་བར་བྱ་སྟེ། ཨོཾ་དྷརྨྨ་དྷཱ་ཏུ་ཝཱ་གཱི་ཤྭ་ར་ཧཱུཾ་ཞེས་བྱ་བ་དང་། ཡང་ན་ཨོཾ་ཨ་བཱི་ར་ཧཱུཾ། ཁེ་ཙ་ར་ཞེས་བྱ་བའི་ཡི་གེ་བརྒྱད་པའི་ [246b.2]སྔགས་འདི་ནི་ངན་སོང་ཐམས་ཅད་སྤྱོང་བར་བྱེད་པ། དོན་ཐམས་ཅད་སྒྲུབ་པར་བྱེད་པ། བཅོམ་ལྡན་འདས་འཇམ་དཔལ་རང་ཉིད་སྔགས་ཀྱི་གཟུགས་ཀྱིས་བཞུགས་པ་བཟླ་བར་བྱའོ། །ལྡང་བའི་དུས་སུ་ཡང་བསྟོད་པའི་མཆོད་པ་བྱས་ལ། མཆོད་ཡོན་ཕུལ་བ་སྔོན་དུ་འགྲོ་བས་ཛཿཧཱུཾ་ [246b.3]བཾ་ཧོཿཞེས་བརྗོད་ལ་ཡིད་གཉིས་ཀྱིས་རང་གི་ལུས་ལ་དཀྱིལ་འཁོར་གྱི་འཁོར་ལོ་ནང་དུ་བཅུག་ལ། རྡོ་རྗེ་བསྡམས་པ་ལས། མཐེ་བོ་གཤིབས་པར་མཛུབ་མོའི་རྩེ་མོ་སྦྱར་བའི་རྡོ་རྗེ་རིན་ཆེན་གྱི་ཕྱག་རྒྱ་སྙིང་ག་ལས་བྱུང་བས། ཨོཾ་བཛྲ་རཏྞ་ཨ་བྷི་ཥིཉྩ་ཞེས་བྱ་བ་དང་། དབང་བསྐུར་ [246b.4]བ་ལ་སོར་མོ་གཉིས་ཀྱིས་ཕྲེང་བ་བཅིངས་ཏེ། སརྦྦ་མུ་དྲ་མཻ་དྲྀ་ཌྷི་ཀུ་རུ་བ་ར་ཀ་བ་ཙེ་ན་བཾ་ཞེས་བྱ་བ་དང་། གོ་བགོས་ལ་མཐར་མཉམ་པའི་ཐལ་མོས་མཉེས་པར་བྱའོ། །དེ་ནས་དྲིལ་བུ་དཀྲོལ་ལ། དམ་ཚིག་གསུམ་གྱི་གླུའི་མཆོད་པ་བྱ་སྟེ། ཡི་གེ་བརྒྱ་པས་རང་གིས་ཕྱག་རྒྱ་ཆེན་པོ་ [246b.5]བརྟན་པར་བྱས་ནས། རང་གི་ལྷའི་ང་རྒྱལ་ཉིད་ཀྱིས་སྟན་ལས་འགྱིང་བག་དང་བཅས་པར་ལངས་ལ། དབང་པོ་ཐམས་ཅད་ཀྱི་ཡུལ་དུ་གྱུར་པའི་དངོས་པོ་རྣམས་རང་གི་ལྷག་པའི་ལྷའི་སྤྱོར་བས་རང་གི་མཆོད་པ་ལ་སོགས་པའི་ངོ་བོ་ཉིད་དུ་བསམས་ལ། མཉམ་པར་མ་ [246b.6]བཞག་པའི་རྣལ་འབྱོར་པས་བྱ་བ་མ་ལུས་པར་རྫོགས་པར་བྱའོ། །དེ་ལྟར་ཐུན་མཚམས་དང་པོ་རྫོགས་ནས་བྱ་བ་ཐམས་ཅད་བྱས་ཏེ། ཉི་མ་གུང་ལ་ཡང་ལྷའི་ཁང་པར་ཞུགས་ཏེ། ཅི་བདེ་བར་འདུག་སྟེ། རང་གི་སྔགས་དང་རང་གི་དམ་ཚིག་གི་ཕྱག་རྒྱས་བྱིན་ཀྱིས་བརླབ་པ་ [246b.7]སྔོན་དུ་འགྲོ་བས་རང་གི་ལྷའི་ང་རྒྱལ་བྱས་ལ། རེ་རེའི་རང་གི་སྔགས་བརྗོད་པས་དཀྱིལ་འཁོར་ཀྱི་ལྷའི་འཁོར་ལོ་ཕྱུང་བའམ། སྐད་ཅིག་མར་རྫོགས་པར་བྱས་ལ། ཡང་དག་པར་མཆོད་ཅིང་ལེགས་པར་བསྟོད་ལ། དམ་ཚིག་གསུམ་བླང་བའི་གླུའི་མཆོད་པ་སྔོན་དུ་འགྲོ་བས་ [247a] [247a.1]ང་རྒྱལ་གསུམ་པོ་ཡང་དག་པར་བསྐྱེད་ལ་མཉམ་པར་བཞག་སྟེ་བཟླས་པ་དང་བསྒོམ་པར་བྱའོ། །དེ་ནས་ལངས་ལ་སྔ་མ་བཞིན་དུ་མཉམ་པར་མ་བཞག་པའི་རྣལ་འབྱོར་ལ་སྤྱོད་ཅིང་གནས་པར་བྱའོ། །དེ་ལྟར་ཐུན་གཉིས་རྫོགས་ནས་མཚན་ཕྱེད་ལ་ཇི་ལྟ་བ་ [247a.2]བཞིན་དུ་ཡང་དག་པར་མཆོད་ཅིང་ལེགས་པར་བསྟོད་ལ། བསོད་ནམས་དང་ཡེ་ཤེས་ཀྱི་ཚོགས་ཉེ་བར་བསགས་པ་ཐམས་ཅད་མངོན་པར་འདོད་པའི་དངོས་གྲུབ་ཀྱི་ཕྱིར་ཡོངས་སུ་བསྔོས་ལ། བཟོད་པ་གསོལ་ཏེ་ལག་པ་གཉིས་ཀྱི་སྲིན་ལག་དང་མཐེའུ་ཆུང་དང་མཐེ་བོ་ལུ་ [247a.3]གུ་རྒྱུད་དུ་སྦྲེལ་ལ། གུང་མོ་དང་མཛུབ་མོ་བརྐྱང་བས་ཆན་པའི་ཚུལ་དུ་བྱ་བ་ནི་རྡོ་རྗེའི་ཆན་པ་སྟེ། དེས་བསྲུང་བ་བཤིག་པའི་ཚུལ་དུ་བྱ་བས་གསལ་ལ། རྡོ་རྗེ་སེམས་མའི་ཕྱག་རྒྱ་བཅིངས་པ་གྱེན་དུ་དགྲོལ་བ་དང་།སྙིང་པོ་འདིས་བཅོམ་ལྡན་འདས་གཤེགས་སུ་གསོལ་ [247a.4]ལོ། །ཨོཾ་ཀྲྀ་ཏོ་བ་སརྦྦ་སཏྭཱ་རྠ། །སིདྡྷི་མ་དཏྟཱ་ཡཱ་ནུ་ག །གཙྪ་ཏྭཱཾ་བུདྡྷཱ་བི་ཥ་ཡཾ། །པུ་ན་ར་ག་མ་ན་ཡ་ཙྪ །ཨོཾ་མུཿམུཿདེ་ནས་སྤྲུལ་པ་རང་གི་ལུས་ལ་བཅུག་ལ་སྔ་མ་བཞིན་དུ་རྡོ་རྗེ་རིན་ཆེན་གྱི་དབང་བསྒུར་བ་ལ་སོགས་པ་བྱས་ལ། ཤེས་རབ་དང་སྙིང་རྗེར་ལྡན་པས་སེང་གེའི་ཉལ་ [247a.5]ཐབས་སུ་རབ་ཏུ་བརྟག་པར་བྱའོ། །དེ་ལྟར་ཉིན་རེ་ཞིང་ཐུན་བཞིར་བྱ་སྟེ། ཇི་སྲིད་ཟླ་བའམ་ཟླ་བ་དྲུག་གམ་ལོ་གཅིག་གམ། ཇི་སྲིད་དཀྱིལ་འཁོར་ཐམས་ཅད་མངོན་སུམ་དུ་སྣང་བར་གྱུར་པའམ། ཇི་སྲིད་བྱེ་བ་གཉིས་ཡོངས་སུ་རྫོགས་པར་འགྱུར་བའམ། དུས་ཇི་སྲིད་ཀྱི་ལྷ་རྣམས་ [247a.6]ཀྱིས་རྗེས་སུ་གནང་བར་འགྱུར་བའམ། འགོག་པའི་རྡོ་རྗེ་བསྒོམ་པར་བྱ་སྟེ། དེ་བཞིན་དུ་རྣལ་འབྱོར་བྱས་ལ་རང་གི་སྙིང་གའི་ཟླ་བ་ལ་རང་གི་སྔགས་ཀྱི་ཡི་གེ་རང་གི་སེམས་དང་གཉིས་སུ་མེད་པར་གྱུར་པ། འོད་ཟེར་དཀར་པོ་དཔག་ཏུ་མེད་པ་དང་ལྡན་པར་སྲོག་རྩེ་གཅིག་ཏུ་བསྡུས་ [247a.7]ལ། ཇི་སྲིད་ཡིད་བརྟན་པར་གྱུར་པ་ཙམ་གྱིས་སྒྲ་ལ་སོགས་པ་ཉེ་བར་སོ་སོར་སྣང་བའི་འཛིན་པ་ཉེ་བར་སྤོང་བར་གྱུར་པ་དེ་སྲིད་དུ་བྱའོ། །ཡང་ན་རང་གི་སྙིང་གར་ནམ་མཁའ་དང་མཉམ་པའི་སྤྱོར་བས་ཞུགས་པའམ། མདུན་དུ་གནས་པའི་ཕྱོགས་སུ་དཀྱིལ་འཁོར་གྱི་འཁོར་ལོ་ [247b] [247b.1]སྤྲུལ་ལ། ཐམས་ཅད་གཞུག་ཅིང་དབང་བསྐུར་བ་ལ་སོགས་པའི་ཆོ་ག་རྒྱས་པས་བཅོམ་ལྡན་འདས་འཇམ་པའི་རྡོ་རྗེས་རྫོགས་པར་ཉིན་རེ་ཞིང་ཐུན་བཞིའི་རིམ་པས་ཇི་སྲིད་དེ་ལྟར་སྣང་བར་གྱུར་པའི་བར་དུ་བསྒོམ་མོ། །དེ་ནས་བརྩམས་ཏེ་རྒྱུད་ཐམས་ཅད་དུ་དབང་བསྐུར་བ་དང་། དངོས་ [247b.2]གྲུབ་ཐམས་ཅད་ཀྱི་སྣོད་དུ་རུང་བར་འགྱུར་རོ། །དེ་བཞིན་དུ་རིམ་པ་གཞན་དག་གིས་ཀྱང་བདག་ཉིད་ནུས་པ་དང་ལྡན་པར་རྟོགས་ནས་དཀྱིལ་འཁོར་བྲིས་ལ་ཟླ་བ་ཉ་ལ་བསྒྲུབས་ན་ངེས་པར་དཔལ་འཇམ་པའི་རྡོ་རྗེར་འགྱུར་རོ། །དེ་ལྟ་བུའི་ནུས་པ་དང་ལྡན་ན་རྒྱུད་འདི་དང་རྒྱུད་ [247b.3]གཞན་དག་ལས་གསུངས་པ། བུ་མོ་ལ་སོགས་པའི་སྒྲུབ་པ་ཆེན་པོ་དང་། གནོད་སྦྱིན་མ་ལ་སོགས་པའི་སྒྲུབ་པ་ཡང་བཅོམ་ལྡན་འདས་ཀྱིས་རྗེས་སུ་གནང་བ་ཡིན་ནོ། །དེ་ལྟ་བུའི་ང་རྒྱལ་བརྟན་པར་གྱུར་པ་ཉིད་དམ། རྒྱུན་མི་འཆད་པར་སློབ་པ་ལ་འཇུག་པའི་ལས་དང་པོ་པ་རྣམས་ལ་ [247b.4]ཡང་མཆོད་རྟེན་གྱི་ལས་རྣམས་དང་ཕྱག་བྱ་བ་ལ་སོགས་པ་བཅོམ་ལྡན་འདས་ཀྱིས་དགག་པ་མཛད་པ་ནི་ཐམས་ཅད་ལས་མཆོག་ཏུ་གྱུར་པའི་ཕྱིར་རྣལ་འབྱོར་འདི་ལས་ལྷག་པའི་ནན་ཏན་ཉམས་སུ་ལེན་པ་མེད་པའི་ཕྱིར་རོ། །གང་ཡང་ཐལ་མལ་པའི་རྣམ་པར་རྟོག་པ་ལ་གནས་པ་དེས་ནི་ [247b.5]མཆོད་རྟེན་ཀྱི་ལས་དང་བྱ་བ་ལ་སོགས་པ་བསོད་ནམས་སུ་བྱ་བའི་དངོས་པོའི་ཐ་སྙད་དུ་བྱ་བ་ཐམས་ཅད་ཉམས་སུ་བླང་བར་བྱ་བ་ཉིད་ཡིན་ཏེ། འདི་ལ་མ་ཞུ་བ་ཟ་བ་ལྟ་བུར་གང་རང་ཉིད་ཐ་མལ་པའི་རྣམ་པར་རྟོག་པ་ལ་གནས་བཞིན་དུ་སྔར་བཤད་པ་མི་བྱེད་པ་ནི་མི་རིགས་སོ། །མཉམ་ [247b.6]པར་གཞག་པ་ལ་གནས་པ་ན་ཡང་མཆོད་པ་དང་། མཆོད་པར་བྱ་བ་དང་། མཆོད་པ་བྱེད་པ་ལ་སོགས་པའི་ཐ་སྙད་ཀྱི་དབྱེ་བའི་རྣམ་པར་རྟོག་པ་ལས་རྣམ་པར་གྲོལ་བ་ལ་རང་གི་ལྷའི་སྦྱོར་བས་བཅོམ་ལྡན་འདས་ཀྱིས་གནང་བ་ཉིད་ཡིན་ཏེ། ཇི་སྐད་དུ། རང་གི་ལྷ་ཡི་སྦྱོར་བ་ཡིས། ། [247b.7]བདག་དང་གཞན་ལ་མཆོད་པར་བྱ། །ཞེས་གསུངས་སོ། །གཞན་དུ་ཇི་ལྟར་ན་ཤིན་ཏུ་བྱང་བར་བསླབས་པ་མེད་པར་ཟབ་ཅིང་རྒྱ་ཆེན་པོའི་བདག་ཉིད་ཀྱི་དངོས་པོ་རྫོགས་པར་འགྱུར་བ་དེ་བས་ན་དེ་དང་ཐ་དད་པ་ནི་སྤང་བར་བྱ་སྟེ། ཕྱག་བྱ་བའི་གནས་ལ་སོགས་པའི་རྟོག་པ་ [248a] [248a.1]དེ་ཉིད་ཐ་མལ་པའི་ཀུན་དུ་རྟོག་པ་ཡིན་པས། རང་རང་གི་དངོས་པོར་ཡོངས་སུ་རྟོག་པ་ཇི་ལྟར་སྤོང་བར་འགྱུར། བདག་ཉིད་ལ་བདག་ཉིད་མཆོད་པ་ནི་བཅོམ་ལྡན་འདས་ཀྱིས་རིགས་པར་གསུངས་ཏེ། འདི་ནི་རྣལ་འབྱོར་པ་དེ་ལས་སོ་སོའི་སྦྱོར་བས་རང་གི་ལྷའི་རྣམ་ [248a.2]པར་ཐར་པའི་སྒོ་མངོན་སུམ་དུ་བྱ་བ་ཉིད་སྐྱེ་བར་འགྱུར་གྱི། ཟབ་ཅིང་རྒྱ་ཆེན་པོའི་བདག་ཉིད་དངོས་པོ་རྫོགས་པའི་རྒྱུ་ཉིད་དུ་མཆོད་རྟེན་ཀྱི་ལས་དང་ཕྱག་བྱ་བ་ལ་སོགས་པ་དེ་ག་ལ་འགྱུར། གཞན་དུ་ན་གལ་ཏེ་བླ་མ་རྣམས་ལ་བསྙེན་བཀུར་མ་བྱས་པས་ཐོས་པ་མེད་ཅིང་ཤེས་རབ་མ་ [248a.3]སྦྱངས་པ་དེ་ཉིད་ནི་མངོན་པའི་ང་རྒྱལ་གྱིས་མཆོད་རྟེན་གྱི་ལས་ལ་སོགས་པ་མི་བྱེད་པ་ནི་ངན་འགྲོར་འགྲོ་བའི་རྒྱུ་ཡིན་ནོ། །ཤིན་ཏུ་སྤྲོས་པས་ཆོག་གོ། །གང་ཞིག་དམ་ཚིག་ཙམ་འདོད་པའི་ཕྱིར། དཀྱིལ་འཁོར་འདྲི་བར་འདོད་ན། དེས་བསྒོམས་པས་དགེ་བའི་མཚན་མ་ཅུང་ཟད་ཅིག་ [248a.4]རྙེད་པའམ། བསྒོམ་པ་མི་ནུས་པས་དཀྱིལ་འཁོར་པའི་ལྷ་རྣམས་ཀྱི་རེ་རེ་ཞིང་འབུམ་ཕྲག་གཅིག་གམ། ཡང་ན་དཔལ་འཇམ་པའི་རྡོ་རྗེའི་འབུམ་ཕྲག་གསུམ་གཞན་དག་གི་བཟླས་བརྗོད་ཁྲི་བྱས་ལ་བྲི་བར་བྱའོ། །ཏིང་ངེ་འཛིན་གསུམ་བསྒོམ་པ་ནི་འདིར་ཐོས་པ་མེད་དེ་རྒྱུད་གཞན་ལས་མཐོང་ [248a.5]བ་ལས་ལྟོས་མེད་དུ་བྱ་བ་ནི་ཧ་ཅང་ཐལ་ཆེས་སོ། །ཡང་ན་དོན་གྱི་བསྒོམ་པའི་རྗེས་སུ་འབྲངས་ནས་ཇི་ལྟར་འདོད་པའི་མིང་དུ་བྱ་བ་ལ་ཉེས་པ་མེད་དོ། །ཉིན་རེ་ཞིང་ཡང་ལྷའི་ཁང་པའི་ཕྱི་རོལ་དུ་དཔུང་བཟངས་ཀྱི་རྒྱུད་ལས་གསུངས་པའི་ཚིགས་སུ་བཅད་པ་རྣམས་ཀྱིས་འབྱོར་པ་དང་། རྗེས་སུ་ [248a.6]མཐུན་པའི་གཏོར་མ་མཚན་མོ་སྦྱིན་པར་བྱའོ། །དེ་ལྟར་མཁས་ཤིང་བྱང་བའི་སྔོན་དུ་བསྙེན་པ་འདི་བཤད་པའི། །བསོད་ནམས་འདིས་ནི་འགྲོ་ལ་ཕན་པའི་དངོས་གྲུབ་འབྱུང་གྱུར་ཅིང་། །བདག་ཀྱང་ཇི་སྲིད་ནམ་མཁའི་ཁམས་ཀྱི་མཐར་ཐུག་སྲིད་གསུམ་ལ། །ཕན་པ་མཛད་པ་འཇམ་ [248a.7]པའི་དབྱངས་དང་སྐུ་གཅིག་ཉིད་གྱུར་ཅིག །སྔོན་དུ་བསྙེན་པའི་ཆོ་གའོ། །རྣམ་པར་རྟོག་སྤངས་ཟབ་ཅིང་རྒྱ་ཆེ་ལ། །སྣ་ཚོགས་སྤྲུལ་པས་འགྲོ་བའི་དོན་མཛད་ཅིང་། །རྣམ་དག་རིག་དང་གཉིས་མེད་སྐུ་འཆང་བ། །འདོད་ལྷ་འཇམ་པའི་དབྱངས་ལ་ཕྱག་འཚལ་ལོ། །དེ་ལྟར་སྔོན་དུ་བསྙེན་ [248b] [248b.1]པ་བྱས་ནས་དཀྱིལ་འཁོར་གྱི་ཡོ་བྱད་ཡང་དག་པར་བསགས་ནས། ཚེས་གྲངས་དང་གཟའ་རྒྱུ་སྐར་དང་། བྱེད་པ་ལ་སོགས་པ་ཤིས་པ་ལ་སྔ་དྲོའི་དུས་སུ་གྲོགས་བཟང་པོ་དང་། དཀྱིལ་འཁོར་གྱི་ས་གཞི་ཡོངས་སུ་བརྟག་པར་བྱ་སྟེ། གཙུག་ལག་ཁང་དང་། ཀུན་དགའ་ [248b.2]ར་བ་དང་། གྲོང་ངམ། གྲོང་ཁྱེར་གྱི་ཤར་རམ། བྱང་གི་ཕྱོགས་ཀྱི་ཆ་མདོར་ན་ས་གཞི་བཟང་ཞིང་སྣུམ་པ། ཟུག་རྔུའི་ཉེས་པ་དང་བྲལ་བ། ཤར་རམ་བྱང་དུ་གཞོལ་བ། མེ་ཏོག་གི་ཤིང་ལ་སོགས་པ་དང་ལྡན་པ། ཉམས་དགའ་བའམ། ཡང་ན་ཡིད་མངོན་པར་དགའ་བ་ [248b.3]གང་ཡང་རུང་བ་དེར་བརྩམ་པར་བྱའོ། །དེ་ནས་བདག་པོའི་སྦྱོར་བ་བྱས་ལ། གནས་ཀྱི་བདག་པོ་ལ་སོགས་པ་ལ་གཏོར་མ་དང་མཆོད་པ་བྱས་ནས་ས་བླང་བར་བྱའོ། །གལ་ཏེ་རྨི་ལམ་ལ་སོགས་པས་དེ་ཐོབ་པར་མ་གྱུར་ན། དེའི་ཚེ་ཉིན་ཞག་གཞན་གྱི་ཉི་མའི་གུང་ལ་དཀྱིལ་ [248b.4]འཁོར་གྱི་སའི་དབུས་སུ་ཁྲོ་བོའི་ང་རྒྱལ་དང་ལྡན་པས་དུག་དང་ཁྲག་དང་། ལན་ཚྭ་བ་ལ་སོགས་པ་དང་། རུས་པའི་ཕྱེ་མ་དང་། ཕཊ་གྱི་མཐའ་དང་ལྡན་པས་མངོན་སྤྱོད་ཀྱི་སྦྱིན་སྲེག་གི་ཆོ་གས་གཡོན་པའི་མཛུབ་མོ་དང་མཐེ་བོ་སྦྱར་བ་དང་། དཀྱིལ་འཁོར་གྱི་བགེགས་ཉེ་བར་གཞོམ་ [248b.5]པའི་ཕྱིར་སྦྱིན་སྲེག་བྱས་ལ་ཕྱི་དྲོའི་དུས་སུ་ཁྲུས་བྱ་ཞིང་ལུས་དྲི་ཞིམ་པོས་བྱུགས་ལ་ཞི་བའི་སྦྱིན་སྲེག་དེའི་ཆོ་གས་བྱས་ལ། བདུད་རྩི་ཐབ་སྦྱོར་གྱིས་བགེགས་བསྐྲད་དེ་གནས་བསྲུང་བ་བྱས་ལ། དེ་ཡང་དེ་ཉིད་ཀྱིས་ཡུངས་ཀར་དང་ཆུ་ལ་སོགས་པ་ལ་ལན་བདུན་བཟླས་པས་ [248b.6]མངོན་པར་གཏོར་ཏེ། སའི་ཆ་དེ་པུས་མོའམ། ལྟེ་བའམ། རྐེད་པ་ཙམ་འོག་ཏུ་དངོས་གྲུབ་མཆོག་དང་བར་མའི་དབྱེ་བས་བརྐོས་ལ། ཕུབ་མ་དང་། རྡོ་བ་དང་། སོལ་བ་དང་། རུས་པ་དང་། གསེག་མ་དང་། གྱོ་མོ་ལ་སོགས་པ་བསལ་ནས་དྲི་བཟང་པོའི་ས་གཞན་དག་པ་ [248b.7]ཆུ་དྲི་ཞིམ་པས་བཀང་ལ། ཡི་གེ་ཧཱུཾ་ཡོངས་སུ་བཟླས་པའི་སྤོས་ཆུས་ཆག་ཆག་བཏབ་སྟེ། འཐས་པར་བརྡུངས་ལ་ལག་པའི་མཐིལ་ལྟར་མཉམ་པར་བྱས་ནས། ཁང་པ་བརྩེག་མའི་ནང་དུ་ཆུད་པར་བྱ་སྟེ། ཕྱོགས་བཞིར་རྟ་བབས་དང་། སྐར་ཁུང་དྲ་བ་ཅན་གྱིས་ཀུན་ [249a] [249a.1]ནས་བསྐོར་ལ། ཤིན་ཏུ་སྣ་ཚོགས་པའི་མེ་ཏོག་གི་ཕྲེང་བ་དྲིལ་བུ་བཏགས་པ་དང་། རྒྱལ་མཚན་དང་བ་དན་གྱི་མཆོག་བྲེས་ནས་ལས་ཐམས་ཅད་པ་བཟླས་པའི་དྲིས་ཉེ་བར་བྱུགས་ཏེ། དེ་ཉིད་བཟླས་པའི་རིན་བོ་ཆེ་དང་། སྨན་དང་འབྲུ་ཐམས་ཅད་བུ་ [249a.2]གའི་དབུས་ཀྱི་ཆར་གཞུག་པར་བྱའོ། །ཟུག་རྔུའི་ཉེས་པ་ཐམས་ཅད་ནི། །གལ་ཏེ་དབྱུང་བར་མི་ནུས་ན། །ལག་པ་བྲམ་ཞིང་གསང་སྔགས་བཟླས། །དེ་ཡི་སྦྱང་བ་དེ་ཡིན་ནོ། །ཁང་སྟེང་དང་རྡོ་ལེབ་དང་། བ་ལང་གི་ལྷས་དང་གཙུག་ལག་ཁང་ལ་སོགས་པ་དང་། ཆུ་འགྲམ་དང་སའི་ [249a.3]ཆ་ཡོངས་སུ་སྦྱངས་ཟིན་པ་རྣམས་སུ་སླར་ཡང་སྦྱང་བ་ལ་སོགས་པ་མི་བྱའོ། །རྣམ་པ་གཞན་དུ་བདུད་རྩི་ཐབ་སྦྱོར་གྱིས་བགེགས་བསྐྲད་ལ་དེ་བཟླས་པའི་ཡུངས་ཀར་དང་། ཆུ་དང་ཐལ་བ་རྣམས་མངོན་པར་གཏོར་ནས། ཤར་ཕྱོགས་ནས་བརྩམས་ཏེ། བའི་རྣམ་ལྔས་ཉེ་བར་ [249a.4]བྱུགས་ལ། དྲིའི་སྤོས་ཆུས་ཀྱང་ཡང་དག་པར་བསང་གཏོར་བྱས་ཏེ། དེ་ཉིད་བཟླས་པའི་རིན་པོ་ཆེ་སྣ་བདུན་དང་། སྨན་དང་འབྲུ་རྣམས་དེར་སའི་དབུས་སུ་གཞུག་པར་བྱ་སྟེ། འདི་གཉི་ག་ནི་ས་སྦྱང་བའི་ཆོ་ག་ཡིན་ནོ། །དེ་ལས་ས་གཞི་དེ་ལྟ་བུར་ཉིན་རེའམ་ཟླ་རེའམ། ལོ་ [249a.5]རེ་དཀྱིལ་འཁོར་བྲི་བར་འདོད་པས་ས་ཡོངས་སུ་གཟུང་བར་བྱ་སྟེ། ཟླ་བ་ཉ་ནས་བརྩམས་ནས་ཕྱི་མའི་ཉའི་བར་དུའམ། ཚེས་གཅིག་ནས་བརྩམས་ནས་ཚེས་བརྒྱད་ཀྱི་བར་དུའམ། ཚེས་དགུ་ལ་སོགས་པ་ནས་བརྩམས་ཏེ། ཟླ་བ་ཉ་ཉིད་དམ་ཐུན་མཚམས་སྔ་མའི་དུས་ནས་བརྩམས་ [249a.6]ཏེ། ཉིན་ཞག་དེ་ཉིད་ལ་དཀྱིལ་འཁོར་གྱི་ལས་ལ་ཤིན་ཏུ་མཁས་པ་དག་གིས་བྱ་སྟེ། ཇི་སྐད་དུ་བཤད་པའི་ཆོ་ག་ཡོངས་སུ་རྫོགས་པས་ཉིན་ཞག་འབྲས་བུ་དང་བཅས་པ་ཡིན་ནོ། །དེ་ལ་ཉིན་ཞག་དང་གཟའ་ལ་གཅིག་ཏུ་མངོན་པར་ཞེན་པ་རྣམས་ཀྱི་ཕྱིར། བཅོམ་ལྡན་འདས་ [249a.7]ཀྱིས་ཉིན་ཞག་གི་ངེས་པར་གསུངས་པ་ཡིན་གྱིས། བློ་རྣམ་པར་དག་པ་རྣམས་ཀྱི་ཕྱིར་ནི་མ་ཡིན་ནོ། །དེ་ལ་སློབ་དཔོན་བདག་ཉིད་འཇམ་པའི་རྡོ་རྗེར་ཇི་ལྟ་བ་བཞིན་དུ་གྱུར་པར་བྱས་ལ། དཀྱིལ་འཁོར་གྱི་སའི་དབུས་ཀྱི་དབུས་མར་འདུག་སྟེ། སྔར་བཤད་པའི་རིམ་པས་བགེགས་ [249b] [249b.1]གཞོམ་པ་དང་། དཀྱིལ་འཁོར་གྱི་འཁོར་ལོ་སྤྲོ་བ་ལ་སོགས་པ་སྔོན་དུ་འགྲོ་བར་བྱས་ལ། རོལ་པའི་སྟང་སྟབས་ཀྱིས་རྡོ་རྗེ་འཛིན་པའི་སྤྲུལ་པའི་སྤྲིན་བཀྱེ་ནས་ཕྱོགས་བཅུར་དེ་བཞིན་གཤེགས་པ་འཁོར་དང་བཅས་པ་ཐམས་ཅད་ལ་ཁྱེད་རྣམས་ཀྱིས་འདིར་བྱིན་གྱིས་ [249b.2]བརླབས་པའི་གནས་མཛད་དེ། སློབ་དཔོན་དང་དེའི་སློབ་མ་རྣམས་ཀྱིས་སྲུང་བར་མཛོད་ཅིག་ཅེས་བསྐུལ་ལ། དེ་ཉེ་བར་བསྡུས་ཏེ་རང་གི་སྙིང་གའི་རྡོ་རྗེའི་ནང་དུ་བསྒོམས་ལ། དེ་ལས་བྱུང་བའི་དཔལ་རྡོ་རྗེ་འཛིན་པ་དང་། གཅིག་ཏུ་བྱས་ལ་བདག་ཉིད་དཔལ་འཇམ་པའི་ [249b.3]རྡོ་རྗེ་དེའི་ང་རྒྱལ་དང་ལྡན་པས་ཡི་གེ་གསུམ་གྱིས་བྱིན་གྱིས་བརླབས་པ་སྔོན་དུ་འགོ་བས་སྐྱིལ་མོ་ཀྲུང་བཤིག་སྟེ་ལངས་ལ། གཡོན་པའི་མིག་ཏུ་ཊ་ལས་ཟླ་བ་བྱ། །གཡས་པར་མ་བཀོད་ཉི་མའི་དཀྱིལ་འཁོར་བསྐྱེད། །ཧཱུཾ་གིས་མིག་འབྲས་བསྐལ་པའི་མེ་ལྟ་བུ། །གནས་ [249b.4]པ་འདིས་ནི་རྡོ་རྗེའི་བལྟ་བ་བྱ། །ལག་པ་གཡས་པས་རྡོ་རྗེ་གསོར་ཏེ། གཡོན་པ་དཀུར་བརྟེན་པས་དྲིལ་བུ་དཀྲོལ་ཞིང་རྐང་པའི་འོག་ཏུ་དབྱངས་ཀྱི་ཡི་གེ་ཐ་མ་བཀོད་པ་ལས་བྱུང་བའི་སྣ་ཚོགས་རྡོ་རྗེ་འབར་བ་དང་། ཁྲོ་བོའི་རྒྱན་དང་བཅས་པའི་ང་རྒྱལ་དང་ལྡན་པས་ཐམས་ཅད་དུ་རྣམ་པར་ [249b.5]བལྟ་ཞིང་བསྐོར་བས་ཡོངས་སུ་སོང་ལ་བསྐྲད་ཅིང་གདུག་པ་ཐམས་ཅད་ལ་འདི་སྐད་ཅེས་བརྗོད་པར་བྱའོ། །སློབ་དཔོན་མིང་འདི་ཞེས་བྱ་བ། སློབ་མ་ཆེ་གེ་མོ་ཞེས་བྱ་བ་རྫོགས་པའི་བྱང་ཆུབ་ཏུ་ཡོངས་སུ་རྫོགས་པར་བྱ་བའི་ཕྱིར་དང་། སེམས་ཅན་ཐམས་ཅད་བླ་ན་མེད་པའི་ཡེ་ [249b.6]ཤེས་ཀྱི་འབྲས་བུ་ཐོབ་པའི་ཕྱིར་ས་ཕྱོགས་འདིར་དཔལ་འཇམ་པའི་རྡོ་རྗེ་འབྱུང་བ་ཞེས་བྱ་བའི་དཀྱིལ་འཁོར་གྱི་རྒྱལ་པོ་འདྲི་ཡིས། ལྷ་དང་། ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། འབྱུང་པོ་དང་། བརྗེད་བྱེད་དང་། མཁའ་འགྲོ་མ་ [249b.7]དང་། གནོན་པོ་དང་། ནམ་མཁའ་ལྡིང་དང་། མིའམ་ཅི་དང་། རིག་སྔགས་གྲུབ་པ་དང་། རྒན་པོ་དང་། །རྒན་མོ་གཡོག་དང་འཁོར་དུ་བཅས་པ་གང་དག་འཁོད་པ་རྣམས་དེངས་ཤིག །དེང་འདི་ལྟར་རྡོ་རྗེ་འཆང་གི་བཀའ་ཐོས་ནས་མྱུར་བ་ཉིད་དུ་དེངས་ཤིག །གང་ [250a] [250a.1]དག་མི་འགྲོ་བ་དེ་དག་ངའི་ཡེ་ཤེས་ཀྱི་རྡོ་རྗེས་མགོ་ཚལ་པ་བརྒྱར་རྣམ་པར་འགས་པར་བྱའོ་ཞེས་ལན་གསུམ་བརྗོད་ལ་ཤིན་ཏུ་འཇིགས་སུ་རུང་བ་ལྟ་བུའི་ཁྲོ་བོའི་གཟུགས་དཔག་ཏུ་མེད་པ་ཕྱུང་སྟེ། དེ་རྣམས་ཉིད་ཀྱིས་གོང་དུ་སྨོས་པ་ཐམས་ཅད་འབྱེར་ [250a.2]བར་བྱས་པར་རྣམ་པར་བསམ་པར་བྱའོ། །དེ་ནས་མཐུན་པའི་རྐང་སྟབས་ཀྱི་གནས་པས་འདུག་ལ། སྤྱི་བོར་ཐལ་མོ་སྦྱར་བར་བྱའོ། །སྔགས་པས་ཤར་ཕྱོགས་ཁ་བལྟས་ནས། །དེ་བཞིན་གཤེགས་རྣམས་ཕྱག་བྱས་ལ། །རྣམ་པར་འགྱུར་ཞིང་སྒེག་མཆོག་བཅས། །རྡོ་རྗེ་ [250a.3]གོམ་པས་གར་བྱའོ། །ཐལ་མོ་སྤྱི་བོ་ནས་ཕབ་སྟེ། །སྙིང་གར་པདྨའི་ཚུལ་གྱིས་ནི། །ཡོངས་བསྐོར་རྡོ་རྗེ་ཁུ་ཚུར་གྱིས། །ཕྱོགས་ནས་ཀུན་དུ་བཅིང་བར་བྱ། །ཁུ་ཚུར་དེ་ནི་གཉིས་བྱས་ལ། །བསྙེམས་པས་གསོར་བར་རབ་བརྩོན་པས། །དབང་ལྡན་ཕྱོགས་ནས་བརྩམས་ [250a.4]ནས་ནི། །ཚམ་ངམ་ཐམས་ཅད་བཅིང་བར་བྱ། །ཞེས་བྱ་བའི་རིམ་པ་འདི་དང་དེ་བཞིན་དུ་ཁྲོ་བོའི་ང་རྒྱལ་བསྒྱིངས་པ་དང་བཅས་ཤིང་བརྗིད་བག་དང་བཅས་པས་གར་སྔོན་དུ་འགྲོ་བའི་གཡས་བརྐྱང་བ་ལ་སོགས་པའི་རྡོ་རྗེ་འགྲོས་ཀྱིས་ཡོངས་སུ་བསྐོར་ལ། གནས་ཇི་ལྟ་བར་ [250a.5]ཧཱུཾ་རྡོ་རྗེ་ཆེ་གེ་མོ་བདག་གོ་ཞེས་བརྗོད་ནས། དཀྱིལ་འཁོར་གྱི་ས་གཞི་གཏན་པ་ལ་ཐུག་གི་བར་དུ་འབར་ཞིང་འབར་བ་ལྟ་བུའི་རྡོ་རྗེ་རྩེ་མོ་གྱེས་པའི་རང་བཞིན་དུ་ས་གཞི་བྱིན་གྱིས་བརླབ་པར་བྱའོ། །གཡས་བརྐྱང་བ་ལ་སོགས་པའི་མཚན་ཉིད་བརྗོད་པར་བྱ་སྟེ། བྱིན་པ་གཡོན་ [250a.6]པ་བཀུག་ལ། གཡས་པ་རྒྱར་མཐོ་ལྔར་བརྐྱང་བ་ནི་གཡས་བརྐྱང་བའོ། །གཡས་པ་བཀུག་ལ་གཡོན་བརྐྱང་བ་ནི་གཡོན་བརྐྱང་བའོ། །རྐང་པའི་སོར་མོ་ཕྱིར་བསྟན་ལ་སོར་མོ་ཉི་ཤུ་རྩ་དྲུག་གིས་ཆོད་པར་བྱས་ནས། པུས་མོ་བརྐྱང་བར་བྱས་པ་ནི་ས་གའི་འདུག་སྟངས་སུ་ [250a.7]འགྱུར་རོ། །དེ་བཞིན་དུ་གནས་པ་ལས་ལག་པ་གཉིས་བརྐྱང་སྟེ་ངང་པའི་གཤོག་པ་ལྟར་བྱ་བ་ནི་ཟླུམ་པོའི་འདུག་སྟངས་སོ། །རྐང་པའི་མཐེ་བོ་དང་སོར་མོ་རྣམས་འབྱོར་པར་ཕན་ཚུན་བཅེར་བ་མི་མཐུན་པའི་རྐང་སྟབས་སོ། །རྐང་པ་གཡས་པས་རྐང་པ་གཡོན་མནན་པ་ནི་རུས་ [250b] [250b.1]སྦལ་གྱི་རྐང་སྟབས་སོ། །རྡོ་རྗེ་སྙིང་གར་བསྟོད་པའི་ཚུལ་དུ་འཇོག་པ་ནི་རྡོ་རྗེ་བརྡེག་པའོ། །རྡོ་རྗེ་ཉིད་སྒེག་པ་དང་བཅས་པས་བསྐོར་བ་ནི་འཇོ་ཚུལ་ལོ། །རྐང་པ་གཅིག་བཏེག་ལ་གཅིག་གིས་གཡས་སུ་བསྐོར་བ་ནི་རྐང་པ་གཅིག་གི་སྟང་སྟབས་སོ། །ལུས་ཀྱི་གཡས་དང་ [250b.2]གཡོན་དག་ཏུ་ཀུན་ནས་བསྐོར་བ་ནི་བུང་བ་འཕུར་བའི་སྟང་སྟབས་སོ། །གཡས་བརྐྱང་བས་རང་གི་ཁར་ལག་པ་གཡོན་པའི་མཁྲིག་མ་བརྐྱང་ལ་དེའི་སྟེང་དུ་གཡས་པའི་མཁྲིག་མ་སྦྱར་ཏེ་ལག་པ་བརྐྱང་པ་ནི་སེང་གེའི་སྟང་སྟབས་སོ། །འདི་ཉིད་ལས་རྒྱབ་ཏུ་ལྟ་བར་བྱེད་པ་ནི་ [250b.3]སེང་གེའི་གླལ་བར་འགྱུར་རོ། །སྙིང་གར་རྡོ་རྗེ་བཅིང་བ་དྲལ་བར་བྱེད་པ་ནི་རྡོ་རྗེ་ལྕགས་སྒྲོག་གོ། །ལག་པ་གཉིས་ཀྱིས་རྡོ་རྗེ་བསྐོར་ཏེ་སྟེང་དུ་གཞག་པ་ནི་རྡོ་རྗེ་གསོར་བའོ། །རྡོ་རྗེ་བསྣུན་པའི་ཚུལ་ནི་རྡོ་རྗེའི་སྟང་སྟབས་སོ། །རྡོ་རྗེ་གར་བྱས་ལ་ལག་པ་གཡོན་པ་བརྐྱང་སྟེ། དེའི་རྩ་བར་ [250b.4]གཡས་པ་ཁ་ཏི་ཁས་གཞག་པ་ནི་རྡོ་རྗེ་གར་དུ་འགྱུར་རོ། །ཁའི་སྟེང་འོག་ཤིན་ཏུ་གདངས་ལ་དེ་ཉིད་དང་འཇིགས་སུ་རུང་བ་ལྟ་བུར་བྱེད་པ་ནི་རྡོ་རྗེ་འཇིགས་སུ་རུང་བའོ། །ལག་པ་གཉིས་ཀྱིས་རོ་བཟུང་ལ་འཆའ་བའི་ཚུལ་དུ་བྱེད་ཅིང་ཡོངས་སུ་བསྐོར་བ་ནི་རྡོ་རྗེ་རོ་ལངས་མའོ། །རྡོ་རྗེ་ [250b.5]ཁུ་ཚུར་ཀྱིས་ཐོ་བ་འདེགས་པ་ལྟར་བྱེད་པ་ནི་རྡོ་རྗེ་ཐོ་བའོ། །ཤར་ལ་སོགས་པའི་ཕྱོགས་སུ་མི་བསྐྱོད་པ་ལ་སོགས་པའི་སྦྱོར་བས་སྟོང་པ་ཉིད་ལ་སོགས་པའི་རྣམ་པར་ཐར་པའི་སྒོ་བཞི་བསྒོམ་ཞིང་ཡོངས་སུ་བསྐོར་བ་ནི་སྒོ་བཞི་བྱིན་གྱིས་བརླབས་པར་འགྱུར་རོ། །བསྐོར་ཞིང་རྡོ་རྗེ་ཡོངས་སུ་ [250b.6]བསྐོར་ལ་རིམ་གྱིས་ས་ལ་རྐང་པ་གཉིས་འཇོག་པ་ནི་རྡོ་རྗེ་གདུ་བུའོ། །རྡོ་རྗེ་གར་སྔོན་དུ་འགྲོ་བའི་དཀུར་བརྟེན་པ་གཉིས་ཀྱིས་མགོ་གཡོན་ཕྱོགས་སུ་འདུད་པ་ནི་བུད་མེད་ཀྱི་སྒྱུ་འཕྲུལ་ལོ། །ལག་པ་གཡོན་ན་གནས་པའི་ཁྲོ་བོའི་རྡོ་རྗེའི་ནང་དུ་གདུག་པ་ཐམས་ཅད་ཆུད་པར་བསམས་ལ་ [250b.7]ལག་པ་གཡས་ན་གནས་པའི་ཁྲོ་བོའི་རྡོ་རྗེས་བསྣུན་པ་ནི་རྡོ་རྗེ་དྲལ་བའོ། །ལག་པ་གཡོན་པ་རྡོ་རྗེ་རྩེ་གསུམ་པ་ལྟ་བུར་བྱས་ལ་གཡས་པའི་རྡོ་རྗེ་ཁུ་ཚུར་གྱིས་ཡུ་བ་ལྟར་བྱས་པས་བཏེག་ནས་འཇོག་པ་ནི་སྟོབས་པོ་ཆེ་འདེགས་པའོ། །རྡོ་རྗེ་མཆེ་བའི་ཕྱག་རྒྱ་ནི་བཤད་ཟིན་ཏོ། །ཧ་ [251a] [251a.1]ཧ་ཞེས་དགོད་པས་ཡང་དང་ཡང་དུ་བྱེད་པ་ནི་རྡོ་རྗེ་བཞད་པར་འགྱུར་རོ། །རྡོ་རྗེ་དྲིལ་བུ་དཀྲོལ་བ་ནི་རྡོ་རྗེ་སྒྲའོ། །གཡོན་པའི་ཁུ་ཚུར་གྱིས་ཤུགས་ལ་དྲངས་ཏེ། གཡས་པའི་ཁུ་ཚུར་རལ་གྲིའི་ཚུལ་དུ་གཞག་པ་ནི་རལ་གྲིའི་ཐབས་སོ། །གཡས་པའི་རྡོ་རྗེ་རྩེ་ [251a.2]གསུམ་པ་འདེགས་པ་ནི་རྡོ་རྗེའི་ཐབས་སོ། །སྙིང་གར་རྡོ་རྗེ་ཁུ་ཚུར་གཉིས་ཀྱིས་མཐེའུ་ཆུང་དང་མཛུབ་མོ་ཕན་ཚུན་རྡོ་རྗེ་བཅིང་བ་བྱས་ལ། འཁོར་ལོ་ལྟར་དགྲོལ་བ་ནི་འཁོར་ལོའི་ཐབས་སོ། །རྡོ་རྗེ་བསྡམས་པས་གཏུན་ཤིང་འཛིན་པའི་ཚུལ་དུ་བྱ་བ་ནི་གཏུན་ཤིང་གི་ཐབས་སོ། ། [251a.3]གཡས་པའི་རྡོ་རྗེ་ཁུ་ཚུར་གྱི་མཛུབ་མོ་དང་གུང་མོ་སྒེག་པ་དང་བཅས་པས་གྱེན་དུ་བརྐྱང་ལ་འཇོག་པ་ནི་བ་དན་གྱི་ཐབས་སོ། །འདོད་པའི་རྒྱལ་པོའི་ཕྱག་རྒྱ་ཉིད་ནི་ཞགས་པའི་ཐབས་སོ། །ཐལ་མོ་ཁོང་སྟོང་ལས་པདྨ་ལྟ་བུར་བྱེད་པ་ནི་པདྨའི་ཚུལ་ལོ། །གཡས་པའི་ཁུ་ཚུར་གྱི་ [251a.4]མཐེ་བོ་ནང་ནས་བཏེག་པ་ནི་བེེ་ཅོན་གྱི་ཐབས་སོ། །ལག་པ་གཡས་པས་མི་འཇིགས་པ་སྦྱིན་པའི་ཚུལ་དུ་བྱེད་པ་ནི་མི་འཇིགས་པའི་ཚུལ་ལོ། །གཡས་པའི་མཛུབ་མོས་འགུགས་པའི་ཚུལ་དུ་བྱེད་པ་ནི་ལྕགས་ཀྱུའི་ཐབས་སོ། །ལག་པ་གཡས་པའི་སོར་མོ་རྣམས་བརྐྱང་ལ་བསྐུམ་ [251a.5]པ་ནི་གདེངས་ཀའི་ཚུལ་ལོ། །རྡོ་རྗེ་ཁུ་ཚུར་གཉིས་ཀྱིས་འདེགས་པ་ལྟར་བྱེད་པ་ནི་མདུང་ཐུང་གི་ཐབས་སོ། །ལག་པ་གཡོན་པས་གཞུ་འཛིན་པ་ལྟར་བྱེད་པ་ནི་གཞུའི་ཐབས་སོ། །གཡས་པའི་མཛུབ་མོ་དང་གུང་མོ་གཉིས་ཀྱིས་མདའ་འཛིན་པ་ལྟར་བྱེད་པ་ནི་མདའ་བཟུང་བའི་ [251a.6]ཐབས་སོ། །དེ་དག་ཉིད་ཀྱིས་མདའ་འཕེན་པ་ལྟར་བྱེད་པ་ནི་མདའ་འཕང་བའི་ཐབས་སོ། །ལག་པ་གཡས་པའི་ཁུ་ཚུར་གྱིས་ཐག་མདུང་བསྐོར་བའི་ཚུལ་དུ་བྱེད་པ་ནི་ཐག་མདུང་གི་ཐབས་སོ། །ལག་པ་གཡས་པས་མཆོག་སྦྱིན་པའི་ཚུལ་དུ་འཇོག་པ་ནི་མཆོག་སྦྱིན་པའི་ཚུལ་ [251a.7]ལོ། །གསོར་བ་སྔོན་དུ་འགྲོ་བས་ལག་པ་གཡས་པས་མདུང་ཐུང་འཕེན་པ་ལྟར་བྱེད་པ་ནི་མདུང་ཐུང་གི་ཐབས་སོ། །མཚོན་རྩེ་གཅིག་པ་འཕན་པའི་ཚུལ་དུ་བྱེད་པ་ནི། མཚོན་རྩེ་གཅིག་པའི་ཐབས་སོ། །ཐལ་མོ་སྦྱར་བ་སྟོད་པར་བྱེད་པའི་ཚུལ་གྱིས་སྙིང་གར་འཇོག་པ་ནི་ཕྱག་ [251b] [251b.1]འཚལ་བའི་ཚུལ་ལོ། །ད་ནི་རྡོ་རྗེའི་འདུག་སྟངས་ལ་སོགས་པས་དབུས་སུ་གནས་ལ། ཡི་གེ་ཧཱུཾ་འདོན་པ་སྔོན་དུ་འགྲོ་བས་དེ་བཞིན་དུ་ས་གཞི་རྡོ་རྗེའི་རང་བཞིན་དུ་བསྒོམ་པར་བྱའོ། །དེ་ལ་མི་བསྐྱོད་པའི་ཕྱག་རྒྱ་ཉིད་ནི་རྡོ་རྗེའི་འདུག་སྟངས་སོ། །འོད་དཔག་ཏུ་མེད་པའི་ཕྱག་རྒྱ་ཉིད་ནི་ [251b.2]བསམ་གཏན་གྱེ་ཚུལ་ལོ། །གཡས་པའི་བྱིན་པ་དང་། བརླའི་དབུས་སུ་རྐང་པ་གཡོན་པ་བཞག་ལ་དེའི་སྟེང་དུ་གཡས་པ་གཞག་པ་ནི་རྡོ་རྗེའི་སྐྱིལ་མོ་ཀྲུང་ངོ་། །བྱིན་པ་གཡས་པས་བྱིན་པ་གཡོན་པ་མནན་ལ། པུས་མོ་གཉིས་ཕབ་པ་ནི་པདྨའི་འདུག་སྟངས་སོ། །བརླ་གཡོན་པའི་སྟེང་དུ་ [251b.3]རྐང་པ་གཡས་པ་བཞག་ལ། གཡོན་པ་དེའི་འོག་ཏུ་གཞག་པ་སེམས་དཔའི་སྐྱིལ་མོ་ཀྲུང་ངོ་། །རྐང་པ་གཡོན་པའི་སྐྱིལ་མོ་ཀྲུང་ཕྱེད་པ་བཅས་པ་དེ་དང་ཉེ་བར་རྐང་པ་གཡས་པ་དྲང་པོར་གཞག་པ་ནི་དཔའ་བོའི་འདུག་སྟངས་སོ། །རྐང་པ་གཉིས་དྲང་པོར་བརྐྱང་ལ་སྟན་ལ་ [251b.4]གནས་ཏེ་འཇོག་པ་ནི་བཟང་པོའི་འདུག་སྟངས་སོ། །རྐང་པ་གཉིས་མཐོ་གང་གིས་ཆོད་པར་སྟན་ལ་བཞག་ལ་ཙོག་ཙོག་པོར་འདུག་པ་ནི་ཙོག་པོའི་འདུག་སྟངས་སོ། །རྐང་པ་གཡོན་པ་སེམས་དཔའི་སྐྱིལ་མོ་ཀྲུང་ཕྱེད་པར་བརྟེན་པར་བྱས་ལ་གཡས་པ་སྒེག་པ་དང་བཅས་པས་བརྐྱང་ [251b.5]པ་ནི་རྩེ་བའི་སྟང་སྟབས་སོ། །འདི་ཉིད་དུ་རྡོ་རྗེའི་ལྟ་བ་དག་གིས་མདུན་དུ་ལྟ་བ་ནི་མདུན་དུ་བསྒྲུབ་པའོ། །འདི་ཉིད་དུ་རྒྱབ་ཏུ་ལྟ་བ་ནི་ཕྱིར་འགྱེད་པའོ། །དེ་ནས་སྔ་མ་བཞིན་དུ་གར་བྱས་ལ། རྡོ་རྗེ་ཁུ་ཚུར་གཉིས་ཕན་ཚུན་ཁ་སྤྲད་དེ། རྐེད་པ་གཡོན་པར་བཞག་པས་སྟང་ [251b.6]སྟབས་ཉེ་བར་བསྡུས་ལ་དབུས་དང་དབང་ལྡན་ལ་སོགས་པའི་མཚམས་རྣམས་སུ་མཐའ་ཡས་དང་རྣམ་པར་རྒྱལ་བ་དང་། སྤྲིན་སྒྲ་དང་། གསུས་པོ་ཆེ་དང་རྒྱལ་བ་ཞེས་བྱ་བའི་ཕུར་བུ་ལྔ་པོ་བདག་པོ་ལྔའི་ངོ་བོ་ཉིད་ཁྲོ་བོའི་གཟུགས་སུ་བྱུང་བ། སྐུ་སྨད་རྡོ་རྗེ་རྩེ་གཅིག་པ་ལྟ་བུ་ [251b.7]ཨོ་གྷ་གྷ་ཙུ་ཞེས་བྱ་བའི་སྔགས་ཀྱིས་རིམ་བཞིན་དུ་བཏབ་ལ། དེ་རྣམས་ཀྱིས་ཀྱང་ས་འོག་ལ་ཐུག་གི་བར་དུ་ཕུར་བུས་བཏབ་པར་ཇི་ལྟ་བ་བཞིན་དུ་བསམས་ལ། དཔལ་འཇམ་པའི་རྡོ་རྗེའི་ཕྱག་རྒྱ་ཆེན་པོ་བཅིངས་ཏེ། ཡི་གེ་ཧཱུཾ་ཟློས་ཤིང་བདག་ཉིད་ནི་དཔལ་འཇམ་པའི་རྡོ་རྗེ་ཡིན་ [252a] [252a.1]ནོ་ཞེས་ངེས་པར་བྱ་བ་གཟུང་བར་བྱའོ། །དེ་ནས་ཡི་གེ་ཧཱུཾ་གིས་ཆོས་ཀྱི་དབྱིངས་ཁྱབ་ལ་ཤེས་རབ་ཀྱི་ཕ་རོལ་དུ་ཕྱིན་པ་སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འོད་གསལ་བ་སྟེ། རྣམ་པར་ཐར་པའི་སྒོ་བཞི་པོའི་ངོ་བོ་ཉིད་ [252a.2]སྟོབས་བཅུ་དང་མི་འཇིགས་པ་ལ་སོགས་པའི་ཡོན་ཏན་གྱི་ཚོགས་རྣམས་ཀྱིས་བརྒྱན་པ། སྟོན་ཀའི་ཟླ་བ་ལྟར་དཀར་བའི་པདྨ་བྱང་ཆུབ་ཀྱི་སེམས་ཀྱིས་ཡོངས་སུ་གང་བ། འོ་མ་ཅན་གྱི་རྒྱ་མཚོ་ལྟ་བུ་བསམས་ལ། དེར་ཡང་ཧྲི་གནས་པ་ལས་བྱུང་བའི་པདྨ་ནམ་མཁའི་ཁམས་མ་ [252a.3]ལུས་པ་དང་། མཉམ་པར་འཇུག་པའི་ཚད་ཙམ་གྱི་ལྟེ་བ་ལ་ཨ་ལས་བྱུང་བའི་སྣ་ཚོགས་རྡོ་རྗེ་དེའི་སྟེང་དུ་ཆོས་ཀྱི་དབྱིངས་ཀྱི་ཕྱག་རྒྱ་ཟུར་གསུམ་པར་གནས་པའི་ཡི་གེ་བྷཱུཾ་གྱི་འཁོར་ལོ་རྩིབས་བརྒྱད་པ་ལས་བྱུང་བའི་རྣམ་པར་སྣང་མཛད་རིག་པ་དང་བཅས་པ་ལས་བྱུང་བའི་ཐུབ་པའི་དབང་པོ་དཔག་ [252a.4]ཏུ་མེད་པའི་འོད་ཀྱི་དཀྱིལ་འཁོར་གསལ་བས་ཕྱོགས་བཅུའི་ཚོགས་ཐམས་ཅད་ཁྱབ་པ། ཡིད་ཀྱི་རང་བཞིན་ཀྱི་མཆོད་པ་ཆེན་པོའི་ཁྱད་པར་གྱིས་བརྒྱན་པ་བསོད་ནམས་དང་ཡེ་ཤེས་ཀྱི་ཚོགས་བསམ་གྱིས་མི་ཁྱབ་པ་དང་ཆོས་ཀྱི་དབྱིངས་ཀྱི་ངོ་བོ་ཉིད་རི་གངས་ཅན་ལྟར་དཀར་བའི་མཆོད་ [252a.5]རྟེན་ཆེན་པོའི་ནང་དུ་ཆུད་པ། དུས་གསུམ་གྱི་སངས་རྒྱས་ཀྱི་བཞུགས་གནས་རིན་པོ་ཆེ་མ་ལུས་པ་ལས་བསྒྲུབས་པའི་བདག་ཉིད་ཅན་གནས་གཙང་མའི་སྟེང་ན་གཞལ་ཡས་ཁང་སྒྱུ་མ་ལྟ་བུ་མིག་ཡོར་ཙམ་དུ་སྣང་བ་རྣམ་པར་བསམས་ལ། སྔར་བཤད་པའི་རིམ་གྱིས་ཕུར་ [252a.6]བུ་དང་། ར་བ་དང་། དྲ་བ་དང་། མཚམས་བཅིང་བ་དང་། ཕྱོགས་བཅིང་བ་ལ་སོགས་པ་བྱས་ནས་གནས་ཏེ། འདི་ལྟར་འབར་བའི་ཕྲེང་བ་ཀུན་དུ་འཁྲུག་པ། རྡོ་རྗེའི་རང་བཞིན་དུ་བྱིན་གྱིས་བརླབས་ལ། བསང་གཏོར་ལ་སོགས་པ་ཡང་དག་པར་སྦྱངས་ཏེ། སྒོ་བཞི་དང་ [252a.7]མཚམས་བཞིར་སྤོས་སྣོད་ལ་སོགས་པ་དང་གླུ་དང་རོལ་མོ་དང་། གར་ལ་སོགས་པས་ཡང་དག་པར་མཆོད་ལ། ལག་པས་བྲམ་ཞིང་དཀྱིལ་འཁོར་གྱི་བདག་པོའི་སྔགས་ལན་བརྒྱ་རྩ་བརྒྱད་དང་བཅས་པའི་ཡི་གེ་བརྒྱ་པ་ལན་བདུན་ཡང་དག་པར་བཟླས་ནས། དེ་ [252b] [252b.1]ཉིད་དུ་ཡིད་མཉམ་པར་བཞག་ནས་ཉལ་བར་བྱའོ། །ས་ཡོངས་སུ་གཟུང་བའི་ཆོ་གའོ། །དེ་ནས་ཉི་མ་གཉིས་པ་ལ་ནང་པར་ཉིད་དུ་བདག་པོའི་སྦྱོར་བ་བྱས་ལ། ཡི་གེ་བཾ་ལས་བྱུང་བའི་སའི་ལྷ་མོ་ལག་ན་བུམ་པ་ཐོགས་པ་འདོད་པའི་རྒྱལ་པོའི་ཕྱག་རྒྱས་བཀུག་ལ་དབུས་ [252b.2]སུ་གནས་པ་ལ་དགུག་པ་ལ་སོགས་པ་སྔོན་དུ་འགྲོ་བས་ཡང་དག་པར་མཆོད་དེ། ལྷག་པར་གནས་པར་བྱའོ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་གྱི་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །དངོས་གྲུབ་ཐམས་ [252b.3]ཅད་འཕེལ་བའི་ཕྱིར། །བདག་གིས་དཀྱིལ་འཁོར་བྲི་བར་བྱ། །ཞེས་ལན་གསུམ་བརྗོད་པས་གཤེགས་སུ་གསོལ་བར་བྱའོ། །དེ་ནས་ཕྱི་དྲོའི་དུས་སུ་ཁྲུས་བྱ་ཞིང་ལུས་དྲིས་བསྒོས་ལ། ཇི་སྙེད་པའི་རྒྱན་གྱིས་བརྒྱན་ཏེ། ཤིན་ཏུ་དམར་པོའི་གོས་བགོ་བ་དང་། མེ་ཏོག་གི་ཕྲེང་ [252b.4]བ་གདགས་ཤིང་ཁ་དྲི་ཞིམ་པོར་བྱས་པ་དང་། དཀྱིལ་འཁོར་གྱི་ས་དྲིས་ཉེ་བར་བྱུགས་ལ་མེ་ཏོག་གི་དྲི་ཞིམ་པོ་དང་དྲིས་ཉེ་བར་མཛེས་པར་སྔ་མ་བཞིན་དུ་བྱས་ལ་དཀྱིལ་འཁོར་གྱི་དབུས་སུ་འདུག་སྟེ། སྒྲུབ་པའི་ཐབས་ཀྱི་རིམ་པས་བགེགས་བསལ་བ་ལ་སོགས་པ་སྔོན་དུ་ [252b.5]འགྲོ་བས། རྣལ་འབྱོར་ཆེན་པོ་རྫོགས་པར་བྱས་ནས་སེམས་དཔའི་སྐྱིལ་མོ་ཀྲུང་དུ་འདུག་སྟེ། དཔལ་འཇམ་པའི་རྡོ་རྗེ་བདག་ཉིད་སྤྲོ་བ་བསྐྱེད་པར་བྱའོ། །དེང་ནི་བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །ལྷ་དང་དམ་ཚིག་བྲི་མཉམ་པར། །གྱུར་ [252b.6]པར་བདག་ནི་སོམ་ཉི་མེད། །བྱང་ཆུབ་སེམས་དང་སེམས་གཅིག་ལས། །མི་ལྡོག་པར་ནི་བདག་གྱུར་ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གི་མཆོག་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་ [252b.7]འདྲེན་པས། །དེང་བདག་འདུས་པའི་མཆོག་ཡིན་ནོ། །མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །རྡོ་རྗེ་ཅན་གྱི་དཀྱིལ་འཁོར་བྲི། །དེང་འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདི་ [253a] [253a.1]འདི་ནི་སྩལ་དུ་གསོལ། །ཞེས་བརྗོད་ལ། དཀྱིལ་འཁོར་སྤྲོ་བ་ལ་སོགས་པ་སྔོན་དུ་འགྲོ་བས་སྔ་མ་བཞིན་དུ་བསྐྱེད་ལ། དཔལ་འཇམ་པའི་རྡོ་རྗེའི་གནས་ན་གནས་ཤིང་དེའི་ཕྱག་རྒྱ་ཆེན་པོ་དང་ལྡན་པ། དེའི་གསང་སྔགས་ཟློས་པ་ལ་བརྩོན་པའི་རྣལ་ [253a.2]འབྱོར་པ་ལ་ནམ་མཁའི་ངོས་ནས་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱིས་སམ། དེའི་ཕྱག་རྒྱའི་ང་རྒྱལ་དང་ལྡན་པའི་སྒྲུབ་པའི་གྲོགས་མཆོག་ཐམས་ཅད་ཀྱིས་དཀྱིལ་འཁོར་ཆེན་པོ་བྲི་བར་བྱ་བའི་ཕྱིར་བདག་ཉིད་ལ་གསོལ་བ་འདེབས་པར་གྱུར་ [253a.3]པར་བསམ་པར་བྱའོ། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་ཀྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་རྣམ་སྤངས་པ། ། [253a.4]ཀུན་དུ་བཟང་པོའི་སྐུ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ཞི་བའི་ཆོས་ནི་མཆོག་ལས་བྱུང་། །ཡེ་ཤེས་སྤྱོད་པ་རྣམ་སྤྱོང་བ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་ [253a.5]དག་པ་དྲི་མ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་དམ་པ་བཤད་དུ་གསོལ། །དེ་ནས་ལངས་ལ་དེ་བཞིན་གཤེགས་པ་ཐམས་ཅད་ཀྱིས་ནམ་མཁའ་ཀུན་དུ་གང་བར་བསམས་ནས་དེའི་ཞབས་ལ་ཕྱག་བྱས་ལ་ང་རྒྱལ་བསྐྱེད་པར་བྱའོ། །བདག་ [253a.6]ཉིད་རྡོ་རྗེ་ཅན་རང་ཉིད། །འཇམ་པའི་རྡོ་རྗེ་བདག་རང་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཆེན་རྡོ་རྗེ་ཅན་བདག་ཡིན། །རྣལ་འབྱོར་དབང་ཕྱུག་རྒྱལ་པོ་བདག །ཕྱག་ན་རྡོ་རྗེ་བརྟན་བདག་སྟེ། །བདག་པོ་རྡོ་རྗེ་ཆེན་པོར་བདག །བྱིན་གྱིས་བརླབ་པ་མི་འདོར་རོ། ། [253a.7]དེ་ནས་རྡོ་རྗེ་དང་དྲིལ་བུ་འཆང་བས་ཧཱུཾ་བཛོད་ཏིཥྛ་ཞེས་བྱ་བ་ཇི་ལྟར་སྤྲུལ་པའི་འཁོར་ལོ་ནམ་མཁའི་ཕྱོགས་སུ་བཏེག་ལ། སྔ་མ་བཞིན་དུ་གཡས་བརྐྱང་བ་ལ་སོགས་པའི་སྟང་སྟབས་ཀྱིས་ས་གཞི་རྡོ་རྗེའི་རང་བཞིན་དུ་བྱིན་གྱིས་བརླབ་པ་ལ་སོགས་པ་བྱས་ལ་གཞལ་ཡས་ཁང་ [253b] [253b.1]ཡང་བསྐྱེད་དེ། དེའི་འོག་ཏུ་སྣ་ཚོགས་རྡོ་རྗེའི་སྟེང་དུ་ཡི་གེ་ཧཱུཾ་ལས་བྱུང་བ། སྐུ་ལུས་ཐུང་བ། གསུས་ཁྱིམ་ཆེ་བ། ཞལ་བཞི་པ། ཕྱག་བཞི་པ་རྡོ་རྗེ་དང་འཁོར་ལོ་དང་པདྨ་དང་དྲིལ་བུ་བསྣམས་པ། རྡོ་རྗེའི་རྒྱུའི་ངོ་བོ་ཉིད་དཀྱིལ་འཁོར་གྱི་དེ་ཁོ་ན་ཉིད་བསམས་ལ། སྒོ་དབྱེ་བའི་ཕྱག་རྒྱས་ [253b.2]སྒོ་ཕྱེ་སྟེ། འདིས་གསང་བའི་དཀྱིལ་འཁོར་དགུག་པར་བྱའོ། །ཨོཾ་བཛྲ་མཎྜལ་ཧཱུཾ་ཛཿ། རྡོ་རྗེ་ཁུ་ཚུར་གཉིས་ཀྱིས་མཛུབ་མོ་དང་མཐེ་བོའི་རྡོ་རྗེ་ནི་འདིའི་ཕྱག་རྒྱའོ། །དེ་ནས་ཡོངས་སུ་གྱུར་པ་ལས་ཟུར་བཞི་ལ་སོགས་པ་དང་ལྡན་པའི་དཀྱིལ་འཁོར་ཆེན་པོའི་རྣམ་པ་འདིས་བྱིན་གྱིས་བརླབ་ [253b.3]པར་བྱའོ། །ཨོཾ་མ་ཧཱ་བཛྲ་ཙཀྲ་ཨ་དྷི་ཏིཥྛ་སིདྡྷི་ཧཱུཾ། རྡོ་རྗེ་ཁུ་ཚུར་གཉིས་མགལ་མེའི་འཁོར་ལོ་ལྟར་བསྐོར་བ་ནི་འདིའི་ཕྱག་རྒྱའོ། །དེ་ནས་སེང་ལྡེང་གི་ཕུར་བུ་སྔར་བཤད་པའི་བསམ་གཏན་གྱི་ཕུར་བུ་ལྟ་བུ་ལ། ཙནྡན་དམར་པོས་བྱུགས་ཏེ། སྲད་བུ་དམར་པོ་དང་ཕྲེང་བ་དམར་ [253b.4]པོས་དཀྲིས་པ་བཞི་ལ་བཟླས་བརྗོད་ལན་བརྒྱ་བྱ་སྟེ། གཡོན་པའི་ཁུ་ཚུར་གྱིས་བཟུང་ནས་གཡས་པས་རྡོ་རྗེ་འབར་བའི་ཐོ་བ་ཙནྡན་དམར་པོས་བྱུགས་ཤིང་སྲད་བུ་དམར་པོ་དང་། མེ་ཏོག་དམར་པོས་དཀྲིས་པས་ཕྱིའི་དཀྱིལ་འཁོར་གྱི་མཚམས་བཞིར་གདབ་པར་བྱའོ། །ཨོཾ་བཛྲ་ [253b.5]ཀཱི་ལི་ཀཱི་ལ་ཡ། སརྦྦ་བིགྷྲཱན་བནྡྷ་ཧཱུཾ་ཕཊ། རྡོ་རྗེ་ཕུར་བུའི་སྔགས་སོ། །ཨོཾ་བཛྲ་མུངྒ་ར་ཨ་ཀོ་ཊ་ཡ་ཧཱུཾ། ཐོ་བའི་སྔགས་ཏེ། སྔར་བཤད་པའི་མཐའ་ཡས་དང་རྣམ་པར་རྒྱལ་བ་ལ་སོགས་པས་གནས་ལྔར་ཕུར་བུས་གདབ་པའམ། ཕྱག་རྒྱས་ཕུར་བུས་གདབ་པར་བྱའོ། །རྡོ་རྗེ་ [253b.6]བསྡམས་པ་ལས་ནང་དུ་བཅིངས་ལ་གུང་མོ་གཉིས་གཤིབས་ཏེ་མཛུབ་མོ་གཉིས་བཀུག་ལ་མཐེ་བོའི་སྟེང་དུ་གཞག་དུ་པ་ནི་ཕུར་བུས་གདབ་པའི་ཕྱག་རྒྱའོ། །དེ་ནས་བདུད་རྩི་ཐབ་སྦྱོར་གྱིས་བགེགས་བསྐྲད་པ་ལ་སོགས་པ་བྱས་ལ་དེ་ཉིད་ཟོས་པའི་གྲོགས་ཀྱིས་དཀྱིལ་ [253b.7]འཁོར་གྱི་ས་གཞི་དྲིས་ཉེ་བར་བྱུགས་པ་དང་། མེ་ཏོག་དྲི་ཞིམ་པོའི་སིལ་མས་ཉེ་བར་མཛེས་པར་བྱེད་དུ་བཅུག་ལ། དེ་བཞིན་དུ་རང་གི་བདག་པོའི་སྦྱོར་བ་དང་ལྡན་པས་ཧཱུཾ་ཟློས་པ་སྔོན་དུ་འགྲོ་བ་དང་། ལྷ་ཐམས་ཅད་ཀྱི་གནས་སུ་དྲིའི་དཀྱིལ་འཁོར་བྱའོ། །དེ་ནས་ཧཱུཾ་གིས་ [254a] [254a.1]སམ་རང་རང་གི་སྔགས་ཀྱིས་དཀྱིལ་འཁོར་པའི་ལྷ་རྣམས་བཏོན་ལ། གནས་ཇི་ལྟ་བ་བཞིན་དུ་བཞག་ནས། སྔར་བཤད་པའི་སྤྱན་དྲངས་པ་ལ་སོགས་པའི་རིམ་གྱིས་ནམ་མཁའི་གནས་ནས་ཕབ་སྟེ། གཅིག་ཏུ་བྱས་ལ་སྐུ་ལ་སོགས་པའི་བྱིན་ [254a.2]གྱིས་བརླབ་པ་སྔོན་དུ་འགྲོ་བས་རང་གི་སྔགས་དང་ཕྱག་རྒྱ་དང་བཅས་པ་ཉེ་བར་བརྟན་ལ། དབང་བསྐུར་ནས་ཡང་དག་པར་མཆོད་དེ། ལེགས་པར་བསྟོད་ནས་ཕྱག་བྱའོ། །དེ་ནས་རྣམ་པར་རྒྱལ་བའི་བུམ་པ་རྩ་བ་མི་གནག་པ་མཆུ་འཕྱང་བ་དང་། མགྲིན་པ་རིང་བ། [254a.3]ལྟོ་བ་ཆེ་བ། མེ་ཏོག་གི་ཕྲེང་བ་དང་། རས་ཀྱིས་མགུལ་བ་བཅིངས་པ། འདབ་མ་དྲི་ཞིམ་པོ་དང་འབྲས་བུས་ཁ་བཀབ་པ། རང་གི་བདག་པོའི་མཚན་མས་མཚན་པ་བླངས་ལ། ཀཎྜ་ཀ་རི་དཀར་པོ་དང་། དམར་པོ་དང་། དཎྜིཏྤ་ལ་དང་། གི་རི་ཀར་ནི་དཀར་པོ་དང་། ཧ་ས་ [254a.4]དེ་བ་སྟེ། སྨན་ཆེན་པོ་ལྔ་དང་། ནས་དང་། མ་ཤ་དང་། ཏིལ་དང་། འབྲས་སོ་བ་དང་། གྲོ་སྟེ། འབྲུ་ལྔ་དང་། བྱུ་རུ་དང་། གསེར་དང་། དུང་དང་། མུ་ཏིག་དང་ནོར་བུ་སྟེ། རིན་པོ་ཆེ་ལྔ་དང་ལྡན་པ། ཡི་གེ་བཾ་ལས་རིན་པོ་ཆེའི་རང་བཞིན་དུ་བསྐྱེད་ལ། བདག་པོའི་སྔགས་དང་ [254a.5]ཡི་གེ་ཧཱུཾ་རེ་རེ་ཞིང་ལན་བརྒྱ་རྩ་བརྒྱད་དམ། སྟོང་རྩ་བརྒྱད་མཆོད་ཡོན་ལ་ཡོངས་སུ་བཟླས་ཏེ་བུམ་པའི་སྟེང་དུ་བཞག་ནས་ཆུ་ཅུང་ཟད་བཅུག་ལ། དེའི་དབུས་སུ་བཾ་ལས་བྱུང་བའི་པདྨ་དེའི་སྟེང་དུ་ཨ་ལས་ཟླ་བའི་དཀྱིལ་འཁོར་བསམས་ལ། དེར་ལྷ་རྣམས་ཀྱི་འཁོར་ལོ་རང་གི་ [254a.6]དམ་ཚིག་གི་གནས་པས་བཞུགས་པར་ཡི་གེ་ཧཱུཾ་ངམ། རང་གི་སྔགས་ཀྱིས་བསམས་ལ། དེ་ལས་བྱུང་བའི་བྱང་ཆུབ་ཀྱི་ཆུས་ཡོངས་སུ་གང་བར་བསྒོམས་ནས་རྡོ་རྗེ་སེམས་མས་ཡོངས་སུ་བཟུང་བའི་མེ་ཏོག་གི་ལྕུག་མས་རྡོ་རྗེ་དང་བཅས་པ་དང་། དཀྱིལ་འཁོར་བའི་ལྷ་ [254a.7]ཐམས་ཅད་ཀྱི་སྔགས་མངོན་པར་བཟླས་ལ། ཨོཾ་བཛོད་ཀ་ཧཱུཾ་ཞེས་བྱ་བ་བརྒྱ་རྩ་བརྒྱད་མངོན་པར་བཟླས་ཏེ། བདུད་རྩི་ཐབ་སྦྱོར་ཡོངས་སུ་བཟླས་པའི་མེ་ཏོག་བཅུག་ལ། སྤོས་ཀྱིས་བདུགས་ཏེ། སྒེག་མོ་ལ་སོགས་པས་ཡང་དག་པར་མཆོད་ནས། དཀྱིལ་འཁོར་བསྐོར་བ་ [254b] [254b.1]བྱས་ཏེ། བཅོམ་ལྡན་འདས་འཇམ་པའི་རྡོ་རྗེའི་སྤྱན་སྔར་གཞག་པར་བྱའོ། །དེ་བཞིན་དུ་དཀྱིལ་འཁོར་དུ་བཞག་ནས་ཀྱང་དཀྱིལ་འཁོར་གྱི་བདག་པོའི་སྔགས་དང་། ཡི་གེ་ཧཱུཾ་གཉིས་མངོན་པར་བཟླ་བར་བྱའོ། །བུམ་པ་ལྷག་པར་གནས་པའི་ཆོ་གའོ། །དེ་ནས་ཕྱི་རོལ་དུ་སོང་སྟེ་ [254b.2]ཕྱོགས་ཀྱི་གཏོར་མ་བྱིན་ནས་ལྷ་རྣམས་ཚིམ་པར་བྱ་བའི་ཕྱིར། སྦྱིན་སྲེག་ཀྱང་བྱས་ནས་དཀྱིལ་འཁོར་གྱི་སར་ཞུགས་ཏེ། སྔ་མ་བཞིན་དུ་རྡོ་རྗེ་ལྕེ་བསམས་ལ། ཨོཾ་པདྨ་ས་ར་སྭ་སྟེ། ས་ཧྱཾ་ཨ་བརྟ་ཡ་ཤོདྷ་ཡཧཱུཾ་ཧྲཱིཿརཿཧྲཱིཿཞེས་བྱ་བས་ལྕེ་བྱིན་གྱིས་བརླབས་ལ་སྤོས་སྣོད་ [254b.3]ལག་ན་ཐོགས་ཤིང་ལུས་ཐམས་ཅད་ཀྱིས་ཕྱག་བྱས་ལ། དེ་བཞིན་གཤེགས་པ་ཐམས་ཅད་ལྷག་པར་གནས་པར་བྱའོ། །ཐུགས་བརྩེ་ཕན་པའི་དགོངས་པ་ཅན། །སངས་རྒྱས་བདག་ལ་དགོངས་སུ་གསོལ། །རྡོ་རྗེ་ཅན་བདག་འདི་ཞེས་བྱ། །དཀྱིལ་འཁོར་བཟང་པོ་འདི་ [254b.4]ཞེས་བྱ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །ཡོ་བྱད་ཅི་འབྱོར་པ་ཡིས་ནི། །ནང་པར་བདག་ནི་བྲི་བར་བགྱིད། །བདག་དང་སློབ་མར་བཅས་པ་ལ། །ཐུགས་བརྩེ་ཉེ་བར་བཟུང་ནས་ནི། །ཚོགས་པ་ཐམས་ཅད་དཀྱིལ་འཁོར་དུ། །བྱིན་ [254b.5]གྱིས་རློབ་པར་མཛོད་དུ་གསོལ། །སྲས་དང་བཅས་པར་གཤེགས་ནས་ནི། །ས་གཞི་ཡོངས་སུ་གཟུང་བར་མཛོད། །དེ་ནས་སེམས་ཅན་ཐམས་ཅད་ལྷག་པར་གནས་པར་བྱ་སྟེ། དེ་ལ་དང་པོར་རེ་ཞིག་སློབ་མ་ལེགས་པར་ཁྲུས་བྱས་ཤིང་། གོས་གཙང་མ་བགོས་ཏེ་ [254b.6]ལག་ན་མེ་ཏོག་ཐོགས་པས་སློབ་དཔོན་ལ་ཕྱག་བྱས་ལ་འདི་སྐད་ཅེས་བརྗོད་པར་བྱའོ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་ [254b.7]དུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་བགྱིད། །དེ་ནས་སློབ་དཔོན་གྱིས་སློབ་མའི་གཙོ་བོ་ལ་སོགས་པ་ [255a] [255a.1]ལ་འདི་སྐད་ཅེས་བརྗོད་པར་བྱའོ། །ཁྱོད་ནི་ཚུལ་ཆེན་སྣོད་ཡིན་ཏེ། །ཁུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་ [255a.2]བཞིན་གང་དག་མ་བྱོན་དང་། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་བཞུགས་པ་དག །དེ་དག་ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་ [255a.3]སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །དེ་ལྟར་ཡང་དག་པར་འཛིན་དུ་བཅུག་ནས། སྐྱབས་སུ་འགྲོ་བ་ལ་སོགས་པ་བྱེད་ [255a.4]དུ་གཞུག་པར་བྱའོ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཡང་ཕྱག་ལ་སོགས་པ་རྒྱ་ཆེར་བྱེད་དུ་གཞུག་པར་བྱ་སྟེ། གང་ཞིག་མི་མཁྱེན་ཅུང་ཟད་མེད། ། [255a.5]འགྲོ་ལའང་རྟག་ཏུ་སྐྱབས་མཛད་པའི། །བདེ་བར་གཤེགས་དང་དམ་པའི་ཆོས། །ཚོགས་ཆེན་བཅས་ལའང་ཕྱག་འཚལ་ལོ། །འཇིག་རྟེན་སྡུག་བསྔལ་ལྡན་སྐྱོབ་ཅིང་། །དེ་ཡི་སྡུག་བསྔལ་ཉིད་གཟིར་བའི། །གཙོ་ལ་ཀུན་ནས་དད་པ་ཡིས། །དེ་ཉིད་ལ་ནི་སྐྱབས་སུ་མཆི། །ཀུན་ [255a.6]ནས་རྣམ་པ་ཐམས་ཅད་དུ། །དེང་མཉེས་པ་ལ་ངས་བྱས་ཏེ། །དེ་རྣམས་ལ་ནི་བདག་དབུལ་གྱིས། །ཁྱེད་ནི་ཀུན་དུ་བདག་བཞེས་ཤིག །སྡིག་པ་མ་ལུས་བཤགས་བགྱི་ཞིང་། །སླར་ཡང་དེ་ལྟར་ཡོང་མི་བགྱིད། །བདག་དང་གཞན་གྱིས་གང་བྱས་པའི། །དགེ་བ་ཀུན་ལ་རྗེ་ཡི་ [255a.7]རང་། །རྫོགས་སངས་དམ་ཆོས་སྟོན་པར་མཛོད། །ནམ་ཡང་མྱ་ངན་འདའ་མ་མཛད། །སེམས་ཅན་རྣམས་ནི་བདེ་མཛད་དེ། །གོ་འཕང་མཆོག་ནི་ཐོབ་པར་མཛོད། །སྐལ་ཆེན་སངས་རྒྱས་དེ་སྲས་ཀྱིས། །ཇི་ལྟར་བྱང་ཆུབ་ཐུགས་བསྐྱེད་པ། །དེ་ལྟར་བླ་མེད་བྱང་ཆུབ་ [255b] [255b.1]སེམས། །དམ་པ་བདག་གིས་བསྐྱེད་པར་བགྱི། །བདག་ནི་ཐམས་ཅད་མཁྱེན་གྱུར་ནས། །ཀུན་གྱི་དབང་ཕྱུག་གནས་འདུག་སྟེ། །སྲིད་པའི་རྒྱ་མཚོ་མཐའ་མེད་དེ། །འགྲོ་བ་ཐམས་ཅད་བསྒྲལ་བར་བགྱི། །སངས་རྒྱས་ཐོབ་པའི་རྒྱུ་ལ་ཡང་། །ཅི་ཡོད་སྟོབས་ཀྱིས་ [255b.2]འཇུག་བགྱི་ཞིང་། །དེར་ཞེན་དེ་བཞིན་བརྟན་པ་ཡིས། །སྨོན་ལམ་འདི་ནི་བདག་བགྱིད་དོ། །དེ་བཞིན་སྐྱེ་བ་ཐམས་ཅད་དུ། །དེ་ཡི་ཐབས་ལ་བརྩོན་པ་དང་། །ཉེས་བྲལ་ཡོན་ཏན་ལྡན་པ་སྟེ། །དབང་ཕྱུག་ཕུན་ཚོགས་ཀུན་ཐོབ་ཤོག །བདག་གིས་དགེ་བ་གང་བགྱིས་དང་། །གང་ [255b.3]ཡང་བགྱིད་དུ་སྩལ་བ་ཡང་།། །དེས་ནི་བདག་དང་འགྲོ་བ་ཀུན། །བདེ་གཤེགས་གོ་འཕང་འགྲུབ་པར་ཤོག །དེ་ནས་སློབ་དཔོན་གྱིས་ཡི་གེ་ཧཱུཾ་བཟླས་པའི་སྤོས་སྙིང་གར་གཏོར་ལ། དེ་ཉིད་ཀྱིས་སློབ་མ་ལ་རྡོ་རྗེ་དང་བཅས་པའི་ལག་པ་གཡས་པ་སྙིང་གར་གཏུགས་ཏེ། རྡོ་རྗེ་ [255b.4]རྩེ་ལྔ་པ་བསམ་པ་དང་། སྤྱི་བོར་ཡང་སྣ་ཚོགས་རྡོ་རྗེ་རྣམ་པར་བསམ་པར་བྱའོ། །དེ་ནས་ཧཱུཾ་གིས་སྤྱི་བོར་མེ་ཏོག་སྦྱིན་ཞིང་། བདུག་སྤོས་ཀྱིས་བདུག་པ་དང་། མར་མེའི་སྣང་བ་ཡང་བྱས་ལ། དེ་ཉིད་ཀྱིས་ཡོངས་སུ་བཟླས་པའི་ཨུ་དུམླཱ་ར་དང་། ཨ་ཤྭཏྠ་སོར་བཅུ་ [255b.5]གཉིས་པ་རྨ་མེད་པ། སྤོས་ཆུས་བཀྲུས་པ། རྩེ་མོ་མེ་ཏོག་གི་ཕྲེང་བས་བཅིངས་པའི་སོ་ཤིང་། སློབ་མ་ཐལ་མོ་སྦྱར་ཞིང་ཁ་བྱང་དུ་བལྟས་པ་ལ་སྦྱིན་པར་བྱའོ། །དེས་ཀྱང་བའི་ཀོ་བ་ཙམ་གྱི་དཀྱིལ་འཁོར་གྱི་དབུས་སུ་འདུག་ལ། ཤར་དུ་བལྟས་ནས་རྩེ་མོ་ནས་བཅའ་སྟེ། མི་ [255b.6]དགོས་པར་མདུན་དུ་ལྟོས་པ་མེད་པར་དོར་བར་བྱའོ། །དེ་ལ་བདག་ལ་བལྟས་ཏེ་ལྷུང་ན་བགེགས་མེད་པར་ཐམས་ཅད་འགྲུབ་པར་འགྱུར་རོ། །གལ་ཏེ་ཁ་གྱེན་དུ་བལྟས་པས་ལྷུང་ན། རིག་འཛིན་གྲུབ་པར་འགྱུར་རོ། །ཁ་ཐུར་དུ་བལྟས་ཏེ་ལྷུང་བས་ནི། ས་འོག་གི་དངོས་གྲུབ་ [255b.7]བོ། །སྐོར་ཕྱོགས་ཀྱི་རིམ་གྱིས་ཤར་ལ་སོགས་པར་ཁ་བལྟས་ཏེ་ལྷུང་ན་ནི་རྒྱས་པ་དང་། མངོན་སྤྱོད་དང་། དབང་དང་། ཞི་བ་འགྲུབ་པར་འགྱུར་རོ། །དཀྱིལ་འཁོར་གྱི་ཕྱི་རིམ་དུ་ལྷུང་ན་ནི། དངོས་གྲུབ་མེད་དོ། །དེ་ནས་ཡི་གེ་བཾ་ལས་བྱུང་ཞིང་དེ་ཉིད་བཟླས་པའི་ཆུས་ [256a] [256a.1]འཐུང་བྱ་བའི་ཕྱིར་བྱིན་ལ། ཨོཾ་ཧྲཱིཿབི་ཤུདྡྷ་དྡྷརྨྨཱཿསརྦྦ་པཱ་པ་ནིཤྩ་ཨ་སྱ་བི་ཤོདྷྱ། སརྦྦ་བི་ཀལྤ་ཨ་པ་ན་ཡ་ཧཱུཾ་ཞེས་བཟླས་པའི་སྤོས་ཆུའི་ཁྱོར་ཆུ་གསུམ་འཐུང་དུ་བཅུག་ལ། ཡི་གེ་ཧྲཱིཿལས་བསྐྱེད་ཅིང་དེ་ཉིད་བཟླས་པའི་ཀུ་ཤ་གསར་ཞིང་མ་འཁྲུགས་པ་གཅིག་ [256a.2]སྔས་སུ་སྦྱིན་པ་དང་། ཀུ་ཤ་གཉིས་པ་ཧཾ་གི་ས་བོན་ལས་བསྐྱེད་ཅིང་། དེ་ཉིད་བཟླས་པ་སྟན་ཀྱི་ཕྱིར་སྦྱིན་པར་བྱའོ། །དེ་ནས་ཡི་གེ་ཧཱུཾ་མངོན་པར་བཟླས་ཤིང་། ཡི་གེ་བརྒྱ་པས་བརྟན་པར་བྱས་པའི་སྲིད་བུ་གསུམ་སྒྲིལ་མདུད་པ་གསུམ་དང་ལྡན་པས་དེ་རྣམས་ཀྱི་དཔུང་པ་ [256a.3]གཡས་པར་རང་ཉིད་བཅིངས་ལ། རྡོ་རྗེ་གོ་ཆས་ཡང་དག་པར་བསྲུངས་ཏེ། ཆོས་བཤད་པས་གཟེངས་བསྟོད་པར་བྱའོ། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་ [256a.4]པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ནི། །རང་བྱུང་སྐལ་བ་ཆེན་པོ་པ། །འཇིག་ [256a.5]རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཡོད་དང་མེད་ལས་རྣམ་པར་འདས། །ནམ་མཁའ་བཞིན་དུ་དྲི་མ་མེད། །ཟབ་མོ་རྟོག་གེ་ཐམས་ཅད་ཀྱི། །རབ་ཏུ་མི་རྟོག་གནས་མེད་པ། །སྤྲོས་པ་ཀུན་དང་བྲལ་བ་སྟེ། །སྤྲོས་པ་རྣམས་ཀྱིས་མ་སྤྲོས་ [256a.6]པ། །ལས་དང་བྱ་བ་ལ་སོགས་བྲལ། །བདེན་པ་གཉིས་ལ་གནས་པ་ཡི། །ཐེག་པ་རབ་ཀྱི་མཆོག་འདི་ནི། །ཚུལ་ལ་གནས་ན་ཐོབ་པར་འགྱུར། །བཞིན་བཟངས་ལོངས་ཤིག །ནང་པར་འཇམ་དཔལ་རྡོ་རྗེའི་བཀའ་དྲིན་གྱིས། དཀྱིལ་འཁོར་ཆེན་པོ་མཐོང་བར་འགྱུར་གྱིས། [256a.7]ཇི་ལྟར་མཐོང་བའི་རྨི་ལམ་རྣམས་ཀྱང་སྨྲོས་ཤིག་ཅེས་བརྗོད་ལ་གཏང་བར་བྱའོ། །དེ་ནས་དཀྱིལ་འཁོར་གྱི་གནས་སུ་ཞུགས་ཏེ། དཀྱིལ་འཁོར་གྱི་འཁོར་ལོ་ཕྱི་དང་གསང་བའི་མཆོད་པ་རྣམས་ཀྱིས་མཆོད་པ་སྔོན་དུ་འགྲོ་བས། དཀྱིལ་འཁོར་པ་དེ་རྣམས་ཐམས་ཅད་སྔ་མ་ [256b] [256b.1]བཞིན་དུ་བཏེག་སྟེ། གཞལ་ཡས་ཁང་ཤེལ་ལྟར་དང་ཞིང་དྲི་མ་མེད་པའི་དབུས་སུ་བཞག་ལ། སྟེང་དང་འོག་ཏུ་གནས་པའི་ཡི་གེ་བཾ་དང་ཧཱུཾ་གི་བར་དུ་ཆུད་པར་བྱས་ནས། ཨོཾ་གཉིས་ལས་བསྐྱེད་པའི་ཁ་སྦྱར་གྱི་ནང་དུ་ཆུད་པར་བསྒོམ་པར་བྱ་བའམ་རྡོ་རྗེའི་ལམ་ནས་རང་གི་སྙིང་གའི་ [256b.2]རྡོ་རྗེའི་ལྟེ་བའི་དབུས་སུ་གནས་པར་བྱས་ལ། དཀྱིལ་འཁོར་གྱི་སའི་མཐར་སློབ་མའི་གཙོ་བོ་དང་ལྷན་ཅིག་ཡིད་བསམ་གཏན་ལ་མཉམ་པར་གཞག་པས་སེང་གེའི་ཉལ་སྟབས་སུ་ཉལ་བར་བྱའོ། །ཞག་གཉིས་པ་ལ་ལྷག་པར་གནས་པའི་ཆོ་གའོ། །དེ་ལས་གཞན་པའི་ [256b.3]ཉི་མ་གསུམ་པ་ལ་རྨི་ལམ་ངན་པ་ལ་སྦྱིན་སྲེག་བརྒྱ་རྩ་བརྒྱད་དམ། སྤྱན་ལ་སོགས་པའི་སྔགས་སྟོང་རྩ་བརྒྱད་བཟླས་པས་ཞི་བར་བྱའོ། །ཡང་ན་ཆོས་ཐམས་ཅད་རྨི་ལམ་ལྟ་བུའོ་ཞེས་ལྷག་པར་མོས་པར་བྱས་ལ། ལས་ཐམས་ཅད་པའི་བུམ་པ་ཡང་འཇུག་པའི་སྒོར་ [256b.4]མངོན་པར་ཕྱོགས་པར་བསང་གཏོར་གྱི་དོན་དུ་གཞག་སྟེ། དཀྱིལ་འཁོར་བྲི་བ་བརྩམ་པར་བྱའོ། །དཔལ་འཇམ་པའི་རྡོ་རྗེའི་རྣལ་འབྱོར་པས་སྔོན་པོ་དང་། དམར་པོ་དང་། དཀར་པོ་དང་། ལྗང་གུ་དང་། སེར་པོའི་ཚོན་རྩི་དྲི་ཞིམ་པོས་ཡུངས་ཀར་གྱི་ཕྱེ་མ་དང་བསྲེས་པས། [256b.5]སོ་སོར་ཁ་བསྒྱུར་བའི་སྲད་བུ་རིམ་པ་ཉིད་ཀྱིས་བཞག་ལ། ཧཱུཾ་ཏྲཱཾ་ཧྲཱིཿཨི། ཞེས་བྱ་བའི་ས་བོན་གྱིས་མི་བསྐྱོད་པ་ལ་སོགས་པ་སྲད་བུ་རྣམས་ལ་བཀོད་དེ། ས་བོན་དེ་རྣམས་ཉིད་ཀྱིས་རང་གི་ཕྱོགས་ན་བཞུགས་པའི་དེ་བཞིན་གཤེགས་པ་རྣམས་ཀྱི་ཐུགས་ཀར་རང་རང་གི་ཁ་དོག་ [256b.6]ཇི་ལྟ་བུའི་འོད་ཀྱི་སྲད་བུར་གནས་པར་བསམས་ལ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་དཀྱིལ་འཁོར་ཆེན་པོའི་ཐིག་གདབ་པའི་ཕྱིར། རྡོ་རྗེའི་ཐིག་བདག་ལ་སྩལ་དུ་གསོལ་ཞེས་མི་བསྐྱོད་པ་ལ་སོགས་པ་ལ་ཡང་དག་པར་བསྐུལ་ལ། ཨོཾ་དཱིཔྟ་དྲྀཥྚི་ཨཾ་ [256b.7]ཀུ་ཤ་ཛཿཞེས་བྱ་བ་མིག་ཏུ་བཀོད་ནས། རབ་ཏུ་གཡོ་བར་བྱེད་པའི་མིག །མིག་གི་རྫི་མ་འདྲེན་པར་བྱེད་པའི་ལྟ་བས་འོད་ཀྱི་སྲད་བུ་མི་བསྐྱོད་པ་ལ་སོགས་པའི་ཐུགས་ཀ་ནས། དེ་རྣམས་ཉིད་བཏང་སྟེ་དྲངས་ནས་དེ་རྣམས་ཀྱིས། རང་གི་ལག་ན་གནས་པའི་སྲད་བུ་ལ་ཀུན་དུ་ [257a] [257a.1]བཀང་ལ། ཨ་ནྱོ་ནྱ་ཨ་ནུ་ག་ཏ་སརྦྦ་དྷརྨྨ་པ་ར་སྤ་ར་ཨ་ནུ་པྲ་བིཥྚ་སརྦྦ་དྷརྨྨ་ཨ་ཏྱན་ཏ་ཨ་ནུ་པྲ་བིཥྚ་སརྦྦ་དྷརྨྨ་ཞེས་བྱ་བ་དང་ཡི་གེ་ཧཱུཾ་བརྗོད་ལ་བསྒྲིལ་ཏེ། མ་དང་ཊ་གཉིས་ལས་ཉི་མ་དང་། ཟླ་བ་གཉིས་སུ་བསྐྱེད་ལ། བཛྲ་དྲྀཥྚི་མ་ཊ་ཞེས་བྱ་བས་བརྟན་པར་བྱས་ནས། [257a.2]དྲི་དཀར་པོའི་ཆུ་དང་ལྡན་པའི་གསེར་ལ་སོགས་པའི་སྣོད་ཀྱི་ནང་དུ་སྲད་བུ་དེ་བཞག་ལ། དྲི་དང་། མེ་ཏོག་དང་། སྤོས་ལ་སོགས་པས་ཀྱང་མཆོད་དོ། །ཨོཾ་བཛྲ་ས་མ་ཡ་སཱུ་ཏྲཾ་མ་ཏི་ཀྲ་མ་ཧཱུཾ་ཞེས་བྱ་བ་རྡོ་རྗེ་ཁུ་ཚུར་གྱིས་བཟུང་ལ། ལན་བརྒྱ་རྩ་བརྒྱད་བཟླ་བར་བྱའོ། །དེ་ནས་ཡི་གེ་ཧཱུཾ་དང་། [257a.3]དཀྱིལ་འཁོར་བའི་ལྷ་ཐམས་ཅད་ཀྱི་སྔགས་ཀྱང་བཟླ་བར་བྱའོ། །དེ་ནས་ཡང་དཀྱིལ་འཁོར་པའི་ས་གཞི་དྲིས་ཉེ་བར་བྱུགས་ལ། མེ་ཏོག་གི་སིལ་མ་གཏོར་ཏེ། དེ་ནམ་མཁའ་ལ་བཞུགས་པའི་བཅོམ་ལྡན་འདས་འཇམ་པའི་རྡོ་རྗེ་འཁོར་དང་བཅས་པ་མངོན་པར་དམིགས་ལ། [257a.4]མཆོད་ཡོན་དབུལ་བ་སྔོན་དུ་འགྲོ་བའི་དྲི་ལ་སོགས་པ་དང་། སྒེག་མོ་ལ་སོགས་པས་ཡང་དག་པར་མཆོད་དེ། ཕྱག་བྱས་ནས་རང་ཉིད་དེའི་སྦྱོར་བ་དང་ལྡན་པས། རང་གི་སྙིང་ག་ནས་སྒྲུབ་པའི་གྲོགས་མཆོག་བདུད་རྩི་ཐབ་སྦྱོར་གྱི་གཟུགས་སུ་སྤྲུལ་ལ། མིག་གཡས་ [257a.5]དང་གཡོན་དུ་ཛཿལས་བྱུང་བའི་ཟླ་བ་དང་། ཉི་མ་སེར་པོར་སྣང་བ་བསམས། ཡི་གེ་ཧཱུཾ་བཟླས་པའི་ཡུངས་ཀར་དཀར་པོ་དང་། དྲི་དཀར་པོའི་ཆུས་སྦངས་ཏེ། ཆུར་དཀྱིལ་འཁོར་ཉིས་འགྱུར་ལ་སྦོམས་སུ་སྒོའི་ཉི་ཤུའི་ཆའི་སྲད་བུ་དེ། གཡོན་པའི་རྡོ་རྗེ་ཁུ་ཚུར་གྱིས་བཟུང་ནས། [257a.6]ལྟེ་བར་འཛིན་ཅིང་ཡི་གེ་ཛཿཐིག་དེ་སྒྲུབ་པའི་གྲོགས་པོའི་ལག་ཏུ་ཨོཾ་ཛཿཛཿཞེས་བྱ་བས་བཏང་ངོ་། །སྒྲུབ་པའི་གྲོགས་ཀྱིས་ཀྱང་རྡོ་རྗེ་ཁུ་ཚུར་གྱིས་བཟུང་ལ། ཛཿཛཿཛཿཞེས་བྱ་བས་དྲངས་ནས་དེ་བཞིན་དུ་སྔོན་དུ་ཕྱོགས་པར་གནས་པར་བྱའོ། །དེ་ལ་ཕྱོགས་ཐམས་ཅད་ [257a.7]མཉམ་པ་ཉིད་དུ་དམིགས་ཏེ། སློབ་དཔོན་ཤར་དང་བྱང་དུ་བལྟས་ལ། ནུབ་དང་ལྷོར་འདུག་སྟེ། ཚངས་པའི་ཐིག་གཉིས་གདབ་པར་བྱའོ། །དཀྱིལ་འཁོར་ཐིག་གདབ་པ་ན། དང་པོར་རྡོ་རྗེ་དང་ཁུ་ཚུར་ཀྱིས་སྲད་བུ་དེ་བཟུང་ལ། ཕྱིས་ནི་ཅི་བདེ་བར་ཐིག་གདབ་པར་བཤད་ [257b] [257b.1]དོ། །མཚན་མ་མེད་པས་དངོས་མི་འགྲུབ། །སྲད་བུ་ཆད་ན་བླ་མ་འཆི། །རིང་ཐུང་ཁྱེར་ན་ན་བར་འགྱུར། །ཕྱོགས་འཁྲུལ་སློབ་མ་མྱོས་པར་འགྱུར། །སློབ་དཔོན་མེ་དང་རླུང་གི་ཕྱོགས་སུ་འདུག་སྟེ། གནོད་སྦྱིན་དང་། ཡི་དྭགས་དང་། ལྷ་དང་ཀླུའི་ཕྱོགས་སུ་མངོན་པར་བལྟས་ [257b.2]ལ། ཤར་དང་། ནུབ་དང་། བྱང་དང་། ལྷོར་ཐིག་གདབ་བོ། །ཡང་མེའི་ཕྱོགས་སུ་གནས་ཏེ། རླུང་གི་མཚམས་དང་། བདེན་བྲལ་གྱི་ཕྱོགས་སུ་གནས་ཏེ། དབང་ལྡན་གྱི་མཚམས་ཀྱི་བར་དུ་སྲད་བུ་བརྐྱང་བར་བྱ་བ་དང་། ཤར་དང་། ནུབ་དང་། བྱང་དང་། ལྷོ་དང་། ཕྱོགས་བཞིར་ [257b.3]ཐིག་བཏབ་པས། དཀྱིལ་འཁོར་བརྒྱད་དུ་ཡང་རིམ་པ་འདི་ཉིད་ཀྱིས་འགྱུར་རོ། །ཨོཾ་བཛྲ་ས་མ་ཡ་སྲུ་ཏྲཾ། མ་ཏི་ཀྲ་མ་ཧཱུཾ་ཞེས་བཟླ་བར་བྱའོ། །ཐིག་གདབ་པའི་སྒྲས་ཀྱང་ནམ་མཁའ་ཁྱབ་པའི་དེ་བཞིན་གཤེགས་པ་རྣམས་ལ་ཁྱེད་ཀྱིས་སེམས་ཅན་གྱི་དོན་མཛད་པའི་དུས་ལགས་ [257b.4]པས། འདིར་གཤེགས་སུ་གསོལ་ཞེས་བསྐུལ་བར་བྱའོ། །ཁྲུ་སྟོང་གི་ཚད་ནས་ཉེ་བར་བཟུང་སྟེ། ཁྲུ་གང་གི་བར་དུ་དཀྱིལ་འཁོར་ཐིག་གདབ་པར་བྱའོ། །སློབ་དཔོན་དང་སྒྲུབ་པའི་གྲོགས་མཆོག་ཐམས་ཅད་དུ་ཡང་གཡས་ནས་བསྐོར་ཏེ་འགྲོ་བར་བྱའོ། །གྲུ་བཞིར་བགྱི་ཞིང་སྒོ་བཞི་ [257b.5]དང་། །རྟ་བབས་བཞིས་ནི་མཛེས་བགྱིས་པ། །ཐིག་བཞི་དང་ནི་ལྡན་གྱུར་པ། །དར་དང་མེ་ཏོག་ཕྲེང་བས་བརྒྱན། །གྲྭ་ཡི་ཕྱོགས་ནི་ཐམས་ཅད་དང་། །སྒོ་ཁྱུད་ཀྱི་ནི་ནང་རྣམས་སུ། །རྡོ་རྗེ་རིན་ཆེན་སྤྲས་པར་ནི། །དཀྱིལ་འཁོར་ཕྱི་རིམ་ཐིག་གདབ་བོ། །དེ་ཡི་རིམ་པའི་ནང་ཞུགས་ [257b.6]ལ། །དེ་ཉིད་དེ་དང་འདྲ་བ་ལ། །ཕྱི་ཡི་འཁོར་ལོ་ཕྱེད་ཀྱི་ཚད། །ཐམས་ཅད་དེ་འདྲ་རྟ་བབས་མེད། །རིམ་པ་ནང་པར་ཞུགས་ནས་ནི། །དེ་ཡི་ཕྱེད་ཀྱིས་གསུམ་པ་ནི། །རྡོ་རྗེ་ཐིག་གིས་ཡོངས་སུ་བསྐོར། །ཀ་བ་བརྒྱད་ཀྱིས་མཛེས་བགྱིས་པ། །རྡོ་རྗེ་ཀ་བའི་ནང་ལོགས་སུ། །ཟླ་བའི་ [257b.7]དཀྱིལ་འཁོར་ལྔ་ཡིས་བརྒྱན། །དེ་ནས་ཧྲཱི་དང་ཁྲོ་ལྟ་བས། །སྒོ་ནི་རྣམ་པར་དབྱེ་བར་བྱ། །སྒོ་ནི་འཁོར་ལོའི་བརྒྱད་ཆ་སྟེ། །ཁ་ཁྱེར་མེད་པ་དག་ཏུ་འདོད། །སྒོ་ཁྱུད་སྒོ་ཡི་ཚད་དུ་སྟེ། །ལྷ་ཡི་སྣམ་བུའང་དེ་དང་འདྲ། །ཁ་ཁྱེར་ཀུན་དུ་སྒོ་ཡི་ཕྱེད། །སྒོ་འགྲམ་སྒོ་ལོགས་དེ་ [258a] [258a.1]བཞིན་ཏེ། །དྲ་བ་དྲ་ཕྱེད་ཉི་ཟླ་དང་། །དར་དང་མེ་ཏོག་ཕྲེང་སྣམ་བུ། །ཚོན་གྱི་ས་ནི་དེ་ཡི་ཕྱེད། །རྩ་བའི་ཐིག་སའི་ཕྱི་རོལ་དུ། །རྡོ་རྗེ་ལ་སོགས་ཀ་བའི་ཐིག །ས་ནི་ཚོན་གྱེ་ས་དང་མཉམ། །སྒོ་ལས་སྒོ་ཁྱུད་སུམ་འགྱུར་ཏེ། །བ་དན་དྲིལ་བུ་རྣམས་དང་ལྡན། ། [258a.2]དྲིལ་གདགས་རླུང་གིས་བསྐྱོད་པ་ཡི། །བ་དན་ཆུ་ཡི་མཚམས་སུ་བྱ། །གཞན་རྣམས་འཁོར་ལོའི་རྗེས་མཐུན་པར། །ཇི་ལྟར་མཛེས་པར་རབ་ཏུ་བརྟག །གལ་ཏེ་ཐིག་འདེབས་འོས་པ་ནི། །འགའ་ཡང་མེད་ན་དེ་ཚེ་རང་། །ཕུར་བུས་བརྟོད་པས་གྲོགས་མེད་པར། །དེ་བཞིན་ [258a.3]ཐིག་ནི་གདབ་པར་བྱ། །དེ་ནས་དཀྱིལ་འཁོར་གྱི་ལྟེ་བར་སྔ་མ་བཞིན་དུ། སྟེང་དང་འོག་ཏུ་རྩེ་མོ་ལྔ་པ་དང་། གཅིག་པའི་རྡོ་རྗེ་ལྟ་བུའི་ཕུར་བུས་བཏབ་ལ། དེ་ལ་བཏགས་པའི་སྲད་བུ་ཉི་རིམ་གྱི་ནང་དང་ཕྱིའི་དཀྱིལ་འཁོར་གྱི་རྒྱབ་ཏུ་རྡོ་རྗེའི་ཐིག་དང་། འོད་ཀྱི་དཀྱིལ་འཁོར་གྱི་ [258a.4]འཁོར་ལོ་དབང་ལྡན་གྱི་ཕྱོགས་ནས་བརྩམས་ཏེ། གཡས་ཕྱོགས་སུ་ཐིག་བཏབ་ནས་ཡེ་ཤེས་ཀྱི་ཐིག་གཤེགས་སུ་གསོལ་བར་བྱའོ། །དེ་ནས་ཡཾ་རཾ་བཾ་ཧཾ་ལཾ་གྱི་ས་བོན་ལས་རིམ་གྱིས་བསྐྱེད་པ་སྲད་བུ་བཤད་པའི་ཁ་དོག་གི་རིམ་པའི་སྔོན་པོ་ལ་སོགས་པའི་ཚོན་རིན་པོ་ཆེ་ལས་ [258a.5]བྱུང་བའམ། ལྕགས་ལྔ་ལས་བྱས་པའམ། ཁམས་ལས་བྱུང་བའམ། ཡང་ན་སཱ་ལུ་ལས་བྱུང་བའམ།དམར་པོ་ནི་སོ་ཕག་ལས། ནག་པོ་ནི་སོལ་བ་ལས་བྱས་པ་བཟང་པོ་ལ། ཧཱུཾ་ཏྲཱཾ་ཨཱཿཁཾ་ཨོཾ་ཞེས་བྱ་བ་ལས་བསྐྱེད་པ་ཕྱག་རྒྱ་མ་ལུས་པའི་གཟུགས་ཅན་ལ། ཨོཾ་བཛྲ་ [258a.6]ཙི་ཏྲ་ས་མ་ཡ་ཧཱུཾ་ཞེས་བརྗོད་ལ། རྡོ་རྗེའི་ཕྱག་རྒྱ་གཉི་ག་ཡི། །མཛུབ་མོ་རྩེ་མོ་རབ་སྤྱོར་བ། །བྱས་ནས་ཚོན་རྩི་ཐམས་ཅད་ལ། །འབར་བའི་ལྟ་བས་དགུག་པར་བྱ། །ཞེས་བྱ་བའི་སྔགས་དང་ཕྱག་རྒྱར་བཅས་པས་བརྒྱ་རྩ་བརྒྱད་བཟླས་མཐར་ཡི་གེ་ཧྲི་བཀོད་དེ། ཚོན་མེད་པོ་ལ་ [258a.7]བདེན་པ་གང་གིས་སངས་རྒྱས་དང་བྱང་ཆུབ་སེམས་དཔའ་རྣམས་སེམས་ཅན་ཐམས་ཅད་ལ་ཆགས་པས་ཆགས་པར་མཛད་པའི་བདེན་པ་དེས་ཚོན་རྩི་འབར་བར་གྱུར་ཅིག་ཅེས་བྱས་ནས་སྦར་བར་བྱའོ། །དེ་ནས་ལྟེ་བར་གནས་པའི་ཕུར་བུ་ཡི་གེ་ཧཱུཾ་གིས་ཕྱུང་ལ། རང་ [258b] [258b.1]གི་ལག་ན་གནས་པའི་རྡོ་རྗེ་བློས་ནང་དུ་ཆུད་པར་བྱས་ནས་ཕུར་བུའི་བུ་ག་ཚོན་རྩི་ལྔས་བཀང་ལ། བླ་ན་མེད་པའི་ཤེས་རབ་ཀྱི་དྲིལ་བུའི་སྒྲ་དང་། རྡོ་རྗེ་གླུ་རྣམས་ཀྱིས་མཚན་མ་ངན་པ་བསལ་ནས། འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་གྲོལ་བྱེད་པ། ། [258b.2]འཇམ་དབྱངས་རྒྱལ་པོ་རང་ཉིད་དེ། །དེ་བཞིན་གཤེགས་པ་ཀུན་གྱི་གནས། །ཞེས་མོས་པར་བྱས་ལ། དང་པོ་གཡོན་པའི་རྡོ་རྗེའི་ཁུ་ཚུར་གྱིས་ནང་དུ་གནས་ནས། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བརྗོད་ལ་དབང་ལྡན་གྱི་ཕྱོགས་ནས་བརྩམས་ཏེ། གཡས་ནས་བསྐོར་ཞིང་ཚོན་ [258b.3]རྩི་དགྱེ་བར་བྱ་སྟེ། ཕྱིས་ནི་ཅི་བདེར་བྱའོ། །དང་པོར་སློབ་དཔོན་གྱིས་བཀྱེ་ལ། །ཕྱིས་ནི་སྒྲུབ་པའི་གྲོགས་པོས་ཏེ། །འདབ་མ་འབྱོར་པ་དང་བཅས་པ་དང་། གཡས་ཕྱོགས་ནས་སྤོམ་ཕྲ་རན་པར་དགྱེ་བར་བྱ་ཞིང་རི་མོ་སྒོའི་ཉི་ཤུ་ཆར་བྱའོ། །སྦོམ་པོར་དགྱེ་བས་ནད་ཀྱིས་ [258b.4]འདེབས། །ཕྲ་མོས་ནོར་ནི་རྣམ་པར་འཇིག །ཡོན་པོས་རྣམ་འགྲས་ཆད་པ་ཡིས། །བླ་མ་དང་ནི་སློབ་མ་འཆི། །གཡས་སྐོར་མིན་པར་དགྱེ་བ་ཡིས། །ཚོན་ནི་ཕུར་བུས་བཏབ་པར་འགྱུར། །སྔོན་པོ་རིན་ཆེན་རྩེ་རང་བཞིན། །དེ་བཞིན་པདྨ་རཱ་གའི་དངོས། །དེ་ལས་གཞན་པ་ཁ་ [258b.5]དོག་དཀར། །མརྒད་འཆར་བ་ལྟ་བུ་གཞན། །སེར་པོ་ནང་དུ་ཤེས་བྱ་སྟེ། །འདི་ནི་ཚོན་གྱི་རིམ་པར་བཤད། །ཤར་ཕྱོགས་སུ་ནི་སྔོན་པོ་ཆེ། །ལྷོར་ནི་དམར་པོས་ཡང་དག་ལྡན། །ཟླ་བ་ལྟར་སྣང་ནུབ་ཀྱི་ཆ། །བྱང་ནི་ལྗང་གུར་ཡང་དག་ལྡན། །དབུས་མ་ཡི་ནི་ས་ [258b.6]ཡི་ཆར། །གསེར་ལྟར་སྣང་བ་བླ་ན་མེད། །རྡོ་རྗེ་དྲིལ་བུ་རྟག་འཆང་ཞིང་། །ལེགས་མཉམ་བཞག་སྟེ་ཡང་དག་བྲི། །ཚོན་ཀྱི་རི་མོ་རྣམས་ཀྱང་ནས་གང་ཙམ་གྱིས་ཕན་ཚུན་མ་འབྱར་བར་དགྱེ་བར་བྱའོ། །དེ་ལ་ཕྱིའི་དཀྱིལ་འཁོར་དུ་ནི་སྔོན་པོ་དང་། དམར་པོ་དང་། དཀར་པོ་ [258b.7]དང་། ལྗང་གུ་དང་། ཚོན་སེར་པོ་རྣམས་ཀྱིས་ར་བ་རྣམ་པ་ལྔ་བྱའོ། །གཉིས་པ་ནི་སྔོན་པོ་དང་། དཀར་པོ་དང་། སེར་པོས་སོ། །འཁོར་ལོ་གསུམ་པར་ནི་དཀར་པོའི་རི་མོ་དགྱེ་བར་བྱའོ། །དེ་ནས་རྡོ་རྗེ་ཤུགས་ཀྱིས་ནང་དུ་ཞུགས་ལ། ཨོཾ་བཛྲ་བེེ་ག་ཨ་ཀྲམ་ཧཱུཾ། འདིའི་ཕྱག་རྒྱ་ནི། [259a] [259a.1]ཡིད་ཀྱིས་རི་མོ་བཏེག་ནས་ནི། །རྡོ་རྗེ་སྲད་བུའམ་གཞན་ཡང་རུང་། །ཕྱིར་བྱུང་ནང་དུ་ཞུགས་ཀྱང་ནི། །དམ་ཚིག་འགལ་བར་དེ་མི་འགྱུར། །ཞེས་བྱ་བ་དང་། ཇི་ལྟ་བ་བཞིན་དུ་དམ་ཚིག་གི་ཕྱག་རྒྱ་དང་། ཛཿཧཱུཾ་བཾ་ཧོཿཞེས་བརྗོད་དེ། ཡིད་ཀྱིས་ཁ་སྦྱར་བྱེ་ལ། ནམ་ [259a.2]མཁའ་ལ་བཞུགས་པ་དང་གཅིག་ཏུ་བྱས་ནས། རང་གི་སྙིང་པོ་བརྗོད་དེ་དཀྱིལ་འཁོར་དབུས་མའི་ལྟེ་བར་བཅོམ་ལྡན་འདས་འཕགས་པ་འཇམ་དཔལ་སེང་གེའི་གདན་ལ་བཞུགས་པའོ། །ཤར་ལ་སོགས་པའི་རེའུ་ཆ་ལ་མི་བསྐྱོད་པ་ལ་སོགས་པའོ། །དཀྱིལ་འཁོར་གྱི་དབང་ [259a.3]ལྡན་ལ་སོགས་པའི་མཚམས་རྣམས་སུ་ནི་སྤྱན་ལ་སོགས་པའོ། །རིམ་པ་གཉིས་པའི་ཤར་ལ་སོགས་པའི་ཕྱོགས་རྣམས་སུ་ནི་རྡོ་རྗེ་སེམས་མ་ལ་སོགས་པའོ། །བྱང་ཤར་ལ་སོགས་པའི་མཚམས་རྣམས་སུ་ནི་སྐུལ་བྱེད་མ་ལ་སོགས་པའོ། །རིམ་པ་གསུམ་པའི་ཤར་ལ་སོགས་པའི་ [259a.4]སྣམ་བུ་ལ་ནི་བྱམས་པ་ལ་སོགས་པའོ། །ཤར་ལ་སོགས་པའི་སྒོ་རྣམས་སུ་ནི་གཤིན་རྗེ་གཤེད་ལ་སོགས་པའོ། །མཚམས་རྣམས་སུ་མི་གཡོ་བ་ལ་སོགས་པ་སྟེ། དེ་དག་སྔར་བཤད་པའི་སྐུ་མདོག་དང་ཕྱག་མཚན་ལ་སོགས་པ་དང་ལྡན་པར་བྱའོ། །ཕྱིའི་མཚམས་དང་སྒོའི་ཡ་ [259a.5]ཕུབས་རྣམས་ལ་ནི། རྡོ་རྗེ་རྣམས་གཞག་པར་བྱའོ། །ཕྱོགས་བཞིར་ནི་རྟ་བབས་རིན་པོ་ཆེ་ལ་སོགས་པ་ལས་བྱས་པ། མེ་ཏོག་གི་ཕྲེང་བ་དང་དྲིལ་བུ་ལ་སོགས་པས་བརྒྱན་པར་ཡི་གེ་ཧཱུཾ་ཟློས་ཤིང་བྱའོ། །ཤར་ལ་སོགས་པའི་ཕྱོགས་ཀྱི་དཀྱིལ་འཁོར་གྱི་ཕྱི་རོལ་དུ་འཕགས་པ་ [259a.6]ཤེས་རབ་ཀྱི་ཕ་རོལ་ཏུ་ཕྱིན་པ་དང་། སྡོང་པོ་བཀོད་པ་དང་། དེ་བཞིན་གཤེགས་པའི་གསང་བ་དང་། གསེར་འོད་དམ་པའི་མདོ་བཀླག་པར་བྱའོ། །ག་ཕུར་དང་། ཨ་ཀ་རུ་དང་། ཏུ་རུ་ས་ལ་སོགས་པའི་སྤོས་སྣོད་ཕྱོགས་མཚམས་བརྒྱད་དུ་རྒྱུན་མི་འཆད་པར་འབྱུང་བར་གཞག་ [259a.7]པར་བྱའོ། །དེ་ནས་ཡི་གེ་ཧཱུཾ་བཟླས་པའམ། བདུད་རྩི་ཐབ་སྦྱོར་བཟླས་པའི་སྤོས་ཆུས་དཀྱིལ་འཁོར་གྱི་མཐའ་ཀུན་དུ་བྱུགས་ལ། དྲི་ཞིམ་པོའི་མེ་ཏོག་གི་སིལ་མ་གཏོར་ནས། དེ་ཉིད་བཟླས་པའི་སྤོས་ཆུ་ཉིད་ཀྱིས་དཀྱིལ་འཁོར་བསངས་ལ། དཀྱིལ་འཁོར་བྱིན་གྱིས་བརླབ་ [259b] [259b.1]པར་བྱ་བའི་ཕྱིར། ཡི་གེ་བརྒྱ་པ་ལན་མང་དུ་བཟླ་བར་བྱའོ། །ཁྲོ་བོ་བརྒྱད་གསུངས་པས་རྡོ་རྗེ་ས་འོག་ལ་སོགས་པ་དགོད་པ་ནི། འདིར་མེད་པ་ཁོ་ན་སྟེ། སྟེང་དང་འོག་ཏུ་དགོད་པར་བྱ་བ་ནུས་པ་ཡང་མ་ཡིན་ནོ། །དེ་འབའ་ཞིག་བརྐོ་བ་དང་ཡུ་བ་ལ་དཔྱངས་ཏེ་བྱའོ་ཞེ་ན། དེ་ཡང་ [259b.2]རིགས་པ་མ་ཡིན་ཏེ། མཚན་མ་ཙམ་ཉིད་ཡིད་ཀྱིས་དགོད་པར་བྱའི་འདི་བྲིས་པས་ཅི་ཞིག་བྱ་སྟེ། བྲི་བའི་ཆོ་ག་འདི་ཡང་ཡིད་ཀྱིས་མ་ཡིན་ཏེ། བཅོམ་ལྡན་འདས་ཀྱི་གསུང་རབ་ལ་བདག་ཅག་རྣམས་འཇུག་པ་ནི་འབྲས་བུ་དང་འདྲ་བ་ཡིན་པས། བཅོམ་ལྡན་འདས་ཀྱིས་ཀྱང་ [259b.3]བྲི་བའི་ཆོ་ག་ནི་བརྒྱད་པོ་ཉིད་དགོད་པར་རྗེས་སུ་གནང་བར་མཛད་པ་ཡིན་ལ། སྤྲོ་བ་ནི་ཡིད་ཀྱི་ཡིན་པས་བཅུ་པོ་སྤྲོ་བར་རིགས་པ་དེ་བཞིན་དུ་རྗེས་སུ་སྤྱད་པར་བྱའི་ཉེ་བར་མཚོན་པར་བཤད་པའི་ལྷག་པར་དགོས་པས་ཅི་ཞིག་དགོད། དཀྱིལ་འཁོར་དག་ནི་འདྲི་བའི་ཚེ། །གལ་ཏེ་བགེགས་ [259b.4]ནི་བྱུང་གྱུར་ན། །དེ་ལ་གཏོར་མ་སྦྱིན་ལ་སོགས། །འོག་ནས་བཤད་པས་བཟློག་པར་བྱ། །བགེགས་ནི་གཞོམ་པར་མ་ནུས་ན། །མཆོད་ཡོན་ཕུལ་ཏེ་གཤེགས་གསོལ་ལ། །ཉི་མ་གཞན་ལ་ཡོ་བྱད་རྣམས། །ལེགས་པར་བསངས་ཏེ་དཀྱིལ་འཁོར་བྲི། །དེ་ནས་ཁྲུས་ [259b.5]བྱས་ཤིང་ལུས་དྲིས་བསྒོས་པ་དང་། ཁ་དྲི་ཞིམ་པོས་བསྒོས་ལ། མེ་ཏོག་གི་ཕྲེང་བ་བཏགས་ཤིང་གོས་གཙང་ཞིང་དྲི་ཞིམ་པས་སྟོད་གཡོགས་དང་། སྨད་གཡོགས་དང་གཙུག་ཏོར་བྱས་པ་རྒྱན་ཐམས་ཅད་ཀྱིས་བརྒྱན་པ་ཁམས་གསུམ་རྣམ་པར་རྒྱལ་བའི་ང་རྒྱལ་དང་ལྡན་པས། [259b.6]ཁམས་གསུམ་རྣམ་པར་རྒྱལ་བའི་མེ་ཏོག་གི་ཕྲེང་བ་ཐོགས་ཏེ། ཧཱུཾ་བཞི་པའི་སྔགས་ཟློས་ཤིང་རྡོ་རྗེ་ཤུགས་ཀྱིས་དཀྱིལ་འཁོར་དུ་ཞུགས་ལ་དྲིལ་བུ་དཀྲོལ་ཞིང་བསྐོར་བ་ལན་གསུམ་བྱས་ལ། ལྷག་པ་དང་མ་ཚང་བའི་ཉེས་པ་ཞི་བར་བྱ་བའི་ཕྱིར། དཀྱིལ་འཁོར་བལྟས་ལ་ [259b.7]ཕྲེང་བ་དེ་བཅོམ་ལྡན་འདས་ལ་ཕུལ་ཏེ། སླར་ཡང་དེ་གར་གྱིས་སྦྱོར་བས་བླངས་ལ། རང་གི་མགོ་ལ་ཧཱུཾ་བཞིས་བཅིང་བར་བྱའོ། །དེ་བཞིན་དུ་དཀྱིལ་འཁོར་གྱི་བདག་པོའི་ང་རྒྱལ་དུ་དམིགས་ལ། སྔར་ལྷག་པར་གནས་པར་བྱས་པའི་རྣམ་པར་རྒྱལ་བའི་བུམ་པའི་ཡི་གེ་ཧཱུཾ་བཟླས་ [260a] [260a.1]ཤིང་། སྲད་བུས་མགུལ་པ་བཅིངས་ལ། ཕྱི་རོལ་དུ་རི་མོ་བྲིས་པ་རྡོ་རྗེ་ཆེན་པོས་བྱིན་གྱིས་བརླབས་པ་མེ་ཏོག་དཀར་པོ་དང་དྲི་དཀར་པོའི་ཆུས་ཡོངས་སུ་གང་བ་མེ་ཏོག་གི་ཕྲེང་བས་བཅིངས་པ་ལ་སྔ་མ་བཞིན་དུ་བདག་པོའི་སྔགས་དང་ཡི་གེ་ཧཱུཾ་བརྒྱ་རྩ་བརྒྱད་བཟླས་ [260a.2]པ། རྡོ་རྗེ་སེམས་མ་ཕྱག་རྒྱས་བཟུང་བའི་མེ་ཏོག་གི་ལྕུག་མའི་རྡོ་རྗེ་དང་བཅས་པས་བཛྲོད་ཀ་ཧཱུཾ་ཞེས་བྱ་བ་བརྒྱ་རྩ་བརྒྱད་དམ། སྟོང་རྩ་བརྒྱད་བཟླས་ཤིང་ལྷ་ཐམས་ཅད་ཀྱི་སྔགས་བདུན་བདུན་བཟླས་པ་དང་། གཉིས་པ་ལས་ཐམས་ཅད་པའི་བུམ་པ་བདུད་རྩི་ཐབ་སྦྱོར་དང་ [260a.3]ཡི་གེ་བརྒྱ་རྩ་བརྒྱད་བཟླས་ཤིང་བདུད་རྩི་ཐབ་སྤྱོར་གྱི་མཚན་མས་མཚན་པ་དང་འཇུག་པའི་སྒོར་བལྟས་པར་བཞག་ལ། ཆུ་དེས་བདག་ཉིད་དང་སློབ་མ་འཇུག་པའི་ཚེ། དབང་བསྐུར་བ་ཕྱག་རྒྱ་བཅིང་བ་དང་འཆིང་དུ་གཞུག་པར་བྱའོ། །དེ་ལས་གཞན་པའི་བུམ་པ་བཞི་ལ་སྤྱན་ལ་ [260a.4]སོགས་པ་ལྷ་མོ་བཞིའི་རང་བཞིན་དམ་ཚིག་གི་ཕྱག་རྒྱས་ཡོངས་སུ་བཟུང་བའི་མེ་ཏོག་གི་ཕྲེང་བས་སོ་སོར་བཟླས་ཤིང་། དེའི་མཚན་མས་མཚན་པར་བྱའོ། །དེ་ཡང་དེ་ལས་གཞན་པའི་བཞི་ལ་ལྷ་རྣམས་ཅད་ཀྱི་མཚན་མ་དེས་མཚན་པར་བྱའོ། །དེ་ནས་དེ་བཞིན་དུ་བདག་པོའི་ [260a.5]སྦྱོར་བ་དང་ལྡན་པ་ཉིད་དང་། ཡིད་ཀྱིས་ལེགས་སོ་ཞེས་བྱ་བའི་སྤྱོར་བས་ལྷ་ཐམས་ཅད་ཀྱི་འཁོར་ལོ་རང་གི་བདག་ཉིད་ཀྱི་ནང་དུ་ཆུད་པར་བྱས་ལ། དེའི་ང་རྒྱལ་དང་ལྡན་པས་ཏིལ་དང་ནས་དང་ཀུ་ཤ་དང་། དྲི་དཀར་པོ་དང་མེ་ཏོག་དྲི་ཞིམ་པོ་དང་། ཙནྡན་གྱི་ཆུ་དུང་ཆོས་ཀྱི་ནང་དུ་བཅུག་ [260a.6]ནས། བདག་པོའི་སྔགས་ལན་བདུན་བཟླ་བ་དང་། དྲི་ལ་སོགས་པའི་མཆོད་པ་རྣམ་པ་ལྔ་རང་གི་སྔགས་སམ་ཡི་གེ་ཧཱུཾ་ཡོངས་སུ་བཟླ་བར་བྱའོ། །དེའི་དབུས་སུ་འདུག་ནས་ནི། རྡོ་རྗེ་སློབ་དཔོན་མཉམ་གཞག་སྟེ། །རྡོ་རྗེའི་སྒོ་ནི་བཞི་པོ་དག །ཡིད་ཀྱིས་རྣམ་པར་དབྱེ་བར་བྱ། །ཨོཾ་ [260a.7]བཛྲོད་གྷ་ཊ་ས་མ་ཡ་པྲ་བེེ་ཤ་ཡ་ཧཱུཾ་ཞེས་བྱ་བ་ནི་སྒོ་དབྱེ་བའི་སྔགས་སོ། །རྡོ་རྗེ་ཁུ་ཚུར་གཉིས་མཛུབ་མོ་གཉིས་བརྐྱང་ལ་རྩེ་སྤྲད་དེ་བཟློག་ནས་གཉིས་སུ་བྱ་སྟེ། བཟླས་བརྗོད་དང་པོར་བྱས་ལ་མཚན་ཐོག་ཐག་བསྒྲུབས་ནས་འདི་དང་བཛྲོད་ཏིཥྛ་ཞེས་བྱ་བའི་སྔགས་ཀྱིས་དཀྱིལ་འཁོར་ [260b] [260b.1]གདེག་པར་བསྟན་པར་བྱའོ། །གནས་སྐབས་འདིར་དཀྱིལ་འཁོར་གདེག་པའི་ཕྱག་རྒྱ་བཤད་དེ། ཕྱག་རྒྱ་དེ་ཉིད་ལས་མཛུབ་མོ་གཉིས་ཀྱི་མཁྲིག་མ་ཕན་ཚུན་བཟུང་ལ་བཏེག་ན་མཁྲིག་མ་བཏེག་པར་འགྱུར་ཏེ། འདི་ནི་སྒོ་དབྱེ་བའི་ཕྱག་རྒྱའོ། །ཤར་ལ་སོགས་པའི་སྒོ་རྣམས་ [260b.2]ནི་ནུབ་ལ་སོགས་པར་འདུག་སྟེ། དེ་བཞིན་དུ་གཡས་བརྐྱང་བ་ལ་སོགས་པའི་གནས་པས་རིམ་གྱིས་བློས་དབྱེ་བར་བྱའོ། །དེ་ནས་རྣམ་པར་རྒྱལ་བའི་བུམ་པ་དང་། བསང་གཏོར་གྱི་བུམ་པ་གནས་ཇི་ལྟ་བ་བཞིན་དུ་གཞག་ཅིང་དེ་ལས་གཞན་པའི་བུམ་པ་རྣམས་ཕྱིའི་དཀྱིལ་ [260b.3]འཁོར་གྱི་དབང་ལྡན་ལ་སོགས་པའི་མཚམས་སུ་རིམ་བཞིན་དུ་གཞག་གོ། །དེའི་ཕྱི་རོལ་དུ་བུམ་པ་གང་བ་བཞག་ལ། ཡི་གེ་ཧཱུཾ་ཟློས་པའམ་སོ་སོའི་རང་གི་སྔགས་དང་། ཅིག་ཅར་རམ། རིམ་གྱིས་དཀྱིལ་འཁོར་པའི་ལྷའི་འཁོར་ལོ་མ་ལུས་པ་ཕྱུང་ནས། གནས་ཇི་ལྟ་ [260b.4]བ་བཞིན་དུ་ཕྱག་རྒྱའི་གཟུགས་སུ་བཅུག་ལ། ཡེ་ཤེས་སེམས་དཔའ་དེ་བཞིན་གཤེགས་པ་ལ་སོགས་པ་རྡོ་རྗེ་ཁྲོ་བོའི་ལྕགས་ཀྱུ་ལ་སོགས་པས་སྔ་མ་བཞིན་དུ་སྤྱན་དྲངས་ལ། ལྕགས་ཀྱུ་ལ་སོགས་པས་དགུག་པ་ལ་སོགས་པ་བྱ་སྟེ། བགེགས་བསལ་བ་དང་། ཕུར་བུ་ [260b.5]དང་ར་བ་ལ་སོགས་པ་བྱས་པས་གནས་བསྲུང་བ་བྱས་ལ། པདྨའི་གདན་དང་མཆོད་ཡོན་དང་ཞབས་བསིལ་ལ་སོགས་པ་ཕུལ་ནས་སྐུ་བྱིན་གྱིས་བརླབ་པ་སོགས་པའི་ཕྱག་རྒྱས་བྱིན་གྱིས་བརླབས་ཏེ། རང་གི་དམ་ཚིག་གི་ཕྱག་རྒྱ་ཉེ་བར་བསྟན་ལ་རང་གི་དབང་བསྐུར་བས་ [260b.6]དབང་བསྐུར་ཏེ། ལག་པ་གཉིས་ཀྱིས་ཁུ་ཚུར་བྱས་ལ་མཛུབ་མོ་བརྐྱང་སྟེ། མདུད་པ་བྱ་བ་ནི་རྡོ་རྗེ་བཅིང་བའི་ཕྱག་རྒྱར་འགྱུར་ཏེ། འདི་དང་བཛྲ་མཥྚི་བཾ་ཞེས་བྱ་བའི་སྔགས་འདིས་ཀྱང་དཀྱིལ་འཁོར་པའི་ལྷ་རྣམས་བཅིངས་ནས་རང་གི་ཏིང་ངེ་འཛིན་གྱི་ལས་ལ་ཞུགས་པ་ལ་སྒེག་མོ་ལ་ [260b.7]སོགས་པས་ཡང་དག་པས་མཆོད་ལ། ཡང་དྲི་ལ་སོགས་པས་མཆོད་པར་བྱའོ། །དེ་ལ་རས་ཟུང་འབུམ་མམ་སྟོང་ངམ་བརྒྱའམ་རེ་རེ་ཞིང་ཟུང་རེའམ། ཐམས་ཅད་ལ་རས་རེ་རེའམ། བླ་རེ་དང་རྒྱལ་མཚན་དང་། བདུགས་དང་། བ་དན་སྣ་ཚོགས་པའི་ཡི་གེ་ཧྲཱུཾ་དང་། བདག་ [261a] [261a.1]པོའི་སྔགས་བཟླས་པ་དང་། བཛྲ་སྤ་ར་ཎ་ཁཾ་ལས་བྱ་བ་འདིས་དབུལ་བར་བྱའོ། །དེ་བཞིན་དུ་ཨོཾ་སརྦྦ་ཏ་ཐཱ་ག་ཏ་གནྡཱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་ཞེས་བྱ་བའི་སྔགས་ཀྱིས་སྔར་སྦྱར་བའི་ག་པུར་དང་། ཨ་ཀ་རུ་དང་། ཏུ་རུ་སྐ་ལ་སོགས་པའི་དྲི་ཙནྡན་ལ་ [261a.2]སོགས་པ་དང་བསྲེས་པ་དབུལ་ལོ། །དེ་བཞིན་དུ་ཨོ་སརྦྦ་ཏ་ཐཱ་ག་ཏ་པུཥྤ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ་ཞེས་བྱ་བ་དང་། མེ་ཏོག་གི་ཤིང་བརྒྱའམ། ཤིང་བཞིའམ། མེ་ཏོག་ཐམས་ཅད་དབུལ་ལོ། །ཨོཾ་སརྦྦ་ཏ་ཐཱ་ག་ཏ་དྷཱུ་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་ཞེས་བྱ་བ་དང་ [261a.3]སྤོས་སྣོད་སྟོང་ངམ་བརྒྱ་དབུལ་བར་བྱ་སྟེ། བཅུ་ལས་ཉུང་བར་ནི་མི་བྱའོ། །ཨ་ཁར་ཞེས་བྱ་བ་ལ་སོགས་པ་དང་། སྭསྟི་ཀ་ལ་སོགས་པར་བྱ་བའི་བཟའ་བ་དང་བཅའ་བ་དང་མྱང་བ་དང་། གཞིབ་པ་དང་། བཏུང་བའི་བཤོས་ཀྱི་རྣམ་པ་སྣ་ཚོགས་པ་གྲངས་སྟོང་སྙེད་དབུལ་ལོ། །ཨོཾ་ [261a.4]སརྦ་ཏ་ཐཱ་ག་ཏ་དཱི་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་ཞེས་བྱ་བ་དང་། མར་གྱི་མར་མེ་ལ་སོགས་པ་འབུམ་ཕྲག་བརྒྱ་དང་མར་མེ་ཆེན་པོའི་སྣོད་བརྒྱའམ། མར་མེ་ཆེན་པོ་བཞི་དབུལ་ལོ། །རྡོ་རྗེ་ཁུ་ཚུར་གཉིས་ཀྱི་ལག་པའི་སོར་མོ་རྣམས་དང་། ཡི་གེ་ཧཱུཾ་འདོན་ཅིང་རོལ་མོ་བརྡུང་ [261a.5]བའི་ཚུལ་དུ་བྱེད་པ་དང་། སིལ་སྙན་སྟོང་ངམ་བརྒྱའམ། པི་ཝང་དང་། གླིང་བུ་ལ་སོགས་པ་དབུལ་བ་དང་། གར་མཁན་དང་ཟློས་གར་མཁན་གྱི་གར་དང་། གདུ་བུ་དང་། རྣ་རྒྱན་དང་། ཅོད་པན་ལ་སོགས་པ་དང་། རྟ་དང་གླང་པོ་དང་། བ་ལང་གི་ཁྱུ་ཤིན་ཏུ་བརྟགས་པ་རྣམས་ [261a.6]དབུལ་བར་བྱ་བ་དང་། རྟ་བབས་གོས་བཟང་པོ་དང་། དྲིལ་བུ་དང་བཅས་ཤིང་རྔ་ཡབ་དང་བཅས་པ་དང་། རྒྱལ་མཚན་དཀར་པོ་དང་། ལེ་བརྒན་དང་། ནག་པོ་དང་། དུད་ཀ་དང་། དམར་པོ་དང་། ཁྲ་བོ་དང་། སེར་པོ་དང་། ལྗང་གུ་སྟེ། བརྒྱད་པོ་ཤར་ལ་སོགས་པར་རིམ་པ་ [261a.7]བཞིན་ཕྱི་རོལ་དུ་བསྒྲེང་བར་བྱའོ། །གཞན་ཡང་ཡིད་ཀྱི་རང་བཞིན་གྱི་མཆོད་པའི་ཁྱད་པར་ནམ་མཁའི་གཏོས་ཐམས་ཅད་ཁྱབ་པ་རྣམས་ཀྱིས་ཀྱང་དག་པར་མཆོད་ལ་ཐལ་མོ་སྦྱར་ཏེ། བྱིན་གྱིས་བརླབས་པའི་རིག་པ་ལན་གསུམ་བརྗོད་ནས་རྡོ་རྗེ་གླུ་རྣམས་ཀྱིས་ཡང་དག་པར་ [261b] [261b.1]བསྟོད་དེ། ཕྱག་བྱས་ལ་བཟོད་པ་གསོལ་ནས་དངོས་གྲུབ་ཐམས་ཅད་ཀྱི་དོན་མཛོད་ཅིག་ཅེས་གསོལ་བ་བཏབ་ལ་སྒྲུབ་པའི་གྲོགས་པོ་དཀྱིལ་འཁོར་དུ་བཞག་སྟེ། ཕྱི་རོལ་དུ་བྱུང་བ་གཏོར་མ་བྱིན་ནས་ཉེ་རེག་བྱ་སྟེ། དཔལ་འཇམ་པའི་རྡོ་རྗེའི་སྦྱིན་སྲེག་བྱའོ། །ལག་པ་གཡས་པ་ [261b.2]བཀན་ཏེ་གུང་མོ་དང་སྲིན་ལག་ཅུང་ཟད་བཀུག་ལ་མངོན་དུ་ཕྱོགས་པར་བཞག་སྟེ། འདི་དག་མི་སྨྲ་ཞིང་ཙོག་པོར་འདུག་ལ། པུས་མོ་གཉིས་ཀྱི་བར་ནས་སོར་མོའི་རྩེས་ཁ་ལ་མང་དུ་རེག་པར་བྱས་ལ། རྣ་བའི་བུ་ག་དང་། མིག་དང་། སྣ་བུག་དང་། ཁ་དང་། དཔུང་མགོ་དང་། [261b.3]ལྟེ་བའི་ཕྱོགས་དང་། སྤྱི་བོར་ལན་གཉིས་སམ་གསུམ་རེག་པར་བྱ་བ་ནི་ཉེ་རེག་གི་ཆོ་གའོ། །དེ་ནས་བདག་པོ་ལ་ནི་བརྒྱ་རྩ་བརྒྱད། དཀྱིལ་འཁོར་པ་གཞན་རྣམས་ལ་ནི་བདུན་འོག་ནས་བཤད་པ་རྒྱས་པའི་ཆོ་གས་སྦྱིན་སྲེག་བྱའོ། །ཡང་ན་བཅོམ་ལྡན་འདས་འཇམ་པའི་དབྱངས་ [261b.4]འཁོར་ལོའི་ཚོགས་དང་བཅས་པ་ཐབ་ཀྱི་དབུས་སུ་བསམས་ལ། དེའི་ཞལ་དུ་སྦྱིན་སྲེག་བྱས་པ་ལྷ་ཐམས་ཅད་ཀྱི་ཞལ་དུ་འབབ་པར་བསམ་པར་བྱ་སྟེ། དེ་ལྟ་བུས་ནི་ཐམས་ཅད་ཚིམ་པར་བྱས་པར་འགྱུར་རོ། །དེ་ནས་དཀྱིལ་འཁོར་དུ་ཞུགས་ལ་མངོན་སུམ་བཞིན་དུ་ [261b.5]བསམས་ཏེ་མཆོད་ལ། འོག་ནས་བཤད་པའི་སློབ་མ་འཇུག་པའི་ཆོ་གས་འཇུག་པ་ལ་སོགས་པ་དང་། ཚིགས་སུ་བཅད་པ་ལྔ་པས་རྗེས་སུ་གནང་བ་དང་། གཟེངས་བསྟོད་པ་དང་། ལུང་བསྟན་པ་དང་། སྔགས་གཟུང་བའི་མཐར་ཐུག་གི་བར་དུ་བཅོམ་ལྡན་འདས་ [261b.6]དཔལ་འཇམ་པའི་རྡོ་རྗེ་ས་རྫོགས་པར་མཛད་པ་དང་། བདག་ཉིད་ཀྱིས་ཀྱང་སླར་ཕྱག་འཚལ་ཏེ། བླངས་པར་གྱུར་པར་རྫོགས་པར་བྱས་ནས་དཀྱིལ་འཁོར་དུ་སློབ་མ་གཞུག་པར་བྱ་བའི་ཕྱིར། བདེན་པའི་བྱིན་ཀྱི་རླབས་ཀྱིས་བསྒྲག་པར་བྱ་སྟེ། ཆོས་རྣམས་གཟུགས་ [261b.7]བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །དེ་བཞིན་ཉིད་ལས་ངེས་པར་སྐྱེས། །བདེན་པ་འདི་ཡིས་དཀྱིལ་འཁོར་དུ། །གཟུགས་བརྙན་གསལ་བར་སློབ་མ་ནི། །ཀུན་གྱིས་དྲི་མ་མེད་མཐོང་ཤོག ། [262a] [262a.1]དམ་ཚིག་གསུམ་གྱིས་གླུ་དང་མཆོད་པ་བྱས་ལ་གསོལ་བ་གདབ་པར་བྱ་སྟེ། སེམས་ཅན་ཀུན་གྱིས་དེ་ཁྱབ་ཅིང་། །སེམས་ཅན་ཀུན་གྱི་སྙིང་ལ་ཞུགས། །སེམས་ཅན་ཀུན་གྱི་ཡབ་གྱུར་ཉིད། །འདོད་མཆོག་དམ་ཚིག་མཆོག་གྱུར་པའོ། །བདེན་པ་ [262a.2]གང་གི་ཡེ་ཤེས་མཆོག །ཤེས་རབ་ཐབས་བདག་དཀྱིལ་འཁོར་ཡིན། །བདེན་པ་དེ་ཡིས་མགོན་བདག་ལ། །ཁྱེད་ཀྱི་འདོད་པ་ཡོངས་རྫོགས་ཤོག །དེ་བཞིན་དུ་རབ་ཏུ་བཏུད་དེ། མཉམ་པར་བཞག་པས་འདི་སྐད་ཅེས་བརྗོད་པར་བྱ་སྟེ། བདག་མིང་འདི་ཞེས་བྱ་བ་ཡི། །རྡོ་ [262a.3]རྗེ་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་ཕན་པའི་ཕྱིར། །བདག་གིས་སློབ་མ་གཞུག་པར་བགྱི། །དེ་ལ་རེ་ཞིག་སློབ་དཔོན་དུ་དབང་བསྐུར་བར་འོས་པའི་སློབ་མས་སློབ་དཔོན་གྱི་རྐང་པ་གཉིས་ལ་ཕྱག་བྱས་ཏེ། འདི་སྐད་ཅེས་བརྗོད་པར་བྱ་སྟེ། དགའ་ཆེན་ཁྱོད་བདག་ [262a.4]སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྡོམ་པ་རྣམས་ཀྱང་སྩལ་དུ་གསོལ། །ཡང་ན་ལག་ན་མེ་ཏོག་ཐོགས་པའི་སློབ་མས་བཤགས་ [262a.5]པ་དང་། རྗེས་སུ་ཡི་རང་བ་ལ་སོགས་པ་བྱས་ལ་འདི་སྐད་ཅེས་བརྗོད་པར་བྱའོ། །གཙོ་བོ་བདག་ལ་སྡོམ་པ་སྩོལ། །ཐུབ་པའི་ཉི་མ་མ་ལུས་པ། །སངས་རྒྱས་རྣམས་ནི་བདག་ལ་དགོངས། །བདག་མིང་འདི་ཞེས་བྱ་བ་ཡིས། །སློབ་དཔོན་དབང་དུ་གནས་པ་ལ། །སངས་རྒྱས་ [262a.6]རོལ་མོ་ལས་བྱུང་བ། །མི་ལྡོག་པ་ཡི་འཁོར་ལོར་འབྱོར། །ཐར་པའི་རང་བཞིན་གྲོང་ཁྱེར་ཆེ། །གསང་བ་ཆེན་པོར་འཇུག་པར་བགྱི། །གསང་བ་ཐམས་ཅད་བསྡུས་པར་ནི། །སློབ་དཔོན་ཆེན་པོ་བདག་འཇུག་མཛོད། །མི་ལྡོག་པ་ཡིས་དབང་བསྐུར་བ། །སྐལ་བ་ཆེན་པོ་བདག་ [262a.7]ལ་སྩོལ། །མཚན་རྣམས་ཀུན་གྱིས་རྒྱས་བཏབ་ཅིང་། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བས། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་ཆེན་པོ་རྨད་བྱུང་ལ། །སེམས་ཅན་ཀུན་གྱི་དོན་བགྱིད་ཕྱིར། །བདག་ནི་རྟག་ཏུ་སློབ་དཔོན་ [262b] [262b.1]གྱུར། །སློབ་དཔོན་བདག་ལ་སྩོལ། །དེ་ནས་སློབ་དཔོན་གྱིས་རིགས་ཐམས་ཅད་ལ་གསོལ་བ་གདབ་པར་བྱ་སྟེ། ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པ། །དམ་ཚིག་མཆོག་དང་གསང་བ་ཡི། །འཁོར་ལོ་འདིར་ནི་འཇུག་པར་འཚལ། །དེ་ནས་ [262b.2]སློབ་དཔོན་གྱིས་ཡང་འདི་སྐད་བརྗོད་པར་བྱ་སྟེ། གསང་བ་ཆེན་པོའི་རིགས་བདག་པ། །གསང་བ་ཡོངས་སུ་འཛིན་པར་ནི། །བདག་ཉིད་ཆེན་པོ་ཁྱོད་འདོད་དམ། །དེས་ཀྱང་འཚལ་ཞེས་བརྗོད་པར་བྱའོ། །ཡང་སློབ་དཔོན་གྱིས་འདི་སྐད་ཅེས་བྱ་སྟེ། སངས་རྒྱས་ཆོས་དང་ [262b.3]དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །དམ་ཚིག་བརྟན་པར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་དག །བློ་ཆེན་ཁྱོད་ཀྱིས་གཟུང་བར་གྱིས། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བསྒྲགས་སོ། །སློབ་དཔོན་ [262b.4]དག་ཀྱང་གཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །སྡོམ་པ་དམ་ཚིག་ཡིན་པར་གསུངས། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོར་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་ [262b.5]རྟག་ཏུ་སྦྱིན། །ཕྱི་དང་གསང་བ་ཐེག་པ་གསུམ། །དམ་ཆོས་ཁྱོད་ཀྱིས་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་གྱིས། ། [262b.6]མཆོད་པའི་ལས་ཀྱང་ཅི་ནུས་བྱ། །གཞན་ཡང་བཅུ་བཞི་འདི་དག་ནི། །ཕས་ཕམ་པར་ནི་རབ་ཏུ་བཤད། །སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བ་ཤེས་པར་བྱ། །ཉིན་དང་མཚན་མོ་ལན་གསུམ་དུ། །ཉིན་རེ་ཞིང་ནི་བཟླ་བར་བྱ། །གང་ཚེ་ཉམས་ན་རྣལ་འབྱོར་པ། །ཁ་ན་མ་ [262b.7]ཐོ་སྦོམ་པོར་འགྱུར། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་ལ་ལོགས་པས་མི་སྤྱད་ཅིང་། །བརྫུན་དུ་སྨྲ་བར་མི་བྱའོ། །ཕུང་ཀྲོལ་ཀུན་གྱི་རྩ་བ་ཡི། །ཆང་ནི་རྣམ་པར་སྤང་བར་བྱ། །སེམས་ཅན་གདུལ་ཕྱིར་མ་རྟོགས་པ། །བྱ་བ་མ་ [263a] [263a.1]ཡིན་ཐམས་ཅད་སྤང་། །དམ་པ་ཉེ་བར་བརྟེན་བྱ་ཞིང་། །རྣལ་འབྱོར་པ་རྣམས་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་རྣམས་དང་། །ཡིད་ཀྱི་རྣམ་པ་གསུམ་དག་ནི། །ཅི་ནུས་བར་ནི་རྗེས་སུ་སྐྱོང་། །ཐེག་པ་དམན་ལ་འདོད་ [263a.2]མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ཀྱང་ཡང་མི་སྤོང་། །རྟག་ཏུ་མྱ་ངན་འདས་མི་ཆགས། །ལྷ་དང་ལྷ་མིན་གསང་བ་ལ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་རྒྱ་བཞོན་པ་མཚོན་བྱ་དང་། །མཚན་མ་འགོམ་པར་མི་བྱའོ། །འདི་དག་དམ་ཚིག་ [263a.3]ཡིན་པར་བཤད། །ཁྱོད་ཀྱིས་རྟག་ཏུ་བསྲུང་བར་བྱ། །དེས་ཀྱང་འདི་སྐད་ཅེས་བརྗོད་པར་བྱ་སྟེ། སློབ་དཔོན་འདིར་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་ནི་བགྱིད་པར་འཚལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། ། [263a.4]ཞེས་བྱ་བ་ལ་སོགས་པ་ནས། །སེམས་ཅན་མྱ་ངན་འདས་ལ་དགོད། །ཅེས་བྱ་བའི་བར་དུ་བརྗོད་པར་བྱའོ། །གང་ཞིག་སྡོམ་པ་འཛིན་པར་མི་བྱེད་པ་དེ་ལ། དེང་ཁྱོད་ཅེས་བྱ་བ་ལ་སོགས་པ་བརྗོད་པར་མི་བྱ་སྟེ། སློབ་དཔོན་དུ་རྗེས་སུ་གནང་བ་དང་དབང་བསྐུར་བར་ཡང་མི་བྱའི། [263a.5]འཇུག་པ་ཙམ་ཞིག་བྱེད་དུ་གཞུག་གོ། །དེ་ནས་ཁྲུས་བྱས་ཤིང་དྲི་བཟང་པོ་ལ་སོགས་པས་ཀྱང་བརྒྱན་ལ། ཡི་གེ་ཧཱུཾ་བཟླས་པའི་གོས་དམར་པོའི་སྟོད་གཡོགས་དང་སྨད་གཡོགས་དང་། གཙུག་ཏོར་དང་། གདོང་གཡོགས་བྱས་ལ། ཨོཾ་སརྦྦ་ཡོ་ག་ཙིཏྟ་ཨུཏྤཱ་ད་ཡཱ་མི་ [263a.6]ཞེས་བྱ་བ་དང་། བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་ནས་སུ། །དེ་ཡི་སྙིང་གར་སྙིང་པོས་ནི། །རྡོ་རྗེ་རབ་ཏུ་གཞག་པར་བྱ། །སུ་ར་ཏ་ས་མ་ཡ་སྟྭཾ་ཧོཿསིདྡྷ་བཛྲ་ཡ་ཐཱ་སུ་ཁཾ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་གྱུར་ཅིག །དེ་ [263a.7]བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་འདི། ཁྱོད་ཀྱིས་དཀྱིལ་འཁོར་ཆེན་པོར་མ་ཞུགས་པ་རྣམས་ལ་སྨྲ་བར་མ་བྱེད་ཅིག །དད་པ་མི་ལྡན་པ་རྣམས་ལ་ཡང་མ་ཡིན་ནོ་ཞེས་བརྗོད་པར་བྱའོ། །དེ་ནས་རབ་ཏུ་ཡོན་ཕུལ་བའི་སློབ་མ་དེ་ལ་དྲི་ལ་སོགས་པས་མཆོད་ [263b] [263b.1]དེ། མེ་ཏོག་གི་ཕྲེང་བ་གདགས་ཤིང་། ཁ་དྲི་ཞིམ་པོས་བསྒོས་པ་ལ་ཕྱི་རོལ་ན་གནས་པས་བུམ་པའི་ཆུས་དབང་བསྐུར་ནས། དཔལ་འཇམ་པའི་རྡོ་རྗེར་བྱིན་གྱིས་བརླབས་ལ། ཨོཾ་ཛི་ན་ཛིཀ་ཅེས་བྱ་བ་ལ་སོགས་པའི་སྙིང་པོ་དང་། སྐུ་ལ་སོགས་པ་བྱིན་གྱིས་བརླབས་པའི་ [263b.2]ཕྱག་རྒྱ་ལ་སོགས་པས་བྱིན་ཀྱིས་བརླབས་ནས། ཐལ་མོ་སྦྱར་བའི་མཛུབ་མོ་དཀྲི་བ་དང་། བཛྲ་ཀ་བ་ཙ་བཾ་ཧཱུཾ་ཞེས་བརྗོད་ལ། དཔྲལ་བ་དང་སྒོག་མ་དང་། སྙིང་ག་དང་དཔུང་མགོ་སྟེ། གནས་ལྔར་གོ་ཆ་བྱས་ནས་རྡོ་རྗེ་སེམས་མའི་ཕྱག་རྒྱས་བཟུང་བའི་མེ་ཏོག་དང་ཡི་ [263b.3]གེ་ཧཱུཾ་བཟླས་པ་ཉིད་ཀྱིས་སྒོར་གནས་པར་བྱས་ལ། ཤར་ལ་སོགས་པའི་སྒོ་ནས་རྡོ་རྗེ་ལྕགས་ཀྱུ་ལ་སོགས་པས་དགུག་པ་ལ་སོགས་པ་བྱས་ནས་ཡང་ཕྱོགས་ཀྱི་སྒོ་ཉིད་ནས་ཚིགས་སུ་བཅད་པ་འདིས་གཞུག་པར་བྱའོ། །རྡོ་རྗེ་ཡེ་ཤེས་འཐོབ་བྱེད་པ། །དེ་བཞིན་གཤེགས་ [263b.4]པ་ཐམས་ཅད་ཀྱི། །ཕོ་བྲང་དཀྱིལ་འཁོར་སྙིང་པོ་འདིར། །བདག་གིས་སློབ་མ་གཞུག་པར་བགྱི། །ཨཱ་ཁཾ་བཱི་ར་ཧཱུཾ་ཞེས་བྱ་བས་སློབ་མ་དཀྱིལ་འཁོར་དུ་ཞུགས་པར་བྱས་ནས་འདི་སྐད་ཅེས་བརྗོད་པར་བྱ་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱི། [263b.5]ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་དུ་འགྲུབ་པ་ཡང་འཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་མ་སྨྲ་ཤིག་ཁྱོད་དམ་ཚིག་ཉམས་པར་གྱུར་ཏ་ [263b.6]རེ། དེ་ནས་རྡོ་རྗེ་སློབ་དཔོན་རང་ཉིད་ཀྱིས་སེམས་མ་རྡོ་རྗེ་མའི་ཕྱག་རྒྱ་ཁ་ཐུར་དུ་བསྟན་པ་དང་གྱེན་དུ་བསྟན་པ་བཅིངས་ལ། རྡོ་རྗེ་སློབ་མའི་སྤྱི་བོར་བཞག་སྟེ། འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་རྡོ་རྗེ་དམ་ཚིག་ཡིན་གྱིས། གལ་ཏེ་འདི་འགའ་ཞིག་ལ་སྨྲས་ན་ཀླད་པ་ [263b.7]འགེམས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་མནའི་སྙིང་པོ་འདི་ལན་ཅིག་བཟླས་ལ་སློབ་མ་དེ་འཐུང་དུ་བཅུག་ལ་འདི་སྐད་ཅེས་བརྗོད་པར་བྱ་སྟེ། ཨོཾ་བཛྲ་སཏྭ་ས་ཡན་ཏེ་དྱ། ཧྲཾ་ད་ཡེ་ས་མ་བསྠི་ཏ། ནིར་བྷིརྱ། ཏཏ་དཀྵ་ཎཾ། ཡ་ཡཱད་ཡ་དི་བྲུ་ཡཏ། ཨི་མཾ་ན་ [264a] [264a.1]ཡ། དེ་ནས་འཐུང་དུ་གཞུག་གོ། །དམ་ཚིག་གི་ཆུ་ག་ཕུར་ཀྱེ་དང་།ཙནྡན་ལ་སོགས་པ་དང་ལྡན་པ་རྡོ་རྗེ་ཕྲ་རབ་ཀྱི་རང་བཞིན་བདག་པོའི་སྔགས་དང་ཡི་གེ་ཧཱུཾ་བཟླས་པ། སློབ་མ་ཡང་བསམ་པ་བརྟན་པོར་བྱས་ཏེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་ [264a.2]སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེ། །རྡོ་རྗེ་བདུད་རྩིའི་ཆུ་འཐུང་ཤིག །ཨོཾ་བཛྲོད་ཀ་ཋ། རྡོ་རྗེ་དྲིལ་བུ་ཕྱག་རྒྱ་ནི། །གལ་ཏེ་དཀྱིལ་འཁོར་མ་མཐོང་སྨྲ། །སྐྱེ་བོ་འདུས་པའི་ནང་གནས་སམ། །དད་པ་མེད་པས་བགད་པར་བྱེད། །དེང་ནས་བརྩམས་ཏེ་ཁྱེད་ཀྱི་ཕྱག་ན་ [264a.3]རྡོ་རྗེ་ང་ཡིན་གྱིས། ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པས་ཁྱེད་དུས་བྱས་ནས་དམྱལ་བར་ལྟུང་བར་གྱུར་ཏ་རེ། དེ་ནས་ཡི་གེ་ཨ་དམར་པོ་འོད་ཟེར་དང་བཅས་པ་རང་གི་སྙིང་གར་བཀོད་ལ། [264a.4]སློབ་མ་ཡང་ཡི་གེ་ཧཱུཾ་གིས་རྡུལ་དང་བྲལ་ཞིང་དག་པ་འཇམ་པའི་རྡོ་རྗེ་ཧཱུཾ་ཧྲཱཾ་ཧྲཱིུཿཁཾ་ཞེས་བྱ་བས། སྙིང་ག་དང་མཛོད་སྤུ་དང་ལྐོག་མ་སྤྱི་བོ་རྣམས་སུ་རྡོ་རྗེ་དང་རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་དང་ལྡན་པ་ལ། སྒོ་གླེགས་དབྱེ་བའི་ཕྱག་རྒྱས་རང་གི་སྙིང་ག་དང་སློབ་མའི་སྙིང་ག་ཕྱེ་ལ། [264a.5]རང་གི་སྙིང་ག་ནས་ཡི་གེ་ཨ་ཕྱུང་ལ། སློབ་མའི་སྙིང་གར་གནས་པའི་རྡོ་རྗེའི་དབུས་སུ་བློས་བཅུག་ལ། དེའི་ལུས་ཀུན་དུ་གང་བར་བསམས་ལ། འདི་སྐད་ཅེས་བརྗོད་པར་བྱའོ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་འབབ་པར་ [264a.6]གྱུར་ཅིག་ཅེས་སྨོས་ཤིག །དེ་ནས་རྡོ་རྗེ་སློབ་དཔོན་གྱིས་མྱུར་དུ་སེམས་མ་རྡོ་རྗེ་མའི་ཕྱག་རྒྱ་བཅིངས་ལ། དེའི་སྙིང་གར་བཞག་སྟེ་འདི་སྐད་ཅེས་བརྗོད་དུ་གཞུག་གོ། །འདི་ནི་རྡོ་རྗེའི་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བྱ་མེད་འདི། །དེ་རིང་ཉིད་དུ་ [264a.7]འབབ་པར་ཤོག །བཛྲ་ཨཱ་བེེ་ཤ་ཨཿ བཅུ་ཉི་ཤུ་སུམ་ཅུ་བཞི་བཅུ། ལྔ་བཅུ་དྲུག་ཅུ་བདུན་ཅུ་བརྒྱད་ཅུ་དགུ་བཅུ་བརྒྱའི་བར་དུ་བརྗོད་ན་ངེས་པར་འབབ་པར་འགྱུར་རོ། །དེ་ལྟར་ཡང་གལ་ཏེ་འབབ་པར་མ་གྱུར་ན། དེའི་ཚེ་རྡོ་རྗེ་སེམས་མའི་ཕྱག་རྒྱ་ཁྲོ་བོའི་ཁུ་ཚུར་གྱིས་ཕྱེ་ལ། རྡོ་རྗེ་ [264b] [264b.1]སེམས་དཔའི་ཡི་གེ་ཨའི་མཐའ་ཅན་བརྒྱའི་བར་དུ་བརྗོད་པར་བྱའོ། །གལ་ཏེ་དེ་ལྟ་ན་ཡང་འབབ་པར་མ་གྱུར་ན། །དེའི་ཚེ་རྡོ་རྗེ་འབེབས་པ་དྲིལ་བུ་དང་བཅས་པ་བཅིངས་ལ། རྐང་པ་གཡོན་པས་སློབ་མའི་རྐང་པ་གཡས་པ་མནན་ལ། དཔལ་རྡོ་རྗེ་སེམས་དཔའི་སྟེང་དུ་རྣམ་པར་ [264b.2]སྣང་མཛད་ཁྲོས་པས་དེ་ལ་དབབ་པར་བྱ་བའི་ཕྱིར་འོད་ཟེར་གྱི་ཚོགས་རྣམས་འབབ་པར་མཛད་པ་དང་། འོག་ཏུ་ཡང་ཡི་གེ་ཧཱུཾ་རླུང་གི་དཀྱིལ་འཁོར་གྱིས་བཏེག་པར་གྱུར་ལ། མི་བསྐྱོད་པ་ལ་སོགས་པ་རིམ་བཞིན་རང་གི་ཕྱོགས་ན་བཞུགས་པས། ཧཱུཾ་ཏྲཱཾ་ཧྲཱིཿཨཱཿཞེས་བྱ་བའི་ས་ [264b.3]བོན་རྣམས་ལས་འོད་ཟེར་གྱི་ཚོགས་ཡང་དག་པར་འབེབས་པར་གྱུར་པར་བསམས་ལ། བཛྲ་སཏྭ། ཨཿཨཿཨཿཞེས་བྱ་བ་ལན་བརྒྱའི་བར་དུ་བརྗོད་པར་བྱའོ། །གལ་ཏེ་སྡིག་པ་ཆེན་པོ་དང་ལྡན་པས་དེ་ལྟ་བུ་བྱས་ཀྱང་འབབ་པར་མ་གྱུར་ན། དེའི་ཚེ་སྡིག་པ་དྲལ་བའི་ཕྱག་རྒྱས་ [264b.4]སྡིག་པ་དྲལ་ལ་ཧཱུཾ་ཨ་ཞེས་བྱ་བ་ལན་མང་དུ་བཟླའོ། །རྡོ་རྗེ་བཅིང་བ་བསྡམ་བྱས་ཏེ། །གུང་མོ་གཉི་ག་སྦྱར་ནས་ནི། །ཐ་མ་བཞི་ནི་རྩེ་མོ་སྦྱར། །སྡིག་པ་འཇོམས་པར་གྲགས་པ་ཡིན། །ཞེས་བྱ་བ་ནི་སྡིག་པ་འཇོམས་པའི་ཕྱག་རྒྱའོ། །ཨོཾ་བཛྲ་པཱ་ཎི་བི་སྥོ་ཊ་ཡ། སརྦྦ་པཱ་པ་ཡ། བནྡྷ་ [264b.5]ན་ནི་པྲ་མོཀྵ་ཡ་སརྦྦ་པཱ་པ་ག་ཏི་བྷྱཿསརྦྦ སཏྭཱ་ན་སརྦྦ་ཏ་ཐཱ་ག་ཏ་བཛྲ་ས་མ་ཡ་ཏྲཊ་ཅེས་བྱ་བ་ནི་སྔགས་སོ། །ཡང་ན་དེ་བཞིན་དུ་འབབ་པར་གྱུར་ཞེས་བརྗོད་ལ། དེའི་སྙིང་གར་ཡི་གེ་ཧཱུཾ་དབང་ཆེན་གྱི་དཀྱིལ་འཁོར་ལ་གནས་པ་དང་། ཧཾ་ཆུའི་དཀྱིལ་འཁོར་ལ་གནས་པ་དང་། ཡི་གེ་ [264b.6]ཨ་ལུས་དང་ངག་ལ་གནས་པ་དང་།རྐང་པའི་འོག་ཏུ་ཡི་གེ་ཛྷཻཾ་སྦར་བར་བྱེད་པ་རླུང་དང་མེ་ལ་གནས་པ་རྣམ་པར་བཀོད་ལ། ཨཱ་བེ་ཤ་ཡ་སྟཾ་བྷ་ར་ར་ཙ་ལ་ཡ་ཙ་ལ་ཡ་ཧཱུཾ་ཧ་ཨཱ་ཛྷཻཾ་ཞེས་བསྐུལ་ན་འབབ་པར་འགྱུར་རོ། །ཡང་ན་ཡི་གེ་ཨོཾ་གྱིས་དེའི་སྤྱི་བོར་རྣམ་པར་སྣང་མཛད་ཇི་ལྟ་བ་བཞིན་དུ་ [264b.7]བསམ་པ་དང་། ཡི་གེ་ཨཱཿལས་ལྐོག་མར་འོད་དཔག་ཏུ་མེད་པ་ཧཱུཾ་ལས་སྙིང་གར་མི་བསྐྱོད་བ་ཡི་གེའམ། རང་གི་ངོ་བོར་སྐུལ་བར་བྱེད་པ་དང་། རྐང་པའི་འོག་ཏུ་ཡང་ཡི་གེ་ཡཾ་ལས་རླུང་གི་དཀྱིལ་འཁོར་གཞུའི་དབྱིབས་ཅན། མཐའ་གཉིས་སུ་བ་དན་བཏགས་པ། དེའི་སྟེང་དུ་ [265a] [265a.1]རཾ་ལས་བྱུང་བའི་མེའི་དཀྱིལ་འཁོར་གྲུ་གསུམ་དེ་ལ་སློབ་མ་སྐུལ་བྱེད་མའི་གཟུགས་སུ་བསམས་ཏེ་བཞག་ལ། རྡོ་རྗེ་འབར་བ་རྣམས་ཀྱིས་ཀུན་དུ་བསྲེག་པར་གྱུར་པར་བསྒོམས་ནས། རྡོ་རྗེ་དྲིལ་བུ་རྡོ་རྗེ་བསྡམས་པས་བསྐྱོད་ཅིང་། ང་རྒྱལ་བརྟན་པ་དང་ལྡན་ཞིང་ [265a.2]བསྒྱིངས་པ་དང་བཅས་པས། འཕགས་པ་སྐུལ་བྱེད་མའི་ཕྲེང་བའི་སྔགས་བརྗོད་པར་བྱའོ། །ན་མཿསཔྟཱ་ནཱ་ན། ས་མྱ་ཀྶཾ་བུདྡྷ་ཀོཊཱི་ནཱཾ། ཏདྱ་ཐ། ཙ་ལེ་ཙུ་ལེ་ཙུ་ནྡེ་སྠ་ཧཱ། མ་ཧཱ་བཱིརྱ་ཨ་པྲ་ཏི་ཧ་ཏ་ཤཱས་ནཾ་མ་ཧཱ་བ་ལ་ར་ཀྲ་མེ། ཨ་སིམུ་ས་ལ་པ་ར་ཤུ་པཱ་ཤ་གྲི་ཧི་ཧ་སྟེ། མཧཱ་ཀྲོདྷ་ཀྲོདྷི་ཤྭ་རི། [265a.3]ཨུ་དྲ་རཱུ་པི་ཎི་ཨ་ན་ནྟ་མུ་ཁི། ས་ཧ་སྲ་བྷུ་ཛེ། ཨ་ཛི་ཏེ་ཨ་བ་རཱ་ཛི་ཏ། ཨ་མོ་གྷི་དུ་རྡ་མེ། ས་ཧ་སྲཱ་ཀྵ། སརྦྦ་ཏ་ཐཱ་ག་ཏ་ཨདྷིཥྛ་ན་སརྦྦ་དེ་བ་ཏཱ་བནྡི་ཏེ། པཱུ་ཛི་ཏེ་པྲ་སཱདྷི་ཏེ། བཛྲ་གྷོ་ནོ། བཛྲེ་བཛྲ་ཨ་བ་ཧེ། བཛྲེ་ཨ་ཡུ་དྷེ། བཛྲ་ཀཱ་ཡཱི་ནི། བཛོ་ན་མི་ལི་ཏཱ་ཀྵ་ཡེ། ཨ་གྷོ་རེ་གྷོར་རཱུ་པི་ཎི། བཀྲྀ་ [265a.4]ཏ་དརྴ་ནེ། བཛྲེ་བཻཌཱུརྱ་ཨ་ལཾ་ཀྲྀ་ཏ་ཤ་རཱི་རེ། ཨྃ་བྷ་ག་བ་ཏི་ཙུ་ནྷེ། དྷྲུཾ་དྷྲུཾ། ཀྲཱུཾ་ཀྲཱུཾ། མྲཱུཾ་མྲཱུཾ། རྲཱུཾ་རྲཱུཾ། ཨཱ་བེ་ཤ་ཡ་ཨཱ་བེ་ཤ་ཡ། གྲྀཧྞ་གྲྀཧྞ། གྲྀཧྞ་པ་ཡ་གྲྀཧྞ་པ་ཡ། ཧ་ར་ཧ་ར། བྷཉྫ་བྷཉྫ། ས་ར་ས་ར། མ་ར་མ་ར། མཱ་ར་ཡ་མཱ་ར་ཡ། པ་ཙ་པ་ཙ། ད་ཧ་ད་ཧ། གྲྀཧྞ་གྲྀཧྞ། ཨི་དཾ་ [265a.5]དུཥྚ་གྲ་ཧཾ། ཛྭ་རཾ། ཨེ་ཀ་ཧི་ཀཾ། དྭ་ཧི་ཀཾཏྱ་ཧི་ཀཾ་ཙ་ཏུ་རྠི་ཧི་ཀཾ །ནི་ཏྱ་ཛྭ་རཾ། མོ་ཧུ་དྷི་ཀཾ། གྲ་ཧཾ། བྷཱུ་ཏཾ། བེ་ཏཱ་ཌཾ། བྲེ་ཏཾ། བི་ཤཱ་ཙཾ། རཱ་ཀྵ་སཾ། ཀུམྦྷཎྜཾ་ཡོ་ནི་ཛཾ། ཀརྨྨ་ཛཾ། སྠཱ་བ་ར་མ། ཛཾ་ག་མཾ། ཡེ་མཱ་མ་ཧི་སནྦྷི་ཀི་ཅིང་དུ་ཥྚ། སྟཾ་སརྦ་མ། སཱ་ད་ཡ་སཱ་ད་ཡ། མརྡ་ཡ་མརྡ་ཡ། [265a.6]ཤོ་ཥ་ཡ་ཤོ་ཥ་ཡ། ཏཱ་པ་ཡ་ཏཱ་པ་ཡ། ཏཱ་པ་ཡ་ཏཱ་པ་ཡ། ཨུ་ཏྶཱ་ད་ཡ། ཧ་ན་ཧ་ན། བཛྲེ་ན། ས་ར་ས་ར། དཎྜེ་ན། མཱ་ར་ཡ་མཱ་ར་ཡ། ཁཌྒེ་ན། ཧཱུཾ་ཧཱུཾ་ཧཱུཾ། ཙུཾ་ཙུཾ་ཙུཾ། དྲཱུཾ་དྲཱུཾ་དྲཱུཾ། ཨོཾ་ཙ་ལེ་ཙུ་ལེ་ཙུ་དེ་སརྦ་ཨ་རྠཱ་ཡ་སྭཱ་ཧཱ། དེས་ན་ངེས་པར་འབབ་པར་འགྱུར་རོ། །སྣོད་ལ་དབབ་པའི་ [265a.7]ཆོ་ག་ལ་ཡང་ཆོ་ག་འདི་ཉིད་ཀྱིས་དཔལ་རྣམ་པར་སྣང་མཛོད་ཀྱི་སྦྱོར་བའམ། དཔལ་འཇམ་པའི་རྡོ་རྗེའི་སྦྱོར་བ་བྱའོ། །བབས་ནས་མངོན་པར་ཤེས་པ་ལྔ་ལ་སོགས་པའི་མཚན་མ་སྐད་ཅིག་དེ་ཉིད་ལ་འབྱུང་བར་འགྱུར་རོ། །དེའི་ལྕེ་ཨ་དམར་བོ་བསམས་ལ། བྲུ་ཧི་བཛྲ་ཞེས་བརྗོད་ན། དགེ་ [265b] [265b.1]བའམ་མི་དགེ་བ་ཐམས་ཅད་སྟོན་པར་འགྱུར་རོ། །དེ་ནས་མངོན་པར་འདོད་པ་ཐམས་ཅད་དྲིས་ལ་དབབ་པ་བརྟན་པར་བྱ་བ་སྔོན་དུ་འགྲོ་བས་ཡང་དག་པར་མཆོད་ཅིང་། བབས་པའི་ལྷ་ཇི་ལྟ་བ་བཞིན་གཤེགས་སུ་གསོལ་ལོ། །དཀྱིལ་འཁོར་དུ་འཇུག་པ་ན་ཁྱེད་ཀྱི་མིག་གིས་ཇི་ [265b.2]ལྟར་མཐོང་ཞེས་དྲིས་ལ། དཀར་པོ་དང་། སེར་པོ་དང་། དམར་པོ་དང་། ནག་པོ་ལ་སོགས་པ་འོད་ཀྱི་དཀྱིལ་འཁོར་སྣང་བ་ལས་རིམ་བཞིན་དུ་མཆོག་གི་དོན་ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་དངོས་གྲུབ་ཀྱི་སྣོད་དུ་གྱུར་པར་ཤེས་ནས་འཇུག་པའི་ཕྱག་རྒྱ་སྙིང་གར་བཅིངས་པ་ [265b.3]བཀྲོལ་ལ་དབབ་ཏེ། ཏིཥྛ་བཛྲ་དྲྀ་ཌྷོ་མེ་བྷ་བ། ཤཱ་ཤྭ་ཏོ་མེ་བྷ་བ། ཧྲྀ་ད་ཡཾ་མེ་ཨ་དྷི་ཏིཥྛ་སརྦྦ་སིདྡྷི་མྨེ་པྲ་ཡཙྪ། སརྦྦ་ཀརྨྨ་སུ་ཙ་མེ། ཅིཏྟཾ་ཤྲེ་ཡཾ་ཀུ་རུ་ཧཱུཾ་ཧ་ཧ་ཧ་ཧ་ཧོཿཞེས་བརྗོད་པས་བརྟན་པར་བྱས་ལ། ཡི་གེ་ཧཱུཾ་གི་ཕྲེང་བ་དེ། ཡི་གེ་ཏྲཱཾ་གིས་བྱིན་གྱིས་བརླབས་ཏེ། དཀྱིལ་འཁོར་དུ་ [265b.4]དོར་ལ་འདི་སྐད་ཅེས་བརྗོད་པར་བྱའོ། །པྲ་ཏཱིཙྪ་བཛྲ་ཧོཿདེ་ལ་གོང་དུ་བབས་པར་གྱུར་པའི་ལྷ་དེ་དེ་ལ་འགྲུབ་པར་འགྱུར་རོ། །དེ་ནས་ཕྲེང་བ་དེ་མགོ་བོར་བཅིངས་ལ་འདི་སྐད་ཅེས་བརྗོད་པར་བྱའོ། །པྲ་ཏི་ཀྲྀཧྞ་ཏྭ་མི་མ། སཏྭ་མ་ཧཱ་བ་ལ། དེ་ནས་སྙིང་གར་བདག་པོ། མིག་ཏུ་ཨོཾ་དཔྲལ་ [265b.5]བ་བསམས་ལ་འདིས་གདོང་གཡོགས་དགྲོལ་བར་བྱའོ། །ཨོཾ་བཛྲ་སཏྭ་སྭ་ཡནྟེ། ཙཀྵཱུ་ངྒྷ་ཊ་ན་ཏཏྤ་ར། ཨུངྒྷ་ཊ་ཡ་ད་སརྦྦཱ་ཀྵོ་བཛྲ་ཙཀྵུ་ཨ་ནུཏྷ་རཾ། དེ་རིང་དད་པའི་ཤུགས་ཀྱིས་ནི། །དཀྱིལ་འཁོར་འདི་ལ་བལྟ་བར་གྱིས། །སངས་རྒྱས་གདུང་གི་རིགས་སུ་སྐྱེས། །སྔགས་ [265b.6]དང་ཕྱག་རྒྱས་བྱིན་གྱིས་བརླབས། །དངོས་གྲུབ་ཐམས་ཅད་ཕུན་སུམ་ཚོགས། །དམ་ཚིག་མཆོག་ཏུ་འགྱུར་བར་བྱེད། །རྡོ་རྗེ་པད་མཆོག་རོལ་པ་དང་། །གསང་སྔགས་རྣམས་ནི་མཉེས་པར་གྱིས། །ཧེ་བཛྲ་པ་ཤྱ། དཀྱིལ་འཁོར་གདེགས་པའི་ཕྱག་རྒྱ་དང་། །སྔགས་སུ་བཅད་ [265b.7]པས་དཀྱིལ་འཁོར་བཏེག་ལ། དཀྱིལ་འཁོར་བསྟན་པར་བྱ་སྟེ། བསོད་ནམས་དང་། བྱིན་གྱི་རླབས་ཇི་ལྟ་བ་ལ་དཀྱིལ་འཁོར་བཏེག་པ་མཐོང་བར་འགྱུར་རོ། །དེ་ནས་བཅོམ་ལྡན་འདས་འཕགས་པ་གཤིན་རྗེ་གཤེགས་ལས་བརྩམས་ཏེ། བཅོམ་ལྡན་འདས་འཇམ་ [266a] [266a.1]དཔལ་གྱི་མཐར་ཐུག་པའི་བར་གྱི་དཀྱིལ་འཁོར་ཐམས་ཅད་བསྟན་པར་བྱའོ། །དེ་ནས་རྡོ་རྗེ་སློབ་དཔོན་ལ། །ཡོན་ནི་མང་དུ་ཕུལ་ནས་སུ། །ཚིགས་སུ་བཅད་པས་ཕྱག་བྱས་ནས། །དབང་བསྐུར་བར་ནི་གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ [266a.2]ཇི་ལྟར་སྩལ་བ་བཞིན། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །སློབ་དཔོན་གྱིས་ཀྱང་དེ་དབང་བསྐུར་བར་བྱ་བའི་ཕྱིར་རྩ་བའི་དཀྱིལ་འཁོར་གྱི་ཕྱི་རོལ་དུ་ཁྲུ་གཉིས་དོར་བར། ཤར་སྒོར་མངོན་པར་བལྟས་པ་དཀྱིལ་འཁོར་གྱི་ཕྱེད་ཀྱི་ཚད་ལ་ [266a.3]རིམ་པ་གཉིས་པ། ཟུར་བཞི་པ་སྒོ་བཞི་པའི་དཀྱིལ་འཁོར་བྲིས་ལ། དེའི་དབུས་སུ་པདྨ་འདབ་མ་བརྒྱད་པ་ཟེ་བ་དང་བཅས་པ་བྲི། སྣམ་བུའི་ཤར་དུ་རྡོ་རྗེ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲི་བྲིས་པ། སློབ་མ་ལུས་ཤིན་ཏུ་ཁྲུས་བྱས་ཤིང་དྲི་དང་བདུག་པ་དང་། ཕྲེང་བ་ལ་ [266a.4]སོགས་པ་དང་ཡང་དག་པར་ལྡན་པ། རྒྱན་ཐམས་ཅད་ཀྱིས་བརྒྱན་པ་དེར་བཞག་ལ། སྦྱང་བའི་ཆོ་ག་བྱ་སྟེ། འཕགས་པ་བདུད་རྩི་ཐབ་སྤྱོར་བཟླས་པའམ། ཡི་གེ་ཧཱུཾ་བཟླས་པའི་ཡུངས་ཀར་ཁུ་ཚུར་གཡས་དང་གཡོན་གྱིས་བཟུང་བས་རིམ་པ་བཞིན་དུ་ལན་གཉིས་གཉིས་དང་ [266a.5]རང་གི་ལོགས་ནས་བསྐོར་ཏེ། ཁམ་ཕོར་གྱི་མེའི་ནང་དུ་དོར་ལ་ཡང་ཁུ་ཚུར་དེ་གཉིས་ཀྱིས་ཅིག་ཅར་གཡས་ནས་བསྐོར་ཏེ། དེ་བཞིན་དུ་སྦྱང་བ་བྱས་ལ། ཡུངས་ཀར་མེར་དོར་བ་དང་ལག་པ་གཡས་དང་གཡོན་གྱིས་དེ་བཞིན་དུ་ཆུ་སྦྱར་བར་བྱའོ། །དེ་ནས་གཉིས་ཀ་ལ་ཡང་ཉེ་ [266a.6]རེག་བྱའོ། །དེ་ནས་སློབ་དཔོན་བདག་ཉིད་དང་སློབ་མ་བསྲུང་བ་བྱས་ལ། རིགས་ཀྱི་ཡུམ་བཟླས་པའི་དྲིས་བྱུགས་པ་དང་། དེ་ཉིད་བཟླས་པའི་མེ་ཏོག་གི་ཕྲེང་བས་མགོ་བོ་དཀྲིས་ལ། རིགས་ཀྱི་སྙིང་པོས་མཆོད་ཡོན་བྱིན་ཏེ། མར་དང་བཅས་པའི་ས་རྫ་ར་སའི་སྤོས་ལ་བདུད་ [266a.7]རྩི་ཐབ་སྤྱོར་བཟླས་པའམ། ཡི་གེ་ཧཱུཾ་བཟླས་པས་བདུག་པར་བྱའོ། །ངེས་པར་སྦྱོང་བའི་ཆོ་གའོ། །དེ་ནས་འཇམ་པའི་རྡོ་རྗེར་བྱས་ལ་རང་ཉིད་ཀྱིས་སྔགས་དང་ཕྱག་རྒྱ་དང་ལྷའི་འཁོར་ལོ་མ་ལུས་པ་གནས་ཇི་ལྟ་བ་བཞིན་དུ་བཀོད་ལ་རྡོ་རྗེ་སེམས་མ་ལ་སོགས་པས་བྱིན་གྱིས་བརླབ་ཅིང་སྐུ་ལ་ [266b] [266b.1]སོགས་པ་བྱིན་གྱིས་བརླབས་ལ་ཕྱག་རྒྱ་ཆེན་པོར་རབ་ཏུ་བཞག་སྟེ། སྟེང་དུ་བླ་རེ་བྲེ་བ་དང་། གཡས་ལོགས་སུ་ཡི་གེ་ཧཱུཾ་བཟླས་པའི་མེ་ཏོག་གི་ཕྲེང་བས་བརྒྱན་པའི་རིན་པོ་ཆེའི་གདུགས་དང་། གཡོན་དུ་ནམ་མཁའི་མཛོད་བཟླས་པའི་རྒྱལ་མཚན་དང་། རྔ་ཡབ་དང་བ་དན་ [266b.2]སྣ་ཚོགས་པ་དང་། མེ་ཏོག་ལ་སོགས་པ་དང་སྒེག་མོ་ལ་སོགས་པས་ཡང་དག་པར་མཆོད་དེ། མཆོད་ཡོན་བྱིན་ལ་དུང་དང་རྔ་བོ་ཆེ་དང་། རྔ་རིངས་དང་། ཟངས་དུང་ལ་སོགས་པའི་སིལ་སྙན་རྣམས་ཀྱིས་ནམ་མཁའི་ངོས་རྣམས་ཀུན་དུ་གང་བར་བསམས་ལ། རྡོ་རྗེ་དྲིལ་བུ་དཀྲོལ་བ་ [266b.3]དང་། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་འདྲའི་སྤྱན་མངའ་བ། །བཀྲ་ཤིས་དེ་ནི་སྐྱེ་དགུ་ཞི་བྱེད་དང་པོའོ། །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ [266b.4]ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །དེ་ནི་འཇིག་རྟེན་དགེ་བའི་བཀྲ་ཤིས་གཉིས་པའོ། །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །མི་དང་ལྷ་དང་ལྷ་མ་ཡིན་ཀྱི་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་ [266b.5]དཔལ་གྱི་གཞི། །དེ་ནི་འཇིག་རྟེན་དགེ་བའི་བཀྲ་ཤིས་གསུམ་པའོ། །སེམས་ཅན་ཀུན་ལ་ཕན་ཕྱིར་བྱང་ཆུབ་མངའ་བ་པོ། །དོན་རྣམས་ཐམས་ཅད་འགྲུབ་པར་བརྟུལ་བ་ཡོངས་ལྡན་པ། །ཚོགས་ཀྱི་ལམ་དགྱེས་ཐུབ་པའི་བཀྲ་ཤིས་གང་བྱུང་བ། །བཀྲ་ཤིས་དེ་ནི་སྐྱེ་དགུ་ [266b.6]རྣམས་ལ་ཞི་བྱེད་ཤོག །འགྲོ་ལ་ཕན་ཕྱིར་དེ་བཞིན་གཤེགས་པ་དགའ་ལྷ་ཡི། །གཞལ་མེད་ཁང་གི་སྙིང་པོ་ནས་ནི་འདིར་གཤེགས་ཏེ། །དབང་བཅས་ལྷས་བསྐོར་བ་ཡི་བཀྲ་ཤིས་གང་བྱུང་བ། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །ལོ་མ་མེ་ཏོག་འོད་འབར་ཉམས་ [266b.7]དགའ་ལུམྦའི་ཚལ། །ལྷ་མང་དག་གིས་བརྟེན་པར་མགོན་པོ་བལྟམས་པ་ན། །སྲིད་པའི་མཐར་ཕྱིན་པ་ཡི་བཀྲ་ཤིས་གང་བྱུང་བ། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །གྲོང་ཁྱེར་སེར་སྐྱའི་གནས་ནས་རྒྱལ་པོའི་ཕོ་བྲང་དུ། །ལྷུམས་ནས་བལྟམས་པ་སྟོན་པ་བདེ་གཤེགས་ [267a] [267a.1]ཟས་གཙང་སྲས། །མྱུར་བསྐྲུན་བདུད་རྩིའི་ཆུས་གཏོར་བ་ཡི་བཀྲ་ཤིས་གང་ཡིན་པ། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །གྲོང་ཁྱེར་དམ་པ་སེར་སྐྱའི་གནས་ཞེས་བྱ་བ་ནི། །རྨད་དུ་བྱུང་བ་གྲགས་པ་ཆེ་བའི་ལྷ་ཡིས་མངོན་བསྟོད་པ། །བསམ་ཡས་དགེ་བསྒྲུབས་ [267a.2]བསོད་ནམས་ཕུང་པོའི་བཀྲ་ཤིས་གང་ཡིན་པ། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །དགྱེས་ཤིང་ནམ་ཕྱེད་གྲོང་ཁྱེར་མཆོག་ནས་མངོན་བྱུང་སྟེ། །དཀའ་ཐུབ་ཚལ་དུ་མངོན་པར་གཤེགས་ཤིང་ཚངས་ལ་སོགས། །ལྷ་ཡི་ཚོགས་ཀྱིས་ཡོངས་སུ་བསྐོར་བའི་བཀྲ་ [267a.3]ཤིས་གང་ཡིན་པ། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །རབ་ཏུ་འོད་འབར་གསེར་དང་འདྲ་བའི་སྐུ་མངའ་ཞིང་། །བཻ་ཌཱུརྱ་ལྟར་སྔོ་བའི་རྩྭ་བཏིང་སྟེང་བཞུགས་ཏེ། །སྐྱིལ་མོ་ཀྲུང་བཅས་མི་གཡོ་མཆོག་གི་བཀྲ་ཤིས་གང་། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག ། [267a.4]ཆུ་བོའི་འགྲམ་ན་ཙ་ཤ་ཕྲེང་གིས་ཡོངས་བསྐོར་བ། །ཤིན་ཏུ་རྨད་དུ་བྱུང་བ་སྲིད་པ་སེལ་མཛད་པ། །ཀླུ་ཡི་རྒྱལ་པོས་ཕྱག་བྱས་པ་ཡི་བཀྲ་ཤིས་གང་། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །ཤིང་རྒྱལ་དྲུང་གཤེགས་བྱམས་པའི་སྟོབས་ཀྱིས་བདུད་ཀྱི་ཕྱོགས། །མང་པོ་ [267a.5]བཏུལ་ཚེ་ས་སྟེངས་དང་ནི་ནམ་མཁའ་ལ། །བཅོམ་ལྡན་བཀྲ་ཤིས་རྣམ་པ་སྣ་ཚོགས་གང་བྱུང་བ། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །སྡུག་བསྔལ་མཐའ་དག་གཞིག་ཕྱིར་རྡོ་རྗེ་གདན་བཞུགས་ཏེ། །ནམ་གྱི་ཐོ་རངས་བདུད་བཞི་པོ་རྣམ་རབ་བཏུལ་བ། །སྟོན་པ་བདེ་བར་ [267a.6]གཤེགས་པའི་བཀྲ་ཤིས་གང་ཡིན་པ། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །གྲོང་ཁྱེར་ཝཱ་རཱ་ཎ་སཱིར་དྲང་སྲོང་མཆོག་བཞུགས་ནས། །ཆོས་ཀྱི་འཁོར་ལོ་མཆོག་བསྟན་པ་ཡི་བཀྲ་ཤིས་གང་། །ལྷ་ཡུལ་དང་འདིར་ཤིན་ཏུ་རྨད་དུ་བྱུང་གྱུར་པ། །བཀྲ་ཤིས་དེ་ནི་སྐྱེ་དགུ་ [267a.7]རྣམས་ལ་ཞི་བྱེད་ཤོག །བཀྲ་ཤིས་གང་ཞིག་ཕན་བྱེད་དམ་པ་དག་བྱེད་པ། །བསོད་ནམས་བྱ་བྱེད་འཕགས་པའི་སྐྱེ་བོས་མངོན་བསྟོད་པ། །བཅོམ་ལྡན་ཤཱཀྱ་ཐུབ་པའི་སེང་གེས་གང་གསུངས་པ། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །མུ་སྟེགས་བྱེད་པ་ཀུན་གྱི་ཀྱི་ང་རྒྱལ་གཞོམ་ [267b] [267b.1]པ་དང་། །འགྲོ་ལ་བདེ་བ་སྐྱེད་ཕྱིར་ཆོ་འཕྲུལ་དམ་པ་དག །ཉེ་བར་སྟོན་པ་རྒྱལ་བའི་བཀྲ་ཤིས་གང་ཡིན་པ། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །འགྲོ་ལ་ཕན་ཕྱིར་མཐོ་རིས་ནས་ནི་འདིར་གཤེགས་ཏེ། །ཚངས་པ་ལ་སོགས་ལྷ་ཚོགས་ལག་ན་རྔ་ཡབ་གདུགས། ། [267b.2]སྣ་ཚོགས་ཐོགས་པས་ཡོངས་སུ་བསྐོར་བའི་བཀྲ་ཤིས་གང་། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །དེ་བཞིན་གཤེགས་པ་ཞི་བ་མཆོག་ཏུ་ཉེར་གཤེགས་པ། །མནྡྲཱ་ར་བས་མེ་ཏོག་མང་པོས་མངོན་མཆོད་པ། །ལྷ་མཆོག་རྣམས་ཀྱིས་མངོན་པར་བསྟོད་པའི་ [267b.3]བཀྲ་ཤིས་གང་། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ཤོག །ལྷ་དང་ཀླུ་དང་མི་ཡི་དབང་པོས་ཕྱག་བྱས་པ། །མཁའ་ལྡིང་གནོད་སྦྱིན་དྲི་ཟའི་དབང་པོས་མཆོད་གྱུར་པ། །དེ་བཞིན་གཤེགས་པ་སྟོབས་བཅུ་ལྡན་ཀྱི་བཀྲ་ཤིས་གང་། །བཀྲ་ཤིས་དེ་ནི་སྐྱེ་དགུ་རྣམས་ལ་ཞི་བྱེད་ [267b.4]ཤོག །ཅེས་བྱ་བ་ལ་སོགས་པའི་བཀྲ་ཤིས་ཀྱི་ཚིགས་སུ་བཅད་པ་དང་གླུ་བླངས་ལ་དེ་སེང་གེའི་གདན་ནམ་ཁྲི་ལ་ཟླ་བའི་དཀྱིལ་འཁོར་དར་གྱིས་གཡོགས་པ་ཡི་གེ་ཧཱུཾ་བཟླས་པ་ལ་བཞག་སྟེ་དབང་བསྐུར་བར་བྱའོ། །དང་པོར་ནི་རྣམ་པར་རྒྱལ་བའི་བུམ་པས་སོ། །དེ་ནས་ནི་ལྷ་མོ་ [267b.5]བཞིའི་བུམ་པ་དང་། ལྷ་ཐམས་ཅད་ཀྱི་བུམ་པས་རེ་རེ་ཞིང་རང་གི་སྔགས་ཟློས་ཤིང་དབང་བསྐུར་རོ། །དེ་ལྟར་ཕྱིའི་དབང་བསྐུར་བ་བྱིན་ནས་གསང་བའི་དབང་བསྐུར་བར་བྱའོ། །དེ་ནས་རང་གི་སྙིང་ག་ལས་བྱུང་བའི་འོད་ཀྱི་ཚོགས་ཀྱིས་ཕྱོགས་བཅུ་མཐའ་ཡས་པ་ན་བཞུགས་པའི་དེ་བཞིན་ [267b.6]གཤེགས་པ་རྣམས་དང་། རིག་པའི་ལྷ་མོ་རྣམས་སློབ་མ་དབང་བསྐུར་བར་བྱ་བའི་ཕྱིར་ཡང་དག་པར་བསྐུལ་ལ། །སྔར་སྨྲས་པའི་ཚིགས་སུ་བཅད་པས་འདི་ལ་སྩལ་དུ་གསོལ་ཞེས། དེ་བཞིན་གཤེགས་པ་རྣམས་ལ་གསོལ་བ་བཏབ་པས་སྔོན་གྱི་ཕན་པར་མཛད་པ་དང་། ཐུགས་རྗེ་ [267b.7]ཆེན་པོའི་ཤུགས་ཀྱིས་ནམ་མཁའི་གཏོས་ཐམས་ཅད་ཏིལ་གྱི་གང་བུ་ལྟར་གང་བར་བྱོན་ནས། གདུགས་དང་། རྒྱལ་མཚན་དང་། བ་དན་དང་། གོས་དང་། སིལ་སྙན་དང་རོལ་མོ་ལ་སོགས་པའི་དབང་བསྐུར་བའི་མཆོད་པའི་ཡོ་བྱད་དང་ལྡན་པ་རྣམས་དང་། རིག་པའི་ལྷ་མོ་པདྨའི་རྩ་བ་ལྟར་ [268a] [268a.1]དཀར་བའི་ཡེ་ཤེས་ཀྱི་བདུད་རྩིའི་ཆུས་གང་བའི་བུམ་པ་ཕྱག་ན་བསྣམས་པ་རྣམས་ཀྱིས་ཕྱག་གི་རྩེ་མོ་མཆོག་གིས་སློབ་མ་རྣམས་ལ། དབང་བསྐུར་བ་ནི་རྡོ་རྗེ་ཆེ། །ཞེས་བྱ་བ་ལ་སོགས་པའི་ཚིགས་སུ་བཅད་པ་དང་། སྔགས་ཀྱིས་དབང་བསྐུར་བར་གྱུར་པར་བསམ་པར་ [268a.2]བྱའོ། །དེའི་འོག་ཏུ་སངས་རྒྱས་བཅོམ་ལྡན་འདས་དང་། ལྷ་མོ་དེ་ནས་སློབ་མའི་བ་སྤུའི་བུ་ག་རྣམས་སུ་ཞུགས་པས་ལུས་ཐམས་ཅད་དེའི་རང་བཞིན་དུ་བྱས་ཏེ། མི་བསྐྱོད་པ་ཅོད་པན་གྱི་ཚུལ་གྱིས་གནས་པར་བསམ་པར་བྱའོ། །དབང་བསྐུར་བ་ལྔ་པོ་སྔར་བཤད་པ་ཉིད་ཀྱི་སྔགས་དང་ [268a.3]ཕྱག་རྒྱ་དང་བཅས་པས་བསྟན་པར་བྱའོ། །དེ་ནས་གོ་ཆ་བསྐོན་ལ་དར་དཔྱངས་འཕྱང་བ་དང་མཉམ་པའི་ཐལ་མོས་དགབ་པར་བྱས་ལ། རྡོ་རྗེའི་དབང་བསྐུར་བ་དང་། བདག་པོའི་དབང་བསྐུར་བ་དང་། མིང་གི་དབང་བསྐུར་བ་དང་། དམ་ཚིག་གསུམ་ཡང་སྒྲུབ་པའི་ཐབས་ཀྱི་རིམ་པས་སྦྱིན་པར་བྱའོ། ། [268a.4]དེའི་འོག་ཏུ་དངོས་གྲུབ་ཀྱི་རྡོ་རྗེའི་བརྟུལ་ཞུགས་སྦྱིན་ནོ། །སློབ་མས་ཀྱང་རྡོ་རྗེ་ཐལ་མོ་བསྐོར་བས་སླར་ཕྱག་བྱས་ལ། དབང་བསྐུར་བ་བླང་བར་བྱའོ། །དེ་ནས་ཡང་དག་པར་བསྟོད་རི་ལ་སྒེག་མོ་ལ་སོགས་པའི་རྣལ་འབྱོར་པས་གར་སྔོན་དུ་འགྲོ་བ་དང་། སྒེག་པ་དང་བཅས་པས་སློབ་མ་དེ་ལ་ལཱ་སུ་ཞེས་ [268a.5]བྱ་བ་དང་མེ་ཏོག་ཅིག་འཕངས་ལ་འདི་སྐད་ཅེས་བརྗོད་པར་བྱའོ། །དེང་ནས་བརྩམས་ཏེ་རྫོགས་སངས་རྒྱས། །དེའི་སྲས་ལྷན་ཅིག་རོལ་པར་གྱིས། །རྡོ་རྗེ་བསྙེམས་པའི་སྦྱོར་བ་ཡིས། །དགའ་བའི་མཆོད་པ་བདེ་མཆོག་ཡིན། །ཨཿསྒེག་བཅས་ཕྲེང་བ་འཕེན་པ་དང་། །སངས་རྒྱས་ཐམས་ཅད་ [268a.6]མཆོད་པར་གྱིས། །ཕྲེང་བ་དེ་ཡི་རྒྱན་ཡིན་པས། །འདི་དང་འབྲལ་བ་མེད་པར་གྱིས། །ཨོཾ་ལུས་ཅན་ཀུན་ལ་དམ་ཆོས་ཀྱི། །ཡང་དག་བརྗོད་པ་གླུ་རུ་བླང་། །དེ་ནི་མྱུར་བར་བདེ་གཤེགས་དེའི། །བདེ་བ་ཉམས་སུ་མྱོང་བར་འགྱུར། །གཱི་ཐལ་མོ་གར་བཅས་ཕུལ་བ་ཡིས། །རྫོགས་པའི་སངས་རྒྱས་ [268a.7]མཉེས་པར་གྱིས། །རྫོགས་སངས་རྒྱས་ཀྱིས་འདུལ་བའི་ལས། །རོལ་མོས་གར་ནི་བྱེད་པོར་འགྱུར། །ཧོཿབདུག་སྤོས་ཕུལ་བས་རྫོགས་སངས་རྒྱས། །བརྟུལ་ཞུགས་བཟང་པོས་ཆེར་ཚིམ་གྱིས། །འགྲོ་ལ་བདེ་གཤེགས་འབབ་པ་དང་། །ཡེ་ཤེས་ཀྱིས་ནི་ཚིམ་པར་འགྱུར། །ཨཿམེ་ཏོག་ [268b] [268b.1]གཏོར་བས་སྡོགས་སངས་རྒྱས། །སླར་ཡང་བྱང་ཆུབ་ཡན་ལག་བསགས། །མཚན་དང་དཔེ་བྱད་ལྡན་པ་ཡི། །བདེ་གཤེགས་སྐུ་ནི་འཐོབ་པར་འགྱུར། །བྷཱུཾ་རྡོ་རྗེ་ཆོས་ལྟར་རང་ཉིད་ཀྱིས། །ཆོས་ཀྱི་མེ་ནི་ལེགས་སྦར་ལ། །མ་རིག་ལྡོངས་བྱས་སེམས་ཅན་རྣམས། །ཡེ་ཤེས་སྣང་ [268b.2]བས་བསལ་བར་གྱིས། །པུཾ་རྒྱལ་བ་ཁྱོད་ཀྱིས་དྲིལ་ཕུལ་བས། །ལུས་ཅན་རྣམས་ལ་བྱང་ཆུབ་བསྐོར། །ཚུལ་ཁྲིམས་ཏིང་འཛིན་ཤེས་རབ་དང་། །རྣམ་གྲོལ་ཡེ་ཤེས་མཐོང་བ་ཡིན། །གཿདེ་ནས་བདག་པོའི་སྦྱོར་བ་དང་ལྡན་པས་གསེར་གྱི་ཐུར་མ་བཟླས་པ་བླངས་ལ། མདུན་དུ་འདི་ [268b.3]སྐད་ཅེས་བརྗོད་པར་བྱའོ། །ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནེེ་ཏྲ་ཨ་པ་ཧ་ར་ཏི་མི་རཾ་ཧྲིཿསློབ་མའི་མིག་གཉིས་སུ་ཡི་གེ་པྲ་བསམས་ལ་བྱུག་པར་བྱའོ། །དེ་ནས་མེ་ [268b.4]ལོང་བསྟན་ལ། ཆོས་ཀྱི་མཚན་ཉིད་བསྟན་པར་བྱའོ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །ངོ་བོ་ཉིད་མེད་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་ [268b.5]མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེས། །དེ་ནས་དབྱངས་ཀྱི་ཡི་གེ་ཐ་མ་ལས་བྱུང་བའི་དྲིལ་བུ་དཀྲོལ་ལ་བྱིན་ཏེ། །ཆོས་རྣམས་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་སྦྱོར་བ་ཡིས། །ཀུན་མཆོག་མཉམ་པ་ཉིད་ [268b.6]དུ་གསལ། །དེ་ནས་ཡི་གེ་ཧོས་གཞུ་བྱིན་ལ། འདི་སྐད་ཅེས་བརྗོད་པར་བྱའོ། །དེ་བཞིན་གཤེགས་པ་ཐམས་ཅད་མཉེས་པར་གྱིས་ཤིག་ཅེས་བརྗོད་དེ། ཕྱོགས་བཞིར་མདའ་བཞི་འཕང་བར་བྱའོ། །གཅིག་ནི་སྟེང་དུའོ། །གཅིག་ནི་འོག་ཏུའོ། །ཡང་ཨཿབཛྲ་སཏྭ་ཞེས་བྱ་བ་འདིས་མེ་ལོང་ [268b.7]བླངས་ལ། རྡོ་རྗེ་སེམས་དཔའ་མེ་ལོང་བཞིན། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་ཉིད་ནི། །བུ་ཁྱོད་ཀྱི་ནི་སྙིང་ལ་ཞུགས། །གང་འདི་དེ་བཞིན་གཤེགས་པ་ཐམས་ཅད་ཀྱི་བདག་པོར་བྱང་ཆུབ་ཀྱི་སེམས་ནི་འདི་ཡིན་པར་ཤེས་པར་གྱིས་ཤིག་ཅེས་བརྗོད་པར་ [269a] [269a.1]བྱའོ། །དེ་ནས་ཨོཾ་བཛྲ་ཧེ་ཏུ་མཾ་ཞེས་བྱ་བ་དང་། རྐང་པ་གཉིས་ཀྱི་བར་དུ་ཆོས་ཀྱི་འཁོར་ལོ་གཞག །ཨོཾ་བཛྲ་བྷ་ཥ་རཾ་ཞེས་བྱ་བ་དང་། ལག་པ་གཡས་སུ་དུང་དབྱངས་ཀྱི་ཡི་གེ་དང་པོས་ལག་པ་གཡོན་དུ་གླེགས་བམ་དང་། དབྱངས་ཀྱི་ཡི་གེ་ཐ་མས་དྲིལ་བུ་བྱིན་ལ། དེ་ནས་བརྩམས་ [269a.2]ཏེ་སེམས་བསྐྱེད་པ་ཙམ་གྱིས་ཆོས་ཀྱི་འཁོར་ལོ་བསྐོར་ཅིག །དེ་རིང་ཕན་ཆད་འཇིག་རྟེན་ལ། །སྐྱོབ་པ་རྣམས་ཀྱིས་འཁོར་ལོ་བསྐོར། །ཆོས་ཀྱི་དུང་ནི་བླ་མེད་པས། །ཀུན་དུ་མ་ལུས་གང་བར་གྱིས། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱད་པའི་ཚུལ་ [269a.3]གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ན་སངས་རྒྱས་ལ། །ཕན་ཐོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཀྱང་། །ཀུན་དུ་ཁྱོད་ལ་སྲུང་བར་བྱེད། །ཡང་དག་པར་རྫོགས་པའི་སངས་རྒྱས་ཀྱི་འཁོར་ལོས་སྒྱུར་བའི་སྦྱོར་བ་ཇི་ལྟ་བ་དང་ལྡན་པས། འཇིག་རྟེན་ཀུན་ལ་ཐམས་ [269a.4]ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བའི། །ཆོས་ཀྱི་འཁོར་ལོ་རབ་ཏུ་བསྐོར། །དེ་བཞིན་དུ་རྡོ་རྗེ་དང་། ཁྲོ་བོ་དང་། པདྨ་དང་། ནོར་བུའི་འཁོར་ལོ་རབ་ཏུ་བསྐོར་ཞེས་ཚིགས་སུ་བཅད་པ་ལྔས་རྗེས་སུ་གནང་བ་བྱིན་ལ། གཟེངས་བསྟོད་པ་ནི། ཕྱག་རྒྱ་ཆེན་ [269a.5]པོ་རྒྱུར་གྱུར་པས་སངས་རྒྱས་ཐམས་ཅད་ཀྱི་བདག་ཉིད་ཀྱི་སྤྱོར་བས་སྙིང་གར་གཡོན་པ་དེ་བཞིན་གཤེགས་པའི་ཁུ་ཚུར་གྱིས་ཆོས་གོས་ཀྱི་ཐ་མ་འཛིན་པའི་ཚུལ་དུ་བྱས་ལ་གཡས་པ་མཆོག་སྦྱིན་པ་ལ། རྡོ་རྗེ་མིང་གི་དབང་བསྐུར་བས་ལུང་བསྟན་པར་བྱའོ། །ཨོཾ་ཨེ་ཤོ་ཧཾ། བྱཱ་ཀ་རོ་མི་ཏྭཾ་བཛྲ་སཏྭ་ཏ་ཐཱ་ག་ཏ་བྷ་ [269a.6]བ་དུར་ག་ཏི་ཏོ་དྟི་ཏྱཱནྟ་བྷ་བ་སིདྡྷ་ཡེ་ཧེ་བཛྲ་ནཱ་མ་ཏ་ཐཱ་ག་ཏ་སིདྡྷ་ས་མ་ཡ་སྟྭཾ། བྷུར་བྷུ་བ་སྭཿགང་ལ་གཟེངས་བསྟོད་པ་འདི་དང་། ཕྱག་རྒྱ་ཆེན་པོས་ལུང་བསྟན་པ་མཆོག་ཏུ་གསང་བའི་ཆོ་གས་བྱས་པ་དེ་ལ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་པ་ཐམས་ཅད་དང་བྱང་ཆུབ་ [269a.7]སེམས་དཔའི་འཁོར་གྱི་དཀྱིལ་འཁོར་དང་བཅས་པའི་དེ་བཞིན་གཤེགས་པ་ཐམས་ཅད་རང་གི་དམ་ཚིག་སློབ་དཔོན་ལ་མགྲིན་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་མཛད་དོ། །འདི་ལྟ་སྟེ། གཟེངས་བསྟོད་པ་འདི་ཉིད་དང་ཕྱག་རྒྱ་ཆེན་པོས་མཆོག་ཏུ་གསང་ [269b] [269b.1]བ་དམ་པའི་དངོས་གྲུབ་ཀྱི་བྱིན་གྱིས་བརླབ་ཆོཔ་འདི་དང་། གསང་སྔགས་ཀྱི་སྟོབས་ལ་དད་པར་བྱའོ་ཞེས་སློབ་མ་རྣམས་ལ་བརྗོད་པར་བྱའོ། །དེ་ནས་དཀྱིལ་འཁོར་དུ་གསང་བ་བརྗོད་པར་བྱ་སྟེ། འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ནི་སྡིག་མེད་དེ། །དེ་བས་འདོད་ལ་ཆགས་ [269b.2]བྲལ་བར། །ཁྱོད་ཀྱིས་ཀྱང་ནི་མ་བྱེད་ཅིག །མ་ཧཱ་ས་མ་ཡ་ཧ་ན་ཕཊ། དེའི་འོག་ཏུ་རང་གི་ལག་པ་གཡོན་པས་སློབ་མའི་མཐེ་བོ་གཡས་པ་བཟུང་ལ། སློབ་མའི་གཙོ་བོ་ལ་དམིགས་ནས་མར་གྱི་སྲེག་བླུགས་བྱ་བ་དང་། སྦྲང་རྩི་དང་མར་དང་ཞོ་དང་བསྲེས་པའི་ཏིལ་ཀྱི་སྲེག་བླུགས་བརྒྱ་བྱས་ [269b.3]ལ། བསང་གཏོར་བྱས་ཏེ་སྙིང་གར་བྱུགས་ལ་ལས་ཐམས་ཅད་པ་དང་། རིགས་ཀྱི་སྙིང་པོ་བཟླས་པའི་སྲུང་སྐུད་དང་། གདུ་བུ་ལག་ངར་དུ་གདགས་པར་བྱའོ། །དེ་ནས་དེའི་མགོ་བོར་གདུགས་བཞག་ལ། སྐོར་བ་བྱེད་དུ་བཅུག་སྟེ། ཐལ་མོ་སྦྱར་བ་དང་བཅས་པར་དཀྱིལ་འཁོར་གྱི་སྒོར་ [269b.4]གདུགས་དང་བཅས་པར་ལུས་ཕབ་ལ་འདི་སྐད་ཅེས་བརྗོད་པར་བྱའོ། །སློབ་མ་འདི་ནི་ཕུལ་བ་ལགས། །གསང་སྔགས་རྒྱུད་ནི་འཛིན་པར་འགྱུར། །གདུགས་བཞག་ནས་ནི་སློབ་དཔོན་གྱིས། །སྙིང་ལ་འབབ་པ་དེ་ལ་བརྗོད། །ད་ནི་དཀྱིལ་འཁོར་སློབ་དཔོན་གྱུར། །གསང་སྔགས་རྒྱུད་ཀྱང་ [269b.5]འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀུན་གྱིས་བཀུར་བར་འགྱུར། །སེམས་ཅན་ཀུན་ལ་སྙིང་བརྩེའི་ཕྱིར། །ཁྱོད་ཀྱིས་དཀྱིལ་འཁོར་ཆོ་ག་བཞིན། །ནན་ཏན་བསྐྱེད་དེ་བྲི་བར་གྱིས། །སྒྲུབ་པ་པོ་ཡང་རྒྱུད་ལ་སྤྱོར། །དེ་ནས་རང་ཉིད་ཀྱིས་ལན་བརྒྱ་བཟླས་པ་དང་བཅས་ [269b.6]པའི་སྔགས་ཕྱག་རྒྱ་དང་ལྡན་པར་སློབ་མ་ལ་བྱིན་ལ། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །ཞེས་རིམ་བཞིན་དུ་སློབ་དཔོན་དང་སློབ་མ་དག་གིས་སྔགས་བསྐུལ་ལ་སྨྲ་བས་ [269b.7]བྱིན་ལ། དཀྱིལ་འཁོར་དུ་བཟླས་ལ་ལྷ་རྣམས་ཀྱི་ཕྱག་རྒྱ་བཞི་ཡང་བསླབས་ལ། ཁྱོད་ཀྱིས་གཞན་ཕྱག་རྒྱ་ལ་མི་མཁས་པ་གང་ལ་ཡང་ཕྱག་རྒྱ་རྣམས་སྟོན་པར་མ་བྱེད་ཅིག །དེ་ཅིའི་ཕྱིར་ཞེ་ན། འདི་ལྟར་སེམས་ཅན་དེ་རྣམས་ནི་དཀྱིལ་འཁོར་མ་མཐོང་བར་ཕྱག་རྒྱ་བཅིང་བ་ལ་རབ་ཏུ་སྦྱོར་བ་ལས་ [270a] [270a.1]འབྲས་བུ་མ་ཐོབ་པ་དང་སོམ་ཉིར་གྱུར་ནས་ཡ་ང་བ་མ་སྤངས་པས་དུས་བྱས་ནས་དམྱལ་བར་འགྲོ་བར་འགྱུར་རོ། །རྒྱུ་དེས་ན་ཇི་ལྟར་ཞུགས་པ་རྣམས་ལ་དེ་བཞིན་གཤེགས་པ་ཐམས་ཅད་འདུས་པ་ལ་སོགས་པའི་དབུགས་དབྱུང་བ་སྦྱིན་པར་བྱ་སྟེ། གསང་བའི་དཀྱིལ་འཁོར་ [270a.2]དམ་པ་ནི། །མཐོང་བ་དང་ནི་ཞུགས་གྱུར་པས། །སྡིག་པ་ཀུན་ལས་ངེས་གྲོལ་ཞིང་། །ཁྱེད་རྣམས་དེ་ཉིད་ལེགས་པར་གནས། །བདེ་ཆེན་ཐེག་པ་འདི་ལས་ནི། །སླར་འཆི་བ་ནི་ཡོད་མིན་ཏེ། །མི་ཤིགས་པ་དང་མི་སོད་པས། །ཅིས་ཀྱང་མི་འཇིགས་དགའ་བར་གྱིས། །སྲིད་པའི་སྡུག་བསྔལ་ལས་ [270a.3]ཁྱོད་བཏོན། །སྲིད་པ་ཤིན་ཏུ་གྲུབ་པའི་ཕྱིར། །སྟོན་པ་མཆོག་ཏུ་གྱུར་པ་ཡིན། །དམ་ཚིག་སྡོམ་པ་གྲུབ་པ་འདི། །རྟག་ཏུ་ཁྱོད་ཀྱིས་བསྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཉིད་དུ་དོགས་མེད་པའི། །བྱང་ཆུབ་སེམས་ཀྱང་གཏང་མི་བྱ། ། [270a.4]ཕྱག་རྒྱ་རྡོ་རྗེ་གང་ཡིན་པའོ། །དེ་རིང་ཕན་ཆད་བུ་ཁྱོད་ཀྱིས། །སྲོག་དང་རུས་པ་ལ་བབ་ཀྱང་། །དམ་པའི་ཆོས་དང་བྱང་ཆུབ་སེམས། །སློབ་དཔོན་དག་ཀྱང་བརྙས་མི་བྱ། །གདུག་ལ་བྱམས་དང་ཆགས་བྲལ་བར། །ནམ་ཡང་བྱ་བ་མ་ཡིན་ནོ། །དེ་ལྟར་བྱས་ན་སངས་རྒྱས་ཀྱིས། །ཁྱོད་ནི་དམྱལ་བའི་མེ་ནང་ [270a.5]འདོར། །བདག་ཉིད་ཡོངས་སུ་སྤངས་ནས་སུ། །དཀའ་ཐུབ་ཀྱིས་ཀྱང་མ་གདུངས་ཤིག །ཅི་བདེ་བར་ནི་བདེ་བར་གཟུང་། །འདི་ནི་མ་བྱོན་རྫོགས་སངས་རྒྱས། །རྡོ་རྗེ་དྲིལ་བུ་ཕྱག་རྒྱ་རྣམས། །ནམ་ཡང་ཡོངས་སུ་མི་དོར་ཞིང་། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་འདྲ། ། [270a.6]སངས་རྒྱས་ཀུན་མཚུངས་བླ་མ་ཡི། །སློབ་དཔོན་ལ་ནི་གང་སྨོད་པ། །དེ་ནི་སངས་རྒྱས་ཀུན་སྨད་པས། །རྟག་ཏུ་སྡུག་བསྔལ་ཐོབ་འགྱུར་ཏེ། །རིམས་དང་དུག་དང་དབྱིག་དུག་ནད། །མཁའ་འགྲོ་རྣམས་ཀྱིས་གཙེས་པ་དང་། །གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་ཅན་དམྱལ་ [270a.7]ལྟུང་འགྱུར། །དེ་བས་ནན་ཏན་ཐམས་ཅད་ཀྱིས། །རྡོ་རྗེ་སློབ་དབོན་བློ་གྲོས་ཆེ། །དགེ་ལ་རབ་ཏུ་མི་སྤྱོམ་པ། །ནམ་ཡང་སྨད་པར་མི་བྱའོ། །བླ་མ་ལ་ནི་གུས་བཅས་ཡོན། །རྗེས་མཐུན་ཁྱོད་ཀྱིས་སྦྱིན་པར་བྱ། །དེས་ན་རིམས་སོགས་གནོད་པ་རྣམས། །ཕྱིར་ཞིང་འབྱུང་བར་མི་འགྱུར་རོ། །རང་གི་དམ་ [270b] [270b.1]ཚིག་སློབ་དཔོན་ནི། །སྦྱིན་མིན་བུ་དང་ཆུང་མ་དང་། །རང་སྲོག་གིས་རྟག་བསྟེན་བྱ་ན། །ལོངས་སྤྱོད་གཡོ་བ་སྨོས་ཅི་དགོས། །གང་ཕྱིར་བསྐལ་པ་བྱེ་བར་ནི། །གྲངས་མེད་པར་རྙེད་དཀའ་བ་ཡི། །སངས་རྒྱས་ཉིད་ཀྱང་བརྩོན་ལྡན་ལ། །ཚེ་འདི་ཉིད་ལ་སྟེར་བར་བྱེད། །རྟག་ཏུ་རང་གི་དམ་ཚིག་བསྲུང་། །རྟག་ [270b.2]ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། །འདི་ནི་སངས་རྒྱས་ཀུན་དང་འདྲ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་ཡིན་ཏེ། །ཚོགས་ལས་དངོས་གྲུབ་མཆོག་ཏུ་འགྱུར། །སློབ་དཔོན་གྱི་ནི་ཡོན་ཏན་བཟུང་། །སྐྱོན་ [270b.3]རྣམས་ནམས་ཀྱང་མ་ཡིན་ནོ། །ཡོན་ཏན་བཟུང་བས་དངོས་གྲུབ་ཅིང་། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཡི་གྲིབ་མ་འགོམ་པ་ནི། །མཆོད་རྟེན་བཤིག་དང་འདྲ་བར་གསུངས། །རྒྱུ་དང་མི་རྒྱུའི་གསང་བ་པ། །དམ་པ་ཐམས་ཅད་སྤངས་པར་འགྱུར། །སློབ་དཔོན་སྨོད་པར་བྱེད་པ་དག ། [270b.4]རྨི་ལམ་དུ་ཡང་མཐོང་མི་བྱ། །སློབ་དཔོན་སྨད་པ་གང་ཡིན་ཏེ། །བགེགས་དང་ལོག་འདྲེན་རྣམས་ཀྱིས་གཟུང་། །གཏུམ་པོའི་ལས་བྱེད་ངན་པའི་བདག །མཁས་པས་རྟག་ཏུ་སྤང་བར་བྱ། །མནར་མེད་ལ་སོགས་འཇིགས་རུང་བའི། །དམྱལ་བ་བསྟན་པ་གང་ཡིན་པ། །དེར་ནི་སློབ་དཔོན་སྨད་བྱེད་པ། ། [270b.5]གནས་པར་འགྱུར་ཞེས་རབ་ཏུ་གསུངས། །དེ་ཕྱིར་ཀུན་གྱིས་རབ་བསྒྲིམས་ཏེ། །བསམ་ཡས་འབྲས་བུ་སྦྱིན་བྱེད་པ། །སངས་རྒྱས་འབྲས་བུ་འདོད་པ་ཡི། །སེམས་ཅན་དད་པས་དེ་མཆོད་ཅིག །གང་ཕྱིར་འདི་ནི་ལེགས་གནས་པས། །དེང་ཁྱོད་སྐྱེ་བ་འབྲས་བུར་བཅས། །དམ་ཚིག་ལྷ་རྣམས་ཀུན་མཉམ་པར། ། [270b.6]དེང་ཁྱོད་གྱུར་པར་ཐེ་ཚོམ་མེད། །སངས་རྒྱས་རྡོ་རྗེ་འཛིན་བཅས་པ། །ཀུན་གྱི་དེང་ཁྱོད་དབང་བསྐུར་བས། །ཁམས་གསུམ་གྱི་ནི་རྒྱལ་པོ་ཆེ། །རྒྱལ་བའི་བདག་པོར་བསྟན་པ་ཡིན། །དེང་ནི་བདུད་ལས་རྣམ་རྒྱལ་ཏེ། །གྲོང་ཁྱེར་མཆོག་ཏུ་རབ་ཏུ་ཞུགས། །ཁྱེད་རྣམས་ཀྱིས་ནི་སངས་རྒྱས་ཉིད། །དེང་འདིར་ཐོབ་པར་ཐེ་ [270b.7]ཚོམ་མེད། །འདོད་པའི་ལོངས་སྤྱོད་ཐམས་ཅད་ཀྱིས། །ཅིས་ཀྱང་མི་འཇིགས་དགའ་བར་གྱིས། །དམ་ཚིག་འདི་ནི་འདའ་དཀའ་སྟེ། །སྡིག་པ་མེད་ཀྱིས་མ་འཇིགས་ཤིག །དེ་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་ཟད་བདེ་བསྐྱེད་བསྟེན་པར་གྱིས། །དེང་ནི་འགྲོ་ལ་མྱུར་བདེ་རྡོ་རྗེ་སེམས་ [271a] [271a.1]དཔའ་དང་། །རབ་ཏུ་མཉམ་ཞིང་རྟག་པ་ཉིད་དུ་རྟོགས་པར་འགྱུར། །སློབ་མ་རབ་དང་མཉེས་གཤིན་པས། །བླ་མའི་ཞབས་ལ་ཕྱག་འཚལ་ལོ། །གཙོ་བོས་ཇི་ལྟར་བཀའ་སྩལ་པ། །དེ་བཞིན་བདག་ནི་བགྱིད་ཅེས་བརྗོད། །དེ་ལྟར་ན་མདོར་བསྡུས་པ་དང་བར་མ་དང་རྒྱ་ཆེ་བའི་དབང་བསྐུར་བའི་ [271a.2]དབྱེ་བ་ནི་འདིར་མ་ཐོས་ཏེ། ཡོངས་སུ་རྫོགས་པའི་ཆོ་ག་གཅིག་པུ་ཉིད་ཐོབ་པའི་ཕྱིར་རོ། །དེ་ལྟར་ན་ཡང་མཁན་པོའི་ཞལ་སྔ་ནས་ཀྱིས་མཛད་པའི་འཕགས་པ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཆོ་གའི་རིམ་པ་རྗེས་སུ་འབྲངས་ནས་གསུམ་དུ་བྱ་བར་འདོད་པར་བྱའོ། །སྤྱིའི་དབང་བསྐུར་བའི་ཆོ་གའོ། ། [271a.3]གཞན་ཡང་དཔོན་དུ་དབང་བསྐུར་བར་འོས་པའི་སློབ་མ་ལ། དེ་བཞིན་དུ་ཁྲུས་དང་གོས་དང་རྒྱན་ལ་སོགས་པས་བརྒྱན་ལ་དམ་ཚིག་གསུམ་སྦྱིན་པའི་མཐར་ཐུག་པའི་ཆོ་ག་བྱས་ལ། དཀྱིལ་འཁོར་དུ་མངོན་པར་ཕྱོགས་པར་ཟླ་བའི་དཀྱིལ་འཁོར་གྱི་སྟེང་དུ་བཞག་གྲུལ། སློབ་དཔོན་གྱིས་དཀྱིལ་འཁོར་གྱི་དེ་ཁོ་ན་ [271a.4]ཉིད་དང་། ལྷའི་དེ་ཁོ་ན་ཉིད་དང་། སློབ་དཔོན་གྱི་ལས་རྣམས་བཤད་པར་བྱ་སྟེ། དེ་ཉིད་དེའི་སློབ་དཔོན་གྱིས་དབང་བསྐུར་བའི་གནས་ཡིན་ནོ། །འདི་དག་ཀྱང་བཅོམ་ལྡན་འདས་ཀྱིས་གསང་བ་ཡིན་པར་གསུངས་སོ། །དེ་ནས་ཚིགས་སུ་བཅད་པ་ལྔ་པས་རྗེས་སུ་གནང་བ་བྱིན་ལ། གཟེངས་བསྟོད་པས་ [271a.5]ལུང་བསྟན་པར་བྱའོ། །དཀྱིལ་འཁོར་གྱི་དེ་ཁོ་ན་ཉིད་ནི་འདི་ཡིན་ཏེ། མི་མཉམ་མེད་པས་ཟུར་བཞིར་མཉམ། །དྲན་དང་དབང་པོས་སྒོ་བཞི་སྟེ། །བསམ་གཏན་རྣམས་ཀྱིས་རྟ་བབས་བཞི། །ཏིང་འཛིན་ཁྱམས་སུ་ཤེས་པར་བྱ། །ཁྱམས་ལ་བརྟེན་པའི་རྡོ་རྗེ་མཆོག །གཟུངས་རྣམས་ལྷ་མོས་མཆོད་པ་ཡིན། ། [271a.6]རྒྱན་རྣམས་ཀུན་ཀྱིས་བཀྲ་བ་ཡང་། །བསམ་པ་ཐམས་ཅད་རྫོགས་བྱེད་པའོ། །གདུལ་བས་བསྐྱོད་པ་སྣ་ཚོགས་མཆོག །དམ་ཆོས་སྒྲ་ནི་ཀུན་འགྲོ་བ། །རླུང་གིས་བསྐྱོད་པའི་སྣ་ཚོགས་མཆོག །དར་འཕན་དྲིལ་བུ་སྒྲོགས་པ་ཡིན། །མེ་ལོང་ཡེ་ཤེས་བཏགས་མེ་ཏོག །བྱང་ཆུབ་ཡན་ལག་མེ་ཏོག་ཕྲེང་། །དྲ་བ་ [271a.7]མེ་ལོང་བཏགས་མེ་ཏོག །མེ་ཏོག་ཆུན་འཕྱང་རྒྱན་གྱིས་བསྐོར། །ཀུན་གྲུབ་མི་ཟད་བདེ་བ་སྟེ། །བདེ་བ་ཆེན་པོ་ཞེས་བཤད་དེ། །དེ་ཡི་ནང་གི་འཁོར་ལོ་དེ། །དཀྱིལ་འཁོར་བརྒྱད་པ་འདྲ་བ་ནི། །དངོས་གྲུབ་བདེ་བ་ཀུན་སྟེར་བའི། །རྣམ་ཐར་བརྒྱད་པོ་དེ་ཉིད་ཡིན། །བྱང་ཆུབ་སེམས་ནི་ཐེག་པ་ཆེ། །མདོ་སྡེ་འཁོར་ལོ་ [271b] [271b.1]རབ་བསྐོར་བས། །རྡོ་རྗེའི་ཐིག་གིས་ཡོངས་བསྐོར་བའི། །རྡོ་རྗེ་འཁོར་ལོ་ཡིན་པར་བཤད། །འགྲོ་ལ་ཡེ་ཤེས་ཀྱི་ཆགས་པས། །ཚོན་ནི་རྫོགས་སངས་རྒྱས་ལྔ་ཡིན། །དབང་པོའི་དོན་ནི་རྣམ་དག་པ། །རང་གི་མཚན་ཉིད་རབ་དབྱེ་ཉིད། །ཤེས་རབ་ཡེ་ཤེས་བདུད་རྩི་འཐུང་། །རྡོ་རྗེ་ཅན་གྱི་བུམ་པ་དེ། །ཚོགས་ [271b.2]རྫོགས་པ་ཡི་རྒྱུ་མཐུན་ཞིང་། །ཐུགས་རྗེའི་རླན་ལྡན་བུམ་པ་གང་། །དཀྱིལ་འཁོར་གང་དུ་མེ་ཏོག་སྤོས། །མར་མེ་ཆེད་དང་དྲིར་བཤད་པ། །བྱང་ཆུབ་ཡན་ལག་ཡིད་རབ་ཚིམ། །ཆོས་ཀྱི་སྣང་གྲགས་ཚོགས་བསྡུས་ཡིན། །ཆོས་ཀྱི་ཟས་ནི་ལྷ་བཤོས་ཏེ། །ངོ་ཚ་ཁྲེལ་ཡོད་པ་ཡང་གོས། །གླུ་དང་གར་དང་ [271b.3]རོལ་མོ་མཆོག །བདེ་བ་ཆེན་པོའི་འཕེལ་བྱེད་ཡིན། །གྲོང་ཁྱེར་ཐར་པའི་གྲོང་ཁྱེར་པས། །དཀྱིལ་འཁོར་སྙིང་པོ་བསྡུས་པ་ཡིན། །དེ་ལྟར་སྤྲོས་པས་མཛེས་པ་ནི། །ཕ་རོལ་ཕྱིན་སོགས་འབྲས་བུ་ཡིན། །ལྷའི་དེ་ཁོ་ན་ཉིད་ཀྱང་དཔལ་འཇམ་པའི་རྡོ་རྗེ་ནི་ཤེས་རབ་ཀྱི་ཡེ་ཤེས་སྣང་བར་མཛད་པའོ་ཞེས་བྱ་བ་ལ་སོགས་པའོ། ། [271b.4]སློབ་དཔོན་གྱི་ནི་ལས་རྣམས་ཀྱང་། །དེ་ནས་རྡོ་རྗེ་སློབ་དཔོན་གྱིས། །དམ་ཚིག་མཆོག་གི་ཕྱག་རྒྱ་ནི། །ཆོ་ག་བཞིན་བཅིངས་ཞུགས་ནས་ཀྱང་། །སྒོ་ཊའི་ཕྱག་རྒྱས་དབབ་པར་བགྱི། །དེ་ལ་ཐམས་ཅད་དབབ་པའི་སྙིང་པོ་ནི་འདི་ལགས་སོ། །ཨཿབདག་ལ་བྱིན་གྱིས་བརླབས་ལ་སོགས། །ཇི་ལྟ་བར་ནི་བཀའ་མནོད་ [271b.5]དོ། །དེ་ལྟར་བགྱིས་ནས་བདག་མིང་བརྗོད། །དེ་ནས་རྡོ་རྗེ་བསྒྲུབ་པར་བགྱི། །རྡོ་རྗེ་སློབ་དཔོན་སེམས་དཔའ་ཡི། །རྡོ་རྗེ་ལྕགས་ཀྱུ་བཅིངས་ནས་ནི། །སེ་གོལ་མང་པོ་བརྡབ་བགྱིས་ལ། །སངས་རྒྱས་ཐམས་ཅད་བསྡུ་བར་བགྱི། །དེ་ཚེ་སངས་རྒྱས་ཐམས་ཅད་ནི། །རྡོ་རྗེ་སེམས་ལ་སོགས་བཅས་པ། །དཀྱིལ་འཁོར་ [271b.6]ཐམས་ཅད་གང་བ་རྣམས། །དཀྱིལ་འཁོར་རྣམས་སུ་འདུས་པར་འགྱུར། །དེ་ནས་རྡོ་རྗེ་སེམས་དཔའ་ཡི། །ཕྱག་རྒྱ་ཆེན་པོ་སྒོམ་བྱེད་ཅིང་། །མིང་བརྒྱ་རྩ་བརྒྱད་དམ་པ་ནི། །ལན་ཅིག་བར་དུ་བརྗོད་པར་བགྱི། །དེ་ནས་འདུས་པ་དགྱེས་པས་ན། །དེ་བཞིན་གཤེགས་རྣམས་བརྟན་པར་འགྱུར། །རྡོ་རྗེ་སེམས་དཔའ་ [271b.7]རང་གྲུབ་པ། །གྲོགས་པོ་ཉིད་དུ་ཉེ་བར་གནས། །དེ་ནས་སྒོ་རྣམས་ཐམས་ཅད་དུ། །ལྕགས་ཀྱུ་ལ་སོགས་ལས་བགྱིས་ནས། །ལས་ཆེན་མཆོག་གི་ཕྱག་རྒྱ་ཡིས། །དམ་ཚིག་རྣམས་ནི་བཞག་པར་བགྱི། །དམ་ཚིག་མཆོག་གི་ཕྱག་རྒྱ་དང་། །སེམས་དཔའི་རྡོ་རྗེ་ལ་སོགས་པས། །དེ་ལྟར་བྱང་ཆུབ་ཆེན་པོ་ [272a] [272a.1]བསྒྲུབ། །ཛཿཧཱུཾ་བཾ་ཧོཿཞེས་བརྗོད་ཅིང་། །དེ་ནས་སངས་རྒྱས་ལ་སོགས་པ།།སེམས་དཔའ་ཆེན་པོ་ཀུན་བསྡུ་བར། །སྤྱན་དྲངས་ནས་ནི་རབ་ཏུ་བཞུགས། །བཅིངས་ནས་དེ་ཡི་དབང་དུ་འགྱུར། །དེ་ནས་བདག་ཉིད་ཆེན་པོ་རྣམས། །གསང་བའི་མཆོད་པས་མཉེས་བགྱིས་ལ། །སེམས་ཅན་དོན་ཀུན་ [272a.2]བསྒྲུབ་པའི་ཕྱིར། །ཐམས་ཅད་མཛོད་ཅེས་གསོལ་བར་བགྱི། །འདི་ནི་གསང་བའི་དབང་བསྐུར་བའི་ཆོ་གའོ། །སློབ་མ་གཞན་དག་ནི་ཇི་ལྟ་བ་བཞིན་དུ་བཅུག་སྟེ། དཀྱིལ་འཁོར་བསྟན་པ་རྡོ་རྗེ་སེམས་མ་ལ་སོགས་པ་དང་། རང་གི་ལྷའི་དམ་ཚིག་གི་ཕྱག་རྒྱས་ཀྱང་རང་གི་ལྷག་པའི་ལྷར་བྱིན་ [272a.3]གྱིས་བརླབས་ལ་ཕྱག་རྒྱ་ཆེན་པོས་སྔར་བཤད་པའི་ཟླ་བའི་དཀྱིལ་འཁོར་ལ་བཞག་སྟེ། སྤོས་ལ་སོགས་པས་མཆོད་ཡོན་སྦྱིན་ཏེ། དང་པོ་ཁོ་ནར་ཆུ། དེ་ནས་ཕྱག་རྒྱ་ཅོད་པན་དར་དཔྱངས་དང་། རྡོ་རྗེ་དང་བདག་པོ་དང་། མིང་གི་དབང་བསྐུར་ལ་སྒེག་མོ་ལ་སོགས་པས་ཀྱང་ཡང་དག་པར་མཆོད་དེ། [272a.4]སྔགས་བྱིན་ལ་རང་གི་ལྷའི་ཕྱག་རྒྱ་བཞི་སྔ་མ་བཞིན་བསྟན་ནས་སློབ་མ་རེ་རེ་ནས་བཟུང་སྟེ། བླུགས་གཟར་གྱིས་དེ་རྣམས་ཀྱི་སྤྱི་བོ་ནས་བསྐོར་ཞིང་ཕབ་སྟེ། དགང་བླུགས་བདུན་ཕུལ་ལ་བསང་ཞིང་བྱབས་ལ་ལག་པར་གདུ་བུ་གདགས་པར་བྱའོ། །འདི་ནི་ཐུན་མོང་གི་འཇུག་པའི་ཆོ་གའོ། །དེ་ནས་དྲི་ལ་ [272a.5]སོགས་པ་དང་། སྒེག་མོ་ལ་སོགས་པས་ཀྱང་དཀྱིལ་འཁོར་པ་རྣམས་ཡང་དག་པར་མཆོད་ལ་དེ་བཞིན་གཤེགས་པ་ཐམས་ཅད་ལ་ཅི་ནུས་པར་མཆོད་ཅིག་ཅེས་སློབ་མ་རྣམས་ལ་བསྒོ་ལ། མཆོད་པ་བྱེད་དུ་བཅུག་ནས་ཇི་ལྟར་ཞུགས་པ་རྣམས་ཡང་བཟའ་བ་དང་བཏུང་བ་སྤྱོད་པ་ལ་སོགས་པ་ཐམས་ཅད་དང་། [272a.6]མགོན་པོ་ལ་ཕུལ་བ་རྣམས་ཀྱིས་ཀུན་དུ་ཚིམ་པར་བྱས་ནས། འདི་ནི་སངས་རྒྱས་ཐམས་ཅད་དེ། །ཞེས་བྱ་བ་ལ་སོགས་པ་རྡོ་རྗེའི་བརྟུལ་ཞུགས་བྱིན་ལ། དེ་རྣམས་དང་ལྷན་ཅིག་མཚན་མོ་ཉལ་བར་བསྒོམ་པ་དང་བཟླས་པ་བྱས་ལ། ཡང་སུ་ལ་ཡང་སྨྲ་བར་མི་བྱེད་ཅིག་ཐམས་ཅད་ལ་བསྒོ་ལ་བླ་མས་ཡོན་བླང་བར་ [272a.7]བྱའོ། །དེ་ནས་ཆུང་མ་སྡུག་པ་དང་། །རིན་ཆེན་གསེར་ནི་འབར་བ་དང་། །ནོར་བུ་མུ་ཏིག་བྱུ་རུ་དང་། །ལུས་ཀྱང་སྦྱིན་པར་བྱ་བ་ཡིན། །སློབ་མས་བླ་མ་ལ་གུས་པས། །ཅི་ནས་འདི་ལྟར་བྱ་བ་སྟེ། །ཇི་ལྟར་བླ་མ་མགུ་བར་བྱ། །བླ་མ་མགུ་བས་དངོས་གྲུབ་ཀྱི། །གཞན་དུ་མིན་ཞེས་ཐུབ་པས་གསུངས། །དེ་ནས་བཞིན་ [272b] [272b.1]བཟངས་ལོངས་ལ། དེ་བཞིན་གཤེགས་པས་གསུངས་པ་ཅི་རིགས་པ་རྫོགས་པར་གྱིས་ལ། གང་གིས་རིང་པོ་མི་ཐོགས་པ་ཁོ་ནར་ལྷ་དང་བཅས་པའི་འཇིག་རྟེན་གྱི་སྟོན་པར་འགྱུར་བ་དེ་ལྟར་གྱིས་ཤིག་ཅེས་སྙིང་ལ་འབབ་པའི་ཚིག་བརྗོད་ལ་སློབ་མ་གཏང་བར་བྱའོ། །དེ་ནས་མེ་ཐབ་ཀྱི་དབུས་སུ་ [272b.2]བཅོམ་ལྡན་འདས་དཀྱིལ་འཁོར་ཆེན་པོའི་བདག་པོ་དཀྱིལ་འཁོར་གྱི་འཁོར་ལོ་རྣམ་པར་བསམས་ལ། རྒྱས་པའི་ཆོ་གས་མར་གྱི་དགང་བླུགས་བརྒྱ་ཕུལ་ལ། ཞི་བའི་ཆོ་གས་ཀྱང་མར་གྱི་དགང་བླུགས་བརྒྱ་ཕུལ་ཏེ། ཡང་དག་པར་བསྟོད་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་དེ་ཕྱོགས་ཀྱི་ [272b.3]གཏོར་མ་བྱིན་ལ་ཕྱག་བྱས་ཏེ། མཆོད་ཡོན་ཕུལ་ལ་དགེ་བའི་རྩ་བ་ཡོངས་སུ་བསྔོས་ཏེ་སྔ་མ་བཞིན་དུ་ཕྱག་རྒྱ་དགྲོལ་བ་ལ་སོགས་པ་རྡོ་རྗེ་སེམས་དཔའི་ཕྱག་རྒྱ་བཅིངས་ལ་དཀྱིལ་འཁོར་ལན་གསུམ་བསྐོར་བ་བྱས་ཏེ། ཡེ་ཤེས་ཀྱི་དཀྱིལ་འཁོར་དང་གསང་བའི་དཀྱིལ་འཁོར་གཤེགས་སུ་གསོལ་ལ། ཇི་ལྟར་སྤྲུལ་ [272b.4]པའི་ཚོགས་ཀྱང་རང་གི་ལུས་ཀྱི་ནང་དུ་ཆུད་པར་བྱས་ལ། ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ་ཨཱདྱ་ནུཏྤནྡ་ཏྭཱཏ་ཅེས་བརྗོད་ལ། དེའི་དོན་ལ་ལྷག་པར་མོས་ཤིང་ཡི་གེ་ཧཱུཾ་དང་དཀྱིལ་འཁོར་འཕྱག་པར་བྱའོ། །འབད་པས་ཚོན་རྩི་བསྡུས་ནས་ནི། །ཆུ་ཆེན་དག་ཏུ་དོར་བར་བྱ། །དོར་ནས་ཀྱང་ནི་ས་གཞི་དེ། །བ་ཡི་ལྕི་བས་བྱུག་པར་བྱ། །དེ་ [272b.5]ནས་ཨོཾ་བཛྲ་ཀཱི་ལོཏ་ཀཱི་ལ་ཡ་སརྦྦ་ཀཱི་ལཱཾ། བུདྡྷ་སདྡྷྱ་ན་བཛྲ་དྷ་ར་ཨཱ་ཛྙཱ་ཡ་ཧཱུཾ་ཧཱུཾ་ཧཱུཾ་ཞེས་བྱ་བའི་རྡོ་རྗེ་ཕུར་པའི་སྔགས་ཀྱིས་བསམ་གཏན་ལས་བྱུང་བའི་ཕུར་བུ་ཕྱུང་ལ་སེང་ལྡེང་ལས་བྱུང་བའི་ཕུར་བུ་ཞི་བའི་རིག་པ་བརྒྱ་རྩ་བརྒྱད་བཟླས་པའི་འོ་མའམ་སྤོས་ཆུས་བཀྲུས་ནས་བུ་ག་ཡང་དགང་བར་བྱའོ། །ལག་པ་ [272b.6]གཉིས་ཁུ་ཚུར་བཅངས། མཛུབ་མོ་གཉིས་ཟླུམ་པོར་བྱས་ཏེ། ལག་ངར་བརྐྱང་ལ་སྐམ་པ་ལྟ་བུར་བྱ་བ་ནི། ཕུར་བུ་དབྱུང་བའི་ཕྱག་རྒྱའོ། །དེ་ནས་བདག་ཉིད་དང་སློབ་མ་དང་། སའི་བདག་པོ་དང་། སེམས་ཅན་ཐམས་ཅད་ལ་དམིགས་ཏེ་ཞི་བའི་སྦྱིན་སྲེག་བྱའོ། །དཀྱིལ་འཁོར་གྱི་ནི་ཡོ་བྱད་རྣམས། །ཐམས་ [272b.7]ཅད་སློབ་དཔོན་དབང་བར་བཤད། །སློབ་མས་ཅུང་ཟད་བསྐུར་མི་བྱ། །གལ་ཏེ་ཁྱེར་ན་དམ་ཚིག་ཉམས། །སློབ་དཔོན་གྱིས་ཀྱང་ཅི་རིགས་པར། །བདག་ཉིད་འདོད་པས་སྤྱད་པར་བྱ། །ཞེས་བཅོམ་ལྡན་འདས་དཔལ་སྒྱུ་འཕྲུལ་དྲ་བས་གསུངས་སོ། །ཐམས་ཅད་དུ་ཡང་དཀྱིལ་འཁོར་དང་། སྦྱིན་སྲེག་ལ་སོགས་པ་རྩོམ་པ་ [273a] [273a.1]ན། གང་གི་ཚེ་སློབ་དཔོན་གྱི་ཕྱི་རོལ་དུ་འགྲོ་ན། དེའི་ཚེ་བཅོམ་ལྡན་འདས་འཕགས་པ་གཤིན་རྗེ་གཤེད་སྔར་བཤད་པའི་རང་གི་ངོ་བོར་རང་གི་སྙིང་ག་ནས་རང་གི་ས་བོན་ལས་ངེས་པར་བྱུང་བ། གདུག་པའི་བགེགས་མ་ལུས་པ་འདུལ་བ་ལ་འཇུག་པ་ལྷ་དང་མི་མ་དང་བ་རྣམས་དང་བར་མཛད་པ། དང་བ་རྣམས་སླར་ [273a.2]ཡང་འཕེལ་བར་མཛད་པ་སྟེ། མདོར་ན་དེ་ནི་སེམས་ཅན་ཐམས་ཅད་ཀྱི་མངོན་པར་མི་འདོད་པ་ཟློག་པར་མཛད་ཅིང་། མངོན་པར་འདོད་པ་རྫོགས་པར་མཛད་པ། མ་ཚང་བའི་ཉེས་པ་རྣམས་སེལ་བར་མཛད་པ། ཁྲོ་བོ་མཐའ་ཡས་པས་ཀུན་དུ་བསྐོར་བ་ཧཱ་ཧཱ་ཞེས་བཞད་པས་རི་བོ་ཆེན་པོ་དང་། རྒྱ་མཚོའི་དཀྱིལ་ [273a.3]འཁོར་འཁྲུགས་པར་མཛད་པས། ནམ་མཁའི་གཏོས་ཐམས་ཅད་ཁྱབ་པར་བསམ་པར་བྱའོ། །དེ་ལྟ་བུ་ནི་གང་གི་ཚེ་སློབ་དཔོན་ནང་ན་གནས་པ་དེའི་ཚེ་ཕྱི་རོལ་ན་བཞུགས་པར་བསམ་པར་བྱའོ། །བྲི་བའི་དཀྱིལ་འཁོར་གྱི་ཆོ་གའོ། །སྔ་མ་བཞིན་དུ་བདག་པོའི་སྦྱོར་བ་འདི་ཉིད་དང་ལྡན་པས་ས་ [273a.4]ཡོངས་སུ་གཟུང་བའི་ཆོ་ག་ལ་སོགས་པ་ཐམས་ཅད་ནས་དབང་བསྐུར་བ་དང་། སློབ་མ་སླར་བཏང་བ་དང་། ཞི་བའི་སྦྱིན་སྲེག་གི་བར་དུ་ཡིད་ཀྱིས་བྱས་ཏེ། ཡིད་ཀྱིས་ཕྱིའི་དཀྱིལ་འཁོར་གྱི་ཆོ་ག་རྒྱ་ཆེར་བྱའོ། །ཡང་ན་དེ་བཞིན་དུ་བདག་པོའི་རྣལ་འབྱོར་པས། སངས་རྒྱས་ཀྱི་ཞིང་བསྲེག་པ་སྔོན་དུ་ [273a.5]འགྲོ་བ་དང་། གཞལ་ཡས་ཁང་བསྐྱེད་ལ་དེའི་ནང་དུ་ཟླ་བ་དང་ཉི་མའི་དཀྱིལ་འཁོར་གྱི་གདན་ཅི་རིགས་པར་པདྨ་ལ་གནས་པར་བསམས་ལ།སློབ་མ་མེའི་དཀྱིལ་འཁོར་ལ་གནས་པའི་མེས་ཐལ་བར་བྱས་ལ། རང་གི་སྔགས་ཀྱི་བདག་ཉིད་ཅན་དུ་སྣ་བུག་གཡས་པ་ནས་བཅུག་སྟེ། རང་ [273a.6]གི་ས་བོན་གྱི་ཡི་གེ་ལས་བསྐྱེད་པ། སྣ་བུག་ཅིག་ཤོས་ནས་ཕྱུང་སྟེ། ཟླ་བའི་དཀྱིལ་འཁོར་དབུས་མ་ལ་གཞག་སྟེ། སྐུ་ལ་སོགས་པས་བྱིན་གྱིས་བརླབས་ལ་བདག་པོའི་སྦྱོར་བས་གནས་པར་རང་གི་ཕྱག་རྒྱའི་རིག་པ་དང་གཉིས་སུ་མེད་པར་གྱུར་པ་རང་གི་སྙིང་གའི་རྡོ་རྗེ་ལྟེ་བ་ལ་གནས་པའི་ཡི་ [273a.7]གེ་ཧཱུཾ་ཡོངས་སུ་གྱུར་པ་དང་། དཀྱིལ་འཁོར་པའི་ལྷའི་འཁོར་ལོ་མ་ལུས་པར་བསམས་ལ་མཐར་རང་གི་ཕྱག་རྒྱའི་བདེ་བ་ཆེན་པོའི་མེར་ཡང་དག་པར་ཞུགས་པས། དེ་ཉིད་ཟླ་བ་ཞུ་བའི་གཟུགས་ཀྱིས་ཕྱུང་ལ། གནས་ཇི་ལྟ་བ་ན་གནས་པའི་ལྷ་མ་ལུས་པ་རྣམས་ཀྱིས་ཡོངས་སུ་བསྐོར་ཞིང་དཀྱིལ་ [273b] [273b.1]འཁོར་གྱི་བདག་པོའི་སྤྱོར་བས་གནས་པ་ལ་སྔ་མ་བཞིན་དུ་ཡི་གེ་གསུམ་གྱིས་བརླབས་པ་དང་། ཧཱུཾ་ལས་བྱུང་བའི་ལྷ་མོ་བཞི་བདེ་བ་ཆེན་པོས་བྱིན་གྱིས་བརླབ་པ་སྙིང་པོ་དང་། ཡོན་བླང་བ་སྔོན་དུ་འགྲོ་བས་སངས་རྒྱས་ཐམས་ཅད་ཀྱིས་ཏིལ་གྱི་གང་བུ་བཞིན་དུ་ནམ་མཁའི་ངོས་ཀུན་དུ་བཀང་ [273b.2]ནས་སྤྱན་ལ་སོགས་པའི་ལྷ་མོ་རྣམས་ནང་དུ་ཞུགས་པས་བདེ་བ་ཆེན་པོའི་ངོ་བོ་ཉིད་དེ་བཞིན་གཤེགས་པ་ཐམས་ཅད་ཀྱི་རང་བཞིན་གྱི་བུམ་པ་ཕྱག་ན་བསྣམས་པ་རྣམས་ཀྱིས་སྤྱི་བོ་ནས་དབང་བསྐུར་ཞིང་། དབང་བསྐུར་བ་ནི་རྡོ་རྗེ་ཆེ། །ཞེས་བྱ་བ་ལ་སོགས་པའི་ཚིགས་སུ་བཅད་པ་དང་། སྙིང་པོ་ [273b.3]བརྗོད་ཅིང་དབང་བསྐུར་ཏེ། དེའི་འོད་ཟེར་རྣམས་ཀྱིས་ཉེས་པ་ཐམས་ཅད་དང་བྲལ་ཞིང་། གོས་ལ་སོགས་པས་བརྒྱན་པའི་ཅོད་པན་གྱི་དབང་བསྒུར་བ་སྔོན་དུ་འགྲོ་བའི་གླུ་རྣམས་ཀྱིས་ཡང་དག་པར་དགའ་བར་བྱས་ལ། སྔ་མ་བཞིན་དུ་དམ་ཚིག་སྦྱིན་པ་ལ་སོགས་པ་རྫོགས་པར་ [273b.4]བྱའོ། །འདི་ནི་རེ་ཞིག་གཞན་གྱི་དབང་བསྐུར་བདག་ཉིད་ཀྱང་བདག་པོའི་སྦྱོར་བས་རང་གི་རིག་པ་དང་གཉིས་སུ་མེད་པར་གྱུར་པས་འདི་ལྟ་བུའི་དབང་བསྐུར་བ་ཉིད་བླང་བར་བྱ་སྟེ། འདི་ཡང་གསང་བའི་དབང་བསྐུར་བ་སྟེ། དེ་བཞིན་གཤེགས་པ་ཐམས་ཅད་ཀྱིས་སྔགས་པ་དབང་བསྐུར་བ་ [273b.5]ཐམས་ཅད་ཀྱི་མཆོག།དངོས་གྲུབ་དམ་པ་ཐམས་ཅད་ཀྱི་རྒྱུ་ཡིན་ནོ། །ཡིད་ཀྱི་དཀྱིལ་འཁོར་གྱི་ཆོ་ག་ནི་འདིར་བཅོམ་ལྡན་འདས་མངོན་པར་བཞེད་པ་ཁོ་ན་སྟེ། ཇི་སྐད་དུ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་གསང་བ་འདུས་པར་དབང་བསྐུར་བའི་བཅོམ་ལྡན་འདས་ [273b.6]སློབ་དཔོན་ལ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་ཇི་ལྟར་བལྟ་བར་བྱ་བ་ལ་སོགས་པ་ཇི་སྐད་གསུངས་པ་འདི་ལྟ་བུ་ཡང་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་། ཐུགས་རྡོ་རྗེའི་འདུས་པས་འདྲེས་པའི་མཚན་ཉིད་ཅན་ [273b.7]གྱི་གསང་བའི་དབང་བསྐུར་བ་ནི་འདི་ཡིད་ཀྱི་ཉིད་ཡིན་ཏེ། སོ་སོའི་སྐྱེ་བོ་རྣམས་ཀྱིས་ཕྱིའི་མེད་པ་དང་། དེའི་དབང་དུ་བྱས་པ་ཡིན་ནོ། །དེ་བས་ན་འདི་ལྟར་དཀྱིལ་འཁོར་གྱི་ལེའུ་ལས་ཏིལ་གྱི་གང་བུ་ལྟར་ཀུན་དུ་གང་བའི་རྒྱལ་བའི་བུམ་པའི་ཆུ་དང་དབང་བསྐུར་བར་མཛད་པར་བསམ་པར་བྱ་བ་ནི། [274a] [274a.1]དཀྱིལ་འཁོར་གྱི་དེ་ཁོ་ན་ཉིད་དང་འདྲའོ་ཞེས་ཇི་སྐད་དུ་གསུངས་པ་དང་། དེ་བཞིན་དུ་དཔལ་དེ་ཁོ་ན་ཉིད་བསྡུས་པ་ལས་ཀྱང་རྡོ་རྗེ་དབྱིངས་ལ་སོགས་པའི་དཀྱིལ་འཁོར་གསུངས་ནས། ཕྱག་རྒྱ་གཅིག་པུའི་དཀྱིལ་འཁོར་གསུངས་ཤིང་། དེ་ཉིད་རས་དང་རྩིག་པ་དང་། ནམ་ [274a.2]མཁའི་ཕྱོགས་སུ་ཡང་བསམ་པར་བྱའོ་ཞེས་གསུངས་པས་དེ་ཡང་དཀྱིལ་འཁོར་ཆེན་པོ་ལ་སོགས་པ་ཐམས་ཅད་དུ་དབང་བསྐུར་བ་ཡིད་ཀྱི་ཉིད་རྗེས་སུ་གནང་བ་ཁོ་ན་ཡིན་ནོ། །དཀྱིལ་འཁོར་ཐམས་ཅད་བཤད་པ་ཁྱད་པར་མེད་པ་དང་། བསྟན་པ་དེས་ཁྱད་པར་ཅི་ཞིག་ཡོད་དེ། [274a.3]གལ་ཏེ་ཕྱག་རྒྱ་གཅིག་པའི་དཀྱིལ་འཁོར་ཉིད་ཡིན་གྱི་དཀྱིལ་འཁོར་ཆེན་པོ་ལ་སོགས་པ་ནི་མ་ཡིན་ནོ། །དེ་ཅིའི་ཕྱིར་ཕྱག་རྒྱ་གཅིག་པའི་དཀྱིལ་འཁོར་ཡིད་ཀྱི་ཡིན་གྱི། དཀྱིལ་འཁོར་ཆེན་པོ་ལ་སོགས་པ་ནི་མ་ཡིན་ནོ་ཞེས་ལ་ལ་ཟེར་བ་དེ་ནི་མི་རིགས་སོ། །བདག་ཅིག་གི་སློབ་དཔོན་རྣམས་ [274a.4]ཀྱིས་ཀྱང་གལ་ཏེ་འདུལ་བའི་དབང་གིས་གཞན་དག་ལ་འདི་སྐད་དུ་གསུངས་ཀྱི་ཡང་དག་པར་མ་ཡིན་ཏེ། ཇི་ལྟར་དབང་བསྐུར་བ་འདི་ནི་མི་སེམས་ཀྱིས་རྗེས་སུ་འབྲང་བ་ཡིན་པ་དེ་བཞིན་དུ་ཆོ་ག་གཞན་དག་ཀྱང་ཅིའི་ཕྱིར་མི་འདོད་དེ། ཁྱད་པར་མེད་པ་ཡིན་ནོ། །ཡིད་མངོན་པར་འདུས་ [274a.5]བྱས་པའི་ཕྱིར་རྩམ་པ་འདི་དག་ཐམས་ཅད་དེ་བྲི་པའི་ཆོ་ག་ཡང་། ཇི་སྲིད་ཡིད་ཀྱི་ཆོ་ག་རྗེས་སུ་མ་སྤྱད་པ་དེ་སྲིད་འབྲས་བུ་དང་ལྡན་པར་མི་འགྱུར་རོ། །དེ་ལྟ་བས་ན་ཡིད་ཀྱི་ཆོ་ག་འདི་སྟོབས་ཅན་ཡིན་པའི་ཕྱིར་མཆོག་ཡིན་གྱི། ཕྱིའི་ནི་མ་ཡིན་ནོ། །ཡིད་ཀྱི་དཀྱིལ་འཁོར་གྱི་ཆོ་གའོ།། །། [274a.6]དེ་ལྟར་གཉི་གས་ཀྱང་འགྲོ་བ་མ་ལུས་པའི་དོན་བྱས་ལ། དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་མཆོད་པར་བཤད་པ། ནམ་མཁའ་དྲི་མ་མེད་པ་ཆོས་ཐམས་ཅད་ཀྱི་དེ་བཞིན་ཉིད་ཀྱིས་ཇི་ལྟར་བདེ་བར་གནས་པར་བྱའོ། །འཇིག་རྟེན་གསུམ་ལ་བདེ་ཕན་བསྒྲུབ་པར་བརྩོན་པ་ཡིས། ། [274a.7]བདག་གིས་ཆོ་ག་འདི་བཤད་དགེ་ཐོབ་གང་ཡིན་པ། །དེས་ནི་འགྲོ་བ་ཀུན་དང་བདག་གིས་འདི་ཉིད་ཀྱི། །དཀྱིལ་འཁོར་འཁོར་ལོ་མངོན་སུམ་གྱུར་པ་མྱུར་ཐོབ་ཤོག །སེམས་ཅན་ཐམས་ཅད་ལ་བདེ་བ་བསྐྱེད་པ་ཞེས་བྱ་བའི་དཀྱིལ་འཁོར་ཀྱི་ཆོ་ག་རྫོགས་སོ།། །།