[1a]
[1b]
[1b.1]{T4268}༄༅༅། །རྒྱ་གར་སྐད་དུ། བི་ཤཱ་ལཱ་ཨ་མ་ལ་ཝ་ཏི་ནཱ་མ་པྲ་མཱ་ཎ་ས་མུཙྪ་ཡ་ཊཱི་ཀཱ། བོད་སྐད་དུ། ཡངས་པ་དང་དྲི་མ་མེད་པ་ལྡན་པ་ཞེས་བྱ་བ་ཚད་མ་ཀུན་ལས་བཏུས་པའི་འགྲེལ་བཤད།
[1b.2]སངས་རྒྱས་ལ་ཕྱག་འཚལ་ལོ། །བདེ་གཤེགས་ཐུགས་རྗེའི་བདག་ཉིད་ཅན་གྱིས་རྒྱལ་གྱུར་ཅིག །ངེས་པར་འབྱུང་བའི་ཆོས་ཀྱིས་རྟག་ཏུ་རྒྱལ་གྱུར་ཅིག །མཐའ་དག་སྲིད་པ་གསུམ་པོ་རྣམས་ཀྱིས་
[1b.3]མཆོད་བྱ་བ། །ཡོན་ཏན་རབ་རྒྱས་འཕགས་པའི་ཚོགས་ཀྱིས་རྒྱལ་གྱུར་ཅིག །དངོས་པོ་ཐོབ་པ་རྣམས་ཀྱིས་དགྲ་ལ་ཡང་། །གཞན་རྗེས་འཛིན་པར་བྱེད་པ་དམ་པས་བསྔགས། །གཞན་གྱི་ལུགས་རྣམས་
[1b.4]རྙེད་པ་རྣམས་ཀྱིས་ཀྱང་། །གཞན་ལ་ཕན་པ་དེ་ནི་བྱ་བར་འོས། །དེ་ཕྱིར་ཤིན་ཏུ་རབ་ཏུ་རྒྱས་པ་ཡི། །སློབ་དཔོན་རྣམས་ཀྱི་ལུགས་རྣམས་ཡང་དག་པར། །ཀུན་ནས་ལྟ་བར་ནུས་པ་མ་ཡིན་པའི། །སྐྱེ་བོ་
[1b.5]ལ་ནི་བློ་ཞན་བདག་ལས་ཀྱང་། །ཆོས་ཀྱི་གྲགས་པ་དང་ནི་གཞན་རྣམས་ཀྱིའང་། །ལུགས་ལས་ཅུང་ཟད་ངེས་པར་བསྡུས་བྱས་ནས། །དེ་ལས་མཐོང་བར་གྱུར་པའི་ཕྱོགས་ཀྱིས་ཀྱང་། །འབད་པས་
[2a]
[2a.1]རང་གིས་མངོན་པར་བརྟག་པར་བྱ། །དོན་གྱི་དེ་ཉིད་རབ་ཕྱེ་རོ་ཞིམ་ཅན། །ཕྱོགས་ཀྱི་གླང་པོའི་ལུགས་ཀྱི་བསྟན་བཅོས་ཀྱི། །རྣམ་པར་བཤད་པ་ཟ་མ་ཏོག་ལྟ་བུ། །འདི་ནི་བདག་གིས་ཕན་པའི་ཆེད་དུ་བྱ། །ཚད་
[2a.2]མར་གྱུར་པ་ཞེས་པ་ལ་སོགས་པ་སྟེ། ཇི་ལྟར། ཁྱོད་ནི་རི་རབ་རྒྱ་མཚོ་ཁྱོད། །མགོན་ཁྱོད་དཔག་བསམ་རྐང་འཐུང་སྟེ། །སྨན་པ་བཟང་ཁྱོད་སྒྲོན་མ་ཁྱོད། །ཁྱོད་ནི་སྒྲོལ་བྱེད་དམ་པའོ། །ཞེས་པ་འདི་འདྲ་བའི་སྒྲ་སྦྱར་བ་མེད་པར་
[2a.3]ཡང་དེའི་དོན་རྟོགས་པ་དེ་ལྟར་འདིར་ཡང་ངོ་ཞེས་པས་ཚད་མ་དང་འདྲ་བས་བཅོམ་ལྡན་འདས་ཚད་མའོ། །གང་གི་ཕྱིར་ཇི་ལྟར་མངོན་སུམ་ལ་སོགས་པའི་ཚད་མ་ནི་སྐྱེས་བུའི་དོན་ལ་ཉེ་བར་མཁོ་བ་སྔར་མ་རྟོགས་པའི་དོན་གསལ་བར་བྱེད་
[2a.4]ཅིང་མི་བསླུ་བ་ཡིན་པ་དེ་ལྟར། བཅོམ་ལྡན་འདས་ཀྱང་གང་ལ་སྐྱེས་བུའི་དོན་གྱི་མཆོག་རག་ལས་པ་འཕགས་པའི་བདེན་པ་བཞིའི་མཚན་ཉིད་ཀྱི་དེ་ཁོ་ན་ཉིད་ལ་དེའི་ཡུལ་ཅན་གྱི་ཤེས་པ་བསྐྱེད་ནས། ངེས་པར་ལེགས་པ་དོན་དུ་གཉེར་
[2a.5]བ་རྣམས་ལ། ཁོང་དུ་མ་ཆུད་པ་དེ་གསལ་བར་བྱེད་པ་དང་མི་བསླུ་བ་དེའི་ཕྱིར་ཚད་མ་དང་ཆོས་མཚུངས་པ་ཉིད་ཀྱི་ཕྱིར་ཚད་མའོ། །གྱུར་པ་ནི་སྐྱེས་པ་སྟེ་བྱུང་བ་ཞེས་པའི་དོན་ཏོ། །གྱུར་པའི་ཚིག་ནི་མ་བྱུང་བ་རྟག་པ་དབང་ཕྱུག་ལ་
[2b]
[2b.1]སོགས་པའི་ཚད་མ་གཞན་གྱིས་ཡོངས་སུ་བརྟགས་པ་དགག་པའི་དོན་དུའོ། །ཚད་མ་ཡང་འདི་ཡིན་ལ་གྱུར་པའང་ཡིན་པས་ཚད་མར་གྱུར་པ་སྟེ། ཚད་མར་གྱུར་པ་དེ་ལའོ། །འོ་ན་འདིར་ཇི་ལྟར་འདི་ཉིད་ཀྱི་འགྲེལ་པར་འདི་ལྟ་བུའི་ཡོན་ཏན་ཅན་གྱི་སྟོན་པ་ལ་ཕྱག་འཚལ་ནས་ཞེས་པ་ལྟར་
[2b.2]གཉིས་པ་འབྱུང་བ་མ་ཡིན་ནམ་ཞེ་ན། བདེན་ཏེ། བརྗོད་འདོད་འདི་ནི་མཆོག་གི་སྦྱོར་བའི་རྗེས་སུ་འབྲང་བ་ཉིད་ཀྱི་ཕྱིར་གང་གི་ཚེ་ལས་ཀྱི་བྱེད་པ་བརྗོད་པར་འདོད་ལ། གང་གི་ཚེ་དོན་དུ་གཉེར་བ་དང་ལྟག་པར་ཞེན་པའི་བྱ་བ་འདི་དག་གི་མཆོག་ཏུ་ཐོབ་པར་འདོད་པ་ཉིད་ཀྱི་ཕྱིར་ཐོབ་པའི་
[2b.3]ལས་སུ་སྟོན་པའི་ཕྱག་འཚལ་བའི་བྱ་བས་མངོན་པར་འདོད་པ་བྱ་བ་ཡང་དག་པར་རབ་ཏུ་སྦྱིན་པ་ཉིད་དུ་བརྗོད་པར་འདོད་པ་དེའི་ཚེ་ལས་ལ་བཞི་པ་ཉིད་རིགས་ཏེ། ཇི་ལྟར་དེ་ཁོ་ནར་ཐོབ་པའི་ལས་ཀྱི་མིང་ཅན་ཉལ་བས་མངོན་པར་འདོད་པར་བྱ་བ་ཉིད་ཀྱི་ཕྱིར་བདག་པོ་ཆེད་དུ་བྱ་བར་བརྗོད་པར་
[2b.4]འདོད་པ་ན་བདག་པོ་ལ་ཉལ་ལོ་ཞེས་པ་འདིར་བཞི་པ་ཁོ་ནར་གྱུར་པ་དེ་བཞིན་དུ་འདིར་ཡང་ངོ་ཞེས་པས་སྐྱོན་མེད་དོ། །འགྲོ་ལ་ཕན་བཞེད་ལ་ཞེས་པ་འགྲོ་བ་ལ་ཕན་པ་ནི་དོར་བར་བྱ་བ་དང་བླང་བར་བྱ་བ་ཐབས་དང་བཅས་པ་དག་གི་འདོར་བ་དང་ལེན་པ་ཕུལ་དུ་བྱུང་བ་དག་སྟེ། དེ་བཞེད་པའི་
[2b.5]ངང་ཚུལ་ཅན་ལའོ། །ཕྱག་འཚལ་ནས་ཞེས་པ་ཡིད་དང་ངག་དང་ལུས་རྣམས་ཀྱིས་རབ་ཏུ་བཏུད་པར་བྱས་ནས་སོ། །འདི་ཡང་ཀུན་ལས་བཏུས་པ་བྱ། །ཞེས་པ་འདི་དང་སྦྲེལ་ལོ། །འདིས་ཕྱག་འཚལ་བ་ལས་མཆོད་པ་བྱས་པའོ། །སྟོན་ལ་ཞེས་པ་འདིར་ཨིཊ་མེད་དེ་ཤམ་སི་ཀྵད་ལ་
[2b.6]སོགས་པ་རྣམས་ལས་ཏྲིན་ཏྲི་ཙ་དག་མིང་ལ་ཨིཊ་མེད་པ་སྟེ། གཞན་དུ་ཡང་མང་པོར་རོ་ཞེས་བཤད་པའི་ཕྱིར་རོ། །སྡུག་བསྔལ་ཟད་པར་བྱེད་པའི་ཐབས་ཉེ་བར་སྟོན་པ་ནི་བསྟན་པ་ཡིན་ལ། དེའི་བྱེད་པ་པོ་སྟོན་པ་ཞེས་བརྗོད་དེ་འབྲས་བུའི་གནས་སྐབས་སུའོ། །འདིར་ནི་བསྟན་པ་དེ་ཉིད་
[2b.7]ཀྱི་རྒྱུ་ལམ་གོམས་པར་བྱེད་པ་ལ་འབྲས་བུ་ཉེ་བར་བཏགས་པའི་ཕྱིར་བསྟན་པའི་སྒྲ་འཇུག་གོ། །བསྟན་པ་དེ་བྱེད་པ་བཅོམ་ལྡན་འདས་བྱང་ཆུབ་སེམས་དཔའི་གནས་སྐབས་ལ་སྟོན་པའི་སྒྲས་བརྗོད་དོ། །བདེ་གཤེགས་ཞེས་པ་ལེགས་པར་གཤེགས་ཤིང་ཐོབ་པ་སྟེ། རྣམ་པ་ཐམས་ཅད་དུ་སྤང་
[3a]
[3a.1]བྱ་ཐམས་ཅད་སྤངས་པས་བདེ་བར་གཤེགས་པའོ། །སྐྱོབ་ལ་ཞེས་པ་འདིས་སྐྱོབ་པར་བྱེད་པས་སྐྱོབ་སྟེ་དེ་ཡང་རང་གིས་མཐོང་བའི་ལམ་ཉེ་བར་སྟོན་པའོ། །དེ་འདི་ལ་ཡོད་པས་སྐྱོབ་པའོ། །རྟོག་པ་སྔོན་དུ་གཏོང་བ་ཐམས་ཅད་ཀྱི་རྩོམ་པ་ལ་དགོས་པས་ཁྱབ་པ་
[3a.2]ཉིད་ཀྱི་ཕྱིར། དེ་ལོག་ན་རྩོམ་པ་ཡང་ལྡོག་ཅིང་། དེ་ཡང་འདི་ལ་མེད་དེ་དེའི་ཕྱིར་འདི་བརྩམ་པར་མི་བྱ་སྟེ། གང་དགོས་པ་མེད་པ་དེ་རྟོག་པ་དང་ལྡན་པས་བརྩམ་པར་བྱ་བ་མ་ཡིན་ཏེ། དཔེར་ན་བསྒྲུབ་བྱ་མ་ཡིན་པའི་ཡུལ་ཅན་གྱི་ཤེས་པ་བརྟག་པ་ཉེ་བར་སྟོན་པ་བཞིན། འདི་ལ་ཡང་དེ་
[3a.3]མེད་དོ་ཞེས་པ་ཁྱབ་བྱེད་མི་དམིགས་པའོ་ཞེ་ན། འདི་མ་གྲུབ་པར་བསྟན་པའི་དོན་དུ་གསུངས་པ། ཚད་མ་གྲུབ་ཆེད་ཅེས་སོ། །ཚད་མ་གྲུབ་པ་ནི་ཚད་མ་བྱེ་བྲག་ཏུ་རྟོགས་པ་ཡིན་ལ་དེའི་དོན་དུ་འདི་སྟེ། དེའི་ཕྱིར་བརྩམ་པར་བྱའོ། །གང་དགོས་པ་ཅན་དེ་རྟོག་པ་དང་ལྡན་པས་བརྩམ་
[3a.4]པར་བྱ་བ་ཡིན་ཏེ། དཔེར་ན་བསྒྲུབ་པར་འོས་པའི་ཡུལ་ཅན་གྱི་ཤེས་པ་བརྟག་པ་ཉེ་བར་སྟོན་པ་བཞིན། འདི་ཡང་དགོས་པ་དང་བཅས་པ་ཡིན་ནོ་ཞེས་པ་རང་བཞིན་ནོ། །གལ་ཏེ་དེའི་དོན་དུ་འདི་བརྩམ་པར་བྱ་བ་ཡིན་ན། དེའི་ཚེ་བརྩམ་པར་མི་བྱ་སྟེ། ཚད་མ་གྲུབ་པ་ནི་རིགས་པའི་
[3a.5]སྒོ་ལ་སོགས་པ་རང་གི་གཞུང་གིས་ཁྱོད་ཀྱིས་སྔར་ཁོ་ནར་བསྒྲུབས་ཟིན་པ་ཉིད་ཀྱི་ཕྱིར་རོ། །གང་བསྒྲུབས་ཟིན་པ་དེ་ནི་སྒྲུབ་པའི་ཆེད་དུ་རྟོག་པ་དང་ལྡན་པས་བརྩམ་པར་བྱ་བ་མ་ཡིན་ཏེ། བསྒྲུབས་ཟིན་པའི་ཟན་བཞིན། ཚད་མ་སྒྲུབ་པ་ཡང་བསྒྲུབས་ཟིན་པ་ཡིན་ནོ། །ཁྱབ་པར་བྱེད་པ་
[3a.6]དང་འགལ་བའོ་ཞེ་ན། འདི་བསལ་བའི་ཆེད་དུ་གསུངས་པ། རང་གཞུང་རྣམ་འཐོར་ཕྱིར་ཞེས་པ་སྟེ་ལྔ་པ་འདི་ནི་རྒྱུ་ལའོ། །རྣམ་པར་འཐོར་བ་ནི་རབ་ཏུ་བཀྲམ་པ་སྟེ། རྣམ་པར་བཀྲམ་པའོ་ཞེས་པའི་ཐ་ཚིག་གོ། །སླར་ཡང་མདོས་བསྐོར་བའི་ཕྱིར་རམ་དུ་མ་ནུས་པའི་ཕྱིར་རོ། །
[3a.7]འདི་ནི་འདིའི་དོན་གཞན་པ་སྟེ། འགྲོ་བའི་དོན་ཐམས་ཅད་ཤེས་པའི་དོན་ནོ་ཞེས་པས་སྲྀ་ཏ་ནི་རྟོགས་པ་སྟེ། ཡོངས་སུ་ཤེས་པའོ། །རབ་ཏུ་རྟོགས་པ་ནི་པྲ་སྲྀ་ཏའོ། །གང་ལ་རབ་ཏུ་རྟོགས་པ་དང་བྲལ་བ་དེ་ནི་བི་པྲ་སྲྀ་ཏ་སྟེ། རང་གི་གཞུང་རིགས་པའི་སྒོ་ལ་སོགས་པ་ནི་ཚད་མ་གཏན་
[3b]
[3b.1]ལ་འབེབས་པ་རབ་ཏུ་རྟོགས་པ་དང་བྲལ་བའོ། །དེ་ལྟར་ཡང་དེར་མངོན་སུམ་རྟོགས་པ་དང་བྲལ་བ་ཞེས་པ་མངོན་སུམ་གྱི་མཚན་ཉིད་འདི་ལ་དམིགས་བསལ་བྱས་པ་མེད་ལ། དེའི་ཕྱིར་ཟླ་བ་གཉིས་ལ་སོགས་པའི་ཤེས་པ་ཡང་མངོན་སུམ་ཉིད་དུ་ཐལ་བར་འགྱུར་རོ། །རྒྱས་པ་དང་
[3b.2]བྲལ་བ་ཡང་དེ་སྟེ་མདོར་བསྡུས་པའོ། །དེས་ན་གང་མགོ་སྨོས་པས་གོ་བ་ཕྱོགས་ཙམ་མཐོང་བས་ཀྱང་མ་བརྗོད་པའི་དོན་བརྟག་པར་ནུས་པ་དེ་ཁོ་ནའི་གཏན་ལ་འབེབས་བྱེད་དུ་འགྱུར་གྱི་གཞན་གྱི་མ་ཡིན་ནོ། །དེ་ལྟར་ཡང་དེ་ཉིད་དུ། སྒོ་ཙམ་འདི་ནི་དམ་པའི་དོན་གྱི་ཚུལ། །ཞེས་པ་ལ་སོགས་
[3b.3]པ་ཚིགས་སུ་བཅད་པ་ཕྱེད་སྔ་མས་བློ་གྲོས་བཟང་པོ་མདོར་བསྡུས་པ་ལ་དགའ་བ་ཁོ་ན་ལ་ཕན་འདོགས་པའི་ཆེད་དུ་འདི་བྱས་སོ་ཞེས་གསལ་བར་བྱས་ལ། གཡོ་སྒྱུ་རྣམས་ཞེས་པ་ལ་སོགས་པ་ཕྱི་མ་ཕྱེད་ཀྱིས་ནི་ཅིག་ཤོས་རྣམས་ལ་འདིས་ཕན་པར་མི་འགྱུར་རོ་ཞེས་སོ། །མུ་སྟེགས་པའི་
[3b.4]རྟོག་གེས་འཁྲུལ་པར་གྱུར་པ་བློ་ཞན་པ་རྣམས་ནི་རྒྱས་པར་རྟོགས་པར་བྱ་བ་སྟེ། གཡོ་སྒྱུ་རྣམས་དང་བྲལ་བར་བྱས་ནས། དོན་གྱི་དེ་ཉིད་ལ་རྟེན་ཅི་ལྟར་འགྱུར་ཏེ་མ་ཡིན་པ་ཁོ་ནའོ་ཞེས་པའི་དོན་རྟོགས་པའི་ཕྱིར་རོ། །འདིར་ཅི་ལྟར་གྱི་སྒྲས་མི་སྲིད་པར་གསལ་བར་བྱེད་དོ། །གང་རྣམས་ནི་
[3b.5]བློ་ཁ་བྱེ་བའི་ཡུལ་ལ་སྨོན་པའི་དོན་དུ་སྨྲ་བར་བྱེད་དེ། བློ་ཁ་བྱེ་བའི་དུག་ཅན་མུ་སྟེགས་པའི་རྟོག་གེས་འཁྲུལ་པས་བྱས་པ་རྣམས་ལམ་ངན་པ་དང་བྲལ་ནས་ཅི་ལྟར་གྱུར་དུ་ཟིན་ཀྱང་དོན་གྱི་དེ་ཁོ་ན་ཉིད་ལ་བརྟེན་པར་གྱུར་ཅིག་ཅེའོ། །དེ་རྣམས་ཀྱི་དེ་ནི་མི་རིགས་ཏེ། མུ་སྟེགས་པའི་རྟོག་གེ་རྣམས་སྐྱོན་
[3b.6]ཤིན་ཏུ་ཆེན་པོ་ཅན་ཏེ་དེ་རྣམས་ནི་རྣམ་པ་དེ་ལྟ་བུ་རྣམས་ཀྱིས་བདེ་བླག་ཏུ་མཚོན་པ་ཡིན་ལ། གང་མ་བརྗོད་དུ་ཟིན་ཀྱང་རྟོགས་པར་དཀའ་བའི་དོན་རྣམས་ཕྱོགས་ཙམ་མཐོང་བས་རང་གིས་བརྟག་པར་ནུས་པ་དེ་རྣམས། མཚོན་པར་སླ་བ་ཆེས་རགས་པའི་སྐྱོན་ཅན་མུ་སྟེགས་པའི་རྟོག་གེ་རྣམས་ཀྱིས་
[3b.7]ལམ་ལོག་པར་དྲང་བར་བྱ་བ་ཡིན་ནོ་ཞེས་པ་འདི་ནི་མི་སྲིད་དོ། །གང་གི་ཕྱིར་དེ་ལྟར་རྣམ་པ་འདི་ལྟ་བུ་རང་གི་གཞུང་སྟེ། དེས་ཐམས་ཅད་ཀྱི་ཚད་མ་བྱེ་བྲག་ཏུ་རྟོགས་བྱེད་བྱས་པ་མ་ཡིན་པ། དེའི་ཕྱིར་རང་གི་གཞུང་མདོར་བསྡུས་པའི་ཕྱིར་དང་། ཚད་མ་གཏན་ལ་འབེབས་བྱེད་རབ་ཏུ་གྱུར་
[4a]
[4a.1]པ་མ་བྱས་པའི་གཏན་ཚིགས་ཀྱི་ཕྱིར། བློ་དམན་པ་རྒྱས་པ་ལ་མོས་པ་རྣམས་ལ་ཡང་ཕན་གདགས་པའི་ཆེད་དུ་སྤྱིར་བཏང་དང་བཅས་པ་དམིགས་བསལ་དང་བཅས་རྒྱས་པ་དང་བཅས་པ་ཚད་མ་གཏན་ལ་འབེབས་པ་ལ་རབ་ཏུ་གྱུར་པ་ཚད་མ་ཀུན་ལས་བཏུས་པ་བྱའོ། །
[4a.2]དེ་ཅི་རིགས་པའི་སྒོ་ལ་སོགས་པ་དེ་ཉིད་དུ་རབ་ཏུ་བྱེད་པ་རེ་རེར་གཞུང་གཞན་འཕངས་ནས་ཀུན་ནས་བཏུས་པ་བྱའམ་ཞེས་དྲི་བའི་སྐབས་ལ་གསུངས་པ། འདིར་གཅིག་པར་ནི་ཞེས་སོ། །འདིར་ཏེ་རབ་ཏུ་བྱེད་པ་གཅིག་པོ་འདིར་བདེ་བླག་ཏུ་རྟོགས་པའི་དོན་དུ་ཀུན་ལས་བཏུས་པ་བྱའོ། །
[4a.3]གཞུང་རྣམ་པར་འཐོར་བ་ནི་རབ་ཏུ་བྱེད་པ་ཐ་དད་པས་ན་བདེ་བླག་ཏུ་ཀུན་ནས་བལྟ་བར་མི་ནུས་སོ། །གཅིག་པར་ནི་ཞེས་པ་ནི་ཨཱ་དི་ལ་སོགས་པ་ཉིད་ཀྱི་ཕྱིར་ཏ་སིའོ། །དེ་ལྟར་ནི་མཆོག་གི་སྦྱོར་བ་སྟེ། ཙ་ར་ཀ་བསྡུས་པར། མེ་དབལ་རྣམས་རབ་ཞི་དོན་དུ། །འདིར་ནི་ལས་རྣམས་གང་
[4a.4]བཤད་པ། །དེ་རྣམས་ཐམས་ཅད་གཅིག་ཏུ་སྟེ། །ཁྲག་འབྱིན་བྱེད་པ་གཅིག་ཏུའོ། །ཞེས་སོ། །འདིར་ཞེས་པ་ཚིགས་སུ་བཅད་པར་རོ། །བཅོམ་ལྡན་འདས་ཀྱིས་ཞེས་པ་ལ། བྷ་གའི་སྒྲ་འདི་ནི་དབང་ཕྱུག་ལ་སོགས་པ་རྣམས་ལ་འཇུག་སྟེ། ཇི་སྐད་དུ་གསུངས་པ། དབང་ཕྱུག་དང་
[4a.5]ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་ཕུན་སུམ་ཚོགས་པ་སྟེ། །དྲུག་རྣམས་བྷ་ག་ཅེས་པར་བཤད། །ཅེས་སོ། །ཕུན་སུམ་ཚོགས་པ་འདི་ཡང་དེ་བཞིན་པ་ཁོ་ན་ལ་ཡོད་པས་དེ་ཁོ་ན་བཅོམ་ལྡན་འདས་སོ། །ཡང་ན་ངེས་པའི་ཚིག་གི་རྣམ་པས་
[4a.6]བདུད་བཞི་བཅོམ་པར་གྱུར་པས་ན་བཅོམ་ལྡན་འདས་སོ། །དེའི་བསྟོད་པ་བརྗོད་པ་ནི། འདིས་བསྟོད་པར་བྱ་བས་ན་བསྟོད་པས་ཏེ་ཡོན་ཏན་དམ་པ་ཡང་དག་པ་སྟོན་པའི་ངག་གོ། །བརྗོད་པ་ནི་འདིར་བརྗོད་པར་འདོད་པའི་དོན་སྒྲས་གོ་བར་བྱེད་ཅིང་ཡང་དག་པར་རྗོད་པར་བྱེད་པའོ། །བསྟོད་པས་
[4a.7]བརྗོད་པ་སྟེ། བསྟོད་པའི་ཚིག་གིས་ཡོན་ཏན་དང་ལྡན་པ་ཉིད་དུ་གསལ་བར་བྱེད་པ་ཞེས་པའི་དོན་ནོ། །ཡོན་ཏན་ཅི་ཞིག་གིས་དེ་ལྟར་གསལ་བར་བྱེད་ཅེ་ན། གསུངས་པ། ཚད་མར་གྱུར་པ་ཉིད་ཀྱིས་ཞེས་སོ། །ཡོན་ཏན་དེ་ཡང་གཏན་ཚིགས་ཅི་ཞིག་གིས་ཤེ་ན། གསུངས་པ། རྒྱུ་དང་
[4b]
[4b.1]འབྲས་བུ་ཕུན་སུམ་ཚོགས་པས་ཞེས་སོ། །རྒྱུ་དང་འབྲས་བུ་དག་གི་ཕུན་སུམ་ཚོགས་པ་རབ་ཏུ་གྱུར་པ་སྟེ་རྒྱུ་དེས་སོ། །གང་ཚད་མར་གྱུར་པ་ཉིད་ནི་ཐུན་མོང་མ་ཡིན་པའི་ཡོན་ཏན་ཏེ། རྒྱུའམ་གཏན་ཚིགས་དེས་བསྟོད་པ་བརྗོད་ཅིང་བསྟོད་པའི་ཚིག་གིས་བཅོམ་ལྡན་འདས་ཡོན་ཏན་དང་ལྡན་པ་
[4b.2]ཉིད་དུ་ཉན་པ་པོ་རྣམས་ལ་རྟོགས་པར་བྱེད་ཅེས་པ་ཇི་སྲིད་པའོ། །དེ་ཡང་ཅིའི་དོན་དུ་ཞེ་ན་གསུངས་པ། རབ་ཏུ་བྱེད་པ་ལ་དང་པོར་གུས་པ་བསྐྱེད་པའི་དོན་དུ་ཞེས་སོ། །ཡང་བཅོམ་ལྡན་འདས་ལ་བསྟོད་པ་བརྗོད་པས་རབ་ཏུ་བྱེད་པ་རྩོམ་པ་ལ་གུས་པར་ཅི་ལྟར་འགྱུར་ཞེ་ན། གང་གི་ཕྱིར་ཡོན་
[4b.3]ཏན་གཞན་རྣམས་ཡོད་ན་ཡང་ཚད་མ་ཉིད་ཀྱི་ཡོན་ཏན་གྱིས་བསྟོད་པས། སློབ་དཔོན་གྱིས་འདི་གསལ་བར་བྱ་སྟེ། གང་འདི་མངོན་སུམ་ལ་སོགས་པའི་ཚད་མའི་མཚན་ཉིད་དེ་ནི་བཅོམ་ལྡན་འདས་ཀྱི་ཉེ་བར་བསྟན་པ་ཁོ་ན་ལས་གྲུབ་པ་སྟེ། ད་ལྟ་ཁོ་བོས་རང་ཉིད་ཀྱིས་བརྟགས་ནས་རྣམ་
[4b.4]པར་མ་བཞག་པ་མ་ཡིན་ནོ་ཞེས་པའོ། །དེ་ཉིད་ཀྱི་ཕྱིར་ཆོས་མངོན་པར་ཡང་གསུངས་སོ་ཞེས་གསུངས་སོ། །རེ་ཞིག་མངོན་སུམ་ནི་དེས་ཉེ་བར་བསྟན་པ་མཐོང་བའི་ཕྱིར་དེ་ལས་གྲུབ་པར་རིགས་མོད། ཉེ་བར་མ་བསྟན་པའི་རྗེས་སུ་དཔག་པ་ཅི་ལྟར་ཞེ་ན། དེའི་ཡང་སྦྱོར་བ་མཐོང་བའི་ཕྱིར་
[4b.5]མཚན་ཉིད་མཛད་པ་ཁོ་ནར་རྟོགས་པར་བྱ་སྟེ། ཇི་སྐད་དུ་གང་ཅུང་ཟད་ཀུན་འབྱུང་བའི་ཆོས་ཅན་དེ་འགོག་པའི་ཆོས་ཅན་ནོ་ཞེས་པ་ལ་སོགས་པ་བཅོམ་ལྡན་འདས་ཀྱི་རྗེས་སུ་དཔག་པའི་སྦྱོར་བ་རྣམས་མཐོང་བ་བཞིན་ནོ། །འདི་སྐད་བརྗོད་པ་ན་རྗེས་སུ་དཔག་པའི་མཚན་ཉིད་བརྗོད་པར་ཅི་ལྟར་
[4b.6]འགྱུར་ཞེ་ན། གང་གི་ཕྱིར་རྗེས་སུ་དཔག་པའི་རྟེན་ནི་མེད་ན་མི་འབྱུང་བ་ཅན་གྱི་རྟགས་ཏེ། སྦྱོར་བ་འདིས་ཀྱང་རྟགས་སྐྱེ་བ་ནི་བསྒྲུབ་པར་བྱ་བ་འགོག་པ་མེད་ན་མི་འབྱུང་བར་གསལ་བ་ཁོ་ནར་བཅོམ་ལྡན་འདས་ཀྱིས་གསུངས་སོ། །དེའི་ཕྱིར་རྗེས་སུ་དཔག་པའི་མཚན་ཉིད་ཀྱང་བཅོམ་
[4b.7]ལྡན་འདས་ཀྱིས་ཉེ་བར་བསྟན་པ་ཁོ་ན་ལས་གྲུབ་བོ། །དེའི་ཕྱིར་བཅོམ་ལྡན་འདས་ཀྱིས་ཉེ་བར་བསྟན་པ་ལས་གྲུབ་པའི་ཚད་མའི་མཚན་ཉིད་རྗེས་སུ་སྒྲུབ་པར་རབ་ཏུ་བྱེད་པ་འདིའོ་ཞེས་ངེས་པ་སྐྱེས་པ་རབ་ཏུ་གྲུབ་པའི་བསྟན་བཅོས་པ་རྣམས་དེ་ལ་གུས་པ་སྐྱེ་ལ། དེ་ལས་ཀྱང་གུས་ནས་ཉན་
[5a]
[5a.1]པ་ལ་སོགས་པ་ལ་འཇུག་གོ། །ཡང་ན་འདིར་རབ་ཏུ་བྱེད་པའི་དང་པོར་བཅོམ་ལྡན་འདས་ཀྱི་བསྟོད་པ་བརྗོད་པ་ནི། བསྟོད་བྱའི་བཅོམ་ལྡན་འདས་ལ་གུས་པ་བསྐྱེད་པའི་དོན་དུ་སྟེ། འདིས་དེ་ལ་གུས་པ་ཇི་ལྟར་སྐྱེ་ཞེ་ན། གང་གི་ཕྱིར་ཚིགས་སུ་བཅད་པ་འདིས་
[5a.2]འཐད་པ་དང་བཅས་པའི་ཚད་མར་གྱུར་པ་ཉིད་བཅོམ་ལྡན་འདས་ཀྱི་ཡོན་ཏན་དུ་གསལ་བར་བྱས་ལ། དེ་ལས་སྔར་རབ་ཏུ་མ་གྲུབ་པའི་བསྟན་བཅོས་པ་རྣམས་ཀྱང་དེ་ལ་གུས་པ་སྐྱེ་ན་ཅིག་ཤོས་རྣམས་ལྟ་ཅི་སྨོས། དེ་ལ་གུས་པ་ལས་ཀྱང་བསོད་ནམས་ཀྱི་ཚོགས་ཉེ་བར་བསགས་པའི་རབ་ཏུ་བྱེད་པ་
[5a.3]གཟུང་བའི་ཆེད་དུ་ཞུགས་པ་རྣམས་ལ་བགེགས་དང་ལོག་འདྲེན་མེད་པར་འགྱུར་རོ་ཞེས་པས་དེ་ལ་གུས་པ་ཡང་དགོས་པ་དང་བཅས་པ་ཁོ་ནའོ། །འོ་ན་འགའ་ཞིག་རྣམས་རྣམ་པ་དེ་ལྟ་བུའི་སྐྱེས་བུ་དགག་པའི་ཆེད་དུ་སྐྱེས་བུ་ཉིད་ལ་སོགས་པའི་སྒྲུབ་པར་བྱེད་པ་སྦྱོར་བ་མ་ཡིན་ནམ། དེའི་
[5a.4]ཕྱིར་ཅི་ལྟར་དེ་ལ་བསྟོད་པ་བརྗོད་པས་གུས་པ་ཉིད་དུ་འགྱུར་ཞེ་ན། གང་གི་ཕྱིར་དེ་ནི་རྟོགས་པར་བྱེད་པ་མ་ཡིན་ཏེ། ལྡོག་པ་དང་རྗེས་སུ་འགྲོ་བ་སྒྲུབ་པར་བྱེད་པ་དག་མི་སྲིད་པའི་ཕྱིར་རོ། །དབང་པོ་ལས་འདས་པ་རྣམས་ལ་དེས་མ་མཐོང་བ་ལས་ལྡོག་པ་སྲིད་པ་མ་ཡིན་ཏེ། ཡོད་པ་
[5a.5]རྣམས་ཀྱང་དེ་རྣམས་ཀྱིས་མི་ཤེས་པའི་ཕྱིར་རོ། །དེ་ཉིད་ཀྱི་ཕྱིར་འགལ་བར་མ་གྲུབ་པའི་ཕྱིར་ན། འགལ་བ་མེད་པ་དང་ལྷན་ཅིག་ཡོད་པར་མི་འགལ་བའི་ཕྱིར་རོ། །སྐྱེས་བུ་ཅིག་ཤོས་དང་མཚུངས་པ་གྲུབ་པ་ཡང་མ་ཡིན་ཏེ། ཁྱད་པར་མི་སྲིད་པར་ཤེས་པར་མི་ནུས་པའི་ཕྱིར་ལ།
[5a.6]འདི་འདྲ་བ་རྣམས་ལ་མི་དམིགས་པ་གཏན་ཚིགས་ཉིད་དུ་མི་རིགས་པའི་ཕྱིར་རོ། །སྐྱེས་བུ་ཉིད་ལ་སོགས་པར་མཚུངས་ན་ཡང་ཡིད་གཞུངས་པ་ལ་སོགས་པ་ཡོན་ཏན་གྱི་ཁྱད་པར་མཐོང་བའི་ཕྱིར་ལ། དེ་བཞིན་དུ་འདུ་བྱེད་པ་ཡོད་ན་གཞན་ཡང་སྲིད་པའི་ཕྱིར་རོ། །ཁྱད་པར་སྲིད་
[5a.7]པ་ལ་ཡང་རྗེས་སུ་འགྲོ་བ་མ་གྲུབ་པའི་ཕྱིར་རོ། །དེའི་ཕྱིར་རྗེས་སུ་དཔག་པ་དེ་ལྷག་མ་དང་ལྡན་པ་སྟེ་ལྡོག་པ་ལ་ཐེ་ཚོམ་ཟ་བའི་ཕྱིར། མི་མཐུན་ཕྱོགས་ལ་འཇུག་པ་མ་མཐོང་ན་ཡང་མི་ནུས་སོ། །དེའི་རྣམ་པ་འདི་ལྟ་བུའི་ཤེས་པའི་མཚན་ཉིད་ཅན་གྱི་ཚད་མ་ཉིད་མི་སྲིད་པ་ཡང་མ་ཡིན་ཏེ།
[5b]
[5b.1]དེའི་སྒྲུབ་བྱེད་རྗེས་སུ་བསྒྲུབ་པ་སྲིད་པའི་ཕྱིར་རོ། །གང་གང་གི་སྒྲུབ་པར་བྱེད་པ་ཕྱིན་ཅི་མ་ལོག་པ་རྗེས་སུ་སྒྲུབ་པ་དེས་དེ་ཐོབ་པ་སྲིད་པ་ཡིན་ཏེ། དཔེར་ན་ནད་མེད་པའི་སྒྲུབ་པར་བྱེད་པ་ཕྱིན་ཅི་མ་ལོག་པ་རྗེས་སུ་སྒྲུབ་པའི་ནད་པ་རྣམས་བཞིན། བཅོམ་ལྡན་འདས་ཀྱང་ཚད་མའི་སྒྲུབ་པར་བྱེད་
[5b.2]པ་ཕྱིན་ཅི་མ་ལོག་པ་རྗེས་སུ་བསྒྲུབས་པ་ཡིན་ནོ། །རང་བཞིན་ནོ། །གང་སྒྲུབ་པར་བྱེད་པ་རྗེས་སུ་བསྒྲུབས་པ་ལས་ཚད་མ་ཉིད་ཐོབ་པ་སྲིད་པ་དེ་སྟོན་པར་བྱེད་པ་གསུངས་པ། དེ་ལ་རྒྱུ་ནི་བསམ་པ་དང་། །སྦྱོར་བ་ཕུན་སུམ་ཚོགས་པའོ་ཞེས་སོ་བསམ་པ་སྟོན་པར་བྱེད་དེ། བསམ་པ་ནི་འགྲོ་བ་ལ་ཕན་
[5b.3]པར་བཞེད་པའོ་ཞེས་སོ། །དེ་ཡང་འགྲོ་བ་མཐའ་དག་ཤིན་ཏུ་སྡུག་བསྔལ་དང་བྲལ་བ་དོན་དུ་གཉེར་བའི་རྣམ་པ་ཅན་བསྐལ་པ་མི་ཉུང་བར་གོམས་པས་དེའི་བདག་ཉིད་དུ་གྱུར་པའི་ཐུགས་རྗེའོ། །ཚིགས་སུ་བཅད་པར་འགྲོ་ལ་ཕན་བཞེད་ལྡན། །ཞེས་པ་འདིས་བསྟན་ཏེ། དེ་དང་ལྡན་པའི་ཕྱིར་འགྲོ་ལ་
[5b.4]ཕན་བཞེད་ལྡན་དུ་འགྱུར་རོ། །གོམས་པ་ལས་དེ་དེའི་བདག་ཉིད་དུ་འགྱུར་བ་སྲིད་དོ། །གང་ཡིད་ཀྱི་ཡོན་ཏན་དེ་རྣམས་ནི་ཤིན་ཏུ་གོམས་པ་ཡོད་ན་དེའི་བདག་ཉིད་དུ་འགྱུར་ཏེ། རིག་བྱེད་པ་དང་ཡིད་འབྱུང་བ་ཉིད་བཞིན། །སྙིང་རྗེ་ཡང་ཡིད་ཀྱི་ཡོན་ཏན་ཡིན་ནོ། །རང་བཞིན་ནོ། །དེ་དེས་གཞན་གྱི་
[5b.5]དོན་ལ་རབ་ཏུ་བསྐུལ་བ་ནི། རང་གིས་མངོན་དུ་མ་བྱས་པར་ཕ་རོལ་རྣམས་ལ་སྡུག་བསྔལ་ཞི་བར་བྱེད་པའི་ཐབས་བསྟན་པར་མི་འཕྲོད་དོ་ཞེས་རང་གི་སྡུག་བསྔལ་ཞི་བའི་ཐབས་སྒོམ་པའི་དོན་དུ་རེ་ཞིག་སྦྱོར་བར་བྱེད་དོ་ཞེས་སྟོན་པར་བྱེད་པ་གསུངས་པ། སྦྱོར་བ་ནི་འགྲོ་བ་ལ་སྟོན་པར་བྱེད་པ་ལས་ཞེས་པ་
[5b.6]ལ་སོགས་གང་གང་ལ་བརྩེ་བ་དེ་དེས་ཇི་ལྟར་དེའི་དོན་དུ་འགྱུར་བ་དེ་ལྟར་རབ་ཏུ་སྦྱོར་ཏེ། དཔེར་ན་མ་བུ་ལ་བརྩེ་བ་ཇི་ལྟ་བུ་དེའི་དོན་དུ་འགྱུར་བ་དེ་ལྟར་རབ་ཏུ་སྦྱོར་བ་བཞིན། བཅོམ་ལྡན་འདས་ཀྱང་འགྲོ་བ་ལ་བརྩེ་བར་འགྱུར་རོ། །རང་བཞིན་ནོ། །འགྲོ་བ་ལ་སྟོན་པ་དངོས་ནི། རང་གིས་མཐོང་བའི་སྡུག་
[5b.7]བསྔལ་ཞི་བར་བྱེད་པའི་ཐབས་ཉེ་བར་སྟོན་པའོ། །འདིར་ནི་རྒྱུ་ལ་འབྲས་བུ་ཉེ་བར་གདགས་པར་བྱས་ནས། ཐབས་གོམས་པར་བྱེད་པ་འགྲོ་བ་ལ་སྟོན་པའི་སྒྲས་བརྗོད་དེ། དེ་སེམས་ཅན་ལ་སྟོན་པར་རུང་བའི་ཐབས་ཉིད་ཀྱིས་ན། དེ་ལས་གཞན་པའི་ཐབས་གོམས་པར་བྱེད་པ་ལས་ཁྱད་པར་དུ་
[6a]
[6a.1]འཕགས་པ་ཉིད་དུ་ཤེས་པར་བྱས་པའི་དོན་དུའོ། །འགྲོ་བ་ལ་སྟོན་པར་བྱེད་པ་ལས་ཞེས་པ་འདི་མཚན་ཉིད་ཀྱི་རྒྱུ་སྟེ། དེས་ན་ཇི་ལྟར་སྲ་བ་ཉིད་ལས་སའོ་ཞེས་བརྗོད་པ་ན། སྲ་བའི་རང་བཞིན་ཅན་སའོ་ཞེས་རྟོགས་པ་དེ་བཞིན་དུ་འགྲོ་བ་ལ་སྟོན་པར་བྱེད་པ་ལས་སྟོན་པ་ཉིད་དོ་ཞེས་
[6a.2]བརྗོད་པ་ན་དེའི་རང་བཞིན་ཅན་སྟོན་པ་ཉིད་དོ་ཞེས་པའོ། །དེ་ནི་ཉེ་བར་ལེན་པའི་ཕུང་པོ་ལྔའི་མཚན་ཉིད་ཀྱི་སྡུག་བསྔལ་ལ་རེས་འགའ་བ་ཉིད་ཀྱི་གཏན་ཚིགས་ཀྱིས་མི་རྟག་པ་དང་། དེ་ཉིད་ཀྱི་ཕྱིར་མི་རྟག་པའི་རྒྱུ་ཅན་དང་། ནད་གཞི་ཟད་པས་ནད་བཞིན་དུ་འདི་རྒྱུ་ཟད་པས་ཟད་པར་ནུས་ལ། གཞན་དུ་
[6a.3]ན་མ་ཡིན་ནོ་ཞེས་ངེས་ནས་འདིའི་རྒྱུ་ཅི་ཞིག་ཅེས་རྣམ་པར་དཔྱོད་པར་བྱེད་ཅིང་། སྡུག་བསྔལ་གྱི་རྒྱུ་ནི་གཙོ་བོར་བདག་ལ་ཆགས་པ་དང་ལྡན་པའི་སྲེད་པ་ཁོ་ནར་རྟོགས་སོ། །གང་སེམས་ཅན་གཞན་གྱིས་བཀྲི་བར་བྱ་བ་མ་ཡིན་པར་མངོན་པར་དགའ་བ་སྔོན་མ་ཅན་དམན་པའི་གནས་ཡོངས་སུ་འཛིན་
[6a.4]པ་དེ་བདག་ལ་ཆགས་པ་དང་ལྡན་པས་སྡུག་བསྔལ་དང་བདེ་བ་དོར་བ་དང་ཐོབ་པར་འདོད་པ་སྔོན་མ་ཅན་ཡིན་ཏེ། དཔེར་ན་སྦྲང་བུ་རྣམས་མངོན་པར་འདོད་པ་སྔོན་མ་ཅན་མི་གཙང་བའི་གནས་ཡོངས་སུ་འཛིན་པ་བཞིན། སྲོག་ཆགས་རྣམས་ཀྱང་སེམས་ཅན་གཞན་གྱིས་བཀྲི་བར་བྱ་བ་མ་ཡིན་
[6a.5]པར་མངོན་པར་དགའ་བ་སྔོན་མ་ཅན་མངལ་ལ་སོགས་པ་དམན་པའི་གནས་ཡོངས་སུ་འཛིན་པ་ཡིན་ནོ། །འབྲས་བུའོ། །སྲིད་པ་དེ་ཉིད་བསྟན་བཅོས་སུ་གཙོ་བོ་ཡིན་པས་ན་ཀུན་འབྱུང་གི་བདེན་པ་ཞེས་བརྗོད་དོ། །གཙོ་བོ་ཡང་དེས་ཀུན་ནས་བསླང་བའི་འབད་པའི་དབང་གིས་སྐྱེ་བའི་ཡུལ་དུ་འགྲོ་བར་
[6a.6]བྱེད་པའི་ཕྱིར་དང་། དེ་མ་ཐག་པ་ཉིད་ཀྱི་ཕྱིར་ཡང་ངོ་། །མི་ཤེས་པ་ཡོད་ན་ཡང་། འདོད་ཆགས་མེད་པར་འཇུག་པ་མི་སྲིད་པའི་ཕྱིར་རོ། །ལས་པས་ཀྱང་སྲེད་པ་ཁོ་ན་གཙོ་བོ་སྟེ། དེ་ལྟར་ནི། ལས་ཡོད་ཀྱང་ཇི་སྲིད་དུ་མ་རིག་པའི་ས་རྡུལ་གྱིས་གཡོགས་པ་དང་སྲེད་པའི་འདོད་ཆགས་ཀྱིས་
[6a.7]མངོན་པར་བརླན་པར་མ་གྱུར་པ་དེ་སྲིད་དུ་འབྲས་བུ་དང་ལྡན་པར་མི་འགྱུར་ཏེ་དཔེར་ན་དགྲ་བཅོམ་པ་རྣམས་བཞིན་ནོ། །དེའི་ཕྱིར་སྲེད་པ་དེ་དང་དེ་ལས་གཞན་པའི་སྐྱོན་རྣམས་ཀྱང་བདག་ཏུ་ལྟ་བ་ཁོ་ན་ལས་བྱུང་བ་སྟེ་དེ་ལྟར་རྟོགས་པར་མཛད་དོ། །བདག་མེད་དོ་བདག་གི་བ་མེད་དོ་ཞེས་མཐོང་བ་
[6b]
[6b.1]ལ་ནི་ཡོངས་སུ་འཛིན་པ་མེད་པས་འགར་ཡང་ཆགས་པ་མེད་ལ། ཆགས་པ་དང་ལྡན་པ་མ་ཡིན་པ་ལ་ཡང་ཞེ་སྡང་བ་མེད་དོ། །བདག་དང་བདག་གི་བ་དང་ཉེ་བར་མ་འབྲེལ་བ་ཅན་དང་ཉེ་བར་འབྲེལ་པ་སོ་སོར་བཅོམ་པ་ལ་དེ་མེད་པའི་ཕྱིར་རོ། །དེ་དང་རིགས་མཐུན་པ་གོམས་པ་ལས་སྐྱེས་པའི་
[6b.2]བདག་ཏུ་ལྟ་བ་དང་བདག་གི་བ་ལ་ཆགས་པ་སྐྱེས་ན་ཞེ་སྡང་དང་བཅས་པ་ལ་སོགས་པ་རྣམས་སོ་ཞེས་པས་སྲེད་པ་ལ་སོགས་པའི་སྐྱོན་རྣམས་ཐམས་ཅད་འཇིག་ཚོགས་ལ་ལྟ་བ་ལས་སྐྱེས་པའོ། །དེ་ཉིད་ནི་མི་ཤེས་པར་བརྗོད་དེ་དེ་ནི་ཤེས་པའི་མི་མཐུན་ཕྱོགས་ཡིན་པ་ཉིད་ཀྱི་ཕྱིར་རོ། །དེ་ཉིད་
[6b.3]བདག་ཏུ་ལྟ་བ་སྟེ། གང་ལས་སྐྱོན་གྱི་རྒྱུ་ཡིན་པ་དེ་ལས་འབྱུང་ཞིང་། དེ་ཟད་པ་ལས་སྲེད་པ་དང་དེ་ལས་གཞན་པའི་སྐྱོན་རྣམས་ཟད་དོ་ཞེས་བསམས་ནས་གང་གོམས་པས་དེ་སྤང་བར་བྱ་བ་བདག་ཏུ་ལྟ་བའི་མི་མཐུན་ཕྱོགས་བརྟག་པ་མཛད་དོ། །བརྟག་པར་བྱེད་པ་ན་ཡང་དེ་ལས་བཟློག་
[6b.4]པའི་རྣམ་པ་ཉིད་ཀྱི་ཕྱིར་བདག་མེད་པ་ཉིད་དུ་ལྟ་བ་ཁོ་ན་བདག་ཏུ་ལྟ་བའི་མི་མཐུན་ཕྱོགས་ཏེ་དེ་ལྟར་རྟོགས་པར་མཛད་དོ། །གང་གང་ལས་བཟློག་པའི་རང་བཞིན་ཅན་དེ་དེའི་མི་མཐུན་ཕྱོགས་ཡིན་ཏེ། རླུང་ནད་ལས་བཟློག་པའི་རང་བཞིན་ཅན་ཏིལ་མར་རླུང་ནད་ཀྱི་བཞིན། བདག་མེད་པ་
[6b.5]ཉིད་དུ་ལྟ་བ་ཡང་བདག་ཏུ་ལྟ་བ་ལས་བཟློག་པའི་རང་བཞིན་ཅན་ཡིན་ནོ་ཞེས་པ་རང་བཞིན་ནོ། །བདག་ཏུ་ལྟ་བ་དང་འགལ་བའི་བདག་མེད་པ་ཉིད་དུ་ལྟ་བ་ནི་དེ་སྔོན་དུ་འགྲོ་བ་ཅན་བདག་ལ་ཆགས་པ་ལ་སོགས་པ་སྐྱོན་གྱི་ཚོགས་དང་ཡང་འགལ་བ་ཁོ་ནའོ་ཞེས་མཁྱེན་ནོ། །གང་གང་གི་རྒྱུ་དང་
[6b.6]འགལ་བ་དེ་དེ་ལ་གནོད་པ་ཡིན་ཏེ། རླུང་ལས་བྱུང་བའི་ནད་ལ་དེའི་རྒྱུ་དང་འགལ་བ་ཏིལ་མར་བཞིན། བདག་མེད་པར་ལྟ་ཁ་ཡང་བདག་ཏུ་ཆགས་པ་ལ་སོགས་པའི་རྒྱུ་བདག་ཏུ་ལྟ་བ་དང་འགལ་བ་ཡིན་ནོ་ཞེས་པ་རང་བཞིན་ནོ། །དེ་དེ་ལྟར་མཁྱེན་ནས་བདག་མེད་པ་མཐོང་བ་དེ་མང་པོ་རྣམ་པ་
[6b.7]དུ་མར་དུས་རིང་པོར་གོམས་པ་ལས་དེ་དང་དེའི་མི་མཐུན་ཕྱོགས་ལ་ཡོན་ཏན་དང་སྐྱོན་རྣམས་ཐམས་ཅད་རྣམ་པ་ཐམས་ཅད་དུ་རབ་ཏུ་གསལ་བར་འགྱུར་རོ། །གང་ཞིག་གང་ལ་ཤེས་རབ་ཅན་གྱིས་མང་པོར་རྣམ་པ་དུ་མར་དུས་རིང་པོར་གོམས་པར་བྱེད་པ་དེ་དེ་དང་དེའི་མི་མཐུན་ཕྱོགས་ལ་སྐྱོན་དང་ཡོན་
[7a]
[7a.1]ཏན་རྣམས་རབ་ཏུ་གསལ་བར་འགྱུར་ཏེ། དཔེར་ན་ཤེས་རབ་ཅན་འགའ་ཞིག་བཟོའི་ཁྱད་པར་འགའ་ཞིག་ལ་མངོན་པར་སྦྱོར་བ་གོམས་པ་བཞིན། བཅོམ་ལྡན་འདས་ཀྱང་བདག་མེད་པར་ལྟ་བ་ལ་རྣམ་པ་དུ་མར་མང་པོས་ཡུན་རིང་པོར་གོམས་པར་མཛད་ཟིན་པ་ཡིན་ནོ། །རང་
[7a.2]བཞིན་ནོ། །ཐབས་གོམས་པར་བྱེད་པ་འདི་ཁོ་ན་ཡང་ལམ་གྱི་བདེན་པ་ཞེས་བརྗོད་དོ། །དེའི་རྣམ་པ་འདི་ལྟ་བུའི་ཐབས་གོམས་པ་གཞན་དང་། ཐུན་མོང་མ་ཡིན་པ་ལས་སྡུག་བསྔལ་གྱི་རྒྱུའི་བག་ཆགས་ཀྱང་མ་ལུས་ཏེ། འདི་ཁོ་ན་བཅོམ་ལྡན་འདས་ཀྱི་བསེ་རུ་ལ་སོགས་པ་ལས་ཁྱད་པར་
[7a.3]རོ། །གཞན་གྱི་དོན་ལ་གཙོ་བོར་འཇུག་པས་ཀྱང་འདིས་རྣམ་པ་འདི་ལྟ་བུའི་གོམས་པ་གདོན་མི་ཟ་བར་བྱ་སྟེ། མི་མཐུན་ཕྱོགས་དང་གཉེན་པོའི་ཕྱོགས་མཐའ་དག་ཡོངས་སུ་མི་ཤེས་པས་ན། གཞན་རྣམས་ལ་མི་མཐུན་ཕྱོགས་དང་གཉེན་པོའི་ཕྱོགས་དག་ཉེ་བར་བསྟན་པར་མི་ནུས་པ་ཉིད་ཀྱི་ཕྱིར་
[7a.4]རོ་ཞེས་པའོ། །ཐབས་གོམས་པར་བྱེད་པ་འདི་དང་སྔར་བསྟན་པའི་ཐུགས་རྗེ་ནི་རྒྱུ་ཕུན་སུམ་ཚོགས་པའོ། །དེའི་འབྲས་བུ་ནི་རང་དང་གཞན་གྱི་དོན་ཕུན་སུམ་ཚོགས་པའོ། །དེ་ལ་རང་གི་དོན་ཕུན་སུམ་ཚོགས་པ་ནི་ཇི་སྐད་བཤད་པའི་ཐབས་གོམས་པ་ལས་སྡུག་བསྔལ་གྱི་རྒྱུ་སྔ་མ་རང་གི་ངང་གིས་
[7a.5]འགག་པ་ན་བདག་མེད་པ་མཐོང་བ་དེའི་བདག་ཉིད་དུ་གྱུར་པར་གནས་པའི་སྡུག་བསྔལ་གྱི་རྒྱུ་ཕྱི་མ་མི་སྐྱེ་བའི་མཚན་ཉིད་ཅན་གྱི་གནས་སྐབས་ཀྱི་ཁྱད་པར་ཏེ་གང་ལ་འགོག་པའི་བདེན་པ་ཞེས་བརྗོད་པའོ། །དེ་ཁོ་ན་ཁྱད་པར་གསུམ་གྱིས་ཁྱད་པར་དུ་འཕགས་པ་ནི་བདེ་བར་གཤེགས་པ་ཉིད་ཅེས་བརྗོད་
[7a.6]དོ། །རང་གི་དོན་ཕུན་སུམ་ཚོགས་པ་དེ་སྟོན་པར་བྱེད་པ་གསུངས་པ། རང་གི་དོན་ཕུན་སུམ་ཚོགས་པ་ནི་བདེ་བར་གཤེགས་པ་ཉིད་ཀྱིས་ཏེ་ཞེས་པ་ལ་སོགས་པའོ། །སུའི་སྒྲ་འདི་ནི་འདིར་རབ་ཏུ་གྱུར་པ་ཉིད་ལ་སོགས་པའི་དོན་གསལ་བར་བྱེད་པར་རིག་པར་བྱའོ། །གང་གསུངས་པ། དོན་
[7a.7]རྣམ་པ་གསུམ་ཉེ་བར་བླངས་ནས་ཞེས་པ་ལ་སོགས་པ་སྟེ། མཆོག་ཏུ་གཤེགས་ཤིང་ཐོབ་པ་ནི་བདེ་བར་གཤེགས་པ་སྟེ། མཆོག་ཉིད་ཀྱང་སླར་སྡུག་བསྔལ་གྱི་རྟེན་མ་ཡིན་པ་ཉིད་ཀྱིས་ཏེ། འཇིག་རྟེན་ན་བདེ་བ་དང་དེའི་རྒྱུ་ནི་མཆོག་ཅེས་བརྗོད་དོ། །སྡུག་བསྔལ་གྱི་རྟེན་མ་ཡིན་པ་དེ་ཡང་བདག་
[7b]
[7b.1]མེད་པར་ལྟ་བ་ཤིན་ཏུ་གོམས་པ་ཉིད་ཀྱི་ཕྱིར་རོ། །ཡང་ན་བརྗོད་མ་ཐག་པའི་ཐབས་ཀྱིས་རིགས་པ་མཐོང་བས་གཤེགས་པའི་ཕྱིར་མཆོག་ཏུ་གཤེགས་པ་སྟེ། འཇིག་རྟེན་ན་གང་རིགས་པ་སྔོན་དུ་འགྲོ་བས་འཇུག་པ་དེ་མཆོག་ཏུ་བྱ་བའོ། །སླར་མི་ལྡོག་པར་གཤེགས་པས་ན་བདེ་བར་གཤེགས་
[7b.2]པ་སྟེ། སླར་མི་ལྡོག་པ་ནི་སྐྱེ་བ་དང་སྐྱོན་འབྱུང་བ་མེད་པ་ཡིན་ལ། དེ་ཡང་དེའི་རྒྱུ་སྔར་བརྗོད་མེད་པའི་ཕྱིར་རོ། །གང་བདག་ཏུ་ལྟ་བ་དང་ཆགས་པ་དག་མེད་པ་དེ་ལ་སྐྱེ་བ་དང་འདོད་ཆགས་ལ་སོགས་པའི་སྐྱོན་འབྱུང་བ་མེད་དེ། །དཔེར་ན་ནམ་མཁའ་བཞིན་ནོ། །བདག་མེད་པར་ལྟ་བ་དེའི་བདག་
[7b.3]ཉིད་དུ་གྱུར་པ་ལ་ཡང་བདག་ཏུ་ལྟ་བ་དང་ཆགས་པ་དག་མེད་དོ། །རྒྱུ་མི་དམིགས་པའོ། །མ་ལུས་པར་གཤེགས་པ་ནི་བདེ་བར་གཤེགས་པ་སྟེ། འདིའི་ལུས་པ་མེད་པར་གྱུར་པ་ཞེས་ཚིག་རྣམ་པར་སྦྱར་རོ། །ལུས་ལ་ཡང་ལུས་ལ་སོགས་པ་ལས་སུ་མི་རུང་བ་སྟེ། དེ་ཡང་རིམ་པ་ཇི་ལྟ་བར་
[7b.4]རྩ་བཀྲོལ་ཅན་མ་ཡིན་ན་ཡང་གོམས་པ་ལས་མཆོང་ཞིང་འགྲོ་བ་ལ་སོགས་པ་དང་། ངའི་སྙམ་པའི་ང་རྒྱལ་མེད་ན་ཡང་རྨངས་མོ་ཞེས་སྨྲ་བ་ལ་སོགས་པ་དང་། རྟག་ཏུ་མཉམ་པར་བཞག་པ་མ་ཡིན་པས་མཉམ་པར་མ་བཞག་པའི་སེམས་ཀྱི་གནས་སྐབས་སོ། །ཡང་ན་རྣམ་པ་དེ་ལྟ་བུའི་ལམ་
[7b.5]གོམས་པ་མེད་པས་ལམ་དང་དེའི་མི་མཐུན་ཕྱོགས་དག་ཤིན་ཏུ་ཡོངས་སུ་མི་ཤེས་པའི་ཕྱིར། ཁོང་དུ་ཆུད་པའི་ལམ་གྱི་རྣམ་པར་དབྱེ་བ་སྟོན་པ་ཡང་མི་གསལ་བ་ཉིད་ལུས་པ་སྟེ། དེ་ཡང་བཅོམ་ལྡན་འདས་ཀྱིས་སྤངས་པས་དེའི་ཕྱིར་འདི་བདེ་བར་གཤེགས་པའོ། །དོན་གསུམ་པོ་འདི་ཡང་ཞེས་
[7b.6]པ་ལ་སོགས་པ་སྟེ། དེ་ལ་ཕྱི་རོལ་པའི་འདོད་ཆགས་དང་བྲལ་བ་རྣམས་ནི་བདག་ཏུ་ལྟ་བའི་རྗེས་སུ་སོང་བ་སྡུག་བསྔལ་གྱི་རྟེན་ཉིད་ཀྱི་ལམ་གྱིས་འགྲོ་བའི་ཕྱིར། དེའི་དབང་གིས་སླར་ཡང་སྡུག་བསྔལ་ལ་རྟེན་པར་བྱེད་ལ། རིགས་པ་མཐོང་བའི་ལམ་གྱིས་སོང་བ་ཡང་མ་ཡིན་ནོ་ཞེས་པ་དེའི་ཕྱིར་དེ་
[7b.7]རྣམས་མཆོག་ཏུ་ཕྱིན་པ་མ་ཡིན་ནོ། །དེ་ལྟར་ནི་འཇིག་རྟེན་ན། གང་སྡུག་བསྔལ་ལ་རྟེན་པར་བྱེད་པ་དང་། རིགས་པ་སྔོན་མ་ཅན་མ་ཡིན་པར་འཇུག་པ་དེ་བསྔགས་པར་འོས་པ་མ་ཡིན་གྱི་འོན་ཀྱང་སྨད་པར་འོས་པ་ཁོ་ནའོ། །སློབ་པ་རྣམས་ནི་གལ་ཏེ་ཡང་སྡུག་བསྔལ་གྱི་རྟེན་མ་ཡིན་པ་དང་རིགས་
[8a]
[8a.1]པས་ངེས་པའི་ལམ་གྱིས་མཆོག་ཏུ་གཤེགས་མོད། དེ་ལྟ་ན་ཡང་དེ་རྣམས་ཀྱི་སྐྱོན་རྣམས་དང་སྐྱེ་བ་ཡང་སླར་ཡང་འབྱུང་ངོ་ཞེས་པ་དེ་རྣམས་ཀྱང་གཉིས་པའི་དོན་གྱིས་བདེ་བར་གཤེགས་པ་མ་ཡིན་ནོ། །མི་སློབ་པ་རྣམས་ཀྱང་དོན་གཉིས་ཀྱིས་བདེ་བར་གཤེགས་པར་ནི་
[8a.2]འདོད་ཀྱི། མ་ལུས་པའི་དོན་གྱིས་ནི་མ་ཡིན་ཏེ། ཇི་སྐད་བཤད་པའི་ལུས་ལ་མ་སྤངས་པའི་ཕྱིར་རོ། །གཞན་དོན་ཕུན་སུམ་ཚོགས་པ་ནི་སྒྲོལ་བའི་དོན་གྱིས་ན་ཞེས་པ་འདིས་སྐྱོབ་པའི་སྒྲའི་དོན་གསུངས་སོ། །འདིས་འཁོར་བའི་རྒྱ་མཚོ་ལས་སེམས་ཅན་རྣམས་བསྒྲལ་བར་བྱ་བས་ན་སྒྲོལ་བ་
[8a.3]སྟེ་རང་གིས་མཐོང་བའི་ལམ་ཉེ་བར་སྟོན་པའོ། །དེ་ཁོ་ནའི་དོན་ཏེ། ཐར་པའི་ཐབས་འདོད་པ་རྣམས་ཀྱིས་དོན་དུ་གཉེར་བར་བྱ་བས་ནའོ་ཞེས་བྱས་ནས་སོ། །དེ་འདི་ལ་ཡོད་དོ་ཞེས་པའི་དོན་དེས་བཅོམ་ལྡན་འདས་སྐྱོབ་པ་ཉིད་དོ། །འདི་ཁོ་ན་ཏཱ་ཡ་ཏིའི་དོན་གཞན་སྐྱོང་བ་སྟེ། འདི་ལྟ་སྟེ་
[8a.4]འཁོར་བའི་རྒྱ་མཚོ་ལས་སྒྲོལ་བའོ། །དེ་ཕྱིན་ཅི་ལོག་ཏུ་ཉེ་བར་སྟོན་པ་ཡང་མི་སྲིད་དེ། དེའི་རྒྱུ་མེད་པའི་ཕྱིར་དང་བརྩེ་བའི་བདག་ཉིད་ཀྱི་ཕྱིར་ཏེ། ལམ་ལེགས་པར་རིག་པ་ཉིད་ཀྱི་ཕྱིར་རོ། །ཆགས་པ་ལ་སོགས་པའི་སྐྱོན་རྣམས་ནི་ཕྱིན་ཅི་ལོག་ཏུ་མངོན་པར་བརྗོད་པའི་རྒྱུ་འམ། ཁ་ཅིག་དགོས་
[8a.5]པ་ཡིན་ལ། དེ་ཡང་མེད་དེ། བརྩེ་བ་དེའི་བདག་ཉིད་དུ་གྱུར་པ་ཡང་གཞན་གྱི་དེ་ཁོ་ནར་སྡུག་བསྔལ་ཟད་པའི་ཐབས་བསྒྲུབས་ནས། ཅི་ལྟར་རྣམ་པ་གཞན་དུ་སྟོན། །གང་གང་གི་ཚེ་བརྫུན་དུ་སྨྲ་བའི་རྒྱུ་རྣམས་མེད་པ་དེ་དེའི་ཚེ་བརྫུན་མི་སྨྲ་སྟེ། དཔེར་ན་གཞན་འགའ་ཞིག་བདེན་པར་སྨྲ་བའི་དུས་ན་བཞིན་
[8a.6]བདེ་བར་གཤེགས་པའི་གནས་སྐབས་ཀྱི་དུས་ན་ཡང་དེ་ལ་བརྫུན་གྱི་རྒྱུ་རྣམས་མེད་དོ། །རྒྱུ་མི་དམིགས་པའོ། །གང་ཞིག་གང་གི་དོན་བྱ་བའི་ཆེད་དུ་གང་ལ་བརྩེ་བས་དོན་གང་སྒྲུབ་པར་བྱེད་བའི་དོན་དེ་གྲུབ་ཟིན་པ་ན་དེའི་ཡུལ་ལ་སྙིང་རྗེ་མ་བཏང་བ་དེ་དེར་དེ་ལ་མི་སླུ་སྟེ། དཔེར་ན་བུ་ལ་ཕན་པའི་ཟས་ཀྱི་
[8a.7]ཆེད་དུ་བཟའ་བ་བསྒྲུབས་ཟིན་པའི་མ་བཞིན། བཅོམ་ལྡན་འདས་ཀྱང་སེམས་ཅན་གྱི་དོན་བྱ་བའི་ཆེད་དུ་སེམས་ཅན་ལ་བརྩེ་བས་སྡུག་བསྔལ་ཟད་པར་བྱེད་པའི་ཐབས་བསྒྲུབས་ཤིང་དེའི་ཡུལ་ལ་ཐུགས་རྗེ་མ་བཏང་བའོ། །ཁྱབ་བྱེད་དང་འགལ་བའོ། །དེའི་ཕྱིར་ཚད་མའོ། །གང་ཞིག་གང་དོན་དུ་
[8b]
[8b.1]གཉེར་བ་ལ་དོན་དེའི་ཐབས་ཕྱིན་ཅི་མ་ལོག་པར་འཆད་པར་བྱེད་པ་དེ་ནི་དེའི་དེ་ལ་ཚད་མ་སྟེ། དཔེར་ན་ནད་པ་ནད་མེད་པ་ཉིད་དོན་དུ་གཉེར་བ་ལ། ནད་མེད་པ་ཉིད་ཀྱི་ཐབས་ཕྱིན་ཅི་མ་ལོག་པར་འཆད་པའི་སྨན་པ་ལ་དེ་བཞིན། བཅོམ་ལྡན་འདས་ཀྱང་སྡུག་བསྔལ་ཟད་པ་དོན་དུ་གཉེར་བ་ལ་སྡུག་
[8b.2]བསྔལ་ཟད་པར་བྱེད་པའི་ཐབས་ཕྱིན་ཅི་མ་ལོག་པར་འཆད་དོ། །རང་བཞིན་ནོ། །དེ་ལྟར་ཚད་མར་གྱུར་པ་ཞེས་པ་འདི་ཁོ་ན་བསྟོད་པའི་ཚིག་སྟེ། འདིས་ནི་བཅོམ་ལྡན་འདས་ཀྱི་ཡེ་ཤེས་ཀྱི་མཚན་ཉིད་ཚད་མ་ཉིད་ཐུན་མོང་མ་ཡིན་པའི་ཡོན་ཏན་གསལ་བར་བྱས་ཤིང་། གང་གི་ཕྱིར་དེ་དང་ལྡན་པའི་ཕྱིར་
[8b.3]དེ་ཚད་མར་འགྱུར་རོ། །ཡོན་ཏན་དེ་ནི་རྒྱུ་མེད་པར་མི་འགྲུབ་བོ་ཞེས་སྟོན་པར་བྱེད་པས་རྒྱུ་ཕུན་སུམ་ཚོགས་པ་གསུངས་སོ། །བདེ་གཤེགས་ཀྱི་སྒྲས་ནི་ཡེ་ཤེས་དེའི་མི་མཐུན་ཕྱོགས་སྤངས་པའི་ཁྱད་པར་འབྲས་བུ་ཕུན་སུམ་ཚོགས་པས་བསྡུས་པ་གསུངས་སོ། །དེ་མེད་ན་མཆོད་པ་ལ་སོགས་པར་
[8b.4]འགྲོ་བ་བཞིན་དུ་ངག་ལས་གོ་བར་བྱ་བའི་དོན་རིགས་པ་མ་ཡིན་པ་ཡང་གསལ་བར་བྱེད་པའི་ལུས་ཀྱིས་བྱ་བ་བྱེད། རྨངས་མོ་ཞེས་སྨྲ་བ་ལ་སོགས་པ་བཞིན་དུ་མི་ལེགས་པ་གཞན་ཡང་འགའ་ཞིག་གི་ཚེ་སྨྲ་བར་བྱེད། རྟག་ཏུ་མཉམ་པར་གཞག་པ་མ་ཡིན་པ་ཉིད་ཀྱིས་ལུང་དུ་མ་བསྟན་པའི་གནས་
[8b.5]སྐབས་ན། སེམས་ཅན་གྱི་དོན་བྱ་བ་མཐའ་དག་ནུས་པ་མ་ཡིན་པར་འགྱུར་བའམ། ཡང་ན་གསལ་བའི་མི་མཐུན་པའི་ཕྱོགས་བག་ཆགས་དང་བཅས་པ་མ་སྤངས་པའི་ཕྱིར། འདིའི་རྟོགས་པའི་ལམ་རབ་ཏུ་གསལ་བར་བྱེད་པ་གསལ་བ་ཉིད་དུ་འགྱུར་བ་མ་ཡིན་ཞིང་། དེ་ཡོད་ན་ནི་སྐྱོན་འདི་རྣམས་
[8b.6]འབྱུང་བ་མ་ཡིན་ནོ་ཞེས་བསྟན་པའི་ཆེད་དུ་སྤངས་པའི་ཁྱད་པར་གསུངས་སོ། །སྐྱོབ་པ་ཞེས་པ་འདིས་ནི་ཡེ་ཤེས་དེ་ཉིད་ཀྱི་བྱ་བའི་ཁྱད་པར་ཇི་ལྟར་མཐོང་བའི་ལམ་ཉེ་བར་སྟོན་པ་བསྟན་ཏོ། །གལ་ཏེ་དེ་མི་འགྱུར་ན་དེ་ཚད་མ་ཉིད་དུ་མི་འགྱུར་ལ། གལ་ཏེ་རྣམ་པ་འདི་ལྟ་བུ་དེའི་འབྲས་བུར་འགྱུར་ན།
[8b.7]དེ་ལྟར་དེ་དང་ལྡན་པའི་ཕྱིར། བཅོམ་ལྡན་འདས་མ་རྟོགས་པའི་དོན་གསལ་བར་བྱེད་པའམ། དེ་ལ་མི་བསླུ་བ་ཡིན་གྱི་རྣམ་པ་གཞན་དུ་ན་མ་ཡིན་ནོ་ཞེས་པ་དེའི་ཕྱིར་བྱ་བའི་ཁྱད་པར་བསྟན་ཏོ། །བརྩེ་བ་ནི་བྱང་ཆུབ་སེམས་དཔའི་གནས་སྐབས་ན། གང་རང་གི་ངང་གིས་འབྱུང་བར་འགྱུར་བ་དེ་བདེ་བར
[9a]
[9a.1]གཤེགས་པའི་གནས་སྐབས་ན་མ་བརྗོད་ཀྱང་གྲུབ་པ་ཁོ་ནའོ་ཞེས་པས་མ་བརྗོད་དོ། །དེ་མེད་ན་ཕན་པ་ཉེ་བར་བསྟན་པ་མི་ནུས་པ་ཁོ་ནའོ་ཞེས་དེ་ཡང་དེའི་གཞན་གྱི་དོན་གྱི་ངོར་ལྷན་ཅིག་བྱེད་པར་གྱུར་པར་རིག་པར་བྱའོ། །དེ་ལྟར་བཅོམ་ལྡན་འདས་ཀྱི་ཡེ་ཤེས་ཀྱི་
[9a.2]མཚན་ཉིད་ཚད་མ་ཉིད་རྒྱུ་དང་བཅས་པ་མི་མཐུན་ཕྱོགས་སྤངས་པའི་ཁྱད་པར་བཅས་པ་བྱ་བའི་ཁྱད་པར་དང་བཅས་པ། རྒྱུར་གྱུར་པའི་ཁྱད་པར་བཅས་པ་གསལ་བར་བྱས་སོ་ཞེས་པ་འདི་ནི་རེ་ཞིག་རིམ་པ་བཞིན་བཤད་པ་སྟེ། གང་དུ་བརྩེ་བ་ལ་སོགས་པ་རྣམས་ཀྱིས་སྟོན་པ་ཉིད་ལ་
[9a.3]སོགས་པ་རྣམས་སྲིད་པར་རྗེས་སུ་དཔོག་པའོ། །ད་ནི་རིམ་པ་བཟློག་པས་བཤད་པར་བྱ་སྟེ། ཡང་ན་སྐྱོབ་པ་ནི་ཕྱིན་ཅི་མ་ལོག་པའི་བདེན་པ་ཉེ་བར་སྟོན་པ་སྟེ། སྡུག་བསྔལ་ཉེ་བར་ཞི་བའི་རྒྱུ་དེ་བཅོམ་ལྡན་འདས་ཀྱིས་སེམས་ཅན་རྣམས་ལ་བསྟན་ཏོ་ཞེས་དེ་ནི་དེ་དོན་དུ་གཉེར་བ་དེ་རྣམས་ཀྱི་དེ་
[9a.4]ལ་ཚད་མའོ། །གང་ཞིག་གང་སྡུག་བསྔལ་རབ་ཏུ་ཞི་བ་དོན་དུ་གཉེར་བ་གང་ལ། སྡུག་བསྔལ་གྱི་རང་བཞིན་ད་དང་། སྡུག་བསྔལ་གྱི་རྒྱུ་དེ་དང་། དེའི་སྡུག་བསྔལ་རབ་ཏུ་ཞི་བ་དང་། སྡུག་བསྔལ་དེ་རབ་ཏུ་ཞི་བའི་ཐབས་ཇི་ལྟ་བ་བཞིན་འཆད་པ་དེ་དེའི་དེ་ལ་ཚད་མ་ཡིན་ཏེ། དཔེར་
[9a.5]ན་ནད་པ་ནད་ཀྱི་སྡུག་བསྔལ་རབ་ཏུ་ཞི་བ་དོན་དུ་གཉེར་བ་ལ་ནད་ཀྱི་སྡུག་བསྔལ་གྱི་རང་བཞིན་ལ་སོགས་པ་ཇི་ལྟར་གྱུར་པ་འཆད་པའི་སྨན་པ་ནི་དེའི་དེ་ལ་བཞིན། བཅོམ་ལྡན་འདས་ཀྱང་འཁོར་བའི་སྡུག་བསྔལ་རབ་ཏུ་ཞི་བའི་དོན་དུ་གཉེར་བའི་སྐྱེས་བུ་ལ་འཁོར་བའི་སྡུག་བསྔལ་གྱི་རང་བཞིན་ལ་
[9a.6]སོགས་པ་ཇི་ལྟ་བ་བཞིན་བཤད་པ་ཡིན་ནོ། །རང་བཞིན་ནོ། །བདེན་པ་དེ་རྣམས་ཀྱང་ཤས་ཀྱིས་བསྟན་ཟིན་ཏོ། །ཇི་ལྟར་སྡུག་བསྔལ་ནི་ཉེ་བར་ལེན་པའི་ཕུང་པོ་ལྔའི་མཚན་ཉིད་དོ། །དེའི་ཀུན་འབྱུང་བ་ནི་སྲེད་པ་སྟེ། དེ་ལས་སྡུག་བསྔལ་ཇི་ལྟར་རིགས་པར་འབྱུང་བའོ། །འགོག་པ་ནི་
[9a.7]ལམ་དེའི་བདག་ཉིད་དུ་གནས་པའི་སྡུག་བསྔལ་གྱི་རྒྱུ་སྔ་མ་འགགས་པར་གྱུར་ན། སྡུག་བསྔལ་གྱི་རྒྱུ་ཕྱི་མ་མི་སྐྱེ་བའི་མཚན་ཉིད་ཅན་གྱི་གནས་སྐབས་ཀྱི་ཁྱད་པར་རོ། །ལམ་ནི་བདག་མེད་པ་མཐོང་བ་གོམས་པར་བྱེད་པ་སྟེ། ཇི་ལྟར་དེ་ལས་འགོག་པ་ཐོབ་པར་འགྱུར་བའོ། །འདི་ཐམས་ཅད་
[9b]
[9b.1]སྔར་ཁོ་ནར་བསྡུས་པས་བསྟན་ཟིན་ཏོ། །དེའི་ཕྱིར་བདེན་པ་བཞི་མཐོང་བ་ལས་གྲོལ་བར་འགྱུར་རོ། །དེའི་ཕྱིར་དེ་ཉེ་བར་སྟོན་པ་ནི། འཁོར་བའི་རྒྱ་མཚོ་ལས་གྲོལ་བ་སྒྲུབ་པར་བྱེད་པ་ཉིད་ཀྱི་ཕྱིར་སྐྱོབ་པའོ། །འདི་ཙམ་ཉིད་ཀྱང་གཞན་ལ་ཕན་པར་འདོད་པས་བྱ་བ་ཡིན་ཏེ། འདི་ལྟ་སྟེ་སྤང་
[9b.2]བྱ་དང་། བླང་བྱའི་དེ་ཁོ་ན་ཉིད་ཐབས་དང་བཅས་པ་སྟོན་པའོ། །དེ་ཡང་བཅོམ་ལྡན་འདས་ཀྱིས་མཛད་དོ། །དེའི་ཕྱིར་འབྲས་བུ་འདི་ལས་ལགས་པ་ལ་སོགས་པ་ཁྱད་པར་གསུམ་གྱིས་ཁྱད་པར་དུ་འཕགས་པའི་ཡེ་ཤེས་རྗེས་སུ་དཔག་སྟེ། འདིར་གཤེགས་པ་རྟོགས་པའི་དོན་ཅན་ལ་
[9b.3]བརྟེན་པ་ལས་སོ། །སྔར་ནི་གཤེགས་པ་ཐོབ་པའི་དོན་ཅན་ལ་བརྟེན་ནས་སྤངས་པ་ཕུན་སུམ་ཚོགས་པའི་འབྲས་བུར་བརྗོད་ལ། ད་ལྟ་ནི་ཡེ་ཤེས་ཕུན་སུམ་ཚོགས་པའི་སྟེ་ལེགས་པར་རྟོགས་པ་ནས་མ་ལུས་པར་རྟོགས་པ་ཞེས་པའི་བར་དུའོ། །དེ་ལྟར་བདེ་བར་གཤེགས་པ་ཉིད་
[9b.4]རིག་པར་བྱའོ། །དེ་ལ་ལེགས་པ་ཉིད་ནི་ཡེ་ཤེས་དེའི་ཡུལ་དེ་ཁོ་ན་ཉིད་ཡིན་པ་ཉིད་ཀྱི་ཕྱིར་ལ། དེ་ཡང་དེས་བསྟན་པའི་ལམ་ཚད་མས་མི་བསླུ་བ་ལས་རྗེས་སུ་དཔག་གོ། །སླར་མི་ལྡོག་པ་ཉིད་ནི་བརྟེན་པ་ཉིད་ཀྱི་ཕྱིར་ཏེ། དེ་ཡང་དེས་ངེས་པའི་ལམ་ལ་ཚད་མ་གཞན་གྱིས་གནོད་
[9b.5]པ་མེད་པ་ལས་ཤེས་པར་བྱའོ། །ཡང་ན་རྣམ་པར་གཡོ་བ་མེད་པའི་སྟེ་སྔ་མ་དང་ཕྱི་མའི་གསུང་གཞོམ་དུ་མེད་པ་སྟེ། གསུང་རབ་ཐམས་ཅད་ལ་འཕགས་པའི་བདེན་པ་བཞི་སྟོན་པ་ལ་གསུང་ངག་གཅིག་པ་ཉིད་ཀྱི་ཕྱིར་རོ། །ལུས་པ་ཡང་འདིར་འཕགས་པའི་བདེན་པ་བཞི་རྟོགས་
[9b.6]པ་རྣམས་ལ་ཡང་། ཡེ་ཤེས་སྒྲུབ་པ་ལ་མི་མཁས་པ་ཡིན་ལ། དེ་མེད་པ་ལས་མ་ལུས་པའི་ཡེ་ཤེས་རྗེས་སུ་དཔག་སྟེ། ཐབས་སྣ་ཚོགས་པ་རྣམས་ཀྱིས་བདེན་པ་སྟོན་པར་བྱེད་པའི་ཕྱིར་རོ། །ཉན་ཐོས་རྣམས་ཀྱི་མཁས་པ་ནི་ཅུང་ཟད་ཙམ་སྟེ། དེ་ཡང་དེའི་རྗེས་སུ་བསླབ་པ་ལས་སོ། །
[9b.7]དེའི་ཕྱིར་དེ་ཁོ་ན་ཉིད་དང་བསྟན་པ་ཉིད་དང་མ་ལུས་པ་ཉིད་ཀྱི་ཁྱད་པར་གྱིས་ཁྱད་པར་དུ་འཕགས་པའི་ཡེ་ཤེས་ཀྱིས། བཅོམ་ལྡན་འདས་ཕྱི་རོལ་པ་དང་སློབ་པ་དང་མི་སློབ་པ་རྣམས་ལས་ལྷག་པ་ཡིན་ནོ། །དེ་ཁོ་ན་ཉིད་ཀྱི་ཁྱད་པར་གྱིས་ཁྱད་པར་དུ་འཕགས་པའི་ཡེ་ཤེས་ཀྱིས་ནི་ཕྱི་
[10a]
[10a.1]རོལ་པའི་འདོད་ཆགས་དང་བྲལ་བ་རྣམས་ལས་ལྷག་སྟེ། དེ་ལྟར་ནི་དེ་རྣམས་ཀྱི་ཤེས་པ་ནི་ཚད་མས་མི་བསླུ་བའི་སྤང་བྱ་དང་བླང་བྱའི་ཡུལ་ཅན་མ་ཡིན་ནོ། །བརྟན་པ་ཉིད་ཀྱི་ཁྱད་པར་གྱིས་ཁྱད་པར་དུ་འཕགས་པ་ནི་སློབ་པ་རྣམས་ལས་ཏེ། དེ་རྣམས་ཀྱིས་མངོན་པར་
[10a.2]འདུ་བྱེད་པ་ཅན་མ་ཡིན་པའི་འཇིག་ཚོགས་ལ་ལྟ་བ་མ་སྤངས་པའི་ཕྱིར་རོ། །དེ་ཀུན་དུ་དཔྱོད་པའི་དུས་ན་སླར་ཡང་ལྡོག་པ་སྲིད་པའི་ཕྱིར་རོ། །མ་ལུས་པའི་ཁྱད་པར་གྱིས་ཁྱད་པར་དུ་འཕགས་པ་ནི་མི་སློབ་པ་རྣམས་ལས་ཏེ། དེ་རྣམས་ལ་ཇི་སྐད་བཤད་པའི་ལུས་པ་སྲིད་པའི་ཕྱིར་རོ། །རྣམ་
[10a.3]པ་འདི་ལྟ་བུའི་ཡེ་ཤེས་ལས་གཞན་དོན་དུ་ལམ་གོམས་པ་རྟོགས་པར་བྱ་སྟེ། གང་གི་ཕྱིར་དེ་རྟོགས་ནས་ཀྱང་རང་སངས་རྒྱས་བཞིན་དུ་བྱ་བ་སྤངས་པ་མ་ཡིན་གྱི། འོ་ན་ཅི་ཞེ་ན་ཇི་ལྟར་རྟོགས་པའི་ལམ་འཆད་པ་ལྷུར་ལེན་པ་ཁོ་ནར་གྱུར་པས་སོ། །གང་གང་རྟོགས་ན་ཡང་བྱ་བ་ལས་མི་ལྡོག་པ་དེ་
[10a.4]དེ་ཙམ་གྱི་འབྲས་བུ་མངོན་པར་འདོད་པ་མ་ཡིན་ཏེ། དཔེར་ན་ཟས་ཐོབ་ན་ཡང་ཟས་ཀྱི་ཆེད་དུ་བྱ་བ་ལ་མི་ལྡོག་པར་འཇུག་པ་བཞིན། བཅོམ་ལྡན་འདས་ཀྱང་ཇི་སྐད་བཤད་པའི་ཡེ་ཤེས་ཀྱི་ཁྱད་པར་རྟོགས་ན་ཡང་དེ་ཙམ་གྱི་བྱ་བ་ལས་ལོག་པར་གྱུར་པ་མ་ཡིན་ནོ། །ཁྱབ་བྱེད་དང་འགལ་
[10a.5]བའོ། །ལམ་གོམས་པར་བྱེད་པ་དེ་ཁོ་ན་སྟོན་པ་ཉིད་དེ་ཉེ་བར་བཏགས་པ་ལས་སོ་ཞེས་པ་འདི་ནི་བརྗོད་ཟིན་ཏོ། །དེ་ལས་ཀྱང་བརྩེ་བ་རྗེས་སུ་དཔག་སྟེ། གང་གི་ཕྱིར་བརྩེ་བ་དང་ལྡན་པ་གཞན་དོན་ལ་རབ་ཏུ་སྦྱོར་གྱི་གཞན་ནི་མ་ཡིན་ནོ། །དེའི་ཕྱིར་རྣམ་པ་འདི་ལྟ་བུའི་རྒྱུ་དང་འབྲས་བུ་ཕུན་
[10a.6]སུམ་ཚོགས་པས་བཅོམ་ལྡན་འདས་ཚད་མའོ། །དེ་ལྟར་ནི་བརྩེ་བས་དོན་ཁོ་ན་ཉེ་བར་སྟོན་པར་འདོད་ཅིང་། བརྩེ་བ་མེད་པ་ནི་ཤེས་ཀྱང་རྣམ་པ་གཞན་དུ་འཆད་པར་བྱེད་དོ་ཞེས་བརྩེ་བ་ནི་ཚད་མ་ཉིད་ལ་ཡན་ལག་གི་དངོས་པོའོ། །བརྩེ་བ་དང་ལྡན་ཀྱང་མི་ཤེས་པ་ལས་དེ་ཁོ་ན་ཉིད་བསྟན་པར་
[10a.7]མི་ནུས་ལ། ཡེ་ཤེས་ལས་ནི་ཡང་དག་པ་ཁོ་ན་སྟོན་པར་བྱེད་དོ་ཞེས་པས་ཡེ་ཤེས་ཀྱང་ཚད་མ་ཉིད་ཀྱི་ངོར་སྒྲུབ་པར་བྱེད་པའི་དངོས་པོའོ། །ཚད་མ་ཉིད་དེ་ཡང་རྒྱུ་དང་བཅས་པ་སྟེ། དེ་ལས་འདི་འབྱུང་བར་རིགས་སོ་ཞེས་པས་རྒྱུ་ཕུན་སུམ་ཚོགས་པ་བརྗོད་དོ། །རྣམ་པ་དེ་ལྟ་བུའི་འབྲས་
[10b]
[10b.1]བུ་ཕུན་སུམ་ཚོགས་པ་ཡོད་པ་ན་དེའི་ཉེ་བར་སྦྱོར་བ་འགའ་ཞིག་མེད་ན་ནི། གལ་ཏེ་རྒྱུ་ཕུན་སུམ་ཚོགས་པ་མེད་ཀྱང་འབྲས་བུ་ཕུན་སུམ་ཚོགས་པ་ཚད་མ་ཉིད་དེ་འགྱུར་བ་ཁོ་ནར་འགྱུར་ན། དེ་ནི་དེ་མེད་པར་མི་སྲིད་དོ་ཞེས་པ་དེ་ཉེ་བར་ལེན་པའོ། །སྐྱོབ་པ་ཉིད་ཀྱིས་ནི་གཞན་རྟོགས་པར་བྱེད་པའི་
[10b.2]ངོར་གདོན་མི་ཟ་བར་མངོན་པར་སྦྱོར་བ་དང་ལྡན་པ་ཞེས་བྱ་བ་འདི་བསྟན་ཏོ། །གང་གི་ཕྱིར་དེ་ལྟར་དགེ་ལེགས་དང་ཡང་དག་པ་འཆད་ཅིང་དེ་འཆད་པ་ལ་འབད་པ་དང་ལྡན་པ་དེའི་ཕྱིར་ཚད་མའོ། །གང་གང་གི་ཆེད་དུ་ལེགས་པ་ཡང་དག་པ་འཆད་ཅིང་དེ་འཆད་པ་ལ་འབད་པ་དང་ལྡན་
[10b.3]པ་དེ། ཤེས་ལྡན་དེས་ཚད་མར་བྱ་བ་ཡིན་ཏེ། དཔེར་ན་ཇི་སྐད་བཤད་པའི་ཡོན་ཏན་རྣམས་ཀྱིས་སློབ་མའི་ཆེད་དུ་ཉེ་བར་སྟོན་པའི་མཁན་པོ་ནི་སློབ་མ་ཤེས་ལྡན་གྱིས་བཞིན། བཅོམ་ལྡན་འདས་ཀྱང་སེམས་ཅན་རྣམས་ཀྱི་ཆེད་དུ་ལེགས་པ་ཡང་དག་པ་འཆད་ཅིང་དེ་འཆད་པ་ལ་
[10b.4]ཡང་འབད་པ་དང་ལྡན་པ་ཡིན་ནོ། །རང་བཞིན་ནོ། །འདིར་བཤད་པའི་རྣམ་པ་ལ་བརྩོན་པར་བྱེད་དོ། །གལ་ཏེ་ཤེས་པ་ཡང་ཚད་མ་ཉིད་ཀྱི་སྒྲུབ་པར་བྱེད་པ་ཉིད་དུ་རྣམ་པར་གཞག་པར་བྱ་ན་སྙིང་རྗེ་ལ་སོགས་པ་གང་གི་སྒྲུབ་པར་བྱེད་པར་བཤད་པར་བྱ་བ་ཚད་མ་ཉིད་དེ་ཅི་ཡིན་ཞེ་ན། བརྗོད་
[10b.5]པར་བྱ་སྟེ། ནུས་པའི་ཁྱད་པར་ཏེ། གང་ཡོད་ན་བཅོམ་ལྡན་འདས་ཀྱིས་མ་རྟོགས་པའི་དོན་རྟོགས་པར་བྱེད་ཅིང་དེ་ལ་ཡང་མི་བསླུ་བར་འགྱུར་རོ། །ནུས་པའི་ཁྱད་པར་དེ་ནི་བརྩེ་བ་ལ་སོགས་པ་རྣམས་དང་ལྡན་པར་འགྱུར་གྱི་ཅིག་ཤོས་ལ་མ་ཡིན་ནོ་ཞེས་དེའི་སྒྲུབ་པར་བྱེད་པ་ཉིད་དུ་རྣམ་པར་གཞག་གོ། །
[10b.6]རང་གི་རབ་ཏུ་བྱེད་པ་རྣམས་ལས་ཞེས་པ་འདི་ནི་རང་གཞུང་ཞེས་པ་འདིའི་བཤད་པའོ། །སྒོ་ཡི་སྒྲ་ཁོ་ནས་ཀྱང་སྔར་བཤད་པའི་འཐོར་བའི་སྒྲའི་དོན་གསལ་བ་ཁོ་ནར་རྟོགས་པར་བྱའོ་ཞེས་པ་རྣམ་དབྱེ་མེད་པའོ། །སྒོ་ནི་དྭཱར་ར་སྟེ་ཕྱོགས་ཙམ་སྟོན་པ་མདོར་བསྡུས་པ་སྟེ། དེ་རྒྱས་པར་རྟོགས་པར་བྱ་བ་རྣམས་
[10b.7]ཀྱིས་གཏན་ལ་འབེབས་པར་མི་འགྱུར་རོ་ཞེས་པ་འདི་ནི་རབ་ཏུ་གྲགས་པ་ཁོ་ནའོ། །མང་པོ་རྣམས་ལ་ཡང་གཞུང་དུ་མཚུངས་པའི་ཕྱིར་ཚིགས་སུ་བཅད་པ་རང་གཞུང་ཞེས་གཅིག་གི་ཚིག་གོ། །འགྲེལ་པར་ནི་དབྱེ་བ་བརྗོད་པར་འདོད་པ་ན་རང་གི་རབ་ཏུ་བྱེད་པ་རྣམས་ལས་ཞེས་མང་པོའི་ཚིག་གོ། །
[11a]
[11a.1]བཏུས་ནས་ཞེས་པ་ལ་སོགས་པ་སྟེ། སྔར་བྱས་པ་དང་གཞན་ཅུང་ཟད་སྔར་མེད་པ་བློ་ལ་གནས་པ་ཡང་། ཡང་དག་པར་བླངས་ནས། ཚད་མ་རྣམས་ཀྱི་ཀུན་ལས་བཏུས་པ་ཡང་དག་པར་བསྡུས་པར་བྱའོ། །འདིར་ཡང་ཚད་མ་དང་གཞལ་བྱ་དང་དེར་སྣང་བ་ལ་སོགས་
[11a.2]པ་རྒྱུ་མཚན་ཡང་དག་པར་བསྒྲིབས་པ་རྣམས་ཐམས་ཅད་ཚད་མའི་ཞར་ལ་འོངས་པ་ཉིད་ཀྱི་ཕྱིར་ཚད་མའི་སྒྲས་བརྗོད་དོ། །གཞན་གྱི་ཚད་མ་དགག་པའི་ཆེད་དང་ཞེས་པ་ལ་སོགས་པས་ཚད་མ་སྒྲུབ་པའི་སྒྲའི་དོན་གསུངས་སོ། །རང་གི་ཚད་མ་ནི་འདིར་དངོས་སོ། །གཞན་གྱི་ཚད་མ་ནི་
[11a.3]གཞན་རྣམས་ཀྱིས་དེ་ལ་ཚད་མར་མངོན་པར་ཞེན་པས་ཚད་མ་ཞེས་བརྗོད་དོ། །དེ་དག་གི་རང་རང་གི་ངོ་བོ་ཇི་ལྟ་བ་བཞིན་ཡོངས་སུ་ཤེས་པ་ནི་ཚད་མ་གྲུབ་པའོ། །དེ་ལ་གཞན་གྱི་ཚད་མ་ཚད་མ་མ་ཡིན་པ་ལ་དམ་པར་སྒྲོ་བཏགས་པའི་ཚད་མའི་རང་བཞིན་ལ་འདི་ནི་ཚད་མའི་རང་བཞིན་
[11a.4]མ་ཡིན་ནོ་ཞེས་གང་གཏན་ལ་འབེབས་པ་དེ་དགག་པ་སྟེ། དེ་ཁོ་ན་ནི་དེ་གྲུབ་པའོ། །རང་གི་ཚད་མ་ཁོ་ན་ཡོན་ཏན་ཏེ། དོན་འདོད་པ་རྣམས་ཀྱིས་བགྲང་བར་བྱ་བའོ་ཞེས་བྱས་ནས་དང་། དོན་ཐོབ་པར་བྱེད་པ་ཉིད་ཀྱི་ཕྱིར་ཡང་ངོ་། །དེ་བརྗོད་པར་བྱ་བ་ནི་ཕྱིན་ཅི་མ་ལོག་པའི་མཚན་ཉིད་མངོན་པར་
[11a.5]བརྗོད་པས་གཏན་ལ་འབེབས་པའོ། །དེ་ཁོ་ན་ཡང་དེ་གྲུབ་པའོ། །གང་གི་ཕྱིར་ཞེས་པ་ལ་སོགས་པས་ཚད་མ་སྐྱེས་བུའི་དོན་ལ་ཉེ་བར་མཁོ་བ་ཉིད་དུ་སྟོན་ཏོ། །གཞན་དུ་ན་དེ་ལ་ཉེ་བར་མཁོ་བ་མེད་པ་གཏན་ལ་འབེབས་པ་དོན་མེད་པའོ་ཞེས་པས་བྱ་བ་མིན་པར་འགྱུར་རོ། །གཞལ་བྱར་ཡང་
[11a.6]འདིར་དོར་བར་བྱ་བ་དང་བླང་བར་བྱ་བའོ། །གང་གི་ཕྱིར་དེ་རྟོགས་པ་ནི་ཚད་མ་ལ་རག་ལས་པ་དེའི་ཕྱིར་ཚད་མ་གྲུབ་པའི་ཆེད་དུ་འབད་པ་འབྲས་བུ་དང་བཅས་པའོ་ཞེས་པ་དགོངས་པའོ། །འདིར་ཁ་ཅིག་སྨྲ་སྟེ། ཚད་མ་རྣམས་ནི་རང་ཁོ་ན་ལས་གྲུབ་པའོ་ཞེས་སོ། །དེའི་ལུགས་ཀྱི་རྗེས་
[11a.7]སུ་འབྲངས་པ་གཞན་རྣམས་ཚིགས་སུ་བཅད་པ་ཀློག་པར་བྱེད་དེ། ཚད་མ་རྣམས་དང་དེས་བྱས་པའི། །ཐ་སྙད་ཀྱང་ནི་རབ་གྲགས་ན། །ཚད་མའི་མཚན་ཉིད་བརྗོད་པ་ལ། །དགོས་པ་ཤེས་པར་བྱ་བ་མིན། །ཞེས་སོ། །དེའི་ཕྱིར་དེ་བསལ་བའི་ཆེད་དུ་གསུངས་པ། འདི་ལ་ཡང་ལོག་པར་
[11b]
[11b.1]རྟོགས་པ་མང་བས་ནའོ་ཞེས་ཏེ། ཡང་གི་སྒྲས་གང་གི་ཕྱིར་ཞེས་པ་འདི་རྗེས་སུ་འགུགས་པར་བྱེད་དོ། །འགལ་བའི་རྟོགས་པ་ནི་ལོག་པར་རྟོགས་པ་རྣམས་ཏེ། ཕན་ཚུན་འགལ་བའི་མཚན་ཉིད་བྱེད་པའི་ཕྱིར་རོ། །གལ་ཏེ་འདི་ཚད་མའོ་ཞེས་མཚན་ཉིད་ངེས་པ་མ་གྲུབ་པར་རང་ཉིད་ལས་ཚད་
[11b.2]མར་འགྱུར་ན། མཚན་ཉིད་བྱེད་པ་རྣམས་ཀྱིས་ཕན་ཚུན་འགལ་བའི་མཚན་ཉིད་བྱེད་པར་མི་འགྱུར་ལ། ཚད་མ་སྐྱེས་པ་ཉིད་ན་ཚད་མའི་རང་གི་ངོ་བོ་འགྲུབ་པའི་ཕྱིར་མཚན་ཉིད་བྱེད་པ་རྣམ་པ་གཅིག་ཁོ་ནར་འགྱུར་རོ། །ཐ་སྙད་བྱེད་པ་པོ་རྣམས་ཀྱང་ལོག་པར་རྟོགས་ཏེ། ཕྱིན་ཅི་ལོག་ཏུ་རྟོགས་པ་
[11b.3]རྣམས་ཏེ་ཚད་མ་མ་ཡིན་པ་ལ་ཚད་མ་ཉིད་དུ་ལྷག་པར་ཞེན་པ་རྣམས་སོ་ཞེས་པའི་དོན་ཏོ། །དེ་ལྟར་ནི་ཚད་མ་ལྟར་སྣང་བས་ཞུགས་པ་རྣམས་འགའ་ཞིག་སླུ་བཞིན་པ་མཐོང་ལ། གལ་ཏེ་ཐམས་ཅད་ཚད་མ་རྣམས་སུ་གྲུབ་པ་ཁོ་ནར་གྱུར་ན། འགའ་ཡང་སླུ་བར་མི་འགྱུར་རོ། །དེའི་ཕྱིར་རང་
[11b.4]ལས་ཏེ་ཚད་མའི་རང་རིག་ལས་རང་གི་ངོ་བོ་གྲུབ་པ་ཙམ་དུ་འགྱུར་ལ། འདོད་པའི་དོན་བྱ་བ་ནུས་པའི་དངོས་པོ་ཐོབ་པར་ནུས་པའི་མཚན་ཉིད་ཅན་ནི། གང་ཚད་མ་ཉིད་ཡིན་པ་དེ་ཡོད་པ་ཁོ་ན་ལས་ཚད་མས་ཡོངས་སུ་མཐོང་བའི་དངོས་པོ་བསྒྲུབ་པར་བྱ་བའི་དོན་བྱེད་པའི་ཡུལ་ཅན་
[11b.5]ཚད་མ་གཞན་གྱི་འཇུག་པས་དང་པོར་ངེས་པར་འགྱུར་རོ། །ཕྱི་མའི་དུས་ན་ན་ཡང་ཡང་དུ་ཚད་མ་ཕྱི་མའི་འཇུག་པས་ཤེས་པའི་གསལ་བ་འགའ་ཞིག་རྣམས་ཚད་མ་ཉིད་དུ་ངེས་པར་བྱེད་ཅིང་གོམས་པར་བྱེད་པ་ལས་ཤེས་རབ་ཅན་ནི་ཚད་མ་ཕྱི་མའི་འཇུག་པ་མེད་པར་ཡང་རྣམ་པ་དེ་ལྟ་བུ་
[11b.6]གཞན་རྣམས་ཀྱི་རང་གི་ངོ་བོ་ཡང་དག་པར་རིག་པ་ཙམ་ཁོ་ན་ལས་ཚད་མ་ཉིད་དུ་ངེས་པར་བྱེད་དོ། །གོམས་པས་ནོར་བུ་ལ་སོགས་པ་རྣམས་ཀྱི་བཅོམ་པ་མ་ཡིན་པ་ལ་སོགས་པའི་ཁྱད་པར་བཞིན་ནོ། །དེ་ལྟར་གང་གི་ཕྱིར་ཚད་མ་ལ་ལོག་པར་རྟོགས་པ་རྣམས་མང་བ་དེའི་ཕྱིར་དེ་རྣམས་ཀྱི་ལོག་པར་
[11b.7]རྟོགས་པ་བསལ་བའི་ཆེད་དུ་བསྟན་བཅོས་སོ་ཞེས་པའོ། །དེ་ལ་འབྲས་བུ་དང་རང་གི་ངོ་བོ་དང་ཡུལ་དང་གྲངས་ལ་ལོག་པར་རྟོགས་པ་བཞི་རྣམས་ཏེ། དེ་རྣམས་ལས་གྲངས་ལ་ལོག་པར་རྟོགས་པ་བསལ་བའི་དོན་དུ་གསུངས་པ། མངོན་སུམ་དང་ནི་རྗེས་སུ་དཔག །ཅེས་པ་ལ་སོགས་པའོ། །
[12a]
[12a.1]གལ་ཏེ་ཚད་མ་གཏན་ལ་དབབ་པར་བྱ་བ་ལ་གྲངས་ལ་སོགས་པ་གཏན་ལ་འབེབས་པ་དོན་མེད་པ་དོན་མེད་དོ་ཞེ་ན། མ་ཡིན་ཏེ་རབ་ཏུ་བྱེད་པ་ནི་ཚད་མ་དང་ཚད་མ་མ་ཡིན་པར་ལོག་པར་རྟོགས་པ་བཟློག་པ་ལྷུར་ལེན་པ་ཉིད་ཀྱི་ཕྱིར་རོ། །དེ་ལ་གལ་ཏེ་གྲངས་ལ་ལོག་པར་
[12a.2]རྟོགས་པ་མི་སེལ་བར་མངོན་སུམ་དང་རྗེས་སུ་དཔག་པ་དག་གི་རང་གི་ངོ་བོ་འབའ་ཞིག་གཏན་ལ་འབེབས་པ་དེའི་ཚེ་ཕ་རོལ་པོ་རྣམས་ཀྱི་འདི་ལྟར་འགྱུར་ཏེ། འདིའི་ཡུལ་ཁོ་ན་ལ་ངེས་པར་བདག་ཅག་རྣམས་ཀྱི་ལོག་པར་རྟོགས་པ་ཡིན་གྱི། གང་ཚད་མ་གཞན་རྣམས་བདག་ཅག་རྣམས་ཀྱིས་
[12a.3]ཁས་བླངས་པ་དེའི་ཡུལ་མ་ཡིན་ནོ་ཞེས་སོ། །འོ་ན་དེ་རྣམས་ཀྱི་ཡང་སྐྱོན་བརྗོད་པའི་ཕྱིར་གང་ལས་དགོས་པ་འདི་ཡིན་ཞེ་ན། འོ་ན་དེ་ལྟར་ན། ཇི་ལྟར་མངོན་སུམ་དང་རྗེས་སུ་དཔག་པ་དག་གི་རང་གི་ངོ་བོ་བདག་ཅག་འདོད་པའི་རང་གི་ངོ་བོ་ལས་གཞན་པ་ཁོ་ན་ཡིན་པ་དེ་བཞིན་དུ་དེ་རྣམས་ཀྱི་ཡང་
[12a.4]ཡོད་པ་ཁོ་ན་ཉིད་ན་དེ་ནི་འདིས་གཏན་ལ་དབབ་པ་མ་བྱས་སོ་ཞེས་དོགས་པར་འགྱུར་རོ། །དེའི་ཕྱིར་གྲངས་གཏན་ལ་དབབ་པའོ། །སྤྱོད་ཡུལ་གཏན་ལ་མ་ཕབ་ན་ནི་གང་གི་ཚེ་ཡུལ་མ་ཡིན་པ་ལ་བཟུང་བ་ཚད་མར་འགྱུར་ན། དེའི་ཚེ་དེ་ལ་དེ་བསླུ་ལ་དེ་བཞིན་དུ་རང་གི་ཡུལ་ལ་ཡང་ཚད་མ་མ་
[12a.5]ཡིན་པར་རྟོགས་པ་པོས་ཁོང་དུ་ཆུད་པར་འགྱུར་རོ་ཞེས་ཡུལ་གཏན་ལ་འབེབས་པའོ། །ཚད་མ་ལས་འབྲས་བུ་གཞན་མ་ཡིན་ནོ་ཞེས་གང་གི་ཚེ་གཏན་ལ་དབབ་པར་མི་བྱ་བ་དེའི་ཚེ་ཚད་མ་ནི་ཚད་མའི་རང་གི་ངོ་བོ་ཉིད་ཉམས་པར་འགྱུར་ཏེ། དེ་ལྟར་ནི་འབྲས་བུ་ནི་རེ་ཞིག་དོན་རྟོགས་པའི་ངོ་བོར་ངེས་
[12a.6]པར་ཁས་བླངས་ཏེ། གཞན་དུ་ན་འབྲས་བུ་ཉིད་དུ་མི་རིགས་པའི་ཕྱིར་རོ། །དེའི་ཕྱིར་རྟོགས་པའི་ངོ་བོ་འབྲས་བུའོ། །དེས་ན་གང་གི་ཚེ་ཤེས་པའི་ངོ་བོ་ལས་ཐ་དད་པ་ཚད་མ་ཡིན་པ་དེའི་ཚེ་དེ་ཤེས་པ་མ་ཡིན་པའི་ངོ་བོར་འགྱུར་ལ། ཤེས་པ་མ་ཡིན་པའི་ངོ་བོ་ཡང་ཚད་མའི་རང་གི་ངོ་བོ་ཉིད་དུ་མི་འགྱུར་
[12a.7]ཏེ་གཟུགས་ལ་སོགས་པ་བཞིན་ནོ་ཞེས་འབྲས་བུ་གཏན་ལ་འབེབས་པའོ། །དེའི་ཕྱིར་གྲངས་ལ་སོགས་པ་གཏན་ལ་དབབ་པ་དོན་མེད་པ་མ་ཡིན་ནོ། །དང་གི་སྒྲ་ནི་གཉིས་པོ་དག་ཀྱང་རང་གི་ཡུལ་ལ་སྟོབས་མཚུངས་པ་ཉིད་དུ་བཤད་པའི་ཆེད་དུ་བསྡུ་བའི་ཚིག་གོ། །ངག་འདིའི་དོན་ཅི་ཡིན། ཅི།
[12b]
[12b.1]མངོན་སུམ་དང་ནི་རྗེས་སུ་དཔག །ཚད་མ་དག་གོ་ཞེས་པ་འདིས་མངོན་སུམ་དང་རྗེས་སུ་དཔག་པའི་ཚད་མ་དག་གཉིས་ཉིད་དུ་བསྒྲུབ་པར་བྱ་བ་སྟེ། མངོན་སུམ་དང་རྗེས་སུ་དཔག་པ་འདི་དག་ཚད་མ་དག་ཁོ་ན་སྟེ། ཚད་མ་གཅིག་དང་ཚད་མ་རྣམས་ནི་མ་ཡིན་ནོ་ཞེས་པའམ། འོན་ཏེ་མངོན་སུམ་
[12b.2]དང་རྗེས་སུ་དཔག་པ་དག་ཚད་མ་ཉིད་དུ་བསྒྲུབ་པར་བྱ་སྟེ། མངོན་སུམ་དང་རྗེས་སུ་དཔག་པ་དག་ཚད་མ་དག་ཁོ་ན་སྟེ་ཚད་མ་མ་ཡིན་པ་དག་མ་ཡིན་ནོ་ཞེས་པ་ཡིན། དེ་ལས་ཅིར་འགྱུར་ན་གལ་ཏེ། རྟོག་པ་དང་པོ་ཡིན་ན་ཚིག་འབྲས་བུ་མེད་པ་སྟེ། དེ་དག་གཉིས་ཉིད་དུ་གྲུབ་པ་ཉིད་ཀྱི་ཕྱིར་རོ། །
[12b.3]མངོན་སུམ་དང་རྗེས་སུ་དཔག་པ་དག་གཉིས་ཉིད་ཀྱི་ངོར། སུའི་ཡང་ལོག་པར་རྟོགས་པ་མེད་པའི་ཕྱིར་རོ། །འོན་ཏེ་གཉིས་པ་ཡིན་ན་ནི་གྲངས་ངེས་པར་གཟུང་བ་མ་བྱས་པར་འགྱུར་ལ། དེ་ལས་ཀྱང་རྣམ་པ་གཉིས་ཁོ་ན་ཚད་མའོ་ཞེས་གང་སྒྲུབ་པར་འདོད་པ་དེ་མ་བསྒྲུབས་པ་ཁོ་ནར་འགྱུར་རོ། །
[12b.4]གྲུབ་པ་སྒྲུབ་པ་ཉིད་ཀྱང་སྟེ། དེ་དག་ཚད་མ་ཉིད་དུ་གྲུབ་པ་ཉིད་ཀྱི་ཕྱིར་རོ། །འོན་ཏེ་ཙཱར་བཱ་ཀའི་ངོར་འདི་བརྗོད་པར་བྱ་ན། དེ་ལྟ་ན་ཡང་མངོན་སུམ་ལ་ལྟོས་ནས་གྲུབ་པ་སྒྲུབ་པར་བྱེད་པ་ཁོ་ནའོ་ཞེ་ན། འདི་ནི་སྐྱོན་མ་ཡིན་ཏེ། འདིར་ངག་གཉིས་ཡིན་པ་ན་སྟེ། མངོན་སུམ་དང་ནི་རྗེས་སུ་
[12b.5]དཔག །ཅེས་པ་ངག་གཅིག་དང་ཚད་མ་དག་གོ་ཞེས་པ་གཉིས་པའོ། །འདི་ལྟར་ཡང་བཤད་པར་བྱ་སྟེ། ཚད་མ་དག་ཁོ་ན་སྟེ་ཚད་མ་རྣམས་དང་ཚད་མ་གཅིག་མ་ཡིན་ནོ་ཞེས་པའི་དོན་ཏོ། །དེ་ཉིད་ཀྱི་ཕྱིར་འགྲེལ་པར་ངེས་པར་གཟུང་བ་མཛད་དེ་གཉིས་དག་ཁོ་ནའོ་ཞེས་སོ། །ངག་གི་རྣམ་
[12b.6]པར་གཅོད་པའི་འབྲས་བུ་ཅན་ཉིད་ཀྱི་ཕྱིར་ཁོ་ནའི་སྒྲ་མེད་ཀྱང་དེའི་དོན་འཐོབ་བོ། །དེ་ལྟར་ངག་འདིས་ཚད་མ་གཉིས་དག་ཁོ་ནའོ་ཞེས་བསྒྲུབས་སོ། །གཉིས་པོ་དེ་དག་ཅི་ཞིག་དག །ཅེས་དོགས་པའི་དྲི་བའི་སྐབས་ལ་འདི་བརྗོད་པར་བྱ་སྟེ། མངོན་སུམ་དང་ནི་རྗེས་སུ་དཔག །ཅེས་པའོ། །
[12b.7]མངོན་སུམ་དང་རྗེས་སུ་དཔག་པ་དག་ཚད་མ་གཉིས་པོ་དག་སྟེ། གཞན་འགའ་ཞིག་གཉིས་དག་མ་ཡིན་པ་ཁོ་ནའོ་ཞེས་པའོ། །བཤད་པ་འདི་ལ་ཇི་སྐད་བརྗོད་པའི་སྐྱོན་གྱི་སྐབས་མི་འགྱུར་རོ། །ཅི་སྟེ་ཚད་མ་གཅིག་ཉིད་དམ་མང་པོ་ཉིད་མ་ཡིན་ནོ་ཞེས་ཇི་ལྟར་རྟོགས་ཤེ་ན། རེ་ཞིག་
[13a]
[13a.1]གཅིག་ཉིད་དུ་མི་འགྱུར་ཏེ། རྗེས་སུ་དཔག་པ་ཡང་ཚད་མ་ཉིད་ཡིན་པའི་ཕྱིར་རོ། །གཞན་དུ་ནི་འདི་ཚད་མའོ། །འདི་ཚད་མ་ཡིན་པ་ཞེས་རྣམ་པར་གཞག་པ་འདི་མི་འགྱུར་རོ། །དེ་ལྟར་ནི་ཤེས་པའི་གསལ་བ་འགའ་ཞིག་གི་འཇུག་པ་ལ་བསླུ་བ་དང་མི་བསླུ་བ་དག་
[13a.2]དམིགས་ནས། དེའི་རིགས་ཅན་ཉིད་ཀྱིས་ཤེས་པ་གཞན་ལ་ཡང་མི་བསླུ་བ་དང་ཅིག་ཤོས་སུ་ངེས་པ་ལས་ཚད་མ་དང་ཅིག་ཤོས་སུ་རྣམ་པར་གཞག་པར་བྱེད་ཀྱི་གཞན་དུ་ན་མ་ཡིན་ནོ། །ཇི་ལྟར་མཐོང་བ་དང་ཆོས་མཐུན་པ་ལས་དེ་ལྟར་ཡོངས་སུ་གཅད་པར་བྱ་བ་དེ་ཡང་རྗེས་སུ་དཔག་པར་བྱ་བ་
[13a.3]ཉིད་ལས་འདའ་བ་མ་ཡིན་ནོ། །གཞན་ཡང་རྗེས་སུ་དཔག་པ་ཚད་མ་ཉིད་མ་ཡིན་ན་བསྟན་བཅོས་བྱ་བར་མི་འགྱུར་ཏེ། གང་གི་ཕྱིར་ཕ་རོལ་གྱིས་ཁོང་དུ་ཆུད་པའི་དོན་དུ་བསྟན་བཅོས་བྱ་བ་ཡིན་ལ། གཞན་གྱིས་རྟོགས་པ་དེ་ཡང་རྗེས་སུ་དཔག་པ་ལས་གཞན་ལས་མི་རྟོགས་ཏེ་མངོན་སུམ་ནི་
[13a.4]ལུས་ཙམ་གྱི་ཡུལ་ཅན་ཉིད་ཀྱི་ཕྱིར་རོ། །ལུས་ཉིད་ནི་བློ་མ་ཡིན་ཏེ། དེ་གྲུབ་ཀྱང་བློའི་རྣམ་པར་བརྟག་པ་ལ། ཐེ་ཚོམ་ཟ་བའི་ཕྱིར་རོ། །གཞན་དང་འབྲེལ་བ་ཅན་འདི་ནི་སྐྱེས་བུ་ཙམ་གྱི་མངོན་སུམ་དུ་མི་རྟོགས་སོ། །འདིས་རྗེས་སུ་དཔག་པ་ལ་སྐུར་པ་འདེབས་པར་བྱེད་ཅིང་། འཇིག་རྟེན་
[13a.5]ཕ་རོལ་ལ་སོགས་པ་དགག་པ་ཡང་མངོན་སུམ་གྱིས་བྱ་བར་འོས་པ་མ་ཡིན་ཏེ། དེ་ནི་དངོས་པོའི་ཡུལ་ཅན་ཉིད་ཀྱི་ཕྱིར་རོ། །དེ་ཡང་དོན་གྱི་ནུས་པ་ལ་ལྟོས་པའི་ཕྱིར་རོ། །ལྟོས་པ་མེད་ན་ནི་བར་དུ་ཆོད་པ་ལ་སོགས་པའི་དངོས་པོ་ལ་ཡང་འབྱུང་བར་ཐལ་ལོ་ཞེས་པའོ། །དེའི་ཕྱིར་རྗེས་སུ་དཔག་
[13a.6]པ་ཡང་ཚད་མ་ཉིད་དུ་ཁས་བླང་བར་བྱའོ། །དེའི་ཕྱིར་ཚད་མ་གཅིག་ཁོ་ན་མ་ཡིན་ནོ། །མང་པོ་ཉིད་དུ་ནི་འགྱུར་ཏེ་དེ་ཡང་ཡུལ་མང་པོ་ཉིད་ཀྱི་ཕྱིར་རམ། ཡུལ་གཅིག་ལ་ཡང་ཚད་མ་དུ་མ་འཇུག་པའི་ཕྱིར་རོ་ཞེ་ན། རེ་ཞིག་ཡུལ་མང་པོ་ཉིད་ཀྱི་ཕྱིར་མ་ཡིན་ཏེ་འདི་ལ་རྒྱུ་གསུངས་པ། གང་གི་ཕྱིར་
[13a.7]མཚན་ཉིད་གཉིས། གཞལ་བྱ་ཞེས་སོ། །དེ་རྣམ་པར་འགྲེལ་པར་བྱེད་པ་མེད་དོ་ཞེས་པ་ལ་སོགས་པས་སོ། །དེ་ལ་རང་གི་མཚན་ཉིད་ནི་གང་དོན་གྱི་བྱ་བ་ནུས་པ་སྟེ་དེ་ཁོ་ན་དངོས་པོའོ། །སྤྱིའི་མཚན་ཉིད་ནི་ཡང་དེ་ལས་བཟློག་པའོ། །གལ་ཏེ་དེ་ལྟར་ན་རབ་རིབ་ཅན་ལ་སོགས་པའི་ཉེ་བར་དམིགས་
[13b]
[13b.1]པ་སྐྲ་ཤད་ལ་སོགས་པ་རྣམས་རང་གི་མཚན་ཉིད་མ་ཡིན་ཏེ། སྐྲ་ཤད་ལ་སོགས་པ་བསྒྲུབ་པར་བྱ་བའི་དོན་བྱ་བ་ལ་ནུས་པ་མེད་པའི་ཕྱིར་རོ། །སྤྱིའི་མཚན་ཉིད་ཀྱང་མ་ཡིན་ཏེ་གསལ་བར་སོ་སོར་སྣང་བ་ཉིད་ཀྱི་ཕྱིར་རོ། །དེ་རྣམས་གཞལ་བྱ་གཞན་ཉིད་དུ་འགྱུར་རོ་ཞེ་ན། འདི་སྐྱོན་མ་ཡིན་ཏེ་གང་གི་ཕྱིར་
[13b.2]གང་ལ་ཐ་སྙད་བྱེད་པ་རྣམས་ཡུལ་ཉིད་དུ་ཞེན་པ་དེ་ལ་དཔྱད་པ་འདི་ཡིན་ལ། རབ་རིབ་ཅན་ལ་སོགས་པ་རྣམས་ཀྱིས་དམིགས་པ་སྐྲ་ཤད་ལ་སོགས་པ་རང་གི་ཤེས་པའི་སྣང་བ་རྣམས་ཀྱི་དེ་རྣམས་ཀྱིས་ཡུལ་ཉིད་དུ་མོས་པ་མེད་དོ། །འོ་ན་དངོས་པོ་མེད་པ་སྤྱིར་མི་འགྱུར་ཏེ། དེ་ནི་ཡུལ་ཉིད་དུ་ཞེན་པར་
[13b.3]བྱ་བ་མ་ཡིན་པས་སོ་ཞེ་ན། མ་ཡིན་ཏེ། ཤེས་བྱ་ཉིད་དུ་ལྷག་པར་ཞེན་པའི་ཕྱིར་དེ་ལ་ཡང་ཡུལ་དུ་ལྷག་པར་མོས་པ་ཡོད་དོ། །ཡང་གང་གི་ཚེ་དངོས་པོ་མེད་པ་བཞིན་དུ་རབ་རིབ་ཅན་ལ་སོགས་པས་མཐོང་བ་སྐྲ་ཤད་ལ་སོགས་པ་རྣམས་ཤེས་པ་གཞན་གྱིས་ཤེས་བྱ་ཉིད་དུ་འཛིན་པ་དེའི་ཚེ་
[13b.4]སྤྱིའི་ངོ་བོ་ཉིད་དུ་འདོད་པ་ཁོ་ནའོ། །ཤེས་པ་གང་ལ་དེ་རྣམས་སོ་སོར་སྣང་བ་དེས་ཤེས་བྱ་ཉིད་དུ་དེ་རྣམས་བཟུང་བ་མ་ཡིན་ནོ་ཞེས་པས་དེ་རྣམས་སྤྱིའི་ངོ་བོ་མ་ཡིན་པར་བརྗོད་པ་འབའ་ཞིག་གོ། །གལ་ཏེ་དེ་རྣམས་དངོས་པོ་མ་ཡིན་ན་ཅི་ལྟར་གསལ་བར་སྣང་ཞེ་ན། ཤེས་པའི་ངོ་བོ་ཉིད་ཀྱིས་རང་གི་
[13b.5]མཚན་ཉིད་ཡིན་པ་ཉིད་ཀྱི་ཕྱིར་རོ། །གང་གི་ཚེ་ངོ་ཤེས་པའི་ཤེས་པས་སྐྲ་ཤད་ལ་སོགས་པ་དང་འདྲ་བར་སྐྲ་ཤད་ལ་སོགས་པ་འདིའི་ཞེས་ཡུལ་དུ་བྱ་བ་དེའི་ཚེ་སྤྱིའི་རྣམ་པས་མི་གསལ་བར་སྣང་བཞིན་པ་རྣམས་སྤྱིའི་ངོ་བོ་ཉིད་དུ་རྣམ་པར་གཞག་གོ། །གལ་ཏེ་དེ་རྣམས་ཤེས་པའི་ངོ་བོ་ཉིད་ཀྱི་ཕྱིར་
[13b.6]དངོས་པོ་ཉིད་ཡིན་ན་སྤྱི་ལ་ཡང་ཐལ་བར་འགྱུར་རོ་ཞེ་ན། དེ་ལྟར་དེ་ཡང་རང་གི་མཚན་ཉིད་དུ་འདོད་དོ་ཞེས་པས་སྐྱོན་མེད་ལ། དེ་སྤྱིའི་ངོ་བོ་ཅན་ཉིད་དུ་ནི་ཡུལ་ལ་ལྟོས་ནས་རྣམ་པར་གཞག་སྟེ། དོན་གཞན་ལས་ལོག་པའི་དངོས་པོ་ལ་བརྟེན་ནས་སྐྱེ་བའི་ངོ་ཤེས་པའི་བློ་ཐ་མི་དད་པའི་རྣམ་པ་ཅན་
[13b.7]གྱིས་དེ་རྣམས་ལས་རྣམ་པ་ཐ་མི་དད་པ་བཞིན་དུ་ཁོ་ནར་མཐོང་ངོ་ཞེས་པས་བློས་རྟོགས་པའི་རྣམ་པ་དེ་དོན་རྣམས་ཀྱི་སྤྱིར་རྣམ་པར་གཞག་གོ། །དེ་ཉིད་ཀྱི་ཕྱིར་འདི་དངོས་པོ་མ་ཡིན་པ་ཉིད་དུ་ཡང་སྟེ། ཕྱི་རོལ་གྱི་ངོ་བོར་ཞེན་པ་ལ་དེའི་ངོ་བོ་མ་ཡིན་པའི་ཕྱིར་རོ། །གལ་ཏེ་དེ་ལྟ་ན་སྤྱི་ནུས་པ་
[14a]
[14a.1]ཐམས་ཅད་དང་བྲལ་བ་དེ་གཞལ་བར་འོས་པ་མ་ཡིན་པ་ཁོ་ནར་འགྱུར་བས་གཞལ་བྱ་མ་ཡིན་པ་ཉིད་ན། དེ་སློབ་དཔོན་གྱིས་རང་དང་སྤྱིའི་མཚན་ཉིད་དག་ལས་གཞན་པའི་གཞལ་བྱ་ཡོད་པ་མ་ཡིན་ནོ་ཞེས་ཡུལ་རྣམ་པ་གཉིས་ཉིད་དུ་གསུངས་པ་ཅི་ལྟར་ཞེ་ན། འདི་བདེན་
[14a.2]ཏེ་གང་སྐྱེས་བུའི་དོན་ལ་ཉེ་བར་མཁོ་བ་རང་གི་མཚན་ཉིད་ཁོ་ན་གཞལ་བྱའོ། །གང་ཡང་སློབ་དཔོན་གྱིས་ཡུལ་རྣམ་པ་གཉིས་ཉིད་དུ་གསུངས་པ་དེ་ནི་ཁོ་ན་རང་གི་ངོ་བོ་དང་གཞན་གྱི་ངོ་བོ་དག་གིས་རྟོགས་པ་ལས་ཏེ། གང་གི་ཕྱིར་དངོས་པོ་དེ་ཁོ་ན་མངོན་སུམ་གྱིས་རང་གི་ངོ་བོས་རྟོགས་པ་ལས་
[14a.3]གཞལ་བྱ་གཅིག་རང་གི་མཚན་ཉིད་དོ། །དེ་ཁོ་ན་རྗེས་སུ་དཔག་པས་སྤྱིའི་རྣམ་པ་རྗེས་སུ་ཆགས་པ་གཟུང་བྱའི་ཆ་ཤས་ཀྱི་བདག་ཉིད་གཞན་གྱི་ངོ་བོས་དེའི་དངོས་པོར་ལྷག་པར་ཞེན་པ་ཉིད་ཀྱིས་རྟོགས་པའི་ཕྱིར་གཉིས་པ་སྤྱིའི་མཚན་ཉིད་དོ། །གཞན་གྱི་ངོ་བོས་རང་གི་མཚན་ཉིད་ཁོ་ན་རྟོགས་
[14a.4]སོ་ཞེས་པ་འདི་ཅི་ལྟར་རྟོགས་པར་བྱ་ཞེ་ན། གང་གི་ཕྱིར་རྗེས་སུ་དཔག་པའི་རྣམ་པར་རྟོག་པའི་ཕྱི་རོལ་ཉིད་དུ་སོ་སོར་སྣང་བའི་ཆ་ཤས་རང་གི་མཚན་ཉིད་མ་ཡིན་པ་ཡང་རང་གི་མཚན་ཉིད་ཉིད་དུ་ཞེན་ནས། དོན་བྱ་བ་དོན་དུ་གཉེར་བའི་སྐྱེས་བུ་རང་གི་མཚན་ཉིད་ཁོ་ན་ལ་འཇུག་པས་སོ། །གཞན་
[14a.5]དུ་ན་གལ་ཏེ་སྤྱི་རྗེས་སུ་དཔག་པས་ཡོངས་སུ་སྤྱད་པར་གྱུར་ན་དོན་བྱ་བ་དོན་དུ་གཉེར་བ་པོ་དེ་ཁོ་ན་ལ་འཇུག་པར་འགྱུར་ཞིང་། བུམ་པ་ཡོངས་སུ་བཅད་ནས་བུམ་པ་རྟོགས་པ་ལ་གནས་པ་དེའི་དོན་བྱ་བ་དོན་དུ་གཉེར་བ་བུམ་པ་ལ་འཇུག་པ་མ་ཡིན་པར་འགྱུར་བའམ། མི་འཇུག་པ་ཁོ་ནར་འགྱུར་ཏེ།
[14a.6]སྤྱི་ནི་གང་དུ་ཡང་ཉེ་བར་མཁོ་བ་མེད་པའི་ཕྱིར་རོ། །རང་གི་མཚན་ཉིད་ལ་དེས་བསྒྲུབ་པར་བྱ་བའི་དོན་བྱ་བ་ཐོབ་པའི་རྗེས་སུ་དཔག་པ་ལས་འཇུག་པ་ཡང་ཡིན། དེས་ན་དེའི་དངོས་པོར་ལྷག་པར་ཞེན་པའོ་ཞེས་རྟོགས་པར་བྱའོ། །མངོན་སུམ་གྱིས་ཀྱང་གཞན་གྱི་ངོ་བོ་ཁོ་ནས་རྟོགས་ལ། འདི་ནི་
[14a.7]ཁྱད་པར་ཏེ་རྗེས་སུ་དཔག་པས་མཐུན་པས་ཐུན་མོང་བར་གྱུར་པའི་གཞན་གྱི་ངོ་བོས་དོན་འཛིན་ཞིང་། མངོན་སུམ་གྱིས་ནི་ཐུན་མོང་མ་ཡིན་པར་གྱུར་པས་སོ་ཞེས་པའོ། །དེའི་ཕྱིར་ཐུན་མོང་དང་ཐུན་མོང་མ་ཡིན་པར་གྱུར་པའི་གཞན་གྱི་ངོ་བོ་དག་གིས་རྟོགས་པའི་ཕྱིར་གཞལ་བྱ་གཉིས་སུ་བཤད་
[14b]
[14b.1]དོ། །རྣམ་པར་ཤེས་པ་བཞིན་དུ་དོན་ནི་རང་ཉིད་ལས་ཡང་དག་པར་རིག་པ་མ་ཡིན་གྱི། དོན་གྱི་རྣམ་པ་ཅན་གྱི་ཤེས་པའི་གང་ཁོ་ན་རང་རིག་པ་དེ་ཁོ་ན་དོན་ཡང་དག་པར་རིག་པའོ། །ཤེས་པ་ལ་དོན་སྣང་བ་ཉམས་སུ་མྱོང་བ་ན་དོན་རྟོགས་སོ་ཞེས་སེམས་པས་ཏེ། དེའི་ཕྱིར་ཕྱི་རོལ་གྱི་དོན་གཞལ་
[14b.2]བྱ་ལ་ཡང་རང་རིག་པ་འབྲས་བུ་ཉིད་དུ་རྣམ་པར་འཇོག་པར་འགྱུར་ཞེས་གཞན་རྣམས་སོ། །འདི་སོང་ངོ་། །འདི་ནི་བརྗོད་པར་བྱ་སྟེ། གཞལ་བྱ་གཉིས་ཉིད་ཀྱི་ཕྱིར་ཚད་མ་གཉིས་ཉིད་དོ་ཞེས་པ་ཇི་ལྟར་ཞེ་ན་གསུངས་པ། རང་གི་མཚན་ཉིད་ཀྱི་ཡུལ་ཅན་ནི་ཞེས་པ་ལ་སོགས་པས་ཏེ། ནིའི་
[14b.3]སྒྲ་ནི་ངེས་པར་གཟུང་བའི་དོན་ཅན་ནོ། །རང་གི་མཚན་ཉིད་ཀྱི་ཡུལ་ཅན་མངོན་སུམ་ཁོ་ན་དང་སྤྱིའི་མཚན་ཉིད་ཀྱི་ཡུལ་ཅན་རྗེས་སུ་དཔག་པ་ཁོ་ན་སྟེ། ཚད་མ་གཞན་ནི་མེད་དོ། །དོན་འདི་ཡང་རྒྱས་པར། རང་གི་མཚན་ཉིད་བསྟན་བྱ་མིན། །གཟུང་བྱ་ཐ་དད་ཕྱིར་ཞེས་པ་ལ་སོགས་པས་
[14b.4]རྟོགས་པར་བྱེད་པར་འགྱུར་རོ་ཞེས་སྟོན་པས་གསུངས་པ། རྟོགས་པར་བྱེད་པར་འགྱུར་རོ་ཞེས་སོ། །ཡང་ན་གཞལ་བྱ་གཉིས་སུ་བསྟན་པ་འདིས་ནི་གཅིག་དང་གསུམ་ལ་སོགས་པའི་ཚད་མ་བསལ་བར་བྱ་སྟེ། རང་གི་མཚན་ཉིད་ལས་གཞན་པའང་གཞལ་བྱར་བསྟན་པས་ཚད་མ་མངོན་སུམ་མ་
[14b.5]ཡིན་པའང་ཡོད་དོ་ཞེས་ཚད་མ་གཅིག་ཡིན་པ་བསལ་བར་བྱས་ལ། གཞལ་བྱ་གསུམ་པོ་མེད་པར་བསྟན་པས་ཚད་མ་གསུམ་ལ་སོགས་པ་བསལ་ལོ། །དེ་ལྟ་ན་གང་ཞེས་པ་ལ་སོགས་པ་སྟེ། གལ་ཏེ་གཞལ་བྱ་ངེས་ཏེ་རང་དང་སྤྱིའི་མཚན་ཉིད་དག་ལས་གཞན་གཞལ་བྱ་མེད་པ་ཁོ་ནའོ་ཞེས་ཁས་
[14b.6]ལེན་པ་དེ་ལྟ་ན་སྔོན་པོ་ལ་སོགས་པ་རྣམས་བྱས་པ་ཉིད་ལ་སོགས་པའི་རྟགས་བསྟན་པ་ལས་གཟུགས་མི་རྟག་གོ་ཞེས་པ་ལ་སོགས་པར་འཛིན་པར་མི་འགྱུར་རོ། །དེ་ལྟར་ནི་སྔོན་པོ་ལ་སོགས་པ་རང་གི་མཚན་ཉིད་དང་མི་རྟག་པ་ཉིད་སྤྱི་ཡིན་ལ་འདི་དག་འདྲེས་པས་འཛིན་པའི་ཕྱིར། དེ་ཅི་ཁོ་ནའམ། རང་
[14b.7]གི་མཚན་ཉིད་ཁོ་ན་མ་ཡིན་ནོ། །དེའི་ཕྱིར་འདི་ནི་ཁྱད་པར་དང་སྤྱིའི་ངོ་བོ་གཞལ་བྱ་གཞན་པ་ཁོ་ན་སྟེ། མི་འཇལ་བར་འགྱུར་ན་འཇལ་བ་ཡང་ཡིན་ཏེ་དེའི་ཕྱིར་གཟུགས་མི་རྟག་ཅེས་པ་ལ་སོགས་པ་ཁྱད་པར་དང་སྤྱིའི་ཡུལ་འཛིན་པ་ཚད་མ་གཞན་ནོ། །དེ་ལྟར་ནི་དེ་མངོན་སུམ་མ་ཡིན་ཏེ་སྤྱི་ཡང་འཛིན་
[15a]
[15a.1]པའི་ཕྱིར་རོ། །རྗེས་སུ་དཔག་པ་ཡང་མ་ཡིན་ཏེ་ཁྱད་པར་ཡང་འཛིན་པའི་ཕྱིར་དང་། རྟགས་མེད་པར་ཡང་དེ་ལྟར་རྟོགས་པ་སྲིད་པའི་ཕྱིར་རོ། །དེ་ཅི་ལྟར་ཞེས་པ་སྟེ། དེ་འཛིན་པ་ཅི་ལྟར་ཚད་མ་གཞན་མ་ཡིན་ཞེས་པའི་དོན་ཏོ། །ལན་ཅིག་མ་ཡིན་པར་ཞེས་པ་སྟེ།
[15a.2]འདིས་ཀྱང་ཁྱད་པར་མཐོང་བ་ཞེས་བྱ་བ་གང་རྗེས་སུ་དཔག་པ་དེ་ཚད་མ་གཞན་ནོ་ཞེས་སྟོན་པར་བྱེད་དོ། །འདི་ལྟ་སྟེ་གཅིག་གི་ཚེ་མངོན་སུམ་གྱིས་མེ་དང་དུ་བ་ཡོངས་སུ་བཅད་པ་ན། སླར་ཡང་བརྒྱུད་པས་གང་གི་ཚེ་དུ་བ་དེ་ཁོ་ནས་མེ་དེ་ཁོ་ན་འདིའོ་ཞེས་ཡོངས་སུ་གཅོད་པ་དེའི་ཚེ་ཁྱད་པར་མཐོང་
[15a.3]བ་ཞེས་བྱ་བ་མེ་འཛིན་པ་ནི་ཚད་མ་གཞན་ཏེ། རྗེས་སུ་དཔག་པ་ནི་སྤྱི་ལས་མཐོང་བ་ཡིན་པའི་ཕྱིར་རོ། །དེ་ཁོ་ན་ཡང་འདིར་རྗེས་སུ་དཔག་པར་འདོད་ལ། མཚན་ཉིད་དེ་ཡང་ཁྱད་པར་མཐོང་བ་ལ་མི་སྲིད་དེ་ཁྱད་པར་དང་རྟགས་འབྲེལ་པ་མི་རིགས་པའི་ཕྱིར་རོ། །དེ་ལྟར་རྣམ་པ་གཉིས་
[15a.4]དག་གིས་ཚད་མ་མང་པོ་ཉིད་སྲིད་དེ། གཞལ་བྱ་མང་པོ་ཉིད་ཀྱི་ཕྱིར་རམ། ཡུལ་གཅིག་ཁོ་ན་ཡང་ཚད་མ་དུ་མ་འཇུག་པའི་ཕྱིར་རོ། །དེ་གཉིས་ཀ་ལྟར་ཡང་ཕ་རོལ་པོས་འོ་ན་གང་ཞེས་པ་ལ་སོགས་པའི་གཞུང་གིས་བསྟན་པའོ། །ཡང་ན་གཞལ་བྱ་གཉིས་ཀ་བསྟན་པ་ལས་གང་ཚད་མ་གཅིག་དང་
[15a.5]དུ་མ་བསལ་བ་སྔར་བརྗོད་པ་དེ་མེད་དོ་ཞེས་བསྒྲུབས་པའོ། །རེ་ཞིག་ཡུལ་ངེས་པའི་ཕྱིར་གྲངས་གཅིག་བསལ་བ་ནི་མ་ཡིན་ཏེ། གང་གི་ཚེ་རྗེས་སུ་དཔག་པ་སྤྱིའི་ཡུལ་ཅན་ཁོ་ན་མ་ཡིན་ཏེ། འོ་ན་ཅི་ཞེ་ན་ཚད་མ་གཞན་གྱི་ཡུལ་ལ་ཡང་འཇུག་པ་དེའི་ཚེ། མངོན་སུམ་ཡང་སྤྱི་ལ་འཇུག་པ་མི་འགལ་
[15a.6]བའི་ཕྱིར། མངོན་གྱུར་མ་ཡིན་པའི་ཕྱིར་ཡུལ་རྟོགས་པར་བྱ་བའི་ཆེད་དུ་རྗེས་སུ་དཔག་པ་བརྟག་པར་བྱ་བ་མ་ཡིན་པས་ཚད་མ་གཅིག་ཁོ་ནར་འགྱུར་རོ། །གསུམ་ལ་སོགས་པའི་གྲངས་བསལ་བ་ཡང་མ་ཡིན་ཏེ། གཞལ་བྱ་གཞན་སྲིད་པའི་ཕྱིར་རོ། །གང་གི་ཕྱིར་གཞལ་བྱ་གཉིས་
[15a.7]ཉིད་ཀྱིས་ཚད་མ་གཉིས་སུ་བརྗོད་ན་གང་གི་ཚེ་གཞལ་བྱ་གཞན་སྲིད་པ་དེའི་ཚེ་དེ་རྟོགས་པར་བྱེད་པ་ཚད་མ་གཞན་དུ་འགྱུར་རོ་ཞེས་པས་ཚད་མ་གཉིས་དག་ཁོ་ན་མ་ཡིན་ནོ་ཞེ་ན། དེ་འཛིན་པ་ནི་ཡོད་ཀྱི་ཞེས་པ་འདི་ལ་བསྙོན་པར་བྱ་བ་མ་ཡིན་གྱི་འོན་ཀྱང་། དེ་ལ་རབ་སྦྱོར་བ། ཚད་མ་གཞན་
[15b]
[15b.1]པ་མ་ཡིན་ནོ། །འདི་ནི་རེ་ཞིག་སྔ་མའི་ལན་ཏེ། དེ་ལ་ཞེས་པ་མི་རྟག་པ་ལ་སོགས་པ་དང་ཁ་དོག་ལ་སོགས་པ་ལའོ། །རབ་སྦྱོར་བ་ནི་སྦྱོར་བར་བྱེད་པའོ། །གང་དེ་སྦྱོར་བ་ལ་འཇུག་པ་དེའི་རྒྱུ་མཚན་ཅན་གྱི་ཤེས་པ་དེ་ཚད་མ་གཞན་མ་ཡིན་ནོ། །དེ་སྦྱོར་བ་ཡང་ཅི་ལྟར་ཡིན་ཞེ་ན་གསུངས་པ།
[15b.2]རང་དང་སྤྱིའི་མཚན་ཉིད་དག་གིས་ཞེས་པ་ལ་སོགས་པ་སྟེ། དང་པོར་རེ་ཞིག་གཟུགས་ལ་སོགས་པ་ནི་ཐ་སྙད་བྱ་བ་མ་ཡིན་པ་རང་གི་མཚན་ཉིད་དུ་མངོན་སུམ་གྱིས་འཛིན་ནོ། །ཕྱིས་དེ་ཁོ་ནའམ་ཁ་དོག་ཉིད་ལ་སོགས་པའི་སྤྱིའི་མཚན་ཉིད་དུ་རྣམ་པར་རྟོག་པ་དང་བཅས་པའི་ཡིད་ཀྱིས་
[15b.3]རྣམ་པར་ཤེས་པས་སོ། །དེའི་ཕྱིར་སྤྱིའི་མཚན་ཉིད་མི་རྟག་པ་ཉིད་ལ་སོགས་པར་ཡང་གང་ཅུང་ཟད་བྱས་པ་དེ་ཐམས་ཅད་མི་རྟག་གོ་ཞེས་པ་འདི་ལྟར་བཟུང་ནས། དེ་ནས་ཁ་དོག་ལ་སོགས་པ་འདི་ནི་བྱས་པ་སྟེ་དེའི་ཕྱིར་མི་རྟག་གོ་ཞེས་ཡིད་ཀྱིས་ཁ་དོག་ཉིད་ལ་སོགས་པའི་སྤྱི་མི་རྟག་པ་
[15b.4]ཉིད་སྤྱི་ཉིད་དང་། སྦྱོར་བར་བྱེད་དེ་ལྡན་པར་བྱེད་དོ། །དེའི་ཕྱིར་ཚད་མ་གཞན་མ་ཡིན་གྱི་འོན་ཀྱང་རྗེས་སུ་དཔག་པ་ཁོ་ནའོ། །ཁྱད་པར་དང་སྦྱོར་བར་མི་བྱེད་པའི་རྒྱུ་ཅི་ཞེ་ན། དེ་དེས་མི་འཛིན་པའི་ཕྱིར་རོ། །དེ་ལྟར་འགྱུར་མོད་ཀྱི་གལ་ཏེ་ཁ་དོག་གི་སྤྱིས་མི་རྟག་པ་ཉིད་ལ་སོགས་པ་རྣམས་
[15b.5]སྦྱོར་བར་བྱེད་ན། དེ་ལྟར་གྱུར་པ་ན་མི་རྟག་པ་ཉིད་ལ་སོགས་པ་རྣམས་སྤྱི་དངོས་པོ་མེད་པ་ཁོ་ནའི་ཆོས་རྣམས་སུ་འགྱུར་གྱི། རང་གི་མཚན་ཉིད་ཀྱི་ནི་མ་ཡིན་ཏེ་དེ་ལ་མི་འཇུག་པའི་ཕྱིར་རོ། །གང་དངོས་པོ་ལ་མི་འཇུག་པ་དེ་རྣམས་དངོས་པོའི་ཆོས་མ་ཡིན་ཏེ་དཔེར་ན་སྐྱེ་བ་མེད་པ་ལ་སོགས་
[15b.6]པ་རྣམས་བཞིན་ནོ་ཞེ་ན། འདི་སྐྱོན་མ་ཡིན་ཏེ་དངོས་པོ་ཁོ་ན་མི་རྟག་པ་ཉིད་ལ་སོགས་པའི་རྣམ་པ་རྣམས་ཀྱིས་དེ་ལྟར་སྒྲུབ་པར་བྱེད་པའི་ཕྱིར་རོ། །གལ་ཏེ་ཡང་རྣམ་པར་རྟོག་པ་ལ་སྣང་བའི་སྤྱི་ཁོ་ན་ལ་དེ་ལྟ་བུའི་དངོས་པོར་ཞེན་པས་འཛིན་པ་དེ་ལྟ་ན་ཡང་དངོས་པོ་དེའི་སྐད་ཅིག་མ་ཉིད་ལ་
[15b.7]སོགས་པ་ཡོད་བཞིན་པ་ཁོ་ནའི་རྣམ་པ་རྣམས་རྗེས་སུ་དཔག་པའི་རྣམ་པར་རྟོག་པ་ལ་སྣང་ངོ་། །དེ་ཇི་ལྟར་གནས་པའི་དངོས་པོ་རྟོགས་པར་བྱེད་པའི་རྟགས་ལ་བརྟེན་ནས་སྐྱེས་པ་ནི་དངོས་པོ་ལ་ཡོད་པའི་རྣམ་པ་རྣམས་ཁོ་ནར་ཞེན་ཏོ། །དེའི་ཕྱིར་ཁ་དོག་སྤྱི་ལ་མི་རྟག་པ་ཉིད་ལ་སོགས་པ་
[16a]
[16a.1]སྒྲུབ་པར་བྱེད་པ་ལ་ཡང་། དེ་ལ་དེའི་རྣམ་པ་གྲུབ་པས་དངོས་པོ་ཁོ་ན་ལས་རྣམ་པ་དེ་གྲུབ་བོ་ཞེས་རྟོགས་པར་བྱ་སྟེ། ཚོགས་པའི་ཁྱད་པར་ལས་སྐྱེས་པའི་བཞིན་གྱི་གཟུགས་བརྙན་གྱི་ཤེས་པའི་ཡུལ་ལ་མཚན་མ་ལ་སོགས་པ་གྲུབ་པས་བཞིན་གྱི་ཕུན་སུམ་ཚོགས་པ་ལ་
[16a.2]སོགས་པ་དོན་ལས་གྲུབ་པ་བཞིན་ནོ། །རྗེས་སུ་དཔག་པའི་རྣམ་པར་རྟོག་པ་དེ་ནི་གལ་ཏེ་ཡང་དོན་ཡང་དག་པར་འབྱུང་བའི་རྣམ་པ་ཁོ་ནར་ལྷག་པར་ཞེན་པ་དེ་ལྟ་ན་ཡང་། དེས་རང་གི་མཚན་ཉིད་ཀྱི་ངོ་བོ་མ་བཟུང་བ་ཁོ་ནའོ། །གཞན་དུ་ན་མཐོང་བ་བཞིན་དུ་དེ་ལ་དངོས་པོའི་ངོ་བོ་གསལ་བར་སྣང་བར་
[16a.3]འགྱུར་རོ། །གང་གིས་མི་གསལ་བར་བཟུང་བ་ཅིག་ཤོས་ཀྱིས་མ་ཡིན་པ། དངོས་པོ་གཅིག་ལ་ཕན་ཚུན་མཚན་ཉིད་མི་མཐུན་པའི་རྣམ་པ་དག་ཡོད་པ་ཡང་མ་ཡིན་ནོ། །དེའི་ཕྱིར་ཁྱད་པར་མི་འཛིན་པའི་ཕྱིར་ཡོད་པ་ལ་མི་རྟག་པ་ཉིད་དང་སྦྱོར་བར་བྱེད་པ་མ་ཡིན་གྱི། འོན་ཀྱང་རང་གི་ཡུལ་ཁ་དོག་
[16a.4]གི་སྤྱི་ཁོ་ན་ལ་སྟེ། དེའི་ཕྱིར་ཚད་མ་གཞན་མ་ཡིན་ནོ། །དེ་ལྟར་འདི་ནི་རྗེས་སུ་དཔག་པས་ཁ་དོག་ལ་སོགས་པ་མི་རྟག་པ་ཉིད་དུ་འཛིན་པའི་དབང་དུ་བྱས་ནས་བཤད་པའོ། །གང་གི་ཚེ་སྐད་ཅིག་མ་ཐ་མ་མཐོང་བས་འདི་ཞིག་གོ་ཞེས་ངེས་པར་འགྱུར་བ་དེའི་ཚེ་མངོན་སུམ་གྱིས་མི་རྟག་པ་ཉིད་ཀྱི་རང་
[16a.5]བཞིན་རྟོགས་པའི་ཕྱིར་བཟུང་ཟིན་པ་ཁོ་ན་ངེས་པར་བྱེད་དོ་ཞེས་པས་འདི་ཚད་མ་ཉིད་དུ་མི་འགྱུར་རོ། །དེའི་ཚེ་ཡང་ལན་ཅིག་མ་ཡིན་པར་ཞེས་པ་འདིའི་ཐུན་མོང་གི་ལན་འཆད་པར་འགྱུར་ཏེ། ཐུག་མེད་འགྱུར་ཕྱིར་ཞེས་པ་འདིར་ཤེས་པར་བྱའོ། །ཡང་ཅི་ལྟར་མངོན་སུམ་གྱིས་སྔར་བཟུང་བ་ཁོ་ན་ཕྱིས་
[16a.6]ངེས་པའི་ཤེས་པས་འཛིན་ཞེ་ན། གང་གི་ཕྱིར་མི་རྟག་པ་ཉིད་ཅེས་བྱ་བ་དངོས་པོ་གཡོ་བ་ལས་གཞན་འགའ་ཞིག་མ་ཡིན་ལ། དེས་ན་སྐད་ཅིག་མ་ཐ་མ་འདྲ་བ་གཞན་དང་མཚམས་སྦྱོར་བ་མེད་པ་མངོན་སུམ་གྱིས་ཡོངས་སུ་གཅོད་ཅིང་། དེའི་རང་བཞིན་འཇིག་པའི་ངང་ཅན་ཉིད་དུ་ཡང་རྟོགས་སོ་
[16a.7]ཞེས་པ་དང་། དེ་ཁོ་ན་ཡང་མི་རྟག་པ་ཉིད་དོ་ཞེས་པས་དེ་མངོན་སུམ་གྱིས་གྲུབ་བོ། །ཅི་སྟེ་ཡང་མི་རྟག་པ་ཉིད་དངོས་པོ་ལས་དོན་གཞན་ཡིན་པ་དེའི་ཚེ་རང་བཞིན་འཇིག་པའི་ངང་ཅན་མ་ཡིན་པར་འགྱུར་ཏེ། གཞན་ཡོད་པ་ན་གཞན་འཇིག་པ་ཞེས་བྱ་བ་ནི་མ་ཡིན་པས་སོ། །དེ་ལས་དངོས་པོ་
[16b]
[16b.1]འཇིག་པའི་ངང་ཅན་ཉིད་ཀྱི་རང་བཞིན་དུ་འབྱུང་བའོ་ཞེ་ན། འདི་ནི་མི་རིགས་ཏེ། རང་ཉིད་གཡོ་བའི་རང་བཞིན་མ་ཡིན་པ་ནི་གཞན་གྱིས་རང་བཞིན་གཞན་སྐྱེད་པར་མི་ནུས་ལ། རང་བཞིན་གྱིས་གཡོ་བའི་བདག་ཉིད་ཡིན་ན་ཡང་མི་རྟག་པ་ཉིད་གཞན་འབྲས་བུ་མེད་པས་སོ། །དེ་ཉིད་དང་གཞན་ཉིད་
[16b.2]དག་ཏུ་བརྗོད་དུ་མེད་པ་ཉིད་ཡིན་ན་ཡང་། དངོས་པོ་མ་ཡིན་པ་ཉིད་ཀྱི་ཕྱིར་དེ་རང་བཞིན་གྱི་དངོས་པོ་མ་ཡིན་ནོ་ཞེས་པས་ཀུན་རྫོབ་དང་མི་རྟག་པར་འགྱུར་གྱི་དོན་དམ་པར་ནི་མ་ཡིན་ནོ། །དེའི་ཕྱིར་དངོས་པོ་ཁོ་ན་མི་རྟག་པ་ཉིད་དོ། །དེའི་ཕྱིར་ཡང་ཆོས་ཅན་གཟུགས་ལ་སོགས་པ་གཟུང་བ་ན་མི་རྟག་
[16b.3]པ་ཉིད་ཀྱང་གཟུང་བ་ཁོ་ནའོ་ཞེས་པས་བཟུང་ཟིན་པ་འཛིན་པའི་ཕྱིར་འདི་ཚད་མ་མ་ཡིན་ནོ། །གལ་ཏེ་མི་རྟག་པ་ཉིད་ལ་སོགས་པའི་ཆོས་ཅན་ལས་གཞན་མ་ཡིན་ན། འོ་ན་དེ་ལྟ་ན། རྗེས་སུ་དཔག་པ་ཡང་ཚད་མ་མ་ཡིན་པར་འགྱུར་རོ། །དེ་ལྟར་ནི་ཆོས་ཅན་མ་གྲུབ་ན་ཆོས་སྒྲུབ་པར་མི་ནུས་ལ།
[16b.4]དེ་གྲུབ་ན་དེའི་བདག་ཉིད་ཡིན་པ་ཉིད་ཀྱིས་ཆོས་ཀྱང་གྲུབ་པ་ཉིད་ཀྱི་ཕྱིར་རོ་ཞེ་ན། མ་ཡིན་ཏེ་དེ་མ་ངེས་པའི་ཕྱིར་རོ། །འདྲ་བ་གཞན་འབྱུང་བས་དེ་ཁོ་ན་འདིའོ་ཞེས་འཁྲུལ་བ་པོའི་མངོན་སུམ་ནི་དེ་ལ་ངེས་པ་སྐྱེད་པར་བྱེད་པ་མ་ཡིན་ལ། ངེས་པ་མེད་པའི་ཕྱིར་ཡང་། དེ་ནི་ཐ་སྙད་དུ་རུང་བ་མ་ཡིན་ཞིང་མ་
[16b.5]བཟུང་བ་དང་འདྲ་བ་ཁོ་ནའོ་ཞེས་པས་ན། དེ་དེ་ལ་ཚད་མ་ཉིད་མ་ཡིན་གྱི་འོན་ཀྱང་རྣམ་པ་གང་ལ་ངེས་པ་སྐྱེད་པར་བྱེད་ཅིང་དྲན་པའི་སྒོ་ནས་རབ་ཏུ་འཇུག་པ་དེ་ཁོ་ན་ལའོ། །ཅིའི་ཕྱིར་ཞེ་ན། ཚད་མ་ནི་རབ་ཏུ་འཇུག་པའི་འབྲས་བུ་ཅན་ཉིད་ཡིན་པའི་ཕྱིར་རོ། །དེའི་ཕྱིར་མ་ངེས་པའི་རྣམ་པ་རྣམས་ལ་
[16b.6]ངེས་པ་སྐྱེད་པར་བྱེད་ཅིང་དེ་ལ་རབ་ཏུ་འཇུག་པར་བྱེད་པའི་ཕྱིར་རྗེས་སུ་དཔག་པ་ཚད་མའོ་ཞེས་པས་མི་མཚུངས་སོ། །འོ་ན་རྟོག་པ་གཉིས་པ་ལ་ཚད་མ་གཞན་མེད་དོ་ཞེས་པའི་གཞུང་ཅི་ལྟར་དྲང་བར་བྱ་སྟེ། ཇི་སྲིད་ཀྱིས་འདི་ཚད་མ་ཉིད་དུ་མི་འགྱུར་བ་དེའི་ཕྱིར་འདི་ཚད་མ་མ་ཡིན་ནོ་ཞེས་སྨྲ་བར་རིགས་
[16b.7]པར་འགྱུར་རོ་ཞེ་ན། འདི་བདེན་མོད་འོན་ཀྱང་ཕ་རོལ་པོས་ཚད་མ་གཞན་ནོ་ཞེས་བྱས་ནས་ཉེ་བར་བཀོད་པ་དེའི་ཕྱིར་དེ་ཁོ་ན་ལྟར་བཀག་པའོ་ཞེས་པས་སྐྱོན་མ་ཡིན་ནོ། །ཡང་ཡང་ངོ་ཤེས་པ་ཡང་མ་ཡིན་ནོ་ཞེས་པ་སྟེ་ངོ་ཤེས་པ་འབྲས་བུར་བྱ་བ་ན་གང་ཁྱད་པར་མཐོང་བའི་ཤེས་པ་དེ་ཚད་མ་མ་ཡིན་ནོ་
[17a]
[17a.1]ཞེས་པའི་དོན་ཏོ། །གལ་ཏེ་ཡང་ཤེས་པ་དང་ངོ་ཤེས་པ་དག་དངོས་པོར་ན་ཐ་དད་མེད་པ་དེ་ལྟ་ན་ཡང་ཚད་མ་དང་འབྲས་བུ་ལྟར་ཐ་དད་དུ་བརྟག་པར་བྱ་ན་ངོ་ཤེས་པར་བྱ་བའི་དོན་གྱིས་རྣམ་པར་སྐྱེ་བའི་ཤེས་པ་ནི་སྔར་བཟུང་བའི་དོན་འཛིན་པའི་ཕྱིར་ངོ་ཤེས་པའོ་ཞེས་པའོ། །ཡང་གི་
[17a.2]སྒྲས་མངོན་སུམ་གྱིས་བཟུང་བ་ཁོ་ན་ལ་སླར་ཡང་ཁ་དོག་ལ་སོགས་པ་མི་རྟག་གོ་ཞེས་གང་འཛིན་པ་དེ་ཡང་ཚད་མ་མ་ཡིན་ནོ་ཞེས་སྟོན་ཏོ། །ཡང་ཡང་ཞེས་པ་འདིས་ལན་ཅིག་མ་ཡིན་པ་ཞེས་པ་འདིའི་དོན་གསུངས་སོ། །འོ་ན་སྔར་གཟུང་བའི་དོན་ལན་ཅིག་འཛིན་པ་ན་ཡང་ཚད་མ་ཡིན་ན་ལན་ཅིག་མ་
[17a.3]ཡིན་པར་ཞེས་པ་དེ་བརྗོད་པ་ཅི་ཞེ་ན། ཕ་རོལ་པོའི་འདོད་པ་ཉེ་བར་བསྟན་པའི་དོན་ཉིད་ཀྱི་ཕྱིར་སྐྱོན་མེད་དེ། གང་གི་ཕྱིར་གྲངས་ཅན་པས་ཁྱད་པར་མཐོང་བ་རྗེས་སུ་དཔག་པའི་མཚན་ཉིད་དུ་བརྗོད་དེ། གང་གི་ཚེ་དུ་བ་དེ་ཁོ་ནས་མེ་དེ་ཁོ་ན་ཡང་ཡང་ཡོད་པ་ཉིད་དུ་རྟོགས་པའོ་ཞེས་པའོ། །དེའི་
[17a.4]ཕྱིར་དེའི་འདོད་པ་བསྟན་པའི་ཆེད་དུ་དེ་སྐད་བརྗོད་ཀྱི་ཡང་ལན་ཅིག་འཛིན་པ་ལས་ཚད་མའོ་ཞེས་བྱས་ནས་ནི་མ་ཡིན་ནོ། །རྩོད་པའི་གཞིར་གྱུར་པའི་དངོས་པོ་རྒྱུ་མེད་པར་རྟོགས་པ་མ་ཡིན་ནོ་ཞེས་པ་དེའི་ཕྱིར། ཅིའི་ཕྱིར་ཞེ་ན་ཞེས་འདྲི་བར་བྱེད་དོ། །སློབ་དཔོན་གྱིས་ཡུལ་རྟོགས་ཟིན་པ་ཉིད་ཚད་མ་ཉིད་མ་
[17a.5]ཡིན་པ་ལ་རྒྱུ་ཉེ་བར་སྟོན་པར་འགྱུར་བ་གསུངས་པ། ཐུག་མེད་ཐལ་ཕྱིར་ཞེས་པའོ། །གྲངས་དང་མཚན་ཉིད་ལས་ཚད་མ་རྣམས་འདི་ཙམ་ཉིད་ཡོངས་སུ་གཅོད་པ་ནི་ཐུག་པ་ཡིན་ལ། དེ་མེད་པར་ཐལ་ལོ་ཞེས་པའི་དོན་ཏོ། །མ་རྟོགས་པའི་དོན་རྟོགས་པར་བྱེད་པ་པོ་ཚད་མའོ། །སྤྱིར་ཚད་མའི་མཚན་
[17a.6]ཉིད་དེ། གྲངས་གཉིས་གསུམ་རྣམས་ཞེས་པ་ལ་སོགས་པ་དེར་མི་འགྱུར་རོ། །གལ་ཏེ་ཤེས་པ་ཐམས་ཅད་ཚད་མ་ཉིད་དུ་འདོད་ན་ཞེས་པ་འདིས་ནི་ཕྱོགས་སྔ་མ་དང་འགལ་བ་གསུངས་སོ། །ཐུག་པ་མེད་པར་རྣམ་པར་གཞག་པས་སེལ་བར་བྱེད་པའི་ཕྱིར་རོ། །དྲན་སོགས་བཞིན་ཞེས་པ་དཔེ་གསུངས་
[17a.7]པའོ། །ཡུལ་ལ་ཡང་འདི་ལྟར་བསྟན་པ་ཡོད་དོ་ཞེ་ན་གསུངས་པ། དྲན་པ་ཁོ་ན་དྲན་པའོ་ཞེས་པ་དངོས་པོ་ལ་ཀྟ་བྱས་པའི་ཕྱིར་རོ། །དཔེར་ན་ཞེས་པ་ལ་སོགས་པས་བསྒྲུབ་པར་བྱ་བས་གཏན་ཚིགས་ཀྱི་རྗེས་སུ་འགྲོ་བ་དཔེ་ལ་སྟོན་པར་བྱེད་དོ། །དེ་བཞིན་ནོ་ཞེས་པ་ཚད་མའི་འབྲས་བུའོ། །གང་ལྟར་རྟོགས་
[17b]
[17b.1]ཟིན་པའི་དོན་གྱི་ཡུལ་ཅན་དེ་ཚད་མ་མ་ཡིན་ཏེ་དྲན་པ་ལ་སོགས་པ་བཞིན། ཁྱད་པར་མཐོང་བ་ཡང་དེ་ལྟ་བུའོ། །ཁྱབ་བྱེད་དང་འགལ་བའོ། །འདིར་འགྱུར་མོད་ཇི་ལྟར་མཐོང་བའི་ཁྱད་པར་དེ་ཁོ་ན་དེས་གཟུང་བ་མ་ཡིན་གྱི། འོན་ཀྱང་དེ་དང་མཚུངས་པ་ཉིད་དོ་ཞེ་ན། འོ་ན་རྗེས་སུ་དཔག་
[17b.2]པ་དེ་ཁྱད་པར་མཐོང་བ་མ་ཡིན་གྱི་འོན་ཀྱང་སྔར་མཐོང་བ་དང་མཚུངས་པ་ཉིད་དུ་ཕྱི་མ་འཛིན་པའི་ཕྱིར་སྤྱི་ལས་མཐོང་བ་ཁོ་ནའོ། །འདིར་འགྱུར་མོད་ཀྱི་དེར་ཡང་མེའི་སྤྱི་ཙམ་འཛིན་པ་འབའ་ཞིག་མ་ཡིན་ཏེ་སོ་སོར་ངེས་པའི་ཡུལ་ལ་གནས་པ་འཛིན་པའི་ཕྱིར་རོ་ཞེ་ན། ཁྱད་པར་ལ་བརྟེན་པ་འདི་ཙམ་གྱིས་ཐུན་
[17b.3]མོང་བ་ཉིད་ཉམས་པ་མ་ཡིན་ཏེ། དེ་ལྟར་ནི་ཨ་ཀ་རུའི་དུ་བ་ལ་སོགས་པས་དེ་སྐྱེད་པར་བྱེད་པའི་མེ་རྟོགས་པས་ཡང་མེའི་སྤྱི་ཁོ་ན་རྟོགས་ཀྱི་སོ་སོར་ངེས་པའི་ཁྱད་པར་ནི་མ་ཡིན་ནོ་ཞེས་པས་འདི་ནི་གྱི་ནའོ། །འདིར་འགྱུར་མོད་ཀྱི་གང་དུ་དཔེ་དང་དཔེ་ཅན་དག་ཐ་དད་པ་དེར་དེ་དག་སྤྱིས་རྗེས་སུ་དཔག་པ་སྲིད་
[17b.4]དོ། །འདིར་ནི་གང་དཔེ་དེ་ཁོ་ན་དཔེ་ཅན་ཏེ་དེ་ཁོ་ན་འདིའི་ཞེས་རབ་ཏུ་སྟོན་པའི་ཕྱིར་རོ། །དེའི་ཕྱིར་སྤྱིའི་རྗེས་སུ་དཔག་པ་མ་ཡིན་ནོ་ཞེ་ན། གལ་ཏེ་གང་ཁོ་ན་བསྒྲུབ་པར་བྱ་བ་དེ་ཁོ་ན་དཔེ་ཡིན་ན། དེ་ལྟར་ན་དེའི་ཚེ་དེས་བཟུང་ཟིན་པ་མ་བརྗེད་པས་འབྱུང་བར་བྱ་སྟེ། གཞན་དུ་ན་དཔེར་འགྱུར་བར་འོས་པ་མ་
[17b.5]ཡིན་པས་སོ། །དེའི་ཕྱིར་ཡང་རྟོགས་ཟིན་པའི་ཡུལ་ཅན་ཉིད་ཡིན་པའི་ཕྱིར་སྐྱོན་དེ་ཁོ་ནའོ། །ཅི་སྟེ་འདི་རྟོགས་ཟིན་པའི་ཡུལ་ཅན་མ་ཡིན་ཏེ་གང་གི་ཕྱིར་རྟོགས་ཟིན་པའི་ཆོས་ཅན་གྱི་སྔར་མཐོང་བའི་དོན་གྱིས་དངོས་པོའི་ཆོས་མ་རྟོགས་པ་འདིས་རྟོགས་པར་བྱའོ་ཞེས་སེམས་ན། འདི་ནི་མི་རིགས་ཏེ། གལ་ཏེ་
[17b.6]རེ་ཞིག་སྔ་མ་དང་ཕྱི་མའི་དུས་སུ་མཐོང་བའི་དོན་དག་ཐ་དད་པ་དེ་ལྟར་ན་གྱུར་ན་དེ་མ་ཡིན་པ་ལ་དེའི་དངོས་པོར་སྒྲོ་འདོགས་པ་ནི་ཕྱིན་ཅི་ལོག་ཁོ་ན་སྟེ་ཚད་མ་མ་ཡིན་ནོ། །འོན་ཏེ་ཐ་མི་དད་པ་དག་ཡིན་ན། རྟོགས་ཟིན་པའི་ཡུལ་ཅན་ཉིད་ཀྱི་ཕྱིར་དེ་ནི་ཚད་མ་ཉིད་མ་ཡིན་པ་ཁོ་ནའོ། །སྔར་མཐོང་བའི་དོན་གྱི་
[17b.7]དངོས་པོ་དེའི་མ་རྟོགས་པ་རྟོགས་པར་བྱ་བའོ་ཞེས་བརྗོད་པ་མ་ཡིན་ནམ་ཞེ་ན། དེ་ནི་མི་རིགས་པར་བརྗོད་དེ། གང་གི་ཕྱིར་འདི་ནི་དོན་གྱི་ཆོས་ཅུང་ཟད་གང་སྔོན་མ་བྱུང་བ་མ་ཡིན་པ་ཕྱིས་འབྱུང་བ་ནི་མ་ཡིན་ནོ། །གལ་ཏེ་ཡིན་ན་ནི་དེ་ཁོ་ན་དེ་དག་གི་རང་བཞིན་ཐ་དད་པའི་རྟེན་ནོ་ཞེས་པས་དངོས་པོ་
[18a]
[18a.1]ཐ་དད་པར་འགྱུར་རོ། །དེ་ལ་ཡང་སྐྱོན་བརྗོད་ཟིན་ཏོ། །དེའི་ཕྱིར་དེ་ཁོ་ན་འདིའོ་ཞེས་ངེས་པ་ཁྱད་པར་དུ་མཐོང་བ་ཉིད་དུ་མངོན་པར་འདོད་པ་ནི་དྲན་པ་ལས་ཐ་དད་པ་མ་ཡིན་ནོ། །འདི་ནི་དྲན་པའི་རང་བཞིན་དེ་འདི་ལྟ་སྟེ་མཐོང་བའི་འདུ་བྱེད་མ་ཡིན་པ་ཉམས་པ་ལ་དེ་ཁོ་ན་
[18a.2]འདིའོ་ཞེས་སྔར་མཐོང་བའི་རྣམ་པར་ཞེན་པའོ། །དེ་འདི་ལ་ཡང་ཡོད་པས་དྲན་པ་ཁོ་ནའོ། །རང་གི་ངོ་བོ་ལ་ལོག་པར་རྟོགས་པ་བསལ་བའི་ཆེད་དུ་གསུངས་པ། མངོན་སུམ་ཞེས་པ་ལ་སོགས་པའོ། །དངོས་པོ་སོ་སོར་གྱུར་པ་ནི་མངོན་སུམ་སྟེ་པྲ་ལ་སོགས་པའི་བསྡུ་བའོ། །འདི་ནི་མཚོན་
[18a.3]བྱའོ། །རྟོག་པ་དང་བྲལ་བ་ཞེས་པ་མཚན་ཉིད་དོ། །རྟོག་པ་དང་ལྡན་པ་མེད་ཅིང་བྲལ་བ་འམ་རྟོགས་པས་ལྡན་པ་མེད་ཅིང་བྲལ་བ་ནི་རྟོག་པ་དང་བྲལ་བའོ། །རྟོག་པ་དང་བྲལ་བ་ངེས་པར་བསྟན་པ་ལས་ཀྱང་། དེ་ཤེས་པའི་བདག་ཉིད་དོ་ཞེས་རྟོགས་པར་བྱ་སྟེ། གང་གི་ཕྱིར་ཤེས་པ་ཁོ་ན་
[18a.4]ལ་རྟོག་པ་དང་འདྲེས་པ་ཡོད་ལ། དེའི་ཕྱིར་དེ་བཀག་པས་དེ་ཁོ་ན་རྟོགས་སོ། །དཔེར་ན་བཞོན་མ་བེའུ་མེད་པ་ཁྱེར་ལ་ཤོག་ཅེས་བེའུ་བཀག་པས་བ་ལང་བཞོན་མ་ཁོ་ན་རྟོགས་པར་བྱའི་གཞན་མ་ཡིན་པ་བཞིན་ནོ། །འོ་ན་རྟོག་པ་ཞེས་བྱ་བ་འདི་ཅི་ཡིན་ཞེ་ན་ཞེས་ཏེ། རྟོག་པ་རྣམས་མང་པོ་ཉིད་
[18a.5]ཀྱི་ཕྱིར་འདིར་འཆད་པར་འདོད་པའི་རྟོག་པ་གང་ཡིན་ཞེས་ཐེ་ཚོམ་ཟ་བའི་དྲི་བའོ། །མིང་དང་རིགས་སོགས་སྦྱོར་བའོ། །མིང་ནི་སོགས་པའི་སྒྲས་བསྡུས་ན་ཡང་། རིགས་ལ་སོགས་པ་རྣམས་དང་ནུས་པ་མཚུངས་པ་མ་ཡིན་པའི་ཕྱིར་ལོགས་སུ་བྱས་པའོ། །ནུས་པ་མཚུངས་པ་མ་ཡིན་པ་ཉིད་ནི་
[18a.6]མིང་ལ་ཡོད་པ་ཉིད་ཀྱི་ཕྱིར་དང་། རིགས་ལ་སོགས་པ་རྣམས་ནི་དེ་ལས་བཟློག་པའི་ཕྱིར་ཏེ། རིགས་ལ་སོགས་པ་རྣམས་ཡོངས་སུ་བརྟགས་པ་ཡིན་གྱི་དེ་ཁོ་ན་ཉིད་དུ་ཡོད་པ་རྣམས་མ་ཡིན་ནོ། །མིང་དང་རིགས་ལ་སོགས་པ་རྣམས་ཀྱི་སྦྱོར་བ་ནི་མིང་དང་རིགས་སོགས་སྦྱོར་བ་སྟེ། ཀྲྀ་ཏའི་
[18a.7]སྦྱོར་བ་ཡང་དྲུག་པའི་བསྡུ་བའོ་ཞེས་པ་ཚིག་སྡུད་དོ། །ཀྲྀ་ཏས་སྒྲུབ་བྱེད་དོ་ཞེས་པ་ཡང་ནའོ། །འདི་ཅི་ཡིན་ཞེ་ན་མིང་ལ་སོགས་པ་རྣམས་དེ་དང་ལྡན་པའི་དོན་དང་གང་གིས་སྦྱོར་བར་བྱེད་ཡང་དག་པར་སྲེ་བར་བྱེད་པའི་ཤེས་པ་དེ་རྟོག་པའོ། །འདིར་ཡང་སྦྱོར་བར་བྱས་ཟིན་པ་ཁོ་ནའི་ཤེས་པ་རྟོག་པ་བརྗོད་
[18b]
[18b.1]པར་འདོད་པ་མ་ཡིན་གྱི། འོ་ན་ཅི་ཞེ་ན་གང་ཡང་སྦྱོར་བ་བྱས་ཟིན་པ་མ་ཡིན་པ་དེ་ལ་ཡང་རུང་བར་སྣང་བ་དེ་ཡང་ཡིན་ནོ། །གང་གང་ལ་རུང་བ་དེ་དེ་ལ་བྱེད་བཞིན་པ་མ་ཡིན་པ་ལ་ཡང་དེས་ཉེ་བར་བསྟན་པར་འོས་ཏེ། མེ་ལ་འཚེད་བྱེད་ཀྱི་ས་བཞིན་ནོ། །དེས་ན་ནུ་ཞོ་འཐུང་བ་ལ་སོགས་པ་རྣམས་ལ་བྱིས་
[18b.2]པ་ཆུང་ངུ་ལ་སོགས་པའི་རྣམ་པར་རྟོག་པའི་ཤེས་པ་གང་ཡིན་པ་དེ་མིང་ལ་སོགས་པ་དང་སྲེ་བ་མེད་ན་ཡང་རྣམ་པར་རྟོག་པ་དང་བཅས་པར་གྲུབ་པར་འགྱུར་རོ། །འདོད་རྒྱལ་བའི་སྒྲ་རྣམས་ལ་ཞེས་པ་ལ་སོགས་པ་སྟེ། རིགས་ལ་སོགས་པ་འཇུག་པའི་རྒྱུ་མཚན་ལ་མི་ལྟོས་པ་རྣམས་ནི་འདོད་རྒྱལ་
[18b.3]བའི་སྒྲ་རྣམས་སོ། །གང་གི་ཕྱིར་རྟོག་པ་ནི་ཤེས་པའི་ཆོས་ཡིན་གྱི་སྒྲའི་ཆོས་མ་ཡིན་ལ། དེའི་ཕྱིར་མིང་གིས་ཁྱད་པར་དུ་བྱས་པའི་དོན་གཟུང་བར་བྱ་ཞེས་སྨྲ་བར་བྱ་བ་ལ་རྟོག་པ་ནི་མངོན་པར་བརྗོད་པ་སྒྲ་དང་ཡུལ་མཚུངས་པ་ཉིད་དུ་བསྟན་པའི་ཆེད་དུ་བརྗོད་པར་བྱ་ཞེས་པ་གསུངས་པའོ། །དེ་
[18b.4]ཡང་མངོན་པར་བརྗོད་པ་བཞིན་དུ་རྟོག་པའི་ཤེས་པ་ཡང་རང་གི་མཚན་ཉིད་ཀྱི་ཡུལ་ཅན་མ་ཡིན་ལ། དེའི་ཕྱིར་དེ་མངོན་སུམ་མ་ཡིན་པ་ཉིད་དུ་མངོན་པར་འདོད་དོ་ཞེས་ཤེས་པར་བྱ་བའི་དོན་དུའོ། །ཌིཏ་ཐ་ཞེས་པ་ཌིཏ་ཐའི་སྒྲའི་རང་གི་ངོ་བོའི་བདག་ཉིད་ཀྱིས་དོན་དེ་དེ་དང་ཐ་མི་དད་པའི་ངོ་བོར་
[18b.5]རྟོགས་པར་བྱ་བའོ་ཞེས་གྲག་གོ། །དེ་བཞིན་དུ་རིགས་ལ་སོགས་པ་རྣམས་ཀྱིས་དེ་དང་ཐ་མི་དད་པར་ཉེ་བར་བཏགས་པར་གྱུར་པའི་དོན་གྱི་དོན་དེ་རྣམས་བརྗོད་པར་བྱ་བའོ། །དབྱུག་པ་ཅན་རྭ་ཅན་ཞེས་པ་སྦྱོར་བ་ཅན་དང་འདུ་བ་ཅན་གྱི་རྫས་ཀྱི་དབྱེ་བས་དཔེར་བརྗོད་གཉིས་སོ། །འདི་ལ་ཞེས་པ་བྱ་བ་
[18b.6]དང་རྫས་ཀྱི་སྒྲ་རྣམས་ལ་སྟེ། བྱ་བ་དང་རྫས་དག་དང་དེ་དང་ལྡན་པ་རྣམས་འབྲེལ་པ་གང་ཡིན་པ་དེ་སྒྲ་འཇུག་པའི་རྒྱུ་མཚན་ནོ། །དེ་ལྟར་ནི་བྱེད་པ་ཉིད་དབྱུག་པ་ཅན་ཉིད་ཅེས་པ་དངོས་པོའི་རྐྱེན་ནི་བྱ་བ་དང་བྱེད་པ་ལ་སོགས་པ་འབྲེལ་བ་ལ་འགྱུར་ཏེ། ཇི་སྐད་དུ་གསུངས་པ་ཚིག་སྡུད་དང་ཀྲྀཏ་དང་
[18b.7]དེ་ལ་ཕན་པ་རྣམས་ལ་འབྲེལ་པ་རྗོད་པར་བྱེད་པའོ་ཞེས་སོ། །སྒྲ་འཇུག་པའི་རྒྱུ་མཚན་ལ་ཡང་དངོས་པོའི་རྐྱེན་འགྱུར་ཏེ། དེ་སྐད་དུ་ཡང་གསུངས་པ། ཡོན་ཏན་གང་གི་དངོས་པོ་ལས་རྫས་ལ་སྒྲ་ངེས་པར་དེ་འཇུག་པ་དེ་རྗོད་པར་བྱེད་པ་ལ་ཏྭ་དང་ཏ་ལ་དག་གོ་ཞེས་སོ། །འཚེད་པ་དབྱུག་
[19a]
[19a.1]པ་ཅན་ཞེས་ཡང་ཀྲྀཏ་དང་དེ་ཕན་དག་གོ། །དེའི་ཕྱིར་འདིར་འབྲེལ་པ་ལ་དངོས་པོའི་རྐྱེན་ནོ། །གཞན་རྣམས་ནི་དོན་གྱིས་སྟོང་པ་རྣམས་ཀྱིས་ཞེས་པ་རང་གི་ལུགས་བཟང་པོ་སྟོན་ཏེ། དོན་དེ་རིགས་ལ་སོགས་པའི་ཁྱད་པར་དང་བྲལ་བ་རྣམས་ཀྱིས་ཞེས་པའི་དོན་ནོ། །
[19a.2]ཇི་ལྟར་འདོད་རྒྱལ་བའི་སྒྲ་རྣམས་རིགས་ལ་སོགས་པའི་ཁྱད་པར་འཇུག་པ་ལ་མི་ལྟོས་པ་ཁོ་ནར་བརྡའི་དབང་ལས་རང་གི་དོན་མངོན་པར་རྗོད་པར་བྱེད་པ་དེ་ལྟར་བ་ལང་ལ་སོགས་པའི་སྒྲ་རྣམས་ཀྱང་སྟེ། འདོད་པ་ཅན་གྱི་དབང་གིས་འཇུག་པའི་སྒྲ་དེ་རྣམས་སྐྱེས་བུ་རྣམས་ཀྱིས་འདོད་པས་གང་དང་གང་དུ་
[19a.3]ཇི་ལྟ་བུར་གྱུར་པ་ལ་ངེས་པར་སྦྱོར་བར་བྱེད་པ་དེ་དང་དེའི་དོན་དེ་ལྟ་བུར་གྱུར་པ་གོ་བར་བྱེད་པ་ཅིས་རྗོད་པར་བྱེད། རིགས་ལ་སོགས་པ་རྣམས་ནི་མ་གྲུབ་པས། དེ་རྣམས་ཀྱི་སྒྲ་འཇུག་པའི་རྒྱུ་མཚན་གྱི་དངོས་པོ་ག་ལ་ཡིན་ཞེས་དགོངས་པའོ། །ཅི་སྟེ་ཅིའི་ཕྱིར་ཞེས་པ་ལ་སོགས་པ་སྟེ། གང་
[19a.4]ཡང་རུང་བ་མེད་ན་མེད་པའི་ཕྱིར་གཉིས་ཀ་ལ་རག་ལས་ནས་འཇུག་པ་དེ་ཅིའི་ཕྱིར་གཉིས་ལ་རག་ལས་ནས་སྐྱེ་བའི་ཤེས་པ་ལ་དབང་པོ་བསྟན་པ་ཁོ་ནས་བརྗོད་ཀྱི་ཡུལ་གྱིས་མ་ཡིན། སྣང་བ་ན་དབང་པོའི་ཤེས་པ་ཐམས་ཅད་ཀྱི་རྒྱུ་མཚན་མ་ཡིན་ཞིང་། འགའ་ཞིག་རྣམས་ཀྱི་མིག་གི་རྣམ་པར་
[19a.5]ཤེས་པའི་ཡང་མ་ཡིན་ནོ་ཞེས་ཉེ་བར་མ་བཀོད་ལ། ཡིད་ལ་བྱེད་པ་ནི་འཇིག་རྟེན་ན་ཡུལ་བཞིན་དང་མིག་བཞིན་དུ་རྒྱུ་ཉིད་དུ་རབ་ཏུ་གྲགས་པ་མ་ཡིན་པས་ཉེ་བར་མ་བཀོད་དོ། །ཡང་ན་ཡུལ་སྨོས་པས་རྒྱུ་གཞན་ཉེ་བར་མཚོན་པ་ཙམ་མོ། །འདིར་ཇི་ལྟར་ཅི་ཞིག་ལྟ་བར་མངོན་སུམ་གྱི་སྒྲ་བཤད་ནས།
[19a.6]དེ་རྣམ་པར་རྟོག་པ་མེད་པའི་ཡང་དག་པའི་ཤེས་པ་ཐམས་ཅད་ལ་མིང་ཉིད་དུ་ཡོངས་སུ་བཤད་པར་བྱ་བའོ་ཞེས་པ་སློབ་དཔོན་གྱི་དགོངས་པའོ། །གཞན་གྱིས་དེ་མི་ཤེས་པར་དབང་པོའི་རྒྱུ་མཚན་ཅན་ཏེ། འདི་མིང་གི་སྒྲ་མ་ཡིན་ཞེས་བསམས་ནས་དྲིས་པའོ། །སློབ་དཔོན་གྱིས་ཞལ་གྱིས་བཞེས་ནས་
[19a.7]ལན་གསུངས་པའོ། །ཐུན་མོང་མིན་པའི་རྒྱུ་ཉིད་ཕྱིར། །ཞེས་པ་སྟེ། གང་གི་ཕྱིར་དབང་པོ་རྣམས་ནི་རང་གི་རྒྱུད་དུ་གཏོགས་པའི་ཡང་ཡིད་ཀྱི་རྣམ་པར་ཤེས་པ་དང་དབང་པོ་གཞན་གྱི་རྣམ་པར་ཤེས་པའི་རྟེན་དུ་མི་འགྱུར་ལ། དེའི་ཕྱིར་དེ་རྣམས་ཁོ་ནས་དབང་པོ་གཟུགས་ཅན་གྱི་རྣམ་པར་ཤེས་
[19b]
[19b.1]པ་བསྟན་པ་རིགས་ཏེ། དེ་ཐུན་མོང་མ་ཡིན་པའི་རྒྱུད་ཉིད་ཡིན་པའི་ཕྱིར་རོ། །དེ་ལྟར་ན་མིག་ལ་སོགས་པའི་རྣམ་པར་ཤེས་པ་ཁོ་ནར་རྟོགས་སུ་གཞུག་པར་ནུས་ཤིང་། ཡུལ་རྣམས་ཀྱིས་བསྟན་པས་ནི་མ་ཡིན་ཏེ། དེ་དེ་ལ་རྟོགས་པར་བྱེད་པ་མ་ཡིན་པའི་ཕྱིར་ལ། དེ་ཡང་ཐུན་མོང་བའི་རྒྱུ་ཉིད་ཡིན་
[19b.2]པའི་ཕྱིར་རོ། །དེ་ལྟར་ནི་ཡུལ་རྣམས་ནི་ཡིད་ཀྱི་རྣམ་པར་ཤེས་པ་དང་གཞན་གྱི་རྒྱུད་ཀྱི་རྣམ་པར་ཤེས་པའི་ཐུན་མོང་བ་སྟེ། ཟླ་བ་གསར་པ་ལ་སོགས་པ་ལྟ་བ་རྣམས་ལ་རྒྱུད་དུ་མའི་མིག་ལ་སོགས་པའི་རྣམ་པར་ཤེས་པའི་རྒྱུ་ཉིད་ཀྱི་ཕྱིར་དང་། དེའི་རྗེས་ལ་ཐོབ་པའི་ཡིད་ཀྱི་རྣམ་པར་ཤེས་པའི་
[19b.3]རྒྱུ་ཉིད་ཀྱི་ཕྱིར་རོ། །འདི་འདིར་དགོངས་པ་སྟེ། གང་གི་ཕྱིར་འཇིག་རྟེན་གྱིས་སྒྲ་འདི་བརྗོད་པར་བྱ་བ་འདི་ལ་རྟོགས་པར་བྱེད་པའི་ནུས་པ་ཡོད་དོ་ཞེས་གོ་བར་བྱེད་པ་ཉིད་མངོན་པར་མཐོང་ནས་སྒྲ་སྦྱོར་ལ། གོ་བར་བྱེད་པ་ཉིད་དེ་ཡང་དབང་པོའི་རྣམ་པར་ཤེས་པ་ལ་དབང་པོས་བསྟན་པས་
[19b.4]ན་ཡོད་ཀྱི་ཡུལ་གྱིས་བསྟན་པ་ལ་ཡོད་པ་མ་ཡིན་ཞིང་། གོ་བར་བྱེད་པ་ཉིད་ཀྱིས་ཀྱང་སྒྲ་སྦྱར་བར་འོས་པ་ཉིད་ལ་ཁྱབ་པོ། །དེའི་ཕྱིར་གོ་བར་བྱེད་པ་ཉིད་དེ་ཡུལ་གྱིས་བསྟན་པ་ལ་ལྡོག་པས་དེ་སྦྱར་བར་འོས་པ་ཉིད་ཀྱང་ལྡོག་པར་བྱེད་དོ། །དེའི་ཕྱིར་ཡུལ་རྣམས་ཀྱིས་བསྟན་པར་བྱ་བ་མ་ཡིན་
[19b.5]ནོ་ཞེས་པའོ། །འོ་ན་འདོད་པའི་དབང་གིས་འཇུག་པའི་སྒྲ་རྣམས་དོན་ཐམས་ཅད་གོ་བར་བྱེད་པར་རུང་བའོ་ཞེས་བརྗོད་པ་མ་ཡིན་ནམ་ཞེ་ན། བདེན་ཏེ་འདོད་པ་ཁོ་ནས་འཇིག་རྟེན་པས་ཐུན་མོང་མ་ཡིན་པས་སྟོན་པ་ལ་ཡོད་ཀྱི་ཐུན་མོང་བས་མ་ཡིན་ཏེ། དེ་ལྟར་ནི་འཇིག་རྟེན་ཐུན་མོང་མ་ཡིན་པ་ཁོ་ནས་སྟོན་
[19b.6]པར་བྱེད་དོ། །སྟོན་པར་བྱེད་པ་གང་ཡིན་པ་ནི། ཐུན་མོང་མ་ཡིན་པས་ཐ་སྙད་བྱེད་པ་ཡང་མཐོང་སྟེ་ཞེས་པ་ལ་སོགས་པའོ། །ཐ་སྙད་ཉིད་ཀྱང་འཇིག་རྟེན་ན་དེས་རྣམ་པར་གཞག་པ་འདིར་བྱ་བ་སྟེ། དེའི་གོ་བར་བྱེད་པ་ཉིད་ཀྱི་ཕྱིར་རོ་ཞེས་སེམས་སོ། །འདི་འཐད་དོ་ཞེས་པ་རིགས་པ་སྟེ། གང་གི་
[19b.7]ཕྱིར་མངོན་སུམ་རྟོགས་པ་དང་བྲལ་བར་མངོན་སུམ་ཁོ་ནས་གྲུབ་ན། འདིར་རིགས་པ་གཞན་གྱིས་ཅི་ཞིག་ཅེས་དགོངས་པའོ། །ཐམས་ཅད་ཀྱི་བརྗོད་པ་དང་འདྲེར་རུང་བའི་རྣམ་པར་རྟོག་པ་ནི་རང་རིག་པ་འམ་ཤེས་པ་གཞན་གྱིས་སོ་སོ་རང་གིས་རིག་པར་བྱ་བ་ཡིན་ཞིང་། མངོན་སུམ་ཡང་རྣམ་
[20a]
[20a.1]པར་རྟོག་པ་དང་མ་འདྲེས་པའི་ཕྱིར་ཏེ། རྣམ་པར་རྟོག་པ་དང་བྲལ་བ་ཁོ་ནར་བདག་ཉིད་ཡོངས་སུ་གཅོད་པ་སྐྱེའོ། །དེ་ལྟར་ནི་ཡུལ་ཐམས་ཅད་ལས་རྣམ་པར་རྟོག་པ་བཀུག་ནས་རྣམ་པར་རྟོག་པ་མ་ལུས་པ་ནུབ་པའི་ཡིད་ཀྱིས་གནས་པའི་སྲོག་ཆགས་ཀྱིས་ཀྱང་མིག་གི་རྣམ་པར་ཤེས་
[20a.2]པས་གཟུགས་མཐོང་སྟེ། དེ་ཡང་རྟོག་པ་དང་བྲལ་བ་མངོན་སུམ་ཁོ་ནའོ། །དབང་པོའི་བློ་རྣམས་རྟོག་པར་གྱུར་པ་ཁོ་ན་སྟེ། འོན་ཀྱང་དེ་རྣམས་ཉེ་བར་མཚོན་པར་བྱ་བ་མ་ཡིན་ནོ་ཞེ་ན། འདི་ནི་གཏམ་ཙམ་སྟེ། དེ་ལྟར་ན་རྣམ་པར་རྟོག་པ་མེད་པའི་སྐབས་ལས་ཕྱིས་ཅུང་ཟད་རྣམ་པར་རྟོག་པ་དེས་
[20a.3]བདག་གི་རྣམ་པར་རྟོག་པ་འདི་ལྟ་བུ་དང་འདི་ལྟ་བུར་གྱུར་ཏོ་ཞེས་སེམས་ཀྱི་རྒྱུན་སྲེ་བར་བྱེད་དོ། །དེའི་ཕྱིར་རྣམ་པར་རྟོག་པ་འདི་ནི་ཉེ་བར་མཚོན་པར་བྱ་བའི་རང་གི་ངོ་བོ་ཅན་ཁོ་ན་སྟེ། དེ་གལ་ཏེ་དབང་པོའི་རྣམ་པར་ཤེས་པ་ལས་འགྱུར་ན་སྔར་ཡང་མཚོན་པར་བྱ་བར་འགྱུར་ན། རྣམ་པར་རྟོག་པ་
[20a.4]བསྡུས་པའི་གནས་སྐབས་ན་ཉེ་བར་མཚོན་པ་ཡང་མ་ཡིན་ནོ། །དེས་ན་དེ་དེ་ལ་མེད་དོ་ཞེས་རྟོགས་པར་བྱའོ། །དེ་ནི་འགྱུར་མོད། དབང་པོའི་བྱ་བ་ཅན་གྱི་ཤེས་པ་གང་ཡིན་པ་ཡིད་ཀྱི་རྣམ་པར་ཤེས་པ་ཉིད་དུ་ཁྱེད་ཅག་མངོན་པར་འདོད་པ་བརྗོད་པ་དང་འདྲེས་པ་སྦྲུལ་ལོ་སྦྲུལ་ལོ་ཞེས་རྒྱུན་གྱིས་འཇུག་པ་འདི་
[20a.5]རྗོད་པར་བྱེད་པ་དང་བརྗོད་པར་བྱ་བ་དག་སྦྱོར་བ་པོ་དང་དོན་མཐོང་བ་པོ་སྟེ། དེ་རྣམ་པར་རྟོག་པ་ཡིན་ཡང་རྣམ་པར་རྟོག་པ་མེད་པའི་ཤེས་པ་བཞིན་དུ་མངོན་སུམ་ཁོ་ནར་འདོད་པར་བྱ་སྟེ། རྣམ་པ་གཞན་དུ་ན་མཐོང་བ་རྣམ་པར་ཆད་པར་འགྱུར་ཞིང་། རྣམ་པར་རྟོག་པ་ཡང་སྟེ། རྣམ་པར་རྟོག་པས་མཐོང་
[20a.6]བ་མ་ཡིན་པའི་ཕྱིར་དང་མཐོང་བས་རྣམ་པར་རྟོག་པས་བྱེད་པ་མ་ཡིན་པའི་ཕྱིར་དང་དེ་དག་ལྷན་ཅིག་མི་འཇུག་པའི་ཕྱིར་རོ། །རྣམ་པར་མ་ཆད་པར་མཐོང་བ་ཡང་ཡོད་དོ། །དེའི་ཕྱིར་རྣམ་པར་རྟོག་པ་དང་བཅས་པ་འདི་ཁོ་ན་དབང་པོ་ལས་སྐྱེས་པའོ་ཞེ་ན། དེའི་ཚེ་རྣམ་པར་རྟོག་པ་ཅན་མངོན་སུམ་དུ་སྨྲ་བའི་
[20a.7]ཡང་། བ་ལང་ལ་སོགས་པ་ཉེ་བར་གྱུར་པའི་ཡུལ་དེ་ལ་མངོན་སུམ་འཇུག་པ་ན། དོན་གཞན་གྱི་མིང་རྗེས་སུ་དྲན་པའི་རྣམ་པར་རྟོག་པ་གཞན་མངོན་དུ་གྱུར་པ་ཡོད་ན། སོ་སོར་ཉེ་བར་གནས་པའི་ཡུལ་འཛིན་པའི་རྣམ་པར་རྟོག་པའི་ཤེས་པ་མངོན་སུམ་ཉིད་དུ་འདོད་པ་ཅི་ལྟར་ཆོད་པ་མ་ཡིན། ཆོད་ན་
[20b]
[20b.1]ཡང་ཅི་ལྟར་མཐོང་བ་རྣམ་པར་མ་ཆད་པར་འགྱུར་ཞེས་པ་བརྩད་པ་མཚུངས་སོ། །འདིར་འགྱུར་མོད། རིགས་མི་མཐུན་པའི་རྣམ་པར་རྟོག་པའི་དུས་ན་མཐོང་བ་མེད་པ། དེ་ལྟ་ན་ཡང་དེ་རྣམ་པར་ཆད་པ་མ་ཡིན་པ་ཁོ་ནར་རྟོགས་པར་བྱ་སྟེ། ཤིན་ཏུ་མྱུར་བར་འཇུག་པས་མཐོང་བ་གཞན་
[20b.2]སྐྱེད་པས་ན་དེས་སྟོང་པའི་དུས་ན་མཚམས་སྦྱོར་བ་ཉིད་ཀྱི་ཕྱིར་མགལ་མེ་བཞིན་ནོ། །མགལ་མེ་ནི་ཡུལ་སྔ་མ་སྔ་མ་སྤངས་ནས་ཕྱི་མ་ཕྱི་མའི་ཡུལ་ལ་འཇུག་པ་སྟེ། འཁོར་ལོར་སྣང་བའི་ཡུལ་མཐའ་དག་ལ་ཁྱབ་པ་མ་ཡིན་ནོ་ཞེས་པས་དེ་ལ་རྣམ་པར་ངེས་པའི་ཡུལ་སྣང་བ་ཁོ་ནའི་རྣམ་པར་
[20b.3]ཤེས་པར་འགྱུར་གྱི་ཕྱོགས་ཐམས་ཅད་དུ་རྗེས་སུ་སོང་བ་སྣང་བ་ནི་མ་ཡིན་པར་འགྱུར་ན། འོན་ཀྱང་འཁོར་ལོར་སྣང་བའི་མཐོང་བར་འགྱུར་ཏེ། དེའི་ཕྱིར་མཚམས་སྦྱོར་བ་ལས་ངས་འཁོར་ལོ་མཐོང་ངོ་སྙམ་པའི་བློ་ཡིན་པ་ཇི་ལྟ་བ་དེ་ལྟར་འདིར་ཡང་ངོ་ཞེ་ན། དེ་ནི་མངོན་སུམ་རྣམ་
[20b.4]པར་རྟོག་པ་མེད་པར་སྨྲ་བ་ལ་ཡང་མཚུངས་ཏེ། གང་ཤིན་ཏུ་མྱུར་བར་འཇུག་པས་ཞེས་པ་ལ་སོགས་པར་བརྗོད་པ་དེ་ནི་རིམ་གྱིས་འབྱུང་བའི་མཐོང་བ་དང་རྣམ་པར་རྟོག་པ་དག་ལ་ཡང་རྣམ་པར་མ་ཆད་པ་མཐོང་བ་ཞེན་པ་སྒྲུབ་པར་བྱེད་པའི་ཆེད་དུ་མངོན་སུམ་རྣམ་པར་རྟོག་པ་མེད་པར་སྨྲ་བའི་
[20b.5]ཡང་ཡོངས་སུ་རྫོགས་པ་ཁོ་ནའོ། །ཡང་ན་རྣམ་པར་རྟོག་པ་དང་བཅས་པ་དང་རྣམ་པར་རྟོག་པ་མེད་པའི་རྣམ་པར་ཤེས་པ་གཉིས་དག་ཅིག་ཅར་དུ་འཇུག་སྟེ། དེ་དག་རང་བཞིན་གྱི་དབྱེ་བ་ངེས་པར་མ་ཟིན་པའི་རྟོགས་པ་པོས་རྨོངས་པ་ལས་གཅིག་ཉིད་དུ་ལྷག་པར་ཞེན་ཏོ། །དེའི་ཕྱིར་
[20b.6]རྣམ་པར་རྟོག་པ་དང་བཅས་པ་འདི་ནི་ཡིད་ཀྱི་རྣམ་པར་ཤེས་པ་ཁོ་ནའོ། །དབང་པོའི་ཤེས་པ་ནི་དེ་དང་ལྷན་ཅིག་འབྱུང་བའམ་རིམ་གྱིས་འབྱུང་ཡང་རུང་རྣམ་པར་རྟོག་པ་མེད་པ་ཁོ་ནའོ་ཞེས་པ་འདི་གནས་སོ། །མངོན་སུམ་རྟོག་པ་དང་བྲལ་བ། །མངོན་སུམ་ཁོ་ནས་གྲུབ་པ་ཡིན། །ཞེས་
[20b.7]སོ། །འདིར་ཁ་ཅིག་སྨྲ་སྟེ། གལ་ཏེ་མངོན་སུམ་གྱི་སྒྲས་མངོན་སུམ་བརྗོད་པར་བྱ་ན། དེ་རྟོག་པ་དང་བྲལ་བ་ཅི་ལྟར་ཡིན་ཏེ། ཅི་ལྟར་མ་བརྗོད་པ་རྟོགས་ཤེའོ། །དེ་ནི་རྟོག་པའི་རང་གི་ངོ་བོ་ཡང་དག་པར་བརྗོད་པ་ཁོ་ནས་བསལ་ལོ། །གང་ལས་བརྗོད་པར་བྱ་བའི་རྟོག་པ་དང་བྲལ་བ་
[21a]
[21a.1]ལྡོག་པར་འགྱུར་བ་རྟོགས་པར་བྱ་བ་མ་ཡིན་གྱི། འོ་ན་ཅི་ཞེ་ན། རྟོགས་པའི་ཁྱད་པར་རོ་ཞེས་བཤད་དོ། །མངོན་སུམ་ཁོ་ནས་རྟོག་པ་དང་བྲལ་བ་ཉིད་གྲུབ་པ་འབའ་ཞིག་ཏུ་མ་ཟད་ཀྱི་འོན་ཀྱང་ལུང་གིས་ཀྱང་ངོ་ཞེས་སྟོན་པ་གསུངས་པ། ཆོས་པ་ལ་སོགས་པའོ། །
[21a.2]ཡང་དག་པར་ལྡན་པ་ནི་ལྡན་པ་སྟེ། འགྲོགས་པ་ཞེས་པའི་དོན་ཏོ། །མིག་གི་རྣམ་པར་ཤེས་པ་དང་ལྡན་ཏེ་དེ་འདི་ལ་ཡོད་དོ་ཞེས་པ་མིག་གི་རྣམ་པར་ཤེས་པ་དང་ལྡན་པ་སྟེ། མིག་གི་རྣམ་པར་ཤེས་པ་དང་འགྲོགས་པ་ཞེས་པའི་བར་དུའོ། །སྔོན་པོ་རྣམ་པར་ཤེས་སོ་ཞེས་པ་སྔོན་པོའོ། །
[21a.3]དོན་རང་གི་ངོ་བོས་ཤེས་ཀྱི། སྔོན་པོའོ་ཞེས་པ་ནི་མ་ཡིན་གྱི། དེའི་མིང་གིས་འདི་སྔོན་པོའོ་ཞེས་ནི་ཤེས་པར་མི་བྱེད་དོ། །འདི་ཁོ་ན་ཚིག་ཕྱི་མ་གཉིས་ཀྱིས་གསལ་བར་བྱེད་དེ། དོན་ལ་དོན་དུ་འདུ་ཤེས་ཀྱི་ཞེས་པ་དོན་རང་གི་ངོ་བོར་འདུ་ཤེས་ཀྱི། དོན་ལ་ཆོས་སུ་འདུ་ཤེས་པ་ནི་མ་ཡིན་
[21a.4]ཞེས་པ་དོན་ལ་མིང་གི་འདུ་ཤེས་པ་མ་ཡིན་ནོ་ཞེས་པའི་དོན་ཏོ། །འོ་ན་ཅི་ལྟར་ཞེས་པ་ལ་སོགས་པ་སྟེ། རྣམ་པར་ཤེས་པའི་ཚོགས་ལྔ་རྣམས་ནི་བསགས་པ་ལ་དམིགས་པ་རྣམས་སོ་ཞེས་པའི་གྲུབ་པའི་མཐའ་འདི་དེ་ཅི་ལྟར་རིགས་ཏེ། གལ་ཏེ་དེ་གཅིག་ཏུ་སྟེ་གཅིག་ཉིད་དུ་དམིགས་པ་ལ་མི་རྟོག་
[21a.5]ནའོ། །འདི་ལྟར་སེམས་ཏེ། བསགས་པའི་སྒྲས་ཚོགས་པ་བརྗོད་དོ། །དངོས་པོ་ལ་ནི་ཥྛཱས་བསྒྲུབས་པའི་ཕྱིར་རོ། །འདུས་པ་དང་བསགས་པ་དང་བསྡུས་པ་དང་ཚོགས་པ་ཞེས་པ་ནི་རྣམ་གྲངས་རྣམས་སོ། །བསགས་པ་དེ་ཡང་རྡུལ་ཕྲ་རབ་གཅིག་ལ་མེད་པ་ཁོ་ན་སྟེ། འོན་ཀྱང་མང་པོ་
[21a.6]རྣམས་ཀྱི་ཐུན་མོང་གི་ཆོས་ཡིན་ལ། སྤྱི་དེ་ལ་གལ་ཏེ་དབང་པོའི་བློ་རབ་ཏུ་འཇུག་ན། དེའི་ཚེ་འདི་རྣམ་པར་རྟོག་པ་ཅན་དུ་འགྱུར་ཏེ། སྤྱིའི་བློ་ནི་ངེས་པར་རྣམ་པར་རྟོག་པ་དང་རྗེས་སུ་འབྲེལ་པས་སོ། །སྤྱི་དངོས་པོར་ཡོད་པའི་གྲུབ་པའི་མཐའ་འདོད་པ་ནི་མ་ཡིན་ནོ། །དེའི་ཕྱིར་དེས་དེ་ལ་རྣམ་པར་རྟོག་
[21a.7]པ་བྱེད་པ་ཁོ་ནའོ་ཞེས་བྱས་ནས་སོ། །གང་ཡང་ཞེས་པ་ལ་སོགས་པ་སྟེ། སྐྱེ་མཆེད་ཀྱི་རང་གི་མཚན་ཉིད་ནི་མིག་གི་རྣམ་པར་ཤེས་པའི་གཟུང་བྱ་ཉིད་ལ་སོགས་པའོ། །དེའི་ངོར་རྣམ་པར་ཤེས་པའི་ཚོགས་ལྔ་པོ་འདི་རྣམས་རང་གི་མཚན་ཉིད་ཀྱི་ཡུལ་ཅན་རྣམས་ཏེ། རྫས་ཀྱི་རང་གི་མཚན་ཉིད་ཀྱི་ནི་མ་
[21b]
[21b.1]ཡིན་ནོ་ཞེས་པ་རྫས་ནི་སྔོན་པོ་ལ་སོགས་པ་བྱེ་བྲག་རྣམས་སོ། །སྔོན་པོ་ལ་སོགས་པའི་རྫས་ཀྱི་རང་གི་མཚན་ཉིད་ཀྱི་ཡུལ་ཅན་ཉིད་བཀག་པས་ཤུགས་ལས་དེ་རྣམས་ཀྱི་ཡུལ་ནི་གང་སྤྱི་ཐ་དད་མེད་པ་དེ་ཡིན་ནོ་ཞེས་བརྗོད་པར་འགྱུར་རོ། །དེའི་ཕྱིར་ཡང་རྣམ་པར་རྟོག་པ་དང་བྲལ་བ་ཉིད་འགལ་ཏེ།
[21b.2]དེའི་བསྟན་བཅོས་དེ་རྣམ་པ་གཞན་དུ་དྲང་བར་ཅི་ལྟར་ནུས་ཞེས་པ་བསམ་པའོ། །དེ་གཉི་གའི་ཡང་ལན་ཅིག་གསུངས་པ། དེར་དོན་དུ་མས་བསྐྱེད་པའི་ཕྱིར་ཞེས་པ་ལ་སོགས་པའོ། །དེར་ཞེས་པ་བསྟན་བཅོས་སུའོ། །གཅིག་མིན་དོན་གྱིས་བསྐྱེད་བྱའི་ཕྱིར། །ཞེས་པ་རྡུལ་ཕྲ་རབ་གཅིག་
[21b.3]མ་ཡིན་པས་བསྐྱེད་པར་བྱ་བ་ཉིད་ཀྱི་ཕྱིར་རོ་ཞེས་པའི་དོན་ཏོ། །རང་གི་རྒྱུ་དང་རྐྱེན་རྣམས་ལས་རྡུལ་ཕྲ་རབ་ཕན་ཚུན་ཐག་ཉེ་བའི་གནས་སྐབས་ཐོབ་པ་ཁོ་ནར་གྱུར་པ་སོ་སོར་རྣམ་པར་ཤེས་པ་སྐྱེད་པར་ནུས་པ་རྣམས་སྐྱེ་བ་ནི་བསགས་པའི་སྒྲས་བརྗོད་དེ། བསགས་པ་བསྡུས་པའི་རྣམ་གྲངས་ཅན་འདི་
[21b.4]རྣམས་ལ་ཡང་དག་པར་སྐྱེས་པའོ་ཞེས་པ་བསགས་པ་རྣམས་ཏེ། པ་ལ་སོགས་པ་རྣམས་ལས་བྱིངས་ལས་སྐྱེས་པའིའོ་ཞེས་པ་ཚིག་ཕྱི་མ་ཕྱིས་པ་ཅན་གྱི་འབྲུ་མང་པོ་བའོ། །དཔེར་ན་རབ་ཏུ་བསྡམས་པ་ཞེས་པ་བཞིན་ནོ། །འདིར་ཀྟའི་རྐྱེན་དངོས་པོ་བྱས་པའང་མ་ཡིན་པ་ཁོ་ན་སྟེ། འོ་ན་ཅི་ཞེ་ན།
[21b.5]ལས་ཁོ་ན་ལས་ཏེ། ཕན་ཚུན་ཉེ་བར་ཕན་པའི་རྐྱེན་རྣམས་ཀྱིས་དེ་རྣམས་བསགས་ཏེ་འདུས་པར་བྱས་པས་སོ། །རྣམ་པ་དེ་ལྟ་བུའི་དུ་མ་དེ་རྣམས་ཀྱིས་རང་སྣང་བ་བསྐྱེད་དོ་ཞེས་པས་བསགས་པ་ལ་དམིགས་པ་རྣམས་ཞེས་གསུངས་སོ། །དེ་རྣམས་ཐམས་ཅད་ལའང་བསགས་པ་ཞེས་བྱ་བའི་
[21b.6]ཁྱད་པར་གྱིས་དམིགས་པ་སྟེ། རྫས་གཅིག་ཁོ་ན་ནི་མ་ཡིན་ནོ་ཞེས་བྱས་ནས་སོ། །གང་ཡང་སྐྱེ་མཆེད་ཀྱི་རང་གི་མཚན་ཉིད་ཀྱི་ངོར་འདི་རྣམས་ཞེས་པ་ལ་སོགས་པ་གསུངས་པ་འདི་ལ་ཡང་། རྡུལ་ཕྲ་རབ་ཇི་སྐད་བརྗོད་པ་འདུས་པ་ཁོ་ན་དེ་རྣམས་ཀྱིས་མིག་ལ་སོགས་པ་རྣམ་པར་ཤེས་པ་བསྐྱེད་ཀྱི།
[21b.7]གཅིག་ཁོ་ནས་ནི་མ་ཡིན་ཏེ། དེའི་ཕྱིར། གཅིག་མིན་དོན་གྱིས་བསྐྱེད་པའི་ཕྱིར། །རང་དོན་ལ་སྤྱིའི་སྤྱོད་ཡུལ་ཅན། །ཞེས་གསུངས་སོ། །འདིའི་སྤྱོད་ཡུལ་སྤྱི་ཡིན་པ་ཞེས་ཚིག་རྣམ་པར་སྦྱར་རོ། །འོ་ན་སྤྱི་ནི་ཐ་མི་དད་པ་བཏགས་པ་ཡིན་ལ། དབང་པོའི་ཤེས་པའི་ཡུལ་ནི་རྡུལ་ཕྲ་རབ་ཅེས་བྱ་
[22a]
[22a.1]བ་གཅིག་མིན་གྱི་དངོས་པོ་སྟེ། དེ་ཅི་ལྟར་སྤྱིའི་སྤྱོད་ཡུལ་ཅན་ཉིད་དུ་རྟོགས་པར་བྱ། ཞེ་ན། སྐྱོན་འདི་ནི་མེད་དེ། གང་དེ་བསགས་པའི་སྒྲ་དང་སྐྱེ་མཆེད་ཀྱི་རང་གི་མཚན་ཉིད་ཀྱི་སྒྲས་གསུངས་པ་རྡུལ་ཕྲ་རབ་གཅིག་མིན་གྱི་དངོས་པོ་དེ་ཁོ་ན་སོ་སོར་ངེས་པའི་རྣམ་པར་ཤེས་པ་
[22a.2]སྐྱེད་པར་བྱེད་པར་ནུས་པས་ཆོས་མཐུན་པས་ན་ཕན་ཚུན་ལྟོས་པས་ཐུན་མོང་བས་ཏེ། ཐུན་མོང་བ་ཁོ་ནའང་སྤྱིའོ། །རང་གི་དོན་ལ་དེ་ཕན་གྱིས་སྒྲུབ་པའི་ཕྱིར་རིགས་བཞི་ཉིད་ཅེས་པ་བཞིན་ནོ། །དེས་ན་འདི་སྐད་བཤད་པར་འགྱུར་ཏེ། བསགས་པའི་སྤྱོད་ཡུལ་ཅན་དང་སྐྱེ་མཆེད་ཀྱི་རང་གི་མཚན་
[22a.3]ཉིད་ཀྱི་སྤྱོད་ཡུལ་ཅན་དུ་གསུངས་སོ་ཞེས་པའོ། །ཐ་དད་པ་རྣམས་ལ་ཐ་མི་དད་པར་རྟོག་པ་ལས་ནི་མ་ཡིན་ནོ་ཞེས་པ། སྤྱིའི་ཡུལ་ཅན་དུ་གསུངས་པ་ཞེས་པ་འདི་དང་སྦྲེལ་ལོ། །ཐ་དད་པ་རྣམས་ལ་ཐ་དད་པ་མེད་པར་རྟོག་པས་ན་བསགས་པའི་ཡུལ་ཅན་དང་སྐྱེ་མཆེད་ཀྱི་རང་གི་མཚན་ཉིད་ཀྱི་
[22a.4]ཡུལ་ཅན་དུ་གསུངས་པ་ནི་མ་ཡིན་ནོ་ཞེས་པའི་དོན་ཏོ། །རྫས་ཀྱི་རང་གི་མཚན་ཉིད་ཀྱི་མ་ཡིན་ནོ་ཞེས་པ་འདིས་ཀྱང་རྡུལ་ཕྲ་རབ་གཅིག་གི་རྫས་ལ་ངེས་པ་བསལ་བ་བསྟན་བཅོས་སུ་མཛད་པར་བལྟ་བར་བྱའི། ཤུགས་ཀྱིས་འཕངས་པའི་སྤྱིའི་ཡུལ་ཉིད་ནི་མ་ཡིན་ནོ་ཞེས་པ་འགལ་བ་མེད་དོ། །
[22a.5]གང་རྣམས་དབང་པོའི་རྣམ་པར་ཤེས་པ་གཅིག་གི་འབྲས་བུ་ཅན་ཉིད་ཀྱིས་གཟུགས་ཀྱི་སྐྱེ་མཆེད་ལ་སོགས་པ་གཅིག་ཏུ་བསྡུས་ན་ཡང་། རྫས་དུ་མ་ཅིག་ཅར་གཟུང་བར་བྱ་བ་མ་ཡིན་གྱི་འོན་ཀྱང་རིམ་པ་ཁོ་ནས་སོ་ཞེས་སྨྲའོ། །དེ་རྣམས་ལ་འདི་བརྗོད་པར་བྱ་སྟེ། གལ་ཏེ་ཅིག་ཅར་རྫས་མང་པོ་
[22a.6]རྣམས་འཛིན་པ་མེད་ན། འོ་ན་ཅི་ལྟར་ཏིལ་དང་མ་ཤ་ལ་སོགས་པ་རྣམ་པར་ཆད་པའི་ཡུལ་ན་གནས་པ་རྣམས་ལན་ཅིག་ལ་འཛིན་པ་ཡིན་ཏེ། དེ་རྣམས་ཀྱིས་ལྡན་པ་མེད་པ་ཉིད་ཀྱི་ཕྱིར་དང་། རིགས་མི་མཐུན་པ་ཉིད་ཀྱི་ཕྱིར་གང་འཛིན་པར་འགྱུར་བ་རྫས་གཞན་གཅིག་པ་རྩོམ་པ་ནི་མེད་དོ། །གལ་
[22a.7]ཏེ་མཐོང་བ་མྱུར་དུ་འཇུག་པ་ཉིད་ཀྱི་ཕྱིར་འཁྲུལ་པས་རིམ་པ་ལྡན་པ་ཡང་དེར་རིམ་པ་མེད་པར་ལྷག་པར་ཞེན་པའོ་ཞེ་ན། དེའི་ཚེ་རིམ་གྱིས་ལྷུང་བ་དེ་རྣམས་ལའང་མྱུར་བ་ཉིད་མཚུངས་པ་ཉིད་ཀྱི་ཕྱིར་ལན་ཅིག་ཁོ་ན་ལ་འཛིན་ནོ་ཞེས་ལྷག་པར་ཞེན་པར་འགྱུར་རོ། །གཞན་ཡང་ར་ཡིག་དང་ས་ཡིག་ལ་
[22b]
[22b.1]སོགས་པའི་ཡི་གེ་རྣམས་ལ་མྱུར་བར་འཇུག་པ་ཉིད་ཀྱི་ཕྱིར་མཐོང་བ་རིམ་པ་མིན་པར་འཛིན་པ་དང་ལྷག་པར་ཞེན་པར་འགྱུར་ཞིང་། དེ་ལས་ཀྱང་ར་ས་དང་ས་ར་ཞེས་པ་འདི་ལྟ་བུ་ལ་སོགས་པའི་སྒྲ་རྣམས་ལ་རིམ་པ་ཐ་དད་པ་ལས་མཉན་པ་ཐ་དད་པར་མི་འགྱུར་རོ། །མྱུར་དུ་འཁོར་བའི་ཆུའི་ཐིགས་
[22b.2]པ་ལྷུང་བ་ལ་སོགས་པ་རྣམས་ལ་ཡང་མཐོང་བ་མྱུར་བ་ཉིད་ཀྱི་ཕྱིར། རིམ་གྱིས་འཛིན་ཞེས་པའི་བསམ་པས་འཛིན་པར་ལྷག་པར་ཞེན་པར་མི་འགྱུར་རོ། །དེའི་ཕྱིར་ཇི་སྲིད་སྤྱོད་ཡུལ་དུ་གྱུར་པ་དེ་ཐམས་ཅད་ཅིག་ཅར་ཁོ་ནར་རྟོགས་པར་འགྱུར་རོ་ཞེས་པའོ། །སྨྲས་པ་ཡང་ཞེས་པ། སྤྱོད་
[22b.3]ཡུལ་ལས་ལོག་པར་རྟོགས་པ་སེལ་ཞིང་རྣམ་པར་རྟོག་པ་མེད་པ་ཉིད་དེ་ཁོ་ན་གཞུང་འཛུགས་ཏེ། ཆོས་ཅན་གཅིག་མིན་ངོ་བོ་ནི། །ཞེས་སོ། །དོན་གཞན་ལས་ལོག་པ་ལ་བརྟེན་པས་གང་ཆོས་ཀྱི་བྱེ་བྲག་ཐ་དད་བརྟགས་པ་སྤྱིའི་ངོ་བོ་ཤེས་བྱ་ཉིད་ལ་སོགས་པ་རྣམས་ཏེ། དེ་ལ་ལྟོས་པས་དུ་
[22b.4]མའི་ངོ་བོ་ཞེས་བརྗོད་ཀྱི། ཡང་དངོས་པོར་ན་གཟུགས་ལ་སོགས་པའི་མཚན་ཉིད་ཅན་གྱི་ཆོས་ཅན་འདི་ནི་ཆ་དང་ལྡན་པ་མ་ཡིན་ནོ། །དེའི་བརྟགས་པའི་དབྱེ་བ་དེ་རྣམས་རྟོག་པའི་ཤེས་པ་ཁོ་ནའི་ཡུལ་ཡིན་གྱི་ཅིག་ཤོས་ཀྱི་ཡུལ་མ་ཡིན་ནོ་ཞེས་སྟོན་པ་གསུངས། དབང་པོ་ལས་རྟོགས་ཀུན་
[22b.5]དུ་མིན། །ཞེས་པ་སྟེ། དབང་པོ་ལས་ཞེས་པ་ལ་རྒྱུ་ལ་ལྔ་པའོ། །ལག་པ་ཕྱིས་པ་ལ་ཡང་ནའོ། །དབང་པོའི་རྒྱུ་ལས་སམ་ཡང་ན་དབང་པོ་ཐོབ་པར་བྱས་ནས་རྣམ་པ་ཐམས་ཅད་དུ་རང་དང་སྤྱིའི་མཚན་ཉིད་དག་གིས་འཛིན་པར་མི་འགྱུར་རོ་ཞེས་པའི་དོན་ཏོ། །འོ་ན་དེའི་དམིགས་པ་ཅི་འདྲ་
[22b.6]བ་ཡིན་ཞེ་ན་གསུངས་པ། རང་གིས་རིག་བྱ་ཞེས་པ་ལ་སོགས་པའོ། །རང་གིས་རིག་པར་བྱ་བ་ནི་ཀུན་དུ་འགྲོ་བ་ཅན་མ་ཡིན་པའོ། །བསྟན་བྱ་མིན་ན་བརྗོད་བྱ་མ་ཡིན་པའོ། །ཡང་ན་རང་གིས་རིག་བྱ་ཞེས་བརྗོད་པ་ལ། དེའི་རང་བཞིན་ནི་ཅི་ཡིན་པ་བརྗོད་པར་བྱའོ་ཞེ་ན། བསྟན་བྱ་
[22b.7]མིན་པ་ཞེས་པ་སྟེ། བསྟན་བྱ་མིན་པ་ཉིད་ནི་དེའི་ཤེས་པ་དག་ངོ་བོ་ཐ་དད་པའི་ཕྱིར་རོ་ཞེས་སེམས་སོ། །དེ་ལྟར་ནི་གང་སྒྲ་ལས་བྱུང་བའི་ཤེས་པ་དང་གང་དབང་པོ་ལས་བྱུང་བ་སྟེ། འདི་དག་གི་སོ་སོར་སྣང་བ་ནི་ཐ་དད་དེ་གསལ་བ་དང་མི་གསལ་བ་ཉིད་ཀྱི་ཕྱིར་རོ། །ཇི་ལྟར་དབང་པོའི་བྱ་བ་
[23a]
[23a.1]ཅན་ལ་དོན་གྱི་ངོ་བོ་དབང་པོའི་ཤེས་པ་ལ་གསལ་བའི་རྣམ་པས་སོ་སོར་སྣང་བ་དེ་ལྟར་ནི་སྒྲ་ལས་བྱུང་བ་ལ་མེད་དེ། གལ་ཏེ་དབང་པོའི་སྤྱོད་ཡུལ་ཁོ་ན་བསྟན་པར་བྱ་བར་འགྱུར་ན་སྒྲ་ལས་བྱུང་བ་ལ་ཡང་དེ་ལྟ་ཁོ་ནར་སོ་སོར་སྣང་བར་འགྱུར་ན་དེ་ལྟར་ཡང་མ་ཡིན་ནོ། །གང་
[23a.2]སྒྲ་ལས་བྱུང་བ་ལ་སྣང་བ་མ་ཡིན་པ་དེ་ནི་སྒྲ་དོན་ཡང་མ་ཡིན་ནོ། །དེའི་ཕྱིར་ཚུལ་ཐ་དད་པའི་ཤེས་པའི་གཟུང་བར་བྱ་བ་ཉིད་ཀྱི་ཕྱིར་དཀར་པོ་ཉིད་ལ་སོགས་པ་ཐ་སྙད་ཀྱིས་བསྟན་བྱ་ནི་དབང་པོའི་ཡུལ་མ་ཡིན་ནོ་ཞེས་པའོ། །གང་གང་ལས་ཐ་དད་པའི་ཚུལ་ཅན་གྱི་ཤེས་པའི་གཟུང་བྱ་དེ་ནི་དེ་
[23a.3]མ་ཡིན་པ་ཁོ་ན་སྟེ། དཔེར་ན་རྟ་ལས་ཐ་དད་པའི་ཤེས་པའི་གཟུང་བར་བྱ་བ་མ་ཧེ་བཞིན། སྒྲའི་ཡུལ་དཀར་པོ་ཉིད་ལ་སོགས་པ་ལའང་། དབང་པོའི་ཡུལ་ལས་ཐ་དད་པའི་ཚུལ་ཅན་གྱི་ཤེས་པའི་གཟུང་བྱ་ཡིན་ནོ། །ཁྱབ་བྱེད་དང་འགལ་བའོ། །དེ་ལྟར་འགྱུར་མོད་ཀྱི་དབང་པོའི་ཤེས་པའི་
[23a.4]རྟེན་ནི་མིག་ལ་སོགས་པ་དང་། སྒྲ་ལས་བྱུང་བའི་ནི་ཡིན་ཏེ། དེའི་ཕྱིར་རྟེན་ཐ་དད་པ་ལས་ཡུལ་གཅིག་པ་ཉིད་ན་ཡང་། དེ་དག་གི་སྣང་བ་ཐ་དད་པའོ་ཞེ་ན། གལ་ཏེ་དེ་ལྟ་ན། ཅི་ལྟར་ད་ནི་མིག་གི་རྣམ་པར་ཤེས་པ་ལ་སོགས་པ་རྣམས་དོན་ཐ་དད་པ་ཞེས་ཁྱེད་ཅག་ལ་ངེས། དེར་ཡང་དེ་
[23a.5]རྣམས་ཀྱི་ཡུལ་གཅིག་ཁོ་ན་ཡིན་ལ་སྣང་བ་ཐ་དད་པ་ནི་རྟེན་གྱི་དབྱེ་བ་ལས་སོ་ཞེས་བརྗོད་པར་ནུས་པས་སོ། །གལ་ཏེ་དོན་གྱི་རྣམ་པ་འགའ་ཞིག་གི་རྗེས་སུ་བྱེད་པའི་ཕྱིར། སྒྲ་ལས་བྱུང་བ་ཁོ་ནའི་ཡུལ་གཅིག་ཉིད་ཡིན་ཞིང་། མིག་གི་རྣམ་པར་ཤེས་པ་ལ་སོགས་པ་རྣམས་ཀྱི་ནི་མ་ཡིན་ཏེ།
[23a.6]དེ་རྣམས་ནི་ཕན་ཚུན་དོན་གྱི་རྣམ་པ་ཅིའི་ཡང་རྗེས་སུ་བྱེད་པ་མེད་པས་སོ་ཞེ་ན། མ་ཡིན་ཏེ་དེ་ལ་ཡང་ཤེས་བྱ་ཉིད་ལ་སོགས་པ་རྗེས་སུ་བྱེད་པ་ཉིད་ཡོད་པ་ཁོ་ནའོ། །གལ་ཏེ་སྒྲ་ལས་བྱུང་བ་དང་དབང་པོའི་ཤེས་པ་དག་ཡུལ་གཅིག་མ་ཡིན་ན། གང་ལྐོག་ཤལ་ལ་སོགས་པ་དང་ལྡན་པ་དེ་བ་ལང་ངོ་
[23a.7]ཞེས་ཉེ་བར་བསྟན་པ་ལས་བ་ལས་རྟོགས་ནས་ཕྱིས་གསལ་བའི་ཁྱད་པར་མཐོང་བ་པོས། གང་འདི་ནི་བདག་གིས་ཐོས་པའོ། །འདི་ནི་འདིའོ་ཞེས་པ་འདི་ལྟ་བུར་ཅི་ལྟར་རྟོགས། བ་ལང་འོན་ཅིག་ཅེས་བརྗོད་པ་ན་དབང་པོའི་ཡུལ་ཁོ་ན་ལ་ཡང་ཅི་ལྟར་འཇུག །གཞན་ཉེ་བར་དམིགས་པ་དང་ལྡན་
[23b]
[23b.1]པས་གཞན་ལ་དེ་ཁོ་ན་འདིའོ་ཞེས་རྟོགས་པར་འགྱུར་བ་ནི་མེད་ཅིང་། གཞན་ལ་སྐུལ་བ་ན་གཞན་དུ་འཇུག་པ་རིགས་པ་ཡང་མ་ཡིན་ལ། སྒྲ་ལས་དབང་པོའི་ཡུལ་ལ་དེ་ལྟར་རྟོག་པ་དང་འཇུག་པར་ཡང་འགྱུར་ཏེ། དེའི་ཕྱིར་དེ་དག་གི་ཡུལ་གཅིག་པའོ་ཞེས་པའི་རྟོག་པ་གང་དེ་
[23b.2]ཡང་རིགས་པ་མ་ཡིན་པ་ཁོ་ན་སྟེ། དེ་ཁོ་ན་ཉིད་རྣམ་པར་དཔྱོད་པར་བྱེད་པའི་འཆད་པ་པོ་རྣམས་ནི་ཡུལ་རྣམ་པར་དབྱེ་བ་འདི་ལྟ་བུ་བྱེད་ཀྱི། ཐ་སྙད་བྱེད་པ་པོ་རྣམས་ནི་མ་ཡིན་ཏེ། དེ་རྣམས་ནི་དེ་ཁོ་ན་ཉིད་དུ་ལྷག་པར་ཞེན་པས་སྣང་བ་དང་རྣམ་པར་བརྟག་པར་བྱ་བའི་དོན་དག་གཅིག་ཏུ་
[23b.3]བྱས་ནས་ཐ་སྙད་དུ་བྱེད་དོ་ཞེས་པ་ཤིན་ཏུ་འཕྲོས་པར་བྱེད་དོ། །དེ་ལྟར་རང་གིས་རིག་པར་བྱ་བ་བསྟན་བྱ་མིན་པའི་ངོ་བོ་ནི་མངོན་སུམ་གྱི་ཡུལ་ཏེ། རྣམ་པ་འདི་ལྟ་བུ་ལ་རྟོག་པ་འཇུག་པ་ཡང་མ་ཡིན་ཏེ། དེ་ནི་སྒྲ་དང་ཡུལ་གཅིག་པ་ཉིད་ཀྱི་ཕྱིར་རོ་ཞེས་པ་ཡུལ་ངེས་པར་བསྟན་པས་ཀྱང་
[23b.4]མངོན་སུམ་རྣམ་པར་རྟོག་པ་མེད་པ་ཉིད་དུ་གཞུང་བཙུགས་པར་འགྱུར་རོ། །འོ་ན་ད་ནི་མངོན་སུམ་མ་ངེས་པའི་བདག་ཉིད་ལ་ཅི་ལྟར་ཐ་སྙད་དུ་འགྱུར། འདི་ཉིད་དོ་ཞེས་ངེས་པས་ནི་བདེ་བ་དང་སྡུག་བསྔལ་གྱི་སྒྲུབ་བྱེད་དག་ཐོབ་པ་དང་སྤོང་བའི་ཆེད་དུ་རབ་ཏུ་འཇུག་པས་སོ་ཞེ་ན། སྐྱོན་འདི་ནི་
[23b.5]མེད་དེ་མངོན་སུམ་དོན་ལ་ལྟ་བ་ཙམ་ཡིན་ན་ཡང་མངོན་སུམ་གྱིས་ཉམས་སུ་མྱོང་བས་གཞག་པའི་མཐུ་ལས་བྱུང་བའི་དྲན་པ་སྔོན་དུ་འགྲོ་བའི་མངོན་པར་འདོད་པ་དང་ཅིག་ཤོས་དག་གིས་ཐ་སྙད་དུ་འགྱུར་རོ། །འདི་ནི་དངོས་པོའི་ཆོས་ཏེ། གང་ཉམས་སུ་མྱོང་བ་ཤིན་ཏུ་གསལ་བ་དྲན་པའི་ས་
[23b.6]བོན་འཇོག་ཅིང་ཇི་ལྟ་བུའི་བདེ་བའི་སྒྲུབ་པར་བྱེད་པའམ་སྡུག་བསྔལ་སྒྲུབ་པར་བྱེད་པ་ཉམས་སུ་མྱོང་བ་དེ་འདྲ་བ་མཐོང་བ་ལས། འདི་སད་པར་གྱུར་པ་ན་དེ་ཁོ་ན་འདིའོ་ཞེས་དྲན་པར་འགྱུར་རོ། །དེ་ལས་མངོན་པར་འདོད་པ་དང་ཅིག་ཤོས་དག་གིས་གང་ཡང་རུང་བའོ། །དེ་ལས་ཀྱང་སྐྱེས་བུའི་ཇི་
[23b.7]ལྟར་འོས་པར་འཇུག་པའོ་ཞེས་པའོ། །དེ་ལྟར་རེ་ཞིག་ཅེས་པ་ལ་སོགས་པ་ནི་མཇུག་བསྡུ་བ་སྟེ། འདིར་དེ་ལྟར་རེ་ཞིག་དབང་པོ་ལྔ་ལས་སྐྱེས་པ་ཞེས་པའི་ཚིག་ལས། རེ་ཞིག་གི་སྒྲས་དབང་པོ་ལྔ་ལས་སྐྱེས་པ་མ་ཡིན་པ་གཞན་ཡང་ཡོད་ལ། དེའི་ཡང་མཚན་ཉིད་ཀྱི་ཁྱད་པར་ལོགས་སུ་
[24a]
[24a.1]འཆད་པར་འགྱུར་རོ་ཞེས་པ་འདི་གསལ་བར་བྱས་སོ། །དེ་ཐམས་ཅད་ཀྱང་རྟོག་པ་མེད་པ་ཁོ་ནའོ་ཞེས་འཐད་པའི་སྒོ་ཁོ་ནར་ཡོངས་སུ་རྟོགས་པར་བྱས་སོ། །དེས་ན་མཁས་པའི་བློ་གྲོས་ཅན་འགའ་ཞིག་གི་རྩོད་པ་དོགས་པར་འགྱུར་རོ། །དེ་ལ་འདི་ནི་རྩོད་པ་སྟེ། འོ་ན་མངོན་
[24a.2]སུམ་གྱི་དབྱེ་བ་འདི་རྣམས་ཐམས་ཅད་རྣམ་པར་རྟོག་པ་མེད་པ་ཁོ་ན་མ་ཡིན་ནམ། དེའི་ཕྱིར་ཡང་མངོན་སུམ་རྟོག་པ་དང་བྲལ་བ་ཞེས་པ་འདི་ཁོ་ནས་བསྡུས་ཏེ། དེ་ལྟར་ནི་འཐད་པའི་སྒོས་འདི་རྣམས་ཀྱི་མཚན་ཉིད་ཐ་དད་པར་བྱས་སོ། །དེས་ན་འདིར་མཚན་ཉིད་ཀྱི་དབྱེ་བ་ཐ་དད་པ་འདི་ལོགས་སུ་
[24a.3]བརྗོད་པར་བྱ་བ་ཅིའི་དོན་དུ་ཡིན་ཞེས་པའོ། །དེའི་ཕྱིར་འདིའི་ལན་གླན་པའི་ཆེད་དུ་གསུངས་པ། འདིར་ཁྱད་པར་ན་གཞན་གྱི་འདོད་པ་ལ་ལྟོས་པ་ཞེས་པའོ། །ཁྱད་པར་དང་བྱེ་བྲག་དང་དབྱེ་བ་ཞེས་པ་ནི་རྣམ་གྲངས་སོ། །དེ་ཡང་སྐབས་ཉིད་ཀྱི་ཕྱིར་མངོན་སུམ་གྱི་མཚན་ཉིད་ཀྱི་ཞེས་རྟོགས་པར་བྱའོ། །
[24a.4]འདིར་ཞེས་པ་ནི་རབ་ཏུ་བྱེད་པར་རོ། །གང་འདི་མཚན་ཉིད་ཀྱི་ཁྱད་པར་ལོག་པ་དེ་ནི་གཞན་རྣམས་ཀྱིས་ལོག་པར་རྟོགས་པའི་མཚན་ཉིད་གང་འདོད་པ་དེ་ལ་ལྟོས་པའོ། །དེ་ལ་ཡིད་ཀྱི་རྣམ་པར་ཤེས་པའི་མངོན་སུམ་ལ་དབང་པོའི་ཤེས་པས་ཉམས་སུ་མྱོང་བའི་དོན་དེ་ཁོ་ན་འཛིན་ནོ་ཞེས་འགའ་ཞིག་
[24a.5]ལོག་པར་རྟོགས་སོ། །འདོད་ཆགས་ལ་སོགས་པའི་རང་རིག་པ་དེ་མེད་དེ་ཞེས་སོ། །རྣལ་འབྱོར་པའི་ཤེས་པ་ལ་ཡང་འདི་ཁོ་ནར་རོ། །གང་གི་ཕྱིར་དེ་ལྟར་གཞན་རྣམས་ཀྱི་ལོག་པར་རྟོགས་པ་དེའི་ཕྱིར་དེ་ལ་ལྟོས་པས། མངོན་སུམ་རྟོག་པ་དང་བྲལ་བས། །ཅེས་པ་འདིས་བསྡུས་ཀྱང་དབང་
[24a.6]པོ་ལྔ་ལས་སྐྱེས་པ་མ་ཡིན་པའི་མངོན་སུམ་གྱི་མཚན་ཉིད་ཀྱི་ཁྱད་པར་ལོག་པར་བརྗོད་དེ་གཞན་གྱི་ལོག་པར་རྟོགས་པ་བསལ་བའི་ཆེད་དུའོ་ཞེས་པ་དགོངས་པའོ། །གཞན་རྣམས་ནི་གང་ལས་ཁྱད་པར་འདི་བྱེད་པ་དབང་པོ་ལྔ་ལས་སྐྱེས་པ་རྟོག་པ་དང་བཅས་པ་ཡང་ཡོད་དམ་ཅི་ཞེ་ན་གསུངས་པ།
[24a.7]གཞན་གྱི་འདོད་པ་ལ་ལྟོས་པའང་ཞེས་པ་ལ་སོགས་པ་སྟེ། གཞན་རྣམས་དབང་པོ་ལས་སྐྱེས་པའི་ཤེས་པ་འགའ་ཞིག་རྟོག་པ་དང་བཅས་པ་སྟེ་གང་ཐ་སྙད་ལ་བྱང་བའིའོ། །འགའ་ཞིག་རྟོག་པ་མེད་པ་སྟེ་གང་ཅིག་ཤོས་ཀྱིའོ་ཞེས་འདོད་པ་དེའི་ཕྱིར་དེ་ལ་ལྟོས་པས་རྟོག་པ་དང་བྲལ་བ་
[24b]
[24b.1]ཞེས་པ་འདིར་དབང་པོའི་ཤེས་པའི་ཁྱད་པར་ཏེ། ཕ་རོལ་གྱིས་ཡོངས་སུ་བརྟགས་པ་དབང་པོའི་ཤེས་པ་རྣམ་པར་རྟོག་པ་དང་བཅས་པ་རྣམ་པར་གཅད་པར་བྱ་བའི་དོན་དུའོ་ཞེས་རྣམ་པར་འཆད་དོ། །དེ་རྣམས་ཀྱི་ལྟར་ན་གལ་ཏེ་གཞན་གྱི་འདོད་པ་ལ་ལྟོས་པས་ཁྱད་པར་འདི་བརྗོད་པ་ཡིན་ན།
[24b.2]དེ་ལྟར་གྱུར་ན་གཞན་གྱི་འདོད་པ་ལ་ལྟོས་པའི་ཁྱད་པར་འདི་བྱ་བ་མ་ཡིན་པ་ན། རང་གི་ལུགས་ཀྱི་མཚན་ཉིད་མ་བརྗོད་པ་ཁོ་ནར་འགྱུར་ལ། དེ་ལས་ཀྱང་མངོན་སུམ་གྱི་མཚན་ཉིད་ཅིར་འགྱུར། རྩོད་པ་འདི་ཡང་མཉམ་པར་མ་བཞག་པར་འགྱུར་རོ་ཞེས་པ་འདི་ནི་མི་རིགས་སོ། །ཐམས་
[24b.3]ཅད་ནི་རྣམ་པར་རྟོག་པ་མེད་པ་ཁོ་ནའོ་ཞེས་པའི་ནིའི་སྒྲས་མཚན་ཉིད་ཀྱི་ཁྱད་པར་ལོག་པར་བརྗོད་པ་འདི་རང་གི་ལུགས་ལ་ལྟོས་པ་མ་ཡིན་ཏེ། ལོག་པར་རྟོགས་པ་མེད་པའི་ཕྱིར་ཞེས་པའི་དོན་གསལ་བར་བྱེད་དོ། །མངོན་སུམ་རྟོག་པ་དང་བྲལ་བ་ཞེས་པའི་ཁྱད་པར་འདི་ཁོ་ནས་མཚོན་བྱ་
[24b.4]ཐམས་ཅད་བསྡུས་སོ། །ཡིད་ཀྱང་ཞེས་པ་ལ་སོགས་པ་སྟེ། ཀྱང་གི་སྒྲ་ནི་བསྡུ་བའི་དོན། །དོན་གྱི་སྒྲ་འདི་ནི་ཤེས་བྱའི་རྣམ་གྲངས་སོ། །འདོད་ཆགས་ལ་སོགས་པ་རྣམས་ཀྱི་རང་ནི། ཆགས་ལ་སོགས། རང་ངོ་། །རང་གི་སྒྲ་འདི་ནི་བདག་ཉིད་རྗོད་པར་བྱེད་པའོ། །དོན་དང་ཆགས་པ་
[24b.5]སོགས་རང་ངོ་། །དེ་རིག་པ་ནི་དོན་དང་ཆགས་ལ་སོགས་རང་རིག་པ་སྟེ། འདིས་རིག་པར་བྱ་ཤེས་པར་བྱ་ཞེས་པ་རིག་པའོ། །རིག་པ་ནི་སོ་སོར་མངོན་པར་སྦྲེལ་ལོ། །རྣམ་པར་རྟོག་པ་མེད་པའི་ཡིད་དེ་ནི་མངོན་སུམ་མོ། །དེ་ལ་ཡིད་ཀྱི་རྣམ་པར་ཤེས་པ་དབང་པོས་གཟུང་བ་ཁོ་ནའི་དོན་
[24b.6]འཛིན་ནམ། དེ་ལས་གཞན་པའོ་ཞེས་པ་བརྟགས་པ་གཉིས་ཏེ། གལ་ཏེ་དང་པོ་ཡིན་ན་དེ་ལས་དེ་ཚད་མ་ཉིད་མ་ཡིན་པ་ཁོ་ནར་འགྱུར་ཏེ། བཟུང་ཟིན་པ་འཛིན་པའི་ཕྱིར་དྲན་པ་ལ་སོགས་པ་བཞིན་ནོ། །འོན་ཏེ་གཉིས་པ་ཡིན་ན་དེའི་ཚེ་ལོང་བ་ལ་སོགས་པས་ཀྱང་དོན་འཛིན་པར་འགྱུར་རོ། །
[24b.7]གལ་ཏེ་ཡིད་ཀྱི་རྣམ་པར་ཤེས་པ་དབང་པོའི་ཤེས་པ་ལ་ལྟོས་པ་མེད་པར་ཕྱི་རོལ་གྱི་དོན་ལ་རབ་ཏུ་འཇུག་ན་དེའི་ཚེ་མིག་ལ་སོགས་པ་མ་ཚང་བས་ཀྱང་མཐོང་བ་ཐོབ་བོ། །དེ་ཅི་འདྲ་བ་ཡིན་པ་དེ་བརྗོད་པར་བྱའོ་ཞེ་ན། ཡིད་ཀྱང་ཞེས་པ་ལ་སོགས་པ་སྟེ། གཟུགས་ལ་སོགས་པ་ཡང་དེ་རྣམས་ཡིན་
[25a]
[25a.1]ལ་ཡུལ་རྣམས་ཀྱང་ངོ་ཞེས་པ་ལས་འཛིན་པའོ། །འོ་ན་གཟུགས་ལ་སོགས་པ་རྣམས་ཡུལ་ཁོ་ན་མ་ཡིན་ནམ། ཡུལ་སྨོས་པ་དེ་ཅིའི་དོན་ཡིན་ཞེ་ན། དམིགས་བཞིན་པ་མིན་པའི་གཟུགས་ལ་སོགས་པ་རྣམ་པར་བཅད་པའི་དོན་དུ་སྟེ། རྣམ་པར་ཤེས་པར་བྱ་བཞིན་པ་མ་
[25a.2]ཡིན་པ་རྣམས་ཡུལ་དུ་འགྱུར་བ་མ་ཡིན་ནོ། །ཉེ་བར་བཏགས་པས་དེའི་རིགས་ཅན་ཉིད་ཀྱིས་ཡུལ་གྱི་ཐ་སྙད་དུ་བསྟན་པར་འགྱུར་གྱི། ཡུལ་དངོས་ཉིད་ནི་མ་ཡིན་ནོ། །ཡང་དེ་རྣམས་ཅིའི་ཡུལ་ཞེ་ན། དེ་མ་ཐག་པ་དབང་པོའི་ཤེས་པའི་སྟེ། སྐབས་ཉིད་ཀྱི་ཕྱིར་དེ་ཁོ་ནའིའོ། །གཟུགས་ལ་
[25a.3]སོགས་པ་ཡུལ་རྣམས་ཀྱི་རྣམ་པར་འགྱུར་བ་ནི། གཟུགས་ལ་སོགས་པ་ཡུལ་གྱི་རྣམ་འགྱུར་རོ། །དེ་གང་གི་དམིགས་པ་ཡིན་པ་དེ་ནི་དེ་སྐད་བཤད་དོ། །ཚོགས་པ་དང་རྣམ་འགྱུར་དང་དྲུག་པའི་ཡང་འབྲུ་མང་པོ་པ་སྟེ། ཚིག་ཕྱི་མ་དབྱི་བ་ཡང་ངོ་ཞེས་པའི་ཚིག་ལས་ཚིག་སྡུད་དང་།
[25a.4]ཚིག་ཕྱི་མ་དབྱི་བ་ཡང་སྟེ། དཔེར་ན་གསེར་གྱི་རྒྱན་ཞེས་པ་བཞིན་ནོ། །གང་དེས་བསྐྱེད་པའི་སྐད་ཅིག་ཕྱི་མའི་ཁྱད་པར་དེ་དེའི་རྣམ་པར་འགྱུར་བ་ཞེས་ཐ་སྙད་ཀྱི་བྱ་བ་ཡུལ་གྱི་རྣམ་པར་འགྱུར་བ་དེ་ཅི་ཞེ་ན། ཆོས་ཅན་གནས་པ་ལ་ཆོས་གཞན་ལྡོག་པ་ན། ཆོས་གཞན་གསལ་བར་འགྱུར་
[25a.5]བ་ནི་མ་ཡིན་ཏེ། གྲངས་ཅན་གྱིས་ཡོངས་སུ་བརྟགས་པའི་ཡོངས་སུ་འགྱུར་བ་བཀག་པ་ཉིད་ཀྱི་ཕྱིར་རོ། །དེས་ན་འདི་སྐད་བརྗོད་པར་འགྱུར་ཏེ། དབང་པོའི་ཤེས་པའི་ཡུལ་ལས་སྐྱེས་པ་དེ་མ་ཐག་པའི་གཟུགས་ལ་སོགས་པ་སྐད་ཅིག་དམིགས་པའོ་ཞེས་པའོ། །འདིས་ནི་ཚད་མ་ཉིད་མ་ཡིན་
[25a.6]པའི་སྐྱོན་སྤངས་སོ། །ཡང་ཅིའི་ཕྱིར་དེའི་ཡུལ་ངེས་པ་ཉིད་ཡིན་ཞེ་ན། གང་གི་ཕྱིར་དེའི་གང་དེ་མ་ཐག་པའི་རྐྱེན་གྱི་ཁྱད་པར་དེ་ནི་རང་གི་ཡུལ་གྱིས་ཉེ་བར་བསྐྱེད་པ་དེ་མ་ཐག་པའི་གཟུགས་ལ་སོགས་པའི་སྐད་ཅིག་གི་ལྷན་ཅིག་བྱེད་པ་ཅན་ཁོ་ནས་དེ་སྐྱེད་པར་བྱེད་དོ། །དེའི་ཕྱིར་དེ་ཇི་སྐད་བཤད་པ་ཁོ་
[25a.7]ནའི་ཡུལ་དང་ལྡན་པའོ་ཞེས་རྟོགས་པར་གྱིས་ཤིག །ཉམས་སུ་མྱོང་བའི་རྣམ་པས་འཇུག་པ་ཞེས་པ་སྟེ། འདིས་ཉམས་སུ་མྱོང་བར་བྱའོ་ཞེས་པ་ཉམས་སུ་མྱོང་བའོ། །རྣམ་པ་ནི་སྣང་བའོ། །དེ་ཡང་གང་དྲན་པ་ལ་སོགས་པ་རྣམས་ཀྱི་ཉམས་སུ་མྱོང་བའི་ཚུལ་ཅན་མ་ཡིན་པ་ཡང་ཡོད་དོ་ཞེས་པས་དེ་
[25b]
[25b.1]རྣམ་པར་བཅད་པའི་ཆེད་དུ་ཉམས་སུ་མྱོང་བ་སྨོས་སོ། །གང་གི་ཉམས་སུ་མྱོང་བ་རྣམ་པ་ཡིན་པ་དེ་དེ་སྐད་བརྗོད་དོ། །དེ་ཡང་ཅི་ཞེ་ན་སྔར་བཤད་པའི་རིགས་པས་དབང་པོའི་ཤེས་པ་ཁོ་ན་སྟེ་ཉམས་སུ་མྱོང་བའི་རྣམ་པ་དེས་ཞུགས་ཤིང་སྐྱེས་པ་ནི་ཉམས་སུ་མྱོང་བའི་རྣམ་པར་ཞུགས་པའོ། །འདི་
[25b.2]སྐད་བརྗོད་པར་འགྱུར་ཏེ་དབང་པོའི་ཤེས་པའི་དེ་མ་ཐག་པའི་རྐྱེན་ལས་སྐྱེས་པའོ་ཞེས་པའོ། །འདིས་ཀྱང་ལོང་བ་ལ་སོགས་པས་ཀྱང་དོན་འཛིན་པར་འགྱུར་རོ་ཞེས་གང་བརྗོད་པ་དེ་བསལ་ཏོ། །གང་གི་ཕྱིར་དེ་ཕྱི་རོལ་གྱི་དོན་རྣམས་ལ་རང་དབང་དུ་འཇུག་པ་མ་ཡིན་གྱི། འོན་ཀྱང་དབང་པོའི་རྐྱེན་
[25b.3]ལ་ལྟོས་ལ། ལོང་བ་ལ་སོགས་པ་ལ་ཡང་དབང་པོའི་ཤེས་པ་མེད་དོ་ཞེས་པས་དེ་མེད་དོ། །འདོད་ཆགས་ལ་སོགས་པ་རྣམས་ལ་ཡང་རང་རིག་པའོ་ཞེས་པ་སྟེ། རང་ཉིད་ལ་རིག་པ་ནི་རང་རིག་གོ། །འདིས་རིག་པར་བྱ་བས་ན་རིག་པ་སྟེ། འཛིན་པའི་རྣམ་པར་ཡང་དག་པར་བཤད་པ་
[25b.4]ཉམས་སུ་མྱོང་བའི་རང་བཞིན་ཉིད་དོ། །ཉམས་སུ་མྱོང་བའི་རང་བཞིན་ཉིད་ཀྱི་ཕྱིར་འདོད་ཆགས་ལ་སོགས་པ་རྣམས་ཉམས་སུ་མྱོང་བའི་བདག་ཉིད་ཀྱིས་རབ་ཏུ་གསལ་བ་རྣམས་བདག་ཉིད་ཡང་དག་པར་རིག་པར་བྱེད་དེ། བདག་ཉིད་རིག་པ་ཞེས་ཀྱང་བསྟན་པར་བྱ་བ་རྣམས་སོ། །དེའི་ཕྱིར་
[25b.5]ཉམས་སུ་མྱོང་བའི་བདག་ཉིད་དེ་ནི་འདི་རྣམས་ཀྱི་ཚད་མའོ། །གང་ཡང་རིག་པ་དངོས་པོའི་ངོ་བོ་རང་རྟོགས་པའི་བདག་ཉིད་དེ་ནི་དེའི་འབྲས་བུར་རིག་པར་བྱ་སྟེ། བདག་ཉིད་ནི་དེ་རྣམས་ཀྱི་གཞལ་བྱའོ། །འདོད་ཆགས་ལ་སོགས་པ་སྨོས་པ་ནི་གསལ་བའི་རིག་པ་བསྟན་པའི་དོན་ཏེ། ཤེས་པ་
[25b.6]ཐམས་ཅད་ཀྱི་བདག་ཉིད་རིག་པ་ནི་མངོན་སུམ་ཡིན་པ་ཉིད་ཀྱི་ཕྱིར་རོ། །རྣམ་པར་རྟོག་པ་མེད་པ་ཉིད་ནི་དེ་ལ་བརྡ་མི་ནུས་པ་ཉིད་ཀྱི་ཕྱིར་རོ། །ཡུལ་དུ་བྱས་པ་ལ་བརྡ་བྱེད་པར་ནུས་ཤིང་། འདོད་ཆགས་ལ་སོགས་པའི་བདག་ཉིད་མ་སྐྱེས་པ་ནི་རིག་པས་ཡུལ་དུ་བྱེད་པ་ཡང་མ་ཡིན་ཏེ། དེ་ཡང་
[25b.7]འདོད་ཆགས་ལ་སོགས་པའི་བདག་ཉིད་ཀྱི་ངོ་བོ་ཉིད་ཀྱིས་ན་མ་སྐྱེས་པ་ཉིད་ཀྱི་ཕྱིར་རོ། །འདོད་ཆགས་ལ་སོགས་པའི་བདག་ཉིད་སྐྱེས་པ་ལ་ཡང་རིག་པས་བརྗོད་པ་སྦྱོར་བ་མིན་ཏེ། དེ་ལྟར་ནི་དེས་བརྗོད་པ་བཟུང་ནས་དེར་སྦྱོར་བར་བྱེད་ཅིང་། བརྗོད་པ་ཟིན་པ་ན་ཡང་སྐད་ཅིག་མ་ཉིད་ཀྱི་ཕྱིར་
[26a]
[26a.1]དེ་མེད་ལ་ཆགས་པ་ལ་སོགས་པ་རྣམས་ཀྱང་མེད་དོ་ཞེས་པས་ཅི་ཞིག་ཅི་ཞིག་གིས་སྦྱོར་བར་བྱེད་ཅེས་བརྡ་མི་ནུས་པ་ཉིད་ཀྱི་ཕྱིར་ཆགས་པ་ལ་སོགས་པ་རྣམས་ཀྱི་རང་རིག་ནི་བརྗོད་པ་དང་འདྲེས་པ་མ་ཡིན་ནོ། །གང་གིས་གང་ལ་སྒྲའི་བརྡ་མི་འཛིན་པ་དེ་ནི་དེ་ལ་སྒྲ་
[26a.2]སྦྱར་ནས་འཛིན་པར་མི་བྱེད་དེ། དཔེར་ན་དྲི་ལ་མིག་གི་རྣམ་པར་ཤེས་པ་བཞིན། འདོད་ཆགས་ལ་སོགས་པའི་བདག་ཉིད་ལ་ཡང་དེ་ཡང་དག་པར་རིག་པས་སྒྲའི་བརྡ་མ་བཟུང་བ་ཡིན་ནོ། །རྒྱུ་མི་དམིགས་པའོ། །འདིར་འགའ་ཞིག་གཞི་མ་གྲུབ་པར་སྨྲ་བར་བྱེད་དེ། དེ་ལྟར་ནི་རང་
[26a.3]རིག་པར་རྟོག་པ་མེད་པར་བསྒྲུབ་པར་བྱ་ན། དེ་ཡང་རེ་ཞིག་ཤེས་པ་ལ་ཡང་མེད་ན། བདེ་བ་ལ་སོགས་པ་ཤེས་པའི་ངོ་བོ་མ་ཡིན་པ་རྣམས་ལ་ག་ལ་ཡིན། དེ་རྣམས་ནི་བདག་གཅིག་པུ་ལ་ཤེས་པ་དང་ལྷན་ཅིག་འདུ་བའི་ཕྱིར། དོན་གཅིག་ལ་འདུ་བ་ཅན་དེས་གཟུང་བར་བྱ་བའོ་ཞེས་པ་
[26a.4]སྟེ། རང་ཉིད་གཞལ་བྱའི་ངོ་བོ་ཁོ་ནའོ། །དེའི་ཕྱིར་དེ་རྣམས་གཞན་གྱི་ཡང་རིག་པར་བྱེད་པ་མ་ཡིན་ན། བདག་ཉིད་ག་ལས་ཡིན་ཞེའོ། །དེ་རྣམས་ཀྱིས་བདེ་བ་ལ་སོགས་པའི་རྣམ་པ་དེ་ཤེས་པར་གདོན་མི་ཟ་བར་ཁས་བླང་བར་བྱ་སྟེ། གཞན་དུ་ན་དེ་རྣམས་དེའི་རིག་པར་བྱ་བ་ཁོ་ནར་མི་
[26a.5]འགྱུར་རོ། །ཤེས་པར་འདོད་པ་ཉིད་ཁོ་ན་དོན་རྣམས་ཀྱི་རིག་པར་བྱེད་པར་རིགས་པ་མ་ཡིན་ཏེ། དེ་ནི་ཐམས་ཅད་ལ་ཁྱད་པར་མེད་པའི་ཕྱིར་རོ། །དོན་ཐམས་ཅད་འཛིན་པར་ཐལ་བར་འགྱུར་བའི་ཕྱིར་རོ། །ཤེས་པ་གང་ཞིག་གང་གི་རྣམ་པ་དང་བྲལ་བ་དེ་ནི་དེའི་རིག་པར་བྱེད་པ་མ་ཡིན་ཏེ། བ་ལང་གི་
[26a.6]ཤེས་པ་རྟའི་བཞིན། བདེ་བ་ལ་སོགས་པའི་ཤེས་པ་ཡང་བདེ་བ་ལ་སོགས་པའི་རྣམ་པ་དང་བྲལ་བའོ། །ཁྱབ་བྱེད་དང་འགལ་བའོ། །ཤེས་པ་དེའི་རྣམ་པ་ཅན་དུ་འགྱུར་མོད། དེ་ལས་ཅིར་འགྱུར་ཞེ་ན། དེ་ལས་འདི་སྟེ། གང་དགའ་བ་དང་ཡོངས་སུ་གདུང་བ་ལ་སོགས་པའི་རྣམ་པ་དང་
[26a.7]ལྡན་པ་དེ་ཁོ་ན་བདེ་བ་ལ་སོགས་པའོ་ཞེས་བདེ་བ་ལ་སོགས་པ་ཤེས་པའི་ངོ་བོར་གྲུབ་བོ། །དངོས་པོ་ཚིམ་པ་ལ་སོགས་པའི་ངོ་བོ་ཅན་ནི་རྟོགས་པའི་ངོ་བོ་ཡིན་པར་ནི་དེ་རྣམས་ལ་ཡང་གྲུབ་སྟེ། དེ་ལ་ཤེས་པ་དང་། བདེ་བ་དང་། སྡུག་བསྔལ་ཞེས་པ་ལ་སོགས་པ་མིང་ཇི་ལྟར་འདོད་པར་བྱོས་
[26b]
[26b.1]ཤིག །འདི་ལས་བཟློག་པ་ཅུང་ཟད་ཀྱང་མེད་དོ། །ཇི་ལྟར་ཤེས་པའི་ཚིམ་པ་ལ་སོགས་པའི་རྣམ་པ་ནི་ཤེས་པ་མེད་པའི་ངོ་བོ་བདེ་བ་ལ་སོགས་པས་བྱས་པར་མི་འགྱུར་བ་དེ་ལྟར་གཞན་དུ་རྟོགས་པར་བྱས་ཟིན་ཏེ། འདིར་ནི་གཞུང་མངས་པའི་འཇིགས་པ་ལས་རབ་ཏུ་རྒྱས་པར་མི་བྱའོ། །
[26b.2]གང་ཞིག་བདེ་བ་ལ་སོགས་པ་རྣམས་ནི་ནང་མ་ཡིན་ལ། སེམས་པ་ཅན་ཡང་མ་ཡིན་གྱི། འོ་ན་ཅི་ཞེ་ན། དེ་ལས་བཟློག་པའི་རང་བཞིན་གཞལ་བྱ་ཁོ་ནའོ་ཞེས་སྨྲ་བ་དེའི་ཡང་། ཇི་སྐད་བཤད་པའི་ཚུལ་གྱིས་ཚིམ་པ་ལ་སོགས་པའི་རྣམ་པ་ཅན་རྟོགས་པའི་བདག་ཉིད་ཀྱི་དངོས་པོར་གྲུབ་ཅིང་།
[26b.3]དེ་ཁོ་ན་ཡང་རང་རིག་པའི་མངོན་སུམ་དུ་བརྗོད་ཀྱི། དེ་ལས་གཞན་པའི་བདེ་བ་ལ་སོགས་པ་གཞན་གྱིས་ཡོངས་སུ་བརྟགས་པ་ནི་མ་ཡིན་ནོ། །རང་རིག་པ་དེ་ཡང་བསྒྲུབ་པར་འགྱུར་རོ་ཞེས་པ་རྟེན་མ་གྲུབ་པ་མེད་དོ། །འོ་ན་ཤེས་པ་ཐམས་ཅད་ཁོ་ན་དང་དབང་པོ་ལས་སྐྱེས་པའི་ཡང་རྟེན་ཡོད་དོ་ཞེས་འདོད་
[26b.4]པར་བྱ་བ་མ་ཡིན་ནམ། རྣམ་པར་ཤེས་པའི་ཚོགས་ལྔ་རྣམས་ནི་དབང་པོ་གཉིས་ཀྱི་རྟེན་ཅན་ནོ་ཞེས་གསུངས་པའི་ཕྱིར་རོ། །དེ་ཅིའི་ཕྱིར་འདི་ཁོ་ན་ཡིད་ལས་བྱུང་བར་བརྗོད་པར་བྱ་ཞེ་ན་གསུངས་པ། དབང་པོ་ལ་མི་ལྟོས་པའི་ཕྱིར་ཞེས་པ་སྟེ་གཟུགས་ཅན་གྱི་དབང་པོ་ལ་ལྟོས་པ་མེད་པ་ཉིད་ཀྱི་ཕྱིར་ཞེས་པ་
[26b.5]དགོངས་པའོ། །གང་གི་རྟེན་ཡིད་ཁོ་ན་ཡིན་གྱི་དབང་པོ་གཟུགས་ཅན་མ་ཡིན་པ་དེ་ཡིད་ཀྱི་མངོན་པར་བརྗོད་དོ། །འོ་ན་གང་རྣམ་པར་ཤེས་པའི་ཚོགས་ལྔ་པོ་རྣམས་དང་དེ་དང་མཚུངས་པར་ལྡན་པ་འདོད་ཆགས་ལ་སོགས་པ་དེ་རྣམས་ཀྱི་རང་རིག་པ་ཇི་ལྟར་ཡིད་ཀྱི་མངོན་སུམ་ཡིན་ཞེ་ན། རང་རིག་པའི་སྤྱི་
[26b.6]བོས་དེའི་རིགས་ཅན་ཉིད་ཀྱི་ཕྱིར་རོ། །ཡང་དབང་པོ་ལ་ལྟོས་པ་མེད་པ་ཉིད་ན། མངོན་སུམ་གྱི་སྒྲ་ཅི་ལྟར་རིགས་ཤེ་ན། ཇི་ཙམ་གྱིས་དབང་པོའི་རྒྱུ་མཚན་ཅན་ནི་མངོན་སུམ་དུ་ཐ་སྙད་བྱ་བ་སྟེ། ཤེས་པའི་ཁྱད་པར་ལ་ཡོངས་སུ་བཤད། ཡོད་པ་ཅན་ནི་མིང་འདིའོ་ཞེས་པ་འདི་ནི་བཤད་ཟིན་ཏོ། །ཡང་
[26b.7]ན་ཡིད་ཀྱང་དབང་པོ་ཡིན་པ་ཉིད་ཀྱི་ཕྱིར་ཕྱོགས་གཞན་ལ་ཡང་སྐྱོན་མེད་དོ། །དེ་བཞིན་དུ། རྣལ་འབྱོར་པའི་ཞེས་པ་སྟེ། ཇི་ལྟར་ཡིད་ཀྱི་རྟོག་པ་མེད་པ་མངོན་སུམ་ཡིན་པ་དེ་བཞིན་དུ། རྣལ་འབྱོར་པ་རྣམས་ཀྱི་ཡང་ངོ་། །རྣལ་འབྱོར་ནི་ཏིང་ངེ་འཛིན་ཏེ། དེ་གང་རྣམས་ལ་ཡོད་པ་དེ་རྣམས་རྣལ་
[27a]
[27a.1]འབྱོར་པ་རྣམས་སོ། །བླ་མས་བསྟན། མ་འདྲེས་པའི་ཞེས་པ་སྟེ། འདིར་ཡུལ་གྱིས་ཡུལ་ཅན་བསྟན་པ་ལ། ལུང་གི་རྣམ་པར་རྟོག་པ་ནི་བླ་མས་བསྟན་པའི་སྒྲས་བརྗོད་དོ། །དེ་དང་མ་འདྲེས་པ་ནི་བྲལ་བ་ཞེས་པའི་དོན་ནོ། །འདིས་ནི་གསལ་བར་སྣང་བ་ཉིད་ཀྱང་དེ་ལ་ཐོས་
[27a.2]པར་བྱས་ཏེ། རྣམ་པར་རྟོག་པ་མེད་པ་ནི་གསལ་བ་ཉིད་ལ་མི་འཁྲུལ་བ་ཉིད་ཀྱི་ཕྱིར་རོ། །ཙམ་གྱི་སྒྲ་ནི་སྒྲོ་བཏགས་པའི་དོན་རྣམ་པར་བཅད་པའི་དོན་དུའོ། །དེས་ན་གང་ཡང་དག་པའི་དོན་གྱི་ཡུལ་ཅན་འཕགས་པའི་བདེན་པ་མཐོང་བ་ལྟ་བུ་དེ་ཁོ་ན་ཚད་མ་སྟེ། ཡང་དག་པ་མ་ཡིན་པའི་དོན་གྱི་
[27a.3]ཡུལ་ཅན་བསླད་པ་ཟད་པར་ས་ལ་སོགས་པ་ནི་མ་ཡིན་ནོ། །འོ་ན་དོན་འདི་འཆད་པར་འགྱུར་བའི་དམིགས་བསལ་ཁོ་ན་ལ་ཐོབ་པར་བྱ་བ་མ་ཡིན་ནམ། དེ་ལ་ཙམ་སྨོས་པ་ཅི་ཞེ་ན། འདི་བདེན་མོད་དེ་ལྟ་ན་ཡང་གཙོ་བོར་ཤེས་པའི་དོན་དུ་འདིའི་མཚན་ཉིད་ཀྱི་ངག་ཁོ་ན་ལ་དོན་འདི་ཡོངས་སུ་
[27a.4]གསལ་བར་བྱས་སོ། །གཙོ་བོ་ཉིད་ནི་ཐར་པའི་རྒྱུ་ཉིད་ཀྱི་ཕྱིར་རོ། །ཡང་རྣམ་པར་རྟོག་པ་མེད་པ་ཉིད་དང་དེའི་གསལ་བར་སྣང་བ་ཉིད་ནི་སྒོམ་པ་ཡོངས་སུ་རྫོགས་པའི་འབྲས་བུ་ཡིན་པ་ཉིད་ཀྱི་ཕྱིར་རོ། །གང་སྒོམ་པ་རྫོགས་པའི་འབྲས་བུ་ཤེས་པ་དེ་ནི་རྟོག་པ་མེད་པ་དང་གསལ་བར་སྣང་
[27a.5]བར་ཡང་འགྱུར་ཏེ། དཔེར་ན་འདོད་པ་དང་མྱ་ངན་ལ་སོགས་པས་ཉེ་བར་བསླད་པ་རྣམས་ཀྱི་དགའ་བ་ལ་སོགས་པའི་ཡུལ་ཅན་གྱི་ཤེས་པ་བཞིན། རྣལ་འབྱོར་པའི་ཤེས་པའང་དེ་ལྟ་བུའོ། །རང་བཞིན་ནོ། །རྟོག་པའི་ཤེས་པ་ཡང་ཞེས་པ་སྟེ། འདིའི་དོན་ནི་འདི་ལྟ་སྟེ། གང་རང་རིག་པ་
[27a.6]བྱ་བ་དེ་རང་རྟོགས་བྱེད་ཀྱི་ངོར་མངོན་སུམ་སྟེ། ཆགས་པ་ལ་སོགས་པའི་ཤེས་པ་བཞིན། རྟོག་པའི་ཤེས་པ་ཡང་དེ་ལྟ་བུའོ་ཞེས་པ་རང་བཞིན་ནོ། །འདི་ནི་བདེན་ཏེ་ཞེས་པ་ལ་སོགས་པ་འདོད་པ་གྲུབ་པར་སྟོན་ཏོ། །འདི་ལྟར་དགོངས་པ་སྟེ། ཡུལ་གང་ལ་ཤེས་པ་གང་སྒྲའི་བརྡ་འཛིན་
[27a.7]པ་དེ་ནི་དེ་ལ་སྒྲའི་སྒོ་ནས་དེའི་ཡུལ་འཛིན་པའི་ཕྱིར་རྣམ་པར་རྟོག་པ་དང་བཅས་པར་འགྱུར་གྱི་རང་གི་ངོ་བོ་ཡང་བརྡ་ནུས་པ་མ་ཡིན་ཏེ། སྔར་ཇི་སྐད་བཤད་པ་བཞིན་ནོ། །དེའི་ཕྱིར་དེ་རྟོགས་པར་བྱ་བ་ལས་སོ། །ཤེས་པ་ཐམས་ཅད་མངོན་སུམ་ཁོ་ནའོ་ཞེས་པའོ། །དེ་ལྟར་རེ་ཞིག་མངོན་
[27b]
[27b.1]སུམ་ཞེས་པ་ལ། རེ་ཞིག་གི་སྒྲ་ནི་རིམ་པ་ལ་སྟེ། མངོན་སུམ་བརྗོད་ནས་དེ་ལྟར་སྣང་བ་རྗོད་པར་བྱེད་དོ་ཞེས་པ་རིམ་པའོ། །འོ་ན་མངོན་སུམ་རྟོག་པ་དང་བྲལ་བ་ཞེས་སྨྲས་པས་རྣམ་པར་རྟོག་པ་དང་བཅས་པ་མངོན་སུམ་ལྟར་སྣང་བའོ་ཞེས་བརྗོད་པར་འགྱུར་ལ། དེ་ཡང་སྔར་ཁོ་ནར་མིང་
[27b.2]དང་རིགས་སྦྱོར་བས་བཤད་ན། དེ་ལ་ཅིའི་དོན་དུ་སླར་ཡང་དེ་བརྗོད་ཅེ་ན། གང་གི་དོན་དུ་ཡིན་པ་དེ་ཕྱི་མར་གསལ་བར་བྱེད་པར་འགྱུར་རོ། །འཁྲུལ་དང་ཀུན་རྫོབ་ཡོད་ཤེས་དང་། །ཞེས་པ་ལ་སོགས་པ་ལ། འདིས་ནི་མངོན་སུམ་ལྟར་སྣང་རྣམ་པ་བཞིར་གསུངས་སོ། །དེ་ལ་འཁྲུལ་
[27b.3]པའི་ཤེས་པ་ཞེས་པ་འདིས་དོན་གཞན་རྟོག་པའི་ཤེས་པ་ཅི་རེ་ཞིག་གསུངས་སོ། །དེ་ལྟར་ནི་ཆུ་ལ་སོགས་པ་དོན་གཞན་མེད་པ་ཁོ་ན་བརྡ་ལ་བརྟེན་པ་ལས། སྨིག་རྒྱུ་ལ་སོགས་པ་རྣམས་ལ་སྒྲོ་འདོགས་པར་བྱེད་ཅིང་རྟོག་པ་སྐྱེའོ། །ཀུན་རྫོབ་ཏུ་ཡོད་པ་རྣམས་ལ་ཞེས་པ་ལ་སོགས་པས།
[27b.4]བརྡ་ལ་བརྟེན་ནས་སྒྲོ་འདོགས་པ་རྟོག་པའི་འཇུག་པ་གཉིས་པའོ། །ཡང་ཀུན་རྫོབ་ཏུ་ཡོད་པ་རྣམས་ལ་གང་ཤེས་པ་དེ་མངོན་སུམ་ལྟར་སྣང་ངོ་ཞེས་པའི་ཅིའི་རྒྱུས་ཤེ་ན། གསུངས་པ། དོན་གཞན་སྒྲོ་འདོགས་པ་ལས་ཞེས་པ་སྟེ། དེ་ནི་བཏགས་པའི་དངོས་པོ་གཟུགས་ལ་སོགས་
[27b.5]པ་རྣམས་ལ་དོན་གཞན་དུ་གྱུར་པ་བུམ་པ་ལ་སོགས་པ་རྣམས་སྒྲོ་འདོགས་ཀྱི་བཏགས་པའི་དངོས་པོ་ཙམ་དུ་རྟོགས་པ་ཡང་མ་ཡིན་པས་སོ། །དེ་ཡང་ཅི་ལྟར་ཤེས་པར་བྱ་ཞེ་ན། གསུངས་པ། དེའི་ངོ་བོར་བཏགས་ནས་འཇུག་པ་ཉིད་ཀྱི་ཕྱིར་ཞེས་པ་སྟེ། དེ་ནི་ཀུན་རྫོབ་ཏུ་ཡོད་པ་དེ་རྣམས་
[27b.6]ལ་དོན་གཞན་ཉིད་དུ་རྟོག་པ་སྐྱེ་སྟེ། སྒྲོ་བཏགས་པའི་དོན་གྱི་རྣམ་པར་བརྟགས་པས་འཇུག་པ་ཉིད་ཀྱི་ཕྱིར་ཀུན་རྫོབ་ཏུ་ཡོད་པའི་ཤེས་པ་ནི་བུམ་པ་ལ་སོགས་པ་རྣམས་སུ་སྒྲོ་འདོགས་པར་བྱེད་ཀྱི། དེ་བཏགས་པའི་དངོས་པོ་ཙམ་དུ་རྟོགས་པར་བྱེད་པ་ནི་མ་ཡིན་ནོ། །དེ་ལ་རེ་ཞིག་གཟུགས་
[27b.7]ལ་སོགས་པ་ཆུ་འཛིན་པ་ལ་སོགས་པའི་འབྲས་བུ་གཅིག་པ་ཉིད་ཀྱིས་དེ་ལས་གཞན་རྣམས་ལས་ཐ་དད་པ་ལན་ཅིག་ལ་བརྗོད་པ་རྣམས་ལ་རང་གི་འབྲས་བུ་ལ་ཉེ་བར་སྦྱོར་བའི་དོན་དུ་དེ་ལ་འཇིག་རྟེན་གྱི་སྒྲའི་བརྡ་གང་ཡིན་པ་དེ་རྟེན་དུ་བྱས་ནས། དོན་གཞན་པའི་བུམ་པ་ལ་སོགས་པ་དང་བྲལ་བ་རྣམས་ལ་
[28a]
[28a.1]ཡང་གཟུགས་ལ་སོགས་པ་རྣམས་ལ་དངོས་པོའི་དོན་གཞན་སྒྲོ་འདོགས་པའི་རྟོག་པ་བུམ་པའོ། །སྣམ་བུའོ་ཞེས་པ་ལ་སོགས་པ་རབ་ཏུ་འཇུག་གོ། །དེ་བཞིན་དུ་ཚོགས་པ་ལ་སོགས་པ་རྣམ་པར་གཅོད་པའི་འབྲས་བུ་ཅན་གྱི་སྒྲར་ཞེན་པ་ལ་བརྟེན་པས་གཅིག་ཉིད་ལ་སོགས་པར་
[28a.2]ཞེན་པའོ། །དེ་བཞིན་དུ་ཡུལ་གཞན་དུ་སྐྱེ་བ་རྣམས་དང་། དེ་བཞིན་དུ་ཡོད་པ་རྣམས་ལ་དང་། དེ་བཞིན་དུ་མང་པོ་འབྲས་བུ་གཅིག་པའི་ཚོགས་པ་རྣམས་ལ་དང་། དེ་བཞིན་དུ་བར་མེད་པ་ཉིད་ལ་སོགས་པའི་གནས་སྐབས་རྣམས་ལ། དེ་ལྟར་གྱུར་པ་མ་ཡིན་པར་རྣམ་པར་གཅད་པའི་ཆེད་དུ་སྒྲའི་བརྡ་
[28a.3]བཏགས་པ་ལ་བརྟེན་ནས་དོན་གཞན་དུ་གྱུར་པའི་ལས་དང་། ཡོད་པ་ཉིད་དང་བུམ་པ་ཉིད་ལ་སོགས་པ་དང་། ལྡན་པ་ལ་སོགས་པར་རིམ་པ་ཇི་ལྟ་བར་སྒྲོ་འདོགས་པའི་རྟོག་པ་ཉེ་བར་སྐྱེའོ། །དེ་ལྟར་རབ་ཏུ་དབྱེ་བ་ལས་སྒྲའི་རྟོག་པ་ཁོ་ན་བརྡ་ཙམ་ལ་བརྟེན་པ་འདི་ནི་རྟོག་པའི་ཤེས་པ་གཉིས་པའོ། །
[28a.4]སྨིག་རྒྱུ་ལ་སོགས་པ་རྣམས་ལ་གང་ཆུ་ལ་སོགས་པའི་རྟོག་པ་དེ་ནི། གང་གིས་བརྡ་ལ་བརྟེན་པ་ཁོ་ནའི་ནང་དུ་འདུས་པའི་ཕྱིར་འདི་ལོགས་སུ་བརྗོད་པར་མི་འགྱུར་བ་ཆུ་མ་ཡིན་པ་རྣམ་པར་གཅད་པའི་ཆེད་དུ་ཆུར་བྱས་པའི་བརྡ་ཙམ་ལ་བརྟེན་ནས་རབ་ཏུ་འཇུག་པ་མ་ཡིན་གྱི། འོ་ན་ཅི་ཞེ་ན། དེར་
[28a.5]འབྱུང་བ་འདུས་པ་ལ་བརྡ་ལ་བརྟེན་པ་ལས་ཡོད་པ་མ་ཡིན་པ་ཁོ་ནའི་ཆུ་ལ་སོགས་པ་སྔར་མཐོང་བའི་དོན་གཞན་ཁོ་ན་སྒྲོ་འདོགས་པ་སྐྱེ་སྟེ། དེ་ཉིད་ཀྱི་ཕྱིར་གསུངས་པ་ཆུ་ལ་སོགས་པའི་རྟོག་པ་འཇུག་པ་ཉིད་ཀྱི་ཕྱིར་ཞེས་པའོ། །བུམ་པ་ལ་སོགས་པ་རྣམས་ནི་རང་གི་ཉེ་བར་ལེན་པ་ལས་གཞན་ཡོད་
[28a.6]པ་མ་ཡིན་པ་ཁོ་ནའོ། །བརྡ་ཙམ་གྱི་རྒྱུ་མཚན་ཅན་ཁོ་ན་དེར་སྒྲོ་འདོགས་པའི་རྟོག་པའོ་ཞེས་པ་སྔ་མ་ལས་ཐ་དད་པར་བརྗོད་དོ། །རྗེས་སུ་དཔག་པ་དང་དེའི་འབྲས་བུ་ལ་སོགས་པའི་ཤེས་པ་ཞེས་པ་སྟེ། འདིས་རྗེས་སུ་དཔག་པར་བྱ་བས་རྗེས་སུ་དཔག་པ་སྟེ་རྟགས་སོ། །དེ་ལ་དེ་ཁོ་ན་དུ་བ་འདིའོ་
[28a.7]ཞེས་འབྲེལ་པའི་དུས་སུ་ཉམས་སུ་མྱོང་བའི་དོན་གྱི་རྟོག་པ་འཇུག་པ་ནི་ཤེས་པའོ། །དེའི་འབྲས་བུ་རྟགས་ཅན་གྱི་ཤེས་པ་ལ་ཡང་སྔར་ཉམས་སུ་མྱོང་བའི་རྟོག་པ་ཡོད་དེ། དེ་ཁོ་ན་འདིར་མེའོ་ཞེས་རྗེས་སུ་དཔོག་པའི་ཕྱིར་རོ། །དྲན་པ་ལ་ཡང་སྔར་ཉམས་སུ་མྱོང་བའི་རྣམ་པ་ཅན་གྱི་རྟོག་པ་སྟེ།
[28b]
[28b.1]འདི་ལྟར་དེ་བདག་གིས་མྱོང་ངོ་ཞེས་པའོ། །མངོན་པར་འདོད་པ་ཅན་ཡང་སྔར་མྱོང་བའི་རྟོག་པ་ལས་མ་འདས་ཏེ། དེ་མེད་ན་མངོན་པར་འདོད་པ་མེད་པའི་ཕྱིར་རོ། །སོགས་པའི་སྒྲས་ཐེ་ཚོམ་གྱི་ཤེས་པ་བཟུང་སྟེ། དེ་ལ་ཡང་ཅི་དེ་ཁོ་ན་འདིའམ་འོན་ཏེ་གཞན་ཡིན་ཞེས་པ་འདི་ལྟ་བུའི་རྣམ་པ་
[28b.2]ཅན་སྔར་མྱོང་བའི་རྟོག་པ་སྐྱེའོ་ཞེས་པ་འདི་ནི་སྔར་མྱོང་བའི་དོན་ཅན་རྟོག་པའི་ཤེས་པ་གསུམ་པའོ། །རབ་རིབ་བཅས་ཞེས་པ་འདིས་དབང་པོ་ལ་ཉེ་བར་གནོད་པ་ལས་སྐྱེས་པ་རབ་རིབ་ལ་སོགས་པའི་ཤེས་པ་མངོན་སུམ་ལྟར་སྣང་བ་བཞི་པ་གསུངས་སོ་ཞེས་པའོ། །དེ་ལ་རྟོག་པའི་ཤེས་པ་སྔ་
[28b.3]མ་གཉིས་དག་ནི་མངོན་སུམ་མ་ཡིན་ནོ་ཞེས་བཤད་པའི་དོན་དུ་གསུངས་སོ། །གང་གིས་དེ་བཟློག་པའི་ཆེད་དུ་འཆད་པར་བྱ་བ་སླར་ཡང་དེ་དག་མངོན་སུམ་དུ་དོགས་པ་ཅི་ལས་ཤེ་ན། དེ་དག་ནི་མངོན་སུམ་ཉེ་བར་འཇུག་པ་དག་སྟེ། དེའི་ཕྱིར་སྐྱེ་བའི་དུས་ཀྱི་རྣམ་པར་དབྱེ་བ་ཕྲ་མོ་རྟོགས་
[28b.4]པར་དཀའ་བ་ཉིད་ཀྱི་ཕྱིར་ཉེ་བར་མཚོན་པ་མེད་པ་ལས་འདི་དག་མངོན་སུམ་ཁོ་ན་དག་གོ་ཞེས་ཁ་ཅིག་འདོད་པར་འགྱུར་ཞིང་། འགའ་ཞིག་རྣམས་ཀྱིས་ལོག་པར་རྟོགས་པ་མཐོང་བ་ཡང་སྟེ། དཔེར་ན་བུམ་པ་ལ་སོགས་པ་ཀུན་རྫོབ་ཏུ་ཡོད་པ་རྣམས་ལ་ཤེས་པ་དང་། སྨིག་རྒྱུ་ལ་སོགས་པ་རྣམས་
[28b.5]ལ་ཆུ་ལ་སོགས་པའི་ཤེས་པ་ནི་མངོན་སུམ་ཁོ་ནའོ་ཞེས་པ་ལྟ་བུའོ། །དེ་ལྟར་ནི་སྨིག་རྒྱུ་ལ་སོགས་པ་ལ་ཆུ་ལ་སོགས་པའི་ཤེས་པ་དེ་ཁོ་ན་རྣམ་པར་གཅད་པའི་ཆེད་དུ་མ་འཁྲུལ་པ་ཞེས་མངོན་སུམ་གྱི་མཚན་ཉིད་ལ་ཁྱད་པར་ཉེ་བར་བྱས་པས་སོ། །དེ་ནི་དབང་པོ་ལ་ཉེ་བར་གནོད་པ་ལས་སྐྱེས་
[28b.6]པའི་ཤེས་པ་བཟློག་པའི་དོན་དུའོ་ཞེ་ན། མ་ཡིན་ཏེ། དོན་དང་ཕྲད་པ་འཛིན་པ་ཁོ་ན་ལས་དོན་མེད་པ་ལས་བྱུང་བ་ཟླ་བ་གཉིས་ལ་སོགས་པའི་ཤེས་པ་བཟློག་པའི་ཕྱིར་རོ། །གཞན་དུ་ན་དབང་པོ་ལས་སྐྱེས་པ་ཤེས་པ་ཉིད་བརྗོད་པར་བྱ་བར་འགྱུར་རོ། །རྗེས་སུ་དཔག་པ་ལ་སོགས་པའི་
[28b.7]ཤེས་པ་ནི། ཇི་ལྟར་སྔར་ཉམས་སུ་མྱོང་བའི་བརྡ་དྲན་པའི་སྟོབས་ལས་འཇུག་པ་དང་མངོན་སུམ་མ་ཡིན་པའང་ཡིན་པར་གྲུབ་པ་ཁོ་ནའོ་ཞེས་པའོ། །དེ་མངོན་སུམ་མ་ཡིན་པར་གྲུབ་ནའང་གང་འདིར་ཉེ་བར་བླངས་པ་དེ་ནི་རྟོགས་པའི་ཤེས་པ་སྔ་མ་དག་དེ་ཁོ་ན་མངོན་སུམ་མ་ཡིན་པ་ཉིད་དུ་སྒྲུབ་པའི་
[29a]
[29a.1]ཆེད་དུ་སྟེ། གང་སྔར་ཉམས་སུ་མྱོང་བའི་བརྡ་དྲན་པའི་སྟོབས་ལས་བྱུང་བའི་ངང་ཅན་དེ་མངོན་སུམ་མ་ཡིན་ཏེ། དཔེར་ན་རྗེས་སུ་དཔག་པ་ལ་སོགས་པའི་ཤེས་པ་འདི་བཞིན་ཤེས་པ་སྔ་མ་དག་ཀྱང་དེ་ལྟ་བུའོ། །ཁྱབ་བྱེད་དང་འགལ་བའོ། །དེ་ལྟར་རྟོག་པའི་
[29a.2]ཤེས་པ་རྣམ་པ་གསུམ་ཁོ་ན་སྟེ། མཚན་ཉིད་ཀྱི་ཚིག་གི་དོན་གྱིས་གོ་བས་བསལ་བའོ། །མངོན་སུམ་ལྟར་སྣང་བ་བཞི་པ་གང་དེ་ནི་འདིར་དམིགས་ཀྱིས་བསལ་བར་བལྟ་བར་བྱའི་མཚན་ཉིད་ཀྱི་ཚིག་གི་དོན་གྱིས་གོ་བས་བསལ་བའི་དཔེར་བརྗོད་པ་ནི་མ་ཡིན་ནོ། །གཞན་དུ་ན་
[29a.3]མཚན་ཉིད་འཁྲུལ་པར་འགྱུར་རོ། །དེའི་ཕྱིར་དམིགས་ཀྱིས་བསལ་བའི་ཚིག་དེས་ཕྱི་དང་ནང་གི་ཉེ་བར་གནོད་པའི་རྐྱེན་གྱིས་བཅོམ་པའི་དབང་པོའི་ཤེས་པ་རྟོག་པ་དང་བྲལ་བ་ཉིད་ནའང་མངོན་སུམ་ལྟར་སྣང་བར་བརྗོད་དོ། །རབ་རིབ་བཅས་ཞེས་པ་འདིར། རབ་རིབ་ནི་དབང་པོ་ཉེ་བར་
[29a.4]བཅོམ་པའི་རྐྱེན་ཐམས་ཅད་ཉེ་བར་མཚོན་པ་ཙམ་དུ་བལྟ་བར་བྱའོ་ལོ། །གང་ཞིག་ཟླ་བ་གཉིས་ལ་སོགས་པའི་ཤེས་པ་དབང་པོ་ལས་སྐྱེས་པ་མ་ཡིན་པ་ཁོ་ན་སྟེ་འོན་ཀྱང་ཡིད་ཀྱི་ཁོ་ནའོ་ཞེས་སྨྲའོ། །དེས་ན་བརྗོད་པར་བྱ་སྟེ། དབང་པོ་ལས་སྐྱེས་པའི་མཚན་ཉིད་ཅི་ཡིན་ཞེས་པའོ། །དབང་པོ་ཡོད་པ་
[29a.5]དང་མེད་པའི་རྗེས་སུ་བྱེད་པའོ་ཞེ་ན། དེ་འདི་ལ་ཡང་མཚུངས་སོ། །དེ་རྣམ་པར་འགྱུར་བས་རྣམ་པར་འགྱུར་བ་ཅན་ཉིད་དོ་ཞེ་ན། འདིར་ཡང་དེ་ཁོ་ན་ལན་ཡིན་ནོ། །གཞན་ཡང་སྦྲུལ་ལ་སོགས་པའི་འཁྲུལ་པ་བཞིན་དུ་འདི་འདོད་པས་ལྡོག་པར་འགྱུར་ཏེ། རྟོག་པ་འདི་ནི་སོ་སོར་བརྟགས་པའི་སྟོབས་
[29a.6]ཀྱིས་བཟློག་པར་ནུས་པས་སོ། །གཞན་ཡང་དབང་པོ་རྣམ་པར་འགྱུར་བ་ཅན་གྱི་རྣམ་པར་འགྱུར་བ་ལྡོག་པ་ན་ཡང་བརྟགས་པ་ལས་མི་ལྡོག་པར་འགྱུར་ན། དེ་ལྟར་ཡང་མ་ཡིན་ནོ། །དེའི་ཕྱིར་འདིར་ཡང་དབང་པོ་ལས་བྱུང་བ་ཁོ་ནའོ། །སློབ་དཔོན་གྱིས་གསུངས་པ་ཡང་། དེ་རྣམས་ནི་དོན་དམ་པར་
[29a.7]རྣམ་པ་གཞན་དུ་ཡོད་པ་རྣམས་ནི་ཟླ་བ་གཉིས་ལ་སོགས་པར་སྣང་བ་དང་སྔོན་པོ་ལ་སོགས་པར་སྣང་བའི་ཤེས་པའི་རྒྱུར་འགྱུར་རོ་ཞེས་སོ། །འདི་ལ་མངོན་པར་ཞེན་པར་བྱ་བ་མ་ཡིན་ནོ། །གང་གི་ཕྱིར་དེ་ལྟར་དབང་པོ་ལས་སྐྱེས་ཀྱང་བསླད་པ་ཡང་ཡོད་དོ། །དེའི་ཕྱིར་འཁྲུལ་པ་ཞེས་པ་ལ་སོགས་པས་
[29b]
[29b.1]བཤད་ཟིན་པའི་རྣམ་པར་རྟོག་པའི་སྡེ་ཚན་ཞེས་བྱ་བའི་ཡི་གེས་རྣམ་པར་གཅད་པ་ལས་ལོགས་སུ་རྣམ་པར་རྟོག་པ་མེད་པ་མངོན་སུམ་ལྟར་སྣང་བ་རབ་རིབ་བཅས་ཞེས་པས་སློབ་དཔོན་གྱིས་གསུངས་སོ། །འདིར་བརྩད་པར་བྱ་སྟེ་འདིར་སླུ་བ་མེད་པ་ལ་འཇུག་པར་བྱེད་པའི་ཤེས་པ་ནི་ཚད་མར་མངོན་པར་
[29b.2]འདོད་དེ། འདི་དག་གིས་དོན་ཡོངས་སུ་བཅད་ནས་འཇུག་པ་ནི་དོན་བྱ་བ་ལ་སླུ་བ་མེད་པས་སོ་ཞེས་གསུངས་པའི་ཕྱིར། དབང་པོ་ཉེ་བར་བཅོམ་པ་ལས་སྐྱེས་པའི་རྣམ་པར་ཤེས་པ་ལ་ཅིག་ཀྱང་ཡང་དག་པར་འདོད་པ་འགའ་ཞིག་ལ་སླུ་བ་མེད་པ་དང་རབ་ཏུ་འཇུག་པར་བྱེད་པ་ཉིད་ཀྱང་ཡོད་པ་ཁོ་
[29b.3]ནའོ། །དེའི་ཕྱིར་གང་འདི་སྐྲ་ཤད་ལ་སོགས་པར་སྣང་བ་རབ་རིབ་ལ་སོགས་པའི་ཤེས་པ་ནི་གང་གི་ཡང་དག་པར་འདོད་པ་སྐྲ་ཤད་ལ་སོགས་པའི་དངོས་པོ་ལ་སླུ་བ་མེད་ཅིང་དེ་ཚད་མ་ཉིད་དུ་མི་འགྱུར་མོད། གང་འདི་མིག་སེར་གྱིས་ཉེ་བར་བསླད་པའི་མིག་ཅན་གྱིས་དུང་དཀར་པོ་ལ་སོགས་པ་
[29b.4]དུང་སེར་པོ་ལ་སོགས་པར་སྣང་བ་དང་། གང་ཡང་ཡུན་རིང་དུ་རབ་རིབ་ཀྱིས་མིག་བསྒྲིབས་པ་ཉིད་ཀྱི་ཕྱིར་རམ་ཐག་རིང་བ་ཉིད་ཀྱི་ཕྱིར་གསལ་བའི་སྔོན་པོ་ལ་སོགས་པ་རྣམས་ལ་མིག་གསལ་བའི་སྔོན་པོ་ལ་སོགས་པའི་རྣམ་པ་དང་། གང་ཡང་གྲུ་དང་བཞོན་པ་བསྐྱོད་པས་བྱས་པའི་འཁྲུལ་པ་ཤིང་
[29b.5]སྡོང་ལ་སོགས་པ་གནས་པ་རྣམས་ལ་ཡང་འགྲོ་བའི་བྱ་བ་དང་ལྡན་པའི་རྐང་འཐུང་ལ་སོགས་པར་སྣང་བ་དང་འདི་ལྟ་བུའི་རྣམ་པ་གཞན་ཡང་། དེ་མ་ཡིན་པ་ལ་དེར་འཛིན་པའི་ཕྱིར། འཁྲུལ་པ་དེ་ཡང་དངོས་པོ་ལ་འབྲེལ་པ་ལས་འདོད་པའི་དོན་ལ་མི་སླུ་བའི་ཕྱིར་འགའ་ཞིག་ལ་ཚད་མ་ཉིད་དུ་
[29b.6]དྲང་བར་བྱའོ། །དེ་ལྟར་ནི་དེ་ལས་རབ་ཏུ་འཇུག་པ་ནི་གེགས་མེད་ན་ངེས་པར་དུང་ལ་སོགས་པའི་དངོས་པོ་ཙམ་ལས་འོངས་པའི་དོན་བྱ་བ་ནུས་པའི་དོན་མངོན་པར་འདོད་པ་སྒྲུབ་པར་བྱེད་དོ། །འོན་ཏེ་འདི་རྣམས་སླུ་བ་མེད་ཀྱང་ལོག་པར་སྣང་བ་ཉིད་ཀྱི་ཕྱིར་ཚད་མ་ཉིད་དུ་མི་འདོད་ན། དེ་ལྟ་ན་རྗེས་སུ་
[29b.7]དཔག་པ་ཡང་དེ་ཉིད་ཀྱི་ཕྱིར་མི་འདོད་པར་བྱས་ན། མི་འདོད་པ་ཡང་མ་ཡིན་ནོ། །དེའི་ཕྱིར་དེ་རྣམས་ཀྱང་ཡང་དག་པར་འདོད་པའི་དོན་བྱ་བ་ནུས་པ་དུང་ལ་སོགས་པའི་དངོས་པོ་ཙམ་ལ་གང་དུ་མི་བསླུ་བ་དེ་ལ་ཚད་མ་ཉིད་དུ་མི་འགལ་བར་མཐོང་ཞིང་། སྨྲ་བར་ཡང་ནུས་ཏེ། ཤེས་པ་གང་ལ་རབ་ཏུ་
[30a]
[30a.1]ཞུགས་པའི་སྐྱེས་བུས་གེགས་མེད་ན་ངེས་པར་མངོན་པར་འདོད་པའི་དོན་སྒྲུབ་པ་དེ་དེ་ལ་དེའི་ཚད་མ་སྟེ། དཔེར་ན་མངོན་པར་འདོད་པའི་མངོན་སུམ་དང་རྗེས་སུ་དཔག་པ་བཞིན་ཇི་སྐད་བཤད་པའི་ཤེས་པ་ལས་རབ་ཏུ་ཞུགས་པའི་སྐྱེས་བུ་ཡང་གེགས་མེད་ན་ངེས་པར་མངོན་པར་
[30a.2]འདོད་པ་དུང་ལ་སོགས་པའི་དངོས་པོ་ཙམ་སྒྲུབ་པར་བྱེད་དོ་ཞེས་པ་རང་བཞིན་ནོ། །འདི་ཡང་རྗེས་སུ་དཔག་པ་མ་ཡིན་ཏེ། རྟགས་ལས་མ་སྐྱེས་པ་ཉིད་ཀྱི་ཕྱིར་དང་རྣམ་པར་རྟོག་པ་མེད་པ་ཉིད་ཀྱི་ཕྱིར་རོ། །ཚད་མ་གསུམ་པ་འདོད་པ་ཡང་མ་ཡིན་ཏེ། དེའི་ཕྱིར་མངོན་སུམ་ཁོ་ནའོ་ཞེས་ཁས་བླང་
[30a.3]བར་བྱའོ། །གང་རྟོག་པ་དང་བྲལ་ཞིང་འདོད་པའི་དོན་ལ་མི་བསླུ་བ་དེ་ནི་མངོན་སུམ་སྟེ། དཔེར་ན་མངོན་པར་འདོད་པའི་མངོན་སུམ་བཞིན། སྐབས་ཀྱི་ཤེས་པའང་དེ་ལྟ་བུའོ། །རང་བཞིན་ནོ། །འདི་འགྱུར་མོད་དུང་ལ་སོགས་པ་ཙམ་གྱི་དངོས་པོ་འདོད་པར་བྱས་པ་ལ་མི་བསླུ་བའི་ཕྱིར་དེ་ཁོ་ན་
[30a.4]ལ་དེ་མངོན་སུམ་ཉིད་དུ་འདོད་ཀྱི་སེར་པོ་ལ་སོགས་པའི་རྣམ་པ་དང་ལྡན་པའི་ཁྱད་པར་ལ་ནི་སླུ་བ་མེད་པར་མི་འདོད་དོ་ཞེས་པ་དེ་ལྟ་ན་རབ་རིབ་བཅས་ཞེས་པ་དམིགས་བསལ་གྱི་ཚིག་འདིས་ཕྱི་དང་ནང་གི་ཉེར་གནོད་ཀྱི་རྐྱེན་ཅན་དབང་པོ་ཉེ་བར་བཅོམ་པའི་ཤེས་པ་རྟོག་པ་དང་བྲལ་བ་ཉིད་ན་ཡང་མངོན་སུམ་
[30a.5]ལྟར་སྣང་བར་གསུངས་པ་དང་། རབ་རིབ་བཅས་ཞེས་པའི་ཚིག་དེར་རབ་རིབ་ནི་དབང་པོ་ལ་ཉེ་བར་གནོད་པའི་རྐྱེན་ཅན་ཐམས་ཅད་ཉེ་བར་མཚོན་པ་ཙམ་འབའ་ཞིག་གོ་ཞེས་པ་འདི་ལྟར་བཤད་པར་བྱ་བ་མ་ཡིན་ཏེ། དབང་པོ་ལ་ཉེ་བར་གནོད་པའི་ཤེས་པ་ཡང་འགའ་ཞིག་ཁ་ཅིག་ཏུ་མངོན་སུམ་ཡིན་
[30a.6]པ་ཉིད་ཀྱི་ཕྱིར་རོ། །མ་འཁྲུལ་པ་ཞེས་པའི་ཁྱད་པར་ཡང་བྱ་བ་མ་ཡིན་ཏེ། འཁྲུལ་པ་ཡང་འགའ་ཞིག་ཀྱང་འགའ་ཞིག་ཏུ་མངོན་སུམ་ཉིད་དུ་འདོད་པའི་ཕྱིར་རོ་ཞེ་ན། དེའི་ཕྱིར་རབ་རིབ་བཅས་ཞེས་པ་དམིགས་བསལ་གྱི་ཚིག་འདི་རྣམ་པ་གཞན་དུ་བཤད་པར་བྱ་སྟེ། རབ་རིབ་ཀྱི་སྒྲ་འདི་ནི་
[30a.7]འདིར་མི་ཤེས་པ་རྗོད་པར་བྱེད་པ་སྟེ། དཔེར་ན། དམན་རྣམས་རབ་རིབ་ཀྱིས་བཅོམ་པ། །ཞེས་པ་ལ་སོགས་པའི་ངག་ལ་བཞིན་ནོ། །རབ་རིབ་ལ་ཡོད་པ་ནི་རབ་རིབ་ཅན་ཏེ། ངག་ནི་རྣམ་པར་གཅོད་པའི་འབྲས་བུ་ཅན་ཉིད་ཀྱི་ཕྱིར་ངག་ཐམས་ཅད་ངེས་པར་གཟུང་བ་དང་བཅས་པའི་ཞེས་པས་རབ་རིབ་ཁོ་ན་
[30b]
[30b.1]ལ་ཡོད་པ་ཞེས་ངེས་པར་གཟུང་བ་དང་བཅས་པའི་ངག་གི་དོན་ལ་དེ་ཕན་དུ་འགྱུར་རོ། །ཡང་འདི་སླུ་བ་ཅི་ཞེ་ན། དེ་གལ་ཏེ་འགྱུར་ན་མི་ཤེས་པ་ཁོ་ན་ལ་འགྱུར་གྱི། ཤེས་པ་ལ་མ་ཡིན་ཏེ། དེ་མཐའ་གཅིག་ཏུ་མི་སླུ་བ་ཉིད་ཀྱི་ཕྱིར་རོ། །འདི་ནི་འཇིག་རྟེན་ན་ཤིན་ཏུ་གྲགས་པ་ཡང་ཡིན་ནོ། །རབ་རིབ་དེ་
[30b.2]དང་ལྷན་ཅིག་འཇུག་གོ་ཞེས་པ་ནི་རབ་རིབ་བཅས་པ་སྟེ་སླུ་བ་ཅན་ནོ་ཞེས་པའི་བར་རོ། །རྣམ་པར་རྟོག་པ་དང་བཅས་པའི་སླུ་བ་ཅན་ཡང་འཁྲུལ་པ་ལ་སོགས་པའི་སྒྲས་ཉེ་བར་བླངས་པའི་ཕྱིར། འདི་རྣམ་པར་རྟོག་པ་མེད་པར་རྟོགས་པར་བྱའོ། །དྲན་དང་མངོན་པར་འདོད་པ་ཡང་། །ཞེས་པའི་ཡང་གི་སྒྲ་འདི་
[30b.3]ཡང་བསྡུ་བའི་དོན་དང་རིམ་པ་ཐ་དད་པ་སྟེ། རབ་རིབ་བཅས་པ་ཡང་ཞེས་པ་འདི་ལྟར་བལྟ་བར་བྱའོ། །དེས་ན་དོན་འདིར་འགྱུར་ཏེ་སླུ་བའི་ཤེས་པ་ནི་མངོན་སུམ་ལྟར་སྣང་བའོ་ཞེས་པ་སྟེ། དེ་ལྟ་ན་འཁྲུལ་པ་རྣམ་པར་རྟོག་པ་མེད་པ་ཡང་གང་ལ་མི་བསླུ་བ་དེར་མངོན་སུམ་ཉིད་ཡིན་ལ། གང་ལ་སླུ་
[30b.4]བ་དེར་ནི་དེ་ལྟར་སྣང་བ་ཉིད་དོ་ཞེས་པ་འདི་གྲུབ་པར་འགྱུར་རོ། །དེ་ལྟར་གྱུར་ན་འགལ་བ་ཅི་ཡང་མེད་དོ། །རྟོག་པའི་ཤེས་པ་བཞིན་ཏེ། ཇི་ལྟར་རྟོག་པའི་ཤེས་པ་ནི་རང་ཉིད་རྟོག་པ་ལ་ལྟོས་ནས་མངོན་སུམ་ཉིད་དང་། ཕྱི་རོལ་གྱི་ཡུལ་ལ་ལྟོས་པས་དེ་ལྟར་སྣང་བ་ཉིད་མི་འགལ་བ་དེ་བཞིན་དུ་
[30b.5]ཇི་སྐད་བཤད་པའི་ཤེས་པ་ཡང་ཡུལ་གྱི་དབྱེ་བ་ལ་ལྟོས་པས་དེ་གཉིས་ཀའོ་ཞེས་པའོ། །འདིར་ཡང་ཞེས་པ་ཁོ་བོའི་འདོད་པར་རོ། །བྱ་དང་བཅས་པར་རྟོགས་པའི་ཕྱིར། །ཞེས་པ་བྱ་བ་དང་ལྷན་ཅིག་རྟོགས་པ་ཉིད་ཀྱི་ཕྱིར་རོ་ཞེས་པའི་དོན་ནོ། །འདི་ནི་ཚད་མ་ཉིད་དུ་ཉེ་བར་འདོགས་པའི་རྒྱུའོ། །
[30b.6]ཚད་མ་འབྲས་བུ་ཁོ་ནར་ཡོད། །ཅེས་པ་ཚད་མའི་རྟོགས་པ་ནི་འབྲས་བུའོ། །དེ་ཡང་རང་ཉིད་ཁོ་ན་སྟེ། དེའི་བདག་ཉིད་དོ་ཞེས་པའོ། །དེའི་ཕྱིར་ཐ་དད་པ་མེད་དོ། །འདི་ལ་ཕྱི་རོལ་པ་རྣམས་ཀྱི་བཞིན་དུ་ཚད་མ་ལས་འབྲས་བུ་དོན་གཞན་མེད་ཅེས་པ། འདིར་ཡང་དེ་དང་འདྲ་བ་ཁོ་ནའི་སྐྱོན་དུ་མ་
[30b.7]གྱུར་ཅིག་པའོ། །དེ་ཁོ་ནའི་ཞེས་པ་ལ་སོགས་པས་དོན་འདི་གསལ་བར་བྱས་ཏེ། རྣམ་པར་གནས་པའི་རང་བཞིན་གྱི་བསྒྲུབ་བྱའམ། སྒྲུབ་བྱེད་ཅུང་ཟད་ཀྱང་ཡོད་པ་མ་ཡིན་པ་ཁོ་ན་སྟེ། ཐམས་ཅད་དུ་བསྒྲུབ་བྱ་སྒྲུབ་བྱེད་ཀྱི་ཐ་སྙད་ནི་རྟོགས་པའི་ངོ་བོ་ལས་མ་འདས་པ་ཉིད་ཀྱི་ཕྱིར་རོ། །འདིར་
[31a]
[31a.1]ཡང་ཡོད་དེ། ཤེས་པ་ནི་ལྷག་པར་རྟོགས་པའི་ངོ་བོ་ཡིན་པ་ཉིད་ཀྱི་ཕྱིར་ན་བསྒྲུབ་པར་བྱ་བ་ཉིད་ཀྱི་རྟོགས་པའོ་ཞེས་པ་འབྲས་བུ་ཉིད་དུ་ཉེ་བར་གདགས་པར་བྱའོ། །དེ་ཁོ་ནའི་འང་ཡུལ་གྱི་རྣམ་པ་ཡོངས་སུ་འཛིན་པ་ལས་དང་། བྱ་བ་དང་བཅས་པར་རྟོགས་པ་ཞེས་
[31a.2]པས་ཚད་མ་ཉིད་དུ་ཉེ་བར་གདགས་ཏེ་ཐ་སྙད་དུ་བྱའོ་ཞེས་པའི་དོན་ཏོ། །དེ་ལྟར་ནི་ཤེས་པ་དེ་ཡུལ་གྱི་རྣམ་པ་ཉིད་འཛིན་པ་ནི་བྱ་བ་མེད་པར་གྱུར་ཀྱང་གང་རང་གི་ཡུལ་ལ་རྟོགས་པའི་བདག་ཉིད་ཀྱི་བྱ་བས་བརྗོད་ཀྱི་རྣམ་པ་གཞན་དུ་མ་ཡིན་ནོ། །དེའི་ཕྱིར་དེའི་བདག་ཉིད་དུ་གྱུར་པའི་ཡུལ་གྱི་རྣམ་པ་
[31a.3]ཉིད་དེ་ཁོ་ན་ཚད་མའོ་ཞེས་པའོ། །འདི་ནི་རིགས་པ་ཡང་ཡིན་ཏེ། དེ་ལྟར་ནི། བྱ་བ་སྒྲུབ་པར་བྱེད་པ་ཞེས་པ་ཁོ་ནས། བྱ་བ་ཐམས་ཅད་ཀྱི་ཐམས་ཅད་སྒྲུབ་པར་བྱེད་པའམ། བྱ་བ་ཐམས་ཅད་ནི་ཐམས་ཅད་ཀྱི་བསྒྲུབ་པར་བྱ་བ་མ་ཡིན་ཏེ། ཐུག་པ་མེད་པར་ཐལ་བའི་ཕྱིར་རོ། །འོ་ན་ཅི་ཞེ་ན། གང་
[31a.4]ཞིག་སྒྲུབ་བྱེད་གང་ལས་བར་མ་ཆོད་པར་རབ་ཏུ་འགྲུབ་པར་འགྱུར་བའི་བྱ་བ་དེའི་དེ་སྒྲུབ་པར་བྱེད་པ་ཡིན་ཞེ་ན། བྱ་བ་དེ་ཁོ་ན་ཡང་དེའི་བསྒྲུབ་བྱ་སྟེ། དེ་ལ་གཟུགས་ལ་སོགས་པའི་ལས་ལ་ཉམས་སུ་མྱོང་བའི་བདག་ཉིད་དུ་འདྲ་བའི་བདག་ཉིད་ཅན་གྱི་ཤེས་པ་ནི་གང་གིས་འདི་ནི་སྔོན་པོའི་ཤེས་
[31a.5]པའོ། །འདི་ནི་སེར་པོའིའོ་ཞེས་རྣམ་པར་འབྱེད་པས་རྣམ་པར་གཞག་པར་བྱ་བའི་བྱེད་པར་གྱུར་པའི་རང་བཞིན་དེས་འབྱུང་བར་བྱ་སྟེ། རྣམ་པ་གཞན་དུ་ན་ཤེས་པ་ཐམས་ཅད་དོན་ཐམས་ཅད་ཀྱིར་འགྱུར་བའམ་ཡང་ན་འགའ་ཞིག་ཀྱང་འགའ་ཞིག་གིར་མི་འགྱུར་ཏེ། བྱེ་བྲག་མེད་པའི་ཕྱིར་རོ། །
[31a.6]དངོས་པོ་ལ་སོགས་པའི་མི་གསལ་བ་ཉིད་ལ་སོགས་པ་ཐ་དད་པ་ནི་ངེས་པར་བྱེད་པའོ་ཞེ་ན་མ་ཡིན་ཏེ། དེ་ནི་ཤེས་པ་མ་ཡིན་པའི་རང་བཞིན་ཡིན་པ་ཉིད་ཀྱི་ཕྱིར་དང་། ཤེས་པ་ཐམས་ཅད་ཀྱི་རྒྱུ་ཡིན་པ་ཉིད་ཀྱི་ཕྱིར་རོ། །ཕྲད་པ་ཡང་མ་ཡིན་ཏེ། འདི་ཉིད་ཁོ་ནའི་ཕྱིར་རོ། །དོན་ལ་ལྟ་བ་ཡང་
[31a.7]མ་ཡིན་ཏེ། ཡུལ་དང་འདྲ་བ་མེད་ན་ནི་དོན་ལ་ལྟ་བ་ཁོ་ན་མི་འགྲུབ་པའི་ཕྱིར་རོ་ཁྱད་པར་གྱིས་ཤེས་པ་ཡང་དེ་ཁོ་ན་ཉིད་ཀྱི་ཕྱིར་རོ། །དེའི་ཕྱིར་གང་ཞིག་གང་ལས་འདི་ནི་སྔོན་པོ་ཁོ་ནའི་རྟོགས་པའོ། །སེར་པོ་ཁོ་ནའིའོ་ཞེས་པ་ལ་སོགས་པའི་ངེས་པ་དེ་དོན་དང་འདྲ་བ་ལས་གཞན་ལས་འགྲུབ་
[31b]
[31b.1]པ་མ་ཡིན་ནོ། །དེའི་ཕྱིར་དེ་ཁོ་ན་དོན་རྟོགས་པའི་སྒྲུབ་པར་བྱེད་པའོ། །བྱེད་པ་པོ་ཐམས་ཅད་ཉེ་བར་སྦྱོར་ན་ཡང་དོན་འདིའི་རྟོགས་པ་འདིའོ་ཞེས་པའི་འབྲེལ་པ་ནི་དེ་ཁོ་ན་ལས་བར་མ་ཆད་པར་འགྲུབ་པའི་ཕྱིར་རོ། །དེ་ཡང་དེའི་སྒྲུབ་པར་བྱེད་པ་ཉིད་ནི་རྣམ་པར་གཞག་པའི་རྟེན་ཡིན་པ་ཉིད་ཀྱིས་ཡིན་གྱི།
[31b.2]འགྲུབ་པར་བྱེད་པ་ཉིད་ཀྱིས་ནི་མ་ཡིན་ཏེ། ཐ་དད་པ་མེད་པའི་ཕྱིར་རོ། །དེ་ལྟར་འགྱུར་མོད། དངོས་པོར་ན་ཐ་དད་པ་མེད་པ་ཤེས་པའི་ཆ་དག་གཅིག་ཉིད་ཡིན་ན་གང་བྱ་བ་དེ་ཁོ་ན་བྱེད་པ་པོ་ཡིན་པ་དེའི་ཕྱིར་འདི་འགལ་བའོ་ཞེ་ན་དེ་མི་བདེན་ཏེ། གང་གི་ཕྱིར་དངོས་པོར་ན་ཐ་མི་དད་ན་ཡང་།
[31b.3]གང་འདི་ཆོས་ཐ་དད་པ་གཞལ་བྱའི་ཚུལ་ཉིད་དང་དོན་རྟོགས་པ་ཞེས་པ་དེ་ན་ཁས་བླང་བར་བྱ་བ་ཁོ་ན་སྟེ། ལྡོག་པ་ཐ་དད་པ་ཉེ་བར་བཏགས་པའི་ཕྱིར་དང་། དངོས་པོ་ལ་ཐ་དད་པ་མེད་ན་ཡང་རྣམ་པར་ཤེས་པའི་སྣང་བ་ཐ་དད་པས་བསྒྲུབ་བྱ་དང་སྒྲུབ་བྱེད་རྣམ་པར་གཞག་པ་བསྟན་པའི་ཕྱིར་རོ། །
[31b.4]དཔེར་ན་འཐུང་བར་བྱེད་བཞིན་པའི་སྦྲང་འཐུང་ངོ་། །བདག་ཉིད་ཀྱིས་བདག་ཉིད་འཛིན་དུ་འཇུག་གོ། །བློས་འཛིན་ནོ་ཞེས་པ་ལྟ་བུ་སྟེ། འདི་ནི་དངོས་པོ་ལ་ངེས་པར་གནས་པའི་བསྒྲུབ་བྱ་དང་སྒྲུབ་བྱེད་ཀྱི་ཐ་སྙད་མ་ཡིན་ནོ་ཞེས་པས་རྩོད་པ་འདི་མེད་དོ། །ཇི་ལྟ་བའི་བྱ་བ་མེད་ཀྱང་དེ་དང་ལྡན་པ་
[31b.5]ཉིད་དུ་སྣང་བར་འགྱུར་བ་ཅི་ལྟར་ཞེ་ན་གསུངས་པ། དཔེར་ན་ཞེས་པ་ལ་སོགས་པའོ། །འདིར་སྔོན་པོ་ལ་སོགས་པའི་རྣམ་པ་གཅིག་ཁོ་ན་ཉམས་སུ་མྱོང་ལ། དེ་རྣམ་པར་ཤེས་པའི་བདག་ཉིད་དུ་གྱུར་པར་ངེས་པར་ཁས་བླང་བར་བྱ་སྟེ། གཞན་དུ་ན་དེ་དོན་དང་འབྲེལ་པར་མི་འགྱུར་རོ། །དེ་
[31b.6]ལས་ཐ་དད་པ་དེའི་རྣམ་པའམ་དེའི་རྣམ་པ་མ་ཡིན་པ་ཕྱི་རོལ་གྱི་དངོས་པོ་ཉེ་བར་དམིགས་པ་ཡང་མ་ཡིན་ནོ། །དམིགས་པ་འཐད་པ་ཡང་མ་ཡིན་ཏེ། ཅི་ལྟར་མི་འཐད་ཅེ་ན། ཇི་ལྟར་འཐད་པ་མ་ཡིན་པ་དེ་ལྟར་རྩོད་པ་སྒྲུབ་པ་རྟག་པར་འཆད་པར་འགྱུར་རོ། །གང་ཡང་འདི་ལྟར་རྟོག་པར་བྱེད་དེ། རྒྱུ་
[31b.7]གཞན་རྣམས་ཡོད་པ་ན་ཡང་འབྲས་བུ་ཤེས་པ་མི་སྐྱེ་བས་ནི་རྒྱུ་གཞན་གསལ་བར་བྱེད་དེ། དེ་ཕྱི་རོལ་གྱི་དོན་དུ་འགྱུར་རོ། །དེའི་ཕྱིར་ལྡོག་པ་ལས་ཕྱི་རོལ་གྱི་དོན་འགྲུབ་པོ་ཞེས་པའོ། །དེ་ཡང་མི་རིགས་ཏེ། གང་གི་ཕྱིར་འབྲས་བུ་རྣམ་པར་ཤེས་པ་མི་འགྲུབ་པ་ནི་རྣམ་པར་ཤེས་པའི་བག་ཆགས་
[32a]
[32a.1]ཡོངས་སུ་སྨིན་པ་མ་ཚང་བ་ལས་ཀྱང་འགྱུར་རོ། །དེའི་ཕྱིར་རྣམ་པར་ཤེས་པ་ལས་ལོག་པའི་ཡང་དག་པར་མྱོང་བ་འགའ་ཡང་སྲིད་པ་མ་ཡིན་གྱི། རྣམ་པར་ཤེས་པ་ཁོ་ན་རང་རིག་པར་སྐྱེའོ་ཞེས་པས་རང་རིག་པ་ཁོ་ན་འབྲས་བུའོ། །ཕྱི་རོལ་གྱི་དོན་ཡོད་དུ་ཆུག་མོད།
[32a.2]དེ་ལྟ་ནའང་མྱོང་བ་ཇི་ལྟ་བ་བཞིན་ཁོ་ནར་ཡུལ་ངེས་སོ་ཞེས་པ་དེ་ཁོ་ན་འབྲས་བུར་རིགས་སོ། །གང་ལས་ཇི་ལྟར་འདི་རྣམ་པར་གནས་པའི་རང་གི་ངོ་བོ་དེ་ལྟར་ངེས་པར་ནུས་པ། རང་བཞིན་ཇི་ལྟ་བ་བཞིན་དུ་དོན་ཉམས་སུ་མྱོང་བ་ནི་མ་ཡིན་ཏེ། ཤེས་པ་རྣམས་ཐམས་ཅད་རྣམ་པ་གཅིག་ཏུ་ཐལ་བར་
[32a.3]འགྱུར་བའི་ཕྱིར་ཏེ། རྣམ་པར་རིག་པ་རྣམས་ནི་རྣམ་པ་དུ་མ་ཅན་རྣམས་སོ། །དེ་ལྟར་ནི་དངོས་པོ་གཅིག་ཁོ་ན་ལ་རྟོགས་པ་པོའི་བྱེ་བྲག་གིས་བསལ་བ་དང་གཞན་པ་ཉིད་ལ་སོགས་པའི་རྣམ་པ་རྣམས་དང་ལྡན་པའི་རྣམ་པར་ཤེས་པ་རྣམས་ཉེ་བར་དམིགས་ལ། དངོས་པོ་གཅིག་རྣམ་པ་དུ་མ་ཡང་མ་ཡིན་
[32a.4]ཏེ་དུ་མ་ཉིད་དུ་ཐལ་བར་འགྱུར་བའི་ཕྱིར་རོ། །དེའི་ཕྱིར་དོན་གྱི་རང་བཞིན་ཇི་ལྟ་བར་ངེས་པར་བྱ་བར་ནུས་པ་མ་ཡིན་ནོ་ཞེས་དགོངས་པས་ཕྱི་རོལ་དང་ཅིག་ཤོས་ཀྱི་ཕྱོགས་དག་ལ་མདོ་གཅིག་ཁོ་ནས་འབྲས་བུའི་ཁྱད་པར་རྣམ་པར་གཞག་པ་བྱེད་པར་བཞེད་པས་གསུངས་པ། ཡང་ན་རང་རིག་
[32a.5]འདིར་འབྲས་བུ་ཞེས་པ་སྟེ། སྔ་མར་ཡུལ་རིག་པ་འབྲས་བུར་གསུངས་ཏེ། དེའི་ཕྱིར་ཡང་ནའི་སྒྲ་ནི་རྣམ་པར་བརྟག་པའི་དོན་ཅན་ནོ། །འདིར་ཞེས་པ་ནི་སྔར་བཤད་པའི་མངོན་སུམ་ལའོ། །རང་གི་སྣང་བ་དང་ཡུལ་གྱི་སྣང་བའོ་ཞེས་པ། འདིའི་སྣང་བ་རང་ཉིད་དོ་ཞེས་པ་རང་གི་སྣང་བ་སྟེ།
[32a.6]རང་གི་ངོ་བོའི་སྣང་བ་དང་འཛིན་པའི་རྣམ་པ་ཞེས་པའི་དོན་ཏོ། །རང་གི་ངོ་བོ་ཁོ་ན་ཤེས་པ་འདིའི་སྣང་བ་སྟེ། གང་གི་ཕྱིར་ཤེས་པ་ཡི་ནི་ཤེས་པའི་ངོ་བོ་ཉིད་གང་ཡིན་པ་ངོ་བོ་དེ་རང་ཉིད་ཁོ་ནས་སྣང་ངོ་ཞེས་བྱས་ནས་སོ། །ཡུལ་གྱི་སྣང་བ་ཞེས་པ་འདིར། གང་གི་ཚེ་ཕྱི་རོལ་གྱི་ཡུལ་ལ་བརྟེན་པ་དེའི་ཚེ་
[32a.7]ཡུལ་ལྟ་བུར་སྣང་བ་འདིའོ་ཞེས་ཚིག་རྣམ་པར་སྦྱར་ཞིང་། གང་གི་ཚེ་མི་བརྟན་པ་དེའི་ཚེ་ནི་ཡུལ་འདིའི་སྣང་བའོ་ཞེས་སོ། །ཡུལ་ནི་འདིར་གཟུང་བྱའི་ཆ་སྟེ། དེ་ལ་ཡུལ་དུ་ཐ་སྙད་བྱས་པའི་ཕྱིར་རོ། །དེའི་ཞེས་པ་ལ་སོགས་པ་སྟེ། ཕྱི་རོལ་གྱི་དོན་ཡོད་དམ་མེད་ན་ཡང་རུང་སྟེ། གཉིས་
[32b]
[32b.1]སྣང་བ་ཅན་གྱི་ཤེས་པ་ཉམས་སུ་མྱོང་ལ། དེའི་གང་རང་རིག་པ་རང་ཉམས་སུ་མྱོང་བ་དེ་འབྲས་བུར་འགྱུར་རོ། །ཅིའི་ཕྱིར་ཞེ་ན་ཞེས་པ་རིགས་པ་ཅིས་ཏེ། རང་རིག་པ་སྲིད་པའོ་ཞེས་པ་ཁོ་ནས་འབྲས་བུ་ཉིད་དུ་བརྟག་པར་རིགས་པ་ནི་མ་ཡིན་ཏེ། ཕྱི་རོལ་གྱི་དོན་གྱི་ཕྱོགས་ལ་ནི་འདི་མི་སྲིད་དོ། །
[32b.2]གང་གི་ཕྱིར་ཡུལ་རྟོགས་པའི་ཕྱིར་དུ་ནི་མིག་ལ་སོགས་པ་རྣམས་ཀྱི་བྱ་བ་ཡོད་ཀྱི་རྣམ་པར་ཤེས་པ་ནི་མ་ཡིན་པས་སོ། །རྣམ་པར་ཤེས་པ་ཉེ་བར་དམིགས་པ་ཁོ་ན་ཡུལ་ཉེ་བར་དམིགས་པ་ཡང་མ་ཡིན་ཏེ། རྣམ་པར་ཤེས་པ་ལས་ཡུལ་ཐ་དད་པའི་ཕྱིར་རོ། །དེའི་ཕྱིར་རང་རིག་པ་འབྲས་
[32b.3]བུ་ཉིད་དུ་མི་འཐད་དོ་ཞེས་སེམས་པའི་དྲི་བའོ། །དེ་ཡི་ངོ་བོས་དོན་ངེས་ཕྱིར། །ཞེས་པ་རྒྱུའོ། །གང་གི་ཚེ་ནི་ཞེས་པ་ལ་སོགས་པ་ནི་འདི་ཁོ་ནའི་རྣམ་པར་བཤད་པ་སྟེ། ནིའི་སྒྲ་ནི་གང་གི་ཕྱིར་གྱི་དོན་ལའོ། །གང་གི་ཕྱིར་གང་གི་ཚེ་ཡུལ་དང་བཅས་པའི་ཤེས་པ་དོན་ཡིན་པ་
[32b.4]དེའི་ཚེ་རང་རིག་པ་དང་རྗེས་སུ་མཐུན་པའི་དོན་འདོད་པའམ་མི་འདོད་པ་རྟོགས་པ་པོས་རྟོགས་པར་བྱེད་དེ། དེའི་ཕྱིར་རང་རིག་པ་འབྲས་བུར་རིགས་སོ། །ཡུལ་དང་བཅས་པ་ཞེས་པ་ཡུལ་དང་ལྷན་ཅིག་པ་ནི་ཡུལ་དང་བཅས་པའོ། །དེ་ལ་ཤེས་བྱ་ནང་གི་ཕྱོགས་ལ་གཟུང་བྱའི་ཆ་ཤས་
[32b.5]ཀྱི་མཚན་ཉིད་ཅན་གྱི་ཡུལ་གྱིས་ཡུལ་དང་བཅས་པ་སྟེ། དེ་ཁོ་ན་ལ་ཡུལ་དུ་རྣམ་པར་གཞག་པའི་ཕྱིར་རོ། །ཕྱི་རོལ་གྱི་དོན་གྱི་ཕྱོགས་ལ་ནི་ཕྱི་རོལ་གྱི་དང་ངོ་། །དེ་ལ་རྣམ་པར་རིག་པ་ཙམ་ཉིད་ལ་ནི་རྣམ་པར་ཤེས་པ་ལས་ཐ་དད་པའི་དངོས་པོ་མེད་པའི་ཕྱིར། བློ་ཁོ་ན་གང་གི་ཚེ་འདོད་པར་
[32b.6]རང་གི་རྣམ་པ་ཉམས་སུ་མྱོང་བ་དེའི་ཚེ་དོན་འདོད་པར་ངེས་པར་བྱེད་ལ། བཟློག་པ་ལས་ནི་བཟློག་པར་འགྱུར་རོ། །ཅི་ལྟར་ཤེས་པ་བདག་ཉིད་ཀྱིས་བདག་ཉིད་ཉམས་སུ་མྱོང་། དེ་ཁོ་ན་ལ་ལས་དང་བྱེད་པ་པོ་དང་བྱེད་པའི་དངོས་པོ་རིགས་པ་མ་ཡིན་པའི་ཕྱིར་རོ་ཞེ་ན། འདི་ནི་འདི་ལྟ་བུ་སྟེ། དོན་
[32b.7]དམ་པར་ན་དེ་ལ་སོགས་པའི་དངོས་པོ་མེད་པ་ཁོ་ནའོ། །དེ་ལྟ་ན་ཡང་དེའི་བདག་ཉིད་ཀྱི་ཕྱིར་རབ་ཏུ་གསལ་བ་བཞིན་དུ། དེ་ལ་དེ་ལྟར་ཐ་སྙད་བྱེད་པ་མི་འགལ་ཏེ། རབ་ཏུ་གསལ་བ་ནི་བདག་ཉིད་རབ་ཏུ་གསལ་བ་སྒྲོན་མ་གཞན་ལ་ལྟོས་པ་མ་ཡིན་ལ། དངོས་པོར་ན་བདག་ཉིད་རབ་ཏུ་གསལ་
[33a]
[33a.1]བར་བྱེད་པ་ཡང་མ་ཡིན་གྱི། རབ་ཏུ་གསལ་བའི་བདག་ཉིད་དུ་སྐྱེ་བཞིན་པ་ལ་བདག་ཉིད་རབ་ཏུ་གསལ་བར་བྱེད་པའོ་ཞེས་བརྗོད་པ་འབའ་ཞིག་གོ། །དེ་བཞིན་དུ་མྱོང་བའི་བདག་ཉིད་དུ་སྐྱེ་བཞིན་པའི་བློ་ནི་བདག་ཉིད་རབ་ཏུ་གསལ་བར་བྱེད་པ་ཞེས་ཐ་སྙད་དུ་བྱའོ། །
[33a.2]ཕྱི་རོལ་གྱི་ཕྱོགས་ལ་ཡང་མྱོང་བ་ཇི་ལྟ་བ་བཞིན་ཁོ་ནར་དོན་རྟོགས་ཀྱི་དོན་ཇི་ལྟ་བ་བཞིན་མྱོང་བ་ནི་མ་ཡིན་ནོ་ཞེས་སྔར་ཁོ་ནར་བཤད་ཟིན་ཏོ། །འོ་ན་རང་རིག་པ་དང་རྗེས་སུ་མཐུན་པར་འདོད་པའམ་མི་འདོད་པའི་དོན་རྟོགས་པར་བྱེད་ཅེས་པ་འདི་ཙམ་གྱིས་མི་བརྗོད་པར་གང་གི་ཚེ་ཤེས་པ་ཡུལ་དང་བཅས་པ་
[33a.3]དོན་ཡིན་པ་དེའི་ཚེ་ཞེས་པ་འདི་ཡིས་ཅི་ཞེ་ན་དགོས་པ་ཡོད་དེ། གང་གི་ཕྱིར་སྔར་རང་རིག་པ་ཚད་མར་བཤད་ལ། དེས་ཀྱང་ཤེས་པའི་རང་གི་ངོ་བོ་ཁོ་ན་རིག་པར་བྱ་བའོ་ཞེས་རང་རིག་པ་ནི་དེ་ཁོ་ནའི་འབྲས་བུ་ཞེས་གསལ་བར་ངེས་པར་བྱ་ཞིང་། དེ་ནས་ཀྱང་རང་རིག་པ་དང་རྗེས་སུ་མཐུན་པར་འདོད་པའམ་མི་
[33a.4]འདོད་པའི་དོན་རྟོགས་པར་བྱེད་དོ་ཞེས་པ་འདི་ཙམ་བརྗོད་པ་ན། རང་རིག་པའི་མངོན་སུམ་ཁོ་ནའི་དབང་དུ་བྱས་ནས་འདི་འབྲས་བུར་རྣམ་པར་གཞག་གོ་ཞེས་འགའ་ཞིག་དོགས་པར་འགྱུར་ལ། འདི་ནི་ཚད་མ་ཐམས་ཅད་ཀྱི་འབྲས་བུ་ཞེས་པའོ། །དེའི་ཕྱིར་དོགས་པ་བཟློག་པའི་དོན་དུ།
[33a.5]གང་གི་ཚེ་ནི་ཤེས་པ་ཡུལ་དང་བཅས་པ་དོན་ཞེས་གསུངས་སོ། །དོན་གྱི་སྒྲ་འདི་ཡང་གཞལ་བྱ་རྗོད་པར་བྱེད་པའོ། །ཡུལ་དང་བཅས་པ་ཞེས་པ་འདི་ཡང་མཐའ་དག་པ་ལ་མི་ཟད་པར་གྱུར་པའོ། །དེའི་ཕྱིར་འདི་སྐད་བཤད་པར་འགྱུར་ཏེ། གང་གི་ཚེ་ཤེས་པ་ཚད་མའི་གཞལ་བྱར་ལྟོས་པ་
[33a.6]དེའི་ཚེ་རང་རིག་པ་དང་རྗེས་སུ་མཐུན་པའི་དོན་རྟོགས་པར་བྱེད་དོ་ཞེས་པས་རང་རིག་པ་འབྲས་བུ་ཡིན་པ་འབའ་ཞིག་ཏུ་མ་ཟད་ཀྱི། འོན་ཀྱང་གང་གི་ཚེ་ཡང་ཡུལ་ཡིན་པ་དེའི་ཚེ་ཡང་ངོ་ཞེས་པའོ། །འདིར་ཕྱི་རོལ་གྱི་དོན་མེད་ན་རང་རིག་པ་འབྲས་བུར་རྣམ་པར་འཇོག་པ་ལ། འཛིན་པའི་རྣམ་པ་ཚད་
[33a.7]མ་ཉིད་དུ་འཆད་པར་འགྱུར་རོ། །དེ་ལས་ཀྱང་ཕྱི་རོལ་གྱི་དོན་གཞལ་བར་བྱ་བ་མེད་པ་ན་ཇི་ལྟར་རང་རིག་པ་འབྲས་བུར་རྣམ་པར་གཞག་པ་ལ་འཛིན་པའི་རྣམ་པ་ཚད་མར་འདོད་པ་དེ་ལྟར་ཕྱི་རོལ་གྱི་དོན་གཞལ་བར་བྱ་བ་ཡོད་པ་ལ་ཡང་འཛིན་པའི་རྣམ་པ་ཁོ་ན་ཚད་མའོ་ཞེས་དོགས་པར་འགྱུར་ཏེ། དེའི་
[33b]
[33b.1]ཕྱིར་དེ་བསལ་བའི་ཆེད་དུ་གསུངས་པ། གང་གི་ཚེ་ནི་ཞེས་པ་ལ་སོགས་པ་སྟེ། ཕྱི་རོལ་གཞལ་བྱ་ལ་རང་རིག་པ་འབྲས་བུར་འཇོག་པ་ན་ཡང་ཡུལ་གྱི་སྣང་བ་ཉིད་ཁོ་ན་ཤེས་པ་ཚད་མར་འདོད་ཀྱི། རྣམ་པར་རིག་པ་ཙམ་ཉིད་བཞིན་དུ་འཛིན་པའི་རྣམ་པ་ནི་མ་ཡིན་ནོ། །འོ་ན་གང་གི་ཚེ་ཕྱི་རོལ་གྱི་
[33b.2]དོན་གཞལ་བྱའོ་ཞེས་པའི་ཕྱོགས་དེའི་ཚེ་ཡང་འཛིན་པའི་རྣམ་པ་མངོན་པར་འདོད་པ་ཁོ་ན་མ་ཡིན་ནམ། དེ་ནི་རང་རིག་པར་བྱ་བ་ཉིད་ཀྱི་ཕྱིར་རོ། །དེ་ཅིའི་ཕྱིར་དེའི་ཚེ་ཚད་མ་ཉིད་དུ་རྣམ་པར་གཞག་པ་མ་ཡིན་ནོ་ཞེ་ན་གསུངས་པ། དེའི་ཚེ་ནི་ཤེས་པར་རིག་པར་བྱ་བ་ཡིན་ཡང་ཞེས་པ་ལ་སོགས་
[33b.3]པ་སྟེ། ཤེས་པ་ནི་རང་རིག་པར་བྱ་བའོ་ཞེས་ཚིག་རྣམ་པར་སྦྱར་རོ། །གལ་ཏེ་ཡང་རང་རིག་པར་བྱ་བའི་རང་གི་ངོ་བོ་དུས་ཐམས་ཅད་དུ་ཡོད་པ་དེ་ལྟ་ན་ཡང་དེ་ལ་མི་ལྟོས་པར་ཕྱི་རོལ་གཞལ་བར་བྱ་བ་ལ་ཤེས་པའི་ཡུལ་གྱི་སྣང་བ་ཉིད་ཁོ་ན་ཚད་མ་ཡིན་གྱི། རང་གི་སྣང་བ་ཉིད་ནི་མ་ཡིན་ཏེ།
[33b.4]ཕྱི་རོལ་གྱི་དོན་ལ་དེ་སྒྲུབ་པར་བྱེད་པ་ཉིད་དུ་མི་རིགས་པའི་ཕྱིར་རོ། །མི་རིགས་པ་ནི་གཞན་གྱི་དོན་ཅན་མ་ཡིན་པ་ཉིད་ཀྱི་ཕྱིར་ཏེ། འཛིན་པའི་རྣམ་པ་བདག་ཉིད་ཀྱི་ཡུལ་ཅན་ནི་ཅི་ལྟར་ཕྱི་རོལ་གྱི་དོན་ལ་ཚད་མར་འགྱུར། གཞན་གྱི་ཡུལ་ཅན་གཞན་ལ་ཚད་མ་ཉིད་དུ་རིགས་པ་ནི་མ་ཡིན་པས་
[33b.5]སོ། །གང་གི་ཕྱིར་ཞེས་པ་ལ་སོགས་པས་དེ་མཚན་མ་ཉིད་ལ་རྒྱུ་གསུངས་པ། གཞལ་བར་བྱ་ཞེས་པ་ངེས་པར་བྱ་བའོ། །ཇི་ལྟ་ཇི་ལྟར་ཞེས་པ་ལ་སོགས་པ་སྟེ། ཤེས་པ་ནི་ཤེས་བྱའི་རྣམ་པའི་དབང་གིས་ཕྱི་རོལ་གྱི་དོན་ངེས་པའོ་ཞེས་པའི་དོན་ནོ། །འདིར་ཡང་དཔེར་ན་དུ་བས་མེ་རྗེས་
[33b.6]སུ་དཔག་པར་བྱ་བའོ་ཞེས་བརྗོད་པ་ན་འདི་དངོས་སུ་དེའི་རྗེས་སུ་དཔག་པ་ཡང་མ་ཡིན་ནོ། །འོ་ན་ཅི་ཞེ་ན་དེའི་རྒྱུ་ཅན་གྱི་དུ་བའི་ཤེས་པས་ཡིན་པ་དེ་བཞིན་དུ། གལ་ཏེ་ཡང་། དོན་དེ་དེ་ཡིས་གཞལ་བར་བྱ། །ཞེས་བརྗོད་པ་དེ་ལྟ་ནའང་དེའི་སྒྲུབ་པར་བྱེད་པ་ཅན་རང་རིག་པས་ཞེས་རྟོགས་པར་
[33b.7]བྱའོ། །དེ་ལྟར་ནི་ཇི་ལྟ་ཇི་ལྟར་དོན་གྱི་རྣམ་པ་སྡུག་པ་དང་མི་སྡུག་པ་ལ་སོགས་པའི་ངོ་བོར་ཤེས་པ་ལ་ངེས་པར་གནས་པ་དེ་ལྟ་དེ་ལྟར་རང་རིག་པ་རྒྱས་པར་བྱེད་ལ། ཇི་ལྟ་ཇི་ལྟར་དེ་སྟོན་པ་དེ་ལྟ་དེ་ལྟར་སྡུག་པ་དང་མི་སྡུག་པ་ལ་སོགས་པའི་གཟུགས་ལ་སོགས་པའི་དོན་རྣམ་པར་ངེས་སོ། །གང་
[34a]
[34a.1]གི་ཕྱིར་གལ་ཏེ་དེའི་རྣམ་པར་སྐྱེས་པར་གྱུར་ན་དེའི་ཚེ་དེ་འདྲའི་བདག་ཉིད་ཀྱི་རང་རིག་པར་འགྱུར་ལ། དེ་ལས་ཀྱང་དེའི་དབང་ལས་ཡུལ་ངེས་པར་འགྱུར་གྱི་གཞན་དུ་ན་མ་ཡིན་ནོ། །དེའི་ཕྱིར་ཡུལ་གྱི་སྣང་བ་ཉིད་ཚད་མའོ། །འོ་ན་འདིར་ཡུལ་དང་འདྲ་བ་ཉིད་རང་རིག་པའི་ངོར་
[34a.2]སྒྲུབ་པར་བྱེད་པ་ཉིད་དུ་རྟོགས་པར་བྱེད་པར་འདོད་པ་མ་ཡིན་ནམ། དེའི་ཕྱིར། གང་གི་ཕྱིར་དེའི་དབང་ལས་དེ་སྟོན་ཏོ་ཞེས་བརྗོད་པར་བྱ་བ་ལ། ཅིའི་དོན་དུ་གང་གི་ཕྱིར། དོན་དེ་དེ་ཡིས་གཞལ་བར་བྱ། །ཞེས་བརྗོད་ཅེ་ན། དགོས་པ་ཡོད་དེ། རང་རིག་པ་དེ་ནི་དོན་རིག་པའི་བྱ་བ་གང་ཡིན་པ་དོན་
[34a.3]རྣམ་པར་ངེས་པ་དེ་བྱེད་དེ། དེའི་ཕྱིར་ཉེ་བར་བཏགས་པའི་དོན་རིག་པ་ཁོ་ནར་འབྲས་བུ་ལས་བལྟ་བར་བྱའོ་ཞེས་པའི་དོན་འདི་གསལ་བར་བྱ་བའི་ཆེད་དུ་དེ་སྐད་གསུངས་སོ། །དེ་ལྟར་ན་ནི་ཚད་མ་དང་འབྲས་བུ་དག་ཡུལ་ཐ་དད་པར་མི་འགྱུར་ཏེ། ཕྱི་རོལ་གང་ཁོ་ན་ལ་སྒྲུབ་པར་བྱེད་པ་ཡིན་པ་
[34a.4]དེ་ཁོ་ན་ལ་རང་རིག་པའོ་ཞེས་བྱས་ནས་སོ། །འོ་ན་རང་རིག་པ་འབྲས་བུ་ཅི་ལྟར་གསུངས་ཤེ་ན། དོན་དམ་པར་ཏེ། དེའི་བདག་ཉིད་ཀྱི་ཕྱིར་རང་རིག་པ་འབྲས་བུར་གསུངས་ལ། ཉེ་བར་བཏགས་པས་ནི་འབྲས་བུ་ལས་དོན་རིག་པ་ཁོ་ནར་དེ་བལྟ་བར་བྱའོ་ཞེས་པས་མི་འགལ་ལོ། །འདིར་རྣམ་
[34a.5]པར་རིག་པ་ཙམ་ཉིད་ལ་འཛིན་པའི་རྣམ་པ་ཚད་མ་དང་གཟུང་བྱའི་རྣམ་པ་གཞལ་བྱའོ་ཞེས་འཆད་པར་འགྱུར་ཏེ། དེའི་ཕྱིར་དེ་ལ་བརྩད་པ་དོགས་སོ། །དེ་ལ་འདི་ནི་རྩོད་པ་སྟེ། གང་གིས་ཕྱི་རོལ་གྱི་དོན་མེད་ན་ཡང་ཚད་མ་ལ་སོགས་པར་འགྱུར་བ་ཐ་དད་པ་མེད་པའི་བདག་ཉིད་ཀྱི་ཤེས་པའི་འཛིན་པའི་
[34a.6]རྣམ་པ་ལ་སོགས་པའི་རྣམ་པར་དབྱེ་བ་ཅི་ལྟར་ཡིན་ཞེ་ན། དེའི་ཕྱིར་དེའི་ལན་གདབ་པའི་ཆེད་དུ་གསུངས་པ། དེ་ལྟར་ཞེས་པ་ལ་སོགས་པ་སྟེ། འདི་ནི་འདིའི་བསྡུས་པའི་དོན་ཏེ་དེ་ཁོ་ན་ཉིད་དུ་དེའི་རྣམ་པར་དབྱེ་བ་ཡོད་པ་མ་ཡིན་པ་ཁོ་ནའོ། །མ་རིག་པས་ཉེ་བར་བསླད་པ་རྣམས་ཀྱིས། དེ་འཛིན་པའི་
[34a.7]རྣམ་པ་ལ་སོགས་པའི་རྣམ་པར་དབྱེ་བ་དང་ལྡན་པ་བཞིན་དུ་མཚོན་པ་འབའ་ཞིག་སྟེ། དེའི་ཕྱིར་ཇི་ལྟར་མཐོང་བ་བཞིན་དུ་ཚད་མ་དང་གཞལ་བྱ་རྣམ་པར་གཞག་པ་འདི་བྱའི། དེ་ཁོ་ན་ཉིད་ཇི་ལྟ་བ་བཞིན་དུ་ནི་མ་ཡིན་ནོ་ཞེས་པའོ། །རྣམ་པར་དབྱེ་བ་མེད་པར་གྱུར་པ་ཡང་ཅི་ལྟར་དེ་ལྟར་སྣང་ཞེ་ན། ཇི་ལྟར་
[34b]
[34b.1]སྔགས་ལ་སོགས་པས་དབང་པོ་ཉེ་བར་བསླད་པ་རྣམས་ཀྱིས་འཇིམ་པའི་དུམ་བུ་ལ་སོགས་པ་རྣམས་གླང་པོ་ཆེ་ལ་སོགས་པའི་གཟུགས་དང་བྲལ་བ་རྣམས་ཀྱང་གླང་པོ་ཆེ་ལ་སོགས་པའི་གཟུགས་རྣམས་སུ་སོ་སོར་སྣང་བ་དང་། ཇི་ལྟར་ཐག་རིང་པོར་མྱ་ངམ་རྣམས་ན་ཆུང་ངུའམ་ཆེན་པོར་སྣང་བ་དེ་ལྟ་མ་རིག་
[34b.2]པས་ལོང་བ་རྣམས་ཀྱི་ཤེས་པ་འདི་ཡང་དེ་ལྟར་གྱུར་པ་མ་ཡིན་པ་ཡང་དེ་ལྟར་སྣང་ངོ་། །སྔགས་ལ་སོགས་པའི་ནུས་པ་ལས་དེ་རྣམས་དེ་ལྟ་ཁོ་ནར་སྐྱེས་པའོ་ཞེས་བརྟག་པར་ནུས་པ་ཡང་མ་ཡིན་ཏེ། གང་གི་ཕྱིར་མཐོང་བ་མ་བསླད་པ་དེའི་ཡུལ་ཉེ་བ་ན་གནས་པ་རྣམས་ཀྱིས་དེ་ལྟར་མཐོང་བ་མེད་པས་
[34b.3]སོ། །དེ་ལྟར་ཞེས་པ་སྟེ། ཇི་སྐད་བཤད་པའི་སྣང་བ་གཉིས་པའི་ཤེས་པའོ་ཞེས་པའོ། །ཤེས་པའི་རིག་པ་ཞེས་པ། ཤེས་པ་ལས་སུ་གྱུར་པའི་རིག་པ་བསྟན་པའོ། །ཅིར་གྱུར་པ་ཞེ་ན། རྣམ་པ་དུ་མ་སྟེ། གང་གི་རྣམ་པ་དུ་མ་ཡིན་པ་དེ་དེ་སྐད་བཤད་དོ། །རྣམ་པ་དེ་རྣམས་ནི་གང་རྣམས་
[34b.4]འཁྲུལ་པ་འདིས་ངེས་པར་མཐོང་བ་འཛིན་པའི་སྣང་བ་ལ་སོགས་པ་དེ་རྣམས་བརྗོད་པར་འདོད་པའོ། །ཉེ་བར་བླངས་ནས་ཞེས་པ་དེ་ཚད་མའི་རྒྱུར་བཟུང་ནས་སོ། །དེ་ལྟ་དེ་ལྟར་ཞེས་པ་ལ་སོགས་པ་ལ། རེ་ཞིག་རྟོག་པ་མེད་པ་ལ། འཛིན་པའི་རྣམ་པར་རྟོག་པ་དང་བྲལ་བ་ནི་མངོན་སུམ་ཚད་མ་
[34b.5]སྟེ། གསལ་བར་སྣང་བ་གཟུང་བྱའི་རྣམ་པར་རང་གི་མཚན་ཉིད་གཞལ་བྱའོ། །རྟགས་ལས་སྐྱེས་པ་ལ་ཡང་འཛིན་པའི་རྣམ་པ་རྗེས་སུ་དཔག་པ་ནི་ཚད་མ་སྟེ། གསལ་བྱའི་བྱེ་བྲག་ལ་རྗེས་སུ་འགྲོ་བ་ལྟ་བུ་མི་གསལ་བར་སྣང་བ་གཟུང་བྱའི་རྣམ་པ་སྤྱིའི་མཚན་ཉིད་ནི་གཞལ་བྱའོ་ཞེས་པའོ། །
[34b.6]ཉེ་བར་གདགས་པར་བྱ་ཞེས་པ་ཐ་སྙད་དུ་བྱ་བའོ། །འདིས་འདི་གསལ་བར་བྱེད་དེ། འདི་ནི་ཐ་སྙད་པའི་ཚད་མ་དང་གཞལ་བྱའི་རང་གི་ངོ་བོ་བརྗོད་པ་སྟེ། འདི་ལ་ཡང་ལོག་པར་རྟོགས་པ་རྣམས་ཀྱི་ཀུན་དུ་རྨོངས་པ་བསལ་བའི་ཆེད་དུའོ། །འཇིག་རྟེན་ལས་འདས་པ་ཁོ་ན་ནི་རྣམ་པར་འཁྲུལ་པས་
[34b.7]དབེན་ཞིང་དྲི་མ་མེད་ལ་ཉམས་པ་མེད་པ་དོན་དམ་པ་པའི་ཚད་མ་སྟེ། དེ་ཁོ་ནའི་སྤྱོད་ཡུལ་ཡང་དག་པ་ནི་གཞལ་བྱའོ་ཞེས་པའོ། །ཆོས་ཐམས་ཅད་ནི་བྱ་བ་དང་བྲལ་བ་རྣམས་སོ་ཞེས་པ་སྟེ། འདིས་ནི་ཤེས་པའི་རིག་པ་དེ་འཁྲུལ་པ་ཉིད་དུ་གསལ་བར་བྱས་སོ། །དེ་ཁོ་ན་ཉིད་དུ་ཆོས་གང་ལ་
[35a]
[35a.1]ཡང་རྣམ་པ་གཅིག་མིན་པ་མཐོང་བའི་བདག་ཉིད་ཀྱི་ཐ་སྙད་སྲིད་པ་མ་ཡིན་ཏེ། རྣམ་པ་རྣམས་ཡོངས་སུ་མ་གྲུབ་པ་ཉིད་ཀྱི་ཕྱིར་རོ། །དེ་ནི་འཁྲུལ་པ་ཁོ་ན་སྟེ། མ་རིག་པས་ལོང་བ་རྣམས་ནི་གང་རིག་པར་བྱ་བ་དང་རིག་པར་བྱེད་པའི་རྣམ་པ་མེད་པའི་ཤེས་པ་ལ་ཡང་དེ་ལྟར་
[35a.2]ལྟའོ། །གལ་ཏེ་དེ་ལྟ་ན་དེ་ཁོ་ན་ཉིད་མི་ཤེས་པ་རྣམས་ཀྱི་ཤེས་པ་ཐམས་ཅད་ཉེ་བར་བསླད་པ་ཁོ་ན་ཡིན་ན། ཅི་ལྟར་ཚད་མ་དང་ཅིག་ཤོས་རྣམ་པར་གཞག་ཅེ་ན། ཉེ་བར་བསླད་པའི་བག་ཆགས་ཀྱི་ཁྱད་པར་ཡོད་པར་གྱུར་པ་ལས་ཏེ། གང་གི་ཕྱིར་ཆུ་ལ་སོགས་པར་སྣང་བའི་ཤེས་པ་ལས།
[35a.3]རེག་པ་དང་བཏུང་བ་དང་ངོམས་པ་ལ་སོགས་པའི་རྐྱེན་རྣམས་སྲིད་པ་ཐ་སྙད་ལ་མི་སླུ་བ་ལ་ལྟོས་པས་ཚད་མ་སྟེ། ཅིག་ཤོས་ནི་རྣམ་པ་དེ་ལྟ་བུའི་བག་ཆགས་དང་བྲལ་བའི་ཕྱིར་ཚད་མ་མ་ཡིན་པའོ་ཞེས་པ་སྐྱོན་མེད་དོ། །འོ་ན་གང་འདི་འབྲས་བུ་ལས་རྒྱུ་རྗེས་སུ་དཔོག་པ་དེ་ཅི་ལྟར་འགྱུར། ཅི་ལྟར་
[35a.4]མི་འགྱུར་ཞེ་ན། གང་གི་ཕྱིར་དུ་བར་སྣང་བའི་ཤེས་པ་སྔར་ཁོ་ནར་གསལ་བར་འགྱུར་ཞིང་། ཕྱིས་མེར་སྣང་བ་སྟེ། དེ་དུ་བར་སྣང་བའི་ཤེས་པ་ལས་སྔར་ཉམས་སུ་མྱོང་བ་ནི་མེད་དོ། །དེའི་ཕྱིར་དུ་བ་མེ་ལས་སྐྱེས་པ་ཁོ་ནར་འགྱུར་རོ་ཞེས་པས་ཅི་ལྟར་དེས་མེ་རྗེས་སུ་དཔོག་ཅེ་ན། སྐྱོན་འདི་ནི་མེད་
[35a.5]དེ། མེའི་རྣམ་པ་ཅན་གྱི་ཤེས་པ་སྐྱེད་པའི་བག་ཆགས་ཀྱི་ཁྱད་པར་དང་ལྡན་པ་ཁོ་ནའི་སེམས་ཀྱི་རྒྱུད་ནི་དུ་བར་སྣང་བའི་བློ་སྐྱེད་པར་བྱེད་ཀྱི། གང་ཅི་ཡང་རུང་བས་ནི་མ་ཡིན་ནོ། །དེའི་ཕྱིར་དེ་རྟོགས་པར་བྱེད་པའི་དུ་བའི་ཤེས་པ་ནི་རྟོགས་པ་པོའི་བག་ཆགས་གསལ་བར་སད་པ་ཅན་མེའི་རྣམ་པ་ཅན་གྱི་
[35a.6]བློ་འབྱུང་བར་འགྱུར་བར་གོ་བར་བྱེད་དོ། །འདིར་ནི་རྒྱུའི་ཆོས་རྗེས་སུ་དཔག་པ་སྟེ། རོ་ལ་སོགས་པ་ལས་གཟུགས་ལ་སོགས་པ་བཞིན་དུ་རྗེས་སུ་དཔོག་པར་འགྱུར་རོ་ཞེས་པས་བརྩད་པར་བྱ་བ་མ་ཡིན་ནོ། །སྨྲས་པ་ཡང་ཞེས་པ་ལ་སོགས་པས་གཞལ་བྱ་ལ་སོགས་པ་རྣམ་པར་གཞག་
[35a.7]པར་དེ་སྟོན་ཏོ་འདིའི་སྣང་བ་གང་ཡིན་པ་ཞེས་ཚིག་རྣམ་པར་སྦྱོར་རོ། །རང་གི་ཆ་ཤས་ཚད་མ་ཉིད་དུ་སྒྲུབ་པར་བྱེད་པའི་ཕྱིར། འདིར་ཡུལ་གྱི་སྣང་བ་གཟུང་བར་བྱའོ། །དེ་གཞལ་བྱ་ཞེས་པ་ཡུལ་གྱི་སྣང་བ་དེ་གཞལ་བྱའོ། །ཚད་མ་འབྲས་བུ་ཉིད་དག་ནི། །འཛིན་པའི་རྣམ་པར་རིག་པ་དག །
[35b]
[35b.1]ཅེས་པ་སྟེ། འཛིན་པའི་རྣམ་པ་ནི་ཚད་མ་ཉིད་དོ། །ཡང་དག་པར་རིག་པ་ནི་འབྲས་བུ་ཉིད་དོ། །འདིར་ཡང་གལ་ཏེ་ཡང་ཡང་དག་པར་རིག་པའི་སྒྲ་དབྱངས་ཤིན་ཏུ་ཉུང་བ་ཉིད་མོད་དེ་ལྟར་ན་ཡང་འཛིན་པའི་རྣམ་པ་ཚད་མ་ཉིད་ཡིན་པའི་ཕྱིར་དེ་ཡང་བྱེ་བྲག་ཏུ་རྟོགས་པར་བྱ་བ་ཉིད་ཀྱི་དབང་དུ་བྱས་པ་ཉིད་
[35b.2]ཀྱི་ཕྱིར་མཆོད་པར་འོས་པ་ཉིད་དོ། །དེའི་ཕྱིར་འཛིན་པའི་རྣམ་པའི་སྒྲ་ཁོ་ན་སྔ་མར་ངེས་པར་གཞག་གོ། །དེ་ཕྱིར་འདི་གསུམ་དབྱེ་མ་བྱས། །ཞེས་པ་གསུམ་ཀ་ཡང་དེ་ཁོ་ན་ཉིད་དུ་ཡོངས་སུ་མ་གྲུབ་པའི་ཕྱིར་ཤེས་པ་ལས་ལོགས་པར་བྱ་བ་མ་ཡིན་ནོ། །འདིར་ཚུལ་གཉིས་པ་ཉིད་ཁས་བླང་བར་བྱས་
[35b.3]ནས་རང་རིག་པ་ཉིད་འབྲས་བུར་བརྗོད་ན། ཤེས་པའི་ཚུལ་གཉིས་པ་དེ་ཉིད་ཀྱང་སྐྱེ་བ་མ་ཡིན་ཏེ། དེའི་འཐད་པ་མེད་པའི་དོན་ཕྱིར་རོ་ཞེས་བསམས་ནས་དྲིས་པ། ཅི་སྟེ་ཚུལ་གཉིས་པ་ཞེས་པ་ལ་སོགས་པའོ། །ཡང་ཅིའི་ཕྱིར་ཚུལ་གསུམ་པ་ཉིད་དྲི་བར་བྱ་བ་ལ་ཚུལ་གཉིས་པ་ཉིད་དྲིས་ཤེ་ན།
[35b.4]ཚུལ་གཉིས་པ་ཉིད་གྲུབ་ན་རང་རིག་པ་ཡང་འགྲུབ་བོ་ཞེས་དགོངས་པ་ལས་ཏེ། ཚུལ་གཉིས་པ་ཉིད་གྲུབ་ན་ནི་བདག་ཉིད་དུ་གྱུར་པའི་ཡུལ་དང་འདྲ་བ་ནི་ཤེས་པས་ཡང་དག་པར་རིག་པར་བྱ་བས་སོ་ཞེས་དོན་གྱིས་བདག་ཉིད་རིག་པ་འགྲུབ་བོ། །ཡུལ་ཤེས་པ་ལ་དེ་ཤེས་པའི། །ཁྱད་པར་
[35b.5]ལས་ནི་ཞེས་པ་ལ་སོགས་པ་སྟེ། ཡུལ་ཤེས་ནི་གཟུགས་ལ་སོགས་པ་འཛིན་པ་མིག་ལ་སོགས་པའི་རྣམ་པར་ཤེས་པའོ། །ཡུལ་གྱི་ཤེས་པ་ལ་དེ་ཤེས་པ་ནི་ཡུལ་ཤེས་པ་ལ་དེ་ཤེས་པ་ལའོ། །འདིར་གལ་ཏེ་དེའི་སྒྲས་ཡུལ་གྱི་ཤེས་པ་ལ་སྦྲེལ་ན། དེ་ཉེ་བར་བླངས་པ་དོན་མེད་པར་འགྱུར་ཏེ།
[35b.6]དེ་མེད་ཀྱང་ཡུལ་གྱི་ཤེས་པ་ལ་དམིགས་པའི་ཤེས་པ་རྟོགས་པའི་ཕྱིར་རོ། །དེའི་ཕྱིར་དེའི་སྒྲས་ཉེ་བར་བླངས་པའི་ཤུགས་ལས་ཡོན་ཏན་དུ་གྱུར་ཀྱང་ཡུལ་ལ་སྦྲེལ་བར་བྱ་སྟེ། དེ་ལས་གཞན་འདིར་སྐབས་སུ་བབ་པ་མ་ཡིན་པ་ཉིད་ཀྱི་ཕྱིར་རོ། །དེས་འདི་སྐད་བཤད་པར་འགྱུར་ཏེ། ཡུལ་གྱི་
[35b.7]ཤེས་པ་ལ་ཡུལ་གྱི་རྣམ་པ་ཤེས་པ་ཞེས་པ་སྟེ། དེ་ཁོ་ན་ཁྱད་པར་རོ། །དེ་ལྟར་ནི་དེ་ཡུལ་གྱི་ཤེས་པ་ལས་ལྷག་པ་ཡུལ་གྱི་རྣམ་པས་ཁྱད་པར་ཡོད་དེ། ཕ་རོལ་པོའི་བསམ་པས་དེ་ལྟར་གསུངས་པ་སྟེ། ཕ་རོལ་པོ་ནི་ཡུལ་གྱི་ཤེས་པ་ལ་ནི་ཉམས་སུ་མྱོང་བའི་རྣམ་པ་འབའ་ཞིག་འདོད་ལ།
[36a]
[36a.1]དེའི་ཤེས་པ་ལ་ནི་ཉམས་སུ་མྱོང་བའི་རྣམ་པའང་ཡོད་དོ། །འདིར་ཡང་བློའི་ཉམས་སུ་མྱོང་བའི་རྣམ་པ་ནི་གྲུབ་པ་ཉིད་ཀྱི་ཕྱིར་དེ་བསྒྲུབ་པར་བྱ་བ་མ་ཡིན་ཏེ། གང་ཤེས་པ་ནི་ཤེས་པའི་ངོ་བོར་འདོད་པ་མ་ཡིན་པའི་རྒོལ་བ་དེ་འགའ་ཡང་མེད་པས་སོ། །ཡུལ་གྱི་རྣམ་པ་ནི་ཕ་རོལ་པོ་ལ་མ་
[36a.2]གྲུབ་བོ་ཞེས་པ་དེས་ན་ཚུལ་གཉིས་ཉིད་བསྒྲུབ་པར་བྱའོ། །ཡུལ་ལ་ནི་ཞེས་པ་སྟེ། ནིའི་སྒྲ་ནི་ངེས་པར་འཛིན་པ་ལ་སྟེ། རིམ་པ་ཐ་དད་པ་ཡང་ངོ་། །དེ་དོན་དང་རང་སྣང་བའོ་ཞེས་པ་འདི་ནི་ཚད་མའི་འབྲས་བུ་སྟེ། དེ་ལ་དོན་སྣང་བ་ནི་ཡུལ་གྱི་རྣམ་པ་ཉིད་ཀྱི་ཕྱིར་རོ། །རང་སྣང་བ་ནི་ཉམས་
[36a.3]སུ་མྱོང་བའི་རྣམ་པ་ཉིད་ཀྱི་ཕྱིར་རོ། །ཡུལ་དང་རྗེས་སུ་མཐུན་པའི་ཤེས་པའི་སྣང་བ་ཞེས་པ། གཟུགས་ལ་སོགས་པའི་ཡུལ་གྱི་རྗེས་སུ་མཐུན་པའི་ཤེས་པ་ནི་ཡུལ་གྱི་ཤེས་པ་ཁོ་ན་ཡིན་ལ་དེ་སྣང་བ་སྟེ། ཡུལ་གྱི་རྣམ་པ་ཅན་གྱི་ཡུལ་ཤེས་པའི་རྣམ་པ་ཞེས་པའི་དོན་ཏོ། །འདིས་ཡུལ་གྱི་
[36a.4]རྣམ་པ་ཅན་གྱི་ཡུལ་ཤེས་པ་རང་གི་ཤེས་པས་དམིགས་སོ་ཞེས་པ་གཏན་ཚིགས་འདི་གསུངས་སོ། །ཤེས་པ་གང་ལ་དངོས་པོ་གང་རྣམ་པ་གང་གིས་སྣང་བ་དེ་རྣམ་པ་དེ་ཁོ་ནར་དེས་དམིགས་སོ་ཞེས་པ་འདི་ནི་རིགས་སོ། །དེ་ལྟར་ནི་ལྐོག་ཤལ་ལ་སོགས་པའི་རྣམ་པས། བ་ལང་ནི་རང་
[36a.5]གི་ཤེས་པ་ལ་སྣང་བཞིན་པ་དེའི་རྣམ་པ་ཁོ་ནར་དེས་དམིགས་སོ། །ཡུལ་ཤེས་པའི་ཤེས་པ་ལ་ཡང་ཡུལ་གྱི་རྣམ་པ་རྗེས་སུ་འབྲེལ་པའི་ཡུལ་གྱི་ཤེས་པའི་རྣམ་པ་ཉེ་བར་དམིགས་ཏེ། དེ་དང་བྲལ་བ་ནི་རྣམ་པ་གཞན་ཅུང་ཟད་ཀྱང་མ་ཡིན་ནོ། །སྣང་བ་མ་ཡིན་པ་ནི་དེའི་ཡུལ་དུ་རིགས་པ་ཡང་མ་
[36a.6]ཡིན་ཏེ། ཧ་ཅང་ཐལ་བའི་ཕྱིར་རོ། །དེའི་ཕྱིར་ཡུལ་གྱི་རྣམ་པ་ཅན་གྱི་ཡུལ་ཤེས་པ་རང་གི་ཤེས་པས་དམིགས་སོ་ཞེས་པས་གཏན་ཚིགས་ཀྱི་དོན་འདི་འཐོབ་བོ། །རང་སྣང་བའོ་ཞེས་པ་ཡུལ་གྱི་རྣམ་པ་ཅན་གྱི་ཡུལ་ཤེས་པའི་སྣང་བར་གྱུར་པ་ནི་རང་གི་ངོ་བོ་ཡང་སོ་སོར་སྣང་ངོ་ཞེས་པའི་དོན་ཏོ། །
[36a.7]རྣམ་པ་གཞན་དུ་ན་ཞེས་པ་ཚུལ་གཉིས་པ་ཉིད་མེད་ན་སྟེ་གལ་ཏེ་ཡུལ་གྱི་རྗེས་སུ་མཐུན་པ་ཁོ་ན་ཡུལ་གྱི་ཤེས་པར་འགྱུར་རོ་ཞེས་པ་ཡིན་ན་ཉམས་སུ་མྱོང་བའི་ངོ་བོ་འང་མ་ཡིན་ནོ། འོ་ན་ཡུལ་གཅིག་པུའི་ངོ་བོའི་ཤེས་པ་འདོད་པ་འགའ་ཡང་མེད་པ་མ་ཡིན་ནམ། དེ་ཅིའི་དོན་དུ་འདི་བརྗོད་ཅེ་ན་ཡུལ་
[36b]
[36b.1]གྱི་རྣམ་པ་ཅན་དུ་ཤེས་པ་བསྒྲུབ་པར་བྱ་བ་ན་ཁ་ཅིག་དོགས་པ་འདིར་འགྱུར་ཏེ། ཡུལ་གྱི་རྣམ་པ་ཅན་དུ་གལ་ཏེ་ཤེས་པ་བསྒྲུབ་པར་བྱ་ན་རང་གི་ངོ་བོ་ཡོངས་སུ་བོར་བས་བསྒྲུབ་པར་བྱའོ་ཞེས་པ་སྟེ། དེའི་ཕྱིར་དེ་བསལ་བའི་དོན་དུ། རང་གི་ངོ་བོ་མ་བཏང་བ་ཁོ་ནར་དེ་ཡུལ་གྱི་རྣམ་པའི་རྗེས་
[36b.2]སུ་བྱེད་དོ་ཞེས་བསྟན་པའི་དོན་དུ་འདི་གསུངས་སོ། །ཡང་ན་རང་གི་ངོ་བོ་ཞེས་པ། ཡང་ན་ཉམས་སུ་མྱོང་བའི་རྣམ་པ་ཁོ་ན་སྟེ། ཡུལ་གྱི་རྣམ་པ་ཅན་ཡང་མ་ཡིན་པའོ། །ཤེས་པའི་ཤེས་པ་ཡང་ཡུལ་ཤེས་པས་ཁྱད་པར་དུ་མ་བྱས་པར་འགྱུར་རོ་ཞེས་པ། ཤེས་པའི་ཤེས་པ་ནི་ཡུལ་
[36b.3]ཤེས་པ་ལ་དམིགས་པའི་ཤེས་པ་སྟེ། དེ་ཡུལ་གྱི་ཤེས་པས་ཁྱད་པར་དུ་མ་བྱས་པ་སྟེ་ཁྱད་པར་དུ་བྱས་པ་མ་ཡིན་པར་འགྱུར་རོ། །ཡུལ་གྱི་རྗེས་སུ་བྱེད་པ་དང་འབྲེལ་པའི་ཡུལ་གྱི་ཤེས་པའི་རྣམ་པ་ཉིད་ཀྱི་ཁྱད་པར་གྱིས་ཁྱད་པར་དུ་བྱས་པར་སྐྱེ་བར་མི་འགྱུར་རོ་ཞེས་པའི་དོན་ཏོ། །གལ་ཏེ་
[36b.4]དམིགས་པས་ནི་བདག་གི་བའི་རྣམ་པ་དང་ལྡན་པའི་རང་གི་ཤེས་པ་སྐྱེད་པར་བྱེད་ཅེས་པ་འདི་ཡོད་ན། དེའི་ཚེ་ཡུལ་གྱི་ཤེས་པ་ལས་སྐྱེ་བཞིན་པའི་ཤེས་པའི་སྐད་བཤད་པའི་རྣམ་པས་ཁྱད་པར་དུ་བྱས་པར་འགྱུར་རོ། །འདི་མེད་ན་ནི་ཇི་ལྟར་ཡུལ་གྱིས་རང་གི་ཤེས་པ་ཁྱད་པར་དུ་མི་བྱེད་དེ།
[36b.5]རང་དང་འདྲ་བའི་ཁྱད་པར་གྱིས་ཁྱད་པར་དུ་བྱས་པར་མི་བསྐྱེད་པ་དེ་བཞིན་དུ་ཡུལ་ཤེས་པས་ཀྱང་རང་གི་ཤེས་པ་ཁྱད་པར་དུ་མི་བྱེད་པར་འགྱུར་བ་ལས། ཁྱད་པར་དུ་བྱེད་པ་ཡང་ཡིན་ནོ། །དེའི་ཕྱིར་ཡུལ་གྱི་ཤེས་པ་ལ་ཡང་ཡུལ་གྱི་རྣམ་པ་ཡོད་དོ། །གང་ཞིག་གང་གི་རྣམ་པ་ཅན་དུ་རང་གི་ཤེས་
[36b.6]པས་དམིགས་པ་དེ་དེའི་རྣམ་པ་ཅན་དུ་འགྱུར་ཏེ། དཔེར་ན་ལྐོག་ཤལ་ལ་སོགས་པ་དང་ལྡན་པའི་རྣམ་པ་ཅན་དུ་རང་གི་ཤེས་པས་དམིགས་པའི་བ་ལང་ནི་ལྐོག་ཤལ་ལ་སོགས་པ་དང་ལྡན་པའི་རྣམ་པ་ཅན་ཡིན་པ་བཞིན། ཡུལ་གྱི་ཤེས་པ་ཡང་ཡུལ་གྱི་རྣམ་པ་ཅན་དུ་རང་གི་ཤེས་པས་དམིགས་སོ། །
[36b.7]དེའི་རྣམ་པ་ཅན་དུ་འདི་དམིགས་སོ་ཞེས་པར་གཞག་པ་འདི་ནི། དེའི་རྣམ་པ་ཅན་གྱི་རྒྱུ་ཅན་ཉིད་ཀྱི་ཕྱིར། དེ་བསྒྲུབ་པར་བྱ་བ་ལ་འདི་འབྲས་བུའོ། །དེའི་རྣམ་པ་ཉིད་ལ་ནི་རང་བཞིན་ནོ། །ཡུལ་ཉམས་སུ་མྱོང་བའི་ཤེས་པ་ཡང་འདིར་མཚོན་པ་ཙམ་སྟེ། དཔྱོད་པའི་ཤེས་པ་ཡང་ཇི་ལྟར་བསམས་
[37a]
[37a.1]པའི་དོན་གྱི་རྣམ་པ་ཅན་དང་ཤེས་པའི་རྣམ་པ་ཅན་དུ་རང་གི་ཤེས་པས་དམིགས་སོ། །དེ་ལྟར་ནི་ཇི་ལྟར་ཡུལ་ཤེས་པའི་ཤེས་པས་ནི་ཡུལ་ཉམས་སུ་མྱོང་བའི་ཤེས་པས་དོན་གྱི་ཚུལ་ཉིད་དམ་ཉམས་སུ་མྱོང་བའི་ཚུལ་ཉིད་འབའ་ཞིག་ལ་རྟོགས་པར་བྱེད་པ་མ་ཡིན་གྱི། འོན་
[37a.2]ཀྱང་འདི་འདྲ་བའི་དོན་དང་དེའི་ཤེས་པར་གྱུར་ཏོ་ཞེས་གཉིས་ཀའི་རྣམ་པར་འཛིན་པ་དེ་ལྟར་དོན་གྱི་རྣམ་པ་འདི་འདྲ་བ་སེམས་པར་གྱུར་ཏོ་ཞེས་རང་གི་ཤེས་པས་གཟུང་བར་བྱ་བས་སོ། །དེ་ལྟར་འགྱུར་མོད་རྣམ་པ་མེད་པ་ཁོ་ནར་ཡུལ་གྱི་ཤེས་པ་སྐྱེ་སྟེ། དེ་ལ་ནི་དོན་གྱི་འབྲས་བུ་ཉིད་ཀྱིས་ཤེས་པ་
[37a.3]འདི་དོན་གྱི་འབྲས་བུའོ་ཞེས་དྲན་པ་འདིར་འགྱུར་ལ། དེ་ཡོད་ན་ཉམས་སུ་མྱོང་བའི་ཤེས་པའི་རྒྱུ་དོན་ཡང་དྲན་ཞིང་། དེ་ལས་ཕྱིས་འཁྲུལ་པས་ཉམས་སུ་མྱོང་བའི་ཤེས་པ་དོན་དང་སྦྱར་ནས་དོན་གྱི་རྣམ་པ་ཉིད་དུ་ལྷག་པར་ཞེན་ནོ། །འཁྲུལ་པ་ཇི་ཙམ་གྱི་འབྲས་བུ་རྟོགས་པ་པོས་དེ་
[37a.4]དེ་ལྟར་ཞེན་པ་དེ་ཙམ་གྱི་དེ་དེའི་རྣམ་པ་ཅན་ཁོ་ནར་འགྱུར་བ་རིགས་པ་ཡང་མ་ཡིན་ནོ་ཞེ་ན་གསུངས་པ། ཕྱི་མ་ཕྱི་མ་རྣམས་ཀྱང་ཞེས་པ་ལ་སོགས་པ་སྟེ། ཀྱང་ཡིག་ནི་ངེས་པར་འཛིན་པ་ལའོ། །ཕྱི་མ་ཕྱི་མ་སྟེ་ཡུལ་ཤེས་པའི་ཤེས་པ་ལ་སོགས་པ་དེ་རྣམས་ནི། སྔ་མ་སྟེ་ཉམས་སུ་མྱོང་བའི་ཤེས་པའི་ཡུལ་
[37a.5]གང་ཡིན་པ་ནི་ཕྱི་མ་ཕྱི་མའི་ཤེས་པ་ལ་ལྟོས་ནས་ཤེས་པས་བར་ཆོད་པའི་ཕྱིར་རིང་བ་ཡིན་ཞེས་དེ་སྣང་བ་ཅན་རྣམས་སུ་མི་འགྱུར་བ་ཁོ་ན་སྟེ། ཐོབ་པ་མ་ཡིན་པ་ཁོ་ནའོ་ཞེས་པའི་དོན་ཏོ། །ཅིའི་ཕྱིར་ཞེ་ན། དེ་ནི་ཡུལ་མ་ཡིན་པ་ཉིད་ཀྱི་ཕྱིར་རོ། །དེ་ནི་སྟེ་ཇི་སྐད་བཤད་པའི་དོན་ནི་ཕྱི་མ་ཕྱི་མའི་ཤེས་པ་
[37a.6]རྣམས་ཀྱི་ཡུལ་མ་ཡིན་པ་ཉིད་ཀྱི་ཕྱིར་རོ། །གལ་ཏེ་དོན་དེ་རྣམས་ཀྱི་ཡང་ཡུལ་དུ་གྱུར་ན་དེའི་ཚེ་དེ་ལས་སྐྱེས་པ་དེ་རྣམས་ལ། ཤེས་པ་འདི་རྣམས་དོན་གྱི་འབྲས་བུ་རྣམས་སོ་ཞེས་དོན་གྱི་འབྲས་བུ་ཉིད་དུ་དྲན་པ་འདི་འགྱུར་ཞིང་། དེ་ལས་དེ་རྣམས་ཀྱི་ཡང་རྒྱུ་དོན་དེ་དྲན་པར་འགྱུར་ལ། དེ་ལས་ཀྱང་
[37a.7]དོན་དེ་དང་བསྲེས་ནས་དེར་སྣང་བ་ཉིད་དུ་འཁྲུལ་པས་རྟོགས་པ་པོས་འཛིན་པར་འགྱུར་ན། འདི་ནི་དེ་རྣམས་ཀྱི་ཡུལ་ཡང་མ་ཡིན་གྱི། འོ་ན་ཅི་ཞེ་ན། ཤེས་པ་དང་པོ་ཁོ་ནའིའོ། །དེའི་ཕྱིར་དོན་གྱི་ནུས་པ་ལས་བྱུང་བ་དེ་ཁོ་ན་དོན་དང་ཡང་དག་པར་སྦྱར་ནས་དེའི་རྣམ་པ་ཅན་ཉིད་དུ་འཛིན་གྱི། ཕྱི་མ་
[37b]
[37b.1]ཕྱི་མ་རྣམས་མ་ཡིན་ཏེ། དེ་རྣམས་ཀྱི་དེ་ཡུལ་མ་ཡིན་པ་ཉིད་ཀྱི་ཕྱིར་རོ། །དེ་རྣམས་ཀྱང་དོན་གྱི་རྣམ་པའི་རྗེས་སུ་བྱེད་པ་ཉིད་དུ་གཟུང་བ་ཡང་ཡིན་ནོ། །དེ་ལྟར་ནི་ཕྱི་མ་ཕྱི་མའི་ཤེས་པ་ནི་རྣམ་པ་རེ་རེས་ལྷག་པར་ཉེ་བར་དམིགས་ཏེ། བུམ་པའི་ཤེས་པའི་ཤེས་པར་བུམ་པའི་རྣམ་པ་ཅན་གྱི་ཤེས་པ་
[37b.2]དམིགས་པ་ན། བུམ་པའི་རྣམ་པ་ཅན་གྱི་ཤེས་པར་གྱུར་ཏོ་ཞེས་བུམ་པའི་རྣམ་པ་དང་ལྷན་ཅིག་ཏུ་རྟོགས་སོ། །དེའི་ཤེས་པས་ནི་བུམ་པའི་ཤེས་པའི་ཤེས་པ་ལ་དམིགས་བཞིན་པའི་བུམ་པའི་ཤེས་པའི་ཤེས་པར་གྱུར་ཏོ་ཞེས་བུམ་པའི་ཤེས་པའི་རྣམ་པ་དང་ལྷན་ཅིག་པའི་བུམ་པའི་ཤེས་པའི་
[37b.3]ཤེས་པའོ། །དེ་བཞིན་དུ་ཕྱི་མ་རྣམས་ལ་ཡང་རིག་པར་བྱའོ། །དེ་ལྟར་ཕྱི་མ་ཕྱི་མའི་ཤེས་པ་སྔ་མ་རིང་པོར་གྱུར་པའི་དོན་གྱི་རྣམ་པ་ཅན་རྣམས་འཛིན་ཏེ། དེ་རྣམས་ཀྱི་རང་གི་ཡུལ་ཡང་མ་ཡིན་ནོ། །གང་གི་ཕྱིར་ཁྱོད་ཀྱིས་བརྗོད་པའི་ཚུལ་གྱིས་དེ་ལྟར་འཛིན་པ་དེའི་ཕྱིར་དེ་རྣམས་
[37b.4]རང་བཞིན་ཁོ་ནས་དེའི་རྣམ་པ་ཅན་རྣམས་སུ་འགྱུར་རོ་ཞེས་ཁས་བླང་བར་བྱའོ། །ཤེས་པ་དང་པོ་ཡུལ་གྱི་རྣམ་པས་སྟོང་པ་ཉིད་ན་རིང་པོར་གྱུར་པའི་དོན་སྔ་མ་སྣང་བ་རྣམས་སུ་མི་འགྱུར་ཏེ་སྔར་ཇི་སྐད་བཤད་པ་བཞིན་ནོ། །དེའི་ཕྱིར་དེ་ཡང་དོན་གྱི་སྣང་བ་ཅན་ཉིད་དུ་འདོད་པར་བྱའོ། །དེའི་
[37b.5]ཕྱིར་ཡང་ཚུལ་གཉིས་ཉིད་དུ་གྲུབ་པོ། །གལ་ཏེ་གང་ལས་དེའི་དབང་གིས་ཡུལ་གྱི་ཤེས་པའི་ཡུལ་དང་འདྲ་བར་འགྱུར་བ་ཡུལ་གྱི་ཤེས་པ་ལ་ཤེས་པ་གང་ཡིན་པ་དེ་ནི་ཡུལ་དང་རྗེས་སུ་མཐུན་པའི་ཤེས་པའི་སྣང་བ་དང་རང་གི་སྣང་བ་ཅན་ནོ་ཞེས་པ་འདི་ཁོ་ན་ཅི་ལས་ཤེ་ན། གང་གི་ཕྱིར་དེའི་
[37b.6]ཡུལ་གྱི་ཤེས་པ་དང་འབྲེལ་པ་ཅན་དེའི་སྒོ་ནས་འོངས་པ་ཡུལ་གྱི་རྣམ་པ་དང་ཉམས་སུ་མྱོང་བའི་རྣམ་པ་དག་དང་། གསུམ་པ་རང་སྣང་བའི་མཚན་ཉིད་ཅན་གྱི་རྣམ་པ་ཞེས་པ་གསུམ་པོ་འདི་རྣམས་རང་གི་ཤེས་པས་དམིགས་སོ། །འདི་ཡང་ཕྱི་མ་ཕྱི་མའི་ཤེས་པ་རྣམ་པ་རེ་རེས་ལྷག་པར་དམིགས་
[37b.7]སོ་ཞེས་པ་འདིས་ད་ལྟ་ཁོ་ན་བཤད་པ་དེ་ཅིའི་རྒྱུས་བརྗེད། དེའི་ཕྱིར་དེར་ཡང་ཡུལ་དང་རྗེས་སུ་མཐུན་པའི་ཤེས་པའི་རྣམ་པ་ཉིད་དུ་བསྒྲུབ་པར་བྱ་བ་ལ། གང་ཞིག་གང་གི་རྣམ་པ་ཅན་དུ་རང་གི་ཤེས་པས་དམིགས་པ་དེ་ཞེས་པ་ལ་སོགས་པའི་སྒྲུབ་བྱེད་རྣམ་པར་ཤེས་པའོ། །འོ་ན་དེ་ལྟར་
[38a]
[38a.1]དེའི་ཤེས་པ་ལ་སོགས་པ་རྣམས་ལ་ཡང་སྒྲུབ་པར་བྱེད་པ་བརྗོད་པར་བྱའོ་ཞེས་པས་ཐུག་པ་མེད་པར་འགྱུར་རོ་ཞེ་ན། འདི་ནི་ཡོད་པ་མ་ཡིན་ཏེ། གང་གི་ཕྱིར་ཤེས་པ་གང་གི་ཡུལ་ཉེ་བར་གྱུར་པ་དེ་ལ་ཐེ་ཚོམ་སྐྱེ་སྟེ། ཅི་སྔོན་པོའི་རྣམ་པ་འདི་ཡུལ་གྱི་ཡིན་ཞིང་
[38a.2]ཤེས་པ་ནི་རྣམ་པ་མེད་པ་ཡིན་ནམ། འོན་ཏེ་ཤེས་པའི་ཡིན་ཞེས་པའོ། །ཤེས་པ་གང་ཞིག་གི་ཡུལ་རིང་བར་གྱུར་པ་དེའི་ཚེ་ནི་མེད་དོ་ཞེས་པས་ངེས་པར་གྱུར་པ་སྟེ། དེའི་ཡུལ་གྱི་རྣམ་པའི་ངོར་ཐེ་ཚོམ་དུ་འགྱུར་བ་མ་ཡིན་པ་ཁོ་ནའོ་ཞེས་པས་ཐུག་པ་མེད་པ་མ་ཡིན་ནོ། །དུས་ཕྱིས་དྲན་པ་ལས་ཀྱང་
[38a.3]སྟེ། །ཞེས་པ་ལ་སོགས་པ་སྟེ། སྔར་ནི་ཡུལ་གྱི་ཤེས་པ་གཅིག་གི་ཡུལ་དང་འདྲ་བ་ཉིད་ཀྱི་ཁྱད་པར་གྱིས་ཚུལ་གཉིས་པ་ཉིད་དུ་བསྒྲུབས་ལ། ད་ནི་ཤེས་པ་རྣམས་ཀྱི་ཕན་ཚུན་ཐ་དད་པར་དྲན་པ་ལས་བསྒྲུབ་པར་བྱའོ། །གང་ཕྱིར་ཇི་ལྟར་ཕན་ཚུན་མཚན་ཉིད་མི་མཐུན་པ་གཟུགས་ལ་སོགས་
[38a.4]པ་ཉམས་སུ་མྱོང་བ་རྣམས་ལ་ཕན་ཚུན་ཐ་དད་པར་དྲན་པར་འགྱུར་བ་དེ་ལྟར་ཤེས་པ་རྣམས་ལ་ཡང་སྟེ་དེའི་ཕྱིར་ཤེས་པའི་ཚུལ་གཉིས་པ་ཉིད་ཡོད་དོ། །གཞན་དུ་ན་ཉམས་སུ་མྱོང་བ་ཙམ་དུ་དོན་སོ་སོ་ལ་ཁྱད་པར་མེད་པར་ཐ་དད་པར་མྱོང་བ་མེད་པའི་ཤེས་པ་ཐམས་ཅད་རྣམས་ལ། བདག་ལ་གཟུགས་
[38a.5]ཀྱི་ཤེས་པར་གྱུར་གྱི་སྒྲའི་ཤེས་པ་ནི་མ་ཡིན་ནོ་ཞེས་པ་འམ། སྒྲའི་ཤེས་པ་བྱུང་གི་གཟུགས་ཀྱི་ཤེས་པ་ནི་མ་ཡིན་ནོ་ཞེས་གང་འདི་ཐ་དད་པར་དྲན་པ་དེ་མེད་པར་འགྱུར་རོ། །དེ་ལྟར་འགྱུར་མོད་ཀྱི་ཇི་ལྟར་ཉམས་སུ་མྱོང་བའི་བདག་ཉིད་དུ་མཚུངས་པ་ལ། ཚོགས་པའི་བྱེ་བྲག་ལས་བདེ་བ་ལ་སོགས་
[38a.6]པའི་བྱེ་བྲག་ཏུ་འགྱུར་བ་དེ་བཞིན་དུ་ཡུལ་སོ་སོ་ལ་ཚོགས་པ་གཞན་དང་གཞན་གྱིས་བྱས་པའི་ཁྱད་པར་ཕྲ་མོ་ཡོད་དེ། དེའི་ཕྱིར་ཐ་དད་པར་དྲན་པར་འགྱུར་རོ་ཞེ་ན། དེ་ནི་བདེན་པ་མིན་ཏེ། ཁྱད་པར་བསལ་བ་དྲན་པའི་རྒྱུ་ཡིན་པས་སོ། །དེ་ལྟར་ནི་བཏང་སྙོམས་ཀྱི་གནས་སུ་གྱུར་པའི་ཡུལ་འགའ་ཞིག་
[38a.7]ལ་གང་ཤེས་པ་རྒྱུན་གྱིས་འབྱུང་བ་དེའི་ཡང་དབང་པོ་ལ་སོགས་པའི་ཚོགས་པ་གཞན་དང་གཞན་མོད། དེ་ལྟ་ན་ཡང་ཇི་སྐད་བློའི་སྐད་ཅིག་འདི་ཙམ་རྣམས་འདས་སོ་ཞེས་པ་ལྟར་ཐ་དད་པར་དྲན་པ་མ་ཡིན་ཏེ། དཔེར་ན་མཚེ་མ་དག་པ་རྣམ་པ་དཔེར་མཚུངས་ཀྱང་དངོས་པོར་ཐ་དད་པ་ཡོད་པ་དེ་ལྟ་ནའང་
[38b]
[38b.1]མི་གསལ་བ་ཉིད་ཀྱི་ཕྱིར་དེ་ལ་ཐ་དད་པར་ངོ་ཤེས་པར་འགྱུར་བ་མ་ཡིན་གྱི། འོ་ན་ཅི་ཞེ་ན། དེ་དག་ཕན་ཚུན་སྒྲོ་འདོགས་པའོ། །དེའི་ཕྱིར་ཁྱད་པར་གསལ་བ་མེད་པའི་དོན་ལ། ཐ་དད་པ་ཅན་གྱི་དྲན་པ་འགྱུར་བ་མ་ཡིན་ནོ། །དེའི་ཕྱིར་ཉམས་སུ་མྱོང་བ་ལ་དོན་གྱིས་བྱས་པའི་ཁྱད་པར་འགའ་ཞིག་
[38b.2]ཡོད་དེ། གང་ལས་ཐ་དད་པར་དྲན་པར་འགྱུར་བའོ་ཞེས་པས་དགའ་མགུར་དོན་དང་འདྲ་བ་ཉིད་འདོད་པར་བྱའོ། །དེའི་ཕྱིར་ཡང་ཤེས་པ་ཚུལ་གཉིས་པར་གྲུབ་བོ་ཞེས་པའོ། །རང་རིག་བྱ་ཉིད་དུ་ཡང་ངོ་ཞེས་པ་འདིས་ནི་དེ་མ་ཐག་པར་བཤད་པ་ཁོ་ནའི་འཐད་པའི་བསྒྲུབ་པར་བྱ་བ་གཞན་གསུངས་
[38b.3]ཏེ། དུས་ཕྱིས་དྲན་པ་ལས་ཤེས་པའི་ཚུལ་གཉིས་པ་ཉིད་གྲུབ་པ་འབའ་ཞིག་ཏུ་མ་ཟད་ཀྱི། འོན་ཀྱང་རང་རིག་པ་ཡང་སྟེ་གང་ཚད་མའི་འབྲས་བུ་ཉིད་དུ་འདོད་པའོ། །རེ་ཞིག་ཅེས་པ་ནི་འབའ་ཞིག་ལས་ཉམས་སུ་མྱོང་བ་ཡོད་དེ། དེའི་ཕྱིར་དྲན་པར་ཡང་འགྱུར་མོད། དེ་ཙམ་གྱིས་ཅིའི་ཕྱིར་རང་
[38b.4]རིག་པ་ཡིན་ཞེས་བསམས་ནས་འདྲི་བ། ཅིའི་ཕྱིར་ཞེ་ན་ཞེས་པའོ། །བདག་ཉིད་ཁོ་ནས་ཤེས་པ་ཉམས་སུ་མྱོང་བར་རིགས་ཀྱི་གཞན་གྱིས་མ་ཡིན་ཞེས་ངེས་པར་བྱས་ནས་གསུངས་པ། འདི་ལ་ཞེས་པ་ལ་སོགས་པ་སྟེ། འདིའི་དོན་ནི་འདི་ཡིན་ཏེ། གང་ལ་དྲན་པ་དེ་ལ་ཉམས་སུ་མྱོང་བ་
[38b.5]སྟེ། གཟུགས་ལ་སོགས་པ་བཞིན་དྲན་པ་ཡང་ཡོད་དོ་ཞེས་པ་འབྲས་བུའོ། །འདིར་འགྱུར་མོད་ཅེས་པ་ལ་སོགས་པས་ཤེས་པ་གཞན་གྱིས་ཉམས་སུ་མྱོང་བར་མངོན་པར་འདོད་པ་ཁོ་ནའོ། །དེའི་ཕྱིར་གྲུབ་པ་ལ་སྒྲུབ་པ་ཉིད་དོ་ཞེས་ཕ་རོལ་གྱི་བསམ་པ་གསལ་བར་བྱེད་དོ། །ཤེས་པ་གཞན་
[38b.6]གྱིས་ཞེས་པ་ལ་སོགས་པས་གྲུབ་པ་ལ་སྒྲུབ་པ་ཉིད་ཡོངས་སུ་སྤོང་སྟེ། ཤེས་པ་གང་གིས་ཤེས་པ་ཉམས་སུ་མྱོང་བ་དེ་ལ་ཡང་དུས་ཕྱིས་དྲན་པ་མཐོང་ལ། ཉམས་སུ་མྱོང་བ་མ་ཡིན་པ་ལ་དྲན་པའི་རིགས་པ་ཡང་མ་ཡིན་ནོ་ཞེས་དེའི་ཕྱིར་དེ་ལ་དམིགས་པའི་ཤེས་པ་གཞན་འབྱུང་བར་བྱ་ཞིང་།
[38b.7]དེ་ལ་ཡང་དྲན་པ་སྟེ། དེ་ལས་དེ་ལ་ཡང་གཞན་གྱིས་ཞེས་པ་དེའི་ཕྱིར། ཤེས་པ་གཞན་གྱིས་ཉམས་སུ་མྱོང་བ་ལ་ཤེས་པ་རྣམས་ཐུག་པ་མེད་པ་སྟེ། ཤེས་པ་གཅིག་མངོན་པར་གྲུབ་པ་ཁོ་ན་ན། ཤེས་པ་བརྒྱུད་པ་ཤེས་པ་ཕྱི་མ་ཕྱི་མ་ཤེས་པ་སྔ་མ་སྔ་མ་ལ་དམིགས་པ་མཐའ་ཡས་པ་
[39a]
[39a.1]རྣམས་སུ་ཐལ་བར་འགྱུར་རོ་ཞེས་པའི་དོན་ཏོ། །དེ་ལྟར་གྱུར་ན་སྐྱོན་ཅི་ཡོད་ཅེ་ན་གསུངས་པ། ཡུལ་གཞན་ལ་འཕོ་བ་ཞེས་པ་ལ་སོགས་པ་སྟེ། ཡུལ་གཞན་ལ་ཤེས་པ་འཇུག་པ་མེད་པར་འགྱུར་ན་འདོད་པ་ཡང་ཡིན་ནོ། །དེ་ལ་ཤེས་པ་གང་ལས་འཕོ་བ་དེ་ལ་
[39a.2]རང་རིག་པར་འགྱུར་རོ། །དེ་ནི་འགྱུར་མོད་ཀྱི་ཤེས་པ་ཐ་མ་ནི་ཤེས་པ་གཞན་གྱིས་ཉམས་སུ་མྱོང་བར་བྱ་བ་ཉིད་དང་དྲན་པར་ཡང་མི་འགྱུར་གྱི། གཅིག་པོ་དེ་ཉམས་སུ་མ་མྱོང་བ་དང་། མ་དྲན་པ་ཁོ་ནར་གནས་ལ་དེའི་ཕྱིར་ཡུལ་གཞན་ལ་འཕོ་བར་འགྱུར་རོ་ཞེ་ན། འདི་ནི་མི་རིགས་ཏེ། དེ་ལྟར་
[39a.3]ནི་གལ་ཏེ་ཤེས་པ་ཐ་མ་ཉམས་སུ་མྱོང་བ་མ་ཡིན་ན། དེའི་ཕྱིར་སྔ་མའི་དུས་སུ་བྱུང་བའི་ཤེས་པ་རྣམས་ཐམས་ཅད་ཉམས་སུ་མྱོང་བ་མེད་པར་འགྱུར་ཏེ། དེའི་དམིགས་བྱེད་ལྐོག་ཏུ་གྱུར་པ་ཉིད་ཀྱི་ཕྱིར་རོ། །གང་ཞིག་གི་དམིགས་བྱེད་གང་ཡིན་པ་ལྐོག་ཏུ་གྱུར་པ་དེ་དེ་ཡིས་ཉམས་སུ་མྱོང་བ་མ་
[39a.4]ཡིན་ཏེ། དཔེར་ན་ལྷས་བྱིན་གྱི་ཤེས་པ་ལྷས་བྱིན་གྱིས་ཉམས་སུ་མྱོང་བ་ནི་མཆོད་བྱིན་གྱིས་བཞིན། སྲོག་ཆགས་རྣམས་ཀྱི་བདག་ཉིད་དང་འབྲེལ་པའི་སྔོན་གྱི་དུས་སུ་བྱུང་བའི་ཤེས་པའི་དམིགས་པ་ཡང་ལྐོག་ཏུ་གྱུར་པའོ། །འགལ་བས་ཁྱབ་པའོ། །ཡང་ན་དམིགས་པ་མངོན་སུམ་མ་
[39a.5]ཡིན་པ་དེ་མངོན་སུམ་མ་ཡིན་ཏེ། ལྐོག་གྱུར་བཞིན། དམིགས་པ་ཉམས་སུ་མ་མྱོང་བའི་ཤེས་པ་ཡང་དེ་ལྟ་བུའོ། །འགལ་བས་ཁྱབ་པའོ། །འདིར་འགྱུར་མོད། གང་བདག་ཉིད་ཀྱིས་ཉམས་སུ་མྱོང་བའི་ཤེས་པ་དེ་མངོན་སུམ་དུ་འགྱུར་ཏེ། དེས་ན་གཞན་རྣམས་ཀྱིས་གང་ཉམས་སུ་མྱོང་བ་དེ་
[39a.6]མངོན་སུམ་མ་ཡིན་པའོ་ཞེ་ན་འོ་ན་བདག་ཉིད་ཉམས་སུ་མྱོང་བ་དེ་ཅི་ཞིག་ལས་གྲུབ། གལ་ཏེ་ཉམས་སུ་མྱོང་བ་གྲུབ་པ་དེའི་ཚེ། བདག་ཉིད་ལའམ་གཞན་ལ་ཞེས་རྣམ་པར་དབྱེ་བར་འགྱུར་ཞེ་ན་དེ་ནི་མ་གྲུབ་པ་ཁོ་ནའོ། །དེ་མ་གྲུབ་པ་ན་གཉིས་ཀར་ཡང་ལྐོག་ཏུ་གྱུར་པ་ཉིད་དུ་ཁྱད་པར་མེད་པའི་
[39a.7]ཕྱིར། ཉམས་སུ་མྱོང་བ་འདི་ནི་བདག་ཉིད་ལ་ཡིན་གྱི་གཞན་ལ་མ་ཡིན་ནོ་ཞེས་པ་འདི་ལྐོག་ཏུ་གྱུར་པའི་དམིགས་པས་ཤེས་པར་དཀའོ། །དེའི་ཕྱིར་ཅི་ཞིག་ལས་བདག་ཉིད་ཀྱིས་ཉམས་སུ་མྱོང་བ་ཡིན། གལ་ཏེ་གཟུང་བྱ་ལ་དམིགས་པ་མ་གྲུབ་ན་ཡང་དངོས་པོ་མངོན་སུམ་དུ་འདོད་ན་འགྲོ་
[39b]
[39b.1]བ་འདི་ཐམས་ཅད་མངོན་སུམ་དུ་འགྱུར་ཏེ། དམིགས་པ་མངོན་སུམ་མ་ཡིན་པ་ཉིད་དུ་བྱེ་བྲག་མེད་པའི་ཕྱིར་ན། འགྱུར་བ་ཡང་མ་ཡིན་ནོ། །དེའི་ཕྱིར་ཤེས་པའི་རང་རིག་པ་ཉིད་དུ་ཁས་བླང་བར་བྱའོ་ཞེས་པའོ། །འདིར་སློབ་དཔོན་དབྱིག་གཉེན་གྱི་རྩོད་པ་སྒྲུབ་པའོ་ཞེས་འཇིག་རྟེན་ན་
[39b.2]རབ་ཏུ་གྲགས་པ་འདི་ནི་བསྟན་བཅོས་མཛད་པས་ནི་དེས་མཛད་པའི་བསྟན་བཅོས་གཞན་རྣམས་སྐྱོན་མེད་པ་ཉིད་ལ་བལྟས་ནས། སྐྱོན་དང་བཅས་པའི་རྩོད་པ་སྒྲུབ་པ་དེས་མཛད་པ་ཉིད་མི་སྲིད་དོ་ཞེས་གསུངས་པ། རྩོད་སྒྲུབ་སློབ་དཔོན་གྱི་མ་ཡིན། །ཞེས་པའོ། །འོ་ན་བྱེད་པ་པོ་མ་མཐོང་བའི་བསྟན་བཅོས་
[39b.3]རྣམས་ཀྱི་བྱེད་པ་པོ་གྲགས་པ་ཁོ་ན་ལས་ངེས་པར་བྱ་བ་མ་ཡིན་ནམ། འདི་ལ་ཡང་དེ་ཡོད་དོ་ཞེས་པས་ཅི་ལྟར་རྩོད་སྒྲུབ་སློབ་དཔོན་གྱི་མ་ཡིན་ཞེ་ན། སྙིང་པོ་མེད་ཅེས་ངེས་པ་འམ། །ཞེས་པ་སྟེ། སྐབས་ཉིད་ཀྱི་ཕྱིར་སློབ་དཔོན་གྱིས་དེ་ལ་ཞེས་རྟོགས་པར་བྱའོ། །འདིས་ནི་འདི་ལྟ་བུའི་དོན་གསལ་བར་
[39b.4]བྱེད་དེ། རེ་ཞིག་གྲགས་པ་ཙམ་གྱིས་ནི་དོན་ངེས་པར་མི་འགྱུར་ཏེ། དོན་མེད་པར་ཡང་དེ་སྲིད་པའི་ཕྱིར་རོ། །གལ་ཏེ་ཡང་དེས་དེ་མཛད་པ་དེ་ལྟ་ན་ཡང་དང་པོ་ཤེས་རབ་ཕུལ་དུ་བྱུང་བ་མ་སྐྱེས་པར་གྱུར་པ་སྟེ། ཕྱིས་བློ་བྱང་བར་གྱུར་པ་ན་འདིས་དེ་ལ་སྙིང་པོ་མེད་པར་ངེས་པ་སྐྱེས་སོ་ཞེས་པའོ། །
[39b.5]ཡང་ཇི་ལྟ་བུར་འདིས་དེ་ལ་སྙིང་པོ་མེད་པར་ངེས་པ་འདི་ཅི་ལྟར་རྟོགས་ཤེ་ན། གཞན་དུ་ན་ཆ་ཤས་སྨྲས་ཕྱིར་ཞེས་པ་སྟེ། སྐྱོན་མེད་པ་ཆ་ཤས་བརྗོད་པའི་ཕྱིར་རོ་ཞེས་པའི་དོན་ཏོ། །གང་སྐྱོན་བསྟན་པ་ལས་ནི་སློབ་དཔོན་གྱིས་རྩོད་པ་སྒྲུབ་པ་ལ་སྙིང་པོ་མེད་པར་ངེས་པ་ལས་ན་རྩོད་པ་སྒྲུབ་པར་བྱེད་
[39b.6]པ་ལ་གཞན་དུ་ཆ་ཤས་བརྗོད་པའོ། །སྐྱོན་དེ་རྣམས་ཁོ་ན་ཁོ་བོ་ཅག་གིས་རབ་ཏུ་གསལ་བར་བྱའོ་ཞེས་སྟོན་པ་གསུངས་པ། དེས་ན་ཞེས་པ་ལ་སོགས་པ་སྟེ། དེས་ན་ཞེས་པའི་སྐྱོན་དང་ལྡན་པ་ཉིད་ཀྱིས་ནའོ། །དེ་ལྟར་ནི། གཞན་དུ་ཆ་ཤས་བརྗོད་པ་ལས། །ཞེས་པ་འདིས་རྩོད་པ་སྒྲུབ་པ་
[39b.7]སྐྱོན་དང་ལྡན་པ་ཉིད་དུ་གསལ་བར་བྱས་སོ། །ཚད་མ་ལ་སོགས་པ་རྣམས་ལ་ཞེས་པ་ལ། ཚད་མའི་ཆ་ཤས་དང་དེ་ལྟར་སྣང་བ་དང་ལྟག་ཆོད་དང་དེའི་ལན་རྣམས་ལའོ། །དོན་དེ་ལས་རྣམ་པར་ཤེས་པ་མངོན་སུམ་ཞེས་པ། ཡུལ་གང་གིས་རྣམ་པར་ཤེས་པ་ཐ་སྙད་བྱ་བ་དེ་ཁོ་ན་ལས་གལ་
[40a]
[40a.1]ཏེ་དེ་སྐྱེ་ཞིང་གཞན་ལས་མ་ཡིན་ལ། དེ་ལས་གཞན་ལས་ཀྱང་མ་ཡིན་པའི་ཤེས་པ་དེ་མངོན་སུམ་སྟེ། དཔེར་ན་གཟུགས་ལ་སོགས་པའི་ཤེས་པ་དང་བདེ་བ་ལ་སོགས་པའི་ཤེས་པ་བཞིན་ཞེས་པའོ། །འདིས་ནི་འཁྲུལ་པའི་ཤེས་པ་བསལ་ཏེ། དཔེར་ན་ཉ་ཕྱིས་ལ་
[40a.2]དངུལ་གྱི་ཤེས་པ་ལྟ་བུའོ། །དེ་ནི་དངུལ་གྱིས་དངུལ་གྱི་ཤེས་པའོ་ཞེས་ཐ་སྙད་བྱེད་ལ་དེ་དངུལ་ལས་སྐྱེ་བ་ཡང་མ་ཡིན་གྱི། ཉ་ཕྱིས་ཁོ་ནས་དེ་བསྐྱེད་པར་བྱ་བའོ། །ཀུན་རྫོབ་པའི་ཤེས་པ་ཡང་འདིས་གསལ་ཏེ། དེ་ལྟར་ནི་བུམ་པའི་ཤེས་པ་བུམ་པའི་ཤེས་པ་ཞེས་པ་འདི་ལྟར་དེ་བུམ་པ་ལ་
[40a.3]སོགས་པ་རྣམས་ཀྱིས་ཐ་སྙད་བྱ་ཞིང་། དེ་དེ་རྣམས་ལས་འབྱུང་བ་ནི་མ་ཡིན་ཏེ། དེ་རྣམས་ནི་ཀུན་རྫོབ་ཏུ་ཡོད་པ་ཉིད་ཀྱིས་རྒྱུ་མ་ཡིན་པ་ཉིད་ཀྱི་ཕྱིར་རོ། །གཟུགས་ལ་སོགས་པ་དེ་ལྟར་ཡང་དག་པར་ཞེན་པ་རྣམས་ཁོ་ན་ལས་དེ་འབྱུང་ངོ་། །རྗེས་སུ་དཔག་པའི་ཤེས་པ་ཡང་འདི་ཁོ་ནས་བསལ་
[40a.4]ཏེ། དུ་བའི་ཤེས་པ་དང་འབྲེལ་པ་དྲན་པ་དག་ལས་ཀྱང་དེ་བྱུང་གི་མེ་ཁོ་ན་ལས་མ་ཡིན་པས་སོ། །དེ་ལས་འབྱུང་བ་ཁོ་ན་སྟེ། མི་འབྱུང་བ་ནི་མ་ཡིན་ནོ་ཞེས་པ་འདི་ཡང་འདིར་དོན་དུ་མངོན་པར་འདོད་དོ། །དེ་དེ་ལྟར་རྣམ་པར་གཞག་པ་ལ། འདི་བརྒལ་ཞིང་བརྟག་པར་བྱ་སྟེ། ཅི་འདི་རྐྱེན་
[40a.5]ལ་ལྟོས་པའི་ངེས་པ་ཉིད་དམ། འོན་ཏེ་དམིགས་པ་ལ་ལྟོས་པ་ཡིན་ཞེས་པའོ། །དེ་ལས་ཅི་ཞེ་ན། གཉི་གའི་གནས་ལ་ཡང་སྐྱོན་ཏེ། རེ་ཞིག་ངེས་པ་སྔ་མའི་དབང་དུ་བྱས་ཏེ་གསུངས་པ། དོན་དེ་ལས་ཞེས་ཀུན་ཡིན་ན། །ཞེས་པ་སྟེ། གལ་ཏེ་དེ་ལས་ཞེས་པ་ལ་སོགས་པ་འདི་ཁོ་ནའི་རྣམ་པར་
[40a.6]བཤད་པའོ། །འོ་ན་རྣམ་པར་ཤེས་པ་ཐ་སྙད་དུ་བྱེད་པའི་རྒྱུ་ཡུལ་ནི་སྐབས་ཡིན་པ་ཉིད་ཀྱི་ཕྱིར། དེ་ལས་ཞེས་པ་འདིས་སྐབས་ཀྱིས་ཉེ་བས་དེ་ཁོ་ན་ལྷུར་ལེན་ནོ་ཞེས་པས་འདི་ཐེ་ཚོམ་མེད་པ་མ་ཡིན་ནམ། དེས་ན་ཅི་ལས་དོགས་པ་འདི་ཡིན་ཞེ་ན། གལ་ཏེ་དེ་ལས་ཞེས་པ་འདིས་རྐྱེན་རྣམ་པ་བཞི་པོ་
[40a.7]ཐམས་ཅད་ཀྱང་བརྗོད་པར་བྱ་ཞེས་པའི་དོན་གང་འདི་ནི་འདིར་ཁྱོད་ཀྱིས་ཡོངས་སུ་བརྟགས་པ་མ་ཡིན་ཏེ། གང་ཕྱིར་འདིར་ཆོས་ཐམས་ཅད་ཀྱི་བདག་ཉིད་ཀྱི་ཕྱིར་དམིགས་པའི་རྐྱེན་ཁོ་ན་ཀུན་གྱི་སྒྲས་བརྗོད་དོ། །ཡང་ཅི་ལྟར་ད་ཆོས་ཐམས་ཅད་ཀྱི་བདག་ཉིད་ཡིན་ཞེ་ན། དམིགས་པ་ཆོས་རྣམས་
[40b]
[40b.1]ཐམས་ཅད་དོ། །ཞེས་པའི་མཚན་ཉིད་ཀྱི་ཕྱིར་རོ། །གཞན་ཆོས་ཐམས་ཅད་ཀྱི་རང་བཞིན་རྣམ་པར་ཤེས་པའི་རྐྱེན་ཐ་སྙད་དུ་བསྟན་པའི་རྒྱུ་གང་ཡིན་པ་དེ་ལས་ཞེས་པ་འདིས་བརྗོད་པར་བྱ་བ་ཡོད་པ་ཡང་མ་ཡིན་ནོ། །དེའི་ཕྱིར་དམིགས་པའི་རྐྱེན་ཁོ་ན་ཀུན་གྱི་སྒྲས་བཤད་དོ་ཞེས་རིག་པར་
[40b.2]བྱའོ། །དེ་ལས་ཀྱང་དོན་འདིར་འགྱུར་ཏེ། གལ་ཏེ་ཆོས་ཀུན་གྱི་རང་བཞིན་ཅན་གྱི་རྐྱེན་བརྗོད་ན་སྟེ། གལ་ཏེ་དམིགས་པའི་རྐྱེན་བརྗོད་ན་ཞེས་པ་ཇི་སྲིད་པའོ། །དེས་ན་དེ་བརྩད་པར་བྱ་བ་མ་ཡིན་ནོ། །གང་གིས་དམིགས་པའི་རྐྱེན་དང་འབྲེལ་པ་ཅན་ཉིད་ཀྱིས་ཤེས་པ་བསྟན་པར་བྱ་བ་དེ་དེ་
[40b.3]ཁོ་ན་ལས་བྱུང་བ་མ་ཡིན་གྱི། འོ་ན་ཞེ་ན། རྐྱེན་གཞན་ལས་ཀྱང་སྟེ། བཞི་ཡིས་སེམས་དང་སེམས་བྱུང་རྣམས། །ཞེས་གསུངས་པའི་ཕྱིར་རོ། །དེ་ལྟར་རྐྱེན་ངེས་པའི་ཕྱོགས་ལ་གྲུབ་པའི་མཐའ་དང་འགལ་བ་གསལ་བར་བྱའོ། །དམིགས་པ་ངེས་པའི་དབང་དུ་བྱས་ཏེ་གསུངས་པ།
[40b.4]དམིགས་པའོ་ཞེ་ན་ཞེས་པ་ལ་སོགས་པ་སྟེ། འདི་ལ་མཚན་ཉིད་ཧ་ཅང་ཁྱབ་པ་ཉིད་དུ་གསུངས་སོ། །ཡུལ་ཙམ་ཞེས་པ་འདིར་གང་དེའི་ཚེ་ཉེ་བར་གྱུར་པའི་གཟུགས་ལ་སོགས་པའི་གསལ་བ་དེ་རྣམ་པར་ཤེས་པའི་དམིགས་པ་ཉིད་ཀྱིས་ན་ཡུལ་གྱི་སྒྲས་བརྗོད་པར་བྱའོ། །ཙམ་གྱི་སྒྲ་དམིགས་
[40b.5]པ་གཞན་རྣམ་པར་གཅོད་པར་བྱེད་དོ། །དྲན་པ་ལ་སོགས་པའི་ཤེས་པ་ཡང་གཟུགས་ལ་སོགས་པ་རྣམས་ཀྱིས་ཐ་སྙད་བྱེད་དེ། གཟུགས་དྲན་ནོ། །སྐྱུར་བ་མངོན་པར་འདོད་དོ། །མེ་རྗེས་སུ་དཔག་གོ་ཞེས་སོ། །དམིགས་པ་གཞན་ལ་མི་ལྟོས་པ་ཡང་སྟེ། དེའི་ཕྱིར་དེ་ཡང་མངོན་སུམ་ཉིད་དུ་
[40b.6]འགྱུར་རོ། །འདིར་འགྱུར་མོད་ཀྱི་རྗེས་སུ་དཔག་པར་བྱ་བའི་ཡུལ་ཅན་གྱི་ཤེས་པ་ནི་མེ་ཙམ་ལས་སྐྱེ་བ་མ་ཡིན་གྱི། འོན་ཀྱང་ཕྱོགས་ཀྱི་ཆོས་ཉིད་དང་འབྲེལ་པ་ཤེས་པ་ལས་ཀྱང་ངོ་། །དེས་ན་ཐལ་བར་འགྱུར་བ་འདི་ཅིའི་ཕྱིར་ཞེ་ན་གསུངས་པ། མེ་ལ་སོགས་པའི་ཤེས་པ་ཞེས་པ་ལ་སོགས་པ་སྟེ། གལ་
[40b.7]ཏེ་ཡང་དེ་དོན་གཞན་ལས་ཀྱང་སྐྱེ་མོད། དེ་ལྟ་ན་ཡང་དོན་གཞན་དེ་དེས་དམིགས་པ་མ་ཡིན་ལ། དེ་ལས་ཀྱང་དམིགས་པ་གཞན་ལ་མི་ལྟོས་པར་སྐྱེ་བ་ཉིད་ཀྱི་ཕྱིར་ཞེས་དེ་མངོན་སུམ་མིན་པར་འགྱུར། འོ་ན་གལ་ཏེ་ཡུལ་གང་གིས་ཤེས་པ་གང་ཐ་སྙད་བྱ་བ་དེ་གལ་ཏེ་དེ་ལས་འགྱུར་ན་ཡིན་གྱི་མི་འགྱུར་ལ་ནི་མ་ཡིན་
[41a]
[41a.1]ནོ་ཞེས་པའི་ངེས་པ་འདི་ཡང་འདིར་མངོན་པར་འདོད་པ་མ་ཡིན་ནམ། དྲན་པ་ལ་སོགས་པ་རྣམས་ནི་དམིགས་པ་གང་གིས་ཐ་སྙད་བྱེད་པ་དེ་ལས་སྐྱེ་བ་ཡང་མ་ཡིན་ཏེ། དེ་མེད་པ་ཉིད་ཀྱི་ཕྱིར་རོ་ཞེ་ན། དེ་ཡོད་པ་མ་ཡིན་ཏེ། །བརྒྱུད་པས་ཀྱང་དེ་ལས་སྐྱེ་བ་མངོན་པར་འདོད་
[41a.2]པའི་ཕྱིར་རོ། །རྣམ་པ་གཞན་དུ་ན་འདི་ཅི་ལྟར་སྦྱོར། གང་རྩོད་པ་སྒྲུབ་པར་རྗེས་སུ་དཔག་པའི་ཤེས་པ་ཡང་འདི་ཁོ་ན་ལས་བསལ་ཏེ། དུ་བའི་ཤེས་པ་དང་འབྲེལ་པ་དྲན་པ་དག་ལས་ཀྱང་དེ་འགྱུར་གྱི། མེ་ཁོ་ན་ལས་མ་ཡིན་ནོ་ཞེས་བཤད་པ་ལ། འདིས་ནི་དུ་བའི་ཤེས་པ་དང་འབྲེལ་པ་དྲན་པ་དག་
[41a.3]ལས་དང་། ཡང་གི་སྒྲ་ལས་མེ་ལས་ཀྱང་དེ་འབྱུང་ངོ་ཞེས་བརྗོད་པར་འགྱུར་རོ། །དེ་འདི་ཅི་ལྟར་རིགས་ཏེ། གལ་ཏེ་ཐ་སྙད་བྱེད་པའི་རྒྱུ་ནི་བརྒྱུད་པས་ཀྱང་འདིར་སྐྱེད་པར་བྱེད་པ་ཉིད་དུ་འདོད་དེ། གཞན་དུ་ན་གལ་ཏེ་དྲན་པ་ལ་སོགས་པ་རྣམས་ཀྱི་ཐ་སྙད་བྱེད་པའི་རྒྱུ་ཡུལ་དེའི་ཚེ་མེད་པ་ཉིད་ཀྱི་
[41a.4]ཕྱིར་སྐྱེད་པར་བྱེད་པ་མ་ཡིན་པ་ཉིད་ཡིན་ནོ། །དེ་འདི་རྗེས་སུ་དཔག་པ་ལ་ཡང་སྐྱེད་པར་བྱེད་པ་མ་ཡིན་པ་ཉིད་མཚུངས་པའོ་ཞེས་པས་ཚིག་འདི་སྦྱར་བར་བྱ་བ་མ་ཡིན་པར་འགྱུར་རོ། །ཅི་སྟེ་དྲན་པ་ལ་སོགས་པ་རྣམས་ཀྱི་ཡུལ་བརྟགས་པ་བ་སྤྱི་ནི་ཐ་སྙད་བྱེད་པའི་རྒྱུ་ཡིན་ཞིང་། དེ་ཡང་ཀུན་རྫོབ་
[41a.5]ཏུ་ཡོད་པ་ཉིད་ཀྱི་ཕྱིར་སྐྱེད་པར་བྱེད་པ་ཉིད་མ་ཡིན་པ་ཉིད་དེ། དེའི་ཕྱིར་དེ་རྣམས་མངོན་སུམ་ཉིད་མ་ཡིན་ནོ་ཞེས་འདོད་ན། འདིར་ཡང་འདི་ཁོ་ན་ལ་ལན་ནོ། །དེ་ལྟར་ནི་རྗེས་སུ་དཔག་པ་ཡང་ཀུན་རྫོབ་ཏུ་ཡོད་པ་ཁོ་ན་ལ་དམིགས་པ་སྟེ། དེ་ལས་ཀྱང་གང་དུ་བའི་ཤེས་པ་དང་འབྲེལ་པ་དྲན་པ་
[41a.6]དག་ལས་ཀྱང་དེ་འགྱུར་གྱི་མེ་ཁོ་ན་ལས་མ་ཡིན་ཞེས་བརྗོད་པ་དེ་མི་རིགས་པར་འགྱུར་རོ། །དེའི་ཕྱིར་ཧ་ཅང་ཁྱབ་པའི་སྐྱོན་གནས་པ་ཁོ་ནའོ། །འདིར་སྨྲ་བ་གཉིས་དག་སྟེ། ཤེས་བྱ་ནང་གིར་སྨྲ་བ་རྣམས་དང་། ཕྱི་རོལ་གྱི་དོན་སྨྲ་བ་རྣམས་སོ། །དེ་ལ་ཤེས་བྱ་ནང་གིར་སྨྲ་བ་རྣམས་ཀྱི་ནི་དེ་ཁོ་ན་
[41a.7]ཉིད་མ་མཐོང་བའི་གནས་སྐབས་ན་ཚད་མ་དང་གཞལ་བྱ་ཡིན་གྱི། དེ་ཁོ་ན་ཉིད་དུ་ཡོངས་སུ་མ་གྲུབ་པ་ཁོ་ན་སྟེ། ཚད་མ་དང་གཞལ་བྱའི་རྣམ་པར་གཞག་པ་བསྟན་པ་འདི་ནི་འཁྲུལ་པ་རྣམས་ཀྱི་ཇི་ལྟར་མཐོང་བ་བཞིན་འབའ་ཞིག་གོ། །འདི་ཡང་སྔར་ཁོ་ནར་བསྒྲུགས་ཟིན་ཏོ། །ཕྱི་རོལ་གྱི་
[41b]
[41b.1]དོན་སྨྲ་བ་རྣམས་ནི་དོན་དམ་པ་ཁོ་ནར་ཕྱི་རོལ་གཞལ་བར་བྱ་བ་དང་དེའི་ཡུལ་ཅན་གྱི་ཚད་མ་ཡང་འདོད་དོ། །དེ་ཡང་ཇི་ལྟར་མི་རིགས་པ་དེ་ལྟར་བསྒྲུབ་པའི་ཆེད་དུ་ད་ནི་དམིགས་པའི་དབང་དུ་བྱས་པས་རྣམ་པར་དཔྱོད་པ་ཙམ་གསུངས་པ། གཟུགས་ལ་སོགས་པ་རྣམས་ལ་ནི་དམིགས་པའི་དོན་དུ་
[41b.2]བརྗོད་པར་བྱ་ན་ཞེས་པ་སྟེ། གདོན་མི་ཟ་བར་འདི་ནི་འདི་ལྟར་ཤེས་པར་བྱ་སྟེ། གང་རྣམས་རྩོད་པར་བསྒྲུབ་པ་སུན་དབྱུང་བའི་ཆེད་ཁོ་ནར་རྩོམ་པ་འདིའོ་ཞེས་སེམས་པ་དེ་རྣམས་ཀྱི། རང་གིས་རིག་བྱ་བསྟན་བྱ་མིན། །ངོ་བོ་དབང་པོའི་སྤྱོད་ཡུལ་ལོ། །ཞེས་གང་བཤད་པ་འདིར་སྤྱོད་ཡུལ་གྱི་དོན་
[41b.3]བཤད་པར་བྱ་སྟེ། ཅི་གང་སྣང་བ་དེ་ལ་ཤེས་པ་སྐྱེ་བ་དེ་དེ་ལྟར་སྤྱོད་ཡུལ་ཡིན་ནམ་ཞེས་པ་ལ་སོགས་པ་རྗེས་སུ་སྦྱོར་བ་མཚུངས་སོ་ཞེས་ཕྱིར་བསྒྲུབ་པར་བྱའོ། །དེའི་ཕྱིར་སྤྱི་ཁོ་ནར་ཕྱི་རོལ་གྱི་དོན་ལ་བརྟེན་པ་ཅན་ཚད་མ་ལ་སོགས་པའི་རྣམ་པར་གཞག་པ་མི་འཐད་དོ་ཞེས་སྒྲུབ་པའི་ཆེད་དུ་
[41b.4]རྩོམ་པ་འདིའོ་ཞེས་རིག་པར་བྱའོ། །དེ་ལ་ཡང་ཕྱི་རོལ་གྱི་དོན་སྨྲ་བ་རྣམས་ལ་སྟོབས་ལྡན་ནི་རང་གི་སྡེ་པ་རྣམས་ཏེ། དེ་རྣམས་ངེས་པར་བཅོམ་པ་ན་ཅིག་ཤོས་རྣམས་ངེས་པར་བཅོམ་པ་ཁོ་ནར་འགྱུར་ཏེ། གཙོ་བོའི་དཔུང་བཅོམ་པ་ན་དེ་ལས་གཞན་པའི་དཔུང་རྣམས་བཞིན་ནོ་ཞེས་པས་དེ་རྣམས་
[41b.5]ཁོ་ན་དང་ལྷན་ཅིག་རྣམ་པར་དཔྱོད་པར་བྱེད་དོ། །དམིགས་པའི་དོན་ཞེས་པ། དམིགས་པའི་སྒྲའི་དོན་ཏོ། །ཅི་གང་སྣང་བ་ཞེས་པ་འདིས་གཟུགས་ལ་སོགས་པའི་རྡུལ་ཕྲ་རབ་རྣམས་སོ་སོར་རང་གི་ངོ་བོས་སྣང་བ་མེད་པའི་ཕྱིར་དང་། ཚོགས་པའི་རྣམ་པར་ཡང་དེ་རྣམས་ལ་རྣམ་པར་ཤེས་པ་
[41b.6]སོ་སོར་སྣང་བའི་ཕྱིར་ན་སྣང་བའི་དོན་དམིགས་པའི་དོན་དུ་སྟོན་ཏོ། །ཅི་སྟེ་ཇི་ལྟར་ཞེས་པ་ལ་སོགས་པས་རྒྱུའི་དོན་ཏོ། །ཇི་ལྟར་ཡོད་པ་ཞེས་པ་སྔོན་པོ་ལ་སོགས་པའི་རང་གི་མཚན་ཉིད་དུའོ། །གཞན་སྣང་བའི་ཡང་ཞེས་པ་ཚོགས་པ་སྣང་བའི་ཡང་ངོ་། །གལ་ཏེ་ཡང་རང་སྣང་བའི་རྣམ་པར་
[41b.7]ཤེས་པ་སྐྱེད་པར་བྱེད་པ་མ་ཡིན་པ་དེ་ལྟ་ནའང་ཞེས་པ་ཡང་གི་སྒྲའི་དོན་ཏོ། །བསགས་པ་ལ་དམིགས་པ་ཉིད་ཀྱི་ཕྱིར་ཞེས་པ། ཚོགས་པ་ལ་དམིགས་པ་ཉིད་ཀྱི་ཕྱིར་བསགས་པ་སྟེ་སོགས་པའོ་ཞེས་བྱས་ནས་སོ། །སོགས་པ་ཡང་ཚོགས་པའོ། །བསགས་པ་ལ་དམིགས་པ་ཉིད་ནི་དེ་རྣམས་ནི་
[42a]
[42a.1]ཚོགས་པར་སྣང་བ་ཉིད་ཀྱི་ཕྱིར་རོ། །ཡང་ན་བསགས་པ་ཉིད་དུ་དམིགས་པ་ཉིད་ཀྱི་ཕྱིར་ཞེས་པ་སྟེ། ཚོགས་པར་སྣང་བ་ཉིད་ཀྱི་ཕྱིར་རོ་ཞེས་པའི་དོན་ཏོ། །འདིས་དམིགས་པའོ་ཞེས་བྱེད་པའི་བྱེད་པར་བྱས་ནས་སྣང་བ་དམིགས་པའི་སྒྲས་བརྗོད་དོ། །ཀུན་རྫོབ་ཏུ་ཡོད་པ་
[42a.2]ཁོ་ན་ལ་དམིགས་པ་ཞེས་པ་མངོན་སུམ་མ་ཡིན་པ་ཉིད་དོ་ཞེས་པ་ལྷག་མའོ། །ཀུན་རྫོབ་ཏུ་ཡོད་པ་ལ་དམིགས་པ་ཉིད་ནི་ཚོགས་པ་རྫས་སུ་ཡོད་པ་མ་ཡིན་པ་ཉིད་ཀྱི་ཕྱིར་རོ། །འདིས་ནི་གང་ཀུན་རྫོབ་ཏུ་ཡོད་པ་ལ་དམིགས་པ་དེ་མངོན་སུམ་མ་ཡིན་ཏེ། དྲན་པ་ལ་སོགས་པ་བཞིན། དབང་པོའི་ཤེས་
[42a.3]པ་ཡང་དེ་ལྟ་བུའོ་ཞེས་ཁྱབ་བྱེད་དང་འགལ་བའི་ཐལ་འགྱུར་གསུངས་སོ། །འོ་ན་དེ་ནི་རྫས་སུ་ཡོད་པ་ཁོ་ནའི་རྡུལ་ཕྲ་རབ་རྣམས་ཀྱི་རྣམ་པ་མ་ཡིན་ནམ། དེ་རྣམས་ཁོ་ན་ནི་ཕན་ཚུན་ཕན་བཏགས་པ་རྣམས་དེ་ལྟར་སོ་སོར་སྣང་ངོ་ཞེས་པས། རྣམ་པ་དུ་མའི་དོན་དུ་སྨྲ་བ་ལ། ནམ་ཡང་མ་གྲུབ་པ་ཉིད་
[42a.4]བརྗོད་པའོ་ཞེས་དོགས་པ་ལ་གསུངས་པ། འདོད་པ་ཞེས་པ་ལ་སོགས་པ་སྟེ། འདོད་པ་ཞེས་པ་ཁས་ལེན་པ་ལའོ། །སྔོན་པོ་ལ་སོགས་པར་སྣང་བའི་རྣམ་པར་ཤེས་པ་རྣམས་ལ། དོན་དེ་ལས་ཞེས་པའི་མཚན་ཉིད་འདི་ལས་ཁྱོད་ཀྱི་ལུགས་ཀྱི་མངོན་སུམ་ཉིད་དུ་འགྱུར་རོ། །ཅིའི་ཕྱིར་
[42a.5]ཞེ་ན་གསུངས་པ། དེ་ལྟར་ནི་ཞེས་པ་ལ་སོགས་པ་སྟེ། དེ་རྣམས་ལ་ཞེས་པ་སྔོན་པོ་ལ་སོགས་པར་སྣང་བའི་ཤེས་པ་རྣམས་ལའོ། །དེ་ཚོགས་པ་ལ་བཏགས་པར་ཡོད་ན་ཡང་ཞེས་པ། སྔོན་པོ་ལ་སོགས་པའི་རྡུལ་ཕྲ་རབ་ཚོགས་པ་ལ། གལ་ཏེ་ཡང་དེ་བཏགས་པར་ཡོད་པ་དེ་ལྟ་ན་ཡང་སྔོན་
[42a.6]པོ་དང་སེར་པོ་ལ་སོགས་པའི་ཤེས་པ་རྣམས་ལ་རྫས་སུ་ཡོད་པའི་རྣམ་པར་ཐོབ་སྟེ་ཁྱོད་ཀྱི་མངོན་པར་འདོད་པའི་རིགས་པས་སོ། །ཡང་ན་དེ་རྣམས་ལ་ཞེས་པ་སྔོན་པོ་ལ་སོགས་པའི་རྡུལ་ཕྲ་རབ་རྣམས་ལ་རྫས་སུ་ཡོད་པའི་རྣམ་པ་ཐོབ་པོ། །རྫས་དང་གྲངས་ལ་སོགས་པའི་རྣམ་པ་རྣམས་ལ་ཡང་ཐོབ་
[42a.7]བོ་ཞེས་པ། གལ་ཏེ་རྡུལ་ཕྲ་རབ་ཀྱི་རྣམ་པ་ཉིད་ཀྱི་ཕྱིར་ཚོགས་པའི་རྣམ་པ་དོན་དམ་པར་ཡོད་པ་ཉིད་ཡིན་ན། རྫས་དང་གྲངས་ལ་སོགས་པ་རྣམས་ཀྱང་རྡུལ་ཕྲ་རབ་ཀྱི་རྣམ་པ་ཉིད་ཀྱི་ཕྱིར་དོན་དམ་པར་ཡོད་པ་ཉིད་དུ་འགྱུར་རོ། །དེ་ལས་ཀྱང་དེའི་རྣམ་པ་ཅན་གྱི་རྣམ་པར་ཤེས་པ་མངོན་སུམ་ལྟར་
[42b]
[42b.1]སྣང་དུ་མངོན་པར་འདོད་པ་ཡང་མངོན་སུམ་དུ་འགྱུར་རོ། །དེ་ལ་ཡང་རིགས་པ་འདི་སྨྲ་བར་ནུས་ཏེ། དེ་རྣམས་ཁོ་ན་ཞེས་པ་ལ་སོགས་པ་གང་སྨྲས་པའོ། །ཅི་སྟེ་ཇི་ལྟར་ཞེས་པ་ལ་སོགས་པ་ཕྱོགས་གཞན་ཉེ་བར་དགོད་པའོ། །དེ་ལྟར་གྱུར་ན་ཞེས་པ་ལ་སོགས་པ་ནི། རྫས་ལ་སོགས་པ་
[42b.2]རྣམས་ལ་གང་ཤེས་པ་དེ་མངོན་སུམ་ཉིད་དུ་ཐལ་བ་མེད་དོ་ཞེས་པའི་དོན་ཏོ། །ཅིའི་ཕྱིར་ཞེ་ན། གསུངས་པ་དེ་ལྟར་དེ་རྣམས་ཞེས་པ་ལ་སོགས་པ་སྟེ། དེ་ལྟར་ཞེས་པ་བུམ་པ་ལ་སོགས་པའི་ངོ་བོར་རོ། །དེ་རྣམས་ཞེས་པ་རྫས་ལ་སོགས་པ་རྣམས་སོ། །དེ་རྣམས་སྔོན་པོ་ལ་སོགས་པའི་རྡུལ་
[42b.3]ཕྲ་རབ་བཞིན་དུ་དེ་ཁོ་ན་ཉིད་དུ་ཡོད་པ་མ་ཡིན་ཞིང་། བུམ་པའི་ཤེས་པ་གཉིས་ཉིད་ཀྱི་ཤེས་པ་ཞེས་དེ་རྣམས་ཀྱིས་ཀྱང་ཤེས་པ་ཐ་སྙད་དུ་བྱེད་དོ། །དེ་ལས་དེ་སྐྱེ་བ་ཡང་མ་ཡིན་ཏེ། དེ་རྣམས་དེ་ཁོ་ན་ཉིད་དུ་མེད་པ་ཉིད་ཀྱི་ཕྱིར་རོ། །དེའི་ཕྱིར་དེའི་ཤེས་པ་མངོན་སུམ་ཉིད་དུ་ཐལ་བ་མ་ཡིན་ལ། ཀུན་
[42b.4]རྫོབ་ཏུ་ཡོད་པ་ལ་དམིགས་པ་ཉིད་ཀྱང་མ་གྲུབ་བོ། །གང་གི་ཕྱིར་རང་གི་ངོ་བོས་རྡུལ་ཕྲ་རབ་རྣམས་དམིགས་པ་ཉིད་ལ་ནི་དབང་པོའི་ཤེས་པ་ཀུན་རྫོབ་ཏུ་ཡོད་པ་ལ་དམིགས་པར་འགྱུར་བ་མ་ཡིན་ནོ། །དེ་ལྟར་ན་སྐྱོན་ཅི་ཞེ་ན་གསུངས་པ། དེ་ལྟར་ན་ནི་ཞེས་པ་ལ་སོགས་པའོ། །མ་ཡིན་ཞེས་པ་
[42b.5]ལ་སོགས་པས་འདི་ཁོ་ན་ལ་འཐད་པ་གསུངས་ཏེ། གལ་ཏེ་རྡུལ་ཕྲ་རབ་རྣམས་ལ་སོ་སོར་ཤེས་པར་འགྱུར་ན། དེ་ལྟར་གྱུར་ན་རྡུལ་ཕྲ་རབ་རེ་རེས་དེ་ཐ་སྙད་བྱེད་པར་འགྱུར་ལ། དེ་ལས་ཀྱང་དེ་རྣམས་སོ་སོར་ཤེས་པའི་རྒྱུ་དང་། དེ་རྣམས་ཀྱིས་སོ་སོར་དེ་ཐ་སྙད་བྱེད་པར་འགྱུར་རོ་ཞེས་པ་དེ་ལས་དམིགས་
[42b.6]པའི་ཤེས་པ་མངོན་སུམ་ཉིད་དུ་ཐོབ་ན་དེ་ལྟར་ཡང་མ་ཡིན་ནོ། །དེའི་ཕྱིར་གང་གིས་དེའི་ཐ་སྙད་བྱེད་པ་ཞེས་པ་འདི་ཐོབ་པ་མ་ཡིན་ནོ། །ཅི་སྟེ་འདུས་པ་སྣང་བ་ཉིད་ལས་དེའི་ཐ་སྙད་བྱེད་པར་འདོད་ན། རྡུལ་ཕྲ་རབ་རྣམས་ཀྱང་འདུས་པའི་གནས་སྐབས་ཁོ་ན་ཕན་ཚུན་ཕན་བཏགས་པ་ཤེས་པའི་རྒྱུ་
[42b.7]རྣམས་ཏེ། དེའི་ཕྱིར་གང་གིས་དེ་ཐ་སྙད་དུ་བྱ་བ་དེ་ཁོ་ན་ལས་སྐྱེའོ་ཞེས་པས་སྔོན་པོ་ལ་སོགས་པའི་ཤེས་པ་རྣམས་མངོན་སུམ་ཉིད་དུ་གྲུབ་བོ་ཞེས་གསུངས་པ། སོ་སོ་པ་ཡང་ཞེས་པ་ལ་སོགས་པ་སྟེ། འདུས་པའི་གནས་སྐབས་ན་ཡང་སོ་སོ་པ་ཁོ་ན་རྒྱུའི་དངོས་པོ་སྟེ་ཚོགས་པ་ནི་མ་ཡིན་ནོ་
[43a]
[43a.1]ཞེས་པའི་དོན་ཏོ། །དེས་ན་གང་གིས་དེའི་ཐ་སྙད་བྱེད་པ་ཞེས་པ་འདི་ཐོབ་པ་མ་ཡིན་ནོ་ཞེས་པ་ཐལ་བར་འགྱུར་བ་དེ་ཁོ་ནའོ། །གང་སྣང་བ་དེ་ནི་དེ་བས་མིན་ཞེས་པ་ཚོགས་པའི་སྣང་བའོ། །ཅིའི་ཕྱིར་མི་འགྱུར་ཞེ་ན་གསུངས་པ། ལྔ་པོ་བསགས་ལ་དམིགས་པའི་ཕྱིར། །ཞེས་
[43a.2]པ་སྟེ། ཚེགས་པར་སྣང་བས་ས་ཞེས་པའི་དོན་ཏེ། བྱེད་པའི་ཀཱ་ར་ཀུ་རུ་བྱས་ནས་སྣང་བ་ནི་དམིགས་པའི་སྒྲས་བརྗོད་དོ། །གང་ལས་དེ་ནི་དོན་དམ་པར། །ཞེས་པས་རྡུལ་ཕྲ་རབ་ལས་སོ། །དེ་ལ་ཐ་སྙད་དུ་མ་བྱས། །ཞེས་པ། དེ་སྣང་བ་མ་ཡིན་པ་ཉིད་ཀྱིས་དེ་མ་རྟོགས་པ་ཉིད་ཀྱི་ཕྱིར་རོ། །
[43a.3]དོན་གྱི་ཚུལ་གྱིས་དབེན་པ་ཞེས་པ་ལ་སོགས་པ་སྟེ། ཤེས་པ་ཐམས་ཅད་ནི་གཟུགས་ཀྱི་ཤེས་པ་སྒྲའི་ཤེས་པ་ཞེས་ཡུལ་གྱི་ཐ་སྙད་སྟོན་པ་མཐོང་སྟེ། ཡུལ་གྱི་ཚུལ་དང་བྲལ་བ་ནི་དེ་ཐ་སྙད་བསྟན་པར་མི་ནུས་སོ། །འོ་ན་ཤེས་པའི་བློའོ་ཞེས་ཡུལ་མེད་པར་ཡང་ཐ་སྙད་སྟོན་པར་མཐོང་བ་མ་ཡིན་
[43a.4]ནམ་མ་ཡིན་ཏེ། དགོངས་པ་ཡོངས་སུ་མི་ཤེས་པ་ཉིད་ཀྱི་ཕྱིར་རོ། །ཡང་འདི་ལ་དགོངས་པ་ཅི་ཡིན་ཞེ་ན། ཡུལ་དང་འབྲེལ་པ་ཅན་ཉིད་དུ་དོན་གྱི་ཚུལ་གྱིས་དབེན་པར་བཤད་པར་ནུས་པ་མ་ཡིན་ཞེས་པ་འདི་དགོངས་པའོ། །དེ་ལྟར་ནི་དོན་གང་གིས་ཤེས་པ་གང་ཐ་སྙད་བྱེད་པ་ནི། གལ་ཏེ་
[43a.5]དེ་ཁོ་ན་ལས་དེ་སྐྱེ་ནའོ་ཞེས་པ་འདི་ཡུལ་དང་དཔྱད་པའི་སྐབས་ཉིད་དེ། གཞན་དུ་ན་ཤེས་པ་ཞེས་སྟོན་པ་ཁོ་ན་སྟེ། ཅི་སྟེ་དེ་སྐད་སྨྲ་བར་འགྱུར། དེ་ལྟར་ན་དེའི་ཚེ་ཡུལ་གྱི་ཚུལ་གྱིས་འདི་ཐ་སྙད་བྱེད་པར་འགྱུར་རོ་ཞེས་གསུངས་པ། འདི་ཡང་ཡུལ་ཞེས་པ་སྟེ། སྤྱིའི་ཚུལ་གྱིས་གཟུགས་ཉིད་ལ་
[43a.6]སོགས་པས་བསྟན་པར་བྱ། སྤྱི་ཡང་བཏགས་པ་བློ་ལ་གནས་པ་ཁོ་ན་སྟེ། དབང་པོའི་ཡུལ་དུ་མངོན་པར་འདོད་པའི་དངོས་པོ་ལ་ཡོད་པ་མ་ཡིན་ནོ། །དེ་ཅི་ལྟར་དེ་ལ་ཐ་སྙད་བྱས་པ་ན་དེ་ཐ་སྙད་དུ་བྱས་པར་འགྱུར། དེས་ན་གང་གིས་ཐ་སྙད་བྱ་བ་ཞེས་པ་དེ་མི་སྲིད་དོ་ཞེས་སྟོན་པར་གསུངས་པ། དེའི་
[43a.7]ཕྱིར་ཐ་སྙད་དུ་མི་བྱ། །ཞེས་པའོ། །འོ་ན་ཐ་སྙད་དུ་བྱ་བ་མ་ཡིན་པའི་དངོས་པོ་ཡང་མཐོང་བྱ་དང་རྣམ་པར་བརྟག་པར་བྱ་བའི་དོན་དག་གཅིག་ཏུ་བྱས་ནས་ལྷག་པར་ཞེན་པ་མ་ཡིན་ནམ། དེ་ནི་དངོས་པོ་ཉིད་དུ་ཐ་སྙད་བྱེད་པ་པོ་རྣམས་ཀྱིས་ཐ་སྙད་དུ་བྱེད་དེ། ཁྱོད་ཀྱིས་ཀྱང་གདོན་མི་ཟ་བར་འདི་ཁས་
[43b]
[43b.1]བླང་བར་བྱའོ། །རྣམ་པ་གཞན་དུ་ན་ཐ་སྙད་བྱེད་པ་མི་རིགས་པའི་ཕྱིར་རོ་ཞེ་ན། གལ་ཏེ་མཐོང་བར་བྱ་བའི་ཕྱི་རོལ་ཅུང་ཟད་དུ་གྱུར་ན། འདི་དེ་ལྟར་འགྱུར་མོད། དེ་ཡང་མེད་དོ། །དམིགས་པའི་མཚན་ཉིད་མི་རུང་བའི་ཕྱིར་རོ་ཞེས་པས་འདི་ནི་ལན་མ་ཡིན་པ་ཁོ་ནའོ། །འོ་ན་དོན་འདི་བརྗོད་ཟིན་པ་ཁོ་
[43b.2]ན་མ་ཡིན་ནམ། དེ་ཅིའི་དོན་དུ་སླར་ཡང་བརྗོད་ཅེ་ན། དགོས་པ་ཡོད་དེ། སྔར་ནི་རྡུལ་ཕྲ་རབ་རྣམས་ཀྱི་རྡུལ་ཕྲ་རབ་ཀྱི་ངོ་བོ་ཀུན་དུ་ཕྲ་མོ་ཁོ་ནའི་དབང་དུ་མཛད་ནས་དོན་འདི་བཤད་ལ། ད་ལྟ་ནི་དེ་རྣམས་ཁོ་ནའི་གང་རགས་པ་ཚོགས་པའི་རྣམ་པ་དེའི་དབང་དུ་བྱས་ནས་བརྗོད་དོ། །སྔར་ནི་རྫས་སུ་
[43b.3]ཡོད་པ་དེ་རྣམས་ཁོ་ནའི་དེའི་ངོ་བོ་ཞེས་རྣམ་པ་དུ་མའི་དོན་དུ་སྨྲ་བའི་ལུགས་སུ་དོགས་ནས། དེའི་བལྟ་བྱ་ཉིད་དང་བརྗོད་པར་བྱ་བ་ཉིད་ཀྱང་ཁས་བླངས་ནས། སྐྱོན་གཞན་བརྗོད་པར་བཞེད་པས་མངོན་སུམ་ཉིད་རྗེས་སུ་གནང་ལ། དེ་ལྟ་ནི་དེ་ཡོད་ན་ཡང་དེ་ཡང་བལྟར་མི་རུང་བ་ཉིད་ཀྱིས་བརྗོད་པར་
[43b.4]བྱ་བ་མ་ཡིན་པ་ཉིད་ཀྱི་ཕྱིར། ཅིའི་ཕྱིར་མངོན་སུམ་ཉིད་ཡིན་ཞེས་སྒྲུབ་པའི་ཆེད་དུ་འདི་བརྗོད་པའོ། །ཡང་དེའི་བལྟར་མི་རུང་བ་ཉིད་ཀྱང་ཅི་ལྟར་ཞེ་ན། འདི་ལྟར་དགོངས་ཏེ། རྣམ་པ་ཐམས་ཅད་དུ་རང་གི་རྣམ་པ་ཅན་གྱི་རྣམ་པར་ཤེས་པ་བྱེད་པར་བྱེད་པ་ཉིད་གཟུང་བྱ་ཉིད་དུ་འགྱུར་རམ།
[43b.5]འོན་ཏེ་རྣམ་པ་འགའ་ཞིག་གིས་མ་ཡིན། གལ་ཏེ་བརྟག་པ་དང་པོ་ཡིན་ན་ཤེས་པ་ནི་རྣམ་པ་ཐམས་ཅད་དུ་དོན་གྱི་རང་བཞིན་ཉིད་ཐོབ་པའི་ཕྱིར་ཤེས་པ་མ་ཡིན་པ་ཉིད་དུ་ཐལ་ལོ། །ཅི་སྟེ་གཉིས་པ་ཡིན་ན། མཚུངས་པ་དེ་མ་ཐག་པའི་འདས་པའི་ཤེས་པ་ནི། གཞན་གྱི་ཡུལ་ཅན་གྱི་ཤེས་པའི་ཡང་
[43b.6]གཟུང་བྱར་འགྱུར་ཏེ། གང་གི་ཕྱིར་དེ་ལ་ཡང་ཤེས་པ་ཉིད་ལ་སོགས་པའི་རྣམ་པ་འགའ་ཞིག་གིས་རང་སྣང་བའི་ཤེས་པ་སྐྱེད་པ་ཡོད་པ་ཁོ་ནའོ་ཞེས་པའོ། །དེའི་ཕྱིར་གཟུང་བྱའི་མཚན་ཉིད་མི་རིགས་ལ། དེ་ལས་ཀྱང་ཕྱི་རོལ་གྱི་དོན་ལ་བརྟེན་པའི་ཚད་མས་སོགས་པའི་རྣམ་པར་གཞག་པ་
[43b.7]རིགས་པ་མ་ཡིན་ནོ་ཞེས་པ་འདི་གནས་པའོ། །རིགས་པ་ཅན་རྣམས་ཀྱི་ནི་ཞེས་པ། གྲགས་པ་ལས་དང་བར་མ་ཆད་པར་ཡང་དེའི་ལུགས་ཉེ་བར་འཕངས་པའི་ཕྱིར་རྐང་མིག་པ་རྣམས་ཀྱི་ཞེས་རྟོགས་པར་བྱའོ། །དབང་པོ་དང་དོན་ཕྲད་པ་ལས་སྐྱེས་པ་ཞེས་པ་ལ་སོགས་པ་སྟེ། དབང་པོ་རྣམས་ནི་སྣ་
[44a]
[44a.1]དང་ལྕེ་དང་མིག་དང་པགས་པ་དང་རྣ་བ་རྣམས་སོ། །དོན་རྣམས་ནི་དྲི་ལ་སོགས་པ་ལྔ་རྣམས་སོ། །དེའི་རྟེན་རྣམས་ནི་ལས་དང་ཡོད་པ་ཉིད་ལ་སོགས་པ་རྣམས་སོ། །དེ་རྣམས་ཀྱི་ཕྲད་པ་ནི་འབྲེལ་པ་ཡིན་ཏེ། དེ་ནི་རྣམ་པ་ལྔ་སྟེ། སྦྱོར་བ་དང་། སྦྱར་བ་ལ་འདུ་བ་
[44a.2]དང་། སྦྱར་བ་འདུས་པ་ལས་འདུ་བ་དང་། འདུ་བ་དང་འདུས་པ་ལས་འདུ་བའོ། །དེ་ལ་དབང་པོ་ནི་རྫས་དང་སྦྱོར་བའི་མཚན་ཉིད་ཀྱི་འབྲེལ་པ་ཡིན་གྱི། གཟུགས་ལ་སོགས་པ་རྣམས་དང་མ་ཡིན་ནོ། །རྣམ་པ་གཞན་དུ་ན་སྦྱོར་བ་ནི། གཉིས་ཀྱི་རྟེན་ཅན་ཉིད་ཀྱི་ཕྱིར། དེ་རྣམས་ཀྱང་
[44a.3]ཡོན་ཏན་ཅན་དུ་འགྱུར་རོ། །ཡོན་ཏན་རྣམས་ནི་ཡོན་ཏན་མེད་པ་ཡང་ངོ་། །དེའི་ཕྱིར་དབང་པོ་དང་ཡང་དག་པར་སྦྱོར་བ་ལས་རྫས་ལ་ཤེས་པ་སྐྱེའོ། །གང་བདག་གི་ཡིད་དང་སྦྱར་བར་བྱ་བ་ཡིན་ཞིང་། ཡིད་ནི་དབང་པོ་དང་སྟེ་དབང་པོ་ནི་དོན་དང་ངོ་། །འདིར་རྫས་དོན་དུ་མངོན་པར་
[44a.4]འདོད་དོ། །རྫས་ལ་འདུས་པ་རྣམས་ལ་སྟེ། གཟུགས་ལ་སོགས་པ་ཡོན་ཏན་རྣམས་དང་། དེ་བཞིན་དུ་རྫས་ཉིད་ལ་སོགས་པ་སྤྱིའི་ཁྱད་པར་རྣམས་དང་། ལས་ལ་སྦྱར་བ་ལ་འདུ་བ་ལས་སོ། །གཟུགས་ཉིད་ལ་སོགས་པ་རྣམས་ལ་སྦྱར་བ་ལ་འདུས་པ་ལ་འདུ་བ་ལས་སོ། །
[44a.5]དེ་བཞིན་དུ་ཡོན་ཏན་ཉིད་དང་ལས་ཉིད་དག་ལའོ། །སྒྲ་ལ་ནི་འདུ་བ་ལས་ཏེ། དེ་ནི་རྣ་བའི་ཤཀྐུ་ལཱི་ཡོངས་སུ་བཅད་པ་ཆོས་དང་ཆོས་མ་ཡིན་པས་མངོན་པར་འདུས་བྱས་པ་ནམ་མཁའི་ཡུལ་གྱི་མཚན་ཉིད་ཅན་རྣ་བའི་དབང་པོ་ལ་འདུས་པ་གཟུང་བར་བྱ་སྟེ། གང་རྣ་བ་ལ་སོགས་པ་དང་བར་
[44a.6]ཆོད་པའི་ཡུལ་དུ་སྐྱེས་པ་དེ་ནི་དེ་ལ་འདུས་པ་མ་ཡིན་པ་ཉིད་ཀྱི་ཕྱིར་གཟུང་བྱ་མ་ཡིན་པ་ཁོ་ནའོ། །དེས་ནི་སྒྲ་གཞན་ཕྱོགས་ཐམས་ཅད་པ་རྣམས་བརྩམ་ཞིང་། དེ་རྣམས་ཀྱིས་ཀྱང་གཞན་རྣམས་ཏེ། དེ་ལྟར་སྒྲ་གཞན་གྱིས་བརྩམས་པ་སྒྲ་བརྒྱུད་པས་རྣ་བའི་དབང་པོ་ལ་གང་འདུས་པའི་སྒྲ་དེ་
[44a.7]དབང་པོ་དང་འདུ་བ་ལས་འཛིན་པར་འགྱུར་རོ། །གང་བདག་ནི་ཡིད་ཀྱིས་སྦྱར་བར་བྱ་བ་ཡིན་ལ། ཡིད་ཀྱང་རྣ་བས་སོ། །སྒྲའི་རིགས་ལ་ནི་འདུས་པ་ལ་འདུ་བ་ལས་སོ། །ཡོད་པ་ཉིད་རྫས་ལ་འདུས་པ་ནི་སྦྱར་བ་ལ་འདུ་བ་ལས་སོ། །ཡོན་ཏན་དང་ལས་ལ་འདུས་པ་ལ་ནི་སྦྱར་བ་ལ་
[44b]
[44b.1]འདུས་པ་ལ་འདུ་བ་ལས་སོ། །སྒྲ་ལ་འདུས་པ་ལ་ནི་འདུས་པ་ལ་འདུ་བ་ལས་སོ་ཞེས་པ་སྟེ། དེ་ལྟར་འབྲེལ་པ་རྣམ་པ་ལྔ་ཤེས་པའི་རྒྱུའོ། །དེ་ལས་སྐྱེས་པ་སྟེ། མངོན་པར་གསལ་བ་མ་ཡིན་པའོ། །ཤེས་པ་ནི་མངོན་སུམ་སྟེ་ཤེས་པ་སྨོས་པ་ནི་བདེ་བ་ལ་སོགས་པ་རྣམ་པར་གཅད་པའི་དོན་ཏོ། །
[44b.2]ཐ་སྙད་དུ་བྱ་ཞིང་། སྦྱོར་བར་རུང་བ་ལ་སོགས་པའི་རྟགས་ཀྱིས་ཤེས་པར་བྱ་བའོ་ཞེས་པ་ཐ་སྙད་དུ་བྱ་སྟེ་ཡུལ་ལོ། །འདི་ལ་ཐ་སྙད་དུ་བྱ་བའི་ཡུལ་ཡོད་པ་མ་ཡིན་པ་ཞེས་པ་ཐ་སྙད་དུ་བྱ་བ་མ་ཡིན་པའོ། །ཡང་ན་ཤེས་པ་དེ་ཁོ་ན་རང་གི་ངོ་བོས་ཐ་སྙད་དུ་བྱ་བ་མ་ཡིན་པ་སྟེ་ངེས་པར་བསྟན་བྱ་མ་ཡིན་
[44b.3]པའོ་ཞེས་པ་ཐ་སྙད་དུ་བྱ་བ་མ་ཡིན་པའོ། །སྨིག་རྒྱུ་ལ་སོགས་པའི་ཡུལ་ཅན་ནི་འཁྲུལ་པ་སྟེ། ཇི་ལྟར་ཆུ་ལ་སོགས་པའི་ངོ་བོ་ཉིད་དུ་གཟུང་བ་དེ་ལྟར་ཡོད་པ་མ་ཡིན་པ་ཉིད་ཀྱི་ཕྱིར་རོ། །འདི་ལ་འཁྲུལ་པ་ཡོད་པ་མ་ཡིན་ནོ། །ཞེས་པ་འཁྲུལ་པ་མེད་པའོ། །ཡང་ན་ཤེས་པ་དེ་ཉིད་དེ། །དེ་མ་ཡིན་
[44b.4]པ་ལ་དེར་འཛིན་པའི་ཕྱིར་འཁྲུལ་པའོ། །ཞེན་པ་འདིའི་བདག་ཉིད་ཡིན་ཞེས་པ་ཞེན་པའི་བདག་ཉིད་དོ། །བདག་ཉིད་ཀྱི་སྒྲ་ནི་རང་བཞིན་རྗོད་པར་བྱེད་པའོ། །ཡང་ན་འབྲས་བུ་བརྗོད་པའོ། །དབང་དོན་ལས་བྱུང་ཞེས་པ། འདི་ལས་འབྱུང་ངོ་ཞེས་པ་བྱུང་བའོ། །དབང་པོ་དང་དོན་དག་འདིའི་
[44b.5]འབྱུང་བྱེད་ཡིན་པའོ་ཞེས་ཚིག་སྦྱར་རོ། །དབང་པོ་དང་དོན་སྨོས་པ་ནི་དེ་ཕྲད་པ་ཉེ་བར་མཚོན་པའི་དོན་ཏོ། །ཐ་སྙད་བྱ་སོགས་སྲིད་མ་ཡིན། །ཞེས་པ་སྟེ། སོགས་པ་སྨོས་པ་ལས་འཁྲུལ་པ་ཉིད་དང་ཞེན་པའི་བདག་ཉིད་ཀྱང་ངོ་། །གལ་ཏེ་མེད་ན་ཁྱད་པར་མི་རིགས་པ་ཅིའི་ཕྱིར་ཞེ་ན། ཁྱད་པར་
[44b.6]ནི་ཞེས་པ་ལ་སོགས་པ་སྟེ། གལ་ཏེ་ཐ་སྙད་དུ་བྱ་བ་མ་ཡིན་པ་ལ་སོགས་པའི་རང་བཞིན་དང་ཅིག་ཤོས་ཀྱི་རང་བཞིན་དུ་ཡང་དབང་པོ་དང་ཕྲད་པ་ལས་སྐྱེས་པའི་ཤེས་པ་འགྱུར་ན། དེ་ལས་ཁྱད་པར་གསུམ་པོ་འདི་རིགས་སོ། །འདིར་ཡང་ན་ཐ་སྙད་དུ་བྱ་བ་མ་ཡིན་པ་དང་། མ་འཁྲུལ་པ་ཞེས་
[44b.7]པ་ཁྱད་པར་གཉིས་ནི་སྲིད་པ་ཁོ་ན་སྟེ། མི་འཁྲུལ་ལོ། །ཞེན་པའི་བདག་ཉིད་ནི་སྲིད་པ་མ་ཡིན་པ་ཁོ་ན་སྟེ། དེ་ཁོ་ན་ཡང་ཁྱད་པར་དུ་འགྱུར་ཏེ། གང་རྟེན་དེ་ལ་འགྱུར་ཞིང་དེ་ལ་ཡོད་པ་མ་ཡིན་པ་ཉིད་ཀྱི་ཕྱིར། དེ་ལའང་འཁྲུལ་པ་ལ་སྟེ། དཔེར་ན་ཨུཏྤ་ལའི་སྔོན་པོ་ཉིད་ལྟ་བུའོ། །དབང་
[45a]
[45a.1]པོའི་བློ་ལ་ཡོད་པ་ཡང་མ་ཡིན་ནོ་ཞེས་པ་སྟེ། གང་གི་ཚེ་འབྲུ་མང་པོ་པའི་ཕྱོགས་ཡིན་པ་དེའི་ཚེ་འདི་བཤད་དོ། །འདིས་ནི་ཐ་སྙད་དུ་བྱ་བ་ཉིད་མི་སྲིད་པས་ན་ཐ་སྙད་དུ་བྱ་བ་མ་ཡིན་པ་ཉིད་མི་འཁྲུལ་པར་སྟོན་ཏོ། །ཅིའི་ཕྱིར་མེད་ཅེ་ན། གསུངས་པ། རྗེས་སུ་དཔག་པའི་ཡུལ་
[45a.2]ཉིད་ཀྱི་ཕྱིར་ཞེས་པ་ལ་སོགས་པ་སྟེ། ཐ་སྙད་དུ་བསྟན་བྱ་ནི་སྤྱི་ཡིན་གྱི། རང་གི་མཚན་ཉིད་ནི་མ་ཡིན་ཏེ། དེ་སྔར་མ་མཐོང་བ་ཉིད་ཀྱི་ཕྱིར་རོ། །སྤྱི་དེ་ཡང་རྗེས་སུ་དཔག་པ་ཁོ་ནའི་ཡུལ་ཏེ། དུ་བ་ལ་སོགས་པ་རྣམས་ཀྱིས་སྔར་མཐོང་བ་དང་ཐུན་མོང་བར་མེ་ལ་སོགས་པ་རྗེས་སུ་དཔོག་པའི་ཕྱིར་རོ། །
[45a.3]མངོན་སུམ་གྱི་ནི་མ་ཡིན་ཏེ། དེ་ནི་ཐུན་མོང་མ་ཡིན་པའི་ཡུལ་ཅན་ཉིད་ཀྱི་ཕྱིར་རོ། །ཅི་སྟེ་ཡང་ཡུལ་ཐ་སྙད་དུ་བྱ་བ་མ་ཡིན་པར་འགྱུར་མོད། མེད་མོད་ཀྱི་ཤེས་པ་ནི་ཐ་སྙད་དུ་བྱ་བ་སྟེ། དེས་ན་ཐ་སྙད་དུ་བྱ་བ་ཉིད་ཡོད་ཅིང་། དེ་ལས་ཀྱང་འཁྲུལ་པའི་ཕྱིར་ཐ་སྙད་དུ་བྱ་བ་མ་ཡིན་པ་ཉིད་ཀྱི་ཁྱད་པར་
[45a.4]རིགས་སོ་ཞེ་ན་འདིར་ཡང་ཤེས་པ་དེ་ཁོ་ན་རང་གི་ངོ་བོས་གང་བསྟན་པར་བྱ་བ་མ་ཡིན་པ་དེ་ཐ་སྙད་དུ་བྱ་བ་མ་ཡིན་པ་ཉིད་དུ་རིགས་སོ་ཞེས་གསུངས་པ། ཐ་སྙད་དུ་བྱ་བ་མ་ཡིན་པ་ཉིད་ལའང་འཁྲུལ་པ་མེད་པ་སྟེ་ཞེས་པ་སྟེ། ཅིའི་ཕྱིར་ཞེ་ན་གསུངས་པ། དབང་པོ་བློ་ཞེས་པ་ལ་སོགས་པ་སྟེ། ཤེས་པ་
[45a.5]ཐམས་ཅད་ནི་ཐ་སྙད་དུ་བྱ་བ་མ་ཡིན་པའི་རང་གི་ངོ་བོ་ཁོ་ན་ཡིན་པས་ན། ཐ་སྙད་དུ་བྱ་བ་མ་ཡིན་པ་ཉིད་ལ་འཁྲུལ་པ་ཡོད་པ་མ་ཡིན་པ་ཁོ་ནའོ། །ཅི་སྟེ་ཅིའི་ངོ་བོས་ཀྱང་གང་བསྟན་བྱ་མ་ཡིན་པ་དེ་ཐ་སྙད་དུ་བྱ་བ་མ་ཡིན་པའོ་ཞེ་ན། དེ་ལྟ་བུ་ཡང་མི་སྲིད་པར་འགྱུར་ཏེ། ཤེས་པ་ཐམས་ཅད་ནི་སྤྱིའི་
[45a.6]ཚུལ་གྱིས་ཐ་སྙད་དུ་བྱ་བ་ཁོ་ན་ཡིན་པས་སོ། །འདིས་ནི་དེའི་སྐྱེས་བུའི་ཕྱོགས་ལ་ཡང་སྐྱོན་བཤད་དོ། །ཕྱོགས་ཅན་ལེན་པས་སྨྲ་བ་གང་གིས་རྟོགས་པར་བྱ་བ་བཞིན་པ་ཐ་སྙད་ཀྱི་ཆེད་དུ་འགྱུར་བ་ཤེས་པ་ལ་མཚུངས་པར་སྟོན་པའི་སྒྲ་མེད་དེ། གཞན་ལ་ཞེས་བྱེད་པ་སྦྱར་བ་ལས་གཟུགས་ཞེས་
[45a.7]ཤེས་པའོ། །རོ་ཞེས་ཤེས་པའོ་ཞེས་ཡུལ་འབྲེལ་པའི་སྒྲ་བྱེད་པའི་ཕྱིར་རོ། །དེའི་ཚེ་ཡང་བསྟན་པར་བྱ་བཞིན་པའི་སྒྲ་ལས་བྱུང་བར་འགྱུར་རོ། །དེའི་ཕྱིར་རྣམ་པར་གཅོད་པའི་དོན་ཅན་ཐ་སྙད་དུ་བྱ་བ་མ་ཡིན་པའོ་ཞེ་ན། སྨྲས་པ། དོན་འཛིན་པའི་དུས་ན་ནི། མཚུངས་པར་སྟོན་པའི་སྒྲ་བྱ་
[45b]
[45b.1]བ་མ་ཡིན་ན། དེའི་ཚེ་དེ་ཐ་སྙད་དུ་བྱ་བ་མ་ཡིན་པ་ཉིད་ཅེས་པས་དེའི་ཡང་ངེས་པར་བསྟན་པར་བྱ་བ་མ་ཡིན་པ་ཉིད་ལ་ཡང་འཁྲུལ་པ་མེད་དོ་ཞེས་པ་འདི་ཉིད་ལེན་ཏོ། །ཐ་སྙད་ཀྱི་དུས་ན་ཡང་ཤེས་པའི་རང་གི་ངོ་བོ་ཐ་སྙད་དུ་བྱ་བར་མི་ནུས་པའི་ཕྱིར། རེ་ཞིག་ཡུལ་དེ་ཡང་རང་གི་ངོ་བོར་ཐ་སྙད་དུ་བྱ་
[45b.2]བར་མི་ནུས་ན་ཅི་ཞིག་ལས་ཡང་དེས་གཞན་ཐ་སྙད་དུ་སྟོན། ཐ་སྙད་དུ་བྱ་བ་ལས་སྒྲ་ལས་བྱུང་བ་ཉིད་དུ་ཐལ་བར་འགྱུར་བ་ཡང་མ་ཡིན་གྱི། འོ་ན་ཅི་ཞེ་ན། བརྗོད་པར་བྱ་བ་ཉིད་དུའོ་ཞེས་པས་འདི་ནི་མ་བརྟགས་པ་བརྗོད་པའོ། །འཁྲུལ་པའི་ཡུལ་ཉིད་ལ་ཡང་མ་ཡིན་ཏེ། སྲིད་པ་ཡོད་པ་
[45b.3]ཞེས་རྗེས་སུ་འཇུག་གོ། །ཡིད་ནི་འཁྲུལ་པའི་ཡུལ་ཉིད་ཀྱི་ཕྱིར་ཞེས་པ་ལ་སོགས་པ་སྟེ། འཁྲུལ་པ་ནི་དེ་ལྟར་ཡོད་པ་མ་ཡིན་པ་སྟེ། འདིས་ཇི་ལྟར་ཉེ་བར་དམིགས་པ་དེ་ལྟར་དེ་ཡོད་པ་མ་ཡིན་པ་ཉིད་དེ། ཇི་ལྟར་སྨིག་རྒྱུ་ལ་སོགས་པའི་ཡུལ་ལྟ་བུའོ། །དེ་ཡང་ཤེས་པ་གང་ལ་རང་
[45b.4]གི་ངོ་བོས་སྣང་བ་དེ་ལ་ལྟོས་ནས་འཁྲུལ་པར་འགྱུར་བ་མ་ཡིན་པ་ཁོ་ན་སྟེ། གང་དུ་ཤེས་པ་ལ་དེ་ལྟ་བུ་མ་ཡིན་པའི་ངོ་བོས་སོ་སོར་སྣང་བ་དེ་ཁོ་ནའི་ངོར་དེ་འཁྲུལ་པ་ཉིད་དོ། །ཡིད་ཀྱི་རྣམ་པར་ཤེས་པ་འཁྲུལ་པ་ལ་ཡང་དེ་དེ་ལྟ་བུར་སོ་སོ་སོ་སོར་སྣང་སྟེ། དེ་ལྟར་ནི་ཆུ་ལ་སོགས་པའི་རང་
[45b.5]བཞིན་མ་ཡིན་པ་འབྱུང་བ་འདུས་པ་ལ་ཡང་ཆུ་ལ་སོགས་པའི་ངོ་བོར་ལྷག་པར་ཞེན་པའི་ཡིད་ཀྱི་འཁྲུལ་པ་སྐྱེའོ། །དེའི་ཕྱིར་དེས་བརྟགས་པ་ཉིད་ལས་དེ་ཁོ་ནའི་ཡུལ་དེ་ཡིན་གྱི་དབང་པོའི་ཤེས་པའི་ནི་མ་ཡིན་ནོ། །དེའི་ཕྱིར་དེ་རྣམ་པར་གཅད་པའི་དོན་དུ་འཁྲུལ་པ་མེད་པ་སྨོས་པར་བྱ་བ་མ་ཡིན་
[45b.6]ནོ། །འོ་ན་དེ་མེད་ན། དབང་པོ་ཉེ་བར་བཅོམ་པ་ལས་སྐྱེས་པའི་གང་འཁྲུལ་པའི་ཡུལ་ཅན་ཟླ་བ་གཉིས་ལ་སོགས་པའི་ཤེས་པ་དེ་ཡང་མངོན་སུམ་ཉིད་དུ་འགྱུར་བ་མ་ཡིན་ནམ། དེའི་ཕྱིར་དེ་བསལ་བའི་ཆེད་དུ་དེ་གདོན་མི་ཟ་བར་བྱའོ་ཞེ་ན། དེ་ཡོད་པ་མ་ཡིན་ཏེ། དོན་དང་ཕྲད་པ་སྨོས་པ་
[45b.7]ཁོ་ནས་དེ་སྤངས་པའི་ཕྱིར་རོ། །གཞན་དུ་ན་དབང་པོ་ལས་སྐྱེས་པ་ཞེས་པ་འདི་ལྟར་བརྗོད་པར་བྱ་བར་འགྱུར་གྱི། དབང་པོ་དང་དོན་ཕྲད་པ་ལས་བྱུང་བ་ཞེས་བྱ་བ་ནི་མ་ཡིན་ཏེ། དེ་ལ་རྣམ་པར་གཅད་པར་བྱ་བ་མེད་པའི་ཕྱིར་རོ། །འདི་ནི་འབྲུ་མང་པོ་པའི་དབང་དུ་བྱས་ནས་བརྗོད་པའོ། །གང་
[46a]
[46a.1]གི་ཚེ་ཤེས་པ་དེ་ཁོ་ན་རང་ཉིད་མ་འཁྲུལ་པ་ཞེས་དེའི་སྐྱེས་བུ་ལ་ཕ་རོལ་པོ་རྣམས་ཀྱིས་བརྟེན་པ་དེའི་ཚེ་འདི་སྐད་སྨྲ་བར་བྱ་སྟེ། འཁྲུལ་པ་མེད་པ་ཉིད་ལ་འཁྲུལ་པ་མེད་དོ་ཞེས་པས། དབང་པོ་དང་དོན་ཕྲད་པ་ལས་སྐྱེས་པའི་ཤེས་པ་འཁྲུལ་པ་མ་ཡིན་ཏེ། ཡིད་ཀྱི་ཤེས་པ་ཁོ་
[46a.2]ན་འཁྲུལ་པ་ཅན་ཉིད་ཀྱི་ཕྱིར་རོ། །ཟླ་བ་གཉིས་ལ་སོགས་པའི་ཤེས་པ་ནི་ཕྲད་པ་ལས་སྐྱེས་པ་སྨོས་པ་ཁོ་ནས་གསལ་ལོ། །སློབ་དཔོན་གྱིས་ནི་འདིར་དེའི་སྐྱེས་བུའི་ཕྱོགས་ལ་སྐྱོན་གསུངས་པ་མེད་དེ། ཕྱོགས་ཙམ་བསྟན་པ་ཁོ་ནས་སྔ་མའི་རྗེས་སུ་འབྲངས་ནས་རྟོགས་པར་བྱའོ་ཞེས་བྱས་ནས་སོ། །
[46a.3]ཞེན་པ་ནི་ཞེས་པ་ལ་སོགས་པ་ཁྱད་པར་མི་སྲིད་པར་གསུངས་སོ། །དེ་མ་བརྟགས་པར་ཞེས་པ་ངེས་པ་ནི་འདི་ལྟ་བུའི་ངོ་བོ་ནི་བ་ལང་ཁོ་ན་སྟེ། རྟ་མ་ཡིན་ནོ་ཞེས་པ་ཡིན་ཞིང་། དེ་ཡང་ཇི་སྲིད་དུ་བ་ལང་ཉིད་ལ་སོགས་པའི་སྤྱི་ལ་རྣམ་པར་རྟོག་པར་མི་བྱེད་པ་དང་། དེས་དེ་དང་ལྡན་པར་སྦྱོར་བར་མི་བྱེད་
[46a.4]པ་དེ་སྲིད་དུ་ཉེ་བར་སྐྱེ་བ་མ་ཡིན་པ་ཁོ་ནའོ། །སྣ་ལ་སོགས་པའི་ཤེས་པ་རྣམས་སྤྱི་ལ་སོགས་པ་སྦྱོར་བ་ལ་ནུས་པ་ཡོད་པ་ཡང་མ་ཡིན་ཏེ། རྣམ་པར་རྟོག་པ་མེད་པ་ཉིད་ཀྱི་ཕྱིར། ཐ་སྙད་ལ་མི་མཁས་པའི་སྣ་ལ་སོགས་པའི་རྣམ་པར་ཤེས་པ་བཞིན་ནོ་ཞེས་པས་ཁྱད་པར་མི་སྲིད་དོ། །རྣམ་པར་རྟོགས་
[46a.5]པ་མེད་པ་ཉིད་མ་གྲུབ་བོ་ཞེ་ན། མ་ཡིན་ཏེ། དེ་མངོན་སུམ་དུ་གྲུབ་པ་ཉིད་ཀྱི་ཕྱིར་རོ། །གཞན་ཡང་དོན་གཞན་ལ་རྣམ་པར་རྟོག་པ་ན་ཡང་མིག་གིས་གཟུགས་མཐོང་ལ། རྣམ་པར་རྟོག་པ་གཉིས་ཅིག་ཅར་དུ་ཁས་བླང་བར་བྱ་བའམ་ཡང་དག་པར་མྱོང་བར་བྱ་བ་ཡང་མ་ཡིན་ཞེས་པས་ཅིའི་ཕྱིར་མ་
[46a.6]གྲུབ། ཅི་སྟེ་ཞེས་པ་ལ་སོགས་པ་སྟེ། དོན་ཇི་ལྟ་བ་མ་ཡིན་པའི་ཤེས་པ་ནི་ལོག་པའི་ཤེས་པའོ། །སོགས་པའི་སྒྲས་ཐེ་ཚོམ་གྱི་ཤེས་པ་གཟུང་བར་བྱའོ། །དོན་ཇི་ལྟ་བ་བཞིན་མ་ཡིན་པ་ལ་སོགས་པའི་ཤེས་པ་དེ་བཟློག་པའི་ཆེད་དུ་ཞེན་པའི་བདག་ཉིད་ཅེས་བརྗོད་པར་བྱའོ། །འདི་སྐད་
[46a.7]བསྟན་ཏེ། འདིར་ཞེས་པའི་སྒྲ་ངེས་པའི་རྣམ་གྲངས་མ་ཡིན་གྱི། འོ་ན་ཅི་ཞེ་ན། ཡང་དག་པའི་དོན་འཛིན་པའི་རྣམ་གྲངས་སོ། །ཞེན་པའི་བདག་ཉིད་ཅེས་པ་ནི་ཡང་དག་པའི་དོན་འཛིན་པའི་རང་བཞིན་ཞེས་པའི་དོན་ཏོ། །ཅིའི་ཕྱིར་ཁྱད་པར་མི་རིགས་ཤེ་ན། གསུངས་པ། མི་འཁྲུལ་པའི་
[46b]
[46b.1]ཕྱིར་ཡང་ཞེས་པ་སྟེ། ཡང་གི་སྒྲ་ལས་དབང་པོའི་བློ་ལ་དོན་ཇི་ལྟ་བ་ཉིད་མ་ཡིན་པ་མི་སྲིད་པའི་ཡང་ཕྱིར་རོ། །ཅིའི་ཕྱིར་མི་སྲིད་ཅེ་ན། གསུངས་པ། ཐམས་ཅད་ནི་ཞེས་པ་ལ་སོགས་པ་སྟེ། ཙམ་གྱི་སྒྲ་ནི་དོན་ཇི་ལྟ་བ་བཞིན་མ་ཡིན་པ་འཛིན་པ་བསལ་བའི་དོན་ཏོ། །རང་གི་དོན་སྨོས་པ་ཙམ་
[46b.2]གྱིས་མི་སྲིད་པར་སྟོན་ཏོ། །གང་བཟློག་པའི་ཆེད་དུ་འདོད་པ་དོན་ཇི་ལྟ་བ་མ་ཡིན་པ་ཉིད་དེ་ནི་དབང་པོའི་ཤེས་པ་ལ་མི་སྲིད་པ་ཁོ་ནའོ། །གལ་ཏེ་དབང་པོའི་བློ་ཞེས་སྤྱིའི་སྒྲ་ཡིན་པ་དེ་ལྟ་ན་ཡང་སྐབས་ལས་དབང་པོ་དང་དོན་ཕྲད་པ་ལས་སྐྱེས་པ་ཁོ་ན་ལ་འཇུག་སྟེ། མི་འཁྲུལ་པའི་ཕྱིར་ཞེས་པ་
[46b.3]འདིས་འདི་བསྟན་ཏོ། །གལ་ཏེ་ཡང་རྨོངས་པ་སྲིད་པར་སེམས་ན། དེ་ལྟ་ན་ཡང་དེ་སྔར་ཁོ་ནར་བསལ་ཟིན་ཏེ། མ་འཁྲུལ་བ་ཞེས་པའི་ཁྱད་པར་འདིས་སོ། །དེས་ན་ཞེན་པའི་བདག་ཉིད་ཀྱི་ཚིག་འདིས་ཅི་ཞིག་ཅེས་པའོ། །ཡང་ན་མི་སྲིད་པའི་ཕྱིར་མི་རིགས་པ་འབའ་ཞིག་ཏུ་མ་ཟད་ཀྱི། འོན་ཀྱང་མི་
[46b.4]འཁྲུལ་པའི་ཕྱིར་ཡང་ངོ་། །མི་འཁྲུལ་པ་དེ་ཐམས་ཅད་ནི་ཞེས་པ་ལ་སོགས་པས་སྟོན་ཏོ། །འགའ་ཞིག་ཏུ་ཡང་གི་སྒྲ་མི་འདོན་ཏེ། དེ་ལ་དོན་ནི། དེ་ལྟ་ན་ཡང་ཁྱད་པར་ཅི་ལྟར་མི་རིགས་ཤེ་ན། གསུངས་པ། མ་འཁྲུལ་པའི་ཕྱིར་ཞེས་པ་སྟེ། དོན་ཇི་ལྟ་བ་ཉིད་ཀྱི་དབང་པོའི་ཤེས་པ་ལ་འཁྲུལ་
[46b.5]པ་མེད་པའི་ཕྱིར་རོ་ཞེས་པའི་དོན་ཏོ། །འཁྲུལ་པ་མེད་པ་ཇི་ལྟར་ཞེ་ན་གསུངས་པ། ཐམས་ཅད་ནི་ཞེས་པ་ལ་སོགས་པའོ། །འོ་ན་ཞེན་པའི་བདག་ཉིད་ཅེས་པ་འདིར་བདག་ཉིད་ཀྱི་སྒྲ་ནི་འབྲས་བུའི་རྣམ་གྲངས་མ་ཡིན་ནམ། དེ་ལས་ཀྱང་ཇི་སྐད་བཤད་པའི་སྐྱོན་མེད་དོ་ཞེ་ན་གསུངས་པ།
[46b.6]འདིས་ནི་ཞེས་པ་ལ་སོགས་པ་སྟེ། སོ་སོར་བརྗོད་དེ་སོ་སོར་སྤངས་སོ། །ཞེན་པའི་འབྲས་བུ་ཅན་ཞེས་པ་ཞེན་པ་འདིའི་འབྲས་བུའོ་ཞེས་ཚིག་རྣམ་པར་སྦྱར་རོ། །ཅི་ལྟར་སོ་སོར་བརྗོད་ཅེ་ན། གསུངས་པ། ཡོད་ན་ནི་མ་ཡིན་ཏེ་ཞེས་པ་ལ་སོགས་པ་སྟེ། དབང་པོའི་བློའི་དེ་མ་ཐག་པར་སྤྱིའི་རྣམ་པར་
[46b.7]དོན་དུ་བློ་ལ་ཀུན་ནས་ཞེན་ཏེ། དེ་ལྟར་དེ་ལ་ཀུན་ནས་ཞེན་པ་མེད་པའི་མིང་དང་རིགས་ལ་སོགས་པའི་སྦྱོར་བ་མི་སྲིད་པ་ཁོ་ནའོ། །དེའི་དེ་མ་ཐག་ཏུ་འདི་ཅི་ཞེས་མངོན་པར་རྟོགས་པའི་རྣམ་པར་རྟོག་པའོ། །དེ་ལས་སྔར་ཉམས་སུ་མྱོང་བའི་རྗེས་སུ་འབྲང་བས་རྗེས་སུ་དྲན་པའི་རྣམ་པར་རྟོག་པའོ། །དེའི་དེ་མ་
[47a]
[47a.1]ཐག་པའི་ངེས་པར་རྟོག་པའི་རྣམ་པར་རྟོག་པ་ངེས་པའི་བདག་ཉིད་ཅན་དུ་འགྱུར་རོ། །དེའི་ཕྱིར་ཞེན་པ་གང་གི་འབྲས་བུ་ཡིན་པའི་ཤེས་པ་དེ་གལ་ཏེ་དབང་པོ་དང་དོན་ཕྲད་པ་ལས་བྱུང་བར་འདོད་ན་དེ་ལྟར་གྱུར་ན་སྔར་ཉམས་སུ་མྱོང་བ་དྲན་པའི་དེ་མ་ཐག་ཏུ་ངེས་པའི་ཤེས་པར་
[47a.2]འགྱུར་རོ་ཞེས་པས་རྗེས་སུ་དྲན་པའི་ཤེས་པ་དབང་པོ་དང་དོན་ཕྲད་པ་ལས་སྐྱེས་པར་འགྱུར་རོ། །དངོས་སུ་སྨོས་པ་ནི་རིང་པོའི་དོན་ཇི་ལྟ་བ་བཞིན་མ་ཡིན་པའི་ཤེས་པའི་འབྲས་བུ་ཅན་རྣམ་པར་གཅད་པར་བྱ་བ་ཉིད་ན་མངོན་སུམ་མེད་པར་ཐལ་བར་འགྱུར་བའི་ཕྱིར་རོ། །དེས་ན་སྤྲོས་པ་འདིས། གང་གིས་
[47a.3]གང་ལ་འཁྲུལ་པ་དང་སྲིད་པ་མེད་པ་དེ་དེའི་ཁྱད་པར་མ་ཡིན་ཏེ། དཔེར་ན་བ་ལཱ་ཀའི་དཀར་པོ་ཉིད་དང་ནག་པོ་ཉིད་བཞིན། ཐ་སྙད་དུ་བྱ་བ་མ་ཡིན་པ་ཉིད་ལ་སོགས་པ་ཡང་དབང་པོའི་ཤེས་པ་ལ་ཇི་ལྟར་རིགས་པར་འཁྲུལ་པ་དང་སྲིད་པ་མེད་དོ་ཞེས་ཁྱབ་པར་བྱེད་པ་མེད་པར་སྟོན་ཏོ། །ཡང་འཁྲུལ་
[47a.4]པ་ཞེས་བྱ་བ་འདི་ཅི་ཡིན་ཞེ་ན། གལ་ཏེ་དེ་ལས་གཞན་པ་ལ་ཡོད་པ་སྟེ། དེ་ལྟར་གྱུར་ན་སྔོན་པོ་ཉིད་དུ་བུང་བའི་ཁྱད་པར་དུ་འགྱུར་རོ། །ཐ་སྙད་དུ་བྱ་བ་མ་ཡིན་པ་ཉིད་ཀྱང་ཤེས་པའི་གདུང་བ་དང་སྡུག་བསྔལ་སོགས་པ་ལ་ཡང་ཡོད་པའི་ཕྱིར་རོ། །ཅི་སྟེ་དེ་ལ་མེད་པ་ཡིན་ན། དེ་ལྟ་ན་ཡང་བརྩལ་མ་ཐག་
[47a.5]ཏུ་བྱུང་བ་ཉིད་ཀྱིས་མི་རྟག་པ་ཉིད་བསྒྲུབ་པར་བྱ་བ་ན། བསྒྲུབ་བྱས་འཁྲུལ་པར་མི་འགྱུར་ཏེ། །གང་ཕྱིར་གང་ལས་བསྒྲུབ་པར་བྱ་བས་འཁྲུལ་པར་འགྱུར་ལ། བརྩལ་མ་ཐག་ཏུ་བྱུང་བ་ལ་དེ་མེད་པ་མ་ཡིན་ནོ། །བརྩལ་མ་ཐག་ཏུ་བྱུང་བ་ཁོ་ན་ནི་མི་རྟག་པ་འགའ་ཞིག་ལ་མེད་དོ་ཞེས་པས་དེ་ཁོ་
[47a.6]ན་ལ་འཁྲུལ་པར་འགྱུར་རོ་ཞེ་ན། འདི་སྐྱོན་མ་ཡིན་ཏེ། འཁྲུལ་པའི་སྒྲའི་དོན་ནི་རྣམ་པ་གཅིག་མ་ཡིན་པས་སོ། །ཁ་ཅིག་ཡུལ་ལ་འཁྲུལ་པ་ཞེས་པ་རྣམ་པ་གཞན་དུ་ཡོད་པའོ། །ཁ་ཅིག་ཏུ་གཞན་ལ་ཡོད་པ་གཏན་ཚིགས་འཁྲུལ་པ་ཞེས་པའོ། །ཁ་ཅིག་ཏུ་དེ་ལ་མེད་པ་ཁྱད་པར་
[47a.7]འཁྲུལ་པ་ཞེས་པ་ལ་སོགས་པའོ། །འདིར་ནི་དེ་ལ་མེད་པར་མངོན་པར་འདོད་དོ། །ཅི་སྟེ་ཡང་ཞེས་པ་ལ་སོགས་པ་ལ། འདིས་ནི་འདི་སྐད་སྟོན་ཏེ། མི་འདོད་པ་བཟློག་པའི་ཆེད་དུ་ཐ་སྙད་དུ་བྱ་བ་མ་ཡིན་པ་ལ་སོགས་པ་སྨོས་པ་མ་ཡིན་གྱི། འོན་ཀྱང་ཚད་མ་ལ་སོགས་པ་རྣམས་ཀྱི་
[47b]
[47b.1]རང་བཞིན་ཡོངས་སུ་ཤེས་པ་ལས། ངེས་པར་ལེགས་པར་འཐོབ་སྟེ། དེའི་ཕྱིར་དེའི་རང་བཞིན་བསྟན་པའི་ཆེད་དུའོ། །དེའི་ཕྱིར་གྲུབ་པ་སྒྲུབ་པའོ་ཞེ་ན། དེ་ནི་མ་ཡིན་ཏེ་ཞེས་པ་ལ་སོགས་པས་འདི་གསུངས་ཏེ། མངོན་སུམ་གྱི་མཚན་ཉིད་བརྗོད་པར་འདོད་པ་ལ་ཤེས་པའི་རང་བཞིན་བསྟན་པ་
[47b.2]སྐབས་ཅི་ཡོད་ཅེས་པའོ། །དེ་ལ་འདིར་འགྱུར་མོད་མངོན་སུམ་གྱི་མཚན་ཉིད་དེ་ཁོ་ན་དེའི་རང་བཞིན་རབ་ཏུ་བསྟན་པ་མེད་པར་སྨྲ་བར་ནུས་པ་མ་ཡིན་ནོ་ཞེ་ན་གསུངས་པ། འདིའི་ཡང་ཞེས་པ་ལ་སོགས་པ་སྟེ་མཚན་ཉིད་ཅེས་བྱ་བ་ནི་གང་དོན་གཞན་ལས་ལྡོག་པའི་ངོ་བོས་མཚོན་པར་བྱ་བ་རྟོགས་པར་
[47b.3]བྱེད་པ་མ་ཡིན་ལ། མཚོན་པར་བྱ་བ་དེ་ཡང་དབང་པོ་དང་དོན་ཕྲད་པ་ལས་བྱུང་བ་ཞེས་པ་འདི་ཁོ་ནས་གྲུབ་བོ་ཞེས་པས་རང་བཞིན་བརྗོད་པ་དོན་མེད་དོ། །འདིས་ནི་གཏན་ཚིག་གསལ་བར་བྱས་སོ། །ཅི་སྟེ་དགོས་པ་ཡང་བསྟན་པར་བྱས་ན་དེ་ལྟར་འགྱུར་ན། ཧ་ཅང་ཐལ་ལོ་ཞེས་སྟོན་པ་
[47b.4]གསུངས་པ། ཤེས་པའི་རང་བཞིན་བསྟན་པར་བྱ་བ་ཉིད་ན་ཡང་ཞེས་པ་ལ་སོགས་པ་སྟེ། འདིས་ནི་དཔེའོ། །གང་མངོན་སུམ་གྱི་མཚན་ཉིད་ལ་ཉེ་བར་མཁོ་བ་མེད་པ་དེ་དེའི་སྐབས་སུ་བསྟན་པར་བྱ་བ་མ་ཡིན་ཏེ། ཡོན་ཏན་ཉིད་ལ་སོགས་པ་བཞིན། ཐ་སྙད་དུ་བྱ་བ་མ་ཡིན་པ་ཉིད་ལ་
[47b.5]སོགས་པ་ཡང་མངོན་སུམ་གྱི་མཚན་ཉིད་ཀྱི་ངོར་ཉེ་བར་མཁོ་བ་མེད་དོ། །ཁྱབ་པར་བྱེད་པ་མེད་པའོ། །གང་ཞིག་ཐ་སྙད་དུ་བྱ་བ་མ་ཡིན་པ་ལ་སོགས་པ་ནི་དབང་པོ་དང་དོན་ཕྲད་པ་ལས་སྐྱེས་པའི་མངོན་སུམ་གྱི་ཁྱད་པར་མ་ཡིན་པ་ཁོ་ན་སྟེ། འོ་ན་ཅི་ཞེ་ན། འདི་ནི་མངོན་སུམ་གཉིས་ཁོ་ན་ཕན་
[47b.6]ཚུན་འདྲེས་པའི་ངོ་བོ་མདོ་གཅིག་གིས་མཚོན་པའོ། །ཐ་སྙད་དུ་བྱ་བ་མ་ཡིན་པ་འཁྲུལ་པ་མེད་པ་ཞེན་པའི་བདག་ཉིད་ཅེས་པ་མདོའི་ཕྱོགས་གཅིག་པོ་འདིས་ཡིད་ཀྱིས་མཚོན་པའོ། །དབང་པོ་དང་དོན་ཕྲད་པ་ལས་བྱུང་བ་ཞེས་པ་འདིས་ནི་དབང་པོ་དང་དོན་ཕྲད་པ་ལས་སྐྱེས་པའོ། །དེའི་ཕྱིར་ཡང་།
[47b.7]དབང་དོན་ལས་བྱུང་བློ་ལ་ནི། །མེད་དོ་ཞེས་པ་ལ་སོགས་པ་གང་བརྗོད་པ་དེ་ནི་མདོའི་དོན་ཡོངས་སུ་མ་ཤེས་པའི་རྣམ་པར་སྤྱོད་པའོ། །དེ་ཉིད་ཀྱི་ཕྱིར། བདེ་སོགས་གཞལ་བྱ་མིན་པའམ། །ཞེས་པ་དེ་ཡང་སྐྱོན་མ་ཡིན་ལ། གང་དེ་མ་ཐག་པར་བརྗོད་པའི་གཏན་ཚིགས་ནི་མ་གྲུབ་པའོ་ཞེས་
[48a]
[48a.1]སེམས་པ་དེས་ནི་ཡིད་དབང་པོ་ཉིད་དུ་བརྗོད་པར་བྱ་སྟེ། མངོན་སུམ་གྱི་ཐ་སྙད་དུ་བྱ་བ་རབ་ཏུ་གྲུབ་པའི་དོན་དུའོ། །གཞན་ཡང་ཐ་སྙད་དུ་ཡང་ཞེས་པ་མ་ཡིན་པ་འཁྲུལ་པ་མེད་པ་ཞེན་པའི་བདག་ཉིད་ཅེས་པ་འདི་ཙམ་མཚན་ཉིད་དུ་འགྱུར་མོད། འདི་ཁོ་ནས་སྔ་མ་ཡང་མངོན་
[48a.2]སུམ་ཉིད་དུ་གྲུབ་པའི་ཕྱིར། མཚན་ཉིད་སྔ་མ་དོན་མེད་པ་ཉིད་དུ་ཐལ་བར་འགྱུར་རོ། །ཐམས་ཅད་དུ་ཡང་ཞེས་པ་ལ་སོགས་པར་མཚན་ཉིད་མ་ཁྱབ་པ་ཉིད་དུ་གསུངས་ཏེ། གང་གི་ཕྱིར་མིག་དང་རྣ་བའི་རྣམ་པར་ཤེས་པ་དག་ཀྱང་མངོན་སུམ་ཉིད་དུ་འདོད་དེ། དེ་དག་ལ་ཡང་ཕྲད་པ་ལ་བྱུང་བ་
[48a.3]མི་སྲིད་དོ། །དེ་མི་སྲིད་པར་སྟོན་པ་གསུངས་པ། བར་དང་བཅས་པ་འཛིན་པ་དང་། །ཞེས་པ་ལ་སོགས་པ་སྟེ། བར་དང་བཅས་པ་འཛིན་པ་ནི་རྣམ་པར་ཆོད་པ་འཛིན་པ་ཞེས་པའོ། །ལྷག་པར་འཛིན་པ་ནི་དབང་པོ་དང་བྲལ་བར་འཛིན་པའོ། །དེར་མི་འགྱུར་རོ། །ཅིའི་ཕྱིར་ཞེ་ན། གསུངས་པ།
[48a.4]མ་ཡིན་ཞེས་པ་ལ་སོགས་པ་སྟེ། འདིས་གང་དབང་པོ་དང་བར་མེད་པ་དེ་དབང་པོ་ལས་བར་དང་བཅས་པ་ཞེས་གཟུང་བར་བྱ་བ་མིན་ཞིང་། ལྷག་པའོ་ཞེས་ཀྱང་མ་ཡིན་ཏེ། དྲི་ལ་སོགས་པ་བཞིན། གཟུགས་དང་སྒྲ་དག་ཀྱང་དེ་ལྟ་བུའོ་ཞེས་འགལ་བས་ཁྱབ་པའི་ཐལ་བར་འགྱུར་བ་
[48a.5]གསུངས་སོ། །དེ་རྣམ་པ་དེ་ལྟར་འཛིན་པ་ཡང་ཡོད་དོ། །དེ་ལྟར་ནི་དབང་པོའི་ཚད་ལས་ལྷག་པའི་རང་བཞིན་རྣམས་དང་རྣམ་པར་ཆོད་པ་ཞེས་པའི་རི་ལ་སོགས་པ་རྣམས་དང་སྒྲ་རྣམས་གཟུང་བར་བྱའོ་ཞེས་པ་འདི་ནི་རབ་ཏུ་གྲགས་པའོ། །འཐོབ་པ་འཛིན་པར་གྱུར་ན་ནི་ཆ་ཇི་སྙེད་ཀྱིས་འཐོབ་པ་
[48a.6]དེ་སྙེད་ཁོ་ན་འཛིན་པར་འགྱུར་ཞིང་རྣམ་པར་མ་ཆད་པ་ཞེས་པར་ཡང་འཛིན་པར་འགྱུར་རོ། །གཟུགས་སྨོས་པ་ནི་འདིར་མིག་གི་ཡུལ་ཉེ་བར་མཚོན་པའི་དོན་ཏོ། །གང་གང་ལས་བར་དང་བཅས་པར་གཟུང་བྱ་སྟེ། དེ་དང་ལྷན་ཅིག་བར་མེད་པ་ཉིད་མ་ཡིན་ཏེ། དཔེར་ན་ཚུ་རོལ་དང་ཕ་རོལ་བཞིན།
[48a.7]གཟུགས་དང་སྒྲ་དག་ཀྱང་རང་འཛིན་པར་བྱེད་པའི་དབང་པོ་ལས་བར་དང་བཅས་པའོ་ཞེས་གཟུང་བར་བྱ་བའོ། །དེ་བཞིན་དུ་གང་གང་ལས་ལྷག་པར་གཟུང་བར་བྱ་བ་དེ་དེ་དང་ལྷན་ཅིག་བདག་ཉིད་ཐམས་ཅད་ཀྱིས་བར་མེད་པ་ཉིད་མ་ཡིན་ཏེ། དཔེར་ན་ཉུངས་ཀར་བཞིན། གཟུགས་དང་སྒྲ་དག་
[48b]
[48b.1]ཀྱང་རང་གི་དབང་པོ་ལས་ལྷག་པར་གཟུང་བར་བྱ་བ་དག་གོ་ཞེས་པ་ཐལ་བ་དང་བཟློག་པས་ཁྱབ་པར་བྱེད་པ་དང་འགལ་བ་གཉིས་པོ་འདིའོ་ཞེས་པའི་སྒྲ་ཉེ་བར་བླང་བ་ནི་མ་གྲུབ་པ་ཉིད་ཡོངས་སུ་སྤང་བའི་ཆེད་དུའོ། །འོ་ན་དབང་པོ་ནི་དབང་པོ་ལས་འདས་པ་མ་ཡིན་ནམ། དེ་ཅི་ལྟར་དེ་ལ་ལྟོས་པས་
[48b.2]ཅུང་ཟད་བར་དང་བཅས་པ་ཞེས་པའམ་ལྷག་པའོ་ཞེས་པར་གཟུང་བར་བྱ་བ་ཡིན། གཟུགས་ལ་སོགས་པ་རྣམས་ལ་ཚད་ཡོད་པ་ཡང་མ་ཡིན་ཏེ། ཡོན་ཏན་རྣམས་ལ་ཡོན་ཏན་མེད་པ་ཉིད་ཀྱི་ཕྱིར་རོ། །དེས་ན་ཅིའི་ཕྱིར་དེ་རྣམས་ལྷག་པ་འཛིན། ཕ་རོལ་པོས་དྲི་ལ་སོགས་པ་རྣམས་དང་
[48b.3]ལྷན་ཅིག་དབང་པོ་བར་མེད་པ་ཉིད་དུ་འདོད་པ་ཡང་མ་ཡིན་ཏེ། དེ་རྣམས་དང་དེ་ལྡན་པ་མེད་པའི་ཕྱིར་རོ། །དེས་ན་དབང་པོ་དང་བར་མེད་པ་དྲི་ལ་སོགས་པ་ལ་མ་ཡིན་པས་ཞེས་པ་ལ་སོགས་པ་འདི་ཅི་ལྟར་བརྗོད་ཅེ་ན། རྫས་གང་ལ་དྲི་ལ་སོགས་པ་རྣམས་འདུས་པའི་རྫས་དེ་འདིར་
[48b.4]དབང་པོ་དང་བར་མེད་པར་ཤེས་པར་བྱས་ལ། དེ་དང་ལྷན་ཅིག་དབང་པོ་སྦྱོར་བའི་ཕྱིར་དེའི་སྒོ་ནས་དྲི་ལ་སོགས་པ་རྣམས་ཀྱང་བར་མེད་པ་ཉིད་ཡོད་དེ། སྦྱར་བ་ལ་འདུ་བའི་མཚན་ཉིད་དོ་ཞེས་པ་སྐྱོན་མེད་དོ། །གང་འོ་ན་དབང་པོ་ནི་དབང་པོ་ལས་འདས་པ་མ་ཡིན་ནམ་ཞེས་པ་ལ་སོགས་
[48b.5]པ་བརྗོད་པ་དེ་ལ་གལ་ཏེ། དབང་པོ་ལ་ལྟོས་ནས་གཟུགས་དང་སྒྲ་དག་དེ་ལྟར་འཛིན་པ་མ་ཡིན་ན་དེའི་ཚེ་ཅི་ལ་ལྟོས་པས་བརྗོད་པར་བྱ། གལ་ཏེ་རྟེན་ལ་ལྟོས་པས་སོ་ཞེ་ན། འོ་ན་དེ་ལྟ་ན་གལ་ཏེ་གཟུགས་དང་སྒྲ་དག་རྟེན་ལས་རྣམ་པར་བཅད་པ་དག་གོ་ཞེས་པ་དང་ལྷག་པ་དག་ཀྱང་ངོ་ཞེས་པར་ཡང་
[48b.6]གཟུང་བར་བྱ་བ་ཡིན་ན། དེ་ལས་ཕྱི་རོལ་མ་ཡིན་པར་འཇུག་པའི་དབང་པོ་ལས་ཀྱང་དེ་དག་ཁོ་ནར་གཟུང་བར་བྱ་སྟེ། གང་གང་ལས་རྣམ་པར་ཆོད་པའོ་ཞེས་པ་དང་ལྷག་པའོ་ཞེས་པར་ཡང་གཟུང་བར་བྱ་བ་དེ། དེ་ལས་ཕྱི་རོལ་མ་ཡིན་པར་འཇུག་པའི་དངོས་པོ་ལས་ཀྱང་དེ་ལྟ་ཁོ་ནར་གཟུང་བར་
[48b.7]བྱ་སྟེ། དཔེར་ན་བུམ་པ་ལས་རྣམ་པར་ཆོད་པ་ཞེས་པ་དང་ལྷག་པ་ཞེས་པར་ཡང་གཟུང་བར་བྱ་བའི་རི་བོ་ནི་བུམ་པ་ལས་ཕྱི་རོལ་དུ་འཇུག་པ་མ་ཡིན་པའི་ཆུ་ལ་སོགས་པ་ལས་དེ་ལྟ་ཁོ་ནར་གཟུང་བྱ་ཡིན་པ་བཞིན། རྩོད་པའི་གཞིར་གྱུར་པའི་གཟུགས་དང་སྒྲ་དག་ཀྱང་དབང་པོའི་རྟེན་ལས་རྣམ་པར་
[49a]
[49a.1]ཆོད་པ་དག་གོ་ཞེས་པ་དང་ལྷག་པ་དག་གོ་ཞེས་པར་ཡང་གཟུང་བར་བྱ་བའོ། །རང་བཞིན་ནོ། །གང་ཡང་གཟུགས་ལ་སོགས་པ་རྣམས་ལ་ཞེས་གང་སྨྲས་པ་དེ་ལ། གལ་ཏེ་གཟུགས་ལ་སོགས་པ་རྣམས་ལ་ཚད་མེད་ན་དེའི་ཚེ་ཅི་ལྟར་གཟུགས་ཆུང་ངུའོ་གཟུགས་
[49a.2]ཆེན་པོའོ་ཞེས་གཟུང་བར་བྱ། གལ་ཏེ་ཉེ་བར་བཏགས་པ་ལ་སྟེ། དེ་འགྱུར་མོད་ཀྱི་གཟུགས་ལ་སོགས་པ་རྣམས་གང་དུ་འཕྲོད་པ་འདུས་པའི་རྫས་དེ་ཆུང་ངུའམ་ཆེན་པོ་སྟེ། དེའི་སྒོ་ནས་གཟུགས་ལ་སོགས་པ་ལ་ལྷག་པ་ཉིད་ལ་སོགས་པ་ཉེ་བར་བཏགས་པའོ་ཞེ་ན། ཇི་ལྟ་བ་དེ་ལྟར་
[49a.3]འགྱུར་མོད། བཏགས་པ་དེས་ཀྱང་དྲི་ལ་སོགས་པ་བཞིན་དུ་གཟུགས་ལ་སོགས་པ་ཡང་ལྷག་པའོ་ཞེས་འཛིན་པ་མི་ཐོབ་བོ་ཞེས་པ་འདི་ཙམ་བརྗོད་པར་བྱའོ། །གཞན་ཡང་ཤེས་པ་མཚུངས་པ་ཡོངས་སུ་གཅད་པར་བྱ་བ་ཉིད་ཀྱི་ཕྱིར། ཉེ་བར་བཏགས་པ་ཁོ་ན་མི་རིགས་ཏེ། རྫས་ལ་གང་འདྲ་
[49a.4]བའི་རྫས་ཆུང་ངུའམ་ཆེན་པོ་ཞེས་པའི་ཤེས་པ་དེ་གཟུགས་ལ་སོགས་པ་རྣམས་ལ་གཟུགས་ཆུང་ངུའམ་ཆེན་པོ་ཞེས་ཁྱད་པར་མེད་ལ། དངོས་དང་བཏགས་པ་དག་ཤེས་པ་མཚུངས་པས་ཡོངས་སུ་གཅད་པར་བྱ་བའང་མ་ཡིན་ཏེ། གང་འདྲ་བའི་ཤེས་པས་བ་ལང་དངོས་ཡོངས་སུ་གཅོད་
[49a.5]པ་དེ་འདྲ་བ་ཁོ་ནས་ཉེ་བར་བཏགས་པ་ཁུར་བུ་བ་མ་ཡིན་པས་སོ། །གལ་ཏེ་ཡང་རྟེན་གྱི་སྒོ་ནས་ཡོན་ཏན་རྣམས་དང་ཡོན་ཏན་དང་ལྡན་པ་རྣམས་རྟོགས་པར་བྱ་བ་ཡིན་ན། སྒྲ་ཐམས་ཅད་ཆེན་པོའོ་ཞེས་པ་ཁོ་ནར་རྟོགས་བྱར་འགྱུར་ཏེ། དེའི་རྟེན་ནམ་མཁའ་ཚད་ཆེན་པོ་ཉིད་ཀྱི་ཕྱིར་རོ། །དེ་ལས་
[49a.6]ཀྱང་གླང་པོ་ཆེ་དང་སྦྲང་བུ་ལ་སོགས་པའི་སྒྲ་རྣམས་ཚད་ཐ་དད་པར་རྟོགས་པར་མི་འགྱུར་རོ། །དེའི་ཕྱིར་དེ་རྣམས་ཀྱང་ཡོན་ཏན་དང་ལྡན་པར་ཁས་བླང་བར་བྱ་ལ། ཡང་ན་རྫས་ཀྱང་མ་ཡིན་ནོ། །ཕྱི་རོལ་དུ་འཇུག་པ་ཉིད་ཀྱི་ཕྱིར་ཞེས་པ་ལ་སོགས་པས་གཏན་ཚིགས་དག་མ་གྲུབ་པར་སྨྲས་སོ། །དེ་ལྟར་
[49a.7]ནི་རྟེན་ལས་ཕྱི་རོལ་དུ་འཇུག་པ་མ་ཡིན་པ་ཉིད་ལ་བརྟེན་ནས། བར་དང་བཅས་པ་དང་ལྷག་པ་འཛིན་པའི་གཏན་ཚིགས་དག་མངོན་པར་བརྗོད་ན། ཕྱི་རོལ་དུ་འཇུག་པ་ཉིད་ལ་ནི་དེ་འཐད་པ་མ་ཡིན་ཏེ། གང་གི་ཕྱིར་དབང་པོ་ནི་ཕྱི་རོལ་དུ་སོན་ནས། རྣམ་པར་རྒྱུ་བའི་ཡུལ་དང་ལྡན་ཞིང་། དེ་རྟེན་
[49b]
[49b.1]ལས་ལྷག་པར་སྣང་སྟེ། མར་མེའི་སྣང་བ་བཞིན་ནོ། །དེའི་ཕྱིར་དེའི་ཡུལ་བར་དང་བཅས་པ་དང་། ལྟག་པར་འཛིན་པ་འཐད་ཀྱི། རྟེན་ལས་ཏེ། དབང་པོ་ལས་མ་ཡིན་ནོ་ཞེས་པ་བསམ་པའོ། །འདིར་བརྩད་པར་བྱ་སྟེ། མིག་ནི་འོད་དང་ལྡན་པ་ཉིད་ཀྱི་ཕྱིར་འོད་ཟེར་རྣམས་བྱུང་ནས་དོན་གསལ་
[49b.2]བར་བྱེད་ཅེས་ཁས་བླངས་པའི་ཕྱིར་ཕྱི་རོལ་དུ་འཇུག་པ་ཉིད་དུ་དོགས་པར་རིགས་ན། རྣ་བ་ནི་ཉན་བྱེད་ཀྱི་བུ་གར་ཡོངས་སུ་བཅད་པའི་ནམ་མཁའི་ཕྱོགས་ཀྱི་ཁྱད་པར་ཡིན་ཏེ། དེ་ནི་ཕ་རོལ་པོས་ཕྱི་རོལ་དུ་འཇུག་པ་ཉིད་དུ་འདོད་པ་མ་ཡིན་ནོ། །དེས་ནི་ཅི་ལྟར་དེ་དེ་ལྟར་དོགས་ཞེས་པའོ། །འདི་
[49b.3]ལྟར་སེམས་ཏེ་ནམ་མཁའ་ཕྱོགས་དང་ལྡན་པ་ཉིད་དུ་བཏགས་ཤིང་། དོན་དམ་པར་ནི་དེ་ཆ་ཤས་མེད་པ་ཁོ་ན་སྟེ། ཇི་སྐད་བཤད་པའི་ཚུལ་གྱིས་བཏགས་པའི་ཕྱོགས་ལ་གང་ཕྱི་རོལ་དུ་འཇུག་པ་མ་ཡིན་པ་དེ་ཉིད་ལ་སྐྱོན་བརྗོད་པ་ལ། མ་རྟོགས་པས་དོན་དམ་པའི་ཕྱོགས་ལ་བརྟེན་པས་ཕྱི་
[49b.4]རོལ་དུ་འཇུག་པ་ཉིད་དུ་རེས་འགའ་ཕ་རོལ་པོས་རྟོགས་པར་བྱེད་དོ་ཞེས་པ་དེའི་ཕྱིར་དོགས་པར་རིགས་སོ། །དེ་ལ་གསོ་བ་ལ་སོགས་པ་ལ་རབ་ཏུ་སྦྱོར་བའི་ཕྱིར་ཞེས་པ་འཐད་པའོ། །འོ་ན་རྐང་པ་བསྐུ་བ་ལ་སོགས་པས་རྟེན་ལས་གཞན་དུ་ཡང་མིག་ལ་སོགས་པ་བྱ་བ་མ་ཡིན་ནམ། དེའི་
[49b.5]ཕྱིར་གང་ལ་གསོ་བའི་སྦྱོར་བ་ཅན་དེ་ལ་དབང་པོའོ་ཞེས་པ་འདི་མཐའ་གཅིག་ཏུ་ངེས་པ་མ་ཡིན་ནོ་ཞེ་ན། དེ་ཡོད་པ་མ་ཡིན་ཏེ། དེར་ཡང་མ་མ་གསོ་བའི་སྒོ་ནས་གཞོན་ནུའི་བཞིན་དུ་མིག་ལ་སོགས་པའི་རྟེན་ལ་གནས་པ་ཁོ་ནའི་རྩ་འཕོ་བས་གསོ་བ་རབ་ཏུ་སྦྱོར་བའི་ཕྱིར་ཏེ། རྣམ་པ་གཞན་དུ་ན་དེ་ལ་ཉེ་བ་མ་
[49b.6]ཡིན་ཞིང་དེ་དག་འབྲེལ་པ་ཉམས་སུ་མ་མྱོང་བ་ནི་ཅི་ལྟར་གསོ་བར་བྱ། ཅི་སྟེ་གསོ་བའི་དུས་སུ་རྐང་པ་ལ་སོགས་པ་ལ་ཉེ་བར་གྱུར་པའོ་ཞེ་ན། དེ་ལྟར་གྱུར་ན་རྐང་པ་ལ་སོགས་པས་གཟུགས་འཛིན་པར་ཐལ་ལོ། །དེའི་ཕྱིར་རང་གི་རྟེན་ལ་གནས་པ་ཁོ་ན་ཇི་སྐད་བཤད་པའི་རྣམ་པས་གསོ་བར་བྱའོ་ཞེས་
[49b.7]ཁས་བླང་བར་བྱའོ། །དེ་འདི་སྐད་བཤད་པར་འགྱུར་ཏེ། དབང་པོ་གང་ཞིག་རང་གི་རྟེན་ལ་གསོ་བར་བྱ་བ་དེ་དེ་ཁོ་ན་ལ་འཇུག་སྟེ། སྣ་ལ་སོགས་པ་བཞིན། མིག་དང་རྣ་བ་དག་ཀྱང་རང་གི་རྟེན་ལ་གསོ་བར་བྱ་བ་དག་གོ་ཞེས་པ་རང་བཞིན་ནོ། །དེའི་ཕྱིར་དབང་པོ་ཁོ་ན་ལས་ཞེས་པ་སྟེ། ཚིག་ཕྲད་
[50a]
[50a.1]ནི་རིམ་པ་ཐ་དད་པ་སྟེ། རྣམ་པར་ཆོད་པ་ཁོ་ན་ལ་ཞེས་པ་འདི་ལྟར་བལྟ་བར་བྱའོ། །ཅིའི་ཕྱིར་ཞེ་ན། གང་གི་ཕྱིར་རྟེན་ལས་ཀྱང་རྣམ་པར་བཅད་པའི་དོན་ཞེས་འཛིན་ཏེ། དབང་པོ་འབའ་ཞིག་ལས་ནི་མ་ཡིན་ནོ། །གང་ཕྱིར་རྟེན་གྱི་སྒོ་ཁོ་ནས་ནི་དབང་པོ་ལས་དོན་བར་དང་
[50a.2]བཅས་པ་འཛིན་པར་རྟོགས་ཏེ། སྔར་ཇི་སྐད་བཤད་པ་བཞིན་ནོ། །སྐྱོན་གཞན་བརྗོད་པར་བཞེད་པས་ཕྱི་རོལ་དུ་འཕོ་བ་ཁས་བླངས་ནས་གསུངས་པ། ཡོད་དུ་ཆུག་ན་ཡང་ཞེས་པ་ལ་སོགས་པའོ། །གཞན་དུ་ན་ཞེས་པ་ལ་སོགས་པས་ཕྱི་རོལ་དུ་འཕོས་པའི་ཡུལ་ལ་དམིགས་པའི་ནུས་པ་མེད་པ་ལ་
[50a.3]གཏན་ཚིགས་གསུངས་ཏེ། དབང་པོ་གང་གི་རྟེན་བཀབ་པ་ན་ཡུལ་འཛིན་པ་མེད་པ་དེ་ཕྱི་རོལ་དུ་འཕོས་པས་ནི་གེགས་མེད་པར་ཡུལ་འཛིན་པའི་ནུས་པ་མེད་དེ། པགས་པ་ལ་སོགས་པའི་དབང་པོ་བཞིན། མིག་དང་རྣ་བ་དག་ཀྱང་རང་གི་རྟེན་བཀབ་པ་ན་ཡུལ་འཛིན་པ་མེད་དོ། །འབྲས་བུ་མི་དམིགས་
[50a.4]པའོ། །འོ་ན་མིག་གི་ནུས་མཐུའི་མཚན་ཉིད་འཇུག་པ་ནི་རྟེན་བཀབ་པ་ན་འཇིག་པའམ། རྟེན་བཀབ་པའི་དུས་ན་དེ་ཁོ་ན་ལ་མྱུར་དུ་རབ་ཏུ་འཇུག་པ་མ་ཡིན་ནམ། དེའི་ཕྱིར་སྐྱོན་འདི་མེད་དེ། རྟེན་མ་བཀབ་པ་ཁོ་ན་ནི་དེའི་ཡུལ་འཛིན་པའི་ནུས་པ་ཡིན་གྱི་རྣམ་པ་གཞན་དུ་མ་ཡིན་ནོ་ཞེས་པའོ། །རྣ་བའི་
[50a.5]དབང་པོའི་ངོར་རེ་ཞིག་འདི་ཡང་དག་པར་འཇོག་པ་མ་ཡིན་ཏེ། དེ་རྟེན་བཀབ་པ་ན་ཡང་ཕྱི་རོལ་དུ་འཇུག་པ་ཉིད་ཀྱི་ཕྱིར་དང་། རྟག་པ་ཉིད་ཀྱི་ཕྱིར་ཡང་ངོ་། །མིག་གི་ངོར་གལ་ཏེ་འདི་ལན་ཡིན་ཞེས་སོ་སོར་རེ་བར་འགྱུར་ན་དེ་ཡང་དོར་ཅིག །གང་གི་ཕྱིར། མིག་གི་བདག་ཉིད་དུ་གྱུར་པའི་འོད་ཀྱི་
[50a.6]ཆ་ཤས་ཅན་ནི་འཕོས་ནས། བདག་ཉིད་ཐམས་ཅད་ཀྱིས་ཡུལ་དང་ཡང་དག་པར་ལྡན་པ་ཉིད་ཀྱི་ཕྱིར། དེ་ཁོ་ན་ལ་ཉེ་བ་ཡིན་གྱི། རྟེན་ལ་མ་ཡིན་ལ། དེ་དང་ལོག་པ་མ་ཡིན་པ་ཉིད་ཀྱི་ཕྱིར། མིག་ཀྱང་ངོ་ཞེ་ན། གང་ལས་རྣམ་པར་དབྱེ་བས་རྟེན་ལ་ཡང་འཇུག་པར་འགྱུར་བ། དེའི་ཆ་ཤས་
[50a.7]རྣམས་ཡོད་པ་མ་ཡིན་པས་ཏེ། དེ་ལས་ཀྱང་དེའི་ཚེ་དེའི་རྟེན་དུ་མངོན་པར་འདོད་པའི་ལུས་ཀྱི་ཆ་ཤས་ནི་དེའི་རྟེན་དུ་འགྱུར་བ་མ་ཡིན་པ་ཁོ་ན་སྟེ། འབྲེལ་པ་མེད་པའི་ཕྱིར། དབང་པོ་གཞན་བཞིན་ནམ་ཧ་ཅང་ཐལ་བ་ཡང་ནའོ། །རྟེན་མ་ཡིན་ན་ཡང་བཀབ་པ་ན་དེའི་འཇིག་པ་དང་འཇུག་པ་དག་
[50b]
[50b.1]ཅིས་འགྱུར་ཞེས་པའམ་ཧ་ཅང་ཐལ་བའོ། །ཅི་སྟེ་ཆ་དང་བཅས་པར་འོད་ཀྱི་ཆ་ཤས་ཅན་རྟོག་ན། དེ་ལྟ་ན་ཡང་དེའི་ཕྱོགས་ཡུལ་དང་ཡང་དག་པར་ལྡན་པ་ཤེས་པ་ཉེ་བར་སྐྱེ་བའི་རྒྱུ་ཡིན་པ་དེ་ལ་སྐྱོན་དེ་ཁོ་ནའོ། །འོན་ཏེ་དེ་མིག་གི་དབང་པོ་ལ་དོན་གཞན་ཉིད་དུ་འདོད་ན་དེའི་ཚེ་དེ་ཁོ་ན་མིག་གི་ངོ་བོ་
[50b.2]བསྟན་པའི་ཤུགས་ལས་དང་། དེའི་མཚན་ཉིད་ལས་མིག་གི་ཡིན་ཞིང་། དེ་ལ་ཡང་ཆ་ཤས་དང་བཅས་པ་དང་། ཆ་ཤས་མེད་པ་ཉིད་ཀྱི་ཕྱོགས་དག་ལ་སྐྱོན་དང་བཅས་པ་དེའི་གནས་སྐབས་ཁོ་ནའོ་ཞེས་པས་འདི་ནི་གྱི་ན་ཡིན་ནོ། །ལྔ་པོ་རྣམས་དབང་པོ་ཉིད་ན་ཞེས་པ། སྣ་དང་ལྕེ་དང་མིག་
[50b.3]དང་པགས་པ་དང་རྣ་བ་རྣམས་དབང་པོ་རྣམས་སོ་ཞེས་པའི་མདོ་ལས་སོ། །བདེ་སོགས་གཞལ་བྱ་མིན་པའམ། །ཞེས་པས་མཚན་ཉིད་མ་ཚང་བ་ཉིད་གསུངས་སོ། །བདེ་བ་ལ་སོགས་པ་ཤེས་པ་མངོན་སུམ་གྱི་མཚན་ཉིད་ཀྱིས་མ་བསྡུས་པའི་ཕྱིར་རོ། །དེ་ལས་ཀྱང་བདེ་བ་ལ་སོགས་པ་
[50b.4]རྣམས་གཞལ་བྱ་ཉིད་དུ་ཁས་ལེན་པ་འགལ་བའོ། །དེ་ལ་འདིར་འགྱུར་མོད། གལ་ཏེ་ཡང་བདེ་བ་ལ་སོགས་པ་མངོན་སུམ་གྱི་ཡུལ་དུ་མི་འགྱུར་མོད། དེ་ལྟ་ན་ཡང་རྗེས་སུ་དཔག་པ་ལ་སོགས་པའི་ཡུལ་ཉིད་ཀྱི་ཕྱིར་གཞལ་བྱར་འགྱུར་རོ་ཞེ་ན། དེའི་ཕྱིར་གསུངས་པ། གང་ཞེས་པ་ལ་
[50b.5]སོགས་པ་སྟེ། རང་སྨོས་པ་ནི་ཕ་རོལ་གྱི་རྣམས་ལ་བདེ་བ་དང་རབ་ཏུ་དང་བ་ལ་སོགས་པའི་རྟགས་རབ་ཏུ་རྙེད་པར་སླ་བ་ཉིད་ཀྱི་ཕྱིར་རོ། །རང་གི་རྣམས་ནི་གང་གི་ཚེ་རྟགས་མེད་པའི་ཕྱིར་རྗེས་སུ་དཔག་པ་མེད་ལ། འདྲ་བ་མེད་པའི་ཕྱིར་ཉེ་བར་འཇལ་བ་མེད་ཅིང་། ཉེ་བར་བསྟན་པ་མེད་པའི་ཕྱིར་
[50b.6]ལུང་མེད་ལ། དབང་པོ་དང་དོན་ཕྲད་པ་མེད་པའི་ཕྱིར་མངོན་སུམ་མ་ཡིན་ཏེ། དེ་ལྟ་ན་ཅི་ལྟར་དེ་རྣམས་གཞལ་བྱ་ཉིད་ཡིན། ཅི་སྟེ་སྐྱོན་འདི་མི་འདོད་ན། དེ་ལྟ་ན་དེའི་ཚེ་བདེ་བ་ལ་སོགས་པའི་ཤེས་པ་ཚད་མ་ལྔ་པར་ཉེ་བར་བགྲང་བར་བྱའོ་ཞེས་སྟོན་པ་གསུངས་པ། དེའི་ཡང་ཞེས་པ་སྟེ། དེ་ལྟ་
[50b.7]ན་ཡང་ཚད་མ་བཞི་ཉིད་དུ་ཁས་བླངས་པ་ལ་གནོད་པའོ། །ཡང་ན་དབང་པོ་གཞན་ཡིད་ཡིད། །ཅེས་པ། གལ་ཏེ་སྐྱོན་འདི་འདོད་པ་མ་ཡིན་ནོ་ཞེས་པ་དགོངས་པའོ། །དེ་ལྟར་ན་ཡང་དབང་པོ་ལྔར་ཁས་བླངས་པ་ལ་གནོད་དོ། །བཀག་པ་མེད་ཕྱིར་ཅེས་པ་འདིས་བསྟན་བཅོས་སུ་ཡིད་དབང་པོ་ཉིད་
[51a]
[51a.1]དུ་འདོད་པ་ཁོ་ནའོ་ཞེས་སྟོན་ཏོ། །ཁ་ཅིག་རྣམས་ལ་ནི་ཡོད་ཅེས་པ་གྲངས་ཅན་ལ་སོགས་པ་རྣམས་ལའོ། །དབང་པོ་གཞན་སྒྲ་དོན་མེད་པའོ་ཞེས་པ་སྣ་ལ་སོགས་པ་རྣམས་ཀྱི་ཡང་དབང་པོ་ཉིད་དུ་དེ་ཁོ་ན་ལས་གྲུབ་པ་ཉིད་ཀྱི་ཕྱིར། དེའི་ཚིག་དོན་མེད་པ་ཉིད་དུ་འགྱུར་རོ། །དེའི་
[51a.2]ཕྱིར་སྔར་ཡང་བརྗོད་པ་ལས་ནི་གཞན་རྣམས་དབང་པོ་ཉིད་དུ་རྟོགས་པར་བྱ་སྟེ། མངོན་པར་འདོད་པ་མ་ཡིན་ནོ་ཞེས་པའོ། །ཁ་ཅིག་སྣ་དང་ལྕེ་དང་མིག་དང་པགས་པ་དང་རྣ་བའི་དབང་པོ་རྣམས་འབྱུང་བ་རྣམས་ལས་སོ་ཞེས་པ་འདིར་སྣ་ལ་སོགས་པ་རྣམས་དབང་པོ་ཉིད་དུ་བསྒྲུབ་པ་མ་ཡིན་གྱི། འོ་ན་
[51a.3]ཅི་ཞེ་ན། དབང་པོ་ཉིད་དུ་རབ་ཏུ་གྲགས་པ་རྣམས་ཁོ་ནའི་འབྱུང་བ་ལས་གྱུར་པ་ཉིད་དང་འབྱུང་བ་ལས་མ་གྱུར་པའི་ཡིད་དེ། དེ་རྗེས་སུ་བསྟན་པའོ་ཞེས་སྨྲའོ། །འདི་ཡང་མ་ཡིན་ཏེ། དབང་པོའི་གྲངས་ཀྱི་རང་བཞིན་གཞན་བསལ་བའི་ཕྱིར་ན་སྣ་ལ་སོགས་པ་རྣམས་འབྱུང་བ་རྣམས་ལས་
[51a.4]སོ་ཞེས་པས་ཀྱང་འབྱུང་བ་ལས་གྱུར་པ་ཉིད་དུ་གྲུབ་པའི་ཕྱིར་དབང་པོ་སྨོས་པ་དོན་མེད་པ་ཉིད་དུ་འགྱུར་རོ། །ཤེས་པའི་ཡང་ཤེས་པ་ལ་སོགས་པ་སྟེ། དབང་པོ་དང་ཕྲད་པ་དག་ཚད་མ་ཉིད་ན། འབྲས་བུ་མེད་པར་མི་འགྱུར་ཏེ། ཤེས་པ་འབྲས་བུ་ཉིད་ཀྱི་ཕྱིར་རོ། །ཤེས་པ་ལས་དོན་
[51a.5]གཞན་མ་ཡིན་པའི་འབྲས་བུ་སྨྲ་བའི་ཡང་ཇི་ལྟར་རང་གི་འདོད་པར་བསྟན་པ་བཞིན་ནོ་ཞེས་སེམས་པའོ། །ངེས་པའི་བདག་ཉིད་ཅན་ནི་ཞེས་པ་ལ་སོགས་པ་ལ། གང་མ་ངེས་པའི་བདག་ཉིད་ཚད་མར་འདོད་པ་དེའི་ངེས་པ་འབྲས་བུ་དོན་གཞན་དུ་འགྱུར་གྱི། ཞེན་པའི་བདག་ཉིད་ཚད་མར་འདོད་པའི་
[51a.6]གཞན་འབྲས་བུར་གྱུར་པ་ནི་མ་ཡིན་ནོ། །འོ་ན་ངེས་པའི་ཤེས་པ་ནི་ཤེས་པ་དུ་མས་བར་ཆད་པ་ཅན་རྗེས་སུ་དྲན་པའི་རྣམ་པར་རྟོག་པ་ལས་དེ་མ་ཐག་པར་འགྱུར་ཏེ། སྔར་ཇི་སྐད་བཤད་པ་བཞིན་ནོ། །བར་ཆོད་པ་ནི་འབྲས་བུ་ཉིད་དུ་རིགས་པ་ཡང་མ་ཡིན་ཏེ། གཞན་དུ་ན་ཧ་ཅང་ཐལ་བར་འགྱུར་རོ། །
[51a.7]དེ་དེས་ན་འབྲས་བུ་ཉིད་ག་ལས་ཤེ་ན། བདེན་ཏེ། དེ་ལྟ་ན་ཡང་གང་གི་ཚད་མ་མ་ངེས་པའི་བདག་ཉིད་དུ་འདོད་པ་དེའི་རིགས་པ་བསྟན་པ་ཉིད་ཀྱི་ངེས་པ་དོན་གཞན་འབྲས་བུར་འགྱུར་རོ་ཞེས་པས། རྟོག་པ་ཡང་རེ་ཞིག་སྲིད་པར་འགྱུར་རོ། །གང་གི་ཞེན་པའི་བདག་ཉིད་ཁོ་ནར་མངོན་སུམ་
[51b]
[51b.1]འདོད་པ་དེའི་ནི་རྟོག་པ་འདི་ཡང་སྲིད་པ་མ་ཡིན་ནོ་ཞེས་བསྟན་པའི་དོན་དུ་འདི་སྐད་བཤད་པའོ། །དེ་ལྟར་འབྲས་བུ་དོན་གཞན་དུ་ཁས་བླངས་པ་འགལ་ལོ། །ཁྱད་པར་གྱི་ཤེས་པ་ཞེས་པ་ལ་སོགས་པས། གལ་ཏེ་ཡང་ངེས་པའི་བདག་ཉིད་དུ་ཐ་དད་པ་མེད་པ་དེ་ལྟ་ན་ཡང་ཡུལ་ཐ་དད་པས་ཤེས་
[51b.2]པ་ཐ་དད་པའི་ཕྱིར་ཚད་མ་ལས་འབྲས་བུ་ཐ་དད་དུ་སྟོན་ཏོ། །ཁྱད་པར་ལ་མིན་ཐ་དད་ཕྱིར། །ཞེས་པ་ལ་སོགས་པའི་དོན་འདི་ཡིན་ཏེ། གང་ཞིག་གང་ལས་གཞན་ཡུལ་ཅན་གྱི་བྱེད་པ་དེ་ནི་དེ་ལ་འབྲས་བུར་འགྱུར་བ་མ་ཡིན་ཏེ། དཔེར་ན་པ་ལཱ་ཤ་ལས་གཞན་པའི་ཡུལ་ཅན་གྱི་གཅོད་བྱེད་ནི་པ་
[51b.3]ལཱ་ཤ་ལས་གཞན། ཁྱད་པར་གྱི་ཤེས་པ་ཡང་ཁྱད་པར་ཅན་ལས་གཞན་པའི་ཡུལ་ཅན་གྱི་བྱེད་པའོ་ཞེས་པ་ཁྱབ་པར་བྱེད་པ་དང་འགལ་བའོ། །གཞན་གྱི་ཡུལ་ཅན་གྱི་ཚད་མའི་ཞེས་པ་གཏན་ཚིགས་སོ། །ཚད་མ་ནི་ཞེས་པ་འདི་ཡང་བྱེད་པ་ཉིད་ཉེ་བར་མཚོན་པའོ། །གཞན་ལ་འབྲས་བུ་
[51b.4]རིགས་པ་ཡང་མ་ཡིན་ནོ། །ཞེས་པ་ཚད་མའི་འབྲས་བུའོ། །ཡུལ་གཞན་ལ་ཞེས་པ་ལ་སོགས་པ་དཔེའོ། །ཁྱད་པར་དུ་བྱ་བའི་ཤེས་པའི་རྒྱུ་ཉིད་ཀྱི་ཕྱིར་ཞེས་པ་མ་གྲུབ་པ་ཉིད་དུ་སྨྲས་སོ། །འདི་ལྟར་སེམས་པ་སྟེ། ཇི་ལྟར་གཅོད་བྱེད་ནི་སེང་ལྡེང་ལ་སོགས་པ་ཚད་མའི་རྒྱུ་མཚན་ཉིད་ཀྱི་ཕྱིར་སེང་
[51b.5]ལྡེང་ལ་སོགས་པའི་ཡུལ་ཅན་ཡིན་པ་དེ་བཞིན་དུ་ཁྱད་པར་གྱི་ཤེས་པ་ནི་ཁྱད་པར་དུ་བྱ་བའི་ཤེས་པའི་རྒྱུ་མཚན་ཉིད་ཀྱི་ཕྱིར་ཁྱད་པར་དུ་བྱ་བའི་ཡུལ་ཅན་ནོ་ཞེས་པའོ། །ཁྱད་པར་དུ་བྱ་བའི་ཤེས་པའི་རྒྱུ་མཚན་ཉིད་ནི་དེའི་དེ་མེད་ན། དེ་ཡོད་པ་མ་ཡིན་པའི་ཕྱིར་རོ། །མ་ཡིན་ཏེ་ཧ་ཅང་ཐལ་བའི་
[51b.6]ཕྱིར་རོ་ཞེས་པ། གང་ཡང་རབ་ཏུ་འཇལ་བ་པོ། །བྱེད་པ་པོ་དང་། གང་བ་ལང་ལ་སོགས་པའི་ལས་གཞལ་བར་བྱ་བ་དང་ཕྱོགས་གང་དུ་ཡིན་པ་གཞིར་དང་། གང་ལས་འབྱུང་བ་འབྱུང་ཁུངས་ལས་དང་། གང་གི་ཆེད་དུ་སྦྱིན་པ་དེ་ཡང་དགོས་ཆེད་དེ། འདི་ཐམས་ཅད་ཀྱང་ཁྱད་པར་དུ་བྱ་
[51b.7]བའི་ཤེས་པའི་རྒྱུ་ཉིད་ཀྱི་ཕྱིར་ཁྱད་པར་གྱི་ཤེས་པ་བཞིན་དུ་བྱེད་པར་ཐལ་ལོ་ཞེས་པའི་དོན་ཏོ། །དེའི་ཕྱིར་ཞེས་པ་ལ་སོགས་པ་སྟེ། འདིར་དེའི་སྒྲ་ནི་གཉིས་དག་སྟེ། དེ་ལ་གཉིས་པའི་འབྲེལ་པ་ཅན་ནི། གང་གི་སྒྲ་ནི་གང་གི་ཞེས་དྲུག་པའི་མཐའ་ཅན་དུ་མཉན་པར་བྱ་བའོ། །དང་པོ་ནི་གང་དང་
[52a]
[52a.1]དེ་གཉིས་རྟག་ཏུ་འབྲེལ་པའི་ཕྱིར་ཐོས་བཞིན་པ་མ་ཡིན་པ་ཡང་རྗེས་སུ་དཔག་པར་བྱ་སྟེ། ཇི་ལྟར་རྟོགས་པ་དང་བློ་དང་སོ་སོར་ཞེན་པའི་དོན་གྱི་སྒྲ་ལས་དང་། ལས་མེད་པ་རྣམས་ཀྱི་ཨ་ཎ་ལ་བྱེད་པ་པོ་དེ་ཎི་ལའོ་ཞེས་པ་འདི་བཞིན་ནོ། །དེ་ཡང་ལས་ལ་ཞེས་པ་འདིས་གཞི་
[52a.2]མཚུངས་པ་ཉིད་དུ་བཤད་པར་བྱའོ། །དེས་ན་དོན་འདིར་འགྱུར་ཏེ། ཤེས་པ་གང་ཞིག་གིས་ཤེས་པར་བྱ་བའི་ལས་གང་ལ་བྱ་བ་སྟོན་ཅིང་བྱེད་པ་ཅན་གཞན་གྱིས་བར་མ་ཆོད་པའི་བྱ་བ་རྟོགས་པའི་ཤེས་པར་བྱ་བའི་ལས་དེ་ཁོ་ནའི་ཤེས་པ་དེ་ཚད་མའོ་ཞེས་པའོ། །འདིར་ཡང་ཁྱད་པར་ལ་ཁྱད་པར་
[52a.3]གྱི་ཤེས་པ་ཁོ་ནའི་བྱ་བ་སྟོན་ཏེ། དེའི་རྣམ་པ་ཅན་དུ་སྐྱེ་བས་སོ། །གཞན་དུ་ན་དེ་ཁྱད་པར་གྱི་ཤེས་པ་ཁོ་ནར་མི་འགྱུར་རོ། །དེའི་ཕྱིར་ཁྱད་པར་དེ་ཁོ་ནའི་ཚད་མ་ཡིན་གྱི། ཁྱད་པར་དུ་བྱ་བ་ནི་མ་ཡིན་ཏེ། དེ་ལ་དེའི་བྱ་བ་རྒྱས་པ་མེད་པའི་ཕྱིར་རོ། །འོ་ན་ཚད་མ་ནི་བྱེད་པ་ཅན་དྲུག་གི་ནང་གི་
[52a.4]བྱེད་པ་མ་ཡིན་ནམ། བྱ་བའི་ཡང་བྱེད་པ་ཅན་རྣམས་སུ་འགྱུར་གྱི། བྱེད་པ་ཅན་གཞན་གྱི་ནི་མ་ཡིན་ནོ། །དེའི་ཕྱིར་ཅི་ལྟར་ལས་དེ་ཁོ་ནའི་དེ་ཚད་མ་ཞེས་བརྗོད་པར་བྱ་ཞེ་ན། འདི་ནི་སྐྱོན་མ་ཡིན་ཏེ། འདི་ནི་འབྲེལ་པའི་མཚན་ཉིད་ཀྱི་དྲུག་པ་མ་ཡིན་པ་ཁོ་ནའི། འོ་ན་ཅི་ཞེ་ན། བྱེད་ལྡན་གྱི་སྦྱོར་བའི་
[52a.5]མཚན་ཉིད་ཅན་ཏེ། དཔེར་ན་པ་ལཱ་ཤ་རྣམས་ཀྱི་གཅོད་བྱེད་ཅེས་པ་ལྟ་བུའོ། །དོན་འདི་ཡིན་ཏེ། ཁྱད་པར་དེ་ཁོ་ནའི་དེ་ཚད་མ་སྟེ། དེ་ཁོ་ན་དེས་གཞལ་བར་བྱ་བའི་ཁྱད་པར་དུ་བྱ་བ་ནི་མ་ཡིན་ནོ་ཞེས་པ་འགོག་པ་དེའི་ཕྱིར་ཡུལ་ཐ་དད་པ་ཉིད་དུ་གྲུབ་བོ། །དེ་ལ་ཡང་ཞེས་པ་ལ་སོགས་པ་སྟེ། འོ་ན་
[52a.6]ཡང་ཁྱད་པར་རྟོགས་པར་བྱ་བ་ལ་ཁྱད་པར་དུ་བྱ་བའི་ཤེས་པ་འབྲས་བུ་ཉིད་དུ་བརྗོད་པ་མ་ཡིན་ནམ། དེ་ལ་འབྲས་བུ་མེད་པ་ཞེས་བརྗོད་པར་བྱ་བ་ཅི་ཞེ་ན། སྐྱོན་འདི་མེད་དེ། ཡང་གི་སྒྲ་ནི་ངེས་པར་གཟུང་བའི་དོན་ཏེ། དེ་ཁོ་ན་ལ་སྟེ་ཁྱད་པར་ཁོ་ན་རྟོགས་པར་བྱ་བ་ལའོ་ཞེས་པའི་དོན་ཏོ། །གང་གི་ཚེ་སྣང་བ་
[52a.7]ཞན་པའི་ཕྱོགས་སུ་བ་ལང་ལ་སོགས་པ་ཙམ་གྱི་ཁྱད་པར་འབའ་ཞིག་ཁོ་ན་ཡོངས་སུ་གཅོད་ཀྱི་གསལ་བའི་བྱེ་བྲག་ནི་མ་ཡིན་ཏེ། དེ་ལ་ཐེ་ཚོམ་ཟ་བའི་ཕྱིར་ཞིང་། བ་ལང་ལ་སོགས་པ་ཙམ་ཡང་སྤྱིའི་ངོ་བོ་ཉིད་ཀྱི་ཕྱིར་དང་། དེ་ལ་ཡང་ཁྱད་པར་གཞན་མེད་པའི་ཕྱིར་ལ། སྤྱི་ནི་ཁྱད་པར་དུ་
[52b]
[52b.1]འགྱུར་བ་སྲིད་པ་མ་ཡིན་པ་དེའི་ཚེ་ཁྱད་པར་གྱི་ཤེས་པ་ཚད་མ་ཉིད་དམ་འབྲས་བུ་ཉིད་དུ་འགྱུར་ཞིང་། གང་ཡང་རུང་བ་ཁས་བླངས་ན་གང་ཡང་རུང་བ་ཉམས་སོ་ཞེས་པས་ཁས་བླངས་པ་ལ་གནོད་པའོ། །དེ་གཉིས་ཅི་ཞེས་པའི་དེའི་ལན་ཏེ། འདིར་ཡང་གཅིག་གི་གཉིས་ཀའི་ངོ་བོ་འགལ་བ་ཡོངས་
[52b.2]སུ་སྤང་བའི་ཆེད་དུ་དཔེར་ན་ཞེས་པ་ལ་སོགས་པས་མཐོང་བའི་མཐའ་སྟེ། གང་གི་ཕྱིར་རྣལ་འབྱོར་པ་རྣམས་ཀྱི་རྣལ་འབྱོར་རྫོགས་པ་ན་བདག་ཉིད་མཐོང་བ་རྣམས་ཀྱི་དེ་གཟུང་བྱར་ཡང་འགྱུར་ལ། འཛིན་པ་པོ་ཡང་ཡིན་པ་བཞིན་ནོ། །དོན་གཞན་འབྲས་བུར་སྨྲ་བ་ལ་འདི་མི་འདོད་པ་སྟེ། དེ་ལྟར་གྱུར་ན་ཐལ་
[52b.3]བར་འགྱུར་རོ་ཞེས་གསུངས་པ། གལ་ཏེ་དོན་གཞན་ཡིན་ན་ཡང་། །ཞེས་པ་ལ་སོགས་པའོ། །རང་བཞིན་ཁོང་དུ་ཆུད་ན་ནི་ཤེས་པའི་ཞེས་པ་ལ་སོགས་པ་སྟེ། འདིས་ནི་འདི་སྟོན་ཏེ། བདག་ཉིད་ཀྱི་དཔེས་ནི་དོན་གཞན་གཞལ་བར་བྱ་བ་ཡིན་པ་ལ་ཁྱད་པར་གྱི་ཤེས་པ་རྣམ་པ་གཉིས་ཀར་འགྲུབ་པ་
[52b.4]མ་ཡིན་ཏེ། དཔེ་དང་དཔེ་ཅན་དག་མི་མཚུངས་པ་ཉིད་ཀྱི་ཕྱིར་རོ། །འོན་ཀྱང་རང་ཉིད་ཁོང་དུ་ཆུད་པ་ཁོ་ན་ལ་ཤེས་པའི་དངོས་པོ་གཉིས་སུ་འགྱུར་ཞིང་། རང་ཉིད་ཁོང་དུ་ཆུད་པ་ལ་ཡང་ཤེས་པའི་རྣམ་པ་གཉིས་ཀ་ལྟར་ན་ཡང་ཚད་མ་དང་གཞལ་བར་བྱ་བ་ལ་ཡང་ཁོ་བོས་འདོད་པ་ཁོ་ན་སྟེ།
[52b.5]དེ་ཡང་ཁྱོད་ཀྱིས་བདག་ཉིད་དཔེར་བརྗོད་པས་གཞུང་བཙུགས་སོ་ཞེས་པའོ། །དེ་ལྟར་ན་འོ་ན་ཞེས་པ་ལ་སོགས་པས་ཇི་ལྟར་སྒྲོན་མའི་མུན་པ་བཟློག་པ་འབྲས་བུ་དོན་གཞན་ཡིན་པ་དེ་བཞིན་དུ་མི་ཤེས་པ་ལ་སོགས་པ་བཟློག་པ་འབྲས་བུར་འགྱུར་རོ་ཞེས་སྟོན་ཏོ། །ཡུལ་གྱི་དབྱེ་བ་ཡང་འདི་ལ་མེད་དོ་
[52b.6]ཞེས་པ་ཉེ་བར་དགོད་པའོ། །ཀུན་ལ་མིན་ཞེས་པས་འབྲས་བུ་རྣམ་པར་གཞག་པའི་མ་ཁྱབ་པ་ཉིད་གསུངས་སོ། །ཅིའི་ཕྱིར་འདི་ཀུན་ལ་མིན་ཞེ་ན། གསུངས་པ། ཁ་ཅིག་ཏུ་ཞེས་པ་ལ་སོགས་པ་སྟེ། གཟས་པ་ཙམ་གྱིས་ཏེ། ཡིད་ལ་བྱེད་པ་ཙམ་གྱིས་སོ། །གང་ལ་གང་གི་རྩོལ་བ་ཙམ་
[52b.7]གྱིས་ཤེས་པ་སྐྱེ་བ་དེ་ལ་དེའི་མི་ཤེས་པ་ཡོད་པ་མ་ཡིན་ཏེ། དཔེར་ན་ཤེས་རབ་ཅན་ཁ་ཅིག་གིས་བཟོའི་གནས་འགའ་ཞིག་ལ་བཞིན་འཇིག་རྟེན་གྱི་ཤེས་པ་ཡང་ཤེས་བྱ་འགའ་ཞིག་ལ་རྩོལ་བ་ཙམ་གྱིས་སྐྱེའོ། །ཁྱབ་བྱེད་དང་འགལ་བ་གསུངས་སོ། །ལྡོག་པ་ཡོད་མིན་འབྲས་བུ་མིན། །ཞེས་
[53a]
[53a.1]པ་ལ། མི་ཤེས་པ་ལ་སོགས་པ་མེད་པ་ནི་མི་ཤེས་པ་ལ་སོགས་པ་ལྡོག་པ་སྟེ། དངོས་པོ་མེད་པ་ལ་ནི་བྱ་བ་ཅུང་ཟད་ཀྱང་ཡོད་པ་མ་ཡིན་ཏེ། ཉེ་བར་བརྗོད་པ་མེད་པ་ཉིད་ཀྱི་ཕྱིར་རོ། །བྱ་བཞིན་པ་མ་ཡིན་པ་ཡང་རབ་ཏུ་འཇལ་བར་འགྱུར་བར་འོས་པ་མ་ཡིན་ནོ། །ཚད་མའི་
[53a.2]འབྲས་བུར་འགྱུར་བར་འོས་པ་མ་ཡིན་ནོ་ཞེས་པའི་དོན་ཏོ། །གང་ཡོད་པ་མ་ཡིན་པ་དེ་ནི་ཚད་མའི་འབྲས་བུ་མ་ཡིན་ཏེ། ཤིན་ཏུ་མེད་པ་བཞིན། ལྡོག་པ་ཡང་ཡོད་པ་མ་ཡིན་པའོ། །འགལ་བས་ཁྱབ་པའོ། །སྒྲོན་མའི་ཡང་མུན་པ་ལྡོག་པ་ཙམ་འབྲས་བུ་མ་ཡིན་ཏེ། འོན་ཀྱང་བུམ་པ་ལ་སོགས་པ་
[53a.3]གསལ་བར་བྱེད་པའོ། །དེའི་ཕྱིར། དེའི་གནས་སྐབས་ནི་ཚད་མ་དང་འབྲས་བུ་མེད་པའི་སྐྱོན་ནོ་ཞེས་པའོ། །འབྲེལ་པ་འགའ་ཞིག་གིས་ཞེས་པ་ལ། འབྲེལ་པ་བྱེད་པའི་འདོད་པའི་བྱེ་བྲག་གིས་འབྲེལ་དུ་མ་རྣམས་ཏེ། དེ་ལ་འབྲེལ་པ་འགའ་ཞིག་ལ་མངོན་སུམ་གྱི་མཚན་ཉིད་ཀྱི་མདོ་
[53a.4]འདི་སྲིད་པ་མ་ཡིན་ཞེས་པ་འདིའི་ཕྱིར། འབྲེལ་པ་འགའ་ཞིག་གིས་ཞེས་སྨྲས་སོ། །དེ་ལ་ཁ་ཅིག་རྣམས་འབྲེལ་སྨྲ་སྟེ། རབ་ཏུ་གྲུབ་པ་དང་། རྟགས་དང་། བདག་སྟེ། རབ་ཏུ་གྲུབ་པ་དང་ཤེས་པ་དོན་གཞན་མ་ཡིན་ནོ། །རབ་ཏུ་གྲུབ་པ་དེ་ཡང་ཡོན་ཏན་ཉིད་དང་མི་རྟག་པ་ཉིད་དུ་སྒྲ་དང་འདྲ་བར་
[53a.5]བལྟ་བར་བྱའོ་ཞེས་སྨྲས་ཤིང་། གལ་ཏེ་བློ་ནི་མི་རྟག་པ་ཡིན་ན། མི་རྟག་པ་ཡང་རྒྱུ་དང་ལྡན་པར་འགྱུར་ཏེ། དེའི་ཕྱིར་འདིའི་ཡང་རྒྱུ་བརྗོད་པར་བྱ་ཞིང་། གཞན་ཉིད་ཀྱང་སྟེ། ཤེས་པ་པོའི་གཏན་ཚིགས་འདིས་ཡིན་པ་ཞེས་པའོ་ཞེ་ན། བརྗོད་པར་བྱ་སྟེ། བདག་དང་དབང་པོ་དང་ཡིད་དང་དོན་ཕྲད་པ་
[53a.6]ལས་གང་གྲུབ་པ་དེ་གཞན་ཏེ། གང་གང་ལས་གྲུབ་པ་དེ་དེ་ལས་གཞན་ཡིན་ཏེ། དཔེར་ན་འཇིམ་པ་ལ་སོགས་པ་ལས་བུམ་པ་ལ་སོགས་པ་བཞིན། བདག་ལ་སོགས་པ་རྣམས་ལས་ཤེས་པ་འགྲུབ་པ་ཡང་དེ་ལྟ་བུའོ། །དེའི་ཕྱིར་དེ་ཡང་དེ་རྣམས་ལས་གཞན་ཡིན་ནོ། །རྒྱུ་ཡང་འདི་ཁོ་ནས་བསྟན་ཏེ་
[53a.7]བདག་ལ་སོགས་པའོ། །འབྲེལ་འདི་ལ་མངོན་སུམ་གྱི་མཚན་ཉིད་ཀྱི་མདོ་འདི་འཐད་པ་མ་ཡིན་ནོ། །གཞན་རྣམས་ནི་འབྲེལ་ཀུན་ནས་སྨྲ་སྟེ། རྟགས་ལས་བྱུང་བ་ཚད་མར་བརྗོད་ལ་དེའི་ཕྱིར་སྨྲས་པ། ཅི་རྟགས་ལས་བྱུང་བ་གཅིག་པུ་ཁོ་ན་ཚད་མའམ། མ་ཡིན་ཞེ་ན་བརྗོད་པར་བྱ་སྟེ། བདག་
[53b]
[53b.1]དང་དབང་པོ་དང་ཡིད་དང་དོན་ཕྲད་པ་ལས་གང་གྲུབ་པ་དེ་གཞན་ནོ། །མངོན་སུམ་ཚད་མའོ་ཞེས་པ་ངག་ལྷག་མའོ། །འབྲེལ་པ་འདི་ལ་མངོན་སུམ་གྱི་མཚན་ཉིད་ཀྱི་མདོ་འདི་རྣམ་པར་བཤད་པར་བྱའོ། །མདོ་ལས་བྱུང་བ་མ་ཡིན་ཡང་བཤད་པར་བྱེད་པས་བརྗོད་པ་ཡིན་ཏེ། དབང་པོ་དང་ཕྲད་
[53b.2]པ་ལ་མངོན་སུམ་མམ་བདག་དང་ཡིད་ཕྲད་པའོ་ཞེས་པ་འདིའི་ཕྱིར་མདོ་ལས་བྱུང་བའོ་ཞེས་སྨྲས་སོ། །རྫས་སྨོས་པས་ཡོན་ཏན་དང་ལས་དག་ལའང་མདོ་ལས་བྱུང་བའི་མངོན་སུམ་གྱི་མཚན་ཉིད་གཞན་ཡོད་དོ་ཞེས་སྟོན་ཏོ། །དེ་སླར་ཡང་ཡོན་ཏན་དང་ལས་རྣམས་ཕྲད་པ་རྣམས་ལ་ཤེས་པ་འགྲུབ་
[53b.3]པའི་ཕྱིར་རྫས་རྒྱུ་སྟེ། རྒྱུའི་རྒྱུ་ཡང་ངོ་ཞེས་པ་འདི་ནི་རང་གི་རྟེན་གྱིས་མངོན་པར་གསལ་བ་མ་ཡིན་པའི་ཡོན་ཏན་དང་ལས་རྣམས་ལ་ཤེས་པ་ཉེ་བར་སྐྱེ་བ་མ་ཡིན་ནོ། །དེའི་ཕྱིར་དེའི་རྟེན་རྫས་ནི་ཡོན་ཏན་དང་ལས་རྣམས་གསལ་བར་བྱེད་ཅིང་དེའི་ཤེས་པའི་རྒྱུར་འགྱུར་རོ། །ཡོན་ཏན་དང་ལས་ཀྱི་ཤེས་པའི་
[53b.4]རྒྱུ་ནི་དབང་པོ་དང་དོན་ཕྲད་པའོ། །དེའི་རྒྱུ་རྫས་བུམ་པ་ལ་སོགས་པ་ནི་རྒྱུའི་རྒྱུའོ་ཞེས་བརྗོད་པར་བྱའོ། །འདིར་ཡང་གཙོ་བོ་ཉིད་ཀྱི་ཕྱིར་དང་། དོན་གཅིག་ལ་འདུས་པའི་རྒྱུ་ཉིད་ཀྱི་ཕྱིར་བདག་དང་ཡིད་ཕྲད་པ་ལས་སྐྱེ་ལ། དབང་པོ་དང་ཡིད་དང་དོན་ཕྲད་པ་རྣམས་ནི་དེ་ལ་ཕན་འདོགས་པ་པོ་རྣམས་
[53b.5]སོ། །ཁ་ཅིག་ནི་ཞེས་པ་སྟེ། གང་གི་ཕྱིར་ཤེས་པ་ཚད་མ་ཉིད་ཡིན་ན་འབྲས་བུ་གཞན་དུ་མི་འགྱུར་ཏེ། དེ་ལྟར་ནི་རྟོགས་པ་འབྲས་བུ་ཡིན་ཞིང་། ཤེས་པ་ལས་རྟོགས་པ་དོན་གཞན་པ་ཡང་མ་ཡིན་ནོ། །དེས་ན་ཤཱ་ཡ་ས་ཀ་ལ་སོགས་པ་རྣམས་ཕྲད་པ་འདོད་པར་བྱེད་དོ། །ཐུན་མོང་མ་ཡིན་པའི་རྒྱུ་ཉིད་ཀྱི་ཕྱིར་
[53b.6]ཞེ་ན། ཕྲད་པ་ཅིག་ཤོས་རྣམས་ནི་དྲན་པ་ལ་སོགས་པའི་ཤེས་པའི་ཐུན་མོང་བ་རྣམས་ཏེ་དབང་པོ་དང་དོན་ཕྲད་པ་ནི་མངོན་སུམ་ཁོ་ནའི་རྒྱུའོ། །གཙོ་བོ་ཉིད་ཀྱི་ཕྱིར་ཞེས་པ་བདག་དང་ཡིད་དག་གཙོ་བོ་ཉིད་ཀྱི་ཕྱིར་དེ་ཕྲད་པ་ཡང་གཙོ་བོ་ཉིད་དེ། དེས་ན་དབྱངས་ཅན་པ་ལ་སོགས་པ་རྣམས་ཏེ་འདོད་པར་
[53b.7]བྱེད་དོ། །དེ་ལ་བདག་ནི་གཙོ་བོ་ཉིད་དེ། ཤེས་པའི་བྱེད་པ་པོ་ཉིད་ཀྱི་ཕྱིར་དང་། དེའི་རྟགས་ཉིད་ཀྱི་ཕྱིར་དང་། འབྲས་བུ་ཉེ་བར་ལོངས་སྤྱོད་པ་པོ་ཉིད་ཀྱི་ཕྱིར་རོ། །ཡིད་ཀྱང་སྟེ་ཡུལ་ཐམས་ཅད་པ་ཉིད་ཀྱི་ཕྱིར་དང་། ཤེས་པ་དང་དོན་གཅིག་ལ་འདུ་བ་ཉིད་ཀྱི་ཕྱིར་རོ། །དེ་ལྟ་ན་ཡང་ཞེས་པ་ལ་
[54a]
[54a.1]སོགས་པས་བསྟན་བཅོས་དང་འགལ་བ་གསུངས་སོ། །ཇི་ལྟར་བདག་ཉིད་མེ་ལ་སོགས་པ་རྗེས་སུ་དྲན་པ་དང་ལྡན་པའི་རྟགས་མངོན་སུམ་པ་མཐོང་ནས་མངོན་སུམ་མ་ཡིན་པའི་དོན་ལ་རྗེས་སུ་དཔག་པར་འགྱུར་བ་དེ་ལྟར་ཁྱད་པར་དྲན་པ་དང་ལྡན་པ་འདི་ཁོ་ནའི་སྤྱི་ཙམ་
[54a.2]མཐོང་བ་ལས་གཟུང་བཞིན་པ་མ་ཡིན་པའི་ཁྱད་པར་རྣམས་ལ་ཐེ་ཚོམ་མོ་ཞེས་པ་ཐེ་ཚོམ་འགྲུབ་པ་ནི་རྟགས་ཅན་དང་མཚུངས་སོ། །ཇི་ལྟར་ཡང་ཡང་དག་པའི་དོན་དང་འབྲེལ་པའི་དབང་གིས་འདི་ནི་དོན་གྱི་རང་བཞིན་ནོ་ཞེས་མངོན་སུམ་སྐྱེ་བ་དེ་ལྟར་ཡང་དག་པའི་དོན་དང་འབྲེལ་པའི་དབང་གིས་འདི་
[54a.3]ཁོ་ན་ཡིན་གྱི་གཞན་ནི་མ་ཡིན་ནོ་ཞེས་གཏན་ལ་ཕེབས་པ་སྐྱེའོ་ཞེས་པས་འདིའི་འགྲུབ་པ་མངོན་སུམ་དང་མཚུངས་སོ་ཞེས་གང་བཤད་པ་དེ་འགལ་ལོ། །གཏན་ལ་ཕེབས་པ་ནི་རྣམ་པར་བརྟགས་པ་སྔོན་མ་ཅན་ཉིད་ཀྱི་ཕྱིར་རོ་ཞེས་འབྲེལ་ལོ། །སྤྱིར་མཐོང་བ་ཅན་གྱི་ཐེ་ཚོམ་དུ་གྱུར་པ་ནི། རྣམ་པར་
[54a.4]བརྟགས་པ་ལས་གང་གི་ཚེ་ཁྱད་པར་གྱི་ངོ་བོས་དོན་ངེས་པར་འཛིན་པ་དེའི་ཚེ་འདི་ནི་བ་ལང་ཁོ་ན་ཡིན་གྱི་བ་མེན་ནི་མ་ཡིན་ནོ་ཞེས་གཏན་ལ་ཕེབས་པ་སྐྱེའོ། །ཡུལ་ལ་ལྟ་དོན་ཅན་ཉིད་ཕྱིར། །ཞེས་པ་ཡུལ་ཉམས་སུ་མྱོང་བའི་དགོས་པ་ཅན་ཉིད་ཀྱི་ཕྱིར་རོ་ཞེས་པའི་དོན་ཏོ། །ཡུལ་ལ་ལྟ་བ་ཙམ་གྱི་
[54a.5]དོན་ནི་ཞེས་པ་ལ། ཙམ་གྱི་སྒྲ་ནི་ལྷག་པ་རྣམ་པར་གཅད་པའི་དོན་ཏོ། །འདི་སྐད་བཤད་པར་འགྱུར་ཏེ། ཁྱད་པར་སྒྲོ་འདོགས་པ་ལ་སོགས་པ་ལ་ནི་བྱ་བ་མ་ཡིན་ཞེས་པས། དེ་ཡང་རྣམ་པར་རྟོག་པ་མེད་པ་ཉིད་ཀྱི་ཕྱིར་རོ། །གང་གིའང་ཡུལ་ཉམས་སུ་མྱོང་བ་ཙམ་དགོས་པ་ཡིན་པ་དེ་རྣམ་
[54a.6]པར་བརྟག་པ་ལ་ལྟོས་པ་མེད་པར་འཇུག་སྟེ། དེ་སྟོན་པར་བྱེད་པ། དེ་ལ་རྣམ་པར་གཅོད་པ་ག་ལས་ཞེས་པ་སྟེ། དེ་ལས་ཀྱང་ཆོས་མི་མཐུན་པ་ཉིད་ཀྱི་ཕྱིར་དེ་དང་གཏན་ལ་ཕེབས་པ་སྐྱེ་བ་མཚུངས་པ་ནི་མ་ཡིན་ཏེ་དཔེར་ན་རྗེས་སུ་དཔག་པ་དང་བཞིན་ནོ། །དེ་ལྟར་འགྱུར་མོད་ཡོད་པའི་དོན་དང་
[54a.7]འབྲེལ་པའི་དབང་ལ་སྐྱེ་བ་ཙམ་བསྒྲེ་བར་བྱེད་པའོ་ཞེ་ན། དེ་ནི་མི་རིགས་ཏེ། ཁྱད་པར་བསྒྲེ་བར་བྱེད་པ་དོན་མེད་པ་ཉིད་དུ་ཐལ་བར་འགྱུར་བའི་ཕྱིར་རོ། །ཐེ་ཚོམ་དང་རྗེས་སུ་དཔག་པ་ལ་སོགས་པ་རྣམས་དང་ཡང་དེ་ལྟར་སྐྱེ་བ་མཚུངས་པ་འཐོབ་སྟེ། དེ་རྣམས་ཀྱང་སྤྱི་ལ་སོགས་པ་
[54b]
[54b.1]ཡང་དག་པའི་དོན་དང་མངོན་པར་འབྲེལ་པའི་དབང་གིས་སྐྱེ་བའི་ཕྱིར་ན་བསྒྲེ་བ་མ་ཡིན་པ་ཁོ་ནའོ་ཞེས་པས་ཤེས་པ་ཉིད་ཆོས་མཐུན་པ་དེ་ཡང་མེད་པའི་ཕྱིར་རོ། །རྣམ་པ་ཐམས་ཅད་འཛིན་པར་ཐལ་ལོ་ཞེས་པ། རྣམ་པ་ཀུན་གྱིས་ཏེ། མང་པོ་ཅན་ཉིད་ལ་སོགས་པ་རྣམས་ཀྱིས་ཀྱང་འཛིན་པར་
[54b.2]འགྱུར་རོ། །ཆ་ཤས་གང་ལ་ནུས་པ་དེ་ཁོ་ན་འཛིན་པར་འགྱུར་རོ་ཞེ་ན་གསུངས་པ། ཐམས་ཅད་ཀྱི་བདག་ཉིད་དང་། ཅེས་པ་ལ་སོགས་པ་སྟེ། ཆ་ཤས་མེད་པ་ཉིད་ཀྱི་ཕྱིར། དོན་ཅི་རིགས་པར་ཕྲད་པ་རྣམ་པ་ལྔས་གང་དབང་པོ་དང་ཕྲད་པ་མ་ཡིན་པའི་ཆ་ཤས་དེ་ཡོད་པ་མ་ཡིན་པ་ཁོ་ནའོ། །
[54b.3]དེ་ལས་ཀྱང་དེའི་ཁྱད་པར་རྣམས་དོན་ལས་ཐ་མི་དད་པ་ཉིད་ཀྱི་ཕྱིར་དོན་ལྟ་བུར་དེ་རྣམས་ལ་ཡང་འཛིན་པ་སྐྱེད་པར་ནུས་པར་འགྱུར་རོ། །འོ་ན་གང་ཁོ་ན་འཛིན་པར་འདོད་པའི་ཆ་ཤས་དེ་ཁོ་ན་གཟུང་བར་བྱ་བ་མ་ཡིན་ནམ་ཞེ་ན་གསུངས་པ། འདི་ཅི་ཞིག་ཅེས་པ་ལ་སོགས་པ་སྟེ། གང་གི་ཚེ་
[54b.4]ཕ་རོལ་རྣམས་མཐོང་བ་པོས་བལྟས་ནས་དོན་མཐོང་བ་ལས་སྔར་ཁོ་ནར་འདི་ཅི་ཞེ་ན་ཁྱད་པར་མེད་པར་འཛིན་པར་འདོད་པར་གྱུར་པ་ན། དེ་ལ་རྟོགས་ནས་མཐོང་བར་བྱེད་པ་དེའི་ཚེ་སྐྱོན་འདི་འབྱུང་ངོ་། །ཕྲད་པ་སྨྲ་བ་ལ་ཡང་སྐྱོན་འདི་བརྗོད་པར་བྱས་པས་འདི་ནི་དོན་གྱིས་ཤེས་པ་སྨྲ་བ་ལ་ཡང་བརྗོད་
[54b.5]པ་ཁོ་ནར་འགྱུར་རོ། །དེ་ལྟར་ནི་ཕྲད་པ་དོན་འཛིན་པའི་རྒྱུའོ་ཞེས་པ་ལ་སྐྱོན་འདི་བརྗོད་པར་བྱ་བ་ཡིན་ཞིང་། ཤེས་པ་ཚད་མར་སྨྲ་བས་ཀྱང་དེ་ཁོ་ན་ཤེས་པའི་རྒྱུར་འདོད་པར་བྱའོ་ཞེས་པས་སྐྱོན་མཚུངས་སོ། །དེ་ལྟར་ནི་སྐྱོན་འདི་ཁོ་ན་རྗེས་སུ་དཔག་པར་འཆད་པར་འགྱུར་རོ། །གལ་ཏེ་དབང་པོ་
[54b.6]དང་དོན་འབྲེལ་པར་གྱུར་པ་ན་བདག་ཉིད་ཐམས་ཅད་ཀྱིས་འཛིན་པར་ཐལ་བར་འགྱུར་བ་དེའི་ཚེ། ཁྱེད་ཀྱི་ཡང་དབང་པོ་གསུམ་པོ་རྣམས་ཀྱིས་འབྲེལ་བཞིན་པའི་ཡུལ་ལ་ཅིའི་ཕྱིར་བདག་ཉིད་ཐམས་ཅད་ཀྱིས་འཛིན་པར་གྱུར་པ་མ་ཡིན་ཞེ་ན། ཁོ་བོ་ཅག་གིས་ཕྲད་པ་དེའི་རྒྱུར་འདོད་པ་མ་ཡིན་ཏེ།
[54b.7]དེ་རྫས་སུ་ཡོད་པ་མ་ཡིན་པ་ཉིད་ཀྱི་ཕྱིར་རོ། །གཞན་ཡང་ཁོ་བོ་ཅག་ནི་མིག་ལ་སོགས་པས་ཀྱང་དོན་རྣམ་པ་ཐམས་ཅད་གཟུང་བར་བྱ་བའོ་ཞེས་འདོད་དོ། །དེ་གཟུང་བ་ན་ཡང་དེ་ལྟར་འཁྲུལ་པའི་རྒྱུ་མཚན་ཡོད་པའི་ཕྱིར་ཆ་ཤས་འགའ་ཞིག་ལ་ངེས་པར་འགྱུར་བ་མ་ཡིན་ནོ་ཞེས་པས་ཐ་དད་དུ་རུང་བ་
[55a]
[55a.1]མ་ཡིན་པ་ཉིད་ཀྱི་ཕྱིར། དེ་ནི་མ་བཟུང་བ་དང་འདྲ་བ་འབའ་ཞིག་གོ་ཞེས་པ་འདི་ནི་བརྗོད་ཟིན་ཏོ། །གལ་ཏེ་ཡང་ཕ་རོལ་པོ་ཡང་འདི་སྐད་དུ་སྨྲ་བར་བྱེད་ན། དེས་འདི་སྐད་དུ་སྨྲ་བར་འོས་པ་མ་ཡིན་ཏེ། གང་དོན་རྣམས་དངོས་སུ་ལྟ་བ་འདི་ནི་བ་ལང་ཁོ་ནའོ། །འདི་ནི་རྟ་
[55a.2]ཁོ་ན་ཞེས་པ་ལྟ་བུ་དེ་མངོན་སུམ་མོ་ཞེས་སྨྲས་པའི་ཕྱིར་རོ། །དེ་ལྟར་ཡང་དག་པའི་དོན་དང་འབྲེལ་པའི་དབང་གིས་འདི་འདིའི་རང་བཞིན་ནོ་ཞེས་འབྱུང་བ་མངོན་སུམ་མོ་ཞེས་སྨྲས་པའི་ཕྱིར་རོ། །དེ་བཞིན་དུ་གང་འདི་ནི་དབང་པོ་རྣམས་ཀྱི་དོན་རྣམས་ལ་རབ་ཏུ་གྲུབ་པ་སྟེ། འདི་ནི་སྒྲའོ། །འདི་ནི་གཟུགས་
[55a.3]སོ། །འདི་ནི་རོའོ། །འདི་ནི་དྲིའོ། །འདི་ནི་རེག་པའོ་ཞེས་པའོ་ཞེས་ཀྱང་བརྗོད་པའི་ཕྱིར་རོ། །གང་གི་ཕྱིར་མངོན་སུམ་ངེས་པའི་བདག་ཉིད་དུ་ཕ་རོལ་པོས་འདོད་པས་སོ། །འདི་ཁོ་ན་ཡང་ངེས་པ་རྣམས་ཀྱི་རང་གི་དོན་རྟོགས་པ་སྟེ། གང་དེ་ངེས་པར་འབྱེད་པའོ། །དེ་གལ་ཏེ་རྣམ་པ་གཞན་བཞིན་དུ་མ་
[55a.4]ངེས་པ་ཡིན་ན། དེ་རྣམས་ཀྱིས་བཟུང་ཟིན་པ་ཅི་ལྟར་ཡིན། ད་ནི་ཁྱེད་ལའང་མངོན་སུམ་གྱིས་མ་ངེས་ཤིང་དེ་ལ་ཡང་གཟུང་བ་ཞེས་བྱ་བ་ཅི་ལྟར་ཡིན་ཞེ་ན། མངོན་སུམ་ནི་གང་གིའང་ངེས་པར་བྱེད་པའི་བདག་ཉིད་མ་ཡིན་ཏེ། དེས་གང་ཞིག་འཛིན་པ་དེ་ཡང་ངེས་པས་ནི་མ་ཡིན་ནོ། །འོ་ན་ཅི་ཞེ་ན། དེར་སྣང་
[55a.5]བས་སོ། །དེ་བས་ན་ངེས་པ་དང་མ་ངེས་པའི་དབང་ལས་མངོན་སུམ་གྱི་འཛིན་པ་དང་མི་འཛིན་པ་དག་མ་ཡིན་ནོ། །ངེས་པའི་ནི་འདི་ལྟ་བུ་མ་ཡིན་ཏེ། ཅུང་ཟད་ངེས་ཀྱང་གཞན་མ་ངེས་པས་འཛིན་པ་དང་མི་འཛིན་པ་ཡིན་ནོ། །དེའི་ཕྱིར་ངེས་པ་གང་ཡིན་པ་དེ་ཁོ་ན་འདིའི་འཛིན་པའོ། །གཞན་དུ་ན་རྣམ་པ་
[55a.6]གཅིག་ལ་ཡང་དེར་མི་འགྱུར་རོ། །ཡང་བདག་ཉིད་ཐམས་ཅད་ཀྱིས་བཟུང་ན་ཡང་དེ་ལྟར་ངེས་པར་མི་འགྱུར་བ་ཅི་ཞེ་ན། ལྷན་ཅིག་བྱེད་པ་མ་ཚང་བ་ཉིད་ཀྱི་ཕྱིར་རོ། །ཉམས་སུ་མྱོང་བ་ནི་རྣམ་པར་རྟོག་པ་གོམས་པ་ཇི་ལྟ་བར་ངེས་པ་རྣམས་སྐྱེད་པར་བྱེད་དེ། དཔེར་ན་གཟུགས་མཐོང་བ་ལ་ཁྱད་པར་མེད་
[55a.7]ཀྱང་། རོ་དང་འདོད་ལྡན་མ་དང་བཟའ་བར་བྱ་བའི་རྣམ་པར་རྟོག་པ་རྣམས་ལྟ་བུའོ། །དེ་ལ་བློ་གསལ་བ་ཉིད་དང་དེའི་བག་ཆགས་གོམས་པ་དང་སྐབས་ཞེས་བྱ་བ་ལ་སོགས་པ་རྣམས་ཉམས་སུ་མྱོང་བ་ལ་ངེས་པ་སྐྱེ་བའི་རྒྱུ་རྣམས་སོ། །དེ་རྣམས་ཁོ་ན་ཤིན་ཏུ་དང་ཆེས་ཤིན་ཏུ་ལ་སོགས་པའི་བྱེ་བྲག་ལས་
[55b]
[55b.1]སྔ་ཕྱི་ཉིད་དུ་སྟེ། དཔེར་ན་སྐྱེད་པར་བྱེད་པ་དང་ཀློག་ཏུ་འཇུག་པར་བྱེད་པ་པོ་ཉིད་དུ་ཁྱད་པར་མེད་ཀྱང་ཕ་འོང་བ་མཐོང་ནས། བདག་གི་ཕ་འོང་ངོ་ཞེས་སྔོན་ལ་ངེས་པར་འགྱུར་གྱི། མཁན་པོ་འོང་ངོ་ཞེས་མ་ཡིན་པ་བཞིན་ནོ། །འགྱུར་བའི་ངེས་པ་དེ་ཡང་འཁྲུལ་པའི་རྒྱུ་མེད་ན་འགྱུར་རོ། །དེའི་ཕྱིར་ཉམས་
[55b.2]སུ་མྱོང་ངོ་ཞེས་པ་ཁོ་ནས་ནི་རྣམ་པ་ཐམས་ཅད་ངེས་པ་མ་ཡིན་ནོ། །གལ་ཏེ་དེ་ལྟ་ན་ཕ་རོལ་པོས་མངོན་སུམ་རྟོག་པ་དང་བཅས་པར་འདོད་ན། ཅི་ལྟར་ཡུལ་ལ་ལྟ་བ་ཙམ་གྱི་དོན་ཅན་ནི་བཞི་པོ་ཕྲད་པ་ལས་སྐྱེས་པའོ་ཞེས་པ་དེ་བརྗོད་ཅེ་ན། དབང་པོའི་ཤེས་པ་རྟོག་པ་མེད་པ་ཉིད་དུ་ཚད་མས་གྲུབ་བོ་ཞེས་
[55b.3]དངོས་པོའི་སྟོབས་ལས་སློབ་དཔོན་གྱིས་དེ་སྐད་དུ་གསུངས་ལ། ཁོ་བོ་ཅག་གིས་ནི་ཕ་རོལ་པོས་ཁས་བླངས་པའི་དབང་ལས་འདི་སྐད་དུ་བཤད་དོ་ཞེས་པས་མི་འགལ་ལོ། །གལ་ཏེ་ཕ་རོལ་པོས་མངོན་སུམ་ངེས་པའི་བདག་ཉིད་དོ་ཞེས་ཁས་བླངས་ན། མངོན་སུམ་དང་གཏན་ལ་ཕེབས་པར་
[55b.4]མཚུངས་པར་སྐྱེ་བའོ་ཞེས་པ་འདི་ཅི་ལྟར་རིགས་ཏེ། དེ་ཁོ་ན་དང་དེ་མཚུངས་པར་སྐྱེའོ་ཞེས་ཁས་བླངས་པར་རིགས་པ་ནི་མ་ཡིན་ནོ་ཞེ་ན། །འདི་ནི་དེའི་སྐྱོན་གཞན་དུ་འགྱུར་ཏེ། གང་འདི་ལྟར་འདོད་པ་ལའོ་ཞེས་པ་ཤིན་ཏུ་ཐལ་ཆེས་པས་ཆོག་གོ། །ཡུལ་ཐ་དད་པ་ཡང་ཞེས་པ། ཚད་མའི་ཡུལ་
[55b.5]བདག་དང་ཡིད་ཡིན་པ་ཉིད་ཀྱི་ཕྱིར་དང་། འབྲས་བུའི་ཡུལ་དོན་ཡིན་པ་ཉིད་ཀྱི་ཕྱིར་རོ། །འོ་ན་ཤེས་པ་ཡང་བདག་ལ་འདུ་བའི་ཕྱིར་དེའི་ཡུལ་ཅན་ཁོ་ན་མ་ཡིན་ནམ་ཞེ་ན། འདི་ཡོད་པ་མ་ཡིན་ཏེ། གང་ཕྱིར་ཤེས་པའི་ཤེས་པར་བྱ་བ་ནི་ཡུལ་ཉིད་དུ་མངོན་པར་འདོད་ཀྱི་འདུ་བ་ཅན་གྱི་རྒྱུ་ནི་མ་ཡིན་པས་སོ། །
[55b.6]གཞན་དུ་ན་ཤེས་པ་ཐམས་ཅད་ཡུལ་གཅིག་པ་ཉིད་དུ་འགྱུར་རོ། །བདག་དང་ཡིད་ཕྲད་པ་ནི་དམིགས་པ་མ་ཡིན་ན། དེའི་འདུ་བ་ཅན་གྱི་རྒྱུ་ལ་གཞན་ཅི་ཞིག་ཡུལ་དུ་འགྱུར་ཞེས་པས་འདི་ནི་ལན་མ་ཡིན་ནོ། །ཡུལ་ཐ་དད་པ་ལ་སྐྱོན་ཅི་ཡོད་ཅེ་ན་གསུངས་པ། མེད་ཅེས་པ་ལ་སོགས་པའོ། །གཞན་
[55b.7]ཡང་ཞེས་པ་ལ་སོགས་པས་ཁས་བླངས་པས་གནོད་པ་གསུངས་ཏེ། བསྟན་བཅོས་སུ་བརྗོད་པ་ནི་སྤྱི་དང་ཁྱད་པར་ལ་ལྟོས་པ་ནི་རྫས་དང་ཡོན་ཏན་དང་ལས་རྣམས་ལ་མངོན་སུམ་སྟེ། རྫས་དང་ཡོན་ཏན་དང་ལས་ལ་ལྟོས་པ་ཡང་རྫས་རྣམས་ལའོ་ཞེས་པ་སྟེ། འདིར་སྤྱི་སྨོས་པས་སྤྱི་ཆེན་པོ་ཡོད་པ་ཉིད་
[56a]
[56a.1]གཟུང་བར་བྱ་ཞིང་། ཁྱད་པར་སྨོས་པས་རྫས་ཉིད་ལ་སོགས་པ་སྤྱི་ལྷག་མ་རྣམས་ཏེ། སྤྱི་དང་ཁྱད་པར་ཞེས་པ་འདི་ཡང་ལྟོས་ནས་བྱས་པ་སྟེ། དེའི་ཕྱིར་སྤྱི་འདི་རྣམས་ནི་ཁྱད་པར་གྱི་སྒྲས་བརྗོད་པར་བྱ་བ་རྣམས་སོ། །ཡོད་པ་ཉིད་ནི་སྤྱི་ལོ་ན་སྟེ་ཁྱད་པར་མ་ཡིན་ལ། ལྷག་མ་རྣམས་
[56a.2]ནི་སྤྱི་རྣམས་དང་ཁྱད་པར་རྣམས་སུ་ཡང་ལྟོས་ནས་འགྱུར་རོ། །དེ་ལ་སྤྱི་ལ་ལ་ལྟོས་པ་ནི་རྫས་ལ་ཡོད་པ་ནི་རྫས་སོ་ཞེས་པའོ་ཁྱད་པར་ལ་ལྟོས་པ་ནི་རྫས་ནི་སའོ་བུམ་པའོ་ཞེས་པ་ལ་སོགས་པའོ། །རྫས་དང་ཡོན་ཏན་དང་ལས་ལ་ལྟོས་པ་ནི་དབྱུག་པ་ཅན། དཀར་པོ། འགྲོའོ་ཞེས་པའོ། །ཅིའི་ཕྱིར་སྦྱར་
[56a.3]བར་མི་བྱ་ཞེ་ན་གསུངས་པ། གང་གི་ཕྱིར་ཞེས་པ་ལ་སོགས་པ་སྟེ། རང་གི་དོན་ཙམ་འཛིན་པ་ཉིད་ཀྱི་ཕྱིར་ཞེས་པ་འདི། ཡུལ་ལ་ལྟ་དོན་ཅན་ཉིད་ཕྱིར། །ཞེས་པ་འདི་ནི་རྣམ་པར་འགྲེལ་ལོ། །མཚམས་སྦྱོར་བ་ནི་སྦྱོར་པར་བྱེད་པའོ། །དེའི་རང་གི་ངོ་བོ་སྟོན་པར་བྱེད་པ། །འདི་ནི་འདིའི་ཞེས་པ་
[56a.4]ལ་སོགས་པ་སྟེ། ངེས་པར་ཞེས་པ་ནི་རྣམ་པ་གཞན་དུ་ན། གང་ཡང་ཁྱད་པར་དུ་བྱེད་པ་དང་ཁྱད་པར་དུ་བྱ་བ་ཡང་འཛིན་པ་མ་ཡིན་ཞིང་དེ་དག་སྦྱོར་བར་ཡང་མི་བྱེད་པ་དེ་ཡང་དེ་ལྟར་འཛིན་པར་འགྱུར་རོ་ཞེས་དགོངས་པའོ། །ལྡན་པ་ཕྱིས་པ་ལས་སམ་ཐ་མི་དད་པར་ཉེ་བར་བཏགས་པ་ལས་ཞེས་ཇི་
[56a.5]ལྟར་སྲིད་པར་བལྟ་བར་བྱའོ། །དེ་ལྟར་ནི་ཡོན་ཏན་གྱི་ཚིག་རྣམས་ལས་ལྡན་པ་དབྱེ་བ་དང་། ཐ་དད་པ་མེད་པར་ཉེ་བར་བཏགས་པ་ཡང་ཐམས་ཅད་དུ་མ་ཡིན་པས་སོ། །གང་གི་ཕྱིར་བྱ་བ་དང་རྫས་ཀྱི་ངོ་བོས་རྟེན་རྟོགས་པ་ཡོད་པ་མ་ཡིན་ཏེ། ལྡན་པའི་རྐྱེན་གྱི་དོན་ནི་གང་དུ་རྟོགས་པར་བྱ་བ་དེ་ཁོ་ན་ལྡན་
[56a.6]པ་ཕྱིས་པས་ཀྱང་མཚོན་པར་བྱའོ། །གལ་ཏེ་དབང་པོའི་བློ་ལ་དེ་མི་འཐད་ན་འོ་ན་དེ་ཅི་ཞིག་ལ་ཡིན་ཞེ་ན་གསུངས་པ། དེ་ཡང་ཞེས་པ་ལ་སོགས་པ་སྟེ། སྔར་ཁྱད་པར་དང་ཁྱད་པར་དུ་བྱ་བའང་གཟུང་ནས་འཇིག་རྟེན་གྱི་རྣམ་པར་གཞག་པ་ཡང་རྗེས་སུ་དྲན་པར་བྱས་ཏེ། རྗེས་སུ་སྦྱར་བར་བྱ་བར་ནུས་ཀྱི་
[56a.7]རྣམ་པ་གཞན་དུ་ན་མ་ཡིན་ནོ། །དེའི་ཚེ་ཡང་དབང་པོའི་ཤེས་པ་ཡུན་རིང་པོ་ན་འགགས་པའོ་ཞེས་པ་དྲན་པ་ཉིད་ཀྱིས་དྲངས་ནས་ཁྱད་པར་བྱེད་པ་ཡིད་ཁོ་ནས་སྦྱར་བར་བྱ་སྟེ། དེའི་ཕྱིར་དེ་ཁོ་ན་ལ་དེ་འཐད་དོ། །རྣམ་པ་གཞན་དུ་ནི་ཞེས་པ་གལ་ཏེ་ཁྱད་པར་ནི་དྲན་པས་དྲངས་པ་ཉིད་དུ་འདོད་པ་མ་ཡིན་ནའོ། །
[56b]
[56b.1]དེ་འདིས་གང་ཁྱད་པར་ལ་ལྟོས་པའི་ཤེས་པ་དེ་མངོན་སུམ་མ་ཡིན་པའམ། དེ་ཡིད་ལ་བྱུང་བ་ཁོ་ན་སྟེ། དཔེར་ན་དྲི་ཞིམ་པོ་ནི་མངར་པོའོ་ཞེས་པའི་ཤེས་པ་བཞིན། བ་ལང་འགྲོའོ་ཞེས་པའང་། ཇི་སྐད་བཤད་པའི་རྣམ་པའོ། །ཁྱབ་པར་བྱེད་པ་དང་འགལ་བ་དང་བསྒྲུབ་པར་བྱ་བ་གཉིས་པ་ལ་
[56b.2]ལྟོས་པས་ནི་རང་བཞིན་གསུངས་ཤིང་། རིགས་པ་ཡང་མ་ཡིན་ཏེ་ཞེས་པ་དཔེ་ལ་བསྒྲུབ་པར་བྱ་བ་མ་ཚང་བའི་དོགས་པ་སེལ་བར་བྱེད་དོ། །དབང་པོ་ཐ་དད་ཀྱིས་གཟུང་བར་བྱ་བ་ཉིད་ཀྱི་ཕྱིར་རོ་ཞེས་པ་དྲི་དང་རོ་དག་སྣ་དང་ལྕེས་གཟུང་བར་བྱ་བ་ཉིད་ཀྱི་ཕྱིར་རོ། །རྫས་ཀྱང་མིག་དང་ལུས་ཀྱིས་གཟུང་
[56b.3]བར་བྱ་བ་ཉིད་ཀྱི་ཕྱིར་རོ། །དེས་འདི་སྐད་བཤད་པར་འགྱུར་ཏེ། གང་དབང་པོ་ཐ་དད་ཀྱིས་གཟུང་བར་བྱ་བའི་ཁྱད་པར་དང་ཁྱད་པར་ཅན་གྱི་ཡུལ་ཅན་གྱི་ཤེས་པ་དེ་མངོན་སུམ་མ་ཡིན་པའམ་དེ་ཡིད་ཁོ་ན་ཡིན་ཏེ། དཔེར་ན་གཟུགས་སྒྱུར་བའོ་ཞེས་པའི་ཤེས་པ་བཞིན། དྲི་བཟང་པོ་ནི་ཞིམ་པོ་ཞེས་
[56b.4]པའི་ཤེས་པ་འདི་ཡང་དེ་ལྟ་བུའོ་ཞེས་པ། སྔ་མ་དང་འདྲ་བར་གཏན་ཚིགས་ཀྱི་དབྱེ་བ་སྦྱར་བར་བྱའོ། །ད་ནི་རྫས་ཉིད་ཅུང་ཟད་ཀྱང་ཡོད་པ་མ་ཡིན་ཏེ། གཟུགས་ལ་སོགས་པ་ཚོགས་པ་ལ་དེ་ཉེ་བར་བཏགས་པའི་ཕྱིར་རོ། །དེས་ན་ཅིའི་ཕྱིར་དེ་ལ་མངོན་སུམ་དུ་འགྱུར་ཞེས་རྫས་རྣམ་པར་
[56b.5]བརྟག་པ་རྩོམ་པ། གལ་ཏེ་ཡང་ཞེས་པ་ལ་སོགས་པ་སྟེ་འདིའི་དོན་ནི་འདི་ཡིན་ཏེ། གང་དབང་པོ་གཅིག་མིན་གྱིས་གཟུང་བར་བྱ་བ་དེ་ནི་གཅིག་མ་ཡིན་ཏེ། གཟུགས་ལ་སོགས་པ་བཞིན། རྫས་ཀྱང་དེ་ལྟ་བུའོ་ཞེས་ཁྱབ་བྱེད་དང་འགལ་བའི་ཐལ་འགྱུར་རོ། །རྫས་དབང་པོ་གཅིག་མིན་གྱིས་
[56b.6]གཟུང་བར་བྱ་བ་ཉིད་ནི། བལྟ་བར་བྱ་བ་དང་རེག་པར་བྱ་བ་ཡང་རྫས་སོ་ཞེས་ཁས་བླངས་པའི་ཕྱིར་རོ། །གཟུགས་སོགས་དབྱེར་མེད་པའམ་ཞེས་པས་འདི་སྐད་སྟོན་ཏེ། གཟུགས་ལ་སོགས་པ་ལ་ཡང་ཐ་དད་པར་རྣམ་པར་འཇོག་པའི་རྒྱུ་ནི་དབང་པོ་གཅིག་མིན་གྱིས་གཟུང་བར་བྱ་བ་ཉིད་དེ། གལ་ཏེ་
[56b.7]ཡང་དེ་ལྟར་གྱུར་ནའང་། རྫས་ལ་ཐ་དད་པ་འདོད་པ་མ་ཡིན་ན་གཟུགས་ལ་སོགས་པ་རྣམས་ལ་ཡང་དེར་མི་འགྱུར་རོ་ཞེས་པའོ། །འཛིན་བྱེད་ཐ་དད་པ་ལ་གཟུགས་ལ་སོགས་པ་རྣམས་ཀྱི་གཅིག་མ་ཡིན་པ་ཉིད་དུ་རྣམ་པར་གཞག་གོ་ཞེ་ན། འགྱུར་མོད། དེ་ལས་ཀྱང་ཁོ་བོ་ཅག་གིས་དབང་པོ་ཐ་དད་པས་
[57a]
[57a.1]གཟུང་བྱ་ཉིད་ཁོ་ནའི་ཕྱིར་ཐ་དད་པའོ་ཞེས་ངེས་པར་གཟུང་བ་མ་ཡིན་ནོ། །གཞན་ཡང་དབང་པོ་ཐ་དད་པ་ཉིད་ཀྱིས་གཟུང་བར་བྱ་བ་ཉིད་ཀྱིས་འཛིན་བྱེད་ཐ་དད་པ་ཡང་འཕངས་པ་ཁོ་ན་སྟེ། དབང་པོ་ཐ་དད་པས་གཟུང་བར་བྱ་བ་ཉིད་ན། གདོན་མི་ཟ་བར་འཛིན་བྱེད་ཐ་དད་པར་འགྱུར་བར་འོས་
[57a.2]སོ། །འོ་ན་རྫས་ཡོད་ནའང་དབང་པོ་ཐ་དད་པས་གཟུང་བར་བྱ་བ་ཉིད་ལ་འཛིན་བྱེད་ཐ་དད་པར་མི་འགྱུར་བ་མ་ཡིན་ནམ་ཞེ་ན། མ་ཡིན་ཏེ། རྫས་དེ་ཁོ་ན་རྣམ་པར་དཔྱད་པར་བྱ་བཞིན་པ་ཉིད་ཀྱི་ཕྱིར་དང་། གཟུགས་ལ་སོགས་པ་རྣམས་ལ་ཡང་བརྒལ་ཞིང་བརྟག་པ་མཚུངས་པའི་ཕྱིར་ཡང་ངོ་། །མཐོང་ཞེ་ན་ཞེས་
[57a.3]པ་ལ་སོགས་པས་རྫས་ཀྱི་གཅིག་ཉིད་ནི་མངོན་སུམ་གྱིས་གྲུབ་ལ། གཟུགས་ལ་སོགས་པ་ཡང་གཅིག་མ་ཡིན་པ་ཉིད་དུའོ། །དེས་ན་ཅི་ལྟར་དེ་རྗེས་སུ་དཔག་པས་རྣམ་པ་གཞན་དུ་བྱ་བར་ནུས་ཞེས་སྟོན་པར་བྱེད་དོ། །ཡོད་པ་དང་ཡོན་ཏན་ཉིད་དག་ལྟ་བུ་ཞེས་པ་འདིས་ཀྱང་ཡོད་པ་དང་ཡོན་ཏན་ཉིད་དག་གིས་མ་
[57a.4]ངེས་པར་སྨྲས་སོ། །ཡོད་པ་ཉིད་དང་ཡོན་ཏན་ཉིད་དག་གི་རྟེན་གཟུགས་ལ་སོགས་པ་རྣམས་ནི་དབང་པོ་ཐམས་ཅད་པ་ཅན་རྣམས་ཏེ། དེའི་ཕྱིར་དེ་དག་ཀྱང་དབང་པོ་ཐམས་ཅད་པ་ཉིད་དོ། །ཇི་སྐད་བཤད་པ་འདིས་ནི་ཡོན་ཏན་ཉིད་ལ་དང་ཡོད་པ་ཉིད་ལ་དབང་པོ་ཐམས་ཅད་པའི་ཤེས་པར་བཤད་དོ་ཞེས་
[57a.5]པའོ། །ཐ་མི་དད་པའི་ཤེས་པ་ནི་སླར་ཡང་གང་ཁོ་ན་བདག་གིས་མཐོང་བ་དེ་ཁོ་ན་རེག་གོ་ཞེས་པ་སྟེ། དེ་དབང་པོས་མིན་ཞེས་པ་ལན་ནོ། །དབང་པོ་དུ་མ་དོན་མེད་ཕྱིར། །ཞེས་པ་དབང་པོ་དུ་མ་བརྟག་པ་ལ་རྒྱུ་མཚན་མེད་པ་ཉིད་ཀྱི་ཕྱིར་ཞེས་པའི་དོན་ཏོ། །དབང་པོ་གཅིག་གིས་དོན་དུ་མ་མཐའ་དག་
[57a.6]རྟོགས་པར་ནུས་པ་མ་ཡིན་ནོ་ཞེས་པས་དབང་པོ་གཞན་ཡོངས་སུ་རྟོགས་པ་ཡིན་ན་གལ་ཏེ་ཡང་དེ་དབང་པོ་གཞན་གྱི་དོན་ལ་ཡང་རབ་ཏུ་འཇུག་ན་དབང་པོ་དུ་མ་བརྟག་པ་རྒྱུ་མཚན་མེད་པར་འགྱུར་རོ། །འདི་སྐད་བཤད་པར་འགྱུར་ཏེ། འབྲས་བུ་ཐ་དད་པས་དབང་པོ་ཐ་དད་པ་རྟོགས་པར་བྱ་ལ། གལ་ཏེ་
[57a.7]དབང་པོའི་བྱ་བ་ཡང་གཅིག་ཁོ་ནས་བྱ་བ་ཡིན་ན། དབང་པོ་གཞན་ལ་ཚད་མ་ཡོད་པ་མ་ཡིན་ནོ་ཞེས་པ་དེ་བརྟག་པར་བྱ་བ་མ་ཡིན་པར་འགྱུར་རོ་ཞེས་པའོ། །དོན་མེད་པ་ཞེས་པ་ནི་རྒྱུ་མཚན་མེད་པ་ཞེས་པའི་དོན་ཏོ། །ཅི་སྟེ་ཡང་འགྱུར་རོ་ཞེས་པ་འདི་ལྟར་བསམས་པ་སྟེ། དབང་པོ་དུ་མས་དོན་གཅིག་
[57b]
[57b.1]ཡོངས་སུ་གཅད་པར་ནུས་ལ། གཅིག་གིས་དོན་དུ་མ་ནི་མ་ཡིན་ཞིང་། གཟུགས་ལ་སོགས་པ་ཡང་དུ་མ་རྣམས་ཏེ། དེའི་ཕྱིར་དབང་པོ་མང་པོ་ཉིད་བརྟགས་པ་དོན་དང་བྲལ་བ་ཉིད་མེད་དོ་ཞེ་ན། རང་ཡུལ་ཐ་དད་ནའང་ཞེས་པ་ལ་སོགས་པ་སྟེ། གལ་ཏེ་དབང་པོ་གཅིག་དབང་པོ་གཞན་གྱི་དོན་ལ་ཡང་
[57b.2]རབ་ཏུ་འཇུག་ན་དེའི་ཕྱིར་དེ་ཐམས་ཅད་ཁོ་ན་དེའི་རང་གི་དོན་དུ་འགྱུར་ཞིང་། རང་གི་དོན་ལ་ཡང་ཐ་དད་ན་ཡང་སྔོན་པོ་ལ་སོགས་པ་བཞིན་ཏེ། དེ་ནུས་པར་འགྱུར་བ་ཁོ་ནའོ་ཞེས་པས་ལན་མ་ཡིན་ནོ། །གྲངས་ལ་སོགས་པ་ཐ་དད་པས་ཀྱང་ཞེས་པ་གྲངས་དང་ཚད་རྣམས་དང་ཐ་དད་པ་ཉིད་དང་ལྡན་པ་དང་རྣམ་
[57b.3]པར་དབྱེ་བ་དག་དང་གཞན་ཉིད་དང་གཞན་མ་ཡིན་པ་ཉིད་དག་དང་ལས་ཏེ། གཟུགས་ཅན་དང་འཕྲོད་པ་འདུ་བའི་ཕྱིར་མིག་གིས་གཟུང་བར་བྱ་བ་རྣམས་སོ་ཞེས་པའི་གྲུབ་མཐའ་ལས་སོ། །དབང་པོ་གཞན་གྱི་དོན་ནི་མ་ཡིན་ནོ་ཞེས་པ་སྟེ། འདིས་ནི་གང་མིག་གི་དབང་པོའི་དོན་ཡིན་པ་དེ་ལ་དཔག་
[57b.4]པའི་དབང་པོ་ནུས་པ་མ་ཡིན་ཏེ། གཟུགས་ལ་སོགས་པ་བཞིན་རྫས་ཀྱང་དེ་ལྟ་བུའོ་ཞེས་ཁྱབ་བྱེད་དང་འགལ་བའི་ཐལ་འགྱུར་གསལ་བར་བྱེད་དོ། །དབང་པོ་གཞན་གྱི་ཡུལ་ཉིད་ཀྱིས་ཀྱང་ཞེས་པ་ལ་སོགས་པ་གཟུགས་དང་རེག་བྱ་དག་ནི་ཐ་དད་པར་གྱུར་ན་ཡང་། ཇི་ཙམ་དུ་དབང་པོ་ཐ་དད་པས་
[57b.5]རྟོགས་པ་མ་ཡིན་པ་དེ་ཙམ་དུ་ནི་ཤེས་པར་ནུས་པ་མ་ཡིན་ནོ། །གལ་ཏེ་ཡང་དབང་པོ་གཅིག་གིས་འཛིན་པར་གྱུར་ན། དེའི་ཚེ་ཇི་ལྟར་སྔོན་པོ་ལ་སོགས་པ་རྣམས་མིག་གི་སྤྱོད་ཡུལ་ཉིད་ཀྱིས་ཐ་མི་དད་པར་དེ་ལྟར་གཟུགས་དང་རེག་བྱ་དག་ཀྱང་འགྱུར་རོ། །དེ་ལས་ཀྱང་རེག་བྱ་ཡང་མིག་གིས་འཛིན་པར་
[57b.6]འགྱུར་རོ། །གང་ལས་མིག་གིས་མི་འཛིན་པ་ཞེས་པ། དབྱེ་བས་བྱས་པའི་དབང་པོ་གཞན་གྱིས་མི་འཛིན་པ་སྟོན་ཏོ། །དེའི་ཕྱིར་འདིས་ནི་གང་ལ་རེག་བྱེད་ཀྱི་དབང་པོས་ནུས་པ་དེ་ནི་མིག་གི་དབང་པོའི་དོན་མ་ཡིན་ཏེ། རེག་བྱ་བཞིན། རྫས་ཀྱང་རེག་བྱེད་ཀྱི་དབང་པོས་ནུས་པའོ་ཞེས་པ་ཁྱབ་བྱེད་
[57b.7]དང་འགལ་བའི་ཐལ་འགྱུར་གསུངས་སོ། །འདི་ཁོ་ནའི་བསྒྲུབ་པར་བྱ་བ་ལས་བཟློག་པ་ལ་མི་འདོད་པར་ཐལ་བར་གྱུར་པ་གསུངས་པ། དེ་གལ་ཏེ་ཞེས་པ་ལ་སོགས་པ་སྟེ། གལ་ཏེ་ཡང་མིག་གི་རིག་བྱེད་ཀྱིས་གཟུང་བྱ་ཡིན་ཡང་རྫས་འཛིན་ཏོ་ཞེས་འདོད་ན་དེའི་ཚེ་དབང་པོ་གཞན་གྱི་དོན་ཡང་མིག་
[58a]
[58a.1]གི་རང་གི་དོན་ཏོ་ཞེས་མངོན་པར་ཁས་བླངས་པར་འགྱུར་ཏེ་རྫས་བཞིན་ནོ། །དེ་ལས་ཀྱང་རང་གི་དོན་ཉིད་ཀྱི་ཕྱིར་དེ་རེག་བྱ་དང་རོ་ལ་སོགས་པའི་དབྱེ་བས་ཐ་དད་ཀྱང་སྔོན་པོ་ལ་སོགས་པ་བཞིན་དུ་མིག་གིས་གཟུང་བར་བྱའོ་ཞེས་པ་འདིའི་ཕྱིར་ན། ཐ་དད་པ་ཉིད་ནི་དབང་པོ་དུ་མས་གཟུང་
[58a.2]བར་བྱ་བ་ཉིད་ལ་རྒྱུ་མ་ཡིན་ཏེ། དབང་པོ་དུ་མ་བརྟག་པའི་རྒྱུ་མ་ཡིན་ནོ་ཞེས་པའི་དོན་ཏོ། །གང་གི་ཕྱིར་རང་གི་དོན་ཐ་དད་པ་ཡང་དབང་པོ་གཅིག་ཁོ་ནས་ཡོངས་སུ་གཅད་པར་བྱ་བ་ཡིན་པ་དེའི་ཕྱིར་ཡང་གཟུགས་ལ་སོགས་པ་རྣམས་ཐ་དད་པ་ཉིད་ཀྱི་ཕྱིར་དབང་པོ་གཅིག་མིན་གྱིས་གཟུང་བར་བྱ་བའོ་ཞེས་གང་
[58a.3]བརྗོད་པ་དེ་མི་རིགས་སོ། །འོ་ན་ཅི་ཞེ་ན་དབང་པོ་གཞན་གྱི་དོན་མི་འཛིན་པའོ་ཞེས་པ། དབང་པོ་གཅིག་མིན་ཉིད་ལ་རྒྱུའོ་ཞེས་སྦྲེལ་ལོ། །གང་ཕྱིར་གལ་ཏེ་དབང་པོ་གཞན་གྱི་དོན་དབང་པོ་གཞན་གྱིས་འཛིན་པར་མི་ནུས་ན། དེ་ལྟ་ན་དབང་པོ་དུ་མ་བརྟག་པར་ནུས་སོ་ཞེས་སྟོན་ཏོ། །དེའི་ཕྱིར་འདི་
[58a.4]ལྟར་དབང་པོ་དུ་མས་གཟུང་བར་བྱ་བའི་རྫས་ཡོད་པ་མ་ཡིན་ནོ་ཞེས་གནས་སོ། །སླར་ཡང་འདི་ཁོ་ན་གསལ་བར་བྱ་བའི་ཆེད་དུ་རྫས་དབང་པོ་དུ་མ་ཅན་དུ་ཁས་ལེན་ན་ཁས་བླངས་པས་གནོད་པ་འཐོབ་བོ་ཞེས་སྟོན་པ་གསུངས་པ། གལ་ཏེ་ཡང་ཞེས་པ་ལ་སོགས་པའོ། །གལ་ཏེ་དོན་ཐ་མི་དད་པ་དབང་
[58a.5]པོ་དུ་མས་འཛིན་པར་འགྱུར་ན་དེ་ལས་ཀྱང་དབང་པོ་རྣམས་རང་གི་ཡུལ་ངེས་པར་མི་འགྱུར་ཞིང་། དེའི་ཕྱིར་ཡང་གཟུགས་ལ་སོགས་པ་རྣམས། དབང་པོ་ཐམས་ཅད་ཀྱིས་གཟུང་བར་བྱ་བར་སོ་སོ་རེ་རེ་ཡང་འགྱུར་ཏེ། རྫས་བཞིན་ནོ། །དབང་པོ་ཐམས་ཅད་ཀྱིས་གཟུང་བྱ་སྨོས་པ་ཡང་། འདིར་དབང་པོ་
[58a.6]གཅིག་གིས་གཟུང་བྱ་ཉིད་ཀྱི་ངེས་པ་སེལ་བ་ལྷུར་བྱེད་པའོ། །གང་གསུངས་པ་དེ་ལྟ་ན་གཟུགས་ལ་སོགས་པ་རྣམས་དབང་པོ་དུ་མས་གཟུང་བར་བྱ་བ་རྣམས་སུ་འགྱུར་རོ་ཞེས་པ་སྟེ། ངེས་པས་དབང་པོ་གཅིག་གིས་གཟུང་བར་བྱ་བ་རྣམས་སུ་མི་འགྱུར་རོ་ཞེས་པའི་དོན་ཏོ། །རང་གི་བྱེ་བྲག་ལ་ངེས་
[58a.7]པར་བྱེད་པ་རྣམས་སོ་ཞེས་པ་རང་གི་ཁྱད་པར་ལ་ངེས་པར་བྱེད་པ་རྣམས་ཏེ། དབང་པོའི་བློ་རྣམས་ཀྱིས་ཞེས་སྦྲེལ་བར་བྱའོ། །རྫས་དང་གྲངས་ལ་སོགས་པ་དང་ལས་རྣམས་ལ་ཞེན་པ། སོགས་པ་སྨོས་པ་ལས་དངོས་པོ་དང་ཡོན་ཏན་ཉིད་དང་ཐ་དད་པ་ཉིད་ལ་སོགས་པ་རྣམས་གཟུང་བར་བྱའོ། །
[58b]
[58b.1]མི་འགྱུར་རོ་ཞེས་པ་ལ་སོགས་པ་སྟེ། རྫས་ནི་རེག་བྱེད་དང་མིག་གིས་འཛིན་པར་མི་འགྱུར་ལ། ལྷག་མ་རྣམས་མིག་གིས་སོ་ཞེས་སྦྱར་བར་བྱའོ། །དེ་ལྟ་ན་འོ་ན་ཞེས་པ་རྣམ་པ་གཞན་དུ་ངེས་པར་བྱེད་པ་ཉིད་སྨྲས་སོ། །དེ་ལྟ་ན་ཡང་ཞེས་པ་སྟེ། ཕྱོགས་འདི་ལ་དེ་མ་ཐག་པར་བརྗོད་པའི་སྐྱོན་འཇུག་པ་མེད་
[58b.2]དོ་ཞེས་སྟོན་པར་བྱེད་དོ། །གང་ཞིག་གི་གང་ལ་ངེས་པར་བྱེད་པའི་རྒྱུ་མེད་པ་དེ་དེ་ལ་ངེས་པ་མ་ཡིན་ཏེ། དཔེར་ན་འདོད་པ་ཙམ་གྱིས་འཇུག་པའི་ལག་པ་ལ་སོགས་པའི་མིང་རྣམས་དོན་འགའ་ཞིག་ལ་བཞིན། དབང་པོ་རྣམས་ཀྱང་རྫས་ལ་སོགས་པ་རྣམས་ལ་ངེས་པར་བྱེད་པའི་རྒྱུ་ཡོད་པ་
[58b.3]མ་ཡིན་ནོ། །རྒྱུ་མེད་པའོ། །མདོ་དང་འགལ་ལོ་ཞེས་པས་ཁས་བླངས་དང་འགལ་བ་གསུངས་སོ། །རིགས་པས་ཀྱང་ཞེས་པ་ལ་སོགས་པས་ཏེ། གང་དངོས་པོ་མེད་པ་དེ་བྱ་བ་མ་ཡིན་ཏེ། ནམ་མཁའི་མེ་ཏོག་བཞིན། དབང་པོ་གཞན་གྱིས་མི་འཛིན་པ་ཡང་དངོས་པོ་མེད་པའོ། །ཁྱབ་
[58b.4]པར་བྱེད་པ་དང་འགལ་བའོ། །གཞན་རྣམས་ནི་མདོ་རྣམ་པ་གཞན་དུ་རྟོག་པར་བྱེད་དེ། དེ་སྨོས་པས་རང་གི་ཁྱད་པར་དང་བྲལ་བའི་ཁྱད་པར་གཞན་དུ་མངོན་པར་འདོད་པ་སྟེ། དེ་མེད་པའི་ཕྱིར་རེག་པ་ཉིད་ལ་སོགས་པ་མེད་པའི་ཕྱིར་རོ། །གཟུགས་ལ་མིག་གི་དབང་པོ་རབ་ཏུ་འཇུག་ལ། དེས་ཀྱང་
[58b.5]རེག་བྱ་ཉིད་ལ་སོགས་པ་མེད་པས་གཟུགས་ཉིད་ཡོད་པར་མཚོན་པར་བྱའོ། །དབང་པོ་གཞན་གྱིས་འཛིན་པ་མ་ཡིན་པ་ནི་མི་འཁྲུལ་བའོ་ཞེས་ཏེ། དེ་ཡང་རིགས་པས་ཀྱང་ཞེས་པ་ལ་སོགས་པ་ཁོ་ནས་བསལ་བར་བྱའོ། །རིགས་པས་རྗེས་སུ་སྒྲུབ་པ་ཅན་ཉིད་དུ་གྱུར་ན་ནི། དེ་ལྟར་བཤད་པ་མཛེས་
[58b.6]མོད། རིགས་པ་དང་འགལ་ན་ནི་དཀའ་བས་རྟོག་པ་ནི་རྟོག་པ་མ་ཡིན་པ་ཁོ་ནའོ། །གཞན་ཡང་རང་གི་བྱེ་བྲག་རྣམས་ཀྱི་སྐབས་ཉིད་ཀྱི་ཕྱིར། དེའི་སྒྲས་དེ་རྣམས་ཁོ་ན་འཛིན་པར་རིགས་ཀྱི་ཁྱད་པར་གཞན་རྣམས་ནི་མ་ཡིན་ཏེ། སྐབས་མ་ཡིན་པ་ཉིད་ཀྱི་ཕྱིར་རོ། །དེ་མེད་པས་ཀྱང་དངོས་པོ་
[58b.7]ཉེ་བར་ལེན་པ་མི་རིགས་སོ་ཞེས་པས་འདི་ནི་སྙིང་པོ་མེད་པའོ། །རྣམ་པར་བཤད་པ་སྔ་མ་ལ་ནི་སྐྱོན་འདི་ཡོད་པ་མ་ཡིན་ཏེ། གང་ལ་གང་གི་རྒྱུ་མེད་པ་དེ་ནི་དེར་འབྱུང་བ་མ་ཡིན་ནོ་ཞེས་པ་རིགས་ཏེ། འགྱུར་མོད་ཅེས་པ་ལ་སོགས་པ་གང་སྨྲས་པའོ། །གལ་ཏེ་དེ་ལྟ་ན་རྫས་མེད་ན། གང་བདག་
[59a]
[59a.1]གིས་མཐོང་བ་དེ་ཁོ་ན་རེག་པའོ་སྙམ་པ་ཐ་དད་པ་མེད་པའི་ཤེས་པ་འདིའི་ཡུལ་ཅི་ཡིན། འདི་ནི་ཡུལ་མེད་པ་ཁོ་ནའོ་ཞེས་སྨྲ་བ་ནུས་པ་ཡང་མ་ཡིན་ཏེ། ཡུལ་ལ་སོགས་པ་ངེས་པས་སྐྱེ་བའི་ཕྱིར། མངོན་པར་འདོད་པའི་མངོན་སུམ་བཞིན། །ཞེས་བསམས་ནས་སྨྲས་པ། འོ་ན་
[59a.2]གང་ཞེས་པ་ལ་སོགས་པའོ། །གཞན་པའི་སྤྱོད་ཡུལ་ཅན་ཞེས་པ་ལ་སོགས་པ་སྟེ། རྫས་ལས་གཞན་པ་བརྟགས་པ་ཁོ་ན་འདིའི་ཡུལ་ལོ་ཞེས་སྟོན་ཏོ། །ཡུལ་ཐ་དད་པ་ཞེས་པ་ལ་སོགས་པ་སྟེ། གཟུགས་དང་རེག་བྱ་ཡང་ཕན་ཚུན་ལས་བཟློག་པའི་ཡུལ་ཉེ་བར་དམིགས་པ་དང་ལྡན་པ་ལས་
[59a.3]དེ་སྐྱེའོ། །དེས་ན་གལ་ཏེ་ཡང་བརྟགས་པ་ཡུལ་ཡིན་པ་དེ་ལྟ་ན་ཡང་གཟུགས་ལ་སོགས་པ་ཉེ་བར་དམིགས་པ་ཡོད་ན་དེ་ཡོད་པའི་ཕྱིར་ན། སྨིག་རྒྱུ་ལ་སོགས་པ་ལ་ཆུའི་ཤེས་པ་བཞིན་དུ་ཡུལ་ལ་སོགས་པ་ངེས་པ་ཁོ་ནས་དེ་སྐྱེའོ་ཞེས་གསལ་བར་བྱེད་དོ། །དེ་ཡང་ལྷན་ཅིག་སྤྱོད་པའི་ཚོགས་
[59a.4]པའི་ཡུལ་ཅན་ཞེས་པ་སྟེ། མིག་དང་ལུས་ཀྱིས་ཉེ་བར་དམིགས་པའི་ཡུལ་ཐ་དད་པ་དེ་འདིའི་ལྷན་ཅིག་སྤྱོད་པ་ཡིན་པ་ཞེས་པ་ནི། དེའི་ཡོན་ཏན་ཡང་དག་པར་ཤེས་པ་སྟེ་འབྲུ་མང་པོ་པའོ། །སླར་ཡང་དེ་དང་ལྷན་ཅིག་སྤྱོད་པའི་ཚོགས་པ་འདིའི་ཡུལ་ཡིན་པ་ཞེས་འབྲུ་མང་པོ་པ་ཁོ་ནའོ། །དེ་ལྟར་
[59a.5]གཟུགས་དང་རེག་བྱ་དག་ལྷན་ཅིག་སྤྱོད་པ་ཉེ་བར་མཚོན་པ་ཉིད་དུ་གྱུར་ན་ཡང་དྲི་ལ་སོགས་པ་ཚོགས་པ་ཙམ་ཡུལ་ཉིད་དུ་བརྗོད་པར་འགྱུར་བ་མ་ཡིན་ནོ། །དྲན་པ་ཉིད་ཐ་མི་དད་པའི་ཤེས་པ་ཞེས་པ། གཟུགས་ལ་སོགས་པ་གང་རྣམས་ལ་ཉམས་སུ་མྱོང་བ་སྔོན་དུ་འགྲོ་བའི་བུམ་པ་ཞེས་པའི་བརྡ་
[59a.6]ཡིན་པ་དེའི་ཚོགས་པ་ལ་སླར་ཡང་ཕྱི་མའི་དུས་སུ་གཟུགས་དང་རེག་པ་ཉེ་བར་དམིགས་པ་དང་ལྡན་པ་པོའི་དྲན་པ་སྟེ། དེ་ཁོ་ན་བུམ་པ་འདིའོ་ཞེས་ཐ་མི་དད་པའི་ཤེས་པ་སྐྱེའོ། །གང་ཚོགས་པ་ནི་དངོས་པོ་མ་ཡིན་པའི་ཕྱིར་ཤེས་པ་འགའ་ཞིག་གིས་ཀྱང་ཉམས་སུ་མྱོང་བ་མ་ཡིན་ཏེ། དེས་ན་ཅི་
[59a.7]ལྟར་དེ་ལ་དྲན་པ་ཡིན་ཞེས་སྨྲ་བ་དེའི་བརྩད་པར་བྱ་བ་མ་ཡིན་ཏེ། གང་གི་ཕྱིར་ཚོགས་པ་ནི་བརྟགས་པ་ཡིན་ལ་གང་ཡང་བརྟགས་པའི་དངོས་པོ་དེ་ནི་རྣམ་པར་ཤེས་པའི་གཟུང་བའི་ཆ་ཤས་ཉིད་ཀྱིས་བདག་ཉིད་དུ་གྱུར་པའོ་ཞེས་པ་རང་རིག་པ་ཁོ་ནས་ཉམས་སུ་མྱོང་བས་སོ། །རྣམ་པ་གཞན་དུ་ན་ཅི་
[59b]
[59b.1]ལྟར་དེ་ཁོ་ན་ཁང་བཟངས་ཀྱི་ཕྲེང་བ་ཆེན་པོ་འདིའོ་ཞེས་དྲན་པར་འགྱུར། ཅིའི་ཕྱིར་འདི་ཚོགས་པའི་ཡུལ་ཅན་ཡིན་གྱི། ཡང་དངོས་པོར་ཡོད་པ་བུམ་པ་ལ་སོགས་པ་རྫས་ཀྱི་ཡུལ་ཅན་ནི་མ་ཡིན་ཞེ་ན། གསུངས་པ། གཟུགས་ལ་སོགས་པ་འཛིན་པ་མེད་ན་དེའི་བློ་མེད་པའི་ཕྱིར་རོ་ཞེས་པ། གང་ཞིག་གང་
[59b.2]འཛིན་པ་མེད་པར་གྱུར་ན། དམིགས་པའི་མཚན་ཉིད་ཀྱིར་གྱུར་པ་མ་དམིགས་པ་དེ་ནི་དེ་ལས་ཐ་དད་པ་ཡོད་པ་མ་ཡིན་ཏེ། ཤིང་ལ་སོགས་པ་རྣམས་ལས་གྲོང་དྲུག་གམ་ཁང་བཟངས་ཀྱི་ཕྲེང་བ་བཞིན། བུམ་པ་ལ་སོགས་པའི་རྫས་ཀྱང་གཟུགས་ལ་སོགས་པ་འཛིན་པ་མེད་ན་དམིགས་པའི་མཚན་ཉིད་ཀྱིར་
[59b.3]གྱུར་པ་མ་དམིགས་པའོ་ཞེས་པ་རང་བཞིན་མ་དམིགས་པ་གསུངས་སོ། །གང་དུ་སྣང་བ་ཀུན་དུ་འཛིན་པ་དེར་གཟུགས་བལྟར་རུང་བ་ཁོ་ནར་འགྱུར་བ་མ་ཡིན་ཏེ། སྣང་བ་མེད་པར་ཡང་སྲོག་ཆགས་འགའ་ཞིག་རྣམས་ཀྱིས་དེ་འཛིན་པའི་ཕྱིར་དེས་མ་ངེས་པ་མ་ཡིན་ནོ། །དེ་བཞིན་དུ་ཁྱད་པར་ཅན་རྣམས་
[59b.4]ཞེས་པ་ལ་སོགས་པ་སྟེ། ཡོད་པ་དང་ཡོན་ཏན་ཉིད་དག་གིས་སྔར་མ་ངེས་པར་བརྗོད་པ་དེ་ཡོངས་སུ་སྤང་བའི་ཆེད་དུ་ཉེ་བར་བཀོད་པ་སྟེ། ཁྱད་པར་ཅན་རྣམས་ནི་གཟུགས་ལ་སོགས་པ་རྣམས་སོ། །དེ་རྣམས་ཐ་དད་པ་རྣམས་ཡོད་པ་དང་ཡོན་ཏན་ཞེས་པའི་ཁྱད་པར་འདི་དང་མ་འབྲེལ་པ་ཁོ་ན་རྣམས།
[59b.5]སྔར་ཉེ་བར་དམིགས་པ་དང་ལྡན་པའི་དེ་ལས་དོན་གཞན་རྣམ་པར་གཅོད་པའི་ཡུལ་ཅན་ཡོད་པ་མ་ཡིན་པ་དང་ཡོན་ཏན་མ་ཡིན་པ་ལས་ལྡོག་པའི་མཚན་ཉིད་ཅན་ཏེ། གང་སྤྱི་ཡིན་པ་དེ་ཡུལ་ལོ་ཞེས་པ་ཇི་སྲིད་པའོ། །ཐ་མི་དད་པས་ཐམས་ཅད་དུ་ཞེས་པ། ཡིད་ལས་བྱུང་བའི་ཤེས་པ་སྤྱིའི་རྣམ་པའི་རྗེས་སུ་
[59b.6]འབྲེལ་པ་དེ་ནི་དེ་རྣམས་ཐ་དད་པ་ཡོད་ཀྱང་བསྒྲིབས་ནས། རང་གི་རྣམ་པ་ཐ་མི་དད་པ་ཡང་འདི་རྣམས་ལ་ཞེན་ཏེ། གཅིག་ཉིད་ལྟ་བུར་ཀུན་ནས་ལེན་ཅིང་དེ་རྣམས་ཐ་མི་དད་པས་དེ་ཐམས་ཅད་ལ་ཉེ་བར་སྐྱེའི་གཅིག་ཁོ་ན་ལ་ནི་མ་ཡིན་ནོ། །ཡོད་པ་དང་ཡོན་ཏན་ཉིད་དག་ནི་མངོན་སུམ་མ་ཡིན་ནོ་ཞེས་པ་འདི་ལས་
[59b.7]མ་ངེས་པ་མ་ཡིན་ནོ་ཞེས་པ་དགོངས་པའོ། །དེ་ཉེ་བར་མ་མཚོན་པའི་ཕྱིར་ཞེས་པ། སྔར་ཉམས་སུ་མྱོང་བའི་ཤེས་པ་ནི་དངོས་པོ་ཐ་དད་པའི་ཡུལ་ཅན་ཏེ། དེའི་ཕྱིར་དེ་སྔོན་དུ་འགྲོ་བ་ནི་ཡིད་ལས་བྱུང་བ་སྤྱིའི་ཤེས་པའོ་ཞེས་ཁྱད་པར་འདི་ཉེ་བར་མ་མཚོན་པའི་ཕྱིར་རོ། །སྤྱོད་ཡུལ་མཚུངས་ཉིད་འདོད་
[60a]
[60a.1]ཅེ་ན། །ཞེས་པ་མ་ངེས་པ་ཉིད་གཞུང་གཟུགས་པའི་ཆེད་དུ་ཉེ་བར་བཀོད་པའོ། །སྤྱོད་ཡུལ་མཚུངས་པ་ཉིད་ལ་གཏན་ཚིགས་སྨྲས་པ། དེ་མི་འཛིན་ན་དེའི་བློ་མེད་པའི་ཕྱིར་རོ་ཞེས་པ་ཁྱད་པར་བྱེད་པ་མ་བཟུང་བས་ཁྱད་པར་ཅན་ལ་བློ་འཇུག་པ་མ་ཡིན་ནོ་ཞེས་པའི་དོན་ཏོ། །དེ་ལས་ཀྱང་གཟུགས་
[60a.2]ལ་སོགས་པ་ཁྱད་པར་ཅན་རྣམས་དབང་པོ་ཐམས་ཅད་པ་ཉིད་ཀྱི་ཕྱིར་དེའི་ཁྱད་པར་ཡོད་པ་ཉིད་དང་ཡོན་ཏན་ཉིད་དག་དབང་པོ་ཐམས་ཅད་པ་ཉིད་དུ་གྲུབ་བོ། །གང་ཁྱད་པར་དང་ཁྱད་པར་ཅན་དུ་གྱུར་པ་དེ་རྣམས་དབང་པོ་མཚུངས་པའི་ཡུལ་ཡིན་ཏེ། དཔེར་ན་དབྱུག་པ་དང་དབྱུག་པ་ཅན་བཞིན་ནོ། །ཡོད་པ་ཉིད་
[60a.3]དང་དེ་དང་ལྡན་པ་རྣམས་དང་། ཡོན་ཏན་དང་དེ་དང་ལྡན་པ་རྣམས་ཀྱང་དེ་ལྟ་བུའོ། །རང་བཞིན་གྱི་གཟུགས་བརྙན་ནོ། །མི་འདོད་པ་ལ་ཐལ་བར་འགྱུར། །ཞེས་པ་ཐལ་འགྱུར་གྱི་ཟོལ་གྱིས་མ་ངེས་པ་ཉིད་དུ་གསུངས་སོ། །རྫས་དང་ལྡན་པ་རྣམས་ཞེས་པ་ལ་སོགས་པ་སྟེ། རྫས་འདི་རྣམས་
[60a.4]ཀྱི་རྟེན་དུ་ཡོད་པ་ཞེས་པ་རྫས་དང་ལྡན་པ་རྣམས་སོ། །འདིར་རྫས་དང་ལྡན་པས་ཡོན་ཏན་ནི་ཁྱད་པར་ཅན་ཏེ། རྫས་ནི་ཁྱད་པར་རོ། །དེ་ལས་ཀྱང་ཇི་ལྟར་ཡོན་ཏན་དབང་པོ་ལྔ་པ་ཡིན་པ་དེ་བཞིན་དུ་རྫས་ཀྱང་འགྱུར་རོ། །དེ་བཞིན་དུ་རྫས་གཅིག་པ་ཉིད་ཀྱི་ཕྱིར་ཞེས་པ་ལ་སོགས་པ་སྟེ། རྫས་ནི་རྫས་
[60a.5]མེད་པ་དང་། རྫས་དུ་མར་འདོད་པར་བྱའི། རྫས་གཅིག་པ་ནི་རྫས་མ་ཡིན་ནོ། །དེ་ལ་རྫས་མེད་པའི་རྫས་ནི། གང་ལ་རྫས་གཞན་གྱི་རྟེན་མེད་པ་སྟེ། དཔེར་ན་རྡུལ་ཕྲ་རབ་དང་ནམ་མཁའ་ལ་སོགས་པ་བཞིན་ནོ། །རྫས་དུ་མའི་རྫས་ནི་གང་ལ་རྫས་དུ་མའི་རྟེན་ཅན་ཏེ། དཔེར་ན་བུམ་པ་ལྟ་བུའོ། །
[60a.6]དེ་ནི་དུ་མ་ལ་འཕྲོད་པ་འདུས་པའོ། །འདིར་ཡང་རྫས་གཅིག་ནི་ཡོད་པ་དབང་པོ་ཐམས་ཅད་པའི་ཁྱད་པར་རོ་ཞེས་པས་རྫས་ཀྱང་དབང་པོ་ཐམས་ཅད་པར་འགྱུར་ལ། འདོད་པ་ཡང་མ་ཡིན་ནོ། །དེའི་ཕྱིར་མ་ངེས་པའོ། །རྫས་འཇུག་པའི་ཕྱིར་ཞེས་པ་ལ་སོགས་པ་སྟེ། རྫས་ལ་འཇུག་པའི་ཡོད་པ་
[60a.7]གང་ཡིན་པ་དེའི་རྫས་གཅིག་ནི་ཁྱད་པར་ཡིན་ལ། འདི་ནི་དབང་པོ་ཐམས་ཅད་པ་ཡང་མ་ཡིན་གྱི། འོ་ན་ཅི་ཞེ་ན། ཡོན་ཏན་ལ་འཇུག་པའོ། །དེའི་ཕྱིར་འདི་ཐལ་བར་འགྱུར་བ་མ་ཡིན་ནོ། །ཅིའི་ཕྱིར་ཐ་མི་དད་པའི་ཡོད་པ་འདི་རྫས་ལ་སོགས་པའི་ཡོད་པ་ལ་དགག་པར་བྱ་བ་མ་ཡིན་གྱི། ཐ་དད་
[60b]
[60b.1]པ་ནི་མ་ཡིན་ཞེ་ན་གསུངས་པ། དེ་སྐད་དུ་བཤད་པ་ནི་ཞེས་པ་ལ་སོགས་པ་སྟེ། ཡོད་པའི་རྫས་ཀྱི་རང་བཞིན་དགག་པ་བྱས་པ་ན། དེའི་ཕྱིར་ཡོན་ཏན་དང་ལས་སུ་འགྱུར་རོ་ཞེས་པའི་དོགས་པ་བསལ་བའི་ཆེད་དུ་འདི་བཤད་དེ། ལས་དང་ཡོན་ཏན་རྣམས་ལ་ཡང་ཡོད་པའི་ཕྱིར་ལས་མ་ཡིན་ཞིང་ཡོན་
[60b.2]ཏན་མ་ཡིན་ནོ་ཞེས་པ་འདིའི་ཕྱིར་སྐབས་སུ་བབ་པ་ཁོ་ནའི་ཡོད་པའི་ཆོས་ཡང་གི་སྒྲས་བསྡུ་བར་བྱ་སྟེ། གཞན་དུ་ན་བསྡུ་བའི་ཆེད་དུ་ཡང་རིགས་སོ། །རྫས་ལ་འཇུག་པ་ལས་ཀྱང་། ཡོན་ཏན་དང་ལས་རྣམས་ལ་མི་འཇུག་པ་ལས། ཡོན་ཏན་དང་ལས་རྣམས་ལ་ཡོད་མིན་གསལ་བར་མི་འགྱུར་རོ། །གལ་
[60b.3]ཏེ་ཡང་ཞེས་པ་ལ་སོགས་པ་སྟེ། གལ་ཏེ་འདི་འགལ་བའི་ཆོས་ལ་གནས་པར་འདོད་ན། དེ་ལས་ཐ་དད་པར་འགྱུར་རོ། །དེ་ལས་ཀྱང་དེ་མ་ཐག་པར་བརྗོད་པའི་སྐྱོན་འདི་འགྱུར་རོ། །མདོ་འདི་ཡང་འགལ་བ་སྟེ། ཡོད་པའི་རྟགས་ཁྱད་པར་མེད་པའི་ཕྱིར་དང་། ཁྱད་པར་གྱི་གཏན་ཚིགས་མེད་པའི་
[60b.4]ཡང་ཕྱིར་ཡོད་པ་གཅིག་པའོ་ཞེས་པ་བསམ་པའོ། །གང་གི་ཚེ་ཡང་ཞེས་པ་ལ་སོགས་པ་སྟེ། གང་གི་ཚེ་འདི་མིག་གིས་མཐོང་ནས་མེ་འདི་དྲོ་བའོ་ཞེས་འཛིན་པ་དེའི་ཕྱིར་དེའི་ཚེ་རེག་བྱ་ཡང་མེའི་ཁྱད་པར་ཉིད་ཀྱི་ཕྱིར་མིག་གིས་གཟུང་བར་བྱ་བར་འགྱུར་ལ། དེ་ལྟར་ཡང་མ་ཡིན་ནོ་ཞེས་པ་སྟེ། དེའི་
[60b.5]ཕྱིར་ཡང་མ་ངེས་པའོ། །མཐོང་བ་ཞེས་པ་འདིས་དོན་གྱིས་གོ་བ་དང་མཚུངས་པའི་ལྟག་ཆོད་ཉེ་བར་འགོད་དོ། །མེད་ཀྱང་ཞེས་པ་ལ་སོགས་པས་སྔོན་པོ་ལ་སོགས་པ་ཐ་དད་པ་རྣམས་ལ་ཡང་དབང་པོ་ཐ་དད་མེད་པ་སྟོན་པར་བྱེད་པས་ཤིང་སེམས་པ་ཅན་ཉིད་ལ་ཉལ་བ་བཞིན་དུ་ཉེ་བར་དམིགས་པར་
[60b.6]མཚུངས་པ་གཉིས་པའོ། །འཛིན་པ་ཐ་དད་པའི་ཕྱིར་ཞེས་པ་ཡང་གཏན་ཚིགས་གཞན་ཉེ་བར་བསྟན་པ་ལས་དང་པོའོ། །རྣམ་གཞན་དུ་བརྗོད་ཅེས་པ་ལ་སོགས་པས་དོན་གྱིས་གོ་བ་དང་མཚུངས་པ་སེལ་བར་བྱེད་དོ། །དེ་ལྟར་འགྱུར་མོད་མ་ངེས་པའོ་ཞེས་པ་འདིས་གཏན་ཚིགས་འཁྲུལ་པར་བརྗོད་
[60b.7]པ་མ་ཡིན་གྱི། འོ་ན་ཅི་ཞེ་ན། དམ་བཅའ་བའི་སྐྱོན་ནོ། །གང་གི་ཕྱིར་ཁྱོད་ཀྱིས་དབང་པོ་ཐ་དད་པས་གཟུང་བྱ་ཉིད་ཁོ་ནའི་ཕྱིར་རོ་ཞེས་ངེས་པར་འཛིན་པས་གཏན་ཚིགས་གཞན་མེད་དོ་ཞེས་དམ་བཅའ་བར་འགྱུར་ལ། དེ་ཡང་མི་རིགས་ཏེ། གཏན་ཚིགས་གཞན་ཡང་ཡོད་པར་གྱུར་པའི་ཕྱིར་རོ་ཞེ་ན།
[61a]
[61a.1]དེའི་ཕྱིར་གསུངས་པ། མ་ཡིན་ཞེས་པ་ལ་སོགས་པ་སྟེ། འདིར་མ་ངེས་པ་ཡང་མ་ཡིན་ནོ་ཞེས་པ་ནི་ངེས་པ་འདི་འཁྲུལ་པ་མ་ཡིན་ནོ་ཞེས་པའི་དོན་ཏོ། །ཐམས་ཅད་བསྒྲུབ་བྱར་ཞེས་པ་ལ་སོགས་པས་ཉེ་བར་དམིགས་པ་གཉིས་པ་སེལ་བར་བྱེད་དོ། །བློ་ཐ་དད་པའང་གཞན་
[61a.2]ཉིད་ཀྱི་ཕྱིར་ཞེས་པ་ལ་སོགས་པས། གཏན་ཚིགས་གཞན་ཡང་བསྒྲུབ་པར་བྱ་བའི་འཇུག་པ་སྟོན་པར་བྱེད་པས། མི་འཁྲུལ་བ་དང་བཅས་པ་བསྟན་པ་ལས་དང་པོའོ། །འབྱེད་ན་རྣམ་གཞན་དབྱེར་མེད་ཅིང་། །ཅེས་པ་འཛིན་པ་ཐ་དད་པ་འབའ་ཞིག་ལས་རྣམ་པ་གཞན་པ་དབང་པོ་ཐ་དད་པ་དང་འཛིན་
[61a.3]བྱེད་ཐ་དད་པར་གྱུར་ན་ཡང་ཐ་མི་དད་པ་མ་ཡིན་པ་ཁོ་ནའོ་ཞེས་པ་ཇི་སྲིད་པའོ། །གང་ལ་ཡང་ཞེས་པ་ལ་སོགས་པས་གལ་ཏེ་འཛིན་པ་ཐ་དད་པ་འབའ་ཞིག་ལས་སྔོན་པོ་ལ་སོགས་པ་རྣམས་ལ་ཐ་དད་པ་སྟེ། དེ་ལྟར་གྱུར་ན་གང་ལ་དབང་པོ་ཐ་དད་པ་དང་འཛིན་བྱེད་ཐ་དད་པ་ཡང་ཡོད་པ་དེ་ལ་ཆེས་ཤིན་
[61a.4]ཏུ་ཡང་ཐ་དད་པར་འགྲུབ་པོ། །དབང་པོ་ཐ་དད་པ་བྱས་པ་ལ་ནི། ཐ་དད་པ་མེད་པའི་དགོས་པ་མེད་པའི་ཕྱིར་རོ་ཞེས་སྟོན་ཏོ། །འདིས་ཞེས་པ་རྫས་ལ་མངོན་སུམ་སེལ་བའི་རིགས་པས་སོ། །ཡོན་ཏན་ལ་སོགས་པ་རྣམས་ལ་ཞེས་པ་ལ། སོགས་པའི་སྒྲས་ལས་རྣམས་ལའོ། །བསལ་ཞིང་སྤངས་
[61a.5]པར་བརྗོད་དོ། །ཅི་ལྟར་ཞེ་ན་གསུངས་པ། དེ་ཡང་ནི་ཞེས་པ་ལ་སོགས་པ་སྟེ། རང་གི་རྟེན་ཅན་ནི། ཡོན་ཏན་དང་ལས་དག་གི་རང་གི་སྤྱི་སྟེ། ཡོན་ཏན་ཉིད་དང་ལས་ཉིད་དོ། །གང་གི་རྟེན་རང་ཉིད་ཡིན་པ་དེ་རང་གི་རྟེན་ཅན་ཏེ། དེ་དང་འབྲེལ་པའི་སྒོ་ནས་སྐྱེའོ་ཞེས་པ་ནི་འདི་དང་ལྷན་ཅིག་
[61a.6]འབྲེལ་པ་སྟེ། ཁྱད་པར་དང་འབྲེལ་པའི་སྒོས་སྐྱེའོ་ཞེས་པ་ཇི་སྲིད་པའོ། །དེའི་ཕྱིར་ཡང་གང་ཁྱད་པར་ལ་ལྟོས་པ་དེ་མངོན་སུམ་མ་ཡིན་ཞེས་པ་ལ་སོགས་པ་སྔ་མ་བཞིན་དུ་སྒྲུབ་བྱེད་བརྗོད་པར་བྱའོ། །གཞན་ཡང་དེ་ཡང་བཞི་པོ་ལ་སོགས་པ་ཕྲད་པ་ཁོ་ན་ལས་སྐྱེའོ་ཞེས་འདི་བསྟན་པའོ། །སོགས་
[61a.7]པའི་སྒྲས་གསུམ་འདུས་པ་ལས་དང་གཉིས་འདུས་པ་ལས་ཀྱང་ཇི་ལྟར་སྲིད་པར་རོ། །དེ་ལས་སྐྱོན་ཅི་ཡོད་ཅེ་ན་གསུངས་པ། ཇི་ལྟར་ཐམས་ཅད་དུ་ཞེས་པ་ལ་སོགས་པ་སྟེ། དེ་ལ་བཞི་པོ་ཕྲད་པ་ལས་ནི་བདག་དང་ཡིད་དང་དབང་པོ་དང་རྫས་ཕྲད་པ་ལས་གཟུགས་ལ་སོགས་པ་རྣམས་ལ་དང་།
[61b]
[61b.1]ལས་རྣམས་ལའོ། །གསུམ་འདུས་པ་ལས་སྒྲ་ལའོ། །དེ་ལ་རྫས་དང་ལྷན་ཅིག་དབང་པོ་འབྲེལ་པ་ཡོད་པ་མ་ཡིན་ཏེ། ནམ་མཁའ་ལས་ཐོས་པ་ཉིད་ཀྱི་ཕྱིར་དང་། དེ་ཁོ་ན་ལ་སྒྲ་འདུ་བ་ཅན་ཡིན་པའི་ཕྱིར་རོ། །གཉིས་ཕྲད་པ་ལས་ནི་བདག་དང་ཡིད་ཕྲད་པ་བདེ་བ་ལ་སོགས་པ་རྣམས་ལའོ། །དེ་ལྟར་
[61b.2]ན་ཡོན་ཏན་དང་ལས་དང་རང་ཉིད་དང་ཕྲད་པ་རྣམས་ལས་ཤེས་པ་འགྲུབ་པའི་ཕྱིར། རྫས་ནི་རྒྱུ་དང་རྒྱུའི་ཡང་ངོ་ཞེས་གང་བརྗོད་པ་དེ་ཡང་སུན་ཕྱུང་བ་ཡིན་ནོ་ཞེས་པའོ། །སེར་སྐྱ་པ་རྣམས་ཀྱི་ཞེས་པ་ལ་སོགས་པ་སྟེ། དེར་བརྗོད་པ། ཅི་རྗེས་སུ་དཔག་པ་གཅིག་པུ་ཁོ་ན་ཚད་མའམ་ཞེ་ན། མ་ཡིན་
[61b.3]ཞེས་བརྗོད་པར་བྱ་སྟེ། རྣ་བ་ལ་སོགས་པའི་འཇུག་པ་ཡང་ངོ་། །མངོན་སུམ་ཚད་མ་ཞེས་པ་ལྷག་མའོ། །རྣ་བ་དང་པགས་པ་དང་མིག་དང་ལྕེ་དང་སྣ་རྣམས་ཀྱི་ཡིད་ཀྱིས་བྱིན་གྱིས་བརླབས་པའི་འཇུག་པ་སྒྲ་དང་རེག་བྱ་དང་གཟུགས་དང་རོ་དང་དྲི་རྣམས་ལ་རིམ་པ་ཇི་ལྟ་བར་འཛིན་པ་ལ་འཇུག་
[61b.4]བཞིན་པ་ནི་མངོན་སུམ་གྱི་ཚད་མའོ། །ཡིད་ཀྱིས་ཞེས་པ་ཡིད་ཀྱི་འཇུག་པ་སྟེ། རང་བཞིན་དང་རྣམ་འགྱུར་དག་ཐ་དད་མེད་པར་ཉེ་བར་བཏགས་པ་ལས་དེ་སྐད་དུ་བཤད་དོ། །བྱིན་གྱིས་བརླབས་པ་ཞེས་པ་དེ་དང་ལྷན་ཅིག་ཡུལ་གཅིག་ལ་ཞུགས་པ་ཞེས་པའི་དོན་ཏོ། །འདིར་བྱིན་གྱིས་
[61b.5]བརླབས་པའི་དོན་ནི་ལྷན་ཅིག་པའི་དོན་ཏེ། དཔེར་ན་རྒྱལ་པོའི་མིས་བྱིན་གྱིས་བརླབས་ཤིང་ཞུགས་པ་ནི་དེ་དང་ལྷན་ཅིག་གོ་ཞེས་རྟོགས་པར་བྱ་བ་ཡིན་པ་བཞིན་ནོ། །གཞན་རྣམས་ན་རེ་ཡིད་ཀྱིས་བྱིན་གྱིས་བརླབས་པ་ཞེས་པ། ཡིད་ཀྱིས་ཡང་དག་པར་རིག་པ་སྟེ། ཇི་སྐད་དུ་བཤད་པ། ཕྱི་རོལ་
[61b.6]གྱི་དོན་རྣམས་ལ། དབང་པོ་ཞེན་པར་བྱེད་ན། དབང་པོ་ཞེན་པ་དེ་ལ་ཡིད་རྗེས་སུ་ཞེན་པར་བྱེད་དོ་ཞེས་སོ། །གཞུང་འདི་ནི་དབང་པོའི་འཇུག་པ་ཁོ་ན་ཕྱི་རོལ་གྱི་ཡུལ་གྱི་རྣམ་པ་ཅན་ནི། ཡིད་ཀྱི་འཇུག་པས་ཡང་དག་པར་རིག་པར་བྱ་བ་སྟེ། དབང་པོའི་འཇུག་པ་དང་ལྷན་ཅིག་པས་ཕྱི་རོལ་གྱི་དོན་ནི་
[61b.7]མ་ཡིན་ནོ་ཞེས་རྟོགས་པར་བྱའོ། །དེའི་ཕྱིར་གང་རྣ་བ་ལ་སོགས་པ་རྣམས་ཀྱི་འཇུག་པ་ཡིད་ཀྱི་འཇུག་པས་གཟུང་བར་བྱ་བ་དེ་ནི་དེས་བྱིན་གྱིས་བརླབས་པ་ཞེས་བརྗོད་དེ། དབང་པོ་རྣམས་ཀྱི་འཇུག་པ་ནི། རང་གི་ཡུལ་ཉེ་བར་གྱུར་པ་ན། དེའི་རྣམ་པར་ཡོངས་སུ་འགྱུར་བར་ཤེས་པར་བྱའོ། །དེ་སླར་ཡང་
[62a]
[62a.1]རྣམ་པ་གཉིས་ཏེ། རྐྱེན་དང་བཅས་པ་དང་རྐྱེན་མེད་པའོ། །རྐྱེན་ནི་སྐྱེས་བུ་ལས་བྱུང་བའི་རྟོགས་པར་བརྗོད་པར་བྱ་སྟེ། སེམས་པ་ཅན་ཉིད་ཀྱི་ངོ་བོ་ཡུལ་ཉམས་སུ་མྱོང་བའི་རང་བཞིན་ནོ། །འདི་ཡང་བདག་གི་ངོ་བོ་ཡིན་གྱི་གཞན་འགའ་ཞིག་གི་མ་ཡིན་ཏེ། སེམས་པ་མེད་པ་ཉིད་
[62a.2]ཀྱི་ཕྱིར་རོ། །སྐྱེས་བུ་ལས་བྱུང་བའི་རྐྱེན་དེ་དང་ལྷན་ཅིག་འདུས་པ་གང་ཡིན་པ་དེ་དང་ངོ་བོ་གཅིག་པ་ལྟ་བུར་སྟོན་པ་དེ་ནི་རྐྱེན་དང་བཅས་པ་སྟེ། དཔེར་ན་བསྲེགས་པའི་གནས་སྐབས་ན་ལྕགས་ཀྱི་གོང་བུ་མེ་དང་འདྲེས་པ་ལས་དེའི་རང་བཞིན་མ་ཡིན་ཡང་མེའི་རང་བཞིན་ཉིད་ལྟ་བུར་འབྱུང་བ་དེ་བཞིན་དུ་འཇུག་པ་ནི་
[62a.3]ཉམས་སུ་མྱོང་བའི་ངོ་བོ་མ་ཡིན་ཡང་སེམས་པ་ཅན་དང་འདྲེས་པ་ལས་སེམས་པ་ཅན་གྱི་ངོ་བོ་ལྟ་བུར་འབྱུང་ངོ་། །གང་ཡང་འཇུག་པ་སྒྲོན་མའི་འོད་ལྟ་བུ་ཡུལ་གསལ་བར་བྱེད་པ་འབའ་ཞིག་མ་ཡིན་གྱི་སེམས་པ་ཅན་དང་འདྲེས་པ་ལས་དེའི་ངོ་བོ་ལྟ་བུར་བྱུང་བ་ནི་མ་ཡིན་པ་དེ་རྐྱེན་མེད་པ་ཞེས་བརྗོད་དོ། །
[62a.4]དེ་ལ་རྐྱེན་མེད་པའི་འཇུག་པ་བཟློག་པའི་ཆེད་དུ་འཛིན་པ་ལ་འཇུག་བཞིན་པ་ཞེས་སྨྲས་སོ། །སྒྲ་དང་རེག་བྱ་དང་གཟུགས་དང་རོ་དང་དྲི་རྣམས་ལས་རིམ་པ་ཇི་ལྟ་བར་ཞེས་པ་འདིས་རང་གི་ཡུལ་ལ་ངེས་པར་འཇུག་པར་བརྗོད་པ་ལས་ཡུལ་ངེས་པ་ཉིད་དོ། །འོ་ན་རྣ་བ་ལ་སོགས་པའི་འཇུག་པ་ཁོ་ན་སྒྲ་ལ་
[62a.5]སོགས་པ་རྣམས་ཀྱི་འཛིན་པར་བྱེད་པ་ཡིན་ན། དེ་ལ་གང་འཛིན་པ་ལ་འཇུག་པར་བྱེད་པ་འཇུག་པ་གཞན་ཅི་ཞིག་ཡིན་ཞེ་ན། ཁ་ཅིག་སྨྲ་བའི་དབང་པོའི་ཡུལ་བར་མ་ཆོད་པས་འཇུག་པ་ཀཱ་ཤཱ་ཡིས་མངོན་པར་བཅོམ་པ་ལྟ་བུའམ། གྱེན་དུ་གཏོར་བའི་ཆུ་ལྟ་བུ་ཡུལ་རང་ཉིད་ལ་མི་གནས་པའི་འཇུག་པ་
[62a.6]བརྗོད་པར་བྱ་ཞིང་། གནས་པ་ནི་ཡུལ་གྱི་རྣམ་པ་ཡོངས་སུ་གྱུར་པས་ཡོངས་སུ་རྫོགས་པའི་འཛིན་པའོ་ཞེས་པ་སྟེ། གང་ལ་བར་ཆོད་པ་མེད་པ་སྣ་ལ་སོགས་པ་དེ་ལ་ཡང་དབང་པོའི་ཡུལ་དང་འབྲེལ་པ་ལས་བར་མ་ཆད་པར་རྣམ་པར་འགྱུར་བ་སྐྱེ་བཞིན་པ་ཡུལ་གྱི་རྣམ་པ་ཉིད་ཀྱིས་ཡོངས་སུ་མ་
[62a.7]རྫོགས་པའི་འཇུག་པར་ཤེས་པར་བྱའོ། །དེས་ཡོངས་སུ་རྫོགས་པ་ནི་ནང་གི་འཛིན་པའོ་ཞེས་སོ། །གཞན་རྣམས་སྨྲ་བ་ནི་འཇུག་པ་རྣམས་རྟོག་པ་མེད་པ་ཉིད་དུ་ཉེ་བར་བསྟན་པའི་དོན་དུ། སྒྲ་ལ་སོགས་པ་རྣམས་ཀྱི་འཛིན་པ་ལ་འཇུག་བཞིན་པ་ཞེས་འདི་ཐ་དད་པར་བཤད་དེ། འདི་སྐད་བཤད་
[62b]
[62b.1]པར་འགྱུར་ཏེ། རང་གི་ངོ་བོ་འཛིན་པ་ཙམ་ལ་འཇུག་བཞིན་པ་ནི་མངོན་སུམ་ཚད་མ་སྟེ། རྣམ་པ་གཞན་དུ་ནི་མ་ཡིན་ནོ་ཞེས་པའོ། །གལ་ཏེ་ཡང་རྣམ་པར་རྟོག་པ་ལ་འདི་སྲིད་པ་ཡོད་པ་མ་ཡིན་མོད། དེ་ལྟ་ན་ཡང་རྒྱལ་དཔོག་པ་ལ་སོགས་པ་རྣམས་ཀྱིས་རྣམ་པར་རྟོག་པ་ཅན་མངོན་སུམ་དུ་བརྟགས་པ་
[62b.2]དེ་ལ་ལྟོས་པས་ཁྱད་པར་འདིའོ། །འཇུག་པ་ཐམས་ཅད་ནི་འཛིན་པ་ཙམ་ལ་འཇུག་སྟེ། རྣམ་པར་རྟོག་པ་ཅན་མ་ཡིན་ནོ་ཞེས་པའོ། །འཛིན་པ་ལ་འཇུག་བཞིན་པ་ཞེས་པ་དེའི་རང་བཞིན་ནོ་ཞེས་པའི་དོན་ཏོ། །གཞན་རྣམས་ནི། རྐྱེན་མེད་པའི་འཇུག་པ་ཁོ་ན་ཚད་མ་དང་རྐྱེན་དང་བཅས་པ་ནི་འབྲས་
[62b.3]བུར་འདོད་དོ། །འཛིན་པ་ལ་འཇུག་བཞིན་པ་ཞེས་པ་ཡང་འདི་ལྟར་བརྗོད་པར་བྱ་སྟེ། འཛིན་པ་ལ་སྟེ། འབྲས་བུ་བྱ་བ་ལ་སྟེ། འཛིན་པའི་རྒྱུ་མཚན་འཇུག་པ་ཞེས་པའི་དོན་ཏོ། །དབང་པོ་ཐུག་མེད་ཅེས་པ་དབང་པོ་རྣམས་མཐའ་ཡས་པ་ཉིད་དུ་ཐལ་བར་འགྱུར་རོ་ཞེས་པའི་དོན་ཏོ། །ཅི་ལྟར་
[62b.4]ཞེ་ན་གསུངས་པ། དེ་རྣམས་ཀྱིས་ནི་ཞེས་པ་ལ་སོགས་པ་སྟེ། ཇི་སྐད་དུ་བཤད་པ་འོན་པས། དབང་པོ་དགུ་རྣམས་ཡོད་པ་ན། །སྒྲ་མི་ཐོས་ཏེ། དེའི་ཕྱིར་རྣ་བ་ཁོ་ན་སྒྲའི་ཡུལ་ཅན་ཏེ། འདིས་པགས་པ་ལ་སོགས་པ་རྣམས་རང་གི་ཡུལ་ལ་འཇུག་པར་རྟོགས་པར་བྱའོ་ཞེས་སོ། །ཡོན་ཏན་
[62b.5]གསུམ་རྣམས་ནི་ཡོན་ཏན་གསུམ་ཉིད་དེ། འཇིག་རྟེན་གསུམ་ཉིད་བཞིན་ནོ། །འཕེལ་བ་ནི་ལྷག་པའོ། །འགྲིབ་པ་ནི་དམན་པ་ཉིད་དོ། །ཙམ་གྱི་སྒྲ་ནི་རང་བཞིན་གྱི་དབྱེ་བ་རྣམ་པར་གཅད་པའི་ཆེད་དུ་སྟེ། སྙིང་སྟོབས་ལ་སོགས་པའི་ཡོན་ཏན་གྱི་རང་བཞིན་སྒྲ་ལ་སོགས་པ་རྣམས་ཀྱི་རང་གི་ངོ་བོ་དབྱེ་
[62b.6]བ་ཡོད་པ་མ་ཡིན་ནོ། །དེ་ལས་ཀྱང་ཞི་བ་དང་འཇིགས་པ་དང་རྨོངས་པ་དང་དྲུག་ལས་སྐྱེས་པ་ལ་སོགས་པའི་བྱེ་བྲག་གིས་མཐའ་ཡས་པའི་ཕྱིར་དབང་པོ་མཐའ་ཡས་པར་འགྱུར་རོ། །ཇི་ལྟར་སྒྲ་ལ་སོགས་པའི་རིགས་ཀྱི་དབྱེ་བ་ཡོན་ཏན་འཕེལ་བ་དང་འགྲིབ་པ་ལས་འགྱུར་བ་དེ་ལྟར་དྲུག་ལས་
[62b.7]སྐྱེས་པ་ལ་སོགས་པའི་དབྱེ་བ་ཡང་ངོ་། །དེའི་ཕྱིར་འདི་སྐད་བཤད་པར་འགྱུར་རོ། །གང་ཡོན་ཏན་འཕེལ་བ་དང་འགྲིབ་པའི་དབྱེ་བས་ཐ་དད་པ་དེ་རྣམས་དབང་པོ་ཐ་དད་པས་གཟུང་བར་བྱ་བའི་རིགས་དང་ཡང་དག་པར་ལྡན་པ་རྣམས་ཡིན་ཏེ། སྒྲ་དང་རེག་བྱ་ལ་སོགས་པ་བཞིན། བློ་
[63a]
[63a.1]གསལ་བ་ལ་སོགས་པའི་སྒྲའི་ཁྱད་པར་རྣམས་ཀྱང་དེ་ལྟ་བུའོ་ཞེས་པ་རང་བཞིན་གྱི་ཐལ་འགྱུར་རོ། །དེ་ལས་ཀྱང་ཁས་བླངས་པས་གནོད་པའོ། །ཅི་སྟེ་ཞེས་པ་ལ་སོགས་པ་སྟེ། གལ་ཏེ་འཕེལ་བ་དང་འགྲིབ་པ་ལ་སོགས་པ་ཐ་དད་པའི་དྲུག་ལས་སྐྱེས་པ་ལ་སོགས་པ་
[63a.2]རྣམས་ལ་ཡང་རྣ་བའི་དབང་པོས་གཟུང་བར་བྱ་བ་གཅིག་པོ་ཡོན་ཏན་གསུམ་གྱི་རིགས་དང་ལྡན་པར་འདོད་ན། དབང་པོ་གཅིག་ཁོ་ནར་ཐོབ་སྟེ། ཐམས་ཅད་དུ་ཡོན་ཏན་གསུམ་ཐ་མི་དད་པའི་ཕྱིར་རོ། །གང་ཡོན་ཏན་གསུམ་ཐ་མི་དད་པའི་རིགས་དང་ལྡན་པ་དེ་རྣམས་རྣ་བའི་དབང་པོས་གཟུང་བར་
[63a.3]བྱ་བ་རྣམས་ཏེ། དྲུག་སྐྱེས་ལ་སོགས་པ་བཞིན། སྒྲ་དང་རེག་བྱ་ལ་སོགས་པ་ཡང་དེ་ལྟ་བུའོ། །དེ་ཁོ་ནའི་ཐལ་འགྱུར་རོ། །འོ་ན་ལས་ཀྱི་དབང་ལས་དབང་པོ་མངོན་པར་འགྲུབ་ཀྱི་གཟུང་བའི་དབང་ལས་མ་ཡིན་པ་མ་ཡིན་ནམ། དེ་ལ་ཅི་ལྟར་དབང་པོ་མཐའ་ཡས་པའམ་དབང་པོ་གཅིག་ཏུ་
[63a.4]འགྱུར་རོ་ཞེས་པའི་རྩོད་པ་འདི་ཅི་ལྟར་ཡིན་ཞེ་ན། ཁོ་བོ་ཅག་གི་ལས་ཀྱི་དབང་ལས་ཏེ། ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པའོ་ཞེས་འདོད་དོ། །ཕ་རོལ་པོས་ནི་སྐྱེས་བུའི་འདོད་པ་འགྲུབ་པའི་ཆེད་དུ་གཙོ་བོའི་འཇུག་པའོ་ཞེས་སེམས་ཏེ། དེ་ལ་གལ་ཏེ་དབང་པོ་གཅིག་ཁོ་ནས་སྐྱེས་བུའི་
[63a.5]དོན་ཕུན་སུམ་ཚོགས་ན་དབང་པོ་གཅིག་གི་བདག་ཉིད་ཁོ་ནས་རང་བཞིན་ཡོངས་སུ་འགྱུར་བར་རིགས་ཏེ། རྣམ་པ་གཞན་དུ་ན་ནི་རྣམ་པ་གཞན་དུའོ་ཞེས་པས་རྩོད་པར་རིགས་སོ། །འདིར་འགྱུར་མོད་ཡོན་ཏན་གསུམ་ཉིད་ཁོ་ན་རྣ་བའི་དབང་པོས་གཟུང་བྱའོ་ཞེས་མི་སྨྲའི། འོན་ཀྱང་དེ་ཁོ་ནའི་ཡོངས་
[63a.6]སུ་འགྱུར་བ་བློ་རྗེས་སུ་འགྲོ་བའི་རྒྱུ་མཚན་འདྲ་བ་ཤེས་པ་ནི་ཞེས་བྱ་བ་ནི་རིགས་ཡིན་ལ། དེ་ཡང་སྒྲའི་བྱེ་བྲག་ཐམས་ཅད་ལ་རྗེས་སུ་འཇུག་ཅིང་རེག་བྱ་ལ་སོགས་པ་རྣམས་ལས་བཟློག་པ་ཡང་ངོ་། །དེ་ཁོ་ན་རྣ་བའི་དབང་པོས་གཟུང་བར་བྱ་བ་སྟེ། དེའི་ཕྱིར་སྐྱོན་ཅུང་ཟད་ཀྱང་མེད་དོ་ཞེ་ན། དེའི་ཕྱིར་
[63a.7]གསུངས་པ། ཡོན་ཏན་གསུམ་ལས་ཐ་དད་པའི་ཞེས་པ་ལ་སོགས་པའོ། །ཅི་ལྟར་མེད་ཅེས་སྨྲས་ཏེ། དབྱིབས་ཀྱི་བདག་ཉིད་ཅན་གྱི་རིགས་ནི་ཡོད་པ་ཁོ་ན་སྟེ། ཡོན་ཏན་གསུམ་ཐ་མི་དད་ན་ཡང་ཡོན་ཏན་གསུམ་གྱི་གནས་སྐབས་ཙམ་ཐ་དད་པ་ལས་སྒྲ་ལ་སོགས་པའི་རིགས་རྣམས་ཐ་དད་དོ། །
[63b]
[63b.1]དེ་སྐད་དུ་ཡང་བཤད་པ། སྒྲ་དང་རེག་བྱ་དང་གཟུགས་དང་རོ་དང་དྲི་སྟེ་ལྔ་རྣམས་ནི། བདེ་བ་དང་སྡུག་བསྔལ་དང་གཏི་མུག་གསུམ་པོ་རྣམས་ཀྱི་ངེས་པར་བཀོད་པའི་བྱེ་བྲག་རྣམས་སོ་ཞེས་པའོ། །དེའི་ཕྱིར་སྒྲའི་རྣམ་པར་ཡོངས་སུ་གྱུར་པའི་བདེ་བ་ལ་སོགས་པ་རྣམས་ནི་དབྱིབས་ཀྱི་ཁྱད་པར་གང་གིས་
[63b.2]ཡང་དག་པར་བཀོད་པ་རྣམས་ཏེ། དབྱིབས་གཞན་གྱིས་ཡང་དག་པར་བཀོད་པ་རྣམས་ནི་རེག་བྱ་ལ་སོགས་པ་རྣམས་སོ་ཞེས་སྟོན་པར་བྱེད་དོ། །དེའི་ཕྱིར་དབང་པོ་ངེས་པར་གཟུང་བར་བྱ་བ་ཉིད་ཡིན་ཞིང་། དབང་པོ་མཐའ་ཡས་པ་ཉིད་ཀྱང་མ་ཡིན་ཏེ། དབྱིབས་རྣམས་ནི་ལྔ་ཉིད་ཀྱི་ཕྱིར་རོ། །
[63b.3]དབྱིབས་ནི་གཉིས་གཟུང་བྱ་ཞེས་པའོ། །འོ་ན་དབྱིབས་ནི་རྫས་ཡོད་མ་ཡིན་ཏེ། དེས་ན་ཅིའི་ཕྱིར་དེ་གཉིས་ཀྱིས་གཟུང་བྱ་ཉིད་ཡིན་ཞེ་ན། སྐྱོན་འདི་མེད་དེ། ཕ་རོལ་པོའི་བསམ་པས་དེ་སྐད་བཤད་དོ། །ཕ་རོལ་པོ་ནི་གཟུགས་ཅན་གྱི་དབང་པོའི་རྣམ་པར་ཤེས་པའི་རྗེས་སུ་འགྲོ་བའི་ཡིད་ཀྱི་
[63b.4]རྣམ་པར་ཤེས་པའི་དབྱིབས་ཉེ་བར་དམིགས་ནས་རྣམ་པར་ཤེས་པ་དེ་དག་གི་ཤིན་ཏུ་ཕྲ་བའི་དུས་ཀྱིས་དབྱེ་བ་ངེས་པར་འཛིན་དཀའ་བ་ཉིད་ཀྱི་ཕྱིར་དེ་འདི་ཁོ་ན་མིག་དང་ལུས་ཀྱི་རྣམ་པར་ཤེས་པ་སྟེ། རིང་པོ་ལ་སོགས་པའི་དབྱིབས་འཛིན་པའོ་ཞེས་ཇི་ལྟར་སེམས་པ་དེ་ལྟར་འདི་བརྗོད་དོ། །འདི་
[63b.5]སྐད་སྟོན་ཏེ། དབྱིབས་དངོས་པོར་འགྱུར་མོད། དེ་གཉིས་ཀྱིས་གཟུང་བར་བྱ་བར་མཐོང་ངོ་ཞེས་པས་རང་གི་ཡུལ་ལ་ངེས་པར་འཇུག་པ་ནི་འགལ་བའོ་ཞེས་པའོ། །སྒྲ་ལ་སོགས་པ་རྣམས་ཀྱང་ཞེས་པ་ཁས་བླངས་པས་གནོད་པ་གསུངས་སོ། །མང་ན་ཐལ་བ་དང་བཟློག་པས་ཏེ། གང་གང་གི་
[63b.6]ཆོས་སུ་འགྱུར་བ་མ་ཡིན་པ་དེ་དེའི་བདག་ཉིད་ཅན་མ་ཡིན་ཏེ། དཔེར་ན་སེམས་པ་ཅན་གཙོ་བོའི་ཆོས་མ་ཡིན་པ་དེ་ནི། དེའི་བདག་ཉིད་མ་ཡིན་པ་བཞིན། །སྒྲ་ལ་སོགས་པ་རྣམས་ཀྱང་དབྱིབས་ཀྱི་ཆོས་སུ་འགྱུར་བ་མ་ཡིན་ནོ་ཞེས་པ་ཁྱབ་པར་བྱེད་པ་མེད་པའོ། །དབྱིབས་ནི། གསུམ་སྤྱོད་ཡུལ་མིན་
[63b.7]ཞེས་པ་བསྒྲུབ་པར་བྱ་བ་མེད་པ་ལ་གཏན་ཚིགས་མེད་པ་གསུངས་སོ། །དབྱིབས་ཀྱིས་བྱས་པ་ཡང་ཞེས་པ་ལ་སོགས་པ་སྟེ། པི་ཝང་དང་རྔ་པ་ཎ་ཝ་ལ་སོགས་པའི་སྒྲའི་རིགས་ཕན་ཚུན་ཐ་དད་པ་རྣམས་ནི་སྒྲའི་རིགས་ལས་མ་འདས་པར་གནས་པ་ཉིད་ཀྱི་ཕྱིར་ཡུལ་མཚུངས་པ་ཉིད་དུ་འགྱུར་རོ། །
[64a]
[64a.1]དེ་ཡང་མི་རིགས་ཏེ། རིང་པོ་དང་ཐུང་ངུ་ལ་སོགས་པའི་དབྱིབས་ཡུལ་གཅིག་ཏུ་མཐོང་བ་དང་འདོད་པ་ནི་མ་ཡིན་ནོ་ཞེས་པས་ཁས་བླངས་དང་འགལ་བའོ། །དབྱིབས་མཚུངས་པ་རྣམས་ལ་ཡང་ཞེས་པ་ལ་སོགས་པ་སྟེ། དབྱིབས་ཐ་དད་པས་བྱས་པ་རིགས་ཐ་དད་པ་
[64a.2]འདོད་པའི་ཕྱིར། གསེར་ལ་སོགས་པའི་རང་བཞིན་གྱི་བུམ་པ་ལ་སོགས་པ་དབྱིབས་མཚུངས་པ་རྣམས་ལ། དབྱིབས་ཀྱི་རང་བཞིན་ཡིན་པ་ཉིད་ཀྱི་ཕྱིར་ན། རིགས་ཐ་དད་པ་རྣམས་ཀྱི་དབྱིབས་ཀྱང་དེ་རྣམས་ལ་མཚུངས་པ་ཉིད་ཀྱི་ཕྱིར། གསེར་ལ་སོགས་པའི་རིགས་རྣམས་དང་དེའི་རྒྱུ་རྣམས་
[64a.3]དང་སྒྲ་ལ་སོགས་པ་རྣམས་དང་། དེའི་རྒྱུ་སྙིང་སྟོབས་ལ་སོགས་པ་རྣམས་ཀྱང་གཅིག་ཉིད་འཐོབ་བོ། །འོ་ན་མ་ཏྲ་ལ་སོགས་པ་དབྱིབས་མཚུངས་པ་རྣམས་ཁོ་ན་ལ་གཅིག་ཉིད་དུ་རིགས་པ་མ་ཡིན་ནམ། གསེར་ལ་སོགས་པ་རྣམས་ལ་ནི་ཇི་ལྟར་ཡིན་ཞེ་ན། དེ་དང་ཐ་མི་དད་པའི་ཕྱིར། དེ་
[64a.4]རྣམས་ཀྱང་དབྱིབས་མཚུངས་པ་རྣམས་སོ་ཞེས་པས་འདི་ནི་བརྩད་པར་བྱ་བ་མ་ཡིན་ནོ། །རང་གི་ཡུལ་ལ་འཇུག་པ་མེད་པ་ཞེས་པ་མིག་གིས་བུམ་པ་ལ་སོགས་པ་འཛིན་པ་ན་སྒྲ་ལ་སོགས་པ་རྣམས་འཛིན་པའི་ཕྱིར་རོ། །ཐལ་བ་དང་། བཟློག་པས་ཀྱང་སྟེ། གང་ཞིག་གང་ཐ་དད་པ་མེད་ན་ཡང་
[64a.5]ཐ་དད་པ་འདི་དེའི་བདག་ཉིད་མ་ཡིན་ཏེ། དཔེར་ན་སེམས་པ་ཅན་ཐ་དད་པ་མེད་ན་ཡང་ཐ་དད་བཞིན་པའི་སྙིང་སྟོབས་ལ་སོགས་པ་རྣམས་དེའི་བདག་ཉིད་མ་ཡིན་པ་བཞིན། གསེར་ལ་སོགས་པ་རྣམས་ཀྱང་དབྱིབས་ཐ་དད་མེད་ན་ཡང་ཐ་དད་པའོ་ཞེས་པ་ཁྱབ་བྱེད་འགལ་བ་གསུངས་སོ། །རིགས་
[64a.6]ཙམ་འཛིན་པའམ་ཞེས་པ་དབྱིབས་ཙམ་འཛིན་པའོ། །ཙམ་གྱི་སྒྲ་ནི་བདེ་བ་ལ་སོགས་པ་འཛིན་པ་རྣམ་པར་གཅད་པའི་དོན་ཏོ། །རིགས་ཀྱིས་ཁྱད་པར་དུ་བྱ་བའི་བདེ་བ་ལ་སོགས་པ་འཛིན་པ་ཞེས་དབྱིབས་ཀྱི་ཁྱད་པར་དུ་བྱས་པའི་བདེ་བ་ལ་སོགས་པ་འཛིན་པ་ཞེས་པའོ། །དོན་འདི་རང་བཞིན་མི་
[64a.7]འཛིན་པ་ཞེས་པ་སྒྲ་ལ་སོགས་པ་རྣམས་ཀྱི་བདེ་བ་ལ་སོགས་པའི་རང་བཞིན་མི་འཛིན་པར་རོ། །དེ་ལྟར་འགྱུར་མོད། དོན་གྱི་རང་བཞིན་ནི་དབྱིབས་ལས་ཐ་མི་དད་པའི་ཕྱིར་དེ་ཉེ་བར་དམིགས་པ་ན་དེ་ཡང་ཉེ་བར་དམིགས་པ་ཁོ་ནའོ་ཞེ་ན། གསུངས་པ། གང་གི་ཕྱིར་མཐོང་ཞེས་པ་ལ་སོགས་པ་སྟེ།
[64b]
[64b.1]འདིས་ནི། གང་གི་དབྱིབས་ཙམ་ཉེ་བར་དམིགས་པ་ནི་དེའི་རང་བཞིན་ཉེ་བར་དམིགས་པ་མ་ཡིན་ཏེ། དཔེར་ན་སྣང་བ་ཞན་པའི་ཕྱོགས་སུ་དམིགས་པར་བྱ་བ་བ་ལང་ལ་སོགས་པའི་དབྱིབས་ཙམ་བཞིན། དབང་པོའི་འཇུག་པས་སྒྲ་ལ་སོགས་པ་རྣམས་ཀྱི་ཡང་དབྱིབས་ཙམ་དམིགས་པའོ་ཞེས་
[64b.2]འགལ་བས་ཁྱབ་པ་གསུངས་སོ། །དོན་དབྱེ་མི་འཛིན་འགྱུར་ཞེས་པ། །སྒྲ་ལ་སོགས་པའི་དོན་གྱི་ཁྱད་པར་དམིགས་པར་མི་འགྱུར་རོ། །དེ་ལ་དབྱིབས་གཞན་མེད་པའི་ཕྱིར་རོ་ཞེས་པ། སྒྲ་ལ་སོགས་པ་རྣམས་ནི་དབྱིབས་ཀྱི་བདག་ཉིད་ཀྱི་རིགས་རྣམས་ཏེ། དེ་ལ་དབྱིབས་གཞན་ཡོད་པ་མ་
[64b.3]ཡིན་ཏེ། གང་གིས་པི་ཝང་གི་སྒྲ་ཞེས་འཛིན་པར་འགྱུར་བའོ་ཞེས་པ་ཁས་བླངས་པ་ཉམས་པའོ། །ཅི་སྟེ་སྐྱོན་འདིར་མ་གྱུར་ཅིག་ཅེས་པས། སྒྲའི་རིགས་ལ་ཡང་དབྱིབས་གཞན་གྱི་ཁྱད་པར་ཀཽ་ཤི་ཀ་ལ་སོགས་པ་འདོད་དེ། དེ་ལྟར་ན་དེའི་ཚེ་སྐྱོན་འདིར་ཐལ་བར་འགྱུར་རོ་ཞེས་སྟོན་པ་གསུངས་པ།
[64b.4]དོན་ལ་ཞེས་བྱ་བ་ལ་སོགས་པ་སྟེ། དོན་ནི་རང་གི་ཡུལ་ཏེ། དེ་ལ་རྣམ་པར་རྟོག་པ་ཅན་དུ་འགྱུར་རོ། །ཅིའི་ཕྱིར་ཞེ་ན་གསུངས་པ། རང་གི་དོན་གྱིས་ཁྱད་པར་དུ་བྱས་པའི་ཞེས་པ་ལ་སོགས་པ་སྟེ། སྒྲའི་རིགས་ཀྱིས་ཁྱད་པར་དུ་བྱས་པའི། དེའི་ཁྱད་པར་ཀཽ་ཤི་ཀ་ལ་སོགས་པ་ཡང་འཛིན་
[64b.5]པའི་ཕྱིར་རོ་ཞེས་པའི་དོན་ཏོ། །ངེས་པར་སྦྱོར་བ་ལས་ཀྱང་ཁྱད་པར་ནི་སྒྲའི་རིགས་ཀྱིས་ཁྱད་པར་དུ་བྱས་པར་གཟུང་བར་བྱའི། གཞན་དུ་ན་འདི་ནི་སྒྲའི་ཁྱད་པར་རོ་ཞེས་འཛིན་པར་མི་འགྱུར་རོ། །རིགས་ཀྱིས་ཁྱད་པར་དུ་བྱས་པ་དང་དེའི་དབྱེ་བ་འཛིན་པར་ཁས་བླངས་པ་ན་རིགས་ཙམ་འཛིན་
[64b.6]པར་བྱེད་པའོ་ཞེས་པའི་ཕྱོགས་འདི་ཉམས་པ་ཡང་མ་ཡིན་ཏེ། གང་གི་ཕྱིར་ཙམ་གྱི་སྒྲས་བདེ་བ་ལ་སོགས་པ་རྣམ་པར་གཅོད་པའི་སྒྲ་ལ་སོགས་པའི་རིགས་ཀྱི་ཁྱད་པར་མ་ཡིན་པས་སོ། །དེས་འདི་སྐད་བརྗོད་པར་འགྱུར་ཏེ། གང་ཁྱད་པར་དུ་བྱེད་པས་རྣམ་པར་གཅད་པའི་དོན་འཛིན་པར་བྱེད་
[64b.7]པའི་བློ་དེ་ནི་རྣམ་པར་རྟོག་པ་དང་བཅས་པ་ཡིན་ཏེ། དཔེར་ན་འདི་བ་ལང་ཁྲ་བོའོ་ཞེས་པའི་བློ་བཞིན། སྒྲ་ལ་སོགས་པའི་ཁྱད་པར་གྱི་ཡུལ་ཅན་གྱི་བློ་ཡང་དེ་ལྟ་བུའོ། །རང་བཞིན་གྱི་ཐལ་འགྱུར་རོ། །ཅི་སྟེ་ཞེས་པ་ལ་སོགས་པས་ཕྱོགས་གཞན་ལ་ཡང་སྐྱོན་དེ་ཁོ་ན་གསུངས་སོ། །
[65a]
[65a.1]བདེ་བ་ལ་སོགས་པ་རྣམས་ཀྱང་ཞེས་པ་བདེ་བ་ལ་སོགས་པ་རྣམས་ཁོ་ན་སྒྲ་ལ་སོགས་པའི་བདག་ཉིད་དུ་བཀོད་པ་རྣམས་སོ་ཞེས་པ་འདི་ལས་དྲིས་པའོ། །རེ་ཞིག་སོ་སོར་ནི་མ་ཡིན་ཏེ་ཞེས་པ་ལ་སོགས་པ་སྟེ། གང་ཕྱིར་བདེ་བ་ལ་སོགས་པ་རེ་རེ་འཛིན་ན་ནི། དབང་
[65a.2]པོའི་འཇུག་པ་རྣམས་རང་གི་ཡུལ་ཁོ་ན་ལ་འཇུག་པར་འགྱུར་བ་མ་ཡིན་ཏེ། ཐམས་ཅད་དུ་བདེ་བ་ལ་སོགས་པ་རྣམས་ཁྱད་པར་མེད་པའི་ཕྱིར་རོ། །དེ་ཡང་འདོད་དེ། དེའི་ཕྱིར་བདེ་བ་ལ་སོགས་པ་སོ་སོར་གཟུང་བར་བྱ་བ་མ་ཡིན་ནོ། །འོ་ན་ཅི་ཞེ་ན། སྒྲ་ལ་སོགས་པ་སྟེ། དེའི་ཕྱིར་
[65a.3]དེ་རྣམས་ཁོ་ན་སོ་སོར་ཡོངས་སུ་གྱུར་པ་སྒྲ་ལ་སོགས་པའི་རང་དངོས་རྣམས་སུ་འགྱུར་རོ་ཞེས་གསུངས་པ་མ་ཡིན་ཞེས་པ་ལ་སོགས་པ་སྟེ། ལྔ་རྣམས་གསུམ་གྱི་བཀོད་པའི་ཁྱད་པར་རྣམས། །ཞེས་ཁས་བླངས་པའི་ཕྱིར་འདི་ཡོད་པ་མ་ཡིན་ནོ། །དེས་འདི་སྐད་བཤད་པར་འགྱུར་ཏེ། གང་
[65a.4]སྒྲ་ལ་སོགས་པའི་རང་དངོས་སུ་མི་འགྱུར་བ་དེ་རྣ་བ་ལ་སོགས་པའི་འཇུག་པས་གཟུང་བར་བྱ་བ་མ་ཡིན་ཏེ། སེམས་པ་ཅན་ཉིད་བཞིན། བདེ་བ་ལ་སོགས་པ་ཡང་སོ་སོར་སྒྲ་ལ་སོགས་པའི་རང་དངོས་སུ་འགྱུར་བ་མ་ཡིན་ནོ་ཞེས་པ་ཁྱབ་པར་བྱེད་པ་མེད་པའོ། །མ་ཡིན་ཏེ་གཞན་མ་ཡིན་པ་
[65a.5]ཉིད་ཀྱི་ཕྱིར་ཞེས་པས་མ་གྲུབ་པ་སྨྲས་སོ། །གང་སྒྲ་ལ་སོགས་པ་ལས་གཞན་མ་ཡིན་པ་དེ་རྣ་བ་ལ་སོགས་པའི་འཇུག་པའི་གཟུང་བར་བྱ་བ་ཡིན་ཏེ། སྒྲ་ལ་སོགས་པ་བཞིན། བདེ་བ་ལ་སོགས་པའི་རང་གི་དངོས་པོ་ཡང་དེ་ལྟ་བུའོ། །རང་བཞིན་ནོ། །གཞན་མིན་ཞེ་ན་ཞེས་པ་ལ་སོགས་
[65a.6]པ་སྟེ། གང་སྒྲ་ལ་སོགས་པ་ལས་གཞན་མ་ཡིན་པ་དེའི་རྒྱུ་མ་ཡིན་ཏེ། སྒྲ་ལ་སོགས་པ་བཞིན། བདེ་བ་ལ་སོགས་པ་ཡང་དེ་ལྟ་བུའོ་ཞེས་པ་འགལ་བས་ཁྱབ་པ་གསུངས་སོ། །དེ་ལས་ཀྱང་ཁས་བླངས་པ་དང་འགལ་ལོ། །གང་བརྗོད་པ་ཞེས་པ་ལ་སོགས་པས་ནི་རྒྱུ་ཉིད་དུ་ཁས་
[65a.7]བླངས་པ་གསུངས་ཏེ། སྙིང་སྟོབས་སྒྲའི་འབྲས་བུར་བཤད་ནས། སྒྲའི་བདག་ཉིད་དུ་གནས་པས་ནི། རྡུལ་དང་མུན་པ་དག་སྒྲ་ལས་བྱུང་བའི་ཆེད་དུ་འཇུག་པར་འཆད་པར་བྱེད་དོ། །རྡུལ་སྒྲའི་འབྲས་བུར་བཤད་ནས་ཞེས་པ་ལ་སོགས་པ་ཐམས་ཅད་སྔ་མ་བཞིན་ནོ། །འདི་ནི་ཁྱད་པར་ཏེ།
[65b]
[65b.1]རྡུལ་གྱིས་སྙིང་སྟོབས་དང་མུན་པ་དག་སྒྲའི་དངོས་པོའི་ཆེད་དུ་འཇུག་པར་བྱེད་དོ། །མུན་པ་ནི་སྙིང་སྟོབས་དང་རྡུལ་དག་དགྲ་ལ་ཡོད་པའི་ཆེད་དུ་རྣམ་པར་འཇོག་པར་བྱེད་དོ་ཞེས་པའོ། །ཅི་སྟེ་གཞན་ཉིད་མ་ཡིན་པ་ཉིད་ན་ཡང་འབྲས་བུ་དང་རྒྱུའི་དངོས་པོར་འདོད་ཅིང་། དེ་ལྟར་གྱུར་ན་འདི་
[65b.2]མི་འདོད་པར་འབྱུང་བར་འགྱུར་རོ་ཞེས་སྟོན་པ་གསུངས་པ། སྙིང་སྟོབས་ལ་སོགས་པ་རྣམས་ཀྱི་ཞེས་པ་ལ་སོགས་པ་སྟེ། གང་སྒྲ་གཅིག་ལས་ཐ་མི་དད་པའི་རང་བཞིན་དེ་ནི་ཐ་མི་དད་པ་ཡིན་ཏེ། སྒྲའི་རང་གི་ངོ་བོ་བཞིན་སྙིང་སྟོབས་ལ་སོགས་པ་རྣམས་ཀྱང་དེ་ལྟ་བུའོ། །གང་སྙིང་སྟོབས་ལ་སོགས་
[65b.3]པ་གཅིག་མིན་ལས་ཐ་མི་དད་པའི་རང་བཞིན་དེ་གཅིག་མིན་ཡིན་ཏེ། བདེ་བ་ལ་སོགས་པ་བཞིན་སྒྲ་ཡང་དེ་ལྟ་བུའོ་ཞེས་པ་རང་བཞིན་གྱི་ཐལ་འགྱུར་དག་གོ། །དེ་ལས་བཟློག་པས་ནི། གང་གཅིག་མིན་དེ་ནི་སྒྲ་གཅིག་ལས་ཐ་མི་དད་པའི་རང་བཞིན་མ་ཡིན་ཏེ། དཔེར་ན་སྐྱེས་བུ་མང་པོ་རྣམས་
[65b.4]བཞིན། སྙིང་སྟོབས་ལ་སོགས་པ་ཡང་དེ་ལྟ་བུའོ། །གང་གཅིག་ཡིན་པ་དེ་སྙིང་སྟོབས་ལ་སོགས་པ་རྣམས་ལས་ཐ་དད་མེད་པ་མ་ཡིན་ཏེ། དཔེར་ན་སེམས་པ་ཅན་གྱི་གསལ་བ་གཅིག་པུ་བཞིན། སྒྲ་ཡང་དེ་ལྟ་བུའོ་ཞེས་པ་ཁྱབ་བྱེད་འགལ་བ་དག་གོ། །དེ་ལས་ཀྱང་ཁས་བླངས་པ་ཉམས་
[65b.5]སོ། །འམ་ཞེས་པའི་སྒྲ་ནི་རྣམ་པར་བརྟག་པའི་དོན་ཅན་ནོ་ཞེས་པ་འབྲས་བྱེད་མིན་པའམ་ཞེས་པ་འདིར་འམ་གྱི་སྒྲ་གང་ཡིན་པའོ། །གཞན་ཉིད་ཡིན་ནའང་གཟུང་བྱ་མིན། །ཞེས་པས་མ་ངེས་པ་གསུངས་སོ། །དེའི་རྡུལ་ཕྲ་རབ་ཅེས་པ་སྒྲའི་རྡུལ་ཕྲ་རབ་བོ། །དེ་ཙམ་ལ་སོགས་པའམ་ཞེས་པ་སྒྲ་
[65b.6]དེ་ཙམ་ལ་སོགས་པའོ། །སོགས་པའི་སྒྲས་ང་རྒྱལ་དང་ཆེན་པོ་དང་གཙོ་བོ་གཟུང་བར་བྱའོ། །མ་ཡིན་ཞེས་པ་ལ་སོགས་པས་ཀྱང་མ་ངེས་པ་གསུངས་སོ། །གང་གི་ཕྱིར་འབྲས་བུ་ཉིད་དང་རྒྱུ་ཉིད་ལ་སོགས་པ་རྣམས་དབང་པོའི་ཡུལ་ལས་ཐ་དད་པ་མ་ཡིན་ཞིང་། དབང་པོའི་བློས་རྟོགས་པ་
[65b.7]ཡང་མ་ཡིན་ནོ། །ཐམས་ཅད་སྣ་ཚོགས་རྣམ་ཅན་འགྱུར་རོ་ཞེས་པ་སྟེ། གང་སྣ་ཚོགས་ཀྱི་རྣམ་པར་མི་འདོད་པ་དེ་ཡང་སྟེ་སྙིང་སྟོབས་ལ་སོགས་པ་ཚོགས་པ་ནི་ཐ་མི་དད་པ་ཉིད་ཀྱི་ཕྱིར་རོ། །ཐ་དད་པ་ལ་ཞེས་པ་ལ་སོགས་པས་བསྒྲུབ་པར་བྱ་བ་མེད་ན་གཏན་ཚིགས་མེད་པ་གསུངས་སོ། །དེའི་
[66a]
[66a.1]དབང་གིས་ཞེས་པ་ལ་སོགས་པ་སྟེ། གང་གི་རྣམ་པར་ཡུལ་ལ་ཤེས་པ་སྐྱེ་བ་དེའི་རྣམ་པས་ཡུལ་དེ་རྟོགས་པར་བྱའོ། །མཐོང་ངོ་ཞེས་པ་ལ་སོགས་པས་གཏན་ཚིགས་གསུངས་སོ། །གང་རྣམ་པ་ཐ་མི་དད་པ་འཛིན་པར་བྱེད་པ་དེ་སྣ་ཚོགས་པའི་ཡུལ་ཅན་མ་ཡིན་ཏེ། སེམས་པ་
[66a.2]ཅན་འཛིན་པ་བཞིན། སྒྲ་ལ་སོགས་པ་འཛིན་པ་ཡང་དེ་ལྟ་བུའོ་ཞེས་པ་ཁྱབ་བྱེད་དང་འགལ་བའོ། །ཡུལ་གཞན་ལ་ཞེས་པ་དབང་པོ་གཞན་གྱི་ཡུལ་ཉིད་དུ་མངོན་པར་འདོད་པ་ལའོ། །འོ་ན་ཡང་ཞེས་པ་ལ་སོགས་པ་སྟེ། ཐམས་ཅད་ལ་བདེ་བ་ལ་སོགས་པའི་རིགས་ཐ་མི་དད་ན་ཡང་དབང་
[66a.3]པོ་གཅིག་ཉིད་དུ་ཐལ་བ་མ་ཡིན་ཏེ། གང་གི་ཕྱིར་དབྱིབས་ཀྱིས་ཁྱད་པར་དུ་བྱས་པའི་བདེ་བ་ལ་སོགས་པ་རྣམས་འཛིན་པར་བྱེད་ཅིང་། དབྱིབས་དེ་ཡང་ཡུལ་གཞན་ལ་མེད་དོ། །དབྱིབས་དུ་མའི་དབྱེ་བས་ཞེས་པ་སྔོན་པོ་དང་སེར་པོ་ལ་སོགས་པའི་དབྱིབས་ཀྱི་ཁྱད་པར་གྱིས་སོ། །དབྱིབས་
[66a.4]གཅིག་རྗེས་སུ་འཇུག་པ་མཐོང་བ་མ་ཡིན་ནོ་ཞེས་པ་སྟེ། འདིས་ནི་རྗེས་སུ་འཇུག་པ་དང་ལྡན་པའི་དབྱིབས་གཅིག་མེད་པ་ཐ་སྙད་ཀྱི་ཆེད་དུ་རང་བཞིན་མི་དམིགས་པ་གསུངས་སོ། །དེ་ཁོ་ན་ཞེས་པ་ལ་སོགས་པ་སྟེ། གང་གི་ཕྱིར་དབྱིབས་ཀྱི་ཐ་དད་ལས་དབང་པོ་ཐ་དད་པའི་གཟུང་བྱ་ཉིད་དུ་སྒྲ་དང་
[66a.5]རེག་བྱ་ལ་སོགས་པའི་རིགས་རྣམས་འདོད་ན། གཟུགས་ཀྱི་རིགས་གཅིག་ཁོ་ན་ལ་ཡང་དབྱིབས་དུ་མར་འདོད་དེ། དེའི་ཕྱིར་དབང་པོ་མཐའ་ཡས་པ་ཉིད་དེ་ཁོ་ནར་ཐལ་བར་འགྱུར་ཏེ། སྒྲའི་མཚན་ཉིད་རྣམས་ལས་མ་ཡིན་པ་ཁོ་ནའོ་ཞེས་པའོ། །སེར་སྐྱ་པ་སྔ་མ་རྣམས་ནི་ཐམས་ཅད་དུ་བདེ་བ་ལ་
[66a.6]སོགས་པ་རྣམས་ངོ་བོ་གཅིག་པ་ཁོ་ན་སྟེ། མ་དྷུ་པ་ནི། ཐམས་ཅད་དུ་དེ་རྣམས་ཐ་དད་པར་འདོད་དོ། །བདེ་བ་ལ་སོགས་པ་གང་རྣམས་སྒྲའི་བདག་ཉིད་དུ་ཡོངས་སུ་འགྱུར་གྱི། རེག་བྱ་ལ་སོགས་པའི་བདག་ཉིད་དུ་ནི་མ་ཡིན་པ་དེ་རྣམས་སྒྲའི་མཚན་ཉིད་གསུམ་མོ་ཞེས་བརྗོད་པར་བྱའོ། །དེ་
[66a.7]བཞིན་དུ་གང་རྣམས་རེག་བྱའི་བདག་ཉིད་ཁོ་ནར་ཡོངས་སུ་འགྱུར་གྱི། དོན་གཞན་གྱི་བདག་ཉིད་དུ་ནི་མ་ཡིན་པ་དེ་རྣམས་རེག་བྱའི་མཚན་ཉིད་གསུམ་མོ་ཞེས་པ་སྟེ། དེ་བཞིན་དུ་གཞན་ལའང་ཤེས་པར་བྱའོ། །འོ་ན་གསུམ་རྣམས་ཀྱི་ཚོགས་པ་ནི་གསུམ་མ་ཡིན་ནམ་དེ་ལ་གཅིག་གི་ཚིག་གིས་
[66b]
[66b.1]འབྱུང་བར་འོས་ཏེ། དེས་ན་གསུམ་པོ་རྣམས་ལས་ཤེས་པ་ཅི་ལྟར་ཞེ་ན། སྐྱོན་འདི་མེད་དེ། སྒྲ་སོ་སོ་ལ་གསུམ་པོ་གཞན་དང་གཞན་ཡིན་ཞིང་། དེའི་ཕྱིར་ན་གསུམ་པོ་རྣམས་མང་པོ་ཉིད་ཀྱི་ཕྱིར་མང་པོའི་ཚིག་གོ། །གཞན་རྣམས་ནི་རྣམ་པ་གཞན་དུ་གསུམ་རྣམས་རྣམ་པར་འཆད་པར་བྱེད་དོ། །
[66b.2]སྒྲའི་རྡུལ་ཕྲ་རབ་གཅིག་ཁོ་ན་གསུམ་པོ་སྟེ། རྫས་གསུམ་གྱི་བདག་ཉིད་ཡིན་ཏེ། བདེ་བ་ལ་སོགས་པ་རྣམས་གཅིག་ཉིད་དུ་གོང་བུར་གྱུར་པ་ཉིད་ཀྱི་ཕྱིར་རོ། །སྒྲའི་རྡུལ་ཕྲ་རབ་ཐམས་ཅད་ནི་འདི་ལྟ་བུ་རྣམས་སོ། །དེ་བཞིན་དུ་རེག་བྱ་ལ་སོགས་པའི་རྡུལ་ཕྲ་རབ་རྣམས་དང་དབང་པོའི་རྡུལ་ཕྲ་
[66b.3]རབ་རྣམས་ཀྱང་རིག་པར་བྱའོ། །དེ་རྣམས་ཁོ་ན་བསགས་པ་རྣམས་ནི། སྤྲོ་བ་ལས་སྔར་གཙོ་བོ་ཞེས་བརྗོད་པར་བྱ་ལ། གང་གི་ཚེ་སྤྲོ་བའི་དུས་ན་འདུས་པ་རྣམས་ཡིན་པ་དེའི་ཚེ་ནི་རྣམ་པར་འགྱུར་བར་ཐ་སྙད་དུ་བསྟན་པ་བསྟེན་ཏོ། །སྒྲ་ལ་སོགས་པའི་མཚན་ཉིད་གསུམ་པོ་རྣམས་དང་རྣ་བ་ལ་
[66b.4]སོགས་པའི་མཚན་ཉིད་གསུམ་རྣམས་ཀྱང་ཕན་ཚུན་ཐ་དད་པའི་རིགས་ཅན་རྣམས་ཁོ་ནའོ་ཞེས་པ་མཱ་དྷ་བའི་འདོད་པའོ། །གཞན་པ་ཡང་དེའི་བྱ་བའི་ཁྱད་པར་ཏེ། ཇི་སྐད་དུ་བརྗོད་པ། གཟུགས་ལ་སོགས་པ་དང་ལྡན་པའི་གཙོ་བོ་ཆ་ཤས་དང་བཅས་པ་སྟེ། ལས་སྔོན་མ་ཅན་གྱི་སྤྲོ་བའོ། །
[66b.5]འཁོར་བ་ཡང་ཐོག་མ་མེད་པར་བཤད་པའི་ཁྱད་པར་རྣམས་ཏེ། རང་གི་ཚོགས་པ་རྣམས་ཀྱིས་འདོད་པའོ་ཞེས་སོ། །སེར་སྐྱའི་སློབ་མ་སྔོན་མ་རྣམས་ཀྱི་ནི་གཙོ་བོ་ནི་གཟུགས་ལ་སོགས་པ་དང་ལྡན་པ་མ་ཡིན་གྱི། ནུས་པའི་བདག་ཉིད་དུ་དེ་ལ་གཟུགས་ལ་སོགས་པ་རྣམས་རྣམ་པར་གནས་ཀྱི་གསལ་
[66b.6]བའི་བདག་ཉིད་ཀྱིས་ནི་མ་ཡིན་ལ། ཆ་ཤས་མེད་པ་ཡང་སྟེ། ལས་སྔོན་མ་ཅན་གྱི་སྤྲོ་བ་མ་ཡིན་གྱི། འོན་ཀྱང་གཙོ་བོ་སྔོན་མ་ཅན་ནོ། །འཁོར་བ་ཡང་སྤྲོ་བ་ལས་སྔོན་དུ་ནུས་པའི་བདག་ཉིད་ཀྱིས་ཏེ། དེ་རྣམས་གསལ་བ་བདག་ཉིད་ཀྱིས་ནི་མ་ཡིན་ནོ། །མཱ་དྷ་བ་ཡིས་ནི་ཐམས་ཅད་རྣམ་པ་གཞན་
[66b.7]དུ་ཁས་བླངས་སོ། །དེ་ཉིད་ཀྱི་ཕྱིར་འདི་ནི་གྲངས་ཅན་ཕུང་བར་བྱེད་པའོ། །གང་ཕྱིར་མ་ཡིན་ཞེས་པ་ལ་སོགས་པས་དབང་པོ་གཅིག་ཏུ་ཐལ་བ་སྤོང་བ་སྟེ། གང་སྙིང་སྟོབས་ལ་སོགས་པ་རྣམས་སྒྲ་མ་ཡིན་པ་དེ་རྣམས་ལས་གཞན་ཁོ་ན་གཟུགས་ལ་སོགས་པའི་བདག་ཉིད་དུ་ཡོངས་སུ་འགྱུར་
[67a]
[67a.1]བར་བྱེད་དོ་ཞེས་བྱས་ནས་སོ། །དེ་ཡང་ཐ་མི་དད་པ་ཞེས་པ་ལ་སོགས་པས་མཐའ་ཡས་པར་ཐལ་བར་འགྱུར་བའོ། །ཤིན་ཏུ་གསལ་བར་ཞེས་པ་རང་གི་དོན་ཁོ་ན་ལ་ཏར་བའི་རྐྱེན་འདི་སྟེ། ཤིན་ཏུ་ཆུང་བ་ལས་ཞེས་པ་ཇི་ལྟ་བ་བཞིན་ནོ། །འདི་ཅིའི་ཕྱིར་ཞེ་ན། མཱ་དྷ་
[67a.2]བས་བརྗོད་པའི་རིམ་པ་ནི་སུན་དབྱུང་བར་བྱ་བ་ཉིད་དུ་གསལ་བ་མ་ཡིན་པ་ཉིད་ཀྱི་ཕྱིར་རིགས་མཚུངས་པ་ལ་སོ་སོ་བའི་སྦྱོར་བ་ཅན་ལ་ཡང་རབ་ཏུ་གྱུར་པའི་རྐྱེན་གྱིས་བསྒྲུབས་པའི་ཕྱིར་རོ། །ཡང་ན་ཕ་རོལ་པོས་ཡོངས་སུ་བརྟགས་པ་གསལ་བ་ཉིད་ལ་ལྟོས་པས་རབ་ཏུ་གྱུར་པའི་རྐྱེན་ནོ། །རེ་རེའི་ངོ་
[67a.3]བོ་ཞེས་པ་འགའ་ཞིག་བདེ་བའི་རང་བཞིན་ཁོ་ན་སྟེ་འགའ་ཞིག་སྒྲའི་ངོ་བོ་ཁོ་ནའོ། །དེ་བཞིན་དུ་བྱ་བ་ལ་སོགས་པའི་རྡུལ་ཕྲ་རབ་རྣམས་རིག་པར་བྱའོ། །དེ་རྣམས་ཀྱང་ཡུལ་དང་དུས་ཐམས་ཅད་དུའོ། །འདིས་ནི། གཙོ་བོའི་ཆོས་གསུངས་སོ། །སོ་སོ་ཞེས་པ་སྟེ། མ་འདུས་པ་རིགས་
[67a.4]མཐུན་པ་ཅན་རྣམས་དང་མ་འབྲེལ་བ་འཐོར་བ་རྣམས་ཞེས་པའི་དོན་ཏོ། །རྣམ་པ་འདི་ལྟ་བུའི་རྡུལ་ཕྲ་རབ་དེ་རྣམས་གཙོ་བོ་ཞེས་བརྗོད་པར་བྱའོ། །རིགས་ལས་ཐམས་ཅད་དུ་སོང་བ་ཞེས་པ། རྡུལ་ཕྲ་རབ་ཀྱི་རྫས་གཅིག་ཁོ་ན་ཐམས་ཅད་དུ་སོང་བ་ཡོད་པ་མ་ཡིན་གྱི། འོན་ཀྱང་རྡུལ་ཕྲ་རབ་དེ་
[67a.5]རྣམས་ཁོ་ན་གྲངས་མེད་པ་རྣམས་ཐམས་ཅད་དུ་ཡོད་ལ། རིགས་གཅིག་པ་ཅན་ནི་དེ་རྣམས་ཀྱི་གཙོ་བོ་ཞེས་རྗོད་པར་བྱེད་པར་འགྱུར་རོ་ཞེས་སྟོན་ཏོ། །གལ་ཏེ་དེ་ལྟར་རྡུལ་ཕྲ་རབ་དེ་རྣམས་དབང་པོ་ལས་འདས་པ་རྣམས་ཡིན་ཞིང་། དེ་རྣམས་དང་བྲལ་བ་འབྲས་བུ་རྩོམ་པ་ཡང་མེད་ན། དེ་
[67a.6]ལས་ཅི་ལྟར་འབྲས་བུའི་ངོ་བོ་རྣམས་མཚོན་པར་འགྱུར་ཞེ་ན། གསུངས་པ། འབྲས་བུའི་ངོ་བོ་རྣམས་ཞེས་པ་ལ་སོགས་པ་སྟེ། ཇི་ལྟར་ཕན་ཚུན་མ་འབྲེལ་པ་བ་མོའི་ཆ་ཤས་ནམ་མཁའ་ལས་ལྟུང་བ་རྣམས་ཉེ་བར་མཚོན་པ་མ་ཡིན་ལ། ཕན་ཚུན་ཡང་དག་པར་འབྱར་བ་ལོ་མ་ལྗང་གུ་ལ་སོགས་པ་
[67a.7]ལ་བབ་པ་རྣམས་ནི་མངོན་སུམ་དུ་འགྱུར་རོ། །དེ་ལྟར་རྡུལ་ཕྲ་རབ་རྣམས། ཡང་དག་སྦྱོར་བའི་བྱེ་བྲག་ལ། །ཞེས་པ། བྱེ་བྲག་སྨོས་པ་ནི་རྡུལ་ཕྲ་རབ་གཉིས་ལ་སོགས་པ་ཡང་དག་པར་སྦྱོར་བ་རྣམ་པར་གཅད་པའི་དོན་དུའོ། །རང་གི་རིགས་ལས་མ་འདས་པར་ཞེས་པ་སྐྲ་ལ་སོགས་པའི་
[67b]
[67b.1]རིགས་ལས་མ་འདས་པར་ཞེས་པའོ། །སྒྲའི་རྡུལ་ཕྲ་རབ་རྣམས་ཁོ་ན་འདུས་པ་རྣམས་ནི་རྣ་བའི་དབང་པོས་གཟུང་བྱ་སྒྲར་འགྱུར་ཏེ། དེ་བཞིན་བདེ་བའི་རྡུལ་ཕྲ་རབ་རྣམས་ཁོ་ན་གོང་བུར་གྱུར་པ་ནི་རང་རིག་པར་བྱ་བའི་བདེ་བར་འགྱུར་རོ། །འདུས་པ་རྣམས་རིགས་མི་མཐུན་པའི་འབྲས་བུའི་
[67b.2]ངོ་བོ་ཉིད་རྟོགས་པར་བྱེད་པ་ནི་མ་ཡིན་ནོ། །དེ་ལྟར་འགྱུར་མོད་ངོ་བོ་གསུམ་ཉིད་ན་ཡང་རྡུལ་ཕྲ་རབ་རྣམས་ལ་གཅིག་གི་རྣམ་པ་ཅན་གྱི་བློ་ཡོངས་སུ་འགྱུར་བའི་བྱེ་བྲག་ལས་འབྱུང་བར་འགྱུར་རོ་ཞེ་ན་གསུངས་པ། རྡུལ་རྣམས་ཞེས་པ་ལ་སོགས་པའོ། །བདེ་བ་ལ་སོགས་པ་དང་བྲལ་བར་
[67b.3]ཞེས་པ། བདེ་བ་ལ་སོགས་པའི་རྣམ་པ་མེད་པར་ཞེས་པའི་དོན་ཏོ། །གང་ཐ་མི་དད་པ་ཞེས་པ་གཅིག་གི་ངོ་བོའོ། །ཅིའི་ཕྱིར་མི་རིགས་ཤེ་ན། གསུངས་པ། དུ་མའི་རང་བཞིན་ཉིད་ཅེས་པའོ། །ཡང་ན་ཐ་དད་པ་དུ་མ་འདིའི་རང་བཞིན་ཉིད་དོ་ཞེས་འབྲུ་མང་པོ་པའོ། །རང་བཞིན་ཁོ་ན་རང་
[67b.4]བཞིན་ཉིད་དོ། །འཇུག་བཞིན་པ་དང་ཉེ་བ་དང་ལྡན་པའི་ཤེས་པའི་རྣམ་པའི་དབང་གིས་ནི་ཡུལ་གྱི་རང་བཞིན་ངེས་པར་འཛིན་ཏེ། གལ་ཏེ་ཡང་ཡུལ་རྣམ་པ་གཞན་དུ་གནས་ན་ཡང་དེ་ཉེ་བར་འཛིན་པའི་ཤེས་པ་རྣམ་པ་གཞན་དུ་འདོད་ན། དེའི་དབང་གིས་ཡུལ་ངེས་པར་འཛིན་པ་མ་ཡིན་པར་འགྱུར་
[67b.5]ལ། དེ་ཡང་འདོད་པས་སོ། །དེ་འདིས། གང་རྣམ་པ་གཅིག་པའི་ཤེས་པ་དེ་ནི་ཐ་དད་པ་དུ་མའི་རང་བཞིན་གྱི་ཡུལ་ཅན་མ་ཡིན་ཏེ། སེམས་ཅན་གྱི་ཤེས་པ་བཞིན་སྒྲའི་ཤེས་པ་ཡང་དེ་ལྟ་བུའོ་ཞེས་པ་ཁྱབ་བྱེད་དང་འགལ་བ་གསུངས་སོ། །ཅིའི་ཕྱིར་ཞེ་ན་ཞེས་པ་གསུམ་པོ་ཡང་དག་པར་
[67b.6]སྦྱར་བ་རྣམས་ནི་རང་བཞིན་ཉིད་གཅིག་ཏུ་ཡོངས་སུ་འགྱུར་བར་འགྱུར་རོ། །དེས་ན་གྲུབ་པ་སྒྲུབ་པར་བྱེད་པའོ་ཞེས་བསམས་པའོ། །རིགས་མི་མཐུན་པ་ཡོངས་སུ་གྱུར་པ། མཚན་ཉིད་མི་མཐུན་པ་རང་བཞིན་དུ་མ་རྣམས་ཀྱི་ཐ་དད་པ་མེད་པའི་རང་བཞིན་གཅིག་ཏུ་ཐོབ་པའོ། །རིགས་ཐ་དད་
[67b.7]པའི་ཕྱིར་ཞེས་པ། འབྲས་བུ་དང་རྒྱུ་རིགས་ཐ་དད་པར་ཐལ་བར་འགྱུར་བའི་ཕྱིར་རོ་ཞེས་པའི་དོན་ཏོ། །དེ་ལས་ཀྱང་འབྲས་བུ་མེད་པ་སྨྲ་བར་འགྱུར་རོ་ཞེས་པས་ཁས་བླངས་པ་ཉམས་པའོ། །ཡང་ན་རིགས་ཐ་དད་པའི་ཕྱིར་ཏེ། བདེ་བ་ལ་སོགས་པ་རྣམས་ཀྱིའོ། །དེ་རྣམས་ཐ་དད་པ་རྣམས་ནི། ཡང་
[68a]
[68a.1]དག་པར་སྦྱོར་བ་ན་ཡང་རང་བཞིན་གཅིག་ཉིད་དུ་ཡོངས་སུ་འགྱུར་བར་འོས་པ་མ་ཡིན་ཏེ། རང་གི་རིགས་ལས་མ་འདས་པར་འབྲས་བུ་རྩོམ་པའི་ཕྱིར་རོ། །འོ་ན་ཐ་དད་པ་རྣམས་ཀྱང་བུ་རམ་དང་ཆུ་ལ་སོགས་པ་རྣམས་བཏུང་བ་ལ་སོགས་པའི་རང་བཞིན་གཅིག་ཉིད་སྐྱེད་པ་མ་
[68a.2]ཡིན་ནམ་ཞེ་ན། གསུངས་པ། སྒྲ་གཅིག་བརྗོད་ལ་ནི་རག་ལ་ཞེས་པ་ལ་སོགས་པ་སྟེ། བཏུང་བ་ལ་སོགས་པ་ཡང་དོན་དམ་པར་ཡོད་པ་མ་ཡིན་པ་ཁོ་ན་སྟེ། ཐ་སྙད་སླ་བའི་དོན་དུ་བུ་རམ་ལ་སོགས་པ་དེ་རྣམས་ཁོ་ན་སྒྲ་གཅིག་གིས་ཐ་སྙད་དུ་བྱེད་པ་འབའ་ཞིག་སྟེ། གང་རེ་ལྡེ་ཞེས་པ་བཞིན་
[68a.3]ནོ། །ཇི་ལྟར་ཕྱེ་ཤིན་ཏུ་ཉུང་ངུ་ལན་ཚྭ་མང་པོ་དང་འདྲེས་པ་ན། ལན་ཚྭའི་རོ་ཁོ་ན་འཛིན་པའམ་འཛིན་པར་འདོད་པའོ་ཞེས་པ་དང་། ཇི་ལྟར་ཁྱི་རྣམས་ཀྱིས་མཛེས་པའི་ལུས་ལ་བཟའ་བྱའི་རང་བཞིན་དུ་ཉེ་བར་དམིགས་པ་དེ་བཞིན་དུ་སྒྲ་ལ་སོགས་པ་ལ་རང་རིག་པར་བྱའོ། །སྒྲ་འཛིན་པ་ལ་མི་
[68a.4]ལྟོས་པར་ཞེས་པ། སྒྲ་ནི་ཡོན་ཏན་གཅིག་གི་བདག་ཉིད་མ་ཡིན་གྱི་འོ་ན་ཅི་ཞེ་ན། ཡོན་ཏན་གསུམ་གྱི་བདག་ཉིད་དོ། །དེ་ལྟར་ཡང་མི་འཛིན་ནོ་ཞེས་པ་དེ་ལ་མི་ལྟོས་པའོ། །དེ་ཁོ་ན་འདིའི་བདག་ཉིད་གཅིག་མ་ཡིན་པ་ཞེས་པའི་སྒྲའིའོ། །ཕྱོགས་གཅིག་གི་ཡུལ་ཅན་ཉིད་ན་དུ་མའི་བདག་
[68a.5]ཉིད་ལྡོག་པར་མི་སྲིད་པས་དྲི་བ། ཅིའི་ཕྱིར་ཞེ་ན་ཞེས་པའོ། །དབང་པོའི་དོན་གྱི་ཁྱད་པར་ཅན་ཞེས་པས་རྒྱུ་གསུངས་སོ། །དུ་མའི་ངོ་བོ་ལ་ནི་ཞེས་པ་སྒྲ་ཉིད་དང་ཡོན་ཏན་ཉིད་དང་སྙིང་སྟོབས་ཉིད་ལ་སོགས་པའི་ངོ་བོའི་བྱེ་བྲག་གིས་སོ། །དེ་ཡང་གཅིག་པུ་ཁོ་ན་ཞེས་པ། བདེ་བ་ལ་སོགས་
[68a.6]པ་རྣམས་ལས་གང་ཡང་རུང་བའོ། །དེ་འདིས་ནི་གང་རྣ་བས་གཟུང་བར་བྱ་བ་མ་ཡིན་པ་དེ་དེའི་དོན་མ་ཡིན་ཏེ། སེམས་པ་ཅན་བཞིན་དང་། སྤྱིའི་ཆོས་ཤེས་བྱ་ཉིད་ལ་སོགས་པ་བཞིན། ངོ་བོ་གཉིས་པོ་ཡང་དེ་ལྟ་བུའོ་ཞེས་པ་ཁྱབ་བྱེད་མི་དམིགས་པ་གསུངས་སོ། །དེ་བཞིན་དུ་དབང་པོ་
[68a.7]གཞན་ལའང་བརྗོད་པར་བྱའོ། །ཕྱེ་དང་ལན་ཚྭ་འདྲེས་པ་ལ་ནི་ཕྱེའི་རོ་གཟུང་བ་ཁོ་ན་སྟེ། དེ་ལྟར་ནི་ལན་ཚྭ་འབའ་ཞིག་པའི་རོ་ཡང་གཞན་དུ་སྣང་བ་ཉེ་བར་དམིགས་ལ། ཕྱེ་དང་འདྲེས་པ་ན་ཡང་གཞན་དུ་སྣང་ངོ་། །རེག་བྱ་ལ་སོགས་པ་རྣམས་ལའང་མཚུངས་པ་ཡིན་ནོ་ཞེས་པ་མཉམ་པའོ། །
[68b]
[68b.1]འདིས་ཀྱང་དབང་པོ་གཅིག་ཉིད་དུ་ཐལ་བ་དེ་ཁོ་ན་གསུངས་སོ། །ཡང་ཕྱོགས་འདི་ལ་ཡང་སྐྱོན་འདི་ཅི་ལྟར་ཏེ། ཇི་སྲིད་དུ་སྒྲ་ལ་སོགས་པ་རྣམས་ལ་ཡོན་ཏན་རྣམས་ཀྱི་དབྱེ་བ་ཁས་བླངས་པས་སོ་ཞེ་ན། ཁས་བླངས་པ་བདེན་མོད། དེ་ནི་གསལ་བ་ཐ་དད་པ་ཡིན་གྱི། རང་བཞིན་ཐ་དད་པ་ནི་མ་
[68b.2]ཡིན་ཏེ། ཐམས་ཅད་དུ་བདེ་བ་ལ་སོགས་པ་རྣམས་ཀྱི་རབ་ཏུ་གསལ་བར་བྱེད་པ་ཉིད་ལ་སོགས་པའི་ངོ་བོ་ཁྱད་པར་མེད་པ་ཉིད་ཀྱི་ཕྱིར་རོ། །གསལ་བ་ཐ་དད་པ་ཙམ་གྱིས་དབང་པོ་གཞན་གྱིས་གཟུང་བྱ་ཉིད་དུ་རིགས་པ་ཡང་མ་ཡིན་ཏེ། སྒྲ་ལ་སོགས་པ་རྣམས་ཀྱི་གསལ་བ་ཐ་དད་པས་
[68b.3]མཐའ་ཡས་པ་ཉིད་ཀྱི་ཕྱིར་དབང་པོ་མཐའ་ཡས་པ་ཉིད་དུ་འགྱུར་ན་མི་རུང་ངོ་། །འོ་ན་སྒྲ་ལ་སོགས་པའི་དངོས་པོས་ཀྱང་ཐ་དད་པ་མ་ཡིན་ནམ་ཞེ་ན། འདི་ཡོད་པ་མ་ཡིན་ཏེ། གང་ཕྱིར་གསུམ་པོ་རྣམས་ཀྱི་སྒྲ་ལ་སོགས་པའི་དངོས་པོས་ཐ་དད་ཀྱི་བདེ་བ་ལ་སོགས་པ་རྣམས་ཀྱི་སོ་སོར་ནི་མ་
[68b.4]ཡིན་ཏེ། སྒྲ་ལ་སོགས་པ་རྣམས་གསུམ་གྱི་ངོ་བོ་ཉིད་དུ་ཁས་བླངས་པའི་ཕྱིར་རོ་ཞེས་གསུངས་པ། རིགས་པ་མ་ཡིན་ནོ་ཞེས་པའོ། །དེའི་ཕྱིར་ཁྱད་འཕགས་ཞེས་པ་ལ་སོགས་པའོ། །འོ་ན་གྲུབ་པའི་མཐའ་དང་འགལ་བའི་ཕྱིར་ཕྱོགས་འདི་ཡང་སྐྱོན་ཅན་ཁོ་ན་མ་ཡིན་ནམ་ཞེ་ན། མཱ་དྷ་བའི་
[68b.5]ཕྱོགས་ལས་འདི་སྐྱོན་ཉུང་བ་ཉིད་ཀྱི་ཕྱིར་ཞེས་དགོངས་པས་འདི་ལྟར་བཤད་དོ་ཞེས་པས་སྐྱོན་མེད་དོ། །འཇུག་པ་ནི་ཚད་མར་བསྒྲུབ་པ་མེད་པའི་ཕྱིར་ཞེས་པ། ཕྱི་རོལ་གྱི་དོན་རྣམས་ལ་དབང་པོས་ཞེན་པར་བྱེད་ལ། དབང་པོས་རྟོགས་པར་བྱས་པ་དེ་ལ་ནི། ཡིད་ཀྱིས་རྗེས་སུ་ཞེན་པར་བྱེད་
[68b.6]ཅིང་། ཇི་ལྟར་ཡང་དབང་པོས་རྟོགས་པར་བྱས་པ་ལ་ཡིད་ཀྱིས་རྗེས་སུ་ཞེན་པར་བྱེད་པ་དེ་བཞིན་དུ། ཡིད་ཀྱིས་ཞེན་པ་དབང་པོས་ཡང་དག་པར་རིག་པར་བྱེད་དོ་ཞེས་པའི་གཞུང་འདིས་འཇུག་པ་གཉིས་པོའི་ཕན་ཚུན་ཡང་དག་པར་རིག་པར་བྱེད་པ་ཉིད་བཤད་དོ། །དེ་མངོན་སུམ་ཉིད་དུ་བསྒྲུབ་
[68b.7]པ་མེད་པའི་ཕྱིར། གཞལ་བྱ་ཐམས་ཅད་ཀྱི་ཡུལ་ཅན་གྱི་ཚད་མ་བརྗོད་པ་མ་ཡིན་ནོ་ཞེས་པས་མཚན་ཉིད་མ་ཁྱབ་པ་ཉིད་དོ། །དེ་ལྟར་འགྱུར་མོད། ལུང་དང་རྗེས་སུ་དཔག་པ་དག་གིས་དེ་གཉིས་ཀ་ཡང་དག་པར་རིག་སྟེ། དེའི་ཕྱིར་སྐྱོན་འདི་མེད་དོ་ཞེ་ན། གསུངས་པ། མེད་ཀྱང་ཞེས་པ་ལ་
[69a]
[69a.1]སོགས་པ་སྟེ། གང་གི་ཚེ་རང་གི་རྒྱུད་དུ་གཏོགས་པའི་འཇུག་པའི་ཡང་དག་པར་མྱོང་བ་དེའི་ཚེ་རྟགས་མེད་པའི་ཕྱིར་རྗེས་སུ་དཔག་པ་མ་ཡིན་ཞིང་། མན་ངག་མེད་པའི་ཕྱིར་ལུང་ཡང་མ་ཡིན་ནོ། །དེའི་ཕྱིར་འདི་མངོན་སུམ་ཁོ་ནའི་རིགས་སོ་ཞེས་པ་དགོངས་པའོ། །འོ་ན་རྣ་བ་
[69a.2]ལ་སོགས་པའི་འཇུག་པ་ཡང་ཞེས་པ་འདིས་ཡང་གི་སྒྲ་ཡིད་ཀྱི་འཇུག་པ་སྡུད་པའི་དོན་ཅན་ནོ་ཞེས་པ་མ་ཡིན་ནམ། དེའི་ཕྱིར་ཡིད་ཀྱི་འཇུག་པ་རེ་ཞིག་མངོན་སུམ་གྱི་ནང་དུ་འདུའོ། །དབང་པོའི་འཇུག་པ་རྣམས་ནི་ཡིད་ཀྱི་འཇུག་པ་རིག་པར་བྱེད་པ་མ་ཡིན་པ་ཁོ་ནར་བསྟན་བཅོས་ཀྱིས་
[69a.3]བཤད་དེ། དེ་ལྟར་ནི་ཇི་ལྟར་དབང་པོས་རྟོགས་པ་ལ་ཡིད་ཀྱིས་རྗེས་སུ་ཞེན་པར་བྱེད་པ། དེ་ལྟར་ཡིད་ཀྱིས་ཞེན་པ་དབང་པོས་ཡང་དག་པར་རིག་པར་བྱེད་དོ་ཞེས་པའི་རིག་པའི་བྱིངས་འདི་ནི་ཙུ་ར་ལ་སོགས་པར་བཤད་པ་ཐོབ་པའི་དོན་ཅན་ཏེ། ཇི་ལྟར་དབང་པོས་རྟོགས་པ་ལ་ཡིད་ཀྱིས་ཞེན་
[69a.4]ཅིང་ཤེས་པར་བྱེད་པ་དེ་ལྟར་ཡིད་ཀྱིས་ཞེན་པ་དབང་པོའི་འཇུག་པས་ཐོབ་པར་བྱེད་དོ་ཞེས་པའི་དོན་ཏོ་ཞེ་ན། འདི་ཡོད་པ་མ་ཡིན་ཏེ། རྣ་བ་ལ་སོགས་པའི་འཇུག་པ་ཡང་ཞེས་པའི་ཡང་གི་སྒྲ་ནི་རེ་ཞིག་ཚད་མ་གཞན་རྗེས་སུ་དཔག་པའི་ཚད་མའི་བསྡུ་བའི་དོན་ཏོ། །ཡང་གི་སྒྲ་ཡིད་ཀྱི་འཇུག་པ་
[69a.5]བསྡུ་བའི་དོན་ཅན་ཡིན་ན་ནི། ཁྱད་པར་མེད་པས་ཡིད་ཀྱི་འཇུག་པ་ཐམས་ཅད་མངོན་སུམ་ཉིད་དུ་ཐལ་བར་འགྱུར་ཏེ། ཁྱད་པར་ཉེ་བར་བླངས་པ་མེད་པའི་ཕྱིར་རོ། །གང་ཡང་ཡིད་ཀྱིས་བྱིན་གྱིས་བརླབས་པ་ཞེས་པ་ཡིད་དང་ལྷན་ཅིག་རྣ་བ་ལ་སོགས་པའི་འཇུག་པ་མངོན་སུམ་མོ་ཞེས་པའི་
[69a.6]དོན་ཏོ་ཞེས་སྨྲ་བ་དེ་ལ་ཡང་ཐལ་འགྱུར་འདི་ཁོ་ནའོ། །ཐོབ་པའི་དོན་ཡང་ཡང་དག་པར་མྱོང་བ་ལས་གཞན་པར་མི་རིགས་ཏེ། འཐོབ་པ་ནི་ཐ་དད་པ་མེད་པའི་དུས་ཅན་དག་ཁོ་ན་འདི་འགྱུར་གྱི་དུས་ཐ་དད་པ་དག་ནི་མ་ཡིན་ནོ། །དེ་ལ་གལ་ཏེ་འཐོབ་པ་རབ་ཏུ་འགྲུབ་པའི་དོན་དུ་དབང་པོའི་རྟོགས་པ་
[69a.7]དང་ཡིད་ཀྱིས་ཞེན་པ་ཅིག་ཅར་ཉིད་དུ་འདོད་ན། དེའི་ཡུལ་ཕྱི་རོལ་གྱི་དོན་དུ་འགྱུར་བའམ་དབང་པོའི་རྟོགས་པ་ཡིན། གལ་ཏེ་སྔ་མ་ཡིན་ན་སྒོ་དང་སྒོ་ཅན་གྱི་དངོས་པོར་མི་འགྱུར་ཏེ། ལྷན་ཅིག་སྐྱེས་པ་ལ་ཕན་འདོགས་པ་ཉིད་མི་རིགས་པའི་ཕྱིར་དང་། ཕན་མི་འདོགས་པ་ཡང་སྒོའི་དངོས་པོར་མི་
[69b]
[69b.1]འཐད་པའི་ཕྱིར་རོ། །གཞན་དུ་ན་ཡིད་ཀྱིས་ཞེན་པ་ཡང་དབང་པོའི་ཞེན་པའི་སྒོར་འགྱུར་རོ། །གལ་ཏེ་ཡང་ཡིད་ཕྱི་རོལ་གྱི་དོན་ལ་དངོས་སུ་འཇུག་ན། དེ་ལྟར་གྱུར་ན་དབང་པོ་ཅིག་ཤོས་རྣམས་དེ་ལ་འཇུག་པ་དོན་མེད་པར་འཐོབ་སྟེ། ཡིད་ཁོ་ནས་སྐྱེས་བུའི་དོན་ཕུན་སུམ་ཚོགས་པ་ཉིད་ཀྱི་
[69b.2]ཕྱིར་རོ། །ཅི་སྟེ་དབང་པོའི་རྟོགས་པ་དེའི་ཡུལ་ཡིན་ན། དེ་ལྟ་ན་ཡང་ཡུལ་གྱི་རྒྱུ་མཚན་ཅན་མ་ཡིན་པ་ཡུལ་ཅན་དུ་འགྱུར་རོ། །དེ་ཡང་མི་རིགས་ཏེ། རྒྱུ་མཚན་མ་ཡིན་པ་ནི་ཡུལ་ཉིད་དུ་འཐད་པ་མ་ཡིན་ནོ། །གཞན་དུ་ན་ཡིད་ཀྱི་ཞེན་པ་ཡང་དབང་པོའི་ཞེན་པའི་ཡུལ་དུ་འགྱུར་རོ། །
[69b.3]གང་ཡིད་ཀྱི་འཇུག་པས་ཀྱང་དབང་པོའི་འཇུག་པ་ཡང་དག་པར་རིག་པར་བྱེད་པར་མི་འདོད་པར་སྨྲ་སྟེ། ཕན་ཚུན་ཡང་དག་པར་རིག་པར་བྱེད་པ་འདི་ནི་ཉམས་སུ་མྱོང་བའི་བདག་ཉིད་དུ་བརྗོད་པ་མ་ཡིན་པ་ཁོ་ནའོ། །འོ་ན་ཅི་ཞེ་ན། འཐོབ་པའི་རང་བཞིན་དུའོ། །ཇི་ལྟར་དབང་པོའི་ཞེན་པ་ཡིད་ཀྱི་
[69b.4]ཞེན་པས་ཡང་དག་པར་རིག་པར་བྱེད། ཐོབ་པར་བྱེད་པ་དེ་ལྟར་ཡིད་ཀྱི་ཞེན་པ་དབང་པོས་ཡང་དག་པར་བྱེད། ཐོབ་པར་བྱེད་དེ་དེ་དང་ལྷན་ཅིག་ཡང་དག་པར་འགྲོགས་པར་བྱེད་དོ་ཞེས་པའི་དོན་ཏོ་ཞེས་པ་དེ་ཡང་འདི་ཁོ་ནས་བསལ་བ་ཡིན་ནོ། །གཞན་ཡང་དེའི་མངོན་སུམ་དུ་དམིགས་པ་
[69b.5]མ་ཡིན་པའི་དོན་མཐོང་བ་ཡང་རབ་ཏུ་འགྲུབ་པ་མ་ཡིན་ཏེ། སྔར་ཇི་སྐད་བཤད་པ་བཞིན་ནོ། །དེའི་ཕྱིར་འཐོབ་པའི་དོན་ཅན་གྱི་རྟོགས་པ་ནི་རིགས་པ་མ་ཡིན་ནོ། །གང་ཡང་རྣ་བ་ལ་སོགས་པའི་འཇུག་པ་ཕྱི་རོལ་གྱི་དོན་ལ་མངོན་སུམ་ཚད་མ་སྟེ། དབང་པོ་རྟོགས་པར་བྱས་པའི་དོན་དེ་ལ་ནི་ཡིད་ཀྱིས་ཕྱི་
[69b.6]ནས་ཞེན་པར་བྱེད་དོ་ཞེས་པའི་དོན་ཏོ། །གཞན་དུ་ན་གལ་ཏེ་དབང་པོའི་འཇུག་པ་ཁོ་ན་ལས་ཡིད་ཀྱི་ཞེན་པར་འགྱུར་ན་རྗེས་སུའི་སྒྲ་རབ་ཏུ་སྦྱར་བ་དོན་མེད་པར་འགྱུར་ཏེ། དབང་པོའི་འཇུག་པ་ལས་སྔར་འགའ་ཞིག་གིས་ཉམས་སུ་མ་མྱོང་བ་ཉིད་ཀྱི་ཕྱིར་རོ། །བསྒྲེ་བ་ཡང་ཕན་འདོགས་པ་ཙམ་
[69b.7]བསྒྲེ་བ་ལས་འཐད་དོ། །འདི་སྐད་བཤད་པར་འགྱུར་ཏེ། ཇི་ལྟར་དབང་པོས་ཕན་འདོགས་པ་ལ་ལྟོས་པའི་ཡིད་ཀྱི་ཕྱི་རོལ་གྱི་དོན་ལ་རབ་ཏུ་འཇུག་པ་དེ་ལྟར་ཡིད་ཀྱིས་ཕན་འདོགས་པ་ལ་ལྟོས་པའི་དབང་པོ་ཡང་ངོ་ཞེས་སྨྲ་བ་དེའི་ཡང་འདི་མངོན་སུམ་དུ་དམིགས་པ་མ་ཡིན་པའི་དོན་མཐོང་བ་
[70a]
[70a.1]འགྲུབ་པ་མ་ཡིན་ནོ་ཞེས་པ་འདི་ཁོ་ནས་བསལ་ལོ། །དེའི་ཕྱིར་ཕན་ཚུན་ཡང་དག་པར་རིག་པར་བྱེད་པ་ཁོ་ན་འདིར་སྟོན་ཏེ། དེ་ཁོ་ན་ཡང་ཕན་འདོགས་པའོ། །རྗེས་སུ་སྒྲ་དོན་མེད་པ་ཡང་མ་ཡིན་ཏེ། བར་མ་ཆོད་པའི་དོན་ཅན་ཉིད་ཀྱི་ཕྱིར་རོ། །ཉེས་པ་འདི་ནི་མེད་དེ་ཞེས་
[70a.2]པ། འཇུག་པ་ཡང་དག་པར་རིག་པ་འདི་ཚད་མར་འདོད་པ་མ་ཡིན་པ་ཁོ་ན་སྟེ། དེ་ནི་དྲན་པ་ཡིན་པས་སོ། །ཇི་ལྟར་འདོད་པ་དང་ཁྲོ་བ་དང་ཞེ་སྡང་དང་འཇིགས་པ་ལ་སོགས་པ་རྣམས་དྲན་པ་དེ་བཞིན་དུ་དབང་པོའི་འཇུག་པ་རྣམས་དང་ཡིད་ཀྱི་འཇུག་པ་ཡང་ཡིད་ཀྱིས་སོ། །གཞུང་ཡང་འདི་
[70a.3]ལྟར་དྲང་བར་བྱ་སྟེ། ཕྱི་རོལ་གྱི་དོན་རྣམས་ལ་དབང་པོ་ཞེན་པར་བྱེད་པ་མངོན་སུམ་གྱི་མཚན་ཉིད་དོ། །དབང་པོས་ཞེན་པ་དེ་ལ་ནི་ཡིད་རྗེས་སུ་ཞེན་པར་བྱེད་དོ་ཞེས་པ་དེ་མ་ཐག་པའི་དྲན་པའོ། །ཇི་ལྟར་ཡང་དབང་པོས་ཞེན་པ་ལ་ཡིད་རྗེས་སུ་ཞེན་པར་བྱེད་པ་དེ་མ་ཐག་པར་བརྗོད་པ་དེ་བཞིན་དུ།
[70a.4]ཡིད་ཀྱི་ཞེན་པ་ནི་དབང་པོ་ཡང་དག་པར་རིག་པར་བྱེད་ཅིང་། དྲན་པར་བྱེད་དོ་ཞེས་པའི་དོན་ཏེ། དབྱིངས་རྣམས་ནི་དུ་མའི་དོན་ཅན་ཉིད་ཀྱི་ཕྱིར་རོ། །ཎི་ཙ་གཉིས་པ་ཡང་རྒྱུ་དང་ལྡན་པ་ཉིད་ཅན་དུ་འདིར་རིག་པར་བྱའོ། །དབང་པོ་ནི་དྲན་པའི་རྗེས་སུ་མཐུན་པ་ཡིད་ལ་ཕན་འདོགས་པར་བྱེད་
[70a.5]ཅིང་དེ་ལ་རབ་ཏུ་སྦྱོར་བ་ལྟ་བུའོ་ཞེས་པའོ། །དྲན་པ་ཁོ་ནས་འཇུག་པ་ཡུལ་དུ་བྱེད་པ་ལ་དོན་མཐོང་བ་འགྲུབ་བོ་སྙམ་དུ་སེམས་ཏེ། དེ་ལྟ་ན་འཇུག་པ་འཛིན་པ་ནི་ཚད་མ་མ་ཡིན་པ་ཉིད་ཀྱི་ཕྱིར་དེ་མ་བསྡུས་པའི་ཕྱིར་མ་ཚང་བ་ཉིད་མ་ཡིན་ནོ། །ཇི་སྐད་བཤད་པ་ཞེས་པ་འཇུག་པ་ཡང་དག་པར་རིག་པ་
[70a.6]དྲན་པ་ཉིད་ཡིན་པ་ལ་ཤེས་པར་བྱེད་པ་གསུངས་སོ། །དྲན་པ་ནི་མངོན་སུམ་གྱི་ཞེན་པའི་ཁྱད་པར་རོ་ཞེས་པ། ཁྱད་པར་གྱི་སྒྲས་སོ་སོར་མངོན་པར་སྦྲེལ་བར་བྱའོ། །འོ་ན་གཞུང་འདིའི་བསྟན་བཅོས་སུ་ཉེ་བར་བཀོད་པ་དོན་གཞན་ཅན་མ་ཡིན་ནམ། དེ་ཅིའི་ཕྱིར་འདིས་དྲན་པ་ཉིད་དུ་ཤེས་པར་བྱ། དེ་ལྟར་
[70a.7]ནི་ཅི་དབང་པོ་དང་ཡིད་དག་ཁོ་ན་ལྷན་ཅིག་ཁོ་ནར་ཕྱི་རོལ་གྱི་དོན་རྣམས་ལ་ཞེན་པར་བྱེད་དམ། འོན་ཏེ་ལྷན་ཅིག་བྱེད་པ་མ་ཡིན་པ་ཁོ་ན་ཞེས་དོགས་པ་ལ། འདི་བཤད་དེ། ཕྱི་རོལ་གྱི་དོན་རྣམས་ལ་དབང་པོ་ཞེན་པར་བྱེད་ལ། དབང་པོས་ཞེན་པ་དེ་ལ་ནི་ཡིད་རྗེས་སུ་ཞེན་པར་བྱེད་དོ། །ཅིའི་ཕྱིར་ན་དྲན་
[70b]
[70b.1]པ་མངོན་སུམ་གྱི་ཞེན་པའི་ཁྱད་པར་འདི་ཡོད་པས་སོ་ཞེས་པའོ། །འདི་ལྟར་བརྗོད་པར་འགྱུར་ཏེ། དྲན་པ་མངོན་སུམ་གྱི་ཞེན་པའི་བྱེ་བྲག་ཡོད་དེ། འདི་ནི་ཤིན་ཏུ་རབ་ཏུ་གྲགས་པ་ཡིན་པས་བསྙོན་པར་མི་ནུས་སོ། །གཉིས་ཀ་དག་གི་ཕྱི་རོལ་གྱི་དོན་ལ་འཇུག་པ་ན་འདི་རིགས་པ་ཡང་མ་ཡིན་ཏེ། གང་
[70b.2]ཕྱིར་གལ་ཏེ་ཕྱི་རོལ་གྱི་དོན་ལ་ཡིད་འཇུག་ཅིང་དབང་པོའི་འཇུག་པ་རྣམས་ལ་མ་ཡིན་པ་དེའི་ཚེ་དེ་རྣམས་ཡིད་ཀྱི་འཇུག་པ་རྣམས་ཀྱིས་བྱིན་གྱིས་མ་བརླབས་པ་དང་། ཞེན་པར་བྱས་པ་མ་ཡིན་པ་རྣམས་དང་། སྐྱེས་བུ་ལས་བྱུང་བ་སེམས་པ་ཅན་དང་ཡང་དག་པར་འདུས་པ་མ་ཡིན་པ་དང་། རྐྱེན་མེད་པ་
[70b.3]རྣམས་སུ་འགྱུར་ལ། དེ་ལས་ཀྱང་ཅི་ལྟར་མངོན་སུམ་ཚད་མར་བརྗོད། རྐྱེན་མེད་པའི་འཇུག་པ་རྣམས་ནི་མངོན་སུམ་ཚད་མར་འགྱུར་བ་མ་ཡིན་པས་སོ། །མངོན་སུམ་མེད་པའི་ཕྱིར་ཡང་དྲན་པ་དེ་ཡང་དེ་སྔོན་མ་ཅན་དུ་མི་འགྱུར་རོ། །གང་གི་ཚེ་དབང་པོའི་ཞེན་པ་ལ་ཡིད་ཀྱིས་རྗེས་སུ་ཞེན་པར་བྱེད་
[70b.4]པ་དེའི་ཚེ་དྲན་པ་མངོན་སུམ་གྱི་ཞེན་པའི་བྱེ་བྲག་ཏུ་འཐད་དེ། དེ་ལྟར་ནི་ད་ལྟར་བའི་དུས་ན་ཕྱི་རོལ་གྱི་དོན་རྣམས་ལ་དབང་པོའི་ཞེན་པ་ཞུགས་པ་ནི་རྗེས་སུ་ངེས་པར་ཞེན་པར་བྱེད་ཅིང་། ཡིད་ལ་དབང་པོའི་ཞེན་པ་ནི་རང་གི་ཡུལ་དུ་སྣང་བ་དང་ཡིད་ཀྱི་ཞེན་པ་དང་ཡང་དག་པར་འདུས་པ་སྟེ། སྐྱེས་བུ་
[70b.5]ཅན་གྱི་རྐྱེན་གྱིས་རྐྱེན་དང་བཅས་པར་འགྱུར་རོ། །དེ་ལྟར་དབང་པོ་དེ་ནི་མངོན་སུམ་གྱི་ཞེན་པར་འགྱུར་ཏེ། དབང་པོའི་ཞེན་པ་དེ་མངོན་སུམ་ཉིད་དུ་འགྱུར་རོ་ཞེས་པའི་དོན་ཏེ། འབའ་ཞིག་པའི་ནི་མངོན་སུམ་གྱི་ཞེན་པ་ལས་ཕྱིས་ཡིད་ཀྱི་དྲན་པའི་ཞེན་པར་འགྱུར་རོ་ཞེས་པའོ། །དེ་སྐད་དུ་ཡང་བཤད་པ།
[70b.6]འབའ་ཞིག་པ་ནི་འདས་པ་དང་མ་འོངས་པའི་དུས་དག་ལ་འཇུག་གོ་ཞེས་པའོ། །འོ་ན་དབང་པོའི་ཞེན་པ་དང་ལྷན་ཅིག་པར་ཕྱི་རོལ་གྱི་དོན་ལ་ཡང་འཇུག་པའི་ཡིད་ནི་ད་ལྟར་གྱི་དུས་སུ་མངོན་སུམ་གྱི་ཞེན་པར་འགྱུར་ཞིང་། འབའ་ཞིག་པའི་ནི་ཕྱིས་དྲན་པའི་ཤེས་པར་མ་ཡིན་ནམ་ཞེ་ན། འདི་
[70b.7]ཡོད་པ་མ་ཡིན་ཏེ། དེ་ལྟར་ཕྱི་རོལ་གྱི་དོན་འཛིན་པར་གྱུར་ན། གཉིས་ཀ་དག་ཀྱང་དོན་གཅིག་བྱེད་པ་ཉིད་ཀྱི་ཕྱིར་དབང་པོ་རྣམས་དོན་མེད་པ་ཉིད་དུ་འགྱུར་རོ། །དེ་ལྟར་ནི་བཤད་པ། དོན་གཅིག་བྱེད་པའི་དབང་པོ་དག་རྟོག་པ་ན། ནུས་པ་ཉིད་མ་ཡིན་ནོ་ཞེས་སོ། །གང་གི་ཕྱིར་དེ་ལྟར་དྲན་
[71a]
[71a.1]པ་མངོན་སུམ་གྱིས་ཞེན་པའི་བྱེ་བྲག་ཕྱི་རོལ་གྱི་དོན་ལ་འཇུག་ན། ཡིད་ཀྱིས་འཐད་པ་མ་ཡིན་པ། དེའི་ཕྱིར་དབང་པོའི་ཞེན་པ་དེ་ལ་ནི་ཡིད་ཀྱིས་རྗེས་སུ་ཞེན་པར་བྱེད་ཀྱི་ཕྱི་རོལ་གྱི་དོན་རྣམས་ལ་ནི་མ་ཡིན་ནོ་ཞེས་པའོ། །དེ་འདི་ལྟར་དབང་པོ་དང་ཡིད་དག་གིས་ལྷན་ཅིག་ཕྱི་རོལ་གྱི་
[71a.2]དོན་རྣམས་ལ་འཇུག་པར་བྱེད་པ་མ་ཡིན་ནོ་ཞེས་པའི་དོན་འདི་བསྒྲུབ་པའི་ཆེད་དུ། འདི་ཡོད་དོ་ཞེས་པ་ལ་སོགས་པའི་གཞུང་ཉེ་བར་བཀོད་ཀྱི། འཇུག་པ་ཡང་དག་པར་རིག་པ་དྲན་པ་ཉིད་དུ་བསྒྲུབ་པའི་ཆེད་དུ་ནི་མ་ཡིན་ན། དེ་ཅི་ལྟར་དེ་དྲན་པ་ཉིད་དུ་ཤེས་པར་བྱེད་པ་ཉིད་དུ་བརྗོད་ཅེས་པའོ། །
[71a.3]འཇུག་པ་ཡང་དག་པར་རིག་པ་འདི་གྲངས་ཅན་པའི་དྲན་པ་ཡང་མ་ཡིན་ཏེ། ཉམས་སུ་མྱོང་བ་སྔོན་མ་ཅན་ཞེས་པ་ནི་དྲན་པར་མངོན་པར་འདོད་ལ། འཇུག་པ་ཡང་དག་པར་རིག་པ་འདི་ནི་སྔར་མེད་པ་ཁོ་ན་ཉམས་སུ་མྱོང་བ་ཡིན་ནོ། །དེ་ཅི་ལྟར་ཕ་རོལ་གྱི་བསམ་པས་དྲན་པ་ནི་དེའི་འཇུག་པ་ཡང་དག་
[71a.4]པར་རིག་པའོ་ཞེས་བརྗོད་ཅེ་ན། ཕ་རོལ་པོ་ལ་རྟོག་པ་གཞན་མེད་པའི་ཕྱིར་རོ། །དེ་ལྟར་ནི་འཇུག་པ་ཉེ་བར་དམིགས་པ་རེ་ཞིག་ངེས་པར་ཁས་བླང་བར་བྱ་སྟེ། གཞན་དུ་ན་དེ་ཉེ་བར་མ་དམིགས་ན། དོན་ཉེ་བར་དམིགས་པར་ཡང་མི་འགྱུར་རོ་ཞེས་འགྲོ་བ་ལོང་བ་དང་ལྐུགས་པར་འགྱུར་རོ། །
[71a.5]འཇུག་པ་ཡང་དག་པར་རིག་པ་མངོན་སུམ་ལ་སོགས་པ་རྣམས་ཀྱི་ནང་དུ་འདུ་བ་ཡང་མ་ཡིན་ནོ། །དེའི་ཕྱིར་རྟོགས་པ་གཞན་མེད་པའི་ཕྱིར་འདི་ཡང་ལན་ཡང་དག་པ་མ་ཡིན་པ་སྨྲ་བའོ་ཞེས་དོགས་པར་བྱས་ནས་དེ་སྐད་དུ་བཤད་དོ། །དབང་པོའི་འཇུག་པ་ལ་ནི་བར་མ་ཆོད་པའི་ཞེས་པ་སྟེ། དབང་
[71a.6]པོའི་འཇུག་པ་སྨོས་པས་ཡིད་ཀྱི་འཇུག་པ་ཡང་གཟུང་བར་བྱའོ། །དྲན་མིན་ཉམས་སུ་མ་མྱོང་ཕྱིར། །ཞེས་པ་ལ་སོགས་པས། གང་ཉམས་སུ་མྱོང་བ་མ་ཡིན་པ་དེ་ལ་དྲན་པའི་རྟོགས་པར་འགྱུར་བ་མ་ཡིན་ཏེ། དཔེར་ན་རྒྱུད་གཞན་གྱི་ཉམས་སུ་མ་མྱོང་བའི་འདོད་པ་ལ་སོགས་པ་རྣམས་ལ་
[71a.7]བཞིན། དབང་པོའི་འཇུག་པ་རྣམས་ཀྱང་ཉམས་སུ་མྱོང་བ་མ་ཡིན་ནོ་ཞེས་རྒྱུད་དང་འགལ་བ་གསུངས་སོ། །ཅིག་ཅར་གཉིས་ཞེས་པ་ལ་སོགས་པ་གལ་ཏེ་དྲན་པ་ཉིད་རབ་ཏུ་བསྒྲུབ་པའི་ཆེད་དུ་གཏན་ཚིགས་མ་གྲུབ་པ་ཉིད་དུ་འདོད་ན། དེ་ལྟ་ན་ལྷན་ཅིག་འབྱུང་བའི་དབང་པོ་དང་ཡིད་ཀྱི་
[71b]
[71b.1]ཞེན་པ་དག་གིས་ཕན་ཚུན་ཡང་དག་པར་རིག་པར་བྱེད་པ་ན། འཇུག་པ་དེ་རྣམས་ལ་དྲན་པའི་རྟོག་པ་བར་མ་ཆད་པར་ཡང་དག་པར་འབྱུང་བར་འགྱུར་རོ། །དེ་ལྟ་ན་ཡང་ཞེས་པ་ཡུལ་དབང་པོའི་ཞེན་པ་གཟུང་བར་བྱ་བ་ཡིན་ཏེ། ཡུལ་ཅན་འཛིན་པར་བྱེད་པ་པོ་ཡིད་ཀྱི་ཞེན་པའིའོ། །ཡིད་ཀྱི་
[71b.2]ཞེན་པ་ཡང་ཡུལ་ཅན་འཛིན་པར་བྱེད་པ་པོ་དབང་པོའི་ཞེན་པའི་ཡུལ་གཟུང་བར་བྱ་སྟེ། ཕན་ཚུན་ཡང་དག་པར་རིག་པར་བྱེད་ན་ནི། དེ་དག་ལྟོས་པས་ཡུལ་ཅན་ཉིད་དང་ཡུལ་ཉིད་དུ་ཡང་འགྱུར་རོ། །དེ་དག་ཕན་ཚུན་རྒྱུ་མཚན་དང་རྒྱུ་མཚན་ལས་བྱུང་བར་འདོད་པར་བྱ་བ་སྟེ། གཞན་དུ་ན་
[71b.3]ཡུལ་དང་ཡུལ་ཅན་ཉིད་སྲིད་པ་མ་ཡིན་པས་སོ། །ཅིག་ཅར་སྐྱེས་པ་དག་ལ་རྒྱུ་མཚན་དང་རྒྱུ་མཚན་ཅན་ཉིད་འཐད་པ་ཡང་མ་ཡིན་ཏེ། དེ་ཡང་ཞེས་པ་ཁས་བླངས་ནས་སྐྱོན་གཞན་གསུངས་པའོ། །གང་འདི་དབང་པོའི་འཇུག་པ་ཉམས་སུ་མྱོང་བ་གང་སྔོན་མ་ཅན་དྲན་པའི་རྟོགས་པ་དེ་ཚད་མར་
[71b.4]བཤད་པ་མ་ཡིན་ནོ་ཞེས་པ་སྟེ། དེ་ཁོ་ན་མ་ཚང་བ་ཉིད་དོ། །འོ་ན་འདོད་པ་ལ་སོགས་པ་རྣམས་ལ་ཅི་ལྟར་ན་དྲན་པ་ཡིན་ཞེ་ན། གསུངས་པ། རང་རིག་པར་བྱ་བ་ཉིད་ཀྱི་ཕྱིར་ཞེས་པ་ལ་སོགས་པའོ། །འདིས་ནི་འདི་གསལ་བར་བྱེད་དེ། འདོད་པ་ལ་སོགས་པ་ཉེ་བར་བཀོད་པ་ནི་རང་ལ་
[71b.5]གནོད་པའི་ཆེད་དུ་བའི་བྱ་བ་སྐྱེད་པ་སྟེ། དེ་ལྟར་ན་ཁོ་བོ་ཅག་གིས་རང་གི་རིག་པར་བྱ་བ་ཉིད་དུ་འདོད་པ་ལ་སོགས་པ་རྣམས་ཁས་བླངས་པ་ཉིད་ཀྱི་ཕྱིར། དེ་ལ་དྲན་པ་ཡང་དག་པར་འབྱུང་ངོ་། །ཁྱོད་ཀྱིས་ནི་དེ་ལྟར་དེ་རྣམས་ཁས་མ་བླངས་པའི་ཕྱིར་དེ་མི་སྲིད་པ་ཁོ་ནའོ། །ཅི་སྟེ་རང་རིག་
[71b.6]པ་ཁས་བླང་བར་བྱ་ན། དེའི་ཚེ་དེ་ཡང་མཚན་ཉིད་ཀྱིས་མ་བསྡུས་པས་སོ་ཞེས་པས་དེ་ཁོ་ན་ཉུང་བ་ཉིད་དོ། །འོ་ན་བསྟན་བཅོས་ཀྱིས་དྲན་པ་ཉིད་བསྒྲུབས་པ་མ་ཡིན་ནམ་ཞེ་ན། གསུངས་པ། འདི་ནི་ལོང་བའི་གོམ་པ་ཁོ་ན་སྟེ་ཞེས་པ་ཇི་ལྟར་ལོང་བའི་གོམ་པ་མ་མཐོང་བ་སྔོན་མ་ཅན་རྣམ་པར་
[71b.7]འགོད་པ་དེ་བཞིན་དུ་འདིའི་ཡང་ཚད་མས་ཡོངས་སུ་གཅད་པར་མངོན་པར་རྗོད་པར་བྱེད་པའི་ཕྱིར་རོ། །ཡང་ན་ཚིག་རྣམས་ལོང་བ་རྣམས་ཏེ་ཚོགས་པའི་དོན་ཅན་མ་ཡིན་པ་རྣམས་དག་གང་ལ་ཡོད་པ་དེ་དེ་སྐད་ཅེས་བྱའོ། །དེ་ལྟར་ནི་ཞེས་པ་ལ་སོགས་པས་ལོང་བའི་གོམ་པ་ཉིད་སྟོན་པར་
[72a]
[72a.1]བྱེད་དེ། གང་གི་ཕྱིར་དབང་པོའི་དོན་ལ་ཡང་དྲན་པ་མི་སྲིད་ལ། གང་ཉམས་སུ་མྱོང་བ་ནི་ཅི་སླར་ཡང་ཉམས་སུ་མྱོང་བ་མ་ཡིན་པའི་འཇུག་པ་རྣམས་ལ་ཡིན་ནམ་ཞེས་པ་ཡང་གི་སྒྲའི་དོན་ཏོ། །དེ་ལྟར་འགྱུར་མོད། དབང་པོའི་ཞེན་པ་དེ་ཡོད་ན། ཕྱི་རོལ་གྱི་དོན་ཁོ་ན་ལས་ཡིད་
[72a.2]ཀྱིས་རྗེས་སུ་ཞེན་པར་བྱེད་དོ་ཞེས་པ་བསྟན་བཅོས་ཀྱི་དོན་ཏེ། དེའི་ཕྱིར་ཉམས་སུ་མྱོང་བ་མ་ཡིན་པ་ཉིད་མ་གྲུབ་བོ་ཞེ་ན། གསུངས་པ། ཉམས་པའམ་ཞེས་པ་ལ་སོགས་པ་སྟེ། བསྟན་བཅོས་ཀྱི་ཉམས་པའོ། །གཞན་མཐོང་བ་ན་དྲན་པ་སྟེ། དབང་པོའི་འཇུག་པས་ཉམས་སུ་མྱོང་བ་ཉིད་ཀྱི་
[72a.3]ཕྱིར་དང་ཡིད་ཀྱིས་ཀྱང་དྲན་པར་བྱ་བ་ཉིད་ཀྱི་ཕྱིར་རོ། །དེ་ཡང་མི་རིགས་ཏེ་ལྷས་བྱིན་གྱིས་ཉམས་སུ་མྱོང་བ་མཆོད་སྦྱིན་གྱིས་དྲན་པ་ནི་མ་ཡིན་པས་སོ། །འོ་ན་རང་གི་ལུགས་ལ་དབང་པོའི་ཤེས་པས་ཉམས་སུ་མྱོང་བ་ཡིད་ཀྱིས་དྲན་པ་ཞེས་པ་ཅི་ལྟར་ཡིན་ཞེ་ན། འདི་ནི་ཕ་རོལ་པོ་ཁོ་ནའི་སྐྱོན་ཏེ། གང་
[72a.4]ཞིག་གི་གཞན་གྱིས་ཉམས་སུ་མྱོང་བ་གཞན་གྱིས་དྲན་པ་མ་ཡིན་ནོ་ཞེས་པ་འདི་འདོད་པའིའོ། །ཁོ་བོ་ཅག་ནི་རྒྱུད་གཅིག་ལ་ཤེས་པ་གཞན་གྱིས་ཉམས་སུ་མྱོང་བ་ཡང་དྲན་ནོ་ཞེས་འདོད་པས་སྐྱོན་མེད་དོ། །ཉམས་སུ་མ་མྱོང་བ་ལ་དྲན་པའམ་ཞེས་པ། ཅི་སྟེ་ཡིད་ཁོ་ནས་ཉམས་སུ་མ་མྱོང་བ་དྲན་
[72a.5]པར་འདོད་ན། དེ་ལྟར་ཡིན་ན་ཉམས་སུ་མ་མྱོང་བའི་དོན་ལ་དྲན་པར་འགྱུར་ཏེ། དེ་ནི་ཡིད་ཀྱིས་སྔར་ཉམས་སུ་མ་མྱོང་བ་ཉིད་ཀྱི་ཕྱིར་རོ། །སྐད་ཅིག་གཉིས་པ་ལ་ཡིད་འདོད་དོ་ཞེས་པ་འདིའི་ཕྱིར་དབང་པོའི་འཇུག་པ་དང་ལྷན་ཅིག་སྐྱེས་པའོ་ཞེ་ན་གསུངས་པ། ཇི་སྐད་བཤད་པའི་ཞེས་པ་ལ་སོགས་
[72a.6]པ་སྟེ། བསྟན་བཅོས་སུ་བཤད་པ་ཅི་ཕྱི་རོལ་གྱི་དོན་རྣམས་ལ་དབང་པོ་དང་ཡིད་དག་གིས་ལྷན་ཅིག་ཞེན་ནམ་ཞེ་ན། མ་ཡིན་ཞེས་བརྗོད་པར་བྱའོ། །ཅིའི་ཕྱིར་ཞེ་ན། དོན་གཅིག་བྱེད་པའི་དབང་པོ་དག་རྟོག་པ་ན་ནུས་པ་ཉིད་མ་ཡིན་ནོ་ཞེས་པའོ། །འདི་སྐད་བཤད་པར་འགྱུར་ཏེ། གལ་ཏེ་དབང་
[72a.7]པོ་དང་ཡིད་དག་གཉིས་པོ་དག་གིས་ཀྱང་ཕྱི་རོལ་གྱི་དོན་འཛིན་པའི་མཚན་ཉིད་ཀྱི་འབྲས་བུ་དོན་གཅིག་བྱེད་པ་ཉིད་དུ་འདོད་ན། དེ་ལྟར་གྱུར་ན། དབང་པོ་རྣམས་ཀྱི་ནུས་པ་ཉིད་མི་འགྱུར་ཏེ། དོན་དང་ལྡན་པ་ཉིད་དུ་མི་འགྱུར་རོ་ཞེས་པའི་དོན་ཏོ། །གཉིས་ཀ་དག་གིས་ཡང་ཕྱི་རོལ་གྱི་དོན་འཛིན་པ་
[72b]
[72b.1]ནི་འདིར་དོན་གཅིག་བྱེད་པ་ཉིད་དོ། །གཉིས་ཀ་དག་གིས་ཀྱང་ཕྱི་རོལ་གྱི་དོན་འཛིན་པའི་ཕྱིར་དབང་པོ་རྣམས་དོན་དང་ལྡན་པར་མི་འགྱུར་རོ། །ཅི་ལྟར་ཞེ་ན། གལ་ཏེ་རེ་ཞིག་ཕྱི་རོལ་གྱི་ཡུལ་འཇུག་བཞིན་པའི་ཡིད་ནི་དབང་པོའི་འཇུག་པས་ཕན་བཏགས་པ་བྱས་པ་ལ་ལྟོས་པ་མེད་ན། དེ་ལྟར་
[72b.2]གྱུར་ན་དབང་པོ་རྣམས་རྣམ་པ་ཐམས་ཅད་དུ་དོན་མེད་པ་ཉིད་དུ་འགྱུར་ཏེ། ཡིད་ཁོ་ན་ཕྱི་རོལ་གྱི་དོན་ཉེ་བར་འཛིན་པའི་ཕྱིར་སྐྱེས་བུའི་ཉེ་བར་ལོངས་སྤྱོད་པ་འགྲུབ་པའི་ཕྱིར་རོ། །དབང་པོའི་འཇུག་པ་ཕྱི་རོལ་གྱི་དོན་དུ་སྣང་བ་རྣམས་ཀྱང་ཡིད་ཀྱི་ཞེན་པ་རྣམས་ཀྱིས་ཞེན་པར་མ་བྱས་པ་རྣམས་དང་དེ་
[72b.3]རྣམས་དང་མ་འདུས་པ་རྣམས་དང་རྟོག་པ་མེད་པ་རྣམས་སུ་འགྱུར་རོ། །གང་ཡང་སྒོ་དང་སྒོ་ཅན་རྣམ་པར་དཔྱད་པར་བཤད་པ་འདི་སྟེ། ཡིད་ལ་གཅིག་ཏུ་འགྱུར་བའི་དབང་པོའི་ཞེན་པ་རྣམས་སྐྱེས་བུས་སེམས་པར་བྱེད་དེ། དབང་པོའི་ཞེན་པ་རྣམས་ཀྱིས་ཡིད་ཀྱི་ཞེན་པ་རྣམས་ནི་མ་ཡིན་
[72b.4]ནོ་ཞེས་པའོ། །དེའི་ཕྱིར་ཡིད་ཁོ་ན་སྒོ་ཅན་དང་སྒོ་ནི་དབང་པོ་རྣམས་སོ་ཞེས་པའོ། །དེ་ཡང་རྣམ་པར་ཉམས་ཏེ། ཅིག་ཅར་དོན་གཅིག་བྱེད་པ་ཉིད་ན་གཉིས་ཀ་དག་ཀྱང་སྒོ་དང་སྒོ་ཅན་ཉིད་དུ་ཐལ་བར་འགྱུར་བའི་ཕྱིར་རོ། །ལོང་བ་ལ་སོགས་པ་རྣམས་ཀྱི་ཡང་གཟུགས་ལ་སོགས་
[72b.5]པའི་ཡུལ་མངོན་སུམ་དུ་འགྱུར་རོ། །ཅི་སྟེ་ཡང་དབང་པོས་བྱས་པའི་ཕན་འདོགས་པ་ལ་ལྟོས་ནས་ཕྱི་རོལ་གྱི་དོན་ལ་ཡིད་རབ་ཏུ་འཇུག་པ་འབའ་ཞིག་པ་ནི་མ་ཡིན་ཏེ། ནུས་པ་མེད་པའི་ཕྱིར་ཞེས་བརྗོད་པར་བྱ་ཞེ་ན། དེ་ལྟ་ན་ཡང་དབང་པོ་རྣམས་ནུས་པ་ཅན་དུ་འགྱུར་བ་མ་ཡིན་པ་ཁོ་ནའོ། །
[72b.6]གང་གི་ཕྱིར་དེ་ལྟར་འདོད་པ་ན། རྐྱེན་དང་བཅས་པའི་འཇུག་པ་མི་སྲིད་པར་འགྱུར་ཏེ། དབང་པོའི་འཇུག་པར་མར་མེའི་འོད་བཞིན་དུ་ལྷན་ཅིག་བྱེད་པ་ཉིད་དུ་ངེས་པར་གནས་པ་ན། ཡིད་ཁོ་ན་ཕྱི་རོལ་གྱི་དོན་ལ་འཛིན་པའི་ཆེད་དུ་རབ་ཏུ་འཇུག་པས་སོ། །དེ་ལ་ཇི་ལྟར་སྒྲོན་མེའི་འོད་
[72b.7]ཡོད་པ་ན། མིག་འཇུག་སྟེ་མར་མེའི་འོད་ནི་ལྷན་ཅིག་བྱེད་པ་ཁོ་ན་འབའ་ཞིག་ཡིན་པ་དེ་ལྟར་དབང་པོའི་འཇུག་པ་ཡོད་པ་ན་ཡིད་ཕྱི་རོལ་གྱི་དོན་ལ་འཛིན་པའི་ཆེད་དུ་འཇུག་སྟེ། དབང་པོའི་འཇུག་པ་ནི་ལྷན་ཅིག་བྱེད་པ་ཁོ་ནའོ། །དེ་ཡང་ཡིད་ཀྱི་འཇུག་པས་གཟུང་བར་བྱ་བ་མ་ཡིན་པས་མ་འདུས་
[73a]
[73a.1]པ་རྐྱེན་མེད་པ་ཁོ་ནར་ཐམས་ཅད་ཀྱི་ཚེ་འགྱུར་བའོ། །དབང་པོ་ཞེན་པ་རྣམས་ཀྱང་ཡིད་ལ་གཅིག་ཏུ་འགྱུར་བ་ལས་དོན་དང་ལྡན་པ་ཉིད་དུ་བརྗོད་ཀྱི། རྣམ་པ་གཞན་དུ་ནི་མ་ཡིན་ནོ། །དེས་ན་དེ་རྣམས་གལ་ཏེ་ཡིད་ཀྱི་ཞེན་པ་རྣམས་ཀྱིས་རྗེས་སུ་ཞེན་པར་བྱེད་ན། དེ་ལྟ་ན་ཡིད་ལ་
[73a.2]གཅིག་ཏུ་གྱུར་པ་རྣམས་སྐྱེས་བུ་ཅན་གྱིས་ཡང་དག་པར་རིག་པར་བྱེད་དེ། དེ་ལས་ཀྱང་དེ་དང་ཡང་དག་པར་འདུས་པ་རྣམས་དེའི་ངོ་བོ་ཉིད་བཞིན་དུ་སྐྱེས་པ་རྣམས་ཚད་མ་ཉིད་དུ་རབ་ཏུ་རྟོགས་པར་བྱ་སྟེ། གཞན་དུ་ན་དེ་རྣམས་ཚད་མ་ཉིད་དུ་མི་འགྱུར་རོ། །གང་རྣམས་ཀྱང་རྐྱེན་མེད་པའི་འཇུག་པ་ཚད་
[73a.3]མ་ཉིད་དུ་མངོན་པར་འདོད་ལ། རྐྱེན་དང་བཅས་པ་ནི་འབྲས་བུར་ཏེ། དེ་རྣམས་ཀྱི་ཡང་ཇི་སྐད་བརྗོད་པའི་རྣམ་པས་རྟོག་པ་དང་བཅས་པའི་འཇུག་པ་མི་སྲིད་པའི་ཕྱིར་འབྲས་བུ་མེད་ཅིང་། དེ་མེད་པའི་ཕྱིར་ཡང་ཚད་མ་ཡང་མེད་དེ། འབྲས་བུ་མེད་པ་ཚད་མར་རིགས་པ་ནི་མ་ཡིན་པས་སོ་ཞེས་ཁ་ཅིག་གོ། །
[73a.4]མིག་དང་ཡིད་དག་སྒོ་དང་སྒོ་ཅན་གྱི་དངོས་པོ་ཡིན་པའི་ཕྱིར། འདི་དག་དོན་གཅིག་བྱེད་པར་བརྟག་པའི་ནུས་པ་བདག་ཅག་ལ་ཡོད་པ་མ་ཡིན་ཏེ། ཅིག་ཅར་དོན་གཅིག་བྱེད་པ་ཉིད་ན་གཉི་ག་དག་ཀྱང་སྒོ་དང་སྒོ་ཅན་ཉིད་དུ་ཐལ་བར་འགྱུར་བའི་ཕྱིར་རོ་ཞེས་གཞན་རྣམས་སོ། །སྐྱོན་འདི་མེད་ཅེས་
[73a.5]པ་ལ་སོགས་པས་འདི་སྒྲུབ་པར་བྱེད་དེ། མ་ཡིན་ཞེས་པའི་དགག་པ་གང་ཡིན་པ་འདི་ནི། ལྷན་ཅིག་ཏུ་ཞེན་པའི་བྱ་བ་ཙམ་འགོག་པ་མ་ཡིན་གྱི། འོན་ཀྱང་གང་ངེས་པ་དང་ལྡན་པའི་གང་ལྷན་ཅིག་ཞེན་པའི་བྱ་བ་དེ་འགོག་པར་བྱེད་དེ། ཡིད་ལས་དྲན་པ་ལྷག་པའི་ཞེན་པ་བསྟན་པའི་དོན་དུའོ། །ལྷན་
[73a.6]ཅིག་པ་ཁོ་ན་མ་ཡིན་གྱི་འོན་ཀྱང་ཕྱིས་ཀྱང་དྲན་པའི་ཞེན་པ་ལྷག་པ་ཡིད་ཀྱིས་བྱེད་དོ་ཞེས་པའོ། །ལྷན་ཅིག་པ་ནི་གྲུབ་པ་ཁོ་ན་ལ་ཞེས་པ་ལ་སོགས་པ་འདི་གསུངས་སོ། །ངེས་པ་དང་བྲལ་བའི་ལྷན་ཅིག་ཞེན་པའི་བྱ་བའི་ངོར་དྲི་བ་འཐད་པ་མ་ཡིན་པ་ཁོ་ན་སྟེ། དེ་སྔར་ཁོ་ནར་ཤེས་ཟིན་པ་ཉིད་ཀྱི་ཕྱིར་
[73a.7]རོ། །དེའི་ཕྱིར་ཅི་ལྷན་ཅིག་ཁོ་ནར་བྱའི་སོ་སོར་བྱ་བ་མ་ཡིན་པ་ཁོ་ན་ཡིན་ཞེས་པ་འདི་ལྟ་བུ་འདི་དྲི་བའི་འཇུག་པར་རྟོགས་པར་བྱའི། ཅི་ལྷན་ཅིག་བྱའམ་འོན་ཏེ་ལྷན་ཅིག་མ་ཡིན་པར་བྱ་ཞེས་པ་ནི་མ་ཡིན་ནོ། །འདི་ལྷན་ཅིག་པ་ནི་གྲུབ་པ་ཁོ་ན་ལ་ཞེན་པ་ལ་དྲི་བའོ་ཞེས་པ་འདི་ག་ལས་ཤེ་ན། གསུངས་
[73b]
[73b.1]པ། ད་ལྟར་གྱི་དུས་སུ་ཞེས་པ་ལ་སོགས་པ་སྟེ། བསྟན་བཅོས་སུ་རྣ་བ་ལ་སོགས་པ་རྣམས་ཀྱི་རང་གི་ཡུལ་ལ་རྣམ་པར་འཇུག་པ་དང་། ད་ལྟར་བའི་དུས་ལ་འཇུག་པ་ཉིད་དུ་བསྒྲུབས་ནས་འདི་སྐད་བཤད་དོ། །དེ་བཞིན་དུ་ཡིད་ནི་དོན་ཐམས་ཅད་ལ་དུས་གསུམ་པ་ཉིད་དུ་རབ་ཏུ་འཇུག་སྟེ། ཕྱི་རོལ་
[73b.2]གྱི་དོན་རྣམས་ལ་ད་ལྟར་བའི་དུས་སུ་གང་གི་ཚེ་དབང་པོ་འགའ་ཞིག་དང་ལྡན་པར་ཡིད་གྱུར་པ་དེའི་ཚེ་དབང་པོ་དང་ནི་རྐྱེན་དང་ལྡན་པའི་འཇུག་པར་འགྱུར་རོ། །འབའ་ཞིག་པ་ནི་འདས་པ་དང་མ་འོངས་པ་དག་གི་ཞེས་པ་ལ་སོགས་པ་སྔར་བརྗོད་ལ། ཕྱིས་དྲི་བ་འདི་བྱས་པའོ། །འདིར་གང་གི་ཚེ་
[73b.3]དབང་པོ་འགའ་ཞིག་དང་ལྡན་པ་ཞེས་པའི་ཚིག་ལས་སྔར་ཁོ་ནར་ལྷན་ཅིག་ཞེན་པ་གྲུབ་ལ། དེའི་ཕྱིར་ངེས་པ་དང་ལྡན་པར་ལྷན་ཅིག་ཞེན་པའི་བྱ་བ་ལས་བརྩམས་ནས་དྲིས་པའོ། །ལན་ཡང་དོན་གཅིག་བྱེད་པའི་དབང་པོ་དག་རྟོགས་པ་ན་ནུས་པ་ཉིད་ཡོད་པ་མ་ཡིན་ནོ་ཞེས་པ་དེ་དགག་པ་ཁོ་
[73b.4]ནར་གྲགས་པ་རྟོགས་པར་བྱ་སྟེ། དེའི་ཕྱིར་བསྟན་བཅོས་ཉམས་པ་མ་ཡིན་ནོ། །དེ་འགལ་ཏེ་ཞེས་པ་ཅི་ལྟར་བྱས་ནས་ཤེ་ན། གང་ལས་ཇི་ལྟར་ཡང་དབང་པོའི་ཞེན་པ་ཞེས་པ་ལ་སོགས་པས་ཕན་ཚུན་གྱི་འཇུག་པ་ཡང་དག་པར་རིག་པར་བསྒྲུབས་སོ། །གདོན་མི་ཟ་བར་ཡང་འདི་འདི་ལྟར་
[73b.5]རྣམ་པར་ཤེས་པར་བྱའོ། །དོན་གཞན་དུ་རྟོགས་ན་ཡང་ཇི་སྐད་བཤད་པའི་སྐྱོན་དུ་ཐལ་བར་འགྱུར་རོ། །དེ་ལས་ཀྱང་དབང་པོའི་འཇུག་པ་དང་ལྷན་ཅིག་སྐྱེས་པའི་ཡིད་ཀྱིས་ཉམས་སུ་མྱོང་བས་ཕྱི་རོལ་གྱི་དོན་ལ་ཕྱིས་དྲན་པའོ་ཞེས་བརྟག་པར་བྱ་བ་མ་ཡིན་ནོ། །དོན་མེད་པར་འགྱུར་རོ་ཞེ་ན་
[73b.6]སྐྱོན་གཞན་གསུངས་སོ། །ཡིད་ཀྱིས་ཞེས་པ་ལ་སོགས་པས་འདི་ཁོ་ན་ལ་གཏན་ཚིགས་སོ། །དུས་གསུམ་པའི་ཡུལ་ཅན་དང་དོན་ཐམས་ཅད་པ་ནི་ཡིད་དོ་ཞེས་བཤད་དོ། །དེ་གལ་ཏེ་ཕྱི་རོལ་གྱི་དོན་ལ་དངོས་སུ་འཇུག་ན། དེ་ཁོ་ནས་སྐྱེས་བུའི་དོན་བྱས་སོ་ཞེས་པ་རྣ་བ་ལ་སོགས་པ་རྣམས་
[73b.7]དོན་མེད་པར་འགྱུར་རོ། །དེ་ལས་ཀྱང་དེའི་བདག་ཉིད་དུ་རང་བཞིན་ཡོངས་སུ་འགྱུར་བ་མ་ཡིན་པ་ཁོ་ནར་འགྱུར་རོ། །སྐྱེས་བུ་ཉིད་འདོད་པ་ངེས་པར་ལྡོག་པའི་ཆེད་དུ་དེ་ཡོངས་སུ་འགྱུར་བར་འདོད་པར་བྱ་སྟེ། གཞན་དུ་ན་སྐྱེས་བུ་འབའ་ཞིག་པ་ཉིད་ཐོབ་པ་ན་ཡང་འགྱུར་རོ་ཞེས་པའོ། །ཡོད་
[74a]
[74a.1]པ་ཡང་དག་པར་སྦྱོར་བ་ཞེས་པ་ལ་སོགས་པ་སྟེ། འདིའི་འབྲེལ་པ་ནི། ཅི་སྟེ་འདི་ལས་ཆོས་གཅིག་ཤེས་པར་འདོད་པས་ཞེས་པ་སྐབས་བྱས་ནས། དེའི་རྒྱུ་མཚན་ཡོངས་སུ་འདོད་པའོ། །ཆོས་དེའི་ཉེ་བར་དམིགས་པའི་རྒྱུ་མཚན་རྣམས་ཏེ་ཚད་མ་རྣམས་ནི་ཡོངས་སུ་
[74a.2]བརྟག་པར་བྱའོ། །དེ་ལ་རེ་ཞིག་མངོན་སུམ་གྱིས་ཆོས་ཉེ་བར་མི་དམིགས་པ་མ་ཡིན་ནོ་ཞེས་སྟོན་ཅིང་གསུངས་པ། ཡོད་པ་ཡང་དག་པར་སྦྱོར་བ་ཞེས་པ་ལ་སོགས་པའོ། །ཡོད་པའི་འམ་ཡོད་པས་ཡང་དག་པར་ཕྲད་པ་ཞེས་པ་ཚིག་རྣམ་པར་སྦྱར་རོ། །ཡང་དག་པར་རབ་ཏུ་སྨོས་པ་ནི།
[74a.3]ཡང་དག་པར་དང་རབ་མཆོག་ཏུ་གྱུར་པས་གང་ཕྲད་པ་དེ་ཤེས་པའི་དོན་དུའོ། །དེ་ལྟ་ན་ཡང་བདག་ལ་སོགས་པ་རྣམས་དང་ཡང་གང་ཕྲད་པའི་འདུ་བྱེད་དེ་ཉེ་བར་གཟུང་བར་འགྱུར་ཏེ། གཞན་དུ་ན་ཡོད་པ་དང་ཕྲད་པ་ཞེས་པ་འདི་ཙམ་ཁོ་ནར་སྨྲ་བར་འགྱུར་རོ། །ཡང་དག་པར་ཕྲད་པ་ནི་
[74a.4]དབང་པོ་རྣམས་ཀྱི་དོན་དང་འབྲེལ་ཞིང་འདུས་པའོ། །བྱ་བ་ཕུལ་དུ་བྱུང་བ་ཡང་ན་ནི་སྟེ། གང་སྐྱེས་པ་ན་བློ་སྐྱེ་བའོ། །ཡོད་པ་དང་ཡང་དག་པར་ཕྲད་པ་ཞེས་པ་འདི་ནི་དབང་པོ་རྣམས་ཀྱི་ཞེས་པ་འདི་དང་འབྲེལ་ལོ། །སྐྱེས་བུའི་ཞེས་པ་འདི་ཡང་བློ་སྐྱེ་བ་ཞེས་པ་འདི་དང་ངོ་། །དབང་པོ་ཞེས་པའི་
[74a.5]སྒྲས་ཡིད་ཀྱང་གཟུང་བར་བྱའོ། །དེས་ན་བདག་དང་ཡིད་ཡང་དག་པར་ཕྲད་པ་ལས་གང་བདག་ཉིད་ཀྱི་ཡུལ་ཅན་གྱི་བློ་སྐྱེ་བ་དེ་ཡང་མངོན་སུམ་ཉིད་དུ་བྱས་པར་འགྱུར་རོ། །བློ་སྐྱེ་བ་ཞེས་པ་ཡང་ལས་འཛིན་པའམ། དྲུག་པ་དེའི་སྐྱེས་བུ་ཡང་ནའོ། །གང་གི་ཚེ་ལས་འཛིན་པ་ཡིན་པ་དེའི་
[74a.6]ཚེ་སྐྱེ་བས་ཁྱད་པར་དུ་བྱས་པ་ཅན་གྱི་བློ་མངོན་སུམ་མོ། །བློ་ནི་སྐྱེ་བ་ཁོ་ནས་ཡུལ་རབ་ཏུ་གསལ་བར་བྱེད་ཀྱི་སྐྱེ་བ་མེད་པར་དེའི་བྱ་བ་གཞན་ཡོད་པ་མ་ཡིན་ཏེ་སྐད་ཅིག་པ་ཉིད་ཀྱི་ཕྱིར་རོ་ཞེས་ཤེས་པར་བྱ་བའི་དོན་དུ་སྐྱེ་བ་སྨོས་སོ། །གང་གི་ཚེ་དྲུག་པའི་བསྡུ་བ་ཡིན་པ་དེའི་ཚེ་བློས་ཁྱད་པར་དུ་བྱས་
[74a.7]པའི་སྐྱེ་བ་མངོན་སུམ་མོ། །དེ་ལ་ཡོད་ཅེས་མེད་བསལ་ཆེད། །ཅེས་པ་ལ་སོགས་པས། གང་ཡང་དག་པར་ཕྲད་པ་ལས་རྟོགས་པ་དེ་རྟོགས་པའི་ཆེད་དུ་ཡོད་པའི་སྒྲ་ཉེ་བར་བླང་བར་བྱ་བ་མ་ཡིན་ཏེ། ཡང་དག་པར་ཕྲད་པ་བཞིན། ཡོད་པ་མ་ཡིན་པ་བསལ་བ་ཡང་དེ་ལྟ་བུའོ་ཞེས་ཁྱབ་བྱེད་
[74b]
[74b.1]དང་འགལ་བ་གསུངས་སོ། །ཡོད་པ་ཁོ་ན་ལས་ཞེས་པ་གཉིས་ལ་གནས་ལ་ཉིད་ཀྱི་ཕྱིར་དེ་གང་ཡང་རུང་བ་མེད་ན་མི་སྲིད་པའི་ཕྱིར་རོ། །འོ་ན་ཡོད་པ་ཁོ་ན་ལས་ཞེས་པའི་ཁོ་ནའི་ཡི་གེ་ཁོ་ན་ལས་ངེས་པ་རྟོགས་པ་ཉིད་ཀྱི་ཕྱིར་ངེས་པ་ལས་ཞེས་པ་བརྗོད་པར་མི་བྱ་བ་མ་ཡིན་ནམ། ཅི་སྟེ་འདི་བརྗོད་
[74b.2]པར་བྱ་བ་ཡིན་ན་ཁོ་ནའི་སྒྲ་དོན་མེད་པར་འགྱུར་རོ་ཞེ་ན། སྐྱོན་འདི་མེད་དེ། གང་ཕྱིར་ངེས་པའི་རང་གི་ངོ་བོ་ཁོ་ནའི་སྒྲས་གསལ་བར་བྱེད་ལ་ངག་གི་དབྱེ་བ་ཡང་བྱས་ནས་འདི་ལྟར་བཤད་པར་བྱ་སྟེ། ཡོད་པ་ཁོ་ན་ལས་ཞེས་པ་ངེས་པ་གང་ཡིན་པ་འདི་ནི་ངེས་པ་འདི་ལས་ཡོད་པ་ཁོ་ནའི་ཡང་དག་
[74b.3]པར་ཕྲད་པར་འགྱུར་རོ་ཞེས་པའོ། །ཡང་ན་ངེས་པར་ཡོད་པ་སྦྱོར་བ་རིགས་པ་མ་ཡིན་ནོ་ཞེས་སྦྲེལ་བར་བྱའོ། །ཡོད་པ་ཡང་དག་པར་སྦྱོར་བ་ནི་རིགས་པ་མ་ཡིན་པ་ཁོ་ནའོ་ཞེས་པ་ཡང་ནའོ། །ཅི་སྟེ་སྦྱོར་ཟླ་བོ་ཞེས་པ་ལ་སོགས་པས་ཡོད་པའི་སྒྲ་དོན་གཞན་ཅན་ཉིད་ཀྱི་ཕྱིར་གྲུབ་པ་སྒྲུབ་པ་སྨྲས་
[74b.4]པའོ། །ཅིའི་དོན་དུ་སྔར་ཡོད་པ་ཁོ་ནའི་ཞེས་སྨྲས་པས་དྲུག་པའི་བསྡུ་བ་བསྟན་ཅིང་། ད་ལྟ་ནི་ཅིས་ཡང་དག་པར་སྦྱོར་ཞེས་པའི་གསུམ་པའི་ཚིག་སྡུད་ཡིན་ཞེ་ན། ཚིག་སྡུད་གཞན་ལ་ཡང་སྐྱོན་འདིའོ་ཞེས་གསལ་བར་བྱེད་པའི་དོན་དུའོ། །དེ་ལྟར་ནི་རི་ཁྲོད་པས་ཡང་དག་པར་ཕྲད་པ་ཡོད་ན་སྟེ་ཡོད་
[74b.5]པ་མིན་ན་མ་ཡིན་ནོ་ཞེས་སྨྲས་པས་འདི་ནི་ལས་འཛིན་པའོ་ཞེས་བཤད་དོ། །དེ་ལའང་སྐྱོན་འདི་བཟློག་པ་མ་ཡིན་ཏེ། གང་གི་ཕྱིར་བདུན་པ་འདི་རྒྱུ་མཚན་གྱི་དོན་ཅན་དུ་འགྱུར་བའམ། གང་གི་ཡང་ཡོད་པས་ཡོད་པའི་མཚན་ཉིད་དོ་ཞེས་པ་འདིས་ཡང་ནའོ། །ཡོད་པ་མིན་པ་ནི་རྒྱུ་མཚན་ཉིད་དང་
[74b.6]མཚན་ཉིད་དུ་ཡང་དག་པར་འགྱུར་བ་མ་ཡིན་ཏེ། དེ་ལས་ཀྱང་གལ་ཏེ་ཡང་དག་པར་ཕྲད་པའི་རྒྱུ་མཚན་གྱིས་བློ་སྐྱེ་བར་འགྱུར་བའམ། དེ་ཡོད་པས་དེ་ཡོད་པར་མཚོན་པར་བྱ་བ་ཡིན་ན། དེ་ལྟར་གྱུར་ན་ཡང་དག་པར་ཕྲད་པ་ནི་ཡོད་པའོ་ཞེས་པ་འདི་རྟོགས་པར་བྱ་བ་ཁོ་ནར་འགྱུར་རོ། །དེ་ལྟར་འགྱུར་
[74b.7]ཏེ་རྟོགས་པར་འགྱུར་བ་བདེན་མོད། དེ་ལྟ་ན་ཡང་གང་འདི་ནི་ཕ་རོལ་པོ་རྣམས་ཀྱིས་ཡོད་པ་མ་ཡིན་པའི་རྟོགས་པ་འདས་པ་དང་མ་འོངས་པའི་ཡུལ་ཅན་དང་རྣལ་འབྱོར་པའི་ཤེས་པ་ནི་ཡོད་པ་མ་ཡིན་ན་ཡང་ཡང་དག་པར་ཕྲད་པ་ན་འགྱུར་རོ་ཞེས་པ་དེ་བསལ་བའི་དོན་དུ་ཡོད་པ་སྨོས་པའོ་ཞེ་ན། འདི་མི་རིགས་
[75a]
[75a.1]ཏེ། བདུན་པའི་མཐའ་ཅན་ཕྲད་པའི་སྒྲ་ཡོད་པའི་དོན་ལ་མི་འཁྲུལ་པ་ཁོ་ནས་རྟོགས་པ་འདིའི་བཟློག་ཟིན་པ་ཉིད་ཀྱི་ཕྱིར་རོ། །གཞན་ཡང་ཁོ་བོ་ཅག་གི་རྣལ་འབྱོར་པའི་མངོན་སུམ་ཡོད་པའི་ཡུལ་ཅན་ཁོ་ནར་སྔར་ཉིད་བཤད་ཟིན་ཏོ། །གང་ཡང་འདས་པ་དང་མ་འོངས་པའི་ཡུལ་
[75a.2]ཅན་དུ་རྣལ་འབྱོར་པ་རྣམས་ཀྱི་ཤེས་པ་བརྗོད་པ་དེ་ཡང་ཉེ་བར་བཏགས་པ་ལས་འདས་པ་དང་མ་འོངས་པའི་ཡུལ་ཅན་ཉིད་དུ་ཁས་བླང་བར་བྱའི། དོན་དམ་པར་ན་དེ་ཡང་ད་ལྟར་བའི་ཡུལ་ཅན་ཁོ་ནའོ། །ཅི་ལྟར་བྱས་པས་ཤེ་ན། གང་ཕྱིར་ད་ལྟར་བའི་དངོས་པོ་ནི་འདས་པའི་རྒྱུ་དང་རྐྱེན་རྣམས་ཀྱི་དངོས་དང་བརྒྱུད་
[75a.3]པས་ཕན་གདགས་པར་བྱ་བ་སྟེ། གང་གི་བར་མ་ཆད་པར་གང་སྐྱེ་བ་དེའི་དངོས་སུ་ཡིན་ལ། གང་རྣམས་ལས་བར་ཆོད་པས་ཡིན་པ་དེ་རྣམས་ཀྱི་བརྒྱུད་པས་སོ། །མ་འོངས་པའི་དངོས་པོ་རྣམས་ཀྱི་ཡང་འདི་ཕན་འདོགས་པར་བྱེད་པ་པོ་སྟེ། དངོས་པོ་གང་རྣམས་དེ་ལས་དེ་མ་ཐག་པར་འབྱུང་བ་དེ་
[75a.4]རྣམས་ཀྱི་ནི་དངོས་སུ་ཡིན་པ་ལ་དེ་ལས་ཕྱིས་ཀྱི་དུས་སུ་འབྱུང་བ་རྣམས་ཀྱི་ནི་བརྒྱུད་པས་སོ། །གང་ཡང་འདི་འདས་པའི་ཕན་གདགས་པར་བྱ་བ་ཉིད་དང་མ་འོངས་པའི་ཕན་འདོགས་པ་པོ་ཉིད་བར་ཆོད་པ་དང་ཅིག་ཤོས་ཀྱང་ཡིན་ཏེ་འདིའི་རང་བཞིན་ནོ། །ད་ལྟར་བའི་དངོས་པོ་དེ་ཡང་བསྒོམ་པ་རབ་ཀྱི་
[75a.5]མཐར་ཐུག་པ་ལས་སྐྱེས་པའི་ཤེས་པས་རྣལ་འབྱོར་པ་རྣམས་ཀྱིས་ཡོངས་སུ་གཅོད་པར་བྱེད་པ་ལས་བདག་ཉིད་ཐམས་ཅད་ཀྱིས་ཡོངས་སུ་གཅོད་པར་བྱེད་དེ། དེ་ལ་ཆ་ཤས་མེད་པ་ཉིད་ཀྱི་ཕྱིར་རོ། །དེ་དེ་ལྟར་ཡོངས་སུ་གཅོད་པ་ན། ཏིང་ངེ་འཛིན་ལས་ལངས་པའི་རྣལ་འབྱོར་པ་རྣམས་ཀྱི་
[75a.6]དངོས་པོ་དེའི་ཕན་འདོགས་པར་བྱེད་པ་དང་ཕན་གདགས་པར་བྱ་བའི་དོན་གང་ཡིན་པ་འདས་པ་དང་མ་འོངས་པ་དེ་རྣམས་ངོ་ཤེས་པ་མི་བསླུ་བ་རྣམས་བསྒོམས་པ་ལས་བྱུང་བའི་ཤེས་པའི་ཁྱད་པར་གྱི་སྟོབས་ལས་ཉེ་བར་སྐྱེ་སྟེ། གང་རྣམས་ཀྱིས་འདས་པ་དང་མ་འོངས་པའི་དངོས་པོ་རྣམ་པར་གཞག་པ་བྱེད་
[75a.7]པའོ། །དེ་ལྟར་འདས་པ་དང་མ་འོངས་པའི་དོན་གྱི་ཡུལ་ཅན་ཤེས་པ་ནི་རྣལ་འབྱོར་པའི་ཤེས་པའི་འབྲས་བུའོ་ཞེས་པས་རྒྱུ་ལ་འབྲས་བུ་བཏགས་པ་ལས། དེ་ཡང་འདས་པ་དང་མ་འོངས་པའི་ཡུལ་ཅན་ཞེས་བརྗོད་པར་བྱའོ། །དེ་ཡུལ་མེད་པར་འགྱུར་མོད་དེ། དོན་དམ་པར་འདས་པ་དང་མ་འོངས་པ་དག་མེད་
[75b]
[75b.1]པ་ཉིད་ཀྱི་ཕྱིར་རོ། །དེ་ལྟ་ན་ཡང་གསལ་བར་འདས་པ་དང་མ་འོངས་པའི་དོན་སོ་སོར་སྣང་བ་དེ་རྣམ་པར་རྟོག་པ་མེད་པའི་ཕྱིར་དང་མི་བསླུ་བ་ཉིད་ཀྱི་ཕྱིར་མངོན་སུམ་ཉིད་དུ་མི་འགལ་བ་ཁོ་ནའོ། །ཇི་ལྟར་ཁྱེད་ཀྱིས་བརྩད་པ་སྐྱེས་ཟིན་པའི་བློ་མ་འོངས་པའི་ཡུལ་ཅན་ཆོས་ཀྱི་རང་གི་ངོ་བོ་འཛིན་པ་མ་ཡིན་ན་ཡང་མི་
[75b.2]བསླུ་བའི་ཕྱིར་ཚད་མ་ཉིད་དུ་འདོད་པ་དེ་ལྟར་ཁོ་བོ་ཅག་གིས་ཀྱང་ཇི་སྐད་བཤད་པའི་རྒྱུ་ལས་དེ་མངོན་སུམ་ཉིད་དེ། གསལ་བར་འདས་པ་ལ་སོགས་པའི་དོན་སོ་སོར་སྣང་བ་ཉིད་དོ། །སླར་ཡང་དེ་རྣམ་པར་རྟོག་པ་མེད་པ་ཉིད་དང་མི་བསླུ་བ་ཉིད་ནི་རྣལ་འབྱོར་གྱི་སྟོབས་ལས་ཏེ། ལས་དང་ལྷ་ལ་སོགས་པའི་
[75b.3]བྱིན་རླབས་ཀྱི་སྟོབས་ལས་རྨི་ལམ་བདེན་པ་མཐོང་བ་བཞིན་ནོ། །དེའི་ཕྱིར་དགོངས་པ་མེད་པའི་ཡོད་པ་ཞེས་པ་འདི་བྱ་བ་མ་ཡིན་པ་ཁོ་ནའོ། །འོ་ན་ཡང་འདི་ནི་མངོན་སུམ་གྱི་མཚན་ཉིད་མ་ཡིན་པ་ཁོ་ནའོ། །འོན་ཀྱང་འགའ་ཞིག་གིས་རྣལ་འབྱོར་པའི་ཤེས་པའི་མངོན་སུམ་ལ་སོགས་པའི་མཚན་ཉིད་
[75b.4]བརྗོད་པ་དེ་དགག་པའི་དོན་དུ་ཆོས་འདི་བརྗོད་པ་སྟེ། རྩོད་པའི་མཚན་ཉིད་ཀྱི་དོན་གྱི་ཆོས་མངོན་སུམ་གྱི་མཚན་ཉིད་མ་ཡིན་ཏེ། ཅིའི་ཕྱིར་ཞེ་ན། གང་གི་ཕྱིར་དེ་འདྲ་བའི་མངོན་སུམ་དང་འབྱུང་བར་འགྱུར་བའི་ཆོས་ཀྱང་ཤེས་པའི་དུས་ན་ཡོད་པ་མ་ཡིན་ཞིང་། དེའི་ཕྱིར་དབང་པོ་ལས་འདས་པའི་དོན་
[75b.5]རྟོགས་པ་ལ་རྒྱུ་མཚན་མ་ཡིན་ཏེ། དེ་ནི་ཡོད་བཞིན་པ་ལ་ཉེ་བར་དམིགས་པ་ཉིད་ཀྱི་ཕྱིར་རོ། །དེ་སྔོན་མ་ཅན་ཉིད་ཀྱི་ཕྱིར་ན། རྗེས་སུ་དཔག་པ་ལ་སོགས་པ་ལ་ཡང་ཆོས་ཀྱི་རྒྱུ་མཚན་དུ་མི་འགྱུར་རོ། །དེའི་ཕྱིར་རྩོད་པའི་མཚན་ཉིད་ཁོ་ནའི་དོན་ཅན་ཆོས་སོ་ཞེས་པས་འདི་འདིར་གཙོ་བོར་རྣམ་པར་བསྒྲུབ་
[75b.6]པར་བྱའི། མངོན་སུམ་གྱི་དོན་འདི་ནི་མངོན་སུམ་གྱི་མཚན་ཉིད་གཙོ་བོར་ནི་མ་ཡིན་ཏེ། མངོན་སུམ་གྲུབ་ཟིན་པ་ཉིད་ཀྱི་ཕྱིར་རྗེས་སུ་བརྗོད་པ་ཙམ་ཁོ་ནར་འདི་བྱ་བའོ་ཞེ་ན། དེ་མི་རིགས་ཏེ། ཚད་མ་རྣམས་མ་གྲུབ་པ་ཉིད་ཀྱི་ཕྱིར་རོ། །འདི་ཡང་སྔར་ཁོ་ནར་རྟོགས་པར་བྱས་ཟིན་ཏོ། །གཞན་ཡང་གལ་ཏེ་གྲུབ་
[75b.7]ཟིན་པ་ཉིད་ཀྱི་ཕྱིར་མངོན་སུམ་གྱི་མཚན་ཉིད་འདིས་བསྒྲུབ་པར་བྱ་བ་མ་ཡིན་གྱི། འོ་ན་ཅི་ཞེ་ན། ཆོས་མངོན་སུམ་གྱི་རྒྱུ་མཚན་ཉིད་དུ་ཡིན་ན། དེ་ལྟར་གྱུར་ན་མངོན་སུམ་རྒྱུ་མཚན་མ་ཡིན་ཏེ། ཡོད་བཞིན་པ་ལ་ཉེ་བར་དམིགས་པ་ཉིད་ཀྱི་ཕྱིར་རོ་ཞེས་པ་འདི་ཙམ་ཁོ་ན་བརྗོད་པར་བྱའོ། །དེ་ལྟར་འགྱུར་མོད་
[76a]
[76a.1]རང་གི་ངོ་བོ་ངེས་པར་བསྟན་པ་ཡོད་ན། འདི་ལྟ་བུའི་མཚན་ཉིད་ཅན་མངོན་སུམ་མོ་ཞེས་རང་གི་ངོ་བོ་ངེས་པར་ཤེས་པའི་ཕྱིར་དེ་རྒྱུ་མཚན་མ་ཡིན་པ་ཉིད་དུ་འགྲུབ་ཀྱི་གཞན་དུ་ན་མ་ཡིན་ནོ་ཞེ་ན། གལ་ཏེ་རང་གི་ངོ་བོ་ངེས་པར་བསྟན་པ་མེད་པར་དེའི་རང་གི་ངོ་བོ་ཤེས་པ་མ་ཡིན་ན། དེའི་
[76a.2]ཚེ་དེ་གྲུབ་པ་མ་ཡིན་ལ། དེ་ལས་ཀྱང་དེའི་མཚན་ཉིད་སྒྲུབ་པ་ཁོ་ན་ལ་བརྟེན་པའོ་ཞེས་པས་སུན་འབྱིན་པ་ལས་གྲོལ་བ་མ་ཡིན་ནོ། །དབང་པོའི་ཁྱད་པར་ཅན་གྱིས་བརྗོད་ཀྱི་ཞེས་པ། དབང་པོའི་ཁྱད་པར་བྱས་པ་ཁོ་ནའི་ཡུལ་ནི་སྦྱོར་ཟླ་ཅན་ཡིན་ཏེ། ཇི་ལྟར་མིག་གི་གཟུགས་ཞེས་པ་འདི་ལྟ་བུ་ལ་
[76a.3]སོགས་པ་ལྟ་བུའོ། །དེའི་ཕྱིར་འདི་ལྟར་སྨྲ་བར་རིགས་ཏེ། གཟུགས་ལ་སོགས་པ་དང་ཕྲད་པ་ན་ཞེས་པའོ། །ཅི་སྟེ་ཡང་འགྱུར་ཞེས་པ་བདག་དང་དབང་པོ་དང་ཡིད་དང་དོན་ཕྲད་པ་ལས་ཤེས་པ་སྐྱེ་ལ། དེ་ཡང་གཟུགས་ལ་སོགས་པའི་སྒྲ་རྣམས་ཀྱིས་སྨྲ་བར་ནུས་པ་མ་ཡིན་ཏེ། དེའི་ཕྱིར་དེ་
[76a.4]རྟོགས་པའི་ཆེད་དུ་ཡོད་པ་སྨོས་སོ། །དབང་པོ་རྣམས་ཀྱི་ཞེས་པའི་ཚིག་ནི་ཉེ་བར་མཚོན་པའི་དོན་དུ་སྟེ། བྱ་རོག་རྣམས་ལས་ཞོ་སྲུངས་ཤིག་ཅེས་པ་ཇི་ལྟ་བ་བཞིན་ནོ་ཞེས་སེམས་ན། ཡོད་ཙམ་ཞེས་པ་ལ་སོགས་པས་སྒྲུབ་པར་བྱེད་པ་སྔ་མ་ཁོ་ན་གསལ་བར་བྱེད་དོ། །དེ་ལྟར་འགྱུར་མོད། ཡོད་པ་
[76a.5]མ་ཡིན་པ་ལ་དེ་མི་འཇུག་གོ་ཞེས་པས་འདི་ཡོད་པ་མ་ཡིན་ནོ། །དེ་ལྟར་ནི་ཡོད་པ་མ་ཡིན་པ་སྨིག་རྒྱུ་ལ་སོགས་པ་རྣམས་ཀྱི་ཡང་ཡང་དག་པར་སྦྱོར་བ་མཐོང་ལ། དེ་ལས་ཀྱང་གཏན་ཚིགས་མ་གྲུབ་པའོ་ཞེ་ན། གསུངས་པ། གང་ཡང་ཞེས་པ་ལ་སོགས་པ་སྟེ། མངོན་སུམ་ལྟར་སྣང་གི་ཡུལ་ཉིད་
[76a.6]ཀྱི་ཕྱིར་མངོན་སུམ་ལྟར་སྣང་བའོ། །དེ་ཉིད་ཀྱི་ཕྱིར་ཡོད་པ་མ་ཡིན་པ་རྣམས་སོ། །དེའི་ཕྱིར་དེ་རྣམས་དང་ལྷན་ཅིག་འགའ་ཞིག་ཀྱང་ཡང་དག་པར་ཕྲད་པ་མ་ཡིན་ཏེ། དེའི་ཕྱིར་ཡང་དེ་དགག་པའི་ཆེད་དུ་ཡོད་པ་སྨོས་པ་རིགས་པ་མ་ཡིན་ནོ་ཞེས་པའོ། །དེ་ལྟར་འགྱུར་མོད། ཡོད་པ་སྨོས་པ་མེད་ན་ཟླ་བ་
[76a.7]གཉིས་ལ་སོགས་པའི་ཤེས་པ་འཁྲུལ་པ་ཡང་མངོན་སུམ་ཉིད་དུ་འགྱུར་རོ། །དེའི་ཕྱིར་དེ་བཟློག་པའི་ཆེད་དུ་ཡོད་པ་སྨོས་པའོ་ཞེ་ན། དེ་ནི་ཡང་དག་པ་མ་ཡིན་ཏེ། དེ་ཡང་དག་པར་ཕྲད་པ་སྨོས་པ་ཁོ་ནས་བཟློག་ཟིན་པ་ཉིད་ཀྱི་ཕྱིར་རོ་ཞེས་པས་འདི་ནི་བརྗོད་ཟིན་ཏོ། །གལ་ཏེ་དེ་ལྟ་ན་དེ་རྣམས་དང་
[76b]
[76b.1]ཡང་དག་པར་ཕྲད་པ་མ་ཡིན་པ་དེ་ཅི་ལྟར་ཆུ་ལ་སོགས་པར་སྣང་བའི་རྣམ་པར་ཤེས་པ་ཡིན་ཞེ་ན། ཡུལ་གྱི་ཁྱད་པར་ཞེས་པ་ལ་སོགས་པ་སྟེ། མྱ་ངམ་དང་ཚ་སྒོ་ཅན་ལ་སོགས་པའི་ཡུལ་གྱི་ཁྱད་པར་དུའོ། །དེར་ཡང་དུས་ཐམས་ཅད་དུ་མ་ཡིན་གྱི། གང་གི་ཚེ་ཉི་མའི་འོད་ཟེར་རྣམས་ཀྱིས་ཡང་
[76b.2]དག་པར་གདུངས་པར་གྱུར་པ་དེའི་ཚེ་རྒྱུར་འགྱུར་གྱི་གཞན་གྱི་ཚེ་མ་ཡིན་ནོ། །གང་གསུངས་པ་ཉི་མའི་གདུང་བ་ལས་ཞེས་པའོ། །བསྟན་པར་བྱ་བ་མ་ཡིན་པ་ཞེས་པས་རང་གི་མཚན་ཉིད་ནི་བསྟན་པར་བྱ་བ་མ་ཡིན་པ་ཉིད་ཀྱི་ཕྱིར་རོ། །རིམ་གྱིས་ཞེས་པ་སྔར་དབང་པོའི་ཤེས་པ་སྟེ། དེ་ནས་འདྲ་བ་ཉིད་
[76b.3]དུ་ངེས་པར་བྱེད་པའི་ཡིད་རྣམ་པར་རྟོག་པའོ། །དེ་ནས་ཆུ་ལ་སོགས་པ་དང་འདྲ་བའི་དངོས་པོ་དྲན་པའོ། །དེའི་བར་མ་ཆད་པར་དེ་ཁོ་ན་འདིའོ་ཞེས་པའི་འཁྲུལ་པ་ཡིད་ཀྱི་རྣམ་པར་ཤེས་པ་སྤྱི་ལ་དམིགས་པར་འགྱུར་རོ། །དོན་དེ་མེད་པར་ཡང་ཞེས་པ་ཆུ་ལ་སོགས་པར་བརྟགས་པའོ། །དེ་མ་
[76b.4]ཐག་པའི་རྐྱེན་གྱི་ཁྱད་པར་ཁོ་ནས་སྐྱེ་བའི་ཕྱིར་རོ། །ཅི་སྟེ་ཞེས་པ་ལ་སོགས་པའི་ཁྱད་པར་དུ་བྱས་པ་ཁོ་ན་བྱེ་བྲག་ཏུ་བྱས་པ་ལས་ཡང་དག་པར་རྟེན་པས་བཤད་དོ་ཞེས་སྟོན་པར་བྱེད་དོ། །ཡང་ན་གང་གང་གི་ཞེས་པ་ལེགས་པ་ལ་ཡང་སཏ་ཀྱི་སྒྲ་འཇུག་སྟེ། དཔེར་ན་སྐྱེས་བུ་དམ་པ་ཞེས་པ་
[76b.5]བཞིན་ནོ། །དེ་ཐིམ་ཞེས་པ་འདིར་གཞན་ཡང་། ཇི་ལྟར་ཡོད་པའི་དོན་ཅན་གྱི་སཏ་ཀྱི་སྒྲ་དབང་པོའི་དོན་དང་འཁྲུལ་པ་ལས་དབང་པོའི་དོན་རྟོགས་པའི་ཆེད་དུ་མི་ནུས་པ། དེ་ལྟར་ཐིམ་པའི་དོན་ཅན་ཡང་ངོ་། །དེ་ལྟར་ནི་དབང་པོ་གཞན་གྱི་དོན་རྡུལ་ལ་སོགས་པ་རྣམས་ཀྱང་དབང་པོ་ལ་ཐིམ་
[76b.6]པའོ། །སོགས་པའི་སྒྲས་ནི་རྣ་བ་ལ་སོགས་པའི་ཕྲེང་བ་ལ་སོགས་པ་རྣམས་གཟུང་བར་བྱའོ། །མིག་སྨན་ལ་སོགས་པ་རྣམས་ཀྱི་ཡང་ཕན་འདོགས་པ་པོ་ཉིད་ཀྱི་ཕྱིར། ལེགས་པ་ཉིད་ཡོད་དེ། དེའི་ཕྱིར་དེ་དང་ཕྲད་པ་ན་ཡང་མངོན་སུམ་ཉིད་དུ་འགྱུར་རོ། །འོ་ན་གང་ཞིག་དབང་པོ་གང་ལ་
[76b.7]ཐིམ་སྟེ་གཞན་དུ་འཇུག་པ་མེད་པའི་ཕྱིར་ཞེས་པའི་ཚིག་ལས་དབང་པོ་དེ་ཁོ་ནའི་ཚིག་ལས་ཡུལ་གྱི་དངོས་པོ་ཉེ་བར་གཏོགས་པའི་མཚན་ཉིད་ཅན་གྱི་ཐིམ་པ་འདིར་བརྗོད་པར་འདོད་པ་སྟེ། ལེགས་པའི་དོན་ཡང་འདིར་རུང་བ་ཉིད་ཀྱིས་བརྗོད་ལ། རུང་བ་ཉིད་ཀྱང་འདིར་དབང་པོའི་ཡུལ་གྱི་དངོས་པོར་ཁས་
[77a]
[77a.1]བླང་བར་ནུས་པ་ཁོ་ན་སྨྲ་བར་འདོད་པས་སོ། །རྣམ་པ་འདི་ལྟ་བུའི་ཐིམ་པར་བྱེད་པ་ཉིད་ལ་སོགས་པ་ནི་རྡུལ་ལ་སོགས་པ་རྣམས་ལ་ཡོད་པ་མ་ཡིན་ཏེ། དེའི་ཕྱིར་ཅི་ལས་ཐལ་བར་འགྱུར་བ་འདི་ཡིན། འདི་ལས་སཏ་ཀྱི་སྒྲ་ནི་ཡོད་པའི་དོན་ཅན་བཞིན་དུ་ཐིམ་པ་ལ་སོགས་པའི་དོན་
[77a.2]ཅན་ཡང་ཁྱད་པར་རྟོགས་པའི་ཆེད་དུ་མི་ནུས་སོ་ཞེས་བཤད་ཟིན་ཏོ། །གལ་ཏེ་ཡང་རྣམ་པ་འདི་ལྟ་བུར་འདིར་ཐིམ་པ་ལ་སོགས་པར་མངོན་པར་འདོད་ན། དེའི་ཕྱིར་ཕྲད་པའི་སྒྲས་དོན་མེད་དེ། ཡོད་ན་གང་བློ་སྐྱེ་བ་དེ་མངོན་སུམ་མོ་ཞེས་པ་འདི་ཙམ་ཁོ་ནས་ཕྲད་པ་ཡང་ཐོབ་པ་ཉིད་ཀྱི་ཕྱིར་རོ། །དེ་མེད་
[77a.3]པར་རྣམ་པ་འདི་ལྟ་བུའི་ཐིམ་པ་ལ་སོགས་པ་ཁྱོད་ཀྱི་ལུགས་ཀྱིས་སྲིད་པ་མ་ཡིན་པས་སོ། །དེའི་ཕྱིར་ཡང་དག་པར་སྦྱོར་བའི་ཡོད་པ་ནི། ཕན་འདོགས་པ་ཉིད་དང་ལེགས་པ་ཉིད་དུ་འདོད་པར་བྱ་སྟེ། དེ་ལས་ཀྱང་རྡུལ་ལ་སོགས་པ་རྣམས་ལ་ཐལ་བར་འགྱུར་རོ། །སླར་ཡང་འདིར་མི་འདོད་པ་ཅི་
[77a.4]ཡོད། གལ་ཏེ་ཡང་རྡུལ་ལ་སོགས་པ་རྣམས་ཀྱིས། མིག་ལ་སོགས་པའི་དབང་པོ་དང་ཕྲད་པ་ལས། རྡུལ་ལ་སོགས་པའི་ཡུལ་ཅན་གྱི་བློ་ཉེ་བར་སྐྱེད་པ་མ་ཡིན་ན། སྐྱོན་འདི་ཡོད་པ་མ་ཡིན་པ་ཁོ་ན་སྟེ། བློ་སྐྱེ་བ་མངོན་སུམ་མོ་ཞེས་པའི་ཚིག་ལས་སོ། །གང་ཡང་དེ་དང་ཕྲད་པ་ལས་རྣམ་
[77a.5]པར་ཤེས་པ་སྐྱེ་བ་དེ་དེའི་ཡུལ་ཅན་མངོན་སུམ་དུ་འདོད་པ་ཁོ་ནའོ་ཞེ་ན། སྐྱོན་འདི་མེད་དེ། འདིར་རྡུལ་ལ་སོགས་པ་རྣམས་དང་ཕྲད་པ་ལས་དེའི་ཡུལ་ཅན་དབང་པོའི་ཤེས་པ་སྐྱེ་བའི་མངོན་སུམ་ཉིད་དུ་ཐལ་བར་བྱེད་པ་མ་ཡིན་གྱི། འོ་ན་ཅི་ཞེ་ན། མངོན་སུམ་གྱི་ཤེས་པ་སྐྱེ་བའོ། །འདི་སྐད་བཤད་པར་
[77a.6]འགྱུར་ཏེ། གལ་ཏེ་གང་དབང་པོ་ལ་ཐིམ་པའམ་དེ་ལ་ལེགས་པ་དེ་དབང་པོའི་དོན་ཏོ། །རྡུལ་ལ་སོགས་པ་རྣམས་ཀྱང་རྣམ་པ་འདི་ལྟ་བུའོ། །དེས་ན་དེ་དང་ཕྲད་པ་ན་ཡང་མངོན་སུམ་སྟེ་ཤེས་པ་སྐྱེ་བར་འགྱུར་རོ་ཞེས་པའོ། །འདི་ལྟར་འགྱུར་བ་མ་ཡིན་ཏེ་ཞེས་པ་ལ་སོགས་པས་ཡོད་པའི་སྒྲ་དབང་
[77a.7]པོའི་དོན་ཁོ་ན་ལ་གྲགས་ཤིང་། དེ་བྱེ་བྲག་ཏུ་བཤད་པ་ན་དོན་དང་འབྲེལ་པ་ཅན་གྱི་ཁྱད་པར་ཐིམ་པ་ཉིད་ལ་སོགས་པ་ལ་བརྟེན་པའི་ཕྱིར་རོ། །ཇི་ལྟར་བ་ལང་གི་སྒྲ་བ་ལང་གི་རིགས་ཁོ་ན་ལ་སྟེ། གཞན་དང་ཐུན་མོང་མ་ཡིན་པར་འགྲོ་བ་ལ་བརྟེན་ནས་བྱེ་བྲག་ཏུ་བཤད་པ་བཞིན་ཞེས་སྟོན་ཏེ། མི་
[77b]
[77b.1]མཐུན་པ་ཉེ་བར་བཀོད་པ་ཞེས་དཔེ་དང་དཔེ་ཅན་དག་མི་མཐུན་པ་ཉིད་ཀྱི་ཕྱིར་རོ། །གྲགས་པའི་སྟོབས་ཀྱིས་ནི་ཁྱད་པར་ལ་བརྟེན་ནས་བྱེ་བྲག་ཏུ་བཤད་པ་བྱ་ན། ཡོད་པའི་སྒྲ་དབང་པོའི་དོན་ལ་གྲགས་པ་ཡང་མ་ཡིན་ནོ་ཞེས་པ་འདི་ནི་ཡང་དག་པ་མ་ཡིན་ནོ། །དེ་ཡི་བར་ཆད་མེད་ལ་གནོད། །ཅེས་
[77b.2]པ། ཕྲད་པ་ནི་བར་མ་ཆོད་པ་ཉིད་དོ། །གལ་ཏེ་ཞེས་པ་ལ་སོགས་པས་དོན་ཀུན་ཡང་དག་ཕྲད་པའི་སྒྲའི་དོན་གསུངས་སོ། །འོ་ན་ཡང་དག་པར་ཕྲད་པའི་སྒྲས་བྱ་བའི་ཁྱད་པར་ཐོབ་པར་བྱ་བ་མ་ཡིན་ནམ། དེས་ན་སྐྱོན་འདི་ག་ལས་ཡིན་ཞེ་ན། དབང་པོའི་བྱ་བ་ཡང་ཅི་ཡིན། གལ་ཏེ་འཛིན་
[77b.3]པའོ་ཞེ་ན། དེ་ཁོ་ན་རྣམ་པར་ཤེས་པའོ་ཞེས་པས་རྣམ་པར་ཤེས་པ་ཁོ་ན་རྣམ་པར་ཤེས་པ་ལས་སྐྱེའོ་ཞེས་བརྗོད་པར་འགྱུར་ཞིང་། དེ་ཡང་མི་རིགས་ཏེ། མིག་གི་རྣམ་པར་ཤེས་པ་མེད་པར་ཡང་མིག་གི་རྣམ་པར་ཤེས་པ་ཡོད་པར་འགྱུར་བའི་ཕྱིར་རོ། །ཅི་སྟེ་རབ་ཏུ་གསལ་བའོ་ཞེ་ན་མིག་
[77b.4]ཁོ་ན་གཟི་དང་ལྡན་པ་ཉིད་དུ་མངོན་པར་འདོད་པ་ཉིད་ཀྱི་ཕྱིར་དེ་ཁོ་ནའི་རབ་ཏུ་གསལ་བར་འགྱུར་གྱི། གཞན་རྣམས་ཀྱི་ནི་མ་ཡིན་ནོ། །ནམ་མཁའི་རང་བཞིན་རྣ་བ་ཡང་བྱ་བ་མེད་པ་ཉིད་ཀྱི་ཕྱིར་ག་ལས་བྱ་བ་ཡིན། ཕྲད་པ་སྨོས་པ་ཡང་དོན་མེད་པ་སྟེ། གང་གི་ཕྱིར་བློ་སྐྱེ་བ་ལ་བྱེད་པ་རྣམས་ཀྱི་
[77b.5]བྱ་བས་གདོན་མི་ཟ་བར་འབྱུང་བར་འོས་པའི་ཕྱིར་རོ། །འཇིག་རྟེན་ན་ཕྲད་པའི་སྒྲའི་བྱ་བའི་དོན་ཅན་དུ་གྲགས་པ་ཡང་མ་ཡིན་ཞིང་། རབ་ཏུ་གྲགས་པའི་དོན་སྨོས་པ་ཡང་མདོར་ཁས་བླངས་པ་སྟེ། དེས་ན་ཕྱོགས་འདི་ཤིན་ཏུ་མི་རིགས་སོ་ཞེས་པ་ཕྲད་པའི་ཕྱོགས་ཁོ་ན་བརྟེན་པར་བྱ་བའོ། །དེ་
[77b.6]ལས་ཀྱང་ཇི་སྐད་བཤད་པའི་མི་འདོད་པར་ཐལ་བར་འགྱུར་རོ་ཞེས་པའོ། །འགྲེལ་པ་བྱེད་པས་ནི་གང་ཡང་བློ་སྐྱེ་བ་ཞེས་པ་རྒྱན་དང་བཅས་པའི་ངག་བརྗོད་དོ་ཞེས་པ་དེའི་ཕྱིར། འདི་གསུངས་པ། བློ་ཡི་རྒྱུ་ཡི་ཚོགས་པ་ན། །ཞེས་པ་ལ་སོགས་པ་སྟེ། དེ་ཞེས་པ་ཡོན་ཏན་དུ་གྱུར་ཀྱང་བློ་ལ་སྙེག་གི །
[77b.7]ཚོགས་པ་ལ་མ་ཡིན་ཏེ་དེ་ལ་མེད་པའི་བུད་མེད་ཀྱི་རྟགས་ཉེ་བར་བཀོད་པའི་ཕྱིར་དང་འགྲེལ་བར་ཡང་དེ་ལྟར་རྣམ་པར་བཤད་པའི་ཕྱིར་རོ། །འདུས་བྱས་པ་ནི་ཆོས་དང་ཆོས་མ་ཡིན་པ་དག་གམ། བདག་གི་ཡོན་ཏན་ཤེས་པ་ལས་སྐྱེས་པ་ཤེས་པའི་རྒྱུ་སྟེ། འདུས་བྱས་པའི་ཁྱད་པར་གྱིས་ཤེས་པའི་ཁྱད་
[78a]
[78a.1]པར་སྐྱེ་བའི་ཕྱིར་རོ། །གཞན་ཞེས་པ་ལ་སོགས་པས། གང་ཡོད་པ་མ་ཡིན་པ་དེ་མངོན་སུམ་མ་ཡིན་ཏེ། ནམ་མཁའི་མེ་ཏོག་བཞིན་ཚོགས་པ་ལ་སོགས་པ་ལས་ཐ་དད་པའི་རྒྱུ་ཡང་དེ་ལྟ་བུའོ་ཞེས་ཁྱབ་པར་བྱེད་པ་མེད་པ་གསུངས་སོ། །བློ་སྐྱེ་བ་ཞེས་པས་ཡང་ཅི་བྱ་ཞེས་པ་འདིས་
[78a.2]ཀྱང་གང་དོན་མེད་པ་དེ་བྱ་བ་མ་ཡིན་ཏེ། དེ་ལས་གཞན་པའི་དོན་མེད་པ་ཅན་བཞིན། བློ་སྐྱེ་བ་སྨོས་པ་ཡང་དེ་ལྟ་བུའོ་ཞེས་པ་ཁྱབ་པར་བྱེད་པ་འགལ་བའོ། །དེ་ལྟར་འགྱུར་མོད། དེ་མེད་ན་བློ་སྐྱེ་བའི་རྒྱུ་མ་ཡིན་པའི་ཡང་དག་པར་ཕྲད་པ་ཡང་མངོན་སུམ་ཉིད་དུ་འགྱུར་རོ། །དེའི་ཕྱིར་ཡང་དག་པར་ཕྲད་
[78a.3]པའི་ཁྱད་པར་གྱི་དོན་དུ་དེ་བྱའོ་ཞེ་ན། འདི་ན་ཡོད་པ་མ་ཡིན་ཏེ། གང་ཕྱིར་ཕྲད་པ་ནི་བློ་སྐྱེ་བའི་རྒྱུ་མ་ཡིན་པ་ཉིད་སྲིད་པ་མ་ཡིན་ཏེ། འབྲས་བུ་ནི་དེའི་ཡོད་པ་ཉིད་རྗེས་སུ་དཔོག་པས་སོ། །དེ་མེད་ན་དེའི་རྟོགས་པ་ག་ལས་ཡིན། བྱ་བའི་ཁྱད་པར་ཡང་བློའི་འབྲས་བུར་ངེས་པར་བྱ་སྟེ། དེ་ལྟར་ནི་རེ་ཞིག་
[78a.4]དངོས་པོ་གཞན་རྣམས་ཀྱང་རྒྱལ་དཔོག་གི་སློབ་མ་རྣམས་ཀྱིས་བྱ་བས་རྗེས་སུ་དཔག་པར་བྱར་འདོད་དེ། དབང་པོ་ལས་འདས་པ་རྣམས་དབང་པོ་རྣམས་ལྟ་ཅི་སྨོས། ཡང་ཅི་ལྟར་རྣམ་པར་དབྱེ་བ་ཐ་དད་པའི་ཁྱད་པར་ནི་གཞི་མཚུངས་པ་ཅན་དུ་འགྱུར་ཏེ། ཡང་དག་པར་ཕྲད་པ་ན་བློ་སྐྱེ་བ་ཞེས་པའོ། །
[78a.5]ཅི་སྟེ་གཞི་མཐུན་པ་དང་བྲལ་བའི་ཁྱད་པར་སྐྱེས་བུའི་རྒྱལ་པོ་ལྟ་བུ་ཡིན་ན། དེའི་ཚེ་ཡང་དག་པར་ཕྲད་པ་ཁོ་ན་བློ་སྐྱེ་བའི་ཁྱད་པར་དུ་འགྱུར་རོ་ཞེས་པ་འདི་སྙིང་པོ་མེད་པའོ། །གཞན་ཡང་ཞེས་པ་ལ་སོགས་པས། གང་དབང་པོའི་ངོར་འཇུག་པ་མ་ཡིན་ཏེ། མངོན་པར་འདོད་པའི་མངོན་སུམ་མ་ཡིན་
[78a.6]པ་བཞིན། ཇི་སྐད་བཤད་པའི་ཚོགས་པ་ཡང་དེ་ལྟ་བུའོ་ཞེས་པ་ཁྱབ་པར་བྱེད་པ་མི་དམིགས་པ་གསུངས་སོ། །འདུ་བྱེད་ལྡན་ཞེས་པ་འདུ་བྱེད་པ་དང་བཅས་པའོ། །ཡིད་དང་དབང་པོ་ཕྲད་པ་དང་དབང་པོ་དང་དོན་ཕྲད་པ་དབང་པོའི་ངོར་འཇུག་གོ་ཞེས་པ་དེའི་ཕྱིར་དེ་བརྗོད་ཅེས་གསུངས་སོ། །གང་ཡང་
[78a.7]རྟོགས་པ་ཞེས་པ། དེའི་བསམ་པ་ནི། དབང་པོ་དང་ཕྲད་པ་ཁོ་ན་ཤེས་པའི་ཐུན་མོང་མ་ཡིན་པའི་རྒྱུ་སྟེ། དེའི་ཕྱིར་དེ་ཁོ་ན་གང་ལས་བློ་སྐྱེ་བ་ཞེས་པས་འདིར་མིང་ཐམས་ཅད་པའི་རྒྱུ་ཉིད་ཀྱི་མཆོག་ཏུ་སྙེག་པ་སྟེ། དེ་ཡང་དབང་པོའི་ངོར་འཇུག་པའི་ཕྱིར་མངོན་སུམ་དུ་བསྟན་པར་རིགས་སོ་ཞེས་པའོ། །
[78b]
[78b.1]དེ་ཡང་གཉིས་ལ་གནས་པའི་ཕྱིར་རོ་ཞེས་པ་དབང་པོ་དང་དོན་ལ་འཇུག་པ་ཉིད་ཀྱི་ཕྱིར་གཉིས་ལ་གནས་པ་ཉིད་དོ། །དེས་ཀྱང་དབང་པོ་ཁོ་ན་འདིའི་ཐུན་མོང་མ་ཡིན་པའི་རྒྱུ་མ་ཡིན་ནོ་ཞེས་བསྟན་ཏོ། །དེ་ལྟར་ནི་དེ་གཉིས་ལ་གནས་པ་ཉིད་ཀྱི་ཕྱིར། ཇི་ལྟར་དབང་པོ་གཞན་དེའི་རྒྱུ་མ་ཡིན་པ་དེ་ལྟར་ཡུལ་
[78b.2]གཞན་ཡང་སྟེ། ཇི་ལྟར་ཡང་ཡུལ་ནི་དབང་པོ་མ་ཡིན་པ་གཞན་གྱིས་ཀྱང་སྦྱོར་བ་ཡིན་པ་དེ་ལྟར་དབང་པོ་ཡང་ཡུལ་མ་ཡིན་པ་གཞན་གྱིས་ཀྱང་ངོ་ཞེས་པས་བྱེ་བྲག་མེད་དོ། །ཐུན་མོང་མ་ཡིན་པས་ཀྱང་འཇིག་རྟེན་ན་ཐ་སྙད་བྱེད་པ་མཐོང་ཞེས་སྔར་བཤད་ཟིན་ཏོ། །དེའི་ཕྱིར་དབང་པོ་ཁོ་ནས་ཐ་སྙད་དུ་བྱ་བ་
[78b.3]མ་ཡིན་ནོ་ཞེས་གསུངས་པ། འདི་ནི་བརྟག་བྱ་མ་ཡིན་ནོ། །ཞེས་པའོ། །གང་ལས་གང་ངེས་པ་ཞེས་པ་ལ་སོགས་པ་གང་ལས་བློ་སྐྱེ་བ་དེ་མངོན་སུམ་མོ་ཞེས་པ་འདིའི་འདི་བཤད་པའོ། །འདི་སྐད་བརྗོད་པར་འགྱུར་ཏེ། དབང་པོ་ལ་སོགས་པ་ཕྲད་པ་གང་ལས་འདི་བ་ལང་ཁོ་ནའོ་ཞེས་པ་ལ་
[78b.4]སོགས་པ་ངེས་པའི་ཤེས་པ་སྐྱེ་བ་དེ་མངོན་སུམ་མོ་ཞེས་པའོ། །དེ་ཡང་རིགས་པ་མ་ཡིན་ཏེ་ཞེས་པ་རྣམ་པ་འདི་ལྟ་བུའི་ཤེས་པ་ནི་དབང་པོ་ལ་སོགས་པ་ཡང་དག་པར་ཕྲད་པ་ལས་ཡང་དག་པར་འབྱུང་བ་མ་ཡིན་པའི་ཕྱིར་རོ། །ཅི་ལྟར་ཞེ་ན། གསུངས་པ། བ་ལང་ལ་སོགས་སྦྱོར་ལས་ཞེས་པ་ལ་
[78b.5]སོགས་པ་སྟེ། ཡང་གི་སྒྲ་ནི་རྒྱུའི་དོན་ལའོ། །གང་གི་ཕྱིར་བ་ལང་ཉིད་ལ་སོགས་པའི་ཁྱད་པར་དང་འབྲེལ་པ་ལས་དོན་ལ་བ་ལང་ཉིད་ལ་སོགས་པར་ངེས་པར་བྱ་བ་ཡིན་ན། དབང་པོའི་བློ་ལ། ཁྱད་པར་དང་ཁྱད་པར་ཅན་དག་སྦྱོར་བར་ནུས་པ་ཡང་མ་ཡིན་ཏེ། དེའི་ཕྱིར་མཚན་ཉིད་མི་སྲིད་
[78b.6]པའོ་ཞེས་པས་མི་རིགས་སོ། །ཁྱོད་ཀྱི་ལུགས་ཀྱི་ཞེས་པ་གང་གི་ཕྱིར་ཕ་རོལ་པོས་བ་ལང་ཉིད་ལ་སོགས་པ་རྣམས་དང་། དེའི་རྟེན་རྫས་ཀྱང་དངོས་པོ་ཉིད་དུ་ཁས་བླངས་ཏེ། དེའི་ཕྱིར་དེའི་ཡུལ་ཅན་ཉིད་དུ་དབང་པོའི་བློ་དོགས་པར་འགྱུར་རོ། །རྗེས་སུ་མཚམས་སྦྱོར་བ་ལ་ནི་ཁྱད་པར་དང་
[78b.7]ཁྱད་པར་ཅན་དངོས་པོར་གྱུར་པ་དག་ལ་ཡང་དབང་པོའི་བློས་ནུས་པ་མ་ཡིན་ནོ། །དེ་ལྟར་ནི་ཕ་རོལ་པོའི་ལུགས་ཀྱིས་དྲི་གཟུགས་ཅན་གྱི་དབང་པོའི་ཡུལ་དང་རྫས་ཀྱང་ཡིན་པ་དེ་ལྟ་ན་ཡང་དེ་དག་ཕན་ཚུན་རྗེས་སུ་མཚམས་སྦྱོར་བ་ན། དེའི་ནུས་པ་ཁས་བླང་བར་བྱ་བ་མ་ཡིན་ཏེ། དྲི་བཟང་པོ་རྫས་
[79a]
[79a.1]སོ་ཞེས་པ་འདི་གལ་ཏེ་མིག་གི་རྣམ་པར་ཤེས་པ་ཡིན་ན་དྲིའི་ཡུལ་ཅན་མ་ཡིན་ཞིང་། དེ་སྟེ་སྣའི་རྣམ་པར་ཤེས་པ་ཡིན་ན་རྫས་ཀྱི་ཡུལ་ཅན་ཉིད་དུ་མི་འཐད་པའི་ཕྱིར་རོ། །རང་གི་ལུགས་ཀྱིས་ནི་རིགས་དང་རྫས་དག་ཀྱང་ཡོད་པ་མ་ཡིན་པ་ཉིད་ཀྱི་ཕྱིར། ཡོད་པ་མ་
[79a.2]ཡིན་པ་ཀུན་ནས་ལྟ་བའོ་ཞེས་བསྟན་པའི་ཆེད་དུ་ཁྱོད་ཀྱི་ལུགས་ཀྱིས་ཞེས་གསུངས་སོ། །འོ་ན་གཟེགས་ཟན་བརྟག་པར་དོན་འདི། ཡུལ་ལ་ལྟ་དོན་ཅན་ཉིད་ཕྱིར། །ཁྱད་པར་རྣམས་ཀྱིས་མཚམས་སྦྱོར་མིན། །ཞེས་པ་བཤད་ཟིན་པ་ཁོ་ན་སྟེ། དེ་སླར་ཡང་བརྗོད་པ་ཅི་ཞེ་ན། དེ་ཁོ་ན་རང་གིས་
[79a.3]རིག་བྱ་ཞེས་པ་ལ་སོགས་པས་བར་མ་ཆད་པར་ཆད་པར་འགྱུར་བའི་རིགས་པས། ཤིན་ཏུ་གསལ་བར་བྱས་པའི་དོན་དུའོ། །དེ་ལྟར་འགྱུར་མོད། མཚམས་སྦྱོར་བ་མེད་པར་ཡང་ངེས་པར་འགྱུར་རོ་ཞེ་ན་གསུངས་པ་མ་ཡིན་ཞེས་པ་ལ་སོགས་པའོ། །དེའི་ཕྱིར་ཡིད་ལས་བྱུང་བ་ཞེས་པ་སྟེ། གང་གི་
[79a.4]ཕྱིར་དེ་ལྟར་དབང་པོ་ལས་སྐྱེས་པས་སྦྱོར་བ་མ་ཡིན་ནོ་ཞེས་པ་དགོངས་པའོ། །ཐ་མི་དད་པར་ཉེ་བར་འདོགས་པ་སྟེ། ཁྱད་པར་རྗོད་པར་བྱེད་པའི་ངོ་བོ་དང་། ཁྱད་པར་ཅན་བརྗོད་པར་བྱ་བའི་རྟོགས་པའོ། །རྗོད་པར་བྱེད་པ་དང་བརྗོད་པར་བྱ་བ་དག་ལས་ཡང་ཞེས་སྨོས་པ་ནི་དཔེའི་དོན་དུའོ། །གང་
[79a.5]ཐ་མི་དད་པར་ཉེ་བར་འདོགས་པའི་ཤེས་པ་དེ་ཡིད་ཀྱི་ཡིན་ཏེ། རྗོད་པར་བྱེད་པ་དང་བརྗོད་པར་བྱ་བ་ཐ་མི་དད་དུ་ཉེ་བར་འདོགས་པའི་རྟོགས་པ་བཞིན། བ་ལང་ཁོ་ན་འདིའོ་ཞེས་པ་ལ་སོགས་པའི་ཤེས་པ་ཡང་དེ་ལྟ་བུའོ། །རང་བཞིན་ནོ། །ཅིའི་ཕྱིར་ཞེ་ན་ཞེས་པ་ཁྱབ་པ་མི་སྲིད་པར་དྲིས་པའོ། །རང་
[79a.6]གིས་རིག་བྱ་ནི་ཞེས་པ་ལ་སོགས་པས་གཏན་ཚིགས་གསུངས་སོ། །འདི་ཡང་དུ་མའི་ངོ་བོའི་ཆོས་ཅན་ནི་ཞེས་པ་འདིའི་ནང་དུ་བཤད་ཟིན་ཏོ། །ཐུན་མོང་མ་ཡིན་པས་ཞེས་པ། ཐུན་མོང་བ་ནི་འགའ་ཞིག་ཏུ་ཉེ་བར་སྦྱོར་བ་མ་ཡིན་པའི་ཕྱིར་རོ་ཞེས་བཤད་ཟིན་ཏོ། །དེ་འདིས་ནི་ཐ་སྙད་དུ་བྱ་བ་མ་ཡིན་པ་ཁོ་ན་
[79a.7]རང་གི་མཚན་ཉིད་ཡིན་ཞིང་དབང་པོའི་བློའི་ཡུལ་ཏེ། ཐ་སྙད་དུ་བྱ་བ་སྤྱི་ནི་མ་ཡིན་ནོ། །དེའི་ཕྱིར་དེས་ནི་ཐ་དད་མེད་པར་ཡང་ཉེ་བར་གདགས་པ་བྱ་བར་ནུས་པ་མ་ཡིན་ནོ་ཞེས་གསལ་བར་བྱས་སོ། །གང་གང་ཞིག་གི་ཡུལ་མ་ཡིན་པ་དེ་དེས་ཐ་མི་དད་པར་ཉེ་བར་གདགས་པ་བྱ་བར་ནུས་པ་མ་
[79b]
[79b.1]ཡིན་ཏེ། དཔེར་ན་མིག་གི་རྣམ་པར་ཤེས་པ་སྒྲས་བཞིན། བ་ལང་ཉིད་ལ་སོགས་པའི་སྤྱི་ཡང་དབང་པོའི་བློའི་ཡུལ་མ་ཡིན་ནོ། །ཁྱབ་པར་བྱེད་པ་དང་འགལ་བའོ། །དེ་ལས་ཀྱང་འདི་ནི་ཡིད་ཀྱི་ཁོ་ནའོ་ཞེས་གནས་སོ། །ཅི་སྟེ་ཡང་ཞེས་པ་མ་གྲུབ་པ་ཉིད་དུ་དོགས་པར་བྱེད་དེ། རྣམ་
[79b.2]པ་ཐམས་ཅད་ཅེས་པ་ཤེས་བྱ་ཉིད་ལ་སོགས་པའི་རྣམ་པས་ཀྱང་ཞེས་པའི་དོན་ཏེ། དེ་ལས་སྐྱོན་ཅི་ཡོད་ཅེ་ན་གསུངས་པ། རྣམ་ཀུན་ཞེས་པ་ལ་སོགས་པ་སྟེ། རྣམ་ཀུན་དོན་གྱི་རྣམ་ཤེས་ནི། །གནས་ན་སྟེ། རྣམ་པ་ཐམས་ཅད་ཀྱི་དོན་རྟོགས་པ་ལ་འཇུག་བཞིན་པར་གྱུར་པ་ན། མངོན་སུམ་བློར་མི་
[79b.3]འགྱུར་ཞེས་སྦྲེལ་ཏེ། མངོན་སུམ་གྱི་སྒྲའི་བརྗོད་བྱ་མ་ཡིན་པར་འགྱུར་རོ་ཞེས་པའི་དོན་ཏོ། །འདི་ཅི་ལས་ཤེ་ན། གསུངས་པ། མངོན་སུམ་གྱི་སྒྲ་ནི་ཞེས་པ་ལ་སོགས་པ་སྟེ། གང་གི་ཕྱིར་བཤད་འགྲེལ་བྱེད་པ་པོའི་འདོད་པས་མངོན་སུམ་གྱི་སྒྲ་གསུམ་རྣམས་ཁོ་ན་ལ་འཇུག་སྟེ། ཚད་མ་
[79b.4]ལ་ནི་དངོས་སོ་ཞེས་པའོ། །ཕྲད་པ་ལ་ནི་མངོན་སུམ་གྱིས་གཞལ་ཟིན་པ་གཉིས་ཀྱི་ཕྱིར་ཞེས་པ་སྟེ། བྲེས་གཞལ་ཟིན་པ་ལ་ནི་བྲེར་ཉེ་བར་འདོགས་པ་བཞིན་ནོ། །ཤེས་པ་ལ་ཞེས་པ་ནི་འབྲས་བུ་ལའོ། །དབང་པོ་ལ་སོ་སོར་འཇུག་པ་ཞེས་པ་འདིས་ཆོས་མཐུན་པ་ཉིད་ཀྱིས་ཚད་མ་དང་
[79b.5]མཚུངས་པ་ཉིད་ཀྱི་ཕྱིར་མངོན་སུམ་དུ་ཉེ་བར་བཏགས་པར་རིགས་ཏེ། བྲམ་ཟེའི་ཁྱེའུ་ལ་སེང་གེ་ཞེས་པ་བཞིན་ནོ། །གལ་ཏེ་ཡང་ཞེས་པ་ལ་སོགས་པས། རྣམ་ཀུན་དོན་གྱི་རྣམ་ཤེས་ནི། །གནས་པ་ཞེས་པ་འདི་བཤད་དེ། །དེ་ཞེས་པ་ལ་སོགས་པ་ནི། །མངོན་སུམ་བློ་མིན་འགྱུར་ཞེས་པ་འདིའོ། །
[79b.6]དབང་པོའི་ལྟོས་པ་དང་ཞེས་པ། སྤྱིའི་བློ་རྣམས་ནི་འདས་པ་ལ་སོགས་པ་རྣམས་ལ་ཡང་ཡོད་པའི་ཕྱིར་ལོང་བ་ལ་སོགས་པ་རྣམས་ལ་ཡང་ངོ་། །ཐ་མི་དད་པར་ཉེ་བར་འདོགས་པར་ཞུགས་པ་ཞེས་པ་ཐ་དད་མེད་པར་ཉེ་བར་བཏགས་པའི་བློ་རྣམས་ཀྱང་འདི་ལྟ་བུའི་རྣམ་པ་ཅན་རྣམས་ཁོ་ནའོ། །
[79b.7]ཡང་ན་ཡོད་པ་མ་ཡིན་པས་ཀྱང་ཐ་མི་དད་པར་ཉེ་བར་འདོགས་པར་བྱེད་དེ། ཇི་ལྟར་གཙོ་བོའི་རང་བཞིན་གྱི་གྲངས་ཅན་པའི་སྐྱེས་བུ་འདིའོ་ཞེས་པ་ལྟར་རོ། །འདི་ལྟ་བུའི་རྣམ་པ་དབང་པོ་ལ་སོགས་པ་ཕྲད་པ་ལས་སྐྱེས་པའི་ཤེས་པར་འདོད་པ་ཡང་མ་ཡིན་ཏེ། སྤྱི་དབང་པོའི་བློའི་ཡུལ་མ་
[80a]
[80a.1]ཡིན་ནོ་ཞེས་བསྒྲུབས་ཀྱང་ཟིན་ཏོ། །དབང་པོའི་གཞན་དབང་དུ་མ་ཡིན་པར་འགྱུར་རོ་ཞེས་པ་ཤུགས་ལས་མངོན་སུམ་གྱི་སྒྲས་བརྗོད་པར་བྱ་བའི་ངོར་ཞེས་རྟོགས་པར་བྱའོ། །དེ་ལྟར་ནི་མངོན་སུམ་གྱི་སྒྲའི་བརྗོད་པར་བྱ་བ་མ་ཡིན་ཉིད་རྟོགས་པར་བྱས་པ་ཉིད་ཀྱིས་སྐབས་སུ་བྱས་
[80a.2]སོ། །འདི་ནི་འདི་ལྟར་གདོན་མི་ཟ་བར་རྣམ་པར་ཤེས་པར་བྱ་སྟེ། གཞན་དུ་ན་དབང་པོ་ལ་མི་ལྟོས་པ་དང་། དབང་པོའི་གཞན་དབང་དག་ཅེས་པ་འགལ་བར་འགྱུར་རོ། །དེ་འདི་སྐད་བཤད་པར་འགྱུར་ཏེ། ཤེས་པ་སྐྱེ་བ་ན་དབང་པོའི་གཞན་དབང་ཅན་དུ་མངོན་སུམ་དང་ཆོས་མཐུན་པའི་ཕྱིར་མངོན་
[80a.3]སུམ་དུ་ཉེ་བར་བཏགས་པ་ནི་ཡང་ན། མངོན་སུམ་གྱི་མཉན་པ་འཇུག་པའི་རྒྱུ་མཚན་ཏེ། དེ་མེད་ན་དེ་འཇུག་པ་མ་ཡིན་ནོ་ཞེས་པའོ། །རྒྱུ་མཚན་ཅན་གྱི་མཉན་པ་གང་ཡིན་པ་དེའི་རྒྱུ་མཚན་གང་ན་མེད་པ་དེར་དེ་འཇུག་པ་མ་ཡིན་ཏེ། དཔེར་ན་དབྱུག་པ་དང་བྲལ་བའི་སྐྱེས་བུ་ལ་དབྱུག་པ་ཅན་གྱི་
[80a.4]མཉན་པ་བཞིན། ཇི་སྐད་བཤད་པའི་ཤེས་པ་ལ་ཡང་མངོན་སུམ་གྱི་མཉན་པའི་རྒྱུ་མཚན་ཡོད་པ་མ་ཡིན་ནོ་ཞེས་པ་རྒྱུ་མི་དམིགས་པའོ། །རྣམ་པ་ཐམས་ཅད་དུ་ཞེས་པ་ལ་སོགས་པས་སྐྱོན་གཞན་གསུངས་སོ། །ཡོན་ཏན་ཉིད་ལ་སོགས་པ་སྤྱིའི་ཆོས་རྣམས་ནི་གཟུགས་དང་སྒྲ་ལ་སོགས་པ་ཐམས་ཅད་དུ་ཡོད་པའི་
[80a.5]ཕྱིར་ན། ཇི་ལྟར་མིག་གིས་གཟུང་བར་བྱ་བ་ཉིད་ཡིན་པ་དེ་ལྟར་རྣ་བ་ལ་སོགས་པ་རྣམས་ཀྱིས་ཀྱང་ངོ་ཞེས་པས་དབང་པོ་གཞན་གྱི་ཡུལ་ལ་ཡང་དབང་པོ་གཞན་འཇུག་གོ། །དེའི་ཕྱིར་དབང་པོ་དུ་མ་བརྟག་པ་དོན་མེད་པ་ཉིད་དུ་འགྱུར་རོ། །འབྲས་བུ་གཞན་པ་འཐོབ་མ་ཡིན། །རྟོགས་པ་ནི་ཤེས་པའི་འབྲས་
[80a.6]བུ་ཡིན་པ་སྟེ། དེ་གལ་ཏེ་ཚད་མ་ཡིན་ན་འབྲས་བུ་གཞན་པ་མེད་དོ། །ཉམས་པ་ཉེ་བར་བླང་བྱ་ལ་ལྟོས་པའི་བློ་རྣམས་འབྲས་བུའོ་ཞེས་བརྟགས་པར་རིགས་པ་ཡང་མ་ཡིན་ཏེ། ཆུ་ལ་སོགས་པ་དྲན་པས་བར་དུ་ཆོད་པའི་ཕྱིར་རོ། །བར་དུ་ཆོད་པ་དང་བར་དུ་ཆོད་པ་མ་ཡིན་པ་དག་ལས་ཀྱང་བར་དུ་མ་ཆོད་
[80a.7]པ་ཁོ་ན་འབྲས་བུར་གཟུང་བར་བྱའོ། །ཡུལ་ཐ་དད་པ་ཉིད་ཀྱི་ཕྱིར་ཡང་འབྲས་བུར་དེ་རྣམས་མི་རིགས་ཏེ། གང་ཕྱིར་མངོན་སུམ་ནི་གཟུགས་ལ་སོགས་པ་རང་གི་མཚན་ཉིད་ཀྱི་ཡུལ་ཅན་ཡིན་ལ། དེ་རྣམས་ནི་འདེགས་པ་ལ་སོགས་པ་བྱ་བའི་ཡུལ་ཅན་རྣམས་སོ། །བློ་ཡི་ཡང་ཞེས་པ་ལ་སོགས་
[80b]
[80b.1]པ་སྟེ། བློ་སྐྱེ་བ་མདོར་མངོན་སུམ་དུ་བཤད་ལ། དེ་ཡང་བློ་ལས་གཞན་ནམ་གཞན་མ་ཡིན་པ་གཅིག་ཏུ་འགྱུར། དེ་ལ་གལ་ཏེ་གཞན་དུ་འདོད་ན། དེ་ཁོ་ན་ཚད་མར་འགྱུར་རོ། །སྐྱེ་བ་ཡང་ཀ་ཎ་བྷུ་ཛཱ་ནི་བདག་ལ་རང་གི་རྒྱུ་ལ་བློའི་འདུ་བ་སྟེ། ཡང་ན་ཡོད་པ་ཉིད་དང་ཡོན་ཏན་ཉིད་དང་བློ་ཉིད་འདུ་
[80b.2]བ་སྟེ་ཤེས་པ་འབྲས་བུ་ལའོ། །དཔྱོད་པ་རྣམས་ཀྱིས་ཀྱང་དེའི་ལུགས་ཁོ་ན་ལ་བརྟེན་ཏོ། །དེ་ཡང་གང་གི་ཕྱིར་བཤད་འགྲེལ་བྱེད་པའི་ལུགས་ཀྱིས་འདུ་བ་མངོན་སུམ་དུ་ཐོབ་ཅིང་། དེ་མངོན་སུམ་ཉིད་དུ་རིགས་པ་མ་ཡིན་ཏེ། དོན་ལ་འཁྲུལ་པའི་ཕྱིར་རོ། །དེ་ལྟར་ནི་རྟག་པ་ཉིད་ཀྱི་ཕྱིར་དོན་མེད་ན་ཡང་
[80b.3]དེ་ཡོད་པས་སོ། །གང་དོན་ལ་འཁྲུལ་པ་དེ་མངོན་སུམ་མ་ཡིན་ཏེ། ལོག་པའི་ཤེས་པ་བཞིན། འདུ་བ་ཡང་དེ་ལྟ་བུའོ། །འགལ་བས་ཁྱབ་པའོ། །ཅི་སྟེ་འགྲེལ་པ་བྱེད་པའི་འདོད་པས་གང་ལས་བློ་སྐྱེ་བ་དེ་མངོན་སུམ་ཡིན་པ། དེ་ལྟ་ན་ཡང་རྟག་པ་ཉིད་ཀྱི་ཕྱིར་འདུ་བ་ནི་འགའ་ཞིག་ལས་
[80b.4]ཀྱང་སྐྱེ་བ་མ་ཡིན་ནོ་ཞེས་པས་ཡུལ་མེད་པའི་མཚན་ཉིད་དོ། །དེའི་ཕྱིར་གཉི་ག་ལྟར་ན་ཡང་ནི་གལ་ཏེ་མདོ་བྱེད་པ་པོའི་འདོད་པས་ཡིན་ན་དང་། གལ་ཏེ་འགྲེལ་པ་བྱེད་པ་པོའི་འདོད་པས་ཡིན་ནའོ། །ཡང་ན་གལ་ཏེ་རང་གི་རྒྱུ་ལ་འབྲས་བུ་འདུ་བ་བློ་སྐྱེ་བར་འདོད་ན་དང་། གལ་ཏེ་ཡོད་པ་ཉིད་
[80b.5]ལ་སོགས་པ་རྣམས་འབྲས་བུ་ཤེས་པ་ལ་འདུ་བ་ཡིན་ན་སྟེ། གཉིས་ཀ་ལྟར་ན་ཡང་མངོན་སུམ་ཉིད་དུ་རིགས་པ་མ་ཡིན་ནོ། །ཅི་སྟེ་ཞེས་པ་ལ་སོགས་པ་སྟེ། གཞན་མ་ཡིན་པ་ཉིད་ན། བློ་ཁོ་ན་སྐྱེ་བའོ་ཞེས་པས་སྐྱེ་བ་སྨོས་པ་ལུགས་གཉིས་ཀ་ལ་ཡང་དོན་མེད་པའོ། །འོ་ན་སྐྱེ་བ་སྨོས་པའི་དགོས་པ་སྐྱེ་བཞིན་
[80b.6]པའི་གནས་སྐབས་ཀྱི་བློ་ཁོ་ན་ཚད་མ་ཉིད་དུ་ཤེས་པར་བྱ་བའི་དོན་དུའོ་ཞེས་བཤད་ཟིན་པ་མ་ཡིན་ནམ་ཞེ་ན། དེ་མི་རིགས་པར་བཤད་ཟིན་ཏོ། །དེ་ལྟར་ནི་སྐད་ཅིག་པ་ཉིད་ཀྱིས་ཕྱི་མའི་དུས་སུ་གནས་པ་མེད་པའི་ཕྱིར། བློ་སྐྱེ་བཞིན་པ་ཁོ་ན་ཚད་མ་ཉིད་ཡིན་གྱི་ཉེ་བར་དམིགས་པ་མ་ཡིན་ནོ་ཞེས་བཤད་དོ། །དེའི་
[80b.7]ཚེ་ཡང་བློ་མེད་པའི་ཕྱིར་ཚད་མ་ཉིད་མེད་པའོ་ཞེས་པས་སྐྱེ་བ་སྨོས་པས་ཅི་ཞིག །ཅི་སྟེ་སྐྱེ་བ་ལས་དུས་ཕྱིས་བློ་ཡོད་ན། དེ་ལྟ་ན་ཡང་ཁྱད་པར་མེད་པའི་ཕྱིར་དེ་ལས་སྔར་ཡང་། དེ་ཡིན་ན་དེའི་ཚེ་ཡང་ཚད་མ་ཉིད་བཟློག་པར་བྱ་བ་མ་ཡིན་ནོ་ཞེས་པས་སྐྱེ་བ་སྨོས་པས་ཅི་ཞིག །བློས་ཁྱད་པར་དུ་བྱས་པའི་སྐྱེ་
[81a]
[81a.1]བ་ནི་དབང་པོའི་ངོར་མི་འཇུག་པའི་ཕྱིར་དང་སྔར་བཤད་པའི་རྒྱུའི་ཕྱིར་མངོན་སུམ་ཉིད་མེད་དོ། །མུ་སྟེགས་པ་ཐམས་ཅད་བདག་རབ་ཏུ་འཇལ་བར་བྱེད་པ་པོར་འདོད་དེ། དེའི་ཕྱིར་བཟློག་པའི་ཆེད་དུ་གསུངས་པ། བློ་སྐྱེ་ལ་ཞེས་པ་ལ་སོགས་པའོ། །ཅི་འདི་ཁོ་ནར་རྣམ་པར་དཔྱོད་
[81a.2]པར་བྱེད་ཅེ་ན། རྣམ་པར་དཔྱད་པ་རྩོམ་པས་ན་རྩོད་པ་འདི་ག་ལ་འཇུག །གཞན་ཡང་འདིར་མཚན་ཉིད་ཀྱི་ངག་ལ་སྐྱེས་བུའི་ཞེས་པའི་ཚིག་གི་ཕྱིར་བདག་གི་དབང་དུ་བྱས་པའོ་ཞེས་པས་འདི་ཁོ་ནར་རྣམ་པར་དཔྱད་པར་རིགས་སོ། །སྔར་གྱི་གནས་སྐབས་ལས་རྣམ་པར་འགྱུར་ཏེ་ཞེས་པ། རབ་ཏུ་འཇལ་
[81a.3]བ་པོ་མ་ཡིན་པའི་གནས་སྐབས་ཉེ་བར་བཅོམ་པ་ཞེས་པའི་དོན་ཏོ། །དེ་ལྟར་གྱུར་ན་མི་རྟག་པར་ཞེས་པ། གང་རྣམ་པར་འགྱུར་བ་ཅན་དེ་མི་རྟག་པར་ཡིན་ཏེ། བུམ་པ་བཞིན། བདག་ཀྱང་དེ་ལྟ་བུའོ། །རང་བཞིན་གྱི་ཐལ་བའོ། །ཅི་སྟེ་མི་འགྱུར་ན་ཞེས་པ་ལ་སོགས་པས་གང་གང་གི་ཚེ་རབ་ཏུ་
[81a.4]འཇལ་བར་བྱེད་པ་པོ་མ་ཡིན་པའི་གནས་སྐབས་ལས་ཁྱད་པར་མེད་པ་དེ་དེའི་ཚེ་རབ་ཏུ་འཇལ་བ་པོ་མ་ཡིན་ཏེ། དཔེར་ན་སྔར་གྱི་སྐྱེས་བུ་དེ་ཁོ་ན་བཞིན། དེ་ཡང་བློ་སྐྱེད་པ་ན་ཡང་ཇི་སྐད་བཤད་པ་ཡིན་ནོ་ཞེས་པ་འགལ་བར་ཁྱབ་པའི་ཐལ་འགྱུར་གསུངས་སོ། །འདི་ཁོ་ནས་ཚང་མ་བརྟག་པ་བཟློག་
[81a.5]པའི་ཆེད་དུ། ཚད་མར་གྱུར་པ་ཞེས་པ་འདིར་གང་གྱུར་པ་སྨོས་པ་དེར་རིགས་པ་གསལ་བར་བྱས་སོ། །འཆད་པར་འགྱུར་བའི་གཏན་ཚིགས་ཀྱི་ཁྱབ་པ་སྒྲུབ་པ་ན་ཡང་ངོ་འདི་ལྟར་ཚིགས་སུ་བཅད་པ་བཀླག་པར་བྱ་སྟེ། གལ་ཏེ་དངོས་པོ་དོན་བྱ་བའི། །དུས་ན་འགྱུར་ན་མི་རྟག་ཉིད། །གལ་
[81a.6]ཏེ་དེ་མེད་དེ་དངོས་མིན། །ནུས་པ་ཐམས་ཅད་སྤངས་པའོ། །ཞེས་པའོ། །ཡོངས་སུ་བཅད་པ་དང་པོའོ། །མངོན་སུམ་དང་རྗེས་སུ་དཔག་པའི་ཚད་མ་གཉིས་དག་ཁོ་ནའོ་ཞེས་བཤད་ཟིན་ཏོ།། །།དེ་ལ་མངོན་སུམ་བཤད་ཟིན་ཏེ། ད་ནི་སྐབས་སུ་བབ་པ་རྗེས་སུ་དཔག་པ་རྣམ་པར་བཤད་པར་བྱ་
[81a.7]བའི་ཆེད་དུ་གསུངས་པ། རྗེས་དཔག་རྣམ་གཉིས་ཞེས་པ་ལ་སོགས་པ་སྟེ། དྲང་དོན་ནི་གང་གིས་རང་ཉིད་ཀྱིས་རྟོགས་པར་བྱེད་པའོ། །གཞན་གྱི་དོན་ནི་གང་གིས་གཞན་གྱིས་རྟོགས་སུ་འཇུག་པའོ། །འོ་ན་གཞན་དོན་གྱི་མཚན་ཉིད་ལོགས་སུ་བརྗོད་བྱ་མ་ཡིན་པ་ཁོ་ནའོ། །གང་ཕྱིར་གོ་
[81b]
[81b.1]བར་བྱེད་པའི་མཚན་ཉིད་བསྒྲུབ་པ་ཁོ་ནས། རྟོགས་པར་འདོད་པ་པོའི་ཚིག་གི་རིམ་པ་བསྟན་པ་ཁོ་ནའི་ཕྱིར་ཏེ། རྣམ་པ་གཞན་དུ་མངོན་པར་བརྗོད་ན་གོ་བར་བྱེད་པའི་ཆོས་རབ་ཏུ་གསལ་བར་མི་བྱེད་པའི་ཕྱིར་རོ། །གང་དོན་འདི་ཇི་ལྟ་བ་བཞིན་རིག་ཅིང་ཚིག་ཤེས་པ་དེ་རྣམས་ནི་དེ་རྟོགས་པར་བྱེད་པ་ན་
[81b.2]སླར་ཉེ་བར་བསྟན་པ་གཞན་ལ་ལྟོས་པ་མ་ཡིན་ནོ་ཞེ་ན། འདི་བདེན་མོད། དེ་ལྟ་ན་ཡང་བྱིས་པས་རྟོགས་པར་བྱ་བའི་དོན་དུ་འདི་བརྩམས་སོ། །དངོས་པོ་ཇི་ལྟ་བཞིན་རྟོགས་པ་རྣམས་ཀྱང་རྣམ་པ་གཞན་དུ་བརྗོད་པ་མཐོང་བས་ཏེ། མེད་ན་མི་འབྱུང་བ་ཉེ་བར་མཁོ་བ་ཡང་མི་བརྗོད་པའི་ཕྱིར་དང་།
[81b.3]ཉེ་བར་མི་མཁོ་བ་ཡང་བསྒྲུབ་པར་བྱ་བ་དང་། ཉེ་བར་གཏོད་པ་དང་མཇུག་བསྡུ་བ་རྣམས་སྦྱོར་བའི་ཕྱིར་རོ། །ཚུལ་གསུམ་ལས་ཞེས་པ་རྒྱུ་ལ་ལྔ་པ་སྟེ། བརྡུངས་པ་ལས་སྒྲ་ཞེས་པ་བཞིན་ནོ། །ཡང་ན་ལག་པ་ཕྱིས་པ་སྟེ། འདི་ལྟར་ཁང་བཟངས་ལ་འཛེགས་ནས་ལྟ་བ་ནི་ཁང་བཟངས་ལ་ལྟ་
[81b.4]བ་ཡིན་པ་དེ་ལྟར་ཚུལ་གསུམ་པའི་རྟགས་མཐོང་ནས་དོན་མཐོང་བ་ནི་ཚུལ་གསུམ་རྟགས་ལས་དོན་མཐོང་བའོ་ཞེས་པའོ། །འོ་ན་ཚུལ་གསུམ་པ་སྨོས་པ་དོན་མེད་དེ། ཚུལ་གསུམ་པ་མ་ཡིན་པ་ནི་རྟགས་མ་ཡིན་པ་ཉིད་ཀྱི་ཕྱིར་རོ། །གཞན་ཡང་མི་གསལ་བའི་དོན་འདིས་རྟགས་སུ་རྟོགས་
[81b.5]པར་བྱེད་པས་རྟགས་ཏེ། དེ་ཡང་ཚུལ་གསུམ་པ་མེད་པར་སྲིད་པ་མ་ཡིན་ནོ། །འདི་ལས་ཀྱང་རྟོགས་ཟིན་པའི་དོན་ཅན་ཉིད་ཀྱི་ཕྱིར་ཚུལ་གསུམ་པ་ལས་ཞེས་པ་བརྗོད་པར་མི་བྱའོ་ཞེ་ན། འདི་ནི་སྐྱོན་མ་ཡིན་ཏེ། ཚུལ་གསུམ་པ་མ་ཡིན་པ་ཡང་འགའ་ཞིག་རྟགས་སུ་འདོད་དེ། དེས་ན་དེའི་ལོག་
[81b.6]པར་རྟོགས་པ་བཟློག་པའི་ཆེད་དུ་ཚུལ་གསུམ་པ་སྨོས་སོ། །དེ་ལ་འཛེམ་མེད་པས་སྨྲས་པ། གང་ཞིག་གི་རྣམ་པ་གཞན་དུ་མི་འཐད་པ་ཉིད་འདི་གཏན་ཚིགས་སུ་འདོད་དེ། མཚན་ཉིད་གཅིག་པ་ཅན་ཁོ་ན་ཡིན་པ་དེ་ནི་དོན་མཚན་ཉིད་བཞི་ཅན་ཁོ་ནའོ་ཞེས་ཏེ། རྣམ་པ་གཞན་དུ་ཞེས་པ་བསྒྲུབ་པར་བྱ་བ་མེད་པར་
[81b.7]ཞེས་པའི་དོན་ཏོ། །མི་འཐད་པ་ཉིད་ནི། རབ་ཏུ་ནུས་པ་མེད་པ་མི་སྲིད་པའོ། །འོ་ན་འདི་མེད་ན་མི་འབྱུང་བ་ཁོ་ནར་འགྱུར་རོ་ཞེ་ན། མ་ཡིན་ནོ་ཞེས་འཛེམ་མེད་པ་སྟེ། མེད་ན་མི་འབྱུང་བ་ཉིད་ནི་བསྒྲུབ་པར་བྱ་བ་ལས་ཕྱི་རོལ་དུ་འདོད་ལ། རྣམ་པ་གཞན་དུ་མི་འཐད་པ་ཉིད་ནི་ཆོས་ཅན་ཁོ་ན་ལ་བསྒྲུབ་
[82a]
[82a.1]པར་བྱ་བའོ་ཞེས་པའོ། །ཚིགས་སུ་བཅད་པ་ཡང་སྨྲས་པ། དཔེ་ལ་བསྒྲུབ་བྱ་མེད་པ་ལས། །རྟགས་ཉིད་མ་མཐོང་གཞན་གྱིས་འདོད། །བདག་གིས་འདི་ནི་མེད་པར་ཡང་། །ཆོས་ཅན་ལ་ནི་མི་སྲིད་པའོ། །ཞེས་སོ། །འདི་ཡང་ཚུལ་གཅིག་ཁོ་ནའོ། །ཡང་ན་
[82a.2]ཚུལ་གསུམ་པ་ཉིད་ཡོད་ན། གཞན་དུ་མི་འཐད་པ་ཉིད་ཚུལ་བཞི་པར་འདོད་པར་བྱའོ། །ཚུལ་གསུམ་པ་ཉིད་ཙམ་ལ་ནི། ཡུལ་གཞན་དུ་སོང་བ་དེ་སྔོ་བསངས་ཡིན་ཏེ། ནག་པོའི་བུ་ཉིད་ཀྱི་ཕྱིར་ཞེས་པ་འདི་ཡང་རྟགས་ཉིད་དུ་འགྱུར་རོ་ཞེའོ། །དེ་ལ་གང་མེད་ན་མི་འབྱུང་བ་ཉིད་ནི་ཕ་
[82a.3]རོལ་པོ་རྣམས་ཀྱིས་བསྒྲུབ་པར་བྱ་བ་ལས་ཕྱི་རོལ་དུ་འདོད་དོ་ཞེས་བརྗོད་པ་འདི་སྒྲོ་བཏགས་པ་སྟེ། ཐམས་ཅད་ཉེ་བར་བསྡུས་པས་གང་དང་གང་ན་སྒྲུབ་པར་བྱེད་པའི་ཆོས་ཡོད་པ་དེ་དང་དེ་ན་བསྒྲུབ་པར་བྱ་བའི་ཆོས་སོ་ཞེས་པ་ཁྱབ་པ་འདི་ནི་མེད་ན་མི་འབྱུང་བ་ཉིད་ཡིན་པས་སོ། །དེའི་ཕྱིར་
[82a.4]བསྒྲུབ་པར་བྱ་བ་ལ་ཡང་དེ་འདོད་པ་ཁོ་ནའོ། །གལ་ཏེ་བསྒྲུབ་པར་བྱ་བའི་ཆོས་ཅན་ཁོ་ན་ལ་གང་བསྒྲུབ་པར་བྱ་བའི་ཆོས་དང་མེད་ན་མི་འབྱུང་བ་དེ་གཏན་ཚིགས་སུ་འདོད་ན། དེ་ལྟར་གྱུར་ན་གང་ཞིག་ཕྱི་རོལ་དུ་ཡང་བསྒྲུབ་པར་བྱ་བ་དང་མེད་ན་མི་འབྱུང་བ་དེ་གཏན་ཚིགས་ཉིད་དུ་མི་འགྱུར་ཞིང་།
[82a.5]འཁྲུལ་པ་ཅན་ཡང་གཏན་ཚིགས་སུ་འགྱུར་ཏེ། དེ་ལ་ཡང་ཆོས་ཅན་ལ་གཞན་དུ་མི་འཐད་པ་ཉིད་སྲིད་པའི་ཕྱིར་རོ། །དེའི་ཕྱིར་འདི་མི་རིགས་སོ། །དེ་ཉིད་ཀྱི་ཕྱིར་འདི་མི་རིགས་པ་ཉིད་ཀྱི་ཕྱིར་གཏན་ཚིགས་མཚན་ཉིད་བཞི་པ་ཅན་འཐད་པ་མ་ཡིན་ནོ། །གང་ཡང་ཚུལ་གསུམ་པ་ཉིད་ཙམ་
[82a.6]ལ་ནི་དེ་སྔོ་བསངས་ཡིན་ཏེ། ནག་པོའི་བུ་ཉིད་ཀྱི་ཕྱིར་རོ་ཞེས་པ་འདི་ཡང་གཏན་ཚིགས་ཉིད་དུ་འགྱུར་རོ་ཞེས་བརྗོད་པ་དེ་མི་རིགས་ཏེ། རང་བཞིན་དང་འབྲས་བུ་དང་མི་དམིགས་པའི་ཁྱད་པར་རྣམས་ཁོ་ན་ལ་ཚུལ་གསུམ་པ་ཉིད་འཐད་ཀྱི། གཞན་རྣམས་ལ་མ་ཡིན་ནོ། །འདི་དེ་རྣམས་ཀྱི་ནང་དུ་
[82a.7]འདུ་བ་ཡང་མ་ཡིན་ན། དེ་ཅི་ལས་ཐལ་བར་འགྱུར་བ་འདི་ཡིན། གཞན་ནི་རྟགས་ཚུལ་གཉིས་པའོ་ཞེས་བསྟན་པའི་ཆེད་དུ་སྨྲས་པ། ཤེས་པ་མ་ཟིན་པའི་ཆོས་ཅན་གྱི་ཆོས་ཤིག་ཆོས་ལ་ཡོད་པ་ཁོ་ན་གང་དུ་ཤེས་པར་བྱ་བ་དང་ཤེས་སུ་གཞུག་པར་བྱ་བ་འདི་ནི་གཏན་ཚིགས་ཏེ། སྒྲུབ་པ་དང་
[82b]
[82b.1]དགག་པ་དང་ལྡན་པའོ་ཞེས་སོ། །ཤེས་མ་ཟིན་པའི་ཆོས་ནི་ཤེས་འདོད་ཅན་ཏེ་མི་རྟག་པ་ཉིད་ལ་སོགས་པའོ། །ཆོས་ཅན་གྱི་སྒྲ་ནི་ལ་སོགས་པའིའོ། །གང་དུ་ཤེས་པར་བྱ་བ་ནི་བྱས་པ་ཉིད་ལ་སོགས་པའི་ཆོས་ལའོ། །ཤེས་ཟིན་པ་ཉིད་ནི་ནུས་པ་ཐོབ་པར་བྱ་བའོ། །ཡོད་པ་ཁོ་ན་ཞེས་པ་རབ་
[82b.2]ཏུ་འཇལ་བ་པོས་བུམ་པ་ལ་སོགས་པ་རྣམས་ལ་རང་ཉིད་དྲན་པའོ། །གཞན་གྱིས་དྲན་པ་ཡང་ན་སྟེ་གཞན་དོན་རྗེས་སུ་དཔག་པ་ལའོ། །ཡོད་པ་ཁོ་ན་དང་མེད་པ་མ་ཡིན་པ་ཞེས་པ་འདི་དག་སྒྲུབ་པ་དང་དགག་པ་དག་སྟེ། དེ་གང་ལ་ཡོད་པ་དེ་ནི་སྒྲུབ་པ་དང་དགག་པ་དང་ལྡན་པ་སྟེ་གཏན་ཚིགས་སོ། །
[82b.3]འདི་ནི་ཆོས་ཅན་གྱི་ཆོས་ཉིད་དང་། ཡོད་པ་བསྒྲུབ་བྱའི་ཆོས་ཉིད་ཅེས་པ་འདི་ཚུལ་གཉིས་ཉིད་དུ་བརྗོད་དོ། །འདི་ལ་བསྒྲུབ་པར་བྱ་བའི་ཆོས་གང་ན་ཡོད་པ་དེ་ཁོ་ན་སྟེ་མེད་པ་མ་ཡིན་པ་ཞེས་སྨྲས་པས་ནི་རྗེས་སུ་འགྲོ་བ་དང་ལྡོག་པ་དང་ལྡན་པ་ཉིད་དེ་ཁོ་ན་བརྗོད་པར་འགྱུར་ཏེ། གང་གི་ཕྱིར་དེ་ལྟར་དེ་དེ་ན་ཡོད་
[82b.4]པ་ཁོ་ནར་འགྱུར་ཞིང་གལ་ཏེ་དེ་མེད་ན་གཏན་ཚིགས་མི་འགྱུར་བ་ཁོ་ན་ཡིན་པའི་ཕྱིར་རོ། །དེ་ལས་ཀྱང་ཚུལ་གསུམ་པ་ཁོ་ན་རྣམ་པ་གཞན་གྱིས་བརྗོད་པའོ་ཞེས་པས་གཏན་ཚིགས་ཚུལ་གཉིས་པ་མ་ཡིན་ནོ། །གཏན་ཚིགས་མཚན་ཉིད་དྲུག་པའོ་ཞེས་གཞན་རྣམས་ཏེ། གསུམ་པོ་འདི་རྣམས་དང་
[82b.5]གནོད་པ་མེད་པའི་ཡུལ་ཅན་ཉིད་དང་། བརྗོད་པར་འདོད་པའི་གྲངས་གཅིག་པ་ཅན་ཉིད་དང་། ཤེས་ཟིན་པ་ཉིད་ཅེའོ། །དེ་ལ་རེ་ཞིག་གནོད་པ་མེད་པའི་ཡུལ་ཅན་ནི་ཚུལ་གཞན་མ་ཡིན་ཏེ། གནོད་པ་དང་མེད་ན་མི་འབྱུང་བ་དག་འགལ་བའི་ཕྱིར་རོ། །མེད་ན་མི་འབྱུང་བ་ནི་གཏན་ཚིགས་བསྒྲུབ་
[82b.6]པར་བྱ་བའི་ཆོས་ཡོད་པ་ཁོ་ན་ལ་ཡོད་པ་ཡིན་ན། ཅི་ལྟར་དེའི་མཚན་ཉིད་ཅན་གྱི་གཏན་ཚིགས་དེ་ཆོས་ཅན་ལ་འགྱུར་ཞིང་། འདི་ལ་བསྒྲུབ་པར་བྱ་བའི་ཆོས་མེད་པར་ཡང་འགྱུར། དེས་ན་གནོད་པ་དང་མེད་ན་མི་འབྱུང་བ་དག་ལྷན་ཅིག་འབྱུང་བ་མ་ཡིན་ནོ། །དེས་ན་གནོད་པ་མེད་པའི་
[82b.7]ཡུལ་ཅན་ཉིད་ཚུལ་གཞན་མ་ཡིན་ནོ། །རྣམ་པར་གཅད་པར་བྱ་བ་མེད་པའི་ཕྱིར་བརྗོད་པར་འདོད་པའི་གྲངས་གཅིག་པ་ཉིད་ཀྱང་མཚན་ཉིད་གཞན་ཉིད་དུ་བརྗོད་པར་བྱ་བ་མ་ཡིན་ནོ། །དེ་ནི་འགལ་བ་མི་འཁྲུལ་པ་ཅན་གཏན་ཚིགས་ཉིད་དུ་ཐལ་བར་འགྱུར་བ་བཟློག་པའི་དོན་དུ་བརྗོད་པར་བྱ་སྟེ།
[83a]
[83a.1]རང་གི་མཚན་ཉིད་དང་ལྡན་པའི་གཏན་ཚིགས་དག་གིས་གཅིག་ལ་འགལ་བ་དག་ཉེ་བར་བསྡུས་པ་ན། འགལ་བ་མི་འཁྲུལ་བ་ཅན་ཉིད་དུ་འགྱུར་རོ། །ཇི་སྐད་བཤད་པའི་མཚན་ཉིད་ཅན་འབྲས་བུ་དང་རང་བཞིན་དང་མི་དམིགས་པ་རྣམས་ལ་ནི་འགལ་ཟླ་ཅན་གྱི་གཏན་
[83a.2]ཚིགས་སྲིད་པ་མ་ཡིན་ནོ། །ཅི་ལྟར་ན་གཅིག་པོ་རང་གི་བསྒྲུབ་པར་བྱ་བ་ཡོད་པ་ཁོ་ན་ལ་ཡོད་པའི་ཕྱིར་དེ་དང་འཁྲུལ་པ་མེད་པ་ཅན་ཡིན་ཞིང་། དེ་ཉིད་ལ་ཡང་གཞན་དེ་ལ་གནོད་པར་བྱེད་པ་ཡོད་པ་ཁོ་ན་ཡང་ཡོད་པའི་ཕྱིར་དེ་དང་འགལ་བ་སྲིད་པར་འགྱུར། གཞན་ཡང་གཏན་ཚིགས་དེ་གལ་
[83a.3]ཏེ་རང་བཞིན་ཁོ་ནས་ཆོས་དེ་ཡོད་པ་ཅན་ཡིན་ན་དེའི་ཚེ་དོན་གཞན་ཉེ་བར་ལྷུང་ན་ཡང་ཅི་ལྟར་རྣམ་པ་གཞན་དུ་འགྱུར། དངོས་པོ་རྣམས་ཀྱི་རང་བཞིན་རྣམ་པ་གཞན་དུ་འགྱུར་བ་དང་འགལ་བ་གཉིས་ཀྱི་རང་བཞིན་ཡང་སྲིད་པ་མ་ཡིན་ནོ། །ཅི་སྟེ་རང་བཞིན་གྱིས་ཆོས་དེ་ཡོད་པ་ཅན་མ་ཡིན་ན། དེ་ལྟར་
[83a.4]གྱུར་ན་གཞན་གྱི་དུས་ན་ཡང་འགའ་ཞིག་གི་ཡང་སྒྲུབ་པར་བྱེད་པར་མི་འགྱུར་རོ། །དེའི་ཕྱིར་རང་བཞིན་ཁོ་ནས་རང་གི་བསྒྲུབ་པར་བྱ་བ་དེ་མེད་ན་མི་འབྱུང་བ་ཅན་ཇི་སྐད་བཤད་པའི་མཚན་ཉིད་ཅན་གྱི་གཏན་ཚིགས་ལ་ནི་དེའི་མཚན་ཉིད་ཅན་གྱི་འགལ་ཟླའི་གཏན་ཚིགས་སྲིད་པ་མ་ཡིན་ནོ་ཞེས་པས་བརྗོད་
[83a.5]པ་འདོད་པའི་གྲངས་གཅིག་པ་ཅན་ནི་མཚན་ཉིད་མ་ཡིན་ནོ། །འགལ་བ་མི་འཁྲུལ་བ་མི་བརྗོད་པར་ཐལ་ལོ་ཞེ་ན། དངོས་པོའི་སྟོབས་ཀྱིས་ཞུགས་པའི་རྟགས་ལ་མི་འདོད་པ་ཉིད་ཀྱི་ཕྱིར་སྐྱོན་མེད་དེ། འདིའི་ཡུལ་ཡང་ཕ་རོལ་དུ་ཤེས་པར་བྱེད་པར་འགྱུར་རོ། །ཡང་ཤེས་པ་རྟགས་ཀྱི་ཆོས་མ་ཡིན་ན་
[83a.6]ཅི་ལྟར་རྟགས་ཀྱི་མཚན་ཉིད་ཡིན། རྟགས་ངོ་བོ་ཅི་ལྟ་བུ་ལས་དོན་རྟོགས་པར་བྱ་ཞེས་སེམས་ན། རྟོགས་པ་པོའི་མི་བསླུ་བ་ཉིད་ནི་ཚུལ་དུ་བརྗོད་པར་བྱ་ལ། གང་མཐོང་བ་ལས་འདི་སྒྲུབ་པར་བྱེད་པ་དང་སྒྲུབ་པར་བྱེད་པ་མ་ཡིན་པ་དག་རབ་ཏུ་རྣམ་པར་ཕྱེ་ནས་དེའི་འདོད་པའི་དོན་སྒྲུབ་པར་བྱེད་པར་ཡིད་
[83a.7]ཆེས་པ་ལས་རབ་ཏུ་འཇུག་གོ། །དེ་ལ་གང་རྟགས་འདིའི་བདག་ཉིད་ཀྱི་ངོ་བོ་དེ་མཚན་ཉིད་དེ། གཞན་གྱི་ངོ་བོ་མ་ཡིན་ནོ། །རྟོགས་པ་སྐྱེ་བ་ལ་ཉེ་བར་སྦྱོར་བ་ཙམ་ལས་དེའི་མཚན་ཉིད་ཡིན་ན་ཧ་ཅང་ཐལ་བར་འགྱུར་བའི་ཕྱིར་རོ། །དེ་ལྟར་ན་ནི་གཞལ་བར་བྱ་བ་དང་སྐྱེས་བུ་ལ་སོགས་པ་རྣམས་ཀྱང་
[83b]
[83b.1]དེའི་མཚན་ཉིད་དུ་འགྱུར་ཏེ། དེ་རྣམས་མེད་ན་ཡང་རྟགས་ཅན་ལ་ཤེས་པ་སྐྱེ་བ་མ་ཡིན་པའི་ཕྱིར་རོ། །དེའི་ཕྱིར་ཤེས་པ་ཡང་རྟགས་ཀྱི་མཚན་ཉིད་དུ་འདོད་པར་བྱ་བ་མ་ཡིན་ནོ་ཞེས་པས་རྟགས་ཚུལ་གསུམ་པའོ་ཞེས་གནས་སོ། །འབྲས་བུ་སྔར་བཞིན་ཞེས་པ། ཇི་ལྟར་མངོན་སུམ་ལ་འབྲས་བུ་རྣམ་པ་
[83b.2]གཉིས་བཤད་དེ། ཡུལ་ཡང་དག་པར་རིག་པ་དང་རང་ཉིད་ཡང་དག་པར་རིག་པའོ། །དེ་ལྟར་འདིར་ཡང་ངོ་། །མངོན་སུམ་བཞིན་དུ་རྗེས་སུ་དཔག་པའི་རྟོགས་པའི་བདག་ཉིད་ཀྱི་འབྲས་ཐ་མི་དད་པའོ་ཞེས་སྨྲས་པས་རྗེས་སུ་དཔག་པ་ཡང་རྟོགས་པའི་རང་བཞིན་ནོ་ཞེས་བཤད་པར་འགྱུར་རོ། །
[83b.3]དེའི་ཕྱིར་དྲི་བ། གལ་ཏེ་གཉིས་ཀ་ཡང་ཞེས་པ་ལ་སོགས་པའོ། །ཡུལ་དང་ནི། ངོ་བོ་མཚུངས་མིན་འདི་དག་གིའོ། །ཞེས་པའོ། །འདིའི་སྒྲ་ནི་ངེས་པར་འཛིན་པའི་དོན་ཏོ། །འདི་ཁོ་ན་གཉིས་པོ་མི་མཚུངས་ཀྱི་རྟོགས་པའི་ངོ་བོ་ཉིད་ནི་མཚུངས་པའོ་ཞེས་པའོ། །འོ་ན་རྟོགས་པ་ནི་དེ་དག་གི་
[83b.4]ངོ་བོ་སྟེ། དེ་གལ་ཏེ་ཐ་མི་དད་པ་ཡིན་ན་ངོ་བོ་གཞན་པ་ཅི་སྟེ། གང་། ངོ་བོ་མཚུངས་མིན་འདི་དག་གི །ཞེས་བརྗོད་པ་ཅི་ཞེ་ན། གང་དེའི་ཡུལ་དང་འདྲ་བ་ཚད་མར་རྣམ་པར་གཞག་པ་དེ་མི་མཚུངས་སོ་ཞེས་བརྗོད་དེ། དེ་ལྟར་ནི་དེ་མངོན་སུམ་གྱི་གསལ་བ་སྟེ། རྗེས་སུ་དཔག་པའི་ནི་མི་གསལ་བའོ། །
[83b.5]ཡུལ་ནི་ཞེས་པ་ལ་སོགས་པ་ལ། ཡུལ་གྱི་སྒྲས་ནི་འདིར་དམིགས་པ་བརྗོད་པར་འདོད་པས་ཏེ། ཚད་མ་ཉིད་ཀྱི་ཡུལ་ནི་མ་ཡིན་ནོ། །རྗེས་སུ་དཔག་པ་ཡང་མི་བསླུ་བའི་མཚན་ཉིད་ཅན་ཚད་མ་ཉིད་དེ་དངོས་པོའི་ཡུལ་ཅན་ཁོ་ནའོ། །དེའི་ཕྱིར་དམིགས་པ་ཐ་དད་པས་ཚད་མ་དག་ཡུལ་ཐ་དད་པར་གསུངས་
[83b.6]སོ། །དམིགས་པ་ཐ་དད་པ་ཡང་ཅི་ལྟར་ཞེ་ན། སོ་སོར་སྣང་བ་ཐ་དད་པ་ཉིད་ཀྱི་ཕྱིར་རོ། །གཅིག་ལ་མཚན་ཉིད་མི་མཐུན་པའི་རྣམ་པ་དེ་དག་རིགས་པ་ནི་མ་ཡིན་པའི་ཕྱིར་རོ། །ཐ་དད་ཅེས་པ་ཡང་ཐ་མི་དད་པ་བཀག་པ་ཁོ་ནར་བལྟ་བར་བྱའི། །ཡུལ་སྣ་ཚོགས་པ་ཉིད་ནི་མ་ཡིན་ཏེ། རྗེས་སུ་དཔག་པའི་རྣམ་
[83b.7]པར་རྟོག་པ་ནི་ཡུལ་མེད་པ་ཅན་ཉིད་ཀྱི་ཕྱིར་རོ། །དེ་ཡང་རྗེས་སུ་དཔག་པའི་ཡུལ་གང་དུ་འདོད་པ་དེ་ནི་དེ་ཁོ་ན་ཉིད་དུ་ན་ཡོངས་སུ་མ་གྲུབ་པ་ཉིད་ཀྱི་ཕྱིར་རོ། །དེའི་རྣམ་པའི་བྱེ་བྲག་ལས་ཀྱང་ཞེས་པ་ལ། དེའི་ཞེས་པ་མངོན་སུམ་དང་རྗེས་སུ་དཔག་པ་དག་གི་ཡུལ་ལ་སྙེག་གོ། །དེའི་རྣམ་པ་ནི་རང་བཞིན་ཏེ།
[84a]
[84a.1]རྣམ་པར་བྱ་ཞིང་ཡོངས་སུ་གཅད་པར་བྱའོ་ཞེས་བྱས་ནས་སོ། །དེའི་རྣམ་པའི་བྱེ་བྲག་སྟེ། ཐ་དད་པའོ་ཞེས་པའོ་ཞེས་པའི་དོན་ཏེ། བྱེ་བྲག་སྨོས་པ་ཡང་བྱེ་བྲག་མེད་པ་དགག་པ་རྟོགས་པར་བྱེད་པ་ལྷུར་ལེན་པར་རིག་པར་བྱའི་སྣ་ཚོགས་པའི་རང་བཞིན་ཉིད་འདིས། རྟོགས་པར་བྱ་བ་
[84a.2]ནི་མ་ཡིན་ཏེ། ཕྱི་ནི་རྣམ་པར་བརྟགས་པ་ཉིད་ཀྱིས་མེད་པ་ཉིད་ཀྱི་ཕྱིར་རོ། །དེས་འདི་གསལ་བར་བྱས་པར་འགྱུར་ཏེ། གང་གི་ཕྱིར་མངོན་སུམ་ལ་ཕྱི་རོལ་གྱི་ཡུལ་ཡོད་དེ། གང་ལས་དེའི་ཡུལ་གྱི་སྣང་བ་གསལ་བར་འགྱུར་ལ་རྗེས་སུ་དཔག་པའི་ནི་མ་ཡིན་ནོ། །གང་དེའི་ཡུལ་གྱི་རྣམ་པ་མི་
[84a.3]གསལ་བ་དེ་ནི་རང་གི་ས་བོན་གྱི་སྟོབས་ཁོ་ན་ལས་སྐྱེ་སྟེ། དེའི་ཕྱིར་མངོན་སུམ་དང་རྗེས་སུ་དཔག་པ་དག་གི་ཇི་སྐད་བཤད་པ་ལྟར་ངོ་བོ་ཐ་དད་པའོ། །ཡང་ན་མངོན་སུམ་གྱི་གཞལ་བར་བྱ་བ་ནི་རང་གི་མཚན་ཉིད་དངོས་སུ་གསལ་བར་སྣང་བའི་རང་གི་རྣམ་པ་སྐྱེད་པར་བྱེད་པ་སྟེ་རང་གི་ངོ་བོས་སོ། །རྗེས་སུ་
[84a.4]དཔག་པའི་ནི་དེ་ཁོ་ན་བརྒྱུད་པས། མི་གསལ་བའི་ཡུལ་གྱི་རྣམ་པར་སྐྱེད་པར་བྱེད་པ་སྟེ་གཞན་གྱི་ངོ་བོས་གཞལ་བར་བྱའོ། །མངོན་སུམ་གྱི་ཡང་གཞན་གྱི་ངོ་བོས་སོ་ཞེས་ཁ་ཅིག་གོ། །དེ་ལྟར་གང་གི་ཕྱིར་མངོན་སུམ་དང་རྗེས་སུ་དཔག་པ་དག་གི་ཡུལ་ཐ་དད་པ་དེའི་ཕྱིར། རང་བཞིན་གྱི་བྱེ་བྲག་
[84a.5]ལས། གསལ་བ་དང་མི་གསལ་བའི་ཡུལ་གྱི་རྣམ་པ་ཉིད་ཀྱིས་ན་རང་གི་ངོ་བོ་ཡང་ཐ་དད་པའོ་ཞེས་པའོ། །ཅི་སྟེ་ཅིའི་ཕྱིར་ཞེས་པ་རྒྱུ་ཅི་ཡིས་རྗེས་སུ་དཔག་པ་ཁོ་ན་རང་གི་དོན་དང་གཞན་གྱི་དབྱེ་བས་ན་རྣམ་པ་གཉིས་སུ་འབྱེད་ཀྱི། མངོན་སུམ་ནི་མ་ཡིན་ནོ་ཞེས་ངེས་པར་འཛིན་པ་སྟོན་པར་བྱེད་དོ། །
[84a.6]འདི་སྐད་བཤད་པར་འགྱུར་ཏེ། རང་གིས་མངོན་སུམ་དུ་བྱས་པའི་དོན་གཞན་གྱིས་རྟོགས་པར་བྱ་བའི་ཆེད་དུ་ཚིག་གང་ཡིན་པ་དེ་གཉིས་པ་གཞན་གྱི་དོན་གྱིས་མངོན་སུམ་དུ་ཅིའི་ཕྱིར་མི་འདོད་ཅེས་པའོ། །གང་གི་ཕྱིར་ཞེས་པ་ལ་སོགས་པ་སྟེ། རྗེས་སུ་དཔག་པའི་ཡུལ་ནི་སྤྱི་ཡིན་པས་ཏེ།
[84a.7]དེ་ལ་ཡང་བདག་ཉིད་ལ་རྗེས་སུ་དཔག་པ་ཅི་འདྲ་བ་དེ་འདྲ་བ་ཁོ་ན་ཕ་རོལ་པོའི་རྒྱུད་ལ་ཚིག་གིས་བྱེད་དོ་ཞེས་པས་དེ་རྣམ་པ་གཉིས་ཉིད་དུ་རིགས་སོ། །མངོན་སུམ་གྱི་ཡུལ་ནི་རང་གི་མཚན་ཉིད་དེ་དེ་ལ་བདག་ཉིད་ཀྱི་མངོན་སུམ་གྱི་ཤེས་པ་ཅི་འདྲ་བ་དེ་ལྟ་བུ་སྒྲས་རྒྱུད་གཞན་ལ་སྐྱེད་པར་ནུས་པ་མ་
[84b]
[84b.1]ཡིན་ཏེ། དེ་ནི་བསྟན་བྱ་མིན་པ་ཉིད་ཀྱི་ཕྱིར་རོ། །གཞན་དུ་ན་ལོང་བ་ལ་སོགས་པ་རྣམས་ལ་ཡང་སྒྲ་ལས་རྣམ་པ་དེ་ལྟ་བུ་ཁོ་ནའི་གསལ་བར་སྣང་བའི་ཤེས་པར་འགྱུར་རོ། །ཅིའི་ཕྱིར་དེ་བསྟན་པར་བྱ་བ་མ་ཡིན་ཞེ་ན། གསུངས་པ། གཟུང་ཐ་དད་ཕྱིར་ཞེས་པའོ། །གང་ཕྱིར་
[84b.2]མངོན་སུམ་གྱི་གཟུང་བར་བྱ་བ་ནི་ཐུན་མོང་མ་ཡིན་པ་སྟེ། དེ་ངེས་པར་བསྟན་པར་ནུས་པ་ཡང་མ་ཡིན་ཏེ། དེ་སྔར་མ་མཐོང་བ་ཉིད་ཀྱི་ཕྱིར་རོ། །རྗེས་སུ་དཔག་པའི་ནི་དེ་ལས་བཟློག་པ་སྟེ། དེའི་ཕྱིར་དེ་ཁོ་ནའི་གཟུང་བྱ་ངེས་པར་བསྟན་པར་བྱ་བ་ཡིན་གྱི་མངོན་སུམ་གྱི་ནི་མ་ཡིན་ནོ། །
[84b.3]རང་གི་བདག་ཉིད་བཞིན་དུ་ཞེས་པ་འདིས་འདི་གསལ་བར་བྱེད་དེ། མངོན་སུམ་དང་རྗེས་སུ་དཔག་པ་དག་གི་རང་གི་ངོ་བོ་ཐ་དད་པ་སྟེ། འདི་ནི་ཐམས་ཅད་ཀྱི་སོ་སོ་རང་གིས་རིག་པར་བྱ་བའོ། །ཡུལ་ཐ་དད་པ་མེད་པ་ཉིད་ལ་རང་གི་ཡུལ་གྱི་རྣམ་པའི་རྗེས་སུ་བྱེད་པ་དག་གི་དེ་སྐྱེ་བ་ཡང་མ་ཡིན་
[84b.4]ནོ། །དེའི་ཕྱིར་ཇི་ལྟར་དེ་དག་གི་རང་གི་ངོ་བོ་ཐ་དད་པ་དེ་ལྟར་ཡུལ་ཐ་དད་པར་ཡང་བལྟ་བར་བྱའོ། །དེའི་ཕྱིར་མངོན་སུམ་གྱི་ཡུལ་ནི་ངེས་པར་བསྟན་པར་བྱ་བ་རྗེས་སུ་དཔག་པའི་ལྟ་བུ་མ་ཡིན་ནོ་ཞེས་པའོ། །གཞན་རྣམས་ན་རེ་སྡེབ་སྦྱོར་ཉམས་པའི་འཇིགས་པ་ལས་འདིར་གང་ཕྱིས་བརྗོད་པར་
[84b.5]བྱ་བ་དེ་སྔར་བརྗོད་པས་ཏེ། དེའི་ཕྱིར་གཞུང་འདི་འདི་ལྟར་ཤེས་པར་བྱའོ། །ཅིའི་ཕྱིར་རྗེས་སུ་དཔག་པ་ཁོ་ན་རྣམ་པ་གཉིས་སུ་འབྱེད་ཀྱི་མངོན་སུམ་ནི་མ་ཡིན་ཞེས་དྲིས་པ་ལ་རྒྱུ་གསུངས་པ། གཟུང་ཐ་དད་ཕྱིར་ཞེས་པ་ལ་སོགས་པའོ། །གལ་ཏེ་གཟུང་བར་བྱ་བ་ཐ་དད་པས་རྗེས་སུ་དཔག་པ་
[84b.6]རྣམ་པ་གཉིས་སུ་འབྱེད་ན་དེ་ལྟར་གྱུར་ན་མངོན་སུམ་ཡང་རྣམ་པ་གཉིས་སུ་དབྱེ་བར་བྱའོ་ཞེ་ན། གསུངས་པ། རང་གི་མཚན་ཉིད་བསྟན་བྱ་མིན། །ཞེས་པའོ། །འདི་སྐད་བཤད་པར་འགྱུར་ཏེ། །འདི་འདྲ་བ་འདི་མངོན་སུམ་དང་རྗེས་སུ་དཔག་པ་དག་གི་གཟུང་བར་བྱ་བར་འདོད་དེ། གང་དུ་
[84b.7]གཅིག་ནི་ངེས་པར་བསྟན་བྱ་ཡིན་ལ། གཞན་ངེས་པར་བསྟན་བྱ་མ་ཡིན་པའོ་ཞེས་པའོ། །དེའི་ཕྱིར་རྗེས་སུ་དཔག་པ་ཁོ་ན་རྣམ་པ་གཉིས་སུ་འབྱེད་དེ། གང་གི་ཡུལ་ཚིག་གིས་ཕ་རོལ་པོ་ལ་རྟོགས་པར་ནུས་པའོ། །མངོན་སུམ་ནི་མ་ཡིན་ནོ་ཞེས་པའོ། །འོ་ན། དོན་དང་ནི། ངོ་བོ་མཚུངས་མིན་འདི་
[85a]
[85a.1]དག་གི །ཞེས་པ་འདིས་སྔར་ཁོ་ནར་ཚད་མ་དག་གི་ཡུལ་གྱི་དབྱེ་བ་བསྒྲུབས་ཟིན་པ་མ་ཡིན་ནམ། དེ་ཐ་དད་པ་ལས་ཀྱང་རང་གི་ངོ་བོ་ཐ་དད་པ་སྟེ། དེས་ན་འདི་ཉེ་བར་བཀོད་པ་ཅི་ཡིན་ཏེ། མངོན་སུམ་དང་རྗེས་སུ་དཔག་པ་དག་གི་རང་གི་བདག་ཉིད་བཞིན་དུ་གཟུང་བྱ་ཐ་དད་པའོ་ཞེས་པ་ལ་
[85a.2]སོགས་པའོ་ཞེ་ན། སྔ་མ་ནི་དོན་གཞན་ལ་དོན་འདི་བརྗོད་པ་སྟེ། ད་ལྟ་ནི་དོན་གཞན་ལའོ་ཞེས་པ་སྐྱོན་མེད་དོ། །གལ་ཏེ་ཡང་ཞེས་པ་ལ་སོགས་པས་རང་གི་མཚན་ཉིད་བསྟན་བྱ་མ་ཡིན་པ་ཉིད་སྒྲུབ་པར་བྱེད་དོ། །དེ་སྒྲ་དེ་ཁོ་ནས་རྗེས་སུ་དཔག་པར་བྱ་བར་འགྱུར་རོ་ཞེས་པ་མངོན་སུམ་གྱི་གཟུང་བར་བྱ་བའི་དོན་དེ་
[85a.3]སྒྲ་དེ་ལས་རྟོགས་པར་འགྱུར་རོ་ཞེས་པའི་དོན་ཏེ། དེ་ལྟར་ཡང་མ་ཡིན་ནོ། །ལོང་བ་ལ་སོགས་པས་ཀྱང་མངོན་སུམ་ཁོ་ནས་དེའི་དོན་མཐོང་བར་གྱུར་ན་མི་རུང་ངོ་ཞེས་པའོ། །ཕ་རོལ་པོ་ནི་བླུན་པོ་ལས་སྐྱོན་འདི་མ་རྟོགས་པས། རང་གིས་ཁས་བླངས་པའི་ཚད་མ་ཡུལ་གཅིག་པ་ཉིད་མཐོང་བ་རྗེས་སུ་སྒྲུབ་
[85a.4]ཅེས་པ་བསྟན་བཅོས་སུའོ། །མིང་ལས་ཤེས་ཕྱིར་རྣམ་པ་གཞན། །བསྟན་བྱ་ཞེས་པ་ལ་སོགས་པ་སྟེ། རང་གི་མཚན་ཉིད་ཀྱི་རྣམ་པ་ལས་གཞན་སྤྱིའི་རྣམ་པའོ། །དེས་བསྟན་པར་བྱ་བ་སྟེ། རང་གི་མཚན་ཉིད་དུ་ནི་མ་ཡིན་ནོ། །དེའི་མིང་ནི་སྔོན་པོའོ་ཞེས་པའི་འདུ་ཤེས་འདི་ཡིན་ཞིང་། དེ་ཡང་
[85a.5]རྣམ་པར་ཤེས་པར་བྱེད་ཀྱི། དོན་རང་གི་མཚན་ཉིད་འབའ་ཞིག་པ་ནི་མ་ཡིན་ནོ། །དེའི་ཕྱིར་བསྟན་བཅོས་སུ་ཡིད་ནི་རྣམ་པ་གཉིས་སུ་འདོད་དེ། སྔོན་པོ་མ་ཡིན་པ་ལས་ལོག་པས་ཞེས་པ་རྣམ་པ་གཞན་དེ་སྟོན་ཏེ། ཐ་སྙད་བྱེད་པ་པོ་རྣམས་ཀྱི་མངོན་པར་བསམ་པའི་ངོ་ལས་སྔོན་པོ་མ་ཡིན་པ་ལས་ལོག་པས་
[85a.6]ཞེས་བརྗོད་དོ། །དེ་རྣམས་ནི་དེ་ཁོ་ན་ཉིད་དུ་ལྷག་པར་ཞེན་པས་ཐ་སྙད་དུ་བྱེད་དོ་ཞེས་པ་འདི་བརྗོད་དེ། གཞན་དུ་ན་ཕན་ཚུན་རྣམ་པར་འཇོམས་པ་ཅན་དུ་འདི་འགྱུར་རོ། །དེ་ལྟར་ནི་གལ་ཏེ་རྣམ་པ་གཞན་གྱིས་ཡིད་ཉེ་བར་སྟོན་ན། དེའི་ཚེ་དེས་མིག་གི་རྣམ་པར་ཤེས་པ་ཉམས་སུ་མྱོང་བ་ཁོ་ན་ངེས་པར་
[85a.7]བསྟན་པར་འགྱུར་བ་མ་ཡིན་ཞིང་། ཅི་སྟེ་རང་གི་མཚན་ཉིད་དེ་ཁོ་ན་ངེས་པར་སྟོན་ན། མིང་ནི་རྣམ་པ་གཞན་གྱིས་མ་ཡིན་ནོ་ཞེས་པའོ། །སྤྱི་མ་ཡིན་ལའང་ཞེས་པའི་ཡང་གི་སྒྲ་ལས་སྤྱི་ལས་ཡང་སྟེ་མི་རྟག་པ་ལ་སོགས་པ་ལའོ། །རླུང་ལ་སོགས་པའི་རང་བཞིན་ཞེས་པ། སོགས་པའི་སྒྲས་
[85b]
[85b.1]ནམ་མཁའ་ལ་སོགས་པ་རྣམས་མངོན་སུམ་མ་ཡིན་པ་རྣམས་གཟུང་ངོ་། །ཇི་སྐད་དུ་སྨྲས་པ་ཞེས་པ་གཟེགས་ཟན་གྱིས་སོ། །མདོ་འདིའི་འབྲེལ་པ་ནི། ས་དང་ཆུ་དང་མེ་བཞིན་དུ་འཛིན་པ་མེད་པའི་ཕྱིར་ན་རེག་པ་ཙམ་རླུང་ངོ་ཞེས་ཕ་རོལ་པོས་བརྗོད་པ་ན། དེ་ཡོངས་སུ་སྤང་བའི་ཆེད་དུ་སྨྲས་པ། མ་
[85b.2]མཐོང་བ་ཡང་རྟགས་ལས་ཡང་དག་པར་རྟོགས་པར་བྱེད་པར་འགྱུར་རོ། །ཡང་དེའི་རྟགས་ཅི་ཞེ་ན། དེ་ལྟར་བརྗོད་པར་བྱ་སྟེ་རེག་བྱ་ཡང་མཐོང་བ་རྣམས་ཀྱི་ཡང་རེག་བྱ་མ་ཡིན་ནོ་ཞེས་དེ་མ་མཐོང་བའི་རྟགས་ཅན་རླུང་ངོ་། །རེག་བྱ་ཡང་གྲང་བ་དང་དྲོ་བའི་ཁྱད་པར་དང་བྲལ་བ་ཡང་དག་པར་
[85b.3]ཉེ་བར་དམིགས་སོ། །ཡང་གི་སྒྲ་ལས་སྒྲ་དང་འཛིན་དང་གཡོ་བ་རྣམས་ཀྱང་ངོ་། །ཤིང་མེད་པའི་ཡུལ་རྣམས་སུ་ཀ་ཤུ་ཀཱའི་སྒྲ་ཉེ་བར་དམིགས་ཤིང་རྩྭ་ལ་སོགས་པ་རྣམས་ཀྱི་བསྟན་པ་སྟེ། དེ་རྣམས་ནི་རྫས་གཞན་གྱི་གེགས་མེད་ན། ལྕི་བ་ཉིད་ཀྱི་ཕྱིར་ལྷུང་བར་འགྱུར་ཞིང་། ནམ་མཁའ་
[85b.4]ལ་གནས་པ་ཡང་མཚོན་ཏེ། འཁྲི་ཤིང་ལ་སོགས་པ་རྣམས་ཀྱི་གཡོ་བའོ། །འདི་ནི་མཐོང་བ་ལ་སོགས་པ་རྣམས་ཀྱི་ཡང་མ་ཡིན་ཞིང་། ཡང་གི་སྒྲ་ལས་མ་མཐོང་བ་ནམ་མཁའ་ལ་སོགས་པ་རྣམས་ཀྱི་ཡང་མ་ཡིན་ནོ། །དེའི་ཕྱིར་མཐོང་བ་དང་མ་མཐོང་བ་རྣམས་ལ་མ་མཐོང་བ་ཉིད་ཀྱི་ཕྱིར་རོ། །
[85b.5]རེག་བྱའི་ཁྱད་པར་ནི་མ་མཐོང་བ་སྟེ། དེ་འདིའི་རྟགས་སོ་ཞེས་པས་མ་མཐོང་བའི་རྟགས་ཅན་རླུང་ངོ་། །འདི་ནི་སྔར་མཐོང་བར་འགྱུར་བ་ཡང་མ་ཡིན་ཏེ། དེ་ཐོག་མར་རེག་བྱའི་ཁྱད་པར་གྱིས་འཛིན་པའི་ཕྱིར་རོ་ཞེས་པ་སྤྱིའི་སྤྱོད་ཡུལ་ཅན་མ་ཡིན་པའི་རྗེས་སུ་དཔག་པར་འགྱུར་རོ། །མ་ཡིན་ཏེ་སྤྱི་གསལ་
[85b.6]བྱེད་ཕྱིར་ཞེས་པ་ལ། དེ་ཞེས་པའི་སྒྲས་རེག་བྱ་ཁོ་ན་དང་འབྲེལ་ཏེ། རླུང་ནི་མ་ཡིན་ནོ། །དེ་ཁོ་ནའི་ཕྱིར་གསུངས་པ། དེ་ནི་རླུང་ལ་སོགས་པ་རྣམས་ལ་མ་ཡིན་ཞེས་པ་ལ་སོགས་པ་སྟེ། རེག་བྱའི་སྤྱི་བརྟེན་པ་ཉིད་ནི་ཡོན་ཏན་ཉིད་ཀྱིས་གསལ་བར་བྱ་བ་སྟེ། གང་ཡོན་ཏན་ཡིན་པ་དེ་བརྟེན་པ་སྟེ། དྲི་
[85b.7]བཞིན། རེག་བྱ་ཡང་ཡོན་ཏན་ནོ། །རེག་པ་ཉིད་སྟོན་ཅིང་ཁོ་བོ་འདི་ན་ཞེས་འོ་ན་ཡང་ཞེས་པ་ལ་སོགས་པས་གསལ་བར་བྱེད་དོ། །རེག་པ་ནི་མངོན་སུམ་གྱི་དོན་ཏེ། དེ་ཁོ་ན་ཡང་གཟུགས་ཀྱིས་རྗེས་སུ་དཔག་པར་བྱའོ་ཞེས་སེམས་སོ། །རེས་འགའ་ཞེས་པ་གང་གི་ཚེ་རེག་བྱ་དབང་པོས་རེག་པར་
[86a]
[86a.1]བྱ་བ་མ་ཡིན་པ་དེའི་ཚེ་ཞེས་པའི་དོན་ཏོ། །ཇི་ལྟར་མངོན་སུམ་བཞིན་མ་ཡིན་ནོ་ཞེས་པ་སྟེ། མངོན་སུམ་ནི་ཁྱད་པར་གཞན་དུ་ཞེན་པས་དབེན་པར་གནས་པའི་ངོ་བོ་ཁོ་ནས་རེག་པ་ཡོངས་སུ་གཅོད་པར་བྱེད་ལ། རྗེས་སུ་དཔག་པས་ནི་དྲན་པས་དྲངས་པའི་སྔ་མ་རྗེས་སུ་མཚམས་
[86a.2]སྦྱོར་བ་ལས་ཏེ། དེ་འདི་དག་གིས་སྔར་ཁོ་བོ་འདི་དང་ལྷན་ཅིག་སྔར་ཉེ་བར་དམིགས་སོ་ཞེས་རེག་པའི་སྤྱི་རེག་པ་མ་ཡིན་པ་ལས་ལོག་པའོ། །དཔེར་ན་ཞེས་པ་སྔར་མཐོང་བ་རྗེས་སུ་མཚམས་སྦྱོར་བ་ལ་དཔེ་གསུངས་པ་སྟེ། ཇི་ལྟར་གཟུགས་ནི་མངོན་སུམ་གྱིས་གཟུང་བ་ཁོ་ནའོ་ཞེས་པས་རང་གི་
[86a.3]མཚན་ཉིད་ཀྱི་རྣམ་པས་རྟགས་སུ་འགྱུར་བ་མ་ཡིན་ཏེ། ཁྱད་པར་རྗེས་སུ་འགྲོ་བ་མེད་པའི་ཕྱིར་ལ། འོན་ཀྱང་སྤྱིའི་རྣམ་པ་ཁོ་ནས་སྔར་མཐོང་བ་རྗེས་སུ་བསྡུས་པས་ཏེ། དེ་ལྟར་རེག་བྱ་ཡང་སྔར་མངོན་སུམ་གྱིས་བཟུང་ངོ་ཞེས་པ་ཁོ་ནས་རང་གི་མཚན་ཉིད་རྗེས་སུ་དཔག་པར་བྱ་བ་མ་ཡིན་གྱི། འོན་ཀྱང་
[86a.4]རྗེས་སུ་སྤྱིའི་རྣམ་པ་ཁོ་ནས་རྗེས་སུ་དཔག་པར་རུང་བས་སོ་ཞེས་སྟོན་ཏེ། ཇི་ལྟར་མཐོང་བ་ལ་སོགས་པའི་ཐ་སྙད་ཡིན་ཞེ་ན་ཞེས་པ། གལ་ཏེ་ཇི་ལྟར་ཉམས་སུ་མྱོང་བ་ལྟར་སྨྲ་བ་དེ་ལྟ་བུའི་ཐ་སྙད་རྣམས་ནི་འཕགས་པ་རྣམས་སྦྱོར་བར་བྱེད་ལ། ཁྱོད་ཀྱི་ལུགས་ཀྱིས་ནི་རང་གི་མཚན་ཉིད་ཉེ་བར་དམིགས་ནས་
[86a.5]གཞན་ཁོ་ན་རྗོད་པར་བྱེད་པ་རྣམས་ཀྱི་ཐ་སྙད་རྣམས་འཕགས་པ་མ་ཡིན་པར་འགྱུར་རོ། །དེ་ལས་ཀྱང་ཁས་བླངས་པ་ལ་གནོད་པའོ་ཞེ་ན། མཐོང་བ་ཞེས་པ་ལ་སོགས་པས་འདི་འཆད་པར་བྱེད་དེ། མཐོང་བར་བྱེད་པ་ལ་སོགས་པའི་བྱ་བའི་རྒྱུ་མཚན་ཅན་མཐོང་བ་ལ་སོགས་པའི་སྒྲ་དེ་རྣམས་ཀྱང་རང་
[86a.6]གི་རྒྱུ་མཚན་ཡོད་པ་ན་འཕགས་པ་རྣམས་ཀྱིས་སྦྱོར་བར་བྱེད་ལ། མེད་པ་ན་མ་ཡིན་ནོ་ཞེས་འཕགས་པའི་ཐ་སྙད་རྣམས་ཁས་བླངས་ཤིང་། རང་གི་མཚན་ཉིད་བརྗོད་པ་ལས་ནི་མ་ཡིན་ནོ་ཞེས་པས་ཁས་བླངས་པས་གནོད་པ་མ་ཡིན་ནོ་ཞེས་པའོ། །འོ་ན་གང་ཞེས་པ་ལ་སོགས་པ་བསྟན་བཅོས་དང་འགལ་
[86a.7]བ་སྨྲས་སོ། །འོ་ན་མིག་གི་རྣམ་པར་ཤེས་པས་ཉམས་སུ་མྱོང་བ་ཁོ་ནའི་སྐད་ཅིག་ཡིད་ཀྱི་རྣམ་པར་ཤེས་པ་ཉམས་སུ་མྱོང་བ་མ་ཡིན་གྱི། འོ་ན་ཅི་ཞེ་ན། སྐད་ཅིག་གཞན་ནོ་ཞེས་སྔར་བཤད་པ་མ་ཡིན་ནམ། དེ་འདི་ལྟ་བུར་བཤད་པ་ཅི་ལྟར་ཞེ་ན། འདི་ནི་སྐྱོན་མ་ཡིན་ཏེ་མིག་གི་རྣམ་པར་ཤེས་པས་
[86b]
[86b.1]ཉམས་སུ་མྱོང་བ་ཁོ་ནའི་དོན་ཞེས་རང་གི་མཚན་ཉིད་ཉེ་བར་མཚོན་པ་ལྷུར་ལེན་པ་འདི་ཡིན་ཏེ། རང་གི་མཚན་ཉིད་ཁོ་ནའོ་ཞེས་པའི་དོན་ཏེ། ཡང་ན་སྔ་མ་དང་ཕྱི་མའི་སྐད་ཅིག་དག་རིགས་མཚུངས་པ་ཉིད་ཀྱི་ཕྱིར་ཐ་མི་དད་པར་བརྗོད་པར་འདོད་པས་འདི་ལྟར་བརྗོད་པར་འགྱུར་རོ། །ཡང་ན་ཨ་ནུ་རི་སྒྲ་
[86b.2]འདི་ནི་ལྷན་ཅིག་པའི་དོན་ལ་འཇུག་ལ། བྷུ་ཏའི་སྒྲ་ཡང་སྐྱེས་པ་ལ་སྟེ། དེ་ལས་ཀྱང་མིག་གི་རྣམ་པར་ཤེས་པ་དང་ལྷན་ཅིག་སྐྱེས་པ་ཁོ་ནའི་དོན་རྣམ་པར་ཤེས་པར་བྱེད་དོ་ཞེས་པ་འདི་འདིར་དོན་ཡིན་ནོ་ཞེས་པས་སྐྱོན་མེད་དོ། །གལ་ཏེ་གང་དེ་ལྟར་ཡིད་ཀྱི་རྣམ་པར་ཤེས་པས་ཉམས་སུ་མྱོང་བའི་རང་གི་
[86b.3]མཚན་ཉིད་དེ་བསྟན་དུ་ཡོད་པ་ཡིན་ན། ཡིད་ཀྱིས་སྔོན་པོ་ཡང་རྣམ་པར་ཤེས་སོ། །སྔོན་པོ་ཞེས་ཀྱང་ཞེན་ཅིང་བརྗོད་པ་དེ་ཅི་ལྟར་ཞེ་ན། དེར་ཡང་རང་བཞིན་ནོ། །ཡང་ན་དེ་ཞེས་པའི་སྒྲས་རླུང་ཁོ་ན་དང་སྦྲེལ་བར་བྱའོ་ཞེས་སྟོན་པ་གསུངས་པ་ཡང་ན་རླུང་ལ་སོགས་པའི་རང་བཞིན་རྣམས་ལ་མ་ཡིན་ནོ་ཞེས་
[86b.4]པ་ལ་སོགས་ཏེ། འདིའི་དོན་ནི་གང་ཡོན་ཏན་ཡིན་པ་དེ་རྫས་ལ་བསྟན་པ་སྟེ། དྲི་བཞིན་རེག་བྱ་ཡང་ཡོན་ཏན་ཡིན་ནོ་ཞེས་པ་རང་བཞིན་ནོ། །རེག་བྱ་ཡོན་ཏན་ཉིད་ཀྱི་ཕྱིར་རྫས་ལ་བརྟེན་པ་ཉིད་དུ་རྗེས་སུ་དཔག་པ་ན། རྫས་ཉིད་ཙམ་ནི་དོན་གྱིས་འགྲུབ་སྟེ། དཔེར་ན་མིག་ལ་སོགས་པ་རྣམས་གཞན་
[86b.5]གྱི་དོན་ཉིད་དུ་གྲུབ་པ་ན་གཞན་ཡང་དོན་གྱིས་འགྲུབ་པ་བཞིན་ནོ་ཞེས་པ་དགོངས་པའོ། །ཡོངས་ཀྱི་ལྷག་མ་ལས་ཞེས་པ། ཡོངས་སུ་ལྷག་མ་ལས་གྲུབ་པ་ནི་རྗེས་སུ་དཔག་པ་ཁོ་ན་སྟེ། རྟགས་ལས་སྐྱེས་པ་ཉིད་ཀྱི་ཕྱིར་ཞེས་སེམས་སོ། །ཇི་སྐད་དུ་སྨྲས་པ་ཞེས་པ་ལ་སོགས་པ་སྟེ། རེག་བྱ་འདི་ནི་སའི་
[86b.6]མ་ཡིན་ཏེ། དྲི་ལ་སོགས་པ་དང་ལྷན་ཅིག་སྤྱོད་པ་མ་ཡིན་པ་ཉིད་ཀྱི་ཕྱིར་རོ། །ཆུ་དང་མེ་དག་གི་ཡང་མ་ཡིན་ཏེ། དྲོ་བ་མེད་པ་དང་གྲང་བ་མེད་པ་ཉིད་ཀྱི་ཕྱིར་རོ། །ནམ་མཁའ་ལ་སོགས་པ་མ་མཐོང་བ་རྣམས་ཀྱི་ཡང་མ་ཡིན་ཏེ། དེ་རྣམས་ནི་རེག་བྱ་དང་ལྡན་པ་ཉིད་ན་བུམ་པ་ལ་སོགས་པ་དེར་སོ་
[86b.7]སོར་ཐོགས་པར་འགྱུར་རོ། །ཡིད་ཀྱི་རྗེས་སུ་དཔག་པར་བྱ་བའི་ཡོན་ཏན་ཉིད་ཀྱི་ཕྱིར་འདིའི་རྗེས་སུ་དཔག་པར་བྱ་བའི་ཡོན་ཏན་དག་རྡུལ་ཉིད་དང་གཅིག་ཉིད་ཀྱང་མ་ཡིན་ནོ། །འདི་ནི་མངོན་སུམ་ཡིན་ལ། རྟེན་མེད་པའི་ཡོན་ཏན་ཡང་དག་པར་བརྗོད་པ་མ་ཡིན་ཏེ། དེ་ལས་ཡོངས་སུ་བའི་ལྷག་མ་
[87a]
[87a.1]ལས། རེག་བྱ་འདི་ནི་རླུང་ཁོ་ནའིའོ་ཞེས་པ་འདི་ནི་ཡོངས་སུ་ལྷག་མ་ལས་གྲུབ་པའོ། །དེ་ཡོད་པར་མ་གྲུབ་པའི་ཕྱིར་ཞེས་པ། དེའི་སྒྲས་རླུང་དང་འབྲེལ་པ་སྟེ། གང་གི་ཕྱིར་གཞན་རྣམས་ལ་གང་གི་མི་སྲིད་ཅིང་དེ་ཡོད་པ་ཉིད་དུ་གྲུབ་པ་ཅན་ལ་དེའི་ཡོད་པ་ཉིད་ཡང་དག་པར་
[87a.2]འབྱུང་བར་བྱ་ན། གང་གི་ཡོད་པ་ཉིད་མ་གྲུབ་ན། དེ་ལ་ཡོངས་སུ་བའི་ལྷག་མ་ལས་དེ་ཡོད་དོ་ཞེས་ཡང་དག་པར་འབྱུང་བ་ཅི་ལྟར་ཏེ། གང་གི་ཚེ་དེར་ཉེ་བའི་སྐྱེས་བུ་གཞན་གྱིས་བྱ་བ་འདིས་བྱས་པ་མ་ཡིན་ནོ་ཞེས་ཡང་དག་པར་འབྱུང་བ་ན། དེའི་ཚེ་མོ་གཤམ་གྱི་བུས་ཡོངས་སུ་བའི་ལྷག་མ་ལས་
[87a.3]འདི་བྱས་སོ་ཞེས་ཡང་དག་པར་འབྱུང་བར་རིགས་པ་མ་ཡིན་གྱི། དེ་རྣམས་ཁོ་ན་ལ་ནི། འདི་སུས་བྱས་ཞེས་ཐེ་ཚོམ་དུ་འགྱུར་རོ། །དགག་པ་མཚུངས་པ་ཉིད་ཀྱི་ཕྱིར་ཡང་ཞེས་པ། དེ་ཡོད་པ་ཉིད་དུ་གྲུབ་ན་ཡང་དགག་པ་མཚུངས་པ་ཉིད་ཀྱི་ཕྱིར་རྗེས་སུ་དཔག་པ་རིགས་པ་མ་ཡིན་ཏེ། ཇི་ལྟར་
[87a.4]རེག་བྱ་འདི་ས་ལ་སོགས་པ་རྣམས་ལ་མཆོག་ཏུ་མཐོང་བ་མ་ཡིན་ནོ་ཞེས་པས་དེ་རྣམས་ལ་འགྱུར་བ་མ་ཡིན་པ། དེ་ལྟར་རླུང་ལ་ཡང་སྔར་མཐོང་བ་མ་ཡིན་ནོ་ཞེས་པས་དེ་ལ་ཡང་མི་འགྱུར་རོ། །དེ་ལྟ་ན་ཡང་རླུང་ཡོངས་སུ་བའི་ལྷག་མ་ལས་གྲུབ་པ་ཅི་ལྟར་ཞེ་ན། གསུངས་པ། གྲུབ་པ་ན་ནི་ཞེས་པ་ལ་
[87a.5]སོགས་པ་སྟེ། ཇི་ལྟར་སྐྱེ་བ་དང་ལྡན་པ་བུམ་པ་ལ་སོགས་པ་རྣམས་ཡོད་པ་ཉིད་དུ་གྲུབ་པ་དེ་ལྟར་གལ་ཏེ་རླུང་ལ་སོགས་པ་ཤེས་འདོད་དང་ལྡན་པ་རྣམས་ཀྱི་ཡོད་པ་ཉིད་དུ་གྲུབ་པར་འགྱུར་བ་དེ་ལྟར་ན་ནི་གཏན་ཚིགས་གྲུབ་པ་ཉིད་ཐོབ་ཀྱི། རྣམ་པ་གཞན་དུ་ན་མ་ཡིན་ནོ། །དགག་པ་མི་སྲིད་པ་ན་ཡང་
[87a.6]ཞེས་པ། དེ་རྣམས་ཡོད་པར་གྲུབ་ན་ཡང་གལ་ཏེ་ཆོས་དེ་ཚད་མས་གནོད་པས་མེ་ལ་གྲང་བ་ཉིད་ལྟ་བུ་ཡིན་ན། དེ་ལྟ་ན་ཡང་མ་གྲུབ་པ་ཁོ་ནའི་གཏན་ཚིགས་སུ་འགྱུར་ལ། བཟློག་པ་ལས་ནི་གྲུབ་པའོ་ཞེས་པའོ། །དེ་ལྟར་ཇི་ལྟར་གཏན་ཚིགས་གྲུབ་པ་ཉིད་དུ་འགྱུར་བ་དེ་ལྟར་བསྟན་ཏོ། །
[87a.7]ཡོན་ཏན་གྱི་བྱེ་བྲག་དང་འབྲེལ་པ་ལས་ཞེས་པ་ཡོན་ཏན་གྱི་བྱེ་བྲག་ནི་ཆོས་ཀྱི་ཁྱད་པར་གཏན་ཚིགས་ཉིད་དུ་མངོན་པར་འདོད་པའོ། །དེའི་འགྲེལ་པ་ནི་བསྒྲུབ་པར་བྱ་བ་དང་མེད་ན་མི་འབྱུང་བའོ། །ཡོན་ཏན་གྱི་སྤྱི་བོར་ནས་ཞེས་པ་ཆོས་ཀྱི་སྤྱི་འཁྲུལ་པ་སྤངས་ནས་སོ། །ཡོན་ཏན་གྱི་བྱེ་བྲག་གིས་ཞེས་
[87b]
[87b.1]པ་ཇི་སྐད་བཤད་པ་བསྒྲུབ་བྱའི་ཆོས་ཅན་ལ་གྲུབ་པའི་ཡོད་པ་ཉིད་ཅན་རྗེས་སུ་འགྲོ་བ་དང་ལྡོག་པ་དང་ལྡན་པའི་ཆོས་ཀྱིས་སོ། །རྫས་ཀྱི་བྱེ་བྲག་རྗེས་སུ་དཔོག་པར་བྱེད་ལ་ཞེས་པ་ཡོངས་སུ་བའི་ལྷག་མ་ལས་རླུང་རྗེས་སུ་དཔོག་པར་བྱེད་ཅེས་པའི་དོན་ཏོ། །དེར་ཡང་སྤྱིའི་རྣམ་པས་ཞེས་རིག་པར་
[87b.2]བྱའི། རང་གི་ངོ་བོས་ནི་མ་ཡིན་ཏེ། གང་གི་ཕྱིར་སྔར་ཁོ་ནར་རྗེས་སུ་དཔག་པ་རང་གི་མཚན་ཉིད་ཀྱི་ཡུལ་ཅན་ཉིད་བཀག་པས་སོ། །བྱེ་བྲག་སྨོས་པ་ནི་ས་ལ་སོགས་པའི་རྫས་བསལ་བའི་དོན་དུའོ། །དེ་ལ་འདི་ནི་སྦྱོར་བ་སྟེ། གང་ཞིག་གང་ལས་གྲུབ་པའི་ཡོད་པ་ཉིད་ལས་གཞན་རྣམས་ལ་མི་
[87b.3]སྲིད་པའི་དངོས་པོའི་ཆོས་ཡིན་ཞིང་དེ་ལ་ཡང་ཚད་མས་མི་གནོད་པ་དེ་དེ་ཡིར་འགྱུར་ཏེ། དཔེར་ན་སྐྱེ་བ་དང་ལྡན་པ་རྣམས་ལས་གྲུབ་པའི་ཡོད་པ་ཉིད་རྣམས་ལས་གཞན་རྣམས་ལ་མི་སྲིད་པ་མི་རྟག་པ་ཉིད་དངོས་པོའི་ཆོས་ཡིན་ཞིང་དེ་ལ་ཚད་མས་མི་གནོད་པ་དེ་དེ་རྣམས་ཀྱིར་འགྱུར་བ་བཞིན་དྲོ་བ་ཡང་མ་
[87b.4]ཡིན། གྲང་བ་ཡང་མ་ཡིན་པའི་རེག་བྱ་ཡང་རླུང་ལས་གྲུབ་པའི་ཡོད་པ་ཉིད་ལས་གཞན་རྣམས་ལ་སྲིད་པ་མ་ཡིན་པའི་དངོས་པོའི་ཆོས་ཡིན་ཞིང་དེ་ལ་ཡང་ཚད་མས་གནོད་མེད་པའོ་ཞེས་པ་རང་བཞིན་ནོ། །དེ་ལྟར་རེག་བྱ་ཡོངས་སུ་བའི་ལྷག་མ་ལས་རླུང་དང་འབྲེལ་པ་ཅན་ཉིད་དུ་གྲུབ་ན། རླུང་
[87b.5]ཡུལ་གྱི་ཁྱད་པར་འམ་དུས་ཀྱི་བྱེ་བྲག་འབའ་ཞིག་ཏུ་འགྲུབ་པ་ཡིན་ན། ཁྱོད་ཀྱི་ལུགས་ཀྱི་ནི་དེ་རྣམས་ཡོངས་སུ་བའི་ལྷག་མ་ལས་གྲུབ་པ་སྲིད་པ་མ་ཡིན་ནོ་ཞེས་སྟོན་པ་གསུངས་པ། ཡོད་པ་ཉིད་ནི་མ་གྲུབ་ཅེས་པ་ལ་སོགས་པ་སྟེ། གང་གི་ཕྱིར་ཡོད་པ་ཉིད་མ་གྲུབ་ཅིང་། ས་ལ་སོགས་པ་
[87b.6]རྣམས་དང་དགག་པ་མཚུངས་པ་ཡང་སྟེ། དེའི་ཕྱིར་ཡོན་ཏན་གྱི་བྱེ་བྲག་མེད་པ་སྟེ། ཚུལ་གསུམ་པ་ཉིད་དང་ལྡན་པའི་ཆོས་མེད་པའོ་ཞེས་པའི་དོན་ཏོ། །དེའི་ཕྱིར་ཡོན་ཏན་གྱི་བྱེ་བྲག་མེད་པའི་ཕྱིར་ན། དེ་ལ་ག་ལས་རྗེས་སུ་དཔག་པ་ཡིན་ཏེ། མ་ཡིན་པ་ཁོ་ནའོ། །དེ་ལྟར་རེ་ཞིག་མཐོང་བ་
[87b.7]དང་མ་མཐོང་བ་རྣམས་ལས་དགག་པ་ཁས་བླངས་ནས་རྗེས་སུ་དཔག་པ་མེད་པ་བརྗོད་ཅིང་། ད་ནི་དགག་པ་ཁོ་ན་མི་རིགས་སོ་ཞེས་སྟོན་པ་གསུངས་པ། གལ་ཏེ་མ་མཐོང་བ་ཙམ་གྱིས་ཞེས་པ་ལ་སོགས་པ་སྟེ། ཙམ་སྨོས་པ་ནི་དམིགས་པའི་མཚན་ཉིད་དུ་གྱུར་པ་གང་མ་མཐོང་བ་དེ་ཁོ་ན་ལས་
[88a]
[88a.1]དངོས་པོ་མེད་པ་འགྲུབ་བོ་ཞེས་གསལ་བར་བྱེད་དོ། །འོ་ན་རེག་བྱ་དམིགས་པའི་མཚན་ཉིད་ཀྱིར་གྱུར་པའི་ཕྱིར་དགག་པར་རིགས་པ་ཁོ་ན་མ་ཡིན་ནམ་ཞེ་ན། རིགས་པ་མ་ཡིན་ཏེ། སྣང་བ་དང་དེའི་རང་བཞིན་ཙམ་འགོག་པ་མ་ཡིན་པའི་ཕྱིར་རོ། །ཁྱོད་ཀྱིས་ནི་ས་ལ་
[88a.2]སོགས་པའི་སྤྱི་བཟུང་ནས་དགག་པ་སྨྲས་སོ། །དེ་ལ་ཡང་ཤིང་བལ་དང་རྡོ་བ་དང་ལོ་མ་ལ་སོགས་པ་རྣམས་ལ་དེ་ཡོད་ན་ཡང་རེག་པ་ཐ་དད་པ་མཐོང་བའི་ཕྱིར་རོ། །འགའ་ཞིག་ཏུ་ཁྱད་པར་ཡང་སྲིད་པ་ལས་དོགས་པར་འགྱུར་བའི་ཕྱིར་ཐམས་ཅད་དུ་མ་མཐོང་བ་ཙམ་གྱིས་དགག་པར་རིགས་པ་མ་ཡིན་
[88a.3]ནོ། །མ་མཐོང་བ་རྣམས་ལས་ཀྱང་རིགས་པ་མ་ཡིན་ནོ་ཞེས་སྟོན་པ་གསུངས་པ། མ་མཐོང་བ་རྣམས་ལས་ནི་མ་ཡིན་ནོ་ཞེས་པ་ལ་སོགས་པ་སྟེ། ནིའི་སྒྲ་ནི་བསྡུ་བ་ལས་ཏེ། ངེས་པར་འཛིན་པ་ལ་ཡང་ནའོ། །ལུས་ཅན་མ་ཡིན་པ་རྣམས་ནི་ཐོགས་པ་མེད་པའི་ཕྱིར་རོ་ཞེས་པ། ཐོགས་པ་འདི་
[88a.4]དགག་པར་འགྱུར་ཞིང་། དེ་ལས་བཟློག་པའི་དངོས་པོའི་ཡང་བསྒྲུབ་པ་སྟེ། གལ་ཏེ་དགག་ན་ནི་མངོན་པར་བཅོམ་པ་དང་རེག་པའི་ཁྱད་པར་དག་ལས་འབྲས་བུ་དང་རྒྱུའི་དངོས་པོའམ་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོར་བརྗོད་པར་བྱ་བ་མ་ཡིན་ཏེ། གང་ལས་རྒྱུ་དང་ཁྱབ་པར་
[88a.5]བྱེད་པ་ལྡོག་པ་དག་ཁོ་ན། རང་དང་འབྲེལ་པའི་འབྲས་བུ་དང་ཁྱབ་བྱ་དག་ལྡོག་པར་བྱེད་པའོ། །གཞན་དུ་ན་ཧ་ཅང་ཐལ་བར་འགྱུར་བའི་ཕྱིར་དང་། འབྲས་བུ་དང་རྒྱུ་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་དག་ཀྱང་མི་འགྲུབ་པའི་ཕྱིར་ཏེ། མངོན་པར་བཅོམ་པ་མེད་ཀྱང་རེག་བྱའི་
[88a.6]ཁྱད་པར་ཡོད་པའི་ཕྱིར་དང་། དོན་གཞན་ཉིད་ཀྱི་ཕྱིར་ཡང་ངོ་། །ཅི་སྟེ་ལུས་དང་ལྡན་པ་མ་ཡིན་པ་རྣམས་ཀྱི་མངོན་པར་བཅོམ་པ་མ་ཡིན་པའི་ཕྱིར་རོ་ཞེས་པ་འདིས་མངོན་པར་བཅོམ་པ་མ་ཡིན་པ་ཞེས་བྱ་བ་དངོས་པོ་ཁོ་ན་བརྗོད་པར་བྱ་སྟེ། མ་ཡིན་པར་དགག་པའི་ཚུལ་གྱིས་སོ་ཞེ་ན། དེའི་ཕྱིར་ཚེ་དེ་
[88a.7]ནམ་མཁའ་ལ་སོགས་པ་རྣམས་དང་འབྲེལ་པར་བསྒྲུབ་པར་བྱ་ཞིང་། རེག་པའི་ཁྱད་པར་དང་ཡང་འགལ་བ་སྟེ། རྣམ་པ་གཞན་དུ་ན་ཅི་ལྟར་དེ་དང་འབྲེལ་པ་མེད་ཅིང་། མི་འགལ་བས་དེ་དེས་དེར་འགོག །ཧ་ཅང་ཐལ་བ་ཡང་ནའོ། །དེ་ལ་རེ་ཞིག་འབྲེལ་པར་མི་འགྲུབ་སྟེ། དེ་ལྟར་ནི་
[88b]
[88b.1]དེ་རྣམས་ལ་དེ་འཇུག་པ་འབྲེལ་པར་འགྱུར་བ་འམ། ཡང་ན་དེས་བསྐྱེད་པར་བྱ་བ་ཉིད་ཡིན། རེ་ཞིག་འཇུག་པ་འགྲུབ་པ་མ་ཡིན་ཏེ། དེ་རྣམས་ནི་དབང་པོ་ལས་འདས་པ་ཉིད་ཀྱི་ཕྱིར་རོ། །དབང་པོ་ལས་འདས་པ་རྣམས་ལ་འགའ་ཞིག་གི་ཡང་འཇུག་པ་ཉེ་བར་དམིགས་པ་མ་ཡིན་པས་སོ། །
[88b.2]ཉེ་བར་དམིགས་པ་མེད་པ་ཡང་འདི་འདིར་འཇུག་གོ་ཞེས་ངེས་པར་ནུས་པ་མ་ཡིན་ནོ། །དེས་བསྐྱེད་པར་བྱ་བ་ཉིད་ཀྱང་འགྲུབ་པ་མ་ཡིན་ཏེ། ལྡོག་པ་མི་འགྲུབ་པའི་ཕྱིར་རོ། །རྗེས་སུ་འགྲོ་བ་ཙམ་ལས་རྒྱུའི་ནུས་པ་རྟོགས་པ་མ་ཡིན་གྱི། འོན་ཀྱང་ལྡོག་པ་ལས་ཀྱང་སྟེ། དེ་ཡང་འདིར་
[88b.3]ཡོད་པ་མ་ཡིན་ནོ། །རྟག་པ་ཉིད་ཀྱི་ཕྱིར་དང་ཐམས་ཅད་དུ་སོང་བ་ཉིད་ཀྱི་ཕྱིར་ནམ་མཁའ་ལ་སོགས་པ་རྣམས་ལ། དེ་མེད་ན་དེ་མེད་པ་མི་སྲིད་པའི་ཕྱིར་རོ། །དེ་ལྟར་མངོན་པར་བཅོམ་པ་མ་ཡིན་པ་ཞེས་བྱ་བ་ནམ་མཁའ་ལ་སོགས་པ་དང་འབྲེལ་པ་ཅན་གྱི་དངོས་པོ་ཁོ་ན་མི་འགྲུབ་ན། ཡང་དེ་རེག་
[88b.4]བྱའི་ཁྱད་པར་དང་འགལ་བ་ག་ལས་ཡིན། དེ་ལྟར་ནི་ཉི་མའི་འོད་ལ་སོགས་པ་རྣམས་ལ། བུམ་པ་ལ་སོགས་པ་རྣམས་ཀྱིས་མངོན་པར་མ་བཅོམ་པ་ཡོད་ལ། འོན་ཀྱང་དེ་རྣམས་རེག་པ་དང་ལྡན་པ་རྣམས་ཏེ། དེའི་ཕྱིར་དེ་ལས་དགག་པ་མ་ཡིན་ནོ། །ཡོན་ཏན་རྗེས་སུ་དཔག་པར་བྱ་བའི་ཕྱིར་
[88b.5]ཞེས་པ་འདི་ནི་དེའི་སྐྱེས་བུ་སྟེ། ཡིད་ལ་ཡང་ཡོན་ཏན་ཉེ་བར་སྐྱེས་པ་ལྡོག་པའི་རྒྱུ་ཅན་གྱི་དྲུག་པ་སྟེ། རྗེས་སུ་དཔག་པར་བྱ་བ་ལ་ལྟོས་པ་མ་ཡིན་ནོ། །ཡིད་ཀྱི་ཡོན་ཏན་རྣམས་རྗེས་སུ་དཔག་པར་བྱ་བ་ཉིད་ཀྱི་ཕྱིར་ཞེས་པ་ངག་གི་དོན་ཏེ། ཡོན་ཏན་ནི་ཡོན་ཏན་ལ་ལྟོས་པའི་ཕྱིར་རྟག་པ་ཉིད་ལས་ནུས་པ་
[88b.6]མེད་པའི་སྐྱོན་ཡང་ཡོད་པ་མ་ཡིན་ནོ། །འདི་ཡང་གཏན་ཚིགས་མ་ཡིན་ཏེ། འགལ་བ་མེད་པའི་ཕྱིར་རོ། །དེ་ལྟར་ནི། ཇི་ལྟར་བདག་གི་ཁྱབ་བདག་ཉིད། །ཅེས་བྱ་བའི་ཡོན་ཏན་རྗེས་སུ་དཔག་པར་བྱ་བ་སྟེ། འོན་ཀྱང་བདེ་བ་ལ་སོགས་པ་རྣམས་མངོན་སུམ་ཡིན་པ་དེ་ལྟར་ཡིད་ཀྱི་རྡུལ་ཉིད་དང་གཅིག་
[88b.7]པུ་ཉིད་ཀྱང་སྟེ། ཡོན་ཏན་གཉིས་པོ་འདི་ནི་རྗེས་སུ་དཔག་པར་བྱ་བར་འགྱུར་ལ། རེག་བྱ་ཡོན་ཏན་འདི་ཡང་མངོན་སུམ་དུ་འགྱུར་རོ་ཞེས་པ་འགལ་བ་ཅི་ཡང་མེད་དོ། །ད་ནི་གང་འདིར་རིགས་པ་དེ་བསྒྲུབ་པའི་ཆེད་དུ་གསུངས་པ། འོ་ན་ཅི་ཞེ་ན་ཞེས་པ་ལ་སོགས་པ་སྟེ། ཡང་གི་སྒྲ་ནི་ངེས་
[89a]
[89a.1]པར་འཛིན་པའི་དོན་ཅན་ནོ། །ཡང་ཅི་ལྟར་མཐོང་བ་རྣམས་ལ་ཡང་མཐོང་བའི་ཕྱིར་ཞེས་པ་འདི་བརྗོད། ཅི་ཙམ་གྱིས་ན་རེག་པའི་ཁྱད་པར་དེ་མཐོང་བ་རྣམས་ལ་ཡང་མཐོང་བ་མ་ཡིན་པ་ཁོ་ནའོ་ཞེ་ན། སྐྱོན་འདི་མེད་དེ། མཐོང་བ་རྣམས་ལ་རེ་ཞིག་རེག་པའི་སྤྱི་སྲིད་པའི་ཁྱད་
[89a.2]པར་མཐོང་ལ། མ་མཐོང་བ་རྣམས་ལ་ནི་དེ་ཡང་མཐོང་བ་མེད་དོ། །དེ་འདི་སྐད་བཤད་པར་འགྱུར་ཏེ། གང་ཞིག་གང་དུ་མཐོང་བའི་སྤྱི་དེ་ནི་དེར་སྲིད་པ་ཡིན་ཏེ། དཔེར་ན་སྐྱུ་རུ་ར་རྣམས་ལ་མངར་བའི་རོ་བཞིན་མཐོང་བ་རྣམས་ལ་རེག་བྱའི་ཁྱད་པར་ཡང་མཐོང་བའི་སྤྱིའོ། །ཡང་ན་གང་དུ་
[89a.3]མཐོང་བ་དེ་དེར་སྲིད་པའི་ཁྱད་པར་ཡིན་ཏེ། དཔེར་ན་སྐྱུ་རུ་ར་རྣམས་ལ་རོ་བཞིན། མཐོང་བ་རྣམས་ལ་རེག་པ་ཡང་མཐོང་བ་ཞེས་པ་རང་བཞིན་དག་གོ། །གཉིས་ཀར་ཡང་གནོད་པར་བྱེད་པ་མེད་པ་ན་ཞེས་པའི་ཁྱད་པར་བལྟ་བར་བྱའོ། །རླུང་ལ་སོགས་པ་ལ་ནི་ཡོད་པའི་ཐ་སྙད་དགག་པའི་
[89a.4]ཆེད་དུ་མི་དམིགས་པ་བརྗོད་པར་བྱའོ། །གལ་ཏེ་འདི་ལྟར་ངེས་པར་འབྱུང་བར་འོས་ན་འདི་ཁོ་ན་ལ་འདི་སྲིད་དོ་ཞེས་པ་ཡིན་ན། ཐེ་ཚོམ་ནི་མཐོང་སྟེ། དེའི་ཕྱིར་འདི་མཐོང་བ་རྣམས་ལ་སྲིད་པ་མ་ཡིན་ནོ་ཞེ་ན། དེའི་ཕྱིར་གསུངས་པ། དེ་རྣམས་ཀྱི་ཡང་ཞེས་པ་ལ་སོགས་པ་སྟེ། དུ་མ་ཉིད་ཀྱི་ཕྱིར་
[89a.5]ཐེ་ཚོམ་སྟེ། དེར་མི་སྲིད་པའི་ཕྱིར་ནི་མ་ཡིན་ནོ་ཞེས་པའི་དོན་ཏོ། །དེ་རྣམས་ཀྱིས་ཀྱང་རླུང་རྗེས་སུ་དཔོག་པ་ཅན་ཉིད་བསལ་ལོ་ཞེས་སྟོན་པ་གསུངས་པ། ཡིད་ཆེས་མིང་གི་སྒྲུབ་བྱེད་ཀྱིས། །ཞེས་པ་ལ་སོགས་པ་སྟེ། རླུང་ནི་རྗེས་སུ་དཔག་པ་ཅན་ཉིད་དེ་ཞེས་འདིར་ལྷག་པར་གཟུང་བར་བྱ་བ་
[89a.6]ཡང་མ་ཡིན་ནོ། །རྫས་ཀྱི་སྤྱི། རྗེས་སུ་དཔག་པ་ཡོད་པ་ན། །ཞེས་པའི་རེག་པའི་ཡོན་ཏན་རྫས་ལ་བརྟེན་པའི་གང་ལ་ནི་འདི་བརྟེན་པའི་རྫས་ཅི་ནས་ཀྱང་ཡོད་དོ་ཞེས་རྫས་ཙམ་རྗེས་སུ་དཔག་པའོ། །དེ་བོར་ནས་ཡིད་ཆེས་པའི་མིང་གི་ཚད་མ་ཉིད་ལས་ཞེས་པ་གང་གི་ཕྱིར། ཉེས་པ་
[89a.7]ཟད་པ་རྣམས་ཀྱིས་རྫས་ཀྱི་མིང་ཅན་དགུ་རྣམས་ཁོ་ན་བྱས་ཏེ། དེ་ལ་ས་ལ་སོགས་པ་རྫས་བརྒྱད་རྣམས་ལ་མིང་བརྒྱད་རྣམས་ངེས་པར་བཞག་ལ། རླུང་གི་མིང་ཅན་ཁོ་ན་ལྷག་མར་ལུས་ཏེ། གཞན་རྫས་བཅུ་ཡོད་པ་ཡང་མ་ཡིན་ནོ། །དེའི་ཕྱིར་རང་གི་རེག་པ་འདི་ཡིན་པ་དེ་ནི་རླུང་ངོ་ཞེས་པའོ། །དེ་ལྟར་
[89b]
[89b.1]ས་ལ་སོགས་པ་རྣམས་ལས་གཞན་པའི་རྫས་བཅུ་པ་ལ་སོགས་པ་དང་ས་ལ་སོགས་པ་གཞན་པ་ཁེགས་པས་རླུང་ཡོད་པ་ཉིད་དུ་རྟོགས་སོ། །མ་ཡིན་ཐ་དད་ཀྱང་སྲིད་ཕྱིར། །ཞེས་པ་སྒྲ་ལས་བྱུང་བ་ཚད་མ་གཞན་ཉིད་ཡིན་པ་དགག་པའི་ཆེད་དུ་ཚད་མ་གཞན་སྨྲ་བས་རེ་ཞིག་ལན་བཏབ་པ་སྟེ། རང་
[89b.2]ཉིད་ནི་ལན་ཕྱི་ནས་འདེབས་པར་བྱེད་དོ། །རབ་ཏུ་གྲགས་པའི་དབང་གིས་ཞེས་པ་སྟེ། མཐུན་ཕྱོགས་དང་མི་མཐུན་ཕྱོགས་དག་ཡོད་པ་དང་མེད་པ་ཉིད་དག་ཉན་པ་པོ་ལ་གྲུབ་པ་ཞེས་པའི་དཔེ་མངོན་པར་མ་བརྗོད་པའོ། །དཔེ་སྨོས་པ་ནི་ཡན་ལག་ཉེ་བར་མཚོན་པའི་དོན་ཏོ། །ཡན་ལག་
[89b.3]རྣམས་ཉེ་བར་མ་བསྟན་པ་ལས་ཞེས་པའི་དོན་ཏོ། །དེས་འདི་སྐད་བཤད་པར་འགྱུར་ཏེ། གང་ཡན་ལག་ཉེ་བར་མ་བསྟན་པ་དེ་རྗེས་སུ་དཔག་པ་ལས་ཐ་དད་པ་སྟེ། མངོན་སུམ་བཞིན་སྒྲ་ལས་བྱུང་བ་ཡང་དེ་ལྟ་བུའོ་ཞེས་པ་རང་བཞིན་ནོ། །དེ་ལྟ་ན་ཡང་ཞེས་པ་འཁྲུལ་པར་གསུངས་སོ། །
[89b.4]དཔེ་གཅིག་གི་ཞེས་ཡན་ལག་ལྷག་མ་ལ་ལྟོས་པས་དཔེའི་གཅིག་ཉིད་དེ། དཔེ་ལ་ལྟོས་པས་ནི་མ་ཡིན་ནོ། །དེ་ལས་དོན་འདི་སྟེ། གང་དུ་དཔེ་ཁོ་ནའི་མི་བརྗོད་པ་ཞེས་པའོ། །གཉིས་དག་གི་ཡང་ན་ཞེས་པ། ཡང་ནའི་སྒྲ་ནི་གང་གི་དོན་ཡིན་ཞིང་། འཇུག་བཞིན་པའི་མ་བརྗོད་པ་སྡུད་
[89b.5]པར་བྱེད་དེ། གསུམ་རྣམས་ཀྱི་དང་བཞི་རྣམས་ཀྱི་དང་ལྔ་རྣམས་ཀྱིའོ་ཞེས་པའི་དོན་ཏོ། །དེ་ནས་གང་གི་ཚེ་ཡང་གཏན་ཚིགས་ཐུན་མོང་བར་བྱེད་པ་དེའི་ཚེ་ཡང་རང་གི་དོན་གྱི་རྗེས་སུ་དཔག་པས་མ་ངེས་པར་འགྱུར་རོ། །སྒྲ་ལས་བྱུང་བ་ཐལ་བར་འགྱུར་རོ་ཞེས་པ་ཕ་རོལ་པོ་ལ་སྒྲ་ལས་བྱུང་བ་
[89b.6]རྗེས་སུ་དཔག་པ་ལས་ཐ་དད་པར་གྲགས་ཏེ། དེས་ན་སྒྲ་ལས་བྱུང་བ་བཞིན་དུ་ཐལ་བར་འགྱུར་ཞིང་། རྗེས་སུ་དཔག་པ་ལས་ཐ་དད་པ་ཉིད་དུ་ཐལ་བར་འགྱུར་རོ་ཞེས་པའི་དོན་ཏེ། སྒྲ་ལས་བྱུང་བ་ཇི་ལྟར་གྱུར་པ་དེ་ལྟར་གྱུར་པར་དེ་ཡང་འཐོབ་བོ་ཞེས་པའི་བར་རོ། །འདྲ་བའི་རྐྱེན་མེད་ཀྱང་
[89b.7]དོན་རྟོགས་པར་བྱ་བའོ་ཞེས་མང་དུ་བཤད་ཟིན་ཏོ། །གཞན་རྣམས་ཟེར་ཞེས་པ་ལ་སོགས་པ་སྟེ། སྒྲ་ནི་རང་གི་ངོ་བོས་ཐ་དད་མེད་པའི་ངོ་བོའི་དོན་ཁོ་ན་རྟོགས་སུ་འཇུག་སྟེ། དེ་ལྟར་དུ་བ་ལ་སོགས་པ་རྣམས་མ་ཡིན་ནོ། །དུ་བ་ལས་མེ་རྟོགས་པའམ་རྟོགས་སུ་འཇུག་པ་ནི་མ་ཡིན་གྱི་དུ་
[90a]
[90a.1]བའི་གཟུགས་ཀྱིས་རྟོགས་པའམ་རྟོགས་སུ་འཇུག་གོ་ཞེས་པ་ཡང་ནའོ། །ཅི་ལྟར་དོན་ལ་རྗེས་སུ་དཔག་པ་ཡིན་ཞེས་པ། དོན་ནི་དུ་མའི་ངོ་བོ་ཡིན་པ་ཉིད་ཀྱི་ཕྱིར་རོ། །དེ་ལ་སྤྱི་རང་གི་ངོ་བོས་དོན་དེ་རྟོགས་པར་བྱའམ། འོན་ཏེ་སྤྱིའི་ངོ་བོས་ཡིན། རྣམ་པ་ཐམས་ཅད་དུ་
[90a.2]མི་འཐད་པར་སེམས་ཏེ། དེ་ལྟར་ནི་གལ་ཏེ་ཤིང་ལ་སོགས་པའི་སྒྲ་རྣམས་ཡོད་པ་ཉིད་ལ་སོགས་པ་སྤྱིའི་རྣམ་པ་ཅན་རྣམས་ཀྱིས་ཤིང་ལ་སོགས་པའི་དོན་རྟོགས་པར་བྱེད་ན། སྒྲ་ཐམས་ཅད་ཀྱི་དོན་གཅིག་ཉིད་དུ་ཐལ་བར་འགྱུར་ཏེ། སྤྱིའི་རྣམ་པ་རྣམས་དོན་དུ་མའི་ཐུན་མོང་བ་ཉིད་ཀྱི་ཕྱིར་རོ། །
[90a.3]ཅི་སྟེ་ཁྱད་པར་གྱི་ངོ་བོས་ཡིན་ན། དེ་མི་རིགས་ཏེ། ཐུན་མོང་མ་ཡིན་པའི་ངོ་བོའི་སོ་སོར་རྟོགས་པ་མི་ནུས་པ་ཉིད་ཀྱི་ཕྱིར་རོ་ཞེས་པས་རྣམ་པ་ཐམས་ཅད་དུ་སྒྲའི་དོན་ཉིད་མེད་དོ། །ཤིང་གི་སྒྲའི་བརྗོད་པར་བྱ་བ་ནི་དོན་གཞན་དུ་འགྱུར་བ་མ་ཡིན་ནོ་ཞེས་པ། ཇི་ལྟར་ཁྱེད་ཀྱི་སྒྲའི་དོན་གཞན་སེལ་བ་སྤྱི་
[90a.4]ཡིན་པ་དེ་ལྟར་ཁོ་བོ་ཅག་གི་ཡང་སྟེ། འདི་ཙམ་ནི་བྱེ་བྲག་སྟེ། བདག་གིས་དེའི་སྒྲའི་རྣམ་པ་ཉེ་བར་ཆགས་པར་རྟོགས་ཞེས་ཁས་བླངས་སོ་ཞེས་སྟོན་པར་བྱེད་དོ། །ཤིང་གི་སྒྲས་བརྗོད་པར་བྱ་བ་གང་ཡིན་པའི་དོན་དེ་བུམ་པ་ལ་སོགས་པ་གཞན་བུམ་པ་ལ་སོགས་པར་འགྱུར་བ་མིན་ཏེ། སྒྲ་གཞན་
[90a.5]གྱི་དོན་མེད་པས་འདིར་ཤིང་གི་སྒྲའི་བརྗོད་པར་བྱ་བ་བསྟེན་པར་མཚོན་ཏོ། །འདི་སྐད་བཤད་པར་འགྱུར་ཏེ། དོན་གཞན་ལས་ལྡོག་པས་ཉེ་བར་མཚོན་པའི་གང་དངོས་པོའི་ཆ་དེ་ཁོ་ན་ཤིང་གི་སྒྲའི་དོན་ཞེས་པ་སྟེ། དེ་ཁོ་ན་དང་དེ་མཚུངས་པ་ཉིད་ཀྱི་ཕྱིར་རོ། །ཡོད་པ་ཉིད་ལ་སོགས་པ་ཐུན་མོང་བའི་
[90a.6]རྣམ་པ་རྣམས་ཀྱིས་སམ། ཐུན་མོང་མ་ཡིན་པའི་ངོ་བོ་དང་ནི་མ་ཡིན་ནོ་ཞེས་པའོ། །གཞན་རྣམས་ཀློག་པ་ནི་ཤིང་གི་སྒྲའི་བརྗོད་པར་བྱ་བ་ནི་གཞན་གྱི་དོན་དུ་མི་འགྱུར་རོ་ཞེས་པ་སྟེ། ཤིང་གི་སྒྲའི་བརྗོད་པར་བྱ་བའི་དོན་གང་ཡིན་པ་དེ་སྒྲ་གཞན་གྱི་དོན་དུ་མི་འགྱུར་རོ། །རྣམ་གྲངས་ཀྱི་སྒྲ་རྣམས་ནི་དོན་
[90a.7]གཅིག་པ་ཉིད་ཀྱིས་གཞན་མ་ཡིན་པ་ཁོ་ནའོ་ཞེས་པ་བསམ་པའོ། །འདིར་ཡང་ཤིང་གི་སྒྲའི་དོན་ནི་སྒྲ་གཞན་གྱི་བརྗོད་པར་བྱ་བ་མ་ཡིན་པ་ཉིད་བསྟན་པས། སྒྲ་གཞན་གྱི་དོན་ལས་ལྡོག་པས་ཉེ་བར་མཚོན་པའི་ཤིང་ཉིད་ཙམ་ནི་ཤིང་གི་སྒྲའི་དོན་ཏོ་ཞེས་བཤད་པར་འགྱུར་རོ་ཞེས་པས་དོན་དེ་ཁོ་ནའོ། །
[90b]
[90b.1]འོ་ན་རྫས་ཀྱི་སྒྲས་ཀྱང་ཡལ་འདབ་ལ་སོགས་པ་དང་ལྡན་པའི་དོན་རྟོགས་པར་བྱེད་དེ། འདི་ནི་དེའི་ངོ་བོ་ཡང་མ་ཡིན་ནོ། །དེ་ལས་ཀྱང་འདྲ་བ་ཉིད་མ་ཡིན་ཡང་བརྗོད་པར་བྱ་བ་ཉིད་སྟོན་པའི་ཕྱིར་སྒྲ་འདྲ་བ་ཉིད་ཀྱིས་དོན་རྟོགས་པ་མ་ཡིན་ནོ་ཞེ་ན། དེའི་ཕྱིར་གསུངས་པ། གལ་ཏེ་ཡང་ཞེས་
[90b.2]པ་ལ་སོགས་པ་སྟེ། ཡང་གི་སྒྲས་ནི་རྫས་ཀྱི་སྒྲ་རྫས་ཀྱི་བྱེ་བྲག་རྣམས་ཀྱི་འཁྲུལ་པའི་ཕྱིར་རྗོད་པར་བྱེད་པ་མ་ཡིན་པ་ཁོ་ན་མོད། ཁས་བླངས་ནས་ལན་བརྗོད་པར་བྱའོ་ཞེས་པའི་དོན་གསལ་བར་བྱེད་དོ། །ཚུལ་གཞན་ནི་རྣམ་པ་གཞན་ཏེ། དངོས་པོ་དེ་ཁོ་ནའི་ཆ་ཤས་འགའ་ཞིག་གོ། །དེ་དང་
[90b.3]ལྷན་ཅིག་རྫས་ཀྱི་སྒྲའི་འདྲ་བ་ཉིད་ཡོད་པ་ཁོ་ནའོ་ཞེས་པ་དགོངས་པའོ། །ཚུལ་གཞན་དེ་ཡང་རྫས་མ་ཡིན་པ་ལས་ལྡོག་པས་ཉེ་བར་མཚོན་པར་བྱའོ་ཞེས་བསྟན་པའི་ཆེད་དུ་འདི་བརྗོད་དེ། རྫས་མ་ཡིན་པ་ལས་ལྡོག་པས་ཞེས་པའོ། །འོ་ན་ཞེས་པ་ལ་སོགས་པ་སྟེ། རྫས་ཀྱི་སྒྲས་རྫས་མ་ཡིན་པ་ལས་
[90b.4]ལྡོག་པས་ཉེ་བར་མཚོན་པའི་དངོས་པོའི་ཚུལ་གཞན་རྫས་ཀྱི་སྒྲ་དང་འདྲ་བ་ཉིད་ཐོབ་པར་རུང་བ་རྟོགས་པ་འབའ་ཞིག་ཏུ་མ་ཟད་ཀྱི། འོན་ཀྱང་ཤིང་གི་སྒྲས་ཀྱང་ངོ་། །དེ་ལྟར་ནི་ཤིང་རྫས་ཞེས་གཞི་མཐུན་པ་ཉིད་མཐོང་བས་ཏེ། དོན་ཐ་དད་པ་དག་ནི་དེ་འཐད་པ་མ་ཡིན་ནོ། །དེ་དང་ལྷན་ཅིག་
[90b.5]དེའི་འདྲ་བ་ཉིད་འདོད་པ་མ་ཡིན་ནོ། །དེའི་ཕྱིར་སྐྱོན་དེ་ཁོ་ན་སྟེ། འདྲ་བ་ཉིད་མ་ཡིན་པ་ལ་ཡང་སྒྲའི་དོན་ཉིད་བསྟན་པའི་ཕྱིར་རོ། །རྗོད་པར་བྱེད་པ་རང་དང་འདྲ་བ་ཉིད་དོན་རྗོད་པར་བྱེད་པ་མ་ཡིན་ནོ་ཞེས་པ་བསམ་པའོ། །དོན་ལས་ཡིན་གྱི་སྒྲ་ལས་ནི་མ་ཡིན་ཞེས་པ་ཤིང་གི་སྒྲའི་དོན་ཁོ་ན་རྫས་
[90b.6]མ་ཡིན་པ་ལས་རྟག་ཏུ་ལྡོག་པ་དང་མེད་ན་མི་འབྱུང་བ་ལས་དེ་རྟོགས་ཏེ། རྨོངས་པས་ནི་སྒྲ་ཁོ་ན་ལས་རྟོགས་སོ་ཞེས་སེམས་སོ། །གཞི་མཐུན་པ་ཉིད་ནི་ཁྱད་པར་བཅས་པའི་ཁྱད་པར་ལ་འཇུག་པའི་ཕྱིར་ན། ཤིང་གི་སྒྲས་རྫས་མ་ཡིན་པ་ལས་ལྡོག་པ་བརྗོད་པ་ནི་མ་ཡིན་ནོ། །གལ་ཏེ་ཤིང་
[90b.7]ལ་སོགས་པའི་ཚིག་རྣམས་ཁོ་ན་ཞེས་པ་ལ་སོགས་པ་སྟེ། སུ་པའི་ཐའི་ཚིག་རྣམས་ཁོ་ན། གལ་ཏེ་སྒྲའི་རྒྱུ་ཅན་གྱི་ཚད་མར་རྗོད་པར་བྱེད་ན་སྐྱོན་ཅན་དུ་འགྱུར་བ་མ་ཡིན་ནོ། །དེ་ལྟར་ནི་དེ་རྣམས་ཀྱི་ཡོངས་སུ་རྫོགས་པའི་ངོ་བོའི་དོན་འདི་དེའོ། །སོ་སོར་ཞེན་པར་རུང་བ་ནི་བློ་ལ་ཡང་དག་པར་ངེས་
[91a]
[91a.1]པར་གནས་པས་སོ་ཞེས་པས། དེ་དང་ལྷན་ཅིག་ཐ་དད་མེད་པར་ཉེ་བར་བཏགས་པ་སྒྲ་ལ་སྲིད་པའོ། །མིང་གི་ཚིག་རྣམས་ཁོ་ན་ཡོངས་སུ་རྫོགས་པའི་དོན་མངོན་པར་རྗོད་པར་བྱེད་པར་བཤད་པར་བྱ་བ་ནི་མ་ཡིན་གྱི། འོ་ན་ཅི་ཞེ་ན། ཏི་ངའི་མཐའ་རྣམས་ཀྱང་ངོ་། །
[91a.2]གང་གསུངས་པ། བྱ་བ་བརྗོད་པའི་སྒྲ་རྣམས་ཀྱིས་ཀྱང་ཞེས་པ་ལ་སོགས་པ་སྟེ། བྱ་བ་བརྗོད་པའི་སྒྲ་ཀློག་གོ་འཚེད་དོ་ཞེས་པ་འདི་ལྟ་བུ་ལ་སོགས་པ་རྣམས་ཀྱིས་སོ། །རྟགས་མེད་པ་གྲངས་མེད་པ་སྔོན་མ་དང་ཕྱི་མར་གྱུར་པའི་ཆ་ཤས་ཡོངས་སུ་མ་རྫོགས་པའི་རང་གི་ངོ་བོའི་བྱ་བ་
[91a.3]བརྗོད་པར་བྱ་ལ། རྣམ་པ་དེ་ལྟ་བུའི་དོན་འདི་དེའི་ཞེས་གཟུང་བ་མེད་པ་ནི་བློས་ཐ་མི་དད་པར་ཉེ་བར་གདགས་པ་བྱས་པར་ནུས་པ་མ་ཡིན་ཞིང་། ཡོངས་སུ་རྫོགས་པའི་ངོ་བོའི་སྒྲའི་བདག་ཉིད་ནི་བསྒྲུབ་པར་བྱ་བཞིན་པའི་རྣམ་པ་ཉིད་དུ་སོ་སོར་རྟོགས་པར་བྱེད་པ་ཡང་མ་ཡིན་ནོ། །གང་
[91a.4]རྣམས་ཀྱི་ངག་ཁོ་ན་སྒྲ་ཡིན་པ་ཞེས་པ་དེས་དོན་སྒྲོགས་པར་བྱེད་པའི་ཕྱིར་རོ། །གལ་ཏེ་ངག་ཁོ་ན་སྒྲ་ཡིན་ན། ཚིག་རྣམས་ཉེ་བར་བླང་བ་དོན་ཅི་ཞེ་ན། དེ་རྟོགས་པའི་ཐབས་ཀྱང་ཞེས་པ་ལ་སོགས་པ་སྟེ། དེ་ཚོགས་པའི་བདག་ཉིད་ཀྱི་ཕྱིར་ན། དཔེར་ན་ཚིག་རྣམས་ཀྱི་ཡི་གེ་རྣམས་བཞིན་
[91a.5]ཞེས་སེམས་སོ། །དེ་རྣམས་ཀྱི་མེད་ཅེས་པ་ལ་སོགས་པ་སྟེ། ངག་གི་དོན་ནི་ཕྱི་རོལ་བསྒྲུབ་པར་བྱ་བ་སྒྲུབ་པར་བྱེད་པ་དང་འབྲེལ་བའི་བདག་ཉིད་དུ་འགྱུར་རམ། སྒྲུབ་པར་བྱེད་པའི་ནུས་པ་ངེས་པར་ཞུགས་པས་རྗེས་སུ་བཟུང་བ་ཆ་ཤས་མེད་པའི་བྱ་བའམ། སོ་སོར་སྣང་བའི་མཚན་
[91a.6]ཉིད་གཞན་ཡིན། འདི་གསུམ་ཀ་ཡང་ཡོད་པར་གྱུར་པ་མ་ཡིན་པ་ཉིད་ན། འདི་དེའོ་ཞེས་སོ་སོར་ངོ་ཤེས་པ་ལས་ཤིན་ཏུ་འདས་པ་ཡིན་ནོ། །དེ་ལྟར་གྱུར་པའི་དོན་གྱིས་དེ་འདིའོ་ཞེས་ཐ་མི་དད་པར་ཉེ་བར་གདགས་པར་བྱ་བར་ནུས་པ་ཡང་མ་ཡིན་ནོ་ཞེས་ཁྱད་པར་གྱི་ཅུང་ཟད་ཅེས་པ་དཔེ་མངོན་
[91a.7]པར་མ་བརྗོད་པ་དང་། སྒྲས་ཐ་མི་དད་པར་ཉེ་བར་གདགས་པ་ནི་ཁྱད་པར་ཅུང་ཟད་དོ། །གལ་ཏེ་དེ་ལྟ་ན་ཡང་ཐ་དད་པ་མ་ཡིན་ན་ཁྱོད་ཀྱིས་ཀྱང་རླུང་ལ་སོགས་པ་རྣམས་ཀྱི་ལུང་ལས་བྱུང་བ་ཉིད་དུ་སྒྲུབ་པར་བྱེད་པས་རང་གི་མཚན་ཉིད་ཀྱི་ཡུལ་ཅན་ཉིད་དུ་སྒྲ་ལས་བྱུང་བ་བསྒྲུབས་ཏེ། དེ་ལྟར་གྱུར་ན་
[91b]
[91b.1]ལུང་དང་རྗེས་སུ་དཔག་པ་དག་ཐ་མི་དད་པའི་ཕྱིར་རང་གི་མཚན་ཉིད་ཀྱི་ཡུལ་ཅན་ཉིད་དུ་གྲུབ་བོ་ཞེ་ན། གསུངས་པ། དེ་ལ་སྒྲ་དང་བྲལ་བ་ཞེས་པ་ལ་སོགས་པ་སྟེ། དེ་ལ་ཞེས་པ་བསྟན་བཅོས་ལ་སྟེ། བསྟན་བཅོས་ཀྱི་རྒྱུ་མཚན་ཞེས་པའི་དོན་ཏོ། །འདི་སྐད་བཤད་པར་འགྱུར་ཏེ། ཁྱེད་
[91b.2]ཀྱིས་བསྟན་བཅོས་རང་གི་མཚན་ཉིད་ཀྱི་ཡུལ་ཅན་ཞེས་ཁས་བླངས་ཏེ། དེ་ལས་གང་འདི་རྗེས་སུ་དཔག་པ་རེག་བྱ་ཡང་མཐོང་བ་རྣམས་ཀྱིའང་རེག་བྱ་མ་ཡིན་ནོ་ཞེས་པ་ལ་སོགས་པས་ཉེ་བར་བཀོད་པ་འདི། ཁྱེད་ཀྱི་བསྟན་བཅོས་ཀྱི་རྒྱུ་མཚན་ཁོ་ན་ལས་རང་གི་མཚན་ཉིད་ཀྱི་ཡུལ་ཅན་མ་
[91b.3]ཡིན་པར་བརྗོད་དེ། ལུང་ལས་གྲུབ་པ་ཉིད་ནི། ཁྱེད་རྣམས་ཁོ་ན་ལ་གྲགས་པ་སྨྲས་པས་ན། རང་ལ་གྲགས་པ་ནི་མ་ཡིན་ནོ་ཞེས་པའོ། །ཅི་ལ་བསམས་ནས་འདི་ལྟར་བརྗོད་ཅེས་གསུངས་པ། སྒྲ་དང་བྲལ་བའི་རྟགས་ལ་མངོན་པར་བསམས་ནས་ཞེས་པ་སྟེ། ལུང་ཞེས་བྱ་
[91b.4]བའི་སྒྲ་དོར་བ་ནི་འདི་ཡིན་ཞིང་རྟགས་ནི་རེག་པ་ཞེས་བྱ་བ་སྟེ། དེ་ལ་ལྟོས་པ་མེད་པ་ཁོ་ནས་གང་ལས་རླུང་ཡོད་པ་ཉིད་དུ་སྒྲུབ་པར་བྱེད་པ་དེའོ། །དེ་ལྟར་ཁྱོད་ཀྱིས་ཁས་བླངས་པའི་བསྟན་བཅོས་ཀྱི་དབང་ལས་ཅི་ཡང་མི་བྱེད་པའི་རྟགས་ལ་བསམས་ནས། དེ་ལས་སྐྱེས་པའི་རྗེས་སུ་དཔག་པ་འདི་
[91b.5]ཁོ་བོ་ཅག་གིས་རང་གི་མཚན་ཉིད་ཀྱི་ཡུལ་ཅན་མ་ཡིན་པར་བརྗོད་ཀྱི། རང་ཉིད་རླུང་ལ་སོགས་པ་རྣམས་ལུང་ལས་གྲུབ་པ་ཉིད་དུ་འདོད་པས་ནི་མ་ཡིན་ནོ་ཞེས་པས་བརྩད་པར་བྱ་བ་མ་ཡིན་ནོ། །དེ་ལྟ་ན་འོ་ན་སྒྲ་ལས་བྱུང་བ་ཡང་ཇི་ལྟར་རང་གི་མཚན་ཉིད་ཀྱི་ཡུལ་ཅན་དུ་འགྱུར་བ་མ་ཡིན་པ་དེ་ལྟར་བསྒྲུབ་པར་
[91b.6]བྱ་བ་ཉིད་དོ་ཞེས་པ་འདིའི་ཕྱིར། བསྒྲུབ་པར་བྱ་བའི་ཆེད་དུ་གསུངས་པ། སྒྲ་ལས་བྱུང་བ་ཡང་ནི་ཞེས་པ་ལ་སོགས་པ་སྟེ། འབྲེལ་པ་མེད་ཅེས་པ་བརྡའི་དུས་ནའོ། །སྒྲ་དང་དོན་གྱི་འབྲེལ་པ་མངོན་པར་ཤེས་པ་ནི་དོན་བརྡའི་དུས་ན་ཉམས་སུ་མྱོང་བའི་སྤྱི་ཁོ་ན་སྒྲ་ལས་རྟོགས་ཀྱི་རང་གི་མཚན་ཉིད་ནི་མ་
[91b.7]ཡིན་ཏེ། དེ་སྔར་མཐོང་བ་མེད་པའི་ཕྱིར་རོ། །རབ་ཏུ་སྦྱོར་བའི་དུས་ན་ཁྱད་པར་གྱི་ཡུལ་ཅན་ཉིད་ཀྱི་དོགས་པ་མི་སྲིད་པ་ཁོ་ནའོ། །བརྡའི་དུས་ན་ནི་རང་གི་མཚན་ཉིད་མངོན་སུམ་མོ་ཞེས་དེའི་ཡུལ་ཅན་ཉིད་དུ་དོགས་པ་སྲིད་དོ། །དེའི་ཕྱིར་འབྲེལ་པ་མེད་པ་ཞེས་གསུངས་སོ་མཐོང་བའི་དོན་ནི་གང་
[92a]
[92a.1]དུ་དོན་མངོན་སུམ་གྱིས་མཐོང་བའོ། །མ་མཐོང་བའི་དོན་ནི་བཟློག་པ་ལས་སོ། །མཐོང་བའི་དོན་ལ་མིང་བྱེ་བྲག་ཏུ་རྟོགས་པ་ཞེས་པ་ནི། དཔེར་ན་འདི་བ་ན་སའོ་ཞེས་པ་ལྟ་བུ་འདིར་འབྲེལ་པ་བྱེ་བྲག་ཏུ་རྟོགས་པ་ཁོ་ནར་འགྱུར་རོ། །རྗེས་སུ་དཔག་པ་ནི་མ་ཡིན་ཏེ། དོན་
[92a.2]མངོན་གྱུར་ཡིན་པ་ཉིད་ཀྱི་ཕྱིར་རོ། །མ་མཐོང་བའི་དོན་ལ་ནི་མཐོ་རིས་ལ་སོགས་པ་ལ་སྟེ། དོན་དུ་རྣམ་པར་རྟོག་པ་ཙམ་ཞེས་པ་གང་ཕྱིར་མཐོ་རིས་ལ་སོགས་པའི་སྒྲ་རྣམས་མཐོ་རིས་ལ་སོགས་པ་རྣམས་ཀྱི་བརྡའི་དུས་སམ། གཞན་གྱི་ཚེ་ཡང་རང་གི་མཚན་ཉིད་བློ་ལ་གཏོད་པ་མ་ཡིན་
[92a.3]པས་ཏེ། དབང་པོ་ལས་འདས་པ་མ་ཡིན་པར་ཐལ་བར་འགྱུར་བའི་ཕྱིར་རོ། །དེ་རྟོགས་སུ་འཇུག་པའི་བསམ་པ་ཅན་རྣམས་ཀྱིས་རབ་ཏུ་སྦྱར་བ་རྣམས་ཉན་པ་པོ་ལ་སོ་སོར་སྣང་བ་མ་ཡིན་པ་དེའི་རང་བཞིན་དོན་གྱི་གཟུགས་བརྙན་འཇོག་པར་བྱེད་པ་འབའ་ཞིག་སྟེ། ལྷའི་གནས་ཀྱི་ཁྱད་
[92a.4]པར་འགའ་ཞིག་ཡོད་དོ་ཞེས་པ་འདི་ལྟ་བུ་ལ་སོགས་པའོ། །དེ་ལྟ་ན་རང་གི་མཚན་ཉིད་རྟོགས་པར་འགྱུར་བ་མ་ཡིན་པ་སོ་སོར་རྟོགས་སུ་བཅུག་པ་ཡང་མ་ཡིན་ཏེ། མཐོ་རིས་ལ་སོགས་པ་ཐོབ་པ་ན། དེ་ཉམས་སུ་མྱོང་བ་རྣམས་ཀྱི་བཞིན་དུ་སོ་སོར་སྣང་བ་ཐ་དད་པར་ཐལ་བར་འགྱུར་བའི་ཕྱིར་རོ། །
[92a.5]དེའི་རང་བཞིན་སོ་སོར་རྟོགས་པ་མ་ཡིན་པ་ཡང་། རྣམ་པར་རྟོག་པའི་གཟུགས་བརྙན་དེ་ལྟར་གྱུར་པ་ཁོ་ན་ལ། དེར་ལྷག་པར་ཞེན་པས་དགའ་བར་བྱེད་དེ། དེ་ལྟར་གྱུར་པ་ཁོ་ན་ལས་སྒྲའི་དོན་རྟོགས་པའི་ཕྱིར་རོ། །འདིར་ཡང་འབྲེལ་པ་མེད་པ་ཞེས་པ་འདི་ལྟོས་པར་བྱ་བ་མ་ཡིན་ཏེ། འོན་ཀྱང་
[92a.6]མཐོང་བའི་དོན་རྣམས་ཁོ་ན་ལའོ། །དེ་ལ་ནི་ཁྱད་པར་མཐོང་བ་ཉིད་ཀྱི་ཕྱིར་དེ་བརྗོད་པར་བྱ་བ་ཉིད་ཁོ་ནར་དོགས་པར་འགྱུར་རོ། །དེའི་ཕྱིར་དེ་བཟློག་པའི་ཆེད་དུ་མིང་བྱེ་བྲག་ཏུ་རྟོགས་པ་ཞེས་བཤད་དོ། །འོ་ན་ཅི་ལྟར་དེ་རྗེས་སུ་དཔག་པ་ཡིན་ཞེ་ན་ཞེས་པ། ཡང་ལུང་ལས་སྐྱེས་བུ་ལ་ཉེ་བར་མཁོ་བའི་
[92a.7]དོན་དབང་པོ་ལས་འདས་པ་ངེས་པར་བྱས་ནས་ཇི་ལྟར་འོས་པར་གནས་པ་བསྒྲུབ་པར་བྱའོ་ཞེས་ལུང་ཚོལ་བར་བྱེད་དེ། དེ་ལས་གལ་ཏེ་དོན་རྣམ་པར་རྟོག་པ་ཙམ་དུ་འགྱུར་གྱི་དོན་གྱི་ཁྱད་པར་རྟོགས་པར་མི་འགྱུར་ན་དེའི་རྗེས་སུ་དཔག་པ་ཉིད་ཁོ་ན་ཉམས་སོ་ཞེས་པ་བསམས་པའོ། །འོ་ན་ཡང་ཇི་
[92b]
[92b.1]ལྟར་ཡིད་ཆེས་པ་མ་ཡིན་པས་རབ་ཏུ་སྦྱར་བའི་སྒྲ་རྣམས་ནི་བརྗོད་པར་འདོད་པའི་མཚན་ཉིད་ཀྱི་དོན་ཙམ་གང་ཡིན་པ་དེ་ཚིག་ལས་རྗེས་སུ་དཔག་པ་ཉིད་ཡིན་གྱི། ཕྱི་རོལ་གྱི་དོན་རྗོད་པར་བྱེད་པ་ལས་ནི་མ་ཡིན་པ་དེ་ལྟར་ཡིད་ཆེས་པས་རབ་ཏུ་སྦྱར་བ་རྣམས་ཀྱང་འགྱུར་རོ་ཞེ་ན་བཤད་པ། མ་ཡིན་ཞེས་
[92b.2]པ་ལ་སོགས་པ་སྟེ། འདི་ལྟར་བསམས་པས་ཏེ། ཡིད་ཆེས་པའི་ཚིག་ནི་བརྗོད་པར་འདོད་པའི་དོན་ཙམ་ལ་ཚད་མ་ཉིད་དུ་འདོད་པར་བྱ་བ་མ་ཡིན་གྱི། འོན་ཀྱང་ཕྱི་རོལ་གྱི་དོན་ལ་ཡང་སྟེ། རྣམ་པ་གཞན་དུ་ན་དེ་དང་ཡིད་ཆེས་པ་མ་ཡིན་པའི་ཚིག་ལ་ཁྱད་པར་ཅིར་འགྱུར། དེའི་ཕྱིར་ཡིད་ཆེས་
[92b.3]པས་རབ་ཏུ་སྦྱར་བའི་མཐོ་རིས་ལ་སོགས་པའི་སྒྲ་རྣམས་ཀྱི་དོན་ཙམ་བརྗོད་པ་མ་ཡིན་གྱི། འོ་ན་ཅི་ཞེ་ན། འཇིག་རྟེན་པའི་སྒྲ་དང་ཐུན་མོང་མ་ཡིན་པའི་ཕྱི་རོལ་གྱི་དོན་ཡང་ངོ་ཞེས་པའོ། །རང་གི་མཚན་ཉིད་རྗོད་པར་བྱེད་པ་ལས་ལུང་རྣམས་རྗེས་སུ་དཔག་པ་ཉིད་མ་ཡིན་གྱི། འོ་ན་ཅི་ཞེ་ན། རྣམ་པ་
[92b.4]དེ་ལྟ་བུའི་དོན་ལ་རྣམ་པར་རྟོག་པ་ཙམ་ཉེ་བར་སྐྱེད་པ་རྣམས་ཀྱི་སྤྱིའི་རྣམ་པས་དོན་གསལ་བར་བྱེད་པའི་ཕྱིར། དེ་ལ་ཡང་མི་བསླུ་བ་ལས་སོ་ཞེས་སྟོན་པ་གསུངས་པ། ཡིད་ཆེས་ཚིག་ནི་མི་བསླུ་བའི། །སྤྱི་ལས་ཞེས་པ་ལ་སོགས་པ་སྟེ། ཡིད་ཆེས་པའི་ཚིག་ཤིན་ཏུ་ལྐོག་ཏུ་གྱུར་པའི་ཡུལ་
[92b.5]ཅན་ནི་ཅིག་ཤོས་མངོན་སུམ་དང་རྗེས་སུ་དཔག་པས་མཐོང་བའི་དོན་གྱི་ཡུལ་ཅན་གྱི་ཡིད་ཆེས་པའི་ཚིག་དང་མི་བསླུ་བར་མཚུངས་པ་ཉིད་ཀྱི་ཕྱིར་རྗེས་སུ་དཔག་པ་ཉིད་དོ་ཞེས་པ་ངག་གི་དོན་ཏོ། །འོ་ན་སྒྲ་རྣམས་དོན་རྣམས་ལ་འབྲེལ་པ་མེད་པའི་ཕྱིར་དང་། སྐྱེས་བུ་ཁྱད་པར་ཅན་ཡང་ངེས་པར་མི་ནུས་
[92b.6]པ་ཉིད་ཀྱི་ཕྱིར། ཕྱི་རོལ་གྱི་དོན་ལ་ཚད་མ་ཉིད་ཁོ་ནར་མི་རིགས་པ་མ་ཡིན་ནམ་ཞེ་ན་འདི་བདེན་མོད་འདི་ནི་འདིར་དགོངས་པ་སྟེ། སྐྱེས་བུ་འདི་ནི་ལུང་ཚད་མ་ཉིད་ལ་མ་བརྟེན་པར་གནས་པར་ནུས་པ་མ་ཡིན་ཏེ། འབྲས་བུ་དབང་པོ་ལས་འདས་པ་འགའ་ཞིག་རྣམས་ཀྱིས་ཕན་ཡོན་ཆེན་པོ་དང་ངན་འགྲོ་
[92b.7]ཐོས་པའི་ཕྱིར་དང་། དེ་ཡོད་པ་ལ་འགལ་བ་མ་མཐོང་བའི་ཕྱིར་ཡང་ངོ་། །དེས་ན་འཇུག་པར་བྱ་བ་ཡོད་ན། འདི་ལྟར་འཇུག་པ་མཆོག་གོ་ཞེས་པའོ། །དེའི་ཕྱིར་ཡོངས་སུ་བརྟགས་ནས་ཚད་མར་གསུངས་སོ། །དེ་ལ་སྐྱེས་བུའི་དོན་དང་ནུས་པ་དང་། དེའི་ཐབས་གང་རྟོགས་པར་བྱེད་པར་
[93a]
[93a.1]ནུས་པའི་བསྟན་བཅོས་དེ་བརྟག་པར་འོས་པའི་ཕྱིར་དེ་ཁོ་ན་བརྟག་པར་བྱ་སྟེ། གཞན་ལ་གནོད་པ་མེད་པ་ཁོ་ན་མི་རིགས་པ་ཉིད་ཀྱི་ཕྱིར་རོ། །དེ་གལ་ཏེ་སླུ་བ་མེད་པ་ཉིད་བརྟེན་པར་གྱུར་ན། འཇུག་པ་མཛེས་སོ། །ཡིད་ཆེས་པའི་ཚིག་བཟུང་ནས་ཞེས་པ་ལ་སོགས་
[93a.2]པ་སྟེ་ཡིད་ཆེས་པའི་ཚིག་བཟུང་ནས་མི་བསླུ་བར་རྟོགས་པའི་རྒྱུར། དེ་རྗེས་སུ་དཔག་པ་ཉིད་དུ་གསུངས་སོ། །ཅིའི་ཕྱིར་དེ་རྗེས་སུ་དཔག་པ་ཉིད་ཡིན་ཞེ་ན། དོན་ལ་མི་བསླུ་བར་མཚུངས་པ་ཉིད་ཀྱི་ཕྱིར་ཞེས་བཤད་པར་བྱའོ། །ཡང་འདིའི་མི་བསླུ་བ་ཅི་ཡིན་ཞེ་ན། མངོན་སུམ་དུ་མངོན་པར་
[93a.3]འདོད་པ་རྣམས་ཀྱི་དེ་ལྟའི་དངོས་པོ་དང་། དེ་ལྟར་མངོན་པར་འདོད་པ་མ་ཡིན་པ་རྣམས་ཀྱི་མངོན་སུམ་མ་ཡིན་པ་ཉིད་དང་། དེ་བཞིན་དུ་རྗེས་སུ་དཔག་པའི་ཡུལ་དུ་མངོན་པར་འདོད་པ་རྣམས་ཀྱི་དེ་ལྟ་བུའི་དངོས་པོ་དང་། དེ་ལྟར་གྱུར་པ་མ་ཡིན་པ་རྣམས་ཀྱི་རྗེས་སུ་དཔག་པར་བྱ་བ་མ་ཡིན་པ་ཉིད་
[93a.4]དེ། ཡོངས་སུ་གཅོད་པར་ནུས་པའི་ཡུལ་མ་ལུས་པ་ཡོངས་སུ་དག་པ་འདི་ནི་མི་བསླུ་བའོ། །དེ་དང་མཚུངས་པ་ཉིད་རྗེས་སུ་དཔག་པར་བྱ་སྟེ། མངོན་སུམ་དང་རྗེས་སུ་དཔག་པས་རྟོགས་པར་བྱ་བ་མ་ཡིན་པའི་དོན་ལ་ཡང་ཡིད་ཆེས་པའི་ཚིག་ཉིད་ཉེ་བར་དམིགས་ནས་སོ། །གང་ཡིད་ཆེས་པའི་
[93a.5]ཚིག་དེ་མི་བསླུ་བ་སྟེ། དེ་ལས་གཞན་པའི་ཡིད་ཆེས་པའི་ཚིག་བཞིན། ཤིན་ཏུ་ལྐོག་ཏུ་གྱུར་པའི་ཡུལ་ཅན་གྱི་ཚིག་འགའ་ཞིག་ཀྱང་ཡིད་ཆེས་པའི་ཚིག་ཡིན་ནོ། །རང་བཞིན་ནོ། །དེའི་ཕྱིར་རང་གི་མཚན་ཉིད་ཡུལ་དུ་བྱེད་པ་མ་ཡིན་ཡང་ལུང་རྣམས་ནི། དེ་ལས་གཞན་པའི་སྒྲ་བཞིན་དུ་
[93a.6]བརྗོད་པར་འདོད་པ་ཙམ་ལ་ཚད་མ་ཉིད་མ་ཡིན་གྱི། འོ་ན་ཅི་ཞེ་ན་དོན་ལ་ཡང་ངོ་། །ཡང་ན་རྣམ་པ་གཞན་དུ་ཡིད་ཆེས་པའི་ཚིག་གི་མི་བསླུ་བ་ལས་རྗེས་སུ་དཔག་པ་ཉིད་དུ་བརྗོད་པར་བྱ་སྟེ། སྤང་བར་བྱ་བ་དང་བླང་བར་བྱ་བ་དང་དེའི་ཐབས་རྣམས་དང་དེ་ཉེ་བར་སྟོན་པ་རྣམས་ཕྱིན་ཅི་མ་ལོག་པ་ཉིད་ནི་མི་
[93a.7]བསླུ་བའོ། །དེ་ལྟར་འདི་སྐྱེས་བུའི་དོན་ལ་ཉེ་བར་མཁོ་བ་ཅན་རྗེས་སུ་སྒྲུབ་པར་འོས་པ་ལ་མི་བསླུ་བའི་ཕྱིར་ཡུལ་གཞན་ལ་ཡང་དེ་ལྟར་ཉིད་དུ་ཁས་ལེན་གྱི། སླུ་བའི་ཆེད་དུ་ནི་མ་ཡིན་ཏེ། འགལ་བ་མེད་པའི་ཕྱིར་དང་། འཆད་པ་པོ་དགོས་པ་མེད་པ་ལ་ཕྱིན་ཅི་ལོག་ཏུ་རྗོད་པར་བྱེད་པ་འབྲས་བུ་མེད་
[93b]
[93b.1]པའི་ཕྱིར་རོ། །དེ་དང་འདི་རྣམས་གཉིས་ཀ་ལྟར་ཡང་གོ་སྐབས་མེད་པས་ལུང་རྗེས་སུ་དཔག་པ་ཉིད་དུ་ཉེ་བར་བསྒྲགས་ཏེ། ལུང་ལས་འཇུག་པ་ན་དེ་ལྟར་འཇུག་པ་མཆོག་གོ་ཞེས་པའོ། །རྗེས་སུ་དཔག་པ་ཉེས་པ་མེད་པ་ནི་མ་ཡིན་ཏེ་སྒྲ་རྣམས་དོན་རྣམས་དང་མེད་ན་འབྱུང་བ་མེད་པ་ཉིད་ཀྱི་ཕྱིར་རོ་ཞེས་པའོ། །
[93b.2]འདིར་ཡང་ཡིད་ཆེས་པའི་ཚིག་བཟུང་ནས། མི་བསླུ་བ་རྗེས་སུ་དཔག་པར་བྱ་ལ། དེ་རྗེས་སུ་དཔག་པ་ན་ཕྱིས་དེ་ཁོ་ན་ལས་མི་བསླུ་བ་ལས་ཡིད་ཆེས་པའི་ཚིག་ནི་རྗེས་སུ་དཔག་པ་ཉིད་དུ་འགྱུར་རོ། །རྗེས་སུ་དཔག་པའི་སྒྲ་ཡང་འདིར་རྟགས་ལ་འཇུག་སྟེ། འདིས་རྗེས་སུ་དཔག་པར་
[93b.3]བྱའོ་ཞེས་བྱས་ནས་སོ། །རྗེས་སུ་དཔོག་པའི་རྒྱུ་ཉིད་ལས་ཡང་ནའོ། །ཡང་ཡིད་ཆེས་པའི་ཚིག་གི་མི་བསླུ་བ་ནི་དོན་གྱི་འབྲས་བུ་ཉིད་ཀྱི་ཕྱིར་རོ། །དེ་ཡང་རྟོགས་པ་པོའི་ངོར་བྱས་པ་ལས་ཏེ། དངོས་པོའི་དབང་ལས་ནི་མ་ཡིན་ནོ། །དེ་སྐད་དུ་ཡང་སྨྲས་པ་ཞེས་པ་འདིས་རང་གི་འདོད་པ་
[93b.4]བསྟན་བཅོས་གཞན་དང་སྒྲིག་པར་བྱེད་དོ། །ཡིད་ཆེས་པ་རྣམས་ནི་མངོན་སུམ་དུ་མཐོ་རིས་ལ་སོགས་པ་རྣམས་ཀྱི་རང་བཞིན་བཟུང་ནས་མིང་བྱེད་དོ། །མིང་གི་ལས་ནི་ཉེ་བར་མཚོན་པ་ཙམ་དུ་རིག་པར་བྱ་སྟེ། དེ་རྣམས་ནི་ཐམས་ཅད་དུ་ཡང་དོན་མཐོང་བ་སྔོན་མ་ཅན་ཁོ་ནར་ཐ་སྙད་བྱེད་ལ། རྣམ་པ་
[93b.5]གཞན་དུ་ན་ཡིད་ཆེས་པ་རྣམས་ཁོ་ནར་མི་འགྱུར་རོ། །དེའི་ཕྱིར་དེ་རྣམས་ཀྱི་ཚིག་ཐམས་ཅད་མི་སླུ་བ་སྟེ། དེས་ན་རྗེས་སུ་དཔག་པའོ་ཞེས་པའོ། །ཕྱོགས་འདིས་ཞེས་པ་སྟེ། གཙོ་བོ་ལ་སོགས་པ་རྣམས་དང་དེ་རྣམས་ཀྱི་རྟགས་རྣམས་འབྲེལ་པ་མ་མཐོང་བ་ཉིད་ཀྱི་ཕྱིར། གཙོ་བོ་ལ་སོགས་པ་
[93b.6]རྣམས་ནི་ལུང་ལས་གྲུབ་པ་ཁོ་ནའོ་ཞེས་སྔར་གྱི་རྗེས་སུ་འབྲངས་ནས་བརྗོད་པར་བྱའོ། །རྗེས་དཔག་བྱ་དང་དེ་མཚུངས་ལའང་། །ཞེས་པ། ཨ་ཐའི་སྒྲ་ནི་སྡུད་པའི་དོན་ཅན་ཏེ། དེ་དང་མཚུངས་པ་ལ་ཡང་ཞེས་པའི་དོན་ཏོ། །དེ་མཚུངས་ལ། ཡོད་གྱུར་ནི་རྗེས་སུ་འགྲོ་བ་མཚོན་པར་རིག་པར་བྱ་སྟེ།
[93b.7]ཇི་ལྟར་བྱ་རོག་ལས་ཞོ་སྲུངས་ཤིག་ཅེས་པ་འདིར་བྱ་རོག་ནི་ཁྱི་ལ་སོགས་པ་གནོད་བྱེད་ཐམས་ཅད་ཀྱི་ཡིན་པ་བཞིན་ནོ། །འདི་སྐད་བཤད་པར་འགྱུར་ཏེ། རྗེས་སུ་འགྲོ་བ་ནི་ཚུལ་གཉིས་པའོ་ཞེས་པའོ། །དེ་ལྟ་ན་ཡང་མཉན་པར་བྱ་བ་ཉིད་ཀྱང་མི་རྟག་པའི་གཏན་ཚིགས་ལ་ཚུལ་གསུམ་པ་
[94a]
[94a.1]ཉིད་དུ་བསྒྲུབ་པར་འགྱུར་ལ། རྣམ་པ་གཞན་དུ་ན་མ་ཡིན་ཏེ། དེ་ལ་དེ་དང་མཚུངས་པ་ལ་ཡོད་པར་གྱུར་པ་ཉིད་ཡོད་པ་མ་ཡིན་པས་སོ། །རྗེས་སུ་འགྲོ་བ་ནི་ཡོད་དེ། རྗེས་སུ་འགྲོ་བ་ཞེས་བྱ་བ་ནི་རྟགས་ལ་རྟགས་ཅན་ཡོད་པ་ཁོ་ན་སྟེ། དེ་ཡང་མཉན་པར་བྱ་བ་
[94a.2]ཉིད་ལ་ཡང་ཡོད་དོ། །དེ་ལྟར་ནི་གང་དུ་མཉན་པར་བྱ་བ་ཉིད་ཡིན་པ་དེར་མི་རྟག་པ་ཉིད་དུ་འགྱུར་བ་ཁོ་ན་སྟེ། རྣམ་པ་གཞན་དུ་ན་མཉན་པར་བྱ་བ་ཉིད་ཁོ་ན་ཡང་མི་འབྱུང་བས་སོ་ཞེས་རྟོགས་པར་བྱེད་པར་འགྱུར་རོ། །མེད་ལ་མེད་ཉིད་པའོ་ཞེས་པ། འདིར་མེད་པའི་སྒྲས་དེ་དང་མཚུངས་པའི་
[94a.3]མེད་པ་བརྗོད་པར་བྱ་བ་འབའ་ཞིག་མ་ཡིན་གྱི། འོན་ཀྱང་དེ་ལས་གཞན་པ་དང་དེ་དང་འགལ་བ་ཡང་སྟེ་དེའི་རྣམ་པས་དབེན་པའི་ཕྱིར་རོ་ཞེས་རིག་པར་བྱའོ། །མེད་པ་ལ་མེད་པ་ཉིད་ནི་ལྡོག་པ་ཉེ་བར་མཚོན་པར་ཡང་བལྟ་བར་བྱའོ། །ལྡོག་པ་ཡང་ཚུལ་གསུམ་པའོ་ཞེས་པ་ངག་གི་དོན་ཏོ། །
[94a.4]འདིར་ཆོས་དང་ཆོས་ཅན་འབའ་ཞིག་པ་དག་གྲུབ་ཟིན་པ་ཉིད་ཀྱི་ཕྱིར། རྗེས་སུ་དཔག་བྱ་ཉིད་དུ་འཐད་པ་མ་ཡིན་ཞིང་། ཚོགས་པ་ཡང་ཇི་སྲིད་དུ་ཆོས་མ་གྲུབ་པ་དེ་སྲིད་དུ་མི་སྲིད་པ་ཁོ་ནའོ། །བློ་ལ་ངེས་པར་ཞུགས་པ་མ་ཡིན་པས་ནི་ཆོས་ཀྱིས་ཁྱད་པར་དུ་བྱས་པའི་ཆོས་ཅན་དུ་རིགས་པ་མ་ཡིན་
[94a.5]པའི་ཕྱིར་ཏེ། ཆོས་ཅན་ལ་གྲུབ་ན་ནི། ཕྱིས་ཚོགས་པ་སྐྱེ་མོད། དེའི་ཚེ་ཡང་དེའི་བསྒྲུབ་པར་བྱ་བ་ཉིད་ལྡོག་སྟེ། གྲུབ་པ་ཉིད་ཀྱི་ཕྱིར་རོ། །དེའི་ཕྱིར་རྗེས་སུ་དཔག་པར་བྱ་བ་ལ་གཏན་ཚིགས་ཡོད་པ་ཉིད་མི་སྲིད་པ་ཁོ་ནའོ་ཞེས་འགའ་ཞིག་གི་རྩོད་པ་དོགས་པར་བྱས་ནས་སྨྲས་པ། རྗེས་སུ་དཔག་
[94a.6]པར་བྱ་བ་ནི་ཞེས་པ་ལ་སོགས་པའོ། །འདིར་གལ་ཏེ་ཡང་ཆོས་ཀྱི་སྒྲ་སྤྱི་སྒྲ་ཡིན་པ་དེ་ལྟ་ན་ཡང་། སྒྲུབ་པར་བྱེད་པའི་སྐབས་ལས་གང་གི་དོན་དུ་སྒྲུབ་པར་བྱེད་པ་རྗེས་སུ་འདོད་པ་དེ་ཁོ་ན་ལ་ཉེ་བ་ལས་འཇུག་གོ། །ཡང་དེའང་ཅི་ཞེ་ན། ཤེས་པར་འདོད་པའི་བྱེ་བྲག་གི་མཚན་ཉིད་ཅན་གྱི་ཆོས་
[94a.7]ཏེ། ཆོས་ཅན་གྱི་ཆོས་ཤེས་པར་འདོད་པ་མེད་པ་ལ་ནི་རྟོག་པ་དང་ལྡན་པ་སུ་ཡང་སྒྲུབ་པར་བྱེད་པ་འགོད་པ་མེད་དེ། དེའི་ཕྱིར་ཡོད་པ་ཉིད་དུ་གྲུབ་པའི་ཆོས་ཅན་ལ། གང་ལ་སྒྲུབ་པར་བྱེད་པ་དྲངས་པ་ཤེས་འདོད་དང་ལྡན་པའི་ཆོས་དེ་ཁོ་ན་ཆོས་ཀྱི་སྒྲས་རྟོགས་པར་བྱས་ཏེ། དེས་ཁྱད་པར་དུ་
[94b]
[94b.1]བྱས་པ་ནི་དོན་གཞན་ལས་རྣམ་པར་གཅད་པ་ཞེས་བྱ་བའི་དོན་ཏོ། །དེ་ལས་ཀྱང་དོན་འདི་ཁོ་ནར་འགྱུར་ཏེ། ཤེས་པར་འདོད་པས་ཁྱད་པར་དུ་བྱས་པའི་ཆོས་ཅན་ཞེས་པའོ། །དེ་ལྟར་ནི་གང་ཤེས་པར་འདོད་པ་གང་ཡིན་པས་ཁྱད་པར་དུ་བྱས་པར་འགྱུར་བ་དེའི་ཤེས་པར་འདོད་པ་འདི་ཁྱད་
[94b.2]པར་དུ་འགྱུར་ཏེ། ཚོགས་པ་བསྒྲུབ་བྱའོ་ཞེས་པའི་ཚིག་ཀྱང་ཤེས་པར་འདོད་པ་ཅན་གྱི་ཆོས་ལ་ལྟོས་པ་ཁོ་ནས་རིག་པར་བྱའོ། །དུས་ཕྱིས་ཀྱི་ཆོས་གྲུབ་པ་བསྟེན་པ་ནི་ཆོས་ཀྱིས་ཁྱད་པར་དུ་བྱས་པའི་ཆོས་ཅན་ཞེས་སོ་སོར་སྟོན་པར་བྱེད་ཀྱི། རྟགས་མཐོང་བའི་དུས་ན་ཆོས་ཀྱིས་ཁྱད་པར་
[94b.3]དུ་བྱས་པ་ཉིད་ཡོད་པ་ནི་མ་ཡིན་ཏེ། ཆོས་ཡང་དག་པར་ཤེས་པ་མེད་པ་ཉིད་ཀྱི་ཕྱིར་རོ་ཞེས་གཞན་རྣམས་སོ། །ཤེས་པར་བྱེད་པ་གཏན་ཚིགས་ཀྱི་སྐབས་ཡིན་པའི་ཕྱིར་ཤེས་པ་དོན་གྱིས་འཕངས་པའོ་ཞེས་ངེས་པར་བྱས་ནས་གསུངས་པ། དེ་ལ་མཐོང་བ་ནི་ཞེས་པ་ལ་སོགས་པ་སྟེ། དེ་ལ་
[94b.4]ཞེས་པ་རྗེས་སུ་དཔག་པར་བྱ་བ་ལའོ། །མངོན་སུམ་མམ་ཞེས་པ་དུ་བ་ལ་སོགས་པ་སྟེ། དུ་བ་དང་བཅས་པའི་ཕྱོགས་དོན་གཞན་གྱིས་དབེན་པའི་ངོ་བོ་ཅན་ཐུན་མོང་མ་ཡིན་པའི་བདག་ཉིད་དུ་མཐོང་བ་པོ་ལ་ནི་མངོན་སུམ་གྱིས་ཏེ། མངོན་སུམ་གྱི་སྟོབས་ཁོ་ནས་ཇི་ལྟར་མཐོང་བའི་ཁྱད་པར་གྱི་ཡུལ་
[94b.5]ཅན་གྱི་ངེས་པ་དེ་ཁོ་ན་འདིའོ་ཞེས་དྲན་པ་རྟགས་ཤེས་པ་དུས་ཕྱིས་སྐྱེའོ། །དེ་ཡང་ཚད་མ་མ་ཡིན་ཏེ། མ་རྟོགས་པར་དོན་བྱ་བར་རུང་བའི་དངོས་པོ་རྟོགས་པ་མེད་པའི་ཕྱིར་རོ། །དང་པོ་ཁོ་ན་ནི་ཚད་མ་ཉིད་དེ། དེ་ལས་བཟློག་པའི་ཕྱིར་རོ། །འདི་ནི་ཚད་མའི་མཚན་ཉིད་ཡིན་པ་ཉིད་ཀྱི་ཕྱིར་ཏེ། དེ་
[94b.6]ག་ལས་ཤེ་ན། དངོས་པོ་ལ་བརྟེན་པ་ཉིད་ལས་ཚད་མ་རྣམ་པར་གཞག་པའི་ཕྱིར་རོ། །དེ་ཡང་ག་ལས་ཤེ་ན། དོན་དུ་གཉེར་བའི་འཇུག་པ་ནི་དོན་བྱ་བར་རུང་བའི་ཡུལ་ཅན་ཉིད་ཡིན་པའི་ཕྱིར་རོ། །འདིས་ནི་ཆོས་ཅན་དང་ཆོས་ལ་སོགས་པའི་རྣམ་པར་རྟོག་པ་ཚད་མ་ཉིད་མ་ཡིན་པར་རིག་པར་བྱའོ། །དེ་
[94b.7]ལས་ཀྱང་གང་རྣམས་རྟགས་ལ་སོགས་པའི་ཤེས་པ་རྣམས་མངོན་སུམ་དང་རྗེས་སུ་དཔག་པའི་ནང་དུ་མ་འདུས་པ་ཉིད་ཀྱི་ཕྱིར་ཚད་མ་གཞན་ཉིད་དུ་འཐོབ་བོ་ཞེས་རྩོད་པར་བྱེད་པ་དེ་རྣམས་བདག་ཉིད་ཀྱིས་བླུན་པོ་ཉིད་དུ་འཆད་དོ། །ཡང་ན་རྗེས་སུ་དཔག་པ་ལས་ཞེས་པ་བྱས་པ་ཉིད་ལ་སོགས་པ་ནི་རེས་
[95a]
[95a.1]འགའ་བ་ཉིད་ལ་སོགས་པའི་རྟགས་ཀྱིས་རྗེས་སུ་དཔག་པར་བྱ་བ་ཡིན་པ་ཉིད་ཀྱི་ཕྱིར་རོ། །དུས་ཕྱིས་ཞེས་པ་སོ་སོར་སྦྲེལ་བར་བྱ་སྟེ། མངོན་སུམ་ལས་དུས་ཕྱིས་སམ་ཡང་ན་རྗེས་སུ་དཔག་པ་ལས་དུས་ཕྱིས་ཞེས་པའོ། །རྗེས་སུ་དཔག་པའི་སྒྲ་ཡང་འདིར་རྟགས་ཤེས་པ་
[95a.2]ལ་འཇུག་སྟེ། ཇི་སྐད་དུ་བཤད་པ། དེ་འདི་ནི་དངོས་སམ་བརྒྱུད་པས་རྗེས་སུ་དཔོག་པའི་རྒྱུ་ཉིད་ཀྱི་ཕྱིར་གཉིས་ཀ་ཡང་རྗེས་སུ་དཔག་པ་སྟེ། བྱེད་པའི་བྱེད་པ་ཅན་དུ་བྱས་ནས་སོ། །ཆོས་སྤྱིའི་ངོ་བོས་ཞེས་པ་ལ། སྤྱིའི་ངོ་བོ་སྨོས་པ་ནི་ཐུན་མོང་མ་ཡིན་པའི་ངོ་བོ་བསལ་བའི་དོན་ཏོ། །དེས་རྗེས་སུ་
[95a.3]དཔག་པ་མི་སྲིད་པའི་ཕྱིར་རོ། །དེ་ནི་མངོན་སུམ་ལ་སོགས་པའི་རྗེས་ལ་བྱུང་བའི་ཤེས་པས་ཡུལ་དུ་བྱ་བར་ནུས་པ་ཡང་མ་ཡིན་ཏེ་དེ་ནི་རྣམ་པར་རྟོག་པ་དང་བཅས་པ་ཉིད་ཀྱི་ཕྱིར་དང་། རྣམ་པར་རྟོག་པ་རྣམས་ཀྱང་སྤྱིའི་ཡུལ་ཅན་ཉིད་ཀྱི་ཕྱིར་རོ། །དེའི་རིགས་ཅན་ལ་ཡང་ཞེས་པ་འདིར་ཡང་སྤྱིའི་
[95a.4]ངོ་བོས་ཞེས་སྦྲེལ་བར་བྱའོ། །འོ་ན་ཆོས་ཅན་གྱིས་ཁྱད་པར་དུ་བྱས་པ་གཞན་དུ་འཇུག་པ་འགལ་བ། ཁྱད་པར་དུ་མི་བྱེད་ནའང་རྗེས་སུ་དཔག་པར་བྱ་བའི་ཆོས་ཉིད་དུ་མི་འགྱུར་རོ་ཞེ་ན་མ་ཡིན་ཏེ། མི་ལྡན་པ་རྣམ་པར་གཅོད་པས་ཁྱད་པར་དུ་བྱེད་པའི་ཕྱིར་ཏེ། དཔེར་ན་ནག་པ་གཞུང་འཛིན་ནོ་
[95a.5]ཞེས་པ་ལྟ་བུའོ། །གལ་ཏེ་དེ་ལྟ་ན་སྒྲུབ་པར་བྱེད་པའི་ཆོས་ཀྱི་བྱེ་བྲག་ནི་རྗེས་སུ་དཔག་པ་དང་རྗེས་སུ་དཔག་པར་བྱ་བའི་ཐ་སྙད་ཀྱི་ངོར་ཉེ་བར་སྦྱོར་བ་མ་ཡིན་ནོ་ཞེས་པ་སྤྱི་ཁོ་ན་རྟགས་སུ་ཡོངས་སུ་གཟུང་བར་བྱ་ལ། བསྒྲུབ་པར་བྱ་བའི་ཆོས་ཀྱི་ཡང་དེ་ཁོ་ན་གཟུང་བར་བྱ་སྟེ། དེའི་ཡང་ཁྱད་པར་ནི་ཉེ་
[95a.6]བར་སྦྱོར་བ་མ་ཡིན་པས་སོ། །སྤྱི་སྒྲུབ་པར་བྱེད་ན་ཡང་གྲུབ་པ་བསྒྲུབ་པར་བྱ་བ་ཉིད་དུ་འགྱུར་རོ་ཞེ་ན། སྐྱོན་འདི་མེད་དེ། སྤྱི་ཁོ་ན་བསྒྲུབ་པར་བྱ་བ་སྟེ། མི་ལྡན་པ་རྣམ་པར་བཅད་པས་སོ། །གྲུབ་པ་ལ་བསྒྲུབ་པ་ཡང་མ་ཡིན་ཏེ། མི་ལྡན་པ་རྣམ་པར་གཅོད་པ་མ་གྲུབ་པའི་ཕྱིར་རོ། །ཕྱོགས་
[95a.7]གཅིག་སྨོས་པས་མཐུན་ཕྱོགས་ལ་མ་ཁྱབ་པ་ཡང་གཏན་ཚིགས་ཉིད་དུ་སྟོན་ཏོ། །དེ་ཅིའི་ཕྱིར་ཞེ་ན་ཞེས་པ་རྗེས་སུ་དཔག་པར་བྱ་བ་དང་དེ་དང་མཚུངས་པ་དག་ལ་མཚུངས་པར་ཡོད་པར་བརྗོད་པ་ལ་གཅིག་ལ་ནི་གཏན་ཚིགས་ཐམས་ཅད་ལ་ཡོད་པར་གྱུར་པ་སྟེ། གཞན་ལ་ནི་ཕྱོགས་གཅིག་ལ་ཡང་ཞེས་པ་འདི་ཅིའི་ཕྱིར་འཐོབ་ཅེས་
[95b]
[95b.1]འདྲི་བར་བྱེད་དོ། །ངག་རྣམས་ནི་རྣམ་པར་གཅོད་པའི་འབྲས་བུ་ཅན་ཉིད་ཀྱི་ཕྱིར་ཏེ། འདོད་པ་ལས་ཀྱང་ངེས་པར་འཛིན་པ་ལས་འདི་འཐོབ་བོ་ཞེས་གསུངས་པ། དེ་དང་མཚུངས་པ་ཁོ་ན་ལ་ཞེས་པ་ལ་སོགས་པའོ། །འདིས་ནི་གཞན་དང་ལྡན་པ་རྣམ་པར་གཅོད་པས་འདིར་ངེས་
[95b.2]པར་གཟུང་བ་ལ་བརྟེན་པ་སྟེ། དཔེར་ན་སྲིད་སྒྲུབ་གཞུ་འཛིན་ཞེས་པ་ལྟ་བུའི་ཞེས་སྟོན་ཏོ། །གལ་ཏེ་དེ་ལྟ་ན་བསྒྲུབ་པར་བྱ་བའི་ཆོས་ཅན་ལ་མི་འཇུག་པར་འགྱུར་རོ་ཞེ་ན། ཆོས་གཞན་དགག་པའི་དོན་ཉིད་ཀྱི་ཕྱིར་རོ། །དེ་ལ་འཇུག་པ་སྒྲུབ་པ་ན་སྡུད་པའི་ངེས་པར་འཛིན་པས་ནི་གཞན་རྣམ་
[95b.3]པར་གཅོད་པ་ཡིན་ཏེ། དཔེར་ན་རང་ལ་བུ་གཉིས་སྐྱེས་གྱུར་ཏེ། །ན་ར་དང་ནི་སྲེད་མེད་ཁོ་ནའོ། །ཞེས་པ་ལྟ་བུའོ། །དེ་ལྟར་ན་བརྗོད་པར་བྱ་བ་མ་ཡིན་ནོ་ཞེས་པ། ངེས་པར་གཟུང་བ་དེ་ཁོ་ན་ལས་དེའི་དོན་རྟོགས་པ་ཉིད་ཀྱི་ཕྱིར་རོ་ཞེས་སེམས་པའོ། །འདི་ཡང་ཞེས་པ་ལ་སོགས་པ་ལ།
[95b.4]འདི་ངེས་པར་བྱ་བས་ན་ངེས་པ་སྟེ། ཆོས་མཐུན་པ་ཉིད་དང་ལྡན་པ་དང་ཆོས་མི་མཐུན་པ་ཉིད་དང་ལྡན་པའི་སྦྱོར་བ་བརྗོད་པར་བྱའོ། །གང་ཕྱིར་སྦྱོར་བའི་ངག་གིས་ནི་ཚད་མ་གསལ་བར་བྱེད་པས། ཅི་འདི་བརྟག་པའམ་འོན་ཏེ་མ་ཡིན་ཞེས་ཕ་རོལ་པོ་རྣམས་ཀྱི་ཐེ་ཚོམ་གྱི་ཁྱོགས་ལ་ཞོན་པའི་བློ་
[95b.5]འདི་ནི་མི་རྟག་པ་ཁོ་ནའོ་ཞེས་དོན་གཞན་ལས་རྣམ་པར་བཅད་ནས་མི་རྟག་པ་ཁོ་ན་ལ་རྣམ་པར་འཇོག་པར་བྱེད་དེ། དེའི་ཕྱིར་སྦྱོར་བ་ངེས་པའོ། །དེའི་དོན་དུ་ཚུལ་གསུམ་པ་བཤད་པར་བྱའོ། །རྗེས་སུ་འགྲོ་བ་དང་ལྡོག་པ་དག་ལས་ཁྱབ་པ་ངེས་པ་ཅན་གྱི་ཚུལ་གཅིག་སྦྱར་བས་ཀྱང་དོན་གྱིས་
[95b.6]གཉིས་པ་རྟོགས་པར་བྱེད་དོ་ཞེས་པས་གཅིག་ཀྱང་སྦྱོར་བར་འགྱུར་རོ་ཞེས་པའོ། །འོ་ན་རྟགས་ཚུལ་གཉིས་འཐོབ་པར་འགྱུར་རོ་ཞེ་ན། མ་ཡིན་ཏེ་རྗེས་སུ་འགྲོ་བ་དང་ལྡོག་པ་དག་ཚུལ་ཐ་དད་པའི་ཕྱིར་རོ། །དེ་དག་ནི་ངག་གཅིག་གིས་ཀྱང་བསྟན་པར་ནུས་པའི་ཕྱིར་སྦྱོར་བ་བསྡུས་ཏེ་བརྗོད་ཀྱི་
[95b.7]ཚུལ་བསྡུས་པ་ནི་མ་ཡིན་ནོ། །དེ་ལྟར་ནི་ཡང་ན་དོན་གྱིས་གོ་བས་གང་ཡང་རུང་བས་གཉིས་ཀ་རབ་ཏུ་བསྟན་པའི་ཕྱིར་གསུངས་སོ། །དེ་ལྟར་འགྱུར་མོད། མེད་པ་ལ་མེད་པ་ཉིད་ནི་འཐད་པ་མ་ཡིན་པ་ཁོ་ན་སྟེ། མེད་པ་ནི་གཞི་ཉིད་ལ་སོགས་པར་མི་རུང་བའི་ཕྱིར་རོ། །བྱེད་པ་ཅན་རྣམས་ནི་ནུས་
[96a]
[96a.1]པ་ལས་རབ་ཏུ་སྐྱེས་པ་ཅན་རྣམས་ཡིན་པས་ཏེ། མེད་པ་ཡང་ནུས་པ་ཐམས་ཅད་དང་བྲལ་བའི་ཕྱིར་རོ་ཞེ་ན། དེའི་ཕྱིར་གསུངས་པ། མེད་པ་ཁོ་ན་ལ་མེད་པ་ཉིད་ཅེས་པ་སྟེ། ཚིག་ཕྲད་རིམ་པ་ཐ་དད་པར་བྱ་ལ། མེད་པ་ལ་མེད་པ་ཉིད་ཁོ་ན་ཞེས་བལྟ་བར་བྱའོ། །ཡང་ན་
[96a.2]ཇི་ལྟར་བཀོད་པ་ཁོ་ན་འགྱུར་རོ། །འོ་ན་དེ་ལྟར་གྱུར་ན་ཡོད་པ་དང་ལྡན་པ་ལ་མེད་པ་ཉིད་ཐོབ་པ་མ་ཡིན་ནོ་ཞེ་ན། སྐྱོན་འདི་མེད་དེ། འདིར་མེད་ལ་མེད་ཉིད་མེད་པའོ། །ཞེས་པའི་མཚན་ཉིད་ཀྱི་ཚིག་ལ་མེད་པ་ལ་མེད་པ་ཉིད་ཁོ་ན་ཞེས་ངེས་པར་གཟུང་བར་འདོད་པ་ཉིད་ཀྱི་ཕྱིར་མེད་པ་ཉིད་བརྗོད་པ་ནི་
[96a.3]ངེས་པ་དང་ལྡན་པའོ། །དེའི་ཕྱིར་དེའི་དབང་དུ་བྱས་ནས་འདི་སྐད་བཤད་པའོ། །འདི་ནི་འདིའི་དོན་ཏེ། མེད་པ་ལ་མེད་པ་ཉིད་ཁོ་ན་ནི་དངོས་པོ་དགག་པའི་ངོ་བོར་འགྱུར་གྱི་ཡོད་པ་ཉིད་སྒྲུབ་པ་ནི་མ་ཡིན་གྱི། མེད་པ་སྒྲུབ་པ་མི་རུང་བའི་ཕྱིར་རོ། །འདི་ནི་ཚད་མའི་འབྲས་བུའོ། །གཞན་པ་
[96a.4]ལ་མ་ཡིན་ཞེས་པ་དེ་མ་ཐག་པའི་མེད་པ་ལས་ཏེ། སྐབས་ཉིད་ཀྱི་ཕྱིར་རོ། །དེ་ལ་ལྟོས་པས་འདིར་གཞན་པའི་དོན་བལྟ་བར་བྱའོ། །མེད་པ་ལས་གཞན་པ་ཡོད་པ་ཉིད་དང་ལྡན་པ་ལ་མེད་པ་ཉིད་ཁོ་ནར་འགྱུར་བ་མ་ཡིན་ཏེ། དེ་ལ་སྒྲུབ་པ་ཡང་སྲིད་པའི་ཕྱིར་རོ། །འདིས་ནི་ངེས་པ་དང་ལྡན་
[96a.5]པས་མེད་པ་ཉིད་ནི་ཡོད་པ་ལ་འགོག་པར་བྱེད་པས་ངེས་པ་དང་བྲལ་བའི་མེད་པ་ཉིད་ཡོད་དོ་ཞེས་དོན་འདི་རྟོགས་ཏེ། དགག་པ་ཁྱད་པར་ཅན་གྱིས་ནི་དེ་ལས་བཟློག་པ་རྟོགས་པར་འགྱུར་རོ། །དཔེར་ན་འདི་ནི་འབྲས་བུ་ཅན་གྱི་པ་ལཱ་ཤ་མེད་དོ་ཞེས་པ་ལྟ་བུའོ། །དཔེ་འདི་ནི་ཕ་རོལ་པོ་ལ་གྲུབ་
[96a.6]པ་ཉིད་ཀྱི་ཕྱིར་རོ། །མེད་པ་ལ་ནི་ཕ་རོལ་པོས་མེད་པ་ཉིད་འདོད་པ་མ་ཡིན་ཞིང་། ཡོད་པ་ལ་ནི་མ་ཡིན་ནོ། །མེད་པ་ལ་ངེས་པ་དང་ལྡན་པའི་མེད་པ་ཉིད་འགྱུར་བ་རྒྱུ་ཅི་ཞེ་ན་གསུངས་པ། འགལ་བ་ལ་ཡང་མ་ཡིན་ཞེས་པ་སྟེ། ཞེས་པའི་བྱེད་པ་ནི་གཏན་ཚིགས་ལའོ། །འདི་སྐད་སྟོན་ཏོ། །གལ་ཏེ་
[96a.7]མེད་པ་ལ་དངོས་པོའི་ཆོས་འགའ་ཞིག་སྒྲུབ་ན་སྐྱོན་དུ་འགྱུར་མོད། དངོས་པོའི་ཆོས་ནི་མེད་པ་ལ་མི་སྲིད་པའི་ཕྱིར་རོ། །འདིར་ཅུང་ཟད་སྒྲུབ་པ་ཡང་མ་ཡིན་གྱི། འོ་ན་ཅི་ཞེ་ན། དགག་པ་ཙམ་དུ་བྱ་བའོ། །ཡོད་པ་མ་ཡིན་པའམ་མེད་པ་ནི་མོ་གཤམ་གྱི་བུ་ལ་སོགས་པ་མེད་པ་ཉིད་དང་འགལ་
[96b]
[96b.1]བ་ཡང་མ་ཡིན་ཏེ། དེའི་ཕྱིར་དེ་དེ་ལ་སྲིད་དོ་ཞེས་པའོ། །ཡང་མེད་པ་ཉིད་དང་འགལ་བ་མ་ཡིན་པ་འདི་ནི་དེ་ལ་སྲིད་པ་སྟེ། དཔེར་ན་མེད་པ་ལ་བཞིན་མེད་པ་ཡང་དངོས་པོའི་ཆོས་བཀག་པའི་མཚན་ཉིད་ཅན་མེད་པ་ཉིད་དང་མི་འགལ་བའོ། །རང་བཞིན་ནོ། །གཞི་ལ་སོགས་པའི་ཐ་
[96b.2]སྙད་ནི་དངོས་པོའི་རྒྱུ་ཅན་ཁོ་ན་མ་ཡིན་ནོ། །མེད་པ་ལ་མེད་པ་ཉིད་མེད་དོ་ཞེས་སྨྲ་བའི་ཕ་རོལ་པོས་ཀྱང་འདི་ཁས་བླངས་སོ་ཞེས་པ་དགོངས་པའོ། །ཤེས་པ་སྨོས་པ་ཞེས་པ་ལ་སོགས་པ་སྟེ། གང་ཞིག་གིས་ཤེས་པ་གཟུང་བར་བྱ་བ་འདི་ནི་ཤེས་པ་སྨོས་པ་སྟེ། རྩོལ་བ་གཞན་པའོ། །
[96b.3]འདི་སྐད་བཤད་པར་འགྱུར་ཏེ། ཇི་ལྟར་རྟགས་ཀྱི་ཡུལ་ཅན་གྱི་ཤེས་པ་འཐོབ་པ་དེ་ལྟར་རྩོལ་བ་གཞན་བྱ་བ་སྟེ། གཞན་དུ་ན་མ་ཤེས་པའི་དུ་བ་ལ་སོགས་པ་ལས་ཀྱང་བསྟན་པའི་ཡུལ་གྱི་ཁྱད་པར་དུ། མེ་ལ་སོགས་པ་ལ་རྗེས་སུ་དཔག་པར་འགྱུར་རོ་ཞེས་པའོ། །ཤེས་པའང་ཐོབ་
[96b.4]ཅེས་པ་ལ་སོགས་པས། ཤེས་པ་ནི་ཤུགས་ཀྱིས་འཕངས་པ་ཉིད་ཀྱི་ཕྱིར་དེ་ལ་རྩོལ་བ་གཞན་བསྒྲུབ་པར་བྱ་བ་མ་ཡིན་ནོ་ཞེས་སྟོན་ཏོ། །ཚུལ་རེ་རེ་དང་གཉིས་གཉིས་པའང་ཞེས་པ་ལ་སོགས་པ་སྟེ། གང་ཞིག་གི་ཚུལ་རེ་རེ་དང་གཉིས་གཉིས་དག་ཡིན་པ་དེ་དེ་སྐད་དུ་བརྗོད་དོ། །དོན་
[96b.5]དང་འབྲེལ་པ་ལས་འདིར་སྐྱེས་པའི་རྟགས་སུ་བསྟན་ཏོ། །དོན་གྱིས་ཞེས་པ་སྒྲ་མེད་ཀྱང་དོན་གྱིས་འཐོབ་པ་ཉིད་དུ་དོན་འདི་སྟོན་པར་བྱེད་དོ། །གལ་ཏེ་དེ་ལྟ་ན་དོན་འདི་དོན་གྱིས་ཐོབ་པ་ཁོ་ན་ཡིན་ན། ཅིའི་དོན་དུ་བཤད་པར་བྱ་སྟེ། དོན་འདི་ཁོ་བོས་སྒྲ་མེད་ཀྱང་དོན་གྱིས་རྟོགས་སོ་ཞེས་པ།
[96b.6]དེ་ལྟར་ཚིག་བརྗོད་པར་བྱ་བཞིན་པ་ལ་ནི། བཤད་ཟིན་པར་ཡང་མི་འགྱུར་ཞིང་། དོན་གྱིས་ཐོབ་པ་སླར་ཡང་བརྗོད་པས་རྟོགས་པར་བྱེད་པ་ནི་འབྲས་བུ་དང་ལྡན་པ་ཡང་མ་ཡིན་ནོ་ཞེ་ན། འདི་བདེན་མོད། དེ་ལྟ་ན་ཡང་བློ་ཞེན་པས་བྱེ་བྲག་ཏུ་རྟོགས་པར་བྱ་བའི་དོན་དུ་འདི་དོན་གྱིས་ཐོབ་ཀྱང་བཤད་པར་
[96b.7]བྱ་སྟེ། མགོ་སྨོས་པས་ཤེས་པ་ལ་ལྟོས་པས་ནི་མ་ཡིན་ནོ་ཞེས་པའོ། །འདིར་རྩོད་པ། དེ་དང་མཚུངས་པ་ཉིད་ལ་ཡོད་པར་གྱུར་པ་ཞེས་པ་འདིས་རྗེས་སུ་འགྲོ་བ་རྟོགས་པར་བྱ་ཞིང་དེ་ཡང་ལྡོག་པ་མེད་པར་མེད་ལ། མེད་པ་ལ་མེད་པ་ཉིད་ཅེས་པ་འདིས་ཀྱང་ལྡོག་པ་སྟེ། དེ་ཡང་རྗེས་སུ་འགྲོ་བ་མེད་
[97a]
[97a.1]པར་མ་ཡིན་ན། དེ་ཇི་ལྟར་འདི་སྐད་དུ། དེ་དང་མཚུངས་པ་ལ་ཡོད་ཅིང་དེ་མེད་པ་ལ་མེད་པ་ནི་མ་ཡིན་པ་དང་། དེ་མེད་པ་ལ་མེད་ཅིང་དེ་དང་མཚུངས་པ་ལ་ཡོད་པ་ནི་མ་ཡིན་པ་ཞེས་པ་ལ་སོགས་པ་བཤད་ཅེ་ན། སྐྱོན་འདི་མེད་དེ། འདི་ནི་རྗེས་སུ་འགྲོ་བའི་མཚན་ཉིད་དང་
[97a.2]ལྡོག་པའི་མཚན་ཉིད་རང་བཞིན་པའི་ངོ་བོའི་དབང་དུ་བྱས་ནས་བཤད་པ་མ་ཡིན་གྱི། འོ་ན་ཅི་ཞེ་ན། མཐུན་པའི་ཕྱོགས་ལ་ཡོད་པར་གྱུར་པ་ཙམ་གྱི་དང་། མི་མཐུན་པའི་ཕྱོགས་ལ་ཡང་མེད་པ་ཉིད་ཙམ་ངེས་པ་དང་བྲལ་བའོ། །འདུན་པ་ལས་ཀྱང་ཚིག་རྣམས་ཀྱི་འཇུག་པ་སྟེ། དོན་ནི་
[97a.3]ཡོངས་སུ་བརྟག་པར་བྱའོ། །འདི་ནི་འདིར་བརྗོད་པར་འདོད་པའི་དོན་ཏོ། །གང་ལ་རྗེས་སུ་འགྲོ་བ་དང་ལྡོག་པ་དག་ཡོད་པ་མ་ཡིན་ན་ཕྱོགས་ཀྱི་ཆོས་ཉིད་ཡོད་ཀྱང་གཏན་ཚིགས་མ་ཡིན་ཞིང་། གང་ལ་ཕྱོགས་ཀྱི་ཆོས་ཉིད་མེད་ན་རྗེས་སུ་འགྲོ་བ་དང་ལྡོག་པ་དང་ལྡན་ན་ཡང་དེ་ཡང་གཏན་
[97a.4]ཚིགས་མ་ཡིན་ནོ་ཞེས་པའོ། །དེ་ཡང་རྣམ་པ་འདིས་ཀྱང་རྟོགས་པར་བྱ་བར་ནུས་པ་དེ་ཁོ་ནའོ་ཞེས་པའོ། །ཀུན་ནས་གནས་པ་མ་ཡིན་པར་སྨྲ་བའི་ངོར་སྒྲ་རྟག་སྟེ་ལུས་ཅན་ཉིད་ཀྱི་ཕྱིར་རོ་ཞེས་པའོ། །བྱེ་བྲག་པའི་འདོད་པས་རྟག་པ་དང་ལུས་ཅན་རྡུལ་ཕྲ་རབ་ལ་ལྟོས་པས་གཅིག་པའོ། །དེ་བཞིན་
[97a.5]དུ་སྒྲ་རྟག་སྟེ་གཞལ་བྱ་མ་ཡིན་པ་ཉིད་ཀྱི་ཕྱིར་རོ་ཞེས་པ་མི་མཐུན་ཕྱོགས་ལས་ལྡོག་པའི་ཕྱིར་ཚུལ་གཅིག་པའོ། །སྒྲ་རྟག་སྟེ་ལུས་ཅན་མ་ཡིན་པ་ཉིད་ཀྱི་ཕྱིར་རོ་ཞེས་པ་ཚུལ་གཉིས་པ་ཐུན་མོང་བའོ། །སྒྲ་རྟག་སྟེ་མཉན་བྱ་ཉིད་ཀྱི་ཕྱིར་རོ་ཞེས་པ་འདི་ཐུན་མོང་མ་ཡིན་པ་ཚུལ་གཉིས་པ་སྟེ། གལ་ཏེ་སྒྲ་ཉིད་
[97a.6]རྟག་པར་ཁས་མི་ལེན་ནའོ། །སྒྲ་མི་རྟག་སྟེ་མིག་གིས་གཟུང་བར་བྱ་བ་ཉིད་ཀྱི་ཕྱིར་རོ་ཞེས་པ་ཚུལ་གཉིས་པ་འདི་མ་གྲུབ་པ་སྟེ། གལ་ཏེ་རིགས་རྣམས་མིག་གིས་གཟུང་བར་མི་འདོད་ནའོ། །ཚུལ་མེད་པ་ཡང་ཡོད་དེ། འདི་ལྟ་སྟེ། སྒྲ་རྟག་སྟེ་མིག་གིས་གཟུང་བར་བྱ་བ་ཉིད་ཀྱི་ཕྱིར་རོ་ཞེས་པ་ལ་
[97a.7]སོགས་པ་ལྟ་བུ་སྟེ། དེ་ནི་ཕྱོགས་འདི་ཁོ་ནས་རྟོགས་པར་བྱའོ་ཞེས་པས་ཚིགས་སུ་བཅད་པར་མ་གསུངས་སོ། །མདོར་ནི་ཚུལ་རེ་རེ་དང་། གཉིས་གཉིས་པའང་ཞེས་པ་འདིར། འང་གི་སྒྲས་དེ་སྡུད་པའི་དོན་ཅན་དུ་བལྟ་བར་བྱའོ། །གཞན་རྣམས་ན་རེ་ཚུལ་མེད་པ་ཉེ་བར་མ་བཀོད་དེ། རྟགས་
[97b]
[97b.1]ལྟར་སྣང་བ་ཉིད་མེད་པའི་ཕྱིར་རོ། །གང་ཕྱིར་གང་དུ་ཚུལ་གྱི་ཕྱོགས་གཅིག་པ་ཅན་ཡོད་པ་དེ་ནི་དེར་སྣང་བཞིན་པས་བློ་ཕྱིན་ཅི་ལོག་ཏུ་བྱེད་དོ་ཞེས་པས་དེ་ཁོ་ན་འདིར་བརྗོད་པར་བྱ་བའོ་ཞེས་ཟེར་རོ། །རྗེས་སུ་དཔག་པར་བྱ་བ་ནི་ཆོས་ཀྱིས་ཁྱད་པར་དུ་བྱས་པའི་ཆོས་ཅན་ནོ་ཞེས་བཤད་ཟིན་ལ། གང་
[97b.2]རྣམས་རྣམ་པ་གཞན་དུ་འདོད་པ་དེ་རྣམས་ཀྱི་འདོད་པ་བསལ་བར་བྱ་བའི་ཆེད་དུ་དགོད་དེ། འདི་ལ་ནི་ཞེས་པ་ལ་སོགས་པ་སྟེ། མི་འཁྲུལ་བས་ཞེས་པ་གཏན་ཚིགས་སོ། །གང་གིས་གང་ལ་མི་འཁྲུལ་བར་བརྗོད་པར་བྱ་བ་མ་ཡིན་པ་དེ་དེའི་བསྒྲུབ་པར་བྱ་བ་མ་ཡིན་ཏེ། དཔེར་ན་དུ་བའི་ཆུ་
[97b.3]བཞིན། གཏན་ཚིགས་ཀྱང་བསྒྲུབ་པར་བྱ་བའི་ཆོས་དང་མི་འཁྲུལ་བར་བརྗོད་པར་བྱ་བ་མ་ཡིན་ནོ་ཞེས་པ་ལྡོག་པ་ཅན་རང་བཞིན་དུ་སེམས་སོ། །གྲུབ་ཉིད་ཕྱིར་ཞེས་པ། གང་གྲུབ་པར་བསྒྲུབ་པར་བྱ་བ་མ་ཡིན་ཏེ། དཔེར་ན་མེ་དྲོའོ་ཞེས་པ་བཞིན་ནོ། །ཆོས་དང་ཆོས་ཅན་འབའ་ཞིག་པ་དག་
[97b.4]ཀྱང་གྲུབ་པའོ་ཞེས་པ་རང་བཞིན་འགལ་བ་གསུངས་སོ། །ཆོས་ལ་གཏན་ཚིགས་གྲུབ་ན་ནི། །ཞེས་པ་གང་ཞིག་ཆོས་འབའ་ཞིག་པ་བསྒྲུབ་པར་བྱ་བར་འདོད་པ་དེས་ནི། ངེས་པར་དེ་ཁོ་ན་ལ་རྟགས་བལྟ་བར་བྱ་སྟེ། རྣམ་པ་གཞན་དུ་ན་དེ་རྟོགས་པར་མི་འགྱུར་རོ། །གང་ཕྱིར་གཞན་དུ་
[97b.5]རིགས་པའི་རྟགས་ཀྱིས་གཞན་རྟོགས་པར་འགྱུར་བ་ནི་མེད་དོ། །ཧ་ཅང་ཐལ་བར་གྱུར་ན་མི་རུང་ངོ་ཞེས་པའོ། །དེ་ལས་ཀྱང་རྟགས་འཛིན་པའི་དུས་ཁོ་ན་ནི་རྟགས་ཅན་ཡང་རྟོགས་པ་ཉིད་ཀྱི་ཕྱིར། གཞན་ཅི་ཞིག་རྗེས་སུ་དཔག་པར་བྱ་སྟེ། གང་གི་དོན་དུ་འབྲེལ་པ་དྲན་བྱ་བའོ། །ཅི་སྟེ་མེ་
[97b.6]དང་འབྲེལ་པའི་ས་ཕྱོགས་སུ་ཞེས་པའི་འབྲེལ་པ་སྨོས་པ་ནི་ཧ་ཅང་ཐལ་བ་ཡོངས་སུ་སྤང་བའི་ཆེད་དུའོ། །ཕྱོགས་དེ་ཁོ་ན་མེ་དང་ལྡན་པ་ཉིད་དུ་མི་འདོད་པ་ཅི་ཡིན་ཞེས་པའི་ཁོ་ནའི་སྒྲ་ནི་ཆོས་འབའ་ཞིག་པའི་བསྒྲུབ་པར་བྱ་བ་ཉིད་རྣམ་པར་གཅད་པའི་ཆེད་དུའོ། །དེ་ལྟར་ཆོས་འབའ་ཞིག་པ་བསྒྲུབ་པར་
[97b.7]བྱ་བ་ཉིད་ན་རིགས་པ་མ་ཡིན་ཏེ། གལ་ཏེ་ཆོས་ཅན་འདིའི་རྟེན་ཉིད་དུ་འདོད་པ་མ་ཡིན་ནའོ། །གཞན་དུ་ན་ཆོས་ཅན་འགའ་ཞིག་ལ་རྟགས་ཉེ་བར་དམིགས་པ་དེར་གཞི་ལ་བརྟེན་པར་བྱ་བཞིན་པ་ཡིན་ན་ཚོགས་པ་ཁོ་ན་བསྒྲུབ་པར་བྱ་བར་འགྱུར་རོ། །དེའི་ཕྱིར་དེ་ཁོ་ན་འདོད་པར་བྱ་སྟེ། ངེས་པར་
[98a]
[98a.1]སྦྱོར་བ་ལས་ཀྱང་འདི་འདི་ལྟར་ཁོ་ན་ཁས་བླང་བར་བྱའོ། །ཆོས་ཙམ་བསྒྲུབ་པར་བྱ་བ་ཡིན་ན་ནི་འདིའི་ཡོད་པ་ཉིད་བསྒྲུབ་པར་བྱ་བར་འགྱུར་ལ། དེ་ཡང་མི་རིགས་ཏེ། དེ་གྲུབ་ཟིན་པ་ཉིད་ཀྱི་ཕྱིར་རོ། །གང་གསུངས་པ། མེ་ཡོད་པ་ཉིད་དུ་མ་རྟོགས་པ་ནི་མ་ཡིན་ནོ་ཞེས་པའོ། །
[98a.2]དེ་འདིས་གང་གྲུབ་པ་དེ་བསྒྲུབ་པར་བྱ་བ་མ་ཡིན་ཞེས་པ་ལ་སོགས་པ་སྔར་བཤད་པའི་རང་བཞིན་འགལ་བ་གསུངས་སོ། །འབྲེལ་པ་ལ་ཡང་གཉིས་ཡོད་མིན། །ཞེས་པ་ལ། གཉིས་ནི་བསྒྲུབ་པར་བྱ་བའི་ཆོས་དང་སྒྲུབ་པར་བྱེད་པའི་ཆོས་སོ། །མེ་དང་ས་ཕྱོགས་ཀྱི་ལྡན་པའི་མཚན་ཉིད་
[98a.3]ཀྱི་འབྲེལ་པ་ལ་མེ་དང་དུ་བ་དག་ཡོད་པ་མ་ཡིན་པས་ཏེ། གལ་ཏེ་དེ་ལ་གཉིས་མེད་པས་ཅིའི་ཕྱིར་དེ་བསྒྲུབ་པར་བྱ་བ་ཉིད་དུ་མི་འགྱུར་ཞེ་ན། གསུངས་པ། འདི་ལྟར་ཡང་བྱེད་ཅེས་པ་ལ་སོགས་པ་སྟེ། རྗེས་སུ་དཔག་པའི་དུས་ན་གང་དུ་དེ་ལ་རྗེས་སུ་དཔག་པར་བྱ་བ་ལ་མཆོག་ཏུ་
[98a.4]སྙེག་པའི་སྒྲ་དག་གིས་རྗེས་སུ་དཔོག་པར་བྱེད་ན། དེ་ལ་གལ་ཏེ་ས་ཕྱོགས་བསྒྲུབ་པར་བྱ་བར་འགྱུར་ན། དེ་དག་གིས་དེ་ལ་སོ་སོར་ཉེ་བར་སྦྱོར་བར་འགྱུར་ལ་གཞན་དུ་ན་རང་གི་སྒྲས་ངེས་པར་བསྟན་པའི་མེ་དང་དུ་བ་དག་དང་ཡུལ་ཕྱོགས་དག་ཀྱང་རྗེས་སུ་དཔག་པར་བྱ་བ་མ་ཡིན་ཏེ། འབྲེལ་པ་
[98a.5]ལ་ཡང་གཉིས་ཡོད་མིན། །ཞེས་པས། དེ་དག་ཡུལ་མེད་པར་འགྱུར་རོ། །དེ་འདིས་ནི་གང་དུ་མེ་དང་དུ་བ་དག་ཡོད་པ་མ་ཡིན་པ་དེ་ནི་དུ་བས་རྗེས་སུ་དཔག་པར་བྱ་བ་མ་ཡིན་ཏེ། ཆུ་བཞིན་འབྲེལ་པ་ལའང་། མེ་དང་དུ་བ་དག་ཡོད་པ་མ་ཡིན་ནོ་ཞེས་པ་འགལ་བས་ཁྱབ་པ་གསུངས་སོ། །
[98a.6]དྲུག་པའི་སྒྲ་རུ་འགྱུར་ཞེས་པ་འབྲེལ་པ་བརྗོད་པར་འདོད་པ་ན་མེའི་སྒྲ་དྲུག་པའི་མཐའ་ཅན་དུ་འགྱུར་ཏེ། དཔེར་ན་མེའི་རེག་པ་དྲོའོ་ཞེས་པ་འདི་བཞིན། མེ་ནི་འདིར་ཞེས་དང་པོའི་མཐའ་ཅན་དུ་ཐོས་པས་ཏེ། དེའི་ཕྱིར་འདིར་འབྲེལ་པ་བརྗོད་པར་འདོད་པར་རྟོགས་པར་བྱ་བ་མ་ཡིན་ནོ་ཞེས་པའོ། །འོ་ན་
[98a.7]འདི་རང་གི་དོན་གྱི་རྗེས་སུ་དཔག་པའི་སྐབས་མ་ཡིན་ནམ། དེ་ལ་དྲུག་པའི་ཐལ་བར་འགྱུར་བ་ཅི་ཡིན་ཞེ་ན། འདི་ནི་སྐྱོན་མ་ཡིན་ཏེ་གཞན་གྱི་དོན་རྗེས་སུ་དཔག་པར་དྲུག་པའི་སྒྲ་མེད་པས་འབྲེལ་པ་མེད་པས་གསལ་བར་ཉེ་བར་དམིགས་ནས་རང་གི་དོན་གྱི་རྗེས་སུ་དཔག་པར་ཡང་རྟོགས་པར་བྱེད་དོ། །
[98b]
[98b.1]དེས་འདི་སྐད་བཤད་པར་འགྱུར་ཏེ། གང་དུ་མེའི་སྒྲ་དང་པོའི་མཐའ་ཅན་དེར་འབྲེལ་པ་རབ་ཏུ་སྦྱོར་བ་ཅན་བརྗོད་པར་འདོད་པ་མ་ཡིན་ཏེ། དཔེར་ན་འབྲེལ་པ་བརྗོད་པར་འདོད་པ་མེད་པ་ན་རབ་ཏུ་སྦྱར་བའི་མེའི་སྒྲ་ལ་བཞིན། འདིར་མེའི་ཞེས་པ་འདིར་ཡང་མེའི་སྒྲ་ནི། དང་པོའི་མཐའ་ཅན་ནོ་ཞེས་པ།
[98b.2]འབྲས་བུ་དང་འགལ་བའོ། །འདིར་འགྱུར་མོད། གནས་གཞིའི་རྣམ་པར་དབྱེ་བ་ཁོ་ནས་འབྲེལ་པ་བཤད་པ་ཡིན་ཏེ། དེས་ན་དྲུག་པར་ཐལ་བར་འགྱུར་རོ་ཞེས་པ་འདི་ག་ལས་ཤེ་ན། དེ་ལྟ་ན་གང་གི་ཚེ་སྒྲ་མི་རྟག་ཅེས་པ་ཆོས་དང་ཆོས་ཅན་དག་དང་པོའི་མཐའ་ཅན་དག་གི་སྦྱོར་བ་ཡིན་པ་དེའི་ཚེ་
[98b.3]རྟོག་པ་ཅན་ཅི་ཡིན། འདིར་མེ་ཞེས་བརྗོད་པ་ན་རྟེན་དང་བརྟེན་པའི་དངོས་པོ་བསྒྲུབ་པར་བྱ་བ་ཉིད་དུ་རྟོགས་པར་བྱ་བ་ཉིད་མ་ཡིན་གྱི། འོ་ན་ཅི་ཞེ་ན་མེ་ཁོ་ནའོ། །འབྲེལ་པ་དེ་ཡང་ས་ཕྱོགས་སུ་བསྒྲུབ་པར་བྱ་བཞིན་པ་ཉིད་ཀྱི་ཕྱིར་ཚོགས་པ་དེ་ཁོ་ན་བསྒྲུབ་པར་བྱ་བའོ་ཞེས་པ་འོངས་པའོ། །རང་གི་ཆོས་
[98b.4]ཀྱིས་བརྗོད་བྱ་མིན་ཞེས་པ་འབྲེལ་པའི་ངོ་བོ་ནི་འབྲེལ་པའོ་ཞེས་དངོས་པོའི་ངོ་བོས་འབྲེལ་པ་དེ་འབྲེལ་པའི་སྒྲས་བརྗོད་པའི་ཕྱིར་དངོས་པོ་ཡང་འབྲེལ་པ་ཅན་གཞན་གྱིས་རིགས་སོ་ཞེས་པས་འབྲེལ་པ་ཅན་གཞན་ཅི་ཞེས་བྱ་བ་སྐྱེ་ཞིང་། ཅི་ཞིག་གི་འབྲེལ་པ་ཡིན་ཞེས་པའོ། །དེ་ལས་ཀྱང་འབྲེལ་པ་
[98b.5]ཅན་ཁོ་ན་དེར་འགྱུར་རོ་ཞེས་པས་རང་གི་ངོ་བོས་འབྲེལ་པ་ཅན་བརྗོད་པར་བྱ་བ་མ་ཡིན་ནོ། །དེ་ལྟར་རྗེས་སུ་དཔག་པར་བྱ་བ་ཡང་མ་ཡིན་ཞེས་པས་ཁས་བླངས་དང་འགལ་བ་གསུངས་སོ། །གང་ཕྱིར་ཕྱོགས་ཀྱི་ཚིག་སྒྲུབ་པར་བྱེད་པ་ཉིད་དུ་འདོད་པས་རྗེས་སུ་དཔག་བྱ་བརྗོད་བྱ་ཉིད་དུ་ཁས་བླངས་
[98b.6]ལ། དེ་འབྲེལ་པ་རྗེས་སུ་དཔག་པར་བྱ་བ་ཉིད་ན་ཉམས་སོ། །གལ་ཏེ་སྒྲས་བརྗོད་པར་བྱ་བར་མི་འགྱུར་ན་དེའི་ཚེ་ཅི་ལྟར་རྟོགས་པར་འགྱུར་ཞེ་ན་གསུངས་པ། དོན་གྱིས་སྨོས་འགྱུར་ཞེས་པ། འདི་ན་མེ་ཞེས་མེའི་གཞིའི་དངོས་པོས་ས་ཕྱོགས་སྒྲས་རྟོགས་པར་བྱའོ། །མེ་དང་ལྡན་པ་ཉིད་ཡོད་
[98b.7]ན་ཡང་ས་ཕྱོགས་ནི་གཞི་བྱེད་པར་ནུས་པ་སྟེ། དེའི་ཕྱིར་དེ་ཁོ་ན་རྟོགས་པར་བྱའི། ལྡན་པ་ནི་བར་དུ་ཆོད་པ་ཅན་ཉིད་ཀྱི་ཕྱིར་རྟོགས་པ་མ་ཡིན་ནོ་ཞེས་པས་དོན་གྱིས་སྨོས་པ་ཞེས་བརྗོད་པར་བྱ་སྟེ། གཞི་བྱེད་ནུས་པ་རང་གི་འབྲས་བུས་དྲང་བར་བྱ་བ་ཉིད་ཀྱི་ཕྱིར་རོ། །འོ་ན་དེ་ལྟ་ན་རྗེས་སུ་དཔག་པར་
[99a]
[99a.1]བྱ་བ་ཁོ་ནར་འགྱུར་ཞེ་ན། དུ་བ་ལ་སོགས་པའི་རྟགས་ཀྱི་བསྒྲུབ་པར་བྱ་བ་ཉིད་ལ་འཇུག་པ་ལས་འདས་པ་དེ་བརྗོད་པར་འདོད་ཀྱི། རྟགས་ཅན་མ་ལུས་པའི་བསྒྲུབ་པར་བྱ་བ་ཉིད་ལ་འཇུག་པ་ལས་འདས་ན་ནི་མ་ཡིན་ནོ་ཞེས་པས་འགལ་བ་མེད་དོ། །གང་ཡང་འབྲས་བུ་རྗེས་
[99a.2]སུ་དཔག་པར་བྱ་བ་ནི་འབྲེལ་པའོ་ཞེས་བཤད་པ་དེ་ཡང་རང་གི་འབྲས་བུས་རྗེས་སུ་དཔག་པར་བྱ་བ་ཉིད་ཀྱི་ཕྱིར་བརྗོད་ཀྱི། དུ་བ་ལ་སོགས་པའི་རྟགས་ཀྱིས་རྗེས་སུ་དཔག་པར་བྱ་བ་ཉིད་ཀྱི་ཕྱིར་ནི་མ་ཡིན་ནོ། །འདི་སྐད་བཤད་པར་འགྱུར་ཏེ། གལ་ཏེ་ཡང་འབྲེལ་པ་ཡོད་དུ་ཆུག་མོད། དེ་རང་
[99a.3]གི་འབྲས་བུ་ཁོ་ནས་རྗེས་སུ་དཔག་པར་བྱའི། དུ་བ་ལ་སོགས་པ་གཞན་གྱིས་ནི་མ་ཡིན་ནོ་ཞེས་པའོ། །གང་གསུངས་པ། དེ་དུ་བས་རྗེས་སུ་དཔག་པར་བྱ་བ་ནི་མ་ཡིན་ནོ་ཞེས་པའོ། །གཏན་ཚིགས་སྔ་མ་རྣམས་ལས་ཞེས་པ། འབྲེལ་པ་ལ་ཡང་གཉིས་ཡོད་མིན། །དྲུག་པ་ཐོས་འགྱུར་
[99a.4]དེ་ལྡན་ལའོ། །བརྗོད་བྱ་མིན་ཞེས་པ་འདི་རྣམས་ལས་སོ། །འདི་ནི་རྟགས་དང་འབྲེལ་པའང་མིན། །ཞེས་པ་མེད་ན་མི་འབྱུང་བའི་མཚན་ཉིད་ཅན་གྱི་འབྲེལ་པས་རྟགས་དང་འབྲེལ་པ་མ་ཡིན་ནོ་ཞེས་པའི་དོན་ཏོ། །གང་ཞིག་གང་དང་མེད་ན་མི་འབྱུང་བ་ཉིད་རབ་ཏུ་བསྟན་པ་མེད་པ་དེ་ནི། དེས་
[99a.5]རྗེས་སུ་དཔག་པར་བྱ་བ་མ་ཡིན་ཏེ། དཔེར་ན་དུ་བས་ཆུ་བཞིན། དུ་བ་ཡང་འབྲེལ་པ་དང་མེད་ན་མི་འབྱུང་བ་ཉིད་རབ་ཏུ་བསྟན་པ་མ་ཡིན་ནོ། །འགལ་བས་ཁྱབ་པར་བྱའོ། །རབ་ཏུ་མ་བསྟན་པ་ན་དོན་གཞན་ནི་དེའི་འབྲས་བུ་མ་ཡིན་པ་དང་མེད་ན་མི་འབྱུང་བ་མེད་པ་ཉིད་ཀྱི་ཕྱིར་རོ། །འདི་མེད་དེ་
[99a.6]ཞེས་པ་ལ་སོགས་པས་མ་ངེས་པར་སྨྲས་སོ། །གཞན་དུ་ཞེས་པ་སྤྱི་ཡིས་ཚང་བང་ལ་སོགས་པ་ཐམས་ཅད་དུའོ། །དེ་ཅིའི་དོན་དུ་སྟོན་པར་བྱེད་ཅེ་ན། ས་ཕྱོགས་ལ་སོགས་པ་གང་དུ་མེ་ལ་སོགས་པ་སྒྲུབ་པར་འདོད་པ་དེ་ལ་རབ་ཏུ་གྲུབ་པའི་དུ་བ་ལ་སོགས་པའི་རྟགས་ནི་མེ་ལ་སོགས་པའི་ཆོས་
[99a.7]གང་དང་དེ་མེད་ན་མི་འབྱུང་བར་གྱུར་ཅིང་། དེ་དང་འབྲེལ་པའི་ས་ཕྱོགས་ལ་སོགས་པའི་ཆོས་ཅན་རྟོགས་པར་འགྱུར་རོ་ཞེས་པ་འདི་ལྟ་བུའི་དོན་ཏོ། །གང་གཞན་དུ་ཞེས་པ། དུ་བ་དང་ལྡན་པའི་ཡུལ་ཕྱིར་རོ། །དེ་གཞན་དུ་ཞེས་པ་ལ་སོགས་པ་སྟེ། གཞན་དུའི་སྒྲ་འདི་ནི་བསྒྲུབ་པར་བྱ་བའི་
[99b]
[99b.1]ཆོས་ཅན་ས་ཕྱོགས་ལ་སོགས་པ་ལ་འཇུག་གོ། །དུ་བ་ཙམ་མཐོང་བ་ན་ཡང་ཞེས་པའི་ཙམ་གྱི་སྒྲ་ནི་མེ་མཐོང་བ་བཅད་པའི་དོན་ཏེ། མེ་མཐོང་བ་མེད་ན་ཡང་ཞེས་པའི་དོན་ཏོ། །ཡང་ན་ཙམ་གྱི་སྒྲས་འདི་སྟོན་ཏེ། ཆོས་ཅན་རྗེས་སུ་འགྲོ་བ་བསྟན་པ་མེད་པར་ཡང་ཞེས་པའོ། །འདི་ནི་བསྡུས་པའི་དོན་
[99b.2]ཏེ། ཆོས་ཅན་གྱི་ཁྱད་པར་དུ་བྱས་པའི་ཆོས་ཅན་རྗེས་སུ་དཔག་པར་བྱ་བ་ཉིད་ན་ཡང་དུ་བ་མེད་དང་མེད་ན་མི་འབྱུང་བ་གང་ཡིན་པ་ཚང་བང་ལ་སོགས་པར་རབ་ཏུ་བསྟན་པར་བྱ་བ་སྟེ། དེ་ནི་ས་ཕྱོགས་མེ་དང་ལྡན་པ་ཉིད་དུ་རབ་ཏུ་སྒྲུབ་པའི་ཆེད་དུ་ཐབས་ཁོ་ནའོ་ཞེས་བྱས་ནས་སོ། །དེ་ལྟར་གང་
[99b.3]ན་དུ་བ་ཡོད་པ་དེ་ན་མེའོ་ཞེས་ངེས་པའི་ཕྱིར་རོ། །གཞན་དུ་དུ་བ་ཙམ་མཐོང་ནས་ཡུལ་ཕྱོགས་མེ་དང་ལྡན་པར་རྟོགས་པར་བྱ་སྟེ། དེའི་ཕྱིར་ཆོས་དང་མེད་ན་མི་འབྱུང་བ་གདོན་མི་ཟ་བར་བསྟན་པར་བྱའོ་ཞེས་པའོ། །ཆོས་ཅན་དང་ནི་ཁྱད་པར་དང་ངམ་སྤྱི་དང་མེད་ན་མི་འབྱུང་བ་བསྟན་པར་བྱ་བ་
[99b.4]ཡིན་གྲང་ན། དེ་ལ་རེ་ཞིག་ཁྱད་པར་དང་རབ་ཏུ་བསྟན་པར་བྱ་བ་ནི་མ་ཡིན་ཏེ། དེ་གཞན་དུ་མི་འབྱུང་བ་ཉིད་ཀྱིས་ན་མི་ནུས་པ་ཉིད་ཀྱི་ཕྱིར་རོ། །གང་གསུངས་པ། རྣམ་པ་གཞན་དུ་ན་ནི་ཞེས་པ་ལ་སོགས་པའོ། །ཆོས་ཅན་སྤྱི་དང་ནི་མེད་ན་མི་འབྱུང་བ་སྲིད་མོད། དེ་དང་རབ་ཏུ་བསྟན་པ་ནི་མ་
[99b.5]ཡིན་ཏེ། གང་གསུངས་པ། རྟེན་སྤྱི་དང་ནི་ཞེས་པ་ལ་སོགས་པ་སྟེ། བརྟེན་པར་བྱ་བ་དང་མེད་ན་མི་འབྱུང་བ་ཉིད་བསྟན་པར་བྱ་བ་ན་རྟེན་དང་ཡང་བསྟན་པར་འགྱུར་ཏེ། རྟེན་ནི་བརྟེན་པའི་དབང་པོ་ཉིད་ཀྱི་ཕྱིར་རོ། །ཡང་ན་གང་ན་དུ་བ་ཡོད་པ་དེ་ན་མེའོ་ཞེས་པ་འདིས་དུ་བ་མེད་ཙམ་དང་མེད་
[99b.6]ན་མི་འབྱུང་བ་ཉིད་བཤད་པ་མ་ཡིན་གྱི། འོ་ན་ཅི་ཞེ་ན། རྟེན་གྱི་སྤྱིས་ཁྱད་པར་དུ་བྱས་པ་དང་ངོ་། །དེའི་ཕྱིར་རྟེན་གྱི་སྤྱི་དང་ཡང་དེ་བསྟན་པ་ཁོ་ནའོ། །འབྲེལ་པ་དང་ནི་རྣམ་པ་ཐམས་ཅད་དུ་མེད་ན་མི་འབྱུང་བ་མི་སྟོན་པ་ཁོ་ནའོ་ཞེས་པ་འདི་གསུངས་སོ། །མི་མཉམ་པ་ཉེ་བར་བཀོད་པ་ཞེས་པའོ། །
[99b.7]དེ་ལྟར་སྤྱིས་ཀྱང་གཏན་ཚིགས་སུ་མངོན་པར་འདོད་པ་མེད་ན་མི་འབྱུང་བ་ཉིད་མི་སྟོན་ལ། དེ་མི་མཐུན་ཕྱོགས་ལ་འཇུག་པ་ཡང་མ་ཡིན་ནོ་ཞེས་པས་མ་ངེས་པ་མ་ཡིན་ནོ། །ཆོས་ལའང་རྣམ་པར་དཔྱད་པ་གཞན། །ཞེས་པ་སྔ་མ་གང་ནི་རྗེས་སུ་དཔག་པར་བྱ་བ་རྟོགས་པ་རྣམ་པར་དཔྱད་པ་བཤད་
[100a]
[100a.1]ཅིང་། ད་ནི་བསྒྲུབ་པར་བྱ་བའི་ཆོས་སུ་གྱུར་པ་རྣམ་པར་དཔྱོད་ཅིང་རྟགས་སུ་གྱུར་པ་ཡང་རབ་ཏུ་བསྟན་པར་བྱའོ། །ཏུའི་སྒྲ་ནི་རྣམ་པར་དཔྱད་པ་དེ་ཁོ་ན་སྲིད་པར་གསལ་བར་བྱེད་དོ། །རྣམ་པར་དཔྱད་པ་དེ་ཡང་གང་རྟགས་དང་རྟགས་ཅན་དག་ཆོས་ཅན་བཞིན་དུ་ཆོས་དུ་
[100a.2]མ་ཅན་དག་སྟེ། དཔེར་ན་མེ་དང་དུ་བ་དག་ལྟ་བུ་སྟེ། དེ་ཁོ་ན་ལ་རྟོགས་པར་བྱ་བ་དང་རྟོགས་པར་བྱེད་པའི་ཆ་ཤས་ངེས་པར་བྱེད་པའི་ཆེད་དུ་འགྱུར་རོ། །བྱས་པ་ཉིད་དང་མི་རྟག་པ་ཉིད་ལ་སོགས་པ་ལ་ནི་མ་ཡིན་ཏེ། དེ་ལ་དུ་མའི་ཆོས་ཉིད་མི་སྲིད་པའི་ཕྱིར་ཆ་ཤས་ཅི་ཞིག་གིས་རྟོགས་
[100a.3]པར་བྱ་བ་དང་རྟོགས་པར་བྱེད་པའི་དངོས་པོ་ཡིན་ཞེས་དོགས་པ་མི་སྲིད་པ་ཁོ་ནའོ། །རྗེས་འབྲེལ་རྣམ་གཅོད་པ་ཞེས་པ། རྗེས་སུ་སྦྲེལ་བར་བྱེད་པས་ན་འབྲེལ་པ་སྟེ། ཆ་ཤས་གང་གིས་མི་རྟོགས་པར་བྱེད་པ་རྫས་ཉིད་ལ་སོགས་པའོ། །དེ་མི་མཐུན་ཕྱོགས་གཞན་ལས་རྣམ་པར་གཅོད་ཅིང་རྣམ་
[100a.4]པར་ལྡོག་པ་རྟོགས་པར་བྱེད་པའོ། །རྗེས་སུ་འབྲེལ་པའི་ཁྱད་པར་རྣམས་ཀྱང་ཅི་ཞེ་ན། གང་མེད་ན་མེ་མི་འབྱུང་བ་ཞེས་པ་ལ་སོགས་པའོ། །འོ་ན་དུ་བ་གསལ་བར་བྱེད་པ་ཉིད་ཀྱི་ཕྱིར། གང་རྣམས་མེད་པ་དུ་བ་མི་འགྱུར་བ་ཞེས་བརྗོད་པར་བྱ་བ་མ་ཡིན་ནམ། ཅིའི་ཕྱིར་འདི་སྐད་སྨྲས་ཤེ་ན། དོན་འདི་
[100a.5]ཁོ་ན་རྣམ་པ་འདིས་བཤད་དོ་ཞེས་པས་སྐྱོན་མེད་དོ། །དེ་ལྟར་ནི་གང་རྣམས་མེད་པས་མེར་མི་འགྱུར་བ་དེ་རྣམས་མེད་པར་དུ་བར་ཡང་འགྱུར་བ་མ་ཡིན་པ་ཁོ་ནའོ། །ཡང་ན་གང་ཞིག་འབྲེལ་པ་རྣམས་ཞེས་པ་དུ་བ་ཁོ་ནའི་རྗེས་སུ་འབྲེལ་པ་རྣམས་ཞེས་སྦྱར་བར་བྱ་སྟེ། གང་རྣམས་དུ་བ་ཁོ་ན་རྗེས་སུ་སྦྲེལ་
[100a.6]བར་བྱེད་པ་དེ་རྣམས་ཁོ་ན་བསྟན་པའི་ཆེད་དུ་གསུངས་པ་གང་རྣམས་མེད་ན་ཞེས་པ་ལ་སོགས་པ་སྟེ། གང་རྣམས་མེད་ན་མེར་མི་འགྱུར་བ་དེ་རྣམས་ཁོ་ན་ནི་དུ་བ་རྗེས་སུ་སྦྲེལ་བར་བྱེད་པས་སོ། །རྗེས་སུ་འབྲེལ་པ་རྣམས་གཞན་ལས་ལྡོག་པ་རྟོགས་པར་བྱེད་དོ་ཞེས་པ་འདི་ལ་དཔེར་བརྗོད་པ་གསུངས་པ།
[100a.7]དཔེར་ན་མེའི་མེ་མ་ཡིན་པ་ལས་ལྡོག་པ་ཙམ་ཞེས་པའོ། །ཅིའི་ཕྱིར་ལྡོག་པ་ཙམ་གོ་བར་བྱེད་ཀྱི་ཁྱད་པར་མ་ཡིན་ཞེ་ན་གསུངས་པ། རང་དང་འབྲེལ་པ་དང་རྗེས་སུ་མཐུན་པ་ཉིད་ལས་ཞེས་པ་ལ་སོགས་པའོ། །འདི་ནི་བྱེད་པའི་རྒྱུ་སྟེ། རྟགས་ནི་མ་ཡིན་ནོ། །དེ་ལྟར་ནི་འདི་ཞེས་པས་དེ་དང་འབྲེལ་པ་
[100b]
[100b.1]དང་རྗེས་སུ་མཐུན་པ་ཉིད་གསུངས་སོ། །མེ་མེད་པ་ཐམས་ཅད་ལ་མ་མཐོང་ཞེས་པ་འདིས་ལྡོག་པ་གཙོ་བོ་ཉིད་དུ་མི་མཐུན་ཕྱོགས་ལ་ཐམས་ཅད་དུ་མ་མཐོང་བས་འཆད་པར་བྱེད་དོ། །གཞན་ལ་ཡང་མཐོང་ངོ་ཞེས་པའི། ཡང་གི་སྒྲས་ནི་འབའ་ཞིག་ཏུ་མ་མཐོང་ཡང་ཞེས་གསལ་བར་བྱེད་པས་རྗེས་སུ་
[100b.2]འགྲོ་བ་གཙོ་བོ་མ་ཡིན་པ་ཉིད་དུའོ། །དེ་ལྟར་གང་གི་ཕྱིར་རྗེས་སུ་འགྲོ་བ་ཉེ་བར་བསགས་པ་ཅན་གྱི་ལྡོག་པ་གཙོ་བོ་འབྲེལ་པ་ཡིན་ལ། དེ་ཡང་སྤྱི་བོ་ནས་སྲིད་ཀྱི། ཁྱད་པར་དང་མ་ཡིན་པ་དེའི་ཕྱིར། དེ་དང་རྗེས་སུ་མཐུན་པ་ལས་ནི་ལྡོག་པའི་སྒོ་ནས་འདིར་མེ་ཁོ་ན་སྟེ། མེ་མ་ཡིན་པ་ནི་མི་འགྱུར་
[100b.3]རོ་ཞེས་མེ་མ་ཡིན་པ་ལས་ལྡོག་པ་ཙམ་རྟོགས་པར་བྱེད་ཀྱི་ཁྱད་པར་མ་ཡིན་ནོ། །ཇི་ལྟར་ཡང་མེ་ཉིད་དང་འབྲེལ་པ་དེ་ལྟར་རྫས་ཉིད་དང་ཡོན་ཏན་ཅན་ཉིད་ལ་སོགས་པ་རྣམས་དང་ཡང་ངོ་ཞེས་པ་སྟེ། དེ་རྣམས་ཀྱང་རྫས་མ་ཡིན་པ་ཉིད་ལ་སོགས་པ་ལས་ལྡོག་པ་ཁོ་ན་རྟོགས་པར་བྱེད་པས་སོ། །
[100b.4]ལྡོག་པའི་སྒོ་ནས་གཏན་ཚིགས་གོ་བར་བྱེད་པའོ་ཞེས་པ་འདི་ལ་གཏན་ཚིགས་གཞན་གསུངས་པ། ཡོན་ཏན་ཉིད་དྲི་དྲི་ཞིམ་པ། །དེའི་བྱེ་བྲག་གིས་ཞེས་པ་ལ་སོགས་པའོ། །གཅིག་འཕེལ་བས་ཞེས་པ་རེ་རེ་འཕེལ་བས་ཞེས་པའི་དོན་ཏོ། །ཡོན་ཏན་ཉིད་ཀྱི་རྫས་མ་ཡིན་པ་ལས་ཞེས་པ་
[100b.5]འདི་ནི་རྫས་ཏེ་ཡོན་ཏན་ཉིད་ཀྱི་ཕྱིར་རོ་ཞེས་ཡོན་ཏན་ཉིད་ཀྱི་རྫས་མ་ཡིན་པ་རྣམ་པར་གཅོད་པའི་ཨུཏྤལ་ལ་སོགས་པ་ལ་བྱ་བ་སྟེ། དེ་ལྟར་ནི་དེ་ཐམས་ཅད་དུ་རྫས་མེད་པ་ལ་མ་མཐོང་ཞིང་། རྫས་ལ་མཐོང་བས་སོ། །འདིར་རྫས་མ་ཡིན་པ་རྣམ་པར་གཅོད་པ་ན། དང་པོས་འཕེལ་བ་གཅིག་ཡོད་ལ།
[100b.6]གང་ལ་ལྟོས་པས་དྲིས་ཤིག །འཕེལ་བས་རྣམ་པར་གཅོད་པ་བྱེད་དེ། དེ་རབ་ཏུ་བསྟན་པའི་དོན་དུ་ནི་ཡོན་ཏན་ཉིད་ཀྱི་རྫས་མ་ཡིན་པ་ལས་ཞེས་གསུངས་སོ། །དེ་ཉིད་ཀྱི་ཕྱིར་ཡོན་ཏན་ཉིད་ཀྱི་ཡང་གཅིག་འཕེལ་བས་རྣམ་པར་གཅོད་པར་བྱེད་པའི་ངོར་ཡན་ལག་གི་དངོས་པོ་ཡོད་དོ། །གལ་ཏེ་དེས་
[100b.7]རྫས་མ་ཡིན་པ་རྣམ་པར་གཅོད་པ་རྣམ་པར་སྒྲུབ་པར་བྱེད་ན་དེ་ལྟ་ན་དྲིས་ཤིག །འཕེལ་བས་རྣམ་པར་གཅོད་པ་བྱེད་ཀྱི་རྣམ་པ་གཞན་དུ་ན་མ་ཡིན་ནོ། །དེ་ལྟ་ན་ཡང་ཚིགས་སུ་བཅད་པར་ཟླས་དབྱེའི་ཚིག་བསྡུའི་མཐར་གྱུར་པ་ཉིད་དང་ཡོན་ཏན་ཉིད་ཀྱི་སྒྲ་མི་འགལ་བར་འགྱུར་ཏེ། ཚིག་གཞན་དང་
[101a]
[101a.1]ནུས་པ་མཚུངས་པ་ཉིད་ཀྱི་ཕྱིར་རོ། །དྲི་ཉིད་ཀྱིས་ས་ལས་གྱུར་པ་མ་ཡིན་པ་དང་། རྫས་མ་ཡིན་པ་ལས་ཀྱང་ངོ་ཞེས་པས་འདི་ནི་ས་ལས་བྱུང་བ་དང་རྫས་ཀྱང་སྟེ། དྲི་ཉིད་ཀྱི་ཕྱིར་ཞེས་པས་ས་ལས་གྱུར་པ་མ་ཡིན་པ་དང་རྫས་མ་ཡིན་པ་ལས་ཀྱང་རྣམ་པར་གཅོད་པར་བྱའོ། །དྲི་
[101a.2]ཞིམ་པ་ཉིད་ཀྱིས་དྲི་ཞིམ་པའི་ཐུན་མོང་བ་མེད་པ་ལས་ཞེས་པ་དྲི་བཞིན་དུ་འདི་ནི་དྲི་ཞིམ་པ་ཉིད་ཀྱི་ཕྱིར་ཞེས་དྲི་ཞིམ་པ་ཉིད་ཀྱིས་སྔ་མ་དག་དང་དྲི་ཞིམ་པའི་ཐུན་མོང་བ་མེད་པ་ལས་ཀྱང་རྣམ་པར་གཅོད་པ་བྱེད་དེ། དྲིའི་བྱེ་བྲག་དྲི་ཞིམ་པའི་ཐུན་མོང་བ་སྤྱི་ནི་དྲི་ཞིམ་པའི་ཐུན་མོང་བ་སྟེ། དྲི་ཙམ་འདིར་བརྗོད་པར་
[101a.3]འདོད་པའོ། །དྲི་ཞིམ་པའི་ཐུན་མོང་བ་ཡོད་པ་མ་ཡིན་པ་གང་ཡིན་པ་དེ་ནི་དེ་སྐད་ཅེས་བཤད་དེ། དྲི་ཞིམ་པའོ་ཞེས་པའི་དོན་ཏོ། །དྲི་ཞིམ་པའི་ཁྱད་པར་ཨུཏྤ་ལ་ལ་སོགས་པ་ལ་དྲིའི་བྱེ་བྲག་གོ། །དེ་ལྟར་རྫས་མ་ཡིན་པ་ལ་སོགས་པ་རྣམ་པར་གཅོད་པ་རེ་རེ་འཕེལ་བས་ཨུཏྤ་ལ་ལ་སོགས་པ་རྣམས་
[101a.4]ལ་ཡོན་ཏན་ཉིད་ལ་སོགས་པ་རྣམས་ཀྱིས་བྱ་བཞིན་པ་མཐོང་བའོ། །དེ་ཅི་ལྟར་ན་གལ་ཏེ་མི་མཐུན་པའི་ཕྱོགས་ལས་ལྡོག་པའི་སྒོ་ནས་ཡིན་ན་གཏན་ཚིགས་གོ་བར་བྱེད་པ་ཡིན་གྱི་རྣམ་པ་གཞན་དུ་མ་ཡིན་པར་རིགས་ཤེ་ན། མཐོང་བ་བཞིན་དུ་སྒྲུབ་པའི་སྒོ་ནས་ཐམས་ཅད་ལ་ཐམས་ཅད་རྣམས་མཐོང་བར་
[101a.5]བྱེད་པ་ཁྱད་པར་མེད་པ་ཉིད་ཀྱི་ཕྱིར་རྟོགས་པ་མཚུངས་པར་འགྱུར་རོ། །དེའི་ཕྱིར་ལྡོག་པའི་སྒོ་ཁོ་ནས་གཏན་ཚིགས་གོ་བར་བྱེད་པའོ་ཞེས་ཁས་བླང་བར་བྱའོ། །གང་རྣམས་དེ་མི་འདོད་པ་དེ་རྣམས་ཀྱི་ངོར་གསུངས་པ། མཐོང་བ་བཞིན་དུ་ཞེས་པ་ལ་སོགས་པའོ། །མཐོང་བ་དང་མཚུངས་པ་ནི་
[101a.6]མཐོང་བ་བཞིན་ཏེ། ཇི་ལྟར་སྔར་འབྲེལ་པའི་དུས་ནས་རྟགས་ཉེ་བར་དམིགས་པ་དེ་ལྟར་གལ་ཏེ་རབ་ཏུ་གསལ་བྱེད་ནའོ་ཞེས་པའི་དོན་ཏེ། སྒྲུབ་པའི་སྒོ་ནས་མེ་འདིར་འགྱུར་རོ་ཞེས་པས་ཏེ། ལྡོག་པའི་སྒོ་ནས་འདིར་མེ་ཁོ་ན་སྟེ། མེ་མ་ཡིན་པ་མ་ཡིན་ནོ་ཞེས་པ་འདི་ལྟར་ནི་མ་ཡིན་ནོ་ཞེས་པའོ། །
[101a.7]ཐམས་ཅད་དུ་མ་མཐོང་བ་ལས་རབ་ཏུ་གསལ་བར་མི་འགྱུར་ཞེས་རྣམ་པར་ཤེས་པར་བྱའོ། །རབ་གསལ་འགྱུར་ཞེས་པ་རབ་ཏུ་གྱུར་པ་ཉིད་ཀྱི་ཕྱིར་རོ། །གལ་ཏེ་ཡང་དཔེར་ན་མེ་ལ་མཐོང་བ་ཞེས་པ་ལ་སོགས་པ་སྟེ། གལ་ཏེ་འདི་ལྟར་ཁས་ལེན་ན་སྒྲུབ་པ་སྨྲ་བ་པོས་གང་གི་ཕྱིར་མེ་ཁོ་ན་ལ་དུ་བ་
[101b]
[101b.1]མཐོང་ཞིང་མེ་མེད་པ་ལ་མ་ཡིན་པ་དེའི་ཕྱིར་རྟོགས་པར་བྱེད་དོ་ཞེས་པ་དེ་ལྟར་གྱུར་ན་དགག་པའི་སྒོ་ཁོ་ནས་རབ་ཏུ་གསལ་བར་བྱེད་པར་འགྱུར་རོ། །དེའི་ཕྱིར་དེས་འདི་ལྟར་ཁས་བླང་བར་བྱ་སྟེ། གང་གི་ཕྱིར་མེད་ལ་མཐོང་བ་ཁོ་ན་སྟེ་མཐོང་བ་ནི་མ་ཡིན་ནོ། །དེའི་ཕྱིར་དེས་དེ་གོ་བར་བྱེད་དོ་ཞེས་པར་
[101b.2]རོ། །དེ་ལས་ཀྱང་རབ་ཏུ་གསལ་བར་མི་འགྱུར་བ་ཁོ་ན་སྟེ། གང་ཕྱིར་ཐམས་ཅད་དུ་དེ་མེ་ལ་མཐོང་བ་ནི་མ་ཡིན་པས་ཏེ། ཕྱོགས་དང་གནས་སྐབས་ལ་སོགས་པ་ཐ་དད་པའི་མེ་ཐམས་ཅད་ལ་མཐོང་བ་ནི་མི་སྲིད་པའི་ཕྱིར་རོ། །གལ་ཏེ་ཡང་ཞེས་པས་སྐྱོན་གཞན་གསུངས་སོ། །གང་གི་ཚེ་
[101b.3]དུ་བ་མེ་ལ་མཐོང་བ་དེའི་ཚེ་འབར་བ་ལ་སོགས་པའི་ཁྱད་པར་རྣམས་ཀྱི་གང་ཡང་རུང་བ་དང་ལྡན་པ་ཁོ་ནར་མཐོང་ལ། དེ་ལས་ཀྱང་དེ་རྣམས་ཀྱང་གསལ་བར་བྱེད་པར་འགྱུར་ན། དེ་ལྟར་ཡང་མ་ཡིན་ནོ། །དེའི་ཕྱིར་མཐོང་བ་ཙམ་གྱིས་ནི་རྗེས་སུ་དཔག་པར་བྱ་བ་རྟོགས་པའི་རྒྱུ་མ་ཡིན་ཏེ། དེ་ཡོད་ན་
[101b.4]ཡང་དེ་མེད་པའི་ཕྱིར་རོ་ཞེས་པའོ། །འོ་ན་དགག་པར་སྨྲ་བ་པོས་ཀྱང་མཐོང་བ་འདོད་པ་ཁོ་ན་མ་ཡིན་ནམ། དེ་ལྟར་ནི་འབྲས་བུ་ཉིད་ཀྱིས་མེད་ན་མི་འབྱུང་བ་ཉིད་ཀྱི་ཕྱིར་དུ་བ་བསྲེག་ཟའི་གཏན་ཚིགས་ཡིན་ཞིང་། རྒྱུ་དང་འབྲས་བུའི་དངོས་པོ་ཡང་མཐོང་བ་དང་མ་མཐོང་བ་དག་གིས་ཏེ།
[101b.5]དེ་ནི་དེ་དག་ལས་འགྲུབ་ཀྱི། མ་མཐོང་བ་འབའ་ཞིག་ལས་ནི་མ་ཡིན་ནོ་ཞེ་ན། གསུངས་པ། གང་གི་ཕྱིར་ཞེས་པ་ལ་སོགས་པའོ། །འདི་སྟོན་ཏེ། གང་གི་ཕྱིར་དུ་བས་མེ་སྤྱིའི་ཚུལ་གྱིས་གསལ་བར་བྱེད་ཀྱི་འབར་བ་ལ་སོགས་པ་ཁྱད་པར་གྱི་ངོ་བོས་ནི་མ་ཡིན་པ་དེའི་ཕྱིར། འབྲས་བུ་དང་རྒྱུའི་དངོས་པོ་
[101b.6]འགྲུབ་པའི་ཆེད་དུ་བསྒྲུབས་པས་ཀྱང་དེ་ཁོ་ན་འདིའི་ངོ་བོ་མཐོང་བའོ་ཞེས་འབྲས་བུ་དང་རྒྱུའི་ཐ་སྙད་འགྲུབ་པའི་རྒྱུ་ཉིད་དུ་རྟོགས་ཀྱི་ཁྱད་པར་གྱི་ངོ་བོ་ནི་མ་ཡིན་ཞེས་པ་དགོངས་པའོ། །གསལ་བ་ལ་སོགས་པའི་ཁྱད་པར་མཐོང་བ་ནི་འབྲས་བུ་དང་རྒྱུའི་ཐ་སྙད་དུ་གྲུབ་པའི་རྒྱུ་མ་ཡིན་ཏེ། དེ་མེད་ཀྱང་དུ་བ་
[101b.7]མཐོང་བའི་ཕྱིར་རོ། །ཆ་ཤས་ཀྱིས་བསྐྱེད་པར་བྱ་བ་དང་སྐྱེད་པར་བྱེད་པར་འགྱུར་རོ་ཞེ་ན། མ་ཡིན་ཏེ། དེས་བསྐྱེད་པར་བྱ་བའི་ཁྱད་པར་གཟུང་ན་འདོད་པའི་ཕྱིར་རོ། །རྣམ་པ་ཐམས་ཅད་དུ་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོའི་སྤྱི་ཁྱད་པར་དུ་མ་བྱས་པ་གཟུང་ན་ནི་འཁྲུལ་པའི་ཕྱིར་མི་འདོད་
[102a]
[102a.1]དོ། །དེ་ལྟར་འགྱུར་མོད། སྤྱི་དངོས་པོ་གཅིག་ཁོ་ན་གསལ་བ་རྣམས་ལ་དེ་དང་ཐ་དད་པའམ་དེ་དང་ཐ་མི་དད་པ་ཡོད་ལ། དེ་ཡང་གསལ་བ་སོ་སོ་ལ་ཐམས་ཅད་ཀྱི་བདག་ཉིད་ཀྱིས་ཡོངས་སུ་རྫོགས་པ་ཉིད་ཀྱི་ཕྱིར་མེའི་གསལ་བ་གཅིག་ཁོ་ན་ལ་མཐོང་བ་འཐད་ཅིང་། དེའི་ཕྱིར་ཐམས་
[102a.2]ཅད་ལ་མ་མཐོང་བའི་ཕྱིར་རབ་ཏུ་གསལ་བར་མི་འགྱུར་རོ་ཞེས་པ་འདི་མི་རིགས་སོ་ཞེ་ན་གསུངས་པ། གལ་ཏེ་ཡང་སྤྱི་ཞེས་པ་ལ་སོགས་པ་སྟེ། གལ་ཏེ་ཡང་ཞེས་པ་འདིས་ནི་དེ་མེད་པ་ཁོ་ན་མོད། ཁས་བླངས་ནས་སྐྱོན་བརྗོད་པར་བྱའོ་ཞེས་པ་འདི་སྟོན་ཏོ། །རེ་ཞིག་མེ་ཉིད་ཡོད་པ་མ་ཡིན་ནོ་ཞེས་པ་གལ་ཏེ་
[102a.3]གསལ་བ་ལས་གཞན་པའི་སྤྱིར་འགྱུར་ན། བློ་ལ་ཐ་དད་པར་སྣང་བར་འགྱུར་ལ། སྣང་བ་ཡང་མ་ཡིན་ནོ། །དེའི་ཕྱིར་རང་བཞིན་མི་དམིགས་པས་བསལ་བར་བྱས་པའི་ཡོད་པ་ཉིད་དེ་ནི་མེད་དོ། །གལ་ཏེ་གཞན་མ་ཡིན་ན། དེ་ལྟ་ན་ཡང་གསལ་བ་བཞིན་དུ། དེ་སྤྱི་ཁོ་ནར་མི་འགྱུར་རོ། །དེ་ལྟ་ན་ཡང་
[102a.4]ཁས་བླངས་ནས། དེ་མཐོང་བ་མི་སྲིད་པར་སྒྲུབ་པའི་ཆེད་དུ་གསུངས་པ། དེ་ཡོད་ན་ཡང་ཞེས་པ་ལ་སོགས་པ་སྟེ། གང་རྟེན་དུ་མའི་ཐུན་མོང་བ་རྟེན་མཐའ་དག་མ་བཟུང་བ་དེ་ནི་མཐོང་བར་ནུས་པ་མ་ཡིན་ཏེ། དཔེར་ན་རྟེན་མཐའ་དག་མ་བཟུང་བའི་གཉིས་ཉིད་ལ་སོགས་པ་བཞིན། མེ་ཉིད་ཀྱང་དེ་
[102a.5]ལྟ་བུའོ་ཞེས་པ་ཁྱབ་བྱེད་དང་འགལ་བའོ། །འདྲ་བའི་ཡང་མ་ཡིན་ཞེས་པ་རྟེན་ལས་ཐ་དད་པ་མེད་པ་ཉིད་ཀྱི་ཕྱིར་འདྲ་བ་ནི་ཐ་དད་པ་ཉེ་བར་བཀོད་པའོ། །འདིར་ཡང་སྦྱོར་བ་དེ་ཁོ་ན་བརྗོད་པར་བྱའོ། །ཅི་སྟེ་རྟེན་གཅིག་བཟུང་ན་ཡང་མཐའ་དག་གཟུང་བར་བྱ་ན། དེ་ལྟར་གྱུར་ན་དེའི་སོ་སོ་ལ་བདག་
[102a.6]ཉིད་ཐམས་ཅད་ཀྱིས་ཡོངས་སུ་རྫོགས་པ་ཉིད་ཀྱི་ཕྱིར་ཡོན་ཏན་བཞིན་དུ་དུ་མ་ཉིད་དུ་འགྱུར་རོ། །གང་གཅིག་ལ་བདག་ཉིད་ཐམས་ཅད་ཀྱིས་ཡོངས་སུ་རྫོགས་ཤིང་དེ་གཞན་ལ་ཡང་ཡོད་དོ་ཞེས་པ་འདི་ནི་སྲིད་པ་ཡོད་པ་མ་ཡིན་ནོ། །གང་དུ་མ་ལ་སོ་སོར་བདག་ཉིད་ཐམས་ཅད་ཀྱིས་ཡོངས་སུ་རྫོགས་པ་དེ་
[102a.7]ནི་དུ་མ་སྟེ། ཡོན་ཏན་བཞིན། སྤྱི་ཡང་དེ་ལྟ་བུའོ་ཞེས་པ་རང་བཞིན་གྱིས་ཐལ་འགྱུར་རོ། །ཡན་ལག་ཅན་ཡང་འདི་ཉིད་ཀྱིས་ཁེགས་པའི་ཕྱིར་མ་ངེས་པ་མ་ཡིན་ནོ། །དུ་མ་ཉིད་ཀྱི་ཕྱིར་ཡང་དེ་སྤྱི་ཁོ་ནར་ཡང་མི་འགྱུར་ཏེ། རྟེན་བཞིན་ནོ། །སྤྱི་ཡང་གཅིག་ཏུ་འདོད་པའི་ཕྱིར་རོ། །དེ་ལྟར་ཞེས་པ་ལ་སོགས་
[102b]
[102b.1]པས་སྔར་དམ་བཅས་པའི་རྟགས་ལ་རྣམ་པར་དཔྱོད་པར་སྟོན་པར་མཛད་དོ། །རྗེས་སུ་དཔག་པར་བྱ་བ་འདིས་ཡན་ལག་ཏུ་རྟོགས་པར་བྱའོ་ཞེས་པ་ཡན་ལག་སྟེ་རྟགས་སུ་བརྗོད་པར་བྱའོ། །འདའ་མིན་ཞེས་པ་འཁྲུལ་པ་མ་ཡིན་པ་ཞེས་པའི་དོན་ཏེ། ཆོས་དུ་མ་ཡང་ཞེས་པ། སྤྱིའི་ཁྱད་པར་
[102b.2]གྱི་ཆོས་རྣམས་ཀྱིས་སོ། །དུ་བ་ཉིད་དང་སྐྱ་བོ་ཉིད་ལ་སོགས་པས་ཞེས་པ་ལ། སྐྱ་བོ་ཉིད་ནི་འདིར་དུ་བ་དང་འབྲེལ་པ་ཅན་ཁོ་ན་བརྗོད་པར་འདོད་ཀྱི། ཞོ་དང་ཀ་ར་ལ་སོགས་པ་འཇུག་པ་ནི་མ་ཡིན་ཏེ་དེ་འཁྲུལ་པའི་ཕྱིར་རོ། །འོ་ན་རྫས་ལ་སོགས་པ་དུ་བའི་ཁྱད་པར་རྣམས་ཀྱང་གང་གི་ཚེ་གཟུང་
[102b.3]བར་བྱ་བ་དེའི་ཚེ། དེ་རྣམས་ཀྱིས་ཀྱང་ཅིའི་ཕྱིར་རྟོགས་པར་བྱེད་པ་མ་ཡིན་ཞེ་ན། རྟོགས་པར་བྱེད་པ་ཁོ་ན་སྟེ་འདི་རྣམ་པ་གཞན་ཡོད་པ་མ་ཡིན་ནོ། །ཁྱད་པར་མེད་པའི་སྤྱི་འཛིན་པ་ལ་མངོན་པར་དགོངས་ནས་འདི་སྐད་བཤད་དེ། རྫས་ཉིད་ལ་སོགས་པ་རྣམས་ཀྱིས་མ་ཡིན་ཞེས་པའོ། །དུ་བ་ཉིད་དང་
[102b.4]སྐྱ་བོ་ཉིད་ལ་སོགས་པས་ཞེས་པའི་སོགས་པའི་སྒྲས་ཚ་བ་ཉིད་ལ་སོགས་པའི་ཁྱད་པར་རྣམས་གཟུང་བར་བྱའོ། །བཤད་ཟིན་པའི་དོན་ཁོ་ན་བསྡུ་བའི་ཚིགས་སུ་བཅད་པ་དག་གིས་བདེ་བླག་ཏུ་རྟོགས་པར་བྱ་བའི་ཆེད་དུ་རྟགས་ལས་དེ་རྣམས་ཀྱང་རྟོགས་བྱ་ཞེས་པ། དེ་རྣམས་ཀྱང་སྟེ། རྗེས་སུ་འབྲེལ་པ་ཅན་
[102b.5]རྫས་ཉིད་ལ་སོགས་པ་རྣམས་རྟོགས་པར་བྱ་བ་སྟེ། མེ་ཉིད་ལ་སོགས་པའི་ཆོས་གང་དེའི་ཚེ་རྟོགས་པར་འདོད་པ་ཁོ་ན་ནི་མ་ཡིན་ནོ་ཞེས་པ་ཀྱང་གི་སྒྲའི་དོན་ཏེ། འཁྲུལ་ཕྱིར་རོ་ཞེས་པ་རྟགས་ལས་སོ། །འབར་བ་ལ་སོགས་པའི་ཁྱད་པར་ལ་ལྟོས་ནས་འཁྲུལ་པ་ཉིད་དོ། །རྟགས་དང་རྗེས་སུ་འབྲེལ་
[102b.6]པའི་དོན། །ཞེས་པ་ཁྱད་པར་དུ་བྱས་པ་མ་ཡིན་པའི་རྫས་ལ་སོགས་པ་སྤྱིའི་ཆོས་རྣམས་སོ། །ཁྱད་པར་རྣམས་ནི་ཞེས་པ་དུ་བ་ཉིད་ལ་སོགས་པ་རྣམས་སོ། །དེ་རྣམས་ཀྱང་ཁྱད་པར་དུ་བྱས་པ་མ་ཡིན་པའི་རྫས་ཉིད་ལ་སོགས་པའི་སྤྱི་ལ་ལྟོས་པས་ཁྱད་པར་ཞེས་བརྗོད་ཀྱི་ཐུན་མོང་མ་ཡིན་པའི་ངོ་བོ་ལ་
[102b.7]ལྟོས་པས་ནི་མ་ཡིན་ནོ། །འོ་ན་གཉིས་ལ་གནས་པ་ཉིད་ཀྱི་ཕྱིར་ཞེས་པ་འབྲེལ་པ་ཐམས་ཅད་ནི་གཉིས་ལ་གནས་པ་ཡིན་ལ། དེའི་ཡང་འབྲེལ་པ་ཅན་དག་ལ་ཁྱད་པར་མེད་པར་འཇུག་ཅིང་། དེ་ལས་ཀྱང་ཇི་ལྟར་ཡང་དག་པར་ལྡན་པ་ཅན་ཉིད་ལ་ལྡན་པ་ཅན་དག་ལ་ཁྱད་པར་མེད་པ་དེ་ལྟར་རྟགས་དང་རྟགས་
[103a]
[103a.1]ཅན་དག་གི་ཡང་མི་འགྱུར་རོ། །དེ་ལྟ་ན་ཡང་རྟགས་ཀྱི་སྤྱི་ཡང་གོ་བར་བྱེད་པར་འགྱུར་ལ། རྟགས་ཅན་གྱི་བྱེ་བྲག་ཀྱང་གོ་བར་བྱ་བར་འགྱུར་ཏེ། འབྲེལ་པ་ཁྱད་པར་མེད་པའི་ཕྱིར་རོ་ཞེས་པའོ། །གང་དག་འབྲེལ་པ་གཅིག་གི་རྟེན་ཅན་དེ་དག་ནི་ཆོས་ཐ་མི་དད་པ་དག་ཡིན་ཏེ།
[103a.2]ལྡན་པ་ཅན་བཞིན། རྟགས་དང་རྟགས་ཅན་དག་དེ་ལྟ་བུའོ། །རང་བཞིན་ལྟར་སྣང་བའོ། །གལ་ཏེ་འབྲེལ་པ་གཉིས་གནས་ཀྱང་། །ཞེས་པ་འབྲེལ་པ་ནི་གཉིས་པ་གནས་པ་མ་ཡིན་པ་ཁོ་ན་སྟེ། དེ་ལྟར་ནི་མེད་ན་མི་འབྱུང་བ་ཉིད་འབྲེལ་པ་ཡིན་ལ། དེ་ཡང་རྟགས་ཁོ་ན་ལ་འཇུག་གི །རྟགས་ཅན་
[103a.3]ལ་ནི་མ་ཡིན་ནོ། །གཉིས་ལ་གནས་པ་དེ་ཁས་བླངས་ནས་ལྷན་ཅིག་འབྱུང་བ་ཉིད་ཡོད་པ་ལ་ལན་བརྗོད་པར་བྱའོ་ཞེས་སྟོན་ཏོ། །རྟེན་དང་བརྟེན་པ་བཞིན་ཞེས་པ། རྟགས་དང་རྟགས་ཅན་གྱི་འབྲེལ་བ་དེ་ན་རྟེན་དང་བརྟེན་པ་བཞིན་དུ་འཇུག་གི །ལྡན་པ་ཅན་དག་བཞིན་མ་ཡིན། །ནམ་གྱི་ཚེ་ཡང་རྟེན་ཞེས་
[103a.4]པ་ལ་སོགས་པ་སྟེ། བརྟེན་པར་བྱ་བའི་ཆོས་ནི་རྟེན་ལ་རག་ལས་པས་གནས་པ་ཉིད་དོ། །རྟེན་གྱི་ཆོས་ནི་བརྟེན་པ་གནས་པར་བྱེད་པའོ། །རྟེན་དང་བརྟེན་པ་དག་འབྲེལ་པའི་གཞི་གཅིག་པ་ཉིད་ན་ཡང་ཆོས་ཐ་དད་མེད་པ་ཉིད་མ་ཡིན་ནོ་ཞེས་པས་མ་ངེས་པ་ཉིད་གསུངས་སོ། །དེ་བཞིན་དུ་ནམ་ཡང་མེད་
[103a.5]ཅེས་པ་ལ་སོགས་པ། རྟགས་དང་རྟགས་ཅན་དག་ཕན་ཚུན་གྱི་ཆོས་སུ་འགྱུར་བ་དག་མ་ཡིན་ཞེས་པའི་དོན་ཏོ། །ཡང་དག་པར་ལྡན་པ་ནི་ཞེས་པ་ལ་སོགས་པས་ཡང་དག་པར་ལྡན་པ་ཅན་དག་དང་རྟགས་ཅན་དག་མི་མཚུངས་པ་ཉིད་དུ་གསུངས་སོ། །དེ་ལྟར་ནི་ཞེས་པ་ལ་སོགས་པས་འབྲེལ་པ་
[103a.6]གཅིག་གི་རྟེན་ཅན་ཉིད་མ་གྲུབ་པ་ཉིད་དུ་གསལ་བར་བྱེད་ཅིང་སྔར་བཤད་པ་ཁོ་ནའི་གོ་བར་བྱ་བ་དང་གོ་བར་བྱེད་པའི་དངོས་པོ་གཞུང་འཛུགས་སོ། །དེ་ལྟར་ནི་རྟགས་དང་རྟགས་ཅན་དག་མེད་ན་མི་འབྱུང་བ་འབྲེལ་པ་དང་། དེ་ཡང་རྟགས་ཁོ་ན་ལ་འཇུག་གི་རྟགས་ཅན་ལ་ནི་མ་ཡིན་ནོ་ཞེས་པའི་ངེས་པར་བཟུང་
[103a.7]བ་གཉིས་པོ་འདིས་རྟོགས་པར་བྱ་བའོ། །ཅི་ལྟར་བྱས་ནས་ཤེ་ན། གང་གི་ཕྱིར་རྟགས་ལ་རྟགས་ཅན་འགྱུར་བ་ཁོ་ནའོ་ཞེས་ངེས་པར་གཟུང་བ་ཅི་ལྟར་རིགས། གལ་ཏེ་གང་དང་གང་དུ་རྟགས་ཡིན་པ་དེ་དང་དེར་རྟགས་ཅན་འགྱུར་ལ། རྟགས་ཅན་ནི་གཞན་དུ་འཇུག་པ་འདིས་དགག་པར་བྱ་བ་མ་
[103b]
[103b.1]ཡིན་ཏེ། ངེས་པར་བཟུང་བ་ནི་རྟགས་ལ་དེ་མེད་པ་ཙམ་རྣམ་པར་གཅོད་པའི་འབྲས་བུ་ཅན་ཉིད་ཀྱི་ཕྱིར་རོ། །དེ་ལས་ཀྱང་རྟགས་ཅན་ལ་ནི་མེད་ན་མི་འབྱུང་བ་ཉིད་འཇུག་པ་མ་ཡིན་ནོ་ཞེས་བརྗོད་པར་འགྱུར་ཏེ། རྟགས་ལས་གཞན་དུ་ཡང་དེ་ཡོད་པ་གསལ་བར་བྱེད་པའི་ཕྱིར་རོ། །ཇི་ལྟར་མེ་ཉིད་དུ་བ་ལ་འགྱུར་བ་ཁོ་ན་ཡིན་
[103b.2]པ་དེ་ལྟར་རྫས་ཉིད་ལ་སོགས་པ་རྣམས་ཀྱང་སྟེ། དེའི་ཕྱིར་དེ་རྣམས་ཀྱི་ཡང་དུ་བ་གོ་བར་བྱེད་པ་ཡིན་གྱི། འབར་བ་ལ་སོགས་པ་རྣམས་ཀྱི་ནི་མ་ཡིན་ཏེ། དེ་རྣམས་དུ་བ་ལ་ཡོད་པ་ཁོ་ན་མ་ཡིན་པས་སོ། །གང་གསུངས་པ། དེའི་ཕྱིར་རིགས་པ་ཞེས་པ་ལ་སོགས་པ་སྟེ། ཅིག་ཤོས་རྟགས་ཅན་ཉིད་ལ་ཡོད། །
[103b.3]ཅེས་པ་འདིས་ཀྱང་རྟགས་ཁོ་ན་ལ་མེད་ན་མི་འབྱུང་བར་རབ་ཏུ་འཇུག་གོ་ཞེས་གསལ་བར་བྱ་བ་སྟེ། རྟགས་ཅན་ལས་གཞན་ལ་རྟགས་འགྱུར་བ་མ་ཡིན་ནོ་ཞེས་པའི་དོན་རྟོགས་པའི་ཕྱིར་རོ། །རྟགས་ཅན་ནི་རྟགས་ལས་གཞན་དུ་ཡོད་པ་དགག་པར་བྱ་བ་མ་ཡིན་ནོ། །ཇི་ལྟར་ཡང་མེ་ལ་དུ་བ་ཉིད་འགྱུར་བ་ཁོ་ན་ཡིན་པ་དེ་
[103b.4]ལྟར་སྐྱ་བོ་ཉིད་ལ་སོགས་པ་ཁྱད་པར་རྣམས་ཀྱང་སྟེ། དེའི་ཕྱིར་དེ་རྣམས་ཀྱང་གོ་བར་བྱེད་པ་རྣམས་ཡིན་གྱི་རྫས་ཉིད་ལ་སོགས་པ་རྣམས་ནི་མ་ཡིན་ཏེ། དེ་རྣམས་མེ་ལ་ཡོད་པ་ཁོ་ན་མ་ཡིན་པས་སོ། །གང་གསུངས་པ་དེའི་ཕྱིར་རིགས་པ་ཞེས་པ་ལ་སོགས་པའོ། །དེ་ལྟར་ན་ཞེས་པ་ལ་སོགས་པས་ཕྱེད་ཕྱི་མ་རྣམ་
[103b.5]པར་འགྲེལ་ཏོ། །འོ་ན་སྔར་དེ་མཚུངས་ཡོད་པ། །ཞེས་པའི་ཚིག་ལ་རྟགས་རྟགས་ཅན་ལ་ཡོད་པར་བཤད་ལ། འདིར་ནི་རྟགས་ཅན་ལ་རྟགས་སུ་འགྱུར་བ་ཁོ་ནའོ་ཞེས་པའི་ཚིག་ལས་རྟགས་ཅན་རྟགས་ལ་ཡོད་པ་ཉིད་དུ་བརྗོད་པར་བྱ་ན། དེ་ཅི་ལྟར་མི་འགལ་ཞེ་ན། སྐྱོན་འདི་མེད་དེ། རྟགས་དང་རྟགས་ཅན་
[103b.6]དག་གཞི་གཅིག་པ་ཉིད་ན། ཇི་ལྟར་རྟགས་ལ་རྟགས་ཅན་དུ་འགྱུར་བ་དེ་ལྟར་རྟགས་ཀྱང་ཅིག་ཤོས་ལའོ། །ངེས་པར་གཟུང་བ་བཟློག་པ་ཉིད་ཀྱིས་རྟགས་ཁོ་ན་ལ་འབྲེལ་པ་འཇུག་གོ་ཞེས་རྟོགས་པར་བྱ་བའི་ཆེད་དུ་འདི་བརྗོད་པ་འབའ་ཞིག་གོ། །གལ་ཏེ་འོ་ན་རྟགས་ཁོ་ན་ལ་འཇུག་ན་ཅི་ལྟར་རྟགས་ཅན་དག་
[103b.7]གི་འབྲེལ་པའོ་ཞེས་བརྗོད་ཅེ་ན། འདི་རྟགས་ཁོ་ན་ལ་འཇུག་ཀྱང་རྟགས་ཅན་གྱི་ངོར་སྦྱོར་བ་ལ་ལྟོས་ནས་འཇུག་གོ་ཞེས་པས་འདི་སྐད་བརྗོད་ཀྱི། གཉིས་ལ་གནས་པ་ཉིད་ཀྱི་ཕྱིར་ནི་མ་ཡིན་ནོ་ཞེས་པས་སྐྱོན་མེད་དོ། །འོ་ན་ཡང་ཞེས་པ་ལ་སོགས་པས། གང་བཤད་པའི་ངེས་པ་བཟློག་པ་ལས་རྟགས་དང་རྟགས་ཅན་
[104a]
[104a.1]དག་གི་འབྲེལ་པའོ་ཞེས་པས་དེ་འཐད་པ་མ་ཡིན་ཞིང་རྟགས་ཅན་ལ་ཡང་མེད་ན་མི་འབྱུང་བ་འཇུག་གོ་ཞེས་སྟོན་ཏོ། །འདོད་ཅེས་པ་ལ་སོགས་པས། གལ་ཏེ་ཡང་རྟགས་ཀྱང་ཅུང་ཟད་རྟགས་ཅན་ལ་འགྱུར་བ་དེ་ལྟ་ན་ཡང་རྟགས་ཅན་གྱི་ངོ་བོ་ཁོ་ནས་སོ། །དེ་ལྟ་ན་ཡང་བྱས་པ་ཉིད་བསྒྲུབ་པར་བྱ་
[104a.2]བ་ལ་ལྟོས་པས་རྟགས་སུ་གྱུར་པ་ཁོ་ན་མི་རྟག་པ་ཉིད་ལ་མེད་ན་མི་འབྱུང་བ་འཇུག་གོ་ཞེས་སྟོན་ཅིང་རང་གི་ཕྱོགས་ཁོ་ན་འཇོག་པར་བྱེད་དོ། །རྟགས་ཀྱང་ཁྱབ་ཅེས་པ་ཁྱབ་པར་བྱེད་པས་ན་ཁྱབ་པ་སྟེ། རྟགས་ཅན་ལ་ཞེས་པ་མི་རྟག་པ་ཉིད་ལའོ། །གང་དེའི་ཁྱབ་པ་ཉིད་དེ་རྟགས་ཅན་གྱི་ཡུལ་ཅན་ནོ་ཞེས་པས།
[104a.3]རྟགས་ཅན་ལ་ཁྱབ་པའོ་ཞེས་བརྗོད་དོ། །དཔེར་ན་ཨཀྵ་རྣམས་ལ་དྷུ་དྷ་ཞེས་པ་བཞིན་ནོ། །ཡན་ལག་ཅན་ནི་དེ་དེ་ལས། །ཁྱབ་བྱེད་ཕྱིར་ཞེས་པ་མི་རྟག་པ་ཉིད་ལ་ཡོད་པ་ཁོ་ན་བྱས་པ་ཉིད་ཀྱི་ཁྱབ་པ་ཉིད་དེ། དེའི་ཕྱིར་ཁྱབ་པ་ཉིད་ཀྱི་ཕྱིར་བྱས་པ་ཉིད་གོ་བར་བྱས་པ་ཁོ་ནར་འགྱུར་གྱི། གོ་བྱེད་མིན། ཅི་དང་འདྲ་
[104a.4]ཞེ་ན་གསུངས་པ། བ་ལང་གི་རྭ་བཞིན་ཞེས་པ། ཇི་ལྟར་རྭ་བ་ལང་གི་ཁྱབ་པར་བྱེད་པ་ཉིད་ཀྱི་ཕྱིར་གོ་བར་བྱ་བ་ཁོ་ནར་རྟོགས་པར་བྱའི། གོ་བར་བྱེད་པ་ནི་མ་ཡིན་པ་དེ་དང་འདྲའོ་ཞེས་པའོ། །གང་ཞིག་གང་ཁོ་ན་ལ་དེ་ནི་དེའི་གོ་བར་བྱེད་པ་ཡིན་ཏེ། དཔེར་ན་བ་ལང་ཉིད་རྭ་ཅན་ཉིད་ཀྱི་བཞིན། བྱས་པ་ཉིད་
[104a.5]ཀྱང་མི་རྟག་པ་ཉིད་ལ་ཡོད་པ་ཁོ་ནའོ། །རང་བཞིན་ནོ། །ཅིའི་ཕྱིར་ཞེ་ན་ཞེས་ཁྱབ་པ་མི་སྲིད་པར་དྲི་བར་བྱེད་པའོ། །དགག་པར་བྱ་ལ་མི་རྒྱུ་བས། །ཞེས་པ་ལ་སོགས་པ་ལ། དགག་བྱ་ནི་བསྒྲུབ་པར་བྱ་བའི་མི་མཐུན་ཕྱོགས་སོ། །དེ་ལ་གཏན་ཚིགས་མི་རྒྱུ་བ་ནི་མེད་པའོ། །དེས་རྟགས་ཀྱི་ཁྱབ་པ་གང་ཡིན་པ་
[104a.6]དེ་ལ་ལྟོས་པར་བྱ་ཞིང་བརྟེན་པར་བྱ་སྟེ། དེ་ཁོ་ན་ལས་གོ་བར་བྱེད་པ་ཉིད་ཀྱི་གཏན་ཚིགས་ཡིན་པ་ཉིད་ཀྱི་ཕྱིར་རོ། །དེའི་ཕྱིར་རྟགས་ཀྱི་ནི་རྟགས་ཅན་གྱི་ཡུལ་ཅན་གྱི་གང་ཁྱབ་པ་དེ་ཡོད་པ་ཡིན་ཡང་རྒྱུ་མ་ཡིན་ཏེ། གོ་བར་བྱེད་པ་ཉིད་ཀྱི་རྒྱུ་མཚན་མ་ཡིན་ནོ་ཞེས་པའི་དོན་ཏོ། །བྱས་པ་ཉིད་ཀྱི་ཞེས་པ་ལ་སོགས་པ་སྟེ།
[104a.7]གལ་ཏེ་ཡང་མི་རྟག་པ་ཉིད་མཐའ་དག་ལ་བྱས་པ་ཉིད་ཁྱབ་པ་དེ་ལྟ་ན་ཡང་དེས་ཁྱབ་པ་ཉིད་ཀྱིས་དེའི་གོ་བར་བྱེད་པ་མ་ཡིན་གྱི་འོན་ཀྱང་རྟག་པ་ཉིད་བཀག་པས་སོ། །རྟག་པ་ཉིད་ལ་དགག་པ་ནི་རབ་ཏུ་མི་རྒྱུ་བ་སྟེ། དེ་ཁོ་ནས་གོ་བར་བྱེད་པའོ། །མི་མཐུན་པའི་ཕྱོགས་ལས་ལྡོག་པ་མེད་པའི་གཏན་ཚིགས་
[104b]
[104b.1]ནི་བསྒྲུབ་པར་བྱ་བ་གོ་བར་བྱེད་པ་མ་ཡིན་པས་ཏེ། གཞལ་བྱ་ཉིད་བཞིན་ནོ། །དེ་བཞིན་དུ་མི་རྟག་པ་ཉིད་ཀྱི་ཞེས་པ་ལ་སོགས་པ་སྟེ། གང་གི་ཚེ་བྱས་པ་ཉིད་འགྲུབ་པའི་ཆེད་དུ་མི་རྟག་པ་ཉིད་གཏན་ཚིགས་ཉིད་དུ་ཉེ་བར་བླང་བར་བྱ་བ་དེའི་ཚེ་ཡང་མི་རྟག་པ་ཉིད་བྱས་པ་མ་ལུས་པ་ལ་ཁྱབ་པ་ཉིད་ནའང་། དེ་ཁྱབ་པ་ཉིད་
[104b.2]ཀྱིས་གོ་བར་བྱེད་པ་མ་ཡིན་གྱི། འོ་ན་ཅི་ཞེ་ན། མ་བྱས་པ་ཉིད་བཀག་པ་སྟེ། མི་མཐུན་པའི་ཕྱོགས་མ་བྱས་པ་ཉིད་ལ་མེད་པས་སོ་ཞེས་པའི་དོན་ཏོ། །དེ་ལྟར་གང་གི་ཕྱིར་རང་གི་བསྒྲུབ་པར་བྱ་བའི་མི་མཐུན་ཕྱོགས་ལས་ལྡོག་པས་གཏན་ཚིགས་གོ་བར་བྱེད་པ་ཉིད་དུ་འགྱུར་གྱི། རྣམ་པ་གཞན་དུ་མ་ཡིན་པ་དེའི་
[104b.3]ཕྱིར་མི་རྟག་པའི་དོན་ལ་བྱས་པ་ཉིད་ཀྱིས་ཁྱབ་པ་ཉིད་གང་ཡིན་པ་དེས་ན་མ་བྱས་པ་ཉིད་ཀྱི་སྐབས་མེད་པའི་ཕྱིར་དང་། མི་རྟག་པ་ཉིད་ཀྱི་མ་བྱས་པ་ཉིད་ལ་སྐབས་མེད་པའི་ཕྱིར་ཏེ། གནས་པ་མེད་པའི་ཕྱིར་དང་མི་སྲིད་པའི་ཕྱིར་དང་། མི་རྟག་པ་ཉིད་ཀྱིས་མ་བྱས་པ་ཉིད་དགག་པས་ཏེ་མ་བྱས་པ་བསལ་བས་
[104b.4]གོ་བར་བྱ་བ་ཁོ་ནར་འགྱུར་རོ། །མ་བྱས་པ་ཉིད་དགག་པས་ཞེས་པའི་ཚིག་ནི་སྒྲུབ་པའི་སྒོ་ནས་རྟོགས་པ་རྣམ་པར་བཅད་པའི་དོན་དུའོ། །གོ་བར་བྱེད་པ་ཉིད་ནི་མ་ཡིན་ནོ་ཞེས་པ། གང་གི་ཕྱིར་མི་མཐུན་ཕྱོགས་ལ་རབ་ཏུ་མི་རྒྱུ་བས་ན་གང་ཁྱབ་པ་ཡིན་པ་དེ་གོ་བར་བྱེད་པ་ཉིད་ཀྱི་རྒྱུ་མཚན་ཡིན་ན། མི་རྟག་པ་
[104b.5]ཉིད་ལ་བྱས་པ་ཉིད་ཀྱིས་ཁྱབ་པ་ནི། མི་མཐུན་པའི་ཕྱོགས་ལ་རབ་ཏུ་རྒྱུ་བ་མེད་པས་ཀྱང་མ་ཡིན་ནོ། །དེ་ལྟར་ནི་གང་མི་རྟག་པ་དེ་བྱས་པའོ་ཞེས་ཁྱབ་པ་ཉེ་བར་བསྟན་པ་ན་རྟག་པ་ལས་བྱས་པ་ཉིད་ལྡོག་པར་རྟོགས་པ་མ་ཡིན་གྱི། འོ་ན་ཅི་ཞེ་ན། མ་བྱས་པའི་ཉིད་ལས་མི་རྟག་པ་ཉིད་ཀྱིའོ། །དེའི་ཕྱིར་མི་རྟག་པ་ཉིད་ཁོ་ན་
[104b.6]མ་བྱས་པ་ཉིད་ལ་སྐབས་མེད་པའོ་ཞེས་མ་བྱས་པ་ཉིད་དགག་པས་གོ་བར་བྱ་བ་ཁོ་ནའོ། །བྱས་པ་ཉིད་ཀྱི་མི་རྟག་པ་ཉིད་ལ་སྦྱོར་བ་མ་ཡིན་ལ། གོ་བར་བྱེད་པ་ཉིད་མ་ཡིན་ནོ་ཞེས་པའོ། །བཤད་པའི་དོན་ཚིགས་སུ་བཅད་པ་དག་གིས་སྡུད་པར་བྱེད་དེ། བྱས་པ་ཉིད་ཀྱིས་འཇིག་པ་ལ་ཞེས་པ་ལ་སོགས་པ་སྟེ།
[104b.7]མི་རྟག་པ་ཉིད་ལ་བྱས་པ་ཉིད་ཀྱིས་ཁྱབ་པ་ལས་མི་རྟག་པ་ཉིད་ཀྱི་ཕྱིར་དེ་མ་བྱས་པ་མ་ཡིན་ནོ་ཞེས་པའི་དོན་འདི་སྐབས་སུ་བབ་པ་མ་ཡིན་པ་ཁོ་ནར་རྟོགས་པར་བྱ་ཞེས་བྱེད་པ་ཕྱིས་པས་ངེས་པར་བསྟན་པའོ། །གང་སྐབས་སུ་བབ་པ་རྟག་པ་ཉིད་མེད་པ་ནི་མི་རྟག་པ་ཉིད་དོ། །དེ་ནི་དེས་ཁྱབ་པས་བྱས་པ་ཉིད་ཀྱི་དོན་ལ་མ་
[105a]
[105a.1]བསྟན་ཏོ། །དོན་འདི་ཁོ་ན་བསལ་བར་བྱ་བའི་ཆེད་དུ་ཚིགས་སུ་བཅད་པ་གཉིས་པས་དཔེ་གསུངས་སོ། །རྭ་ཅན་མིན་པ་ཉིད་ཟློག་བྱེད། །ཅེས་པ་རྭ་ཅན་ཉིད་གོ་བར་བྱེད་དོ་ཞེས་པའི་དོན་ཏོ། །བ་ལང་མིན་དོན་ལྡོག་བྱེད་མིན། །ཞེས་པ་བ་ལང་གི་དོན་གྱི་སྒྲུབ་བྱེད་མ་ཡིན་ཞེས་པའི་དོན་
[105a.2]ཏོ།། །།མེད་ན་མི་འབྱུང་བའི་དོན་མཐོང་བ་དེ་རིགས་པ་རྗེས་སུ་དཔག་པའོ་ཞེས་པ་ལ། དོན་གང་ཞིག་གང་མེད་པར་མི་འབྱུང་བ་དེ་ནི་དེའི་མེད་ན་མི་འབྱུང་བ་སྟེ། དཔེར་ན་མེའི་དུ་བ་ལྟ་བུའོ། །དེས་མ་མཐོང་བ་དེ་ནི་རྗེས་སུ་དཔག་པ་སྟེ། འདིས་རྗེས་སུ་དཔག་པར་བྱའོ་ཞེས་བྱས་ནས་སོ། །རྗེས་སུ་དཔག་
[105a.3]པར་བྱ་བའི་དོན་ཤེས་པ་ནི་འབྲས་བུའོ། །འདིས་ནི་འཁྲུལ་པའི་མཐོང་བ་བསལ་ཏོ། །རྟགས་མཐོང་བ་ནི་འབྲེལ་པ་དྲན་པ་ལ་ལྟོས་པ་ཉིད་བསྟན་པའི་ཆེད་དུ་དེ་རིག་པ་ཞེས་བཤད་དོ། །གང་ཞིག་དེ་རིག་པ་མེད་ན་མི་འབྱུང་བ་འདིའོ་ཞེས་པ་དེའི་རྗེས་སུ་དཔག་པ་སྟེ། གཞན་གྱི་ནི་མ་ཡིན་ནོ། །མེད་ན་མི་འབྱུང་བ་ཉིད་
[105a.4]ཁོ་ནས་ཞེས་པ། དེ་མེད་ན་མི་འབྱུང་བ་ཉིད་ཁོ་ན་རང་གི་རྣམ་པར་འགྱུར་ན་དེ་རིག་བརྗོད་མིན་ཞེས་པ་འདི་ནི་ཤུགས་ཀྱིས་ཐོབ་པའི་ཕྱིར་རོ། །དེ་རིག་པ་མ་ཡིན་པ་མེད་ན་མི་འབྱུང་བ་འདིའོ་ཞེས་སྟོན་པ་སྲིད་པ་མ་ཡིན་པས་སོ་ཞེས་པའི་བྱེད་པ་ཕྱིས་པས་ངེས་པར་བསྟན་པའོ་ཞེས་པས་དེ་མེད་པར་རང་གི་ངོ་བོའི་དངོས་པོ་ཉིད་རྣམ་པར་
[105a.5]ཤེས་པར་བྱ་བ་མ་ཡིན་པས་སོ། །དེས་ན་གཞན་ཁོ་ན་ཅུང་ཟད་ཅིག་དེ་རིག་པ་བརྗོད་པར་བྱ་བ་མ་ཡིན་ནོ་ཞེས་པའི་དོན་རྟོགས་པར་འགྱུར་རོ། །ངེས་པར་བསྟན་པ་ནི་ངེས་པར་སྟོན་པ་སྟེ། གང་གི་ཕྱིས་པ་ངེས་པར་བསྟན་པ་ཡིན་པ་དེ་དེ་སྐད་བརྗོད་དོ། །དབྱི་བ་ནི་ངག་དེའི་རང་གི་ངོ་བོ་རྟོགས་པར་བྱེད་པ་བརྗོད་པར་
[105a.6]འདོད་པ་ན་རབ་ཏུ་འབྲེལ་པའི་མི་མཐོང་པ་ཁོ་ན་སྟེ། རབ་ཏུ་འབྲེལ་པའི་མི་མཐོང་བ་ནི་དབྱི་བའོ་ཞེས་བྱས་ནས་སོ། །འདིས་འདི་གསལ་བར་བྱེད་དེ། རང་གི་ངོ་བོའི་ཚིག་གི་དོན་ཅན་དུ་དེ་རིག་པ་ཞེས་པ་འདི་རིག་པར་བྱའོ་ཞེས་པའི་ཡི་གེ་ནི་དེའི་དོན་དུ་བསྟན་པར་འོས་ནའང་སྡེབ་སྦྱོར་འཇིག་པའི་འཇིགས་པ་ལས་
[105a.7]མ་བསྟན་ཞེས་པའོ། །གཞན་གྱིས་ནི། གལ་ཏེ་བརྗོད་ན་ཅི་ལྟར་ཅིར་ཞེས་པ། དེའི་བརྗོད་པར་བྱ་བ་རྣམ་པ་མང་བ་ཉིད་ཀྱི་ཕྱིར་རོ། །རྣམ་པ་ཅིས་དང་གནས་ཅིར་མཐོང་བ་ཡིན། དེ་བརྗོད་པར་བྱ་བ་མ་ཡིན་ན་ནི་གནས་ངེས་པར་མི་འགྱུར་ལ། དེ་ལས་ཀྱང་བུམ་པ་ལས་མིག་གིས་གཟུང་བྱ་ཉིད་མཐོང་བ་ལ་
[105b]
[105b.1]སྒྲ་ལ་ཡང་མི་རྟག་པ་ཉིད་དུ་རྟོགས་པར་འགྱུར་རོ། །འོ་ན་རྣམ་པར་རྟོག་པ་སྔ་མ་ལ་ཡང་ཅི་ཞིག་ཏུ་མཐོང་བ་ཞེས་བརྗོད་པར་བྱའོ་ཞེས་པ་འདི་བརྩད་པར་རིགས་པ་མ་ཡིན་ནམ། འདི་ཁོ་ནར་བརྩད་པར་བྱ་བ་ཅི་ཞེ་ན། འདི་ལྟར་སེམས་ཏེ། མེད་ན་མི་འབྱུང་བ་ཉིད་ཀྱིས་བསྟན་པ་ནི། གང་མེད་ན་དེ་འགྱུར་བ་མ་
[105b.2]ཡིན་པ་དེ་ཁོ་ན་ལ་མཐོང་བའོ་ཞེས་མ་བརྗོད་ཀྱང་རྟོགས་པར་བྱ་བ་ཁོ་ན་སྟེ། དེ་ཉེ་བའི་ཕྱིར་ཞེས་པའོ། །དོན་ཞེས་པ་ནི་ལྷག་མ་སྟེ་ཞེས་པ། དོན་སྨོས་པ་ནི་ཤིན་ཏུ་ལྷག་གོ་ཞེས་པའི་དོན་ཏེ། དེ་ལྟར་མེད་ན་མི་འབྱུང་བ་ནི་དོན་ཁོ་ནར་འགྱུར་བས། དོན་སྨོས་པས་ཅི་ཡིན། དེའི་ཕྱིར་མཐོང་བའི་ཁྱད་པར་གྱི་དོན་དུ་
[105b.3]དེའོ་ཞེས་རྟོགས་པར་བྱའོ། །དེས་ན་རྟགས་ཀྱི་དོན་གྱི་རྣམ་པ་འཛིན་པ་ནི་རྗེས་སུ་དཔག་པའོ། །འོ་ན་རྟགས་ཀྱི་རྣམ་པ་ནི་འཁྲུལ་པའི་ཕྱིར་དེས་རྗེས་སུ་དཔག་པ་མི་སྲིད་པ་མ་ཡིན་ནོ་ཞེ་ན། འདི་ལྟར་སེམས་ཏེ། དུ་བ་ལ་སོགས་པའི་ངོ་བོས་འཛིན་པ་ནི་དོན་འཛིན་པ་སྟེ། རྣམ་པ་གཞན་དུ་ན་སྤྱིའི་རྗེས་སུ་འགྲོ་བ་ཉིད་
[105b.4]ཀྱི་ཕྱིར་འདི་ནི་འཛིན་པ་ཙམ་དུ་འགྱུར་ཞིང་། དེ་ལས་ཀྱང་དོན་སྨོས་པ་དོན་མེད་པར་འགྱུར་ཏེ་དོན་གྱི་འཛིན་པ་ཙམ་ནི་མེད་ན་མི་འབྱུང་བ་སྨོས་པ་ཁོ་ནས་འཐོབ་པ་ཉིད་ཀྱི་ཕྱིར་རོ་ཞེས་པའོ། །བསྒྲུབ་པར་བྱ་བ་སྐབས་སུ་བབ་པ་ཡང་ཞེས་པ། རྣམ་པར་དཔྱད་པ་ན། འདོད་པའི་དོན་ནི་ཕྱོགས་ཞེས་པར་རམ།
[105b.5]ཡང་ན་བསྒྲུབ་པར་བྱ་བ་བརྗོད་པ་དམ་བཅའ་ཞེས་པ་འདིར་རོ། །དེའི་ཕྱིར་བསྒྲུབ་པར་བྱ་བ་ལ་མཐོང་བའོ་ཞེས་རྟོགས་པར་བྱའོ། །སྔ་མས་ནི་ཅི་ཞེས་པ་དོན་མཐོང་བ་མེད་ན་མི་འབྱུང་བ་ཉིད་རིག་པ་ཞེས་བརྗོད་པ་ན། གང་ཞིག་མེ་ལ་སོགས་པ་མེད་པར་དུ་བ་ལ་སོགས་པ་འདི་བྱུང་བ་ནི་མ་ཡིན་ནོ་ཞེས་རིག་པ་
[105b.6]དེའི་དེ་ལྟར་རིག་པའི་མེད་ན་མི་འབྱུང་བའི་དོན་མཐོང་བ་ཁོ་ན་དེར་འགྱུར་རོ། །ཡང་ན་དོན་མཐོང་བ་མེད་ན་མི་འབྱུང་བ་རིག་པ་ཞེས་བརྗོད་པ་ན། དོན་གང་གི་བསྒྲུབ་པར་བྱ་བ་ལ་མཐོང་བ་དེ་མེད་ན་མི་འབྱུང་བ་ཉིད་རིག་པའོ་ཞེས་པའི་དོན་དུ་རྟོགས་པར་བྱ་ལ། དེ་ལས་ཀྱང་སྔ་མ་མེད་ན་མི་འབྱུང་བ་སྨོས་པས་
[105b.7]ཅི་ཞིག །མེ་སོགས་ལའང་ཞེས་པ། མེ་དང་ས་བོན་དང་མི་རྟག་པ་ཉིད་རྣམས་རྗེས་སུ་དཔག་པར་བྱ་བ་ཉིད་དུ་དཔེར་བརྗོད་པའི་ཕྱིར་ཆོས་ཙམ་རྗེས་སུ་དཔག་པར་བྱ་བ་ཉིད་དུ་མངོན་པར་འདོད་དོ་ཞེས་རྟོགས་པར་བྱའོ། །དེ་ལྟར་ནི་ད་ལྟར་བ་ལ་སོགས་པའི་བྱེ་བྲག་གིས་དཔེར་བརྗོད་པ་གསུམ་པོ་འདི་
[106a]
[106a.1]བཤད་ལ། ཆོས་ཀྱིས་ཁྱད་པར་དུ་བྱས་པའི་ཆོས་ཅན་བསྒྲུབ་པར་བྱ་བ་ཉིད་ཡིན་པ་ལ་ནི་དབྱེ་བ་འདི་སྲིད་པ་ཡང་མ་ཡིན་ཏེ། ཐམས་ཅད་དུ་ཆོས་ཅན་འཇུག་བཞིན་པ་ཉིད་ཀྱི་ཕྱིར་རོ། །དེ་ལས་ཀྱང་མེ་ལ་སོགས་པ་ལ་དུ་བ་ལ་སོགས་པ་མཐོང་བ་ན་མེ་ལ་སོགས་པ་རྣམས་ངེས་པ་
[106a.2]ཁོ་ནར་འགྱུར་རོ་ཞེས་པས་དེ་རིགས་པས་རྗེས་སུ་དཔག་པར་བྱ་བ་གཞན་ཅི་ཞིག་ཡིན། འདིས་ནི་བསྒྲུབ་པར་བྱ་བ་ལ་མཐོང་བ་ཞེས་གང་བརྗོད་པ་དེ་ཡང་མི་རིགས་པར་གསུངས་སོ། །ཅི་ལྟར་མ་བརྗོད་ཅེས་པ་འདིས་ཀྱང་བྱེད་པ་མི་གསལ་བའི་སྐྱོན་ཡང་ངོ་ཞེས་པའོ།། །།རིགས་པ་ཅན་
[106a.3]རྣམས་ཀྱི་ཡང་ཞེས་པ་ལ་སོགས་པ་ལ། མངོན་སུམ་དང་རྗེས་སུ་དཔག་པ་དང་ཉེ་བར་འཇལ་བ་དང་སྒྲ་རྣམས་ཚད་མ་རྣམས་སོ་ཞེས་མདོར་བསྟན་ནས། མངོན་སུམ་གྱི་མཚན་ཉིད་བཤད་ཟིན་པ་ན། དེ་མ་ཐག་ཏུ་སྐབས་སུ་བབ་པ་རྗེས་སུ་དཔག་པའི་མཚན་ཉིད་བཤད་པ། དེ་སྔོན་དུ་འགྲོ་བ་ཅན་ཞེས་པ་ལ་སོགས་
[106a.4]པའོ། །དེའི་བར་མ་ཆོད་པའི་སྐབས་ཀྱིས་མངོན་སུམ་གང་གི་སྔོན་དུ་ཡིན་པ་དེ་དེ་སྐད་བཤད་དོ། །གང་གི་སྔོན་དུ་མངོན་སུམ་གྱིས་རྟགས་དང་རྟགས་ཅན་རབ་ཏུ་གྲུབ་པ་དག་གམ་དེའི་འབྲེལ་པ་ཡང་སྟེ། དེ་ཁོ་ན་དུས་ཕྱིས་རྟགས་ཙམ་མཐོང་བས་རྟགས་ཅན་རྗེས་སུ་དཔག་པར་བྱ་བའོ་ཞེས་པས། དེ་མངོན་སུམ་སྔ་
[106a.5]མ་ཅན་དུ་འགྱུར་རོ། །སྔ་མ་དང་མཚུངས་པ་ནི་སྔ་མ་དང་འདྲ་བ་སྟེ། ཇི་ལྟར་འབྲེལ་པའི་དུས་ན་མངོན་སུམ་གྱི་དངོས་པོ་རྟོགས་པ་དེ་ལྟ་ཁོ་ནར་དུས་ཕྱིས་རྟགས་མཐོང་བ་ལས་ཀྱང་དེ་ལ་ཤེས་པ་ཉེ་བར་སྐྱེ་སྟེ། དེའི་ཕྱིར་དེ་སྔ་མ་དང་འདྲ་བར་འགྱུར་རོ། །ལྷག་མ་སྟེ་མངོན་སུམ་དང་མཚུངས་པ་ནི་ལྷག་མ་དང་
[106a.6]འདྲ་བ་སྟེ་དངོས་པོ་ཡིན་ལ། དེའི་ཡུལ་ཅན་གྱི་ཤེས་པ་ཡང་ལྷག་མ་དང་འདྲ་བ་སྟེ། ཇི་ལྟར་འབྲས་བུ་གཅིག་རོའི་སྒོ་ནས་མངོན་སུམ་དུ་བྱས་ནས། ལྷག་མ་རྣམས་ཀྱང་རོ་འདི་ལྟ་བུ་ཅན་རྣམས་ཏེ། མངོན་སུམ་པའི་རོ་དང་མཚུངས་པ་ཉིད་ཀྱི་ཕྱིར། དེ་བཞིན་ནོ་ཞེས་སོ། །རྗེས་སུ་དཔོག་པ་ལྟ་བུའོ། །
[106a.7]འོ་ན་མངོན་སུམ་ལས་ཅིག་ཤོས་ལྷག་མར་འགྱུར་གྱི་ལྷག་མ་དང་མཚུངས་པ་ནི་མ་ཡིན་ནོ། །དེའི་ཕྱིར་དེའི་ཡུལ་ཅན་གྱི་ཤེས་པ། ཅི་ལྟར་ལྷག་མ་དང་འདྲ་བའི་ཡུལ་ཅན་དུ་འགྱུར་ཞེ་ན། འདི་རྣམས་ཀྱི་ཕན་ཚུན་ལྟོས་པ་ལྷག་མ་ཉིད་དོ་ཞེས་པས་མངོན་སུམ་ཡང་ཅིག་ཤོས་ལ་ལྟོས་པས་ལྷག་མ་སྟེ། དེས་ན་ཅིག་
[106b]
[106b.1]ཤོས་ཀྱང་མཚུངས་པ་ཉིད་ཀྱི་ཕྱིར་ལྷག་མ་དང་འདྲ་བ་ཉིད་དོ་ཞེས་པས་སྐྱོན་མེད་དོ། །ཡང་ན་སྔོན་མ་ནི་རྒྱུ་སྟེ། དེ་འདི་ལ་ཡང་ཡོད་དོ་ཞེས་པ་སྔོན་མ་དང་ལྡན་པ་སྟེ་འབྲས་བུའོ། །དེའི་ཡུལ་ཅན་གྱི་ཤེས་པ་ཡང་སྔ་མ་དང་ལྡན་པ་སྟེ། གང་རྒྱུ་ལས་འབྲས་བུ་རྗེས་སུ་དཔོག་པའོ། །ལྷག་མ་ནི་འབྲས་བུ་སྟེ།
[106b.2]དེ་འདི་ལ་ཡོད་དོ་ཞེས་པ་ལྷག་མ་དང་ལྡན་པ་སྟེ་རྒྱུའོ། །དེའི་ཡུལ་ཅན་གྱི་ཤེས་པ་ཡང་ལྷག་མ་དང་ལྡན་པ་སྟེ། གང་འབྲས་བུ་ལས་རྒྱུ་རྗེས་སུ་དཔོག་པའོ། །སྤྱི་མཐོང་བ་ནི་གང་གཞན་དང་འདྲ་བ་ལས་གཞན་ཤིན་ཏུ་ལྐོག་ཏུ་གྱུར་པ་ལས་ཤེས་པ་སྟེ། དཔེར་ན་ནག་པོའི་བགྲོད་པ་སྔོན་མ་ཅན་ཡུལ་
[106b.3]གཞན་ཐོབ་པ་ཉེ་བར་དམིགས་ནས། དེ་དང་མཚུངས་པ་ཉིད་ཀྱིས་ཉི་མའང་བགྲོད་པ་སྔོན་མ་ཅན་རི་ལ་རྒས་པ་ཐོབ་པར་རྗེས་སུ་དཔག་པར་བྱ་བ་ལྟ་བུའོ། །རྒྱས་པར་བསྟན་པ་ཁོ་ན་ལས་གསུམ་ཉིད་དུ་གྲུབ་པ་ལ། རྣམ་པ་གསུམ་ཞེས་སྨོས་པ་ནི་སྔ་མ་དང་ལྡན་པའི་རྗེས་སུ་དཔག་པ་གཅིག་པུ་དུས་གསུམ་
[106b.4]གྱི་ཡུལ་ཅན་ཉིད་ཀྱིས་རྣམ་པ་གསུམ་པ་ཉིད་དུ་ཤེས་པར་བྱ་བའི་དོན་དུའོ། །དེ་ལ་ཆུ་ཀླུང་རྒྱས་པ་ལས་ཆར་པ་ཞེས་པ་འདས་པ་ལ་རྗེས་སུ་དཔག་པའོ། །གྲོག་མའི་སྒོ་ང་འཕོ་བ་ལས་ཆར་པར་འགྱུར་རོ་ཞེས་པ་མ་འོངས་པ་ལའོ། །རྨ་བྱའི་སྒྲ་གྲག་པའི་ཕྱིར་འདི་ན་རྨ་བྱའོ་ཞེས་པ་ད་ལྟར་བ་ལའོ། །
[106b.5]འདིར་མ་ཏུ་སའི་སྔ་མ་དང་འདྲ་བ་ཉིད་སྲིད་པ་མ་ཡིན་ནོ་ཞེས་པ་ཏི་ཡིས་སྦྱར་བར་བྱ་བའོ། །འབྲེལ་པ་དབང་པོའི་གཟུང་བྱ་མིན། །ཞེས་པ་འབྱུང་བའི་ཡོན་ཏན་བཞིན་དུ་འབྲེལ་པ་ཅན་རྣམས་ལས་ཐ་དད་པར་མི་སྣང་བའི་ཕྱིར་རོ་ཞེས་བསམས་པའོ། །གང་དབང་པོའི་ཤེས་པ་ལ་སྣང་བ་མ་ཡིན་པ་དེ་དབང་
[106b.6]པོའི་གཟུང་བར་བྱ་བ་མ་ཡིན་ཏེ། དབང་པོ་བཞིན་འབྲེལ་པ་ཡང་དེ་ལྟ་བུའོ། །ཁྱབ་བྱེད་མེད་པའོ། །ཐམས་ཅད་དུ་ཡང་མ་ཡིན་ཞེས་པ། མིག་གི་རྣམ་པར་ཤེས་པ་དང་དབང་པོ་ལ་སོགས་པ་རྣམས་དབང་པོས་འཛིན་པ་མི་སྲིད་པའི་ཕྱིར་རོ། །ཐམས་ཅད་དུ་ཞེས་སྨོས་པ་ནི་མེ་དང་དུ་བ་ལ་སོགས་པ་རྣམས་
[106b.7]མངོན་སུམ་གྱིས་འཛིན་པ་སྲིད་པའི་ཕྱིར་རོ། །འདིས་ནི་མ་ཁྱབ་པ་ཉིད་གསུངས་སོ། །ཡང་ན་ཐམས་ཅད་དུ་འབྲེལ་པ་ཅན་དག་མངོན་སུམ་མ་ཡིན་པ་དག་གོ་ཞེས་པའི་དོན་འདི་སྟེ། སྤྱིའི་ངོ་བོ་ཉིད་ཀྱི་ཕྱིར་དེ་ཡང་མངོན་སུམ་མ་ཡིན་པར་བསྒྲུབ་པ་ཉིད་ཀྱི་ཕྱིར་རོ། །དེ་ལས་ཀྱང་མི་སྲིད་པའི་ཕྱིར་འདི་ནི་མཚན་
[107a]
[107a.1]ཉིད་མ་ཡིན་ནོ། །རྟགས་དང་རྟགས་ཅན་དག་མངོན་སུམ་མ་ཡིན་པ་དག་གོ་ཞེས་པ་འདི་ཙམ་ཁོ་ནས་བརྗོད་པར་འདོད་པའི་དོན་རྟོགས་པ་ཡིན་ན་ཡང་ཐམས་ཅད་དུ་སྨོས་པ་ནི་འགའ་ཞིག་མེ་དང་དུ་བ་ལ་སོགས་པ་རྣམས་ལ་མངོན་སུམ་དུ་མངོན་པར་འདོད་པ་བསལ་བའི་དོན་དུའོ། །ཀུན་ལ་
[107a.2]སྲིད་ཕྱིར་ལྟ་བུ་མིན། །ཞེས་པ་ཐམས་ཅད་སྔ་མ་དང་འདྲ་བ་ཉིད་ཡིན་བཞིན་དུ་གཅིག་ཁོ་ན་སྔ་མ་དང་འདྲ་བར་སྨྲ་བས། ཅིག་ཤོས་དག་ལ་དེ་མེད་དོ་ཞེས་དམ་བཅས་ཏེ། དེ་ལ་ཡང་སྔ་མ་དང་འདྲ་བ་ཉིད་གྲུབ་པས་གནང་ངོ་། །འབྲེལ་པ་གཞན་གྱིས་ཀྱང་འདི་ཞེས་པ་ལ། འབྲེལ་པ་གཞན་ནི་
[107a.3]འབྲེལ་པའི་བྱེ་བྲག་མེད་ན་མི་འབྱུང་བ་སྟེ། དེའི་སྟོབས་ཀྱིས་སྔ་མ་དང་འདྲ་བར་དོན་རྟོགས་པའོ། །དེ་ངེས་པར་བསྟན་པ་མེད་པའི་ཕྱིར་རྗེས་སུ་དཔག་པར་ངེས་པར་བསྟན་པ་མ་ཡིན་པ་ཁོ་ནའོ། །འོ་ན་འདི་མ་ཏུས་སུ་འགྱུར་མོད། ཇི་སྐད་བཤད་པའི་སྐྱོན་འབྱུང་བ་མ་ཡིན་ཏེ། རྗེས་སུ་དཔག་པ་ཐམས་ཅད་ནི་
[107a.4]རྒྱུ་ལས་འབྲས་བུའི་ཡུལ་ཅན་དུ་འགྱུར་བ་མ་ཡིན་པས་སོ། །འབྲེལ་པ་ཡང་འདིར་བསྟན་པ་ཁོ་ན་སྟེ། འབྲས་བུ་དང་རྒྱུའི་དངོས་པོ་རབ་ཏུ་བསྟན་པའི་ཕྱིར་རོ་ཞེ་ན། དེའི་ཕྱིར་གསུངས་པ། འཁྲུལ་པའི་ཕྱིར་ན་ལྷན་སྐྱོན་མིན། །ཞེས་པ། འབྲས་བུ་དང་རྒྱུའི་དངོས་པོས་ནི་འབྲས་བུ་ཁོ་ནའི་མེད་ན་མི་
[107a.5]འབྱུང་བར་འགྱུར་གྱི། རྒྱུའི་ནི་མ་ཡིན་ནོ། །དེ་ལྟར་ནི་རྒྱུ་ཡོད་ན་ཡང་ལྷན་ཅིག་བྱེད་པ་མ་ཚང་བའི་ཕྱིར་འབྲས་བུར་འགྱུར་བ་མ་ཡིན་ནོ། །དཔེར་ན་སྤྲིན་ཡོད་ན་ཡང་ཞིང་པ་རྣམས་ཀྱི་ཆེས་མེད་པའི་ཕྱིར་ཆར་པ་བཞིན་ནོ། །རྒྱུ་གཞན་ཚོགས་པ་ཡོད་ན་ཡང་། །ཆོས་མ་ཡིན་པ་ལ་སོགས་པ་འགལ་བས་
[107a.6]གགས་བྱས་པའི་ཕྱིར་རོ། །འོ་ན་ཁྱད་པར་དུ་གྱུར་པའི་གནས་སྐབས་ཐོས་པའི་ས་བོན་ལ་སོགས་པ་ནི་རྒྱུ་དངོས་ཉིད་དེ། དེ་ལ་གགས་བྱ་བར་ཡང་མི་ནུས་སོ། །དེ་ཅིའི་ཕྱིར་འཁྲུལ་པ་ཉིད་ཡིན་ཞེ་ན། མ་ཡིན་ཏེ། དེ་མཐོང་བ་ལས་འབྲེལ་པ་དྲན་པ་ལ་ལྟོས་པ་ལས་རྗེས་སུ་དཔག་པར་བྱ་བ་རྟོགས་པར་
[107a.7]འདོད་པ་ན། འབྲེལ་པ་དྲན་པ་ལས་སྔོན་དུ་འབྲས་བུ་སྐྱེས་པ་ཁོ་ན་མངོན་སུམ་དུ་འགྱུར་རོ། །འབྲས་བུ་མངོན་སུམ་མ་ཡིན་པ་ལ་རྣམ་པ་དེ་ལྟ་བུའི་རྒྱུ་རྟོགས་པ་ཡང་མ་ཡིན་ཏེ། གང་གིས་རྒྱུ་ལས་དེ་རྟོགས་པར་བྱ་བའོ། །དེའི་ཕྱིར་རྒྱུ་ལས་འབྲས་བུ་འགྲུབ་པ་མ་ཡིན་ནོ། །ལྷག་ལྡན་ལ་ཡང་ལྟ་བུ་ན། །
[107b]
[107b.1]ཞེས་པ་ལ་སོགས་པས་འདི་ལ་ཡང་དེ་མ་ཐག་ཏུ་བརྗོད་པ་ཁོ་ནའི་སྐྱོན་གསུངས་སོ། །གདོན་མི་ཟ་བར་མ་ཡིན་ཞེས་པ་ལ་སོགས་པ་སྟེ། གཟུགས་ལ་སོགས་པ་མཚུངས་པ་རྣམས་ཀྱི་རོ་མཚུངས་པར་འབྱུང་བའི་ངེས་པ་སྦྱོར་བ་འདི་ནི་མ་ཡིན་ནོ། །འདི་ཙམ་ཞིག་ཏུ་ནི་འགྱུར་ཏེ་འདི་ལྟ་བུའི་རང་བཞིན་ཅན་
[107b.2]འདི་དང་རྒྱུ་མཚུངས་པ་རྣམས་ནི་རོ་འདི་ལྟ་བུ་ཅན་རྣམས་སོ་ཞེས་པར་འགྱུར་གྱི། གཟུགས་མཚུངས་པ་ཙམ་ལས་རྗེས་སུ་དཔག་པ་ནི་མ་ཡིན་ཏེ་འཁྲུལ་པའི་ཕྱིར་རོ། །ལྡན་པས་ཞེ་ན་མ་རྟོགས་ན། །མི་འགྱུར་ཞེས་པ་ལ་སོགས་པ་ལ་མ་རྟོགས་པ་ནི་མ་གོ་བའོ། །ཅི་ཞེ་ན། གང་ལས་འབྲས་བུ་ལ་རྒྱུ་རྗེས་སུ་
[107b.3]དཔོག་པ་འདི་ཡིན་པ་འབྲས་བུ་ཉིད་དོ། །དེའི་ཕྱིར་འབྲས་བུའི་ངོ་བོ་ཁོ་ནར་རྟོགས་པ་མེད་པར་གྱུར་པ་ན། རྟགས་ནི་རྗེས་སུ་དཔག་པར་བྱ་བ་རྒྱུ་ལ་མེད་ན་མི་འབྱུང་བ་ཉིད་འཛིན་པ་ལས་རྟོགས་པ་མེད་པར་འགྱུར་ན། དེ་ཡང་མཐོང་ངོ་། །འོ་ན་དོན་གཞན་འབྲས་བུ་དང་རྒྱུའི་དངོས་པོར་གྲུབ་པ་ཁོ་ནའི་མེད་
[107b.4]ན་མི་འབྱུང་བ་ངེས་པ་མ་ཡིན་ནམ། དེ་ལ་ཅི་ལྟར་ན་འབྲས་བུ་ཉིད་དུ་མ་བཟུང་ནས་མེད་ན་མི་འབྱུང་བ་ཉིད་ངེས་པར་ནུས་ཤེ་ན། བསྟན་བཅོས་ལ་མཐོང་བའི་འབྲས་བུ་ཉིད་འཛིན་པ་ལས་འདས་པ་འདིར་བརྗོད་པར་འདོད་ཀྱི། འཇིག་རྟེན་ལ་གྲགས་པའི་འབྲས་བུ་ཉིད་དུ་འཛིན་པ་ལས་འདས་པ་ནི་མ་ཡིན་
[107b.5]ཞེས་པས་སྐྱོན་མེད་དོ། །བསྟན་བཅོས་སུ་ནི་ཆུའི་རྒྱུན་གྱི་ཡན་ལག་ཅན་རྣམས། ཆུ་ལ་བྱུང་བའི་རྡུལ་ཕྲ་རབ་རིས་མཐུན་པ་རྣམས་ཁོ་ནས་རྩོམ་པར་བྱེད་ཅིང་། སྤྲིན་རྣམས་ནི་རྡུལ་ཕྲ་རབ་རྣམས་འགུགས་པའི་ངོར་རྒྱུ་མཚན་ཉིད་དུ་ཉེ་བར་གྱུར་པ་རྣམས་ཆར་པའི་རྒྱུར་ཐ་སྙད་དུ་བསྟན་པ་བསྟེན་པར་འགྱུར་བ་ཞེས་
[107b.6]པ་རྣམ་པར་གཞག་པའོ། །རྣམ་པ་འདི་ལྟ་བུའི་འབྲས་བུ་དང་རྒྱུའི་དངོས་པོ་འཇིག་རྟེན་གྱིས་རྟོགས་པར་ཡང་མ་ཡིན་གྱི། འོ་ན་ཅི་ཞེ་ན། སྤྲིན་རྣམས་ཡོད་པ་ན་ཆར་འབབ་པ་མཐོང་བའི་ཕྱིར་དང་། དེ་མེད་པ་ན་ཡང་མ་མཐོང་བའི་ཕྱིར་སྤྲིན་རྣམས་ཁོ་ན་ཆར་འབབ་པའི་རྒྱུ་དངོས་སོ་ཞེས་པ་སྟེ།
[107b.7]དེ་ལྟར་མཐོང་བ་དང་མ་མཐོང་བ་དག་གིས་འབྲས་བུ་དང་རྒྱུའི་དངོས་པོར་རྟོགས་སོ། །བསྟན་བཅོས་ལས་མཐོང་བའི་རྒྱུ་དང་འབྲས་བུའི་དངོས་པོ་རྣམས་ནི་མི་འཐད་པ་ཁོ་ན་སྟེ། རྡུལ་ཕྲ་རབ་རྟག་པ་རྣམས་མ་གྲུབ་པའི་ཕྱིར་རོ། །གྲུབ་ཏུ་ཆུག་ཀྱང་རྣམ་པར་འགྱུར་བ་མེད་པ་ཉིད་ཀྱི་ཕྱིར་ན་དགུག་པར་མི་
[108a]
[108a.1]ནུས་པ་ཉིད་ཀྱི་ཕྱིར་དང་། བཀུག་པ་རྣམས་ལ་ཡང་རིམ་དང་ཅིག་ཅར་ཉིད་དག་གིས་འབྲས་བུ་རྩོམ་པ་མི་རིགས་པའི་ཕྱིར་རོ། །འདུ་བ་ཅན་གྱི་འབྲས་བུ་ཡང་དངོས་པོར་ཡོད་པའི་བློ་དང་ལྡན་པ་རྣམས་ཀྱིས་གཞན་དུ་རྒྱ་ཆེར་བཀག་པ་ཉིད་ཀྱི་ཕྱིར་རོ་ཞེས་པ་ཤིན་ཏུ་འཕྲོས་པས་ཆོག་གོ། །
[108a.2]དེ་བཞིན་དུ་གང་བྱས་པ་ལ་སོགས་པ་རྣམས་ཀྱིས་ཞེས་པས་ལྡན་པའི་ཕྱོགས་ལ་མ་ཁྱབ་པ་ཉིད་གསུངས་ཏེ། བྱས་པ་ཉིད་ལ་སོགས་པ་རྣམས་མི་རྟག་པ་ཉིད་ལ་སོགས་པ་རྣམས་དང་འབྲས་བུ་དང་རྒྱུའི་དངོས་པོ་ཡོད་པ་ནི་མ་ཡིན་པས་སོ། །གཞན་རྣམས་ན་རེ་ལུས་པོ་ལ་སོགས་པའི་ཡན་ལག་ཅན་
[108a.3]གཅིག་མཐོང་བ་ནི་ལྟོ་བ་ལ་སོགས་པའི་ཡན་ལག་མངོན་སུམ་གྱིས་རྟོགས་པ་གཅིག་ལས་གཞན་པའི་ཡན་ལག་རྒྱབ་ལ་སོགས་པ་གང་ཡིན་པ་དེ་ལྷག་མ་ཡིན་ཞིང་། དེའི་ཡུལ་ཅན་གྱི་ཤེས་པ་ནི་ལྷག་མ་དང་ལྡན་པ་སྟེ། འདི་འཁྲུལ་པ་ཡང་མ་ཡིན་ཏེ་ལྟོ་བ་ནི་རྒྱབ་ལ་སོགས་པ་མེད་པར་ནམ་གྱི་ཚེ་
[108a.4]ཡང་ཉེ་བར་དམིགས་པ་སྔ་མ་མ་ཡིན་ནོ་ཞེའོ། །འདི་ལ་ཡང་ཐམས་ཅད་འབྱུང་བ་ཁོ་ན་སྟེ། གང་ཕྱིར་རྗེས་སུ་དཔག་པ་ཐམས་ཅད་ལ་ནི་མངོན་སུམ་གྱི་དོན་ལས་ཐ་དད་པ་ཁོ་ནའི་དོན་ལ་ཡང་དག་པར་རྟོགས་པ་སྟེ། རྟགས་མ་བཟུང་བ་ལས་འགར་ཡང་རྗེས་སུ་དཔག་པ་ཉེ་བར་སྐྱེ་བ་ནི་མ་ཡིན་པའི་ཕྱིར་
[108a.5]རོ། །འཁྲུལ་པ་ཡང་ཡོད་པ་ཁོ་ན་སྟེ། རྭ་ལ་སོགས་པའི་ཡན་ལག་ཡང་དག་པར་ཡོད་པ་ལ་ཡང་རྔ་མ་ལ་སོགས་པའི་ཡན་ལག་མེད་པའི་ཕྱིར་རོ། །སྔ་མ་དང་ལྡན་པ་ལ་ཡང་ཞེས་པ་སྔ་མ་ཝ་ཏ་ཅེས་པ་འདི་ལ་འདྲ་བའི་ཕྱོགས་ལ་རྭ་ལ་སོགས་པའི་རྟགས་ཀྱི་བ་ལང་གི་དོན་རྗེས་སུ་དཔོག་པ་ན།
[108a.6]དུ་བའི་འབྲེལ་པ་ཡིན་ཞིང་། དེ་ཡང་འདིར་བློའི་རྟགས་ལས་ངེས་པར་བྱ་བར་བཤད་ན། འདིར་བློ་ཡང་དེ་དང་འབྲེལ་པ་མ་གྲུབ་པའི་ཕྱིར་དང་། སོ་སོར་འཆིང་བ་མེད་པའི་ཕྱིར་ཡང་། རྟགས་སུ་མི་རུང་ཞེས་པས་དེ་ལས་དེ་འགྲུབ་པ་མ་ཡིན་ནོ། །དེ་ལས་ཀྱང་ལྐོག་ཤལ་ལ་སོགས་པའི་རྟགས་
[108a.7]ལས་བ་ལང་གི་དོན་རྗེས་སུ་དཔོག་པར་མི་འགྱུར་ཏེ། དེ་ཡང་མཐོང་ངོ་། །དེ་ལྟར་ནི་ཚོགས་པ་གཅིག་ལ་རག་ལས་པའི་ལྐོག་ཤལ་ལ་སོགས་པའི་ཡན་ལག་གི་བདག་ཉིད་ཅན་བ་ལང་ངོ་ཞེས་རིགས་པས་རྣམ་པར་དཔྱོད་པ་རྣམས་ནི། མེད་ན་མི་འབྱུང་བ་དེས་ནས་ལྐོག་ཤལ་ལ་སོགས་པའི་རྟགས་ལས་
[108b]
[108b.1]བ་ལང་གི་དོན་ལ་རྗེས་སུ་དཔག་པར་བྱེད་པས་སོ། །དུ་བ་ལས་མེ་རྗེས་སུ་དཔོག་པ་ན་ལྡན་པའི་འབྲེལ་པ་སྟེ། དེ་ཡང་མ་བཟུང་བ་ན་རྟོགས་པར་མི་འགྱུར་ན་དེ་ཡང་མཐོང་ངོ་། །དེ་ལྟར་ནི་དུ་བ་ཙམ་མཐོང་ནས་མེ་མེད་ན་མི་འབྱུང་བར་ངེས་པ་སྔོན་མ་ཅན་གྱིས་རྗེས་སུ་དཔོག་པར་བྱེད་པས་སོ། །དེའི་ཚེ་
[108b.2]རྟེན་མཐའ་དག་མ་བཟུང་བ་ནི། དོན་དུ་མའི་ཐུན་མོང་བ་ཉིད་ཀྱི་ཕྱིར་ན་གཉིས་ཉིད་ལ་སོགས་པ་ལྟར་ལྡན་པ་ཡོངས་སུ་གཅོད་པ་ཡང་མ་ཡིན་ནོ། །ལྡན་པའི་རྐྱེན་གྱི་ཕྱོགས་ལ་ནི་སྤྲིན་ལ་སོགས་པ་རྣམས་ཆར་པ་ལ་སོགས་པ་རྣམས་དང་ལྷན་ཅིག་འབྲས་བུ་དང་རྒྱུའི་དངོས་པོའི་འབྲེལ་པའོ། །ལྷག་མ་
[108b.3]དང་ལྡན་འདྲ་ལ་ཡང་། །འདྲ་བའི་ཕྱོགས་ལ་ཡང་གཟུགས་ནི་རོ་ལ་དོན་གཅིག་ལ་འདུ་བ་མ་ཡིན་ཞེས་པས་འདི་རྣམས་ཇི་སྐད་བཤད་པའི་འབྲེལ་པ་རྣམས་སོ། །ཕྱི་མ་ལ་བསྟན་པ་མེད་པའི་ཕྱིར་རོ་ཞེས་པ། ལྷག་མ་དང་ལྡན་པ་ལ་ལྡན་པའི་ཕྱོགས་ནི་རྣམ་པར་དཔྱད་པའི་ཕྱི་མ་སྟེ། དེ་ལ་འདི་
[108b.4]བསྟན་པ་ཉིད་ཀྱི་ཕྱིར་རོ། །རྒྱུ་ཉིད་ལ་སོགས་པ་རྣམས་ཀྱི་ཡང་འབྲེལ་པ་ཅན་ཉིད་ཅེས་པ། རྒྱུ་ལ་སོགས་པ་རྣམས་ཀྱི་འབྲས་བུ་ཉིད་ལ་སོགས་པ་རྣམས་དང་ལྷན་ཅིག་རྟགས་དང་རྟགས་ཅན་གྱི་དངོས་པོར་འབྲེལ་པ་འདོད་པ་ན། རྒྱུ་ཉིད་ལ་སོགས་པ་ནི་འབྲས་བུ་ཉིད་ལ་སོགས་པ་ཙམ་ལ་ལྟོས་པ་ཉིད་
[108b.5]ཀྱི་ཕྱིར། དེ་ལ་རྟགས་ཅན་ལ་འབྲས་བུ་ཉིད་ལ་སོགས་པའི་རྣམ་པ་ཅན་ཁོ་ན་ཤེས་པར་འགྱུར་གྱི། ཆར་པ་ལ་སོགས་པའི་རྣམ་པ་ཅན་དུ་ནི་མ་ཡིན་ནོ། །ཅིའི་ཕྱིར་ཞེ་ན་གསུངས་པ། འབྲེལ་པ་ཙམ་གྱི་སྒོ་ནས་ཞེས་པ་ལ་སོགས་པ་སྟེ། འབྲེལ་པ་མེད་པར་ནི་རྟགས་ལས་རྟགས་ཅན་ལ་ཤེས་པ་
[108b.6]སྐྱེ་བ་མ་ཡིན་ཞིང་། རྟགས་ཀྱང་ཇི་ལྟར་གང་དང་ལྷན་ཅིག་འབྲེལ་པ་དེ་ལྟར་དེ་ཁོ་ན་རྟོགས་པར་བྱེད་ཀྱི། གཞན་རྣམ་པ་གཞན་དུ་མ་ཡིན་ཏེ། ཧ་ཅང་ཐལ་བར་འགྱུར་ན་མི་རུང་ངོ་ཞེས་པས་སོ། །རྒྱུ་ཉིད་ལ་སོགས་པས་སྤྲིན་ལ་སོགས་པ་རྣམས་འབྲས་བུ་ཉིད་ལ་སོགས་པས་ཆར་པ་ལ་སོགས་པ་
[108b.7]རྣམས་འབྲེལ་པའོ་ཞེས་པས་དེ་ཙམ་རྟོགས་པར་འགྱུར་རོ། །དེ་འགྱུར་མེད་དོ། །བདག་ཉིད་ཐམས་ཅད་ཀྱིས་དེ་རྣམས་ཀྱི་འབྲས་བུ་དང་རྒྱུའི་དངོས་པོ་ལ་སོགས་པ་རྣམས་འབྲེལ་པ་ཡིན་གྱི་ཆ་ཤས་ཀྱིས་ནི་མ་ཡིན་ནོ། །དེའི་ཕྱིར་ཐལ་བ་འདིར་མི་འགྱུར་ཏེ། ཁྱད་པར་རྣམས་ཀྱང་འབྲེལ་པ་ཅན་
[109a]
[109a.1]ཡིན་པ་ཉིད་ཀྱི་ཕྱིར་ཞེ་ན། གསུངས་པ། རྣམ་པ་ཐམས་ཅད་འཛིན་པའམ་ཞེས་པ་ལ་སོགས་པ་ནི། ཐིགས་པ་ཆེན་པོ་ཅན་གྱི་ཆར་པ་མྱུར་དུ་འབབ་པ་ཞེས་པ་ལ་སོགས་པ་ཡང་འཛིན་པར་འགྱུར་ཏེ། འདི་ལྟ་བུ་ལ་སོགས་པའི་རྣམ་པ་རྣམས་དང་ཡང་ལྷན་ཅིག་རྒྱུ་དང་འབྲས་བུ་
[109a.2]ལ་སོགས་པའི་དངོས་པོ་ཡིན་པའི་ཕྱིར་རོ། །ཁོ་བོ་ཅག་ལ་ནི་གལ་ཏེ་ཡང་རྣམ་པ་ཐམས་ཅད་དུ་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ཡིན་པ་དེ་ལྟ་ན་ཡང་ཐལ་བར་འགྱུར་བ་འདི་མ་ཡིན་ཏེ། དེ་ལྟར་ངེས་པར་མི་ནུས་པ་ཉིད་ཀྱི་ཕྱིར་རོ། །ཕ་རོལ་པོས་ནི་མངོན་སུམ་ངེས་པའི་བདག་ཉིད་དུ་
[109a.3]འདོད་དེ། དེའི་ཡུལ་ཡང་ཆ་ཤས་མེད་པའོ། །དེའི་ཕྱིར་གལ་ཏེ་དེ་འཛིན་ན་དེས་དེ་རྣམ་པ་ཐམས་ཅད་དུ་གཟུང་བར་བྱ་ཞིང་། ཡང་ན་ཇི་ལྟར་ཡང་མ་ཡིན་ནོ་ཞེས་བཤད་དོ། །དེའི་ཕྱིར་དེ་ཁོ་ན་ལ་སྐྱོན་འདིའོ། །སྔ་མ་ལ་གང་མངོན་པར་བརྗོད་པའི་སྐྱོན་འབྲེལ་པ་གཞན་ལས་རྟོགས་པ་དང་འབྲས་བུ་ཙམ་
[109a.4]ལ་སོགས་པའི་རྗེས་སུ་དཔོག་པ་དང་རྣམ་པ་ཐམས་ཅད་འཛིན་པར་ཞེས་པ་ལ་སོགས་པ་དེ་རྣམས་སྤྱི་ལས་མཐོང་བ་ལ་ཡང་བསྒྲེ་བར་བསྟན་པའི་ཆེད་དུ་གསུངས་པ། སྤྱི་ལས་མཐོང་བའང་དེ་བཞིན་ནོ་ཞེས་པའོ། །ཅི་ལྟར་ཞེ་ན་གསུངས་པ། དེ་ཡང་ནི་ཞེས་པ་ལ་སོགས་པ་སྟེ། འོ་ན་སྔ་མ་དག་
[109a.5]ལས་དེའི་ཁྱད་པར་ཅི་ཞེ་ན་གསུངས་པ། ཤིན་ཏུ་ལྐོག་ཏུ་གྱུར་པ་ལ་ཞེས་པའོ། །ཐམས་ཅད་དུ་ཡང་ཞེས་པ་སྔ་མ་དང་ལྡན་པ་ལ་སོགས་པ་རྣམས་ལ་ཡང་སྟེ། སྔ་མ་འདྲ་བ་དང་ཕྱི་མ་འདྲ་བའོ་ཞེས་སྨྲ་བས་རྗེས་སུ་དཔག་པར་བྱ་བའི་ཤེས་པ་ཚད་མར་བརྗོད་ལ། དེ་ཁོ་ན་ཡང་དོན་རྟོགས་པ་སྟེ།
[109a.6]འབྲས་བུ་གཞན་པ་ཡང་མེད་དེ། དེ་ལས་ཀྱང་ཁས་བླངས་པ་ཉམས་སོ། །དེར་འགྱུར་མོད། ཡང་ན་ཉེ་བར་ལེན་པ་ལ་ལྟོས་པའི་བློ་རྣམས་འབྲས་བུ་མ་ཡིན་ནོ་ཞེ་ན། དེ་ཡོད་པ་མ་ཡིན་ཏེ། དེ་རྣམས་ནི་ཕན་པ་དང་མི་ཕན་པ་དྲན་པའི་རྒྱུ་ཅན་ཉིད་ཀྱི་ཕྱིར་རོ། །དེ་ཁོ་ན་དང་འདི་ནི་ཕན་པ་དང་མི་ཕན་པའོ་ཞེས་པ་ལ་
[109a.7]སོགས་པ་དྲན་པ་མེད་པ་དེ་རྣམས་ནི་འགའ་ཞིག་ལ་ཡང་ཉེ་བར་སྐྱེ་བ་མ་ཡིན་པས་སོ། །དེ་ལྟར་འགྱུར་མོད་འབྲས་བུ་ཁས་བླངས་པ་མེད་པ་ཁོ་ནའོ་ཞེ་ན་གསུངས་པ་མ་ཡིན་ཞེས་པ་ལ་སོགས་པ་སྟེ། གང་བྱེད་པ་ཡིན་པ་དེ་ལས་ལ་བྱ་བའི་འབྲས་བུ་ཅན་ཏེ། སྟ་རེ་བཞིན་རྗེས་སུ་དཔག་པ་ཡང་དེ་ལྟ་བུའོ། །རང་
[109b]
[109b.1]བཞིན་ནོ། །གྲུབ་པ་ལ་བསྒྲུབ་པར་བྱ་བ་ཉིད་དུ་དོགས་པར་བྱས་ནས་གསུངས་པ། རྟགས་ཤེས་ཞེས་པ་ལ་སོགས་པའོ། །ཐ་སྙད་བསྟན་པ་འགྲུབ་མི་འགྱུར། །ཞེས་པ་གང་གི་ཕྱིར་རྗེས་སུ་དཔག་པར་བྱ་བ་ཁོ་ན་སྔ་མ་དང་ལྡན་པ་དང་ལྷག་མ་དང་ལྡན་པ་གཙོ་བོ་སྟེ། ཤེས་པ་ནི་ཉེ་བར་བརྟགས་
[109b.2]པས་ཏེ། དེའི་ཡུལ་ཅན་ཉིད་ཀྱི་ཕྱིར་དེ་ལྟར་རྣམ་པར་བསྟན་ཏོ་ཞེས་བསྒྲགས་ན་གང་ལས་དེ་ལྟར་འདི་ཐ་སྙད་དུ་བསྟན་པར་འགྱུར་བ་རྟགས་ཀྱི་ཤེས་པ་ནི་དེའི་ཡུལ་ཅན་ཡང་མ་ཡིན་ཏེ། རྟགས་ནི་སྔ་མ་དང་ལྡན་པ་དང་ལྷག་མ་དང་ལྡན་པ་ཉིད་དུ་བསྟན་བཅོས་སུ་ཡང་དག་པར་མ་བསྒྲགས་པ་ཉིད་ཀྱི་ཕྱིར་རོ་
[109b.3]ཞེས་པས་ཁས་བླངས་པ་ཉམས་པའོ། །གང་ཡང་ཞེས་པ་ལ་སོགས་པས་ཀྱང་ཁས་བླངས་པ་ཉམས་པ་ཁོ་ན་གསུངས་སོ། །དེ་ལྟར་ནི་དེ་ཉིད་དུ་བཤད་པ། རེ་རེའི་ཡང་རྣམ་པ་གསུམ་ཉིད་དུ་ཤེས་པར་བྱ་བའི་དོན་དུ་རྣམ་པ་གསུམ་ཞེས་སོ། །གཏན་ཚིགས་ཅི་ཞེ་ན་འདི་ཁོ་ན་དུས་གསུམ་ཉིད་དུ་
[109b.4]འཛིན་པའི་ཕྱིར་རོ་ཞེས་པའོ། །འདི་ཡང་ལྡན་པའི་ཕྱོགས་ལ་མི་འཐད་པ་ཁོ་ན་སྟེ། རྒྱུ་ལ་འབྲས་བུ་མ་འོངས་པ་ཁོ་ན་འཛིན་པའི་ཕྱིར་རོ། །ལྷག་མ་དང་ལྡན་པའི་ཡང་མ་ཡིན་ཏེ། མ་འོངས་པའི་རྗེས་སུ་དཔག་པ་མི་སྲིད་པའི་ཕྱིར་རོ། །རྒྱུ་ལས་སྔར་འབྲས་བུ་སྲིད་པ་ཡོད་པ་མ་ཡིན་པའི་ཕྱིར་རོ། །
[109b.5]ཕྱོགས་ཅན་པས་སྨྲས་པ། རྫས་ལ་སོགས་པའི་ཚིག་གི་དོན་བཀག་པ་ལས་སྒྲ་ལ་ཡོན་ཏན་ཉིད་ཡང་དག་པར་སྒྲུབ་པ་ལྷག་མ་དང་ལྡན་པའོ་ཞེས་པའོ། །འདིར་ཡང་འབྲེལ་པ་བསྟན་པ་མེད་པའི་ཕྱིར། དེའི་རྗེས་སུ་དཔག་པ་ཉིད་ཁོ་ན་ཡང་རྙེད་པར་དཀའ་ན། རྣམ་པ་གསུམ་ཉིད་ལྟ་ཅི་སྨོས། །རབ་
[109b.6]ཏུ་སྤྲོས་པས་སྒྲ་ཡང་ཡོན་ཏན་ཉིད་བསྒྲུབས་པ་ནི་ལུང་ལས་གྲུབ་པ་སྟེ། ཡིད་ཆེས་པའི་མིང་རྣམ་པར་སྒྲུབ་པས་ཞེས་པ་ལ་སོགས་པའོ། །དེའི་ཕྱིར་སྒྲ་ལ་ཡོན་ཏན་ཉིད་སྒྲུབ་པ་ནི་རྗེས་སུ་དཔག་པ་མ་ཡིན་ནོ། །དེ་ལ་ནི་ལྟ་བུ་ཡང་མ་ཡིན་ན་ཞེས་པ་སྔ་མ་ལྟ་བུའི་རྗེས་སུ་དཔག་པ་ལ་རང་གི་འབྲེལ་པ་བསྟན་
[109b.7]པ་ཁོ་ན་མེད་དེ། དེའི་ཕྱིར་དེ་རྗེས་སུ་དཔག་པ་ཉིད་དུ་བསྟན་པ་མ་ཡིན་ནོ་ཞེས་པ་འདིའི་རྣམ་པ་གསུམ་ཉིད་ག་ལས་ཡིན། སྔ་མ་དང་མཚུངས་པ་ཞེས་རྣམ་པ་ཙམ་སྟོན་པ་ལས་བསྟན་པར་འགྱུར་བ་ནི་མ་ཡིན་ཏེ། དྲན་པ་ལ་སོགས་པ་རྣམས་ལ་ཡང་སྔ་མ་དང་འདྲ་བར་འཛིན་པའི་ཕྱིར་རོ། །དེ་བཞིན་
[110a]
[110a.1]དུ་ལྷག་མ་དང་སྟེ་མངོན་སུམ་དང་མཚུངས་པའོ་ཞེས་འདིར་ཡང་འབྲེལ་པ་བསྟན་པ་མ་ཡིན་པ་ཁོ་ནའོ་ཞེས་པའོ། །བྱེ་བྲག་པ་རྣམས་ཀྱི་ཡང་ཞེས་པ་ལ་སོགས་པའོ། །འདིའི་འབྲེལ་པ་ནི་རྣལ་འབྱོར་པ་རྣམས་ཀྱི་མངོན་སུམ་གྱི་ཤེས་པའི་སྒྲུབ་པར་བརྗོད་ལ། རྟགས་ལས་
[110a.2]སྐྱེས་པ་ཉིད་དུ་དེ་འཆད་པར་འགྱུར་རོ། །འོ་ན་རྟགས་ལས་སྐྱེས་པ་ཞེས་པ་འདི་ཅི་ཞེ་ན། བརྗོད་པར་བྱ་བ་སྟེ། ཀུན་ནས་བལྟས་ཤིང་ལྷག་པར་ཞེན་པ་ནི། ཀུན་ནས་བལྟས་པ་རྣམས་ཏེ། རྗེས་སུ་རྟོགས་པ་ཡང་ངོ་། །དེ་ལ་གང་དངོས་སུ་དོན་རྣམས་ཀུན་ནས་ལྟ་བ། དཔེར་ན་འདི་ནི་བ་ལང་ཁོ་ནའོ། །
[110a.3]འདི་ནི་རྟ་ཁོ་ནའོ་ཞེས་པ་དེ་མངོན་སུམ་མོ། །གང་གཞན་བལྟ་བར་བྱ་བ་རྣམས་འདིའི་རྗེས་སུ་རྟོགས་པ་དེ་ནི་རྟོགས་པ་ལས་བྱུང་བ་ཧ་ཅང་ཐལ་བར་བྱ་བཞིན་པ་དེ་ནི་རྟགས་དང་རྟགས་ཅན་ངེས་པའི་ཆེད་དུ་བརྡ་ལས་བྱུང་བ་ཅན་གྱི་མཚན་ཉིད་ངེས་པར་བསྟན་པར་བྱ་བ་སྟེ། བརྡ་ལ་ཡོད་པ་ནི་བརྡ་ལས་བྱུང་
[110a.4]བ་སྟེ། བརྡ་བྱས་པ་ཞེས་པའི་དོན་ཏོ། །འདི་ལྟ་སྟེ། འདིའི་འདི་ནི་ཞེས་པ་ལ་སོགས་པ་སྟེ། འདིའི་ཞེས་པས་རྟགས་གསུངས་སོ། །འདི་ནི་ཞེས་པ་ནི་རྗེས་སུ་དཔག་པར་བྱ་བའོ། །གང་གི་ཚེ་འདིའི་འདི་རབ་ཏུ་གྲུབ་པ་དང་། ཐེ་ཚོམ་མེད་པར་ཡང་འགྱུར་བའོ། །འདིའི་སྟེ་ཤེས་པར་བྱེད་པའམ་
[110a.5]འབྱུང་བར་བྱེད་པ་ལ་ནུས་པ་ཅན་གྱི་རྒྱུའི། འདི་ལྟ་སྟེ་གསལ་བར་བྱ་བའམ་འགྲུབ་པར་བྱ་བ་འབྲས་བུའོ་ཞེས་པའོ། །ཅི་སྟེ་འདིའི་རྒྱུ་མཐོང་བ་ལས་འབྲས་བུ་གཟུང་བར་བྱ་བ་མ་ཡིན་ན་ཡང་རྗེས་སུ་ངེས་པར་འགྱུར་ཏེ། དཔེར་ན་ཉིན་མོར་བྱེད་པ་ཤར་བར་མཐོང་བ་ལས་བུམ་པ་མངོན་པར་གསལ་བ་ལ་བཞིན་དང་།
[110a.6]སྣལ་མ་རྣམས་བྲེས་ཤིང་བརྐྱང་བར་གནས་པ་རྣམས་དང་ཐ་ག་པ་ལྷག་པར་གནས་པ་རྣམས་མཐོང་ནས་འབྱུང་བའི་སྣམ་བུ་ལ་བཞིན་ནོ། །དེ་ལྟར་གང་གི་ཚེ་འདིའི་འདི་རབ་ཏུ་གྲུབ་པ་དང་ཐེ་ཚོམ་མེད་པར་འགྱུར་བ་སྟེ། གསལ་བར་བྱ་བའམ་འགྲུབ་པར་བྱ་བའི་འབྲས་བུ་འདིའི་ཡང་འདི་རྒྱུའོ་ཞེས་པ་ཡིན་པ་ན།
[110a.7]དེ་ནས་འདིའི་འབྲས་བུ་ལྟ་བའི་ཕྱིར་ཞེས་པ་ལ་སོགས་པ་ཇི་ལྟར་རིགས་པར་བརྗོད་པར་བྱའོ། །འབྲེལ་པ་ཅན་རྣམ་པ་གཉིས་ཏེ་ཡང་དག་པར་ལྡན་པ་ཅན་ཡང་དཔེར་ན་དུ་བ་མེ་ལས་ལྟ་བུ་སྟེ། ཡང་དག་པར་འདུ་བ་ཅན་ཡང་དཔེར་ན་བ་ལང་གི་རྭ་ལྟ་བུའོ། །དོན་གཅིག་ལ་འདུ་བ་ཅན་ཡང་རྣམ་པ་གཉིས་
[110b]
[110b.1]ཏེ། འབྲས་བུ་གཞན་གྱི་འབྲས་བུ་དང་། རྒྱུ་གཞན་གྱི་རྒྱུའོ། །དེ་ལ་རྒྱུའི་དོན་གཅིག་ལ་འདུ་བ་སྟེ། གཅིག་གི་དོན་རྣམས་ལ་འདུ་བའོ། །འབྲས་བུ་ཡང་གཅིག་ཏུ་དོན་རྣམས་ཀྱི་འདུ་བ་ཞེས་ཚིག་རྣམ་པར་སྦྱར་བ་ཐ་དད་པ་ལས་སོ། །དེ་ལ་འབྲས་བུ་ལས་འབྲས་བུ་གཞན་ལ་རྗེས་སུ་དཔོག་པ་ནི་
[110b.2]དཔེར་ན་གཟུགས་ལས་རེག་པ་ལྟ་བུའོ། །རྒྱུ་ལས་རྒྱུ་གཞན་ལ་ནི་དཔེར་ན་རྐང་པ་ལས་ལག་པ་དག་ལྟ་བུའོ། །འགལ་བ་ནི་རྣམ་པ་བཞི་སྟེ། བྱུང་བའི་མ་བྱུང་བ་ནི་དཔེར་ན་ཡོད་པ་མ་ཡིན་པའི་ཆར་པའི་ལས་ནི་ཡོད་པ་རླུང་དང་སྤྲིན་ཡང་དག་པར་སྦྱོར་བའི་སྟེ། དེ་ཡོད་ན་ཆར་པའི་ལས་མེད་པའི་ཕྱིར་རོ། །
[110b.3]བྱུང་བ་མ་བྱུང་བའི་ནི། ཆར་པའི་ལས་ཡོད་བཞིན་པ་དེ་ཁོ་ན་རླུང་དང་ཆར་པ་ཡང་དག་པར་སྦྱོར་བ་དེ་ཁོ་ནའི་སྟེ། ཤིན་ཏུ་འཇུག་པ་ཉིད་དང་རབ་ཏུ་འཇུག་པ་མེད་པ་ཉིད་རྟོགས་པར་བྱེད་དོ། །བྱུང་བ་བྱུང་བའི་ནི་གཤེར་བ་ཉིད་ཆུ་ལོན་འཆིང་བའི་སྟེ། གཤེར་བ་ཉིད་ཀྱི་འབྲས་བུ་རླན་པ་དང་འགལ་བའི་ཕྱིར་
[110b.4]གཤེར་བ་ཉིད་དང་འགལ་བར་བསྟན་ཏོ། །མ་བྱུང་བ་མ་བྱུང་བའི་ནི་མངོན་པར་གྲུབ་པ་ལྗང་གུ་ཉིད་ཀྱི་བུམ་པ་ཚོས་པ་ལས་སྐྱེས་པའི་ངོ་བོར་བྱུང་བ་ལ། མངོན་པར་གྲུབ་པའི་བུམ་པ་མེ་དང་ཡང་དག་པར་སྦྱོར་བའོ། །རྒྱུས་འབྲས་བུ་རྗེས་སུ་དཔག་པའི་གཏན་ཚིགས་དག་གོ་ཞེས་བརྗོད་དོ་ཞེས་པ་ཕ་
[110b.5]རོལ་པོའི་མངོན་པར་འདོད་པ་ལ་ཞེན་པ་དགོངས་པའོ། །འོ་ན་བསྐྱེད་པར་བྱ་བ་དང་སྐྱེད་པར་བྱེད་པའི་མཚན་ཉིད་དག་སྟེ། དེ་ལ་འབྲས་བུ་དང་རྒྱུ་དག་བཀག་གི །གསལ་བར་བྱ་བ་དང་གསལ་བར་བྱེད་པའི་མཚན་ཉིད་དག་ནི་མ་ཡིན་ནོ་ཞེ་ན། སྐྱོན་འདི་མེད་དེ། གསལ་བར་བྱ་བ་དང་གསལ་བར་བྱེད་
[110b.6]པའི་དངོས་པོ་ནི་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ཁོ་ནའོ། །དེ་ལྟར་ནི་ལྷན་ཅིག་བྱེད་པ་པོ་གསལ་བར་བྱེད་པ་ལས། ཉེ་བར་ལེན་པ་ལ་ལྟོས་ནས་ཤེས་པ་སྐྱེད་པར་རུང་བའི་སྐད་ཅིག་གཞན་སྐྱེས་པ་ཁོ་ན་ནི། བུམ་པ་ལ་སོགས་པ་རྣམས་ཀྱི་བསལ་བ་སྟེ། རྣམ་པ་གཞན་དུ་ན་དེས་བྱས་
[110b.7]པའི་ཕན་འདོགས་པ་ལ་ལྟོས་པ་མེད་པར་ཤེས་པ་སྐྱེ་བར་ཐལ་བར་འགྱུར་བའི་ཕྱིར་རོ། །ཕ་རོལ་པོ་ནི་རྨོངས་པ་ལས་སྐྱེད་པ་དང་བྲལ་བ་ཁོ་ནའི་ངོ་བོ་མ་དོར་བའི་བུམ་པ་ལ་སོགས་པའི་མངོན་པར་གསལ་བར་སེམས་སོ། །དེའི་རང་གི་ངོ་བོ་ངེས་པར་རྟོགས་པ་ཡང་མ་ཡིན་ནོ། །ཤེས་པ་སྐྱེད་བྱེད་
[111a]
[111a.1]ཀྱི་ནུས་པ་མངོན་པར་གསལ་བའོ་ཞེ་ན། དེ་ལྟ་ན་འོ་མ་བུམ་པ་ལ་སོགས་པ་ཁོ་ན་མངོན་པར་གསལ་བར་བྱེད་པས་བྱའོ་ཞེས་འཐོབ་སྟེ། ནུས་པ་ནི་དེའི་བདག་ཉིད་དུ་གྱུར་པ་ཉིད་ཀྱི་ཕྱིར་རོ། །དོན་གཞན་ཉིད་ན་བུམ་པ་ལ་སོགས་པ་ལ་ཕན་མི་འདོགས་པར་ཐལ་བའི་ཕྱིར་རོ། །
[111a.2]ནུས་པ་ལས་ཤེས་པ་སྐྱེ་བའི་ཕྱིར་བུམ་པ་ལ་སོགས་པ་རྣམས་རྟག་ཏུ་འཛིན་པ་མ་ཡིན་པར་ཡང་ཐལ་བར་འགྱུར་ཏེ། རྒྱུ་མ་ཡིན་པ་ནི་ཡུལ་དུ་འཐད་པ་མ་ཡིན་པས་སོ། །དེའི་ཡང་དེ་ལ་ནུས་པའོ་ཞེ་ན། འབའ་ཞིག་པས་ཀྱང་སྐྱེད་པར་བྱེད་པར་འགྱུར་རོ། །ལྷན་ཅིག་བྱེད་པ་ལ་ལྟོས་ནས་སྐྱེད་པར་བྱེད་ཀྱི་
[111a.3]འབའ་ཞིག་པས་མ་ཡིན་ནོ་ཞེ་ན། ཕན་གདགས་བྱ་མ་ཡིན་པའི་ལྟོས་པ་འདི་ཅི་ཞིག །ཤེས་པ་མངོན་པར་གསལ་བའོ་ཞེ་ན། རྟག་ཏུ་བུམ་པ་ལ་སོགས་པ་མི་འཛིན་པར་ཐལ་ལོ་ཞེས་པ་ལ་སོགས་པ་ཐམས་ཅད་སླར་ཡང་འཇུག་གོ། །དེས་ན་ཕ་རོལ་པོས་ཡོངས་སུ་བརྟགས་པའི་མངོན་པར་གསལ་
[111a.4]བ་ནི་འཐད་པ་མ་ཡིན་ཏེ། དེའི་ཕྱིར་དེ་ནི་རྟགས་དང་རྟགས་ཅན་གྱི་དངོས་པོ་མ་ཡིན་ནོ། །སྣལ་མ་ལ་སོགས་པ་ཡན་ལག་རྣམས་ལས་གཞན་པའི་ཡན་ལག་ཅན་གྱི་རྫས་བུམ་པ་ལ་སོགས་པར་རྟོགས་པར་བྱ་བ་ཡང་མ་ཡིན་ཏེ། དེའི་ཕྱིར་རང་བཞིན་མི་དམིགས་པས་ཡོད་པ་ཉིད་གསལ་བར་བྱས་
[111a.5]པ་ཅན་དེ་ནི་མེད་པ་ཁོ་ནའོ། །དེས་ན་དེ་རྣམས་ཀྱིས་དེའམ། དེས་དེ་རྣམས་རྗེས་སུ་དཔོག་པ་ག་ལ་ཡིན། དེ་ཡོད་པ་ཉིད་ན་ཡང་རྒྱུ་ལས་རྗེས་སུ་དཔོག་པ་རིགས་པ་མ་ཡིན་ཏེ། འཁྲུལ་པའི་ཕྱིར་རོ་ཞེས་བརྗོད་ཟིན་ཏོ། །དེ་ལྟར་འགྱུར་མོད་རྒྱུ་ཚོགས་པས་འབྲས་བུ་སྲིད་པ་རྗེས་སུ་དཔག་པར་
[111a.6]བྱའོ་ཞེ་ན། འདི་མི་རིགས་ཏེ། མངོན་སུམ་ངེས་པའི་བདག་ཉིད་ཅན་དུ་ཁས་བླངས་པའི་ཕྱིར་རོ། །རྒྱུ་ནི་སྐྱེད་པར་བྱེད་པ་ཁོ་ནར་འགྱུར་བ་གེགས་བྱེད་པ་མི་འབྱུང་བ་ཅན་ནམ། སྐྱེད་པར་བྱེད་པ་མ་ཡིན་པ་ཁོ་ནའང་གེགས་ངེས་པར་འབྱུང་བ་ཅན་ཡིན། བརྟག་པ་སྔ་མ་ལ་ནི། དེ་དེའི་ངོ་བོར་མངོན་
[111a.7]སུམ་གྱིས་ངེས་སོ་ཞེས་པས། དེ་ལས་ཁྱད་པར་ཅན་གྱི་འབྲས་བུ་སྐྱེད་པ་རྗེས་སུ་དཔག་པ་ཁོ་ནར་འགྱུར་ན་འགྱུར་བ་ཡང་མ་ཡིན་ནོ། །ཇི་ལྟར་རྒྱུ་ལས་འབྲས་བུ་ཡོངས་སུ་བཅད་ནས་དེའི་དོན་ལ་རབ་ཏུ་འཇུག་བཞིན་པ་སླུ་བ་མེད་པ་མཐོང་བ་བཞིན་ནོ། །ཕྱོགས་གཉིས་པ་ལ་ནི་རྒྱུ་ཁོ་ནར་དེ་མི་
[111b]
[111b.1]འགྱུར་རོ་ཞེས་པའི་ངེས་པ་ཡོད་པ་ན། དེ་ལས་འབྲས་བུ་འབྱུང་བ་རྗེས་སུ་དཔག་པ་ག་ལ་ཡིན། མེ་གྲང་བའི་རྒྱུར་གྱུར་པ་མ་ཡིན་ན་ཞེས་ངེས་པ་ཡོད་པ་ལ་འགའ་ཞིག་མེས་གྲང་བ་ཡང་དག་པར་འབྱུང་བ་རྗེས་སུ་དཔོག་པ་ནི་མ་ཡིན་པས་སོ། །དེ་ལྟར་ཕ་རོལ་པོའི་འདོད་པས་རྒྱུས་འབྲས་བུ་དག་
[111b.2]རྗེས་སུ་དཔོག་པའི་གཏན་ཚིགས་དག་མ་ཡིན་ནོ། །ལྡན་མིན་རྟོགས་མེད་ལ་འགྲུབ་ཕྱིར། །ཞེས་པ་གང་མ་བཟུང་བ་ན་ཡང་གང་ལ་རྗེས་སུ་དཔོག་པ་དེ་ནི་རྗེས་སུ་དཔོག་པའི་རྒྱུ་མ་ཡིན་ཏེ། དཔེར་ན་ཆུའི་མེ་བཞིན། མེ་དང་དུ་བའི་ལྡན་པ་མ་བཟུང་བ་ན་ཡང་མེ་རྗེས་སུ་དཔོག་པར་འགྱུར་རོ། །
[111b.3]ཁྱབ་པར་བྱེད་པ་དང་འགལ་བའོ། །ཡང་ཅི་ལྟར་དེ་མ་རྟོགས་པ་ན་ཡང་འགྲུབ་པ་ཡིན་ཞེ་ན། སྨྲས་པ། མཐོང་བའི་ཕྱིར་ཞེས་པ་ལ་སོགས་པ་སྟེ། ལྡན་པ་ནི་གཉིས་ལ་གནས་པ་ཉིད་ཀྱི་ཕྱིར་གཉིས་ཉིད་བཞིན་དུ་རྟེན་ཐམས་ཅད་མཐོང་བ་སྔོན་མ་ཅན་ཁོ་ནས་འཛིན་པར་འགྱུར་ལ། རྗེས་སུ་
[111b.4]དཔག་པའི་དུས་ན་ཡང་རྟེན་ཐམས་ཅད་མ་མཐོང་བའི་ཕྱིར་ལྡན་པ་འཛིན་པ་མི་སྲིད་པ་ཁོ་ནའོ། །དེ་སྟེ་ཡང་མེད་ན་མི་འབྱུང་བ་ཉིད་དྲན་པ་ལས་དུ་བས་མེ་རྗེས་སུ་དཔག་པར་བྱ་བ་མ་ཡིན་ནོ། །འདིར་འགྱུར་མོད་འདི་ནི་མ་ཤེས་པ་ཁོ་ནར་རྗེས་སུ་དཔོག་པའི་གཏན་ཚིགས་སུ་འགྱུར་རོ་ཞེ་ན། གསུངས་
[111b.5]པ། ཤེས་པའི་རྒྱུ་ཉིད་ཁོ་ནས་ཀྱང་། །ཞེས་པ་ལ་སོགས་པ་སྟེ། རང་གི་ཡུལ་ཅན་གྱི་ཤེས་པའི་རྒྱུས་ཞེས་པའི་དོན་ཏོ། །གང་ཕྱིར་ཤེས་པར་བྱེད་པ་ཐམས་ཅད་ནི་རང་གི་ཡུལ་ཅན་གྱི་ཤེས་པ་ཉེ་བར་སྐྱེད་པར་བྱེད་ཅིང་ཤེས་པར་བྱ་བའི་དོན་ཤེས་པར་བྱེད་དེ་སྒྲོན་མ་བཞིན་ནོ། །རྣམ་པ་
[111b.6]གཞན་དུ་ན་མ་བཟུང་བའི་དུ་བ་ལས་ཀྱང་མེ་ལ་རྟོགས་པར་འགྱུར་རོ། །ལྡན་པ་ཡང་ཞེས་པ་ལ་སོགས་པ་སྟེ། གང་ལྡན་པའི་རྟེན་ཡིན་པ་དེ་སོ་སོར་སྦྱོར་བ་གཉིས་པ་ལ་རྟོགས་པར་བྱེད་པའི་གཏན་ཚིགས་ཏེ། དཔེར་ན་དུ་བ་བཞིན། མེ་ཡང་དེ་ལྟ་བུའོ་ཞེས་རང་བཞིན་གྱི་ཐལ་འགྱུར་གསུངས་
[111b.7]སོ། །དེ་ལྟར་འགྱུར་མོད། འདི་ནི་འདོད་པ་ཁོ་ནའོ་ཞེ་ན་གསུངས་པ། མཐོང་ཞེས་པ་ལ་སོགས་པའོ། །འོ་ན་དུ་བ་ཡང་གནས་ཀྱི་ཁང་པ་ལ་སོགས་རྣམས་སུ་མེ་མེད་པ་ལས་འབྱུང་བ་མཐོང་བ་ཁོ་ནའོ། །དེས་ན་གང་གིས་གཅིག་ལ་མངོན་པར་གསལ་བར་བྱེད་པ་ཉིད་དུ་ཐལ་བར་
[112a]
[112a.1]འགྱུར་བར་རྩོད་ཅིང་ཅིག་ཤོས་ལ་མ་ཡིན་པ་འདི་དག་གི་ཁྱད་པར་ཅི་ཡིན། འདི་ལྟར་སེམས་ཏེ་གལ་ཏེ་ཡང་དུ་བའི་ལྡན་པ་ཅན་ཉིད་ད་ལྟར་བྱུང་བ་མེད་མོད། བྱུང་བ་སྔོན་མ་ནི་ཡོད་པ་ཁོ་ན་སྟེ། རྒྱུ་མཚན་ཅན་ནི་རྒྱུ་མཚན་ལ་མི་འཁྲུལ་བའི་ཕྱིར་རོ། །སྐྱེ་བཞིན་པ་ཁོ་ནའི་དུ་བ་
[112a.2]ནི་མེ་དང་ལྡན་ཞིང་། མེ་ནི་དེའི་རྒྱུ་མཚན་ཡིན་ལ། གདོན་མི་ཟ་བར་རྒྱུ་མཚན་རྣམས་ནི་རྒྱུ་མཚན་ཅན་ལ་འཇུག་པར་འགྱུར་བ་ཡང་མ་ཡིན་ནོ། །དེའི་ཕྱིར་དེ་གནས་སྐབས་གང་དུ་ཡང་བྱུང་བ་སྔོན་མ་ཅན་གྱིས་ཡང་ལྡན་པ་ཅན་ཉིད་སྲིད་པ་མ་ཡིན་ནོ་ཞེས་པའོ། །དེ་ལྟར་གང་གི་ཕྱིར་མེ་ནི་རེས་འགའ་དུ་
[112a.3]བའི་རྒྱུ་མཚན་ཡིན་ལ་རེས་འགའ་རྒྱུ་མཚན་མ་ཡིན་པ་དེའི་ཕྱིར་འཁྲུལ་པ་ཉིད་ལས་དེ་དུ་བའི་ངོར་མངོན་པར་གསལ་བར་བྱེད་པ་ཉིད་མ་ཡིན་ནོ། །ལྡན་པ་རྗེས་སུ་དཔོག་པའི་རྒྱུར་འདོད་པ་ལ་ནི་དེ་འཐོབ་བོ་ཞེས་བརྩད་པར་བྱའོ། །དམིགས་ཀྱིས་བསལ་བའི་ཕྱིར་ཞེས་པ་ལ་སོགས་པ་སྟེ། ཐེ་ཚོམ་ཟ་
[112a.4]བའི་མཉན་པས་མ་ངེས་པ་ཉིད་སྨྲས་ཏེ། ཐེ་ཚོམ་གྱི་རྒྱུ་ཉིད་ཀྱི་ཕྱིར་རོ། །ཡང་ཅི་ལྟར་ལྡན་པ་ཅན་ཉིད་མཚུངས་པ་ཉིད་ལ་མེའི་མ་ངེས་པ་ཉིད་དང་དུ་བའི་མ་ཡིན་པ་ཅི་ལྟར་ཞེ་ན་སྨྲས་པ། དེ་གདོན་མི་ཟ་བར་མ་ཡིན་ཞེས་པ་ལ་སོགས་པའོ། །ཐ་དད་མིན་ཕྱིར་ཞེས་པས་ལྡན་པ་ནི་ཐོབ་པ་ཡིན་ལ།
[112a.5]དེ་ཐ་དད་པ་ཡོད་པ་ཡང་མ་ཡིན་ཏེ། དེ་ལས་ཀྱང་ཇི་ལྟར་གཅིག་གི་ཐོབ་པ་དེ་ལྟར་གཉིས་པའི་ཡང་ངོ་ཞེས་པ་མེ་གཅིག་པུ་ལ་རྒྱུ་མ་ཡིན་པར་རིགས་པ་མ་ཡིན་ནོ། །དེ་ལྟར་འགྱུར་མོད་ལྡན་པའི་རྟེན་འགའ་ཞིག་ནི་འཁྲུལ་པ་སྟེ་གང་དེ་ལ་འཁྲུལ་པའོ། །འགའ་ཞིག་ནི་མི་འཁྲུལ་བ་སྟེ་གང་
[112a.6]འཁྲུལ་པ་མེད་པའོ། །དེ་ལ་གང་ཞིག་འདིའི་རྟེན་མི་འཁྲུལ་བ་དེ་ཁོ་ན་རྟགས་ཉིད་དུ་འདོད་ཀྱི་ཅིག་ཤོས་ནི་མ་ཡིན་ནོ། །དེའི་ཕྱིར་ལྡན་པ་གཟུང་བ་ཞེས་པ་ཁོ་ན་རྗེས་སུ་དཔོག་པའི་རྒྱུ་མ་ཡིན་གྱི། འོ་ན་ཅི་ཞེ་ན། གང་གི་ཚེ་འདི་ནི་འདིའི་རྟེན་འཁྲུལ་པ་ཅན་ནོ། །འདི་ནི་འཁྲུལ་པ་མེད་པའོ་ཞེས་
[112a.7]པ་འདི་ལྟར་ཡང་འཁྲུལ་པ་དང་། འཁྲུལ་པ་མེད་པའི་རྟེན་ཉིད་ཀྱིས་རྣམ་པར་དཔྱོད་པ་སྔོན་མ་ཅན་གཟུང་བར་བྱ་སྟེ། དེ་ཁོ་ན་འཁྲུལ་པ་མེད་པའི་རྟེན་ལ་རྟོགས་པར་བྱེད་པ་ཉིད་འཛིན་པའོ། །དེས་ན་འཁྲུལ་པ་མེད་པ་དེ་ཁོ་ནས་རྗེས་སུ་དཔག་པར་བྱའོ་ཞེས་པས་ཇི་སྐད་བརྗོད་པའི་སྐྱོན་གྱི་གནས་
[112b]
[112b.1]མེད་དོ་ཞེས་གསུངས་པ། མ་ཡིན་ཞེས་པ་ལ་སོགས་པ་སྟེ། ལྡན་པ་ནི་ལྷན་ཅིག་གམ་གཅིག་མ་ཡིན་པར་གཟུང་བར་བྱ་བ་ཡིན། བདག་ཉིད་ཕུལ་དུ་བྱུང་བ་ཅི་ཡང་སྒྲུབ་པར་མི་བྱེད་དེ། གང་གིས་ལན་ཅིག་མ་ཡིན་པར་ལྡན་པ་གཟུང་བར་བྱ་བ་དེ་རྗེས་སུ་དཔོག་པའི་རྒྱུ་ཉིད་དུ་འགྱུར་བའོ། །
[112b.2]གལ་ཏེ་ཡང་དེ་བཟུང་ཟིན་པར་གྱུར་ཡང་སླར་ཡང་འཁྲུལ་པ་དང་མ་འཁྲུལ་བའི་རྟེན་ཉིད་དུ་འཛིན་པ་ལྟོས་པ་ཡིན་ན། དེ་ལྟར་གྱུར་ན་གཞན་ཁོ་ན་མེད་ན་མི་འབྱུང་བའི་འབྲེལ་པ་ཉིད་དུ་ཁས་བླངས་པར་འགྱུར་གྱི། ལྡན་པ་ནི་མ་ཡིན་ནོ། །དེའི་ཕྱིར་དེ་ཁས་ལེན་པར་བྱེད་པ་ན། འདིའི་ཅིག་ཅར་
[112b.3]ཁོ་ན་འཛིན་པ་ཚད་མར་བྱ་བའོ། །དེ་ལས་ཀྱང་འདིའི་འཁྲུལ་པ་དང་མ་འཁྲུལ་པ་ཉིད་དུ་རྣམ་པར་དཔྱད་པ་ག་ལས་ཡིན་ཞེས་པའོ། །གང་གི་ཡང་མེད་ན་མི་འབྱུང་བ་ཉིད་འབྲེལ་པ་ཡིན་པ་དེའི་ཡང་སྐྱོན་འདི་ཅི་ལྟར་མི་འབྱུང་ཞེ་ན་གསུངས་པ། གང་གི་ནི་ཞེས་པ་ལ་སོགས་པ་སྟེ། གདོན་
[112b.4]མི་ཟ་བར་སྨོས་པ་ནི། བྱས་པ་ཉིད་དང་མི་རྟག་པ་ཉིད་ལ་སོགས་པ་ལ་མེད་ན་མི་འབྱུང་བ་ཉིད་ཀྱང་གཉིས་ཀ་ལ་འཇུག་པའི་ཕྱིར་རོ། །ཆ་འགའ་ཡིས་མིན་ཞེས་པ་ལ་སོགས་པས་ནི། མེའི་ངོ་བོ་གང་ཞིག་དུ་བ་ལ་ལྡན་པ་ཅན་ཡིན་པ་དེ་ནི་དུ་བའི་གོ་བར་བྱ་བ་སྟེ། མེ་ལ་སོགས་པའི་ངོ་བོ་
[112b.5]བཞིན། འབར་བ་ལ་སོགས་པའི་ངོ་བོ་ཡང་དེ་ལྟ་བུའོ། །དེ་བཞིན་དུ་དུ་བའི་ངོ་བོ་གང་ཞིག་མེ་དང་ལྡན་པ་ཅན་ཡིན་པ་དེ་ནི་མེའི་གོ་བར་བྱེད་པ་ཡིན་ཏེ། དུ་བ་ཉིད་ལ་སོགས་པའི་ངོ་བོ་བཞིན། རྫས་ལ་སོགས་པའི་ངོ་བོ་ཡང་དེ་ལྟ་བུའོ་ཞེས་རང་བཞིན་གྱི་ཐལ་འགྱུར་གཉིས་གསུངས་སོ། །
[112b.6]འབར་བ་ལ་སོགས་པའི་མཉན་པས་ཀྱང་འདིར་དེ་དང་ལྡན་པའི་མེའི་ངོ་བོ་ཁོ་ན་གསུངས་ཀྱི་ཡོན་ཏན་དང་སྤྱི་དག་ནི་མ་ཡིན་ཏེ། དེ་དག་གི་ལྡན་པ་ཅན་ཉིད་མི་སྲིད་པའི་ཕྱིར་རོ། །ཇི་ལྟར་ཡང་ཞེས་པ་ལ་སོགས་པ། ཇི་སྐད་བཤད་པའི་སྐྱོན་ནི་འབྲེལ་པ་གཞན་ལ་ཡང་བསྒྲེས་ནས་སྟོན་ཏོ། །
[112b.7]འགལ་བ་རྣམས་ལ་སྲིད་པའི་ཕྱིར། །ཞེས་པ་སྲིད་པ་སྨོས་པས་ནི་བྱུང་ཟིན་པ་ཁོ་ནའི་འགལ་བ་ལ་ཐལ་བར་འགྱུར་བ་འདི་སྟེ། མ་བྱུང་བ་ལ་ནི་མ་ཡིན་ཏེ། དེ་ལ་སྤྱི་དང་ཁྱད་པར་མི་འཐད་པའི་ཕྱིར་ཞེས་སྟོན་ཏོ། །རྟགས་ཀྱི་ཞེས་པ་ལ་སོགས་པ་སྟེ། རྟགས་ཀྱི་སྟེང་དུ་བ་ལ་སོགས་
[113a]
[113a.1]པའི་གཞན་དང་སྤྱི་གང་ཡིན་པ་རྫས་ཉིད་ལ་སོགས་པའི་ངོ་བོ་དང་། གང་ཡང་འབར་བ་ལ་སོགས་པ་ཁྱད་པར་རྣམས་ཏེ། དེ་གཉིས་ཀ་ལ་ཡང་གསལ་བར་བྱེད་པ་དང་གསལ་བར་བྱ་བར་མི་འགྱུར་རོ། །འདིར་ཡང་བར་ཆོད་པ་སྦྲེལ་བར་བལྟ་བར་བྱ་སྟེ། རྟགས་ནི་
[113a.2]གཞན་དང་ཐུན་མོང་དང་། །རྟགས་ཅན་གྱི་ནི་ཁྱད་པར་རྣམས། །གསལ་བྱེད་གསལ་བྱ་མིན་ཞེས་པའོ། །སྡེབ་སྦྱོར་གྱི་ངོར་དེ་ལྟར་ཀླགས་པའོ། །གཞན་ལ་སྟེ་བྱེ་བྲག་པ་ལ་སོགས་པ་རྣམས་ཀྱི་ལྟར་ནའོ། །རྣམ་པ་ཀུན་དུ་ཐལ་བར་འགྱུར་ཏེ་གསལ་བྱེད་དང་གསལ་བྱའི་ལྡན་པ་ལ་སོགས་པའི་
[113a.3]འབྲེལ་པ་ཁྱད་པར་མེད་པ་ཉིད་ཀྱི་ཕྱིར་རོ་ཞེས་པའོ། །ལྡན་པ་ཅན་ཙམ་རྟོགས་པར་ཐལ་བར་འགྱུར་རོ་ཞེས་པ་ལྡན་པ་ཅན་གྱི་རྣམ་པ་ཙམ་གྱིས་རྗེས་སུ་དཔག་པར་བྱ་བ་འཛིན་པར་འགྱུར་རོ་ཞེས་པའི་དོན་ཏོ། །འདི་ག་ལས་ཤེ་ན་གསུངས་པ། གཞན་དུ་ན་ཞེས་པ་ལ་སོགས་པའོ། །འབྲེལ་
[113a.4]པའི་རྗེས་སུ་མཐུན་པར་རྟགས་ཀྱིས་རྟགས་ཅན་གོ་བར་བྱེད་དོ། །དེའི་ཕྱིར་ལྡན་པའི་དབང་གིས་རྟགས་ཀྱིས་རྟོགས་པར་བྱེད་པར་འགྱུར་ཞིང་། ལྡན་པ་ཅན་གྱི་ངོ་བོར་བཟུང་བ་དེའི་ངོ་བོ་ཁོ་ནས་རྟོགས་པར་འགྱུར་ཏེ། ལྡན་པ་ཅན་ཉིད་ནི་ལྡན་པ་ཅན་གཞན་ལ་ལྟོས་པ་ཉིད་ཀྱི་ཕྱིར་རོ། །དེ་སྐད་དུ་ཡང་
[113a.5]བཤད་པ། གང་འདི་འདིའི་ལྡན་པ་ཅན་དུ་རབ་ཏུ་གྲུབ་ཅིང་ཐེ་ཚོམ་མེད་པར་འགྱུར་ན། དེ་ནས་འདིའི་འབྲེལ་པ་ཅན་འཛིན་པའི་ཕྱིར། འབྲེལ་པ་ཅན་གཟུང་བ་མ་ཡིན་པ་ལ་ཡང་རྗེས་སུ་ངེས་པར་འགྱུར་རོ་ཞེས་པའོ། །འདིར་འགྱུར་མོད་མེའི་ངོ་བོ་ཁོ་ནས་ལྡན་པ་སྟེ། དེའི་ཕྱིར་དེའི་ངོ་བོས་
[113a.6]ཀྱང་རྟོགས་སོ། །གང་ཡང་དེ་ནས་འདིའི་ཞེས་པ་ལ་སོགས་པ་བཤད་པ་དེ་ལ། འབྲེལ་པ་ཅན་ལ་ཞེས་པ་འདིས་ཁྱད་པར་ཁོ་ན་ལ་མཆོག་ཏུ་སྙེགས་པ་སྟེ། ལྡན་པ་ཅན་ཡན་ལག་ཅན་གྱི་ངོ་བོ་ཙམ་ནི་མ་ཡིན་ནོ་ཞེ་ན་གསུངས་པ། འདིར་ཡང་མ་ཡིན་ཞེས་པ་ལ་སོགས་པའོ། །
[113a.7]ཡང་ན་དོགས་པར་མ་བྱས་ནས། ཕྱོགས་སྔ་མ་ལ་སྐྱོན་གཞན་ཁོ་ན་འདིས་གསུངས་སོ། །གལ་ཏེ་དུ་བས་ལྡན་པ་ཅན་གྱིས་མེ་ཡོད་པ་ཉིད་སྒྲུབ་པར་བྱེད་ན། མེ་དང་དུ་བ་ལྡན་པ་ནི་རྗེས་སུ་དཔོག་པ་ལ་ཡན་ལག་ཏུ་འགྱུར་ན། འདིར་ནི་བསྒྲུབ་པར་བྱ་བ་ཡང་མ་ཡིན་ཏེ། ཅིའི་ཕྱིར་ཞེ་ན།
[113b]
[113b.1]གསུངས་པ། དེ་རྟོགས་ཟིན་པ་ཉིད་ཀྱི་ཕྱིར་ཞེས་པའོ། །འོ་ན་ཅི་བསྒྲུབ་པར་བྱ་བ་ཡིན་ཞེ་ན་གསུངས་པ། གང་དུ་ནི་ཞེས་པ་ལ་སོགས་པ་སྟེ། ཅིའི་ཕྱིར་ཞེ་ན། འདིར་འདི་ཞེས་པའི་ཚིག་ལས་འདིར་གྱི་སྒྲས་འདིར་ཡུལ་གྱི་རྟེན་ཉིད་དུ་རྟོགས་པར་བྱའོ། །འོ་ན་རྟེན་ནི་སྤྱི་ཡིན་ཞིང་། འདིར་
[113b.2]ཞེས་པའི་ཚིག་གིས་བསྒྲུབ་པར་བྱ་བ་ཡིན་ན། དེ་ལ་དེ་ལས་ཁྱད་པར་རྟོགས་པ་ག་ལས་ཡིན་ཞེ་ན་གསུངས་པ། རྣམ་པ་གཞན་དུ་ན་ཞེས་པ་ལ་སོགས་པ་སྟེ། འདིས་ནི་ཁྱད་པར་དོན་གཞན་ཉིད་མི་སྲིད་པར་གསལ་བར་བྱེད་དོ། །གང་དུ་འདིར་ཞེས་པའི་ཚིག་འདི་དོན་གཞན་མི་སྲིད་པ་
[113b.3]ཡིན་པ་དེར། རབ་ཏུ་འཇུག་པའི་རྟེན་བརྗོད་པར་འདོད་པ་ཡིན་ཏེ། དཔེར་ན་འདི་ཁྲོན་པ་ཞེས་པའི་ངག་ལ་བཞིན། འདིར་མེ་ཞེས་པ་འདི་ལ་ཡང་འདིར་ཞེས་པའི་ཚིག་ནི་དོན་གཞན་མི་སྲིད་པ་ཅན་ཡིན་ནོ། །འབྲས་བུའོ། །འོ་ན་ཁྱད་པར་མ་གྲུབ་པ་མ་ཡིན་ནམ། དུ་བ་ཁོ་ན་འདིར་ཞེས་པ་
[113b.4]འདིས་བརྗོད་པར་འདོད་པ་ཉིད་ཀྱི་ཕྱིར་རོ་ཞེ་ན་གསུངས་པ། དུ་བ་ལ་མེ་ཞེས་པ་ལ་སོགས་པ་སྟེ། དམ་བཅའི་དོན་གྱི་ཕྱོགས་གཅིག་ཉིད་ནི་བསྒྲུབ་པར་བྱ་བའི་ཆོས་ཅན་ཁོ་ན་གཏན་ཚིགས་ཉིད་དུ་མངོན་པར་བརྗོད་པའི་ཕྱིར་རོ། །འོ་ན་ཁྱད་པར་དམ་བཅའི་ཕྱོགས་གཅིག་ཡིན་ལ། སྤྱི་གཏན་
[113b.5]ཚིགས་ཏེ། དེས་ན་སྐྱོན་འདི་ག་ལས་ཡིན་ཞེ་ན། འདི་ལྟར་སེམས་ཏེ། མེ་དང་དུ་བ་དག་གི་ལྡན་པ་འབྲེལ་པར་འདོད་པས་གཏན་ཚིགས་ཀྱང་ཁྱད་པར་གྱི་མཚན་ཉིད་ཀྱི་བདག་ཉིད་ཁོ་ནར་ཁས་བླང་བར་བྱ་སྟེ། སྤྱི་ནི་མ་ཡིན་ནོ། །རྣམ་པ་གཞན་དུ་ན་རྫས་དག་ཁོ་ན་ཕན་ཚུན་ལྡན་པ་མི་སྲིད་པར་
[113b.6]འགྱུར་ན། གང་གི་ཕྱིར་འདི་ནི་བསྟན་བཅོས་སུ་འདོད་པས་ཡང་ངོ་། །དེ་ལས་ཀྱང་དམ་བཅའ་བའི་དོན་གྱི་ཕྱོགས་གཅིག་གཏན་ཚིགས་སུ་འགྱུར་རོ། །འདིར་ཡང་འདི་བརྗོད་པར་བྱ་བ་ཁོ་ན་སྟེ། འདིར་མེ་ཡོད་པ་བསྒྲུབ་པར་བྱ་བ་ཡང་མ་ཡིན་ཏེ། དེ་ནི་རྟོགས་ཟིན་པ་ཉིད་ཀྱི་ཕྱིར་ཞེས་པ་
[113b.7]ལ་སོགས་པའོ། །ལན་དེ་བརྗོད་པར་བྱ་བ་ཡིན་དུ་ཟད་མོད། གང་ལ་ཇི་སྐད་བཤད་པའི་སྐྱོན་ལས་གྲོལ་བ་མ་ཡིན་ནོ། །འདིར་ནི་དུ་བའི་ཁྱད་པར་ལ་ཡང་མེ་བསྒྲུབ་པར་བྱ་བ་ལ། སྐྱོན་དང་བཅས་པ་དེའི་གནས་སྐབས་ཁོ་ནའོ། །དེའི་ཕྱིར་འདིའི་ལན་མ་ཡིན་ནོ་ཞེས་པའོ། །གལ་ཏེ་
[114a]
[114a.1]དེ་ལྟ་ན་རྫས་དག་ཁོ་ནའི་ཕན་ཚུན་ནི་ལྡན་པའོ་ཞེས་པ་གཞུང་ལུགས་ཏེ། འོ་ན་དེ་ལྟ་ན་མེ་ཡང་ཁྱད་པར་ཁོ་ན་རང་གི་མཚན་ཉིད་ཀྱི་རྣམ་གྲངས་པ་བསྒྲུབ་པར་བྱ་བ་ཉིད་དུ་ཁས་བླང་བར་བྱ་བ་མ་ཡིན་ནམ། དེ་ལས་ཀྱང་བསྒྲུབ་པར་བྱ་བ་དང་སྒྲུབ་པར་བྱེད་པ་དག་རང་གི་མཚན་ཉིད་ཀྱི་
[114a.2]བདག་ཉིད་ཡིན་པ་ཉིད་ཀྱི་ཕྱིར་གཏན་ཚིགས་ཐམས་ཅད་ཐུན་མོང་མ་ཡིན་པར་འགྱུར་རོ། །དཔེ་ཡང་བསྒྲུབ་བྱ་དང་སྒྲུབ་བྱེད་དང་བྲལ་བའོ་ཞེ་ན། འདི་ནི་བདེན་ཏེ། དེའི་ཕྱིར་གསུངས་པ། དེའི་ཕྱིར་རྟགས་དང་རྟགས་ཅན་དག་གདོན་མི་ཟ་བར་ལྡན་པ་མ་ཡིན་གྱི་ཞེས་པ་སྟེ། འདིར་ཁས་
[114a.3]བླང་བར་བྱའོ་ཞེས་བརྟག་པར་བྱ་སྟེ། གང་གི་ཕྱིར་ལྡན་པའི་འབྲེལ་པ་ལ་དེ་ལྟ་བུའི་སྐྱོན་ཡིན་པ་དེའི་ཕྱིར་རྟགས་དང་རྟགས་ཅན་དག་ལྡན་པའི་འབྲེལ་པ་ཅན་དུ་ཁས་བླང་བར་བྱ་བ་མ་ཡིན་པ་ཁོ་ནའོ། །གདོན་མི་ཟ་བ་སྨོས་པས་ནི་ངེས་པར་གཟུང་བ་བསྟན་པའོ། །འོ་ན་ཅི་ཞེ་ན། མེད་ན་མི་འབྱུང་བ་ཉིད་
[114a.4]ཁོ་ན་ཞེས་པ། དེ་ལ་སྐྱོན་མེད་པ་ཉིད་ཀྱི་ཕྱིར་རོ། །འོ་ན་ཡང་དེ་ཡང་སྐྱོན་དང་བཅས་པ་ཁོ་ན་མ་ཡིན་ནམ། མ་ཁྱབ་པ་ཉིད་ཀྱི་ཕྱིར་རོ། །གང་ཕྱིར་དེ་ཐམས་ཅད་ཀྱི་ཚེ་རྟགས་ལ་འབྱུང་བར་འགྱུར་བ་ནི་མ་ཡིན་པས་ཏེ། དེ་ལྟར་ནི་མེས་སྟོང་པའི་ཡུལ་དང་དུས་དག་ན་ཡང་འགའ་ཞིག་གི་ཚེ་དུ་བ་ཉེ་
[114a.5]བར་དམིགས་པས་སོ་ཞེ་ན་གསུངས་པ། ཡུལ་དང་ལས་ལ་ལྟོས་པ་ནི། །ཞེས་པ་ལ་སོགས་པ་སྟེ། ཇི་ཙམ་གྱི་ཡུལ་དུ་དུ་བ་མེ་མེད་པར་མཐོང་བ་མ་ཡིན་པ་དེ་ལ་ལྟོས་པས་མེད་ན་མི་འབྱུང་བ་ཉིད་དུ་འགྱུར་ལ། དུས་ཇི་ཙམ་གྱིས་ཏེ། གཙུབ་ཤིང་གཙུབས་པ་ལ་སོགས་པའི་གནས་སྐབས་
[114a.6]ནའོ། །སོགས་པའི་སྒྲས་དེ་ལས་གཞན་པའི་གནས་སྐབས་མེ་ཉེ་བར་གྱུར་པ་ན་ཡང་། དུ་བ་མེ་དང་མེད་ན་མི་འབྱུང་བར་ཉེ་བར་དམིགས་པ་ནི་དེ་ལ་ལྟོས་པས་མེད་ན་མི་འབྱུང་བ་ཉིད་དོ། །འདུ་བ་ཡང་ཞེས་པ་ལ་སོགས་པ་སྟེ། གང་འབྲེལ་པ་ཉེ་བར་མ་དམིགས་པ་འདི་ནི་རྗེས་སུ་དཔོག་པའི་
[114a.7]རྒྱུ་མ་ཡིན་ཏེ། དཔེར་ན་རྒྱུ་དང་འབྲས་བུའི་དངོས་པོ་རབ་ཏུ་མ་གྲུབ་པ་འགའ་ཞིག་དག་གི་བཞིན། འདུ་བ་ཡང་རབ་ཏུ་མ་གྲུབ་པའོ་ཞེས་པ་ཁྱབ་པར་བྱེད་པ་མི་དམིགས་པ་གསུངས་པའོ། །འབྲེལ་པ་ནི་ཞེས་པ་ལ་སོགས་པ་དཔེ་གསལ་བར་བྱེད་པའོ། །མ་ཡིན་ཞེས་པ་ལ་སོགས་པ་
[114b]
[114b.1]འདི་ཉིད་ཀྱི་རྣམ་པར་འབྲེལ་པའོ། །རྟོགས་པ་མེད་པའི་ཡང་ཞེས་པ་སྟེ། གང་ཞིག་གི་ཡང་འདུ་བ་ཅན་གྱི་ཡུལ་ཅན་རྟོགས་པ་ཡོད་པ་མ་ཡིན་པ་དེའི་ཡང་རྭ་ལ་སོགས་པ་ལ། མེད་ན་མི་འབྱུང་བ་ཉིད་དྲན་པ་ལས་བ་ལང་ལ་སོགས་པ་ཡང་དག་པར་རྟོགས་པར་མཐོང་ངོ་། །དེའི་ཕྱིར་མེད་ན་མི་
[114b.2]འབྱུང་བ་ཉིད་ཁོ་ན་རྗེས་སུ་དཔོག་པའི་རྒྱུ་ཡིན་ཏེ། དེ་ཡོད་པའི་དངོས་པོ་དག་དེ་དང་ལྡན་པ་ཉིད་ཀྱི་ཕྱིར། མྱུ་གུའི་ས་བོན་བཞིན་ནོ། །འདི་ལ་ཡང་དེ་ཁོ་ན་ཞེས་པ་ལ་སོགས་པས་དོན་གཅིག་ལ་འདུ་བ་ལ་འདུ་བའི་སྐྱོན་དང་ལྡན་པ་ཉིད་དུ་གསུངས་སོ། །འདིར་ཡང་ཞེས་པ་ལ་སོགས་པས་
[114b.3]ཀྱང་ལྡན་པའི་སྐྱོན་དང་ལྡན་པ་ཉིད་དུའོ། །དེར་འགྱུར་མོད། ཡོད་པ་མ་ཡིན་པ་དང་ཐེ་ཚོམ་ཟ་བ་ནི་བསྟན་པ་མ་ཡིན་ནོ་ཞེས་དམིགས་བསལ་ཡོད་དོ། །དེའི་ཕྱིར་གཟུགས་ནི་རེག་བྱ་ལ་རླུང་ལས་རྗེས་སུ་དཔག་པ་མ་ཡིན་ནོ་ཞེ་ན་གསུངས་པ། འཁྲུལ་པ་ཉིད་ན་ཡང་ཞེས་པ་ལ་སོགས་པའོ། །
[114b.4]རྒྱུའི་རྒྱུ་ལས་ཞེས་པ། ལུས་ཀྱི་རྒྱུ་ནི་མགོ་བོ་ཡིན་ལ། དེའི་ཡང་རྒྱུ་ནི་རང་གི་ཆ་ཤས་དཔྲལ་བའོ། །དེ་ལས་ཀྱང་རྒྱུའི་རྒྱུ་ལས་འབྲས་བུའི་འབྲས་བུ་ལུས་ལ་ཡང་དག་པར་རྟོགས་པ་མཐོང་སྟེ། ཡང་ལུས་དང་མགོ་བོའི་ཆ་ཤས་ནི་དོན་གཅིག་ལ་འདུ་བ་ཅི་ལྟར་ཡིན། ཇི་ཙམ་གྱིས་ཚིག་རྣམ་
[114b.5]པར་སྦྱར་བ་ཐ་དད་པ་ལས་དོན་གཅིག་ལ་འདུ་བ་ཅན་རྣམ་པ་གཉིས་སུ་བསྟན་ཏོ། །དོན་གཅིག་གིས་འདུ་བ་ཞེས་ཚིག་རྣམ་པར་སྦྱར་བ་གཞན་ལ་བརྟེན་པའི་ཕྱིར་རོ། །དེ་ལྟར་ནི་མགོ་བོ་དོན་གཅིག་ཡིན་ཞིང་དེས་ཀྱང་དེ་གཉིས་ཀ་དག་གི་ཡང་འདུ་བའོ། །ཇི་སྐད་དུ་སྨྲས་པ་ཞེས་པ། དེའི་ཚིག་ཁོ་ན་
[114b.6]ཤེས་པར་བྱེད་པར་གསུངས་སོ། །གང་ཞིག་ལ་འདི་རབ་ཏུ་གྲུབ་པ་དང་ཐེ་ཚོམ་མེད་པར་གྱུར་ཏེ། མགོ་བོ་ལ་སོགས་པ་འདི་རྣམས་ལུས་མ་བརྩམས་པ་རྣམས་སུ་འགྱུར་བ་མ་ཡིན་ལ། འདི་རྣམས་ཞིག་ན་ལུས་མི་འཇིག་པ་སྲིད་པ་ཡང་མ་ཡིན་ཞིང་། མགོ་བོ་ལ་སོགས་པ་མ་ཞིག་པ་ན། དེའི་ཡན་ལག་
[114b.7]རྣམས་རྣམ་པར་འགྱེས་པར་འགྱུར་བ་ཡང་མ་ཡིན་ནོ་ཞེས་པ་དེ་ལ་རྣམ་པ་འདི་ལྟ་བུའི་རྟོགས་པར་འགྱུར་ཏེ། ལུས་སུ་འགྱུར་ཏེ། གང་ཞིག་གི་འདི་ནི་ཡན་ལག་དང་ཡན་ལག་ཡིན་པའོ་ཞེས་པར་རོ། །དེའི་ཕྱིར་རྣམ་པ་གཉིས་ཁོ་ནའོ་ཞེས་ངེས་པར་གཟུང་བར་བྱ་བ་མ་ཡིན་ནོ་ཞེས་པའོ། །འོ་ན་
[115a]
[115a.1]མཐོང་བ་ཞིག་པའི་མགོ་བོ་དེ་ཁོ་ན་ལས་ཡང་དག་པར་རྟོགས་པ་ཡིན་གྱི། དེའི་ཆ་ཤས་ལས་ནི་མ་ཡིན་ནོ། །དེ་ཉིད་ཀྱི་ཕྱིར་གསུངས་པ། མ་གྱུར་པ་ལས་ཞེས་པ་སྟེ། མ་ཡིན་ཏེ་མེད་པ་རྒྱུ་ཉིད་དུ་མི་རིགས་པའི་ཕྱིར་ན་ཤིན་ཏུ་མེད་པ་བཞིན་ནོ། །འགལ་བ་ནི་རྗེས་སུ་དཔག་པའི་
[115a.2]རྒྱུ་ཉིད་ཡིན་པ་ངེས་པར་བསལ་བའི་ཆེད་དུ་གསུངས་པ། གང་ཞིག་འགལ་བ་ཞེས་པ་ལ་སོགས་པའོ། །རླུང་དང་སྤྲིན་ཡང་དག་པར་སྦྱོར་བ་ནི་ཆར་པའི་ལས་དང་འགལ་བ་ཞེས་པ་ནི། དེ་དག་ལྷན་ཅིག་མི་གནས་པའི་ཕྱིར་རོ། །འདིར་ཆར་པའི་ལས་རྟགས་ཀྱང་མ་ཡིན་གྱི་ཞེས་པ་དེ་དང་འགལ་
[115a.3]བའི་ཆོས་སྒྲུབ་པར་བྱེད་པའི་ཕྱིར་རོ། །འོ་ན་ཅི་ཞེན་དེ་མེད་པ་ཡིན་ནོ་ཞེས་པ། རླུང་དང་སྤྲིན་ཡང་དག་པར་སྦྱོར་བ་ཡོད་ན། ཆར་པའི་ལས་མེད་པའི་ཕྱིར་རོ། །ཆར་པའི་ལས་མེད་པ་དང་རླུང་སྤྲིན་སྦྱོར་བ་དག་འགལ་བ་ཡང་མ་ཡིན་ནོ་ཞེས་པ་ལྷན་ཅིག་གནས་པའི་ཕྱིར་རོ། །འདིར་འགྱུར་མོད།
[115a.4]ཆར་པའི་ལས་ཀྱི་མེད་པ་གང་ཡིན་པ་དེ་ནི་དེ་ཁོ་ནའི་གནས་སྐབས་ཀྱི་ཁྱད་པར་ཏེ། དེ་ལས་ཆར་པའི་ལས་ཁོ་ནའི་གནས་སྐབས་ཐོབ་པ་ནི་རྟགས་སོ་ཞེ་ན། ཡང་ཅི་ལྟར་མེད་པ་ནི་ཡོད་པའི་ཁྱད་པར་ཡིན་ཞིང་། དེའི་ཁྱད་པར་ཉིད་ཡིན་ན་ཡང་མེད་པ་ཁོ་ནར་མི་འགྱུར་ཏེ། ཁྱད་པར་ནི་དངོས་པོའི་
[115a.5]བདག་ཉིད་དུ་གྱུར་པ་ཉིད་ཀྱི་ཕྱིར་རོ། །དོན་གཞན་པ་ཉིད་ན་ཡང་སྐྱོན་དེ་ཁོ་ན་སྟེ། གང་ཞིག་འགལ་བ་དེ་རྟགས་མིན་ཞེས་པ་འདི་ལན་མེད་པའོ། །དེ་བཞིན་དུ་གཞན་ལ་ཡང་བརྗོད་པར་བྱའོ་ཞེ་ན། གང་དུ་མ་གྱུར་པ་རྟགས་ཡིན་པ་དེར་ཡང་རླུང་དང་སྤྲིན་ཡང་དག་པར་ལྡན་པ་མེད་པ་ནི་
[115a.6]ཆར་བའི་ལས་མེད་པ་དང་འགལ་བའི་ཕྱིར། འདིར་ཆར་པའི་ལས་མེད་པ་ནི་རྟགས་ཀྱང་མ་ཡིན་གྱི། འོ་ན་ཅི་ཞེ་ན་ཆར་པའི་ལས་སོ། །ཆར་པའི་ལས་དང་རླུང་དང་སྤྲིན་ཡང་དག་པར་ལྡན་པ་མེད་པ་དག་འགལ་བ་ཡང་མ་ཡིན་ནོ། །དེ་བཞིན་དུ་བྱུང་བ་བྱུང་བའི་ཞེས་པ་འདིར་ཡང་གཤེར་བ་ཉིད་
[115a.7]ཀྱི་ལས་རླན་པ་ནི་ཆུ་ལོན་འཆིང་བ་དང་འགལ་བ་སྟེ། རླན་པ་ཡང་རྟགས་མ་ཡིན་གྱི། འོ་ན་ཅི་ཞེ་ན་དེ་མེད་པའོ། །དེ་བཞིན་དུ་མ་བྱུང་བ་མ་བྱུང་བའི་ཞེས་པ་འདིར་ཡང་ལྗང་གུ་ཉིད་དང་མེ་དང་ཡང་དག་པར་ལྡན་པ་དག་འགལ་བ་སྟེ། འདིར་དེ་དག་རྟགས་དང་རྟགས་ཅན་གྱི་དངོས་པོ་ཡང་མ་ཡིན་ཏེ།
[115b]
[115b.1]འོ་ན་ཅི་ཞེ་ན་དེ་ལྡོག་པ་དག་གོ། །གང་བཤད་པ་ཡང་ཞེས་པ། ཡོད་པ་ནི་མི་རྟག་པ་སྟེ་རྫས་བཞིན། འབྲས་བུ་ནི་རྒྱུ་སྟེ་སྤྱི་དང་ཁྱད་པར་བཞིན་ཞེས་པའོ། །རྫས་དང་ཡོན་ཏན་དང་ལས་རྣམས་ཁྱད་པར་མེད་པའོ་ཞེས་པའི་ཚིག་ལས། བསྟན་བཅོས་སུ་རྫས་དང་ཡོན་ཏན་དང་ལས་རྣམས་ཁོ་ན་
[115b.2]རྒྱུའི་དངོས་པོར་བཤད་དོ། །འདིར་ཡང་མ་བྱུང་བ་ནི་བྱུང་བའི་ཞེས་པ་ལ་སོགས་པས། དངོས་པོ་མེད་པ་རྒྱུར་བརྗོད་པའི་ཕྱིར། ཅི་ལྟར་དངོས་པོ་མེད་པ་དངོས་པོའི་རྟགས་ཡིན་ཞེས་དྲིས་པའོ། །དངོས་པོ་མེད་པ་དངོས་པོའི་རྟགས་སུ་ཁོ་བོ་ཅག་སྨྲ་བ་མ་ཡིན་གྱི། འོ་ན་ཅི་ཞེ་ན་མ་བྱུང་བ་ལ་
[115b.3]སོགས་པ་རྟོགས་པའོ། །ཅིའི་ཕྱིར་ཞེ་ན། དམིགས་ཀྱིས་བསྟན་པ་ནི་རབ་ཏུ་གྲགས་པ་སྔོན་མ་ཅན་ཉིད་ཀྱི་ཕྱིར་རོ་ཞེས་པའོ། །གང་ཞིག་གི་དུ་བ་མེའི་ཡང་དག་པར་ལྡན་པ་ཅན་ནོ་ཞེས་སྔར་འབྲེལ་པ་འཛིན་པའི་དུས་ན་རབ་ཏུ་གྲུབ་པར་འགྱུར་བ་དེ་ཁོ་ནའི་དུ་བ་མཐོང་བ་ལས་མེ་ལ་རྗེས་སུ་དཔག་
[115b.4]པ་སྟེ། ཅིག་ཤོས་ཀྱི་ནི་མ་ཡིན་ནོ། །དེའི་ཕྱིར་དུ་བ་ལ་སོགས་པ་རྟོགས་པ་ཁོ་ན་རྟགས་སོ། །དེའི་ཡུལ་ཅན་ལ་ནི་རྟག་པ་ཉིད་ཉེ་བར་བརྟགས་པ་སྟེ། དཔེར་ན་ཙནྡན་གྱི་ཞོ་ཆ་ཞེས་པ་བཞིན་ནོ། །འབྲེལ་པ་མེད་ཕྱིར་རྟགས་བློ་མིན། །ཞེས་པ་སྟེ། གང་ཞིག་གང་དང་ལྷན་ཅིག་འབྲེལ་པ་
[115b.5]མེད་པ་དེ་ནི་དེའི་རྟགས་མ་ཡིན་ཏེ། དཔེར་ན་བུམ་པ་ནི་སྣམ་བུའི་བཞིན་ཏེ། རྟགས་ཅན་ཡང་རྟགས་ཀྱི་བློ་དང་འབྲེལ་པ་མེད་དོ་ཞེས་པ་ཁྱབ་པར་བྱེད་པ་མི་དམིགས་པ་གསུངས་སོ། །འབྲེལ་པའི་དོན་ཡང་ཞེས་པ་ལ་སོགས་པ་སྟེ། བདག་ཉིད་ལ་རབ་ཏུ་གྲུབ་པ་ཞེས་བརྗོད་པ་ན། ཕ་རོལ་པོས་བརྗོད་
[115b.6]པ་ནི་བདག་ཉིད་ལ་རབ་ཏུ་གྲུབ་པའི་རྟགས་མ་ཡིན་ཏེ། གཞན་ཉིད་ཀྱི་ཕྱིར་རོ། །དོན་གཞན་གྱིས་དོན་གཞན་རྟོགས་པར་བྱེད་པ་ནི་མ་ཡིན་པའི་ཕྱིར་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །དེའི་ཕྱིར་མདོ་འདི་ཉེ་བར་བཀོད་དོ། །འདི་སྐད་བཤད་པར་འགྱུར་ཏེ། ཐམས་ཅད་ནི་དོན་གཞན་གྱི་རྟགས་
[115b.7]མ་ཡིན་གྱི། འོ་ན་ཅི་ཞེ་ན། གང་ཁོ་ན་རྒྱུ་དང་འབྲས་བུ་ལ་སོགས་པའི་འབྲེལ་པ་རྣམས་ལས་གང་ཡང་རུང་བས་འབྲེལ་པར་གྱུར་པ་དེ་ཁོ་ན་དམིགས་ཀྱིས་བསྟན་པའོ་ཞེས་པའོ། །རྟགས་ལས་བྱུང་བར་བསྟན་པའི་ཕྱིར། །ཞེས་པ། རྟགས་ལས་བྱུང་བ་ཞེས་པའི་ཚིག་ལས་མདོ་འདིར་རྟགས་ཀྱི་
[116a]
[116a.1]ཤེས་པས་ནི་རྟགས་ལས་བྱུང་བ་ཉིད་དུ་ངེས་པར་བསྟན་ལ། དེ་ལས་དེ་རྟགས་ཉིད་དུ་དམ་བཅས་པ་ལ་ཁས་བླངས་པས་གནོད་པའོ། །ཅི་སྟེ་རྗེས་སུ་དཔག་པར་བྱ་བའི་ཤེས་པ་འདིར་རྟགས་ལས་བྱུང་བ་ཉིད་དུ་ངེས་པར་བསྟན་པར་སེམས་ཀྱི། རྟགས་ཀྱི་ཤེས་པ་ནི་མ་ཡིན་
[116a.2]ནོ་ཞེ་ན་གསུངས་པ། རྗེས་སུ་དཔག་པར་བྱ་བའི་ཤེས་པ་ནི་ཞེས་པ་ལ་སོགས་པ་སྟེ། གལ་ཏེ་རྟགས་ཀྱི་ཤེས་པ་རྟགས་ལས་བྱུང་བར་འདོད་ན། དེ་ལྟ་ན་རྗེས་སུ་དཔག་པར་བྱ་བའི་ཤེས་པ་འདི་ལ་འབྲས་བུ་དང་བྲལ་བར་འགྱུར་རོ། །རྗེས་སུ་དཔག་པར་བྱ་བའི་ཤེས་པ་རྟགས་ལས་བྱུང་བ་
[116a.3]ཉིད་ན་ནི། དེ་སྐྱེས་པ་ནི་དོན་དེ་རྟོགས་ཟིན་ཏོ་ཞེས་པས་འབྲས་བུ་མེད་པའོ། །དེའི་ཕྱིར་དེ་ཁོ་ན་ཁས་བླངས་པས་གནོད་པའོ། །དེ་ལྟར་འགྱུར་མོད། རྟགས་ཀྱི་ཤེས་པ་ནི་རྟགས་ཡིན་ལ། འབྲེལ་བ་དྲན་པ་ནི་རྟགས་ལས་བྱུང་བ་སྟེ། རྗེས་སུ་དཔག་པར་བྱ་བ་རྟོགས་པ་ནི་འབྲས་བུའོ་ཞེ་ན།
[116a.4]དེའི་ཕྱིར་གསུངས་པ། དྲན་པ་ཙམ་ཞེས་པ་ལ་སོགས་པ་སྟེ། གལ་ཏེ་འབྲེལ་པ་དྲན་པ་ཚད་མ་ཡིན་པ་དེ་ལྟར་གྱུར་ན་གང་ཡང་རྟགས་མ་མཐོང་བ་དེས་ཀྱང་དུ་བའི་འབྲེལ་པ་དྲན་པ་ལས་མེ་རྟོགས་པར་འགྱུར་རོ། །ཙམ་གྱི་སྒྲ་ནི་དུ་བ་མཐོང་བ་བསལ་བའི་ཆེད་དུའོ། །དེ་དང་བཅས་པའི་འབྲེལ་
[116a.5]པས་དྲན་པ་ནི་རྗེས་སུ་དཔོག་པར་འདོད་པ་ཁོ་ནའོ། །གང་གསུངས་པ་དེ་དང་འདི་ཡང་དངོས་དང་བརྒྱུད་པས་རྗེས་སུ་དཔོག་པའི་རྒྱུ་ཉིད་ཀྱི་ཕྱིར་གཉིས་ཀ་ཡང་རྗེས་སུ་དཔག་པའོ་ཞེས་པའི་བྱེད་པ་བསྟན་པ་ལས་ཞེས་པ། འགལ་བ་ཡང་ཞེས་པའི་མདོའི་མཐར་ཞེས་པའི་བྱེད་པ་ཀློག་པའི་ཕྱིར།
[116a.6]འདིའི་འདི་འབྲས་བུ་ཞེས་པ་ལ་སོགས་པའི་ཤེས་པ་གང་ཡིན་པ་དེའོ་ཞེས་པས། བྱེད་པ་གསལ་བར་བྱེད་དོ། །གལ་ཏེ་དེ་ལྟ་ན་རྟགས་ཀྱི་ཤེས་པ་རྟགས་ལས་བྱུང་བ་ཡིན་ན་བྱེ་བྲག་ཏུ་མ་རྟོགས་པས་ཀྱང་རྟགས་མཐོང་བ་ཙམ་ལས་ལྷག་པར་རྟོགས་པར་འགྱུར་རོ་ཞེ་ན། དེའི་ཕྱིར་གསུངས་པ།
[116a.7]འབྲེལ་པ་དྲན་པ་ལ་ལྟོས་པས་ཞེས་པ་སྟེ། འབྲེལ་པ་དྲན་པ་ལ་ལྟོས་པ་ཉིད་ནི་དེའི་དམིགས་ཀྱིས་བསྟན་པ་ནི་རབ་ཏུ་གྲུབ་པ་སྔོན་མ་ཅན་ཉིད་ཀྱི་ཕྱིར་རོ་ཞེས་པ་འདི་ལས་ཐོབ་པའོ། །རྒྱུར་བྱས་ནས་ཞེས་པ། རྟགས་ཀྱི་སྒྲ་འདི་ནི་རྒྱུའི་རྣམ་གྲངས་ཏེ། བྱིངས་རྣམས་ནི་དུ་མའི་དོན་ཅན་ཉིད་ཀྱི་ཕྱིར་རོ། །
[116b]
[116b.1]འདིས་འབྲས་བུ་རྟགས་སུ་བྱེད་སྐྱེད་པར་བྱེད་ཅེས་བྱེ་བྲག་ཏུ་བཤད་པ་ལས་སོ། །རྟགས་རྟོགས་པ་ཡང་རྗེས་སུ་དཔག་པར་བྱ་བ་རྟོགས་པའི་རྒྱུར་འགྱུར་རོ། །དེའི་ཕྱིར་གང་ཡང་གསུངས་པ། འབྲེལ་པ་མེད་ཕྱིར་རྟགས་བློ་མིན། །རྟགས་སོ་ཞེས་པ་འདི་གྲུབ་པ་བསྒྲུབ་པར་བྱ་བ་
[116b.2]ཉིད་དེ། བྱེད་རྒྱུའི་རྒྱུ་བརྗོད་པར་འདོད་པ་ཉིད་ཀྱི་ཕྱིར་རོ་ཞེ་ན། དེ་ཡང་མ་ཡིན་ཏེ་ཞེས་པ་ལ་སོགས་པས་སེལ་བར་བྱེད་དེ། རྗེས་སུ་དཔག་པར་བྱ་བའི་མཚན་མར་གྱུར་པའི་ཞེས་པ་ཤེས་པར་བྱེད་པར་འགྱུར་བའི་ཞེས་པའི་དོན་ཏེ། རྗེས་སུ་དཔག་པར་བྱ་བ་མཚོན་པར་བྱེད་ཤེས་པར་
[116b.3]བྱེད་ཅེས་བྱས་ནས་སོ། །རྣམ་པ་གཞན་དུ་ན་ནི་ཞེས་པ་གལ་ཏེ། སྐྱེད་པར་བྱེད་པ་ཡང་རྟགས་ཀྱི་སྐབས་སུ་འགྱུར་བ་ཡིན་ན། བདག་དང་དབང་པོ་དང་ཡིད་དང་དོན་དང་ཕྲད་པ་ཡང་བརྗོད་པར་བྱ་བར་འགྱུར་ཏེ། དེ་རྣམས་ཀྱང་རྗེས་སུ་དཔག་པར་བྱ་བའི་ཤེས་པའི་རྒྱུ་རྣམས་ཡིན་པས་སོ་ཞེས་པ་སྟེ།
[116b.4]བརྗོད་པ་ནི་མ་ཡིན་ནོ། །དེའི་ཕྱིར་འདིར་སྐྱེད་པར་བྱེད་པའི་སྐབས་མ་ཡིན་ནོ་ཞེས་པའོ། །དེར་འགྱུར་མོད། རྗེས་སུ་དཔག་པར་བྱ་བའི་ཤེས་པའི་ངོར་རྟགས་ཀྱི་ཤེས་པ་ནི་དངོས་ཀྱི་རྒྱུ་ཉིད་དེ། གཞན་གྱི་ནི་མ་ཡིན་ནོ། །དེའི་ཕྱིར་དངོས་ཀྱི་རྒྱུ་ཉིད་ཀྱི་ཕྱིར་རྟགས་ཀྱི་ཤེས་པ་ཁོ་ན་བརྗོད་དོ་ཞེ་ན་
[116b.5]གསུངས་པ། དངོས་སུ་མ་ཡིན་ཞེས་པ་ལ་སོགས་པའོ། །ཅི་ལྟར་མ་ཡིན་ཞེ་ན་གསུངས་པ། འབྲེལ་པ་དྲན་པས་བར་དུ་ཆོད་པ་ཉིད་ཀྱི་ཕྱིར་རོ་ཞེས་པའོ། །འབྲེལ་པ་དྲན་པ་གྲུབ་པར་འགྱུར། །ཞེས་པ་ཚིག་འདི་ལས་འབྲེལ་པ་དྲན་པ་འགྲུབ་ཀྱི། འབྲེལ་པ་ཅན་དུ་བ་ལ་སོགས་པ་ལ་
[116b.6]ནི་རྟོགས་པ་མ་ཡིན་ནོ། །དེ་ལྟར་ནི་བཤད་འགྲེལ་ལས། གང་གི་དུ་བ་ལ་སོགས་པ་རྣམས་མེ་ལ་སོགས་པ་རྣམས་དང་འབྲེལ་པ་གྲུབ་པ་ཞེས་པ་ལ་སོགས་པས། འདི་སྐད་དུ་འཆད་པར་འགྱུར་བ་ཞེས་པས་དོན་འདི་ལ་ཤེས་པར་བྱེད་པ་གསུངས་སོ། །གང་གི་ཕྱིར་དེ་ཉིད་དུ་བཤད་པ་རབ་ཏུ་
[116b.7]གྲུབ་པ་སྔོན་མ་ཅན་ཁོ་ནའི་དམིགས་ཀྱིས་བསྟན་པ་ཞེས་པ་ཅི་ལྟར་རྟོགས་པར་བྱ་ཞེ་ན། བརྗོད་པར་བྱ་སྟེ། དོན་གཞན་གྱི་དངོས་པོ་ཡོད་ན། གང་གི་ཕྱིར་རབ་ཏུ་མ་གྲུབ་པ་ནི་དམིགས་ཀྱིས་བསྟན་པ་མ་ཡིན་ནོ། །ཅི་ལྟར་ཞེ་ན། གང་ཞིག་གི་དུ་བ་ལ་སོགས་པ་རྣམས་མེ་ལ་སོགས་པ་རྣམས་དང་
[117a]
[117a.1]འབྲེལ་པ་རབ་ཏུ་གྲུབ་པ་མ་ཡིན་པ་དེའི་ངོར་དུ་བ་ལ་སོགས་པ་རྣམས་དམིགས་ཀྱིས་བསྟན་པ་མ་ཡིན་པའོ་ཞེས་པ་དེའི་ཕྱིར་རྟགས་ཀྱི་ཤེས་པ་རྟགས་ལས་བྱུང་བ་ཉིད་ལ་འདི་ཤེས་པར་བྱེད་པ་མ་ཡིན་ནོ། །འབྲས་བུ་ལ་སོགས་པ་མདོར་མ་བརྗོད་ཅེས་པ་བསྟན་བཅོས་སུ།
[117a.2]འབྲས་བུ་ཉིད་ཀྱི་ཕྱིར་དང་། རྒྱུ་ལས་རྣམ་པར་འགྱུར་བའི་ཕྱིར་དང་ཡང་དག་པར་ལྡན་པའི་ཕྱིར་དང་། རྣམ་པར་དབྱེ་བ་ལས་དང་། སྒྲ་ལས་དང་། སྒྲ་གྲུབ་པ་ལས་ཀྱང་། སྒྲ་མི་རྟག་གོ་ཞེས་པའོ། །འབྲས་བུ་ཉིད་ལ་སོགས་པ་སྒྲ་མི་རྟག་པའི་གཏན་ཚིགས་བཤད་པ་རྣམས་དང་། དེ་
[117a.3]བཞིན་དུ་ཡོད་པའི་རྒྱུ་དང་ལྡན་པ་མ་ཡིན་པ་ནི་རྟག་པའོ་ཞེས་རྟག་པ་ཉིད་སྒྲུབ་པའི་ཆེད་དུ་ཡོད་པའི་རྒྱུ་དང་ལྡན་པ་མ་ཡིན་པ་ཉིད་བཤད་དོ། །འབྲས་བུ་ཉིད་ལ་སོགས་པ་དེ་རྣམས་རྟགས་ཉིད་དུ་བརྗོད་པ་མ་ཡིན་ནོ་ཞེས་པས་མཚན་ཉིད་མ་ཚང་བ་ཉིད་དོ། །དེ་ལ་འདིར་འགྱུར་གྱི་དེ་རྣམས་ཀྱང་
[117a.4]འབྲས་བུ་ཉིད་ལ་སོགས་པ་རྣམས་ཀྱི་ནང་དུ་འདུའོ་ཞེ་ན་གསུངས་པ། འདི་རྣམས་ཞེས་པ་ལ་སོགས་པའོ། །འདི་རྣམས་ཀྱི་སྟེ་མི་རྟག་པ་ཉིད་ལ་སོགས་པ་རྟགས་རྣམས་ཀྱིའོ། །གང་ཡང་རུང་བ་ཞེས་པ་གཅིག་ཀྱང་ངོ་ཞེས་པའི་དོན་ཏོ། །འོ་ན་འབྲས་བུ་ཉིད་དང་ཡོད་པའི་རྒྱུ་མ་ཡིན་པ་ཉིད་ཀྱང་
[117a.5]དོན་གཅིག་ལ་འདུ་བ་ཅན་ཉིད་ཀྱི་ནང་དུ་འདུས་པར་འགྱུར་བ་མ་ཡིན་ནམ། དོན་གཅིག་ལ་སྟེ་སྒྲ་ལ་སོགས་པ་ལ་འབྲས་བུ་ཉིད་དང་མི་རྟག་པ་ཉིད་དག་དང་། བདག་ལ་སོགས་པ་ལ་རྟག་པ་ཉིད་དང་ཡོད་པའི་རྒྱུ་མ་ཡིན་པ་ཉིད་དག་འདུས་པའི་ཕྱིར་རོ་ཞེ་ན། འདི་ནི་ཡོད་པ་མ་ཡིན་ཏེ། དོན་གཅིག་
[117a.6]ལ་འདུ་བ་ཅན་ནི་འབྲས་བུ་འབྲས་བུ་གཞན་ལ་དང་རྒྱུ་རྒྱུ་གཞན་ལའོ་ཞེས་བཤད་ལ། འདིར་འབྲས་བུ་དང་རྒྱུའི་དངོས་པོ་སྲིད་པ་ཡང་མ་ཡིན་ནོ། །གསལ་བར་བྱ་བ་དང་གསལ་བར་བྱེད་པ་ཉིད་ཀྱི་ཞེས་པ། མི་རྟག་པ་ཉིད་གསལ་བར་བྱ་བ་ཉིད་ཀྱི་ཕྱིར་འབྲས་བུ་སྟེ། འབྲས་བུ་ཉིད་ནི་གསལ་བར་
[117a.7]བྱེད་པ་ཉིད་ཀྱི་ཕྱིར་རྒྱུའོ་ཞེས་པ་སྟེ། དེ་བཞིན་དུ་གཞན་ལ་ཡང་རིག་པར་བྱའོ། །ལྷག་མ་གསལ་བྱེད་མིན་པ་འཐོབ། །ཅེས་པ་རྣམ་པ་གཞན་དུ་ན་ཐ་དད་པར་ངེས་པར་བསྟན་པ་ཁོ་ནར་མི་འགྱུར་ན། དེ་ཡང་ཡོད་དོ། །དེས་ན་གསལ་བྱ་གསལ་བྱེད་ཉིད་ཀྱིས་འདིར་འབྲས་བུ་དང་རྒྱུ་ཉིད་
[117b]
[117b.1]དུ་མངོན་པར་དགོངས་པའོ་ཞེས་རྟོགས་པར་བྱ་བ་མ་ཡིན་ནོ། །དོན་མེད་གཞན་ལ་དེ་རྟོགས་ཕྱིར། །ཞེས་པ་ལ། དོན་མེད་པ་ནི་དགོས་པ་དང་བྲལ་བའོ། །གཞན་ལས་ཞེས་པ་མེད་ན་མི་འབྱུང་བ་ལས་སོ། །མེད་ན་མི་འབྱུང་བ་ཉིད་ཀྱིས་ནི། དུ་བ་ལ་སོགས་པའི་རྟགས་ལས་
[117b.2]རྗེས་སུ་དཔག་པར་བྱ་བ་རྟོགས་ནས། འདི་ནི་འདིའི་གསལ་བར་བྱེད་པའོ་ཞེས་ཡིད་ཀྱིས་བརྟག་པར་བྱ་བའོ། །དེའི་ཕྱིར་དོན་མེད་པ་སྟེ་འདི་རྗེས་སུ་དཔོག་པའི་རྒྱུར་རྟོགས་པ་ཞེས་པ་ལྷག་མའོ། །ཡང་ན་རྟོག་པར་བྱེད་དོ་ཞེས་པའི་དཀྱུས་མ་འདིར་ཡང་སྦྲེལ་བར་བྱའོ། །ཕ་རོལ་པོས་
[117b.3]དགོས་པ་མེད་པ་ཁོ་ནར་འདི་རྗེས་སུ་དཔོག་པའི་རྒྱུ་ཉིད་དུ་རྟོག་པར་བྱེད་དོ་ཞེས་པའི་དོན་ཏོ། །གཞན་རྣམས་ཀྱང་འདི་སྐད་སྨྲ་བར་བྱེད་དེ། མེད་ན་མི་འབྱུང་བ་ཁོ་ན་འབྲེལ་པ་སྟེ། རྗེས་སུ་དཔོག་པའི་རྒྱུར་བསྟན་བཅོས་འདིར་ངེས་པར་བསྟན་ལ། རྗེས་སུ་དཔག་པའི་དབྱེ་བ་རབ་ཏུ་བསྟན་པའི་དོན་དུ་
[117b.4]ནི་འབྲས་བུ་དང་། རྒྱུའི་དངོས་པོ་ལ་སོགས་པའི་འབྲེལ་པ་ཉེ་བར་བླངས་ཏེ། དེ་ལས་ཀྱང་སྐྱོན་ཐམས་ཅད་མེད་དོ་ཞེས་སོ། །དེ་མི་རིགས་ཏེ་རྒྱུ་དང་རྟགས་ཉིད་དུ་ངེས་པར་བསྟན་པའི་ཕྱིར་དང་། དེ་ལ་ཡང་མེད་ན་མི་འབྱུང་བ་མེད་པའི་ཕྱིར་ཏེ། སྲིད་པར་རྗེས་སུ་དཔོག་པ་ཡང་ཕ་རོལ་པོའི་དངོས་
[117b.5]པོས་མི་སྲིད་པའི་ཕྱིར་རོ་ཞེས་པའོ། །གྲངས་ཅན་པ་རྣམས་ཀྱི་ཡང་ཞེས་པ་ལ་སོགས་པ་སྟེ། རྗེས་སུ་དཔག་པ་རྒྱ་ཆེར་རིག་པར་བྱའོ་ཞེས་གནས་པ་ལ། དེའི་རང་གི་ངོ་བོ་ཡོངས་སུ་ཤེས་པར་བྱ་བའི་ཆེད་དུ་ཕ་རོལ་པོས་རྗེས་སུ་དཔག་པ་ཞེས་བྱ་བ་འདི་ཅི་ཞེས་བརྗོད་པ་ལ་སྨྲས་པ། འབྲེལ་པ་གཅིག་
[117b.6]ལས་ཞེས་པ་ལ་སོགས་པའོ། །འབྲེལ་པ་རྣམ་པ་བདུན་ནོ་ཞེས་པ། དོན་རྣམས་ཀྱི་འབྲེལ་པ་ནི་རྣམ་པ་བདུན་ཉིད་དེ། ནོར་དང་བདག་པོའི་དངོས་པོས་དང་། །ཞེས་པ་ལ་སོགས་པ་བཤད་འགྲེལ་དུ་བཤད་པའི་ཕྱིར་རོ། །འབྲེལ་པ་རྣམས་ཀྱི་དོན་རྣམས་ཀྱི་ཞེས་ངེས་པར་བསྟན་པ་ལས་མདོ་རུ་
[117b.7]ལས་སྒྲུབ་པར་འབྲེལ་བའི་སྒྲར་ཤེས་པར་བྱའོ། །ནོར་དང་བདག་པོའི་དངོས་པོས་དང་། །ཞེས་པ། རྒྱལ་པོ་དང་བྲན་བཞིན་དང་། གཙོ་བོ་དང་སྐྱེས་བུ་བཞིན་ཏེ། དཔེར་བརྗོད་པ་གཉིས་ནི་འཇིག་རྟེན་དང་བསྟན་བཅོས་ལ་རབ་ཏུ་གྲགས་པའི་དབང་གིས་སོ། །དེ་བཞིན་དུ་ཕྱི་མ་ལ་ཡང་ཤེས་པར་
[118a]
[118a.1]བྱའོ། །ནོར་དང་བདག་པོའི་དངོས་པོ་ནི་ཕན་ཚུན་ལྟོས་པ་སྟེ། ནོར་བདག་པོའི་ངོར་ཡོད་པ་དང་། དེར་རུང་བ་ཉིད་དེ། དེ་བཞིན་དུ་ནོར་ཅན་གྱི་ཡང་ནོར་གྱི་ངོར་ཡོད་པའོ། །རང་བཞིན་དང་རྣམ་འགྱུར་གྱི་དངོས་པོས་ནི། ཞོ་དང་འོ་མ་བཞིན་དང་། གཙོ་བོ་དང་ཆེན་པོ་ལ་
[118a.2]སོགས་པ་བཞིན་ནོ། །རང་བཞིན་ནི་རྣམ་པར་དབྱེར་མེད་པར་རྒྱུ་སྟེ། རྣམ་འགྱུར་ནི་དེའི་ཡོངས་སུ་འགྱུར་བ་ཅན་གྱི་ཆོས་སོ། །འབྲས་བུ་དང་རྒྱུའི་དངོས་པོས་ནི། ཕན་ཚུན་ཕན་འདོགས་པའི་མཚན་ཉིད་ཀྱིས་ཏེ། ཤིང་རྟ་དང་ཡན་ལག་བཞིན་དང་། སྙིང་སྟོབས་ལ་སོགས་པ་བཞིན་ཏེ། སྒྲ་ལ་
[118a.3]སོགས་པའི་དངོས་པོས་ཡོངས་སུ་འགྱུར་བ་ནའོ། །རྒྱུ་མཚན་དང་རྒྱུ་མཚན་ཅན་གྱི་དངོས་པོས་ནི། གང་ཡང་རུང་བས་ཕན་འདོགས་པའི་མཚན་ཉིད་ཀྱིས་ཏེ། རྫ་མཁན་དང་བུམ་པ་བཞིན་དང་། སྐྱེས་བུ་དང་གཙོ་བོའི་འཇུག་པ་བཞིན་ནོ། །ཙམ་པོ་དང་ཙམ་པོ་ཅན་གྱི་དངོས་པོས་ཡང་
[118a.4]ནའོ། །ཡན་ལག་དང་ཡན་ལག་ཅན་གྱི་དངོས་པོའི་མཚན་ཉིད་ཀྱིས་ནི་ཡལ་ག་ལ་སོགས་པ་དང་ཤིང་བཞིན་དང་། སྒྲ་ལ་སོགས་པ་དང་འབྱུང་བ་ཆེན་པོ་བཞིན་ནོ། །ལྷན་ཅིག་སྤྱོད་པའི་དངོས་པོས་ནི། ངུར་པ་ལྟ་བུ་དང་། སྙིང་སྟོབས་ལ་སོགས་པ་བཞིན་ནོ། །གནོད་བྱ་གནོད་བྱེད་ཀྱི་
[118a.5]དངོས་པོས་ནི་སྦྲུལ་དང་སྦྲེ་མོ་བཞིན་དང་། ཡན་ལག་དང་ཡན་ལག་ཅན་དུ་གྱུར་པའི་སྙིང་སྟོབས་ལ་སོགས་པ་བཞིན་ནོ། །སྙིང་སྟོབས་ལ་སོགས་པ་རྣམས་ཀྱི་ནི་གང་གི་ཡན་ལག་ཅན་ཉིད་དེས་ཅིག་ཤོས་ཟིལ་གྱིས་གནོན་པའི་ཕྱིར་རོ། །འདི་ནི་འབྲེལ་པ་རྣམ་པ་བདུན་ཏེ། དེས་ན་ཇི་ལྟར་སྲིད་པ་
[118a.6]བཞིན་འབྲེལ་པ་གཅིག་ལས་ཞེས་པ། ཇི་སྐད་བཤད་པ་དོན་གང་ཞིག་དབང་པོ་འགའ་ཞིག་གི་མངོན་སུམ་དུ་འགྱུར་བ་དེ་ལས། ད་ལྟར་དབང་པོའི་མངོན་སུམ་པའི་དོན་ལས་སྔར་ཚོགས་པ་ལ་འབྲེལ་པ་བྱས་པ་ལས་བློས་ནི་ཁྱད་པར་དུ་མ་བྱས་པའི་དོན་ཡོད་པ་ཉིད་དུ་རྟོགས་པར་བྱེད་དེ། དཔེར་ན་
[118a.7]སྔར་དུ་བ་དང་མེ་དག་གི་འབྲེལ་པ་མཐོང་ནས་དུ་བ་མཐོང་བ་ལས་མེ་ཡང་ཡོད་པ་ཉིད་དུ་རྟོགས་སོ་ཞེས་སོ། །འགྲུབ་པའི་རྒྱུ་ཞེས་པ། རྟགས་ཀྱི་ཤེས་པ་འབྲེལ་པ་དྲན་པ་ལ་ལྟོས་པ་སྟེ། དེ་ནི་ཁྱད་པར་མངོན་སུམ་མ་ཡིན་པའི་རྟགས་ཅན་མི་འགྲུབ་པའི་རྒྱུའོ། །འགྲུབ་པ་ནི་འབྲས་བུའོ། །མདོ་རུ་
[118b]
[118b.1]ནི་རྒྱུ་ལས་འབྲས་བུ་ཉེ་བར་བཏགས་པའི་ཕྱིར་ལྷག་མ་འགྲུབ་པ་ནི་རྗེས་སུ་དཔག་པ་ཞེས་བཤད་དོ། །རྟགས་ཀྱི་ཤེས་པ་ནི། ཅུང་ཟད་མ་ངེས་པར་ཡང་འགྱུར། །ཞེས་པ། རླངས་པ་ལ་སོགས་པ་དང་ཐུན་མོང་བའི་སྐྱ་བོ་ཉིད་ལ་སོགས་པ་ཙམ་མཐོང་བ་བཞིན་ཏེ། ཅི་འདི་དུ་བའམ། འོན་ཏེ་རླངས་
[118b.2]པ་ལ་སོགས་པ་ཞེས་ཐེ་ཚོམ་ཟ་བའི་ཕྱིར་རོ། །དོན་ཇི་ལྟ་བ་བཞིན་མ་ཡིན་པ་ཡང་ཞེས་པ་རླངས་པ་ལ་སོགས་པ་ལ་དུ་བའོ་ཞེས་འཛིན་པའི་ཕྱིར་རོ། །ཁྱད་པར་དུ་བྱ་བའི་དོན་དུ་ཕྱིས་ཀྱི་རྩོམ་པ་ཞེས་པ། གང་བཤད་པ་མངོན་སུམ་གཅིག་ལས་ཞེས་པ་དེའི་འདི་ཁྱད་པར་རོ། །མངོན་སུམ་ཡང་
[118b.3]ཡིན་ལ་ངེས་པར་མ་བཟུང་བ་ཡང་ངོ་ཞེས་པ། སྤྱི་ལས་ཏེ། རྣ་བ་ལ་སོགས་པའི་འཇུག་པས་འཛིན་པའི་ཕྱིར་མངོན་སུམ་མོ། །བྱེ་བྲག་ཏུ་ནི། ཐེ་ཚོམ་དང་ཕྱིན་ཅི་ལོག་པ་དག་གིས་ངེས་པར་མ་ཟིན་པའོ། །བྱེ་བྲག་མཐོང་བ་ལས་ཞེས་པ་ལ། ཁྱད་པར་དུ་བྱེད་པས་ན་བྱེ་བྲག་རྣམས་ཏེ། དུ་བ་ཁོ་
[118b.4]ན་ལ་འཇུག་པའི་ཁྱད་པར་གང་ཡིན་པ་སྐྱ་བོ་ཉིད་ལ་སོགས་པ་རྣམས་སོ། །དེ་མཐོང་བ་ལས་ཁྱད་པར་དུ་རྟོགས་པ་སྟེ། འདི་ནི་དུ་བ་ཁོ་ནའོ་ཞེས་པ་འདི་ལྟར་རོ། །ཐམས་ཅད་ཅེས་པ་འདི་གཞུང་ལྷག་མ་གསལ་བར་བྱེད་དོ། །དེ་ཡང་འདི་ལྟ་སྟེ། སྣང་བ་ཞན་ཅིང་གཞན་པར་བ་ལང་
[118b.5]དང་རྟ་འོས་པའི་ས་ཕྱོགས་སུ། བ་ལང་གི་ཚད་ཀྱི་གཟུགས་དུམ་པ་མཐོང་ནས། ཐེ་ཚོམ་དང་ལྡན་པའི་བློ་ནི་ཁྱད་པར་མཐོང་བ་ལས་བྱེ་བྲག་ཏུ་རྟོགས་པར་བྱེད་དེ། བ་ལང་ངོ་། །རྟའོ་ཞེས་པར་ཡང་ངོ་། །གཟུགས་དུམ་པ་མཐོང་ནས་ཞེས་པ། གཟུགས་ཅུང་ཟད་ཙམ་མཐོང་ནས་ཏེ། དབྱིབས་ཙམ་
[118b.6]མཐོང་ནས་ཞེས་པའི་དོན་ཏོ། །འདི་ལྟར་ཡང་འདོད་ན་ཞེས་པ་སྤྱིར་བཟུང་བའི་རྟགས་ཀྱི་སླར་ཡང་ཁྱད་པར་དུ་འཛིན་པར་འདོད་ནའོ། །རང་དོན་ལྟ་བ་ཙམ་ཉིད་ཕྱིར། །ཞེས་པ་སྒྲ་ལ་སོགས་པའི་རང་གི་མཚན་ཉིད་ཉམས་སུ་མྱོང་བ་ཙམ་ཉིད་ཀྱི་ཕྱིར་ཞེས་པའི་དོན་ཏོ། །ཙམ་གྱི་སྒྲ་ནི་སྤྱི་དང་ཁྱད་པར་འཛིན་པ་
[118b.7]བསལ་བའི་དོན་ཏོ། །རྣ་བ་ལ་སོགས་པའི་འཇུག་པའི་ནི་མ་ཡིན་ཞེས་པ་ལ་སོགས་པ་སྟེ། སྤྱི་དང་ཁྱད་པར་དག་ནི་དོན་གཞན་ལ་ལྟོས་པ་དག་སྟེ། དེའི་ཕྱིར་དོན་གཞན་ལ་ལྟོས་པས། འདི་འདི་དང་མཚུངས་པའམ། འདི་ནི་འདི་ལས་ཁྱད་པར་རོ་ཞེས་པར་འགྱུར་རོ། །རྣ་བ་ལ་སོགས་པའི་འཇུག་
[119a]
[119a.1]པ་ནི་འདི་ལྟ་བུར་འཛིན་པ་ལ་ནུས་པ་ཡང་མ་ཡིན་ཏེ། རྣམ་པར་རྟོག་པ་མེད་པ་ཉིད་ཀྱི་ཕྱིར་རོ་ཞེས་པས། དབང་པོའི་འཇུག་པའི་ནི་སྤྱི་འམ་ཁྱད་པར་ཡུལ་མ་ཡིན་ནོ། །དོན་ཇི་ལྟ་བ་བཞིན་མ་ཡིན་པ་ཉིད་ཀྱི་ཕྱིར་རོ་ཞེས་པ། སྤྱིའི་ཡུལ་ཅན་གྱི་དབང་པོའི་བློའིའོ། །དེ་
[119a.2]སྐད་དུ་ནི་བཤད་པ། སྤྱི་ལས་ནི་ངེས་པར་ཡང་མངོན་སུམ་ངེས་པར་མ་བཟུང་བ་ཡང་ངོ་ཞེས་སོ། །དེ་ཁོ་ན་ཁྱད་པར་དུ་ལེན་པར་བརྗོད་པར་བྱ་སྟེ་ཞེས་པ། དོན་ཇི་ལྟ་བ་བཞིན་པའི་རྣ་བ་ལ་སོགས་པའི་འཇུག་པ་མངོན་སུམ་མོ་ཞེས་པའོ། །ཇི་སྐད་དུ་གཞན་དུ་ཞེས་པ་རིགས་པ་ཕྲ་མོར་རོ། །
[119a.3]དེ་ལྟར་བརྗོད་པར་བྱ་བཞིན་པ་ན། མངོན་སུམ་གྱི་མཚན་ཉིད་ཀྱང་སྐྱོན་མེད་པར་འགྱུར་ཞིང་། འདིར་ཡང་ཁྱད་པར་བྱ་བ་མ་ཡིན་པར་འབྱུང་སྟེ། ངེས་པར་མ་བཟུང་བའི་རྟགས་ནི་མངོན་སུམ་མ་ཡིན་པ་ཉིད་ཀྱི་ཕྱིར་རྟགས་མ་ཡིན་པ་ཉིད་དུ་ཐལ་བར་འགྱུར་བའི་ཕྱིར་རོ། །འདིར་ཁ་ཅིག་སྨྲ་
[119a.4]བར་བྱེད་དེ། གལ་ཏེ་ཡང་མངོན་སུམ་རང་གི་དོན་ལ་ལྟ་བ་ཙམ་ཡིན་པ་དེ་ལྟ་ན་ཡང་སྤྱི་དང་ཁྱད་པར་གྱི་ཡུལ་ཅན་ཉིད་དུ་མི་འགྱུར་བ་མ་ཡིན་པ་ཁོ་ན་སྟེ། སྤྱི་དང་ཁྱད་པར་དག་ནི་སྒྲ་ལ་སོགས་པ་ལས་དོན་གཞན་མ་ཡིན་པ་ཉིད་ཀྱི་ཕྱིར་ཏེ། རྣམ་པ་ཐམས་ཅད་དུ་སྒྲ་ལ་སོགས་པ་དབང་པོའི་ཡུལ་
[119a.5]ཉིད་ཀྱི་ཕྱིར་རོ་ཞེའོ། །དེ་མི་རིགས་ཏེ་རང་གི་ཡུལ་ལ་རྣམ་པར་འཇུག་པ་ལ་གནོད་པར་ཐལ་བར་འགྱུར་བའི་ཕྱིར་རོ། །དེ་ལྟར་ནི་གང་སྒྲ་ལ་འཇུག་པའི་སྤྱི་དེ་ཁོ་ན་ནི་གཟུགས་ལ་སོགས་པ་ལ་ཡང་འཇུག་སྟེ། དེ་ལྟར་དེ་སྒྲ་ལས་གཞན་མ་ཡིན་པ་དེ་ལྟར་གཟུགས་ལ་སོགས་པ་ལས་ཀྱང་ངོ་། །དེ་རྣ་བའི་
[119a.6]འཇུག་པས་འཛིན་པ་ན་གཟུགས་ལ་སོགས་པ་ཡང་འཛིན་པར་ཐལ་བར་འགྱུར་ཞིང་། གཟུགས་ལ་སོགས་པ་དུ་མ་ལས་ཀྱང་གཞན་མ་ཡིན་པ་ཉིད་ཀྱི་ཕྱིར་སྤྱི་གཅིག་པ་མ་ཡིན་པ་ཉིད་དང་། གཟུགས་ལ་སོགས་པ་རྣམས་ཀྱང་གཅིག་པོ་དེ་ལས་གཞན་མ་ཡིན་པ་ཉིད་ཀྱི་ཕྱིར་གཅིག་ཉིད་དུའོ་
[119a.7]ཞེས་པའོ། །མངོན་སུམ་གྱི་འབྲས་བུ་མངོན་སུམ་ཞེས་པ་སྟེ། གང་འདི་ལྟར་ཡང་འདོད་ན་ཞེས་པ་ལ་སོགས་པ་གསུངས་པ་དེའི་ལན་འདི་ཡིན་ནོ། །ཡིད་ཀྱི་འཇུག་པ་ནི་རྣམ་པར་རྟོག་པ་ཅན་ཉིད་ཀྱི་ཕྱིར་ཏེ་སྤྱི་དང་ཁྱད་པར་གྱི་ཡུལ་ཅན་ཉིད་ཀྱི་ཕྱིར་རོ། །དེ་ཡང་མི་དམིགས་སོ་ཞེས་པ།
[119b]
[119b.1]གལ་ཏེ་ཡིད་ཀྱི་འཇུག་པ་མངོན་སུམ་གྱི་འབྲས་བུ་ཉིད་དུ་གྱུར་ན། དེ་ལྟར་ཐ་སྙད་དུ་བསྟན་པར་འགྱུར་ལ། དེ་ཡང་ཡོད་པ་མ་ཡིན་ཏེ། ཡུལ་ཐ་དད་པ་ཉིད་ཀྱི་ཕྱིར་རོ། །འདི་ཡང་སྔར་ཁོ་ནར་བརྗོད་ཟིན་ཏོ། །དེའི་ཕྱིར་དེ་མངོན་སུམ་གྱི་སྒྲས་ཐ་སྙད་དུ་བསྟན་པར་བྱ་བ་ཉིད་དུ་མི་འཐད་
[119b.2]པར་སྟོན་ཏོ། །གཞན་གྱི་འང་མ་ཡིན་ཞེས་པ་ལ་སོགས་པ་སྟེ། མངོན་སུམ་ལས་སམ། དེའི་འབྲས་བུ་ལས་གཞན་གྱི་ཡུལ་ལ་ཉེ་བར་འདོགས་པའི་རྒྱུ་མེད་པའི་ཕྱིར་རོ། །ཡང་ན་འགའ་ཞིག་འདི་སྐད་དུ་སྨྲ་བར་བྱེད་དེ། མངོན་སུམ་གཅིག་ལས་ཞེས་པའི་མངོན་སུམ་གྱི་སྒྲ་འདི་ནི་རབ་ཏུ་
[119b.3]གྲུབ་པ་ཉིད་ཉེ་བར་མཚོན་པར་བྱེད་དོ། །མངོན་སུམ་ལས་ཏེ་རབ་ཏུ་གྲུབ་པ་ལས་ཞེས་པའི་དོན་ཏོ། །དེས་ན་མངོན་སུམ་ལས་དང་། མངོན་སུམ་གྱི་འབྲས་བུ་ལས་གཞན་པའི་ཡང་ཤེས་པའི་ཡུལ་གྱི་རྟགས་ལ། མངོན་སུམ་ཐ་དད་དུ་བསྟན་པར་འགྱུར་རོ་ཞེའོ། །དེའི་ཕྱིར་གསུངས་
[119b.4]པ། གཞན་གྱིའང་མ་ཡིན་ཞེས་པ་ལ་སོགས་པའོ། །འདི་ལྟར་སེམས་ཏེ་རབ་ཏུ་གྲུབ་པ་ཉིད་ནི་མངོན་སུམ་ལ་སོགས་པའི་ཚད་མས་འགྱུར་ཞིང་། དེ་ལ་རེ་ཞིག་དེ་མངོན་སུམ་གྱིས་ཉེ་བར་རྟོགས་པ་ནི་མ་ཡིན་ཏེ། ཇི་སྐད་བཤད་པའི་རྣམ་པའི་ཕྱིར་རོ། །རྗེས་སུ་དཔག་པས་
[119b.5]ཀྱང་མ་ཡིན་པ་ཁོ་ན་སྟེ། ཐུག་པ་མེད་པར་ཐལ་བར་འགྱུར་བའི་ཕྱིར་རོ། །གང་ཕྱིར་རྟགས་གང་གིས་དུ་བ་རྗེས་སུ་དཔག་པར་བྱ་བ་དེ་བསྒྲུབ་པའི་ཆེད་དུ་རྟགས་གཞན་རྗེས་སུ་འདོད་ན། དེ་འགྲུབ་པའི་ཆེད་དུ་ཡང་གཞན་ནོ་ཞེས་པས་ཐུག་པ་མེད་པར་ཐལ་བར་འགྱུར་རོ། །ལུང་ཡང་རྟག་ཏུ་རྟགས་
[119b.6]འཛིན་པ་ལ་བྱ་བ་དང་ལྡན་པ་མ་ཡིན་ཏེ། གྲུབ་པའི་མཐའི་གཞུང་ལུགས་ལ་མ་བརྟེན་པའི་རྟགས་ལུང་གིས་ཡོངས་སུ་གཅོད་པ་མ་ཡིན་པས་སོ། །དོན་འགའ་ཞིག་དབང་པོ་འགའ་ཞིག་གི་མངོན་སུམ་དུ་འགྱུར་རོ་ཞེས་བཤད་འགྲེལ་དུ་བརྗོད་པའི་ཕྱིར་ཡང་འདི་མི་རིགས་སོ་ཞེས་པའོ། །མངོན་སུམ་དུ་
[119b.7]ཐ་སྙད་དུ་བྱ་བ་ཅི་ཞིག་ལྟར་ཡིན་པར་འགྱུར་དུ་ཆུག་མོད་ཞེས་ཁས་བླངས་ནས་སྐྱོན་གཞན་བརྗོད་པར་འདོད་པས་གསུངས་པ། འདི་ཡང་བརྗོད་པར་བྱ་བ་ཞེས་པ་ལ་སོགས་པའོ། །ནོར་ལ་སོགས་པ་འབྲེལ་པ་ཅན་ལས་ནོར་ཉིད་ལ་སོགས་པའི་ངོ་བོ་ཁོ་ནས་སམ། ཡང་ན་ངོ་བོ་གཞན་གྱིས་འཛིན་པར་
[120a]
[120a.1]འགྱུར་རོ། །གལ་ཏེ་ནོར་ཉིད་ལ་སོགས་པའི་ངོ་བོས་ནོར་ཞེས་པ་འདི་ལྟར་གཟུང་བར་བྱ་བ་ཡིན་ན། དེ་ལྟར་གྱུར་ན་རྗེ་བོའི་འབྲེལ་པ་ཅན་ཉིད་ཀྱི་ཕྱིར། ནོར་གྱིས་རྗེ་བོ་མེད་པར་ནོར་ཉིད་མི་འཐད་པའི་ཕྱིར། རྗེ་བོ་ལ་ངེས་པར་ལྟོས་པ་ཉིད་ཀྱི་ཕྱིར་ན་རྟགས་མཐོང་བ་ལས་སྔར་ཁོ་ནར་
[120a.2]རྗེ་བོར་རྟོགས་པས་འབྱུང་བར་འོས་ཏེ། རྣམ་པ་གཞན་དུ་ན་འདི་འདིའི་ནོར་རོ་ཞེས་པ་འདི་ལྟར་འཛིན་པ་མི་སྲིད་པ་མ་ཡིན་པས་སོ། །དེ་ལས་ཀྱང་དུས་ཕྱིས་འབྲེལ་པ་དྲན་པ་དོན་མེད་པར་འགྱུར་རོ། །རྗེ་བོ་ནི་སྔར་ཁོ་ནར་གྲུབ་ཟིན་པ་ཉིད་ཀྱི་ཕྱིར་རོ། །ལྷག་མ་མི་འཐད་པའི་ཕྱིར་ཏེ། ལྷག་མས་གྲུབ་པ་
[120a.3]ཡང་རྗེས་སུ་དཔག་པ་ཉིད་དུ་འདོད་པ་ཉིད་ཀྱི་ཕྱིར་རོ། །ཅི་སྟེ་རྣམ་པ་གཞན་དུ་ན་རྣམ་པ་གཞན་གྱིས་འཛིན་པར་འདོད་ན། དེ་མ་བརྗོད་དོ་ཞེས་པས་མཚན་ཉིད་ཡོངས་སུ་མ་རྫོགས་པ་ཉིད་དོ། །རྟགས་འཛིན་པ་ལ་མཚུངས་པ་ཞེས་པ། གལ་ཏེ་མེད་ན་མི་འབྱུང་བ་ཉིད་ཀྱིས་རྟགས་འཛིན་ན། མེད་ན་མི་
[120a.4]འབྱུང་བ་ཉིད་ཀྱང་སོ་སོར་སྦྱོར་བ་གཞན་ལ་ལྟོས་པ་ཁོ་ནའོ་ཞེས་པས། རྟགས་འཛིན་པ་ལས་སྔར་ཁོ་ན་བསྒྲུབ་པར་བྱ་བ་རྟོགས་པར་འགྱུར་བར་འོས་ལ། དེ་ལྟ་ན་ཡང་བསྒྲུབ་པར་བྱ་བ་སོ་སོར་སྦྱོར་བ་ཅན་གྲུབ་ན། འབྲེལ་པ་དྲན་པ་དོན་མེད་པ་ཉིད་དོ། །ཅི་སྟེ་གཞན་དུ་ན། དེ་ནི་མ་བརྗོད་དོ་ཞེས་པ་
[120a.5]མཚུངས་སོ། །མ་ཡིན་ཏེ་དེ་ནི་ཞེས་པ་ལ་སོགས་པ། རྗེས་སུ་དཔག་པར་བྱ་བ་ལ་ཡོད་པ་ཞེས་པའི་ཚིག་ལས། ཆོས་ཅན་ལ་དུ་བ་ལ་སོགས་པ་ཡོད་པ་ཙམ་གཟུང་བར་བྱའི། འབྲེལ་པ་ཅན་ཉིད་ནི་མ་ཡིན་ནོ། །འོ་ན་ནམ་གྱི་ཚེ་དེ་གཟུང་བར་བྱ་ཞེ་ན་གསུངས་པ། ཕྱིས་ཞེས་པ་ལ་སོགས་པའོ། །
[120a.6]མ་རྟོགས་པ་ཡིས་དེ་རྟོགས་ཕྱིར། །ཞེས་པ། ནོར་དང་ནོར་ཅན་གྱི་འབྲེལ་པ་ལ་སོགས་པ་མངོན་པར་མི་ཤེས་པས་ཡང་ལྷག་མ་རྟོགས་པའི་ཕྱིར་རོ་ཞེས་པའི་དོན་ཏོ། །ཡང་ཅི་ལྟར་དེ་རྟོགས་པ་ཡིན་ཞེ་ན་གསུངས་པ། མཐོང་ཞེས་པ་ལ་སོགས་པའོ། །འབྲས་བུ་དང་རྒྱུའི་དངོས་པོའི་འབྲེལ་པ་ལ་ནི།
[120a.7]ཇི་ལྟར་འབྲས་བུ་དང་རྒྱུའི་དངོས་པོའི་འབྲེལ་པ་བསྟན་བཅོས་སུ་རྣམ་པར་ཕྱེ་བ་དེ་ལྟ་ཁོ་ནར་མ་རྟོགས་པ་ཉིད་འདིར་བརྗོད་པར་འདོད་ཀྱི་རྣམ་པ་ཐམས་ཅད་དུ་ནི་མ་ཡིན་ནོ་ཞེས་རིག་པར་བྱའོ། །བསྟན་བཅོས་སུ་ནི་དངོས་པོ་གཅིག་ཁོ་ནའི་རང་གི་ངོ་བོ་མི་གཏོང་བ་ལས་ཡོངས་སུ་འགྱུར་བས་འབྲས་བུ་དང་
[120b]
[120b.1]རྒྱུའི་དངོས་པོར་རྣམ་པར་འཇོག་པར་བྱེད་ལ། གང་རྣམས་དེ་ལྟར་འབྲས་བུ་དང་རྒྱུའི་དངོས་པོའི་འབྲེལ་པ་རབ་ཏུ་རྟོགས་པ་མ་ཡིན་པ་དེ་རྣམས་ཀྱང་རྣམ་པ་གཞན་གྱིས་དེ་རབ་ཏུ་རྟོགས་ནས། མེད་ན་མི་འབྱུང་བ་ཉིད་ཙམ་ཉེ་བར་དམིགས་པ་ལས་རྗེས་སུ་དཔག་པར་བྱ་བ་ངེས་པར་བྱེད་དོ། །བསྟན་
[120b.2]བཅོས་སུ་མཐོང་བའི་འབྲས་བུ་དང་རྒྱུའི་དངོས་པོ་ནི་མི་འཐད་པ་ཁོ་ན་སྟེ། གང་གི་ཕྱིར་འབྲས་བུ་དང་རྒྱུ་དག་གཅིག་ཉིད་ལ་འདི་ནི་འབྲས་བུའོ་འདི་ནི་རྒྱུའོ་ཞེས་པ་འདི་ཁོ་ནར་མི་འགྱུར་རོ། །ཅི་སྟེ་དེ་དག་ལ་གང་གིས་འདི་ལྟར་འགྱུར་བ་རང་བཞིན་ཕུལ་དུ་བྱུང་བ་འགའ་ཞིག་ཡོད་ན་ནི། ཐ་དད་
[120b.3]པར་ཐལ་བར་འགྱུར་ཏེ་སྙིང་སྟོབས་ལ་སོགས་པ་རྣམས་ལ་ཡང་རང་བཞིན་ཐ་དད་པ་ཁོ་ན་ཐ་དད་པར་རྣམ་པར་གཞག་པའི་རྒྱུ་ཡིན་པས་སོ། །གལ་ཏེ་འབྲས་བུ་དང་རྒྱུའི་དངོས་པོ་ཉིད་ཡོད་ན་ཡང་ཐ་དད་པ་མ་ཡིན་ཏེ། ཡོན་ཏན་གསུམ་གྱི་རིགས་ཐ་མི་དད་པ་ཉིད་ཀྱི་ཕྱིར་གཅིག་ཉིད་དོ་ཞེ་ན། མ་ཡིན་
[120b.4]ཏེ། འབྲས་བུ་དང་རྒྱུ་ལས་ཐ་དད་པར་ཡོན་ཏན་གསུམ་ཉིད་ཉེ་བར་མི་མཚོན་པའི་ཕྱིར་རོ། །རྟག་པ་ནི་རིམ་གྱིས་སམ་ཅིག་ཅར་ཡོངས་སུ་འགྱུར་བ་སྲིད་པ་ཡང་མ་ཡིན་ན། དེས་ན་དེའི་རྒྱུ་ཅན་འབྲས་བུ་དང་རྒྱུའི་རྣམ་པར་གཞག་པ་ག་ལ་ཡིན་ཞེས་པ་ཐལ་ཆེས་པས་ཆོག་གོ། །དེ་ལྟར་
[120b.5]འགྱུར་མོད། དེ་མ་བཟུང་བ་ཁོ་ན་དེ་རྗེས་སུ་དཔོག་པའི་རྒྱུའོ་ཞེ་ན་གསུངས་པ། མ་ཡིན་ཞེས་པ་ལ་སོགས་པ་སྟེ་གོ་སླའོ། །གདོན་མི་ཟ་བར་མ་ཡིན་ཞེས་པ་ལ་སོགས་པའོ། །འོ་ན་ནོར་གྱི་རང་གི་ངོ་བོ་འགྲུབ་པ་ནོར་ཅན་ལ་ལྟོས་པ་ཁོ་ན་མ་ཡིན་ནམ། དེ་འཁྲུལ་པ་ག་ལས་ཡིན་ཞེ་ན། འདི་ལྟར་
[120b.6]སེམས་ཏེ་རྗེས་སུ་དཔོག་པའི་དུས་ཁོ་ནར་ནོར་ཉིད་དུ་བཟུང་བའི་རྟགས་ནི་སོ་སོར་སྦྱོར་བ་རྟོགས་པར་བྱེད་ལ། ཡང་ན་སྔར་འབྲེལ་པ་འཛིན་པའི་དུས་སུ་དེ་ལྟར་ཡོངས་སུ་བཅད་པར་གྱུར་པ་ནི་རྗེས་སུ་དཔོག་པའི་དུས་སུ་སྟེ། རྣམ་པ་གཞན་དུ་ན་ཡང་ཉེ་བར་དམིགས་པར་བྱ་བཞིན་པའོ་ཞེས་པའོ། །གལ་ཏེ་
[120b.7]རྗེས་སུ་དཔག་པའི་དུས་སུ་འདི་འདིའི་ནོར་རོ་ཞེས་པ་འདི་ལྟར་ངེས་པ་གོ་བར་བྱེད་པར་འདོད་ན་ནི་འདིར་བརྗོད་པའི་སྐྱོན་ནོ། །ནོར་ཅན་གྱི་འབྲེལ་པ་ལས་ནོར་ཉིད་ཅེས་པ་ལ་སོགས་པས་སོ། །དེའི་ཕྱིར་ལྟ་བ་གཉིས་པ་ཁས་བླང་བར་བྱ་ལ་དེ་ལས་ཀྱང་འཁྲུལ་པའོ། །ནོར་དང་ནོར་ཅན་དག་བརྒྱུད་
[121a]
[121a.1]པས་བཟློག་པའི་དངོས་པོ་སྲིད་པའི་ཕྱིར་དེ་ལྟར་རྗེས་སུ་དཔག་པར་བྱ་བར་ནུས་པ་མ་ཡིན་ནོ། །འདིར་ནི་བདག་གིས་དེའི་སྔར་ནོར་ཉིད་ཀྱིས་བཟུང་ཟིན་ཏེ། དེའི་ཕྱིར་གང་ན་འདི་ཡིན་པ་དེ་ན་འདིའི་ནོར་ཅན་དེས་འབྱུང་བར་འོས་སོ་ཞེས་པས། སའི་དབང་ཕྱུག་ལ་སོགས་པ་
[121a.2]མེད་ཀྱི། གདུགས་ལ་སོགས་པ་འབའ་ཞིག་པ་བདག་པོ་མེད་པའང་མཐོང་བ་སྲིད་པའི་ཕྱིར་རོ་ཞེས་པའོ། །དེ་བཞིན་དུ་གཞན་དུ་ཡང་ཇི་ལྟར་སྲེད་པར་འཁྲུལ་པ་བརྟག་པར་བྱའོ། །དེ་ལྟར་འགྱུར་མོད། ནོར་དང་ནོར་ཅན་གྱི་དངོས་པོ་ལ་སོགས་པས་འབྲེལ་པ་ཐམས་ཅད་གོ་བར་བྱེད་པ་
[121a.3]ནི་མ་ཡིན་གྱི་འོ་ན་ཅི་ཞེ་ན། གང་མི་འཁྲུལ་པའོ་ཞེ་ན། དེའི་ཕྱིར་གསུངས་པ། འབྲེལ་པ་ཉེ་བར་དམིགས་པའི་མ་ཡིན་ཞེས་པ་ལ་སོགས་པ་སྟེ། གལ་ཏེ་ཇི་སྐད་བཤད་པའི་འབྲེལ་པ་བཟུང་བ་ལ་ཡང་། སླར་ཡང་རྟགས་ནི་འཁྲུལ་པ་དང་མ་འཁྲུལ་པ་ཉིད་ལ་ལྟོས་ཏེ། དེའི་ཕྱིར་
[121a.4]མེད་ན་མི་འབྱུང་བ་ཉིད་ཁོ་ན་རྗེས་སུ་དཔོག་པའི་རྒྱུར་འགྱུར་གྱི། ནོར་དང་ནོར་ཅན་གྱི་དངོས་པོ་ལ་སོགས་པའི་འབྲེལ་པ་རྣམས་ནི་མ་ཡིན་ནོ། །མེད་ན་མི་འབྱུང་བའི་དངོས་པོ་རྗེས་སུ་དཔག་པའི་རྒྱུ་ཡིན་པ་འདི་ནི་འགྱུར་མོད། དེ་ནི་ཇི་སྐད་བཤད་པའི་འབྲེལ་པ་ཡོད་ན་འགྱུར་ཏེ། དེའི་ཕྱིར་དེ་ངེས་
[121a.5]པར་བསྟན་ཏོ་ཞེ་ན། དེ་མི་རིགས་ཏེ་དེ་ཡོད་ན་ཡང་དེ་མེད་པའི་ཕྱིར་རོ། །འབྲེལ་པ་ཁྱད་པར་མེད་པ་ཉིད་ཀྱི་ཕྱིར་རོ་ཞེས་པ་རྒྱུ་མཚན་དང་རྒྱུ་མཚན་ཅན་གྱི་འབྲེལ་པ་ནི་གཉིས་ལ་གནས་པས་ཏེ། དེ་ནི་གཅིག་ལ་ཇི་ལྟ་བ་བཞིན་དུ་གཉིས་པ་ལ་ཡང་ངོ་ཞེས་པ་སྟེ། གཉིས་ཀ་ལ་གོ་བར་བྱ་བ་དང་གོ་བར་
[121a.6]བྱེད་པའི་དངོས་པོར་འགྱུར་རོ། །གནོད་བྱ་གནོད་བྱེད་ཀྱི་དངོས་པོ་ནི་འབྲེལ་པ་མེད་པ་ཁོ་ན་སྟེ། ཞེས་པ། རྟགས་དང་རྟགས་ཅན་དག་གི་ཞེས་པ་དགོངས་པའོ། །དེ་ཉིད་ཀྱི་ཕྱིར་གསུངས་པ། དེ་དག་རྟགས་དང་རྟགས་ཅན་མིན། །ཞེས་པ་འབྲེལ་པ་ཅིག་ཤོས་རྣམས་ནི་ཕ་རོལ་པོའི་འདོད་
[121a.7]པས་རྟགས་དང་རྟགས་ཅན་དག་ཏུ་འགྱུར་ལ། གནོད་བྱ་གནོད་བྱེད་ཀྱི་དངོས་པོ་ནི་ཕ་རོལ་པོའི་འདོད་པས་ཀྱང་འགྱུར་བ་མ་ཡིན་ནོ། །སྦྲུལ་དང་སྦྲེ་མོ་དག་ནི་གནོད་བྱ་གནོད་བྱེད་ཀྱི་དངོས་པོ་ཡིན་ལ། དེ་དག་རྟགས་དང་རྟགས་ཅན་དག་ཏུ་འདོད་པ་ཡང་མ་ཡིན་ཏེ། འཁྲུལ་པའི་ཕྱིར་རོ། །
[121b]
[121b.1]འོན་ཀྱང་སྦྲུལ་རྒྱལ་བ་དང་སྦྲེ་མོ་འཕམ་པ་དག་སྟེ། དེ་དག་གནོད་བྱ་གནོད་བྱེད་ཀྱི་དངོས་པོ་ཡང་མ་ཡིན་ནོ། །དེ་བཞིན་དུ་གཞན་ལ་ཡང་ངོ་ཞེས་པ། བྱ་རོག་དང་འུག་པ་ལ་སོགས་པ་རྣམས་ལའོ། །གང་ཡང་ངེས་པར་བཟུང་བ་ཞེས་པ་ལ་སོགས་པས་མཚན་ཉིད་མ་ཁྱབ་པ་ཉིད་གསུངས་སོ། །
[121b.2]གཙོ་བོ་དང་སྐྱེས་བུ་ཡང་དག་པར་ལྡན་པར་སྒྲུབ་པའི་གཏན་ཚིགས་ཀྱི་རྗེས་སུ་དཔག་པ་མ་བསྡུས་པའི་ཕྱིར་རོ། །རྗེས་སུ་འགྲོ་བ་ལ་སོགས་པ་རྣམས་ཀྱིས་ཞེས་པའི་སོགས་པའི་སྒྲས། ཚད་ཅན་དང་འབྲས་བུ་དང་རྒྱུའི་དངོས་པོ་དང་། ནུས་པ་འཇུག་པ་དང་སྣ་ཚོགས་ཀྱི་ངོ་བོ་ཉིད་རྣམས་གཟུང་
[121b.3]བར་བྱའོ། །གཙོ་བོ་ཡོད་པ་ཉིད་ལ་སོགས་པ་རྟོགས་པ་ཞེས་པ་འདིར་ཡང་སོགས་པ་སྨོས་པས། གཅིག་ཉིད་དང་། དོན་དང་ལྡན་པ་ཉིད་དང་། གཞན་གྱི་དོན་ལ་སོགས་པ་རྣམས་དང་། ཙཱུ་ལི་ཀའི་དོན་རྣམས་སོ། །དེའི་ཚེ་ཅི་ཡིན་ཞེས་པ་བདུན་པ་རྣམས་ལས་གཅིག་ཀྱང་སྲིད་པ་མ་ཡིན་
[121b.4]ནོ་ཞེས་དྲི་བའོ། །བསམ་པར་བྱ་ཞེས་པ་རྣམ་པ་གཉིས་ཉིད་སྲིད་པའི་ཕྱིར་རོ། །སོ་སོར་བརྗོད་བྱ་མིན་ཞེས་པ་གཙོ་བོ་ཡོད་དོ། །ཐ་དད་པ་རྣམས་ལ་མཐོང་བའི་ཕྱིར་རོ་ཞེས་པ་ཁོ་ན་བརྗོད་པར་བྱའི། ཐ་དད་པ་རྣམས་ཀྱི་རྗེས་སུ་འགྲོ་བ་མཐོང་བའི་ཕྱིར་ཞེས་པ་ནི་མ་ཡིན་ནོ། །ཐ་དད་པ་རྣམས་ཁོ་ན་ནི་
[121b.5]རྒྱུ་མཚན་ཅན་ནོ་ཞེས་པ་བསྐྱེད་པར་བྱ་བ་ཉིད་ཀྱི་ཕྱིར་རོ། །རྒྱུ་མཚན་ནི་གཙོ་བོའི་ཞེས་པ་ནི་སྐྱེད་པར་བྱེད་པ་ཉིད་ཀྱི་ཕྱིར་རོ། །གཞན་མ་ཡིན་པ་ཉིད་ཀྱི་ཕྱིར་ཞེས་པ། རྗེས་སུ་འགྲོ་བ་ཡང་ཐ་དད་པ་རྣམས་ཀྱི་བདག་ཉིད་དུ་གྱུར་པ་སྟེ། དེའི་ཆོས་ཉིད་ཀྱི་ཕྱིར་ཏེ། ཆོས་དང་ཆོས་ཅན་དག་ཀྱང་གཞན་མ་
[121b.6]ཡིན་པ་ཉིད་ཀྱི་ཕྱིར་རོ། །དེའི་ཕྱིར་ཐ་དད་པ་བཞིན་དུ་དེ་ཡང་རྒྱུ་མཚན་ཅན་ཉིད་དུ་འཐད་དོ། །དེ་བཞིན་དུ་ཚད་ཅན་ལ་སོགས་པ་རྣམས་ཀྱི་ཡང་རིག་པར་བྱའོ། །རྣམ་ལྔ་མིན་ཞེས་པ་རྗེས་སུ་འགྲོ་བ་ལ་སོགས་པ་རྣམས་ཐ་དད་པའི་བདག་ཉིད་དུ་གྱུར་པ་ཉིད་ཀྱི་ཕྱིར་རོ། །ཐ་དད་པ་རྣམས་ཁོ་ན་གཅིག་པུ་
[121b.7]ཅན་དུ་འགྱུར་རོ། །འགའ་ཞིག་མིན་ཞེས་པ་ལ་སོགས་པས། གང་ཐ་དད་པ་རྣམས་ཀྱི་འགྲུབ་པར་བྱེད་པ་པོ་གཙོ་བའི་ཆོས་དེ་རྣམས་ནི་དེས་རྟོགས་པར་བྱ་བ་རྣམས་ཏེ། གཅིག་ཉིད་ལ་སོགས་པ་བཞིན། ཆ་ཤས་མེད་པའི་ལུས་ལ་སོགས་པ་རྣམས་ཀྱང་དེ་ལྟ་བུའོ། །དེ་བཞིན་དུ་གང་གཙོ་བོས་འགྲུབ་
[122a]
[122a.1]པར་བྱ་བ་ཐ་དད་པའི་ཆོས་དེ་རྣམས་ནི་དེའི་རྟོགས་པར་བྱེད་པ་རྣམས་ཏེ། རྗེས་སུ་འགྲོ་བ་ལ་སོགས་པ་བཞིན། ཡོད་པ་ཉིད་དང་ཁྱབ་བདག་ཉིད་ལ་སོགས་པ་རྣམས་ཀྱང་དེ་ལྟ་བུའོ་ཞེས་པ་རང་བཞིན་གྱི་ཐལ་བར་འགྱུར་བ་གཉིས་གསུངས་སོ། །འོ་ན་གལ་ཏེ་ཡང་
[122a.2]རྣམ་པ་ཐམས་ཅད་དུ་རྒྱུ་མཚན་དང་རྒྱུ་མཚན་ཅན་གྱི་དངོས་པོ་ཡིན་པ་དེ་ལྟ་ན་ཡང་དེ་ལྟར་མ་ངེས་པའི་ཕྱིར་རྣམ་པ་ཐམས་ཅད་དུ་གོ་བར་བྱ་བ་དང་གོ་བར་བྱེད་པ་ཉིད་དུ་ཐལ་བ་མ་ཡིན་ནོ་ཞེ་ན། ཐུན་མོང་དུ་མངོན་སུམ་པ་ཡང་ངེས་པར་མ་བཟུང་བའི་དོན་ཁྱད་པར་མཐོང་བ་ལས་ཁྱད་པར་དུ་རྟོགས་པར་བྱེད་
[122a.3]དོ་ཞེས་པ་ལ་སོགས་པའི་ཚིག་ལ། རྟགས་ཀྱི་ཤེས་པ་ནི་ངེས་པའི་བདག་ཉིད་ཅན་དུ་འདོད་པ་ཉིད་ཀྱི་ཕྱིར་རོ། །མ་ངེས་པར་འདོད་པ་རྣམས་ཀྱི་ཡང་རྟགས་ཀྱི་ཆོས་རྣམས་གཞན་མ་ཡིན་པ་ཉིད་ཀྱི་ཕྱིར་འདི་ནི་ལན་མ་ཡིན་ནོ། །དེ་ལྟར་འགྱུར་མོད། དེ་ལྟར་གོ་བར་བྱ་བ་དང་གོ་བར་བྱེད་པའི་
[122a.4]དངོས་པོར་འདོད་པ་ཁོ་ནའོ་ཞེ་ན་གསུངས་པ། ཐ་དད་པ་རྣམས་ཀྱི་ཞེས་པ་ལ་སོགས་པ་སྟེ། གང་གི་ཕྱིར་རྗེས་སུ་འགྲོ་བ་ལ་སོགས་པ་རྣམས་ཁོ་ན་བསྟན་བཅོས་སུ་གཏན་ཚིགས་ཉིད་དུ་གཟུང་བར་བྱའི། ཡོད་པ་ཙམ་ལ་སོགས་པ་རྣམས་ནི་མ་ཡིན། གཙོ་བོའི་ཡང་ཡོད་པ་ཉིད་ལ་སོགས་
[122a.5]པ་རྣམས་ཁོ་ན་བསྒྲུབ་པར་བྱ་བ་ཉིད་དུ་ཡིན་གྱི། ཆ་ཤས་མེད་པ་ཉིད་ལ་སོགས་པ་རྣམས་ནི་མ་ཡིན་པ་དེའི་ཕྱིར། རྒྱུ་མཚན་དང་རྒྱུ་མཚན་ཅན་གྱི་དངོས་པོ་ནི་གཙོ་བོ་ཡོད་པ་ཉིད་ལ་སོགས་པ་རྟོགས་པར་བྱེད་པའི་གཏན་ཚིགས་མ་ཡིན་ནོ། །ཡང་ཅི་ལྟར་གཙོ་བོའི་ཆ་ཤས་མེད་པ་ཉིད་ཡིན།
[122a.6]ཇི་ཙམ་གྱིས་སྙིང་སྟོབས་ལ་སོགས་པ་དེའི་ཆ་ཤས་རྣམས་སུ་འགྱུར་བ་ཁོ་ནའོ་ཞེ་ན། དེ་དང་བྲལ་བའི་ཆ་ཤས་ཡོད་པ་མ་ཡིན་པའི་ཕྱིར་ཆ་ཤས་མེད་པ་ཉིད་དོ་ཞེས་པས་སྐྱོན་མེད་དོ། །གཙུག་ཕུད་ཅན་གྱི་དོན་བཅུ་ཞེས་པ་ཡོད་པ་ཉིད་དང་། གཅིག་ཉིད་དང་། དོན་དོན་དང་ལྡན་པ་ཉིད་དང་།
[122a.7]གཞན་གྱི་དོན་ཉིད། གཞན་ཉིད་དང་། བྱེད་པ་པོའི་དངོས་པོ་མ་ཡིན་པ་དང་། སྦྱོར་བ་དང་། འབྲལ་བ་དང་། མང་པོའི་སྐྱེས་བུ་རྣམས་དང་། གནས་པ་སྟེ། ལུས་ཀྱི་ཡང་ལྷག་མར་འཇུག་པས་ཞེས་པ་འདི་རྣམས་སུ་རིག་པར་བྱའོ། །དེའི་ཕྱིར་གང་གང་དུ་རྗེས་སུ་མཐུན་པ་ཞེས་སྦྱར་བར་བྱ་ལ།
[122b]
[122b.1]དེ་ཡང་མེད་ན་མི་འབྱུང་བ་ཁོ་ནའོ། །འོ་ན་རྒྱུ་མཚན་དང་རྒྱུ་མཚན་ཅན་གྱི་དངོས་པོས་དེ་ཡང་འཕངས་པ་ཁོ་ན་མ་ཡིན་ནམ། རྒྱུ་མཚན་ཅན་ནི་རྒྱུ་མཚན་མེད་ན་མི་འབྱུང་བ་ཉིད་ཀྱི་ཕྱིར་རོ་ཞེ་ན། འཕངས་པ་བདེན་མོད། ཕ་རོལ་པོས་ནི་རྒྱུ་མཚན་དང་རྒྱུ་མཚན་ཅན་གྱི་དངོས་པོས་འབྲེལ་པའི་
[122b.2]རྟགས་གོ་བར་བྱེད་པ་ཉིད་དུ་འདོད་པས། རྒྱུ་མཚན་ཡང་གོ་བར་བྱེད་པ་ཉིད་དུ་ཁས་བླངས་པར་བྱས་ཏེ། དེ་ཡང་དེ་དང་འབྲེལ་པའི་ཕྱིར་རོ། །རྣམ་པ་ཐམས་ཅད་དུ་གོ་བར་བྱ་བ་དང་གོ་བར་བྱེད་པ་ཉིད་དེ་རྣམ་པ་ཐམས་ཅད་དུ་རྒྱུ་མཚན་དང་རྒྱུ་མཚན་ཅན་ཡོད་པའི་ཕྱིར་རོ་ཞེས་པའོ། །དེའི་
[122b.3]ཕྱིར་དེའི་འདི་མི་འདོད་པ་ལྟུང་བའོ། །གལ་ཏེ་ཡང་རྒྱུ་མཚན་དང་རྒྱུ་མཚན་ཅན་གྱི་དངོས་པོས་གང་ཞིག་གི་མེད་ན་མི་འབྱུང་བ་ཡིན་པ་དེ་གོ་བར་བྱེད་པའོ་ཞེས་ཁས་བླངས་ན། རྣམ་པ་ཐམས་ཅད་དུ་རྒྱུ་མཚན་དང་རྒྱུ་མཚན་ཅན་གྱི་དངོས་པོར་མི་འགྱུར་ཞིང་། མི་འདོད་པ་ཅུང་ཟད་དུ་འགྱུར་བ་
[122b.4]མ་ཡིན་ནོ། །དེ་བཞིན་ཞེས་པ་ལ་སོགས་པས་འབྲེལ་པ་ཅིག་ཤོས་རྣམས་ལ་ཡང་ཇི་སྐད་བཤད་པའི་སྐྱོན་སྟོན་ཏོ། །ཆ་ཤས་ཁོ་ནས་ཞེས་པ་རྣམ་པ་འགའ་ཞིག་གིས་ཞེས་པའི་དོན་ཏོ། །འབྲེལ་མིན་ཉིད་དུ་ཡང་དག་བརྗོད། །ཅེས་པ། འབྲེལ་མིན་ཉིད་ཅེས་པ་འདི་ནི་མ་ཡིན་པར་དགག་
[122b.5]པའོ། །རྗེས་སུ་དཔག་པར་བྱ་བ་རྟོགས་པའི་གཏན་ཚིགས་ཀྱི་འབྲེལ་པའི་འབྲེལ་པ་ཉིད་གང་ཡིན་པ་དེ་ལས་གཞན་པའི་འབྲེལ་པ་ནི་བཤད་དོ་ཞེས་པའི་དོན་དུ་རིག་པར་བྱའོ། །རྣམ་པ་གཞན་དུ་ན་འབྲེལ་པ་རྣམས་ཀྱི་འབྲེལ་པ་མེད་པ་ཉིད་མི་འཐད་པའི་ཕྱིར་འགལ་བར་འགྱུར་རོ། །འོ་ན་ནོར་
[122b.6]དང་ནོར་ཅན་གྱི་དངོས་པོ་ལ་སོགས་པའི་འབྲེལ་པ་རྣམས་གསལ་བྱེད་རྣམས་ཡིན་ལ། དེའི་ཕྱིར་དེའི་སྒོ་ནས་རྟགས་ཀྱིས་གསལ་བར་བྱེད་ཅིང་རང་གི་འབྲེལ་པ་དང་རྗེས་སུ་མཐུན་པ་ཉིད་ལས་ཆ་འགའ་ཞིག་ཁོ་ནས་གསལ་བར་བྱེད་དོ་ཞེས་པ་རིགས་སོ། །དེས་ན་རྣམ་པ་ཐམས་ཅད་དུ་གོ་བར་
[122b.7]བྱ་བ་དང་གོ་བར་བྱེད་པའི་དངོས་པོ་གང་ལས་ཡིན་ཞེ་ན་གསུངས་པ། ནོར་དང་ནོར་ཅན་སོགས་ཙམ་གྱིས། །ཞེས་པ་ལ་སོགས་པ་སྟེ། རང་གི་ལྟ་བ་ལས་རྒྱལ་པོ་ལ་སོགས་པ་ལ་ནོར་ཅན་གྱི་རྣམ་པ་ཁོ་ནར་རྟོགས་པར་འགྱུར་ལ། དཔལ་དགའ་བ་ལ་སོགས་པ་བྱེ་བྲག་ཏུ་ནི་མ་ཡིན་ནོ། །
[123a]
[123a.1]ཅིའི་ཕྱིར་ཞེ་ན་གསུངས་པ་རྣམ་པ་གཞན་དུ་ཤེས་ན་ཞེས་པ་ལ་སོགས་པ་སྟེ། གལ་ཏེ་རང་གི་འབྲེལ་པའི་རྗེས་སུ་མཐུན་པ་ཉིད་ལས་ལོག་པར་འཛིན་པར་ནུས་པར་འདོད་ན། དེ་ཁོ་ན་རྣམ་པ་ཐམས་ཅད་དུ་གོ་བར་བྱ་བ་དང་གོ་བར་བྱེད་པའི་དངོས་པོར་འགྱུར་རོ། །
[123a.2]ནོར་ཉིད་ཀྱི་ཆ་ནས་ཀྱང་ཞེས་པ་ལ་སོགས་པ་སྟེ། ཡོད་པའི་སྙིང་སྟོབས་ཀྱི་ཆ་ཡང་ནོར་ཅན་ཉིད་ཙམ་གྱིས་འབྲེལ་པ་ཡིན་ལ། དེས་ན་གལ་ཏེ་འབྲེལ་པའི་རྗེས་སུ་མཐུན་པ་ཉིད་ལས་དེ་ཁོ་ནས་དེ་ཁོ་ན་གསལ་བར་འདོད་ན་ནོར་ཅན་ཉིད་ཙམ་རྟགས་ཅན་ལ་རྟོགས་པར་འགྱུར་རོ། །
[123a.3]ཅིའི་ཕྱིར་ཞེ་ན་གསུངས་པ། མ་ཡིན་ཞེས་པ་ལ་སོགས་པ་སྟེ། འབྲེལ་པ་ལ་ལྟོས་པ་མེད་པས་རྟོགས་པར་བྱེད་ན་ཧ་ཅང་ཐལ་བར་འགྱུར་རོ་ཞེས་པ་དགོངས་པའོ། །དེ་ལས་ཤིན་ཏུ་འདས་ན་ཞེས་པ་དེ་མ་ཐག་པར་བརྗོད་པའི་དོན་ལས་ཤིན་ཏུ་འདས་ནའོ། །གལ་ཏེ་རང་གི་འབྲེལ་པའི་སྒོ་མ་
[123a.4]གཏོགས་པར་གཞན་དུ་སྟེ། རྣམ་པ་གཞན་གྱིས་ཀྱང་རང་གི་དོན་རྟོགས་པར་ནུས་པར་འགྱུར་ན་ནི། རང་གི་འབྲེལ་པ་དང་རྗེས་སུ་མཐུན་པས་མ་ཡིན་ནོ་ཞེས་པའི་དོན་ཏོ། །ཞར་ལ་འོངས་པས་ཆོག་གོ་ཞེས་པ་ནོར་དང་ནོར་ཅན་ལ་སོགས་པའི་རྟགས་དང་རྟགས་ཅན་རྣམས་ཞར་ལ་
[123a.5]བྱུང་བས་བླངས་པའོ་ཞེས་སྟོན་པར་བྱེད་དོ། །གསལ་བྱ་གསལ་བྱེད་དངོས་པོ་ཡིས། །ཞེས་པ། གལ་ཏེ་གསལ་བྱ་གསལ་བྱེད་ཀྱི་དངོས་པོས་རྒྱུ་མཚན་དང་རྒྱུ་མཚན་ཅན་གྱི་དངོས་པོ་འདོད་ན། དེ་ལས་རྒྱུ་མཚན་དང་རྒྱུ་མཚན་ཅན་གྱི་དངོས་པོ་གཅིག་པུ་ཁོ་ན་གསལ་བྱེད་དུ་བརྗོད་པར་བྱ་བ་
[123a.6]མིན་ནོ། །ཅིའི་ཕྱིར་ཞེ་ན་གསུངས་པ། དེ་རྣམ་བདུན་ཞེས་པ་སྟེ། གོ་བྱ་གོ་བྱེད་ཀྱི་དངོས་པོ་ནི་གསལ་བྱ་གསལ་བྱེད་ཀྱི་དངོས་པོ་ཡིན་ཞིང་། འབྲེལ་པ་བདུན་པོ་རྣམས་ཀྱིས་ཀྱང་རྗེས་སུ་དཔག་པར་བྱ་བ་རྟོགས་ཏེ། དེའི་ཕྱིར་དེ་ཁོ་ན་རྣམ་པ་བདུན་ཞེས་ཁས་བླང་བར་བྱའོ། །རྣམ་པ་གཞན་དུ་
[123a.7]ན་གཞན་རྣམས་གསལ་བར་བྱེད་པ་མ་ཡིན་པ་ཉིད་དུ་འགྱུར་རོ། །དེའི་ཕྱིར་ཐ་དད་པ་ཉིད་ཀྱི་ཕྱིར་ཞེས་པ། རྒྱུ་མཚན་དང་རྒྱུ་མཚན་ཅན་གྱི་དངོས་པོ་ལས་གཞན་ཉིད་ཀྱི་ཕྱིར་རོ། །སྔར་བརྗོད་ཟིན་ཏོ་ཞེས་པ་དེ་ཡང་གཞན་ལས་རྟོགས་པའི་ཕྱིར་དོན་མེད་པའོ་ཞེས་པ་འདིས་དོན་འདི་སྔར་ཁོ་ནར་བཤད་
[123b]
[123b.1]ཟིན་ཏོ། །རྒྱུ་མཚན་དང་རྒྱུ་མཚན་ཅན་གྱི་དངོས་པོ་ཞེས་ཀྱང་བརྗོད་པར་མི་བྱའོ་ཞེས་པ་གལ་ཏེ་རྒྱུ་མཚན་དང་རྒྱུ་མཚན་ཅན་གཉིས་ཀ་དག་གི་གོ་བར་བྱེད་པ་ཉིད་དུ་འགྱུར་ན། དེ་སྐད་སྨྲ་བར་རིགས་པ་ལས། གཉིས་ཀ་དག་གི་གོ་བར་བྱེད་པ་ཉིད་ཀྱང་མ་ཡིན་གྱི། འོན་ཀྱང་རྒྱུ་མཚན་
[123b.2]ཅན་ཁོ་ནའིའོ། །དེ་སྟོན་པར་བྱེད་དེ། གང་གི་ཕྱིར་མངོན་པར་གསལ་བར་བྱེད་པ་ནི་འདིར་རྒྱུ་མཚན་ཉིད་ཅེས་པ་ལ། འདིར་ཏེ་རྗེས་སུ་དཔག་པ་དང་རྗེས་སུ་དཔག་པར་བྱ་བའི་ཐ་སྙད་ལ་མངོན་པར་གསལ་བར་བྱེད་པ་ནི་རྒྱུ་མཚན་ཉིད་ཁོ་ནའོ། །ཡང་རྒྱུ་མཚན་ཉིད་ཅེས་བྱ་བ་འདི་ཅི་ཞེ་ན།
[123b.3]རྒྱུ་མཚན་ཏེ་དུ་བ་ལ་སོགས་པའི་རང་གི་བསྒྲུབ་པར་བྱ་བ་ལ་མེད་ན་མི་འབྱུང་བ་སྟེ། རབ་ཏུ་འཇུག་པའི་རྒྱུ་མཚན་གང་གིས་དེ་ལ་རྒྱུ་མཚན་གྱི་སྒྲ་རབ་ཏུ་འཇུག་པ་དེ་ནི་རྒྱུ་མཚན་ཉིད་དོ། །རྒྱུ་མཚན་ཉིད་ནི་མ་ཡིན་ནོ། །ཞེས་པ། གསལ་བར་བྱེད་པ་ཞེས་པ་འདི་དང་སྦྲེལ་བར་བྱའོ། །འདིར་
[123b.4]ཡང་བསྒྲུབ་པར་བྱ་བའི་ཆ་ཤས་གང་ཡིན་པ་གོ་བར་བྱ་བ་དེ་ནི་རྒྱུ་མཚན་ཅན་ཉིད་དོ། །ཡང་ཅིའི་ཕྱིར་རྒྱུ་མཚན་ཅན་ནི་གསལ་བར་བྱེད་པ་མ་ཡིན་ཞེ་ན་གསུངས་པ། གསལ་བར་བྱ་བ་ཉིད་ཀྱི་ཕྱིར་རོ་ཞེས་པ། བསྒྲུབ་པར་བྱ་བ་ཉིད་ཀྱི་ཕྱིར་རོ་ཞེས་པའི་དོན་ཏོ། །གྲུབ་པ་ནི་གོ་བར་བྱེད་པ་ཉིད་
[123b.5]དུ་འགྱུར་གྱི། བསྒྲུབ་པར་བྱ་བ་ནི་མ་ཡིན་ནོ། །དེའི་ཕྱིར་རྒྱུ་མཚན་གྱི་དངོས་པོ་ཞེས་པ་ཁོ་ན་བརྗོད་པར་བྱ་བའི་རྒྱུ་མཚན་དང་རྒྱུ་མཚན་གྱི་དངོས་པོ་ཞེས་ནི་མ་ཡིན་ནོ། །འདིར་འགྱུར་མོད། རྒྱུ་མཚན་དང་རྒྱུ་མཚན་ཅན་དག་གི་དངོས་པོ་ནི་རྒྱུ་མཚན་དང་རྒྱུ་མཚན་ཅན་གྱི་དངོས་པོ་ཞེས་རྣམ་
[123b.6]པར་ཤེས་པར་བྱ་བ་མ་ཡིན་ལ། དེ་ལྟར་ཤེས་པར་བྱ་བ་ན་ནི་རྒྱུ་མཚན་ཅན་སྨོས་པ་དོན་མེད་པར་འགྱུར་ཏེ། རྒྱུ་མཚན་གྱི་དངོས་པོ་ཁོ་ན་གོ་བར་བྱེད་པ་ཉིད་ཀྱི་ཕྱིར་རོ། །འོ་ན་ཅི་ལྟར་ཞེ་ན། རྒྱུ་མཚན་གྱི་རྒྱུ་མཚན་ཅན་དང་ཡོད་པ་ཞེས་པ་སྟེ། དེ་ཡང་མེད་ན་མི་འབྱུང་བར་འགྱུར་ཏེ། འདི་ལས་
[123b.7]བསྒྲུབ་པར་བྱ་བ་འགྲུབ་པའི་རྒྱུ་མཚན་ཞེས་མངོན་པར་བརྗོད་པ་དང་རྐྱེན་ཡང་ངོ་ཞེས་བྱས་ནས་སོ། །རྒྱུ་མཚན་ཡོད་པ་ཞེས་པ་འདི་ཙམ་བརྗོད་པར་བྱ་བ་ན། ཅི་ཞིག་དང་ལྷན་ཅིག་རྒྱུ་མཚན་ཡོད་པ་མེད་ན་མི་འབྱུང་བའི་མཚན་ཉིད་ཡིན་ཞེས་མི་ཤེས་སོ། །དེའི་ཕྱིར་སོ་སོར་སྦྱོར་བའི་ཟླ་བོ་རྟོགས་
[124a]
[124a.1]པར་བྱ་བའི་ཆེད་རྒྱུ་མཚན་གྱི་སྒྲ་ཉེ་བར་བླངས་པའོ་ཞེ་ན། འདི་ནི་ཡོད་པ་མ་ཡིན་ཏེ། རྒྱུ་མཚན་ནི་ངེས་པར་རྒྱུ་མཚན་ཅན་ལ་ལྟོས་པ་ཉིད་ཀྱི་ཕྱིར། དེ་སྐད་མ་བརྗོད་ན་ཡང་སོ་སོར་སྦྱོར་བའི་ཟླ་བོ་རྟོགས་སོ་ཞེས་པས་རྒྱུ་མཚན་ཅན་སྨོས་པ་འབྲས་བུ་མེད་པའོ། །གང་
[124a.2]ཡང་སྨྲས་པ་ཞེས་པ། ལྟ་བ་གཞན་ལ་སུན་འབྱིན་བསྒྲེས་ནས་སྟོན་ཏོ། །ལྷན་ཅིག་སྤྱོད་པའི་དངོས་པོ་ནི་རྗེས་སུ་འགྲོ་བ་ལ་སོགས་པ་རྣམས་གཙོ་བོ་མེད་ན་ཡོད་པ་མ་ཡིན་པའོ། །ལྷན་ཅིག་སྤྱོད་པའི་དངོས་པོའོ་ཞེས་པས་རྗེས་སུ་འགྲོ་བ་ལ་སོགས་པ་རྣམས་ཀྱིས་གཙོ་བོ་ལ་སོགས་པ་དབང་པོ་
[124a.3]ལས་འདས་པའི་དོན་རྟོགས་པ་ཡང་མ་ཡིན་ནོ། །དབང་པོ་ལས་འདས་པའི་དོན་རྟོགས་པར་བྱེད་པའི་གཏན་ཚིགས་བསྟན་བཅོས་སུ་བཤད་པ་ནི་རྗེས་སུ་དཔག་པ་ལྷག་མ་དང་ལྡན་པ་ཡང་ངོ་། །ལྷན་ཅིག་སྤྱོད་པའི་དངོས་པོའི་འབྲེལ་བ་ཡང་གཙོ་བོ་དང་རྗེས་སུ་འགྲོ་བ་ལ་སོགས་པ་རྣམས་
[124a.4]ཀྱི་འདི་ལྷག་མ་དང་ལྡན་པར་རིགས་པ་ཡང་མ་ཡིན་ནོ། །ལྷན་ཅིག་སྤྱོད་པའི་དངོས་པོ་ནི་འབྲས་བུ་དང་རྒྱུའི་དངོས་པོ་མ་ཡིན་ཏེ། ཐ་དད་པར་ངེས་པར་བསྟན་པའི་ཕྱིར་རོ། །གཞན་ཡང་རྣམ་པར་གནས་པ་གཉིས་དག་གིས་ལྷན་ཅིག་སྤྱོད་པའི་དངོས་པོར་འགྱུར་ཏེ། ངུར་པ་བཞིན་ནོ། །འབྲས་
[124a.5]བུ་དང་རྒྱུ་དག་ཅིག་ཅར་ཡོད་པ་ཡང་མ་ཡིན་ཏེ་འབྲས་བུའི་དུས་ན་རྒྱུ་མི་སྣང་བར་འགྱུར་བའི་ཕྱིར་རོ། །དེས་ན་ལྷན་ཅིག་སྤྱོད་པའི་དངོས་པོ་དེ་ལས་དབང་པོ་ལས་འདས་པའི་དོན་རྟོགས་པ་ག་ལས་ཡིན། རྗེས་སུ་འགྲོ་བ་ལ་སོགས་པ་རྣམས་ཀྱིས་དབང་པོ་ལས་འདས་པའི་དོན་རྟོགས་པར་ཁས་བླངས་ལ།
[124a.6]དེ་ལྷན་ཅིག་སྤྱོད་པའི་དངོས་པོའི་འབྲེལ་པས་སྦྱོར་རོ་ཞེས་པ་ཁས་བླངས་པ་ཉམས་སོ། །དེའི་ཕྱིར་འདི་དག་ཁོ་ན་མ་ཡིན་ནོ་ཞེས་པས་གཞན་ཡང་འདོད་པར་བྱ་སྟེ། གང་ལས་རྗེས་སུ་འགྲོ་བ་ལ་སོགས་པ་རྣམས་ཀྱིས་གཙོ་བོ་ལ་སོགས་པ་འགྲུབ་པར་འགྱུར་བའོ། །རྗེས་སུ་དཔག་པ་རྣམ་པ་གཉིས་
[124a.7]ཞེས་པ་སྟེ། དེ་ལ་ཁྱད་པར་མཐོང་བ་ནི། གང་གི་ཚེ་མེ་དང་དུ་བ་འབྲེལ་པ་མཐོང་ནས། དུ་བ་དེ་ཁོ་ནས་མེ་དེ་ཁོ་ནའི་ཡང་དང་ཡང་དུ་མེ་དེ་ཁོ་ན་འདིའོ་ཞེས་ཡོད་པ་ཉིད་དུ་རྟོགས་པར་བྱེད་པའོ། །སྤྱིར་མཐོང་བ་ནི་གང་འགའ་ཞིག་ཏུ་དུ་བ་དང་མེ་འབྲེལ་པར་མཐོང་ནས། དུས་ཕྱིས་དུ་བ་ཙམ་
[124b]
[124b.1]མཐོང་བ་ལས་མེ་སྤྱིར་རྗེས་སུ་དཔོག་པའོ། །སྤྱིར་མཐོང་བའི་རྗེས་སུ་དཔག་པ་འདི་ཡང་རྣམ་པ་གཉིས་ཏེ། སྔ་མ་དང་ལྡན་པ་དང་ལྷག་མ་དང་ལྡན་པའོ། །དེ་ལ་སྔ་མ་དང་ལྡན་པ་ནི་གང་གི་ཚེ་རྒྱུ་མ་ཚང་བ་མེད་པ་མཐོང་ནས་འབྲས་བུ་འབྱུང་བར་འགྱུར་བ་ཉིད་རྟོགས་པ་སྟེ། དཔེར་ན་སྤྲིན་བྱུང་
[124b.2]བ་མཐོང་ནས་ཆར་པ་འབྱུང་བར་འགྱུར་བ་ཉིད་ལྟ་བུའོ། །ལྷག་མ་དང་ལྡན་པ་ནི་གང་གི་ཚེ་འབྲས་བུ་གྲུབ་པ་མཐོང་ནས་རྒྱུ་བྱུང་ཟིན་པ་ཉིད་རྟོགས་པ་སྟེ། དཔེར་ན་ཆུ་ཀླུང་གསར་དུ་ཆུ་འཕེལ་བ་མཐོང་བ་ནས་སྤྲིན་བྱུང་བ་ཉིད་ལྟ་བུའོ། །དེ་ལ་སྔ་མ་དང་ལྡན་པའི་རྗེས་སུ་དཔག་པ་ནི་འཁྲུལ་པའོ། །
[124b.3]ལྷག་མ་དང་ལྡན་པ་རྣམ་པར་དཔྱད་པ་དང་བཅས་པ་ནི་འཁྲུལ་པ་མེད་པའོ། །དེ་རྣམས་ཀྱིས་གང་འདི་སྤྱིར་མཐོང་བའི་རྗེས་སུ་དཔག་པ་ལྷག་མ་དང་ལྡན་པ་འདི་ནི་དབང་པོ་ལས་འདས་པའི་དངོས་པོ་རྣམས་ཡང་དག་པར་རྟོགས་པར་བྱེད་པའོ་ཞེའོ། །དེ་དྲན་པར་འདོད་ཅེས་པ་འདི་ལ་འཐད་
[124b.4]པ་གསུངས་པ་མ་ཡིན་ཞེས་པ་ལ་སོགས་པའོ། །འདིས་ནི་སྔར་ཉམས་སུ་མྱོང་བ་དེ་ཁོ་ན་འདིའོ་ཞེས་སོ་སོར་ངོ་ཤེས་པ་དེ་ནི་དྲན་པའི་བདག་ཉིད་ཡིན་ཏེ། དཔེར་ན་དུ་བ་དེ་ཁོ་ན་འདིའོ་ཞེས་པའི་ཤེས་པ་བཞིན། ཁྱད་པར་མཐོང་བ་ཡང་ཇི་སྐད་བཤད་པའི་ཆོས་དང་ལྡན་པའོ་ཞེས་རང་བཞིན་གསུངས་སོ། །
[124b.5]འབྲས་བུ་དང་རྒྱུ་དག་ལས་ཞེས་པ་ལ་སོགས་པ་སྟེ། སྤྱིར་མཐོང་བ་ཁོ་ན་རྣམ་པ་གཉིས་ཞེས་ངེས་པར་བཟུང་བ་ནི་གཞན་རྣམ་པ་གཉིས་ཉིད་རྣམ་པར་གཅོད་པ་འབྲས་བུའོ། །དེ་ལས་ཀྱང་འབྲས་བུ་དང་རྒྱུ་དག་ལས་ཡང་དང་ཡང་དུ་རྗེས་སུ་དཔག་པ་མེད་པར་ཐལ་བར་འགྱུར་ལ། ཡང་དང་ཡང་དུ་
[124b.6]རྗེས་སུ་དཔོག་པ་ཁྱད་པར་མཐོང་བའོ་ཞེས་བྱས་ནས་ཞེས་པ་ཁས་བླངས་པ་ཉམས་སོ། །ཅི་སྟེ་ཞེས་པ་འདི་ལྟ་བུ་ལ་སོགས་པས་ཀྱང་ཁས་བླངས་པ་ཁོ་ན་གསུངས་སོ། །གང་གི་ཕྱིར་སྤྱིར་མཐོང་བ་རྣམ་པ་གཉིས་ཁོ་ནའི་ངེས་པར་གཟུང་བའི་འབྲས་བུ་ནི་གྲངས་གཞན་རྣམ་པར་སེལ་བའོ། །དེ་ལས་
[124b.7]ཀྱང་ནོར་དང་ནོར་ཅན་ལ་སོགས་པའི་འབྲེལ་པ་རྣམས་ཀྱིས་དེ་དང་པོར་རྗེས་སུ་དཔག་པར་མི་འགྱུར་རོ། །དེ་དང་པོར་སྨོས་པ་ནི་ཡང་དང་ཡང་རྗེས་སུ་དཔོག་པ་ལ། ཁྱད་པར་མཐོང་བ་སྲིད་པའི་ཕྱིར་རོ། །ཅིའི་ཕྱིར་སྤྱིར་མཐོང་བ་མེད་ཅེ་ན་གསུངས་པ། འདི་རྣམས་ལ་འབྲས་བུ་དང་རྒྱུའི་
[125a]
[125a.1]དངོས་པོ་ཡོད་པ་ནི་མ་ཡིན་ཞིང་ཞེས་པ་སྟེ། འབྲས་བུ་དང་རྒྱུའི་དངོས་པོ་ལས་ཀྱང་སྤྱིར་མཐོང་བར་འདོད་དོ། །ཅི་ལྟར་ན་ཁྱད་པར་མཐོང་བ་མེད་ཅེ་ན་གསུངས་པ། ཁྱད་པར་འཛིན་པ་ཡང་མ་ཡིན་ནོ་ཞེས་པ་སྟེ། གཉིས་པ་ལ་སོགས་པའི་སྐད་ཅིག་རྣམས་ལ་དེ་ཁོ་ན་
[125a.2]འདིའོ་ཞེས་ཁྱད་པར་འཛིན་པ་སྲིད་དེ། དེའི་དངོས་པོ་ཞེས་བྱ་བའི་ཁྱད་པར་འཛིན་པའི་ཕྱིར་རོ། །སྐད་ཅིག་དང་པོ་ལ་ནི་མ་ཡིན་ནོ། །འབྲེལ་པ་རྣམ་བདུན་བསྟན་པ་དང་། །ཞེས་པ་ནོར་དང་ནོར་ཅན་གྱི་དངོས་པོ་ལ་སོགས་པ་རྣམས་སོ། །རྗེས་སུ་དཔག་པ་རྣམ་གཉིས་ཉིད། །ཅེས་པ། སྤྱིར་
[125a.3]མཐོང་བ་དང་ཁྱད་པར་མཐོང་བ་དག་ལས་གཞན་ཡང་སྲིད་པའི་ཕྱིར་རོ། །ནིའི་སྒྲ་གཅིག་ནི་གང་གི་ཕྱིར་གྱི་དོན་ལའོ། །གཉིས་པ་ནི་དེའི་ཕྱིར་གྱི་དོན་ལ་སྟེ། གང་གི་ཕྱིར་རྗེས་སུ་དཔག་པ་རྣམ་པ་གཉིས་ཁོ་ན་ཡིན་པ་དེའི་ཕྱིར་ནོར་དང་ནོར་ཅན་ལ་སོགས་པ་གསུམ་རྣམས་ཀྱིས་དང་པོར་རྗེས་སུ་
[125a.4]དཔག་པར་བྱ་བ་རྟོགས་པ་ན་རྗེས་སུ་དཔག་པ་གསུམ་པོ་གང་ཡིན་པ་དེ་རྣམས་གང་གི་ཁོངས་སུ་བསྡུ་སྟེ། དེར་གང་དུ་ཡང་ནང་དུ་འདུ་བ་མ་ཡིན་ནོ་ཞེས་པ་དགོངས་པའོ། །གསུམ་སྨོས་པ་ནི་རང་བཞིན་དང་རྣམ་འགྱུར་དང་། རྒྱུ་མཚན་དང་རྒྱུ་མཚན་ཅན་དང་ཙམ་པོ་དང་ཚད་ཅན་གྱི་དངོས་པོ་
[125a.5]རྣམས་འབྲས་བུ་དང་རྒྱུའི་དངོས་པོ་ཁོ་ནའི་ནང་དུ་འདུ་བའི་ཕྱིར་རོ། །རྗེས་སུ་གཟུང་བར་བྱ་བ་དང་རྗེས་སུ་འཛིན་པར་བྱེད་པ་ཉིད་ཀྱི་ཕྱིར་རོ་ཞེས་པ། ཕན་གདགས་པར་བྱ་བ་དང་ཕན་འདོགས་པར་བྱེད་པ་པོ་ཉིད་ཀྱི་ཕྱིར་རོ་ཞེས་པའི་དོན་ཏོ། །ཕན་གདགས་པར་བྱ་བ་དང་ཕན་འདོགས་པ་པོའི་དངོས་
[125a.6]པོ་མེད་པར་ནོར་དང་ནོར་ཅན་གྱི་དངོས་པོ་སྲིད་པ་ནི་མ་ཡིན་ཏེ། རྣམ་པ་གཞན་དུ་ན་ཧ་ཅང་ཐལ་བར་འགྱུར་རོ། །ཕྱོགས་འདིས་ལྷན་ཅིག་སྤྱོད་པའི་དངོས་པོ་དང་གནོད་པར་བྱ་བ་དང་གནོད་པར་བྱེད་པའི་འབྲེལ་པ་དག་ཀྱང་འབྲས་བུ་དང་རྒྱུའི་དངོས་པོར་དྲང་བར་བྱའོ་ཞེས་པས་ལོག་པར་མ་བརྗོད་དོ། །
[125a.7]དེ་ལྟར་ནི་ཕན་འདོགས་པ་མེད་པར་ལྷན་ཅིག་སྤྱོད་པའི་དངོས་པོ་ཡོད་པ་མ་ཡིན་པས་སོ། །ངུར་པ་དག་ཀྱང་འཁྲིག་པའི་བདེ་བ་ཉེ་བར་སྒྲུབ་པ་ལ་སོགས་པས་ཕན་ཚུན་ཕན་འདོགས་པ་མཐོང་བའི་ཕྱིར་རོ། །གནོད་བྱ་གནོད་བྱེད་ཀྱི་དངོས་པོ་ལ་ཡང་སྦྲུལ་རྒྱལ་བ་དང་སྦྲེ་མོ་འཕམ་པ་དག་འབྲས་
[125b]
[125b.1]བུ་དང་རྒྱུའི་དངོས་པོ་དག་ཁོ་ན་སྟེ། ཕན་ཚུན་རྒྱུ་ཉིད་ཀྱི་ཕྱིར་རོ། །སྙིང་སྟོབས་ལ་སོགས་པ་རྣམས་ཀྱི་སྒྲ་ལ་སོགས་པའི་དངོས་པོར་ཡོངས་སུ་གྱུར་པ་ན་བཞིན་ནོ། །འབྲེལ་པ་གཞན་མེད་པར་ཐལ་བར་འགྱུར་བའི་ཕྱིར་རོ་ཞེས་པ། འབྲས་བུ་དང་རྒྱུའི་འབྲེལ་པ་གཅིག་པུ་ཁོ་ནར་འགྱུར་གྱི་
[125b.2]འབྲེལ་པ་གཞན་ནི་མ་ཡིན་ཏེ། ཕན་གདགས་པར་བྱ་བ་དང་ཕན་འདོགས་པར་བྱེད་པ་མེད་པར་འབྲེལ་པ་སྲིད་པ་མ་ཡིན་པའམ། ཧ་ཅང་ཐལ་བར་འགྱུར་བ་ཡང་ནའོ། །ཅི་ལྟར་ན་འབྲེལ་པ་གཞན་མེད་ཅེ་ན་གསུངས་པ། ཐམས་ཅད་དུ་ཞེས་པ་ལ་སོགས་པ་སྟེ། འབྲེལ་པ་བདུན་རྣམས་
[125b.3]ཀྱིས་ཀྱང་རྗེས་སུ་དཔག་པར་བྱ་བ་ལ། རྟོགས་པར་བྱ་བ་དང་རྟོགས་པར་བྱེད་པའི་འབྲེལ་པ་ཅན་དག་གིས་བྱས་པ་ཕན་ཚུན་ནམ་གང་ཡང་རུང་བའི་ཇི་ལྟར་སྲིད་པར་ཕན་འདོགས་པ་ཡོད་དེ། རྣམ་པ་གཞན་དུ་ན་དེ་དག་འབྲེལ་པ་ཁོ་ནར་མི་འགྱུར་རོ། །ཡང་ན་འདིས་རྗེས་སུ་དཔག་
[125b.4]པར་བྱ་བའོ་ཞེས་པས་རྗེས་སུ་དཔག་པ་ནི། འབྲེལ་པ་རྣམ་པ་བདུན་ཏེ། རྗེས་སུ་དཔག་པ་དེར་རོ། །རྒྱུ་མཚན་གྱི་དོན་ཅན་བདུན་པ་སྟེ། འབྲེལ་པ་རྣམ་པ་བདུན་ནི་རྒྱུ་མཚན་ནོ། །རྟོགས་པར་བྱ་བ་དང་རྟོགས་པར་བྱེད་པ་དག་གིས་ཞེས་པ་ལ་སོགས་པ་ལྷག་མ་སྔ་མ་བཞིན་ནོ། །བཤད་པ།
[125b.5]འདི་ལ་གང་འདི་རྩོད་པ་ནི། འོ་ན་འབྲས་བུ་དང་རྒྱུའི་དངོས་པོ་ནི་རྟོགས་པར་བྱ་བའི་ཆེད་དུ་བརྟེན་པར་བྱ་བ་མ་ཡིན་ནམ། གཞན་དུ་ན་འབྲེལ་པ་མི་ཤེས་པའི་རྟགས་ལས་ཀྱང་དང་པོ་མཐོང་བ་ན་རྗེས་སུ་དཔག་པར་འགྱུར་རོ། །དེའི་ཕྱིར་དེ་ཁོ་ན་ཕན་འདོགས་པའོ་ཞེས་ཇི་ལྟར་བརྗོད་པར་བྱ་ཞེས་པའོ། །
[125b.6]དེ་འཇུག་པ་མེད་པ་ཁོ་ན་སྟེ། གང་གི་ཕྱིར་འདིར་རྟོགས་པར་བྱེད་པ་ཕན་འདོགས་པར་བྱེད་པ་མངོན་པར་ཡང་དག་པར་བརྗོད་པ་མ་ཡིན་གྱི། འོ་ན་ཅི་ཞེ་ན། འབྲེལ་པ་ཅན་དག་གི་བདག་ཉིད་དུ་གྱུར་པའི་རྗེས་སུ་འཛིན་པའོ། །སྐྱོན་རྣམ་པ་གཉིས་ཞེས་པ། འདི་ཁོ་ན་ཕྱོགས་གཉིས་ཀ་ལ་
[125b.7]ཡོད་པའོ། །འབྲས་བུ་མེད་ཅེས་པ་ངག་རྣམས་ནི་དོན་གཞན་རྣམ་པར་གཅོད་པའི་འབྲས་བུ་ཅན་ཉིད་ཀྱི་ཕྱིར་རོ། །འདིའི་ཅི་ཡིན་ཞེས་པ་ལ་སོགས་པས་འབྲས་བུ་མེད་པ་དེ་ཁོ་ན་སྟོན་ཏོ། །འོ་ནའང་རྣམ་པ་གཉིས་ཉིད་མ་ཤེས་པ་རྟོགས་པར་བྱེད་པ་ཁོ་ན་ངག་གི་འབྲས་བུར་འགྱུར་བ་མ་
[126a]
[126a.1]ཡིན་ནམ། འདིར་དོན་གཞན་རྣམ་པར་གཅོད་པས་ཅི་ཞིག་བྱ་ཞེ་ན། འདི་ནི་མི་རིགས་ཏེ། དོན་གཞན་རྣམ་པར་གཅོད་པས་ནི་དེའི་རང་གི་ངོ་བོ་རྟོགས་པའི་ཕྱིར་ལ། དེ་ནི་རང་བཞིན་གཞན་ལས་ལོག་པའི་ངོ་བོ་ཅན་ཉིད་ཀྱི་ཕྱིར་རོ། །གལ་ཏེ་ངོ་བོ་གཞན་རྣམ་པར་
[126a.2]གཅད་པ་མ་ཡིན་ན་ནི། དེའི་རང་གི་ངོ་བོ་རྟོགས་པ་ག་ལས་ཡིན། རྣམ་པ་གཉིས་ཉིད་མ་ཤེས་པ་ཡང་མ་ཡིན་ཏེ། འབྲས་བུ་དང་རྒྱུ་རྗེས་སུ་དཔོག་པའི་སྐབས་ཡིན་པའི་ཕྱིར་རོ། །དེ་ལ་སླར་ཡང་བརྗོད་པ་ནི་ངེས་པར་བྱ་བའི་དོན་དུ་རྣམ་པར་ཤེས་པར་བྱའོ། །དེ་མི་རིགས་ཏེ་ཞེས་པ་
[126a.3]འདི་ལ་གཏན་ཚིགས་གསུངས་པ། འབྲེལ་པ་ཅན་གྱི་འཁྲུལ་པ་མེད་པའི་ཕྱིར་རོ་ཞེས་པའོ། །གེགས་ལ་སོགས་པ་སྲིད་པ་ན། །ཞེས་པ། གེགས་ནི་འགལ་བའི་རྐྱེན་ཉེ་བར་བབ་པའོ། །སོགས་པའི་སྒྲས་ལྷན་ཅིག་བྱེད་པ་མ་ཚང་བ་སྲིད་པ་ནའོ། །རྟགས་སུ་བྱ་བའོ་ཞེས་པ་ནི་
[126a.4]རྟོགས་པར་བྱ་བའོ་ཞེས་པའི་དོན་ཏོ། །འདིར་ཉེ་བར་གདགས་པར་རིགས་པ་ཡང་མ་ཡིན་ཞེས་པ་ཉེ་བར་འདོགས་པའི་རྒྱུར་གྱུར་པ་རྗེས་སུ་དཔག་པའི་རྒྱུ་ཉིད་མེད་པའི་ཕྱིར་རོ། །ཅི་སྟེ་ཞེས་པ་ལ་སོགས་པ་སྟེ། གང་ཞིག་རྒྱུ་འགའ་ཞིག་འབྲས་བུ་ཉེ་བར་བསྐྱེད་པ་ཟིན་པར་མཐོང་ནས་དེའི་རིགས་
[126a.5]ཅན་གཞན་ཡང་མཐོང་ཞིང་འདྲ་བར་བློ་འཁྲུལ་པ་པོ་འདི་ཡང་ངེས་པར་འབྲས་བུ་དེ་སྐྱེད་པར་འགྱུར་རོ་ཞེས་ལྷག་པར་ཞེན་པར་བྱེད་པ་པོ་དེའི་ནི་རྒྱུ་ལས་འབྲས་བུའི་ཤེས་པར་འགྱུར་རོ། །འགའ་ཞིག་གི་ཚེ་ཞེས་པའི་ཚིག་ལས་མི་འགྱུར་བ་ཡང་ངོ་། །གང་གི་ཕྱིར་འགྱུར་བ་དེའི་ཕྱིར་རྗེས་སུ་དཔག་
[126a.6]པའི་རྒྱུ་ཡིན་པ་ཉིད་ཀྱི་ཕྱིར་རྗེས་སུ་དཔག་པར་བརྗོད་པར་བྱའོ། །གང་ཞིག་ཕྱིར་འགའ་ཞིག་གི་ཚེ་འབྱུང་བ་མ་ཡིན་པ་དེའི་ཕྱིར་འཁྲུལ་པ་ཞེས་བརྗོད་པར་བྱའོ། །དེ་ལྟར་རྗེས་སུ་དཔག་པ་ཉིད་དང་འཁྲུལ་པ་ཉིད་དུ་ཡང་བརྗོད་དོ་ཞེའོ། །དེ་ནི་མ་ཡིན་ཏེ། དེའི་ཚེ་དེའི་རྒྱུ་མ་ཡིན་པ་ཉིད་ཀྱི་ཕྱིར་རོ་ཞེས་
[126a.7]པ། དེའི་ཚེ་ཡང་རྗེས་སུ་དཔག་པར་ཉེ་བར་གདགས་པར་རིགས་པ་མ་ཡིན་པ་ཁོ་ན་སྟེ། རྗེས་སུ་དཔག་པའི་རྒྱུ་ཉིད་མེད་པའི་ཕྱིར་རོ། །དེའི་ཚེ་ནི་དེ་རྗེས་སུ་དཔག་པ་མ་ཡིན་པ་ཁོ་ནའོ་ཞེས་པ། གང་ཞིག་དེ་ཡང་དོན་ཇི་ལྟ་བ་རྟོགས་པ་ཡིན་ཏེ། དེའི་ཕྱིར་དེའི་རྒྱུས་རྗེས་སུ་དཔག་པར་ཉེ་བར་
[126b]
[126b.1]གདགས་པར་རིགས་མོད། གང་གི་ཚེ་ཡང་དོན་ཇི་ལྟ་བ་ཡིན་པ་དེའི་ཚེ་འཁྲུལ་པ་ཉིད་མེད་དོ། །དེའི་ཕྱིར་དེ་གཅིག་པུ་གང་ཡིན་པ་རྗེས་སུ་དཔག་པར་འགྱུར་ཞིང་འཁྲུལ་པ་ཡང་ཡིན་པ་ནི་མེད་དོ། །འོ་ན་རྗེས་སུ་དཔག་པ་ལྟར་སྣང་བའི་རྒྱུ་ཡང་རྗེས་སུ་དཔག་པར་བརྗོད་པར་བྱ་བ་མ་ཡིན་
[126b.2]ནམ། དེ་ལྟར་ནི་སྨྲ་བ་པོ་རྣམས་སུ་འགྱུར་ཏེ། གང་འདིས་རྗེས་སུ་དཔག་པ་ཉེ་བར་བཀོད་པ་དེ་དག་གིས་སུན་ཕྱུང་ངོ་ཞེས་པ་དང་། གཞན་ཡང་རྒྱུ་ནི་འཁྲུལ་པའོ་ཞེས་པ་སྟེ། དོན་འདི་ཙམ་བརྗོད་པར་འདོད་པ་ཉིད་ཀྱི་ཕྱིར་རོ་ཞེ་ན། འདི་ནི་སུན་འབྱིན་པ་མ་ཡིན་ནོ་ཞེས་གསུངས་པ། གལ་
[126b.3]ཏེ་ཡང་ཞེས་པ་ལ་སོགས་པ་སྟེ། གལ་ཏེ་འབྲས་བུ་དང་རྒྱུའི་ཤེས་པ་ཡོད་པ་ལ་ཡང་། སླར་ཡང་དེ་ལ་ལྷག་པོའི་འཁྲུལ་པ་དང་མ་འཁྲུལ་བ་ཉིད་ལ་ལྟོས་ན། འབྲེལ་པ་གཞན་ཞིག་འོངས་པའོ་ཞེས་པས་ཁས་བླངས་པ་ཉམས་སོ། །གང་ཁོ་ནའི་མི་འཁྲུལ་བ་ཉིད་ལ་ལྟོས་པ་ཞེས་པ།
[126b.4]གང་ཁོ་ནའི་མི་འཁྲུལ་བ་ཉིད་ཀྱི་རང་གི་ངོ་བོ་ལ་ལྟོས་པ་ཞེས་པའི་དོན་ཏོ། །རང་གི་ངོ་བོ་ཞེས་པ་འདི་གང་ལས་ཤེ་ན། གང་གི་ཕྱིར་མེད་ན་མི་འབྱུང་བ་ཉིད་ཀྱི་སྟེ་གཞན་པ་མི་འཁྲུལ་པ་ཉིད་ཡོད་པ་མ་ཡིན་ཞིང་དེ་ནི་མི་འཁྲུལ་པའི་ངོ་བོ་ཉིད་ཡིན་པའི་ཕྱིར་རོ། །རྗེས་སུ་དཔག་པ་ཐམས་ཅད་ལ་ཡང་
[126b.5]ཞེས་པ་ལ་སོགས་པས་སླར་བརྗོད་པ་དོན་མེད་པ་ཉིད་གསུངས་སོ། །ཅི་སྟེ་ངེས་པའི་དོན་དུ་དེ་བརྗོད་དོ་ཞེ་ན། དེ་ལྟ་ན་ཡང་སྤྱིར་ཡིན་ཞེས་པ་ལ་སོགས་པ་དོན་མེད་པ་ཉིད་དུ་འགྱུར་རོ། །ཡོད་ཉིད་ལའང་རྣམ་དཔྱད་འདིའི། །ཞེས་པ་ལ། ཡོད་པའི་སྒྲ་ནི་འདིར་རང་གི་ངོ་བོ་མངོན་པར་བརྗོད་པའོ། །
[126b.6]གང་ཕྱིར་འབྲས་བུ་དང་རྒྱུའི་འབྲེལ་པ་རྗེས་སུ་དཔོག་པའི་རྒྱུ་ཉིད་དུ་ཁས་བླངས་པ་ན། རྟགས་ཀྱི་རང་གི་ངོ་བོ་ཁོ་ན་ཅི་འདི་འབྲས་བུར་འགྱུར་རམ་མི་འགྱུར་ཞེས་རྣམ་པར་དཔྱད་པར་རིགས་སོ། །འདི་ལྟ་སྟེ་ཆུ་ཀླུང་གང་བ་ལ་ཞེས་པ། དེ་ལ་ནི་རང་གི་ངོ་བོ་རྟོགས་པ་ཁོ་ན་ལ་རྣམ་པར་དཔྱད་
[126b.7]པ་སྟེ། ཅི་ཆུ་ཀླུང་གང་བ་འདི་ཆར་པས་བྱས་པའམ། འོན་ཏེ་མ་ཡིན་ཞེས་པའོ། །གང་གི་ཚེ་འདི་དབུ་བ་འཁྲུག་པ་དང་ཆུ་རྡུལ་དང་ལྡན་པ་ལ་སོགས་པའི་མཚན་མ་རྣམས་ཀྱིས་རང་གི་ངོ་བོ་ངེས་པར་འགྱུར་བ་དེའི་ཚེ་སླར་ཡང་མི་འཁྲུལ་བ་ཉིད་ལ་རྣམ་པར་དཔྱད་པ་ལ་ལྟོས་པ་མ་ཡིན་ནོ། །
[127a]
[127a.1]ཆར་པའི་འབྲས་བུ་ཉིད་དུ་ངེས་ན་ནི། དེ་ལ་འཁྲུལ་པ་ཉིད་དུ་དོགས་པ་མ་ཡིན་ཏེ་འབྲས་བུ་ནི་རྒྱུ་ལ་འཁྲུལ་པ་མེད་པའི་ཕྱིར་རོ། །དེ་ཁོ་ན་སྟོན་པ་གསུངས་པ། རྣམ་པར་མ་དཔྱད་པ་ཡང་ཞེས་པ་ལ་སོགས་པའོ། །དེའི་ཕྱིར་ངེས་པར་འཛིན་པ་རིགས་པ་མ་ཡིན་ནོ་ཞེས་པ་གཞན་
[127a.2]པ་ལས་ཀྱང་དབང་པོ་ལས་འདས་པའི་དོན་རྟོགས་པའི་ཕྱིར་རོ། །འོ་ན་སྤྱིར་མཐོང་བ་ཁོ་ན་དབང་པོ་ལས་འདས་པའི་དོན་མཐོང་བའི་རྒྱུའོ་ཞེས་པ་འདི་ལྟར་ངེས་པར་གཟུང་བར་བྱ་བ་མ་ཡིན་གྱི། འོ་ན་ཅི་ལྟར་ཞེ་ན། སྤྱིར་མཐོང་བ་ནི་དབང་པོ་ལས་འདས་པའི་དོན་ཉེ་བར་དམིགས་པའི་རྒྱུ་ཁོ་ནའོ་ཞེས་སོ། །
[127a.3]དེ་ལྟ་ན་ཡང་རྗེས་སུ་དཔག་པ་གཞན་དབང་པོ་ལས་འདས་པའི་དོན་རྟོགས་པའི་རྒྱུ་ཡིན་པ་ཉིད་བཀག་པ་མེད་པའི་ཕྱིར་སྐྱོན་མེད་དོ་ཞེ་ན། འདི་ཡོད་པ་མ་ཡིན་ཏེ་རྗེས་སུ་དཔག་པ་ཐམས་ཅད་རྣམས་མངོན་གྱུར་མ་ཡིན་པ་རྟོགས་པའི་རྒྱུ་ཉིད་ཀྱི་ཕྱིར་སྤྱིར་མཐོང་བ་ཡང་དེ་རྟོགས་པའི་རྒྱུ་ཉིད་ཐོབ་པ་ལས།
[127a.4]སླར་ཡང་བརྗོད་པ་ན་དེ་ལས་བཟློག་པ་དགག་པའི་ངོ་བོ་ངེས་པ་ཡིན་པ་རྣམ་པར་ཤེས་པར་བྱ་སྟེ། སེན་མོ་ལྔ་ལྔ་རྣམས་ཀྱིས་བཟའ་བར་བྱའོ་ཞེས་པ་ཇི་ལྟ་བ་བཞིན་ཡིན་ན། རྗེས་སུ་དཔག་པ་གཉིས་ལས་སྤྱིར་མཐོང་བ་ཐ་དད་པར་བྱས་ནས་དབང་པོ་ལས་འདས་པའི་དོན་རྟོགས་པའི་རྒྱུ་ཉིད་དུ་ཉེ་
[127a.5]བར་བླང་བར་བྱས་ཏེ། དེ་ལས་ཀྱང་དེ་ཁོ་ན་དེར་རྣམ་པར་ཤེས་པར་བྱ་སྟེ། ཇི་ལྟར་བ་རྣམས་ཀྱི་ནག་མོ་ནི་ཤིན་ཏུ་འོ་མ་ཕུན་སུམ་ཚོགས་པ་ཞེས་པས། ནག་མོ་ཁོ་ན་ཤིན་ཏུ་འོ་མ་ཕུན་སུམ་ཚོགས་པ་ཉིད་བཞིན་ནོ། །དེ་ཡོད་པར་གྱུར་པ་ཁོ་ནའི་རྒྱུ་ཉིད་ཀྱི་ཕྱིར་རོ་ཞེས་པ། གཙོ་བོ་ཡོད་པའི་དངོས་
[127a.6]པོ་ཁོ་ནའི་སྟེ། དེ་ཡོད་པ་ཙམ་གྱིས་གཙོ་བོ་ནི་ཐ་དད་པའི་རྒྱུ་ཡིན་གྱི། གཅིག་ཉིད་ལ་སོགས་པའི་ཆོས་རྣམས་ཀྱིས་ནི་མ་ཡིན་ནོ། །འདི་ལྟར་སེམས་ཏེ། མེད་པ་ལས་རྣམ་འགྱུར་རྣམས་ཉེ་བར་སྐྱེད་པ་ཁེགས་ཏེ། གསལ་བ་ནི་མེད་པ་ལས་སྐྱེད་པ་མ་ཡིན་ནོ་ཞེས་པ་འདིའི་ཕྱིར། ཡོངས་སུ་
[127a.7]བའི་ལྷག་མ་ལས་གཙོ་བོ་ཡོད་པའི་དངོས་པོ་ཁོ་ན་ལས་བྱེ་བྲག་རྣམས་སྐྱེའོ། །བྱེ་བྲག་རྣམས་ཡོད་པའི་ངོ་བོའི་རྗེས་སུ་བྱེད་པའི་ཕྱིར་ཡང་ཡོད་པའི་ངོ་བོ་ཁོ་ན་རྒྱུ་ཡིན་ལ། ཡོད་པའི་ངོ་བོ་ཡང་དེའི་བདག་ཉིད་འཛིན་དུ་འཇུག་པ་པོ་རང་བཞིན་པ་ཁོ་ནའོ། །ཡོད་པ་ཉིད་དང་འདྲིས་པར་བྱས་པ་ནི་
[127b]
[127b.1]མ་ཡིན་ཏེ། ཡོད་པ་ནི་ཡོངས་སུ་འགྱུར་བ་ལས་སྔར་མི་སྲིད་པའི་ཕྱིར་རོ། །དེ་སྐད་དུ་གསུངས་པ། ངེས་པར་ཡོད་པ་དང་ཡོད་པ་ཞེས་སོ། །ཇི་ལྟར་ཡང་དེའི་ཚེ་ཡོད་པ་མེད་པ་དེ་ལྟར་གཅིག་ཉིད་ལ་སོགས་པ་རྣམས་ཀྱང་ངོ་། །ཅིའི་ཕྱིར་དེ་རྣམས་ཀྱི་རྒྱུ་ཉིད་ཡིན་ཞེ་ན། གཙོ་བོ་ཡོད་
[127b.2]པ་ཁོ་ནའང་སྐྱེས་བུའི་འདོད་པ་རྣམ་པར་བསལ་བའི་ཆེད་དུ་འཇུག་པ་ཡིན་ལ། དེའི་ཕྱིར་དེ་ཁོ་ན་རྒྱུ་ཉིད་དོ་ཞེས་པའོ། །གལ་ཏེ་དེ་ལྟ་ན་བྱེ་བྲག་དེ་ནི་གཙོ་བོའི་ལྡོག་པར་བྱེད་པ་འགའ་ཡང་མ་ཡིན་ནོ་ཞེས་པ་ལ་སོགས་པ་དེ་བརྗོད་པ་ཅི་ལྟར་ཡིན་ཞེ་ན། དེ་ནི་ཕ་རོལ་པོའི་བསམ་པ་ཁོ་ནས་འདི་
[127b.3]ལྟར་བརྗོད་པ་སྟེ། གལ་ཏེ་ཕ་རོལ་པོས་གཞན་མ་ཡིན་པ་ཉིད་དུ་ཁས་བླང་བར་ནས། གཙོ་བོ་དང་སྐྱེས་བུའི་དོན་དུ་གཏོགས་པ་གཙུག་ཕུད་ཅན་ནམ་སིལ་བུ་ཅན་གྱི་དོན་བཅུ་རྣམས་སྒྲུབ་པར་བྱེད་ན། རྣམ་པ་ཐམས་ཅད་དུ་གཏོགས་པར་འགྱུར་རོ། །འདི་ནི་རང་གི་བསམ་པས་ཏེ། དེ་ཡོད་པའི་
[127b.4]དངོས་པོ་ཁོ་ན་རྒྱུ་ཉིད་དུ་རིགས་སོ་ཞེས་བྱས་ནས་སོ། །དེའི་ཡང་ཁྱད་པར་རྣམས་ཁོ་ན་ལས་ཞེས་པ་གཙོ་བོ་ཡོད་པ་ཉིད་ཀྱིའོ། །ཡོད་པ་ཉིད་དམ་མང་པོ་ཉིད་དམ་ཞེས་པ་ལ་སོགས་པས་རྣམ་ཀུན་གྱི་སྒྲའི་དོན་བཤད་དོ། །འམ་གྱི་སྒྲ་སྡུད་པའི་དོན་ཅན་ལས་གཅིག་ཉིད་ལ་སོགས་པའོ། །
[127b.5]ཐ་དད་པའམ་ཐ་མི་དད་པའང་རུང་ཞེས་པ། ཡོད་པ་ཉིད་དམ་གཅིག་དང་ངམ། བྱེད་པ་པོ་མ་ཡིན་པ་ཉིད་ལ་སོགས་པ་རྣམས་དང་ངོ་། །ཡང་ན་གཅིག་དང་སྟེ་བྲལ་བ་དང་ངམ། ལྔ་རྣམས་དང་ཡང་ནའོ། །ཡང་ན་གལ་ཏེ་ཡོད་པ་ཉིད་ལ་སོགས་པ་རྣམས་སྐྱེས་བུ་ལས་ཐ་དད་པ་
[127b.6]རྣམས་དང་། ཅི་སྟེ་ཐ་མི་དད་པ་རྣམས་ཏེ། རྣམ་པ་ཐམས་ཅད་དུ་རྟོགས་པ་མ་ཡིན་ནོ་ཞེས་པས་ཁས་བླངས་པ་ཉམས་སོ། །གང་རྒྱུ་མ་ཡིན་པ་དེ་ལྷག་མ་དང་ལྡན་པའི་རྗེས་སུ་དཔག་པས་རྟོགས་པར་བྱ་བ་མ་ཡིན་ཏེ། ཤིན་ཏུ་མེད་པ་བཞིན། སྐྱེས་བུ་ཡང་དེ་ལྟ་བུའོ་ཞེས་པ་ཁྱབ་པར་བྱེད་པ་
[127b.7]མེད་པའོ། །གང་རྣམས་སྒྲའི་རྣམ་པ་ཡོངས་སུ་གྱུར་པ་དབང་པོའི་འཇུག་པ་ལ་ངེས་པར་སྣང་བ་ན་ཡིད་ཀྱི་འཇུག་པ་ཉེ་བར་སྐྱེས་པ་ན། སྐྱེས་བུ་ཡང་དེའི་རྣམ་པར་འཇུག་པ་ཉེ་བར་སྐྱེས་ལ། དེའི་ཕྱིར་འཇུག་པའི་རྣམ་པ་ཡོངས་སུ་འགྱུར་བ་ཅན་སྐྱེས་བུའོ་ཞེས་འདོད་པ་ནི། གཏན་ཚིགས་མ་
[128a]
[128a.1]གྲུབ་པ་ཉིད་དུ་སྨྲ་བར་བྱེད་དོ། །དེ་རྣམས་ཀྱི་སྐྱེས་བུ་ནི་གཙོ་བོའི་ངོ་བོར་འགྱུར་རོ། །དེ་ལྟར་ནི་ཡིད་ཀྱི་འཇུག་པ་ནི་ཡོན་ཏན་གསུམ་གྱི་བདག་ཉིད་ཡིན་ལ། སྐྱེས་བུའི་འཇུག་པ་ཡང་དེའི་རྣམ་པ་ཅན་ཏེ། དེ་ལས་ཀྱང་དེ་ཡང་ཡོན་ཏན་གསུམ་གྱི་བདག་ཉིད་ཅན་དུ་འགྱུར་རོ། །
[128a.2]དེ་ལྟ་ན་ཡང་འཇུག་པ་དང་འཇུག་ལྡན་གཞན་མ་ཡིན་པ་ཉིད་ཀྱི་ཕྱིར་ན་སྐྱེས་བུ་ཡང་ཡོན་ཏན་གསུམ་གྱི་བདག་ཉིད་འཐོབ་ཅིང་། ཡོན་ཏན་གྱི་རང་བཞིན་ཉིད་ཀྱི་ཕྱིར་ཡང་དེ་ཡང་གཙོ་བོ་ཁོ་ནར་འགྱུར་རོ། །དེ་ལ་ཡང་བཤད་པའི་སྐྱོན་ཏེ། གཙོ་བོ་ཡང་གཅིག་ཉིད་དུ་ཁས་བླངས་པ་ཉམས་སོ་ཞེས་པས་
[128a.3]འདི་ནི་སྙིང་པོ་མེད་པའོ། །རྗེས་སུ་དཔག་པ་ལ་སོགས་པ་རྣམས་ཞེས་པ་ལ་སོགས་པ་སྟེ། སོགས་པའི་སྒྲས་སྒྲ་ལས་བྱུང་བ་དང་ཉེ་བར་འཇལ་བ་དང་དོན་གྱིས་གོ་བ་རྣམས་བསྡུ་བར་བྱའོ། །མངོན་སུམ་སྔོན་དུ་འགྲོ་བ་ཅན་ཉིད་ཀྱི་ཕྱིར། །དེ་དང་འདྲ་བ་ཁོ་ན་ཞེས་པ། ཇི་ལྟར་མངོན་སུམ་
[128a.4]ཆོས་ཀྱི་ངོར་རྒྱུ་མཚན་མ་ཡིན་པ་དེ་ལྟར་རྗེས་སུ་དཔག་པ་ལ་སོགས་པ་རྣམས་ཀྱང་སྟེ། ཅིའི་ཕྱིར་ཞེ་ན། མངོན་སུམ་སྔོན་དུ་འགྲོ་བ་ཅན་ཉིད་ཀྱི་ཕྱིར་རོ། །དེ་ཁོ་ནའི་ཕྱིར་འདི་རྣམས་མདོར་བྱས་པ་མ་ཡིན་ནོ། །མངོན་སུམ་ལ་སོགས་པའི་ཚད་མ་རྣམས་ཅིའི་དོན་དུ་ཡོངས་སུ་བརྟགས་པར་བྱ་བ་
[128a.5]ཡིན་ན། རྩོད་པའི་མཚན་ཉིད་ནི་ཆོས་ཡིན་ལ་མངོན་སུམ་ལ་སོགས་པའི་མཚན་ཉིད་ནི་མ་ཡིན་ནོ་ཞེས་ཤེས་པར་བྱ་བའི་ཆེད་དུ་སྟེ། མངོན་སུམ་ཡང་ཆོས་ཀྱི་ངོར་རྒྱུ་མཚན་མ་ཡིན་པ་ཉིད་དུ་ཤེས་པ་ན། མངོན་སུམ་སྔོན་མ་ཅན་གང་ཡིན་པ་གཞན་དེ་ཡང་ཆོས་ཡོངས་སུ་ཤེས་པའི་རྒྱུ་མཚན་དུ་
[128a.6]མི་འགྱུར་རོ་ཞེས་ཤེས་པ་ཁོ་ན་སྟེ། དེ་མདོར་བྱས་པས་ཅི་ཞིག་བྱ། འོ་ན་ཅི་ལྟར་དཔྱོད་པ་ལ་ཚད་མ་དྲུག་རྣམས་རྟོགས་པར་བྱ་ཞེ་ན་གསུངས་པ། འགྲེལ་པ་བྱེད་པས་ཞེས་པ་ལ་སོགས་པའོ། །དེ་ལ་ཞེས་པ་ལ་སོགས་པས་སུན་འབྱིན་པ་གསུངས་སོ། །འོ་ན་མདོར་མངོན་སུམ་སྔོན་མ་
[128a.7]ཅན་ཉིད་མདོར་མ་བྱས་པ་ཉིད་ལ་གཏན་ཚིགས་ཉིད་དུ་ཉེ་བར་བླངས་ཤིང་། འགྲེལ་པ་ནི་ཚད་མ་ཉིད་ཡོངས་སུ་ཤེས་པ་ལ་སྟེ། གལ་ཏེ་གང་མངོན་སུམ་སྔ་མ་ཅན་དེ་ཚད་མ་ཉིད་དུ་རྣམ་པར་ཤེས་པར་འགྱུར་ན་ཞེས་མངོན་པར་བརྗོད་པའི་ཕྱིར་རོ། །དེས་ན་ཅི་ལྟར་འགྲེལ་པ་མདོའི་དོན་གྱི་རྗེས་སུ་
[128b]
[128b.1]འགྲོ་བ་ཡིན་ཞེ་ན། མདོར་མངོན་སུམ་སྔོན་མ་ཅན་ཉིད་མདོར་མ་བྱས་པའི་བརྒྱུད་པས་གཏན་ཚིགས་ཉིད་དུ་ཉེ་བར་བླངས་ཀྱི། དངོས་སུ་མ་ཡིན་ལ། བརྒྱུད་པ་དེ་ཁོ་ན་བསྟན་པའི་ཆེད་དུ་གང་མངོན་སུམ་སྔོན་མ་ཅན་ཞེས་པ་ལ་སོགས་པ་རྣམ་པར་བཤད་པ་བྱས་སོ་ཞེས་པས་སྐྱོན་མེད་དོ། །གལ་
[128b.2]ཏེ་ཡང་ཚད་མར་ཡོངས་སུ་ཤེས་པ་ཁོ་ན་མདོར་མ་བྱས་པའི་གཏན་ཚིགས་བར་མ་ཆད་པར་བརྗོད་པར་བྱ་ན། ཚད་མར་ཡོངས་སུ་ཤེས་པའི་གཏན་ཚིགས་བརྗོད་པ་མ་ཡིན་པར་འགྱུར་རོ། །དེ་ལས་ཀྱང་། དྲན་དང་འདོད་དང་སྡང་བ་དང་། །རྩོལ་སོགས་ཚད་མར་ཐལ་བར་འགྱུར། །ཞེས་པ་
[128b.3]སུན་འབྱིན་པ་འདི་འཇུག་པ་མེད་པར་འགྱུར་རོ། །དེའི་ཕྱིར་སུན་འབྱིན་པའི་སྐབས་སྦྱིན་པའི་ཆེད་དུ་མངོན་སུམ་སྔོན་མ་ཅན་ཉིད་ཀྱི་ཕྱིར་རོ་ཞེས་བཤད་དོ། །འོ་ན་དཔྱོད་པ་ལ་མངོན་སུམ་སྔོན་མ་ཅན་ཉིད་ཀྱིས་ཚད་མ་ཉིད་དུ་བརྗོད་པ་མ་ཡིན་པ་ཁོ་ནའི། འོན་ཀྱང་འདི་རྣམས་ཆོས་ཀྱི་ངོར་རྒྱུ་མཚན་མ་
[128b.4]ཡིན་པ་ཉིད་བརྗོད་དེ། གང་སྨྲས་པ། མངོན་སུམ་སྔོན་མ་ཅན་ཉིད་ཀྱི་ཕྱིར་ཡང་རྗེས་སུ་དཔག་པ་དང་ཉེ་བར་འཇལ་བ་དང་དོན་གྱིས་གོ་བ་རྣམས་ཀྱང་རྒྱུ་མ་ཡིན་པ་ཉིད་དོ་ཞེས་སོ། །ཉེ་བའི་ཝར་ཥ་ཡིས་ཀྱང་རབ་ཏུ་གྲགས་པ་ཉིད་ཀྱི་ཕྱིར་མ་བརྗོད་པ་རྣམས་སོ་ཞེས་པས་མངོན་སུམ་ལ་སོགས་པའི་
[128b.5]ཚད་མ་རྣམས་རབ་ཏུ་གྲུབ་པ་རྣམས་སོ་ཞེས་བརྗོད་དོ་ཞེ་ན། སྐྱོན་འདི་མེད་དེ། འདིར་དེ་རྣམས་རབ་ཏུ་གྲུབ་པ་ཉིད་མེད་དོ་ཞེས་པ་འདི་ནི་ལོག་པར་རྟོགས་པ་རྣམས་ཀྱང་མང་པོ་ཞེས་པ་འདིས་ཤེས་པར་བྱས་ཟིན་ཏོ། །དེ་རྣམས་ཀྱི་མཚན་ཉིད་བརྗོད་པ་ཡང་མ་ཡིན་ཏེ། གང་ལས་རང་གི་ངོ་བོ་ཤེས་པར་འགྱུར་
[128b.6]བའོ། །མངོན་སུམ་སྔོན་མ་ཅན་ཉིད་ཀྱི་ཕྱིར་ཡང་ཆོས་ཀྱི་ངོར་རྒྱུ་མཚན་མ་ཡིན་པ་ཉིད་དུ་རྗེས་སུ་དཔག་པ་ལ་སོགས་པ་རྣམ་པར་ཤེས་པར་བྱ་བ་ཁོ་ན་སྟེ། དེའི་ཕྱིར་མ་བརྗོད་པ་རྣམས་སོ་ཞེས་པའོ། །འགྲེལ་པ་བྱེད་པ་ངག་བྱེད་པའི་དགོངས་པ་གསལ་བར་བྱེད་པ་རྣམས་ཀྱིས་མངོན་སུམ་སྔོན་མ་
[128b.7]ཅན་གང་ཡིན་པ་དེ་ཚད་མ་ཉིད་དུ་རྣམ་པར་ཤེས་པར་བྱ་བ་ཁོ་ན་སྟེ། དེའི་ཕྱིར་མ་བརྗོད་པ་རྣམས་སོ་ཞེས་པ་འདི་ཡང་དགོངས་པར་རྟོག་གོ་ཞེས་པ་སྲིད་པར་བྱའོ། །གཞན་དུ་ན་སྔ་མ་ཡང་དགོངས་པར་མི་འགྱུར་རོ། །ཚད་མ་གཞན་རྣམས་ཀྱིས་རང་གི་ངོ་བོ་རྣམ་པར་མ་ཤེས་པར་ཆོས་ཀྱི་ངོར་
[129a]
[129a.1]རྒྱུ་མཚན་མ་ཡིན་པ་ཉིད་དུ་རྣམ་པར་ཤེས་པར་ནུས་པ་མ་ཡིན་ནོ། །དེའི་ཕྱིར་རང་གི་ངོ་བོ་ཡོངས་སུ་ཤེས་པའི་དོན་དུ་བཤད་པར་བྱ་བ་རྣམས་སུ་འགྱུར་ན། བརྗོད་པ་ཡང་མ་ཡིན་ནོ། །དེའི་ཕྱིར་ངེས་པར་གང་མངོན་སུམ་སྔོན་མ་ཅན་དེ་ཚད་མ་ཉིད་དུ་རྣམ་པར་ཤེས་པར་བྱ་བ་
[129a.2]ཁོ་ན་སྟེ། དེའི་ཕྱིར་མ་བརྗོད་པ་རྣམས་སོ་ཞེས་པ་འདི་ཡང་འགྲེལ་པ་བྱེད་པ་རྣམས་ཀྱིས་ངག་བྱེད་པའི་དགོངས་པར་མངོན་པར་བརྟགས་པའོ་ཞེས་དགོངས་པར་འགྱུར། དེ་ལས་ཀྱང་དྲན་པ་ལ་སོགས་པ་རྣམས་ཀྱང་མངོན་སུམ་སྔོན་མ་ཅན་ཉིད་ཀྱི་ཕྱིར་ཚད་མ་ཉིད་དུ་ཐལ་བར་འགྱུར་རོ་ཞེས་
[129a.3]པའོ། །རྗེས་དཔག་བསྟན་པ་ལ་སོགས་པ། །ཞེས་སོགས་པའི་སྒྲས་ཉེ་བར་འཇལ་བ་དང་དོན་གྱིས་གོ་བར་བཟུང་ངོ་། །བསྟན་པ་ནི་རྣམ་པ་གཉིས་ཏེ། སྐྱེས་བུས་བྱས་པ་དང་སྐྱེས་བུས་མ་བྱས་པའོ། །འདིར་སྔ་མ་བཟུང་བ་སྟེ། ཅིག་ཤོས་ནི་ཕ་རོལ་པོ་རྣམས་ཀྱིས་ཀྱང་མངོན་
[129a.4]སུམ་སྔོན་མ་ཅན་ཉིད་དུ་མངོན་པར་འདོད་པ་མ་ཡིན་པ་ཁོ་ནའོ། །ཐུན་མོང་མ་ཡིན་པའི་ཡུལ་ཅན་ཞེས་བརྗོད་ཟིན་ཏོ་ཞེས་པ། དུ་མའི་ངོ་བོའི་ཆོས་ཅན་ནི། །ཞེས་པ་འདིར་དབང་པོའི་བློ་ནི་ཐུན་མོང་མ་ཡིན་པའི་ཡུལ་ཅན་དུ་བསྒྲུབས་ཟིན་ཏོ། །འབྲེལ་པ་ནི་རྟེན་དུ་མ་ཅན་ཞེས་པ་ལ་
[129a.5]སོགས་པས་འབྲེལ་པ་ཐུན་མོང་བ་ཉིད་དུ་སྟོན་ཅིང་། གང་ཐུན་མོང་བ་དེ་མངོན་སུམ་གྱི་ཡུལ་མ་ཡིན་ཏེ། སྤྱི་བཞིན་འབྲེལ་པ་ཡང་དེ་ལྟ་བུའོ་ཞེས་ཁྱབ་བྱེད་འགལ་བ་གསལ་བར་བྱེད་དོ། །སྤྱི་ཡིས་མཐོང་བ་མ་ཡིན་པར། །གལ་ཏེ་ཡང་སྤྱི་ཞེས་པ་ལ་སོགས་པས་བསྒྲུབས་ཟིན་ཏོ། །
[129a.6]འདི་ལ་ཁྱབ་པ་མེད་པ་དོགས་པར་བྱ་བ་མ་ཡིན་ཏེ། གང་ཕྱིར་དབང་པོའི་བློ་ནི་དངོས་པོའི་ཡུལ་ཅན་དུ་འདོད་ཅིང་། དངོས་པོ་ཡང་ཐུན་མོང་མ་ཡིན་པ་སྟེ། ཐུན་མོང་བ་ནི་མ་ཡིན་ནོ། །འབྲེལ་པ་ཡང་ཐུན་མོང་བ་སྟེ། དེའི་ཕྱིར་དངོས་པོ་མ་ཡིན་ཞིང་། དེའི་ཕྱིར་དབང་པོའི་བློའི་ཡུལ་མ་
[129a.7]ཡིན་ནོ། །འབྲེལ་པ་ཅན་རྣམས་ཀྱང་ཞེས་པ་ལ་སོགས་པ་སྟེ། གལ་ཏེ་འབྲེལ་པ་རྣམས་འབྲེལ་པ་ཅན་གྱི་ངོ་བོར་ཏེ། ལྡན་པ་ཅན་དང་འདུ་བ་ཅན་ལ་སོགས་པ་ཉིད་དུ་གཟུང་བར་བྱ་ན། དེ་ལྟ་ན་ནི་རྗེས་སུ་དཔག་པ་ལ་སོགས་པ་ལ་ཉེ་བར་མཁོ་བར་འགྱུར་རོ། །སོགས་པའི་སྒྲ་ལས་ཉེ་
[129b]
[129b.1]བར་འཇལ་བ་ལ་སོགས་པ་ལ་ཉེ་བར་མཁོ་བའོ། །གཞན་དུ་ན་གང་ཡང་མེའི་འབྲེལ་པ་ཅན་མ་ཡིན་པ་ཉིད་ཀྱིས་ན། ཐོག་མར་མེ་དང་དུ་བ་འབྲེལ་པར་མ་རྟོགས་པས་དུ་བ་འཛིན་པ་དེ་ཡང་རྗེས་སུ་དཔག་པར་འགྱུར་རོ། །དེ་རྣམས་དེ་ལྟར་མངོན་སུམ་ཡང་མ་ཡིན་ནོ་ཞེས་པ། འབྲེལ་པ་ལ་
[129b.2]ལྟོས་པ་ཉིད་ཀྱི་ཕྱིར་དང་། འབྲེལ་པ་ཅན་ཉིད་དམ་འབྲེལ་པ་ཡང་མངོན་སུམ་མ་ཡིན་པ་ཉིད་ཀྱི་ཕྱིར་རོ། །དབང་པོའི་བློ་ནི་དོན་ལ་ལྟ་བ་ཙམ་ཉིད་ཀྱི་ཕྱིར་ཡང་འབྲེལ་པར་བྱེད་པའི་ངོར་ནུས་པ་མེད་པ་ཉིད་ཀྱི་ཕྱིར། དེ་རྣམས་མངོན་སུམ་གྱིས་འབྲེལ་བ་ཅན་གྱི་ངོ་བོར་འཛིན་པ་སྲིད་པ་མ་ཡིན་
[129b.3]ནོ། །མཐོང་བ་དང་སྤྱི་ལས་མཐོང་བ་ལ་སོགས་པ་འབྱེད་པའི་ཕྱིར་རོ་ཞེས་པ། མཐོང་བ་ནི་གང་དུ་རྟགས་དང་རྟགས་ཅན་དག་གི་འབྲེལ་པ་མཐོང་བའོ། །སྤྱི་ལས་མཐོང་བ་ནི་གང་དུ་འགའ་ཞིག་ཏུ་འབྲེལ་པ་མཐོང་བ་ལས་དེའི་སྤྱིའི་རྣམ་པས་དབང་པོ་ལས་འདས་པའི་དོན་རྟོགས་པའོ། །
[129b.4]སོགས་པའི་སྒྲས་སྔ་མ་དང་ལྡན་པ་ལ་སོགས་པ་རིགས་ཅན་པས་བརྗོད་པ་རྣམས་གཟུང་བར་བྱའོ། །དེ་ལས་ཞེས་པ་ལ་སོགས་པས་འདུ་བ་ལ་སོགས་པ་རྣམས་དང་། དེ་དང་ལྡན་པའི་དུ་བ་ཅན་ལ་སོགས་པ་རྣམས་འདུ་བ་ལ་སོགས་པའི་ངོ་བོས་མངོན་སུམ་མ་ཡིན་པར་ཁས་བླངས་པའི་
[129b.5]ཕྱིར། ཕ་རོལ་པོའི་འདོད་པས་ཀྱང་དེ་ལ་བརྟེན་པའི་རྗེས་སུ་དཔག་པ་ལ་མངོན་སུམ་སྔ་མ་ཅན་ཉིད་མེད་དོ་ཞེས་སྟོན་ཏོ། །དེའི་འདོད་པས་ནི་ཞེས་པ་ལ། དེའི་འདོད་པ་སྨོས་པ་ནི། རང་གི་འདོད་པས་ལྡན་པ་དང་ལྡན་པ་ཅན་དག་ཀྱང་མངོན་སུམ་མ་ཡིན་པ་ཉིད་ཀྱི་ཕྱིར་རོ། །དེ་ཁས་བླངས་
[129b.6]ནས་ཞེས་པ། དེའི་སྒྲས་དེའི་འདོད་པ་སྦྲེལ་བར་བྱའོ། །རྗེས་སུ་དཔོག་པའི་རྒྱུ་མིན་ཞེས་པ་དང་གི་སྒྲ་ནི་རིམ་པ་ཐ་དད་པའམ། ངེས་པར་འཛིན་པར་ཡང་བལྟ་བར་བྱ་སྟེ། གཏན་ཚིགས་མ་ཡིན་པ་ཁོ་ནའོ་ཞེས་པའི་དོན་ཏོ། །གཉིས་དག་ལ་ཁྱད་པར་མེད་པའི་ཕྱིར་རོ་ཞེས་པ་ལ་སོགས་པ་
[129b.7]སྟེ། འབྲེལ་པ་ཅན་གཉིས་ཀ་དག་ལ་ཡང་ལྡན་པ་ཁྱད་པར་མེད་ལ། དེ་ལས་ཀྱང་མེ་དང་དུ་བ་གཉིས་ཀ་ཡང་གོ་བར་བྱ་བ་དང་གོ་བར་བྱེད་པའི་དངོས་པོར་འགྱུར་ཏེ། རྣམ་པ་ཐམས་ཅད་དུ་ཡང་ཐམས་ཅད་ཀྱི་བདག་ཉིད་ཀྱིས་ལྡན་པའི་ཕྱིར་རོ། །ལྡན་ཅན་དག །རང་གི་ངོ་བོས་རྟོགས་བྱའང་
[130a]
[130a.1]མིན། །ཞེས་པ་རང་གི་ངོ་བོ་ནི་གང་འབྲེལ་པ་མི་ཤེས་པས་ཀྱང་གཟུང་བར་བྱ་བ་དུ་བ་ལ་སོགས་པའི་ངོ་བོ་ཡིན་ཏེ། དེས་ལྷག་པར་རྟོགས་པར་འོས་པ་དག་མ་ཡིན་པས་སོ། །ཅིའི་ཕྱིར་ཞེ་ན། སྨྲས་པ། རྗེས་སུ་དཔག་པ་ལ་མ་ཡིན། །ཞེས་པ་ལ་སོགས་པའོ། །
[130a.2]འོ་ན་འབྲེལ་པ་ཅན་གྱི་ངོ་བོས་དེ་དག་ལྷག་པར་རྟོགས་པ་དག་ཕན་འདོགས་པར་འགྱུར་རོ་ཞེ་ན་སྨྲས་པ། མ་ཡིན་ཞེས་པ་ལ་སོགས་པ་སྟེ། དབང་པོའི་བློ་ནི་སྦྱོར་བའི་ཡུལ་ཅན་མ་ཡིན་ལ། དེ་དང་ལྡན་པ་ཡང་མ་ཡིན་ནོ་ཞེས་པ་འདིས། ལྡན་པ་ཅན་གྱི་ངོ་བོས་ལྡན་པ་ཅན་དག་མངོན་སུམ་
[130a.3]ཉིད་དུ་འགྱུར་བ་མ་ཡིན་ནོ་ཞེས་བཤད་ཟིན་ཏོ། །དེ་ལྟར་འགྱུར་མོད། རྗེས་སུ་དཔག་པ་ལ་སོགས་པ་རྣམས་ཀྱི་མིང་མངོན་སུམ་སྔོན་མ་ཅན་མ་ཡིན་ལ། དེ་རྣམས་ཀྱི་མཚན་ཉིད་ནི་གང་འདོད་པ་དེ་ཁ་ན་མ་ཐོ་བ་མེད་པ་སྟེ། གང་ལས་དེ་དགག་པ་བརྗོད་པར་བྱ་བ་མ་ཡིན་པའོ་ཞེ་ན་གསུངས་
[130a.4]པ། རྗེས་སུ་དཔག་པ་དང་ཉེ་བར་སྟོན་པ་དང་ཉེ་བར་འཇལ་བ་རྣམས་ཀྱི་ཞེས་པ་ལ་སོགས་པའོ། །ཡང་ཅི་ལྟར་རང་གི་བསམ་པས་མ་བརྗོད་ཅེ་ན་གསུངས་པ། འབྲེལ་པ་གཞན་མ་བསྟན་པའི་ཕྱིར་རོ་ཞེ་ན། བྱེ་བྲག་པ་ལ་སོགས་པ་མངོན་པར་འདོད་པའི་འབྲེལ་པ་རྣམས་ལས་གཞན་པའི་
[130a.5]འབྲེལ་པ་འགའ་ཡང་ངེས་པར་བསྟན་པ་ནི་མེད་དོ། །གང་ཡང་རི་ཁྲོད་པས་རང་གི་བསམ་པས་རྗེས་སུ་དཔག་པ་འདི་བརྗོད་པ་ལའོ། །རྗེས་སུ་དཔག་པ་ནི་འབྲེལ་པ་ཤེས་པའི་ཕྱོགས་གཅིག་མཐོང་བ་ལས་ཕྱིར་ཕྱོགས་གཞན་པ་གཅིག་ཉེ་བ་མ་ཡིན་པ་ལ་བློ་ཡིན་པའོ། །དེ་རྣམ་པ་གཉིས་ཏེ་མངོན་
[130a.6]སུམ་གྱིས་འབྲེལ་པ་མཐོང་བ་དང་། སྤྱིར་མཐོང་བ་ཞེས་པའོ། །དེ་ཡང་བྱེ་བྲག་པའི་རྗེས་སུ་དཔག་པ་ཁོ་ནའོ། །གལ་ཏེ་འབྲེལ་པ་དེ་རྣམས་ཁོ་ན་བརྗོད་པར་འདོད་ན། འོ་ན་དེ་རྣམས་ཀྱི་རང་གི་ངོ་བོ་གཞན་ངེས་པར་བསྟན་པ་མ་ཡིན་ནོ་ཞེས་པས་རྗེས་སུ་དཔག་པ་ངེས་པར་མ་བསྟན་པ་ཁོ་
[130a.7]ནའོ། །དྲན་པ་ཡང་ཕྱོགས་གཅིག་ཏུ་མཐོང་བ་ལས་ཕྱོགས་གཞན་པ་གཅིག་པོ་སྔར་རྟོགས་པ་ལ་སྐྱེའོ་ཞེས་པས། དེ་ཡང་རྗེས་སུ་དཔག་པར་འགྱུར་རོ། །འབྲེལ་པ་ཡང་དབང་པོས་གཟུང་བར་བྱ་བ་མ་ཡིན་ནོ་ཞེས་བཤད་ཟིན་ཏོ། །དེས་ན་ཅིའི་ཕྱིར་དེ་མངོན་སུམ་གྱིས་འབྲེལ་པ་
[130b]
[130b.1]མཐོང་བ་ཉིད་ཡིན་ཞེས་པས་འདི་ནི་མི་རིགས་སོ། །དོན་གྱིས་གོ་བ་དང་དངོས་པོ་མེད་པ་དག་གི་དགག་པ་བརྗོད་པར་བྱ་སྟེ་ཞེས་པ། དེ་དག་རང་གི་འདོད་པས་བརྗོད་པའི་ཕྱིར་རོ། །ཕྲུ་བ་ལ་སོགས་པ་དང་རྟེན་པར་བྱེད་པ་ལ་སོགས་པའི་དོན་གྱིས་བཟུང་བ་ཞེས་པ་ལ། སོགས་པའི་སྒྲ་
[130b.2]གཅིག་གིས་ཐལ་བ་དང་སྐྱ་བོ་ལ་སོགས་པའི་སྒྲུབ་བྱེད་ཀྱི་བྱེ་བྲག་རྣམས་གཟུང་ངོ་། །གཉིས་པས་ཀྱང་ཆུ་ལེན་པ་ལ་སོགས་པའི་བྱ་བའི་ཁྱད་པར་རྣམས་སོ། །དོན་སྨོས་པ་ཉིད་ནི་ཚོས་པ་ནི་དེ་ལས་སྐྱེས་པའི་ཕྱིར་ཏེ། དེ་རྣམས་མེད་པས་ཚོས་པ་འགྲུབ་པར་མི་འགྱུར་བས་སོ། །དེའི་ཕྱིར་
[130b.3]གཞན་དུ་ནི་མི་འཐད་པས་དེ་ཐམས་ཅད་དོན་གྱིས་བཟུང་བ་ཁོ་ནའོ། །ཡང་ཅི་ལྟར་རྗེས་སུ་དཔག་པ་ཡིན་ཏེ། ཇི་ཙམ་གྱིས་ཚུལ་གསུམ་པའི་རྟགས་ལས་དོན་མཐོང་བ་རྗེས་སུ་དཔག་པར་བརྗོད་དོ་ཞེ་ན། འཚེད་པའི་རྟགས་ཉིད་ལས་རྟོགས་པར་བྱ་བ་ཞེས་པ། འཚོད་པ་ནི་ཕྲུ་བ་ལ་སོགས་
[130b.4]པ་རྣམས་ལ་མེད་ན་མི་འབྱུང་བའི་ཕྱིར་རྟགས་སོ། །མེད་ན་མི་འབྱུང་བ་ནི་དེ་ལས་སྐྱེས་པའི་ཕྱིར་རོ། །དེའི་ཕྱིར་དུ་བ་ལས་མེ་རྗེས་སུ་དཔག་པ་བཞིན་དུ་རྟགས་ལས་སྐྱེས་པ་ཉིད་ཀྱི་ཕྱིར་རྗེས་སུ་དཔག་པ་ལས་ཐ་དད་པ་མ་ཡིན་ནོ། །གཞན་རྣམས་ནི་ཡོད་པ་དང་མེད་པ་དག་ལས། འབྲས་
[130b.5]བུ་དང་རྒྱུ་རྟོགས་པ་དོན་གྱིས་གོ་བར་འདོད་ལ། གཞན་རྣམས་ནི་དེ་ཁོ་ན་རིགས་པ་ཞེས་བྱ་བ་ཚད་མ་གཞན་ཡིན་ནོ་ཞེས་ཏེ། དཔེར་ན་མིག་ཡོད་ན་མིག་གི་རྣམ་པར་ཤེས་པར་འགྱུར་ལ། མེད་ན་མི་འགྱུར་ཏེ། དེའི་ཕྱིར་མིག་ནི་དེའི་རྒྱུ་ཁོ་ནའོ་ཞེས་པའོ། །འདི་ནི་རྗེས་སུ་དཔག་པར་རིགས་
[130b.6]པ་མ་ཡིན་ཏེ། དཔེ་མེད་པའི་ཕྱིར་རོ། །ཚད་མ་གཞན་གྱིས་དཔེ་གྲུབ་པར་འགྱུར་ཞིང་། འདིར་ཚད་མ་གཞན་གྱིས་དཔེ་འགྲུབ་པ་ཡང་མ་ཡིན་ཏེ། དེ་ལྟར་ནི་གང་ཡང་ས་བོན་དང་མྱུ་གུ་ལ་སོགས་པ་འདི་དཔེ་ཉིད་དུ་འདོད་ན། དེར་ཡང་འདི་ཁོ་ནས་འབྲས་བུ་དང་རྒྱུའི་དངོས་པོ་འགྲུབ་ཅིང་།
[130b.7]དེ་ཡང་རིགས་པ་མ་ཡིན་ཏེ། གང་གིས་བསྒྲུབ་པར་བྱ་བ་འགྲུབ་པ་དེ་ཁོ་ནས་དཔེ་ཡང་ངོ་ཞེས་པས་ན་དཔེ་ཐུག་པ་མེད་པར་ཐལ་བར་འགྱུར་བའི་ཕྱིར་རོ་ཞེའོ། །དེ་ཡང་ཚད་མ་གཞན་མ་ཡིན་པ་ཁོ་ན་སྟེ། འདིར་འབྲས་བུ་དང་རྒྱུའི་དངོས་པོ་བསྒྲུབ་པར་བྱ་བ་མ་ཡིན་ཏེ། བསྒྲུབ་པར་བྱ་བ་
[131a]
[131a.1]དང་སྒྲུབ་པར་བྱེད་པ་དག་ཐ་དད་མེད་པའི་ཕྱིར་རོ། །རྒྱུ་དང་འབྲས་བུའི་དངོས་པོ་ནི་ཡོད་པ་དང་མེད་པ་དག་ལས་གཞན་པ་མ་ཡིན་ལ། དེ་ཁོ་ནས་དེ་བསྒྲུབ་པར་བྱ་བ་ཉིད་དུ་འཐད་པ་ཡང་མ་ཡིན་ནོ། །དེའི་ཕྱིར་འདིར་རྨོངས་པའི་ངོར་སྐྱེད་པར་བྱེད་པར་རྗོད་པས་ན་ཕ་ཉིད་
[131a.2]བཞིན་དུ་ཡུལ་བསྟན་པས་ཡུལ་ཅན་འབྲེལ་པ་ཞུགས་པ་དྲན་པར་བྱེད་པའི་ཐ་སྙད་བསྒྲུབ་པར་བྱ་བ་སྟེ། གང་འདྲ་བའི་ཡུལ་དུ་ཁྱོད་ཀྱིས་གཞན་ལ་འབྲས་བུ་དང་རྒྱུའི་ཐ་སྙད་ཞུགས་པ་དེ་འདྲ་བ་ཁོ་ན་འདི་ཡིན་ཏེ། དེའི་ཕྱིར་འདི་ལ་ཡང་འཇུག་པར་བྱོས་ཤིག་ཅེས་ཐ་སྙད་བསྒྲུབ་པར་བྱ་བ་ལ་དཔེ་
[131a.3]སྲིད་དོ་ཞེས་པས་རྗེས་སུ་དཔག་པ་ཁོ་ནའོ། །སྦྱོར་བ་ནི། གང་དུ་དེ་ཡོད་པ་ན་ཡོད་པ་ཉིད་དེ་ལ་འབྲས་བུ་དང་རྒྱུའི་ཐ་སྙད་བྱ་སྟེ། དཔེར་ན་གང་དུ་སྔར་རྒྱུ་དང་འབྲས་བུའི་དངོས་པོ་རབ་ཏུ་ཞུགས་པས་ས་བོན་དང་མྱུ་གུ་ལ་སོགས་པ་ལ་བཞིན། མིག་དང་དེའི་རྣམ་པར་ཤེས་པ་དག་ཀྱང་དེ་
[131a.4]ཡོད་ན་ཡོད་པ་ཉིད་ཡིན་ནོ་ཞེས་པ་རང་བཞིན་ནོ། །རི་ཁྲོད་པ་ན་རེ་དོན་གྱིས་གོ་བ་ཡང་མཐོང་བའམ་ཐོས་པའི་དོན་རྣམ་པ་གཞན་དུ་མི་འཐད་དོ་ཞེས་པས་དོན་གྱིས་ཡོངས་སུ་རྟོགས་པ་སྟེ། དཔེར་ན་ལྷས་བྱིན་འཚོ་བ་ན་ཁང་པར་མ་མཐོང་བས་ཕྱི་རོལ་ན་ཡོད་པ་མ་མཐོང་བ་ཡང་རྟོགས་པ་བཞིན་
[131a.5]ནོ་ཞེས་ཟེར་རོ། །འདིར་བ་ལང་དང་བོང་བུའི་ཚུལ་གྱིས། སྒྲ་ལས་ཁོང་དུ་ཆུད་པ་ནི་ཐོས་པའི་སྒྲས་ལོགས་སུ་ཉེ་བར་བླངས་པའི་ཕྱིར་མཐོང་བའི་སྒྲ་ཚད་མ་གཞན་གྱིས་ཉེ་བར་དམིགས་པ་ལ་འཇུག་གོ། །དཔེར་ན་འཚོ་བ་ན་ཞེས་པ་དངོས་པོ་མེད་པ་སྔོན་དུ་འགྲོ་བའི་དོན་གྱིས་གོ་བའི་དཔེར་བརྗོད་པ་བཞིན་
[131a.6]ནོ། །ཁྱིམ་ན་མ་མཐོང་བས་ཕྱི་རོལ་ན་ཡོད་པ་ཞེས་པ་ནི་འཚོ་བ་ཅན་གྱི་ལྷས་བྱིན་ཁྱིམ་ན་མ་མཐོང་བའི་དངོས་པོ་མེད་པའི་ཚད་མས་ཉེ་བར་དམིགས་པ་ནི་ཕྱི་རོལ་ན་ཡོད་པ་ལས་གཞན་དུ་མི་འཐད་པའི་ཕྱིར་རོ་ཞེས་པའི་དོན་ཏོ། །འདིར་གལ་ཏེ་འཚོ་བ་ཅན་གྱི་ལྷས་བྱིན་ཁྱིམ་ན་མ་མཐོང་བ་ནི་ཕྱི་རོལ་
[131a.7]ན་ཡོད་པ་ལས་རྣམ་པ་གཞན་དུ་མཐོང་བ་མ་ཡིན་ནོ་ཞེས་པས་ན་གཞན་དུ་འཐད་པ་མ་ཡིན་ནོ་ཞེས་བརྗོད་པར་བྱ་ལ། དེ་ལྟར་གྱུར་ན་ཕྱི་རོལ་ན་ཡོད་པ་དང་མེད་ན་མི་འབྱུང་བར་ཡང་དེ་མཐོང་བ་མ་ཡིན་ནོ་ཞེས་པས། དེ་ལྟར་ན་ཡང་འཐད་པ་མ་ཡིན་ནོ། །ཅི་སྟེ་ལྷས་བྱིན་གསོན་པ་ཁང་པ་ན་མ་མཐོང་
[131b]
[131b.1]བ་ནི་ཕྱི་རོལ་ན་ཡོད་པར་གྱུར་པ་ཁོ་ན་ལ་མཐོང་གི་དེ་མེད་ན་ཡང་མཐོང་བ་མ་ཡིན་ནོ་ཞེས་པས་རྣམ་པ་གཞན་དུ་འཐད་པ་མ་ཡིན་ནོ་ཞེས་བརྗོད་པར་བྱ་ན། དེའི་ཚེ་དེ་ཡོད་པ་ཁོ་ན་གཞན་དུ་མི་འཐད་པ་ཉིད་དུ་བརྗོད་པར་འགྱུར་ལ། དེ་ཡང་རྗེས་སུ་འགྲོ་བ་དང་ལྡོག་པ་ཅན་གྱི་དོན་ཁོ་ན་ལ་འགྱུར་རོ་
[131b.2]ཞེས་པས་དོན་གྱིས་གོ་བ་རྗེས་སུ་དཔག་པ་ལས་ཐ་དད་པ་མ་ཡིན་ནོ། །སྦྱོར་བ་ནི་དམིགས་པའི་མཚན་ཉིད་དུ་གྱུར་པ་ཁང་པ་ན་མ་དམིགས་ཤིང་འཚོ་བ་དང་ལྡན་པ་དེ་ནི་ཕྱི་རོལ་ན་ཡོད་དེ། དཔེར་ན་ཇི་སྐད་བཤད་པའི་རྣམ་པ་ཅན་ཕྱི་རོལ་ན་ཉེ་བར་དམིགས་པའི་མཆོད་སྦྱིན་བཞིན། སྒྲ་ལས་ཁོང་
[131b.3]དུ་ཆུད་པའི་ཡོད་པ་ཅན་ལྷས་བྱིན་ཡང་ཇི་སྐད་བཤད་པའི་ཆོས་དང་ལྡན་པའོ་ཞེས་པ་རང་བཞིན་ནོ། །ཐེ་ཚོམ་གྱི་རྒྱུ་ཉིད་ཀྱི་ཕྱིར་ཞེས་པ། གང་ཐེ་ཚོམ་གྱི་རྒྱུ་དེ་ནི་ཚད་མ་མ་ཡིན་ཏེ། གཞལ་བྱ་ཉིད་བཞིན། མ་ངེས་པའི་དོན་གྱིས་གོ་བ་ཡང་དེ་ལྟ་བུའོ་ཞེས་ཁྱབ་བྱེད་དང་འགལ་བ་གསུངས་
[131b.4]སོ། །ནག་པ་ཁྱིམ་ན་མེད་པ་ལས། །ཞེས་པ་ལ་སོགས་པ་སྟེ། ཁང་པ་ན་མེད་པ་ཙམ་གྱིས་ནག་པ་ཕྱི་རོལ་ན་ཡོད་པར་རྟོགས་པར་འགྱུར་བ་མ་ཡིན་ཏེ། གཞན་དུ་ན་རི་བོང་གི་རྭའི་ཡང་འགྱུར་རོ། །ཁྱིམ་གྱི་སྒྲ་ངག་དེ་ལ་རབ་ཏུ་སྦྱར་བས་ནི། དེ་ཕྱི་རོལ་ན་ཡོད་པ་གོ་བར་བྱེད་དེ། ཁྱིམ་
[131b.5]གྱི་སྒྲ་རབ་ཏུ་སྦྱར་ན་ནི་ངག་འདིས་མེད་པ་ངེས་པ་དང་ལྡན་པར་རྗོད་པར་བྱེད་དོ། །རྣམ་པ་དེ་ལྟ་བུའི་དོན་བརྗོད་པར་འདོད་པ་ཁོ་ན་ལ་རྣམ་པ་འདི་ལྟ་བུའི་ངག་སྦྱོར་བའི་ཕྱིར་རོ། །གང་གསུངས་པ། གལ་ཏེ་ཁྱིམ་དང་ཕྱི་རོལ་ན་ཡང་མེད་པར་གྱུར་ན་ནི་མེད་དོ་ཞེས་པ་ཁོ་ན་བརྗོད་པར་བྱའོ་ཞེས་པ་སྟེ།
[131b.6]དེའི་ཕྱིར་ངག་འདིས་ནི་ཁྱིམ་ན་མེད་པ་དང་ཕྱི་རོལ་ན་ཡོད་པ་གཉིས་ཀ་འཕེན་པར་བྱེད་དེ། ངེས་པར་སྦྱོར་བ་འཆད་པར་བྱེད་པ་གཅིག་ཀྱང་གཉིས་པ་འཕེན་པ་མེད་ན་མི་འབྱུང་བ་ཅན་ཡིན་པའི་ཕྱིར་རོ། །མེད་པ་འབའ་ཞིག་པ་ནི་ཕྱི་རོལ་ན་ཡོད་པ་འཕེན་པ་མ་ཡིན་ལ། ངེས་པ་དང་ལྡན་པ་ཡང་འབའ་
[131b.7]ཞིག་པ་མ་ཡིན་ཏེ། ངེས་པ་ནི་གཉིས་ཀའི་ངོ་བོ་ཉིད་ཀྱི་ཕྱིར་རོ། །དེའི་ཕྱིར་ནག་པ་ཁང་པ་ན་མེད་དོ་ཞེས་པ་དངོས་པོ་མེད་པ་ཁོ་ན་བརྗོད་པ་མ་ཡིན་གྱི། འོན་ཀྱང་ཕྱི་རོལ་ན་ཡོད་པ་ཡང་ངོ་། །དེའི་ཕྱིར་དོན་གྱིས་གོ་བ་ཁོ་ན་དངོས་པོ་མེད་པ་ཞེས་པ། དཔེར་ན་སྣོད་ལ་སོགས་པ་མེད་པར་ཚོས་པ་
[132a]
[132a.1]ཡོངས་སུ་འགྲུབ་པ་སྲིད་པ་མ་ཡིན་ནོ་ཞེས་པས་མེད་ན་མེད་པ་ཉིད་ཀྱི་ཕྱིར་དེ་ནི་དེ་འཕེན་པར་བྱེད་དོ། །དེ་བཞིན་དུ་དགག་པ་ངེས་པར་བརྗོད་པར་འདོད་པ་ན། ཁྱིམ་གྱི་སྒྲ་རབ་ཏུ་སྦྱོར་བ་ནི་ཕྱི་རོལ་ན་ཡོད་པ་མེད་ན་སྲིད་པ་མ་ཡིན་ནོ་ཞེས་པས་མེད་ན་མི་འབྱུང་བ་ཉིད་ཀྱི་ཕྱིར་དེ་ནི་དེ་འཕེན་
[132a.2]པར་བྱེད་དོ། །དེའི་ཕྱིར་ཡང་ཇི་ལྟར་འཚོད་པ་ནི་ཕྲུ་བ་ལ་སོགས་པའི་རྟགས་ཡིན་པ་དེ་ལྟར། རྣམ་པ་འདི་ལྟ་བུའི་ངག་གི་ཆ་ཤས་ཀྱི་ཁང་པའི་སྒྲ་ཡང་ཕྱི་རོལ་ན་ཡོད་པའི་འོ་ཞེས་པས་དེ་ལས་དེ་རྟོགས་སོ། །རི་ཁྲོད་པ་ན་རེ་དངོས་པོ་མེད་པ་ཡང་ཚད་མའི་དངོས་པོ་མེད་པ་ནི་མེད་དོ་ཞེས་པ་ཕྲད་པ་
[132a.3]མེད་པའི་དོན་ནོ་ཞེས་ཟེར་རོ། །མངོན་སུམ་ལ་སོགས་པའི་ཚད་མ་ལྔ་མེད་པ་ནི། དབང་པོ་དང་ཕྲད་པ་མེད་པའི་དོན་མེད་དོ་ཞེས་པ་དངོས་པོ་མེད་པ་ལ་ངེས་པའི་རྒྱུར་འགྱུར་རོ། །དེའི་ཕྱིར་དངོས་པོ་མེད་པ་ཚད་མའོ་ཞེས་པ་ངག་གི་དོན་ཏོ། །དེ་ཁོ་ན་མ་དམིགས་པའི་སྒྲས་ཐ་སྙད་དུ་བྱེད་པ་
[132a.4]ལས་ཚད་མ་གཞན་དུ་སྨྲ་བ་གཞན་རྣམས་སྨྲ་བར་བྱེད་དེ། ཉེ་བར་དམིགས་པ་གང་གིས་དོན། །གང་ཞིག་ཤེས་པ་དེ་མེད་ལས། །མེད་ཉིད་ཤེས་པ་དེ་ཡིས་ནི། །འདི་ནི་མི་དམིགས་ཡིན་པར་འདོད། །ཅེས་སོ། །འདི་ལ་ཡང་ཚད་མ་མེད་པའོ། །མ་བཟུང་བ་ནི་དངོས་པོ་མེད་པ་འཛིན་པའི་
[132a.5]རྒྱུར་འགྱུར་བ་མ་ཡིན་ནོ། །ཅི་སྟེ་འཛིན་པ་ལ་ལྟོས་པ་དེ་དངོས་པོ་མེད་པ་འཛིན་པ་ལ་བྱ་བ་བྱེད་ན་ནི་ཐུག་པ་མེད་པར་འགྱུར་རོ། །ཇི་ལྟར་བུམ་པ་མེད་པ་ཚད་མ་མེད་པས་འཛིན་པ་དེ་ལྟར་ཚད་མ་མེད་པ་ཡང་གཞན་གྱིས་ཏེ། དེ་ཡང་གཞན་གྱིས་སོ་ཞེས་པས་ཐུག་པ་མེད་པའི་ཕྱིར། གཅིག་
[132a.6]འཛིན་པ་མེད་པ་ན་ཡང་ཐམས་ཅད་ཀྱི་འཛིན་པ་མེད་པའོ་ཞེས་པས་ན་དེ་ག་ལས་ཚད་མ་ཉིད་ཡིན། གལ་ཏེ་མ་བཟུང་བ་ཡང་དབང་པོ་བཞིན་དུ་འཛིན་པའི་རྒྱུ་ཉིད་དུ་འགྱུར་ཞེ་ན་མ་ཡིན་ཏེ། མེད་པ་ནི་ནུས་པ་ཐམས་ཅད་དང་བྲལ་བའི་མཚན་ཉིད་ཅན་ཉིད་ཀྱི་ཕྱིར་རོ། །གཞན་དུ་ན་ཡོད་པ་ཁོ་ནར་
[132a.7]འགྱུར་ཏེ། ཡོད་པ་ནི་དོན་བྱ་བ་ནུས་པའི་མཚན་ཉིད་ཅན་ཉིད་ཀྱི་ཕྱིར་རོ་ཞེས་པས་དངོས་པོ་མེད་པ་ཚད་མ་མ་ཡིན་ནོ། །འོ་ན་ཁྱེད་ལ་ཡང་མི་དམིགས་པ་ཚད་མར་མི་འགྱུར་ཏེ། ཇི་སྐད་བཤད་པའི་སྐྱོན་ཁོ་ནའི་ཕྱིར་རོ་ཞེ་ན། འདི་ནི་ཡོད་པ་མ་ཡིན་ནོ། །གང་གི་ཕྱིར་ཁོ་བོས་རྣམ་པ་འདི་ལྟ་བུའི་
[132b]
[132b.1]མི་དམིགས་པ་འདོད་པ་མ་ཡིན་གྱི། འོན་ཀྱང་དམིགས་པའི་མཚན་ཉིད་དུ་གྱུར་པ་མི་དམིགས་པའོ། །དམིགས་པའི་མཚན་ཉིད་དུ་གྱུར་པ་ནི། དམིགས་པའི་རྐྱེན་གཞན་ཚང་བ་དང་རང་བཞིན་ཁྱད་པར་ཅན་ཏེ། རང་བཞིན་གང་ཞིག་དམིགས་པའི་རྐྱེན་གཞན་རྣམས་ཡོད་པ་ན་ཡོད་
[132b.2]པ་མངོན་སུམ་ཁོ་ནར་འགྱུར་བའོ། །དེ་ལ་དམིགས་པ་ནི་བྱེད་པ་པོ་ལ་གནས་པའི་བྱ་བའམ་ལས་ལ་གནས་པར་འགྱུར་རོ། །བརྟགས་པ་སྔ་མ་ལ་དམིགས་པར་བྱེད་བཞིན་པའི་ཆོས་ཤེས་པ་ནི་དམིགས་པ་ཡིན་ཞིང་། དེ་ལས་གཞན་པའི་དམིགས་པ་ནི་མི་དམིགས་པ་ཡིན་ཏེ་བརྗོད་པར་
[132b.3]འདོད་པའི་དམིགས་པ་ལས་གཞན་ཡིན་པ་ཉིད་ཀྱི་ཕྱིར། བཟའ་བར་བྱ་བ་མ་ཡིན་པ་དང་རེག་པར་བྱ་བ་མ་ཡིན་པ་བཞིན་ནོ། །གང་གི་ཚེ་ལས་ལ་གནས་པའི་བྱ་བ་དམིགས་པའི་སྒྲས་བརྗོད་པར་བྱ་བ་དེའི་ཚེ་ཉེ་བར་དམིགས་པར་བྱ་བཞིན་པ་ཁོ་ནའི་ཆོས་རང་གི་ཡུལ་ཅན་གྱི་ཤེས་པ་སྐྱེད་
[132b.4]པར་རུང་བ་ཉིད་ཀྱི་མཚན་ཉིད་ཅན་ནི་དམིགས་པ་ཡིན་ཞིང་ཡུལ་གྱི་རང་བཞིན་ཁོ་ན་སྟེ། རུང་བ་ཉིད་ནི་དངོས་པོའི་ངོ་བོ་ཡིན་པ་ཉིད་ཀྱི་ཕྱིར་རོ། །དེ་ལས་གཞན་པ་དམིགས་པར་རུང་བ་དེ་དང་ཤེས་པ་གཅིག་ལ་འབྲེལ་པའི་རང་བཞིན་ཁོ་ན་མི་དམིགས་པའོ། །ཇི་སྐད་བཤད་པའི་མི་
[132b.5]དམིགས་པ་དེ་དང་དེ་རྣམ་པ་གཉིས་ཀ་ཡང་མངོན་སུམ་ཁོ་ནས་འགྲུབ་བོ་ཞེས་པས་ཁོ་བོ་ཅག་ལ་ཇི་སྐད་བརྗོད་པའི་སྐྱོན་སྲིད་པ་མ་ཡིན་ནོ། །འོ་ན་རྣམ་པ་འདི་ལྟ་བུའི་མི་དམིགས་པ་ཚད་མར་འགྱུར་དུ་ཆུག་མོད། ཡང་དེ་ཅི་ལྟར་རྗེས་སུ་དཔག་པར་འགྱུར། ཅི་ལྟར་མི་འགྱུར་ཞེ་ན། དཔེ་
[132b.6]ལ་མི་ལྟོས་པའི་ཕྱིར་རོ། །གང་གི་ཕྱིར་འདི་ལ་དཔེ་འགའ་ཡང་ཡོད་པ་མ་ཡིན་པས་ཏེ། ཚད་མས་གྲུབ་པ་དཔེར་འགྱུར་བས་སོ། །གཞན་དུ་ན་གལ་ཏེ་དཔེ་མི་དམིགས་པས་གྲུབ་པ་ཁོ་ནར་འགྱུར་ན། དེ་ལྟར་གྱུར་ན་ནི། ཇི་ལྟར་བུམ་པ་མེད་པ་དཔེས་བསྒྲུབ་པར་བྱ་བ་དེ་ལྟར། དཔེ་ཉེ་བར་
[132b.7]བརྗོད་པ་མེད་པ་ནམ་མཁའི་མེ་ཏོག་ལ་སོགས་པ་ཡང་དཔེ་གཞན་གྱིས་བསྒྲུབ་པར་བྱ་ཞིང་། དེ་ཡང་གཞན་གྱིས་སོ་ཞེས་པས་ཐུག་པ་མེད་པར་ཐལ་བར་འགྱུར་རོ། །ཅི་སྟེ་དཔེ་ནི་དཔེ་མེད་པར་ཡང་འགྲུབ་ན་བུམ་པ་མེད་པར་ཡང་འགྲུབ་པར་འགྱུར་རོ། །དེའི་ཕྱིར་ཡང་མི་དམིགས་པ་ཚད་མ་གཞན་ཁོ་
[133a]
[133a.1]ནར་འགྱུར་ཏེ། དཔེ་ལ་མི་ལྟོས་པའི་ཕྱིར་རོ་ཞེ་ན་སྐྱོན་འདི་མེད་དེ། གང་གི་ཕྱིར་མི་དམིགས་པས་དངོས་པོ་མེད་པ་བསྒྲུབ་པ་མ་ཡིན་གྱི། འོ་ན་ཅི་ཞེ་ན། མེད་པའི་ཐ་སྙད་དོ། །དམིགས་སུ་རུང་བ་མ་དམིགས་པ་དེ་ནི་མེད་པའི་ཐ་སྙད་ཀྱི་རྒྱུ་མཚན་ཡིན་ཏེ། དེ་ནི་རང་ཉིད་ཉེ་
[133a.2]བ་ལས་རང་གི་རྒྱུ་མཚན་ཅན་འདི་ལྟར་སྒྲུབ་པར་བྱེད་དོ། །རང་གི་རྒྱུ་མཚན་ཚོགས་པར་འབྱུང་བ་ཅན་ཐམས་ཅད་འདིར་དཔེའོ། །ཡོད་པའི་ཐ་སྙད་དགག་པ་བསྒྲུབ་པར་བྱ་བ་ལ་ཡང་། མི་དམིགས་པ་དང་ཅིག་ཤོས་ཀྱིས་ཏེ། རྒྱུ་མཚན་དང་བྲལ་ན་མི་འབྱུང་བ་ཅན་མྱུ་གུ་ལ་སོགས་
[133a.3]པ་རྣམས་ཀྱང་དཔེའོ། །ཉེ་བར་བརྗོད་པ་མེད་པ་འབའ་ཞིག་ཁོ་ན་ནི་མ་ཡིན་ནོ་ཞེས་པས་ཚད་མ་གཞན་ཉིད་དུ་ཐལ་བ་མ་ཡིན་ནོ། །ཡང་དངོས་པོ་མེད་པ་ཁོ་ན་བསྒྲུབ་བྱ་མ་ཡིན་པའི་རྒྱུ་ཅི་ཞེ་ན། ཁྱད་པར་མེད་པའི་ཕྱིར་རོ། །དེ་ལྟར་ནི་དམིགས་པ་ཁོ་ན་བལྟར་རུང་བའི་བདག་ཉིད་རྣམས་ཀྱི་
[133a.4]ཡོད་པ་སྟེ། མི་དམིགས་པ་ཡང་མེད་པ་ཉིད་དོ། །ཅི་ལྟར་བྱས་ནས་ཤེ་ན། རེ་ཞིག་གང་གི་ཚེ་ཇི་སྐད་བཤད་པའི་རང་གི་ཡུལ་ཅན་གྱི་ཤེས་པ་སྐྱེད་པར་རུང་བ་ཉིད་དམིགས་པ་ཡིན་པ་དེའི་ཚེ་རུང་བ་ཉིད་ཀྱི་རང་བཞིན་དུ་གྱུར་པ་ཉིད་ཀྱི་ཕྱིར་དམིགས་པ་ནི་ཡོད་པ་ཉིད་ཡིན་ནོ་ཞེས་པ་འདི་གྲུབ་བོ། །གང་གི་ཚེ་ཡང་
[133a.5]བྱེད་པ་པོའི་ཆོས་ཤེས་པ་ནི་དམིགས་པ་ཡིན་པ་དེའི་ཚེ་ཡང་དེ་ནི་བལྟར་རུང་བའི་དོན་གྱི་ཡོད་པ་ཉིད་ཀྱི་རྒྱུ་མཚན་ཡིན་པ་ཉིད་ཀྱི་ཕྱིར་ལ། དེས་ན་ཁྱབ་པ་དང་ལྡོག་པ་དག་གིས་དེའི་རང་བཞིན་དང་ཁྱད་པར་མེད་དོ་ཞེས་པས་ཡོད་པ་དང་འདྲ་བར་ཉེ་བར་བཏགས་པ་ལས་ཡོད་པ་ཉིད་ཁོ་ནའོ། །དེ་ལྟར་
[133a.6]གཉིས་ཀ་ལྟར་ན་ཡང་ཡོད་པ་ཉིད་ནི་དམིགས་པ་ཡིན་ནོ། །དེ་མེད་པ་ཡང་མེད་པ་ཉིད་ཡིན་ཏེ། མ་ཡིན་པར་དགག་པའི་འཇུག་པས་ཏེ། སྔ་མ་བཞིན་ནོ། །དེ་ཁོ་ན་ཡང་མི་དམིགས་པའོ་ཞེས་པས་བསྒྲུབ་པར་བྱ་བ་དང་སྒྲུབ་པ་དག་ལ་བྱེ་བྲག་མེད་དོ། །དེས་ན་མི་དམིགས་པས་དངོས་པོ་མེད་
[133a.7]པ་བསྒྲུབ་པར་བྱ་བ་མ་ཡིན་ནོ། །དེའི་ཕྱིར་རྒྱུ་མཚན་ཉེ་བར་མཐོང་བ་ན་མེད་དོ་ཞེས་མི་དམིགས་པ་ལས་མེད་པའི་ཐ་སྙད་རྨོངས་པའི་ངོར་བསྒྲུབ་པར་བྱ་སྟེ། སྐྱེད་པར་བྱེད་པར་རྗོད་པས་ཕ་ཉིད་བཞིན་ནོ། །མི་སྣང་བ་མི་དམིགས་པས་ཀྱང་རྒྱུ་མཚན་མེད་པའི་ཕྱིར་ཐ་སྙད་འགོག་སྟེ། སྐྱེད་པར་བྱེད་པ་མ་
[133b]
[133b.1]ཡིན་པར་བརྗོད་པས་ཕ་ཉིད་མ་ཡིན་པ་བཞིན་ནོ་ཞེས་པའོ། །གང་གཞན་གྱི་ཕྱོགས་བཀག་པས་ཞེས་པ་ལ་སོགས་པ་སྟེ། བཤད་འགྲེལ་བྱེད་པས་གང་བརྗོད་པ། ཕ་རོལ་གྱི་ཕྱོགས་བཀག་པས་རང་གི་ཕྱོགས་འགྲུབ་བོ་ཞེས་པ་དེ་དགག་པ་གྲངས་ཅན་པའི་བསལ་ཏེ་འོངས་པ་དགག་པ་ཁོ་
[133b.2]ན་ལས་བྱས་ཟིན་པར་རིག་པར་བྱ་སྟེ། འདི་ཡང་བསལ་ཏེ་འོངས་པའི་སྦྱོར་བ་ཁོ་ནའོ་ཞེས་བྱས་ནས་སོ། །ལེའུ་གཉིས་པའོ།། །།རང་གི་དོན་དང་གཞན་དོན་གྱི་དབྱེ་བས་རྗེས་སུ་དཔག་པ་རྣམ་པ་གཉིས་སོ་ཞེས་བརྗོད་ལ། དེ་ལ་རང་གི་དོན་བཤད་ཟིན་ཏོ། །ད་ནི་གཞན་དོན་གཏན་ལ་
[133b.3]འབེབས་པར་འདོད་པས་གསུངས་པ། གཞན་དོན་ཞེས་པ་ལ་སོགས་པའོ། །རང་དོན་ནི་རྗེས་སུ་དཔག་པ་ཉིད་དངོས་ཡིན་ལ། འདི་ནི་ཉེ་བར་བཏགས་པའོ་ཞེས་ཁྱད་པར་གྱི་དོན་ལ་ནིའི་སྒྲའོ། །རང་ཉིད་ཀྱིས་མཐོང་བ་ནི་རང་གིས་མཐོང་བའོ། །རང་གིས་མཐོང་བ་ཡང་འདི་ཡིན་ལ། དོན་ཡང་
[133b.4]ཡིན་པས་རང་གིས་མཐོང་དོན་ཏེ། ཚུལ་གསུམ་པའི་གཏན་ཚིགས་སོ། །དེ་ཚིག་གང་གིས་གསལ་བར་བྱེད་པ་དེ་ནི་གཞན་དོན་རྗེས་སུ་དཔག་པའོ། །ཡང་དེ་ཅི་ལྟར་གཞན་གྱི་དོན་ཉིད་ཡིན་ཞེ་ན་གསུངས་པ། ཇི་ལྟར་ཞེས་པ་ལ་སོགས་པའོ། །འོ་ན་རྗེས་སུ་དཔག་པར་བྱ་བའི་ཡུལ་ཅན་གྱི་ཤེས་
[133b.5]པ་རྗེས་སུ་དཔག་པ་ཡིན་ཏེ། ཤེས་པ་ཁོ་ན་ཚད་མ་ཡིན་པ་ཉིད་ཀྱི་ཕྱིར་རོ། །དེས་ན་ཅི་ལྟར་ཚིག་རྗེས་སུ་དཔག་པ་ཉིད་ཡིན་ཞེ་ན་གསུངས་པ། རྒྱུ་ལ་འབྲས་བུ་བཏགས་པའི་ཕྱིར་རོ་ཞེས་པ། ཚུལ་གསུམ་པའི་རྟགས་བརྗོད་པས་ནི་ཕ་རོལ་པོ་རྣམས་ལ་རྟགས་མ་རྟོགས་པར་འགྱུར་ལ། དེ་ལས་ཀྱང་རྗེས་
[133b.6]སུ་དཔག་པར་བྱ་བ་རྟོགས་པའོ། །དེའི་ཕྱིར་དེ་བརྒྱུད་པས་རྗེས་སུ་དཔག་པའི་རྒྱུར་འགྱུར་རོ་ཞེས་པས་རྒྱུ་དེ་ལ་འབྲས་བུ་ཉེ་བར་བཏགས་པ་ལས་དེ་རྗེས་སུ་དཔག་པ་ཞེས་བརྗོད་པར་བྱའོ། །འདིར་བརྩད་པ། ཚུལ་གསུམ་པའི་རྟགས་བརྗོད་པ་ཞེས་པ་འདི་ཙམ་ཞིག་ཁོ་ན་མཚན་ཉིད་དུ་འགྱུར་རོ། །རང་
[133b.7]གིས་མཐོང་དོན་སྨོས་པའི་དོན་ཅི་ཡིན་པ་བརྗོད་པར་བྱའོ་ཞེ་ན། བརྗོད་པར་བྱ་སྟེ། ཁ་ཅིག་འདི་སྐད་དུ་སྨྲ་སྟེ། གཞན་གྱིས་རྟོགས་པར་བྱ་བ་ཉིད་ཀྱི་ཕྱིར། རང་གིས་མ་མཐོང་ཡང་ཕ་རོལ་པོ་རྣམས་ཀྱིས་ལུང་ལས་མཐོང་བ་ནི་སྒྲུབ་པར་བྱེད་པ་སྟེ། དཔེར་ན་བདེ་བ་ལ་སོགས་པ་རྣམས་སམ་བློ་ནི་
[134a]
[134a.1]སེམས་པ་མེད་པ་རྣམས་ཏེ། སྐྱེ་བའི་ཕྱིར་རམ་མི་རྟག་པ་ཉིད་ཀྱི་ཕྱིར། གཟུགས་ལ་སོགས་པ་བཞིན་ཞེས་པ་ལྟ་བུའོ་ཞེའོ། །དེའི་ཕྱིར་དེའི་ལུང་ལས་ཕ་རོལ་པོས་མཐོང་བ་ནི་སྒྲུབ་པར་བྱེད་པ་མ་ཡིན་ནོ་ཞེས་ཤེས་པར་བྱ་བའི་དོན་དུ་རང་སྨོས་སོ། །ཅིའི་ཕྱིར་དེ་སྒྲུབ་པར་བྱེད་པ་མ་ཡིན་
[134a.2]ཞེ་ན། དངོས་པོའི་སྟོབས་ཀྱིས་ཞུགས་པའི་རྗེས་སུ་དཔག་པའི་ཡུལ་ལ་ཚིག་ཚད་མ་ཉིད་མ་ཡིན་པའི་ཕྱིར་རོ། །ཅི་སྟེ་ལུང་ཚད་མ་ཡིན་ན། འོ་ན་དེས་གྲུབ་པ་ཕ་རོལ་པོ་ཁོ་ན་ལ་གྲུབ་པ་མ་ཡིན་ནོ། །གཞན་ཡང་ཇི་ལྟར་ཚད་མར་གྱུར་པའི་ལུང་དེ་ལས་ཕ་རོལ་པོས་བདེ་བ་ལ་སོགས་པ་རྣམས་སྐྱེ་བ་
[134a.3]ཅན་དང་། མི་རྟག་པ་ཉིད་དུ་གྲུབ་པ་དེ་ལྟར་སེམས་པ་དང་བཅས་པ་ཉིད་དུ་སྤང་སྟེ། དེའི་ཕྱིར་དེ་ལ་གནོད་པར་བྱེད་པའི་རྗེས་དཔག་འཇུག་པ་མ་ཡིན་ནོ། །འཇུག་ན་ཡང་དེའི་དེས་གནོད་བཞིན་པ་ནི་ཅི་ལྟར་ལུང་ཚད་མ་ཡིན། དེས་ན་ལུང་ལ་ཕ་རོལ་པོས་ཁས་བླངས་པ་ནི་སྒྲུབ་བྱེད་མ་ཡིན་ནོ། །
[134a.4]གལ་ཏེ་སྒྲུབ་པར་བྱེད་པ་མ་ཡིན་ན་དེ་དང་དེར་ཐལ་བར་འགྱུར་བའི་སྒྲུབ་བྱེད་བརྗོད་པ་ཅི་ལྟར་ཡིན་ཞེ་ན། འདི་སྐྱོན་མ་ཡིན་ཏེ། གང་གི་ཕྱིར་གང་ཕ་རོལ་པོས་བརྟགས་པ་རྣམས་ཀྱིས་ཐལ་འགྱུར་དུ་བྱ་བ་དཔེར་ན་ནམ་མཁའ་ལ་སོགས་པ་ནི་ཡོད་པ་ཉིད་ཀྱི་ཕྱིར་མི་རྟག་པ་ཉིད་དུའོ་ཞེས་པ་ལྟ་བུ་དེ་ནི། ཆོས་
[134a.5]གཅིག་ཁས་བླངས་པ་ན་ཆོས་གཞན་ཁས་བླངས་པར་བསྟན་པའི་དོན་དུ་སྟེ། མུ་སྟེགས་པ་རྣམས་ཀྱིས་སངས་རྒྱས་པ་འགའ་ཞིག་ལ་འདི་ལྟར་འཛིན་དུ་འཇུག་སྟེ། ནམ་མཁའ་ལ་སོགས་པ་རྣམས་དེ་ཁོ་ན་ཉིད་དུ་ཡོད་དོ་ཞེས་ཟུང་ཤིག་ཅེས་པ་ལ། འཛིན་དུ་གཞུག་བྱ་དེས་སྨྲས་པ། གལ་ཏེ་དེ་རྣམས་དེ་
[134a.6]ཁོ་ན་ཉིད་དུ་ཡོད་ན་དེ་ལྟར་གྱུར་ན། དོན་དམ་པར་ཡོད་པ་ཉིད་ཀྱི་ཕྱིར་བུམ་པ་ལ་སོགས་པ་བཞིན་དུ་དེ་རྣམས་རྟག་པ་ཉིད་མ་ཡིན་པར་རོ་ཞེས་སོ། །ཅི་སྟེ་འདི་ཁས་བླང་བ་མ་ཡིན་ན་དེ་རྣམས་ཡོད་པ་ཉིད་དུ་ཡང་འགྱུར་བ་མ་ཡིན་ནོ། །དེ་ལྟར་ནི་དོན་བྱེད་ནུས་པ་གང་དེ་ཁོ་ན་དོན་དམ་པར་ཡོད་པ་ཡིན་ལ། རྟག་
[134a.7]པ་ལ་དོན་བྱེད་པ་ཡོད་པ་ཡང་མ་ཡིན་ཏེ། རིམ་པ་དང་ཅིག་ཅར་ཉིད་འགལ་བའི་ཕྱིར་རོ། །རེ་ཞིག་དེ་རིམ་གྱིས་དོན་བྱེད་པ་རིགས་པ་མ་ཡིན་ཏེ། འདི་ག་ལས་ན་ལྟོས་པ་མེད་པའི་བྱེད་པ་པོ་ནི་རང་ཡོད་པ་ཙམ་གྱིས་ཏེ། སྡོད་པར་བྱ་བར་མི་རིགས་པའི་ཕྱིར་རོ། །ཅི་སྟེ་ཕྱིས་ཀྱི་དུས་ན་འབྱུང་བའི་འབྲས་
[134b]
[134b.1]བུའི་ངོར་དེའི་ནུས་པ་སྔར་ཡོད་པ་མ་ཡིན་ནོ་ཞེས་པས་དེ་བྱེད་པ་མ་ཡིན་ན། དེ་ལྟར་འགྱུར་ན། ཕྱིས་ཀྱང་བྱེད་པ་མ་ཡིན་པར་འགྱུར་ཏེ་ཁྱད་པར་མེད་པའི་ཕྱིར་སྔར་བཞིན་ནོ། །ལྷན་ཅིག་བྱེད་པ་ཉེ་བར་བྱས་ནས་ཕྱིས་བྱེད་དོ་ཞེ་ན། མ་ཡིན་ཏེ། ཕུལ་དུ་བྱུང་བར་བསྒྲུབ་ཏུ་མེད་པ་ནི་ལྟོས་པར་མི་རུང་བའི་
[134b.2]ཕྱིར་རོ། །ཅིག་ཅར་དོན་བྱེད་པའང་སྲིད་པ་མ་ཡིན་ཏེ། དོན་བྱེད་ནུས་པའི་རང་བཞིན་ནི་སྔར་བཞིན་དུ་ཕྱིས་ཀྱང་མི་བྱེད་པ་མི་རིགས་པའི་ཕྱིར་རོ། །དེའི་ཕྱིར་ནམ་མཁའ་ལ་སོགས་པ་རྣམས་ཡོད་པ་ཉིད་དུ་ཁས་ལེན་ན་དེ་རྣམས་ཀྱི་རྟག་པ་ཉིད་ཀྱང་མེད་དོ་ཞེས་གདོན་མི་ཟ་བར་ཁས་བླང་བར་བྱའོ། །
[134b.3]མེད་པ་ཉིད་ཀྱང་མ་ཡིན་ནོ་ཞེས་པ་ཞར་ལ་བྱུང་བས་ཆོག་གོ། །ལུང་ལས་ཕ་རོལ་པོས་མཐོང་བ་ནི་སྒྲུབ་པར་བྱེད་པ་མ་ཡིན་ནོ་ཞེས་པ་འདི་གནས་སོ། །དོན་སྨོས་པ་ནི་དོན་མེད་པ་རྟོག་པས་སྒྲོ་བཏགས་པའི་རང་བཞིན་ནི་རྟགས་མ་ཡིན་ནོ་ཞེས་ཤེས་པའི་དོན་དུ་སྟེ། དཔེར་ན་སྒྲ་མི་རྟག་སྟེ་ཕྱོགས་དང་
[134b.4]མཐུན་པའི་ཕྱོགས་གང་རུང་བ་ཉིད་ཀྱི་ཕྱིར། བུམ་པ་བཞིན་ཞེས་པ་ལྟ་བུའོ། །ཕྱོགས་དང་མཐུན་པའི་ཕྱོགས་ལས་གང་ཡང་རུང་བ་ཉིད་ནི་སྒྲ་ལ་དངོས་པོའི་ཆོས་ཉིད་དུ་གནས་པ་ནི་མ་ཡིན་གྱི། འོན་ཀྱང་སྨྲ་བ་པོའི་བརྗོད་པར་འདོད་པའི་དབང་ལས་སོ། །དེ་ལྟར་ནི་སྒྲ་རྟག་སྟེ། ཕྱོགས་དང་མཐུན་
[134b.5]པའི་ཕྱོགས་ལས་གང་ཡང་རུང་བ་ཉིད་ཀྱི་ཕྱིར། ནམ་མཁའ་བཞིན་ཞེས་འདོད་པའི་རྗེས་སུ་བྱེད་པའི་ཕྱིར་རྟག་པར་མངོན་པར་འདོད་པ་ནམ་མཁའ་ལ་སོགས་པ་ཡང་ལྟོས་པར་བྱ་བར་འགྱུར་རོ། །དེའི་ཕྱིར་སྨྲ་བ་པོའི་འདོད་པ་ཙམ་གྱིས་འཇུག་པའི་ཆོས་འདི་རྣམས་དངོས་པོའི་སྟོབས་ཀྱིས་འཇུག་པ་
[134b.6]རྣམས་མ་ཡིན་ལ། རྣམ་པ་འདི་ལྟ་བུ་རྣམས་ལས་དངོས་པོ་འགྲུབ་པ་ཡང་མ་ཡིན་ཏེ། དངོས་པོ་གཅིག་ནི་འགལ་བའི་རང་བཞིན་ཉིད་དུ་མི་འགྱུར་རོ་ཞེས་པའོ། །གང་དུ་ཆོས་གཅིག་ལ་འཇུག་པའི་མཚན་ཉིད་ཉེ་བ་ཅན་དེར་ནི་དེ་ལས་དོན་འགྲུབ་པར་འགྱུར་ཏེ། དཔེར་ན་འགའ་ཞིག་ཏུ་དོན་
[134b.7]གཞན་འདྲེས་པའི་ངོ་བོའི་ཆོས་མཐུན་པ་ཉིད་མངོན་པར་མཐོང་ནས། གོང་བུ་འདི་ནི་རྭ་ཅན་ཡིན་ཏེ། བ་ལང་དང་བ་མེན་དག་ལས་གང་ཡང་རུང་བ་ཡིན་པ་ཉིད་ཀྱི་ཕྱིར་རོ་ཞེས་བརྗོད་པ་ལྟ་བུ་སྟེ། འཕྲོས་པས་ཆོག་གོ། །དངོས་པོ་མ་ཡིན་པ་རྟོག་པས་སྒྲོ་བཏགས་པའི་རང་བཞིན་ནི་རྟགས་མ་
[135a]
[135a.1]ཡིན་ནོ་ཞེས་པ་འདི་ནི་གནས་སོ། །འདིར་ཡང་ཚུལ་གང་ཡང་རུང་བ་མ་བརྗོད་པ་ནི་མ་ཚང་བ་ཉིད་ཅེས་བཤད་པར་འགྱུར་རོ་ཞེས་སླར་ཡང་བཤད་པར་བྱ་བ་མ་ཡིན་ཏེ། བསྟན་པ་འདི་ཁོ་ནས་དོན་གྱིས་བརྗོད་ཟིན་པ་ཉིད་ཀྱི་ཕྱིར་རོ། །གང་གི་ཕྱིར་ཇི་ལྟར་ཚུལ་གསུམ་པ་
[135a.2]གཏན་ཚིགས་ཡིན་ཞེས་བཤད་པས་ཚུལ་རེ་རེ་བ་དང་གཉིས་གཉིས་པའི་དོན་ནི་གཏན་ཚིགས་མ་ཡིན་ནོ་ཞེས་བཤད་པར་འགྱུར་བ་དེ་ལྟར་ཚུལ་གསུམ་བརྗོད་པ་གཞན་དོན་རྗེས་སུ་དཔག་པའོ་ཞེས་བརྗོད་པས། ཚུལ་རེ་རེ་དང་གཉིས་གཉིས་བརྗོད་པ་ནི་རྗེས་སུ་དཔག་པ་མ་ཡིན་གྱི། འོ་ན་ཅི་
[135a.3]ཞེ་ན་མ་ཚང་བ་ཉིད་ཀྱི་སྒྲུབ་པར་བྱེད་པའི་སྐྱོན་ཏེ། དེ་ལས་ཕ་རོལ་པོ་ལ་ཡང་དག་པའི་ངེས་པ་མི་སྐྱེ་བའི་ཕྱིར་རོ། །འོ་ན་གང་ཞེས་པ་ལ་སོགས་པས་ནི། ཚུལ་གསུམ་པའི་རྟགས་བརྗོད་པ་ཙམ་རྗེས་སུ་དཔག་པ་ཉིད་དུ་བརྗོད་པའི་ཕྱིར་རོ། །རིགས་པ་ཕྲ་མོ་ལ་སོགས་པ་རྟོག་གེའི་བསྟན་
[135a.4]བཅོས་རྣམས་སུ་ཕྱོགས་བརྗོད་པ་ཡང་སྒྲུབ་པར་བྱེད་པ་ཉིད་དུ་བསྟན་པའི་ཕྱིར་འདྲི་བར་བྱེད་དོ། །གཞན་དོན་རྗེས་སུ་དཔག་པར་བཀོད་པ་ནི། དེའི་ནང་དུ་འདུས་པ་སྟེ། སྒྲུབ་པར་བྱེད་པའི་ཡན་ལག་ཉིད་དུ་བསྟན་པའི་ཕྱིར་རོ། །དེ་ཅི་ལྟར་ཞེས་པ་དེའི་བསྟན་བཅོས་བྱེད་པ་རྣམས་ལ་དེ་ལ་འཐད་
[135a.5]པ་ཅི་ཞིག་ཡོད་ཅེས་པའོ། །དེ་རྣམས་ཁོ་ན་ལ་དྲི་བར་བྱའོ་ཞེས་པ། གང་རྣམས་བསྒྲུབ་པར་བྱ་བ་འགྲུབ་པའི་ངོར་ནུས་པ་མེད་པའི་ཕྱོགས་ཀྱི་ཚིག་ཀྱང་སྒྲུབ་པར་བྱེད་པ་ཉིད་དུ་སྨྲ་བ་རྣམས་ལའོ་ཞེས་པ་དགོངས་པའོ། །ཡང་ཅི་ལྟར་ཕྱོགས་ཀྱི་ཚིག་ནུས་པ་མེད་པ་ཉིད་ཡིན། ཇི་སྲིད་དུ་བསྒྲུབ་
[135a.6]པར་བྱ་བ་རྗོད་པར་བྱེད་པ་མེད་ན་གཏན་ཚིགས་ཀྱི་ཚིག་མི་འཇུག་པ་ཁོ་ན་སྟེ། དེའི་ཕྱིར་གཏན་ཚིགས་ཀྱི་ཚིག་འཇུག་པར་བྱེད་པའི་ཕྱིར་ཕྱོགས་ཀྱི་ཚིག་ལ་ཡང་ནུས་པ་ཡོད་པ་ཁོ་ནའོ་ཞེ་ན། གལ་ཏེ་དེ་ལྟ་ན་མི་མཐུན་ཕྱོགས་ཀྱི་ཚིག་ལའང་ཐལ་འགྱུར་ཏེ། འགའ་ཞིག་གིས་སྒྲ་རྟག་གོ་ཞེས་བརྗོད་པ་ན་
[135a.7]ཕ་རོལ་པོས་སྨྲས་པ། སྒྲ་བྱས་པ་ཡིན་ལ། བྱས་པ་ཡང་མི་རྟག་པ་སྟེ། དཔེར་ན་བུམ་པ་བཞིན་ནོ་ཞེས་སོ། །དེ་ལྟར་མི་མཐུན་ཕྱོགས་ཀྱི་ཚིག་ལས་ཀྱང་གཏན་ཚིགས་ཀྱི་ཚིག་འཇུག་པ་ཡོད་པའི་ཕྱིར་ན་མི་མཐུན་ཕྱོགས་ཀྱི་ཚིག་ཀྱང་བྱས་པ་ཉིད་རྗོད་པ་དེ་དང་ལྷན་ཅིག་སྒྲུབ་པར་བྱེད་པར་འགྱུར་ཏེ། དེའི་ཕྱིར་
[135b]
[135b.1]འདི་ནི་མི་རིགས་སོ། །འོ་ན་རྟོགས་སུ་འཇུག་པ་པོས་ཇི་སྲིད་དུ་གཏན་ཚིགས་ཀྱི་ཡུལ་མ་བརྗོད་པ་དེ་སྲིད་དུ་གཏན་ཚིགས་འཇུག་པ་མི་སྲིད་པ་ཁོ་ན་མ་ཡིན་ནམ། གདོན་མི་ཟ་བར་ཡུལ་བཤད་པར་བྱ་བ་ཡིན་ལ། དེའི་ཕྱིར་ཡུལ་སྟོན་པ་ཁོ་ན་ལས། ཕྱོགས་ཀྱི་ཚིག་བསྒྲུབ་པར་བྱ་བ་འགྲུབ་པའི་ངོར་
[135b.2]ནུས་པ་ཉིད་དོ་ཞེ་ན། འདི་ཡོད་པ་མ་ཡིན་ཏེ། ཕྱོགས་ཀྱི་ཚིག་མེད་པར་ཡང་། གང་འགའ་ཞིག་ཏུ་བྱས་པ་དེ་ཐམས་ཅད་ནི་མི་རྟག་པ་སྟེ། སྒྲ་ཡང་བྱས་པའོ་ཞེས་ཁྱབ་པ་དང་ཕྱོགས་ཀྱི་ཆོས་ཉིད་བསྟན་པ་ན། སྒྲ་མི་རྟག་པའོ་ཞེས་དོན་གྱིས་རྟོགས་པ་ཁོ་ནའོ་ཞེས་པས་ཕྱོགས་ཀྱི་ཚིག་དོན་དང་བྲལ་
[135b.3]བའོ། །དེས་ན་ཕྱོགས་ནི་མ་བརྗོད་ན་ཡང་འགྲུབ་པ་ལ་གེགས་མེད་པའི་ཕྱིར་ཚུལ་གསུམ་པོ་རྣམས་ལས་གང་ཡང་རུང་བ་ཁོ་ན་མ་བརྗོད་པ་ནི་མ་ཚང་བ་ཉིད་རྗོད་པ་སྒྲུབ་པར་བྱེད་པའི་སྐྱོན་ཡིན་གྱི། ཕྱོགས་མ་བརྗོད་པ་ནི་མ་ཡིན་ནོ། །གལ་ཏེ་འོ་ན་ཕྱོགས་ཀྱི་ཚིག་སྒྲུབ་པར་བྱེད་པ་མ་ཡིན་ན།
[135b.4]དེའི་ཚེ་སྒྲུབ་པར་བྱེད་པའི་ཡན་ལག་གི་སྐབས་སུ་ཁྱེད་ཅག་གིས་ཀྱང་རྗེས་སུ་དཔག་པར་བྱ་བའི་མཚན་ཉིད་ངེས་པར་བསྟན་པ་རིགས་པ་མ་ཡིན་ནོ་ཞེ་ན་གསུངས་པ། ཁོ་བོ་ཅག་གི་ནི་ཞེས་པ་ལ་སོགས་པ་སྟེ། འདིས་བསྟན་པར་བྱ་བའོ་རྗེས་སུ་དཔག་པར་བྱ་བ་བསྟན་པ་ནི་རྗེས་སུ་དཔག་བྱ་
[135b.5]བསྟན་པའོ། །དེ་ཡང་འདིར་མཚན་ཉིད་བསྟན་པར་རིག་པར་བྱའི་དམ་བཅའ་བརྗོད་པ་ནི་མ་ཡིན་ནོ། །གཏན་ཚིགས་ནི་ཚུལ་གསུམ་པའི་རྟགས་ཡིན་ལ་དེའི་དོན་ནི་གཏན་ཚིགས་དོན་ཏེ། དེ་གང་གི་ཡུལ་ཡིན་པ་དེ་ནི་གཏན་ཚིགས་དོན་གྱི་ཡུལ་ཅན་ནོ། །གང་གི་ཕྱིར་རྗེས་སུ་དཔག་པར་བྱ་
[135b.6]བའི་མཚན་ཉིད་བསྟན་པས་ནི་གཏན་ཚིགས་ཀྱི་དོན་ཕྱིན་ཅི་མ་ལོག་པར་རབ་ཏུ་གསལ་བ་དེའི་ཕྱིར་དེའི་ཡུལ་ཅན་ཡིན་པ་ཉིད་ཀྱི་ཕྱིར། སྒྲུབ་པར་བྱེད་པའི་སྐབས་སུའང་དེ་ཉེ་བར་བཀོད་པའོ་ཞེས་པ་ངག་གི་དོན་ཏོ། །ཡན་ལག་རྣམས་སུ་ཞེས་པ་ལ་སོགས་པ་སྟེ། ཡན་ལག་རྣམས་ཀྱི་སྐབས་
[135b.7]རྣམས་སུ་གང་རྗེས་སུ་དཔག་པར་བྱ་བ་བསྟན་པ་དེ་ནི། ཁོ་བོ་ཅག་གིས་སྒྲུབ་པར་བྱེད་པ་ཉིད་དུ་མ་ཡིན་ནོ། །ཅིའི་ཕྱིར་ཞེ་ན། དེ་ཁོ་ན་ལ་ཐེ་ཚོམ་སྐྱེ་བའི་ཕྱིར་རོ། །དེ་ལས་ཞེས་པ་ནི་ཨཱརྱ་ལ་སོགས་པ་ཉིད་ཀྱི་ཕྱིར་བདུན་པའི་དོན་ལ་ཏ་སིའོ། །དེ་ཁོ་ན་ལ་སྟེ་རྗེས་སུ་དཔག་པར་བྱ་བ་ལ་ཐེ་ཚོམ་
[136a]
[136a.1]སྐྱེད་པའི་ཕྱིར་རོ་ཞེས་པའི་དོན་ཏོ། །ཡང་ན་རྒྱུའི་ལྔ་པའི་མཐའ་ཅན་ཁོ་ན་ལས་ཏ་སི་འདི་སྟེ། དེ་ཁོ་ན་ལས་ཏེ་རྗེས་སུ་དཔག་པར་བྱ་བ་དམིགས་པའི་རྒྱུ་ལས་ཐེ་ཚོམ་སྐྱེ་བའི་ཕྱིར་རོ་ཞེས་པའི་དོན་ཏོ། །འདིས་རྗེས་སུ་དཔག་པར་བྱ་བ་ཐེ་ཚོམ་ཅན་ཉིད་དུ་སྟོན་ཅིང་དོན་འདི་གསལ་
[136a.2]བར་བྱེད་དེ། གྲུབ་པ་སྒྲུབ་པར་བྱེད་པ་ཡིན་གྱི་ཅིག་ཤོས་ནི་མ་ཡིན་ལ། རྗེས་སུ་དཔག་པར་བྱ་བ་ཡང་ཐེ་ཚོམ་ཅན་ཏེ། དེ་ནི་རེ་ཞིག་གཞན་ལའང་འགྲུབ་པར་བྱེད་པའི་ནུས་པ་མེད་ན་བདག་ཉིད་ལ་ལྟ་ཅི་སྨོས་ཞེས་པའོ། །རྗེས་སུ་དཔག་པར་བྱ་བ་ཡང་སྒྲུབ་པར་བྱེད་པ་མ་ཡིན་པ་ཉིད་དུ་བསྟན་
[136a.3]པས་དེའི་ཚིག་ཀྱང་བསྟན་པར་འགྱུར་རོ། །དེ་ལྟར་ནི་དོན་ཁོ་ན་ནི་དངོས་སུ་རྟོགས་པར་བྱེད་ཀྱི་ཚིག་གིས་མ་ཡིན་ལ། དེ་ནི་ནུས་པའི་དོན་གསལ་བར་བྱེད་པའི་ཕྱིར་བརྒྱུད་པས་སྒྲུབ་པར་བྱེད་པར་འགྱུར་རོ། །གང་ལ་དོན་ཉིད་ལ་བསྒྲུབ་བྱ་འགྲུབ་པའི་ནུས་པ་མེད་པར་ངེས་པ་དེ་ལ། དེ་རྗོད་
[136a.4]པར་བྱེད་པ་ལ་ཤིན་ཏུའང་ནུས་པ་མེད་དོ་ཞེས་གསལ་བ་ཁོ་ནར་རྟོགས་པར་བྱའོ། །འོན་ཀྱང་ཞེས་པ་ལ་སོགས་པས། གཏན་ཚིགས་དོན་གྱི་ཡུལ་ཅན་འདོད། །ཅེས་པའི་དོན་འཆད་དོ། །འོ་ན་གཏན་ཚིགས་ཀྱི་དོན་གྱི་མཚན་ཉིད་བསྟན་པ་ནི་རྟོག་གེའི་བསྟན་བཅོས་གཞན་དུ་བྱས་པ་མ་
[136a.5]ཡིན་ནམ། དེ་ཅིའི་ཕྱིར་འདིར་བྱ་ཞེ་ན་གསུངས་པ། དེ་ནི་དེས་གསལ་བར་བྱ་བའོ་ཞེས་པའོ། །གང་གི་ཕྱིར་ཁོ་བོ་ཅག་འདོད་པའི་རྗེས་སུ་དཔག་པར་བྱ་བ་དེ་ཁོ་ན་གཏན་ཚིགས་དེས་བསྒྲུབ་པར་བྱའི། གཞན་གྱིས་ཡོངས་སུ་བརྟགས་པ་ནི་མ་ཡིན་པ་དེའི་ཕྱིར་དེའི་མཚན་ཉིད་བསྟན་པར་བྱའོ། །
[136a.6]རྣམ་པ་འདི་ལྟ་བུ་ཁོ་ནའི་དོན་གཏན་ཚིགས་ཀྱིས་བསྒྲུབ་པར་བྱའི་དེ་ལས་བཟློག་པ་མ་ཡིན་པར་ཅི་ལྟར་ཤེས་པར་འགྱུར་ཞེས་པ་དགོངས་པའོ། །དེའི་ཕྱིར་འདིར་མདོར་བསྡུས་པས་བསྟན་ཏོ། །མང་པོ་རྣམས་ལ་བསྒྲུབ་པར་བྱ་བའི་ཡུལ་ཅན་གྱི་ལོག་པར་རྟོགས་པ་མཐོང་སྟེ། དེའི་ཕྱིར་དེ་བསལ་
[136a.7]བའི་དོན་དུ་བསྟན་བཅོས་སུ་ཕྱོགས་ཀྱི་མཚན་ཉིད་བསྟན་པར་བྱས་ཀྱི། སྦྱོར་བའི་དུས་སུ་དེ་བསྟན་པར་བྱ་བ་ནི་མ་ཡིན་ཏེ། ཉེ་བར་མཁོ་བ་མེད་པའི་ཕྱིར་རོ། །ཅི་སྟེ་ཡང་བསྟན་པར་བྱ་བའོ་ཞེས་ཤིན་ཏུ་འབད་པ་དེ་ལྟ་ནའང་རྣམ་པ་འདི་ལྟ་བུ་བསྟན་པར་བྱའོ་ཞེས་སློབ་པ་གསུངས་པ། ངོ་བོ་ཁོ་ན་
[136b]
[136b.1]ཞེས་པ་ལ་སོགས་པའོ། །འདིར་ངོ་བོ་དང་། ཚིག་ཕྲད་དང་། འདོད་པ་དང་རང་ཉིད་ཀྱི་ཚིག་བཞི་མོ་རྣམས་ཀྱིས་རིམ་པ་ཇི་ལྟ་བར་མ་གྲུབ་པ་དང་། སྒྲུབ་པར་བྱེད་པ་མིན་པ་དང་། འདོད་པས་ཡུལ་དུ་བྱས་པ་དང་། སྒྲུབ་པར་བྱེད་པ་བྱེད་པ་པོས་བསྒྲུབ་པར་འདོད་པ་གཟུང་ངོ་། །དེ་
[136b.2]ལས་ཀྱང་བསྒྲུབ་པར་བྱ་བ་ཚུལ་བཞི་པའོ་ཞེས་བསྟན་པར་འགྱུར་རོ། །གྲུབ་པ་དང་སྒྲུབ་པར་བྱེད་པའི་ངོ་བོས་ནི་མ་ཡིན་ནོ་ཞེས་པ། རིམ་པ་ཇི་ལྟ་བར་ངོ་བོ་དང་ཚིག་ཕྲད་དག་གི་རྣམ་པར་གཅད་པར་བྱ་བ་སྟོན་པར་བྱེད་དོ། །དེ་ལྟར་ནི་རང་གི་ངོ་བོའི་སྒྲས་མ་གྲུབ་པ་བཟུང་ལ། དེའི་རྣམ་
[136b.3]པར་གཅད་པར་བྱ་བ་ནི་གྲུབ་པ་སྟེ། སྒྲ་མཉན་པར་བྱ་བའོ་ཞེས་པ་ལྟ་བུའོ། །རང་གི་ངོ་བོ་ཁོ་ནས་ཞེས་པ་ཚིག་ཕྲད་ཀྱིས་སྒྲུབ་པར་བྱེད་པ་མ་ཡིན་པ་གཟུང་ལ། དེའི་རྣམ་པར་གཅད་པར་བྱ་བ་ནི་མ་གྲུབ་ཀྱང་སྒྲུབ་པར་བྱེད་པ་ཉིད་དུ་འདོད་པ་སྟེ། དཔེར་ན་མ་གྲུབ་པའི་གཏན་ཚིགས་
[136b.4]དང་དཔེ་དག་སྟེ། སྒྲ་རྟག་སྟེ་མིག་གིས་གཟུང་བར་བྱ་བ་ཉིད་ཀྱི་ཕྱིར་བློ་བཞིན་ཞེས་པ་འདི་ལྟ་བུའི་ངོ་བོ་དག་གོ། །དེ་ལ་གྲུབ་ཟིན་རྣམ་པར་གཅོད་པའི་འབྲས་བུ་ཅན་གོ་སླ་བ་ཉིད་ཀྱི་ཕྱིར་སྒྲུབ་པར་བྱེད་པ་རྣམ་པར་གཅོད་པའི་འབྲས་བུ་ཅན་ཁོ་ན་དེ་ལྟ་ན་ཡང་ཞེས་པ་ལ་སོགས་པས་སྟོན་པར་བྱེད་དོ། །
[136b.5]དེ་ལྟ་ན་ཡང་ཞེས་པ་ངེས་པར་གཟུང་བ་ལ་སྟེ། ཡོད་ན་ཞེས་པའི་དོན་ཏོ། །གཏན་ཚིགས་དང་དཔེ་ལྟར་སྣང་བ་ཡང་དེ་དག་ཡིན་ལ། མ་གྲུབ་པ་དག་ཀྱང་ངོ་ཞེས་ཚིག་རྣམ་པར་སྦྱར་རོ། །མ་གྲུབ་པའི་གཏན་ཚིགས་དང་དཔེ་ལྟར་སྣང་བ་དག་བརྗོད་པ་ཡོངས་སུ་སྤངས་པར་འགྱུར་ཏེ། དམ་
[136b.6]བཅའ་བ་ཉིད་དོར་བར་འགྱུར་ཞེས་པའི་དོན་ཏོ། །འོ་ན་གང་མ་གྲུབ་པའི་གཏན་ཚིགས་དང་དཔེ་ཡིན་པ་དེ་དག་དེ་ལྟར་སྣང་བ་ཉིད་ལ་མི་འཁྲུལ་བའི་ཕྱིར་ལྟར་སྣང་བ་སྨོས་པ་དོན་མེད་དོ་ཞེ་ན། གལ་ཏེ་ཁྱད་པར་རྩོམ་པར་སྤྱི་བརྗོད་པར་འདོད་པ་ན། ཁྱད་པར་མངོན་པར་བརྗོད་པ་ན་སྔོན་དུ་
[136b.7]འགྲོ་བ་དོན་མེད་དོ་ཞེས་པས། སྤྱི་མངོན་པར་བརྗོད་པ་ན། ཁྱད་པར་སྤྱི་ལ་མི་འཁྲུལ་བའི་ཕྱིར་སྤྱིའི་སྒྲ་སྦྱོར་བ་དོན་མེད་དོ། །སྤྱི་རྩོམ་པ་ན་ཁྱད་པར་མངོན་པར་བརྗོད་པ་ན་ནི། སྤྱི་ཁྱད་པར་ལ་འཁྲུལ་པའི་ཕྱིར་རྣམ་གཅོད་ལ་ལྟོས་སོ་ཞེས་པས་ཁྱད་པར་གཞན་རྣམ་པར་བཅད་པའི་ཆེད་དུ་ཁྱད་
[137a]
[137a.1]པར་གྱི་སྒྲ་རབ་ཏུ་སྦྱོར་བ་ནི་དོན་དང་ལྡན་པར་འགྱུར་རོ། །འདིར་ཡང་གཏན་ཚིགས་དང་དཔེ་ལྟར་སྣང་བ་ཉིད་ཀྱི་མཚན་ཉིད་ཅན་གང་སྤྱི་དེ། དེའི་སྐབས་ཀྱི་མ་གྲུབ་པའི་མཚན་ཉིད་ཅན་གྱི་ཁྱད་པར་བརྗོད་པར་འདོད་དོ་ཞེས་པས་དོན་མེད་པ་ཉིད་མ་ཡིན་ནོ། །གལ་ཏེ་སྤྱི་
[137a.2]ཉེ་བར་རྩོམ་པ་ལ་ཁྱད་པར་བརྗོད་པར་འདོད་པ་ན་སྤྱིའི་སྒྲ་སྔོན་དུ་སྦྱོར་བར་འགྱུར་རོ་ཞེ་ན། མ་ཡིན་ཏེ། འགྲེལ་པར་རིམ་པ་བསྟན་བཅོས་ཀྱིས་བྱས་པ་ཉིད་ཀྱི་ཕྱིར་རོ། །ངག་ལ་ནི་སྒྲ་རྣམས་བརྗོད་པར་འདོད་པ་རྗེས་སུ་སྒྲུབ་པར་བྱེད་ལ། ཚིག་སྡུད་པ་ཉེ་བར་བསྒྱུར་བའི་རྗེས་སུ་སྔོན་མའོ་
[137a.3]ཞེས་པའི་བསྟན་བཅོས་ཀྱིས་སྔ་མ་དང་ཕྱི་མ་ཉིད་ངེས་པ་ཉིད་ཀྱི་ཕྱིར་རོ། །གལ་ཏེ་ཡང་སྤྱི་ཉེ་བར་རྩོམ་པ་ལ་ཁྱད་པར་བརྗོད་པར་འདོད་པ་དེ་ལྟ་ནའང་ཁྱད་པར་གྱི་སྒྲ་ཁོ་ན་སྔོན་དུ་སྦྱོར་བར་འགྱུར་ལ། དེ་ལྟར་གྱུར་ན་སྤྱིའི་སྒྲ་མི་སྦྱོར་བར་ཐལ་བ་ཡང་མེད་དོ། །ཐམས་ཅད་ཚིག་གཅིག་པ་ཉིད་
[137a.4]ཡིན་པའི་ཕྱིར་ཚིག་གི་ཆ་ཤས་འབའ་ཞིག་པ་རབ་ཏུ་སྦྱར་བར་འོས་པ་ཡང་མ་ཡིན་ཏེ་རང་བཞིན་དང་རྐྱེན་བཞིན་ནོ་ཞེས་པ་འཕྲོས་པས་ཆོག་གོ། །དེ་དག་བསྒྲུབ་པར་བྱ་བའི་ཚུལ་གྱིས་བསྟན་པར་བྱ་བ་ནི་མ་ཡིན་ནོ་ཞེས་པ་སྟེ། མ་གྲུབ་པ་དག་ཀྱང་སྒྲུབ་པར་བྱེད་པ་ཉིད་དུ་མངོན་པར་བརྗོད་པའི་ཕྱིར་
[137a.5]རོ། །འོ་ན་འདིར་རྒོལ་བ་རང་ཉིད་ཀྱི་བསྒྲུབ་པར་བྱ་བ་ཉིད་དུ་འདོད་པ་དེ་བསྒྲུབ་བྱ་ཡིན་ལ། མ་གྲུབ་པའི་སྒྲུབ་པར་བྱེད་པ་ནི་དེའི་ཚེ་དེས་བསྒྲུབ་པར་བྱ་བ་ཉིད་དུ་འདོད་པའང་མ་ཡིན་གྱི། འདོད་པར་འགྱུར་བ་ཡིན་མོད། དེ་ལས་ནིཥྛའི་རྐྱེན་ནི་བྱུང་བའི་དུས་ལ་ངེས་པ་ཉིད་ཀྱི་ཕྱིར། རང་ཉིད་
[137a.6]འདོད་པ་བརྗོད་པས་ངེས་པར་གཟུང་བའི་དོན་རྟོགས་པ་ཁོ་ན་སྟེ། དེའི་ཕྱིར་ཁོ་ནའི་སྒྲ་དོན་མེད་པ་ཉིད་དོ་ཞེ་ན། གལ་ཏེ་བྱུང་བའི་དུས་ཁོ་ན་ལ་འདོད་པའི་སྒྲ་འཇུག་པར་འཐོབ་ན་དེ་དེ་ལྟར་འགྱུར་མོད། དེ་ནི་འཐོབ་པ་མ་ཡིན་ཏེ། དུས་གསུམ་གྱི་ཡུལ་ཅན་བྱ་བའི་མཐའ་ཅན་དང་འབྲེལ་པའི་ཕྱིར་ཏེ།
[137a.7]དཔེར་ན་ལྷས་བྱིན་བལྟ་བར་བྱ་བ་འོངས་སོ་ཞེས་པ་བཞིན་ནོ། །དེའི་ཕྱིར་འདིར་ཨིཥུའི་ཎིཥྛ་འབྲས་བུ་དང་ལྡན་པ་མ་ཡིན་ནོ། །དེའི་ཕྱིར་མ་གྲུབ་པའི་རྟགས་ལ་སོགས་པ་བརྗོད་པར་གྱུར་པ་ལ། ཕ་རོལ་གྱིས་སྐྱོན་བརྗོད་པ་ན། བསྒྲུབ་པར་བྱ་བ་ཉིད་དུ་བསྟན་པར་བྱ་བ་ཉིད་ཀྱང་སྲིད་དོ་ཞེས་
[137b]
[137b.1]པས་སྟོན་པར་འགྱུར་བའང་ཕྱོགས་ཉིད་དུ་འགྱུར་རོ། །དེའི་ཕྱིར་དེ་བཟློག་པའི་ཆེད་དུ་ཚིག་ཕྲད་བརྗོད་དོ། །བསྟན་བཅོས་ལ་མི་ལྟོས་པར་ཞེས་པ་ནི་བསྟན་བཅོས་ལ་ལྟོས་པ་མེད་པར་ཞེས་པའི་དོན་ཏོ། །ཁས་བླངས་པ་ཞེས་པ་ནི་དམ་བཅའ་བའི་དོན་ཏོ། །དེ་ཁས་བླང་བར་བྱ་བའོ་ཞེས་
[137b.2]པས་ཁས་བླང་བའོ། །འོ་ན་རང་ཉིད་འདོད་པ་ཞེས་པ་འདིས་རྒོལ་བ་བདག་ཉིད་ཀྱིས་འདོད་པ་གང་ཡིན་པ་དེ་ཁོ་ན་བསྒྲུབ་པར་བྱ་བའོ་ཞེས་རྟོགས་པར་བྱེད་པས་གཞན་འདོད་པ་ཐམས་ཅད་རྣམ་པར་གཅོད་པར་བྱེད་པ་མ་ཡིན་ནམ། དེའི་ཕྱིར་རང་ཉིད་འདོད་པ་ཞེས་པ་འདིས་གཞན་འདོད་པ་
[137b.3]ཐམས་ཅད་ལ་མི་ལྟོས་པར་ཁས་བླངས་པ་སྟོན་པར་བྱེད་པའོ་ཞེས་བརྗོད་པར་བྱ་མོད། རང་ཉིད་འདོད་པ་ཞེས་པ་འདིས་བསྟན་བཅོས་ལ་མི་ལྟོས་པར་ཁས་བླངས་པ་སྟོན་པར་བྱེད་པའོ་ཞེས་བརྗོད་པར་བྱ་བ་དེ་སྐད་དུ་སྨྲ་བ་དེ་ཅི་ཡིན་ཞེ་ན། བརྗོད་པར་བྱ་སྟེ། འདིར་བསྟན་བཅོས་ཁས་
[137b.4]བླངས་པ་ན་ཡང་། གལ་ཏེ་ཡང་བསྟན་བཅོས་དེ་བྱེད་པ་པོས་ཆོས་ཅན་གཅིག་ལ་ནམ་མཁའི་ཡོན་ཏན་ཉིད་ལ་སོགས་པ་མང་པོ་རྣམས་མངོན་པར་འདོད་པ་དེ་ལྟ་ནའང་། སྒྲུབ་པར་བྱེད་པ་འགོད་པར་བྱེད་པ་པོ་བདག་ཉིད་ཁོ་ནས་གང་སྒྲུབ་པར་འདོད་པ་མི་རྟག་པ་ཉིད་ལ་སོགས་པའི་ཆོས་དེ་
[137b.5]ཁོ་ན་བསྒྲུབ་པར་བྱ་བ་ཡིན་གྱི་ཅིག་ཤོས་ནི་མ་ཡིན་ནོ་ཞེས་བསྟན་པའི་དོན་དུ་རང་ཉིད་སྨོས་པར་བྱས་སོ། །དེའི་ཕྱིར་དེས་གཞན་འདོད་པ་ཐམས་ཅད་སེལ་ནའང་དོགས་པའི་གནས་གང་ཡིན་པ་དེ་ཙམ་སེལ་བ་ལ་དེའི་བྱ་བ་བསྟན་པའི་ཆེད་དུ་འདི་སྐད་བཤད་དོ། །བསྟན་བཅོས་ཁས་བླངས་པའི་
[137b.6]ཕྱིར་དེར་མཐོང་བ་ཐམས་ཅད་བསྒྲུབ་པར་བྱ་བའོ་ཞེས་དོགས་པར་འགྱུར་ལ། འགའ་ཞིག་རྣམས་ཀྱིས་བསྟན་བཅོས་སུ་མཐོང་བ་ནི་བསྒྲུབ་པར་བྱ་བར་འགྱུར་བ་ཁོ་ན་ཡིན་ལ། དེ་ལ་གནོད་ནའང་གཏན་ཚིགས་དང་དམ་བཅའ་དག་གི་སྐྱོན་ཡིན་ནོ་ཞེས་ལོག་པར་རྟོགས་པ་ཡང་མཐོང་བ་ཁོ་ན་སྟེ་དེ་རྣམས་
[137b.7]ཀྱི་སྒྲ་ལ་བྱས་པ་ཉིད་ཀྱིས་མི་རྟག་པ་ཉིད་བསྒྲུབ་པར་བྱ་བ་ན། ནམ་མཁའི་ཡོན་ཏན་ཉིད་ལ་སོགས་པའི་ཆོས་སེལ་བ་ན། ཇི་ལྟར་འགལ་བ་ཉིད་ཡིན་པ་དེ་ལྟར་དྲི་ལ་སའི་ཡོན་ཏན་ཉིད་སེལ་བ་ནའང་འགྱུར་རོ། །དེ་ལྟར་ཡིན་མོད་ཀྱི་དྲི་སའི་ཡོན་ཏན་ཉིད་ནི་བསྒྲུབ་པར་བྱ་བའི་སྐབས་མ་ཡིན་ཏེ།
[138a]
[138a.1]དེས་ན་དེ་སེལ་ན་ཡང་འགལ་བ་ཉིད་མ་ཡིན་ནོ་ཞེ་ན། དེ་ནི་གཞན་ལ་མཚུངས་ཏེ། གང་ཕྱིར་ཇི་ལྟར་དྲི་ལ་སའི་ཡོན་ཏན་ཉིད་སྐབས་མ་ཡིན་པ་དེ་ལྟར་སྒྲ་ལ་ཡང་ནམ་མཁའི་ཡོན་ཏན་ཉིད་ལ་སོགས་པ་རྣམས་ཏེ། དེའི་ཕྱིར་དེ་ལ་གནོད་ནའང་སྐྱོན་དུ་མི་འགྱུར་རོ། །དེ་ལྟར་
[138a.2]འགྱུར་མོད་ཀྱི་ནམ་མཁའི་ཡོན་ཏན་ཉིད་ལ་སོགས་པ་ལ་ཆོས་ཅན་སྒྲ་སྐབས་ཡིན་ཏེ། དེ་ལ་མི་རྟག་པ་ཉིད་དམ་བཅའ་བའི་ཕྱིར་རོ། །དེའི་ཕྱིར་དེ་ཉིད་བཟློག་པ་ལ་སྐྱོན་ཡིན་ལ། སའི་ཡོན་ཏན་ཉིད་ནི་མ་ཡིན་ཏེ། དེ་ཆོས་ཅན་གྱི་སྐབས་མ་ཡིན་པ་ཉིད་ཀྱི་ཕྱིར་རོ་ཞེ་ན། འདི་ནི་ལན་རིགས་པ་མ་ཡིན་
[138a.3]ཏེ། གང་ཕྱིར་གང་ལས་སའི་ཡོན་ཏན་ཉིད་བཟློག་པ་ན་འགྱུར་བ་མ་ཡིན་པ་རྒོལ་བས་ཉེ་བར་བཀོད་པའི་ཆོས་ཅན་གྱི་སྐབས་མ་ཡིན་ནོ་ཞེས་པས། ཆོས་ཅན་ལ་བརྟེན་པས་ནམ་མཁའི་ཡོན་ཏན་ཉིད་བཟློག་པ་ན་སྐྱོན་དུ་བརྗོད་པ་མ་ཡིན་གྱི། འོ་ན་ཅི་ཞེ་ན། བསྟན་བཅོས་ཀྱི་དོན་སྒྲུབ་པར་བྱེད་
[138a.4]པ་སྐབས་ཡིན་ནོ་ཞེས་བྱས་ནས་སོ། །དེས་ན་གལ་ཏེ་ཡང་ཆོས་ཅན་སྐབས་མ་ཡིན་པ་དེ་ལྟ་ན་ཡང་བསྟན་བཅོས་ཀྱི་དོན་སྒྲུབ་པར་བྱེད་པ་སྐབས་ཡིན་ནོ་ཞེས་པས། བསྟན་བཅོས་སུ་ཉེ་བར་བླངས་པའི་ཆོས་གཅིག་ལའང་འགའ་ཞིག་གིས་སེལ་བ་ན་བསྒྲུབ་པར་བྱ་བའི་ཆོས་ཟློག་པའི་ཕྱིར་
[138a.5]གཏན་ཚིགས་དང་དམ་བཅའ་དག་གི་སྐྱོན་དུ་འགྱུར་རོ། །དེའི་ཕྱིར་བསྟན་བཅོས་སུ་མཐོང་བ་ཐམས་ཅད་བསྒྲུབ་པར་བྱ་བ་ཡིན་ལ་དེ་ལ་གནོད་ན་ཡང་གཏན་ཚིགས་དང་དམ་བཅའ་དག་གི་སྐྱོན་ཡིན་ནོ་ཞེས་པ་འདི་ནི་མི་རིགས་སོ། །གང་རྒོལ་བ་བདག་ཉིད་ཀྱིས་བསྒྲུབ་པར་བྱ་བ་ཉིད་དུ་འདོད་པ་དེ་ཁོ་
[138a.6]ན་རིགས་པའོ། །འདི་ནི་སོང་ངོ་། །འོ་ན་འདོད་པ་སྨོས་པ་ཅིའི་དོན་ཡིན་ཞེ་ན། བརྗོད་པར་བྱ་སྟེ། མ་བརྗོད་པ་ནི་འདོད་པས་ཡུལ་དུ་བྱས་ཀྱང་བསྒྲུབ་པར་བྱ་བ་ཉིད་མ་ཡིན་ལ། དེས་ན་དེའི་སྒོ་ནས་སྐྱོན་བརྗོད་པ་གང་ཡིན་པ་དེ་ནི་འཕེལ་བ་དང་མཚུངས་པའི་ལྟག་ཆོད་དོ་ཞེས་ཁ་ཅིག་ལ་ལོག་པར་རྟོགས་
[138a.7]པ་འདི་ཡོད་དེ། དེའི་ཕྱིར་དེ་སེལ་བའི་ཆེད་དུ་མ་བརྗོད་ཀྱང་འདོད་པས་ཡུལ་དུ་བྱས་པ་ནི་བསྒྲུབ་པར་བྱ་བ་ཡིན་ཏེ། དཔེར་ན་མིག་ལ་སོགས་པ་རྣམས་གཞན་གྱི་དོན་ཡིན་ཞེས་པ་འདིར་མིག་ལ་སོགས་པ་རྣམས་གཞན་གྱི་དོན་ཉིད་དུ་བསྒྲུབ་པར་བྱ་བ་ན། མ་བརྗོད་ཀྱང་འདོད་པས་ཁྱབ་པ་
[138b]
[138b.1]བདག་གི་དོན་ཉིད་བསྒྲུབ་བྱ་ཡིན་པ་བཞིན་ནོ་ཞེས་བསྟན་པའི་དོན་དུའོ། །གལ་ཏེ་རྒོལ་བའི་འདོད་པས་བསྒྲུབ་བྱ་ཡིན་པ་དེའི་ཚེ་ཆོས་ཀྱི་ཁྱད་པར་ཟློག་པ་སྒྲུབ་པར་བྱེད་པ་ལ་སོགས་པ་མི་སྲིད་པ་ཁོ་ན་སྟེ། བསྒྲུབ་པར་བྱ་བ་ཚོགས་པ་ནི་གཅིག་ཁོ་ན་ཡིན་ལ། དེའི་ཕྱིར་དེ་ལས་བཟློག་པའང་གཅིག་
[138b.2]ཁོ་ནའོ་ཞེ་ན། འདི་བདེན་ཏེ། གང་ཚོགས་པ་ལས་བཟློག་པ་སྒྲུབ་པར་བྱེད་པ་གཅིག་པུ་ཁོ་ན་འགལ་བ་སྟེ། ཚོགས་པ་ཁོ་ན་བསྒྲུབ་པར་བྱ་བ་ཡིན་པ་ཉིད་ཀྱི་ཕྱིར་རོ། །དེ་ནི་རེས་འགའ་ཆོས་ཅན་གྱི་སྒོ་ནས་སམ། ཆོས་ཀྱི་སྒོ་ནས་སམ། དེ་གཉིས་ཀའི་སྒོ་ནས་སམ། དེའི་ཁྱད་པར་གྱི་
[138b.3]སྒོ་ནས་བྱ་བའོ་ཞེས་པས་དེས་ཐ་སྙད་དུ་བྱེད་པའི་ཕྱིར། རྣམ་པར་གཞག་པ་ཙམ་ཐ་དད་ཀྱི་དོན་ནི་མ་ཡིན་ནོ། །ཡང་ཇི་ལྟར་མ་བརྗོད་པ་དེ་ཡང་བསྒྲུབ་པར་བྱ་བའོ་ཞེས་ཅི་ལྟར་རྟོགས་ཤེ་ན། རྩོད་པའི་སྐབས་ལས་མ་བརྗོད་པའང་རྟོགས་སོ་ཞེས་པས་འདི་ནི་བརྩད་པར་བྱ་བ་མ་ཡིན་ནོ། །དེའི་
[138b.4]ཕྱིར་མ་བརྗོད་ཀྱང་འདོད་པས་ཁྱབ་པ་བསྒྲུབ་པར་བྱ་བ་ཡིན་ཞིང་། དེ་རྗེས་སུ་འགྲོ་བ་མེད་ན་བསྒྲུབ་པར་བྱ་བ་དང་མི་ལྡན་པ་ཉིད་ལ་སོགས་པ་རྣམས་དཔེ་ལ་སོགས་པའི་སྐྱོན་རྣམས་སོ་ཞེས་པའོ། །མ་བསལ་བ་ཞེས་པ་ལ་སོགས་པ་སྟེ། མངོན་སུམ་ཡང་འདི་ཡིན་ལ་དོན་ཡང་ཡིན་པས་མངོན་སུམ་
[138b.5]དོན་ནོ། །དེ་དང་རྗེས་དཔག་དང་ཡིད་ཆེས་པ་དང་གྲགས་པའོ་ཞེས་ཚིག་རྣམ་པར་སྦྱར་བ་བྱས་ནས་ཟླས་དབྱེ་གཅིག་དང་འདྲ་བར་འགྱུར་བས་དེ་ལྟར་བསྟན་ཏོ། །རང་གི་ཆོས་ཅན་ལའོ་ཞེས་པ་འདི་རྒྱུ་མཚན་གྱི་བདུན་པ་སྟེ། རང་གི་ཆོས་ཅན་ཡིན་པའི་རྒྱུ་མཚན་གྱིས་མ་བསལ་བའོ་ཞེས་པའི་དོན་
[138b.6]ཏོ། །འདི་སྐད་བཤད་པར་འགྱུར་ཏེ། རང་གི་ཆོས་ཅན་ལ་གནོད་པ་ན་གལ་ཏེ་དེའི་སྒོ་ནས་འོངས་པ་གནོད་པ་བསྒྲུབ་པར་བྱ་བའི་ཆོས་ལའང་འགྱུར་བ་མ་ཡིན་ནའོ་ཞེས་པའི་དོན་ཏོ། །གལ་ཏེ་རྒྱུ་མཚན་གྱི་བདུན་པ་འདི་ཡིན་ན་མངོན་སུམ་ལ་སོགས་པས་རབ་ཏུ་གྲུབ་པའི་འགལ་བ་ཆོས་གཞན་
[138b.7]གྱི་རྟེན་བསྟན་པ་མ་ཡིན་པར་འགྱུར་ལ། དེ་ལས་ཀྱང་ཁྱད་པར་མེད་པར་བརྗོད་པའི་ཕྱིར་ཆོས་ཅན་གཞན་ལའང་རབ་ཏུ་གྲུབ་པས་སེལ་བར་རྟོགས་པར་འགྱུར་རོ་ཞེ་ན། མ་ཡིན་ཏེ་ཆོས་ཅན་གཞན་ལ་རབ་ཏུ་གྲུབ་པས་སེལ་བ་མི་སྲིད་པའི་ཕྱིར་དེ་ཁོ་ན་ལ་རབ་ཏུ་གྲུབ་པས་ཞེས་པར་རྟོགས་
[139a]
[139a.1]པར་བྱའོ་ཞེས་པས་སྐྱོན་མེད་དོ། །རང་གི་ཆོས་འདི་ལ་ཡོད་པས་ན་རང་གི་ཆོས་ཅན་ཏེ། རང་གི་ཆོས་ཅན་དེ་ལའོ། །སྒྲུབ་བྱེད་འགོད་པ་པོས་བསྒྲུབ་བྱ་ཉིད་དུ་འདོད་པ་གང་ཡིན་པ་ནི་རང་གི་ཆོས་ཏེ་དེ་དང་ལྡན་པ་ལའོ་ཞེས་པའི་ཐ་ཚིག་གོ། །གཞན་དུ་ན་གང་གིས་
[139a.2]དེའི་དོགས་པ་བཟློག་པའི་དོན་དུ་འདི་འབྲས་བུ་དང་ལྡན་པར་འགྱུར་བ་སྐབས་སུ་བབ་པ་མ་ཡིན་པའི་ཆོས་དང་ལྡན་པའི་ཆོས་ཅན་གཞན་ལ་སྐབས་སུ་བབ་པ་མ་ཡིན་པའི་ཆོས་དང་ལྡན་པ་ཉིད་ཀྱིས་གནོད་པ་ན་སྐབས་སུ་བབ་པའི་བསྒྲུབ་པར་བྱ་བ་ལ་ཅི་ཞིག་གནོད། དེའི་ཕྱིར་སྐབས་སུ་བབ་པའི་ཆོས་
[139a.3]དང་ལྡན་པའི་ཆོས་ཅན་ལ་གནོད་ན་སྐྱོན་ཡིན་གྱི། སྐབས་སུ་མ་བབ་པའི་ཆོས་དང་ལྡན་པ་ལ་མ་ཡིན་ནོ་ཞེས་རྟོགས་པའི་དོན་དུ་རང་གི་ཆོས་ཅན་ལ་ཞེས་བརྗོད་དོ། །གལ་ཏེ་འདིའི་དོན་དུ་བྱ་བ་མ་ཡིན་ཏེ། རང་ཉིད་ཅེས་པ་འདི་ཁོ་ནས་དོན་འདི་ཐོབ་པ་ཉིད་ཀྱི་ཕྱིར་རོ། །དེ་ལྟར་ནི་རྒོལ་བ་རང་ཉིད་
[139a.4]ཀྱི་སྒྲུབ་པར་འདོད་པ་གང་ཡིན་པ་དེ་བསྒྲུབ་པར་བྱ་བ་སྟེ། དེའི་ཕྱིར་དེ་ལས་བཟློག་པ། སྒྲུབ་པར་བྱེད་པ་ཁོ་ན་ལ་གནོད་དོ་ཞེས་པ་འདི་དོན་གྱིས་གྲུབ་བོ་ཞེ་ན། བདེན་ཏེ། དེ་ལྟར་དོན་གྱིས་གྲུབ་ནའང་། འདིར་རང་གི་ཆོས་ཅན་གྱི་ཚིག་སླར་ཡང་བྱས་པ་གང་ཡིན་པ་དེ་ནི། བསྒྲུབ་པར་བྱ་བའི་
[139a.5]ཆོས་ལ་དངོས་སུ་གནོད་ན་སྐྱོན་དུ་འགྱུར་བ་འབའ་ཞིག་ཏུ་མ་ཟད་ཀྱི། འོན་ཀྱང་ཆོས་ཅན་ལའང་གནོད་ན་ཅི་ཞིག་ལྟར་འགྱུར་རོ་ཞེས་པའི་དོན་འདི་རབ་ཏུ་འགྲུབ་པའི་ཆེད་དུའོ། །གཞན་དུ་ན་ནི་ཆོས་ཅན་ལ་གནོད་ནའང་། དེའི་ཆོས་ལ་གནོད་པར་འགྲུབ་པར་བྱ་བའི་དོན་དུ་རང་གི་ཆོས་ཅན་གྱི་ཚིག་
[139a.6]གལ་ཏེ་བྱ་བ་མ་ཡིན་ན། དེའི་ཚེ་རྒོལ་བ་བདག་ཉིད་ཀྱིས་བསྒྲུབ་པར་བྱ་བའི་ངོ་བོར་འདོད་པའི་ཆོས་ནི་བསྒྲུབ་པར་བྱ་བའོ་ཞེས་བརྗོད་པའི་ཕྱིར། དེའི་སྒོ་ནས་འོངས་པ་ཁོ་ན་ལ་གནོད་པར་རྟོགས་པ་པོས་སེམས་ཀྱི། ཆོས་ཅན་གྱི་སྒོ་ནས་འོངས་པ་ཉིད་ལ་ནི་མ་ཡིན་ནོ། །དེའི་ཕྱིར་རང་གི་ཆོས་
[139a.7]ཅན་གྱི་ཚིག་བྱས་སོ། །འོ་ན་འདིའང་དོན་གྱིས་གྲུབ་པ་ཁོ་ན་མ་ཡིན་ནམ། དེ་ལྟ་ནི་ཆོས་ལ་གནོད་པས་ནི་དེ་ཙམ་དུ་ཉམས་པ་ཡིན་ལ། དེ་ཡང་བསྒྲུབ་པར་བྱ་བའི་ཆོས་ལ་དངོས་སུ་གནོད་པ་ན་འགྱུར་བའམ། ཆོས་ཅན་ལ་གནོད་པའི་སྒོ་ནས་ཀྱང་རུང་སྟེ། རྣམ་པ་གཉིས་ཀ་ལྟར་ན་ཡང་ཆོས་
[139b]
[139b.1]ལ་གནོད་དེ། དེའི་ཕྱིར་ཆོས་ཅན་ལ་གནོད་པའི་སྒོ་ནས་འོངས་པས་ཀྱང་ཆོས་ལ་གནོད་པ་དོན་གྱིས་འཐོབ་པ་ཁོ་ནའོ་ཞེས་པས་དེའི་དོན་དུ་རང་གི་ཆོས་ཅན་ལ་ཞེས་བརྗོད་པར་བྱ་བ་མ་ཡིན་ནོ་ཞེ་ན། འདི་ནི་བདེན་ཏེ། གང་དུ་ཆོས་ཅན་ལ་གནོད་པ་ན་བསྒྲུབ་པར་བྱ་བའི་ཆོས་ལ་གནོད་པ་མེད་
[139b.2]ཅིང་། ཡུལ་གང་ཞིག་ལ་ཆོས་ཅན་ཉེ་བར་འགོག་པ་ན་ཡང་བསྒྲུབ་པར་བྱ་བའི་ཆོས་ལ་ཉམས་པ་ཅི་ཡང་མེད་པ་དེ་ལའང་ཆོས་ཅན་འབའ་ཞིག་ཉེ་བར་འགོག་པ་ནའང་རྒོལ་བ་འགའ་ཞིག་དམ་བཅའི་སྐྱོན་གྱིས་དང་གཏན་ཚིགས་འགལ་བ་ཉིད་ཀྱི་སྐྱོན་དང་ལྡན་པ་ཉིད་དུ་འདོད་དེ། དཔེར་ན་
[139b.3]ནམ་མཁའ་ལ་སོགས་པ་ནི་གཅིག་གི་རང་བཞིན་དུ་གནས་པ་མ་ཡིན་ཏེ། ཅིག་ཅར་འབྲས་བུ་མི་བྱེད་པའི་ཕྱིར་རོ་ཞེས་དངོས་པོར་གྱུར་པའི་ནམ་མཁའ་ལ་སོགས་པ་ཆོས་ཅན་ཡིན་ནམ། འོན་ཏེ་མ་ཡིན་ཞེས་བརྗོད་པར་འདོད་པ་ཁས་བླངས་པ་མེད་པར། ནམ་མཁའ་མེད་པ་ཉིད་དུ་སྨྲ་བས་
[139b.4]སྤྱིར་ནམ་མཁའ་ལ་སོགས་པའི་ཕྱོགས་སུ་བྱས་པ་ལ། ཆོས་ཀྱང་རྣམ་པར་གཅོད་པ་ཙམ་བསྒྲུབ་པར་བྱ་བ་ལ། རྣམ་པར་གཅོད་པའི་ངོ་བོ་གཏན་ཚིགས་ཡིན་པ་ན། སུན་འབྱིན་པར་བྱེད་པ་པོས་དངོས་པོར་གྱུར་པའི་ནམ་མཁའ་ལ་སོགས་པའི་ཆོས་ཅན་མེད་པའང་སྒྲུབ་པར་བྱེད་དོ་ཞེས་
[139b.5]སྨྲ་བ་ལྟ་བུ་སྟེ། དེ་ལྟར་དངོས་པོར་གྱུར་པའི་ཆོས་ཅན་བསལ་བ་ནའང་འདོད་པའི་བསྒྲུབ་བྱའི་ཆོས་རྣམ་པར་གཅོད་པ་ཙམ་ལ་གནོད་པར་འགྱུར་བའམ་རྣམ་པར་གཅོད་པའི་ངོ་བོའི་གཏན་ཚིགས་ཀྱིས་མ་གྲུབ་པ་ཉིད་འགའ་ཡང་ཡོད་པ་མ་ཡིན་ནོ། །དེ་ལྟ་ན་ཡང་འདི་ལྟར་ཆོས་ཅན་འབའ་
[139b.6]ཞིག་ལ་ཉེ་བར་གནོད་ནའང་འདིར་གནོད་པར་ཁ་ཅིག་འདོད་མོད། འདོད་པར་བྱ་བ་ཡང་མ་ཡིན་ཏེ། དངོས་པོར་གྱུར་པའི་ཆོས་ཅན་བསལ་ནའང་། རྣམ་པར་གཅོད་པ་ཙམ་གྱི་བསྒྲུབ་པར་བྱ་བ་དང་གཏན་ཚིགས་འགྲུབ་པའི་ཕྱིར་རོ། །དེས་ན་གང་དུ་ཆོས་ཅན་ལ་གནོད་པས་བསྒྲུབ་
[139b.7]པར་བྱ་བའི་ཆོས་ཉེ་བར་འགོག་པར་འགྱུར་བ་དེར་སྐྱོན་ཡིན་གྱི། གང་དུ་ཆོས་ཅན་འགོག་ནའང་བསྒྲུབ་པར་བྱ་བའི་ཆོས་ལ་ཉམས་པ་འགའ་ཡང་མེད་པ་དེ་ལ་མ་ཡིན་ནོ། །ཅིའི་ཕྱིར་ཞེ་ན། རང་གི་བསྒྲུབ་པར་བྱ་བའི་ཆོས་ཀྱིས་ཁྱད་པར་དུ་བྱས་པ་ཅན་གྱི་ཆོས་ཅན་ཁོ་ན་བསྒྲུབ་པར་
[140a]
[140a.1]བྱ་བ་ཡིན་གྱི་འབའ་ཞིག་པ་མ་ཡིན་པའི་ཕྱིར་རོ། །དེས་ན་འབའ་ཞིག་པ་བཀག་ནའང་ཅི་ལྟར་གནོད་པར་འགྱུར། དེའི་ཕྱིར་རྣམ་པར་གཅོད་པ་ཙམ་བསྒྲུབ་པར་བྱ་བ་ལ་དངོས་པོར་གྱུར་པའི་ཆོས་ཅན་སེམས་ན་ཡང་སྐྱོན་དང་ལྡན་པ་ཉིད་མ་ཡིན་ནོ་ཞེས་པ་འདི་རང་གི་
[140a.2]ཆོས་ཅན་སྨོས་པས་བསྟན་ཏོ། །འོ་ན་འདི་ཡང་རང་ཉིད་སྨོས་པ་ཁོ་ནས་འགྲུབ་པ་མ་ཡིན་ནམ། དངོས་པོར་གྱུར་པའི་ཆོས་ཅན་བསྒྲུབ་པར་བྱ་བ་ཉིད་དུ་འདོད་པའི་ཕྱིར་རོ་ཞེ་ན། འདི་ཡོད་པ་མ་ཡིན་ཏེ། དངོས་པོར་གྱུར་པ་དང་དངོས་པོར་མ་གྱུར་པ་ཉིད་བརྗོད་པར་འདོད་པ་མེད་པར། སྤྱིར་
[140a.3]བརྗོད་པར་འདོད་པས་འདིར་ནམ་མཁའ་ལ་སོགས་པ་ཕྱོགས་སུ་བྱས་ལ། དེའི་ཕྱིར་དངོས་པོར་མ་གྱུར་པ་དང་དངོས་པོར་གྱུར་པའི་ཆོས་ཅན་ཐམས་ཅད་འཕངས་པ་ཁོ་ནའོ། །དེ་ལྟ་ནའང་དངོས་པོར་གྱུར་པ་བསལ་ནའང་སྐྱོན་མེད་དེ། དངོས་པོར་མ་གྱུར་པའི་ཆོས་ཅན་མ་བསལ་
[140a.4]བ་ཉིད་ཀྱི་ཕྱིར་རོ། །ཡང་གལ་ཏེ་དངོས་པོར་མ་གྱུར་པའི་ཆོས་ཅན་ཡང་བསལ་ན་སྐྱོན་དུ་འགྱུར་མོད། དེ་ནི་བསལ་བ་མ་ཡིན་ནོ་ཞེས་པས་ཁ་ན་མ་ཐོ་བ་མེད་དོ། །དེས་ན་འདིར་ཕྱོགས་ཀྱི་མཚན་ཉིད་འདིར་རང་ཉིད་ཀྱི་སྒྲས་སྐབས་སུ་བབ་པ་ཡིན་པའི་ཆོས་གཞན་བསྟན་བཅོས་ལ་
[140a.5]མཐོང་བ་རྣམས་ལ་གང་གནོད་པ་དེ་ནི་འགལ་བ་མ་ཡིན་པ་ཁོ་ནའོ་ཞེས་བཤད་ཅིང་། རང་གི་ཆོས་ཅན་ལའོ་ཞེས་པ་འདིས་ནི་ཆོས་ཅན་གཞན་བསལ་བ་གང་དེས་བསལ་བ་མ་ཡིན་ནོ་ཞེས་བཤད་དོ་ཞེས་པའོ། །ཆོས་ཅན་གང་ཆོས་ཀྱིས་ཁྱད་པར་དུ་བྱས་པ་ཞེས་པ་འདིས་བསྒྲུབ་པར་བྱ་བའི་
[140a.6]ཆོས་ཀྱིས་ཁྱད་པར་དུ་བྱས་པ་ཁོ་ནའི་ཆོས་ཅན་བསྒྲུབ་པར་བྱ་བ་ཉིད་དུ་སྟོན་ཅིང་། ཆོས་ཅན་འབའ་ཞིག་པ་འགོག་ན་ཡང་གནོད་པར་འགྱུར་བ་མ་ཡིན་ནོ་ཞེས་པ་འདི་གསལ་བར་བྱེད་དོ། །གལ་ཏེ་དེ་ལ་ཞེས་པ་བསྒྲུབ་པར་བྱ་བའི་ཆོས་བཀག་པའི་རྒྱུ་མཚན་ཆོས་གཞན་དེས་གལ་ཏེ་མ་
[140a.7]བསལ་ཞིང་། གལ་ཏེ་གནོད་པར་བྱ་བ་དེ་ལ་དེའི་སྒོ་ནས་འོངས་པའི་གནོད་པ་བསྒྲུབ་པར་བྱ་བའི་ཆོས་ལའང་མ་ཡིན་པར་འགྱུར་ནའོ་ཞེས་པའི་དོན་ཏོ། །སྒྲ་མཉན་བྱ་མ་ཡིན་ནོ་ཞེས་པའི་མཉན་བྱའི་སྒྲས་འདིར། ངོ་བོ་སྣ་ཚོགས་ཅན་གྱི་སྒྲའི་ངོ་བོ་གང་ཉན་པའི་ཤེས་པ་ལ་སྣང་བ། སྣ་
[140b]
[140b.1]ཚོགས་སུ་སྣང་བའི་བློ་མཐོང་བ་མེད་པའི་ཕྱིར་ན་རིགས་ལ་སོགས་པའི་འབྲེལ་པ་ཅན་གཞན་གྱིས་དབེན་པ་དེ་ཁོ་ན་བཤད་དོ། །ཉན་པའི་ཤེས་པས་གཟུང་བར་བྱའོ་ཞེས་བྱས་ནས་སོ། །དེ་ཁོ་ན་བསྟན་པའི་དོན་དུ་མདོར་མངོན་སུམ་དོན་དང་ཞེས་དོན་བཤད་དོ། །ཉན་པའི་དབང་པོའི་
[140b.2]ཡུལ་འདི་ཁོ་ན་སྤོང་ན་མངོན་སུམ་གྱིས་གནོད་ཀྱི། སྤྱི་ལ་ནི་མ་ཡིན་ཏེ། གང་ཕྱིར་འདི་ལྟར་གྱུར་པའི་ངོ་བོ་དེ་ཁོ་ན་དོན་ཏེ། ལྷག་མ་ཤེས་བྱ་ཉིད་ལ་སོགས་པ་སྤྱི་ནི་དངོས་པོའི་ངོ་བོ་མ་ཡིན་ནོ། །དངོས་པོ་མ་ཡིན་པ་ཉིད་ཀྱི་ཕྱིར་དེ་དབང་པོའི་སྤྱོད་ཡུལ་མ་ཡིན་ལ། དེའི་ཕྱིར་དེ་སྤོང་ན་གནོད་
[140b.3]པ་མ་ཡིན་ནོ་ཞེས་པ་འདི་མཉན་བྱ་བརྗོད་པས་གསལ་བར་བྱས་སོ། །གལ་ཏེ་དབང་པོའི་ཡུལ་གྱི་རང་བཞིན་གྱི་དོན་མངོན་པར་འདོད་པ་ཡིན་ན། དེ་རང་གི་མིང་གིས་བརྗོད་པར་བྱ། ཅིས་མིན་ཞེ་ན། རང་གི་མཚན་ཉིད་ནི་རྣམ་པ་ཀུན་དུ་བརྗོད་པར་བྱ་བ་མ་ཡིན་པ་ཉིད་ཀྱི་ཕྱིར་རོ། །སྤྱིའི་ངོ་བོས་
[140b.4]རྗོད་པར་བྱེད་པ་ལ། མཉན་པར་བྱ་བའི་སྒྲས་སམ་གཞན་གྱིས་བརྗོད་པར་བྱའོ་ཞེས་ཁྱད་པར་ཅིའང་མེད་དོ་ཞེས་པས་འདི་ལ་མངོན་པར་ཞེན་བྱ་མ་ཡིན་ནོ། །གཞན་ཡང་ཉན་པའི་ཤེས་པ་ལས་དོན་དེ་འགྲུབ་སྟེ། དེའི་སྒྲུབ་པར་བྱེད་པ་གཞན་མེད་པའི་ཕྱིར་རོ། །དེའི་ཕྱིར་དེའི་སྟོབས་ལས་
[140b.5]རང་བཞིན་གྲུབ་པ་ནི་དེ་ཁོ་ནས་ཐ་སྙད་དུ་བྱའོ་ཞེས་པ་འདི་ནི་དེ་ལྟར་མངོན་པར་བརྗོད་པའི་དགོས་པའོ། །གཞན་ཡང་སྒྲ་ལ་དེ་ལྟ་བུའི་ངོ་བོ་དེ་མེད་དོ་ཞེས་སྨྲ་བ་པོའི་ཉན་པའི་ཤེས་པའི་མངོན་སུམ་ཁོ་ནས་གནོད་པའོ་ཞེས་པའི་རྒྱུ་མཚན་འདིས་ཀྱང་། སྒྲ་ནི་དབང་པོའི་སྤྱོད་ཡུལ་གྱི་རང་བཞིན་དུ་མཉན་
[140b.6]བྱའི་སྒྲས་བཤད་དོ། །རྗེས་སུ་དཔག་པ་དང་འགལ་བའི་དཔེར་བརྗོད་པ་ནི། བུམ་པ་རྟག་གོ་ཞེས་པའོ། །བུམ་པ་ལ་བརྡེགས་པར་བཟོད་པ། མཐོང་བ་ལས་འགའ་ཞིག་གི་འཁྲུལ་པས་འདིར་འགྱུར་རོ། །དེ་ཡང་མཐོང་བ་འགགས་པའི་བུམ་པ་བཞིན་དུ་སྐྱེ་བ་ལ་སོགས་པའི་ཕྱིར་མི་སྲིད་
[140b.7]དོ། །གལ་ཏེ་མི་རྟག་པའི་བུམ་པ་ནི་འགའ་ཡང་མེད་ཀྱི། དེར་ཡང་གསལ་བ་མི་སྣང་བའི་ཕྱིར་རོ་ཞེ་ན། དེའི་གནས་སྐབས་ཉིད་ནི་རྟག་པ་ཉིད་ཡིན་ལ། དེའི་གནས་སྐབས་ཉིད་མ་ཡིན་པ་ནི་མི་རྟག་པ་ཉིད་དུ་སྨྲའོ། །དེ་ནི་འགགས་པ་ལ་ཡོད་དོ་ཞེས་པས། ཞིག་པའི་ཕྱིར་རམ་མི་སྣང་བའི་ཕྱིར་
[141a]
[141a.1]ཞེས་པ་ནི་འདིར་མངོན་པར་ཞེན་བྱ་མ་ཡིན་ནོ། །ཚད་མ་རྣམ་པ་མེད་དོ་ཞེས་པ་ནི་ཡིད་ཆེས་པས་གནོད་པའི་དཔེར་བརྗོད་དོ། །འོ་ན་ཚད་མས་གནོད་པར་འགྱུར་ལ། དེ་ཡང་རྣམ་པ་གཉིས་ཏེ། དེས་ན་དེས་བྱས་པའི་གནོད་པ་དེ་མ་ཐག་པར་བརྗོད་པ་རྣམ་པ་གཉིས་ཁོ་ནར་འགྱུར་
[141a.2]རོ། །གང་འདི་ཡིད་ཆེས་པས་གནོད་པ་དང་གྲགས་པས་གནོད་པ་སྟེ། གནོད་པ་གཉིས་པོ་འདི་དག་ཅི་ལྟར་ཞེ་ན། སྐྱོན་འདི་མེད་དེ། རྗེས་སུ་དཔག་པའི་རྣམ་པ་གསུམ་དུ་དབྱེ་བ་བྱས་ནས་གནོད་པ་དེ་རྣམ་པ་བཞིར་གསུངས་སོ། །མངོན་སུམ་གྱིས་གཅིག་དང་རྗེས་སུ་དཔག་པས་
[141a.3]རྣམ་པ་གསུམ་མོ་ཞེས་བསྡུས་ནས་རྣམ་པ་བཞིར་འགྱུར་རོ། །ཡང་གང་གི་རྗེས་སུ་དཔག་པའི་དབྱེ་བ་རྣམ་གསུམ་དུ་འགྱུར་བ་ཇི་སྐད་བཤད་པའི་རྟགས་ཀྱི་ནང་དུ་ཁས་བླངས་པ་ལ་སོགས་པ་ཅི་ལྟར་འདུས་པར་འགྱུར་ཞེ་ན། བརྗོད་པར་བྱ་སྟེ། དེ་ལ་ཁས་བླངས་པ་ནི་འབྲས་བུའི་
[141a.4]རྟགས་དང་། གྲགས་པ་ནི་རང་བཞིན་གྱི་མཚན་ཉིད་ཅན་ནོ། །བདག་གམ་གཞན་དོན་ཇི་ལྟ་བ་བཞིན་མཐོང་བས་ངག་འཇུག་པ་ནི་ཡིད་ཆེས་པར་མངོན་པར་འདོད་དོ། །དེ་ལྟར་ནི་བསྟན་བཅོས་ཁས་ལེན་པའི་རྒོལ་བ་དེས་དེའི་བྱེད་པ་པོ་དང་བདག་ཉིད་ཀྱང་རྣམ་པ་འདི་ལྟ་བུར་ཁས་བླངས་
[141a.5]ལ། དེའི་ཕྱིར་འདི་དག་ནི་ཡིད་ཆེས་པའི་སྒྲས་བརྗོད་པར་བྱ་བ་དག་སྟེ། འདི་དག་གི་དོན་དེ་ལྟ་བུར་གྱུར་པ་མེད་པར་ངག་འཇུག་པ་མ་ཡིན་ནོ་ཞེས་པའོ། །དེ་ནི་སྨྲ་བ་པོའི་བསམ་པའི་ངོར་བྱེད་པས་འབྲས་བུར་རྣམ་པ་གཞག་ལ། རང་གི་འབྲས་བུས་ཡང་དག་པར་བསྟན་པ་དེས་ནི་རང་ལས་ཕྱིན་
[141a.6]ཅི་ལོག་ཏུ་ཁས་བླངས་པའི་གེགས་བྱེད་དོ། །གགས་ཙམ་གྱི་མཚན་ཉིད་ཅན་ཡང་འདིར་གནོད་པར་རིག་པར་བྱའོ། །དེ་ལྟར་འབྲས་བུའི་གཏན་ཚིགས་ཉིད་དུ་མཚུངས་པའི་ཕྱིར་རང་གི་ཚིག་དང་བསྟན་བཅོས་བསྡུས་ནས་ཡིད་ཆེས་པའི་སྒྲས་བརྗོད་དོ། །ཇི་ལྟར་བདག་ཉིད་ཚད་མ་མ་ཡིན་པ་
[141a.7]ཉིད་དུ་ཁས་ལེན་ན་རྒོལ་བའི་ཚིག་ཕ་རོལ་པོ་ངེས་སུ་གཞུག་པའི་ཆེད་དུ་འཇུག་པ་མ་ཡིན་པ་དེ་ལྟར་བསྟན་བཅོས་ཚད་མ་ཉིད་མ་ཡིན་ན། དེས་རབ་ཏུ་གྲུབ་པའི་ཆོས་ཅན་ཚད་མ་མེད་པ་ཅན་རྣམ་པར་དཔྱོད་པ་འཇུག་པ་མ་ཡིན་ནོ་ཞེས་པ་འདི་ནི་གཉིས་ཀ་ཡིད་ཆེས་པའི་སྒྲའི་བརྗོད་པར་བྱ་བ་ཉིད་དུ་
[141b]
[141b.1]མཚུངས་པའི་རྒྱུ་མཚན་གཞན་ཡིན་ནོ། །སྦྱར་བས་སྟོན་པ་ལ་ཡང་འདི་ཁོ་ན་མཚུངས་པའི་ཕྱིར་རྒྱུ་མཚན་ནོ། །གང་གིས་འདི་ལྟར་འདི་དག་མཚུངས་པ་ཡིན་པ་དེས་དཔེ་བརྗོད་པའང་འདིར་འདྲ་བར་སློབ་དཔོན་གྱིས་གཞལ་བྱའི་དོན་སྒྲུབ་པར་བྱེད་པའི་ཚད་མ་རྣམས་མེད་དོ་ཞེས་བསྟན་ཏོ། །ཡང་
[141b.2]དངོས་པོར་ན་ཚད་མ་མ་ཡིན་པ་འདི་དག་གིས་གེགས་ཀྱི་མཚན་ཉིད་ཅན་གྱི་གནོད་པ་ཅི་ལྟར་བྱ་ཞེ་ན་གསུངས་པ། དམ་བཅའ་བ་ཙམ་གྱིས་ཞེས་པའོ། །གཏན་ཚིགས་བསྟན་པ་འདིས་ན་བསྟན་བཅོས་དང་རང་གི་ཚིག་དག་ནི་ཚད་མ་ཅན་མ་ཡིན་པའི་དམ་བཅའ་ལ་གནོད་པར་བྱེད་པ་ཡིན་གྱི་
[141b.3]དངོས་པོར་ན་ཚད་མ་མ་ཡིན་པའི་ཕྱིར་ནི་མ་ཡིན་ནོ། །དེ་ཉིད་ཀྱི་ཕྱིར་འདི་དག་གི་ཡུལ་གྱི་དབྱེ་བ་འདི་བསྟན་པའི་དོན་དུ་རྗེས་སུ་དཔག་པ་ལས་ཐ་དད་པར་བཤད་དོ་ཞེས་སྟོན་ཏོ། །ཙམ་སྨོས་པ་ནི་རང་གི་ཚིག་ལ་སོགས་པ་ལ་གལ་ཏེ་ཡང་རྗེས་སུ་དཔག་པས་གནོད་པར་བྱེད་པའང་སྲིད་མོད།
[141b.4]དེ་ལྟ་ནའང་དེ་ལ་ལྟོས་པ་མེད་པར་རྒོལ་བས་ཚད་མ་ཉིད་དུ་དམ་བཅའ་ཙམ་གྱིས་དང་། རང་གི་ཚིག་ལ་སོགས་པ་འགལ་བ་བསམ་པར་བྱའི། རྗེས་སུ་དཔག་པས་གནོད་པའི་སྒོ་ནས་ནི་མ་ཡིན་ནོ་ཞེས་ཡོངས་སུ་གསལ་བར་བྱ་བའི་དོན་དུའོ། །འདི་ཡང་རང་གི་ཚིག་དང་འགལ་བ་ལ་ནི་
[141b.5]དཔེར་རྗོད་པ་གསལ་པོ་ཡིན་ནོ། །དེ་ལྟར་ནི་གལ་ཏེ་རྒོལ་བས་རང་གི་ཚིག་ཚད་མ་ཉིད་དུ་ཁས་མི་ལེན་ན་དེའི་ཚེ་ཕ་རོལ་པོས་རྟོགས་པར་བྱ་བའི་ཆེད་དུ་ཚིག་ཅུང་ཟད་ཀྱང་མི་བརྗོད་པར་འགྱུར་ན། རྗོད་པར་ཡང་བྱེད་དོ། །དེའི་ཕྱིར་ཚིག་ཕ་རོལ་པོའི་རྟོགས་པ་སྒྲུབ་པར་བྱེད་པའི་དངོས་པོར་རྗོད་པར་
[141b.6]བྱེད་པས་ཚད་མ་ཉིད་དུ་ཁས་བླངས་ལ་དེའི་ཕྱིར་དེ་ཚད་མར་ཡོད་པ་ཉིད་དུ་རྟོགས་པར་བྱེད་པའི་རྗོད་པས་ནི། ཚད་མ་མེད་པའི་དམ་བཅའ་སེལ་བར་བྱེད་དོ། །ལུང་དང་འགལ་བ་ལ་ནི་བཤད་པ་འདི་ཕྱོགས་ཙམ་སྟོན་པ་ཡིན་ཏེ། གང་གི་ཕྱིར་བསྟན་བཅོས་ལ་བརྟེན་པའི་སྟོབས་ཁོ་ནས་ཚད་མ་ཉིད་
[141b.7]དུ་གདོན་མི་ཟ་བར་རྟོགས་པ་མ་ཡིན་གྱི། འོ་ན་ཅི་ཞེ་ན། ཤེས་པ་འགའ་ཞིག་ལ་དོན་ཤེས་ནས། དོན་བྱ་བ་ལ་མི་སླུ་བར་ཉམས་སུ་མྱོང་བ་ལས་ཀྱང་སྟེ། རྣམ་པ་དེ་ལྟ་བུ་རྣམས་ནི་ཉམས་སུ་མ་མྱོང་བ་དེ་ཡོངས་སུ་མཐོང་བའི་དོན་ཅན་བསྒྲུབ་པར་བྱ་བའི་དོན་བྱེད་པ་རྣམས་ཀྱང་དེའི་རང་བཞིན་ཉིད་
[142a]
[142a.1]དོ་ཞེས་ཚད་མ་ཉིད་དུ་རྟོགས་པར་བྱེད་དོ། །དེ་ལ་གང་གི་ཚེ་ཁས་བླངས་པའི་བསྟན་བཅོས་ཀྱི་རབ་ཏུ་གྲུབ་པའི་ཚད་མ་རྣམས་སྤོང་བར་བྱེད་པ་དེའི་ཚེ་འདི་བསྟན་བཅོས་དང་འགལ་བའི་དཔེ་བརྗོད་དུ་འགྱུར་རོ། །གང་གི་ཚེ་བསྟན་བཅོས་ལ་མ་བརྟེན་པར་ཚད་མ་ཡོད་པ་ཉིད་དུ་ཁོང་དུ་
[142a.2]ཆུད་པ་དེའི་ཚེ་འདི་ལུང་དང་འགལ་བའི་དཔེར་རྗོད་དུ་འཐད་པ་མ་ཡིན་ནོ། །དེའི་ཕྱིར་ཁས་བླངས་པ་གནོད་པ་ལ་འདི་ཕྱོགས་ཙམ་བསྟན་པར་བཤད་དོ། །འདི་ལ་དཔེར་བརྗོད་པ་གསལ་བ་ནི་འདི་ཡིན་ཏེ། ཆོས་ནི་ཚེ་འཕོས་ནས་བདེ་བ་སྟེར་བ་མ་ཡིན་ནོ་ཞེས་པའོ། །དེ་ལྟར་ནི་ཆོས་ནི་བསྟན་བཅོས་ཀྱི་
[142a.3]གཞག་པའི་ཆོས་ཅན་ཡིན་ཞིང་། དེ་ལ་བདེ་བ་མི་སྟེར་བ་ཉིད་བསྒྲུབ་པར་བྱ་བ་ལ། བདེ་བ་སྟེར་བ་ཉིད་དུ་བསྟན་བཅོས་སུ་མཐོང་བས་གནོད་པའོ། །གལ་ཏེ་ལུང་དང་རང་གི་ཚིག་དག་གིས་གགས་ཙམ་བྱེད་པ་ཡིན་ན། འོ་ན་ད་འདི་དག་གི་ཁྱད་པར་ཅི་ཞེ་ན། ཅིའང་མེད་དོ། །གལ་ཏེ་ཅིའང་
[142a.4]མེད་ན་འདི་དག་རིགས་པའི་སྒོར་ཐ་དད་དུ་གསུངས་པ་ཅི་ལྟར་ཞེ་ན། ངག་གི་དབྱེ་བ་ལས་ཏེ། རང་ཉིད་ཁོ་ནས་ཕ་རོལ་པོའི་སྒོ་ཅན་གྱི་ངག་གཞན་གྱིས་དོན་འགའ་ཞིག་སོ་སོར་བཞག་ནས། ཡང་དེ་ཁོ་ན་ཕྱི་མས་ཉམས་པར་བྱེད་པའི་ཕྱིར་ལུང་དང་འགལ་བ་སྟེ། དཔེར་ན་འུག་པ་པས་སྒྲ་རྟག་གོ་
[142a.5]ཞེས་པ་ལྟ་བུའོ། །གང་དེ་ཉིད་ཀྱིས་རང་གི་དོན་དང་འགལ་ན་རང་གི་ཚིག་འགལ་བ་སྟེ། དཔེར་ན་རྗེས་སུ་དཔག་པ་ཚད་མ་མ་ཡིན་ཞེས་པ་དང་། སྨྲས་པ་ཐམས་ཅད་བརྫུན་ཡིན་ནོ་ཞེས་པ་ལྟ་བུའོ། །གང་ལའང་ཞེས་པ་ལ་སོགས་པས་གྲགས་པས་གནོད་པ་དཔེར་བརྗོད་དོ། །འདིར་རི་བོང་
[142a.6]ཅན་ཟླ་བ་མ་ཡིན་ནོ་ཞེས་པ་དམ་བཅའོ། །འདིའི་དོན་ནི་རི་བོང་ཅན་ཟླ་བའི་བརྗོད་པར་བྱ་བ་ཉིད་མེད་དོ་ཞེས་པའོ། །དེ་ཡང་སྒྲ་ལས་བྱུང་བས་རབ་ཏུ་གྲུབ་པ་དང་འགལ་བའི་དོན་གྱིས་སེལ་ཏེ། སྒྲ་ལས་བྱུང་བ་ནི་གྲགས་པ་ཞེས་བྱ་བའི་རྗེས་སུ་དཔག་པའོ། །དེས་རབ་ཏུ་གྲུབ་ཅིང་ངེས་པ་ནི་སྒྲ་ལས་
[142a.7]བྱུང་བས་རབ་ཏུ་གྲུབ་པའོ། །ཡང་འདི་ཉིད་ཀྱི་དོན་གཞན་འདི་ཤེས་པར་བྱ་སྟེ། ཟླ་བ་ཟླ་བ་ཞེས་པ་འདི་ལྟ་བུ་ལ་སོགས་པ་སྒྲའི་རྒྱུ་ཅན་གྱི་ཐ་སྙད་ནི་སྒྲ་ལས་བྱུང་བ་ཡིན་ལ། དེ་ལས་རབ་ཏུ་གྲུབ་ཅིང་སྐྱེས་པ་འདོད་པའི་སྒྲའི་བརྗོད་པར་བྱ་བའི་མཚན་ཉིད་ཅན་གྱི་ཆོས་ནི་སྒྲ་ལས་བྱུང་བ་ལས་རབ་ཏུ་
[142b]
[142b.1]གྲུབ་པ་སྟེ། མཆོག་ཏུ་གྲུབ་པ་ཉིད་དུ་ཤེས་པར་བྱེད་པའི་དོན་ལ་རབ་ཀྱི་སྒྲ་ཉེ་བར་བླངས་པ་ཡིན་ནོ། །མཆོག་ཏུ་ནི་དེ་དོན་ཐམས་ཅད་ལ་གྲུབ་པ་ཉིད་ཀྱི་ཕྱིར་རོ། །དེས་འདི་སྐད་བཤད་པར་འགྱུར་ཏེ། གང་སྒྲའི་ཐ་སྙད་ལས་སྐྱེས་པའི་ཆོས་གྲགས་པ་ཞེས་བྱ་བའི་རྗེས་སུ་དཔག་པས་ངེས་པ་ཇི་སྐད་
[142b.2]བཤད་པའི་ངོ་བོ་ཅན་ཡིན་ཞིང་དེས་གནོད་དོ་ཞེས་པའོ། །ཐུན་མོང་མ་ཡིན་པ་ཉིད་ཀྱི་ཕྱིར་ཞེས་པ་ལ་སོགས་པ་སྟེ། ཡོད་པ་ཉིད་ལ་སོགས་པ་གནོད་པར་བྱེད་པའི་གཏན་ཚིགས་ནི་ཐུན་མོང་མ་ཡིན་པ་ཉིད་དོ། །དེའི་ཕྱིར་ཡང་རྗེས་སུ་དཔག་པ་མེད་དེ། འདོད་པའི་སྒྲའི་རུང་བ་ཉིད་སྤོངས་པ་ལ་ཡང་གང་ལ་
[142b.3]དངོས་པོ་ཐམས་ཅད་ལ་འབྱུང་བའི་ངང་ཚུལ་ཅན་ཡོད་པ་ཉིད་ཀྱང་རྗེས་སུ་འགྲོ་བ་མེད་པ་དེར་རྟགས་གཞན་རྗེས་སུ་འགྲོ་བར་ག་ལ་འགྱུར་ཞེས་པས། འདིར་གཏན་ཚིགས་རྣམ་པ་ཐམས་ཅད་ཐུན་མོང་མ་ཡིན་པ་ཉིད་དོ་ཞེས་པ་འདི་རྟོགས་པ་ནི་གཏན་ཚིགས་ལ་ཡོད་པ་ཉིད་དཔེར་བརྗོད་པའི་འབྲས་
[142b.4]བུའོ། །འོ་ན་བུམ་པ་ལ་སོགས་པ་མཐུན་ཕྱོགས་ཟླ་བ་མ་ཡིན་པ་ལ་ཡོད་པ་ཉིད་རྗེས་སུ་འགྲོ་སྟེ། དེས་ན་འདི་ཅི་ལྟར་ཐུན་མོང་མ་ཡིན་པ་ཡིན་ཞེ་ན། དེ་ནི་ཡོད་པ་མ་ཡིན་ཏེ། འདོད་པའི་སྒྲས་བརྗོད་དུ་རུང་བ་ཉིད་ནི་དོན་ཐམས་ཅད་ལ་འབྱུང་བ་ཅན་ཡིན་ནོ། །དེ་ལྟར་ནི་བརྡ་བྱས་པ་རྣམས་དང་བརྡ་མ་
[142b.5]བྱས་པའི་སྒྲ་རྣམས་ཀྱི་རུང་བ་ནི་ཐམས་ཅད་ཡིན་ནོ། །འདོད་པ་ཙམ་གྱིས་འཇུག་པའི་ཕྱིར་རོ། །སྒྲའི་རུང་བ་ཉིད་ཀྱི་སྟོབས་ཁོ་ན་ལས་སྒྲ་ཐམས་ཅད་སྒྲའི་རུང་བ་ཉིད་ལ་འབྲེལ་པ་སྟེ། གང་གི་ཚེ་ཁོ་ན་སྒྲ་གང་ཞིག་དོན་གང་ལ་སྦྱོར་བར་འདོད་པ་དེའི་ཚེ་ཁོ་ན་དེ་དེ་ལ་སྦྱོར་བར་ནུས་སོ་ཞེས་པའོ། །བུམ་
[142b.6]པ་ལ་སོགས་པ་རྣམས་ལའང་འདོད་པའི་སྒྲའི་བརྗོད་པར་བྱ་བ་ཉིད་རབ་ཏུ་གྲུབ་པ་ཁོ་ནའོ་ཞེས་རྣམ་པར་འཇོག་སྟེ། རུང་བ་ཉིད་ཀྱི་ཕྱིར་ཏེ། དཔེར་ན་འཚེད་པར་བྱེད་བཞིན་པ་མ་ཡིན་ཡང་འཚེད་པ་པོ་ཉིད་བཞིན་ནོ། །དེའི་ཕྱིར་བུམ་པ་ལ་སོགས་པ་རྣམས་ཀྱང་ཟླ་བ་སྟེ། དཔེར་ན་ཟླ་བ་མ་ཡིན་པ་
[142b.7]འགའ་ཞིག་ལ་ཡོད་པ་ཉིད་རྗེས་སུ་འགྲོ་བ་མེད་དོ། །དེའི་ཕྱིར་ཐུན་མོང་མ་ཡིན་པ་ཁོ་ནའོ། །དེ་ལྟར་འགྱུར་མོད། འདི་མི་མཐུན་ཕྱོགས་ཁོ་ན་ལ་ཡོད་པའི་ཕྱིར། འགལ་བ་ཉིད་དུ་འགྱུར་གྱི། ཐུན་མོང་མ་ཡིན་པ་ཉིད་དུ་ནི་མི་འགྱུར་རོ་ཞེ་ན། འདི་ནི་བདེན་ཏེ། ཕ་རོལ་པོས་བུམ་པ་ལ་
[143a]
[143a.1]སོགས་པ་རྣམས་མི་མཐུན་ཕྱོགས་ཉིད་དུ་མི་འདོད་དོ་ཞེས་པ་འདིའི་ཕྱིར། ཕ་རོལ་པོའི་བསམ་པས་མི་མཐུན་ཕྱོགས་ལ་འཇུག་པ་མ་ཡིན་ནོ། །ཐུན་མོང་མ་ཡིན་པ་ཉིད་དུ་བརྗོད་པ་འགའ་ཞིག་གོ། །ཡང་ན་ཐུན་མོང་མ་ཡིན་པའི་ཕྱིར་རྗེས་སུ་དཔག་པ་མེད་པ་ལ་ཞེས་པ་འདིའི་
[143a.2]དོན་གཞན་འདི་ཡིན་ཏེ། གང་གྲགས་པ་ལ་ལོག་པར་ཞུགས་པ་ཐམས་ཅད་ལ་གྲགས་པ་ཉིད་མི་འདོད་པ་རི་བོང་ཅན་ཟླ་བ་མ་ཡིན་ཞེས། ཡོངས་སུ་བཤད་པ་ཅན་གྱི་དོན་མེད་པ་ཉིད་དུ་སོ་སོར་ཤེས་པའམ་དམ་བཅས་པ་ལ། དེའི་ངོར་རྗེས་སུ་དཔག་པ་མེད་པར་གསུངས་ཏེ། འཇིག་རྟེན་གྱི་
[143a.3]ཡོངས་སུ་བཤད་པ་ཅན་གྱི་དོན་སྒྲུབ་པར་བྱེད་པའིའོ། །དེ་ནི་རི་བོང་ཅན་ཇི་སྲིད་པའང་ཟླ་བར་མི་འདོད་ན། གང་གི་དཔེར་འགྱུར་བ་གྲགས་པས་གྲུབ་པ་ཅི་ཞིག་འདོད་པར་འགྱུར་ཞེས་པས་རབ་ཏུ་འཇུག་པ་པོའི་གཏན་ཚིགས་ཐུན་མོང་མ་ཡིན་པ་ཉིད་དོ། །གལ་ཏེ་ཡང་དེ་ལྟ་མ་ཡིན་པ་དེ་ལྟ་ནའང་
[143a.4]འདོད་པ་ཙམ་གྱིས་འཇུག་པའི་གྲགས་པས་གྲུབ་པ་དང་འགལ་བའི་དོན་གྱིས་ཇི་སྐད་བཤད་པའི་དམ་བཅའི་དོན་ལ་གནོད་པར་བྱེད་དོ། འདོད་པ་ཙམ་དང་རྗེས་སུ་འབྲེལ་པ་དངོས་པོ་ལ་ངེས་པ་མེད་པའི་བརྡ་ཅན་སྒྲ་འབྱུང་བའི་ཆོས་རྣམས་ཀྱི་རུང་བ་ནི་དངོས་པོ་ཐམས་ཅད་ཡིན་པས་ཏེ། འདོད་པ་ལ་
[143a.5]འགོག་པ་མེད་པའི་ཕྱིར་རོ། །དེས་ན་འདོད་པ་ཙམ་གྱི་དབང་དུ་གྱུར་པའི་བརྡའི་རྗེས་སུ་བྱེད་པའི་སྒྲ་རྣམས་ཀྱི་དོན་ངེས་པ་མེད་པའི་ཕྱིར། འདོད་རྒྱལ་བའི་སྒྲའི་ཡུལ་གྱི་དོན་ལ་འགོག་པ་འགལ་བ་ཡིན་ནོ། །གང་གི་ཚེ་རྒྱུ་མཚན་ཅན་གྱི་སྒྲ་འཚེད་པ་པོ་ལ་སོགས་པ་རང་གི་རྒྱུ་མཚན་མེད་པ་ལས་དོན་ལ་
[143a.6]འགོག་པ་དང་། དཔེར་ན་ཟླ་བ་ཉིད་ཅེས་བྱ་བ་དོན་དམ་པར་ན་ཡོད་པ་མ་ཡིན་ནོ་ཞེས་དོན་དམ་པ་པའི་དོན་འགོག་པ་དེའི་ཚེ་གྲགས་པས་གནོད་པའི་སྐྱོན་དུ་འགྱུར་བ་མ་ཡིན་ནོ། །གང་གི་ཕྱིར་ཡོངས་སུ་བཤད་པ་ཁོ་ནའི་དོན་འགོག་པ་བྱེད་བཞིན་པ་ལ་གྲགས་པས་གནོད་པར་འགྱུར་གྱི་གཞན་ལ་ནི་མ་
[143a.7]ཡིན་པ་དེའི་ཕྱིར་ཡུལ་གྱི་ཁྱད་པར་འདི་ཁོ་ན་བསྟན་པའི་ཆེད་དུ། གྲགས་པ་དང་རྗེས་སུ་དཔག་པ་ལས་ཕྱི་རོལ་དུ་གྱུར་པ་མ་ཡིན་ཡང་ཐ་དད་དུ་བྱས་ཏེ། རྣམ་པ་གཞན་དུ་ན་ཧ་ཅང་ཐལ་བར་འགྱུར་ཏེ། རྗེས་སུ་དཔག་པ་ལ་རྟགས་ཀྱི་བྱེ་བྲག་དུ་བ་ལ་སོགས་པ་ཇི་སྙེད་པ་དེ་རྣམས་ཀྱིས་གནོད་
[143b]
[143b.1]པའང་སོ་སོ་སོ་སོར་བཤད་པར་བྱ་བར་འགྱུར་བའམ། ཐ་དད་དུ་བྱས་པ་དོན་མེད་པར་འགྱུར་རོ། །ཡུལ་གྱི་དབྱེ་བ་འདི་ཁོ་ན་གྲགས་པ་ཐ་དད་པར་འཆད་པའི་རྒྱུ་མཚན་དུ་སྟོན་ཅིང་། ཁས་བླངས་པས་གནོད་པ་དང་འདྲ་བར་གྲགས་པས་གནོད་པའང་རྒྱུ་དང་བཅས་པར། སྒྲ་ལས་བྱུང་བས་
[143b.2]རབ་ཏུ་གྲུབ་པས་ཞེས་པ་ལ་སོགས་པས་གསུངས་ཏེ། འདོད་པ་ཙམ་གྱིས་འབྱུང་བའི་སྒྲ་ལས་བྱུང་བས་རབ་ཏུ་གྲུབ་པ་ཁོ་ནས་གནོད་པ་ཡིན་གྱི། འདོད་པ་ལ་མི་ལྟོས་པར་དངོས་པོའི་སྟོབས་ཀྱིས་རབ་ཏུ་གྲུབ་པས་ནི་མ་ཡིན་ནོ་ཞེས་པའི་དོན་ཏོ། །ཡང་མངོན་སུམ་དང་རྗེས་སུ་དཔག་པས་གནོད་པ་
[143b.3]དག་ལ་ནི་རྒྱུ་དང་བཅས་པར་གསུངས་པ་མ་ཡིན་ཏེ། སྒྲ་མཉན་བྱ་མ་ཡིན་ནོ་སྒྲ་རྟག་གོ་ཞེས་རྒྱུ་བསྟན་པ་དང་བྲལ་བ་ཁོ་ནར་བརྗོད་པའི་ཕྱིར་རོ། །ཡུལ་གྱི་དབྱེ་བ་བསྟན་པས་ཀྱང་དངོས་པོ་ཡོད་པ་དང་མེད་པའི་རྗེས་སུ་ཤིན་ཏུ་བྱེད་པའི་རྗེས་སུ་དཔག་པ་ལས་ཐ་དད་པ་ཅན་གྱི་གྲགས་པ་ནི་དངོས་པོའི་
[143b.4]དབང་གིས་འཇུག་པ་མ་ཡིན་ནོ་ཞེས་གསལ་བར་བྱེད་པས། གྲགས་པའི་དབང་ལས་དངོས་པོའི་ཡོད་པ་ཉིད་དང་ལྡོག་པ་དང་ལྡོག་པ་མ་ཡིན་པ་དང་གཅིག་ཉིད་དང་གཅིག་མ་ཡིན་པ་ཉིད་འགྲུབ་པ་མ་ཡིན་ཞེས་རྟོགས་པར་བྱེད་དོ། །བཤད་པ་འདིར་ནི་གལ་ཏེ་ཡང་འདོད་པ་ཙམ་གྱི་དབང་དུ་གྱུར་
[143b.5]པ་དངོས་པོ་ལ་ངེས་པ་མ་ཡིན་པའི་བརྡ་ཅན་གྱི་སྒྲ་ལས་བྱུང་བ་གྲགས་པ་ཞེས་བྱ་བའི་རྗེས་སུ་དཔག་པ་ནི་དུ་བ་ལས་མེ་རྗེས་སུ་དཔག་པ་བཞིན་དུ་དངོས་པོའི་སྟོབས་ཀྱིས་འཇུག་པ་མ་ཡིན་པ་དེ་ལྟ་ནའང་དེ་དང་མི་མཐུན་པའི་གཏན་ཚིགས་མེད་དོ་ཞེས་པ་འདི་ཡོད་པའི་གཏན་ཚིགས་ཉེ་བར་བཀོད་པས་གསལ་བར་
[143b.6]བྱེད་དོ། །གྲགས་པའི་མིང་ཅན་གྱི་རྗེས་སུ་དཔག་པ་དེའི་སྦྱོར་བ་ནི། གང་འདོད་པ་ཙམ་གྱི་རྗེས་སུ་བྱེད་པ་དེ་ཐམས་ཅད་དུ་སྲིད་དེ། ཡིད་ཀྱི་རྣམ་པར་རྟོག་པ་འབའ་ཞིག་པ་བཞིན། དོན་རྣམས་ལ་འདོད་པའི་སྒྲའི་བརྗོད་པར་བྱ་བ་ཉིད་ཀྱང་འདོད་པ་ཙམ་གྱི་རྗེས་སུ་བྱེད་པའོ་ཞེས་པ་རང་བཞིན་ནོ། །འོ་ན་
[143b.7]གྲགས་པ་ཞེས་པ་ནི་ཐ་སྙད་ལ་བརྗོད་ལ། དེས་ན་ཅི་ལྟར་འདོད་པ་ཙམ་གྱི་རྗེས་སུ་བྱེད་པ་ཉིད་གྲགས་པ་ཞེས་བྱ་བར་འཐོབ་ཅེ་ན་ཉེ་བར་བཏགས་པ་ལས་ཏེ། འདོད་པའི་སྒྲའི་བརྗོད་པར་བྱ་བ་ཉིད་གང་དུ་ཆོས་ཅན་ཉིད་དུ་ཉེ་བར་བླངས་པ་དེ་ནི་གྲགས་པའི་འབྲས་བུ་སྟེ། དེའི་རང་བཞིན་ཉིད་ཀྱི་ཕྱིར་
[144a]
[144a.1]རོ། །དེའི་ཆོས་འདོད་པ་ཙམ་གྱི་རྗེས་སུ་བྱེད་པ་ཉིད་ཀྱང་གྲགས་པའི་འབྲས་བུར་འགྱུར་རོ། །དེའི་ཕྱིར་འབྲས་བུ་ལ་རྒྱུ་ཉེ་བར་བཏགས་པ་ལས་གྲགས་པར་ཐ་སྙད་འབྱུང་ཞེས་པས་སྐྱོན་མེད་དོ། །རེ་ཞིག་གང་གྲགས་པས་གྲུབ་པས་རང་གི་ཆོས་ཅན་ལས་དེ་ཉིད་ལ་དམ་བཅའི་དོན་
[144a.2]འགལ་བ་ལ་གནོད་དོ་ཞེས་པ་འདི་ནི་རིགས་མོད། མངོན་སུམ་དང་རྗེས་སུ་དཔག་པ་དང་ཁས་བླངས་རྣམས་ནི་འཇལ་བ་པོ་ལ་འཇུག་གི་གནོད་པར་བྱ་བའི་ཆོས་ཅན་ལ་ནི་མ་ཡིན་ན། དེ་ཅི་ལྟར་དེ་རྣམས་ལ་གནོད་པར་བྱེད་པ་ཡིན་ཞེ་ན། བདེན་ཏེ། འདིར་མངོན་སུམ་ལ་སོགས་པ་ནི་གནོད་པར་
[144a.3]བྱེད་པ་པོ་མ་ཡིན་གྱི། འོ་ན་ཅི་ཞེ་ན། དེ་ཡོངས་སུ་བཅད་པ་མཉན་བྱ་ཉིད་ལ་སོགས་པའི་ཆོས་རྣམས་ཡིན་ལ། དེ་རྣམས་འདིར་མངོན་སུམ་ལ་སོགས་པས་གཞལ་བར་བྱས་པ་ཉིད་ཀྱི་ཕྱིར་མངོན་སུམ་ལ་སོགས་པའི་སྒྲ་སྒྲོ་བཏགས་པས་མཚོན་པར་བྱས་སོ་ཞེས་པས་ཁ་ན་མ་ཐོ་བ་མེད་དོ། །འདི་ནི་
[144a.4]ཞེས་པ་ལ་སོགས་པ་སྟེ། འདིར་ཆོས་དང་ཆོས་ཅན་ཚོགས་པ་ཁོ་ན་བསྒྲུབ་པར་བྱ་བ་ཡིན་ཏེ། དེས་ན་ཐམས་ཅད་དུ་ཚོགས་པ་བསལ་བ་ཁོ་ན་ལས་ཉེ་བར་འགོག་ཅིང་། དེ་རེས་འགའ་ཆོས་ཀྱི་སྒོ་ནས་སམ། ཆོས་ཅན་གྱི་སྒོ་ནས་སམ། དེ་གཉིས་ཀའི་སྒོ་ནས་སམ། དེའི་ཁྱད་པར་གྱི་སྒོ་ནས་
[144a.5]བྱ་བའོ་ཞེས་པས་དེས་ཐ་སྙད་དུ་བྱའོ། །འདི་ནི་སྟེ། དཔེར་རྗོད་པ་བཞི་པོ་ནི། ཆོས་ཀྱི་རང་གི་ངོ་བོ་བསལ་བས་ཏེ། ཆོས་ཀྱི་རང་གི་ངོ་བོ་སེལ་བའི་སྒོ་ནས་རྣམ་པ་གཅིག་བསྟན་པའི་ཕྱིར། ཕྱོགས་ཙམ་བཤད་པའོ། །ཕྱོགས་འདིས་ནི་ཆོས་དང་ཆོས་ཅན་གྱི་ཁྱད་པར་ཏེ་སྐབས་སུ་བབ་པའི་
[144a.6]བསྒྲུབ་པར་བྱ་བ་མེད་ན་མི་འབྱུང་བ་རྣམས་དང་ཆོས་ཅན་གྱི་རང་གི་ངོ་བོ་སེལ་བའི་སྒོ་ནས། རྣམ་པ་གཞན་རྣམས་རིག་པར་བྱའོ། །ཡན་ལག་ཅན་ནི་ཡན་ལག་རྣམས་ལས་གཞན་ཡིན་ཞེས་དམ་བཅའ་བ་བྱས་པ་ལ། ཡན་ལག་ཅན་ནི་ཡན་ལག་རྣམས་ལས་གཞན་མ་ཡིན་ཏེ། སྲང་དམའ་བའི་
[144a.7]ཁྱད་པར་མི་འཛིན་པའི་ཕྱིར་རོ་ཞེས་པ་འདི་སུན་འབྱིན་པའོ། །འདིས་ཀྱང་གཞན་ཁྱད་པར་བསལ་གྱི། གཞན་ཙམ་ནི་མ་ཡིན་ནོ། །དེ་ལྟར་ནི་ཕ་རོལ་པོའང་རྡུལ་ཕྲ་རབ་རྣམས་ལ་མཐོང་བ་དང་སྒྲིབ་པ་དང་ཐོགས་པ་ལ་སོགས་པའི་འབྲས་བུ་སྲིད་པ་མ་ཡིན་ཞེས། དེ་རྣམས་འགྲུབ་པའི་ཆེད་དུ་ཡན་
[144b]
[144b.1]ལག་རྣམས་ལས་གཞན་པའི་དོན་ཡན་ལག་ཅན་གྱི་སྒྲ་བྱས་པ། བྱ་བ་དང་ལྡན་པ་དང་ཡོན་ཏན་དང་ལྡན་པ་དང་འཕྲོད་པ་འདུ་བའི་རྒྱུ་ནི་རྫས་སོ་ཞེས་པ་རྫས་ཀྱི་མཚན་ཉིད་འདི་དང་ལྡན་པ་མཐོང་བྱའི་རང་བཞིན་ཅན་བསྒྲུབ་པར་འདོད་ཀྱི། ཁྱད་པར་བ་མིན་པའི་གཞན་ཉིད་ཙམ་ནི་མ་ཡིན་ནོ། །དེའི་ཕྱིར་
[144b.2]དེ་སེལ་བའང་མ་ཡིན་ལ། དེ་སེལ་ན་ནི་ཆོས་ཀྱི་རང་གི་ངོ་བོ་ཁོ་ན་སེལ་བར་འགྱུར་གྱི། དེའི་ཁྱད་པར་ནི་མ་ཡིན་ནོ། །འདི་ནི་ཆོས་ཀྱི་ཁྱད་པར་སེལ་བར་ཡང་འདོད་དོ། །དེས་ན་འདི་ནི་གཞན་གྱི་ཁྱད་པར་སེལ་བའོ། །ཅི་ལྟར་བྱས་ནས་ཤེ་ན། གལ་ཏེ་ཡན་ལག་ཅན་འདི་ལྕི་བ་ཉིད་དུ་འགྱུར་
[144b.3]ན། དེ་ལྟར་ཡིན་ན་འཇི་བ་ལ་སོགས་པའི་གོང་བུ་དག་བསྲེས་པ་བཅལ་བ་དག་ལ། རྫས་ནི་རྫས་གཞན་རྩོམ་ཞིང་ཡོན་ཏན་རྣམས་ཀྱང་ཡོན་ཏན་གཞན་ནོ་ཞེས་པའི་ལུགས་ཀྱི་ཕྱིར། དེ་དག་གིས་ཡན་ལག་ཅན་གྱི་འབྲས་བུ་རྫས་གསུམ་པ་རྩོམ་པ་ན། དེའི་ཡོན་ཏན་གཞན་ལྕི་བ་ཞེས་བྱ་བ་
[144b.4]སྐྱེས་པའི་ཕྱིར། དེའི་ཚེ་དེས་བྱས་པ་སྲང་དམའ་བ་ཞེས་པའི་ཁྱད་པར་དུ་འགྱུར་རོ། །གང་དུ་སྲང་དམའ་བའི་ཁྱད་པར་གྱི་རྒྱུ་ནུས་པ་ཐོགས་པ་མེད་པ་རྫས་གཞན་འདུ་བ་ཅན་གྱི་ལྕི་བ་ཉིད་ཡོད་པ་དེ་སྲང་དམའ་བའི་ཁྱད་པར་དུ་འགྱུར་ཏེ། དཔེར་ན་འཇིམ་པའི་གོང་བུ་གསུམ་པ་སྲང་ལ་གཞག་པ་
[144b.5]བཞིན། འཇིམ་པའི་གོང་བུ་གཉིས་བསྲེས་པ་དག་གཞལ་བ་དག་གི་ཡན་ལག་ཅན་གྱི་རྫས་གཞན་གསུམ་པ་རྩོམ་པ་ལའང་ཇི་སྐད་བཤད་པའི་ལྕི་བ་ཡོད་དོ། །རང་བཞིན་ནོ། །དེའི་ཚེ་སྲང་དམའ་བའི་ཁྱད་པར་དེའི་ཚེ་མཚོན་པ་ཡང་མ་ཡིན་ནོ་ཞེས་པ་བཟློག་པས། གང་ན་སྲང་དམའ་བའི་
[144b.6]ཁྱད་པར་མེད་པ་དེ་ན་ཇི་སྐད་བཤད་པའི་ལྕི་བ་ཉིད་མེད་དོ། །དཔེར་ན་མ་བསྲེས་པར་གཞལ་བའི་འཇིམ་པའི་གོང་བུ་དག་ལ་བཞིན། བསྲེས་ནས་བཅལ་བའི་འཇིམ་པའི་གོང་བུ་དག་ལའང་སྲང་དམའ་བའི་ཁྱད་པར་མེད་དོ། །འབྲས་བུ་མི་དམིགས་པའོ། །དེའི་ཕྱིར་ཡན་ལག་རྣམས་ལས་
[144b.7]གཞན་པའི་ཡན་ལག་ཅན་ལྕི་བའི་ཡོན་ཏན་མེད་ཅེས་པའོ། །འདིར་ཁ་ཅིག་སྨྲ་སྟེ། རྡུལ་ཕྲ་མོ་གཉིས་ནས་བརྩམས་ཏེ། ཇི་སྲིད་རྡུལ་ཕྲན་གསུམ་ལ་སོགས་པའི་འབྲས་བུ་བརྒྱུད་པ་དེ་གཞལ་བར་བྱ་ཞིང་། དེ་ལ་སྲང་དམའ་བའི་ཁྱད་པར་ཡིན་གྱི། རྫས་ཐམས་ཅད་ཀྱི་ལྕི་བ་ཉིད་བྱས་པ་
[145a]
[145a.1]ནི་མ་ཡིན་ནོ། །དེའི་ཕྱིར་མཐའི་འབྲས་བུ་གཅིག་ལྷག་ནའང་དེ་ཙམ་གྱིས་དམའ་བའི་ཁྱད་པར་དུ་འགྱུར་བ་མ་ཡིན་ཏེ། དཔེར་ན་རས་བལ་གྱི་སྐུད་པ་ལ་སོགས་པ་གཞལ་བར་བྱ་བ་དེ་ལའང་ལྕི་བ་ཉིད་ཡོད་ཅིང་། དེ་སྟེ་ཡང་ཚོགས་ཆེན་པོ་གཞལ་བ་ན། གང་གི་ཚེ་རས་བལ་
[145a.2]གྱི་འདབ་མ་ཤིན་ཏུ་ཕྲ་བ་གཞག་པར་གྱུར་པ་དེའི་ཚེ་དེ་ལ་ལྕི་བ་ཉིད་ཡོད་ནའང་སྲང་དམའ་བའི་ཁྱད་པར་དམིགས་པ་མ་ཡིན་ནོ། །དེས་ན་ཐལ་བ་དང་བཟློག་པའི་སྒྲུབ་པར་བྱེད་པ་དག་མ་ངེས་པ་ཡིན་ནོ་ཞེའོ། །དེ་སྐད་སྨྲ་བ་དེའི་རིམ་གྱིས་བསྡོམས་པའི་རྡུལ་གྱི་ཚོགས་རྡུལ་ཕྲན་གཉིས་ལ་སོགས་
[145a.3]པའི་འབྲས་བུའི་རྫས་དུ་མ་ཅན་ལ་ཇི་ལྟ་བུའི་ལྕི་བ་ཉིད་དེ་ལྟ་བུ་ཅིག་ཅར་བསྡོམས་པ་དེ་ལ་མི་འགྱུར་ཏེ། འབྲས་བུའི་རྫས་གཅིག་ཁོ་ནའོ་ཞེས་བྱས་ནས་སོ། །འོན་ཀྱང་ལྕིད་ཐ་དད་པར་འགྱུར་རོ། །དེ་ལས་ཀྱང་དེས་བྱས་པའི་སྲང་དམའ་བར་འགྱུར་ལ། འགྱུར་བའང་མ་ཡིན་ནོ། །གཞན་ཡང་གང་
[145a.4]གི་ཚེ། གསེར་ལ་སོགས་པ་རྣམས་ཀྱི་ར་ཏི་རེ་རེ་བ་ཇི་སྲིད་དུ་དེ་རྣམས་བརྒྱ་གཞལ་བར་གྱུར་པ་དེ་སྲིད་གཅིག་གཞལ་ཞིང་། སླར་ཡང་དེ་རྣམས་ཁོ་ན་རིམ་གྱིས་བསྡོམས་པ་རྣམས་བརྒྱ་གཞལ་བ་དེའི་ཚེ་གྲངས་མཚུངས་པར་མི་འགྱུར་རོ། །གང་ཕྱིར། དེ་ཙམ་གྱིས་རྫས་ཀྱི་ཚོགས་ཉེ་བ་དང་
[145a.5]དེ་དང་བྲལ་བ་ལ་ལྕིད་མཚུངས་པར་ཅི་ལྟར་འགྱུར། འགྱུར་བའང་ཡིན་ཏེ། དེའི་ཕྱིར་རྡུལ་ཕྲན་གཉིས་ལ་སོགས་པའི་འབྲས་བུའི་རྫས་གཞན་གཞལ་བར་བྱ་བ་ཡོད་པ་མ་ཡིན་ནོ། །ཅི་སྟེ་སྐྱོན་འདིར་མ་གྱུར་ཅིག་སྙམ་པས། ཡུངས་ཀར་ལ་སོགས་པའི་འབྲས་བུའི་རྫས་ཀྱི་སྟེ། སོགས་པའི་
[145a.6]སྒྲས་ཡུངས་ཀར་གཉིས་ལ་སོགས་པ་ནས་བརྩམས་པ་གོང་མ་གོང་མ་ལ་ལྕི་བ་ཉིད་འཕེལ་བ་དང་ལྡན་ཡང་དམིགས་པ་མ་ཡིན་པ་ཁོ་ནའོ་ཞེས་འདོད་ན། འོ་ན་དེ་ལྟ་ན་ཡུངས་ཀར་ལས་སྔ་མའི་འབྲས་བུའི་རྫས་ཀྱི་ཕྲེང་བའི་ལྕིད་གང་ཡིན་པ་དེ་ནི་ཤིན་ཏུ་མཚོན་དཀའ་བ་ཁོ་ན་ཡིན་ལ། ཡུངས་ཀར་ལས་
[145a.7]བྱུང་བ་ཕྱི་མའི་ལྕིད་ཉིད་ཉེ་བར་མཚོན་པ་ལ་རང་ཉིད་ཁོ་ན་སོན་པར་བྱེད་དོ། །དེའི་ཕྱིར་རྣམ་པ་ཐམས་ཅད་དུ་ལྕི་བ་ཉིད་མི་དམིགས་པར་ཐལ་བར་འགྱུར་རོ་ཞེས་པས་ལན་སྙིང་པོ་མེད་པའོ། །རས་འདབ་ཀྱི་ནི་གལ་ཏེ་ཡང་ལྕི་བ་ཉེ་བར་མཚོན་པ་མ་ཡིན་པ་དེ་ལྟ་ནའང་དེ་མཐོང་ངོ་ཞེས་པས་ཡོད་པ་
[145b]
[145b.1]ཉིད་དུ་རིགས་སོ། །ཡན་ལག་ཅན་ནི་ཡན་ལག་ལས་ཐ་དད་པར་མཐོང་བ་མ་ཡིན་ཞིང་དེ་ལས་བྱུང་བ་གཟུགས་ལ་སོགས་པ་གཞན་ཉེ་བར་དམིགས་པའང་མ་ཡིན་ནོ། །དེའི་ཕྱིར་ལྕིད་ཉིད་ཀྱི་ཁྱད་པར་མེད་པ་ལྟར་དེའི་གཟུགས་ལ་སོགས་པའི་ཡོན་ཏན་གྱི་ཁྱད་པར་ཡང་མེད་ལ། བྱ་བའི་ཁྱད་
[145b.2]པར་ཡང་མེད་དེ། འཇིམ་པ་ལ་སོགས་པའི་རིལ་བུ་མ་འདྲེས་པའི་གནས་སྐབས་ན་གང་གཟུགས་ལ་སོགས་པ་དང་། གང་བྱ་བ་ཡོད་པ་དེ་ལས་ལྷག་པའི་གཟུགས་ལ་སོགས་པ་དང་བྱ་བ་ནི་འདྲེས་པའི་གནས་སྐབས་ནའང་། རང་ཉིད་ཇི་ལྟ་བའི་དབང་པོས་མ་དམིགས་པའི་ཕྱིར་རོ། །
[145b.3]གང་ལྕིད་ཉིད་མེད་པར་སྒྲུབ་པར་བྱེད་པ་སྲང་དམའ་བའི་ཁྱད་པར་མི་འཛིན་པ་དེ་ནི། ཡན་ལག་ཅན་གྱི་རང་གི་ངོ་བོ་དང་དེ་དང་འདུས་པའི་ཡོན་ཏན་དང་བྱ་བ་མི་དམིགས་པ་ཉེ་བར་མཚོན་པ་ཙམ་མོ། །དེའི་ཕྱིར་ཡན་ལག་ཅན་གྱི་བྱ་བ་མེད་ལ། ཡོན་ཏན་རྣམས་ཀྱང་མེད་དེ། དེ་མེད་པའི་
[145b.4]ཕྱིར་ཡང་འདུ་བ་ཅན་གྱི་རྒྱུ་ཉིད་ཀྱང་མ་ཡིན་ལ། མཐོང་བར་བྱ་བའམ་རེག་པར་བྱ་བ་ཉིད་ཀྱང་མ་ཡིན་ནོ། །རྫས་ཀྱི་མཚན་ཉིད་ཅན་དང་ལྡན་པ་མཐོང་བར་བྱ་བའམ་རེག་པར་བྱ་བའི་ཡན་ལག་ཅན་ནི་ཡན་ལག་རྣམས་ལ་གཞན་མེད་དོ། །གང་དམིགས་སུ་རུང་བ་མི་དམིགས་པ་དེ་ནི་ཡོད་
[145b.5]པ་མ་ཡིན་ཏེ། འདི་ལྟ་སྟེ་རི་བོང་གི་རྭ་བཞིན། རྫས་ཀྱི་མཚན་ཉིད་དང་ལྡན་པའི་ཡན་ལག་ཅན་ཡན་ལག་རྣམས་ལས་གཞན་པའང་དམིགས་སུ་རུང་བ་མ་དམིགས་སོ། །རང་བཞིན་མི་དམིགས་པའོ། །ཡན་ལག་རྣམས་ནི་གཞན་མ་ཡིན་པ་ཞེས་པ་ཆོས་ཅན་གྱི་ཁྱད་པར་སེལ་བའོ། །
[145b.6]ཡན་ལག་རྣམས་ཡན་ལག་ཅན་ལས་གཞན་ནོ་ཞེས་པ་དམ་བཅའོ། །འདིར་ཡན་ལག་རྣམས་ཆོས་ཅན་ཏེ། དེ་རྣམས་གཞན་ཉིད་ཀྱི་ཆོས་ནི་བསྒྲུབ་པར་བྱ་བའོ། །དེ་རྣམས་ཀྱི་ཡང་འགའ་ཞིག་མངོན་སུམ་ཉིད་ཀྱི་ཁྱད་པར་དུ་ཕ་རོལ་པོས་འདོད་དེ། དེ་ལས་གཞན་ཉིད་ཡོད་ན། དེ་ལས་
[145b.7]ཐ་དད་པར་མི་སྣང་བའི་ཕྱིར་འཐད་པ་མ་ཡིན་ནོ། །གཞན་ཉིད་དུ་ཡོད་པ་ན་གང་ཞིག་གང་ལས་ཐ་དད་པར་སྣང་བ་མ་ཡིན་པ་དེ་མངོན་སུམ་མ་ཡིན་ཏེ། ཆེན་པོ་མ་ཡིན་པའི་ཡན་ལག་ཅན་དང་པོའི་ཡན་ལག་རྣམས་བཞིན། ཡན་ལག་རྣམས་ཀྱང་གཞན་ཉིད་དུ་ཡོད་པ་ན་ཡན་ལག་ཅན་ཕ་རོལ་དེ་
[146a]
[146a.1]ལས་ཐ་དད་པར་སྣང་བ་མ་ཡིན་ནོ། །ཁྱབ་པར་བྱེད་པ་མི་དམིགས་པའོ། །རྫས་ནི་ཡོད་པ་མ་ཡིན་ཏེ་ཞེས་པ་ལ་སོགས་པའོ། །འདིའི་ཤིན་ཏུ་གྲགས་པའི་དོན་ནི་སློབ་དཔོན་རང་ཉིད་ཀྱིས་ཕྱིས་འཆད་པར་འགྱུར་རོ། །དོན་གཞན་ཡང་ཤིན་ཏུ་གྲགས་པ་མ་ཡིན་པ་སྲིད་པ་
[146a.2]དེ་ཁོ་ན་བཤད་པར་བྱའོ། །རྫས་ཡོད་དོ་ཞེས་པ་དམ་བཅའོ། །རྫས་ནི་ས་ལ་སོགས་པ་སྟེ། དེ་ཡོད་དེ། ཡོད་པའོ་ཞེས་པའི་དོན་ཏོ། །ཡོད་པ་ཉིད་དང་ལྡན་པའི་ཕྱིར་ཀཱ་ཎ་བྷུ་ཛ་ནི་རྫས་ལ་སོགས་པ་གསུམ་ཡོད་པའོ་ཞེས་མངོན་པར་འདོད་དོ། །དེ་ལས་ཀྱང་ཡོན་ཏན་རྣམས་ཀྱང་རྫས་ཀྱི་རང་
[146a.3]བཞིན་ཉིད་དུ་འགྱུར་ཏེ། རྫས་ལ་གནས་པའི་བདག་ཉིད་ཡོད་པ་ཉིད་དང་འབྲེལ་བའི་ཕྱིར་རོ། །འདི་སྐད་བརྗོད་པར་འགྱུར་ཏེ། གལ་ཏེ་ཡོད་པ་ཉིད་རྫས་ལ་འཇུག་ན་དེའི་ཚེ་ངེས་པར་འདིས་རྫས་ལ་འདུ་བ་ཅན་གྱི་རང་བཞིན་དུ་འགྱུར་བར་བྱ་སྟེ། གཞན་དུ་ན་རྫས་ལ་འཇུག་པར་མི་འགྱུར་ན།
[146a.4]འཇུག་པ་ཡང་ཡིན་ནོ། །དེའི་ཕྱིར་ཡོད་པ་ཉིད་རྫས་ལ་འཇུག་པའི་རང་བཞིན་ཡིན་ལ། དེ་ལྟར་གྱུར་ན་དེ་རང་བཞིན་གང་གིས་རྫས་ལ་འཇུག་པ་དེ་ཁོ་ནས་ཡོན་ཏན་རྣམས་ལའང་ངོ་། །ཅི་སྟེ་རང་བཞིན་དེས་མི་འཇུག་ན། དེའི་ཚེ་དེའི་རང་བཞིན་གཞན་ཁོ་ན་ཡོན་ཏན་རྣམས་ལ་ཞུགས་པར་
[146a.5]འགྱུར་གྱི་དེ་ཁོ་ན་ནི་མ་ཡིན་ནོ་ཞེས་པས། ཐ་དད་པ་ཉིད་ཀྱི་ཕྱིར་གཅིག་ཉིད་ཉམས་སོ། །དེའང་འདོད་པ་མ་ཡིན་ནོ་ཞེས་པས། ཡོན་ཏན་རྣམས་ལའང་དེ་རྫས་ལ་གནས་པའི་རང་བཞིན་ཁོ་ན་འཇུག་པར་འདོད་པར་བྱ་ལ། དེ་ལས་ཀྱང་། གང་ལས་དེ་ལྟར་དེ་རྣམས་ལ་རྫས་ལ་འདུ་བ་ཅན་གྱི་
[146a.6]རང་བཞིན་དེ་འཇུག་པར་འགྱུར་བ་དེ་རྣམས་ཀྱང་རྫས་ཀྱི་རང་བཞིན་དུ་ཐལ་བར་འགྱུར་རོ། །གལ་ཏེ་དེ་རྣམས་ཀྱང་རྫས་ཀྱི་རང་བཞིན་དུ་གྱུར་ན། ཡོན་ཏན་རྣམས་རྫས་ཀྱི་རང་བཞིན་དུ་ཐལ་བར་འགྱུར་བས་དཔེ་གསལ་བར་བྱས་སོ། །ཡོན་ཏན་རྣམས་རྫས་ཀྱི་རང་བཞིན་དུ་འདོད་པའང་མ་ཡིན་ཏེ།
[146a.7]དེའི་ཕྱིར་ཡོད་པ་ཉིད་ནི་རྫས་ལ་མི་འཇུག་པའི་རང་བཞིན་དུ་ཁས་བླང་བར་བྱའོ། །དེའི་ཕྱིར་རྫས་སུ་མངོན་པར་འདོད་པ་ལའང་འཕྲོད་པ་འདུས་པ་འདི་ནི་རྫས་མ་ཡིན་པ་ལ་གནས་པའི་བདག་ཉིད་ཁོ་ནའི་རང་བཞིན་ནོ། །དེ་ལྟ་ནའང་དེ་ལ་ཞུགས་པ་དེའི་རང་བཞིན་དེར་འགྱུར་རོ། །གལ་ཏེ་
[146b]
[146b.1]རྫས་སུ་མངོན་པར་འདོད་པ་རྫས་མ་ཡིན་པར་འགྱུར་ན། དེའི་ཕྱིར་རྫས་ནི་ཡོད་པ་མ་ཡིན་ནོ་ཞེས་པའོ། །གང་ཡོད་པ་ཉིད་དང་ལྡན་པ་དེ་རྫས་མ་ཡིན་ཏེ། ཡོན་ཏན་བཞིན་རྫས་སུ་མངོན་པར་འདོད་པའི་དངོས་པོ་འང་ཡོད་པ་ཉིད་དང་ལྡན་ནོ་ཞེས་པ་འགལ་བས་ཁྱབ་པས། ཆོས་ཅན་གྱི་རང་གི་ངོ་བོ་
[146b.2]གསལ་བའི་ཕྱིར་དམ་བཅའི་སྐྱོན་ནོ། །ངག་ཐམས་ཅད་བརྫུན་པའི་དོན་ཅན་ནོ་ཞེས་དམ་བཅའོ། །འདིས་ཀྱང་རང་ཉིད་ལས་གཞན་པའི་ངག་ཐམས་ཅད་བརྫུན་པའི་དོན་ཅན་ཞེས་དམ་བཅས་ཏེ། དེ་ལྟར་ནི་ཕ་རོལ་པོས་རྟོགས་པའི་ཆེད་དུ་ཚིག་རྗོད་པར་བྱེད་པ་ཁོ་ནས་སྨྲ་བ་པོས་རང་གི་ཚིག་ཚད་
[146b.3]མ་ཉིད་དུ་ཁས་བླང་བར་བྱས་ཏེ། དེའི་ཕྱིར་དེ་འདིར་བརྗོད་པར་འདོད་པ་མ་ཡིན་ནོ། །དེའི་ཕྱིར་ཐམས་ཅད་ཀྱི་སྒྲ་ནི་འདིར་ངག་གི་ཕྱོགས་གཅིག་ཕ་རོལ་པོའི་ཁོ་ན་ལ་འཇུག་གོ། །གང་ཡང་ངག་ཅེས་པ་རྗེས་སུ་བརྗོད་པ་ངག་དེ་ཅི་འདྲ་བ་ཡིན་ཞེ་ན་གསུངས་པ། ངག་ཡོད་དེ། ངག་གི་བདག་
[146b.4]ཉིད་ཀྱིས་དང་བརྫུན་པའི་དོན་ཅན་ཉིད་ཀྱིས་ཀྱང་ཞེས་པ་སྟེ། ངག་གི་བདག་ཉིད་ཀྱིས་ཞེས་པ་ངག་གི་རང་བཞིན་གྱིས་སོ། །འདིས་ནི་ཆོས་ཅན་གྱི་རང་གི་ངོ་བོ་རྗེས་སུ་བརྗོད་དོ། །བརྫུན་པའི་དོན་ཅན་ཉིད་ཀྱིས་ཀྱང་ཞེས་པ་དོན་ཇི་ལྟ་བ་བཞིན་མ་ཡིན་པ་ཉིད་ཀྱིས་སོ། །འདིས་ཀྱང་ཆོས་ཀྱི་རང་གི་
[146b.5]ངོ་བོའོ། །གསུམ་པ་འདི་ནི་འདི་ལྟར་གྱུར་པའི་མཚན་ཉིད་ཅན་ནོ། །ཀྱང་གི་སྒྲ་ནི་ཆོས་ཅན་དང་ཆོས་ཀྱི་ཁྱད་པར་རྗེས་སུ་བརྗོད་པའི་ངག་སྡུད་པའི་དོན་དུའོ། །དེ་ཡང་ཅི་འདྲ་བ་ཞིག་ཅེ་ན། ངག་གི་ཁྱད་པར་མི་རྟག་པ་ཉིད་ལ་སོགས་པ་ཡོད་ལ། བརྫུན་པའི་དོན་ཅན་ཉིད་ཀྱི་ཡང་བརྫུན་ཚིག་གི་
[146b.6]བརྗོད་པར་བྱ་བ་ཅན་ཉིད་ལ་སོགས་པ་ཡོད་དེ་ཞེས་པ་འདི་ལྟ་བུའི་རྣམ་པའོ། །འདིའི་ཞེས་པ་རྗེས་སུ་བརྗོད་པའི་ངག་གིའོ། །འདིའི་ཡང་དམ་བཅའི་ངག་གིས་བྷཱ་ར་ཏ་ལ་སོགས་པའི་ངག་བཞིན་དུ་བརྫུན་པའི་དོན་ཅན་ཉིད་དུ་དམ་བཅས་སོ། །དེ་ཡང་བརྫུན་པའི་དོན་ཅན་ཉིད་ན་བྷཱ་ར་ཏ་ལ་སོགས་
[146b.7]པའི་ངག་རང་བཞིན་རྗོད་བྱེད་མ་ཡིན་པའང་བདེན་པའི་དོན་ཅན་དུ་ཡང་དག་པར་འབྱུང་ཞིང་། གང་ཡང་མི་བདེན་པའི་དོན་ཅན་ཉིད་དེའི་ཁྱད་པར་ཡིན་པ་དེའང་ཉམས་སོ། །དེའི་ཕྱིར་དམ་བཅའ་བར་རང་གི་བརྗོད་པར་བྱ་བ་ལ་ངེས་པར་བསལ་བར་བྱས་པར་འགྱུར་རོ། །དེ་ནི་རང་གི་ངོ་བོའི་སྒོ་
[147a]
[147a.1]ནས་སམ་ཁྱད་པར་གྱི་སྒོ་ནས་ཏེ། དེ་ལ་གལ་ཏེ་ངག་དང་བདེན་མིན་ཉིད་དག་ལ་རྣམ་པ་ཐམས་ཅད་དུ་ངེས་པར་བསལ་བ་ཡིན་ན་ཞེས་པ། འདིས་ཆོས་ཅན་དང་ཆོས་ཀྱི་རང་གི་ངོ་བོ་ངེས་པར་བསལ་བའི་སྒོ་ནས་དམ་བཅའ་བའི་དོན་ངེས་པར་བསལ་བར་སྟོན་ཏོ། །ཅི་ལྟར་བྱས་
[147a.2]ནས་ཤེ་ན། ངག་དང་བདེན་པ་མིན་པ་ཉིད་དག་ལ་ཞེས་པ་རྒྱུ་མཚན་གྱི་དོན་ཅན་གྱི་བདུན་པ་སྟེ། དེས་ན་དོན་འདིར་འགྱུར་རོ། །གལ་ཏེ་ངག་ཆོས་ཅན་གྱིས་དང་བདེན་མིན་གྱི་དོན་ཅན་བསྒྲུབ་པར་བྱ་བའི་ཆོས་ཀྱི་རྒྱུ་མཚན་གྱིས་རྣམ་པ་ཐམས་ཅད་དུ་ངེས་པར་བསལ་བར་ཕྱོགས་འགྱུར་ནའོ། །འདི་
[147a.3]སྐད་བཤད་པར་འགྱུར་ཏེ། གལ་ཏེ་ཆོས་ཅན་གྱི་ངོ་བོའམ་ཆོས་ཀྱི་ངོ་བོ་ལ་གནོད་པ་ཡིན་ན། དེའི་སྒོ་ནས་བསྒྲུབ་པར་བྱ་བ་ཚོགས་པ་ལ་གནོད་པར་འགྱུར་ལ། དེ་ལྟར་གྱུར་ན་གཉིས་ཀའི་རང་གི་ངོ་བོ་བསལ་བ་ཞེས་པའོ། །རྣམ་པ་ཐམས་ཅད་དུ་ཞེས་པ་འདིས་ནི་རྣམ་པ་ཐམས་ཅད་ཀྱིས་
[147a.4]བསྒྲུབ་པར་བྱ་བ་མཐའ་དག་གལ་ཏེ་ཉེ་བར་འགོག་པར་འགྱུར་ན་དེ་ལྟ་ན་དམ་བཅའི་སྐྱོན་དུ་འགྱུར་གྱི། ཇི་ལྟར་ཁ་ཅིག་སྨྲ་བ་ལྟར་ཆོས་ཅན་ཙམ་ལ་གནོད་པས་ནི་མ་ཡིན་ནོ་ཞེས་པ་འདི་སྟོན་པར་བྱེད་དོ། །དོན་འདི་ཁོ་ན་འགྲུབ་པའི་ཆེད་དུ་རྣམ་པ་ཐམས་ཅད་དུ་ཞེས་པ་འདི་དམ་བཅའི་སྐྱོན་ཐམས་
[147a.5]ཅད་ལ་ཁྱབ་པར་བྱེད་པ་ལྟའོ། །དེ་ཉིད་ཀྱི་ཕྱིར་འདི་ལ་མཐའི་དཔེར་བརྗོད་ཁོ་ན་སྨོས་པར་གྱུར་མོད་ཀྱང་འདི་ནི་དམ་བཅའི་སྐྱོན་ཐམས་ཅད་ཀྱི་ཐུན་མོང་བར་རྣམ་པར་ཤེས་པར་བྱའོ་ཞེས་པའོ། །དེ་ལྟར་རེ་ཞིག་སྒྲ་ཇི་ལྟ་བ་བཞིན་པའི་ངག་གི་བརྫུན་པའི་དོན་ཅན་ཉིད་དུ་གྱུར་ན་གཉིས་ཀའི་ངོ་བོའི་སྒོ་ནས་
[147a.6]བསལ་བའོ། །ད་ནི་སྒྲས་ཟིན་པ། དོན་ཇི་ལྟ་བ་བཞིན་མ་ཡིན་པ་ཉིད་ལ། ཁྱད་པར་གྱི་སྒོ་ནས་དམ་བཅའི་དོན་གསལ་བ་རྟོགས་པར་བྱ་བའི་ཆེད་དུ་གསུངས་པ། ཅི་སྟེ་ཞེས་པ་ལ་སོགས་པའོ། །ངག་བདག་ཉིད་ཀྱི་ཞེས་པ། ངག་གི་བདག་ཉིད་དམ་ཡང་ངག་གི་བདག་ཉིད་ངག་ཡིན་པ་དེ་དེ་
[147a.7]སྐད་བརྗོད་དེ། འདིའང་ཅི་ཞེ་ན་ཆོས་ཅན་ངག་གི་ཁྱད་པར་རོ། །འདི་ཅི་ལས་ཤེ་ན་གང་ལས་དེ་ངག་གི་བདག་ཉིད་དུ་གྱུར་པའོ། །གཞན་ཡང་ཆོས་ཅན་དང་ཆོས་ཀྱི་ཁྱད་པར་སེལ་བ་རྟོགས་པར་བྱེད་པའི་སྐབས་ཡིན་ཏེ། གང་གི་ཕྱིར་དེ་མ་ཐག་པ་ཁོ་ནར་བཤད་པ། དེ་ལྟར་གྱུར་ན་གཉིས་
[147b]
[147b.1]ཀའི་ཁྱད་པར་བསལ་བ་ཡིན་ནོ་ཞེས་པའོ། །དེའི་ཕྱིར་འདི་སྤྱིའི་སྒྲ་ཡིན་ཡང་སྐབས་ལས་དང་ཤུགས་ལས་ངག་གི་ཁྱད་པར་ཁོ་ན་ལ་འཇུག་སྟེ། ཁྱད་པར་གྱི་སྒྲ་ཉེ་བ་ཁོ་ན་ནི་ངག་རྣམས་ཀྱི་ཁྱད་པར་འཇོག་པའི་རྒྱུ་མ་ཡིན་གྱི། འོན་ཀྱང་སྐབས་ལ་སོགས་པའང་ཡིན་ནོ་ཞེས་པ་གནས་མ་
[147b.2]ཡིན་པའི་ལོག་པར་རྟོགས་པས་ཆོག་གོ། །བདེན་པ་མིན་པ་དོན་ཅན་ཉིད་ཀྱིས་ཀྱང་། །ཞེས་པ། བདེན་པ་མིན་པའི་དོན་ཏེ་བརྗོད་བྱ་ཅན་ནོ། །དེའི་དངོས་པོ་ནི་བདེན་པ་མིན་པའི་དོན་ཅན་ཉིད་དོ། །དེ་ཡང་བསྒྲུབ་པར་བྱ་བའི་ཆོས་ཀྱི་ཁྱད་པར་རོ། །འདིའང་བར་མ་ཆད་པར་བརྗོད་པའི་འཐད་པ་
[147b.3]ཁོ་ནས་རྟོགས་པར་བྱའོ། །ཀྱང་གི་སྒྲ་ལས་ཁྱད་པར་གཞན་འགའ་ཞིག་གིས་ཀྱང་ངོ་། །གསུམ་པ་འདི་ནི་རྒྱུ་ལའོ། །དེས་ན་ངག་གི་དོན་འདི་འབྱུང་སྟེ། ཅི་སྟེ་ཆོས་ཅན་གྱི་ཁྱད་པར་མི་རྟག་པ་ཉིད་ལ་སོགས་པས་དང་། ཆོས་ཀྱི་ཁྱད་པར་བདེན་པ་མིན་པའི་ཚིག་གི་བརྗོད་པར་བྱ་བ་
[147b.4]ཉིད་ལ་སོགས་པའི་རྒྱུས། དེ་བསལ་བའི་སྒོ་ནས་རྣམ་པ་ཐམས་ཅད་དུ་དམ་བཅའ་བའི་དོན་བསལ་བར་འགྱུར་རོ། །དེ་ལྟར་གཉིས་ཀ་དག་གི་ཁྱད་པར་བསལ་བའོ་ཞེས་པའོ། །དེ་ལྟར་ན་འདིར་དམ་བཅའི་ངག་གིས་དང་། རྗེས་སུ་བསྒྲགས་པའི་ངག་གིས་ཡང་དོན་ཇི་ལྟ་བ་ཉིད་མ་ཡིན་
[147b.5]པར་དམ་འཆའ་བས་ཀྱང་རང་གི་དོན་ཁོ་ན་བསལ་བར་འགྱུར་རོ་ཞེས་པས་རང་གི་ཚིག་འགལ་བ་དམ་བཅའི་སྐྱོན་ཡིན་ནོ། །འོ་ན་ངག་རྣམས་ཀྱི་ངོ་བོ་དང་ཁྱད་པར་འདི་གཉིས་ཀ་ཡང་མངོན་སུམ་ལ་སོགས་པས་རབ་ཏུ་གྲུབ་པ་ཁོ་ན་ཡིན་ཏེ། དེས་ན་དེའི་རྣམ་པ་གཞན་ཉིད་དུ་ཅི་ལྟར་ཡིན་
[147b.6]ཞེ་ན། འདི་ནི་དེ་ལྟ་མ་ཡིན་ཏེ། དེ་ལྟར་ན་ནི་དམ་བཅའ་བར་བྱ་བཞིན་པར་གྱུར་པ་ན་འདི་མི་འདོད་པར་ཐལ་བར་འགྱུར་རོ་ཞེས་པའོ། །ངག་གི་དོན་གྱི་དབང་ལས་འདི་འདི་ལྟར་སྨྲ་བ་པོ་ལ་ཉེ་བར་དམིགས་པར་འབྱུང་གི །དངོས་པོའི་དབང་ལས་ནི་མ་ཡིན་ནོ། །ཚིག་གི་ཡོན་ཏན་དང་སྐྱོན་
[147b.7]དག་ནི་གཞན་གྱི་དོན་གྱི་རྗེས་སུ་དཔག་པར་སྐབས་ཡིན་གྱི། དོན་གྱི་ནི་མ་ཡིན་ནོ། །དེའི་ཕྱིར་མངོན་སུམ་ལ་སོགས་པ་དང་འགལ་བ་ཡོད་དུ་ཟིན་ཀྱང་། དེ་ལ་ལྟོས་པ་མེད་པར་སྒྲའི་དོན་ལ་ལྟོས་པར་རང་གི་ཚིག་འགལ་བ་འདི་འབྱུང་ངོ་ཞེས་པ་ཁ་ན་མ་ཐོ་བ་མེད་དོ། །གལ་ཏེ་ཁྱད་
[148a]
[148a.1]པར་མ་གྲུབ་པ་ཉིད་ལ་སོགས་པ་སྒྲུབ་བྱེད་མི་སྲིད་པའི་ཕྱིར་ཕྱོགས་ལྟར་སྣང་བར་བཤད་པ་དེ་རྣམས་འདིར་ཅིས་མ་བཤད་ཅེ་ན། གང་གི་ཕྱིར་དེ་རྣམས་ལ་དཔེ་བསྒྲུབ་པར་བྱ་བ་དང་བྲལ་བ་ལ་སོགས་པའི་སྐྱོན་ལས་སྒྲུབ་པར་བྱེད་པ་མི་སྲིད་པ་ཡིན་གྱི། དམ་བཅའ་བ་
[148a.2]ཙམ་གྱིས་མ་ཡིན་པ་དེས་ན་མ་བརྗོད་དོ། །མ་གྲུབ་པ་ཉིད་ལ་སོགས་པ་སྐྱོན་ཐམས་ཅད་ཀྱིས་ཀྱང་ཕྱོགས་ཁོ་ན་ལ་ཉེ་བར་གནོད་ཅིང་། དེ་ལྟ་བུ་དེ་ལས་ཀྱང་། དེ་ལྟ་ན་ཡང་ཕྱོགས་ལྟར་སྣང་བ་ཉིད་དུ་འགྱུར་ན། མ་གྲུབ་པ་ལ་སོགས་པ་རྣམས་ཀྱང་ཕྱོགས་ལྟར་སྣང་བར་བརྗོད་པར་བྱ་བར་འགྱུར་
[148a.3]ལ་དེ་འདོད་པའང་མ་ཡིན་ནོ། །དེའི་ཕྱིར་གལ་ཏེ་ཡང་སྒྲུབ་པར་བྱེད་པའི་སྐྱོན་ཐམས་ཅད་ཀྱིས་ཕྱོགས་ཉིད་འགོག་པ་དེ་ལྟ་ནའང་དམ་བཅའ་ཙམ་ལ་འབྱུང་བ་རྣམས་ཁོ་ན་ཕྱོགས་ཀྱི་སྐྱོན་ཉིད་དོ། །དེ་ཉིད་ཀྱི་ཕྱིར་དོན་གཞན་འདི་གསལ་བར་བྱེད་པ། དམ་བཅའ་ཙམ་དང་ཞེས་པའི་ཚིག་
[148a.4]ཐམས་ཅད་དུ་ཁྱབ་པར་བྱེད་པར་བལྟ་བར་བྱའོ། །གང་གི་ཕྱིར་འདི་ལྟར་ཡིན་པ་དེའི་ཕྱིར་ཁྱད་པར་མ་གྲུབ་པ་ལ་སོགས་པ་དེར་གང་ཕྱོགས་ཀྱི་ཆོས་ཉིད་ལ་སོགས་པ་ཡན་ལག་ཕྱི་མ་ལ་ལྟོས་ནས་སྐྱོན་དུ་འགྱུར་བ་དེ་ནི་དེ་ཁོ་ནའི་ཡིན་གྱི་ཕྱོགས་ཀྱི་ནི་མ་ཡིན་ནོ་ཞེས་བཤད་པར་འགྱུར་རོ། །
[148a.5]དེའི་ཕྱིར་ཁྱད་པར་མ་གྲུབ་པ་ཉིད་ལ་སོགས་པ་རྣམས་ཕྱོགས་ཀྱི་སྐྱོན་མ་ཡིན་ནོ་ཞེས་པའོ། །རིགས་པ་ཅན་རྣམས་ནི་ཞེས་པ་ལ་སོགས་པ་སྟེ། ནིའི་སྒྲ་ནི་ལུགས་གཞན་ལས་ཁྱད་པར་གསལ་བར་བྱེད་པའོ། །བསྒྲུབ་བྱ་སྟོན་པ་དམ་བཅའོ་ཞེས་འདི་ལ་བསྒྲུབ་པར་བྱ་བའི་སྒྲ་འདི་གྲུབ་ཟིན་པ་
[148a.6]མ་ཡིན་གྱི། འོན་ཀྱང་བསྒྲུབ་པར་བྱར་འོས་པའོ་ཞེས་པ་འདི་ཙམ་གྱི་དོན་རྗོད་པར་བྱེད་ཅིང་། གྲུབ་པ་མ་ཡིན་ཏེ། གྲུབ་པ་མ་ཡིན་པ་དགག་པ་ཙམ་ལ་དོན་སྤྱད་པར་བྱས་པ་ཉིད་ཀྱི་ཕྱིར། དེ་ཁོ་ན་ལ་ནུས་པ་ཉེ་བར་ཟད་པའོ། །རྩོམ་པ་གཞན་མེད་པར་བསྒྲུབ་པར་བྱ་བའི་ཁྱད་པར་དུ་གནས་
[148a.7]ཏེ། དེས་ན་སྐྱོན་ཅི་ཡོད་ཅེས་ཟེར་རོ། །དེ་ལྟ་ན་ནི་ཞེས་པ་ལ་སོགས་པ་སྟེ། དཔེར་ན་སྒྲ་མི་རྟག་གོ་ཞེས་བསྒྲུབ་པར་འདོད་པའི་དོན་བསྟན་པ་འདི་ནི་དམ་བཅའ་ཡིན་ལ། དེ་ལྟར་ཡིན་ན་མ་གྲུབ་པའི་གཏན་ཚིགས་དང་དཔེ་རྗོད་པར་བྱེད་པ། དམ་བཅའ་བར་ཐལ་བར་འགྱུར། འོ་ན་སྒྲ་རྟག་པ་
[148b]
[148b.1]ཉིད་ལ་སོགས་པ་སྒྲུབ་པའི་དུས་ན། མ་གྲུབ་པའི་གཏན་ཚིགས་དང་། དཔེ་དག་བསྒྲུབ་པར་བྱ་བ་ཉིད་དུ་འདོད་པ་མ་ཡིན་པ་ཁོ་ན་སྟེ། དེས་ན་ཐལ་བར་འགྱུར་བ་འདི་ཅིའི་ཕྱིར་ཡིན་ཞེ་ན། གང་གི་ཕྱིར་བསྒྲུབ་པར་བྱ་བའི་སྒྲ་ནི་བྱ་བའི་རྐྱེན་གྱི་མཐའ་ཅན་ཡིན་ལ། བྱ་བའི་རྐྱེན་རྣམས་ཀྱང་དུས་
[148b.2]གསུམ་པའི་ཡུལ་ཅན་ཡིན་པ་དེའི་ཕྱིར་རྟག་པ་ཉིད་ལ་སོགས་པ་སྒྲུབ་པར་བྱེད་པའི་སྐབས་སུ། རྟག་པ་ལ་སོགས་པའི་རང་བཞིན་ཉིད་དུ་ཕ་རོལ་པོའི་ངོར་མ་གྲུབ་པ་གང་ཡིན་པ། དེ་ལྟའི་དངོས་པོར་ཉེ་བར་བཀོད་པ་བསྒྲུབ་པར་བྱ་བར་འགྱུར་བ་བློ་ལ་སོགས་པ་དེ་སྒྲ་རྟག་པ་ཉིད་ལ་སོགས་པ་སྒྲུབ་
[148b.3]པར་བྱེད་པའི་དུས་ན་མི་འདོད་ནའང་བསྒྲུབ་པར་འོས་པ་ཉིད་ཀྱིས་ན་བསྒྲུབ་པར་བྱ་བ་ཁོ་ནའོ་ཞེས་པས་དེ་བརྗོད་པ་ནི་དམ་བཅའ་ཉིད་དུ་ཐལ་བར་འགྱུར་རོ། །གལ་ཏེ་བསྒྲུབ་པར་བྱ་བའི་སྒྲ་ནི་དེའི་ཚེ་གང་ཅུང་ཟད་མ་གྲུབ་པ་དེ་ཐམས་ཅད་འཛིན་པར་བྱེད་པ་མ་ཡིན་གྱི། རྒོལ་བའི་བསྒྲུབ་པར་བྱ་
[148b.4]བ་ཉིད་དུ་འདོད་པའི་ཁྱད་པར་དེ་ཁོ་ན་འཛིན་པ་ཡིན་མོད། དེས་ན་མ་གྲུབ་པའི་གཏན་ཚིགས་ལ་སོགས་པ་བརྗོད་པ་ཁོ་ན་དམ་བཅའ་བར་ཅིས་འགྱུར་ཞེ་ན། བརྗོད་པར་བྱ་སྟེ། མ་གྲུབ་པ་བརྗོད་པ་ཐམས་ཅད་ནི་མ་ཡིན་ཏེ། ཤེས་པར་བྱེད་པའི་སྐབས་ལས་གཞན་རྣམས་ཐལ་བར་མི་འགྱུར་
[148b.5]བའི་ཕྱིར་རོ། །རྣམ་པ་གཞན་དུ་ན་རི་བོང་གི་རྭ་ལ་སོགས་པ་མ་གྲུབ་པ་བརྗོད་པ་ཐམས་ཅད་ཀྱང་དམ་བཅའ་བ་ཉིད་དུ་འགྱུར་རོ། །དེའི་ཕྱིར་ཤེས་པར་བྱེད་པའི་སྐབས་ལས་མི་འགྱུར་རོ་ཞེས་འདོད་པར་བྱའོ། །དེ་ལྟར་འགྱུར་མོད་ཀྱི། རང་གི་ངོ་བོས་ལས་ལ་སོགས་པ་བསྒྲུབ་པ་རྣམས་
[148b.6]རྣམ་པར་གནས་ལ། བྱ་བའི་རྐྱེན་འདི་ནི་ལས་ལ་སྟེ། དེས་ན་ལས་བརྗོད་པའི་ངང་ཚུལ་ཅན། བསྒྲུབ་བྱའི་སྒྲས་བསྒྲུབ་བྱ་མ་ཡིན་པ་འཕེན་པ་མ་ཡིན་ནོ། །བྱེད་པ་པོས་ཤིན་ཏུ་འདོད་པར་གྱུར་པ་ནི་ལས་ཡིན་ལ། དེའི་ཚེ་མ་གྲུབ་པའི་གཏན་ཚིགས་ལ་སོགས་པ་བསྒྲུབ་པར་བྱ་བ་ཉིད་
[148b.7]དུ་འདོད་པ་ཡང་མ་ཡིན་ནོ། །གྲུབ་མཐའ་ཡང་རྣམ་པ་བཞི་སྟེ། རྒྱུད་ཐམས་ཅད་ཀྱི་གྲུབ་མཐའ་དང་། སོ་སོའི་རྒྱུད་ཀྱི་གྲུབ་མཐའ་དང་། སྐབས་ཀྱི་གྲུབ་མཐའ་དང་། ཁས་བླངས་པའི་གྲུབ་མཐའོ། །དེ་ལ་རྒྱུད་ཐམས་ཅད་ཀྱི་གྲུབ་པའི་མཐའ་ནི་དོན་གང་རྒྱུད་རྣམས་ཐམས་ཅད་དུ་དབང་དུ་བྱས་པ་རྒྱུད་
[149a]
[149a.1]ཐམས་ཅད་དང་མི་འགལ་བ་སྟེ། དཔེར་ན་གཞལ་བྱའི་དོན་འཛིན་པར་བྱེད་པའི་ཚད་མ་རྣམས་ཡོད་དོ་ཞེས་པ་ལྟ་བུའོ། །ཆོས་གང་རང་གི་བའི་རྒྱུད་དུ་གྲུབ་ལ་གཞན་གྱི་རྒྱུད་དུ་མ་གྲུབ་པ་དེ་ནི་སོ་སོའི་རྒྱུད་ཀྱི་གྲུབ་པའི་མཐའ་སྟེ། དཔེར་ན་ཐམས་ཅད་གཅིག་པའམ། ཐ་དད་པའོ། །
[149a.2]ཐམས་ཅད་མི་རྟག་པའམ། རྟག་པའོ་ཞེས་པ་ལ་སོགས་པའོ། །གང་འགྲུབ་པ་ན་རྣམ་པ་གཞན་འགྲུབ་པ་དེ་ནི་སྐབས་ཀྱི་གྲུབ་པའི་མཐའ་སྟེ། དཔེར་ན་ལུས་ཅན་མ་ཡིན་པའི་བདག་ནི་ཤི་ནས་འབྲས་བུ་རྣམས་ལོངས་སྤྱོད་དེ། དེར་ལུས་འབྱུང་བ་ཡོད་པ་ནི་མ་ཡིན་ཞེས་བརྗོད་པ་ན། བདག་ཡོད་
[149a.3]པར་གྲུབ་པར་འགྱུར་ལ། འདི་ལུས་ལས་གོང་དུའང་འགྱུར་རོ་ཞེས་པའོ། །མ་བརྟགས་པར་ཁས་བླངས་པ་ལས་དེའི་ཁྱད་པར་རྟོགས་པ་ནི་ཁས་བླངས་པའི་གྲུབ་པའི་མཐའ་སྟེ། གང་མ་བརྟགས་ཤིང་ཉེ་བར་མ་བསྟན་པ་ཁས་བླངས་ནས་དེའི་ཁྱད་པར་རྣམ་པར་དཔྱོད་པར་བྱེད་པ་དེ་ཁས་བླངས་
[149a.4]པའི་གྲུབ་པའི་མཐའ་སྟེ། དཔེར་ན་མ་བརྟགས་པར་བདག་ཡོད་པ་ཉིད་དུ་ཁས་བླངས་ནས། མི་རྟག་པ་ཉིད་ལ་སོགས་པ་རྣམ་པར་དཔྱོད་པ་ལྟ་བུའོ། །དེ་ལྟར་གྲུབ་མཐའ་རྣམ་པ་བཞི་པོ་སྐབས་སུ་བྱས་ནས་བསྒྲུབ་བྱ་སྟོན་པ་དམ་བཅའོ་ཞེས་བརྗོད་པའི་ཕྱིར། གྲུབ་མཐའི་མཚན་ཉིད་ཅན་ཁོ་ན་སྟོན་
[149a.5]པ་དམ་བཅའ་ཡིན་གྱི་གཞན་ནི་མ་ཡིན་ནོ། །གཞན་ཡང་དམ་བཅའ་དང་གཏན་ཚིགས་དང་དཔེ་དང་ཉེ་བར་སྦྱར་བ་དང་མཇུག་བསྡུ་བ་སྟེ། སྒྲུབ་པར་བྱེད་པའི་ཡན་ལག་རྣམས་ཀྱི་སྐབས་སུ་གྲུབ་པར་བྱེད་པའི་ཡུལ་གང་ཡིན་པ་ཁོ་ན་བསྒྲུབ་པར་བྱ་བའི་ཡན་ལག་ཡིན་ལ། དེ་སྟོན་པ་དམ་བཅའོ་
[149a.6]ཞེས་ཀྱང་དོན་གྱིས་རྟོགས་པའི་ཕྱིར། མ་གྲུབ་པའི་གཏན་ཚིགས་ལ་སོགས་པ་དམ་བཅའ་ཉིད་མ་ཡིན་ནོ་ཞེ་ན། དེ་འདིར་བསྒྲུབ་བྱ་གང་ཡིན་པ་དེ་ནི་ལས་ཡིན་ཏེ་རྣམ་པ་འགའ་ཞིག་གིས་ཐམས་ཅད་མ་གྲུབ་པ་ཉིད་ཀྱི་ཕྱིར་རོ། །གང་བསྒྲུབ་པར་བྱ་བཞིན་པ་དང་གང་བསྒྲུབ་པར་བྱ་བར་འགྱུར་བ་
[149a.7]དེ་ཐམས་ཅད་ནི་ལས་ཡིན་པ་ཁོ་ན་སྟེ། དེའི་ཕྱིར་རེ་ཞིག་དང་པོ་ལན་མ་ཡིན་ནོ། །གང་ཡང་བསྒྲུབ་བྱའི་ཡན་ལག་ཡིན་པ་དེ་སྟོན་པ་དམ་བཅའ་ཞེས་བརྗོད་པ་འདིའང་ཡང་དག་པ་མ་ཡིན་ཏེ། སྔར་མ་གྲུབ་པའི་རང་བཞིན་ཡིན་པའི་ཕྱིར་རོ། །གང་གིས་སྔར་བསྒྲུབ་བྱའམ་སྒྲུབ་པར་བྱེད་པ་གྲུབ་པ་
[149b]
[149b.1]མ་ཡིན་པ་དེས། མཚན་ཉིད་ཀྱི་ཚིག་ལས་དེ་དག་གི་སོ་སོར་དབྱེ་བ་རྟོགས་པར་བྱ་ལ། མཚན་ཉིད་ཀྱི་སྐབས་སུ་བསྒྲུབ་བྱ་དང་སྒྲུབ་བྱེད་ཀྱི་རྣམ་པར་དབྱེ་བ་མ་བཟུང་བས་ནི། མ་གྲུབ་པའི་གཏན་ཚིགས་ལ་སོགས་པའང་དམ་བཅའ་བ་ཉིད་དུ་འཛིན་པར་འགྱུར་རོ་ཞེས་པས། བསྒྲུབ་པར་བྱ་
[149b.2]བའི་ཁྱད་པར་རྟོགས་པ་ག་ལ་ཡིན། གྲུབ་མཐའི་སྐབས་ཀྱང་བསྒྲུབ་པར་བྱ་བའི་ཁྱད་པར་སྒྲུབ་པར་བྱེད་པ་མ་ཡིན་ཏེ། གང་གི་ཕྱིར་གཏན་ཚིགས་ལ་སོགས་པའང་གྲུབ་མཐའ་ཉིད་དུ་མཚུངས་སོ། །དེ་ལྟར་ནི་ཐམས་ཅད་ཀྱི་རྒྱུད་ཀྱི་གྲུབ་མཐའ་ལ་སོགས་པ་རྣམས་ཐམས་ཅད་ཁྱད་པར་དུ་ཁས་
[149b.3]བླངས་པའི་མཚན་ཉིད་ཅན་རྣམས་ཁོ་ནའོ། །གང་གི་ཕྱིར་དཔྱོད་པའི་རྟེན་ཁོ་ནར་ཚད་མ་རྣམས་ཁས་བླངས་པ་ཡིན་ཏེ། དེ་རྣམས་མེད་ན་རྣམ་པར་དཔྱོད་པ་མི་རུང་བའི་ཕྱིར་རོ། །སོ་སོའི་རྒྱུད་ཀྱི་གྲུབ་མཐའ་རུ་ཡང་། དེས་རབ་ཏུ་གྲུབ་པའི་ཚིག་གི་དོན་གང་ཡིན་པ་རྣམས་བྱེ་བྲག་པ་ལ་སོགས་པས་
[149b.4]ཁས་བླངས་པ་ཁོ་ན་སྟེ། གང་ཤི་ནས་བདག་འབྲས་བུ་ལོངས་སྤྱོད་པ་པོ་ཉིད་དུ་འདོད་པ་དེས་ངེས་པར་བདག་ཀྱང་ཡོད་པ་ཉིད་དུ་ཁས་བླངས་པ་ཁོ་ནའོ། །མ་གྲུབ་པའི་གཏན་ཚིགས་ལ་སོགས་པའང་གལ་ཏེ་ཡང་དེའི་ཚེ་ཁས་མ་བླངས་པ་དེ་ལྟ་ནའང་། ཁས་བླང་བྱར་འགྱུར་བ་ལ་དེར་བྱ་བའི་
[149b.5]རྐྱེན་བསྟན་པ་ཁོ་ན་ལས་གྲུབ་མཐའ་ཉིད་དུ་འཐོབ་བོ་ཞེས་པས། ཅིའི་ཕྱིར་གྲུབ་མཐའི་སྐབས་ལས་བསྒྲུབ་པར་བྱ་བའི་ཁྱད་པར་འགྲུབ་པ་ཡིན། ཆོས་བསྒྲུབ་བྱ་ན་ཆོས་མཐུན་མེད། །ཅེས་པ་ཆོས་བསྒྲུབ་པར་བྱ་བ་ཡིན་ན་བསྒྲུབ་པར་བྱ་བ་དང་། ཆོས་མཐུན་པ་ཉིད་ལས་དེའི་ཆོས་རྟགས་
[149b.6]པའི་ཚུལ་ཅན་དཔེ་ཡིན་པར་དཔེར་བརྗོད་དོ་ཞེས་པ་འགལ་ཏེ། དེ་ལྟར་ནི་བསྒྲུབ་པར་བྱ་བའི་ཆོས་མི་རྟག་པ་ཉིད་ཀྱི་སྐྱེ་བ་ཅན་ལ་སོགས་པ་ཆོས་སུ་འགྱུར་བ་མ་ཡིན་གྱི། འོ་ན་ཅི་ཞེ་ན་སྒྲའིའོ། །དེ་ལས་ཀྱང་མི་རྟག་པ་ཉིད་ལ་སོགས་པ་བསྒྲུབ་པར་བྱ་བ་དང་སྐྱེ་བ་ཅན་ཉིད་ལ་སོགས་པ་ཆོས་
[149b.7]མཐུན་པ་ཉིད་ནི་བུམ་པ་ལ་སོགས་པའི་དཔེ་ལ་མེད་དོ་ཞེས་པས། དེ་ནི་བསྒྲུབ་པར་བྱ་བ་དང་ཆོས་མཐུན་པ་ཉིད་ལས་དེའི་ཆོས་རྟོགས་པའི་ཚུལ་ཅན་ཉིད་དུ་འགྱུར་རོ། །ཆོས་ཅན་ཡིན་ན་རྟགས་དོན་མེད། །ཅེས་པ་དཔེར་བརྗོད་པ་དང་ཆོས་མཐུན་པ་ཉིད་ལས་བསྒྲུབ་བྱ་སྒྲུབ་པར་བྱེད་པ་གཏན་
[150a]
[150a.1]ཚིགས་ཡིན་ནོ་ཞེས་པ་མི་རིགས་ཏེ། གང་གིས་དེ་སྒྲུབ་པར་བྱེད་པ་ལས་བསྒྲུབ་བྱ་སྒྲུབ་པར་བྱེད་པའི་གཏན་ཚིགས་སུ་འགྱུར་བ་སྒྲའི་སྒྲ་མ་གྲུབ་པ་མ་ཡིན་ནོ་ཞེས་པས་གཏན་ཚིགས་དོན་མེད་དོ། །ཅི་སྟེ་གཉིས་ཀ་གཙོར་ཡིན་པ་དེའི་ཚེ་གཉིས་ཀ་བསྒྲུབ་པར་བྱ་བ་ཉིད་ལ་འབྱུང་བའི་
[150a.2]སྐྱོན་དེ་མི་ཟློགས་པ་ཁོ་ནའོ་ཞེས་གསུངས་པ་ནི་གཉིས་ཀ་ལྟར་ནའང་སྐྱོན་ཞེས་པའོ། །སྔ་མར་ངེས་གཟུང་ཞེས་པ་ཁོ་ནའི་སྒྲ་ནི་ངེས་པར་འཛིན་པའི་དོན་ཅན་ཉིད་ཀྱི་ཕྱིར་ངེས་པར་གཟུང་བའི་སྒྲས་བརྗོད་དོ། །སྔོན་མར་ངེས་པར་གཟུང་བ་ནི། སྔ་མར་ངེས་གཟུང་སྟེ། དེ་བཞིན་དུ་ཕྱི་མར་ངེས་གཟུང་ལ་
[150a.3]ཡང་སྦྱར་བར་བྱའོ། །སྔ་མར་ངེས་གཟུང་དོན་མེད་དོ། །ཞེས་པ་འདི་ལ་གཏན་ཚིགས་གསུངས་པ། སྒྲུབ་བྱེད་སྟོན་པའི་ཞེས་པ་ལ་སོགས་པའོ། །འདིའི་དོན་འདི་ཡིན་ཏེ། བསྒྲུབ་པར་བྱ་བ་སྟོན་པ་ཁོ་ན་ཞེས་ཡོངས་སུ་པ་ནི། སྒྲུབ་བྱེད་ཀྱི་ཚིག་དམ་བཅའ་མ་ཡིན་ནོ་ཞེས་བརྗོད་པར་འགྱུར་ན།
[150a.4]སྒྲུབ་པར་བྱེད་པའི་ཚིག་དམ་བཅའ་བ་ཉིད་དུ་ཐལ་བ་ཡང་མ་ཡིན་ནོ་ཞེས་པས་སྒྲུབ་བྱེད་ཀྱི་ཚིག་དམ་བཅའ་བ་ཉིད་དུ་དོགས་པ་མ་ཡིན་ནོ་ཞེས་པའོ། །ཅིའི་ཕྱིར་ཞེ་ན། གཏན་ཚིགས་ལ་སོགས་པས་དེ་ལ་ཁྱབ་པ་ཉིད་ཀྱི་ཕྱིར་རོ། །འོ་ན་གང་བསྒྲུབ་པར་བྱ་བའང་མ་ཡིན་ལ་སྒྲུབ་པར་བྱེད་པའང་
[150a.5]མ་ཡིན་པ་དེ་རྣམ་པར་གཅོད་པའི་དོན་ཅན་ཉིད་ཀྱི་ཕྱིར་དོན་མེད་པ་ཉིད་དུ་མི་འགྱུར་རོ་ཞེ་ན་མ་ཡིན་ཏེ། ཤེས་བྱེད་ཀྱི་སྐབས་ཀྱི་ཕྱིར་དེ་ལྟར་གྱུར་པ་སྐབས་མ་ཡིན་པའི་ཕྱིར་དམ་བཅའ་བ་ཉིད་དུ་ཐལ་བ་མ་ཡིན་ནོ་ཞེས་པ་འདི་ནི་བཤད་ཟིན་ཏོ། །ཅི་སྟེ་ཞེས་པ་ལ་སོགས་པ་སྟེ། འདིར་ཚིག་ཕྲད་ནི་
[150a.6]མི་ལྡན་པ་རྣམ་པར་གཅོད་པའི་འབྲས་བུ་ཅན་ཡིན་གྱི་གཞན་དང་ལྡན་པ་རྣམ་པར་གཅད་པ་ནི་མ་ཡིན་ཞེས་པས་མ་གྲུབ་པའི་སྒྲུབ་བྱེད་བརྗོད་པའང་དམ་བཅའ་ཉིད་དུ་ཐལ་བར་འགྱུར་རོ། །དེ་བཞིན་བསྒྲུབ་བྱ་བརྗོད་པ་ལའང་། །ཞེས་པ་རྩོད་པ་བསྒྲུབ་པར་བྱ་བ་བརྗོད་པ་དམ་བཅའི་མཚན་ཉིད་དོ། །
[150a.7]དེ་ལ་བསྒྲུབ་པར་བྱ་བ་སྟོན་པ་དམ་བཅའོ་ཞེས་པ་འདི་ལ་སྐྱོན་གང་བཤད་པ་དེ་འདིས་བསྒྲེས་ཏེ་སྟོན་པར་བྱེད་དོ། །ཕྱོགས་ལྷག་ཕྱིར་ན་སྲིད་མ་ཡིན། །ཞེས་པ། ཇི་སྐད་བཤད་པའི་སྐྱོན་ནོ། །རྣམ་པར་དཔྱད་པ་ལ་འདོད་པའི་དོན་ཕྱོགས་ཡིན་ཞེས་པ་སྐབས་སུ་བབ་པའོ། །དེའི་ཕྱིར་
[150b]
[150b.1]ཕྱོགས་ཁོ་ན་ཡིན་པའི་བསྒྲུབ་པར་བྱ་བ་བརྗོད་པ་དམ་བཅའ་ཉིད་དུ་རྟོགས་པར་བྱའི་ཕྱོགས་མ་ཡིན་པ་མ་གྲུབ་པའི་གཏན་ཚིགས་ལ་སོགས་པ་ནི་མ་ཡིན་ནོ། །དེ་ལ་འང་ཞེས་པ་ཕྱོགས་ཀྱི་མཚན་ཉིད་ལའོ། །དེ་ནི་མི་འདོད་པ་བཟློག་པ་ལ་དཔྱད་ཟིན་པའི་དོན་ཅན་ཞེས་པ་ལ་འདི་གསུངས་ཏེ།
[150b.2]ཕྱོགས་ཀྱི་སྒྲ་ནི་སྤྱི་སྒྲ་ཡིན་པ་ཉིད་ཀྱི་ཕྱིར། རྣམ་པར་དཔྱོད་པ་ན་མི་འདོད་པ་མ་ཡིན་པ་དགག་པས་ཅུང་ཟད་འདོད་པ། ཇི་སྙེད་པ་དེ་ཐམས་ཅད་ཤེས་པར་བྱེད་ལ། དེ་ཁོ་ན་ལ་ཉེ་བར་སྦྱོར་བ་ནུས་པ་སྟེ། ཅི་ལྟར་བསྒྲུབ་པར་བྱ་བའི་བྱེ་བྲག་རྟོགས་པར་བྱེད་ཅེས་པའོ། །འོ་ན་རྣམ་པར་དཔྱོད་
[150b.3]པ་ན་འདོད་པ་ཞེས་པ་ནི་བྱུང་ཟིན་པའི་དོན་གྱི་ཡུལ་ཅན་བརྗོད་པ་མ་ཡིན་ནམ། དེའི་ཚེ་མ་གྲུབ་པའི་གཏན་ཚིགས་ལ་སོགས་པ་རྣམ་པར་དཔྱོད་པ་ན་འདོད་པའང་མ་ཡིན་པས། དེ་ཕྱོགས་ཉིད་མ་ཡིན་ཏེ། དེས་ན་ཅིའི་ཕྱིར་ཐལ་བར་འགྱུར་བ་འདི་ཡིན་ཞེ་ན། འདི་ནི་ལན་མ་ཡིན་ཏེ། དེ་ལྟར་
[150b.4]ནི་དུས་གསུམ་པའི་ཡུལ་ཅན་བྱ་བའི་རྐྱེན་དང་འབྲེལ་པའི་ཕྱིར་ཕྱོགས་ཀྱི་སྒྲ་འདས་པའི་དུས་ཁོ་ན་ལ་འཇུག་པར་འཐོབ་པ་མ་ཡིན་པས་སོ་ཞེས་པ་འདི་ནི་མིང་དུ་བཤད་ཟིན་ཏོ། །དེའི་ཕྱིར་རྣམ་པར་དཔྱོད་པ་ན་འདོད་པར་འགྱུར་བ་ལ་ཡང་ཕྱོགས་ཀྱི་སྒྲ་འཇུག་གོ། །དེ་བྱ་བའི་མཐའ་དང་འབྲེལ་
[150b.5]པའི་ཕྱིར་འདོད་པར་འགྱུར་བ་ལའང་འཇུག་པ་དེ་ཉིད་ཀྱང་སྟོན་པ་གསུངས་པ། ནུས་པ་ཞེས་པ་ལ་སོགས་པའོ། །རིགས་པ་ཅན་རྣམས་ལ་ནི་ཞེས་པ་ལ་སོགས་པ་སྟེ། འདིར་དེའི་དོན་དང་འགལ་བའི་ཕྱིར་ཉེ་བར་བཏགས་པ་ལས་དམ་བཅའ་འགལ་བ་ཞེས་བཤད་དེ། ཐམས་ཅད་མི་རྟག་
[150b.6]པ་ཉིད་ན་ནི། སྒྲ་ཐམས་ཅད་ཀྱི་ནང་དུ་འདུས་པ་ཉིད་ཀྱི་ཕྱིར་རྟག་པ་ཉིད་དུ་འགལ་ལོ། །གཉིས་ཀའང་ཡང་དག་པ་མ་ཡིན་ནོ་ཞེས་པ་འཐད་པ་མ་ཡིན་པའམ་ཡོད་པ་མ་ཡིན་པའོ། །ཅི་ལྟར་ཞེ་ན་གསུངས་པ། དེ་ནི་ཞེས་པ་ལ་སོགས་པའོ། །འདི་སྐད་སྟོན་ཏེ། གལ་ཏེ་སྒྲ་རྟག་པ་ཉིད་
[150b.7]སྒྲུབ་པར་བྱེད་པའི་ཆེད་དུ་ཐམས་ཅད་མི་རྟག་པ་ཉིད་གཏན་ཚིགས་སུ་བརྗོད་པར་གྱུར་ན། དེའི་ཚེ་དེས་སྒྲ་རྟག་པ་ཉིད་བསལ་བས་ན། དམ་བཅའ་བ་གཏན་ཚིགས་དང་འགལ་བར་འགྱུར་ན། འདི་ནི་དེ་ལྟའང་མ་ཡིན་ཏེ། གང་གསུངས་པ། འདི་ནི་ཞེས་པ་ལ་སོགས་པའོ། །ཡང་
[151a]
[151a.1]ཅི་ལྟར་ན་འདི་གཏན་ཚིགས་ཀྱི་སྦྱོར་བ་མ་ཡིན་ཞེ་ན། གང་གི་ཕྱིར་ཐམས་ཅད་མི་རྟག་པ་ཉིད་ལ་ནི། དཔེར་བརྗོད་དང་ཆོས་མཐུན་པ་ཉིད་ལས་བསྒྲུབ་བྱ་སྒྲུབ་པའི་གཏན་ཚིགས་དང་། དེ་བཞིན་དུ་ཆོས་མི་མཐུན་པ་ཉིད་ལས་ཞེས་པ། གཏན་ཚིགས་ཀྱི་མཚན་
[151a.2]ཉིད་འདི་འཐད་པ་མ་ཡིན་ཏེ། དེ་ལྟར་ནི་ཁྱད་པར་སྒྲ་ཁོ་ན་ལ་འགལ་བའི་ཆོས་རྟག་པ་ཉིད་བརྗོད་ནས་ཐམས་ཅད་མི་རྟག་པ་ཉིད་ཕྱིར་ཞེ་ན། ཐམས་ཅད་དུ་སྤྱིར་བསྒྲུབ་པར་བྱ་བའི་མི་རྟག་པ་ཉིད་ནི་སྒྲ་ལ་བརྟེན་པ་མ་ཡིན་ནོ། །གང་གི་ཕྱིར་ཁྱད་པར་སྐབས་སུ་བྱས་པ་ལ། ཕྱིས་སྤྱི་སྒྲུབ་པ་ནི་ཁྱད་
[151a.3]པར་དེ་ལ་ཁྱབ་པ་མ་ཡིན་གྱི། འོན་ཀྱང་སྐབས་སུ་བབ་པའི་ཁྱད་པར་སྤངས་པས་གཞན་ཐམས་ཅད་ལ་འཇུག་སྟེ། དཔེར་ན་ཀུཎ་ཌི་ནའི་བུ་ལ་དར་བ་བྱིན་ལ། བྲམ་ཟེ་རྣམས་ལ་ཞོ་བྱིན་ཞེས་བརྗོད་པ་ན། ཀུཎ་ཌི་ནའི་བུ་ལ་ཞོ་སྦྱིན་པ་མ་ཡིན་གྱི། འོ་ན་ཅི་ཞེ་ན། དེ་ལས་ཐ་དད་པའི་བྲམ་ཟེ་རྣམས་ལའོ། །
[151a.4]དེ་བཞིན་དུ་འདིར་ཡང་ངོ་། །དེའི་ཕྱིར་སྒྲ་ལ་ཐམས་ཅད་མི་རྟག་པ་ཉིད་ཡོད་པ་མ་ཡིན་པའི་ཕྱིར། དེའི་དེ་ནི་དཔེར་བརྗོད་པ་འགའ་ཞིག་དང་ཆོས་མཐུན་པ་ཉིད་དམ་མི་མཐུན་པ་ཉིད་མ་ཡིན་ཞིང་དཔེར་བརྗོད་དང་ཆོས་མཐུན་པ་ཉིད་དང་ཆོས་མི་མཐུན་པ་ཉིད་ལས་ཀྱང་གཏན་ཚིགས་བསྒྲུབ་བྱ་སྒྲུབ་
[151a.5]པར་བྱེད་པར་འདོད་དོ་ཞེས་པས་གཏན་ཚིགས་ཀྱི་མཚན་ཉིད་རིགས་པ་མ་ཡིན་ནོ། །ངེད་ཀྱི་ལུགས་ཀྱིས་ཀྱང་ཕྱོགས་ཆོས་མེད་པ་ཉིད་ཀྱི་ཕྱིར་གཏན་ཚིགས་ཀྱི་མཚན་ཉིད་མི་འཐད་དོ། །འོན་ཀྱང་ཆོས་མི་མཐུན་པ་ཉིད་ཀྱིས་དཔེའི་སྦྱོར་བའོ་ཞེས་པ་ནི་དེའི་མཚན་ཉིད་ཅུང་ཟད་བསྟེན་པའི་ཕྱིར་རོ་ཞེས་པ་
[151a.6]དགོངས་པའོ། །དེ་ལྟར་ནི་ཐམས་ཅད་མ་ཡིན་པའི་སྒྲ་དང་། ཐམས་ཅད་བུམ་པ་ལ་སོགས་པ་ཐམས་ཅད་ཉིད་དུ་ཆོས་མི་མཐུན་པ་ཉིད་ཡོད་ལ། བསྒྲུབ་བྱས་ཆོས་མི་མཐུན་པ་ལས་ཀྱང་ཆོས་མི་མཐུན་པའི་དཔེའོ་ཞེས་འདོད་དོ། །བསྒྲུབ་བྱས་ཆོས་མཐུན་པ་ལས་དེའི་ཆོས་རྟོགས་པའི་དཔེ་ནི་དཔེར་
[151a.7]བརྗོད་དེ། དེ་བཞིན་དུ་ཆོས་མི་མཐུན་པ་ལས་སོ་ཞེས་སྨྲས་པའི་ཕྱིར་རོ། །ཆོས་མི་མཐུན་པ་ཉིད་ཀྱི་དཔེས་ཀྱང་ཁྱེད་བསྒྲུབ་བྱ་དང་གཏན་ཚིགས་ཀྱི་མི་མཐུན་ཕྱོགས་དག་གི་ལྷན་ཅིག་འབྱུང་བ་འཆད་པ་དེ་ཡང་འདིར་ཡོད་པ་ཁོ་ནའོ། །དེ་ལྟར་ནི་སྒྲ་རྟག་ལ། ཐམས་ཅད་མི་རྟག་པ་ཉིད་ཀྱི་ཕྱིར་ཞེས་
[151b]
[151b.1]བརྗོད་པ་ན། རྟག་པ་དང་ཐམས་ཅད་མ་ཡིན་པའི་མི་མཐུན་ཕྱོགས་དག་གི་ལྷན་ཅིག་འབྱུང་བ་རྟོགས་ཏེ། ཐམས་ཅད་ནི་མི་རྟག་པའོ་ཞེས་རྟོགས་པའི་ཕྱིར་རོ། །དེའི་ཕྱིར་འདི་ནི་ཆོས་མི་མཐུན་པ་ཉིད་ཀྱི་དཔེའི་སྦྱོར་བའོ་ཞེས་པ་འདི་ནི་གནས་པའོ། །དེ་ལའང་ཞེས་པ་ལ་སོགས་པས་ཕ་རོལ་པོ་
[151b.2]རྣམས་ཀྱི་ལེགས་པར་མ་བསླབས་པ་ཉིད་སྟོན་ཏེ། ཐམས་ཅད་མི་རྟག་པ་ཉིད་ཀྱི་ཕྱིར་ཞེས་པ་འདིར་མི་རྟག་པའི་སྒྲ་རྟག་པ་མེད་པ་ལ་འཇུག་པ་ནི་གོ་སླ་བའོ་ཞེས་པས་ཐམས་ཅད་ཀྱི་སྒྲ་ཁོ་ན་ཐམས་ཅད་མ་ཡིན་པ་ཉིད་ཀྱི་གཏན་ཚིགས་མེད་པ་ལ་འཇུག་པ་འཆད་དོ། །ཐམས་ཅད་མ་ཡིན་པ་ཉིད་མེད་
[151b.3]པའི་ཕྱིར་རོ་ཞེས་པའི་དོན་ཏོ་ཞེས་པ་འདིས། འདི་སྐད་སྟོན་ཏེ། ཐམས་ཅད་ཀྱི་སྒྲས་འདིར་ཐམས་ཅད་མ་ཡིན་པ་ཉིད་མེད་པ་ཉེ་བར་མཚོན་ཞིང་། ཡུལ་ཐམས་ཅད་ཡུལ་གྱི་ཡུལ་ཅན་ཐམས་ཅད་མ་ཡིན་པ་ཉིད་མེད་པ་ཉེ་བར་མཚོན་པའི་ཕྱིར་རོ་ཞེས་པའོ། །དེ་ལྟ་ན་ནི་བསྒྲུབ་པར་བྱ་བ་མེད་པ་ལ་གཏན་
[151b.4]ཚིགས་མེད་པ་བརྗོད་པ་ན། གཏན་ཚིགས་གོ་བར་བྱེད་པ་ཉིད་དུ་བརྗོད་པར་འགྱུར་གྱི། རྣམ་པ་གཞན་དུ་ནི་མ་ཡིན་ནོ། །ཇི་ལྟར་འདི་འདི་ལྟར་ཡིན་པ་དེ་ལྟར་ཕྱི་ནས་བསྒྲུབ་པར་འགྱུར་རོ། །འོ་ན་འདིར་གཏན་ཚིགས་ཐམས་ཅད་མ་ཡིན་པ་ཉིད་ཐོས་པ་མེད་དེ། དེས་ན་ཅི་ལྟར་དེ་མེད་པ་ལ་
[151b.5]ཐམས་ཅད་ཀྱི་སྒྲ་འཇུག་པ་རྟོགས་པར་བྱ་ཞེ་ན། གསུངས་པ། རྟགས་ནི་ཉེར་སྦྱོར་ལས་འདིར་ཞེས་པ། ཆོས་མི་མཐུན་པ་ཉིད་ཀྱི་ཉེ་བར་སྦྱོར་བས་འདིར་ཐམས་ཅད་མ་ཡིན་པ་ཉིད་ཀྱི་གཏན་ཚིགས་གསལ་བར་བྱས་སོ། །འདི་ལྟ་སྟེ་བུམ་པ་ལ་སོགས་པ་མི་རྟག་པ་ནི་ཐམས་ཅད་ཡིན་ལ།
[151b.6]སྒྲ་ནི་དེ་ལྟར་ཐམས་ཅད་མ་ཡིན་གྱི། འོན་ཀྱང་ཐམས་ཅད་མ་ཡིན་པའོ། །དེའི་ཕྱིར་ཐམས་ཅད་མ་ཡིན་པ་ཉིད་ཀྱི་ཕྱིར་ཞེས་པའོ། །དེ་ཡང་མ་གྲུབ་པ་སྟེ་ཞེས་པ་འདི་ལ་སྒྲ་ནི་ཞེས་པ་ལ་སོགས་པས་འཐད་པ་གསུངས་སོ། །ཐམས་ཅད་ཀྱི་སྒྲ་ནི་རྣམ་པ་གཉིས་ཏེ། འཇིག་རྟེན་ལ་གྲགས་
[151b.7]པ་དང་ཡོངས་སུ་བཤད་པ་ཅན་ནོ། །དེ་ལ་དང་པོ་ནི་མ་ལུས་པའི་དོན་ལ་འཇུག་ལ། ཕྱི་མ་ནི་ཉི་ཚེ་བ་ལ་འཇུག་གོ། །དེ་ལ་རེ་ཞིག་འཇིག་རྟེན་ལ་གྲགས་པའི་དབང་དུ་བྱས་ཏེ་གསུངས་པ། གལ་ཏེ་ཡང་ཞེས་པ་ལ་སོགས་པའོ། །ཅི་ལྟར་མེད་དེ་ཞེས་པ་འདིས་སྒྲ་ལ་ཐམས་ཅད་ཉིད་དང་
[152a]
[152a.1]འགལ་བ་ཐམས་ཅད་མ་ཡིན་པ་ཉིད་ཀྱི་ཆོས་སྨྲས་པས་སྒྲ་ནི་ཐམས་ཅད་ལས་གཞན་ཉིད་དུ་སྨྲས་པ་སྟེ། མ་གྲུབ་པ་ཉིད་ཡོངས་སུ་སྤང་བའི་ཆེད་དུའོ། །དེ་ལྟ་ན་འོ་ན་ཞེས་པ་ལ་སོགས་པས་སེལ་བར་བྱེད་དོ། །འདི་ནི་དགོངས་པ་སྟེ་སྤྱི་རྣམས་ནི་ཁྱད་པར་མི་སྤོང་བའི་ཕྱིར།
[152a.2]སྤྱིའི་སྒྲ་ནི་རང་གི་ཁྱད་པར་མི་གཏོང་གི །འོན་ཀྱང་འཕངས་པ་ཁོ་ནས་འཇུག་གོ། །དཔེར་ན་ཤིང་གི་སྒྲས་ཤིང་ཤ་པ་ལ་སོགས་པའི་ཁྱད་པར་རྣམས་ལྟ་བུའོ། །དེའི་ཕྱིར་ཐམས་ཅད་ཀྱི་སྒྲས་སྒྲའང་འཕེན་ནོ་ཞེས་པས་སྒྲ་ནི་ཐམས་ཅད་ཁོ་ནའོ། །གང་དུའང་ཅི་ཤིང་ཤ་པ་ཁོ་ན་ཤིང་ཡིན་ནམ་འོན་ཏེ་མ་
[152a.3]ཡིན་ཞེས་དྲིས་པ་ལ་ལན་བརྗོད་པ་ཤིང་ཤ་པ་ཤིང་མ་ཡིན་ཞེས་པ་དེ་ལའང་། ཤིང་ཤ་པ་ལ་ཤིང་ཉིད་བཀག་པ་ལས། སྤྱིས་ཁྱད་པར་ཤིང་ཤ་པ་སྤངས་པར་འགྱུར་བ་མ་ཡིན་གྱི། གང་གི་ཕྱིར་ཤིང་ཉིད་ཀྱི་སྤྱི་རྣམ་པ་འདིས་ཤིང་ཤ་པའི་གསལ་བ་གཅིག་ལ་སོ་སོར་ངེས་པར་བཟློག་པའོ། །ཇི་ལྟར་
[152a.4]ཡང་འདི་ལྟ་བུར་སྐབས་འགའ་ཞིག་ཏུ་ཤིང་ཤ་པ་ཤིང་མ་ཡིན་ཞེས་སྤྱི་གསལ་བ་གཅིག་ལ་འཇུག་པའི་ངེས་པ་འགོག་པ་དེ་ལྟར་སྒྲ་ནི་ཐམས་ཅད་དུ་འགྱུར་བ་མ་ཡིན་ནོ་ཞེས་པའི་ཚིག་འདིས་འདི་ནི་འདི་ལྟ་བུ་གཅིག་ལ་འཇུག་པའི་ངེས་པ་འགོག་པ་བྱ་བ་ཡིན་གྱི་ཐམས་ཅད་ཉིད་སྒྲ་ལ་འཇུག་པ་ཟློག་པ་མ་
[152a.5]ཡིན་ཞིང་། འདི་ཙམ་གྱིས་ཐམས་ཅད་ཉིད་སྒྲ་གཅིག་པུ་ལ་འཇུག་པའི་ངེས་པ་བཀག་པ་ཙམ་གྱིས་སྒྲ་ཐམས་ཅད་དུ་མི་འགྱུར་བའང་མ་ཡིན་ནོ། །ཅི་སྟེ་འདི་ལྟ་བུས་དེ་ཐམས་ཅད་མ་ཡིན་པ་ཉིད་དུ་འགྱུར་ན། དེ་ལྟ་ན་འོ་ན་སྒྲའི་བདག་ཉིད་མ་ཡིན་པའི་ཁྱད་པར་རྣམས་ཐམས་ཅད་ཀྱང་སོ་སོར་ཐམས་ཅད་མ་
[152a.6]ཡིན་པ་ཉིད་ན། ཐམས་ཅད་ཡིན་པ་འགའ་ཡང་མེད་པར་འགྱུར་ཞིང་འདོད་པའང་ཡིན་ནོ། །དེའི་ཕྱིར་སྒྲ་ནི་ཐམས་ཅད་ཀྱི་ནང་དུ་འདུས་པའོ་ཞེས་པས། དེ་ལ་ཐམས་ཅད་མ་ཡིན་པ་ཉིད་མ་གྲུབ་བོ། །འོ་ན་ཞེས་པ་ལ་སོགས་པ་སྟེ། དངོས་པོ་ཐམས་ཅད་མི་རྟག་པ་ཉིད་དུ་བརྗོད་པས། དམ་བཅའ་བའི་
[152a.7]རྟག་པ་ཉིད་སེལ་བའི་ཕྱིར་རང་གི་ཚིག་གིས་གནོད་པ་སྨྲས་པའམ། ཡང་ན་ཁས་བླངས་པས་གནོད་པ་སྟེ། དངོས་པོ་ཐམས་ཅད་མི་རྟག་པ་ཉིད་དུ་ཁས་བླངས་པས་སྒྲ་རྟག་པ་ཉིད་སེལ་བའི་ཕྱིར་རོ། །སྒྲ་ལ་གནས་པ་ཉིད་ཀྱིས་ཞེས་པ་ལ་སོགས་པ་སྟེ། ཆོས་ཅན་གཅིག་ལ་ཆོས་འགལ་བ་ཉེ་བར་
[152b]
[152b.1]སྡུད་ན་གནོད་པར་འགྱུར་རོ། །འདིར་ནི་དར་བ་དང་ཀུཎ་ཌི་ནའི་བུའི་རིགས་པས་སྒྲ་ལས་གཞན་ལ་མི་རྟག་པ་ཉིད་བརྗོད་དེ། གང་གསུངས་པ་ཐམས་ཅད་ལ་གནས་པ་བརྗོད་པར་བྱ་བ་ན་ཞེས་པ་སྟེ། སྒྲ་མ་གཏོགས་པའི་ཐམས་ཅད་གང་ཡིན་པ་དེ་ལ་གནས་པ་བརྗོད་པར་བྱ་བ་ཞེས་པ་
[152b.2]དགོངས་པའོ། །དེ་ལྟར་འགྱུར་མོད་གལ་ཏེ་འཇིག་རྟེན་ལ་གྲགས་པའི་ཐམས་ཅད་མངོན་པར་བརྗོད་པར་གྱུར་ན་ཐམས་ཅད་མ་ཡིན་པ་ཉིད་མ་གྲུབ་པར་འགྱུར་ཏེ། ཐམས་ཅད་ཀྱི་ནང་དུ་འདུས་པ་ཉིད་ཀྱི་ཕྱིར་རོ། །གང་གི་ཚེ་ཡོངས་སུ་བཤད་པ་ཅན་ཡིན་པ་དེའི་ཚེ་ཅི་ལྟར་མ་གྲུབ་པ་ཡིན་
[152b.3]ཞེས་དགོངས་པ་བྱས་ནས་ཡོངས་སུ་བཤད་པ་ཅན་གྱི་ཐམས་ཅད་ཀྱི་སྒྲའི་དབང་དུ་བྱས་ཏེ་གསུངས་པ། ཅི་སྟེ་ཞེས་པ་ལ་སོགས་པ་སྟེ། གལ་ཏེ་སྒྲ་ལས་གཞན་པ་རྣམས་ཐམས་ཅད་ཀྱི་སྒྲའི་བརྗོད་པར་བྱ་བ་སྟེ། སྒྲ་གཅིག་པུ་ཁོ་ན་ཐམས་ཅད་མ་ཡིན་ན་དེའི་ཚེ་སྒྲ་དང་ཐམས་ཅད་མ་ཡིན་པ་ཞེས་
[152b.4]པ་འདི་དག་རྣམ་གྲངས་ཀྱི་སྒྲ་སྟེ་རྣམ་གྲངས་ཉིད་ལ་ཡང་སྐྱོན་གང་ཡིན་པ་དེ་སྟོན་པ་གསུངས་པ། དེ་ཡང་ཞེས་པ་ལ་སོགས་པའོ། །དཔེར་ན་ཞེས་པ་ལ་སོགས་པའི་དཔེས་དེ་ཁོ་ན་གསལ་བར་བྱེད་དོ། །འོ་ན་སྒྲ་མངོན་སུམ་ཁོ་ན་ལས་གྲུབ་པ་མ་ཡིན་ནམ། དེས་ན་དེ་ཡང་མ་གྲུབ་ཅེས་བརྗོད་པ་ཅི་
[152b.5]ཞེ་ན། རང་གི་ངོ་བོ་ཁོ་ནར་མ་གྲུབ་པར་བརྗོད་པར་བྱ་བ་ནི་མ་ཡིན་གྱི་འོན་ཀྱང་རང་ཉིད་ནི་བདག་ཉིད་བསྒྲུབ་པར་བྱ་བ་ལ་གཏན་ཚིགས་ཉིད་དུ་སྟེ། བསྒྲུབ་པར་བྱ་བ་ཁོ་ན་སྒྲུབ་པར་བྱེད་པར་འགྱུར་བ་ནི་མ་ཡིན་ཞིང་། སྒྲ་ཡང་བསྒྲུབ་པར་བྱ་བའི་ཆོས་ཅན་ནོ། །དེའི་ཕྱིར་འདི་ནི་བདག་ཉིད་སྒྲུབ་པར་བྱེད་
[152b.6]པ་ལ་ཤེས་པར་བྱེད་པ་ཉིད་དུ་མ་གྲུབ་སྟེ། དེ་ཤེས་པར་བྱ་བ་ཡིན་པ་ཉིད་ཀྱི་ཕྱིར་རོ། །སྒྲ་གཅིག་ཡིན་ལ། དེ་ཡང་བསྒྲུབ་པར་བྱ་བ་ཉིད་དུ་ཉེ་བར་བླངས་ཤིང་། གང་གི་སྒྲུབ་པར་བྱེད་པ་ཉིད་དུ་འགྱུར་བ་སྒྲ་གཞན་ཡོད་པའང་མ་ཡིན་ནོ། །དེས་ན་དེ་རང་གི་ངོ་བོ་གྲུབ་ཀྱང་བདག་ཉིད་ལ་གཏན་ཚིགས་
[152b.7]ཉིད་དུ་མ་གྲུབ་བོ་ཞེས་པ་འདི་འདིར་དོན་ཡིན་ནོ། །དངོས་པོ་ཐམས་ཅད་ལ་ཆོས་ཅན་དང་ཆོས་ཀྱི་རྣམ་པར་དབྱེ་བ་མ་གྲུབ་པའི་ཕྱིར། ཐམས་ཅད་དུ་དམ་བཅའ་བའི་དོན་གྱི་ཕྱོགས་གཅིག་ཉིད་ཀྱིས་མ་གྲུབ་པའི་སྐྱོན་མཚུངས་སོ་ཞེ་ན། མ་ཡིན་ཏེ། ཀུན་རྫོབ་པའི་ལྡོག་པ་ཐ་དད་པ་ལ་བརྟེན་པས་བསྒྲུབ་
[153a]
[153a.1]པར་བྱ་བ་དང་སྒྲུབ་པར་བྱེད་པ་དག་གི་ཁྱད་པར་གྲུབ་པའི་ཕྱིར་རོ། །དེ་ལྟར་ནི་ཐམས་ཅད་ལས་ལོག་པའི་དངོས་པོ་གཅིག་ལ་གང་དང་གང་ལས་ཐ་དད་པ་དེ་ལ་ལྟོས་པས་ཆོས་རྣམས་རྣམ་པར་གཞག་པར་བྱ་བས་སོ། །དོན་དམ་པ་སེམས་པ་ན་ཀུན་རྫོབ་པའི་དངོས་
[153a.2]པོ་རྣམས་ལ། དངོས་པོར་གྱུར་པའི་ཆོས་གཞན་དེ་ཉིད་དང་གཞན་ཉིད་འགོག་པ་འབའ་ཞིག་སྟེ། དེ་དག་དངོས་པོའི་རྟེན་ཅན་ཉིད་ཀྱི་ཕྱིར་རོ། །གང་འདི་རྗེས་སུ་དཔག་པ་དང་རྗེས་སུ་དཔག་པར་བྱ་བའི་ཐ་སྙད་གནས་པ་དེ་ནི། ལྡོག་པ་ལ་བརྟེན་པའི་དབྱེ་བ་རྟོགས་པས་གྲུབ་པ་གང་ཡིན་པ་
[153a.3]དེ་ལ་བརྟེན་ནས་བསྟན་པར་བྱའོ། །དེ་ལྟར་ནི་སྒྲ་ཞེས་བརྗོད་པ་དང་བྱས་པ་ཉིད་ཅེས་བརྗོད་པ་ལ་རྟོགས་པ་ཐ་དད་པ་ཁོ་ནར་འགྱུར་གྱི། དངོས་པོར་ན་ཐ་དད་པའང་མ་ཡིན་ནོ། །དེ་ལྟ་ནའང་ལྡོག་པ་ལ་བརྟེན་པའི་གང་རྟོགས་པ་ཐ་དད་པའི་ཆོས་ཅན་དང་ཆོས་སོ་སོར་སྣང་བ་སྐྱེ་ལ། དེས་བསྟན་
[153a.4]པའི་ཆོས་ཅན་དང་ཆོས་ཐ་དད་པ་ལ་བརྟེན་པས་སྒྲུབ་པར་བྱེད་པའི་ཐ་སྙད་འགལ་བ་མེད་དོ། །དོན་ལ་མི་སླུ་བ་ནི་འབྲེལ་པ་ལས་སོ་ཞེས་བཤད་ཟིན་ཏོ། །འདིར་ནི་སྒྲ་རྟག་སྟེ། ཐམས་ཅད་མ་ཡིན་པ་ཉིད་ཀྱི་ཕྱིར་རོ་ཞེས་པ་ལ་གང་གིས་དམ་བཅའ་བའི་དོན་གྱི་ཕྱོགས་གཅིག་ཏུ་མི་འགྱུར་བ་ལྡོག་
[153a.5]པ་ཐ་དད་པ་ཡང་མེད་དོ། །དེ་ལྟར་ནི་གང་ཞིག་བསྒྲུབ་པར་བྱ་བ་ཉིད་དུ་ཉེ་བར་བཀོད་པ་དེ་བསྒྲུབ་པར་བྱ་བ་ཉིད་དུ་ཉེ་བར་གཞག་པའི་རྣམ་པ་ལས་གཞན་པའི་ངོ་བོར་ཤེས་པ་གཞན་ལ་ཉེ་བར་མི་གནས་པ་སྒྲུབ་པར་བྱེད་པ་ཉིད་དུ་བྱས་པ་སྟེ། སོ་སོར་རྣམ་པར་གཅད་པར་བྱ་བ་མེད་པའི་ཕྱིར།
[153a.6]ཤེས་པ་ལ་གྲུབ་པའི་ཐ་དད་པ་ཡང་ཡོད་པ་མ་ཡིན་ཏེ། དེའི་ཕྱིར་མ་གྲུབ་པ་ཞེས་བཤད་དོ། །དེ་འདི་སྐད་བརྗོད་པར་འགྱུར་རོ། །གང་དམ་བཅའ་བའི་དོན་གྱི་ཕྱོགས་གཅིག་ཡིན་པ་དེ་གཏན་ཚིགས་མ་ཡིན་ཏེ། དཔེར་ན་སྒྲ་མི་རྟག་པ་ཉིད་བསྒྲུབ་པར་བྱ་བ་ལ་མི་རྟག་པ་ཉིད་བཞིན།
[153a.7]སྒྲ་རྟག་པ་ཉིད་བསྒྲུབ་པར་བྱ་བ་ལ་ཐམས་ཅད་མ་ཡིན་པ་ཉིད་ཀྱང་དམ་བཅའ་བའི་དོན་གྱི་ཕྱོགས་གཅིག་ཡིན་ནོ་ཞེས་པས་ཁྱབ་བྱེད་དང་འགལ་བའོ། །འོ་ན་ཡང་ཞེས་པ་ལ་སོགས་པས་མ་ངེས་པར་སྨྲས་ཤིང་། འདིར་ཞེས་པ་ལ་སོགས་པས་ལན་འདེབས་པར་བྱེད་དོ། །ཤེས་པ་ཐ་མི་དད་
[153b]
[153b.1]པའི་ཡུལ་བསྒྲུབ་པར་བྱ་བ་ཉིད་དུ་ཉ་བར་དྲངས་པ་ནི། དམ་བཅའ་བའི་དོན་གྱི་ཕྱོགས་གཅིག་ཡིན་ཏེ། ཁྱད་པར་མེད་པའི་ཕྱིར་རོ། །འདིར་ནི་ཁྱད་པར་བསྒྲུབ་པར་བྱ་བ་ཡིན་ཞིང་། སྤྱི་སྒྲུབ་པར་བྱེད་པའོ་ཞེས་པས་ཁྱད་པར་ཡོད་དོ། །དཔེ་མེད་པར་ཐལ་བར་འགྱུར་བའི་ཕྱིར་རོ་ཞེས་པ་
[153b.2]འདི་ཉིད་ཀྱི་འཐད་པ་སྟེ། དཔེར་ཡོད་པར་གྱུར་པ་ཉིད་ཀྱི་ཕྱིར་འདིར་ཐམས་ཅད་ནི་བསྒྲུབ་པར་བྱ་བ་མ་ཡིན་ནོ། །གྲུབ་པ་དཔེར་འགྱུར་ཞིང་། མ་གྲུབ་པ་ནི་བསྒྲུབ་པར་བྱ་བར་འདོད་ལ། འདིར་ཐམས་ཅད་ཕྱོགས་སུ་བྱས་པ་ནི་མ་ཡིན་ནོ། །མིག་ལ་སོགས་པ་རྣམས་ནི་ཞེས་པ་ལ་
[153b.3]སོགས་པས། ཁྱད་པར་དང་སྤྱིའི་བདག་ཉིད་བསྒྲུབ་པར་བྱ་བ་དང་སྒྲུབ་པར་བྱེད་པ་ཐ་དད་པ་ཉིད་དེ་སྟོན་པར་བྱེད་དོ། །ཅི་སྟེ་ཞེས་པ་ལ་སོགས་པ་སྟེ། སྒྲ་ཉིད་ནི་སྒྲ་གཅིག་པུ་ཁོ་ན་ལ་ཡོད་པའི་ཕྱིར་མཉན་བྱ་ཉིད་དང་འདྲ་བར་ཐུན་མོང་མ་ཡིན་པ་ཉིད་དུ་འགྱུར་གྱི་མ་གྲུབ་པ་ཉིད་མ་ཡིན་ནོ་ཞེས་
[153b.4]པ་ཕ་རོལ་པོའོ། །དམ་བཅའ་བའི་དོན་གྱི་ནི་ཞེས་པ་ལ་སོགས་པ་སྟེ། ཆོས་ཀྱིས་ཁྱད་པར་དུ་བྱས་པའི་ཆོས་ཅན་ནི་དམ་བཅའ་བའི་དོན་ནོ། །དེའི་ཆོས་མཉན་པར་བྱ་བ་ཉིད་ཐུན་མོང་མ་ཡིན་པ་ཉིད་དུ་རིགས་ཏེ། ཆོས་ཅན་དང་ཆོས་ཐ་དད་པའི་ཕྱིར་རོ། །དེ་ལྟར་ནི་སྒྲའི་སྒྲས་ནི་སྒྲ་མ་ཡིན་
[153b.5]པ་རྣམ་པར་གཅོད་པ་བརྗོད་ཅིང་། མཉན་པར་བྱ་བའི་སྒྲས་ནི་རྣ་བའི་དབང་པོའི་ཡུལ་མ་ཡིན་པ་རྣམ་པར་གཅོད་པའི་ཕྱིར་རོ། །སྒྲའི་ཆོས་སུ་མཉན་པར་བྱ་བ་ཉིད་ཡོད་ལ། དེ་ནི་ཐུན་མོང་མ་ཡིན་པར་འགྱུར་རོ། །འདིར་ནི་གཏན་ཚིགས་དང་ཆོས་ཅན་བརྗོད་པའི་སྒྲ་དག་ལ་རྣམ་པར་གཅོད་པ་
[153b.6]ཐ་དད་པ་མེད་དོ་ཞེས་པས་སྒྲ་ལ་སྒྲ་ཉིད་གཞན་ཡོད་པ་མ་ཡིན་ནོ། །བསྒྲུབ་པར་བྱ་བ་དེ་ཁོ་ན་སྒྲུབ་པར་བྱེད་པ་ཉིད་དུ་བརྗོད་དོ་ཞེས་པས་མ་གྲུབ་པ་ཁོ་ནའོ། །རྩོད་པ་བསྒྲུབ་པར་ནི་འདི་ཞེས་པ་ཐམས་ཅད་མི་རྟག་པ་ཉིད་ཀྱི་ཕྱིར་ཞེས་གང་བཤད་པའོ། །དེར་ནི་ཞེས་པ་ལ་སོགས་པ་སྟེ། དེ་ལ་གྲུབ་
[153b.7]པའི་མཐའ་དང་འགལ་བ་ནི། བྱེ་བྲག་པའི་དབང་པོས་གཟུང་བར་བྱ་བ་ཉིད་ཀྱི་ཕྱིར་སྒྲ་མི་རྟག་པའོ་ཞེས་ཏེ། དེས་ནི་དངོས་པོ་དང་ཡོན་ཏན་ལ་སོགས་པ་དབང་པོས་གཟུང་བར་བྱ་བ་རྣམས་རྟག་པ་ཉིད་དུ་ཁས་བླངས་པ་རྣམས་ཀྱི་མི་རྟག་པ་ཉིད་འོངས་པ་ན་གྲུབ་པའི་མཐའ་འགལ་བའོ། །
[154a]
[154a.1]དམ་བཅའ་བའི་དོན་དང་འགལ་བ་ནི་གྲངས་ཅན་པའི་རྒྱུ་ལ་འབྲས་བུ་ཡོད་དེ། ཡང་དག་པར་འབྱུང་བའི་ཕྱིར་རོ་ཞེས་པ་སྟེ། ཡང་དག་པར་འབྱུང་བའི་ཕྱིར་རོ་ཞེས་པ་འདི་དང་ཡོད་པ་ཉིད་དུ་དམ་བཅས་པ་འགལ་བ་སྟེ། ཡོད་པ་ཉིད་ནི་ཡང་དག་པར་འབྱུང་བར་རིགས་
[154a.2]པ་མ་ཡིན་ཏེ། སྐྱེས་བུ་བཞིན་ནོ་ཞེས་པའོ། །འདི་ལ་དེ་དག་སྲིད་པ་ཡང་མ་ཡིན་ནོ་ཞེས་པ། གང་གི་ཕྱིར་དེ་ལ་ནི་ཕྱོགས་ཀྱི་ཆོས་ཁོ་ན་གཏན་ཚིགས་ཉིད་དུ་བརྗོད་ལ། འདི་ནི་ཕྱོགས་ཀྱི་ཆོས་སུ་འགྱུར་པ་མ་ཡིན་པ་ཁོ་ནའོ་ཞེས་པའོ། །བསྟན་པར་བྱ་བའོ་ཞེས་པ་གཏན་ཚིགས་ལྟར་སྣང་བ་
[154a.3]བརྟག་པའི་སྐབས་སུའོ། །ཕྱོགས་ལྟར་སྣང་དང་བཅས་པ་བཤད་ཟིན་ཏོ། །ད་ནི་གང་གི་རྗོད་པར་བྱེད་པ་གཞན་དོན་རྗེས་སུ་དཔག་པ་ཡིན་པ་གཏན་ཚིགས་བཤད་པར་བྱའོ། །འོ་ན་དེའི་མཚན་ཉིད་སྔར་ཁོ་ནར་བཤད་ཟིན་པ་མ་ཡིན་ནམ་ཞེ་ན། བཤད་ཟིན་པ་བདེན་ཏེ། དེ་ལྟ་ནའང་རབ་ཏུ་དབྱེ་
[154a.4]བ་བསྟན་པའི་ཆེད་དུ་གཏན་ཚིགས་ཀྱི་མཚན་ཉིད་ཀྱི་དབང་དུ་བྱེད་དོ། །དེ་ལའང་ཞེས་པ་གཏན་ཚིགས་དེ་ལའོ། །བསྒྲུབ་པར་བྱ་བའི་དེ་མ་ཐག་ཏུ་བཤད་པར་བྱ་བ་ཡིན་པ་ལ་དེ་མ་བཤད་པ་ཁོ་ནར་ཕྱོགས་ཀྱི་རབ་ཏུ་དབྱེ་བ་སྐབས་སུ་མ་བབ་པ་སྔོན་དུ་རབ་ཏུ་སྟོན་པ་ལ་རྒྱུ་གསུངས་པ། གང་ཕྱིར་
[154a.5]བསྒྲུབ་བྱའི་ཆོས་གཏན་ཚིགས་ཞེས་པ་ལ་སོགས་པའོ། །ཕལ་ཆེ་བས་ཞེས་པའི་ཚིག་ནི་མ་གྲུབ་པ་ཕྱོགས་ཆོས་མེད་པའང་གཏན་ཚིགས་ལྟར་སྣང་བ་ཉིད་དུ་ཤེས་པའི་དོན་དུའོ། །འདི་ནི་ཚིགས་སུ་བཅད་པའི་དོན་ཡིན་ཏེ། གང་གི་ཕྱིར་གཏན་ཚིགས་དང་དེར་སྣང་བ་ཕལ་ཆེ་བ་ནི་ཕྱོགས་
[154a.6]ཀྱི་ཆོས་ཁོ་ན་ཡིན་པ་དེའི་ཕྱིར་གཏན་ཚིགས་དང་འགལ་བ་མ་ངས་པ་ཉིད་རྣམས་ལས་སྔོན་དུ་ཕྱོགས་ཀྱི་ཆོས་རྒྱས་པར་བསྟན་པར་བྱའོ་ཞེས་པའོ། །འདི་སྐད་བཤད་པར་འགྱུར་ཏེ། གང་གི་ཕྱིར་ཕྱོགས་ཀྱི་ཆོས་ཉིད་འདི་ནི་མང་པོ་རྣམས་ཀྱི་སྤྱིའི་ཚུལ་ཡིན་པ་དེའི་ཕྱིར་ཕྱོགས་ཀྱི་ཆོས་ཀྱི་རབ་ཏུ་དབྱེ་
[154a.7]བ་ཁོ་ན་གཏན་ཚིགས་ལ་སོགས་པ་ལས་སྔོན་དུ་བསྟན་པར་བྱའོ་ཞེས་པའོ། །དེ་ནི་ཕྱོགས་ཀྱི་ཆོས་རབ་ཏུ་དབྱེ་བ་དེ་བསྟན་པའི་ཆེད་དུ་བདེ་བླག་ཏུ་གཟུང་བའི་དོན་དུ་གཏན་ཚིགས་ཀྱི་སྐབས་ཀྱི་མདོ་བསྡུས་པ་གསུངས་པ། མཐུན་ཕྱོགས་ལ་ཡོད་མེད་ཅེས་པ་ལ་སོགས་པའོ། །འདིར་ཞེས་པ་
[154b]
[154b.1]ཚིགས་སུ་བཅད་པ་འདིར་རོ། །གང་གི་ཕྱིར་ཕྱོགས་ཀྱི་ཆོས་རྣམ་པ་དགུ་བཤད་པ་སྟེ། གང་གི་ཕྱིར་འདི་མང་པོ་རྣམས་ཀྱི་ཐུན་མོང་གི་ཚུལ་ཡིན་པ་དེའི་ཕྱིར་དེ་ཉིད་ཐུན་མོང་ལས་སྔར་བརྟག་པར་བྱ་སྟེ། དེ་ངེས་པར་ཤེས་པ་ན་གཏན་ཚིགས་ལ་སོགས་པའི་མཚན་ཉིད་རྒྱས་པས་བསྟན་པའི་ཆེད་
[154b.2]དང་ཤེས་པའི་ཆེད་དུ་བདེ་བླག་ཏུ་འགྱུར་རོ་ཞེས་པའི་ཕྱིར་དེ་ཕྱིས་ངེས་པར་བསྟན་པར་བྱའོ། །འདིར་ཆོས་ཅན་ཁོ་ནའི་ཆོས་སུ་འགྱུར་གྱི། ཚོགས་པའི་མ་ཡིན་ཞིང་ཆོས་ཀྱི་ཡང་མ་ཡིན་ནོ། །དེའི་ཕྱིར་བསྒྲུབ་བྱ་ཆོས་ཞེས་སྨྲས་པ་ཆོས་ཅན་ཁོ་ན་ཕྱོགས་ཉིད་དུ་དམ་བཅས་ཏེ། བསྒྲུབ་བྱའི་
[154b.3]སྒྲ་ནི་ཕྱོགས་ཀྱི་རྣམ་གྲངས་ཡིན་པ་ཉིད་ཀྱི་ཕྱིར་རོ། །དེ་ཡང་མི་རིགས་སོ་ཞེས་སེམས་པས་སྨྲས་པ། རེ་ཞིག་ཅི་ལྟར་ཞེས་པ་ལ་སོགས་པའོ། །གང་གི་ཕྱིར་ཞེས་པ་ལ་སོགས་པས། གང་ཞིག་བསྒྲུབ་པར་འདོད་པ་མ་ཡིན་པ་དེ་ནི་ཕྱོགས་མ་ཡིན་ཏེ་གཏན་ཚིགས་བཞིན། ཆོས་ཅན་ཡང་དེ་
[154b.4]ལྟ་བུའོ་ཞེས་ཁྱབ་པར་བྱེད་པ་མེད་པ་སྨྲས་སོ། །གྲུབ་ཟིན་པ་ཉིད་ཀྱི་ཕྱིར་ཞེས་པ་འདིས་ནི་མ་གྲུབ་པ་ཉིད་དུ་དོགས་པ་སེལ་བར་བྱེད་དོ། །གང་གྲུབ་ཟིན་པ་དེ་ནི་བསྒྲུབ་པར་འདོད་པ་མ་ཡིན་ཏེ་གཏན་ཚིགས་བཞིན། ཆོས་ཅན་ཡང་དེ་ལྟ་བུའོ་ཞེས་པ་ཁྱབ་བྱེད་དང་འགལ་བའོ། །དེའི་ཕྱིར་དེའི་
[154b.5]ཆོས་ནི་ཕྱོགས་ཆོས་སུ་བསྟན་པར་འོས་པ་མ་ཡིན་ནོ་ཞེ་ན། ཉེས་པ་འདི་མེད་དེ་ཞེས་པ་ལ་སོགས་པའོ། །གདོན་མི་ཟ་བར་དངོས་ཀྱི་སྒྲ་རྣམས་ཁོ་ནས་ཐ་སྙད་བྱེད་པ་མ་ཡིན་གྱི། འོ་ན་ཅི་ཞེ་ན་ཉེ་བར་བཏགས་པ་རྣམས་ཀྱིས་ཀྱང་ངོ་། །དེ་ལ་གལ་ཏེ་ཕྱོགས་དངོས་མ་ཡིན་ནོ་ཞེས་བརྗོད་པ་ཡིན་ན་གྲུབ་
[154b.6]པ་སྒྲུབ་པའོ། །ཅི་སྟེ་ཆོས་ཅན་ནི་ཕྱོགས་ཀྱི་ཕྱོགས་གཅིག་ཡིན་པ་ཉིད་ཀྱི་ཕྱིར་ན་ཉེ་བར་བཏགས་པས་ཀྱང་དེ་ལྟར་བསྟན་པར་འོས་པ་མ་ཡིན་ནོ་ཞེས་བསྒྲུབ་པར་བྱ་ན་དེའི་ཚེ་མ་ངེས་པ་སྟེ། ཚོགས་པའི་ཕྱོགས་གཅིག་ལ་ཚོགས་པ་ཉེ་བར་བཏགས་ནས་བསྟན་པའི་ཕྱིར་ཏེ། རས་ཡུག་གི་ཕྱོགས་
[154b.7]གཅིག་ལ་རས་ཡུག་ཏུ་ཉེ་བར་འདོགས་པ་བཞིན་ནོ། །ཆོས་སྨོས་པ་ནི་ཞར་ལ་བྱུང་བ་སྟེ། བསྒྲུབ་པར་བྱ་བས་གཏན་ཚིགས་ཀྱི་རྗེས་སུ་འགྲོ་བ་ཞེས་པ་འདིར་ཡང་རྩོད་པ་འདི་ཡོངས་སུ་སྤང་བའི་དོན་དུའོ། །དངོས་མིན་ན་ཡང་ཞེས་པ་སྟེ་འདིར་ནི་ཤེས་པར་འདོད་ཅིང་ཕྱིས་ཀྱི་དུས་སུ་གྲུབ་པ་
[155a]
[155a.1]བརྟེན་པའི་ཆོས་ཀྱིས་ཁྱད་པར་དུ་བྱས་པའི་ཆོས་ཅན་བསྒྲུབ་པར་བྱ་བའོ་ཞེས་པས་ཚོགས་པ་བསྒྲུབ་བྱར་བརྗོད་པར་བྱའོ། །རྣམ་པ་དེ་ལྟ་བུའི་ཆོས་ཅན་དེ་ཡང་བསྒྲུབ་པར་བྱ་བ་དངོས་ཁོ་ན་སྟེ། དེ་ལ་བྱས་པ་ཉིད་ལ་སོགས་པའི་ཆོས་མི་སྲིད་པར་འགྱུར་རོ་ཞེས་པས་འདི་ནི་
[155a.2]བརྩད་པར་བྱ་བ་མ་ཡིན་པ་ཁོ་ནའོ། །ཁྱོད་ཀྱིས་ཡོངས་སུ་བརྟགས་པ་ནི་ཚོགས་པ་བསྒྲུབ་པར་བྱ་བར་ཁས་བླངས་ནས་ནི་ཁོ་བོས་འདི་ལན་དུ་བརྗོད་པར་བྱའོ་ཞེས་པ་འདི་ཡང་གི་སྒྲས་གསལ་བར་བྱེད་དོ། །འདི་སྐད་བཤད་པར་གྱུར་ཏོ། །གལ་ཏེ་ཡང་དངོས་མ་ཡིན་པ་དེ་ལྟ་ན་ཡང་སྐྱོན་
[155a.3]མེད་ན་དངོས་ཉིད་ལ་ལྟ་ཅི་ཞིག་ཅེས་པའོ། །ཡང་དངོས་མ་ཡིན་པ་ཉིད་ལ་སྐྱོན་མེད་པ་ཡིན་པ་གང་ལས་དེ་ལ་བསྒྲུབ་པར་བྱ་བ་ཉིད་དུ་ཉེ་བར་གདགས་པར་བྱ་བ་ཅི་ལྟར་ཡིན་ཞེ་ན། ཉེ་བར་འདོགས་པའི་རྒྱུ་གསུངས་པ། །ཕྱོགས་གཅིག་ཕྱིར་ཞེས་པ་སྟེ། དེ་འདིས་ནི། གང་ཞིག་གང་ཕྱོགས་
[155a.4]གཅིག་ཡིན་པ་དེ་ནི་དེས་ཐ་སྙད་བསྟན་པར་འོས་པ་ཡིན་ཏེ། དཔེར་ན་སྣམ་བུའི་ཕྱོགས་གཅིག་ནི་སྣམ་བུར་ཐ་སྙད་བསྟན་པ་བཞིན། ཆོས་ཅན་ཡང་ཕྱོགས་ཀྱི་ཕྱོགས་གཅིག་ཡིན་ནོ་ཞེས་པ་རང་བཞིན་གསུངས་སོ། །དགོས་པ་མེད་པའི་ཕྱིར་ཉེ་བར་གདགས་པར་མི་བྱའོ་ཞེ་ན། མ་ཡིན་ཏེ།
[155a.5]དེའི་ཕྱོགས་གཅིག་ཡིན་པ་ཉིད་ཀྱི་ཕྱིར་ཉེ་བར་གདགས་སུ་རུང་བའི་ཆོས་ཅན་གྱི་ཆོས་རྟོགས་པའི་དོན་ཅན་ཡིན་པ་ཉིད་ཀྱི་ཕྱིར་ཏེ། ཉེ་བར་བཏགས་པ་ནིའོ། །དེ་ལྟ་ན་ཡང་མིག་གིས་གཟུང་བྱ་ཉིད་ལ་སོགས་པ་ཡང་ཡོངས་སུ་སྤངས་པར་འགྱུར་རོ། །འབའ་ཞིག་པ་ནི་ཉེ་བར་བཏགས་པར་འགྱུར་རོ་
[155a.6]ཞེས་པ་འདིར་བསྒྲུབ་པར་བྱ་བ་ཞེས་སྦྲེལ་བར་བྱའོ། །འདིར་ཡང་ཞེས་པ་གཞན་གྱི་དོན་གྱི་རྗེས་སུ་དཔག་པར་རོ། །གཉིས་ལ་གྲུབ་པས་ཞེས་པ་རྒོལ་བ་དང་ཕྱིར་རྒོལ་བ་དག་ལ་ཕྱོགས་ཀྱི་ཆོས་ཉིད་དུ་ངེས་པར་གྱུར་པ་གང་ཡིན་པ་དེས་ཐ་སྙད་ཡིན་ནོ། །ཅིའི་ཕྱིར་ཞེ་ན། འདི་ཤེས་པར་བྱེད་
[155a.7]པའི་གཏན་ཚིགས་ཀྱི་དབང་དུ་བྱས་པའི་ཕྱིར་རོ་ཞེས་བཤད་ཟིན་ཏེ། །དེའི་ཕྱིར་དོན་གྱིས་གོ་བས། གཉིས་ལ་བཟློག་པ་ན་སྟེ། མ་ངེས་པ་ན་ཞེས་པའི་ཐ་ཚིག་གོ། །གཅིག་ལ་ཡང་བཟློག་པ་ན་དང་གཉིས་ལའམ་གཅིག་ལ་ཐེ་ཚོམ་ཟ་ན་དང་། གཞི་མ་གྲུབ་ནའང་འདོད་མ་ཡིན། །
[155b]
[155b.1]གཏན་ཚིགས་སུ་ཞེས་པའོ། །དེས་ན་དེ་བསལ་བའི་དོན་དུ་རྩོལ་མ་ཐག་པ་གཞག་པར་བྱའོ། །གལ་ཏེ་རྣམ་པ་འདི་ལྟ་བུ་སྒྲུབ་པར་བྱེད་པ་མ་ཡིན་ན། འོ་ན་སུན་འབྱིན་པར་འགྱུར་རོ་ཞེ་ན། གསུངས་པ། མི་འདོད་ཕྱིར་ཀུན་སུན་འབྱིན་མིན། །ཞེས་པའོ། །ཇི་ལྟར་གཉིས་ཀ་ལ་གྲུབ་པས་
[155b.2]བསྒྲུབ་པར་བྱ་བ་ངེས་པར་འགྱུར་གྱི་རྣམ་པ་གཞན་དུ་མ་ཡིན་པ་དེ་ལྟར་གཉིས་ཀ་ལ་གྲུབ་པ་ཁོ་ནས་སྐྱོན་ཅན་ཉིད་དུ་ངེས་པར་བྱེད་ཀྱི་རྣམ་པ་གཞན་དུ་མི་འདོད་པ་ཙམ་གྱིས་ནི་མ་ཡིན་ནོ། །འོ་ན་འདིས་སུན་དབྱུང་བར་བྱ་བའོ་ཞེས་པས་ན་སུན་འབྱིན་ཏེ་སྐྱོན་རྗོད་པར་བྱེད་པའི་ཚིག་མ་ཡིན་ནམ། ཅི་ལྟར་ན་དོན་
[155b.3]སུན་འབྱིན་པའོ་ཞེས་བརྗོད་ཅེ་ན། ཡུལ་དང་ཡུལ་ཅན་ཐ་མི་དད་པ་ཉེ་བར་བཏགས་པ་ལས་སམ། སུན་འབྱིན་གྱི་སྒྲ་ལས་སྒྲུབ་པ་ཡིན་པ་ཉིད་ཀྱི་ཕྱིར་དེ་སྐད་བཤད་དོ་ཞེས་པས་སྐྱོན་མེད་དོ། །ཡང་འདི་སུན་འབྱིན་པ་མ་ཡིན་པ་ཅི་ཡིན་ཞེ་ན་གསུངས་པ། འདི་ལྟ་སྟེ་ཞེས་པ་ལ་སོགས་པའོ། །འོ་ན་
[155b.4]ཅི་འདྲ་བ་ཞིག་སྒྲུབ་པར་བྱེད་པ་དང་སུན་འབྱིན་པར་བྱེད་པ་ཡིན་ཞེ་ན། གསུངས་པ། གཉི་ག་ལ་ཡང་རབ་གྲུབ་པ། ཞེས་པ་ལ་སོགས་པའོ། །གང་ཞིག་གཉི་ག་ལ་ཡང་ཕྱོགས་ཀྱི་ཆོས་མ་ཡིན་པ་ཞེས་པར་གྲུབ་པ་དེ་ནི་སུན་འབྱིན་པ་ཁོ་ན་སྟེ། དཔེར་ན་མིག་གིས་གཟུང་བར་བྱ་བ་ཉིད་ལྟ་བུའོ། །
[155b.5]སྒྲུབ་པར་བྱེད་པ་ནི་གཉིས་ཀ་ལ་ཕྱོགས་ཀྱི་ཆོས་ཉིད་དུ་རབ་ཏུ་གྲུབ་པ་སྟེ། དཔེར་ན་རྐྱེན་གྱི་བྱེ་བྲག་གིས་ཐ་དད་པ་ཉིད་ལྟ་བུ་སྟེ་བྱས་པ་ཉིད་ལ་སོགས་པ་བསྒྲུབ་པར་བྱ་བ་ནའོ། །འོ་ན་རྐྱེན་ནི་རྒྱུ་ཡིན་ན་སྒྲ་ལ་ནི་རྒྱུ་ཅི་ཡང་མེད་དེ། དེ་རྟག་པ་ཉིད་དུ་རྒོལ་བས་ཁས་ལེན་པས་སོ། །དེས་ན་ཅི་ཞིག་ལས་
[155b.6]རྐྱེན་གྱི་བྱེ་བྲག་གིས་ཐ་དད་པ་ཉིད་ཡིན་ཞེ་ན། འོ་ན་དེ་རྐན་ལ་སོགས་པའི་གཡོ་བ་ཡོད་པ་ཁོ་ན་ལ་དམིགས་པ་ཅི་ལྟར་ཡིན། གལ་ཏེ་རྐན་ལ་སོགས་པ་རྣམས་དེའི་རྒྱུ་མ་ཡིན་གྱི། དེ་རྐན་ལ་སོགས་པ་རྣམས་ཀྱིས་གསལ་བར་བྱེད་དེ། དེས་ན་དེའི་བྱ་བ་ཡོད་པ་ཁོ་ན་ལ་དེ་དམིགས་པའོ་ཞེ་ན། མ་ཡིན་
[155b.7]ཏེ་རྟག་པ་རྣམས་ལ་མངོན་པར་གསལ་བ་མི་རུང་བའི་ཕྱིར་ཏེ་སྔར་ཇི་སྐད་བཤད་པ་བཞིན་ནོ། །རྐན་ལ་སོགས་པའི་བྱེད་པས་སྒྲིབ་པ་སེལ་བར་བྱེད་དོ། །དེའི་ཕྱིར་དེའི་དེ་མ་ཐག་ཏུ་ཉེ་བར་དམིགས་པ་ཡིན་ནོ་ཞེ་ན། མ་ཡིན་ཏེ། དེའི་བདག་ཉིད་ཉམས་པ་མེད་པ་ལས་ན་འགའ་ཞིག་གི་ཡང་སྒྲིབ་པ་ཉིད་མི་སྲིད་
[156a]
[156a.1]པའི་ཕྱིར་རོ། །རང་གི་ཡུལ་ལ་ཤེས་པ་སྐྱེད་པར་བྱེད་པའི་ཕྱིར། དེ་ལ་རྐན་ལ་སོགས་པའི་གཡོ་བ་ལྷན་ཅིག་བྱེད་པའོ་ཞེ་ན། མ་ཡིན་ཏེ་ཕན་འདོགས་པ་མ་ཡིན་པ་རྣམས་ལྷན་ཅིག་བྱེད་པ་ཉིད་དུ་མི་འཐད་པའི་ཕྱིར་རོ། །མཐའི་གནས་སྐབས་ན་ནི་གང་ས་བོན་ལ་སོགས་
[156a.2]པ་ཕན་ཚུན་ཕན་འདོགས་པ་ལ་མི་ལྟོས་པ་རྣམས་ལྷན་ཅིག་བྱེད་པ་ཡིན་ཏེ། དེ་ནི་ཁྱད་པར་སྐྱེད་པར་བྱེད་པ་མ་ཡིན་གྱི་འོ་ན་ཅི་ཞེ་ན། འབྲས་བུ་གཅིག་བྱེད་པ་ཁོ་ན་ཡིན་ན། འདི་ནི་སྒྲ་ལ་སྲིད་པ་ཡང་མ་ཡིན་ཏེ། དེ་ནི་གལ་ཏེ་ནུས་པ་ཡིན་ན། འབའ་ཞིག་པས་ཀྱང་བྱེད་པར་འགྱུར་ཞིང་། གལ་ཏེ་མི་
[156a.3]ནུས་པ་ཡིན་ན་ལྷན་ཅིག་པ་ཡང་བྱེད་པ་མ་ཡིན་ནོ་ཞེས་པས་འདི་ནི་ཐེ་ཚོམ་མེད་དོ། །ཕན་འདོགས་པ་འགའ་ཞིག་བྱེད་པ་ཁོ་ནའོ་ཞེ་ན། དེ་ཅི་དེ་ལས་དོན་གཞན་ནམ་འོན་ཏེ་ཅིག་ཤོས་ཡིན། དོན་གཞན་ཉིད་ན་སྒྲའི་ཕན་པ་ཞེས་པའི་འབྲེལ་པ་ཅི་ཞིག་ཡིན། དོན་གཞན་མ་ཡིན་པ་ཉིད་ན་དེ་ཁོ་ན་བྱེད་
[156a.4]པའོ་ཞེས་པས་རྐྱེན་གྱི་བྱེ་བྲག་གིས་ཐ་དད་པ་ཉིད་གྲུབ་བོ། །འོ་ན་ཕྱོགས་ཀྱི་ཆོས་ཁོ་ན་གཏན་ཚིགས་ཉིད་ཡིན་ན་ཆོས་ཅན་གྱིས་ཆོས་ཅན་དང་ཆོས་སམ་ཆོས་ཅན་གྱིས་སམ་ཆོས་ཀྱིས་ཆོས་ཅན་རྗེས་སུ་དཔག་པར་འགྱུར་བ་མ་ཡིན་ནོ་ཞེས་པས་མཚན་ཉིད་མ་ཁྱབ་པ་ཅན་ནོ་ཞེ་ན་གསུངས་པ། ཕྱོགས་ཆོས་
[156a.5]ཀྱི་སྒྲུབ་པར་བྱེད་པ་ཉིད་ན་ཞེས་པ་སྟེ། ཕྱོགས་ཆོས་ཁོ་ན་གཏན་ཚིགས་སོ་ཞེས་འདིར་ཁས་བླངས་པར་གྱུར་ན་ཞེས་པའི་དོན་ཏོ། །ཆོས་ཅན་ཆོས་ཅན་གྱིས་བསྒྲུབ་མིན། །ཆོས་ནི་ཆོས་ཅན་གྱིས་བསྒྲུབ་བྱ་མ་ཡིན་ནོ་ཞེས་པ་དང་། དེས་ཏེ་ཆོས་ཀྱིས་ཆོས་ཅན་ཡང་བསྒྲུབ་བྱ་མ་ཡིན་ནོ། །རེ་ཞིག་གང་
[156a.6]རྣམས་རྗོད་པར་བྱེད་པ་ཞེས་པ་ལ། དེ་རྣམས་ནི་འདི་ལྟར་སེམས་པར་བྱེད་དོ། །ཚོགས་པའི་དོན་བསྒྲུབ་པར་བྱ་བ་ཉིད་ན། དེའི་ཕྱོགས་གཅིག་པའི་ཆོས་ནི་ཕྱོགས་ཆོས་སོ་ཞེས་པས་ཕྱོགས་ཆོས་གཏན་ཚིགས་སུ་འགྱུར་མོད་ཀྱི། གང་གི་ཚེ་ཆོས་ཅན་མེ་ཁོ་ན་བསྒྲུབ་བྱ་ཡིན་ཞིང་ཚོགས་པ་ནི་མ་
[156a.7]ཡིན་ལ། དེ་ཡང་ཆོས་ཅན་གཞན་དུ་བས་ཡིན་ཏེ། དེའི་ཚེ་ཅི་ལྟར་ཕྱོགས་ཆོས་གཏན་ཚིགས་སུ་འགྱུར་ཞེས་པར་རོ། །འདི་ལའོ་ཞེས་བརྗོད་པར་བྱའོ་ཞེས་པས། མེ་ཡོད་པ་ཉིད་བསྒྲུབ་པར་བྱ་བ་མ་ཡིན་པ་ཉིད་ལ་འཐད་པ་གཞན་འདིའོ། །འདི་ལའི་སྒྲ་དང་དུ་བ་མངོན་པར་འབྲེལ་བར་འགྱུར་
[156b]
[156b.1]རམ། འོན་ཏེ་ཡུལ་ཕྱོགས་སམ་མེར་འགྱུར། དེ་ལ་གལ་ཏེ་དུ་བ་འབྲེལ་ན་དམ་བཅའ་བའི་དོན་གྱི་ཕྱོགས་གཅིག་ཉིད་དུ་འགྱུར་ཏེ་སྔར་བཞིན་ནོ། །དེ་ལྟར་འགྱུར་མོད་ཀྱི་མེ་ཁོ་ན་འདི་ལ་ཞེས་ངེས་པར་བསྟན་པར་བྱ་བའོ་ཞེ་ན། གསུངས་པ་མེ་ལ་ཞེས་པ་ལ་སོགས་པ་སྟེ། ཡང་གི་སྒྲ་ནི་མེ་
[156b.2]དེ་ཁོ་ན་བདག་ཉིད་ཀྱི་རྟེན་དུ་རིགས་པའང་མ་ཡིན་ནོ་ཞེས་པའི་སྐྱོན་བསྡུ་བའི་དོན་དུའོ། །ཡང་ཅིའི་ཕྱིར་མེ་ལ་མཐོང་བ་རིགས་པ་མ་ཡིན་ཞེ་ན་གསུངས་པ། རྗེས་སུ་དཔག་པ་མེད་པར་ཐལ་བར་འགྱུར་བའི་ཕྱིར་རོ་ཞེས་པ་སྟེ། མངོན་སུམ་མ་ཡིན་པའི་མེ་ལ་དུ་བ་མཐོང་བ་ནི་སྲིད་པ་མ་ཡིན་པས་
[156b.3]སོ། །དེའི་ཕྱིར་རྟགས་འཛིན་པའི་དུས་ཁོ་ན་ན་མེ་རྟོགས་པ་ཉིད་ཀྱི་ཕྱིར་རྗེས་སུ་དཔག་པ་མེད་པར་འགྱུར་རོ། །དེའི་ཕྱིར་ཞེས་པ་ལ་སོགས་པ་སྟེ། རྣམ་པ་གཞན་མེད་པའི་ཕྱིར་འདི་ལ་ཞེས་པ་ནི་ཡུལ་ཕྱོགས་ལ་ཡིན་པར་གདོན་མི་ཟ་བར་ཁས་བླང་བར་བྱའོ། །དེ་ཡང་དེ་དག་གིས་ཆོས་
[156b.4]ཅན་ཁོ་ནའོ་ཞེས་པ། མེ་དང་དུ་བ་དག་ཡུལ་ཕྱོགས་ཀྱི་ངོར་ཆོས་ཉིད་དུ་གསུངས་སོ། །དེ་ལས་ཀྱང་མེས་ཁྱད་པར་དུ་བྱས་པར་ས་ཕྱོགས་དེའི་ཆོས་དུ་བས་བསྒྲུབ་པར་བྱའོ་ཞེས་པས་ཕྱོགས་ཆོས་མེད་པའི་གཏན་ཚིགས་ཉིད་མེད་དོ། །འོ་ན་དེ་ལྟ་ན་ཡང་དུ་བ་ནི་འཕྱུར་བ་དང་སྐྱ་ལོ་ཉིད་
[156b.5]ལ་སོགས་པའི་ཡོན་ཏན་རྣམས་ཀྱིས་ཡོན་ཏན་ཅན་ཉིད་ཀྱི་ཕྱིར་ཆོས་ཅན་ཁོ་ན་སྟེ། དེ་བཞིན་དུ་མེ་ཡང་དྲོ་བ་ཉིད་དང་སྲེག་པར་བྱེད་པ་ཉིད་ལ་སོགས་པའི་ཡོན་ཏན་རྣམས་ཀྱིས་སོ་ཞེས་ཅི་ལྟར་དེ་དག་ཆོས་ཡིན་ཞེ་ན། དེའི་ཕྱིར་གསུངས་པ། འདིར་ཞེས་པ་ལ་སོགས་པའོ། །བསྒྲུབ་པར་
[156b.6]བྱ་བ་དང་སྒྲུབ་པར་བྱེད་པའི་ཐ་སྙད་ལ་ཡོན་ཏན་དང་ཡོན་ཏན་ཅན་ཉིད་ཀྱིས་ཆོས་དང་ཆོས་ཅན་ཉིད་དུ་མངོན་པར་དགོངས་པ་ནི་མ་ཡིན་ནོ། །འོ་ན་ཅི་ཞེ་ན། བསྒྲུབ་པའི་བྱ་བ་ཉིད་ལ་ལྟོས་པས་ཏེ། གང་ཞིག་དོན་གང་གིས་ཁྱད་པར་དུ་བྱས་པར་གང་ཞིག་གིས་བསྒྲུབ་པར་བྱ་བ་དེ་ནི་ཆོས་
[156b.7]ཅན་ཡིན་ཏེ། ཕན་གདགས་པར་བྱ་བ་ཉིད་ཀྱི་ཕྱིར་དང་། ཅིག་ཤོས་དག་ནི་ཕན་འདོགས་པ་པོ་ཉིད་ཀྱི་ཕྱིར་ཆོས་ཡིན་པ་ཉིད་དོ་ཞེས་པས་མེ་དང་དུ་བ་དག་ཆོས་ཡིན་པར་འགྱུར་བ་ཁོ་ནའོ། །དེ་ལ་གང་རྣམས་མེས་རེག་བྱ། །ཞེས་པ་འདི་ནི་དྲོ་བའི་རེག་པ་ཡོད་དོ། །མེའི་ཕྱིར་རོ་ཞེས་
[157a]
[157a.1]པ་འདི་ལ། རེག་པ་ཙམ་བསྒྲུབ་པར་བྱ་བ་ཡིན་ཞིང་རེག་པ་ཡང་ཆོས་ཡིན་ཏེ། ལུས་དང་ལྡན་པའི་ཡོན་ཏན་ཡིན་པ་ཉིད་ཀྱི་ཕྱིར་རོ། །སྔ་མ་བཞིན་དུ་ཞེས་པ་ནི། འདིར་ཞེས་པ་གལ་ཏེ་མེ་དང་སྦྲེལ་བ་ཡིན་ན་དམ་བཅའ་བའི་དོན་གྱི་ཕྱོགས་གཅིག་གཏན་ཚིགས་སུ་
[157a.2]འགྱུར་རོ། །རྗེས་སུ་དཔག་པར་བྱ་བ་རེག་པ་ལ་མེ་མཐོང་བ་རིགས་པ་ཡང་མ་ཡིན་ཏེ་རྗེས་སུ་དཔག་པ་མེད་པར་ཐལ་བའི་ཕྱིར་རོ། །དེའི་ཕྱིར་གདོན་མི་ཟ་བར་འདིར་ཞེས་པ་ལ་སོགས་པ་བརྗོད་པར་བྱའོ། །རེ་ཞིག་ཐམས་ཅད་ལ་ཞེས་པ་ལ་སོགས་པ་སྟེ། གནས་མལ་ཁང་ལ་སོགས་
[157a.3]པར་གང་དུ་བ་ཅན་དེར་མེ་དམིགས་པ་མ་ཡིན་ནོ་ཞེས་པས་ཡུལ་ཕྱོགས་བསྒྲུབ་པར་བྱ་བ་ཉིད་དུ་རིགས་ཤིང་། དྲོ་བའི་རེག་པ་དང་བྲལ་བའི་མེ་ནི་ནམ་ཡང་དམིགས་པ་མ་ཡིན་ཏེ། དེས་ན་ཇི་ལྟར་དུ་བ་འདི་ནི་མེ་དང་ལྡན་པ་སྟེ་དེ་ལས་གཞན་པའི་དུ་བ་བཞིན་ནོ་ཞེས་པ་འཁྲུལ་པ་ཡིན་པ་དེ་ལྟར་མེ་
[157a.4]འདི་ནི་དྲོ་བའི་རེག་པ་ཅན་ཏེ། མེ་ཉིད་ཀྱི་ཕྱིར་དེ་ལས་གཞན་པའི་མེ་བཞིན་ནོ་ཞེས་པ་འཁྲུལ་པ་ཡོད་པ་མ་ཡིན་ནོ། །དེའི་ཕྱིར་མེའི་ཁྱད་པར་ལ་རེག་བྱའི་ཁྱད་པར་བསྒྲུབ་པར་བྱ་བ་ཉིད་ཀྱི་ཕྱིར་ཡུལ་ཕྱོགས་བརྟགས་པ་དོན་མེད་དོ། །ད་ལྟར་འགྱུར་མོད་ཀྱི་བསྒྲུབ་པར་བྱ་བ་དང་སྒྲུབ་པར་བྱེད་པ་དག་
[157a.5]ཐ་མི་དད་པའི་ཕྱིར་ན་དམ་བཅའ་བའི་དོན་གྱི་ཕྱོགས་གཅིག་གཏན་ཚིགས་སུ་འགྱུར་རོ་ཞེ་ན་སྨྲས་པ། མ་ཡིན་ཞེས་པ་ལ་སོགས་པའོ། །མེའི་ཁྱད་པར་བསྒྲུབ་པར་བྱ་བ་ཉིད་ན་ཡང་ཞེས་པ། གལ་ཏེའང་མེའི་ཁྱད་པར་བསྒྲུབ་པར་བྱ་བ་ཡིན་པ་དེ་ལྟ་ན་ཡང་ཡུལ་ཕྱོགས་བསྒྲུབ་པར་བྱ་བ་ཉིད་
[157a.6]དུ་གདོན་མི་ཟ་བར་ཁས་བླང་བར་བྱ་སྟེ། གང་གི་ཕྱིར་ཡུལ་ཕྱོགས་ཀྱི་ཁྱད་པར་ཁོ་ན་ལས་མེའི་ཁྱད་པར་དུ་འགྱུར་གྱི་རྣམ་པ་གཞན་དུ་མ་ཡིན་པ་དེར་གདོན་མི་ཟ་བར་ས་ཕྱོགས་འདི་མེའོ་ཞེས་ཕྱོགས་སུ་བྱས་ལ། དེ་ལས་ཀྱང་ཡུལ་ཕྱོགས་སུ་དེ་ཁོ་ན་དྲོ་བའི་རེག་པ་ཉིད་ཀྱིས་བསྒྲུབ་པར་བྱའོ། །
[157a.7]དེ་ལ་ཡུལ་ཕྱོགས་ཀྱི་ཁྱད་པར་ལ་སྡང་བ་དང་མེའི་ཁྱད་པར་ལ་རྗེས་སུ་ཆགས་པ་འདི་ཅི་ཞིག་ཆོས་ཅན་ཡང་དེས་ཞེས་པ་ཆོས་ཀྱིས་སོ། །འདིར་ཕ་རོལ་པོའི་བསམ་པ་ནི་འདི་ཡིན་ཏེ། གཙོ་བོ་ནི་ཆོས་ཅན་ཏེ། ཡོངས་སུ་འགྱུར་བ་ལ་སོགས་པའི་ཆོས་དང་ལྡན་པའི་ཕྱིར་རོ། །དེ་ཡང་འདིར། ཁྱད་
[157b]
[157b.1]པར་རྣམས་ལ་རྗེས་སུ་འགྲོ་བའི་ཆོས་ཀྱི་རང་གི་ངོ་བོས་བསྒྲུབ་པར་བྱ་སྟེ། ཆོས་གཞན་བརྗོད་པ་ནི་མ་ཡིན་ནོ། །མ་གྲུབ་པ་ནི་གྲུབ་པའི་ཆོས་ཡིན་པ་སྲིད་པ་མ་ཡིན་ཏེ། དེས་ན་ཕྱོགས་ཆོས་ཉིད་གཏན་ཚིགས་སོ་ཞེས་པ་འདི་མི་རིགས་སོ་ཞེས་པའོ། །དེར་ནི་ཁྱད་པར་རྣམས་ཁོ་ན་ཞེས་པ་ལ་སོགས་
[157b.2]པ་སྟེ། ཁྱད་པར་རྣམས་ནི་ནང་དང་ཕྱིའི་རྣམ་འགྱུར་རྣམས་ཏེ། དེ་རྣམས་རྒྱུ་གཅིག་པ་ཉིད་དུ་བསྒྲུབ་པར་བྱའོ། །ཅིའི་ཕྱིར་འདི་ཡིན་ཞེ་ན། གསུངས་པ། དེ་ལྟར་ནི་ཞེས་པ་ལ་སོགས་པའོ། །འདི་སྐད་བཤད་དེ། སྤྱི་སྔོན་མ་ཅན་གྱི་ཁྱད་པར་རྣམས་ནི་འཇིག་རྟེན་ན་རིགས་གཅིག་རྗེས་སུ་
[157b.3]འགྲོ་བ་ཅན་དུ་མཐོང་སྟེ། འདི་ལྟ་སྟེ། གྱོ་མོ་དང་གསེར་གྱི་རྒྱན་ལ་སོགས་པ་བཞིན་ཞེས་པ། འདི་ལྟར་དཔེར་བརྗོད་པར་བྱ་བ་ན་ཡང་ཉེ་བར་སྦྱོར་བ་དང་མཇུག་སྡུད་དག་གིས་བསྒྲུབ་པར་བྱ་བ་དང་སྒྲུབ་པར་བྱེད་པ་གསལ་བར་འགྱུར་རོ། །དེ་ལྟར་ཡང་ནང་གི་བདག་ཉིད་ཀྱི་ཁྱད་པར་རྣམས་ལ་
[157b.4]རིགས་གཅིག་རྗེས་སུ་འགྲོ་བ་དེའི་ཕྱིར་དེ་རྣམས་སྤྱི་སྔོན་མ་ཅན་རྣམས་སོ་ཞེས་སམ། རྒྱུ་གཅིག་པ་རྣམས་སོ་ཞེས་པའི་དོན་ཏོ། །དེ་ལྟར་རིགས་གཅིག་རྗེས་སུ་འགྲོ་བའི་གཏན་ཚིགས་ཀྱིས་ཁྱད་པར་རྣམས་རྒྱུ་གཅིག་པ་ཉིད་དུ་བསྒྲུབ་པར་བྱའོ་ཞེས་རྟོགས་པར་བྱའོ། །ཁྱད་པར་རྣམས་རྒྱུ་གཅིག་པ་
[157b.5]ཅན་ཉིད་དུ་གྲུབ་པ་ནི། གང་རྒྱུ་གཅིག་པ་དེ་ཁོ་ན་གཙོ་བོའོ་ཞེས་སེམས་པས་སྨྲས་པས། གཙོ་བོ་ཡོད་དོ་ཞེས་པའོ། །དེ་ལྟར་འདིར་ཡང་གཏན་ཚིགས་ཕྱོགས་ཆོས་མེད་པ་ཉིད་མ་ཡིན་ནོ། །དེའི་ཕྱིར་ཞེས་པ་ལ་སོགས་པ་སྟེ། གང་གི་ཕྱིར་དེ་ལྟར་ཆོས་དང་ཆོས་ཅན་དག་གི་བསྒྲུབ་པར་བྱ་བའི་དངོས་
[157b.6]པོ་སྲིད་པ་མ་ཡིན་པ་དེའི་ཕྱིར། བསྒྲུབ་བྱའི་ཆོས་ལ་གཞན་ཉིད་ཀྱི་ཕྱིར། ཆོས་གཞན་གཏན་ཚིགས་ཞེས་བྱ་བ་བྱས་པ་ཉིད་ལ་སོགས་པ། བསྒྲུབ་བྱའི་ཆོས་མི་རྟག་པ་ཉིད་ལ་སོགས་པ་དང་མེད་ན་མི་འབྱུང་བ་ཉིད་དུ་བསྒྲུབ་པར་བྱ་བར་རྟོགས་པར་བྱའོ་ཞེས་པའི་དོན་ཏོ། །ཡང་ཆོས་ཀྱིས་ཆོས་ནི་
[157b.7]བསྒྲུབ་པར་བྱ་བའོ་ཞེས་པ་ཅི་ལྟར་ཞེ་ན། འདི་ཙམ་གྱིས་ཁྱད་པར་འདི་རྣམས་ཐོབ་པར་འགྱུར་ཏེ། བརྗོད་པར་འདོད་པའི་དབང་ལས་སོ། །ནུས་པ་ཡོད་ན་སྒྲ་རྣམས་བརྗོད་འདོད་ཀྱི་རྗེས་སུ་སྒྲུབ་པར་བྱེད་དེ། དཔེར་ན་གང་གིས་ཡན་ལག་རྣམ་པར་འགྱུར་རོ་ཞེས་པ་འདི་ལྟ་བུའོ། །དེ་ལྟར་ན་ཆོས་ཀྱིས་
[158a]
[158a.1]ཆོས་ཞེས་འདིར་ཐ་དད་པ་སྦྱོར་བ་ལ་གསུམ་བལྟ་བར་བྱ་སྟེ། ཆོས་ཅན་ཆོས་ཅན་གྱིས་བསྒྲུབ་མིན། །ཞེས་པ་ལ་སོགས་པར་ནི་བྱེད་པ་ཁོ་ན་ལའོ། །སྔར་ཆོས་ཀྱིས་ཁྱད་པར་དུ་བྱས་པའི་ཆོས་ཅན་བསྒྲུབ་བྱའོ་ཞེས་བརྗོད་ཅིང་། ད་ལྟར་ནི། ཆོས་ཀྱིས་ཆོས་ནི་བསྒྲུབ་བྱའོ། །
[158a.2]ཞེས་པ་འདིའི་ཕྱིར་ཚིག་འགལ་བ་དང་། སྒྲུབ་པར་བྱེད་པ་སྐབས་སུ་མ་བབ་པར་སེམས་པས་སྨྲས་པ། ཅིའི་ཕྱིར་ཞེ་ན་ཞེས་པའོ། །ཆོས་ཅན་དེ་ལྟར་བསྒྲུབ་བྱའི་ཕྱིར། །ཞེས་པས་རྒྱུ་གསུངས་སོ། །དེ་ལྟར་ཞེས་པ་ནི་ཞེས་པ་ལ་སོགས་པས་འདི་ཁོ་ན་རྣམ་པར་འབྱེད་དོ། །གང་གི་ཕྱིར་ཆོས་ཀྱིས་
[158a.3]ཁྱད་པར་དུ་བྱས་པའི་ཆོས་ཅན་བསྒྲུབ་པར་བྱ་བ་སྟེ། དེའི་ཕྱིར་སྒྲུབ་པར་བྱེད་པའི་ཆོས་ནི་བསྒྲུབ་པར་བྱ་བའི་ཆོས་མེད་ན་མི་འབྱུང་བ་ཅན་དུ་བསྒྲུབ་པར་བྱ་བ་ཡིན་ནོ། །འདི་ཁོ་ན་ནི་ཆོས་ཀྱིས་ཁྱད་པར་དུ་བྱས་པའི་ཆོས་ཅན་འགྲུབ་པའི་ཐབས་སོ་ཞེས་པ་དགོངས་པའོ། །དེ་ལྟར་ནི་སྔར་གསུངས་པ། རྟགས་
[158a.4]ནི་ཆོས་དང་མི་འཁྲུལ་བར། །གཞན་དུ་བསྟན་པར་བྱ་བ་སྟེ། །དེ་ལྟ་རབ་གྲུབ་དེ་ལྡན་པར། །ཆོས་ཅན་རྟོགས་པར་འགྱུར་བ་ཡིན། །ཞེས་སོ། །དེའི་ཕྱིར་ཚིག་འགལ་བ་མ་ཡིན་ཞིང་། སྐབས་སུ་མ་བབ་པ་སྒྲུབ་པར་བྱེད་པ་ཡང་མ་ཡིན་ཏེ། འདི་ནི་སྐབས་སུ་བབ་པ་འགྲུབ་པའི་ཐབས་འཆད་
[158a.5]པ་ལྷུར་ལེན་པ་ཉིད་ཀྱི་ཕྱིར་རོ། །འདིར་སྒྲ་ནི་མི་རྟག་པ་སྟེ། བྱས་པ་མི་རྟག་པ་ཉིད་ཀྱི་ཕྱིར་དང་། རྟག་པ་ནི་མ་བྱས་པ་ཉིད་ཀྱི་ཕྱིར་རོ་ཞེས་དམ་བཅའི་དེ་མ་ཐག་ཏུ་ལྔ་པའི་མཐའ་ཅན་ཐོབ་པའི་ཕྱིར་ཕྱོགས་ཆོས་མེད་ཀྱང་འདི་ནི་གཏན་ཚིགས་ཡིན་ནོ། །དེ་ལས་ཀྱང་གཏན་ཚིགས་ཕྱོགས་ཆོས་ཁོ་
[158a.6]ནའོ་ཞེས་པ་འདི་མི་རིགས་ཞེས་ཁ་ཅིག་ཕྱིན་ཅི་ལོག་ཏུ་བྱེད་དེ། དེའི་ཕྱིར་དེ་རྣམས་ཀྱི་ཕྱིན་ཅི་ལོག་བསལ་བའི་ཆེད་དུ་གསུངས་པ། ཕྱོགས་ཆོས་ཀྱི་ཡང་ཞེས་པ་ལ་སོགས་པའོ། །གང་དུ་རྟགས་བསྒྲུབ་བྱ་རྗེས་འགྲོ། །ཞེས་པ་ལ་སོགས་པའི་ཚིགས་སུ་བཅད་པའི་སྔ་མ་ཕྱེད་ཀྱིས་དཔེ་
[158a.7]གཉིས་ཀྱི་མཚན་ཉིད་གསུངས་སོ། །གང་དུ་དང་དེར་གྱི་སྒྲ་དག་གིས་སྦྱོར་བ་ངེས་པར་བསྟན་ཏོ། །རྐང་པ་གསུམ་པས་ནི་ལྔ་པའི་མཐའ་འདི་ནི་དཔེའི་སྦྱོར་བ་ཁོ་ནར་རིག་པར་བྱའི་གཏན་ཚིགས་ནི་མ་ཡིན་ནོ་ཞེས་པ་འདི་ཤེས་པར་བྱས་སོ། །བཞི་པས་ནི་དེར་ཇི་ལྟར་གཏན་ཚིགས་འཐོབ་པ་དེ་
[158b]
[158b.1]ལྟར་བཤད་དོ་ཞེས་པའོ། །འདི་ལ་ཕྱོགས་ཆོས་ཉིད་ཡོད་པ་མ་ཡིན་ཏེ་ཞེས་བརྗོད་པ་ན། ཕ་རོལ་པོས་གཏན་ཚིགས་ཕྱོགས་ཆོས་མེད་པ་ཉིད་དུ་འགྱུར་རོ་ཞེས་འགའ་ཞིག་གི་སེམས་སོ་ཞེས་པས་གསུངས་པ། དཔེའི་མཚན་ཉིད་ཀྱང་སྲིད་དོ་ཞེས་པ་སྟེ། ཀྱང་གི་སྒྲ་ནི་ངེས་པར་གཟུང་བའི་
[158b.2]དོན་ཏོ། །འོ་ན་གཏན་ཚིགས་ཀྱི་མེད་ན་མི་འབྱུང་བ་དཔེས་འཆད་པ་མ་ཡིན་ནམ། འདིར་གཏན་ཚིགས་ཐོས་པ་ཡང་མ་ཡིན་ཏེ། དེས་ན་ཅི་ལྟར་འདི་དཔེའི་སྦྱོར་བ་ཡིན་ཞེ་ན་གསུངས་པ། གཏན་ཚིགས་ཉེ་བར་སྦྱར་ལས་འདོད། །ཅེས་པའོ། །འོ་ན་འདི་ཕྱོགས་ཆོས་མེད་པའི་གཏན་ཚིགས་
[158b.3]ཡིན་ཏེ། གསལ་བ་ནི་མེད་པ་སྐྱེ་བ་མ་ཡིན་ཏེ་ཐ་དད་དུ་ཐལ་བའི་ཕྱིར་རོ་ཞེས་པའི་ཐ་དད་དུ་ཐལ་བ་ནི་གསལ་བའི་ཆོས་མ་ཡིན་པས་སོ་ཞེ་ན་གསུངས་པ། རྒྱུ་མེད་པར་ནི་ཐལ་འགྱུར་བ། །ཞེས་སོ། །རྒྱུ་སྟེ་རྗེས་སུ་འགྲོ་བ་མེད་པ་ནི་ཐ་དད་པ་ཡིན་ཞིང་དེར་ཐལ་བར་འགྱུར་བའོ། །གང་དུ་ཞེས་པ་
[158b.4]ནི་བསྟན་བཅོས་སུའོ། །དེ་ནི་དཔེ་གཉིས་ལས་གྲུབ་ཕྱིར། །ཞེས་པ་ལ། གང་ལ་མཐོང་བ་མཐའ་སྟེ་ངེས་བྱེད་ཡིན་པའོ་ཞེས་པས་རྗེས་སུ་འགྲོ་བ་དང་ལྡོག་པ་གཉིས་པོ་འདིར་དཔེའི་སྒྲས་བརྗོད་པར་འདོད་དེ། རྗེས་སུ་འགྲོ་བ་དང་ལྡོག་པ་གཉིས་ལས་བསྒྲུབ་བྱ་འགྲུབ་པའི་ཕྱིར་རོ་ཞེས་པའི་ཐ་
[158b.5]ཚིག་གོ། །དེ་ལས་ཀྱང་རྣམ་པར་ལྡན་པ་ལས་བསལ་ཏེ་འོངས་པ་ཐ་དད་པ་མ་ཡིན་ནོ་ཞེས་པ་དགོངས་པའོ། །བསལ་ཏེ་འོངས་པས་ཞེས་པ་ནི། གཞན་གྱི་ཕྱོགས་བཀག་པས་རང་གི་ཕྱོགས་འཇོག་པར་བྱེད་པ་ནི་བསལ་ཏེ་འོངས་པའོ། །བསལ་བ་ནི་ཞེས་པ་ལ་སོགས་པས་དེའི་སྦྱོར་བ་སྟོན་
[158b.6]ཏོ། །དེ་ལ་ཞེས་པ་ལ་སོགས་པས་དཔེ་གཉིས་ལས་བསྒྲུབ་བྱ་འགྲུབ་པའི་ཕྱིར་གཏན་ཚིགས་མེད་པར་ཐལ་བར་འགྱུར་བ་བརྗོད་པར་བྱའོ་ཞེས་རྟོགས་པར་བྱེད་ཅིང་རྣམ་པ་གཞན་སེལ་བར་བྱེད་དོ། །རྣམ་པ་གཞན་ནི་མེད་པ་སྔོན་མ་ཅན་རྣམས་ཀྱི་ཐ་དད་པ་མཐོང་བར་ཡང་འགྱུར་བ་སྟེ་གང་མེད་པ་
[158b.7]སྔོན་མ་ཅན་དེ་ཐ་དད་པ་དམིགས་སོ་ཞེས་པའོ། །ཡང་ན་དེ་རྣམས་ཁོ་ནའི་རྗེས་སུ་འགྲོ་བ་མ་མཐོང་བ་ལས་བཟློག་པ་སྒྲུབ་པ་སྟེ། གང་མེད་པ་སྔོན་མ་ཅན་དེའི་རྗེས་སུ་འགྲོ་བ་མཐོང་བ་མ་ཡིན་ཏེ། དེའི་ཕྱིར་དེ་ལས་བཟློག་པ་ཐ་དད་པར་ཐལ་བར་འགྱུར་རོ་ཞེས་པའོ། །གཉིས་ཀ་ལྟར་ན་ཡང་མི་
[159a]
[159a.1]འཐད་དེ། རེ་ཞིག་མེད་པ་སྔོན་མ་ཅན་གྱི་ཐ་དད་པ་འགའ་ཞིག་རྣམས་དམིགས་པ་ནི་མ་ཡིན་ཏེ། དེ་རྣམས་མེད་པའི་ཕྱིར་རོ། །མེད་པ་སྔ་མ་ཅན་གྱི་ཐ་དད་པ་རྣམས་ལ་རྗེས་སུ་འགྲོ་བ་མཐོང་བ་མ་ཡིན་ནོ་ཞེས་མེད་པ་སྔོན་མ་ཅན་ཉིད་ཁས་ལེན་པ་ན། རྗེས་སུ་འགྲོ་བ་ལས་བཟློག་
[159a.2]པས་ཐ་དད་པར་ཐལ་བར་བྱེད་པ་རིགས་པ་ཡང་མ་ཡིན་ནོ། །ཅིའི་ཕྱིར་ཞེ་ན་སྨྲས་པ། མི་འདོད་པར་ཐལ་བར་འགྱུར་བའི་ཕྱིར་རོ་ཞེས་པ། གལ་ཏེ་མ་མཐོང་བ་ལས་བཟློག་པ་སྒྲོ་འདོགས་པར་བྱེད་ན། ཐ་དད་པ་ཡང་འདི་རྣམས་ལ་མཐོང་བ་མ་ཡིན་ནོ་ཞེས་པས་དེ་ལས་བཟློག་པ་ཡང་འཐོབ་བོ་ཞེས་
[159a.3]པ་འདི་ནི་མི་འདོད་པའོ། །གལ་ཏེ་དེ་ལྟར་ཐ་དད་པར་ཐལ་བར་འགྱུར་བ་དེ་མི་རིགས་ན། འོ་ན་རིགས་པ་དེ་ཅི་ལྟར་ཞེ་ན་གསུངས་པ། འོ་ན་ཅི་ཞེ་ན་ཞེས་པ་ལ་སོགས་པ་སྟེ། འདིས་རང་གི་ཕྱོགས་འཇོག་པར་བྱེད་དོ། །གང་གི་ཕྱིར་རྗེས་སུ་འགྲོ་བ་ནི་གཅིག་སྔོན་མ་ཅན་ཉིད་ལ་གྱོ་མོ་ལ་སོགས་པ་ལ་
[159a.4]མཐོང་ལ། འདིས་ནི་རྗེས་སུ་འགྲོ་བ་སྟོན་ཏོ། །དེ་མེད་པ་ལ་ཡང་མ་མཐོང་སྟེ། རྒྱུ་གཅིག་པ་ཉིད་མེད་པ་ལ་ཡང་སྣ་ཚོགས་པ་སྔ་མ་ཅན་རྣམས་ལའམ་མེད་པ་སྔ་མ་ཅན་རྣམས་ལ་མ་མཐོང་ངོ་། །འདིས་ཀྱང་ལྡོག་པའོ། །དེའི་ཕྱིར་གཅིག་སྔོན་མ་ཅན་ཉིད་དོ་ཞེས་པ་ནི་གང་གི་ཕྱིར་དེ་ལྟར་རིགས་གཅིག་
[159a.5]རྗེས་སུ་འགྲོ་བ་ནི་གཅིག་སྔོན་མ་ཅན་ཉིད་ཀྱིས་ཁྱབ་པ་དེའི་ཕྱིར། གསལ་བ་ནི་གཅིག་སྔོན་མ་ཅན་ཉིད་དོ། །དེས་ཁས་མི་ལེན་ན་ཡང་ཞེས་པ་ཁྱབ་པར་བྱེད་པ་གཅིག་སྔོན་མ་ཅན་དེ་ཁས་མི་ལེན་ནའོ། །རྗེས་སུ་འགྲོ་བ་མེད་པར་ཐལ་བར་འགྱུར་ཞེས་པ་ཁྱབ་པར་བྱ་བ་རྗེས་སུ་འགྲོ་བ་མེད་པར་ཐལ་བར་
[159a.6]འགྱུར་རོ་ཞེས་པའི་དོན་ཏེ། ཁྱབ་པར་བྱེད་པ་ལྡོག་པ་ནི་ཁྱབ་པར་བྱ་བ་ལྡོག་པར་བྱེད་དེ། གཞན་དུ་ན་དེ་དེའི་ཁྱབ་པར་བྱེད་པ་ཉིད་དུ་མི་འགྱུར་རོ། །རྗེས་སུ་འགྲོ་བ་མེད་པར་ཐལ་བ་དེ་ཡང་མེད་དོ་ཞེས་ཐལ་བར་འགྱུར་བ་བཟློག་པས་རྗེས་སུ་འགྲོ་བ་དེ་ཉིད་བཤད་པར་འགྱུར་ཏེ། རྗེས་སུ་འགྲོ་བའི་ཕྱིར་
[159a.7]ཐ་དད་པ་རྣམས་ནི་རྒྱུ་གཅིག་སྔོན་མ་ཅན་རྣམས་སོ་ཞེས་པའོ། །དེའི་ཕྱིར་ལྡན་ལས་ཐ་དད་མིན། །ཞེས་པ་གང་གི་ཕྱིར། འདིར་ཡང་རྗེས་སུ་འགྲོ་བ་དང་ལྡོག་པའི་སྟོབས་ལས་ཐལ་འགྱུར་དུ་བསྒྲུབས་ནས་དེ་བཟློག་པས་རྗེས་སུ་འགྲོ་བ་ཁོ་ན་བརྗོད་དེ། འདི་ལ་ཁྱད་པར་ཅི་ཞིག་ཡོད། །ཅེས་པའོ། །
[159b]
[159b.1]སྦྱོར་བ་ཁོ་ན་ཐ་དད་པ་འབའ་ཞིག་སྟེ་དོན་ནི་མ་ཡིན་ནོ། །དེ་ལྟར་བསལ་ཏེ་འོངས་པ་ལ་ཡང་ཐལ་འགྱུར་དང་བཟློག་པས་ཕྱོགས་ཀྱི་ཆོས་བརྗོད་པའོ་ཞེས་པས་འགར་ཡང་ཕྱོགས་ཀྱི་ཆོས་མེད་པའི་གཏན་ཚིགས་མ་ཡིན་ནོ། །དེ་ཅི་ལྟར་བསལ་ཏེ་འོངས་པ་མ་ཡིན་ཞེས་ཏེ། རྣམ་པར་ལྡན་པ་ལས་བསལ་
[159b.2]ཏེ་འོངས་པ་ཐ་མི་དད་པར་བརྗོད་པས་བསལ་ཏེ་འོངས་པ་ཡང་ཕྱོགས་ཆོས་ཉིད་དོ་ཞེས་བཤད་ཅིང་། འདི་བསལ་ཏེ་འོངས་པར་སྲིད་པ་ཡང་མ་ཡིན་ཏེ། བསལ་ཏེ་འོངས་པས་ནི་གཏན་ཚིགས་མེད་པར་རྩོད་ལ། འདིར་ནི་མ་ཡིན་ནོ། །ལོངས་སྤྱོད་པ་པོ་དང་ལོངས་སྤྱད་པར་བྱ་བ་དག་ནི་ཡོན་ཏན་
[159b.3]མེད་པ་ཉིད་དམ་ཡོན་ཏན་ཉིད་མ་ཡིན་ཞིང་། རྫས་མ་ཡིན་པ་ཉིད་དམ་རྫས་ཉིད་ཀྱང་མ་ཡིན་ནོ། །ཡོན་ཏན་དང་རྫས་རྣམས་ཡོད་པ་ཉིད་ལ་གཏན་ཚིགས་བཤད་དེ། གང་ལས་དེ་མེད་པར་ཐལ་བས་གཏན་ཚིགས་མེད་པར་རྩོད་པ་ལས་འདི་བསལ་ཏེ་འོངས་པར་འགྱུར་བའོ། །འདི་གཏན་
[159b.4]ཚིགས་མ་ཡིན་པ་ཡང་མ་ཡིན་ཏེ། དེས་ན་གཏན་ཚིགས་ཕྱོགས་ཆོས་ཁོ་ནའོ་ཞེས་པ་འདི་འཐད་པ་མ་ཡིན་ཞེའོ། །འདི་ནི་བསལ་ཏེ་འོངས་པ་མ་ཡིན་ནོ། །ཅི་ལྟར་ཞེ་ན་གསུངས་པ། གང་གི་ཕྱིར་ཞེས་པ་ལ་སོགས་པའོ། །བསལ་ཏེ་འོངས་པའི་ཕྱོགས་ཀྱི་ཆོས་སོ་ཞེས་བསྒྲུབས་ཟིན་
[159b.5]ཏོ། །སྦྱོར་བ་འདི་ནི་གང་གི་ཕྱིར་ཕྱོགས་ཆོས་མེད་ཉིད་ཕྱིར་བསལ་ཏེ་འོངས་པ་ལས་གཞན་ནོ། །དེའི་ཕྱིར་འདི་བསལ་ཏེ་འོངས་པ་མ་ཡིན་ནོ། །འོ་ན་འདི་ཅི་ཡིན་ཞེ་ན་གསུངས་པ། སུན་འབྱིན་ཞེས་པའོ། །ཅིའི་ཕྱིར་ཞེ་ན་གསུངས་པ། རྟགས་དང་དམ་བཅའ་དག་གི་ཞེས་པ་སྟེ། ཡང་ཅི་ལྟར་
[159b.6]འདི་སུན་འབྱིན་ནོ་ཞེས་ཤེས་པར་བྱ་ཞེ་ན་གསུངས་པ། སྐྱོན་བརྗོད་པས་ཞེས་པ་སྟེ་སྐྱོན་བསལ་བར་བྱེད་པས་ཞེས་པའི་དོན་ཏོ། །བརྗོད་པའི་སྒྲ་འདིར་དངོས་པོ་སྒྲུབ་པའོ། །སྐྱོན་བརྗོད་པ་དེ་ཡང་སྔ་མ་ཁས་བླངས་པ་ཡོད་ན་འགྱུར་རོ་ཞེས་པ་འདི་བཤད་པ་ནི། སྔ་མར་ཁས་བླངས་པ་ཡོད་
[159b.7]ན་ཞེས་པའོ། །འདི་སྐད་བཤད་པར་འགྱུར་ཏེ། སུན་འབྱིན་ཞེས་བྱ་བ་ནི་གང་གི་ཕྱོགས་སྔ་མ་རྒོལ་བས་ཁས་བླངས་པའི་དོན་འགའ་ཞིག་སུན་འབྱིན་པར་བྱ་བ་སྟེ། དེའི་ཚིག་ནི་སུན་འབྱིན་ནོ། །སྔ་མས་ཁས་བླངས་པའི་སྐྱོན་བསལ་བར་བྱེད་པ་ནི་དེའི་འབྲས་བུ་སྟེ། དེའི་ཕྱིར་འབྲས་བུ་དེས་འདི་སུན་
[160a]
[160a.1]འབྱིན་ནོ་ཞེས་ངེས་པར་བྱའོ་ཞེས་པའོ། །གཏན་ཚིགས་ཅི་ཞིག་གིས་འདི་སུན་འབྱིན་ཡིན་ཞེ་ན་གསུངས་པ། འདིར་ནི་ཞེས་པ་ལ་སོགས་པའོ། །གཙོ་བོ་ཡོད་པ་ཉིད་ཀྱི་གཏན་ཚིགས་ནི་ཡོན་ཏན་རྗེས་སུ་འགྲོ་བ་སྟེ། གཙོ་བོ་ཡོད་དེ། ཁྱད་པར་རྣམས་ལ་རྗེས་སུ་འགྲོ་བ་
[160a.2]མཐོང་བའི་ཕྱིར་ཞེས་པའོ། །དེ་ཡང་གཞན་གྱི་ངོར་མ་གྲུབ་སྟེ། སངས་རྒྱས་པ་ལ་སོགས་པ་རྣམས་ནི་སྙིང་སྟོབས་ལ་སོགས་པའི་ཡོན་ཏན་རྣམས་ཀྱི་རྗེས་སུ་སོང་བ་ཉིད་དུ་ཁྱད་པར་རྣམས་ཡིད་ཆེས་པ་མ་ཡིན་ནོ། །དེའི་ཕྱིར་དེ་རབ་ཏུ་བསྒྲུབ་པའི་ཆེད་དུ་གྲངས་ཅན་པས་འབྲས་བུ་གཅིག་པ་ཉིད་གཏན་
[160a.3]ཚིགས་སུ་བཤད་དོ། །སྒྲ་དང་རེག་པ་དང་གཟུགས་དང་རོ་དང་དྲི་སྟེ་ལྔ་རྣམས་ནི་བདེ་བ་དང་སྡུག་བསྔལ་བ་དང་རྨོངས་པ་སྟེ་གསུམ་པོ་རྣམས་ཀྱི་བཀོད་པའི་ཁྱད་པར་རོ། །ཅིའི་ཕྱིར་ཞེ་ན། ལྔ་པོ་རྣམས་ཀྱི་དང་ལྔ་པོ་རྣམས་ཀྱི་འབྲས་བུ་གཅིག་པ་ཉིད་ཡོད་པའི་ཕྱིར་རོ། །སྒྲ་དང་རེག་བྱ་དང་
[160a.4]གཟུགས་དང་རོ་དང་དྲི་བདེ་བ་རྣམས་ཀྱི་འབྲས་བུ་ནི་རབ་ཏུ་དང་བ་དང་ཡང་བ་ཉིད་དང་རབ་ཏུ་དག་པ་དང་མངོན་པར་ཆགས་པ་དང་མཆོག་ཏུ་རངས་པ་དང་དགའ་བ་རྣམས་སོ། །སྡུག་བསྔལ་རྣམས་ཀྱི་ནི་མྱ་ངན་དང་གདུང་བ་དང་ཟུག་གཟེར་དང་རེངས་པ་དང་ཡིད་འབྱུང་བ་དང་ཞེ་སྡང་བ་རྣམས་སོ། །
[160a.5]རྨོངས་པ་རྣམས་ཀྱི་ནི་འགེབས་པ་དང་འབྱིན་པ་དང་འཇིག་པ་དང་མི་སྡུག་པ་ཉིད་དང་ཞུམ་པ་ཉིད་དང་ལྕི་བ་ཉིད་རྣམས་སོ། །དེ་རྣམས་ནི་ལྔ་རྣམས་དང་ལྔ་རྣམས་ཀྱི་འབྲས་བུ་གཅིག་པར་འགྱུར་བ་མཐོང་ནས་སྒྲ་དང་རེག་པ་དང་གཟུགས་དང་རོ་དང་དྲི་སྟེ་ལྔ་པོ་རྣམས། བདེ་བ་དང་སྡུག་བསྔལ་དང་
[160a.6]གཏི་མུག་སྟེ་གསུམ་པོ་རྣམས་ཀྱི་བཀོད་པའི་ཁྱད་པར་རོ་ཞེས་འཛིན་པར་བྱེད་དོ། །དེས་ན་ཁས་བླངས་པ་ཞེས་པ་ལ་སོགས་པ་སྟེ། གང་གི་རབ་ཏུ་དང་བ་ལ་སོགས་པ་འབྲས་བུ་ཡིན་པ་དེ་ནི་བདེ་བ་ལ་སོགས་པའི་རང་བཞིན་ཡིན་ཏེ། བདེ་བ་ལ་སོགས་པ་བཞིན་ཡུལ་གྱི་དངོས་པོར་གནས་པའི་བ་ལང་
[160a.7]ལ་སོགས་པའི་ཡང་རབ་ཏུ་དང་བ་ལ་སོགས་པ་འབྲས་བུ་ཡིན་ནོ་ཞེས་པ་འབྲས་བུའི་གཟུགས་བརྙན་གྱིས་སྒྲུབ་པར་བྱེད་པ་འདི་ཁས་བླངས་པར་འགྱུར་རོ། །དེ་ལྟར་ན་ཟ་བ་པོ་ལའང་ཐལ་བར་འགྱུར་བའི་ཕྱིར་མ་ངེས་པ་སྟེ། དེ་ལྟར་ནི་སྐྱེས་བུ་རང་བཞིན་དང་བྲལ་བ་ཡང་བསྒོམས་པ་ལས་དྲང་སྲོང་
[160b]
[160b.1]སེར་སྐྱའི་ནི་རབ་ཏུ་དང་བ་ལ་སོགས་པར་འགྱུར་ལ། དེ་ལས་གཞན་རྣམས་ཀྱི་ནི་མྱ་ངན་ལ་སོགས་པར་རོ། །དེའི་ཕྱིར་སྐྱེས་བུ་ཡང་བདེ་བ་ལ་སོགས་པའི་རང་བཞིན་དུ་ཐལ་བར་འགྱུར་རོ། །ཁས་མི་ལེན་ན་ཡང་ཞེས་པ་ལ་སོགས་པས་དེ་ཉིད་མ་ངེས་པ་ཉིད་དུ་གསལ་བར་བྱེད་ཅིང་མ་ངེས་པ་ཉིད་
[160b.2]དུ་བརྗོད་པའི་འབྲས་བུ་སྟོན་པར་བྱེད་དོ། །འམ་གྱི་སྒྲ་ནི་གཏན་ཚིགས་ལའོ། །འདི་བཤད་པར་འགྱུར་ཏེ། གང་གི་ཕྱིར་རབ་ཏུ་དང་བ་ལ་སོགས་པའི་འབྲས་བུ་ཅན་ཡིན་ཡང་སྐྱེས་བུ་བདེ་བ་ལ་སོགས་པའི་རང་བཞིན་དུ་ཁས་མ་བླངས་ཏེ། དེའི་ཕྱིར་དེ་ཁས་མི་ལེན་ན་ལོངས་སྤྱད་པར་བྱ་བ་
[160b.3]ཡང་ཡོན་ཏན་མ་ཡིན་པ་སྟེ། དེའི་ཕྱིར་རྩ་བའི་གཏན་ཚིགས་ཡོན་ཏན་རྗེས་སུ་འགྲོ་བ་ནི་མ་གྲུབ་པ་ཉིད་དོ་ཞེས་པའོ། །དེ་ལྟར་འགྱུར་མོད་ཀྱི། སྐྱེས་བུ་ནི་མཐོང་བ་ཉིད་མེད་དེ། དེས་ན་ཅིའི་ཕྱིར་དེ་མཐོང་བ་ལ་རབ་ཏུ་དང་བ་ལ་སོགས་པའི་འབྲས་བུ་སྐྱེད་པར་བྱེད་ཅེ་ན། དེ་ནི་ཡོད་པ་མ་ཡིན་ཏེ།
[160b.4]ལྐོག་ཏུ་གྱུར་པའི་ཡང་རྗེས་སུ་དཔག་པའི་དངོས་པོའི་རབ་ཏུ་དང་བ་དང་མྱ་ངན་ལ་སོགས་པའི་འབྲས་བུ་མཐོང་བའི་ཕྱིར་ཏེ། དེ་ལྟར་ནི་གྲང་བས་ཉེན་པ་དུ་བ་མཐོང་བ་ལས་མེ་ངེས་པ་ནི་དགའ་བར་འགྱུར་ཞིང་། སྟག་གི་སྒྲ་ཐོས་པ་ལས་སྟག་ཐག་ཉེ་བར་རྗེས་སུ་དཔག་པ་ལ་ཡོངས་སུ་གདུང་
[160b.5]བར་རོ། །དེའི་ཕྱིར་སྐྱེས་བུ་རྗེས་སུ་དཔག་པའི་ཡང་རབ་ཏུ་དང་བ་ལ་སོགས་པར་འགྱུར་བ་ཁོ་ན་སྟེ། བདག་གིས་སྐྱེས་བུ་ངེས་པར་བྱ་སྟེ་རིང་པོ་མི་ཐོགས་པར་ཐར་པ་ཉིད་ཐོབ་པར་འགྱུར་རོ་ཞེས་སེམས་པའིའོ། །ཅི་སྟེ་རྗེས་སུ་དཔག་པའི་ཡུལ་དུ་ཡང་འགྱུར་བ་མ་ཡིན་ན་ནི། འོ་ན་དེ་ཡོད་དོ་
[160b.6]ཞེས་ཅི་ལྟར་ངེས་པར་བྱ། དེའི་ཕྱིར་བསྟན་བཅོས་རྩོམ་པ་དོན་མེད་པ་ཉིད་དུ་འགྱུར་ཏེ། བསྟན་བཅོས་ཀྱི་འབྲས་བུ་ནི་སྐྱེས་བུ་ཐར་པའི་ཐབས་སྒྲུབ་པ་ཡིན་པ་ཉིད་ཀྱི་ཕྱིར་རོ། །འོ་ན་ཡང་སྐྱེས་བུ་ཉེ་བར་སེམས་པ་ཅན་གྱི་གཟུགས་བརྙན་བསྒྲུབ་པའི་ཡིད་ཁོ་ན་རབ་ཏུ་དང་བ་ལ་སོགས་པ་མངོན་པར་
[160b.7]གསལ་བར་བྱེད་པ་མ་ཡིན་ནམ། དེ་ཡང་གཙོ་བོ་ཅན་ཉིད་ཀྱི་ཕྱིར་ཡོན་ཏན་གསུམ་ཁོ་ནའོ་ཞེས་པས། ཅིའི་ཕྱིར་སྐྱེས་བུ་མ་ངེས་པ་ཡིན་ཞེ་ན། འདི་ནི་གཏམ་སྟེ། སྐྱེས་བུའི་རང་གི་ངོ་བོ་ཡོངས་སུ་མ་ཤེས་ན་སྐྱེས་བུ་ཉེ་བའི་སེམས་པ་ཅན་གྱི་ཡིད་དོ་ཞེས་ཅི་ལས་ངེས་པ་ཡིན། རྒྱ་སྐྱེགས་ལ་
[161a]
[161a.1]སོགས་པ་འགེགས་པར་བྱེད་པ་ངེས་པར་མ་བཅད་ན་ནི། དེས་བཀབ་པའི་གཟུགས་ཀྱི་བྱེ་བྲག་ཤེལ་ལ་སོགས་པ་ལ། རྒྱ་སྐྱེགས་ལ་སོགས་པས་བཀབ་པའི་གཟུགས་ཀྱི་བྱེ་བྲག་གོ་ཞེས་ངེས་པར་ནུས་པ་མ་ཡིན་པས་སོ། །གལ་ཏེ་ཡང་སྐྱེས་བུ་ཉེ་བ་ན་ཡིད་ནི་སེམས་
[161a.2]པ་ཅན་གྱི་གཟུགས་བརྙན་ཐོབ་པར་འགྱུར་རོ་ཞེ་ན། རྟག་ཏུ་འགྱུར་ཏེ་སྐྱེས་བུ་རྟག་པ་ཉིད་ཀྱི་ཕྱིར་རོ་ཞེས་པ་ཞར་ལས་བྱུང་བས་ཆོག་གོ། །རྫས་ཀྱི་ཡང་ཞེས་པ་ལ་སོགས་པ་སྟེ། འདི་ནི་དམ་བཅའི་སྒོ་ནས་སུན་འབྱིན་པའོ། །རྫས་ཉིད་དང་ལྡན་པ་དེའི་དངོས་པོར་ཁས་ལེན་ན་ཞེས་པ། རྫས་
[161a.3]ཀྱི་དངོས་པོར་ཁས་ལེན་ནའོ། །བྱེ་བྲག་པ་རྣམས་ཀྱི་དམ་བཅའ་འདི་ཡིན་ཏེ། རྫས་ཉིད་དང་ལྡན་པ་ནི་རྫས་སུ་ཡོད་དོ་ཞེས་པའོ། །དེའི་ཕྱིར་སྐྱོན་འདི་བརྗོད་པར་བྱ་སྟེ། ཡོན་ཏན་རྣམས་ཀྱང་རྫས་ཉིད་དུ་ཐལ་བར་འགྱུར་རོ་ཞེས་པ་སྟེ། སྦྱོར་བ་ལས་དམིགས་བསལ་ཏེ། རྫས་ཀྱི་སྦྱོར་བ་ཁོ་ན་ལས་
[161a.4]རྫས་དམིགས་ཀྱིས་བསལ་བའོ་ཞེས་པའི་དོན་ཏོ། །ཅི་ལྟར་ཞེ་ན་གསུངས་པ། འཕྲོད་པ་འདུ་བ་གཅིག་ཉིད་ཀྱི་ཕྱིར་དང་ཞེས་པའོ། །པེ་ལུ་ཀའི་གལ་ཏེ་ཡང་སྤྱི་རྣམས་རང་གི་རྟེན་ལས་འཕྲོད་པ་འདུས་པ་དེ་ལྟ་ན་ཡང་། འཕྲོད་འདུ་བ་གང་གི་རྫས་ཉིད་རྫས་ལ་འཇུག་པའི་འཕྲོད་འདུ་དེ་ཁོ་ན་ཡོན་
[161a.5]ཏན་རྣམས་ལ་ཡང་ངོ་ཞེས་པས་ཡོན་ཏན་རྣམས་ཀྱང་རྫས་སུ་འགྱུར་བ་འཐོབ་བོ། །འོ་ན་བཻ་ཐ་ར་རྣམས་ཀྱི་ཡང་དག་པ་ལྡན་པ་བཞིན་དུ་འཕྲོད་འདུ་ཡང་འཕྲོད་འདུ་ཅན་སོ་སོ་ཐ་དད་པ་ཁོ་ན་མ་ཡིན་ནམ། དེས་ན་ཅིའི་ཕྱིར་ཐལ་འགྱུར་འདིར་འགྱུར་ཞེ་ན། གསུངས་པ། ཡང་ན་སྤྱི་རྣམས་ཐམས་ཅད་
[161a.6]དུ་སོང་བའི་ཕྱིར་ཞེས་པའོ། །རྫས་ཉིད་དང་ལྡན་པའི་ཡང་ཞེས་པ་ལ་སོགས་པ་སྟེ། ཅི་སྟེ་རྫས་ཉིད་དང་ལྡན་པ་ཡང་རྫས་སུ་མི་འདོད་ན་རྫས་ཉིད་དང་ལྡན་པ་ཡོད་དོ་ཞེས་པའི་དམ་བཅའ་སུན་འབྱིན་པར་འགྱུར་རོ། །ཅིའི་ཕྱིར་ཞེ་ན་གསུངས་པ། རྫས་ནི་རྫས་མ་ཡིན་པ་ཉིད་ཀྱིས་སེལ་བའི་
[161a.7]ཕྱིར་རོ་ཞེས་པའོ། །མ་ངེས་པའི་རྩོད་པར་འགྱུར་རོ་ཞེས་པ། རྫས་ཉིད་དང་ལྡན་པ་ཉིད་ཀྱི་ཕྱིར་རྫས་ཉིད་དུ་སྒྲུབ་པར་བྱེད་ན་ཡོན་ཏན་རྣམས་ལ་ཡང་གཏན་ཚིགས་འདི་ཡོད་པའི་ཕྱིར་མ་ངེས་པའི་རྩོད་པར་འགྱུར་རོ། །རྫས་ཉིད་དང་ལྡན་པ་གཞན་ཞེས་པ་སྟེ། མཐུན་ཕྱོགས་ལ་ཡོད་ཅིང་མི་མཐུན་
[161b]
[161b.1]ཕྱོགས་ལ་འཇུག་ན་མ་ངེས་པར་འགྱུར་ན། འདི་ལ་མཐུན་ཕྱོགས་ལ་ཡོད་པ་མ་ཡིན་ཏེ། རྫས་ཉིད་དང་ལྡན་པ་གཞན་མ་མཐོང་བའི་ཕྱིར་རོ། །འགལ་བའི་རྩོད་པར་འགྱུར་བ་མ་ཡིན་པ་ཅིའི་ཕྱིར་ཞེ་ན། དེ་ལྟར་སྦྱོར་བ་མེད་པའི་ཕྱིར་རོ། །འདིར་ཡང་རྫས་ནི་ཡོད་པ་མ་ཡིན་ཏེ། ཡོན་ཏན་
[161b.2]དང་རྫས་རྣམས་ཀྱི་རྫས་དང་རྫས་མ་ཡིན་པ་ཉིད་དུ་ཐལ་བར་འགྱུར་བའི་ཕྱིར་རོ་ཞེས་བརྗོད་པ་ཡིན་གྱི། རྫས་ནི་མེད་དེ་ཡོན་ཏན་རྣམས་ཁོ་ན་རྫས་ཉིད་དུ་ཐལ་བར་འགྱུར་བའི་ཕྱིར་རོ་ཞེས་ནི་མ་ཡིན་ནོ། །མ་ངེས་པར་རྩོད་པ་འཁྲུལ་པ་མཐོང་བའི་ཕྱིར་དོགས་སོ། །མཚན་ཉིད་ཀྱི་གཏན་
[161b.3]ཚིགས་ལ་ནི་ཞེས་པ། དོན་གཞན་ལས་ལོག་པའི་ཚུལ་གྱིས་མཚོན་ཆ་གོ་བར་བྱེད་ཅིང་རྟོགས་པར་བྱེད་དོ་ཞེས་པས་མཚན་ཉིད་ཁོ་ན་གཏན་ཚིགས་སུ་འདིར་མངོན་པར་དགོངས་ཏེ། སའི་སྲ་བ་ཉིད་བཞིན་ནོ། །རྫས་ཉིད་དང་ལྡན་པས་ཀྱང་རྫས་མཚོན་པར་བྱ་བའོ་ཞེས་པས་འདི་མཚན་
[161b.4]ཉིད་ཀྱི་གཏན་ཚིགས་སོ། །དེ་ཡང་རྫས་ལས་གཞན་ལ་ཡང་འཇུག་གོ་ཞེས་པ་ཡོན་ཏན་རྣམས་ལ་ཐལ་བར་འགྱུར་བ་བརྗོད་ཟིན་ཏོ། །ཤེས་པར་བྱེད་པའི་གཏན་ཚིགས་ཀྱི་ནི་མ་ཡིན་ཏེ། མ་ངེས་པ་ཉིད་ཀྱི་ཕྱིར་རོ། །བསྒྲུབ་པར་བྱ་བའི་ཆོས་ཀྱི་སྤྱིས་ཞེས་པ་ལ། བསྒྲུབ་པར་བྱ་བ་ཡང་འདི་
[161b.5]ཡིན་ལ་ཆོས་ཀྱང་ངོ་ཞེས་པ་བསྒྲུབ་བྱའི་ཆོས་སོ་དེ་ཁོ་ན་སྤྱི་སྟེ། དེས་མཐུན་པའི་ཕྱོགས་ནི་མཐུན་ཕྱོགས་སོ། །སར་འགྱུར་བ་ནི་ཡང་འདིར་སྦྱོར་བ་ཐ་དད་པའི་ཕྱིར་ས་བྷཱ་ག་དང་། ས་ཛཱ་ཏི་བཞིན་ནོ། །སྤྱིར་བརྗོད་པའི་ཕྱིར་ཅི་ལྟར་འདི་ཐོབ་ཅེ་ན་གསུངས་པ། ཉེ་བའི་ཕྱིར་ཞེས་པ། གང་གིས་ན་མི་
[161b.6]རྟག་པ་ཉིད་ལ་སོགས་པའི་ཆོས་ཀྱིས་ཁྱད་པར་དུ་བྱས་པར་ཆོས་ཅན་བསྒྲུབ་པར་བྱ་བ་སྟེ། དེ་སྐབས་སུ་བྱས་པ་ཉིད་ཀྱི་ཕྱིར་ཉེ་བའོ། །དེའི་ཕྱིར་དེ་ཁོ་ན་དང་མཐུན་པའི་ཕྱོགས་ནི་མཐུན་ཕྱོགས་ཏེ་གཞན་དང་ནི་མ་ཡིན་ནོ་ཞེས་པ་རིགས་པའོ། །འོ་ན་འདི་ཕྱོགས་ཉིད་དུ་འགྱུར་བ་མ་ཡིན་ཏེ།
[161b.7]བསྒྲུབ་པར་བྱ་བ་ཉིད་དུ་མི་འདོད་པ་ཉིད་ཀྱི་ཕྱིར་རོ་ཞེ་ན་གསུངས་པ། དོན་ཐམས་ཅད་ཕྱོགས་ཞེས་པར་བྱས་ནས་ཞེས་པ། རང་གི་ཡོངས་སུ་བཤད་པ་སྟོན་ཏོ་ཕྱོགས་སུ་བྱའོ། །གསལ་བར་བྱའོ་ཞེས་པས་དངོས་པོ་ཐམས་ཅད་ཕྱོགས་ཞེས་བཤད་པར་བྱའོ། །འོ་ན་ཁྱད་པར་ནི་རང་གི་
[162a]
[162a.1]རྟེན་ལ་ངེས་པ་མ་ཡིན་ནམ། དེ་ཅི་ལྟར་གཞན་གྱི་ཆོས་གཞན་ལ་ཡིན་ཞེ་ན་གསུངས་པ། སྒྲུབ་པར་བྱེད་པའི་ཆོས་དེ་ནི་ཞེས་པ་ལ་སོགས་པའོ། །སྤྱི་གཏན་ཚིགས་ཉིད་དུ་ཉེ་བར་བླངས་པའི་ཕྱིར་ཏེ། ཁྱད་པར་ནི་མ་ཡིན་ནོ། །དེས་ན་སྐྱོན་འདི་མེད་དོ་ཞེས་སྟོན་ཏོ། །དེ་
[162a.2]ལྟ་ན་འོ་ན་ཞེས་ཇི་ལྟར་སྒྲུབ་པར་བྱེད་པའི་ཆོས་ནི་རྗེས་སུ་དཔག་པ་ལ་སྤྱིའི་ངོ་བོར་བླང་བར་བྱ་བ་དེ་ལྟར་བསྒྲུབ་པར་བྱ་བའི་ཆོས་ཀྱང་སྟེ། ཁྱད་པར་རྗེས་སུ་དཔག་པ་མི་རུང་བའི་ཕྱིར་རོ། །དེའི་ཕྱིར་མི་རྟག་པ་ཉིད་གཅིག་ཡིན་པ་དེ་ཁོ་ན་གཉིས་ཀ་ལ་ཡང་འཇུག་གོ་ཞེས་པས་མཐུན་ཕྱོགས་ཀྱང་
[162a.3]ནི་ཕྱོགས་ཉིད་འགྱུར། ཅིའི་ཕྱིར་ཐ་སྙད་གཞན་གྱི་ཐ་སྙད་དུ་བྱེད་ཅེ་ན། འདིར་འགྱུར་མོད་ཅེས་པ་ལ་སོགས་པའོ། །དེ་ལྟར་འགྱུར་མོད་མེད་པ་ལ་བརྗོད་འདོད་པ་མི་རིགས་སོ་ཞེ་ན། གསུངས་པ། ཐ་དད་ནི་ཡོད་དེ་ཞེས་སོ། །ཡང་ཅི་ལྟར་ཐ་དད་མེད་པའི་མི་རྟག་པ་ཉིད་ཀྱི་ཐ་དད་པ་
[162a.4]མ་ཡིན་ཞེ་ན། བུམ་པ་ཞེས་པ་ལ་སོགས་པ་སྟེ་བུམ་པ་ལ་སོགས་པ་ལ་མི་རྟག་པ་ཉིད་གྲུབ་ཟིན་པ་ཉིད་ཀྱི་ཕྱིར། བསྒྲུབ་པར་བྱ་བ་ཉིད་མེད་ལ། སྒྲ་ལ་དེ་ལྟ་མ་ཡིན་ནོ། །དེས་ན་འདི་ཁོ་ན་ཐ་དད་དེ། གང་གཅིག་ལ་བསྒྲུབ་བྱའི་ཆོས་རྟོགས་ཟིན་ཅིང་གཞན་ལ་རྟོགས་མ་ཟིན་པའོ་ཞེས་པའོ། །གང་
[162a.5]དུ་དེ་རྟོགས་ཟིན་པ་དེ་མཐུན་ཕྱོགས་སུ་བརྗོད་ཅིང་། གང་དུ་རྟོགས་མ་ཟིན་པ་དེ་ཕྱོགས་ཞེས་པར་རོ། །གཏན་ཚིགས་ནི་གཉིས་ཀ་ལ་གྲུབ་པ་ཁོ་ན་རྗེས་སུ་དཔོག་པ་ལ་ཉེ་བར་སྦྱོར་རོ་ཞེས་པས་དེ་ལ་རྣམ་པ་འདི་ལྟ་བུའི་དབྱེ་བ་ཡོད་པ་མ་ཡིན་ནོ། །དེའི་ཕྱིར་བརྗོད་པར་འདོད་པ་མ་ཡིན་ནོ། །དེའི་
[162a.6]ཕྱིར་འདིར་ཐ་དད་པའང་ཞེས་ཏེ། ཇི་སྐད་བཤད་པའོ། །ཡང་གི་སྒྲ་ལས་ཐ་མི་དད་པ་ཡང་སྟེ་རྟག་པ་རྣམ་པར་གཅོད་པའི་ངོ་བོའི་མི་རྟག་པ་ཉིད་ཐ་མི་དད་པ་ཉིད་ཀྱི་ཕྱིར་རོ་ཞེས་པའི་ཡི་གེ་གཏན་ཚིགས་ཀྱི་དོན་ཏོ། །གང་གི་ཕྱིར་དེ་ལྟར་ཐ་དད་པ་དང་ཐ་མི་དད་པ་དག་སྟེ། དེའི་ཕྱིར་མི་འདོད་དོ། །
[162a.7]ཕྱོགས་དང་མཐུན་ཕྱོགས་དག་གཅིག་ཉིད་དུའོ་ཞེས་པའི་དོན་ཏོ། །འོ་ན་མི་མཐུན་པའི་ཕྱོགས་ཅི་ཡིན་ཞེས་པ་ཐེ་ཚོམ་ཅན་གྱི་དྲི་བའོ། །ཐེ་ཚོམ་གྱི་ཡང་དག་པ་དོན་དུ་མ་ལ་འཇུག་པ་ཉིད་དེ། དེ་ཡང་རང་ཉིད་ཀྱིས་སྟོན་པ་གསུངས་པ། ཡོད་དོ་ཞེས་པ་ལ་སོགས་པའོ། །གལ་ཏེ་ཡང་སྨད་པ་ལ་
[162b]
[162b.1]སོགས་པ་རྣམས་ལ་ཡང་འཇུག་མོད། དེ་ལྟ་ན་ཡང་གང་ཁོ་ན་འདིར་དོན་གསུམ་སྲིད་པ་དེ་ཁོ་ན་ཉེ་བར་བཀོད་པའོ། །དེ་ལ་ཞེས་པ་ལ་སོགས་པའོ། །འདིར་ཁས་བླང་བར་བྱའོ་ཞེས་བརྟག་པར་བྱའོ། །དང་གི་སྒྲ་ནི་བསྡུ་བའི་དོན་ཏོ། །མ་ཡིན་པའི་ཡི་གེ་ནི་རིམ་པ་ཐ་དད་པ་སྟེ། རྣམ་པར་
[162b.2]གཅོད་པའི་སྒྲའི་དེ་མ་ཐག་ཏུ་བལྟ་བར་བྱའོ། །དེས་ན་དོན་འདིར་འགྱུར་ཏེ། རྣམ་པ་གསུམ་པོ་དེ་རྣམས་ལ། དེ་ལས་ཏེ་མཐུན་ཕྱོགས་ལས་གཞན་དང་དེ་དང་འགལ་བ་སྟེ། རྣམ་པ་གཉིས་པ་འདི་ཡང་མི་མཐུན་ཕྱོགས་སུ་རེ་ཞིག་ཁས་བླང་བར་གྱིས་ཞེས་པའོ། །རེ་ཞིག་གི་སྒྲས་དུས་ཕྱིས་
[162b.3]མེད་པར་ཡང་མི་མཐུན་ཕྱོགས་ཉིད་དུ་ཁས་ལེན་པ་བསལ་བར་བྱེད་པའོ། །དེར་འགྱུར་མོད། དེ་ལས་གཞན་པ་ལ་དང་དེ་དང་འགལ་བ་ལ་སྟེ། རྣམ་པ་གཉིས་ཀ་ཡང་འདིར་མི་མཐུན་པའི་ཕྱོགས་ཡིན་ན་སྐྱོན་ཡིན་ནོ། །གལ་ཏེ་དེ་ལས་གཞན་པ་མི་མཐུན་པའི་ཕྱོགས་ཉིད་དུ་ཁས་
[162b.4]ལེན་ནའང་ཁོ་བོ་ལ་གཏན་ཚིགས་མེད་པ་ཁོ་ནར་ཐལ་བར་འགྱུར་ཏེ། དེ་ལྟར་ནི་གང་ཁོ་ན་བུམ་པ་ལ་སོགས་པ་མཐུན་པའི་ཕྱོགས་ཡིན་པ་དེ་ཁོ་ན་མི་རྟག་པ་ཉིད་ལས་ཆོས་གཞན་དང་ལྡན་པའི་ཕྱིར་མཐུན་ཕྱོགས་ལས་གཞན་ནོ་ཞེས་པས་མི་མཐུན་ཕྱོགས་ཡིན་ཞིང་། དེ་ལ་ཡང་བྱས་པ་
[162b.5]ཉིད་ལ་སོགས་པ་འཇུག་པའི་ཕྱིར་མ་ངེས་པ་ཉིད་དུ་འགྱུར་རོ། །དེ་དང་འགལ་བ་མི་མཐུན་པའི་ཕྱོགས་ཉིད་ན་ཡང་། མེ་ནི་འདིར་དྲོ་བ་ཉིད་དོ་ཞེས་པ། མི་མཐུན་ཕྱོགས་རྣམ་པར་གཅོད་པས་གཏན་ཚིགས་བསྒྲུབ་པར་བྱ་བ་གོ་བར་བྱེད་དོ་ཞེས་པས་འགལ་བ་གྲང་བ་ཁོ་ན་ལས་རྣམ་པར་
[162b.6]བཅད་པར་མེ་བསྒྲུབ་པར་བྱ་བ་ན་གོ་བར་བྱེད་ཀྱི། དྲོ་བ་ཡང་མ་ཡིན་གྲང་བ་ཡང་མ་ཡིན་པ་ལས་ནི་མ་ཡིན་ཏེ། དེ་ནི་མི་འགལ་བ་ཉིད་ཀྱི་ཕྱིར་རོ། །དེ་ལས་ཀྱང་དྲོ་བའི་རེག་པ་རྟོགས་པར་འགྱུར་བ་མ་ཡིན་ནོ། །དེས་ན་ཅི་ལྟར་འདི་དག་མི་མཐུན་ཕྱོགས་སུ་ཁས་ལེན་པར་བྱེད་ཅེ་ན་གསུངས་པ།
[162b.7]གཉིས་ནི་ཞེས་པ་ལ་སོགས་པ་སྟེ། ནིའི་སྒྲ་ནི་གཏན་ཚིགས་ལའོ། །གང་གི་ཕྱིར་གཞན་པ་དང་འགལ་བ་དག་མི་མཐུན་ཕྱོགས་ཉིད་ཡིན་ན། རིམ་པ་ཇི་ལྟ་བར་གཏན་ཚིགས་མེད་པར་ཐལ་འགྱུར་བ་དང་འགལ་བ་ལས་ཀྱང་རྣམ་པར་གཅོད་པར་ཐལ་བར་འགྱུར་བ་མ་ཡིན་ནོ། །དེའི་ཕྱིར་འདི་
[163a]
[163a.1]གཉིས་ཀ་དག་གི་ཡང་མི་མཐུན་ཕྱོགས་ཉིད་དུ་ཁས་བླང་བར་བྱོས་ཤིག་ཅེས་པའི་དོན་ཏོ། །གལ་ཏེ་མཐུན་ཕྱོགས་ལས་གཞན་གང་ཡིན་པ་དེ་མི་མཐུན་ཕྱོགས་ཡིན་ན་ཞེས་པ་ལ་སོགས་པ་སྟེ། ཚིག་ཕྲད་ནི་རིམ་པ་ཐ་དད་པ་སྟེ། གལ་ཏེ་མཐུན་ཕྱོགས་ལ་གཞན་གང་
[163a.2]ཡིན་པ་དེ་མི་མཐུན་ཕྱོགས་ཡིན་ན་ཁྱོད་ལ་གཏན་ཚིགས་མེད་པ་འཐོབ་པ་མ་ཡིན་པ་ཁོ་ན་ཞེས་པའི་དོན་ཏོ། །འདི་ལྟར་སེམས་ཏེ། ཆོས་གཞན་དང་ལྡན་པ་ལས་མཐུན་པའི་ཕྱོགས་རང་ཉིད་ཁོ་ན་ལས་གཞན་ཉིད་དུ་རིགས་པ་ནི་མ་ཡིན་ཏེ། དེ་ལྟར་ནི་བྲམ་ཟེ་ལས་གཞན་ཤོག་ཅིག་ཅེས་བརྗོད་
[163a.3]པ་ནི། བྲམ་ཟེ་ཁོ་ན་སྐྱེས་བུ་ཉིད་ལ་སོགས་པ་ཆོས་གཞན་དང་ལྡན་པའི་ཕྱིར་བྲམ་ཟེ་ལས་གཞན་ཡིན་ནོ་ཞེས་འཇིག་རྟེན་ན་རྟོགས་པ་མ་ཡིན་གྱི། འོ་ན་ཅི་ཞེ་ན་བརྗོད་པར་འདོད་པའི་ཆོས་མི་བརྟེན་པ་རྒྱལ་རིགས་ལ་སོགས་པའོ། །དེའི་ཕྱིར་གཏན་ཚིགས་མེད་པར་ཐལ་བར་འགྱུར་བ་
[163a.4]མ་ཡིན་ནོ། །དེ་ལྟར་ནི་ཞེས་པ་ལ་སོགས་པས་ནི་གཅིག་མིན་སྒྲུབ་པར་བྱེད་པ་ཉིད་ནི། གཞན་པ་མི་མཐུན་ཕྱོགས་ཉིད་ཡིན་པ་ལ་གཏན་ཚིགས་སྟོན་པར་བྱེད་ཅིང་། དེ་མ་ཐག་པའི་གཏན་ཚིགས་མེད་པར་ཐལ་བར་འགྱུར་བ་མེད་པ་གཞུང་འཛུགས་པར་བྱེད་དོ། །གང་མཐུན་པའི་ཕྱོགས་ལ་ཡོད་
[163a.5]དོ་ཞེས་པས་མཐུན་ཕྱོགས་ཁོ་ན་ལ་ཡོད་ཅེས་ངེས་པར་བཟུང་བ་བལྟ་བར་བྱའོ། །དེ་མི་རྟག་པ་ཉིད་ལ་སོགས་པ་ལས་གཞན་ལ་ཡང་ཞེས་པ་སྟེ། འདིར་སྡུག་བསྔལ་ལ་སོགས་པ་ལ་ཞེས་པ་འདི་ནི་རྒྱུ་མཚན་གྱི་བདུན་པའོ། །དེ་ལ་འདི་ནི་ཚོགས་པའི་དོན་ཏེ། གང་གི་ཕྱིར་གང་མཐུན་ཕྱོགས་ཁོ་
[163a.6]ན་ལ་ཡོད་པའི་བྱས་པ་ཉིད་ལ་སོགས་པའི་ཕྱོགས་ཆོས་ནི་གཞན་པའི་མཚན་ཉིད་ཅན་གྱི་མི་མཐུན་ཕྱོགས་ལ་མེད་ཅིང་། དེ་ནི་མི་རྟག་པ་ཉིད་ཀྱི་རྒྱུ་མཚན་དུ་འགྱུར་བ་འབའ་ཞིག་ཏུ་མ་ཟད་ཀྱི། འོན་ཀྱང་མི་རྟག་པ་ཉིད་ལས་གཞན་ཡང་གང་ཆོས་གཞན་སྡུག་བསྔལ་བ་ཉིད་ལ་སོགས་པ་དེའི་རྒྱུ་མཚན་
[163a.7]ཡང་ཡིན་པ་དེའི་ཕྱིར་གཏན་ཚིགས་མེད་པར་ཐལ་བར་བཟློག་གོ། །གལ་ཏེ་ཡང་མཐུན་པའི་ཕྱོགས་དང་འགལ་བ་དེ་མི་མཐུན་ཕྱོགས་ཡིན་པ་དེ་ལྟ་ན་ཡང་སྐྱོན་མེད་དོ་ཞེས་པ་ལྷག་མའོ། །མཐུན་ཕྱོགས་དང་འགལ་བ་ཁོ་ན་ཞེས་ངེས་པར་གཟུང་བ་འདིར་བལྟ་བར་བྱའོ། །གལ་ཏེ་ཡང་ཞེས་པ་
[163b]
[163b.1]འདིས་འདི་སྐད་སྟོན་ཏེ། འགལ་བ་ཁོ་ན་མི་མཐུན་ཕྱོགས་ནི་མ་ཡིན་གྱི། འོ་ན་ཅི་ཞེ་ན་གཞན་པ་དང་མེད་པ་དག་ཀྱང་ངོ་། །དེས་ན་འདི་སྐྱོན་མེད་པ་ཁོ་ནའོ། །འགལ་བ་ཁོ་ན་མཐུན་ཕྱོགས་ཉིད་དུ་ཁས་བླངས་ནས་ནི་བདག་གིས་ལན་བརྗོད་པར་བྱའོ་ཞེས་པའོ། །ཅིའི་ཕྱིར་འགལ་བ་ཁོ་ན་མི་
[163b.2]མཐུན་ཕྱོགས་ཉིད་ན་སྐྱོན་མེད་ཅེ་ན། དེས་ན་ཞེས་པ་ལ་སོགས་པ་སྟེ། དེས་ན་ཞེས་པ་ནི་འགལ་བ་ཁོ་ན་མི་མཐུན་ཕྱོགས་ཉིད་ཀྱིས་སོ། །གང་ཁོ་ན་ལ་སྟེ་མི་མཐུན་ཕྱོགས་འགལ་བའི་བདག་ཉིད་ལ་མེད་པ་དེ་ཁོ་ན་རྣམ་པར་གཅོད་པ་བསྒྲུབ་པར་བྱ་བ་མ་རྟོགས་པར་འགྱུར་རོ་ཞེས་པའི་དོན་ཏོ། །འོ་ན་
[163b.3]གང་ལ་ཞེས་པ་སྤྱི་སྒྲ་འདི་ཅི་ལས་ཁྱད་པར་འདི་འཐོབ་པ་ཡིན་ཞེ་ན། འོ་ན་མི་མཐུན་ཕྱོགས་ཅི་ཡིན་ཞེས་པ་འདིར་མི་མཐུན་ཕྱོགས་ཀྱི་སྐབས་སུ་བྱས་པ་ཉིད་ཀྱི་ཕྱིར་རོ། །གཞན་རྣམས་ནི་གང་ཞིག་དེ་ཉིད་ལ་མེད་པ་ཞེས་ཀློག་པར་བྱེད་དོ། །འདི་ལྟར་བཤད་པར་བྱ་སྟེ། གང་དེ་ཁོ་ན་ལ་སྟེ། མཐུན་
[163b.4]ཕྱོགས་དང་འགལ་བའི་མི་མཐུན་ཕྱོགས་ཁོ་ན་ལ་མེད་པའོ། །ཁོ་ནའི་ཡི་གེ་ནི་མཐུན་ཕྱོགས་ལ་ཡོད་པ་ཉིད་རྣམ་པར་མི་གཅོད་པའི་དོན་ཅན་ནོ་དེས་ནི་དེ་རྣམ་པར་གཅོད་པ་སྟེ། འགལ་བ་རྣམ་པར་གཅོད་པ་ཁོ་ན་བསྒྲུབ་པར་བྱ་བ་ལ་རྟོགས་པར་བྱེད་དོ། །གལ་ཏེ་འགལ་བ་ཁོ་ན་རྣམ་པར་གཅོད་པ་བསྒྲུབ་
[163b.5]པར་བྱ་བ་ལ་རྟོགས་པར་བྱེད་ན་དེ་ལས་ཅི་ལྟར་མི་འདོད་པ་འོངས་པ་མ་ཡིན་ཞེ་ན། གསུངས་པ། དེ་ལྟར་ཡང་ཞེས་པ་ལ་སོགས་པའོ། །འདི་ལྟར་སེམས་ཏེ། མི་མཐུན་ཕྱོགས་ལས་ལོག་པའི་གཏན་ཚིགས་ནི་མཐུན་ཕྱོགས་མེད་པར་བསྒྲུབ་བྱ་ལ་རྟོགས་པར་བྱེད་ཅིང་དྲོ་མིན་གྲང་མིན་ནི་མ་ཡིན་ནོ། །
[163b.6]མི་མཐུན་ཕྱོགས་ཀྱང་འགལ་བ་གྲང་བ་ཁོ་ན་སྟེ། དེ་ལས་ཀྱང་འདི་ན་དྲོ་བ་ཉིད་དེ་མེའི་ཕྱིར་རོ་ཞེས་པ་འདི་ལ། མེ་གྲང་བ་མེད་པ་བསྒྲུབ་བྱ་ལ་གོ་བར་བྱེད་ཀྱི། དྲོ་མིན་གྲང་མིན་མེད་པ་ཡང་མ་ཡིན་ནོ། །འདི་ནི་འདོད་པ་ཡང་སྟེ། གང་གི་ཕྱིར་དྲོ་མིན་གྲང་མིན་གྱི་རེག་པ་ནི་གྲང་བ་དང་དྲོ་བ་དག་ལས་
[163b.7]གཞན་ཡོད་པ་མ་ཡིན་ཏེ། འཇམ་པ་ཉིད་དང་རྩུབ་པ་ཉིད་ལ་སོགས་པ་རེག་བྱའི་བྱེ་བྲག་རྣམས་ལས་གཞན་དུའོ། །དེ་ལྟར་ནི་བསྟན་བཅོས་སུ་རེག་བྱ་བཅུ་གཅིག་བདག་ཉིད་དུ་གསུངས་ཤིང་། དེའི་ནང་དུ་ཡང་དྲོ་མིན་གྲང་མིན་གྱི་རེག་བྱ་བཤད་པ་མེད་དོ། །དེའི་ཕྱིར་འཇམ་པ་ཉིད་ལ་སོགས་
[164a]
[164a.1]པ་རྣམས་ཁོ་ན་དྲོ་མིན་གྲང་མིན་ནོ། །དེ་རྣམས་ཀྱང་ཕྱོགས་གང་ན་དྲོ་བའི་རེག་པ་འཇུག་པའི་ཕྱོགས་དེ་ན་ཡོད་པ་ཁོ་ནའོ། །དེའི་ཕྱིར་གང་ན་དྲོ་བའི་རེག་པ་ཡིན་པ་དེ་ནི་དྲོ་མིན་གྲང་མིན་གྱི་རེག་པ་རྣམ་པར་གཅོད་པ་མེད་པ་ཁོ་ནའོ། །དྲོ་མིན་གྲང་མིན་གྱི་རེག་པ་འཇམ་པ་ཉིད་
[164a.2]ལ་སོགས་པ་ལས་ཐ་དད་པ་ཡོད་ན་ཆུག་མོད། དེ་ལྟ་ན་ཡང་ཇི་ལྟར་དྲོ་བའི་རེག་པ་གྲང་བའི་རེག་པ་དང་འགལ་བ་དེ་ལྟར་དྲོ་མིན་གྲང་མིན་དང་ཡང་སྟེ། ལྷན་ཅིག་མི་གནས་པ་ཉིད་ཀྱི་ཕྱིར་རོ། །ཅི་སྟེ་མི་འགལ་བ་དེ་ལྟ་ན་ཡང་ལྷན་ཅིག་གནས་པའི་ཕྱིར། གང་ན་དྲོ་བའི་རེག་པ་ཡོད་པ་དེ་ན་
[164a.3]དེ་རྣམ་པར་གཅོད་པ་མེད་པ་ཁོ་ནའོ། །དེ་མེད་པར་གལ་ཏེ་མེས་རྟོགས་པར་བྱེད་པ་མ་ཡིན་ན་ནི་མ་ཡིན་དུ་ཆུག་ཀྱང་ཡོད་པ་རྟོགས་པར་བྱེད་པ་མ་ཡིན་ན་སྐྱོན་དུ་འགྱུར་ཞིང་། མེད་པ་ནི་རྟོགས་པར་མི་བྱེད་པར་ཡང་འདོད་པ་ཁོ་ན་སྟེ། མི་འདོད་པ་འབབ་པར་ཡང་ཐལ་བར་འགྱུར་རོ་ཞེས་པའོ། །རེག་བྱ་ལ་
[164a.4]རྟོགས་པར་འགྱུར་རོ་ཞེས་པ་འདིར་རེག་བྱའི་སྒྲ་ནི་དེ་དང་ལྡན་པའི་ཕྱོགས་ལ་འཇུག་གོ་ཞེས་པའི་ཡི་གེ་ནི་གཏན་ཚིགས་ལའོ། །གང་གི་ཕྱིར་མེ་ནི་གྲང་བ་ཉིད་མེད་པ་རེག་བྱ་ལ་གོ་བར་བྱེད་ཀྱི་དྲོ་མིན་གྲང་མིན་མེད་པར་ཡང་མ་ཡིན་ཞིང་། དེ་འདོད་པ་ཡང་ཡིན་ནོ། །དེའི་ཕྱིར་གང་སྔར་འགལ་བ་ཁོ་ན་
[164a.5]ལས་རྣམ་པར་གཅོད་པར་ཐལ་བར་འགྱུར་བ་མ་ཡིན་ཏེ། དེ་ནི་མི་འདོད་པ་འབྱུང་བའི་མཚན་ཉིད་ཅན་ཉིད་ཀྱི་ཕྱིར་རོ། །གལ་ཏེ་འོ་ན་གང་ན་མེ་ཡོད་པ་དེ་ན་འཇམ་པ་ཉིད་ལ་སོགས་པའི་རེག་པ་ཡང་ཡོད་ན། ཅིའི་ཕྱིར་མེས་དྲོ་བའི་རེག་པ་ཁོ་ན་རྟོགས་པར་བྱེད་ཀྱི་གཞན་མ་ཡིན་ཞེ་ན། གང་ཞིག་ལ་
[164a.6]གང་གིས་ཁྱབ་པ་དེས་དེ་རྟོགས་པར་བྱེད་དེ། གལ་ཏེ་ཡང་དྲོ་བའི་རེག་པས་སམ་གཞན་གྱིས་ཀྱང་མེ་ལ་ཁྱབ་ན། དེ་ཡང་རྟོགས་པར་བྱེད་པ་ཁོ་ན་སྟེ། གཏན་ཚིགས་ནི་དོན་དུ་མ་གྲུབ་པར་བྱེད་པ་ཉིད་མི་འགལ་བ་ཁོ་ནའི་ཕྱིར་རོ། །ཅི་སྟེ་མ་གྲུབ་ན་དེ་ལ་འཁྲུལ་པ་ཉིད་ཀྱི་ཕྱིར་གོ་བར་བྱེད་པ་མ་ཡིན་ནོ་
[164a.7]ཞེས་པས་རྩོད་པ་འདི་མེད་དོ། །གཞན་པ་དང་འགལ་བའི་མི་མཐུན་ཕྱོགས་དག་འགྱུར་དུ་ཆུག་མོད། མེད་པ་ནི་ཅི་ལྟར་ཡིན། མེད་པ་མི་མཐུན་ཕྱོགས་ཉིད་ཡིན་ན་ནི། གང་འདི་སྐད་བརྗོད་པ། སོ་སོར་མི་མཐུན་ཕྱོགས་ལ་ཡང་། །ཡོད་མེད་རྣམ་པ་གཉིས་ཕྱིར་རོ། །ཞེས་པ་མི་རིགས་ཏེ། དངོས་
[164b]
[164b.1]པོར་མ་གྱུར་པའི་ཕྱོགས་ཆོས་ནི་མེད་པ་ལ་ཡོད་པ་ཉིད་དུ་འགྱུར་དུ་ཆུག་མོད། དངོས་པོར་གྱུར་པ་ནི་ཅི་ལྟར་ཞེ་ན། གསུངས་པ། དེ་ཕྱིར་མཐུན་ཕྱོགས་མེད་ཁོ་ནའོ་ཞེས་སོ། །ཁོ་ནའི་སྒྲ་ནི་དེའི་ཕྱིར་གྱི་སྒྲའི་དེ་མ་ཐག་པར་བལྟ་བར་བྱའོ། །དེའི་ཕྱིར་ཞེས་པ་འདིས་ཀྱང་དེ་མ་ཐག་ཏུ་བསྒྲུབ་པའི་
[164b.2]གཞན་པ་དང་། འགལ་བ་དག་མི་མཐུན་ཕྱོགས་སུ་འགྱུར་བ་ལ་སྙེགས་སོ། །གང་གི་ཕྱིར་གཞན་པ་དང་འགལ་བ་དག་མི་མཐུན་ཕྱོགས་ཡིན་པ་དེ་ཁོ་ནའི་ཕྱིར་མཐུན་ཕྱོགས་མེད་པ་ནི་མི་མཐུན་ཕྱོགས་སུ་འདོད་དོ། །དེ་ལས་ཀྱང་མེད་པའི་མཚན་ཉིད་ཅན་གྱི་མི་མཐུན་ཕྱོགས་ལ་ལྟོས་པས་
[164b.3]ཕྱོགས་ཆོས་ཡོད་དང་མེད་ཕྱིར་རོ་ཞེས་པ་འདི་མི་རིགས་སོ་ཞེས་པ་འདི་དོགས་པར་མི་བྱའོ། །གང་གི་ཕྱིར་མེད་པ་ཙམ་ནི་མི་མཐུན་ཕྱོགས་མ་ཡིན་ནོ། །འོ་ན་ཅི་ཞེ་ན། གཞན་པ་དང་འགལ་བ་དག་ཀྱང་ངོ་། །ཡང་ཅི་ལྟར་གསུམ་པོ་རྣམས་མི་མཐུན་ཕྱོགས་ཉིད་དུ་འཐོབ་ཅེ་ན། གང་གི་ཕྱིར་མཐུན་
[164b.4]ཕྱོགས་མ་ཡིན་པ་ནི་མི་མཐུན་ཕྱོགས་སོ་ཞེས་མཐུན་ཕྱོགས་ལྡོག་པ་ནི་མི་མཐུན་ཕྱོགས་ཀྱི་མཚན་ཉིད་ཡིན་ཞིང་། མ་ཡིན་པར་དགག་པ་དེ་ནི་མི་མཐུན་ཕྱོགས་དེ་དག་ལ་ཡང་མཚུངས་ཏེ། ལྡོག་པ་རྟོགས་པ་ནི་ཐམས་ཅད་ལ་མཚུངས་པ་ཉིད་ཀྱི་ཕྱིར་ཏེ། དངོས་དང་དོན་གྱིས་གོ་བས་ཀྱང་ངོ་ཞེས་
[164b.5]པའོ། །དེ་ལྟར་གཅིག་ཀྱང་ཞེས་པ་ལ་སོགས་པས། མེད་པ་མི་མཐུན་ཕྱོགས་ལ་གཏན་ཚིགས་དོན་དུ་མ་སྒྲུབ་པར་བྱེད་པ་ཉིད་དུ་སྟོན་ཅིང་མེད་པ་མི་མཐུན་ཕྱོགས་ཉིད་དུ་བརྟན་པར་བྱེད་དོ། །མཚན་ཉིད་ལས་ཞེས་པ་གཏན་ཚིགས་ཀྱི་མཚན་ཉིད་ལས་ཞེས་པའི་དོན་ཏོ། །གཞན་པ་དང་མེད་
[164b.6]པའི་མི་མཐུན་ཕྱོགས་དག་ལ། དུ་མ་སྒྲུབ་པར་བྱེད་པ་ཉིད་དུ་བསྟན་པའི་ཕྱིར་འགལ་བའི་མི་མཐུན་ཕྱོགས་ལ་ཡང་དེ་རྟོགས་པའོ་ཞེས་པས་མ་བཤད་དོ། །འོ་ན་ཡང་འདི་ཞེས་པ་ལ་སོགས་པས། གང་རྣམས་བྱས་པ་ཉིད་ཐུན་མོང་བ་ནི། དེ་ལ་ཐེ་ཚོམ་གྱི་རྒྱུ་ཡིན་ཏེ་བུམ་པ་ལ་སོགས་པ་བཞིན། དེ་
[164b.7]ཡང་ནི་མི་རྟག་པ་དང་བདག་མེད་པ་ཉིད་ལ་སོགས་པ་རྣམས་ཀྱི་ཐུན་མོང་བ་ཡང་ངོ་ཞེས་པ་རང་བཞིན་གྱི་གཟུགས་བརྙན་སྨྲས་སོ། །སྤྱི་ཞེས་པ་ལ་སོགས་པ་ཕྱོགས་ཀྱི་ཆོས་སོ། །བུམ་པ་ལ་སོགས་པ་རྣམས་ལ་ཞེས་པ་ནི་དཔེའོ། །ཐེ་ཚོམ་ཉིད་དུ་འགྱུར་ཞེས་བྱ་བ་ནི་ཚད་མའི་འབྲས་བུའོ། །
[165a]
[165a.1]མིན་ཞེས་པ་ལ་སོགས་པས་མ་ངེས་པར་གསུངས་སོ། །རྟོགས་པར་བྱར་མི་ནུས་པ་ཉིད་ཀྱི་ཕྱིར་ཐེ་ཚོམ་གྱི་རྒྱུ་ནི་བླུན་པོ་ཞེས་པར་གསུངས་སོ། །རྗེས་སུ་འགྲོ་བ་ནི་ཁྱབ་པའོ། །སྤྱི་ཡིན་ནོ་ཞེས་པ་ཁོ་ནས་ཐེ་ཚོམ་གྱི་རྒྱུ་ནི་མ་ཡིན་ཏེ། དེ་ལྟར་ནི་དུ་བ་ནི་རྫས་ཉིད་ལ་སོགས་པ་དོན་དུ་མ་
[165a.2]དང་ལྷན་ཅིག་འབྱུང་བ་ཐེ་ཚོམ་གྱི་རྒྱུ་མ་ཡིན་ནོ། །གལ་ཏེ་རང་གི་བསྒྲུབ་པར་བྱ་བ་མེད་པར་དུ་མ་ལ་འཇུག་ན་ཐེ་ཚོམ་གྱི་རྒྱུར་འགྱུར་རོ་ཞེས་སྟོན་པ་གསུངས་པ། བུམ་པ་ལ་ནི་ཞེས་པ་ལ་སོགས་པའོ། །བྱས་པ་ནི་བུམ་པ་ལ་སོགས་པ་རྣམས་ལ་ཕན་ཚུན་མེད་པ་ལའང་མཐོང་སྟེ། དེའི་ཕྱིར་དེ་
[165a.3]ནི་ཐེ་ཚོམ་གྱི་རྒྱུ་ཉིད་དུ་རིགས་ཀྱི། དེ་བདག་མེད་པ་ཉིད་ལ་སོགས་པ་རྣམས་ལ་ཕན་ཚུན་མེད་པ་ལ་མཐོང་བ་ནི་མ་ཡིན་ནོ་ཞེས་པས་ནི། སྤྱི་ཡིན་པའི་ཕྱིར་གོ་བར་བྱེད་པ་མ་ཡིན་ཏེ། ཁྱབ་པ་ཡོད་པ་ནའོ། །རྣམ་པར་གཅོད་པའི་གཏན་ཚིགས་སོ་ཞེས་པ་ནི་ངེས་པར་བྱེད་པའི་གཏན་ཚིགས་སོ་
[165a.4]ཞེས་པའི་དོན་ཏོ། །དང་གི་སྒྲ་ཕྱིས་པ་ལས་ཞེས་པ། དང་གི་དོན་རྟོགས་པའི་ཕྱིར་རོ་ཞེས་པའི་དོན་ཏོ། །གང་དུ་གང་སྦྱར་བ་མེད་ཀྱང་དོན་རྟོགས་པ་དེར་དེ་ཕྱིས་པའོ་ཞེས་བརྗོད་པར་བྱ་ཞིང་འདིར་ཡང་། ཡང་རྣམ་གསུམ་ཞེས་བརྗོད་པ་ལས་དང་། སྔར་ཡང་རྣམ་པ་གསུམ་ཉིད་དུ་བསྒྲུབས་
[165a.5]པའི་ཕྱིར་དོན་རྟོགས་སོ། །གཞན་དུ་ན་ཞེས་པ་ལ་སོགས་པ་སྟེ། གལ་ཏེ་ཡང་ཇི་སྐད་བརྗོད་པའི་རྣམ་པས་དང་གི་དོན་རྟོགས་པ་མ་ཡིན་ན། དེ་ལས་གཉིས་པོ་འདི་ཁོ་ནའི་ལྷུར་ལེན་པ་རྟོགས་པར་འགྱུར་རོ། །དེ་ལྟ་ན་གང་གི་ཚེ་ཞེས་པ་ལ་སོགས་པས། མཚན་ཉིད་མ་ཁྱབ་པ་ཉིད་སྨྲས་སོ། །
[165a.6]དངོས་པོ་ཡོད་ན་དེ་ལ་མེད་དོ་ཞེས་སྨྲ་བ་ནུས་ཀྱི་གཞན་དུ་ན་མ་ཡིན་ནོ། །གང་གི་ཕྱིར་རྟེན་གྱི་བྱེ་བྲག་གི་ཁྱད་པར་ཅན་དུ་འདིར་མེད་པ་ཉིད་བརྗོད་པ་ཡིན་ནོ། །མཐུན་ཕྱོགས་མེད་པ་ཡང་མི་མཐུན་ཕྱོགས་སུ་བརྗོད་པ་མ་ཡིན་ནམ་ཞེ་ན། དེ་ནི་ཅི་ལྟར་མེད་དོ་ཞེས་བརྗོད་པར་བྱ་སྟེ། དངོས་པོར་གྱུར་པ་མེད་
[165a.7]དོ་ཞེས་བསམ་པའོ། །དེའི་ཚེ་ཞེས་པ་ལ་སོགས་པ་སྟེ། འདིར་རྟེན་རྣམ་པར་བཅད་པའི་དབང་ནི་མ་ཡིན་གྱི། འོ་ན་ཅི་ཞེ་ན་བསྒྲུབ་པར་བྱ་བ་མེད་པ་ལ་མེད་པ་བརྗོད་པས། བསྒྲུབ་པར་བྱ་བ་ཡོད་པར་གྱུར་པ་ལ་རྟགས་ཡོད་པར་བརྗོད་པའོ། །གལ་ཏེ་ཡང་དངོས་པོ་རྟག་པ་མེད་པ་ཁོ་ན་ཡིན་ན་དེ་ལ་ཡོད་
[165b]
[165b.1]པར་ཆེས་ཤིན་ཏུ་འགྲུབ་སྟེ། དངོས་པོ་རྟག་པ་ཡོད་ན་བྱས་པ་ཉིད་ལ་སོགས་པ་དངོས་པོའི་ཆོས་ནི་དེ་ལ་ཡང་འཇུག་པར་དོགས་ཤིང་། དེ་ལས་ཀྱང་དེ་ཡོད་པར་བརྗོད་པའི་ཆེད་དུ་འབད་པ་གནས་པར་བྱའོ། །གང་གི་ཚེ་དངོས་པོ་རྟག་པ་མེད་པ་ཁོ་ནའོ་ཞེས་ཁས་ལེན་པ་དེའི་ཚེ། བསྒྲུབ་པར་བྱ་བའི་
[165b.2]སྒྲུབ་པར་བྱེད་པ་ཡོད་པ་ཐེ་ཚོམ་མེད་པ་ཁོ་ནའོ། །གཏན་ཚིགས་ཁོ་ན་འབའ་ཞིག་པ་བརྗོད་པར་བྱ་སྟེ། གང་གི་དོན་དུ་དཔེ་བརྗོད་པར་བྱ་བའི་དོན་དེ་གྲུབ་ཟིན་བྱས་ནས་སོ་ཞེས་པ་དགོངས་པའོ། །རྒྱུ་ཅིའི་ཕྱིར་དེ་ལྟར་ཕྱོགས་ཆོས་རྣམ་པ་དགུར་ཕྱེ་ཞེ་ན། གང་ལ་དེའི་བདག་ཉིད་ཀྱི་མཚན་ཉིད་ཅན་གྱི་
[165b.3]འབྲེལ་པ་ཅན་དང་། གང་ལ་འབྲས་བུ་དང་རྒྱུའི་དངོས་པོའི་སྒོ་ཅན་དེ་དག་ཁོ་ན་རང་གི་ཁྱབ་བྱེད་བསྒྲུབ་པར་བྱ་བ་ལ་གོ་བར་བྱེད་པ་ཉིད་ཡིན་ཞིང་། བཟློག་པ་ན་ཡང་ཟློག་པར་བྱེད་པའོ་ཞེས་བསྟན་པའི་དོན་དུ། སྒྲ་མི་རྟག་སྟེ་བྱས་པ་ཉིད་ཀྱི་ཕྱིར་དང་། རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་ཞེས་པ་
[165b.4]གཏན་ཚིགས་གཉིས་དག་ངེས་པར་བསྟན་ཅིང་། སྒྲ་རྟག་སྟེ་བྱས་པ་ཉིད་ཀྱི་ཕྱིར་དང་རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་རོ་ཞེས་པ་འགལ་བ་གཉིས་དག་ཀྱང་ངོ་། །ཁ་ཅིག་ཁྱད་པར་དང་སྤྱིའི་མ་ངེས་པ་དག་ཀྱང་མཐའ་གཅིག་པ་ཅན་ཉིད་དུ་སྨྲའོ། །དེའི་ཕྱིར་ལྡོག་པ་ཅན་དང་རྗེས་སུ་འགྲོ་བ་ཅན་ནི་གོ་བྱེད་
[165b.5]ཀྱི་གཏན་ཚིགས་མ་ཡིན་ནོ་ཞེས་སྒྲུབ་པའི་ཆེད་དུ་གཞན་གཉིས་དག་སྟེ། དཔེར་ན་སྒྲ་རྟག་སྟེ་མཉན་པར་བྱ་བ་ཉིད་ཀྱི་ཕྱིར་དང་། གཞལ་བྱ་ཉིད་ཀྱི་ཕྱིར་རོ་ཞེས་པ་ལྟ་བུའོ། །གཏན་ཚིགས་ཀྱི་ལྡོག་པ་གཙོ་བོར་བཤད་པའི་ཆེད་དུ་གསུམ་སྟེ། དེ་ལྟར་ནི་རྗེས་སུ་འགྲོ་བའི་སྒོ་ནས་ནི་གཏན་ཚིགས་གོ་བྱེད་
[165b.6]མ་ཡིན་ཏེ། མི་རྟག་པ་ཉིད་ཀྱི་ཕྱིར་རྩོལ་མ་ཐག་ཏུ་བྱུང་བ་མ་ཡིན་པའོ་ཞེས་པས་མ་གོ་བའི་ཕྱིར་རོ། །དེ་ལས་མི་འགྱུར་ཏེ་ལྡོག་པ་མེད་པ་ཉིད་ཀྱིས་ན་རྗེས་སུ་འགྲོ་བ་འབའ་ཞིག་པ་ཉིད་ཀྱི་ཕྱིར་རོ་ཞེ་ན། འོ་ན་རེག་བྱ་མ་ཡིན་པའི་ཕྱིར་རྟག་གོ་ཞེས་པ་འདི་ལ་འགྱུར་རོ། །འདི་ལ་ཡང་རྗེས་སུ་འགྲོ་བ་གཙོ་བོ་
[165b.7]མ་ཡིན་པ་ཉིད་ཀྱི་ཕྱིར་མ་ཡིན་ནོ་ཞེ་ན། འདི་ལ་རྗེས་སུ་འགྲོ་བ་སྟོབས་དང་ལྡན་ཞིང་ལྡོག་པ་སྟོབས་ཆུང་བ་སྟེ། གཏན་ཚིགས་མཐུན་ཕྱོགས་ལ་ཁྱབ་པའི་ཕྱིར་དང་མི་མཐུན་ཕྱོགས་འགའ་ཞིག་ལ་མེད་པའི་ཕྱིར་ཏེ། དཔེར་ན་རྩོལ་མ་ཐག་ཏུ་བྱུང་བ་སྟེ། མི་རྟག་པ་ཉིད་ཀྱི་ཕྱིར་རོ་ཞེས་པ་གོ་བྱེད་དུ་
[166a]
[166a.1]འགྱུར་ན་འགྱུར་བ་ཡང་མ་ཡིན་ནོ། །དེའི་ཕྱིར་རྗེས་སུ་འགྲོ་བ་ཡོད་པ་ཙམ་གྱིས་མ་ཡིན་ཞིང་ལྡོག་པ་དང་བཅས་པ་ཉིད་ཀྱིས་མ་ཡིན་ལ་གཙོ་ཆེ་བས་ཀྱང་གཏན་ཚིགས་གོ་བར་བྱེད་པ་མ་ཡིན་གྱི་འོན་ཀྱང་ཐམས་ཅད་ལས་ལྡོག་པ་ངེས་པས་ཡིན་ནོ། །དེ་ལས་ཀྱང་
[166a.2]གང་བྱས་པ་དེ་མི་རྟག་པ་ཁོ་ནའོ་ཞེས་རྟག་པ་རྣམ་པར་གཅོད་པས་གོ་བར་བྱེད་དོ། །འོ་ན་སྒྲ་མི་རྟག་སྟེ་རྩོལ་མ་ཐག་བྱུང་བ་ཉིད་ཀྱི་ཕྱིར་ཞེས་པའི་དཔེར་བརྗོད་འདི་ཁོ་ན་བསྟན་པས་གཏན་ཚིགས་ཀྱི་མཚན་ཉིད་ཀྱི་ཡུལ་བསྟན་པ་ཁོ་ན་སྟེ། རྩོལ་མ་ཐག་པའི་བསལ་བ་འབྱུང་བ་དང་སྐྱེ་བ་དག་ལ་རྩོལ་
[166a.3]མ་ཐག་ཏུ་འབྱུང་བའི་སྒྲས་བརྗོད་པའི་ཕྱིར་རོ། །དེ་ལ་གང་གི་ཚེ་བསལ་བ་ཤེས་པའི་མཚན་ཉིད་དུ་བརྗོད་པར་བྱ་བ་དེའི་ཚེ་རྩོལ་མ་ཐག་ཏུ་བྱུང་བ་ཉིད་ནི་འབྲས་བུར་འགྱུར་ཞིང་། གང་གི་ཕྱིར་སྐྱེ་བ་ཡིན་པ་དེའི་ཚེ་ནི་རང་བཞིན་ནོ། །དེས་ན་ཅིའི་དོན་དུ་རང་བཞིན་བྱས་པ་ཉིད་ཐ་དད་དུ་དཔེར་བརྗོད་ཅེ་ན།
[166a.4]རང་བཞིན་ཐམས་ཅད་རྣམ་པ་འདི་ལྟ་བུར་མཐུན་ཕྱོགས་ཀྱི་ཕྱོགས་གཅིག་ལ་ཡོད་པ་ཁོ་ནའོ་ཞེས་ཁ་ཅིག་དོགས་པར་འགྱུར་ཏེ། དེའི་ཕྱིར་དེ་བསལ་བའི་ཆེད་དུ་ཐ་དད་པར་དཔེར་བརྗོད་དོ། །གཏན་ཚིགས་ཀྱི་ཚིག་བྱེ་བྲག་ཏུ་རྟོགས་པར་བྱ་བའི་ཆེད་དུ་རང་དོན་རྗེས་སུ་དཔག་པར་བཤད་ཟིན་
[166a.5]པའི་དོན་ཅན་ཡིན་ཡང་སླར་ཡང་འདིར་སྐབས་སུ་བྱ་སྟེ། དེས་ན་རབ་ཏུ་དབྱེ་བ་ཙམ་བཤད་དེ། མཚན་ཉིད་ནི་དེ་ཁོ་ནའོ། །གཞན་ཡང་ཞེས་པ་ལ་སོགས་པས་ངེས་པར་གཟུང་བ་ངས་ཉེ་བར་ཐོབ་པར་བྱེད་དེ། འདི་ཡང་ཅི་ཞིག་ཡིན་ཞེ་ན་གསུངས་པ། བསྒྲུབ་བྱ་ལ་གནོད་པར་བྱེད་པའི་སྒྲུབ་བྱེད་
[166a.6]ཅེས་པའི་འཆད་པར་འགྱུར་བའི་འདུས་པ་ཉིད་ལ་ལྟོས་པས་ན་མ་ནིང་གིས་བསྟན་ཏོ། །འགལ་བ་ཐམས་ཅད་ཀྱང་བསྒྲུབ་བྱ་ལ་གནོད་པར་བྱེད་པའི་སྒྲུབ་བྱེད་ཡིན་ཏེ། དེའི་ཕྱིར་བསྒྲུབ་བྱ་ལ་གནོད་པའི་སྒྲུབ་བྱེད་ཅེས་པའི་ཚིག་གི་ཤུགས་ལས་ཁྱད་པར་རྟོགས་པར་བྱ་ཞིང་། དེ་ཡང་གང་ངག་ཏུ་
[166a.7]མ་བརྗོད་ཀྱང་འདོད་པས་ཁྱབ་པ་ལ་གནོད་པ་སྒྲུབ་པར་བྱེད་པ་དེ་ཡིན་པར་རིག་པར་བྱའོ། །དེ་ཉིད་ཀྱི་ཕྱིར་འདི་ནི་གནོད་པ་ལ་གནོད་པར་བྱེད་པའོ་ཞེས་བརྗོད་པར་བྱའོ། །དེ་དཔེར་བརྗོད་ཀྱིས་སྟོན་ཏེ། དཔེར་ན་ཞེས་པ་ལ་སོགས་པས་སོ། །ཐ་དད་པ་རྣམས་ཀྱི་ཞེས་པ་མིག་ལ་སོགས་པ་རྣམས་
[166b]
[166b.1]ཀྱིའོ། །དེ་ནི་ཞེས་པ་ལ་སོགས་པ་སྟེ། འདུས་པ་ཉིད་ནི་གཞན་གྱི་དོན་ཡང་སྒྲུབ་པར་བྱེད་དོ། །འདུས་པ་ཉིད་ཀྱང་ཆོས་སམ་ཆོས་ཅན་གྱི་ཁྱད་པར་ལ་གནོད་པར་བྱེད་དོ། །གང་ཁོ་ན་འདིས་བསྒྲུབ་པར་འདོད་པ་དེ་ཁོ་ན་ལ་ལྟོས་ནས་ཆོས་དང་ཆོས་ཅན་གྱི་ཁྱད་པར་དུ་བཤད་དེ། གཡོན་ཅན་གྱི་
[166b.2]ཐ་སྙད་ལ་ཁྱད་པར་ཇི་ལྟ་བ་བཞིན་སྐྱོན་བསྟན་པའི་དོན་དུའོ། །འདི་རྣམས་ནི་འདུས་པ་མ་ཡིན་པའི་ཡུལ་ཅན་གཞན་གྱི་དོན་ཡིན་ཏེ་ཞེས་བརྗོད་པ་ན་ཆོས་ཀྱི་ཁྱད་པར་ཉིད་དུ་ཉེ་བར་བླངས་པའི་ཕྱིར་དེའི་ཁྱད་པར་ཡིན་ཞིང་། མིག་ལ་སོགས་པ་འདུས་པ་མ་ཡིན་པའི་དོན་རྣམས་གཞན་གྱི་དོན་ཡིན་ནོ་ཞེས་
[166b.3]པ་ཆོས་ཅན་གྱི་ཁྱད་པར་རོ། །གཏན་ཚིགས་ཁོ་ནའི་ནང་དུ་འདུས། །ཞེས་པ། ཇི་ལྟར་གནས་པའི་དངོས་པོའི་རང་གི་ངོ་བོ་འདོད་པའམ་མི་འདོད་པ་སྒྲུབ་པར་བྱེད་པ་གང་ཡིན་པ་དེ་གཏན་ཚིགས་ཏེ། འདིར་ནི་འགལ་བ་གཞན་ཡང་ཡོད་དོ་ཞེས་པའི་ཚིག་ལས། སྦྱོར་བ་པོའི་འདོད་པ་ལས་བཟློག་
[166b.4]པ་སྒྲུབ་པར་བྱེད་པ་གང་ཡིན་པ་དོན་གཅིག་མིན་སྒྲུབ་པར་བྱེད་པ་དེའི་ནང་དུ་འདུ་བར་རིག་པར་བྱའོ། །ཇི་ལྟར་སྒྲ་རྟག་སྟེ་བྱས་པ་ཉིད་ཀྱི་ཕྱིར་རོ་ཞེས་པ་དོན་གཅིག་མིན་སྒྲུབ་པར་བྱེད་པ་འགལ་བའི་གཏན་ཚིགས་ཁོ་ན་ཡིན་པ་དེ་ལྟར་འདི་ཡང་ངོ་ཞེས་པའོ་ཞེས་པའི་ཡི་གེ་ནི་གཏན་ཚིགས་ལ་སྟེ། གང་གི་
[166b.5]ཕྱིར་དོན་གཅིག་མིན་སྒྲུབ་པར་བྱེད་པའི་འགལ་བའི་གཏན་ཚིགས་ཀྱི་ནང་དུ་འདུས་པ་དེའི་ཕྱིར་དགུ་པོ་རྣམས་ལས་ཕྱི་རོལ་དུ་རྣམ་པར་གཞག་པ་མ་ཡིན་ནོ། །དེའི་ཕྱིར་ངེས་པར་གཟུང་བ་འགལ་བ་མེད་དོ་ཞེས་པ་དགོངས་པའོ། །འོ་ན་འདུས་པ་རྣམས་གཞན་ལ་ཕན་འདོགས་པར་བྱེད་པ་ངེས་པ་མེད་པའི་
[166b.6]ཕྱིར་འདི་འགལ་བ་མ་ཡིན་པ་ཁོ་ན་སྟེ། གང་འདུས་པ་རྣམས་གཞན་ལ་ཕན་པ་བྱེད་པའོ་ཞེས་པའི་ངེས་པ་འདི་ཅི་ཡོད་དེ། འདི་ཡང་རྒྱུ་རྣམས་ནི་གདོན་མི་ཟ་བར་འབྲས་བུ་དང་ལྡན་པ་མ་ཡིན་པས་ཤེ་ན། སྐྱོན་འདི་མེད་དེ། འདིར་ཕན་འདོགས་པའི་བྱ་བ་ལ་ཐོགས་པ་མེད་པའི་ནུས་པ་ཅན་གྱི་མིག་ལ་སོགས་
[166b.7]པ་རྣམས་ཕྱོགས་སུ་བྱས་པ་ཉིད་ཀྱི་ཕྱིར་རོ། །དེ་ལྟར་ན་ཡང་འདུས་པ་ལ་ཕན་འདོགས་པ་ཞེས་པའི་འབྲེལ་བ་ཅི་ཞེ་ན། འདི་ཡང་སྐྱོན་མ་ཡིན་པ་ཁོ་ན་སྟེ། གང་གི་ཕྱིར་རྣམ་པ་འདི་ལྟ་བུའི་མིག་ལ་སོགས་པ་རྣམས་ཀྱི་རང་བཞིན་དུ་གྱུར་པ་ཁོ་ནའི་ཕན་པ་རྣམས་གཞན་ལ་བྱེད་དེ། དེ་ལྟར་གྱུར་པའི་ཕན་པ་
[167a]
[167a.1]བྱེད་པ་དེ་རྣམས་ཁོ་ན་འདུས་པའི་སྒྲས་བརྗོད་དེ། དུ་མའི་བདག་ཉིད་ཅན་ཉིད་ཆོས་མཐུན་པ་ཉིད་ཀྱི་ཕྱིར་རོ། །དེ་གྲུབ་ན་ཡང་སྐྱེས་བུའི་འདོད་པས་གཞག་པའི་གཅིག་གི་རང་བཞིན་ཉིད་ཉམས་པར་བྱེད་དོ་ཞེས་པས་འགལ་བར་འགྱུར་རོ། །འདིར་གཅིག་གི་ཚིག་གི་མཐའ་
[167a.2]ཅན་གྱི་རིགས་ཀྱི་སྒྲ་རྣམས་ལ་ཁ་ཅིག་ཏུ་རིགས་ཙམ་བརྗོད་པར་འདོད་ཀྱི་གྲངས་མ་ཡིན་ཏེ། དཔེར་ན་བྲམ་ཟེ་གཞོམ་བྱ་མ་ཡིན་ཞེས་པ་ལྟ་བུའོ། །ཁ་ཅིག་ཏུ་གཅིག་ཉིད་ཀྱི་གྲངས་ཏེ་དཔེར་ན་འདིར་བ་ལང་འགའ་ཞིག་མཐོང་ངོ་ཞེས་པ་ལྟ་བུའོ། །བ་ལང་གི་སྒྲ་ནི་གསལ་བའི་ཁྱད་པར་
[167a.3]ཉེ་བར་མཚོན་པའི་དོན་དུའོ། །ཁ་ཅིག་ཏུ་གཉིས་ཀ་སྟེ། དཔེར་ན་ཕྱུགས་ཀྱིས་མཆོད་སྦྱིན་བྱེད་དོ་ཞེས་པ་འདི་ལྟ་བུར་རོ། །འདིར་གཏན་ཚིགས་ལ་སོགས་པའི་མཚན་ཉིད་ལ་རྟོགས་པ་ཅི་ཡིན་ཞེ་ན་གསུངས་པ། འདིར་ཡང་ཞེས་པ་བརྗོད་མ་ཐག་པའི་ཚིགས་སུ་བཅད་པར་རོ། །
[167a.4]གཏན་ཚིགས་ལ་སོགས་པའི་མཚན་ཉིད་རྣམས་ལ་ཞེས་པ། སོགས་པའི་སྒྲས་འགལ་བ་དང་མ་ངེས་པར་གཟུང་ངོ་། །འདི་ལ་གྲངས་གཅིག་ཡིན་པ་ཞེས་པ་ནི་གྲངས་གཅིག་ཅན་ཏེ་དེའི་དངོས་པོ་ནི་གྲངས་གཅིག་ཅན་ཉིད་དོ། །བརྗོད་པར་འདོད་པ་ཡང་དེ་ཡིན་ལ་གྲངས་གཅིག་པ་ཅན་ཡང་
[167a.5]ངོ་ཞེས་ཚིག་རྣམ་པར་སྦྱར་རོ། །དེ་ཡང་ཅི་ཞིག་ལ་ཞེ་ན་གསུངས་པ། རིགས་ཀྱི་ཚིག་གི་དོན་ལ་ཞེས་པ་སྟེ། འདིར་ཁ་ཅིག་རིགས་ཚིག་གི་དོན་དུ་འདོད་ཅིང་། གཞན་རྣམས་ནི་རྫས་ཏེ། དེའི་ཕྱིར་ཁྱད་པར་གྱི་དོན་དུ་དེ་སྐད་བརྗོད་དོ། །འདི་སྐད་བརྗོད་པར་འགྱུར་ཏེ། རྟེན་གྱི་གྲངས་ཀྱིས་
[167a.6]འདིར་རིགས་ངེས་པར་བསྟན་པའོ། །དེའི་ཕྱིར་གཏན་ཚིགས་གཅིག་ལ་སོགས་པའི་གཞི་ཁོ་ན་འདིར་གཏན་ཚིགས་ལ་སོགས་པའི་རིགས་སུ་རིག་པར་བྱའོ་ཞེས་པའོ། །ཅིའི་ཕྱིར་ཞེ་ན་ཞེས་པ། རེ་ཞིག་རིགས་བརྗོད་པར་འདོད་པ་ནི་རིགས་པ་ཡིན་ན། དཔེར་བརྗོད་མཚན་ཉིད་གཅིག་སྦྱར་
[167a.7]བར་ནི་འོས་པ་མ་ཡིན་ཏེ། དེ་ཉིད་རང་གི་ངོ་བོས་རྗོད་པར་ཐལ་བའི་ཕྱིར་ཏེ། འཛིན་ཏོ་ཞེས་པ་ལ་སོགས་པའི་སྒྲ་བཞིན་ནོ། །ཅི་སྟེ་གཅིག་ཉིད་ཀྱི་གྲངས་བརྗོད་པར་འདོད་པའི་དགོས་པ་ཅི་ཡིན་ཞེས་མི་ཤེས་པ་འདྲི་བར་བྱེད་པའོ། །འགལ་བ་དག་ལས་ཞེས་པ་ལ་སོགས་པ་ལ་ཕན་ཚུན་
[167b]
[167b.1]འགལ་བའི་དོན་སྒྲུབ་པར་བྱེད་པ་ཉིད་ཀྱི་ཕྱིར་འགལ་བ་དག་སྟེ། སྒྲ་མི་རྟག་སྟེ་བྱས་པ་ཉིད་ཀྱི་ཕྱིར་བུམ་པ་བཞིན། སྒྲ་རྟག་སྟེ་མཉན་པར་བྱ་བ་ཉིད་ཀྱི་ཕྱིར་སྒྲ་ཉིད་བཞིན་ཞེས་པ་འདི་དག་གཉི་ག་ཡང་རང་གི་ཡུལ་ལ་ངེས་པར་བྱེད་པའི་གཏན་ཚིགས་དག་ཡིན་ཞིང་། ཚོགས་པ་དག་ནི་ཐེ་ཚོམ་གྱི་རྒྱུ་
[167b.2]ཉིད་དུ་མཐོང་ངོ་། །དེ་བཞིན་དུ་སྒྲ་རྟག་སྟེ་བྱས་པའི་ཕྱིར། མི་རྟག་སྟེ་མཉན་བྱ་ཉིད་ཀྱི་ཕྱིར་ཞེས་བསྣོལ་བ་དག་ལ་ནི་འགལ་བ་དག་ཀྱང་མཉམ་པ་དག་ལ་ཐེ་ཚོམ་གྱི་རྒྱུ་ཉིད་དོ། །འདི་ནི་སྔ་མ་ཁོ་ནས་རྟོགས་པ་ཉིད་ཀྱི་ཕྱིར་དཔེར་མ་བརྗོད་དོ། །དེ་བཞིན་ཐེ་ཚོམ་རྟགས་དག་ལས། །ཞེས་པ་
[167b.3]གང་གི་ཚེ་སྒྲ་ནི་རྫས་མ་ཡིན་ཞིང་། ལས་མ་ཡིན་ཏེ་མིག་གིས་གཟུང་བྱ་མ་ཡིན་པ་ཉིད་ཀྱི་ཕྱིར་ན་རོ་བཞིན་ནོ་ཞེས་བྱ་བ་དེའི་ཚེ་ཡིད་ཀྱིས་དང་དེ་རྟོགས་པའི་ལས་ཀྱིས་ཀྱང་མ་ངེས་པའི་ཕྱིར་ཐེ་ཚོམ་མོ། །གང་གི་ཚེ་ཡང་མངོན་སུམ་ཡིན་པ་ཉིད་ཀྱི་ཕྱིར་ཞེས་བྱས་པ་དེའི་ཚེ་ཡང་བུམ་པ་ལ་སོགས་པས་
[167b.4]དང་དེས་རྟོགས་པའི་ལས་ཀྱིས་སོ། །གང་གི་ཚེ་སྒྲ་ནི་རྫས་མ་ཡིན་ཞིང་ལས་མ་ཡིན་ཏེ། མིག་གིས་གཟུང་བྱ་མ་ཡིན་ཞིང་མངོན་སུམ་པ་ཉིད་ཀྱི་ཕྱིར་རོ་བཞིན་ཞེས་ལྷན་ཅིག་པ་དག་སྦྱོར་བ་དེའི་ཚེ་ངེས་པ་མཐོང་ངོ་། །འོ་ན་མེད་ན་མི་འབྱུང་བ་ནི་གཏན་ཚིགས་ཀྱི་མཚན་ཉིད་དེ། དེ་ཡང་འབྲས་བུ་
[167b.5]དང་རང་བཞིན་དག་ཁོ་ན་ལ་ཡིན་ནོ། །འབྲས་བུ་དང་རང་བཞིན་ཉིད་ཀྱང་དངོས་པོ་རྣམས་ལ་གནས་པ་ཁོ་ན་སྟེ། དེ་དོན་གཞན་ལ་ཉེ་བར་གནས་པས་ཉམས་པའམ་སྐྱེ་བ་ནི་མ་ཡིན་ནོ། །དེའི་ཕྱིར་གང་ཞིག་གང་གི་གཏན་ཚིགས་ཡིན་པ་ནི་དོན་གཞན་དང་ལྷན་ཅིག་པ་ཡང་དེ་དེའི་གཏན་ཚིགས་ཁོ་ན་སྟེ།
[167b.6]གང་ཡང་གང་ལ་ཐེ་ཚོམ་གྱི་རྒྱུ་ཡིན་པ་ནི་ལྷན་ཅིག་པ་ཡིན་ཡང་དེ་དེ་ལ་ཐེ་ཚོམ་གྱི་རྒྱུ་ཁོ་ནའོ། །དེའི་ཕྱིར་ཞེ་ན་གཅིག་ཉིད་ཀྱི་གྲངས་བརྗོད་པར་འདོད་ཅེ་ན་འདི་ནི་སྐྱོན་མ་ཡིན་ཏེ། དངོས་པོའི་སྟོབས་ཀྱིས་ཞུགས་པའི་རྟགས་ཁོ་ན་ལ་འདི་དེ་ལྟར་ཡིན་ཞིང་དེའི་དབང་དུ་བྱས་ནས་བརྗོད་པར་འདོད་པའི་
[167b.7]གྲངས་གཅིག་པ་ཉིད་བཤད་པ་ཡང་མ་ཡིན་ནོ། །འོ་ན་ཅི་ཞེ་ན། དངོས་པོའི་སྟོབས་ཀྱིས་མ་ཞུགས་པ་ལུང་ལ་བརྟེན་པའི་སྟེ། དེ་ལ་ཡང་ཇི་སྐད་བཤད་པའི་རྣམ་པ་སྲིད་དེ། བསྟན་བཅོས་བྱེད་པ་རྣམས་དོན་རྣམས་ལ་འཁྲུལ་པས་ཕྱིན་ཅི་ལོག་གི་རང་བཞིན་ཉེ་བར་སྡུད་པའི་ཕྱིར་རོ། །གལ་ཏེ་དེ་
[168a]
[168a.1]ལྟ་ན་འདིར་བྱས་པ་ཉིད་དེ་མཉན་བྱ་དག་ལས་སྒྲ་ལ་རྟག་པ་ཉིད་དང་མི་རྟག་པར་ཐེ་ཚོམ་མཐོང་ངོ་ཞེས་བཤད་པ་དེ་ཅི་ལྟར་ཡིན། ཇི་ཙམ་དུ་བྱས་པ་ཉིད་ནི་དངོས་པོའི་སྟོབས་ཀྱིས་ཞུགས་པ་ཡིན་ཏེ། དེའི་ཕྱིར་དེ་འདིར་ཉེ་བར་དགོད་པར་མི་རིགས་སོ་ཞེ་ན། སྐྱོན་འདི་མེད་
[168a.2]དེ། ཕྱོགས་ཙམ་བསྟན་པའི་ཆེད་དུ་དཔེར་བརྗོད་པ་འདི་སློབ་དཔོན་གྱིས་གསུངས་སོ། །འདི་ནི་འདིར་དཔེ་བརྗོད་དུ་རིགས་ཏེ། གང་ཡུལ་ཐམས་ཅད་ན་གནས་པའི་རང་དང་འབྲེལ་པ་ཅན་རྣམས་དང་ཅིག་ཅར་འབྲེལ་པ་དེ་ནི་ཐམས་ཅད་དུ་སོང་བ་ཡིན་ཏེ་དཔེར་ན་ནམ་མཁའ་བཞིན། སྤྱི་ཡང་
[168a.3]ཡུལ་ཐམས་ཅད་ན་གནས་པའི་རང་དང་འབྲེལ་པ་ཅན་རྣམས་དང་ཅིག་ཅར་འབྲེལ་པའོ་ཞེས་པ་སྟེ། དེ་དང་འབྲེལ་བ་ཅན་གྱི་རང་བཞིན་ཙམ་དང་རྗེས་སུ་འབྲེལ་པ་ནི་དེའི་ཡུལ་ན་འདུག་པའི་རང་བཞིན་ཉིད་དོ། །འདིའི་གང་ཞིག་གང་ན་མེད་པ་དེ་ནི་དེའི་ཡུལ་ལ་བདག་ཉིད་ཀྱིས་ཁྱབ་པ་མ་
[168a.4]ཡིན་ནོ་ཞེས་པས་ནི་འདི་ནི་རང་བཞིན་གྱི་གཏན་ཚིགས་ཀྱི་སྦྱོར་བའོ། །སྦྱོར་བ་གཉིས་པ་ཡང་། གང་དམིགས་པའི་མཚན་ཉིད་ཀྱིར་གྱུར་པ་ནི་མ་དམིགས་པ་དེ་ནི་དེ་ན་ཡོད་པ་མ་ཡིན་ཏེ། དཔེར་ན་འགའ་ཞིག་ན་བུམ་པ་མེད་པ་བཞིན། སྤྱི་ཡང་བསལ་བའི་བར་རྣམས་སུ་དམིགས་པའི་
[168a.5]མཚན་ཉིད་ཀྱིར་གྱུར་པ་མ་དམིགས་སོ་ཞེས་པའོ། །མི་དམིགས་པ་འདི་དང་རང་བཞིན་ནི་ཕན་ཚུན་འགལ་བའི་དོན་སྒྲུབ་པར་བྱེད་པའི་ཕྱིར་གཅིག་ལ་ཐེ་ཚོམ་སྐྱེད་པར་བྱེད་དོ་ཞེས་པའོ། །དེའི་ཕྱིར་བརྗོད་པར་འདོད་པ་ཞེས་པ། གྲངས་ཀྱང་མཚན་ཉིད་དུ་ཁས་ལེན་པའི་ཕྱིར་རོ། །འོ་ན་ཚུལ་
[168a.6]གསུམ་རྟགས་ལས་དོན་མཐོང་བའོ་ཞེས་བརྗོད་པར་བྱ་བ་མ་ཡིན་གྱི། ཚུལ་བཞིན་ཞེས་བྱ་བར་བརྗོད་པར་བྱ་སྟེ། གཅིག་ཉིད་ནི་ཚུལ་གཞན་ཉིད་ཡིན་པའི་ཕྱིར་ཞེ་ན། དངོས་པོའི་སྟོབས་ཞུགས་ཀྱི་རྟགས་ཀྱི་དབང་དུ་བྱས་ནས་དེ་སྐད་བཤད་ཅིང་གྲངས་གཅིག་བརྗོད་པར་འདོད་པ་ཅན་ཉིད་ནི་ལུང་གི་
[168a.7]སྟོབས་ཀྱིས་ཞུགས་པའི་དབང་དུ་བྱས་ནས་སོ་ཞེས་པ་འདི་བརྗོད་ཟིན་ཏོ། །དེས་ན་འདི་མི་འགལ་ལོ། །ཅི་ལྟར་ད་ནི་ལུང་ལ་བརྟེན་པའི་རྟགས་ལས་སྐྱེས་པ་དེ་རྗེས་སུ་དཔག་པ་ཉིད་དུ་རྟོགས་པར་བྱ། ཇི་སྐད་བཤད་པའི་མཚན་ཉིད་ཇི་ཙམ་པས་དེ་མཚོན་པར་བྱས་པ་མ་ཡིན་པས་སོ་ཞེ་ན། གལ་ཏེ་
[168b]
[168b.1]ཡང་མཚོན་པར་བྱས་པ་མ་ཡིན་མོད། དེ་ལྟ་ན་ཡང་འདིར་ཡང་གཏན་ཚིགས་ལ་སོགས་པའི་མཚན་ཉིད་ཐམས་ཅད་ལ་གྲངས་གཅིག་བརྗོད་པར་འདོད་པ་ཉིད་ཅེས་པ་ལ་སོགས་པའི་གཞུང་གིས་གསལ་བར་བྱས་སོ་ཞེས་སྐྱོན་མེད་དོ། །ཡང་ཅིའི་དོན་དུ་དེའི་མཚན་ཉིད་ཀྱི་མདོ་བྱས་ཤེ་ན། གཙོ་བོ་མ་
[168b.2]ཡིན་པ་ཉིད་དུ་ཤེས་པའི་དོན་དུའོ། །གཙོ་བོ་མ་ཡིན་པ་ནི། དངོས་པོར་ན་དེ་ཚད་མ་ཉིད་མ་ཡིན་པའི་ཕྱིར་ཏེ། ལུང་ཡང་རེ་ཞིག་དངོས་པོའི་དབང་ལས་ཚད་མ་ཉིད་མ་ཡིན་ན། དེའི་གྲུབ་པའི་རྟགས་ལས་སྐྱེས་པའི་ཤེས་པ་ལྟ་ཅི་སྨོས། ཁས་བླངས་པའི་དབང་ལས་ནི་དེ་ཚད་མ་ཉིད་དུ་རྣམ་
[168b.3]པར་གཞག་གོ་ཞེས་པ་ཞར་ལ་བྱུང་བས་ཆོག་གོ། །གཉིས་དག་ལས་ཐེ་ཚོམ་དང་ངེས་པ་ཡང་འཐོབ་པ་མ་ཡིན་ནོ་ཞེས་ཁས་བླངས་ཉམས་པ་སྨྲས་སོ། །བྱས་པ་ཉིད་དང་མཉན་པར་བྱ་བ་ཉིད་དག་ལས་ཡང་དག་པའི་ཤེས་པ་དང་བཟློག་པ་བཞིན་དུ་ཐེ་ཚོམ་མེད་པ་ཉིད་ཐོབ་པར་འགྱུར་ཞིང་།
[168b.4]མིག་གིས་གཟུང་བྱ་མ་ཡིན་པ་ཉིད་དང་མངོན་སུམ་དག་ལས་ཀྱང་ཐེ་ཚོམ་བཞིན་དུ་ངེས་པ་མེད་པའོ། །གཉིས་དག་གིས་ཏེ། ཐེ་ཚོམ་དང་གཏན་ལ་ཕེབས་པ་དག་གི་མཚན་ཉིད་ཀྱིས་ཞེས་པ་རྒྱུ་ལ་འབྲས་བུ་ཉེ་བར་བཏགས་པ་ལས། ཐེ་ཚོམ་དང་གཏན་ལ་ཕེབས་པའི་རྒྱུ་དག་ཐེ་ཚོམ་དང་
[168b.5]གཏན་ལ་ཕེབས་པའི་སྒྲས་བརྗོད་དོ། །གཏན་ཚིགས་ལ་སོགས་པའི་མཚན་ཉིད་དང་ལྡན་པ་ལ་གྲངས་གཅིག་བརྗོད་པར་འདོད་པ་ཡིན་གྱི། བྱས་པ་ཉིད་དང་མཉན་པར་བྱ་བ་ཉིད་འབའ་ཞིག་པ་དག་ལ། ཐེ་ཚོམ་གྱི་རྒྱུའི་མཚན་ཉིད་ཡོད་པ་མ་ཡིན་ཞིང་། མིག་གིས་གཟུང་བྱ་མ་ཡིན་པ་
[168b.6]ཉིད་དང་མངོན་སུམ་པ་ཉིད་དག་ལ་གཏན་ལ་ཕེབས་པའི་རྒྱུའི་མཚན་ཉིད་ཀྱང་མ་ཡིན་གྱི། འོ་ན་ཅི་ཞེ་ན། ལྷན་ཅིག་པ་དག་ལའོ། །འདིར་ཅི་ཞེས་པ་ཐུན་མོང་བ་དང་ཐུན་མོང་མ་ཡིན་པ་ཉིད་སྲིད་པའི་ཕྱིར་དྲི་བའོ། །འགལ་བ་མི་འཁྲུལ་བ་ནི་རེ་ཞིག་ཅེས་པ་ལ། རེ་ཞིག་གི་སྒྲས་ཐུན་མོང་
[168b.7]བ་དང་ཐུན་མོང་མ་ཡིན་པ་དག་ཁོ་ན་གདོན་མི་ཟ་བར་ཐེ་ཚོམ་གྱི་རྒྱུ་མ་ཡིན་ཞེས་སྟོན་ཏོ། །འགལ་བའི་དོན་སྒྲུབ་པར་བྱེད་པའི་ཕྱིར་འགལ་བ་ཡང་དེ་དག་ཡིན་ལ། མི་འཁྲུལ་བ་ཅན་དག་ཀྱང་ངོ་ཞེས་པ་འགལ་བ་མི་འཁྲུལ་བ་དག་གོ། །ཡན་ལག་གི་ཆོས་ཀྱིས་ཚོགས་པ་ལ་བསྟན་
[169a]
[169a.1]པའི་ཕྱིར། འགལ་བ་མི་འཁྲུལ་བ་ཅན་ཞེས་བརྗོད་པར་བྱའོ། །ཡང་ན་འགལ་བ་དག་གི་མི་འཁྲུལ་བ་སྟེ། དེ་འདི་ལ་ཡོད་དོ་ཞེས་པས་འགལ་བ་མི་འཁྲུལ་བ་ཅན་ཏེ། དེ་ནི་འགལ་བ་དོན་གཅིག་པ་མི་སྲིད་པའི་ཕྱིར་ཐེ་ཚོམ་གྱི་རྒྱུའོ། །དེ་གཅིག་ལ་མེད་ཅེས་
[169a.2]པ་ལ་སོགས་པས་ཁས་བླངས་པ་ཉམས་པ་ཡོངས་སུ་སྤོང་སྟེ། གཅིག་ཁོ་ན་ལ་ཞེས་པ། ཐེ་ཚོམ་གྱི་རྒྱུ་ཉིད་ལ་བྱས་པ་ཉིད་དང་མཉན་བྱ་ཉིད་དག་གིས་ཐ་མི་དད་པ་གསུངས་སོ། །དེ་བཞིན་དུ་མིག་གིས་གཟུང་བ་མ་ཡིན་པ་ཉིད་དང་མངོན་སུམ་ཉིད་དག་ངེས་པའི་རྒྱུ་ཉིད་ལའོ། །དེ་ལ་དུ་
[169a.3]མ་ལས་ཅི་ལྟར་ངེས་པར་འགྱུར་ཏེ། ངེས་པར་འགྱུར་བ་མ་ཡིན་པ་ཁོ་ན་ཞེ་ན། གཅིག་ཉིད་དུ་བརྗོད་པར་འདོད་པ་ཉིད་ཀྱི་ཕྱིར་ཏེ། དེ་ཡང་ཡོད་དོ། །དེའི་ཕྱིར་བརྗོད་པར་འདོད་པའི་གྲངས་གཅིག་ཉིད་རིགས་པ་མ་ཡིན་ནོ་ཞེས་པའོ། །འོ་ན་ལུང་ན་གྲུབ་པ་དག་གི་གཅིག་ཉིད་བརྗོད་
[169a.4]པར་འདོད་པ་མ་ཡིན་ནམ་འདི་དག་ནི་དངོས་པོའི་སྟོབས་ཀྱིས་ཞུགས་པའི་ཚད་མ་ཁོ་ནས་གྲུབ་པ་དག་སྟེ། དེས་ན་ཅིའི་ཕྱིར་འདིའི་སྐབས་ཡིན་ཞེ་ན། སྐྱོན་འདི་མེད་དེ། ཕ་རོལ་པོས་ནི་སློབ་དཔོན་གྱི་དགོངས་པ་གཅིག་ཉིད་དུ་བརྗོད་པར་འདོད་པའི་ཡུལ་མི་ཤེས་པས། ཡུལ་ཐམས་
[169a.5]ཅད་ལ་གཅིག་ཉིད་དུ་བརྗོད་པར་འདོད་པའོ་ཞེས་བསམས་ནས་རྩོད་ཅིང་། སློབ་དཔོན་གྱིས་ནི་རེ་ཞིག་འདི་ལྟར་འགྱུར་དུ་ཆུག་མོད། ཕྱིས་རང་གི་དགོངས་པ་གསལ་བར་བྱའོ་ཞེས་དགོངས་པས་ཁས་བླངས་ནས་ལན་གསུངས་པའོ། །མི་འགལ་བ་ནི་ཞེས་པ་ལ་སོགས་པ་སྟེ། མི་
[169a.6]འགལ་བའི་དོན་སྒྲུབ་པར་བྱེད་པའི་ཕྱིར་མི་འགལ་བ་སྟེ། དེའི་དོན་དུ་མ་ཉིད་ཡོད་ན་ཡང་དོན་གཅིག་བྱེད་པ་ཉིད་ཀྱི་ཕྱིར་གཅིག་ཁོ་ནའོ་ཞེས་པས་སྐྱོན་མེད་དོ། །དེ་ལྟ་ན་གང་དུ་ཞེས་པ་ལ་སོགས་པས་སླར་ཡང་དོན་གཅིག་བརྗོད་པར་འདོད་པ་མི་འཐད་པར་གསུངས་སོ། །རེ་རེ་ནི་དེར་ཞེས་
[169a.7]པ་ལ་སོགས་པས། དོན་གཅིག་བྱེད་པ་ཉིད་སྟོན་ཅིང་། དེ་ཁོ་ནའི་ལན་གསུངས་སོ། །འོ་ན་གང་དུ་ཞེས་པ་ལ་སོགས་པ་སྟེ། ཡན་ལག་ཅན་ནི་ཡན་ལག་རྣམས་ལ་གཞན་ཞེས་པ་འདིར་ནི་བསྒྲུབ་པར་བྱ་བ་ཐ་དད་པ་དག་སྟེ། ཕན་ཚུན་གྱི་མཚམས་ལ་ལྟོས་པས། གཞན་ཉིད་ཀྱི་ཁྱད་པར་
[169b]
[169b.1]ཡན་ལག་དང་ཡན་ལག་ཅན་དག་བསྒྲུབ་བྱ་ཉིད་ཀྱི་ཕྱིར་རོ། །འདིར་གཏན་ཚིགས་ཀྱང་ཐ་དད་པ་སྟེ། ཐེ་ཚོམ་དང་གཏན་ལ་ཕེབས་པའི་དངོས་པའི་ཕྱིར་རོ་ཞེས་པ་ཐེ་ཚོམ་དང་གཏན་ལ་ཕེབས་པ་དག་གོ། །དེ་ལྟར་ནི་རྐྱང་བ་ཙམ་དམིགས་པ་ན། ཡན་ལག་སྣལ་མ་རྣམས་ལ་ངེས་པ་མཐོང་ཞིང་
[169b.2]ཡན་ལག་ཅན་སྣམ་བུ་ལ་སོགས་ལ་ཐེ་ཚོམ་སྟེ། ཅི་འདི་སྣམ་བུའམ་འོན་ཏེ་ཡོལ་བ་ཡིན་ཞེས་པའོ། །གང་ལ་ཐེ་ཚོམ་དང་གཏན་ལ་ཕེབས་པ་ཡོད་པ་དེ་ལ་གཞན་ཉིད་དེ། དཔེར་ན་དགེ་སློང་དང་ངུར་སྨྲིག་དག་ལ་བཞིན་ཏེ། ངུར་སྨྲིག་ཙམ་མཐོང་བ་ལས་ངུར་སྨྲིག་ལ་ངེས་པ་དང་དགེ་
[169b.3]སློང་ལ་ཐེ་ཚོམ་སྟེ། ཅི་འདི་ཤཱཀྱའི་དགེ་སློང་ངམ། འོན་ཏེ་སེར་སྐྱ་བའི་དགེ་སློང་ཡིན་ཞེས་རིང་པོར་གོང་བུ་ཙམ་དམིགས་པ་ནའོ། །དེ་ལ་ཡང་གཉིས་ཀར་གཏོགས་པའི་གཞན་ཉིད་ཅེས་པ། གང་ཡན་ལག་ཅན་ཡན་ལག་ལས་གཞན་དུ་གྱུར་པ་འདི་ནི་སྲིད་པ་ཡོད་པ་མ་ཡིན་ཏེ། ཡན་
[169b.4]ལག་རྣམས་ནི་དེ་ལས་གཞན་མ་ཡིན་ནོ་ཞེས་པའོ། །དཔེར་ན་ནག་པ་བཤེས་གཉེན་གྱི་སྤུན་ཡ་ཡིན་ཞེས་པ་ལ། དེ་ཡང་དེའི་སྤུན་དྲང་ངོ་ཞེས་རྟོགས་པ་བཞིན་ནོ། །རེ་རེ་ཡང་གཏན་ཚིགས་ཡིན་ཞེས་པ་ཐེ་ཚོམ་ནི་གཏན་ལ་ཕེབས་པའི་ཟླ་བོ་ལ་ལྟོས་པ་སྟེ། གཏན་ལ་ཕེབས་པ་ཡོད་ན་
[169b.5]ཐེ་ཚོམ་ཡོད་པའི་ཕྱིར་ཞེས་པའོ། །གཏན་ལ་ཕེབས་ཀྱང་ཐེ་ཚོམ་གྱི་ཟླ་བོ་ལ་ལྟོས་པའི་གཏན་ཚིགས་ཏེ། ཐེ་ཚོམ་ཡོད་ན་གཏན་ལ་ཕེབས་པའི་ཕྱིར་རོ་ཞེས་པའོ། །བསྡུས་པ་དག་ནི་གཏན་ཚིགས་ཀྱི་མཚན་ཉིད་དང་ལྡན་པའི་ཕྱིར་ཉེས་པ་མེད་དོ་ཞེས་འབྲེལ་བར་བྱའོ། །གཉིས་ཀ་སྒྲུབ་
[169b.6]པར་བྱེད་ན་ཞེས་བྱ་བ་རྒྱུ་མཚན་གྱི་དོན་ཅན་གྱི་བདུན་པའོ། །རེ་ཞིག་རིགས་པ་ཞེས་པ། རྣམ་པ་བཞི་པོ་ནི་ཐེ་ཚོམ་གྱི་རྒྱུ་ཉིད་ལ་བྱེད་རྒྱུ་གཉིས་ཀ་ལ་ཡོད་པ་ཡོད་དེ། དེས་ན་གཞལ་བྱ་ཉིད་ལ་སོགས་པས་ཐེ་ཚོམ་སྐྱེད་པར་བྱེད་ཅིང་། མཉན་པར་བྱ་བ་ཉིད་ལ་ནི་དེ་མེད་དོ་ཞེས་སྨྲས་པ། མཉན་
[169b.7]པར་བྱ་བ་ནི་ཅི་ལྟར་ཞེས་པ་རྣམ་པ་ཅི་ཞིག་གིས་ཞེས་པ་སྟེ་བྱེད་པའི་རྒྱུ་མ་མཐོང་བས་དྲིས་པའོ། །ཐུན་མོང་མ་ཡིན་པ་ཉིད་ཀྱི་ཕྱིར་རོ་ཞེས་པས་བྱེད་རྒྱུ་གསུངས་སོ། །གལ་ཏེ་ཐུན་མོང་མ་ཡིན་པ་ཐེ་ཚོམ་གྱི་རྒྱུ་ཉིད་ཡིན་པ་ཅིས་ཤེ་ན་གསུངས་པ། གང་ཞེས་པ་ལ་སོགས་པ་སྟེ། བསྒྲུབ་པར་བྱ་
[170a]
[170a.1]བའི་ཆོས་ཞེས་པ་ཕྱོགས་ཆོས་སོ། །འདིས་འབྲེལ་པ་ཉིད་གསུངས་ཏེ། མ་འབྲེལ་པ་ལ་ནི་མིག་གིས་གཟུང་བྱ་ཉིད་བཞིན་དུ་དཔྱོད་པ་མེད་པའི་ཕྱིར་རོ། །ཁྱད་པར་ཇི་སྲིད་ཀྱིས་ཞེས་པ། རྟག་པ་དང་མི་རྟག་པའི་དངོས་པོའི་ཁྱད་པར་གྱིས་དང་། ཟག་པ་དང་བཅས་པ་
[170a.2]དང་ཟག་པ་མེད་པའི་ཁྱད་པར་གྱིས་སམ། མུ་སྟེགས་བྱེད་ཀྱིས་རྣམ་པར་གཞག་པའི་དངོས་པོའི་ཁྱད་པར་གྱིས་དངོས་པོ་ཐམས་ཅད་བསྡུས་པའོ། །དེ་ལ་སྟེ་དངོས་པོ་དེ་རྣམས་ལ་ཐེ་ཚོམ་གྱི་རྒྱུ་ཡིན་ཏེ། དེ་དང་ལྡན་པ་རྣམས་དེས་བསྡུས་པའི་ཕྱིར་དང་ཞེས་པ་ཐུན་མོང་མ་ཡིན་པའི་ཆོས་དང་ལྡན་
[170a.3]པ་རྣམས་དེ་རྣམས་ཀྱིས་བསྡུས་པའི་ཕྱིར་རམ་དེ་རྣམས་སུ་བསྡུས་པའི་ཕྱིར་རོ། །འདིས་ནི་གང་ལ་དངོས་པོའི་ཆོས་ཚིག་གི་དོན་ལས་ཕྱི་རོལ་དུ་གྱུར་པ་འདི་གནས་པར་འགྱུར་བ་རྣམ་པའི་ཁྱད་པར་ལས་ཕྱི་རོལ་པ་མེད་པར་གསུངས་སོ། །མཐའ་གཅིག་པ་ལྡོག་པའི་ཕྱིར་རོ་ཞེས་པ། མཐའ་
[170a.4]གཅིག་པ་ནི་གཏན་ལ་ཕེབས་པ་ཡིན་ཞིང་། དེ་ལྡོག་པ་ནི་མེད་པའོ། །འདིས་གཅིག་ལ་ཡོད་པ་ལ་སྒྲུབ་བྱེད་མེད་པ་གསུངས་སོ། །གཉིས་པོ་འདི་གཅིག་ལ་བསྡུས་པས་ནི་རྣམ་པའི་ཁྱད་པར་ཐམས་ཅད་ལ་ཐུན་མོང་མ་ཡིན་པ་ཐེ་ཚོམ་གྱི་རྒྱུ་སྟེ། གཞན་ལས་མ་བྱུང་བར་ངེས་ཤིང་ཡོན་ཏན་
[170a.5]མཚུངས་པའི་སྐྱེས་བུ་ལ་སྲིད་པའི་བུད་མེད་ཀྱི་མངལ་ནི་སྐྱེས་བུ་རྣམས་ལ་བཞིན་ནོ། །འོ་ན་དེ་ཡང་ཐམས་ཅད་ཐེ་ཚོམ་གྱི་རྒྱུར་བརྗོད་པར་བྱ་བ་མ་ཡིན་ཏེ། ཐུན་མོང་མ་ཡིན་པ་འགའ་ཞིག་ཀྱང་ངེས་པའི་རྒྱུ་ཉིད་ཀྱི་ཕྱིར་ཏེ། དཔེར་ན་གསོན་པོའི་ལུས་ནི་བདག་དང་བཅས་པ་སྟེ། སྲོག་ལ་
[170a.6]སོགས་པ་དང་ལྡན་པ་ཉིད་ཀྱི་ཕྱིར་རོ་ཞེས་པ་ལྟ་བུའོ་ཞེ་ན། འདི་མཉན་པར་བྱ་བ་ཉིད་ལས་ཁྱད་པར་ཅི་ཞིག་ཡོད་གལ་ཏེ་ལྡོག་པ་མི་འཁྲུལ་བའོ། །འདི་ནི་འགྱུར་ཏེ། སྲོག་ལ་སོགས་པ་མི་མཐུན་ཕྱོགས་ཁོ་ན་ལས་ལྡོག་གི་མཐུན་ཕྱོགས་ལས་ནི་མ་ཡིན་ཏེ། མེད་པ་ལས་ལྡོག་པ་མི་རུང་བའི་ཕྱིར་
[170a.7]ཞེས་པས། འདིའི་ལྡོག་པ་ནི་མི་འཁྲུལ་བའོ། །མཉན་པར་བྱ་བ་ཉིད་ཀྱི་ནི་དེ་ལྟ་མ་ཡིན་ཏེ། མི་མཐུན་ཕྱོགས་ཉིད་ལས་མཉན་པར་བྱ་བ་ཉིད་ལྡོག་པ་ནི་མ་ཡིན་གྱི། འོན་ཀྱང་མཐུན་ཕྱོགས་ལས་ཀྱང་ངོ་ཞེའོ། །དེ་ལྟན་མཉན་པར་བྱ་བ་ཉིད་མི་མཐུན་ཕྱོགས་ཁོ་ན་ལས་ལྡོག་པ་མ་ཡིན་ནོ་ཞེས་སྨྲས་པས་
[170b]
[170b.1]ཁྱོད་ཀྱིས་ཀྱང་མཐུན་ཕྱོགས་ལ་རྗེས་སུ་འགྲོ་བ་མེད་པར་འགྱུར་བ་མ་ཡིན་ནམ། དེ་གཞན་ལ་ཡང་མཚུངས་པ་ཁོ་ན་སྟེ། རྣམ་པ་གཞན་དུ་ན་འདི་ལྡོག་པ་ཅན་ཁོ་ནར་མི་འགྱུར་རོ་ཞེས་པས་སྲོག་ལ་སོགས་པ་མཉན་པར་བྱ་བ་ཉིད་དང་ཁྱད་པར་མེད་དོ། །གང་ཡང་མེད་པ་ལས་ལྡོག་པ་མི་རུང་བའི་ཕྱིར་ཞེས་
[170b.2]བརྗོད་པ་འདི་ཡང་ལྔར་ཁོ་ནར་བཏགས་ཟིན་པ་ཉིད་དེ། དངོས་པོའི་ངོ་བོ་འགུགས་པའི་དགག་པ་མེད་པ་ལ་མི་སྲིད་མོད། མ་ཡིན་པར་དགག་པ་གཅིག་པུ་ནི་དགག་པའི་ཡུལ་མ་ཡིན་གྱི། འོན་ཀྱང་མེད་པར་དགག་པ་ཡང་ཡིན་ཞིང་། དེ་མེད་པ་ལ་ཡང་འགལ་བ་མ་ཡིན་ནོ་ཞེས་བཤད་ཟིན་ཏོ། །ཐུན་
[170b.3]མོང་བ་དང་ཐུན་མོང་མ་ཡིན་པ་དག་ཐེ་ཚོམ་གྱི་རྒྱུ་ཉིད་དུ་མཚུངས་པ་ལ། ཁྱད་པར་སྟོན་པ་གསུངས་པ། ཐུན་མོང་བ་ནི་ཞེས་པ་ལ་སོགས་པ་སྟེ། རྣམ་པར་མི་གཅོད་པའི་གཏན་ཚིགས་ནི་ཐེ་ཚོམ་གྱི་རྒྱུའོ་ཞེས་པའི་དོན་ཏོ། །དེ་ཞེས་པའི་ཐམས་ཅད་པའི་མིང་གིས་སྐབས་སུ་བབ་པའི་ཐེ་ཚོམ་གྱི་རྒྱུ་ལ་
[170b.4]སྙེགས་སོ། །འདིར་འདི་ལྟར་ཡང་བཤད་པར་བྱ་སྟེ། ཐུན་མོང་བ་ནི་གང་རྣམས་ཀྱི་ཐེ་ཚོམ་གྱི་རྒྱུར་ཡོད་པ་དེ་ཁོ་ན་ལ་རྣམ་པར་གཅོད་པ་མིན་པའི་གཏན་ཚིགས་སུ་འགྱུར་གྱི་གཞན་ལ་མ་ཡིན་ནོ་ཞེས་པའོ། །གང་འདིར་གཉིས་ཀ་ལ་བརྟེན་པ་ཞེས་པ་རྗེས་སུ་འཇུག་པ་དང་ལྡོག་པ་དག་ལ་བརྟེན་པའོ། །
[170b.5]ཐེ་ཚོམ་གྱི་རྒྱུ་ཉིད་དུ་མཚུངས་ན་ཡང་འདི་ནི་ཁྱད་པར་ཏེ། འདི་རྣམས་ལ་གང་གཉིས་ཀ་ལ་བརྟེན་པ་དེ་ནི་བསྒྲུབ་པར་བྱ་བ་འགའ་ཞིག་ལ་ངེས་པའི་རྒྱུ་ཡང་ཡིན་ཏེ། ཐེ་ཚོམ་གྱི་རྒྱུ་ཁོ་ན་ནི་མ་ཡིན་ནོ། །ཅིའི་ཕྱིར་ཞེ་ན་གསུངས་པ། གཞན་ལས་ལྡོག་པའི་ཕྱིར་ཞེས་པ། མི་མཐུན་ཕྱོགས་ལས་ལྡོག་པའི་
[170b.6]ཕྱིར་ཞེས་པའི་དོན་ཏོ། །དཔེར་ན་རྩོལ་མ་ཐག་ཏུ་བྱུང་བ་བསྒྲུབ་པར་བྱ་བ་ལ། མི་རྟག་པ་ཉིད་ཐེ་ཚོམ་གྱི་གཏན་ཚིགས་ཡིན་ཞིང་། བྱས་པ་ཉིད་ལ་ངེས་པའི་གཏན་ཚིགས་ཡིན་པ་བཞིན་ཏེ། མ་བྱས་པ་ལས་ལྡོག་པའི་ཕྱིར་རོ། །དེ་བཞིན་དུ་རེག་པར་བྱ་བ་མ་ཡིན་པ་ནི་རྟག་པ་དང་མི་རྟག་པ་དག་ལ་ཐེ་
[170b.7]ཚོམ་གྱི་རྒྱུ་སྟེ། བྱ་བ་མེད་པ་ཉིད་ལ་ནི་བྱ་བ་དང་བཅས་པ་ལས་ལྡོག་པའི་ཕྱིར་ངེས་པའི་གཏན་ཚིགས་སོ། །གང་གཉི་ག་ལ་བརྟེན་པར་མི་འགྱུར་བ་དཔེར་ན་མཉན་བྱ་ཉིད་དང་གཞལ་བྱ་ཉིད་ལྟ་བུ་དེ་ནི་བསྒྲུབ་པར་བྱ་བ་གཞན་ལ་ཡང་ངེས་པའི་རྒྱུ་མ་ཡིན་ཏེ། གཞན་ལས་ལྡོག་པ་མེད་པའི་ཕྱིར་རོ། །
[171a]
[171a.1]ཡང་མཉན་པར་བྱ་བ་ཉིད་ཅི་ལྟར་ན་གཉི་ག་བརྟེན་པར་མི་འགྱུར་ཏེ། དངོས་པོའི་ཆོས་སུ་གྱུར་པ་དེས་ནི་གདོན་མི་ཟ་བར་འགའ་ཞིག་ཏུ་འཇུག་པར་བྱ་བ་འམ། འགའ་ཞིག་ལས་ལྡོག་པར་བྱའོ་ཞེ་ན། འཇུག་པ་དང་ལྡོག་པ་དག་མ་ངེས་པ་ཉིད་ཀྱི་ཕྱིར་དེ་སྐད་དུ་བཤད་དོ་
[171a.2]ཞེས་པས་སྐྱོན་མེད་དེ། ཡོད་ན་ཡང་དེ་དག་ནི་ཇི་སྲིད་དུ་ངེས་པར་མ་བྱས་པ་དེ་སྲིད་དུ་མེད་པ་དང་མཚུངས་པ་དག་སྟེ། རྗེས་སུ་དཔོག་པ་ལ་ཡན་ལག་མ་ཡིན་པ་ཉིད་ཀྱི་ཕྱིར་རོ། །འོ་ན་མཉན་པར་བྱ་བ་ཉིད་ནི་རྣ་བས་གཟུང་བར་བྱ་བ་ཉིད་དེ། རང་གི་རྣམ་པ་ཅན་གྱི་རྣ་བའི་རྣམ་པར་ཤེས་པའི་རྒྱུ་ཉིད་ཀྱི་
[171a.3]མཚན་ཉིད་ཅན་ཡིན་ཞིང་། དེ་ཡང་མི་རྟག་པ་ཁོ་ནར་རིགས་ཀྱི་རྟག་པ་ནི་མ་ཡིན་ཏེ། རྣམ་པ་ཐམས་ཅད་དུ་དོན་བྱེད་ནུས་པ་མི་འཐད་པའི་ཕྱིར་རོ། །དོན་བྱེད་ནུས་པའི་མཚན་ཉིད་ཅན་ཡང་དངོས་པོ་ཞེས་པ་འདི་ནི་བཤད་ཟིན་ཏོ། །དེས་ན་མཉན་པར་བྱ་བ་ཉིད་མི་རྟག་པ་ཁོ་ན་ལ་འཇུག་གོ་ཞེས་
[171a.4]པ་འདི་ནི་ཐེ་ཚོམ་མེད་དེ། དེས་ན་ཅི་ལྟར་རྗེས་སུ་འཇུག་པ་དང་ལྡོག་པ་དག་མ་ངེས་པའི་ཕྱིར་རོ་ཞེས་བརྗོད་ཅེ་ན། སྐྱོན་འདི་མེད་དེ། ཕ་རོལ་པོའི་རྟག་པ་ཡང་དངོས་པོར་ཁས་ལེན་ཏེ། དེས་ན་དེའི་འདོད་པ་ལ་ལྟོས་པས་དེ་སྐད་བཤད་དོ། །རང་གི་ལུགས་ཀྱིས་ནི་མཉན་བྱ་ཉིད་མི་རྟག་པ་
[171a.5]ཉིད་ལ་གཏན་ཚིགས་ཁོ་ནའོ། །ཁ་ཅིག་ནི་གཉིས་ཀ་ལ་མི་བསྟེན་པའི་གཞལ་བྱ་ཉིད་ཀྱང་འདུས་མ་བྱས་ལ་སྐུར་པ་འདེབས་པ་ལས་མེད་པ་ལ་རྗེས་སུ་འགྲོ་བ་མི་རིགས་པའི་ཕྱིར་རྗེས་སུ་འགྲོ་བ་མི་འཁྲུལ་བ་ཅན་མཐུན་ཕྱོགས་ཁོ་ན་ལ་ཡོད་དོ་ཞེས་པས་རྗེས་སུ་འགྲོ་བ་ཅན་ཁོ་ནའི་གཏན་ཚིགས་སུ་
[171a.6]སྨྲའོ། །དེ་མི་རིགས་ཏེ་ཅི་ལྟར་མི་མཐུན་པའི་ཕྱོགས་ལས་ལྡོག་པ་མེད་པའམ། ཅི་ལྟར་མཐུན་པའི་ཕྱོགས་ཁོ་ན་ལ་ཡོད་པ་ཡིན་ཞེས་པའོ། །གལ་ཏེ་མཐུན་པའི་ཕྱོགས་ལ་ཡོད་པ་ཉིད་རྣམ་པར་མི་གཅོད་ན་ངེས་པར་གཟུང་བ་འདིའི་འབྲས་བུ་ཅི་ཡིན་རྣམ་པར་གཅོད་ནའང་ཅི་ལྟར་མི་ལྡོག་
[171a.7]སྟེ། ལྡོག་པ་ནི་ཡོད་པ་རྣམ་པར་གཅོད་པ་ལས་གཞན་མ་ཡིན་པའི་ཕྱིར་རོ། །རྗེས་སུ་འགྲོ་བ་ཡང་མ་ཡིན་ཞིང་ལྡོག་པ་ཡང་མ་ཡིན་ཞེས་པ་འདི་ནི་འགལ་བ་སྟེ། གང་མེད་དོ་ཞེས་རྗེས་སུ་འགྲོ་བ་བཀག་པ་དེ་ཉིད་ལྡོག་པ་ཡིན་པའི་ཕྱིར་རོ། །དེའི་ཕྱིར་རྗེས་སུ་འགྲོ་བ་ཅན་ཞེས་བྱ་བའི་གཏན་
[171b]
[171b.1]ཚིགས་ནི་འགའ་ཡང་མེད་དོ། །གཞལ་བྱ་ཉིད་མི་མཐུན་ཕྱོགས་ལ་རྗེས་སུ་འགྲོ་བ་དང་མི་ལྡན་པ་ཡང་མ་ཡིན་ཏེ། གང་གི་ཕྱིར་ཆོས་རྣམ་པ་གསུམ་སྟེ། དངོས་པོའི་ཆོས་སྐྱེ་བ་ལ་སོགས་པ་རྣམས་དང་། དངོས་པོ་མེད་པའི་ཆོས་སྐྱེ་བ་མེད་པ་ལ་སོགས་པ་རྣམས་དང་། གཉི་གའི་ཆོས་གཞལ་
[171b.2]བྱ་ཉིད་ལ་སོགས་པ་རྣམས་ཡིན་པའི་ཕྱིར་རོ། །མེད་པ་ནི་ཆོས་འགའ་ཡང་མ་ཡིན་པ་ཁོ་ནའོ་ཞེ་ན། ཆོས་ཐམས་ཅད་དང་བྲལ་བ་ཞེས་བྱ་བ་འདི་ཁོ་ན་དེའི་ཆོས་མ་ཡིན་ནམ། བློས་སྤྲུལ་པ་ནི་མེད་པ་ལ་ཡང་མི་འགལ་བའི་ཕྱིར་རོ། །རང་བཞིན་ཐམས་ཅད་དང་བྲལ་བ་དངོས་པོ་མེད་པའོ་ཞེས་ཉེ་བར་སྐྱེ་
[171b.3]བའི་བློ་ནི་དངོས་པོ་ཐམས་ཅད་དང་བྲལ་བ་ནི་དེའི་ཆོས་བཞིན་དུ་ཉེ་བར་སྟོན་ཏེ། དེའི་ཕྱིར་དེའི་བསམ་པའི་ངོར་དངོས་མེད་ལ་ཡང་ཆོས་སུ་རྣམ་པར་གཞག་པར་བྱའོ་ཞེས་པའོ། །འོ་ན་གང་གི་ཚེ་ཞེས་པ་ལ་སོགས་པ་སྟེ། འདི་ནི་ཐུན་མོང་མ་ཡིན་པ་ཉིད་ཀྱི་ཕྱིར་ན་ཐེ་ཚོམ་གྱི་རྒྱུའོ་ཞེས་བཤད་ཟིན་ལ་
[171b.4]གང་གི་ཚེ་སྒྲ་ཉིད་དེ་མཉན་པར་བྱ་བ་ཉིད་རྟག་པར་ཁས་ལེན་པར་བྱེད་པ་དེའི་ཚེ་གང་ལས་འདི་ཐེ་ཚོམ་གྱི་རྒྱུར་འགྱུར་བ་ཐུན་མོང་མ་ཡིན་པ་ཉིད་ཅི་ལྟར་ཡིན་དེའི་ཚེ་འདི་ཞེས་པ་ལ་སོགས་པ་སྟེ། གཉིས་ཀ་མ་ཡིན་པ་བསྟེན་པ་ཉིད་ཀྱི་གནས་སྐབས་ལ་ནི་ཐུན་མོང་མ་ཡིན་པ་ཉིད་ཀྱི་ཕྱིར་ཐེ་ཚོམ་གྱི་རྒྱུ་ཉིད་དུ་
[171b.5]བཤད་ལ། གང་གི་ཚེ་སྒྲ་ཉིད་ཀྱང་མཉན་བྱར་ཁས་ལེན་པ་དེའི་ཚེ། འདི་གཉིས་ཀ་བསྟེན་པ་ཁོ་ནར་འགྱུར་ཞིང་། འདི་དེའི་ཚེ་ཐུན་མོང་མ་ཡིན་པ་ཉིད་དུ་འདོད་པ་ཡང་མ་ཡིན་ཏེ། དེའི་ཕྱིར་དེའི་ཚེ་འདི་གཏན་ཚིགས་ཁོ་ན་འགྱུར་ཏེ། མི་རྟག་པ་ལས་ལྡོག་པའི་ཕྱིར་དང་། དེ་རྣམ་པར་གཅོད་
[171b.6]པས་རྟག་པ་ཉིད་གོ་བར་བྱེད་པའི་ཕྱིར་རོ། །གལ་ཏེ་འདི་ལ་མི་རྟག་པ་ཉིད་ཀྱི་གཏན་ཚིགས་ཀྱང་བྱེ་བྲག་པས་སྟོན་པར་མི་བྱེད་པ་དེའི་ཚེ་གཏན་ཚིགས་ཉིད་དུ་ཡང་འགྱུར་ཞེས་སྦྲེལ་བར་བྱའོ། །འགལ་བ་དོན་གཅིག་པ་མི་སྲིད་པའི་ཕྱིར་ཞེས་པ། འགལ་བ་དག་སྟེ་རྟག་པ་དང་མི་རྟག་པ་ཉིད་དག་
[171b.7]ཆོས་ཅན་གཅིག་ལ་མི་སྲིད་པའི་ཕྱིར་རོ། །འགལ་བ་ཉིད་ཀྱང་དེ་དག་ཕན་ཚུན་སྤངས་ཏེ་གནས་པའི་མཚན་ཉིད་ཅན་ཉིད་ཀྱི་ཕྱིར་རོ། །འགལ་བའི་གཅིག་གི་དོན་གྱི་མི་སྲིད་པ་ཉིད་ཀྱི་ཕྱིར་ཞེས་གཞན་རྣམས་སོ། །གཅིག་མིན་པ་ནི་འགལ་བ་སྲིད་པ་སྟེ། དཔེར་ན་ནམ་མཁའ་རྟག་གོ་བུམ་པ་མི་རྟག་
[172a]
[172a.1]གོ་ཞེས་པ་ལྟ་བུ་སྟེ། གཅིག་ལ་ནི་མ་ཡིན་ནོ་ཞེས་པའོ། །དེའི་ཕྱིར་ཐེ་ཚོམ་དུ་འགྱུར་ཏེ། འགལ་བའི་དོན་མངོན་པར་བརྗོད་པའི་གཏམ་གཉིས་བཞིན་ནོ། །གལ་ཏེ་ཐེ་ཚོམ་གྱི་རྒྱུ་ཡིན་ན་ཅི་ལས་འདི་ལ་ངེས་པར་འབྱུང་བར་བྱ་ཞེ་ན། འདིར་ཡང་ཞེས་པ་ལ་སོགས་པ་སྟེ། འདིར་
[172a.2]གྱི་སྒྲས་ནི་འགལ་བ་མི་འཁྲུལ་བ་ཅན་གྱི་ཡུལ་སྤྱིར་སྟོན་གྱི་འདི་གཅིག་པུ་ནི་མ་ཡིན་ནོ། །མངོན་སུམ་གྱིས་མི་སླུ་བའི་ལུང་ནི་མངོན་སུམ་གྱི་ལུང་སྟེ། བར་གྱི་ཚིག་ཕྱིས་པ་ལས་ལོ་མའི་རྒྱལ་པོ་བཞིན་དང་། རྡོ་རྗེའི་སོར་གདུབ་བཞིན་ནོ། །མངོན་སུམ་སྨོས་པ་ནི་ཚད་མ་མཚོན་པའི་དོན་དུ་སྟེ། ཚད་
[172a.3]མས་མི་སླུ་བའི་ལུང་ནི་སྟོབས་དང་ལྡན་པ་ཉིད་ཀྱི་ཕྱིར་རོ་ཞེས་པའི་དོན་ཏོ། །འདི་སྐད་སྟོན་ཏེ། ལུང་གིས་གྲུབ་པའི་རྟགས་ཀྱི་དབང་དུ་བྱས་ནས་འགལ་བ་མི་འཁྲུལ་བ་བརྗོད་ཅིང་། དེ་ནི་འདི་རྣམས་ཁོ་ནས་ཀྱང་ལུང་སྟོབས་དང་ལྡན་པར་ཁས་བླངས་ལ། སྟོབས་དང་ལྡན་པ་ནི་ཡང་དེ་ཚད་མས་རྗེས་སུ་
[172a.4]གཟུང་བ་ལས་འགྱུར་ཏེ། དེ་དེའི་ཕྱིར་ཚད་མ་དེ་ལས་ངེས་པ་བཙལ་བར་བྱའོ། །དེའི་ཚིག་གིས་ཡོན་ཏན་དུ་གྱུར་ཀྱང་ཚད་མ་ལ་སྙེགས་པའོ། །ཡང་ན་དེ་ཁོ་ན་ལས་ཏེ་ཚད་མས་མི་སླུ་བའི་ལུང་ལས་ངེས་པ་བཙལ་བར་བྱའོ། །དེ་སྐད་བརྗོད་པས་ཀྱང་ཚད་མ་ཁོ་ན་ལས་ངེས་པ་བཙལ་བར་བྱའོ་
[172a.5]ཞེས་དོན་གྱིས་བརྗོད་པར་འགྱུར་རོ། །བསྡུ་བའི་ཚིགས་སུ་བཅད་པར་གང་རྣམས་ཀྱི་དང་གང་རྣམས་ཀྱི་ཞེས་འདིར་གཅིག་ལྷག་བལྟ་བར་བྱ་སྟེ། གྲངས་མཉམ་པའི་དོན་དུའོ། །ཐུན་མོང་མིན་པ་ནི་ཐམས་ཅད་ཐེ་ཚོམ་གྱི་རྒྱུའོ། །སྤྱི་ནི་རྟག་པ་ལ་སོགས་པ་གང་རྣམས་ཀྱི་ཆོས་སོ། །འགལ་བ་མི་
[172a.6]འཁྲུལ་བ་ཅན་ཡང་གང་རྣམ་པ་ཀྱི་ཞེས་པའོ། །གཞན་རྣམས་ནི་གཅིག་ལྷག་མ་བྱས་པ་ཁོ་ནར་ཇི་ལྟར་རིགས་པར་སྦྱོར་བར་བྱེད་དོ། །འདིར་ཕྱོགས་ཆོས་གཉིས་དག་ཁོ་ན་གཏན་ཚིགས་ལྟར་སྣང་བར་བཤད་དེ། ཐེ་ཚོམ་གྱི་རྒྱུ་དང་ཕྱིན་ཅི་ལོག་གི་རྒྱུའོ། །གཞན་རྣམས་ཀྱིས་ནི་འཁྲུལ་པ་དང་བཅས་
[172a.7]པ་ལ་སོགས་པ་རྣམས་ཀྱང་བཤད་དོ། །དེ་རྣམས་ནི་མ་བརྗོད་པ་ཉིད་ཀྱི་ཕྱིར་མ་ལུས་པ་ཡིན་པ་བརྗོད་པ་ཉིད་དུ་དོགས་པར་འགྱུར་རོ། །དེས་ན་དེ་བསལ་བའི་ཆེད་དུ་གསུངས་པ། ཕྱོགས་ཆོས་མཐོང་བ་ལས་ཞེས་པ་ལ་སོགས་པའོ། །འདིའི་དོན་ནི་འདི་ཡིན་ཏེ། ཕྱོགས་ཆོས་མཐོང་བ་ལས་
[172b]
[172b.1]ཤེས་པར་འདོད་པ་པོའི་འདོད་པ་མ་གྲུབ་པ་ན། གང་ལས་ཕྱིན་ཅི་ལོག་ཐོབ་པའམ། ཐེ་ཚོམ་ཐོབ་པར་འགྱུར་ཏེ། དང་གི་སྒྲ་ནི་ངེས་པར་གཟུང་བའི་དོན་ཅན་ཏེ་རིམ་པ་ཐ་དད་པ་ཡང་ངོ་། །ཟློག་པ་དང་ཐེ་ཚོམ་ཐོབ་པ་ཁོ་ན་སྟེ། རྣམ་པ་གཞན་མེད་དོ། །དེ་ལ་གལ་ཏེ་འཁྲུལ་པ་དང་བཅས་པ་
[172b.2]ལ་སོགས་པ་རྣམས་ཐེ་ཚོམ་སྐྱེད་པར་བྱེད་ན་མ་ངེས་པ་ཁོ་ནའི་ནང་དུ་འདུ་ཞིང་། ཅི་སྟེ་ཟློག་པ་ཡིན་ན། དེ་ལས་ཟློག་པའི་གཏན་ཚིགས་སུའོ། །ཅི་སྟེ་གཉིས་ཀ་མི་སྐྱེ་ན་གཏན་ཚིགས་ལྟར་སྣང་བ་ཉིད་དུ་དེ་རྣམས་མི་འགྱུར་ཏེ། ཡང་དག་པའི་ཤེས་པའི་རྟགས་བཞིན་ནོ། །དེའི་ཕྱིར་འགལ་བ་དང་
[172b.3]མ་ངེས་པ་དག་ལས་གཞན་པའི་ཕྱོགས་ཆོས་ཅན་གྱི་གཏན་ཚིགས་ལྟར་སྣང་བ་མེད་དོ་ཞེས་པའོ། །འོ་ན་གང་ཞེས་པ། གལ་ཏེ་ཕྱོགས་ཆོས་ཅན་གྱི་གཏན་ཚིགས་ལྟར་སྣང་བ་གཉིས་ཁོ་ན་ཡིན་ན། གང་འདོད་པ་ལ་གནོད་པར་བྱེད་པའི་འགལ་བར་འདོད་པ་དེ་ཅི་ལྟར་བརྗོད་པར་བྱ་སྟེ། ཅི་བཟློག་པའི་
[172b.4]གཏན་ཚིགས་སམ། འོན་ཏེ་ཐེ་ཚོམ་གྱི་གཏན་ཚིགས་ཡིན་ཞེས་པར་རོ། །རྣམ་པ་གཉིས་ཀར་བརྗོད་པར་མི་ནུས་སོ་ཞེས་པ་བསམ་པའོ། །གལ་ཏེ་དེ་ལྟར་གནས་ན་ཞེས་པ་ལ་སོགས་པ་སྟེ། གལ་ཏེ་འདི་བཟློག་པའི་གཏན་ཚིགས་སུ་འགྱུར་ན་ནི་ཟློག་པ་གྲུབ་པར་འགྱུར་ན། འགྱུར་བ་མ་ཡིན་
[172b.5]ནོ། །དེའི་ཕྱིར་འདི་བཟློག་པའི་གཏན་ཚིགས་མ་ཡིན་ན་ཞེས་པའོ། །འདིར་སྨྲས་པ་ཙམ་ཁོ་ན་བསྒྲུབ་བྱའོ་ཞེས་གང་སེམས་པར་བྱེད་པ་དེས་རེ་ཞིག་ལན་སྨྲས་པ། གཞན་གྱི་དོན་གྱི་གཏན་ཚིགས་ཡོད་པའི་ཕྱིར་ཞེས་པ་སྟེ། དཔེར་ན་ཞེས་པ་ལ་སོགས་པ་གསལ་བར་བྱེད་པའི་ཆེད་དུ་དཔེའོ། །
[172b.6]མི་འདྲ་བ་ཉེ་བར་བཀོད་པ་སྟེ་ཞེས་པ། ཉེ་བར་བཀོད་པ་ནི་དཔེ་སྟེ། ཉེ་བར་འགོད་པར་བྱེད་ཅིང་དཔེ་ཅན་ཉེ་བར་འཇོག་པར་བྱེད་དོ་ཞེས་བྱས་ནས་སོ། །མི་འདྲ་བ་ཉིད་ནི་དེ་དཔེ་ཅན་དང་མི་མཚུངས་པ་ཉིད་ཀྱི་ཕྱིར་རོ། །དེ་སྟོན་པ། དེ་ལ་ནི་ཞེས་པ་ལ་སོགས་པའོ། །རྟག་པ་ཉིད་ཀྱི་གཏན་ཚིགས་དང་
[172b.7]ལྷན་ཅིག་པ་ནི་སྒྲུབ་པར་བྱེད་པ་མ་ཡིན་པར་འགྱུར་རོ་ཞེས་སྦྲེལ་ལོ། །ཅིའི་ཕྱིར་ཞེ་ན་སྨྲས་པ་གཅིག་འཛིན་པའི་ཕྱིར་ཞེས་པ་སྟེ། གྲངས་གཅིག་བརྗོད་པར་འདོད་པ་ཉིད་ཀྱི་ཕྱིར་གཅིག་ཁོ་ན་སྒྲུབ་པར་བྱེད་པ་ཉིད་དུ་གཟུང་བའོ། །གཏན་ཚིགས་གཉིས་པོ་འདི་དག་ནི་ཕན་ཚུན་འགལ་བ་དག་སྟེ། དེ་ལ་
[173a]
[173a.1]སྒྲུབ་པར་བྱེད་པ་མ་ཡིན་པ་ཉིད་དུ་རིགས་པའོ། །འདིར་ནི་འགལ་ཟླ་དང་བྲལ་བ་གཅིག་ཁོ་ན་ཅིའི་ཕྱིར་སྒྲུབ་པར་མི་བྱེད། འདི་ལྟ་ན་འོ་ན་ཞེས་པ་མི་འདྲ་བ་ཉིད་ཡོངས་སུ་སྤོང་བར་བྱེད་དེ། །བསྒྲུབ་བྱའི་བྱེ་བྲག་ལས་ཞེས་པ་གཉིས་ཉིད་ཀྱི་གྲངས་རྟོགས་པ་ལ་རྒྱུ་བཤད་པའོ། །
[173a.2]བསྒྲུབ་བྱའི་ཁྱད་པར་ནི་གཞན་གྱི་དོན་ཉིད་དང་གཞན་གྱི་དོན་མིན་པ་ཉིད་ཀྱི་མཚན་ཉིད་ཅན་དུ་སེམས་པར་བྱེད་དོ། །དཔེར་ན་མིག་གིས་གཟུང་བྱ་མ་ཡིན་པ་ཉིད་དང་མངོན་སུམ་པ་ཉིད་དག་བཞིན་དུ་གཅིག་པོ་ཉིད་ཅེས་པ་ནི། ཇི་ལྟར་འདི་དག་གིས་བསྒྲུབ་པར་བྱ་བར་གཏོགས་པའི་གྲངས་བརྟགས་
[173a.3]པ་ཡིན་པ་དེ་ལྟར་འདུས་པ་ཉིད་ཀྱི་བསྒྲུབ་པར་བྱ་བར་གཏོགས་པའི་གྲངས་བརྟགས་པར་འགྱུར་རོ་ཞེས་པའོ། །འདི་ཙམ་གྱིས་དཔེའི་ཆོས་མཐུན་པ་ཉིད་དོ། །ཐ་དད་མེད་པར་འགྱུར་རོ་ཞེས་པ་དེའི་མཚན་ཉིད་ཅན་གྱི་ཕྱིར་རོ། །དེ་ལྟར་འགྱུར་མོད་ཀྱི་ཐ་མི་དད་པར་འདོད་པ་ཁོ་ནའོ་ཞེ་ན།
[173a.4]བཤད་པ། མ་ཡིན་ཞེས་པ་ལ་སོགས་པའོ། །དེ་ལྟར་སྨྲས་པ་ཙམ་བསྒྲུབ་པར་བྱ་བར་སྨྲ་བ་བསལ་བ་ལ། སློབ་དཔོན་གྱིས་གསུངས་པ། དེ་ལྟ་ན་འོ་ན་ཞེས་པ་ལ་སོགས་པའོ། །ཁྱད་པར་མེད་པའི་སྨྲས་པ་ཙམ་གཞན་གྱི་དོན་ཉིད་ནི་བསྒྲུབ་པར་བྱ་བ་མ་ཡིན་ཏེ་དེ་ལ་རྩོད་པ་མེད་པའི་ཕྱིར་རོ། །
[173a.5]འོ་ན་ཅི་ཞེ་ན། ཁྱད་པར་ཅན་འདུས་པ་མ་ཡིན་པ་གཞན་གྱི་དོན་ཉིད་དོ། །དེའི་ཕྱིར་དེ་ལས་བཟློག་པ་འདུས་པ་གཞན་གྱི་དོན་ཉིད་སྒྲུབ་པར་བྱེད་པའི་ཕྱིར་འགལ་བ་ཉིད་དོ། །དེ་ཉིད་སྟོན་པ་གསུངས་པ། དེ་ལྟར་ནི་ཞེས་པ་ལ་སོགས་པའོ། །གཅིག་གི་རང་བཞིན་དུ་རྣམ་པར་གནས་
[173a.6]པ་ཉིད་འདིར་འདུས་པ་མ་ཡིན་པའི་སྒྲས་བརྗོད་པར་འདོད་པའོ། །འོ་ན་མལ་ཆ་དང་སྟན་ལ་སོགས་པ་རྣམས་ཀྱང་འདུས་པ་མ་ཡིན་པ་གཞན་བདག་གི་དོན་བྱེད་དེ། དེའི་ཕྱིར་འགལ་བ་བསྒྲུབ་པར་བྱ་བ་ལ་དཔེ་བསྒྲུབ་བྱས་དམན་པའོ་ཞེས་གསུངས་པ། དེ་ནི་མ་ཡིན་ཞེས་པ་ལ་སོགས་པའོ། །ཅི་
[173a.7]ལྟར་ན་གྲུབ་པ་མ་ཡིན་ཞེ་ན་གསུངས་པ། དེ་ཡོད་པར་མ་གྲུབ་པའི་ཕྱིར་ཞེས་པ་སྟེ། དེ་ཡོད་པ་ཉིད་དུ་གྲུབ་ན་ནི་དཔེ་བསྒྲུབ་པར་བྱ་བ་དང་བྲལ་བ་ཉིད་དུ་འགྱུར་མོད། དེ་ཡང་མ་གྲུབ་བོ། །འགལ་བ་གཞན་ལས་ཞེས་པ། ཆོས་དང་ཆོས་ཅན་གྱི་རང་གི་ངོ་བོ་ཟློག་པ་སྒྲུབ་པར་བྱེད་པ་ལས།
[173b]
[173b.1]མ་སྨྲས་པའི་ཆོས་དང་ཆོས་ཅན་གྱི་ཁྱད་པར་ལས་ཟློག་པ་སྒྲུབ་པར་བྱེད་པ་ཉིད་ཀྱི་ཁྱད་པར་གྱི་ཐ་དད་པ་ཡིན་ནོ། །འགལ་བའི་མ་ངེས་པ་ལས་ཞེས་པ། འགལ་བ་མི་འཁྲུལ་བ་ལས་ཏེ། དེ་ནི་འགལ་བའི་དོན་ལ་མི་འཁྲུལ་བའི་ཕྱིར་འགལ་བ་ཡིན་ཞིང་ཐེ་ཚོམ་གྱི་རྒྱུ་ཉིད་ཀྱི་ཕྱིར་མ་ངེས་པའོ། །
[173b.2]འོ་ན་དེ་ལས་མཚན་ཉིད་ཀྱི་བྱེ་བྲག་ལས་ཀྱང་ཐ་དད་པ་མ་ཡིན་ནམ། དེས་ན་འདི་ཁོ་ནས་ཀྱང་ཞེས་བརྗོད་པ་འདི་ཅི་ཞེ་ན། འདི་སྐྱོན་མ་ཡིན་ཏེ། ཀྱང་གི་སྒྲ་ནི་དེ་ཉིད་སྡུད་པའི་དོན་ཅན་ནོ། །དེ་བཞིན་དུ་ཞེས་པ་ལ་སོགས་པ་སྟེ། ཇི་ལྟར་ཆོས་ཀྱི་རང་གི་ངོ་བོ་ལས་བཟློག་པ་སྒྲུབ་པར་བྱེད་པ་འདི་
[173b.3]འདོད་པ་ལ་གནོད་པར་བྱེད་པའི་འགལ་བར་བརྗོད་པ་དེ་བཞིན་དུ། ཚད་མ་གཞན་གྱིས་མཐོང་བས་གནོད་ན་ཆོས་ཅན་གྱི་རང་གི་ངོ་བོ་དང་ཁྱད་པར་དང་འགལ་བ་སྒྲུབ་པར་བྱེད་པའི་ཕྱིར་འགལ་བར་བརྗོད་པར་བྱའོ། །ཅི་ལྟར་ཇི་ལྟར་མཐོང་བའི་ཆོས་གཞན་གྱིས་གནོད་པ་ཡིན་ཞེ་ན། གསུངས་
[173b.4]པ། དཔེར་ན་བརྩལ་མ་ཐག་ཏུ་བྱུང་བ་ཉིད་ཀྱི་ཕྱིར་རོ་ཞེས་པ་ལ་སོགས་པ་སྟེ། སྒྲའི་རང་གི་ངོ་བོ་ནི་མངོན་སུམ་གྱིས་གྲུབ་པ་སྟེ། དེས་ན་སྒྲའི་རང་གི་ངོ་བོ་མེད་པའི་དམ་བཅའི་དོན་བསལ་བའོ། །མཉན་བྱ་མེད་དོ་ཞེས་པ་འདིར་ནི་མཉན་བྱའི་སྒྲའི་བརྗོད་པར་བྱ་བ་ཉིད་འདི་ལ་མེད་དོ་ཞེས་པ་དམ་བཅའ་
[173b.5]བའི་དོན་ཏེ། དེ་ཡང་གྲགས་པ་ཞེས་བྱ་བའི་རྗེས་སུ་དཔག་པས་བསལ་བར་བྱ་བའོ། །བཟློག་པས་གནོད་པ་ནི་གཉིས་པོ་འདི་དང་སྦྱར་བར་བྱའོ། །ཅིའི་ཕྱིར་ཆོས་ཅན་གྱི་རང་གི་ངོ་བོ་ལས་བཟློག་པ་སྒྲུབ་པར་བྱེད་པའི་དཔེར་བརྗོད་ཉེ་བར་དགོད་པ་མ་བྱས་ཤེ་ན། མཚན་ཉིད་ལས་ནི་སྔར་ཉེ་
[173b.6]བར་བཀོད་ཅིང་། དཔེར་བརྗོད་པའི་ཕྱོགས་ཀྱིས་ཀྱང་མཚོན་བྱ་རྟོགས་པའི་ཕྱིར་འདིར་དཔེར་བརྗོད་མ་བཀོད་དོ། །དེ་ལ་འདི་ནི་ཆོས་ཅན་གྱི་རང་གི་ངོ་བོ་དང་འགལ་བའི་དཔེར་བརྗོད་པ་སྟེ། ནམ་མཁའ་ལ་སོགས་པ་ནི་རྟག་པ་སྟེ། མི་རྟག་པའི་ཆོས་མེད་པའི་ཕྱིར་རོ་ཞེས་བྱས་པ་ནའོ། །གཏན་
[173b.7]ཚིགས་འདི་ནི་ཆོས་ཅན་གྱི་རང་གི་ངོ་བོ་ལས་བཟློག་པ་སྒྲུབ་པར་བྱེད་པ་སྟེ། དེ་ལྟར་ནི་དོན་བྱ་བ་ནུས་པ་ཡང་མི་རྟག་པའི་ཆོས་ཡིན་ཞིང་། དེ་ཡང་གལ་ཏེ་ནམ་མཁའ་ལ་སོགས་པ་ལ་མེད་ན། དེ་ནི་དངོས་པོར་གྱུར་པ་ཉིད་དུ་མི་འགྱུར་ཏེ། དངོས་པོ་ནི་དོན་བྱ་བ་ནུས་པའི་མཚན་ཉིད་ཅན་ཉིད་ཀྱི་
[174a]
[174a.1]ཕྱིར་རོ། །འོ་ན་ཆོས་ཅན་གྱི་རང་གི་ངོ་བོ་སེལ་བར་བྱེད་ན། རྟེན་མ་གྲུབ་པའི་གཏན་ཚིགས་སུ་འགྱུར་རོ་ཞེ་ན། འདི་འདོད་པ་མ་ཡིན་ཏེ། འདིར་ནི་རྣམ་པར་གཅོད་པ་ཙམ་གཏན་ཚིགས་ཉིད་དུ་ཉེ་བར་བླངས་ཤིང་། དེའི་རྟེན་དུ་དངོས་པོར་མ་གྱུར་པ་ཡང་འགལ་བ་མེད་
[174a.2]པ་ཁོ་ནའོ། །ཐམས་ཅད་དུ་ཡང་འདི་ཁོ་ན་ཆོས་ཅན་གྱི་རང་གི་ངོ་བོ་ལས་ཟློག་པ་སྒྲུབ་པར་བྱེད་པའི་ཡུལ་ཏེ། གང་དུ་དངོས་པོར་གྱུར་པའི་ཆོས་ཅན་ཉེ་བར་བླངས་ཤིང་། གཏན་ཚིགས་ནི་རྣམ་པར་གཅོད་པ་ཙམ་གྱི་ཆོས་ཡིན་པའོ། །དེས་ན་འདི་བརྩད་པར་མི་བྱ་བ་ཁོ་ནའོ། །ཆོས་ཅན་གྱི་ཁྱད་
[174a.3]པར་དང་འགལ་བ་དཔེར་བརྗོད་པ་ནི་མིག་ལ་སོགས་པ་རྣམས་གཞན་གྱི་དོན་ཡིན་ཏེ། འདུས་པ་ཉིད་ཀྱི་ཕྱིར་རོ་ཞེས་འདི་སྔར་ཁོ་ནར་བཤད་ཟིན་ཏོ། །ཅིའི་ཕྱིར་ཡང་སྐབས་སུ་མ་བབ་པའི་ཆོས་ཅན་གྱི་རང་གི་ངོ་བོ་དང་ཁྱད་པར་ཟློག་པ་སྒྲུབ་པར་བྱེད་པ་ན། འགལ་བ་ཉིད་དུ་བརྗོད་པར་བྱ་ཞེ་ན་
[174a.4]གསུངས་པ། གཉིས་ཀ་ནི་ཞེས་པ་ལ་སོགས་པའོ། །ཆོས་ཁོ་ན་མ་ཤེས་པ་ཉིད་ཀྱི་ཕྱིར་བསྒྲུབ་པར་བྱ་བ་འདིར་འགྱུར་མོད། དེས་ཅིའི་ཕྱིར་ཆོས་ཅན་བསྒྲུབ་བྱ་ཉིད་ཡིན་ཞེ་ན་གསུངས་པ། ཆོས་ཀྱིས་ཁྱད་པར་དུ་བྱས་པའི་ཆོས་ཅན་བསྒྲུབ་བྱ་ཉིད་ཀྱི་ཕྱིར་རོ་ཞེས་པའོ། །འདིས་འདི་བསལ་
[174a.5]བར་བྱེད་དེ། ཚོགས་པ་ཁོ་ན་བསྒྲུབ་བྱ་ཡིན་ཞིང་། དེས་ན་དེ་ལས་ཟློག་པ་སྒྲུབ་པར་བྱེད་པའི་ཕྱིར་འགལ་བ་གཅིག་ཁོ་ན་སྟེ། དེ་ནི་ཆོས་ལ་སོགས་པའི་སྒོ་ནས་འཇུག་པ་ཉིད་ཀྱི་ཕྱིར་རབ་ཏུ་དབྱེ་བས་རྣམ་པར་གཞག་པར་བྱའོ་ཞེས་པའོ། །གང་འགལ་བའི་ཁྱད་པར་མཚན་ཉིད་ཀྱིས་མ་བསྡུས་པ་
[174a.6]དེ་བསྟན་པའི་ཆེད་དུ་གསུངས་པ། བརྗོད་པ་ཐམས་ཅད་ཅེས་པ་ལ་སོགས་པའོ། །འདིར་དམ་བཅའི་ངག་ལས་གཞན་པ་བྷཱ་ར་ཏ་ལ་སོགས་པའི་ངག་ནི་ཆོས་ཅན་ཡིན་ཞིང་། དེ་ནི་མི་བདེན་པའི་དོན་ཅན་ཉིད་ནི་ཆོས་ཏེ་བསྒྲུབ་པར་བྱ་བའོ། །རྨི་ལམ་གྱི་ལུས་ཀྱི་རྣམ་པར་རིག་བྱེད་ལ་ཅི་ལྟར་དོན་རྟོགས་
[174a.7]པར་བྱེད་པ་དང་། བདེན་པའི་དོན་ཅན་ཡིན་ཞེ་ན། གང་གི་ཕྱིར་རྨི་ལམ་ན་ཡང་མགོ་སྒྲིལ་བ་ལ་སོགས་པ་ཉེ་བར་དམིགས་པས་ནི། མེད་པ་ཉིད་ལ་སོགས་པའི་དོན་གྱི་ཡུལ་ཅན་གྱི་རྟོགས་པ་སྐྱེད་པར་བྱེད་ཅིང་། རྟོགས་པར་བྱ་བའི་དོན་དེ་རྨི་ལམ་ན་ཡོད་པ་ཡང་མ་ཡིན་ནོ་ཞེས་པས་མི་བདེན་པའི་དོན་
[174b]
[174b.1]ཅན་ཉིད་དོ། །དེ་ལྟར་སྒྲུབ་པར་བྱེད་པས་བྱས་པ་ན། གང་གི་རྗེས་སུ་རྗོད་པར་བྱེད་པའི་ངག་གི་དབང་གིས་གཏན་ཚིགས་འགལ་བ་ཉིད་དུ་འགྱུར་ཏེ། དེ་སྟོན་པ་གསུངས་པ་གང་འདི་ཞེས་པ་ལ་སོགས་པའོ། །ཡང་གི་སྒྲ་ནི་ཆོས་དང་ཆོས་ཅན་གྱི་ཁྱད་པར་རྗེས་སུ་བརྗོད་པའི་ངག་བསྡུ་བའི་དོན་
[174b.2]ཏོ། །གལ་ཏེ་རྣམ་པ་ཐམས་ཅད་ལ་སྐུར་པ་འདེབས་ན་ཞེས་ཆོས་ཀྱི་རང་གི་ངོ་བོའི་སྒོ་ནས་སམ། ཆོས་ཅན་གྱི་རང་གི་ངོ་བོའི་སྒོ་ནས་གལ་ཏེ་སྐུར་པ་འདེབས་ནའོ་ཞེས་པའི་དོན་ཏོ། །འོ་ན་རྣམ་པ་ཐམས་ཅད་དུ་ཞེས་པའི་ཚིག་ལས། དེའི་ཁྱད་པར་གྱི་སྒོ་ནས་ཀྱང་ཞེས་པའི་དོན་རིགས་པ་མ་ཡིན་ནམ།
[174b.3]དེའི་སྒོ་ནས་འཇུག་པ་ནི་ཁྱད་པར་དང་འགལ་བ་ཉིད་ཀྱིས་ཚིག་ལས་མ་ཡིན་ནོ། །དེས་ན་རང་གི་ངོ་བོ་དང་འགལ་བ་ཞེས་པ་སྟེ། དེའི་སྒོ་ནས་ཞུགས་པ་ཉིད་ཀྱི་ཕྱིར་རོ། །དེ་ལྟར་རེ་ཞིག་དངོས་སུ་ཉེ་བར་བླངས་པ་དང་། རྗེས་སུ་བརྗོད་པའི་ངག་གི་སྟོབས་ཀྱིས་གཉིས་ཀའི་རང་གི་ངོ་བོ་དང་འགལ་བ་
[174b.4]བཤད་དོ། །ཅི་སྟེ་ཞེས་པ་ལ་སོགས་པ་ཡང་གི་སྒྲས་གང་བསྡུས་པ་རྗེས་སུ་ཡི་རང་བའི་ངག་སྟེ། དེའི་སྟོབས་ཀྱིས་གཉིས་ཀའི་ཁྱད་པར་དང་འགལ་བ་སྟོན་ཏེ། རྗོད་པར་བྱེད་པ་ཉིད་ཀྱིས་དང་ཞེས་པ། སྨྲ་བར་བྱེད་པ་ཉིད་ཀྱིས་དང་ཞེས་པའི་དོན་ཏོ། །བརྗོད་པའི་སྒྲ་སྔ་མ་ནི་དངོས་པོ་སྒྲུབ་པ་སྟེ།
[174b.5]འདི་ནི་བྱེད་པ་པོ་གྲུབ་པའོ། །མི་བདེན་པའི་དོན་ཉིད་ཀྱིས་ཞེས་པ་མི་བདེན་པའི་དོན་ནི་མི་བདེན་དོན་ཏེ། དེའི་དངོས་པོ་ནི་མི་བདེན་དོན་ཉིད་དོ། །སྔ་མ་ནི་མི་བདེན་པའི་དོན་འདིའི་ཡིན་པ་ཞེས་འབྲུ་མང་པོ་པ་ལ་བརྟེན་པ་སྟེ། གཉིས་ཀ་ལ་གསུམ་པ་འདི་ནི་རྒྱུ་ལའོ། །ཚོགས་པ་ལ་སྐུར་པ་
[174b.6]འདེབས་པ་ཞེས་པ་འདིར་ཡང་འཇུག་གོ། །དེས་ན་དོན་འདིར་འགྱུར་ཏེ། ཅི་སྟེ་རྗོད་པར་བྱེད་པ་ཉིད་དང་། མི་བདེན་པའི་དོན་ཉིད་ཀྱི་གཏན་ཚིགས་ཀྱིས་ཚོགས་པའི་དོན་ལ་སྐུར་པ་འདེབས་པར་འགྱུར་ན། དེའི་སྒོ་ནས་དེ་གཉིས་ཀ་ལ་གནོད་པ་ན། ཚོགས་པའི་དོན་ལ་སྐུར་པ་འདེབས་ཏེ།
[174b.7]དེའི་ཕྱིར་ཁྱད་པར་དང་འགལ་བར་འགྱུར་རོ་ཞེས་པའོ། །ཡང་འདི་ཅི་ལྟར་འགལ་བ་ཡིན་ཏེ། འདི་ལ་འགལ་བའི་མཚན་ཉིད་སྲིད་པ་མ་ཡིན་པས་སོ་ཞེ་ན། ཇི་ལྟར་འགལ་བ་ཡིན་པ་དེ་ལྟར་བརྗོད་པར་བྱ་སྟེ། མངོན་པར་བསྒོ་བའི་ངག་ཀྱང་བརྫུན་པའི་དོན་ཅན་ཉིད་ཡིན་ན། བྷཱ་ར་ཏ་
[175a]
[175a.1]ལ་སོགས་པའི་ངག་ཐམས་ཅད་བརྗོད་པའི་རང་བཞིན་མ་ཡིན་པ་དང་། ཇི་ལྟ་བའི་དོན་ཅན་དུ་འབྱུང་སྟེ། གང་ཡང་དེའི་ཁྱད་པར་རྗོད་པར་བྱེད་པ་ཉིད་ལ་སོགས་པ་དང་དེའི་ཆོས་ཀྱི་མི་བདེན་པའི་དོན་ཅན་ཉིད་ལ་སོགས་པ་དེ་ཡང་རྣམ་པ་གཞན་དུ་འབྱུང་ངོ་ཞེས་པས་
[175a.2]འདི་ལྟར་འགལ་བར་འགྱུར་རོ། །འོ་ན་བྷཱ་ར་ཏ་ལ་སོགས་པའི་ངག་རྣམས་ནི་མཉན་པར་བྱ་བཞིན་པ་ཉིད་ཀྱི་ཕྱིར་མངོན་སུམ་ཁོ་ན་རྣམས་ཏེ། དེ་རྣམས་བརྗོད་པ་མ་ཡིན་པ་ཉིད་དུ་ཅི་ལྟར་འགྱུར། མི་བདེན་པའི་དོན་ཅན་གྱི་ངག་འགའ་ཞིག་རྣམས་ཀྱང་དམིགས་ཏེ། དེས་ན་ངག་ཐམས་ཅད་ཇི་
[175a.3]ལྟ་བ་བཞིན་གྱི་དོན་ཅན་དུ་འབྱུང་ངོ་ཞེས་བཤད་པ་འདི་མི་རིགས་སོ་ཞེ་ན། འདི་འདི་ལྟར་མ་ཡིན་ཏེ། ངག་འདིའི་དོན་འདི་ལྟ་བུ་འདི་ལྟར་དུ་བརྗོད་པར་བྱ་བ་ན། ཐལ་བར་འགྱུར་རོ་ཞེས་སྒྲའི་དོན་གྱི་དབང་ལས་འདི་འདི་ལྟ་བུར་འབྱུང་གི་དངོས་པོའི་དབང་ལས་ནི་མ་ཡིན་ནོ། །བརྗོད་པའི་སྐྱོན་ནི་
[175a.4]གཞན་དོན་རྗེས་སུ་དཔག་པར་དབང་དུ་བྱ་བའོ་ཞེས་བཤད་ལ་དེའི་ཕྱིར་མངོན་སུམ་ལ་སོགས་པ་དང་འགལ་བ་ཡོད་ན་ཡང་། དེ་ལ་མ་ལྟོས་པར་འགལ་བ་ཉིད་བརྗོད་པར་བྱའོ། །གལ་ཏེ་རྗེས་སུ་བསྒོ་བའི་ངག་མི་བདེན་པའི་དོན་ཅན་ཉིད་དུ་གྲུབ་ན། འགལ་བ་ཉིད་དུ་འགྱུར་མོད། དེ་ཉིད་
[175a.5]ནི་འགྲུབ་པ་མ་ཡིན་ཏེ། དོན་རྟོགས་པར་བྱེད་པ་ཐམས་ཅད་ནི་མི་བདེན་པའི་དོན་ཅན་ཉིད་དུ་འབྱུང་བར་བྱའོ་ཞེས་པའི་ངེས་པ་འདི་མེད་དེ། འབྲེལ་པ་མེད་པའི་ཕྱིར་རོ་ཞེ་ན། འདི་བདེན་མོད། འོན་ཀྱང་སྐྱོན་གཞན་འདིར་ལྟོས་པར་བྱ་བ་མ་ཡིན་ཏེ། དཔེར་ན་གྲངས་ཅན་ལ་བརྟག་པ་ན་གཞི་མ་གྲུབ་པ་
[175a.6]ཉིད་ལ་སོགས་པ་བཞིན་ནོ། །དོན་རྟོགས་པར་བྱེད་པའི་སྒྲུབ་པར་བྱེད་པའི་དངོས་པོ་ཁས་བླངས་ནས་ནི། དེས་རྟོགས་པར་བྱས་པའི་མི་བདེན་པའི་དོན་ཅན་གྱི་ངག་གི་སྟོབས་ཀྱིས་རང་གི་ངོ་བོ་དང་ཁྱད་པར་བསལ་བའི་ཕྱིར་གཏན་ཚིགས་འགལ་བ་ཉིད་དུ་འགྱུར་རོ། །དེས་ན་འདི་ནི་འགལ་བ་གཞན་ཁོ་ནའོ། །
[175a.7]དེའི་ཕྱིར་འདི་ལ་ཇི་སྐད་བཤད་པའི་འགལ་བའི་མཚན་ཉིད་བཙལ་བར་བྱ་བ་མ་ཡིན་ནོ། །ཡང་ཅིའི་ཕྱིར་འདིའི་མཚན་ཉིད་ཀྱི་མདོ་ལོག་པར་མ་མཛད་ཅེ་ན། གཙོ་བོ་མ་ཡིན་པར་ཤེས་པའི་དོན་དུ་སྟེ། ལུང་ལ་བརྟེན་པའི་རྗེས་སུ་དཔག་པ་བཞིན་ནོ། །གཙོ་བོ་མ་ཡིན་པ་ཉིད་ནི་དངོས་པོ་ལས་མི་འགལ་བ་ཉིད་
[175b]
[175b.1]ཀྱི་ཕྱིར་རོ། །སྨྲས་པ་ཡང་ཞེས་པ་སྟེ། ཆོས་དང་ཆོས་ཅན་དང་། ཆོས་ཆོས་ཅན་དག་སྟེ། དེ་རྣམས་ནི་ཆོས་དང་ཆོས་ཅན་རྣམས་སོ། །དེ་རྣམས་ཀྱི་རང་གི་ངོ་བོའམ། དེའི་ཁྱད་པར་གྱི་ཞེས་པ། ཆོས་དང་ཆོས་ཅན་དག་གི་ཁྱད་པར་གྱི། ཕྱིན་ཅི་ལོག་ཏུ་ཉེར་བྱེད་ཕྱིར། །ཞེས་པ་འགལ་བ་
[175b.2]སྒྲུབ་པར་བྱེད་པའི་ཕྱིར་ཞེས་པའི་དོན་ཏོ། །དེ་ལྟ་ན་འོ་ན་སྒྲ་མཉན་པར་བྱ་བ་མ་ཡིན་ཏེ། བརྩལ་མ་ཐག་ཏུ་བྱུང་བའི་ཕྱིར་རོ་ཞེས་པ་འང་འགལ་བར་འགྱུར་རོ་ཞེ་ན་གསུངས་པ། གནོད་པ་ཡོད་ན་ཞེས་པའོ། །འདུས་པ་ཉིད་འབའ་ཞིག་པ་ནི་འགལ་བ་ཉིད་དུ་འགྱུར་མོད། གང་གི་ཚེ་གང་དོགས་
[175b.3]པ་བསུ་ནས་སློབ་དཔོན་དབྱིག་གཉེན་གྱིས། ད་ལྟར་འདུས་རྣམས་ནང་མ་ཡིན། །དེ་བཞིན་གཞན་དོན་ཅན་མི་འགྱུར། །ཞེས་བཤད་པ་ནང་ཉིད་དང་། ལྷན་ཅིག་པ་རབ་ཏུ་སྦྱོར་བ་དེའི་ཚེ་དེ་ཅི་ལྟར་འགལ་བ་ཉིད་ཡིན་ཞེ་ན་གསུངས་པ། གང་སློབ་དཔོན་གྱིས་གསུངས་པ་ཞེས་པ་ལ་སོགས་པ་སྟེ།
[175b.4]གྲངས་ཅན་པས་བརྗོད་པ། མིག་ལ་སོགས་པ་རྣམས་ནི་གཞན་གྱི་དོན་ཡིན་ཏེ་འདུས་པ་ཉིད་ཀྱི་ཕྱིར། འདིར་མལ་ཆ་དང་སྟན་དང་ཤིང་རྟ་ལ་སོགས་པའི་འདུས་པ་རྣམས་གཞན་གྱི་དོན་དུ་མཐོང་ཞིང་། ནག་པ་ལ་སོགས་པའི་རྣམ་འགྱུར་སྐྱེས་བུའི་དོན་རྣམས་ནི་བདག་ཉིད་ཀྱི་དོན་མ་ཡིན་ལ།
[175b.5]ཕན་ཚུན་གྱི་དོན་མ་ཡིན་ཞིང་། དོན་མེད་ཅན་མ་ཡིན་པ་དེ་བཞིན་དུ། མིག་ལ་སོགས་པའི་འདུས་པ་རྣམས་ཀྱང་ངོ་། །དེའི་ཕྱིར་གཞན་གྱི་དོན་འདི་རྣམས་ཀྱིས་འབྱུང་བར་བྱ་བ། གང་གི་དོན་དུ་འདི་རྣམས་ཡིན་པ་དེ་ནི་བདག་སྟེ། དེའི་ཕྱིར་བདག་ཡོད་དོ་ཞེས་པའོ། །འདི་ལ་སློབ་དཔོན་གྱིས་
[175b.6]གསུངས་པ། བདག་གཞན་ཡིན་ན་དེ་མ་གྲུབ་བོ། །གལ་ཏེ་གཞན་གྱི་སྒྲས་བདག་བསྟན་པར་བྱ་བ་ཡིན་ན་མལ་ཆ་དང་སྟན་ལ་སོགས་པའི་འདུས་པ་རྣམས་གཞན་གྱི་དོན་དུ་མཐོང་ངོ་ཞེས་པས། འདིར་བདག་མ་གྲུབ་བོ། །དཔེ་བསྒྲུབ་པར་བྱ་བ་དང་བྲལ་བའོ་ཞེས་པའི་དོན་ཏོ། །འདིས་ནི་
[175b.7]འགལ་བ་ཉིད་དུ་བཤད་དེ། འདུས་པ་རྣམས་ནི་གལ་ཏེ་དེའི་དོན་ཡིན་ནའོ། །ཅི་སྟེ་མིག་ལ་སོགས་པ་འདུས་པ་ཡིན་ཞིང་། ནག་པ་ལ་སོགས་པ་གཞན་གྱི་སྒྲས་མཚོན་པ་ཡིན་ན། གང་གི་དོན་དུ་མལ་ཆ་དང་སྟན་ལ་སོགས་པ་རྣམས་ཡིན་ཞིང་། མིག་ལ་སོགས་པ་རྣམས་ཀྱང་ཡིན་པ་དེའི་
[176a]
[176a.1]དོན་ཅན་རྣམས་སུ་འགྲུབ་སྟེ། འདུས་པའི་དོན་རྣམས་སུ་ཞེས་པའི་དོན་ཏོ། །འདིས་ནི་འདུས་པ་རྣམས་དེའི་དོན་ཉིད་དུ་གྲུབ་ཅིང་། ཕ་རོལ་པོས་ཀྱང་མིག་ལ་སོགས་པ་རྣམས་སེམས་དང་སེམས་ལས་བྱུང་བའི་ཚོགས་ཀྱི་དོན་ཉིད་དུ་ཁས་བླངས་པའི་ཕྱིར་གྲུབ་པ་བསྒྲུབ་
[176a.2]པའོ། །འདིར་གྲངས་ཅན་པ་གཞན་གྱི་སྒྲ་བདག་གི་རྗོད་བྱེད་དོ་ཞེས་པའི་ཕྱོགས་འདི་ལ་གང་སྐྱོན་བརྗོད་པ་དེ་སྤོང་བར་འདོད་པས་ནང་ཉིད་དུ་ཡོད་པ་ན་ཞེས་རྟགས་ཀྱི་ཁྱད་པར་འགའ་ཞིག་གི་ཚེ་ཉེ་བར་ལེན་པར་བྱེད་ཅེས་དོགས་པར་བྱས་ཏེ། དེ་ལྟར་འདུས་པ་ནང་རྣམས་ཡིན། །ཞེས་པ་ལ་
[176a.3]སོགས་པ་གསུངས་སོ། །འདིས་ཇི་ལྟར་འགལ་བ་ཉིད་དུ་བརྗོད་པ་དེ་ལྟར་བསྟན་པའི་ཆེད་དུ་གསུངས་པ་དེ་ལ་ཞེས་པ་ལ་སོགས་པའོ། །ཅི་ལྟར་ན་གཏན་ཚིགས་ཀྱི་མཚན་ཉིད་དང་མི་ལྡན་པ་ཡིན་ཞེ་ན། དེ་ལྟར་ནི་ཞེས་པ་ལ་སོགས་པའོ། །འདིས་ནི་འགལ་བའི་གཏན་ཚིགས་ཀྱི་མཚན་ཉིད་
[176a.4]དང་ལྡན་པར་སྟོན་པ་ཉིད་ཀྱི་ཕྱིར་ན་གཏན་ཚིགས་ཀྱི་མཚན་ཉིད་དང་མི་ལྡན་པར་སྟོན་ཏོ། །གཉིས་ཀ་ཞེས་པ་ནང་གི་ཉིད་དང་འདུས་པ་ཉིད་ཀྱང་། མཐུན་ཕྱོགས་ལ་སྟེ་བདག་གི་དོན་འགའ་ཞིག་ལ་རིགས་པས་གྲུབ་པ་མ་ཡིན་ཏེ། བདག་ཕུལ་དུ་བྱུང་བ་བྱར་མེད་པ་ལ་ཕན་གདགས་པར་མི་ནུས་
[176a.5]པ་ཉིད་ཀྱི་ཕྱིར་རོ། །ཕན་ཚུན་གྱི་དོན་ཅན་དང་། དོན་མ་ཡིན་པ་རྣམས་ལ་གྲུབ་སྟེ། དེ་ལྟར་ནི་བསྟན་བཅོས་སུ་ཕན་ཚུན་གྱི་དོན་ཉིད་བཤད་དེ། དབང་པོ་གང་ཞིག་དབང་པོ་གང་ཞིག་ལ་ཡུལ་སྟོན་པ་བྱེད། དག་པར་བྱེད། སོ་སླར་འདུ་བྱེད། ཉེ་བར་འཛིན་པར་བྱེད་པ་དེ་ནི་རྒྱུ་ཡིན་ཞིང་ཅིག་ཤོས་
[176a.6]ནི་འབྲས་བུའོ་ཞེས་སོ། །ཕན་ཚུན་དུ་གདགས་པར་བྱ་བ་ཉིད་ཀྱིས་ན་འབྲས་བུ་དང་དངོས་པོ་བཤད་དོ། །དོན་མེད་པ་ཉིད་ནི་མངལ་དུ་ངེས་པར་འཆི་བ་རྣམས་ཀྱི་སྒྲ་སྟེ། སྒྲ་ལ་སོགས་པ་ལོངས་སྤྱད་པ་མ་བྱས་པ་ཁོ་ནར་འགག་པ་ཉིད་ཀྱི་ཕྱིར་རོ། །སྔ་མ་ཉིད་དུ་ཞེས་པ་རང་གི་ངོ་བོ་སེལ་བར་བྱེད་
[176a.7]པར་རོ། །འདི་ལ་ཁྱབ་པ་མེད་པ་འམ་འགལ་བར་གྲུབ་པར་དོགས་པར་བྱ་བ་ཡང་མ་ཡིན་ཏེ། གང་གི་ཕྱིར་མིག་ལ་སོགས་པ་རྣམས་གལ་ཏེ་དོན་བྱེད་ན་བདག་མེད་པ་མི་རྟག་པ་ཁོ་ནའི་སྟེ། ཡང་ན་ནི་བྱེད་པ་མ་ཡིན་པ་ཁོ་ནའོ། །བདག་ནི་རྣམ་པར་མི་འགྱུར་བ་ཉིད་ཀྱི་ཕྱིར་འདི་རྣམས་ལ་དེའི་
[176b]
[176b.1]དོན་ཉིད་སྲིད་པ་མ་ཡིན་པ་ཁོ་ནའོ། །དེའི་ཕྱིར་ནང་གི་འདུས་པ་རྣམས་ནི་བདག་མེད་པའི་དོན་ཅན་ཉིད་ཀྱིས་ཁྱབ་བོ་ཞེས་པས་འགལ་བར་འགྱུར་རོ། །སླར་ཡང་དོན་འདི་ཉིད་ཅེས་པ། གང་འདི་མཐུན་ཕྱོགས་ཡོད་མེད་དང་། །ཞེས་པ་ལ་སོགས་པས་རྒྱ་ཆེར་བཤད་པའོ། །ཅིའི་
[176b.2]དོན་དུ་ཞེ་ན། གཏན་ཚིགས་དང་འགལ་བ་དང་མ་ངེས་པ་ཉིད་འདི་ཁོ་ན་གསལ་བར་བྱེད་པའི་ཆེད་དུའོ། །གང་གི་ཕྱིར་རྣམ་པ་གཞན་གྱིས་བརྗོད་པར་བྱས་པས་དོན་དེ་ཁོ་ན་དྲི་མ་མེད་པར་འགྱུར་ཏེ། ཀུན་དུ་རྨོངས་པའི་ལྷག་མ་དང་བྲལ་བའི་ཕྱིར་རོ། །གསུམ་པོ་ཁོ་ན་སྟེ་ཞེས་པ། ཆ་
[176b.3]ཤས་གསུམ་རྟོགས་པ་སྟེ། རབ་ཏུ་དབྱེ་བ་ཞེས་པའི་དོན་ཏོ། །སྤྱི་ཡང་གཞལ་བྱ་ཉིད་དེ་རྗེས་སུ་འགྲོ་བ་ཅན་གྱི་གཏན་ཚིགས་སོ། །ཁྱད་པར་ཡང་སྲོག་ལ་སོགས་པ་དང་ལྡན་པ་ཉིད་དོ། །ལྡོག་པ་ཅན་ཞེས་ཁ་ཅིག་འདོད་དེ། དེའི་ཕྱིར་དེ་སེལ་བའི་ཆེད་དུ་ངེས་པར་འཛིན་པར་བྱེད་པ། དེར་དང་
[176b.4]པོ་གཉིས་ཐེ་ཚོམ་ཆེད་ཅེས་པའོ། །འོ་ན་མཉན་པར་བྱ་བ་ཉིད་ཐེ་ཚོམ་གྱི་རྒྱུ་ཁོ་ན་ཞེས་པ་འདི་མི་རིགས་ཏེ། དེ་ལྟར་ནི་དེ་བསྒྲུབ་པར་བྱ་བ་གཞན་འགའ་ཞིག་ལ་ངེས་པར་བྱེད་པའི་གཏན་ཚིགས་ཀྱང་ཡིན་པས་སོ། །དཔེར་ན་ཡི་གེའི་བདག་ཉིད་ཀྱི་སྒྲ་ནི་མི་རྟག་པ་སྟེ། མཉན་པར་བྱ་བ་ཉིད་ཀྱི་
[176b.5]ཕྱིར་གླིང་བུ་ལ་སོགས་པའི་སྒྲ་བཞིན་ཞེས་པ་ལྟ་བུའོ་ཞེ་ན། འདིར་འདིའི་ཐུན་མོང་མ་ཡིན་པ་ཉིད་མེད་དོ་ཞེས་པས་སྐྱོན་མིན་ནོ། །རང་གི་བྱེ་བྲག་ཐ་དད་པ་རྣམས་ལ་ཞེས་པ། གང་ཞིག་ཁྱད་པར་ཇི་སྙེད་ཀྱིས་དངོས་པོ་ཐམས་ཅད་བསྡུས་པ་དེ་ནི་དེ་རྣམས་ལ་མཐའ་གཅིག་ཏུ་འདི་དག་ཐེ་ཚོམ་གྱི་རྒྱུ་དག་
[176b.6]གོ། །རྟག་པ་དང་མི་རྟག་པའི་ཡུལ་བསྟན་པ་ནི་དཔེར་བརྗོད་ཙམ་མོ། །སྒྲ་ཐམས་ཅད་ཀྱང་འདིར་བསྒྲུབ་པར་བྱ་བ་ཉིད་དུ་འདོད་པ་ན་འཇུག་གོ་ཞེས་རིག་པར་བྱའོ། །བསྒྲུབ་པར་བྱ་བ་ཉིད་ལ་ལྟོས་པ་ཞེས་པ། དཔེར་ན་བྱས་པ་ཉིད་རྟག་པ་དང་མི་རྟག་པ་དག་ལ་ཡང་དག་པ་དང་ལོག་པ་སྒྲུབ་
[176b.7]པའི་གཏན་ཚིགས་ཇི་ལྟར་རིགས་པར་ཡིན་པ་དང་། བརྩལ་བ་དང་མ་བརྩལ་བའི་དེ་མ་ཐག་ཏུ་བྱུང་བ་ཉིད་དག་ལ་གང་ཐེ་ཚོམ་གྱི་རྒྱུ་ཁོ་ན་སྟེ། དེ་བཞིན་དུ་གཞན་ལ་ཡང་སྔ་མའི་རྗེས་སུ་འབྲང་བས་བརྟག་པར་བྱའོ། །ཅིའི་ཕྱིར་ཞེ་ན་ཞེས་པ། རྟག་པ་ཉིད་ལ་སྐུར་པ་འདེབས་པ་པོའི་སྤྱི་གཞལ་
[177a]
[177a.1]བྱ་ཉིད་དང་ལུས་བདག་དང་བཅས་པར་བསྒྲུབ་པར་བྱ་ལ། སྲོག་ལ་སོགས་པ་དང་ལྡན་པ་ཉིད་ཀྱི། ཁྱད་པར་ཡང་ཡང་དག་པའི་གཏན་ཚིགས་སུ་རིགས་སོ་ཞེས་ལོག་པར་རྟོགས་པའི་དྲི་བའོ། །རྗེས་འཇུག་ཕྱིར་ཞེས་པ་ལ་སོགས་པ་སྟེ། གཞལ་བྱ་ཉིད་ནི་ཐམས་ཅད་ལ་རྗེས་
[177a.2]སུ་འཇུག་པའི་ཕྱིར། ལྡོག་པ་བཟོད་མ་ཡིན། ལྡོག་པ་མི་རུང་ཞེས་པའི་དོན་ཏོ། །དངོས་པོ་མེད་པ་ཡང་གཞལ་བྱ་ཡིན་པས་ཏེ། གཞན་དུ་ན་མུ་སྟེགས་བྱེད་གཞན་གྱིས་ཡོངས་སུ་བརྟགས་པའི་ཚིག་གི་དོན་མེད་པ་ཚད་མའི་ཡུལ་དུ་མི་འགྱུར་རོ། །དེ་ལས་ཀྱང་དེ་གྱུར་པའི་ཐ་སྙད་ཆད་པ་ཁོ་
[177a.3]ནར་འགྱུར་རོ། །དེའི་ཕྱིར་དེ་མེད་པ་ལ་ཡང་གཞལ་བྱ་ཉིད་འཇུག་གོ། །ཁྱད་པར་མཉན་བྱ་ཉིད་ལ་སོགས་པ་ནི། ཐམས་ཅད་ལ་མི་འཇུག་པའི་ཕྱིར་རྗེས་སུ་འགྲོ་བ་བཟོད་མ་ཡིན། ཡང་ཅི་ལྟར་དངོས་པོའི་ཆོས་སུ་གྱུར་པ་ནི་ཐམས་ཅད་ལ་མི་འཇུག་པར་རིགས། དངོས་པོའི་ཆོས་ཡིན་པ་ཉིད་
[177a.4]ཁོ་ན་ནི་ཐམས་ཅད་ལས་ལྡོག་པ་ལས་འགྱུར་བ་མ་ཡིན་ནོ་ཞེ་ན། འདི་བདེན་མོད་ཀྱི་གཞན་གྱི་འདོད་པའི་ངོར་དེ་སྐད་བཤད་པ་སྟེ། ཕ་རོལ་པོ་ནི་མ་མཐོང་བ་ཙམ་ཁོ་ནས་ལྡོག་པར་འདོད་དེ། དཔེར་ན་བདག་མེད་པ་བུམ་པ་ལ་སོགས་པ་རྣམས་ལས་སྲོག་ལ་སོགས་པ་ལྟ་བུའོ། །དེའི་ཕྱིར་དེའི་
[177a.5]རྨོངས་པ་བསལ་བའི་དོན་དུ་འདི་སྐད་བཤད་དོ། །གལ་ཏེ་མ་མཐོང་བ་ཙམ་ལས་ལྡོག་པ་འགྲུབ་ན། མཉན་པར་བྱ་བ་ཉིད་ནི་རྟག་པ་དང་མི་རྟག་པ་ཐམས་ཅད་ལས་ལྡོག་པར་འགྱུར་ཞིང་། དེ་ལས་ཀྱང་དངོས་པོའི་ཆོས་མ་ཡིན་པ་ཉིད་ཁོ་ནར་འགྱུར་རོ། །འདི་རིགས་པའང་མ་ཡིན་ནོ། །
[177a.6]དེའི་ཕྱིར་སྲོག་ལ་སོགས་པ་ཡང་མ་མཐོང་བ་ཙམ་གྱིས་ལྡོག་པ་འགྲུབ་པ་མ་ཡིན་ནོ་ཞེས་པས་ལྡོག་པ་ཅན་གོ་བར་བྱེད་པ་ཉིད་དུ་འདོད་པར་བྱ་བ་མ་ཡིན་ན། དེ་ཡང་རྗེས་སུ་འགྲོ་བ་དང་ལྡོག་པ་དག་ལས་ཞེས་པ། གང་གི་ཕྱིར་ལྡོག་པས་རྟག་པ་ལས་རྣམ་པར་གཅད་པར་བྱ་ཞིང་། རྗེས་འགྲོས་
[177a.7]ནི་མི་རྟག་པ་ལ་བསྒྲུབ་པར་བྱ་བ་སྟེ། འདི་དག་ཀྱང་ཡན་ལག་གཅིག་མ་ཚང་བའོ་ཞེས་པའོ། །ཡང་ཅི་ལྟར་ཡན་ལག་གཅིག་མ་ཚང་བ་ཉིད་དུ་བརྗོད་ཅེ་ན། ཇི་ཙམ་གྱིས་མཐུན་ཕྱོགས་ཁོ་ན་ལ་ཡོད་པ་རྗེས་སུ་འགྲོ་སྟེ། དེ་ཡང་ལྡོག་པ་མེད་པར་མ་ཡིན་ནོ། །མི་མཐུན་ཕྱོགས་ལ་མེད་
[177b]
[177b.1]པ་ཁོ་ན་ནི་ལྡོག་པ་སྟེ། དེ་ཡང་རྗེས་འགྲོ་མེད་པར་མ་ཡིན་ནོ། །རང་གི་ལུགས་སོ། །ཕ་རོལ་པོ་ནི་ཡོད་པར་གྱུར་པ་ཙམ་ནི་རྗེས་སུ་འགྲོ་བར་སེམས་ཤིང་། མ་མཐོང་བ་ཙམ་གྱིས་ཀྱང་ལྡོག་པར་རོ། །འདི་གཉིས་ཀྱང་གཞལ་བྱ་ཉིད་དང་མཉན་བྱ་ཉིད་དག་ལ་ཡོད་དོ་ཞེས་པས་ཡན་ལག་གཅིག་མ་
[177b.2]ཚང་བ་ཉིད་དུ་ཕ་རོལ་པོའི་འདོད་པས་བརྗོད་དོ། །དེ་ལྟར་ན་འོ་ན་ཞེས་པ་སྟེ། གལ་ཏེ་གང་གི་གཏན་ཚིགས་ལྡོག་པས་གཅིག་ལས་གཅོད་ཅིང་། རྗེས་འགྲོ་ཅིག་ཤོས་ལ་སྒྲུབ་པར་བྱེད་པ་ཡིན་ན། འོ་ན་རྗེས་སུ་འགྲོ་བ་ཁོ་ན་འབའ་ཞིག་པ་སྟེ། ཐམས་ཅད་ལ་སྒྲུབ་པར་བྱེད་ཅིང་རྗེས་སུ་འཇུག་
[177b.3]པའི་ཤེས་པའི་རྒྱུ་ཁོ་ནར་འགྱུར་ཏེ། རང་གི་རྟེན་ལ་རྟག་པ་ཡིན་ཞིང་འདི་མི་རྟག་པ་ཡང་ངོ་ཞེས་པར་རོ། །གང་གི་ཡང་ལྡོག་པ་ཁོ་ན་རྗེས་འགྲོ་མེད་པ་དེས་ཐམས་ཅད་ལས་གཅོད་པར་བྱེད་ཅིང་། ལྡོག་པའི་ཤེས་པའི་གཏན་ཚིགས་ཁོ་ནར་འགྱུར་ཏེ། རྟག་པ་མ་ཡིན་ཞིང་མི་རྟག་པ་མ་ཡིན་ཞེས་
[177b.4]པར་རོ། །དཔེར་ན་གཉིས་ཀ་ལ་བརྟེན་པ་ཞེས་པ། རྗེས་སུ་འགྲོ་བ་དང་ལྡོག་པ་ལ་བརྟེན་པ་བྱས་པ་ཉིད་ལ་སོགས་པ་སྟེ། བྱས་པ་ཉིད་ནི་རྟག་པ་ལས་ལྡོག་གོ་ཞེས་པས་རང་གི་རྟེན་ལ་རྟག་པ་རྣམ་པར་གཅོད་པའི་ཤེས་པའི་གཏན་ཚིགས་ཡིན་ཞིང་། མི་རྟག་པ་བུམ་པ་ལ་སོགས་པ་ལ་
[177b.5]ཡང་འཇུག་གོ་ཞེས་པས་མི་རྟག་པ་ཉིད་ཀྱི་ཤེས་པའི་རྒྱུ་ཡང་ངོ་། །ཀུན་ལ་ཡོད་པ་ཡང་མ་ཡིན། །ཞེས་པ་ལ་སོགས་པ་སྟེ། ཡང་གི་སྒྲ་ནི་ངེས་པར་གཟུང་བ་ལའོ། །རྟག་དང་མི་རྟག་པ་དག་ནི་ཕན་ཚུན་སྤངས་ཏེ་གནས་པའི་མཚན་ཉིད་ཅན་གྱི་ཕྱིར། དངོས་པོ་གཅིག་གཉིས་ཀའི་ངོ་བོ་མ་ཡིན་
[177b.6]ལ། དེ་གཉིས་ཀ་རྣམ་པར་གཅོད་པའི་ངོ་བོ་ཡང་མི་སྲིད་དོ་ཞེས་པའི་དོན་ཏོ། །གཞན་ཡང་གཅིག་ཐམས་ཅད་ཀྱི་རང་བཞིན་ཉིད་ན། དངོས་པོ་གཅིག་གི་འགལ་བ་དུ་མའི་རང་བཞིན་དུ་འགྱུར་ཞིང་། ཐམས་ཅད་མ་ཡིན་པ་ཉིད་ན་ཡང་། ཐམས་ཅད་ཀྱི་རང་བཞིན་དང་བྲལ་བའི་ཕྱིར་དེ་དངོས་པོ་ཉིད་
[177b.7]དུ་འགྱུར་བ་མ་ཡིན་ནོ། །འོ་ན་ཅི་ལྟར་ཞེས་པ་ལ་སོགས་པ་སྟེ། འགལ་བའི་དོན་ལ་འཇུག་པ་ཉིད་ནི་བྱས་པ་ཉིད་དང་གཞལ་བྱ་ཉིད་ལ་མཚུངས་ཏེ། དེ་གལ་ཏེ་གཞལ་བྱ་ཉིད་སྒྲ་ལ་ཐེ་ཚོམ་གྱི་རྒྱུ་ཡིན་ན། ཅི་ལྟར་གཉིས་ཀ་ལ་བརྟེན་པ་བྱས་པ་ཉིད་ལ་སོགས་པ་ཕན་ཚུན་དུ་འགལ་བ་རྩོལ་མ་ཐག་ཏུ་
[178a]
[178a.1]བྱུང་བ་དང་། རྩོལ་མ་ཐག་ཏུ་མ་བྱུང་བ་ལ་འཇུག་བཞིན་པ་ནི་རྗེས་སུ་འཇུག་པའི་ཤེས་པའི་གཏན་ཚིགས་ཅི་ལྟར་ཡིན། དེ་ལས་ནི་གློག་དང་བུམ་པ་ལ་སོགས་པ་ལ་མི་རྟག་ཅེས་ངེས་པ་རྗེས་སུ་འཇུག་པའི་ཤེས་པ་སྐྱེའོ། །འདི་ཡང་ནི་ཡང་དག་པར་རྟོགས་པར་བྱེད་པའི་གཏན་
[178a.2]ཚིགས་གསལ་བར་བྱེད་པའི་ཆེད་དུ་ཉེ་བར་བཀོད་པའོ། །དོན་གཞན་རྣམ་པར་གཅོད་པའི་སྒོ་ནས་ཞེས་པ་སྟེ། འདིས་ལྡོག་པ་ཡོད་པར་གྱུར་པ་ནི་གཉིས་ཀ་བརྟེན་པའི་ཁྱད་པར་དུ་གསལ་བར་བྱེད་དོ། །དེ་ལྟར་ནི་ལྡོག་པ་གཙོ་བོ་ཉིད་ལས། དོན་གཞན་རྣམ་པར་གཅོད་པར་བྱེད་པའི་སྒོ་ནས་
[178a.3]གཏན་ཚིགས་གོ་བར་བྱེད་པའོ་ཞེས་བརྗོད་ཀྱི། དེའི་ཁྱད་པར་འཛིན་པས་ནི་མ་ཡིན་ནོ་ཞེས་པས་གློག་དང་བུམ་པ་ལ་སོགས་པ་ཁྱད་པར་གྱི་སྒོ་ནས་མ་ཡིན་ཏེ། མཐོང་བ་བཞིན་དུ་སྒྲུབ་པའི་སྒོ་ནས་མ་ཡིན་ནོ་ཞེས་པའི་དོན་ཏོ། །རྗེས་སུ་འགྲོ་བ་གཙོ་བོ་ཉིད་མ་ཡིན་པའི་ཕྱིར་ཞེས་བཤད་དོ། །ཅིའི་
[178a.4]ཕྱིར་ལྡོག་པའི་སྒོ་ནས་གོ་བར་བྱེད་ཀྱི་རྗེས་འགྲོའི་སྒོ་ནས་ནི་མ་ཡིན་ཞེ་ན། གསུངས་པ། དེ་ལྟར་ནི་དེ་ཞེས་པ་ལ་སོགས་པ་སྟེ། གང་ལ་མེད་ལ་སྟེ། མི་མཐུན་ཕྱོགས་ལ། དེ་རྣམས་གཅོད་དེ། དེ་སེལ་བ། དེ་གྲུབ་དོན་དུ་ཇི་བཞིན་གྱི་དོན་ཤེས་པའི་རྒྱུ་ཞེས་པའི་དོན་ཏོ། །ཁྱད་པར་རྟོགས་
[178a.5]པའི་དོན་དུ་མ་ཡིན་ཏེ། དེ་ལ་འཁྲུལ་པའི་ཕྱིར་རོ། །རྫས་སུ་ཡོད་པའི་སྤྱི་རྟོགས་པའི་དོན་དུ་མ་ཡིན་ཏེ་དེ་མེད་པའི་ཕྱིར་རོ། །གང་ལ་མེད་པ་དེ་རྣམ་པར་གཅོད་པའི་སྒོ་ནས་དོན་ཇི་ལྟ་བ་བཞིན་ཤེས་པའི་གཏན་ཚིགས་སུ་བརྗོད་དོ་ཞེས་འབྲེལ་ལོ། །མཐའ་དག་ལ་ཞེས་པ་ལ་སོགས་པས།
[178a.6]རྣམ་གཉིས་འཇུག་ཅེས་པ་འདིའི་དོན་འཆད་དོ། །འདིས་ཀྱང་རྗེས་འགྲོ་གཙོ་བོ་ཉིད་མ་ཡིན་པར་གསུངས་སོ། །དཔེར་ན་ཞེས་པ་ལ་སོགས་པས་རྣམ་གཉིས་སུ་འཇུག་པ་དེ་སྟོན་ཏོ། །དེ་ལྟར་བྱས་ནས་ཞེས་པ། གང་གི་ཕྱིར་རྣམ་པར་གཅོད་པའི་སྒོ་ནས་གཏན་ཚིགས་གོ་བྱེད་ཡིན་པ་དེའི་
[178a.7]ཕྱིར་དྲི་ཞིམ་པའི་གཏན་ཚིགས་གཅིག་ལས་ཨུཏྤ་ལ་དྲི་ཉིད་ལ་སོགས་པ་རྣམས་འགྲུབ་སྟེ། དྲི་ཞིམ་པ་ཉིད་ནི། གང་ན་དྲི་ཉིད་ལ་སོགས་པ་ཅན་དེ་ན་ཡོད་པའི་ཕྱིར་དང་། དེ་མེད་པ་ན་མེད་པའི་ཕྱིར་རོ། །འོ་ན་དྲི་ཞིམ་པ་ནི་དྲི་ཉིད་ལ་སོགས་པ་རྣམས་ལ་མཐོང་བའི་ཕྱིར་མཐོང་བའི་སྒོ་
[178b]
[178b.1]ཉིད་ནས་དྲི་ལ་སོགས་པ་རྣམས་འགྲུབ་བོ་ཞེ་ན། གསུངས་པ། གཞན་དུ་ན་ཞེས་པ་ལ་སོགས་པའོ། །གལ་ཏེ་ཇི་ལྟར་མཐོང་བ་དེ་ལྟར་རྟོགས་ཀྱི་རྣམ་པར་གཅོད་པའི་སྒོ་ནས་མ་ཡིན་ན། རིམ་པ་ཇི་ལྟ་བར་དཀར་པོ་ཉིད་ཀྱིས་གཟུགས་ཉིད་དང་ཡོན་ཏན་ཉིད་དང་བརྟེན་པ་ཉིད་གསུམ་རྣམས་
[178b.2]རྟོགས་པར་འགྱུར་ཞིང་། གཟུགས་ཉིད་ལས་ཡོན་ཏན་དང་བརྟེན་པ་ཉིད་གཉིས་དག་དང་། ཡོན་ཏན་ཉིད་ལ་བརྟེན་པ་ཉིད་གཅིག་པུ་ཡང་ངོ་། །དེ་བཞིན་དུ་ལུགས་ལས་བཟློག་པས་ཀྱང་སྟེ། བརྟེན་པ་ཉིད་ཀྱི་ཕྱིར་ཡོན་ཏན་ཉིད་དང་གཟུགས་ཉིད་དང་དཀར་པོ་ཉིད་དེ་གསུམ་པོ་རྣམས་
[178b.3]འགྱུར་ཞིང་། ཡོན་ཏན་ཉིད་ཀྱི་ཕྱིར་གཟུགས་ཉིད་དང་དཀར་པོ་ཉིད་དེ་གཉིས་པོ་དག་དང་། གཟུགས་ཉིད་ཀྱི་ཕྱིར་དཀར་པོ་གཅིག་པུ་ཁོ་ན་ཡང་ངོ་། །བརྟེན་པ་ཉིད་ལ་སོགས་པ་རྣམས་ཡོན་ཏན་ཉིད་ལ་སོགས་པ་རྣམས་ལ་མཐོང་བ་མེད་པ་ནི་མ་ཡིན་ནོ། །ཅི་སྟེ་ཇི་ལྟར་བརྟེན་པ་ཉིད་ཡོན་
[178b.4]ཏན་ཉིད་ལ་སོགས་པ་རྣམས་ལ་མཐོང་བ་དེ་ལྟར་ལས་ལ་སོགས་པ་རྣམས་ལ་ཡང་ངོ་ཞེས་པས་ཐེ་ཚོམ་དུ་འགྱུར་ན། དཀར་པོ་ཉིད་ཀྱང་གཟུགས་དང་ཡོན་ཏན་དང་བརྟེན་པ་རྣམས་ལ་མཐོང་ངོ་ཞེས་པས། དེའི་ཕྱིར་དེ་རྣམས་ལ་ཐུན་མོང་བའི་ཕྱིར་ཐེ་ཚོམ་དུ་འགྱུར་རོ། །ལྡོག་པའི་སྒོ་ནས་རྟོགས་པ་
[178b.5]ལ་ནི་སྐྱོན་མེད་དོ། །དཔེར་ན་གཟུགས་ཉིད་མེད་པ་ལ་མེད་པའི་ཕྱིར་དཀར་པོ་ཉིད་ནི་གཟུགས་ཉིད་ལ་གཏན་ཚིགས་སོ། །དེ་ལྟར་ཡོན་ཏན་ཉིད་དང་བརྟེན་པ་ཉིད་དག་ལ་ཡང་། དེ་དག་མེད་ན་མེད་པའི་ཕྱིར་རོ་ཞེས་པའོ། །བརྟེན་པ་ཉིད་ནི་ཡོན་ཏན་ཉིད་ལ་སོགས་པ་མེད་པ་ལ་ཡང་མཐོང་ངོ་ཞེས་
[178b.6]པས་ཡོད་པ་མ་ཡིན་ནོ། །དེའི་ཕྱིར་ཡོན་ཏན་ཉིད་ལ་སོགས་པའི་ངེས་པར་བྱེད་པའོ། །ཅི་སྟེ་གཅིག་སྨོས་པ་ཅིའི་དོན་དུ་ཡིན་གཅིག་ཉིད་ནི་གཟུགས་གཞན་མ་ཡིན་ནོ་ཞེ་ན། གསུངས་པ། གཅིག་སྨོས་པ་ནི་ཞེས་པ་ལ་སོགས་པའོ། །འོ་ན། གཅིག་གི་ཚིག་ཏུ་བསྟན་པའི་ཕྱིར། །ཞེས་པ་ལ་
[178b.7]སོགས་པ་སྟེ། གང་དུ་མེད་པ་རྣམ་གཉིས་འཇུག །ཅེས་པ་འདིར། གཅིག་གི་གྲངས་སུ་བརྗོད་པར་འདོད་པ་ཉིད་ཀྱི་ཕྱིར་རོ། །ཇི་སྐད་དུ་སྔར། གྲངས་གཅིག་བརྗོད་པར་འདོད་པ་ཉིད། །ཅེས་པ་ལ་སོགས་པ་བཤད་པ་བཞིན་ནོ་ཞེ་ནའོ། །མ་ཡིན་ཏེ་འགལ་བ་མེད་པ་རྣམས་ལ་ཞེས་པ་
[179a]
[179a.1]ལ་སོགས་པ་སྟེ། འགལ་བ་སྟེ་མི་མཐུན་པའི་ཟླ་བོའི་གཏན་ཚིགས་འདི་རྣམས་ལ་མེད་དོ་ཞེས་པ་འགལ་བ་མེད་པ་རྣམས་ཏེ། དངོས་པོའི་སྟོབས་ཀྱིས་ཞུགས་པའི་གཏན་ཚིགས་རྣམས་སོ། །དེ་རྣམས་ལ་གྲངས་གཅིག་བརྗོད་པར་འདོད་པ་མ་ཡིན་ནོ། །དེ་འདིས་
[179a.2]ཡོངས་སུ་བའི་ལྷག་མ་ཡིན་པའི་ཕྱིར་དངོས་པོའི་སྟོབས་ཀྱིས་མ་ཞུགས་པའི་རྟགས་ཁོ་ན་གྲངས་གཅིག་པའི་ཡུལ་ཡིན་ནོ་ཞེས་བཤད་པར་འགྱུར་རོ། །གལ་ཏེ་འོ་ན་འགལ་བ་མེད་པ་རྣམས་ལ་གཅིག་ཉིད་བརྗོད་པར་འདོད་པ་མ་ཡིན་ན། དེ་རྣམས་ཀྱི་དུ་མ་རྣམས་གཅིག་ལ་སྦྱོར་བ་རྗེས་སུ་སྣང་
[179a.3]བར་འགྱུར་ཞིང་། དེ་ལས་ཀྱང་དུ་མ་གཅིག་ལ་སྦྱོར་བ་ན་གཏན་ཚིགས་དང་དཔེ་ལྷག་ཅིང་ལྷག་པ་ཞེས་པས་ཚར་གཅད་པའི་གནས་སུ་ཐལ་བར་འགྱུར་རོ་ཞེ་ན་གསུངས་པ་ཡིན་ནོ་ཞེས་པ་ལ་སོགས་པའོ། །འདི་ལྟར་དགོངས་པ་སྟེ་ངེས་པ་ཁས་ལེན་པ་ན་འདི་སྐྱོན་ཡིན་ཏེ། གང་དུ་སྒྲུབ་པར་བྱེད་
[179a.4]པའི་ངག་གཅིག་གི་སྦྱོར་བ་ངེས་པར་སྔོན་མ་ཅན་རྣམ་པར་དཔྱོད་པར་བྱེད་པ་དེར་ལྷག་པར་བརྗོད་པའོ་ཞེས་པས་ཚར་གཅད་པའི་གནས་ཡིན་ནོ། །སྤྲོས་པའི་གཏམ་ལ་ནི་ཅུང་ཟད་ཀྱང་མ་ཡིན་ཏེ། ངེས་པ་མེད་པའི་ཕྱིར་རོ་ཞེས་པའོ། །དཔེར་ན་འགྲེང་བ་ཉིད་དང་བྱ་རོག་གི་གནས་དག་ཅེས་
[179a.5]པའོ། །མི་འགལ་བ་དག་དོན་གཅིག་རྟོགས་པར་བྱེད་པའི་གཏན་ཚིགས་ཉིད་དུ་མཐོང་བ་ནི་འདི་ཙམ་གྱིས་ཉེ་བར་དཔོག་པའོ། །འདི་དག་སོ་སོ་བ་ཡང་བྱས་པ་ཉིད་ལ་སོགས་པ་བཞིན་དུ་ནུས་པ་ཉིད་མཐོང་བ་ནི་མ་ཡིན་ནོ། །དེ་ནི་བཟློག་པ་ལ་ཞེས་པ་ལ། ནིའི་སྒྲ་ནི་ངེས་པར་འཛིན་པ་ལའོ། །
[179a.6]དེ་ཁོ་ན་སྟེ་གང་དུ་བསྒྲུབ་བྱ་ལ་ཡང་དག་པའི་ཤེས་པའི་རྒྱུར་འདོད་པ་དེ་ཁོ་ན་ནི་དེ་ལས་བཟློག་པ་བསྒྲུབ་པར་བྱ་བ་ལ་འགལ་བར་འགྱུར་རོ། །གང་དུ་རྣམ་པ་གཉིས་སུ་འཇུག་པ་དེ་རྣམ་པར་གཅོད་པར་འགྲུབ་པའི་དོན་གཞན་ལ་མི་འཇུག་པ་སྟེ། མཐུན་ཕྱོགས་རྟག་པ་ལ་མི་འཇུག་པ་
[179a.7]ཞེས་པའི་དོན་ཏོ། །འདི་ལ་ཡང་ཞེས་པ་ཇི་ལྟར་འཇིག་པ་ཉིད་བསྒྲུབ་པར་བྱ་བ་ལ་འདི་ནི་མི་རྟག་པ་ཁོ་ན་སྟེ། རྟག་པར་འགྱུར་བ་ནི་མ་ཡིན་ནོ་ཞེས་དེ་རྟག་པ་བཀག་པའི་སྒོ་ནས་སྒྲུབ་པར་བྱེད་པ་དེ་ལྟར་རྟག་པ་ཉིད་བསྒྲུབ་པར་བྱ་བ་ལ་ཡང་དེ་ལ་བཟློག་པའོ་ཞེས་པའོ། །འདིར་འོ་ན་ཅི་
[179b]
[179b.1]ལྟར་ཞེས། འདི་ལ་ཡང་བཟློག་པ་ལས་རྟག་པ་བཀག་པའི་སྒོ་ཁོ་ནས་སྒྲུབ་པར་བྱེད་དོ་ཞེས་སྨྲས་པས། བསྒྲུབ་བྱ་བཀག་པའི་སྒོ་ཁོ་ནས་འགལ་བར་འགྱུར་རོ་ཞེས་དམ་བཅས་ཏེ། དེ་ལྟར་གྱུར་ན་འདི་ན་གྲང་བའི་རེག་པ་སྟེ་མེའི་ཕྱིར་རོ་ཞེས་པ་འདི་ལ་བསྒྲུབ་པར་བྱ་བ་གྲང་བ་བཀག་པ་
[179b.2]ཙམ་གྱིས་དྲོ་བར་འགྲུབ་པ་མ་ཡིན་ཏེ། དྲོ་མིན་གྲང་མིན་གྱི་ཕུང་པོ་གསུམ་པ་ཡང་ཡོད་པའི་ཕྱིར་རོ། །སྒྲུབ་པས་དྲོ་བའི་རེག་པ་སྒྲུབ་པར་བྱེད་པ་ལ་ནི་སྐྱོན་འདི་མེད་དེ། དེའི་ཕྱིར་སྒྲུབ་པ་ཁོ་ནས་བཟློག་པ་སྒྲུབ་པར་བྱེད་པའི་ཕྱིར་འགལ་བར་རིགས་སོ་ཞེས་སེམས་སོ། །གལ་ཏེ་ཡང་
[179b.3]དྲོ་བ་མི་སྒྲུབ་ཀྱི་ཞེས་པ་སྟེ། གལ་ཏེ་ཡང་ཞེས་པ་འདིས་འགྲུབ་པ་ཁོ་ན་སྟེ། གྲང་བ་ཙམ་བཀག་པས་ཀྱང་དྲོ་བས་ཏེ། དེས་མེ་ལ་ཁྱབ་པ་ཉིད་ཀྱི་ཕྱིར་རོ། །དྲོ་མིན་གྲང་མིན་ནི་འཇམ་པ་ཉིད་ལ་སོགས་པ་སྟེ། དེ་ནི་གང་ན་དྲོ་བའི་རེག་པ་ཅན་དེར་སྲིད་པ་ཁོ་ན་སྟེ། འགལ་བ་མེད་པའི་
[179b.4]ཕྱིར་རོ། །དེ་ཡོད་ན་ཡང་དྲོ་བ་ཉིད་འགྲུབ་པའི་ཕྱིར་འགལ་བ་ཅུང་ཟད་ཀྱང་མེད་དེ། དཔེར་ན་སྒྲ་ལ་རྩོལ་མ་ཐག་ཏུ་བྱུང་བ་ཉིད་ཡོད་པར་གྱུར་ན་ཡང་བྱས་པ་ཉིད་ལ་མི་རྟག་པ་ཉིད་འགྲུབ་སྟེ། དེས་དེ་ལ་ཁྱབ་པ་ཉིད་ཀྱི་ཕྱིར་འགྲུབ་པ་དེ་བཞིན་དུ། ས་ཕྱོགས་སུ་འཇམ་པ་ཉིད་ལ་སོགས་
[179b.5]པའི་རེག་པ་ཡོད་པར་གྱུར་ཀྱང་མེ་ལས་དྲོ་བ་ཉིད་འགྲུབ་སྟེ། དེས་དེ་ལ་ཁྱབ་པ་ཉིད་ཀྱི་ཕྱིར་རོ། །ཁས་བླངས་ནས་ཁོ་བོས་ལན་བརྗོད་པར་བྱའོ་ཞེས་གསལ་བར་བྱེད་དོ། །གྲང་བ་མ་ཡིན་པ་ནི་འགྲུབ་བོ་ཞེས་པ་གྲང་བ་མེད་པའོ། །དེ་ལྟ་ན་ཡང་འགལ་བ་ཞེས་པ། གྲང་བ་ཉིད་མེད་པ་
[179b.6]འགྲུབ་པའི་ཕྱིར་ཏེ། སྒྲུབ་པས་དྲོ་བ་ཉིད་སྒྲུབ་པར་བྱེད་པ་ན་ནི་མ་ཡིན་ནོ། །འདིར་གྲང་བའི་རེག་པ་སྟེ། མེའི་ཕྱིར་རོ་ཞེས་བྱས་པ་ན། གང་གི་ཚེ་གྲང་བ་མེད་པ་སྒྲུབ་པ་ལ་གཏན་ཚིགས་ཉིད་དུ་བརྗོད་དེ། ཇི་ལྟར་གཏན་ཚིགས་འདིས་གྲང་བ་མེད་པ་ཁོ་ན་སྒྲུབ་པར་བྱེད་པ་ལྟར་རོ་ཞེས་
[179b.7]པ་ལྟ་བུ་ཡིན་པ་དེའི་ཚེ་འགལ་བར་འགྱུར་མོད། གང་གི་ཚེ་དྲོ་བ་འགྲུབ་པ་ལ། མེ་གཏན་ཚིགས་སུ་བརྗོད་པ་དེའི་ཚེ་ཅི་ལྟར་གྲང་བ་བཀག་པའི་སྒོ་ནས་འགལ་བར་འགྱུར་ཞེ་ན་གསུངས་པ། གང་གི་ཚེ་ཞེས་པ་ལ་སོགས་པའོ། །དེའི་ཚེ་ཡང་དོན་གྱིས་གོ་བར་གྲང་བ་ཉིད་མེད་པར་མེས་སྒྲུབ་པར་བྱེད་
[180a]
[180a.1]པ་ཁོ་ན་སྟེ། གཞན་དུ་ན་དྲོ་བ་ཁོ་ན་འགྲུབ་པ་མ་ཡིན་ནོ། །དེའི་ཕྱིར་དེའི་ཚེ་ཡང་གྲང་བ་མེད་པ་གྲུབ་པ་ཁོ་ན་འགལ་བར་འགྱུར་རོ། །ལྷག་མ་རྣམ་གསུམ་ལྟོས་པ་ཡིས། །ཞེས་སྔར་བཤད་པ་དེ་ལ་ཡང་དག་པ་དང་ལོག་པ་སྒྲུབ་པར་བྱེད་པའི་གཏན་ཚིགས་ཉིད་ཀྱིས་ལྷག་
[180a.2]མ་གསལ་བར་བྱས་སོ། །ད་ནི་ཐེ་ཚོམ་གྱི་གཏན་ཚིགས་ཉིད་གསལ་བར་བྱས་པའི་ཆེད་དུ་ཕྱོགས་སྔ་མ་འགོད་ལ། འོ་ན་ཡང་ཞེས་པ་ལ་སོགས་པ་སྟེ། ཐམས་ཅད་ལ་འཇུག་བཞིན་པ་ཞེས་པ་ངག་གི་ལྷག་མའོ། །མ་ཡིན་དགག་གི་འཇུག་པས་ཞེས་པ། བསྒྲུབ་པས་ཏེ་བརྟག་པ་
[180a.3]དགག་པ་ལ་མི་ལྟོས་པར་ཞེས་པའོ། །སྒྲ་མི་རྟག་སྟེ་བྱས་པ་ཉིད་ཀྱི་ཕྱིར་རོ་ཞེས་བྱས་པ་ན། རྟག་པར་མི་འགྱུར་རོ་ཞེས་རྟོགས་པ་ནི་མ་ཡིན་ནོ། །འོ་ན་ཅི་ཞེ་ན། སྒྲུབ་པ་ཁོ་ནས་འཇིག་པའོ་ཞེས་པར་རོ། །དེའི་ཕྱིར་རྟག་པ་བཀག་པའི་སྒོ་ནས་རྟོགས་སོ་ཞེ་ན། འདི་དེ་ལྟར་འགྱུར་ན་ཞེས་པ་ལ་སོགས་པ་
[180a.4]སྟེ། གལ་ཏེ་བྱས་པ་ལ་སོགས་པ་གང་ཞིག་བུམ་པ་ལ་སོགས་པ་གང་ལ་འཇུག་པ་དེ་དེའི་ཁྱད་པར་མཆོག་ཏུ་འཛིན་པས་ཁྱད་པར་གཟུང་བས་ངེས་པར་བྱ་བར་ནུས་པར་གྱུར་ན་སྒྲུབ་པའི་སྒོ་ནས་རྟོགས་པར་བྱེད་པ་ཉིད་རིགས་ན། དེ་ཡང་མེད་དེ། གང་གསུངས་པ། གང་ལ་ཞེས་པ་ལ་སོགས་
[180a.5]པའོ། །འོ་ན་དེ་ལྟ་ན་ཞེས་པ་ནི། གལ་ཏེ་བུམ་པ་ལ་སོགས་པ་དུ་མ་ལ་མཐོང་བའི་ཕྱིར་བྱས་པ་ཉིད་ཐེ་ཚོམ་གྱི་རྒྱུ་ཡིན་ན་བདག་མེད་པ་ཉིད་ལ་སོགས་པ་རྣམས་ལ་ཡང་འགྱུར་བའོ། །འདི་དེ་ལྟར་འགྱུར་རོ་ཞེས་པ། ཁྱད་པར་རྣམས་ལ་ཐེ་ཚོམ་གྱི་རྒྱུར་བརྗོད་པར་བྱ་ན། མི་རྟག་པ་དང་བདག་མེད་
[180a.6]པ་ལ་སོགས་པ་རྣམས་ཁྱད་པར་མ་ཡིན་ནོ། །དེ་ལྟར་ན་ནི་དེ་རྣམས་ཞེས་པ་སྟེ། འདིས་ནི་གང་རྣམས་ཕན་ཚུན་དུ་ལྡོག་ཅིང་ཐ་དད་པ་དེ་རྣམས་ཁོ་ན་འདིར་ཁྱད་པར་དུ་བརྗོད་པར་འདོད་ཅིང་། མི་རྟག་པ་ཉིད་ལ་སོགས་པ་རྣམས་ཕན་ཚུན་དུ་ལྡོག་པ་ཡོད་པ་ཡང་མ་ཡིན་ཏེ། དངོས་པོར་ན་ཐ་མི་
[180a.7]དད་པ་ཉིད་ཀྱི་ཕྱིར་རོ་ཞེས་སྟོན་ཏེ། །དེ་ལྟར་འགྱུར་མོད། ཁྱད་པར་རྣམས་ལ་འཁྲུལ་པའི་བདག་ཉིད་དུ་གྱུར་པ་སྒྲུབ་པའི་སྒོ་ནས་རྟོགས་པར་བྱེད་པ་ཉིད་དེ། སྤྱི་ལ་ནི་འཁྲུལ་པ་མེད་དོ། །དེའི་ཕྱིར་སྒྲུབ་ལས་སྤྱི་དངོས་པོར་གྱུར་པ་ཁོ་ན་རྟོགས་པར་འགྱུར་རོ་ཞེ་ན། དེའི་ཕྱིར་གསུངས་
[180b]
[180b.1]པ་མ་ཡིན་ཞེས་པ་ལ་སོགས་པ་སྟེ། མི་རྟག་པ་ཉིད་ནི་རྟག་པ་ཉིད་བཀག་པ་ལས་ཏེ། རྟག་པ་ཉིད་བསལ་བ་ལས་གཞན་གང་སྒྲུབ་པས་བརྗོད་པར་བྱ་བ་དོན་གཞན་མ་ཡིན་པ་ཡོད་པ་ནི་མ་ཡིན་ནོ། །རིགས་པ་ཡང་ཞེས་པས་འཐད་པའི་རིགས་པའོ། །དེ་ཅི་ཞིག་ཅེ་ན་གསུངས་པ། གང་
[180b.2]མི་མཐུན་ཕྱོགས་ལས་ཞེས་པ་ལ་སོགས་པ་སྟེ། འདིས་ནི་ལྡོག་པ་གཙོ་བོ་ཉིད་དུ་སྟོན་ཅིང་། ལྡོག་པའི་སྒོ་ནས་རྟོགས་པའི་རིགས་པ་ཉིད་དུ་གསུངས་སོ། །དེ་ལྟར་ནི་འགྱུར་མོད་ཀྱི་རྗེས་སུ་འགྲོ་བ་ཡང་གཙོ་བོ་ཉིད་ཀྱི་ཕྱིར། མཐོང་བ་བཞིན་དུ་སྒྲུབ་པའི་ངོ་བོས་ཀྱང་རྟོགས་པར་རིགས་སོ་
[180b.3]ཞེ་ན་གསུངས་པ། འདི་ནི་ཞེས་པ་ལ་སོགས་པའོ། །འདིས་ནི་རྗེས་སུ་འགྲོ་བ་གཙོ་བོ་ཉིད་མ་ཡིན་པར་སྟོན་ཏོ། །འོ་ན་བྱས་པ་ཉིད་ནི་མི་རྟག་པ་ཐམས་ཅད་ལ་ཡོད་པའི་ཕྱིར་དེ་སྒྲུབ་པས་རྟོགས་པར་བྱེད་པར་རིགས་སོ་ཞེ་ན་གསུངས་པ། ཐམས་ཅད་ལ་ཞེས་པ་ལ་སོགས་པའོ། །འོ་ན་
[180b.4]ལྡོག་པ་ཡང་ངེས་པ་མི་སྲིད་པ་མ་ཡིན་ནམ། རིགས་མི་མཐུན་རྣམས་མཐའ་ཡས་པའི་ཕྱིར་རོ་ཞེ་ན། འདི་འདི་ལྟར་མ་ཡིན་ཏེ། བསྒྲུབ་པར་བྱ་བའི་རིགས་མི་མཐུན་པ་འཛིན་པ་ལས་གཏན་ཚིགས་ཀྱི་ལྡོག་པ་གཟུང་བར་བྱ་བ་ནི་མ་ཡིན་གྱི། འོ་ན་ཅི་ཞེ་ན། གཏན་ཚིགས་ཀྱི་བསྒྲུབ་
[180b.5]པར་བྱ་བ་བཟློག་པ་ལ་གནོད་པ་ཅན་གྱི་ཚད་མ་ཉེ་བར་བསྟན་པ་ལས་སོ། །དེ་ལྟར་འགྱུར་མོད། འབྲེལ་པའི་སྟོབས་ཀྱིས་རྟོགས་པར་བྱེད་པ་ན། འབྲེལ་པ་ནི་ལྡོག་པ་གཙོ་བོ་མ་ཡིན་པ་ཉིད་ཀྱི་ཕྱིར། དེའི་སྒོ་ནས་གོ་བར་བྱེད་པར་འགྱུར་རོ། །དེས་ན་མི་འདོད་པ་འདིར་མ་གྱུར་ཅིག་
[180b.6]ཅེས་པས་འབྲེལ་པ་མེད་པ་ཁོ་ནར་གཏན་ཚིགས་གོ་བར་བྱེད་པར་འགྱུར་མོད་ཅེ་ན། དེའི་ཕྱིར་གསུངས་པ། རྟགས་ནི་ཞེས་པ་ལ་སོགས་པ་སྟེ། འདི་ལྟ་ན་ཧ་ཅང་ཐལ་བར་འགྱུར་རོ་ཞེས་པ་དགོངས་པའོ། །འདིར་ཡང་ཞེས་པ་ཐེ་ཚོམ་གྱི་གཏན་ཚིགས་ལའོ། །ཅིའི་ཕྱིར་ཞེ་ན་
[180b.7]གསུངས་པ། དེ་ལྟར་ནི་ཞེས་པ་ལ་སོགས་པ་སྟེ། ངག་གི་རྣམ་པར་རིག་བྱེད་ཀྱི་སྒྲ་ནི་རྩོལ་མ་ཐག་ཏུ་བྱུང་བ་སྟེ། བྱས་པ་ཉིད་ཀྱི་ཕྱིར། ལུས་ཀྱི་རྣམ་པར་རིག་བྱེད་བཞིན་ནོ་ཞེས་པ་གློག་ལ་སོགས་པས་མ་ངེས་པ་སྟེ། རང་ཀུན་ནས་སློང་བར་བྱེད་པ་རྟོགས་པར་བྱེད་པའི་ཕྱིར་ཞེས་པ་ནི་
[181a]
[181a.1]སྒྲའི་བདག་ཉིད་རྟག་པ་གསལ་སྒྲས་སོ། །གཉིས་ཀ་དག་ཚོགས་ན་ནི་ངེས་པ་ཁོ་ནར་འགྱུར་རོ། །དེ་ལ་ངག་གི་རྣམ་པར་རིག་བྱེད་ཀྱི་སྒྲ་ནི་ཡི་གེའི་བདག་ཉིད་ཀྱི་གྲག་པའོ། །ལུས་ཀྱི་རྣམ་པར་རིག་བྱེད་ནི་འགྲོ་བ་ལ་སོགས་པའི་མཚན་ཉིད་ཅན་ནོ། །གསལ་
[181a.2]སྒྲ་ནི་ཐ་མི་དད་པ་སྟེ་གསལ་བར་བྱེད་པའི་གྲག་སྒྲའི་རྗེས་སུ་འགྲོ་བ་ལས་ངོ་བོ་ཐ་དད་པ་བཞིན་དུ་འབྱུང་བ་རྟག་པ་རྩོལ་མ་ཐག་ཏུ་བྱུང་བ་མིན་པ་སྒྲའི་བདག་ཉིད་དོ། །འདི་ཡང་ཀུན་ནས་སློང་བ་རྟོགས་པར་བྱེད་དོ། ཤིང་ལ་སོགས་པའི་སྒྲ་ཐོས་པ་ལས་དེ་ཀུན་ནས་སློང་བའི་སེམས་རྟོགས་པའི་ཕྱིར་
[181a.3]རོ། །ཀུན་ནས་སློང་བར་བྱེད་པ་ནི་དེའི་མངོན་པར་གསལ་བ་སྟེ། གསལ་བར་བྱེད་པའི་གྲག་སྒྲ་ཀུན་ནས་སློང་བའི་ཕྱིར་ཡང་སེམས་ཀྱང་བརྒྱུད་པས་དེའི་ཀུན་ནས་སློང་བྱེད་དུ་འགྱུར་རོ། །སེམས་དང་སེམས་ལས་བྱུང་བ་རྣམས་ཁོ་ན་ཀུན་ནས་སློང་བྱེད་དུ་བརྗོད་པར་འདོད་ཀྱི། རྒྱུ་ཙམ་ནི་མ་ཡིན་ཏེ།
[181a.4]རྣམ་པ་གཞན་དུ་ན་གློག་ལ་སོགས་པ་རྣམས་ཀྱང་རང་ཀུན་ནས་སློང་བ་རྟོགས་པར་བྱེད་པའི་ཕྱིར་ལྷན་ཅིག་པ་དག་ཀྱང་མ་ངེས་པར་འགྱུར་རོ། །དེ་ལྟ་ན་འོ་ན་ཞེས་པ་ལ་སོགས་པ་སྟེ། གལ་ཏེ་ཐེ་ཚོམ་གྱི་གཏན་ཚིགས་ནི་ཆོས་གཞན་མཐོང་བ་ལས་བསྒྲུབ་བྱ་ངེས་པར་བྱེད་པ་མཐོང་ཞེས་གཅིག་
[181a.5]སྨོས་པ་རྗེས་སུ་འཇུག་པ་ཡིན་ན། དང་པོ་དག་ལ་ཡང་གཅིག་སྨོས་པར་བྱའོ། །ཅིའི་ཕྱིར་ཞེ་ན་སྨྲས་པ། དེ་ལ་ཡང་ཞེས་པ་ལ་སོགས་པ་སྟེ། ཆོས་གཞན་མཐོང་བའི་ཕྱིར་ཞེས་པ། བྱས་པ་ཉིད་ལ་སོགས་པའི་ཆོས་བསྟན་པའི་ཕྱིར་རོ། །སྒྲ་མི་རྟག་སྟེ། མཉན་པར་བྱ་བ་ཉིད་ཀྱི་ཕྱིར་ཞིང་
[181a.6]བྱས་པ་ཉིད་ཀྱི་ཕྱིར་བུམ་པ་བཞིན་ཞེས་བྱས་པ་ན། མཉན་པར་བྱ་བ་ཉིད་ཡོད་པ་ན་ཡང་མི་རྟག་པ་ཉིད་ངེས་པར་འགྱུར་རོ། །དེ་བཞིན་དུ་མི་རྟག་པ་སྟེ། གཞལ་བྱ་ཉིད་ཀྱི་ཕྱིར་ཞིང་བྱས་པ་ཉིད་ཀྱི་ཕྱིར། བུམ་པ་བཞིན་ཞེས་པ་འདི་ལ་ཡང་ངེས་པར་མཐོང་ངོ་། །དེ་ཁོ་ན་ལ་ཞེས་པ། གང་བསྟན་
[181a.7]པ་ལས་ངེས་པ་མཐོང་བའོ། །རྣམ་པར་གཅོད་བྱེད་ཀྱི་གཏན་ཚིགས་མིན་པའི་ཕྱིར་ཞེས་པ། ཕུལ་དུ་ཕྱུང་བས་ཞེས་པ་དགོངས་པའོ། །གཞན་དུ་ན་གཉིས་ཀ་ལ་བརྟེན་པ་ཡང་རྣམ་པར་གཅོད་བྱེད་ཀྱི་གཏན་ཚིགས་ཉིད་མ་ཡིན་པའི་ཕྱིར་ན། དེ་ལས་གཞན་པའི་ཆོས་དང་བཅས་པ་ཉིད་ན།
[181b]
[181b.1]དེ་ཁོ་ན་ལས་ངེས་པ་སྐྱེ་བར་འགྱུར་རོ། །གཉི་ག་ལ་བརྟེན་པའི་གཞན་ལས་རྣམ་པར་བཅད་ནས་ཞེས་པ། མི་མཐུན་ཕྱོགས་ལས་རྣམ་པར་བཅད་ནས་སོ། །འདིས་ནི་དང་པོ་དག་ལས་གཉིས་ཀ་ལ་བརྟེན་པ་རྣམ་པར་གཅོད་པའི་གཏན་ཚིགས་ཉིད་དུ་ཁྱད་པར་གསུངས་སོ། །ཇི་ལྟར་གཉིས་ལ་
[181b.2]བརྟེན་པ་ཐེ་ཚོམ་གྱི་རྒྱུ་ཡིན་ཡང་ཆོས་གཞན་དང་ལྷན་ཅིག་པ་ནི་ངེས་པ་ལ་གཏན་ཚིགས་སོ་ཞེས་སླར་ཡང་ངེས་པར་གཟུང་བར་བྱ་བ་ཅིའི་ཕྱིར་ཞེ་ན་བཤད་པ། དེ་ལྟར་ནི་ཞེས་པ་ལ་སོགས་པའོ། །བྱ་རོག་གནས་པ་ནི་སྐྱེས་བུ་ལ་སོགས་པ་རྣམས་ལས་རྣམ་པར་བཅད་ནས། ཐོ་ཡོར་དང་ཐང་དག་ལ་ཐེ་
[181b.3]ཚོམ་གྱི་རྒྱུ་འབའ་ཞིག་གོ། །སྒྲེང་བ་ཉིད་དང་ལྷན་ཅིག་པ་ནི། ཐོ་ཡོར་ལ་ངེས་བྱེད་ཀྱི་གཏན་ཚིགས་སོ། །ཐོ་ཡོར་སྨོས་པ་ཡང་འདིར་སྐྱེས་བུ་མ་ཡིན་པའི་གཟུགས་ཅན་བསྒྲེང་བ་ཉིད་ཀྱི་སྤྱི་ཉེ་བར་མཚོན་པའི་དོན་དུའོ། །རང་ཀུན་ནས་སློང་བྱེད་རྟོགས་པར་བྱེད་པའང་སྒྲ་རྟག་པ་ཉིད་དང་
[181b.4]སྨྲ་བའི་ངོར། འབའ་ཞིག་པས་ངེས་པར་བྱེད་མི་ནུས་པའི་ཕྱིར། བྱས་པ་ཉིད་དང་ལྷན་ཅིག་པ་ཁོ་ན་ནི་དེ་ངེས་པར་བྱེད་པའི་གཏན་ཚིགས་སོ་ཞེས་བརྟག་པར་བྱའོ། །སྒྲ་རྟག་པ་ཉིད་སྨྲ་བའི་ངོར་ཞེས་སྨོས་པ་ནི་སྒྲ་མི་རྟག་པ་ཉིད་དུ་སྨྲ་བའི་ངོར་འབའ་ཞིག་པ་ཡང་ནུས་པའི་ཕྱིར་རོ། །
[181b.5]དེ་ཡང་ཞེས་པ་ལ་སོགས་པ་སྟེ། དེ་ཞེས་པ་ནི་གཉིས་ཀ་ལ་བརྟེན་པའི་རྟགས་སོ། །ཡང་གི་སྒྲ་ནི་ཁྱད་པར་གྱི་དོན་ཏེ། ཡང་དག་པ་དང་ལོག་པའི་ཤེས་པའི་རྒྱུ་དག་གིས་གཉིས་ཀ་ལ་བརྟེན་པའི་ཁྱད་པར་སྟོན་པར་བྱེད་དོ། །དེ་དག་ནི་གང་དུ་མ་མཐོང་བ་དེ་རྣམ་པར་གཅོད་པའི་སྒོ་ནས་
[181b.6]རྟོགས་པར་བྱེད་དོ། །ཐེ་ཚོམ་གྱི་གཏན་ཚིགས་ནི། གང་དུ་འཇུག་པ་དེ་ལ་ལྟོས་པས་ཐེ་ཚོམ་སྐྱེད་པར་བྱེད་དོ། །དེ་སྟོན་པ་དཔེར་ན་ཞེས་པ་ལ་སོགས་པའོ། །འོ་ན་ནམ་མཁའ་ཡང་གློག་ལ་སོགས་པ་བཞིན་བརྩལ་མ་ཐག་ཏུ་མ་བྱུང་བ་མ་ཡིན་ནམ། དེའི་ཕྱིར་དེ་ལ་ལྟོས་ནས་ཀྱང་ཅིའི་ཕྱིར་ཐེ་
[181b.7]ཚོམ་སྐྱེད་པར་མི་བྱེད་ཅེ་ན། གསུངས་པ། གང་གི་ཕྱིར་ཞེས་པ་ལ་སོགས་པ་སྟེ། གང་གི་ཕྱིར་བྱས་པ་ཉིད་ནི་ནམ་མཁའ་ལ་སོགས་པ་ལས་རྣམས་ལྡོག་བཞིན་པ་ཉིད་ཀྱི་ཕྱིར། རང་གི་རྟེན་རྟག་པ་ལས་རྣམ་པར་བཅད་ནས་དེ་ལ་མི་རྟག་པ་ཉིད་དུ་ངེས་པར་བྱས་པ་ན། རྩོལ་བ་ལས་སྐྱེས་པ་
[182a]
[182a.1]ཉིད་དུ་ཐེ་ཚོམ་གྱི་རྒྱུ་སྟེ། དེའི་ཕྱིར་ནམ་མཁའ་ལ་སོགས་པ་རྣམས་རྩོལ་མ་ཐག་ཏུ་མ་བྱུང་བ་ཉིད་དུ་ཡོད་ན་ཡང་། དེ་ལ་ལྟོས་ནས་བྱས་པ་ཉིད་ཐེ་ཚོམ་གྱི་གཏན་ཚིགས་མ་ཡིན་ནོ། །གང་ལས་རྣམ་པར་གཅོད་པར་བྱེད་པ་དེ་ལ་ལྟོས་ནས་ཐེ་ཚོམ་བྱེད་དོ་ཞེས་པས་རིགས་
[182a.2]པ་ནི་མ་ཡིན་ནོ། །དེ་ལྟར་འགྱུར་མོད། འདི་ནི་རྣམ་པར་གཅོད་པའི་གཏན་ཚིགས་ཁོ་ན་མ་ཡིན་ཏེ། དེས་ན་ཅིའི་ཕྱིར་ནམ་མཁའ་ལ་སོགས་པ་རྣམས་ལས་རྣམ་པར་གཅོད་པར་བྱེད་ཅེ་ན་གསུངས་པ། མ་ཡིན་ཞེས་པ་ལ་སོགས་པ་སྟེ། གང་རྣམ་པར་གཅོད་པར་བྱེད་ཀྱི་གཏན་ཚིགས་མ་
[182a.3]ཡིན་པ་འདིས་ནི་ཡོངས་སུ་གཞལ་བའི་དོན་ལ་ཐེ་ཚོམ་བྱེད་པ་མ་ཡིན་ཏེ། གཞལ་བྱ་ཉིད་བཞིན་ནོ། །གཉིས་ཀ་ལ་བརྟེན་པ་ཡང་འདི་ལྟ་བུ་མ་ཡིན་ནོ། །དེའི་ཕྱིར་འདི་རྣམ་པར་གཅོད་པའི་གཏན་ཚིགས་སོ་ཞེས་པའོ། །དེའི་ཕྱིར་འདི་ཁོ་ན་ལ་གཅིག་སྨོས་པའི་བྱའོ་ཞེས་གནས་སོ། །ད་ནི་
[182a.4]གང་བརྟག་པ་བཀག་པ་ལ་མི་ལྟོས་པར་མ་ཡིན་པར་དགག་པའི་འཇུག་པས་ཞེས་པ་ལ་སོགས་པ་སྨྲས་པ་དེ་མི་རིགས་པ་ཉིད་དུ་བསྟན་པའི་ཆེད་དུ་གསུངས་པ། མ་ཡིན་པ་དགག་པ་ཡང་ཞེས་པ་ལ་སོགས་པ་སྟེ། དོན་གཞན་མ་ཡིན་པར་དགག་པས་དོན་གཞན་མངོན་པར་བརྗོད་པའི་ཕྱིར་མ་
[182a.5]ཡིན་པར་དགག་པ་སྦྱོར་ཏེ་དགག་པ་ལ་མི་ལྟོས་ན་ནི་མ་ཡིན་པར་དགག་པ་མ་ཡིན་པ་ནི། མ་ཡིན་པར་དགག་པ་ཅུང་ཟད་དུ་ཇི་ལྟར་འགྱུར། གཞན་དུ་ན་ཞེས་པ་ལ་སོགས་པ་སྟེ། གལ་ཏེ་རྟག་པ་དགག་པར་བྱེད་པས་མི་རྟག་པ་བརྗོད་པ་མ་ཡིན་ན། རང་གི་ཚིག་གིས་བརྗོད་པར་བྱ་བ་ཁོ་ནར་
[182a.6]འགྱུར་རོ་ཞེས་པ། རང་གི་ཚིག་ནི་བདག་གི་བའི་བརྗོད་པ་བུམ་པ་ཞེས་པ་ལ་སོགས་པའི་ཁྱད་པར་གྱི་སྒྲའོ། །དེ་ཁོ་ནས་བུམ་པ་ལ་སོགས་པ་བརྗོད་པར་བྱ་སྟེ། མི་རྟག་པ་ཞེས་པ་འདི་ལྟ་བུ་ལ་སོགས་པ་དགག་སྒྲའི་ཉེ་བར་བསྒྱུར་བ་ཅན་གྱི་སྒྲ་ཡིས་ནི་དགག་པར་བྱ་བ་མེད་ན། དགག་
[182a.7]སྒྲ་དགག་པའི་རྒྱུ་མཚན་ཅན་གྱི་སྦྱོར་བ་འཐད་པ་ནི་མ་ཡིན་ནོ། །གལ་ཏེ་འདི་ལ་ཡང་དགག་པ་ལ་ལྟོས་ན་འོ་ན་མ་ཡིན་དགག་ནི་མེད་དགག་ལས་ཁྱད་པར་ཅི་ཡོད་ཅེ་ན། འདི་ནི་ཞེས་པ་ལ་སོགས་པ་སྟེ། རྟག་པ་དགག་པ་ལ་ཞེས་པ་རྟག་པ་བཀག་པས་ཉེ་བར་མཚོན་པའི་བུམ་པ་ལ་སོགས་པའི་
[182b]
[182b.1]དོན་ལ་བསྒྲུབ་པར་བྱ་བཞིན་པའི་བྱ་བ་བརྗོད་པར་འདོད་པ་ནི་མི་རྟག་པར་འགྱུར་རོ་ཞེས་པའོ། །མ་ཡིན་པར་དགག་པ་ལ་དགག་སྒྲ་ནི་བྱ་བ་དང་འབྲེལ་པ་མེད་པ་ཁོ་ན་སྟེ། དེའི་ཕྱིར་དེ་ལ་བྱ་བ་དགག་པ་མ་ཡིན་གྱི། འོ་ན་ཅི་ཞེ་ན་བསྒྲུབ་པར་བྱའོ། །རྟོགས་པ་ཅན་ཁོ་ན་ནི་དགག་སྒྲ་དང་འབྲེལ་ཞིང་།
[182b.2]རྟོགས་པ་ཅན་གྱི་དོན་ཡང་ཡོངས་སུ་གྲུབ་པའི་ངོ་བོ་ཉིད་ཀྱི་ཕྱིར་དགག་པར་མི་འཐད་པའི་ཕྱིར་རོ། །དེ་ལས་བཟློག་པ་རྟོགས་པར་བྱེད་པའི་དོན་ཅན་ཁོ་ནར་བསྡུ་བ་ཤེས་པར་བྱ་སྟེ། དེའི་ཕྱིར་ཡང་དེ་ལས་བཟློག་པའི་དངོས་པོ་ངེས་པར་གནས་པ་ཁོ་ན་ལ། བྱ་བ་རྣམ་པར་ཤེས་པར་བྱ་སྟེ། མི་རྟག་པར་
[182b.3]འགྱུར་རོ་ཞེས་པའོ། །མེད་པ་དགག་པ་ལ་ནི་ཏི་ངའི་མཐའ་ཁོ་ན་དང་དགག་སྒྲ་འབྲེལ་པ་སྟེ། རྟག་པར་མི་འགྱུར་རོ་ཞེས་པ། བྱ་བ་དང་འབྲེལ་པ་ཁོ་ནར་དགག་སྒྲ་བརྗོད་པར་འདོད་པར་འགྱུར་རོ། །དེ་དཔེར་བརྗོད་ཀྱིས་སྟོན་ཏོ། །སྒྲ་ནི་རྟག་པར་མི་འགྱུར་ཏེ། རེག་པར་བྱ་བ་ཉིད་ཀྱི་ཕྱིར་རོ་
[182b.4]ཞེས་སོ། །ཅིའི་ཕྱིར་འདིར་མེད་པར་དགག་པ་ཡིན་ཞིང་། སྒྲ་མི་རྟག་སྟེ་བྱས་པ་ཉིད་ཀྱི་ཕྱིར་ཞེས་པ་འདིར་ནི་མ་ཡིན་པར་དགག་པ་ཡིན་ཞེ་ན་གསུངས་པ། འདིར་ནི་ཞེས་པ་ལ་སོགས་པ་སྟེ། གང་གི་ཕྱིར་སྦྱོར་བ་འདིར་ཐེ་ཚོམ་ལ་ལྟོས་པའི་དགག་པ་སྟེ། ཅི་རེག་བྱ་མ་ཡིན་པ་ཉིད་ལས་རྟག་
[182b.5]པ་འགྲུབ་པ་ཡོད་དམ་མེད་ཅེས་ཐེ་ཚོམ་དུ་གྱུར་པ་ན་བརྗོད་པ་རེག་བྱ་མ་ཡིན་པ་ལས་རྟག་པར་མི་འགྱུར་རོ་ཞེས་པ་ལ་རྟག་པ་བྱེད་པ་པོ་སྟེ། འགྱུར་རོ་ཁོ་ན་དགག་ཚིག་དང་མངོན་པར་འབྲེལ་པར་བྱའོ། །སྔ་མ་ནི་བཟློག་པ་ལ་ལྟོས་པ་ཞེས་པ་སྒྲ་མི་རྟག་སྟེ་བྱས་པ་ཉིད་ཀྱི་ཕྱིར་རོ་ཞེས་པ་འདིར་
[182b.6]ནི་བཟློག་པ་ལ་ལྟོས་པས་ཏེ། ངེས་པ་ལ་ལྟོས་པའོ་ཞེས་པའི་དོན་ཏེ། བྱས་པ་ཉིད་ཀྱིས་སྒྲ་འཇིག་པ་ཉིད་དུ་ངེས་པར་བྱས་ནས་རྟག་པ་ཉིད་བཀག་པས་ཕ་རོལ་པོ་རྣམས་ལ་མི་རྟག་པ་ཉིད་སྒྲུབ་པར་བྱེད་པའི་ཕྱིར་རོ། །གང་གི་ཚེ་འོ་ན་ཞེས་སྨྲས་ཏེ། མ་ཡིན་པར་དགག་པར་བྱ་བ་ཡོད་ན་མ་ཡིན་
[182b.7]པར་དགག་པར་འགྱུར་མོད། གང་གི་ཚེ་རྟག་པའི་དངོས་པོ་ཉིད་ཁས་མི་ལེན་པ་དེའི་ཚེ་ཅི་ལྟར་མ་ཡིན་པར་དགག་པ་ཡིན་ཞེ་ན། དེའི་ཚེ་གཞན་གྱིས་ཡོངས་སུ་བརྟགས་པའི་ཕྱིར་ཞེས་པ། གཞན་རྣམས་ཀྱིས་གང་གི་ཕྱིར་རྟག་པ་ནམ་མཁའ་ལ་སོགས་པ་རྣམས་ཡོངས་སུ་བརྟག་པ་དེའི་
[183a]
[183a.1]ཕྱིར་དེ་བཀག་པས་སྒྲ་མི་རྟག་པའོ་ཞེས་སྒྲུབ་པར་བྱེད་དེ། ཇི་ལྟར་གཞན་རྣམས་ཀྱིས་ཡོངས་སུ་བརྟགས་པའི་ནམ་མཁའ་ལ་སོགས་པ་དེ་ལྟར་སྒྲ་འདི་མི་འགྱུར་རོ་ཞེས་པའི་དོན་ཏོ། །དེའི་དུས་སུ་ཡོད་པ་བཞིན་དུ་ཞེས་པ། ཇི་ལྟར་ཉེ་བར་དམིགས་པའི་དུས་ན་ཡོད་པར་
[183a.2]གྱུར་པ་དེ་ལྟར་དེ་ལས་སྔར་དང་ཕྱིས་ཀྱང་ངོ་ཞེས་ཕ་རོལ་པོ་རྣམས་ཀྱིས་རྟོགས་པར་བྱ་སྟེ། དེ་བས་ན་གང་དེ་ཤིན་ཏུ་གནས་པར་ཡོངས་སུ་རྟོགས་པ་དེའི་བློ་ལ་སྒྲོ་བཏགས་པ་མ་ཡིན་པར་དགག་པས་ཤིན་ཏུ་ཡོད་པ་མ་ཡིན་པའི་མཚན་ཉིད་ཅན་མི་རྟག་པ་ཉིད་དུ་བསྒྲུབ་པར་བྱའོ་ཞེས་པས་སྐྱོན་
[183a.3]མེད་དོ། །སྔར་ལྷག་མ་རྣམ་གསུམ་ལྟོས་པ་ཡིས་ཞེས་བཤད་པ་དེ་ལ་བྱས་པ་ཉིད་དང་རྩོལ་མ་ཐག་ཏུ་བྱུང་བ་ཉིད་དག་ཡང་དགག་པའི་ཤེས་པ་ལ་སོགས་པའི་རྒྱུ་ཉིད་དུ་བཤད་ལ། གཉིས་ཀ་ལ་བརྟེན་པ་ལྷག་མ་རྣམས་ནི་གཏན་ཚིགས་ཀྱི་འཁོར་ལོར་ཐེ་ཚོམ་གྱི་རྒྱུ་རྣམས་ཁོ་ནར་བཤད་དེ།
[183a.4]གཞན་ནི་ངེས་པར་མ་བྱས་པའི་ཚིག་ལས་སོ། །དེའི་ཕྱིར་དེ་ལ་ཅི་ལྟར་རྣམ་པ་གསུམ་ཡིན་ཏེ། གང་ཡང་རུང་བའི་རྣམ་པ་ཉིད་བསྟན་པ་ན་ཡང་། ལྷག་མའི་ཡང་རྟོགས་པར་བྱ་བའོ་ཞེས་སེམས་པས་སྨྲས་པ། གལ་ཏེ་ཐམས་ཅད་ཅེས་པ་ལ་སོགས་པའོ། །འདི་ཡང་ཞེས་པས་སྔ་མ་དག་
[183a.5]དང་འདི་མཚུངས་པ་ཉིད་དུ་གསུངས་སོ། །གང་ལ་ལྟོས་པས་ཞེས་པ། གང་ལ་འཇུག་པ་ནམ་མཁའ་དང་ལས་ལ་སོགས་པ་དེ་ལ་ལྟོས་པ་ཁོ་ནས་ཐེ་ཚོམ་གྱི་རྒྱུ་སྟེ། དེ་ལས་གཞན་པ་ལས་རྣམ་པར་གཅོད་དོ་ཞེས་པ། བུམ་པ་དང་རྡུལ་ཕྲ་རབ་ལ་སོགས་པ་གཟུགས་ཅན་གྱི་དངོས་པོ་རྣམས་ལས་ཏེ།
[183a.6]དེ་ལས་ལོག་པ་ཉིད་ཀྱི་ཕྱིར་རོ། །ཅི་ལྟར་རྣམ་པར་བྱེད་པ་ཤེས་པར་བྱ་ཞེ་ན། དེ་ལྟར་ནི་ཞེས་པ་ལ་སོགས་པ་སྟེ། གཉིས་ཀ་ལ་འཇུག་པ་ཉིད་ན་ཡང་ཞེས་པ། རྟག་པ་དང་མི་རྟག་པ་ལ་འཇུག་པ་ཉིད་ན་ཡང་ངོ་། །དེའི་ཕྱིར་འདི་གཟུགས་ཅན་རྣམས་ལས་ཆོས་གཞན་བསྒྲུབ་པར་བྱ་བ་ཉིད་ན་སྟེ།
[183a.7]བྱ་བ་མེད་པ་ལ་སོགས་པའི་ཆོས་བསྒྲུབ་པར་བྱ་བ་ཉིད་ན་རྣམ་པར་གཅོད་པའི་གཏན་ཚིགས་སུ་འགྱུར་རོ། །སྒྲ་བྱ་བ་མེད་པའམ་བྱ་བ་དང་བཅས་པ་ཞེས་སྒྲུབ་པར་བྱེད་དོ། །དེ་ལ་བྱ་བ་མེད་པ་ཉིད་ལ་ཡང་དག་པའི་གཏན་ཚིགས་ཏེ། བྱ་བ་དང་བཅས་པ་ཉིད་ལ་ལོག་པའི་ཤེས་པའི་རྒྱུ་སྟེ། བྱ་བ་
[183b]
[183b.1]དང་བཅས་པ་ཐམས་ཅད་ལས་ལྡོག་པའི་ཕྱིར་རོ། །རྟག་པ་དང་མི་རྟག་པ་ཉིད་སྒྲུབ་པ་ལ་ནི་རྣམ་པར་གཅོད་པའི་གཏན་ཚིགས་མ་ཡིན་ཏེ། ཅིས་ཤེ་ན། ཐམས་ཅད་ལས་མི་ལྡོག་པའི་ཕྱིར་རོ། །མི་རྟག་པའི་ཕྱོགས་སམ་རྟག་པའི་ཕྱོགས་ཐམས་ཅད་ལས་མི་ལྡོག་པའི་ཕྱིར་ཏེ། རིམ་པ་
[183b.2]ཇི་ལྟ་བ་བཞིན་རྟག་པ་དང་མི་རྟག་པ་ཉིད་སྒྲུབ་པ་ནའོ། །དེ་འདྲ་བ་དང་མེད་ན་མི་འབྱུང་བའི་ཆོས་ཉེ་བར་སྟོན་པ་གཏན་ཚིགས་སོ་ཞེས་པ་ནི། དོན་གང་སྒྲ་མི་རྟག་པ་ཉིད་ལ་སོགས་པ་བསྒྲུབ་པར་བྱ་བ་དེ་འདྲ་བ་སྟེ། དེའི་རིགས་ཅན་མེད་ན་དོན་གང་ཞིག་འགར་ཡང་འབྱུང་བ་མ་ཡིན་པ་སྟེ། རྩོལ་
[183b.3]བ་ལས་བྱུང་བ་ཉིད་ནི་མི་རྟག་པ་ཉིད་ལྟ་བུ་དང་དུ་བ་ནི་མེ་ལྟ་བུའོ་ཞེས་པ་དེ་ནི་དེ་འདྲ་བ་མེད་ན་མི་འབྱུང་བའི་ཆོས་ཅན་ཏེ། དེ་ཉེ་བར་སྟོན་པ་ནི་འདིས་ཉེ་བར་བསྟན་པར་བྱའོ་ཞེས་པའི་ཚིག་གོ། །དཔེར་ན་བརྩལ་མ་ཐག་ཏུ་བྱུང་བ་ཉིད་ཀྱི་ཕྱིར་ཞེས་པ་འདི་ལྟ་བུ་ལ་སོགས་པ་སྟེ་དེ་ནི་གཏན་ཚིགས་སོ། །
[183b.4]གང་གིས་ཉེ་བར་སྟོན་པ་མ་ཡིན་པ་དེ་ནི་གཏན་ཚིགས་མ་ཡིན་ཏེ། དཔེར་ན་སྒྲ་མི་རྟག་སྟེ་མིག་གིས་གཟུང་བྱ་ཉིད་ཀྱི་ཕྱིར་ཞེས་པ་འདི་ལྟ་བུ་ལ་སོགས་པའོ། །འདིར་ངག་གིས་ངེས་པར་གཟུང་བའི་འབྲས་བུ་ཅན་ཉིད་ཀྱི་ཕྱིར་རོ། །ངེས་པར་གཟུང་བ་ཁོ་ན་རེ་ཞིག་རྣམ་པར་དཔྱད་པར་བྱའོ། །
[183b.5]འདི་ལ་ངེས་པར་གཟུང་བ་རྣམ་པ་གསུམ་སྲིད་དེ། དེ་འདྲ་མེད་ན་མི་འབྱུང་བ་ཁོ་ན་དང་། དེ་འདྲ་མེད་པ་ཁོ་ནར་མི་འབྱུང་བ་དང་། དེ་འདྲ་བ་ཁོ་ན་མེད་ན་མི་འབྱུང་བ་ཞེས་པའོ། །ཐམས་ཅད་ལ་ཡང་སྐྱོན་ཏེ། དེ་ལ་རེ་ཞིག་ངེས་པར་གཟུང་བ་སྔ་མའི་དབང་དུ་བྱས་ནས་གསུངས་པ། གལ་ཏེ་
[183b.6]དེ་འདྲ་མེད་ན་ནི། །མེད་ཉིད་ཅེས་པ་ལ་སོགས་པའོ། །འདིར་འགལ་བ་དང་ཐུན་མོང་བའི་མ་ངེས་པ་ཙམ་རྣམ་པར་གཅོད་པའི་ཕྱིར། མཉན་པར་བྱ་བ་ཉིད་ཀྱི་ཕྱིར་སྒྲ་རྟག་གོ་ཞེས་པ་འདི་ཡང་གཏན་ཚིགས་སུ་འཐོབ་བོ། །གང་གི་ཕྱིར་དེ་འདྲ་བའི་རྟག་པ་ཉིད་མེད་ན་མི་འབྱུང་བ་ཁོ་ནའོ་ཞེས་
[183b.7]ཧ་ཅང་ཁྱབ་པའི་མཚན་ཉིད་དོ། །འོ་ན་རྟག་པ་ཉིད་མེད་པ་ལ་མཉན་པར་བྱ་བ་ཉིད་འགྱུར་བ་ཁོ་ན་མ་ཡིན་ན། དེ་ལྟར་མི་རྟག་པ་ཁོ་ན་མཉན་པར་བྱ་བ་ཉིད་དུ་འཐད་ཀྱི་ཅིག་ཤོས་ནི་མ་ཡིན་ནོ་ཞེས་པ་འདི་བསྒྲུབས་ཟིན་པས་སོ། །འདི་ཅི་ལྟར་སྐྱོན་དུ་ཐལ་བར་འགྱུར་ཞེ་ན། འདི་བསམ་པར་བྱ་སྟེ།
[184a]
[184a.1]མེད་པ་ཁོ་ནར་ཞེས་པ་འདི་ལ་ནི། གང་དེ་འདྲ་མེད་པ་ཁོ་ནར་མི་འབྱུང་བ་སྟེ། ལྷན་ཅིག་ཀྱང་ནི་མ་ཡིན་པ་དེ་གཏན་ཚིགས་ཞེས་པས་མཉན་པར་བྱ་བ་ཉིད་ལ་ཐལ་བར་འགྱུར་བ་མེད་དོ། །དེ་ལྟར་ནི་དེ་འབའ་ཞིག་པ་མེད་ན་མི་འབྱུང་བ་མ་ཡིན་གྱི། འོ་ན་ཅི་ཞེ་ན་ལྷན་ཅིག་པ་
[184a.2]ཡང་ངོ་། །འོན་ཀྱང་མཐུན་ཕྱོགས་ལ་ཁྱབ་པ་གང་ཡིན་པ་བྱས་པ་ལ་སོགས་པ་ཁོ་ན་གཏན་ཚིགས་འགྱུར་གྱི། མཐུན་ཕྱོགས་ལ་མ་ཁྱབ་པ་བརྩལ་མ་ཐག་ཏུ་བྱུང་བ་ཉིད་ལ་སོགས་པ་ནི་མ་ཡིན་ནོ། །དེ་ལྟར་ནི་དེ་འདྲ་མེད་པ་ཁོ་ནར་མི་འབྱུང་བ་ཞེས་པའི་ངེས་པར་གཟུང་བ་འདི་ལས། ཇི་ལྟར་
[184a.3]མཉན་པར་བྱ་བ་ཉིད་མཚན་ཉིད་ཀྱིས་ཡུལ་དུ་མ་བྱས་ཏེ། ལྷན་ཅིག་ཀྱང་མི་འབྱུང་བའོ་ཞེས་བྱས་ནས་ཡིན་པ་དེ་ལྟར་རྩོལ་མ་ཐག་ཏུ་བྱུང་བ་ཉིད་ཀྱང་སྟེ། གང་གི་ཕྱིར་དེ་ཡང་མཉན་པར་བྱ་བ་བཞིན་དུ་དེ་འདྲ་བས་ལྷན་ཅིག་ཀྱང་མི་འབྱུང་བ་སྟེ་གློག་ལ་སོགས་པ་ལའོ། །དེ་ལས་ཀྱང་དོན་གྱི་
[184a.4]ལྷན་ཅིག་འབྱུང་བ་བྱས་པ་ལ་སོགས་པ་འབའ་ཞིག་ཁོ་ན་གཏན་ཚིགས་སུ་འགྱུར་གྱི། བརྩལ་མ་ཐག་ཏུ་བྱུང་བ་ཉིད་ནི་མ་ཡིན་ཏེ། དེ་མི་རྟག་པ་དང་ལྷན་ཅིག་འབྱུང་བ་ཁོ་ན་ནི་མ་ཡིན་ནོ། །དེ་སྟོན་ཏེ། དེ་མི་རྟག་པ་ཉིད་དང་ཞེས་པ་ལ་སོགས་པའོ། །འགའ་ཞིག་གིས་སྨྲས་པ། མེད་
[184a.5]པ་ཁོ་ནར་མི་འབྱུང་བ་ཞེས་བརྗོད་པ་ན་དོན་གྱིས་ལྷན་ཅིག་ཁོ་ནར་གང་འགྱུར་བ་དེ་གཏན་ཚིགས་སོ་ཞེས་བརྗོད་པར་འགྱུར་གྱི། གང་ལྷན་ཅིག་འགྱུར་བ་ཁོ་ན་ཞེས་པ་ནི་མ་ཡིན་ཏེ། དེའི་ཕྱིར་སྐྱོན་མེད་དོ་ཞེ་ན། དེ་མི་རིགས་ཏེ། གལ་ཏེ་ངེས་པར་གཟུང་བ་འདི་ལ་དོན་གྱིས་ལྷན་ཅིག་ཁོ་
[184a.6]ནར་གང་འགྱུར་བ་དེ་གཏན་ཚིགས་སོ་ཞེས་རྟོག་ན་ངེས་པར་གཟུང་བ་དོན་མེད་པར་འགྱུར་ཏེ། གལ་ཏེ་ལྷན་ཅིག་ཀྱང་མི་འབྱུང་བ་གཏན་ཚིགས་སུ་འགྱུར་ན་ངེས་པར་གཟུང་བའི་འབྲས་གཞན་ཅི་ཞིག་ཅེས་པ་འདི་བརྗོད་པར་བྱའོ། །དེ་ལྟར་ངེས་པར་གཟུང་བ་གཉིས་པ་ལ་མ་ཁྱབ་པའི་མཚན་ཉིད་
[184a.7]དོ། །ངེས་པར་གཟུང་བ་གསུམ་པ་ལ་ནི་མཚན་ཉིད་མི་སྲིད་པར་སྟོན་པ་གསུངས་པ། དེ་འདྲ་ཁོ་ན་ཞེས་པ་ལ་སོགས་པ་སྟེ། ཀྱང་གི་སྒྲ་ནི་ངེས་པར་གཟུང་བ་ལ་སྟེ། མི་འདོད་པ་ཁོ་ནར་ཞེས་པའི་དོན་ཏོ། །ངེས་པར་གཟུང་བ་སྔ་མ་དག་ནི་ཅུང་ཟད་འདོད་པ་ཡང་འགྲུབ་ཅིང་འདིར་ནི་འདོད་པ་
[184b]
[184b.1]མེད་པ་ཁོ་ནའོ། །སྔ་མ་དག་ལ་ཐལ་བར་མི་འགྱུར་བ་བདེན་མོད་ཀྱི་ཞེས་པའོ། །ཅི་ལྟར་ཐལ་བར་མི་འགྱུར་ཞེ་ན། གསུངས་པ། དེ་འདྲ་བ་ཁོ་ནས་ལྷན་ཅིག་མི་འབྱུང་བ་ཞེས་བྱས་ནས་ཞེས་པ་སྟེ། མཉན་པར་བྱ་བ་ཉིད་ལ་ཆོས་འདི་ཡོད་པ་ཡང་མ་ཡིན་ནོ་ཞེས་པས་དེ་ལ་གཏན་
[184b.2]ཚིགས་སུ་ཐལ་བ་མེད་དོ། །རྩོལ་མ་ཐག་ཏུ་བྱུང་བ་ཉིད་ལ་ཡང་སྐྱོན་སྔ་མ་རྗེས་སུ་འབྲེལ་པ་མ་ཡིན་པ་ཁོ་ན་སྟེ། སྐྱོན་སྔ་མ་ནི་བྱས་པ་ཉིད་ལ་སོགས་པ་གཏན་ཚིགས་ཉིད་དུ་གྲུབ་པའི་རྗེས་སུ་འབྲང་ལ། འདིར་ནི་གཏན་ཚིགས་ཉིད་དུ་གྲུབ་པའི་དྲི་ཡང་མེད་པས་སོ། །གང་གསུངས་པ།
[184b.3]འོན་ཀྱང་ཞེས་པ་ལ་སོགས་པའོ། །འོ་ན་ཁྱོད་ཀྱིའང་དེ་མཚུངས་ལ་ཡོད་པ་ཁོ་ན་ཞེས་པ་འདིར། དེ་དང་མཚུངས་པ་ཁོ་ན་ལ་ཞེས་ངེས་པར་གཟུང་བའི་ཕྱིར་ཐལ་བར་འགྱུར་བ་མཚུངས་ཏེ། དེ་དང་མཐུན་པ་ཁོ་ན་ལ་ཡོད་པའི་གཏན་ཚིགས་འགའ་ཡང་མེད་དེ། དངོས་པོ་ཐམས་ཅད་
[184b.4]རིགས་མི་མཐུན་གྱི་ཆོས་ཀྱི་རྗེས་སུ་འགྲོ་བ་ཉིད་ཀྱི་ཕྱིར་ཞེ་ན། འདི་ཡོད་པ་མ་ཡིན་ཏེ། དེ་མཚུངས་དང་མཐུན་ཕྱོགས་ཞེས་པ་རྣམ་གྲངས་དག་སྟེ། མཐུན་ཕྱོགས་ཀྱང་བསྒྲུབ་བྱའི་ཆོས་ཀྱི་སྤྱིས་དོན་མཐུན་པའོ། །འདིར་ཡང་འདི་ལྟར་ངེས་པར་གཟུང་བར་བྱ་སྟེ། གང་བསྒྲུབ་པར་བྱ་བའི་ཆོས་ཀྱི་
[184b.5]སྤྱི་དང་དོན་མཐུན་པ་ཁོ་ན་མཐུན་ཕྱོགས་སོ་ཞེས་པ་སྟེ། བསྒྲུབ་པར་བྱ་བའི་ཆོས་ཀྱི་སྤྱི་ཁོ་ནས་མཐུན་པ་ཞེས་པ་ནི་མ་ཡིན་ནོ། །དེས་ན་དེ་མཚུངས་ཀྱང་གང་བསྒྲུབ་པར་བྱ་བའི་ཆོས་ཀྱི་སྤྱི་མཚུངས་པ་ཁོ་ན་ཡིན་པ་དེ་འགྱུར་བར་འོས་ཀྱི། བསྒྲུབ་པར་བྱ་བའི་ཆོས་ཀྱི་སྤྱི་ཁོ་ནས་ནི་མ་ཡིན་ནོ་ཞེས་
[184b.6]པར་ཐལ་བར་འགྱུར་བ་མི་མཚུངས་སོ། །འོ་ན་དོད་ཟླ་ལྡན་པར་གཅོད་པ་ཁོ་ན་ངེས་པར་གཟུང་བ་ལས་རྟོགས་པ་མ་ཡིན་ནམ། ཆོས་ཐམས་ཅད་བཀག་པ་ནི་མ་ཡིན་ཏེ། དེས་ན་ཅིའི་ཕྱིར་མཚོན་པར་བྱ་ལ་མེད་པ་མ་ཡིན་ཞེ་ན། གང་དེ་ཡང་དོད་ཟླ་ལྡན་པ་སེལ་བ་ཁོ་ན་ལ་ངེས་པར་གཟུང་བ་ནུས་པ་
[184b.7]ཉིད་ཡིན་པ་དེ་ལྟ་ཡང་། འདིར་མི་རྟག་པ་དང་རྟག་པ་ལ་སོགས་པ་སྐབས་སུ་བབ་པ་འགའ་ཞིག་མེད་པའི་ཕྱིར་ན་ཆོས་ཐམས་ཅད་ཀྱང་ཕན་ཚུན་ལྟོས་པས་དེ་འདྲ་བ་མ་ཡིན་པ་ཉིད་ཀྱི་ཕྱིར་དང་དེ་འདྲ་བ་མ་ཡིན་པ་ཡང་དོད་ཟླ་ལྡན་པ་མ་ཡིན་པ་ཉིད་ཀྱི་ཕྱིར་སེལ་བར་རིགས་སོ། །ཅི་འདི་རེ་ཞིག་
[185a]
[185a.1]ཅེས་པ། ཇི་ལྟར་སྦྱོར་བས་བསྟན་པར་བྱ་བ་དེ་ལྟར་འདི་མཚན་ཉིད་ཡིན་ནམ། ཅི་སྟེ་ཇི་ལྟ་བུར་གྱུར་པའི་དོན་གྱིས་ཡིན་ཞེས་པ་ནི། དོན་དམ་པར་དེ་འདྲ་བ་མེད་པ་ནི་མི་འབྱུང་བའི་ཆོས་གང་ཡིན་པ་དེ་སྟོན་པ་གཏན་ཚིགས་ཡིན་ཞེས་པས་ན། དེ་ནི་ཅི་སྟེ་དེ་ཁོ་ནའི་རྣམ་
[185a.2]པས་སམ། རྣམ་པ་གཞན་གྱིས་ཡིན་ཞེས་པའོ། །འདིར་ནི་འདིར་བརྗོད་པར་མི་འདོད་པ་ཁོ་ནའོ། །དེ་བདག་ཉིད་ཀྱིས་ཞེས་པས། དེ་འདྲ་བ་མེད་ན་མི་འབྱུང་བ་ཉིད་ཀྱིས་ཞེས་པའི་དོན་ཏོ། །གཏན་ཚིགས་སྨྲས་པས་མི་ནུས་སོ་ཞེས་ཏེ། དེའི་བདག་ཉིད་ཀྱིས་བསྟན་པར་ཞེས་པ་ལྷག་
[185a.3]མའོ། །གཏན་ཚིགས་བརྗོད་པས་ནི་ཕྱོགས་ཀྱི་ཆོས་ཙམ་འབའ་ཞིག་བརྗོད་ཀྱི། མེད་ན་མི་འབྱུང་བའི་འབྲེལ་པ་ནི་མ་ཡིན་ཏེ། དེ་ནི་དཔེའི་ཚིག་གི་རྟོགས་པར་བྱ་བ་ཉིད་ཀྱི་ཕྱིར་རོ། །རྣམ་པ་ཅིས་སམ་ཅི་ལ་ཞེས་པ། དེའི་རྣམ་པ་མང་པོ་རྣམས་སྲིད་དེ། དཔེར་ན་དུ་བ་དང་བཅས་པའི་སྤྱི་དང་
[185a.4]ཁྱད་པར་གྱི་ཆོས་རྣམས་ལྟ་བུའོ། །དེ་ལ་རྣམ་པ་འདིས་ཉེ་བར་སྟོན་པའོ་ཞེས་བརྗོད་པ་མ་ཡིན་ནོ། །ཅི་ལ་སྟེ་ཅི་བསྒྲུབ་པར་བྱ་བ་ལ་དེ་སྟོན་ནམ། འོན་ཏེ་དེའི་གཞི་ལའམ། འོན་ཏེ་བསྒྲུབ་བྱའི་རིགས་མི་མཐུན་ལ་ཞེས་སོ། །དེའི་ཕྱིར་མཚན་ཉིད་ཉུངས་པ་ཉིད་དོ། །ཕྱོགས་འདི་ཁོ་ན་ལ་
[185a.5]སྐྱོན་གཞན་གསུངས་པ། ཤེས་བྱེད་ལས་ནི་འདས་པ་ཡིས། །འདི་ལྟར་ཞེས་པའོ། །ཅིའི་ཕྱིར་ཞེ་ན་གསུངས་པ། མ་མཐོང་ཞེས་པ་ལ་སོགས་པའོ། །མིག་གིས་གཟུང་སོགས་ཞེས་ཏེ། བཱའི་སྒྲ་ནི་དང་གི་དོན་ལའོ། །སོགས་ཀྱི་སྒྲས་ཕྱི་རོལ་ཉིད་ལ་སོགས་པ་གཟུང་ངོ་། །དེ་རྣམས་མི་
[185a.6]རྟག་པ་ཉིད་དང་ལྷན་ཅིག་རྒྱུ་བ་ཉིད་ཡོད་པས་སོ་ཞེས་སྒྲ་མི་རྟག་པ་ཉིད་བསྒྲུབ་པར་བྱ་བ་ལ་གཏན་ཚིགས་སུ་འགྱུར་རོ། །འདི་ནི་མ་གྲུབ་པ་ཉེ་བར་མཚོན་པའི་དོན་དུའང་ཡིན་ཏེ། ཕྱོགས་ཆོས་མ་བརྗོད་པ་ཉིད་ཀྱི་ཕྱིར་ཆ་གྲུབ་པ་ཡང་གཏན་ཚིགས་ཡིན་པ་འཐོབ་བོ་ཞེས་པའི་དོན་ཏོ། །མ་བསྟན་
[185a.7]པ་ཞེས་བྱ་བ་འདི། ཅི་ལྟར་ཅི་ལ་ཞེས་མ་བརྗོད་ཅེས་པ་གང་གིས་བསྟན་པ་ཞེས་པ་འདི་ཙམ་གྱིས་ནི་རྣམ་པ་འདིས་དང་འདི་ལའི་དོན་ཉེ་བར་མ་བསྟན་པའོ་ཞེས་པས་ཁྱད་པར་རྟོགས་པ་མ་ཡིན་པས་སོ་ཞེས་པའི་ཕྱིར། འདི་མ་བརྗོད་པ་དང་མཚུངས་པའོ། །ལྷན་ཅིག་འབྱུང་བས་བསྒྲུབ་
[185b]
[185b.1]བྱར་ན། །ཞེས་པ། འདི་ལྟར་སེམས་ཏེ། བསྟན་ཟིན་པའི་རྣམ་པ་ཁོ་ན་ལྷན་ཅིག་འབྱུང་བ་སྟེ། རྣམ་པ་གཞན་མ་ཐོབ་པ་ཉིད་ཀྱི་ཕྱིར་དང་། མཚན་ཉིད་ཀྱི་ངག་ལ་ཡང་དེ་འདྲ་བ་མེད་ན་མི་འབྱུང་བ་ཉིད་རྟོགས་པར་བྱ་བ་ཉིད་ཀྱི་ཕྱིར་རོ། །ཡུལ་ཡང་བསྒྲུབ་པར་བྱ་བ་ཁོ་ནར་རྟོགས་པར་བྱ་སྟེ། དེ་
[185b.2]ཉེ་བའི་ཕྱིར་རོ་ཞེའོ། །མ་ཡིན་ཞེས་པ་ལ་སོགས་པས་སེལ་བར་བྱེད་དེ། ཆོས་མཐུན་པ་ཉིད་དམ་ཆོས་མི་མཐུན་པ་ཉིད་ཀྱིས་ཞེས་པའི་དམ་གྱི་སྒྲས་གང་ཡང་རུང་བ་ཡང་འབྲེལ་པ་སྟོན་པར་ནུས་པར་གསུངས་སོ། །ཕྱི་རོལ་གྱི་དོན་ཉེ་བར་བསྡུས་པས་ཞེས་པ། ཕྱོགས་སུ་བྱས་པའི་ཆོས་ཅན་
[185b.3]གྱི་ཁྱད་པར་ལས་གཞན་དུ་སྤྱི་ལ་ཉེ་བར་བསྟན་པས་ཞེས་པའི་དོན་ཏོ། །སྤྱི་ཡང་ཁྱད་པར་ཡོངས་སུ་མི་སྤོང་བའི་ཕྱིར། བསྒྲུབ་པར་བྱ་བའི་ཆོས་ཅན་ཡང་དེར་ནང་དུ་འདུས་པ་ཁོ་ན་སྟེ། བསྒྲུབ་བྱའི་ཆོས་ཅན་ཁོ་ན་ལ་མེད་ན། མི་འབྱུང་བ་ཉིད་སྟོན་པ་བསལ་བ་ལྷུར་ལེན་པ་ནི་ཕྱི་རོལ་གྱི་དོན་སྨོས་
[185b.4]པའོ། །དེ་ལྟར་ན་གལ་ཏེ་གང་གིས་མ་བསྟན་པ་དེ་གཏན་ཚིགས་མ་ཡིན་ན། རྣམ་པ་ཐམས་ཅད་དུ་གཏན་ཚིགས་ཡོད་པ་མ་ཡིན་པར་ཐལ་འགྱུར་ཏེ། རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་ཞེས་པ་ལ་སོགས་པས་འབྲེལ་པ་སྟོན་པར་ནུས་པ་མ་ཡིན་གྱི། འོ་ན་ཅི་ཞེ་ན། དཔེ་གཉིས་པོས་སོ་
[185b.5]ཞེ་ན། འདི་དེའི་བའི་ཚིག་ཁོ་ནས་རྟོགས་པར་བྱ་བའི་ཆེད་དུ་གསུངས་པ། ཇི་སྐད་འཆད་པར་འགྱུར་བ་ལྟ་བུ་ཞེས་པ་ལ་སོགས་པའོ། །གང་བརྗོད་པ་ཡང་ཞེས་པ་འདིས་བསྒྲུབ་པར་བྱ་བ་ལ་གཏན་ཚིགས་ཉེ་བར་སྟོན་པ་མི་སྲིད་པ་གསུངས་ཏེ། མི་རྟག་པ་ལ་སོགས་པ་རྣམས་ནི་བསྒྲུབ་པར་བྱ་
[185b.6]བ་ཉིད་དུ་བཤད་ལ། དེ་རྣམས་ལ་གལ་ཏེ་མེད་ན་མི་འབྱུང་བ་ཉིད་ཀྱི་ཆོས་ཉེ་བར་སྟོན་ན། གཏན་ཚིགས་འཛིན་པའི་དུས་ཁོ་ན་ན་བསྒྲུབ་བྱ་གྲུབ་པ་ཉིད་ཀྱི་ཕྱིར་གང་སྒྲུབ་པའི་ཆེད་དུ་གཏན་ཚིགས་སུ་འགྱུར་བ་མ་གྲུབ་པ་གཞན་ཅི། དེ་ལྟར་འགྱུར་མོད། ཆོས་ཅན་ནི་བསྒྲུབ་པར་བྱ་བ་སྟེ། དེ་ལ་
[185b.7]མཐོང་བའི་ཆོས་ཀྱིས་གཏན་ཚིགས་ཀྱི་མེད་ན་མི་འབྱུང་བ་ཉིད་སྟོན་པའོ་ཞེ་ན། གསུངས་པ། གཞན་ནི་ཞེས་པ་ལ་སོགས་པ་སྟེ། བསྒྲུབ་བྱའི་ཆོས་ལ་ཐ་དད་པའི་བསྒྲུབ་བྱ་གཞན་རྩོད་པ་སྒྲུབ་པར་བཤད་པ་མ་ཡིན་ཏེ། བསྒྲུབ་བྱའི་ཆོས་ཀྱིས་ཁྱད་པར་དུ་བྱས་པའི་ཆོས་ཅན་བསྒྲུབ་བྱ་ཉིད་དུ་མ་བརྗོད་
[186a]
[186a.1]པའི་ཕྱིར་རོ། །དཔེ་བརྗོད་དང་ཆོས་མཐུན་པ་ལས་བསྒྲུབ་བྱ་སྒྲུབ་པར་བྱེད་པ་ནི་གཏན་ཚིགས་སོ་ཞེས་པ། བསྒྲུབ་པར་བྱ་བ་དང་ཆོས་མཐུན་པ་ཉིད་ལས་དེའི་ཆོས་རྟོགས་པར་བྱེད་པའི་དཔེ་ནི་དཔེ་བརྗོད་དེ། དཔེར་ན་སྒྲ་མི་རྟག་པར་བསྒྲུབ་པར་བྱ་བ་ལ་བུམ་པ་ལ་
[186a.2]སོགས་པ་ལྟ་བུའོ། །དེ་དང་བསྒྲུབ་པར་བྱ་བའི་ཆོས་མཐུན་པ་ཉིད་ལས་ཏེ་མཚུངས་པ་ཉིད་ལས་བསྒྲུབ་པར་བྱ་བ་སྒྲུབ་པར་བྱེད་པ་སྟེ། བསྒྲུབ་པར་བྱ་བ་རྟོགས་པར་བྱེད་པ་ནི་གཏན་ཚིགས་ཏེ། དཔེར་ན་སྐྱེ་བའི་ཆོས་ཅན་ཉིད་ཀྱི་ཕྱིར་རོ་ཞེས་པ་ལ་སོགས་པ་ལྟ་བུའོ། །གལ་ཏེ་ཆོས་མཐུན་
[186a.3]སྒྲུབ་བྱེད་ན། །ཞེས་པ་ལ་སོགས་པ་སྟེ། གལ་ཏེ་དེ་དང་ཆོས་མཐུན་པ་སྐྱེ་བའི་ཆོས་ཅན་ཉིད་ལ་སོགས་པ་གང་ཡིན་པ་དེ་བསྒྲུབ་བྱ་སྒྲུབ་པར་བྱེད་པའི་གཏན་ཚིགས་ཡིན་གྱི་དེའི་ཚིག་མ་ཡིན་ན། ངག་གི་ཡན་ལག་གཏན་ཚིགས་མིན་པར་གྱུར་ན། ཡན་ལག་སྔ་ཅན་གྱི་ངག་གི་ནི་གཏན་
[186a.4]ཚིགས་ཡན་ལག་ཉིད་དུ་བརྗོད་དེ། དམ་བཅའ་དང་གཏན་ཚིགས་དང་དཔེ་བརྗོད་དང་ཉེ་བར་སྦྱར་བ་དང་མཇུག་བསྡུ་བ་རྣམས་ཡན་ལག་རྣམས་སོ་ཞེས་བརྗོད་པའི་ཕྱིར་རོ། །དོན་གྱི་མཚན་ཉིད་ལ་ནི་གཏན་ཚིགས་ལ་དེ་འཐོབ་པ་མ་ཡིན་ནོ་ཞེས་པས་ཁས་བླངས་པ་ཉམས་སོ། །ཅི་ལྟར་
[186a.5]ལྔ་པ་ངེས་པར་བསྟན་པར་གྱུར་པ་ན་ཆོས་མཐུན་པ་ཉིད་ཁོ་ན་གཏན་ཚིགས་ཉིད་དུ་དོགས་ཤེ་ན། གཞན་ཐོས་པ་མེད་པའི་ཕྱིར་དང་། ཆོས་མཐུན་པ་ཉིད་ཀྱང་བསྒྲུབ་བྱ་དང་མངོན་པར་འབྲེལ་པའི་ཕྱིར་ཏེ། ཚིག་ནི་དོན་གྱི་སྒོ་ནས་བསྒྲུབ་བྱ་མངོན་པར་བསལ་བའི་རྒྱུ་ཉིད་ཀྱི་ཕྱིར་ན།
[186a.6]དེ་ཁོ་ན་བསྒྲུབ་པར་བྱ་བ་སྒྲུབ་པར་བྱེད་པའི་ཕྱིར་གཏན་ཚིགས་ཉིད་དུ་དོགས་སོ། །ཐ་དད་དུ་འཇུག་པའི་ཕྱིར་རོ་ཞེས་པ། ངག་གི་ཡོན་ཏན་མ་ཡིན་པ་ཉིད་ན་གཏན་ཚིགས་ཏེ། བྱ་བ་ཐ་དད་པ་ཉིད་ཀྱི་ཕྱིར་རོ་ཞེས་པའི་དོན་ཏོ། །འདི་ཡང་བརྒྱུད་པས་གཏན་ཚིགས་ཡིན་ནོ། །ཐ་
[186a.7]དད་དུ་འཇུག་པ་ཉིད་དུ་གྱུར་ན། ཐ་དད་པ་རྣམས་ལ་ཐ་མི་དད་པར་བརྗོད་པར་འདོད་པ་ལྡོག་སྟེ། དེ་ལྡོག་པ་ན་ཡང་ཡན་ལག་གི་ཐ་སྙད་དོ་ཞེས་པས། ལྷན་ཅིག་མ་ཡིན་པ་བརྗོད་པར་འདོད་པ་ཁོ་ན་བར་མ་ཆོད་ཀྱི་གཏན་ཚིགས་སོ། །དེ་བསྟན་པའི་ཆེད་དུ་གསུངས་པ། ལྷན་ཅིག་
[186b]
[186b.1]བརྗོད་པར་འདོད་པ་ནི་ཞེས་པ་ལ་སོགས་པའོ། །དེ་འདི་སྐད་བཤད་པར་འགྱུར་ཏེ། གང་འཇུག་པ་ཐ་དད་པ་དེ་རྣམས་ན་ལྷན་ཅིག་བརྗོད་པར་འདོད་པ་མ་ཡིན་ཏེ། དཔེར་ན་རྫ་མཁན་དང་ཐགས་མཁན་དང་བ་ལང་རྫི་ལ་སོགས་པ་རྣམས་བཞིན། ཇི་སྐད་དུ་བཤད་པའི་གཏན་ཚིགས་ཀྱང་དམ་
[186b.2]བཅའ་ལ་སོགས་པ་རྣམས་དང་ལྷན་ཅིག་འཇུག་པ་ཐ་དད་པའོ་ཞེས་པ་རྒྱུ་དང་འགལ་བའོ། །གང་གི་ཕྱིར་བྱ་བ་ཐ་མི་དད་པའི་ནུས་པ་ཤེས་པའི་དོན་དུ་སྒྲ་གཅིག་གིས་ལྷན་ཅིག་བརྗོད་པར་འདོད་པས་སོ། །དེ་གང་ཞིག་གང་གི་ཡན་ལག་གཞན་རྣམས་དང་ལྷན་ཅིག་བརྗོད་པར་འདོད་པ་
[186b.3]མེད་པ་དེ་ནི་དེའི་ཡན་ལག་མ་ཡིན་ཏེ། དཔེར་ན་དམག་གི་བ་ལང་བཞིན། ཇི་སྐད་བཤད་པའི་གཏན་ཚིགས་ཀྱང་དམ་བཅའ་ལ་སོགས་པ་སྒྲུབ་བྱེད་ཀྱི་ངག་གི་ཡན་ལག་རྣམས་དང་ལྷན་ཅིག་བརྗོད་པར་འདོད་པ་མེད་དོ་ཞེས་པ་ནི་རྒྱུ་མི་དམིགས་པའོ། །དེ་ལྟར་ནི་འདིའི་འདི་ཡན་ལག་ཡིན་
[186b.4]ནོ་ཞེས་པའི་ཐ་སྙད་ཀྱི་རྒྱུ་ནི། དེའི་ཡན་ལག་གཞན་རྣམས་དང་ལྷན་ཅིག་བརྗོད་པར་འདོད་པའོ། །ཆོས་མི་མཐུན་པའི་སྦྱོར་བ་ནི་གླང་པོ་ཆེ་དང་རྟ་དང་ཤིང་རྟ་དང་རྐང་ཐང་གི་དཔེས་སྦྱར་བར་བྱ་བའོ། །འོ་ན་སྒྲུབ་བྱེད་མ་ལོག་པ་དཔེ་མ་ཡིན་ནམ། གླང་པོ་ལ་སོགས་པ་རྣམས་ཀྱང་འཇུག་
[186b.5]པ་ཐ་དད་པའི་ཕྱིར་རོ་ཞེ་ན། མ་ཡིན་ཏེ་དེར་ནི་ལྷན་ཅིག་བརྗོད་པར་འདོད་པ་ཡང་མེད་པའི་ཕྱིར་རོ། །གླང་པོ་མྱོས་པ་རྣམས་ལ་སྡེ་མྱོས་སོ་ཞེས་བརྗོད་པར་བྱ་བའམ། རྟ་རྣམས་སྐད་འདོན་པ་ན་དམག་སྡེ་རྣམས་སྐད་འདོན་ནོ་ཞེས་པ་ནི་མ་ཡིན་པས་སོ། །འཇུག་པ་གང་གི་དབང་དུ་བྱས་ནས་
[186b.6]ལྷན་ཅིག་བརྗོད་པར་འདོད་པ་དེའི་ཐ་དད་པ་མེད་པའི་ཕྱིར་སྒྲུབ་པར་བྱེད་པ་ལྡོག་པ་མེད་དེ། དཔེར་ན་དམག་སྡེ་རྣམས་གོ་ཆ་གྱོན་ནོ་འཁྲུག་གོ། །རྣམ་པར་རྒྱལ་ལོ་ཞེས་པ་ལྟ་བུའོ། །མ་ཡིན་ཞེས་པ་ལ་སོགས་པས་གཏན་ཚིགས་གྲུབ་པར་མཇུག་སྡུད་པར་བྱེད་དོ། །ཅི་ལྟར་ན་འཇུག་པ་ཐ་
[186b.7]མི་དད་པར་འགྱུར་བ་མ་ཡིན་ཞེ་ན་གསུངས་པ་དོན་མ་བརྗོད་པ་ཉིད་ཀྱི་ཕྱིར་རོ་ཞེས་པ་སྟེ། དམ་བཅའ་ལ་སོགས་པའི་ཡན་ལག་རྣམས་ནི་དོན་བརྗོད་པའི་མཚན་ཉིད་ཅན་གྱི་འཇུག་པ་སྟེ། དེ་ཡང་དཔེར་བརྗོད་དང་ཆོས་མཐུན་པ་ཉིད་ཀྱི་མཚན་ཉིད་ཅན་གྱི་དོན་ལ་ཡོད་པ་མ་ཡིན་ཏེ། དེས་ན་དོན་
[187a]
[187a.1]བརྗོད་པར་བྱ་བ་ནི་མ་ཡིན་པས་སོ། །ཅིའི་ཕྱིར་དཔེར་བརྗོད་དང་ཆོས་མཐུན་པ་ལས་ཞེས་པའི་ལྔ་པ་འདི་མི་རིགས་ཤེ་ན་མ་ཡིན་ཞེས་པ་ལ་སོགས་པ་སྟེ། ཐ་དད་ཡོད་ན་འབྱུང་ཁུངས་བརྗོད་པར་འདོད་པ་ན་ལྔ་པར་འགྱུར་ཏེ། གྲོང་ནས་འོངས་སོ་ཞེས་པ་ལྟ་བུའོ། །
[187a.2]འདིར་ནི་ཐ་དད་པ་མེད་དེ། དཔེར་བརྗོད་དང་ཆོས་མཐུན་པ་ཉིད་ཁོ་ན་སྒྲུབ་པར་བྱེད་པ་ཉིད་དུ་འདོད་པ་ཉིད་ཀྱི་ཕྱིར་རོ། །འོ་ན་ཐ་མི་དད་པ་ལ་ཡང་ལྔ་པ་ཉེ་བར་དམིགས་པ་མ་ཡིན་ནམ། ནགས་ནས་ཤིང་གཅོད་དོ་ཞེས་པ་ལྟ་བུའོ་ཞེ་ན། འདི་ཡོད་པ་མ་ཡིན་ཏེ། ནགས་དང་ཤིང་དག་
[187a.3]ཚོགས་པ་དང་ཡན་ལག་ཉིད་ཀྱིས་ཐ་དད་པའི་ཕྱིར་རོ། །གལ་ཏེ་ཡང་ནགས་དང་ཤིང་དག་དངོས་པོར་ཐ་མི་དད་པ་དེ་ལྟ་ན་ཡང་། བློའི་སྣང་བས་བྱས་པའི་ཐ་དད་ཡོད་པ་ཁོ་ནའོ། །གཞན་ཡང་ཕ་རོལ་པོ་དངོས་པོའི་དབང་ཁོ་ན་ལས་སྒྲའི་དོན་རྣམ་པར་གཞག་པར་འདོད་དོ་ཞེས་པས་དེ་ཁོ་ན་
[187a.4]ལ་འདི་སྐྱོན་ཡིན་ནོ། །ཁྱད་པར་དང་ཁྱད་པར་ཅན་དག་གི་ཞེས་པ། སྔོན་པོ་དང་ཨུཏྤ་ལ་ལ་སོགས་པ་རྣམས་ཀྱི་ཁྱད་པར་དང་ཁྱད་པར་ཅན་གྱི་དངོས་པོ་ཡོད་ན། གཞི་མཐུན་པ་རྣམས་ལ་རྣམ་དབྱེ་ཐ་དད་པ་ཉིད་མཐོང་བ་མེད་དོ། །འདིར་ཡང་བསྒྲུབ་པར་བྱ་བ་དང་སྒྲུབ་པར་བྱེད་པ་གཞི་
[187a.5]མཐུན་པ་སྟེ། ཆོས་མཐུན་པ་ཉིད་ནི་ཁྱད་པར་དུ་འདོད་དོ། །དེའི་ཕྱིར་རྣམ་དབྱེ་ཐ་དད་པར་མི་འགྱུར་རོ། །གང་ཞིག་ཀློག་པར་བྱེད་པ། དཔེ་བརྗོད་དང་ཆོས་མཐུན་པ་ཉིད་འདིའི་ཞེས་འབྲུ་མང་པོ་པས་ཆོས་ཅན་བརྗོད་པར་བྱ་ཞིང་། དེའི་ཕྱིར་དཔེ་བརྗོད་དང་ཆོས་མཐུན་པ་ཉིད་ལས་
[187a.6]ཏེ། ཆོས་ཅན་ལས་གང་ཆོས་མཐུན་པ་ཉིད་དུ་འགྱུར་བ་དེ་གཏན་ཚིགས་སོ་ཞེའོ། །དེའི་ཆོས་མཐུན་པ་ཉིད་ཁྱད་པར་དུ་མ་བྱས་པ་ཉིད་ཀྱི་ཕྱིར་ཆོས་མཐུན་པ་ཉིད་ཙམ་གཏན་ཚིགས་སུ་ཐལ་བར་འགྱུར་རོ། །བསྒྲུབ་པར་བྱ་བ་དང་སྒྲུབ་པར་བྱེད་པར་གཟུང་བ་ནི་དེའི་ཁྱད་པར་དུ་འཐད་པ་ཡང་མ་
[187a.7]ཡིན་ཏེ། དེ་ཁོ་ན་ཡོངས་སུ་མི་ཤེས་པའི་ཕྱིར་ཏེ། ཡན་ལག་ཐམས་ཅད་ཀྱང་བསྒྲུབ་བྱ་སྒྲུབ་པར་བྱེད་པ་ཉིད་ཀྱི་ཕྱིར་རོ། །འདིར་ཆོས་མཐུན་པ་ཉིད་སྨོས་པ་ཡང་ཡོད་པ་མ་ཡིན་ནོ། །གང་ཡོད་པ་དེ་ནི་ཆོས་ཅན་གྱི་ཁྱད་པར་རོ་ཞེས་པ་འདི་མི་རིགས་སོ། །ངག་ཅེ་ན་ཞེས་པ་ལ་སོགས་པ་སྟེ།
[187b]
[187b.1]ངག་གི་སྒྲས་འདིར་བྱས་པ་ཉིད་ཀྱི་ཕྱིར་ཞེས་པ་ལ་སོགས་པའི་ཚིག་ཙམ་པོ་བརྗོད་པར་འདོད་པའོ། །དེ་ཉིད་ཀྱི་ཕྱིར་འགྲེལ་པར་གསུངས་པ། ཚིག་གང་ཞིག་ཅེས་པའོ། །འོ་ན་ཡང་དག་པར་སྦྱོར་བ་ལ་སོགས་པ་རྣམས་ལས་སྒྲ་འབྱུང་གི །ཆོས་མཐུན་པ་ཉིད་ལས་ནི་མ་ཡིན་ཞེས་སྨྲས་
[187b.2]པ། བརྒྱུད་པས་ཞེས་པ་སྟེ། བྱས་པ་ཉིད་ལ་སོགས་པ་ཉེ་བར་དམིགས་པ་ན། དེ་བརྗོད་པར་འདོད་པར་འགྱུར་ཞིང་། དེ་ལས་རྩོལ་བའོ་དེ་ལས་དང་འབད་པ་ལས་ཀྱང་བྱེད་པ་བསྐྱོད་པའོ། །དེ་ལས་ཀྱང་ལས་སོ། །དེ་ལས་ཡང་དག་པར་སྦྱོར་བ་དང་རྣམ་པར་འབྱེད་པའོ། །དེ་རྣམས་
[187b.3]ལས་སྒྲའོ་ཞེས་པ་འདི་ནི་བརྒྱུད་པའོ། །གལ་ཏེ་དངོས་སུ་ཞེས་པ་ལ་སོགས་པའོ། །དངོས་སུ་སྟེ་གང་ལས་གཞན་གྱིས་མ་ཆོད་པར་རྗེས་སུ་དཔག་པར་བྱ་བ་ངེས་པ་སྐྱེ་བ་ཡིན་ན། དེ་ཡང་ཉན་པ་པོའི་མེད་ན་མི་འབྱུང་བའི་འབྲེལ་པ་དྲན་པ་སྟེ། དེ་ལས་དེ་མ་ཐག་ཏུ་རྗེས་སུ་དཔག་པར་བྱ་བ་
[187b.4]ངེས་སོ་ཞེས་པས་དེ་ཁོ་ན་གཏན་ཚིགས་ཉིད་དུ་འགྱུར་རོ། །ཅི་སྟེ་ཞེས་པ་ལ་སོགས་པ་སྟེ། གང་བར་དུ་ཆོད་ཀྱང་མེད་ན་མི་འབྱུང་བ་ཉིད་ཀྱི་ཕྱིར་རྗེས་སུ་དཔག་པའི་རྒྱུ་ཡིན་པ་དེ་བརྒྱུད་པས་ཏེ། ཉན་པ་པོའི་གཏན་ཚིགས་ཤེས་པ་ཡང་རྣམ་པ་འདི་ལྟ་བུའོ་ཞེས་པས་དེ་གཏན་ཚིགས་ཉིད་དུ་
[187b.5]འགྱུར་རོ། །ཕྱོགས་ཆོས་ཀྱི་ཤེས་པ་ཡང་ཆོས་མཐུན་པ་ཉིད་ལས་བརྒྱུད་པས་རྗེས་སུ་དཔོག་པའི་རྒྱུར་འགྱུར་མོད། དེ་ཆོས་མཐུན་ཉིད་གཏན་ཚིགས་མིན། །ཞེས་པ། ཉན་པ་པོའི་གང་ཆོས་མཐུན་པ་ཉིད་ཀྱི་ཤེས་པ་དེ་ནི། དེའི་ཚིག་ལས་བར་མ་ཆད་པར་འགྱུར་གྱི། ཆོས་མཐུན་
[187b.6]པ་ཉིད་ལས་ནི་མ་ཡིན་ནོ། །ཚིག་ནི་དེ་ཁོ་ན་ལས་ཞེས་པ་བསམ་པའོ། །སྐབས་སུ་བབ་པའི་ཕྱིར་ཁྱད་པར་དུ་བྱ་བ་མ་ཡིན་ནོ་ཞེས་པ་བསྒྲུབ་བྱ་སྟོན་པ་དམ་བཅའོ་ཞེས་པ་འདི་ལས་སྟོན་པ་སྨོས་པ་རྗེས་སུ་འཇུག་སྟེ། དེས་ན་འདི་ལྟར་འབྲེལ་པར་བྱ་སྟེ། དཔེ་བརྗོད་དང་ཆོས་མཐུན་པ་ཉིད་
[187b.7]ལས་གང་སྟོན་པ་དེ་གཏན་ཚིགས་སོ་ཞེས་པར་ཏེ། དེའི་ཕྱིར་ཁྱད་པར་དུ་བྱ་བ་མ་ཡིན་ནོ། །སྐབས་ཉིད་ཡིན་ན་གཞན་ལ་སྲིད་ཅེས་པ་ནི། སྟོན་པ་སྐབས་ཉིད་དུ་བརྟེན་པར་བྱ་བ་ཡིན་ན། གཏན་ཚིགས་ཉིད་དུ་མངོན་པར་འདོད་པ་སྟོན་པ་ལས་གཞན་པ་སྟོན་པའི་ཡང་གཏན་ཚིགས་
[188a]
[188a.1]ཉིད་དུ་སྲིད་དོ་ཞེས་པའི་དོན་ཏོ། །ཅི་ལྟར་གཞན་སྲིད་ཅེ་ན་གསུངས་པ། སྐབས་སུ་བབ་པ་ཉིད་ལ་ཡང་ཞེས་པ་ལ་སོགས་པ་སྟེ། གལ་ཏེ་ཡང་སྟོན་པ་སྐབས་སུ་བབ་པ་ཡིན་པ་དེ་ལྟ་ན་ཡང་ལྔ་པས་སྟོན་པ་ཉིད་ལས་དཔེ་བརྗོད་དང་ཆོས་མཐུན་པ་ཉིད་ལས་གང་ངེས་པར་
[188a.2]སྟོན་པ་དེ་གཏན་ཚིགས་ཞེས་པ་འདི་རྟོགས་ཀྱི་དཔེ་བརྗོད་དང་ཆོས་མཐུན་པའི་གང་སྟོན་པ་དེ་གཏན་ཚིགས་སོ་ཞེས་པ་ནི་མ་ཡིན་ནོ། །དེ་ལས་ཀྱང་ཧ་ཅང་ཐལ་བར་འགྱུར་རོ། །དེ་ལྟར་འགྱུར་མོད། དཔེ་བརྗོད་དང་ཆོས་མཐུན་པ་ལས་དེ་ཁོ་ན་སྟོན་པ་ནི་འགྱུར་གྱི། །གཞན་ནི་མ་ཡིན་ནོ། །དེས་
[188a.3]ན་སྐྱོན་འདི་མེད་དོ་ཞེ་ན་གསུངས་པ། འགྱུར་ཏེ་ཞེས་པ་ལ་སོགས་པ་སྟེ། གང་ཁོ་ན་བསྒྲུབ་པར་བྱ་བའི་དཔེ་བརྗོད་དང་ཆོས་མཐུན་པ་ཉིད་ཁོ་ན་བསྒྲུབ་བྱ་དང་ཆོས་མཐུན་པ་ཉིད་ལས་དེའི་ཆོས་རྟོགས་པའི་དཔེ་ནི་དཔེ་བརྗོད་དོ་ཞེས་པ་འདིར་བསྒྲུབ་བྱ་དང་ཆོས་མཐུན་པའི་སྒྲས་བརྗོད་དོ། །དེའི་ཕྱིར་
[188a.4]དཔེ་བརྗོད་དང་ཆོས་མཐུན་པ་ལ་ལྟོས་ནས་དཔེ་སྟོན་པའོ། །དེ་ལྟ་བུ་ནི་ཉེ་བར་སྦྱར་བ་སྟོན་པ་ཡང་སྟེ། གང་གི་ཕྱིར་དེས་ནི་དཔེ་བརྗོད་དང་ཆོས་མཐུན་པ་ཉིད་ཁོ་ནར་བསྒྲུབ་བྱ་ཉེ་བར་གཏོད་དོ། །ཉེས་པ་འདི་ནི་མེད་དེ་ཞེས་པ། འདི་སྙམ་དུ་སེམས་ཏེ། དཔེར་ན་བྲམ་ཟེ་རྣམས་ལ་ཞོ་བྱིན་
[188a.5]ཅིག །ཀུཎ་ཌི་ནའི་བུ་ལ་དར་བ་བྱིན་ཅིག་ཅེས་པ་ལ། སྤྱིར་ཐོབ་པའི་ཞོ་སྦྱིན་པ་ནི། ཁྱད་པར་བྱས་པའི་དར་བ་སྦྱིན་པས་འགོག་པ་དེ་ལྟར་ཡན་ལག་ཕྱི་མ་རྣམས་ལ་གཏན་ཚིགས་ཉིད་ནི། རང་གི་མཚན་ཉིད་སྟོན་པས་སོ་ཞེའོ། །མ་ཡིན་རྣམ་བརྟག་སོགས་སྲིད་ཕྱིར། །ཞེས་པ་སྟེ། དེ་ལ་
[188a.6]རྣམ་པར་བརྟག་པ་ནི་ལྷས་བྱིན་ཁར་བའི་སྣོད་དམ། དངུལ་གྱི་འམ། གསེར་གྱི་རུ་ཟ་རུ་ཆུག་ཅེས་པ་སྟེ། རྣམ་པར་བརྟག་པས་གཞིའི་དངོས་པོ་འདིར་རྣམ་པར་ཤེས་པར་བྱའོ། །བསྡུ་བ་ནི་ལྷས་བྱིན་མར་སར་དང་ལོ་མ་དང་། ལན་ཚྭས་ཟ་རུ་ཆུག །འགེགས་པ་ནི་དཔེར་ན་བྲམ་ཟེ་རྣམས་ལ་
[188a.7]ཞོ་བྱིན། ཀུཎ་ཌི་ནའི་བུ་ལ་དར་བ་བྱིན་ཞེས་པ་ལྟ་བུ་སྟེ། དེ་ལྟར་གང་གི་ཕྱིར་གཅིག་ཏུ་ཐོབ་པ་རྣམས་ལ་ནི་གནོད་པ་བཞིན་དུ་རྣམ་པར་བརྟག་པ་དང་བསྡུ་བ་དག་ཀྱང་འགྱུར་ཏེ། དེ་ལས་ཐེ་ཚོམ་མོ། །དེ་ཕྱིར་ཐེ་ཚོམ་ཡོངས་སུ་སྤང་བའི་དོན་དུ་དྲུག་པར་འགྱུར་མོད། འོ་ན་སྤྱིར་བཏང་ལ་དམིགས་
[188b]
[188b.1]བསལ་གནོད་བྱེད་དོ་ཞེས་རབ་ཏུ་གྲགས་པ་འདི་ཁོ་ན་རིགས་པ་སྟེ། དེས་ན་འདི་ལ་ཐེ་ཚོམ་ཟ་བ་ཅི་ཞེ་ན། འདི་སྙམ་དུ་སེམས་ཏེ། རིགས་པ་འདི་ལ་ཕ་རོལ་པོ་རྗེས་སུ་མི་འཇུག་གོ། །གལ་ཏེ་འཇུག་ན་དཔེར་བརྗོད་དང་ཆོས་མཐུན་པ་ཉིད་ལས་བསྒྲུབ་བྱ་སྒྲུབ་པར་བྱེད་པ་གཏན་ཚིགས་སོ། །
[188b.2]དེ་བཞིན་དུ་ཆོས་མི་མཐུན་པ་ཉིད་ལས་ཞེས་པ་འདིར་སྒྲུབ་པར་བྱེད་པ་སྨོས་པ་མི་བྱེད་པར་འགྱུར་རོ། །དེ་ལྟར་ནི་འདི་གཏན་ཚིགས་ལྟར་སྣང་བའི་བདག་ཉིད་གང་ཆོས་མཐུན་པ་ཉིད་དམ་མི་མཐུན་པ་ཉིད་དེ་རྣམ་པར་གཅོད་པའི་ཆེད་དུ་དེ་ལས་བཟློག་པས་ཉེ་བར་བླངས་པས་སོ། །འདི་སྐད་
[188b.3]བརྗོད་པར་འགྱུར་ཏེ། གང་ཆོས་མཐུན་པ་ཉིད་དམ་མི་མཐུན་པ་ཉིད་ཡིན་ཞིང་གཏན་ཚིགས་ལྟར་སྣང་བ་རྣམས་མ་ཡིན་པ་དེ་གཏན་ཚིགས་སོ་ཞེས་པའོ། །རིགས་པ་འདི་འདོད་པ་ན་ནི། གང་ཆོས་མཐུན་པ་ཉིད་དམ་མི་མཐུན་པ་ཉིད་གཏན་ཚིགས་ལྟར་སྣང་ཡིན་པ་དེ་གཏན་ཚིགས་ཉིད་དུ་
[188b.4]ཐལ་བར་འགྱུར་བ་མ་ཡིན་པ་ཁོ་ན་སྟེ། དམིགས་བསལ་གྱི་ཡུལ་ལ་སྤྱིར་བཏང་གི་སྐབས་མེད་པ་ཉིད་ཀྱི་ཕྱིར་རོ། །སྒྲུབ་པར་བྱེད་པ་སྨོས་པ་ཡང་བྱས་ཏེ། དེས་ན་རིགས་པ་འདི་འདའ་བར་བྱས་ནས་འཇུག་གོ། །དེས་ན་ཐེ་ཚོམ་མོ་ཞེས་པའོ། །སྐྱོན་མེད་པ་ཁོ་ན་ནི་མ་ཡིན་ཏེ་ཞེས་
[188b.5]པ་མི་སྲིད་པའི་ཁྱད་པར་ཉེ་བར་བླངས་པའི་ཕྱིར་རོ། །དེ་བཞིན་དུ་དོན་གྱི་ཁྱད་པར་བསྒྲུབ་པར་བྱ་བ་སྒྲུབ་པར་བྱེད་པ་སྟེ། དོན་ཁོ་ནས་དོན་རྟོགས་པར་བྱེད་ཀྱི་སྒྲས་ནི་མ་ཡིན་ནོ། །འོ་ན་ཡང་ཞེས་པ་ལ་སོགས་པ་སྟེ། འདི་ལ་བསམ་པ་ནི་འཆད་པར་འགྱུར་བའོ། །ཡང་ཅི་ལྟར་དེ་ཁྱད་པར་གྱི་དོན་
[188b.6]ཉིད་དུ་བརྟག་པར་བྱ་ཞེ་ན་གསུངས་པ། ངག་ནི་ཆོས་མཐུན་པ་ཐམས་ཅད་ཀྱི་གཏན་ཚིགས་མ་ཡིན་ཞེས་པ་སྟེ། དཔེར་ན་གཞལ་བྱ་ཉིད་ལ་སོགས་པའི་ལྟ་བུའོ། །གང་འདོད་དེ་ནི་ཁྱད་པར་གྱིས། །ཞེས་པ། དཔེར་བརྗོད་དང་ཆོས་མཐུན་པ་ཉིད་མ་འཁྲུལ་པའི་ཚིག་གཏན་ཚིགས་སོ་ཞེས་
[188b.7]པར་རོ། །ཚིག་གི་ཁྱད་པར་གྱིས་དོན་ཅི་ཞིག་ཡིན་ཞེས་པ། ཅུང་ཟད་ཀྱང་མེད་པ་ཁོ་ནའོ། །ཁྱད་པར་བརྒྱ་ཕྲག་ལྡན་ཡང་ཚིག་ནི་བསྒྲུབ་པར་བྱ་བའི་དོན་ལ་མི་འཁྲུལ་བར་འགྱུར་བ་མ་ཡིན་པས་སོ། །འོ་ན་ཡང་ཞེས་པ་ལ་སོགས་པས་བསམ་པ་གང་གིས། འོ་ན་ཡང་དེ་ཁང་པར་བྱེད་
[189a]
[189a.1]པའི་དོན་དུ་འགྱུར་ཏེ་ཞེས་བཤད་པ་དེ་གསལ་བར་བྱེད་དོ། །དཔེར་ན་དམ་བཅའ་དང་གཏན་ཚིགས་དག་འགལ་བ་ཞེས་པ་སྟེ། འདིར་ནི་ཚིག་དག་འགལ་བ་སྲིད་པ་མ་ཡིན་ནོ་ཞེས་པས་དོན་དག་ཁོ་ན་རྣམ་པར་ཤེས་པར་བྱའོ། །དགོས་པ་མེད་པ་འདོད་མ་
[189a.2]ཡིན། །ཞེས་པ། དགོས་པ་ལས་ཉེ་བར་བཏགས་པའི་སྒྲས་བརྗོད་པ་ལ་བརྟེན་པར་བྱ་སྟེ། དཔེར་ན་བྲམ་ཟེའི་ཁྱེའུ་ལ་སེང་གེ་ཞེས་པ་བཞིན་ཏེ། དཔའ་བ་ཉིད་ཕུལ་དུ་བྱུང་བ་གོ་བའི་ཆེད་དུ་སེང་གེའི་སྒྲས་བརྗོད་པའོ། །འདིར་ཡང་བསྒྲུབ་བྱ་དང་སྒྲུབ་བྱེད་ཀྱི་སྒྲའི་གཙོ་བོའི་དོན་ནི་ཆོས་
[189a.3]མཐུན་པ་ཉིད་ཁོ་ནའོ་ཞེས་པས་དེ་ཁོ་ན་ལ་ཁྱད་པར་བྱའི། དོན་ནི་སྒྲའི་ཁྱད་པར་གྱིས་མ་ཡིན་ནོ། །དེ་ལྟར་ཁྱད་པར་བྱའོ་ཞེས་པ། དཔེ་བརྗོད་དང་ཆོས་མཐུན་པ་ནི་སྒྲུབ་བྱེད་མ་ཡིན་པ་ཡང་ཡོད་དོ། །དེའི་ཇི་ལྟར་དེ་ལས་ཁྱད་པར་དུ་འགྱུར་བ་དེ་ལྟར་ཁྱད་པར་དུ་གྱིས་ཤིག །འོ་ན་ཞེས་
[189a.4]པ་སྒྲུབ་བྱེད་མ་ཡིན་པ་རྣམ་པར་གཅོད་པ་ནི་སྒྲུབ་བྱེད་ཀྱི་སྒྲས་བྱེད་དེ། དེས་ན་ཅི་ལྟར་སྒྲུབ་བྱེད་མ་ཡིན་པ་ལས་ཁྱད་པར་དུ་བྱས་པ་མ་ཡིན་པར་འགྱུར་ཞེས་སེམས་པའོ། །འདི་ཁྱད་པར་དུ་བྱས་པ་མ་ཡིན་ཏེ། རྣམ་གྲངས་ཙམ་ཉིད་ཀྱི་ཕྱིར་རོ། །ཡན་ལག་ཐམས་ཅད་རྣམས་ཁོ་ན་བསྒྲུབ་
[189a.5]བྱ་རྟོགས་པའི་ཆེད་དུ་འཇུག་པ་ཉིད་ཀྱི་ཕྱིར། བསྒྲུབ་པར་བྱ་བ་སྒྲུབ་པར་བྱེད་པའོ་ཞེས་པས་འདི་རྣམ་གྲངས་ཏེ། དེ་ཁོ་ན་ནི་དེ་རྣམས་ཀྱི་བསྒྲུབ་བྱ་སྒྲུབ་པར་བྱེད་པའི་དངོས་པོར་སོ་སོ་ལ་ཇི་ལྟར་རིགས་པ་དེ་ལྟར་ཁྱད་པར་བརྗོད་པར་བྱའོ། །དེ་ཁོ་ན་ནི་ཡན་ལག་ཐམས་ཅད་ཀྱི་ཐུན་མོང་བའི་ངོ་བོ་
[189a.6]མ་ཡིན་ནོ། །དེ་སྒྲུབ་པས་ནི་ཁྱད་པར་རྟོགས་པའི་ཆེད་དུ་ནུས་པ་ཡང་མ་ཡིན་ཏེ། ཡོངས་སུ་མི་ཤེས་པ་ཉིད་ཀྱི་ཕྱིར་ཡང་དེ་ཁྱད་པར་ཉིད་དུ་མི་འཐད་དོ། །ཅི་ལྟར་ན་ཡན་ལག་ཐམས་ཅད་ལ་བསྒྲུབ་བྱ་སྒྲུབ་བྱེད་ཀྱི་སྒྲ་རྣམ་གྲངས་པར་རིགས། སྤྱི་དང་ཁྱད་པར་གྱི་སྒྲ་དག་རྣམ་གྲངས་པ་ཉིད་ནི་མ་
[189a.7]ཡིན་ཏེ། ཤིང་དང་ཤིང་ཤ་པའི་སྒྲ་བཞིན་ནོ་ཞེ་ན། རྣམ་པར་གཅོད་པར་མི་བྱེད་པ་པོ་ཉིད་ཀྱི་ཕྱིར་ན། རྣམ་གྲངས་དང་མཚུངས་པ་ཉིད་ཀྱི་ཕྱིར་རྣམ་གྲངས་ཀྱི་སྒྲས་བརྗོད་དོ་ཞེས་པས་སྐྱོན་མེད་དོ། །དེ་ལྟ་ན་འོ་ན་ཞེས་པ། རྣམ་གྲངས་པ་ཉིད་ཡོངས་སུ་སྤོང་བར་བྱེད་དོ། །སྒྲུབ་བྱེད་མ་ཡིན་
[189b]
[189b.1]པའི་ཆོས་མཐུན་པ་ཉིད་དང་ཆོས་མ་མཐུན་པ་ཉིད་ལས་བཟློག་པས་བསྒྲུབ་བྱ་སྒྲུབ་པར་བྱེད་པ་སྨོས་པ་འདི་བྱས་སོ། །དོན་གྱི་སྐབས་ཀྱི་དབང་ལས་སྤྱིའི་སྒྲ་རྣམས་ཀྱང་ཁྱད་པར་གྱི་རྣམ་པར་གཅོད་པའི་རྒྱུ་རྣམས་སུ་མཐོང་སྟེ། དཔེར་ན་གླང་པོ་རྣམས་གོ་བསྐོན་པར་བྱ་བ་ཉིད་ལ་སྒྲུབ་པར་བྱེད་པའོ་
[189b.2]ཞེས་པ་ལྟ་བུ་སྟེ། གླང་པོ་ཆེ་རྣམས་ཁོ་ན་སྒྲུབ་པར་བྱེད་པའི་ནུས་པ་དང་བྲལ་བ་རྣམ་པར་གཅོད་པར་བྱེད་ཀྱི་ཤིང་རྟ་ལ་སོགས་པ་རྣམས་ནི་མ་ཡིན་པ་དེ་བཞིན་དུ་འདིར་ཡང་ངོ་། །དཔེར་བརྗོད་དང་ཆོས་མཐུན་པའམ་མི་མཐུན་པ་ཉིད་བསྒྲུབ་བྱ་སྒྲུབ་པར་བྱེད་པ་གཏན་ཚིགས་སོ་ཞེས་བརྗོད་པ་ན་
[189b.3]ཆོས་མཐུན་པ་ཉིད་དང་མི་མཐུན་པ་ཉིད་ཁོ་ན་སྒྲུབ་བྱེད་ཡིན་པ་སེལ་ཏེ། དེའི་ཕྱིར་འདི་ཁྱད་པར་དུ་འགྱུར་རོ། །ཆོས་མི་མཐུན་པ་ཉིད་སྨོས་པ་ནི། དེ་བཞིན་དུ་ཆོས་མི་མཐུན་པ་ལས་ཞེས་གཏན་ཚིགས་ཀྱི་མཚན་ཉིད་ཉེ་བར་སྟོན་པ་ལས་སོ། །ཡང་སྒྲུབ་བྱེད་མ་ཡིན་པ་ཅི་ཡིན་ཞེས་པ། སྒྲུབ་
[189b.4]པར་བྱེད་པ་ངེས་པར་མི་ཤེས་པའི་ཕྱིར། སྒྲུབ་བྱེད་མ་ཡིན་པ་ཡང་དེ་ལས་བཟློག་པར་ཤེས་པར་མི་ནུས་ཞེས་པའི་དྲི་བའོ། །གཏན་ཚིགས་ལྟར་སྣང་བ་ཉིད་དུ་ངེས་པར་བསྟན་པ་ལས་སྒྲུབ་བྱེད་མ་ཡིན་པ་ཉིད་དུ་རྟོགས་པ་ཁོ་ནའོ་ཞེས་སེམས་སོ། །གང་གི་ཕྱིར་སྤྱིར་བཏང་ནི་ཞེས་པ་སྟེ། སྤྱིར་
[189b.5]བསྒྲུབ་པ་ནི་སྤྱིར་བཏང་ངོ་། །དེ་འཐོབ་པ་སེལ་བ་ནི་དམིགས་བསལ་ལོ། །དེ་ལ་དཔེ་བརྗོད་དང་ཆོས་མཐུན་པ་གཏན་ཚིགས་སོ་ཞེས་པ་ནི་སྤྱིར་བསྒྲུབ་པའི་ཕྱིར་སྤྱིར་བཏང་ངོ་། །གཏན་ཚིགས་ལྟར་སྣང་བའི་མཚན་ཉིད་ནི་དམིགས་བསལ་ལོ། །སྤྱིར་བཏང་ནི། དམིགས་ཀྱིས་བསལ་ལ་
[189b.6]ཡོད་སྲིད་མིན། །ཡང་སྤྱིའི་འཇུག་པའི་སྤྱིར་བཏང་བ་ནི་ཁྱད་པར་ཐམས་ཅད་ལ་འཇུག་པས་ན་ཅི་ལྟར་དམིགས་ཀྱིས་བསལ་བའི་ཡུལ་ཡོངས་སུ་སྤོང་ཞེ་ན་གསུངས་པ། སྔར་དམིགས་ཀྱིས་བསལ་བ་ཞེས་པ་ལ་སོགས་པས་ཏེ། སྤྱི་ལ་སྤྱིར་བཏང་བ་སྟེ། དེ་ཡང་སྤྱིའི་ནང་དུ་འདུས་པའི་ཁྱད་
[189b.7]པར་རམ་ཡོངས་སུ་བོར་བའི་ཁྱད་པར་ཡིན། གང་གི་ཚེ་རྟོག་པ་སྔ་མ་ཡིན་པ། དེའི་ཚེ་ཡུལ་རྣམ་པར་དབྱེ་བ་མི་ཤེས་པ་ཉིད་ཀྱི་ཕྱིར། དམིགས་ཀྱིས་བསལ་བའི་འཇུག་པ་རེ་ཞིག་བལྟ་བར་བྱའོ། །ཕྱིས་དེ་ལས་གཞན་པའི་ཡུལ་ལ་རང་ཉིད་གནས་སོ། །འདིའི་དབང་དུ་བྱས་ནས་གསུངས་
[190a]
[190a.1]པ། སྔར་དམིགས་ཀྱིས་བསལ་བ་ཞེས་པ་ལ་སོགས་པའོ། །གང་གི་ཚེ་གཉིས་པ་ཡིན་པ་དེའི་ཚེ་དམིགས་ཀྱིས་བསལ་བའི་ཡུལ་སྤངས་པ་ཉིད་ཀྱི་ཕྱིར་རང་གི་ཡུལ་ལ་སྔར་སྤྱིར་བཏང་འཇུག་གོ། །དེའི་དབང་དུ་བྱས་ནས་གསུངས་པ། དམིགས་བསལ་གྱི་
[190a.2]ཡུལ་བརྟགས་ནས་ཞེས་པ་ལ་སོགས་པའོ། །ད་ནི་ཁྱད་པར་གཉིས་ཁས་བླངས་ནས་ཀྱང་ཐལ་བར་འགྱུར་བ་སྟོན་པ་གསུངས་པ། གཏན་ཚིགས་འགྱུར་ཞེས་པ་ལ་སོགས་པ། རིགས་པ་ཅན་པས་བརྗོད་པའི་གཏན་ཚིགས་ལྟར་སྣང་བས་སྟོང་པ་ཡང་མཚུངས་པའི་ཆོས་ཉིད་དེ།
[190a.3]དཔེར་བརྗོད་དང་ཆོས་མཐུན་པ་ཉིད་དང་གཞན་གྱི་ཆོས་ཉིད་དེ། ཆོས་མི་མཐུན་པ་ཉིད་གཏན་ཚིགས་སུ་འགྱུར་རོ། །དཔེ་བརྗོད་ཀྱིས་སྟོན་ཏེ། སྒྲ་རྟག་སྟེ་མཉན་པར་བྱ་བ་ཉིད་ཀྱི་ཕྱིར་ཞེས་པ་ལ་སོགས་པའོ། །མཉན་པར་བྱ་བ་ཉིད་ནི་མི་མཐུན་པའི་ཟླ་བོའི་གཏན་ཚིགས་གཞན་དང་
[190a.4]བཅས་པ། རིགས་པ་ཅན་པས་བརྗོད་པའི་གཏན་ཚིགས་ལྟར་སྣང་བ་གང་གིའང་ནང་དུ་འདུ་བ་མ་ཡིན་ནོ། །གཏན་ཚིགས་ལྟར་སྣང་བ་མ་ཡིན་པ་ནི་མ་ཡིན་ཏེ། ཐེ་ཚོམ་གྱི་རྒྱུད་ཉིད་ཀྱི་ཕྱིར་རོ། །དཔེ་སྒྲ་ཉིད་དང་ཡང་མཚུངས་པའི་ཆོས་ཡིན་པ་ཉིད་དེ། དེས་ན་གཏན་ཚིགས་
[190a.5]སུ་འགྱུར་རོ། །གཞན་གྱི་ཆོས་ཉིད་ཡང་ན་སྟེ། འདི་ཁོ་ན་ལ་བུམ་པ་ལ་སོགས་པ་ཆོས་མི་མཐུན་པས་སོ། །རྩོལ་མ་ཐག་ཏུ་བྱུང་བ་ཉིད་ནི། གཞན་གྱི་ཆོས་ཉིད་ཁོ་ན་སྟེ། གློག་ལ་སོགས་པ་ཆོས་མི་མཐུན་པ་ཉིད་ཀྱིས་ཏེ། སྒྲ་རྟག་སྟེ་རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར། མི་རྟག་པ་
[190a.6]གློག་ལ་སོགས་པ་ནི་རྩོལ་མ་ཐག་ཏུ་བྱུང་བ་མ་ཡིན་པའོ་ཞེས་པའོ། །འདི་ཡང་དེ་བཞིན་དུ་ཆོས་མི་མཐུན་པ་ཉིད་ལས་ཞེས་པ་མཚན་ཉིད་གཉིས་པ་ལ་ལྟོས་ནས་བཤད་པའོ། །འདིར་འགྱུར་མོད། འདི་ཡང་ཇི་སྐད་བཤད་པའི་གཏན་ཚིགས་ལྟར་སྣང་བའི་ནང་དུ་འདུ་བ་ཁོ་ནའོ་ཞེ་ན།
[190a.7]དེའི་ཕྱིར་གསུངས་པ། འདི་ནི་ཞེས་པ་ལ་སོགས་པ་སྟེ། འཁྲུལ་པ་དང་བཅས་པ་དང་འགལ་བ་དང་སྐབས་དང་མཚུངས་པ་དང་། བསྒྲུབ་བྱ་དང་མཚུངས་པ་དང་དུས་ལས་འདས་པ་རྣམས་ནི་གཏན་ཚིགས་ལྟར་སྣང་བའོ་ཞེས་ཡོངས་སུ་བགྲངས་པའི་ཕྱིར། འདི་ནི་ཇི་སྐད་བཤད་
[190b]
[190b.1]པའི་གཏན་ཚིགས་ལྟར་སྣང་པའི་ནང་དུ་འདུ་བ་མ་ཡིན་ནོ། །འགལ་བ་ཡང་དེར་རྣམ་པ་གཞན་ཁོ་ནར་བརྗོད་དེ། གྲུབ་མཐའ་དང་ཁས་བླངས་དང་འགལ་བ་ནི་འགལ་བའོ་ཞེས་སོ། །དེའི་ཕྱིར་འདི་ནི་ཁྱད་པར་མད་པ་སྟེ། མི་འདོད་པ་ཐམས་ཅད་ལས་རྣམ་པར་མི་གཅོད་པའི་ཕྱིར་རོ། །
[190b.2]གཞན་རྣམས་ནི་ཞེས་པ་ལ་སོགས་པ་ཡན་ལག་སྟོན་པ་ཐམས་ཅད་ནི་བསྒྲུབ་བྱ་སྒྲུབ་པར་བྱེད་པ་སྟེ། དེའི་ཕྱིར་བསྒྲུབ་བྱ་སྒྲུབ་པར་བྱེད་པ་གཏན་ཚིགས་སོ་ཞེས་བརྗོད་པ་ན། འདིར་གཏན་ཚིགས་ཡིན་ཞེས་མི་ཤེས་པ་དེའི་ཕྱིར། སེམས་ཁྱད་པར་དུ་བྱེད་དེ། ཆོས་མཐུན་ཉིད་སྟོན་པས་སོ། །
[190b.3]དེ་ནི་མདོའི་སྔ་མའི་ཆ་ཉིད་ཀྱི་ཕྱིར། སྔ་མ་སྟེ་དེ་ཁྱད་པར་དང་། བསྒྲུབ་བྱ་སྒྲུབ་པར་བྱེད་པ་ཁྱད་པར་ཅན་ཞེས་པའོ། །འདི་བརྗོད་པར་འགྱུར་ཞེས་པས། ཁྱད་པར་དང་ཁྱད་པར་དུ་བྱ་བའི་དངོས་པོ་འདོད་པ་དེ་སྟོན་ཏོ། །དཔེར་བརྗོད་དང་ཆོས་མཐུན་པ་ལས་གང་སྟོན་པ་ཡིན་པའི་བསྒྲུབ་བྱ་
[190b.4]སྒྲུབ་པར་བྱེད་པ་དེ་ནི་གཏན་ཚིགས་སོ། །གང་ཞིག་བསྒྲུབ་བྱ་དང་ཆོས་མཐུན་པ་ཉིད་ལས་བསྒྲུབ་བྱ་སྒྲུབ་པར་བྱེད་པ་ངེས་པར་སྟོན་པ་དེ་དཔེའོ། །གང་དཔེར་བརྗོད་ལ་ལྟོས་པར་བྱ་བ་དེ་ལྟ་བུའམ་དེ་ལྟ་བུ་མ་ཡིན་ནོ་ཞེས་པ་མཇུག་སྡུད་དོ། །བསྒྲུབ་བྱ་ལ་ཉེ་བར་གཏོད་པ་ཞེས་པ་ལ་སོགས་
[190b.5]པ་ཐམས་ཅད་བརྗོད་པར་བྱའོ། །དེ་རྣམས་ཀྱི་ཡང་དྲུག་པར་རིགས་པའི་ངོ་བོ་ཞེས་པ། ལྔ་པས་སྟོན་པ་སྐབས་སུ་བྱས་པ་ཉིད་ལ་ནི་གཞན་མི་སྲིད་དོ་ཞེས་བཤད་ཟིན་ཏོ། །གཏན་ཚིགས་ལྟར་སྣང་བ་ལས་ལྡོག་པ་ལ་ཡང་ཞེས་པ། དེར་སྣང་མ་གཏོགས་མཚུངས་པ་དང་། །གཞན་གྱི་
[190b.6]ཆོས་ཉིད་གཏན་ཚིགས་འགྱུར། །ཞེས་གང་བཤད་པའི་སྐྱོན་དེ་ཕྱོགས་འདི་ལ་ཡང་གཡོ་བ་མེད་པ་ཁོ་ནའོ་ཞེས་སྟོན་ཏོ། །དེ་ལྡན་པའི་ཆོས་ཀྱི་གཏན་ཚིགས་སོ་ཞེས་པ་དེ་འདི་ལ་ཡོད་དོ་ཞེས་པ་དེ་དང་ལྡན་པའོ། །དེ་དང་ལྡན་པའི་ཆོས་ནི་དེ་ལྡན་ཆོས་སོ། །འབྲེལ་པ་ཅན་ཉིད་ཙམ་གྱི་
[190b.7]གཏན་ཚིགས་ཉིད་ལ་ཐལ་བར་འགྱུར་ན་དེ་གཅད་པའི་ཆེད་དུ་གསུངས་པ། བརྗོད་པ་ཞེས་འཇུག་གོ་ཞེས་པ། བསྒྲུབ་བྱ་བརྗོད་པ་དམ་བཅའོ་ཞེས་པའི་དཀྱུས་མའོ། །དེས་ན་ངག་གི་དོན་འདི་ཡིན་ཏེ། དེ་ལྡན་པའི་ཆོས་བརྗོད་པ་གཏན་ཚིགས་སོ་ཞེས་པའོ། །གལ་ཏེ་བསྒྲུབ་བྱ་
[191a]
[191a.1]བརྗོད་པ་འབྲེལ་པར་བྱེད་ན་ཞེས་པ་དེ་གཙོ་བོ་ཉིད་ཀྱི་ཕྱིར་རོ། །དེས་ཀྱང་བསྒྲུབ་བྱ་ཁོ་ན་དེ་དང་ལྡན་པས་ཞེས་པ། འབྲེལ་པ་ཅན་གྱི་སྒྲ་ཉིད་ཀྱི་ཕྱིར། བརྗོད་པའི་བརྗོད་པར་བྱ་བ་ཁོ་ན་དེས་དེ་དང་ལྡན་པར་འགྱུར་ཏེ། དེ་ལྟར་ནི་བུ་དང་ལྡན་པ་ཞེས་བརྗོད་པ་ན་ཕ་ཁོ་ན་
[191a.2]དེ་དང་ལྡན་པར་འགྱུར་རོ། །ནམ་མཁའ་ཡང་དེས་དེ་དང་ལྡན་པར་འགྱུར་བ་མ་ཡིན་ནམ། དེ་ནི་དེ་དང་འཕྲོད་པ་འདུ་བ་ཅན་ཉིད་ཀྱི་ཕྱིར་རོ་ཞེ་ན། བདེན་ཏེ་དེ་ལྟ་ན་ཡང་བསྟན་བཅོས་ཀྱིས་ནམ་མཁའི་ཆོས་འབྲས་བུ་ཉིད་ལ་སོགས་པ་རྣམས་ཀྱང་ཚིག་གི་རྒྱུ་ཉིད་དུ་ཉེ་བར་བླངས་པའི་ཕྱིར་
[191a.3]ནམ་མཁའི་ཡང་བསྒྲུབ་པ་བྱས་པ་ཁོ་ནའོ་ཞེས་སེམས་སོ། །ཚོགས་པ་ལ་ཆོས་གཞན་ནི་ཡོད་པ་མ་ཡིན་ནོ་ཞེས་པ། ཚོགས་པའི་ནི་བསྡུས་པ་ཙམ་ཡིན་ཞིང་། བློས་ཀུན་རྟོགས་པ་ཁོ་ན་སྟེ། །ཁང་བཟངས་ཀྱི་ཕྲེང་བ་བཞིན་ནོ། །དེ་ཚོགས་པ་ཅན་ལས་ཐ་དད་པར་མེད་པའི་ཕྱིར་རོ། །ཅིའི་
[191a.4]ཕྱིར་བྱས་པ་ཉིད་ལ་སོགས་པ་ཆོས་ཡིན་ཞེ་ན། ཚོགས་པ་ཅན་ཁོ་ནའི་ཆོས་གང་ཡིན་པ་དེ་ནི་དེའི་ཕྱོགས་གཅིག་ཡིན་པ་ཉིད་ཀྱི་ཕྱིར་དེའི་ཞེས་ཐ་སྙད་དུ་བྱ་བར་ནུས་ཏེ། དཔེར་ན་ཁང་པའི་མཛོད་མིག་ལྟ་བུའོ། །དེའི་ཕྱིར་ཚོགས་པ་ཅན་ཁོ་ན་གཏན་ཚིགས་སུ་འཐོབ་ཅིང་། དེ་ཡང་དམ་
[191a.5]བཅའ་བའི་དོན་གྱི་ཕྱོགས་གཅིག་ཉིད་ཀྱི་ཕྱིར་མ་གྲུབ་བོ། །འོ་ན་ཚོགས་པ་ནི་ཆོས་གཞན་མེད་ཅིང་། དེའི་ཕྱོགས་གཅིག་པ་ཆོས་ཅན་སྒྲ་ལ་སོགས་པའི་ནི་བྱས་པ་ཉིད་ལ་སོགས་པ་ཆོས་སྲིད་དེ། དེ་ལས་ཀྱང་དེ་ཁོ་ན་བརྗོད་པའི་གཏན་ཚིགས་སུ་འགྱུར་རོ་ཞེ་ན་གསུངས་པ། རྭ་ཅན་
[191a.6]ཡིན་པ་དེའི་ཕྱིར་རྟའོ་ཞེས་པ་ལ་སོགས་པ་སྟེ། གང་སྣང་དུ་རུང་བའི་རྭ་ཅན་གྱི་གོང་བུ་འདི་རྟ་ཡིན་ཏེ། རྭ་ཅན་ཉིད་ཀྱི་ཕྱིར་ཞེས་འདིར་བསྒྲུབ་བྱའི་ཆོས་རྟ་ཉིད་ཀྱིས་ཁྱད་པར་དུ་བྱས་པའི་གོང་བུ་ཆོས་ཅན་གྱི་ཆོས་རྭ་ཅན་ཉིད་ཡིན་ནོ་ཞེས་པ། རང་གི་བསྟན་བཅོས་སུ་བརྗོད་པའི་གཏན་ཚིགས་ལྟར་
[191a.7]སྣང་བ་ནི་གཏན་ཚིགས་སུ་འགྱུར་རོ། །དེ་ལ་ལ་བྱས་པ་ཉིད་ལ་སོགས་པ་སྲིད་པ་མ་ཡིན་ནོ་ཞེས་པ། ཆོས་རྣམས་ནི་ཆོས་ཅན་གྱི་གཞན་གྱི་དབང་ཉིད་ཀྱི་ཕྱིར། མི་རྟག་པ་ཉིད་ལ་སོགས་པའི་ཆོས་ལ་བྱས་པ་ཉིད་ལ་སོགས་པའི་ཆོས་རྣམས་འཆད་པ་མ་ཡིན་ནོ། །དེ་ནི་གྲུབ་པ་ཉིད་ཀྱི་ཕྱིར་
[191b]
[191b.1]རོ་ཞེས་པ། གྲུབ་པ་ནི་བསྒྲུབ་བྱ་ཉིད་དུ་མི་འཐད་པའི་ཕྱིར་རོ། །མཚན་ཉིད་ཡུལ་མེད་པ་ཉིད་དུ་འགྱུར་རོ། །ཆོས་ལ་ཡང་སྐྱོན་འདི་མཚུངས་སོ་ཞེས་པས་དེ་ལ་ཡང་བརྗོད་པར་བྱའོ། །མི་རྟག་པ་ཉིད་དུ་བསྒྲུབ་པར་བྱའོ་ཞེ་ན་ཞེས་པ། མི་རྟག་པ་ཉིད་ཀྱིས་ཁྱད་པར་དུ་བྱས་པ་བསྒྲུབ་བྱ་ཉིད་ཀྱི་
[191b.2]ཕྱིར་རོ། །རྣམ་པར་གཅོད་པའི་འབྲས་བུ་ཅན་ཉིད་ཀྱི་ཕྱིར་རོ་ཞེས་པ། སྒྲའི་སྒྲ་ནི་གནས་སྐབས་ཐམས་ཅད་ཀྱི་སྒྲ་ཡོངས་སུ་བཟུང་ནས་འཇུག་ཅིང་། དེ་བཞིན་དུ་མི་རྟག་པའི་སྒྲ་ནི་སྒྲ་ལ་སོགས་པ་མི་རྟག་པའི་དངོས་པོ་ཐམས་ཅད་ཉེ་བར་བཟུང་ནས་སོ། །དེ་དག་ཕན་ཚུན་དུ་རྣམ་པར་
[191b.3]གཅོད་དེ། མི་རྟག་པའི་སྒྲས་སྒྲའི་གནས་སྐབས་གཞན་རྣམ་པར་གཅོད་པའི་ཕྱིར་དང་། སྒྲའི་སྒྲས་ཀྱང་མི་རྟག་པ་ཉིད་ཀྱི་རྟེན་གཞན་རྣམ་པར་གཅོད་པའི་ཕྱིར་རོ། །དེའི་ཕྱིར་ཡང་ཕན་ཚུན་རྣམ་པར་གཅོད་པས་བསྲེས་པར་གྱུར་པའི་ཕྱིར་ཚོགས་པ་ཁོ་ན་བསྒྲུབ་པར་བྱ་བ་ཉིད་དུ་འགྱུར་
[191b.4]རོ། །ཡོན་ཏན་དུ་གྱུར་པ་ཡང་ཞེས་པ་བརྗོད་པའི་ཁྱད་པར་ཉིད་ཡིན་པའི་ཕྱིར་བསྒྲུབ་པར་བྱ་བ་ནི་ཡོན་ཏན་དུ་གྱུར་པའོ། །དེ་ལྟ་ན་ཡང་བརྗོད་པར་འདོད་པའི་དབང་ལས་ནུས་པ་ཡོད་ན་སྒྲ་རྣམས་བརྗོད་པར་འདོད་པ་རྗེས་སུ་སྒྲུབ་པར་བྱེད་ཅེས་པས། དེའི་སྒྲས་བསྒྲུབ་པར་བྱ་བ་ཁོ་ན་ལ་སྙེགས་པར་
[191b.5]བྱེད་དོ། །ཚོགས་པའམ་ཆོས་ཅན་གྱིས་གཞན་དེ་དང་ལྡན་པ་མེད་དོ་ཞེས་པ་ཆོས་ཅན་དང་ཚོགས་པ་དག་རང་དབང་ཅན་ཉིད་ཀྱི་ཕྱིར་རོ། །འོ་ན་ཚོགས་པ་ཅན་ལས་དེ་དང་ལྡན་པ་མེད་པ་མ་ཡིན་ནམ། དེས་ན་འདི་ལྟ་བུ་ཅི་ཡིན་ཞེ་ན། འདི་འདི་ལྟར་མ་ཡིན་ཏེ། འདིར་ཆོས་ནི་ཚོགས་པས་དེ་དང་ལྡན་
[191b.6]པར་འགྱུར་རམ། ཡང་ན་ཆོས་ཅན་ཡིན། གལ་ཏེ་ཆོས་མི་རྟག་པ་ཉིད་ལ་སོགས་པ་ཡིན་ན། གང་བརྗོད་པ་གཏན་ཚིགས་སུ་འགྱུར་བ་དེའི་ཆོས་མེད་པ་ཁོ་ནའོ། །ཅི་སྟེ་ཆོས་ཅན་ཡིན་ན། དེ་ལ་ཆོས་ཅན་ཙམ་བསྒྲུབ་བྱ་ཡིན་པ་ལ་གང་སྐྱོན་ཡིན་པ་དེ་འཐོབ་པ་ཁོ་ནའོ། །དེའི་ཕྱིར་ཚོགས་
[191b.7]པའམ་ཆོས་ཅན་གྱིས་གཞན་དེ་དང་ལྡན་པ་མེད་དོ་ཞེས་པ་འདི་ལ་ཇི་སྐད་བཤད་པའི་སྐྱོན་མི་འཇུག་སྟེ། དེ་མེད་དོ་ཞེས་དགོངས་པའོ་ཞེས་པས་སྐྱོན་མེད་དོ། །ཁྱད་པར་བསྒྲུབ་བྱ་དང་ལྡན་ཆོས། །འཐོབ་སྟེ་ཞེས་པ་སྟེ། བསྒྲུབ་བྱ་དང་ལྡན་པ་ཁོ་ནའི་ཞེས་ངེས་པ་གཟུང་བ་ལས་ཞེས་པའི་
[192a]
[192a.1]དགོངས་པ་གསལ་བར་བྱེད་དོ། །རྒྱུ་ཅིའི་ཕྱིར་ན་འདི་ལྟར་ངེས་པར་གཟུང་ཞེས་གསུངས་པ། མ་ཡིན་ཞེས་པ་ལ་སོགས་པའོ། །ཆོས་ཅན་ལ་ཐལ་བར་མི་འགྱུར་བའི་ཕྱིར་རོ་ཞེས་པ། བསྒྲུབ་བྱ་དང་ལྡན་པའི་ཆོས་ཅན་ལ་ཆོས་ཅན་སྲིད་པ་ནི་མ་ཡིན་ཏེ། དེ་ནི་རང་དབང་ཅན་ཉིད་
[192a.2]ཀྱི་ཕྱིར་རོ། །ཉེ་བ་ཉིད་ཀྱི་ཕྱིར་ཏེ། གཞན་དང་འཕྲོད་པ་འདུས་པ་མ་ཡིན་པ་ཉིད་ཀྱི་ཕྱིར་དེ་ཉེ་བ་ཉིད་དོ། །མཉན་པར་བྱ་བ་ཉིད་ཀྱི་ཕྱིར་རོ་ཞེས་པ་ཡང་གཏན་ཚིགས་སུ་འགྱུར་རོ་ཞེས་པའི། ཡང་གི་སྒྲ་ནི་ངེས་པར་གཟུང་བའི་དོན་ཅན་ནམ། སྨད་པའི་དོན་ཅན་ནོ། །འོ་ན་ཕྱོགས་ཆོས་མེད་
[192a.3]པ་བཟློག་པའི་དོན་དུ་དེའི་ཆོས་ཀྱི་ཚིག་མ་ཡིན་ནམ། དེ་ལྟར་ཡང་དེ་དང་ལྡན་པ་ཁོ་ནའི་ཞེས་ངེས་པར་གཟུང་བ་མེད་པའི་ཕྱིར་ཐུན་མོང་མ་ཡིན་པ་གཏན་ཚིགས་སུ་ཐལ་བར་འགྱུར་བ་མེད་དོ་ཞེ་ན། འདི་ལྟར་སེམས་ཏེ། ཕྱོགས་ཆོས་མེད་པའི་ཐལ་བར་འགྱུར་བ་མེད་པའི་ཕྱིར། དེ་བཟློག་
[192a.4]པའི་ཆེད་དུ་འབད་པ་དོན་མེད་པ་སྟེ། གང་གི་ཕྱིར་འབྲེལ་པ་མེད་པའི་དོན་གྱི་བདག་ཉིད་འདིའི་འདི་ནི་འབྲས་བུ་དང་རྒྱུ་ཞེས་པ་ལ་སོགས་པར་སྔར་ཁོ་ནར་གཏན་ཚིགས་ཉིད་བསལ་ཟིན་ཏོ་ཞེས་པའོ། །བསྒྲུབ་བྱའི་ཆོས་ལ་ཡང་ཞེས་པ་ལ་སོགས་པ་ནི། དེ་ལ་གདོན་མི་ཟ་བར་
[192a.5]འདི་ལྟར་ངེས་པར་གཟུང་བར་བྱ་སྟེ། བསྒྲུབ་པར་བྱ་བ་ཁོ་ནའི་ཆོས་ཞེས་པ་ལ་སོགས་པ་ཐམས་ཅད་བརྗོད་པར་བྱའོ། །མ་ཡིན་ཏེ་དེའི་ཞེས་པ་ལ་སོགས་པ། བསྒྲུབ་པར་བྱ་བའི་ཆོས་ནི་གཞན་ལ་རྣམ་པ་གཉིས་སུ་ཞུགས་ཞེས་ཁྱད་པར་དུ་བྱའོ། །དེ་ལ་གལ་ཏེ་བསྒྲུབ་པར་བྱ་བ་ཁོ་ནའི་ཆོས་
[192a.6]ཞེས་ངེས་པར་གཟུང་ན། ཁྱད་པར་འཐད་པ་མ་ཡིན་ནོ། །དེའི་ཕྱིར་བསྒྲུབ་པར་བྱ་བའི་ཆོས་ཁོ་ན་ཞེས་ངེས་པར་གཟུང་བར་བྱའོ་ཞེས་པའོ། །གལ་ཏེ་ཡང་ཐུན་མོང་མ་ཡིན་པ་ཡང་ཆོས་ཁོ་ན་ཡིན་པ་དེ་ལྟ་ནའང་དེ་གཏན་ཚིགས་ཉིད་དུ་ཐལ་བར་འགྱུར་བ་མ་ཡིན་ཏེ། གཞན་ལ་འཇུག་པ་མེད་
[192a.7]པའི་ཕྱིར་རོ། །གང་གསུངས་པ། ཐུན་མོང་མ་ཡིན་པ་ནི་ཞེས་པ་ལ་སོགས་པའོ། །སླར་ཡང་འདི་ཅིའི་དོན་དུ་ཉེ་བར་བཀོད་དེ། ཇི་ཙམ་གྱིས་ཕྱོགས་ཆོས་མེད་པ་བཟློག་པའི་དོན་ཁོ་ནས་དེར་བསྒྲུབ་བྱའི་ཆོས་བརྗོད་དེ། གང་སྨྲས་པ། ཕྱོགས་ཀྱི་ཆོས་ཁོ་ན་ཞེས་ངེས་པར་གཟུང་བའི་ཕྱིར་
[192b]
[192b.1]རོ་ཞེ་ན། འོ་ན་ཕྱོགས་ཆོས་ཁོ་ནའི་ཞེས་ལྷག་པར་གནས་པར་བྱས་ནས་བརྗོད་པའི་ཕྱིར་སྐྱོན་མེད་དོ། །མི་རྟག་པ་ཉིད་ཙམ་ཞེས་པ་ལ་སོགས་པ་སྟེ། གང་གི་རྟག་པ་ཉིད་ཙམ་བསྒྲུབ་བྱ་ཡིན་པ་དེའི་བུམ་པ་ལ་སོགས་པ་རྣམས་ཀྱང་དེ་དང་ལྡན་པའོ་ཞེས་པས་དེའི་ཆོས་མིག་གིས་གཟུང་བར་བྱ་བ་
[192b.2]ཉིད་ཀྱང་གཏན་ཚིགས་སུ་འགྱུར་རོ། །ཅི་སྟེ་རྟེན་ཐ་དད་པས་བྱས་པའི་ངོ་བོའི་དབྱེ་བ་ལ་བརྟེན་པས་བུམ་པ་ལ་སོགས་པ་ལ་སོན་པའི་མི་རྟག་པ་བསྒྲུབ་བྱ་མིན་པ་ཉིད་ཀྱི་ཕྱིར་ཐལ་བར་འགྱུར་བ་འདི་མེད་དོ་ཞེ་ན། དེ་ལྟར་གྱུར་ན་མཉན་པར་བྱ་བ་ཉིད་ཁོ་ན་གཏན་ཚིགས་སུ་འགྱུར་རོ། །
[192b.3]སྒྲ་མི་རྟག་པ་ཉིད་བསྒྲུབ་པར་བྱ་བ་ན་ཡང་ཚོགས་དོན་དུ་འགྱུར་རོ། །མ་ངེས་པ་ཞེས་པ་ལ་ངེས་པ་ནི་ངེས་པ་སྟེ། འདི་ལ་ངེས་པ་ཡོད་པ་མ་ཡིན་ནོ་ཞེས་པས་མ་ངེས་པའོ། །འདིའི་དོན་རྣམ་གྲངས་གཞན་གྱིས་གསལ་བར་བྱེད་དེ། ཐེ་ཚོམ་གྱི་གཏན་ཚིགས་ཞེས་པའོ། །ཐེ་ཚོམ་གྱི་
[192b.4]གཏན་ཚིགས་ཞེས་པ་ཅི་ཞེ་ན། འཁྲུལ་པ་ཅན་ནོ་ཞེས་པའོ། །དེ་ཙམ་ཞིག་ཀྱང་ཞེས་པའི་དེའི་སྒྲས་བསྒྲུབ་བྱ་བརྗོད་པ་ལ་བསྙེགས་པའམ། བསྒྲུབ་བྱ་ལ་བསྙེགས་སོ། །བསྒྲུབ་བྱ་ཡང་ཚོགས་པའམ་ཆོས་སམ་ཆོས་ཅན་དུ་འགྱུར། ངེས་པར་གཟུང་བ་ཡང་དེ་དང་ལྡན་པ་ཁོ་ནའི་ཆོས་
[192b.5]སམ། དེ་དང་ལྡན་པའི་ཆོས་ཁོ་ན་ཞེས་པ་འདི་ཙམ་རྣམས་བརྟག་པའོ། །དེའི་ཕྱིར་ཞེས་པ་ལ་སོགས་པ་སྟེ། མི་རྟག་པ་ཉིད་ལ་སོགས་པའི་ཆོས་དང་ལྡན་པ་བུམ་པ་ལ་སོགས་པས་ཆོས་མཐུན་པ་ཉིད་གང་བསྒྲུབ་པར་བྱ་བ་དེའི་མི་འཁྲུལ་བ་བརྗོད་པ་ནི་གཏན་ཚིགས་སོ་ཞེས་པའོ། །
[192b.6]བསྒྲུབ་པར་བྱ་བ་ཞེས་པ་དེ་ག་ལས་ཤེ་ན། སོ་སོ་ཉེ་བ་ལས་སོ། །དེ་ལྟར་གྱུར་ན་ཆོས་གཞན་སྤངས་པར་འགྱུར་རོ་ཞེས་པས་མིག་གིས་གཟུང་བྱ་ཉིད་དང་མཉན་པར་བྱ་བ་ཉིད་ཡོངས་སུ་སྤངས་པར་འགྱུར་རོ། །དེ་ནི་དེ་དང་ལྡན་པས་བསྒྲུབ་བྱའི་ཆོས་མཐུན་པ་ཉིད་མ་ཡིན་པས་སོ། །ངེས་པར་གཟུང་
[192b.7]བ་ལས་ཞེས་པ། དེ་དང་ལྡན་པ་ཁོ་ནས་ཆོས་མཐུན་པ་ཉིད་ཀྱི་ཞེས་ངེས་པར་གཟུང་བའི་ཕྱིར་རོ། །མཁའ་སོགས་ཡོད་པར་སྒྲུབ་པ་ལ། །ཞེས་པ་ལ་སོགས་པའི་སྒྲས་བདག་ལ་སོགས་པ་རྣམས་གཟུང་བར་བྱའོ། །དེ་ལ་ཞེས་པ་ནམ་མཁའ་ལ་སོགས་པ་སྒྲུབ་པ་ལའོ། །དམ་བཅའ་
[193a]
[193a.1]དང་ལྡན་པའམ་བསྒྲུབ་བྱ་དང་ལྡན་པ་ཞེས་པ་དེའི་སྒྲས་གལ་ཏེ་བརྗོད་པ་ལ་བསྙེགས་སམ། གལ་ཏེ་བསྒྲུབ་བྱ་ལ་ཡིན། རྣམ་པ་གཉིས་ཀ་ལྟར་ན་ཡང་སྦྱོར་བ་འཐད་པ་མ་ཡིན་ནོ། །རྣམ་པར་ལྡན་པ་དང་བསལ་ཏེ་འོངས་པའི་བྱེ་བྲག་ལས་ཞེས་པ་དེ་ལ་བཤད་པ།
[193a.2]གང་འདི་ཕྱིར་མཐོང་བ་ནི་རྗེས་སུ་དཔག་པ་སྟེ། ལྷག་མ་དང་ལྡན་པ་འདི་ནི་དབང་པོ་ལས་འདས་པའི་དངོས་པོ་རྣམས་རྟོགས་པར་བྱ་བ་ལ་གཏན་ཚིགས་སོ། །དེའི་སྦྱོར་བ་ཉེ་བར་སྤྱོད་པའི་བྱེ་བྲག་ལས་རྣམ་པ་གཉིས་ཉིད་དེ། རྣམ་པར་ལྡན་པ་དང་བས་བསལ་ཏེ་འོངས་པའོ་ཞེས་སོ། །
[193a.3]སྦྱོར་བ་ཉེ་བར་སྤྱོད་པའི་བྱེ་བྲག་ལས་ཏེ། སྦྱོར་བ་རྟོགས་པའི་བྱེ་བྲག་ལས་ཞེས་པའི་དོན་ཏོ། །གཞན་སྨྲ་བ། སྦྱོར་བ་ནི་ཕ་རོལ་པོས་རྟོགས་པར་བྱེད་པའི་དུས་ཏེ། འདིར་རབ་ཏུ་སྦྱར་བར་བྱ་བའོ་ཞེས་བྱས་ནས་སོ། །ཉེ་བར་སྤྱོད་པ་ནི་བརྗོད་པའོ། །དེའི་བྱེ་བྲག་ལས་རྣམ་པ་
[193a.4]གཉིས་སོ། །ཡང་དོན་གྱི་དབྱེ་བ་ཡོད་པ་མ་ཡིན་ཏེ། རེས་འགའ་རང་གི་ཕྱོགས་འགྲུབ་པའི་ཆེད་དུ་གཏན་ཚིགས་ཉེ་བར་ལེན་ཅིང་། རེས་འགའ་གཞན་གྱི་ཕྱོགས་དགག་པའི་ཆེད་དུའོ། །རྟོགས་པར་བྱ་བའི་དོན་ཁྱད་པར་དུ་རྟོགས་པ་ནི་རྣམ་པར་ལྡན་པ་སྟེ། གཞན་གྱི་ཕྱོགས་
[193a.5]བཀག་ནས་དོན་དེ་ཁོ་ན་འོངས་པ་ཞེས་པ་ནི་བསལ་ཏེ་འོངས་པའོ། །དེ་ལ་རྣམ་པར་ལྡན་པ་ནི་ངག་གི་རང་བཞིན་ཞེས་པ། ངག་གི་དངོས་པོ་ནི་ངག་གི་རང་བཞིན་ཏེ་ངག་གི་ངོ་བོའོ། །ལྔའི་ཕྱོགས་ཞེས་པ་ཡན་ལག་ལྔའོ། །དམ་བཅའ་ལ་སོགས་པའི་ཁྱད་པར་ལས་ཞེས་
[193a.6]པའི། སོགས་པའི་སྒྲ་ནི་གཏན་ཚིགས་དང་། དཔེ་བརྗོད་དང་ཉེ་བར་སྦྱོར་བ་དང་མཇུག་སྡུད་རྣམས་བསྡུ་བའི་དོན་དུའོ། །འདི་ཡང་ཞེས་པ་རྗེས་སུ་དཔག་པ་རྣམ་པ་གཉིས་སོ། །ཡང་གི་སྒྲ་ནི་བྱེ་བྲག་པ་རྣམས་ཀྱི་འབའ་ཞིག་ཏུ་མ་ཟད་ཅེས་གསལ་བར་བྱེད་པའི་ཆེད་དུའོ། །བྱེ་བྲག་
[193a.7]པ་དགག་པར་ནི། སྦྱོར་བ་གཞལ་བྱ་དང་མ་འབྲེལ་བར་བཤད་དེ། མཁའ་སོགས་ཡོད་ཉིད་སྒྲུབ་པ་ལ། །སྦྱོར་བ་འཐད་པ་མ་ཡིན་ནོ། །ཞེས་པ་འདིས་སོ། །དེ་བཞིན་དུ་འདིར་ཡང་གཞལ་བྱ་དང་མ་འབྲེལ་བ་ཉིད་ཁོ་ནའི་གཏན་ཚིགས་ཀྱིས་རྣམ་པར་ལྡན་པ་དང་བསལ་ཏེ་འོངས་
[193b]
[193b.1]པ་དག་གི་ཡན་ལག་རྣམས་ཐམས་ཅད་རྣམ་པར་དཔྱད་པར་བྱའི། གཏན་ཚིགས་ཁོ་ན་ནི་མ་ཡིན་ནོ། །ཅིའི་ཕྱིར་ཞེ་ན། དེ་རྣམས་རྣམ་པར་ལྡན་པ་དང་། བསལ་ཏེ་འོངས་པའི་ནང་དུ་འདུས་པ་ཉིད་ཀྱི་ཕྱིར་རོ། །ཡན་ལག་གི་སྦྱོར་བའི་བདག་ཉིད་ནི་རྣམ་པར་ལྡན་པ་དང་བསལ་ཏེ་འོངས་པ་
[193b.2]དག་གོ། །དེའི་ཕྱིར་ཡན་ལག་རྣམས་ཐམས་ཅད་དེའི་ནང་དུ་འདུས་སོ། །གཙོ་བོ་ཡོད་དེ་ཞེས་པ་དམ་བཅའོ། །འདིར་ཁྱད་པར་རྣམས་རབ་ཏུ་གཟུང་བར་བྱ་བའམ། ཁྱད་པར་རྣམས་རབ་ཏུ་འཛིན་པས་ན་ཞེས་པ་གཙོ་བོ་སྟེ། སྙིང་སྟོབས་དང་རྡུལ་དང་མུན་པ་རྣམས་མཉམ་པའི་གནས་
[193b.3]སྐབས་སོ། །ཁྱད་པར་རྣམས་ལ་རྗེས་སུ་འགྲོ་བ་མཐོང་བའི་ཕྱིར་ཞེས་པ་ལ་སོགས་པ་ནི་གཏན་ཚིགས་སོ། །ཕན་ཚུན་དུ་ཁྱད་པར་དུ་བྱ་ཞིང་དབྱེ་བར་བྱའོ་ཞེས་པས་ན་ཁྱད་པར་རྣམས་ཏེ་རྣམ་འགྱུར་རྣམས་སོ། །དེ་རྣམས་ལ་རྗེས་སུ་འགྲོ་བ་ནི་རྗེས་སུ་འབྲང་བ་སྟེ། བདེ་བ་དང་སྡུག་བསྔལ་
[193b.4]དང་རྨོངས་པ་རྣམས་བདག་ཉིད་ཀྱི་ཕྱིར་རོ། །དེ་ལ་གལ་ཏེ་ཞེས་པ། གལ་ཏེའི་སྒྲས་དམ་བཅའ་གཞན་ཏེ། དེ་ཡང་གང་གཅིག་མ་ཡིན་པ་དེ་སྙེད་ཀྱི་ཕྱོགས་འགོད་པར་བྱེད་དོ། །དེ་ལྟར་ནི་གཙོ་བོ་ཡོད་དོ་ཞེས་བརྗོད་ནས། གང་ལས་གཏན་ཚིགས་ཀྱི་ཡུལ་འདྲི་བ་ཀུན་ནས་སློང་བར་བྱེད་དེ།
[193b.5]དེའི་ཕྱིར་གཙོ་བོ་ཡོད་པ་ཉིད་བསྒྲུབ་པར་བྱ་བའོ་ཞེས་རྟོགས་པར་བྱའོ། །ཉེ་བར་གཏོད་པའི་སྦྱོར་བ་ནི་ཁྱད་པར་རྣམས་ཁོ་ན་ལ་གཙོ་བོ་ཡོད་པ་ཉིད་དུ་བསྒྲུབ་པར་བྱ་བའོ་ཞེས་རྟོགས་པར་བྱ་སྟེ། དེ་ལྟ་ནི་བཤད་པ། ནང་གི་བདག་ཉིད་དང་ཕྱི་རོལ་གྱི་ཁྱད་པར་རྣམས་ལ་རིགས་གཅིག་རྗེས་སུ་
[193b.6]འགྲོ་བ་འདི་ནི་ཡོད་དེ། དེས་ན་འདི་རྣམས་སྔར་ཐ་དད་པ་ལས་འགའ་ཞིག་ཏུ་སྤྱིར་གྱུར་པར་སེམས་སོ་ཞེས་པ་ལ་སོགས་པའོ། །དེ་ལྟར་རྣམ་པར་རྟོག་པ་གཉིས་སྲིད་དེ། གལ་ཏེ་གཙོ་བོ་ཡོད་པ་ཉིད་དུ་བསྒྲུབ་པར་བྱ་བ་ཡིན་ན་དེ་ཡང་དག་པ་མ་ཡིན་ཏེ་མི་རིགས་སོ། །ཅིའི་ཕྱིར་ཞེ་ན།
[193b.7]གསུངས་པ། ཚད་མའི་ཡུལ་མི་ཤེས་པའི་ཕྱིར་ཞེས་པ། ཚད་མའི་སྒྲས་འདིར་རྗེས་སུ་དཔག་པ་བརྗོད་པར་འདོད་པའོ། །དེའི་ཡུལ་སྤྱི་སྟེ། དེ་མི་ཤེས་པའི་ཕྱིར་རོ། །སྤྱིའི་མཚན་ཉིད་ཀྱི་ཡུལ་ཅན་མ་ཡིན་པ་ཞེས་པ་རང་གི་མཚན་ཉིད་ཀྱི་ཡུལ་ཅན་ནོ། །བསྟན་ཟིན་ཏོ་ཞེས་པ་རླུང་གི་རབ་
[194a]
[194a.1]ཏུ་བྱེད་པར་རྟོགས་པར་བྱས་ཟིན་པའོ། །བསྒྲུབ་བྱའི་ཆོས་ཀྱང་སྒྲུབ་པར་བྱེད། །ཅེས་པ་ལ་སོགས་པས་གང་བསྒྲུབ་བྱའི་ཆོས་སུ་མི་འགྱུར་བ་དེ་སྒྲུབ་བྱེད་དུ་འགྱུར་བ་མ་ཡིན་ཏེ། དཔེར་ན་སྒྲ་མི་རྟག་པར་བསྒྲུབ་པར་བྱ་བ་ལ་མེ་སྲེག་པར་བྱེད་པ་ཉིད་བཞིན། གཙོ་བོ་ཡོད་པ་
[194a.2]ཉིད་དུ་བསྒྲུབ་པར་བྱ་བ་ལ་ཁྱད་པར་རྣམས་ལ་རྗེས་སུ་འགྲོ་བ་ཡང་བསྒྲུབ་པར་བྱ་བའི་ཆོས་སུ་འགྱུར་བ་མ་ཡིན་ནོ་ཞེས་ཁྱད་པར་བྱེད་པ་མེད་པ་གསུངས་སོ། །རྒྱས་པའི་ཚིག་མིན་གཏན་ཚིགས་སུ་རིགས་པ་ཞེས་པ་ངག་གི་ལྷག་མའོ། །གཙོ་བོ་ཡོད་དེ་ཁྱད་པར་རྣམས་ལ་རྗེས་སུ་འགྲོ་བ་མཐོང་
[194a.3]བའི་ཕྱིར་རོ། །ནང་གི་བདག་ཉིད་ཀྱི་ཁྱད་པར་འབྲས་བུ་དང་རྒྱུར་གྱུར་པ་རྣམས་ལ་རིགས་གཅིག་རྗེས་སུ་འགྲོ་བར་མཐོང་སྟེ། ཇི་སྲིད་དུ་སྒྲ་དང་རེག་པ་དང་། གཟུགས་དང་རོ་དང་དྲི་སྟེ་ལྔ་པོ་རྣམས་ནི། བདེ་བ་དང་སྡུག་བསྔལ་དང་རྨོངས་པ་རྣམས་ཏེ་གསུམ་པོ་རྣམས་ཀྱི་བཀོད་པའི་ཁྱད་
[194a.4]པར་རོ། །ཅིའི་ཕྱིར་ལྔ་པོ་རྣམས་ཀྱི་ཞེ་ན། ལྔ་པོ་རྣམས་ལ་འབྲས་བུ་གཅིག་ཡོད་པའི་ཕྱིར་རོ་ཞེས་པ་ལ་སོགས་པ་རྒྱས་པའི་ཚིག་ནི་གཏན་ཚིགས་སུ་མི་འགྱུར་རོ། །ཅིའི་ཕྱིར་ཞེ་ན། སྒྲུབ་བྱེད་བསྡུས་པའི་ཚིག་གི་ཕྱིར་རོ་ཞེས་པ། སྒྲུབ་བྱེད་བསྡུས་པའི་ཚིག་གཏན་ཚིགས་སོ་ཞེས་
[194a.5]པའི་མཚན་ཉིད་ཀྱི་ཕྱིར་རོ། །འོ་ན་ཁྱད་པར་རྣམས་ལ་རྗེས་སུ་འགྲོ་བ་མཐོང་བའི་ཕྱིར་ཞེས་པ་འདི་ཙམ་ཁོ་ནའི་ངག་ནི་འདིར་གཏན་ཚིགས་མ་ཡིན་ནམ། འདི་ཡང་བསྡུས་པ་ཁོ་ན་སྟེ། ཡང་འདིར་གཞུང་ལྷག་མ་ནི་གཏན་ཚིགས་ཀྱི་ཁྱབ་པ་སྟོན་པའི་ཆེད་དུ་དང་། མ་གྲུབ་པ་ཉིད་
[194a.6]ཡོངས་སུ་སྤང་བའི་ཆེད་དུ་བཀོད་པའོ་ཞེ་ན་གསུངས་པ། དེ་ཡང་མ་བརྗོད་དོ་ཞེས་པ། སྒྲུབ་བྱེད་བསྡུས་པའི་ཚིག་གཏན་ཚིགས་སོ་ཞེས་བརྗོད་ཀྱི་སྒྲུབ་བྱེད་ནི་མ་ཡིན་ཏེ། དེ་མ་བརྗོད་ན་དེའི་ཚིག་ཀྱང་གཏན་ཚིགས་ཉིད་དུ་རྟོགས་པར་བྱའོ་ཞེས་པས་འདི་ནི་མ་བརྗོད་པ་དང་མཚུངས་པ་ཁོ་ནའོ་
[194a.7]ཞེས་སེམས་སོ། །དེ་ལྟར་འགྱུར་མོད་ཀྱི་སྒྲུབ་བྱེད་ཀྱི་ཚིག་ལས་ཁྱད་པར་རྟོགས་པར་བྱའོ་ཞེ་ན་གསུངས་པ། ཐམས་ཅད་ཁོ་ན་ནི་ཞེས་པ་ལ་སོགས་པའོ། །ཡང་ན་འདིར་འགྱུར་མོད། འདིར་གང་ཡན་ལག་སྒྲུབ་པར་བྱེད་པ་ནི་དེའི་བརྗོད་པར་བྱ་བའི་དོན་སྒྲུབ་བྱེད་ཉིད་དུ་རྣམ་པར་རིག་པར་བྱེད་
[194b]
[194b.1]པ་སྟེ། ངག་གི་སྒྲུབ་པར་བྱེད་པ་ཉིད་ནི་དོན་གྱི་སྒོ་ཅན་ཡིན་གྱི། རང་ཉིད་ལས་ནི་མ་ཡིན་ནོ་ཞེ་ན་གསུངས་པ། ཐམས་ཅད་ཁོ་ན་ནི་ཞེས་པ་ལ་སོགས་པའོ། །འོ་ན་ལྷག་མ་དང་ལྡན་པ་འདི་ནི་དབང་པོ་ལས་འདས་པའི་དངོས་པོ་རྣམས་རྟོགས་པར་བྱེད་པ་ལ་གཏན་ཚིགས་སོ་ཞེས་པས་དེ་ཁོ་ན་སྒྲུབ་
[194b.2]པར་བྱེད་པ་སྟེ། དེའི་ཚིག་ནི་གཏན་ཚིགས་སོ་ཞེ་ན། འདི་ནི་མི་རིགས་ཏེ། ཡན་ལག་ཐམས་ཅད་ཚོགས་པ་ནི་ལྷག་མ་དང་ལྡན་པ་ཡིན་པ་ཉིད་ཀྱི་ཕྱིར་རོ། །དཔེ་ཡང་ཞེས་པ་ལ་སོགས་པ། དེ་ངེས་པར་སྟོན་པ་དཔེ་ཞེས་པ་འདི་ལ་ཡང་ན་གཞི་བསྒྲུབ་པ་ལ་བརྟེན་པར་བྱ་བ་སྟེ། བསྒྲུབ་པར་
[194b.3]བྱ་བ་དང་སྒྲུབ་པར་བྱེད་པ་དེ་དག་གང་དུ་ངེས་པར་བསྟན་པར་བྱ་བ་ཞེས་པའམ། ཡང་ན་བྱེད་པ་སྟེ། དེ་དག་འདིས་ངེས་པར་སྟོན་པའོ་ཞེས་པ་ཡིན། དེ་ལ་བརྟག་པ་དང་པོ་ལ་མངོན་པར་འདོད་པའི་མཚོན་བྱ་ལ་མ་ཁྱབ་པའི་ཕྱིར་མཚན་ཉིད་མ་ཁྱབ་པ་ཉིད་དུ་སྟོན་པར་གསུངས་པ། གལ་ཏེ་
[194b.4]གང་དུ་ཞེས་པ་ལ་སོགས་པའོ། །ཡོད་ན་ཡང་ཞེས་པ། བསྒྲུབ་བྱ་དང་སྒྲུབ་བྱེད་རྗེས་སུ་འགྲོ་བ་ཁས་བླངས་ནས་དཔེའི་སྐྱོན་གཞན་གསུངས་པ། རྗེས་སུ་འགྲོ་བ་མེད་པའི་ཕྱིར་རོ་ཞེས་པ། བསྒྲུབ་པར་བྱ་བས་སྒྲུབ་པར་བྱེད་པ་ལ་ཁྱབ་པ་ཉེ་བར་སྟོན་པ་ནི་རྗེས་སུ་འགྲོ་བ་སྟེ། འདིར་
[194b.5]ནི་སྒྲུབ་པར་བྱེད་པས་བསྒྲུབ་པར་བྱ་བ་ལ་ཁྱབ་པར་བརྗོད་དེ། འཇིག་རྟེན་ན་སྤྱི་སྔོན་མ་ཅན་གྱི་ཁྱད་པར་རྣམས་ལ། རིགས་གཅིག་ཡང་དག་པར་རྗེས་སུ་འགྲོ་བ་མཐོང་ཞེས་པའོ། །འདི་ལྟ་བུ་ནི་སྒྲུབ་པར་བྱེད་པའི་དོན་འགའ་ཡང་མ་ཡིན་ནོ་ཞེས་པ། དཔེ་ལྟར་སྣང་བ་ཉིད་ཀྱི་གཏན་ཚིགས་
[194b.6]སོ། །རྗེས་སུ་འགྲོ་བ་ཕྱིན་ཅི་ལོག་པས་ནི་སྒྲུབ་པར་བྱེད་པ་ལ་ཕན་འདོགས་པ་འགའ་ཡང་འབྱུང་བ་མེད་དེ། མེད་ན་མི་འབྱུང་བ་ཉིད་མི་སྟོན་པའི་ཕྱིར་རོ། །ངག་གི་ཡན་ལག་ཉམས་པའོ་ཞེས་པ། ངག་གི་བདག་ཉིད་རྣམ་པར་ལྡན་པའི་དོན་ཡན་ལག་ཡིན་པར་རིགས་པ་མ་ཡིན་ཏེ། འཇུག་
[194b.7]པ་ཐ་དད་པ་རྣམས་ལྷན་ཅིག་བརྗོད་པར་འདོད་པ་མེད་པའི་ཕྱིར་ཞེས་བཤད་ཟིན་ཏོ། །རྣམ་པར་རྟོག་པ་གཉིས་པ་ལ་སྐྱོན་ཉིད་རྟོགས་པར་བྱ་བའི་ཆེད་དུ་གསུངས་པ། ཅི་སྟེ་ཞེས་པ་ལ་སོགས་པའོ། །བརྗོད་པར་བྱ་བ་ཁོ་ན་ལ་དེ་མ་ཡིན་ཞེས་པ་ནི། དེ་ལྟར་གྱུར་པའི་དོན་ལ་མེད་པ་ན།
[195a]
[195a.1]ངག་ཀྱང་དེའི་དོན་རྟོགས་པར་བྱེད་པའི་འབྲས་བུ་ཅན་མ་ཡིན་ནོ། །གསུངས་པ། མ་ཡིན་ཞེས་པ་ལ་སོགས་པའོ། །ཉེ་བར་སྦྱར་མི་རིགས་ཞེས་པ་བསྒྲུབ་བྱ་དང་དཔེ་དག་གཅིག་ཏུ་བྱ་བ་ཞེས་པ་ཉེ་བར་སྦྱར་བའི་མཚན་ཉིད་དེ། དེ་དག་གི་དཔེ་ཉིད་ལ་འཐད་པ་མ་ཡིན་ཏེ།
[195a.2]དཔེར་ན་དུམ་ཞོགས་དང་ཐོད་པ་དང་སྣོད་སྤྱད་དང་རྒྱན་ལ་སོགས་པ་ཞེས་པའི་ངག་འདི་ལྟ་བུ་ནི་མ་ཡིན་ནོ། །དེ་ལྟར་གཙོ་བོ་ལ་སོགས་པ་བསྒྲུབ་པར་བྱ་བའོ། །དེ་ལྟར་ཡན་ལག་གི་མཚན་ཉིད་ནི་དངོས་སུ་གཙོ་བོ་ཡོད་པ་ཉིད་ཅེས་པ་གཙོ་བོ་ཡོད་དོ་ཞེས་བར་མ་ཆད་པར་གཙོ་བོ་བསྒྲུབ་པར་བྱ་བ་
[195a.3]ལ་ནི་དཔེ་དང་ཉེ་བར་བསྡུ་བའི་མཚན་ཉིད་རྣམ་པ་ཐམས་ཅད་དུ་འབྲེལ་པ་མ་ཡིན་ནོ། །དེ་ལྟར་ནི་བསྒྲུབ་བྱ་ངེས་པར་འཛིན་པ་དམ་བཅའོ་ཞེས་པ་དམ་བཅའི་མཚན་ཉིད་དེ། གཙོ་བོ་ཟླ་བོའི་ངོ་བོ་བསྒྲུབ་པར་བྱ་བར་བརྟགས་པ་ཡང་མ་ཡིན་ནོ། །དེ་སྟོན་པ་དཔེའོ་ཞེས་པ་དཔེའི་མཚན་ཉིད་
[195a.4]ཡིན་ཞིང་། དེ་དག་གཅིག་ཏུ་བྱ་བ་ཞེས་པ་ཉེ་བར་སྦྱར་བའི་མཚན་ཉིད་དེ། དེ་གཉིས་ཀ་ཡང་འདིར་ཡོད་པ་མ་ཡིན་ནོ་ཞེས་རྟོགས་པར་བྱས་ཟིན་ཏོ། །འོ་ན་རིགས་པའི་སྒོར་འདི་སྒྲུབ་བྱེད་དུ་ཉེ་བར་སྒྲུབ་པ་མ་ཡིན་ནམ། དེ་ཅི་ལྟར་སྔ་མའི་སྐྱོན་འབྱུང་ཞེ་ན་གསུངས་པ། རིགས་པའི་སྒོའི་ཕྱོགས་
[195a.5]ཀྱིས་ནི་ཞེས་པ་སྟེ། དེས་ནི་གཙོ་བོ་དོན་གྱིས་སྒྲུབ་ཀྱི་དངོས་སུ་མ་ཡིན་ཏེ། དངོས་སུ་ནི་ཁྱད་པར་རྣམས་ཁོ་ན་བསྒྲུབ་བྱའོ། །ཁྱད་པར་རྣམས་ཁོ་ན་དེར་རྒྱུ་གཅིག་པ་ཉིད་དུ་བསྒྲུབ་པར་བྱ་བ་ཉིད་ཀྱི་ཕྱིར་ཕྱོགས་སོ་ཞེས་པའི་ཚིག་ལས་སོ། །དེ་རྣམས་བསྒྲུབ་པར་བྱ་བ་ཉིད་ན་ཇི་སྐད་བཤད་པའི་ཡན་
[195a.6]ལག་གི་སྦྱོར་བ་འབྲེལ་པར་འགྱུར་ཏེ། འབྲེལ་པ་ཙམ་དུ་འགྱུར་ཞེས་པའོ། །ཙམ་གྱི་སྒྲ་ནི་ཡན་ལག་སྐྱོན་མེད་པ་ཉིད་རྣམ་པར་གཅོད་པའི་དོན་དུའོ། །དམ་བཅའི་དོན་དང་འགལ་བར་འགྱུར་ཞེས་པས་ཁས་བླངས་དང་འགལ་བ་གསུངས་སོ། །དམ་བཅའི་དོན་དང་འགལ་བ་གང་ཡིན་ཞེ་ན་
[195a.7]གསུངས་པ། ཁྱད་པར་རྣམས་རྒྱུ་གཅིག་པ་ཞེས་པའོ། །ཅི་ལྟར་ན་དམ་བཅས་པའི་སྐྱོན་ཡིན་ཞེ་ན་གསུངས་པ། དུམ་བུ་ལ་སོགས་པ་རྣམས་ཀྱི་ཞེས་པ་ལ་སོགས་པ་སྟེ། གང་དེ་དུམ་ཞོགས་དང་ཐོད་པ་དང་སྣོད་སྤྱད་དང་རྒྱན་ལ་སོགས་པ་རྣམས་ཀྱི་ཁྱད་པར་ཉིད་དུ་གྱུར་ན། ཤིང་དང་བུམ་
[195b]
[195b.1]པ་དང་། སའི་གོང་བུ་དང་གསེར་ལ་སོགས་པ་རྒྱུ་དུ་མ་སྔོན་མ་ཅན་ཉིད་དུ་ཁས་བླངས་སོ། །དེས་རྒྱུ་གཅིག་སྔོན་མ་ཅན་ཉིད་སེལ་བའི་ཕྱིར་དམ་བཅའ་བའི་དོན་དང་འགལ་བའོ། །དེ་ལྟར་འགྱུར་མོད་ནང་གི་བདག་ཉིད་ཀྱི་ཁྱད་པར་རྣམས་ཁོ་ན་རྒྱུ་གཅིག་སྔོན་མ་ཅན་ཉིད་དུ་ཁས་བླང་བར་བྱའི། ཕྱི་
[195b.2]རོལ་གྱི་རྣམ་པ་ནི་མ་ཡིན་ཏེ། དེས་ན་འདི་སྐྱོན་མ་ཡིན་ནོ་ཞེ་ན་གསུངས་པ། ཁས་མི་ལེན་ན་ཡང་དཔེ་མེད་པ་ཞེས་པ་སྟེ། རྒྱུ་གཅིག་པ་ཉིད་མེད་པའི་ཕྱིར་ན་བསྒྲུབ་བྱ་དང་བྲལ་བའི་ཕྱིར་དཔེ་ལྟར་སྣང་བའོ་ཞེས་བྱས་ནས་སོ། །ཡང་ན་འདིར་ཁྱད་པར་ཐམས་ཅད་ཕྱོགས་སུ་བྱས་པ་རྣམས་
[195b.3]ཏེ། དེ་ལ་དུམ་ཞོགས་ལ་སོགས་པ་རྣམས་ཀྱི་ཁྱད་པར་ཡོད་པ་ལ་ཤིང་ལ་སོགས་པ་རྒྱུ་དུ་མ་ཁས་བླངས་པའི་ཕྱིར་དམ་བཅའ་བའི་དོན་དང་འགལ་བ་སྟེ། རྒྱུ་གཅིག་པ་ཉིད་སེལ་བའི་ཕྱིར་རོ། །ཁས་མི་ལེན་ན་ཡང་ཞེས་པ་གལ་ཏེ་དུམ་ཞོགས་ལ་སོགས་པ་རྣམས་ཀྱང་གཙོ་བོ་གཅིག་གི་
[195b.4]རྒྱུ་ཅན་ཉིད་ཀྱི་ཕྱིར་ཤིང་ལ་སོགས་པའི་རྒྱུ་ཅན་དུ་ཁས་བླངས་པ་མ་ཡིན་ནོ་ཞེ་ན། དེ་ལྟར་གྱུར་ན་དཔེ་མེད་པ་སྟེ། དུམ་ཞོགས་ལ་སོགས་རྣམས་ཀྱི་རྒྱུ་གཅིག་པ་ཉིད་མ་གྲུབ་པའི་ཕྱིར་རོ། །ཅི་ཡོད་པ་སྔོན་མ་ཅན་ཉིད་དུ་ཞེས་པ། གཙོ་བོ་ཡོད་དོ་ཞེས་པའི་དམ་བཅའ་ལས་དང་དེའི་ཕྱིར་གཙོ་བོ་
[195b.5]ཡོད་དོ་ཞེས་པའི་མཇུག་སྡུད་ལས། ཡོད་པ་སྔོན་མ་ཅན་ཁོ་ནར་ཁྱད་པར་རྣམས་བསྒྲུབ་པར་བྱ་ཞིང་། དཔེ་མེད་པ་མ་ཡིན་ཏེ་དུམ་བུ་ལ་སོགས་པ་རྣམས་ཡོད་པ་སྔོན་མ་ཅན་ཉིད་དུ་རྟོགས་པའི་ཕྱིར་རོ་ཞེ་ན། མ་ཡིན་ཏེ་གཅིག་ཉིད་ལ་ཡང་ཞེས་པ་ལ་སོགས་པ་སྟེ། གཅིག་ཉིད་བསྒྲུབ་པར་
[195b.6]བྱ་བ་ལ་ཡང་གཙོ་བོའི་འདི་ཁོ་ན་སྒྲུབ་བྱེད་དུ་སྟོན་ཏེ། འདི་སྐད་དུ་རྣམ་པར་ལྡན་པ་ལྔ་པོ་འདི་རྣམས་ལས་གཙོ་བོའི་ཡོད་པ་ཉིད་དུ་གྲུབ་ཅིང་། འདིའི་གཅིག་ཉིད་ཀྱང་འདི་ཁོ་ན་ལས་གྲུབ་བོ་ཞེས་བརྗོད་པའི་ཕྱིར་རོ། །རྩོད་པ་མེད་ཕྱིར་ཡང་ཞེས་པས་གྲུབ་པ་བསྒྲུབ་བྱ་ཉིད་གསུངས་སོ། །
[195b.7]ཅི་ལྟར་ན་རྩོད་པ་མེད་ཅེ་ན་གསུངས་པ། མ་ཡིན་ཞེས་པ་ལ་སོགས་པའོ། །གཞན་རྣམས་ནི་ཞེས་པ། ཇི་སྐད་བཤད་པའི་སྐྱོན་ཡོངས་སུ་སྤང་བའི་ཆེད་དུ་ཕྱོགས་གཞན་ལ་བརྟེན་ཏེ། བདེ་བ་ལ་སོགས་པ་རྣམས་ཀྱི་རིགས་རྗེས་སུ་འགྲོ་བས་ཁྱད་པར་རྣམས་གཙོ་བོ་དེའི་རིགས་
[196a]
[196a.1]ཅན་ཉིད་དུ་སྟེ། བདེ་བ་ལ་སོགས་པ་ལས་བྱུང་བ་ཉིད་དུ་བསྒྲུབ་པར་བྱ་བའོ་ཞེས་ཏེ། ཇི་ལྟར་དུམ་བུ་ལ་སོགས་པ་རྣམས་ལ་ཙནྡན་ལ་སོགས་པའི་རིགས་རྗེས་སུ་འགྲོ་བ་ཡོད་ན། དེའི་རྒྱུ་ཅན་རྣམས་ཙནྡན་ལ་སོགས་པའི་རིགས་ཅན་ཉིད་ཡིན་པ་དེ་ལྟར་ཁྱད་པར་རྣམས་
[196a.2]ལ་བདེ་བ་ལ་སོགས་པའི་རིགས་རྗེས་སུ་འགྲོ་བ་ན། དེའི་རྒྱུ་ཅན་བདེ་བ་ལ་སོགས་པ་ལས་བྱུང་བའོ་ཞེས་པའོ། །དེ་ལྟར་ནི་གང་གང་གི་རང་བཞིན་རྣམས་ཀྱིས་བརྩམས་པ་དེ་ནི་དེའི་རང་བཞིན་ཁོ་ནར་འགྱུར་རོ། །ཤེས་པའི་བསྟན་བཅོས་ནི་འབྲས་བུ་དང་རྒྱུ་དག་རང་བཞིན་གཅིག་ཉིད་དུ་རྟོགས་པར་བྱེད་
[196a.3]པའོ། །དེ་འདི་སྐད་བཤད་པར་འགྱུར་ཏེ། གང་ཞིག་གང་གི་རིགས་དང་ལྡན་པ་དེ་ནི་དེའི་རང་བཞིན་གྱི་རྒྱུ་ཅན་ཡིན་ཏེ། དུམ་བུ་ལ་སོགས་པ་བཞིན། ཁྱད་པར་རྣམས་ཀྱང་བདེ་བ་ལ་སོགས་པའི་རིགས་དང་ལྡན་པ་ཡིན་ནོ་ཞེས་པ་འབྲས་བུའི་གཟུགས་བརྙན་ནོ། །དེ་ཡང་མ་ཡིན་ཏེ། རིགས་
[196a.4]དུ་མའི་རྗེས་སུ་འགྲོ་བའི་ཕྱིར་རོ་ཞེས་པ་མིག་དང་རྣ་བ་དང་གཟུགས་དང་སྒྲ་ནང་གི་བདག་ཉིད་ལ་སོགས་པའི་རིགས་དང་ལྡན་པའི་ཁྱད་པར་རྣམས་ཀྱང་ཡོད་དོ། །དེ་རྣམས་ཀྱི་རྒྱུ་ནི་དེའི་རང་བཞིན་མ་ཡིན་ནོ་ཞེས་པ་དེས་ངེས་པའོ། །ཐམས་ཅད་ལ་རྗེས་སུ་འགྲོ་བར་བསྒྲུབ་པར་བྱའོ་ཞེ་ན་ཞེས་པ། སྣ་
[196a.5]ཚོགས་པའི་ངོ་བོའི་འབྲས་བུ་སྐྱེད་པ་མཐོང་བའི་ཕྱིར་གཙོ་བོ་ནི་ཐམས་ཅད་ཀྱི་བདག་ཉིད་ཉིད་དུ་འདོད་པ་ཁོ་ནའོ། །དེའི་ཕྱིར་འདིར་བདེ་བ་ལ་སོགས་པའི་རིགས་ཅན་ཙམ་བསྒྲུབ་པར་བྱ་བ་མ་ཡིན་གྱི་འོན་ཀྱང་ཇི་སྙེད་ཅིག་རིགས་དང་ལྡན་པའི་ཁྱད་པར་རྣམས་ཡིན་པ་དེ་སྙེད་པའི་རིགས་ཅན་ཉིད་དུ་
[196a.6]བསྒྲུབ་པར་བྱའོ་ཞེས་པས་མ་ངེས་པ་མ་ཡིན་ནོ། །མ་ཡིན་ཏེ་དཔེ་མེད་པའི་ཕྱིར་རོ་ཞེས་པ། ཐམས་ཅད་ཀྱི་རིགས་དང་ལྡན་པའི་ཁྱད་པར་གྱི་རྒྱུ་བསྒྲུབ་པར་བྱ་བ་ཡིན་ན། དུམ་བུ་ལ་སོགས་པ་རྣམས་བསྒྲུབ་བྱ་དང་བྲལ་བ་ཉིད་དོ་ཞེས་པས་དཔེ་མེད་པའོ། །འདིར་འགྱུར་མོད། གང་ཞིག་གང་
[196a.7]རྗེས་སུ་སོང་བ་དེ་ནི་དེའི་རིགས་ཅན་གྱི་རྒྱུ་ཅན་ཡིན་ཏེ། དུམ་བུ་ལ་སོགས་པ་བཞིན་ཞེས་སྤྱིར་རྗེས་སུ་འགྲོ་བ་སྟོན་པ་ན་དུམ་བུ་ལ་སོགས་པ་དཔེར་རིགས་པ་ཁོ་ནའོ་ཞེ་ན། གསུངས་པ། རགས་པ་དང་མི་རྟག་པ་དང་འབྲས་བུ་ཉིད་ལ་སོགས་པ་རྗེས་སུ་འགྲོ་བའི་ཕྱིར་ཡང་ཞེས་པ། རགས་པ་དང་
[196b]
[196b.1]མི་རྟག་པ་དང་འབྲས་བུ་ཉིད་ལ་སོགས་པ་རྗེས་སུ་འགྲོ་བ་ཁྱད་པར་རྣམས་ལ་དམིགས་སོ་ཞེས་པས་དེའི་བདག་ཉིད་ཉིད་དུ་ཡང་གཙོ་བོ་བསྒྲུབ་པར་བྱ་བར་འགྱུར་རོ། །སོགས་པ་སྨོས་པ་ལས་གསལ་བ་ཉིད་དང་མངོན་སུམ་ཉིད་ལ་སོགས་པ་རྣམས་ཡོངས་སུ་གཟུང་ངོ་། །དེ་རྣམས་དེའི་རྣམ་
[196b.2]པར་ཡང་འཐད་པ་མ་ཡིན་ཏེ། རྣམ་པར་ལྡན་པ་གཞན་རྣམས་ལ་ཡང་མ་འབྲེལ་བའི་ཕྱིར་རོ་ཞེས་པ། རྣམ་པར་ལྡན་པ་གཞན་རྣམས་ལ་སྟེ་ཚད་དང་། སྣ་ཚོགས་པའི་གཟུགས་ཉིད་དང་འབྲས་བུ་དང་རྒྱུའི་དངོས་པོ་དང་ནུས་པས་འཇུག་པའི་བདག་ཉིད་རྣམས་ལའོ། །གང་ཁྱད་
[196b.3]པར་གྱི་ཆོས་གཏན་ཚིགས་ཉིད་དུ་ཉེ་བར་བླངས་པ་དེ་རྗེས་སུ་འགྲོ་བ་གཙོ་བོ་མི་རུང་བའི་ཕྱིར་རོ་ཞེས་པའི་དོན་ཏོ། །གཙོ་བོ་ལ་བཅུ་དྲུག་ལ་སོགས་པའི་ཚད་འཐད་པ་མ་ཡིན་ཏེ། གཅིག་ཉིད་དུ་ཁས་བླངས་པའི་ཕྱིར་རོ། །སྣ་ཚོགས་པའི་གཟུགས་ཀྱང་མ་ཡིན་ཏེ། དེ་གཟུགས་མེད་པ་ཉིད་
[196b.4]ཀྱི་ཕྱིར་དང་གཅིག་ཉིད་ཀྱི་ཕྱིར་རོ། །འབྲས་བུ་ཉིད་ཀྱང་མ་ཡིན་ཏེ། རྒྱུ་ཉིད་ཀྱི་ཕྱིར་རོ། །ནུས་པའི་འཇུག་པ་ཡང་མ་ཡིན་ཏེ་ཐོག་མ་མེད་པའི་ཕྱིར་རོ། །དེའི་ཕྱིར་རྣམ་པར་ལྡན་པ་གཞན་ཕྱི་མ་རྣམས་ལ་བསྒྲུབ་བྱ་མི་རིགས་པའི་ཕྱིར་འདི་བསྒྲུབ་པར་བྱ་བ་མ་ཡིན་ནོ། །གང་ལས་ཐ་དད་
[196b.5]དུ་ཉེ་བར་ལེན་པ་འདི་དག་གི་གཞུང་ཐ་དད་པ་ཅི་ལྟར་ཡིན་ཞེ་ན། བསྟན་བཅོས་ཅན་དང་བསྟན་བཅོས་ཅན་མ་ཡིན་པ་ཉིད་ཀྱི་ཕྱིར་རོ། །རགས་པ་ལ་སོགས་པ་རྣམས་ནི་བསྟན་བཅོས་ཅན་མ་ཡིན་པའོ། །ཚད་ལ་སོགས་པ་རྣམས་ནི་བསྟན་བཅོས་ཅན་ཉིད་ཀྱི་ཕྱིར་ཐ་དད་དུ་ཉེ་བར་བླངས་པའོ། །
[196b.6]རིགས་གཅིག་རྗེས་སུ་འགྲོ་བ་མེད་པའི་ཕྱིར་རོ་ཞེས་པ། བདེ་བ་ལ་སོགས་པ་རྣམས་སེམས་པ་ཅན་ཉིད་ཀྱི་ཕྱིར། དེའི་བདག་ཉིད་ཀྱི་མཚན་ཉིད་ཅན་གྱི་རྗེས་སུ་འགྲོ་བ་ཁྱད་པར་ཐམས་ཅད་ལ་ཡོད་པ་མ་ཡིན་ནོ། །འོ་ན་སྒྲ་དང་རེག་བྱ་དང་གཟུགས་དང་རོ་དང་དྲི་སྟེ་ལྔ་པོ་རྣམས་ནི་བདེ་བ་དང་སྡུག་
[196b.7]བསྔལ་དང་རྨོངས་པ་སྟེ་གསུམ་པོ་རྣམས་ཀྱི་བཀོད་པའི་ཁྱད་པར་ཏེ། ཅི་ལས་ལྔ་རྣམས་དང་ལྔ་པོ་རྣམས་ལ་འབྲས་བུ་གཅིག་པ་མེད་པའི་ཕྱིར་རོ་ཞེས་པའི་བསྟན་བཅོས་ལས་གཏན་ཚིགས་སུ་ཡང་དག་པར་བཞག་པ་ཁོ་ན་ནི་མ་གྲུབ་པ་ཉིད་དོ། །དེ་ལྟར་ནི་འདིས་གང་འབྲས་བུ་གཅིག་པ་དེ་ནི་
[197a]
[197a.1]རིགས་གཅིག་རྗེས་སུ་སོང་བ་ཅན་ཡིན་ཏེ། དུམ་བུ་ལ་སོགས་པ་བཞིན་སྒྲ་ལ་སོགས་པ་རྣམས་ཀྱང་དེ་ལྟ་བུའོ་ཞེས་བྱ་བའི་སྒྲུབ་པར་བྱེད་པ་བསལ་བར་བྱས་སོ། །དེའི་ཕྱིར་མ་གྲུབ་པ་ཉིད་མེད་དོ་ཞེ་ན་གསུངས་པ། གང་གི་ཕྱིར་འབྲས་བུ་གཅིག་པ་ཞེས་པ་ལ་སོགས་པའོ། །
[197a.2]དེ་རྣམས་ཀྱི་སྒྲ་ལ་སོགས་པ་འབྲས་བུ་ཐ་མི་དད་པའོ་ཞེས་པ། སྙིང་སྟོབས་དང་རྡུལ་དང་མུན་པ་རྣམས་ཕན་ཚུན་ཕན་འདོགས་པའི་དངོས་པོར་འཇུག་པ་རྣམས་ནི་སྒྲ་ལ་སོགས་པའི་བདག་ཉིད་དུ་རྣམ་པར་གཞག་གོ་ཞེས་པས། སྒྲ་ལ་སོགས་པ་འབྲས་བུ་གཅིག་པར་བརྗོད་དོ། །སྙིང་སྟོབས་ལ་
[197a.3]སོགས་པ་རྣམས་ལ་རིགས་གཅིག་རྗེས་སུ་འགྲོ་བ་ཡོད་པ་ཡང་མ་ཡིན་ཏེ། ཤིན་ཏུ་ཐ་དད་པའི་ཕྱིར་རོ། །འཇིག་རྟེན་ན་ཡང་མིག་དང་གཟུགས་དང་སྣང་བ་དང་ཡིད་ལ་བྱེད་པ་ལ་སོགས་པ་རྣམས་ལ་རིགས་གཅིག་རྗེས་སུ་འགྲོ་བ་མེད་ན་ཡང་རྣམ་པར་ཤེས་པ་ལ་སོགས་པ་འབྲས་བུ་
[197a.4]གཅིག་ཡིན་ཏེ། དེའི་ཕྱིར་ཡང་མ་ངེས་པའི་ཕྱིར་ན་རིགས་གཅིག་རྗེས་སུ་འགྲོ་བ་མ་གྲུབ་པའོ། །ཉེ་བར་ལེན་པ་ལས་དེ་རྟོགས་སོ་ཞེས་པ་རྒྱུ་ནི་རྣམ་པ་གཉིས་ཏེ། ཉེ་བར་ལེན་པ་དང་ཉེ་བར་ལེན་པ་མ་ཡིན་པས་སོ། །དེ་ལ་ཉེ་བར་ལེན་པ་ནི་གང་ཐུན་མོང་མ་ཡིན་པ་སྟེ། གང་འབྲས་བུའི་བདག་
[197a.5]ཉིད་ཀྱིས་རྣམ་པར་གནས་པ་དཔེར་ན། མྱུ་གུའི་ས་བོན་དང་བུམ་པའི་སའི་རྫས་ལྟ་བུའོ། །ཅིག་ཤོས་ཕན་འདོགས་པར་བྱེད་པ་ནི་ཉེ་བར་ལན་པ་མ་ཡིན་པ་སྟེ། དཔེར་ན་མྱུ་གུའི་ཆུ་ལ་སོགས་པ་དང་། བུམ་པའི་དབྱུག་པ་དང་སྐུད་པ་ལ་སོགས་པ་ལྟ་བུའོ། །གང་གང་གིས་ཉེ་བར་ལེན་པ་ཡིན་པ་
[197a.6]དེ་ནི་འབྲས་བུའི་ཆོས་དང་འབྲེལ་གྱི། ཅིག་ཤོས་མ་ཡིན་ཏེ། དཔེར་ན་སའི་རང་བཞིན་ཉིད་ལ་སོགས་པ་བུམ་པའི་ཆོས་དང་སའི་གོང་བུ་ཡིན་གྱི། སྐུད་པ་ལ་སོགས་པ་མ་ཡིན་པ་བཞིན་ནོ། །གང་གི་བྱེད་པ་ཁོ་ན་ཡང་རབ་ཏུ་དང་བ་ལ་སོགས་པ་རྣམས་ཀྱི་ཉེ་བར་ལེན་པའི་རྒྱུའོ། །དེ་ལྟར་ནི་དེ་རྣམས་མཚོ་
[197a.7]འཁྱིལ་བ་ལས་ཆུའི་རླབས་བཞིན་དུ་དེ་ལས་ཡོངས་སུ་འཇུག་པས་སོ། །དེའི་ཕྱིར་དེ་ཁོ་ན་རབ་ཏུ་དང་བ་ལ་སོགས་པའི་ཆོས་བདེ་བ་ལ་སོགས་པའི་རང་བཞིན་ཉིད་དང་འབྲེལ་བར་རིགས་ཀྱི་སྒྲ་ལ་སོགས་པ་ནི་མ་ཡིན་ནོ། །ཅིའི་ཕྱིར་ཞེ་ན་གསུངས་པ། མ་གྱུར་ཅིག་ཅེས་པ་ལ་སོགས་པ་སྟེ་ཡང་ཅི་ལྟར་ན་
[197b]
[197b.1]སྐྱེས་བུ་ན་ཡང་ཡོན་ཏན་གསུམ་རྗེས་སུ་དཔོག་པར་ཐལ་བར་འགྱུར་ཞེ་ན་གསུངས་པ། དེའི་རྣམ་པར་ཤེས་པ་ཡང་ཞེས་པ་ལ་སོགས་པ་སྟེ། སྐྱེས་བུ་ནི་སྐྱེས་བུའི་དེ་ཉིད་རིགས་པ་ཐེ་ཚོམ་དང་ཕྱིན་ཅི་ལོག་ལ་སོགས་པ་རྣམས་ཀྱི་ཡང་ནང་གི་བྱེད་པ་ཡིན་ན། རབ་ཏུ་དང་བ་ལ་སོགས་པའི་འབྲས་བུའི་རྒྱུར་
[197b.2]གྱུར་པ་ཡིན་ཡང་། རབ་ཏུ་དང་བ་ལ་སོགས་པའི་འབྲས་བུའི་ཉེ་བར་ལེན་པ་མ་ཡིན་པའི་ཕྱིར་བདེ་བ་ལ་སོགས་པའི་རིགས་རྗེས་སུ་འགྲོ་བར་འདོད་པ་ནི་མ་ཡིན་ཏེ། དེ་བཞིན་དུ་སྒྲ་ལ་སོགས་པ་རྣམས་ཀྱང་ཉེ་བར་ལེན་པ་མ་ཡིན་པའི་ཕྱིར། བདེ་བ་ལ་སོགས་པའི་རིགས་དང་ལྡན་པ་མ་ཡིན་ནོ་
[197b.3]ཞེས་རྟོགས་པར་བྱའོ། །ཁས་མི་ལེན་ན་ཡང་སྐྱེས་བུ་ཡང་བདེ་བ་ལ་སོགས་པའི་རིགས་དང་ལྡན་པ་འཐོབ་བོ། །དེ་འདིས་ནི་སྒྲ་ལ་སོགས་པ་རྣམས་ལ་རིགས་གཅིག་རྗེས་སུ་འགྲོ་བར་བསྒྲུབ་པར་བྱ་བ་ལ། འབྲས་བུ་གཅིག་པ་ཉིད་ཀྱི་གཏན་ཚིགས་ནི། སྐྱེས་བུས་མ་ངེས་པར་བསྟན་ཏོ། །
[197b.4]ཅི་སྟེ་ཡང་ཞེས་པ་ལ་སོགས་པས་གང་བརྗོད་ཟིན་པ་ཉེ་བར་ལེན་ལ། དེ་རྟོགས་སོ་ཞེས་པ་དེའི་རྗེས་སུ་ཡི་རང་བར་བྱེད་དོ། །ཕྱི་རོལ་ཁོ་ནའི་སྒྲ་ལ་སོགས་པའི་རྒྱུ་ལ་རབ་ཏུ་དང་བ་ལ་སོགས་པའི་འབྲས་བུ་འདོད་དེ། ནང་གི་བྱེད་པ་ལ་ནི་མ་ཡིན་ནོ། །དེ་ནི་དཔེར་ན་མེའི་ཡོན་ཏན་དྲོ་བ་ཉིད་ནི་ཆུ་འམ་
[197b.5]ལུས་ལ་གསལ་བ་དེ་ལྟར་སྒྲ་ལ་སོན་པ་ཁོ་ནའི་འབྲས་བུ་ཡིད་ལ་གསལ་ལོ་ཞེས་པ་སྒྲ་ལ་སོགས་པ་རྣམས་ཀྱི་ཉེ་བར་ལེན་པ་ཉིད་ཡོད་དོ། །དེ་ལྟར་རབ་ཏུ་དང་བ་ལ་སོགས་པ་ཉེ་བར་ལེན་པ་ཉིད་ཀྱི་རྒྱུ་གཞན་ནི་ཉེ་བར་ལེན་པ་ཡིན་པའི་ཕྱིར་སྐྱེས་བུས་མ་ངེས་པ་མེད་དོ། །འདི་རབ་ཏུ་དང་བ་ལ་
[197b.6]སོགས་པའི་ཉེ་བར་ལེན་པ་ནི་མ་ཡིན་ཞེས་སེམས་པའོ། །གལ་ཏེ་ཐ་མི་དད་པར་ཞེས་པ། གང་ཁོ་ན་ལ་སྒྲ་ལ་རྣ་བའི་འཇུག་པས་འཛིན་པ་དེ་ཁོ་ན་གལ་ཏེ་རེག་པ་ལ་སོགས་པ་རྣམས་ལ་ཡང་པགས་པ་ལ་སོགས་པའི་འཇུག་པ་རྣམས་ཀྱིས་ཡིན་ན། དེ་ལས་རང་གི་ཡུལ་ལས་འཇུག་པ་ཉམས་
[197b.7]ཏེ། རྣ་བ་ལ་སོགས་པའི་འཇུག་པ་ལྔ་པོ་རྣམས་ཀྱི་ཡང་། རབ་ཏུ་དང་བ་ལ་སོགས་པ་འབྲས་བུ་གཅིག་གི་ཡུལ་ཅན་ཉིད་ཀྱི་ཕྱིར་ཞེས་པ་ཁས་བླངས་པ་ཉམས་སོ། །ཅི་སྟེ་ཐ་དད་ན་ཞེས་པ་ལ་སོགས་པ། གང་སྒྲ་ལ་རྣ་བའི་འཇུག་པས་གཟུང་ཞིང་། དེ་ལས་གཞན་པ་ཁོ་ན་རེག་པ་ལ་
[198a]
[198a.1]སོགས་པ་རྣམས་ལ་པགས་པ་ལ་སོགས་པའི་འཇུག་པ་རྣམས་ཀྱིས་སོ། །དེ་ལྟར་གྱུར་ན་གཅིག་གི་རིགས་ཅན་དུ་རྗེས་སུ་དཔག་པ་ལ་གནོད་དེ། འབྲས་བུ་གཅིག་པ་ཉིད་མ་གྲུབ་པའི་ཕྱིར་རོ། །གང་གི་ཕྱིར་དེ་རྣམས་ངོ་བོ་ཐ་དད་པ་ཁོ་ན་སྟེ། སྒྲ་ལ་སོགས་པ་བཞིན་
[198a.2]དབང་པོ་ཐ་དད་པའི་གཟུང་བར་བྱ་བ་ཉིད་ཀྱི་ཕྱིར་ཏེ། སྒྲ་ཐ་མི་དད་ཀྱི་བརྗོད་པར་བྱ་བ་ཡོད་ན་ཡང་ངོ་། །དེ་ལྟར་འགྱུར་མོད། སྒྲ་ལ་སོགས་པ་རྣམས་རྣ་བ་ལ་སོགས་པའི་འཇུག་པས་གཟུང་བྱ་རྣམས་ཏེ། རྣ་བ་དང་པགས་པ་དང་མིག་དང་ལྕེ་དང་སྣ་རྣམས་ཀྱི་འཇུག་པ་ཡིད་ཀྱིས་བྱིན་གྱིས་བརླབས་
[198a.3]པ་སྒྲ་དང་རིག་པ་དང་གཟུགས་དང་རོ་དང་དྲི་རྣམས་རིམ་པ་ཇི་ལྟ་བར་འཛིན་པ་ལ་འཇུག་པ་ལ་ནི་མངོན་སུམ་མོ་ཞེས་པའི་བསྟན་བཅོས་ལས་ཏེ། དེས་ན་རབ་ཏུ་དང་བ་ལ་སོགས་པ་ཐ་དད་པ་དང་ཐ་མི་དད་པའི་རྣམ་པར་དཔྱོད་པ་འདི་མི་རིགས་པ་ཁོ་ནའོ་ཞེ་ན་གསུངས་པ། མ་ཡིན་ཞེས་པ་ལ་སོགས་
[198a.4]པ་སྟེ། གང་ཞིག་གང་ཚོགས་པ་ལ་གདགས་པར་བྱ་བ་དེ་ནི་དེའི་འབྲས་བུ་མ་ཡིན་ཏེ། དཔེར་ན་སའི་རྣམ་པ་ལ་སོགས་པ་བཞིན། སྒྲ་ལ་སོགས་པ་ཡང་རབ་ཏུ་དང་བ་ལ་སོགས་པ་ཚོགས་པ་ལ་གདགས་པར་བྱ་བའི་ཞེས་པ་ཁྱབ་བྱེད་དང་འགལ་བའོ། །རྣམ་པ་ལ་སོགས་པ་རྣམས་
[198a.5]ནི་རྣམ་པ་དང་ལྕི་བ་ཉིད་དང་རྩུབ་པ་ཉིད་དང་། སྒྲིབ་བྱེད་དང་། བརྟན་པ་ཉིད་དང་། གཏན་པ་ཉིད་དང་། གནས་པ་དང་། འབྱེད་པ་དང་བཟོད་པ་དང་ནག་པ་ཉིད་དང་ལུས་དང་ཐམས་ཅད་སྤྱད་པར་བྱ་བ་ཉིད་ཅེས་པ་འདི་རྣམས་ནི་ས་ལས་བྱུང་བའི་ཆོས་རྣམས་སོ། །དེའི་ཁྱད་པར་ཅན་དེ་ལྟ་བུ་གཞན་རྣམས་
[198a.6]ནི་ཆུ་དང་མེ་དང་རླུང་དང་ནམ་མཁའི་ཁྱབ་བྱེད་རྣམས་སུ་དེ་རྣམས་རྟོགས་པར་བྱའོ་ཞེས་པ་འདི་རྣམས་རིག་པར་བྱའོ། །དེ་འདིས་འབྲས་བུ་གཅིག་པ་ཉིད་དང་རབ་ཏུ་དང་བ་ལ་སོགས་པའི་ཉེ་བར་ལེན་པ་ཉིད་ཀྱི་མ་གྲུབ་པ་ཉིད་གསུངས་སོ། །གལ་ཏེ་རྗེས་སུ་དཔག་པ་འདི་ལས་ཞེས་པ། གང་འདི་
[198a.7]འབྲས་བུ་གཅིག་པའི་དངོས་པོའི་མཚན་ཉིད་ཉེ་བར་བཀོད་པ་ནི། རིགས་གཅིག་ཁོ་ནས་ཞེས་པ་བདེ་བ་དང་སྡུག་བསྔལ་དང་གཏི་མུག་གི་བདག་ཉིད་ཀྱིས་སོ། །སྣ་ཚོགས་པའི་རང་བཞིན་འགལ་ལོ་ཞེས་པ་མཐའ་ཡས་པའི་རིགས་ལ་གནོད་དོ་ཞེས་པའི་དོན་ཏོ། །མཐའ་ཡས་པའི་རིགས་
[198b]
[198b.1]རྗེས་སུ་འགྲོ་བ་ནི་སྣ་ཚོགས་པའི་ངོ་བོ་ཉིད་དེ། དེ་ཡང་རིགས་གཅིག་ཁོ་ནས་རྗེས་སུ་འགྲོ་བ་ལ་སྲིད་པ་མ་ཡིན་ནོ། །ཅི་སྟེ་ངེས་པར་མི་འཛིན་ན་སྟེ། གཅིག་ཁོ་ནས་ཞེས་པར་རོ། །རྗེས་སུ་འགྲོ་བ་ལས་སྣ་ཚོགས་པའི་ངོ་བོ་ཉིད་ཀྱི་རྣམ་པར་ལྡན་པ་གཞན་མེད་དོ། །དེ་ལྟར་གལ་ཏེ་སྣ་ཚོགས་
[198b.2]པའི་གཟུགས་ཁོ་ན་ཞེས་ངེས་པར་མི་འཛིན་ན་སྣ་ཚོགས་པའི་ངོ་བོ་ཉིད་ལས་རྗེས་སུ་འགྲོ་བ་རྣམ་པར་ལྡན་པ་གཞན་ཉིད་དུ་མི་འགྱུར་རོ། །གཉི་གར་ཡང་ཞེས་པ་ལ་སོགས་པ། ཕན་ཚུན་དུ་ལྡོག་པ་དག་ཐ་དད་པར་འགྱུར་རོ། །ངེས་པར་མ་བཟུང་ན་ཡང་ལྡོག་པ་མི་སྲིད་དོ། །དེའི་ཕྱིར་དོན་གྱི་
[198b.3]གོ་བས་སམ་ཐོས་པས་ན། གཉི་ག་དག་གིས་ཉེ་བར་ལེན་པ་ལས་སྤྱི་དང་ཁྱད་པར་དང་ལྡན་པ་ཉིད་ཀྱི་རྣམ་པར་ལྡན་པ་གཅིག་ཁོ་ནར་འགྱུར་རོ། །སྤྱི་ནི་རྗེས་སུ་འགྲོ་བ་དང་ཁྱད་པར་ནི་སྣ་ཚོགས་པའི་ངོ་བོ་ཉིད་དེ། དེ་དག་སོ་སོར་རྣམ་པར་ལྡན་པ་གཞན་ཉིད་མི་འགྲུབ་བོ་ཞེས་པའི་དོན་ཏོ། །གང་
[198b.4]གི་ཕྱིར་དུ་མ་སྔོན་དུ་འགྲོ་བ་ཅན་ཁོ་ན་ཞེས་པ། མི་མཐུན་ཕྱོགས་ཁོ་ན་ལ་རིགས་གཅིག་རྗེས་སུ་འགྲོ་བ་མཐོང་ཞེས་པའི་དོན་ཏོ། །འདིར་འགྱུར་མོད་དུམ་བུ་ལ་སོགས་པ་ཤིང་ལ་སོགས་པའི་རྒྱུ་གཅིག་སྔོན་མ་ཅན་རྣམས་ལ་རིགས་གཅིག་རྗེས་སུ་འགྲོ་བ་མཐོང་སྟེ། དེས་ན་གང་ལས་འགལ་བ་ཉིད་
[198b.5]ཡིན་ཞེ་ན་གསུངས་པ། དེ་ལ་ཤིང་ལ་སོགས་པ་རྣམས་ལ་གཅིག་ཉིད་གྲུབ་པ་ནི་མེད་ཅིང་། དུམ་བུ་ལ་སོགས་པ་རྣམས་དེ་སྔོན་མ་ཅན་ཉིད་ཀྱང་མ་ཡིན་ཏེ་ཞེས་པའོ། །ཅིའི་ཕྱིར་ཞེ་ན། ཤིང་ལ་སོགས་པ་ཉེ་བར་ལེན་པའི་དངོས་པོའི་ཕྱིར་རོ། །གང་གི་ཕྱིར་དུམ་བུ་ལ་སོགས་པ་རྣམས་
[198b.6]ནི་ཤིང་ལ་སོགས་པའི་ཉེ་བར་ལེན་པ་ཅན་ཉིད་ཉེ་བར་གཟུང་ནས་ཤིང་ལ་སོགས་པ་ཉེ་བར་འདོགས་པའི་ཕྱིར་ཏེ། དྷ་བ་ལ་སོགས་པ་རྣམས་ཉེ་བར་གཟུང་ནས་ནགས་ཉེ་བར་འདོགས་པ་བཞིན་ནོ། །དེའི་ཕྱིར་ཤིང་ལ་སོགས་པ་རྣམས་གཅིག་ཉིད་མ་ཡིན་ཞིང་། དུམ་བུ་ལ་སོགས་པ་རྣམས་དེ་
[198b.7]སྔོན་མ་ཅན་ཉིད་ཀྱང་མ་ཡིན་ནོ། །ནགས་ནི་གཅིག་ཉིད་མ་ཡིན་ཞིང་། །དྷ་བ་ལ་སོགས་པ་རྣམས་དེ་སྔོན་མ་ཅན་ཉིད་དུ་བསྒྲུབ་པར་ནུས་པ་ཡང་མ་ཡིན་ནོ། །འོ་ན་འདི་ནི་མི་འགྲིག་སྟེ། །རིགས་གཅིག་རྗེས་སུ་འགྲོ་བས་རྒྱུ་དུ་མ་སྔོན་མ་ཅན་ཉིད་དུ་འབྱུང་བར་བྱའོ་ཞེས་པའི་གེགས་མེད་པའི་
[199a]
[199a.1]ཕྱིར། དེ་དག་ལས་འགལ་བ་ཉིད་ཡིན་ཞེ་ན། ཇི་ལྟར་འགལ་བ་ཉིད་ཡིན་པ་དེ་ལྟར་བརྗོད་པར་བྱ་སྟེ། གལ་ཏེ་གཙོ་བོ་དུ་མ་ཉིད་དུ་མི་འགྱུར་ཞིང་། དེ་ལས་གསལ་བའི་ཐ་དད་པ་ཉིད་ཁོ་ནར་མི་འགྱུར་ན་ཕན་ཚུན་དུ་ཐ་དད་པ་ཆེན་པོ་ལ་སོགས་པ་རྣམས་ཀྱི་ནི་ཐ་དད་པ་ཉིད་
[199a.2]དུ་ཉེ་བར་སྐྱེ་ལ། ཕན་ཚུན་ཐ་དད་པ་ཡང་གཙོ་བོ་གཅིག་ཉིད་ལ་སྲིད་པ་མ་ཡིན་ནོ། །འབྲས་བུ་དང་རྒྱུ་དག་གཅིག་ཉིད་དུ་ཁས་བླངས་པའི་ཕྱིར། ཐ་དད་པ་མེད་ནའང་ཅི་ཞིག་ལ་རིགས་གཅིག་རྗེས་སུ་འགྲོ། །དེའི་ཕྱིར་རིགས་གཅིག་རྗེས་སུ་འགྲོ་བར་འདོད་པས་དེའི་རྒྱུ་དུ་མ་ཉིད་དུ་ཁས་བླང་བར་
[199a.3]བྱའོ་ཞེས་པས་འགལ་བ་ཉིད་དུ་འགྱུར་རོ། །ཁས་བླངས་ནས་ཀྱང་ཞེས་པ་གལ་ཏེ་ཡང་དུམ་བུ་ལ་སོགས་པ་རྣམས་གཅིག་ཉིད་ཀྱི་ཁྱད་པར་ཅན་དང་ཤིང་ལ་སོགས་པ་སྔ་མ་ཅན་ཉིད་ཡིན་པ་དེ་ལྟ་ན་ཡང་གཏན་ཚིགས་མ་ངེས་པ་སྟེ། གང་གི་ཕྱིར་དུམ་བུ་དང་ཐོད་པ་དང་སྣོད་སྤྱད་དང་རྒྱན་ལ་
[199a.4]སོགས་པ་བདེ་བ་ལ་སོགས་པའི་རིགས་རྗེས་སུ་འགྲོ་བ་རྣམས། ཤིང་དང་བུམ་པ་དང་སའི་གོང་བུ་དང་གསེར་ལ་སོགས་པའི་རིགས་དུ་མའི་རྒྱུ་སྔོན་མ་ཅན་རྣམས་ཏེ། སྔ་མར་ནི་ཤིང་ལ་སོགས་པ་རྣམས་ལ་ནི་སོ་སོར་གཅིག་ཉིད་མེད་པའི་ཕྱིར་འགལ་བ་ཉིད་དུ་བཤད་ཅིང་། ད་ལྟ་ནི་ཁས་བླངས་ནས་
[199a.5]ཀྱང་གཅིག་ཉིད་མཐའ་དག་གི་དུ་མ་ཉིད་ཀྱི་ཕྱིར་མ་ངེས་པ་ཉིད་དུ་བརྗོད་དོ་ཞེས་པ་ཁྱད་པར་རོ། །དཔེ་ནི་བསྒྲུབ་བྱས་དམན་པ་ཞེས་པ། ཁྱད་པར་རྣམས་ཐམས་ཅད་གཙོ་བོ་གཅིག་གི་རྒྱུ་ཅན་ཉིད་དུ་ཁས་ལེན་པ་ལ་དུམ་ཞོགས་ལ་སོགས་པ་རྣམས་ཤིང་ལ་སོགས་པ་སྔོན་མ་ཅན་ཉིད་རིགས་པ་མ་ཡིན་
[199a.6]ནོ། །འོ་ན་ཁྱད་པར་རྣམས་རྒྱུ་གཅིག་སྔོན་མ་ཅན་རྣམས་སོ་ཞེས་པ་ལྟོས་པ་མེད་པའི་གཙོ་བོ་ལ་སོགས་པའི་ངོ་བོ་གཅིག་གི་རྒྱུ་ཅན་ཉིད་དུ་བསྒྲུབ་པར་བྱ་སྟེ། དེས་ན་གང་ལས་དཔེ་མེད་པ་ཡིན་ཞེ་ན། འདི་ལྟར་སེམས་ཏེ། ཁྱད་པར་ལ་མི་སྙེགས་པ་ཡིན་ན་གྲུབ་པ་བསྒྲུབ་བྱ་ཉིད་ཁོ་ནར་འགྱུར་གྱི།
[199a.7]ཤིང་ལ་སོགས་པ་གཅིག་པ་ཉིད་འགྲུབ་པ་ནི་མ་ཡིན་ནོ། །དེས་ན་དཔེ་ལྟར་སྣང་བའི་ཞེས་པའོ། །དུམ་ཞོགས་ལ་སོགས་པ་རྣམས་ཁྱད་པར་ལས་ཕྱི་རོལ་དུ་གྱུར་པ་མ་ཡིན་པའི་ཕྱིར། ཁྱད་པར་རྣམས་ཐམས་ཅད་ཀྱང་བསྒྲུབ་པར་བྱ་བ་ཉིད་ཀྱི་ཕྱིར་དཔེ་མེད་དོ། །བསྒྲུབ་པར་བྱ་བ་ཁོ་ན་དཔེར་
[199b]
[199b.1]འཐད་པ་ནི་མ་ཡིན་པས་ཏེ། དེའི་ཕྱིར་ཆོས་ཅན་མ་གྲུབ་པའི་དཔེའི་སྐྱོན་ནོ། །འོ་ན་དུམ་ཞོགས་ལ་སོགས་པ་རྣམས་གྲུབ་པ་སྟེ། དེ་ཅི་ལྟར་ཆོས་ཅན་མ་གྲུབ་པ་ཡིན་ཞེ་ན། གྲུབ་པ་བདེན་མོད། གཏན་ཚིགས་ཀྱི་བསྒྲུབ་བྱ་ཉིད་དུ་ཉེ་བར་བླངས་ཏེ། གཞན་ཡོད་པ་མ་ཡིན་ནོ་ཞེས་པས་གསལ་
[199b.2]བ་ཁོ་ནར་ཆོས་ཅན་མ་གྲུབ་བོ། །ཅི་སྟེ་ཉེ་བར་མི་ལེན་ན། དེ་ལྟ་ན་ཡང་གཙོ་བོ་སྔོན་མ་ཅན་ཉིད་དུ་དུམ་ཞོགས་ལ་སོགས་པ་རྣམས་མི་འགྱུར་རོ་ཞེས་པས་ཡོན་ཏན་གསུམ་ཉིད་མེད་དོ། །དེ་བཞིན་དུ་ལྷག་མ་རྣམས་ལ་ཞེས་པ་ཚད་དང་འབྲས་བུ་དང་རྒྱུའི་དངོས་པོ་དང་། ནུས་པས་འཇུག་པ་རྣམས་དང་།
[199b.3]སྣ་ཚོགས་པའི་ངོ་བོའི་རྣམ་པར་ལྡན་པ་རྣམས་ལའོ། །དེ་ལ་ཡང་གལ་ཏེ་དངོས་སུ་གཙོ་བོ་ཡོད་པ་ཉིད་བསྒྲུབ་བྱ་ཡིན་ན། དེ་ཡང་དག་པ་མ་ཡིན་ཏེ། ཚད་མའི་ཡུལ་མི་ཤེས་པའི་ཕྱིར། སྤྱིའི་མཚན་ཉིད་ཀྱི་ཡུལ་ཅན་མ་ཡིན་པའི་རྗེས་སུ་དཔག་པ་ཡོད་པ་མ་ཡིན་པས་སོ་ཞེས་པ་འདི་ལྟ་བུ་ལ་
[199b.4]སོགས་པ་སྔར་གྱི་རྗེས་སུ་འབྲང་བས་གཏན་ཚིགས་དང་དཔེ་དང་ཉེ་བར་བསྡུ་བ་རྣམས་མ་འབྲེལ་བ་ཉིད་དུ་ཇི་ལྟར་རིགས་པར་བརྗོད་པར་བྱའོ། །རིགས་པའི་སྒོའི་ཕྱོགས་ཀྱིས་ནི་མི་རིགས་པ་ཉིད་དུའོ། །མ་གྲུབ་པ་དང་འགལ་བ་ཉིད་ཀྱི་ཕྱིར་རོ་ཞེས་པའི་སྐྱོན་ལས་སོ། །དེ་ལ་ཚད་ཅན་གྱི་རྣམ་
[199b.5]པར་ལྡན་པས་ནི་ཁྱད་པར་རྣམས་རྒྱུ་གཅིག་འདྲེས་པ་སྔོན་མ་ཅན་ཉིད་དུ་བསྒྲུབ་པར་བྱ་སྟེ། དཔེར་ན་མྱུ་གུ་དང་འདབ་མ་དང་སྡོང་བུ་ལ་སོགས་པ་རྣམས་ནི་ཡོངས་སུ་འགྱུར་བ་དང་ལྡན་པ་ཉིད་ཀྱི་ཕྱིར་འབྲུ་གཅིག་གི་རྒྱུ་ལ་འདྲེས་པ་ཡིན་པ་དང་། ཇི་ལྟར་མེར་མེར་པོ་དང་ནར་ནར་པོ་ལ་སོགས་པ་རྣམས་
[199b.6]ཁུ་བ་དང་། ཁྲག་ལ་ཡིན་པ་དེ་བཞིན་དུ་ཁྱད་པར་རྣམས་ཀྱང་རྒྱུ་གཅིག་ཏུ་འགའ་ཞིག་ལ་འདྲེས་པར་འབྱུང་བར་བྱ་ཞིང་དེ་ཡང་གཙོ་བོའོ། །དེས་ན་དེ་ཡོད་དོ་ཞེས་གྲག་གོ། །འདི་ཡང་མ་གྲུབ་པ་ཉིད་དེ། ཁྱད་པར་རྣམས་ཚད་མེད་པ་ཉིད་ཀྱི་ཕྱིར་རོ། །མིག་ལ་སོགས་པ་རིགས་ཀྱིས་
[199b.7]ཡོངས་སུ་ཟིན་པས་ཚད་ཅན་ནོ་ཞེ་ན་མ་ཡིན་ཏེ། རིགས་ནི་ཁྱད་པར་རྣམས་ལས་གཞན་མ་ཡིན་པ་ཉིད་དུ་ཁས་ལེན་པའི་ཕྱིར་དེ་དང་ལྡན་པ་མཐའ་ཡས་པའི་ཕྱིར་རོ། །ཁས་བླངས་ནས་ཞེས་པ་ལ་སོགས་པ་འགལ་བ་ཉིད་སྔ་མ་བཞིན་ནོ། །འབྲུ་ལ་སོགས་པ་རྣམས་གཅིག་ཉིད་གྲུབ་པ་མ་
[200a]
[200a.1]ཡིན་ཞིང་། མྱུ་གུ་ལ་སོགས་པ་རྣམས་དེ་ལ་འདྲེས་པ་མ་ཡིན་ཏེ། སྐྱེ་བ་ལས་སྔར་མ་གྲུབ་པ་ཉིད་ཀྱི་ཕྱིར་རོ། །ཡོད་ན་ཡང་སྐྱེ་བར་མི་འགྱུར་ཏེ། ད་ལྟར་བ་བཞིན་ནོ། །གཏན་ཚིགས་མཐུན་ཕྱོགས་ལ་ཡོད་པ་ཉིད་ཁས་བླངས་ནས་ཀྱང་མ་ངེས་པ་སྟེ། ས་བོན་ལ་
[200a.2]སོགས་པ་སྣ་ཚོགས་པ་སྔོན་མ་ཅན་འབྲུ་ལ་སོགས་པ་རྣམས་ཀྱི་འདྲེས་པ་མ་མཐོང་བའི་ཕྱིར་དང་། འབྲེལ་པ་མེད་པ་ལས་ཀྱང་ཁྱབ་པ་མི་འགྲུབ་པའི་ཕྱིར་རོ། །ནུས་པའི་འཇུག་པའི་རྣམ་པར་ལྡན་པས་ཁྱད་པར་རྣམས་ནུས་པ་གཅིག་སྔོན་མ་ཅན་ཉིད་དུ་སྒྲུབ་པར་བྱེད་དེ། རྒྱུ་རྣམས་ལ་འབྲས་
[200a.3]བུའི་ནུས་པ་ཡོད་ན། འབྲས་བུ་འཇུག་པ་མཐོང་སྟེ། དཔེར་ན་འོ་མ་ལ་ཞོའི་ནུས་པ་ཡོད་པ་ན་ཞོ་ལྟ་བུའོ། །ཆེན་པོ་ལ་སོགས་པ་རྣམས་ཀྱི་འཇུག་པ་ཡང་ཡོད་དེ། དེའི་ཕྱིར་འཇུག་པ་ལས་སྔར་གང་ལས་ཕྱིས་ཆེན་པོ་ལ་སོགས་པ་འབྱུང་བར་འགྱུར་བ་ནུས་པ་དེ་ཡོད་དོ། །དེ་ཡང་གཙོ་བོ་
[200a.4]ཡིན་ནོ་ལོ། །འདིར་གལ་ཏེ་འཇུག་པ་ནི་བྱ་བའི་མཚན་ཉིད་ཅན་དུ་འདོད་ན། དེ་བདེ་བར་གཤེགས་པ་རྣམས་ཀྱི་ངོར་མ་གྲུབ་སྟེ། དངོས་པོ་ཐམས་ཅད་སྐད་ཅིག་པ་ཉིད་དུ་ཁས་ལེན་པའི་ཕྱིར་རོ། །ཅི་སྟེ་སྐྱེ་བ་ནི་ཐོག་མཐའ་དང་ལྡན་པ་ཉིད་དམ། སྐྱེ་བ་དང་འཇིག་པའི་མཚན་ཉིད་ཅན་ཡིན་
[200a.5]ན། དེ་ཡང་ཇི་འདྲ་བ་ཕ་རོལ་པོ་མངོན་པར་འདོད་པ་དེ་འདྲ་བར་མ་གྲུབ་པ་ཁོ་ན་སྟེ། ཕ་རོལ་པོ་ནི་སྔར་ཡོད་པ་ཁོ་ན་གསལ་བར་འགྱུར་བ་སྐྱེ་བར་འདོད་ཅིང་། རང་གི་ངོ་བོ་ལས་མ་ཉམས་པའི་བདག་ཉིད་ཁོ་ནའི་མི་གསལ་བར་འགྱུར་བ་ནི་འཇིག་པར་རོ། །འདི་ལྟ་བུའི་རྣམ་པའི་སྐྱེ་
[200a.6]བ་དང་འཇིག་པ་དག་བདེ་བར་གཤེགས་པ་རྣམས་ཀྱིས་ཁས་ལེན་པ་ཡང་མ་ཡིན་གྱི། འོ་ན་ཅི་ཞེ་ན་མ་བྱུང་བ་འབྱུང་བ་དང་རང་གི་ངོ་བོ་ཉམས་པའི་མཚན་ཉིད་ཅན་དག་གོ། །འོ་ན་བརྗོད་པར་འདོད་པའི་ཁྱད་པར་ཅན་གྱི་སྤྱི་གྲུབ་པ་ཉིད་མ་ཡིན་ནམ་དེ་གྲུབ་པ་ན་ཁྱད་པར་རྣམ་པར་བརྟག་པས་མ་གྲུབ་
[200a.7]པར་རྩོད་པ་ནི་ལྟག་ཆོད་ཀྱི་ལན་ཁོ་ནའོ་ཞེ་ན། གལ་ཏེ་གཉིས་ཀ་ཡང་འདོད་པའི་དངོས་པོའི་སྤྱི་ཅུང་ཟད་པ། གང་གི་རྒྱུ་ཅན་སྐྱེ་བ་དང་མི་རྟག་པའི་སྒྲ་དག་ཡིན་པ་བྱས་པ་ཉིད་ལ་སོགས་པ་ལྟ་བུ་ཡོད་ན་ལྟག་ཆོད་ཀྱི་ལན་དུ་འགྱུར་མོད། དེ་ཡང་མེད་དོ། །གསལ་བར་འགྱུར་བ་དང་
[200b]
[200b.1]མི་གསལ་བར་འགྱུར་བ་དག་ཀྱང་སྔ་མ་ཕྱིས་གནས་པའི་རང་གི་ངོ་བོ་ཅན་ལ་རིགས་པ་མ་ཡིན་ཏེ། དབུས་ཀྱི་གནས་སྐབས་བཞིན་ཞེས་པས་འཇུག་པ་མ་གྲུབ་བོ། །ཁས་བླངས་ནས་ཀྱང་འགལ་བ་ཉིད་དེ། ཆོས་གང་རྣམས་ཀྱིས་ཁྱད་པར་དུ་བྱས་པའི་གཙོ་བོ་བསྒྲུབ་བྱ་ཉིད་དུ་མངོན་པར་འདོད་པ་
[200b.2]དེ་དང་མཚན་ཉིད་མི་མཐུན་པ་སྔ་མ་ཁོ་ནའི་ཞོ་ལ་སོགས་པ་རྣམས་ལ་འཇུག་པ་མཐོང་བའི་ཕྱིར་རོ། །གཏན་ཚིགས་མཐུན་ཕྱོགས་ལ་ཡོད་པ་ཉིད་དུ་ཁས་བླངས་ནས་ཀྱང་མ་ངེས་པ་ཉིད་དེ། ནུས་པ་སྔོན་མ་ཅན་སྣ་ཚོགས་པའི་དངོས་པོ་རྣམས་ལ་འཇུག་པ་མཐོང་བའི་ཕྱིར་རོ། །འབྲས་བུ་དང་
[200b.3]རྒྱུའི་དངོས་པོས་ཁྱད་པར་རྣམས་བྱེད་པ་པོ་གཅིག་སྔོན་མ་ཅན་ཉིད་དུ་བསྒྲུབ་པར་བྱ་བ་ནི། དཔེར་ན་མལ་ཆ་དང་སྟན་དང་ཤིང་རྟ་ལ་སོགས་པ་རྣམས་འབྲས་བུ་དང་རྒྱུའི་དངོས་པོ་ཉིད་ཀྱི་ཕྱིར་བྱེད་པ་པོ་གཅིག་སྔོན་མ་ཅན་ཉིད་ཡིན་པ་དེ་ལྟར་ཆེན་པོ་ལ་སོགས་པ་རྣམས་ཀྱང་ངོ་། །གང་
[200b.4]བྱེད་པ་པོར་གྱུར་པའི་དངོས་པོ་གཅིག་པོ་དེ་གཙོ་བོའོ་ཞེ་ལོ། །འདི་ཡང་དེ་མ་ཐག་ཏུ་བརྗོད་པའི་ཚུལ་གྱིས་མ་གྲུབ་པ་ཉིད་དང་འགལ་བ་ཉིད་བརྗོད་པར་བྱའོ། །མ་ངེས་པ་ཉིད་དེ། བྱེད་པ་པོ་གཅིག་མ་ཡིན་པ་མལ་ཆ་དང་སྟན་ལ་སོགས་པ་རྣམས་ལ་ཡང་མཐོང་བའི་ཕྱིར་རོ། །སྣ་ཚོགས་
[200b.5]པའི་ངོ་བོ་ཉིད་ཀྱི་རྣམ་པར་ལྡན་པས། ཁྱད་པར་རྣམས་རྒྱུ་གཅིག་པ་རྣམ་པར་དབྱེར་མེད་པ་སྔོན་མ་ཅན་ཉིད་དུ་བསྒྲུབ་པར་བྱ་བ་ནི། ཇི་ལྟར་ཞོ་དང་སྤྲིས་མ་དང་དར་བ་ལ་སོགས་པ་སྣ་ཚོགས་པའི་ངོ་བོ་རྣམས་ནི་བྱེད་པ་པོ་འོ་མ་གཅིག་ལ་སྔར་མ་བྲལ་བར་གྱུར་པ་རྣམས་ཕྱིས་རྣམ་པར་དབྱེ་བར་
[200b.6]འགྱུར་བ་སྟེ། དེ་ལྟར་ཆེན་པོ་ལ་སོགས་པ་རྣམས་ཀྱང་ངོ་། །གང་དུ་འདི་རྣམས་སྔར་རྣམ་པར་དབྱེ་བ་མེད་པར་གྱུར་པ་དེ་གཙོ་བོའོ་ཞེ་ལོ། །འདི་ལ་ཡང་འགལ་བ་དང་མ་ངེས་པ་ཉིད་དག །སྔ་མའི་རྗེས་སུ་འབྲང་བས་བརྗོད་པར་བྱའོ། །ཡོངས་སུ་བའི་ལྷག་མ་ལས་བསལ་ཏེ་འོངས་པས་
[200b.7]གྲུབ་པ་ཞེས་པའོ། །འདི་ནི་བསལ་ཏེ་འོངས་པའི་མཚན་ཉིད་དོ། །འདིའི་བཤད་པ་ནི། ཇི་སྐད་དུ་འདི་ནི་འདི་ལས་རྣམ་པ་གཞན་དུ་སྲིད་པ་མ་ཡིན་ཏེ། འདི་ཡང་ཡོད་དོ། །དེའི་ཕྱིར་ཡོངས་སུ་བའི་ལྷག་མ་ལས་འདི་ནི་གཏན་ཚིགས་ཁོ་ནའོ་ཞེས་ངེས་པར་གཟུང་བའི་འབྲས་བུ་གྲུབ་ན་ཡང་
[201a]
[201a.1]སྟོན་པ་དེའི་ཚེ་བསལ་ཏེ་འོངས་པ་ཞེས་པར་འགྱུར་རོ་ཞེས་སོ། །གཞན་གྱི་ཕྱོགས་བཀག་པས་ཞེས་པ་ལ་སོགས་པས་བསལ་ཏེ་འོངས་པའི་མཚན་ཉིད་ཀྱི་དོན་བསྡུས་ནས་སྨྲའོ། །ལོའི་སྒྲ་ནི་མི་འདོད་པ་བསལ་བར་བྱེད་པའི་དོན་ཅན་ནོ། །དགག་པའི་ཐབས་གཉིས་ཏེ་ཞེས་
[201a.2]པ། ལན་གཉིས་དག་གོ་ཞེས་པའི་དོན་ཏོ། །དཔེ་བརྗོད་ལ་དཔེར་རབ་ཏུ་གྲགས་སོ། །དེ་གཅོད་པའི་ཆེད་དུ་སྨྲས་པ། འཇིག་རྟེན་དཔེ་ཞེས་པའོ། །གང་འཇིག་རྟེན་ལ་རབ་ཏུ་གྲགས་པ་དང་འགལ་བའི་ཚིག་དེ་དཔེ་དང་འགལ་བ་ཡིན་ལོ། །དེ་དེ་དང་འགལ་བ་བརྗོད་པ་ཁོ་ནས་སེལ་ན་ནི་
[201a.3]འཇིག་རྟེན་ན་དཔེ་ཞེས་པའི་རྗེས་སུ་དཔག་པའོ་ཞེས་གཞན་རྣམས་སོ། །དོན་སྣ་ཚོགས་བལྟ་བར་བྱ་ཞིང་སྣང་བར་བྱའོ་ཞེས་པ་འཇིག་རྟེན་ནོ། །མཐའ་ནི་དངོས་པོ་ཇི་ལྟ་བ་བཞིན་གྱི་བདག་ཉིད་དེ། མཐའ་འདིར་རམ་འདིས་མཐོང་ངོ་ཞེས་པ་དཔེའོ། །བསྟན་བཅོས་ཚད་མ་ཉིད་ནི་ཁས་ལེན་པ་
[201a.4]སྟེ། དེ་དང་འགལ་བ་བརྗོད་པ་གང་ཡིན་པ་དེ་ཁས་བླངས་པ་ཉམས་པའོ། །གཞན་གྱི་ཕྱོགས་བཀག་པ་ཙམ་གྱིས་རང་གི་ཕྱོགས་འགྲུབ་པ་ནི་མཐོང་བ་མ་ཡིན་ནོ་ཞེས་པ། རང་གི་ཕྱོགས་ཀྱི་སྒྲུབ་བྱེད་མེད་པར་ཞེས་པ་ཙམ་གྱི་སྒྲས་གསལ་བར་བྱེད་དོ། །ཅི་ལྟར་མཐོང་བ་མེད་ཅེ་ན་གསུངས་
[201a.5]པ། དཔེར་ན་ཞེས་པ་ལ་སོགས་པའོ། །འོ་ན་སྔར་རྟག་པ་ཉིད་དགག་པ་མ་གཏོགས་པར་མི་རྟག་པ་ཉིད་གཞན་ཡོད་པ་མ་ཡིན་ནོ་ཞེས་བཤད་པ་མ་ཡིན་ནམ། དེ་ཅི་ལྟར་མི་རྟག་པ་ཉིད་འགྲུབ་པ་མ་ཡིན་ཞེ་ན། འདི་ནི་གཏམ་སྟེ། གང་གི་ཕྱིར་དེར་ནི་མ་ཡིན་དགག་ཁོ་ན་ལ་བརྟེན་པ་སྟེ། དེས་
[201a.6]ན་རྟག་པ་ཉིད་ལས་བཟློག་པའི་ཆོས་གཞན་ཁོ་ན་མི་རྟག་པ་ཉིད་དེ། བྲམ་ཟེ་མ་ཡིན་པ་ལ་སོགས་པ་བཞིན་ཡིན་གྱི། རྟག་པ་ཉིད་བཀག་པ་ཙམ་ནི་མ་ཡིན་ནོ། །གཞན་དུ་ན་རི་བོང་གི་རྭ་ལ་སོགས་པ་རྣམས་ཀྱང་མི་རྟག་པ་ཉིད་དུ་ཐལ་བར་འགྱུར་རོ། །དེ་ལས་ཀྱང་མི་རྟག་པ་ཉིད་འདུས་
[201a.7]བྱས་ཀྱི་མཚན་ཉིད་དུ་མི་འགྱུར་ཏེ། འདུས་མ་བྱས་རྣམས་ལ་ཡང་ཡོད་པའི་ཕྱིར་རོ། །གནས་སྐབས་དེ་ཡང་དངོས་པོའི་རྐྱེན་གྱིས་བརྗོད་པར་བྱའོ་ཞེས་པས་འགལ་བའོ། །གང་ཡང་རྟག་པ་ཉིད་དགག་པ་མ་གཏོགས་པར་ཞེས་པ་ལ་སོགས་པ་བཤད་པ་འདི་ནི། དེས་དབེན་པའི་སྤྱི་ལ་དགོངས་
[201b]
[201b.1]ནས་ཡིན་ནོ། །དེ་ལྟར་ན་སྒྲ་མི་རྟག་པ་འགྲུབ་པ་ནི་མ་ཡིན་ཏེ་ཞེས་པ། སྒྲུབ་བྱེད་ཀྱི་སྐྱོན་བརྗོད་པས་གཞན་གྱི་ཕྱོགས་བཀག་པ་ཙམ་གྱིས་སོ། །དེ་ལ་ཡང་མ་ངེས་པའི་ཕྱིར་རོ་ཞེས་པ་ངེས་བྱད་མེད་པའི་ཕྱིར་རོ་ཞེས་པའི་དོན་ཏོ། །འོ་ན་དགག་པ་ཙམ་ལས་ཀྱང་། ཆུ་ཀླུང་ཁེངས་པ་ནི་ཆར་བབ་པ་སྔོན་མ་
[201b.2]ཅན་ཉིད་གྲུབ་པ་མཐོང་ངོ་ཞེ་ན་གསུངས་པ། གང་ཆུ་ཀླུང་ཁེངས་པ་ནི་ཞེས་པ་ལ་སོགས་པ་སྟེ། དགག་པ་ཙམ་ལས་དེ་གྲུབ་པ་མ་ཡིན་གྱི། འོ་ན་ཅི་ཞེ་ན་ཁྱད་པར་ཅན་གྱི་ཆུ་ཀླུང་ཁེངས་པ་ལས་ཏེ། ཁ་བ་ཞུ་བ་ལ་སོགས་པ་བཀག་པས་ཏེ་དཀར་བ་ཉིད་ལ་སོགས་པ་མེད་པས་ཆུ་ཀླུང་ཁེངས་པ་ཁྱད་པར་དུ་
[201b.3]བྱའོ། །གང་འདྲ་བའི་ཆུ་ཀླུང་ཁེངས་པ་ཆར་བབ་པ་མེད་ན་མི་འབྱུང་བར་མཐོང་བ། འདི་ལྟ་སྟེ་ལྦུ་བ་ཅན་དང་གྲང་བ་དང་རྙོག་པ་ཅན་དང་རྩྭ་དང་ལོ་མ་ལ་སོགས་པ་འདྲེས་པའི་ཆུ་ཅན་ཏེ། འདི་ལྟ་བུ་ནི་ཁ་བ་ཞུ་བ་ལ་མེད་ལ། ཆུ་ལོན་བཅིངས་པ་ལ་མེད་ཅིང་། སྦྲུལ་རྩེ་བ་ལ་མཐོང་བ་མེད་དེ།
[201b.4]དེ་རྣམས་ལ་རྣམ་པ་འདི་ལྟ་བུ་མི་སྲིད་པའི་ཕྱིར་རོ་ཞེས་པའོ། །དགག་པ་ཙམ་གྱིས་ནི་ཞེས་བྱ་བ་ལ་སོགས་པ་སྟེ། སོགས་པ་སྨོས་པས་ལྷ་རྩེ་བ་སྔོན་མ་ཅན་ཡང་ངོ་། །ཅི་སྟེ་དེ་བཀག་པས་ཀྱང་ཆར་བབ་པ་སྔོན་མ་ཅན་ཉིད་བསྒྲུབ་ན། ལྷས་བྱིན་རྒོད་པ་སྔོན་མ་ཅན་ཡང་འགྱུར་རོ། །
[201b.5]འདི་ཅི་ལས་ཤེ་ན། ཁ་བ་ཞུ་བ་ལ་སོགས་པ་བཀག་པས་ཆར་བབ་པ་སྔོན་མ་ཅན་ཁོ་ན་སྟེ། ལྷས་བྱིན་རྒོད་པ་སྔོན་མ་ཅན་ཡང་མ་ཡིན་ནོ། །ཅི་སྟེ་ལྷས་བྱིན་རྒོད་པ་སྔོན་མ་ཅན་ཆུ་ཀླུང་གང་བ་མ་མཐོང་བའི་ཕྱིར། དེ་སྔོན་མ་ཅན་ཉིད་རྗེས་སུ་དཔོག་པ་མེད་ན། འོ་ན་བཀག་པ་ཙམ་ལས་རང་གི་
[201b.6]ཕྱོགས་འགྲུབ་པ་མ་ཡིན་གྱི། འོ་ན་ཅི་ཞེ་ན། ཁྱད་པར་ཅན་ཆར་བབ་པ་མེད་ན་མི་འབྱུང་བའི་ཆུ་ཀླུང་གང་བ་ལས་སོ། །དེ་ནི་དེའི་ཁྱད་པར་ཅན་ཉིད་དུ་དགག་པས་ཉེ་བར་བསྟན་པར་བྱའོ་ཞེས་པ་འདི་ཙམ་ནི་དགག་པའི་ཉེ་བར་མཁོ་བའོ། །དགག་པ་གཏན་ཚིགས་ཅན་མིན་ཞེས་པ་གཏན་
[201b.7]ཚིགས་གཉིས་པ་ཅན་ཁོ་ན་མ་ཡིན་ནོ་ཞེས་པའི་དོན་ཏོ། །ངེས་པར་གཟུང་བས་ནི་འདིར་དགག་པར་བྱ་སྟེ། རྒྱུ་གཉིས་ཅན་ཉིད་ནི་མ་ཡིན་ནོ། །དེ་ལྟར་ནི་གསུངས་པ། དགག་པ་ནི་གཉིས་དག་ཁོ་ནས་མ་ཡིན་ཞེས་པ་ལ་སོགས་པའོ། །འཇིག་རྟེན་གྱི་སྒྲས་རྗེས་སུ་དཔག་པ་བརྗོད་ན་ནི་དེ་དང་
[202a]
[202a.1]འགལ་བ་ཡོངས་སུ་གཟུང་བ་ཙམ་དུ་འགྱུར་གྱི། དགག་པའི་ཐབས་མཐའ་དག་རྣམས་ཡོངས་སུ་གཟུང་བ་ནི་མ་ཡིན་ཏེ། དེ་རྣམས་རྗེས་སུ་དཔག་པ་དང་འགལ་བ་ལས་ཐ་དད་པའི་ཕྱིར་རོ། །དེ་ལས་ཀྱང་དེ་ཁོ་ན་སྐྱོན་ཡིན་ཏེ། དགག་པ་རྒྱུ་གཉིས་ཅན་མ་ཡིན་ཞེས་
[202a.2]པའོ། །ཅི་སྟེ་དགག་པའི་ཐབས་མཐའ་དག་དཔེའི་སྒྲས་ཡོངས་སུ་གཟུང་བར་བྱ་ན། ཁས་བླངས་པ་ཉམས་པའི་ཚིག་དོན་མེད་པར་འགྱུར་ཏེ། དེ་ཡང་དེའི་ནང་དུ་འདུས་པའི་ཕྱིར་རོ། །སྦྱོར་བ་གཉིས་ཀྱང་རིགས་མ་ཡིན། །ཞེས་པ་བས་རྣམ་པ་གཉིས་ཀས་ཀྱང་མི་རིགས་སོ་ཞེས་པའི་
[202a.3]དོན་ཏོ། །གལ་ཏེ་གསལ་བ་མེད་པ་ལས་སྐྱེ་བ་ཞེས་པ། མེད་པ་ལས་ཏེ་ཡོད་པ་མ་ཡིན་པའི་རྒྱུ་ལས་ཞེས་པའི་དོན་ཏོ། །སྐྱེ་གནས་མེད་པའི་ཕྱིར་ཞེས་པ་རྒྱུ་མེད་པའི་ཕྱིར་རོ་ཞེས་པའི་དོན་ཏོ། །འདིར་འདྲེ་བར་བྱེད་དེ་ཁྱད་པར་རྣམས་ཐམས་ཅད་ནུས་པའི་བདག་ཉིད་ཀྱིས་འདྲེ་བར་འགྱུར་རོ་
[202a.4]ཞེས་པ་སྐྱེ་གནས་ཏེ་གཙོ་བོ་ནུས་པའི་ཁྱད་པར་མཐའ་དག་གི་རྗེས་སུ་སོང་བ་སྟེ། ཁྱད་པར་ལ་རྗེས་སུ་འགྲོ་བ་བཟློག་པ་ནི་ཐ་དད་པར་ཐལ་བར་འགྱུར་བ་ལས་ཏེ་རྗེས་སུ་འགྲོ་བ་མེད་པར་ཐལ་བར་འགྱུར་བ་ལས་ཞེས་པའི་དོན་ཏོ། །འདི་ནི་ཞེས་པ་ལ་སོགས་པས་བསམ་པ་རྣམ་པ་གཉིས་པོ་དེ་
[202a.5]སྟོན་ཏོ། །གང་སྐྱེ་གནས་མེད་པའི་ཕྱིར་ཐ་དད་པར་ཐལ་བར་འགྱུར་རོ་ཞེས་པ་འདི་བརྗོད་པར་བྱ་བ་སྟེ། སྐྱེ་གནས་མེད་པ་སྔོན་མ་ཅན་རྣམས་ཐ་དད་པར་དམིགས་ནས་ཏེ། དཔེར་ན་ནམ་མཁའ་ལ་སོགས་པ་རྟག་པ་རྣམས་མ་བྱས་པ་ཁོ་ནར་ཉེ་བར་དམིགས་ནས། སྒྲ་རྟག་པ་ཉིད་དུ་ཁས་ལེན་
[202a.6]ན་མ་བྱས་པ་ཉིད་དུ་ཐལ་བར་འགྱུར་བར་བྱེད་དེ། གལ་ཏེ་སྒྲ་རྟག་པར་ཁས་ལེན་ན་མ་བྱས་པ་ཡང་འཐོབ་བོ་ཞེས་པ་དེ་བཞིན་དུ་འདིར་ཡང་སྐྱེ་གནས་མེད་པ་སྔོན་མ་ཅན་རྣམས་ཐ་དད་པར་ཉེ་བར་དམིགས་ནས། སྐྱེ་གནས་མེད་པ་སྔོན་མ་ཅན་ཉིད་དུ་ཁས་ལེན་ན་ཐ་དད་དེ་སྤྱི་མེད་པའི་ཁྱད་པར་
[202a.7]ཙམ་འཐོབ་བོ་ཞེས་པའོ། །རིགས་གཅིག་རྗེས་སུ་འགྲོ་བ་ཞེས་པ་ལ་སོགས་པ་ལ། ཇི་ལྟར་རྟག་པ་ནམ་མཁའ་ལ་སོགས་པ་རྣམས་ལ་བྱས་པ་ཉིད་མ་མཐོང་ནས། སྒྲ་རྟག་པར་ཁས་ལེན་ན་བྱས་པ་ཉིད་ལས་བཟློག་པས་མ་བྱས་པ་ཉིད་དུ་ཐལ་བར་འགྱུར་བ་སྒྲ་ལས་བྱེད་དེ། དེ་རྣམས་
[202b]
[202b.1]མ་བྱས་པར་འཐོབ་བོ་ཞེས་པ་དེ་ལྟར་འདིར་ཡང་སྐྱེ་གནས་སྔོན་མ་ཅན་མ་ཡིན་པ་རྣམས་རྗེས་སུ་འགྲོ་བ་སྟེ་རིགས་གཅིག་རྗེས་སུ་འབྲང་བར་མ་མཐོང་ནས། སྐྱེ་གནས་སྔོན་མ་ཅན་མ་ཡིན་པ་ཉིད་དུ་ཁས་ལེན་ན་ཐ་དད་དུ་ཐལ་བར་འགྱུར་བར་བྱེད་དེ། དེ་རྣམས་ཐ་དད་པར་འཐོབ་བོ་ཞེས་
[202b.2]པའོ། །དེ་ལ་རེ་ཞིག་ཅེས་པ་ལ་སོགས་པས། སྐྱེ་གནས་སྔོན་མ་ཅན་མ་ཡིན་པ་རྣམས་མེད་པ་ཁོ་ནའི་ཕྱིར། དེ་མཐོང་བའི་སྒོས་ཐ་དད་དུ་ཐལ་བར་འགྱུར་བ་མི་འཐད་པར་སྟོན་ཏོ། །འོ་ན་སྐྱེ་གནས་སྔོན་མ་ཅན་མ་ཡིན་པར་སྐྱེས་བུ་རྣམས་འདོད་དེ། དེ་རྣམས་ཀྱང་ཐ་དད་པའོ་ཞེ་ན།
[202b.3]འདི་ཡོད་པ་མིན་ཏེ། སྐྱེ་གནས་སྔོན་མ་ཅན་དུ་འགྱུར་བ་མ་ཡིན་ནོ་ཞེས་པ་སྐྱེ་གནས་སྔོན་མ་ཅན་མ་ཡིན་པ་མ་ཡིན་གྱི། འོ་ན་ཅི་ཞེ་ན། སྐྱེ་གནས་མེད་པ་འདི་རྣམས་ཀྱི་སྔོན་དུའོ་ཞེས་པས་སྐྱེ་གནས་མེད་པ་སྔོན་མ་ཅན་རྣམས་སོ། །སྐྱེས་བུ་ནི་རྟག་པ་ཉིད་ཀྱི་ཕྱིར་སྐྱེ་གནས་སྔ་མ་མ་ཡིན་ཞིང་། སྐྱེ་གནས་
[202b.4]མེད་པས་སྔོན་ཅན་མིན། །ཞེས་པས་འདི་བརྩད་པར་བྱ་བ་མ་ཡིན་ནོ། །མ་ཡིན་ཞེས་པ་ལ་སོགས་པས་ནི་མ་མཐོང་བའི་སྒོ་ནས་བཟློག་པའི་ཐལ་བར་འགྱུར་བ་མི་སྲིད་པར་གསུངས་སོ། །མ་མཐོང་བ་ཙམ་གྱིས་ཞེས་པའི་ཙམ་གྱི་སྒྲ་ནི། སྐྱེ་གནས་མེད་པས་སྔོན་མ་ཅན་རྣམས་ལ་རྗེས་སུ་འགྲོ་བ་མ་
[202b.5]མཐོང་བ་དགག་པའི་དོན་ཏོ། །མ་མཐོང་བ་ཙམ་གྱིས་བཟློག་པ་སྒྲོ་འདོགས་པ་རིགས་པ་མ་ཡིན་ཏེ། ཐ་དད་པ་ཡང་མ་མཐོང་བའི་ཕྱིར་ན། དེ་ལས་བཟློག་པ་སྒྲོ་འདོགས་པར་ཐལ་བར་འགྱུར་ན་མི་རུང་ངོ་། །ཇི་ལྟར་སྐྱེ་གནས་མེད་པ་སྔོན་མ་ཅན་རྣམས་ལ་རྗེས་སུ་འགྲོ་བ་མ་མཐོང་བ་དག་དེ་
[202b.6]ལས་བཟློག་པས་ཐ་དད་པར་ཐལ་བར་འགྱུར་བ་དེ་བཞིན་དུ་ཐ་དད་པར་ཡང་མ་མཐོང་བ་ཁོ་ནའོ་ཞེས་པ་དེ་ལས་བཟློག་པས་རྗེས་སུ་འགྲོ་བར་ཐལ་བར་འགྱུར་ཏེ། གཉི་ག་ལྟར་ཡང་མ་མཐོང་བ་མཚུངས་པའི་ཕྱིར་རོ། །དེ་ལས་ཀྱང་ཁས་བླངས་པ་ཉམས་པ་སྟེ། རིགས་གཅིག་རྗེས་སུ་འགྲོ་བ་
[202b.7]མངོན་པར་འདོད་པ་ཉིད་ཀྱི་ཕྱིར་རོ། །ཉེས་པ་འདི་མེད་དེ་ཞེས་པ་ཁས་བླངས་པ་ཉམས་པ་མ་ཡིན་ཏེ། རིགས་གཅིག་རྗེས་སུ་འགྲོ་བར་ཐལ་བར་འགྱུར་བ་ཡང་འདོད་པའི་ཕྱིར། དེ་འདོད་པ་ཉིད་དུ་སྟོན་པ་སྨྲས་པ་ཞེས་པ་ལ་སོགས་པའོ། །བསྟན་བཅོས་སུ་བཤད་པ་ཁོ་ན་སྟེ། སྐྱེ་གནས་
[203a]
[203a.1]མེད་པའི་ཕྱིར་གཅིག་ཉིད་དུ་ཐལ་བར་འགྱུར་རོ་ཞེས་སོ། །ཁྱད་པར་ནི་སྤྱི་སྔོན་མ་ཅན་ཉིད་ཀྱི་ཕྱིར་ཏེ། འཇིག་རྟེན་ན་ཁྱད་པར་རྣམས་ནི་སྤྱི་སྔོན་མ་ཅན་རྣམས་རིགས་གཅིག་པ་ཅན་དུ་མཐོང་སྟེ། འདི་ལྟ་སྟེ་འོ་མ་སྔོན་མ་ཅན་དུ་ཞོ་དང་སྤྲིས་མ་དང་དར་བ་དང་མར་ལ་སོགས་པ་
[203a.2]རྣམས་འགྱུར་ཞིང་། མེད་ན་འབྱུང་བ་ནི་མ་ཡིན་ནོ། །གང་སྔོན་མ་ཅན་གསལ་བའི་ཁྱད་པར་རྣམས་སུ་འགྱུར་བ་འགའ་ཞིག་ཡོད་དེ། དེའི་ཕྱིར་སྤྱི་ཙམ་འདི་གསལ་བའི་ནི་ཁྱད་པར་མེད་པའོ་ཞེས་པ་འདིར་ཐལ་བར་འགྱུར་རོ་ཞེས་པའོ། །འདི་རིགས་པར་ནི་མ་བརྗོད་དོ་ཞེས་པ། འདིར་མི་
[203a.3]རིགས་པ་ཉིད་ལ་གཏན་ཚིགས་གསུངས་པ། མ་ཡིན་ཞེས་པ་ལ་སོགས་པའོ། །འདི་སྐད་བཤད་པར་འགྱུར་ཏེ། ཐལ་བར་འགྱུར་བར་ཞེས་བྱ་བ་ནི་མི་འདོད་པ་འབེབས་པ་ཡིན་གྱི། འདོད་པ་ཁོ་ན་ནི་མ་ཡིན་ཏེ། སྒྲ་མི་རྟག་པར་སྨྲ་བ་ལ་བྱས་པ་ཉིད་དུ་ཐལ་བར་འགྱུར་བར་མི་འོས་སོ། །རྗེས་
[203a.4]སུ་འགྲོ་བ་ཁྱད་པར་རྣམས་ལ་འདོད་པ་མེད་པ་ཡང་མ་ཡིན་ནོ་ཞེས་པའོ། །གལ་ཏེ་མཐའ་གཅིག་ཏུ་དགག་པ་ཡིན་ནོ་ཞེ་ན་ཞེས་པ། དེ་ལྟར་འགྱུར་མོད་ཁྱད་པར་རྣམས་ལ་རིགས་གཅིག་རྗེས་སུ་འགྲོ་བ་མེད་པ་ནི་མ་ཡིན་གྱི། རིགས་གཅིག་རྗེས་སུ་འགྲོ་བ་ཁོ་ན་དགག་སྟེ། བདེ་བ་ལ་
[203a.5]སོགས་པའི་རིགས་རྗེས་སུ་འགྲོ་བ་ཡོད་ན། ཐ་དད་པ་ཁྱད་པར་ལ་ཡང་འདོད་པ་ཉིད་ཀྱི་ཕྱིར་རོ། །མ་ཡིན་ཏེ་དེ་ལ་ཡང་ཞེས་པ་ལ་སོགས་པ་སྟེ། གལ་ཏེ་མ་མཐོང་བ་ཙམ་གྱིས་བཟློག་པ་སྒྲོ་འདོགས་པར་བྱེད་ན། གཅིག་ཉིད་དུ་མཐའ་གཅིག་ཏུ་ངེས་པར་ནི་རྣམ་པར་ལྡན་པ་སྐྱེ་གནས་མེད་པ་
[203a.6]སྔོན་མ་ཅན་རྣམས་ལ་ཡང་མ་མཐོང་ངོ་ཞེས་པས་བཟློག་པས། སྤྱི་དང་ཁྱད་པར་དང་ལྡན་པ་ཉིད་འཐོབ་བོ་ཞེས་པ་འདི་ལྟ་ན་ཡང་མི་འདོད་པ་ལྟུང་བ་ལས་མི་གྲོལ་ལོ། །རྗེས་སུ་འགྲོ་ན་སྣ་ཚོགས་པའི་ངོ་བོ་དག་གི་ཞེས་པ་ལ་སོགས་པ་ཉེས་པ་གཞན་འགོད་དོ། །ཅི་ལྟར་ཞེ་ན་དེའི་ཕྱིར་
[203a.7]གསུངས་པ། དེ་ལ་མིན་ཞེས་པ་ལ་སོགས་པ་སྟེ། དེ་ལ་ཞེས་པ་རྗེས་སུ་འགྲོ་བ་ལ་དང་སྣ་ཚོགས་པའི་ངོ་བོ་ཉིད་ལའོ། །གང་གི་ཚེ་ཡང་རྗེས་སུ་འགྲོ་བ་མཐའ་གཅིག་པ་འདོད་པ་དེའི་ཚེ་སྣ་ཚོགས་པའི་ངོ་བོའི་རྣམ་པར་ལྡན་པ་ལས་རྗེས་སུ་འགྲོ་བ་ཐ་དད་པར་འགྱུར་ཞིང་། གང་གི་
[203b]
[203b.1]ཚེ་སྣ་ཚོགས་པའི་ངོ་བོ་ཉིད་མཐའ་གཅིག་པའི་འདོད་པ་དེའི་ཚེ་རྗེས་སུ་འགྲོ་བའི་རྣམ་པར་ལྡན་པ་ལས་སྣ་ཚོགས་པའི་ངོ་བོའི་རྣམ་པར་ལྡན་པ་ཐ་དད་དེ། ཕན་ཚུན་ཤིན་ཏུ་མཚན་ཉིད་མི་མཐུན་པའི་ཕྱིར་རོ། །གང་གི་ཚེ་ཁྱད་པར་རྣམས་ལ་རྗེས་སུ་འགྲོ་བ་མཐའ་གཅིག་པ་མེད་ཅིང་། སྣ་ཚོགས་
[203b.2]པའི་ངོ་བོ་ཉིད་མཐའ་གཅིག་པ་མེད་པ་དེའི་ཚེ། དེ་དག་ཐ་དད་པ་མི་རིགས་པ་ཁོ་ནའོ་ཞེས་པས། སྤྱི་དང་ཁྱད་པར་གྱི་མཚན་ཉིད་ཅན་རྣམ་པར་ལྡན་པ་གཅིག་ཁོ་ནར་ཐལ་བར་འགྱུར་རོ། །འོ་ན་ཅི་ལྟར་ན་བཟློག་པའི་ཐལ་བར་འགྱུར་བ་རིགས་ཤེ་ན་གསུངས་པ། འགྱུར་ཏེ་ཞེས་པ་ལ་སོགས་པ།
[203b.3]གང་ཐ་མི་དད་པ་དེ་རྣམས་སྐྱེ་གནས་མེད་པ་སྔོན་མ་ཅན་མ་ཡིན་གྱི། འོ་ན་ཅི་ཞེ་ན་རྒྱུ་གཅིག་སྔོན་མ་ཅན་རྣམས་སོ་ཞེས་པ་གང་འདི་མཐའ་གཅིག་པའི་ངེས་པ་སྟེ། དེ་ལས་བཟློག་ན་གཅིག་སྔོན་མ་ཅན་ཉིད་མེད་ན་བསལ་བ་ནི་ཐ་དད་པར་ཐལ་བར་འགྱུར་བར་རིགས་ཏེ། དཔེར་བྱས་པ་རྣམས་མི་
[203b.4]རྟག་པ་ཉིད་དུ་མཐའ་གཅིག་པའི་ཕྱིར། སྒྲ་ནི་མི་རྟག་པ་ཉིད་ལས་བཟློག་པ་ཡིན་ན། མ་བྱས་པ་ཉིད་དུ་ཐལ་བར་འགྱུར་རོ་ཞེས་པ་ལྟ་བུའོ། །དེ་ལྟར་ཡང་ཡོངས་སུ་ལྷག་པ་བཟློག་པ་ལ་ཞེས་པ། ཇི་ལྟ་བ་བཞིན་ཉིད་དུ་བརྗོད་པ་མ་ཡིན་ནོ། །འདི་མེད་པ་ལས་སྐྱེ་བ་མིན་གྱི། ཡོངས་
[203b.5]སུ་ལྷག་མ་ལས་གསལ་བ་འདི་གཙོ་བོ་ཁོ་ན་ལས་སྐྱེའོ་ཞེས་པའོ། །དེ་ལྟར་ན་ཡང་ཡོངས་སུ་ལྷག་མ་ནི་རིགས་སོ་ཞེས་པའི་བསམ་པའོ། །འདི་ལྟ་ན་ཡང་ཞེས་པ་ལ་སོགས་པས། དེ་ལྟར་ཡང་། ཡོངས་སུ་ལྷག་མ་བཟློག་པ་ལ། །ཞེས་པ་འདིས་དོན་གསལ་བར་བྱེད་དེ། རིགས་
[203b.6]གཅིག་པ་རྣམས་གཅིག་སྔོན་མ་ཅན་ཉིད་དུ་རྗེས་སུ་དཔོག་པས་ཞེས་པས། ཐ་མི་དད་པ་རྣམས་གཅིག་སྔོན་མ་ཅན་ཉིད་དུ་མཐའ་གཅིག་པ་རྗེས་སུ་བརྗོད་དོ། །མེད་པ་སྔོན་མ་ཅན་ཉིད་ལ་སོགས་པ་ཉིད་ཅེས་པ་གཅིག་སྔོན་མ་ཅན་ཉིད་མེད་པ་གསུངས་སོ། །དེ་ལ་གཅིག་སྔོན་མ་ཅན་ཉིད་མེད་ན་ཡོངས་སུ་
[203b.7]བའི་ལྷག་མ་ལས་ཐ་དད་པར་ཐལ་བར་རིགས་ཏེ། དེ་ཁོ་ན་དེ་ཡོངས་སུ་བའི་ལྷག་མའི་ཡུལ་ཡིན་ཞེས་བྱས་ནས་སོ། །ཡོངས་སུ་ལྷག་མ་ལས་གཅིག་སྔོན་མ་ཅན་ཉིད་རྗེས་སུ་དཔོག་པ་མ་ཡིན་ཞེས་པ། གཏན་ཚིགས་ཀྱིས་ཕན་མི་འདོགས་པའི་ཕྱིར་རོ། །གལ་ཏེ་གསལ་བ་ནི་མེད་པ་
[204a]
[204a.1]ལས་སྐྱེ་ན་སྐྱེ་གནས་མེད་པའི་ཕྱིར་ཐ་དད་པར་འགྱུར་རོ་ཞེས་བྱེད་པ་ན། རྗེས་སུ་འགྲོ་བའི་གཏན་ཚིགས་ཀྱིས་ཕན་པ་ཅི་ཡང་བྱས་པར་འགྱུར་བ་མ་ཡིན་པའི་ཕྱིར་རོ། །དེ་ལས་ཡང་ཞེས་པ་ལ་སོགས་པས་ཀྱང་། རྣམ་པར་ལྡན་པ་མ་ཡིན་པ་དག་གི་ཐ་མི་དད་པར་སྟོན་ཏེ།
[204a.2]དེ་ལའི་སྒྲས་ནི་རྗེས་སུ་འགྲོ་བའི་བ་ལ་སྙེག་གོ། །གལ་ཏེ་གསལ་བ་ལ་ནི་མེད་པ་ལས་སྐྱེ་ན་སྐྱེ་གནས་མེད་པའི་ཕྱིར་ཐ་དད་པར་ཐལ་བར་འགྱུར་ན། ཐ་དད་པ་ཡོད་པ་ཡང་མ་ཡིན་གྱི། འོ་ན་ཅི་ཞེ་ན་རིགས་གཅིག་ཡང་དག་པར་རྗེས་སུ་འགྲོ་བའོ། །དེའི་ཕྱིར་རིགས་གཅིག་རྗེས་སུ་འགྲོ་བའི་
[204a.3]ཕྱིར་རྒྱུ་གཅིག་སྔོན་མ་ཅན་ནི་གསལ་བའོ་ཞེས་པ་དག་གི་དོན་འདི་ནི་ཐལ་བར་འགྱུར་བ་དང་བཟློག་པས་ཉེ་བར་སྐྱེའོ། །དེའི་ཕྱིར་རྣམ་པར་ལྡན་པ་དང་བསལ་ཏེ་འོངས་པ་དག་གི་ཐ་དད་པ་མེད་དེ། གཉི་ག་ལ་ངག་གི་དོན་མཚུངས་པ་ཉིད་ཀྱི་ཕྱིར་རོ། །དེའི་ཕྱིར་ཡང་གང་བརྗོད་པ་འདི་
[204a.4]ལྟར་རྣམ་པར་ལྡན་པ་ལྔ་པོ་འདི་རྣམས་ཀྱི་གཙོ་བོ་ཡོངས་སུ་གཟུང་བ་བྱས་ནས་སླར་ཡང་བསལ་ཏེ་འོངས་པ་རྣམས་ཀྱི་བྱའོ་ཞེས་པ་འདི་མི་རིགས་སོ། །སྦྱོར་བ་ཡང་འདི་ལྟར་ཞེས་པ་ལ་སོགས་པ་སྟེ། གཙོ་བོ་སྔོན་མ་ཅན་དུ་གསལ་བ་བསྒྲུབ་པར་བྱ་ཞིང་། དེ་མི་འདོད་པ་རྣམས་ལ་མི་འདོད་
[204a.5]པ་འབབ་པར་ཉེ་བར་སྟོན་པས་སྦྱོར་བ་འདི་ལྟར་བྱའོ། །གལ་ཏེ་གསལ་བ་ནི་གཅིག་ལས་སྐྱེ་བ་མ་ཡིན་ན་ཞེས་པ། གང་གི་ཕྱིར་ཁྱབ་པར་བྱེད་པའི་དོན་གྱི་དངོས་པོ་མེད་ན། ཁྱབ་པར་བྱ་བ་ཟློག་པར་འགྱུར་ཏེ། འདིར་ཡང་གཅིག་སྔོན་མ་ཅན་ཉིད་ཀྱིས་རིགས་གཅིག་རྗེས་སུ་འགྲོ་བ་ལ་ཁྱབ་
[204a.6]སྟེ། གང་གི་ཕྱིར་རིགས་གཅིག་དང་ལྡན་པ་རྣམས་གཅིག་སྔོན་མ་ཅན་ཉིད་དུ་མཐོང་གི །མེད་པ་སྔོན་མ་ཅན་མ་ཡིན་ཞིང་དབང་ཕྱུག་ལ་སོགས་པ་སྔོན་མ་ཅན་ཉིད་མ་ཡིན་ནོ། །དེའི་ཕྱིར་གལ་ཏེ་གཅིག་ལས་སྐྱེ་བ་མ་ཡིན་ན་ནི་ཞེས་པ་འདི་ལྟར་བརྗོད་པར་བྱའོ། །འོ་ན་གལ་ཏེ་མེད་པ་ལས་
[204a.7]སྐྱེ་ན་ཞེས་པ་མ་ཡིན་ནམ་ཞེ་ན། ཡོད་པ་སྔོན་མ་ཅན་ཉིད་ཙམ་བསྒྲུབ་པར་བྱ་བ་ནི་མ་ཡིན་པས་སོ་ཞེས་པ་འདི་ལ་རྩོད་པ་མེད་པའི་ཕྱིར་རོ། །རིགས་གཅིག་པ་ཅན་མེད་པར་ཐལ་བར་འགྱུར་རོ་ཞེས་པ་འདིས་ཀྱང་ངོ་། །ཐ་དད་པ་སྨོས་པ་ནི་རྗེས་སུ་འགྲོ་བ་མེད་པ་ཉེ་བར་མཚོན་པའི་དོན་དུ་
[204b]
[204b.1]བཤད་པར་བྱ་སྟེ། བསྒྲུབ་པར་བྱ་བ་མེད་ན་གཏན་ཚིགས་མེད་པའི་ཕྱིར་ཞེས་སྟོན་ཏོ། །ཡོངས་སུ་ལྷག་པ་ལས་ཀྱང་ཞེས་པ་ཐམས་ཅད་ལས་ལྷག་མ་ནི་ཡོངས་སུ་ལྷག་པའོ། །འདིར་ཐམས་ཅད་ཀྱི་ཅི་ཞེ་ན་ཟླ་བོའི་ཕྱོགས་སུའོ། །དེ་ཡང་རྣམ་པ་དུ་མ་སྟེ། ཐམས་ཅད་ཀྱི་མཐའ་གཅིག་
[204b.2]པ་ཅན་སྐྱེས་བུ་དང་དབང་ཕྱུག་ལ་སོགས་པའི་དབྱེ་བ་ལས་སོ། །དེ་ཐམས་ཅད་བཀག་པས་ཡོངས་སུ་ལྷག་མ་རིགས་ཏེ། འདི་མེད་པ་ལས་སྐྱེ་བ་ཡང་མ་ཡིན། དབང་ཕྱུག་ལ་སོགས་པ་རྣམས་ལས་ཀྱང་མ་ཡིན་གྱི། ཡོངས་སུའི་ལྷག་མ་ལས་གཙོ་བོ་ཁོ་ན་ལས་སོ་ཞེས་པའོ། །གཞན་
[204b.3]དུ་ན་མེད་པ་ལས་སྐྱེ་བ་མ་ཡིན་ཞེས་བྱ་བ་ན། ཡོངས་སུ་ལྷག་མ་ལས་དབང་ཕྱུག་ལ་སོགས་པ་ཁོ་ན་ལས་སོ་ཞེས་པར་ཡང་འགྱུར་རོ། །ལྔ་ཉིད་མིན་པ་དང་ཞེས་པའི་དང་གི་སྒྲ་ལས་གཅིག་གསལ་བ་ན། ཡོངས་སུ་ལྷག་མ་འདི་རིགས་པ་མིན་ནོ། །ཅིའི་ཕྱིར་ཞེ་ན། ལྔ་ཉིད་མིན་
[204b.4]ཞེས་གསུངས་སོ། །འདི་ནི་མིན་ཞེས་པ་ལ་སོགས་པ། འདི་ནི་མེད་པ་ལས་སྐྱེ་བ་མ་ཡིན་གྱི། ཡོངས་སུ་ལྷག་མ་ལས་གཙོ་བོ་ཁོ་ན་ལས་གསལ་བ་འདི་སྐྱེའོ་ཞེས་པ་འདི་ནི་ཡོངས་སུ་ལྷག་མའི་མཚན་ཉིད་དང་འབྲེལ་པ་མ་ཡིན་ཏེ། གང་གི་ཕྱིར་ཀུན་ནས་ལྷག་མ་ནི་ཡོངས་སུ་ལྷག་
[204b.5]མ་ཡིན་ཞིང་། གཙོ་བོ་ཁོ་ནའང་ཡོངས་སུ་ལྷག་མ་མ་ཡིན་ཏེ། ཕྱོགས་གཞན་སོ་སོར་བཀག་པ་མ་ཡིན་པ་རྣམས་ཀྱང་ཡོངས་སུ་ལྷག་མར་བྱ་བ་ཉིད་ཀྱི་ཕྱིར་རོ། །གང་གི་ཚེ་གཞན་གྱི་ཕྱོགས་ཐམས་ཅད་རྒྱུ་ཉིད་དུ་བཀག་པར་གྱུར་པ་དེའི་ཚེ་གཙོ་བོ་ཁོ་ན་ཡོངས་སུ་ལྷག་མར་འགྱུར་རོ་
[204b.6]ཞེས་པས། ཡོངས་སུ་ལྷག་མ་ལས་བསལ་ཏེ་འོངས་པ་གཅིག་ཁོ་ནར་འགྱུར་གྱི་ལྔ་མ་ཡིན་ནོ། །དེ་ལྟར་འགྱུར་མོད། རྒོལ་བ་ཐམས་ཅད་བཀག་པས་ཡོངས་སུ་ལྷག་མར་འདོད་པ་མ་ཡིན་གྱི། འོ་ན་ཅི་ཞེ་ན། གཞན་གྱི་ཕྱོགས་རེ་རེ་བཀག་པས་སོ། །དེའི་ཕྱིར་བསལ་ཏེ་འོངས་
[204b.7]པ་གཅིག་ཉིད་དུ་འགྱུར་བ་མ་ཡིན་གྱི། འོ་ན་ཅི་ཞེ་ན། ལྔ་ཉིད་ཁོ་ནར་ཏེ། སོ་སོ་བས་ཡོངས་སུ་ལྷག་མར་རྟོགས་པའི་ཕྱིར། དེ་ལྟར་ནི་འདིར་ཐ་དད་པ་མེད་པར་ཐལ་བར་འགྱུར་བ་ལ་སོགས་པ་ཐབས་ལྔ་པོ་རྣམས་ངེས་པར་བསྟན་ཏོ་ཞེ་ན། གསུངས་པ། རྒོལ་བ་གཅིག་ནི་བཀག་
[205a]
[205a.1]པ་ཡིས། །ཞེས་པ་ལ་སོགས་པས་ཏེ། དེ་ལྟ་ན་ཡང་བསལ་ཏེ་འོངས་པ་རྣམས་ལྔ་ཉིད་མ་ཡིན་པར་ཐལ་བར་འགྱུར་ཏེ། གང་གི་ཕྱིར་ལྷ་རྣམས་ལས་ལྷག་པའི་རྒོལ་བ་འགེགས་པའི་ཐབས་རྣམས་ཡིན་པས་སོ། །ཡང་ན་གལ་ཏེ་རྒོལ་བ་གཅིག་བཀག་པ་ན་ཡང་། ཡོངས་
[205a.2]སུ་ལྷག་མའི་ཐབས་སུ་འདོད་ན་བསལ་ཏེ་འོངས་པ་རྣམ་ལྔ་ཉིད་མ་ཡིན་ཏེ། རྒོལ་བ་མཐའ་ཡས་པ་རྣམས་དགག་པར་བྱ་བ་པ་ཉིད་ཀྱི་ཕྱིར་རོ། །མཐའ་ཡས་པའི་སྒྲས་འདིར་ལྔ་རྣམས་ལས་ལྷག་པ་ཉེ་བར་མཚོན་པའོ། །གཏན་ཚིགས་ལྟར་སྣང་བ་རྣམས་བསམ་པར་བྱ་སྟེ། དེ་ལས་བཟློག་པས་
[205a.3]གཏན་ཚིགས་གསལ་བ་ཁོང་དུ་ཆུད་པའི་དོན་དུའོ། །གང་མ་བཤད་པ་མ་གྲུབ་པའི་དབྱེ་བ་འདི་ཅི་ཡིན་ཞེ་ན་གསུངས་པ། དེ་ནི་གང་ཡང་རུང་བ་མ་གྲུབ་པ་ལ་སོགས་པའི་དབྱེ་བས་ཞེས་པ་ལ་སོགས་པའོ། །འོ་ན་མིག་གིས་གཟུང་བར་བྱ་བ་ཉིད་དང་འདྲ་བ་ལས་དེ་རྣམས་
[205a.4]ཕྱོགས་ཆོས་མེད་པ་ཉིད་དུ་བཤད་པ་བྱས་པ་མ་ཡིན་ནམ་ཞེ་ན། གསུངས་པ། མཚན་ཉིད་བརྗོད་པ་མེད་ན་དེ་འདྲ་བ་ཁོང་དུ་ཆུད། འོ་ན་དོན་དང་མཐུན་པའི་མིང་བསྟན་པ་ཁོ་ན་ལས། འདི་རྣམས་ཀྱི་མཚན་ཉིད་ཤེས་པ་ཡང་མ་ཡིན་ནམ་ཞེ་ན། ཁྱད་པར་ཡོངས་སུ་མི་ཤེས་པ་ལས་ནི་མ་ཡིན་ཏེ། མ་གྲུབ་
[205a.5]པ་ཞེས་པར་མི་ཤེས་ཏེ། ཅི་ཞིག་ཏུ་མ་གྲུབ་པ་ཞེས་སོ། །འོ་ན་སློབ་དཔོན་གྱིས་ཀྱང་མ་གྲུབ་པའི་དབྱེ་བ་བཤད་པ་མེད་པ་ཁོ་ན་མ་ཡིན་ནམ། ཕྱོགས་ཀྱི་ཕྱོགས་གཅིག་ལ་མ་གྲུབ་པ་དང་དམ་བཅའ་བའི་དོན་གྱི་ཕྱོགས་གཅིག་མ་གྲུབ་པ་དག་མ་བརྗོད་པའི་ཕྱིར་རོ་ཞེ་ན། སྐྱོན་འདི་
[205a.6]མེད་དེ། མཚན་ཉིད་བརྗོད་པ་ལས། སྤྱིར་དཔེར་བརྗོད་པ་མཐའ་དག་རྟོགས་པའི་ཕྱིར་རོ། །འོ་ན་འདིར་ཡང་གཏན་ཚིགས་ཀྱི་མཚན་ཉིད་རྟོགས་པ་ལས། གཏན་ཚིགས་ཀྱི་མཚན་ཉིད་ལས་བཟློག་པས་བདེ་བླག་ཏུ་ཤེས་པ་ཉིད་ཀྱི་ཕྱིར་མཚན་ཉིད་མ་བརྗོད་ན་ཡང་གཏན་ཚིགས་ལྟར་
[205a.7]སྣང་བ་ཐམས་ཅད་ཀྱི་རང་གི་ངོ་བོ་རྟོགས་པར་འགྱུར་རོ་ཞེ་ན་འདི་ཡོད་པ་མ་ཡིན་ཏེ། དེ་འདྲ་བ་མེད་ན་མི་འབྱུང་བའི་ཆོས་སྟོན་པ་གཏན་ཚིགས་སོ་ཞེས་པའི་གཏན་ཚིགས་ཀྱི་མཚན་ཉིད་ལས་མ་གྲུབ་པ་མ་བསལ་བའི་ཕྱིར་རོ། །དེ་ལྟར་ཡང་གསུངས་ཟིན་ཏེ། མིག་གི་གཟུང་སོགས་སྒྲ་
[205b]
[205b.1]ཡི་ནི། །མི་རྟག་པ་ལ་གཏན་ཚིགས་འགྱུར། །ཞེས་སོ། །གང་ཡང་འདིའི་དོན་མ་གྲུབ་བོ་ཞེས་པས་མ་གྲུབ་པའོ། །ཅི་ཞིག་ཏུ་མ་གྲུབ་ཅེ་ན། ཉེ་བ་ལས་ཕྱོགས་སུ་བྱས་པ་ཁོ་ནའི་ཆོས་ཅན་ལའོ། །དེས་ན་གང་ཡང་རུང་བ་ལ་མ་གྲུབ་པ་ལ་སོགས་པ་རྣམས་ཀྱང་གསལ་བ་བྱས་པ་ཁོ་ནའོ་
[205b.2]ཞེས་སེམས་པ་དེའི་གཏན་ཚིགས་ཀྱི་སྒྲ་ཁོ་ནས་གཏན་ཚིགས་རྟོགས་ཟིན་པ་ཉིད་ཀྱི་ཕྱིར། མཚན་ཉིད་བརྗོད་པའི་འབད་པ་དོན་མེད་དོ། །གང་དབྱེ་བ་མ་བཤད་པའི་འགལ་བ་མི་འཁྲུལ་བ་ཅན་དེ་ཅི་ཡིན་ཞེ་ན། གསུངས་པ། དེ་ཡང་ཞེས་པ་ལ་སོགས་པ་སྟེ། ཐུན་མོང་མ་ཡིན་པ་ཡང་ཡོད་ཅིང་།
[205b.3]གང་ལུས་ཅན་ཉིད་ལ་སོགས་པའི་མཚན་ཉིད་ཅན། འགལ་བ་མི་འཁྲུལ་བ་ཅན་ཡང་ངོ་། །འགལ་བ་གཅིག་ནི་སྤྱི་ཡིན་ནོ་ཞེས་པ་བྱེ་བྲག་པའི་སྤྱི་དབང་པོས་གཟུང་བར་བྱ་བ་རྣམས་ཡོད་དེ། དེའི་ཕྱིར་དབང་པོ་གཟུང་བར་བྱ་བ་ཉིད་ཀྱི་ཕྱིར་མི་རྟག་པའོ་ཞེས་སྒྲུབ་པར་བྱེད་པ་ལ་དེ་འགལ་བའི་
[205b.4]ཕྱིར་འགལ་བ་ཞེས་བརྗོད་པར་བྱའོ། །འདི་བཟློག་པ་སྒྲུབ་པར་བྱེད་པའི་ཕྱིར་འགལ་བ་ཡང་མ་ཡིན་གྱི། འོན་ཀྱང་རྟག་པ་དང་མི་རྟག་པ་རྣམས་ལ་ཐུན་མོང་དུ་བུམ་པ་ལ་སོགས་པ་རྣམས་ལ་མཐོང་བའི་ཕྱིར་མ་ངེས་པ་ཁོ་ནའོ། །གྲངས་ཅན་པའི་རྒྱུ་ལ་འབྲས་བུ་ཡོད་དེ། འབྱུང་བའི་ཕྱིར་རོ་ཞེས་
[205b.5]པ་འབྱུང་བ་ནི་ཡོད་པ་ཉིད་དང་འགལ་བའོ་ཞེས་པས་དམ་བཅའི་དོན་སེལ་བའི་ཕྱིར་འགལ་བ་གཉིས་པའོ་ལོ། །འདི་ཡང་མ་གྲུབ་པ་དང་ཐུན་མོང་མིན་པར་འགྱུར་རོ། །ཅི་ལྟར་ཞེ་ན་གསུངས་པ། ཐམས་ཅད་ཅེས་པ་ལ་སོགས་པ་སྟེ། འབྲས་བུ་ནི་སྐྱེ་བ་ལས་སྔར་ཐམས་ཅད་ཡོད་པ་ཉིད་དུ་བསྒྲུབ་
[205b.6]པར་བྱ་སྟེ། སྐྱེས་ཟིན་པ་ཡོད་པ་ཉིད་ལ་ནི་རྩོད་པ་མེད་པའི་ཕྱིར་རོ། །སྐྱེ་བ་ལས་སྔར་འབྱུང་བ་ནི་མི་རིགས་ཏེ། གང་ལས་འབྱུང་བ་ནི་ཡོད་པ་འབྱུང་བ་ཁོ་ན་ཡིན་པའོ། །འབྱུང་བ་ནི་འདིར་འབྱུང་བ་རྗོད་པར་འདོད་པའོ་ཞེ་ན་མ་ཡིན་ཏེ། གང་ཡོད་པ་དེ་ནི་སྐྱེས་ཟིན་པ་ཁོ་ན་སྟེ། ཅིས་ན་སྐྱེ་བ་ཡིན། སྐྱེ་བ་
[205b.7]ནི་བདག་ཉིད་འཐོབ་པ་ཡིན་ན། ཡོད་པ་ཉིད་ནི་བདག་ཉིད་ཀྱི་འཐོབ་པར་བྱེད་པ་ཡང་མ་ཡིན་ནོ། །སྐྱེ་བའི་ཆེད་དུ་འབྱུང་བ་དེ་ཁོ་ན་འབྱུང་བའོ། །འབྲས་བུ་རྣམས་ཐམས་ཅད་ཡོད་པ་ཉིད་དུ་བསྒྲུབ་པར་བྱ་བ་ཉིད་ཀྱི་ཕྱིར། དེ་ལས་གཞན་ལ་འབྱུང་བ་མེད་པའི་ཕྱིར། ཐུན་མོང་མ་ཡིན་པ་
[206a]
[206a.1]ཡིན་གྱི་འགལ་བ་མ་ཡིན་ཏེ། བཟློག་པ་སྒྲུབ་པར་བྱེད་པ་མ་ཡིན་པའི་ཕྱིར། མ་ངེས་པ་བཞིན་ནོ། །བཟློག་པ་ཡི་ནི་རྒྱུ་མཚན་དང་། །འདོད་ལ་གནོད་པར་བྱེད་མ་བརྗོད། །ཅེས་པས་དཔེར་བརྗོད་ལས་ཀྱང་མ་ཚང་བ་ཉིད་གསུངས་སོ། །འདོད་པར་འགྱུར་ཏེ་འདི་
[206a.2]རྣམས་ཀྱི་ནང་ཁོ་ནར་འདི་དག་འདུས་བྱས་པར་འགྱུར་རོ་ཞེ་ན་གསུངས་པ། མ་ཡིན་ཞེས་པ་ལ་སོགས་པའོ། །དེ་ལྟར་འགྱུར་མོད་ཀྱི། དེ་དག་གཏན་ཚིགས་ལྟར་སྣང་བར་འགྱུར་བ་མ་ཡིན་པ་ཁོ་ནའོ་ཞེ་ན། གསུངས་པ། མ་ཡིན་ཞེས་པ་ལ་སོགས་པ་སྟེ། འདི་ཁོ་ན་ལ་གཏན་ཚིགས་གསུངས་
[206a.3]པ། བཟློག་པ་དང་གནོད་པའི་གཏན་ཚིགས་ཡིན་པ་ཉིད་ཀྱི་ཕྱིར་རོ་ཞེས་པའོ། །དེ་ལ་མ་ངེས་པ་ནི་འཁྲུལ་པ་དང་བཅས་པའོ་ཞེས་པ་འཁྲུལ་པ་དང་ལྷན་ཅིག་པ་ནི་འཁྲུལ་པ་དང་བཅས་པའོ། །འཁྲུལ་པ་ནི་གཞན་ལ་ཡོད་པ་སྟེ། གཅིག་ལ་གནས་པ་མ་ཡིན་པ་ཉིད་ཅེས་པའི་དོན་ཏོ། །དེ་
[206a.4]ཡང་མ་ངེས་པ་ལ་ཡོད་དེ། དེའི་ཕྱིར་འདི་ནི་འཁྲུལ་པ་དང་བཅས་པའོ། །འདི་ནི་ཞེས་པ་ལ་སོགས་པ་སྟེ། ཁྱད་པར་མེད་པར་ནི་སྤྱིར་བརྗོད་པ་ཉིད་ལས་མ་ངེས་པའི་སྒྲ་ནི་ཁྱད་པར་ལ་གནས་པ་འཐོབ་པ་མ་ཡིན་ཏེ། དེ་ལས་ཀྱང་གཏན་ཚིགས་ཀྱང་མ་ངེས་པར་འགྱུར་རོ་ཞེས་པ་དགོངས་པའོ། །
[206a.5]དེ་ལྟར་ནི་དེར་ཡང་ཕྱོགས་ལས་གཞན་ལའང་འཇུག་སྟེ། མཐའ་གཅིག་ཏུ་ཕྱོགས་ཁོ་ན་ལ་མ་ཡིན་ནོ། །དེས་ན་ཁྱད་པར་དུ་བྱས་ནས་བརྗོད་པར་བྱའོ། །འོ་ན་སྤྱིའི་སྒྲ་ཡང་ཁྱད་པར་ལ་གནས་པ་མཐོང་སྟེ། དཔེར་ན་འགའ་ཞིག་འོངས་སོ་ཞེས་པ་བཞིན། དེའི་ཕྱིར་སྤྱིའི་སྒྲ་འདི་ཡང་ཁྱད་པར་ལ་
[206a.6]གནས་པར་འགྱུར་ཏེ། དེས་ན་བསྒྲུབ་བྱའི་རིགས་ཁོ་ན་ལ་འཇུག་པ་མ་ཡིན་པ་དེ་ཁོ་ན་མ་ངེས་པའོ་ཞེས་རྟོགས་པར་བྱའོ་ཞེ་ན། གསུངས་པ། མ་ཡིན་ཞེས་པ་ལ་སོགས་པའོ། །འདི་ཉིད་ལ་དཔེ་གསུངས་པ། གཉིས་ཀ་ལྟར་ན་ཞེས་པ་ལ་སོགས་པའོ། །གཉིས་ཀྱི་སྒྲས་ནི་སྤྱིར་བརྗོད་པ་ཡང་
[206a.7]འགལ་བ་ཅན་དང་མི་འགལ་བ་ཅན་ཉིད་དོ། །ཡོན་ཏན་གྱི་འབྲས་བུས་སྐབས་སུ་བྱས་པ་གང་ཞིག་ཤེས་པར་བྱེད་དེ། སྐབས་ཀྱི་སྟོབས་ལས་སོ། །དེ་ཁོ་ན་སོ་སོའི་ཁྱད་པར་ལ་གནས་ཏེ། འབྲས་བུའི་འགལ་བ་ཅན་དང་མི་འགལ་བ་ཅན་ནོ་ཞེས་པའོ། །ཅི་སྟེ་ཡང་ཞེས་པ་ལ་སོགས་པས་
[206b]
[206b.1]ནི་སྤྱིའི་སྒྲ་ཉིད་ལ་གནོད་པར་བྱེད་དོ། །གང་མ་ཡིན་པ་དགག་པས་མ་ངེས་པ་ཉིད་དུ་རིག་པར་བྱ་བ་ངེས་པ་ཉིད་ཅི་ཡིན་ཞེ་ན། བཤད་པ་གང་ཞིག་ཅེས་པ་ལ་སོགས་པའོ། །བསྒྲུབ་པར་བྱ་བ་དང་སོ་སོར་ཉེ་བ་ཉིད་ཀྱི་ཕྱིར་རྟག་ཏུ་བ་ཉིད་ལས་བསྒྲུབ་པར་བྱ་བའི་རིགས་ཁོ་ན་ལ་གང་འཇུག་པ་
[206b.2]དེ་ནི་ངེས་པ་ཉིད་དེ། དེ་དགག་པས་མ་ངེས་པ་ཉིད་ཁྱད་པར་དུ་བྱས་པ་ཁོ་ན་རྟོགས་པར་བྱའོ་ཞེས་སེམས་སོ། །དེ་ལྟ་ན་ཡང་ཁྱད་པར་དུ་བྱས་པ་མ་ཡིན་ཏེ་ཞེས་པས། རྣམ་པར་རྟོག་པ་འདི་ལ་ཡང་། །འདི་ཁྱད་པར་གྱི་སྒྲ་མ་ཡིན་པ་ཁོ་ནའོ་ཞེས་སྟོན་ཏོ། །ཅི་ལྟར་ཞེ་ན་གསུངས་པ། དེ་ལྟར་ནི་ཞེས་
[206b.3]པ་ལ་སོགས་པའོ། །གང་ཞིག་བསྒྲུབ་པར་བྱ་བའི་རིགས་ཁོ་ན་ལ་འཇུག་པ་དེ་ངེས་པ་ཉིད་དོ། །འདི་ལས་དོན་གྱིས་རྟོགས་པར་བྱ་སྟེ། གང་གི་བསྒྲུབ་བྱ་མེད་པའམ། དེ་ལས་གཞན་པའམ། དེ་དང་འགལ་བ་ལ་འཇུག་པ་མ་ངེས་པ་ཉིད་དོ་ཞེས་སོ། །དེ་ལས་ཀྱང་ཇི་སྲིད་བསྒྲུབ་པར་བྱ་བ་མེད་
[206b.4]པ་ལ་སོགས་པ་རྣམས་ལ་འཇུག་པ་ཅུང་ཟད་པ་དེ་ཐམས་ཅད་མ་ངེས་པ་ཉིད་དུ་འགྱུར་རམ། འོན་ཏེ་འདོད་པ་ཁོ་ནར་འགྱུར་ཞེས་པའོ། །དེའི་ཕྱིར་གསུངས་པ་མ་ཡིན་ཞེས་པ་ལ་སོགས་པའོ། །གང་ཞིག་བསྒྲུབ་པར་བྱ་བའི་རིགས་ལ་འཇུག་པ་ཡོད་ན། དེ་མེད་པ་ལ་སོགས་པ་རྣམས་ལ་
[206b.5]འཇུག་པ་མ་མཐོང་བ་འམ་སྲིད་པ་དེ་མ་ངེས་པ་ཉིད་དུ་རིགས་སོ། །གང་གིས་བསྒྲུབ་པར་བྱ་བའི་རིགས་མེད་པ་ལ་སོགས་པ་ཁོ་ན་ལ་འཇུག་ཅིང་བསྒྲུབ་བྱའི་རིགས་ལ་ནི་མ་ཡིན། དེ་ཅི་ལྟར་མ་ངེས་པ་ཉིད་ཡིན་ཏེ། དེ་ནི་བཟློག་པ་སྒྲུབ་པར་བྱེད་པའི་ཕྱིར་འགལ་བ་ཉིད་དུ་དྲང་བར་བྱའོ། །འདིར་
[206b.6]འགྱུར་མོད། ངེས་པ་ཉིད་བཀག་པས། བསྒྲུབ་པར་བྱ་བའི་རིགས་ཅན་ལ་འཇུག་པ་བཞིན་གང་གིས་གཞན་ལ་ཡང་འཇུག་པ་དེ་ཁོ་ན་མ་ངེས་པ་ཉིད་དུ་རྟོགས་པར་བྱ་སྟེ། དེའི་ཕྱིར་སྐྱོན་འདི་མེད་དོ་ཞེ་ན་གལ་ཏེ་དེ་ལྟ་ན་གཏན་ཚིགས་ཀྱང་བསྒྲུབ་པར་བྱ་བའི་རིགས་ཅན་ལས་ཀྱང་གཞན་ཕྱོགས་ལ་
[206b.7]འཇུག་པ་ཡོད་དོ་ཞེས་པས། དེ་ཡང་མ་ངེས་པ་ཉིད་དུ་འགྱུར་རོ་ཞེས་པས་འདི་ནི་ལན་མ་ཡིན་པ་ཁོ་ནའོ། །སྔར་བཤད་ཟིན་ཏོ་ཞེས་པ། འདི་ལས་བཟློག་པ་ནི་འགལ་བའོ་ཞེས་འགལ་བའི་མཚན་ཉིད་བྱེད་པས་སོ། །དོན་གྱིས་བསྒྲུབ་བྱའི་རིགས་མེད་པ་ལ་སོགས་པ་རྣམས་ལ་འཇུག་
[207a]
[207a.1]པ་ཡོད་དེ་ཐམས་ཅད་ནི་འཁྲུལ་པ་དང་བཅས་པའོ་ཞེས་བརྗོད་པར་འགྱུར་རོ། །དཔེར་ན་བྱེ་བྲག་པའི་ཞེས་པ། དེས་ན་རྫས་རྣམས་ནི་རྫས་གཞན་རྩོལ་བར་བྱེད་དོ་ཞེས་པའི་ཐམས་ཅད་དུ་སོང་བའི་རྫས་ཀྱི་ཚད་ནི་ལུས་ཅན་ནོ་ཞེས་པའི་བརྗོད་པ་ལས་རྡུལ་ཕྲ་རབ་རྣམས་རྩོམ་པར་བྱེད་པ་
[207a.2]ཉིད་དང་ལུས་ཅན་ཉིད་དུ་ཁས་བླངས་སོ། །དེ་ལྟར་ཁས་བླངས་ནས་རྡུལ་ཕྲ་རབ་རྣམས་ནི་རྩོམ་པ་པོ་མ་ཡིན་ཏེ། ལུས་ཅན་མ་ཡིན་པ་ཉིད་ཀྱི་ཕྱིར་ཞེས་སྨྲས་པ། གྲུབ་པའི་མཐའ་དང་འགལ་བའི་ཕྱིར་ན་འགལ་བར་འགྱུར་རོ། །དེ་ལྟར་ཡང་བརྟག་པར་བྱ་བ་ཞེས་པ། གལ་ཏེ་ཡན་ལག་གཞན་གྱི་
[207a.3]སྐྱོན་ཉིད་དུ་རྟོགས་པ་ཡང་འགལ་བ་ཉིད་དུ་བརྟག་པར་བྱ་བ་དེའི་ཚེ་སྒྲུབ་པར་བྱེད་པའི་སྐྱོན་གཞན་ཡང་གཏན་ཚིགས་ཀྱི་སྐྱོན་ལས་གཞན་ཉིད་དུ་རྟོགས་པ་དེ་ནི་རང་གི་གྲུབ་པའི་མཐའ་དང་འགལ་བར་བརྗོད་པར་བྱ་བའི་འགལ་བར་འགྱུར་རོ། །དེ་ལྟར་ཡང་སྒྲ་རྟག་སྟེ། ལུས་ཅན་མ་ཡིན་པ་ཉིད་
[207a.4]ཀྱི་ཕྱིར་སྨྲས་པ། ལས་བཞིན་དང་རྡུལ་ཕྲ་རབ་བཞིན་དང་བུམ་པ་བཞིན་ཞེས་པའི་ལས་ལ་སོགས་པ་རྣམས་ཀྱི་རྟག་པ་ཉིད་ལ་སོགས་པའི་ཆོས་ནི་གྲུབ་པའི་མཐའ་དང་འགལ་བའོ་ཞེས་བྱས་ནས་དཔེའི་སྐྱོན་འགལ་བར་འགྱུར་རོ། །འདིས་ནི་ཁས་བླངས་ཉམས་པ་གསུངས་ཏེ། མདོར་གཏན་
[207a.5]ཚིགས་ལྟར་སྣང་བ་ཉིད་ཁོ་ནར་བསྟན་པའི་ཕྱིར་དང་། བཤད་པ་ཡང་། ཡན་ལག་གཞན་གྱི་སྐྱོན་ཡང་འགལ་བ་ཉིད་དུ་དཔེར་བརྗོད་པའི་ཕྱིར་རོ། །ཡང་ཅིས་ན་སྐྱོན་གཞན་འགལ་བར་བརྗོད་ཅེ་ན། དེའི་ཕྱིར་གསུངས་པ། འདི་ལ་ནི་ལུས་ཅན་མ་ཡིན་པ་ཉིད་ཀྱི་ཕྱིར་ཞེས་པ་ལ་སོགས་པའོ། །
[207a.6]ཡང་ན་འདི་ལྟར་ཡང་བརྟག་པར་བྱ་བ་ཞེས་པ། གལ་ཏེ་གྲུབ་པའི་མཐའ་དང་འགལ་བར་བརྗོད་པར་བྱ་བ་འགལ་བར་འདོད་ན་དེ་ལྟར་གྱུར་ན་སྒྲུབ་པར་བྱེད་པའི་སྐྱོན་གཞན་ཡང་སྟེ། གང་ཡང་མ་གྲུབ་པའམ། མ་ངེས་པ་ཡང་འགལ་བར་འགྱུར་ཏེ། འདི་གཅིག་པུ་འབའ་ཞིག་ཁོ་ན་ནི་མ་ཡིན་
[207a.7]ནོ། །སླར་ཡང་གཞན་ཡང་ཞེས་པ་འདིའི་དོན་གཞན་པ་ནི་འདི་ཡིན་ཏེ། ཡན་ལག་གཞན་གྱི་སྐྱོན་ཡང་འགལ་བ་ཁོ་ནར་འགྱུར་ཞེས་པའོ། །དེ་ལས་ཀྱང་ཤིན་ཏུ་ཁྱབ་པའི་མཚན་ཉིད་དོ། །ཅི་ཞིག་ཏུ་གཏན་ཚིགས་ལྟར་སྣང་བ་གཞན་དང་ཡན་ལག་གཞན་གྱི་སྐྱོན་ཡང་འགལ་བ་ཉིད་དུ་
[207b]
[207b.1]འཐོབ་ཅེ་ན། གསུངས་པ། འདི་ལ་ནི་ཞེས་པ་ལ་སོགས་པའོ། །མ་གྲུབ་པ་ཉིད་ཀྱི་སྐྱོན་ཞེས་པ། རྡུལ་ཕྲ་རབ་རྣམས་ལུས་ཅན་མ་ཡིན་པ་ཉིད་མ་གྲུབ་པ་ཉིད་ཀྱི་ཕྱིར་རོ། །དམ་བཅའི་སྐྱོན་ཞེས་པ། སྔར་ཁས་ལེན་པས་གནོད་པའི་ཕྱིར་རོ། །ཅི་སྟེ་ཞེས་པ་ལ་སོགས་པ་ཤིན་ཏུ་ཁྱབ་པ་ཉིད་སྤོང་བར་
[207b.2]བྱེད་དེ། མི་འདོད་པ་ཡང་འཐོབ་པ་ནི་ཤིན་ཏུ་ཁྱབ་པ་ཡིན་ན། འདི་ལ་དེ་ཡོད་པ་མ་ཡིན་ཏེ། མཚན་ཉིད་ཀྱི་ཡུལ་ཐམས་ཅད་འགལ་བ་ཉིད་དུ་འདོད་པ་ཉིད་ཀྱི་ཕྱིར་རོ། །དེ་ལ་ཞེས་པ་ཇི་སྐད་བརྗོད་པའི་དཔེར་བརྗོད་ལའོ། །སྦྱོར་བ་ནི་གཉིས་ཀ་ཅིག་ཅར་འགལ་བ་དག་སྟེ་ཞེས་པ་བརྗོད་པ་འདོད་པ་
[207b.3]གཉིས་ཅིག་ཅར་མི་སྲིད་པའི་ཕྱིར་རོ། །སྦྱོར་བའི་སྒྲས་ཀྱང་འདིར་སྐྱོན་རྗོད་པར་འདོད་པའོ། །གལ་ཏེ་འདིར་གཉིས་གཉིས་དག་ཏུ་འགྱུར་ན། ཁྱོད་ཀྱི་བསམ་པས་གཉིས་དག་ཅིག་ཅར་སྦྱོར་བ་འཐད་པ་མ་ཡིན་ཏེ། མཚན་ཉིད་ཐ་དད་པ་གཉིས་དག་ཅིག་ཅར་གཅིག་ལ་སྲིད་པ་ཡོད་པ་མ་ཡིན་
[207b.4]ནོ། །གང་གི་ཚེ་ཡང་འགའ་ཞིག་ཏུ་གཅིག་ལ་ཡང་འགལ་བ་ཉིད་ལ་སོགས་པའི་སྐྱོན་རྣམས་བརྗོད་པ་དེའི་ཚེ་སྐྱོན་གཞན་མེད་པར་ཁས་བླངས་ནས། སྐྱོན་གཞན་རྗོད་པར་བྱེད་པའི་ཕྱིར་ཅིག་ཅར་སྦྱོར་བ་སྲིད་པ་མ་ཡིན་པ་ཁོ་ན་སྟེ། མ་གྲུབ་པ་དང་འགལ་བ་ཉིད་དང་མ་ངེས་པ་རྣམས་བསྡུས་པ་མི་སྲིད་
[207b.5]པའི་ཕྱིར་རོ། །དེ་ཡང་བྱེད་པ་བཞིན་དུ་ཞེས་པ་ལ་སོགས་པ་སྟེ། འདིར་ཅིག་ཅར་སྦྱོར་བར་འདོད་པ་མ་ཡིན་པ་ཁོ་ནའོ། །འོ་ན་ཅི་ཞེ་ན། གང་ཡང་རུང་བ་ཁོ་ནའིའོ། །ཇི་ལྟར་གཞུ་གཅིག་ལ་བྱེད་པ་དུ་མ་སྲིད་ན་ཡང་བརྗོད་པར་འདོད་པའི་དབང་ལས་གང་ཡང་རུང་བའི་སྦྱོར་བར་འགྱུར་ཏེ།
[207b.6]གཞུ་སྣུན་པར་བྱེད་དོ། །གཞུས་སྣུན་ནོ་ཞེས་པ་དེ་ལྟར་འདིར་ཡང་བརྗོད་པར་འདོད་པའི་དབང་ལས་སྐྱོན་གང་ཡང་རུང་བ་རྗོད་པ་འགལ་བ་མེད་དོ། །གལ་ཏེ་བྱེད་པའི་སྦྱོར་བ་བཞིན་དུ་ཞེས་པ། བྱེད་པའི་སྦྱོར་བ་བཞིན་དུ་གལ་ཏེ་ཆོས་གཞན་སྟོན་པར་བྱེད་ན། འདི་འདི་ལྟར་འགྱུར་མོད་དེ།
[207b.7]འདི་ལྟ་བུར་འགྱུར་ཏེ། གང་ཡང་རུང་བའི་སྦྱོར་བར་རོ་ཞེས་པའི་དོན་ཏོ། །ཆོས་གཞན་ཉེ་བར་སྟོན་པ་ཡང་མ་ཡིན་ཏེ། གང་གི་ཕྱིར་མ་གྲུབ་པ་ཉིད་ཁོ་ན་དང་དེར་དམ་བཅའ་བའི་སྐྱོན་ཡང་འགལ་བར་བརྗོད་པར་བྱ་སྟེ། དེ་མེད་ན་བསྟན་བཅོས་དང་འགལ་བ་མི་སྲིད་པའི་ཕྱིར་རོ། །དེ་གཞན་
[208a]
[208a.1]མིན་ཁོ་ནའོ། །དེ་ལ་འགལ་བ་ཉིད་ཅེས་བྱ་བ་ཆོས་གཞན་ཡོད་པ་མ་ཡིན་ནོ། །དེ་ལྟར་ནི་རྡུལ་ཕྲ་རབ་རྣམས་ལུས་ཅན་ཉིད་ཀྱི་ཕྱིར། གྲུབ་པའི་མཐའ་དང་འགལ་བ་ཉིད་དེ། དེ་ཁོ་ནའི་ཕྱིར་ཡང་མ་གྲུབ་པ་ཉིད་དོ་ཞེས་པས་གཞན་ཉིད་མེད་དོ། །དེ་ལྟར་ན་ཡང་རྩོམ་བྱེད་
[208a.2]ཡིན་པ་ཉིད་ཀྱི་ཕྱིར་འགལ་བ་ཉིད་དེ། དམ་བཅའ་བའི་སྐྱོན་ཡང་ངོ་ཞེས་སོ། །བྱེད་པ་ལ་ནི་ཞེས་པ་ལ་སོགས་པས། དེ་ལ་ཆོས་མི་མཐུན་པ་ཉིད་གསུངས་སོ། ཡང་ཅི་ལྟར་ན་ཆོས་གཞན་ཡིན་ཞེ་ན་གསུངས་པ། རང་དབང་ཉིད་དང་གཞན་དབང་ཉིད་ལས་ཞེས་པ་སྟེ། གཞུ་སྣུན་པར་བྱེད་
[208a.3]དོ་ཞེས་པ་བྱེད་པ་པོ་ཉིད་ཀྱི་ཕྱིར་རང་དབང་ཉིད་ཀྱི་མཚན་ཉིད་ཅན་གྱི་ཆོས་གཞན་ཉེ་བར་སྟོན་ཏོ། །གཞུས་སྣུན་ནོ་ཞེས་པ་བྱེད་པ་ཉིད་ཀྱི་ཕྱིར་གཞན་དབང་ཅན་ཉིད་ཀྱི་མཚན་ཉིད་ཅན་ནོ། །འོ་ན་གང་དུ་ཞེས་པ་ལ་སོགས་པ། སེམས་པ་ཅན་མ་ཡིན་པའི་གཙོ་བོ་ནི་གྲུབ་མཐའ་དང་འགལ་བའི་
[208a.4]དོན་གྱིས་སྒྲུབ་པར་བྱེད་པ་ཡིན་པའི་ཕྱིར་འགལ་བ་སྟེ། མ་གྲུབ་པ་ནི་མ་ཡིན་ནོ། །དེའི་ཕྱིར་འདི་འགལ་བའོ་ཞེས་པ་ནི་ཉེ་བར་དགོས་པའོ། །འདི་ལ་ཁས་བླངས་པས་གནོད་པ་ནི་མ་ཡིན་གྱི། སྐྱོན་གཞན་ཉིད་ཀྱི་ཕྱིར་བསམ་པར་བྱའོ། །གཏན་ཚིགས་ཀྱི་སྐྱོན་ཙམ་ལ་བརྟེན་ནས་དཔེར་
[208a.5]བརྗོད་པའི་ཕྱིར། དེ་ལ་ཡང་ཞེས་པས་གསལ་བ་གཙོ་བོ་ལས་གཞན་མ་ཡིན་པ་ཉིད་ན། གཙོ་བོ་ལས་ཐ་དད་པའི་སེམས་པ་ཅན་མ་ཡིན་པ་ཅུང་ཟད་ཀྱང་ཡོད་པ་མ་ཡིན་ཏེ། སྐྱེས་བུ་ནི་སེམས་ཅན་ཉིད་ཀྱི་ཕྱིར་རོ། །དེ་ལས་ཀྱང་གཏན་ཚིགས་ཐུན་མོང་མ་ཡིན་པ་ཉིད་ཁོ་ན་སྟེ། མ་ངེས་པ་
[208a.6]ཉིད་དོ། །ཁྱད་པར་རྣམས་ལས་གཞན་དུ་བརྗོད་པར་འདོད་ན་ཞེས་པ། ཆེན་པོ་ལ་སོགས་པ་མི་མཐུན་ཕྱོགས་ཁོ་ན་ལ་ཡོད་པའི་ཕྱིར་དང་། མཐུན་ཕྱོགས་སྐྱེས་བུ་ལ་མེད་པའི་ཕྱིར། སེམས་པ་ཅན་མ་ཡིན་པ་ཉིད་ནི་འགལ་བ་ཉིད་དུ་འགྱུར་རོ། །ལོག་པའི་ཕྱོགས་ལ། འོན་ཀྱང་ཞེས་པ་
[208a.7]ལ་སོགས་པ་སྟེ་གོ་བླའོ། །ཕྱོགས་ཅན་ལ་ནི་སྨྲ་བ་རྣམ་འགྱུར་ནི་གསལ་བ་དང་བྲལ་བ་སྟེ། རྟག་པ་ཉིད་བཀག་པའི་ཕྱིར་རོ་ཞེས་པའི་གཏན་ཚིགས་འདི་ནི། རྣམ་འགྱུར་གསལ་བ་དང་བྲལ་བ་ཡང་ཡོད་དོ་ཞེས་པའི་གྲུབ་པའི་མཐའ་འདི་དང་འགལ་བའི་ཕྱིར་འགལ་བའོ་ཞེའོ། །འདིར་
[208b]
[208b.1]ཡང་སྐྱོན་དེ་དག་ཁོ་ན་སྟེ། དེ་ལྟར་ནི་གསལ་བ་དང་བྲལ་བའོ་ཞེས་པ་འདིས་ནི་ནུས་པའི་ངོ་བོ་ལས་ཀྱང་བྲལ་བར་བརྗོད་དེ། ནུས་པ་དང་འགལ་བ་དག་གཞན་མ་ཡིན་པ་ཉིད་ཀྱི་ཕྱིར་རོ། །དེའི་ཕྱིར་ཁས་ལེན་པ་དང་འགལ་བ་སྟེ། དེ་ཉིད་ཀྱི་ཕྱིར་རྟག་པ་ཉིད་བཀག་པ་གྲུབ་པ་སྟེ་རྫས་རྟག་པའི་
[208b.2]ཕྱིར་རོ། །གསལ་བ་ཡང་དེ་ལས་གཞན་མ་ཡིན་པའི་ཕྱིར་རོ། །དེའི་ཕྱིར་འགལ་བ་མེད་དོ། །གང་ལས་སྐབས་སེམས་པ་རྣམས་ལ་ཞེས་པ་ལ་སོགས་པ་སྟེ། དྲི་མ་དང་བྲལ་བ་ལ་གནས་པའི་ཕྱོགས་དང་ཟླ་བོའི་ཕྱོགས་དག་སྐབས་ཀྱི་སྒྲས་བརྗོད་དེ། རྣམ་པར་དཔྱོད་པའི་ཆེད་དུ་རབ་ཏུ་
[208b.3]བྱེད་ཅེས་བྱས་ནས་སོ། །དེ་སེམས་པ་སྟེ་རྣམ་པར་བརྟག་པ་གང་ལས་ཉེ་བར་སྐྱེ་བའོ། །དེ་གཏན་ཚིགས་ཉིད་དུ་སྟོན་པ་ནི་སྐབས་དང་མཚུངས་པ་སྟེ། དཔེར་ན་བདག་ནི་མི་རྟག་པ་སྟེ། ལུས་ལས་གཞན་ཉིད་ཀྱི་ཕྱིར་རོ་ཞེས་པ་ལྟ་བུ་སྟེ། གང་གི་ཕྱིར་ལུས་ལས་གཞན་ཡིན་པ་དེའི་
[208b.4]ཕྱིར་རྟག་པ་དང་མི་རྟག་པ་བསམ་པར་བྱ་སྟེ། གལ་ཏེ་ལུས་ཁོ་ན་བདག་ཏུ་གྱུར་ན་དེ་མངོན་སུམ་ཁོ་ནར་འཇིག་པ་ཉིད་དོ་ཞེས་པས་སེམས་པར་མི་འགྱུར་རོ། །འདི་ལ་ཡང་ལུས་ལས་གཞན་ཉིད་ཀྱི་ཕྱིར་རྟག་པ་དང་མི་རྟག་པ་སེམས་པ་མ་ཡིན་གྱི། འོ་ན་ཅི་ཞེ་ན། གཞན་ཉིད་དེ་ནི། མ་ངེས་
[208b.5]པ་ལས། གལ་ཏེ་ལུས་ལས་གཞན་ཉིད་ནི་ཕྱོགས་གཅིག་ལ་གནས་པར་གྱུར་ན། རྟག་པ་དང་མི་རྟག་པ་རྣམ་པར་དཔྱོད་པར་མི་འགྱུར་རོ། །ཡང་ཅིའི་ཕྱིར་འདི་ལས་མ་ངེས་པ་ཡིན་ཞེ་ན། གསུངས་པ། གང་གི་ཕྱིར་ཞེས་པ་ལ་སོགས་པའོ། །ཕྱོགས་ཅན་ལེན་པ་ནི་སྨྲ་བ། སྒྲ་མི་རྟག་སྟེ།
[208b.6]རྟག་པའི་ཆོས་ཉེ་བར་མ་དམིགས་པའི་ཕྱིར་ཞེས་པ་འདི་སྐབས་དང་མཚུངས་པ་སྟེ། གང་གི་ཕྱིར་རྟག་པ་དང་མི་རྟག་པའི་ཆོས་མ་དམིགས་པ་ཁོ་ན་ལས་སྒྲ་ལ་སེམས་ཤིང་། མི་དམིགས་པ་ཁོ་ན་ནི་གཏན་ཚིགས་ཉིད་དུ་སྟོན་པའོ་ཞེའོ། །གལ་ཏེ་རྟག་པ་དང་མི་རྟག་པའི་ཆོས་མ་
[208b.7]དམིགས་པའི་ཕྱིར་ཞེས་བརྗོད་ན། འདི་འདི་ལྟར་འགྱུར་མོད། དེ་ལ་ཡང་ཐུན་མོང་མིན་པ་ཉིད་ཀྱི་སྐྱོན་ཏེ། རྟག་པ་དང་མི་རྟག་པའི་ཆོས་མི་དམིགས་པ་ནི། གཞན་འགའ་ཞིག་ཏུ་ཡང་མ་མཐོང་བའི་ཕྱིར་རོ། །མ་གྲུབ་པ་ཉིད་ཡང་ན་སྟེ། སྒྲ་ལ་ཡང་གདོན་མི་ཟ་བར་བྱས་པ་ཉིད་
[209a]
[209a.1]ལ་སོགས་པ་རྟག་པ་དང་མི་རྟག་པའི་ཆོས་དམིགས་པའི་ཕྱིར་རོ། །ཡང་ན་མ་ངེས་པ་ཉིད་ནམ་མཁའི་མེ་ཏོག་ལ་སོགས་པ་རྣམས་ཀྱིས་སོ། །ཡང་དག་པར་རྟོགས་པར་བྱ་བ་ནི་ཞེས་པ་ལ་སོགས་པ་སྟེ། གང་གི་ཕྱིར་གཞི་མཚུངས་པ་རྣམས་ཀྱིས་འབྲུ་མང་པོ་པའོ་
[209a.2]ཞེས་བཤད་ཅིང་། འདིར་མི་འགྱུར་ཏེ། འདི་ལྔ་རྣམས་ཀྱིས་ཟོས་པའོ་ཞེས་པའོ། །འོ་ན་མགྲིན་པ་ན་ནག་པོ་ལ་སོགས་པ་རྣམས་ལ། གཞི་མི་མཐུན་པ་རྣམས་ཀྱང་འགའ་ཞིག་ཏུ་འགྱུར་བ་ཁོ་ན་མ་ཡིན་ནམ་ཞེ་ན། དེའི་ཕྱིར་གསུངས་པ། ཐམས་ཅད་དུ་ཞེས་པ་ལ་སོགས་པའོ། །གང་
[209a.3]དུ་གོ་བར་བྱེད་པ་དེ་ཁོ་ན་ལ་འདོད་ཅིང་། འདིར་གོ་བར་བྱེད་པ་ཉིད་ཀྱང་མ་ཡིན་ཏེ། བསྒྲུབ་བྱས་ཁྱད་པར་དུ་མ་བྱས་པའི་དཔེའི་སྒྲ་ཁོ་ན་ནི་བརྗོད་པར་འདོད་པའི་དོན་གྱི་རྗོད་པར་བྱེད་པ་ཡིན་གྱི། བསྒྲུབ་བྱས་ཁྱད་པར་དུ་བྱས་པའི་སྒྲ་ནི་མ་ཡིན་ནོ། །མ་གྲུབ་པ་གཏན་ཚིགས་མ་ཡིན་ནོ་ཞེས་པ། འདི་
[209a.4]ལ་གྲུབ་པ་ཡོད་པ་མ་ཡིན་ཞེས་པ་མ་གྲུབ་པའོ། །གཏན་ཚིགས་མ་ཡིན་ཏེ། བསྒྲུབ་བྱས་ཁྱད་པར་དུ་མ་བྱས་པའི་དཔེ་ཞེས་པའི་དོན་ཏོ། །འདི་སྟོན་ཏོ། །བསྒྲུབ་བྱས་གང་ལ་ཁྱད་པར་དུ་མ་བྱས་པ་ཞེས་པ་ངག་ཚོགས་པ་སྟེ། བདུན་པས་འབྲེལ་པར་འོས་ཀྱི་གཏན་ཚིགས་ནི་མ་ཡིན་ཏེ།
[209a.5]དཔེ་ནི་ངག་ཚོགས་པའི་ཕྱོགས་གཅིག་ཡིན་པ་ཉིད་ཀྱི་ཕྱིར་རོ། །གཏན་ཚིགས་ནི་དཔེ་དང་འདྲ་བར་ངག་ཚོགས་པ་ཁོ་ན་སྟེ། ཡན་ལག་ཉིད་ཀྱིས་ནི་ཡོན་ཏན་དུ་གྱུར་པའོ་ཞེས་པས་གཙོ་བོ་མ་ཡིན་ནོ། །ཡན་ལག་ནི་ཡན་ལག་གཞན་དང་འབྲེལ་པ་ཡོད་པ་མ་ཡིན་ཏེ། ལག་པ་འདིའི་རྣ་བ་དག་འཕྱང་
[209a.6]ངོ་ཞེས་པར་ནི་འགྱུར་བ་མ་ཡིན་ནོ། །དུས་ལས་འདས་ནས་བསྟན་པ་ནི་དུས་ལས་འདས་པ་ཞེས་པའོ། །དུས་ལས་འདས་པར་བྱེད་པ་ནི་དུས་ལས་རྒལ་བའོ། །དུས་ལས་འདས་པར་བྱེད་པས་བསྟན་པ་གང་ཡིན་པ་དེ་ནི་དུས་ལས་འདས་པའོ། །གཏན་ཚིགས་རྣམས་ནི་དུས་ངེས་པ་ཅན་ཁོ་ནར་
[209a.7]འགྱུར་ཏེ། དེ་ལྟར་ནི་དུས་གཞན་དུ་བསྐྲུན་ཀྱང་ས་བོན་ནི་མྱུ་གུ་བསྐྱེད་པར་ནུས་པ་མ་ཡིན་པས་སོ། །དེའི་ཕྱིར་དུས་ལས་འདས་ནས་བརྗོད་པ་ནི། གཏན་ཚིགས་སུ་འགྱུར་བ་མ་ཡིན་ནོ། །བརྒལ་ནས་སམ་ཞེས་པ། ཁྱོད་ཀྱིས་སྒྲུབ་པར་བྱེད་པ་ནི་གཏན་ཚིགས་མ་ཚང་བའོ་ཞེས་པ་འདི་ལྟ་
[209b]
[209b.1]བུའམ། ངེས་པའི་དོན་དུ་ཞེས་གང་གི་ཚེ་རྒོལ་བས་མ་རྟོགས་པ་ཉིད་ཀྱི་ཕྱིར་རམ། སྐབས་ཉིད་ཀྱི་ཕྱིར་མ་བརྗོད་པར་གྱུར་པ་ན། བྱས་པ་ཉིད་ཀྱི་ཕྱིར་ཞེས་སོ། །ཕ་རོལ་པོ་ཡང་བསམ་པ་ཤེས་པ་ཁོ་ན་གསལ་བར་བྱ་བར་འདོད་པས་འདྲི་སྟེ། གང་གི་སྒྲ་མི་རྟག་པ་ཉིད་དུ་ཁོ་བོ་ཅག་གིས་
[209b.2]རྟོགས་པར་འགྱུར་བ། འདི་ལ་གཏན་ཚིགས་ཅི་ཡིན་ནོ་ཞེས་སོ། །དེ་ལྟ་ན་ཅི་ལྟར་གཏན་ཚིགས་ལྟར་སྣང་བ་ཉིད་དུ་རིགས་པ་མ་ཡིན་ཞེ་ན་གསུངས་པ། གཏན་ཚིགས་ཀྱི་གནས་སུ་ཞེས་པ་ལ་སོགས་པ་སྟེ། གཏན་ཚིགས་ཀྱི་གནས་ནི་རྩོད་པའི་གཞི་སྟེ། དེའི་རྒྱུ་མཚན་དུ་རབ་ཏུ་
[209b.3]སྦྱར་བ་གཏན་ཚིགས་ཀྱི་མཚན་ཉིད་ཀྱི་ཕྱོགས་གཅིག་དང་ལྡན་པའི་ཕྱིར། གཏན་ཚིགས་བཞིན་དུ་སྣང་བ་གང་ཡིན་པ་དེ་གཏན་ཚིགས་ལྟར་སྣང་བ་སྟེ། དེ་འདི་ལ་ཡོད་པ་མ་ཡིན་ཞེས་པས། གཏན་ཚིགས་ལྟར་སྣང་བ་ག་ལ་ཡིན། གང་དུས་ངེས་པ་ཉིད་དུ་ས་བོན་ལ་སོགས་པ་རྣམས།
[209b.4]དེའི་བྱེད་པོ་ཉིད་ལས་སྐྱེ་ཞིང་། ཤེས་བྱེད་ནི་ཇི་ལྟར་དེ་ལྟར་རྟོགས་པ་ལྟར། རང་གི་དོན་ཁོང་དུ་ཆུད་པ་ན་དུས་ལ་ལྟོས་པ་མ་ཡིན་ནོ། །ཕྱོགས་ཅན་ལན་སྨྲ་བ། གང་གི་དོན་ཕྱོགས་གཅིག་སྟོན་བཞིན་པའི་དུས་ལས་འདས་པར་སྦྱར་བ། དུས་ལས་འདས་པ་སྟོན་པ་སྟེ། དཔེར་ན་སྒྲ་རྟག་སྟེ།
[209b.5]ལྡན་པས་མངོན་པར་གསལ་བར་བྱ་བ་ཉིད་ཀྱི་ཕྱིར་གཟུགས་བཞིན་ཞེས་པ་ལྟ་བུ་སྟེ། སྔར་དང་ཕྱིས་ཀྱང་མངོན་པར་གསལ་བའི་གནས་སྐབས་ནི་རྟག་པ་ཉིད་དོ། །འདི་ནི་གཏན་ཚིགས་མ་ཡིན་ཏེ། དུས་ལས་འདས་པར་བསྟན་པའི་ཕྱིར་རོ། །གང་གི་ཕྱིར་གསལ་བྱ་གཟུགས་ལ་སོགས་པ།
[209b.6]གསལ་བར་བྱེད་པ་འོད་དང་ལྡན་པ་ལྡན་པ་ཡོད་པ་ཁོ་ན་ནི་འཛིན་པར་འགྱུར་གྱི་འདས་པ་ན་ནི་མ་ཡིན་ནོ། །གལ་ཏེ་དེ་ཡང་སྒྲ་དང་ལྡན་པའི་གསལ་བར་བྱ་བར་གྱུར་ན་དེ་གཟུགས་གསལ་བར་བྱེད་པ་ཉེ་བ་ཁོ་ན་ན་རྟོགས་པར་འགྱུར་གྱི། དེ་འདས་པ་ན་སྟེ་གསལ་བར་བྱེད་པ་འདས་པ་ན་
[209b.7]ནི་མ་ཡིན་ནོ། །ཤིང་དང་སྟ་རེ་ལྡན་པ་ན་རིང་པོ་ནས་གནས་པ་རྣམས་ཀྱིས་སྒྲ་རྣམ་པར་དབྱེ་བ་དང་དུས་སུ་ཉེ་བར་དམིགས་ཏེ། དེ་ལས་ཀྱང་མངོན་པར་གསལ་བ་ལྡན་པའི་དུས་ལས་འདས་སོ་ཞེས་པས་ལྡན་པའི་རྒྱུ་ཅན་མ་ཡིན་ནོ། །དེའི་ཕྱིར་གཏན་ཚིགས་ལྟར་སྣང་བའོ་ཞེས་པས་
[210a]
[210a.1]དེ་འདི་བསྒྲུབ་བྱ་དང་མཚུངས་པ་ལས་ཐ་དད་པ་མིན་ནོ། །ལྡན་པ་སྒྲ་མངོན་པར་གསལ་བའི་རྒྱུ་མཚན་ཡིན་པ་བཀག་པའི་ཕྱིར། དེའི་ཕྱིར་འདི་མ་གྲུབ་པ་ཁོ་ནའོ། །བྱེ་བྲག་པ་རྣམས་ཀྱི་ཞེས་པ་ལ་སོགས་པ་སྟེ། དེ་ལ་རབ་ཏུ་མ་གྲུབ་པ་ནི་རྟགས་དང་རྟགས་
[210a.2]ཅན་གྱི་འབྲེལ་པ་རབ་ཏུ་མ་གྲུབ་པ་ཉིད་ཀྱི་ཕྱིར་རོ། །དཔེར་ན་མེ་དང་དུ་བའི་འབྲེལ་པ་ཡོད་ཀྱང་གང་གིས་འབྲས་བུ་དང་ལྡན་པའི་རྒྱུའི་མཚན་ཉིད་མ་གྲུབ་པ་དེའི་ངོར་དུ་བ་ནི་མ་བསྟན་པ་སྟེ་གཏན་ཚིགས་མ་ཡིན་པའོ་ཞེས་པའི་དོན་ཏོ། །མེད་པ་ནི་ལྡན་པ་ལ་སོགས་པའི་འབྲེལ་པ་མེད་པའི་ཕྱིར་ཡོད་པ་
[210a.3]མ་ཡིན་པ་སྟེ། དཔེར་ན་རྭ་ཅན་ཏེ་དེའི་ཕྱིར་རྟའོ་ཞེས་པ་ལྟ་བུའོ། །གང་རྟ་དང་རྭ་དག་གཞན་མ་ཡིན་པ་ཉིད་དུ་གྲུབ་ན་རྭ་ཅན་དུ་འབུགས་སོ་ཞེས་བརྗོད་པ་ན། ཅི་ཞིག་འདིར་ཤེས་པར་བྱ། གལ་ཏེ་རྭ་ཅན་ཏེ། དེའི་ཕྱིར་རྟའོ་ཞེས་སྨྲ་ན། སྨྲ་བྱ་དེ་ནི་མེད་པ་སྨྲའོ་ཞེས་པས། རྟ་དང་རྭ་དག་ལ་
[210a.4]འབྲེལ་པ་གང་ཡང་རུང་བ་ཡོད་པ་མ་ཡིན་པས་སོ། །ཐེ་ཚོམ་ཟ་བ་ནི་གང་ཡོད་ཀྱང་མ་ངེས་པ་སྟེ། དཔེར་ན་རྭ་ཅན་རིག་གོ་ཞེས་བརྗོད་པ་ན། ཅི་ཞིག་འདིར་ཤེས་པར་བྱ་ཞེ་ན། གལ་ཏེ་རྭ་ཅན་ཏེ། དེའི་ཕྱིར་བ་ལང་ངོ་ཞེས་སྨྲ་ན་དེ་ནི་སྨྲ་བར་བྱ་བ་ཐེ་ཚོམ་དུ་སྨྲའོ་ཞེས་པའོ། །ཅིའི་ཕྱིར་ཞེ་ན། མ་ཧེ་
[210a.5]ལ་སོགས་པ་རྣམས་ལ་ཡང་རྭ་ཡོད་ཅེས་སོ། །རེ་ཞིག་རབ་ཏུ་མ་གྲུབ་པ་ཞེས་པ་ལ་སོགས་པ་རྟགས་དང་རྟགས་ཅན་དག་གིས་འབྲེལ་པ་རབ་ཏུ་མ་གྲུབ་ན་དཔེ་ལ་རྟེན་པའི་སྐྱོན་གཉིས་དག་སྲིད་དེ། དཔེ་ནི་མེད་པའམ་རབ་ཏུ་མ་གྲུབ་པའི་དོན་ཉིད་ཡང་ན་སྟེ་གཏན་ཚིགས་ཀྱི་དོན་གྱིས་སོ། །དེའི་
[210a.6]ཕྱིར་གསུངས་པ། འམ་གྱི་སྒྲ་ནི་རྣམ་པར་བརྟགས་པའི་དོན་ཅན་ནོ་ཞེས་པའོ། །དེ་ལ་གང་གི་ཚེ་ན་རེ་ཞིག་དཔེའི་ཆོས་ཅན་ཁོ་ན་རང་གི་ངོ་བོ་རབ་ཏུ་མ་གྲུབ་པ་ལས་འབྲེལ་པ་མ་རྟོགས་པ་དེའི་ཚེ་དཔེ་མེད་པ་སྟེ། ཆོས་ཅན་མ་གྲུབ་པ་ལས་སོ། །ཅི་སྟེ་ཆོས་ཅན་གྲུབ་ན་ཡང་དེ་ལ་སྔར་རྟགས་མ་
[210a.7]མཐོང་བའི་ཕྱིར་འབྲེལ་པ་རབ་ཏུ་མ་གྲུབ་པ་ཉིད་ཡིན་པ་དེའི་ཚེ། གཏན་ཚིགས་ཀྱི་དོན་གྱིས་རབ་ཏུ་མ་གྲུབ་པའི་དོན་ཉིད་དེ། སྒྲུབ་པར་བྱེད་པ་ན་མ་ཚང་བ་ཉིད་ཅེས་པའི་དོན་ཏོ། །ཅིའི་ཕྱིར་ཡང་དཔེ་ལྟར་སྣང་བ་ཡིན་གྱི་གཏན་ཚིགས་ལྟར་སྣང་བ་མ་ཡིན་ཞེ་ན། གསུངས་པ། དེ་ལྟར་ན་ནི་ཞེས་པ་ལ་
[210b]
[210b.1]སོགས་པ་སྟེ། རྣམ་པ་འདི་དག་གིས་གང་གི་ཕྱིར་དཔེ་ལ་རབ་ཏུ་མ་གྲུབ་པར་འགྱུར་བ་དེའི་ཕྱིར་འདི་ནི་དཔེའི་སྐྱོན་ཏེ། གཏན་ཚིགས་ལྟར་སྣང་བ་ནི་མ་ཡིན་ནོ། །ཅི་སྟེ་ཡང་ཞེས་པ་ལ་སོགས་པ་སྟེ། བསྒྲུབ་བྱའི་ཆོས་ཅན་ལའམ་ཡོད་བཞིན་པ་ཡང་ན་སྟེ། མིག་གི་གཟུང་བྱ་ཉིད་དང་
[210b.2]འདྲ་བ་ནི་རབ་ཏུ་མ་གྲུབ་པའི་སྒྲས་བརྗོད་ཀྱི་དཔེ་ལ་ནི་མ་ཡིན་ཞེའོ། །དེ་ལྟར་གྱུར་ན་གཏན་ཚིགས་ཀྱི་དོན་འགལ་བར་འགྱུར་རོ། །ཡང་གཏན་ཚིགས་ཀྱི་དོན་འགལ་བར་འགྱུར་བ་ཅིས་ཤེ་ན་གསུངས་པ། བསྟན་པ་ནི་རབ་ཏུ་གྲུབ་པ་སྔོན་མ་ཅན་ཉིད་ཀྱི་ཕྱིར་ཞེས་པ། གང་སྔོན་འབྲེལ་པའི་
[210b.3]དུས་སུ་རབ་ཏུ་གྲུབ་ཅིང་རྣམ་པར་ཤེས་པ་དེ་ཁོ་ན་བསྟན་གྱི། གཞན་ནི་མ་ཡིན་ནོ་ཞེས་པའི་དོན་མངོན་པར་འདོད་པའོ། །དེ་ལྟར་ནི་གལ་ཏེ་ཡོད་པ་མ་ཡིན་ཡང་ཥཪྵའི་ལས་གཏན་ཚིགས་ཉིད་དུ་འདོད་ན། དེ་ལྟར་གྱུར་ན་རྫས་དང་ཡོན་ཏན་དང་ལས་རྣམས་ཁོ་ནའི་རྒྱུ་ཉིད་དོ་ཞེས་གང་ཁས་
[210b.4]བླངས་པ་དེ་ཉམས་སོ་ཞེས་ཡོངས་སུ་རྩོད་པ་བརྗོད་དོ། །བྱུང་བ་མིན་པ་རྟགས་མ་ཡིན་གྱི་འོ་ན་ཅི་ཞེ་ན། བྱུང་བ་མིན་པ་ལ་སོགས་པ་རྟོགས་པའོ། །གཏན་ཚིགས་ཅི་ཞེ་ན། བསྟན་པ་ནི་རབ་ཏུ་གྲུབ་པ་སྔོན་མ་ཅན་ཉིད་ཀྱི་ཕྱིར་ཞེས་པ་ཉེ་བར་དམིགས་པ་སྔོན་མ་ཅན་གྱི་ཕྱིར་ཞེས་པའི་དོན་ཏོ། །
[210b.5]གང་གི་དུ་བ་ལ་སོགས་པ་རྣམས་དང་མེ་ལ་སོགས་པ་རྣམས་འབྲེལ་པ་འགལ་བ་ཅན་ནམ་མི་འགལ་བ་ཅན་རབ་ཏུ་གྲུབ་པར་འགྱུར་བ་དེའི་དུ་བ་ལ་སོགས་པ་རྣམས་བསྟན་པར་འགྱུར་རོ། །རབ་ཏུ་གྲུབ་པ་སྔོན་མ་ཅན་ཁོ་ན་བསྟན་པའོ་ཞེས་ཅི་ལྟར་རྟོགས་པར་བྱ་ཞེ་ན། སྔོན་མའི་སྒྲ་སྦྱོར་བའི་ཕྱིར་ཡང་
[210b.6]འབྲེལ་པའི་དུས་སུ་གྲུབ་པ་ཉིད་ཁོ་ན་འདིས་བརྗོད་དེ་གཞན་དུ་ན་རབ་ཏུ་གྲུབ་པ་ཉིད་ཀྱི་ཕྱིར་ཞེས་པ་ཁོ་ན་བརྗོད་པར་བྱ་བར་འགྱུར་རོ་རབ་ཏུ་གྲུབ་པར་བྱས་ནས་ཞེས་པ། དེ་ལ་སྣང་བཞིན་པའི་གོང་བུ་ལ་རྭ་ཅན་ཉིད་མེད་པའམ་ཐེ་ཚོམ་ཟ་བར་བྱས་ནས་དཔེར་བརྗོད་པ་ནི་མ་ཡིན་གྱི་འོ་ན་ཅི་ཞེ་ན། རབ་ཏུ་གྲུབ་པ་ཁོ་ནའོ། །
[210b.7]འདི་ག་ལས་ཤེ་ན། གལ་ཏེ་རྭ་ཅན་ཏེ་ཞེས་རྗེས་སུ་བརྗོད་པ་ལས་ཏེ། ཕྱོགས་ཀྱི་ཆོས་ཁས་བླངས་པ་ནི་འདི་སྐད་སྨྲའོ། །བསྒྲུབ་པར་བྱ་བའི་ཆོས་རྟ་ལ་དང་། བ་ལང་ལ་དེ་རབ་ཏུ་མ་གྲུབ་པ་ཉིད་ནི་མ་ངེས་པ་ཉིད་སྤངས་ཏེ། ཆོས་ཅན་གོང་བུ་ལ་ནི་མ་ཡིན་ནོ། །ཅི་སྟེ་ཡང་མེད་པའི་གཏན་
[211a]
[211a.1]ཚིགས་ཞེས་པ་མེད་པའི་ཤེས་པའི་གཏན་ཚིགས་ནི་མེད་པ་དང་། ཐེ་ཚོམ་གྱི་གཏན་ཚིགས་ཐེ་ཚོམ་དུ་འགྱུར་ཏེ། རྒྱུ་ལ་འབྲས་བུ་བཏགས་པའི་ཕྱིར་རོ། །གཏན་ཚིགས་ཀྱི་ཆོས་ཅན་མེད་པ་ཉིད་ཀྱི་ཕྱིར་དང་། ཐེ་ཚོམ་ཟ་བ་ཉིད་ཀྱི་ཕྱིར་ནི་མ་ཡིན་ནོ། །ཉུང་
[211a.2]བར་བརྗོད་པ་ཡིན་ཞེས་པས་མ་ཚང་བ་ཉིད་གསུངས་སོ། །རྭ་ཅན་ཏེ་དེའི་ཕྱིར་བ་ལང་ངོ་ཞེས་པ་ནི་ཐུན་མོང་གི་མ་ངེས་པ་ཁོ་ནའི་དཔེར་བརྗོད་དེ། དཔེར་རྗོད་མཐོང་བ་ལས་ཀྱང་དེ་དང་འདྲ་བ་ཁོ་ནའི་དངོས་པོ་རྟོགས་པར་འགྱུར་གྱི། མ་ངེས་པ་མ་ལུས་པ་དང་། ཐུན་མོང་མ་ཡིན་པ་དང་འགལ་
[211a.3]བའི་མི་འཁྲུལ་བ་དག་ནི་མ་ཡིན་ཏེ། དེ་ལས་མཚན་ཉིད་ཤིན་ཏུ་མི་མཐུན་པའི་ཕྱིར་ག་ལ་རྟོགས། དཔེར་ན་ཞེས་པ་ལ་སོགས་པས་ཐུན་མོང་མ་ཡིན་པ་རེ་ཞིག་མ་བླངས་པ་དཔེར་རྗོད་ཀྱིས་སྟོན་ཏོ། །ཚིག་གི་དོན་དྲུག་པོ་རྣམས་ལ་ཞེས་པ། ཐེ་ཚོམ་གྱི་རྒྱུ་ཡིན་ནོ་ཞེས་འཇུག་གོ། །ཡང་ཅིའི་
[211a.4]ཕྱིར་དྲུག་པོ་རྣམས་ལ་ཡང་ཐེ་ཚོམ་གྱི་རྒྱུ་ཞེ་ན། ཐམས་ཅད་ལ་མེད་པའི་ཕྱིར་ཞེས་པ་སྟེ། ཐམས་ཅད་དུ་མ་མཐོང་བའི་ཕྱིར་ཞེས་པའི་དོན་ཏོ། །འདི་ལས་ཡོད་པའི་ཐ་སྙད་དུ་འགྱུར་རོ་ཞེས་པས་མཐོང་བ་ནི་ཡོད་པའོ། །དེ་བཀག་པས་མ་མཐོང་བ་ནི་མེད་པའོ་ཞེས་བརྗོད་པར་བྱའོ། །འོ་ན་ཡང་མ་བརྗོད་པ་
[211a.5]ཡང་ཐེ་ཚོམ་གྱི་གཏན་ཚིགས་སོ། །ཐེ་ཚོམ་ཟ་བ་ཞེས་པའི་མཚན་ཉིད་ལ་རྟོགས་པར་འགྱུར་བ་མ་ཡིན་ནམ་ཞེ་ན། འདི་ཡོད་པ་མ་ཡིན་ཏེ། ཐེ་ཚོམ་ཟ་བའི་གཏན་ཚིགས་སོ་ཞེས་པ་འདི་ཐེ་ཚོམ་གཏན་ཚིགས་ཀྱི་མཚན་ཉིད་དུ་བརྟག་པར་བྱ་བ་ནི་མ་ཡིན་ཏེ། དེ་ཉིད་ཡོངས་སུ་མི་ཤེས་པའི་ཕྱིར་རོ། །
[211a.6]གང་རྣམས་སྨྲ་བ་ཞེས་པ་བྱེ་བྲག་པ་ཁོ་ན་འགའ་ཞིག་གོ། །ཁྱད་པར་དུ་བྱེད་ཅིང་ལྡོག་པར་བྱེད་དོ་ཞེས་པ་ཁྱད་པར་རོ། །གཉིས་ཀ་ལ་མཐོང་བའི་ཕྱིར་རོ་ཞེས་པ་བསྒྲུབ་བྱ་ལ་ལྟོས་པས་རིགས་མཚུངས་པ་རྣམས་དང་། ཅིག་ཤོས་རྣམས་ལ་འབྲེལ་པ་ཅན་ཉིད་དུ་མཐོང་བའི་ཕྱིར་རོ། །བསྒྲེང་བ་ལ་
[211a.7]སོགས་པ་བཞིན་དུ་ཞེས་པ། ཇི་ལྟར་བསྒྲེང་བ་ཉིད་ཐོ་ཡོར་དང་སྐྱེས་བུ་དང་འབྲེལ་པ་ཅན་ལ་རྗེས་སུ་འཇུག་པའི་སྒོས་ཡིན་པ་དེ་ལྟར་མཉན་པར་བྱ་བ་ཉིད་རྫས་ལ་སོགས་པའི་ཚིག་གི་དོན་དང་འབྲེལ་པ་ཅན་ལ་ལྡོག་པའི་སྒོས་སོ། །དེ་ལས་ཀྱང་གལ་ཏེ་རྭ་ཅན་ཡིན་ན་དེའི་ཕྱིར་བ་ལང་ངོ་ཞེས་
[211b]
[211b.1]པའི་དཔེ་རྗོད་པ་འདིས་ཐུན་མོང་མ་ཡིན་པ་ཉེ་བར་བླང་བར་བྱས་སོ་ཞེས་པ་བསམས་པའོ། །དེ་མི་རིགས་ཏེ་ཞེས་པ་གལ་ཏེ་ལྡོག་པ་གཉིས་ཀ་ལྟར་འགྱུར་ན་དེའི་སྒོ་ནས་ཕྱིར་འགྱུར་མོད། དེ་ཉིད་ནི་སྲིད་པ་མ་ཡིན་ཏེ། ཅིའི་ཕྱིར་ཞེ་ན། མ་ཡིན་ཞེས་པ་ལ་སོགས་པའོ། །ཅིའི་ཕྱིར་གང་ལས་
[211b.2]ལྡོག་པ་དེ་ལྟར་སྣང་བ་ལ་ཐེ་ཚོམ་འཐད་པར་བྱེད་པ་མ་ཡིན་ཞེ་ན། གསུངས་པ། མ་གྱུར་ཅིག་ཅེས་པ་ལ་སོགས་པ་སྟེ། རྫས་གཅིག་དང་ལྡན་པ་ཉིད་ནི་ས་ལ་སོགས་པ་ལས་ལྡོག་ཅིང་། དེའི་རྣམ་པས་ཐེ་ཚོམ་སྐྱེད་པར་བྱེད་པ་ཡང་མ་ཡིན་ཏེ། ཅི་རྫས་གཅིག་དང་ལྡན་པ་ཉིད་ཀྱི་ཕྱིར་སའམ།
[211b.3]འོན་ཏེ་ཆུའམ། འོན་ཏེ་མེ་ཡིན་ཞེས་པར་རོ། །དེ་འདིས་ནི་གང་ཞིག་གང་ལས་ལོག་པ་དེ་ནི་དེ་ལ་དེར་སྣང་བའི་ཐེ་ཚོམ་གྱི་གཏན་ཚིགས་མ་ཡིན་ཏེ། དཔེར་ན་རྫས་གཅིག་དང་ལྡན་པ་ཉིད་ནི་ས་ལ་སོགས་པ་རྣམས་ལ་བཞིན་མཉན་པར་བྱ་བ་ཉིད་ཀྱང་ཚིག་གི་དོན་དྲུག་རྣམས་ལས་ཁྱོད་ཀྱི་
[211b.4]ལུགས་ཀྱིས་ལྡོག་པ་ཡིན་ནོ་ཞེས་པ་ཁྱབ་བྱེད་དང་འགལ་བའི་ཐལ་བར་འགྱུར་བར་གསུངས་སོ། །དེ་ལྟར་ཡང་མ་ཡིན་ནོ་ཞེས་པ་སྟེ། གང་ཞིག་གང་ལ་ཐེ་ཚོམ་གྱི་རྒྱུ་ཡིན་པ་དེ་ནི་དེ་ལས་ལྡོག་པ་མ་ཡིན་ཏེ། དཔེར་ན་ཐོ་ཡོར་དང་མི་དག་འགྲེང་བ་བཞིན་མཉན་པར་བྱ་བ་ཉིད་ཀྱང་ཚིག་གི་
[211b.5]དོན་དྲུག་རྣམས་ལ་ཐེ་ཚོམ་གྱི་རྒྱུའོ་ཞེས་པ་བཟློག་པས་ཀྱང་ཁྱབ་པར་བྱེད་པ་དང་འགལ་བ་དམིགས་པ་ཁོ་ནའོ། །དེའི་ཕྱིར་ཞེས་པ་ལ་སོགས་པ་སྟེ། རྫས་ལ་སོགས་པ་རྣམས་གང་ཡང་རུང་བའི་སྒྲ་གདོན་མི་ཟ་བར་འབྱུང་བར་བྱའོ། །གཞན་དུ་ན་དེ་དངོས་པོ་ཉིད་ཁོ་ནར་མི་འགྱུར་ཏེ། ཚིག་
[211b.6]གི་དོན་གཞན་ཁས་མི་ལེན་པའི་ཕྱིར་རོ། །དེའི་ཕྱིར་རྫས་ལ་སོགས་པ་རྣམས་ཁོ་ན་ལས་གང་ཡང་རུང་བར་གྱུར་པ་འགའ་ཞིག་གི་ཆོས་འདི་ཡིན་ཞེས་པ་སྟེ། དེའི་ཆོས་སུ་སྲེད་པའི་སྒོ་ནས་ཐེ་ཚོམ་གྱི་རྒྱུ་ཡིན་ཏེ། དེ་ལས་ལྡོག་པའི་སྒོ་ནས་ནི་མ་ཡིན་ནོ་ཞེས་པ་ཐུན་མོང་བ་ལས་གཞན་ཡིན་
[211b.7]ཏེ། དེ་ཡང་མཚན་ཉིད་ལས་དང་དཔེ་བརྗོད་ལས་ཀྱང་མ་བཤད་དོ་ཞེས་པས་ཉུངས་པས་བརྗོད་པའོ། །འགལ་བ་མཐའ་གཅིག་པ་ཅན་ཞེས་པ་ཕན་ཚུན་འགལ་བའི་དོན་སྒྲུབ་པར་བྱེད་པའི་ཕྱིར་འགལ་བ་ཡང་འདི་ཡིན་ལ་མཐའ་གཅིག་པ་ཅན་ཡང་ངོ་ཞེས་པས་འགལ་བ་མཐའ་
[212a]
[212a.1]གཅིག་པ་ཅན་ཏེ། ཡན་ལག་གི་སྒོ་ནས་ཚོགས་པ་ལ་འཇུག་པ་དག་གི་ཚིག་སྡུད་དེ་གཞུ་དམར་པོ་བཞིན་ནོ། །འགལ་བ་མ་ངེས་པ་ཅན་ཞེས་པ་ཁ་ཅིག་ཏུ་ཀློག་སྟེ་དེ་ལ་འགལ་བ་ནི་སྔ་མ་བཞིན་ཡིན་ཞིང་། མ་ངེས་པ་ནི་ཐེ་ཚོམ་གྱི་རྒྱུ་ཉིད་ཀྱི་ཕྱིར་རོ། །འགལ་བ་མ་ངེས་
[212a.2]པ་ཅན་ཞེས་བརྗོད་པ་ལ། སླར་ཡང་དུ་མ་སྨོས་པ་ནི། འགལ་བའི་གཏན་ཚིགས་ལས་ཁྱད་པར་གྱི་དོན་དུའོ། །གཞན་པ་ཟེར་བ་ནི། ཐེ་ཚོམ་གྱི་གཏན་ཚིགས་ཀྱི་སྐབས་ལས། ཤུགས་ཀྱིས་ཐོབ་པ་ཁོ་ནའི་དུ་མ་ཉིད། དུ་མ་ཞེས་རྗེས་སུ་བརྗོད་པ་ནི་བདེ་བླག་ཏུ་རྟོགས་པའི་དོན་དུའོ་ཞེའོ། །
[212a.3]ལྔ་པོ་རྣམས་ཀྱི་རྟགས་དམིགས་པའི་ཕྱིར་དང་ཞེས་པ། གང་ཞིག་གང་དུ་རྟགས་དམིགས་པ་དེ་དེའི་རྩོམ་པར་བྱེད་པ་སྟེ། དཔེར་ན་བུམ་པའི་ས་བཞིན་ལུས་ལ་ཡང་འབྱུང་བ་ཆེན་པོ་རྣམས་འཛིན་པ་དང་སྡུད་པ་དང་སྨིན་པ་དང་། གཡོ་བ་དང་སྐབས་སྦྱིན་པའི་རྟགས་ཅན་རྣམས་དམིགས་སོ་ཞེས་
[212a.4]པ་རང་བཞིན་ནོ། །རིགས་མི་མཐུན་པ་རྩོམ་པ་བཀག་པའི་ཕྱིར་ཞེས་པ། གང་ཞིག་གང་ལས་རིགས་མི་མཐུན་པ་དེ་དེའི་རྩོམ་པར་བྱེད་པ་པོ་མ་ཡིན་ཏེ། དཔེར་ན་མེའི་རྡུལ་ཕྲ་རབ་རྣམས་སའི་ཡན་ལག་ཅན་གྱི་བཞིན་ལུས་ཀྱང་འབྱུང་བ་རྣམས་ལས་རིགས་མི་མཐུན་པའོ། །ཁྱབ་པར་བྱེད་པ་དང་
[212a.5]འགལ་བའོ། །འདི་ཡང་ཐེ་ཚོམ་གྱི་གཏན་ཚིགས་ཏེ་བསྟན་བཅོས་སུ་མཐོང་བ་ཁོ་ན་ཡིན་ཏེ། མཚན་ཉིད་ལས་སམ་དཔེར་བརྗོད་ལས་མ་བཤད་དོ་ཞེས་པས་མ་ཚང་བ་ཉིད་དོ། །འདིས་ཞེས་པ་ཐུན་མོང་མ་ཡིན་པ་དང་འགལ་བ་མི་འཁྲུལ་བ་ཅན་དག་གིས་དཔེ་བརྗོད་མ་བསྡུས་པས་སོ། །སྤྱི་མངོན་
[212a.6]སུམ་ལས་དང་ཁྱད་པར་མངོན་སུམ་མ་ཡིན་པ་ལས་ཁྱད་པར་དྲན་པ་ལས་ཐེ་ཚོམ་མོ་ཞེས་པ་མདོའོ། །འདི་ཐེ་ཚོམ་གྱི་གཏན་ཚིགས་དག་ཡིན་ཡང་ཐུན་མོང་མ་ཡིན་པ་དང་འགལ་བ་མི་འཁྲུལ་བ་དག་མ་བསྡུས་པའི་ཕྱིར་མ་ཁྱབ་པ་ཉིད་དོ། །འདིར་ཡང་ཞེས་པ་ཐེ་ཚོམ་གྱི་མདོ་འདིར་རོ། །ཐེ་ཚོམ་གྱི་
[212a.7]གཏན་ཚིགས་ཀྱི་མཚན་ཉིད་ཧ་ཅང་ཁྱབ་པ་ཉིད་གསུངས་ཏེ། གང་གི་ཕྱིར་ཀུན་ད་དཀར་བ་ཉིད་སྤྱི་ཡིན་ཞིང་དེ་མངོན་སུམ་ཉིད་ན་ཡང་གཟུགས་ལ་སོགས་པ་རྣམས་ལ་ངེས་པ་མཐོང་གི་ཐེ་ཚོམ་ནི་མ་ཡིན་ནོ། །ཇི་ལྟར་མཚན་ཉིད་ཡིན་པ་དེ་ལྟར་དེ་ཡང་ཐེ་ཚོམ་གྱི་གཏན་ཚིགས་ཉིད་ཁོ་ནར་འཐོབ་བོ། །
[212b]
[212b.1]དེའི་ཕྱིར་གང་རྣམ་པར་གཅོད་བྱེད་མ་ཡིན་པའི་གཏན་ཚིགས་སྤྱི་དེ་མངོན་སུམ་པ་ཉིད་ན་ཐེ་ཚོམ་དུ་འགྱུར་རོ་ཞེས་ཁྱད་པར་དུ་བྱས་ནས་བརྗོད་པར་བྱའོ། །བརྗོད་པ་ནི་མ་ཡིན་ཏེ། དེའི་ཕྱིར་མ་ཚང་བ་ཉིད་དོ། །རྣམ་པར་གཅོད་བྱེད་མ་ཡིན་པའི་གཏན་ཚིགས་ཞེས་པ་འཁྲུལ་པ་ཅན་ཞེས་
[212b.2]པའི་དོན་ཏོ། །ཡང་ཅི་ལྟར་དེ་ནི་དེ་རྣམས་ཀྱི་སྤྱི་ཡིན་ཏེ། ཇི་ཙམ་དུ་དཀར་པོ་ཉིད་དེ་ནི་ཁྱད་པར་ཁོ་ནའོ་ཞེ་ན་འདི་སྐྱོན་མ་ཡིན་ཏེ། དུ་མ་དང་འབྲེལ་པ་ཅན་ཉིད་ཀྱི་ཕྱིར་དེ་ཡང་སྤྱི་དང་འདྲ་བས་སྤྱི་སྟེ། འདིར་སྤྱིའི་ཚིག་དོན་ཁོ་ན་སྤྱིའི་མཉན་པས་བརྗོད་པར་འདོད་པ་ཡང་མ་ཡིན་ནོ། །
[212b.3]གང་གི་ཕྱིར་ཡོན་ཏན་མཐོང་བ་ལས་ཀྱང་ཐེ་ཚོམ་ཉེ་བར་སྐྱེ་བ་སྟེ། དེས་ན་དུ་མ་དང་འབྲེལ་པ་ཅན་ཁོ་ན་འདིར་ཐེ་ཚོམ་གྱི་རྒྱུར་བརྗོད་དོ། །ཡུལ་འགའ་ཞིག་ཏུ་ཞེས་པ་ཐམས་ཅད་དུ་དུ་བ་ལ་སོགས་པ་ཉིད་ཀྱི་ཐེ་ཚོམ་ཟ་བ་མི་སྲིད་པར་སྟོན་ཏོ། །འདིར་དེའི་བདག་ཉིད་དང་དེ་ལས་བྱུང་
[212b.4]བའི་མཚན་ཉིད་ཅན་གྱི་འབྲེལ་པ་བཤད་པའི་ཆེད་དུ་གཏན་ཚིགས་རིགས་མཐུན་པ་དང་མི་མཐུན་པ་དག་ལ་ཡོད་པ་དང་མེད་པ་ཉིད་དག་དཔེའི་སྦྱོར་བས་བཤད་པར་བྱ་ན། དེ་དག་ཀྱང་གཏན་ཚིགས་ཀྱི་མཚན་ཉིད་ཁོ་ན་ལས་གྲུབ་སྟེ། དེའི་ཕྱིར་དཔེའི་མཚན་ཉིད་དོན་མེད་པ་ཅན་ནོ་ཞེ་ན་
[212b.5]གསུངས་པ། ཚུལ་གསུམ་གཏན་ཚིགས་ཞེས་པ་ལ་སོགས་པའོ། །གལ་ཏེ་ཡང་ཚུལ་གསུམ་གཏན་ཚིགས་ཞེས་བརྗོད་པ་དེ་ལྟ་ན་ཡང་སྦྱོར་བའི་དུས་སུ། ཕྱོགས་ཆོས་སུ་ནི་ལེགས་གནས་པ། །ནིའི་སྒྲ་ནི་ངེས་པར་གཟུང་བ་ལའོ། །ཕྱོགས་ཆོས་ཙམ་རང་གི་ངོ་བོས་གནས་
[212b.6]པར་གཏན་ཚིགས་ཀྱི་ཚིག་གིས་སྟོན་ཏེ། ཕྱོགས་ཆོས་ཙམ་བརྗོད་ཅེས་པའི་དོན་ཏོ། །ཅི་ལས་ཤེ་ན་གསུངས་པ། གྲགས་ཕྱིར་ཞེས་སོ། །ཡང་གྲགས་པ་དེས་ཅི་བྱས་ཤེ་ན་གསུངས་པ། རྟོག་གེའི་བསྟན་བཅོས་རྣམས་སུ་ནི་ཞེས་པ་ལ་སོགས་པ་སྟེ། རྒྱུ་མཚན་གྱི་དོན་ལ་བདུན་
[212b.7]པའོ། །རིགས་པ་ཕྲ་མོ་ལ་སོགས་པ་རྣམས་སུ་ཕྱོགས་ཆོས་ཙམ་གཏན་ཚིགས་སུ་བཤད་དེ་དེའི་ཕྱིར་དེའི་སྒོས་འཇིག་རྟེན་པའི་སྦྱོར་བ་ལ་ཡང་ཕྱོགས་ཆོས་ཙམ་གཏན་ཚིགས་ཉིད་དུ་རབ་ཏུ་གྲགས་སོ། །དེ་སྐད་དུ་དེར་གཏན་ཚིགས་བརྗོད་པ་བཤད་ཟིན་ཏོ། །དཔེ་བརྗོད་པར་བྱའོ་ཞེས་སྨྲ་བ་
[213a]
[213a.1]པོ་རྣམས་དམིགས་སོ། །གྲགས་པ་དེ་ཉིད་སྟོན་པ་གསུངས་པ། དཔེར་ན་ཞེས་པ་ལ་སོགས་པའོ། །སྒྲ་མི་རྟག་སྟེ་བྱས་པའི་ཕྱིར་རོ་ཞེས་བརྗོད་པ་ན། བྱས་པ་ཉིད་ཙམ་གྱི་གཏན་ཚིགས་ཕྱོགས་སུ་བྱས་པ་སྒྲའི་ཆོས་སོ་ཞེས་པ་འདི་ཙམ་རྟོགས་སོ་ཞེས་པའི་དོན་ཏོ། །
[213a.2]མཚན་ཉིད་ལྷག་མ་ནི་སྦྱོར་བ་ལ་མ་བརྗོད་ཅེས་པ་བྱས་པའི་ཕྱིར་ཞེས་པ་འདི་ཁོ་ནས་མཐུན་ཕྱོགས་དང་མི་མཐུན་ཕྱོགས་དག་ལ་འདི་ཡོད་པ་དང་མེད་པ་དག་བཤད་པ་ནི་མ་ཡིན་ནོ། །དེའི་ཕྱིར་དེའི་དོན་དུ་དཔེ་བརྗོད་པར་བྱ་བའོ་ཞེས་པ་དང་། དཔེ་ཡིས་རབ་ཏུ་གསལ་བར་བྱེད། །ཅེས་ཀྱང་ངོ་། །རྗོད་པར་
[213a.3]བྱེད་པ་དང་བརྗོད་པར་བྱ་བ་དག་ཐ་མི་དད་པར་ཉེ་བར་བཏགས་པ་ལ་འདི་སྐད་ཅེས་བརྗོད་དོ། །གཞན་དུ་ན་གང་ལ་ཞེས་པ་བརྗོད་པར་བྱ་བ་ལ་ཞེས་པའི་ཚིག་ལས་དོན་ཁོ་ན་དཔེ་ཉིད་དེ། དོན་གྱིས་གསལ་བར་བྱེད་པ་ཡང་མ་ཡིན་ནོ་ཞེས་པས་འདི་མི་རིགས་པར་འགྱུར་རོ། །དེའི་ཕྱིར་ཐ་མི་དད་པ་ཉེ་བར་
[213a.4]བཏགས་པ་ལས་དཔེ་རྗོད་པར་བྱེད་པའི་ངང་ཚུལ་ཅན་གྱི་ཚིག་ནི་འདིར་དཔེའི་སྒྲས་བརྗོད་དོ། །གཏན་ཚིགས་བསྒྲུབ་བྱའི་རྗེས་འགྲོ་བ། །ཞེས་པ་བསྒྲུབ་བྱའི་སྒྲ་ནི་འདིར་ཤེས་པར་འདོད་པའི་ཆོས་ཙམ་ལ་འཇུག་གོ། །རྗེས་འགྲོ་བ་ནི་གཏན་ཚིགས་ཀྱི་རྗེས་སུ་འགྲོ་བ་པ་སྟེ་གང་ན་གཏན་ཚིགས་ཡོད་པ་
[213a.5]དེ་ན་བསྒྲུབ་བྱའི་ཡོད་པ་ཁོ་ན་སྟེ། ལྷན་ཅིག་ཡོད་པ་ཙམ་ནི་མ་ཡིན་ནོ། །བསྒྲུབ་བྱ་ཁོ་ནས་གཏན་ཚིགས་ཀྱི་སྟེ། གཏན་ཚིགས་ཀྱིས་བསྒྲུབ་བྱའི་ནི་མ་ཡིན་ནོ། །བསྒྲུབ་བྱ་མེད་ལ་མེད་པ་ཉིད་བསྒྲུབ་པར་བྱ་བ་མེད་པ་ཁོ་ན་ལ་གཏན་ཚིགས་མེད་པ་ཉིད་དེ། གཏན་ཚིགས་མེད་པ་ལ་བསྒྲུབ་བྱ་
[213a.6]ནི་མ་ཡིན་ནོ། །དེའི་མི་མཐུན་ཕྱོགས་དག་ལ་ལྷན་ཅིག་ཡོད་པ་ཉིད་ཙམ་ཡང་མ་ཡིན་ནོ། །མེད་པ་ཉིད་ཅེས་པའི་མེད་པའི་སྒྲ་ནི་འདི་ངག་གི་ངོ་བོའི་སྒྲ་གཞན་པ་མེད་པ་བརྗོད་པ་རྟོགས་པར་བྱེད་པར་བལྟ་བར་བྱའོ། །དེ་ཆོས་མཐུན་དང་ཅིག་ཤོས་ཞེས་པ། ཆོས་མཐུན་པ་ཉིད་ཅན་གྱི་དཔེ་དང་
[213a.7]ཆོས་མི་མཐུན་པ་ཉིད་ཀྱི་དཔེའོ་ཞེས་ཞར་བའམ་འཕྱེ་བོ་ལ་སོགས་པ་བཞིན་དུ་ཁྱད་པར་གྱི་བསྡུ་བའོ། །ཡང་ན་ཆོས་མཐུན་པ་ཉིད་དང་ཅིག་ཤོས་དང་བཅས་པ་ནི་ཆོས་མཐུན་བཅས། ཅིག་ཤོས་ཞེས་པ་འབྲུ་མང་པོའོ། །བཤད་པ་ནི་འདི་ལ་ནི་དེ་ཞེས་པ་མིང་ཐམས་ཅད་པའི་ཚིག་འདི་མ་བརྗོད་
[213b]
[213b.1]ཀྱང་། གང་དང་དེ་དག་ནི་རྟག་ཏུ་འབྲེལ་པའི་ཕྱིར་འཐོབ་པོ། །ཐམས་ཅད་ལ་འགྲོ་བ་ནི་རྗེས་སུ་འགྲོ་བའོ་ཞེས་པ་འདིས་རྗེས་སུའི་སྒྲ་ནི་འདིར་ཁྱབ་པ་གསལ་བར་བྱེད་དོ་ཞེས་བསྟན་ཏོ། །གང་ལ་ཞེས་པ་བརྗོད་པར་བྱ་བ་ལ་ཞེས་པ་འདིས་དོན་དཔེ་ཉིད་གསུངས་སོ། །ཚིག་ནི་དེའི་རྗོད་
[213b.2]པར་བྱེད་པ་ཉིད་ཀྱི་ཕྱིར་ཉེ་བར་བཏགས་པའི་དཔེའོ། །འདི་ཡང་། དཔེ་ཡིས་རབ་ཏུ་བསྟན་པར་བྱ། །ཞེས་པ་འདིས་སྔར་ཉིད་རིག་པར་བྱས་ཟིན་ཏོ། །གང་རྩོལ་བ་ལས་བྱུང་བ་དེ་ནི་ཞེས་པའི་ནིའི་སྒྲ་ནི་ཐོབ་པར་འདོད་པའི་དོན་ཏོ། །དེ་ལྟ་ན་ནི་གཏན་ཚིགས་མཐུན་ཕྱོགས་ཁོ་ན་ལ་ཡོད་པ་ཉིད་
[213b.3]དུ་བཤད་པར་འགྱུར་རོ། །གལ་ཏེ་གང་དང་གང་རྩོལ་མ་ཐག་ཏུ་བྱུང་བ་དེ་དང་དེ་མི་རྟག་གོ་ཞེས་སྟོན་པར་བྱེད་ན་སྟེ། གཞན་དུ་ན་མ་ཡིན་ནོ། །དེ་ལྟར་ཐམས་ཅད་བསྡུས་པས་ཁྱབ་པ་བསྟན་ནས། གསལ་བར་བྱེད་པའི་དོན་དུ་ཕྱོགས་གཅིག་དཔེར་རྗོད་པར་བྱེད་དེ། དཔེར་ན་བུམ་པ་བཞིན་
[213b.4]ཞེས་པའོ། །རྟག་པ་ནི་རྩོལ་མ་ཐག་ཏུ་བྱུང་བ་མ་ཡིན་ཞེས་པ། རྟག་པའི་སྒྲས་མི་རྟག་པ་ཉིད་མེད་པ་མཚོན་པར་བྱེད་དོ། །དེ་ལྟར་ན་ནི་གཏན་ཚིགས་སྒྲུབ་བྱེད་མེད་པ་ལ་མེད་པ་ཉིད་བརྗོད་པར་འགྱུར་གྱི། རྣམ་པ་གཞན་དུ་ན་མ་ཡིན་ནོ། །དེ་འདིས་འབྲས་བུ་དང་རང་བཞིན་གྱི་གཏན་
[213b.5]ཚིགས་གཉིས་པོ་དེ་དག་གི་ཡང་མཚན་ཉིད་ལྷག་མ་བསྟན་ཏོ། །དེ་ལྟར་ནི་རྩོལ་མ་ཐག་ཏུ་བྱུང་བ་ཉིད་གཉིས་ཀའི་ནང་དུ་འདུས་ཏེ། བརྩལ་མ་ཐག་ཏུ་གསལ་བ་དང་སྐྱེ་བ་དག་རྩོལ་མ་ཐག་ཏུ་བྱུང་བའི་སྒྲས་བརྗོད་པའི་ཕྱིར་རོ། །དངོས་པོ་སྒྲུབ་པར་བྱེད་པའི་གཏན་ཚིགས་ལ་ཡང་བསྒྲུབ་
[213b.6]བྱའི་ཁྱད་པར་མི་རྟག་པ་ལ་སོགས་པ་འགའ་ཞིག་ལ་དགག་སྒྲའི་སྦྱོར་བ་བསྟན་པའི་ཕྱིར་ན། འགའ་ཞིག་གི་དགག་པའི་ངོ་བོར་བསྒྲུབ་བྱ་སྟོན་པར་བྱེད་དོ་ཞེས་དོགས་པར་འགྱུར་ཏེ། དེའི་ཕྱིར་དེ་གསལ་བའི་ཆེད་དུ་གསུངས་པ། སྒྲུབ་པས་ཞེས་པ་ལ་སོགས་པའོ། །ཆོས་མཐུན་པ་ཉིད་
[213b.7]ཅན་གྱི་དཔེ་ལ་དངོས་པོར་གྱུར་པའི་བསྒྲུབ་བྱ་རང་གི་ངོ་བོ་ཁོ་ནས་སྒྲུབ་བྱེད་ལ་བསྟན་པར་བྱའི་རང་གི་ངོ་བོ་དགག་པའི་ངོ་བོས་ནི་མ་ཡིན་ནོ། །གདོན་མི་ཟ་བར་ཞེས་པ་གཞན་དུ་ན་དོན་གང་ཆོས་མཐུན་པ་ཉིད་ཀྱི་དཔེ་ལ་བརྗོད་པར་བྱ་བ་ཁོ་ན་གཏན་ཚིགས་མཐུན་པའི་ཕྱོགས་ལ་ཡོད་པ་ཉིད་དུ་
[214a]
[214a.1]རྟོགས་པ་མ་ཡིན་ནོ་ཞེས་དགོངས་པའོ། །བསྒྲུབ་བྱ་མེད་ལ་ནི་མེད། ཅེས་པ་ཆོས་མི་མཐུན་པ་ཉིད་ཀྱིས་ནི་རྟག་པ་ནི་རྩོལ་བ་ལས་མ་བྱུང་བའོ་ཞེས་པ་འདིས་མི་རྟག་པ་མེད་ན། རྩོལ་མ་ཐག་ཏུ་བྱུང་བ་མེད་པ་བསྟན་པར་བྱའི། རྟག་པའི་དངོས་པོ་ལ་བརྩལ་མ་
[214a.2]ཐག་ཏུ་མ་བྱུང་བ་ཁྱབ་པ་བཤད་པར་བྱ་བ་ནི་མ་ཡིན་ནོ། །ཇི་སྐད་བཤད་པའི་དོགས་པ་མེད་པར་མ་གྱུར་ཅིག་ཅེས་པས་གསུངས་པ། གདོན་མི་ཟ་བར་ཞེས་པའོ། །ཡང་ཅི་ལྟར་ན་བསྒྲུབ་བྱ་མེད་པ་ལ་ཡང་མེད་པ་ཉིད་ཅེས་བརྗོད་པ་ན། གང་གིས་དེ་བཟློག་པའི་ཆེད་དུ་འབད་པ་བྱ་བ་རྣམ་
[214a.3]པ་གཞན་དུ་བཤད་པར་དོགས་ཤེ་ན། །གང་རྣམས་ཀྱི་རྟག་པའི་སྒྲ་ནི་དངོས་པོ་བརྗོད་པ་ཡིན་པར་རབ་ཏུ་གྲགས་པ་དེ་རྣམས་རྟག་པ་རྩོལ་མ་ཐག་ཏུ་མ་བྱུང་བའོ་ཞེས་བརྗོད་པ་ན་དངོས་པོ་ཁོ་ན་རྟག་པའི་སྒྲས་བརྗོད་དོ་སྙམ་དུ་འཁྲུལ་བར་འགྱུར་རོ། །དེས་ན་དེ་རྣམས་བསལ་བར་བྱ་སྟེ།
[214a.4]རྟག་པའི་སྒྲས་འདིར་མི་རྟག་པ་མེད་པ་བརྗོད་ཀྱི། དངོས་པོ་ནི་མ་ཡིན་ནོ་ཞེས་སོ། །དེ་ལྟར་ན་གང་དུ་དགག་པ་ཁོ་ན་དངོས་སུ་བསྒྲུབ་པར་བྱ་བ་དེར་ཅི་ལྟར་བསྒྲུབ་པས་སྒྲུབ་བྱེད་ལ་བསྒྲུབ་བྱ་བསྟན་པར་བྱ་ཞེ་ན། འདི་སྐྱོན་མ་ཡིན་ཏེ། གང་དུ་རྣམ་པ་གཞན་གྱིས་བསྟན་པར་དོགས་པ་
[214a.5]དེ་ཁོ་ན་ལ་འདི་ཉེ་བར་བསྟན་པའོ། །འདིར་ནི་གཙོ་བོ་མེད་དོ་ཞེས་པ་ལ་སོགས་པ་ལ། གཏན་ཚིགས་བསྒྲུབ་བྱས་རྗེས་འགྲོ་བ། །ཞེས་པའི་ཚིག་ལས་རྣམ་པ་གཞན་དུ་སྟོན་པའི་དོགས་པ་ཉིད་མེད་དོ། །སྔ་མ་ལ་ནི་དོགས་པ་སྲིད་པར་བསྟན་ཏོ། །དེ་ལྟར་བྱས་ན་ཅིར་འགྱུར་ཞེ་ན་
[214a.6]གསུངས་པ། མ་ཡིན་དགག་གི་དགག་པ་ཡང་ཞེས་པ་ལ་སོགས་པའོ། །མཚན་ཉིད་མི་མཐུན་པ་ནི་མི་འདྲ་བ་སྟེ་དགག་སྒྲའི་དོན་དུ་གྱུར་པ་ལའོ། །ངེས་པར་ཡང་མ་ཡིན་དགག་པ་དང་དགག་པ་དག་གི་རྣམ་པ་གཉི་ག་ལྟར་ན་དོན་རྗེས་སུ་རྟོགས་པར་བྱ་སྟེ། རྗེས་སུ་འགྲོ་བ་དང་ལྡོག་པ་དག་གིས་
[214a.7]དོན་རྗེས་སུ་དཔོག་པའི་ཕྱིར་རོ། །འདི་དག་མེད་པ་ཡང་རྗེས་སུ་འགྲོ་བ་དང་ལྡོག་པ་མི་སྲིད་པའི་ཕྱིར་རོ། །དེ་ལྟར་ན་ཞེས་པ་ལ་སོགས་པས་ཆོས་མི་མཐུན་པའི་དཔེ་ལ་མེད་པར་དགག་པ་བརྗོད་པའི་ཡོན་ཏན་སྟོན་པར་བྱེད་དེ། གལ་ཏེ་བསྒྲུབ་བྱ་སྒྲུབ་བྱེད་ཀྱི་མི་མཐུན་ཕྱོགས་བཞིན།
[214b]
[214b.1]དངོས་པོ་ཁོ་ན་ཆོས་མི་མཐུན་པ་ཉིད་ཀྱི་དཔེར་འགྱུར་ན། མི་རྟག་པ་སྒྲུབ་པར་བྱེད་པ་ན་མདོ་སྡེ་པའི་ཆོས་མི་མཐུན་པའི་དཔེར་འགྱུར་བ་མིན་ཏེ་རྟག་པའི་དངོས་པོ་ཁས་མི་ལེན་པའི་ཕྱིར་རོ། །མེད་དགག་གི་དག་པ་ལ་བརྟེན་པ་ལ་ནི་སྐྱོན་འདི་མེད་དེ། རྟག་པའི་སྒྲས་བསྒྲུབ་པར་བྱ་བ་མེད་པ་
[214b.2]ཙམ་རྗོད་པའི་ཕྱིར་རོ། །དངོས་པོའི་ཆོས་སྒྲུབ་པ་ལ་ནི་བཞི་ལ་ལྟོས་ཏེ། སྒྲུབ་པ་ནི་དངོས་པོ་ལ་བརྟེན་པའི་ཕྱིར་རོ། །དགག་པ་ནི་མ་ཡིན་ནོ་ཞེས་པས་དངོས་པོ་མེད་པའི་ངོ་བོ་ཡང་དཔེ་རུ་འཐད་དོ། །ཡང་རྒྱུ་ཅིས་གཅིག་ལ་ནི་ཞེས་པ། ཅི་རྣམ་པ་གཞན་དུ་སྦྱོར་བ་ལ་མངོན་པར་འདོད་པའི་
[214b.3]དོན་འགྲུབ་པ་མིན་པའམ། སྐྱོན་ཅི་ཞིག་འབྱུང་། གང་གིས་འདི་ལྟ་ཁོ་ནར་སྦྱོར་བར་བྱ། །ཞེས་མི་ཤེས་པར་སེམས་པས། སྦྱོར་བ་ངེས་པའི་རྒྱུ་འདྲི་བར་བྱེད་དོ། །འདི་ལྟར་ན་ནི་ཞེས་པ་ལ་སོགས་པ་འདི་ལྟ་བུའི་རྣམ་པ་ཁོ་ནའི་སྦྱོར་བས་གཏན་ཚིགས་ཀྱི་ཁྱད་པར་བསྟན་པར་ནུས་ཏེ། རྣམ་པ་གཞན་
[214b.4]དུ་ནི་མ་ཡིན་ཞེས་པ་བསྡུས་པའི་དོན་ཏོ། །དེ་ལྟར་ནི་བྱས་པ་ཉིད་ཀྱི་ཕྱིར། རྩོལ་མ་ཐག་ཏུ་བྱུང་བ་ཉིད་དུ་དམ་བཅས་པ་ལ། གང་རྩོལ་མ་ཐག་ཏུ་བྱུང་བ་དེ་བྱས་པའོ་ཞེས་བསྒྲུབ་བྱ་ལ་གཏན་ཚིགས་ཀྱི་རྗེས་སུ་འགྲོ་བར་བྱས་པ་བརྗོད་ཀྱི། གཏན་ཚིགས་བསྒྲུབ་བྱ་ཁོ་ན་ལ་ཡོད་པ་ཉིད་རྟོགས་
[214b.5]པ་ནི་མ་ཡིན་ནོ། །དེ་བཞིན་དུ་གང་བྱས་པ་མིན་པ་དེ་རྩོལ་མ་ཐག་ཏུ་མ་བྱུང་བའོ་ཞེས་གཏན་ཚིགས་མེད་ན་བསྒྲུབ་བྱ་མེད་པ་སྟོན་གྱི། བསྒྲུབ་བྱ་མེད་ན་གཏན་ཚིགས་མེད་པ་ཁོ་ན་རྟོགས་པ་ནི་མ་ཡིན་ནོ། །འོ་ན་དེ་ལྟ་ན་ཞེས་པ། གལ་ཏེ་གང་དུ་གཏན་ཚིགས་བསྒྲུབ་བྱས་རྗེས་སུ་འགྲོ་
[214b.6]བ་ཡིན་པ་དེ་ཆོས་མཐུན་པ་ཉིད་ཀྱི་དཔེའོ་ཞེས་པ་མཚན་ཉིད་ཡིན་ན། བུམ་པ་དཔེ་མ་ཡིན་ཏེ། དེ་ལ་བསྒྲུབ་བྱ་དང་སྒྲུབ་བྱེད་དག་ཕན་ཚུན་རྗེས་སུ་འགྲོ་བའི་ཕྱིར་དེ་དཔེར་བརྗོད་དུ་བཤད་པར་བྱ་ན། གང་ལ་བསྒྲུབ་བྱ་ཁོ་ནས་གཏན་ཚིགས་ཀྱི་རྗེས་སུ་འགྲོའི་གཏན་ཚིགས་ཀྱི་བསྒྲུབ་བྱ་
[214b.7]མ་ཡིན་ནོ། །མ་ཡིན་ཏེ་བརྗོད་པར་མི་འདོད་པ་ཉིད་ཀྱི་ཕྱིར་ཞེས་པ་བསྒྲུབ་བྱའི་གཏན་ཚིགས་ཀྱི་རྗེས་སུ་འགྲོ་བ་ཡོད་ཀྱང་། བརྗོད་པར་འདོད་པ་ཡོད་པ་མ་ཡིན་ཏེ། བྱས་པའི་ཁྱད་པར་བཞིན་དུ་གཙོ་བོ་མ་ཡིན་པ་ཉིད་ཀྱི་ཕྱིར་རོ། །གཙོ་བོ་མ་ཡིན་པ་ཉིད་ནི་རྗེས་སུ་དཔོག་པ་ལ་ཡན་
[215a]
[215a.1]ལག་མ་ཡིན་པ་ཉིད་ཀྱི་ཕྱིར་རོ། །དེ་བཞིན་ཁོ་ནར་ཕྱི་རོལ་གྱི་དོན་བསྟན་པ་ནི་ཞེས་པ། བུམ་པ་ལ་སོགས་པའི་ཁྱད་པར་ལས། བསྒྲུབ་བྱའི་རིགས་ཅན་གྱི་སྤྱི་ནི་ཕྱི་རོལ་གྱི་དོན་ཏོ། །དེ་ལ་སྤྱིར་གང་ཅུང་ཟད་བྱས་པ་ཞེས་བྱ་བ་དེ་ཐམས་ཅད་མི་རྟག་པ་
[215a.2]ཁོ་ནའོ་ཞེས་བསྒྲུབ་བྱས་གཏན་ཚིགས་ལ་ཁྱབ་པ་གསལ་བར་བྱེད་པ་ནི་ཕྱི་རོལ་གྱི་དོན་གསལ་བར་བྱེད་པའོ། །དེ་ཁོ་ན་ངེས་པར་བསྟན་པར་བྱ་བ་ལ་སྟེ་དཔེ་ལ་གཙོ་བོ་ཡིན་ཏེ། རྗེས་སུ་དཔག་པའི་ཡན་ལག་ཉིད་ཀྱི་ཕྱིར་རོ། །བུམ་པ་ཁྱད་པར་བསྒྲུབ་བྱ་དང་སྒྲུབ་བྱེད་དག་གི་ཕན་ཚུན་རྗེས་
[215a.3]སུ་འགྲོ་བ་གང་ཡིན་པ་ནི་མ་ཡིན་ཏེ། དེའི་སྟོབས་ལས་བསྒྲུབ་བྱ་འགྲུབ་པར་འགྱུར་བ་ནི་མ་ཡིན་པས་སོ། །དེའི་ཕྱིར་སྤྱིས་ཇི་སྐད་བཤད་པའི་དཔེའི་མཚན་ཉིད་ཅན་གྱི་དོན་གྱི་ཕུང་པོ་ཐམས་ཅད་དཔེ་སྟེ། བུམ་པ་ཁོ་ན་ནི་མ་ཡིན་ནོ། །བུམ་པ་ནི་དེའི་ནང་དུ་འདུས་པས་ཏེ་དེ་ཁོ་ན་ཉེ་བར་
[215a.4]མཚོན་པའི་དོན་དུ་དཔེར་རྗོད་པའོ། །དེའི་ཕྱིར་དེ་ལ་གང་བསྒྲུབ་བྱའི་གཏན་ཚིགས་ཀྱི་རྗེས་སུ་འགྲོ་བ་འདི་ནི་གཙོ་བོ་མ་ཡིན་པའི་ཕྱིར་བརྗོད་པར་འདོད་པ་མ་ཡིན་ནོ་ཞེས་པ་དང་། ཕྱི་རོལ་གྱི་དོན་སྟོན་པ་ནི་ངེས་པར་བསྟན་པར་བྱ་ལ་གཙོ་བོའོ་ཞེས་པའི་ཚིག་ནི་གསལ་བའི་ཁྱད་པར་གཅིག་ཁོ་ན་
[215a.5]ལ་རབ་ཏུ་སྟོན་པ་གཙོ་བོ་ཉིད་ཡིན་པ་སེལ་བ་ལྷུར་བྱེད་པར་བལྟ་བར་བྱའོ། །བཟློག་པའི་སྦྱོར་བས་གཏན་ཚིགས་ཀྱི་ཁྱད་པར་སྟོན་པར་མི་ནུས་པ་འབའ་ཞིག་གོ། །སྐྱོན་གཞན་ཡང་འབབ་པོ་ཞེས་སྟོན་པ་གསུངས་པ། གཞན་ཡང་ཞེས་པ་ལ་སོགས་པ་སྟེ། མ་བྱས་ཉིད་ཀྱིས་རྟག་
[215a.6]པ་ཉིད། །མ་བརྗོད་པར་བྱས་པར་འགྱུར་ཞིང་། །འཇིག་ཉིད་ཕྱིར་ཡང་འབྲས་བུ་ཉིད་ཀྱང་མ་བརྗོད་པར་བྱས་པར་འགྱུར་རོ། །མ་ཁྱབ་པ་དང་མི་འདོད་འགྱུར་རོ། །འདིར་རྗེས་འགྲོ་མཉམ་ལ་ཞེས་པའི་ཚིག་རྣམས་འབྲེལ་པར་སྦྱར་བར་བྱའོ། །ཡང་ཞེས་པ་སྡུད་པའི་དོན་ཅན་ནོ། །
[215a.7]འབྲས་བུ་ཉིད་ཅེས་པ་བྱས་པ་ཉིད་དོ། །མ་བརྗོད་ཅེས་པ་དམ་མ་བཅས་པའོ། །བྱས་པ་ཞེས་པ་ནི་བསྒྲུབ་པའོ། །དང་ཡིག་ནི་དེ་མ་ཐག་ཏུ་བརྗོད་པའི་སྐབས་སུ་མ་བབ་པའི་དོན་སྒྲུབ་པར་བྱེད་པ་སྡུད་པའོ། །རྗེས་འགྲོ་མཉམ་ལ་ཞེས་པ་ཆོས་མཐུན་པ་ཉིད་དང་ཆོས་མི་མཐུན་
[215b]
[215b.1]པ་ཉིད་དག་གི་རྗེས་སུ་འགྲོ་བར་མཚུངས་པར་གྱུར་པ་ལ་ཞེས་པའི་དོན་ཏོ། །ཆོས་མཐུན་པ་ཉིད་ཀྱི་དབང་གིས་ཞེས་པ་ཆོས་མཐུན་པ་ཉིད་ཀྱི་དཔེའི་རྗེས་སུ་འཇུག་པས་ཏེ། ཆོས་མཐུན་པ་ཉིད་ཀྱི་དཔེ་ལ་བསྒྲུབ་བྱས་གཏན་ཚིགས་ཀྱི་རྗེས་སུ་སོང་བ་བསྟན་པར་བྱའོ་ཞེས་བྱས་ནས་
[215b.2]གལ་ཏེ་ཆོས་མི་མཐུན་པ་ཉིད་ཀྱི་དཔེ་ལ་གཏན་ཚིགས་མེད་པ་བསྒྲུབ་བྱ་མེད་པས་རྗེས་སུ་སོང་བར་བརྗོད་ནའོ་ཞེས་པའི་དོན་ཏོ། །དམ་མ་བཅས་པ་ཁོ་ནའི་རྟག་པ་ཉིད་བསྒྲུབ་པར་འགྱུར་རོ་ཞེས་པ། རྟག་པ་ཉིད་ཀྱིས་དེ་ལ་ཁྱབ་པ་ཉེ་བར་སྟོན་པའི་ཕྱིར་རོ། །གང་ལ་གང་གིས་
[215b.3]ཁྱབ་པར་བརྗོད་པ་དེ་ནི་དེས་བསྒྲུབ་པར་བྱ་བ་ཡིན་ཏེ། དཔེར་ན་གང་བྱས་པ་དེ་མི་རྟག་གོ་ཞེས་པའི་མི་རྟག་པ་ཉིད་ཀྱིས་བྱས་པ་ཉིད་ལ་ཁྱབ་པར་ཉེ་བར་སྟོན་པའི་ཕྱིར་བྱས་པ་ཉིད་ཀྱིས་མི་རྟག་པ་ཉིད་ཡིན་པ་བཞིན་ནོ། །འདི་ལྟ་ན་ཡང་མི་རྟག་པ་ཉིད་ཀྱིས་བྱས་པ་ཉིད་བསྒྲུབ་པར་འགྱུར་
[215b.4]རོ་ཞེས་པ་འདིར་ཡང་དེ་ལྟ་ཁོ་ནའི་རིགས་པའོ། །མ་ཁྱབ་པ་ལ་ཞེས་པ་ལ་སོགས་པ་སྟེ། རྩོལ་མ་ཐག་ཏུ་བྱུང་བ་ཉིད་ནི་རང་གི་བསྒྲུབ་པར་བྱ་བས་མ་ཁྱབ་པ་ཉིད་ཀྱི་ཕྱིར་མ་ཁྱབ་པའོ། །དེ་ལ་གང་རྩོལ་མ་ཐག་ཏུ་མ་བྱུང་བ་ཉིད་ཀྱི་ཕྱིར་གློག་ལ་སོགས་པ་རྣམས་རྟག་པའོ། །གང་
[215b.5]མི་རྟག་པ་སྟེ་རྩོལ་མ་ཐག་ཏུ་བྱུང་བའོ་ཞེས་མི་རྟག་པ་ཉིད་ཀྱི་ཕྱིར་ན་རྩོལ་མ་ཐག་ཏུ་བྱུང་བ་ཉིད་དུ་མི་འདོད་པར་ཐལ་བར་འགྱུར་རོ། །གལ་ཏེ་འདི་ལྟར་ངེས་པར་འཛིན་ན་སྐྱོན་འདི་ཡོད་དོ། །རྩོལ་མ་ཐག་ཏུ་མ་བྱུང་བ་ཉིད་ནི་རྟག་པ་ཁོ་ན་སྟེ། མི་རྟག་པར་མི་འགྱུར་རོ་ཞེས་པ་དང་།
[215b.6]མི་རྟག་པ་ཡང་རྩོལ་མ་ཐག་ཏུ་བྱུང་བ་ཁོ་ན་སྟེ། རྩོལ་བ་ལས་མ་བྱུང་བར་ནི་མི་འགྱུར་རོ་ཞེས་པའོ། །དེའི་ཚེ་རྩོལ་བ་ལས་མ་བྱུང་བ་ཉིད་ཀྱི་ཕྱིར་རྟག་པ་ཉིད་དུ་ཐལ་བར་འགྱུར་རོ། །སྐབས་སུ་མ་བབ་པའི་དོན་སྒྲུབ་པར་བྱེད་པར་ཡང་སྟེ། རྩོལ་བ་ལས་བྱུང་བ་ཉིད་ལ་མི་རྟག་པ་ཉིད་
[215b.7]ཀྱིས་ཁྱབ་པར་བསྟན་པའི་ཕྱིར་རོ། །གང་གི་ཚེ་འདི་ལྟར་ངེས་པར་གཟུང་བར་བྱེད་དེ། རྟག་པ་ནི་རྩོལ་བ་ལས་མ་བྱུང་བ་ཁོ་ན་སྟེ། རྩོལ་བ་ལས་བྱུང་བ་ནི་མ་ཡིན་ནོ་ཞེས་པ་དེའི་ཚེ་སྐྱོན་འགའ་ཡང་མེད་དོ། །དེ་ལྟ་ན་ཡང་གང་གི་ཕྱིར་རྟག་པ་ཉིད་ནི་རྩོལ་མ་ཐག་ཏུ་བྱུང་བ་ལ་མེད་པར་བཤད་པར་
[216a]
[216a.1]འགྱུར་གྱི། རྩོལ་བ་ལས་མ་བྱུང་བ་ལ་རྟག་པ་ཡོད་པར་ནི་མ་ཡིན་པ་དེའི་ཕྱིར་གློག་ལ་སོགས་པ་རྣམས་རྟག་པ་ཉིད་དུ་ཐལ་བར་འགྱུར་བ་མེད་དོ། །དེ་བཞིན་དུ་ཆོས་མཐུན་པ་ཉིད་ཀྱི་དཔེ་ལ་མི་རྟག་པ་ཁོ་ན་རྩོལ་བ་ལས་བྱུང་བ་སྟེ། རྟག་པ་ནི་མ་ཡིན་ནོ་
[216a.2]ཞེས་ངེས་པར་གཟུང་བ་ལས། རྩོལ་བ་ལས་བྱུང་བ་ཉིད་རྟག་པ་ལ་མེད་པར་བརྗོད་པར་འགྱུར་གྱི། མི་རྟག་པ་ལ་རྩོལ་བ་ལས་བྱུང་བ་ཉིད་ཡོད་པ་ནི་མ་ཡིན་ནོ་ཞེས་པས། གློག་ལ་སོགས་པ་རྣམས་རྩོལ་བ་ལས་བྱུང་བ་ཉིད་དུ་ཐལ་བར་འགྱུར་བ་མེད་ཅིང་། སྐབས་སུ་མ་བབ་པ་སྒྲུབ་
[216a.3]པར་བྱེད་པ་ཡང་མ་ཡིན་ནོ། །འདིར་མི་རྟག་པ་ཉིད་ལ་རྩོལ་མ་ཐག་ཏུ་བྱུང་བ་ཉིད་ཀྱིས་ཁྱབ་པ་བརྗོད་པ་མ་ཡིན་གྱི། འོ་ན་ཅི་ཞེ་ན། རྩོལ་མ་ཐག་ཏུ་བྱུང་བ་ཉིད་ཀྱི་རྟག་པ་ལ་མེད་པ་སྟེ། རྩོལ་མ་ཐག་ཏུ་བྱུང་བ་ནི་མི་རྟག་པ་ཁོ་ནས་ཏེ་རྟག་པ་ནི་མ་ཡིན་ནོ་ཞེས་སོ། །འོ་ན་དེ་ལྟར་གྱུར་ན་གཏན་ཚིགས་
[216a.4]ངེས་པར་གཟུང་བར་འགྱུར་ལ་དེའི་ཕྱིར་རྩོལ་བ་ལས་བྱུང་བ་མི་རྟག་པ་ཁོ་ནས་ཏེ་བྱས་པ་ལ་སོགས་པ་ནི་མ་ཡིན་ཞེས་པའི་དོན་འདི་འབྱུང་ཞིང་། དེ་ལས་ཀྱང་གཏན་ཚིགས་གཞན་མེད་པར་འགྱུར་རོ་ཞེ་ན། འདི་ཡོད་པ་མ་ཡིན་ཏེ། ངེས་པར་གཟུང་བ་འདི་གལ་ཏེ་ཡང་གཏན་ཚིགས་
[216a.5]ངེས་པར་གཟུང་བ་ལས་གཏན་ཚིགས་གཞན་མེད་པ་འཐོབ་མོད་དེ་ལྟ་ན་ཡང་སྨྲ་བ་པོའི་བསམ་པའི་དབང་ལས་ངེས་པར་གཟུང་བའོ་ཞེས་པས། སྨྲ་བ་པོ་གང་དོད་ཟླར་བསམ་པ་དེ་ཁོ་ན་ངེས་པར་གཟུང་བས་གཅོད་པར་བྱེད་ཀྱི་གཞན་ནི་མ་ཡིན་ནོ། །དེའི་ཕྱིར་རྩོལ་བ་ལས་བྱུང་བ་ཁོ་ན་
[216a.6]རྟག་པ་ལ་མེད་པར་བརྗོད་ཀྱི། ཆོས་གཞན་རྣམས་རྩོལ་མ་ཐག་ཏུ་བྱུང་བ་ལ་ནི་མ་ཡིན་ནོ། །མི་མཐུན་པ་ཉེ་བར་དགོད་པ་སྟེ། གང་གི་ཕྱིར་བཟློག་པའི་སྦྱོར་བ་ལ་ཡང་ངེས་པར་གཟུང་བ་ཐ་དད་ཀྱི་རྟེན་ལས་མི་འདོད་པ་འབབ་པ་ཡོངས་སུ་སྤོང་བར་འདོད་པས་ཏེ། དེ་ཡང་བྱེད་པ་
[216a.7]ན་ཡང་དེ་ལྟར་ངེས་པར་གཟུང་བ་ན་འཐོབ་པ་ཁོ་ནའོ། །དེ་ལྟར་ནི་ཇི་ལྟར་རྟག་པ་ལ་རྩོལ་བ་ལས་བྱུང་བ་ཉིད་མེད་པའི་ཕྱིར་མི་རྟག་པ་ཉིད་དུ་རྗེས་སུ་དཔོག་པ་དེ་བཞིན་དུ་རྩོལ་མ་ཐག་ཏུ་བྱུང་བ་ལ་རྟག་པ་ཉིད་མེད་པའི་ཕྱིར་རྩོལ་མ་ཐག་ཏུ་མ་བྱུང་བ་ཉིད་དུ་རྗེས་སུ་དཔོག་པ་དང་།
[216b]
[216b.1]ཇི་ལྟར་ན་ཆོས་མཐུན་པ་ཉིད་ཀྱིས་རྩོལ་མ་ཐག་ཏུ་བྱུང་བ་མི་རྟག་པ་ཁོ་ནས་ཏེ་རྟག་པ་ནི་མ་ཡིན་ཞེས་རྟག་པ་ལ་རྩོལ་མ་ཐག་ཏུ་བྱུང་བ་ཉིད་མེད་པ་ལས་རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་མི་རྟག་པ་ཉིད་རྗེས་སུ་དཔོག་པ་དེ་བཞིན་དུ་ཆོས་མི་མཐུན་པ་ཉིད་ཀྱིས་རྟག་པ་ནི་རྩོལ་མ་ཐག་ཏུ་མ་བྱུང་
[216b.2]བ་ཁོ་ན་སྟེ། རྩོལ་མ་ཐག་ཏུ་བྱུང་བ་ནི་མ་ཡིན་ནོ་ཞེས་རྩོལ་མ་ཐག་ཏུ་བྱུང་བ་ཉིད་ལ་རྟག་པ་ཉིད་མེད་པའི་ཕྱིར་ན། རྟག་པ་ཉིད་ལས་རྩོལ་མ་ཐག་ཏུ་མ་བྱུང་བ་ཉིད་རྗེས་སུ་དཔོག་གོ་ཞེས་པའོ། །དེ་ཁོ་ན་དམ་བཅས་པའི་དོན་ཉིད་སྒྲུབ་པ་མ་ཡིན་པའོ། །དེའི་ཕྱིར་གཏན་ཚིགས་
[216b.3]ཁོ་ན་བསྒྲུབ་བྱ་མེད་པ་ལ་མེད་པར་བསྟན་པར་བྱའི། ངེས་པར་གཟུང་བས་དོན་ནི་མ་ཡིན་ནོ། །འོ་ན་འདིར་བསྒྲུབ་བྱ་མེད་པ་ལ་མེད་པ་ཉེ་བར་བསྟན་ན། མི་རྟག་པ་ཁོ་ན་རྩོལ་མ་ཐག་ཏུ་བྱུང་བའོ་ཞེས་པའི་ངེས་པར་གཟུང་བ་འདི་ལ་ནི་མི་རྟག་པ་མེད་ན་རྩོལ་མ་ཐག་ཏུ་བྱུང་བ་ཉིད་དུ་འགྱུར་བ་མ་
[216b.4]ཡིན་ནོ་ཞེས་པ་འདི་ངེས་པར་རྟོགས་པས་སྐྱོན་འགའ་ཡང་མེད་དེ། ཅི་སྟེ་ཡོད་ན་དེ་ལྟ་ན་སྨྲ་བར་བྱ་སྟེ། དེ་ལ་སྐྱོན་ཅི་ཡིན་ཞེ་ན། བརྗོད་པར་བྱ་སྟེ། ཐུན་མོང་མ་ཡིན་པ་ཡང་རྟག་པ་ལ་གཏན་ཚིགས་ཉིད་དུ་འགྱུར་རོ་ཞེས་པ་སྐྱོན་འདི་ཡིན་ནོ། །དཔེར་ན་རྟག་པ་ཉིད་ནི་མཉན་པར་བྱ་བ་སྟེ།
[216b.5]མི་རྟག་པ་མེད་དོ་ཞེས་པ་འདི་ལ་ཡང་བསྒྲུབ་པར་བྱ་བ་རྟག་པ་ཉིད་མེད་ན་མཉན་པར་བྱ་བ་མེད་པ་ཉིད་བསྟན་ཏེ། འཇིག་པའི་ངང་ཅན་ལ་མཉན་པར་བྱ་བ་ཉིད་མེད་པའི་ཕྱིར་ཞེས་པས་གཏན་ཚིགས་སུ་འགྱུར་རོ། །ཉེས་པ་འདི་ནི་མེད་དེ། དཔེར་ན་མི་རྟག་པ་ཁོ་ན་ནི་རྩོལ་མ་ཐག་
[216b.6]ཏུ་བྱུང་བའོ་ཞེས་པ་འདིར་རྟག་པ་ལས་རྣམ་པར་བཅད་དེ། མི་རྟག་པ་ལ་རྩོལ་མ་ཐག་ཏུ་བྱུང་བ་ཉིད་དོན་གྱིས་བརྗོད་པར་འགྱུར་རོ། །དེ་ཡང་དེ་ལ་རབ་ཏུ་གྲུབ་པའོ། །མཉན་པར་བྱ་བ་ཉིད་ནི་འདི་ལྟར་མི་རྟག་པ་ལས་རྣམ་པར་བཅད་པ། རྟག་པ་འགའ་ཞིག་ལ་བསྟན་པར་ནུས་པ་
[216b.7]མ་ཡིན་ཏེ། དེ་ཡོད་པ་དང་མེད་པ་དག་ཐམས་ཅད་ལ་ཐེ་ཚོམ་ཉིད་ཀྱི་ཕྱིར་རོ། །གལ་ཏེ་དེ་ལྟར་ན་དོན་གྱི་གོ་བས་གཉིས་ཀ་རྙེད་པ་ཡིན་ན། དེ་ཁོ་བོ་ཅག་གི་རྗེས་སུ་སྣང་བ་ཁོ་ན་སྟེ། གང་ཡང་རུང་བས་གཉིས་ཀ་རབ་ཏུ་བསྟན་པའི་ཕྱིར་རོ་ཞེས་པའོ། །འདིར་གཏན་ཚིགས་
[217a]
[217a.1]བསྒྲུབ་བྱས་རྗེས་འགྲོ་བ། །ཞེས་པ་འདི་ལ། རྗེས་སུ་འགྲོ་བའི་སྒྲ་ནི་ཁྱབ་པའི་དོན་དུ་མངོན་པར་དགོངས་པ་སྟེ། ཐམས་ཅད་དུ་འགྲོ་བ་ནི་རྗེས་སུ་འགྲོ་བའོ་ཞེས་པའི་ཚིག་ལས་སོ། །དེ་ལ་སྐྱོན་བརྗོད་པ་སྨྲས་པ། གལ་ཏེ་ཞེས་པ་ལ་སོགས་པའོ། །
[217a.2]གང་དང་གང་བྱས་པ་དེ་དང་དེ་མི་རྟག་པའོ་ཞེས་ཁྱབ་པ་རབ་ཏུ་བསྟན་པ་ན། བྱས་པ་ཉིད་རྟག་པ་ལས་ལྡོག་པར་རྟོགས་པར་འགྱུར་བ་ཁོ་ན་སྟེ། དེ་ལས་ཀྱང་། བསྒྲུབ་བྱ་མེད་ལ་མེད་པ་ཉིད། །ཅེས་པའི་ཆོས་མི་མཐུན་པ་ཉིད་ཀྱི་དཔེའི་མཚན་ཉིད་བརྗོད་པར་བྱ་བ་མ་ཡིན་ཏེ།
[217a.3]དེའི་དགོས་པ་ནི་ཆོས་མཐུན་པ་ཉིད་ཀྱི་དཔེ་ལ་ཁྱབ་པ་ཁོ་ནས་བསྒྲུབས་ཟིན་པ་ཉིད་ཀྱི་ཕྱིར་རོ། །ཅི་སྟེ་མཐུན་པའི་ཕྱོགས་ལ་གཏན་ཚིགས་ཡོད་པ་ཙམ་བསྟན་པར་བྱ་བ་ཡིན་ན་ཆོས་མི་མཐུན་པ་ཉིད་ཀྱི་དཔེའི་མཚན་ཉིད་བརྗོད་པར་རིགས་ཏེ། དགོས་པ་དང་ལྡན་པ་ཉིད་ཀྱི་ཕྱིར་གྱི་
[217a.4]འོན་ཀྱང་གང་བཤད་ཟིན་པའི་ཕྱི་རོལ་གྱི་དོན་སྟོན་པ་ནི་ངེས་པར་བསྟན་པར་བྱ་བ་ལ་གཙོ་བོའོ་ཞེས་པ་འདི་མི་རིགས་པས་ན་བརྗོད་པར་བྱ་བ་མ་ཡིན་ཏེ། ཡོད་པར་གྱུར་པ་ཙམ་སྟོན་པ་ལ་དཔེའི་ཕྱིའི་དོན་ལ་ལྟོས་པ་ཉིད་རིགས་པ་མ་ཡིན་པས་སོ། །དེ་སྟོན་ཏོ། རྩོལ་མ་ཐག་ཏུ་བྱུང་བ་ཉིད་
[217a.5]ཀྱིས་ཀྱང་ཞེས་པ་ལ་སོགས་པ་སྟེ། ཀྱང་གི་སྒྲས་མི་རྟག་པ་ཉིད་ཀྱིས་ཀྱང་རོ། །བུམ་པ་ལ་རྩོལ་མ་ཐག་ཏུ་བྱུང་བ་ཉིད་མེད་ན་མི་འབྱུང་བ་ལའོ། །དེ་ལས་ཀྱང་བུམ་པ་ལ་མི་རྟག་པ་ཉིད་དང་རྩོལ་མ་ཐག་ཏུ་བྱུང་བ་ཉིད་མཐོང་ངོ་ཞེས་བྱས་པ་ན། གཏན་ཚིགས་མཐུན་ཕྱོགས་ལ་ཡོད་
[217a.6]པར་གྱུར་པ་ཙམ་རྟོགས་པ་ཁོ་ནའོ་ཞེས་པས། འདིར་ཕྱི་རོལ་གྱི་དོན་ལ་ལྟོས་པས་ཅི་ཞིག་ཁྱབ་པ་ཁོ་ནས་ཞེས་པ་གང་དུ་བསྒྲུབ་བྱས་རྗེས་སུ་འགྲོ་བ་ཞེས་པའི་མཚན་ཉིད་ལས་སོ། །འོ་ན་ཡང་ཆོས་མི་མཐུན་པ་ཉིད་ཀྱི་མཚན་ཉིད་བརྗོད་ཟིན་མོད། བརྗོད་པར་བྱ་བ་མ་ཡིན་ཏེ།
[217a.7]དགོས་པ་མེད་པའི་ཕྱིར་རོ་ཞེ་ན། གསུངས་པ། འདི་ལ་ཡང་ཞེས་པ་ལ་སོགས་པའོ། །གནས་སྐབས་འདི་ལ་ཡང་ཞེས་སྨྲ་བས་འདི་གསལ་བར་བྱེད་དེ། གང་གི་ཚེ་ཆོས་མཐུན་པ་ཉིད་ཀྱི་དཔེས་ཁྱབ་པ་སྟོན་པ་མ་ཡིན་པ་དེའི་ཚེ་ཆོས་མི་མཐུན་པ་ཉིད་ཀྱི་དཔེས་བསྟན་པར་བྱ་སྟེ།
[217b]
[217b.1]དེའི་ཕྱིར་གནས་སྐབས་གཞན་ལ་ཆོས་མི་མཐུན་པ་ཉིད་ཀྱི་དཔེ་དགོས་པ་དང་ལྡན་ཞིང་དེའི་ཕྱིར་དེའི་མཚན་ཉིད་བརྗོད་པ་རིགས་པ་ཁོ་ནའོ་ཞེས་པའོ། །དེ་ཉིད་ཀྱང་གནས་སྐབས་གཞན་དུ་ཆོས་མི་མཐུན་པ་ཉིད་ཀྱི་དཔེའི་དགོས་པ་སྟོན་ཅིང་གསུངས་པ། གང་གི་ཚེ་ནི་ཞེས་པ་ལ་སོགས་པ་སྟེ།
[217b.2]གང་གི་ཚེ་རྟོགས་པ་པོ་བློ་ཞེན་པར་འགྱུར་ཏེ། ཆོས་མི་མཐུན་པ་ཉིད་ཀྱི་དཔེས་བསྟན་ཀྱང་ཁྱབ་པ་བདེ་བླག་ཏུ་རྟོགས་པར་མཐུན་ཕྱོགས་ལ་ཡོད་པར་གྱུར་པ་སྟོན་པ་ལས་གཞན་པས་ནུས་པ་མ་ཡིན་པ་དེའི་ཚེ་དེའི་རྟོགས་པ་ལྕི་བ་ཉིད་ཡོངས་སུ་སྤང་བའི་དོན་དུ་མཐུན་ཕྱོགས་ལ་ཡོད་པ་ཙམ་
[217b.3]ཆོས་མཐུན་པ་ཉིད་ཀྱི་དཔེས་བསྟན་པར་བྱའོ། །དེ་ལྟ་ན་ནི་མ་ཡིན་ཞེས་པ་ལ་སོགས་པ་འདི་ལྟར་སེམས་ཏེ། དེའི་ཚེ་མཐུན་ཕྱོགས་ལ་ཡོད་པ་ཙམ་རབ་ཏུ་བསྟན་པར་བྱའི་ཞེས་པ་སྨྲ་བས་འདི་གསལ་བར་བྱེད་དེ། གང་ལ་གཏན་ཚིགས་ཀྱི་ཡོད་པ་ཙམ་བཤད་པར་བྱ་བ་དེའི་ཆོས་
[217b.4]མཐུན་པ་ཉིད་ཀྱི་དཔེའོ་ཞེས་པའོ། །དེ་ལས་ཀྱང་། གཏན་ཚིགས་བསྒྲུབ་བྱའི་རྗེས་འགྲོ་བ། །ཞེས་པ་ལ་སོགས་པ་འདི་བཤད་པར་བྱ་བ་མ་ཡིན་གྱི། འདི་སྐད་ནི་བཤད་པར་བྱ་སྟེ། གང་དུ་གཏན་ཚིགས་མཐུན་ཕྱོགས་ལ་ཡོད་པ་ཙམ་བཤད་པར་བྱ་བའོ་ཞེས་སོ། །ཡང་ན།
[217b.5]གཏན་ཚིགས་བསྒྲུབ་བྱའི་རྗེས་འགྲོ་བ། །ཞེས་པ་འདི་ཁོ་ནའི་དོན་འདི་བཤད་པར་བྱ་སྟེ། གང་དུ་གཏན་ཚིགས་ཀྱི་ལྷན་ཅིག་འབྱུང་བ་བསྟན་པར་བྱ་བའོ་ཞེས་པའོ། །འདི་ཡང་ཞེས་པ་ལ་སོགས་པས་འདི་གསལ་བར་བྱེད་དེ། ཁྱོད་ཀྱིས་གང་སྨྲས་པ་འདི་ནི་བདེན་མོད། དེ་ཁྱད་པར་
[217b.6]གྱི་གནས་སྐབས་ཁོ་ན་ལ་ཡིན་ཏེ། གང་གི་ཚེ་དཔེ་གཉིས་ཀ་རབ་ཏུ་སྦྱར་བར་བྱ་བ་ཞེས་པ་ལ་སོགས་པས་གསལ་བར་བྱས་པ་ལའོ། །གང་གི་ཚེ་ནི་ཆོས་མཐུན་པ་ཉིད་ཀྱི་དཔེ་ཁོ་ནས་ཁྱབ་པ་སྟོན་པ་དེའི་ཚེ། ཁྱབ་པ་ཁོ་ན་རྗེས་འགྲོའི་སྒྲའི་བརྗོད་བྱའི་དོན་དུ་རིགས་ཏེ།
[217b.7]དེས་ན་གནས་སྐབས་དེ་ལ་ཕྱིན་ཅི་ལོག་པའི་ཁྱབ་པ་དགག་པའི་ཆེད་དུ། གཏན་ཚིགས་བསྒྲུབ་བྱའི་རྗེས་འགྲོ་བ། །ཞེས་བཤད་དོ་ཞེས་པའོ། །དེ་ལ་འདིར་འགྱུར་ཏེ། དེ་བཀག་པས་དོན་འགའ་ཡང་མེད་པ་ཁོ་ནས་ཏེ། དེའི་ཕྱིར་དེའི་དོན་དུ་འདི་བརྗོད་པར་བྱ་བ་མ་ཡིན་ནོ་ཞེ་ན་
[218a]
[218a.1]གསུངས་པ། དེ་བཀག་པ་ལ་དོན་མེད་པ་མ་ཡིན་ཏེ་ཞེས་པ། གཏན་ཚིགས་ཀྱི་བསྒྲུབ་བྱའི་རྗེས་སུ་འགྲོ་བ་བཀག་པ་ལ་དོན་མེད་པ་ནི་མ་ཡིན་གྱི། འོ་ན་ཅི་ཞེ་ན། དོན་ཁོ་ན་ལའོ། །ཅིའི་ཕྱིར་ཞེ་ན་གསུངས་པ། ཡོད་དང་རྣམ་གཉིས་ཞེས་བརྗོད་པའི་ཕྱིར་
[218a.2]རོ་ཞེས་པ་ཕྱོགས་ཆོས་གང་ཞིག་མཐུན་ཕྱོགས་ལ་ཡོད་པ་དང་རྣམ་པ་གཉིས་ཀ་སྟེ། དེ་གཏན་ཚིགས་སོ་ཞེས་པ་འདི་ལྟར་སྔར་བརྗོད་པའི་ཕྱིར་རོ། །ཅི་ལྟར་ན་འདི་སྐད་བརྗོད་པ་ལས་གཏན་ཚིགས་ཀྱི་བསྒྲུབ་བྱའི་རྗེས་སུ་འགྲོ་བ་བཀག་པ་ན་དོན་དུ་འགྱུར་ཞེ་ན་གསུངས་པ། གཏན་
[218a.3]ཚིགས་ལྷག་མ་ཡང་ཞེས་པ་ལ་སོགས་པ་སྟེ། ཚུལ་གསུམ་པོ་གཏན་ཚིགས་སུ་བཤད་ལ། དེ་ལ་ཕྱོགས་ཀྱི་ཆོས་ཉིད་ནི་གཏན་ཚིགས་ཀྱི་ཚིག་ཁོ་ནས་བཤད་དོ་ཞེས་པས་ཚུལ་གཉིས་ལྷག་མར་ལུས་ཏེ། དེ་ཡང་དཔེས་བསྟན་པར་བྱ་བའོ། །གཏན་ཚིགས་ཀྱི་མཚན་ཉིད་སྟོན་
[218a.4]པ་ན་ཡང་གང་གསུངས་པ། རིགས་མཐུན་པ་ལ་ཡོད་ཅེས་པ། །དེ་ལ་ཡང་གདོན་མི་ཟ་བར་རིགས་མཐུན་པ་ཁོ་ན་ལ་ཡོད་པ་ཞེས་པ་འདི་ལྟ་ཁོ་ན་ངེས་པར་གཟུང་བར་བྱའི་ཡོད་པ་ཁོ་ན་ཞེས་ངེས་པར་གཟུང་ན་ནི། རྣམ་གཉིས་ཀྱང་ཞེས་པ་འདི་ཉམས་པར་འགྱུར་རོ། །འདིས་ནི་གང་འདྲ་བའི་
[218a.5]གཏན་ཚིགས་ཀྱི་ལྷག་མ་དཔེས་གསལ་བར་བྱ་བ་དེ་བསྟན་ཏོ། །གལ་ཏེ་ཡང་གང་མི་རྟག་པ་དེ་རྩོལ་བ་ལས་བྱུང་བའོ་ཞེས་གཏན་ཚིགས་ཀྱི་བསྒྲུབ་བྱའི་རྗེས་སུ་འགྲོ་བ་བཤད་པར་བྱ་ན། དེ་ལྟར་འགྱུར་ན་རིགས་མཐུན་པ་ལ་ཡོད་པ་ཁོ་ན་ཞེས་བསྟན་པར་འགྱུར་གྱི། རིགས་
[218a.6]མཐུན་པ་ཡིན་ལ་ཡོད་པ་ཞེས་ནི་མ་ཡིན་ཏེ། མཐུན་ཕྱོགས་ལ་ཁྱབ་པར་བསྟན་པའི་ཕྱིར་རོ། །དེ་ལས་ཀྱང་གཏན་ཚིགས་ལྷག་མ་བསྟན་པར་འགྱུར་བ་མ་ཡིན་ནོ། །དེའི་ཕྱིར་གཏན་ཚིགས་ལྷག་མ་སྟོན་པས་གདོན་མི་ཟ་བར་བསྒྲུབ་པར་བྱ་བ་ཁོ་ནས་གཏན་ཚིགས་ཀྱི་
[218a.7]རྗེས་སུ་འགྲོ་བ་བསྟན་པར་བྱའོ། །དེ་ཅི་ལྟར་འཐོབ་ཅེ་ན། གལ་ཏེ་གཏན་ཚིགས་ཀྱི་བསྒྲུབ་བྱའི་རྗེས་སུ་འགྲོ་བ་དགག་པར་བྱེད་ནའོ། །དེའི་ཕྱིར་གཏན་ཚིགས་ལྷག་མ་རབ་ཏུ་བསྟན་པ་ནི་དོན་ཏེ། གཏན་ཚིགས་ཀྱི་བསྒྲུབ་བྱའི་རྗེས་སུ་འགྲོ་བ་དགག་པ་ལའོ། །འོ་ན་གཏན་
[218b]
[218b.1]ཚིགས་ལྷག་མའི་མཚན་ཉིད་ཀྱི་བསྒྲུབ་པ་ཁོ་ན་ལས་ཇི་འདྲ་བའི་ངག་གིས་གཏན་ཚིགས་ལྷག་མ་བསྟན་པར་ནུས་པ་དེ་བསྟན་པ་ཁོ་ནར་འགྱུར་ཏེ། རྣམ་པ་གཞན་དུ་བརྗོད་ན་གཏན་ཚིགས་ལྷག་མ་གསལ་བར་མི་བྱེད་པའི་ཕྱིར་རོ། །གང་རྣམས་དོན་གང་ཇི་ལྟ་
[218b.2]བ་བཞིན་ཤེས་པའི་ངག་ཤེས་པ་དེ་རྣམས་ནི་དེ་རྟོགས་པ་ལ་སླར་ཡང་ཉེ་བར་བསྟན་པ་གཞན་ལ་ལྟོས་པ་མ་ཡིན་ཏེ། དེའི་ཕྱིར་འདི་ནི་དགོས་པ་མེད་པ་ཁོ་ནའོ་ཞེ་ན། རྩོམ་པ་འདི་ནི་བྱིས་པས་རྟོགས་པའི་དོན་དུ་སྟེ། དངོས་པོ་ཇི་ལྟ་བ་བཞིན་རྟོགས་ཀྱང་
[218b.3]རྣམ་པ་གཞན་དུ་བརྗོད་པ་མཐོང་ངོ་ཞེས་ལན་བརྗོད་ཟིན་ཏོ། །གལ་ཏེ་དེ་ལྟ་ན་རིགས་མཐུན་པ་ལ་ཡོད་པ་ཞེས་པ་འདིར་རིགས་མཐུན་པ་ཁོ་ན་ལ་ཡོད་པ་ཞེས་ངེས་པར་གཟུང་བར་བྱ་བ་དེ་ལྟར་གྱུར་ན། འདི་ཁོ་ནས་མི་མཐུན་ཕྱོགས་གཏན་ཚིགས་མེད་པ་ཉིད་དུ་རྟོགས་པ་ཉིད་
[218b.4]ཀྱི་ཕྱིར། དེ་མེད་པ་ལ་མེད་པ་ཞེས་པ་འདི་བརྗོད་པར་བྱ་བ་མ་ཡིན་ནོ་ཞེ་ན། དེའི་ཕྱིར་གསུངས་པ། དེ་ལྟ་ན་རིགས་མཐུན་པ་ཁོ་ན་ལ་ཡོད་ཅེས་པ་ལ་སོགས་པའོ། །དེ་ལྟར་ན་ཞེས་པ་དེའི་ཚེ་ཞེས་པའི་དོན་ཅན་གྱི་ཚིག་ཕྲད་དེ། འདི་ནི་བྱེ་བྲག་ཏུ་མ་བཤད་པའི་སྒྲ་གཞན་ཁོ་ནའོ། །
[218b.5]དེ་ལྟར་ནི་མི་བཟོད་པ་ལ་སོགས་པ་རྣམས་ལ་ཡང་རབ་ཏུ་སྦྱོར་བས་སོ། །རིགས་མི་མཐུན་གྱི་སྒྲ་ནི་འདིར་གཞན་པ་དང་འགལ་བའི་མི་མཐུན་ཕྱོགས་དག་ལ་འཇུག་གོ། །དེའི་ཕྱིར་འདིར་དོན་འདི་ཡིན་ཏེ། གང་གི་ཚེ་རིགས་མཐུན་པ་ཁོ་ན་ལ་ཡོད་པ་ཞེས་ངེས་པར་གཟུང་བ་དེའི་ཚེ་
[218b.6]མི་མཐུན་ཕྱོགས་རྣམ་པ་གསུམ་ཀ་ལ་ཡང་གཏན་ཚིགས་དགག་པ་ཐོབ་པ་ལ། དེ་དག་བྲལ་བ་ལ་མེད་པ་ཞེས་པ་འདི་བརྗོད་པར་མི་བྱ་བ་ཁོ་ན་བདེན་ཏེ། གང་འདིས་བྱ་བ་དེ་གཞན་ཁོ་ན་ལས་ཐོབ་པ་ཉིད་ཀྱི་ཕྱིར་རོ། །བརྗོད་པ་ཡང་ཡིན་ཏེ། དེ་འདི་སྦྱོར་བའི་དོན་དུ་འགྱུར་རོ་
[218b.7]ཞེས་པའོ། །ངེས་པའི་སྒྲས་ནི་འདིར་སྦྱོར་བ་ཁོ་ན་བརྗོད་པར་འདོད་པ་སྟེ། འདིའི་བློ་ངེས་པར་བྱེད་ཅེས་བྱས་ནས་སོ་ཞེས་བཤད་དོ། །དེ་ལྟར་འགྱུར་མོད་རིགས་མཐུན་པ་ཁོ་ན་ལ་ཡོད་པ་ཞེས་པ་འདི་ལས་རིགས་མི་མཐུན་པ་ལ་ཡང་དགག་པ་ཐོབ་ཅིང་། དེ་ལྟ་ན་ཡང་མཐུན་
[219a]
[219a.1]ཕྱོགས་ལ་ཡང་དགག་པ་བྱས་པར་འགྱུར་ཏེ། དེ་ལྟར་ནི་མཐུན་ཕྱོགས་ཀྱང་བསྒྲུབ་བྱའི་ཆོས་ལས་གཞན་པའི་ཆོས་དང་ལྡན་པའི་ཕྱིར་གཞན་དུ་འགྱུར་ལ། དེ་ལ་གཏན་ཚིགས་འཇུག་གོ་ཞེས་པས་མ་ངེས་པར་འགྱུར་རོ་ཞེ་ན་གསུངས་པ། དེ་དང་བྲལ་བ་ཁོ་ན་ལ་
[219a.2]མེད་པ་ཡིན་གྱི། རིགས་མི་མཐུན་པ་བདག་ལ་སོགས་པ་མེད་པ་ལ་མ་ཡིན་ཞེས་པ་སྟེ། དེ་དང་བྲལ་བ་ནི་བསྒྲུབ་པར་བྱ་བའི་རིགས་ཅན་མེད་པ་ཞེས་པའི་དོན་ཏོ། །དེ་དང་བྲལ་བའི་མཉན་པས་ཀྱང་གཞན་པ་དང་འགལ་བ་དག་ཀྱང་གཟུང་ངོ་། །ཡང་ཅི་ལྟར་ན་ཡོད་པ་ཁོ་ན་མེད་
[219a.3]པར་ཅི་ལྟར་འགྱུར་ཞེ་ན། དེའི་རྣམ་པས་དབེན་པའི་ཕྱིར་ཏེ། རིགས་མི་མཐུན་པ་ཡང་འདིར་དེ་དང་བྲལ་བའི་སྐབས་ཡིན་པ་ཉིད་ཀྱི་ཕྱིར་དེ་ལ་ལྟོས་པ་ཁོ་ནས་རིག་པར་བྱའོ། །བདག་ལ་སོགས་པ་མེད་པ་ཡེ་ཤེས་པ་འདིས་དེ་དང་རིགས་མི་མཐུན་པའི་དངོས་པོ་སྟོན་ཏོ། །འདི་ལ་བདག་
[219a.4]ལ་སོགས་པ་ཡོད་པ་མ་ཡིན་ནོ་ཞེས་པས། བདག་ལ་སོགས་པ་མེད་པ་སྟེ། །མི་རྟག་པའི་དངོས་པོ་བརྗོད་དོ། །དེས་འདི་སྐད་བཤད་པར་འགྱུར་ཏེ། སྔར་བཤད་པའི་མི་མཐུན་ཕྱོགས་རྣམ་པ་གསུམ་ཁོ་ན་ལ་མེད་པ་སྟེ། དེ་དང་རིགས་མི་མཐུན་པའི་མཐུན་ཕྱོགས་ལ་ནི་མ་ཡིན་
[219a.5]ནོ་ཞེས་པས། མཐུན་ཕྱོགས་ཁོ་ན་མི་མཐུན་ཕྱོགས་སུ་འགྱུར་བ་མ་ཡིན་ནོ། །ཆོས་གཞན་དང་ལྡན་ཡང་དངོས་པོར་ན་ཐ་མི་དད་པའི་ཕྱིར་རོ། །ཆོས་གཞན་དང་ལྡན་པ་ལས་གཞན་ཉིད་ཀྱང་མ་ཡིན་གྱི། འོན་ཀྱང་བརྗོད་པར་འདོད་པའི་ཆོས་མི་རྟེན་པ་ཉིད་ཀྱི་ཕྱིར་རོ་
[219a.6]ཞེས་དགོངས་པའོ། །དེ་བཞིན་དུ་འདི་ཡང་ཞེས་པ་བརྗོད་མ་ཐག་པའི་དོན་ཆོས་མི་མཐུན་པ་ཉིད་ཀྱི་དཔེའི་མཚན་ཉིད་ལ་བསྒྲེས་ནས་སྟོན་ཏོ། །འདིར་ཡང་བསྒྲུབ་པར་བྱ་བ་མེད་པ་ཞེས་པ་འདིས་གཞན་པ་དང་འགལ་བ་དག་གི་མི་མཐུན་ཕྱོགས་དག་ཀྱང་གཟུང་སྟེ། མེད་པ་
[219a.7]ཉིད་ནི་སྔ་མ་བཞིན་དུ་དེ་དག་གི་རིགས་མི་མཐུན་པ་ཉིད་དེ། འདིར་ཡང་བསྒྲུབ་བྱ་མེད་པ་སྐབས་ཉིད་ཡིན་པའི་ཕྱིར་ན། དེ་ལ་ལྟོས་པར་བལྟ་བར་བྱའོ། །དེས་ན་དོན་འདིར་འགྱུར་ཏེ། འདིར་ཡང་དཔེ་ལ་ཇི་ལྟར་སྲིད་པ་བཞིན་དུ་མི་མཐུན་ཕྱོགས་རྣམ་པ་གསུམ་ལ་མེད་པ་ཉིད་བཤད་
[219b]
[219b.1]པར་བྱའོ། དེ་དང་རིགས་མི་མཐུན་པའི་ཕྱོགས་ལ་ནི་མ་ཡིན་ནོ་ཞེས་པའོ། །དེ་ཁོ་ན་ཆོས་གཞན་དང་ལྡན་པས་གཞན་ཉིད་ན་མ་ཡིན་ཏེ། དེའི་ཕྱིར་དེར་ཆོས་གཞན་དང་ལྡན་པ་ལ་ཡང་འཇུག་པའི་གཏན་ཚིགས་ནི་མ་ངེས་པ་ཉིད་དུ་དོགས་པར་བྱ་བ་མ་ཡིན་ནོ་ཞེས་དགོངས་པའོ། །
[219b.2]ཇི་ལྟར་དེ་དང་བྲལ་བ་ལ་མེད་པ་ཞེས་པ་འདི་སྦྱོར་བའི་དོན་ཡིན་པ་དེ་བཞིན་དུ་བསྒྲུབ་བྱ་མེད་པ་ལ་ཡང་མེད་པ་ཉིད་ཅེས་པ་འདི་ཡང་སྦྱོར་བའི་དོན་ནོ་ཞེས་པ་འདི་འདིར་ཡང་སྦྱར་ནས་སྟོན་པར་རིག་པར་བྱའོ། །དེ་ལྟར་གྱུར་ན་འདོད་པ་གྲུབ་པ་ཅིར་འགྱུར་ཞེ་ན་གསུངས་པ། རིགས་
[219b.3]མི་མཐུན་པ་ལ་ནི་ཞེས་པ་ལ་སོགས་པའོ། །བསྒྲུབ་བྱ་ལ་རྗེས་སུ་འགྲོ་བ་ཡོད་ན་ཞེས་པ་འདིས་ནི་རྣམ་པ་གང་གིས་འདིར་རིགས་མི་མཐུན་པར་འདོད་པ་དེ་སྟོན་ཏེ། བསྒྲུབ་པར་བྱ་བས་རྗེས་སུ་འགྲོ་བའི་གཏན་ཚིགས་ཀྱི་རིགས་མི་མཐུན་ན་ཞེས་པའི་དོན་ཏོ། །དོན་དུ་མི་སྒྲུབ་པར་
[219b.4]བྱེད་པ་ཉིད་ཀྱི་ཕྱིར་གཏན་ཚིགས་དུ་མའོ། །དེ་རང་གི་བསྒྲུབ་པར་བྱ་བའི་རྗེས་སུ་འགྲོ་བར་གྱུར་པ་ན་གང་རང་གི་བསྒྲུབ་པར་བྱ་བ་མེད་པ་དང་རིགས་མི་མཐུན་པ་དེ་ལ། ཆོས་གཞན་དང་ལྡན་ན་ཡང་སྒྲུབ་བྱེད་དུ་བྱས་པ་ན། གང་བསྒྲུབ་པར་འདོད་པ་དེ་དང་འགལ་བ་ལ་འཇུག་པ་
[219b.5]འདུས་པ་ཉིད་ལ་སོགས་པ་འགལ་བའི་གཏན་ཚིགས་སུ་བཤད་པ་ཁོ་ནའོ། །སྒྲུབ་བྱེད་དུ་བྱས་པ་ཉིད་ནི་གང་སྒྲུབ་པར་འདོད་པ་དེ་དང་མི་འགལ་བ་ཆོས་གཞན་དང་ལྡན་པ་ལས་མི་འགལ་ན་ཆོས་གཞན་དང་ལྡན་པ་ལ་ཡང་འཇུག་པ་བྱས་པ་ཉིད་ལ་སོགས་པ་མི་འགལ་
[219b.6]བའི་གཏན་ཚིགས་ཉིད་དུ་བཤད་པ་ཁོ་ན་སྟེ་ལེའུ་གསུམ་པའོ།། །།ཡང་ཅི་ལྟར་ན་གང་ལས་བསྒྲུབ་པར་བྱ་བ་མེད་པར་རིགས་མི་མཐུན་པ་ཉིད་དུ་འགྱུར་བ་གང་ལ་འགལ་བར་འཇུག་པ་དེ་བསྒྲུབ་བྱའི་རྗེས་སུ་འགྲོ་བ་ཡིན་ཞེ་ན། གལ་ཏེ་འགལ་བའི་གཏན་ཚིགས་
[219b.7]ཀྱི་དངོས་པོར་ན་བསྒྲུབ་པར་བྱ་བ་དེས་རྗེས་སུ་འགྲོ་བར་གྱུར་ན་རིགས་མི་མཐུན་པ་ལ་སྟེ། གང་རྒོལ་བས་བསྒྲུབ་པར་འདོད་པ་དེས་ནི་མ་ཡིན་ནོ་ཞེས་དགོངས་པའོ། །འདི་ནི་བསྡུས་པའི་དོན་ཏེ། གལ་ཏེ་ཆོས་གཞན་དང་ལྡན་པ་ལ་གང་འཇུག་པ་དེ་མ་ངེས་པ་ཉིད་
[220a]
[220a.1]དུ་འདོད་ན། དེའི་ཕྱིར་འགའ་ཞིག་ཀྱང་གཏན་ཚིགས་སུ་འགྱུར་བ་མ་ཡིན་ཞིང་འགལ་བར་ཡང་མ་ཡིན་གྱི། ཐམས་ཅད་མ་ངེས་པ་ཁོ་ནར་འགྱུར་ཏེ། དངོས་པོ་ཐམས་ཅད་ཆོས་གཞན་དང་ལྡན་པའི་ཕྱིར་རོ། །དེའི་ཕྱིར་གང་གི་མི་མཐུན་ཕྱོགས་ཐམས་
[220a.2]ཅད་ལས་ལྡོག་པ་དེ་ཆོས་གཞན་དང་ལྡན་ཡང་མཐུན་པའི་ཕྱོགས་ལ་འཇུག་པ་ནི་ཡང་དག་པའི་ཤེས་པའི་རྒྱུ་ཁོ་ནའོ། །གང་མཐུན་ཕྱོགས་ཐམས་ཅད་ལ་ལྡོག་པ་དེ་ཆོས་གཞན་དང་ལྡན་ན་ཡང་མི་མཐུན་ཕྱོགས་ལ་འཇུག་པ་ནི་འགལ་བ་ཉིད་ཁོ་ནའོ། །གང་མཐུན་ཕྱོགས་ལ་
[220a.3]འཇུག་ཅིང་མི་མཐུན་ཕྱོགས་ལ་འཇུག་པའམ་དེར་དོགས་པ་དེ་ནི་མ་ངེས་པ་ཉིད་དོ། །དེས་སེལ་བའི་ཆེད་དུ་དེ་དང་བྲལ་བ་ལ་མེད་པ་ཞེས་པ་སྟེ། འདིས་མི་མཐུན་ཕྱོགས་ལ་གཏན་ཚིགས་མེད་པ་ཉིད་ཁོ་ན་བརྗོད་པར་བྱའི་ཆོས་གཞན་དང་ལྡན་པའི་མཐུན་ཕྱོགས་ལ་ཡང་མ་ཡིན་ནོ། །
[220a.4]ཚུལ་གསུམ་པ་གསལ་བར་བྱེད་པའི་དོན་དུ་ཆོས་མི་མཐུན་པ་ཉིད་ཀྱི་དཔེའོ་ཞེས་པ་དེ་ལའང་བསྒྲུབ་བྱ་མེད་པ་ཁོ་ན་ལ་གཏན་ཚིགས་མེད་པ་བཤད་པར་བྱའི་མཐུན་ཕྱོགས་ཉིད་ཆོས་གཞན་དང་ལྡན་པ་ལ་ནི་མ་ཡིན་ནོ། །འགལ་བ་ཉིད་དུ་བཤད་པ་ཁོ་ནའོ་ཞེས་པའི་ཚིག་སྟེ། འདི་ལ་
[220a.5]ཡང་མི་མཐུན་ཕྱོགས་ནི་ཆོས་གཞན་འགལ་བ་མེད་པ་ཤེས་བྱ་ཉིད་ལ་སོགས་པ་དང་ལྡན་པའི་ཕྱིར་ན་མི་མཐུན་ཕྱོགས་ལས་གཞན་ཏེ། དེ་ལས་ཀྱང་མི་མཐུན་ཕྱོགས་ལས་ཅིག་ཤོས་ལ་འཇུག་པ་ཉིད་ཀྱི་ཕྱིར་འགལ་བའི་གཏན་ཚིགས་ཀྱང་མ་ངེས་པར་འགྱུར་ཞེས་པ་ཡང་དག་པ་མ་
[220a.6]ཡིན་པའི་རྟོག་པ་བསལ་བའི་དོན་དུའོ། །དེ་ལྟར་གྱུར་ན་གཞན་དུ་ཡང་གང་ལ་མ་ངེས་པ་ཉིད་བརྗོད་པ་དེ་ལ་ཡང་འདི་ལྟ་ཁོ་ནར་མ་ངེས་པ་ཉིད་དུ་བལྟ་བར་བྱའོ་ཞེས་སྟོན་པ་གསུངས་པ། གང་ལ་ཡང་ཞེས་པ་ལ་སོགས་པ་སྟེ། ཐུན་མོང་བའི་ཁྱད་པར་ཉིད་དང་འགལ་བ་ཉིད་ཀྱང་སྒྲུབ་
[220a.7]པར་བྱེད་པ་ཉིད་དག་ཏུ་འགྱུར་རོ། །རེ་རེ་གཉིས་སུ་མ་བརྗོད་པ་ལ་དཔེར་བརྗོད་པར་བྱ་སྟེ། དེའི་ཕྱིར་གཉིས་ཞེས་འདི་ལ་འཆད་པར་འགྱུར་རོ། །ལུས་ཅན་མ་ཡིན་པའི་ཞེས་སྨོས་པ་ནི་གཏན་ཚིགས་ཉེ་བར་མཚོན་པའི་དོན་ཏོ། །གང་གི་ཕྱིར་ལུས་ཅན་མ་ཡིན་པ་ཁོ་ནའི་དབང་
[220b]
[220b.1]དུ་བྱས་ནས་ཆོས་མཐུན་པ་ཉིད་ཙམ་བརྗོད་པ་ན་མ་ངེས་པ་ཉིད་དུ་ཐལ་བར་འགྱུར་བ་བྱ་བ་མ་ཡིན་གྱི། འོ་ན་ཅི་ཞེ་ན། གཏན་ཚིགས་ཐམས་ཅད་ཀྱིའོ། །འདི་ལྟར་ཡང་། དེ་རྟག་པ་ཉིད་བསྒྲུབ་པར་བྱ་བ་ལ་མ་ངེས་པ་ཉིད་དུ་མངོན་པར་འདོད་པ་ཉིད་ཀྱི་ཕྱིར་དང་། ཐལ་བར་
[220b.2]འགྱུར་བ་ནི་མི་འདོད་པ་འབེབས་པའི་མཚན་ཉིད་ཅན་ཉིད་ཀྱི་ཕྱིར་ཡང་ངོ་། །རྟག་པ་མེད་པ་ལ་ཞེས་པ་འདི་ཡང་བསྒྲུབ་བྱ་མེད་པ་ཉེ་བར་མཚོན་པ་སྟེ། བསྒྲུབ་བྱ་ཐམས་ཅད་མེད་པ་ལ་གཏན་ཚིགས་ཡོད་པར་གྱུར་པའི་ཕྱིར་ན་མ་ངེས་པ་བརྩད་པར་མངོན་པར་འདོད་པ་ཉིད་ཀྱི་ཕྱིར་རོ། །
[220b.3]ཡོད་པའི་ཕྱིར་ཞེས་པ་འདིས་ཀྱང་ཡུལ་གྱི་ཡུལ་ཅན་ལ་དོགས་པ་བསྟན་པར་རིག་པར་བྱའོ། །དེ་ལྟར་ནི་དེ་ཉིད་དུ་འཆད་པར་འགྱུར་ཏེ། གལ་ཏེ་ཆོས་མཐུན་པ་ཉིད་ཙམ་གྱིས་བརྗོད་པར་བྱ་ན། དེ་ལས་བསྒྲུབ་བྱ་ལ་མེད་ན་ཡང་འགྱུར་རོ་ཞེས་གཏན་ཚིགས་ཐུན་མོང་བ་ཉིད་དུ་དོགས་པར་འགྱུར་
[220b.4]རོ་ཞེས་པའོ། །དེ་འདི་སྐད་བཤད་པར་འགྱུར་ཏེ། དེ་ལ་ཡང་ཆོས་མཐུན་པ་ཉིད་ཙམ་བརྗོད་པ་ན་བསྒྲུབ་བྱ་མེད་པ་ལ་གཏན་ཚིགས་ཡོད་པར་དོགས་པས་མ་ངེས་པའོ་ཞེས་བསྟན་པར་བྱའི། གཞན་པའམ་འགལ་བ་ལ་ཡོད་པ་ཞེས་པས་མ་ངེས་པ་ཞེས་པ་ནི་བསྟན་པར་བྱ་བ་མ་ཡིན་ནོ་ཞེས་
[220b.5]པའོ། །ཆོས་གཞན་དང་ལྡན་ན་ཡང་ཞེས་པ་དགོངས་པའོ། །འདིར་ཡང་བསྒྲུབ་པར་བྱ་བ་མེད་པ་སྐབས་སུ་བབ་པ་ཉིད་ཀྱི་ཕྱིར་དེ་ལ་ལྟོས་པས་དོན་གཞན་པ་ཤེས་པར་བྱ་སྟེ། འགལ་བ་ནི་གང་རྒོལ་བས་བསྒྲུབ་བྱ་ཉིད་དུ་འདོད་པ་དེ་ལ་ལྟོས་པས་སོ། །འདི་ག་ལས་ཤེ་ན། ཐ་དད་དུ་ཉེ་བར་
[220b.6]ལེན་པའི་ཤུགས་ལས་སོ། །གལ་ཏེ་འགལ་བ་ཡང་བསྒྲུབ་པར་བྱ་བ་མེད་པ་ལ་ལྟོས་པས་བརྗོད་པར་འདོད་པར་གྱུར་ན་ནི། གཞན་པ་ལ་མ་ཡིན་ཞེས་པ་འདི་ཙམ་བརྗོད་པར་བྱ་བར་འགྱུར་རོ། །དེ་ལྟར་ནི་བསྒྲུབ་པར་བྱ་བ་མེད་པ་ལས་གཞན་ནི་བསྒྲུབ་བྱ་ཡོད་པ་སྟེ། དེ་ཡང་
[220b.7]བསྒྲུབ་བྱ་མེད་པ་དང་འགལ་བ་ཁོ་ནའོ། །དེ་ལས་ཀྱང་གཞན་པ་ལ་མ་ཡིན་ཞེས་པ་འདི་ཁོ་ནས་འགལ་བ་ལ་ཞེས་པ་འདིས་རྟོགས་པར་བྱ་བའི་དོན་རྟོགས་ཟིན་པ་ཉིད་ཀྱི་ཕྱིར། འདི་བརྗོད་པར་བྱ་བ་མ་ཡིན་པར་འགྱུར་ན། བརྗོད་པ་ཡང་ཡིན་ཏེ། དེའི་བསྒྲུབ་བྱ་ལ་ལྟོས་པས་
[221a]
[221a.1]འགལ་བར་རིག་པར་བྱའོ། །འདིར་ཕ་རོལ་གྱི་ཡང་དག་པའི་ཤེས་པའི་རྒྱུ་ཉིད་དུ་མངོན་པར་མ་བསམས་པ་ལ་མ་ངེས་པ་ཉིད་དུ་བརྗོད་པར་བྱ་བའམ། ཡང་ན་འགལ་བ་ཉིད་དུའོ། །དེ་ལ་རྟོགས་པ་སྔ་མ་ལ། །བསྒྲུབ་བྱ་མེད་པ་ལས་གཞན་བསྒྲུབ་བྱ་
[221a.2]ཡོད་པ་ཆོས་གཞན་དང་ལྡན་པ་ལ་ཡང་ཡོད་པར་གྱུར་པ་ཞེས་མ་ངེས་པ་ཉིད་དུ་རབ་ཏུ་བསྟན་པར་བྱ་བ་ནི་མ་ཡིན་ནོ། །འོ་ན་ཅི་ཞེ་ན། བསྒྲུབ་བྱ་མེད་པ་ལ་ཡང་ཡོད་པར་གྱུར་པ་ལས་སམ་དེར་དོགས་པས་སོ། །གཉིས་པ་ལ་ནི་བསྒྲུབ་བྱ་དང་འགལ་བ་ཆོས་གཞན་དང་ལྡན་པ་ལ་
[221a.3]ཡང་ཡོད་པར་གྱུར་པ་ཞེས་མ་ངེས་པ་ཉིད་དུ་བསྟན་པར་བྱ་བ་མ་ཡིན་གྱི། འོན་ཀྱང་འགལ་བའི་གཏན་ཚིགས་ཀྱི་གང་བསྒྲུབ་པར་བྱ་བ་དེ་མེད་པ་ལ་ཡང་ཡོད་པ་ལས་སམ། དེར་དོགས་པས་སོ། །དེ་ལྟར་བྱས་ནས་ཞེས་པ། གང་གི་ཕྱིར་བསྒྲུབ་བྱ་མེད་པ་ལ་གཏན་ཚིགས་མེད་པ་ཉིད་
[221a.4]ཉེ་བར་མ་བསྟན་པ་ན་མ་ངེས་པ་ཉིད་དུ་དོགས་ཀྱི། ཆོས་གཞན་དང་ལྡན་པ་ལ་ཡང་ཕྱོགས་དང་མཐུན་ཕྱོགས་ཁོ་ན་ལ་འཇུག་པའི་ནི་མ་ཡིན་པ་དེའི་ཕྱིར་རྟག་པ་ནི་རྩོལ་བ་ལས་མ་བྱུང་བའོ་ཞེས་པ་ཆོས་མི་མཐུན་པ་ཉིད་ཀྱི་སྦྱོར་བ་འདིས་མི་རྟག་པ་མེད་པ་ལ་གཏན་ཚིགས་མེད་པ་རབ་ཏུ་
[221a.5]བསྟན་པར་བྱའི། མི་རྟག་པ་ཁོ་ན་ཆོས་གཞན་དང་ལྡན་པ་ལ་ནི་མ་ཡིན་ནོ་ཞེས་པ་དགོངས་པའོ། །ཡང་ཅི་ལྟར་ན་དེ་བསྟན་པར་ནུས་ཤེ་ན་གསུངས་པ། བརྩལ་མ་ཐག་ཏུ་བྱུང་བ་ཉིད་ནི་ཞེས་པ་ལ་སོགས་པའོ། །གང་གི་ཕྱིར་བརྩལ་མ་ཐག་ཏུ་བྱུང་བ་ཉིད་མི་རྟག་པ་ཉིད་དང་རྗེས་སུ་
[221a.6]འབྲེལ་པ་དེའི་ཕྱིར་དེ་ལྡོག་པས་དེ་ལྡོག་པར་བསྟན་པར་ནུས་སོ། །སྔར་གཞན་པ་དང་འགལ་བ་དག་མི་མཐུན་ཕྱོགས་ཉིད་དུ་བརྗོད་ཅིང་། དེའི་ཕྱིར་ཡང་དེ་ལ་ཡང་གཏན་ཚིགས་མེད་པ་རབ་ཏུ་བསྟན་པར་བྱ། མི་རྟག་པ་ལས་ཀྱང་རྟག་པ་ནི་གཞན་ཉིད་དང་འགལ་བར་
[221a.7]འགྱུར་རོ། །དེ་ལས་ཀྱང་མདོ་སྡེ་པའི་ཆོས་མི་མཐུན་པ་ཉིད་ཀྱི་དཔེ་མེད་པར་འགྱུར་ཏེ། དངོས་པོ་རྟག་པ་མི་འདོད་པ་ཉིད་ཀྱི་ཕྱིར་རོ་ཞེས་དོགས་པར་བྱས་ནས་གསུངས་པ། རྟག་པ་མེད་པ་ལ་ནི་མ་ཡིན་ནོ་ཞེས་པའོ། །འདི་སྐད་སྟོན་ཏེ་མི་མཐུན་ཕྱོགས་རྣམ་པ་གསུམ་ལ་
[221b]
[221b.1]གང་སྲིད་པ་དེ་ལ་གཏན་ཚིགས་མེད་པ་རབ་ཏུ་བསྟན་པར་བྱའི། ཅིག་ཤོས་ལ་ནི་མ་ཡིན་ནོ་ཞེས་པའོ། །ཡང་ཅིའི་ཕྱིར་བཟློག་པ་བསྟན་པར་བྱ་བ་མ་ཡིན་ཞེ་ན་གསུངས་པ། མ་གྱུར་ཅིག་ཅེས་པ་ལ་སོགས་པའོ། །འཇིག་རྟེན་པ་ཡང་སྦྱོར་བཞིན་དུ་བསྒྲུབ་བྱ་དང་སྒྲུབ་བྱེད་ཀྱི་
[221b.2]མི་མཐུན་ཕྱོགས་དག་ལྷན་ཅིག་ཡོད་པ་སྟོན་པ་ན་རྟག་པ་ཉིད་ཀྱིས་དམ་མ་བཅས་པའི་བྱས་པ་ཉིད་བསྒྲུབས་པར་འགྱུར་རོ། །དེ་ལྟ་ན་འོ་ན་ཞེས་པ་ལ་སོགས་པ་སྟེ། གལ་ཏེ་འདི་དཔེའི་མཚན་ཉིད་ཡིན་ན། དེ་ལྟ་ན་འོ་ན་འགལ་བ་དང་མ་ངེས་པའི་གཉེན་པོར་གཉིས་ཀ་ཡང་བརྗོད་པར་བྱའོ་ཞེས་པ་བརྗོད་
[221b.3]པར་མི་བྱ་སྟེ། ཅིའི་ཕྱིར་ཞེ་ན། སྨྲས་པ་མི་འགྱུར་ཞེས་པ་ལ་སོགས་པ་སྟེ། གང་གི་ཚེ་རེ་ཞིག་ཆོས་མཐུན་པ་ཉིད་ཀྱིས་ཁྱབ་པ་བསྟན་པར་བྱ་བ་དེའི་ཚེ་འགལ་བ་དང་ཐུན་མོང་བ་དང་ཐུན་མོང་མ་ཡིན་པ་ཉིད་དོགས་པར་མི་སྲིད་པ་ཁོ་ན་ཡིན་ཞིང་། ཆོས་མི་མཐུན་པ་ཉིད་ཀྱིས་ཀྱང་
[221b.4]བསྒྲུབ་པར་བྱ་བ་མེད་པ་ཁོ་ན་གཏན་ཚིགས་མེད་པར་བརྗོད་པ་ན་ཐུན་མོང་མ་ཡིན་པ་ཉིད་དོགས་པའི་ཐལ་བར་འགྱུར་བ་ཅི་ཞིག །གལ་ཏེ་རིགས་མཐུན་པ་ལའང་འགྱུར་བ་མ་ཡིན་ན་ནི། བསྒྲུབ་བྱ་མེད་པ་ཁོ་ན་ལ་མེད་དོ་ཞེས་པ་འདིར་མི་འགྱུར་རོ། །འདི་ནི་འཇིག་རྟེན་པའི་སྦྱོར་བ་ཞེས་
[221b.5]པ་དེ་ལ་ནི་མཐུན་ཕྱོགས་ལ་གཏན་ཚིགས་ཡོད་པར་གྱུར་པ་ཅམ་ཁོ་ན་རབ་ཏུ་སྟོན་ཏེ་ཆོས་མཐུན་པ་ཉིད་ཀྱིས་ཁྱབ་པ་མངོན་པར་བརྗོད་པའི་ཕྱིར་རོ། །དེའི་ཕྱིར་ཐུན་མོང་བ་དོགས་པ་སྲིད་དོ། །ཆོས་མི་མཐུན་པ་ཉིད་ཀྱིས་ཀྱང་བསྒྲུབ་བྱ་དང་སྒྲུབ་བྱེད་ཀྱི་མི་མཐུན་ཕྱོགས་དག་གི་ཡོད་པར་
[221b.6]གྱུར་པ་ཙམ་བསྟན་པར་བྱ་བ་དེའི་ཕྱིར་ཐུན་མོང་མ་ཡིན་པ་ཉིད་དོགས་པའོ། །མཚན་ཉིད་མ་ཡིན་ཞེས་པ། ཇི་ལྟར་དཔེ་དག་གི་མཚན་ཉིད་དེ་ལྟར་རེ་རེ་བརྗོད་པ་ན་ཡང་ཇི་སྐད་བཤད་པའི་སྐྱོན་དུ་མི་ཐལ་བའི་ཕྱིར་རོ། །དཔེར་ན་བསྒྲུབ་བྱའི་ཆོས་ཙམ་གྱི་ཞེས་པ། ཇི་ལྟར་འདི་ཕ་རོལ་
[221b.7]པོའི་འདོད་པ་ལ་ལྟོས་པས་བརྗོད་པ་དེ་ལྟར་འདི་ཡང་ངོ་ཞེས་སྟོན་ཏོ། །ཕྱོགས་ཆོས་ཉིད་ཙམ་གཏན་ཚིགས་ཉིད་ན་མ་ངེས་པ་ཐལ་བར་འགྱུར་རོ་ཞེས་པ་མ་ངེས་པ་གཏན་ཚིགས་ཉིད་དུ་ཐལ་བར་འགྱུར་རོ་ཞེས་པའི་དོན་ཏོ། །ཐལ་འགྱུར་ནི་ཐལ་བར་བྱ་བཞིན་པའི་དོད་ཟླ་ལ་ལྟོས་པ་ཉིད་
[222a]
[222a.1]ཀྱི་ཕྱིར་དང་། མི་འདོད་པ་འབབ་པའི་ངོ་བོ་ཉིད་ཀྱི་ཕྱིར་རོ། །གཏན་ཚིགས་ཉིད་ཀྱང་མ་འདོད་པ་ཉིད་ཀྱི་ཕྱིར་དང་། དེ་ཁོ་ན་དོད་ཟླའི་སྦྱོར་བས་གཞན་པའོ་ཞེས་རྟོགས་པར་བྱའོ། །ཡང་ཅི་ཞེས་པ་རིགས་མཐུན་པ་ལ་ཁྱབ་པར་བྱེད་པ་དང་ཁྱབ་པར་བྱེད་པ་མ་ཡིན་པ་དག་
[222a.2]གི་གཏན་ཚིགས་འབའ་ཞིག་པ་དག་གི་ཡང་ནུས་པ་ཉེ་བར་དམིགས་ནས་ཐེ་ཚོམ་ཟ་བས་འདྲིའོ། །ཁྱད་པར་ཉིད་ནི་ཐུན་མོང་མ་ཡིན་ནོ། །རེ་རེའི་འམ་གཉི་གའི་མ་བརྗོད་པ་ནི། རེ་རེ་གཉིས་ཀ་མ་བརྗོད་པའོ། །འགའ་ཞིག་གི་ཞེས་པ་ལ་སོགས་པ་སྟེ། ཕ་རོལ་པོ་རྟོགས་པའི་དོན་དུ་
[222a.3]གཞན་གྱི་དོན་གྱི་རྗེས་སུ་དཔག་པ་ཉིད་ཡིན་ནོ། །ཕ་རོལ་པོས་གལ་ཏེ་དཔེ་གང་ཡང་རུང་བས་རྟོགས་པར་བྱ་བའི་དོན་རབ་ཏུ་གྲུབ་ན། གང་ཡང་རུང་བ་བརྗོད་པ་ཡང་སྒྲུབ་པར་བྱེད་པ་སྟེ། རབ་ཏུ་གྲུབ་ཟིན་པ་བརྗོད་པ་ནི་དོན་མེད་པ་ཉིད་ཀྱི་ཕྱིར་རོ། །ཡང་གི་སྒྲ་ནི་ངེས་པར་གཟུང་བའི་
[222a.4]དོན་ཏོ། །སྒྲ་ལས་བྱུང་བ་བཞིན་དུ་ཞེས་པ་ལ་སོགས་པ་སྟེ་རྟོགས་པ་ཉིད་ཙམ་དུ་ཆོས་མཐུན་པ་ཉིད་ཉེ་བར་བླངས་ནས་སྒྲ་ལས་བྱུང་བ་བཞིན་དུ་ཞེས་པ་དཔེར་རིག་པར་བྱ་སྟེ། མངོན་པར་མ་བརྗོད་པ་ནི་མ་ཡིན་ནོ། །གཞན་དུ་ན་སྒྲ་ལས་བྱུང་བ་ནི་རང་གི་དོན་རྗེས་སུ་དཔག་པ་ཉིད་ཀྱི་ཕྱིར་
[222a.5]ངེས་པར་སྟོན་པ་འདི་མི་རིགས་པར་འགྱུར་ཏེ། ཐལ་བར་འགྱུར་བ་མེད་པའི་ཕྱིར་རོ། །རང་གི་དོན་རྗེས་སུ་དཔག་པ་ལ་དཔེའི་ཐལ་བར་འགྱུར་བ་མེད་པའི་ཕྱིར་ཏེ། དོན་གྱི་བདག་ཉིད་ཀྱི་ཕྱིར་རོ། །དོན་གཉིས་ཀ་ལྷུར་ལེན་པ་སྔོན་མ་ཅན་ནི་མངོན་པར་བརྗོད་པ་ལ་ལྟོས་པ་མེད་པར་
[222a.6]རང་དོན་རྗེས་སུ་དཔག་པས་ངེས་པའོ། །དེ་ལྟར་ནི་སྒྲ་མངོན་སུམ་དུ་ཉེ་བར་དམིགས་ནས། དེ་རིགས་མཐུན་པ་གཞན་ལ་ཡོད་པ་ཉིད་དང་། མེད་པ་ལ་མེད་པ་ཉིད་དྲན་ཏེ། དེ་ཙམ་ཁོ་ནས་བརྗོད་པར་བྱ་བ་རྟོགས་པར་བྱེད་དོ། །དེའི་ཕྱིར་རྟོགས་པར་བྱེད་པ་ཉིད་ཙམ་ཉེ་བར་
[222a.7]གཟུང་ནས་དཔེར་བྱས་པའོ་ཞེས་པའོ། །གཉིས་ཀ་མི་བརྗོད་པ་ཞེས་པ། འདིར་འདི་ནི་དགོངས་པ་སྟེ། དཔེ་ལ་བསྒྲུབ་བྱའི་ཆོས་ནི་སྒྲུབ་པར་བྱེད་པའི་དངོས་པོ་སྟེ་དེ་ཙམ་དང་རྗེས་སུ་འབྲེལ་པས་དེའི་རང་བཞིན་ཉིད་དུ་སྟོན་ཏེ། གང་བྱས་པའི་རང་བཞིན་སྐྱེད་པར་བྱེད་པ་དེ་
[222b]
[222b.1]མི་རྟག་པའི་རང་བཞིན་དུ་གྱུར་པ་སྐྱེད་པར་བྱེད་དོ་ཞེས་པའི་ཚད་མ་དཔེས་བསྟན་པར་བྱའོ། །གཞན་དུ་ན་ཆོས་གཅིག་ཡོད་པར་གྱུར་པ་ལས། དེ་ལས་གཞན་པས་ཀྱང་འབྱུང་བར་བྱའོ་ཞེས་པའི་ངེས་པ་མེད་པའི་ཕྱིར་འཁྲུལ་བར་དོགས་པར་འགྱུར་རོ། །ཚད་མ་དེས་ཀྱང་དེ་
[222b.2]ཙམ་དང་རྗེས་སུ་འབྲེལ་པ་བརྗོད་པར་བྱ་བའོ། །རང་གི་རྒྱུ་ཁོ་ན་ལས་བྱས་པ་དེ་ལྟར་གྱུར་པར་སྐྱེས་པ་གང་ཡིན་པ་འཇིག་པའི་ངང་ཅན་ནི་སྐད་ཅིག་ཙམ་གནས་པའི་ཆོས་ཅན་ཏེ། གཞན་ལས་དེའི་དངོས་པོ་ཁེགས་པའི་ཕྱིར་རོ། །ཡང་ན་རྒྱུའི་དངོས་པོར་ཏེ། དེ་ཡོད་པ་ཁོ་ན་
[222b.3]ལས་འབྱུང་བའི་ཕྱིར་རོ་ཞེས་དོན་གཞན་དཔེ་ཡིས་རབ་ཏུ་བསྟན་པར་བྱའོ། །དེ་ལྟར་དེའི་དངོས་པོ་དང་རྒྱུའི་དངོས་པོར་རབ་ཏུ་གྲུབ་པ་ན་རྗེས་སུ་འགྲོ་བ་དང་ལྡོག་པ་དག་འགྲུབ་བོ། །གང་རྣམས་དེའི་དངོས་པོ་དང་རྒྱུའི་དངོས་པོ་དག་རབ་ཏུ་གྲུབ་པ་ཁོ་ན་ཡིན་པ་དེ་རྣམས་ལ་གཏན་ཚིགས་
[222b.4]ཁོ་ན་བརྗོད་པར་བྱ་སྟེ། གང་གི་དོན་དུ་དཔེ་བརྗོད་པར་བྱ་བའི་དོན་ཏེ་གྲུབ་ཟིན་ཏོ་ཞེས་པས་དེ་བརྗོད་པས་ཅི་ཞིག་ཅེས་པའོ། །འདི་ནི་རང་གི་འདོད་པ་ལ་ལྟོས་པས་དགོངས་པ་བརྗོད་པའོ། །ཕ་རོལ་གྱི་འདོད་པ་ལ་ལྟོས་པས་ནི་མཐུན་ཕྱོགས་ལ་བསྒྲུབ་པར་བྱ་བ་དང་སྒྲུབ་པར་བྱེད་པ་དག་ཡོད་པར་
[222b.5]གྱུར་པ་ཙམ་བཤད་པའི་ཆེད་དུ་རིགས་མཐུན་པའི་དཔེ་བརྗོད་ཅིང་། ཆོས་མི་མཐུན་པ་ཉིད་ཀྱི་དཔེ་ཡང་བསྒྲུབ་བྱ་དང་སྒྲུབ་བྱེད་ཀྱི་མི་མཐུན་ཕྱོགས་དག་གི་ལྷན་ཅིག་འབྱུང་བ་ཙམ་བཤད་པའི་ཆེད་དུ་སྟེ། གང་རྣམས་དེ་གཉིས་ག་རྟོགས་ཟིན་པ་དེ་རྣམས་ཀྱི་ངོར་གཉིས་ཀ་མི་བརྗོད་པ་
[222b.6]སྟེ། དཔེས་རྟོགས་པར་བྱ་བའི་དོན་གྲུབ་ཟིན་པ་ཉིད་ཀྱི་ཕྱིར་རོ་ཞེས་དགོངས་པའོ། །དོན་གྱིས་གོ་བས་ཞེས་པ་ལ་སོགས་པ། འདི་ནི་རང་གི་འདོད་པས་བཤད་པའོ། །འདིར་ཡང་དཔེས་དེའི་དངོས་པོ་གཏན་ཚིགས་ཀྱི་དངོས་པོར་སྟོན་པར་སེམས་བཞིན་པས་དོན་གྱི་གོ་བས་
[222b.7]གཅིག་བརྗོད་པས་གཉིས་པ་འགྲུབ་པར་གསུངས་སོ། །དེ་ལྟ་ན་གང་བྱས་པ་དེ་མི་རྟག་པ་ཁོ་ནའོ་ཞེས་བརྗོད་པ་ན། དོན་གཞན་མ་ཡིན་པར་གྱུར་པ་ན། གསལ་བར་འདི་ནི་འདིའི་རང་བཞིན་ཏེ། དེ་ཙམ་དང་རྗེས་སུ་འབྲེལ་པ་ཚད་མས་མཐོང་ཞིང་དེའི་དངོས་པོར་ངེས་པའི་ཕྱིར་
[223a]
[223a.1]རོ་ཞེས་འབྲེལ་པ་ཤེས་པ་ནི་དོན་གྱིས་གོ་བས་མི་རྟག་པ་ཉིད་མེད་ན་བྱས་པ་ཉིད་དུ་མི་འགྱུར་ཞེས་པར་འགྱུར་ཏེ་ཐ་མི་དད་པའི་ཕྱིར་རོ། །གཞན་དུ་ན་དེ་ཡོད་པ་ན་ཡོད་པ་ཁོ་ནའོ་ཞེས་པ་འདི་ཁོ་ན་མི་འགྱུར་རོ། །དེ་མེད་པ་ན་མི་འགྱུར་བ་ཁོ་ནའོ་ཞེས་པ་འདི་
[223a.2]བརྗོད་པ་ན། དེ་ཡོད་པར་རིགས་པ་ནི་གསལ་བར་འདི་ནི་འདིའི་རང་བཞིན་ཏེ། གང་གིས་དེ་མེད་པ་ན་མི་འབྱུང་བའོ། །གཞན་དུ་ན་མི་རིགས་པའི་ཕྱིར་རོ་ཞེས་དེའི་རང་བཞིན་ཉིད་དུ་རྟོགས་པས་རྗེས་སུ་འགྲོ་བ་དྲན་པར་འགྱུར་རོ། །དེ་བཞིན་དུ་གང་ན་དུ་བ་ཡོད་པ་དེར་མེར་
[223a.3]འགྱུར་བ་ཁོ་ན་ཞེས་བརྗོད་པ་ན། གང་གིས་དུ་བ་ཡོད་པ་མེར་གདོན་མི་ཟ་བར་འགྱུར་བ་དུ་བ་ནི་མེའི་འབྲས་བུ་སྟེ། གཞན་དུ་ན་དོན་གཞན་དེ་དང་རྗེས་སུ་འབྲེལ་པའི་ངེས་པ་མེད་པའི་ཕྱིར་ན་རང་བཞིན་རང་དབང་ཅན་དུ་འགྱུར་ཏེ། དེ་མེད་པ་ལ་ཡང་རང་བཞིན་མ་ཚང་བ་མེད་པའི་ཕྱིར་ན་
[223a.4]མེད་པ་མ་ཡིན་ནོ། །འབྲས་བུ་ལ་ནི་གདོན་མི་ཟ་བར་རྒྱུར་འགྱུར་བ་ཡིན་ཏེ། འདི་ཁོ་ན་ནི་རྒྱུའི་རྒྱུ་ཉིད་ཡིན་པའི་ཕྱིར་རོ། །གང་དོན་གཞན་ཡོད་པ་ན་རང་བཞིན་ཉེ་བར་སྒྲུབ་ཅིང་། འབྲས་བུ་ཡང་དེ་ཡོད་པ་ཁོ་ན་ལ་ཡོད་པ་སྟེ། དེ་ཡང་དུ་བ་ལ་ཡོད་ཅིང་དེའི་ཕྱིར་དུ་བ་འབྲས་བུའོ། །
[223a.5]དེ་ལྟར་རྗེས་སུ་འགྲོ་བས་དེ་འབྲས་བུ་ཉིད་དུ་རིག་པའི། སྲེག་པར་བྱེད་པ་མེད་པ་ན་དུ་བ་འགྱུར་བ་མ་ཡིན་ནོ་ཞེས་དོན་གྱིས་ལྡོག་པ་རྟོགས་པར་འགྱུར་རོ། །དེ་བཞིན་དུ་མེ་མེད་པ་ལ་དུ་བ་མེད་པ་ཁོ་ནའོ་ཞེས་བརྗོད་པ་ན། དུ་བ་ལ་མེ་གདོན་མི་ཟ་བར་ཞེས་དོན་གྱིས་རྗེས་སུ་འགྲོ་བ་རྟོགས་སོ་ཞེས་པའོ་
[223a.6]སྒྲུབ་པར་བྱེད་པའི་ངག་གཅིག་ལ་གཉིས་ཀ་དག་སྦྱོར་བར་འདོད་པ་མ་ཡིན་ཏེ། དོན་མེད་པ་ཉིད་ཀྱི་ཕྱིར་རོ་ཞེས་པའོ། །རྗེས་སུ་དཔག་པ་ལ་ཡང་ཞེས་རང་གི་དོན་རྗེས་སུ་དཔག་པ་ལའོ། །ཚུལ་འདི་ཞེས་པ་རྟོགས་པའི་ཚུལ་ལོ། །དྲན་པ་སྐྱེད་པར་བྱེད་པ་ཁོ་ན་རྗེས་སུ་འགྲོ་བ་དང་ལྡོག་པ་སོ་སོར་
[223a.7]རྟོགས་པ་དག་ཕྱོགས་ཆོས་ངེས་པར་གྱུར་པ་ན་རང་དོན་རྗེས་སུ་དཔག་པ་ལ་ཡང་འདི་མཐོང་ངོ་ཞེས་པའི་དོན་ཏོ། །དེ་སྟོན་པར་གསུངས་པ། གལ་ཏེ་འདི་ཞེས་པ་ལ་སོགས་པའོ། །དེ་ཉིད་ཀྱི་ཕྱིར་ཞེས་པ། གང་གི་ཕྱིར་རང་དོན་རྗེས་སུ་དཔག་པ་ལ་ཡང་ཚུལ་འདི་མཐོང་ངོ་ཞེས་པའི་དོན་ཡིན་པ་
[223b]
[223b.1]དེའི་ཕྱིར་གཞན་དོན་རྗེས་སུ་དཔག་པ་ལ་ཚུལ་འདི་བལྟ་བར་བྱ་སྟེ། དེ་ནི་སྔོན་མ་ཅན་ཉིད་ཀྱི་ཕྱིར་ཞེས་སྟོན་ཅིང་ཐལ་བར་འགྱུར་བ་ལས་ཀྱང་། ཉེ་བར་སྦྱོར་བ་ལ་སོགས་པ་རྣམས་དགག་པ་བསྒྲུབ་པའི་ཆེད་དུ་གསུངས་པ། རང་གིས་ངེས་བཞིན་ཞེས་པ་ལ་སོགས་
[223b.2]པ་སྟེ། ཇི་ལྟར་བདག་ཉིད་ལ་ངེས་པ་སྐྱེད་པ་དེ་ལྟར་ཕ་རོལ་པོ་རྣམས་ལ་ཡང་ངེས་པ་སྐྱེད་པའི་ཆེད་དུ། གང་ལས་འདོད་པར་འགྱུར་བ་དང་། གང་ལས་ཕྱོགས་ཆོས་ཉིད་དང་འབྲེལ་པ་དག་གི་བསྒྲུབ་བྱ་བརྗོད་པ་བསྒྲུབ་བྱ་གསལ་བར་བྱེད་པའི་བདག་ཉིད་དུ་འགྱུར་བའོ། །
[223b.3]དེས་ན་ཕྱོགས་ལ་སོགས་པའི་ཚིག་ལས་གཞན་པ་དེ་ལ་ཉེ་བར་མི་མཁོ་བ་ཤེས་པ་ལ་སོགས་པ་རྣམས་གཞན་དོན་རྗེས་སུ་དཔག་པ་ལ་དོར་བའོ་ཞེས་པའི་དོན་ཏོ། །གཞན་དག་སོང་ཞེས་པ་འདིར་ཕྱོགས་ཆོས་ལ་སོགས་པ་རྗོད་པ་ལས་ཞེས་བརྟག་པར་བྱའོ། །ཡང་ཅི་
[223b.4]ལྟར་འཆད་པར་བྱེད་པའི་དོན་ཅན་བརྗོད་པ་གསལ་བར་བྱེད་པ་ལ་འཇུག་པ་སྟེ། དཔེར་ན་རིགས་པ་དེས་སྨྲའོ་ཞེས་པ་འདིར་སྨྲ་བ་ཇི་ལྟར་ཡིན་པ་ལྟ་བུ་སྟེ་སྐད་ཀྱི་བྱིངས་རྣམས་ནི་དུ་མའི་དོན་ཅན་ཉིད་ཀྱི་ཕྱིར་རོ། །འབྲེལ་པ་ནི་མེད་ན་མི་འབྱུང་བའོ། །རྗེས་སུ་དཔག་པར་བྱ་བ་བསྟན་
[223b.5]པའི་དོན་དུ་ཕྱོགས་བརྗོད་པ་ཞེས་པ་ནི་ཕྱོགས་ཀྱི་སྒྲ་ནི་འདིར་དོན་གྱི་རྣམ་གྲངས་སོ། །ཇི་སྐད་དུ་གསུངས་པ། ཡོད་པའི་དོན་ནི་ཕྱོགས་ཞེས་སོ། །འདི་སྐད་བཤད་པར་འགྱུར་ཏེ། རྗེས་སུ་དཔག་པའི་དུས་སུ་དོན་གང་ཅི་ཡང་རུང་བ་བརྗོད་པ་དེ་རྗེས་སུ་དཔག་པར་བྱ་བ་རྟོགས་པའི་དོན་
[223b.6]དུ་སྟེ། དེ་ལ་དགོས་པ་གཞན་ཅུང་ཟད་ཀྱང་ཡོད་པ་མ་ཡིན་ནོ། །ཕྱོགས་ཆོས་ལ་སོགས་པ་བརྗོད་པ་ནུས་པ་མངོན་པར་བརྗོད་པ་ཁོ་ན་ནི་གཞན་དོན་རྗེས་སུ་དཔོག་པ་ལ་ཡན་ལག་གི་དངོས་པོ་སྟེ། དེའི་ཕྱིར་དེ་ཁོ་ན་ཉེ་བར་བླང་ངོ་ཞེས་པ་དགོངས་པའོ། །དེའི་ཕྱིར་གསུངས་པ། གཞན་
[223b.7]གྱི་ཡང་མ་ཡིན་ཞེས་པ་ལ་སོགས་པའོ། །འདིས་དེ་མ་ཐག་པར་བརྗོད་པ་ཁོ་ནའི་ཡན་ལག་གི་དངོས་པོའོ་ཞེས་པ་འདི་གསལ་བར་བྱེད་དོ། །ཤེས་འདོད་ལ་སོགས་པ་རྣམས་ཀྱི་ཞེས་པས་ཤེས་འདོད་དང་ཐེ་ཚོམ་དང་དོགས་པ་དང་ནུས་པ་ཐོབ་པ་རྣམས་འཕངས་པ་ཡིན་ནོ། །ཉེ་བར་
[224a]
[224a.1]སྦྱོར་བ་དང་མཇུག་སྡུད་དག་སོགས་པའི་སྒྲས་འཕངས་ནའང་། སླར་ཡང་ཁྱད་པར་དུ་སྤངས་པ་ནི། །རིགས་པ་ཅན་པ་རྣམས་ཀྱིས་ཤེས་པར་འདོད་པ་སུན་ཕྱུང་ནས། དེ་དག་ཡན་ལག་གཞན་ཉིད་དུ་རྣམ་པར་གཞག་པའི་ཕྱིར་རོ། །དེ་དག་ཡན་ལག་གཞན་
[224a.2]ཉིད་དུ་རིགས་པ་ཡང་མ་ཡིན་ཏེ། བརྗོད་ཟིན་པ་དང་ནུས་པ་མེད་པའི་དོན་སྟོན་པའི་ཕྱིར་ཏེ། ཇི་ལྟར་རིགས་པར་རོ། །དཔེའི་ཚིག་ཀྱང་ཞེས་པ་ལ་སོགས་པས་བརྗོད་ཟིན་པའི་དོན་སྟོན་པའི་ཕྱིར་རོ་ཞེས་པ་འདི་མ་ངེས་པ་ཉིད་དུ་སྨྲས་སོ། །གཏན་ཚིགས་ཀྱི་དོན་སྟོན་པའི་ཕྱིར་རོ་ཞེས་
[224a.3]པ། གང་གི་ཕྱིར་དཔེས་མཐུན་ཕྱོགས་དང་མི་མཐུན་ཕྱོགས་དག་ལ་ཡོད་པ་དང་མེད་པ་ཉིད་དག་གི་གཏན་ཚིགས་ཀྱི་དོན་ཁོ་ན་སྟོན་ཏོ། །གལ་ཏེ་གཏན་ཚིགས་ལས་ཞེས་པ་ལ་སོགས་པས། ལན་འདེབས་སོ། །གཏན་ཚིགས་ལས་ཞེས་པ་གཏན་ཚིགས་ཀྱི་ཚིག་ལས་སོ། །གལ་
[224a.4]ཏེ་ཡང་གཏན་ཚིགས་ལས་དཔེ་ཐ་དད་མེད་པར་བསྒྲགས་ཏེ། དེས་ཀྱང་གཏན་ཚིགས་ཀྱི་དོན་གྱི་ཕྱོགས་གཅིག་བརྗོད་པའི་ཕྱིར་རོ། །དེ་ལྟ་ན་ཡང་ཉེ་བར་སྦྱར་བ་ལ་སོགས་པ་བཞིན་དུ་དགོས་པ་མེད་པ་མ་ཡིན་ཏེ། གཏན་ཚིགས་ཀྱི་ཚིག་གིས་མ་བརྗོད་པའི་གཏན་ཚིགས་ཀྱི་དོན་
[224a.5]སྟོན་པའི་ཕྱིར་རོ། །གཏན་ཚིགས་འབྲེལ་པ་སྒྲུབ་དོན་དུ། །ཞེས་པ་བསྒྲུབ་པར་བྱ་བ་དང་མེད་ན་མི་འབྱུང་བ་ཉིད་རབ་ཏུ་བསྟན་པའི་དོན་དུའོ་ཞེས་པའི་དོན་ཏོ། །ལོགས་ཤིག་ཅེས་པ་མ་འབྲེལ་བ་སྟེ། ལོགས་པའི་དོན་མངོན་པར་བརྗོད་པའི་ཕྱིར་རོ། །ལོགས་པར་འགྱུར་མོད་དེ་གཏན་
[224a.6]ཚིགས་ཀྱི་ཚིག་བརྗོད་པར་བྱ་བ་མ་ཡིན་པའི་དོན་མ་འབྲེལ་བའི་དོན་མངོན་པར་བརྗོད་པར་འགྱུར་མོད་ཅེས་པའི་ཐ་ཚིག་གོ། །གཏན་ཚིགས་ལྷག་མ་རབ་ཏུ་འགྲུབ་པའི་དོན་དུ་ཞེས་པ། གཏན་ཚིགས་ལས་གཞན་གང་ཡིན་པ་དེ་ནི་ལྷག་མའོ། །དེ་ཡང་བསྒྲུབ་པར་བྱ་བ་དང་སྒྲུབ་པར་བྱེད་
[224a.7]པ་དག་དང་། དེའི་མི་མཐུན་ཕྱོགས་དག་ལྷན་ཅིག་འབྱུང་བ་ཕ་རོལ་པོས་མངོན་པར་འདོད་པ་སྟེ། དེ་རབ་ཏུ་འགྲུབ་པའི་དོན་དུའོ། །སྒྲ་མི་རྟག་སྟེ་བྱས་པ་ཉིད་ཀྱི་ཕྱིར་བུམ་པ་བཞིན་ཞེས་བྱས་པ་ན། བྱས་པ་ཉིད་དང་མི་རྟག་པ་ཉིད་དག་ལྷན་ཅིག་འབྱུང་བ་བུམ་པ་ལ་རྟོགས་པར་བྱེད་ལ།
[224b]
[224b.1]དེ་བཞིན་དུ་རྟག་པ་ནི་མ་བྱས་པའོ་ཞེས་བྱས་པ་ན། ནམ་མཁའ་ལ་རྟག་པ་དང་མ་བྱས་པ་ཉིད་དག་གིའོ། །དེའི་ཕྱིར་དཔེ་ནི་ལོགས་པ་ཁོ་ནར་འགྱུར་མོད་པའོ། །འཇིག་རྟེན་མཚུངས་ཕྱིར་ལོགས་པ་མིན། །ཞེས་པ་འཇིག་རྟེན་པའི་སྦྱོར་བ་དང་མཚུངས་པ་ཉིད་དུ་ཐལ་བར་འགྱུར་བའི་ཕྱིར་རོ་ཞེས་
[224b.2]པའི་དོན་ཏོ། །དེ་ཉིད་ཀྱི་ཕྱིར་གསུངས་པ། དེ་ལྟ་ན་ནི་ཞེས་པ་ལ་སོགས་པའོ། །འཇིག་རྟེན་པའི་སྦྱོར་བ་ལ་དཔེ་ནི་གཏན་ཚིགས་ཀྱི་དོན་དང་མ་འབྲེལ་བ་ཉིད་བསྟན་པའི་ཆེད་དུ་གསུངས་པ། དཔེ་བརྗོད་དང་ཆོས་མཐུན་ཞེས་པ་ལ་སོགས་པའོ། །དཔེ་བརྗོད་བུམ་པ་ལ་སོགས་པ་དང་བྱས་པ་ཉིད་ལ་
[224b.3]སོགས་པ་ཆོས་མཐུན་ཉིད་ནི་འཇིག་རྟེན་པ་རྣམས་ཀྱིས་བརྗོད་དོ། །མཚན་ཉིད་ཀྱི་དབང་གིས་སྦྱོར་བར་འགྱུར་ཞིང་། དེ་རྣམས་ཀྱི་རྟགས་ཀྱི་མཚན་ཉིད་ཀྱང་དཔེ་བརྗོད་དང་ཆོས་མཐུན་པ་ཉིད་ལས་བསྒྲུབ་པར་བྱ་བ་སྒྲུབ་པར་བྱེད་པ་ནི་གཏན་ཚིགས་སོ་ཞེས་པའོ། །དེ་ལྟར་ཡང་སྦྱོར་བ་ལས་བྱས་པ་
[224b.4]ཉིད་ཀྱི་ཕྱིར་རོ་ཞེས་པ་འདིས་དཔེ་བརྗོད་དང་ཆོས་མཐུན་པ་ཉིད་འབའ་ཞིག་བརྗོད་དེ། སྒྲ་མི་རྟག་སྟེ་བྱས་པ་ཉིད་ཀྱི་ཕྱིར་བུམ་པ་བཞིན་ཞེས་ཀྱི། བསྒྲུབ་བྱ་སྒྲུབ་བྱེད་ཉིད་མ་བརྗོད་དོ་ཞེས་མེད་ན་མི་འབྱུང་བ་བསྟན་པའི་སྟོབས་ཀྱིས་བསྒྲུབ་པར་བྱ་བ་སྒྲུབ་པར་བྱེད་པ་ཉིད་འཐོབ་ཀྱི། ཆོས་མཐུན་པ་ཉིད་ཙམ་
[224b.5]བརྗོད་པ་ལས་ནི་མ་ཡིན་ནོ། །འདི་ལྟར་འགྱུར་མོད། བསྒྲུབ་པར་བྱ་བ་སྒྲུབ་པར་བྱེད་པ་ནི་གཏན་ཚིགས་སོ་ཞེས་པའི་ཚིག་ལས་ན། ཅི་ལྟར་བསྒྲུབ་པར་བྱ་བ་སྒྲུབ་པར་བྱེད་པ་ཉིད་མ་བརྗོད་པ་ཡིན་ཞེ་ན་གསུངས་པ། ཇི་ལྟར་ནི་ཞེས་པ་ལ་སོགས་པ་སྟེ། གང་གི་ཕྱིར་བསྒྲུབ་པར་བྱ་བ་
[224b.6]སྒྲུབ་པར་བྱེད་པ་ཉིད་ནི་ཡན་ལག་ཐམས་ཅད་ཀྱི་ཐུན་མོང་བའི་ངོ་བོ་མཚོན་པར་བྱ་བ་སྟེ། དེ་མཚན་ཉིད་མ་ཡིན་ནོ། །དེ་ཁོ་ན་ཡོངས་སུ་ཤེས་པར་བྱ་བའི་ཆེད་དུ་མཚན་ཉིད་བྱ་བ་ཡིན་ཏེ། དེའི་ཕྱིར་དཔེ་བརྗོད་དང་ཆོས་མཐུན་པ་ཉིད་ཙམ་ཁོ་ན་གཏན་ཚིགས་ཀྱི་མཚན་ཉིད་དུ་ཞེས་པས་
[224b.7]སྦྱོར་བ་ལ་ཡང་བརྗོད་པར་བྱའོ། །དེ་ཚོད་ཙམ་གྱིས་གཏན་ཚིགས་བསྒྲུབ་པར་བྱ་བ་སྒྲུབ་པར་བྱེད་པ་ཉིད་དུ་འགྱུར་བ་ཡང་མ་ཡིན་ཏེ། གཞན་དུ་ན་སྒྲ་རྟག་སྟེ་ལུས་ཅན་མ་ཡིན་པ་ཉིད་ཀྱི་ཕྱིར་ཞེས་པ་འདི་ཡང་འགྱུར་རོ་ཞེ་ན་གསུངས་པ། དེ་ལྟར་ཡང་ནི་དཔེ་ཙམ་ཉིད་ཅེས་པའོ། །
[225a]
[225a.1]དེ་ལྟ་ན་ཡང་དཔེ་ཉིད་ཙམ་རབ་ཏུ་སྟོན་པ་ནི་སྦྱོར་བ་ལ་བསྟན་ཏེ། བུམ་པ་བཞིན་དུ་བྱས་པ་ཉིད་ཀྱི་ཕྱིར་མི་རྟག་ཅེས་པ་ལ་གཏན་ཚིགས་ལ་རྗེས་སུ་མི་འཛིན་པའི་ཕྱིར་ཞེས་པ། ལྷན་ཅིག་འབྱུང་བ་ཙམ་བསྟན་པས་ནི་གཏན་ཚིགས་རྗེས་སུ་འཛིན་པ་ཅི་ཡང་བྱས་པ་མ་
[225a.2]ཡིན་ནོ། །ཅི་སྟེ་ཡང་འགྱུར་མོད་ཅེས་པ་ལ་སོགས་པས་ནི་ཆོས་མི་མཐུན་པ་ཉིད་ཀྱང་གཏན་ཚིགས་རྗེས་སུ་འཛིན་པའི་ངོར་ནུས་པ་མེད་པ་ཉིད་སྨྲས་པའོ། །བསྒྲུབ་པར་བྱ་བ་མེད་ན་གཏན་ཚིགས་མེད་པ་རབ་ཏུ་བསྟན་པས་རྗེས་སུ་གཟུང་བར་འགྱུར་གྱི། བསྒྲུབ་པས་བསྒྲུབ་པར་བྱ་བ་དང་
[225a.3]སྒྲུབ་པར་བྱེད་པའི་མི་མཐུན་པའི་ཕྱོགས་དག་ལྷན་ཅིག་སྤྱོད་པ་ཙམ་བསྟན་པས་ནི་མ་ཡིན་ནོ། །འཇིག་རྟེན་པའི་སྦྱོར་བས་ཀྱང་འདི་ཙམ་ཁོ་ན་བྱ་བ་སྟེ། ཟློག་པས་རྟག་པའི་དཔེ་ལྡོག་པའི་དོན་དུ་ཞེས་པ། མ་བྱས་པ་ཉིད་ཟློག་པས་ཏེ་བྱས་པ་ཉིད་ཀྱིས་རྟག་པའི་དཔེ་ལྡོག་པའི་དོན་དུ་སྟེ།
[225a.4]ནམ་མཁའ་བཞིན་དུ་རྟག་པ་མ་ཡིན་ནོ་ཞེས་རྟག་པ་ནམ་མཁའ་ལ་སོགས་པས་སྒྲ་བྱས་པའི་དཔེ་ཡིན་པ་མེད་དོ་ཞེས་པའི་དོན་ཏོ། །ཅི་སྟེ་ཡང་ཞེས་པ་བསྒྲུབ་པར་བྱ་བ་འགྲུབ་པའི་ཆེད་དུ། གཏན་ཚིགས་རྗེས་སུ་འཛིན་པ་ཚོལ་བ་ཡིན་ཞིང་། དེ་གལ་ཏེ་དཔེ་ཙམ་གྱིས་འགྱུར་ན་གཏན་
[225a.5]ཚིགས་རྗེས་སུ་འཛིན་པ་དོན་མེད་པར་འགྱུར་ཏེ། དཔེ་ཙམ་གྱིས་བསྒྲུབ་པར་བྱ་བ་འགྲུབ་པས་སོ་ཞེས་པ་བསམས་པའོ། །འགྲུབ་པ་ཁོ་ན་བསྒྲུབ་པར་བྱ་བ་རྗེས་སུ་འཛིན་པའོ། །འདི་ཡོད་པ་མ་ཡིན་ཏེ་ཞེས་པ་དཔེ་ཙམ་གྱིས་བསྒྲུབ་པར་བྱ་བ་རྗེས་སུ་འཛིན་པར་འགྱུར་བ་མ་ཡིན་ནོ། །ཅིའི་ཕྱིར་
[225a.6]ཞེ་ན། དེ་ལ་ཡང་ཞེས་པ་ལ་སོགས་པ་སྟེ། གཏན་ཚིགས་བཅས་པའི་བསྒྲུབ་པར་བྱ་བའི་དང་བསྒྲུབ་བྱ་ཙམ་གྱི་སྟེ། བསྒྲུབ་བྱ་ཙམ་གྱི་ཞེས་པ་ཕྱི་མར་མངོན་པར་བརྗོད་པའི་ཕྱིར། སྔ་མ་ནི་གཏན་ཚིགས་བཅས་པ་བསྒྲུབ་པར་བྱ་བའི་ཞེས་རྟོགས་པར་བྱའོ། །དེའི་ཁྱད་པར་གྱིའམ།
[225a.7]དེའི་སྒྲས་བསྒྲུབ་པར་བྱ་བ་ལ་བསྙེགས་སོ། །དཔེ་ཡིན་ན་སྟེ། དཔེ་ཡིན་པ་ནའོ། །དཔེ་ནི་ཐུག་པ་མེད་འགྱུར་ཞིང་། །གཏན་ཚིགས་དང་བཅས་པའི་བསྒྲུབ་པར་བྱ་བ་དཔེ་ཡིན་ནའོ། །ཕྱི་མ་དག་ཡིན་ན་ནི་མི་མཐུན་ཕྱོགས་ལས་ཟློག་པ་ཡང་བརྗོད་པར་བྱའོ། །དཔེར་ན་བུམ་པ་ནི་བྱས་
[225b]
[225b.1]པའི་ཕྱིར་མི་རྟག་སྟེ། དེ་བཞིན་དུ་སྒྲ་ཡང་ཡིན་ནོ་ཞེས་པ་དཔེར་ན་བུམ་པ་བྱས་པ་ཉིད་ཀྱིས་མི་རྟག་པ་ཉིད་དུ་རྗེས་སུ་དཔག་པ་དེ་ལྟ་བུ་སྒྲ་ཡང་ཡིན་ནོ་ཞེས་པའི་ཐ་ཚིག་གོ། །སླར་ཡང་བུམ་པ་མི་རྟག་པ་ཉིད་ལ་ཡང་ཞེས་པ་ལ་སོགས་པ་ཇི་ལྟར་སྒྲ་ལ་དཔེས་མི་རྟག་པ་ཉིད་འགྲུབ་པ་དེ་བཞིན་
[225b.2]དུ་བུམ་པ་ལ་སྟེ། དེ་བཞིན་དུ་དེའི་དཔེ་ལ་ཡང་ངོ་ཞེས་པ་ཐུག་པ་མེད་པའོ། །ནམ་མཁའ་བཞིན་དུ་རྟག་པ་ནི་མ་ཡིན་ནོ་ཞེས་པ། རྟག་པ་ཉིད་བཀག་པས་མི་རྟག་པ་ཉིད་ཙམ་བསྒྲུབ་པར་བྱ་བའོ་ཞེས་སྟོན་པར་བྱེད་དོ། །དེས་ནི་ནམ་མཁའ་ལ་སོགས་པ་རྣམས་ལས་ཞེས་པ་ལ་སོགས་པ་སྟེ།
[225b.3]མི་མཐུན་ཕྱོགས་ལས་ལྡོག་པ་མེད་པ་ནི་གོ་བར་བྱེད་པ་མ་ཡིན་ཏེ། དེའི་ཕྱིར་ནམ་མཁའ་བཞིན་དུ་རྟག་པ་ནི་མ་ཡིན་ནོ་ཞེས་པ་འདི་བརྗོད་པར་འདོད་པ་ན། བྱས་པ་ཉིད་ཀྱི་ཉེ་བར་སྦྱོར་བ་སྟོན་པས་ནམ་མཁའ་ལ་སོགས་པ་མི་མཐུན་ཕྱོགས་རྣམས་ལས་དེའི་ལྡོག་པ་ཉེ་བར་བསྟན་པར་བྱ་སྟེ། བྱས་
[225b.4]པ་ཉིད་ལས་གྱུར་ན་མི་རུང་ངོ་ཞེས་འདི་ནི་དོན་མེད་པ་ཉིད་དོ་ཞེས་པའོ་ཡོད་པས་ཡང་མ་ཡིན་ནོ་ཞེས་པ་བུམ་པ་བཞིན་དུ་མི་རྟག་པའོ་ཞེས་པ་འདི་ཙམ་གྱིས་དེ་རྣམས་ལས་ལྡོག་པ་རྟོགས་པ་མ་ཡིན་པས་སོ། །སྣམ་བུ་ལ་སོགས་པ་བཞིན་དུ་ནི་མ་ཡིན་ནོ་ཞེས་པ། ཁྱད་པར་གཞན་བཀག་པས་ཁྱད་པར་
[225b.5]བསྒྲུབ་པར་བྱའོ་ཞེས་སྟོན་ཏོ། །དེ་ལྟ་ན་ཡང་སྣམ་བུ་ལ་སོགས་པ་རྣམས་ལས་ཞེས་པ་ལ་སོགས་པ་སྟེ། ཁྱད་པར་བསྒྲུབ་པར་བྱ་བ་ཡིན་ན་ནི་ནམ་མཁའ་ལ་སོགས་པ་བཞིན་དུ་སྣམ་བུ་ལ་སོགས་པ་ཡང་མི་མཐུན་ཕྱོགས་ཁོ་ན་སྟེ། དེའི་ཕྱིར་ཡང་དེ་ལས་ཀྱང་གཏན་ཚིགས་ལྡོག་པར་བརྗོད་
[225b.6]པར་བྱ་སྟེ། གཞན་དུ་ན་བྱས་པ་ཉིད་ཀྱི་ཕྱིར་སྣམ་བུ་བཞིན་དུ་མི་རྟག་གོ་ཞེས་པར་ཡང་འགྱུར་རོ། །དཔེ་ཙམ་བསྟན་པས་དེ་རྟོགས་པ་ཡང་མ་ཡིན་ཏེ། སྣམ་བུ་ལ་སོགས་པ་རྣམས་ཀྱང་བྱས་པ་ཉིད་ལས་ཡོད་པ་ཡང་མ་ཡིན་ནོ། །བསྒྲུབ་པར་བྱ་བ་ནི་ཐམས་ཅད་དུ་རྣམ་པ་དང་ལྡན་པ་ཡང་
[225b.7]མ་ཡིན་ཞེས་པ་ཁྱད་པར་དང་ལྡན་པ་མ་ཡིན་ཞེས་པའི་བར་རོ། །ཐམས་ཅད་དུ་ཞེས་སྨོས་པ་ནི་ཁ་ཅིག་ཏུ་རྣམ་པ་དང་ལྡན་པ་ཉིད་སྲིད་པའི་ཕྱིར་ཏེ། དཔེར་ན་འདིར་མེའོ་ཞེས་པ་དེར་ནི་བསྒྲུབ་པར་བྱ་བའི་ཆོས་ནི་ཆོས་ཅན་གྱི་ངོ་བོ་ཡིན་གྱི་ཆོས་ཀྱི་ངོ་བོ་ནི་མ་ཡིན་ཏེ། ཆོས་ཅན་ཡང་རྣམ་པ་དང་ལྡན་
[226a]
[226a.1]པ་ཉིད་སྲིད་པས་སོ། །ཡང་ན་བསྒྲུབ་པར་བྱ་བ་ནི་ཐམས་ཅད་དུ་རྣམ་པ་དང་ལྡན་པའང་མ་ཡིན་ནོ་ཞེས་པ། སྤྱི་ཁོ་ན་ནི་མི་ལྡན་པ་རྣམ་པར་བཅད་པས་བསྒྲུབ་པར་བྱ་བ་སྟེ། ཐམས་ཅད་དུ་ཞེས་པ་ངེས་པར་འཛིན་པར་བལྟ་བར་བྱ་སྟེ། ཐམས་ཅད་ཁོ་ནར་
[226a.2]རྣམ་པ་དང་ལྡན་པ་མ་ཡིན་ཞེས་པའི་དོན་ཏོ། །འོ་ན་འགའ་ཞིག་ཏུ་རྣམ་པ་དང་ལྡན་པ་ཡོད་པ་མ་ཡིན་ནམ། དེ་ལྟར་ནི་སྲེག་པར་བྱེད་པ་ལ་སོགས་པ་རྣམས་ཁྱད་པར་དང་ལྡན་པ་སྟེ། རྩྭ་ལས་བྱུང་བ་དང་ལོ་མ་ལས་བྱུང་བ་ལ་སོགས་པ་ཐ་དད་པའི་ཕྱིར་རོ་ཞེ་ན། འདི་ཡོད་པ་མ་
[226a.3]ཡིན་ཏེ། དེ་ལས་ཡང་རྩྭ་ལས་བྱུང་བ་དང་ལོ་མ་ལས་བྱུང་བ་ལ་སོགས་པ་སྲེག་པར་བྱེད་པའི་ཁྱད་པར་སྒྲུབ་པར་བྱེད་པ་ན་ཡང་རྩྭ་ལས་བྱུང་བ་ལ་སོགས་པ་སྲེག་པར་བྱེད་པའི་སྤྱི་ཁོ་ན་བསྒྲུབ་པར་བྱའོ་ཞེས་པས་ཅིའི་ཕྱིར་རྣམ་པ་དང་ལྡན་པ་ཉིད་ཡིན། དེ་ཉིད་ཀྱི་ཕྱིར་གསུངས་པ།
[226a.4]དམ་བཅའ་བའི་དོན་དང་ཡང་མ་འབྲེལ་བ་སྟེ་མི་རྟག་པ་ཉིད་ཙམ་གྱིས་དམ་བཅས་པའི་ཕྱིར་རོ་ཞེས་པ་མི་རྟག་པ་ཉིད་ཙམ་གྱིས་དམ་བཅས་པ་ན། དེ་ལ་ལྟོས་པ་ཁོ་ནས་བྱ་བཞིན་པའི་དཔེའི་དོན་འཐད་པར་འགྱུར་ཞིང་། ཁྱད་པར་ལ་ལྟོས་པས་ནི་དམ་བཅའ་བའི་དོན་དང་འབྲེལ་པ་མ་
[226a.5]ཡིན་ཏེ། གཞན་དམ་བཅས་ཤིང་གཞན་ཁོ་ན་ཉེ་བར་དཔོག་པས་སོ་ཞེས་བྱས་ནས་སོ། །གལ་ཏེ་ཡང་ཞེས་པ་ལ་སོགས་པ་སྟེ། དཔེ་གཏན་ཚིགས་ལས་ཐ་དད་པ་ཉིད་དུ་གྱུར་ན་ཕྱོགས་ཀྱི་ཆོས་ཙམ་ཁོ་ན་གཏན་ཚིགས་སོ་ཞེས་པ་འདི་ཐོབ་སྟེ། དཔེ་བརྗོད་དང་ཆོས་མཐུན་པ་ཉིད་ལས་
[226a.6]བསྒྲུབ་པར་བྱ་བ་སྒྲུབ་པར་བྱེད་པ་ནི་གཏན་ཚིགས་སོ་ཞེས་པའི་མཚན་ཉིད་ཀྱི་ཕྱིར་རོ། །ཡང་དེ་ལྟར་གྱུར་ན་མི་འདོད་པ་ཅིར་འགྱུར་ཞེ་ན་གསུངས་པ། དེ་ལྟ་ན་ཡང་ཞེས་པ་ལ་སོགས་པའོ། །དེ་ལ་འཁྲུལ་བའི་སྐབས་ཡོད་དོ་ཞེས་པ་ནི་བསྒྲུབ་པར་བྱ་བའི་མི་མཐུན་ཕྱོགས་ལ་གཏན་ཚིགས་ཀྱི་མི་
[226a.7]མཐུན་ཕྱོགས་རབ་ཏུ་བསྟན་པའི་ཕྱིར་རོ། །གང་གི་ཡང་ཆོས་མི་མཐུན་པ་ཉིད་ཁོ་ནས་ཡིན་པ་དེའི་ཡང་ཐུན་མོང་མ་ཡིན་པ་གཏན་ཚིགས་ཉིད་དུ་ཐལ་བར་འགྱུར་ཏེ། མཐུན་པའི་ཕྱོགས་ལ་གཏན་ཚིགས་ཡོད་པར་གྱུར་པ་ཉིད་མ་བཤད་པའི་ཕྱིར་རོ། །གང་གི་ཡང་གཉིས་ཀ་བརྗོད་
[226b]
[226b.1]པར་བྱ་བ་དེ་ལ་མི་སྲིད་དེ། གཉི་གར་གཉི་ག་བརྗོད་པ་ཉིད་ཀྱི་ཕྱིར་རོ། །དང་པོ་དང་ཐ་མའི་གསུམ་པའི་དཔེ་བརྗོད་ཕྱི་མ་དག་ལ་ཞེས་པ། དང་པོ་གསུམ་གྱི་དཔེར་བརྗོད་ཕྱི་མ་ནི་མི་རྟག་པ་ཉིད་ཀྱི་ཕྱིར་རྩོལ་མ་ཐག་ཏུ་བྱུང་བ་ཞེས་པའོ། །འདི་ལ་བུམ་པ་ལ་སོགས་པ་ཆོས་མཐུན་པ་ཉིད་
[226b.2]ཀྱིས་དཔེ་དང་། ནམ་མཁའ་ལ་སོགས་པ་ཆོས་མི་མཐུན་པ་ཉིད་ཀྱིས་ཏེ། དཔེ་གཉིས་ཀ་ལ་ཡོད་ན་ཡང་མ་ངེས་པ་ཉིད་དེ། གློག་ལ་སོགས་པ་མི་མཐུན་པའི་ཕྱོགས་ལ་ཡོད་པའི་ཕྱིར་རོ། །མཐའ་མ་གསུམ་ལ་དཔེ་བརྗོད་ཕྱི་མ་ནི་རེག་པར་བྱ་བ་མ་ཡིན་པ་ཉིད་ཀྱི་ཕྱིར་རྟག་གོ་
[226b.3]ཞེས་པ་སྟེ། འདི་ལ་ཡང་ནམ་མཁའ་ལ་སོགས་པ་ཆོས་མཐུན་པ་ཉིད་ཀྱིས་དཔེ་དང་། ཆོས་མི་མཐུན་པ་ཉིད་ཀྱིས་བུམ་པ་ལ་སོགས་པའོ། །དེ་ལྟ་ན་ཡང་ལས་ལ་སོགས་པ་མི་མཐུན་ཕྱོགས་ལ་ཡོད་པའི་ཕྱིར་མ་ངེས་པའོ། །གཏན་ཚིགས་བསྒྲུབ་བྱ་གཉིས་མི་ལྡན། །
[226b.4]ཞེས་པ་གཏན་ཚིགས་དང་བསྒྲུབ་བྱ་དང་གཉིས་པོ་ནི་གཏན་ཚིགས་བསྒྲུབ་བྱ་གཉིས་ཏེ། དེ་དང་མི་ལྡན་པའོ། །ཡང་གཉིས་ནི་གཏན་ཚིགས་དང་བསྒྲུབ་བྱའོ། །འདི་ཅི་ལས་ཤེ་ན། འདི་ཁོ་ན་སྐབས་ཡིན་པ་ཉིད་ཀྱི་ཕྱིར་དང་། གཞན་ཡང་མ་ཐོས་པའི་ཕྱིར་རོ། །དེ་ཡི་
[226b.5]མི་མཐུན་ཕྱོགས་མེད་བྱས། །ཞེས་པ་དེའི་སྒྲས་གཏན་ཚིགས་ཉིད་ལ་སོགས་པ་ལ་བསྙེགས་ཤིང་། མི་མཐུན་ཕྱོགས་ཀྱི་སྒྲས་འདིར་གཏན་ཚིགས་ཉིད་ལ་སོགས་པ་མེད་པ་ཙམ་བརྗོད་པར་འདོད་པ་སྟེ། གཏན་ཚིགས་ལ་སོགས་པ་མེད་པ་དང་བྲལ་བ་ཞེས་པའི་དོན་ཏོ། །
[226b.6]རྗེས་འགྲོ་ཟློག་པ་རྣམ་གཉིས་དག །ཅེས་པ་ཆོས་མཐུན་པ་ཉིད་དང་། ཆོས་མི་མཐུན་པ་ཉིད་ཀྱི་བྱེ་བྲག་ལས་སོ། །དེར་སྣང་བ་ཞེས་པ་དཔེ་ལྟར་སྣང་བའོ། །རྗེས་འགྲོ་མེད་པ་ཡང་ཞེས་པ། ཡང་གི་སྒྲ་ནི་སྡུད་པ་ལའོ། །རྣམ་གཉིས་དག་ཅེས་འཇུག་གོ། །རྗེས་སུ་འགྲོ་
[226b.7]བ་མེད་པ་ཡང་དཔེ་ལྟར་སྣང་བ་སྟེ། དེ་ཡང་གང་དུ་བསྒྲུབ་པར་བྱ་བ་དང་སྒྲུབ་པར་བྱེད་པ་དག་དང་དེའི་མི་མཐུན་ཕྱོགས་དག་ལྷན་ཅིག་འབྱུང་བ་ཙམ་སྟོན་པར་བྱེད་ཀྱི་ཁྱབ་པ་ནི་མ་ཡིན་ནོ། །གཞན་རྣམས་ནི་རྣམ་གཉིས་ཞེས་པ་འདི་ཡང་གི་སྒྲས་སྡུད་པར་བྱེད་པ་སྟེ། རྗེས་འགྲོ་མེད་པ་ཡང་
[227a]
[227a.1]ཆོས་མཐུན་པ་ཉིད་དང་ཆོས་མི་མཐུན་པ་ཉིད་ཀྱི་བྱེ་བྲག་ལས་རྣམ་པ་གཉིས་སོ་ཞེས་ཟེར་རོ། །འོ་ན་ཆོས་ཅན་མ་གྲུབ་པ་ཡང་དཔེ་ལྟར་སྣང་བ་མ་ཡིན་ནམ། དེ་ཡང་འདིར་མ་བསྡུས་ཏེ། དེའི་ཕྱིར་ཡང་མ་ཁྱབ་པ་ཉིད་དོ་ཞེ་ན་གསུངས་པ། གཉིས་ཀ་དང་མི་ལྡན་
[227a.2]པ་ཞེས་པ་འདི་ཁོ་ནས་དོན་གྱིས་ན་ཆོས་མཐུན་པ་ཉིད་ཉེ་བར་དྲངས་པས་ཆོས་ཅན་མ་གྲུབ་པ་ཡང་དཔེ་ལྟར་སྣང་བ་ཉིད་དུ་བཤད་དོ། །ནམ་མཁའ་ལ་སོགས་པ་རྟག་པར་ཁས་མ་བླངས་པ་ལ་ནི་གཉིས་ཀ་དང་ལྡན་པ་མི་སྲིད་པའི་ཕྱིར་རོ། །ཆོས་མཐུན་པ་ཉིད་ཉེ་བར་དྲངས་པ་སྨོས་པ་ནི། དེ་མེད་
[227a.3]པའི་ཕྱིར་དེ་ལས་མི་འཇུག་པ་ལས་ཞེས་པ་ཆོས་མི་མཐུན་པ་ཉིད་ཉེ་བར་བླངས་པ་ནི་ཆོས་ཅན་མ་གྲུབ་པ་ལ་སྐྱོན་མེད་པའི་ཕྱིར་རོ། །དཔེར་ན་ཁ་ཅིག་ཟེར་བ་ཞེས་པ་བྱེ་བྲག་པ་རྣམས་སོ། །འདིས་ནི་རྗེས་སུ་འགྲོ་བ་མེད་པའི་དཔེ་ལྟར་སྣང་བ་ནི་དེ་རྣམས་ཀྱི་དཔེའི་མཚན་ཉིད་ཀྱིས་ཡོངས་སུ་བསྡུས་
[227a.4]པ་མ་ཡིན་ནོ་ཞེས་སྟོན་ཏོ། །གཏན་ཚིགས་ལ་སོགས་པ་མེད་ཅེས་པ་ལ་སོགས་པས། འདི་རྣམས་དཔེ་ལྟར་སྣང་བ་ཉིད་ཡིན་པ་ལ་གཏན་ཚིགས་གསུངས་སོ། །གཏན་ཚིགས་གང་རྣམས་ཀྱི་དང་པོ་ཡིན་པ་དེ་འདི་རྣམས་ནི་གཏན་ཚིགས་ལ་སོགས་པ་རྣམས་ཏེ་སོགས་པའི་སྒྲས་
[227a.5]ནི་བསྒྲུབ་པར་བྱ་བ་དང་། གཏན་ཚིགས་དང་བསྒྲུབ་བྱའི་མཚན་ཉིད་གཉིས་དང་། དེ་རྣམས་ཀྱི་མི་མཐུན་ཕྱོགས་གཟུང་བར་བྱའོ། །འདི་ལ་གཏན་ཚིགས་ལ་སོགས་པ་རྣམས་ཡོད་པ་མ་ཡིན་པས་ན་གཏན་ཚིགས་སོགས་མེད་དོ། །དེ་འདི་ནི་དཔེ་མིན་པ་སྟེ། དེའི་མཚན་
[227a.6]ཉིད་མི་བརྟེན་པའི་ཕྱིར་རོ། །གང་གི་ཕྱིར་འདི་ནི་དཔེའི་མཚན་ཉིད་དེ། གཏན་ཚིགས་ལ་བསྒྲུབ་བྱ་རྗེས་སུ་འགྲོ་བ་དང་གང་དུ་མེད་པ་ལ་མེད་པ་ཡང་སྟོན་པར་བྱེད་པའོ་ཞེས་པ་འདི་འདི་རྣམས་ལ་ཡོད་པ་མ་ཡིན་ནོ། །རྗེས་འགྲོ་ཕྱིན་ཅི་ལོག་སོགས་པའི། །ཞེས་པའི་སོགས་པའི་སྒྲས་
[227a.7]རྗེས་སུ་འགྲོ་བ་མེད་པ་ཡོངས་སུ་བསྡུའོ། །ཡང་ཅིའི་ཕྱིར་རྗེས་འགྲོ་ཕྱིན་ཅི་ལོག་ལ་སོགས་པ་དཔེ་ལྟར་སྣང་བ་ཡིན་ཏེ། ཇི་སྲིད་དུ་འདི་ལ་སྐྱོན་འགའ་ཡང་ཡོད་པ་མ་ཡིན་ནོ་ཞེ་ན་དེའི་ཕྱིར་གསུངས་པ། ཉེ་བར་བསྡུ་བ་མ་འབྲེལ་པ་ཞེས་པ་སྟེ། གལ་ཏེ་ཡང་དོན་གྱི་སྐྱོན་མེད་པ་
[227b]
[227b.1]དེ་ལྟ་ནའང་ཉེ་བར་བསྡུ་བ་དང་མ་འབྲེལ་པའི་ཕྱིར་དཔེ་ལྟར་སྣང་བའོ་ཞེས་པའི་དོན་ཏོ། །ཉེ་བར་བསྡུ་བ་ནི་མེད་ན་མི་འབྱུང་བ་ཉིད་དེ། ཐམས་ཅད་དུ་སྒྲུབ་པར་བྱེད་པ་ལ་བསྒྲུབ་པར་བྱ་བ་ཉེ་བར་བསྡུ་བ་སྟེ་ཉེ་བར་འདྲེན་པའོ། །བསྒྲུབ་པར་བྱ་བ་མེད་པ་ན་ཡང་གཏན་ཚིགས་མེད་
[227b.2]པའིའོ། །དེ་དང་མ་འབྲེལ་བ་ནི་རྣམ་པར་བྲལ་བའོ། །ཡང་ཅིའི་ཕྱིར་ཉེ་བར་བསྡུ་བ་དང་མ་འབྲེལ་བ་ཡིན་ཞེ་ན་གསུངས་པ། འབྲེལ་པ་རབ་ཏུ་མ་བསྟན་ཕྱིར། །ཞེས་པ་སྟེ། འབྲེལ་པ་ནི་མེད་ན་མི་འབྱུང་བའོ། །དེ་ཡོད་དུ་ཟིན་ཀྱང་རབ་ཏུ་སྟོན་པ་ནི་རྗེས་འགྲོ་ཕྱིན་ཅི་ལོག་ལ་
[227b.3]སོགས་པ་ལ་སྲིད་པ་མ་ཡིན་ནོ། །དེའི་ཕྱིར་འདི་ཉེ་བར་བསྡུ་བ་དང་མ་འབྲེལ་བའོ་ཞེས་པའོ། །དེ་དག་གི་འབྲེལ་པ་སྟོན་པ་དཔེའོ་ཞེས་པ། དེ་དག་གི་སྟེ་དེ་འདྲ་བ་དང་དེ་མེད་ན་ནི་མི་འབྱུང་བའི་བསྒྲུབ་པར་བྱ་བ་དང་སྒྲུབ་པར་བྱེད་པ་དག་གི་འབྲེལ་པ་སྟེ་མེད་ན་མི་འབྱུང་བ་ཉིད་གང་གིས་ངེས་
[227b.4]པར་སྟོན་པ་དེ་དཔེའོ། །དེའི་རང་གི་ངོ་བོ་སྟོན་པ་གསུངས་པ། གང་འདི་རྗོད་པར་བྱེད་པ་དཔེར་ན་བུམ་པ་བཞིན་ཞེས་པ་སྟེ། ངག་གང་གིས་འབྲེལ་པ་ངེས་པར་སྟོན་པ་དེ་དཔེའོ། །ཡང་དེ་ཅི་འདྲི་བ་ཞིག་ཅེ་ན་གསུངས་པ། གང་རྩོལ་བ་ལས་བྱུང་བ་དེ་མི་རྟག་པའོ་ཞེའོ། །དེ་ལྟ་ན་ཡང་ཞེས་པ་
[227b.5]ལ་སོགས་པ་སྟེ། དེ་ལྟར་ཡང་མཚན་ཉིད་ཀྱི་རྣམ་པར་རྟོག་པ་ཡིན་ན་དཔེར་ན་བུམ་པ་བཞིན་པ་འདི་མི་རིགས་ཏེ། དཔེ་ཉིད་དུ་དཔེར་བརྗོད་པར་ཏེ། དཔེ་ངག་ཏུ་བརྗོད་པར་སྨྲ་བའིའོ། །ཅིའི་ཕྱིར་ཞེ་ན་གསུངས་པ། ངེས་པར་བསྟན་པར་བྱ་བ་ནི་དཔེ་མ་ཡིན་པའི་ཕྱིར་ཞེས་པ། བསྟན་པར་འོས་པ་
[227b.6]ན་ངེས་པར་བསྟན་པར་བྱ་བ་སྟེ། བུམ་པ་ལ་སོགས་པའི་དོན་ཏོ། །གང་འདི་རྗོད་པར་བྱེད་པ་ཞེས་པའི་ཚིག་ལས། དེའི་དཔེ་ཉིད་མེད་དོ། །དཔེར་ན་བུམ་པ་བཞིན་ཞེས་པ་འདིས་ཀྱང་བརྗོད་པར་བྱ་བ་ཁོ་ན་བརྗོད་དེ། དེ་ལས་ཀྱང་མི་རིགས་ཏེ། རྗོད་པར་བྱེད་པ་ལ་དཔེ་ཉིད་དུ་བརྗོད་པ་ཉིད་
[227b.7]ཀྱི་ཕྱིར་དང་། དོན་གྱི་བདག་ཉིད་ཀྱང་དཔེར་བརྗོད་པ་ཉིད་ཀྱི་ཕྱིར་རོ། །དེ་ལྟར་འགྱུར་མོད་དཔེར་ན་བུམ་པ་བཞིན་ཞེས་པ་འདིས་རྗོད་པར་བྱེད་པ་ཁོ་ན་འདིར་དཔེ་ཉིད་དུ་དཔེར་བརྗོད་དེ། བུམ་པ་ཞེས་པའི་ཚིག་འདིའི་ཚིག་གི་དོན་ནི་རང་གི་ངོ་བོ་ཡིན་པ་ཉིད་ཀྱི་ཕྱིར་རོ་ཞེ་ན་དེའི་ཕྱིར་གསུངས་པ།
[228a]
[228a.1]འདི་ཙམ་གྱིས་ཀྱང་ཞེས་པ་ལ་སོགས་པ་སྟེ། དཔེར་ན་བུམ་པ་བཞིན་ཞེས་པའི་ཚིག་འདི་ཙམ་གྱིས་མེད་ན་མི་འབྱུང་བ་ཉིད་ངེས་པར་བསྟན་པར་མི་ནུས་ཏེ། དེའི་ཕྱིར་འདི་ཡང་དཔེ་ཉིད་དུ་མི་རིགས་སོ། །དེ་དག་གི་ཞེས་བརྗོད་མི་བྱ། །ཞེས་པ་འདི་ལ་བརྗོད་
[228a.2]པར་མི་བྱེད་པ་ལ་རྒྱུ་ངེས་པར་བསྟན་པ་མ་ཡིན་ནོ་ཞེས་དྲིས་པ། ཅིའི་ཕྱིར་ཞེ་ན་ཞེས་པའོ། །རྒྱུ་གསུངས་པ། ཕན་ཚུན་བསྒྲུབ་བྱ་ཉིད་མ་གྱུར། །ཞེས་པའོ། །མེད་ན་མི་འབྱུང་བ་ཉིད་ནི་འབྲེལ་པ་ཡིན་ལ་ཞེས་པ། གཞན་ནི་རྗེས་སུ་དཔོག་པ་ལ་ཉེ་བར་མི་སྦྱོར་བའི་ཕྱིར་རོ། །དེ་ཡང་
[228a.3]དེ་དག་གི་ཞེས་བརྗོད་པའི་ཕྱིར། གཉིས་ཀ་དག་ལ་ཡང་ཡོད་དོ་ཞེས་དམ་བཅས་པར་འགྱུར་རོ། །གཞན་དུ་ན་བསྒྲུབ་པར་བྱ་བས་གཏན་ཚིགས་ལ་འབྲེལ་པ་ངེས་པར་སྟོན་པ་ཞེས་བརྗོད་པར་བྱ་བར་འགྱུར་རོ། །དེ་ལས་ཀྱང་ཕན་ཚུན་བསྒྲུབ་པར་བྱ་བ་ཉིད་དུ་འགྱུར་རོ། །དེ་སྟོན་པ་
[228a.4]ཇི་ལྟར་རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་ཞེས་པ་ལ་སོགས་པའོ། །ཆོས་མཐུན་ཙམ་གྱིས་ཞེས་པ་ལ་སོགས་པའོ། །དཔེར་ན་བུམ་པ་བཞིན་ཞེས་པ་ཆོས་མཐུན་པ་ཉིད་ཙམ་འདིས་ལྡོག་པའི་ཚིག་མེད་པར་མེད་ན་མི་འབྱུང་བ་ཉིད་ངེས་པར་བསྟན་པ་ནུས་པ་མ་ཡིན་ནོ། །དོན་གྱིས་གོ་
[228a.5]བས་ཞེས་པ་ལ་སོགས་པ་ནི་ཆོས་མཐུན་པ་ཉིད་ཀྱི་སྦྱོར་བ་ཁོ་ནས་ཁྱབ་པ་ཉེ་བར་བསྟན་པ་ན་ཤུགས་ཀྱིས་ལྡོག་པ་རྟོགས་པ་ཁོ་ན་སྟེ། འདི་ཁོ་ན་སྟོན་པར་བྱེད་པ་གསུངས་པ། གང་རྩོལ་མ་ཐག་ཏུ་བྱུང་བ་ཞེས་པ་ལ་སོགས་པ་སྟེ། དེ་ལྟར་འོ་ན་ཡང་དེ་བརྗོད་བྱ་མིན་ཞེས་པ་
[228a.6]བསྒྲུབ་པར་བྱ་བ་དང་སྒྲུབ་པར་བྱེད་པའི་མི་མཐུན་ཕྱོགས་དག་གི་མེད་ན་མི་འབྱུང་བ་རབ་ཏུ་བསྟན་པའི་དོན་དུ་འདི་བརྗོད་པར་བྱ་བ་ཡིན་ན། དེ་ཡང་གཞན་ཁོ་ན་ལས་གྲུབ་པོ་ཞེས་པས་བརྗོད་པར་བྱ་བ་མ་ཡིན་ནོ། །འདི་འགྱུར་མོད། །ཆོས་མི་མཐུན་པ་ཉིད་ཀྱི་སྦྱོར་བ་བསྟན་པའི་དོན་
[228a.7]དུ་འདི་བརྗོད་པའོ་ཞེ་ན་གསུངས་པ། དེ་མི་མཐུན་ཕྱོགས་མེད་མི་འབྱུང་། །འབྲེལ་པ་ལ་ཡང་ཞེས་པ་ལ་སོགས་པ་སྟེ། གལ་ཏེ་ཁྱོད་ཀྱིས་ཡོངས་སུ་བརྟགས་པའི་ཆོས་མི་མཐུན་པ་ཉིད་ཀྱི་སྦྱོར་བས་བསྒྲུབ་བྱ་རྗེས་སུ་འཛིན་པར་འགྱུར་ན་མཛེས་ཏེ། དེ་རབ་ཏུ་བསྟན་
[228b]
[228b.1]པའི་དོན་དུ་འབད་པ་ཡིན་ན། དེ་ཡང་མེད་དོ་ཞེས་པས་འདི་མི་རིགས་སོ། །གལ་ཏེ་རྟག་པ་རྩོལ་བ་ལས་མ་བྱུང་བའོ་ཞེས་པ་བསྒྲུབ་པར་སྟོན་པར་བྱེད་ན་རྗེས་སུ་འཛིན་པར་འགྱུར་བ་མ་ཡིན་པ་ཅིས་ཤེ་ན། དེ་ཡིས་གཞན་ནི་ཞེས་པ་ལ་སོགས་པའོ། །དེ་ལས་གཞན་རབ་ཏུ་
[228b.2]བསྒྲུབ་པ་ཡང་སྟོན་པ་གསུངས་པ། དམ་མ་བཅས་པ་ཁོ་ན་ཞེས་པ་ལ་སོགས་པ་སྟེ། རྟག་པ་ཉིད་དང་རྩོལ་བ་ལས་མ་བྱུང་བ་དག་གི་འབྲེལ་པ་རབ་ཏུ་སྟོན་པ་ན་དེ་དག་ཁོ་ནའི་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་བསྟན་པར་འགྱུར་གྱི་གཏན་ཚིགས་སྔ་མ་ལ་
[228b.3]ཕན་འདོགས་པ་འགའ་ཞིག་ནི་མ་ཡིན་ནོ། །འདིར་འགྱུར་མོད་སྒྲུབ་པས་ཀྱང་མི་མཐུན་པའི་ཕྱོགས་ཀྱི་འབྲེལ་པ་རབ་ཏུ་སྟོན་པ་ན་ཕན་འདོགས་པར་འགྱུར་བ་ཁོ་ན་སྟེ། གང་གི་ཕྱིར་བསྒྲུབ་པར་བྱ་བས་ཁྱབ་པ་རབ་ཏུ་སྟོན་པ་ནི་གཏན་ཚིགས་ལ་རྗེས་སུ་འཛིན་པར་ཡིན་པས་སོ། །
[228b.4]གང་གི་ཚེ་ཡང་རྟག་པ་ལ་རྩོལ་བ་ལས་མ་བྱུང་བ་ལས་ཁྱབ་པ་ཉེ་བར་བསྟན་པར་འགྱུར་བ་དེའི་ཚེ་འཇིག་པའི་ངང་ཅན་ཁོ་ན་ལ་རྩོལ་བ་ལས་བྱུང་བ་ཡོད་པ་ཉིད་དུ་རྟོགས་ཀྱི། ཅིག་ཤོས་ལ་མ་ཡིན་ཏེ། འགལ་བ་དག་གཅིག་ལ་མི་སྲིད་པའི་ཕྱིར་རོ་ཞེ་ན་གསུངས་པ། བསྒྲུབ་པས་ཀྱང་
[228b.5]ཞེས་པ་ལ་སོགས་པ་སྟེ། འདིས་མདོ་སྡེ་པའི་ཕྱོགས་ལ་བརྟེན་པའི་ཁས་བླངས་པ་ཉམས་པ་གསུངས་སོ། །ཕན་ཚུན་མེད་ན་མི་འབྱུང་བའང་། །ཞེས་པ་དེའི་མི་མཐུན་པའི་ཕྱོགས་དག་གི་འབྲེལ་པ་ངེས་པར་སྟོན་པ་ཞེས་པའི་ཚིག་ལས་གཉིས་ཀ་དག་གི་ཕན་ཚུན་དུ་མེད་ན་མི་འབྱུང་
[228b.6]བ་སྟེ་མི་འབྱུང་བ་ཉིད་བཤད་པར་བྱའོ་ཞེས་བརྗོད་པར་འགྱུར་རོ། །དེ་ལས་ཀྱང་གློག་ལ་སོགས་པ་རྣམས་ཀྱང་རྟག་པར་འགྱུར་རོ་ཞེས་པས་ཁས་བླངས་པས་གནོད་པའོ། །རྩོལ་བ་ལས་སྐྱེས་སོ་ཞེས་པ་རྩོལ་སྐྱེས་ཏེ། རྩོལ་མ་ཐག་ཏུ་བྱུང་བ་ཞེས་པའི་དོན་ཏོ། །མ་གྲུབ་པའི་
[228b.7]དོན་ཅན་ཉིད་ནི་དཔེའི་སྐྱོན་ཡིན་ཞེས་པ་འདིའི་དོན་མ་གྲུབ་པ་ཞེས་པ་འབྲུ་མང་པོ་པ་སྟེ། དེ་ནས་དངོས་པོའི་རྐྱེན་ནོ། །རེག་པར་བྱ་བ་མ་ཡིན་པ་ཉིད་ཀྱི་ཕྱིར་སྒྲ་རྟག་པ་སྟེ་བློ་བཞིན་ཞེས་པ་བསྒྲུབ་པར་བྱ་བའི་ཆོས་མ་གྲུབ་པ་ཉིད་དོ། །བུམ་པ་བཞིན་ཞེས་པ་བསྒྲུབ་བྱ་དང་སྒྲུབ་བྱེད་ཀྱི་
[229a]
[229a.1]ཆོས་མ་གྲུབ་པའོ། །འདི་འབྲེལ་པ་ཙམ་བརྗོད་པ་ནི་ཞེས་པ་ལ། གང་འདི་བརྗོད་པ་ཞེས་པའི་ཚིག་ལས་བསྒྲུབ་པར་བྱ་བ་དང་སྒྲུབ་པར་བྱེད་པ་དག་གི་འབྲེལ་པ་གང་གིས་བསྟན་པར་བྱ་བའི་ངག་དེ་ནི་དཔེར་མངོན་པར་འདོད་ཀྱི། བསྟན་པར་བྱ་བ་བུམ་པ་
[229a.2]ལ་སོགས་པ་ནི་མ་ཡིན་ནོ། །དེའི་ཕྱིར་དེ་མ་གྲུབ་པའི་དོན་ཅན་ཉིད་ཀྱིས་དཔེ་ལྟར་སྣང་བ་ཉིད་དུ་སྨྲ་བར་རིགས་པ་མ་ཡིན་ནོ་ཞེས་པའོ། །འདི་སྐད་དུ་བརྗོད་པར་བྱ་ཞེས་པ། འབྲེལ་པ་རྗོད་པར་བྱེད་པའི་ངག་དཔེ་ཉིད་ན། རྗོད་པར་བྱེད་པ་ཁོ་ན་འབྲེལ་པ་སྟོན་པར་མི་ནུས་པ་གང་ཡིན་པ་
[229a.3]དེ་ཁོ་ན་དཔེ་ལྟར་སྣང་བ་ཉིད་དུ་རིགས་སོ། །དེའི་ཕྱིར་རྗེས་སུ་འགྲོ་བ་ཕྱིན་ཅི་ལོག་སྟོན་པའི་རྗོད་པར་བྱེད་པ་ཁོ་ན་དཔེ་ལྟར་སྣང་བ་ཉིད་དུ་བརྗོད་པར་བྱའོ། །གང་རྟག་པ་དེ་རེག་པ་དང་ལྡན་པ་མ་ཡིན་ནོ་ཞེས་སློབ་པར་བྱེད་དོ། །ཡང་འདི་དཔེ་ལྟར་སྣང་བ་ཡིན་པའི་རྒྱུ་ཅི་ཞེ་ན་གསུངས་པ་འདིས་
[229a.4]ནི་ཞེས་པ་ལ་སོགས་པའོ། །གཅིག་ཉིད་མ་ཡིན་ཞེས་པ་ལ་སོགས་པས་བློ་དང་བུམ་པ་དག་དཔེ་ལྟར་སྣང་བ་ཉིད་དུ་ཁས་བླངས་ནས་མཚན་ཉིད་མ་ཁྱབ་པ་ཉིད་དུ་སྟོན་ཏོ། །གང་གི་ཕྱིར་མ་གྲུབ་པའི་དོན་ཅན་ཉིད་ཁོ་ན་དཔེའི་སྐྱོན་མ་ཡིན་ནོ་ཞེས། གཏན་ཚིགས་བསྒྲུབ་བྱ་གཉིས་མི་
[229a.5]ལྡན། །ཞེས་པ་ལ་སོགས་པས་ཉེ་བར་བསྟན་ཟིན་ཏོ།། །།བསྒྲུབ་པར་བྱ་བ་དང་ཆོས་མཐུན་པ་ཉིད་ལས་ཞེས་པ་ལ་སོགས་པ་ལ་བསྒྲུབ་པར་བྱ་བ་ནི་སྒྲ་ལ་སོགས་པ་ཆོས་ཅན་ནོ། །དེ་དང་ཆོས་མཐུན་པ་ཉིད་ནི་གང་བྱས་པ་ཉིད་ལ་སོགས་པའོ། །བསྒྲུབ་པར་བྱ་བ་དང་
[229a.6]ཆོས་མཐུན་པ་ཉིད་དེ་ལས་དེའི་ཆོས་རྟོགས་པ་སྟེ། བསྒྲུབ་པར་བྱ་བ་དེའི་ཆོས་མི་རྟག་པ་ཉིད་ལ་སོགས་པའོ། །དེའི་ཆོས་རྟོགས་ཤིང་གོ་བར་བྱེད་པའི་ངང་ཚུལ་འདིའི་ཡིན་པ་ཞེས་པ་ནི་དེའི་ཆོས་རྟོགས་པ་སྟེ། འཇིག་རྟེན་པའི་ཡོངས་སུ་རྟོགས་པར་བྱེད་པ་པོ་རྣམས་ཀྱིའོ། །
[229a.7]དོན་གང་ལ་བློ་མ་མཚུངས་པ་དེ་དཔེ་སྟེ་བུམ་པ་ལ་སོགས་པའོ། །དེ་དཔེ་བརྗོད་དེ། དཔེར་བརྗོད་པར་བྱ་བའོ་ཞེས་པས་ན་དཔེ་བརྗོད་དོ། །ཡང་ན་འདིས་བསྒྲུབ་པར་བྱ་བ་དང་སྒྲུབ་པར་བྱེད་པའི་ཆོས་དག་གི་འབྲེལ་པ་དཔེར་བརྗོད་པར་བྱའོ་ཞེས་པ་དཔེ་བརྗོད་དོ། །དེ་ལས་བཟློག་
[229b]
[229b.1]པ་ལས་ཀྱང་ཕྱིན་ཅི་ལོག་གོ་ཞེས་པ་དཔེ་སྟེ་དཔེར་བརྗོད་པའོ་ཞེས་རྗེས་སུ་འཇུག་གོ། །དེ་ལས་ཞེས་པ་བསྒྲུབ་པར་བྱ་བ་དང་ཆོས་མཐུན་པ་ཉིད་ལ་སྙེག་གོ། །དེ་ལས་ཟློག་པ་ནི་བསྒྲུབ་པར་བྱ་བ་དང་ཆོས་མི་མཐུན་པ་ཉིད་དོ། །བསྒྲུབ་པར་བྱ་བ་དང་ཆོས་མི་མཐུན་པ་ཉིད་དེ་ལས་དཔེ་ཕྱིན་ཅི་
[229b.2]ལོག་གི་དཔེ་བརྗོད་དེ། ཆོས་མི་མཐུན་པ་ཉིད་ཀྱི་དཔེ་བརྗོད་དོ་ཞེས་པའི་དོན་ཏོ། །སྒྲ་མི་རྟག་པ་བསྒྲུབ་པ་ལ་བྱས་པ་ཉིད་ཀྱི་ཕྱིར། བུམ་པ་བཞིན་དང་ནམ་མཁའ་བཞིན། །ཞེས་པ་རིམ་པ་ཇི་ལྟ་བ་བཞིན་ནོ། །འདི་ལ་ཡང་ཞེས་པ་རྩོད་པ་བསྒྲུབ་པ་ལ་སྐྱོན་ཡོད་པ་འབའ་ཞིག་ཏུ་མ་ཟད་
[229b.3]ཀྱི། འོ་ན་ཅི་ཞེ་ན་འདི་ལ་ཡང་ངོ་ཞེས་པ་ཡང་གི་སྒྲའི་དོན་ཏོ། །གལ་ཏེ་གཏན་ཚིགས་ཀྱི་དོན་ལས་དཔེ་ལ་སོགས་པ་ཁོ་ན་ཡིན་ན་གཏན་ཚིགས་ཀྱི་ཕྱོགས་གཅིག་མ་ཡིན་ཏེ། དེ་ལྟར་གྱུར་ན་ཁོ་བོའི་སྦྱོར་བ་བཞིན་དུ་དེ་གཏན་ཚིགས་ཀྱི་དོན་དང་རྗེས་སུ་འབྲེལ་པ་ཉིད་དུ་གདོན་མི་ཟ་
[229b.4]བར་བརྗོད་པར་བྱ་བར་མི་འགྱུར་རོ། །དེ་ལ་སྐྱོན་ཅི་ཞེ་ན་གསུངས་པ། དེ་ལྟ་ན་ཡང་ཞེས་པ་ལ་སོགས་པའོ། །ཡང་ཅི་ལྟར་ཆོས་མཐུན་པ་ཉིད་དང་ཆོས་མི་མཐུན་པ་ཉིད་དག་མེད་པར་ནམ་མཁའ་དཔེ་ཉིད་དུ་ཐལ་བར་འགྱུར་ཞེ་ན་གསུངས་པ། ཡོད་པ་ཉིད་དོ་ཞེས་པ་ལ་སོགས་
[229b.5]པ་སྟེ། ནམ་མཁའ་ལ་ཡང་བསྒྲུབ་པར་བྱ་བ་སྒྲ་དང་ཆོས་མཐུན་པ་ཉིད་ཀྱང་ཡོད་པ་ཉིད་དང་རེག་པར་བྱ་བ་ཉིད་ལ་སོགས་པ་ཡོད་ཅིང་། ཆོས་མི་མཐུན་པ་ཉིད་ཀྱང་མཉན་པར་བྱ་བ་མ་ཡིན་པ་ཉིད་དང་སྐྱེ་ལྡན་མ་ཡིན་པ་ཉིད་ལ་སོགས་པ་ཡང་ངོ་། །དེ་ལས་ཀྱང་གཅིག་ཁོ་ན་དཔེ་
[229b.6]གཉིས་ཀ་ཉིད་དུ་ཐལ་བར་འགྱུར་ཏེ། གང་ལས་ཆོས་མཐུན་པ་ཉིད་དང་མི་མཐུན་པ་ཉིད་འདི་ལས་དཔེར་མ་ཡིན་པར་འགྱུར་བ། འདི་ལ་ཁྱད་པར་ཅུང་ཟད་ཉེ་བར་བླངས་པ་ནི་མེད་པས་སོ། །འོ་ན་ནམ་མཁའ་ལ་ཆོས་མི་མཐུན་པ་ཉིད་ཀྱི་དཔེ་ཉིད་ཡོད་པ་མ་ཡིན་ནམ། དེའི་ཕྱིར་
[229b.7]ཐལ་བར་འགྱུར་བས་ཅི་ཡིན་ཞེ་ན། གང་ཅི་ལས་ཀྱང་ཆོས་མི་མཐུན་པ་ཉིད་ཀྱི་དཔེ་ཉིད་དུ་ཐལ་བར་འགྱུར་རོ་ཞེས་པ་དགོངས་པ་སྟེ། དེ་ཉིད་ཀྱི་ཕྱིར་མཉན་པར་བྱ་བ་མ་ཡིན་པ་ཉིད་ཉེ་བར་བཀོད་པའོ། །སྔ་མས་ཞེས་པ་བསྒྲུབ་པར་བྱ་བ་དང་ཆོས་མཐུན་པ་ཉིད་ལས་དེའི་ཆོས་
[230a]
[230a.1]རྟོགས་པས་ཞེས་པ་འདིས་དང་། བསྒྲུབ་པར་བྱ་བ་དང་ཆོས་མི་མཐུན་པ་ཉིད་ལས་དེའི་ཆོས་རྟོགས་པ་ཞེས་པ་འདིས་ཀྱང་ངོ་། །འདི་ཡང་སྔ་མ་ཉིད་དེ། མདོའི་ལྷག་མ་ལ་ལྟོས་པས་སོ། །གང་གི་ཕྱིར་འདི་ལྟར་ཞེས་པ་ལ་སོགས་པས། ཆོས་མཐུན་པ་ཉིད་
[230a.2]དང་ཆོས་མི་མཐུན་པ་ཉིད་མི་སྨོས་པའི་རྒྱུ་གསུངས་སོ། །ཕྱི་རོལ་གྱི་དོན་ཉེ་བར་མ་བསྡུས་པ་ཞེས་པ་ཆོས་མཐུན་པ་ཉིད་དང་ཆོས་མི་མཐུན་པ་ཉིད་ཙམ་ལས་གཞན་པའི་དོན་ནི་ཕྱི་རོལ་གྱི་དོན་ཏེ། དེ་ཡང་ཁྱབ་པ་སྟེ་མེད་ན་མི་འབྱུང་བ་ཉིད་དོ་ཞེས་པའི་ཐ་ཚིག་གོ། །དེའི་ཉེ་བར་བསྡུས་པ་ནི་
[230a.3]རྟོགས་པར་བྱ་བའི་ཡུལ་ཉིད་དུ་ཉེ་བར་སྦྱར་བ་སྟེ། གསལ་བར་བྱེད་པ་ཞེས་པའི་དོན་ཏོ། །དེ་མེད་ན་དཔེ་ལ་གོ་བར་བྱེད་པ་ཉིད་མེད་དོ་ཞེས་པ་ངག་གི་དོན་ཏོ། །དེ་ལྟར་འགྱུར་མོད་ཀྱི་དེའི་ཆོས་རྟོགས་པ་ཞེས་པ་འདི་ཁོ་ནས་ཁྱབ་པ་ཡང་ཐོབ་པ་ཁོ་ན་སྟེ། རྣམ་པ་གཞན་དུ་ན་དེའི་ཆོས་
[230a.4]རྟོགས་པ་ཉིད་མི་སྲིད་པས་སོ་ཞེ་ན། དེའི་ཕྱིར་གསུངས་པ། དེའི་ཆོས་རྟོགས་པ་ཉིད་དུ་ཡང་མ་གྲུབ་པ་ཞེས་པའོ། །འམ་ཞེས་པ་ནི་རྣམ་པར་བརྟགས་པའི་དོན་ཏོ། །ཆོས་མཐུན་པ་ཉིད་ཅན་དང་ཆོས་མི་མཐུན་པ་ཉིད་ཅན་གྱི་དཔེ་མ་སྨོས་པའམ་ཞེས་པའི་དོན་ཏོ། །ཇི་ལྟར་དེ་མེད་པར་དེ་
[230a.5]མི་སྲིད་པའི་ཕྱིར་དེའི་ཆོས་རྟོགས་པ་ཉིད་ཀྱིས་ཁྱབ་པ་འཕངས་པ་དེ་ལྟར་ཆོས་མཐུན་པ་ཉིད་ལ་སོགས་པ་ཡང་། དེ་མེད་པར་དེ་སྲིད་པ་མ་ཡིན་ཏེ། དེའི་ཕྱིར་ཡང་དེ་སྨོས་པར་བྱ་བ་ཡང་མ་ཡིན་ནོ། །ཅི་སྟེ་ཞེས་པ་ལ་སོགས་པ་དེའི་ཆོས་རྟོགས་པ་ཉིད་ཅེས་བྱ་བ་ནི། བསྒྲུབ་པར་བྱ་བ་
[230a.6]མངོན་པར་གསལ་བར་ནུས་པ་ཉིད་དེ། དེ་ཡང་ཡན་ལག་ཐམས་ཅད་ཀྱི་ཐུན་མོང་བའོ་ཞེས་པས། དེའི་ཆོས་རྟོགས་པའི་དཔེ་བརྗོད་དོ་ཞེས་པ་འདི་ཙམ་བརྗོད་པ་ན། གཏན་ཚིགས་ལ་སོགས་པ་རྣམས་ཀྱིའང་དཔེ་ཉིད་དུ་འགྱུར་རོ། །དེའི་ཕྱིར་གཏན་ཚིགས་ལ་སོགས་པ་རྣམས་ལས་
[230a.7]ལྷག་མས་ཁྱད་པར་དུ་བྱ་བ་སྟེ། སྔ་མས་ཞེས་པ་ཡང་སྐབས་ཡིན་པ་ཉིད་ཀྱི་ཕྱིར་ན་ལྷག་མ་སྔ་མས་ཞེས་རྣམ་པར་ཤེས་པར་བྱ་ཞིང་། དེ་ཡང་ཆོས་མཐུན་པ་ཉིད་དང་མི་མཐུན་པ་ཉིད་དོ། །འདི་སྐད་བཤད་པར་འགྱུར་ཏེ། ཆོས་མཐུན་པ་ཉིད་དང་མི་མཐུན་པ་ཉིད་ལས་དེའི་
[230b]
[230b.1]ཆོས་རྟོགས་པ་གང་ཡིན་པ་དེའི་དཔེ་དེ་དཔེ་བརྗོད་པ་སྟེ། གཏན་ཚིགས་ལ་སོགས་པ་ནི་མ་ཡིན་ནོ་ཞེས་པའོ། །དོན་མེད་པ་ཉིད་ལ་རིགས་པ་མ་བརྗོད་པའི་ཕྱིར་རོ། །དོན་དང་བཅས་པ་ཉིད་ལ་ཡང་འཐད་པ་ཡོད་དོ་ཞེས་སེམས་བཞིན་པས་སྨྲས་པ། ཇི་ལྟར་ཞེས་པ་ལ་སོགས་
[230b.2]པའོ། །དེའི་ཆོས་རྟོགས་པ་ཉིད་ཀྱིས་ནི་ཞེས་པ་ལ་སོགས་པས་འཐད་པ་དེ་སྟོན་ཏོ། །བསྒྲུབ་བྱ་དང་ཆོས་མཐུན་པ་ཉིད་དང་མི་མཐུན་པ་ཉིད་དང་ལྡན་པའི་དོན་ལ་ཞེས་པ། བསྒྲུབ་པར་བྱ་བ་དང་ཆོས་མཐུན་པ་ཉིད་ནི་བྱས་པ་ཉིད་ལ་སོགས་པའོ། །ཆོས་མི་མཐུན་པ་ཉིད་ནི་དེ་ལས་
[230b.3]བཟློག་པའོ། །དེ་དང་ལྡན་པ་བུམ་པ་ལ་སོགས་པ་དང་ནམ་མཁའ་ལ་སོགས་པ་ཡང་ངོ་། །རིམ་པ་ཇི་ལྟ་བར་བསྒྲུབ་པར་བྱ་བ་དང་བཟློག་པའི་ཆོས་དང་ལྡན་པ་ཉིད་ཐོབ་བོ། །བསྒྲུབ་པར་བྱ་བའི་ཆོས་དང་ལྡན་པ་ཉིད་ནི་མི་རྟག་པ་ཉིད་ལ་སོགས་པའི་ཆོས་དང་ལྡན་པ་སྟེ་བུམ་པ་ལ་སོགས་པ་ལ་
[230b.4]དང་། བཟློག་པའི་ཆོས་དང་ལྡན་པ་ཉིད་ནམ་མཁའ་ལ་སོགས་པ་ལ་ཐོབ་བོ། །ཡང་ཅིའི་ཕྱིར་རྙེད་ཅེ་ན་གསུངས་པ། གཞན་དུ་ན་དེས་ཞེས་པ་ལ་སོགས་པ་སྟེ། བསྒྲུབ་པར་བྱ་བ་དེ་དང་དེ་ལས་བཟློག་པའི་ཆོས་དང་བྲལ་བའི་དཔེ་ནི་དེའི་ཆོས་རྟོགས་པར་བྱེད་པ་མ་ཡིན་པས་སོ། །རབ་ཏུ་
[230b.5]གྲུབ་པའི་དེའི་ཆོས་རྟོགས་པ་ཉིད་ཅེས་པ་རྒོལ་བ་དང་ཕྱིར་རྒོལ་བ་ལ་ངེས་པའི་ཆོས་མཐུན་པ་ཉིད་དང་ཆོས་མི་མཐུན་པ་ཉིད་ཀྱི་ཆོས་དང་ལྡན་པ་ཉིད་དོ། །རྒོལ་བ་དང་ཕྱིར་རྒོལ་བ་ལ་ངེས་པ་བསྒྲུབ་པར་བྱ་བ་དང་དེ་ལས་བཟློག་པའི་ཆོས་དང་ལྡན་པ་ཉིད་ཀྱང་རྙེད་དོ་ཞེས་པའི་དོན་ཏོ། །ཅི་
[230b.6]ལྟར་རྙེད་ཅེ་ན་གསུངས་པ། བཤད་པ་ནི་ཞེས་པ་ལ་སོགས་པ་སྟེ། བློ་མཐུན་པ་ནི་ལོག་པར་རྟོགས་པ་མེད་པའོ། །རྣམ་གྲངས་ཕྱིར་ཞེས་པ་ཡན་ལག་ཐམས་ཅད་ནི་བསྒྲུབ་པར་བྱ་བ་ཁོང་དུ་ཆུད་པ་རྒྱུ་ཉིད་ཀྱི་ཕྱིར་དེའི་ཆོས་རྟོགས་པར་བྱེད་པའི་སྒྲའི་བརྗོད་པར་བྱ་བ་རྣམས་ཏེ་གང་ལ་
[230b.7]བསྒྲུབ་པར་བྱ་བ་མངོན་པར་གསལ་བར་ནུས་པ་མེད་པ་དེ་ནི་ཡན་ལག་ཉིད་དུ་མི་འདོད་པ་ཁོ་ནའོ། །གང་གི་ཕྱིར་ཡན་ལག་ཐམས་ཅད་ཅེས་པ་ལ་སོགས་པས་དེའི་རྣམ་གྲངས་ཉིད་སྟོན་པར་བྱེད་དོ། །གང་གི་ཕྱིར་ཡན་ལག་ཐམས་ཅད་བསྒྲུབ་པར་བྱ་བའི་ཆོས་རྟོགས་པར་བྱེད་པ་
[231a]
[231a.1]ཉིད་ཡིན་པ་དེའི་ཕྱིར་རྣམ་གྲངས་སོ། །ཡང་འདི་ནི་ཅི་ཡིན་ཞེ་ན། སྐབས་ཡིན་པ་ཉིད་ཀྱི་ཕྱིར་ན། བསྒྲུབ་པར་བྱ་བའི་ཆོས་རྟོགས་པར་བྱེད་པ་ཞེས་པའི་སྒྲ་འདི་རྟོགས་པར་བྱ་སྟེ། དེའི་ཆོས་རྟོགས་པ་ཉིད་ཁོ་ན་ནི་རྣམ་གྲངས་མ་ཡིན་ཏེ། དོན་གྱི་
[231a.2]བདག་ཉིད་ཡིན་པ་ཉིད་ཀྱི་ཕྱིར་རོ། །དེ་ནི་སྒྲ་འཇུག་པའི་རྒྱུ་མཚན་ནོ། །ཡང་ན་དེ་ལ་འཇུག་པའི་རྒྱུ་མཚན་ཉེ་བར་བཏགས་པ་ལས་རྗོད་པར་བྱེད་པ་ནི། དེའི་ཆོས་རྟོགས་པ་ཉིད་ཀྱི་སྒྲས་བརྗོད་དོ། །དེ་ཉིད་ཀྱིས་ཞེས་པ། དེའི་ཆོས་རྟོགས་པ་སྨོས་པས་སོ། །འདི་ཞེས་པ་
[231a.3]བསྒྲུབ་པར་བྱ་བ་དང་དེ་ལས་བཟློག་པའི་ཆོས་དང་ལྡན་པ་ཉིད་དོ། །ཇི་ལྟར་བསྒྲུབ་པར་བྱ་བ་སྒྲུབ་པར་བྱེད་པའི་སྒྲའམ། ཡན་ལག་གི་སྒྲ་ནི་ཡན་ལག་ཐམས་ཅད་ཀྱི་རྣམ་གྲངས་ཡིན་པ་ཉིད་ཀྱི་ཕྱིར་འདི་འཐོབ་པར་ནུས་པ་མ་ཡིན་པ་དེ་བཞིན་དུ། དེའི་ཆོས་རྟོགས་པར་
[231a.4]བྱེད་པའི་སྒྲ་ཡང་ངོ་། །འོ་ན་འདི་མེད་པར་འདི་མི་སྲིད་པའི་ཕྱིར། མེད་ན་མི་འབྱུང་བ་ཉིད་ལས་འཕེན་པ་ཡིན་ཏེ། འཚོད་པ་ལ་ཕྲུ་བ་ལ་སོགས་པ་བཞིན་ནོ། །དེའི་ཆོས་རྟོགས་པ་ཞེས་པའི་སྒྲ་འདི་ཡན་ལག་ཐམས་ཅད་ཀྱི་རྣམ་གྲངས་ཀྱང་མ་ཡིན་ཏེ། དེས་ན་འདིས་འདི་ནུས་པ་མ་
[231a.5]ཡིན་ནོ་ཞེས་པ་འདི་ཅིས་བརྗོད་ཅེ་ན་གསུངས་པ། འདི་ཉིད་གཅིག་ཅེས་པ་ལ་སོགས་པ་སྟེ། རིགས་པ་གང་ཁོ་ན་ལས་འདི་འཐོབ་པ་ཁོ་ན་ལས་ཆོས་མཐུན་པ་ཉིད་དང་ཆོས་མི་མཐུན་པ་ཉིད་ཀྱང་སྟེ། རིགས་པ་དེ་ཁོ་ན་སྟོན་པ་གསུངས་པ། གཞན་དུ་ན་དེ་ཞེས་པ་ལ་སོགས་
[231a.6]པའོ། །བསྒྲུབ་པར་བྱ་བའི་ཆོས་ཅན་ཞེས་པའི་དོན་ཞེས་པ་འདིས་ཀྱང་དེའི་ཆོས་རྟོགས་པ་ཞེས་པ་འདི་ལ། དེའི་སྒྲས་ཡོན་ཏན་དུ་གྱུར་པའི་བསྒྲུབ་པར་བྱ་བའང་བསྙེགས་སོ་ཞེས་སྟོན་ཏོ། །ཆོས་མཐུན་པ་ཉིད་ལ་བསྙེགས་སོ་ཞེ་ན་དེའི་སྒྲ་དོན་མེད་པ་ཉིད་ཁོ་ནར་འགྱུར་ཏེ། དེ་
[231a.7]ལ་མི་རྟག་པ་ཉིད་ལ་སོགས་པའི་ཆོས་མེད་པའི་ཕྱིར་རོ། །གཉིས་ཀའི་ཆོས་དང་ལྡན་པས་ཀྱང་མ་ཡིན་ཞེས་པ། གལ་ཏེ་དེ་ལ་གཉིས་ཀའི་ཆོས་དང་ལྡན་པའི་དཔེས་དོན་གཞན་པར་མདོ་འདི་འགྱུར་མོད། བརྗོད་པར་འདོད་པའི་དོན་རྟོགས་པར་བྱེད་པའི་ཕྱིར་རོ་ཞེས་པ་ན།
[231b]
[231b.1]མདོའི་རྣམ་པར་བརྟགས་པ་ཉེ་བར་བཀོད་པ་འདི་ནི། ཁྱབ་པ་གསལ་བར་བྱེད་པ་འདི་ཙམ་མེད་པར་བསྒྲུབ་པར་བྱ་བའི་དོན་རྟོགས་པར་ནུས་པ་མ་ཡིན་ནོ་ཞེས་སྔར་བཤད་ཟིན་ཏོ། །འདིས་ནི་ཆོས་ཀྱང་འདི་ཡིན་ལ་རྟོགས་པ་ཡང་ཡིན་པ་ནི། དེའི་ཆོས་རྟོགས་པའོ། །དེ་འདི་ལ་ཡོད་དོ་ཞེས་
[231b.2]པ་དེའི་ཆོས་རྟོགས་པ་ཅན་ཏེ། རྟོགས་པ་སྨོས་པས་བྱས་པ་ལ་སོགས་པ་རྣམས་རྫས་དང་ལྡན་པ་ཉིད་དུ་རྟོགས་པར་བྱེད་དེ། ཁ་ཅིག་བྱས་པ་ཉིད་དང་མི་རྟག་པ་ཉིད་དག་ནི་དངོས་པོའི་ངོ་བོ་མ་ཡིན་པ་དག་གོ་ཞེས་འདོད་པ་དེའི་ཕྱིར་དེ་དགག་པའི་ཆེད་དུ་ཡོད་པ་སྨོས་སོ་ཞེས་
[231b.3]གང་བརྗོད་པ་འདི་ཡང་སོ་སོར་སྤངས་སོ། །དངོས་པོའི་ཆོས་དང་ལྡན་པའི་དཔེས་ཀྱང་ཕྱི་རོལ་གྱི་དོན་ཉེ་བར་བསྡུས་པ་མེད་པར་བསྒྲུབ་པར་བྱ་བའི་དོན་རྟོགས་པར་ནུས་པ་མ་ཡིན་པའི་ཕྱིར་རོ། །གཞན་ཡང་གལ་ཏེ་བྱས་པ་ཉིད་ལ་སོགས་པ་རྣམས་དངོས་པོར་གྱུར་པར་མངོན་པར་
[231b.4]འདོད་ན། དེ་རྣམས་ཅིའི་ནང་དུ་འདུས་པ་ཡིན་ཞེས་ཀྱང་བརྗོད་པར་བྱའོ། །བྱས་པ་ཉིད་ལ་སོགས་པ་རྣམས་རྫས་དང་ཡོན་ཏན་དང་ལས་རྣམས་སུ་ནང་དུ་འདུས་པ་མ་ཡིན་ཏེ། ཡོན་ཏན་དང་ལས་རྣམས་ལ་ཡོད་པའི་ཕྱིར་རོ། །སྤྱི་དང་འདུ་བ་དག་གི་ཡང་མ་ཡིན་ཏེ། རྒྱུའི་
[231b.5]དབང་དུ་གྱུར་པའི་བདག་ཉིད་ཐོབ་པ་ནི་འབྲས་བུ་ཉིད་དང་འཇིག་པའི་ངང་ཅན་ཉིད་ནི་མི་རྟག་པ་ཉིད་ཡིན་ལ། དེ་སྤྱི་དང་འདུ་བ་དག་ལ་ཡོད་པ་ཡང་མ་ཡིན་ཏེ། རྟག་པ་ཉིད་དུ་དམ་བཅས་པའི་ཕྱིར་རོ། །འདིར་བློའི་རྒྱུ་མེད་པའི་ཕྱིར་ཡང་འདུ་བས་བསྡུས་པ་མ་ཡིན་ནོ། །ཁྱད་པར་
[231b.6]གྱིས་ཀྱང་མ་ཡིན་ཏེ། དེ་ནི་རྡུལ་ཕྲ་རབ་ལ་འདུ་བ་ཅན་ཁོ་ནར་འདོད་ཅིང་། བྱས་པ་ཉིད་དང་མི་རྟག་པ་ཉིད་དག་འབྲས་བུའི་རྫས་ཁོ་ན་ལ་འདུ་བའོ། །འདི་དག་ནི་བློ་དང་སྒྲ་རྗེས་སུ་འགྲོ་བའི་རྒྱུ་ཉིད་ཡང་ཡིན་ལ་ཁྱད་པར་ནི་དེ་ལས་བཟློག་པའོ། །གང་དུ་བྱས་པ་ཉིད་ལ་སོགས་པ་ནང་
[231b.7]དུ་འདུས་པར་འགྱུར་བ་ཚིག་གི་དོན་དྲུག་ལས་གཞན་པའི་དངོས་པོ་ཡོད་པ་ཡང་མ་ཡིན་ནོ། །བསྒྲུབ་པར་བྱ་བ་དང་ཆོས་མཐུན་པ་ཉིད་སྨོས་པ་ཡང་མི་རིགས་ཏེ། བསྒྲུབ་པར་བྱ་བའི་ཆོས་དང་ལྡན་པ་ཉིད་ནི་བསྒྲུབ་པར་བྱ་བ་དང་ཆོས་མཐུན་པ་ཉིད་ཀྱིས་བྱས་པ་མ་ཡིན་པའི་ཕྱིར་རོ་
[232a]
[232a.1]ཞེས་པས་འདི་ནི་སྙིང་པོ་མེད་པའོ། །འདི་ལ་ཡང་ཞེས་པ། སྔ་མའི་བརྗོད་པ་ཁོ་ན་ལ་སྐྱོན་ཡོད་པ་འབའ་ཞིག་ཏུ་མ་ཟད་ཀྱི། འོ་ན་ཅི་ཞེ་ན། མདོའི་རྣམ་པར་བརྟག་པ་འདི་ལ་ཡང་ངོ་ཞེས་སྟོན་ཏོ། །བསྒྲུབ་པར་བྱ་བའི་ཆོས་ཅན་རྗེས་སུ་འཇལ་བ་ཉིད་ལ་ཞེས་
[232a.2]པ་བསྒྲུབ་པར་བྱ་བ་དང་ཆོས་མཐུན་པ་ཉིད་ལས་ཞེས་པ་གཏན་ཚིགས་ལ་ལྔ་པ་སྟེ། དེ་ལས་ཀྱང་གལ་ཏེ་བསྒྲུབ་པར་བྱ་བ་དང་ཆོས་མཐུན་པ་ཉིད་ལས་ཏེ་བྱས་པ་ཉིད་ལ་སོགས་པ་ལས་བསྒྲུབ་པར་བྱ་བའི་ཆོས་ཅན་ནོ་ཞེས་དཔེ་བུམ་པ་ལ་སོགས་པ་ངེས་པར་བྱས་ན། དེ་ལ་ཡང་དཔེ་
[232a.3]གཞན་བརྗོད་པར་བྱ་ཞིང་། དེ་ལ་ཡང་གཞན་པའོ་ཞེས་པས་དཔེ་ཐུག་པ་མེད་པར་འགྱུར་བར། གཏན་ཚིགས་བཅས་པའི་བསྒྲུབ་བྱ་ཙམ། །ཞེས་པ་ལ་སོགས་པས་བཤད་ཟིན་ཏོ། །གསལ་བར་བྱེད་པའི་རྒྱུའི་དབང་དུ་བྱས་པའི་ཕྱིར་ཞེས་པ། དཔེ་ལ་སོགས་པ་རྣམས་ནི་
[232a.4]གསལ་བར་བྱེད་པ་སྟེ། རྗེས་སུ་དཔག་པར་བྱ་བའི་མཚན་མར་གྱུར་པ་རྣམས་ཏེ། ཤེས་པར་བྱེད་པ་ཡང་ཤེས་ཟིན་པ་ཁོ་ན་ནི་སྒྲོན་མ་ལ་སོགས་པ་བཞིན་དུ་ཤེས་པར་བྱ་བའི་དོན་གསལ་བར་བྱེད་དོ་ཞེས་པ་འདི་ནི་བརྗོད་ཟིན་ཏོ། །དེའི་ཕྱིར་དེ་རབ་ཏུ་འགྲུབ་པའི་ཆེད་དུ་འབད་པ་
[232a.5]གཞན་བསྒྲུབ་པར་བྱ་བ་མ་ཡིན་ནོ། །གཞན་དུ་ན་ཞེས་པ་ལ་སོགས་པ་གལ་ཏེ་ཤེས་པར་བྱེད་པའི་རྒྱུ་ཡང་། རབ་ཏུ་འགྲུབ་པའི་ཆེད་དུ་འབད་པ་གནས་པར་བྱ་བ་ཡིན་ན་དཔེ་བརྗོད་དང་ཆོས་མཐུན་པ་ཉིད་ལས་བསྒྲུབ་པར་བྱ་བ་སྒྲུབ་པར་བྱེད་པ་ནི་གཏན་ཚིགས་སོ་ཞེས་བཤད་པ།
[232a.6]འདི་ལ་ཡང་ཆོས་མཐུན་པ་ཉིད་ངེས་པའི་དོན་དུ་འབད་པར་བྱ་བར་རིགས་པར་འགྱུར་རོ། །གཞན་རྣམས་ནི་ཞེས་པ་ཟླ་བའི་རི་མོ་པ་རྣམས་སོ། །དེ་རྣམས་ནི་དེའི་ཆོས་རྟོགས་པ་དཔེའོ་ཞེས་པ་འདི་ལ། དོན་དེ་བརྗོད་པར་བྱ་བ་དཔེ་ཉིད་ན། ངག་གི་ཡན་ལག་ཉིད་ཉམས་
[232a.7]པར་འགྱུར་རོ་ཞེས་བསམས་ནས། དེའི་ཆོས་རྟོགས་པ་ཉིད་ནི་དཔེའི་དཔེ་བརྗོད་དོ་ཞེས་འདོན་ཏོ། །འདི་ལ་ཡང་ཞེས་པའི་ཡང་གི་སྒྲ་དེ་ནི། འདོན་པ་སྔ་མ་ཁོ་ན་ལ་སྐྱོན་ཡོད་པ་འབའ་ཞིག་ཏུ་མ་ཟད་ཀྱི། འོ་ན་ཅི་ཞེ་ན་འདི་ལ་ཡང་ཞེས་སྟོན་ཏོ། །ཅིའི་ཕྱིར་ཆོས་མཐུན་པ་ཉིད་
[232b]
[232b.1]དང་ཆོས་མི་མཐུན་པ་ཉིད་སྨོས་པ་རིགས་པ་མ་ཡིན་ཞེ་ན། དེ་ལྟར་གོ་བྱེད་དེ་མ་མཐོང་། །ཞེས་བྱས་ནས་ཞེས་ཕྱི་རོལ་གྱི་དོན་ཉེ་བར་བསྡུས་པ་མེད་པར་གོ་བར་བྱེད་པ་ཉིད་མེད་དོ་ཞེས་པ་འདི་བཤད་ཟིན་ཏོ། །ཆོས་མཐུན་ཉིད་ཀྱང་མི་རིགས་འགྱུར། །ཞེས་ཁྱད་པར་མེད་པར་བརྗོད་
[232b.2]པའི་ཕྱིར། ཁོང་དུ་མ་ཆུད་པ་འདྲི་བར་བྱེད་དེ། ཅི་ཞིག་ཏུ་འམ་ཞེས་པ་ལ་སོགས་པའོ། །འདིར་ཅི་ཞིག་ཏུ་ཞེས་པ་ལ་སོགས་པ་བཞི་རྣམས་དྲི་བའོ། །དེ་རྣམས་ཀྱིས་ཅི་ཞིག་ཏུ་མི་རིགས་ཞེས་པ་འདིའི་ལན་གྱི་ཚིག་ནི་དཔེ་བརྗོད་དང་ཆོས་མཐུན་པ་ཉིད་ལས་ཞེས་པའི་མདོ་འདིར་རོ། །
[232b.3]ཅིའི་ཞེས་པའི་དཔེ་བརྗོད་ཀྱིས་སོ། །ཅིའི་ཞེས་པ་བསྒྲུབ་པར་བྱ་བའིའོ། །ཅི་ཞེས་པའི་བྱས་པ་ཉིད་ལ་སོགས་པ་ཆོས་མཐུན་པ་ཉིད་དོ། །ཅིའི་ཕྱིར་མི་རིགས་ཤེ་ན་གསུངས་པ། བུམ་པས་ནི་ཞེས་པ་ལ་སོགས་པ་སྟེ། བུམ་པས་ནི་ཆོས་མཐུན་པ་བྱས་པ་ཉིད་དེ་བསྒྲུབ་པར་བྱ་བ་སྒྲའིའོ། །
[232b.4]དེའི་བསྒྲུབ་པར་བྱ་བའི་ཆོས་རྟོགས་པ་ཉིད་བྱ་བ་དང་བྱེད་པའི་འབྲེལ་པས་མ་ཡིན་ཏེ། བསྒྲུབ་པར་བྱ་བའི་ཆོས་རྟོགས་པ་ཉིད་ཀྱི་སྒྲས་ནི་དཔེ་བུམ་པ་རྟོགས་པར་བྱེད་པ་པོ་དང་རྟོགས་པའི་བྱ་བའི་འབྲེལ་པ་འཕྲོད་པ་འདུ་བའི་མཚན་ཉིད་ཅན་བརྗོད་ན་དེ་ཡང་རྟག་པ་ཉིད་ཀྱི་ཕྱིར་མ་བྱས་
[232b.5]པའོ། །དེའི་ཕྱིར་དེ་དང་བསྒྲུབ་པར་བྱ་བའི་ཆོས་ཅན་སྒྲའི་བྱས་པ་ཉིད་ལ་སོགས་པ་ཆོས་མཐུན་པ་ཉིད་དུ་རིགས་པ་མ་ཡིན་ནོ། །བྱས་པ་ཉིད་ལ་སོགས་པ་ཆོས་མཐུན་པ་ཉིད་མ་ཡིན་མོད་ཀྱི། གང་ཞིག་དེའི་ཆོས་རྟོགས་པ་ཉིད་ཀྱི་ཆོས་གཞན་ནི་དེའི་ཆོས་མཐུན་པ་ཉིད་དུ་
[232b.6]འགྱུར་རོ་ཞེས་གསུངས་པ། མ་གྱུར་ཅིག་ཅེས་པ་ལ་སོགས་པའོ། །ཡོད་པ་ཉིད་ལ་སོགས་པས་ཞེས་པ། ཡོད་བཞིན་པ་ཉིད་ལ་སོགས་པས་སོ། །སོགས་པའི་སྒྲས་ཤེས་པར་བྱ་བ་ཉིད་ལ་སོགས་པ་ཡོངས་སུ་གཟུང་ངོ་། །འོ་ན་ཡོད་པ་ཉིད་ལ་སོགས་པ་ཆོས་མཐུན་
[232b.7]པ་ཉིད་ཡོད་པ་ཁོ་ན་མ་ཡིན་ནམ། དེའི་ཕྱིར་མ་གྱུར་ཅིག་ཅེས་བརྗོད་པ་ཅི་ཞེ་ན། གཏན་ཚིགས་སུ་མ་གྱུར་ཅིག་ཅེས་དགོངས་པའོ། །འདི་སྐད་བཤད་པར་འགྱུར་ཏེ། གལ་ཏེ་དཔེར་བརྗོད་འགྲུབ་པའི་དོན་དུ་དེའི་ཆོས་རྟོགས་པ་ཉིད་ཀྱིས་བསྒྲུབ་པར་བྱའི་གང་ཆོས་མཐུན་པ་ཉིད་
[233a]
[233a.1]ཡོད་པ་དེ་གཏན་ཚིགས་སུ་འདོད་ན། ཡོད་པ་ཉིད་ལ་སོགས་པའི་ཆོས་མཐུན་པ་ཉིད་གཏན་ཚིགས་ཉིད་དུ་འགྱུར་རོ་ཞེས་པའོ། །གལ་ཏེ་འདི་ལྟར་ན་ཡོད་པ་ཉིད་ལ་སོགས་པའི་ཆོས་གཞན་ནི་བསྒྲུབ་པར་བྱ་བའི་ཆོས་མཐུན་པ་ཉིད་དུ་མ་གྱུར་ཅིག་ཅེས་བརྗོད་པར་བྱའི།
[233a.2]ཆོས་གཞན་ཡོད་པ་ཉིད་ལ་སོགས་པས་བསྒྲུབ་པར་བྱ་བའི་ཆོས་མཐུན་པ་ཉིད་དུ་མ་གྱུར་ཅིག་ཅེས་པ་ནི་མ་ཡིན་ན། གང་ལས་ཡོད་པ་ཉིད་ལ་སོགས་པ་ཆོས་གཞན་གཏན་ཚིགས་ཉིད་དུ་ཐལ་བར་བྱ་བ་མ་ཡིན། ཡོད་པ་ཉིད་ལ་སོགས་པའི་ཆོས་གཞན་གྱིས་བསྒྲུབ་པར་བྱ་བའི་
[233a.3]ཆོས་མཐུན་པ་ཉིད་གཞན་གང་ཡིན་པ་དེ་གཏན་ཚིགས་ཉིད་དུ་འགྱུར་བ་ནི་མ་ཡིན་ནོ་ཞེ་ན། སྐྱོན་འདི་མེད་དེ། བསྒྲུབ་པར་བྱ་བའི་ཆོས་ཅན་གྱི་རྣམ་པ་གཉིས་ནི་དཔེ་བརྗོད་ཀྱིས་ཆོས་མཐུན་པ་ཉིད་དེ་སྒྲུབ་པར་བྱེད་པར་གྱུར་པ་ཡོད་པ་ཉིད་ལ་སོགས་པ་དང་། བསྒྲུབ་པར་བྱ་བར་གྱུར་པ་རྟག་
[233a.4]པ་ཉིད་ལ་སོགས་པའོ། །དེས་ན་འདིར་དོན་འདི་མངོན་པར་ཡང་དག་པར་བརྗོད་པ་སྟེ། ཡོད་པ་ཉིད་ལ་སོགས་པའི་ཆོས་གཞན་སྒྲུབ་པར་བྱེད་པར་གྱུར་པས། བསྒྲུབ་པར་བྱ་བའི་ཆོས་ཅན་གྱི། །བསྒྲུབ་པར་བྱ་བ་རྟག་པ་ཉིད་ལ་སོགས་པ་ལ་དཔེ་བརྗོད་དང་ཆོས་མཐུན་པ་ཉིད་དུ་
[233a.5]མ་གྱུར་ཅིག་ཅེས་པ་སྟེ། ཡོད་པ་ཉིད་ལ་སོགས་པ་ནི་སྒྲ་ལ་སོགས་པ་ལ་རྟག་པ་ཉིད་ལ་སོགས་པ་འགྲུབ་པར་མ་གྱུར་ཅིག་ཅེས་པའི་དོན་ཏོ། །དེ་ལས་ཀྱང་རྣམ་པ་འདིས་དོན་འདི་ཁོ་ན་བཤད་པར་འགྱུར་ཏེ། ཆོས་གཞན་ཡོད་པ་ཉིད་ལ་སོགས་པ་ནི་བསྒྲུབ་པར་བྱ་བའི་ཆོས་མཐུན་པ་ཉིད་དེ་གཏན་
[233a.6]ཚིགས་སུ་མ་གྱུར་ཅིག་ཅེས་པའོ། །དེ་གཏན་ཚིགས་ཉིད་དུ་རིགས་པ་ཡང་མ་ཡིན་ཏེ། འཁྲུལ་བའི་ཕྱིར་རོ་ཞེས་པ་ཁ་ན་མ་ཐོ་བ་མེད་དོ། །འདོན་པ་གཉིས་ཀ་ལ་ཡང་ཞེས་པ་ལ་སོགས་པ་སྟེ། ངག་ཕྱི་རོལ་གྱི་ཡན་ལག་ཉིད་དཔེར་བརྗོད་ཀྱི་ཉམས་པར་མ་གྱུར་ཅིག་
[233a.7]ཅེས་འདོན་པ་གཞན་ལ་བརྟེན་པའོ། །དེ་ཡོད་ན་ཡང་སྐྱོན་དེ་ཁོ་ནའོ་ཞེས་པས་འདོན་པ་གཉིས་ཀ་ལ་ཡང་ཁས་བླངས་པ་ཉམས་ཏེ། དོན་ནི་དཔེ་བརྗོད་ཉིད་དུ་བཤད་དེ་བུམ་པ་ལ་སོགས་པའམ་འབྲེལ་པའོ། །ཚིག་མ་ཡིན་ནོ། །དཔེ་བརྗོད་ནི་ངག་གི་ཡན་ལག་སྟེ།
[233b]
[233b.1]དམ་བཅའ་དང་། གཏན་ཚིགས་དང་། དཔེ་བརྗོད་དང་། ཉེ་བར་སྦྱར་བ་དང་མཇུག་སྡུད་རྣམས་ནི་ཡན་ལག་རྣམས་སོ་ཞེས་པའི་གཏན་ཚིགས་སོ་ཞེས་པས་དཔེ་བརྗོད་མི་རིགས་སོ་ཞེས་པས་དཔེ་བརྗོད་ལ་ལྟོས་པ་དེ་བཞིན་དུ་ཞེས་པ་ཉེ་བར་སྡུད་པ་དང་། དེ་བཞིན་དུ་མ་ཡིན་
[233b.2]པ་ཞེས་ཀྱང་སྟེ། བསྒྲུབ་པར་བྱ་བ་ལ་ཉེ་བར་སྦྱོར་བ་ཞེས་པ་ཉེ་བར་སྦྱོར་བའི་མཚན་ཉིད་དོ། །སྒྲ་ལ་སོགས་པ་ལ་མི་རྟག་པ་བྱས་པ་ཉིད་ལ་སོགས་པས་བསྒྲུབ་པར་བྱ་བ་ལ། བུམ་པ་ལ་སོགས་པ་མཐུན་པ་ཉིད་ཀྱིས་བསྒྲུབ་བྱ་སྒྲུབ་པར་བྱེད་པ་དང་ལྡན་པ་དང་། བསྒྲུབ་བྱ་སྒྲུབ་པར་བྱེད་པའི་
[233b.3]མི་མཐུན་ཕྱོགས་དང་ལྡན་པ་ནམ་མཁའ་ལ་སོགས་པ་ཆོས་མི་མཐུན་པ་ཉིད་ཀྱིས་སོ། །དེ་ལ་ལྟོས་པ་ནི་དེའི་དབང་དུ་གྱུར་པ་སྟེ། དཔེ་བརྗོད་ཡོད་ན་དེ་བཞིན་དང་དེ་བཞིན་མ་ཡིན་པ་ཞེས་པར་ཡང་འགྱུར་བ་དེའི་ཕྱིར་དེ་ལ་ལྟོས་པ་ཉིད་དོ། །བསྒྲུབ་པར་བྱ་བ་ལ་སྟེ་སྒྲ་ལ་སོགས་པ་ལ་
[233b.4]གཏན་ཚིགས་འདིས་ཉེ་བར་བསྡུ་བར་བྱའོ་ཞེས་པ་ཉེ་བར་སྡུད་པའོ། །དེ་ཡང་རྣམ་པ་གཉིས་ཏེ། ཆོས་མཐུན་པ་ཉིད་ཀྱིས་དང་ཆོས་མི་མཐུན་པ་ཉིད་ཀྱིས་སོ། །དེ་ལ་རེ་ཞིག་ཆོས་མཐུན་པ་ཉིད་ཀྱིས་ནི། བུམ་པ་བྱས་པ་ནི་མི་རྟག་པ་སྟེ། དེ་བཞིན་དུ་སྒྲ་ཡང་ངོ་ཞེས་པའོ། །ཆོས་
[233b.5]མི་མཐུན་པ་ཉིད་ཀྱིས་ནི། ནམ་མཁའ་མ་བྱས་པ་ནི་རྟག་པ་སྟེ། སྒྲ་ནི་དེ་བཞིན་མ་བྱས་པ་མ་ཡིན་ནོ་ཞེས་པའོ། །འདི་ལ་ཡང་ཞེས་པ་ལ་སོགས་པ། དཔེ་བརྗོད་ཀྱི་ནི་བསྒྲུབ་བྱ་སྒྲུབ་པར་བྱེད་པ་རྟོགས་པར་བྱེད་པས་རབ་ཏུ་ཕྱེ་བ་ཉིད་ཀྱི་ཕྱིར་རམ་སྐབས་མ་ཡིན་པ་ཉིད་ཀྱི་ཕྱིར་ཆོས་
[233b.6]མཐུན་པ་ཉིད་ཀྱིའོ། །དེ་བཞིན་ཞེས་པས་བྱས་པ་ཉིད་ཁོ་ན་ཉེ་བར་སྦྱོར་བར་བྱེད་ན། དེ་ལ་ཡང་སྤྱིའམ་ཁྱད་པར་ཉེ་བར་སྦྱོར་བར་བྱེད། བསྒྲུབ་པར་བྱ་བ་དང་ཆོས་མཐུན་པ་ཉིད་ལ་མི་ལྟོས་ན་ནི། ཁྱད་པར་མེད་པ་ན་རྣམ་པ་ཐམས་ཅད་ཀྱི་སྤྱི་རྣམ་པར་ཤེས་པར་བྱ་སྟེ། དེ་ལས་
[233b.7]དབྱེ་བ་མེད་པའི་ཕྱིར་དེ་བཞིན་ཞེས་ཐ་སྙད་བསྟན་པ་ཁོ་ན་མི་ནུས་པར་འགྱུར་རོ། །དཔེར་ན་ནམ་མཁའ་ལ་སོགས་པ་མ་བྱས་པ་ལྟ་བུ་ནི་མ་ཡིན་ནོ་ཞེས་པ། མ་བྱས་པ་རྣམ་པར་བཅད་པ་བྱས་པ་ཉིད་ཀྱི་སྤྱི་སྟོན་པའོ། །སྤྱི་ནི་གཏན་ཚིགས་ཁོ་ནས་བརྗོད། །ཅེས་པ་འདིས་
[234a]
[234a.1]གང་བརྗོད་པའི་དོན་མངོན་པར་བརྗོད་པ་དེ་ཡན་ལག་གཞན་མ་ཡིན་ཏེ། འདི་ལྟ་སྟེ། དེ་ཁོ་ན་ཡང་བརྗོད་པ་བཞིན། །ཉེ་བར་སྦྱར་བ་ཡང་དེ་ལྟ་བུའོ་ཞེས་ཁྱབ་བྱེད་དང་འགལ་བ་གསུངས་སོ། །འོ་ན་བྱས་པ་ཉིད་ཀྱི་ཕྱིར་ཞེས་པ་འདིས་བྱས་པ་ཉིད་ཙམ་
[234a.2]བརྗོད་ཅིང་ཉེ་བར་སྦྱོར་བས་ནི་བསྒྲུབ་པར་བྱ་བ་དེ་ཉེ་བར་སྡུད་པ་ཁོ་ན་བྱེད་པ་མ་ཡིན་ནམ། དེས་ན་མ་གྲུབ་པའི་གཏན་ཚིགས་སོ་ཞེ་ན་གསུངས་པ། སྒྲའི་ཞེས་འབྲེལ་པའི་ཕྱིར་རོ་ཞེས་པ་སྒྲ་མི་རྟག་སྟེ་བྱས་པ་ཉིད་ཀྱི་ཕྱིར་རོ་ཞེས་བརྗོད་པ་ན། སྒྲའི་ཞེས་རྟོགས་པར་བྱ་སྟེ།
[234a.3]དེའི་སྐབས་ཡིན་པ་ཉིད་ཀྱི་ཕྱིར་དང་། གཞན་འདིར་ཐོས་པ་མེད་པའི་ཕྱིར་དང་། ཡོད་པ་ནི་རྟེན་ལ་ལྟོས་པ་ཉིད་ཀྱི་ཕྱིར་རོ་ཞེས་པས་མ་གྲུབ་པ་མ་ཡིན་ནོ། །དེ་ལྟར་འགྱུར་མོད་ཀྱི། བསྒྲུབ་པར་བྱ་བ་དང་དཔེའི་ཆོས་ཅན་དག་གི་བསྒྲུབ་པར་བྱ་བའི་ཆོས་ཀྱི་སྤྱི་ལས་དེ་ལྡན་
[234a.4]པའི་བསྒྲུབ་པར་བྱ་བའི་ཆོས་འགྲུབ་པའི་དོན་དུ་གཅིག་ཏུ་བྱེད་པ་ནི་ཉེ་བར་སྡུད་པ་སྟེ། གཏན་ཚིགས་ཀྱིས་ནི་གཅིག་ཏུ་བྱེད་པ་བྱས་པ་ཡང་མ་ཡིན་ནོ། །དེའི་ཕྱིར་མ་གྲུབ་པའི་དོན་ཅན་ཉིད་ཁོ་ནའོ་ཞེ་ན་གསུངས་པ། དཔེས་ནི་ཞེས་པ་ལ་སོགས་པའོ། །དཔེས་ནི་གཅིག་ཏུ་
[234a.5]བྱེད་པ་ལས་ཏེ་ཁྱད་པར་མེད་པར་བྱེད་པ་ལས་ཞེས་པའི་དོན་ཏོ། །གཞན་དུ་ན་ཞེས་པ་ལ་སོགས་པ་གཏན་ཏེ་ཁྱབ་པ་རབ་ཏུ་གསལ་བ་མེད་པར་ཡང་། གཅིག་ཏུ་བྱེད་པ་ཙམ་ལས་དེ་དང་ལྡན་པ་མི་རྟག་པ་ཉིད་དུ་འགྲུབ་པ་ཁོ་ནར་འགྱུར་ན། དེ་ལྟར་གྱུར་ན་ནི། གལ་ཏེ་བུམ་པ་དང་ཆོས་མཐུན་
[234a.6]པ་ཉིད་བསྟན་པ་ལས་གཞན་ཡང་ཁྱད་པར་མེད་པར་བྱེད་ན་བུམ་པའི་ཆོས་ཐམས་ཅད་སྒྲ་ལ་འཐོབ་པར་འགྱུར་རོ་ཞེས་པའོ། །དེ་ལྟ་བུ་ལ་སོགས་པའི་ལྟག་ཆོད་རྣམས་ལན་ཁོ་ནར་འགྱུར་ཏེ། སུན་འབྱིན་པ་ཁོ་ནར་འགྱུར་རོ། །སོགས་པའི་སྒྲས་ནི་ཆོས་མཐུན་པ་མཚུངས་པ་ལ་
[234a.7]སོགས་པ་རྣམས་སོ། །ཕྱིའི་དོན་ཉེ་བར་སྡུད་པ་ལ་ནི་ཐལ་བར་འགྱུར་བ་འདི་མེད་དེ། ཡོངས་སུ་གནས་པ་མི་མཚུངས་པ་ཉིད་ཀྱི་ཕྱིར་རོ། །དེ་རྣམས་ཀྱི་ཁྱབ་པ་བསྟན་པར་ནུས་པ་ནི་མ་ཡིན་ནོ། །ཅི་སྟེ་ཞེས་པ་ཕྱོགས་གཉིས་པ་ཉེ་བར་དགོད་པའོ། །བྱས་
[234b]
[234b.1]པ་ཉིད་དུ་གྲུབ་པ་ལ་ཞེས་པ་བྱས་པ་ཉིད་ཀྱི་ཕྱིར་རོ་ཞེས་པ་འདི་ལས་རྟོགས་པ་ལ་ཁྱད་པར་ཉེ་བར་སྦྱར་བར་བྱའོ་ཞེས་པ་དེ་རྟོགས་པ་ཉིད་ཀྱི་ཕྱིར་རོ། །ཁྱད་པར་ཉེ་བར་སྦྱོར་བ་དེ་ཉིད་ཁྱད་པར་གཞན་རྣམ་པར་གཅོད་པས་སྟོན་པ་སྨྲས་པ། བུམ་པ་བཞིན་དུ་བྱས་པ་ཡིན་གྱི། སྣམ་བུ་
[234b.2]ལ་སོགས་པ་བཞིན་དུ་མ་ཡིན་ནོ་ཞེས་པའོ། །ཁྱད་པར་རང་རྟེན་ལ་རྗེས་འགྲོ། །ཞེས་པ། རང་གི་རྟེན་ལ་ངེས་པའོ། །གལ་ཏེ་དེ་ནི་རྟེན་གཞན་ལ་འཇུག་པར་འགྱུར་ན་སྤྱི་ཁོ་ནར་འགྱུར་གྱི་ཁྱད་པར་ནི་མ་ཡིན་ནོ། །དེའི་ཕྱིར་སྒྲ་ནི་བུམ་པ་བཞིན་བྱས་པ་ནི་མ་ཡིན་ནོ་ཞེས་གསུངས་པ།
[234b.3]རྣམ་པ་གཞན་དུ་སྐྱེས་པའི་ཕྱིར་ཞེས་པ། བུམ་པ་ནི་འཇིམ་པའི་གོང་བུ་ལ་སོགས་པ་རྣམས་ལས་སྐྱེས་ལ། སྒྲ་ནི་རྐན་ལ་སོགས་པ་ཡང་དག་པར་སྦྱོར་བ་ལ་སོགས་པ་རྣམས་ལས་སོ་ཞེས་པས་སྒྲ་ནི་བུམ་པ་བཞིན་དུ་བྱས་པ་མ་ཡིན་ནོ། །དེ་ནི་གཏན་ཚིགས་ཁོ་ནས་བཤད་དོ་
[234b.4]ཞེས་པ་འདི་ཡང་། སྔ་མ་བཞིན་དུ་ཡན་ལག་གཞན་ཡིན་པ་ཉམས་པ་གསུངས་སོ། །ཅི་སྟེ་ཞེས་པ་ལ་སོགས་པ་ནི་དེ་བྱས་པ་ཉིད་དུ་བརྗོད་པ་མ་ཡིན་པ་ཁོ་ནའོ། །འོ་ན་ཅི་ཞེ་ན། མ་བྱས་པ་ཉིད་དགག་པ་ཙམ་བྱ་བ་སྟེ། ཡང་དེ་ཅིའི་དོན་དུ་ཞེ་ན་སྨྲས་པ། དེ་དང་ལྷན་ཅིག་སྤྱོད་པའི་
[234b.5]རྟག་པ་ཉིད་དགག་པའི་དོན་དུ་ཞེས་པ་མ་བྱས་པ་དེ་དང་ལྷན་ཅིག་སྤྱོད་པའི་རྟག་པ་ཉིད་དགག་པའི་དོན་དུ་སྟེ། དཔེར་ན་ནམ་མཁའ་བཞིན་དུ་མ་བྱས་པར་འགྱུར་བ་མ་ཡིན་པ་དེ་ལྟར་རྟག་པར་ཡང་ངོ་ཞེས་པའོ། །གཉེན་པོའི་ཕྱོགས་ཀྱང་མི་ལྡན་པ་སྟེ་ཞེས་པ་གཉེན་པོའི་ཕྱོགས་ནི་བྱས་པ་
[234b.6]ཉིད་ཀྱིས་མ་བྱས་པ་ཉིད་དེ། ལྷན་ཅིག་མི་གནས་པའི་ཕྱིར་རོ། །དེ་མི་ལྡན་པ་ནི་སྒྲ་ལ་གོ་སྐབས་མེད་པའོ། །སྤྱི་ཡང་གཏན་ཚིགས་ཉིད་ཀྱིས་བརྗོད་དོ་ཞེས་བརྗོད་པར་བྱ་ཞེས་པ་ནི་ཀྱང་གི་སྒྲ་ལས་སོ་ཞེས་པའོ། །འོ་ན་བྱས་པ་ཉིད་དགག་པ་བྱ་བ་མ་ཡིན་ནམ། བྱས་པ་ཉིད་
[234b.7]བརྗོད་པར་བྱའོ་ཞེས་པ་འདིའི་ཕྱོགས་ལ་བརྟེན་པ་ནི་མ་ཡིན་ཏེ། དེས་ན་ཅིའི་ཕྱིར་བསྡུ་བ་ཡིན་ཞེ་ན། ཕན་ཚུན་སྤངས་ཏེ་གནས་པའི་དངོས་པོའི་ཆོས་དག་ནི་གང་ཁོ་ན་གཅིག་དགག་པ་དེ་ཁོ་ན་ཅིག་ཤོས་ཀྱི་སྒྲུབ་པའོ་ཞེས་དགོངས་པའོ། །གཞན་རྣམས་ནི་དང་གི་སྒྲ་
[235a]
[235a.1]འདིར་རྣམ་པར་བརྟག་པའི་དོན་ཏོ་ཞེས་སྨྲའོ། །མི་ལྡན་པ་ཅིའི་ཕྱིར་ཞེ་ན་གསུངས་པ། བྱས་པ་ཉིད་ཡོད་ན་ཞེས་པ་ལ་སོགས་པ། གང་གི་གང་ན་འགལ་བ་ཡོད་པ་ན་དེ་ན་སྲིད་པ་མ་ཡིན་ཏེ། དཔེར་ན་མེ་ལ་གྲང་བའི་རེག་པ་བཞིན་སྒྲ་ལ་ཡང་
[235a.2]མ་བྱས་པ་ཉིད་དང་འགལ་བ་བྱས་པ་ཉིད་ཡོད་དོ་ཞེས་པ་རང་བཞིན་འགལ་བའོ། །གང་ཞིག་གང་དུ་གྲུབ་པ་མི་སྲིད་པ་དེ་ནི་དེར་དགག་པར་བྱ་བ་མ་ཡིན་ཏེ། དཔེར་ན་ལག་པའི་མཐིལ་དུ་ལག་ལྡན་གྱི་ཁྱུ་བཞིན་སྒྲ་ལ་ཡང་མ་བྱས་པ་ཉིད་ཀྱི་མི་སྲིད་པ་གྲུབ་བོ། །ཁྱབ་པར་བྱེད་པ་དང་
[235a.3]འགལ་བའོ་ཞེས་པ་ཚོགས་པའི་དོན་ཏོ། །མ་བྱས་པ་ཉིད་དང་ལྷན་ཅིག་རྒྱུ་བ་ཞེས་པ་འདིར་ཡང་མི་དམིགས་པ་གཉིས་པོ་དེ་ཁོ་ན་སྔ་མའི་རྗེས་སུ་འབྲངས་པས་བརྗོད་པར་བྱའོ། །འདི་ནི་འདིར་ཁྱད་པར་ཡིན་ཏེ་གཅིག་ལ། སྒྲ་ལ་ཡང་རྟག་པ་ཉིད་དང་འགལ་བ་མི་རྟག་པ་ཡོད་དོ་
[235a.4]ཞེས་པ། ཕྱོགས་ཀྱི་ཆོས་ཏེ། སྒྲ་ལ་ཡང་རྟག་པ་ཉིད་ཀྱི་མི་སྲིད་པ་གྲུབ་བོ་ཞེས་པ་གཞན་ལའོ། །ཅི་སྟེ་ཡང་ཞེས་པ་ལ་སོགས་པས་མ་གྲུབ་པ་ཉིད་སྨྲས་སོ། །གལ་ཏེ་ཆོས་མཐུན་པ་ཉིད་སྦྱོར་ན། དེ་ལས་བྱས་པ་ཉིད་དང་མི་རྟག་པ་ཉིད་དག་འགྲུབ་པར་འགྱུར་ཞིང་། དེ་
[235a.5]ལས་ཀྱང་མི་མཐུན་པའི་ཕྱོགས་དང་མི་ལྡན་པའོ། །གང་གི་ཚེ་ཆོས་མི་མཐུན་པ་ཉིད་ཀྱི་ཉེ་བར་སྦྱོར་བ་ཁོ་ནས་མི་རྟག་པ་ཉིད་འགྲུབ་པའི་ཆེད་དུ་རྟག་པ་ཉིད་དགག་པ་བྱས་པ་དེའི་ཚེ་འདི་གཉིས་ཀ་ཡང་མེད་དོ་ཞེས་པས་གཏན་ཚིགས་མ་གྲུབ་བོ། །ཁྱད་པར་གྱིས་ཀྱང་དེ་རྟོགས་འགྱུར། །
[235a.6]ཞེས་པ་ཐུན་མོང་མ་ཡིན་པས་ཀྱང་ཞེས་པའི་ཐ་ཚིག་གོ། །འདི་འདོད་པ་ཡང་མ་ཡིན་ན་ཞེས་པ་སྒྲ་མི་རྟག་ཅེས་ཁས་བླངས་པའི་ཕྱིར་རོ། །གཞན་ཡང་མི་རྟག་པ་ཉིད་འགྲུབ་པ་ལ་མཚུངས་པ་ཉིད་ཀྱི་ཕྱིར་ཏེ། སྒྲ་མི་རྟག་སྟེ་མཉན་པར་བྱ་བ་ཉིད་ཀྱི་ཕྱིར་རོ། །རྟག་པ་ནམ་
[235a.7]མཁའ་ལ་སོགས་པ་རྣམས་མཉན་པར་བྱ་བ་མ་ཡིན་པར་མཐོང་སྟེ། དེ་ལྟར་སྒྲ་ནི་མཉན་བྱ་མ་ཡིན་པ་མ་ཡིན་ནོ་ཞེས་བྱས་ན་རྟག་པ་ནམ་མཁའ་ལ་སོགས་པ་ལ་མཉན་པར་བྱ་བ་ཉིད་མེད་པའི་ཕྱིར་ན་མཉན་པར་བྱ་བ་མ་ཡིན་པ་ཉིད་དང་ལྷན་ཅིག་སྤྱོད་པའི་རྟག་པ་ཉིད་བཀག་པས་
[235b]
[235b.1]མི་རྟག་པ་ཉིད་འགྲུབ་པར་འགྱུར་རོ། །དེ་ཡང་མི་འཐད་པ་ཉིད་ཀྱི་ཕྱིར་འདི་མི་འདོད་པ་སྟེ། གང་གི་ཕྱིར་དངོས་པོ་གཅིག་ལ་ཕན་ཚུན་འགལ་བའི་ཆོས་དག་རིགས་པ་མ་ཡིན་པས་སོ། །སྐྱོན་འདི་ཙམ་གྱིས་གྲོལ་བ་ཡང་མ་ཡིན་ནོ་ཞེས་སྟོན་པ་གསུངས་པ། འདི་ལ་ཡང་ཞེས་པ་ལ་སོགས་པ་
[235b.2]སྟེ། རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་མི་རྟག་པའོ་ཞེས་པའི་སྦྱོར་བ་འདི་ལ་ཡང་རྟག་པ་ཉིད་དུ་ཐལ་བར་འགྱུར་རོ། །ཅི་ལྟར་ཞེ་ན། གློག་ལ་སོགས་པ་ཆོས་མི་མཐུན་པ་ཉིད་ཀྱིས་ཏེ་གློག་ལ་སོགས་པ་རྩོལ་བ་ལས་མ་བྱུང་བ་མི་རྟག་པར་མཐོང་ཞིང་། སྒྲ་ནི་དེ་ལྟར་རྩོལ་བ་ལས་
[235b.3]མ་བྱུང་བ་མ་ཡིན་ནོ་ཞེས་བྱས་པ་ན། རྩོལ་མ་ཐག་ཏུ་མ་བྱུང་བ་དང་ལྷན་ཅིག་སྤྱོད་པའི་མི་རྟག་པ་ཉིད་བཀག་པས་རྟག་པ་ཉིད་འགྲུབ་པར་འགྱུར་རོ། །གལ་ཏེ་ཆོས་མི་མཐུན་པ་ཉེ་བར་སྦྱོར་བ་ཉིད་འབའ་ཞིག་བྱེད་ན། འདི་ལ་རིགས་པ་ཅུང་ཟད་ཀྱང་ཡོད་པ་མ་ཡིན་ནོ་ཞེས་པ། འདི་ལ་
[235b.4]འཐད་པ་འགའ་ཡང་ཡོད་པ་མ་ཡིན་ནོ། །འོ་ན་རྟག་པ་ཉིད་ཀྱི་གཏན་ཚིགས་མ་བྱས་པ་ཉིད་མེད་པ་ཁོ་ན་རིགས་པ་མ་ཡིན་ནམ། གཏན་ཚིགས་མེད་པར་བསྒྲུབ་པར་བྱ་བ་འགྲུབ་པ་ནི་འཐད་པ་མ་ཡིན་ནོ་ཞེ་ན་གསུངས་པ། མ་ཡིན་ཞེས་པ་ལ་སོགས་པའོ། །གལ་ཏེ་རྟག་པ་ལ་མ་
[235b.5]བྱས་པ་ཉིད་ཁོ་ན་གཅིག་པུ་གཏན་ཚིགས་སུ་འགྱུར་ན་དེ་མེད་པ་ན་མེད་པར་འགྱུར་མོད། དེ་ཡང་མེད་དེ་གང་གི་ཕྱིར་སྐྱེ་བ་དང་ལྡན་པ་ཉིད་མ་ཡིན་པ་ལ་སོགས་པ་རྣམས་ཀྱང་རྟག་པ་ཉིད་ཀྱི་གཏན་ཚིགས་འདོད་པས་སོ། །ཡང་ཅིའི་ཕྱིར་གཏན་ཚིགས་གཅིག་ལོག་པ་ཁོ་ནས་
[235b.6]བསྒྲུབ་པར་བྱ་བ་ལྡོག་པར་མི་འགྱུར་ཞེ་ན་སྨྲས་པ། མ་གྱུར་ཅིག་ཅེས་པ་ལ་སོགས་པ་སྟེ། གལ་ཏེ་གཏན་ཚིགས་གཅིག་མེད་པ་ན་ཡང་བསྒྲུབ་པར་བྱ་བ་མེད་པར་འགྱུར་ན། དེ་ལྟར་གྱུར་པ་ན་ལུས་ཅན་ཉིད་དང་ཡན་ལག་ཅན་ཉིད་ལ་སོགས་པ་མི་རྟག་པ་ཉིད་ཀྱི་གཏན་ཚིགས་
[235b.7]མེད་པའི་ཕྱིར། བྱས་པ་ཉིད་ལ་སོགས་པ་ཡོད་པ་ན་ཡང་། མི་རྟག་པ་ཉིད་ཁེགས་པར་འགྱུར་རོ། །ཡང་ཅི་ལྟར་ལུས་ཅན་ཉིད་མི་རྟག་པའི་གཏན་ཚིགས་ཡིན་ཏེ། ཇི་སྲིད་དུ་ལུས་ཅན་རྡུལ་ཕྲ་རབ་རྣམས་རྟག་པ་ཉིད་དུ་ཕ་རོལ་པོས་མངོན་པར་འདོད་དོ་ཞེ་ན། སྐྱོན་
[236a]
[236a.1]འདི་མ་ཡིན་ཏེ། འདིར་སོགས་པའི་སྒྲ་ནི་རྣམ་པར་བརྗོད་པ་ཡིན་ཞིང་། དེས་ན་མཚན་ཉིད་མཆོག་ཉིད་ཀྱི་ཕྱིར། དཔེར་བརྗོད་ནི་འདིར་དབང་ཅན་མ་ཡིན་ནོ། །ཡང་ན་དངོས་པོའི་སྟོབས་ལ་ལྟོས་པས་འདི་བཤད་ཀྱི་ཁས་བླངས་ལ་ལྟོས་པ་ནི་མ་ཡིན་
[236a.2]ནོ། །གལ་ཏེ་དེ་ལྟར་ཉེ་བར་སྦྱོར་བ་མི་རིགས་ན། འོ་ན་རིགས་པ་ཅི་ལྟར་ཞེ་ན་གསུངས་པ། ཕྱི་རོལ་གྱི་དོན་ལ་ལྟོས་པས་ནི་ཞེས་པ་ལ་སོགས་པའོ། །ཅི་ལྟར་ཕྱི་རོལ་གྱི་དོན་ལ་ལྟོས་པ་ཡིན་ཞེ་ན་གསུངས་པ། གང་གི་ཕྱིར་ཞེས་པ་ལ་སོགས་པའོ། །ཕྱི་རོལ་སྨོས་པ་ནི་འབའ་
[236a.3]ཞིག་པའི་བུམ་པ་དང་། ནམ་མཁའ་ཡོད་པ་དང་མེད་པ་ཉིད་ཙམ་ལ་ལྟོས་པ་སེམས་ལྷུར་བྱེད་པའོ། །དེ་ཉིད་ཀྱི་ཕྱིར་གསུངས་པ། རྟག་པ་ཉིད་བྱས་པ་ནི་འགའ་ཡང་ཡོད་པ་མ་ཡིན་ནོ་ཞེས་པ་སྟེ། མི་རྟག་པ་ཉིད་དང་བྲལ་བའི་བྱས་པ་ཡོད་པ་མ་ཡིན་ནོ་ཞེས་པའི་དོན་ཏོ། །འདིས་
[236a.4]ལྡོག་པ་གསུངས་སོ། །མི་རྟག་པ་ཡང་ཡོད་དེ་བུམ་པ་བཞིན་ཞེས་པ་འདིས་ཀྱང་རྗེས་འགྲོའོ། །རྗེས་འགྲོ་དང་ལྡོག་པ་ལ་ལྟོས་ནས། དེ་བསྟན་པའི་ཆེད་དུ་ནམ་མཁའ་བཞིན་དང་བུམ་པ་བཞིན་ཞེས་ཕྱོགས་གཅིག་དཔེར་བརྗོད་པ་ཙམ་ཉེ་བར་སྦྱར་བའོ་ཞེས་པས་ཁོ་
[236a.5]བོའི་ལུགས་ཀྱིས་ནམ་མཁའ་སོགས་ཉེ་བར་སྦྱར་བ་རིགས་སོ། །དེ་ལྟར་ཉེ་བར་སྦྱོར་བ་ཡང་མི་རིགས་ཏེ། དཔེར་བརྗོད་ཉིད་འབའ་ཞིག་ཏུ་མ་ཟད་དོ། །སླར་ཡང་བརྗོད་པ་ཁོ་ན་ལས་ཞེས། གཏན་ཚིགས་ཉེ་བར་བསྟན་པ་ལས་དམ་བཅའ་བ་སླར་ཡང་བརྗོད་པ་ནི་
[236a.6]མཇུག་སྡུད་དོ་ཞེས་པའི་མདོ་ལས་སོ། །གཏན་ཚིགས་ངེས་པར་བསྟན་པ་ལས་དེ་མ་ཐག་ཏུ་སྟེ་དེ་སྔོན་མ་ཅན་ཞེས་པའི་དོན་ཏོ། །འདི་ལྟ་སྟེ། དེའི་ཕྱིར་བྱས་པ་ཉིད་ཀྱི་ཕྱིར་སྒྲ་མི་རྟག་གོ་ཞེས་པའོ། །འདིས་ནི་རང་གི་ཚིག་ཁོ་ནས་མཇུག་སྡུད་ཡན་ལག་གཞན་ཉིད་བསལ་
[236a.7]ལོ་ཞེས་སྟོན་ཏོ། །སླར་ཡང་བརྗོད་པ་ཡན་ལག་གཞན་ཉིད་ཡིན་ན་ནི། ལན་ཅིག་མ་ཡིན་པར་བརྗོད་པ་ནི་ཡིན་ལ་མཐའ་ཡས་པར་འགྱུར་རོ། །ཁ་ཅིག་འདི་ལ་ལན་སྨྲ་སྟེ། །བསྒྲུབ་པར་བྱ་བའི་དོན་མངོན་པར་བརྗོད་པ་ནི་དམ་བཅའ་སྟེ། གཏན་ཚིགས་ཀྱི་ཡུལ་དེས་བསྟན་
[236b]
[236b.1]པར་བྱའོ། །གྲུབ་པའི་ངོ་བོའི་དོན་སྒྲུབ་པར་བྱེད་པའི་འབྲས་བུར་གྱུར་པ་ནི་མཇུག་སྡུད་ཀྱིས་སོ། །དེས་ན་སླར་ཡང་བརྗོད་པ་ཉིད་མེད་དོ་ཞེས་པའོ། །དེ་མི་རིགས་ཏེ། གྲུབ་པའི་ངོ་བོ་རྗོད་པར་བྱེད་པ་ཉིད་ཡིན་ན་ནི་སྒྲུབ་པར་བྱེད་པ་མི་འཐད་པའི་ཕྱིར་ཏེ། དཔེར་ན་སྒྲ་མཉན་པར་བྱའོ་
[236b.2]ཞེས་པ་ལྟ་བུའོ། །དེ་ལྟ་ན་ཡང་སྒྲུབ་པར་བྱེད་པ་ནི་ཡན་ལག་རྣམས་སོ་ཞེས་པའི་དམ་བཅའ་བ་ཉམས་སོ། །གཞན་རྣམས་ནི་རྣམ་པ་གཞན་དུ་མཇུག་སྡུད་ཡན་ལག་གཞན་ཉིད་དུ་རབ་ཏུ་སྟོན་པར་བྱེད་དེ། སྒྲ་མི་རྟག་གོ་ཞེས་པ་དམ་བཅའ་བ་འདི་ལུས་དང་། བྱས་པ་ཉིད་ཀྱི་ཕྱིར་
[236b.3]ཞེས་པའི་གཏན་ཚིགས་འདི་རྗེས་སུ་དཔག་པའོ། །བུམ་པ་བཞིན་ཞེས་པའི་དཔེ་འདི་མངོན་སུམ་མོ། །ཇི་ལྟར་བུམ་པ་བྱས་པ་ཉིད་ཀྱི་ཕྱིར་མི་རྟག་པ་དེ་ལྟར་སྒྲའོ་ཞེས་པ་ཉེ་བར་སྦྱོར་བ་འདི་ཉེ་བར་འཇལ་བའོ། །ཚད་མ་བཞི་པོ་འདི་རྣམས་ཀྱི་ཡུལ་གཅིག་པ་ཉིད་དུ་ཤེས་པའི་དོན་དུ་མཇུག་
[236b.4]བསྡུ་བ་སྟེ། དེའི་ཕྱིར་བྱས་པ་ཉིད་ཀྱི་ཕྱིར་མི་རྟག་གོ་ཞེས་པའོ། །འདི་ཡང་མི་རིགས་ཏེ། གལ་ཏེ་རྣམ་པ་གཞན་དུ་རྟོགས་པ་མི་འབྱུང་ན་ཐམས་ཅད་ལེགས་མོད། དེ་མེད་ཀྱང་ཕྱོགས་ཆོས་དང་འབྲེལ་བ་བརྗོད་པ་ཙམ་ལས་རྟོགས་པ་མཐོང་ངོ་ཞེས་པས། དེ་ཉེ་བར་མཁོ་བ་ཅི་ཞིག་
[236b.5]འདིས་ནི་དམ་བཅའ་བ་དང་ཉེ་བར་སྦྱོར་བ་དག་ཀྱང་སྒྲུབ་པར་བྱེད་པ་ཡིན་པ་ཉིད་སྤངས་སོ། །ཕ་རོལ་པོས་ཡོངས་སུ་བརྟགས་པའི་གཏན་ཚིགས་དང་དཔེ་རྣམས་ཀྱང་ཇི་ལྟར་སྒྲུབ་པར་བྱེད་པའི་ཡན་ལག་ཉིད་དུ་འཐད་པ་མ་ཡིན་པ་དེ་ལྟར་བཤད་ཟིན་ཏོ། །དེ་ལྟར་དམ་བཅའ་བ་ལ་སོགས་པ་
[236b.6]རྣམས་ཁོ་ན་རེ་ཞིག་སྒྲུབ་པར་བྱེད་པ་ཉིད་དུ་འཐད་པ་མ་ཡིན་ན། ཅིའི་ཕྱིར། ཡུལ་གཅིག་ཏུ་འཆད་པ་ལས་མཇུག་སྡུད་ཡིན་ཞེས་པས་མཇུག་སྡུད་མི་རིགས་སོ། །གཉིས་ཀ་རབ་ཏུ་གྲུབ་པ་དཔེའོ་ཞེས་པ་གཉིས་ཀ་རབ་ཏུ་གྲུབ་ཅིང་ངེས་པ་གང་དུ་ཡིན་པ་དེ་གཉིས་ཀ་རབ་ཏུ་གྲུབ་པ་སྟེ།
[236b.7]གཉིས་ཀ་ནི་གཏན་ཚིགས་དང་དམ་བཅའ་བ་དག་གམ་དེའི་དོན་ཏོ། །ནམ་མཁའ་དཔེར་ན་ཐལ་བའམ། །ཞེས་པ་ཕྱོགས་དང་པོ་ལའོ། །ངག་གི་ཕྱོགས་གཅིག་ཉིད་ཀྱང་མིན། །ཞེས་པ་གཉིས་པ་ལའོ། །དེ་ལྟར་རྣམ་པ་གཉིས་ཀ་ལྟར་ན་ཡང་ཁས་བླངས་པ་ཉམས་སོ། །
[237a]
[237a.1]དེ་ཡི་ཡོན་ཏན་ཉིད་ཀྱི་ཕྱིར་ཞེས་པ། དམ་བཅའ་དང་། གཏན་ཚིགས་དག་སྒྲའི་བདག་ཉིད་ཡིན་པ་ཉིད་ཀྱི་ཕྱིར་ཏེ། སྒྲ་ཡང་ནམ་མཁའི་ཡོན་ཏན་ནོ། །ཞེས་པའི་གཞུང་ལུགས་ལས་སོ། །དེའི་ཆོས་དག་ཞེས་པ་བསྒྲུབ་པར་བྱ་བ་དང་སྒྲུབ་པར་བྱེད་པའི་ཆོས་
[237a.2]དག་སྟེ། མི་རྟག་པ་དང་བྱས་པ་ཉིད་ལ་སོགས་པ་སྟེ། གང་དུ་རབ་ཏུ་གྲུབ་པ་དག་གོ་ཞེས་པ་དོན་བུམ་པ་ལ་སོགས་པར་རོ། །ངག་གི་ཡན་ལག་ཉིད་མི་རིགས་སོ་ཞེས་པ། ཇི་སྐད་དུ་བཤད་པ། ལྷན་ཅིག་བརྗོད་པར་འདོད་པ་ནི་དབྱེ་བ་ཡོད་པ་ན་ཐ་མི་དད་པར་འཇུག་པ་རྣམས་ཀྱི་འགྱུར་
[237a.3]རོ་ཞེས་པ་སྟེ། དོན་དང་སྒྲ་དག་ལ་ཐ་མི་དད་པར་འཇུག་པ་ཉིད་ཡོད་པ་ཡང་མ་ཡིན་ནོ། །རྗེས་སུ་འགྲོ་བ་མ་བརྗོད་ཕྱིར། །ཞེས་པ་ལ་སོགས་པ་སྟེ། ཇི་ལྟར་ཁོ་བོ་ཅག་གི་གཏན་ཚིགས་ཀྱི་མེད་ན་མི་འབྱུང་བ་ཉིད་དཔེས་སྟོན་པ་དེ་ལྟར་བྱེ་བྲག་པ་རྣམས་ཀྱི་ནི་མ་ཡིན་ནོ། །དེ་ལས་ཀྱང་
[237a.4]དཔེ་ལྟར་སྣང་བའོ། །སྔ་མ་བཞིན་ཞེས་པ། སྔར་ཇི་སྐད་དུ་བཤད་པ། རྗེས་འགྲོ་ཕྱིན་ཅི་ལོག་རྣམ་གཉིས། །རྗེས་འགྲོ་མེད་པའང་དེར་སྣང་བའོ་ཞེས་པ་དེ་ལྟར་འདིར་ཡང་བརྗོད་པར་བྱའོ། །རྣམ་པ་གཉིས་ཀ་ལྟར་ན་ཡང་མི་རིགས་སོ་ཞེས་པ། གལ་ཏེ་གཏན་ཚིགས་
[237a.5]དམ་བཅའ་བ་དག་གཉིས་ཀ་སྨོས་པས་འཛིན་ན་དང་། གལ་ཏེ་དེའི་དོན་དག་ནའོ། །སྒྲུབ་བྱེད་ཉིད་དང་དཔེའི་དོན་ཀྱང་། རང་དབང་ཡིན་ན་དོན་མེད་དོ། །ཞེས་པ། བསྒྲུབ་པར་བྱ་བ་ཡང་དག་པར་འགྲུབ་པའི་དོན་དུ་གཉེར་བར་བྱའོ་ཞེས་པའི་དོན་ཏོ། །བསྒྲུབ་པར་བྱ་བ་སྒྲུབ་
[237a.6]པར་བྱེད་པའི་ནུས་པའི་རང་གི་ངོ་བོར་བརྗོད་པར་བྱའོ། །དེ་དག་ལ་དོན་ཡོད་པ་མ་ཡིན་ནོ་ཞེས་དོན་མེད་པ་སྟེ། བསྒྲུབ་པར་བྱ་བ་སྒྲུབ་པར་བྱེད་པར་ནུས་པའི་རང་གི་ངོ་བོ་དག་མི་སྲིད་པ་དག་ཅེས་པའི་དོན་ཏོ། །དོན་འདི་ཉིད་འགྲེལ་པས་གསལ་བར་བྱེད་དེ། སྒྲུབ་པར་བྱེད་པ་
[237a.7]ཉིད་སྲིད་པ་མ་ཡིན་ཞིང་། དཔེའི་དོན་ཡང་མ་ཡིན་ནོ། །ཞེས་པའོ། །རིགས་པ་ནི། གང་སྒྲུབ་པར་བྱེད་པ་ཉིད་སྲིད་པ་མ་ཡིན་ཏེ་སྒྲུབ་པར་བྱེད་པའི་ནུས་པ་དང་བྲལ་བ་ཉིད་ཀྱི་ཕྱིར་རོ། །དཔེའི་དོན་ནི་ཅི་ལྟར་ཡིན་ཏེ། གང་འདྲ་བ་ཕ་རོལ་པོས་བསྒྲུབ་པར་བྱ་བ་རྗེས་སུ་
[237b]
[237b.1]འཛིན་པ་མངོན་པར་འདོད་པ་དེ་འདྲ་བ་སྲིད་པ་མ་ཡིན་ནོ་ཞེས་པ་དགོངས་པའོ། །སྔར་ཇི་སྐད་བཤད་པ་བཞིན་ཞེས་པ། དཔེར་བརྗོད་པ་དང་ཆོས་མཐུན་ཉིད། །འབའ་ཞིག་དེ་རྣམས་ཀྱིས་བརྗོད་བྱ། །བསྒྲུབ་བྱ་སྒྲུབ་བྱེད་གཉིས་བརྗོད་མིན། །དེ་ལྟར་དཔེ་ཉིད་ཙམ་ཡིན་ནོ། །ཞེས་
[237b.2]པའོ། །དེ་ལྟར་སྒྲུབ་པར་བྱེད་པ་ཉིད་མེད་པར་བརྗོད་དོ། །དཔེ་མེད་པ་ཡང་གཏན་ཚིགས་བཅས་པའི་བསྒྲུབ་བྱ་ཙམ་མམ། དེ་ཡི་ཁྱད་པར་དཔོག་པ་ན། །དཔེ་ནི་ཐུག་པ་མེད་པར་འགྱུར། །མི་མཐུན་ཕྱོགས་ལས་ལྡོག་པར་ཡང་། །ཅེས་པའོ། །ལེའུ་བཞི་པའོ།། །།
[237b.3]ཚད་མ་གཞན་དུ་རྩོད་པའི་སྐབས་སྦྱིན་པའི་ཆེད་དུ་གསུངས་པ། ཚད་མ་གཉིས་བཤད་ཟིན་ཏོ་ཞེས་པ་སྟེ། གང་སྔར་དམ་བཅས་པ། མངོན་སུམ་དང་ནི་རྗེས་སུ་དཔག །ཚད་མ་དག་ནི་གཉིས་ཁོ་ན། །ཞེས་པའི་ཚད་མ་གཉིས་པོ་དེ་བཤད་ཟིན་ཏོ། །རང་གི་ཚད་མའི་ཡོན་ཏན་བརྗོད་པ་
[237b.4]ལས་དང་། གཞན་གྱི་ཚད་མ་དགག་པ་ལས་ཀྱང་ངོ་། །ཁ་ཅིག་ནི་སྒྲ་ལས་བྱུང་བ་ཡང་ཞེས་པ་ཁ་ཅིག་ཅེས་པ་སེར་སྐྱ་པ་ལ་སོགས་པ་རྣམས་སོ། །སྒྲ་ལས་ཉེ་བ་མ་ཡིན་པའི་དོན་ལ་ཤེས་པ་ཉེ་བར་སྐྱེ་བ་ནི་སྒྲ་ལས་བྱུང་བའོ། །དོན་གྱི་གོ་བ་ལ་སོགས་པ་རྣམས་འབའ་ཞིག་ཏུ་མ་ཟད་དོ་ཞེས་པ་
[237b.5]ཡང་གི་སྒྲའི་དོན་ཏོ། །ཅི་ལྟར་སྒྲ་ལས་བྱུང་བ་ཚད་མ་གཞན་མ་ཡིན་ཞེ་ན་གསུངས་པ། དེ་ལྟར་དེ་ཞེས་པ་ལ་སོགས་པའོ། །དེ་ཞེས་པ་ཤུགས་ཀྱིས་ཐོབ་པ་སྒྲ་ལ་སྦྲེལ་ལོ། །བྱས་སོགས་བཞིན་དུ་ཞེས་པ། ཇི་ལྟར་བྱིས་པ་ཉིད་ལ་སོགས་པའི་རྟགས་ནི་ཚུལ་གསུམ་དང་ལྡན་པ་ལས་
[237b.6]རང་གི་དོན་གསལ་བར་བྱེད་པ་དེ་བཞིན་སྒྲ་ཡང་ངོ་ཞེས་པའི་དོན་ཏོ། །དཔེ་འདིས་ནི་སྒྲ་རྟག་པ་ཉིད་དུ་ཡོངས་སུ་གསལ་བར་བྱེད་པས་སྒྲ་ལས་བྱུང་བ་རྗེས་སུ་དཔག་པ་ཉིད་དུ་མཚོན་པར་གསལ་བར་བྱེད་དོ། །གཞན་སེལ་བ་ཡིས་ཞེས་པ་དོན་གཞན་ལས་ལྡོག་པས་ཡིན་གྱི།
[237b.7]མཐོང་བ་བཞིན་དུ་སྒྲུབ་པའི་ངོ་བོས་ནི་མ་ཡིན་ནོ། །སྒྲ་ནི་ཡུལ་གང་ལ་རབ་ཏུ་སྦྱོར་བ་ཞེས་པ། དོན་གང་གོ་བར་བྱེད་པའི་དོན་དུ་བརྗོད་པ་དེ་དེའི་ཡུལ་ཏེ། གོ་བར་བྱ་བ་ཉིད་ཀྱི་ཕྱིར། །དཔེར་ན་རྟགས་ཀྱི་རྟགས་ཅན་བཞིན་ནོ། །དེའི་ཡན་ལག་གང་གིས་ཞེས་པ། བརྗོད་པར་བྱ་
[238a]
[238a.1]བའི་དོན་གྱི་ཡན་ལག་ཡོད་པ་ཉིད་དང་ཤེས་བྱ་དེ་ཉིད་ལ་སོགས་པ་རྣམས་ནི་མང་བ་སྟེ། དེ་རྣམས་ཐམས་ཅད་དང་ཤིང་ལ་སོགས་པའི་སྒྲ་མེད་ན་མི་འབྱུང་བ་ཉིད་དུ་འབྲེལ་པ་ཡང་མ་ཡིན་གྱི། གང་དང་འབྲེལ་པ་དེ་བྱས་པ་ཉིད་ལ་སོགས་པ་བཞིན་དུ་དོན་
[238a.2]གཞན་རྣམ་པར་གཅོད་པས་གསལ་བར་བྱེད་དོ། །བརྗོད་པ་ནི་སྒྲའི་ཆོས་ཉིད་དུ་གྲགས་པ་ཉིད་ཀྱི་ཕྱིར་དཔེ་དང་དཔེ་ཅན་དག་མི་མཚུངས་པ་ཉིད་དུ་མ་གྱུར་ཅིག་ཅེས་གསལ་བར་བྱེད་དོ་ཞེས་གསུངས་སོ། །དེས་ཇི་སྐད་བརྗོད་པར་འགྱུར་ཏེ། གང་རྗེས་སུ་དཔག་པའི་མཚན་ཉིད་ཅན་
[238a.3]དེ་ནི་དེ་ལས་ཐ་དད་པ་མ་ཡིན་ཏེ། དུ་བ་ལས་མེ་ཤེས་པ་བཞིན། །སྒྲ་ལས་བྱུང་བ་ཡང་དེ་ལྟ་བུ་ཡིན་ནོ་ཞེས་པ་ཁྱབ་པར་བྱེད་པ་དང་འགལ་བའོ། །ཅི་སྟེ། གཞན་སེལ་བ་ཡིན་རྗོད་པར་བྱེད། །ཅེས་པ་འདི་ཅིའི་དོན་དུ་ཡིན། །ཇི་ཙམ་དུ། བྱས་ཉིད་སོགས་བཞིན་རྗོད་པར་བྱེད། །ཅེས་
[238a.4]པ་འདི་ཁོ་ནས་རྗེས་སུ་དཔག་པ་ལས་སྒྲ་ལས་བྱུང་བ་ཐ་མི་དད་པར་རྟོགས་སོ་ཞེ་ན། དགོས་པ་ཡོད་དོ། །བྱས་པ་ཉིད་ལ་སོགས་པའི་རྟགས་ནི་དོན་གཞན་རྣམ་པར་གཅོད་པས་རང་གི་དོན་རྟོགས་པར་བྱེད་དོ་ཞེས་སྔར་འདི་བསྒྲུབས་ཟིན་ཏོ། །དེའི་ཕྱིར་གལ་ཏེ་གཞན་སེལ་བས་ཞེས་
[238a.5]པ་འདི་མ་བརྗོད་ན། དེའི་ཚེ་ཚད་མ་གཞན་སྨྲ་བ་རྣམས་ཀྱི་རྟོགས་པ་འདིར་འགྱུར་ཏེ། བྱས་པ་ཉིད་ལ་སོགས་པའི་རྟགས་ནི་དོན་གཞན་ལས་ལྡོག་པས་རང་གི་དོན་རྟོགས་པར་བྱེད་ཅིང་། སྒྲ་ནི་སྒྲུབ་པའི་སྒོ་ཡིས་ཏེ། །དེ་ཁོ་ནའི་ཁྱད་པར་ལས་སྒྲ་ལས་བྱུང་བ་རྗེས་སུ་དཔག་པ་ལས་
[238a.6]ཐ་དད་དོ་ཞེས་པའོ། །དེའི་ཕྱིར། དེ་གསལ་བའི་དོན་དུ་འདི་བཤད་དོ། །སླར་ཡང་སྐབས་གཞན་གྱིས་འདིའི་དོགས་པ་བསལ་བར་བྱེད་པར་འགྱུར་རོ་ཞེས་རེ་ཞིག་གཞག་གོ། །ཅི་ལྟར་སྒྲའི་ཚུལ་གསུམ་ཉིད་ཡིན། ཅི་ལྟར་མི་འགྱུར་ན། ཆོས་ཅན་མི་རིགས་པའི་ཕྱིར་རོ། །
[238a.7]དེ་ལྟར་ནི་སྒྲའི་དོན་ནི་ཆོས་ཅན་ཉིད་དུ་འཐད་པ་མ་ཡིན་ཏེ། རྟོགས་པར་བྱ་བ་ཉིད་ཀྱི་ཕྱིར་མི་རྟག་པ་ཉིད་བཞིན་ནོ། །དོན་ལ་སྒྲ་མཐོང་བ་ཡང་མ་ཡིན་ཏེ། སྨྲ་བ་པོ་ལ་གནས་པ་ཉིད་ཀྱི་ཕྱིར་ཏེ། དེ་ཁོ་ན་ལ་ཉེ་བར་དམིགས་པའི་ཕྱིར་རོ། །དེའི་ཕྱིར་འདི་ནི་ཚད་མ་གཞན་ཁོ་ན་སྟེ།
[238b]
[238b.1]བརྡ་ཇི་ལྟ་བ་བཞིན་དུ་དོན་རྟོགས་པའི་རྒྱུ་ཉིད་ཀྱི་ཕྱིར་རོ་ཞེ་ན། དེ་དང་འདི་ནི་སྒྲ་ལས་བྱུང་བའི་ཚད་མ་ཉིད་ཀྱི་ཡུལ་ཡོངས་སུ་མི་ཤེས་པའི་ཕྱིར་འདི་ལྟར་བརྗོད་པ་སྟེ། དེའི་ཕྱི་རོལ་གྱི་དོན་ལ་ཚད་མ་ཉིད་མ་ཡིན་པས་ཏེ། དེ་ལྟར་ནི་དེ་དེའི་རྟོགས་པར་བྱེད་པར་འགྱུར་བ་མ་ཡིན་པས་ཏེ།
[238b.2]འོ་ན་ཅི་ལ་ཞེ་ན། བརྗོད་པར་འདོད་པ་ལ་སྟེ། དེ་ལ་ནི་སྒྲའི་ཚུལ་གསུམ་པ་ཉིད་ཡོད་པ་ཁོ་ནའོ། །དེ་ལྟར་ནི་བརྗོད་པར་འདོད་པ་དང་ལྡན་པའི་སྐྱེས་བུ་ཆོས་ཅན་ནོ། །བརྗོད་པར་འདོད་པ་བསྒྲུབ་པར་བྱ་བའི་ཆོས་སོ། །བརྗོད་པར་འདོད་པ་དང་ལྡན་པ་ལ་ཉེ་བར་དམིགས་པ་ཡོད་པ་
[238b.3]ཁོ་ནའི་ཕྱིར་སྒྲ་ནི་ཕྱོགས་ཀྱི་ཆོས་སོ། །བརྗོད་པར་འདོད་པ་དང་ལྡན་པ་སྔར་ཉམས་སུ་མྱོང་བ་ནི་མཐུན་ཕྱོགས་སོ། །དེ་དང་བྲལ་བ་ནི་མི་མཐུན་ཕྱོགས་སོ་ཞེས་པས་ཅི་ལྟར་ཚུལ་གསུམ་སྲིད་པ་མ་ཡིན། འོ་ན་བརྗོད་པར་འདོད་པ་ལ་ཡང་དེ་ཚད་མ་ཉིད་མ་ཡིན་པ་ཁོ་ནའོ། །དེ་ལྟར་
[238b.4]ནི་བརྗོད་པར་འདོད་པ་སྤྱི་ལ་ཚད་མ་ཉིད་དུ་འགྱུར་རམ། ཡང་ན་བརྗོད་པར་འདོད་པའི་ཁྱད་པར་ལ་ཡིན། རེ་ཞིག་སྤྱི་ལ་མ་ཡིན་ཏེ་དེ་ལས་ཐ་སྙད་དུ་མི་རིགས་པའི་ཕྱིར་རོ། །གལ་ཏེ་བརྗོད་པར་འདོད་པའི་སྤྱི་སྒྲའི་དོན་དུ་གྱུར་ན་གོ་ཞེས་བརྗོད་པ་ན་དགུ་བཟུང་བའི་ཡི་གེའི་རྣམ་པར་དབྱེ་བ།
[238b.5]འདི་ཅི་སྨྲ་ཞེས་ཡོངས་སུ་རྗེས་སུ་སྦྱོར་བ་མ་ཡིན་ཏེ། སྒྲ་བརྗོད་པ་ཙམ་ཁོ་ན་ལས་བརྗོད་པར་འདོད་པའི་སྤྱིའི་ངེས་པར་ཤེས་པ་ཉིད་ཀྱི་ཕྱིར་རོ། །བརྗོད་པར་འདོད་པའི་སྤྱིའི་དོན་དང་ལྡན་པ་ཉིད་ནི་སྒྲ་རྣམས་འཇུག་པའི་རྒྱུར་འགྱུར་བ་ཡང་མ་ཡིན་ཏེ། བརྗོད་པར་འདོད་པའི་
[238b.6]སྤྱིས་ནི་དོན་དུ་གཉེར་བ་པོ་འགའ་ཞིག་རབ་ཏུ་འཇུག་པའི་ཡན་ལག་དང་ཚད་མ་ཡང་མ་ཡིན་ཏེ། འདི་དག་གིས་དོན་ཡོངས་སུ་བཅད་ནས་འཇུག་པ་ན་དོན་བྱ་བ་ལ་སླུ་བ་མེད་པའི་ཕྱིར་རོ་ཞེས་བརྗོད་པའི་ཕྱིར་རོ། །དེ་འདི་ལྟར་བརྗོད་པར་འདོད་པའི་སྤྱི་ལ་ཚད་མ་ཉིད་མ་ཡིན་
[238b.7]ནོ། །ཁྱད་པར་ལ་ཡང་མ་ཡིན་ཏེ་འཁྲུལ་པའི་ཕྱིར་རོ། །དེ་ཡང་བརྗོད་པར་འདོད་པའི་ཁྱད་པར་དང་ལྡན་པ་ལས་སྒྲ་གཞན་དུ་དམིགས་པའི་ཕྱིར་རོ། །དེ་སྐད་དུ་ཡང་གསུངས་པ། ཇི་ལྟར་འདོད་ཆགས་དང་ལྡན་པ་སྨྲ་བ་དེ་ལྟར་འདོད་ཆགས་དང་བྲལ་བ་ཡང་ངོ་
[239a]
[239a.1]ཞེས་སོ། །སྒྲའི་ཐ་སྙད་ནི་བློ་སྔོན་དུ་བཏང་ནས་རྣམ་པ་གཞན་དུ་ཡང་བྱ་བར་ནུས་ཏེ། དེའི་ཕྱིར་སྒྲ་རྣམས་ལས་ཁྱད་པར་ངེས་པ་མ་ཡིན་ཞིང་། ཁྱད་པར་ཁོ་ན་ཡང་ཐ་སྙད་ཀྱི་ཡན་ལག་ཡིན་ན། དེ་ཡང་ངེས་པར་གཟུང་བར་མི་ནུས་པ་ཉིད་ཀྱི་
[239a.2]ཕྱིར། །ཅི་ལས་སྒྲ་ལས་བྱུང་བ་ཚད་མ་ཉིད་ཡིན་ཞེ་ན། དེ་ལ་བརྗོད་པར་འདོད་པའི་སྤྱི་ནི་མི་འཁྲུལ་ན་ཡང་སྒྲའི་དོན་མ་ཡིན་ཏེ་དེས་ཐ་སྙད་ལ་མི་སྦྱོར་བའི་ཕྱིར་རོ་ཞེས་གང་བརྗོད་པ་དེ་རིགས་པ་མ་ཡིན་ཏེ། གང་ཞིག་རྒྱུད་གཞན་ཙམ་བསྒྲུབ་པར་བྱ་བ་དོན་དུ་གཉེར་བ་པོ་དེ་ལ་ཅི་
[239a.3]ལྟར་བརྗོད་པར་འདོད་པའི་སྤྱི་ཐ་སྙད་ཀྱི་ཡན་ལག་མ་ཡིན། འདི་ནི་སྒྲ་ལས་བརྗོད་པར་འདོད་པའི་སྤྱི་ཡོངས་སུ་བཅད་ནས་འཇུག་པ་ན་རྒྱུད་གཞན་ཙམ་བསྒྲུབ་པར་བྱ་བའི་དོན་བྱ་བ་ལ་འཇུག་པ་ན་སླུ་བ་མེད་པའི་ཕྱིར་རོ། །གང་ཡང་ཁྱད་པར་ལ་ཡང་ཚད་མ་ཉིད་མ་ཡིན་ཏེ། འཁྲུལ་པའི་
[239a.4]ཕྱིར་རོ་ཞེས་བརྗོད་པ་དེ་ཡང་ཡང་དག་པ་མ་ཡིན་ཏེ། ཁྱད་པར་ཁོ་ན་གཏན་ཚིགས་ཉིད་ཀྱི་ཕྱིར་རོ། །གལ་ཏེ་ཁྱད་པར་ནི་རྗེས་སུ་འགྲོ་བ་དཀའ་བ་ཉིད་ཀྱི་ཕྱིར་གཏན་ཚིགས་ཉིད་དུ་མི་རིགས་སོ་ཞེ་ན། འོ་ན་དུ་བ་ཡང་གཏན་ཚིགས་ཉིད་དུ་མི་འགྱུར་ཏེ། འདི་ཡང་སྒྱུ་མ་བྱེད་པས་སྤྲུལ་
[239a.5]པའི་དུ་བ་ལྟར་སྣང་བའི་འབྱུང་བ་འདུས་པ་ལས་ནི་གཞན་ལས་ལོག་པའི་ངོ་བོར་རྟོགས་པ་པོ་ཐམས་ཅད་ཀྱིས་ངེས་པར་གཟུང་བར་ནུས་པ་མ་ཡིན་པའི་ཕྱིར་རོ། །ཅི་སྟེ་གང་ཞིག་དེ་ངེས་པར་གཟུང་བར་ནུས་པ་དེའི་ངོར་དེ་རྗེས་སུ་དཔག་པའི་ཡན་ལག་ཉིད་ཡིན་ན། དེ་དང་འདི་ནི་ཅིག་
[239a.6]ཤོས་ལ་ཡང་མཚུངས་སོ། །ཡང་ན་ངེས་པར་རྟོགས་པ་པོས་མི་སླུ་བའི་ངག་འདི་ནི་འདི་འདྲ་བར་གང་ལ་མངོན་པར་ཞེན་པ་དེའི་ཚིག་ནི་མི་སླུ་བར་མཚུངས་པ་ཉིད་དུ་སྒྲོ་བཏགས་ནས་རྗེས་སུ་དཔག་པར་བྱེད་དེ། དེའི་ཕྱིར་རྟོགས་པ་པོའི་བསམ་པའི་ཁྱད་པར་གྱི་དབང་ལས།
[239a.7]ཁྱད་པར་ལ་སྒྲ་རྗེས་སུ་དཔག་པ་ཉིད་དུ་གསུངས་ཏེ་དོན་དམ་པར་ནི་མ་ཡིན་ནོ། །གཞན་སེལ་བས་སྒྲའི་དོན་རྟོགས་པར་བྱེད་དོ་ཞེས་བཤད་པ་ཡིན་ཏེ། དེ་རྗེས་སུ་མ་བསམས་པས་གང་རྣམས་སྨྲ་བ། རིགས་ཀྱི་སྒྲ་ཞེས་པ་ལ་སོགས་
[239b]
[239b.1]པའོ། །རིགས་ཀྱི་སྒྲ་ནི་ཡོད་པ་ལ་སོགས་པའོ། །ཅི་ལྟར་རིགས་བརྗོད་པར་བྱ་བ་མ་ཡིན་པར་གྱུར་པ་ཐ་སྙད་ཀྱི་རྒྱུ་ཡིན་ཞེ་ན། ཐ་དད་མེད་པར་ཉེ་བར་གདགས་པའི་རྒྱུ་ཉིད་ཀྱི་ཕྱིར་ཡོན་ཏན་བཞིན་ནོ། །དཔེར་ན་བྲམ་ཟེའི་ཁྱེའུ་སེང་གེ་ཞེས་པ་བཞིན་ཏེ། དཔའ་བ་ཉིད་ལ་སོགས་པའི་ཡོན་ཏན་གྱི་ཁྱད་པར་ནི་སེང་གེ་དང་བྲམ་ཟེའི་ཁྱེའུ་དག་
[239b.2]གི་ཐ་དད་མེད་པར་ཉེ་བར་གདགས་པའི་རྒྱུར་འགྱུར་ཞིང་ཐ་སྙད་ཀྱི་རྒྱུར་འགྱུར་ཏེ། ཡོན་ཏན་གྱི་སྒྲ་ཞེས་པ་ཡིན་པ་དེ་ལྟར་རིགས་ཀྱང་སྟེ་སྒྲའི་ཐ་དད་པ་རྣམས་ཀྱིས་ཐ་མི་དད་པར་ཉེ་བར་གདགས་པའི་རྒྱུའོ་ཞེས་པས་རིགས་ཀྱི་སྒྲ་ཞེས་དེ་ནི་ཐ་སྙད་ཀྱི་རྒྱུ་ཡིན་ནོ། །རང་གི་ཁྱད་པར་རྣམས་ཤེས་པ་རང་གི་སྟེ་
[239b.3]རིགས་ཀྱི་ཁྱད་པར་རྣམས་ཏེ། རིགས་གང་གིས་སྒྲ་གང་གི་ཐ་སྙད་དུ་སྟོན་པའི་རྒྱུ་ཡིན་པ་དེ་ནི་དེའི་རང་གི་བར་འགྱུར་རོ། །ཕན་ཚུན་ཁྱད་པར་དུ་བྱེད་ཅིང་ཐ་དད་དུ་བྱེད་དོ་ཞེས་པ་ཁྱད་པར་རྣམས་ཏེ། དཔེར་ན་རིགས་ཡོད་པའི་རྫས་དང་ཡོན་ཏན་དང་ལས་རྣམས་ལྟ་བུའོ། །ཐམས་ཅད་
[239b.4]རྣམས་ཁོ་ན་སྨྲས་པ་ཞེས་པ། ཅུང་ཟད་ཙམ་ཁོ་ན་མ་ཡིན་པའོ། །དེ་ལྟར་ནི་བྲམ་ཟེ་གསད་པར་བྱ་བ་མ་ཡིན་ནོ་ཞེས་པས་བརྗོད་པ་ན། བྲམ་ཟེའི་རིགས་ཀྱི་ཁྱད་པར་མ་ཋ་རའི་བུ་ལ་སོགས་པ་ཐམས་ཅད་གསད་པར་བྱ་བ་མ་ཡིན་ནོ། །གལ་ཏེ་རིགས་ཀྱི་སྒྲས་རང་གི་ཁྱད་པར་མ་ལུས་
[239b.5]པ་བརྗོད་ན། འོ་ན་བྲམ་ཟེ་ཀུཎ་ཌི་ནའི་བུ་ཤོག་ཅིག་ཅེས་ཁྱད་པར་གྱི་མཉན་པ་ཅིའི་དོན་དུ་ཡིན། བྲམ་ཟེའི་སྒྲ་ཇི་ཙམ་པས་ཀུཎ་ཌི་ནའི་བུ་མངོན་པར་བརྗོད་པས་སོ་ཞེ་ན། སྨྲས་པ་བརྗོད་པ་རྣམས་ལ་ནི་ངེས་པའི་དོན་དུ་ཁྱད་པར་གྱི་སྒྲ་ཞེས་པ། ཀུཎ་ཌི་ནའི་བུ་ཁོ་ན་སྟེ་མ་ཋ་རའི་
[239b.6]བུ་ནི་མ་ཡིན་ནོ་ཞེས་པའོ། །དཔེར་ན་བྱ་བས་ནི་རྫས་འདྲེན་པར་བྱེད་དོ་ཞེས་བརྗོད་པ་ན། སླར་ཡང་རྫས་མ་ཡིན་པ་ནི་མ་ཡིན་ཞེས་ངེས་པའི་དོན་དུ་བརྗོད་པ་བཞིན་དང་། ཇི་ལྟར་རྫས་ཁོ་ན་རྟོགས་པ་བཞིན་ནོ་ཞེས་པའོ། །རྗོད་པར་བྱེད་པ་ཞེས་བརྗོད་པར་བྱ་སྟེ་ཞེས་པ་སྟེ། དོགས་
[239b.7]པ་དང་བཅས་པ་ཉིད་ཀྱི་ཕྱིར་ཡོངས་སུ་མ་རྫོགས་པའི་ངག་ཅེས་པས་ན་འཆད་པར་འགྱུར་བའི་ཚིག་གིས་དོགས་པ་རྣམ་པར་གཅོད་པར་སྟོན་ཏོ། །མཐའ་ཡས་ཉིད་ཕྱིར་ཞེས་པ་འཐད་པའོ། །ཅི་ཞིག་མཐའ་ཡས་པའི་ཕྱིར་ཞེ་ན། སྐབས་ཉིད་ཀྱི་ཕྱིར་ཁྱད་པར་རྣམས་ཁོ་ན་
[240a]
[240a.1]སྟེ། གང་གསུངས་པ་ཁྱད་པར་རྣམས་ནི་མཐའ་ཡས་པ་ཡིན་ན་ནི་ཞེས་པ་ལ་སོགས་པའོ། །འབྲེལ་པ་བྱ་བར་མི་ནུས་ཞེས་པ། བརྗོད་པ་སྟེ། བྱ་བའི་བྱིངས་ནི་དོན་དུ་མ་ཅན་ཉིད་ཀྱི་ཕྱིར་རོ། །དེ་འདི་གཏན་ཚིགས་གཉིས་བཤད་དེ། །མཐའ་
[240a.2]ཡས་པ་ཉིད་ནི་འབྲེལ་པ་མི་ནུས་པ་ཉིད་ལ་གཏན་ཚིགས་སོ། །འབྲེལ་པ་མ་བརྗོད་པ་ཉིད་ནི་ཡང་རྗོད་པར་བྱེད་པ་མ་ཡིན་པ་ཉིད་ལ་སྟེ། དེ་ལྟར་ཡང་གསུངས་པ། འབྲེལ་པ་མ་བྱས་པའི་སྒྲ་ལ་ནི་དོན་རྗོད་པར་བྱེད་པའི་རིགས་པ་མ་ཡིན་ཞེས་པའོ། །མཐའ་ཡས་པ་ཉིད་ཀྱང་
[240a.3]ཡུལ་གྱིས་བསྐལ་པ་སྟེ། ཉེ་བར་རྗོད་པར་བྱེད་པའི་མཐའི་སྒྲའི་དགག་པ་དང་མངོན་པར་འབྲེལ་པའི་ཕྱིར་རོ། །དེ་དང་འདིས་འདི་སྐད་སྟོན་ཏེ། གང་རྣམས་བསྐལ་པའི་ཡུལ་དུ་འཇུག་པ་དེ་རྣམས་འདིར་གནས་པ་རྣམས་ཀྱིས་རང་ཉིད་ཀྱི་སྦྱོར་ཟླའི་འབྲེལ་པ་ཉིད་དུ་བརྗོད་པར་ནུས་
[240a.4]པ་མ་ཡིན་ཏེ། དཔེར་ན་མཐོ་རིས་སུ་སོང་བའི་ནག་པ་ལ་སོགས་པ་རྣམས་བཞིན། ཁྱད་པར་ཁ་ཅིག་རྣམས་ཀྱང་དེ་ལྟ་བུའོ་ཞེས་པ་ཁྱབ་པར་བྱེད་པ་དང་འགལ་བའོ། །ཡང་ན་མུ་མེད་པ་ཉིད་མཐའ་ཡས་པ་ཉིད་དེ། ཕྱོགས་ཀྱི་མཐའ་བཞིན་ཏེ། ཡོངས་སུ་བཅད་པ་རྗོད་པར་
[240a.5]བྱེད་པའི་མཐའི་སྒྲ་དགག་སྒྲ་དང་འབྲེལ་པའི་ཕྱིར་རོ། །སྦྱོར་བ་ནི་གང་རྣམས་མུ་མེད་པ་དེ་རྣམས་རང་དང་འབྲེལ་པ་ཅན་གྱི་འབྲེལ་པ་ཅན་ཉིད་དུ་བཤད་པར་བྱ་བ་མ་ཡིན་ཏེ། ས་གཞིའི་རྡུལ་བཞིན་ཁྱད་པར་རྣམས་ཀྱང་དེ་ལྟ་བུའོ་ཞེས་པ་འགལ་བ་དེ་ཁོ་ནའོ། །འབྲེལ་པ་མ་བྱས་པ་ཞེས་པ་ལ་སོགས་
[240a.6]པས། གང་ཁྱད་པར་རྣམས་དང་འབྲེལ་པ་མ་བཤད་པ་དེ་ནི། དེ་རྣམས་ཀྱི་རྗོད་པར་བྱེད་པ་མ་ཡིན་ཏེ། འཕགས་པ་པའི་ངོར་ཀླ་ཀློའི་སྒྲ་བཞིན། རིགས་ཀྱི་སྒྲ་ཡང་དེ་ལྟ་བུའོ་ཞེས་པ་ཁྱབ་བྱེད་མི་དམིགས་པ་གསུངས་སོ། །རང་གི་ངོ་བོ་ཙམ་རྟོགས་པའི་ཕྱིར་རོ་ཞེས་པ་
[240a.7]དཔེ་གསལ་བར་བྱེད་པ་སྟེ། ཀླ་ཀློའི་སྒྲ་ལ་ནི་སྒྲའི་རང་གི་ངོ་བོ་ཙམ་ཁོ་ན་རྟོགས་ཀྱི་དོན་ནི་མ་ཡིན་པས་སོ། །གཞན་ཡང་ཞེས་པ་གཏན་ཚིགས་སོགས་པའོ། །ཅི་ལྟར་ན་ཡང་འཁྲུལ་པ་ཡིན་ཞེ་ན་གསུངས་པ། ཇི་ལྟར་ཞེས་པ་ལ་སོགས་པ་སྟེ། རྫས་མེད་ན་ཡང་
[240b]
[240b.1]ཡོན་ཏན་མཐོང་བའི་ཕྱིར་དང་། དེ་མེད་ན་ཡང་རྫས་དང་ལས་དག་ལ་ཡང་ཞེས་པ་ཐམས་ཅད་དུ་འཁྲུལ་པར་ཐེ་ཚོམ་དུ་འགྱུར་རོ། །རྗོད་པར་བྱེད་པ་མ་ཡིན་ཞེས་པ་གང་ཞིག་གང་ལ་ཐེ་ཚོམ་གྱི་རྒྱུ་ཡིན་པ་དེ་དེའི་རྟོགས་པར་བྱེད་པ་མ་ཡིན་ཏེ། འདི་ལྟ་སྟེ་གཞལ་བྱ་ཉིད་རྟག་པ་དང་
[240b.2]མི་རྟག་པ་དག་གི་བཞིན་རིགས་ཀྱི་སྒྲ་ཡང་ཁྱད་པར་རྣམས་ལ་དེ་ལྟ་བུའོ་ཞེས་རང་བཞིན་འགལ་བ་གསུངས་སོ། །ཐེ་ཚོམ་གྱི་རྒྱུ་ཉིད་དང་འཁྲུལ་པའི་ཕྱིར་ཞེས་པ་འདིས་གསལ་བར་བྱས་སོ། །གང་ཞིག་གང་ལ་འཁྲུལ་པ་དེ་ནི་དེ་ལ་ཐེ་ཚོམ་གྱི་རྒྱུ་སྟེ། དཔེ་དེ་ཁོ་ནའོ། །རིགས་ཀྱི་
[240b.3]སྒྲ་ཡང་ཁྱད་པར་ལ་འཁྲུལ་པའོ། །རང་བཞིན་ནོ། །འོ་ན་རིགས་ཀྱི་སྒྲ་ལས་རང་གི་ཁྱད་པར་ཐམས་ཅད་རྟོགས་པ་མ་ཡིན་ནམ། ཐམས་ཅད་ལ་ཐེ་ཚོམ་ཉེ་བར་སྐྱེ་བ་ནི་མ་ཡིན་ཞིང་། རང་གི་ཁྱད་པར་ཐམས་ཅད་མེད་པ་ན་ནམ་ཡང་། རིགས་ཀྱི་སྒྲ་ནི་འགའ་ཞིག་ཏུ་ཡང་དོན་
[240b.4]གཞན་ལ་འཇུག་པ་ཉེ་བར་དམིགས་པ་ཡང་མ་ཡིན་ཏེ། དེས་ན་ཅིའི་ཕྱིར་འཁྲུལ་ཞེ་ན་སྐྱོན་འདི་མེད་དེ། རིགས་ཀྱི་སྒྲས་ཁྱད་པར་དང་ཁྱད་པར་མེད་པའི་ངོ་བོ་ལ་རེག་པས་རྟོགས་པར་བྱ་བ་ནི་མ་ཡིན་ཞིང་། གང་སྒྲས་བརྗོད་པར་བྱ་བ་ཁྱད་པར་མཐའ་དག་གི་ངོ་བོ་ཞེས་བྱ་བ་དེ་རྣམས་ཀྱི་སྤྱི་
[240b.5]ཡང་ཡོད་པ་མ་ཡིན་ཏེ། ཁྱད་པར་གྱི་ངོ་བོ་ཡོངས་སུ་གཏོང་བ་ན། དེ་རྣམས་ཁོ་ནའི་རིགས་ཉིད་དུ་ཐལ་བར་འགྱུར་བའི་ཕྱིར་རོ། །ཁྱད་པར་གྱི་ངོ་བོས་ཁྱབ་པ་ཡོད་པ་ཡང་མ་ཡིན་ཏེ། ཁྱད་པར་གྱི་ངོ་བོ་ནི་ཕན་ཚུན་ལོག་པ་ཉིད་ཀྱི་ཕྱིར་རོ་ཞེས་པས་མ་གྲུབ་པ་མེད་དོ། །གང་ཡང་
[240b.6]སེམས་པ་ཞེས་པ་སྐྱོན་སྔ་མ་མེད་པ་ལས་ཕྱོགས་གཞན་ཉེ་བར་དགོད་པའོ། །འབྲེལ་པ་སླ་བ་ཉིད་ཀྱི་ཕྱིར་དང་མི་འཁྲུལ་བའི་ཕྱིར་ཞེས་པ་སླ་བ་ནི་རིགས་གཅིག་ཉིད་ཀྱི་ཕྱིར་ཏེ། ཡུལ་མང་པོ་ཉིད་ཡོད་ནའང་སོ་སོར་བདག་ཉིད་ཐམས་ཅད་ཀྱིས་ཡོངས་སུ་རྫོགས་པ་ཉིད་ཀྱི་ཕྱིར་རོ། །
[240b.7]ཉེ་བ་ཉིད་ཀྱི་ཕྱིར་ཡང་རྟེན་ཉེ་བ་ཉིད་ཀྱིས་འབྲེལ་པའོ། །འབྲེལ་པ་རང་གི་རྟེན་ལ་འཕྲོད་པ་འདུ་བ་ཡང་འཁྲུལ་པ་ཡང་མེད་པ་ཁོ་ནའོ། །ཁྱད་པར་རྣམས་ནི་དུ་མ་ཉིད་ཀྱི་ཕྱིར་ཕན་ཚུན་མེད་པ་ལ་ཡང་ཡོད་པའི་འཁྲུལ་པར་རིགས་ཀྱི་རིགས་སམ་སྦྱོར་བ་ལ་ནི་མ་ཡིན་ཏེ། དེ་དག་ཐ་མི་དད་པའི་ཕྱིར་དང་།
[241a]
[241a.1]དེ་མེད་ན་ཡང་སྒྲ་མི་འཇུག་པའི་ཕྱིར་རོ། །དེ་མི་རིགས་ཞེས་པ་རིགས་པ་དང་འབྲེལ་པ་མ་ཡིན་ཞེས་པའི་དོན་ཏོ། །ཡང་འདིར་རིགས་པ་ཅི་ཞིག་ཅེ་ན། ལུང་ཞེས་བྱ་བའི་ཚད་མའོ། །ཅི་ལྟར་དེ་དང་འབྲེལ་པ་མ་ཡིན་ཞེ་ན། ཐ་དད་པའི། དོན་དང་ཐ་དད་མེད་ཐོས་ཕྱིར། །
[241a.2]གང་རྣམས་ཀྱི་དོན་ཐ་དད་ཡིན་པ་ཞེས་པ་སྟེ། ཐ་དད་པའི་དོན་ཅན་གྱི་བྱེ་བྲག་གི་སྒྲ་རྣམས་སོ། །དེ་རྣམས་དང་ཐ་དད་མེད་པར་ཐོས་པ་ནི་གཞི་མཐུན་པ་ཉིད་དེ། ཐ་དད་མེད་པ་སྟེ་གཞི་གཅིག་ལ་ཐོས་པ་ཞེས་བྱས་ནས་སོ། །ཡིད་ཆེས་པ་རྣམས་ལས་ཐ་དད་མེད་པར་ཐོས་པ་ཡོད་པའི་
[241a.3]རྫས་ཞེས་པ་ལ་སོགས་པ་མཐོང་བ་དེར་མི་འགྱུར་ན། དེ་ཡང་མཐོང་ངོ་ཞེས་པ་རིགས་དང་འབྲེལ་པ་རྗོད་པར་བྱེད་པ་དམ་བཅའ་བ་བསྟན་བཅོས་སུ་མཐོང་བས་གཞི་མཐུན་པ་ཉིད་ཀྱིས་གནོད་དོ་ཞེས་པའི་དོན་ཏོ། །ཡང་ན་གང་གིས་ཐ་དད་པའི་དོན་ཅན་རྣམས་དང་གཞི་མཐུན་པ་ཉིད་
[241a.4]ཡིན་པ་དེ་ནི་རིགས་དང་སྦྱོར་བ་བརྗོད་པ་མ་ཡིན་ཏེ། འདི་ལྟ་སྟེ། འདི་བུམ་པའོ་འདི་སྒྲའོ་ཞེས་པ་བཞིན། ཡོད་པའི་སྒྲའི་ཡང་ཐ་དད་པའི་དོན་ཅན་རྣམས་དང་གཞི་མཐུན་པ་ཉིད་ཡིན་ནོ་ཞེས་པ་ཁྱབ་བྱེད་དང་འགལ་བ་གསུངས་སོ། །ཡང་ཅིའི་ཕྱིར་བསྟན་པ་འདི་ལ་གཞི་མཐུན་པ་
[241a.5]ཉིད་དུ་མི་འགྱུར་ཞེ་ན་གསུངས་པ། ཡོད་པ་ཉིད་ཅེས་པ་ལ་སོགས་པའོ། །གང་གི་ཕྱིར་རྫས་དང་ཡོན་ཏན་དང་ལས་རྣམས་ལ་དོན་གཞན་པ་ཡོད་པ་ཉིད་བཤད་ལ། འབྲེལ་པ་ཡང་རྫས་ལ་སོགས་པ་དགག་པ་སྟེ། དངོས་པོ་ལ་ནི་བཤད་པའོ་ཞེས་པའོ། །འོ་ན་ཅི་ཞེ་ན། རྫས་ཀྱིའམ་
[241a.6]ཡོན་ཏན་གྱིའོ་ཞེས་པ། འབྲེལ་པའི་མཚན་ཉིད་ཀྱི་དྲུག་པས་འདིར་འབྱུང་བར་བྱའོ་ཞེས་པའི་དོན་ཏོ། །འོ་ན་རྫས་ལ་སོགས་པའི་སྒྲ་རྣམས་ཀྱིས་ཀྱང་རིགས་ཙམ་པོ་རྫས་ཉིད་ལས་བརྗོད་པར་བྱའོ་ཞེས་པས། དེ་ལས་གང་ལ་དྲུག་པའི་བརྗོད་པར་བྱ་བར་རིགས་ནི་རིགས་གཞན་
[241a.7]དང་འབྲེལ་པ་ཅི་ཞིག་ཡིན་ཞེ་ན། སྐྱོན་འདི་མེད་དེ། རྫས་ཉིད་དང་ལྡན་པ་ནི་རྫས་སུ་འདིར་ལྡན་པའི་དོན་ཅན་གྱི་རྐྱེན་དབྱི་བར་བྱས་ནས་བསྟན་ཏེ། གཞི་མི་མཐུན་པ་ཉིད་རབ་ཏུ་བསྟན་པའི་དོན་དུའོ། །གལ་ཏེ་འདི་ལྟར་བྱས་ན་ཡོད་པའི་སྒྲ་ལ་ཡང་ལྡན་པའི་དོན་ཅན་
[241b]
[241b.1]དབྱི་བར་བྱས་པ་ལས་གཞི་མཐུན་པ་ཉིད་དུ་འགྱུར་རོ་ཞེ་ན། འོ་ན་གང་གི་ཚེ་ཡོད་པ་ཉིད་ཙམ་བརྗོད་པར་འདོད་པ་ཉིད་ཀྱི་ཕྱིར་ལྡན་པའི་དོན་ཅན་མི་འཐད་པ་དེའི་ཚེ་འཐོབ་པ་མ་ཡིན་ནོ། །དེའི་ཚེ་ཡོད་པ་ནི་རྫས་ཀྱིས་ཞེས་འདོད་པ་ཡང་མ་ཡིན་ནོ། །འོ་ན་རྐྱེན་ཐམས་ཅད་བདག་ཉིད་རང་ཉིད་ཡང་དག་
[241b.2]པར་ཞུགས་པའི་ངོ་བོ་ཉིད་ཀྱི་ཕྱིར། འབྲེལ་པའི་སྒྲས་ཀྱང་རེ་ཞིག་འབྲེལ་པ་ཡོད་པ་བརྗོད་པར་བྱ་བ་མ་ཡིན་ན། རིགས་ཀྱི་སྒྲ་ཡིས་ག་ལས་ཡིན། །དེ་ཅི་ལྟར་བརྗོད་པར་བྱ་བ་དང་བཅས་པ་ཉིད་དུ་དོགས་པ་ཡིན་ཞེ་ན་གསུངས་པ། འབྲེལ་པའང་འདིར་ཞེས་པ་རང་གི་ཆོས་ཀྱིས་
[241b.3]བརྗོད་པར་བྱ་བ་ཉིད་ཀྱི་ཕྱིར་འབྲེལ་པ་བརྗོད་པར་བྱ་བར་བཤད་པ་ནི་མ་ཡིན་པ་ཁོ་ན་སྟེ། འོ་ན་ཅི་ཞེ་ན། འབྲེལ་པ་ཅན་གྱི་ཆོས་ཀྱིས་སོ། །ཡང་ཅི་ལྟར་འབྲེལ་པ་ཅན་གྱི་ཆོས་ཀྱིས་བཤད་པར་བྱ་བ་ཡིན་ཞེ་ན་གསུངས་པ། དེ་ལྟར་ཞེས་པ་ལ་སོགས་པ་འདིར་སྒྲའི་དོན་འགའ་ཞིག་
[241b.4]སྒྲ་འགའ་ཞིག་གིས་བརྗོད་པར་བྱ་བཞིན་པ་ནི་འབྲེལ་པ་ཅན་གཞན་ལ་དོགས་པ་ཉེ་བར་སྐྱེ་བའི་རྒྱུ་སྟེ། དེ་ལྟར་ནི་སྡུད་པ་ཡིན་ཞིང་སྡུད་པའི་སྒྲ་བརྗོད་པ་ན། ཕ་རོལ་དོགས་པ་ཉེ་བར་སྐྱེ་བའི་རྒྱུར་འགྱུར་ཏེ། དེ་ཁོ་ན་རྒོལ་བས་ཉེ་བར་ལེན་པ་ནི་ཅིའི་ཞེས་དོགས་པ་སྐྱེད་པར་བྱེད་པ་
[241b.5]ཡིན་པས་སོ། །དངོས་པོ་ཡང་དངོས་པོ་བསྒྲུབ་པའི་སྒྲས་བརྗོད་པར་བྱ་བ་ནི་ངེས་པར་ཡུལ་གཞན་ལ་དོགས་པ་སྐྱེད་པར་བྱེད་དོ་ཞེས་གསུངས་པ། དངོས་པོ་གཞན་གྱིས་སྦྱོར་བར་བྱ། །ཞེས་པའོ། །འོ་ན་རིགས་ལ་ཡང་འདི་སྐད་བརྗོད་པར་འཐད་པ་མ་ཡིན་ནམ། རིགས་
[241b.6]ཀྱི་སྒྲས་བརྗོད་པར་བྱ་བའི་རིགས་ཀྱང་འབྲེལ་པ་ཅན་གྱི་ངོ་བོར་བརྗོད་པར་བྱ་སྟེ། རྟའི་འམ་བ་ལང་གི་རིགས་སོ་ཞེས་པའོ་ཞེ་ན། འདི་ཡོད་པ་མ་ཡིན་ཏེ། འབྲེལ་པ་ཅན་ཡིན་ནའང་རིགས་ནི་རིགས་ཀྱི་ངོ་བོར་གཏོང་བ་མ་ཡིན་ཞིང་། འབྲེལ་པ་ནི་འབྲེལ་པ་ཅན་
[241b.7]ཉིད་ཡིན་ན་རང་གི་ངོ་བོ་ཉམས་པ་ཁོ་ནའོ་འབྲེལ་པ་གཞན་མེད་ན། འབྲེལ་པ་ཅན་ཉིད་མི་འཐད་པའི་ཕྱིར་རོ། །དེ་ལྟ་ན་ཡང་ཐུག་པ་མེད་པར་ཐལ་བར་འགྱུར་རོ། །འབྲེལ་པ་ཉིད་ནི་འབྲེལ་པའོ་ཞེས་པ་དངོས་པོ་ཉིད་དུ་འདི་སྟོན་པར་མཛད་དེ། དངོས་པོ་བྱས་ནས་བརྗོད་ཅེས་པའི་
[242a]
[242a.1]དངོས་པོ་ཞེས་པའི་དགོངས་པས་གསུངས་པའོ། །དངོས་པོའང་གཞན་གྱིས་སྦྱར་བར་བྱ། །ཞེས་པ། གང་དངོས་པོ་ཡིན་པ་དེ་ནི་གཞན་གྱིས་སྦྱར་བར་བྱ་བས་ཏེ་ཆོས་བཞིན་འབྲེལ་པ་ཡང་དེ་ལྟ་བུའོ་ཞེས་པའི་རང་བཞིན་གསུངས་སོ། །དེའི་
[242a.2]ཕྱིར་འབྲེལ་པ་ཅན་གྱི་ཆོས་ཀྱི་འབྲེལ་པ་བརྗོད་པར་བྱའོ་ཞེས་བྱས་ནས་དོགས་པའོ་ཞེས་པས་འབྲེལ་པའི་སྒྲས་ནི་འདི་ངོ་བོ་གཞན་གྱིས་བརྗོད་པར་བྱ་བར་མཐོང་སྟེ། དེ་ཡང་ཡོད་པའི་སྒྲ་དང་ཡོད་པའི་འབྲེལ་པའོ་ཞེས་གཞི་མཐུན་པའོ། །དེའི་ཕྱིར་ཡོད་པའི་སྒྲས་ཀྱང་
[242a.3]འབྲེལ་པ་ཅན་ཉིད་དུ་བརྗོད་པར་བྱའོ་ཞེས་རེས་འགའ་ཕ་རོལ་པོས་ཁས་ལེན་པ་ན་བྱེད་པས་ན་དོགས་པར་བྱས་ནས་དགག་པར་བརྗོད་དོ་ཞེས་སྟོན་ཏོ། རང་གི་ཆོས་ཀྱིས་ནི་ཞེས་པ། རང་གི་ངོ་བོས་ནི་འབྲེལ་པ་རྗོད་པར་བྱེད་པའི་སྒྲ་མེད་དོ་ཞེས་པའོ། །འདི་སྟེ་ཞེས་པ་བསྙེགས་
[242a.4]པར་རུང་བའི་ངོ་བོ་ཉིད་ཀྱིས་ཡོད་པ་མ་ཡིན་པར་གྱུར་པ་ཉིད་ཀྱི་ཕྱིར་རང་གི་ངོ་བོ་བརྗོད་པའི་ངོར་དོགས་པ་མེད་པ་ཁོ་ན་སྟེ། དེའི་ཕྱིར་འདི་རིགས་ཀྱི་སྒྲས་བརྗོད་པར་བྱ་བ་ཉིད་དུ་འཐད་པ་མ་ཡིན་ནོ་ཞེས་པའོ། །བྱེ་བྲག་གི་སྒྲ་རྣམས་ཀྱིས་ཞེས་པ་ལ་སོགས་པས་སྐྱོན་སྔ་མ་མེད་པ་ལས་
[242a.5]ཕྱོགས་གཞན་དགོད་པའོ། །རྫས་ལ་སོགས་པ་རྣམས་ནི་བྱེ་བྲག་གི་སྒྲ་རྣམས་སོ། །དེ་རྣམས་དང་གཞི་མཐུན་པ་ཉིད་ནི་དོན་གཅིག་ལ་འཇུག་པ་ཉིད་ཀྱི་ཕྱིར་རོ། །རྫས་གང་ཁོ་ན་ལ་ཡོད་པ་ཉིད་འཇུག་པའི་རྒྱུ་མཚན་ཉེ་བར་བླངས་ནས་ཡོད་པའི་སྒྲ་འཇུག་པ་དེ་ཁོ་ན་རྫས་ཀྱི་སྒྲ་རྫས་
[242a.6]ཉིད་ཀྱི་རྒྱུ་མཚན་ཅན་ཏེ་དེའི་ཕྱིར་གཞི་མཐུན་པ་ཉིད་འཐད་དེ། དེ་དང་ལྡན་པ་བརྗོད་པ་ན་ཡོད་པའི་རྫས་ཞེས་པའོ། །འབྲེལ་པ་མི་ནུས་པ་ཉིད་ཀྱང་མ་ཡིན་ཏེ། དེ་ཙམ་ནི་ཐ་མི་དད་པ་ཉིད་ཀྱི་ཕྱིར་རོ། །འདིར་ཁྱད་པར་རྣམས་བརྗོད་པ་ནི་མ་ཡིན་གྱི། འོན་ཀྱང་དེ་རྣམས་ཀྱི་རིགས་དང་ལྡན་པ་ཙམ་
[242a.7]གང་སྤྱིའི་ངོ་བོའོ། །དེ་ཡང་གཅིག་ཉིད་ཀྱི་ཕྱིར་འབྲེལ་པ་སླ་བའོ། །འཁྲུལ་པ་མེད་པ་ཡང་སྟེ། དེ་མེད་ན་སྒྲ་མི་འཇུག་པའི་ཕྱིར་རོ། །དེ་ཞེས་པ་ངག་ཉེ་བར་དགོད་པའི་དོན་ཏོ། །དེ་ལྡན་ཞེས་པ་རིགས་ལྡན་ཞེས་པའི་དོན་ཏོ། །རང་དབང་མེད་ཕྱིར་ཞེས་པ་ཕ་རོལ་ལ་ལྟོས་པའི་ཕྱིར་
[242b]
[242b.1]ཞེས་པའི་ཐ་ཚིག་གོ། །རང་དབང་མེད་པ་ཉིད་དེ་སྟོན་པ་གསུངས་པ། དེ་ལྟ་ན་ཡང་ཞེས་པ་ལ་སོགས་པའོ། །རིགས་དང་རང་གི་ངོ་བོ་ཡང་ཞེས་ཟླས་དབྱེ་བའོ། །རང་གི་ངོ་བོའི་སྒྲས་སྒྲའི་རང་གི་ངོ་བོ་གསུངས་སོ། །དེ་དག་ཉེ་བར་སྒྱུར་བར་བྱེད་པ་ནི་གཙོ་བོ་མ་ཡིན་པ་གང་གི་ཡིན་པ་དེ་དེ་
[242b.2]སྐད་བཤད་དོ། །ཙམ་སྨོན་པ་ནི་རྫས་ལ་རྟོགས་པའི་ཆོས་གཞན་གྱི་བྱེ་བྲག་དགག་པའི་དོན་ཏོ། །ཡང་ཅི་ལྟར་ན་རང་གི་ངོ་བོ་རྫས་ཀྱི་ཞར་ལ་བྱུང་བ་ཡིན། ཇི་ཙམ་དུ་རིགས་ཁོ་ན་དེའི་ཞར་ལ་བྱུང་བ་སྟེ། སྒྲ་ནི་རང་གི་ངོ་བོས་ཁྱད་པར་དུ་བྱས་པའི་རིགས་བརྗོད་ཅིང་། དེ་ལ་ཕྱིས་ཀྱི་དུས་སུ་སྒྲའི་
[242b.3]རང་གི་ངོ་བོས་ཁྱད་པར་དུ་བྱས་པའི་རྫས་སོ་ཞེ་ན། འདི་སྐྱོན་མ་ཡིན་ཏེ། ཕན་འདོགས་པ་དང་ཕན་འདོགས་པ་ཅན་རྣམས་ནི་ཕན་འདོགས་པ་ཅན་རང་གི་ཁྱད་པར་དུ་བྱེད་པ་ལ་ལྟོས་པ་ཅན་གྱིར་འགྱུར་ཏེ། ཁྱད་པར་དུ་བྱེད་པ་ནི་གཙོ་བོའི་ཕན་འདོགས་བྱེད་ཆེན་པོ་ལ་འཇུག་བཞིན་པ་ཉིད་ཀྱི་ཕྱིར་རོ། །
[242b.4]དཔེར་ན་རབ་ཏུ་མྱོས་མ་ནི་རང་གི་འགྲམ་པ་བྱུག་པ་ལ་སོགས་པའི་འདུ་བྱ་བ་སྔོན་དུ་སྒྲུབ་ཅིང་། དེ་ནས་འདུས་བྱས་པའི་དབང་གིས་མངོན་པར་འབྲེལ་པ་ནི། ཆེས་མཆོག་ཏུ་གྱུར་པའི་ཕན་འདོགས་པ་དེ་ལ་བྱེད་པ་བཞིན་ནོ། །དངོས་སུ་ནི་མ་ཡིན་ནོ་ཞེས་པ་བར་དུ་མ་ཆོད་པས་མ་ཡིན་པའོ། །དེར་
[242b.5]གཏོགས་པའི་བུམ་པ་ལ་སོགས་པའི་ཁྱད་པར་མ་འཕངས་པའི་ཕྱིར་ཞེས་པ། གང་དེ་རིགས་དང་ལྡན་པ་དེར་གཏོགས་པ་གང་ཁྱད་པར་བུམ་པ་ལ་སོགས་པ་རྣམས་ཏེ། དེ་རྣམས་མ་འཕངས་པའི་ཕྱིར་ཞེས་པའི་དོན་ཏོ། །རིགས་དང་རང་གི་ངོ་བོ་སྨོས་པ་ནི་གཉིས་ཀས་བར་དུ་ཆོད་པས་ན་ལྷག་
[242b.6]པར་གཞན་གྱི་དབང་ཉིད་རབ་ཏུ་བསྟན་པའི་དོན་དུའོ། །ཅི་སྟེ་འཕེན་པ་ཞེས་བྱ་བ་འདི་ཅི་ཞིག་མི་གཏོང་བའོ། །འོ་ན་བུམ་པ་ལ་སོགས་པ་རྣམས་ཀྱང་མ་བཏང་བ་མ་ཡིན་ནམ། ཡོད་པ་ཉིད་ཀྱི་རྟེན་ཉིད་ཀྱི་ཕྱིར་ཏེ། དེའི་རྟེན་ཡང་བརྗོད་པའི་ཕྱིར་རོ་ཞེ་ན། མ་ཡིན་ཏེ། བུམ་པ་ཉིད་ལ་སོགས་པ་
[242b.7]རྣམས་མི་འཕེན་པའི་ཕྱིར་རོ། །ཡོད་པའི་སྒྲ་ནི་ཡོད་པ་ཉིད་ཀྱི་གཞན་གྱི་དབང་ཉིད་ཀྱི་ཕྱིར་དེ་ལས་ཐ་དད་པའི་ངོ་བོ་བུམ་པ་ཉིད་ལ་སོགས་པ་རྣམས་མི་འཕེན་ནོ། །བུམ་པ་ཉིད་ལ་སོགས་པའི་ངོ་བོ་ཡང་དག་པར་གནས་པ་ལས་དངོས་པོ་དེ་བུམ་པའམ་སྣམ་བུར་འགྱུར་གྱི། རང་ལས་ནི་མ་
[243a]
[243a.1]ཡིན་ཏེ། དངོས་པོ་ཙམ་ལ་ཁྱད་པར་མེད་པའི་ཕྱིར་རོ། །དེའི་ཕྱིར་ཇི་ལྟར་བུམ་པའི་སྒྲས་བུམ་པ་ཉིད་ལ་སོགས་པ་དང་མ་འདྲེས་པ་ལས། བུམ་པ་ལ་སོགས་པ་རྣམས་མི་འཕེན་པ་དེ་ལྟར་ཡོད་པའི་སྒྲས་ཀྱང་ངོ་། །དེ་ལས་ཅི་ཡིན་ཞེ་ན། དེའི་ཕྱིར་དེ་ཁོ་ན་དེའི་
[243a.2]ཁྱད་པར་མ་ཡིན་པ་ཉིད་ན་གཞི་མཐུན་པ་ཉིད་མེད་དོ། །ཅི་ལྟར་བྱས་ནས་ཤེ་ན། གལ་ཏེ་ཡོད་པའི་སྒྲས་བུམ་པ་ལ་སོགས་པ་རྣམས་མི་འཕེན་ན། དེ་བས་ན་དེ་རྣམས་དེའི་བྱེ་བྲག་མ་ཡིན་ཏེ། མ་འཕངས་པའི་བྱེ་བྲག་རྣམས་ནི་མཐོང་བ་མ་ཡིན་པས་སོ། །དེའི་ཁྱད་པར་མ་ཡིན་པའི་ཕྱིར་ཡང་དེའི་
[243a.3]སྒྲ་དང་གཞི་མཐུན་པ་ཉིད་དུ་མི་འགྱུར་རོ། །ཅིའི་ཕྱིར་ཞེ་ན་གསུངས་པ། ཁྱབ་པ་ཡོད་པ་མིན་པ་ལ། །ཞེས་བྱ་བ་ལ་སོགས་པའོ། །ཁྱབ་པ་ནི་འཕེན་པ་སྟེ་ཇི་ལྟར་གཟུགས་ཀྱི་སྒྲས་མངར་བ་ལ་སོགས་པ་རྣམས་མི་འཕེན་ན། དེའི་ཁྱད་པར་མ་ཡིན་པ་ཉིད་ཀྱི་ཕྱིར། དེའི་སྒྲ་རྣམས་དང་གཞི་
[243a.4]མཐུན་པ་ཉིད་དུ་མི་འགྱུར་ཏེ་གཟུགས་སྐྱུར་བའོ་ཞེས་པ་མི་འགྱུར་བ་ལྟར་རོ། །ཁྱབ་པ་ན་ནི་འགྱུར་ཏེ་གཟུགས་སྔོན་པོའོ་ཞེས་པའོ། །དཔེར་ན་ཞེས་པ་ལ་སོགས་པ་དཔེ་ཉེ་བར་སྟོན་པའོ། །དཀར་བའི་སྒྲའི་རང་གི་བརྗོད་པར་བྱ་བའི་ཡོན་ཏན་ནི་རབ་ཏུ་འཇུག་པའི་རྒྱུ་མཚན་ཉིད་ཀྱི་ཕྱིར་དཀར་
[243a.5]པོ་ཉིད་དོ། །དེ་ནི་དེ་ཙམ་གྱིས་ཁྱད་པར་དུ་བྱས་པའི་རྫས་བརྗོད་པའི་ཕྱིར་ཡོད་ཀྱང་རྫས་ཀྱི་བདག་ཉིད་དེ་ལ་མངར་པོ་ལ་སོགས་པ་རྣམས་འཕེན་པ་མ་ཡིན་ཏེ། དེ་ནི་དཀར་པོ་ཉིད་བཞིན་དུ་མངར་པོ་ཉིད་ལ་སོགས་པ་རྣམས་འཇུག་པའི་རྒྱུ་མ་ཡིན་པས་སོ། །དེའི་ཕྱིར་དེའི་ཁྱད་པར་མིན་པ་
[243a.6]ཉིད་དོ་ཞེས་པ། མི་འཕེན་པའི་ཕྱིར་མངར་པོ་ཉིད་ལ་སོགས་པ་རྣམས་དཀར་པོའི་ཁྱད་པར་མ་ཡིན་ནོ་ཞེས་པའི་དོན་ཏོ། །དེ་བཞིན་དུ་འདིར་ཡང་ཐལ་བར་འགྱུར་རོ་ཞེས་པ་བསྒྲུབ་པར་བྱ་བ་ལ་དཔེ་ལ་བསྒྲུབ་པའི་དོན་ཉེ་བར་སྦྱོར་བར་བྱེད་དེ། ཡོད་པའི་སྒྲས་བུམ་པ་ལ་སོགས་པ་རྣམས་མི་
[243a.7]འཕེན་ཅིང་། མི་འཕེན་པའི་ཕྱིར་ཡང་དེའི་ཁྱད་པར་ཉིད་མ་ཡིན་ནོ་ཞེས་པའི་དོན་ཏོ། །དེ་འདིས་ཕ་རོལ་པོ་ལ་མི་འདོད་པ་འབྱུང་བའི་ཆེད་དུ། གང་ཞིག་ཁྱད་པར་དུ་བྱས་པའི་ཡོན་ཏན་རྣམ་པར་བཅད་པས་རྫས་གང་ཡིན་པ་བརྗོད་པ་དེ་ནི་དེར་གཏོགས་པའི་ཁྱད་པར་གཞན་མི་འཕེན་པ་
[243b]
[243b.1]ཡིན་ཏེ། དཀར་པོའི་སྒྲ་བཞིན་ཡོད་པའི་སྒྲ་ཡང་དེ་ལྟ་བུའོ་ཞེས་ཁྱབ་པར་བྱེད་པ་འགལ་བ་དང་། དེ་བཞིན་དུ་གང་རྣམས་གང་རྗོད་པར་བྱེད་པའི་སྒྲས་མ་འཕངས་པ་དེ་རྣམས་ནི་དེའི་ཁྱད་པར་རྣམས་མ་ཡིན་ཏེ། དཔེར་ན་མངར་པོ་ལ་སོགས་པ་རྣམས་དཀར་པོ་བཞིན། བུམ་པ་ལ་
[243b.2]སོགས་པ་རྣམས་ཀྱང་ཡོད་པ་ཉིད་རྗོད་པར་བྱེད་པའི་སྒྲས་མ་འཕངས་པ་རྣམས་སོ་ཞེས་པ་ཁྱབ་བྱེད་མེད་པ་དང་། དེ་བཞིན་དུ་གང་རྣམས་གང་གིས་བརྗོད་པར་བྱ་བའི་ཁྱད་པར་རྗོད་པར་བྱེད་པ་རྣམས་སུ་མི་འགྱུར་བ་དེ་རྣམས་དང་དེ་གཞི་མཐུན་པ་ཉིད་དུ་འགྱུར་བ་མ་ཡིན་ཏེ། འདི་ལྟ་སྟེ་སྐྱུར་པོ་ལ་
[243b.3]སོགས་པའི་སྒྲ་རྣམས་དང་གཟུགས་ཀྱི་སྒྲ་བཞིན་བུམ་པ་ལ་སོགས་པའི་སྒྲ་རྣམས་ཀྱང་ཡོད་པའི་སྒྲའི་བརྗོད་པར་བྱ་བའི་ཁྱད་པར་རྗོད་པར་བྱེད་པ་རྣམས་སུ་མི་འགྱུར་རོ་ཞེས་པ་ཁྱབ་པར་བྱེད་པ་མེད་པ་ཁོ་ན་སྟོན་ཏེ། འདིར་རིགས་ཀྱི་སྒྲས་དེ་དང་ལྡན་པ་བརྗོད་དོ་ཞེས་པ་འདི་བཤད་དོ། །དེ་ལྡན་
[243b.4]ལ་ཡང་སྒྲ་ལྡན་པའི་རྐྱེན་ཕྱིས་པ་ལས་སམ། ཐ་དད་མེད་པར་ཉེ་བར་བཏགས་པ་ལས་འཇུག་པ་ཡིན། དེ་ལ་ལྡན་པའི་རྐྱེན་གྱི་ཕྱོགས་ལ་དཀར་པོ་ལ་སོགས་པ་བཞིན་དུ་རྗོད་པར་བྱེད་པ་སྲིད་དོ་ཞེས་བརྗོད་པར་བྱ་བ་ཉིད་ཡོད་པ་ལ་སྐྱོན་གསུངས་སོ། །ཐ་དད་མེད་པར་ཉེ་བར་གདགས་པ་ལ་ནི་སྒྲོ་
[243b.5]བཏགས་པའི་ཡོད་པ་ཉིད་ཀྱི་ངོ་བོ་དེ་ཁོ་ན་རྗོད་པར་བྱེད་པའི་ཕྱིར་བརྗོད་པར་བྱ་བ་ཉིད་དུ་དེ་ལྡན་སྲིད་པ་མ་ཡིན་ནོ་ཞེས་བསྟན་པའི་ཆེད་དུ་གསུངས་པ། ཉེ་བར་བཏགས་ཕྱིར་ཞེས་པའོ། །རང་གི་ངོ་བོ་ཞེས་པ་གང་རྣམས་སྒྲའི་རང་གི་ངོ་བོ་བརྗོད་པར་བྱ་བར་འདོད་པ་དེའི་ལུགས་ཀྱིས་སོ། །
[243b.6]ཡང་ན་རིགས་ཞེས་པ་གང་རྣམས་རིགས་ཏེ། རང་གི་ངོ་བོ་ནི་མ་ཡིན་ནོ། །དེ་དང་ལྡན་པ་ལ་ཉེ་བར་བཏགས་པ་ཞེས་པ་རིགས་དང་ལྡན་པ་ལའོ། །རང་གི་ངོ་བོ་བརྗོད་པར་བྱ་བར་སྨྲ་བ་རྣམས་ཀྱི་ནི་རིགས་ལ་ཡང་ཉེ་བར་བཏགས་པའོ། །འདི་ནི་གཏན་ཚིགས་ཉེ་བར་སྟོན་པའོ། །གང་
[243b.7]ཞིག་གང་ལ་ཞེས་པས་རྗེས་འགྲོའོ། །ཡང་དག་པའི་དོན་སྨོས་པ་ནི་ཉེ་བར་བཏགས་པ་ལས། དེ་ལྟར་རྟོགས་པར་ཀུན་ནས་བསྟན་པའི་དོན་དུ་ངེས་པར་སྟོན་པ་བརྟག་པར་བྱའོ། །གང་ཞིག་གང་ལ་ཉེ་བར་བཏགས་པ་དེ་ནི་དོན་དེ་ཡང་དག་པར་བརྗོད་པ་མ་ཡིན་ཏེ། འདི་ལྟ་སྟེ།
[244a]
[244a.1]སྐྱེས་བུ་ལ་རྒྱལ་པོའི་སྒྲ་བཞིན། རིགས་ཀྱི་སྒྲ་ཡང་དེ་དང་ལྡན་པ་ལ་ཉེ་བར་བཏགས་པའོ་ཞེས་པ་ཁྱབ་བྱེད་དང་འགལ་བའོ། །དཔེ་ལ་བསྒྲུབ་པར་བྱ་བ་མ་ཚང་བ་ཉིད་དུ་དོགས་པར་བྱ་བ་མ་ཡིན་ཏེ། འདོད་པ་ཉིད་ཀྱི་ཕྱིར་རོ། །ཇི་སྐད་དུ་བཤད་པ།
[244a.2]ཁྲི་ཡི་སྒྲ་ནི་རྟེན་ཇི་བཞིན། །ཁྲི་རྣམས་ཁོ་ནར་རྣམ་གནས་པ། །དེ་ཉིད་དུ་བརྗོད་དེ་ལྟར་ནི། །རིགས་སྒྲ་རྫས་རྣམས་ལ་འཇུག་གོ། །ཞེས་སོ། །འདི་ནི་རྒྱལ་པོའོ་ཞེས་ཉེ་བར་བཏགས་བཞིན་པའི་རྒྱལ་པོའི་སྒྲ་ནི་ཡང་། ཡང་དག་པའི་དོན་དུ་འབངས་རྗོད་པར་བྱེད་པ་མ་ཡིན་པས་སོ། །
[244a.3]ཉེ་བར་བཏགས་པ་ཁོ་ན་ནི་དེ་ལྟར་འགྱུར་བ་མ་ཡིན་པས་ཏེ། འབངས་ཀྱི་སྒྲ་བཞིན་ནོ། །རྒྱལ་པོའི་དོན་དེ་ཁོ་ན་ནི་གཞི་ཐ་དད་པར་བརྗོད་པར་བྱའོ་ཞེས་པས་ཉེ་བར་བཏགས་པར་འགྱུར་རོ། །ཉེ་བར་བཏགས་པ་ནི་འདྲ་བའི་རྒྱུ་ཅན་ཉིད་ཀྱི་ཕྱིར་འདྲ་བ་བརྟག་པའི་ཆེད་དུ་དེ་དང་ལྡན་པ་ལ་ཡང་
[244a.4]ཞེས་པ་ལ་སོགས་པས་རྣམ་པར་དཔྱོད་པ་རྩོམ་མོ། །འོ་ན་ཕ་རོལ་ལ་ཡང་དེའི་ཁྱད་པར་དུ་བྱེད་པའི་རང་གི་ངོ་བོ་དོན་དམ་པར་མེད་པ་ཁོ་ན་མ་ཡིན་ནམ། ཉེ་བར་བཏགས་པའི་ཚིག་ལས་སོ། །དེ་ལྟར་ན་འདྲ་བ་མེད་པ་ཉིད་ལ་ཡང་ཉེ་བར་བཏགས་པ་དམིགས་ཏེ་བདག་པོ་དང་འབངས་
[244a.5]དག་ལའོ། །དེའི་ཕྱིར་ཡོན་ཏན་འདྲ་བ་དགག་པའི་འབད་པ་ནི་དོན་མེད་པའོ་ཞེ་ན། སྐྱོན་འདི་མེད་དེ་ཡོན་ཏན་དང་ཡང་དག་པར་སྦྱར་བས་བྱས་པའི་ངོ་བོ་ལྡོག་པས་ན། བརྗོད་པར་བྱ་བའི་ངོ་བོ་གཞན་མེད་པའི་ཕྱིར་བརྗེད་པར་བྱ་བ་མེད་པར་ཐལ་བ་ལ། ཕ་རོལ་པོ་རེས་འགའ་
[244a.6]འདྲ་བ་ལ་བརྟེན་པས་སོ་སོར་གནས་པར་འདོད་དེ། དེའི་ཕྱིར་ཡོན་ཏན་འདྲ་བ་དགག་པའི་ཚིག་གོ། །དེ་ལ་འདྲ་བ་ཉིད་ནི་འདྲེ་བར་བྱེད་པ་ལས་གྲུབ་པར་འགྱུར་རམ། རང་ཉིད་ཁོ་ན་ལས་སམ། རྟེན་གཞན་ལས་ཏེ་རྣམ་པ་གཞན་མེད་པའི་ཕྱིར་རོ། །དེ་ལ་རྟོགས་པ་འཕོ་བ་
[244a.7]ལས་མ་ཡིན་ཞེས་པ་འདིས་ནི་འདྲེ་བར་གྲུབ་པའི་འདྲ་བ་ཉིད་མེད་དོ་ཞེས་དམ་བཅའ་བ་གསལ་བར་བྱེད་དོ། །རྟོགས་པ་འཕོ་བས་ནི་འདྲ་བ་ཉིད་ཡོད་པ་ཁོ་ན་ངེས་པར་བྱེད་པ་འབའ་ཞིག་སྟེ། བྱེད་པ་ནི་མ་ཡིན་ནོ། །ཡོན་ཏན་གྱི་ཕན་འདོགས་པ་ལས་ཀྱང་མ་ཡིན་ཞེས་
[244b]
[244b.1]པ་འདིས་ན་གཞན་གྱིས་བྱས་པའི་འདྲ་བ་ཉིད་མེད་པ་ཉིད་དུ་དམ་བཅའོ། །ཡང་ཅི་ལྟར་དོན་སོ་སོ་ལ་ངེས་པ་སྐད་ཅིག་གིས་འཇིག་པའི་རྟོགས་པ་རྣམས་དོན་གཞན་ལ་འཕོ་བ་སྲིད་ཅེ་ན། འདི་བདེན་ཏེ་མི་སྲིད་པ་ཁོ་ནའོ། །དེ་ལྟ་ན་ཡང་རྣམ་པར་ཤེས་པ་འདྲ་བ་གཞན་སྐྱེ་བ་ལ་ཐ་དད་
[244b.2]མེད་པར་བཏགས་པའི་ཕྱིར་འཕངས་པའོ་ཞེས་བརྗོད་པའོ་ཞེས་པས་སྐྱོན་མེད་དོ། །རིགས་དང་དེ་དང་ལྡན་པ་གཉིས་ཀ་དག་རང་ཉིད་ཁོ་ན་ལས་འདྲ་བ་སྟེ། རིགས་ལ་སོགས་པ་རྣམས་ཀྱི་ངོ་བོ་རང་གི་རྟེན་དང་མཚན་ཉིད་མི་མཐུན་པ་ཅུང་ཟད་ཀྱང་ཉེ་བར་དམིགས་པ་མ་ཡིན་པ་སྟེ།
[244b.3]དེའི་ཕྱིར་དེ་དག་གི་འདྲེ་བ་གྲུབ་པ་ཁོ་ན་འདྲེ་བ་ཉིད་དོ་ཞེས་སེམས་པར་འགྱུར་བས་འདྲི་སྟེ། ཅི་ལྟར་རྟོགས་པ་འཕོ་བ་ལས་མ་ཡིན་ཞེ་ནའོ། །ཉེ་བར་བཏགས་པ་ཡིན་ན། བློ་ཡི་ངོ་བོ་ཐ་དད་ཕྱིར། །ཞེས་པ་རིགས་ལ་འཇུག་པའི་སྒྲ་དེ་དང་ལྡན་པ་ལ་ཉེ་བར་གདགས་པར་བྱ་བ་ཡིན་ན་ནི།
[244b.4]ཉེ་བར་བཏགས་པ་ཡིན་པ་ལ་རྣམ་པ་མཚུངས་པ་ཅན་གྱི་བློར་འགྱུར་བ་ཡང་མ་ཡིན་ནོ། །འདི་དཔེས་རྟོགས་པར་བྱེད་དེ། བྲན་ལ་རྒྱལ་པོར་བཏགས་པ་བཞིན། །ཞེས་པའོ། །དཔེར་ན་ཞེས་པ་ལ་སོགས་པས་ནི་འདི་ཁོ་ན་འཆད་དོ། །ཉེ་བར་བཏགས་པ་ཡང་ཞེས་པ་ལ་སོགས་
[244b.5]པས་ཕྱོགས་ཆོས་ཉེ་བར་སྟོན་ཏོ། །དེ་ལྟར་དེ་དང་ལྡན་པ་ལ་ཉེ་བར་བཏགས་པར་བརྗོད་པའི་ཕྱིར་རིགས་ལ་དངོས་སོ་ཞེས་བརྗོད་པར་འགྱུར་རོ། །དེ་འདིས་གང་དག་དངོས་དང་ཉེ་བར་བཏགས་པའི་སྒྲའི་བརྗོད་པར་བྱ་བ་དེ་དག་ནི་འདྲ་བ་མ་ཡིན་ཏེ། འདི་ལྟ་སྟེ། རྒྱལ་པོ་
[244b.6]དང་ཁོལ་པོ་དག་བཞིན། རིགས་དང་དེ་དང་ལྡན་པ་དག་ཀྱང་དངོས་དང་ཉེ་བར་བཏགས་པའི་སྒྲའི་བརྗོད་པར་བྱ་བ་དག་གོ་ཞེས་ཁྱབ་བྱེད་དང་འགལ་བ་གསུངས་སོ། །འོ་ན་ཉེ་བར་བཏགས་པ་སེང་གེའི་སྒྲ་དང་། དངོས་བྲམ་ཟེའི་ཁྱེའུའི་སྒྲས་ཀྱང་བྲམ་ཟེའི་ཁྱེའུ་
[244b.7]རྗོད་པར་བྱེད་པའི་ཕྱིར་མ་ངེས་སོ་ཞེ་ན། དེ་སྤང་བའི་ཆེད་དུ་གཅིག་སྨོས་པར་བྱ་སྟེ། དངོས་དང་ཉེ་བར་བཏགས་པའི་སྒྲ་གཅིག་གི་བརྗོད་པར་བྱ་བའི་ཕྱིར་རོ་ཞེས་བྱའོ། །ཡང་ཅི་ལྟར་རྗེ་བོ་དང་འབངས་དག་དངོས་དང་བཏགས་པའི་སྒྲ་གཅིག་གི་བརྗོད་པར་བྱ་བ་ཉིད་ཡིན། ཇི་ཙམ་དུ་
[245a]
[245a.1]གང་ཁོ་ན་ང་ཡིན་པ་དེ་ཁོ་ན་འདིའོ་ཞེས་སྒྲ་ཐ་དད་ཀྱི་བརྗོད་པར་བྱ་བ་ཉིད་ཁོ་ནའོ། །ཅི་སྟེ་རྒྱལ་པོའི་སྒྲ་གཅིག་ཁོ་ནས་ཇོ་བོ་དང་བྲན་དག་གཉིས་ཀ་བརྗོད་ན་ནི། སེང་གེའི་སྒྲ་ཁོ་ནས་གཉིས་ཀ་དག་རྗོད་པར་བྱེད་པའི་ཕྱིར་རོ། །ཁྱད་པར་དུ་བྱེད་པ་ཡོད་ན་ཡང་མ་ངེས་པ་དེ་
[245a.2]ཁོ་ནའོ། །ཅི་སྟེ་བྲམ་ཟེའི་ཁྱེའུ་ལ་སོགས་པ་གང་ཉེ་བ་མ་ཡིན་པ་རྟོགས་པར་བྱ་བ་ཉིད་ཀྱི་ཕྱིར་ན། བྲམ་ཟེའི་ཁྱེའུ་གཅིག་མ་ཡིན་པའི་ཚིག་གི་རྟོགས་པར་བྱ་བ་ཉིད་ན་ནི། རྒྱལ་པོ་དང་བྲན་དག་ཀྱང་ཚིག་གཞན་མ་གཏོགས་པར་རྒྱལ་པོའི་སྒྲ་འབའ་ཞིག་པས་རྗོད་པར་བྱེད་པ་
[245a.3]རྟག་པར་བྱ་བ་མ་ཡིན་པ་ཁོ་ནའོ། །དེའི་ཕྱིར་གཅིག་སྨོས་པ་བྱས་པ་ན་ཡང་དཔེ་སྒྲུབ་པར་བྱེད་པ་མ་ཚང་བའོ་ཞེ་ན། གཞན་ཡང་འདིར་འདྲ་བ་ཉིད་ནི་ཁྱད་པར་ཅན་ཁོ་ན་ཕ་རོལ་པོས་མངོན་པར་འདོད་དེ། གང་ཡོད་ན་གཉིས་ཀ་ལ་ཡང་དབང་པོའི་ཤེས་པ་རྣམ་པ་མཚུངས་པར་འགྱུར་བའོ་
[245a.4]རྣམ་པ་གཞན་དུ་ན། དངོས་པོ་ཐམས་ཅད་ཤེས་བྱ་ཉིད་ལ་སོགས་པའི་ཆོས་འགའ་ཞིག་གི་ཡོད་པ་ཉིད་དང་འདྲ་བ་ཡོད་དོ་ཞེས་པས་དངོས་པོ་ཐམས་ཅད་ཡོད་པའི་སྒྲའི་བརྗོད་པར་བྱ་བར་འགྱུར་རོ། །དེ་འགོག་ན་ཡང་ཁས་བླངས་པས་གནོད་པའོ། །དེའི་ཕྱིར་ཁྱད་པར་ཅན་
[245a.5]ཁོ་ནར་འདྲ་བ་ཕ་རོལ་པོས་འདོད་ཅིང་། དེས་ན་དགག་པ་ཡང་དེ་ཁོ་ན་ལ་བྱ་སྟེ། སེང་གེ་དང་བྲམ་ཟེའི་ཁྱེའུ་དག་ལ་རྣམ་པ་དེ་ལྟ་བུའི་འདྲ་བ་ཡོད་པ་ཡང་མ་ཡིན་ཞིང་། འཇིག་རྟེན་དུ་གྲགས་པ་ཡང་མ་ཡིན་ན་དེ་མ་ངེས་པ་ག་ལ་ཡིན། དེའི་ཕྱིར་ཁྱད་པར་བྱེད་པས་དོན་མ་ཡིན་
[245a.6]ནོ། །ཡང་འདིར་ཅི་ལྟར་ཁྱབ་པ་ཡིན། །འདི་ལ་འགལ་བ་འགའ་ཞིག་ཀྱང་མཐོང་བ་མེད་པའི་ཕྱིར་རོ་ཞེ་ན། བརྗོད་པར་བྱ་སྟེ། གལ་ཏེ་འདྲེས་པས་གྲུབ་པའི་རིགས་དང་དེ་དང་ལྡན་པ་དག་འདྲ་བ་ཉིད་དུ་འགྱུར་ན། དེས་ན་རིགས་ལ་ཡོད་པའི་སྒྲ་དངོས་དང་། དེ་དང་ལྡན་པ་
[245a.7]ལ་ཉེ་བར་བཏགས་པའོ་ཞེས་པའི་ཐ་དད་འདིར་འགྱུར་བ་མ་ཡིན་ཏེ་ཁྱད་པར་མེད་པའི་ཕྱིར་རོ། །དེ་ལྟར་ནི་ཇི་ལྟར་རིགས་རང་བཞིན་གྱིས་ཡོད་པའི་ངོ་བོ་ཡིན་པ་དེ་ལྟར་དེ་དང་ལྡན་པ་ཡང་ཡིན་ཞིང་། ཡོད་པའི་ངོ་བོ་ཉིད་ཀྱང་ཡོད་པའི་སྒྲའི་འཇུག་པའི་རྒྱུ་མཚན་ནོ་ཞེས་པ་གཉིས་
[245b]
[245b.1]ཀ་ལ་དངོས་ཉིད་དུ་འགྱུར་རོ། །དེ་ལྟར་འགྱུར་མོད་ཀྱི་ཡོད་པ་ཉིད་ནི་ཐ་མི་དད་པའི་ངོ་བོ་ཉིད་ཀྱི་ཕྱིར་དེ་ཁོ་ན་ལ་ཐ་མི་དད་པའི་ཡོད་པའི་སྒྲ་རིགས་ཀྱི། དེ་དང་ལྡན་པ་རྣམས་ལ་ནི་མ་ཡིན་ཏེ། དེ་རྣམས་ཐ་དད་པ་ཉིད་ཀྱི་ཕྱིར་ཞེ་ན། གལ་ཏེ་དེ་ལྟ་ན་ཡོད་པའི་ངོ་བོ་ཉིད་ནི་ཡོད་
[245b.2]པའི་སྒྲ་འཇུག་པའི་རྒྱུ་མཚན་མ་ཡིན་གྱི་འོ་ན་ཅི་ཞེ་ན། རྗེས་སུ་འགྲོ་བའི་ངོ་བོ་ཉིད་དོ། །དེ་ལས་ཀྱང་རིགས་གཞན་ལ་ཡང་དེ་རབ་ཏུ་འཇུག་པར་འགྱུར་ཏེ། དེ་ལ་ཡང་དེའི་ངོ་བོ་ཡོད་པའི་ཕྱིར་རོ། །གལ་ཏེ་ཐ་དད་པ་རྣམས་ལ་ཐ་མི་དད་པའི་སྒྲ་འཇུག་པ་མ་ཡིན་ཞེ་ན་ཐ་དད་
[245b.3]པའི་རིགས་རྣམས་ལ་རིགས་ཀྱི་སྒྲ་ཐ་མི་དད་པ་ཅི་ལྟར་འཇུག་དེ་ལ་རིགས་ཐམས་ཅད་ལ་ཁྱབ་པའི་རིགས་གཞན་གང་སྒྲ་འཇུག་པའི་རྒྱུ་མཚན་དུ་འགྱུར་བ་ཡོད་པ་མ་ཡིན་པའི་ཕྱིར་རོ། །དེ་ལྟར་འགྱུར་མོད་ཀྱི་རིགས་རྣམས་ལ་སྒྲའི་རང་གི་ངོ་བོ་ཁོ་ན་ཐ་མི་དད་པའི་རྒྱུ་མཚན་རྒྱུར་བྱས་ནས་
[245b.4]འཇུག་གོ་ཞེ་ན། གལ་ཏེ་དེ་ལྟ་ན་རིགས་དང་ལྡན་པ་དག་ལའང་དེ་ཉིད་ལ་བརྟེན་ནས་འཇུག་པར་འགྱུར་ཏེ། དེ་ལས་ཀྱང་དངོས་དང་ཉེ་བར་བཏགས་པའི་སྒྲའི་བརྗོད་པར་བྱ་བ་ཉིད་དུ་མི་འགྱུར་ན། དེ་ཡང་འདོད་དེ། དེའི་ཕྱིར་འདྲེས་པས་གྲུབ་པའི་འདྲ་བ་ཉིད་མེད་དོ་
[245b.5]ཞེས་པས་ཁྱབ་པ་གྲུབ་བོ། །འོ་ན་ཉེ་བར་བཏགས་པ་ལ་རྗོད་པར་བྱེད་པ་མེད་པའི་ཕྱིར། སྤྱི་ལས་ཉེ་བར་བཏགས་པ་སྒྲའི་བརྗོད་པར་བྱ་བ་ཉིད་ཡིན། གལ་ཏེ་ཡང་གཉིས་ཀ་དག་སྒྲའི་དོན་ཉིད་ན། གཉིས་ཀ་ལ་འབྲས་བུར་ཐལ་བར་འགྱུར་ཏེ། བ་ལང་ཁྱེར་ལ་ཤོག་ཅེས་
[245b.6]བརྗོད་པ་ན་མི་བླུན་པོ་ཡང་ཁྱེར་འོང་བར་འགྱུར་རོ་ཞེ་ན། ཕ་རོལ་པོས་དངོས་དང་ཉེ་བར་བཏགས་པ་སྒྲའི་བརྗོད་བྱ་ཉིད་དུ་རྟོགས་ཏེ། དེའི་ཕྱིར་དེ་ལ་བརྟེན་ནས་དེ་ལྟར་བཤད་དོ་ཞེས་པས་མི་སྐྱོན་ནོ། །འདྲ་བ་ཉིད་ནི་དབང་པོའི་རྟོགས་པ་འཕོས་པས་ཡོངས་སུ་གཅད་པར་བྱ་
[245b.7]བའམ། སྒྲ་ལས་བྱུང་བའི་རྟོགས་པ་འཕོས་པས་ཡིན། དེ་ལ་དབང་པོའི་རྟོགས་པ་འཕོས་པས་རིགས་དང་དེ་དང་ལྡན་པ་དག་གི་འདྲ་བ་ཉིད་ངེས་པར་བྱ་བ་མ་ཡིན་ནོ་ཞེས་པ་འདི་ཕལ་ཆེར་བསྒྲུབས་ཟིན་ཏེ། སྤྱི་མི་མཐོང་བར་སྒྲུབ་པར་བྱེད་པས་སོ། གལ་ཏེ་ཡང་
[246a]
[246a.1]སྤྱི་འགྱུར་དུ་ཆུག །དེར་དེའི་གཞན་མཐོང་སྟེ། རྟེན་མི་མཐོང་བའི་ཕྱིར་མི་འགྱུར་རོ་ཞེས་པ་ལ་སོགས་པས་སོ། །སྣང་རུང་མ་ཡིན་པ་དང་ལྷན་ཅིག་འགའ་ཞིག་གི་ཡང་འདྲ་བ་ཉིད་རྟོགས་པར་ནུས་པ་མ་ཡིན་ཞིང་། སྒྲ་ལས་བྱུང་བའི་རྟོགས་པས་འཕོ་བར་ཡང་
[246a.2]ངེས་པར་བྱ་བ་མ་ཡིན་ནོ་ཞེས་སྟོན་པ་གསུངས་པ། རིམ་གྱིས་བརྗོད་པ་མ་ཡིན་ཕྱིར། །ཞེས་པ་སྟེ་རིགས་དང་དེ་དང་ལྡན་པ་དག་ལ་ནི་སྒྲ་ལས་བྱུང་བའི་རྟོགས་པ་འཕོ་བའི་རྒྱུ་རིམ་གྱིས་སྒྲ་སྦྱོར་བ་མེད་པའི་ཕྱིར་རོ་ཞེས་པའི་དོན་ཏོ། །གལ་ཏེ་རིགས་ལ་དང་དེ་དང་ལྡན་པ་ལ་རིམ་པས་སྒྲ་སྦྱོར་བར་
[246a.3]གྱུར་ན། དེ་ལས་སྒྲ་ལ་རིགས་ལ་རྟོགས་པ་གང་འདྲ་བར་འགྱུར་བ་དེ་འདྲ་བ་ཁོ་ན་དེ་དང་ལྡན་པ་ལ་ཡང་ཞེས་པ་རྟོགས་པ་འཕོ་བར་འགྱུར་ན། རིམ་པས་སྒྲ་སྦྱོར་བ་ཡང་མ་ཡིན་གྱི། འོ་ན་ཅི་ཞེ་ན་ཅིག་ཅར་ཁོ་ནའོ། །དེ་ལས་ཀྱང་རྟོགས་པ་གཅིག་ཁོ་ནའོ་ཞེས་པས། གང་ལས་རྟོགས་
[246a.4]པ་འཕོ་བ་ཡིན་ཞེས་པ་འདི་ནི་གཏན་ཚིགས་སོ། །ཀུན་ད་དུང་སོགས་དཀར་པོ་བཞིན། །ཞེས་པ་ཆོས་མི་མཐུན་པ་ཉིད་ཀྱི་རྗེས་འགྲོའོ། །རིགས་དང་དེ་དང་ལྡན་པ་དག་ལ་སྒྲ་ཅིག་ཅར་ཞེས་པ་ཉེ་བར་སྦྱོར་བའོ། །འདིས་ནི་དོན་གྱིས་གོ་བས་རིམ་གྱིས་སྒྲ་སྦྱོར་བ་མེད་པར་སྟོན་ཏོ། །གང་ལ་སྒྲ་
[246a.5]ལས་བྱུང་བའི་རྟོགས་པ་འཕོ་བ་དེ་ལ་རིམ་གྱིས་དེའི་རྒྱུས་སྒྲ་སྦྱོར་ཏེ། འདི་ལྟ་སྟེ་ཀུན་ད་ལ་སོགས་པ་རྣམས་ལ་བཞིན། རིགས་དང་དེ་དང་ལྡན་པ་དག་ཀྱང་སྒྲ་ལས་བྱུང་བའི་རྟོགས་པ་འཕོ་བའི་རྒྱུས་རིམ་གྱིས་སྒྲ་སྦྱོར་བ་མེད་དོ། །རྒྱུ་མི་དམིགས་པའོ། །རྟོགས་པ་འཕོ་བ་བཀག་པས་
[246a.6]ཀྱང་འདྲ་བ་ཉིད་མེད་པའི་ཐ་སྙད་འགྲུབ་པའི་ཆེད་དུ་རང་བཞིན་མི་དམིགས་པ་གསལ་བར་བྱས་སོ་ཞེས་པས་དེའི་སྦྱོར་བ་བརྗོད་པར་བྱ་སྟེ། རྟོགས་པ་འཕོ་བ་ལས་འདྲ་བ་ཉིད་ཡོད་པ་མ་ཡིན་ནོ་ཞེས་པ། རྟོགས་པ་འཕོ་བ་ལས་ནི། གང་འདྲེས་པས་འགྲུབ་པའི་འདྲ་བ་ཉིད་ངེས་པར་
[246a.7]བྱ་བ་དེ་ཡོད་པ་མ་ཡིན་ནོ་ཞེས་པའི་དོན་ཏོ། །རང་ཉིད་ལས་འདྲ་བ་ཉིད་དུ་མི་འགྱུར་མོད། རིགས་ཀྱིས་ཉེ་བར་བསྒྱུར་བའི་ཕྱིར་ནི་རྫས་དེ་རང་ཉིད་དེའི་ངོ་བོ་མ་ཡིན་ཡང་དེ་ལྟར་རབ་ཏུ་གསལ་ཏེ། ཇི་ལྟར་ཤེལ་དང་ཉེ་བར་གཞག་པའི་དབང་ལས་རང་ཉིད་དེའི་ངོ་བོ་མ་ཡིན་པ་ཡང་
[246b]
[246b.1]དེའི་ངོ་བོ་ཉིད་བཞིན་ནོ་ཞེ་ན། དེའི་ཕྱིར་གསུངས་པ། ཡོན་ཏན་གྱིས་ཕན་འདོགས་ཕྱིར་དེའི་ངོ་བོ་ལ། རབ་གྱུར་འགྱུར་ཞེས་པ་ལ། རབ་གྱུར་ཞེས་པ་ཡུལ་གྱི་ཡུལ་ཅན་རབ་ཏུ་གྱུར་པའི་བློ་བསྟན་ཏེ་རབ་ཏུ་གྱུར་པའི་བློར་འགྱུར་རོ་ཞེས་པའི་དོན་ཏོ། །ཡང་ཅིའི་ཕྱིར་སྐྱོན་འདི་འགོད་པར་བྱེད་དེ།
[246b.2]ཇི་སྲིད་དུ་མཐོང་བ་ཁོ་ནས་རྫས་ལ་རབ་ཏུ་གྱུར་པའི་བློ་ཡིན་ཞེ་ན། བློ་མེད་ཀྱང་ཞེས་པ་ཡོན་ཏན་རབ་ཏུ་གྱུར་པའི་བློ་མེད་པར་ཡང་ཞེས་པའི་དོན་ཏོ། །གལ་ཏེ་ཤེལ་བཞིན་དུ་ཡོན་ཏན་གྱིས་ཉེ་བར་བསྒྱུར་བའི་ཕྱིར། དེ་དང་ལྡན་པ་ཡོན་ཏན་གྱི་རང་གི་ངོ་བོར་འགྱུར་ན། དེ་ལྟར་གྱུར་ན་མཆོག་ཏུ་
[246b.3]སྔོ་བའི་རས་ཞེས་རྫས་ལ་ཁྱད་པར་གྱི་རབ་ཏུ་གྱུར་པའི་བློ་ལ་མ་ལྟོས་པའི་རབ་ཏུ་གྱུར་པའི་བློར་འགྱུར་རོ། །ཁྱད་པར་རབ་ཏུ་གྱུར་པ་མ་བཟུང་བར་ཁྱད་པར་དུ་བྱ་བ་ལ་རབ་ཏུ་གྱུར་པའི་བློར་འགྱུར་བ་ཡང་མ་ཡིན་ཏེ། རྫས་ལ་རང་ཉིད་ལས་རབ་ཏུ་གྱུར་པ་དང་ཉམས་པ་མེད་པའི་ཕྱིར་རོ། །སྣམ་བུ་ནི་
[246b.4]རང་ཉིད་ཁོ་ན་ལས་སྣམ་བུ་གཞན་ལས་རབ་ཏུ་གྱུར་པ་མ་ཡིན་གྱི། འོན་ཀྱང་སྔོན་པོ་ཉིད་ལ་སོགས་པ་བརྟེན་པར་བྱས་པའི་ཡོན་ཏན་ལས་ཏེ། ཉེ་བ་མ་ཡིན་པའི་དངོས་པོའི་རང་གི་ངོ་བོ་ལས་ཤེས་པ་མི་སྲིད་པའི་ཕྱིར་རོ། །ཡོན་ཏན་གྱི་སྒྲ་ཡང་འདིར་འདྲེས་པའི་ཡོན་ཏན་རྗོད་པར་
[246b.5]བྱེད་པ་ཡིན་གྱི། དཀར་པོ་ཉིད་ལ་སོགས་པ་རྣམས་དེས་ཡོན་ཏན་བརྗོད་པར་འདོད་པ་རྣམས་ནི་མ་ཡིན་ཏེ། ཆེས་འཚེད་པར་བྱེད་པ། ཆེས་གཅོད་པར་བྱེད་པ་ཞེས་ཡོན་ཏན་རབ་ཏུ་གྱུར་པ་ལ་ལྟོས་པ་མེད་པ་ཁོ་ནར་ཕུལ་དུ་གྱུར་པའི་རྟོགས་པར་མི་འགྱུར་རོ། །ཡང་ཅིའི་ཕྱིར་
[246b.6]ཡོན་ཏན་རབ་ཏུ་གྱུར་པ་ལ་ལྟོས་པ་མེད་པར་རྫས་ལ་རབ་ཏུ་བྱུང་བའི་བློར་ཐལ་བར་འགྱུར་ཞེ་ན་གསུངས་པ། མ་ཡིན་ཞེས་པ་ལ་སོགས་པ་སྟེ། ཉེ་བར་གཞག་པས་དེའི་ངོ་བོ་ཉིད་ཉེ་བར་བསྒྲུབ་པ་ན་ཤེལ་ལ་ཉེ་བའི་རྟེན་རྟོགས་པ་ལ་ལྟོས་པའི་ཚོན་གྱི་བློ་འཇུག་པ་མ་ཡིན་ཏེ། ཅིའི་ཕྱིར་
[246b.7]ཞེ་ན་གསུངས་པ། མ་བྱང་བ་ལ་ཞེས་པ་ལ་སོགས་པ་སྟེ། མ་བྱང་བ་ལ་ཤེལ་དང་ཉེ་བར་གཞག་པ་དག་ལ་ཐ་དད་པའི་བློར་གྱུར་པ་མ་ཡིན་ཏེ། དེ་ནི་ཤེལ་འདི་ཁོ་ན་རྣམ་པ་འདིའོ་ཞེས་ལྷག་པར་ཞེན་ཏོ། །བྱང་བ་ལ་ནི་དམར་པོ་འདི་ནི་ཤེལ་ལོ་ཞེས་ངེས་པ་མི་འཐད་པ་ཁོ་ནའོ། །རབ་ཏུ་གྱུར་པ་
[247a]
[247a.1]སྨོས་པ་ནི་ཡོན་ཏན་ལ་ལྟོས་པའི་རྟོགས་པ་གཞུང་གཟུགས་པའི་དོན་དུ་སྟེ། གཞན་དུ་ན་ངེས་པར་བྱ་བཞིན་པའི་རིགས་ཀྱང་རིགས་དང་ལྡན་པའི་དོན་ལ་ཕན་འདོགས་པར་འཇུག་ཅིང་། དེ་ལས་ཀྱང་དེས་ཕན་འདོགས་པ་ལས་དེ་ལྟར་སྣང་ངོ་ཞེས་ཁ་ཅིག་སོ་
[247a.2]སོར་གནས་སོ། །རབ་ཏུ་གྱུར་པ་ནི་ངེས་པར་སྦྱོར་བ་ལས་དེར་ངེས་པ་ལ་ལྟོས་པའི་རྟོགས་པས་ཡོངས་སུ་གཅད་པར་བྱ་བ་ཁོ་ན་སྟེ། རྫས་ནི་རང་ཉིད་ལས་རབ་ཏུ་གྱུར་པ་མེད་པའི་ཕྱིར་རོ། །རྫས་ནི་རང་ཉིད་ལས་རྫས་གཞན་ལས་ཕུལ་དུ་བྱུང་བར་བྱ་བར་ནུས་པ་མ་ཡིན་ཏེ། རང་གི་
[247a.3]ངོ་བོ་ཙམ་གྱིས་སྨྲ་བར་རམ་རྟོགས་པར་ནུས་པ་མ་ཡིན་པ་ཉིད་ཀྱི་ཕྱིར། འོ་ན་རིགས་པ་ནི་རབ་ཏུ་གྱུར་པ་མེད་པའི་ཕྱིར། དེ་ལ་མི་ལྟོས་པའི་ཁྱད་པར་ཅན་རྟོགས་སོ་ཞེ་ན། འདི་སྐྱོན་མ་ཡིན་ཏེ། ཁྱད་པར་ཅན་རྟོགས་པ་ནི་སྔོན་པོ་ལ་སོགས་པ་ལ་ནི་ཁྱད་པར་ལ་ལྟོས་པ་སྟེ། དེས་ན་ཡོད་པ་ལ་
[247a.4]སོགས་པའི་ཁྱད་པར་ལ་ལྟོས་པ་ནི་ཁྱད་པར་ཅན་ལ་ཡོད་པ་ལ་སོགས་པའི་རྟོགས་པ་སྔོན་པོ་ལ་སོགས་པ་རྟོགས་པ་བཞིན་དུའོ་ཞེས་བཤད་པར་འགྱུར་རོ། །གཞན་དུ་ན་གལ་ཏེ་རང་གི་རྟེན་ལ་མ་བཟུང་བའི་ཡང་བ་ལང་ཉིད་ལ་སོགས་པའི་རིགས་ཀྱིས་བ་ལང་ལ་སོགས་པ་རྟོགས་པར་བྱེད་ན་གང་གི་ཚེ་འདི་ནི་རྫས་
[247a.5]ཅི་ཞིག་གོ་ཞེས་རྫས་ཙམ་ཉེ་བར་དམིགས་པ་ན་བ་ལང་ཉིད་ལ་སོགས་པ་རྣམས་གཟུང་བྱ་མ་ཡིན་པ་དེའི་ཚེ་ཡང་བ་ལང་ལ་སོགས་པ་ངེས་པར་འགྱུར་ན་འགྱུར་བ་ཡང་མ་ཡིན་ནོ། །དེའི་ཕྱིར་རིགས་ལ་ལྟོས་པ་མེད་པར་དེ་དང་ལྡན་པ་ལ་རྟོགས་པ་ནི་མ་ཡིན་ནོ། །གང་ཞིག་ཁྱད་པར་ལ་ལྟོས་པར་
[247a.6]རྟོགས་པ་ཡོངས་སུ་གཅད་པར་བྱ་བ་དེ་ནི་ཡོན་ཏན་ཕུལ་དུ་བྱུང་བས་བསྒྲུབས་པའི་ཡོན་ཏན་འདྲ་བ་ཉིད་མ་ཡིན་ཏེ། དབྱུག་པ་ཅན་བཞིན། དེ་དང་ལྡན་པ་དང་དེ་ལྟ་བུའོ་ཞེས་པ་ཁྱབ་བྱེད་དང་འགལ་བའོ། །ཆོས་མི་མཐུན་པ་ཉིད་ཀྱི་སྦྱོར་བ་ནི་ཤེལ་གྱི་དཔེས་སྦྱར་བར་བྱའོ། །འདྲེས་པའི་ངོ་བོའི་
[247a.7]ཕྱིར་ཀུན་ལ། །ལོག་པའི་ཤེས་པར་ཐལ་བར་འགྱུར། །ཡོན་ཏན་གྱིས་ཕན་འདོགས་པ་ལས་དེའི་ངོ་བོ་ཉིད་དུ་ཁས་བླངས་པ་ནའོ། །ཅི་ལྟར་ཞེ་ན་གསུངས་པ། ཐམས་ཅད་ནི་ཞེས་པ་ལ་སོགས་པ་སྟེ། འདྲེས་པའི་ཁྱད་པར་ནི་ཡོན་ཏན་ཞེས་པ་དོན་གཅིག་པའོ། །སྒྲ་ལས་བྱུང་བའི་
[247b]
[247b.1]རྟོགས་པ་ཐམས་ཅད་ནི་དོན་རྣམས་ལ་འདྲེས་པའི་ངོ་བོས་བར་དུ་ཆོད་པ་སྟེ། དེའི་ཕྱིར་གལ་ཏེ་ཡོན་ཏན་གྱིས་ཕན་འདོགས་པའི་ཕྱིར་ཡོན་ཏན་ཅན་ལ་དེའི་ངོ་བོ་ཉིད་དུ་འགྱུར་ན། དེ་ལྟར་གྱུར་ན་ཇི་ལྟར་ཤེལ་སྔོན་པོའོ་ཞེས་འཛིན་པ་ནི་དོན་ཇི་ལྟ་བ་ཡིན་པའི་རྟོགས་པ་སྟེ། ཤེལ་ནི་རང་ཉིད་ལས་
[247b.2]སྔོན་པོ་མ་ཡིན་པ་ཉིད་ཀྱི་ཕྱིར་ཏེ། དེ་ལྟར་བུམ་པའོ་ཞེས་པ་ལ་སོགས་པ་སྒྲ་ལས་བྱུང་བའི་རྟོགས་པ་ཐམས་ཅད་ཇི་ལྟ་བའི་དོན་ཅན་མ་ཡིན་པར་འགྱུར་ཏེ། རྫས་ནི་རང་ཉིད་ལས་བུམ་པ་ལ་སོགས་པའི་ངོ་བོ་མེད་པའི་ཕྱིར་རོ། །འདོད་པའང་མ་ཡིན་ནོ། །དེ་འདིས་ནི་གང་ཞིག་དོན་ཇི་ལྟ་བ་བཞིན་པའི་
[247b.3]རྟོགས་པའི་ཡུལ་དེ་ནི་ཁྱད་པར་དུ་བྱེད་པའི་རང་གི་ངོ་བོ་མ་ཡིན་ཏེ། འདི་ལྟ་སྟེ་དབྱུག་པ་ཅན་བཞིན། དེ་དང་ལྡན་པའང་དེ་ལྟ་བུའོ་ཞེས་པ་ཁྱབ་བྱེད་དང་འགལ་བ་གསུངས་སོ། །ཁྱབ་པ་མེད་པར་འདི་ལ་དོགས་པར་བྱ་བ་མ་ཡིན་ཞིང་དོན་ཇི་ལྟ་བ་བཞིན་མ་ཡིན་པ་ཉིད་དུ་ཐལ་བར་འགྱུར་བ་ནི་མི་
[247b.4]འདོད་པ་ཉིད་དོ། །སྤྱི་ལ་སོགས་པ་མང་ཉིད་ནའང་། །ཞེས་པ་ལ་སོགས་པ་སྟེ། སོགས་པ་སྨོས་པ་ལས་ཡོན་ཏན་དང་བྱ་བ་འཛིན་ནོ། །ཅིག་ཅར་འཛིན་བྱེད་རྣམས་ལ་ཡང་། །ཞེས་པ། གང་གི་ཚེ་དུས་གཅིག་ཏུ་རྟོགས་པ་པོ་མང་པོ་རྣམས་ཁྱད་པར་ཐ་དད་པ་རྣམས་ཀྱི་དོན་གཅིག་རྟོགས་
[247b.5]པར་བྱེད་པ་དེའི་ཚེ། ཕན་འདོགས་པ་ནི་འགལ་བར་འགྱུར། །ཡོན་ཏན་བྱས་པའོ། །དེ་དཔེར་བརྗོད་ཀྱིས་སྟོན་པ་གསུངས་པ། དཔེར་ན་ཞེས་པ་ལ་སོགས་པའོ། །ཅིའི་ཕྱིར་འགལ་བར་འགྱུར་ཞེ་ན། མི་ནུས་ཞེས་པ་ལ་སོགས་པ། འདིར་རྟོགས་པ་གསུམ་སྟེ། གང་ཡང་
[247b.6]རུང་བའི་ཡོན་ཏན་གྱི་ངོ་བོ་རྟོགས་པའམ། ཐམས་ཅད་ཀྱི་ཡང་ཕྱོགས་གཅིག་རྣམས་ཀྱིས་སམ། བདག་ཉིད་ཐམས་ཅད་ཀྱི་ཐམས་ཅད་ཁོ་ནའི་ཡིན་ཞེས་པའོ། །དེ་ལ་རེ་ཞིག་རེ་རེ་ཁོ་ནའི་མ་ཡིན་ཏེ། ཁྱད་པར་མེད་པའི་ཕྱིར་རོ། །གང་ལས་གཅིག་ཁོ་ནའི་ངོ་བོ་རྟོགས་པར་འགྱུར་གྱི་གཞན་མ་
[247b.7]ཡིན་པ་ཡོད་པ་ཉིད་ལ་སོགས་པ་རྣམས་ལ་ཁྱད་པར་འགའ་ཡང་ཡོད་པ་མ་ཡིན་པས་སོ། །ཡང་ན་རྟོགས་པ་པོ་རྣམས་ལ་ཁྱད་པར་མེད་པའི་ཕྱིར་ཏེ། རྟོགས་པ་པོ་གཅིག་གི་ངོར་ཁྱད་པར་གཅིག་ཁོ་ནའི་ངོ་བོའི་རྗེས་སུ་བྱེད་པ་མ་ཡིན་ནོ། །ཕྱོགས་གཅིག་གི་ཡོན་ཏན་གྱི་ངོ་བོ་ཉམས་སུ་མྱོང་
[248a]
[248a.1]བར་ནུས་པ་ཡང་མ་ཡིན་ཏེ། ཅིའི་ཕྱིར་ཞེ་ན་གསུངས་པ། མཐའ་དག་ཅེས་པ་ལ་སོགས་པ་སྟེ། གལ་ཏེ་ཕྱོགས་གཅིག་གི་ཁྱད་པར་གྱི་ངོ་བོ་རྟོགས་པར་གྱུར་ན། དེའི་བུམ་པ་ཞེས་དེའི་ཕྱོགས་གཅིག་རྟོགས་པར་འགྱུར་ཏེ། དེ་ལྟར་ས་ལས་གྱུར་པའོ་
[248a.2]རྫས་སོ་ཞེས་པ་ལ་སོགས་པའོ། །གསུམ་པའི་ཕྱོགས་ལ་ནི་སྐྱོན་གསུངས་པ། ཀུན་གྱིས་ཡིན་ན་འདྲེས་མཐོང་འགྱུར་རོ། །ཞེས་པ། ཀུན་གྱིས་ཏེ། བུམ་པ་ཉིད་དང་ས་ལས་གྱུར་པ་ཉིད་ལ་སོགས་པའི་ཁྱད་པར་རྣམས་ཀྱི་དངོས་པོ་མཐའ་དག་ལ་ཅིག་ཅར་ཕན་འདོགས་ན། དེའི་ངོ་བོ་
[248a.3]བླངས་པ་ན། བུམ་པ་ལ་སོགས་པའི་ངོ་བོ་རྣམ་པར་ཕྱེ་ནས་འཛིན་པ་མེད་པའི་ཕྱིར། རྣམ་པར་དབྱེ་བ་མེད་པས་ཕན་ཚུན་ཡང་དག་པར་ཐ་དད་པའི་ངོ་བོ་དུ་མ་འཛིན་པར་འགྱུར་གྱི། རྣམ་པར་དབྱེ་བས་ནི་མ་ཡིན་ཏེ། བུམ་པ་འདིའོ་ས་ལས་གྱུར་པའོ་ཞེས་པ་ལ་སོགས་པའོ། །ཅིའི་ཕྱིར་ཞེ་ན་
[248a.4]གསུངས་པ། ཅིག་ཅར་ངོ་བོ་ཐམས་ཅད་རྟོགས་པའི་ཕྱིར་ཞེས་པ། གང་ལས་རྫས་དེ་ཐམས་ཅད་ཀྱི་ངོ་བོ་ཅིག་ཅར་རྟོགས་པར་འགྱུར་བའོ། །དེས་ན་འདི་ལྟར་ཕན་འདོགས་པ་འགལ་བའི་ཕྱིར་བུམ་པ་ལ་སོགས་པའི་ངོ་བོར་འཛིན་པར་མི་འགྱུར་ན་དེ་ཡང་ཡོད་དོ། །དེ་འདིས་ནི་གང་ཞིག་
[248a.5]ཅིག་ཅར་ཁྱད་པར་དུ་མའི་རྗེས་སུ་བསྒྲུབས་པའི་རྟོགས་པས་ཡོངས་སུ་གཅད་པར་བྱ་བ་དེ་ནི་ཁྱད་པར་གྱི་ངོ་བོ་རྟོགས་པ་མ་ཡིན་ཏེ། འདི་ལྟ་སྟེ། དཔུང་རྒྱན་དང་རྣ་རྒྱན་ཞེས་པ་བཞིན་དེ་དང་ལྡན་པའི་དངོས་པོ་ཡང་དེ་ལྟ་བུའོ་ཞེས་འགལ་བས་ཁྱབ་པ་གསུངས་སོ། །ཁྱད་པར་རྣམས་ལ་
[248a.6]ཞེས་པ་ལ་སོགས་པས་དེ་དང་ལྡན་པའི་ཕྱོགས་ལ་རྗོད་པའི་སྐྱོན་ཕྱོགས་གཞན་རྣམས་ལ་བསྒྲེ་བ་སྟོན་པ་སྟེ། བྱེད་ཕྱི་མས་ནི་འདི་ཁོ་ན་ལ་འཐད་པ་གསུངས་སོ། །རིགས་ཀྱི་ངོ་བོ་ནི་ཁྱད་པར་རྣམས་ལས་མི་རིགས་ཤིང་། སྒྲའི་རང་གི་ངོ་བོ་ནི་རིགས་ལ་དང་། སྒྲའི་རང་གི་ངོ་བོ་དང་ལྡན་
[248a.7]པའི་རིགས་ཀྱི་ངོ་བོ་ནི་འབྲེལ་པ་ལའོ། །འབྲེལ་པ་ཅན་གྱི་ངོ་བོས་དབེན་པའི་དོན་གྱི་བདག་ཉིད་ནི་ཚིག་གི་ཡུལ་དུ་བྱ་བར་མི་ནུས་པ་ཉིད་ཀྱི་ཕྱིར་གདོན་མི་ཟ་བར་ཞེས་གསུངས་སོ། །འོ་ན་དེ་དང་ལྡན་པའི་ཕྱོགས་ལས་ཁྱད་པར་གྱི་ཕྱོགས་ཀྱི་བྱེ་བྲག་ཅི་ཞེ་ན། དེ་དང་ལྡན་པའི་ཕྱོགས་ལ་ཡོད་པའི་
[248b]
[248b.1]རིགས་ཀྱི་ངོ་བོར་ཡོད་པའི་སྒྲས་རྗོད་པར་བྱེད་པ་སྟེ། ཁྱད་པར་གྱི་ཕྱོགས་ལ་ནི་རྫས་ལ་སོགས་པའི་ངོ་བོར་རོ། །དེ་ལྟར་ན་དེ་རྣམས་ཁྱད་པར་གྱི་ངོ་བོར་བརྗོད་པར་བྱས་པར་འགྱུར་རོ་ཞེས་པ་བྱེ་བྲག་གོ། །དེ་ལ་ཡང་རྫས་ཉིད་ལ་སོགས་པ་རྣམས་ལ་དངོས་དང་། ཁྱད་པར་རྣམས་ལ་ཉེ་བར་
[248b.2]བཏགས་པའོ་ཞེས་སྔ་མ་ཁོ་ན་ལྟར་སྐྱོན་བརྗོད་པར་བྱ་བ་སྟེ། དངོས་དང་བཏགས་པའི་འཇུག་པ་ཉིད་དང་། རིགས་ཀྱིས་བརྗོད་པ་མ་ཡིན་པ་དང་། ཡོན་ཏན་གྱི་ཕན་འདོགས་པ་འགལ་བའོ། །སྲིད་པ་ལས་ཞེས་པ་རིགས་རྗོད་པར་བྱེད་པ་ན། རབ་གྱུར་འགྱུར་ཏེ། བློ་མེད་པར་ཞེས་པ་འདི་
[248b.3]མི་སྲིད་པའི་ཕྱིར་རོ། །འབྲེལ་པ་རྗོད་པར་བྱེད་པ་ན་ཡང་སྟེ། འདི་ཉིད་ཀྱི་ཕྱིར་སྲིད་པ་སྨོས་པའོ། །འོ་ན་སྔར་འབྲེལ་པ་བརྗོད་པར་བྱ་བ་མ་ཡིན་པ་ཉིད་དུ་བཤད་ན། དེ་ཅི་ལྟར་ད་ལྟར་ཡོད་པའི་ངོ་བོ་རྗོད་པར་བྱེད་པ་ལ་བརྟེན་པ་ཡིན། ཡང་ཅི་ལྟར་འདིར་ཐ་དད་མེད་པར་ཉེ་བར་གདགས་པ་འབྲེལ་
[248b.4]པའི་ཡན་ལག་ཏུ་བྱ་བ་ཡིན། སྔ་མ་ནི་ཡོད་པ་ཉིད་དུ་གྱུར་པ་མ་ཡིན་པ་ཉིད་ཀྱི་ཕྱིར་ཀུན་བཤད་པའི་དོན་ཅན་ལ་སྒྲ་ཐ་དད་མེད་པར་ཉེ་བར་གདགས་པ་མི་འཐད་པའི་ཕྱིར་རྗོད་པར་མི་བྱེད་པར་བཤད་པ་སྟེ། འབྲེལ་པར་ཡང་ཡོད་པ་ཉིད་དུ་གྱུར་པ་མ་ཡིན་པ་ཁོ་ན་ཡིན་ན། དེ་ཅི་ལྟར་དེའི་
[248b.5]ཡོད་པ་ཉིད་དམ་ཡོད་པའི་སྒྲ་དང་ཐ་དད་མེད་པར་གདགས་པ་ཡིན། ཐ་དད་མེད་པར་གདགས་པ་མེད་ནའང་ཅི་ལས་སྔར་བརྗོད་པའི་སྐྱོན་དུ་ཐལ་བར་འགྱུར་ཅི་སྟེ་ཡོད་པ་ཉིད་དང་ཐ་མི་དད་པ་ཉེ་བར་གདགས་པས་དེ་བརྗོད་པར་བྱ་ན། ཅི་ལྟར་ཡོད་པ་དང་སྦྱོར་བའི་སྒྲ་དག་གཞི་མཐུན་པ་
[248b.6]ཉིད་དུ་མི་འཐད་ཅེ་ན། སྐྱོན་འདི་མ་ཡིན་ཏེ། འབྲེལ་པ་རྗོད་པར་བྱེད་པར་ཁས་བླངས་ནས་སྐྱོན་འདི་བརྗོད་པའི་ཕྱིར་རོ། །གལ་ཏེ་ཡང་འབྲེལ་པ་བརྗོད་པར་བྱ་བ་ཡིན་པ་དེ་ལྟ་ན་ཡང་དེ་དང་ལྡན་པའི་ཕྱོགས་ཀྱི་སྐྱོན་འདའ་བ་མེད་དེ། རིགས་ལྡན་དང་མཚུངས་པར་ནུས་པ་ཉིད་ཀྱི་ཕྱིར་
[248b.7]རོ་ཞེས་བསྟན་པའི་དོན་དུ་འདི་བཤད་དོ། །དེ་ལྡན་ཡང་ཞེས་པ་ལ་སོགས་པས་འདིའི་ཕྱོགས་གཞན་ཉིད་ཁོ་ན་སེལ་བར་བྱེད་དོ། །འོ་ན་ཡང་བཤད་པ་ཞེས་པ་ལ་སོགས་པས་ཕྱོགས་གཞན་ཉིད་སྟོན་ཏོ། །འདིར་ཐ་དད་པ་དང་ཐ་མི་དད་པའི་ངོ་བོས་བརྗོད་པར་བྱ་བ་མ་ཡིན་གྱི། འོ་ན་
[249a]
[249a.1]ཅི་ཞེ་ན། རིགས་ལྡན་དེ་རྣམས་ཀྱི་གང་བྱེ་བྲག་མེད་པའི་ངོ་བོ་ཡོད་པ་ཉིད་དུ་སྒྲོ་བཏགས་པ་དེ་ཁོ་ན་ཁྱད་པར་གྱི་ངོ་བོ་ལ་མ་རེག་པར་བརྗོད་པར་བྱ་བའོ། །དེ་ལྟ་ན་ཡང་ཁྱད་པར་གྱི་ཕྱོགས་ལས་ཕྱོགས་གཞན་ཁོ་ན་འདིའོ་ཞེས་སེམས་སོ། །གལ་ཏེ་དེ་ལྟ་ན་ཞེས་
[249a.2]པ་ལ་སོགས་པས། རིགས་དང་སྦྱོར་བའི་ཕྱོགས་དག་གི་ནང་དུ་འདི་འདུས་པའི་ཕྱིར་ཕྱོགས་གཞན་ཉིད་འགེགས་པར་བྱེད་དོ། །ཡང་ཅི་ལྟར་དེ་ལྡན་ཙམ་ཡོད་པ་ཉིད་དམ་འབྲེལ་པར་འགྱུར་ཞེ་ན་གསུངས་པ། དེ་དང་ལྡན་པ་ཙམ་ནི་ཞེས་པ་ལ་སོགས་པ། ཙམ་གྱི་སྒྲས་ཁྱད་པར་སེལ་བ་ནི།
[249a.3]སྤྱི་ཐམས་ཅད་ཀྱི་རྗེས་སུ་སོང་བའི་ངོ་བོ་སྒྲའི་དོན་བརྗོད་པར་འགྱུར་རོ། །དེ་ཡང་རབ་ཏུ་འཇུག་པའི་རྒྱུ་མཚན་ཉིད་ཀྱི་ཕྱིར་དངོས་པོའི་རྐྱེན་གྱིས་བརྗོད་པར་བྱ་བ་མ་ཡིན་ཞིང་། ཡོད་པ་ཉིད་དམ་འབྲེལ་པ་མ་གཏོགས་པར་གཞན་ཉེ་བར་དམིགས་པ་མ་ཡིན་ཏེ། དངོས་པོའི་རྐྱེན་ནི་དེ་ཁོ་ན་ལ་བྱས་
[249a.4]པའི་ཕྱིར་རོ། །འདི་ལུང་གིས་བསྟན་པའི་ཆེད་དུ་གསུངས་པ། ཚིག་སྡུད་དང་བྱེད་ལྡན་དང་དེ་ཕན་རྣམས་ལ་ཞེས་པ་ལ་སོགས་པའོ། །འབྲེལ་པ་བརྗོད་པར་བྱ་བ་ཉིད་ལ་ལུང་སྟེ། རྒྱལ་པོའི་སྐྱེས་བུ་ཉིད་འཚེད་པར་བྱེད་པ་ཉིད་ཉེ་བའི་བ་ལང་གི་བུ་ཉིད་ཅེས་པའོ། །ཚིག་སྡུད་ལ་སོགས་པ་འདི་རྣམས་
[249a.5]ལ་རང་དང་བདག་པོའི་དང་བྱ་བ་དང་བྱེད་པ་ཅན་གྱི་དང་བུ་རྒྱུད་དང་བུ་རྒྱུད་དང་ལྡན་པའི་འབྲེལ་པ་བརྗོད་པར་བྱ་སྟེ་རིམ་པ་ཇི་ལྟ་བར་རོ། །དེས་ན་འདིར་ཡང་ཡོད་པའི་སྒྲ་ནི་བྱེད་ལྡན་གྱི་མཐའ་ཅན་ཉིད་ཀྱི་ཕྱིར་འབྲེལ་པ་རྗོད་པར་བྱེད་པར་འགྱུར་རོ། །གཞན་རྣམས་ནི་འདི་ཁོ་ནའི་དམིགས་བསལ་
[249a.6]བཤད་དེ། གཞན་དུ་ཞེས་པ་ལ་སོགས་པའོ། །འདི་ཡོན་ཏན་བརྗོད་པ་ཉིད་ལ་ལུང་སྟེ་གྲགས་པས། ཚིག་སྡུད་ལས་ལྕི་རྩུབ་ཉིད་དང་། བྱེད་ལྡན་ལས་འགྲོ་བའི་ངང་ཅན་ཉིད་དང་། དེ་ཕན་ལས་ལག་ལྡན་ཉིད་དོ། །འདིར་རིགས་ཙམ་བརྗོད་ཀྱི་འབྲེལ་པ་ནི་མ་ཡིན་ནོ། །ཐ་མི་དད་
[249a.7]པའི་ངོ་བོའི་དེ་ཕན་ལས་དཀར་བ་ཉིད་དེ། དཀར་པོའི་སྒྲ་ནི་ལྡན་པའི་རྐྱེན་གྱི་མཐའ་ཅན་གྱིའང་རང་བཞིན་གྱིས་ངོ་བོ་མཚུངས་པ་ཉིད་ཀྱི་ཕྱིར་འདིར་ཡང་ཡོན་ཏན་ཁོ་ན་བརྗོད་པར་བྱ་བའོ། །མི་འཁྲུལ་བ་ཉིད་ཀྱི་འབྲེལ་པ་ལས་ནི་ཅི་ལ་ཡོད་པ་ཉིད་ཡིན། ཚིག་གི་དོན་ནི་ཡོད་པ་ཉིད་ལ་
[249b]
[249b.1]འཁྲུལ་པ་ནི་མ་ཡིན་ནོ་ཞེས་པ་སྟེ། འདིར་ཡོད་པ་ཉིད་དེ་ཁོ་ན་བརྗོད་པར་བྱ་བའི་འབྲེལ་པ་ནི་མ་ཡིན་ནོ། །དེ་ལྡན་བུམ་པ་ལ་སོགས་དོན། །ཞེས་པ་ལ་སོགས་པས་ནི་དུ་མ་ལ་མི་འཇུག་པ་ཉིད་ཀྱི་གཏན་ཚིགས་གསལ་བར་བྱས་སོ། །སྤྱིའི་དོན་དེ་ཇི་ལྟ་བུ་ཞེས་པ་ནི་ཚད་མའི་འབྲས་བུའོ། །
[249b.2]གང་དུ་མ་ལ་འཇུག་པ་མ་ཡིན་པ་དེ་ནི་སྤྱི་མ་ཡིན་ཏེ། རང་གི་མཚན་ཉིད་བཞིན་དེ་དང་ལྡན་པ་ཡང་དེ་ལྟ་བུའོ། །ཁྱབ་པར་བྱེད་པ་མེད་པའོ། །སྤྱི་ནི་དུ་མ་ལ་འཇུག་པ་ཡིན་ནོ་ཞེས་པ་ལྡོག་པའོ། །དེ་ཡང་ཞེས་པ་ལ་སོགས་པས་གཏན་ཚིགས་ཉིད་ཀྱི་དོན་རྣམ་པར་འབྱེད་དོ། །ཅི་ལྟར་ཞེས་
[249b.3]པ་ལ་སོགས་པ་རྣམས་ཀྱིས་དམ་བཅའ་བའི་དོན་ཏོ། །འོ་ན་ཡང་ཞེས་པ་ལ་སོགས་པས་བསྒྲུབ་བྱ་གྲུབ་པ་ཉིད་སྨྲས་ཏེ། དེ་ལྡན་ནི་སྤྱིའི་ངོ་བོ་ཉིད་དུ་མི་འདོད་པ་ཉིད་ཀྱི་ཕྱིར་རོ། །དེ་མི་འདོད་པ་ཉིད་སྤྱིའི་ངོ་བོ་སྒྲོ་བཏགས་པར་གསལ་བར་བྱེད་པ་གསུངས་པ། ཅིའི་དོན་དུ་ཞེས་པ་ལ་སོགས་
[249b.4]པའོ། །གང་གི་ཕྱིར་ཞེས་པ་ལ་སོགས་པ་གྲུབ་པ་བསྒྲུབ་བྱ་ཉིད་ཀྱི་ལན་འདེབས་སོ། །འདི་ལྟར་སེམས་ཏེ། འབྲེལ་པ་བྱ་བར་སླ་བ་ཉིད་དང་། མི་འཁྲུལ་བར་སྨྲ་བས་ཡོད་པའི་སྒྲས་སྤྱི་རྗོད་པར་བྱེད་པ་ཉིད་ལ་བརྟེན་ཏེ། ཁྱད་པར་གྱི་སྒྲ་རྣམས་དང་གཞི་མཐུན་པ་ཉིད་ཁས་བླངས་པའི་
[249b.5]ཕྱིར་ཡང་ངོ་། །སྤྱི་དང་ཁྱད་པར་གྱི་དངོས་པོ་མེད་ན་གཞི་མཐུན་པ་ཉིད་འཐད་པ་མ་ཡིན་པས་སོ། །དེ་ལྟར་ནི་སྤྱིའི་སྒྲ་ལས་ཁྱད་པར་མེད་པར་འཇུག་བཞིན་པའི་བློ་ནི་ཁྱད་པར་གྱི་སྒྲ་རྣམས་ཀྱིས་ཁྱད་པར་གཞན་རྣམས་ལ་རྣམ་པར་བཅད་ནས། ཁྱད་པར་དུ་བྱས་པའི་ཡུལ་ལ་རྣམ་པར་
[249b.6]འཇོག་སྟེ། དེ་སྤྱི་མེད་ན་འཐད་པ་མ་ཡིན་ནོ་ཞེས་པའོ། །འདིར་ཡང་སྤྱི་དང་དེ་ལྡན་པ་ཞེས་ཁས་ལེན་པ་ན། རྣམ་པར་རྟོག་པ་རྣམ་པ་གཉིས་ཏེ། ཡོད་པ་ཉིད་ལ་སོགས་པ་སྤྱིའི་དེ་ལྡན་ཉིད་དུ་འགྱུར་བའམ། བུམ་པ་ལ་སོགས་པ་དེ་ལྡན་གྱི་མཚུངས་པ་ཉིད་ཅེས་པའོ། །དེ་ལ་སྔ་མ་མི་
[249b.7]སྲིད་དོ་ཞེས་སྟོན་པ་གསུངས་པ། ཡོད་པ་ཉིད་ལ་སོགས་པ་རྣམས་ལ་ཡང་ཞེས་པ་ལ་སོགས་པ་སྟེ། ཡོད་པ་ཉིད་ལ་སོགས་པ་རྣམས་ལ་རིགས་གཞན་ཡོད་པ་མ་ཡིན་ཏེ། རིགས་རྣམས་ལ་རིགས་མེད་པ་ཉིད་ཀྱི་ཕྱིར་རོ། །དེས་ན་གདོན་མི་ཟ་བར་རྣམ་པར་རྟོག་པ་གཉིས་
[250a]
[250a.1]པ་ཁས་བླང་བར་བྱའོ་ཞེས་སྟོན་པ་གསུངས་པ། དེའི་ཕྱིར་ཞེས་པ་ལ་སོགས་པའོ། །དོན་ལ་ཞེས་པ་སྐབས་སུ་བབ་པ་ཉིད་ཀྱི་ཕྱིར་དེ་ལྡན་ལ་སྟེ་བུམ་པ་ལ་སོགས་པ་ལའོ། །དེ་ལྟར་འགྱུར་བ་སླ་སྟེ། འོ་ན་དེ་ཁོ་ན་ལའོ་ཞེ་ན། འདི་ལ་གསུངས་པ། དེ་ཡང་ཞེས་
[250a.2]པ་ལ་སོགས་པའོ། །ཅིའི་ཕྱིར་ཡོད་པ་མ་ཡིན་ཞེ་ན། གང་གི་ཕྱིར་ཞེས་པ་ལ་སོགས་པའོ། །འབའ་ཞིག་གོ་སྨོས་པས་ནི་བརྗོད་པར་བྱ་བ་མཚུངས་པ་སེལ་བར་བྱེད་དེ། སྒྲ་ཁོ་ན་རྗོད་པར་བྱེད་པ་སྟེ། འདི་རྣམས་མཚུངས་ཀྱི་བརྗོད་པར་བྱ་བ་ནི་མ་ཡིན་ནོ། །དེ་ལྟར་ཅུང་ཟད་ཀྱང་ཞེས་པའི་
[250a.3]དོན་ཏོ། །དེ་དང་ལྡན་པ་འགའ་ཞིག་གིས་ཀྱང་མ་ཡིན་ཞེས་བརྗོད་པར་བྱེད་པ་མཚུངས་པ་ཁོ་ནས་འདི་རྣམས་མཚུངས་ཏེ། བརྗོད་པར་བྱ་བ་དེ་ལྡན་གྱི་དངོས་པོའི་ངོ་བོ་འབའ་ཞིག་གིས་ནི་མ་ཡིན་ནོ་ཞེས་པའི་དོན་ཏོ། །འོ་ན་ཡོད་པ་ཉིད་ཀྱི་སྒྲའི་རང་གི་ངོ་བོས་དེ་ལྡན་བརྗོད་པར་བྱ་སྟེ། འབྲེལ་པ་
[250a.4]ཡང་ཡོད་པ་ཉིད་ཀྱི་ངོ་བོས་སོ། །དེའི་ཕྱིར་ཡོད་པ་ཉིད་དམ་འབྲེལ་པའི་བརྗོད་པར་བྱ་བས་དེ་ལྡན་དང་མཚུངས་པར་འགྱུར་རོ་ཞེ་ན་གསུངས་པ། ཡོད་པ་ཉིད་དང་སྦྱོར་བ་དག་ཀྱང་ཞེས་པ་ལ་སོགས་པ་ནི། ཁྱད་པར་རིགས་དང་དེ་སྦྱོར་ལ། །ཉེས་པ་མཚུངས་ཏེ་རྣམས་ལའང་། །ཞེས་པ་ལ་སོགས་པས་
[250a.5]སྔར་ཁོ་ནར་བསལ་ཟིན་ཏེ། རིགས་དང་སྦྱོར་བ་དག་དེ་ལྡན་ཉིད་དུ་རྗོད་པར་བྱེད་པའོ། །གལ་ཏེ་བུམ་པ་ལ་སོགས་པ་རྣམས་ལ་སྒྲ་མཚུངས་ཏེ། དེའི་ཚེ་སྒྲ་དེ་ཁོ་ན་སྒྲ་ཉིད་ཀྱིས་དེ་ལྡན་ནི་དེ་རྣམས་ཀྱི་སྤྱི་ཉིད་དུ་འགྱུར་ཏེ་ཞེ་ན་གསུངས་པ། རྒྱུ་མཚན་མེད་མིན་ཞེས་པ་ལ་སོགས་པ་སྟེ། སྒྲ་ནི་དེ་
[250a.6]རྣམས་ཀྱི་རྗོད་པར་བྱེད་པ་ཉིད་ཀྱི་འབྲེལ་པ་ཅན་ཉིད་ཡིན་ཞིང་འབྲེལ་པ་ཅན་ཉིད་དེ་ཁོ་ན་ནི་རྒྱུ་མཚན་མེད་པར་འཐད་པ་མ་ཡིན་ཏེ། གང་གི་རིགས་ཀྱི་སྒྲ་རྒྱུ་མཚན་ཅན་ཡིན་ནོ་ཞེས་ལེན་པའོ། །འདིས་ནི་རྒྱུ་མཚན་ཅན་གྱི་སྒྲ་གང་ཞིག་གི་གང་ལ་རྒྱུ་མཚན་མེད་པ་དེ་ནི་དེ་ལ་སྦྱོར་བར་འོས་པ་མ་ཡིན་
[250a.7]ཏེ། དབྱུག་པ་ཅན་གྱི་སྒྲ་དབྱུག་པ་དང་བྲལ་བའི་སྐྱེས་བུ་ལ་བཞིན། བུམ་པ་ལ་སོགས་པ་རྣམས་ལ་ཡང་རྒྱུ་མཚན་ཅན་རིགས་ཀྱི་སྒྲའི་རྒྱུ་མཚན་མེད་དོ་ཞེས་པ་རྒྱུ་མ་དམིགས་པ་གསུངས་སོ། །དེའི་ཕྱིར་ཡང་ཞེས་པ་ལ་སོགས་པ་ལ། གལ་ཏེ་ཡོད་པའི་སྒྲས་སྤྱི་བརྗོད་པར་བྱ་བ་ན།
[250b]
[250b.1]དེ་ལས་དེ་ཁྱད་པར་དུ་བྱ་བའི་དོན་དུ་བུམ་པ་ཞེས་བརྗོད་པར་བྱའོ་ཞེས་གཞི་མཐུན་པ་ཉིད་དུ་འགྱུར་རོ། །སྤྱི་རྗོད་པར་བྱེད་པ་མེད་ན་ནི་ཅི་ཞིག་ཅིའི་ཁྱད་པར་དུ་བྱ། དེ་ལས་ཀྱང་ཁས་བླངས་པ་ཉམས་པའོ། །ཅི་སྟེ་ཡང་ཞེས་པ། སྤྱི་དང་ཁྱད་པར་གྱི་དངོས་པོ་མེད་ན་ཡང་རྣམ་པ་གཞན་དུ་ཁྱད་པར་དུ་བྱེད་པ་དང་ཁྱད་
[250b.2]པར་དུ་བྱ་བ་ཉིད་གཞུང་འཛུགས་པར་བྱེད་དོ། །རྫས་གཞན་ལ་འཇུག་པ་མ་ཡིན་པ་ཞེས་པ། གཞན་མ་ཡིན་པའི་རྫས་ལ་འཇུག་པའི་ཡོད་པའི་ཡོན་ཏན་བུམ་པ་ལ་སོགས་པའི་རྫས་སོ། །ཡོད་པའི་ཡོན་ཏན་ཞེས་པ་ཡོད་པ་ཉིད་ཀྱི་ཡོན་ཏན་ཅན་ཞེས་པའི་དོན་ཏེ། འདིའི་ཡོད་པ་ཉིད་ཡོན་
[250b.3]ཏན་ཡིན་པ་ཞེས་བྱས་ནས་སོ། །འདིས་ནི་མི་མཚུངས་པ་ཉིད་སྨྲས་སོ། །དེ་ལྟར་མཚུངས་པ་མ་ཡིན་པ་ཉིད་ཡོད་ན་ཡང་ཡོད་པའི་སྒྲ་ལས་བུམ་པ་ལ་སོགས་པ་ལ་དོགས་པ་ན། ཁྱད་པར་བྱེད་དང་ཁྱད་པར་དུ་བྱ་བའི་དངོས་པོར་འགྱུར་རོ། །ཤིན་ཏུ་སྔོ་བ་ལ་སོགས་པ་བཞིན་ཏེ། ཇི་ལྟར་སྔོན་
[250b.4]པོའི་ཡོན་ཅན་གྱི་རྫས་ནི། ཤིན་ཏུ་སྔོན་པོ་ལ་སོགས་པའི་རྫས་གཞན་ལ་དང་། དེའི་ཡོན་ཏན་ལ་མ་ཡིན་པ་ལ་འཇུག་པ་མ་ཡིན་ཞེས་པས་དེ་སྤྱི་མ་ཡིན་ཏེ། དེ་ལྟར་ཡང་སྔོན་པོ་ཞེས་བརྗོད་པ་ན་སྔོན་པོའི་སྒྲ་ལས། གང་འདི་སྔོན་པོ་ཞེས་བརྗོད་པ་དེ་ཅི། གཉིས་ལས་ཤིན་ཏུ་སྔོ་བ་ཡིན་ནམ། ཅི་
[250b.5]སྟེ་མང་པོའི་ནང་ན་ཤིན་ཏུ་སྔོ་བ་ཡིན་ཞེས་ཁྱད་པར་ལ་དོགས་པར་འགྱུར་རོ། །དེའི་ཕྱིར་གཉིས་ཀྱི་ནང་ནས་ཆེས་སྔོན་པོའམ་མང་པོའི་ནང་ནས་ཆེས་སྔོན་པོ་ཞེས་ཁྱད་པར་གྱི་སྒྲ་རྣམས་ཀྱི་ཁྱད་པར་དུ་བྱ་བ་དེ་བཞིན་དུ་ཡོད་པ་ཞེས་བརྗོད་པ་ན་ཡོད་པ་ཉིད་ནི་དོན་དུ་མ་ལ་འཇུག་པ་ཉིད་ཀྱི་ཕྱིར་ན་གང་ཡོད་པ་
[250b.6]འདི་ནི་ཅི་བུམ་པའམ། འོན་ཏེ་སྣམ་བུ་ཡིན་ཞེས་བུམ་པ་ལ་སོགས་པ་ལ་དོགས་པར་འགྱུར་ཏེ། དེས་ན་དེའི་སྒྲ་རྣམས་ཀྱི་ཁྱད་པར་དུ་བྱ་སྟེ། བུམ་པའམ་སྣམ་བུའོ་ཞེས་པའོ། །གལ་ཏེ་གཅིག་ལའང་སྔོ་སོགས་བཞིན། །ཞེས་པ་གལ་ཏེ་གཅིག་ལ་སྟེ་ཐུན་མོང་མ་ཡིན་པའི་ངོ་བོའི་
[250b.7]རིགས་དང་ལྡན་པའི་རྫས་ལ་ཐུན་མོང་བ་ཡོད་པ་ཉིད་འཇུག་གོ་ཞེས་པ། དེ་ལ་ཡོད་པ་ཞེས་བརྗོད་པ་ན་བུམ་པ་ལ་སོགས་པ་ལ་དོགས་པར་འགྱུར་ཏེ། དཔེར་ན་སྔོན་པོ་ཞེས་བརྗོད་པ་ན་ཤིན་ཏུ་སྔོན་པོ་ལ་སོགས་པ་ལ་དོགས་པ་བཞིན་ཏེ། དེས་ན་ཁྱད་པར་དང་ཁྱད་པར་ཅན་གྱི་དངོས་པོ་འདོད་
[251a]
[251a.1]པར་བྱའོ། །དེས་ན་འདི་ཡང་ཡོད་མིན། ཅིའི་ཕྱིར་ཞེ་ན་གསུངས་པ་སྔོན་པོའི་སྒྲ་ནི་ཞེས་པ་ལ་སོགས་པ་སྟེ། སྔོན་པོའི་སྒྲ་ནི་སྔོན་པོའི་ཡོན་ཏན་ཅན་གྱི་རྫས་རྗོད་པར་བྱེད་དེ། དེ་ཡང་ཤིན་ཏུ་སྔོ་བ་ལ་སོགས་པ་རྫས་གཞན་ལ་འཇུག་པ་མ་ཡིན་ནོ། །གང་
[251a.2]སྔོན་པོ་ཉིད་འཇུག་པའམ། དེའི་འབྲེལ་པ་དེ་ནི་སྒྲའི་དོན་ཉིད་དུ་མི་འགྱུར་ཏེ། དེའི་ཕྱིར་འདིར་ཡང་། རྒྱུ་མཚན་མེད་མིན་དེ་ཡང་འདོད། །ཅེས་པ་འདི་མཚུངས་སོ་ཞེས་པས། །དཔེ་ཅན་དང་འདྲ་བར་དཔེ་ཡང་མ་གྲུབ་པ་ཁོ་ནའོ། །ཁས་བླངས་ནའང་ཞེས་པ། གལ་ཏེ་ཡང་དཔེ་གྲུབ་པར་
[251a.3]གྱུར་ན། དེ་ལྟ་ན་ཡང་ཡོད་པ་ཉིད་ལ་དེ་དང་མཚུངས་པ་ཉིད་མེད་དོ། །དེ་སྟོན་ཏེ། དེ་མིན་རིགས་ལ་རིགས་མེད་ཕྱིར། །ཞེས་པ་ཡོད་པ་ཉིད་རིགས་འདི་ལ་བུམ་པ་ཉིད་ལ་སོགས་པའི་རིགས་ཡོད་པ་མ་ཡིན་ནོ་ཞེས་པས། འདི་ལྟར་རིགས་མེད་པའི་ཡོད་པའི་རིགས་ནི་རིགས་ལྡན་མ་ཡིན་ཞེས་པའོ། །
[251a.4]ཡོད་པ་ཉིད་ལ་བུམ་པ་ཉིད་ལ་སོགས་པའི་རིགས་ཀྱི་བྱེ་བྲག་རྣམས་ཡོད་པ་མ་ཡིན་ཏེ། ཇི་ལྟར་སྔོན་པོའི་ཡོན་ཏན་ལ་གཉིས་ལས་ཆེས་སྔོ་བ་ལ་སོགས་པའི་བྱེ་བྲག་རྣམས་བཞིན་ཏེ། གང་ལས་བྱེ་བྲག་དེ་རྣམས་ཉེ་བར་བླངས་ནས་རྫས་ལ་འཇུག་པའོ། །དེ་ཉེ་བར་མ་བླངས་ན་ཡང་དེའི་དངོས་
[251a.5]པོ་ལ་ཡང་དག་པར་ཕྱོགས་པའི་ངོ་བོ་ནི་བུམ་པ་མ་ཡིན། སྣམ་བུ་མ་ཡིན་ཏེ། དེའི་ཕྱིར་ཡོད་པའི་སྒྲ་ལས་བུམ་པ་ལ་སོགས་པའི་བྱེ་བྲག་ལ་དོགས་པར་རིགས་པ་མ་ཡིན་ནོ། །སྔོན་པོའི་ཡོན་ཏན་ནི་དབྱེ་བ་དུ་མ་སྟེ། དེ་རྫས་གཅིག་ལ་ཡང་འཇུག་བཞིན་པ་ནི། རང་གི་ཁྱད་པར་རྣམས་ཉེ་
[251a.6]བར་བླངས་ནས་ཇི་ལྟར་མངོན་པར་སྲིད་པར་འཇུག་གོ་ཞེས་པས། དེ་རྗོད་པར་བྱེད་པའི་སྔོན་པོའི་སྒྲ་ལས་གཉིས་ནས་ཆེས་སྔོ་བ་ལ་སོགས་པ་ལ་དོགས་པར་རིགས་སོ་ཞེས་སྟོན་ཏོ། །འོ་ན་དེ་ལྟར་ཞེས་པས་རྣམ་པ་གཞན་གྱི་བྱེ་བྲག་ལ་དོགས་པ་སྲིད་པར་གསུངས་སོ། །སྒྲ་ནི་གཞན་
[251a.7]དབང་སྟེ། ཡོན་ཏན་ལ་ལྟོས་ནས་འཇུག་པ་ཉིད་ཀྱི་ཕྱིར། ཁྱད་པར་འཕེན་པར་ནུས་པའོ། །དོན་ནི་དགོས་པ་ཉིད་ཀྱི་ཕྱིར་གཙོ་བོའོ། །དེས་ན་རིགས་ལྡན་གྱི་དོན་ནི་ཁྱད་པར་ཐམས་ཅད་འཕངས་ནས་འཇུག་སྟེ། དེ་ལས་ཀྱང་གལ་ཏེ་ཡང་བུམ་པ་ཉིད་ལ་སོགས་པ་རྣམས་ཡོད་པའི་
[251b]
[251b.1]སྒྲའི་བརྗོད་པར་བྱ་བར་མི་འགྱུར་བ་དེ་ལྟ་ན་ཡང་། ཡོད་པ་ཉིད་དང་ལྡན་པའི་དོན་གྱིས་བུམ་པ་ལ་སོགས་པ་རྣམས་འཕངས་པ་ན་ཁྱད་པར་ལ་དོགས་པར་འགྱུར་རོ། །དེའི་ཕྱིར་ཁྱད་པར་དང་ཁྱད་པར་དུ་བྱ་བ་ཉིད་མ་ཡིན་པ་མེད་དོ། །ཡང་ཅི་ལྟར་དོན་གྱིས་ཁྱད་པར་མཐའ་དག་འཕེན་ཅེ་ན་སྨྲས་
[251b.2]པ། དེ་ལྡན་གྱི་དོན་ནི་གདོན་མི་ཟ་བར་ཞེས་པ་ལ་སོགས་པ་སྟེ། རིགས་ལྡན་གྱི་དོན་ནི་སྒྲས་ཉེ་བར་ལེན་ཅིང་། དེ་ཡང་ངེས་པར་སྦྱོར་བ་ཁོ་ན་ལས་བུམ་པ་ཉིད་ལ་སོགས་པའི་སྤྱི་འགའ་ཞིག་དང་རྗེས་སུ་འབྲེལ་ཏེ། དེ་ལས་ཀྱང་དེའི་སྤྱིའི་དབྱེ་བ་འཕེན་པ་ན་བུམ་པ་ལ་སོགས་པའི་བྱེ་བྲག་
[251b.3]འཕེན་པའོ་ཞེའོ། །རྟོགས་པ་འདི་ཡང་སེལ་བར་བྱེད་པ་གསུངས་པ། དོན་གྱིས་འཕེན་ནའང་མ་ངེས་པ། །ཞེས་སོ། །དོན་གྱིས་འཕངས་པ་ནི་ཞེས་པ་ལ་སོགས་པས་དོན་གྱིས་འཕེན་པའི་རང་གི་ངོ་བོ་གསུངས་ཤིང་། དེ་མེད་པར་འདིར་བསྟན་པའི་ཆེད་དུ་དཔེར་ན་ཉིན་པར་མི་ཟ་ཞེས་ཆོས་
[251b.4]མི་མཐུན་པ་ཉིད་ངེས་པར་བསྟན་ཏོ། །འདིར་ནི་ཞེས་པ་ལ་སོགས་པས་ཆོས་མི་མཐུན་པ་ཉིད་ཀྱི་ཉེ་བར་སྦྱོར་བར་ཕྱོགས་ཆོས་ཉེ་བར་བསྟན་ཏོ། །འཕངས་པ་ཡོད་པ་མ་ཡིན་ནོ་ཞེས་པ་ཆད་མའི་འབྲས་བུའོ། །གང་དུ་དོན་གྱིས་འཕངས་པ་དེར་ནི་མ་ངེས་པ་སྟེ། འདི་ལྟ་སྟེ་ཉིན་པར་
[251b.5]མི་ཟའོ་ཞེས་པ་འདིར་མཚན་མོ་ཟ་བ་ལའོ། །ཡོད་པ་ཞེས་བརྗོད་པ་ན་བུམ་པ་ལ་སོགས་པ་རྣམས་ལ་ངེས་པ་ཡང་མ་ཡིན་གྱི། འོ་ན་ཅི་ཞེ་ན་ཐེ་ཚོམ་མོ་ཞེས་པ་རང་བཞིན་འགལ་བའོ། །གལ་ཏེ་འོ་ན་གང་དུ་ཐེ་ཚོམ་ཟ་བ་དེར་མི་འཕེན་པ་ཡིན་ན། སྤྱིའི་སྒྲས་ཀྱང་རང་གི་ཁྱད་པར་མི་འཕེན་
[251b.6]པར་འགྱུར་ཏེ། དེ་ལས་ཀྱང་དེ་རྣམས་ལ་ཐེ་ཚོམ་སྐྱེ་བའི་ཕྱིར་རོ། །གཞི་མཐུན་པ་ཉིད་མེད་པའི་ཆེད་དུ་མི་འཕེན་པ་ཡིན་ན་ཡང་། གཞི་མཐུན་པ་ཉིད་དེ་ཡང་ཐེ་ཚོམ་ཁོ་ན་ཡོད་པ་ལ་ཉེ་བར་དམིགས་ཏེ། གང་སྨྲས་པ། ཐེ་ཚོམ་འདོད་ཕྱིར་ཁྱད་པར་ནི། །རང་གི་སྤྱི་ཡི་འདོར་མ་ཡིན། །བླངས་
[251b.7]མིན་ཐེ་ཚོམ་སྐྱེད་པའི་ཕྱིར། །མཚུངས་ནའང་དེ་དག་དོན་གཅིག་ཉིད། །ཅེས་སོ། །གལ་ཏེ་ཡང་དོན་ལས་དོན་ངེས་པ་ཁོ་ནར་འགྱུར་ན། ཁྱད་པར་དང་ཁྱད་པར་དུ་བྱ་བའི་དངོས་པོ་མི་འཐད་དེ། རྣམ་གྲངས་ཀྱི་སྒྲ་བཞིན་ནོ། །དེ་དག་ལས་དོན་དེས་ཟིན་པ་ཉིད་ཀྱི་ཕྱིར་རོ་ཞེ་ན། དེའི་ཕྱིར་
[252a]
[252a.1]འདི་གསལ་བར་བྱའོ། །དེ་ལ་གལ་ཏེ་འོ་ན་གང་དུ་ཐེ་ཚོམ་ཟ་བ་དེར་མི་འཕེན་པ་ཞེས་པ་ལ་སོགས་པ་གང་བརྗོད་པ་དེ་རེ་ཞིག་བསམ་པར་བྱ་སྟེ། སྒྲ་འཕེན་པ་ཡང་གཞན་ཡིན་ལ། དོན་འཕེན་པ་ཡང་གཞན་ཡིན་ཏེ། སྒྲ་འཕེན་པ་ནི་མི་གཏོང་བའི་མཚན་ཉིད་ཅན་ཏེ།
[252a.2]དོན་འཕེན་པ་ནི་ངེས་པའི་མཚན་ཉིད་ཅན་ནོ། །དེ་ལ་ཐེ་ཚོམ་ལས་ངེས་པའི་མཚན་ཉིད་ཅན་གྱི་དོན་འཕེན་པ་མ་ཡིན་ནོ་ཞེས་བརྗོད་པ་ན། གལ་ཏེ་འོ་ན་གང་དུ་ཐེ་ཚོམ་ཟ་བ་དེར་མི་འཕེན་པ་ཡིན་ན་སྤྱིའི་སྒྲས་ཀྱང་། རང་གི་ཁྱད་པར་འཕེན་པ་མི་གཏོང་བའི་མཚན་ཉིད་ཅན་དུ་མི་འགྱུར་རོ་ཞེས་པ་ཅིས་
[252a.3]ན་ཅིར་ཐལ་བར་འགྱུར། གང་བརྗོད་པ་ཡང་གཞི་མཐུན་པ་ཉིད་མེད་པའི་ཆེད་དུ་མི་འཕེན་པ་ཞེས་པ་ལ་སོགས་པ་དང་། གང་ཡང་གལ་ཏེ་ཡང་དོན་ལས་དོན་ངེས་པ་ཁོ་ནར་ཞེས་པ་ལ་སོགས་པ་བརྗོད་པ་དེ་གཉིས་ཀ་ཡང་མི་རིགས་ཏེ། ཇི་ལྟར་ཁྱད་པར་སྨྲ་བའི་ལུགས་ཀྱིས་རིགས་ཀྱི་སྒྲ་ཁོ་ནས་
[252a.4]ངེས་ཟིན་པའི་ཁྱད་པར་ཐམས་ཅད་ལ་ཡང་ངེས་པའི་དོན་དུ་ཁྱད་པར་གྱི་མཉན་པ་མ་སྦྱར་བ་ན། གཞི་མཐུན་པ་ཉིད་དང་ཁྱད་པར་དང་ཁྱད་པར་དུ་བྱ་བའི་དངོས་པོར་འགྱུར་བ་མ་ཡིན་པ་ཁོ་ན་བ་དེ་ལྟར་དེ་ལྡན་གྱི་ཕྱོགས་སྨྲ་བའི་ལུགས་ཀྱིས་ཀྱང་འགྱུར་རོ་ཞེས་པ་འདི་བསམས་ཟིན་ཏོ། །གལ་ཏེ་
[252a.5]འོ་ན་དོན་འཕེན་པ་ངེས་པའི་བདག་ཉིད་ཡིན་ན། ཅི་ལྟར་དོན་འཕངས་པའི་བུམ་པ་ལ་སོགས་པ་རྣམས་ལ་བྱེ་བྲག་རེ་བར་འགྱུར་རོ་ཞེས་པ་འདི་བརྗོད་དེ། རེ་བ་ཞེས་བྱ་བ་ནི་དེ་རྣམས་ལ་ཐེ་ཚོམ་ཟ་བའི་ངེས་པ་དོན་དུ་གཉེར་བ་ཡིན་ནོ་ཞེ་ན། སྐྱོན་འདི་མེད་དོ། །གང་ཞིག་དོན་འཕངས་པ་འདོད་པ་དེ་
[252a.6]ནི་རྣམ་པ་འདི་ལྟ་བུའི་རེ་བ་འདོད་པ་མ་ཡིན་གྱི། འོ་ན་ཅི་ཞེ་ན་བྱེ་བྲག་ངེས་པར་ར་བ་སྟེ། དེ་ཁོ་ནའི་དབང་དུ་བྱས་ནས་འདི་བརྗོད་དོ། །ཡང་ན་མཁས་པས་རྩོད་པ་འདི་ཐམས་ཅད་ཀྱི་ལན་འཆད་པར་འགྱུར་རོ་ཞེས་པས་འདི་གཞག་གོ། །དེའི་ཕྱིར་ཞེས་པ་ལ་སོགས་པས་ཇི་སྐད་བཤད་པའི་རིགས་ལ་
[252a.7]སོགས་པ་རྗོད་པར་བྱེད་པ་དགག་པ་ཉེ་བར་སྡུད་པས་རང་གི་ཕྱོགས་ཁོ་ན་བསྟན་པར་མཛད་དོ། །འོ་ན་ཕ་རོལ་པོའི་ཕྱོགས་བཀག་པས་རང་གི་ཕྱོགས་འགྲུབ་པ་མི་འཐོབ་སྟེ། བསལ་ཏེ་འོངས་པ་དགག་པར་ཇི་སྐད་བཤད་པ་བཞིན་ནོ་ཞེ་ན། སྐྱོན་འདི་མེད་དེ། འདི་ལ་སྔར་ཁོ་ནར། བྱས་
[252b]
[252b.1]སོགས་བཞིན་དུ་རང་དོན་ལ། གཞན་སེལ་བས་ནི་རྗོད་པར་བྱེད། །ཅེས་སྒྲ་ལས་བྱུང་བ་རྗེས་དཔག་ལས་ཐ་མི་དད་པ་ཉིད་དུ་བསྒྲུབས་ཟིན་ཏོ། །དེ་ལ་ཚད་མ་གཞན་དུ་སྨྲ་བ་རྣམས་ཀྱིས་བསྒྲུབ་པའི་སྒོ་ནས་རིགས་ལ་སོགས་པ་རྣམས་རྗོད་པར་བྱེད་དོ་ཞེས་བཤད་པ། དེ་བཀག་པ་ན་དོན་དེ་
[252b.2]ཁོ་ན་རྣམ་པར་གནས་པ་འབའ་ཞིག་གོ། །འཆད་པར་འགྱུར་བའི་རང་གི་ཕྱོགས་སྒྲུབ་པར་བྱེད་པ་ཐུགས་ལ་བྱས་ནས་ཀྱང་འདི་སྐད་གསུངས་སོ། །ཡང་ཅི་འདིར་སེལ་བ་ཙམ་གྱི་བརྗོད་པར་བྱ་བ་ཉིད་དུ་མངོན་པར་འབྲེལ་ལམ། འོན་ཏེ་དེའི་ཁྱད་པར་དུ་བྱས་པ་ཡིན། དེ་ལས་ཅིར་འགྱུར་ན། གལ་
[252b.3]ཏེ་གཞན་སེལ་བ་ཙམ་ཡིན་ན། རང་དོན་ལ། གཞན་སེལ་བ་ཡིས་རྗོད་པར་བྱེད། ཅེས་པའི་གཞུང་འགལ་ཏེ། རང་གི་དོན་ལས་ཐ་དད་པར་གཞན་སེལ་བ་བརྟེན་པ་ཉིད་ཀྱི་ཕྱིར་རོ། །དེ་ལྟར་དངོས་པོ་དེའི་ཆ་འགའ་ཞིག་དོན་གཞན་ལས་ལྡོག་པས་རྟོགས་པར་བྱ་སྟེ། སྒྲ་ནི་དོན་གཞན་
[252b.4]ལས་ལྡོག་པས་ཁྱད་པར་དུ་བྱ་བའི་དངོས་པོ་རྣམས་སྨྲའོ་ཞེས་པ་ལ་སོགས་པ་བསྟན་པ་དེ་ལྡན་གྱི་ཕྱོགས་གསལ་བར་བྱེད་པ་རྣམས་འགལ་ལོ། །ཅི་སྟེ་དེས་ཀྱང་ཁྱད་པར་དུ་བྱས་པ་ཡིན་ན། དེས་ན་མཉན་པ་གཞན་སེལ་བྱེད། །ཅེས་ཉམས་ཏེ། གང་གི་ཕྱིར་གཞན་སེལ་བར་བྱེད་དོ་
[252b.5]ཞེས་པ་ནི་རྗོད་པར་བྱེད་དོ་ཞེས་པའི་དོན་ཏེ། ཇི་ལྟར་དགག་ཚིག་གིས་འགོག་པར་བྱེད་དོ་ཞེས་པ་འདི་ལ་བཞིན་ནོ། །སྒྲའི་བྱེད་པ་གཞན་སྲིད་པ་ནི་མ་ཡིན་ནོ། །དེ་ལྡན་གྱི་ཕྱོགས་ཀྱང་ཕྱོགས་གཞན་དུ་མི་འགྱུར་ཏེ། དེའི་ཕྱིར་དེ་ལྡན་གྱི་ཕྱོགས་ལ་བརྗོད་པའི་སྐྱོན་རྣམས་འདི་ལ་ཡང་ཐལ་བར་འགྱུར་རོ་ཞེ་ན།
[252b.6]སྐྱོན་འདི་མེད་དེ། གཞན་སེལ་བ་ཁོ་ན་སྒྲའི་དོན་ཡིན་པས་སོ་འགལ་བ་ཡང་མ་ཡིན་ཏེ། གང་གི་ཕྱིར་གང་འདི་རང་གི་དོན་ཡིན་པ་དེ་ཁོ་ན་གཞན་སེལ་བྱེད་ཅེས་འདིར་གཞན་སེལ་གྱི་སྒྲས་བརྗོད་པས་སོ། །གཞན་སེལ་བས་ནི་རྗོད་པར་བྱེད། །ཅེས་པ་འདིའི་དགོས་པ་ནི་བཤད་ཟིན་
[252b.7]ཏོ། །གཞན་ཡང་ཁྱད་པར་གཅིག་བསྐུལ་ན་ཡང་གཞན་ལས་ལྡོག་པ་རྟོགས་པ་ལ། རྗེས་སུ་འགྲོ་བ་དང་ལྡོག་པས་བསྐུལ་བའི་ཐ་སྙད་རྟོགས་པར་སྒྲ་རྣམས་སྟོན་ཅིང་གཞན་སེལ་བས་རྗོད་པར་བྱེད་དེ། དངོས་པོ་དེའི་ཆ་འགའ་ཞིག་དོན་གཞན་ལས་ལྡོག་པས་རྟོགས་པར་
[253a]
[253a.1]བྱའོ། །སྒྲ་ནི་དོན་གཞན་ལས་ལྡོག་པའི་ཁྱད་པར་ཅན་ཁོ་ནའི་དངོས་པོ་རྣམས་རྗོད་པར་བྱེད་དོ་ཞེས་པ་ལ་སོགས་པ་གསུངས་པའོ། །ཁྱད་པར་དང་ཁྱད་པར་དུ་བྱ་བའི་དངོས་པོ་ནི་མ་ཡིན་ནོ། །འོ་ན་རྗེས་སུ་འགྲོ་བ་ཙམ་སྟོན་པ་ཁོ་ནས་སམ་ལྡོག་པ་ཙམ་སྟོན་པ་ཁོ་
[253a.2]ནས་སྒྲའི་ཐ་སྙད་རྟོགས་པར་འགྱུར་བ་མ་ཡིན་ནམ་ཞེ་ན། འདི་ཡོད་པ་མ་ཡིན་ཏེ། རྗེས་སུ་འགྲོ་བ་གཅིག་པུ་ལ་ནི་ཡོངས་སུ་སྤང་བར་བྱ་བ་མེད་ན་འབྲས་བུ་མེད་པའི་སྟོན་པ་ཡིན་པ་ཉིད་ཀྱི་ཕྱིར་དང་། དེ་བཞིན་དུ་ཡོངས་སུ་སྤང་བར་བྱ་བ་གཅིག་ལ་འགའ་ཞིག་ལ་གནས་པ་མེད་ནའོ། །ལྡོག་པ་
[253a.3]མེད་པ་ཅན་གྱི་རྗེས་སུ་འགྲོ་བ་ཡང་མེད་ལ་རྗེས་སུ་འགྲོ་བ་མེད་པ་ཅན་གྱི་ལྡོག་པ་ཡང་མེད་དེ། རང་གི་དོན་རྟོགས་པར་བྱེད་པ་ནི་རྗེས་སུ་འགྲོ་བ་ཡིན་ཞིང་འདི་ནི་ལྡོག་པ་མེད་པར་སྲིད་པ་ཡང་མ་ཡིན་ནོ། །རང་གི་དོན་ལས་དོན་གཞན་རྣམ་པར་གཅོད་པ་ནི་ལྡོག་པ་སྟེ། དེ་ཡང་རྗེས་སུ་འགྲོ་བ་མེད་པར་
[253a.4]བརྟག་པར་འོས་པ་མ་ཡིན་ནོ། །དེ་ཉིད་ཀྱི་ཕྱིར་སྒྲ་ལས་དེ་ལས་གཞན་ཟློག་པ་དང་། གང་གི་དོན་བརྗོད་པའི་བྱ་བ་གཉིས་ནི་མེད་དེ། རང་གི་དོན་ནི་ཐ་དད་པའི་ངོ་བོ་ཉིད་ཀྱི་ཕྱིར་ན། དེ་བརྗོད་པ་ཁོ་ན་ལས་དེ་ལས་གཞན་པ་བཟློག་པ་རྟོགས་པའི་ཕྱིར་རོ། །ཇི་ལྟར་འདི་འདིའི་སྤུན་དྲུང་ངོ་ཞེས་བརྗོད་པ་ན་
[253a.5]སྤུན་དྲུང་ཉིད་ནི་གཉིས་ཀར་གྱུར་པ་ཉིད་ཀྱི་ཕྱིར་ན། གཅིག་ལ་སྤུན་དྲུང་དུ་བརྗོད་ན་ཡང་། མེད་ན་མི་འབྱུང་བ་ཉིད་ཀྱི་ཕྱིར་ཅིག་ཤོག་ཀྱང་སྤུན་དྲུང་ཉིད་དུ་རྟོགས་པ་དེ་ལྟར་དབྱེ་བར་བྱ་བ་གཉིས་དག་ལ། དབྱེ་བ་ནི་གཉིས་ཀར་གྱུར་པ་ཉིད་ཀྱི་ཕྱིར་དབྱེ་བ་གཅིག་བསྐུལ་བ་ན་ཡང་མེད་ན་མི་
[253a.6]འབྱུང་བ་ཉིད་ཀྱི་ཕྱིར་དེ་གཞན་ལས་ལྡོག་པའོ། །དེའི་ཕྱིར་ཡང་གང་ཞིག་མཉན་པས་དོན་གཞན་སེལ་བར་བྱེད་ན། དེ་དགག་པ་ཁོ་ན་དོན་སྤྱད་ཟིན་པ་ཅན་ཉིད་ཀྱི་ཕྱིར་རང་གི་དོན་རྟོགས་པའི་ཆེད་དུ་སྒྲ་གཞན་བཙལ་བར་བྱའོ་ཞེས་བརྗོད་པ་དེ་ཡང་མི་འཐད་དེ། གང་གི་ཕྱིར་སྒྲ་ནི་རང་གི་དོན་
[253a.7]ཁོ་ན་རྟོགས་པར་བྱེད་ཅིང་། རྟོགས་པར་བྱ་བའི་དོན་དེ་ལ་མེད་ན་མི་འབྱུང་བ་ཉིད་ཀྱི་ཕྱིར་དོན་གཞན་ལྡོག་པ་རྟོགས་སོ་ཞེས་པས་སོ། །དེས་ན་དེ་ལྟར་སེལ་བ་ཁོ་ན་སྒྲའི་དོན་ཏེ་འགལ་བ་ཅི་ཡང་མེད་དོ་ཞེས་པའོ། །ཡང་སྒྲའི་དོན་འདི་ཅི་ཞེ་ན། གང་བརྗོད་འདོད་ཀྱི་སྤྱིའི་རྣམ་པ་འདི་ཡིན་
[253b]
[253b.1]ཏེ། དེ་ཡང་བརྗོད་འདོད་ལ་མི་འཁྲུལ་ཞེས་པས་བརྗོད་འདོད་ལ་སྒྲ་ཚད་མ་ཉིད་དུ་བཤད་དོ། །འོ་ན་སྤྱི་སྒྲའི་དོན་ཡིན་ན་དེས་ན་ཇི་ལྟར་བློའི་སྣང་བ་སྒྲའི་ཡུལ་དུ་བརྗོད་ཅེ་ན། དེ་ཁོ་ན་སྤྱིར་གཞག་པར་བྱ་སྟེ། ཅི་ལྟར་ཞེ་ན། འདིར་དབང་པོ་དང་སྣང་བ་དང་ཡིད་ལ་བྱེད་པ་རྣམས་སམ། བདག་
[253b.2]དང་དབང་པོ་དང་ཡིད་དང་དོན་དང་ཕྲད་པ་རྣམས་སྤྱི་མེད་པར་ཐ་དད་པ་ཡིན་ཀྱང་གཟུགས་ཀྱི་ཤེས་པ་གཅིག་སྐྱེད་པར་བྱེད་པ་ཇི་ལྟ་བ་དེ་ལྟར་ཤིང་ཤ་པ་ལ་སོགས་པའི་ཁྱད་པར་རྣམས་ཀྱང་། ཕན་ཚུན་རྗེས་སུ་འགྲོ་བ་མེད་ན་ཡང་རང་ཉམས་སུ་མྱོང་བའི་སྒོ་ནས་རྣམ་པར་རྟོག་པའི་བག་ཆགས་སད་པར་
[253b.3]བྱེད་པ་རྣམས་ཀྱིས་ཐ་མི་དད་པར་སྣང་བའི་རྣམ་པར་རྟོག་པའི་ཤེས་པ་གཅིག་སྐྱེད་པར་བྱེད་དོ། །དེ་ཡང་བསྒྲུབ་པར་བྱ་བ་དང་སྒྲུབ་པར་བྱེད་པ་གཅིག་པ་ཉིད་ཀྱིས་ན། གཞན་ལས་ཐ་དད་པ་རྣམས་དང་རྣམ་པར་རྟོག་པའི་བག་ཆགས་ཀྱི་རང་བཞིན་གང་ཡིན་པ་དེ་ནི། གང་དེའི་དབང་གིས་དེ་
[253b.4]རྣམས་ཀྱི་དེར་སྐྱེ་བཞིན་པའི་ངོ་བོ་ཐ་དད་པ་བསྒྲིབས་ཏེ། བདག་ཉིད་ཀྱི་སྣང་བ་ཐ་མི་དད་པ་དེ་རྣམས་ལ་སྒྲོ་བཏགས་ནས། དེ་རྣམས་ངོ་བོ་ཐ་མི་དད་པ་བཞིན་དུ་རྣམ་པ་འགའ་ཞིག་གིས་སྟོན་ཏོ། །དེའི་སྣང་བ་ཐ་མི་དད་པ་གང་ཡིན་པ་ནི་ཕྱི་རོལ་བཞིན་དང་། དོན་བྱ་བ་བྱེད་པ་བཞིན་དང་། གསལ་བ་
[253b.5]ཐ་དད་ལ་རྗེས་སུ་འགྲོ་བ་བཞིན་ཏེ། རྟོགས་པ་པོ་འཁྲུལ་པ་རྣམས་ཀྱིས་ཕྱི་རོལ་ཉིད་དུ་ཞེན་པར་བྱས་པའོ། །བློ་ལ་ཡོངས་སུ་འཇུག་པའི་དངོས་པོ་རྣམས་ཀྱི་ཕྱི་རོལ་ལྟ་བུར་ཀུན་དུ་འཕྲོ་བ་ཉིད་དེ་ནི་རྟོགས་པ་པོས་བསམ་པའི་ངོར་སྤྱིར་རྣམ་པར་གཞག་གོ། །ད་ནི་ཅི་ལྟར་གཞན་སེལ་བའི་སྤྱི་སྒྲའི་
[253b.6]དོན་ནོ་ཞེས་བརྗོད་ཅེ་ན། དེ་ཁོ་ན་ནི་གཞན་སེལ་བ་ཡིན་ནོ། །ཅི་ལྟར་ཇི་ཙམ་པས་ཕྱི་རོལ་རྣམས་ཀྱི་དོན་གཞན་ལས་ལྡོག་པ་དེ་ཁོ་ན་གཞན་སེལ་བ་ཡིན་ཏེ། ལྡོག་པ་དང་གཞན་སེལ་བ་དང་དོན་གཞན་རྣམ་པར་གཅོད་པ་ཞེས་པ་ལ་སོགས་པ་རྣམས་ནི་རྣམ་གྲངས་རྣམས་ཡིན་ཞིང་། ལྡོག་པ་
[253b.7]ནི་ལྡོག་ལྡན་ལས་གཞན་དུ་འདོད་པ་ཡང་མ་ཡིན་ཏེ། དེས་ན་ཕྱི་རོལ་གྱི་རང་གི་མཚན་ཉིད་ཀྱི་བདག་ཉིད་ཅི་ལྟར་གཞན་སེལ་བ་ཤེས་པའི་རྣམ་པའི་རང་བཞིན་དུ་འགྱུར་ཞེ་ན་སྐྱོན་མེད་དེ། དེ་ཁོ་ན་ཉིད་དཔྱོད་པར་བྱེད་པ་འཆད་པར་བྱེད་པ་རྣམས་དེ་ལྟར་རྣམ་པར་འབྱེད་པར་བྱེད་ཀྱི་ཅིག་
[254a]
[254a.1]ཤོས་རྣམས་ནི་མ་ཡིན་ཏེ། དེ་རྣམས་ནི་བློ་ལ་ཡོད་པའི་རྣམ་པ་དེ་ཁོ་ན་དོན་བྱ་བར་རུང་བ་ཡིན་པར་སེམས་ཤིང་། བརྡ་དང་ཐ་སྙད་ཀྱི་དུས་དག་ཏུ་སྣང་བ་དང་རྣམ་པར་བརྟག་པར་བྱ་བའི་དོན་དག་གཅིག་ཉིད་དུ་ཞེ་ན། དེའི་ཕྱིར་དེ་རྣམས་ཀྱི་བསམ་པའི་དབང་
[254a.2]ལས་གཞན་སེལ་བ་ཕྱི་རོལ་གྱི་དོན་གྱི་ཡུལ་ལོ་ཞེས་བརྗོད་ཀྱི། དེ་ཁོ་ན་ཉིད་སེམས་པ་ན་མཁས་པ་རྣམས་ནི་སྣང་བ་ཐ་དད་པ་ལ་སོགས་པ་རྣམས་ཀྱི་ཕྱིར་ཐ་དད་པ་མེད་པར་མི་སེམས་སོ། །གཞན་ཡང་གང་ཐ་མི་དད་པའི་རྣམ་པ་ཅན་གྱི་བློ་སྐྱེ་བ་དེའི་རྟེན་ནི་གཞན་སེལ་བ་ཁོ་
[254a.3]ནའོ་ཞེས་བསྟན་པའི་ཆེད་དུ་སྒྲའི་ཡུལ་གཞན་སེལ་བའོ་ཞེས་བཤད་དེ། དེ་ནི་དངོས་པོ་རྣམས་ལ་ཡོད་པའི་ཕྱིར་དང་མི་འགལ་བའི་ཕྱིར་རོ། །མཚུངས་པའི་བློའི་རྟེན་གྱི་དངོས་པོ་ནི་གཞན་སེལ་བར་མི་འགལ་ཏེ། དེ་ལྟར་ནི་འབྲས་བུ་གཅིག་པ་ཉིད་ཀྱིས་དེའི་འབྲས་བུ་ཅན་མ་ཡིན་
[254a.4]པ་རྣམས་ལས་ལྡོག་པའི་ཁྱད་པར་རྣམས་ནི་རང་ཉམས་སུ་མྱོང་བའི་སྒོ་ནས་འཁྲུལ་བའི་འབྲས་བུ་ཅན་གྱི་བག་ཆགས་ཀྱི་རྒྱུ་རྣམས་སུ་འགྱུར་ཞིང་སྤྱིའི་རྣམ་པ་རྗེས་སུ་འབྲེལ་པའི་བློ་སྐྱེད་པར་བྱེད་དོ་ཞེས་པ་འདི་བསྟན་ཏོ། །འདི་ལ་སྤྱི་སྨྲ་བ་རྣམས་རྒོལ་བར་བྱེད་དེ། གལ་ཏེ་ཤིང་ནི་ཤིང་མ་ཡིན་
[254a.5]པ་དག་ལས་ཐ་དད་པ་ཡིན་ན། དེ་ནི་བརྡའི་དུས་སུ་ཤིང་མིན་འཛིན་པ་མེད་པར་དེ་ལྟར་གཟུང་བར་མི་ནུས་པ་ཉིད་ཀྱི་ཕྱིར་དང་། ཤིང་མི་ཤེས་པ་ཅན་གྱིས་དེ་རྣམ་པར་གཅོད་པའི་ངོ་བོ་ཤིང་མིན་ཡང་ཡོངས་སུ་མི་ཤེས་པའི་ཕྱིར་རོ། །ཤིང་མིན་ཅི་ཞིག་ཅེས་དྲིས་པ་ན་སྨྲས་པ་གང་ཤིང་མ་ཡིན་
[254a.6]པའོ་ཞེས་དང་། ཤིང་ཅི་ཞིག་གང་ཤིང་མིན་མ་ཡིན་པའོ་ཞེས་ཕན་ཚུན་བསྟེན་པའི་ཉེས་པ་སྟེ། འདིའི་ཕྱིར་བློ་ལ་མི་གནས་པའི་དོན་ལ་གཞན་རྣམ་པར་གཅོད་པས་བརྡ་བྱ་བར་མི་ནུས་སོ་ཞེའོ། །དེ་རྣམས་ཀྱི་སྤྱི་ལ་བརྡ་བྱེད་པ་ན་ཡང་ཤིང་མིན་རྣམ་པར་བཅད་དམ་འོན་ཏེ་མ་ཡིན།
[254a.7]གལ་ཏེ་རྣམ་གཅོད་ན་སྔར་ཤིང་། །འཛིན་པ་མེད་ན་ཅི་ལྟར་ཤེས། །དེའི་ཚེ་རྟོགས་པ་པོས་ཤིང་ཤེས་པ་མ་ཡིན་པས་ཏེ། ཤིང་དང་ཤིང་མིན་ཤེས་པ་ཁོ་ནའི་ཆེད་དུ། དེ་དོན་དུ་གཉེར་བ་ཉིད་དུ་ཉེ་བར་འགྲོ་བའི་ཕྱིར་རོ། །མི་ཤེས་པ་དེས་ཅི་ལྟར་བརྡ་ལ་ཤིང་མིན་རྣམ་པར་གཅོད་པ་རྟོགས་
[254b]
[254b.1]པར་འགྱུར། མི་རྟོགས་ན་ཡང་གཞན་རྣམ་པར་མ་བཅད་པས་བཀོད་པའི་སྒྲ་ལས། དེ་ཡོངས་སུ་སྤངས་ནས་ཐ་སྙད་ལ་འཇུག་པ་མི་རིགས་ཏེ། ཤིང་ཤ་པ་ལ་སོགས་པའི་ཁྱད་པར་བཞིན་ནོ། །གང་རྣམ་པར་མ་བཅད་པས་གང་ལ་བརྡར་བྱས་པའི་སྒྲ་ནི་དེ་ལ་དེ་ཡོངས་སུ་སྤངས་པས་
[254b.2]འཇུག་པ་མ་ཡིན་ཏེ། འདི་ལྟ་སྟེ། ཤིང་ཉིད་ལ་ཤིང་ཤ་པ་ལ་སོགས་པ་ཁྱད་པར་རྣམ་པར་མ་བཅད་པར་བརྡར་བྱས་པའི་ཤིང་གི་སྒྲ་ནི་དེ་ཡོངས་སུ་སྤངས་པས་འཇུག་པ་མ་ཡིན་པ་བཞིན། ཤིང་གི་སྒྲ་ཡང་ཤིང་ཉིད་ལ་ཤིང་མིན་རྣམ་པར་མ་བཅད་པས་བརྡར་བྱས་པའོ། །འགལ་
[254b.3]བས་ཁྱབ་པའོ། །དེ་ལྟར་འགྱུར་མོད། སྤྱི་དངོས་པོར་སྨྲ་བ་ནི། འགའ་ཞིག་རྣམ་པར་བཅད་པས་ཅུང་ཟད་སྒྲུབ་པ་མ་ཡིན་གྱི། འོ་ན་ཅི་ཞེ་ན། མདུན་ན་གནས་པའི་དངོས་པོ་གཅིག་ཅིག་ཡང་དག་པར་བསྟན་ནས། འདི་ཤིང་ཡིན་ཞེས་བརྡར་བྱེད་ལ་དེ་ལྟར་བརྡའི་དུས་སུ་
[254b.4]མཐོང་བ་ཁོ་ནའི་སྤྱིའམ་དེ་དང་འབྲེལ་པ་ཅན་ནི་ཐ་སྙད་ཀྱི་དུས་སུ་ཡང་རྟོགས་སོ་ཞེས་པས་ཐལ་བར་འགྱུར་བ་མཚུངས་པ་མ་ཡིན་ནོ་ཞེ་ན། མི་མཚུངས་པ་མ་ཡིན་ཏེ་གང་གི་ཕྱིར་གཅིག་རབ་ཏུ་བསྟན་ནས་འདི་ཤིང་ངོ་ཞེས་སྨྲ་བ་ཡང་། ངེས་པར་བཟུང་ནས་བརྡ་བྱེད་དམ། འོན་ཏེ་ངེས་
[254b.5]པར་མ་བཟུང་བ་ཡིན། གལ་ཏེ་འདི་ཁོ་ན་ཤིང་ཡིན་གྱི་གཞན་མ་ཡིན་ནོ་ཞེས་ངེས་པར་བཟུང་ནས་ཡིན་ན། སྔར་ཤིང་འཛིན་པ་མེད་པས་ཤིང་མིན་ཡོངས་སུ་མི་ཤེས་པ་ནི་ཅི་ལྟར་བརྡ་ལ་དེ་ཡོངས་སུ་བཅད་པ་རྟོགས་པར་བྱེད། ཅི་སྟེ་འདི་ཡང་ཤིང་སྟེ་གཞན་ཡང་ཡིན་ནོ་ཞེས་
[254b.6]ངེས་པར་མ་བཟུང་བ་ཡིན་ན། ཅི་ལྟར་རྟོགས་པ་པོ་ཐ་སྙད་ཀྱི་ཚེ་གཞན་ཡོངས་སུ་སྤངས་པས་འཇུག་ཅེས་པ་སྐྱོན་དེ་ཁོ་ནའོ། །ཅི་སྟེ་མཐོང་བ་ལས་བཟློག་པ་ནི་ཤེས་པར་སླ་བའི་ཕྱིར་སྐྱོན་མེད་དེ། གཅིག་འགའ་ཞིག་མཐོང་བ་དང་ལྡན་ཞིང་གཞན་ལ་དེ་དང་མི་མཐུན་པའི་རྣམ་
[254b.7]པ་ཅན་གྱི་བློ་ཉམས་སུ་མྱོང་བ་ལ་ནི་བརྡའི་དུས་ན་གཟུང་བའི་དངོས་པོ་དེ་ལས། དེ་ལས་བཟློག་པའི་རྣམ་པ་ཅན་འདི་ནི་གཞན་ནོ་ཞེས་ཆོས་མི་མཐུན་པ་ཉིད་ཀྱི་ངེས་པར་འགྱུར་རོ། །དེས་ནི་འདི་ཁོ་ན་ཤིང་ངོ་ཞེས་རབ་ཏུ་རྟོགས་པར་བྱས་ཏེ། གང་ཁོ་ན་ལ་དེ་མི་སྣང་བ་དེ་ཁོ་ན་ཤིང་མ་ཡིན་པར་
[255a]
[255a.1]རང་ཉིད་ཀྱིས་རྟོགས་པར་འགྱུར་རོ། །རྣམ་པར་གཅོད་པ་སྨྲ་བ་ལ་འདི་མི་སྲིད་དེ། གཅིག་ཏུ་མཐོང་བའི་ངོ་བོ་ནི་འགའ་ཞིག་ལ་ཡང་རྗེས་སུ་མི་འགྲོ་བའི་ཕྱིར་རོ། །མངོན་སུམ་གྱི་བརྡའི་དུས་བཟུང་བ་ནི་ཕྱིས་མི་རྟོགས་པའི་ཕྱིར་ཏེ། རྟོགས་པ་ཡོད་ན་ཡང་བརྡའི་དུས་སུ་གཟུང་བའི་
[255a.2]ཤིང་གི་གསལ་བ་ནི་གསལ་བ་གཞན་ལ་ཡང་དེ་ཁོ་ན་འདིའོ་ཞེས་རྟོགས་པར་མི་འགྱུར་ཏེ། དེ་ལྟར་ནི་ཇི་ལྟར་བུམ་པ་དེ་ལས་མཚན་ཉིད་མི་མཐུན་པ་དེ་ལྟར་པ་ལ་ཤ་ལ་སོགས་པའི་ཁྱད་པར་ཡང་སྟེ། རྗེས་སུ་འགྲོ་བའི་ངོ་བོ་ཁས་མ་བླངས་པའི་ཕྱིར་རོ་ཞེ་ན། དེ་ལྟར་ན་འོ་ན་འདི་ན་སེལ་བ་སྨྲ་བ་ལ་ཡང་
[255a.3]མཚུངས་ཏེ། གང་གི་ཕྱིར་དངོས་པོ་འདི་རྣམས་ཐ་དད་ཀྱང་འགའ་ཞིག་རྣམས་ནི་ངོ་ཤེས་ལ་སོགས་པའི་འབྲས་བུ་གཅིག་རང་བཞིན་གྱིས་བྱེད་ཀྱི་གཞན་རྣམས་ནི་མ་ཡིན་ཏེ། དེ་རྣམས་མཐོང་ནས་རྟོགས་པ་པོས་འདི་རྣམས་ནི་དེའི་རྒྱུ་སྟེ་གཞན་རྣམས་ནི་མ་ཡིན་ནོ་ཞེས་བློས་རྣམ་པར་ཕྱེ་ནས་ཕུང་པོ་གཉིས་སུ་
[255a.4]རྣམ་པར་འཇོག་གོ། །དེ་ལ་འདི་ནི་བརྒྱུད་པས་འབྲས་བུ་གཅིག་པ་ཅན་གྱི་དངོས་པོ་ལས་སྐྱེ་བའི་ཕྱིར། ཐ་མི་དད་པའི་དོན་འཛིན་པ་ཅན་ཡང་སྟེ། དེ་ཉམས་སུ་མྱོང་བ་ལས་སྐྱེ་བའི་རང་བཞིན་ལས་ཕྱི་རོལ་གྱི་དོན་དུ་ལྷག་པར་ཞེན་པའི་ངོ་བོ་ཅན་སྤྱིའི་རྣམ་པ་དང་ལྡན་པ་ངོ་ཤེས་པ་ལ། གང་འབྲས་བུ་གཅིག་
[255a.5]པའི་རྒྱུ་ཉིད་ཀྱིས་རྣམ་པར་ཕྱེ་བ་རྣམས་ཕྱི་རོལ་བཞིན་དང་དོན་བྱ་བ་བྱེད་པ་བཞིན་དང་། རྗེས་སུ་འགྲོ་བ་ཅན་གྱི་ངོ་བོ་འགའ་ཞིག་གི་རྗེས་སུ་སོང་བ་བཞིན་དུ་སོ་སོར་སྣང་ངོ་། །ཕྱི་རོལ་གྱི་དོན་གྱི་རང་བཞིན་དུ་ཞེན་པར་བྱས་པ་དེ་རྣམས་རྟོགས་ནས། རྟོགས་པ་པོའི་རྣམ་པར་རྟོག་པ་རྣམས་ལ་ཐ་མི་དད་པར་
[255a.6]རབ་ཏུ་སྣང་བ་རྣམས་རབ་རིབ་ཅན་གྱིས་ཟླ་བ་གཉིས་མཐོང་བ་བཞིན་དུ་རང་རང་གི་སྣང་བ་ཉམས་སུ་མྱོང་ན་ཡང་གཅིག་ཉིད་དུ་ལྷག་པར་ཞེན་པའི་ཕྱིར། དེ་རྣམས་བསྟན་ནས་འདི་རྣམས་ཤིང་ངོ་ཞེས་བརྡ་བྱས་པ་ན། འཁྲུལ་པ་དེས་དེ་ལ་རྗེས་སུ་འགྲོ་བའི་ངོ་བོ་གཅིག་བཞིན་དུ་མཐོང་ནས། དེའི་
[255a.7]རྒྱུ་མ་ཡིན་པ་ཉིད་དུ་རྣམ་པར་ཕྱེ་བ་དེ་ལས་བཟློག་པའི་རྣམ་པ་ཅན་རྣམས་ལ་ཤིང་མིན་ཉིད་དུ་བདེ་བླག་ཏུ་ལྷག་པར་ཞེན་པར་བྱེད་དོ། །དེ་ལ་ཐ་དད་པ་མཐོང་ཡང་གང་ཞིག་མཐོང་བ་དང་མ་མཐོང་བ་དག་གིས་འདི་ཤིང་དང་ཤིང་མིན་པ་རྣམ་པར་འབྱེད་པར་བྱེད་པ་དངོས་པོ་ཐ་མི་དད་པ་བལྟར་རུང་བ་
[255b]
[255b.1]གཅིག་ནི་མེད་དེ། དེ་ནི་རྣམ་པར་ཕྱེ་བས་དབྱུག་པ་དང་དབྱུག་པ་ཅན་བཞིན་དུ་མི་འཛིན་པའི་ཕྱིར་རོ། །མ་བཟུང་བ་ཡང་ཉེ་བར་མ་མཚོན་པའི་ཕྱིར་རོ། །གཅིག་ལ་མཐོང་བའི་རྣམ་པ་ཡང་གཞན་ལ་ལྟ་བར་མི་ནུས་པའི་ཕྱིར་དེ་དང་དེ་མ་ཡིན་པ་དང་ལྡན་པ་དག་ཤིང་དང་ཤིང་མ་ཡིན་པ་ཉིད་ཡིན་ན་
[255b.2]གསལ་བ་གཅིག་ཁོ་ན་ཤིང་ཡིན་པར་འགྱུར་རོ། །འདིར་ཡང་སེལ་བའི་རང་གི་ངོ་བོ་མི་ཤེས་པ་རྣམས་ཀྱིས་དངོས་པོ་མེད་པ་ཙམ་གཞན་སེལ་བའོ་ཞེས་སྒྲོ་བཏགས་ནས་སུན་འབྱིན་བྱེད་པར་འདོད་པས་ཕ་རོལ་པོ་རྣམས་ཀྱིས་གང་སྨྲས་པ་དེ་གཞན་སེལ་བའི་རང་གི་ངོ་བོ་ལེགས་པར་བཤད་པ་ཁོ་
[255b.3]ནས་གསལ་ཞིང་ཕ་རོལ་མནན་ཏེ། དེ་སེལ་བའི་ཆེད་དུ་བདག་ཉིད་ཆེན་པོ་རྣམས་ཀྱིས་སོ་ཞེས་པ་ཤིན་ཏུ་འཕྲོས་པས་ཆོག་གོ། །བཤད་དོ་ཞེས་པ་དོན་གྱི་རྟོགས་པར་བྱ་བའི་ཆ་ཡང་དག་པར་བསྟན་པས་གཞན་སེལ་བ་ཁོ་ན་སྒྲའི་དོན་དུ་གཞུང་འཛུགས་པར་བྱེད་དོ། །རྣམ་མང་ཞེས་པ། ཤིང་
[255b.4]ཤ་པ་ལ་སོགས་པའི་ཁྱད་པར་གྱིས་དང་། མེ་ཏོག་ཅན་དང་འབྲས་བུ་ཅན་ལ་སོགས་པའི་ཁྱད་པར་གྱིས་རྣམ་པ་དུ་མ་ཉིད་ན་ཡང་ཞེས་པའི་དོན་ཏོ། །བརྗོད་པར་བྱ་བ་ཞེས་པ་ཤིང་ལ་སོགས་པའི་དོན་ཏོ། །དེ་ནི་ཉིད་རྣམ་པ་དུ་མ་ཉིད་ན་ཡང་སྒྲ་ལས་རྣམ་པ་ཐམས་ཅད་རྟོགས་པ་མེད་
[255b.5]དོ། །རང་དང་འབྲེལ་པ་རྗེས་མཐུན་ལས། །ཞེས་པ་ལ་རང་གི་འབྲེལ་པ་ནི་མེད་ན་མི་འབྱུང་བ་ཉིད་དེ་རྗེས་སུ་འགྲོ་བ་དང་ལྡོག་པའི་མཚན་ཉིད་ཅན་ནོ། །དེ་ཡང་དེའི་སྤྱི་ལ་ལྟོས་ནས་ཡིན་གྱི་ཁྱད་པར་ལ་ལྟོས་ནས་ནི་མ་ཡིན་ནོ། །དེའི་ཕྱིར་འབྲེལ་པ་གང་འདྲ་བ་རྟོགས་པར་བྱེད་པ་ཉིད་
[255b.6]ཀྱང་དེ་འདྲ་བ་ཁོ་ནར་རིགས་སོ། །འདི་སྐད་བཤད་པར་འགྱུར་ཏེ། སྤྱི་ལ་ལྟོས་ནས་འདིའི་འབྲེལ་པ་ཡིན་ཞིང་། སྤྱི་ཡང་རྣམ་པར་གཅོད་པའི་ངོ་བོ་ཁོ་ནར་ཇི་སྐད་བཤད་པ་བཞིན་ཏེ། ལྟོས་ནས་ཡིན་གྱི་ཁྱད་པར་ལ་གཞན་མི་རིགས་པའི་ཕྱིར་རོ། །དེའི་ཕྱིར་རྣམ་པར་གཅོད་པ་ཁོ་ན་བྱེད་ཅིང་
[255b.7]རྟོགས་པར་བྱེད་དོ་ཞེས་པའོ། །ཅི་སྟེ་སྒྲ་ཡིས་ཆ་ཅི་ཞིག་རྟོགས་པར་བྱེད་ཅེ་ན་གསུངས་པ། སྒྲ་ཡང་དུ་མའི་ཆོས་ལྡན་པ། །ཞེས་པ་ལ་སོགས་པ་སྟེ། རང་དང་སྤྱིའི་ཆོས་རྣམས་ཀྱི་ཆོས་དུ་མའོ། །གང་གི་དོན་ནི་འདའ་མིན་པ། །ཞེས་པ་སྤྱིའི་ཆོས་ཤིང་དང་སྒྲ་ཉིད་ལ་སོགས་པ་གང་གིས་
[256a]
[256a.1]འཁྲུལ་བར་བྱེད་པ་མིན་ཞིང་རྟོགས་པར་བྱེད་པ་དེ་ཉིད་ཀྱིས་ཞེས་པ་འདིས་ཆོས་དེ་ཁོ་ན་རྟོགས་པར་བྱེད་དོ་ཞེས་པའི་དོན་ཏོ། །ཉིད་ཀྱི་སྒྲས་ནི་གང་རྣམ་པར་བཅད་པ་དེ་བསྟན་ཏོ། །སྒྲ་ཡི་ཡོན་ཏན་སོགས་ཀྱིས་མིན། །ཞེས་པ་སོགས་ཀྱི་སྒྲས་སྒྲའི་ཤེས་བྱ་ཉིད་
[256a.2]ལ་སོགས་པ་རྣམས་གཟུང་ངོ་། །རྟོགས་བྱེད་མ་ཡིན་པ་ཉིད་ནི་དེ་རྣམས་ལ་འཁྲུལ་པ་ཉིད་ཀྱི་ཕྱིར་རོ། །དེ་ལྟར་ནི་དེ་རྣམས་ནི་ཤིང་གི་དོན་མེད་ཀྱང་རོ་ལ་སོགས་པ་རྣམས་ལ་མཐོང་གི །ཤིང་གི་སྒྲ་ཉིད་ལ་སོགས་པའི་སྤྱི་ནི་མ་ཡིན་ནོ། །གལ་ཏེ་གཞན་སེལ་བ་ཙམ་ཞེས་པ་ལ་སོགས་པ་སྟེ།
[256a.3]འདིར་བསམ་པ་ནི་འཆད་པར་འགྱུར་བའོ། །ཅི་ལྟར་ཞེས་པ་ལ་སོགས་པ་འདི་ནི་ཚད་མའི་འབྲས་བུའོ། །དྲི་བས་བསམ་པ་བསལ་བར་བྱ་བའི་ཆེད་དུ་གསུངས་པ། ཅི་ལྟར་མི་འགྱུར་ཞེ་ན་ཞེས་པ་ལ་སོགས་པའོ། །གང་གི་ཕྱིར་ཐ་དད་ཅེས་པ་ལ་སོགས་པ་སྟེ། བསལ་བར་བྱ་བ་ཐ་དད་
[256a.4]པས་ནི་ལྷན་ཅིག་སྤྱོད་པ་ལས་དོན་ཐ་དད་པ་སྟོན་ཏོ། །འདི་ནི་གཏན་ཚིགས་ཏེ་གང་རྣམས་དོན་ཐ་དད་པ་དེ་རྣམས་ནི་གཞི་མཐུན་པ་མ་ཡིན་ཞིང་། ཁྱད་པར་དང་ཁྱད་པར་དུ་བྱ་བར་གྱུར་པ་ཡང་མ་ཡིན་ཏེ། བུམ་པ་དང་སྣམ་བུ་ལ་སོགས་པའི་སྒྲ་བཞིན། སྔོན་པོ་དང་ཨུཏྤ་ལ་ལ་སོགས་པའི་
[256a.5]སྒྲ་རྣམས་ཀྱང་དེ་ལྟ་བུའོ། །ཁྱབ་པར་བྱེད་པ་དང་འགལ་བའོ། །དེ་རྣམས་ཀྱང་ཞེས་པ་ལ་སོགས་པ་སྟེ། གལ་ཏེ་ཡང་། བསལ་བའི་དབྱེ་བས་དོན་ཐ་དད། །དེ་ལྟ་ན་ཡང་ཁྱད་པར་ཡོད་དེ། གང་གི་ཕྱིར། རང་དོན་དབྱེ་བ་རྟོགས་ལ་རྨོངས། །སོ་སོར་ཞེས་པ་ལྷག་མའོ། །རང་གི་དོན་ནི་སྤྱི་
[256a.6]སྟེ། ཨུཏྤ་ལའི་སྒྲ་ནི་ཨུཏྤ་ལ་ཙམ་མོ། །དེའི་དབྱེ་བ་ནི་ཨུཏྤ་ལ་དམར་པོ་ལ་སོགས་པ་རྣམས་སོ། །སྔོན་པོ་ཙམ་སྟེ། དེའི་དབྱེ་བ་བུང་བ་ལ་སོགས་པ་རྣམས་སོ། །དེ་རྟོགས་ལ་བླུན་པ་ནི་ཐེ་ཚོམ་གྱི་རྒྱུ་རྣམས་སོ། །འདིས་ནི་སོ་སོར་རང་གི་དོན་གྱི་ཁྱད་པར་ལ་ཐེ་ཚོམ་གྱི་རྒྱུ་ཉིད་དེ། དོན་གྱིས་
[256a.7]གོ་བས་ལྷན་ཅིག་པ་རྣམས་ལ་ངེས་པའི་རྒྱུ་ཉིད་དུ་བྱེ་བྲག་སྨྲས་སོ། །གང་གི་ཕྱིར་འདི་ལྟར་ཨུཏྤ་ལ་སྔོན་པོ་ལ་སོགས་པའི་སྒྲ་རྣམས་ཕན་ཚུན་གྱི་དོན་ལ་རང་གི་དོན་གྱི་བྱེ་བྲག་ལ་སོ་སོར་ཐེ་ཚོམ་གྱི་རྒྱུ་ཉིད་དེ། ལྷན་ཅིག་ཏུ་གྱུར་པ་རྣམས་ཁོ་ན་ལ་ནི་ངེས་པའི་རྒྱུ་ཉིད་ཡིན་པ་དེའི་ཕྱིར་ཨུཏྤལ་
[256b]
[256b.1]སྔོན་པོ་ཞེས་པ་བྱ་བ་དངོས་པོ་གཅིག་ལ་འབྲས་བུ་ཐ་མི་དད་པ་ཉིད་ཡིན་ཞིང་། ཁྱད་པར་དུ་བྱས་པའི་དོན་མངོན་པར་གསལ་བའི་མཚན་ཉིད་ཅན་དུ་རིགས་ཏེ། དེའི་ཕྱིར་གཅིག་འབྲས་བུ་ཐ་དད་མེད་པ་ཉིད་ཀྱི་ཕྱིར་གཞི་མཐུན་པ་ཉིད་དེ་དེའི་ཕྱིར་ཡང་ཁྱད་པར་བྱེད་པ་དང་ཁྱད་པར་བྱ་བའི་དངོས་
[256b.2]པོར་འཐད་དོ། །ཅི་ལྟར་བྱས་ནས་ཤེ་ན། ཨུཏྤ་ལའི་སྒྲ་རང་གི་དོན་གྱི་ཁྱད་པར་ལ་ཐེ་ཚོམ་གྱི་རྒྱུས། རང་གི་དོན་སྤྱི་བློས་སྒྲོ་བཏགས་པ་ལ། དོན་དེ་ནི་གཞན་གྱི་རྣམ་པ་ཡོངས་སུ་མ་བཅད་པ་ཅན་ཉིད་ཀྱི་ཕྱིར་ན་རྣམ་པ་གཞན་དུ་འདོད་པ་དང་བཅས་པའི་བློས་ཡོངས་སུ་གཅད་པར་བྱ་བ་
[256b.3]སྟེ། གང་ཨུཏྤ་ལ་འདི་ཅི་སྔོན་པོ་ཡིན་ནམ་འོན་ཏེ་གཞན་དམར་པོ་ལ་སོགས་པ་ཡིན་ཞེས་དེའི་ཕྱིར་དོགས་པ་གཅད་པའི་ཆེད་དུ་སྔོན་པོའི་སྒྲ་སྦྱར་བཞིན་པ་ནི་གང་ཨུཏྤ་ལ་འདི་ནི་སྔོན་པོ་སྟེ། དམར་པོ་ནི་མ་ཡིན་ནོ་ཞེས་དེ་ལ་རང་གི་དོན་ཉེ་བར་སྡུད་ཅིང་ཨུཏྤ་ལའི་དོན་ཁྱད་པར་དུ་བྱེད་དོ་ཞེས་
[256b.4]པས་ཁྱད་པར་དང་ཁྱད་པར་དུ་བྱ་བའི་དངོས་པོར་འགྱུར་རོ། །འདིར་དོན་ནི་འདི་ཡིན་ཏེ། གང་སྒྲ་རྣམས་ཀྱིས་བརྗོད་པར་བྱ་བ་ནི་བློ་ལ་སྣང་བའི་བདག་ཉིད་ཡིན་ཡང་ལྷག་པར་ཞེན་པས་ཕྱི་རོལ་གྱི་དོན་གྱི་རང་བཞིན་ནོ། །དེས་ན་སྒྲའི་དོན་ཐ་དད་པ་ཉེ་བར་སྡུད་པ་ན་ཡང་ཆོས་དུ་མ་རྗེས་སུ་སོང་
[256b.5]བ་ནི་ཐ་མི་དད་པ་ལྟར་སྣང་སྟེ། དེ་ལས་ཀྱང་ཨུཏྤ་ལ་སྔོན་པོ་ལ་སོགས་པའི་སྒྲ་རྣམས་ཀྱིས་རྣམ་པ་དེ་ལྟ་བུའི་དོན་གྱི་གཟུགས་བརྙན་བློ་ལ་གཏོད་པར་བྱེད་ཅིང་དངོས་པོ་གཅིག་ཁོ་ན་ཨུཏྤ་ལ་དང་སྔོན་པོ་ཉིད་ལ་སོགས་པའི་ཆོས་དུ་མར་རབ་ཏུ་གསལ་བར་བྱེད་དོ་ཞེས་པས། ཐ་སྙད་བྱེད་པ་པོ་
[256b.6]འཁྲུལ་པ་རྣམས་ཀྱིས་རྟོགས་པར་བྱེད་དེ། དེའི་ཕྱིར་དེ་རྣམས་ཀྱི་རྟོགས་པ་ཇི་ལྟ་བ་བཞིན་དུ་གཞི་མཐུན་པ་ཉིད་འགལ་བ་མེད་དོ། །དེ་ལྟར་བློ་ལ་ཡོད་པའི་སྒྲའི་དོན་དེ་ཁོ་ན་ནི་སྔོན་པོ་ལ་སོགས་པའི་སྒྲ་གང་རུང་ཅིག་སྦྱར་བ་ལས་སྔོན་པོ་ལ་སོགས་པའི་རྣམ་པ་གཅིག་ངེས་ཀྱང་བྱེ་བྲག་གཞན་
[256b.7]མ་ངེས་པ་ཉིད་ཀྱི་ཕྱིར། གང་སྔོན་པོ་འདི་ཅི་གང་ཨུཏྤ་ལ་འམ། འོན་ཏེ་བུང་བ་ལ་སོགས་གཞན་ཡིན་ཞེས་པ་འདི་ལྟ་བུ་ལ་སོགས་པས་བྱེ་བྲག་གཞན་དུ་དོགས་པ་དང་བཅས་པའི་བློས་ཡོངས་སུ་གཅོད་པར་བྱེད་དེ། དེའི་ཕྱིར་དོགས་པ་གཅད་པའི་ཆེད་དུ་སྔོན་པོའི་སྒྲ་དང་ལྷན་ཅིག་ཏུ་སྦྱར་བཞིན་
[257a]
[257a.1]པ་ཨུཏྤལ་ལ་སོགས་པའི་སྒྲ་སྦྱར་བཞིན་པ་རྣམས་ཨུཏྤལ་སྔོན་པོ་ལ་སོགས་པར་སྣང་བའི་རྣམ་པར་ཤེས་པ་སྐྱེད་པར་བྱེད་ཅིང་། སྔོན་པོ་ལ་སོགས་པའི་རྣམ་པ་ཅན་གྱི་དངོས་པོ་ནི་ཨུཏྤལ་མ་ཡིན་པ་ལ་སོགས་པ་དོན་གཞན་ལ་རྣམ་པར་གཅོད་པར་བྱེད་དོ་ཞེས་ལྷག་པར་ཞེན་པར་བྱེད་དོ། །
[257a.2]དེའི་ཕྱིར་རྟོགས་པའི་ངོར་བྱས་པས་ཁྱད་པར་དང་ཁྱད་པར་དུ་བྱ་བའི་དངོས་པོ་ཡང་འཐད་དོ་ཞེས་པའོ། །བསལ་བར་བྱ་བ་ཐ་དད་པ་ཡོད་ན་ཡང་ཞེས་པ་འདི་ཡང་སྔར་བཞིན་དུ་བསལ་བྱ་ཐ་དད་པས་དོན་ཐ་དད་པར་སྟོན་ཏོ། །རང་གི་དོན་གྱི་ཁྱད་པར་གསལ་བར་བྱ་བའི་དོན་དུ་ཞེས་པ། རང་གི་དོན་གྱི་ཁྱད་
[257a.3]པར་ནི་ཨུཏྤལ་སྔོན་པོ་ལ་སོགས་པའི་སྒྲ་རྣམས་ཀྱི་ནི་ཨུཏྤ་ལ་སྔོན་པོ་ལ་སོགས་པའོ། །དེ་མངོན་པར་གསལ་བའི་དོན་དུ་སྟེ། འདིས་ནི་འབྲས་བུ་ཐ་དད་མེད་པ་ཉིད་གསུངས་སོ། །འགྲེང་བ་དང་བྱ་རོག་གནས་པ་བཞིན་དུ་རང་བསལ་བའི་དོན་དུ་ཞེས་པ། སྔོན་པོའི་སྤྱི་དང་ཨུཏྤ་ལའི་སྤྱིའོ། །གཅིག་
[257a.4]ལ་སྡུད་པར་བྱེད་པ་རྣམས་ཞེས་པ། ཨུཏྤ་ལ་སྔོན་པོ་ལ་སོགས་པའི་དོན་གྱི་ཁྱད་པར་ལ་ཁྱད་པར་དུ་བྱེད་པ་ཉིད་དུ་བཤད་པའི་ཨུཏྤལ་སྔོན་པོ་ལ་སོགས་པའི་སྒྲ་ལྷན་ཅིག་སྦྱར་བ་རྣམས་ནི་ཨུཏྤ་ལ་སྔོན་པོ་ལ་སོགས་པར་སྣང་བ། རྣམ་པར་ཤེས་པ་ལ་གཏོད་པར་བྱེད་ཅིང་། ཨུཏྤ་ལ་སྔོན་པོ་ལ་
[257a.5]སོགས་པའི་དོན་ལ་རང་གི་དོན་གྱི་སྤྱི་ཨུཏྤལ་སྔོན་པོ་ལ་སོགས་པ་ནི་ཁྱད་པར་དུ་བྱེད་པ་ཉིད་དུ་ཉེ་བར་སྡུད་པར་བྱེད་པ་པོ་རྣམས་རྟོགས་པ་པོ་རྣམས་ཀྱིས་རབ་ཏུ་རྟོགས་པར་བྱེད་དེ། དེའི་ཕྱིར་དེའི་རྟོགས་པའི་དབང་ལས་དེ་སྐད་དུ་བཤད་པའོ། །འགྲེང་བ་ཉིད་ནི་འགྲེང་བ་མ་ཡིན་པ་རྣམ་པར་གཅོད་
[257a.6]པས་བསྒྲེང་བའི་སྤྱི་རྟོགས་པར་བྱེད་ཅིང་། ཐོ་ཡོར་དང་མི་ལ་སོགས་པ་འགྲེང་བའི་ཁྱད་པར་ལ་ཐེ་ཚོམ་གྱི་རྒྱུ་སྟེ། བྱ་རོག་གནས་པ་ཡང་བྱ་རོག་གི་རྟེན་དུ་མི་རུང་བའི་དངོས་པོ་རྣམ་པར་གཅོད་པས་བྱ་རོག་གནས་པར་རུང་བའི་དངོས་པོ་ཙམ་རྟོགས་པར་བྱེད་ཅིང་། དེའི་ཁྱད་པར་ཐོ་ཡོར་
[257a.7]དང་ཐང་ལ་སོགས་པ་རྣམས་ལ་ཐེ་ཚོམ་གྱི་རྒྱུ་ཡིན་ཞིང་། དེ་དག་ལྷན་ཅིག་བྱས་པ་དག་ནི་སྐྱེས་བུའི་གཟུགས་མ་ཡིན་པའི་འགྲེང་བ་ཉིད་ཀྱི་བྱེ་བྲག་ལ་ངེས་པའི་རྒྱུ་ཉིད་ཀྱི་ཕྱིར་གཞི་མཐུན་པར་འགྱུར་བ་ཇི་ལྟ་བ་དེ་བཞིན་དུ། ཨུཏྤལ་སྔོན་པོ་ལ་སོགས་པའི་སྒྲ་རྣམས་དོན་གཅིག་ལ་སྔར་
[257b]
[257b.1]བརྗོད་པའི་རྣམ་པས་དེར་འགྱུར་རོ། །དེ་ལྟར་ནི་དེ་རྣམས་ཞེས་པ་སོ་སོ་བ་ནི་རང་གི་དོན་གྱི་ཁྱད་པར་ལ་ཐེ་ཚོམ་གྱི་རྒྱུ་སྟེ། དོན་གྱིས་གོ་བས་ལྷན་ཅིག་བྱས་པ་རྣམས་ནི་ངེས་པའི་རྒྱུ་ཉིད་དུ་གསུངས་སོ། །གང་གི་ཕྱིར་ཨུཏྤ་ལ་སྔོན་པོ་ལ་སོགས་པའི་སྒྲ་རྣམས་སོ་སོ་བ་ནི་རང་གི་དོན་གྱི་བྱེ་བྲག་ལ་ཐེ་ཚོམ་
[257b.2]གྱི་རྒྱུ་རྣམས་ཏེ། ལྷན་ཅིག་བྱས་པ་རྣམས་ཁོ་ན་ནི་ངེས་པའི་རྒྱུ་ཡིན་པ་དེའི་ཕྱིར་ལྷན་ཅིག་པ་རྣམས་ནི་རང་གི་དོན་གྱི་ཁྱད་པར་དོན་གཅིག་གསལ་བར་བྱེད་པ་རྣམས་གཞི་མཐུན་པར་འགྱུར་རོ། །སྒྲ་གཞན་དང་ལྷན་ཅིག་པའི་གསལ་བར་བྱ་བའི་དོན་མི་སྲིད་པའི་ཕྱིར་ཡང་ཞེས་པ་ལ་སོགས་པ། སྒྲ་གཞན་སྔོན་པོའི་
[257b.3]སྒྲ་དང་ལྷན་ཅིག་པའི་ཨུཏྤ་ལའི་སྒྲའི་གསལ་བར་བྱ་བའི་གང་ཁྱད་པར་ཅན་གྱི་དོན་དེ་ནི་ཨུཏྤ་ལའི་སྒྲ་འབའ་ཞིག་པ་ལ་སྲིད་པ་མ་ཡིན་ནོ། །དེ་བཞིན་དུ་སྔོན་པོའི་སྒྲ་ལ་ཡང་ཨུཏྤ་ལའི་སྒྲ་དང་ལྷན་ཅིག་པའི་གསལ་བར་བྱ་བ་གང་ཡིན་པ་དེ་འབའ་ཞིག་པ་ལ་མི་སྲིད་དོ་ཞེས་པའོ། །སྒྲ་གཞན་ཉེ་བས་ཁྱད་
[257b.4]པར་དུ་བྱས་པའི་དོན་ལ་འཇུག་པའི་ཕྱིར་ཕན་ཚུན་ཁྱད་པར་དང་ཁྱད་པར་དུ་བྱ་བའི་དངོས་པོའོ། །དཔེར་ན་འགྲེང་བ་ཉིད་དང་བྱ་རོག་གནས་པ་དག་ནི་ལྷན་ཅིག་པ་དག་ཁོ་ན་ཁྱད་པར་དུ་བྱས་པའི་དོན་རྟོགས་པར་བྱེད་པ་དག་ཡིན་པ་བཞིན་ནོ། །དོན་རྣམས་ཁོ་ནའི་ཁྱད་པར་དང་ཁྱད་པར་དུ་བྱ་བའི་དངོས་པོར་འཇིག་
[257b.5]རྟེན་ན་གྲགས་ཀྱི། སྒྲ་རྣམས་ལ་ནི་མ་ཡིན་ཏེ། དེས་ན་ཅི་ལྟར་དེ་རྣམས་ལ་དེ་ཅི་ལྟར་རྣམ་པར་གཞག་ཅེས་དོགས་པར་བྱས་ནས་གྱུར་པ་སྨོས་པ་སྟེ། གྱུར་པའི་སྒྲ་ནི་དཔེ་རྗོད་པར་བྱེད་པ་དོན་དུ་གྱུར་པ་ཁོ་ནའི་ཆོས་ཏེ། དེ་རྗོད་པར་བྱེད་པའི་སྒྲར་ཉེ་བར་གདགས་པར་བྱའོ་ཞེས་གྱུར་པའི་སྒྲའི་
[257b.6]དོན་ཏོ། །དེས་ན་འདིས་ནི་གཞི་མཐུན་པ་ཉིད་ཡོད་ན་ཡང་ཁྱད་པར་དང་ཁྱད་པར་དུ་བྱ་བའི་དངོས་པོ་དག་ཀྱང་བསྒྲེང་བ་དང་བྱ་རོག་གནས་པ་ལ་སོགས་པ་རྣམས་ལ་མཐོང་བའི་ཕྱིར་གཏན་ཚིགས་འཁྲུལ་པར་གསུངས་སོ། །འོ་ན་གཞི་གཅིག་པ་ཅན་གང་ཡིན་པ་དེ་ཞེས་པ། ཚིག་རྣམ་པར་སྦྱོར་
[257b.7]བའི་དུས་ན་སྔོན་པོ་ཡང་དེ་ཡིན་ལ་ཨུཏྤ་ལ་ཡང་ངོ་ཞེས་བྱེད་དེ། དེའི་ཕྱིར་དྲི་བའོ། །འདིས་ནི་གང་བརྗོད་པ་སྒྲ་གཞན་དང་ལྷན་ཅིག་པ་ཁོ་ནའི་སྒྲ་ཡིས་ཁྱད་པར་དུ་བྱས་པའི་དོན་གསལ་བར་བྱའོ་ཞེས་པ་འདི་ལ་ཁས་བླངས་པས་གནོད་པ་གསུངས་སོ། །དེ་ནི་སྔོན་པོ་འབའ་ཞིག་མིན། །ཞེས་པ་
[258a]
[258a.1]སྔོན་པོ་འབའ་ཞིག་པ་བཀག་པས་སྔོན་པོའི་སྒྲ་ཙམ་གྱི་བརྗོད་པར་བྱ་བ་ཉིད་འགེགས་སོ། །དེ་བཞིན་དུ་ཨུཏྤལ་འགའ་ཞིག་ཀྱང་མ་ཡིན་ཞེས་པས་ཨུཏྤལའི་སྒྲ་ཙམ་གྱི་བརྗོད་པར་བྱ་བ་ཉིད་འབའ་ཞིག་པའོ། །དེ་ལྟར་ན་སྔོན་པོའི་སྒྲ་འབའ་ཞིག་པ་དང་ཨུཏྤལའི་སྒྲ་
[258a.2]འབའ་ཞིག་པ་གང་བརྗོད་པར་བྱ་བ་དེ་འཇིག་རྟེན་ན་སྔོན་པོ་འབའ་ཞིག་པ་དང་ཨུཏྤལ་འབའ་ཞིག་པའོ་ཞེས་གྲགས་སོ། །ཡང་ཅིའི་ཕྱིར་སྔོན་པོ་དང་ཨུཏྤལའི་སྒྲ་འབའ་ཞིག་པ་དག་གིས་དེ་བརྗོད་པར་བྱ་བ་མ་ཡིན་ཞེ་ན་གསུངས་པ། ཚོགས་པ་བརྗོད་བྱ་ཉིད་ཡིན་ཕྱིར། །ཞེས་པ་གང་གི་ཕྱིར་ལྷན་ཅིག་
[258a.3]བྱས་པ་དག་ཁོ་ནའི་སྔོན་པོ་དང་ཨུཏྤལའི་སྒྲ་དག་གིས་དོན་དེ་བརྗོད་པར་བྱ་བ་སྟེ། འབའ་ཞིག་པ་དག་གིས་མ་ཡིན་པས་ཏེ། གཞན་དུ་ན་གཅིག་གིས་དོན་དེ་རྗོད་པར་བྱེད་པ་ཉིད་ན་རྣམ་གྲངས་པའི་སྒྲ་ལྟར་དེ་དག་ལྷན་ཅིག་སྦྱོར་བ་མི་འཐད་དོ། །དེས་ན་འདིས་ནི་ཚིག་རྣམ་པར་སྦྱོར་བའི་དུས་
[258a.4]ན་ཡང་ལྷན་ཅིག་པ་ཁོ་ནའི་སྔོན་པོ་དང་ཨུཏྤལའི་སྒྲ་དག་གིས་དེ་བརྗོད་པར་བྱའོ་ཞེས་ཁས་བླངས་པའི་ཕྱིར་ཁས་བླངས་པས་གནོད་པ་མ་ཡིན་ནོ་ཞེས་སྟོན་ཏོ། །འོ་ན་འབའ་ཞིག་པ་དག་གིས་ཅི་ཞིག་རྟོགས་ཤེ་ན། ཅུང་ཟད་ཀྱང་མ་ཡིན་ནོ། །གང་གི་ཕྱིར། ཡི་གེ་བཞིན་དུ་དེ་དོན་མེད་ཡང་ཆ་
[258a.5]ཤས་རྣམས་ལ་དོན་མེད་པ་ཉིད་ན་ཅི་ལྟར་དེ་ཚོགས་པ་དོན་དང་ལྡན་པ་ཉིད་ཡིན་ཞེ་ན་གསུངས་པ། ཇི་ལྟར་ཞེས་པ་ལ་སོགས་པའོ། །མི་མཐུན་པ་ཉེ་བར་བཀོད་པ་ཞེས་པས། དཔེ་མི་མཚུངས་པ་ཉིད་སྨྲས་སོ། །ཅི་ལྟར་མི་མཚུངས་པ་ཡིན་ཞེ་ན་སྨྲས་པ་མ་ཡིན་ཞེས་པ་ལ་སོགས་པ་སྟེ།
[258a.6]འདིས་ནི་ཁས་བླངས་པ་ཉམས་པ་ཉིད་སྨྲས་ཏེ། སྔོན་པོའི་སྒྲ་འབའ་ཞིག་པ་ཡང་དོན་དང་ལྡན་པ་ཉིད་དུ་ཁས་བླངས་པའི་ཕྱིར་རོ། །ཡིག་ལ་དོན་འགའ་མེད་པ་སྟེ། །ཚིག་གཉིས་པ་ནི་རྟོགས་ཤེ་ན། །སྐྱོན་འདི་མེད་དེ་གང་གི་ཕྱིར། །དེ་ཡིས་བརྗོད་བྱ་ཞེས་དེར་ཡང་། །འབའ་ཞིག་ཡང་དག་
[258a.7]རྟོགས་པར་བྱ། །སྔོན་པོའི་སྒྲ་དེར་ཡང་དོན་གང་རྟོགས་པར་བྱ་བ་དེ་སྔོན་པོའི་སྒྲའི་བརྗོད་པར་བྱ་བའོ་ཞེས་པ་འབའ་ཞིག་པ་རྟོགས་ཀྱི། ཚོགས་པའི་དོན་ནི་སྔོན་པོའི་སྒྲའི་བརྗོད་པར་བྱ་བ་ཉིད་དུ་རྟོགས་པར་བྱ་བ་མ་ཡིན་ནོ་ཞེས་པའི་དོན་ཏོ། །དེ་ཉིད་ཀྱི་ཕྱིར་ཚོགས་པའི་དོན་གྱིས་སྟོང་པ་ཉིད་དུ་འབའ་
[258b]
[258b.1]ཞིག་པ་དག་སྟོན་པ་གསུངས་པ། ཇི་ལྟར་ཁོ་ནར་ཞེས་པ་ལ་སོགས་པའོ། །གང་བཤད་པ་ཞེས་པ་ལ་སོགས་པས་ཕྱོགས་སྔ་མ་སོ་སོར་བརྗོད་ནས། དེ་ལ་ཡང་ཞེས་པ་ལ་སོགས་པས་དེའི་བརྗོད་བྱ་ཞེས་པ་ལ་སོགས་པ་ཕྱེད་ཕྱི་མའི་དོན་འཆད་དོ། །རིགས་ནི་སྔོན་པོའི་ཡོན་ཏན་དང་འཕྲོད་པ་འདུ་བ་
[258b.2]ཅན་གྱི་སྔོན་པོ་ཉིད་དོ། །འབའ་ཞིག་པ་སྨོས་པས་ཚོགས་པའི་དོན་གྱིས་སྟོང་པ་ཉིད་གསུངས་སོ། །སྔོན་པོའི་སྒྲས་བརྗོད་པར་བྱ་བས་ནི། གང་ལ་དེ་འཕྲོད་པ་འདུས་པ་རིགས་དང་སྦྱར་བའི་ཡོན་ཏན་ནམ། གང་ལ་སྔོན་པོའི་ཡོན་ཏན་འཕྲོད་པ་འདུས་པ་རིགས་དང་སྦྱར་བའི་ཡོན་ཏན་དང་
[258b.3]སྦྱར་བའི་རྫས་ཏེ། འདི་ཐམས་ཅད་ཀྱང་ཚོགས་པའི་དོན་མ་ཡིན་ནོ། །དེ་ལྟར་ན་གཉིས་ཀར་ཡང་ཚོགས་པའི་བརྗོད་པར་བྱ་བའི་དོན་གྱིས་དོན་མེད་པ་ཉིད་མངོན་པར་བརྗོད་པ་ཉིད་ཀྱི་ཕྱིར་མི་མཐུན་པ་ཉེ་བར་བཀོད་པ་ཉིད་མེད་ཅིང་དམ་བཅའ་བ་ལ་ཁས་བླངས་པས་གནོད་པ་མ་ཡིན་ནོ། །དེའི་
[258b.4]ཕྱིར་དོན་གྱིས་སྟོང་པ་རྣམས་ཀྱིས་ཞེས་པ། ཚོགས་པའི་དོན་གྱིས་སྟོང་པ་རྣམས་ཀྱིས་སོ། །ཚོགས་པ་རྣམས་ཀྱིས་ཞེས་པ་སྔོན་པོ་ལ་སོགས་པའི་སྒྲ་རྣམས་ཀྱིས་སོ། །འོ་ན། བསལ་བྱའི་དབྱེ་བས་དོན་ཐ་དད། །ཅེས་པ་བརྗོད་པར་བྱ་བ་རྣམས་སོ་ཞེས་པ་ཅི་ལྟར་ཞེ་ན་གསུངས་
[258b.5]པ། སྒྲ་ཐ་དད་པའི་བརྗོད་པར་བྱ་བས་ཞེས་པ་ལ་སོགས་པ་སྟེ། ཐ་དད་པར་ནི་སོ་སོར་གྱུར་པ་སྟེ། འབའ་ཞིག་པ་ཞེས་པའི་ཐ་ཚིག་གོ། །འདི་སྐད་བཤད་པར་འགྱུར་ཏེ། སྔོན་པོ་ལ་སོགས་པའི་འབའ་ཞིག་པའི་སྒྲའི་བརྗོད་པར་བྱ་བའི་དོན་གྱིས་ཐ་དད་ཅེས་པ་བརྗོད་པར་བྱའི། ཚོགས་
[258b.6]པའི་དོན་གྱིས་ནི་མ་ཡིན་ནོ་ཞེས་པའོ། །གལ་ཏེ་དེ་ལྟ་ན་ཚོགས་པའི་བརྗོད་པར་བྱ་བ་ཁོ་ན་ཁྱད་པར་དུ་བྱས་པའི་དོན་ཡིན་ན། དེ་ཅི་ལྟར་གཞི་མཐུན་པ་ཉིད་དམ་ཁྱད་པར་དང་ཁྱད་པར་དུ་བྱས་པའི་དངོས་པོའི་བར་ཡིན་ཏེ། འདི་གཉིས་ཀ་ནི་ཐ་དད་པའི་རྟེན་ཅན་ཡིན་ཞིང་། ཚོགས་པ་ཡང་གཅིག་ཡིན་
[258b.7]ནོ་ཞེ་ན། ཡོངས་སུ་བརྟགས་ནས་སྒྲོ་བཏགས་པའི་ཆ་ཤས་ཡོད་པར་གྱུར་པའི་ཕྱིར་གཉིས་ཀ་རྣམ་པར་གཞག་པར་བྱ་སྟེ། འདི་ནི་སེལ་བའི་སྒོ་ལ་གང་འདིའི་འདི་དག་ལས་དོན་དུ་བརྟགས་པའོ་ཞེས་འཆད་པར་འགྱུར་རོ། །རྟོགས་པ་པོའི་བསམ་པའི་དབང་ལས་ཡང་ན་སྟེ། རྟོགས་པ་པོ་
[259a]
[259a.1]རྣམས་ནི་ཁྱད་པར་དང་ཁྱད་པར་ཅན་གཉི་ག་ཅན་གྱི་དོན་གཅིག་ཁོ་ན་ལ་སྒྲ་གཉིས་པོ་འདི་དག་ནི་སོ་སོར་རྗོད་པར་བྱེད་པ་དག་གོ་ཞེས་སེམས་པར་བྱེད་དེ། དེའི་ཕྱིར་དེ་རྣམས་ཀྱི་བསམ་པའི་དབང་ལས་དེ་ལྟར་རྣམ་པར་གཞག་པར་བྱའོ། །དོན་གཞན་ཞེས་པ་ལ་སོགས་པ་སྟེ། གལ་ཏེ་
[259a.2]གཞན་སེལ་བ་ལས་གཞན་རིགས་ལ་སོགས་པ་བརྗོད་པར་བྱ་བར་འདོད་ནའོ། །ཡན་ལག་གི་དོན་དག་ཅེས་པ་སྔོན་པོ་ལ་སོགས་པའི་སྒྲ་འབའ་ཞིག་པའི་བརྗོད་པར་བྱ་བ་དག་གོ། །དེ་དག་གི་གཞི་ནི་ཚོགས་པའི་བརྗོད་པར་བྱ་བའི་དོན་གང་ཡིན་པའོ། །དེ་ལས་ཞེས་པ་ཡན་ལག་གི་དོན་དེ་དག་ལས་སོ། །
[259a.3]ཐ་དད་པར་འགྱུར་བའམ་ཐ་མི་དད་པ་ཞེས་པ་རྫས་སུ་ཡོད་པ་ལ་རྣམ་པར་རྟོག་པ་གསུམ་པ་མེད་པའི་ཕྱིར་རོ། །དེ་ལ་ཐ་མི་དད་པའི་ཕྱོགས་ལ་སྐྱོན་ཉེ་བར་བསྟན་པའི་ཆེད་དུ་གསུངས་པ། ཚོགས་པ་གཅིག་ཉིད་ཡོད་མ་ཡིན། །ཞེས་པ་སྟེ་ཅིའི་ཕྱིར་ཞེ་ན། ཕན་ཚུན་ཁྱད་པར་མེད་ཐལ་ཕྱིར། །ཚོགས་པ་
[259a.4]ཅན་དག་ཕན་ཚུན་ཐ་དད་མེད་པར་ཐལ་བར་འགྱུར་རོ་ཞེས་པའི་དོན་ཏོ། །གལ་ཏེ་ཞེས་པ་ལ་སོགས་པས་ཚིག་ལེའུར་བྱས་པའི་དོན་དུ་གསུངས་པའོ། །འདི་ནི་འདིར་བསྡུས་པའི་དོན་ཏོ། །གང་ཚོགས་པ་གཅིག་ལས་གཞན་མ་ཡིན་པ་དེ་ནི་ཐ་མི་དད་པ་སྟེ། ཚོགས་པའི་རང་གི་ངོ་བོ་བཞིན། །ཡོན་ཏན་སྔོན་
[259a.5]པོ་དང་རིགས་ཨུཏྤལ་དག་ཀྱང་ཨུཏྤ་ལ་སྔོན་པོ་ཞེས་པའི་ཚོགས་པ་གཅིག་ལས་གཞན་མ་ཡིན་ནོ། །རང་བཞིན་གྱིས་ཐལ་བར་འགྱུར་བ་སྟེ། དེ་ལྟར་ཡང་མ་ཡིན་ནོ་ཞེས་པ་བཟློག་པའོ། །གང་དག་ཕན་ཚུན་ཐ་དད་པ་དེ་དག་ཨུཏྤ་ལ་སྔོན་པོ་ལས་གཞན་མ་ཡིན་པ་མ་ཡིན་ཏེ་བ་ལང་དང་རྟ་བཞིན་ཡོན་ཏན་
[259a.6]སྔོན་པོ་དང་རིགས་ཨུཏྤ་ལ་དག་ཀྱང་ཕན་ཚུན་ཐ་དད་པ་དག་གོ་ཞེས་པ་ཁྱབ་བྱེད་དང་འགལ་བའོ། །ཚོགས་པ་དུ་མ་ཉིད་ཐལ་ཕྱིར། །ཞེས་པ་ཚོགས་པ་གཅིག་གི་བདག་ཉིད་ཡོད་པ་མ་ཡིན་ནོ་ཞེས་དཀྱུས་མའོ། །ཚོགས་པ་སྟེ་རིགས་དང་ཡོན་ཏན་ཚོགས་ལ་ཡན་ལག་དུ་མ་ལས་ཐ་མི་དད་པའི་ཕྱིར་དུ་
[259a.7]མ་ཉིད་དུ་ཐལ་བར་འགྱུར་རོ། །གང་དུ་མ་ཚོགས་པ་དེ་ནི་དངོས་པོ་བ་མ་ཡིན་གྱི། བརྟགས་པ་པ་ཁོ་ན་སྟེ་གྲོང་དྲུག་བཞིན་ནོ། །སྔོན་པོ་དང་ཨུཏྤལའི་དོན་ཅན་དག་གི་ཞེས་པ་འབྲུ་མང་པོ་པ་སྟེ། སྔོན་པོ་དང་ཨུཏྤལ་རྗོད་པར་བྱེད་པའི་སྒྲ་དག་གི་ཞེས་པའི་དོན་ཏོ། །གཅིག་ལ་ཡང་འཇུག་བཞིན་
[259b]
[259b.1]པ་དག་ནི་ཞེས་པ་སྒྲའི་ཚོགས་པ་གཅིག་ལ་ཡན་ལག་གི་དངོས་པོས་འཇུག་བཞིན་པ་དག་ཅེས་པའི་དོན་ཏོ། །ཅི་ལས་གཞི་མཐུན་པ་ཉིད་དུ་འགྱུར་ཞེས་པ་དོན་ཐ་དད་པ་ཉིད་ཀྱི་ཕྱིར་ཏེ། དཔེར་ན་བུམ་པ་དང་སྣམ་བུའི་སྒྲ་དག་ལ་གཞི་མཐུན་པ་ཉིད་མེད་པ་དེ་ལྟར་སྔོན་པོ་དང་ཨུཏྤ་ལའི་སྒྲ་ཚོགས་ཟིན་
[259b.2]པ་དག་ལ་ཡང་ངོ་ཞེས་པ་ཁྱབ་བྱེད་དང་འགལ་བ་གསལ་བར་བྱེད་དོ། །ཁྱད་པར་ནི་སྤྱིའི་ནང་དུ་འདུས་པའི་ཕྱིར་ཞེས་པ། སྔོན་པོ་ཞེས་པ་སྤྱི་སྟེ། དེའི་ཁྱད་པར་རྣམས་ནི་ཨུཏྤ་ལ་ལ་སོགས་པ་རྣམས་སོ། །དེ་རྣམས་དེར་ནང་དུ་འདུས་སོ། །སྔོན་པོ་དང་ཨུཏྤ་ལའི་སྒྲ་དག་ནི་སྤྱི་རྗོད་པར་བྱེད་པ་
[259b.3]དག་སྟེ། ཁྱད་པར་ནང་དུ་འདུས་ནས་འཇུག་པ་དག་གོ། །དེའི་ཕྱིར་ཁྱད་པར་རྣམས་སྤྱིའི་ནང་དུ་འདུས་པའོ་ཞེས་པས། དེ་རྣམས་ཀྱང་སྔོན་པོ་དང་ཨུཏྤ་ལའི་སྒྲ་དག་གི་དོན་རྣམས་སོ། །དེ་ལྟར་སྔོན་པོ་དང་ཨུཏྤ་ལའི་སྒྲ་གཉིས་ཀ་དག་ཀྱང་ཨུཏྤ་ལ་སྔོན་པོ་དོན་དང་ལྡན་པ་དག་གོ། །དེ་ལས་ཀྱང་
[259b.4]རང་གི་དོན་ཡོངས་སུ་མི་སྤོང་ན་ཡང་སྐྱོན་ཅུང་ཟད་ཀྱང་མེད་དོ། །གལ་ཏེ་འོ་ན་སྤྱིའི་སྒྲ་ཡང་ཁྱད་པར་གྱི་དོན་ཅན་ཏེ། དེ་ཁོ་ན་ལས་ཁྱད་པར་རྟོགས་པའི་ཕྱིར་སྒྲ་གཉིས་པ་སྦྱོར་བ་སྤྱིའི་དོན་དུ་ཡིན་ཞེ་ན་སྨྲས་པ། འདྲ་བའི་ངོ་བོ་དག་ཅེས་པ་ལ་སོགས་པ་སྟེ། ངོ་བོ་གང་གིས་སྔོན་པོའི་སྒྲ་སྔོན་པོ་ཉིད་
[259b.5]རྗོད་པ་དེ་ཁོ་ནས་ཨུཏྤལ་སྔོན་པོ་ཡང་ངོ་། །དེའི་ཕྱིར་ངོ་བོ་མཚུངས་པ་ཉིད་ཀྱི་ཕྱིར་ཅི་འདི་སྤྱིའི་དོན་ཁོ་ནའམ་འོན་ཏེ་ཁྱད་པར་གྱི་དོན་ཡང་ཡིན་ཞེས་མི་ཤེས་ཏེ། ཁྱད་པར་གྱི་དོན་དང་ལྡན་པ་ཉིད་དུ་ཤེས་པར་བྱ་བའི་དོན་དུ་སྒྲའི་སྦྱོར་བ་གཉིས་པའོ། །འདིར་རེ་ཞིག་ཅེས་པ་ལ་སོགས་པ་སྟེ། སྔོན་པོའི་སྒྲས་
[259b.6]ནི་སྔོན་པོའི་རིགས་སམ། དེ་དང་སྦྱོར་བའི་ཡོན་ཏན་བརྗོད་པར་བྱའི་ཨུཏྤ་ལ་ལ་སོགས་པའི་རྫས་ཀྱི་རིགས་ནི་མ་ཡིན་པས་ཏེ། དེ་ལས་ཀྱང་ཨུཏྤལ་དམར་པོ་ལ་སོགས་པ་རྣམས་ནི་ཡོན་ཏན་སྔོན་པོའམ་དེ་ལ་འཕྲོད་པ་འདུ་བའི་སྔོན་པོ་ཉིད་ཀྱི་མ་ཡིན་ཏེ། དེས་ན་ཅི་ལྟར་སྔོན་པོའི་སྒྲའི་དོན་གྱི་ནང་དུ་ཨུཏྤལ་
[259b.7]སྔོན་པོ་ལ་སོགས་པ་རྣམས་འདུ་བར་འགྱུར། སྤྱིས་བརྗོད་པ་ཞེས་པས་ཐ་མི་དད་པའི་སྒྲའི་དོན་སྨྲས་སོ། །དེ་འདིས་ནི་གང་རྣམས་སྔོན་པོའི་སྒྲའི་དོན་གྱི་ཁྱད་པར་དུ་འགྱུར་བ་མ་ཡིན་པ་དེ་རྣམས་ནི་དེའི་ནང་དུ་འདུ་བ་མ་ཡིན་ཏེ། དཔེར་ན་པ་ལ་ཀ་ལ་སོགས་པ་རྣམས་བཞིན། སྔོན་པོའི་ཨུཏྤལ་ལ་
[260a]
[260a.1]སོགས་པ་རྫས་ཀྱི་སྤྱིའི་ཁྱད་པར་རྣམས་ཀྱང་དེ་ལྟ་བུའོ་ཞེས་པ་ཁྱབ་པར་བྱེད་པ་མེད་པ་གསུངས་སོ། །འོ་ན་ཡང་ཞེས་པ་ལྟ་བ་གཞན་ལ་མ་གྲུབ་པ་ཉིད་དུ་གསལ་བར་བྱེད་དོ། །སྔོན་པོའི་སྒྲས་སྔོན་པོའི་ཡོན་ཏན་ནམ་དེའི་རིགས་བརྗོད་པར་བྱ་བ་མ་ཡིན་གྱི། འོ་ན་ཅི་ཞེ་ན་སྔོན་
[260a.2]པོའི་ཡོན་ཏན་དང་ལྡན་པའི་སྤྱིས་རྫས་ཡིན་ཞིང་། དེའི་ཁྱད་པར་ཡང་ཨུཏྤ་ལ་སྔོན་པོ་ལ་སོགས་པ་རྣམས་ཀྱང་ཡིན་ནོ་ཞེས་པས་ཁ་ན་མ་ཐོ་བ་མེད་དོ་ཞེ་ན། དེ་ལྟར་འགྱུར་བར་ནི་མི་རིགས་ཏེ་ཞེས་པ་ཉེ་བར་བཀོད་པ་འདི་ནི་དེ་དང་ལྡན་པའི་ཕྱོགས་ཀྱི་ལྟ་བ་ཡིན་ལ། དེ་ཡང་སྔར་བཀག་ཟིན་པ་ཁོ་ནའོ་
[260a.3]ཞེས་བྱས་ནས་སོ། །སྔར་བཀག་ཟིན་པ་དེ་ཁོ་ན་སྟོན་པ་གསུངས་པ། སྔར་བཤད་ཕྱིར་ཞེས་པ་ལ་སོགས་པའོ། །དེ་མི་རིགས་ཏེ་ཞེས་པ། བརྗོད་པར་བྱ་བ་ཉིད་ཀྱིས་ན་ནང་དུ་འདུས་པར་འདོད་ཅིང་། ཁྱད་པར་རྣམས་སྤྱིའི་སྒྲའི་བརྗོད་པར་བྱ་བ་ཉིད་དུ་སྲིད་པ་ཡང་མ་ཡིན་ཏེ། འདི་ལ་གཏན་ཚིགས་གསུངས་
[260a.4]པ། ཐེ་ཚོམ་ཟ་ཕྱིར་ཞེས་པའི་ཐེ་ཚོམ་ནི་ཞེས་པ་ལ་སོགས་པ་ནི་འདི་ཉིད་ཀྱིས་འགྲེལ་པའོ། །གང་ལས་ཐེ་ཚོམ་ཟ་བ་ཞེས་པ་ལ་སོགས་པ་ནི་རྗེས་སུ་འགྲོ་བ་ཉེ་བར་སྟོན་པའོ། །འགྱུར་དུ་ཆུག་ན་ཡང་དོན་གྱིས་ཞེས་པ་ལ་སོགས་པས་ལྡོག་པའོ། །ཤིང་ཤ་པའི་སྒྲའི་དོན་ནི་ཤིང་གི་སྤྱི་ལ་མི་འཁྲུལ་
[260a.5]ལོ་ཞེས་པས་ཤིང་ཤ་པའི་སྒྲ་ལས་དོན་གྱིས་ཤིང་གི་སྤྱི་རྟོགས་པར་འགྱུར་རོ། །དོན་གྱིས་ཞེས་པ་སྨས་པ་ནི་དངོས་སུ་རྗོད་པར་བྱེད་པར་མི་འདོད་པའི་ཕྱིར་རོ། །གང་ཞིག་གང་ལ་ཐེ་ཚོམ་གྱི་རྒྱུ་ཡིན་པ་དེ་ནི་དེ་ལ་ངེས་པའི་རྒྱུ་མ་ཡིན་ཏེ། དཔེར་ན་རྟག་པ་དང་མི་རྟག་པ་ཉིད་དག་ལ་གཞལ་
[260a.6]བྱ་ཉིད་བཞིན། སྤྱིའི་སྒྲ་ཡང་ཁྱད་པར་རྣམས་ལ་ཐེ་ཚོམ་གྱི་རྒྱུ་ཡིན་ནོ་ཞེས་པ་རང་བཞིན་འགལ་བའོ། །འདི་ཉིད་ཀྱི་ཆོས་མི་མཐུན་པ་ཉིད་ཀྱི་སྦྱོར་བ་ནི། གང་ཞིག་གང་ལ་ངེས་པའི་རྒྱུ་ཡིན་པ་དེ་ནི་དེ་ལ་ཐེ་ཚོམ་གྱི་རྒྱུ་མ་ཡིན་ཏེ། དཔེར་ན་ཁྱད་པར་གྱི་སྒྲའི་དོན་ནི་སྤྱི་ལ་བཞིན། སྤྱིའི་སྒྲ་ནི་ཁྱད་
[260a.7]པར་རྣམས་ལ་ངེས་པའི་རྒྱུ་མ་ཡིན་གྱི་འོ་ན་ཅི་ཞེ་ན་ཐེ་ཚོམ་གྱི་རྒྱུའོ་ཞེས་པའོ། །འོ་ན་གང་འདི་ཞེས་པ་ལ་སོགས་པ་ནི་གལ་ཏེ་ཁྱད་པར་སྤྱིའི་ནང་དུ་འདུས་པ་མ་ཡིན་ན། དེ་ཅི་ལྟར་ལུང་འདི་དང་འགལ་བ་མ་ཡིན་ཞེས་པ་བསམས་པའོ། །འདི་ཞེས་པ་ལ་སོགས་པས་ལུང་རྟོགས་པར་བྱེད་དོ། །རྣམ་
[260b]
[260b.1]གྲངས་ལ་གཅིག་ལས་རྟོགས་པ་རྣམ་གྲངས་ཀྱི་སྒྲ་རྣམས་ལ་ནི་རྣམ་གྲངས་ཀྱི་སྒྲ་གཅིག་ཁོ་ན་ལས་བརྗོད་པར་འདོད་པའི་དོན་རྟོགས་པར་འགྱུར་ཏེ། དེ་ལས་ཀྱང་གཉིས་པ་སྦྱོར་བ་མེད་པ་ཁོ་ནའོ་ཞེས་པས་ཅི་ལྟར་མཐུན་པ་ཉིད་དམ་ཁྱད་པར་དང་ཁྱད་པར་དུ་བྱ་བའི་དངོས་པོ་ཡིན་ཞེས་པ་དགོས་
[260b.2]པའོ། །འོ་ན་རྣམ་གྲངས་ཀྱི་སྒྲ་དུ་མ་ལྷན་ཅིག་སྦྱར་བས་ཀྱང་དོན་གཅིག་རྟོགས་པར་བྱ་བ་བཞིན་པ་མཐོང་སྟེ། དཔེར་ན་ཁུ་བྱུག་དང་ཀོ་ཀི་ལ་བཞིན་ནོ་ཞེ་ན། གསུངས་པ། རྣམ་གྲངས་ཀྱི་སྒྲས་ནི་ཞེས་པ་ལ་སོགས་པའོ། །དེ་ལ་དོན་ངེས་པར་མ་ཤེས་པ་ལ་རྣམ་གྲངས་གཞན་སྦྱོར་བར་འགྱུར་ཏེ།
[260b.3]དཔེར་ན་འགའ་ཞིག་ཁུ་བྱུག་གི་སྒྲ་ལ་དོན་ངེས་པར་མ་ཤེས་པ་ལ་དེའི་དོན་རྟོགས་པའི་ཆེད་དུ་ཀོ་ཀི་ལའི་སྒྲ་བཞིན་ནོ། །དོན་དུ་མ་ཅན་ལ་ཡང་དོན་གཞན་རྣམ་པར་གཅོད་པའི་ཁྱད་པར་གྱི་དོན་རྟོགས་པའི་ཆེད་དུ་སྟེ། དཔེར་ན་ཨ་ཀྵའི་སྒྲ་ལ་བ་རུ་རའི་སྒྲ་བཞིན་ནོ། །འདིར་ནི་རྣམ་པ་འདི་ཡོད་
[260b.4]པ་མ་ཡིན་ཏེ། དེའི་ཕྱིར་གཉིས་པ་སྦྱོར་བ་མི་རིགས་སོ་ཞེས་པ་དགོངས་པའོ། །ཡང་ཅིའི་ཕྱིར་རྣམ་གྲངས་གཅིག་སྦྱོར་བ་ན། དེ་ལ་གཉིས་པ་མི་སྦྱོར་ཞེ་ན་གསུངས་པ། འདི་ཉིད་ནི་ཞེས་པ་ལ་སོགས་པའོ། །འདི་ནི་དོན་དང་མཐུན་པའི་མིང་སྟེ། རྣམ་གྲངས་ཀྱི་དོན་མངོན་པར་རྗོད་པར་བྱེད་
[260b.5]དོ་ཞེས་པ་རྣམ་གྲངས་པའོ། །དེ་ཅིག་ཅར་སྦྱོར་བ་ལ་མེད་དེ་རང་གི་རྒྱུ་མཚན་མེད་པའི་ཕྱིར་རོ། །འགྱུར་དུ་ཞེས་པ་འདི་ལས་མཚུངས་པར་བརྗོད་པ་ཁོ་ན་ཅིག་ཅར་སྦྱོར་བ་དང་འབྲེལ་ལོ་ཞེས་སྟོན་ཏོ་ཞེས་པའོ། །རྣམ་གྲངས་པ་ཉིད་ཅེས་པ་ནི་རྣམ་གྲངས་པའི་སྒྲའི་བརྗོད་པར་བྱ་བ་ཉིད་ཅེས་པའི་དོན་
[260b.6]ཏེ། དེ་ལྟར་ན་ཡང་ཞེས་པ་ལ་སོགས་པས། གང་གི་ཕྱིར་རྣམ་གྲངས་པའི་སྒྲ་ནི་གཅིག་ཁོ་ན་བརྗོད་པའི་ཆེད་དུ་ནུས་པ་དེའི་ཕྱིར། ཨུཏྤལའི་སྒྲ་དང་བཅས་པའི་གསལ་བར་བྱ་བའི་དོན་ནི་སྔོན་པོའི་སྒྲ་འབའ་ཞིག་པ་ཁོ་ནས་རྟོགས་པའི་ཕྱིར། གཅད་པར་བྱ་བ་ཉིད་མེད་དོ་ཞེས་པས་ཁྱད་པར་
[260b.7]དང་ཁྱད་པར་གྱི་གཞིའི་དངོས་པོ་མེད་དོ། །གཞི་མཐུན་པ་ཉིད་ནི་གཉིས་པ་སྦྱོར་བ་མེད་པ་ཁོ་ནའི་ཕྱིར་འགྱུར་བ་མ་ཡིན་ནོ། །དེ་བཞིན་དུ་ཐ་དད་པ་ལ་ཡང་ཞེས་པ་སྐྱོན་ཞེས་འཇུག་གོ། །ཡང་ཅི་ལྟར་སྐྱོན་ཡིན་ཞེ་ན་གསུངས་པ། ཚོགས་པ་གཞན་ཉིད་དུ་བསྒྲུབ་པར་བྱ་ན་ཞེས་པ་འགྲུབ་པ་མ་ཡིན་ནོ་ཞེས་པའི་
[261a]
[261a.1]དོན་ཏོ། །ཅི་ལྟར་བསྒྲུབ་པར་བྱ་བ་ཡིན་ཞེ་ན། དེ་ཞེས་པ་ལ་སོགས་པ་སྟེ། ཆ་ཤས་ཅན་དེ་ཆ་ཤས་དེ་རྣམས་སུའམ། ཆ་ཤས་དེ་རྣམས་ཚོགས་པ་དེར་མཐའ་དག་གིས་ཏེ་བདག་ཉིད་ཐབས་ཀྱིས་སམ་ཕྱོགས་གཅིག་གིས་ཏེ་ཆ་ཤས་འཇུག་པ་སྲིད་པ་མ་ཡིན་པས་སོ། །གལ་ཏེ་
[261a.2]ཆ་ཤས་ཅན་ཆ་ཤས་རྣམས་སུ་ཕྱོགས་གཅིག་གིས་འཇུག་ན་ཆ་ཤས་ཐུག་པ་མེད་པར་འགྱུར་ཏེ། དེ་ལྟར་ནི་ཆ་ཤས་གང་རྣམས་ཀྱིས་ཆ་ཤས་ཅན་འཕྲོད་པ་འདུ་བ་ཅན་གྱི་རྒྱུའི་ཆ་ཤས་རྣམས་ལ་འཇུག་པ་དེ་རྣམས་ལ་ཡང་ཆ་ཤས་ཀྱི་དབྱེ་བ་དེ་ཁོ་ནས་འཇུག་པར་བྱ་བས་ཏེ། སླར་ཡང་དེ་རྣམས་ལ་ཡང་དེ་
[261a.3]བཞིན་ནོ་ཞེས་པས་ཐུག་པ་མེད་པའོ། །དེ་འཇུག་པ་ན་ཡང་ཆ་ཤས་ཅན་འཇུག་པ་ཡོད་པ་མ་ཡིན་ཏེ། དེ་རྣམས་ལ་ཆ་ཤས་ཅན་མེད་པ་ཉིད་ཀྱི་ཕྱིར་རོ། །ཅི་སྟེ་མཐའ་དག་གིས་འཇུག་ན་དེའི་ཚེ་ཡན་ལག་ཅན་མང་པོ་ཉིད་དུ་ཐལ་བར་འགྱུར་ཏེ། ཆ་ཤས་རྣམས་མང་པོ་ཉིད་ཀྱི་ཕྱིར་རོ། །དེ་རྣམས་སུ་ཡང་སོ་
[261a.4]སོར་བདག་ཉིད་ཐམས་ཅད་ཀྱི་ཡོངས་སུ་རྫོགས་པ་ཉིད་ཀྱི་ཕྱིར་རོ། །ཡུལ་ཕྱོགས་ཐ་མི་དད་པ་ཅན་ཉིད་ཀྱི་ཕྱིར་ཡང་ཡན་ལག་ཅན་གྱིས་ཡན་ལག་རྣམས་ཐམས་ཅད་ཡང་དག་པར་སྦྱར་བའི་ཡུལ་ཕྱོགས་ཀྱིས་ཡུལ་ཕྱོགས་ཐ་མི་དད་པ་ཅན་རྣམས་སུ་འགྱུར་རོ། །ཅི་སྟེ་ཐ་མི་དད་པའི་ཡུལ་ཅན་དུ་འདོད་ན། དེ་
[261a.5]ལྟ་ན་འོ་ན་ཆ་ཤས་ཅན་རྫས་གཅིག་ཏུ་འགྱུར་རོ་ཞེས་པ་འདི་ལྟ་བུ་ལ་སོགས་པ་མཐའ་དག་གི་འཇུག་པའི་སྐྱོན་རྣམས་ནི་དེ་རྣམས་ལ་ཡང་ངོ་། །དེ་ལ་གལ་ཏེ་བདག་ཉིད་ཐམས་ཅད་ལ་ཡན་ལག་ཅན་ཁྱབ་པར་བྱས་ནས་འཇུག་ན། དེ་ལས་དེ་ནི་ཆ་ཤས་མེད་པ་ཉིད་ཀྱི་ཕྱིར། ཐམས་ཅད་ཀྱི་ཡུལ་ཕྱོགས་
[261a.6]གཅིག་ཉིད་དེ། དེ་ལས་ཀྱང་གང་དུ་ལག་པ་ཡིན་པ་དེར་རྐང་པ་ལ་སོགས་པ་རྣམས་ཀྱང་ངོ་ཞེས་པས་འདྲེས་མཐོང་བར་ཐལ་བར་འགྱུར་ཏེ། རྣམ་པར་ཕྱེ་བས་འཛིན་པ་མི་སྲིད་པའི་ཕྱིར་རོ། །ཅི་སྟེ་ཡུལ་ཕྱོགས་གཅིག་ལ་འཇུག་ན་དེ་ཁོ་ན་ཆ་ཤས་ཐུག་པ་མེད་པ་སྟེ། ཕྱོགས་གཅིག་པ་གང་རྣམས་སུ་ཆ་
[261a.7]ཤས་པ་རྣམས་འཇུག་པ་དེ་ཉིད་ཀྱིས་ཀྱང་གཞན་རྣམས་སུ་འཇུག་པར་བྱ་ཞིང་དེ་རྣམས་ཀྱིས་ཀྱང་དེ་བཞིན་ནོ་ཞེས་པ་ཐུག་པ་མེད་པའོ། །གང་སྔོན་པོ་ཡིན་པ་དེ་ཨུཏྤ་ལ་མ་ཡིན་པར་འགྱུར་ཞིང་། གང་ཡང་ཨུཏྤ་ལ་ཡིན་ན་དེ་སྔོན་པོ་མ་ཡིན་ནོ་ཞེས་པ་ལ་སོགས་པའོ། །གང་གི་ཕྱིར་འདི་ལྟར་མཐའ་
[261b]
[261b.1]དག་ཉིད་ཀྱིས་སམ་ཕྱོགས་གཅིག་གིས་འཇུག་པ་སྲིད་པ་མ་ཡིན་པ་དེའི་ཕྱིར་ཆ་ཤས་ལས་ཐ་དད་པའི་ཚོགས་པ་འགྲུབ་པ་མ་ཡིན་ནོ། །དེ་ནི་དོན་དག་གི་འགྱུར་བ་འམ་ཞེས་པ། དེ་ཞེས་པ་གཉི་ག་དང་སྦྲེལ་བར་བྱའོ། །གལ་ཏེའང་དོན་གཅིག་ལ་འཇུག་ཉིད། །ཅེས་པ་འདི་གལ་ཏེ་ཡང་ཞེས་པ་ལ་སོགས་
[261b.2]པས་འཆད་པར་བྱེད་དོ། །རྫས་གཅིག་ལ་གཉིས་ཀ་ཡང་འཕྲོད་པ་འདུ་བའི་ཕྱིར་རིགས་དང་ཡོན་ཏན་དག་གི་གཞི་མཐུན་པ་ཉིད་འཐད་ན་ཁྱད་པར་དང་ཁྱད་པར་དུ་བྱ་བའི་དངོས་པོ་ནི་མ་ཡིན་ཏེ། ཅིའི་ཕྱིར་ཞེ་ན་གསུངས་པ། མ་ཡིན་ཞེས་པ་ལ་སོགས་པ་སྟེ། འདིས་ནི་ཕན་ཚུན་འབྲེལ་པ་མེད་པ་
[261b.3]གསུངས་སོ། །འདི་ཡང་། སྤྱི་དང་ཁྱད་པར་ཉིད་མ་ཡིན་ཞེས་པ་འདིའི་འབྲེལ་པའོ། །གང་རྣམས་ཕན་ཚུན་འབྲེལ་པ་མེད་པ་དེ་རྣམས་ནི་ཁྱད་པར་དང་ཁྱད་པར་དུ་བྱ་བའི་དངོས་པོ་མ་ཡིན་ཏེ། བུམ་པ་དང་སྣམ་བུ་ལ་སོགས་པ་བཞིན་རིགས་དང་ཡོན་ཏན་དག་ཀྱང་ཕན་ཚུན་འབྲེལ་པ་མེད་དོ། །
[261b.4]ཁྱབ་པར་བྱེད་པ་མེད་པའོ། །རྫས་དག་གཞན་དུ་མི་འཇུག་པའི་ཕྱིར་ཞེས་པ། གང་གི་ཕྱིར་རིགས་དང་ཡོན་ཏན་དག་གིས་ཁྱད་པར་དུ་བྱས་པའི་རྫས་དག་ནི་གང་ལ་དེ་དག་འཇུག་པར་འགྱུར་བ་གཞན་ལ་རག་ལས་པ་ཡོད་པ་མ་ཡིན་ཏེ། དེའི་ཕྱིར་གཅིག་ལ་འཇུག་པ་མེད་པའི་ཕྱིར། ཕྱོགས་
[261b.5]དང་ནམ་མཁའ་དག་བཞིན་དུ་གཞི་མཐུན་པ་ཉིད་མེད་དོ་ཞེས་པ་ཁྱབ་པར་བྱེད་པ་མེད་པ་ཉིད་གསལ་བར་བྱེད་དོ། །ཡང་ཅིའི་ཕྱིར་དེ་ལྡན་དག་གི་ཞེས་བརྗོད་པར་བྱ་ཞེ་ན། ཅི་ཙམ་གྱིས་རྫས་གཅིག་ཡིན་པ་དེ་གཉི་གའི་ཁྱད་པར་གྱི་ཁྱད་པར་དུ་བྱས་པ་ཡིན་ཏེ། གཅིག་ཀྱང་ཡོན་ཏན་ཐ་དད་པ་ལ་བརྟེན་ནས་
[261b.6]དེ་སྐད་བཤད་དོ་ཞེས་པས་སྐྱོན་མེད་དོ། །གཉི་གའམ་གཅིག་ལ་ནི་སྤྱི་དང་ཁྱད་པར་དང་ལྡན་པ་ཉིད་དུ་མི་རིགས་པའི་ཕྱིར་རོ་ཞེས་པ། སྔོན་པོའི་རྫས་བུང་བ་ལ་སོགས་པ་ལ་དང་། ཨུཏྤལའི་རྫས་ལ་སྤྱི་དང་ཁྱད་པར་དང་ལྡན་པ་ཉིད་ཡོད་པ་མ་ཡིན་པས་ཏེ། དེའི་ཕྱིར་འདི་དག་ལ་ཁྱད་པར་
[261b.7]དང་ཁྱད་པར་དུ་བྱ་བ་མེད་དོ། །རིགས་གཉིས་བཞིན་ནོ། །གཅིག་ལ་ནི་གང་དུ་རིགས་དང་ཡོན་ཏན་དག་ལྷན་ཅིག་འཇུག་པ་དེ་ཁོ་ན་དེའི་སྤྱིའམ་ཁྱད་པར་དུ་འགྱུར་བ་ནི་མ་ཡིན་པས་ཏེ། དེའི་ཕྱིར་འདི་ལ་ཡང་ཁྱད་པར་དང་ཁྱད་པར་དུ་བྱ་བའི་དངོས་པོ་མེད་དེ། དཔེར་ན་བུམ་པ་གཅིག་བཞིན་ནོ། །
[262a]
[262a.1]ཤིན་ཏུ་ཐ་དད་པ་དག་ནི་ཞེས་པ། སྤྱི་དང་ཁྱད་པར་དག་ལ་ཐ་དད་པ་ཡོད་པ་ཉིད་དེ། དེ་དང་མ་ཡིན་པའི་ཡུལ་ཉིད་ཀྱིས་ཏེ། ཤིན་ཏུ་ནི་མ་ཡིན་ནོ། །དེས་ན་ད་རྣམ་པར་གཅད་པའི་ཆེད་དུ་ཤིན་ཏུ་སྨོས་སོ། །དེ་ལྟ་ན་ཡང་བ་ལང་དང་རྟའི་སྒྲ་བཞིན་དུ་གཞི་མཐུན་པ་ཉིད་མི་
[262a.2]འཐད་དོ། །ཁྱད་པར་དང་ཁྱད་པར་དུ་བྱ་བའི་དངོས་པོ་ཡང་རིགས་དང་ཡོན་ཏན་རྗོད་པར་བྱེད་པའི་སྒྲ་དག་ལ་འཐད་པ་མ་ཡིན་ཏེ། དེ་དག་གི་ཁྱད་པར་དང་ཁྱད་པར་དུ་བྱ་བའི་དངོས་པོ་ནི་དོན་གྱི་སྒོ་ཅན་ཡིན་ན། དེ་དག་གི་དོན་རིགས་དང་ཡོན་ཏན་དག་ལ་མངོན་པར་འབྲེལ་པ་ཅི་ཡང་མེད་པའོ། །
[262a.3]དེ་ལས་ཀྱང་བ་ལང་དང་རྟ་ལ་སོགས་པའི་སྒྲའི་དཔེས་ཁྱབ་པར་བྱེད་པ་མེད་པར་སྦྱར་བར་བྱའོ། །འདྲ་དང་མི་འདྲར་ཐལ་བར་འགྱུར། །ཞེས་པ་ལ། འདྲ་བའི་སྒྲ་ནི་འདིར་གཅིག་གི་རྣམ་གྲངས་ཏེ་གཅིག་པའམ་གཅིག་མ་ཡིན་པ་ཅན་གྱི་གཞི་ཅན་དུ་ཐལ་བར་འགྱུར་རོ་ཞེས་པའི་དོན་ཏོ། །དེ་ལས་
[262a.4]ཀྱང་གཞི་མཐུན་པ་ཉིད་མེད་པ་སྟེ། གཞི་མཐུན་པ་ཁོ་ནར་འགྱུར་བ་མ་ཡིན་ནོ་ཞེས་བྱས་ནས་སོ། །མི་འདྲ་བརྗོད་འདོད་མིན་ཞེ་ན། །ཞེས་པ་གཞི་མཐུན་ཞིང་མི་མཐུན་པ་སྲིད་ན། གཞི་མཐུན་པ་ཅན་ལ་བརྟེན་ནས་གཞི་མཐུན་པར་བརྗོད་པར་བྱ་ཞིང་། བསྒྲུབ་པས་གཞི་མཐུན་པ་ཉིད་དུ་བརྗོད་པའི་ཕྱིར་ན་གཞི་
[262a.5]ཐ་དད་པ་དགག་པར་མི་བྱེད་ཀྱི་འོ་ན་ཅི་ཞེ་ན་ཐ་མི་དད་པ་བསྒྲུབ་པར་བྱའོ། །དེས་ན་དེ་སྲིད་ཙམ་བརྗོད་པར་འདོད་པས་འདྲ་བ་ཉིད་དེ། དེ་སྲིད་ལ་བརྟེན་ནས་གཞི་མཐུན་པ་ཉིད་དུ་འགྱུར་རོ། །གང་དངོས་པོ་ལས་འབྲེལ་པ་ཅན་དུ་བྱས་པའི་ཐ་དད་པ་དེ་ནི་བརྗོད་པར་འདོད་པས་ཉེ་བར་མ་བཞག་པ་ཉིད་ཀྱི་ཕྱིར་ན་
[262a.6]གཞི་ཐ་མི་དད་པ་ཉིད་ཀྱི་ཆེད་དུ་བརྟག་པར་བྱ་བ་མ་ཡིན་ནོ་ཞེས་པ་ཕ་རོལ་པོའི་བསམ་པ་འདི་གསལ་བར་བྱེད་དོ། །གང་དུ་ཡང་ཞེས་པ་ལ་སོགས་པས་སེལ་བའི་ཕྱོགས་ལ་ཡང་རིགས་པ་འདི་ལ་བརྟེན་པར་བྱའོ་ཞེས་སྟོན་པར་བྱེད་དེ། །བློ་རྣམ་པ་མཚུངས་པའི་རྒྱུ་ཉིད་ཀྱི་ཕྱིར་ཞེས་པ། གཞི་འདྲ་
[262a.7]བར་སྣང་བའི་བློའི་རྒྱུ་ཉིད་ཀྱི་ཕྱིར་ཞེས་པའི་དོན་ཏོ། །འདི་སྐད་བརྗོད་པར་འགྱུར་ཏེ། དེར་ཡང་མེ་ཏོག་ཁ་ཟུམ་པ་ལ་སོགས་པའི་ཁྱད་པར་རྣམས་བརྗོད་པར་འདོད་ན། གང་ཐ་མི་དད་པའི་རྣམ་པ་ཅན་གྱི་བློ་སྒྲས་ཉེ་བར་སྐྱེད་པར་སྟོན་ཅིང་། དེ་ཙམ་ལ་བརྟེན་ནས་ཁྱོད་ཀྱིས་ཀྱང་གཞི་མཐུན་པ་
[262b]
[262b.1]ཉིད་རྣམ་པར་གཞག་པར་བྱའོ་ཞེས་པའོ། །གཉིས་ཀ་རྣམ་པར་བསལ་བས་རྗེས་སུ་བཟུང་ན་ཞེས་པའོ། །གཉིས་ཀ་རྣམ་པར་བསལ་བ་ནི་སྔོན་པོ་མ་ཡིན་པ་དང་ཨུཏྤལ་མ་ཡིན་པ་ལས་ལྡོག་པའོ། །དེ་ཡང་ལྡོག་པ་དང་ལྡན་པ་ལ་དོན་དམ་པར་གཞན་མ་ཡིན་ནོ་ཞེས་པས། དེ་ཁོ་ན་སྔོན་པོ་མ་ཡིན་པ་
[262b.2]དང་ཨུཏྤ་ལ་མ་ཡིན་པ་ལས་ལོག་པ་ཨུཏྤལ་སྔོན་པོ་ཞེས་བྱ་བ་སྔོན་པོའི་དེ་ཉིད་དུ་བརྗོད་པར་བྱའོ། །དེས་རྗེས་སུ་བཟུང་ཞིང་ཕན་བཏགས་པ་ནི། ཡང་བློ་ལ་ཡོད་པའི་སྒྲའི་དོན་དེའི་ཉེ་བར་སྐྱེད་པར་བྱེད་པ་ཁོ་ན་སྟེ། དེ་ཁོ་ན་ལ་ཨུཏྤ་ལ་སྔོན་པོའི་སྒྲའི་བྱ་བ་ཡིན་གྱི། མེ་ཏོག་ཁ་མ་བྱེ་བ་ལ་སོགས་པ་རྣམ་
[262b.3]པར་བསལ་བས་རྗེས་སུ་གཟུང་བ་ལ་ནི་མ་ཡིན་ནོ་ཞེས་པས་དེ་ཙམ་ཁོ་ན་བརྗོད་པར་འདོད་པ་རིགས་ཀྱི་གཞན་མེ་ཏོག་ཁ་མ་བྱེ་བ་ལ་སོགས་པ་རྣམས་ནི་མ་ཡིན་ནོ། །འབྲེལ་པ་ཅན་དུ་བྱས་པ་དག་ནི་ཞེས་པ་སྔོན་པོ་དང་ཨུཏྤ་ལའི་སྒྲ་དག་ནི་སྔོན་པོའི་ཡོན་ཏན་དང་ཨུཏྤལའི་རིགས་དག་གིས་རྣམ་པར་བཅད་པ་
[262b.4]ཁོ་ནའི་དངོས་པོ་ལ་དེའི་རྒྱུ་མཚན་ཅན་དག་འཇུག་གོ། །དེ་ལ་གལ་ཏེ་ཁྱད་པར་དུ་བྱེད་པས་བྱས་པའི་ཁྱད་པར་བརྗོད་པར་འདོད་པ་མ་ཡིན་ན། དོན་མེད་པའི་ངོ་བོའི་དངོས་པོ་དེ་ཅི་ལྟར་བརྗོད་པར་བྱ་བ་ཡིན། དངོས་པོར་ན་རང་ཉིད་ལས་སྔོན་པོ་དང་། ཨུཏྤལ་ལ་སོགས་པའི་རང་བཞིན་ཉིད་དུ་འགྱུར་བ་ནི་མ་
[262b.5]ཡིན་པས་སོ་ཞེས་པས་ཐ་སྙད་དུ་མི་བྱ་བ་ཁོ་ནར་འགྱུར་རོ། །རྟ་དང་བ་ལང་སོགས་མཚུངས་ཉིད། །ཅེས་པས་གལ་ཏེ་སྒྲའི་ཡུལ་དུ་བྱས་པའི་ཡང་ཁྱད་པར་བརྗོད་པར་མི་འདོད་ན། བ་ལང་ངོ་རྟའོ་ཞེས་པ་འདིར་ཡང་མཚུངས་པ་ཉིད་དུ་འགྱུར་རོ། །བརྗོད་པར་བྱ་བ་མ་ཡིན་ཉིད་དུ་ཞེས་པ། གང་དེ་
[262b.6]སྤྱི་དང་ཁྱད་པར་དང་བྲལ་བའི་དངོས་པོ་ཙམ་དེ་སྒྲ་རྣམས་ཀྱི་ཡུལ་མ་ཡིན་པ་ཁོ་ན་སྟེ། འདྲེས་པའི་ཚིག་གི་དོན་གྱིས་ཉེ་བར་བསྒྲུབས་པའི་དངོས་པོའི་ཁྱད་པར་གྱི་ཡུལ་ཅན་ཉིད་ཀྱི་ཕྱིར་རོ། །དེ་ལས་ཀྱང་བ་ལང་དང་རྟ་ནི་མཚུངས་པ་ཉིད་དེ་ཁྱད་པར་མེད་པ་ཉིད་དུ་འགྱུར་ཞིང་། ཨུཏྤལ་སྔོན་
[262b.7]པོ་ལ་སོགས་པ་བཞིན་དུ་གཞི་མཐུན་པ་ཉིད་དུ་ཐལ་བར་འགྱུར་རོ་ཞེས་པའོ། །འདི་ལྟར་དགོངས་ཏེ། ཨུཏྤ་ལ་སྔོན་པོ་ཞེས་པས་འདིར་ཡང་བརྗོད་པར་བྱ་བ་གཅིག་པུ་ཅུང་ཟད་ཀྱང་མེད་དེ། སྔོན་པོའི་ཡོན་ཏན་དང་ཨུཏྤ་ལའི་རིགས་ཡང་དག་པར་སྦྱར་བས་ཐོབ་པའི་ངོ་བོའི་ཁྱད་པར་ལས་
[263a]
[263a.1]ཐ་དད་པར་ཨུཏྤལ་སྔོན་པོའི་ངོ་བོ་གཞན་མེད་པའི་ཕྱིར་རོ། །དེ་ལས་དེར་ཡང་བརྗོད་པར་བྱ་བ་མ་ཡིན་པ་ཉིད་ཀྱིས་དངོས་པོ་མཚུངས་པ་ཁོ་ན་གཞི་མཐུན་པ་ཉིད་ཀྱི་རྒྱུ་སྟེ། དེ་ནི་བ་ལང་དང་རྟ་ལ་ཡང་བརྗོད་པར་བྱ་བ་མ་ཡིན་པ་ཉིད་ཁྱད་པར་མེད་པའོ་ཞེས་པས་གཞི་
[263a.2]མཐུན་པ་ཉིད་འཐོབ་པའོ་ཞེས་པའོ། །དེར་རྣམ་པའི་ཁྱད་པར་ཡིན་ན་ཞེས་པ། བ་ལང་ཉིད་དང་རྟ་ཉིད་ལ་སོགས་པ་འབྲེལ་པ་ཅན་ཐ་དད་པས་བྱས་པའི་ཁྱད་པར་མེད་པར་ཡང་། རང་ཁོ་ན་ལས་གང་མངོན་པར་བསལ་བའི་སྤྱི་བ་ལང་ཉིད་ལ་སོགས་པ་སྒྲས་ཉེ་བར་ལེན་པ་བ་ལང་དང་རྟ་ལ་ཁྱད་
[263a.3]པར་ཡོད་དོ། །དེའི་ཕྱིར་འདི་མི་རིགས་ཏེ། བ་ལང་དང་རྟ་ལ་བ་ལང་ཉིད་དང་རྟ་ཉིད་དག་ཏུ་བརྗོད་པར་འདོད་པ་ཉིད་གང་ཡིན་པ་དེ་ནི་སྒྲས་ཡུལ་དུ་བྱས་པ་ཉིད་ཀྱི་ཕྱིར་རོ། །གཞན་དུ་ན་དེ་རྗོད་པར་བྱེད་པ་ཁོ་ནར་མི་འགྱུར་རོ། །རང་གི་སྤྱི་མངོན་པར་གསལ་བའི་རྒྱུ་ཞེས་པ་འདིས་དེ་ཡོད་པ་ཉིད་དུ་ཁོང་དུ་ཆུད་
[263a.4]པའི་རྒྱུ་སྨྲས་སོ། །འབྲས་བུའི་ཁྱད་པར་ལས་དབྱིབས་ཡན་ལག་ཡང་དག་པར་བཀོད་པའི་བདག་ཉིད་རྗེས་སུ་དཔག་པར་བྱའོ་ཞེས་པའི་དོན་ཏོ། །འོ་ན་བརྟེན་པའི་ཆོས་ཀྱི་ཐ་དད་ཁོ་ན་འདི་སྟེ། ཇི་ལྟར་བ་ལང་ཉིད་དང་རྟ་ཉིད་ལ་སོགས་པ་རྣམས་ནི་སྤྱི་དང་ཁྱད་པར་གྱི་དངོས་པོ་མ་ཡིན་པ་གཅོད་པའི་རྒྱུ་ཉིད་ཀྱི་
[263a.5]ཕྱིར་བདག་ཉིད་དུ་གྱུར་པ་མ་ཡིན་པའི་དངོས་པོ་རྣམས་ཡིན་པ་དེ་བཞིན་དུ་དབྱིབས་ཀྱང་ངོ་། །དེ་ལྟར་ན་ཡང་དེ་ཉེ་བར་བཅོམ་པ་ན་དངོས་པོའི་བདག་ཉིད་ཁོ་ན་ལུས་པའོ་ཞེ་ན། འདི་བདེན་ཏེ། སྐྱོན་གཞན་བརྗོད་པར་འདོད་པས་འདི་ལ་ལྟོས་པར་བྱས་པའོ། །དེ་བྱས་ན་དེ་དག་དེ་ལྟར་བརྗོད་པ་ན་ཅི་ལྟར་བརྗོད་པར་
[263a.6]འདོད་པ་མ་ཡིན་ཞེས་པ་དབྱིབས་ཀྱི་ཁྱད་པར་བྱས་པ་ན་བ་ལང་ངོ་རྟའོ་ཞེས་པ་འདི་ལྟར་བརྗོད་པར་གྱུར་པ་ན་ཅི་ལྟར་ཐ་དད་པ་བརྗོད་པར་འདོད་པ་མ་ཡིན། ཡང་ན་དེར་བྱས་ན་ནི་དེ་དག་དེ་ལྟར་བརྗོད་པ་དག་ཅེས་པ། འདི་ནི་གཉིས་ཀྱི་ཚིག་ཁོ་ནའོ། །བརྗོད་པ་ནི་སྒྲ་སྟེ་འདིས་བརྗོད་པར་བྱ་བའོ་ཞེས་བྱས་ནས་
[263a.7]སོ། །ཨུཏྤལ་སྔོན་པོ་ཉིད་དང་ལྡན་པའི་དོན་གྱི་ནི་མ་ཡིན་ཞེས་པ་ལ་སོགས་པ། ཡོན་ཏན་སྔོན་པོ་དང་རིགས་ཨུཏྤ་ལ་དང་ལྡན་པའི་དོན་གྱི་ནི་བ་ལང་དང་རྟ་བཞིན་དུ་དབྱིབས་ཐ་དད་པ་མ་ཡིན་ཏེ། དེའི་ཕྱིར་དེ་བཞིན་དུ་སྟེ། ཨུཏྤལ་སྔོན་པོ་ལ་སོགས་པའི་སྒྲ་བཞིན་དུ་བ་ལང་དང་རྟ་ལ་སོགས་པའི་སྒྲ་
[263b]
[263b.1]རྣམས་གཞི་མཐུན་པ་ཉིད་མ་ཡིན་ནོ། །རྣམ་པ་དུ་མ་འདྲེས་པར་འགྱུར་ཞེས་པ་གལ་ཏེ་དབྱིབས་ཐ་དད་པ་ལས་སྤྱི་ཐ་དད་པ་མངོན་པར་གསལ་བ་ཡིན་ན། དངོས་པོ་གཅིག་ལ་བུམ་པ་ཉིད་དང་ཡོད་པ་ཉིད་དང་རྫས་ཉིད་ལ་སོགས་པ་མངོན་པར་གསལ་བའི་ཕྱིར་དབྱིབས་དུ་མ་འཇུག་པར་ཐལ་བར་འགྱུར་
[263b.2]ན། མཐོང་བ་ཡང་མ་ཡིན་ནོ་ཞེས་པ། རིང་པོ་དང་ཡོངས་སུ་ཟླུམ་པོ་ལ་སོགས་པ་རྣམས་གཅིག་ལ་འཇུག་པ་ནི་མཐོང་བ་མ་ཡིན་པས་ཏེ། འདིས་ནི་དེ་མེད་པའི་ཐ་སྙད་འགྲུབ་པའི་ཆེད་དུ་རང་བཞིན་མ་དམིགས་པ་གསུངས་སོ། །ཡང་གི་སྒྲ་ནི་ཁྱོད་འདོད་པ་ཡང་མ་ཡིན་ནོ་ཞེས་པའི་དོན་གསལ་བའི་ཆེད་
[263b.3]དུའོ། །བུམ་པ་ལ་སོགས་པ་ལ་རྣམ་པ་གཅིག་པའི་བརྗོད་པ་དང་རྟོགས་པ་མེད་པར་ཐལ་བར་འགྱུར་བའི་ཕྱིར་ཏེ། དབྱིབས་དུ་མ་ཅན་གྱི་དངོས་པོ་ལ་དེའི་དབང་དུ་གྱུར་པའི་སྒྲ་དང་བློ་དག་རྣམ་པ་གཅིག་པ་ཉིད་ནི་འཐད་པ་མ་ཡིན་ཏེ། དེའི་དབང་གིས་དངོས་པོའི་དེའི་ངོ་བོ་ངེས་པ་མེད་པར་ཐལ་
[263b.4]བར་འགྱུར་བའི་ཕྱིར་རོ། །དེའི་ཕྱིར་དབྱིབས་ཐ་དད་ལས་སྤྱི་ཐ་དད་པ་མངོན་པར་གསལ་བ་ནི་ཁས་བླང་བར་བྱ་བ་མ་ཡིན་ནོ། །གཞན་ཡང་ཞེས་པ་ལ་སོགས་པ་སྟེ། སྔ་མ་ནི་བ་ལང་ཉིད་དང་རྟ་ཉིད་དག་གི་ཁྱད་པར་བརྗོད་པར་བྱ་བ་མ་ཡིན་པ་ཉིད་ཀྱི་ཕྱིར་ཡང་ཁྱད་པར་མེད་པའོ་ཞེས་པས་
[263b.5]གཞི་མཚུངས་པ་དང་མི་མཚུངས་པར་བརྗོད་དོ། །ད་ནི་བརྗོད་པར་བྱ་བ་མ་ཡིན་པ་ཉིད་ཀྱི་ཕྱིར་དང་ཡོད་པ་ཉིད་དང་རྫས་ཉིད་ལ་སོགས་པ་གསལ་བར་བྱེད་པ་ཉིད་ཀྱི་ཕྱིར་མཚུངས་ཤིང་། བ་ལང་ཉིད་དང་རྟ་ཉིད་གསལ་བར་བྱེད་པ་ཉིད་ཀྱི་ཕྱིར་མི་མཚུངས་པ་ཡང་ངོ་ཞེས་པས་གཞི་མཚུངས་པ་
[263b.6]དང་མི་མཚུངས་པའོ། །དེས་ན་དེ་ལ་ཡང་མི་མཚུངས་པ་ཉིད་བརྗོད་པར་འདོད་པ་མ་ཡིན་པ་ལ་ཨུཏྤ་ལ་སྔོན་པོ་ལ་སོགས་པ་བཞིན་དུ་གཞི་མཐུན་པ་ཉིད་དུ་ཐལ་བར་འགྱུར་རོ་ཞེས་པའོ། །འདོད་པ་ལ་ཡང་མེད་ཅེས་སྐྱོན་གཞན་གསུངས་སོ། །གང་ལ་ཡང་ཞེས་པ་ལ་སོགས་པ་ཚད་མའི་
[263b.7]འབྲས་བུའོ། །གལ་ཏེ་ཞེས་པ་ལ་སོགས་པ་དཔེའོ། །དེ་བཞིན་དུ་ནི་ཞེས་པ་ལ་སོགས་པ་ཕྱོགས་ཆོས་སོ། །གང་རྣམས་སྤྱི་ཐ་དད་པ་མངོན་པར་བྱེད་པ་དེའི་སྒྲ་རྣམས་ནི་གཞི་མཐུན་པ་ཉིད་མ་ཡིན་ཏེ། བ་ལང་དང་རྟ་བཞིན་དུ་ཨུཏྤ་ལ་ཡང་དེ་ལྟ་བུའོ་ཞེས་པ་འགལ་བས་ཁྱབ་པའི་
[264a]
[264a.1]ཐལ་འགྱུར་རོ། །ཡོན་ཏན་ལས་དག་གསལ་བ་ཡིན། །གལ་ཏེ་དབྱིབས་ཁོ་ན་སྤྱིའི་གསལ་བར་བྱེད་པ་ཁས་ལེན་ན། ཡོན་ཏན་ཉིད་དང་ལས་ཉིད་ལ་སོགས་པ་རྣམས་མི་གསལ་བར་ཐལ་བར་འགྱུར་ཏེ། དེ་རྣམས་དབྱིབས་དང་ལྡན་པ་མ་ཡིན་པ་ཉིད་ཀྱི་ཕྱིར་རོ། །གང་ལ་
[264a.2]གསལ་བར་བྱེད་པ་མེད་པ་དེ་གསལ་བ་མ་ཡིན་ཏེ། ནམ་མཁའི་མེ་ཏོག་བཞིན་ཡོན་ཏན་ཉིད་ལ་སོགས་པ་རྣམས་ལ་ཡང་གསལ་བར་བྱེད་པ་མེད་དོ་ཞེས་པ་རྒྱུ་མེད་པ་ཐལ་བར་འགྱུར་བའོ། །ནུས་པའི་ཁྱད་པར་གྱིས་ཞེས་པ་ལ་སོགས་པ། དབྱིབས་ཀྱི་ཕྱོགས་ངན་པའི་ཕྱིར་དེ་དོར་ནས་
[264a.3]ཕྱོགས་གཞན་འགོད་པར་བྱེད་དོ། །རྫས་དང་ཡོན་ཏན་དང་ལས་རྣམས་ལ་རྫས་ཉིད་ལ་སོགས་པ་གསལ་བའི་རྒྱུ་ནུས་པའི་ཁྱད་པར་ཡོད་དེ། དེའི་ཕྱིར་ཡོན་ཏན་དང་ལས་ལ་སོན་པའི་སྤྱི་མངོན་པར་མི་གསལ་བའི་སྐྱོན་མེད་དོ། །དངོས་པོ་ཐ་དད་པ་མེད་ཀྱང་ཞེས་པ་ལ་སོགས་པ་སྟེ། འདི་
[264a.4]འདི་ལྟར་མ་ཡིན་ཏེ་མ་ངེས་པའི་ཕྱིར་རོ། །དེ་ལྟར་ནི་བུམ་པ་ལ་སྤྱི་དུ་མ་དང་ལྡན་པ་ཉིད་ཀྱི་ཕྱིར་དེ་གསལ་བ་ན་ནུས་པའི་ཁྱད་པར་ཁས་བླང་བར་བྱ་ཞིང་། དེ་ལས་ཀྱང་གཅིག་ལ་ཡང་ནུས་པ་ཐ་དད་པ་མཐོང་བའི་ཕྱིར། ཐ་དད་པ་བསྒྲུབ་པར་བྱ་བའི་ཆེད་དུ་ནུས་པ་ཐ་དད་པ་ནི་ནུས་པ་མ་ཡིན་ནོ། །ཁྱད་པར་ཅི་
[264a.5]ཞིག་བྱས་པ་ཡིན། །ཞེས་པ་ཁྱད་པར་ཐ་དད་པ་ནི་ཁྱད་པར་དུ་བྱ་བ་ཐ་དད་པ་བསྒྲུབ་པའི་ཆེད་དུ་ནུས་པའོ་ཞེས་པས། དེ་དག་གི་ཐ་དད་པ་ཁོ་ན་རྗེས་སུ་སྦྱོར་བར་བྱེད་དོ། །དེ་རྣམས་ནི་འདོད་དགའ་བའི་སྒྲ་རྣམས་ལ་ཞེས་པ་རང་གི་ངོ་བོ་ཙམ་གྱི་རྒྱུ་མཚན་གྱིས་འཇུག་པ་རྣམས་ནི་འདོད་དགའ་བའི་སྒྲ་རྣམས་
[264a.6]ཏེ། ཌིཏ་ཐའི་སྒྲ་ལ་སོགས་པ་རྣམས་སོ། །བ་ལང་ལ་སོགས་པའི་སྒྲ་རྣམས་ཀྱང་བ་ལང་ཉིད་ལ་སོགས་པ་རྣམས་ལ་ཕྱི་རོལ་གྱི་འཇུག་པའི་རྒྱུ་མཚན་མེད་པའི་ཕྱིར་འདོད་དགའ་བའི་སྒྲ་རྣམས་སོ། །དེ་རྣམས་ཀྱི་བརྗོད་པར་བྱ་བ་ཉིད་ཁོ་ན་དེ་རྣམས་ཀྱི་ཁྱད་པར་རོ། །བ་ལང་ཉིད་ལ་སོགས་པ་
[264a.7]འདོད་དགའ་བའི་སྒྲའི་ཡུལ་རྣམས་ནི་བ་ལང་ལ་སོགས་པའི་སྒྲའི་བརྗོད་པར་བྱ་བ་ཉིད་ཁོ་ནས་དངོས་པོ་གཞན་ལས་ཁྱད་པར་དུ་བྱ་བའོ་ཞེས་སྒྲ་ལས་བྱུང་བ་རྣམས་སེམས་པར་བྱེད་དོ། །འོ་ན་ནི་ཏ་ཐ་ལ་སོགས་པ་རྣམས་ལ་རང་ལས་ཀྱང་ཁྱད་པར་ཡོད་དེ། སྒྲ་ཙམ་གྱིས་བྱས་པའི་ཁྱད་པར་
[264b]
[264b.1]ཡིན་ན་ནི་མིང་མ་བྱས་པ་དང་དེའི་ཉིན་པར་སྐྱེས་པ་དག་ལ་ཁྱད་པར་འཐད་པ་མ་ཡིན་ནོ་ཞེ་ན། སྐྱོན་འདི་མེད་དེ། སྒྲའི་བྱ་བ་ལ་ཐ་དད་པ་འདི་བསམ་པར་བྱའི། མ་མཐོང་བ་ལ་ནི་མ་ཡིན་ནོ། །སྒྲའི་བྱ་བ་ལ་ཌིཏ་ཐ་ལ་སོགས་པ་ལ་ཁྱད་པར་གཞན་ཡོད་པ་ཡང་མ་ཡིན་ནོ། །བརྗོད་ཐ་དད་པས་ཐ་དད་ཅེས། །
[264b.2]ཞེས་པ་ལ་སོགས་པ་སྟེ། འདིར་སྒྲ་ཁོ་ནའི་ཐ་དད་པ་སྟེ་དོན་གྱིས་ནི་མ་ཡིན་ནོ་ཞེས་པའི་ཐ་ཚིག་གོ། །ཁྱད་པར་བྱས་པ་མེད་པའི་དངོས་པོ་ལ་མངོན་པར་རྗོད་པར་བྱེད་པའི་སྒྲས་ཐ་མི་དད་པ་ཉེ་བར་བཏགས་པའི་ཕྱིར། དེ་ལས་ཀྱང་ཁྱད་པར་དུ་བྱས་པའི་སྤྱི་མངོན་པར་གསལ་བའི་རྒྱུ་ཉིད་ཀྱི་ཕྱིར་
[264b.3]བ་ལང་ལ་སོགས་པ་རྣམས་ཁྱད་པར་དུ་བྱས་པའོ་ཞེས་པ་བརྗོད་པར་བྱ་བ་མ་ཡིན་ཏེ། སྤྱི་རྣམས་ཁོ་ན་ཁྱད་པར་མེད་པའི་ཕྱིར་རོ། །མ་ཡིན་ཏེ། དེ་ཉིད་བརྟག་པར་བྱ་བ་ཉིད་ཀྱི་ཕྱིར་ཞེས་པ། དེ་ཉིད་དེ་རྗོད་བྱེད་ཀྱིས་བྱས་པའི་ཁྱད་པར་ནི་ནག་པ་ལ་སོགས་པ་རྣམས་ལ་ཡང་བ་ལང་ཉིད་ལ་སོགས་པ་
[264b.4]རྣམས་ལ་བཞིན་དུ་བརྟག་པར་བྱ་བ་ཉིད་ཀྱི་ཕྱིར་ཏེ། ཅི་ནག་པ་དང་བྱམས་པ་དག་ལ་རང་ཉིད་ལས་ཐ་དད་པ་ཡིན་ནམ། འོན་ཏེ་རྗོད་བྱེད་ཐ་དད་པ་ལས་ཡིན་ཞེས་པའོ། །འོ་ན་དེ་ཁོ་ན་ལས་དེ་ཐ་དད་པ་རྗེས་སུ་དཔག་པར་བྱའོ་ཞེ་ན་གསུངས་པ། གཅིག་ཀྱང་ཞེས་པ་ལ་སོགས་པ་སྟེ། རྣམ་
[264b.5]གྲངས་ཀྱི་སྒྲ་རྣམས་ཀྱིས་མ་ངེས་པའི་ཕྱིར་དེ་ལས་ཐ་དད་པ་རྟོགས་པར་བྱ་བ་མ་ཡིན་ནོ་ཞེས་པའི་དོན་ཏོ། །དེ་ལ་དོན་བཞིན་དུ་རྣམ་པར་དཔྱད་པའི་ཞེས་པ་སྒྲ་ལས་ཏེ། བ་ལང་གི་སྒྲ་དང་རྟའི་སྒྲ་དག་ལ་ཁྱད་པར་ཅི་ཞིག་བྱས་ཞེས་བརྗོད་པ་ན་རང་གི་སྤྱི་མངོན་པར་གསལ་བར་བྱེད་པ་ཉིད་ཀྱི་ཁྱད་པར་རོ་ཞེས་
[264b.6]གདོན་མི་ཟ་བར་བརྗོད་པར་བྱའོ། །དེ་ལྟར་ནི་བ་ལང་གི་སྒྲ་ནི་བ་ལང་གི་སྒྲ་ཉིད་ཀྱིས་གསལ་བར་བྱེད་པ་པོ་དང་རྟའི་སྒྲ་ནི་རྟའི་སྒྲ་ཉིད་ཀྱིའོ་ཞེས་པ་དེ་ལྟར་གལ་ཏེ་སྤྱི་ཐ་དད་པ་མངོན་པར་གསལ་བར་བྱེད་པ་ཉིད་ཀྱི་ཕྱིར་བ་ལང་ལ་སོགས་པའི་སྒྲ་ཐ་དད་པར་འདོད་ན། རང་ཉིད་ལས་ཐ་མི་དད་པར་ཐལ་
[264b.7]བར་འགྱུར་རོ། །དེ་ལྟར་ནི་སྤྱིའི་ཁྱད་པར་བ་ལང་གི་སྒྲ་ཉིད་ལ་སོགས་པ་དང་ལྷན་ཅིག་ཐ་མི་དད་པར་བཏགས་པའི་ཕྱིར། ཉེ་བར་བཏགས་པ་ལས་ཐ་མི་དད་པ་སྟེ། དངོས་པོ་པ་ནི་མ་ཡིན་ནོ། །བ་ལང་གི་སྒྲ་གཅིག་པུ་ཡང་སྒྲ་ཉིད་དང་བ་ལང་གི་སྒྲ་ཉིད་དང་ཡོན་ཏན་ཉིད་ལ་སོགས་པ་
[265a]
[265a.1]རྣམས་ཀྱི་གསལ་བར་བྱེད་པ་ཉིད་ཀྱི་ཕྱིར་དུ་མ་ཉིད་དུ་ཐལ་བར་འགྱུར་རོ། །ཅི་སྟེ་ཁྱད་པར་རྗོད་བྱེད་ཀྱིས་བྱས་པ་ཡིན་ན་དེ་མི་རིགས་ཏེ། གཅིག་ཀྱང་རྣམ་གྲངས་དུ་མའི་སྒྲའི་བརྗོད་པར་བྱ་བ་ཉིད་ཀྱི་ཕྱིར་རོ་ཞེས་དོན་ལ་བཞིན་དུ་རྣམ་པར་དཔྱད་པ་འདིའོ། །ཡང་ན་དེ་ལ་
[265a.2]དོན་བཞིན་དུ་རྣམ་པར་དཔྱད་པ་ཞེས་པ་སྒྲའི་སྤྱི་ལ་སྟེ། འདིའི་ཁྱད་པར་ཅི་ཞིག་བྱས་ཞེས་སྔ་མ་བཞིན་དུ་རྣམ་པར་དཔྱད་པར་བྱའོ། །དེ་ནི་རྗོད་པར་བྱེད་པ་མ་ཡིན་ཏེ་ཞེས་པ་ལ་སོགས་པ་རང་གི་མཚན་ཉིད་མངོན་སུམ་གྱི་ཡུལ་ཏེ། དེ་ཡང་ཐུན་མོང་མ་ཡིན་པ་ཉིད་ཀྱི་ཕྱིར་རོ། །དོན་དང་ལྷན་
[265a.3]ཅིག་སྔོན་མཐོང་བ་མ་ཡིན་ཞིང་། སྔར་འབྲེལ་པ་མ་བཟུང་བ་ལ་རྗོད་པར་བྱེད་པ་ཉིད་ཡོད་པ་ཡང་མ་ཡིན་ནོ། །ཤིང་རྟ་ལ་སོགས་པས་རབ་ཏུ་སྦྱར་བ་ཡང་ཞེས་པ་ལ་སོགས་པ་ནི། དོན་གང་ཁོ་ན་མཆོག་གིས་རབ་ཏུ་སྦྱར་བའི་སྒྲས་སྨྲས་པ་དེ་ཁོ་ན་མཆོག་མ་ཡིན་པས་སྦྱར་བས་ཀྱང་ངོ་། །
[265a.4]གལ་ཏེ་ཡང་རང་གི་མཚན་ཉིད་ཐ་དད་པས་སྒྲ་རྣམས་དབྱེ་བར་བྱ་བ་ཡིན་ན། དོན་དེ་དང་དེའི་རྗོད་པར་བྱེད་པར་འགྱུར་ཞིང་དེ་ལས་ཀྱང་གོ་ཎི་ལ་སོགས་པའི་སྒྲ་རྣམས་ཀྱིས་དོན་དེ་ཁོ་ན་མི་རྟོགས་པར་འགྱུར་ན་རྟོགས་པར་ཡང་འགྱུར་རོ། །དེའི་ཕྱིར་ཁྱད་པར་རྗོད་པར་བྱེད་པ་མ་ཡིན་གྱི། མཚུངས་
[265a.5]པ་ཁོ་ན་རྗོད་པར་བྱེད་པ་སྟེ། དེ་ལྟར་ན་མཆོག་མ་ཡིན་པས་སྦྱོར་བའི་སྒྲ་ལས་ཀྱང་དོན་དེ་ཁོ་ན་རྟོགས་པར་འགྱུར་ཏེ། སྤྱི་ཐ་མི་དད་པ་ཉིད་ཀྱི་ཕྱིར་རོ། །རྣམ་པ་གཞན་དུ་ནི་མ་ཡིན་ནོ། །སྤྱི་བོ་དང་རྒྱབ་དང་ལྟོ་བ་ཞེས་པ་འདི་ལྟ་བུ་ལ་སོགས་པ། མགོ་བོ་ཞེས་པའི་ཤེས་པ་དང་། ཇི་སྲིད་དུ་ལག་པ་
[265a.6]ཞེས་པའི་ཤེས་པའི་བར་གང་ཡིན་པ་དེ་ཡན་ལག་གི་དབྱིབས་ཀྱི་ཁྱད་པར་རྣམས་ལས་ཞེས་པའི་དོན་ཏོ། །དེ་ལྟར་ནི་གང་གི་ཚེ་མགོ་བོ་ཉིད་རང་གི་རྟེན་གྱི་དབྱིབས་ཀྱིས་གསལ་བ་དེའི་ཚེ་དེ་ལས་མགོ་བོ་ཞེས་པའི་ཤེས་པར་འགྱུར་རོ། །གསལ་བྱེད་གསལ་བ་ལས་ཐ་དད། །ཅེས་པ་ལ་
[265a.7]སོགས་པ་གསལ་བྱེད་རྫས་ཀྱིས་བྱས་པའི་གསལ་བ་ནི། རང་གི་སྤྱིའི་ངོ་བོ་གསལ་བར་བྱེད་པའོ། །དེ་ལས་ཐ་དད་པ་ལ་སྤྱི་འདོད་ན། ཕན་ཚུན་བརྟེན་པར་བཤད་པ་འཐོབ་སྟེ། གང་ཡང་རུང་བའང་མ་རྟོགས་པ་ཉིད་ཀྱི་ཕྱིར་རོ། །དེ་ལས་ཀྱང་ཕན་ཚུན་ཐ་དད་པ་བསྒྲུབ་པའི་ཆེད་དུ་ནུས་པ་མ་
[265b]
[265b.1]ཡིན་ནོ། །རྫས་ཀྱི་རང་བཞིན་ཅི་ཡིན་ཞེས་པ་ལ་སོགས་པས་དེ་ཕན་ཚུན་བརྟེན་པ་ཉིད་དེ་སྟོན་ཏོ། །རྫས་ཀྱི་རང་བཞིན་ཅི་ཡིན་ཞེས་བརྗོད་པ་ན། རང་གི་སྤྱི་གསལ་བར་བྱེད་པ་ཉིད་དེ། བ་ལང་ཉིད་གསལ་བར་བྱེད་པ་ཉིད་བ་ལང་གི་རང་བཞིན་ནོ་ཞེས་བཤད་པར་བྱའོ། །སྤྱིའི་རང་བཞིན་ཞེས་
[265b.2]བརྗོད་པ་ན། རང་གི་རྫས་ཀྱིས་མངོན་པར་གསལ་བར་བྱ་བ་ཉིད་དེ། བ་ལང་གི་རྫས་ཀྱིས་མངོན་པར་གསལ་བར་བྱ་བ་ནི་བ་ལང་ཉིད་དོ་ཞེས་བཤད་པར་བྱའོ་ཞེས་པ་འདི་ལྟར་ཕན་ཚུན་བརྟེན་པས་རང་བཞིན་ངེས་པར་བསྟན་པའི་ཕྱིར་ཕན་ཚུན་བརྟེན་པ་ཉིད་དུ་འགྱུར་རོ། །གཅིག་ལ་རང་བཞིན་དུ་
[265b.3]དུ་མ་ཉིད། །ཅེས་པ་རྫས་དང་ཡོད་པ་ཉིད་ལ་སོགས་པའང་རང་བཞིན་དུ་མ་ཉིད་དུ་ཐལ་བར་འགྱུར་རོ། །ཅི་ལས་ཤེ་ན་གསུངས་པ། ཕན་ཚུན་མང་པོ་གསལ་བྱེད་ཕྱིར། །མང་པོ་རྣམས་གསལ་བར་བྱེད་པའི་ཕྱིར་རམ། མང་པོ་རྣམས་ཀྱིས་གསལ་བར་བྱེད་པའི་ཕྱིར་ཞེས་པ། རྒྱུད་དམ་
[265b.4]ཀུན་ནས་འཇུག་པའི་རིགས་པ་ལ་བརྟེན་ནས་ཚིག་རྣམ་པར་སྦྱར་བ་ཐ་དད་པས་དོན་ཐ་དད་པ་གསུངས་སོ། །རྫས་ལས་ནི་ཞེས་པ་བུམ་པ་ལ་སོགས་པ་ལས་སོ། །ཡོད་པ་ཉིད་ལ་སོགས་པ་ཞེས་པའི་སོགས་པའི་སྒྲས་བུམ་པ་ཉིད་དང་ས་ལས་གྱུར་པ་ཉིད་ལ་སོགས་པ་རྣམས་གཟུང་བར་བྱའོ། །
[265b.5]ས་ལས་གྱུར་པ་ཉིད་ལ་སོགས་པས་ཞེས་པ་འདིར་ཡང་སོགས་པའི་སྒྲས་ཆུ་ལས་གྱུར་པ་དང་མེ་ལས་གྱུར་པ་ཉིད་ལ་སོགས་པ་རྣམས་སོ། །དེ་ལྟར་བུམ་པ་ལ་སོགས་པའི་རྫས་གཅིག་ནི་ས་ལས་གྱུར་པ་ཉིད་ལ་སོགས་པ་དུ་མ་རྣམས་ཀྱི་གསལ་བར་བྱེད་པའོ་ཞེས་པ་དེ་དུ་མའི་རང་བཞིན་ཉིད་དུ་ཐལ་
[265b.6]བར་འགྱུར་ཏེ། གལ་ཏེ་གསལ་བར་བྱེད་པའི་སྤྱི་ཐ་དད་པ་ལས་རྫས་ཐ་དད་ནའོ། །དེ་བཞིན་དུ་ཡོད་པ་ཉིད་ལ་སོགས་པའི་སྤྱི་ནི་ས་ལས་གྱུར་པ་ཉིད་ལ་སོགས་པའི་རྫས་དུ་མས་གསལ་བར་བྱ་བའོ་ཞེས་པས་དེ་ཡང་རང་བཞིན་དུ་མ་རྣམས་སུ་ཐལ་བར་འགྱུར་ཏེ། གལ་ཏེ་གསལ་
[265b.7]བར་བྱེད་པ་རྫས་ཐ་དད་པ་ལས་སྤྱི་ཐ་དད་པ་ཁས་ལེན་ནའོ། །དེའི་ཕྱིར་གསལ་བར་བྱེད་པའི་རྫས་ཐ་དད་པ་ལས་སྤྱི་ཐ་དད་པ་མ་ཡིན་ཞིང་། གསལ་བར་བྱ་བ་སྤྱི་ཐ་དད་པ་ལས་རྫས་ཐ་དད་པ་ཡང་མ་ཡིན་ཏེ། མ་ངེས་པའི་ཕྱིར་རོ་ཞེས་ཐལ་བར་འགྱུར་བའི་ཟོལ་གྱིས་སྟོན་ཏོ། །རྣམ་
[266a]
[266a.1]པ་ཐམས་ཅད་དུ་ཡང་ཞེས་པ་ལ་སོགས་པས་རྒྱས་པར་བཤད་ཟིན་པའི་དོན་སླར་ཡང་མདོར་བསྡུས་པས་བདེ་བླག་ཏུ་གཟུང་བའི་དོན་དུ་གསུངས་སོ། །ཡོན་ཏན་དང་འབྲེལ་པའི་ཁྱད་པར་ལས་ཞེས་པ། ཇི་སྐད་དུ་སྤྱི་ཐ་དད་པ་མངོན་པར་གསལ་བར་བྱེད་པ་ཉིད་ཀྱི་ཕྱིར་ཞེས་
[266a.2]བཤད་པ་ལྟ་བུའོ། །ཡོན་ཏན་ནི་འདིར་སྤྱིའི་ཁྱད་པར་དུ་མངོན་པར་དགོངས་ཏེ། དེ་དང་འབྲེལ་པའོ། །དེ་ཐ་དད་པ་ལས་ཐ་དད་པར་ཁས་ལེན་པ་ན་རྫས་དུ་མ་ཉིད་དུ་ཐལ་བར་འགྱུར་རོ། །ནུས་པ་ཐ་དད་པའི་ཕྱིར་ནི་ཇི་སྐད་དུ་བཤད་པ། ནུས་པ་ཐ་དད་པ་རང་གི་སྤྱི་མངོན་པར་གསལ་བར་བྱེད་པ་ཉིད་
[266a.3]ཀྱི་ཕྱིར་རྫས་ལ་སོགས་པ་རྣམས་ལ་ཐ་དད་པ་ཡིན་གྱི་ཞེས་པའོ། །མངོན་པར་རྗོད་པ་ཐ་དད་པ་ལས་ནི་ཇི་སྐད་བཤད་པ། སྒྲ་ལས་བྱུང་བ་རྣམས་ཀྱི་རེ་ཞིག་མངོན་པར་རྗོད་པར་བྱེད་པས་སྒྲས་བྱས་པ་ཞེས་དང་། ཇི་སྐད་བཤད་པ། ནག་པ་ལ་སོགས་པ་བཞིན་དུ་མངོན་པར་རྗོད་པ་ཐ་དད་པ་ལས་ཀྱང་ཐ་
[266a.4]དད་པ་མཐོང་ངོ་ཞེ་ན་ཞེས་སོ། །དེ་ལྟར་དེ་དང་ལྡན་པ་རྗོད་པར་བྱེད་པའི་ཕྱོགས་ལ་གཞི་མཐུན་པ་ཉིད་མེད་པའོ། །ཁྱད་པར་ཁྱད་པར་བྱ་ཉིད་ནི། །རང་དབང་མེད་ཕྱིར་སྔར་བརྗོད་ཟིན། །ཞེས་པ། དེ་ལྡན་རང་དབང་མེད་ཕྱིར་མིན། །ཞེས་པ་འདིར་དེ་དང་ཐ་དད་མེད་པར་བཤད་དོ། །དེ་ལས་ཐ་དད་
[266a.5]མ་ཡིན་པ་ཉིད་ལ་ཡང་ཇི་ལྟར་གཞི་མཐུན་པ་ཉིད་མི་སྲིད་པ་དེ་ལྟར་ཁྱད་པར་དང་ཁྱད་པར་དུ་བྱ་བའི་དངོས་པོ་ཡང་སྟེ། ཐ་དད་པས་སྤྱི་ཁྱད་པར་དུ་བྱ་བ་ཡིན་གྱི་ཐ་མི་དད་པས་ནི་མ་ཡིན་པས་སོ། །སྒྲ་ནི་འཇུག་པ་དང་མི་འཇུག་པའི་དོན་ཅན་ཉིད་ཀྱི་ཕྱིར་ན་རྗེས་སུ་འགྲོ་བ་དང་ལྡོག་པས་བསྐུལ་
[266a.6]བས་ཐ་སྙད་ཀྱི་ཡན་ལག་ཉིད་ཡིན་གྱི། རྣམ་པ་གཞན་དུ་ནི་མ་ཡིན་ནོ་ཞེས་བསྟན་པའི་ཆེད་དུ་སྔར། བྱས་སོགས་བཞིན་དུ་རང་དོན་ལ། །གཞན་སེལ་བ་ཡི་སྒྲ་རྗོད་བྱེད། །ཅེས་བཤད་ཅིང་། དེ་ནི་དེའི་དམིགས་བསལ་གཞན་ཉིད་ན་ཡང་ཞེས་པ་ལ་སོགས་པས་གསུངས་སོ། །གང་མཆོག་
[266a.7]ཏུ་སྤངས་པ་ནི་གཞན་སེལ་བར་བྱེད་དོ་ཞེས་པ་དེ་སྤྱི་དང་བྱེ་བྲག་དང་རྣམ་གྲངས་ཀྱི་སྒྲའི་དོན་ཡོངས་སུ་སྤངས་པས་ཞེས་པའོ། །གཞན་ཉིད་དུ་མཚུངས་ན་ཡང་ཞེས་པས་ཐལ་བར་འགྱུར་བའི་རྒྱུ་གསུངས་སོ། །དགག་པ་ནི་ཐལ་བར་འགྱུར་བ་སྔོན་མ་ཅན་ཉིད་ཀྱི་ཕྱིར་དང་། གཞན་ཉིད་ཀྱང་
[266b]
[266b.1]སེལ་བ་ལ་རྒྱུ་མཚན་ནོ། །འགལ་བ་མེད་ཕྱིར་ཞེས་པ་མི་སེལ་བ་ཉིད་ལ་རྒྱུའོ། །གང་རྣམས་མི་འགལ་བ་དེ་རྣམས་ནི་ཕན་ཚུན་སྤོང་བ་མ་ཡིན་ཞིང་སེལ་བ་མ་ཡིན་ཏེ། དཔེར་ན་རྫས་ལ་གཟུགས་ལ་སོགས་པ་རྣམས་བཞིན་ནོ། །དེ་ལྟར་གསུམ་ཀའི་མི་འགལ་བ་ཉིད་ཅིག་ཅར་བརྗོད་ནས་ད་ནི་སོ་
[266b.2]སོར་བསྟན་པའི་ཆེད་དུ་གསུངས་པ། རྣམ་གྲངས་པའི་སྒྲ་ནི་ཞེས་པ་ལ་སོགས་པའོ། །བསལ་བྱ་མཚུངས་པ་ཞེས་པས་དོན་གཅིག་པ་ཉིད་གསུངས་སོ། །ཅིག་ཅར་སྦྱོར་བ་མ་ཡིན་པའི་ཕྱིར་ཞེས་པ་དོན་གཅིག་པ་ཉིད་སྒྲུབ་པར་བྱེད་པ་སྟེ། གཅིག་གི་དོན་དེ་བྱས་ཟིན་པ་ཉིད་ཀྱི་ཕྱིར་གཉིས་
[266b.3]པ་སྦྱོར་བ་མ་ཡིན་ནོ། །གང་དུ་ནུས་པ་ཡོད་ན་ཡང་གཉིས་པ་མི་སྦྱོར་བ་དག་ནི་དོན་གཅིག་པ་ཉིད་དེ། དཔེར་ན་བྱེ་བྲག་དག་བཞིན་ནོ། །གང་རྣམས་དོན་གཅིག་པ་དེ་རྣམས་ནི་འགལ་བ་མ་ཡིན་ཏེ། དཔེར་ན་རྫས་ལ་གཟུགས་ལ་སོགས་པ་རྣམས་བཞིན་ནམ་གྲོགས་པོ་རྣམས་བཞིན་ནོ། །རྣམ་
[266b.4]གྲངས་པའི་སྒྲ་རྣམས་ཀྱང་དོན་གཅིག་པའོ་ཞེས་པ་ཁྱབ་བྱེད་དང་འགལ་བའོ། །གང་མི་འགལ་བ་དེ་རྣམས་ནི་ཕན་ཚུན་རྣམས་ལས་སྤོང་བ་མ་ཡིན་ཏེ། དཔེ་དེ་ཁོ་ན་བཞིན་རྣམ་གྲངས་པའི་སྒྲ་རྣམས་ཀྱང་མི་འགལ་བའོ། །ཁྱབ་བྱེད་དང་འགལ་བ་ཁོ་ནའོ། །རང་གི་དོན་སྤོང་བ་རིགས་པ་ཡང་མ་ཡིན་
[266b.5]ནོ་ཞེས་པ། མི་སེལ་བ་ཉིད་ལ་གཏན་ཚིགས་གཞན་གསུངས་སོ། །གང་ཞིག་གང་གི་རང་གི་དོན་ཡིན་པ་དེས་ན་དེ་སེལ་བ་མ་ཡིན་ཏེ། དཔེར་ན་རྣམ་པར་ཤེས་པ་རང་གི་དོན་བཞིན་རྣམ་གྲངས་ཀྱི་སྒྲའི་དོན་ཡང་རྣམ་གྲངས་ཀྱི་སྒྲ་གཞན་གྱི་རང་གི་དོན་ཡིན་ནོ། །ཁྱབ་བྱེད་དང་འགལ་བའོ། །
[266b.6]སྤྱིའི་སྒྲས་ཀྱང་ཞེས་པ་ལ་སོགས་པ་སྟེ། སྤྱིའི་སྒྲ་ཤིང་གི་སྒྲ་ནི་གང་རང་ནི་སྤྱི་ཤིང་ཉིད་ཡིན་ཞིང་དེའི་ཁྱད་པར་རྣམས་ནི་རང་གི་ཁྱད་པར་རྣམས་ཏེ་ཤིང་ཤ་པ་ལ་སོགས་པ་རྣམས་སོ། །དེ་རྣམས་ལ་དོན་གཞན་བུམ་པ་ལ་སོགས་པ་ཤིང་གི་སྒྲས་བསལ་བ་ནི་ཁྱད་པར་གྱི་སྒྲ་སྟེ། ཤིང་ཤ་པའི་སྒྲས་རྗེས་
[266b.7]སུ་འདོད་པ་ཁོ་ན་སྟེ། དོན་དུ་གཉེར་བའི་ཕྱིར་རོ། །དོན་དུ་གཉེར་བ་ནི་ཤིང་ཤ་པའི་སྒྲས་བུམ་པ་ལ་སོགས་པ་བསལ་བ་སྟེ། དོན་དུ་གཉེར་བ་ཉིད་དེ་སྟོན་པར་གསུངས་པ། དཔེར་ན་ཞེས་པ་ལ་སོགས་པའོ། །འདིས་ནི་བུམ་པ་ལ་སོགས་པ་བསལ་བས་དོན་དུ་གཉེར་བ་ཉིད་ལས་དོན་
[267a]
[267a.1]གཅིག་ཉིད་གསལ་བར་བྱེད་པའི་ཁྱད་པར་གྱི་སྒྲ་ནི་སྤྱིའི་སྒྲ་དང་མི་འགལ་ལོ་ཞེས་སྟོན་པར་བྱེད་དོ། །ཇི་ལྟར་ནི་པ་ལ་ཤ་ལ་སོགས་པའི་ངོ་བོ་ཤིང་ཤ་པའི་སྒྲའི་དོན་དུ་འགྱུར་བ་མ་ཡིན་ནོ་ཞེས་པས་པ་ལ་ཤ་ལ་སོགས་པ་རྣམས་དེའི་སྤང་བར་བྱ་བ་ཡིན་པ་དེ་བཞིན་དུ་
[267a.2]བུམ་པ་ལ་སོགས་པའི་ངོ་བོ་ཡང་འགྱུར་བ་མ་ཡིན་ནོ་ཞེས་པས་བུམ་པ་ལ་སོགས་པ་རྣམས་ཀྱང་བསལ་བར་བྱའོ། །དེ་རྣམས་ཀྱང་ཤིང་གི་སྒྲས་སེལ་བར་བྱེད་དོ། །འདིས་ནི་ཞེས་པ་ལ་སོགས་པས་རང་གི་སྤྱི་ཤིང་ཉིད་ཀྱི་གང་སྤྱི་ས་ལས་གྱུར་པ་ཉིད་དེའི་སྒྲ་ནི་ས་ལས་གྱུར་པའི་སྒྲ་སྟེ། སྤྱིའི་
[267a.3]སྤྱི་སྒྲའོ། །དེས་གང་བསལ་བར་བྱ་བ་ཆུ་ལས་གྱུར་པ་ལ་སོགས་པ་དེ་ཤིང་ཤ་པའི་སྒྲས་ཀྱང་རྗེས་སུ་སེམས་པར་བྱེད་དེ། དོན་དུ་གཉེར་བ་ཉིད་ཀྱི་ཕྱིར་རོ། །ཇི་ལྟར་ཤིང་ཤ་པ་ནི་པ་ལ་ཤ་ལ་སོགས་པ་མ་ཡིན་པ་དེ་ལྟར། ཆུ་ལས་མ་གྱུར་པ་ཉིད་ལ་སོགས་པ་ཡང་མ་ཡིན་ནོ། །དེ་ལྟར་
[267a.4]ཀུན་ནས་འཇུག་པས་རྫས་མ་ཡིན་པ་དང་ཡོད་པ་མ་ཡིན་པ་ཡང་རྫས་དང་ཡོད་པའི་སྒྲ་དག་གིས་གསལ་བར་བྱ་བ་ནི་དོན་དུ་གཉེར་བ་ཉིད་ཀྱི་ཕྱིར་རྗེས་སུ་སེམས་པར་བྱེད་པར་བཙལ་བར་བྱའོ། །དེ་བཞིན་དུ་སྤྱིའི་སྒྲ་ཞེས་པ་ལ་སོགས་པ། ཇི་ལྟར་ཁྱད་པར་གྱི་སྒྲ་མི་འགལ་བའི་ཕྱིར་སྤྱིའི་སྒྲའི་
[267a.5]དོན་སྤོང་བ་མ་ཡིན་པ་དེ་བཞིན་དུ་སྤྱིའི་སྒྲ་ཡང་ཡོད་པ་ལ་སོགས་པའོ། །རང་གི་དོན་ནི་ཡོད་པ་ཉིད་ལ་སོགས་པའོ། །མངོན་པར་འདོད་པའི་ཡུལ་ལ་འཇོག་པ་ཞེས་པ། ཁྱད་པར་རྣམས་ལ་མི་གནས་པ་ཉིད་ཀྱི་ཕྱིར་འཇོག་བཞིན་པའོ། །མངོན་པར་འདོད་པའི་ཡུལ་ལ་སྟེ། ཡོན་
[267a.6]ཏན་ལ་སོགས་པས་རྣམ་པར་བཅད་པའི་རྫས་ལ་སོགས་པ་ལ་འཇོག་པ་སྟེ། ཡུལ་གཞན་མ་ཡིན་པ་ཉིད་ཉེ་བར་འདྲེན་པར་བྱེད་པས་ནི་ཁྱད་པར་གྱི་སྒྲ་སྟེ། རྫས་ལ་སོགས་པས་སམ། ཁྱད་པར་གྱི་ཁྱད་པར་གྱི་སྒྲ་སྟེ། ས་ལས་གྱུར་པའི་ཤིང་གི་ཤིང་ཤ་པའི་སྒྲ་ལ་སོགས་པས་ཅི་ལྟར་
[267a.7]བཏང་སྙོམས་སུ་བྱེད་པ་མ་ཡིན། བཏང་སྙོམས་སུ་བྱེད་པ་ཁོ་ནའོ། །དོན་དུ་གཉེར་བ་ནི་རང་གི་ཡུལ་ལ་གནས་པས་ཡུལ་མེད་པའི་རང་གི་དོན་མི་འཐད་པའི་ཕྱིར་རོ། །འདིས་ནི་མངོན་པར་འདོད་པའི་དོན་སྒྲུབ་པར་བྱེད་པའི་ཕྱིར་ཁྱད་པར་གྱི་སྒྲ་ནི་སྤྱིའི་སྒྲ་ལ་ཕན་འདོགས་པ་སྟེ། དེ་
[267b]
[267b.1]ལས་ཀྱང་སྤྱིའི་སྒྲ་དེ་དང་མི་འགལ་ལོ་ཞེས་སྟོན་པར་བྱེད་དོ། །ཚོགས་པ་ཡང་ཞེས་པ་ལ་སོགས་པས་མི་འགལ་བའི་ཕྱིར་མ་སྤངས་པ་ན་ཡོན་ཏན་འཕེལ་བ་སྟོན་པར་བྱེད་དོ། །ཡང་ན་ཕན་ཚུན་མི་སྤོང་བ་ལ་གཏན་ཚིགས་གཞན་གསུངས་སོ། །ཕན་ཚུན་གྱི་དོན་མི་སྤོང་ན་ནི་རང་གི་དོན་གྱི་ཁྱད་
[267b.2]པར་དུ་བྱས་པའི་དོན་རྗོད་པར་བྱེད་པ་ཉིད་དུ་འཐད་ཀྱི་རྣམ་པ་གཞན་དུ་ན་མ་ཡིན་ནོ། །ཡོངས་སུ་བོར་བ་ནི་ཡོངས་སུ་བོར་བརྗོད་པར་བྱེད་པ་བུམ་པ་ལ་སོགས་པའི་སྒྲ་རྣམས་ཀྱིས་གཞན་དུ་ཡིན་ན་ཅི་ལས་ཤིང་གི་སྒྲ་ནི་ཤིང་ཤ་པ་ལ་སོགས་པའི་སྒྲ་རྣམས་དང་གཞི་མཐུན་པ་ཉིད་དུ་འགྱུར། དེ་བཞིན་
[267b.3]དུ་ཡང་ཞེས་པ་ཕན་ཚུན་གྱི་དོན་མི་སྤོང་བར་གྱུར་པ་ཁོ་ནའོ་ཞེས་པའི་དོན་ཏོ། །གཉིད་དག་གིས་ཞེས་པ། དཔེར་ན་ཤིང་ལ་ཞེས་པ་ལྟ་བུའི་རང་བཞིན་དང་རྐྱེན་དག་གིའོ། །འདིར་ཡང་སོ་སོར་རྟོག་པར་བྱེད་པ་ནི་རང་གི་དོན་ཤིང་གི་སྤྱི་ལ་འཇུག་བཞིན་པ་ནི་ལས་ལ་སོགས་པ་རྣམ་པར་དབྱེ་བའི་
[267b.4]དོན་སྤོང་བར་མི་བྱེད་ཅིང་། ཨམ་ཞེས་པའི་རྐྱེན་ལས་ཀྱི་སྤྱི་ལ་གནས་པ་ཡང་ཤིང་ལ་སོགས་པ་དོན་རྟོགས་པར་བྱེད་པ་རྣམས་སྤོང་བ་མ་ཡིན་ནོ། །དེ་ལྟར་ཕན་ཚུན་གྱི་དོན་མི་སྤོང་བ་ན། དེ་དག་གི་ཚོགས་པ་གང་ཡིན་པ་ཤིང་ལ་ཞེས་པ་དེ་ནི་ཡན་ལག་གི་དོན་གྱི་ཁྱད་པར་དུ་བྱས་པའི་དོན་རྗོད་པར་བྱེད་པར་
[267b.5]འཐད་དོ། །དེ་བཞིན་དུ་ཨུཏྤ་ལ་སྔོན་པོ་ཞེས་པའི་སྔོན་པོ་དང་ཨུཏྤ་ལའི་སྒྲ་དག་ཚིག་སྡུད་ཀྱི་དོན་རྗོད་པར་བྱེད་པ་ཉིད་ནི་ཕན་ཚུན་གྱི་དོན་ལས་མ་བསལ་བར་གྱུར་པ་ན་སྦྱོར་རོ་ཞེས་སྦྱར་བར་བྱའོ། །དེ་ལྟར་ནི་སྔོན་པོའི་སྒྲ་སྔོན་པོའི་ཁྱད་པར་ཨུཏྤ་ལ་མ་ཡིན་པ་ལ་སོགས་པ་རྣམས་མི་སྤོང་བ་
[267b.6]ནི། ཨུཏྤ་ལ་དང་ཨུཏྤ་ལ་མ་ཡིན་པ་ལ་འཇུག་པའི་དོན་ཏོ། །ཨུཏྤ་ལའི་སྒྲ་ཨུཏྤ་ལའི་ཁྱད་པར་སྔོན་པོ་མ་ཡིན་པ་ལ་སོགས་པ་མི་སྤོང་བའི་ཡང་སྔོན་པོ་དང་སྔོན་པོ་མ་ཡིན་པ་ལ་འཇུག་པའོ། །ཚོགས་པ་ནི་ཆ་ཤས་ཀྱི་དོན་དག་གིས་ཁྱད་པར་དུ་བྱས་པའོ། །དེ་ལྟ་ན་འོ་ན་དེ་དག་གི་
[267b.7]བརྗོད་པར་བྱ་བ་མ་ཡིན་པ་ཁོ་ན་ན་དེ་ཅི་ལྟར་དེ་དག་གི་གཞི་མཐུན་པ་ཡིན། དེ་ལྟར་ནི་གང་གིས་བརྗོད་པར་བྱ་བ་དེ་ཐ་མི་དད་པ་སྟེ། གང་དག་ཐ་དད་པ་དེ་དག་དེའི་བརྗོད་པར་བྱ་བ་མ་ཡིན་ནོ་ཞེ་ན། དེ་གཞི་གཅིག་པར་རྟོགས་པར་བྱེད་པར་འགྱུར་རོ་ཞེས་པའོ། །དེ་ལྟར་དེ་དག་གི་དོན་རབ་ཏུ་
[268a]
[268a.1]སྦྱོར་བའོ་ཞེས་དེའི་དོན་ཉིད་ཀྱི་ཕྱིར། དེ་ནི་དེ་དག་གི་ཞེས་བརྗོད་པར་བྱའོ། །ཡང་ན་ཡན་ལག་ཐ་དད་པས་ཐ་དད་པར་སྒྲོ་བཏགས་ནས་དེ་དག་གི་ཚོགས་པ་ཁོ་ནའོ་ཞེས་ཐ་སྙད་བསྟན་པར་བྱའོ། །མང་པོ་རྣམས་ཀྱི་སྟེ། དཔེར་ན་རྒྱལ་པོའི་སྐྱེས་བུ་གཟུགས་མཛེས་པ་ཅན་
[268a.2]ཤོག་ཅེས་པ་ལྟ་བུ་སྟེ། རང་གི་དོན་གྱི་སྤྱི་ལ་འཇུག་བཞིན་པའི་ངག་གི་ཚིག་རྣམས་ཐམས་ཅད་ཀྱི། ཅིག་ཤོས་རྣམས་ཀྱི་ཡང་ངག་གི་དོན་རྗོད་པར་བྱེད་པ་ཉིད་མ་སྤངས་པ་ན་སྦྱར་བར་བྱའོ། །དོན་གཞན་གྱི་རྗོད་པར་བྱེད་པ་སྔར་ཁོ་ནར་རྟོགས་པར་བྱས་ཟིན་ནོ་ཞེས་གསུངས་པ། སྔར་ཇི་སྐད་བཤད་
[268a.3]པ་བཞིན་ཞེས་པ་ནི་དེ་ནི་སྔོན་པོ་འབའ་ཞིག་མིན་ཨུཏྤལ་འབའ་ཞིག་ཀྱང་མ་ཡིན་ཞེས་པ་ལ་སོགས་པས་སྔོན་པོ་དང་ཨུཏྤལའི་སྒྲ་དག་ནི་ཚོགས་པའི་དོན་གྱིས་སོ་སོར་དོན་མེད་པ་ཉིད་དུ་སྟོན་པས། ཚོགས་པའི་དོན་གཞན་མངོན་པར་རྗོད་པར་བྱེད་པ་ཉིད་དུ་གསུངས་སོ། །བརྗོད་པ་ཡང་
[268a.4]ཞེས་པ་སྤྱི་དང་ཁྱད་པར་གྱི་སྒྲ་དག་མི་འགལ་བ་ན་སྤྱིའི་སྒྲས་ཁྱད་པར་རྣམས་མི་གཏོང་ཞིང་མི་ལེན་པའི་དབང་དུ་བྱས་ནས་ཚིགས་སུ་བཅད་པ་གསུངས་པ། དེ་ཙམ་འདོད་ཕྱིར་ཞེས་པ་ལ་སོགས་པའོ། །རང་གི་ཁྱད་པར་ཙམ་འདོད་པའི་ཕྱིར་ཞེས་པའི་དོན་ཏོ། །འདོད་པ་ནི་དེ་རྣམས་ལ་
[268a.5]ཐེ་ཚོམ་ཟ་བ་རྣམ་པར་གཅད་པ་དོན་དུ་གཉེར་བའོ། །ཙམ་གྱི་སྒྲ་ནི་ཁྱད་པར་གཞན་འདོད་པ་བསལ་བའི་ཆེད་དུའོ། །དེ་ལྟར་ནི་ཤིང་གི་སྒྲ་ལས་པ་ལ་ཤ་ལ་སོགས་པའི་ཡུལ་ཅན་ཁོ་ནའི་འདོད་པ་སྐྱེའི། བུམ་པ་ལ་སོགས་པའི་ཡུལ་ཅན་ནི་མ་ཡིན་ནོ། །གལ་ཏེ་ཡང་བུམ་པ་ལ་སོགས་པ་བཞིན་དུ་པ་ལ་
[268a.6]ཤ་ལ་སོགས་པ་རྣམས་ཀྱང་དོར་བར་འགྱུར་ན། དེ་ལ་ཡང་བུམ་པ་ལ་སོགས་པ་བཞིན་དུ་འདོད་པར་མི་འགྱུར་ན་འགྱུར་བ་ཡང་སྟེ། དེའི་ཕྱིར་དོར་བ་མ་ཡིན་ནོ། །གང་ཞིག་གང་རྣམས་ལ་འདོད་པའི་རྒྱུ་ཡིན་པ་དེས་དེ་རྣམས་དོར་བ་མ་ཡིན་ཏེ། དཔེར་ན་གཞལ་བྱ་ཉིད་ཀྱིས་མི་རྟག་པ་ཉིད་ལ་སོགས་
[268a.7]པ་རྣམས་བཞིན། སྤྱིའི་སྒྲ་ཡང་རང་གི་ཁྱད་པར་རྣམས་ལ་འདོད་པའི་རྒྱུའོ་ཞེས་པ་ཁྱབ་བྱེད་དང་འགལ་བའོ། །འོ་ན་ཉེ་བར་བླངས་པ་སྟེ་མ་བཏང་བའི་ཕྱིར་རོ་ཞེ་ན་གསུངས་པ། བླངས་མ་ཡིན་ཞེས་པ་ལ་སོགས་པ་སྟེ། བླངས་པ་མ་ཡིན་ཞིང་། རྟོགས་པར་བྱས་པ་མ་ཡིན་ནོ་ཞེས་པའི་དོན་ཏོ། །
[268b]
[268b.1]གང་ཞིག་གང་རྣམས་ལ་ཐེ་ཚོམ་གྱི་རྒྱུ་ཡིན་པ་དེས་དེ་རྣམས་རྟོགས་པར་བྱས་པ་མ་ཡིན་ཏེ། དཔེ་དེ་ཁོ་ན་བཞིན། སྤྱིའི་སྒྲ་ཡང་རང་གི་ཁྱད་པར་རྣམས་ལ་ཐེ་ཚོམ་གྱི་རྒྱུའོ་ཞེས་པ་རྒྱུ་དང་འགལ་བའོ། །མཚུངས་ན་འང་དེ་དག་དོན་གཅིག་ཉིད། །ཅེས་པ་གང་དུ་སྤྱི་དང་ཁྱད་པར་གྱི་སྒྲ་གཉིས་ཀ་མི་སྤོང་
[268b.2]བ་དང་མི་ལེན་པ་དེར་དོན་གཅིག་པ་ཉིད་དེ་གཞི་མཐུན་པ་ཉིད་ཅེས་པའི་དོན་ཏོ། །ཇི་ལྟར་སྤྱིའི་སྒྲས་རང་གི་ཁྱད་པར་རྣམས་སྤོང་བ་མ་ཡིན་ཞིང་འདོར་བ་མ་ཡིན་པ་དེ་ལྟར་ཅི་ཁྱད་པར་གྱི་སྒྲས་ཀྱང་སྤྱི་ཡིན་ནམ་ཞེས་པའི་དྲི་བ་སྤོང་བར་བྱེད་པ་གསུངས་པ། དུ་མ་ཡིན་ཡང་ཞེས་པ་ལ་སོགས་
[268b.3]པ་སྟེ། གལ་ཏེ་ཡང་སྤྱི་དུ་མ་ཡིན་པ་དེ་ལྟ་ཡང་། དེའི་ཁྱད་པར་སྒྲས་ལེན་ཏེ་རྟོགས་པར་བྱས་སོ་ཞེས་པའི་དོན་ཏོ། །རྟོགས་པར་བྱེད་པ་ལས་ཐ་དད་པར་ལེན་པ་མི་སྲིད་པའི་ཕྱིར་རོ། །ཇི་ལྟར་ཤིང་ཤ་པའི་སྒྲས་དོན་གྱི་ཤིང་དང་ས་ལས་གྱུར་པ་དང་རྫས་སུ་ཡོད་པའི་སྤྱི་བླངས་ཀྱི་མ་དོར་
[268b.4]བ་འབའ་ཞིག་ཏུ་མ་ཟད་པ་བཞིན་ནོ། །ཅིའི་ཕྱིར་ཡང་ཁྱད་པར་གྱི་སྒྲས་སྤྱི་རྣམས་ཉེ་བར་ལེན་ཞེ་ན་གསུངས་པ། མི་འཁྲུལ་བས་ཤེས་པ་གང་གི་ཕྱིར་བྱེ་བྲག་ནི་སྤྱི་ལ་མི་འཁྲུལ་བ་སྟེ། སྤྱི་མེད་ན་བྱེ་བྲག་མེད་པའི་ཕྱིར་རོ། །དེའི་ཕྱིར་དེས་ཉེ་བར་ལེན་པའོ། །དེ་དག་ཁྱད་པར་དང་།
[268b.5]ཁྱད་པར་གཞི་ཉིད་འདོད་པ་མ་ཡིན་ཞེས་པ་ཤིང་ནི་ཤིང་ཤ་པ་ལ་སོགས་ལ་འཁྲུལ་པ་རྣམ་པར་གཅོད་པ་ལ་ལྟོས་སོ་ཞེས་པས་ཁྱད་པར་དང་ཁྱད་པར་དུ་བྱ་བའི་དངོས་པོ་ཡོད་དོ། །ཤིང་ཤ་པ་ནི་ཤིང་གི་སྤྱི་ལ་མི་འཁྲུལ་ཞིང་ལྟོས་པ་མ་ཡིན་ནོ་ཞེས་པས་མེད་དོ། །འཁྲུལ་པ་ཅན་གྱི་ཁྱད་
[268b.6]པར་དག་ལ་ནི་ཁྱད་པར་དང་ཁྱད་པར་གྱི་དངོས་པོ་མཚུངས་པ་སྟེ། དཔེར་ན་སྔོན་པོ་དང་ཨུཏྤ་ལ་དག་བཞིན་ནོ། །སྤྱི་དང་ཁྱད་པར་གྱི་སྒྲ་དག་ཕན་ཚུན་སྤོང་བ་བཀག་པ་ན། སྤྱིའི་སྒྲ་གཉིས་དག་དང་ཁྱད་པར་གྱི་སྒྲ་གཉིས་དག་ཕན་ཚུན་གྱི་དོན་སྤོང་བ་གྲུབ་བོ་ཞེས་པས་འདི་བསྒྲུབ་པར་
[268b.7]བྱ་བ་མ་ཡིན་ཞིང་། རྒྱུ་ནི་བསྒྲུབ་པར་བྱ་བའོ་ཞེས་པ་དེའི་ཕྱིར་དེ་ཁོ་ན་འདྲི་སྟེ། ཡང་འདི་ལ་ཅི་ཞིག་ཅེས་པ་ལ་སོགས་པའོ། །སྤྱི་དག་གི་རང་གི་སྤྱི་ལ་ལྟོས་པས་ཐ་དད་པའི་ཕྱིར་ལོགས་པར་ཉེ་བར་མ་བླངས་སོ། །ཁྱད་པར་ཁྱད་པར་གཞན་དོན་ཅན། །ཞེས་པ་ཤིང་ཉིད་ཀྱི་ཁྱད་
[269a]
[269a.1]པར་ནི་ཤིང་ཤ་པ་ལ་སོགས་པ་སྟེ། ཕན་ཚུན་ལས་ཐ་དད་དོ་ཞེས་བྱས་ནས་སོ། །དེ་ཁོ་ན་སེང་ལྡེང་ལ་སོགས་པ་ལ་ལྟོས་པས་ཁྱད་པར་གཞན་ཡང་ངོ་ཞེས་པས་ཁྱད་པར་གཞན་ནོ། །འདིར་ནི་ཡུལ་གྱི་ཡུལ་ཅན་ངེས་པར་བསྟན་པ་ལས་སྒྲ་ནི་ཁྱད་པར་དང་ཁྱད་པར་གཞན་
[269a.2]ནོ་ཞེས་རྣམ་པར་ཤེས་པར་བྱའོ། །ཁྱད་པར་གྱི་སྒྲ་དང་ཁྱད་པར་གཞན་གྱི་སྒྲའི་དོན་ཞེས་པའི་དོན་ཏོ། །འགལ་བའི་ཕྱིར་ན་ཞེས་པ་གཏན་ཚིགས་སོ། །སྤྱིའི་དོན་འཕྲོག་པར་བྱེད་པའི་ཕྱིར་ཞེས་པ་འགལ་བ་ཉིད་ཀྱི་རྒྱུའོ། །རྒྱལ་པོའི་བུ་བཞིན་ཞེས་པ་ལ་དཔེ་སྟེ། རྒྱལ་པོའི་བུ་རྣམས་ཀྱི་ཕ་ནོངས་
[269a.3]པ་ན། སྤྱིའི་དོན་ནི་རྒྱལ་སྲིད་དོ། །དེ་དེ་རྣམས་ཀྱིས་ཐམས་ཅད་ཀྱི་སྟོབས་ཇི་ལྟ་བ་བཞིན་འཕྲོག་པ་ཉིད་ཀྱི་ཕྱིར་འགལ་བ་རྣམས་སོ། །དེ་ལས་ཀྱང་ཕན་ཚུན་གྱི་དོན་བཟོད་པ་མ་ཡིན་ཏེ། གང་སྤྱིའི་དོན་འཕྲོག་པ་དེ་རྣམས་ནི་ཕན་ཚུན་འགལ་བ་རྣམས་ཏེ། རྒྱལ་པོའི་བུ་བཞིན་སྤྱིའི་སྒྲ་རྣམས་
[269a.4]ཀྱང་དེ་ལྟ་བུའོ། །རང་བཞིན་ནོ། །གང་རྣམས་འགལ་བ་དེ་ནི་ཕན་ཚུན་གྱི་དོན་བཟོད་པ་མ་ཡིན་ཏེ། དེ་ཁོ་ན་བཞིན། ཁྱད་པར་གྱི་སྒྲ་རྣམས་ཀྱང་དེ་ལྟ་བུའོ། །ཁྱབ་བྱེད་དང་འགལ་བའོ། །དཔེར་ན་ཞེས་པས་སྤྱིའི་དོན་འཕྲོག་པ་ཉིད་སྟོན་ཏོ། །རྫས་གཅིག་འཕྲོག་པར་བྱེད་པའི་
[269a.5]ཕྱིར་ཞེས་པ། སྤྱིའི་དོན་འཕྲོག་པ་ཉིད་ཁོ་ནའི་རྗེས་སུ་བརྗོད་པའོ། །འོ་ན་འདི་ནི་འགལ་བ་ཉིད་ལ་གཏན་ཚིགས་ཡིན་གྱི། ཁྱད་པར་གཞན་སེལ་བ་ནི་མ་ཡིན་ཏེ། དེ་ཅིའི་ཕྱིར་དེ་ལས་དེ་རབ་ཏུ་སྦྱར་བ་བརྗོད་ཅེ་ན། དེ་ཡང་དེའི་བརྒྱུད་པས་གཏན་ཚིགས་སོ་ཞེས་པས་སྐྱོན་མེད་དོ། །
[269a.6]འགལ་བ་ནི་སྤོང་བའི་གཏན་ཚིགས་སུ་བརྗོད་ལ། དེ་ཡང་སྤྱིའི་དོན་འཕྲོག་པ་ཉིད་ཀྱི་ཕྱིར་རོ། །སྤྱི་གཞན་ས་ལས་གྱུར་པ་ཉིད་ལ་སོགས་པའི་ཁྱད་པར་གང་བུམ་པ་ལ་སོགས་པ་རྣམས་ཡིན་ཞིང་དེ་རྗོད་པར་བྱེད་པའི་སྒྲ་རྣམས་དང་ལྷན་ཅིག་ཤིང་ཤ་པའི་སྒྲ་དོན་གཅིག་པ་འཕྲོག་པ་
[269a.7]ཉིད་མ་ཡིན་གྱི། འོ་ན་ཅི་ཞེ་ན། ཤིང་གི་སྒྲ་དང་ངོ་། །དེའི་ཕྱིར་སྤོང་བའི་རྒྱུ་མེད་པའི་ཕྱིར་སེལ་བ་མ་ཡིན་ནོ་ཞེས་སེམས་བཞིན་པས་སྨྲས་པ། ཅི་སྟེ་ཞེས་པ་ལ་སོགས་པའོ། །ཤིང་ཤ་པའི་སྤྱི་ནི་ཤིང་ཉིད་དོ། །དེ་ལས་གཞན་པ་ཉིད་ཀྱི་ཕྱིར་ས་ལས་གྱུར་པ་ཉིད་ནི་སྤྱི་གཞན་ནོ། །
[269b]
[269b.1]དེའི་ཁྱད་པར་ནི་བུམ་པ་ལ་སོགས་པ་སྟེ་དེ་ནི་འབྲེལ་པ་མེད་པ་སྟེ། ཤིང་ཤ་པའི་སྒྲ་དང་འགལ་བ་མེད་པའི་ཕྱིར་ན། དེའི་སྒྲས་ཤིང་ཤ་པའི་སྒྲའི་རྫས་གཅིག་འཕྲོག་པ་ཉིད་ཀྱང་མ་ཡིན་ནོ། །དེའི་ཕྱིར་དེ་ཅིའི་ཕྱིར་སེལ་བར་བྱེད་དེ། འགལ་བ་མེད་པའི་ཕྱིར་འདི་སེལ་བ་མ་ཡིན་པ་ཁོ་
[269b.2]ནའོ་ཞེས་པའི་དོན་ཏོ། །སྤྱི་གཞན་ཁྱད་པར་དོན་རྣམས་ནི། །ཞེས་པས་དེ་ཁོ་ན་སེལ་བའི་རྒྱུ་འགལ་བ་སྟོན་ཏེ་འགལ་བའི་སྤྱི་ནི་སེལ་བའི་རྒྱུ་ཡིན་ཞིང་། འདིར་ཡང་གལ་ཏེ་ཡང་དངོས་སུ་འགལ་བ་མེད་མོད། བརྒྱུད་པས་ནི་ཡོད་པ་ཁོ་ནའོ། །དེ་སྟོན་ཏེ། ཤིང་གི་སྒྲས་ནི་ཞེས་པ་ལ་
[269b.3]སོགས་པའོ། །དེས་ཞེས་པ་ལ་སོགས་པ་སྟེ། ཤིང་ཤ་པའི་སྒྲའི་གྲོགས་པོ་ནི་ཤིང་གི་སྒྲ་སྟེ། དེའི་དོན་གྱི་སྤྱི་རྗོད་པར་བྱེད་པ་ཉིད་ཀྱི་ཕྱིར་རོ། །དེའི་སྒྲ་རྣམས་ནི་བུམ་པ་ལ་སོགས་པའི་སྒྲ་རྣམས་ཏེ། ས་ལས་གྱུར་པ་འཕྲོག་པ་ཉིད་ཀྱི་ཕྱིར་རོ། །དེས་ན་ཤིང་གི་སྒྲ་དེས་བུམ་པ་ལ་སོགས་
[269b.4]པ་བསལ་བར་བྱས་བཞིན་པ་ལ་ནི་ཤིང་ཤ་པའི་སྒྲས་རྗེས་སུ་ཡི་རང་སྟེ། གྲོགས་པོའི་དགྲ་བོ་བཞིན་ནོ། །དོན་གྱིས་དེ་དེ་ཞེས་པ་ཤིང་ཤ་པའི་སྒྲའི་དོན་ནི་ཤིང་ཤ་པའི་སྤྱིའོ། །དེ་ཡང་བུམ་པ་ལ་སོགས་པ་མ་ཡིན་པའི་ངོ་བོ་ཉིད་ཀྱི་ཕྱིར་བུམ་པ་ལ་སོགས་པ་ལས་ལྡོག་པའོ། །དེ་ཉིད་ཀྱི་ཕྱིར་དོན་གྱིས་
[269b.5]རྟོགས་པར་བྱ་བའོ། །ཤིང་ཤ་པའི་སྒྲའི་ནི་དེ་ལ་བྱ་བ་ཡང་མ་ཡིན་ནོ། །དེ་ལྟ་ན་ཡང་ཤིང་ཤ་པའི་སྒྲ་དེས་བུམ་པ་ལ་སོགས་པ་བསལ་ལོ་ཞེས་རྟོགས་པར་བྱ་སྟེ། དེ་རྟོགས་པས་དོན་གྱིས་དེ་བསལ་བ་ཉིད་ཀྱི་ཕྱིར་རོ། །འདིས་ནི་ཞེས་པ། རིགས་པ་འདིས་ནི་ས་ལས་གྱུར་པའི་སྤྱི་ལས་སྤྱི་གཞན་
[269b.6]རྫས་ཉིད་དེ། དེའི་སྤྱི་ཡོད་པ་ཉིད་དང་དེའི་ཁྱད་པར་རྣམས་དང་ཡོན་ཏན་རྣམས་དང་ལས་རྣམས་དང་། དེ་རྣམས་ཀྱིའང་ཁྱད་པར་གཟུགས་ལ་སོགས་པ་རྣམས་དང་། འདེགས་པ་ལ་སོགས་པ་རྣམས་ཀྱང་རིམ་པ་ཇི་ལྟ་བར་རང་དང་འགལ་བའི་སྤྱིའི་སྒྲས་སེལ་བ་དང་བྱེ་བྲག་གི་སྒྲས་བཏང་
[269b.7]སྙོམས་སུ་བྱེད་པར་འབྲེལ་པ་དང་འབྲེལ་ལས་རིག་པར་བྱའོ། །ཅི་ལྟར་ཞེ་ན་གསུངས་པ། གྲོགས་པོའི་གྲོགས་པོའི་དགྲ་བོ་བཞིན་དུ་ཞེས་པ་ལ་སོགས་པ་སྟེ། འདིར་གྲོགས་པོའི་གྲོགས་པོ་ཞེས་གཉིས་བརྗོད་པ་ནི་རྒྱུད་པས་གྲོགས་པོར་རྟོགས་པར་བྱེད་པ་ལྷུར་ལེན་པར་རིག་པར་བྱའོ། །
[270a]
[270a.1]གཞན་དུ་ན་གྲོགས་པོ་གཅིག་བྱས་པ་ཁོ་ནས་གྲོགས་པོར་རྟོགས་པས་སོ། །དེ་ལ་ཡོན་ཏན་དང་ལས་ནི་ཤིང་ཤ་པའི་སྒྲས་རྫས་ཀྱི་སྒྲ་སེལ་བར་བྱེད་བཞིན་པ་ལ་གྲོགས་པོའི་གྲོགས་པོའི་དགྲ་བོ་བཞིན་དུ་རྗེས་སུ་ཡི་རང་བར་བྱེད་དོ། །ཡོན་ཏན་གྱི་བྱེ་བྲག་གཟུགས་ལ་སོགས་པ་
[270a.2]རྣམས་དང་ལས་ཀྱི་ཁྱད་པར་འདེགས་པ་ལ་སོགས་པ་རྣམས་ནི་ཤིང་ཤ་པའི་སྒས་གྲོགས་པོའི་དགྲ་བོའི་གྲོགས་པོ་བཞིན་དུ་རྫས་ཀྱི་སྒྲས་གཟུགས་ལ་སོགས་པ་དང་འདེགས་པ་ལ་སོགས་པའི་སྒྲ་རྣམས་ཀྱི་གང་རུང་བ་བསལ་བར་བྱ་བཞིན་པ་རྣམས་ལ་བཏང་སྙོམས་སུ་བྱེད་དོ། །འོ་ན་ཤིང་
[270a.3]ཤ་པའི་སྒྲ་ཁོ་ནས་བུམ་པ་ལ་སོགས་པ་རྣམས་དངོས་སུ་སེལ་བ་མ་ཡིན་ནམ། དེ་ལྟར་ན་ཤིང་ཤ་པའི་སྒྲ་བརྗོད་པ་ཁོ་ན་ལས་དེས་སེལ་བ་རྟོགས་པས་སོ་ཞེ་ན་གསུངས་པ། དེ་ལ་ནི། དེ་ན་དངོས་སུ་དེ་སེལ་ཡིན། །ཞེས་པ་ལ་སོགས་པ་དངོས་སུ་མི་སེལ་བ་ལ་རིགས་པ་གསུངས་སོ། །
[270a.4]མ་གྱུར་ཅིག་ཅེས་པ་ལ་སོགས་པ་གལ་ཏེ་དངོས་སུ་སེལ་ན། སྡོང་པོའི་སྒྲ་བཞིན་དུ་ཤིང་གི་སྒྲ་དང་མཚུངས་པའི་དོན་ཅན་དུ་འགྱུར་རོ། །དེ་ལྟར་གྱུར་ན་སྐྱོན་ཞིག་ཏུ་འགྱུར་ཞེ་ན་གསུངས་པ། དེ་ལྟར་ཁྱད་པར་གཞན་རྣམས་ནི། །ཞེས་པ་ལ་སོགས་པའོ། །དེ་ལྟར་གྱུར་ན་པ་ལ་ཤ་ལ་
[270a.5]སོགས་པ་རྣམས་ཤིང་གི་སྒྲ་བཞིན་དུ་ཤིང་ཤ་པའི་སྒྲས་ཀྱང་སེལ་བར་མི་འགྱུར་རོ། །ཇི་ལྟར་ཤིང་གི་སྒྲ་ནི་བུམ་པ་ལ་སོགས་པ་སྤངས་པས་ཤིང་ལེན་པའི་ཕྱིར་པ་ལ་ཤ་ལ་སོགས་པ་རྣམས་སེལ་བ་མ་ཡིན་པ་དེ་ལྟར་ཤིང་ཤ་པའི་སྒྲས་ཀྱང་མི་སེལ་བར་འགྱུར་རོ། །འདིས་ནི་གང་ཤིང་པ་ལ་ཤ་ལ་
[270a.6]སོགས་པ་རྣམས་སྤོང་བ་དེ་ནི་ཤིང་གི་དོན་ཉེ་བར་འཛིན་པ་མ་ཡིན་ཏེ། བུམ་པ་ལ་སོགས་པའི་སྒྲ་བཞིན་ཤིང་ཤ་པའི་སྒྲ་ཡང་པ་ལ་ཤ་ལ་སོགས་པ་རྣམས་སྤོང་ངོ་ཞེས་པ་ཁྱབ་བྱེད་དང་འགལ་བ་གསུངས་སོ། །འདིར་ཡང་ཐལ་བར་འགྱུར་བ་དང་བཟློག་པས་གཏན་ཚིགས་ཀྱི་དོན་མངོན་པར་
[270a.7]བསལ་བར་བྱས་སོ། །ཉུང་ངུ་དང་མང་པོའི་དོན་སེལ་བར་བྱེད་པ་ཉིད་ཀྱིས་ཐ་དད་པ་ཉིད་ཀྱི་ཕྱིར་ཞེས་པ། ཤིང་ཤ་པའི་གསལ་བར་བྱ་བ་མང་པོ་ཉིད་དེ། པ་ལ་ཤ་ལ་སོགས་པ་སྤོང་བའི་ཕྱིར་རོ། །ཤིང་གི་སྒྲ་ནི་ཤིན་ཏུ་ཉུང་བ་སྟེ། པ་ལ་ཤ་ལ་སོགས་པ་རྣམས་མི་སྤོང་བའི་ཕྱིར་རོ། །
[270b]
[270b.1]དེའི་ཕྱིར་ཡང་བསལ་བར་བྱ་བ་མི་མཚུངས་པ་ཉིད་ཀྱི་ཕྱིར་ཤིང་ཤ་པའི་སྒྲ་ནི་ཤིང་གི་སྒྲ་དང་མཚུངས་པའི་དོན་ཅན་མ་ཡིན་ནོ། །དེ་ལྟར་ནི་ཤིང་གི་སྒྲའི་དོན་ནི་ཤིང་ཉིད་དོ། །ཤིང་ཤ་པའི་སྒྲའི་ནི་དེ་ཡང་སྟེ། ཤིང་ཤ་པ་ཉིད་ཀྱང་ངོ་། །དེའི་ཕྱིར་བསལ་བར་བྱ་བ་ཉུང་ངུ་དང་མང་པོ་ཉིད་ཀྱི་ནི་ཐ་དད་པ་ཉིད་ཀྱི་
[270b.2]ཕྱིར་སྐྱོན་འདི་མ་ཡིན་ནོ། །འདི་སྐད་བཤད་པར་འགྱུར་ཏེ། གལ་ཏེ་ཡང་ཤིང་ཤ་པའི་སྒྲ་དང་ཤིང་གི་སྒྲའི་དོན་ཤིང་ཉིད་ཡིན་པ་དེ་ལྟ་ན་ཡང་ཤིང་ཤ་པའི་སྒྲ་ལ་ཤིང་ཤ་པའི་དོན་དང་ལྡན་པ་ཉིད་ཀྱི་མཚན་ཉིད་ཀྱི་བྱེ་བྲག་ཡོད་དེ། དེས་ན་ཤིང་གི་དོན་ཉེ་བར་ལེན་པ་ཡོད་ན་ཡང་པ་ལ་ཤ་ལ་སོགས་
[270b.3]པ་མི་སེལ་བར་ཐལ་བར་འགྱུར་བ་མ་ཡིན་ནོ་ཞེ་ན། མི་རིགས་ཏེ་ཞེས་པ་ལ་སོགས་པ། ཇི་ལྟར་ཕ་རོལ་པོས་ཤིང་ཤ་པའི་སྒྲ་དག་མ་འདྲེས་པའི་དོན་དུ་བརྗོད་པས་དེ་ལྟར་འདིར་ཡང་འགྱུར་བར་བྱ་དགོས་སོ་ཞེས་པ་བསྡུས་པའི་དོན་ཏོ། །ཡང་གང་ཕ་རོལ་པོའི་ལྟར་འགྱུར་བར་བྱ་དགོས་སོ་ཞེས་
[270b.4]པའི་ངེས་པར་འདི་ཅི་ལས་ཤེ་ན། ཅི་ལས་ཀྱང་མ་ཡིན་གྱི། ཇི་ལྟར་ཕ་རོལ་པོས་འཇིག་རྟེན་པའི་གྲགས་པ་རྗེས་སུ་སྲུང་བས་ཏེ། འཇིག་རྟེན་ན་སྤྱི་དང་ཁྱད་པར་གྱི་སྒྲ་དག་མ་འདྲེས་པའི་དོན་ཅན་ཉིད་ཀྱི་ཕྱིར། ཤིང་ཤ་པ་དང་ཤིང་གི་སྒྲ་དག་ནི་དོན་ཐ་དད་པ་རྣམ་པར་གཞག་པ་དེ་ལྟར་
[270b.5]ཁོ་བོ་ཅག་གིས་ཀྱང་ངོ་ཞེས་པ་འདི་ཙམ་ཞིག་བརྗོད་པར་བྱའོ། །གལ་ཏེ་དེ་དེའི་བྱ་བ་མ་ཡིན་ན། འོ་ན་ཅི་ལྟར་ཤིང་ཤ་པའི་སྒྲ་ལས། སེལ་བ་ཤིན་ཏུ་མང་པོར་རྟོགས་པར་བྱ་ཞེ་ན་གསུངས་པ། དོན་གྱིས་ནི་འགྱུར་ཞེས་པ་ལ་སོགས་པའོ། །ཤིང་ཤ་པའི་སྒྲས་ཤིང་ཤ་པའི་དོན་རྟོགས་
[270b.6]པར་བྱས་པ་ན་ཤིང་ཤ་པ་ཉིད་ཀྱང་ངོ་མེད་ན་མི་འབྱུང་བ་ཉིད་ཀྱི་ཕྱིར་ཤུགས་ལས་ཤིང་ཉིད་རྟོགས་ཏེ། དེའི་ཕྱིར་དེས་དོན་གྱིས་བསལ་བར་བྱ་བཞིན་པ་བུམ་པ་ལ་སོགས་པ་ནི་རྨོངས་པས་སྒྲས་བྱས་པར་སེམས་པར་བྱེད་དོ། །ཡང་ཅི་ལྟར་རྟགས་ཉིད་དུ་མཚུངས་པ་ལ། དུ་བ་ལ་
[270b.7]སོགས་པ་ནི་དངོས་སུ་མེ་ལ་སོགས་པ་ལ་རྫས་ཉིད་ལ་སོགས་པ་རྟོགས་པར་བྱེད། གང་གསུངས་པ་རྟགས་ལས་ནི་གང་རྗེས་སུ་འབྲེལ་པ་ཅན་གྱི་རྟགས་ཅན་དེ་རྣམས་ཀྱང་རྟོགས་པར་བྱ་བའོ་ཞེས་སོ། །ཤིང་ཤ་པའི་སྒྲ་ནི་དངོས་སུ་ཤིང་ཤ་པ་ཉིད་ཁོ་ན་རྟོགས་པར་བྱེད་ཅིང་སྤྱི་
[271a]
[271a.1]གཞན་རྣམས་ནི་ཤུགས་ལས་ཡིན་ནོ། །གཞན་ཡང་རྗེས་སུ་འགྲོ་བ་དང་ལྡོག་པའི་མཚན་ཉིད་ཅན་གྱི་འབྲེལ་པ་ལ་ལྟོས་པས་སྒྲ་རང་གི་དོན་རྟོགས་པའི་རྒྱུ་འདོད་ཅིང་། དེ་ཅི་ལྟར་རྫས་སུ་ཡོད་པ་ཉིད་ལ་སོགས་པ་རྟོགས་པར་བྱེད་པ་མ་ཡིན། དེ་མེད་ན་སྒྲ་
[271a.2]ཉེ་བར་དམིགས་པ་མ་ཡིན་པས་སོ་ཞེ་ན། སྐྱོན་འདི་མེད་དེ། དེ་ལ་དོན་གྱི་འབྲེལ་པ་ནི་སྐྱེས་བུས་བྱས་པ་མ་ཡིན་གྱི། འོན་ཀྱང་རང་བཞིན་ལས་ཏེ། དེ་ནི་གང་དང་གང་རང་བཞིན་གྱིས་མེད་ན་མི་འབྱུང་བར་གྱུར་པ་དེ་དང་དེ་ཁོ་ན་རྟོགས་པར་བྱེད་དོ། །སྒྲའི་འབྲེལ་པ་ནི་སྐྱེས་བུས་བྱས་པའི་
[271a.3]བརྡས་ཉེ་བར་འོངས་པ་སྟེ། རྫས་ཉིད་ལ་སོགས་པ་ལ་ཤིང་གི་སྒྲ་བརྡར་བྱས་པ་ཡང་མ་ཡིན་ནོ། དེ་ཅི་ལས་དེ་ལ་ལྟོས་པས་རྗེས་སུ་འགྲོ་བ་དང་ལྡོག་པ་དག་ཡིན། དེའི་ཕྱིར་དེ་ནི་རྫས་ལ་སོགས་པ་རྣམས་ཀྱི་རྟོགས་པར་བྱེད་པ་པོ་མ་ཡིན་ནོ། །འོ་ན་སྒྲའི་འབྲེལ་པ་ཡང་སྐྱེས་བུས་མ་
[271a.4]བྱས་པ་ཁོ་ནར་བརྗོད་པར་འདོད་པ་ན་ནི། དེ་ལ་དེས་བསྐྱེད་པར་བྱ་བའི་ཁྱད་པར་གཟུང་བ་ན་སྤྱི་གཞན་རྟོགས་པའི་རྒྱུ་ཉིད་དུ་འདོད་པ་ཁོ་ན་སྟེ། དེ་ཁྱད་པར་མེད་པར་གཟུང་བ་ན་ནི། འཁྲུལ་པའི་ཕྱིར་མི་འདོད་དོ་ཞེ་ན། དུ་བ་ལ་སོགས་པའི་རྟགས་ལ་ཡང་འདི་མཚུངས་པ་ཁོ་ན་སྟེ། དེ་ཡང་
[271a.5]འབར་བ་ཉིད་ལ་སོགས་པའི་སྤྱིའི་ཁྱད་པར་ཅན་དུ་མེ་ལ་སོགས་པ་ལ་རྟོགས་པར་ནུས་པ་མ་ཡིན་པས་སོ། །དེ་ལ་སྒྲ་ཁོ་ན་ལ་བརྩད་པ་ལ་རྗེས་སུ་ཆགས་པ་འདི་ཅི་ཡིན། གལ་ཏེ་ཁྱད་པར་ནི་ཁྱད་པར་གཞན་གྱི་དོན་ཞེས་པ། ཡོན་ཏན་གྱི་ཁྱད་པར་ནི་མངར་བ་དང་སྣུམ་པ་ཉིད་ལ་སོགས་པ་རྣམས་སོ། །
[271a.6]དེ་ལ་འདི་རྣམས་ཕན་ཚུན་སེལ་ན་གཞི་མཐུན་པ་ཉིད་དུ་འགྱུར་བར་བྱ་བར་མི་རིགས་ན། དེ་ཡང་ཡོད་དེ། དེ་ལྟར་ནི་ཙ་ར་ཀ་རུ་རོ་ནི་སྣུམ་པ་ཉིད་ལ་སོགས་པ་ཡོན་ཏན་གཞན་རྣམས་དང་གཞི་མཐུན་པ་ཉིད་དུ་ཉེ་བར་དམིགས་སོ། །དེ་ཅི་ལྟར་ཞེས་པ་ཅི་ལྟར་ཡང་རིགས་པ་མ་ཡིན་ནོ་ཞེས་
[271a.7]སེམས་པའོ། །འདིས་ནི་གཞི་མཐུན་པ་ཉིད་ཀྱི་ཕྱིར་མངར་བ་ལ་སོགས་པ་རྣམས་ཏིལ་ནག་པོ་བཞིན་དུ་མི་སེལ་བར་རྗེས་སུ་དཔག་ནས་འགལ་བའི་གཏན་ཚིགས་མ་ངེས་པ་ཉིད་དུ་གསལ་བར་བྱེད་དོ། །སེལ་བ་མེད་ན་ཡང་ཡོད་པའི་ཕྱིར་མངར་བ་དང་སྣུམ་པ་དང་གྲང་བ་ཉིད་ལ་སོགས་
[271b]
[271b.1]པ་ལ་སེལ་བ་ནི་དོད་ཟླ་དང་འགལ་བའི་རྒྱུ་མ་ཡིན་པ་ཉིད་དེ། དེ་ཡོད་ཀྱང་མ་ཚང་བ་ན་དེ་མེད་པའི་ཕྱིར་རོ་ཞེས་པའོ། །གཞི་མཐུན་པ་ཉིད་ནི་ཞེས་པ་ལ་སོགས་པ། ཡོན་ཏན་གྱི་ཁྱད་པར་རྣམས་ཀྱི་གཞི་མཐུན་པ་ཉིད་གང་ཡིན་པ་འདི་ནི་དེའི་རྟེན་དང་མི་འགལ་བའི་ཕྱིར། མངར་བ་
[271b.2]ལ་སོགས་པ་རྣམས་ཀྱི་གང་རྟེན་དུ་གྱུར་པའི་རྫས་དེ་དང་དེ་རྣམས་མི་འགལ་བ་སྟེ། ཡོན་ཏན་རྣམས་ནི་རང་གི་རྟེན་དང་འགལ་བ་མ་ཡིན་པ་སྟེ། རྫས་ཁོ་ནའི་ཡོན་ཏན་མངར་པོའོ། །དེ་ཁོ་ནའི་ཡོན་ཏན་གྲང་བ་དང་སྣུམ་པ་ཉིད་ལ་སོགས་པའི་ཡོན་ཏན་རྣམས་ནི་རོའི་ཡོན་ཏན་གྱི་མ་ཡིན་
[271b.3]ཏེ། དེའི་ཕྱིར་རྫས་དེ་ལ་ཞུགས་པ་རྣམས་རོ་ལ་ཉེ་བར་གདགས་པར་བྱའོ། །འདོགས་པའི་རྒྱུ་མཚན་ནི་དོན་གཅིག་ལ་འཕྲོད་པ་འདུ་བའོ། །བཏགས་པའི་འབྲས་བུ་ནི་མངར་པོ་ཉིད་ནི་སྣུམ་པ་ལ་སོགས་པ་རྣམས་དང་ལྷན་ཅིག་སྤྱོད་པ་ཉིད་དུ་འཆད་པའོ། །དེ་ལས་ཀྱང་ཇི་ལྟར་དེ་
[271b.4]རྣམས་ཀྱི་རྟེན་དངོས་རྫས་ནི་མངར་པོ་ལ་སོགས་པའི་ཡོན་ཏན་དང་ལྡན་པའི་ཕྱིར། མངར་པོ་རྫས་སོ། །གྲང་བའོ། །ལྕི་བ་ཉིད་དོ་ཞེས་བརྗོད་པར་བྱ་བ་དེ་ལྟར་བཏགས་པའི་རྟེན་མངར་བ་ཞེས་བྱ་བའི་རོ་ཡང་སྣུམ་པ་ཉིད་ལ་སོགས་པའི་ཡོན་ཏན་དང་ལྡན་པའི་ཕྱིར་རོ། །མངར་པོ་ནི་སྣུམ་
[271b.5]པའོ་ལྕི་བ་ཞེས་བརྗོད་པར་བྱའོ། །དེ་ལྟར་བརྟགས་པ་ནི་འདིར་གཞི་མཐུན་པ་ཉིད་དུ་བརྟགས་པའོ་ཞེས་བརྗོད་པར་འགྱུར་རོ། །བརྟགས་པའི་དོན་གྱི་དབང་ལས་དངོས་པོར་ན་དེའི་བདག་ཉིད་འགྲུབ་པ་མ་ཡིན་ནོ་ཞེས་པས་ཇི་སྐད་བརྗོད་པའི་སྐྱོན་མེད་དོ། །མ་མཐོང་ཕྱིར་ན་སེལ་བ་ཉིད། །
[271b.6]ཉིད་ཀྱི་སྒྲ་ནི་ངེས་པར་འཛིན་པའི་དོན་ཅན་ནོ། །མ་མཐོང་བ་ཉིད་ཁོ་ནའི་ཕྱིར་སེལ་བ་སྟེ་འགལ་བ་ཉིད་ཀྱི་ཕྱིར་ནི་མ་ཡིན་ནོ་ཞེས་པའི་དོན་ཏོ། །ཇི་ལྟར་བྱས་པ་ཉིད་རྟག་པ་རྣམས་ལ་མ་མཐོང་བའི་ཕྱིར་དེ་སེལ་བར་བྱེད་པ་དེ་ལྟར་ཁྱད་པར་གྱི་སྒྲ་ཁྱད་པར་གཞན་རྣམས་ལ་མ་མཐོང་
[271b.7]བའི་ཕྱིར་དེ་རྣམས་སེལ་ལོ། །ཅིའི་ཕྱིར་མ་མཐོང་ཞེ་ན་ཞེས་པ། ཤིང་ཤ་པའི་སྒྲ་པ་ལ་ཤ་ལ་སོགས་པ་ལ་མི་མཐོང་བའི་རྒྱུ་འདྲི་བའོ། །རང་བཞིན་པའི་དོན་ལ་ཡང་ཞེས་པ། རྒྱུ་དང་རྐྱེན་གྱི་རང་བཞིན་དུ་འབྲེལ་པ་ཉིད་ཀྱིས་ན་རང་བཞིན་པ་སྟེ། སྒྲའི་མཚན་ཉིད་ཀྱི་དོན་ཏོ་ཞེས་པ་
[272a]
[272a.1]འདིར་དགོངས་པའོ། །ཤིང་ཤ་པ་ལ་སོགས་པའི་སྒྲ་ནི་ཤིང་ཤ་པ་ལ་སོགས་པ་བརྗོད་པར་འདོད་པ་ཁོ་ནས་རབ་ཏུ་སྦྱར་གྱི་པ་ལ་ཤ་ལ་སོགས་པ་བརྗོད་པར་འདོད་པས་ནི་མ་ཡིན་ནོ། །དེའི་ཕྱིར་ཤིང་ཤ་པ་བརྗོད་པར་འདོད་པའི་རང་བཞིན་ལ་འབྲེལ་པ་ཉིད་ཀྱི་ཕྱིར་
[272a.2]པ་ལ་ཤ་ལ་སོགས་པ་རྣམས་ལ་ཤིང་ཤ་པའི་སྒྲའི་སྦྱོར་བར་འགྱུར་བ་མ་ཡིན་ནོ། །དེ་ལས་ཀྱང་དེ་ལ་མ་མཐོང་བ་སྟེ། དེས་ན་རང་བཞིན་པའི་དོན་འདི་ལ་དེ་མ་མཐོང་བ་ཁྱད་པར་གཞན་སེལ་བར་ནུས་པ་དོར་ནས། གང་འགལ་བ་ཉིད་སྤོང་བའི་རྒྱུར་བརྗོད་པ་དེ་ནི་རིགས་པ་ལས་འདས་ནས་བདག་
[272a.3]མཚར་བར་སེམས་པའི་སྐྱེས་བུ་ཉིད་དོ་ཞེས་པའི་དོན་ཏོ། །འགལ་བ་ཉིད་ནི་ཉེ་བར་མཚོན་པ་ཙམ་སྟེ། གང་དེའི་ལྷག་པའི་རྒྱུ་གཞན་བཤད་པ་དེ་ཡང་རིག་པར་བྱའོ། །ཨེ་མ་བདག་ཅེས་སེམས་པ་གང་ཡིན་པ་དེ་ནི་བདག་མཚར་བ་ཅན་གྱི་སྐྱེས་བུ་སྟེ། དེའི་དངོས་པོ་ནི་བདག་མཚར་བར་
[272a.4]སེམས་པའི་སྐྱེས་བུ་ཉིད་དོ། །དེ་ཡང་མངོན་པའི་ང་རྒྱལ་ཉིད་དོ། །དེ་ནི་བདག་མཚར་བར་སེམས་པའི་སྐྱེས་བུའི་སྒྲའི་རབ་ཏུ་སྦྱོར་བ་ལའོ། །ཡང་གང་གིས་བདག་མཚར་བར་སེམས་པའི་སྐྱེས་བུའི་རྟོགས་པའོ་ཞེས་པ་འདི་ལྟར་བརྗོད་པ་འདི་ལ་མི་རིགས་པ་ཅི་ཞིག་ཡིན་ཞེ་ན།
[272a.5]ཁྱད་པར་གྱི་དོན་ཅན་གྱི་སྒྲ་རྣམས་ནི་སྤྱིའི་དོན་འཕྲོག་པར་བྱེད་པའི་ཕྱིར་རྒྱལ་པོའི་བུ་བཞིན་དུ་ཕན་ཚུན་འགལ་བ་རྣམས་སོ་ཞེས་པ་འདི་ཁོ་ན་རེ་ཞིག་མི་རིགས་ཏེ། དེ་ལྟར་ནི་སྤྱིའི་དོན་འཕྲོག་པར་བྱེད་པ་ཉིད་ནི་འགལ་བ་གཏན་ཚིགས་སུ་ཉེ་བར་བླངས་ཤིང་། དེ་ཡང་སྒྲ་རྣམས་ཀྱི་ཁྱད་
[272a.6]པར་གྱི་ཡུལ་ལ་སྤྱིའི་དོན་རྟོགས་པར་བྱེད་པའི་མཚན་ཉིད་ཡིན་ལ། རྒྱལ་པོའི་བུ་རྣམས་ནི་དེ་དང་རིགས་མི་མཐུན་པ་རྒྱལ་སྲིད་རང་གིར་བྱེད་པའི་མཚན་ཉིད་ཅན་ཏེ། གང་ཡོད་ན་རང་ཉིད་རྣམ་པར་རྒྱལ་བ་ནི་སྦྱིན་པ་ལ་སོགས་པའི་བྱ་བ་རྣམས་ལ་རང་དབང་དུ་འགྱུར་བའོ། །དེ་ལ་
[272a.7]གལ་ཏེ་སྒྲ་ལ་སོན་པའི་སྤྱིའི་དོན་ལེན་པར་བྱེད་པ་ཉིད་གཏན་ཚིགས་ཉིད་དུ་ཉེ་བར་ལེན་ན་ནི་དཔེ་གཏན་ཚིགས་དང་བྲལ་བར་འགྱུར་ཞིང་ཅི་སྟེ་རྒྱལ་པོའི་བུ་ལ་སོན་པ་ཡིན་ན་གཏན་ཚིགས་མ་གྲུབ་པ་ཉིད་དོ། །དེ་ལ་སྒྲ་ཙམ་ཞིག་ཐ་མི་དད་པ་ཡིན་གྱི་དོན་ཅུང་ཟད་ཀྱང་མ་ཡིན་ནོ། །དེ་
[272b]
[272b.1]ལས་དོན་གྲུབ་པ་ཡང་མ་ཡིན་ཏེ། དངོས་པོ་ལ་མི་ལྟོས་པའི་སྒྲ་ཙམ་ནི་འདོད་པ་ཙམ་ལས་འབྱུང་བ་སྟེ་ཡོད་པ་མ་ཡིན་པས་ཞེས་པའོ། །རྟོགས་པར་བྱ་བའི་དངོས་པོ་ནི་དངོས་པོས་འགྲུབ་སྟེ། ཇི་སྐད་དུ་གསུངས་པ། ཐ་དད་དངོས་ལ་རབ་གྲུབ་པ། །སྒྲ་མཚུངས་ཐ་དད་མེད་པ་ལས། །
[272b.2]རྗེས་དཔོག་རིགས་པ་མ་ཡིན་ཏེ། །སྐྱ་བོའི་རྫས་ལ་མེ་བཞིན་ནོ། །རིགས་གཞན་ལས་ནི་རབ་གྲུབ་པ། །སྒྲ་ཡི་སྤྱི་ནི་མཐོང་བ་ལས། །སྒྲུབ་བྱེད་མི་རིགས་ངག་ལ་སོགས། །གོ་ཉིད་ཕྱིར་ན་རྭ་ཅན་བཞིན། །ཞེས་སོ། །ཁྱད་པར་གྱི་སྒྲ་འབའ་ཞིག་པས་ནི་སྤྱིའི་དོན་ཁྱད་པར་བྱས་པའི་ཡུལ་ལ་
[272b.3]རྟོགས་པར་བྱ་བ་ཡང་མ་ཡིན་གྱི་འོ་ན་ཅི་ཞེ་ན། སྤྱིའི་སྒྲ་དང་ལྷན་ཅིག་པ་སྟེ། དེ་ལས་ཀྱང་གཉིས་ཀ་དག་ནི་འདུས་ནས་ཁྱད་པར་གྱི་སྒྲ་སྤྱིའི་དོན་ལེན་པར་བྱེད་པའི་ཕྱིར་རོ། །གལ་ཏེ་དེ་ལས་ཁྱད་པར་གཞན་གྱི་སྒྲ་དང་འགལ་བ་ཡིན་ན་སྤྱིའི་སྒྲ་ཡང་འགྱུར་ན་ཡོད་པ་ཡང་མ་ཡིན་ཏེ། དེའི་
[272b.4]ཕྱིར་འདི་ནི་མི་རིགས་སོ། །གང་ཡང་། དེ་རྣམས་དངོས་སུ་དེ་སེལ་མིན། །སྤྱི་དང་མཚུངས་ཉིད་མ་གྱུར་ཅིག །གལ་ཏེ་དངོས་སུ་སེལ་ན་ནི་ཤིང་གི་སྒྲ་དང་ཁྱད་པར་མེད་པར་འགྱུར་རོ་ཞེས་པ་ལ་སོགས་པ་བརྗོད་པ་དེ་ཡང་ཡང་དག་པ་མ་ཡིན་པ་ཁོ་ན་སྟེ། གང་ལ་སྒྲ་བརྡར་བྱས་པ་དེ་ཁོ་
[272b.5]ན་བརྗོད་ཅིང་། ཤིང་ཤ་པའི་སྒྲ་ཡང་ཤིང་ཤ་པ་ཁོ་ན་ལ་བརྡར་བྱས་ཀྱི་ཤིང་སྤྱི་ལ་ནི་མ་ཡིན་ནོ། །དེས་ན་གལ་ཏེ་ཡང་བུམ་པ་ལ་སོགས་པ་རྣམས་དེས་དངོས་སུ་སེལ་བ་དེ་ལྟ་ན་ཡང་ཤིང་ཉིད་ཉེ་བར་ལེན་པ་མ་ཡིན་ནོ། །གང་ཡང་འདི་ནི་དོན་གྱིས་ཉུང་ངུ་དང་ཤིན་ཏུ་མང་པོ་སེལ་བར་
[272b.6]འགྱུར་རོ་ཞེས་པ་འདི་ཡང་རིགས་པ་མ་ཡིན་པ་ཁོ་ན་སྟེ། ཁྱད་པར་ནི་གཉིས་ཀ་ལ་སོན་པ་ཉིད་ཀྱི་ཕྱིར་དང་། རང་གི་དོན་ཡང་ཁྱད་པར་གྱི་ངོ་བོ་ཉིད་ཀྱི་ཕྱིར་རོ། །གང་ཡང་རུང་བའི་ཁྱད་པར་གྱིས་བརྗོད་པ་ལ་ཡང་གཉིས་ཀ་ལ་སོན་པའི་ཁྱད་པར་རྟོགས་པར་བྱའོ། །དཔེར་ན་
[272b.7]ལྷས་བྱིན་ནི་མཆོད་སྦྱིན་བྱིན་གྱི་སྤུན་དྲུང་ངོ་ཞེས་བརྗོད་པ་ན་མཆོད་སྦྱིན་བྱིན་གྱི་ཡང་སྤུན་དྲུང་ཉིད་ཡིན་པ་བཞིན་ནོ། །གང་ལྷས་བྱིན་མཆོད་སྦྱིན་བྱིན་གྱི་སྤུན་དྲུང་དུ་འགྱུར་གྱི། མཆོད་སྦྱིན་བྱིན་ནི་མ་ཡིན་ནོ་ཞེས་བརྗོད་པ་འདི་ནི་སྲིད་པ་ཡོད་པ་མ་ཡིན་པས་སོ། །ཇི་ལྟར་ཡང་ཤིང་
[273a]
[273a.1]ཤ་པ་ནི་པ་ལ་ཤ་ལ་སོགས་པ་ལས་ཐ་དད་པ་དེ་ལྟར་བུམ་པ་ལ་སོགས་པ་ལས་ཀྱང་སྟེ། དེ་ལས་ཀྱང་ཤིང་ཤ་པ་བརྗོད་པ་ན་ཇི་ལྟར་པ་ལ་ཤ་ལ་སོགས་པ་གསལ་བ་རྟོགས་པ་དེ་བཞིན་དུ་བུམ་པ་ལ་སོགས་པ་བསལ་བ་ཡང་སྟེ། དེའི་ཕྱིར་སྤྱི་
[273a.2]ལས་པ་ལ་ཤ་ལ་སོགས་པ་རྣམས་ནི་དེའི་དངོས་སུ་གསལ་བར་བྱ་བ་དང་བུམ་པ་ལ་སོགས་པ་རྣམས་ཀྱི་དོན་གྱིས་སོ་ཞེས་པས་རྣམ་པར་དབྱེ་བ་འདི་ཐོབ་པ་ཡིན། ཡང་ཅིའི་ཕྱིར་སློབ་དཔོན་གྱིས་བདག་ཉིད་མཚར་བར་སེམས་པའི་སྐྱེས་བུའི་འཇུག་པ་དང་། དེ་དོར་ནས་རིགས་
[273a.3]པ་ཁོ་ན་དགོད་པར་མཛད་ཅེ་ན། རིགས་པ་དང་བྲལ་བ་མང་པོ་རྗོད་པར་བྱེད་པ་རྣམས་ཀྱིས་ཀྱང་དངོས་པོའི་དེ་ཁོ་ན་ཉིད་རྣམ་པར་གཞག་པར་ནུས་པ་མ་ཡིན་ཏེ། དེའི་ཕྱིར་རིགས་པ་ལས་དགོངས་ནས་བདག་ཉིད་མཚར་བར་སེམས་པའི་སྐྱེས་བུའི་འཇུག་པས་གང་རྣམས་དངོས་
[273a.4]པོའི་དེ་ཁོ་ན་ཉིད་རྟོགས་པར་བྱ་བ་འདོད་པ་དེ་རྣམས་ཀྱིས་དེ་དོར་ནས་རིགས་པ་ཁོ་ནའི་རྗེས་སུ་འབྲང་བར་བྱའོ་ཞེས་བསལ་བར་བྱ་བའི་དོན་དུའོ། །འོ་ན་དེ་ལྟ་ན་ཞེས་པ་ལ་སོགས་པས། སྤྱིའི་སྒྲ་ནི་ཁྱད་པར་རྣམས་ལ་མ་མཐོང་བ་ཡོད་ན་ཡང་སེལ་བ་མེད་པའི་ཕྱིར་སེལ་བ་ནི་དེའི་རྒྱུ་
[273a.5]ཅན་མ་ཡིན་པ་ཉིད་དུ་སྨྲས་སོ། །མ་ཡིན་གཞན་ལྡན་མཐོང་བའི་ཕྱིར། །ཞེས་པས་མ་གྲུབ་པ་ཉིད་གསུངས་སོ། །དོན་དང་སྐབས་ལ་སོགས་པ་རྣམས་ཀྱིས་མཐོང་ཞེས་པའི་སོགས་པའི་སྒྲས་ཡང་དག་པར་འགྲོགས་པ་ལ་སོགས་པ་རྣམས་གཟུང་བར་བྱའོ། །དེ་ལ་དོན་
[273a.6]གྱི་ཤུགས་ཀྱིས་སྤྱིའི་སྒྲ་ནི་ཁྱད་པར་རྟོགས་པར་བྱེད་དེ། དཔེར་ན་གཟུགས་མཛེས་པའི་ཆེད་དུ་གཞོན་ནུ་མ་སྦྱིན་པར་བྱའོ་ཞེས་པ་ལྟ་བུ་སྟེ། ཚིག་མེད་ཀྱང་གཟུགས་མཛེས་པ་ཅན་གྱི་ཆེད་ཁོ་ནར་གཞོན་ནུ་མ་སྦྱིན་པ་གྲུབ་པ་ཁོ་ན་སྟེ། ཚིག་བརྗོད་པའི་ཤུགས་ལས་ཤིན་ཏུ་
[273a.7]གཟུགས་མཛེས་པའི་ཆེད་དུ་ཞེས་རྟོགས་པར་བྱའོ། །སྐབས་ཀྱི་ནི་བ་ལང་རྫི་ཟ་མ་ཟ་བའི་སྐབས་སུ་སེན་དྷ་ཝ་འོན་ཅིག་ཅེས་བརྗོད་པ་ན་ལན་ཚྭ་ཁོ་ན་ལ་རྟོགས་པར་འགྱུར་རོ། །ཡང་དག་པར་འགྲོགས་པས་ནི་བེའུ་དང་བཅས་པའི་བཞོན་མ་འོན་ཅིག་ཅེས་བརྗོད་པ་ན། བ་ལང་
[273b]
[273b.1]བཞོན་མ་ཁོ་ན་རྟོགས་པ་ལྟ་བུའོ། །དེ་ལྟར་དེ་སྣང་ཐེ་ཚོམ་ཡིན། །ཞེས་པ་སྤྱིའི་སྒྲ་ཁྱད་པར་རྣམས་ལ་མཐོང་བ་ལ་གཏན་ཚིགས་གཞན་གསུངས་སོ། །ནག་པོའི་མངར་བ་ལ་སོགས་པ་རྣམས་ལ་སྔར་མཐོང་བ་པོའི་དེའི་རྣམ་པ་ཅན་གྱི་ཐེ་ཚོམ་གྱི་རྒྱུ་ཉིད་མ་ཡིན་ནོ། །འདིས་
[273b.2]ནི་གང་ཞིག་རང་གི་ཁྱད་པར་གྱི་རྣམ་པ་ཅན་གྱི་ཐེ་ཚོམ་གྱི་རྒྱུ་ཡིན་པ་དེ་ནི་རང་གི་ཁྱད་པར་རྣམས་ལ་སྔར་མཐོང་བ་ཅན་ཡིན་ཏེ། འགྲེང་བ་ཉིད་བཞིན་སྤྱིའི་སྒྲ་ཡང་དེ་ལྟ་བུའོ་ཞེས་རང་བཞིན་གསུངས་སོ། །འོ་ན་མཉན་པར་བྱ་བ་ཉིད་ཀྱིས་མ་ངེས་པ་མ་ཡིན་ནམ། དེ་ནི་གང་དུ་ཡང་མ་མཐོང་
[273b.3]བ་སྟེ། ཐེ་ཚོམ་གྱི་རྒྱུ་ཡང་ངོ་ཞེ་ན། འདི་ཡོད་པ་མ་ཡིན་ཏེ། མཉན་པར་བྱ་བ་ཉིད་ཀྱི་ཕྱིར་རང་གི་ཁྱད་པར་ནི་མཉན་པར་བྱ་བའི་བྱེ་བྲག་གི་བདག་ཉིད་རྣམས་ཁོ་ན་སྟེ། དེ་ལ་ཡང་དེ་མཐོང་བ་ཁོ་ནའོ། །གང་རྣམས་ལ་མ་མཐོང་བ་རྟག་པ་ལ་སོགས་པའི་ཚིག་གི་དོན་རྣམས་ནི་དེའི་ཁྱད་པར་མ་
[273b.4]ཡིན་ནོ་ཞེས་པས་འདི་བརྩད་པར་བྱ་བ་མ་ཡིན་ནོ། །སྤྱི་ཉིད་ཡོད་ན་ཞེས་པའི་ཁྱད་པར་འདིར་ཡང་ན་བལྟ་བར་བྱ་སྟེ། དེ་ཡང་སྤྱིའི་སྒྲའི་དབང་དུ་བྱས་པ་ལས་འཐོབ་བོ། །ཐེ་ཚོམ་མི་རིགས་ཕྱིར་ཞེ་ན། །ཞེས་པ་གལ་ཏེ་དོན་དང་སྐབས་ལ་སོགས་པ་དང་བཅས་པར་གྱུར་ན། ཐེ་
[273b.5]ཚོམ་གྱི་རྒྱུར་མི་འགྱུར་ཏེ། བྱ་རོག་གནས་པ་དང་བཅས་པའི་འགྲེང་བ་བཞིན་ན། ཐེ་ཚོམ་ཡང་ཡོད་དེ། དེའི་ཕྱིར་ཇི་ལྟར་རང་གི་ཁྱད་པར་རྣམས་ལ་ཉེ་བར་དམིགས་པ། སྔོན་མ་ཅན་ཉིད་དེ་ལྟར་དོན་ལ་སོགས་པ་དང་ལྷན་ཅིག་པ་ཉིད་མེད་ཀྱང་ངོ་ཞེས་པས་གཏན་ཚིགས་འགལ་
[273b.6]བའོ་ཞེས་སེམས་སོ། །ངེས་ལ་འབའ་ཞིག་ལས་དེ་ཡིན། །ཞེས་པ་ལ་སོགས་པ་སྟེ། ཁྱད་པར་དང་ལྷན་ཅིག་པ་ལས་ཐེ་ཚོམ་དུ་བརྗོད་པར་བྱ་བ་མ་ཡིན་གྱི། འོ་ན་ཅི་ཞེ་ན། དོན་དང་སྐབས་ལ་སོགས་པ་དང་ལྷན་ཅིག་པའི་སྤྱིའི་སྒྲ་ལས་ཤིང་ཤ་པ་ལ་སོགས་པ་ཁྱད་པར་ངེས་པ་ལ་
[273b.7]དུས་ཕྱིས་འབའ་ཞིག་པ་ལས་ཁྱད་པར་རྣམས་ལ་ཐེ་ཚོམ་ཡིན་ནོ། །འདིས་ནི་དོན་ལ་སོགས་པ་དང་ལྷན་ཅིག་པ་ཉེ་བར་དམིགས་པའི་དུས་ན་ཐེ་ཚོམ་གྱི་རྒྱུ་ཉིད་མི་འགྲུབ་པའི་ཕྱིར། གང་གི་ཚེ་ཡང་ཐེ་ཚོམ་གྱི་རྒྱུ་ཉིད་ཡིན་པ་དེའི་ཚེ་དོན་ལ་སོགས་པ་དང་ལྷན་ཅིག་པ་ཉིད་དུ་དམ་
[274a]
[274a.1]བཅས་པའི་ཕྱིར་འགལ་བ་ཉིད་མེད་དོ་ཞེས་སྟོན་པར་བྱེད་དོ། །ཁྱད་པར་ལ་འབའ་ཞིག་མེད་ཅེ་ན་ཞེས་པ་འབའ་ཞིག་པ་ནི་ཁྱད་པར་རྣམས་ལ་སྦྱོར་བ་ཉིད་མེད་དེ། དེ་རྗོད་པར་མི་བྱེད་པ་ཉིད་ཀྱི་ཕྱིར་སྒྲ་གཞན་བཞིན་ནོ། །མ་སྦྱར་བ་ཡང་ཐེ་ཚོམ་གྱི་རྒྱུ་ཉིད་དུ་འཐད་པ་མ་
[274a.2]ཡིན་ནོ་ཞེས་པའོ། །དེ་ལྟར་ན་ཡང་རང་གི་ཁྱད་པར་གྱི་རྣམ་པ་ཅན་གྱི་ཐེ་ཚོམ་གྱི་རྒྱུ་ཉིད་མ་གྲུབ་པོ། །ཉན་ལ་ལྟོས་ནས་མཐོང་བ་ཡིན། །ཞེས་པ་ལན་ནོ། །ཡང་ནམ་གྱི་ཚེ་ཉན་པ་པོ་ལ་ལྟོས་པས་སྦྱོར་བ་ཡིན་ཞེ་ན་གསུངས་པ། གང་གི་ཚེ་ནི་ཞེས་པ་ལ་སོགས་པ་སྟེ། གང་གི་ཚེ་ཉན་པ་
[274a.3]པོས་ཤིང་གི་རང་བཞིན་ལ་ཐེ་ཚོམ་ཟ་བས། ས་ལས་གྱུར་པ་ཉིད་ལ་སོགས་པ་སྤྱི་རྣམས་ཀྱི་གང་ཡང་རུང་བའི་རང་བཞིན་རྟོགས་པའི་དོན་དུ། དེ་ལས་གཞན་པའི་སྤྱི་བསལ་བས་དོན་དུ་གཉེར་བར་འགྱུར་བ་དེའི་ཚེ། ས་ལས་གྱུར་པ་ཞེས་པ་ལས་གྱུར་པའི་སྒྲ་འབའ་ཞིག་པའི་སྦྱོར་བ་སྲིད་
[274a.4]དོ། །འོ་ན་ངེས་པ་ལ་ཞེས་པ་ལ་སོགས་པས་ཐེ་ཚོམ་མི་འཐད་པར་སྟོན་ཏོ། །འདྲི་བ་པོས་ནི་ཤིང་ངེས་པ་ཁོ་ན་སྟེ། དེ་ལྟར་ནི་འདི་ལྟར་འདྲི་སྟེ་ཅི་ཤིང་ནི་ས་ལས་གྱུར་པ་ཡིན་ནམ། འོན་ཏེ་འབྱུང་བ་ཆེན་པོ་ལྔ་ལས་གྱུར་པ་ཡིན་ཞེས་སོ། །དེ་ལྟར་འདྲི་བ་པོས་ཤིང་ངེས་པ་ལ་ཅི་ཞིག་ལས་
[274a.5]སྤྱིའི་སྒྲ་འབའ་ཞིག་ལས་ཐེ་ཚོམ་ཡིན། དེ་ཁོ་ན་གཏན་ཚིགས་མ་གྲུབ་པ་ཉིད་དོ། །དེའི་ངེས་པ་ལ་གཞན་གྱི་ཞེས་པ། བདེན་ཏེ་འདྲི་བ་པོས་ཤིང་ངེས་པ་ཁོ་ན་ལ། གང་གཞན་སྐབས་དེ་མི་ཤེས་ཤིང་། །ས་ལས་གྱུར་པའི་སྒྲ་འབའ་ཞིག་ཐོས་པར་གྱུར་པ་དེའི་ཐེ་ཚོམ་སྐྱེ་སྟེ།
[274a.6]སྔར་དོན་ལ་སོགས་པ་དང་ལྷན་ཅིག་པའི་ཁྱད་པར་མཐོང་བའི་ཕྱིར་རོ་ཞེས་སོ། །དེ་ལྟར་དོན་གྱི་སྤྱི་བྱེ་བྲག་ཏུ་རྟོགས་པར་བྱས་ནས། སྒྲའི་སྤྱི་བྱེ་བྲག་ཏུ་རྟོགས་པའི་ཆེད་དུ་གསུངས་པ། ཇི་ལྟར་ཡང་ཞེས་པ་ལ་སོགས་པའོ། །ཇི་ལྟར་དོན་རྣམས་ལ་དོན་བྱ་བ་གཅིག་བྱེད་པའི་གསལ་བའི་
[274a.7]ཁྱད་པར་ཉམས་སུ་མྱོང་བའི་སྒོ་ནས་འོངས་པ། བློ་ལ་སོགས་པར་འཇུག་བཞིན་པ་སྤྱིའི་རྣམ་པ་ཐ་སྙད་བྱེད་པ་པོ་རྣམས་ཀྱིས་ཕྱི་རོལ་གྱི་ངོ་བོ་ཉིད་དུ་ཞེན་བཞིན་པ། དོན་གཞན་རྣམ་པར་སེལ་བ་ཞེས་བྱ་བའི་སྤྱི་རྟོགས་པར་བྱེད་པ་དེ་བཞིན་དུ་སྒྲ་རྣམས་ལ་དེའི་འབྲས་བུ་
[274b]
[274b.1]ཅན་ཡང་མ་ཡིན་པ་ལ་སོགས་པའི་སྒྲའི་རང་གི་མཚན་ཉིད་ཉམས་སུ་མྱོང་བས་བྱས་པའི་འཁྲུལ་པའི་བག་ཆགས་ཀྱིས་ཉེ་བར་དྲངས་པ་ལས་སྐྱེས་པ། བློ་ལ་ཡོད་པ། སྤྱིའི་རྣམ་པ། ཐ་སྙད་ཀྱི་རྗེས་སུ་འབྲང་བ་རྣམས་ཀྱིས་ཕྱི་རོལ་གྱི་སྒྲ་ཙམ་རྗེས་སུ་འགྲོ་བ་ཉིད་དུ་ལྷག་པར་ཞེན་པ། སྒྲ་
[274b.2]གཞན་རྣམ་པར་གཅོད་པ་ན་ཞེས་བྱ་བ་སྤྱི་རུ་རྣམ་པར་གཞག་པར་བྱའོ། །ཇི་ལྟར་ཞེས་པ་ལ་སོགས་པས་ཚིག་ལེའུར་བྱས་པའི་དོན་འཆད་དོ། །མ་བྱས་པ་བསལ་བས་ཞེས་པ་རྒྱུ་ལ་གསུམ་པའོ། །མ་བྱས་པ་བསལ་བ་ནི་བྱས་པའི་དངོས་པོར་བརྗོད་པར་བྱ་སྟེ། ལྡོག་པ་ནི་ལྡོག་པ་དང་
[274b.3]ལྡན་པ་ལས་གཞན་མ་ཡིན་པས་སོ་ཞེས་བཤད་ཟིན་པས་སོ། །ལྡོག་པ་དང་རྣམ་པར་བསལ་བ་དང་རྣམ་པར་གཅོད་པ་ཞེས་པ་འདི་རྣམ་གྲངས་ཡིན་པས་སོ། །དེས་ན་འདི་སྐད་བཤད་པར་འགྱུར་ཏེ། མ་བྱས་པ་བསལ་བའི་རྒྱུས་བྱས་པ་ཉིད་བྱས་པའི་དངོས་པོའི་རྒྱུ་ཅན་གང་བྱས་པ་
[274b.4]ཉིད་བློ་ལ་སོ་སོར་སྣང་བའི་ཁྱད་པར་ནི་ཇི་ལྟར་དེའི་སྤྱི་ལས་ཏེ་བྱས་པའི་གསལ་བ་ལ་ཐུན་མོང་བ་ཉིད་ལས་མི་རྟག་པ་ཉིད་ལ་སོགས་པ་རྟོགས་པར་བྱེད་པ་དེ་ལྟར་སྒྲ་གཞན་རྣམ་པར་གཅད་པའི་རྒྱུས་རྣམ་པར་ཤེས་པའི་རྣམ་པའི་ཁྱད་པར་གྱི་ངོ་བོ་ནི་སྒྲ་ལ་རང་གི་སྤྱི་རུ་བརྗོད་པར་བྱ་ཞིང་། དེ་
[274b.5]ཉིད་ཀྱིས་སྒྲ་དོན་རྟོགས་པར་བྱེད་ཀྱི། རང་གི་མཚན་ཉིད་ཀྱིས་ནི་མ་ཡིན་ཏེ། དེ་སྔར་མཐོང་བ་མེད་པ་ཉིད་ཀྱི་ཕྱིར་རོ་ཞེས་པའོ། །སྒྲའི་གཅིག་དང་དུ་མ་ཉིད་དུ་བྱེ་བྲག་ཏུ་རྟོགས་པར་བྱ་བའི་ཆེད་དུ་གསུངས་པ། དེ་ལ་ཡང་ཞེས་པ་ལ་སོགས་པའོ། །དེ་ལ་ཡང་སྟེ་སྒྲ་ལ་གཞན་འདིར་
[274b.6]རིག་པར་བྱ་སྟེ། གང་དུ་ཨཀྵ་ལ་སོགས་པའི་སྒྲ་ཐོས་པ་ལ། བརྗོད་པར་བྱ་བ་ཤིང་རྟའི་ཡན་ལག་ལ་སོགས་པ་ལ་ཐེ་ཚོམ་དུ་འགྱུར་ཏེ། སོགས་པ་སྨོས་པ་ལས་བ་རུ་ར་ལ་སོགས་པ་ལའོ། །དེ་ལ་སྒྲ་གཅིག་ཉིད་ཡིན་ནོ། །གཅིག་ནི་དོན་དུ་མ་དང་འབྲེལ་པ་རྣམས་ལ་ཐེ་ཚོམ་
[274b.7]གྱི་རྒྱུ་ཉིད་དུ་རབ་ཏུ་གྲུབ་སྟེ། དེའི་ཕྱིར་གཞན་ལ་བྱ་བ་ཉིད་བཞིན་དུ་དུ་མ་དང་འབྲེལ་པ་ཅན་ནི་ཐེ་ཚོམ་གྱི་རྒྱུ་ཉིད་ཀྱི་ཕྱིར་གཅིག་ཅེས་རྟོགས་པར་བྱའོ། །དུ་མ་ལས་དེར་ཐེ་ཚོམ་ལའོ་ཞེས་པ། ཇི་ལྟར་བྷ་ཝ་ཏིའི་སྒྲ་ལ་སོགས་པ་ལ་འདྲ་བ་ཉིད་ལས་ཐེ་ཚོམ་དུ་འགྱུར་ཏེ། ཅི་འདི་ཤ་
[275a]
[275a.1]ཏྲིའི་མཐའ་ཅན་གྱི་བདུན་པའི་གཅིག་གི་ཚིག་ཏུ་གྱུར་པ་ནའི་གཟུགས་ཡིན་ནམ། འོན་ཏེ་ཏིང་ངའི་མཐའ་འམ། འོན་ཏེ་བོད་པ་ཡིན། དེ་བཞིན་དུ་ཨ་སྱ་ཞེས་བརྗོད་པ་ན་ཐེ་ཚོམ་སྟེ། ཅི་འདི་དྲུག་པའི་མཐའ་ཅན་གྱི་ཚིག་གམ། འོན་ཏེ་ལོ་ཊའི་སྐྱེས་བུ་བར་པའི་
[275a.2]གཅིག་གི་ཚིག་གི་མཐའ་ཅན་ཡིན་ཞེས་པ་འདི་ལྟ་བུ་ལ་སོགས་པ་རྣམས་ལ། སྒྲ་མཚུངས་ན་ཡང་སྒྲའི་དབྱེ་བ་བལྟ་བར་བྱའོ། །ཅི་ཞིག་ཏུ་ཇི་ལྟ་བུར་ཞེ་ན་གསུངས་པ། དཔེར་ན་ཀ་ཨི་ཧ་ཞེས་པ་ལྟ་བུ་སྟེ། འདིར་ནི་འདུས་པ་ན་སྒྲའི་ངོ་བོར་གྱུར་པའི་ཐེ་ཚོམ་སྟེ། ཅི་འདི་དང་པོའི་མཐའ་ཅན་
[275a.3]ནམ་འོན་ཏེ་བདུན་པའི་མཐའ་ཅན་ཞེས་ཏེ། གཅིག་མ་ཡིན་པ་ཉིད་ཀྱང་རབ་ཏུ་གྲུབ་པོ། །དེ་ལྟར་འཇིག་རྟེན་གྱི་དོན་ལ་དང་སྒྲ་ལ་ཡང་ཐེ་ཚོམ་ཟ་བའི་ཕྱིར་ཐ་མི་དད་པ་དང་ཐ་དད་པ་ཡང་རིག་པར་བྱའོ། །ཡང་ཅི་ལྟར་ཞེས་པ་ལ་སོགས་པ་སྟེ། སྒྲ་དོན་གཞན་རྣམ་པར་གཅད་པས་ཇི་
[275a.4]སྐད་བཤད་པའི་རང་གི་དོན་རྗོད་པར་བྱེད་པའོ་ཞེས་པའི་ཕྱོགས་འདི་ལ་གང་ལས་འདི་ཁས་བླང་བ། ཕྱོགས་བཞི་པོ་རྣམས་ལ་གང་སྔར་བརྗོད་པའི་སྐྱོན་དེ་རྣམས་ཅི་ལྟར་མེད་ཅེས་འདྲི་བའོ། །སྒྲ་གཞན་དོན་ལ་མ་མཐོང་ཕྱིར། །ཞེས་པ་སྒྲའི་དོན་སྨོས་པ་ནི་མི་མཐུན་ཕྱོགས་ཉེ་
[275a.5]བར་མཚོན་པ་སྟེ། མི་མཐུན་ཕྱོགས་ལ་མ་མཐོང་བའི་ཕྱིར་ཞེས་པའི་དོན་ཏོ། །རང་དོན་ཆ་ཤས་ལ་མཐོང་ཕྱིར། །ཞེས་པ་འདིར་རང་རང་གི་དོན་ཡིན་ནོ། །འདི་ཡང་ཅི་ཡིན་ཞེ་ན། བརྗོད་པར་འདོད་པ་དང་ལྡན་པའི་སྐྱེས་བུའི་ཚོགས་པའོ། །དེའི་ཆ་ཤས་ནི་ཡན་ལག་སྟེ། བརྗོད་
[275a.6]འདོད་པ་དང་ལྡན་པའི་སྐྱེས་བུའོ། །ཆ་ཤས་ལའང་ཞེས་པ་བརྗོད་འདོད་ཅན་གྱི་འདི་རྣམ་གྲངས་སོ། །འདི་སྐད་བཤད་པར་འགྱུར་ཏེ། གལ་ཏེ་ཡང་ཇི་སྐད་བཤད་པའི་རང་གི་དོན་གྱི་ཆ་ཤས་རྣམས་མཐའ་ཡས་པ་དེ་ལྟ་ན་ཡང་གཅིག་ལ་ཡང་མཐོང་བའི་ཕྱིར་ཞེས་པ་སྟེ། ཡང་གི་སྒྲ་ནི་དུ་མ་
[275a.7]ལ་ཡང་ངོ་ཞེས་གསལ་བར་བྱེད་པའོ། །མཐུན་ཕྱོགས་ལ་ཁྱབ་པ་ནི་རྟོགས་པར་བྱེད་པ་ལ་ཡན་ལག་མ་ཡིན་པ་ཉིད་ཀྱི་ཕྱིར་ཆ་ཤས་སྨོས་ཏེ་ཁྱབ་པར་བྱེད་པ་མ་ཡིན་ན་ཡང་གོ་བར་བྱེད་པ་ཡིན་ནོ། །སྒྲ་ཡི་འབྲེལ་པ་སླ་བ་ཉིད། །ཇི་སྐད་བཤད་པའི་གཏན་ཚིགས་ཀྱི་ཕྱིར་རོ། །
[275b]
[275b.1]འཁྲུལ་པ་ཉིད་ནི་ཡོད་མ་ཡིན། །རང་གི་དོན་མེད་ན་མེད་པའི་ཕྱིར་རོ། །རྗེས་སུ་འགྲོ་བ་དང་ལྡོག་པ་དག་ནི་ཞེས་པ་ལ་སོགས་པས་དོན་འདི་ཁོ་ན་གསལ་བར་བྱེད་དོ། །སྒོ་ནི་ཐབས་སོ། །སྒྲ་ནི་རྟགས་ཡིན་པ་ཉིད་ཀྱི་ཕྱིར་དང་། དེ་ཡང་རྗེས་སུ་འགྲོ་བ་དང་ལྡོག་པའི་མཚན་ཉིད་ཀྱིས་འབྲེལ་
[275b.2]པའི་སྟོབས་ཀྱིས་གོ་བར་བྱེད་པ་ཉིད་ཀྱི་ཕྱིར་རོ། །དེ་དག་ཀྱང་ཞེས་པ་རྗེས་སུ་འགྲོ་བ་དང་ལྡོག་པའི་ངོ་བོ་ཉེ་བར་རྗོད་པ་སྟེ། རྟགས་དེ་དང་མཚུངས་པ་ཁོ་ན་ལ་འཇུག་པ་དང་། དེ་དང་མི་མཚུངས་པ་ལ་མི་འཇུག་པ་ཁོ་ནའོ་ཞེས་པ་འདི་ནི་རྗེས་སུ་འགྲོ་བ་དང་ལྡོག་པ་དག་གི་རང་
[275b.3]གི་ངོ་བོའོ། །དེ་ལ་དེ་དང་མཚུངས་པ་ལ་ནི་གདོན་མི་ཟ་བར་མ་ཡིན་ཞེས་པ། ངེས་པ་འདི་ནི་རིགས་མཐུན་པ་ཐམས་ཅད་ལ་འཇུག་པར་བརྗོད་པར་བྱ་བ་མ་ཡིན་པའོ། །ཅིའི་ཕྱིར་ཞེ་ན། གསུངས་པ། འགའ་ཞིག་ལ་ཞེས་པ་ལ་སོགས་པའོ། །ཤིང་ལ་
[275b.4]སོགས་པའི་སྒྲ་ནི་ཤིང་ལ་སོགས་པ་ཐམས་ཅད་ལ་མཐོང་བ་སྲིད་པ་མ་ཡིན་པ་སྟེ། དེ་རྣམས་མཐའ་ཡས་པ་ཉིད་ཀྱི་ཕྱིར་རོ། །འདོད་རྒྱལ་བའི་སྒྲ་རྣམས་ནི་ཐམས་ཅད་དུ་མཐོང་བ་སྲིད་དེ། དེའི་ཡུལ་གཅིག་ཉིད་ཀྱི་ཕྱིར་རོ་ཞེས་པ་སྟེ་དེའི་ཕྱིར་འགའ་ཞིག་ཏུ་ཞེས་གསུངས་
[275b.5]སོ། །དེ་ལྟར་རེ་ཞིག་རྗེས་སུ་འགྲོ་བ་བཤད་པ་སླ་བའོ། །དེ་ལྟར་འགྱུར་མོད་དེ་དང་མི་མཚུངས་པ་རྣམས་མཐའ་ཡས་པ་ཉིད་ཀྱི་ཕྱིར་ལྡོག་པ་བཤད་པ་ཡང་ཐམས་ཅད་དུ་མི་སྲིད་པའོ་ཞེ་ན། དེའི་ཕྱིར་གསུངས་པ། མི་མཚུངས་པ་ལ་ནི་མཐའ་ཡས་པ་ཉིད་ཡོད་ན་ཡང་ཞེས་པ་གང་
[275b.6]ལ་སྒྲའི་དོན་མེད་པ་དེ་རྣམས་མཐའ་ཡས་པ་ཉིད་ཡོད་ན་འང་རང་གི་དོན་མེད་ན་སྒྲ་མེད་པའི་མཚན་ཉིད་ཅན་གྱི་ལྡོག་པ་བསྟན་པར་ནུས་ཏེ། མ་མཐོང་བ་ནི་མེད་པ་ཙམ་ཉིད་ཀྱི་ཕྱིར་རོ། །སྒྲ་དང་དོན་དག་འབྲས་བུ་དང་རྒྱུའི་དངོས་པོར་གྲུབ་པ་ལ་རྒྱུ་དོན་མེད་པ་ན། དེའི་འབྲས་བུ་སྒྲ་མེད་
[275b.7]པར་འགྱུར་རོ་ཞེས་པ་འདི་ཙམ་གྱིས་མ་མཐོང་བ་རྟོགས་པར་བྱས་པར་འགྱུར་རོ། །དེ་ལ་རྟེན་མཐོང་བ་མི་དགོས་ཏེ། དེ་མེད་ཀྱང་ལྡོག་པར་ངེས་པའི་ཕྱིར་རོ། །རྒྱུ་མེད་ན་འབྲས་བུ་སྲིད་པ་མ་ཡིན་པས་ཏེ། དེའི་ཕྱིར་ལྡོག་པ་ཡང་བཤད་པ་སླ་བའོ། །དེ་ཉིད་ཀྱི་ཕྱིར་ཞེས་པ་
[276a]
[276a.1]གང་གི་ཕྱིར་མཐོང་བ་ནི་དེ་དང་མཚུངས་པ་ཐམས་ཅད་ལ་མི་སྲིད་ཅིང་། དེ་དང་མཚུངས་པ་མ་ཡིན་པ་ལ་ནི་མ་མཐོང་བ་སྲིད་པ་དེའི་ཕྱིར་རང་དང་འབྲེལ་བ་ཅན་རྣམས་ལས་ཏེ་རིགས་མཐུན་པ་རྣམས་ལས་གཞན་ལ་སྟེ། མི་མཐུན་ཕྱོགས་ལ་མ་མཐོང་བའི་ཕྱིར།
[276a.2]དེ་རྣམ་པར་གཅོད་པ་རྗེས་སུ་དཔག་པའོ་ཞེས་པ། གང་དུ་རང་གི་དོན་མེད་པ་ལ་མ་མཐོང་བ་དེ་ནི་རྣམ་པར་གཅོད་པ་རྣམས་རྗེས་སུ་དཔོག་པ་ནི་རྗེས་སུ་དཔག་པར་རང་གི་དོན་ལ་མངོན་པར་བརྗོད་དོ་ཞེས་བཤད་པར་བྱའོ། །འདིས་ནི་གལ་ཏེ་ཡང་རྗེས་སུ་འགྲོ་བ་དང་ལྡོག་པ་དག་གཉིས་
[276a.3]ཀ་དག་ཀྱང་རྗེས་སུ་དཔོག་པ་ལ་ཡན་ལག་ཉིད་ཡིན་པ་དེ་ལྟ་ན་ཡང་ལྡོག་པ་གཙོ་བོ་ཉིད་ཀྱི་ཕྱིར་དེའི་སྒོ་ཁོ་ནས་གོ་བར་བྱེད་པ་ཉིད་དོ་ཞེས་སྟོན་ཏོ། རྗེས་སུ་འགྲོ་བའི་སྒོ་ཡིས་ནི། །ཞེས་པ་ལ་སོགས་པ་སྟེ། ནིའི་སྒྲ་ནི་ངེས་པར་འཛིན་པའི་དོན་ཅན་ནོ། །གལ་ཏེ་རྗེས་སུ་འགྲོ་བའི་སྒོ་ཁོ་ནས་མངོན་
[276a.4]པར་འདོད་ན། དེ་ལྟར་གྱུར་ན་ཤིང་གི་སྒྲ་དོན་ལ་སོགས་པ་དང་ལྷན་ཅིག་པ་ནི་ཤིང་ཤ་པ་ལ་སོགས་པ་རྣམས་ལ་རྗེས་སུ་འགྲོ་བ་ཡོད་དོ་ཞེས་པས། ཤིང་གི་སྒྲ་འབའ་ཞིག་པ་ལས་དངོས་པོ་གཅིག་ལ་ཤིང་ཤ་པ་ལ་སོགས་པར་སྣང་བར་ཐེ་ཚོམ་དུ་མི་འགྱུར་གྱི། འོན་ཀྱང་ངེས་པ་ཁོ་ནར་འགྱུར་
[276a.5]རོ། །ཅི་སྟེ་དུ་མ་ལ་མཐོང་བའི་ཕྱིར་ཐེ་ཚོམ་ཡིན་ན། དེ་ལྟ་ན་འོ་ན་དེ་ལ་ཐེ་ཚོམ་ཟ་བ་བཞིན་དུ་ས་ལས་གྱུར་པ་ཉིད་དང་རྫས་ཉིད་ལ་སོགས་པར་སྣང་བ་ལ་ཡང་ཐེ་ཚོམ་དུ་འགྱུར་ཏེ། ས་ལས་གྱུར་པ་ཉིད་ལ་སོགས་པ་ལ་དུ་མ་ལ་མཐོང་བའི་ཕྱིར་རོ། །ངེས་པ་ནི་མཐོང་སྟེ། གང་གི་ཕྱིར་དུ་མ་
[276a.6]ལ་ཡང་འཇུག་བཞིན་པ་ནི། གང་མེད་ན་མི་འགྱུར་བ་དེས་རྟོགས་པར་བྱེད་ཀྱི་ཅིག་ཤོས་ནི་མ་ཡིན་ནོ། །དེའི་ཕྱིར་ལྡོག་པའི་སྒོ་ཁོ་ནས་རྗེས་སུ་དཔག་པ་སྟེ། འདི་ཁོ་ན་སྟོན་པ་གསུངས་པ། གང་གི་ཕྱིར་ནི་ཞེས་པ་ལ་སོགས་པའོ། །ལྡོག་པའི་སྒོ་ཁོ་ནས་རྟོགས་པར་བྱེད་པའོ་ཞེས་པ་
[276a.7]འདི་གཞུང་གཟུགས་པར་བྱ་བའི་ཆེད་དུ་བར་སྐབས་ཀྱི་ཚིགས་སུ་བཅད་པ་གསུངས་པ། ཤེས་བྱའི་སྒྲ་ནི་ཡོད་པ་དང་རྫས་དང་ས་ལས་གྱུར་པ་དང་ཤིང་ཉིད་དེ། གཞི་རྣམས་ལ་ཐེ་ཚོམ་གྱི་རྒྱུ་སྟེ། གང་གི་ཕྱིར་དེ་ནི་དེ་རྣམས་མེད་ན་ཡང་མཐོང་བས་སོ། །འདི་ལྟར་དུ་ཕྱི་མ་རྣམས་
[276b]
[276b.1]ལ་ཡང་བརྗོད་པར་བྱའོ། །ཡོད་པའི་སྒྲ་ནི་རྫས་དང་ས་ལས་གྱུར་པ་དང་ཤིང་ཉིད་དེ་གསུམ་རྣམས་ལའོ། །རྫས་ཀྱི་སྒྲ་ནི་ས་ལས་གྱུར་པ་དང་ཤིང་ཉིད་དེ་གཉིས་དག་ལའོ། །ས་ལས་གྱུར་པའི་སྒྲ་ནི་ཤིང་ཉིད་གཅིག་པུ་ལའོ། །དེས་ལ་གཞན་དུ་ཞེས་པ་ལ་རྒྱུ་མཚན་ནོ་ཞེས་འཇུག་
[276b.2]གོ། །གཞན་དུ་ཞེས་པ་ལུགས་དང་མཐུན་པས་ཏེ། ཤིང་གི་སྒྲ་ནི་ས་ལས་གྱུར་པ་དང་། རྫས་དང་ཡོད་པ་དང་ཤེས་བྱ་སྟེ་གཞི་རྣམས་ལ་ངེས་པའི་རྒྱུའོ། །དེ་ལྟར་ནི་དེ་ནི་དེ་རྣམས་ལ་ཡང་མཐོང་ཞིང་དེ་རྣམས་ལེག་པ་ལ་ཡང་མ་མཐོང་བས་སོ། །དེ་བཞིན་དུ་ཕྱི་མ་རྣམས་ལ་ཡང་
[276b.3]བརྗོད་པར་བྱ་སྟེ། ས་ལས་གྱུར་པའི་སྒྲ་ལ་སོགས་པ་རྣམས་ཀྱང་དེ་བཞིན་དུ་རེ་རེས་དམན་པས་རྫས་ཉིད་ལ་སོགས་པ་རྣམས་ལ་ངེས་པའི་རྒྱུར་ཤེས་པར་བྱའོ། །གལ་ཏེ་ཡང་མཐོང་བཞིན་དུ་བསྒྲུབ་པས་རྟོགས་པར་བྱེད་པར་འགྱུར་ན། རིམ་པ་ཇི་ལྟ་བས་བཞི་དང་གསུམ་དང་
[276b.4]གཉིས་དང་གཅིག་གི་དོན་ལ་ངེས་པ་དང་། དེ་ལྟར་ལུགས་ལས་ལྡོག་པར་འགྱུར་ཏེ། ཤེས་བྱའི་སྒྲ་ལ་སོགས་པ་རྣམས་ཡོད་པ་ཉིད་ལ་སོགས་པ་རྣམས་ལ་མཐོང་བའི་ཕྱིར་རོ། །གང་གི་ཕྱིར་དེ་མེད་ན་ཡང་མཐོང་བ་ཉིད་ཀྱི་ཕྱིར་ཐེ་ཚོམ་སྟེ། དེའི་ཕྱིར་ལྡོག་པའི་སྒོ་ཁོ་ནས་གོ་བར་བྱེད་པ་
[276b.5]ཉིད་དོ་ཞེས་པའོ། །འབྲེལ་པའི་སྒོ་མ་རྟོགས་པར་ཞེས་པ་ལ་སོགས་པ་སྟེ། འབྲེལ་པ་ནི་མེད་ན་མི་འབྱུང་བའོ། །དེ་ཁོ་ན་སྒོ་སྟེ། རྗེས་སུ་དཔོག་པའི་རྒྱུ་མཚན་ནོ། །དེ་ཡོངས་སུ་སྤངས་ནས་སྒྲ་ནི་བརྟགས་བཞིན་དུ་རང་གི་དོན་རྟོགས་པའི་ནུས་པ་ཡོད་པ་མ་ཡིན་ཏེ། བཞིན་གྱི་སྒྲ་ནི་དཔེ་ཉིད་
[276b.6]ལའོ། །ཇི་ལྟར་དོན་གྱི་བདག་ཉིད་ཀྱི་རྟགས་ནི་མེད་ན་མི་འབྱུང་བའི་འབྲེལ་པའི་སྒོ་ནས་རྟོགས་པར་བྱེད་ཅིང་རང་གི་དོན་ལྡོག་པའི་སྒོ་ནས་རྟོགས་པར་བྱེད་པ་དེ་ལྟར་སྒྲ་ཡང་ངོ་ཞེས་རྟོགས་པར་བྱ་བའི་ཆེད་དུ་བརྟགས་བཞིན་ཞེས་པའི་ཚིག་གོ། །དེའི་ཆོས་དུ་མ་ཉིད་ན་ཞེས་པ། ཤིང་ཤ་
[276b.7]པ་ལ་སོགས་པའི་དབྱེ་བས་སམ། མེ་ཏོག་ཅན་དང་འབྲས་བུ་ཅན་ཉིད་ལ་སོགས་པའི་དབྱེ་བས་ཤིང་ལ་སོགས་པའི་དོན་ནི་ཆོས་དུ་མ་ཅན་ཉིད་ན་ཡང་། རྣམ་པ་ཐམས་ཅད་རྟོགས་པ་མི་སྲིད་པའི་ཕྱིར་རོ་ཞེས་པ། གལ་ཏེ་རྣམ་པ་ཐམས་ཅད་ཀྱིས་མེ་ཏོག་ཅན་དང་འབྲས་བུ་ཅན་ལ་
[277a]
[277a.1]སོགས་པས་རྟོགས་པར་གྱུར་ན། དེའི་ཚེ་ཇི་སྐད་བཤད་པའི་འབྲེལ་པ་མེད་པར་སྒྲུབ་པ་ཁོ་ནས་རྟོགས་པར་འགྱུར་ན་དེ་ཡང་སྲིད་པ་མ་ཡིན་ཏེ། མེ་ཏོག་ཅན་ཉིད་ལ་སོགས་པའི་བྱེ་བྲག་རྣམས་ལ་འཁྲུལ་པའི་ཕྱིར་རོ། །ཇི་ལྟར་མཐོང་བ་བཞིན་དུ་རྟོགས་པ་ནི་སྒྲུབ་
[277a.2]པ་ཡིན་ཏེ། དེའི་ཕྱིར་སྒྲུབ་པས་རྟོག་པ་མ་ཡིན་གྱི་འོན་ཀྱང་དོན་གཞན་ལས་ལྡོག་པའི་སྒོ་ནས་སོ། །ཁྱད་པར་མི་བརྗོད་པའི་ཕྱིར་ཞེས་པ། དེ་རྣམས་ཕན་ཚུན་མེད་ན་ཡང་ཡོད་པའི་ཕྱིར་འཁྲུལ་པར་འགྱུར་ཞིང་། སྤྱི་བརྗོད་པར་བྱ་བ་ཡིན་ན་མ་ཡིན་ཏེ། དེ་ཐ་མི་དད་པའི་ཕྱིར་དང་།
[277a.3]དེ་མེད་ན་ཡང་སྒྲ་མེད་པའི་ཕྱིར་རོ། །གཞན་བཀག་པ་ནི་ཁྱབ་པའི་ཕྱིར། །ཞེས་པ་ཁྱབ་པ་ནི་རང་གི་ཁྱད་པར་མི་སྤོང་བའོ། །གཞན་བཀག་པ་ནི་ཇི་སྐད་བཤད་པའི་སྤྱིའོ། །དེ་ཁྱབ་པའི་ཕྱིར་ཏེ། རང་གི་ཁྱད་པར་རྣམས་ལ་ཁྱབ་པར་བྱེད་པ་ཉིད་ཀྱི་ཕྱིར་ཞེས་པའི་དོན་ཏོ། །གཞན་
[277a.4]བཀག་པའི་ཞེས་པ་ཀྲྀ་ཏའི་སྦྱོར་བའི་མཚན་ཉིད་ཅན་གྱི་བྱེད་པ་པོ་ལ་དྲུག་པ་འདིའོ། །དེ་ཁྱད་དོན་དང་ཐ་དད་མེད། །ཅེས་པ་གཞན་སེལ་བའི་ཁྱད་པར་བརྗོད་པ་རྣམས་དང་སྟེ། རྫས་ལ་སོགས་པའི་སྒྲ་རྣམས་དང་ཡོད་པ་ལ་སོགས་པའི་སྒྲ་གཞི་མཐུན་པའོ་ཞེས་པའི་དོན་ཏོ། །སྤྱིའི་
[277a.5]སྒྲའི་ནི་ཞེས་པ་ལ་སོགས་པ་སྟེ། སྤྱིའི་སྒྲའི་གང་བྱ་བ་སྟེ། རྟོགས་པར་བྱ་བའོ། །དེ་ཡང་ཅི་ལྟ་བུ་ཞེ་ན། དོན་གཞན་བསལ་བ་དེ་ནི་རང་གི་དོན་མ་སྤངས་པས་སོ། །འདིས་ནི་ཁྱབ་པར་བྱེད་པ་ཉིད་གསུངས་སོ། །ཇི་ལྟར་རིགས་མངོན་པར་བརྗོད་པ་ན། རིགས་གཞན་རྣམས་ཡོངས་
[277a.6]སུ་སྤོང་བ་དེ་ལྟར་དོན་གཞན་སེལ་བ་མངོན་པར་བརྗོད་པ་ན་རྫས་ཉིད་ལ་སོགས་པའི་ཁྱད་པར་རྣམས་ནི་མ་ཡིན་ཏེ། ཐ་མི་དད་པའི་དངོས་པོའི་ཡོད་པའི་སྒྲ་ལས་རྫས་མ་སྤངས་པ་ཉིད་ལ་སོགས་པའི་རྣམ་པ་ཅན་ནི་བློ་ལ་སོ་སོར་སྣང་བའི་ཕྱིར་རོ། །ནིའི་སྒྲ་ནི་གང་གི་ཕྱིར་གྱི་དོན་ལའོ་ཅེས་
[277a.7]པའི་སྒྲ་ནི་དེའི་ཕྱིར་གྱི་དོན་ཅན་ནོ། །གང་གི་ཕྱིར་འདི་ལྟར་ཡིན་པ་དེའི་ཕྱིར། ཐ་དད་པའི་དོན་ཅན་རྫས་ལ་སོགས་པའི་སྒྲ་རྣམས་དང་ཡོད་པའི་སྒྲ་གཞི་མཐུན་པ་ཉིད་འཐད་པའོ། །ཅི་ལྟར་བྱས་ནས་ཤེ་ན་ཤེས་པ་གང་འདི་ནི་དངོས་པོའི་རང་བཞིན་འཛིན་པའི་ཉམས་སུ་མྱོང་བས་བྱས་པའི་
[277b]
[277b.1]བག་ཆགས་ལ་བརྟེན་ནས། ཕྱི་རོལ་གྱི་དོན་གྱི་ཡུལ་ཅན་མ་ཡིན་ཡང་དེའི་ཡུལ་ཅན་བཞིན་དང་། འབྲས་བུ་ཐ་མི་དད་པའི་དངོས་པོ་ལས་རབ་ཏུ་སྐྱེས་པའི་ཕྱིར་ཐ་མི་དད་པའི་དོན་འཛིན་པ་ལྟ་བུའི་རྣམ་པར་རྟོག་པ་སྐྱེའོ། །དེ་ལ་གང་དོན་གྱི་རྣམ་པར་སྣང་བ་ཐ་སྙད་བྱེད་པ་པོ་རྣམས་
[277b.2]ཀྱིས་ཕྱི་རོལ་གྱི་དོན་ཉིད་དུ་ལྷག་པར་ཞེན་པ་དེ་ལ་གཞི་མཐུན་པ་ཉིད་དུ་རྣམ་པར་གཞག་གི །རང་གི་མཚན་ཉིད་ལ་ནི་མ་ཡིན་ཏེ། བློ་ལ་མི་སྣང་བའི་ཕྱིར་རོ། །ཡོད་པ་མ་ཡིན་པ་ལས་ལོག་པའི་ངོ་བོར་སོ་སོར་སྣང་བཞིན་པ་དེ་ནི་ཐ་མི་དད་པའི་རྣམ་པའི་རྗེས་སུ་སོང་བར་སོ་སོར་སྣང་ཞིང་།
[277b.3]ཡོད་པ་མ་ཡིན་པ་ལས་ལྡོག་པ་དེ་ཁོ་ན་ནི་ཡང་རྫས་མ་ཡིན་པ་ཉིད་ལ་སོགས་པ་ལས་ཀྱང་ལོག་པ་སྟེ། རྫས་ཉིད་ལ་སོགས་པའི་རྣམ་པ་གཉིས་པ་དང་རྗེས་སུ་ལྡན་པ་དང་ཐ་མི་དད་པར་སོ་སོར་སྣང་ངོ་། །དེའི་ཕྱིར་དངོས་པོ་གཅིག་ཡོད་པ་ཉིད་དང་རྫས་ཉིད་དུ་གསལ་བཞིན་པ་ནི་
[277b.4]ཡོད་པའི་རྫས་སོ་ཞེས་ཡོད་པ་དང་རྫས་ཀྱི་སྒྲ་དག་གིས་བརྗོད་པར་བྱའོ་ཞེས་གཞི་མཐུན་པ་ཉིད་དུ་རྣམ་པར་གཞག་པར་བྱའོ། །དེ་ལྟར་ནི་རང་གི་དོན་ལ་མི་འཁྲུལ་ལོ་ཞེས་པ། ཚོགས་པའི་དོན་ནི་ཁྱད་པར་དུ་བྱས་པ་སྟེ། གལ་ཏེ་དེ་རྗོད་པར་བྱེད་པར་ཚིག་འགྱུར་ན། དེའི་ཚེ་དེ་མེད་
[277b.5]ན་ཡང་ཚིག་འཇུག་པའི་ཕྱིར་དེ་རྟོགས་པར་མི་འགྱུར་རོ། །གང་གི་ཕྱིར་ཚོགས་པ་ནི་སྒྲ་གཞན་ཁོ་ན་སྟེ་དེའི་རྗོད་བྱེད་ཡིན་པ་དེའི་ཕྱིར་འཁྲུལ་པ་མ་ཡིན་ནོ། །ཕྱི་མའི་ཡང་ཞེས་པ། རང་དབང་མེད་ཕྱིར་དེ་ལྡན་མིན། །ཞེས་པ་འདིའིའོ། །དངོས་སུ་འཇུག་ཕྱིར་ཞེས་པ་དེ་
[277b.6]དང་ལྡན་པའི་ཕྱོགས་བཞིན་དུ་ཡོན་ཏན་གྱི་ངོ་བོ་ཕན་བཏགས་པའི་དངོས་པོ་སྒྲས་བརྗོད་པར་བྱ་བ་མ་ཡིན་པས་ཏེ། དེར་ནི་ཡོན་ཏན་གཞན་གྱིས་ཕན་འདོགས་པ་འགལ་བའི་ཕྱིར་དོར་ཞིང་། འདིར་ནི་ཡོད་པ་ཉིད་ལ་སོགས་པའི་ཡོན་ཏན་གཞན་ལ་མ་ལྟོས་པར་ཡོད་པ་མ་ཡིན་པ་
[277b.7]བསལ་བའི་དངོས་པོ་ལ་སྒྲ་འཇུག་གོ། །དེ་སྟོན་ཏེ་དོན་གཞན་ཉེ་བར་བླངས་ནས་ཞེས་པ་ལ་སོགས་པའོ། །དེའི་ཕྱིར་གཞན་དབང་ཉིད་ཡིན་པས་ཞེས་པ་སྟེ། གང་ཉེ་བར་བླངས་ནས་རྫས་ལ་སྒྲ་འཇུག་པ་གཞན་སེལ་བ་ཞེས་བྱ་བ་རིགས་ལ་སོགས་པ་ལྟར་དོན་གཞན་ཅུང་ཟད་ཅིག་
[278a]
[278a.1]མ་ཡིན་ཏེ། དེའི་ཕྱིར་བར་ཆོད་པ་མེད་པའི་ཕྱིར་ཅི་ཞིག་ལས་གཞན་གྱི་དབང་ཉིད་ཡིན། དེ་ཁོ་ན་ནི་དངོས་པོ་ཡོད་པ་མ་ཡིན་པ་ལས་ལོག་པ་དངོས་སུ་བརྗོད་པར་བྱ་བ་སྟེ། དེའི་ཕྱིར་དེའི་ཁྱད་པར་གང་ཡིན་པ་དེ་ལ་ཐ་མི་དད་པའི་ཕྱིར་སྤོང་བར་བྱ་བ་མ་ཡིན་ནོ། །
[278a.2]དེ་ཉིད་ཀྱི་ཕྱིར་བཏགས་པའི་ཉེས་པ་ཡང་མེད་དེ། གཞན་དུ་ན་གཙོ་བོར་འཇུག་པའི་སྒྲ་ནི་རྫས་ལ་སོགས་པ་རྣམས་ལ་གདགས་པར་བྱ་བ་མ་ཡིན་པས་སོ། །འང་མ་ཡིན་ཞེས་པ་ལ་སོགས་པ་ཁྱད་པར་ནི་མཐའ་ཡས་པ་ཐུག་པ་མེད་པ་སྟེ། དེའི་ཕྱིར་མ་བརྗོད་པའི་སྐྱོན་མེད་དོ། །དེ་ལྡན་
[278a.3]ཁྱད་པར་ཁོ་ནར་བརྗོད། །དེ་ཡང་སྔར་ནི་བསལ་བ་ཡིན། །ཞེས་པ་འདིས་བཤད་པའོ། །ཁྱབ་པར་བྱེད་པ་མ་ཡིན་པའི་ཕྱིར་སྤྱི་མ་ཡིན་པའི་སྐྱོན་ཡང་མེད་དེ། གང་བཤད་པ། དེ་ལྡན་དོན་ནི་བུམ་སོགས་པའང་། །ཞེས་པ་ལ་སོགས་པས་སོ། །ཅིའི་ཕྱིར་མེད་ཅེ་ན་གསུངས་པ།
[278a.4]དོན་གཞན་སེལ་བ་ཙམ་ནི་ཐ་མི་དད་པའི་ཕྱིར་ཞེས་པ་སྟེ། འདིས་ནི་ཐ་དད་མེད་ཕྱིར་ཞེས་པ་འདི་བཀྲལ་བའོ། །ཐ་དད་ཡོད་ན་ནི་མཐའ་ཡས་པ་ཉིད་ཀྱི་སྐྱོན་དུ་འགྱུར་ཞིང་། སྤྱི་མེད་པའི་སྐྱོན་དུ་ཡང་ངོ་། །གཞན་ནི་གཞན་ལ་མི་འཇུག་པ་ལས་དོན་གཞན་སེལ་བ་ཙམ་ནི་ཐ་མི་དད་པ་སྟེ།
[278a.5]དེ་ལ་ཅི་ལས་སྐྱོན་འདིའི་སྐབས་ཡིན། འོ་ན་གང་ཤེས་པའི་སྤྱིའི་རྣམ་པ་ནི་སྤྱིར་རྣམ་པར་གཞག་ཅིང་། དེ་ཡང་ཤེས་པ་ལས་ཐ་མི་དད་པ་ཉིད་ཀྱི་ཕྱིར། གཞན་ལ་མི་འཇུག་པ་སྟེ། ཅི་ལྟར་སྤྱི་ཡིན་ཞེ་ན་གསུངས་པ། རྫས་མ་ཡིན་པ་ཉིད་ཀྱི་ཕྱིར་རོ་ཞེས་པ་ལ་སོགས་པ་སྟེ། རྣམ་
[278a.6]པར་ཤེས་པའི་རྣམ་པ་ཡང་སྤྱིའི་ངོ་བོར་ཡོངས་སུ་མ་གྲུབ་པ་ཉིད་ཀྱི་ཕྱིར་སྤྱི་རྫས་སུ་ཡོད་པ་མ་ཡིན་པ་ཁོ་ན་སྟེ། འདི་མི་འདོད་པ་མ་ཡིན་པ་ཁོ་ནའོ། །འདི་སྐད་བཤད་པར་འགྱུར་ཏེ། ལོག་པའི་རྣམ་པར་རྟོག་པ་འདི་ཁོ་ན་དོན་རྣམས་ལ་གཅིག་གི་བདག་ཉིད་དུ་འཛིན་པ་སྟེ། དངོས་
[278a.7]པོར་ན་སྤྱི་ཞེས་བྱ་བ་མེད་པ་ཁོ་ནའོ། །སྐྱེ་བོ་འཁྲུལ་པའི་བསམ་པའི་དབང་ལས་སྤྱི་རུ་རྣམ་པར་གཞག་པ་འདི་བྱ་བ་འབའ་ཞིག་གོ། །ཐ་སྙད་བྱེད་པ་པོ་འཁྲུལ་པ་རྣམས་ནི་རང་གི་ཤེས་པའི་སྣང་བའི་ཕྱིར་བྱེ་བྲག་ཁོ་ན་ཕྱི་རོལ་གྱི་གསལ་བའི་ཁྱད་པར་ལ་རྗེས་སུ་སོང་བ་ལྟ་བུར་སྤྱིར་སེམས་
[278b]
[278b.1]པར་བྱེད་དོ་ཞེས་བྱས་ནས་སོ་ཞེས་པའོ། །དེ་ཉིད་ཀྱི་ཕྱིར་ཞེས་པ། དངོས་སུ་འཇུག་པའི་ཕྱིར་ཏེ། དེ་ལ་ནི་ཡོད་པ་ཉིད་ཀྱི་ཕྱིར་ཁྱད་པར་བྱེད་ཀྱི་ངོ་བོ་བརྗོད་པའི་ཕྱིར་དངོས་པོའི་རང་གི་ངོ་བོའི་བར་དུ་ཆོད་པར་བྱེད་དོ། །དེ་དང་འབྲེལ་པ་ཅན་གྱི་བུམ་པ་ཉིད་ལ་སོགས་པ་རྣམས་ནི་ཡོད་པ་ཉིད་དང་འབྲེལ་པ་
[278b.2]ཅན་མ་ཡིན་ཏེ། རིགས་ལ་རིགས་མེད་པའི་ཕྱིར་རོ། །དེའི་ཕྱིར་དེའི་སྒོ་ནས་དོན་དུ་མ་འདོད་པའི་རྒྱུ་མ་ཡིན་ནོ། །འདི་ལ་ནི་དངོས་སུ་ཡོད་པ་མ་ཡིན་པ་འགོག་པས་རང་གི་དོན་ལ་སྒྲ་འཇུག་ཅིང་། དེའི་ཕྱིར་དེའི་ཁྱད་པར་འདོད་པའི་རྒྱུ་ཉིད་དུ་འཐད་དེ། སྤྱི་གཞན་ལྡན་པ་མེད་པར་ཡང་ངོ་། །
[278b.3]དངོས་སུ་དོན་གཞན་བཀག་པའི་ཕྱིར་ཞེས་པ། དོན་གཞན་འགེགས་པའི་ཐབས་སུ་གྱུར་པ་རང་གི་དོན་རྗོད་པར་བྱེད་པ་ནི་དེ་སྐད་དུ་བཤད་དེ། རང་གི་དོན་དངོས་སུ་རྗོད་པར་བྱེད་པའི་ཕྱིར་རོ་ཞེས་པའི་དོན་ཏོ། །འདིས་ནི་དེ་ཉིད་ཀྱི་ཕྱིར་ཞེས་པ་འདིའི་དོན་བསྟན་ཏོ། །འདིར་ཡང་དངོས་པོར་ཡོད་པའི་
[278b.4]རིགས་གཞན་དང་ལྡན་པ་དགག་པ་བརྗོད་པར་འདོད་ཀྱི། བརྟགས་པའི་རིགས་གཞན་དང་ལྡན་པ་ཡང་ནི་མ་ཡིན་ནོ། །དེ་ལྟར་ནི་གང་ཡོད་པའོ་ཞེས་བརྗོད་པ་དེ་ཁོ་ན་དེ་དང་དེ་ལས་ལོག་པ་རྣམ་པ་གཞན་དུ་སོ་སོར་སྣང་བ་ནི་བརྟགས་པའི་སྤྱི་གཞན་དང་ལྡན་པར་དེ་ལྟ་དེ་ལྟར་རྣམ་པར་འབྱེད་པས་སོ། །
[278b.5]འདི་ཁོ་ན་ལ་རྣམ་པར་གནས་སོ་ཞེས་པ་ནི་རིགས་ཤིང་ལྡན་ནོ་ཞེས་པའི་དོན་ཏོ། །ཐ་མི་དད་པའི་ཕྱིར་གཅིག་ཉིད་དེ། དོན་གཞན་སེལ་བ་ནི་བློ་ལ་ཐ་མི་དད་པའི་ངོ་བོ་ཉིད་དུ་སོ་སོར་སྣང་བས་ན། ཐ་སྙད་ཀྱི་རྗེས་སུ་འགྲོ་བ་རྣམས་ཀྱིས་གཅིག་ཉིད་དུ་ལྷག་པར་ཞེན་པའོ་ཞེས་པས་དེ་གཅིག་ཉིད་དུ་རྣམ་
[278b.6]པར་གཞག་གོ། །རྟེན་མི་འཆད་པའི་ཕྱིར་རྟག་པ་ཉིད་དེ། རྟེན་ནི་དེའི་དོན་གྱི་བྱ་བ་བྱེད་པ་ཉིད་ཀྱིས་དེ་མི་བྱེད་པ་རྣམས་ལས་ལོག་པའི་ཁྱད་པར་རྣམས་ཡིན་ཞིང་དེ་རྣམས་ནི་རང་ཉམས་སུ་མྱོང་བའི་སྒོ་ནས་སྒྲའི་དོན་གྱི་རྒྱུ་མཚན་དུ་འགྱུར་ཏེ་སྔར་ཇི་སྐད་བཤད་པ་བཞིན་ནོ། །དེ་རྣམས་
[278b.7]ཀྱང་ཆད་པ་མེད་པ་སྟེ་མཐའ་ཡས་པ་ཉིད་ཀྱི་ཕྱིར་རོ། །དེའི་ཕྱིར་དེ་རྣམས་ཇི་སྙེད་པ་དེ་སྙེད་དེའོ་ཞེས་པས་རྟག་པ་ཉིད་དུ་བརྟག་པ་ཡང་འཐད་དོ། །དོན་མཐའ་དག་རྟོགས་པའི་ཕྱིར་ནི་རེ་རེ་ལ་ཡོངས་སུ་རྫོགས་པ་སྟེ། དོན་གཞན་སེལ་བ་ནི་པ་ལ་ཤ་ལ་སོགས་པ་ལ་སོ་སོར་བློ་ཡོངས་སུ་འཇུག་
[279a]
[279a.1]པ་ན། ཐ་སྙད་ཀྱི་རྗེས་སུ་འབྲང་བའི་རྟོགས་པ་པོ་རྣམས་ཀྱིས་ཐམས་ཅད་ཀྱི་བདག་ཉིད་དུ་རྟོགས་སོ་ཞེས་པས་དེའི་རྟོགས་པའི་ངོར་རྣམ་པར་གཞག་པར་བྱ་བཞིན་པ་མཐའ་དག་པའི་དོན་ཡོངས་སུ་རྫོགས་པར་མི་འགལ་ལོ། །ཡོན་ཏན་འཕེལ་བའི་ཕྱིར་ཞེས་པ་རིགས་ཀྱི་
[279a.2]ཆོས་རྣམ་པར་གཞག་པ་ནི་འདི་ཁོ་ན་ལ་རིགས་པ་ཉིད་ཀྱི་ཕྱིར་རོ། །རིགས་དངོས་པོར་ཡོད་པའི་ཕྱོགས་ལ་ནི་ཇི་ལྟར་དེ་མི་འཐད་པ་དེ་ལྟར་སྤྱི་བརྟག་པའི་སྐབས་སུ་རིག་པར་བྱའོ། །གཞན་སེལ་ངེས་པ་སྤྱི་ལས་ཡིན། །ཞེས་པ་རྒྱུ་འགའ་ཞིག་ལས་ཀྱང་མ་ཡིན་ནོ་ཞེས་པའི་དོན་ཏོ། །སྔོན་པོ་
[279a.3]ལ་སོགས་པ་རྣམས་ཕན་ཚུན་གྱི་ངོ་བོ་ཡང་དག་པར་རྗེས་སུ་འགྲོ་བ་མེད་པའི་ཕྱིར། རོ་ལ་སོགས་པ་བཞིན་དུ་དེ་རྣམས་ཀྱང་ཐ་དད་དོ། དེ་ལས་ཐ་དད་པར་མཚུངས་པ་ལ་གཟུགས་ཀྱི་སྒྲས་རོ་ལ་སོགས་པ་རྣམས་སེལ་གྱི་ཁ་དོག་གང་ཡང་རུང་བ་བརྗོད་པ་ན་ཁ་དོག་ལྷག་མ་རྣམས་ནི་མ་ཡིན་
[279a.4]ཞེས་པ་འདི་ལ་ངེས་པའི་རྒྱུ་ཅི་ཡང་མེད་དོ། །འདིས་ནི་ཁས་བླངས་དང་འགལ་བ་སྨྲས་སོ། །འོ་ན་ཁྱོད་ལ་ཡང་རྩོད་པ་མཚུངས་པ་མ་ཡིན་ནམ། ཅིའི་ཕྱིར་གཟུགས་ཀྱི་སྒྲ་སྔོན་པོ་ལ་སོགས་པ་རྣམས་ཐམས་ཅད་ལ་འཇུག་ཅིང་། ཡང་ཁ་དོག་གང་ཡང་རུང་བ་བརྗོད་པ་ན་རོ་ལ་
[279a.5]སོགས་པ་རྣམས་ལ། གཞན་དུ་ལྷག་རྣམས་ལ་མི་འཇུག །ཅེས་པ་དེའི་ཕྱིར་སྨྲས་པ་གང་གི་ནི་ཞེས་པ་ལ་སོགས་པ་སྟེ། གང་གི་རྫས་སུ་ཡོད་པའི་སྤྱི་གཟུགས་ཉིད་ཐ་མི་དད་པ་དེ་ལ་ནི། དེས་བྱས་པའི་ངེས་པ་སྟེ། གང་ལ་དེ་ཡོད་པ་དེ་ཁོ་ན་ལ་གཟུགས་ཀྱི་སྒྲ་འཇུག་ཅིང་དེ་ཡང་
[279a.6]སྔོན་པོ་ལ་སོགས་པ་རྣམས་ཁོ་ན་ལ་ཡོད་ཀྱི་རོ་ལ་སོགས་པ་ལ་ནི་མ་ཡིན་ནོ། །དེའི་ཕྱིར་རྫས་སུ་ཡོད་པའི་སྤྱི་ཁས་བླང་བར་བྱའོ་ཞེས་པ་བསམས་པའོ། །འཇིག་རྟེན་གྲགས་པ་བརྩལ་མི་བྱ། །ཞེས་པའི་དབྱིངས་རྣམས་ནི་དུ་མའི་དོན་ཅན་ཉིད་ཀྱི་ཕྱིར་མངོན་པར་ཞེན་པར་མི་བྱའོ་ཞེས་པའི་
[279a.7]དོན་ཏོ། །ཅིའི་ཕྱིར་ཞེ་ན། གསུངས་པས་སོ་ཞེས་པ་ལ་སོགས་པ་སྟེ། སྐྱེ་བོའི་ངེས་པའི་ཚིག་ནི་འཇིག་རྟེན་གྱི་ཐ་སྙད་དོ། །ཚོགས་པའི་སྒྲ་རྣམས་ནི་ཡོད་པ་ཉིད་ལ་སོགས་པ་དངོས་པོར་གྱུར་པའི་སྤྱི་རབ་ཏུ་འཇུག་པའི་རྒྱུ་མཚན་རྒྱུར་བྱས་ནས་དེ་དང་ལྡན་པ་ལ་འཇུག་མོད།
[279b]
[279b.1]ཡོད་པ་ཉིད་ལ་སོགས་པ་རྫས་སུ་ཡོད་པའི་སྤྱི་ལ་རྒྱུ་མཚན་གཞན་མེད་པའི་ཕྱིར་ཡོངས་སུ་བཤད་པ་འདོད་རྒྱལ་བའོ་ཞེས་པས་འདི་ལྟར་མངོན་པར་ཞེན་པར་མི་བྱ་སྟེ། དངོས་པོར་གྱུར་པའི་སྤྱི་མི་རིགས་པའི་ཕྱིར་རོ། །མིང་ཡང་ཞེས་པ་ལ་སོགས་པ་ཐ་སྙད་ཀྱང་རྒྱུག་པར་མི་བྱ་ཞིང་མི་འདའ་བར་
[279b.2]བྱའོ་ཞེས་པའི་དོན་ཏོ། །དེའི་ཕྱིར་ཞེས་པ་གང་གི་ཕྱིར་བཅོམ་ལྡན་འདས་ཀྱིས་དེ་ལྟར་གསུངས་ཤིང་མངོན་པར་བརྗོད་པའོ། །ཡང་དག་པའི་དོན་ཅན་ཉིད་དུ་ཞེས་པ། གང་རྣམས་ལ་ཡང་དག་པའི་དངོས་པོར་གྱུར་པའི་སྤྱིའམ། རབ་ཏུ་འཇུག་པའི་རྒྱུ་མཚན་གྱི་ཡུལ་ཡོད་པ་དེ་རྣམས་དེ་
[279b.3]སྐད་དུ་བརྗོད་དེ། དེའི་དངོས་པོ་ནི་ཡང་དག་པའི་དོན་ཅན་ཉིད་དོ། །དེས་བརྩལ་བར་མི་བྱ་ཞིང་མངོན་པར་ཞེན་པར་མི་བྱ་སྟེ། འདི་ལྟར་གྱུར་པའི་མཚན་ཉིད་ཀྱི་གསུམ་པའོ། །འཇིག་རྟེན་བཞིན་ཁོ་ན་རྗེས་སུ་རྟོགས་པར་བྱའོ་ཞེས་པ་ཇི་ལྟར་འཇིག་རྟེན་པ་མངོན་པར་མ་ཞེན་པར་
[279b.4]རྗེས་སུ་རྟོགས་པར་བྱེད་པ་དེ་ལྟར་ཁོ་བོ་ཅག་གིས་ཀྱང་རྗེས་སུ་རྟོགས་པར་བྱའོ། །དེ་ལྟར་འགྱུར་མོད་ཀྱི་དངོས་པོར་ཡོད་པའི་སྤྱི་མེད་པར་འཇིག་རྟེན་ན་ཡང་གཟུགས་ཀྱི་སྒྲ་རོ་ལ་སོགས་པ་རྣམས་ལ་བཞིན་དུ་སྔོན་པོ་ལ་སོགས་པ་རྣམས་ལ་འགྲུབ་པ་མ་ཡིན་པ་ཁོ་ནའོ་ཞེ་ན། དེའི་ཕྱིར་གསུངས་པ།
[279b.5]གྲུབ་པོ་ཞེས་པ་ལ་སོགས་པ་སྟེ། དངོས་པོར་ཡོད་པའི་སྤྱི་མེད་ཀྱང་། །ཀུན་རྫོབ་ཏུ་ཡོད་པའི་སྤྱི་ཁོ་ན་ལས་གཟུགས་ཀྱི་སྒྲ་འཇིག་རྟེན་ན་སྔོན་པོ་ལ་སོགས་པ་རྣམས་ཁོ་ན་ལ་གྲུབ་ཀྱི་རོ་ལ་སོགས་པ་རྣམས་ལ་ནི་མ་ཡིན་ནོ། །དེར་ནི་སྔོན་པོ་ལ་སོགས་པ་ཁོ་ན་ལ་འཇུག་གི་རོ་ལ་སོགས་པ་རྣམས་ལ་
[279b.6]མ་ཡིན་ནོ། །རང་བཞིན་གྱིས་རང་ཉམས་སུ་མྱོང་བའི་སྒོ་ནས་རྣམ་པ་དེ་ལྟ་བུའི་སྤྱིའི་རྣམ་པ་རྣམ་པར་རྟོག་པའི་བློ་ལ་གཏོད་པར་བྱེད་དེ། གང་གིས་འཇིག་རྟེན་དེ་རྣམས་ཁོ་ན་ལ་གཟུགས་ཀྱི་ཐ་སྙད་བྱེད་ཅིང་ཅིག་ཤོས་ལ་མ་ཡིན་པའོ། །དེ་ལ་འདི་འགྱུར་མོད་གལ་ཏེ་དེ་འཇུག་པའི་རྒྱུ་མཚན་
[279b.7]ཀུན་རྫོབ་ཏུ་ཡོད་པའི་སྤྱི་སྔོན་པོ་ལ་སོགས་པ་ཁོ་ན་ལ་འཇུག་པར་འགྱུར་ན། གཟུགས་ཀྱི་སྒྲ་སྔོན་པོ་ལ་སོགས་པ་ཁོ་ན་ལ་འགྲུབ་པར་འགྱུར་མོད་དེ་ཡང་མེད་དེ། ཤིན་ཏུ་ཐ་དད་པར་མཚུངས་པ་ལ་སྔོན་པོ་ལ་སོགས་པ་ཁོ་ན་ལ་དེ་འཇུག་གི་རོ་ལ་སོགས་པ་ལ་མ་ཡིན་ནོ་ཞེས་པ་འདི་ཅི་ཞིག་
[280a]
[280a.1]ལས་ཡིན། རོ་ལ་སོགས་པ་ལ་མི་འཇུག་པ་བཞིན་དུ་སེར་པོ་ལ་སོགས་པ་ལ་ཡང་མི་འཇུག་གོ་ཞེ་ན་གསུངས་པ། གཟུགས་ཉིད་ལ་ཡང་འདི་མཚུངས་སོ། །ཞེས་པ་ལ་སོགས་པ་སྟེ། ཁྱོད་ལ་ཡང་རྗེས་སུ་སྦྱོར་བ་འདི་མཚུངས་སོ་ཞེས་པའི་དོན་ཏོ། །འདི་ལ་
[280a.2]ཡོད་དོ་ཞེས་པ་ལ་སོགས་པས་རྗེས་སུ་སྦྱོར་བ་ཉིད་ཡོངས་སུ་སྤོང་ངོ་། །རང་བཞིན་ཐ་དད་པ་ཡོད་ན་ཡང་ཞེས་པ། སྔོན་པོ་ལ་སོགས་པ་རྣམས་ལ་རང་བཞིན་ཐ་དད་པ་ཡོད་ན་ཡང་ཞེས་པའི་དོན་ཏོ། །མིག་གཟུང་ཉིད་ལ་བྱ་བ་བྱས། །ཞེས་པ་མིག་གཟུང་ཉིད་ལ་སྟེ། ངེས་པའི་རྒྱུར་འདོད་པ་ལ་བྱ་བའི་
[280a.3]རྒྱུ་མཚན་ཅན་དུ་གཟུགས་ཀྱི་སྒྲ་འགྱུར་གྱི། རིགས་ཀྱི་རྒྱུ་མཚན་ཅན་དུ་ནི་མ་ཡིན་ནོ་ཞེས་ཁས་བླངས་པ་ལ་གནོད་པ་ཉིད་དུ་བྱ་བའི་རྒྱུ་མཚན་སྟོན་པར་བྱེད་པ། མིག་གིས་ཞེས་པ་ལ་སོགས་པའོ། །འོ་ན་དེ་ལྟར་ན་གཟུགས་ཉིད་ཀྱི་འཕྲོད་པ་འདུ་བ་བྱས་པར་འགྱུར་བ་མ་ཡིན་ནམ། སྒྲ་ནི་རིགས་ཀྱི་རྒྱུ་མཚན་
[280a.4]ཅན་ཁོ་ན་སྟེ། དེས་ན་བྱ་བ་བྱས་པའོ་ཞེས་བརྗོད་པར་བྱ་བ་ཅི་རིགས་ཤེ་ན་གསུངས་པ་མིག་གིས་གཟུང་བ་ཉིད་ཐ་མི་དད་ན་ཡང་ཞེས་པ་ལ་སོགས་པའོ། །འདི་ལྟར་དགོངས་ཏེ་ཐ་དད་རྣམས་ལ་ཐ་མི་དད་འཇུག་པ་མི་རིགས་པའི་ཕྱིར་ན། གཟུགས་ཉིད་ཐ་མི་དད་པའི་རྒྱུ་མཚན་དུ་རྟོག་པ་ལ།
[280a.5]གལ་ཏེ་ཡང་སྔོན་པོ་ལ་སོགས་པ་རྣམས་ལ་མིག་གིས་གཟུང་བྱ་ཉིད་ཐ་མི་དད་པ་འདོད་ན། དེ་ཁོ་ན་ལས་གཟུགས་ཞེས་པའི་མངོན་པར་བརྗོད་པ་ཐ་མི་དད་པར་འགྱུར་མོད། གཟུགས་ཉིད་ཀྱིས་ཅི་ཡིན་ཞེས་པའོ། །ཅི་སྟེ་ཞེས་པ་ལ་སོགས་པ་ལ་བསམ་པ་འདི་ཡིན་ཏེ། དངོས་པོའི་ནུས་པ་
[280a.6]རྣམས་ནི་ཐ་དད་པ་རྣམས་སོ། །དེས་ན་གཟུགས་ཉིད་ནི་མངོན་པར་བརྗོད་པ་ཐ་མི་དད་པ་འཇུག་པའི་རྒྱུ་མཚན་ཏེ། མིག་གིས་གཟུང་བྱ་ཉིད་ནི་གཟུགས་ཉིད་དང་འབྲེལ་པའིའོ་ཞེས་པའོ། །དེ་ལྟ་ན་ཡང་ཞེས་པ་ལ་སོགས་པས་ཁས་བླངས་དང་འགལ་བ་གསུངས་ཏེ། འཕྲོད་པ་འདུ་
[280a.7]བ་ནི་རྟག་པ་ཉིད་དུ་ཁས་བླངས་པའི་ཕྱིར་རོ། །དེ་ལྟར་འགྱུར་མོད་མིག་གིས་གཟུང་བར་བྱ་བ་ཉིད་ཀྱི་ཕྱིར་གཟུགས་ཉིད་འཕྲོད་པ་འདུ་བར་མི་སྨྲའི། །འོན་ཀྱང་འཕྲོད་པ་འདུས་པ་ཉིད་མངོན་པར་གསལ་བའོ་ཞེ་ན། དེའི་ཕྱིར་གསུངས་པ། གཟུགས་ཉིད་མངོན་པར་གསལ་བ་ཞེས་པ་
[280b]
[280b.1]སྟེ། བྱ་བས་བྱས་པར་ཐོབ་པོ་ཞེས་སྦྲེལ་བར་བྱའོ། །འདིས་ཀྱང་ཁས་བླངས་པས་གནོད་པ་གསུངས་ཏེ། གཟུགས་ཉིད་ལ་སོགས་པ་རྣམས་རང་གི་རྟེན་གྱིས་གསལ་བར་བྱ་བ་ཉིད་དུ་ཁས་ལེན་པའི་ཕྱིར་རོ། །མིག་གིས་གཟུང་བར་བྱ་བ་ཉིད་ཀྱང་ཞེས་པ་རང་བཞིན་གྱི་དབྱེ་བ་ཡོད་ན་ཅིའི་
[280b.2]ཕྱིར་སྔོན་པོ་ལ་སོགས་པ་རྣམས་ཁོ་ན་ལ་མིག་གིས་གཟུང་བར་བྱ་བ་ཉིད་འཇུག་གི་རོ་ལ་སོགས་པ་རྣམས་ལ་ཡང་ནི་མ་ཡིན་ནོ་ཞེས་འདི་ལ་ཡང་ངེས་པའི་རྒྱུ་བརྗོད་པར་བྱའོ། །དེའི་ཕྱིར་གདོན་མི་ཟ་བར་ཤིན་ཏུ་རིང་བར་ཡང་ཕྱིན་ནས་རང་བཞིན་ཉིད་ལ་བརྟེན་པར་བྱ་སྟེ། གང་གིས་དེ་ཁོ་ན་ལ་མིག་གིས་
[280b.3]གཟུང་བར་བྱ་བ་ཉིད་དུ་འགྱུར་གྱི་རོ་ལ་སོགས་པ་རྣམས་ལ་ནི་མ་ཡིན་པ་འདི་འདྲ་བ་ནི་སྔོན་པོ་ལ་སོགས་པ་རྣམས་ཀྱི་རང་བཞིན་མ་ཡིན་ནོ་ཞེས་པའོ། །ཁྱོད་ཀྱིས་ཇི་ལྟ་བ་དེ་ལྟར་ཁོ་བོས་ཀྱང་ངོ་ཞེས་པས་རྩོད་པའི་ལན་མཚུངས་པའོ། །རྫས་སོགས་རྣམས་ལའང་ཐལ་བར་འགྱུར། །ཞེས་པ། གལ་ཏེ་
[280b.4]གང་དུ་མིག་གིས་གཟུང་བར་བྱ་བ་ཉིད་ཡིན་པ་དེར་གཟུགས་ཉིད་ཡིན་ན། རྫས་ལ་སོགས་པ་རྣམས་ལ་ཡང་གཟུགས་ཉིད་དུ་འགྱུར་ཏེ། དེ་རྣམས་མིག་གིས་གཟུང་བར་བྱ་བ་ཉིད་ཀྱི་ཕྱིར་ཏེ། རྫས་ཉིད་དང་གྲངས་དང་ཚད་རྣམས་དང་སོ་སོ་བ་ཉིད་དང་ལྡན་པ་དང་། རྣམ་པར་དབྱེ་བ་དག་དང་།
[280b.5]གཞན་ཉིད་དང་གཞན་མིན་པ་ཉིད་དག་དང་ལས་ནི་གཟུགས་ཅན་ལ་འཕྲོད་པ་འདུ་བའི་ཕྱིར་མིག་གིས་གཟུང་བར་བྱ་བ་རྣམས་སོ་ཞེས་པའི་ཚིག་ལས་སོ། །དཀར་མིན་སོགས་ལ་ཁྱད་མེད་འགྱུར། །ཞེས་པ་ངེས་པའི་རྒྱུ་མིག་གིས་གཟུང་བྱ་ཉིད་དུ་ཁྱད་པར་མེད་པའི་ཕྱིར་དང་ངེས་པའི་རྒྱུ་
[280b.6]གཞན་མེད་པའི་ཕྱིར་གཟུགས་སོ་ཞེས་པའི་བརྗོད་པའི་རྟོགས་པ་མཚུངས་པའི་ཕྱིར་སྔོན་པོ་དང་སེར་པོ་ལ་སོགས་པ་ཐ་དད་པར་མི་འགྱུར་རོ། །གལ་ཏེ་མིག་གིས་གཟུང་བར་བྱ་བ་ཉིད་ཀྱི་ཕྱིར་སྔོན་པོ་ལ་སོགས་པ་རྣམས་གཟུགས་ཉིད་དུ་ཐ་མི་དད་པར་འདོད་ན། དེ་ལ་མིག་གིས་གཟུང་བར་བྱ་
[280b.7]བ་ཉིད་ཀྱི་ཕྱིར། དེ་བྱེ་བྲག་མེད་པ་ཡོད་ན་ཡང་། སྔོན་པོ་ཉིད་ལ་སོགས་པ་དང་ལྡན་པ་ལས་བྱེ་བྲག་ཏུ་འགྱུར་ན་མ་ཡིན་ཏེ། དེ་ཁོ་ན་མི་ལྡན་པའི་ཕྱིར་རོ། །སྔོན་པོ་ལ་སོགས་པ་རྣམས་ལ་ནི་གང་ལས་སྔོན་པོ་ཉིད་ལ་སོགས་པ་འཕྲོད་པ་འདུ་བ་ངེས་པར་འགྱུར་བ་རྒྱུ་སོ་སོར་ངེས་པ་ཅུང་ཟད་ཀྱང་
[281a]
[281a.1]ཡོད་པ་མ་ཡིན་པས་སོ། །ནུས་པ་ཐ་དད་པའི་རྒྱུ་ཡོད་དོ་ཞེ་ན། དེ་ལ་ཡང་གང་ལས་དེ་འགའ་ཞིག་ཁོ་ན་ལ་འཇུག་གི་གཞན་ཐམས་ཅད་ལ་མ་ཡིན་པའི་རྒྱུ་ཅི་ཞིག་ཡོད་ཅེས་པས་འདི་ནི་ལན་ལ་ཡིན་ནོ། །དེའི་ཕྱིར་གདོན་མི་ཟ་བར་ཞེས་པ། གང་གི་ཕྱིར་མིག་གིས་
[281a.2]གཟུང་བྱ་ཉིད་ནི་གཟུགས་ཉིད་དང་ལྡན་པའི་ངོར་གཏན་ཚིགས་ཉིད་དུ་རིགས་པ་མ་ཡིན་པ་དེའི་ཕྱིར་མིག་གིས་གཟུང་བྱ་ཉིད་མེད་པར་ངེས་པར་སྦྱོར་བ་ལས་སྔོན་པོ་ལ་སོགས་པ་རྣམས་ཁོ་ན་ལ་གཟུགས་ཀྱི་སྒྲ་འཇིག་རྟེན་ན་གྲགས་པའི་རྗེས་སུ་འབྲང་བར་བྱའི་རོ་ལ་སོགས་པ་རྣམས་ལ་
[281a.3]ནི་མ་ཡིན་ནོ། །གྲགས་པའི་རྒྱུ་མཚན་ཡང་ཀུན་རྫོབ་ཏུ་ཡོད་པའི་སྤྱི་ཁོ་ན་སྟེ། རྫས་སུ་ཡོད་པ་ནི་མ་ཡིན་ནོ་ཞེས་པ་དགོངས་པའོ། །སླར་ཡང་དོན་གཞན་ལས་ལྡོག་པའི་སྒོས་སྒྲ་རང་གི་དོན་རྟོགས་པར་བྱེད་དོ་ཞེས་པ་འདི་བསྟན་པར་བྱ་བའི་ཆེད་དུ་གསུངས་པ། གལ་ཏེ་ཡང་ཞེས་པ་ལ་
[281a.4]སོགས་པའོ། །རྗེས་འགྲོ་ཉིད་ལས་འགྲུབ་པར་འགྱུར། །ཞེས་པ་དོན་གཞན་ལས་ལྡོག་པ་ལ་མི་ལྟོས་པ་ཉིད་ན་རྗེས་འགྲོ་འབའ་ཞིག་པ་ཁོ་ན་ལས་ཁྱད་པར་གྱི་བརྗོད་པར་བྱ་བ་ངེས་པར་འགྱུར་གྱི། རྗེས་སུ་འགྲོ་བ་དང་ལྡོག་པ་ལྷན་ཅིག་པ་དག་ལས་ནི་མ་ཡིན་ནོ། །དེ་ལྟར་འགྱུར་མོད།
[281a.5]འགྱུར་དུ་ཆུག་ཀྱང་དེ་ལ་གནོད་པ་མེད་པ་ཅི་ཡིན་ཞེ་ན་གསུངས་པ་འདོད་པ་ཡང་ཞེས་པ་ལ་སོགས་པའོ། །བྱེད་པ་པོའི་མཆོག་ཏུ་ཐོབ་པར་འདོད་པ་ནི་ཞེས་པ། བྱེད་པ་པོ་ཁོ་ནའི་སྟེ། བྱེད་པ་པོ་མིན་པའི་ནི་མ་ཡིན་ཞིང་བྱེད་པ་པོའི་སྒྲ་ནི་བྱེད་པ་པོ་མིན་པ་རྣམ་པར་གཅོད་པར་བྱེད་ཅིང་མཆོག་
[281a.6]ཏུ་འདོད་པ་རང་གི་དོན་དང་འབྲེལ་པར་བྱེད་དོ། །དེ་བཞིན་དུ་ཤིན་ཏུ་ཐོབ་པར་འདོད་པ་དེ་ཁོ་ན་སྟེ། ཤིན་ཏུ་ཐོབ་པར་འདོད་པ་མིན་པ་ནི་མ་ཡིན་ཤིན་ཏུ་ཐོབ་པར་འདོད་པའི་སྒྲ་ཡང་མཆོག་ཏུ་ཐོབ་འདོད་མིན་པ་རྣམ་པར་བསལ་ནས་བྱེད་པ་པོའི་སྒྲ་དོན་རང་གི་དོན་དང་སྦྱོར་བར་བྱེད་དོ། །དེ་ལྟར་
[281a.7]གཉིས་ཀ་ངེས་པར་གཟུང་བས་ཁྱད་པར་དུ་བྱས་པའི་དོན་ངེས་པའི་ཕྱིར་མངོན་པར་བརྗོད་པ་འབྲས་བུ་དང་བཅས་པ་ཉིད་དོ། །གང་ཡང་རུང་བ་ངེས་པར་གཟུང་བས་ནི་ཇི་ལྟར་ན། སྤྲིན་རྣམས་ཡོད་ན་ཆར་འབབ་པར་འགྱུར་རོ་ཞེས་པ་ལྟ་བུ་སྟེ། ཡོད་པ་ཁོ་ན་ཡིན་གྱི་མེད་པ་ནི་མ་ཡིན་གྱི་
[281b]
[281b.1]མི་འགྱུར་བ་ཁོ་ནའོ་ཞེས་པའོ། །དེ་ལྟར་གང་ཡང་རུང་བའམ། གཉིས་ཀ་ངེས་པར་གཟུང་བས་མངོན་པར་བརྗོད་པ་འབྲས་བུ་དང་བཅས་པའི་ཕྱིར། ལྡོག་པ་ལས་ཀྱང་ཁྱད་པར་གྱི་དོན་མངོན་པར་བརྗོད་པར་འདོད་དེ། དེས་ན་དོན་གཞན་ལས་ལྡོག་པ་ལ་མི་ལྟོས་པ་ཉིད་ལ་སྒྲ་མི་འཐོབ་པོ་
[281b.2]ཞེས་པའོ། །དེ་ལྟར་ནི་གལ་ཏེ་བྱེད་པ་པོ་མིན་པའི་ཡང་མཆོག་ཏུ་འདོད་པ་ལས་ཡིན་ན། བྱེད་པ་པོའི་སྒྲ་བརྗོད་པ་དོན་མེད་པར་འགྱུར་ཞིང་། དེ་བཞིན་དུ་གལ་ཏེ་མཆོག་ཏུ་འདོད་པ་མ་ཡིན་པ་ཡང་ལས་ཡིན་ན། མཆོག་ཏུ་ཐོབ་པར་འདོད་པ་ཞེས་བརྗོད་པ་འབྲས་བུ་མེད་པར་འགྱུར་རོ། །དེའི་
[281b.3]ཕྱིར་དོན་གཞན་ལས་ལྡོག་པའི་སྒོ་ནས་སྒྲས་དོན་རྟོགས་པར་བྱེད་དོ་ཞེས་ཁས་བླང་བར་བྱའོ། །འོ་ན་ཡང་ཞེས་པ་ལ་སོགས་པ་ནི་དོན་གཞན་མེད་པ་ཙམ་སྒྲའི་དོན་དུ་སྒྲོ་བཏགས་ནས་རྩོད་པར་བྱེད་དོ། །སེལ་བ་སྨྲ་བ་པོ་ལ་དོན་གཞན་ལས་ལྡོག་པ་ཙམ་ལས་གཞན་པའི་བརྗོད་པར་བྱ་བ་ཡོད་
[281b.4]པ་མ་ཡིན་ཞིང་དོན་གཞན་ལས་ལྡོག་པ་ཡང་ལྡོག་པ་འབའ་ཞིག་པ་ཁོ་ནས་བྱ་བའོ་ཞེས་པས་ལྡོག་པ་ཁོ་ན་ལས་རྗོད་པར་བྱེད་པར་འགྱུར་རོ། །སྒྲས་དོན་གཞན་ལས་ལྡོག་པ་ཙམ་བྱ་བ་མ་ཡིན་པ་ཁོ་ན་སྟེ། འོ་ན་ཅི་ཞེ་ན་དོན་གཞན་ལས་ལྡོག་པའི་སྒོ་རྣམས་བཏགས་པ་པའི་རང་གི་དོན་རྟོགས་པར་བྱེད་དོ་ཞེས་
[281b.5]གསལ་བར་བྱེད་པ་གསུངས་པ། འདི་འདི་ལྟར་འགྱུར་ན་ཞེས་པ་ལ་སོགས་པའོ། །དངོས་པོ་ཡི་ནི་གཙོ་བོར་ཞེས་པ་དངོས་པོ་ཡོད་པ་ཉིད་ཀྱི་སྤྱི་ཞེས་བྱ་བས་སྒྲའི་རྗེས་སུ་འགྲོ་བ་མི་འདོད་དེ་དེ་མི་རུང་བའི་ཕྱིར་རོ། །དེ་མི་རུང་བར་དངོས་པོ་རྣམས་ལ་མ་ཡིན་ཞེས་པ་ལ་སོགས་པས་སྟོན་ཏོ། །
[281b.6]བརྗོད་ཟིན་ཏོ་ཞེས་པ་རབ་ཏུ་བྱེད་པ་གཞན་དུའོ། །འདིར་ཡང་གལ་ཏེ་ཡང་སྤྱིར་འགྱུར་ན་ཞེས་པ་ལ་སོགས་པས་དང་། དེ་བཞིན་དུ་ཁྱད་པར་རྣམས་རང་གི་དབང་པོ་རྣམས་ཀྱིས་ཉེ་བར་དམིགས་ན་ཞེས་པ་ལ་སོགས་པས་ཀྱང་ངོ་། །རིགས་མེད་པར་ནི་ཞེས་པ་རིགས་དང་བྲལ་བ་སྟེ།
[281b.7]དངོས་པོར་ཡོད་པ་དང་བྲལ་བ་ཞེས་པའི་ཐ་ཚིག་གོ། །དོན་གཞན་སེལ་བས་ཁྱད་པར་དུ་བྱས་པའི་དོན་ལ་ཞེས་པ་བརྗོད་པར་འདོད་པ་དང་ལྡན་པའི་སྐྱེས་བུ་ལ་སྟེ། དེ་ནི་སྒྲའི་དོན་གྱི་རྟེན་ནོ་ཞེས་པས་དེ་ཁྱད་པར་དུ་བྱས་པར་བརྗོད་དོ། །གང་སྨྲས་པ་ཞེས་པ་ལ་སོགས་པ་སྟེ། དོན་གཞན་
[282a]
[282a.1]མེད་པའི་མཚན་ཉིད་ཅན་གྱི་ཡོད་པ་མ་ཡིན་པ་ཡང་དག་པར་རྗེས་སུ་འགྲོ་བར་ཁས་བླངས་ནས། བ་ལང་ལ་སོགས་པ་མེད་པ་ལས་ཡོད་པའི་བདག་ཉིད་དུ་རྟོགས་པར་བྱ་བར་མི་རིགས་སོ་ཞེས་པ་འདི་ཙམ་གྱིས་འདི་ཉེ་བར་བཀོད་པའོ། །དོན་གཞན་ལས་འདི་གཞན་སེལ་བ་
[282a.2]རྗེས་སུ་འགྲོ་བ་དང་རྣམ་པར་ལྡན་པར་བརྗོད་པའི་དེ་མ་ཐག་ཏུ་རྣམ་པར་འཇིག་པ་ཉིད་དུ་བརྗོད་དེ། དེ་མེད་པའི་གསལ་བར་བྱེད་པའོ་ཞེས་པ་ངག་གི་ལྷག་མའོ། །གང་འདི་ཁྱོད་ཀྱིས་གསལ་བའི་རིགས་གཅིག་རྗེས་སུ་འགྲོ་བ་གཙོ་བོ་འགྲུབ་པའི་དོན་དུ་བརྗོད་པ་དེ་ནི་མེད་པར་འགྲུབ་པ་ཡང་
[282a.3]གསལ་བར་བྱེད་དེ། ཅིའི་ཕྱིར་ན་གསལ་བ་འདི་ནི་མེད་པ་ཡང་དག་པར་རྗེས་སུ་འགྲོ་བ་ལས་མེད་པ་རྗེས་སུ་ལྡན་པ་ཅན་ཏེ། ས་ལ་སོགས་པ་རྣམས་དང་བ་ལང་ལ་སོགས་པ་རྣམས་ཕན་ཚུན་གྱི་བདག་ཉིད་རྣམས་ལ་ཡོད་པ་མ་ཡིན་ནོ། །གང་ཞིག་གང་དང་ལྡན་པ་དེའི་འདི་རྣམ་པར་འགྱུར་
[282a.4]བ་སྟེ། དཔེར་ན་ཞོ་འོ་མ་དང་ལྡན་པ་ནི་འོ་མའི་རྣམ་པར་འགྱུར་བ་ཡིན་པ་བཞིན། གསལ་བ་འདི་ཡང་མེད་པ་དང་ལྡན་པ་སྟེ། དེའི་ཕྱིར་གསལ་བ་འདི་ནི་མེད་པའི་རྣམ་པར་འགྱུར་བའོ་ཞེས་པའོ། །ཞོ་འོ་མ་དང་ལྡན་པ་ཞེས་པ་ནི་གྲངས་ཅན་གྱི་ལུགས་ཀྱི་དབང་དུ་བྱས་ནས་བརྗོད་པའོ། །གང་
[282a.5]ཞིག་གང་དང་ལྡན་པ་དེ་ནི་དེའི་རྣམ་པར་འགྱུར་བ་སྟེ། དཔེར་ན་ཞོ་འོ་མའི་བཞིན་གསལ་བ་འདི་ཡང་མེད་པ་དང་ལྡན་པའོ། །ཕ་རོལ་པོའི་འདོད་པས་རང་བཞིན་ནོ། །འདིར་ཡང་མེད་པའི་རྣམ་འགྱུར་རོ་ཞེས་པ་འདིས་མེད་པ་སྔོན་མ་ཅན་ཉིད་དུ་གསལ་བར་བསྒྲུབ་པར་བྱ་བའོ། །ཕྱོགས་སྔ་མ་
[282a.6]འདི་ལ་གྲངས་ཅན་གྱིས་བརྗོད་པ། གལ་ཏེ་གསལ་བ་ཐམས་ཅད་མེད་པའི་རྣམ་པར་འགྱུར་བར་བསྒྲུབ་པར་བྱ་བ་ཡིན་ན། དེ་ལྟར་གྱུར་ན་ཐམས་ཅད་ཀྱི་བདག་ཉིད་དུ་ཐལ་བར་འགྱུར་བའི་ཕྱིར་མེད་པ་ལས་ཡོད་པའི་བདག་ཉིད་དུ་ཐལ་བར་འགྱུར་རོ་ཞེས་པའོ། །རྣམ་འགྱུར་ཐམས་ཅད་ཀྱི་རང་
[282a.7]གི་ངོ་བོ་ཉིད་ནི་ཐམས་ཅད་ཀྱི་བདག་ཉིད་དེ། རང་བཞིན་ནི་རྣམ་འགྱུར་གྱི་རང་གི་ངོ་བོར་མཐོང་བའི་ཕྱིར། དེའི་རང་གི་ངོ་བོར་དཔག་གོ། །དེ་ལྟར་ནི་འོ་མའི་རྣམ་འགྱུར་ཞོ་ལ་སོགས་པ་རྣམས་དེའི་བདག་ཉིད་རྣམས་ཏེ། དེའི་བདག་ཉིད་ཀྱི་རང་བཞིན་རྣམས་ཁོ་ན་ནི་ཐམས་ཅད་ཀྱི་བདག་ཉིད་ཅན་གྱི་རྣམ་འགྱུར་རྣམས་སོ། །
[282b]
[282b.1]དེའི་ཕྱིར་རང་བཞིན་མང་ཐམས་ཅད་ཀྱི་བདག་ཉིད་དོ། །ཐམས་ཅད་ཀྱི་བདག་ཉིད་ཡིན་པ་ཉིད་ཀྱི་ཕྱིར་ཡང་ཡོད་པ་ཉིད་དུ་ཐལ་བར་འགྱུར་ཏེ། མེད་པ་ནི་ཐམས་ཅད་ཀྱི་བདག་ཉིད་དུ་མི་འཐད་པས་སོ། །དེ་ལས་ཀྱང་ཁྱད་པར་རྣམས་མེད་པ། སྔོན་མ་ཅན་མའོ་ཞེས་པ་གྲུབ་པ་སྒྲུབ་པའོ་ཞེས་པའོ། །ཐམས་
[282b.2]ཅད་མེད་པ་དང་ལྡན་ཞེས། ཁས་ལེན་བྱེད་པ་གང་ཡིན་ཞེས་པ། གལ་ཏེ། བ་ལང་ལ་སོགས་པའི་གསལ་བ་ཐམས་ཅད་མེད་པའི་རྣམ་པར་འགྱུར་བའོ་ཞེས་སྨྲ་ཞིང་། གསལ་བ་ཐམས་ཅད་མེད་པ་དང་ལྡན་ནོ་ཞེས་ཁས་ལེན་པར་བྱེད་པའོ། །གལ་ཏེའི་སྒྲ་ནི་ཁས་བླངས་པ་ཡོངས་སུ་གསལ་བར་
[282b.3]བྱེད་པའོ། །དེ་ལྟར། གྲངས་ཅན་ཁས་ལེན་པ་ཅན་དེའི། །དུ་མའི་བདག་ཉིད་ཕྱིར་ཡོད་པ། །ཡིན་ཞེས་ཅི་ཞིག་ཅི་ཡིས་འབྲེལ། ཁས་བླངས་པ་དང་ཕྱི་མ་མ་འབྲེལ་ལོ། །ཞེས་པའི་དོན་ཏོ། །དེ་ལ་བ་ལང་ལ་སོགས་པ་གཞན་ཅི་ཞིག་ཡིན་ཞེས་པ། ཕན་ཚུན་མེད་པ་ཁོ་ན་ནི་ཐ་སྙད་པའི་
[282b.4]བ་ལང་ལ་སོགས་པ་རྣམས་ཏེ། དེ་ལས་ཐ་དད་པ་གཞན་ནི་མེད་དོ། །ཕན་ཚུན་མེད་པ་ཡང་དངོས་པོ་མ་ཡིན་ཏེ། བརྟགས་པ་ཉིད་ཀྱི་ཕྱིར་རོ། །དེས་ན་དེའི་རང་བཞིན་ཉིད་ལ་ཅི་ལྟར་མེད་པ་ལས་ཡོད་པ་ཉིད་དུ་ཐལ་བར་འགྱུར། ཐམས་ཅད་ནི་ཞེས་པ་ལ་སོགས་པ་སྟེ། བ་ལང་ལ་སོགས་
[282b.5]པ་རྣམས་མེད་པའི་བདག་ཉིད་དུ་ཁས་ལེན་པ་ལ། དེའི་བདག་ཉིད་ཀྱི་ཕྱིར་མེད་པ་ནི་ཡོད་པའི་བདག་ཉིད་དུ་འཐོབ་བོ་ཞེས་པའི་ལན་རིགས་པ་ནི་མ་ཡིན་པས་ཏེ། ཁས་བླངས་པ་དང་འགལ་བའི་ཕྱིར་རོ། །གང་ཡང་བརྗོད་པ་ཞེས་པ། དེ་ལ་བརྗོད་པ་ནི། གལ་ཏེ་བ་ལ་སོགས་པའི་
[282b.6]གསལ་བ་ཐམས་ཅད་མེད་པའི་རྣམ་འགྱུར་ཡིན་ན་མེད་པ་དང་ཡོད་པ་དག་ལས་རྟོགས་པ་ཐ་མི་དད་པར་འགྱུར་རོ། །ཅིའི་ཕྱིར་ཞེ་ན། རང་བཞིན་གྱི་རྟོགས་པ་ནི། རྣམ་པར་འགྱུར་ལ་མཐོང་སྟེ། དཔེར་ན་འཇིམ་པའི་རྟོགས་པ་ཁམ་ཕོར་ལ་བཞིན་ཞེས་པའོ། །འདི་སྐད་བཤད་པར་
[282b.7]འགྱུར་ཏེ། མེད་པ་རྗེས་སུ་འགྲོ་བ་ལ་ནི་དེའི་རྣམ་པ་ཅན་ཁོ་ནའི་རྟོགས་པར་འགྱུར་གྱི། བ་ལང་ངོ་རྟའོ་ཞེས་དངོས་པོ་ཐ་དད་པའི་རྣམ་པ་ཅན་དུ་ནི་མི་འགྱུར་ན། འགྱུར་བ་ཡང་སྟེ། དེའི་ཕྱིར་གསལ་བ་ནི་མེད་པ་རྗེས་སུ་འགྲོ་བ་མ་ཡིན་ནོ། །གང་ཞིག་གང་ལས་ཐ་དད་པའི་རྣམ་པ་
[283a]
[283a.1]ཅན་གྱི་རྟོགས་པས་རྟོགས་པར་བྱ་བ་དེ་ནི་དེའི་བདག་ཉིད་མ་ཡིན་ཏེ། དཔེར་ན་བ་ལང་ལས་ཐ་དད་པའི་རྣམ་པ་ཅན་གྱི་རྟོགས་པས་ངེས་པར་བྱ་བའི་རྟ་ནི་བ་ལང་གི་བདག་ཉིད་མ་ཡིན་པ་བཞིན། རྣམ་འགྱུར་རྣམས་ཀྱང་མེད་པའི་རང་བཞིན་ལས་ཐ་དད་པའི་རྣམ་པ་
[283a.2]ཅན་གྱི་རྟོགས་པས་ངེས་པར་བྱ་བའོ་ཞེས་པ་ཁྱབ་བྱེད་དང་འགལ་བའོ། །འདིས་ནི་མེད་པའི་རྗེས་སུ་འགྲོ་བ་ནི་མ་གྲུབ་པ་ཉིད་དུ་སྨྲས་སོ། །འཇིམ་ཁྱད་མེད་ལ་ཁམ་ཕོར་སོགས། །བློ་ཐ་དད་པ་གལ་ཏེ་འདོད། །ཅེས་པ་འཇིམ་པ་རྣམས་ལས་ཁམ་ཕོར་ལ་སོགས་པ་ཐ་མི་དད་དེ། དེ་
[283a.3]ལ་ཐ་མི་དད་པའི་རྣམ་པ་ཅན་གྱི་རྟོགས་པར་ཐལ་བར་འགྱུར་བ་ལ་གལ་ཏེ་རྟོགས་པ་ཐ་དད་པ་ཐ་དད་པ་འདོད་དེ། འཇི་བ་ལ་འཇི་བའི་རྟོགས་པ་དང་ཁམ་ཕོར་ལ་སོགས་པ་ལ་ཁམ་ཕོར་ལ་སོགས་པའི་རྟོགས་པའོ། །དེ་ལྟར་གྱུར་ན། མེད་ཁྱད་མེད་ན་ཡང་སྟེ་མེད་པའི་རྒྱུ་ལ་ཐ་དད་མེད་ན་
[283a.4]ཡང་། བ་ལང་ལ་སོགས་པའི་གསལ་བ་མེད་པ་དང་ལྡན་པ་ལའང་། ཐ་དད་བློ་ནི་སྟེ། བ་ལང་ངོ་རྟའོ་ཞེས་པ་འདི་ལྟ་བུ་ལ་སོགས་པའི་རྟོགས་པ་ཐ་དད་པ་ཅིས་བཟློག །རྣམ་པ་ཅིས་ཞེས་པ། དབྱིབས་ཀྱི་ཁྱད་པར་གྱིས་སམ། སྐྱེས་བུའི་དོན་གྱི་དབང་གིས་སོ། །སྒྲའི་ཁྱད་པར་
[283a.5]གོམས་པའི་དབང་ལས་ཞེས་པ། ཐོག་མ་མེད་པར་སྒྲའི་ཐ་སྙད་བརྒྱུད་པ་ནི། སྒྲའི་བྱེ་བྲག་གིས་བྱས་པ་དེའི་རྣམ་པ་ཅན་གྱི་རྟོགས་པ་སྐྱེད་པའི་ཆེད་དུ་གང་བག་ཆགས་ཡིན་པ་དེ་ནི་སྒྲའི་ཁྱད་པར་གོམས་པ་སྟེ། དེའི་དབང་ལས་ཐ་དད་པའི་རྣམ་པ་ཅན་གྱི་རྟོགས་པ་སྐྱེ་བར་འགྱུར་རོ། །
[283a.6]འདིས་ནི་དེའི་བདག་ཉིད་ན་ཡང་དེ་ལས་ཐ་དད་པའི་རྣམ་པ་ཅན་གྱི་རྟོགས་པས་ངེས་པར་བྱ་བ་ཉིད་ཁམ་ཕོར་ལ་སོགས་པ་རྣམས་ལ་མཐོང་བའི་ཕྱིར་མ་ངེས་པ་ཉིད་དུ་བཤད་དོ། །དེས་ན་མེད་པ་རྗེས་སུ་འགྲོ་བ་ནི་མ་གྲུབ་པ་ཉིད་དུ་རིགས་པ་མ་ཡིན་ནོ། །གང་ཡོད་པ་ལས་ཐ་མི་དད་ནའང་
[283a.7]དངོས་པོར་ཡོད་པའི་ཕྱིར་མངོན་སུམ་གྱིས་ཡོངས་སུ་བཅད་པ་བ་ལང་ལ་སོགས་པ་རྣམས་ནི། སྒྲ་གོམས་པའི་དབང་ལས་དེ་ལྟར་ཡོངས་སུ་བཅད་པ་སྟེ། མངོན་སུམ་དུ་བྱས་པའི་དངོས་པོ་ལ་སྒྲའི་བརྡ་བྱ་བར་ནུས་ཀྱི། རྣམ་པ་གཞན་དུ་ནི་མ་ཡིན་ནོ། །དེ་རྣམས་ཀྱིས་མེད་པ་ཉིད་དུ་འདོད་
[283b]
[283b.1]པར་བྱ་བ་ལ་ནི་ཅི་ལྟར་ཐ་དད་པའི་རྣམ་པ་ཅན་གྱི་རྟོགས་པས་ངེས་པར་བྱ་བ་ཉིད་ཡིན་ཞེས་པ་འདིའི་ཕྱིར་ན་གསུངས་པ། ཁྱོད་ཀྱི་ཡང་ནི་ཞེས་པ་ལ་སོགས་པའོ། །ཡོན་ཏན་རྣམས་ཀྱི་ངོ་བོ་མཆོག །གང་མཉམ་པའི་གནས་སྐབས་ན། ཕྱིན་ཅི་མ་ལོག་པའི་རང་བཞིན་དེ་ནི་དབང་པོ་
[283b.2]ལས་འདས་པ་ཉིད་ཀྱི་ཕྱིར། མཐོང་བ་ཡུལ་གྱི་དངོས་པོར་ཉེ་བར་མི་འགྲོའོ། །གསལ་བའི་གནས་སྐབས་སུ་དེ་རྣམས་ཀྱི་ངོ་བོ་དེ་ནི། སྒྱུ་མ་བཞིན་དུ་ཤིན་ཏུ་གསོག་རང་བཞིན་གྱིས་སྟོང་པའོ་ཞེས་པའི་དོན་ཏོ། །དེ་ལས་ཀྱང་ཁྱོད་ཀྱང་དངོས་པོའི་དེ་ཁོ་ན་ཉིད་ཀྱི་རྒྱུ་ཅན་མ་ཡིན་པ་ཁོ་ནར་ཐ་
[283b.3]སྙད་ཁས་བླང་བར་བྱའོ་ཞེས་པས་བརྩད་པ་མཚུངས་སོ། །ལྐོག་ཤལ་ལ་སོགས་པ་མཐོང་ཕྱིར། །ཞེས་པ་ལ་སོགས་པ་དེ་ལ་འཇིག་པ་སྨྲ་བ་པ་ཡིས་བརྗོད་པ། གང་ཞིག་མཐོང་བ་ལས་གང་ཞེས་འཇིག་རྟེན་ན་རྟོགས་པར་འགྱུར་བ་དེ་ཁོ་ན་དེར་འགྱུར་ཏེ། དཔེར་ན་ལྐོག་ཤལ་ལ་སོགས་
[283b.4]པ་མཐོང་བ་ལས་བ་ལང་གི་རྟོགས་པར་འགྱུར་བའི་ལྐོག་ཤལ་ལ་སོགས་པ་ཁོ་ན་ནི་བ་ལང་ཡིན་པ་བཞིན་ནོ། །དོན་གཞན་ལ་རྟོགས་པ་ཡང་བདག་ཉིད་གཞན་མེད་པ་མཐོང་བ་ལས་ཡིན་ཏེ། དེའི་ཕྱིར་དོན་གཞན་མེད་པ་ཁོ་ན་བདག་ཉིད་གཞན་རྣམས་སོ་ཞེས་པའོ། །འདིས་ནི་གང་མཐོང་བ་ལས་གང་
[283b.5]རྟོགས་པར་འགྱུར་བ་དེ་ཁོ་ན་དེར་འགྱུར་ཏེ། དཔེར་ན་ལྐོག་ཤལ་ལ་སོགས་པ་མཐོང་བ་ལས་བ་ལང་གི་རྟོགས་པར་འགྱུར་བའི་ལྐོག་ཤལ་ལ་སོགས་པ་རྣམས་ཁོ་ན་བ་ལང་ཡིན་པ་བཞིན། བདག་ཉིད་གཞན་ལ་རྟོགས་པ་ཡང་བདག་ཉིད་གཞན་མེད་པ་མཐོང་བ་ལས་འགྱུར་རོ་ཞེས་འབྲས་བུ་
[283b.6]གསུངས་སོ། །འདི་གྲངས་ཅན་པས་སླར་བསྒྲུབ་པར་བཤད་པ། གལ་ཏེ་ལྐོག་ཤལ་ལ་སོགས་པ་མཐོང་བ་ལས་བ་ལང་གི་རྟོགས་པར་འགྱུར་ན། དེ་ལྟར་གྱུར་ན་བདག་ཉིད་གཞན་མེད་པ་མཐོང་བ་ལས་བདག་ཉིད་གཞན་ལ་རྟོགས་པར་འགྱུར་རོ་ཞེས་གང་བརྗོད་པ་དེ་མི་རིགས་
[283b.7]ཏེ་ཞེས་སོ། །བདག་ཉིད་གཞན་མེད་པའི་རྒྱུ་མཚན་ཅན་དུ་རྟོགས་པ་ཐམས་ཅད་ཁས་ལེན་ན། ཅི་ལྟར་བ་ལང་གི་རྟོགས་པའི་རྒྱུ་མཚན་ལྐོག་ཤལ་ལ་སོགས་པ་ཉིད་ཡིན་ཞེས་པའི་ཐ་ཚིག་གོ། །འདིས་ནི་ཁས་བླངས་པ་ཉམས་པ་སྨྲས་ཏེ། དཔེ་ལ་རང་གི་ཕྱོགས་བཏང་བའི་ཕྱིར་རོ་
[284a]
[284a.1]ཞེས་པ་གྲུབ་མཐའ་དང་འགལ་བའི་ཕྱིར་རོ། །ཁྱོད་ཀྱིས་འདོད་པས་ཞེས་པ། ཁྱོད་ཀྱིས་ནི་ལྐོག་ཤལ་ལ་སོགས་པ་རྣམས་ཁོ་ན་བ་ལང་ངོ་ཞེས་འདོད་པས་སོ། །ཁོ་བོ་ཅག་གི་འདོད་པས་ནི་ཕན་ཚུན་བསལ་བྱ་དེ་ཐ་དད་དེ། བ་ལང་དང་ལྐོག་ཤལ་ལ་སོགས་
[284a.2]པ་རྣམས་ནི་འདི་རྣམས་ལ་གསལ་བར་བྱ་བ་ཐ་དད་པའོ་ཞེས་བྱས་ནས་སོ། །གང་གི་ནི་ཞེས་པ་སེལ་བ་སྨྲ་བའིའོ། །ཁས་བླངས་ནས་ཞེས་པ་ལ་སོགས་པ་ཁྱོད་ཀྱི་ནི་ལྐོག་ཤལ་ལ་སོགས་པ་ཚོགས་པ་ཁོ་ན་ལ་བ་ལང་ངོ་ཞེས་འདོད་དེ། དེའི་ཕྱིར་དེ་ཁས་བླངས་ནས་དཔེ་འདི་རང་གི་འདོད་པ་དང་
[284a.3]འགལ་བ་ཡང་བརྗོད་པའོ། །འདི་སྐད་བཤད་པར་འགྱུར་ཏེ། ཇི་ལྟར་ཁྱོད་ཀྱི་ལྐོག་ཤལ་ལ་སོགས་པ་ཚོགས་པ་མཐོང་བ་ལས་བ་ལང་གི་རྟོགས་པ་ཡིན་པ་དེ་ལྟར་ངེད་ཀྱི་ཡང་བདག་ཉིད་གཞན་མེད་པ་མ་མཐོང་བ་ལས་བདག་ཉིད་གཞན་ལ་རྟོགས་པའོ་ཞེས་པའོ། །སྒྲ་ཐ་དད་པ་ལས་ནི་ཞེས་པ་
[284a.4]ལ་སོགས་པ་ལྐོག་ཤལ་ལ་སོགས་པ་སྒྲའི་ནི་ལྐོག་ཤལ་ལ་སོགས་པ་རྣམས་ལ་ལྐོག་ཤལ་ལ་སོགས་མ་ཡིན་པ་བསལ་བྱ་སྟེ། བ་ལང་གི་སྒྲའི་ཡང་བ་ལང་ལ་བ་ལང་མ་ཡིན་པ་བསལ་བྱའོ། །གང་གི་ཕྱིར་དེ་ལྟར་བསལ་བྱ་ཐ་དད་པ་དེའི་ཕྱིར་ལྐོག་ཤལ་ལ་སོགས་པ་རྣམས་ལ་ལྐོག་ཤལ་ལ་སོགས་པ་མ་ཡིན་པ་
[284a.5]སེལ་བས་ལྐོག་ཤལ་ལ་སོགས་པའི་རྟོགས་པ་དང་བ་ལང་ལ་བ་ལང་མ་ཡིན་པ་རྣམ་པར་གཅོད་པས་བ་ལང་གི་རྟོགས་པའོ། །དེ་ལྟར་ན་འདིར་ཡང་བདག་ཉིད་གཞན་མེད་པ་མཐོང་བ་ཁོ་ན་ལས་བདག་ཉིད་གཞན་བ་ལང་ལ་རྟོགས་པ་རང་གི་འདོད་པས་སོ་ཞེས་པས་ཁས་བླངས་པ་ཉམས་
[284a.6]པ་མེད་དོ། །དེ་མི་ལྟོས་ཞེས་པ་ལ་སོགས་པ་ནི་གྲངས་ཅན་པས་བདག་ཉིད་གཞན་མེད་པ་མཐོང་བ་ལས་ཀྱང་བདག་ཉིད་གཞན་ལ་རྟོགས་པར་འགྱུར་རོ་ཞེས་པ་མ་གྲུབ་པ་ཉིད་དུ་བསྟན་པའི་ཆེད་དུ་བཤད་པའོ། །དེ་ལྟོས་མེད། བདག་ཉིད་གཞན་རྟོགས་པའོ། །ཅིའི་ཕྱིར་ཞེ་ན།
[284a.7]ངེད་ཀྱི་ནི་བདག་ཉིད་གཞན་མེད་པ་མཐོང་བ་ལས་བདག་ཉིད་གཞན་ལ་རྟོགས་པར་འགྱུར་བ་མ་ཡིན་གྱི། འོ་ན་ཅི་ཞེ་ན་སྒྲུབ་པའི་ངོ་བོ་ཁོ་ནས་བ་ལང་ཞེས་སོ། །རང་གི་རྣམ་པར་རྟོག་པས་སྤྲུལ་པ་ཞེས་པ་འདི་ནི་རང་གི་རྣམ་པར་རྟོག་པས་དབྱེ་བར་བྱས་པའོ། །འདི་སྐད་བཤད་པར་འགྱུར་
[284b]
[284b.1]ཏེ། རང་གི་རྣམ་པར་རྟོག་པའི་དབང་ལས་འདི་ནི་འདི་ལྟར་དུ་བརྗོད་པར་བྱའོ། །རིགས་པ་ནི་མ་ཡིན་ནོ་ཞེས་པའོ། །ཅིའི་ཕྱིར་ཞེ་ན་གསུངས་པ། སེལ་བ་མེད་པར་ཞེས་པ་ལ་སོགས་པའོ། །ལྐོག་ཤལ་ལ་སོགས་པ་རྣམས་ལ་ནི་ཞེས་པ་ལ་སོགས་པ་ནི་འདི་ཁོ་ནའི་འགྲེལ་པའོ། །
[284b.2]ལྐོག་ཤལ་ལ་སོགས་པའི་སྒྲ་ནི་སྤྱིའི་ངོ་བོར་རང་གི་དོན་རྟོགས་པར་བྱེད་དེ། དེ་ཡང་སྤྱིའི་ངོ་བོ་རྟོགས་པ་ན་དོན་གཞན་མེད་པ་ལ་མི་ལྟོས་པར་མི་འགྱུར་རོ་ཞེས་སྔར་བསྒྲུབས་ཟིན་པ་ཁོ་ནའོ། །འོ་ན་དངོས་པོའི་རང་གི་མཚན་ཉིད་རྟོགས་པ་ནི་དོན་གཞན་མེད་པ་རྟོགས་པ་ལ་མི་ལྟོས་པ་བ་ལང་
[284b.3]ཞེས་སྒྲུབ་པ་ཁོ་ནས་འགྱུར་རོ་ཞེ་ན་གསུངས་པ། རང་གི་ངོ་བོ་ནི་ཞེས་པ་ལ་སོགས་པའོ། །རང་གི་ངོ་བོ་ནི་རང་གི་མཚན་ཉིད་དེ། དེ་རྟོགས་པ་ན་གལ་ཏེ་དོན་གཞན་མེད་པ་ལྟོས་པར་བྱ་བ་མ་ཡིན་མོད། དེ་བརྗོད་པར་བྱ་བ་མ་ཡིན་པའི་ཕྱིར་རོ། །བརྗོད་པར་བྱ་བ་ཐ་སྙད་པའི་ངོ་བོ་ནི་བ་ལང་ལ་
[284b.4]སོགས་པ་རྣམས་ལ་དོན་གཞན་སེལ་བ་ལ་མི་ལྟོས་པར་རྟོགས་པ་མ་ཡིན་ནོ། །དེ་ཡང་རྣམ་པར་དཔྱད་པའི་ཆེད་དུ་སྐབས་སུ་བྱས་པའོ། །དེའི་ཕྱིར་གཏན་ཚིགས་མ་གྲུབ་པ་ཉིད་མ་ཡིན་ནོ། །གང་བརྗོད་པ་ཞེས་པ། འདི་སྐད་དུ་བརྗོད་དེ། གལ་ཏེ་བདག་ཉིད་གཞན་མེད་པ་མཐོང་བ་ལས་
[284b.5]བདག་ཉིད་གཞན་ལ་རྟོགས་པར་འགྱུར་ན། དང་པོའི་རྟོགས་པ་འཇུག་པ་མེད་པ་ཁོ་ན་སྟེ། ཅིའི་ཕྱིར་ན། དེ་ལ་བདག་ཉིད་གཞན་མེད་པ་མཐོང་བ་མེད་པའི་ཕྱིར་ཞེས་པའོ། །འདིར་དང་པོའི་རྟོགས་པ་ནི་གང་འཁོར་བར་ཐོག་མར་སྐྱེས་པ་སྟེ་དེ་མེད་པའོ། །དེའི་ཚེ་གཞན་གྱི་བདག་
[284b.6]ཉིད་མ་མཐོང་བའི་ཕྱིར། བདག་ཉིད་གཞན་ཡང་མ་བཟུང་བས། དེ་མེད་པས་ཉེ་བར་མཚོན་པའི་བདག་ཉིད་གཞན་ཡང་གཟུང་བར་མི་ནུས་སོ་ཞེས་པས་ཁས་བླངས་པ་ཉམས་པའོ། །ཐོག་མ་མེད་ཕྱིར་འདོད་པ་གྲུབ། །ཅེས་པ་འདི་ནི་འདོད་པ་ཁོ་ན་སྟེ། དང་པོའི་རྟོགས་པ་ཁས་
[284b.7]མི་ལེན་པའི་ཕྱིར་རོ། །དེའི་ཕྱིར་ཁས་བླངས་པ་ཉམས་པ་མ་ཡིན་ནོ་ཞེས་པའི་དོན་ཏོ། །གང་གི་ཡང་ཞེས་པ་ལ་སོགས་པས་ཕ་རོལ་པོ་ཁོ་ན་ལ་སྐྱོན་འདི་སླར་ཐལ་བར་འགྱུར་བར་བྱེད་དོ། །རིགས་དང་ལྡན་པ་ལ་ཁྱབ་པར་ནུས་པ་མ་ཡིན་ཞེས་པ། གལ་ཏེ་ཁྱད་པར་ཐམས་
[285a]
[285a.1]ཅད་ལ་སྒྲ་སྦྱར་བར་ནུས་པ་ཉིད་ན། དེ་ལྟ་ན་རིགས་དང་ལྡན་པའི་དངོས་པོ་སྒྲས་ཁྱད་པར་ནུས་མོད། དེ་སྲིད་པ་མ་ཡིན་ཏེ། རིགས་དང་ལྡན་པ་རྣམས་མཐའ་ཡས་པ་ཉིད་ཀྱི་ཕྱིར་རོ། །འབྲེལ་པ་མ་བྱས་པར་སྒྲས་རྟོགས་པར་ནུས་པ་ཡང་མ་ཡིན་ནོ། །
[285a.2]དེ་ལྟར་འགྱུར་མོད་ཀྱི་གཅིག་ཡིན་པ་ཉིད་ཀྱི་ཕྱིར་རིགས་ཀྱིས་ཁྱབ་པར་ནུས་སོ་ཞེ་ན་གསུངས་པ། ཡང་མིན་ཞེས་པ་ལ་སོགས་པ་སྟེ། ཁྱབ་པར་ནུས་པ་ཞེས་དཀྱུས་མ་དང་སྦྲེལ་ལོ། །གལ་ཏེ་རེ་ཞིག་རྟེན་ལས་ཐ་དད་པའི་རིགས་ནི་རྟེན་མཐའ་དག་ལ་འཇུག་པར་རྟོག་
[285a.3]ན། དེའི་ཚེ་གཉིས་ཉིད་ལ་སོགས་པ་བཞིན་དུ་རྟེན་མཐོང་བ་སྔོན་དུ་འགྲོ་བར་དེ་མཐོང་བར་འགྱུར་ན། རྟེན་རྣམས་ནི་མཐའ་ཡས་པའི་ཕྱིར་མཐོང་བ་སྲིད་པ་ཡང་མ་ཡིན་ནོ། །ཅི་སྟེ་རྟེན་སོ་སོ་ལ་བདག་ཉིད་ཐམས་ཅད་ཀྱིས་ཡོངས་སུ་རྫོགས་པ་ཉིད་ཀྱི་ཕྱིར་རྟེན་གཅིག་མཐོང་ན་ཡང་
[285a.4]འཛིན་པར་འདོད་ན་དེའི་ཚེ་ཐ་དད་པར་འགྱུར་རོ། །དེ་ལས་ཀྱང་རྟེན་དང་འདྲ་བར་མཐའ་ཡས་པ་ཉིད་ཀྱི་ཕྱིར་འབྲེལ་པ་མེད་པའོ། །ཅི་སྟེ་རྟེན་ལས་ཐ་མི་དད་ན་དེ་ལྟར་ན་ཡང་ཁྱད་པར་ལྟ་བུའི་སྐྱོན་ཏེ། ཁྱད་པར་རྣམས་ལས་ཐ་མི་དད་པ་ནི་དེ་ཁོ་ན་བཞིན་དུ་མཐའ་ཡས་པ་ཉིད་ཀྱི་ཕྱིར་
[285a.5]རོ། །དེ་ལྟར་རིགས་སྨྲ་བ་ཁོ་ན་ལ་དང་པོའི་རྟོགས་པ་མེད་པར་ཐལ་བར་འགྱུར་རོ། །གང་ཡང་བརྗོད་པ་ཞེས་པ་གལ་ཏེ་བདག་ཉིད་གཞན་མེད་པ་མཐོང་བ་ལས་བདག་ཉིད་གཞན་ལ་རྟོགས་པར་འགྱུར་ན། རྟོགས་པ་འཇུག་པ་ཉིད་མེད་དེ། ཅིའི་ཕྱིར་ན་བསལ་བར་བྱ་བ་
[285a.6]བདག་ཉིད་གཞན་མཐའ་ཡས་པ་ཉིད་ཀྱི་ཕྱིར་ཏེ། བདག་ཉིད་གཞན་ཐམས་ཅད་མེད་པ་མཐོང་བ་མེད་དོ་ཞེས་པའོ། །འདི་སྐད་བཤད་པར་འགྱུར་ཏེ། གལ་ཏེ་བདག་ཉིད་གཞན་རྣམས་ཐམས་ཅད་བསལ་བས་རྟོགས་པ་ཡིན་ན་བ་ལང་མ་ཡིན་པའི་དོན་དེ་རྣམས་མཐའ་ཡས་
[285a.7]པ་ཉིད་ཀྱི་ཕྱིར་མི་མཐོང་སྟེ། བ་ལང་གི་ཁྱད་པར་བཞིན་ནོ། །དེ་ལས་ཀྱང་དེ་བསལ་བས་བ་ལང་རྟོགས་པ་མ་ཡིན་ཏེ། དེ་ཁོ་ན་བཞིན་ཞེས་པའོ། །གང་རྣམས་མཐའ་ཡས་པ་དེ་རྣམས་ཐམས་ཅད་མཐོང་བ་མ་ཡིན་ཏེ། བ་ལང་གི་ཁྱད་པར་བཞིན་བསལ་བྱ་རྣམས་ཀྱང་
[285b]
[285b.1]མཐའ་ཡས་པ་ཉིད་དོ། །ཁྱབ་པར་བྱེད་པ་དང་འགལ་བའོ། །གང་མཐའ་ཡས་པ་ཉིད་ནི་དེ་བསལ་བས་བ་ལང་རྟོགས་པ་མ་ཡིན་ཏེ། དཔེར་ན་བ་ལང་གི་ཁྱད་པར་རྣམས་མཐའ་ཡས་པ་ཉིད་དེ་བསལ་བས་བ་ལང་རྟོགས་པར་མི་འགྱུར་བ་བཞིན། བ་ལང་མ་ཡིན་པའི་དོན་
[285b.2]རྣམས་ཀྱང་མཐའ་ཡས་པ་ཉིད་དོ། །ཁྱབ་བྱེད་དང་འགལ་བའོ། །དེ་ལས་ཀྱང་ཁས་བླངས་པ་ཉམས་པའོ། །དེ་ཡང་མི་རིགས་ཏེ། ཅི་ལས་ཤེ་ན། སྤྱི་ཡིས་ངེས་པར་སེལ་བའི་ཕྱིར། །ཤིང་མ་ཡིན་དུ་མི་འགྱུར་རོ། །ཞེས་པ་འདི་ལྟར་སྤྱིའི་ངོ་བོས་ངེས་པར་སེལ་བའི་ཕྱིར་རོ། །དེ་ནི་
[285b.3]གཞན་ཞེས་པ་ལ་སོགས་པ་སྟེ། གང་གི་ཕྱིར་ཤིང་གི་སྒྲ་དེ་ནི་རིགས་གཞན་བུམ་པ་ལ་སོགས་པ་རྣམས་རྫས་སོ་སོར་འདི་བུམ་པར་མི་འགྱུར་རོ་ཞེས་པ་འདི་ལྟར་སེལ་བ་མ་ཡིན་གྱི། འོ་ན་ཅི་ཞེ་ན་རྣམ་པར་གཅད་བྱར་བརྗོད་པར་འདོད་པས་སྤྱིའི་ཆོས་གཅིག་གིས་སོ། །སྤྱིའི་ཆོས་གཅིག་
[285b.4]པོ་གང་རྣམ་པར་གཅད་བྱར་བརྗོད་པར་འདོད་པ་ངེས་ཏེ་རྒྱུར་གྱུར་པས་སེལ་བར་བྱེད་དོ། །ཅིའི་ཕྱིར་སེལ་ཞེ་ན། སྐབས་གཞན་དུ་བསྟན་པའི་ཕྱིར་དེ་ཁོ་ནའི་སྤྱིའི་ཆོས་ཀྱིས་སོ་ཞེས་རྣམ་པར་ཤེས་པར་བྱའོ། །འདི་སྐད་བཤད་པར་འགྱུར་ཏེ། སྤྱིའི་ཆོས་རྣམ་པར་གཅད་བྱར་བརྗོད་པར་འདོད་
[285b.5]པས་ཐོབ་པའི་ཐ་མི་དད་པའི་ངོ་བོ་རྣམས་ཤིང་དུ་མི་འགྱུར་རོ་ཞེས་པ་འདི་ལྟ་བུ་བུམ་པ་ལ་སོགས་པའི་རྣམ་པར་གཅད་པར་བྱ་བ་རྣམས་སེལ་བར་བྱེད་དོ་ཞེས་པའོ། །དེའི་ཕྱིར་ཤིང་མ་ཡིན་པ་ཉིད་ལ་སོགས་པ་ནི་མཐའ་ཡས་པ་ཉིད་དུ་མ་གྲུབ་སྟེ། སྤྱིའི་ངོ་བོ་ཐ་མི་དད་པ་ཉིད་ཀྱི་ཕྱིར་
[285b.6]རོ། །འདི་ལ་ཡང་བཤད་པ་ཞེས་པ་ལ་སོགས་པ་སྟེ། སྒྲ་གཞན་དོན་ནི་མ་མཐོང་ཕྱིར། །ཞེས་པ་འདིར་བཤད་དོ། །རིགས་མི་མཐུན་ལ་མ་མཐོང་བ་ཙམ་གྱིས་རྗེས་སུ་དཔག་པའོ་ཞེས་པ། གང་ཞིག་གང་ལ་མ་མཐོང་བ་དེ་ནི་དེ་སེལ་བར་བྱེད་ཅིང་། ཤིང་གི་སྒྲ་ཡང་རང་གི་དོན་མེད་པའི་རིགས་མི་
[285b.7]མཐུན་ལ་མ་མཐོང་བ་སྟེ། རྒྱུ་མེད་ན་འབྲས་བུ་མེད་པའི་ཕྱིར་རོ། །དེའི་ཕྱིར་མཐའ་ཡས་པ་ཉིད་ཡོད་ན་ཡང་རྗེས་སུ་དཔོག་པ་འཐད་དོ། །ཉེས་པ་འདི་ནི་ཁྱོད་ཉིད་ལ། །ཞེས་པ་རྟོགས་པ་འཇུག་པ་མེད་པའི་སྐྱོན་ནོ། །ཅི་ལྟར་ཞེ་ན་གསུངས་པ། གལ་ཏེ་རང་གི་རིགས་མཐུན་ལ་
[286a]
[286a.1]ཁྱབ་པས་ཞེས་པ་ལ་སོགས་པ་སྟེ། གང་གི་སྒྲུབ་པས་རྟོགས་པར་བྱེད་པ་དེའི་རྗེས་སུ་འགྲོ་བ་གཙོ་བོའོ་ཞེས་པས། རང་གི་རིགས་མཐུན་པ་མཐའ་དག་ལ་ཁྱབ་པར་སྒྲས་འཇུག་པར་བྱ་ན། དེ་ཡང་མི་སྲིད་དེ། རིགས་མཐུན་པ་རྣམས་མཐའ་མེད་པ་ཉིད་
[286a.2]ཀྱི་ཕྱིར་དང་། རིགས་ནི་དེ་རྣམས་དང་ཐ་མི་དད་པའི་ཕྱིར་ཡང་ངོ་། །དེའི་ཕྱིར་དཔེར་ན་ཞེས་པ་ལ་སོགས་པ་སྟེ། རྭ་ཅན་ཉིད་ནི་རྟ་ལས་ལྡོག་བཞིན་པས་རྟ་མ་ཡིན་པ་ཉིད་རྟོགས་པར་བྱའོ། །དེ་ཡང་དངོས་པོར་ཡོད་པའི་སྤྱི་སྨྲ་བ་རྣམས་ཀྱིས་ཀྱང་རྟ་མ་ཡིན་པ་ཉིད་ཅེས་བྱ་བའི་དངོས་པོར་
[286a.3]ཡོད་པའི་སྤྱི་དམ་བཅས་པ་ཅུང་ཟད་ཀྱང་མེད་དོ། །གང་རྣམས་རྟ་མ་ཡིན་པ་བ་ལང་ལ་སོགས་པ་དེ་རྣམས་ཀྱང་རྭ་ཅན་ཉིད་ཀྱིས་སོ་སོར་ཁྱབ་པར་མི་བྱེད་དོ། །གང་རྣམས་དེ་དང་རིགས་མི་མཐུན་པ་རྟ་དེ་རྣམས་ཀྱང་སོ་སོར་མི་སེལ་བ་ཁོ་ནའོ། །དེ་སྟེ་ཡང་དེ་ལ་ཇི་ལྟར་སྤྱི་
[286a.4]རིགས་མི་མཐུན་པ་བསྒྲིབས་པའི་ཕྱིར་རྟར་མི་འགྱུར་རོ་ཞེས་ལྡོག་པའི་བློར་འགྱུར་ཞིང་། རྟ་ལས་ལོག་པའི་བ་ལང་ལ་སོགས་པ་རྣམས་ལ་སྤྱིའི་རྣམ་པས་རྟ་མ་ཡིན་པའོ་ཞེས་རྗེས་སུ་འཇུག་པའི་བློ་ཡང་ཡིན་པ། དེ་ལྟར་འདིར་རིགས་པ་སྟེ། སྒྲ་ཡང་རྟགས་དང་ལྡན་པ་ལས་བ་ལང་ལ་སོགས་
[286a.5]པའི་སྒྲ་ལས་ཀྱང་། བ་ལང་ལ་སོགས་པ་ལ་རྗེས་སུ་འཇུག་པའི་བློ་ཡིན་ཞིང་། བ་ལང་མ་ཡིན་པ་ལ་སོགས་པ་རྣམས་ལ་ཡང་ལྡོག་པའི་བློར་འགྱུར་རོ། །འདི་སྐད་བཤད་པར་འགྱུར་ཏེ། གང་རྟགས་ཡིན་པ་དེ་ནི་སྤྱིར་རིགས་མི་མཐུན་པ་རྣམ་པར་གཅོད་པར་བྱེད་ཅིང་རང་གི་
[286a.6]དོན་རྟོགས་པར་བྱེད་དེ། དཔེར་ན་རྭ་ཅན་ཉིད་བཞིན་སྒྲ་ཡང་རྟགས་ཡིན་ནོ་ཞེས་པ་རང་བཞིན་ནོ། །གང་ཡང་གལ་ཏེ་བདག་ཉིད་གཞན་མེད་པ་མཐོང་བ་ལས་བདག་ཉིད་གཞན་ལ་ལྟོས་པར་འགྱུར་ན་བདག་ཉིད་གཞན་མེད་པ་ཡང་གཅིག་པུ་སྟེ། དེ་ལས་བདག་ཉིད་གཞན་
[286a.7]ཐམས་ཅད་ལ་ལྟོས་པ་གཅིག་ཏུ་ཐལ་བར་འགྱུར་ཞིང་ཐམས་ཅད་ཚུལ་གཅིག་པ་ཅན་གྱི་རྟོགས་པས་རྟོགས་པར་འགྱུར་ཏེ། བྱེ་བྲག་གི་གཅིག་པ་ཉིད་ཀྱི་ཕྱིར་རོ། །ཇི་ལྟར་དཀར་པོ་ཉིད་ཀྱི་ཁྱད་པར་ཐ་མི་དད་པ་ཉིད་ཀྱི་ཕྱིར། ཀུ་མུད་
[286b]
[286b.1]དང་དུང་ནི་དཀར་པོའོ་ཞེས་ཀུ་མུད་ལ་སོགས་པ་རྣམས་ཐ་མི་དད་པའི་རྣམ་པ་ཅན་གྱི་རྟོགས་པས་རྟོགས་པར་བྱ་བ་བཞིན་ནོ། །ཅི་སྟེ་བདག་ཉིད་གཞན་མེད་པ་གཅིག་མ་ཡིན་ན། །དེ་ལས་སོ་སོའི་བདག་ཉིད་ལ་རྟོགས་པ་སྣ་ཚོགས་པ་ཉིད་དུ་ཐལ་བར་འགྱུར་ཏེ། སྒྲ་འཇུག་པའི་རྒྱུ་མཚན་ཐ་དད་པ་ཉིད་ཀྱི་
[286b.2]ཕྱིར་རོ། །ཁ་ར་ནི་དཀར་བ་མངར་བ་དྲི་ཞིམ་པ་ལ་བསིལ་བའོ་ཞེས་པ་ཇི་ལྟ་བ་བཞིན་ནོ། །འདི་གཉིས་ཀ་མི་འདོད་ཅེས་པ་ཁས་བླངས་པ་ཉམས་པའོ་ཞེས་བརྗོད་པ། དེ་ལ་སླར་སྒྲུབ་པ་གསུངས་པ། བདག་ཉིད་གཞན་མེད་ཁས་བླངས་ནས། །གཅིག་དང་དུ་མ་ཉིད་
[286b.3]རྟོགས་པ། །རིགས་མིན་ཞེས་པ་སྟེ། ཅིའི་ཕྱིར་ཞེ་ན། གང་ཕྱིར་དངོས་པོ་འདི་ལ་འགྱུར་རོ་ཞེས་པ་ལྷག་མའོ། །གཅིག་ཉིད་དང་དུ་མ་ཉིད་ནི་དངོས་པོ་ཁོ་ན་ལ་སྲིད་ཀྱི་དངོས་པོར་མེད་པ་ལ་ནི་མ་ཡིན་ནོ། །གཞན་མེད་པ་དེ་ཁས་བླངས་ནས་གཅིག་དང་ཅིག་ཤོས་མ་ཡིན་པ་ཉིད་རྟག་
[286b.4]པར་མི་རིགས་སོ། །གང་ཡང་། རིགས་ཀྱི་ཆོས་ནི་རྣམ་གནས་ཕྱིར། །ཞེས་པ་འདིར་གཞན་སེལ་བ་གཅིག་ཉིད་དུ་རྣམ་པར་གཞག་པ་དེ་ནི་བློའི་སྣང་བ་ལ་བརྟེན་ནས་ཉེ་བར་བཏགས་པའོ། །ཁྱོད་ཀྱིའང་བསལ་མིན་ནུས་རྣམས་ལས། །ཐལ་བར་འགྱུར་བར་མཚུངས་སོ་ཞེས་
[286b.5]པ་ལྷག་མའོ། །བསལ་བར་མིན་པ་ནི་ཡོན་ཏན་རྣམས་མཉམ་པའི་གནས་སྐབས་གཙོ་བོ་སྟེ། དེ་ལ་ཆེན་པོ་ལ་སོགས་པ་རྣམ་པར་འགྱུར་གྱི་ནུས་པ་རྣམས་གཅིག་ཉིད་ན་རྒྱུ་ཐ་མི་དད་པ་ཉིད་ཀྱི་ཕྱིར་རྣམ་འགྱུར་ཐ་དད་པར་མི་འགྱུར་ཞིང་། ཐ་དད་པ་ཉིད་ན་གཙོ་བོ་གཅིག་ཉིད་དུ་
[286b.6]འགལ་བར་ནུས་པ་རྣམས་ལས་གཞན་མ་ཡིན་པ་ཉིད་ཀྱི་ཕྱིར་རོ། །ནུས་པ་དེ་རྣམས་དངོས་པོར་ཡོད་པ་ཁོ་ནར་ཞེས་ཁས་བླང་བར་ནུས་པ་ཡང་མ་ཡིན་ཏེ། གཅིག་དང་གཅིག་མིན་ཉིད་འགལ་བའི་ཕྱིར་རོ། །གང་ཡང་གལ་ཏེ་བདག་ཉིད་གཞན་མེད་
[286b.7]པ་མཐོང་བ་ལས་བདག་ཉིད་གཞན་ལ་རྟོགས་པ་ནི་དབང་པོ་ལས་བྱུང་བ་ཡང་ངོ་ཞེས་པས། མེད་པ་ནི་སྒྲ་ལ་སོགས་པ་རྣམས་ལས་གང་ཡང་རུང་བར་འཐོབ་སྟེ། རྣ་བ་ལ་སོགས་པའི་གཟུང་བྱ་ཉིད་ཀྱི་ཕྱིར་རོ། །ཅི་སྟེ་སྒྲ་ལ་སོགས་པ་རྣམས་ལས་གང་ཡང་རུང་བ་མ་ཡིན་
[287a]
[287a.1]ནོ། །དེའི་འཛིན་པ་པོ་དབང་པོ་དྲུག་ལ་ཡོད་དོ་ཞེས་པ་འདི་འོངས་ན། འདི་གཉིས་ཀ་ཡང་འདོད་པ་མ་ཡིན་ནོ་ཞེས་བྱ་བ་བརྗོད་པ་དེའི་ལན་འདི་སྟེ། སྒྲའི་བརྗོད་བྱའི་དོན་ལ་འདི། །བསམ་བྱ་ཞེས་པ་ལ་སོགས་པའོ། །མངོན་སུམ་གྱི་དོན་ནི་བསྟན་དུ་མེད་
[287a.2]པ་ཞེས་པ་སོ་སོར་རང་གིས་རིག་པར་བྱ་བ་བརྗོད་དུ་མེད་པའོ། །བསྟན་པར་བྱ་བའང་རྟོགས་པ་སྟེ། གང་འདི་སྐད་དུ་བདག་ཉིད་གཞན་མེད་པ་ནི་བདག་ཉིད་གཞན་ནོ་ཞེས་བརྗོད་པ་དེ་ནི་བསྟན་པར་བྱ་ཞིང་བརྗོད་པར་བྱ་བའི་དོན་གྱི་ངོར་བཤད་ཀྱི་དབང་པོའི་སྤྱོད་ཡུལ་ནི་མ་ཡིན་ནོ། །དེའི་ཕྱིར་
[287a.3]འདི་མངོན་སུམ་པ་དབང་པོའི་སྤྱོད་ཡུལ་འཕེན་པར་རིགས་པ་མ་ཡིན་ཏེ། དེ་བསྟན་དུ་མེད་པ་ཉིད་ཀྱི་ཕྱིར་རོ། །དེའི་ཕྱིར་ཇི་སྐད་བཤད་པའི་སྐྱོན་དུ་ཐལ་བར་འགྱུར་བ་མེད་དོ། །དམིགས་ཀྱིས་དགར་བ་ཚིག་གི་འདི་ཞེས་པ་དམིགས་ཀྱིས་དགར་བ་ནི་ལོགས་སུ་བྱེད་པར་བྱས་པའོ། །སླར་
[287a.4]ཡང་ངག་ལས་དམིགས་ཀྱིས་བཀར་བ་པ་ནི་འདི་ཞེས་པ་གཞན་སེལ་བའོ། །ཡང་ཅི་ལྟར་ན་ཡན་ལག་རྣམ་པར་ཕྱེ་བ་མེད་པའི་ངག་གཅིག་ལས་ཚིག་དམིགས་ཀྱིས་བཀར་བར་ནུས་ཤེ་ན། ཡན་ལག་རབ་ཏུ་བརྟགས་པ་དང་ཚུལ་གསུམ་པའི་བློས་རྣམ་པར་དབྱེ་བར་བྱེད་པའི་ཕྱིར་ཏེ། དེ་ཉིད་
[287a.5]ཀྱི་ཕྱིར་གསུངས་པ་རྣམ་པ་རྟགས་ལའོ་ཞེས་པའོ། །ཅིའི་ཕྱིར་རྣམ་པར་དབྱེ་བ་ལ་ཡིན་ཞེ་ན། ངག་གི་དོན་ཞེས་པ་ལ་སོགས་པའོ། །གང་གི་ཕྱིར་ངག་དོན་སོ་སོར་སྤོབས་པའི་མིང་ཅན་ནི། དེ་ཡིས་ཏེ་ཚིག་གི་དོན་གྱིས་ཐོག་མར་མ་བྱང་བ་རྣམས་ལ་སྐྱེད་དོ། །ཚིག་གི་དོན་མི་ཤེས་པ་ནི་སྔར་བློས་
[287a.6]ངག་གི་དོན་རྟོགས་པར་བཟོད་པ་མ་ཡིན་ཏེ། དེའི་ཕྱིར་ཆ་ཤས་མེད་པའི་ངག་གི་དོན་རྟོགས་པའི་ཐབས་ཉིད་ཀྱི་ཕྱིར་ན། རང་བཞིན་དང་རྐྱེན་བཞིན་དུ་རྗོད་པར་བྱེད་པ་ཉིད་དུ། མེད་ཀྱང་ཚིག་གི་དོན་བརྟགས་སོ། །ངག་གི་དོན་དུ་སྣང་བ་དེ་ནི་ཉན་པ་པོའི་རྒྱུད་ལ་འབྱུང་བ་གང་ཡིན་པ་
[287a.7]ཡང་ངག་ལས་ཉན་པ་པོ་ལ་ཉེ་བར་སྐྱེ་ཞིང་། སྨྲ་བ་པོའི་རྒྱུད་ལ་འབྱུང་བ་གང་ཡིན་པ་ཡང་ངག་ཀུན་ནས་སློང་བ་པོའོ། །དེ་ལ་སྔ་མའི་དབང་དུ་བྱས་ཏེ། ངག་དོན་སྤོབས་པ་ཞེས་བྱ་གང་། །དེ་ཡིས་དང་པོར་ཉེ་བར་བསྐྱེད། །ཅེས་སོ། །འདི་སྐད་བརྗོད་དེ། ངག་གི་དོན་ཉིད་ནི་དེའི་
[287b]
[287b.1]རབ་ཏུ་སྦྱོར་བ་པོ་ཉིད་ཀྱི་ཕྱིར། དེའི་དོན་དུ་སྨྲ་བ་པོས་ངག་སྦྱར་མོད་ཀྱི། ངག་གི་སྒྲོན་མ་ལས་ཕ་རོལ་པོའི་ངག་གི་དོན་གྱི་ཡུལ་ཅན་གྱི་སྤོབས་པར་འགྱུར་རོ་ཞེས་པའོ། །གང་ཡང་ངག་ཀུན་ནས་སློང་བ་པོ་ངག་དེ་ཉིད་དང་དེའི་དོན་ནི་སྒྲའི་དོན་དངོས་ངག་གོ་ཞེས་འདིར་འཆད་པར་
[287b.2]འགྱུར་རོ། །ངག་གི་དོན་ཉིད་ནི་དེས་གཞལ་བར་བྱ་བ་ཉིད་ཀྱི་ཕྱིར་དེ་ནི་འབྲས་བུའི་རྟགས་ངག་གིས་རྗེས་སུ་དཔག་པར་བྱ་བ་སྟེ། དུ་བས་མེ་བཞིན་ནོ། །ཚིག་གི་མེད་ཀྱང་ཞེས་པ་བརྗོད་པར་བྱ་བ་ཉིད་དུ་མེད་པའོ། །གང་གི་ཕྱིར་ངག་ཁོ་ན་སྒྲ་དངོས་ཏེ། དེ་ཁོ་ན་དོན་དང་འབྲེལ་པའི་ཕྱིར་རྗོད་
[287b.3]པར་བྱེད་པ་ཉིད་དོ། །ཚིག་རྣམས་ནི་མ་ཡིན་ཏེ། ཡི་གེ་བཞིན་དུ་ཐ་སྙད་ཀྱི་ཡན་ལག་ངག་གི་དོན་གྱིས་སྟོང་པ་ཉིད་ཀྱི་ཕྱིར་རོ། །གང་སྨྲས་པ། མེད་ཀྱང་ནང་གི་བ་ཡི་ནི། །སྒྲ་རྣམས་ཡོད་དོ་ཞེས་སེམས་ཏེ། །རྟོགས་པ་པོ་ཡི་ནུས་མེད་དེ། །འཛིན་པའི་ཐབས་ཁོ་ན་དེའོ། །ཞེས་སོ། །
[287b.4]ཚིག་དེ་ངག་ལས་འབྲས་བུའི་དོན་དུ་བཀར་བ་ནི་ལུང་ཇི་ལྟ་བར་རབ་ཏུ་བརྟགས་པས་དོན་རྣམ་པར་གཞག་པར་བྱའོ་ཞེས་པའོ། །གང་གི་ལུང་གང་ཡིན་པ་འགའ་ཞིག་རྣམས་ཀྱིས་བརྗོད་པར་བྱ་བ་ཐ་དད་པའི་ཚིག་གི་དོན་ཅན་ནོ་ཞེས་པ་ལུང་སྟེ། ཕ་རོལ་པོ་རྣམས་ཀྱི་རིགས་དང་། གཞན་
[287b.5]རྣམས་ཀྱི་འབྲེལ་པ་དང་འགའ་ཞིག་རྣམས་ཀྱི་དེ་དང་ལྡན་པའོ་ཞེས་པའོ། །ཅིའི་ཕྱིར་དགར་བ་ནི་ཞེས་བརྗོད་པར་བྱ་ཞེ་ན་གསུངས་པ། འབའ་ཞིག་ནི་མི་སྦྱོར་བའི་ཕྱིར་རོ་ཞེས་པ། འཇིག་རྟེན་པའི་སྦྱོར་བ་ལས་སྒྲ་རྣམས་ཀྱི་དོན་ངེས་པར་གཟུང་བར་བྱ་ཞིང་འཇིག་རྟེན་ན་ཡང་ཚིག་འབའ་ཞིག་
[287b.6]པའི་སྦྱོར་བ་མེད་དེ། གང་དུ་ཡང་བྱ་བའི་ཚིག་གཞན་མ་ཐོས་པ་ཤིང་བླ་ཀྵའོ་ཞེས་པ་དེར་ཡང་ཡོད་དོ། །འགྱུར་རོ་དག་ལྷུར་བྱེད་པ། སྐྱེས་བུ་དང་པོ་རབ་ཏུ་མ་སྦྱར་བཞིན་པ་ཡོད་དོ་ཞེས་རྟོགས་པར་བྱའོ། །དེ་སྐད་དུ་ཡང་བཤད་པ། གང་ཡང་འདི་ཅི་ཞེས་དྲིས་ཤིག །ཡོད་པ་བ་ལང་
[287b.7]རྟ་ཞེས་ཀྱང་བརྗོད་པའི་དྲི་བ་ཁོ་ན་བྱ་བ་སྟེ། དེ་ལ་རབ་ཞུགས་མཐོང་བའི་ཕྱིར། །ཞེས་སོ། །ཇི་ལྟ་བུར་མེད་པ་ལ་རབ་ཏུ་བརྟགས་པས་དོན་བརྗོད་པར་བྱ། ཅི་ཞིག་ཡིན་ཞེ་ན་གསུངས་པ་རང་བཞིན་དང་རྐྱེན་བཞིན་དུ་ཞེས་པ། ཚིག་སྨྲ་བ་པོས་ནི་རང་བཞིན་ལ་སོགས་པའི་
[288a]
[288a.1]དབྱེ་བ་མེད་པའི་ཚིག་དོན་ལ་རབ་ཏུ་སྦྱོར་ཞིང་རང་བཞིན་དང་རྐྱེན་དག་ནི་འབའ་ཞིག་པའི་ཚིག་གི་དོན་ལ་རྟེན་པར་བྱེད་པ་སྟེ། འབའ་ཞིག་པ་དག་སྦྱོར་བ་ནི་མེད་དོ། །མ་སྦྱར་བ་དག་ནི་ཡོད་པ་ཉིད་དུ་ངེས་པར་གཟུང་བར་ནུས་པ་ཡང་མ་ཡིན་ཏེ། དེས་ན་དེ་དག་
[288a.2]མེད་པ་ཁོ་ནའོ། །དེ་ལྟ་ཡང་ཇི་ལྟར་དེ་དག་གི་དོན་རབ་ཏུ་བརྟགས་པས་བརྗོད་པར་བྱ་བ་དེ་ལྟར་ཚིག་གིའོ། །འོ་ན་གཞན་གྱིས་རབ་ཏུ་བརྟགས་པ་དེ་ཁོ་ན་ཚིག་གི་དོན་དུ་འགྱུར་མོད། མེད་པའི་དོན་ལ་འབད་པ་འདིས་ཅི་བྱ་ཞེ་ན་གསུངས་པ། དེ་ཡང་རབ་ཏུ་བརྟགས་པ་
[288a.3]ཞེས་པ་ལ་སོགས་པ། ལུང་འདི་ལས་གཞན་པའི་ལུང་རྣམས་ལ་མི་རིགས་པའི་དོན་འཛིན་པ་ཇི་ལྟ་བ་དེ་ལྟར། ཁྱད་པར་རྣམས་ལ་རིགས་སྒྲ་མིན། །ཞེས་པ་ལ་སོགས་པས་བཤད་ཟིན་ཏོ། །དེའི་ཕྱིར་དོན་གཞན་རིགས་པ་དང་ལྡན་པ་གཞན་སེལ་བ་ཞེས་བྱ་བ་འདི་ཉེ་བར་འཕངས་
[288a.4]པ་ཡིན་ནོ། །འདི་རིགས་པ་དང་ལྡན་པ་ཉིད་དུ་ཡང་བསྒྲུབས་ཟིན་ཏེ། སྒྲ་དོན་གཞན་ནི་མ་མཐོང་ཕྱིར། །ཞེས་པ་ལ་སོགས་པའོ། །གང་གི་ཕྱིར་ཚིག་གི་དོན་འཛིན་པའི་ཐབས་ཅན་ཞེས་པ་ཚིག་གི་དོན་བརྟགས་པའི་དགོས་པ་སྟོན་ཏོ། །ཚིག་གི་དོན་འཛིན་པ་གང་གིས་ཐབས་ཡིན་པ་
[288a.5]དེ་དེ་སྐད་བརྗོད་དོ། །རང་ཉིད་ཁོ་ནས་ཚིག་གི་དོན་རྣམས་རྗེས་སུ་འཛིན་པ་ལས་སེམས་ཀྱིས་རྣམ་པར་གནས་པའི་ཁྱད་པར་གྱི་ངོ་བོ་ཅན་དབྱེ་བ་མེད་པའི་ངག་གི་དོན་སྣང་བ་སྐྱེ་ཞེས་བྱ་བར་འོས་པ་ཉིད་དོ། །ཤེས་རབ་བཟང་པོའི་སྤོབས་པ་ཅན་སོ་སོར་ངེས་པའི་དབྱེ་བ་ཡོངས་སུ་
[288a.6]གཅོད་པའི་བྱ་བའོ་ཞེས་བྱ་བར་འོས་པ་ཉིད་དོ། །དེ་ལྟར་ནི་འདིས་འདི་ལྟར་དང་འདི་ལྟར་བྱ་བར་འོས་སོ་ཞེས་པ་བྱ་བར་འོས་པའི་གཞི་སྟེ། དེའི་དངོས་པོ་ནི་དེ་སྐད་གྱུར་པའི་བྱ་བ་དེའི་ཡུལ་ཅན་ནོ། །ཇི་ལྟར་བསྒྲུབས་པའི་བྱ་བའི་བར་མ་ཆད་པར་ཤེས་རབ་དང་སྤོབས་པ་གང་
[288a.7]ལ་ཉེ་བར་སྐྱེས་པ་ན་རབ་ཏུ་འཇུག་པའམ་བཏང་སྙོམས་སུ་བྱེད་དོ། །དང་པོར་ཞེས་པ་གང་རྣམས་སྒྲ་དོན་གྱི་འབྲེལ་པ་མ་གོམས་པ་དེ་རྣམས་ནི། ཚིག་གི་དོན་འཛིན་པའི་ཐབས་ཅན་ངག་གི་དོན་རྟོགས་པར་བྱེད་དོ། །གང་རྣམས་སྒྲ་དང་དོན་གྱི་འབྲེལ་པ་གོམས་པ་ལས་ངག་
[288b]
[288b.1]གི་དོན་ལ་མཁས་པ་ཉེ་བར་སྐྱེས་པ་དེ་རྣམས་ཀྱི་ཡན་ལག་མེད་པའི་ངག་ཁོ་ན་ལས་ཆ་ཤས་མེད་པའི་ངག་གི་དོན་གྱི་ཡུལ་ཅན་གྱི་སྤོབས་པར་འགྱུར་རོ། །གལ་ཏེ་ཚིག་དང་དེའི་དོན་ཏེ། འདི་གཉིས་ཀ་བརྡ་ལས་བྱུང་བ་ཡིན་ན། འོ་ན་སྒྲ་དང་དོན་དངོས་ངག་ཅི་ཞིག་ཡིན་ཞེ་ན་གསུངས་
[288b.2]པ། ངག་ཉིད་ཁོ་ན་དང་ཞེས་པ་ལ་སོགས་པའོ། །ཅིའི་ཕྱིར་འདི་ཡིན་ཞེ་ན་གསུངས་པ། དེ་དག་ཐ་མི་དད་པ་ཉིད་ཀྱི་ཕྱིར་ཞེས་པ། ངག་ལ་ཚིག་ལ་སོགས་པ་ཆ་ཤས་སུ་གྱུར་པ་རྣམས་མ་ཡིན་ཞིང་། ངག་གི་དོན་ལ་ཚིག་གི་དོན་རྣམས་ཀྱང་མ་ཡིན་ཏེ། དེ་རྣམས་རབ་ཏུ་བརྟགས་
[288b.3]པ་ཉིད་ཀྱི་ཕྱིར། རང་བཞིན་དང་རྐྱེན་བཞིན་དང་། དེ་དག་གི་དོན་བཞིན་ནོ། །གང་གཞན་ཚིག་ལ་སྒྲ་འཛིན་པར་མངོན་པར་རློམ་ཞིང་ཚིག་གི་དོན་ལ་ཡང་སྒྲའི་དོན་འཛིན་པར་མངོན་པར་རློམ་པ་ཕྱིན་ཅི་ལོག་པའོ། །དེ་ནི་རབ་ཏུ་བརྟགས་པ་ལས་ཏེ་ལྕགས་ཀྱུ་མེད་པ་ཉིད་ཀྱི་ཕྱིར་
[288b.4]ཏེ། རང་དབང་ཉིད་ཀྱི་ཕྱིར་ཞེས་པའི་དོན་ཏོ། །རང་དབང་ཉིད་ཀྱང་དོན་ལ་མི་ལྟོས་པ་ཉིད་ཀྱིས་ཏེ། དེ་ཉིད་ཀྱི་ཕྱིར་ཡང་འདི་ནི་དངོས་པོ་ལས་འདས་ནས་འཇུག་བཞིན་པ་ནི་རྣམ་པར་གཅད་པར་མི་ནུས་སོ། །ཡང་གང་རྣམས་ཞེས་པ་ལ་སོགས་པ་སྟེ་སྤོབས་པ་སྨོས་པ་ནི་ངག་
[288b.5]ཀུན་ནས་སློང་བར་བྱེད་པ་ཉེ་བར་མཚོན་པའོ། །དེའི་ཕྱིར་དེས་བརྗོད་འདོད་ཀྱང་འཕེན་ཏེ། སྤོབས་པ་དང་བརྗོད་འདོད་སྤངས་ནས་ཞེས་པའི་དོན་ཏོ། །དེ་ལས་གཞན་ཕྱི་རོལ་གྱི་དོན་བ་ལང་ལ་སོགས་པའམ། ངག་ཕྱི་རོལ་གྱི་དོན་རྣམས་ཀྱི་འབྲེལ་པ་ཕན་ཚུན་ཕན་འདོགས་
[288b.6]པའི་མཚན་ཉིད་ཅན་སྒྲ་དོན་དུ་རྟོགས་པར་བྱེད་པ་དེ་རྣམས་ཀྱི་ཡང་དེ་རྟོགས་པ་ཙམ་སྟེ། རིགས་པ་མེད་པ་དོན་གྱིས་སྟོང་པ་ཞེས་པའི་དོན་ཏོ། །འདིས་ནི་སྤོབས་པ་དང་བརྗོད་འདོད་ནི་ངག་གི་དོན་ཏོ་ཞེས་རང་གི་ལུགས་གསལ་བར་བྱེད་དོ། །ཅིའི་རྒྱུས་རྣམ་པར་རྟོག་པ་ཙམ་ཡིན་ཞེ་ན་
[288b.7]གསུངས་པ། ཇི་ལྟར་གོམས་བཞིན་ཞེས་པ་ལ་སོགས་པ་སྟེ། གང་དང་གང་གོམས་པ་ནི་ཇི་ལྟ་བར་གོམས་པའོ། །རང་གི་རྐྱེན་གྱི་རྗེས་བྱེད་པས། །ཞེས་པ། རང་གི་རྐྱེན་ནི་རྣམ་པར་ཤེས་པའི་རྟེན་བག་ཆགས་ཏེ་དེ་དང་རྗེས་སུ་མཐུན་པ་ཉིད་ཀྱིས་སོ། །ཕྱི་རོལ་གྱི་དོན་མེད་ཀྱང་གང་
[289a]
[289a.1]ལས་གོམས་པ་ཇི་ལྟ་བ་བཞིན་དུ་རྟོགས་པ་རྣམ་པ་དུ་མ་ཅན་སྐྱེ་སྟེ། དེའི་ཕྱིར་ཕྱི་རོལ་གྱི་དོན་ནམ་དེའི་འབྲེལ་པ་ནི་ངག་གི་དོན་དུ་འཐད་པ་མ་ཡིན་ནོ། །ཡང་ཡང་དུ་དོན་གོམས་པ་སྒྲའི་དོན་འཛིན་པ་སྟེ། དེས་བྱས་པ་རྣམ་པར་ཤེས་པ་ལ་ནུས་པའི་ཁྱད་
[289a.2]པར་ནི་དོན་གོམས་པའི་བག་ཆགས་ཏེ་དེ་ལ་ལྟོས་པའོ། །དེའི་རྒྱུ་མཚན་ཅན་དོན་བྱ་བ་རྟོགས་པ་ངོ་བོ་སྣ་ཚོགས་པ་སྐྱེའོ། །རྟོགས་པ་པོས་དོན་བྱ་བ་སྤོབས་པ་གང་ཞིག་སྐྱེས་པས་རྟོགས་པ་དེ་ནི་དོན་བྱ་བ་རྟོགས་པ་ངོ་བོ་སྣ་ཚོགས་སྐྱེ་བའོ། །ངག་གི་བག་ཆགས་རབ་ཏུ་སད་པའི་རྒྱུ་
[289a.3]མཚན་ཉིད་དུ་བསྟན་པའི་ཆེད་དུ་ངག་ལས་ཞེས་བཤད་དོ། །རང་གི་རྐྱེན་དང་རྗེས་སུ་མཐུན་པ་ཉིད་དུ་ཞེས་པ། གང་ཞིག་གི་བག་ཆགས་གང་འདྲ་བ་དེའི་དེ་དང་རྗེས་སུ་མཐུན་པ་ཁོ་ནའི་སྤོབས་པ་ཉེ་བར་སྐྱེའོ་ཞེས་པའི་དོན་ཏོ། །སྟག་ལ་སོགས་པ་ཐོས་པ་བཞིན་དུ་ཞེས་པ། སྟག་མེད་
[289a.4]ཀྱང་སྟག་གནས་སོ་ཞེས་བརྗོད་པ་ན་སྟག་གིས་སྒྲུབ་པར་བྱེད་པ་གནས་པའི་བྱ་བར་སྣང་བའི་རྟོགས་པ་ཉེ་བར་སྐྱེ་སྟེ། སོགས་པའི་སྒྲས་ཆུ་ཀླུང་གི་འགྲམ་ན་བུ་རམ་གྱི་ཤིང་རྟ་ཡོད་ཅེས་པ་ལ་སོགས་པ་གཟུང་ངོ་། །དེ་ཁྱད་པར་མེད་ན་ཡང་སྟེ་ངག་གི་དོན་ཁྱད་པར་མེད་པ་ལ།
[289a.5]དོན་བྱ་བ་རྟོགས་པའི་རྣམ་པར་རྟོག་པ་སྐྱེའོ་ཞེས་དཀྱུས་མ་དང་སྦྲེལ་ལོ། །སྒེག་པའི་སྙན་དངགས་ཐོས་པ་ལས། །ཞེས་པ། མཆུ་དང་འོ་མ་འཛིན་པ་ལ་སོགས་པ་བསྔགས་པའི་ངག་ཐོས་པ་ལས། དངོས་པོ་ཐ་མི་དད་ན་ཡང་ཆགས་པ་ཅན་རྣམས་ལ་འདོད་ཆགས་དང་རྗེས་སུ་
[289a.6]མཐུན་པའི་རྟོགས་པར་འགྱུར་ཏེ། ཡིད་དུ་འོང་བའི་རྣམ་པ་ཉིད་ཀྱི་ཕྱིར་རོ། །འདོད་ཆགས་དང་བྲལ་བ་རྣམས་ལ་ནི་ཡིད་འབྱུང་བ་དང་རྗེས་སུ་མཐུན་པ་སྟེ། ཡིད་དུ་མི་འོང་བའི་རྣམ་པ་ཉིད་ཀྱི་ཕྱིར་རོ། །འདི་ངག་ལ་ངག་གི་ཡུལ་ཉིད་ལ་སྲིད་པ་ཡང་མ་ཡིན་ཏེ། ཡུལ་ནི་གཅིག་གི་
[289a.7]ངོ་བོ་ཉིད་ཀྱི་ཕྱིར་རོ། །འདིས་ནི་ངག་ནི་ངག་དོན་གྱི་རང་གི་ངོ་བོ་ལ་འཁྲུལ་པར་སྟོན་ཅིང་། གང་ཞིག་གང་ལས་འཁྲུལ་པ་དེ་ནི་དེ་རྟོགས་པར་བྱེད་པ་མ་ཡིན་ཏེ། མི་རྟག་པ་ཉིད་ལ་ལུས་ཅན་མ་ཡིན་པ་ཉིད་བཞིན། ངག་ཀྱང་ངག་དོན་གྱི་རང་གི་ངོ་བོ་ལ་འཁྲུལ་པའོ་ཞེས་པ་ཁྱབ་བྱེད་
[289b]
[289b.1]དང་འགའ་བ་གསུངས་སོ། །འོ་ན་གང་གི་ཡང་སྤོབས་པ་ནི་ངག་གི་དོན་ཞེས་འདོད་པ་མ་ཡིན་ནམ། དེའི་ཡང་དེ་ནི་རྣམ་པར་རྟོག་པ་ཙམ་མ་ཡིན་ཞིང་། སྤོབས་པ་ཐ་མི་དད་ན་ཡང་སྒེག་པའི་སྙན་དངགས་ཐོས་པ་ལས་ཇི་སྐད་བཤད་པའི་རྟོགས་པ་ཐ་དད་པ་མཐོང་བའི་ཕྱིར་རོ་ཞེ་ན་
[289b.2]འདི་ཡོད་པ་མ་ཡིན་ཏེ། གང་ངག་གིས་ཀུན་ནས་བསྐྱེད་པའི་རྟོགས་པ་ངག་དོན་གྱི་རང་གི་མཚན་ཉིད་ཀྱི་ཡུལ་ཅན་དུ་འདོད་པའི་ཕ་རོལ་པོ་ཁོ་ན་ལ་སྐྱོན་འདི་སྟོན་གྱི། ཁོ་བོ་ཅག་ལ་ནི་མ་ཡིན་ཏེ། རྣམ་པར་རྟོག་པ་རྣམས་རང་གི་མཚན་ཉིད་ཀྱི་ཡུལ་ཅན་མ་ཡིན་པ་ཉིད་དུ་ཁས་
[289b.3]བླངས་པའི་ཕྱིར་རོ། །ད་ནི་སྤོབས་པ་མངོན་སུམ་དང་རྗེས་སུ་དཔག་པ་ངག་གི་ནང་དུ་འདུས་པར་བསྟན་པའི་ཆེད་དུ་གསུངས་པ། དེ་ཡང་ཞེས་པ་ལ་སོགས་པ་ལྷས་བྱིན་པ་དཀར་མོ་མངོན་དུ་དེད་ཅིག་ཅེས་པ་ལ་སོགས་པའི་ངག་ལས་གང་ཉན་པ་པོ་ལ་སྤོབས་པ་སྐྱེ་བ་དེ་ནི་མཆོད་
[289b.4]སྦྱིན་གྲོང་ཁྱེར་སྐྱ་སྣར་གྱི་བུར་སོང་ཅིག་ཅེས་པ་ལ་སོགས་པ་ངག་གཞན་རྣམས་ཀྱི་དོན་གང་ཡིན་པ་དེ་རྣམས་ལས་ལོག་པའི་དོན་ལ་སྤོབས་པ་སྤྱི་དང་ཁྱད་པར་ལ་འདོད་དོ། །དེ་ལྟར་ན་ངག་རྣམས་ཇི་སྙེད་པ་དེ་སྙེད་ཁོ་ནའི་སྤོབས་པ་རྣམས་དེའི་དོན་གྱི་ཡུལ་ཅན་ནོ་ཞེས་བརྗོད་པར་
[289b.5]འགྱུར་རོ། །འདིས་ནི་སྤོབས་པ་དུ་མ་ཉིད་དུ་སྟོན་ཅིང་། སྤོབས་པའི་སྤྱི་ངག་ཀུན་ནས་སློང་བར་རྟོགས་པའི་ཡུལ་ཡོད་དོ་ཞེས་གསལ་བར་བྱེད་དོ། །ཡུལ་དུ་མའི་གཞི་ཅན་ནི་རྟོགས་པའི་སྤྱིའོ། །འབྲེལ་པ་ཤེས་པའི་ཞེས་པ། གང་སྒྲ་དང་དོན་ངག་གིས་འབྲེལ་པ་ཤེས་པའོ། །
[289b.6]འདིས་ནི་ངག་རྟོགས་སོ་ཞེས་དགོངས་པས། གང་ཞིག་སྤྱིའི་ངོ་བོ་ནི་དོན་ལ་འབྲེལ་པ་ཤེས་པའི་རྟགས་ལས་རྟོགས་པར་འགྱུར་བ་དེ་ནི་རྗེས་སུ་དཔག་པ་སྟེ། དུ་བ་ལས་མེ་རྟོགས་པ་བཞིན། སྨྲ་བ་པོའི་སྤོབས་པ་ལས་ཉན་པ་པོའི་སྤོབས་པ་ཡང་དེ་ལྟ་བུའོ་ཞེས་རང་བཞིན་གསུངས་སོ། །
[289b.7]གང་ཞིག་ངག་ལས་རྟོགས་པ་ནི་ཞེས་པ་ལ་སོགས་པས་ནི། གང་རང་རིག་པར་བྱ་བ་དེ་ནི་རང་རིག་པའི་མངོན་སུམ་གྱི་ནང་དུ་འདུ་སྟེ། འདོད་ཆགས་ལ་སོགས་པ་བཞིན་སྤོབས་པ་ཡང་དེ་ལྟ་བུའོ་ཞེས་པ་རང་བཞིན་ཁོ་ནའོ། །རེ་ཞིག་རིགས་ན་ཞེས་པ་ལ་སོགས་པ་སྟེ། རྒྱུ་མཚན་
[290a]
[290a.1]ཅན་རྣམས་ནི་རིགས་དང་ཡོན་ཏན་དང་བྱ་བ་དང་རྫས་ཀྱི་སྒྲ་རྣམས་སོ། །དེ་རྣམས་ལ་རང་ཉིད་ཇི་ལྟ་བའི་རྒྱུ་མཚན་དང་ལྡན་པའི་དོན་དུ་མ་གཞན་སོ་སོར་སྤྱིའི་ངོ་བོས་མངོན་པར་བརྗོད་པ་སྲིད་དོ། །འདོད་རྒྱལ་བ་དངོས་པོ་གཅིག་ལ་ཉེ་བར་ལྷུང་བ་རྣམས་ལ་ནི་ཅི་
[290a.2]ལྟར་ཡིན། དེ་རྣམས་ལ་བརྗོད་པར་བྱ་བ་སྤྱི་ཡོད་པ་མ་ཡིན་པས་ཏེ། སྤྱི་ནི་དུ་མ་ལ་བརྟེན་པ་ཉིད་ཀྱི་ཕྱིར་རོ། །འདིས་ནི་འདོད་རྒྱལ་བ་རྣམས་སྤྱིའི་དོན་མི་བརྗོད་པའི་ཕྱིར་ཁས་བླངས་པ་ཉམས་པ་སྨྲས་སོ། །འདོད་རྒྱལ་བ་ལའང་ཞེས་པ་ལ་སོགས་པས་ཌིཏ་ཐ་ལ་སོགས་པ་རྣམས་
[290a.3]དུ་བ་ཉིད་དུ་སྟོན་ཅིང་། དེ་ལ་ཡང་སྤྱི་ཡོད་དོ་ཞེས་སྒྲུབ་པར་བྱེད་དོ། །འདོད་རྒྱལ་བ་ནི་ཞེས་པ་ལ་སོགས་པ་ཀཱ་ཎ་དང་ཀུཎ་ཌ་ལ་སོགས་པ་སྟེ། ཡོན་ཏན་ཚོགས་པ་རྗོད་པར་བྱེད་པ་འདོད་རྒྱལ་པ་ཌིཏ་ཐ་ལ་སོགས་པའི་སྒྲའོ། །ཚོགས་པ་དེའི་ཆ་ཤས་ཀཱ་ཎ་དང་ཀུཎ་ཌ་ལ་
[290a.4]སོགས་པ་རྣམས་ཏེ། དེ་རྣམས་ཐ་དད་པར་སྤྱི་ཡིས་བརྗོད་དོ། །དེའི་ཕྱིར་ཇི་ལྟར་ཤིང་གི་སྒྲ་ཤིང་ཤ་པ་ལ་སོགས་པའི་ཁྱད་པར་རྣམས་ཐ་དད་པ་བརྗོད་ཅིང་སྤྱི་བརྗོད་པ་དེ་ལྟར་ཚོགས་པའི་སྒྲ་ཌིཏ་ཐ་ལ་སོགས་པའི་སྒྲ་ཡང་ངོ་། །དེའི་ཕྱིར་ཁས་བླངས་པ་ཉམས་པ་མ་ཡིན་
[290a.5]ནོ། །འོ་ན་ཅི་ཞེས་པ་ལ་སོགས་པ་རྣམས་ཏེ། གལ་ཏེ་གཉིས་ཀ་ཡང་སྤྱི་རྗོད་པར་བྱེད་པ་དག་ཡིན་ན་རིགས་དང་ཚོགས་པའི་སྒྲ་དག་ལ་ཁྱད་པར་ཅི་ཞིག་ཡོད་དེ། ཅུང་ཟད་ཀྱང་མ་ཡིན་ནོ་ཞེས་པ་བསམས་པའོ། །ཅུང་ཟད་ཀྱང་མེད་དོ་ཞེས་པ་ཆ་ཤས་འདི་ཙམ་གྱིས་ཁྱད་པར་
[290a.6]མེད་པ་ཁོ་ནའོ་ཞེས་པ་དགོངས་པའོ། །རྣམ་པ་ཐམས་ཅད་དུ་མེད་པ་མ་ཡིན་པ་ཁོ་ནའོ་ཞེས་པ་སྟེ། གཞན་དུ་ན་འདི་ནི་རིགས་ཀྱི་སྒྲའོ། །འདི་ནི་ཚོགས་པའི་སྒྲའོ་ཞེས་པ་ཐ་དད་དུ་མི་འཐད་པར་འགྱུར་རོ། །འོ་ན་ཆ་ཤས་རྣམས་ལ་དངོས་དང་ཉེ་བར་བཏགས་པས་འཇུག་
[290a.7]པ་ཉིད་ཀྱི་ཁྱད་པར་དུ་འགྱུར་བ་མ་ཡིན་ནམ། རིགས་ཀྱི་སྒྲ་ནི་སོ་སོར་ཡན་ལག་རྣམས་ལ་དངོས་སུ་འཇུག་ཅིང་། ཚོགས་པའི་སྒྲ་ནི་ཉེ་བར་བཏགས་པ་སྟེ། ཇི་སྐད་དུ་སྤྱི་བརྟགས་པ་རྒྱས་པར། འདི་ནི་རིགས་དང་ཚོགས་པའི་སྒྲ་དག་གི་ཁྱད་པར་ཏེ། རབ་ཏུ་
[290b]
[290b.1]གྲགས་པའི་དབང་ལས་རིགས་ཀྱི་སྒྲ་ནི་སོ་སོར་ཡང་ཚོགས་པ་ཅན་རྣམས་ལ་འཇུག་སྟེ། ཚོགས་པའི་སྒྲ་ནི་སོ་སོར་ཚོགས་པ་ཅན་རྣམས་ལ་ཉེ་བར་གདགས་པར་བྱའོ་ཞེ་ན། དེའི་ཕྱིར་གསུངས་པ། རབ་ཏུ་གྲགས་པའི་དབང་དུ་བྱས་པ་ཞེས་པ་ལ་སོགས་པའོ། །
[290b.2]ཕག་པའི་གསལ་བའི་ཡན་ལག་རྣམས་ལ་ཡང་ཕག་པའི་སྒྲ་བཏགས་པ་ལས་འཇུག་སྟེ། དཔེར་ན་གྲོང་གི་ཕག་བཟའ་བྱ་མིན་ནོ་ཞེས་བརྗོད་པ་ན་ཆ་ཤས་རྣམས་ཀྱང་བཟའ་བྱ་མིན་པ་ལྟ་བུའོ། །ཁ་ཅིག་ཏུ་གཙོ་བོར་ཆ་ཤས་རྣམས་ལ་འཇུག་སྟེ། ཇི་སྐད་དུ། བྷ་ར་ཏི་ཧ་
[290b.3]རིས་སྨྲས་པ། ཆུ་སོགས་རྣམས་ལ་སོགས་པའི་སྒྲས་ས་ལ་སོགས་པ་ཡོངས་སུ་གཟུང་ངོ་། །གྲངས་ལ་སོགས་པ་ལ་མི་ལྟོས་པ་ཉིད་ཀྱིས་ན་ཆ་ཤས་རྣམས་ལ་གཙོ་བོར་འཇུག་པ་ཉིད་དུ་སྟོན་ཏོ། །གྲངས་ལ་སོགས་པ་ལ་ལྟོས་པ་དང་བཅས་པ་ཉིད་ན་ཀཱརྵཱ་པ་ཎ་དང་དཔག་
[290b.4]ཚད་དང་གྲུ་བཞི་ལ་སོགས་པའི་སྒྲ་བཞིན་དུ་ཕྱོགས་གཅིག་ལ་འཇུག་པ་ཉིད་དུ་མི་འགྱུར་རོ། །དེ་ལ་གྲངས་ལ་མི་ལྟོས་པ་ཐིགས་པ་དང་ཁྱོར་པ་གང་ལ་སོགས་པ་སྟེ། གྲངས་ལ་མི་ལྟོས་པ་ཉིད་ཀྱི་ཕྱིར་གཅིག་ལ་ཡང་ཐིགས་པ་འཇུག་ཅིང་དུ་མ་ལ་ཡང་ཡོད་དོ། །ཆུའི་སྒྲ་ནི་
[290b.5]ཚད་ལ་མི་ལྟོས་པ་སྟེ། ལྟེ་བ་དང་བརླ་དང་པུས་མོ་ཙམ་ཉིད་ལ་སོགས་པ་མི་ལྟོས་པའི་ཕྱིར་རོ། །དབྱིབས་ལ་མི་ལྟོས་པ་སྟེ། རིང་པོ་དང་ཟླུམ་པོ་དང་གྲུ་བཞི་ལ་སོགས་པ་ལ་མི་ལྟོས་པ་ཉིད་ཀྱི་ཕྱིར་རོ། །དེ་བཞིན་དུ་ཁུ་ཚུར་དང་མདུད་པ་དང་རྣ་རྒྱན་ལ་སོགས་པ་རྣམས་ཀྱི་ཆ་
[290b.6]ཤས་ནི་ཁུ་ཚུར་ལ་སོགས་པའི་སྒྲ་རྣམས་ཀྱིས་བརྗོད་པར་བྱ་བ་མ་ཡིན་ནོ། །ཡན་ལག་ཁྱད་པར་ཅན་ལ་ཞེས་པ། ངེས་པའི་ཡན་ལག་གི་ཁྱད་པར་ཚོགས་པ་རྗོད་པར་བྱེད་པ་བརྒྱ་ལ་སོགས་པའི་སྒྲ་རྣམས་ཡན་ལག་ལ་འཇུག་པ་རྣམས་མ་ཡིན་ནོ། །ཁ་དོག་ཁྱད་པར་ཅན་ལ་ཁྲ་བོ་
[290b.7]དང་འདྲེན་མ་ཞེས་པ་ནི་སྔོན་པོའམ། དམར་པོ་ཁྲ་བོའི་ཡན་ལག་ལ་འཇུག་པ་མ་ཡིན་ནོ། །རེ་རེ་ལ་ཡོངས་སུ་རྫོགས་པ་སྟེ་ཞེས་པ་དང་། ཆ་ཤས་རེ་རེ་ལ་གཙོ་བོར་རབ་ཏུ་སྦྱར་རོ་ཞེས་པའི་དོན་ཏོ། །གཙོ་བོ་ཞེས་པ་འདི་ཅི་ལས་ཤེ་ན། ཕྱི་མ་ལ་ཉེ་བར་བཏགས་པ་ཞེས་
[291a]
[291a.1]པའི་ཚིག་ལས་སོ། །གྲོང་གི་སྒྲ་ནི་ཁང་པ་དང་ཞིང་དང་ལམ་དང་ལྕགས་རི་དང་སབ་མ་དང་སྐྱེས་བུ་ལ་སོགས་པ་ཚོགས་པ་རྗོད་པར་བྱེད་པ་སྟེ། དེ་ཕྱོགས་གཅིག་སྐྱེས་བུ་ལ་འཇུག་པའོ། །ལུས་ཀྱི་ལས་ཀྱིས་བདག་གི་ལས་བཤད་པ་ཞེས་པ་འདིར་ལུས་ཀྱི་སྒྲ་ལག་པ་
[291a.2]དང་རྐང་པ་ལ་སོགས་པ་ཚོགས་པ་ལ་འཇུག་བཞིན་པ་ནི་དེའི་ཆ་ཤས་ཁོ་ན་ལ་ཉེ་བར་བཏགས་པའོ། །སྤྱི་བརྟགས་པ་རྒྱས་པར་ནི། ཆ་ཤས་རྣམས་ལ་ཉེ་བར་བཏགས་པས་འཇུག་པ་ཉིད་མང་བ་ཉིད་དུ་མཐོང་ངོ་ཞེས་རིགས་ཀྱི་སྒྲ་ལས་ཚོགས་པའི་སྒྲ་ཁྱད་པར་དུ་བྱེད་པ་ཉིད་ཀྱིས་
[291a.3]བཤད་དོ། །འདི་ནི་ཕྱོགས་ཙམ་བསྟན་པའོ། །ཡང་འདི་ནི་འདིར་རིགས་དང་ཚོགས་པའི་སྒྲ་དག་གི་ཁྱད་པར་གསལ་བ་སྟེ། ཚོགས་པའི་སྒྲ་ནི་ཚོགས་པ་གཅིག་གི་ནང་དུ་འདུས་པའི་རིགས་མི་མཐུན་དང་རིགས་མཐུན་ཡང་ཐ་མི་དད་པར་བརྗོད་དེ། རིགས་ཀྱི་སྒྲ་ནི་དེའི་
[291a.4]རིགས་མཐུན་པ་ཁོ་ནའི་ཚོགས་པ་དང་ཚོགས་པ་མ་ཡིན་པ་ཡང་ངོ་ཞེས་པའོ། །འོ་ན་གང་འདི་ཉིད་ཉི་མ་ལ་སོགས་པའི་སྒྲ་གསལ་བ་གཅིག་ལ་ཉེ་བར་ལྟུང་བ་དེ་རྣམས་ཅི་ལྟར་སྤྱི་བརྗོད་པ་ཡིན་ཞེ་ན། དེ་ལ་ཡང་ཉི་མ་ལ་སོགས་པ་རྣམས་ཀྱི་གནས་སྐབས་ཐ་དད་པས་ཐ་དད་
[291a.5]པའི་ཕྱིར་དུ་མ་ཉིད་ཡོད་དོ་ཞེས་པས་མི་སྐྱོན་ནོ། །འབྲེལ་པ་མ་བྱས་པ་ཞེས་པ། འབྲེལ་པ་མི་ཤེས་པའི་རྟོགས་པ་པོའོ། །ཅི་ལྟར་རྗེས་སུ་དཔག་པ་ཡིན་ཞེས་པ་མ་ཡིན་པ་ཁོ་ནའོ་ཞེས་པ་བསམས་པའོ། །འབྲེལ་པ་ཞེས་མ་བྱས་པའི་སྒྲ་ལས་སྐྱེས་པའི་རྟོགས་པ་གང་ཡིན་པ་དེ་ནི་རྗེས་སུ་དཔག་པ་
[291a.6]མ་ཡིན་ཏེ། དཔེར་ན་གང་ཞིག་གི་ཀླ་ཀློའི་སྒྲ་ལས་སྐྱེས་པའི་ཐེ་ཚོམ་བཞིན། འབྲེལ་པ་བྱེད་པའི་དུས་སུ་འདི་པ་ན་སའོ་ཞེས་པ་འདི་ལ་ཡང་རྟོགས་པ་ནི་རྣམ་པ་དེ་ལྟ་བུའོ་ཞེས་པ་ཁྱབ་པར་བྱེད་པ་དང་འགལ་བའོ། །དེ་ལ་མ་ཡིན་ཞེས་པ་ལ་སོགས་པས་ནི་མ་གྲུབ་པ་ཉིད་དུ་གསུངས་སོ། །
[291a.7]རྟོགས་པས་ཞེས་པ་ལ་སོགས་པས་ནི། འདི་ཁོ་ན་ལ་འཐད་པའོ། །རྟོགས་པས་ཞེས་པ་འབྲེལ་བ་རྟོགས་པས་ཞེས་བྱ་བའི་དོན་ཏོ། །འདི་ནི་སྒྲ་དང་ཞེས་པ་ལ་སོགས་པས་རྟོགས་པ་དེ་སྟོན་ཏོ། །འོ་ན་འདི་སྒྲ་ཡང་ཉེ་བ་མངོན་སུམ་པའི་དངོས་པོའི་སྤྱི་རྗོད་པར་བྱེད་པ་མ་ཡིན་ནམ།
[291b]
[291b.1]དེས་ན་ཅི་ཞིག་ལས་དེས་པ་ན་སའི་དོན་འགྲུབ་ཅེ་ན། སྐྱོན་འདི་མེད་དེ་ཇི་ལྟར་འབྲེལ་པ་རྟོགས་པའི་ཤིང་གི་སྒྲ་སྤྱི་རྗོད་པར་བྱེད་པ་ཡང་གང་གི་ཚེ་མདུན་ན་གནས་པའི་པ་ལ་ཤ་ལ་སོགས་པ་ལ་ཤིང་འདི་ཆོད་ཅིག་ཅེས་སྦྱོར་བ་དེའི་ཚེ་ཤིང་གི་བྱེ་བྲག་ཁོ་ན་ལ་འཇུག་པ་དེ་ལྟར་འདི་སྒྲ་ཡང་ངོ་། །འོ་ན་
[291b.2]ཅི་ཞེ་ན། མིང་བྱེ་བྲག་ཏུ་རྟོགས་པའོ་ཞེས་པ། པན་སའི་སྒྲས་དེར་མིང་བྱེ་བྲག་ཏུ་རྟོགས་པ་ཙམ་བྱ་བའོ་ཞེས་པའི་དོན་ཏོ། །འདི་ཁོ་ན་གསལ་བར་བྱེད་པ་གསུངས་པ། འབྲེལ་པ་རབ་ཏུ་བསྟན་པའི་དོན་ནི་ཞེས་པ་ལ་སོགས་པ་སྟེ། ནིའི་སྒྲ་ནི་ངེས་པར་འཛིན་པའི་དོན་ཅན་ནོ། །མིང་ཅན་
[291b.3]གང་གི་དོན་ཡིན་པ་དེ་ནི་དེ་སྐད་ཅེས་བརྗོད་དེ། གང་འདིའི་སྒྲ་པ་ན་སའི་དོན་ཅན་དང་པ་ན་སའི་སྒྲ་གཞི་མཐུན་པ་ཉིད་དེ་ནི་འབྲེལ་པ་བསྟན་པའི་དོན་ཅན་ནོ། །འོ་ན་བརྗོད་པར་བྱ་བ་གཅིག་ལ་སྒྲ་དག་འཇུག་པ་ནི་གཞི་མཐུན་པ་ཉིད་དོ། །དེའི་ཚེ་ཡང་འབྲེལ་པ་མི་ཤེས་པ་ཉིད་ཀྱི་
[291b.4]ཕྱིར་པ་ན་སའི་སྒྲའི་དོན་མེད་པ་ཁོ་ན་སྟེ། དེ་ཅི་ལས་གཞི་མཐུན་པ་ཉིད་ཡིན་ཞེ་ན། བརྡར་བྱེད་དུ་འཇུག་པ་པོས་མིང་ཉིད་ཀྱིས་པ་ན་སའི་དོན་ལ་འཇུག་པའི་ཕྱིར་དེའི་ཚེ་འདི་སྒྲའི་དོན་ལ་ངེས་པར་སྦྱར་ཏེ། དེའི་ཕྱིར་དེ་ལ་འཇུག་གོ་ཞེས་པས་མི་སྐྱོན་ནོ། །འདིར་འདི་དོན་ཡིན་ཏེ། མིང་དང་མིང་ཅན་
[291b.5]གྱི་འབྲེལ་པ་རྟོགས་པ་ཙམ་གྱི་དོན་ཅན་ཁོ་ན་དེའི་ཚེ་པ་ན་སའི་སྒྲའི་ཡིན་ཏེ། འདིའི་སྒྲའི་ཡུལ་པ་ན་ས་ལ་མིང་ཉིད་དུ་ངེས་པར་སྦྱར་བའོ་ཞེས་པའོ། །ཡང་ཅི་ལྟར་དེ་དང་འབྲེལ་པ་རབ་ཏུ་བསྟན་པར་ནུས། ཇི་ཙམ་གྱིས་འདི་དེ་ལ་འཇུག་པའི་རྒྱུ་མཚན་དངོས་པོར་ཡོད་པ་ཅུང་ཟད་
[291b.6]ཀྱང་ཁྱེད་ཀྱིས་འདོད་པ་མ་ཡིན་ནོ་ཞེས་གསུངས་པ། གཉིས་ཀའི་བརྗོད་པར་བྱ་བའོ་ཞེས་བྱས་ནས་སོ་ཞེས་པ། པ་ན་ས་དང་འདིའི་སྒྲ་གཉིས་ཀ་དག་ཀྱང་རྗོད་བྱེད་དུ་འོས་པའམ། གཉིས་དག་གིས་བརྗོད་པར་ནུས་པའོ་ཞེས་པའི་དོན་ཏོ། །འདི་སྐད་བཤད་པར་འགྱུར་ཏེ། སྒྲ་རྣམས་
[291b.7]འདོད་པ་ཙམ་གྱིས་འཇུག་པ་ཉིད་ཀྱི་ཕྱིར་དོན་རྣམས་ཐམས་ཅད་ལ་རུང་བ་སྟེ། དེའི་ཕྱིར་འཇུག་པའི་རྒྱུ་མཚན་གཞན་མེད་ཀྱང་འབྲེལ་པ་བསྟན་པར་ནུས་སོ། །དེའི་དོན་ཉིད་མ་ཡིན་པའི་ཕྱིར་ནི་མིང་གི་དོན་ཅན་པ་ན་སའི་སྒྲ་ཡིན་ནོ་ཞེས་པ་པ་ན་ས་དེས་དོན་དང་ལྡན་པ་
[292a]
[292a.1]མ་ཡིན་པ་ཉིད་ཀྱི་ཕྱིར། པ་ན་སའི་སྒྲ་ནི་མིང་བྱེ་བྲག་ཏུ་རྟོགས་པའི་དགོས་པ་ཅན་ནོ་ཞེས་པའི་དོན་ཏོ། །འོ་ན་དེ་ཁོ་ན་ཞེས་པ་ལ་སོགས་པ། འདིའི་སྒྲ་དང་དོན་དག་གི་འབྲེལ་པ་གང་ཡིན་པ་དེ་ཁོ་ན་སྒྲའི་སྒྲུབ་པའི་ངོ་བོར་བརྗོད་པར་བྱ་བར་འགྱུར་ཞིང་། དེ་
[292a.2]ལས་ཀྱང་ཁྱད་པར་འདི་ཁོ་ནས། སྒྲ་ལས་བྱུང་བ་རྗེས་སུ་དཔག་པ་ལས་ཚད་མ་གཞན་དུ་འགྱུར་རོ་ཞེས་སེམས་པའོ། །ཚད་མ་གཞན་གྱིས་ཉེ་བར་དམིགས་ནས་ཞེས་པ་མངོན་སུམ་ལ་སོགས་པས་སོ། །ཡང་ཇི་ལྟར་མངོན་སུམ་གྱིས་འབྲེལ་པ་ཅན་དག་ཉེ་བར་དམིགས། ཇི་ཙམ་དུ་
[292a.3]སྒྲ་དང་དོན་དག་ནི་སྤྱིའི་ངོ་བོ་དག་གོ་ཞེས་བསྒྲུབས་ཟིན་ཅིང་། མངོན་སུམ་སྤྱིའི་ཡུལ་ཅན་ཡང་མ་ཡིན་ནོ་ཞེ་ན། ཕ་རོལ་པོའི་འདོད་པས་འདི་སྐད་བཤད་པའོ། །ཡང་ན་ཚད་མ་གཞན་གྱི་རྗེས་ལ་བྱུང་བའི་ཤེས་པ་སྟེ། འབྲས་བུ་ལ་རྒྱུས་ཉེ་བར་བཏགས་པའི་ཕྱིར་ཚད་མ་གཞན་གྱི་སྒྲས་
[292a.4]བརྗོད་དོ་ཞེས་པས་མི་སྐྱོན་ནོ། །ཡིད་ཀྱིས་བརྟགས་པའོ་ཞེས་པས་འབྲེལ་པ་ནི་འབྲེལ་པ་ཅན་ལས་ཐ་དད་པར་མེད་པ་ཁོ་ན་སྟེ། འབྲེལ་པ་ཅན་དག་ཕན་ཚུན་ལྟོས་པའི་དབང་ལས་རྣམ་པར་བརྟགས་པ་འབའ་ཞིག་གོ། །གང་བརྟགས་པ་དེ་ནི་འགའ་ཞིག་ཏུ་ཡང་དོན་བྱ་བ་ལ་སྦྱོར་བ་མ་ཡིན་
[292a.5]ཞིང་དོན་བྱ་བའི་དོན་ཅན་ནི་རྟོགས་པ་ལྡན་པ་རྣམས་ཀྱི་རྩོམ་པ་ཐམས་ཅད་དོ་ཞེས་པས་འབྲེལ་པ་རྗེས་སུ་དཔག་པར་འོས་པ་མ་ཡིན་ནོ། །གང་བརྟགས་པ་དེ་ནི་རྗེས་སུ་དཔག་པར་འོས་པ་མ་ཡིན་ཏེ། རྗེས་སུ་དཔག་པ་དང་རྗེས་སུ་དཔག་པར་བྱ་བའི་འབྲེལ་པ་བཞིན་སྒྲ་དང་དོན་གྱི་
[292a.6]འབྲེལ་པ་ཡང་དེ་ལྟ་བུའོ། །ཁྱབ་བྱེད་དང་འགལ་བའོ། །འོ་ན་སྤྱི་བརྟགས་པ་ཡིན་ན། ཡང་ན་རྗེས་སུ་དཔག་པར་བྱའོ་ཞེ་ན། དེ་ལ་རང་གི་མཚན་ཉིད་ཁོ་ན་གཞན་གྱི་ངོ་བོས་རྗེས་སུ་དཔག་པར་བྱ་བའོ་ཞེས་པ་འདི་བཤད་ཟིན་ཏོ། །ཅི་སྟེ་ཉེ་བར་འཇལ་བ་ལ་སོགས་པ་ལྷག་མ་ཅི་ལྟར་ཞེས་
[292a.7]པ་སོགས་པའི་སྒྲས་ནི་ཞེས་གྲགས་པ་ཉིད་དུ་སྲིད་པ་ལ་སོགས་པ་གཟུང་བར་བྱའོ། །ཕྱོགས་འདི་ལྷག་མ་བཤད་པ་ཡིན་ཞེས་པ་ཇི་སྐད་བཤད་པའི་ཕྱོགས་འདི་ཁོ་ནས་ཉེ་བར་འཇལ་བ་ལ་སོགས་པ་རྣམས་ཇི་ལྟར་སྲིད་པ་བཞིན་དུ་ཚད་མ་མ་ཡིན་པ་ཉིད་དང་། ཚད་མ་གཞན་མ་ཡིན་
[292b]
[292b.1]པ་ཉིད་དུ་བཤད་པར་རིག་པར་བྱའོ། །ཇི་སྐད་བཤད་པའི་ཕྱོགས་དེ་ཉེ་བར་འཇལ་བའི་དབང་དུ་བྱས་ནས་གསུངས་པ། རེ་ཞིག་ཉེ་བར་འཇལ་བ་ནི་ཞེས་པ་ལ་སོགས་པ་སྟེ། བ་ལང་དང་བ་མེན་ལ་སོགས་པ་རྣམས་ལ་ཞེས་པས་ལུང་སྟོན་ཏོ། །འདྲ་བར་རྟོགས་པའི་དོན་ཅན་ཞེས་
[292b.2]པ་འདྲ་བར་ངེས་པའི་རྒྱུ་མཚན་ཞེས་པའི་དོན་ཏོ། །རབ་ཏུ་གྲུབ་པ་དང་ཆོས་མཐུན་པ་ཉིད་ལས་བསྒྲུབ་བྱ་སྒྲུབ་པར་བྱེད་པ་ནི་ཉེ་བར་འཇལ་བའོ་ཞེས་པ་འདི་དེའི་མཚན་ཉིད་དོ། །རབ་ཏུ་གྲུབ་པ་ནི་ཚད་ལས་ངེས་པ་བ་ལང་ལ་སོགས་པ་ཡིན་ཞིང་། དེ་དང་ཆོས་མཐུན་པ་ཉིད་དེ་ཆོས་མཚུངས་
[292b.3]པ་ཉིད་ནི་རབ་ཏུ་གྲུབ་པ་དང་ཆོས་མཐུན་པ་ཉིད་དོ། །དེ་ལས་བ་ལང་ལ་སོགས་པ་ལ་ལྟོས་པས་བ་མེན་ལ་སོགས་པ་འདྲ་བ་ཉིད་སྒྲུབ་པར་བྱེད་ཅིང་འགྲུབ་པ་གང་ཡིན་པ་དེ་ནི་ཉེ་བར་འཇལ་བའོ། །དེ་ལ་གཞན་ལས་ཐོས་ནས་ཞེས་པ། བ་ལང་ལྟ་བུ་ནི་བ་མེན་ནོ་ཞེས་པ་ལ་སོགས་པ་
[292b.4]ཡིད་ཆེས་པའི་ཚིག་ཐོས་པ་སྔོན་མ་ཅན། བརྗོད་པར་འདོད་པའི་རྟེན་གྱི་བ་མེན་ལ་སོགས་པ་འདྲ་བ་ཉིད་རྟོགས་པ་གང་དེ་ནི་སྒྲ་ལས་བྱུང་བ་ཁོ་ན་སྟེ། སྒྲ་ལས་རབ་ཏུ་བྱུང་བ་ཉིད་ཀྱི་ཕྱིར་ཏེ། སྒྲ་ལས་བྱུང་བ་ཡང་རྗེས་སུ་དཔག་པའི་ནང་དུ་འདུས་པ་ཉིད་ཀྱི་ཕྱིར་ཚད་མ་གཞན་མ་ཡིན་ནོ། །ཕྱི་རོལ་གྱི་དོན་
[292b.5]ལ་ནི་སླུ་བ་ཉིད་ཀྱི་ཕྱིར་ན་དེ་ཚད་མ་ཉིད་ཁོ་ན་མེད་དོ་ཞེས་པ་དགོངས་པའོ། །རང་ཉིད་ཀྱིས་ཡིན་ན་ནི་དོན་གཉིས་ཞེས་པ། རང་ཉིད་ཁོ་ནས་བ་ལང་དང་བ་མེན་གཉིས་མངོན་སུམ་གྱིས་རྟོགས་ནས། ཡིད་ཀྱིས་འདྲ་བ་ཉིད་དུ་གང་གི་ཚེ་འདི་དག་རྟོགས་པ་དེའི་ཚེ་ཉམས་སུ་མྱོང་ཟིན་
[292b.6]པའི་དོན་གྱི་ཡུལ་ཅན་ཉིད་ཀྱི་ཕྱིར། རྟོགས་པ་དེ་དྲན་པ་ལ་སོགས་པ་བཞིན་དུ་ཚད་མ་ཁོ་ནར་མི་འགྱུར་ན། ཅི་ཞིག་ལས་ཚད་མ་གཞན་དུ་འགྱུར། །རྣམ་པ་གཞན་དུ་ན་བ་ལང་དང་མ་ཧེ་མངོན་སུམ་གྱིས་མཐོང་ནས་གང་གི་ཚེ་འདི་ལས་འདི་མི་འདྲ་བའོ་ཞེས་པ་དེ་དག་མི་འདྲ་བར་
[292b.7]རྟོགས་པ་དེའི་དེ་ཡང་ཚད་མ་གཞན་དུ་འགྱུར་རོ་ཞེས་པ་དགོངས་པའོ། །དེ་ལྟར་རྟོགས་པ་ན་མ་ཡིན་ཞེས་པ། ཚད་མ་ཡིན་པས་རྟོགས་བཞིན་པ་ནི། དྲན་པ་ལ་སོགས་པས་རྟོགས་པ་ལྟར་འདྲ་བ་ཉིད་ནི་གཞལ་བྱ་མ་ཡིན་ནོ་ཞེས་པའི་དོན་ཏོ། །ཕྱོགས་ཅན་ལེན་གྱིས་
[293a]
[293a.1]སྨྲས་པ། ལུང་གིས་བྱས་པའི་འདུ་བྱེད་ལས་དྲན་པ་ལ་ལྟོས་པའི་ཆོས་མཐུན་པ་ཉིད་ཤེས་པ་ལས་མཚུངས་པ་ཉིད་ཅེས་བྱ་བའི་འབྲེལ་པ་རྟོགས་པ་ནི་ཉེ་བར་འཇལ་བའི་དོན་ཏོ་ཞེས་སོ། །བ་ལང་ལྟ་བུ་བ་མེན་ནོ་ཞེས་པའི་ལུང་འདིས་བྱས་པའི་འདུ་བྱེད་གང་ཡིན་པ་དྲན་
[293a.2]པའི་ཤེས་པའི་རྒྱུ་སྟེ། དེ་ལས་དྲན་པ་གང་ཡིན་པ་དེ་ལ་ལྟོས་པའི་ཆོས་མཐུན་པ་ཉིད་ཤེས་པ་ལས། གང་མཚུངས་པ་ཞེས་བྱ་བའི་འབྲེལ་པ་རྟོགས་པ་སྟེ། མིང་དང་མིང་ཅན་གྱི་འབྲེལ་པ་ཡོངས་སུ་གཅོད་པ་དེ་ཉེ་བར་འཇལ་བའི་ཡུལ་ལོ། །འདི་སྐད་བཤད་པར་འགྱུར་ཏེ། དང་པོར་རེ་ཞིག་
[293a.3]བ་ལང་ལྟ་བུར་བ་མེན་ནོ་ཞེས་སྒྲས་ཡོངས་སུ་གཅོད་ཅིང་། དེ་ལས་བ་མེན་མཐོང་བ་དྲན་པ་ལ་ལྟོས་པའི་ཆོས་མཐུན་པ་ཉིད་ཤེས་པ་ཁོ་ན་ལས་འདི་ལྟར་འདི་བ་མེན་ནོ་ཞེས་ཞེན་པར་བྱེད་དོ་ཞེས་པའོ། །འདི་ཡང་གལ་ཏེ་ཇི་ལྟར་ལུང་ལས་ཡོངས་སུ་གཅད་པ་དེ་ལྟར་མ་མཐོང་བ་ཡང་ཡོངས་སུ་
[293a.4]གཅོད་པར་བྱེད་ན་ནི། དེས་ན་དྲན་པ་ཁོ་ན་སྟེ་ཚད་མ་མ་ཡིན་ནོ། །ཅི་སྟེ་འདིའི་ཞེས་ཁྱད་པར་ངོ་ཤེས་པ་ལས་ཁྱད་པར་དུ་རྟོགས་པར་བྱེད་ན་དེའི་ཕྱིར་རྗེས་སུ་དཔག་པ་ཁོ་ན་སྟེ་ཚད་མ་གཞན་མ་ཡིན་ནོ། །དེ་ལྟར་ནི་གང་བ་ལང་དང་མཚུངས་པ་དེ་བ་མེན་ནོ་ཞེས་རྣམ་པར་གཞག་པ་ན། འདྲ་བའི་
[293a.5]རྟགས་ལས་ཁྱད་པར་རྟོགས་པས་སོ། །འདི་སྐད་བཤད་པར་འགྱུར་ཏེ། མཐོང་བཞིན་པའི་གོང་བུ་ནི་ཆོས་ཅན་ནོ། །འདི་བ་མེན་ནོ་ཞེས་པའི་མིང་ནི་བསྒྲུབ་པར་བྱ་བའི་ཆོས་སོ། །སྒྲ་ཉམས་སུ་མྱོང་བ་ལས་མདུན་ན་གནས་པ་དག་ལ་གང་བ་ལང་དང་བ་མེན་འདྲ་བའི་སྤྱི་དེ་ནི་ཕྱོགས་ཀྱི་ཆོས་སོ། །
[293a.6]ལུང་ཉམས་སུ་མྱོང་བའི་བློ་ལ་གནས་པའི་བ་མེན་ནི་དཔེའོ་ཞེས་པའོ། །ཐབས་མཐའ་ཡས་པ་ཅན་ཡང་མཚུངས་སོ་ཞེས་བྱ་བ་འབྲེལ་པ་རྟོགས་པའོ་ཞེས་པས། ཉེ་བར་འཇལ་བ་ཁོ་ན་ལ་ངོར་དགའ་བ་ཅི་ཞིག་ཡིན། དཔེར་ན་གང་སྣ་མཐོ་བ་དེ་ནག་པ་སྟེ་གང་རྟ་ལ་ཞོན་པ་དེ་བྱམས་
[293a.7]པའོ་ཞེས་པ་ལྟ་བུའོ། །འདི་ཚད་མ་ཡང་མ་ཡིན་ནོ། །རི་ཁྲོད་པས་ན་སྨྲས་པ། ཉེ་བར་འཇལ་བ་ཡང་འདྲ་བ་ཉིད་དུ། ཉེ་བར་མ་གྲུབ་པའི་དོན་ལ་བློ་སྐྱེ་བ་སྟེ། དཔེར་ན་བ་མེན་མཐོང་བ་བ་ལང་དྲན་པའི་ཞེས་སོ། །དེ་ཡང་བཟུང་ཟིན་པའི་ཡུལ་ཅན་ཉིད་ཀྱི་ཕྱིར་དྲན་པ་ལ་སོགས་
[293b]
[293b.1]པ་བཞིན་དུ་ཚད་མ་ཉིད་དུ་མི་འཐད་དོ། །དེ་ལྟར་འགྱུར་མོད་ཀྱི། གཟུང་བ་ཙམ་ཁོ་ན་འཛིན་པར་གྱུར་པ་ན་ཉེ་བར་འཇལ་བ་ཚད་མ་ཉིད་མ་ཡིན་གྱི། འོ་ན་ཅི་ཞེ་ན། འདྲ་བས་ཁྱད་པར་དུ་བྱས་པའོ། །དེ་ནི་དེ་ལྟར་སྔར་བཟུང་བ་ཡང་མ་ཡིན་ཏེ། དེའི་ཕྱིར་བཟུང་ཟིན་པའི་ཡུལ་ཅན་
[293b.2]ཉིད་མ་གྲུབ་བོ་ཞེ་ན། འདི་མི་རིགས་ཏེ། མངོན་སུམ་ཁོ་ན་ལས་དེ་རྟོགས་པའི་ཕྱིར་རོ། །འདྲ་བས་ཁྱད་པར་དུ་བྱས་པ་ཁོ་ནར་དེ་སྔར་ཡང་ཡོངས་སུ་བཅད་པས་སོ། །འདི་གདོན་མི་ཟ་བར་ཁས་བླང་བར་བྱ་བ་སྟེ། རྣམ་པ་གཞན་དུ་ན་སྔར་བ་ལང་མཐོང་ནས་ཕྱིས་མ་ཧེ་མཐོང་བའི་
[293b.3]ཡང་བ་ལང་ལ་འདྲ་བའི་བློར་འགྱུར་ན་འགྱུར་བ་ཡང་མ་ཡིན་ནོ། །དེའི་ཕྱིར་འདྲ་བས་ཁྱད་པར་དུ་བྱས་པའི་དངོས་པོ་འཛིན་བཞིན་པ་ཡང་ཚད་མ་གཞན་དུ་རྟགས་པའི་ཆེད་དུ་ནུས་པ་མ་ཡིན་ནོ། །ཅི་སྟེ་དེ་ལྟ་ན་ཡང་དེ་ཡང་འགའ་ཙམ་ཞིག་གིས་ཁྱད་པར་དུ་བྱས་པ་འཛིན་ཞེས་པས་ཚད་མ་གཞན་ཉིད་དུ་
[293b.4]བརྟག་པར་བྱ་ན། མངོན་སུམ་ལས་ཡོངས་སུ་གཅད་པའི་ཨུཏྤལ་སྔོན་པོའི་རྫས་ལ་གང་དུས་ཕྱིས་འབྱུང་བའི་ཨུཏྤ་ལ་སྔོན་པོ་ཞེས་འཛིན་པར་དེ་ཡང་ཚད་མ་གཞན་དུ་བརྟག་པར་བྱ་བ་སྟེ། འདི་ལ་ཡང་སྔར་ཨུཏྤ་ལ་སྔོན་པོའོ་ཞེས་པའི་རྣམ་པ་འདིས་མངོན་སུམ་ལས་ཡོངས་སུ་བཅད་
[293b.5]པ་མ་ཡིན་པ་ཁོ་ན་སྟེ། རྣམ་པར་མི་རྟོག་པ་ཉིད་ཀྱི་ཕྱིར་རོ། །དེ་ལྟར་འགྱུར་མོད་ཀྱི་དེ་ནི་དབང་པོ་ལས་སྐྱེས་པ་ཉིད་ཀྱི་ཕྱིར་མངོན་སུམ་ཁོ་ནའི་ནང་དུ་འདུས་པར་རིག་པར་འགྱུར་རོ། །ཐ་སྙད་ལ་མཁས་པའི་དབང་པོའི་ཤེས་པ་ཡང་རྣམ་པར་རྟོག་པ་དང་བཅས་པར་འགྱུར་ཏེ། དེའི་ཕྱིར་འདིར་
[293b.6]ཐལ་བར་འགྱུར་རོ་ཞེ་ན། འདི་མི་རིགས་ཏེ། བརྡ་ལ་ལྟོས་པ་ཉིད་ཀྱི་ཕྱིར་རོ། །གཞན་དུ་ན་བརྡ་མངོན་པར་མི་ཤེས་པ་ཡང་དེ་ལྟར་ཡོངས་སུ་གཅོད་པར་འགྱུར་རོ། །དབང་པོ་ལས་བྱུང་བ་བརྡ་ལ་ལྟོས་པ་ཡང་མ་ཡིན་ཏེ། དངོས་པོའི་རང་བཞིན་ངེས་པར་རྟོགས་པ་མི་གནས་པར་
[293b.7]གྱུར་ན་མི་རུང་ངོ་། །དེ་ལྟར་ནི་ཨུཏྤལ་སྔོན་པོའི་བདག་ཉིད་དུ་གང་དངོས་པོ་རྣམ་པར་གནས་པ་དེ་ཁོ་ན་ལ། འདོད་པ་ལས་སེར་པོའི་སྒྲ་བརྡར་བྱས་པ་ན། འགའ་ཞིག་སྔོན་པོ་ཞེས་ཞེན་ཅིང་། ཁ་ཅིག་སེར་པོར་ཞེས་སོ། །དེའི་ཕྱིར་མི་ཤེས་པར་གྱུར་ན། ཅི་ལྟར་དེའི་དངོས་པོ་
[294a]
[294a.1]རྣམ་པར་གནས་པ་ཡིན་ཞེས་པའོ། །དངོས་པོ་ཇི་ལྟ་བའི་བརྡ་ནི་མེད་དེ། དེ་འདོད་པའི་རྗེས་སུ་བྱེད་པའི་ཕྱིར་དང་། འདོད་པ་ཡང་དངོས་པོ་ལ་རྟེན་མ་ངེས་པ་ཉིད་ཀྱི་ཕྱིར་རོ། །གཞན་ཡང་གལ་ཏེ་མཐོང་བཞིན་པ་ལས་གཞན་པའི་ལྐོག་གྱུར་ལ་འདི་དང་དེ་འདྲའོ་
[294a.2]ཞེས་འདྲ་བ་ཉིད་ཀྱི་བློ་ནི་ཚད་མ་གཞན་དུ་རྟོག་ན། མཐོང་བཞིན་པ་ལས་གཞན་པའི་ལྐོག་གྱུར་ལ་འདི་དང་དེ་མི་འདྲ་བའོ་ཞེས་མི་འདྲ་བ་ཉིད་ཀྱི་བློ་ཡང་ཚད་མ་གཞན་བདུན་པར་ཅིའི་ཕྱིར་བརྟག་པར་བྱ་བ་ཉིད་མ་ཡིན་ཞིང་། དངོས་པོ་མེད་པའི་ཚད་མ་ལས་ཕྱི་རོལ་དུ་མ་གྱུར་པ་ཉིད་ཀྱི་
[294a.3]ཕྱིར་ཞེ་ན། མ་ཡིན་ཏེ་འདི་ནི་དངོས་པོའི་ཡུལ་ཅན་ཉིད་ཀྱི་ཕྱིར་རོ། །དེ་ལྟར་འགྱུར་མོད། ཕན་ཚུན་མེད་པའི་ངོ་བོ་ཉིད་ཀྱིས་ན་མི་འདྲ་བའི་བློའི་ཡུལ་གང་ཡིན་པ་དེ་ནི་དངོས་པོ་མེད་པའི་ཡུལ་ཁོ་ན་སྟེ། དེ་ལས་ཀྱང་དངོས་པོ་མེད་པའི་ཡུལ་ཅན་ཉིད་དུ་འཐད་དོ་ཞེ་ན། གལ་ཏེ་དེ་ལྟ་ན་
[294a.4]འདྲ་བའི་བློའི་ཡུལ་ལ་ཡང་ཚུལ་འདི་ཡོད་དོ་ཞེས་པས་འདྲ་བའི་བློ་ཡང་དངོས་པོ་མེད་པའི་ཚད་མ་ལས་ཕྱི་རོལ་དུ་མ་གྱུར་པར་ཐལ་བར་འགྱུར་རོ། །ཅི་སྟེ་འདྲ་བ་ཉིད་ཀྱི་ཁྱད་པར་ལ་མི་ལྟོས་པ་ཁྱད་པར་མེད་པ་ཁོ་ནར་མཐོང་བཞིན་པ་ལ་ལྟོས་པ་སྔོན་མཐོང་བ་ཤེས་པ་མཐོང་བཞིན་པ་ནི་
[294a.5]ཉེ་བར་འཇལ་བའོ་ཞེས་རྟོགས་ན་དེ་ལ་ཡང་ནག་པ་ཡོངས་སུ་བཅད་དེ། དུས་ཕྱིས་དེའི་བུ་ཡང་རྟོགས་ནས། འདི་ལྟར་དེ་ནི་འདིའོ་ཕའོ་ཞེས་ཞེན་པར་བྱེད་པ་དེ་ལའང་སྔར་བཟུང་བའི་ནག་པ་ལ་ཕྱིས་མཐོང་བཞིན་པའི་བུ་ལ་ལྟོས་པའི་ཕ་ཉིད་དུ་རྟོགས་པ་སྲིད་པ་ཁོ་ནའོ། །དེ་བཞིན་
[294a.6]དུ་སྐས་ཀྱི་ཕྲེང་བ་ལ་འཛེག་པ་ན། སྤང་ལེབ་དང་པོ་འདས་ཤིང་། སྤང་ལེབ་གཉིས་པ་ཐོབ་པ་ན། འདས་ཟིན་པའི་སྤང་ལེབ་ལ། འདི་ལས་དེ་སྔ་མའོ་ཞེས་མཐོང་བཞིན་པའི་སྤང་ལེབ་ལ་ལྟོས་པས་རྣམ་པར་ཤེས་པར་འགྱུར་རོ་ཞེས་པས་དེ་ཡང་ཉེ་བར་འཇལ་བ་ཉིད་དུ་འགྱུར་ན།
[294a.7]དེ་འདོད་པ་ཡང་མ་ཡིན་ནོ། །དེའི་ཕྱིར་འདི་ཚད་མ་ཉིད་དུ་མི་རིགས་སོ། །དེ་བཞིན་དུ་ཞེས་པ་ལ་སོགས་པ་གཞན་རྣམས་ཀྱང་སྟེ། གང་ཚད་མ་གཞན་ཉིད་དུ་བཏགས་པའི་ཚད་མ་དེ་རྣམས་ཀྱང་རྗེས་སུ་དཔག་པའི་རྣམ་པར་རྟོག་པ་ལས་མི་གཞན་པ་ཉིད་ཀྱི་ཕྱིར་ཚད་མ་གཞན་
[294b]
[294b.1]ཉིད་ཡིན་པར་འདོད་པ་སྤང་བར་བྱ་བ་རྣམས་ཡིན་ནོ། །དེ་ལ་ཞེ་དྲག་པ་ནི་ཞེ་དྲག་ཅིང་བརྗོད་ནས་ངེས་པར་བསྟན་པ་འཇུག་པར་བྱེད་པ་བརྒྱུད་པར་འོས་པའི་ཚིག་སྟེ་དཔེར་ན་ནགས་འདི་ན་གནོད་སྦྱིན་གནས་སོ་ཞེས་པ་ལྟ་བུའོ། །འདི་ཡང་བརྗོད་པར་འདོད་པ་ན་སྒྲ་ལས་བྱུང་བ་ཉིད་
[294b.2]ལས་ཐ་མི་དད་དེ། ཕྱི་རོལ་གྱི་དོན་ལ་ནི་འདིའི་ཚད་མ་ཉིད་ཁོ་ན་མེད་དོ། །སྲིད་པ་ཞེས་བྱ་བ་གང་དུ་གང་སྲིད་པ་དེ་གཟུང་བ་ལས་སྲིད་པ་ཅན་དུ་ཡོད་པ་ཉིད་འཛིན་པ་སྟེ། དཔེར་ན་ཁལ་འཛིན་པ་ལས་བྲེ་གང་ཡོད་པ་ཉིད་དུ་གཟུང་བ་ལྟ་བུའོ། །འདི་ཡང་ཚོགས་པ་རྣམ་པར་གཞག་པ་ཡི། །
[294b.3]རྒྱུ་ནི་ཚོགས་པ་ཅན་ཡིན་ནོ་ཞེས་པས། ཁལ་འབྲས་བུའི་རྟགས་ཁོ་ན་ལས་འཛིན་པའོ། །དེའི་ཕྱིར་རྗེས་སུ་དཔག་པ་ཁོ་ནའི་ནང་དུ་འདུས་པའོ། །དོན་གྱིས་གོ་བ་ལ་སོགས་པ་རྣམས་ནི་སྔར་ཁོ་ནར་བསྒྲུབ་པར་བྱས་སོ་ཞེས་པའོ། །མངོན་སུམ་དང་རྗེས་སུ་དཔག་པ་སྟེ། ཚད་མ་དག་
[294b.4]གཉིས་ཁོ་ནའོ་ཞེས་པ་འདི་ནི་གནས་པའོ། །ལེའུ་ལྔ་པའོ།། །།ཚད་མ་གཉིས་སུ་གནས་སོ་ཞེས་པ་ཚད་མ་དག་གོ། །གཉིས་དག་ཁོ་ནའོ་ཞེས་གང་དམ་བཅས་པ་དེ་སྒྲ་ལས་བྱུང་བ་ལ་སོགས་པ་རྣམས་ཚད་མ་གཞན་ཉིད་བཀག་པས་རྣམ་པས་གནས་སོ་ཞེས་དམ་བཅའ་
[294b.5]བརྟན་པར་བྱེད་པ་ཉིད་སྟོན་ཏོ། །དེ་ལ་ཚད་མ་བརྗོད་པའི་དགོས་པ་ནི་སྔར་ཁོ་ནར་བརྗོད་ཟིན་ཏོ། །ཚད་མ་ལྟར་སྣང་བ་རྣམས་ཀྱི་ནི་བརྗོད་པ་མ་ཡིན་ནོ་ཞེས་བསྟན་པའི་ཆེད་དུ་ཕྱོགས་སྔ་མ་ཉེ་བར་དགོད་པ་གསུངས་པ། ཅི་སྟེ་ཅིའི་དོན་ཞེས་པ་ལ་སོགས་པའོ། །ཚད་མ་ནི་དངོས་པོའི་དེ་ཁོ་ན་ཉིད་
[294b.6]རྟོགས་པའི་ཐབས་ཏེ། དེའི་ཕྱིར་དེ་ཉེ་བར་སྟོན་པ་ནི་དོན་དང་ལྡན་ནོ། །དེ་སྐད་དུ་ཡང་བཤད་པ། གང་གི་ཕྱིར་གཞལ་བྱ་རྟོགས་པ་ནི་ཚད་མ་ལ་རག་ལས་ལ་ཞེས་སོ། །ཚད་མ་ལྟར་སྣང་བ་ཉེ་བར་བསྟན་པ་ལ་ནི་དགོས་པ་ཅུང་ཟད་ཀྱང་ཡོད་པ་མ་ཡིན་ཏེ། དེའི་ཕྱིར་བྱ་བ་མ་ཡིན་ནོ་ཞེས་པའོ། །
[294b.7]གང་ལ་དགོས་པ་མེད་པ་དེ་བྱ་བ་མ་ཡིན་ཏེ། ཇི་ལྟར་དགོས་པ་མེད་པ་གཞན་འགའ་ཞིག་བཞིན། ཚད་མ་ལྟར་སྣང་བ་ཉེ་བར་བསྟན་པ་ཡང་དགོས་པ་མེད་པའོ་ཞེས་པ་ཁྱབ་པར་བྱེད་པ་མེད་པའོ། །སོགས་པའི་སྒྲས་ནི་ཕྱོགས་དང་། གཏན་ཚིགས་དང་། དཔེའི་
[295a]
[295a.1]སྐྱོན་རྣམས་གཟུང་ངོ་། །ཚད་མ་ལྟར་སྣང་སྨྲ་རྣམས་ཀྱི་ཞེས་པ་ལ་སོགས་པས་མ་གྲུབ་པ་ཉིད་དུ་གསལ་བར་བྱེད་དེ། ཇི་ལྟར་ཡན་ལག་རིག་པར་སྨྲ་བ་རྣམས་ཀྱི་ཕྱོགས་གྲུབ་པར་གྱུར་པ་དེ་ལྟར། ཚད་མ་ལྟར་སྣང་སྨྲ་རྣམས་ཀྱི། །མ་གྱུར་ཅིག་སྟེ་འགྱུར་བ་
[295a.2]མིན་ནོ་ཞེས་པའི་དོན་ཏོ། །མཉམ་ནས་མ་ཚང་ལ་སོགས་བརྗོད། །དེའི་ཕྱོགས་འགྲུབ་པ་ངེས་པར་ཟློག་པའི་དོན་དུའོ་ཞེས་པ་ལྷག་མའོ། །དེ་ཉིད་ཀྱི་ཕྱིར་འབྲེལ་པར་གསུངས་པ། ཕྱོགས་འགྲུབ་པ་ངེས་པར་བཟློག་པའི་ཆེད་དུ་མ་ཚང་བ་ཉིད་ལ་སོགས་པ་སྒྲུབ་བྱེད་ཀྱི་སྐྱོན་རྣམས་བཤད་དོ་
[295a.3]ཞེས་པའོ། །ངག་ཙམ་ལ་མཁས་པ་དངོས་པོའི་དེ་ཁོ་ན་ཉིད་མི་ཤེས་པ་དེ་རྣམས་སྒྲུབ་བྱེད་ལྟར་སྣང་བ་ཙམ་གྱིས་ཀྱང་བསྒྲུབ་བྱ་འགྲུབ་པར་འགྱུར་རོ་ཞེས་པའི་ཕྱོགས་གང་ཡིན་པ་དེ་འགྲུབ་པ་བཟློག་པའི་ཆེད་དུ་སྒྲུབ་པར་བྱེད་པའི་སྐྱོན་རྣམས་བཤད་དོ་ཞེས་པའི་ཐ་ཚིག་གོ། །དེ་ལྟར་ན་ཚད་མ་
[295a.4]ལྟར་སྣང་བ་སྟོན་པའི་དགོས་པ་ནི་ལྡོག་པར་རྟོགས་པ་སེལ་བའོ་ཞེས་བརྗོད་པར་འགྱུར་རོ། །དེ་ཕྱིར་དེ་སྟོན་པ་ཉིད་ནི་ཞེས་པ་གང་གི་ཕྱིར་མ་ཚང་བ་ཉིད་ལ་སོགས་པ་རྣམས་ཀྱིས་བསྒྲུབ་བྱ་གྲུབ་པར་མི་འགྱུར་བ་དེའི་ཕྱིར། མ་ཚང་བ་ཉིད་ལ་སོགས་པ་དེ་རྣམས་སྟོན་པ་ནི་རིགས་པའི་ལན་
[295a.5]དུ་བརྗོད་པ་ཡིན་ནོ། །དེར་སྣང་བ་ནི་རྗོད་བྱེད་པ་ཉིད་ལ་སོགས་པ་ལྟར་སྣང་བ་རྗོད་པར་བྱེད་པ་ནི། ལྟག་ཆོད་དུ་སྟེ་ཞེས་པ་དེ་ལྟར་སྣང་བ་རྗོད་པར་བྱེད་པ་ནི། ལྟག་ཆོད་རྣམས་ཀྱི་ནང་དུ་འདུའོ་ཞེས་སྟོན་ཏོ། །ལེན་ལྟར་སྣང་སུན་འབྱིན་པ་ལྟར་སྣང་བའོ་ཞེས་པའི་དོན་ཏོ། །ཅིའི་ཕྱིར་དེ་
[295a.6]སྟོན་པ་རིགས་པའི་ལན་ཡིན་ཞེ་ན་གསུངས་པ། གང་གི་ཕྱིར་འདི་རྣམས་ཀྱི་ཞེས་པ་ལ་སོགས་པའོ། །ཅིའི་ཕྱིར་མ་ཚང་བ་ཉིད་ལ་སོགས་པ་ལྟར་སྣང་བ་སྟོན་པ། ལན་གྱི་སྐྱོན་ཡིན་ཞེ་ན་གསུངས་པ་འདིས་མ་ཡིན་ཞེས་པ་ལ་སོགས་པའོ། །ཕྲད་མ་ཕྲད་ལ་མི་འདོད་བརྗོད། །
[295a.7]ཞེས་པ་ཕྲད་པ་དང་ལྷན་ཅིག་པའི་མ་ཕྲད་པ་ནི་ཕྲད་མ་ཕྲད་དོ། །དེ་ཡོད་པ་ལ་གཏན་ཚིགས་ཀྱི་མི་འདོད་བརྗོད། དུས་གསུམ་པ་ལ་ཡང་མི་འདོད་བརྗོད། །ཅིའི་ཕྱིར་ཞེ་ན་གཏན་ཚིགས་ཀྱི་ཞེས་འཇུག་གོ། །དེ་ལ་ཕྲད་དང་མ་ཕྲད་ལ། །གཏན་ཚིགས་མི་འདོད་བརྗོད་པ་ཞེས་པ་འདི་
[295b]
[295b.1]ནི་ཕྲད་མ་ཕྲད་མཚུངས་པའི་མཚན་ཉིད་དོ། །ལྷག་མ་ནི་རྟགས་མིན་མཚུངས་པའི་འོ། །ཕྲད་མ་ཕྲད་རྟགས་མིན་ཞེས་བྱ། །ཞེས་པ་མཚན་བྱ་ངེས་པར་སྟོན་པའོ། །དཔེ་བརྗོད་དང་བཅས་པའི་གཏན་ཚིགས་ལ་ཞེས་པ་སྦྱོར་བ་ཡོངས་སུ་རྫོགས་པ་ཉིད་དུ་གསལ་བར་བྱེད་དོ། །བསྒྲུབ་བྱ་
[295b.2]དང་ཁྱད་པར་མེད་པར་འགྱུར་རོ་ཞེས་པ་གཏན་ཚིགས་ཀྱང་བསྒྲུབ་པར་བྱ་བར་འཐོབ་བོ་ཞེས་པའོ། །ཅི་ལྟ་བུ་བཞིན་དུ་ཞེ་ན་གསུངས་པ། ཆུ་བོ་དང་རྒྱ་མཚོའི་ཆུ་ཕྲད་པ་ལ་ཁྱད་པར་མེད་པ་བཞིན་ཞེས་པ། ཕྲད་པ་དག་ཀྱང་ཡིན་ལ་དེ་ཆུ་བོ་དང་རྒྱ་མཚོའི་ཆུ་དག་ཀྱང་ཞེས་པ་ལས་འཛིན་པ་སྟེ།
[295b.3]དེ་དག་ཇི་ལྟར་ཁྱད་པར་མེད་པ་དེ་བཞིན་ནོ། །མ་གྲུབ་པ་དང་ཕྲད་པ་མེད་པའི་ཕྱིར་ཞེས་པ། སྔ་མ་ནི་ཕྲད་པ་ཁས་བླངས་ནས་ཁྱད་པར་མེད་པ་བརྗོད་པས་གཏན་ཚིགས་ལྟར་སྣང་བར་བརྗོད་ལ། ད་ལྟ་ནི་ཕྲད་པ་མེད་པ་ཁོ་ནའོ་ཞེས་སྟོན་ཏོ། །བསྒྲུབ་པར་བྱ་བ་ཡོང་ཡོངས་སུ་མ་གྲུབ་ན།
[295b.4]དེ་ཅི་ལྟར་གཏན་ཚིགས་གྲུབ་པ་དང་ཕྲད་པར་འགྱུར། ཅི་སྟེ་ཕྲད་པ་འགྲུབ་པའི་དོན་དུ་བསྒྲུབ་བྱ་ཡོངས་སུ་གྲུབ་པར་འདོད་ན། དེ་ལྟར་གྱུར་ན་འདི་ཅི་ཞིག་གི་གཏན་ཚིགས་ཡིན། གཏན་ཚིགས་ནི་བསྒྲུབ་པར་བྱ་བ་སྒྲུབ་པར་བྱེད་པའི་ཆེད་དུ་འདོད་པ་ཡིན་ན་གལ་ཏེ་དེ་གྲུབ་ན་འདི་ཅི་ཞིག་གི་
[295b.5]གཏན་ཚིགས་ཡིན་ཞེས་པ་གཏན་ཚིགས་མེད་པར་ཐལ་བར་འགྱུར་རོ། །ཅི་སྟེ་མ་ཕྲད་པས་ཞེས་པ་གཏན་ཚིགས་བསྒྲུབ་བྱ་སྒྲུབ་པར་བྱེད་པ་ཞེས་སྦྲེལ་ལོ། །མ་ཕྲད་པ་རྣམས་ཁྱད་པར་མེད་པ་ཉིད་ཀྱི་ཕྱིར་རོ་ཞེས་པ་ཇི་ལྟར་མིག་གིས་གཟུང་བར་བྱ་བ་ཉིད་ལ་སོགས་པ་བསྒྲུབ་བྱ་ལ་མ་
[295b.6]ཕྲད་པ་རྣམས་གཏན་ཚིགས་མ་ཡིན་པ་དེ་ལྟར་འདི་ཡང་གཏན་ཚིགས་མ་ཡིན་ནོ་ཞེས་པའོ། །དེ་ལྟ་ན་ཡང་གཏན་ཚིགས་མེད་པ་ཁོ་ནའོ། །བསྒྲུབ་བྱ་མེད་པ་ལ་ཅི་ཞིག་གི་གཏན་ཚིགས་ཡིན་ཞེས་པ་ཅིའི་ཡང་མ་ཡིན་པ་ཁོ་ནའོ་ཞེས་པའི་དོན་ཏོ། །བསྒྲུབ་བྱ་ལ་ལྟོས་ནས་ནི་འདི་གཏན་
[295b.7]ཚིགས་ཉིད་ཡིན་པ་ལ། བསྒྲུབ་བྱ་མེད་ན་དེ་མི་རིགས་པས་སོ། །ཅི་སྟེ་བསྒྲུབ་པར་བྱ་བ་ལས་གཏན་ཚིགས་ཀྱིས་ཁོ་ན་ཡིན་ན་དེ་ལྟར་ན་བསྒྲུབ་པར་བྱ་བ་གྲུབ་ན། འདི་ཅི་ཞིག་གི་གཏན་ཚིགས་ཡིན། གཏན་ཚིགས་དང་གཏན་ཚིགས་དང་ལྡན་པའི་དངོས་པོ་མི་འགྲུབ་བོ་ཞེས་པའོ། །
[296a]
[296a.1]གཏན་ཚིགས་མ་ཚང་བ་ཉིད་ཀྱི་གཟུགས་བརྙན་དག་སྟེ་ཞེས་པ་གཏན་ཚིགས་མ་ཚང་བ་ཉིད་དུ་རྩོད་པ་ལྟར་སྣང་བ་དག་གོ་ཞེས་པའི་དོན་ཏོ། །རྗོད་པར་བྱེད་པ་ལ་བརྗོད་པར་བྱ་བ་ཉེ་བར་བཏགས་པའི་ཕྱིར་རོ། །ཡང་ཅིའི་ཕྱིར་གཏན་ཚིགས་མ་ཚང་བ་ཉིད་ཀྱི་རྩོད་པ་དག་ཁོ་
[296a.2]ནར་མི་འགྱུར་ཞེ་ན་གསུངས་པ། མི་རིགས་པས་གཏན་ཚིགས་ཐམས་ཅད་ལ་སྐུར་པ་འདེབས་པའི་ཕྱིར་རོ་ཞེས་པ་འདིར་གཏན་ཚིགས་སྤྱི་བཟུང་ནས་མི་རིགས་པ་ཉིད་དུ་རྩོད་ཀྱི། ཁྱད་པར་རྩོལ་བ་ལས་བྱུང་བ་ཁོ་ན་ལ་ནི་མ་ཡིན་ནོ། །དེའི་ཕྱིར་གཏན་ཚིགས་ཐམས་ཅད་ལ་སྐུར་པ་བཏབ་
[296a.3]པ་བྱས་པར་འགྱུར་རོ། །འདི་ལ་རིགས་པ་ཅི་ཡིན་ཞེས་པ་ལ་སོགས་པའོ། །གང་ཚུལ་གསུམ་པ་ཉིད་དེ་ནི་དོན་གྱིས་རྟོགས་པར་བྱེད་པ་ཉིད་ཀྱང་མངོན་པར་བརྗོད་པ་ནི་རྟགས་ཀྱི་མཚན་ཉིད་དོ། །དེ་དང་ལྡན་པ་ཡང་གཏན་ཚིགས་མ་ཡིན་པར་འགྱུར་བར་བྱས་ཞེས་པ་འདི་ལ་རིགས་པ་ཅི་ཡང་མེད་དོ་
[296a.4]ཞེས་པའི་དོན་ཏོ། །འདི་ཡང་བསྒྲུབ་པར་བྱ་བ་རྣམ་པ་གཉིས་ཏེ། བསྐྱེད་པར་བྱ་བའམ་ཤེས་པར་བྱ་བར་འགྱུར་རོ། །དེ་ལ་བསྐྱེད་པར་བྱ་བ་ནི་བློ་སྟེ། ཤེས་པར་བྱ་བ་ནི་མི་རྟག་པ་ཉིད་དོ། །གཏན་ཚིགས་ཀྱང་རྗོད་པར་བྱེད་པའམ་དོན་ཏོ། །དེ་ལ་བསྐྱེད་པར་བྱ་བའི་བསྒྲུབ་བྱའི་དབང་དུ་
[296a.5]བྱས་ནས་གལ་ཏེ་བརྗོད་ན། ཅི་ལྟར་མ་ཕྲད་པ་དང་ཆོས་མཐུན་པ་ཉིད་ལས་གཏན་ཚིགས་མ་ཡིན་པར་འགྱུར། མ་ཕྲད་པ་ནི་གཏན་ཚིགས་མ་ཡིན་པ་ཁོ་ན་ལ་འཇུག་པ་མ་ཡིན་པས་ཏེ། འོ་ན་ཅི་ཞེ་ན་གཏན་ཚིགས་ལ་ཡང་ངོ་། །དེ་ལྟར་ནི་གཟུགས་ལ་སོགས་པ་རྣམས་བློ་དང་ཕྲད་པ་ཡང་
[296a.6]མ་ཡིན་ཞིང་། དེ་སྟེ་ཡང་དེའི་སྐྱེད་པར་བྱེད་པ་རྣམས་ཡིན་པས་སོ། །མ་ཕྲད་པའི་ཕྱོགས་ལ་བརྟེན་པ་ལས་ཀྱང་། ཕྲད་པར་བྱ་བ་སྒྲུབ་པར་མི་བྱེད་དོ་ཞེས་བཤད་པར་འགྱུར་རོ། །དེ་བཞིན་དུ་བསྒྲུབ་བྱ་ལས་སྔར་ཞེས་པ། སྔར་རྒྱུ་དང་ཕྱི་ནས་བསྒྲུབ་པར་བྱ་བ་བློར་འདོད་ན། དེ་ལ་བསྒྲུབ་པར་
[296a.7]བྱ་བ་མེད་ན་འདི་ཅི་ཞིག་གི་གཏན་ཚིགས་ཡིན་ཞེས་གང་བརྗོད་པ་དེ་མི་རིགས་ཏེ། དེ་ལྟར་ནི་བསྒྲུབ་པར་བྱ་བ་མེད་པ་ཁོ་ན་ལ་གཏན་ཚིགས་ཀྱི་དོན་ཏེ། མི་རྟག་པ་ཉིད་ལ་སོགས་པར་ངེས་པ་སྐྱེས་ཟིན་པ་ན་གཏན་ཚིགས་ཀྱིས་དགོས་པ་ཅི་ཡང་མེད་དོ། །མ་སྐྱེས་པ་ན་གཏན་ཚིགས་
[296b]
[296b.1]ཞེས་པའི་ཐ་སྙད་དུ་མི་འགྱུར་བ་འདི་ཙམ་ཞིག་ཏུ་ནི་མི་འགྱུར་ཏེ། བུ་མ་སྐྱེས་པ་ན་ཕའི་ཐ་སྙད་བཞིན་ནོ། །འདི་ཙམ་གྱིས་སྒྲུབ་བྱེད་མིན་པ་ཉིད་དུ་རིགས་པ་ཡང་མ་ཡིན་ཏེ། འབྲས་བུ་སྐྱེད་པར་བྱེད་པ་ནི་ཐ་སྙད་ལ་འབྲེལ་པ་མ་ཡིན་གྱི། འོ་ན་ཅི་ཞེ་ན་ནུས་པ་ལ་སྟེ། དེ་ཡང་ཡོད་དོ་ཞེས་
[296b.2]པས་འདི་ནི་གཏན་ཚིགས་མ་ཡིན་པ་མ་ཡིན་ནོ་ཐམས་ཅད་ལ་སྐུར་པ་འདེབས་པའི་སྐྱོན་འབའ་ཞིག་ཏུ་མ་ཟད་ཀྱི། རང་ཉིད་འཇོམས་པ་ཉིད་ཀྱི་སྐྱོན་ཡང་སྟེ། རང་ཉིད་འཇོམས་པ་འདིའི་ངང་ཚུལ་ལོ་ཞེས་པ་བདག་ཉིད་འཇོམས་པའོ། །ཡང་ན་རང་ཉིད་འཇོམས་པ་ནི་བདག་ཉིད་
[296b.3]འཇོམས་པ་སྟེ། དེ་འདི་ལ་ཡང་ཡོད་པས་ན་རང་ཉིད་འཇོམས་པ་ཅན་ནོ། །དེའི་དངོས་པོ་ནི་རང་ཉིད་འཇོམས་པ་ཅན་ཉིད་དོ། །དེ་ཁོ་ན་སྐྱོན་ནོ། །ཅིའི་ཕྱིར་འདི་ཡང་སྐྱོན་ཡིན་ཞེ་ན་གསུངས་པ། དགག་པ་མཚུངས་པ་ཉིད་ཀྱི་ཕྱིར། །ཞེས་པ། གལ་ཏེ་སུན་འབྱིན་འདི་སུན་དབྱུང་བྱ་དང་ཕྲད་ནས་སུན་འབྱིན་ན་སུན་དབྱུང་
[296b.4]བྱ་དང་ཁྱད་པར་མེད་པར་འཐོབ་བོ་ཞེས་པ་ལ་སོགས་པ་ཐམས་ཅད་བརྗོད་པར་བྱའོ། །དེ་བཞིན་དུ་སུན་འབྱིན་པ་འདི་སུན་དབྱུང་བྱ་ལས་སྔར་ཡིན་ན་སུན་དབྱུང་བྱ་མེད་ན་འདི་ཅི་ཞིག་གི་སུན་འབྱིན་པ་ཡིན་ཞེས་པ་ལ་སོགས་པ་ཐམས་ཅད་འདི་ལ་ཡང་བརྗོད་པར་བྱའོ། །དེ་ལྟར་ཞེས་པ་དེ་མ་ཐག་ཏུ་བརྗོད་པའི་རྣམ་
[296b.5]པས་སོ། །བློ་བསྒྲུབ་པར་བྱ་བ་མ་ཡིན་ན་ཞེས་པ་མི་རྟག་པ་ཉིད་ཀྱིས་ཁྱད་པར་དུ་བྱས་པའི་སྒྲ་ལ་དམིགས་པའི་བློ་བསྒྲུབ་པར་བྱ་བ་ཉིད་དུ་གང་གི་ཚེ་ལྟོས་པར་བྱ་བ་དེའི་ཚེ་ཚིག་གི་བདག་ཉིད་ཀྱི་གཏན་ཚིགས་བཀག་པའི་ཕྱིར་དང་གཞན་ཡང་མི་སྟོན་པའི་ཕྱིར་གཏན་ཚིགས་མ་ཚང་བར་སྣང་བ་ཉིད་དོ། །
[296b.6]དོན་རྟགས་ཡིན་ན་མ་གྲུབ་སྣང་བ་དག་གོ་ཞེས་པ་གང་གི་ཚེ་དོན་གཏན་ཚིགས་ཡིན་ཞིང་། བློ་ཁོ་ན་བསྒྲུབ་བྱ་ཡིན་པ་དེའི་ཚེ་ཚིག་མ་བཀག་སྟེ། གཏན་ཚིགས་ཀྱི་གནས་སུ་སྦྱོར་བའི་ཕྱིར་རོ། །དོན་གཏན་ཚིགས་ཡིན་ན་མ་གྲུབ་པ་ལྟར་སྣང་བ་ཉིད་དེ། གང་དམ་བཅའ་བའི་དོན་གྱི་ཆོས་འདི་ནི་
[296b.7]མ་གྲུབ་པར་མི་འགྱུར་རོ། །བློ་ནི་དམ་བཅའ་བའི་དོན་ཡང་མ་ཡིན་གྱི། འོ་ན་ཅི་ཞེ་ན་མི་རྟག་པ་ཉིད་ཀྱི་ཁྱད་པར་དུ་བྱས་པའི་སྒྲ་ཡིན་ཞིང་། དེའི་ཡང་ཆོས་སུ་འདི་འགྱུར་བ་ཁོ་ནའོ་ཞེས་པས་མ་གྲུབ་པ་ཉིད་མ་ཡིན་ནོ། །ཅི་སྟེ་ཡང་བསྒྲུབ་པར་བྱ་བ་ལས་སྔར་ཕྲད་པ་མེད་པའི་ཕྱིར་དང་། གཏན་ཚིགས་
[297a]
[297a.1]ཀྱི་ཐ་སྙད་མེད་པའི་ཕྱིར་མ་གྲུབ་པ་ཉིད་ཁོ་ནར་འགྱུར་རོ་ཞེ་ན་དེའི་ཕྱིར་གསུངས་པ། ཆོས་རྣམས་ཐམས་ཅད་ཀྱི། །ཞེས་པ་ལ་སོགས་པའོ། །གཏན་ཚིགས་གཉིས་ཀྱིས་ཀྱང་ཞེས་པ། ཚིག་གི་བདག་ཉིད་དང་དོན་གྱི་བདག་ཉིད་ཀྱིས་སོ། །མི་རྟག་པ་ཉིད་ལ་
[297a.2]སོགས་པ་ཤེས་པར་བྱ་བའི་དོན་བསྒྲུབ་པར་བྱ་བ་ལའོ། །འདིར་ཡང་མ་ཚང་བ་ཉིད་དང་མ་གྲུབ་པ་ཉིད་ལྟར་སྣང་བ་དག་སྟེ། རིམ་པ་ཇི་ལྟ་བར་ཚིག་རབ་ཏུ་སྦྱོར་བའི་ཕྱིར་དང་དོན་གྲུབ་པ་ཉིད་ཀྱི་ཕྱིར་རོ། །དེ་དག་རྒྱུ་དང་འབྲས་བུའི་དངོས་པོ་མ་ཡིན་པའི་ཕྱིར་ཞེས་པ་བསྒྲུབ་པར་བྱ་བ་དང་སྒྲུབ་
[297a.3]པར་བྱེད་པ་དག་ནི་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་མ་ཡིན་གྱི། འོ་ན་ཅི་ཞེ་ན་ཤེས་པར་བྱ་བ་དང་ཤེས་པར་བྱེད་པའི་དངོས་པོ་ཡིན་ཞིང་། དེ་ཡང་མ་ཕྲད་པ་དག་ལ་ཡང་མཐོང་བ་སྟེ། དཔེར་ན་ཆུ་དང་སྤྲིན་བཞིན་དུ་ཐ་དད་པ་དང་ཐ་མི་དད་པའི་དུས་ཅན་དག་ལ་ཡང་སྟེ། རྗེས་
[297a.4]སུ་དཔག་པ་ནི་དུས་གསུམ་པ་ཉིད་ཀྱི་ཕྱིར་རོ་ཞེས་པས་འདི་མི་རིགས་སོ། །རྟག་པ་ཞེས་བྱ་ཞེས་པ་རྟག་པ་མཚུངས་པའོ། །མི་རྟག་པ་ཉིད། རྗེས་སུ་འགྲོ་ཕྱིར་རྟག་ཉིད་ཐལ། །ཞེས་མི་རྟག་པ་ཉིད་རྗེས་སུ་འགྲོ་བ་གཏན་ཚིགས་ལས་རྟག་པ་ཉིད་དུ་ཀུན་དུ་འབྲེལ་པར་བྱེད་པ་ཞེས་པའི་དོན་
[297a.5]ཏོ། །དེ་རྟག་ཏུ་མི་རྟག་པ་ཉིད་དང་ལྡན་པ་ཐོབ་སྟེ། གནས་སྐབས་འགའ་ཞིག་ཏུ་ཡང་མི་རྟག་པ་མ་ཡིན་པར་འགྱུར་བ་མ་ཡིན་ནོ་ཞེས་པའི་དོན་ཏོ། །ཅིའི་ཕྱིར་ཞེ་ན་སྨྲས་པ། མི་འཕོ་བའི་རང་བཞིན་ཉིད་ཀྱི་ཕྱིར་རོ་ཞེས་པ་ལ་སོགས་པའོ། །ཆོས་རྣམས་ནི་རང་བཞིན་ལས་འཕོ་བ་མ་ཡིན་ཏེ།
[297a.6]དཔེར་ན་མེ་ནི་སྲེག་པར་བྱེད་པ་ཉིད་ལས་བཞིན་ནོ། །དེའི་ཕྱིར་ཡང་རྟག་པ་ཁོ་ནའོ་ཞེས་པ་སྒྲ་མི་རྟག་པ་ལ་དུས་ཐམས་ཅད་དུ་མི་རྟག་པ་ཉིད་དང་ལྡན་པ་མི་སྲིད་དོ་ཞེས་པས་སྒྲ་རྟག་པ་ཉིད་དུ་དམ་བཅའ་བར་འགྱུར་ཏེ། དེ་ལས་ཀྱང་རང་ཚིག་འགལ་བའོ་དམ་བཅའི་སྐྱོན་ལྟར་སྣང་བ་ཞེས་པ་རང་ཚིག་
[297a.7]འགལ་བ་ལྟར་སྣང་བ་ཞེས་པ་རང་ཚིག་འགལ་བ་ལྟར་སྣང་བའོ། །ཅིའི་ཕྱིར་ཞེ་ན་གསུངས་པ། མི་རྟག་པ་ཉིད་སྒྲོ་བཏགས་པའི་ཕྱིར་རོ་ཞེས་པ། གང་གི་ཕྱིར་ཕ་རོལ་པོས་ཐ་དད་པར་མི་རྟག་པ་ཉིད་སྒྲོ་འདོགས་པར་བྱེད་དོ། །འོ་ན་གང་ལ་དངོས་པོའི་རྐྱེན་འདི་ཡིན་པ་མི་རྟག་པ་ཉིད་ཡོད་
[297b]
[297b.1]པ་མ་ཡིན་ནམ། དེས་ན་མི་རྟག་པ་ཉིད་སྒྲོ་འདོགས་པའི་ཕྱིར་རོ་ཞེས་ཅིས་བརྗོད་པར་བྱེད་ཅེ་ན་གསུངས་པ། མི་རྟག་པ་ཉིད་ཅེས་པ་ལ་སོགས་པའོ། །གལ་ཏེ་མེད་ན་ཅི་ལྟར་མི་རྟག་པ་ཡིན་ཞེ་ན་གསུངས་པ། དེ་ཁོ་ན་ཞེས་པའོ། །གལ་ཏེ་མི་རྟག་པ་ཉིད་དོན་གཞན་མེད་ན་དངོས་པོའི་རྐྱེན་འདིས་
[297b.2]བརྗོད་པར་བྱ་བ་ཅི་ཡིན་ཞེ་ན་གསུངས་པ། དེ་ཡང་ཞེས་པ་ལ་སོགས་པ་སྟེ། ཇི་ལྟར་དངོས་པོ་དེ་ཁོ་ན་རང་བཞིན་གྲུབ་པ་ན་ཕ་རོལ་གྱི་བྱ་བ་ལ་ལྟོས་པ་ནི་འབྲས་བུ་ཞེས་བརྗོད་ཅིང་། དེའི་གནས་སྐབས་དེ་ཡང་དངོས་པོའི་རྐྱེན་གྱིས་བརྗོད་པ་དེ་བཞིན་དུ་སྒྲའིའང་ཇི་སྐད་བཤད་པའི་གནས་སྐབས་ནི་
[297b.3]དངོས་པོའི་རྐྱེན་གྱིས་བརྗོད་པར་བྱའོ་ཞེས་པའོ། །བརྗོད་པ་ལས་སྔར་ཞེས་པ་ལ་སོགས་པ་བརྗོད་པ་ལས་སྔོན་དུ་རྟགས་མེད་པས། གང་གི་ཕྱིར། བསྒྲུབ་བྱ་མེད་པར་ཐལ་བྱེད་པ། དེ་ནི་མ་བརྗོད་མཚུངས་པའོ། །ཞེས་བྱ་བའི་ལྟག་ཆོད་ཀྱི་ལན་ནོ། །རྗོད་པར་བྱེད་པ་ལས་སྔར་ཞེས་པ། ཇི་
[297b.4]སྲིད་དུ་བརྩལ་མ་ཐག་ཏུ་བྱུང་བ་ཉིད་ཀྱི་ཕྱིར་ཞེས་པའི་ཚིག་མི་བརྗོད་པ་དེ་སྲིད་དུ་གཏན་ཚིགས་མེད་དོ། །དེ་ལས་ཀྱང་སྒྲ་མི་རྟག་པ་མ་ཡིན་པར་ཐལ་ལོ་ཞེས་པའོ། །སྒྲོ་བཏགས་ནས། སྨྲ་བ་པོའི་ངག་གིས་ཞེས་པ་རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་རོ་ཞེས་པ་སྨྲ་བ་པོའི་ཚིག་འདིས་སྒྲ་ལ་མི་རྟག་
[297b.5]པ་ཉིད་རྗེས་སུ་དཔག་པར་སྒྲོ་བཏགས་ནས། བརྗོད་པ་ལས་སྔར་དེ་མེད་པར་ཐལ་བར་འགྱུར་བར་བྱེད་དེ། མ་གྲུབ་ལྟར་སྣང་། ཅིའི་ཕྱིར་ཞེ་ན་གསུངས་པ་དོན་གྱིས་ནི་ཞེས་པ་ལ་སོགས་པའོ། །སྔ་མ་ཞེས་པ་རང་གི་དོན་གྱི་རྗེས་སུ་དཔག་པའི་དུས་སུའོ། །དེ་མེད་པ་ལས་ཞེས་པ། དོན་མེད་པ་
[297b.6]ལས་སོ། །ཡང་ན་ཉུང་ལྟར་སྣང་། བརྗོད་པ་ལས་སྔར་སྒྲུབ་བྱེད་ངོར། །ཞེས་པ་གལ་ཏེ་གཏན་ཚིགས་བརྗོད་པ་ལས་སྔར་སྒྲུབ་པར་བྱེད་པར་སྒྲོ་བཏགས་ནས་གཏན་ཚིགས་ཀྱི་ཚིག་མེད་པར་རྩོད་པར་བྱེད་ན། དེ་ལྟ་ན་གཏན་ཚིགས་མ་ཚང་བ་ལྟར་སྣང་བའོ། །ཅིའི་ཕྱིར་ཞེ་ན་གསུངས་པ། སྒྲུབ་
[297b.7]པར་བྱེད་པའི་དུས་སུ་ཞེས་པ་ལ་སོགས་པའོ། །གང་གི་ཕྱིར་སྒྲུབ་པར་བྱེད་པའི་དུས་ཁོ་ནར་གཏན་ཚིགས་མི་བརྗོད་པ་ནི་གཏན་ཚིགས་མ་ཚང་བའི་སྒྲུབ་པར་བྱེད་པར་འགྱུར་བ་དེའི་ཕྱིར་སྒྲུབ་པར་བྱེད་པའི་དུས་ལས་གཞན་གྱི་ཚེ་གཏན་ཚིགས་མེད་པའི་ཕྱིར་ན་སྒྲུབ་པར་བྱེད་པ་མ་ཚང་བ་མ་ཡིན་པར་
[298a]
[298a.1]རིགས་སོ། །དེ་ལྟར་འགྱུར་མོད་ཀྱི་གཏན་ཚིགས་ཀྱི་ཚིག་ལས་སྔར་ཁོ་ནར་འདི་སྒྲུབ་པར་བྱེད་དོ་ཞེ་ན་དེའི་ཕྱིར་གསུངས་པ། འདི་ཡང་མ་ཡིན་ཞེས་པ་ལ་སོགས་པའོ། །མཐའ་དག་གི་དོན་ཅན་ཞེས་མཐའ་དག་པ་སྟེ། ཚུལ་གསུམ་པའི་གཏན་ཚིགས་གང་གི་དོན་ཡིན་
[298a.2]པ་དེ་མཐའ་དག་གི་དོན་ཅན་ཏེ། ཚུལ་གསུམ་བརྗོད་པའི་ཚིག་གོ། །དེ་མེད་པར་རྩོད་པས་ཁྱད་པར་མེད་པར་དཔེར་བརྗོད་སྟོན་པ་གཉིས་ཀྱང་མེད་པར་རྩོད་པར་འགྱུར་རོ་ཞེས་པས་དཔེ་བརྗོད་པ་མ་ཚང་བ་ཉིད་ལྟར་སྣང་བ་ཉིད་དུ་ཡང་རིག་པར་བྱའོ། །སྐྱེ་བ་ལས་རྟགས་མེད་ཕྱིར་ཞེས་པ་སྐྱེ་བ་ལས་སྔར་
[298a.3]སྒྲ་ལས་རྩོལ་མ་ཐག་ཏུ་བྱུང་བ་ཉིད་མེད་དོ་ཞེས་པས་འདི་གཏན་ཚིགས་མ་ཡིན་པ་ཉིད་དུ་རྩོད་པར་བྱེད་དེ། ལན་འདི་ནི་མ་གྲུབ་པ་ལ་བརྟེན་པ་དང་བཟློག་པར་བརྟེན་པར་འགྱུར་ཏེ། གང་ལས་རྩོལ་མ་ཐག་ཏུ་བྱུང་བ་ཉིད་མ་གྲུབ་པ་དང་། རྩོལ་མ་ཐག་ཏུ་མ་བྱུང་བ་ཉིད་ནི་དེ་ལས་ལྡོག་པ་བརྟེན་ཏེ་རྩོད་
[298a.4]པར་བྱེད་ཅེས་པའི་དོན་ཏོ། དེ་ལས་ཀྱང་རྩོལ་མ་ཐག་ཏུ་བྱུང་བ་ཉིད་མེད་པར་ཐལ་བར་བྱེད་ཅིང་། དེ་ལས་བཟློག་པ་རྩོལ་མ་ཐག་ཏུ་མ་བྱུང་བ་ཉིད་གྲུབ་པ་ཉིད་ཀྱི་ཕྱིར་མི་རྟག་པ་ལས་བཟློག་པ་རྟག་པ་ཉིད་ཡོད་པར་རོ། །འདི་ཁོ་ན་རྣམ་པར་འབྱེད་པ་གསུངས་པ། སྐྱེ་བ་ལས་སྔར་སྒྲ་རྩོལ་མ་ཐག་ཏུ་
[298a.5]བྱུང་བ་མ་ཡིན་ཞེས་པ་ལ་སོགས་པའོ། །འདི་ནི་རྣམ་པ་གཉིས་སུ་ཞེས་པ་འདི་ནི་འདོད་ཞེས་པ་འདི་དང་སྦྲེལ་ལོ། །རྣམ་པ་གཉིས་ཉིད་དེ་མ་གྲུབ་པ་ལྟར་སྣང་བ་ཉིད་ཀྱི་ཕྱིར་དང་མ་ངེས་པ་ལྟར་སྣང་བ་ཉིད་ཀྱི་ཕྱིར་རོ། །ཡང་ཅིའི་ཕྱིར་རྣམ་པ་གཉིས་ཡིན་ཞེ་ན། གསུངས་པ་གཉིས་སུ་སྒྲོ་བཏགས་
[298a.6]པ་ལས་ཞེས་པའོ། །སྐྱེ་བ་ལས་སྔར་སྒྲུབ་བྱེད་དུ་སྒྲོ་བཏགས་པའི་ཕྱིར་ཏེ། རྩོལ་མ་ཐག་བྱུང་བ་ཉིད་དུ་སྒྲོ་གདགས་པ་ལས་སོ། །དེ་ལ་སྒྲོ་འདོགས་པ་སྔ་མ་ལས་མ་གྲུབ་པ་ལྟར་སྣང་བར་འདོད་ཅིང་ཅིག་ཤོས་ལས་མ་ངེས་པ་ལྟར་སྣང་བ་སྟེ། དོན་གྱིས་གོ་བས་རྟག་པ་ཉིད་དུ་སྒྲོ་
[298a.7]གདགས་པའི་ཕྱིར་རོ། །ཡང་ཅིའི་ཕྱིར་མ་གྲུབ་པ་ལྟར་སྣང་བ་ཉིད་ཡིན་ཞེ་ན་གསུངས་པ། སྐྱེས་པ་ནི་ཞེས་པ་ལ་སོགས་པའོ། །དེ་ལ་འདིར་འགྱུར་མོད། སྐྱེས་པ་ཡང་བརྩལ་མ་ཐག་ཏུ་བྱུང་བ་ཉིད་མེད་དོ་ཞེ་ན། དེའི་ཕྱིར་གསུངས་པ། དེ་ནི་དེའི་ཚེ་ཡོད་པ་ཡང་ང་ཞེས་པ་སྒྲ་སྐྱེས་པ་
[298b]
[298b.1]ནའོ། །རྩོལ་མ་ཐག་ཏུ་མ་བྱུང་བ་ཉིད་ཀྱི་ཕྱིར་ནི་ཞེས་པ་ལ་སོགས་པ་སྟེ། བརྩལ་མ་ཐག་ཏུ་བྱུང་བ་ཉིད་ཀྱི་ཕྱིར་མི་རྟག་ཅེས་སྨྲས་པས། དོན་གྱིས་འདི་སྐད་བརྗོད་པར་འགྱུར་ཏེ། རྩོལ་མ་ཐག་ཏུ་མ་བྱུང་བ་ཉིད་ཀྱི་ཕྱིར་རྟག་པའོ་ཞེས་པར་རོ། །དེའི་ཀློག་ལ་སོགས་པས་མ་ངེས་སོ་ཞེས་པ་འདི་ལྟར་མ་
[298b.2]ངེས་པ་ལྟར་སྣང་བའོ། །འབྲས་ཉིད་གཞན་ཉིད་ཆ་ཡིས་ནི། །ཞེས་པ་ལ་སོགས་པ་སྟེ། འབྲས་ཉིད་དེ་བྱས་པ་ཉིད་དོ། །དེའི་གཞན་གྱི་ཆ་སྟེ་དབྱེ་བའི་ཆའོ། །དེ་ལྷུར་ལེན་པའི་གཏན་ཚིགས་ཀྱིས་བསྒྲུབ་བྱ་མི་འགྲུབ་པར་ཚིག་གང་གིས་སྟོན་པ། དེ་ནི་འབྲས་མཚུངས། གལ་ཏེ་བུམ་པ་ནི་གཞན་
[298b.3]གྱིས་བྱས་པ་ཉིད་ཀྱིས་ཞེས་པ། འཇི་བ་དབྱུ་གུ་འཁོར་ལོ་དང་སྐུད་པ་ལ་སོགས་པའི་རྒྱུས་སོ། །འདིར་སྒྲ་ལས་ཅིར་ཞེས་པ། གང་ལས་དེ་དང་འདྲ་བར་མི་རྟག་པར་འགྱུར་བ་དེའི་བྱས་པ་ཉིད་སྒྲ་ལ་ཡོད་པ་ནི་མ་ཡིན་པས་སོ། །དེའི་ཚེ་མ་གྲུབ་པ་ལྟར་སྣང་བའོ་ཞེས་པ་བུམ་པའི་བྱས་པ་ཉིད་སྒྲ་ལས་
[298b.4]མ་གྲུབ་པ་ཉིད་ཀྱི་ཕྱིར་རོ། །བུམ་པ་ལ་སོགས་པའི་མི་རྟག་པ་རྣམས་ལ་མེད་ཅེས་པ། བུམ་པ་ལ་སོགས་པའི་མི་རྟག་པ་རྣམས་ཁོ་ན་ལ་ཞེས་ངེས་པར་གཟུང་བར་བལྟ་བར་བྱ་སྟེ། ཕྱི་མ་ལ་རྟག་པ་རྣམས་ལ་ཡང་མེད་ཅེས་བརྗོད་པའི་ཕྱིར་རོ། །འགལ་བས་ལྟར་སྣང་བའོ་ཞེས་པ། སྒྲའི་གང་བྱས་
[298b.5]པ་ཉིད་དེ་མི་མཐུན་ཕྱོགས་ཁོ་ན་ལ་ཡོད་པའི་ཕྱིར་རོ། །ཅི་སྟེ་འདི་ཁོ་ན་ཞེས་པ་སྒྲའི་བྱས་པ་ཉིད་དོ། །དཔེའི་སྐྱོན་ལྟར་སྣང་བའམ་སྟེ། ཅིའི་ཕྱིར་ཞེ་ན། ཆོས་མཐུན་པ་ཉིད་དུ་ཉེ་བར་བླངས་པ་ཉིད་ཀྱི་ཕྱིར་ཏེ། ཆོས་མཐུན་པ་ཉིད་དུ་ཉེ་བར་བླངས་པའི་བུམ་པ་ལ་བྱས་པ་ཉིད་མེད་དེ། དེའི་ཕྱིར་དཔེ་སྒྲུབ་
[298b.6]བྱེད་དང་བྲལ་བའི་སྐྱོན་ལྟར་སྣང་བའོ། །ཡང་ཅིའི་ཕྱིར་ཁྱད་པར་གཟུང་ནས་རྗེས་སུ་དཔག་པ་མི་བྱེད་ཅེ་ན་གསུངས་པ། དེ་ནི་ཞེས་པ་ལ་སོགས་པའོ། །ཁྱད་པར་ནི་དོན་དང་དོན་ལ་སོ་སོར་ངེས་པ་སྟེ། དེའི་ཕྱིར་གལ་ཏེ་འདི་རྗེས་སུ་དཔག་པ་ལ་ཉེ་བར་ལེན་ན་དེ་ནི་སྤྱིའོ། །རྗེས་སུ་དཔག་པ་
[298b.7]མེད་པ་ཁོ་ནར་འགྱུར་ཏེ། གཏན་ཚིགས་ཐམས་ཅད་མེད་པར་འཐོབ་པའི་ཕྱིར་རོ། །རྗེས་སུ་དཔག་པ་ཡང་ཡོད་དེ། དེའི་ཕྱིར་ཁྱད་པར་ཡོངས་སུ་གཟུང་བར་མི་བྱའོ། །དཔེ་དང་མི་མཐུན་ཕྱོགས་དག་གིས་ཞེས་པ་ལ་སོགས་པ་སྟེ། དཔེ་དང་དཔེའི་མི་མཐུན་ཕྱོགས་ནི་དཔེ་དང་དཔེའི་
[299a]
[299a.1]མི་མཐུན་ཕྱོགས་དག་སྟེ། ཡན་ལག་གི་ངོ་བོ་རྣམས་ལ་ཡང་གཅིག་ལྷག་མཐོང་བས་ཏེ། ཡང་དང་ཙཀ་དག་གོ་ཞེས་པ་ཇི་ལྟ་བ་བཞིན་ནོ། །དེ་དག་གི་ཆོས་མཐུན་ཉིད་ཀྱིས་བསྒྲུབ་པར་བྱ་བར་འདོད་པའི་དོན་ལས་བཟློག་པའི་དོན་ཚིག་གང་གིས་སྒྲུབ་སྟེ། སྟོན་
[299a.2]པ་དེ་ཆོས་མཐུན་མཚུངས་པའོ། །སྒྲུབ་བྱེད་ཀྱི་སྒྲ་ནི་དངོས་པོ་ལ་སོགས་པ་སྒྲུབ་པར་བྱེད་པ་ཡང་མཐོང་ངོ་ཞེས་པ་དེའི་ཕྱིར་དེ་རྣམ་པར་གཅོད་པའི་ཆེད་དུ་གསུངས་པ། བྱེད་པའི་བྱེད་པ་ཅན་དུ་བྱས་ནས་སོ་ཞེས་པའོ། །དཔེར་ན་ཞེས་པ་ལ་སོགས་པ་དཔེར་བརྗོད་རབ་ཏུ་སྟོན་པའོ། །སྒྲ་མི་རྟག་
[299a.3]སྟེ་རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་ནམ་མཁའ་ཆོས་མི་མཐུན་པ་ཉིད་ཀྱི་སྦྱོར་བར་བྱས་པ་ན་ལྟག་ཆོད་སྨྲ་བ་པོས་སྨྲས་པ། གལ་ཏེ་དཔེར་གྱུར་པའི་མི་མཐུན་ཕྱོགས་དང་ཆོས་མཐུན་པ་ཉིད་ལས་རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་སྒྲ་མི་རྟག་པ་ཡིན་ན་དཔེར་བྱས་པའི་ནམ་མཁའ་དང་ཆོས་མཐུན་
[299a.4]པ་ཉིད་ལས་ལུས་ཅན་མ་ཡིན་པ་ཉིད་ཀྱི་ཕྱིར་རྟག་པར་འགྱུར་རོ་ཞེས་པའོ། །དེ་བཞིན་དུ་བུམ་པ་ཆོས་མཐུན་པ་ཉིད་དུ་བྱས་པའི་སྦྱོར་བ་ལ་ལྟག་ཆོད་སྨྲ་བ་པོས་སྨྲས་པ། གལ་ཏེ་དཔེར་བྱས་པའི་བུམ་པ་དང་ཆོས་མཐུན་པ་ཉིད་ཀྱི་ཕྱིར་བརྩལ་མ་ཐག་ཏུ་བྱུང་བ་ཉིད་ལས་སྒྲ་མི་རྟག་པ་ཡིན་ན་དཔེར་བྱས་
[299a.5]པའི་མི་མཐུན་ཕྱོགས་ནམ་མཁའ་དང་ཆོས་མཐུན་པ་ཉིད་ཀྱི་ཕྱིར། ལུས་ཅན་མ་ཡིན་པ་ཉིད་ལས་རྟག་པའོ་ཞེས་པ་འདི་ཆོས་མཐུན་པ་ཉིད་མཚུངས་པའོ། །སྔ་མ་ལྟ་བུའི་དཔེ་གཉིས་ལ་བུམ་པ་དང་ཆོས་མི་མཐུན་པར་སྦྱར་བར་བྱའོ་ཞེས་པ་ཇི་ལྟར་ཆོས་མཐུན་པ་མཚུངས་པ་ཉིད་ཀྱི་དཔེ་
[299a.6]གཉིས་ལ། ནམ་མཁའ་དང་ཆོས་མཐུན་པ་ཉིད་དུ་སྦྱར་བ་དེ་ལྟར་འདི་ཡང་བུམ་པ་དང་ཆོས་མི་མཐུན་པ་ཉིད་ཀྱིས་སྦྱར་བར་བྱའོ། །འདི་ལྟ་སྟེ། སྒྲ་མི་རྟག་སྟེ་བརྩལ་མ་ཐག་ཏུ་བྱུང་བ་ཉིད་ཀྱི་ཕྱིར། བུམ་པ་ཆོས་མཐུན་པ་ཉིད་དུ་བྱས་པ་ལ། ཕ་རོལ་པོས་སྨྲས་པ། གལ་ཏེ་དཔེར་བྱས་
[299a.7]པའི་བུམ་པ་དང་ཆོས་མཐུན་པ་ཉིད་ཀྱི་ཕྱིར་རྩོལ་མ་ཐག་ཏུ་བྱུང་བ་ཉིད་ལས་སྒྲ་མི་རྟག་པ་ཡིན་ན། དཔེར་གྱུར་པའི་བུམ་པ་དང་ཆོས་མི་མཐུན་པ་ལས་ལུས་ཅན་མ་ཡིན་པ་ཉིད་ཀྱི་ཕྱིར་རྟག་པའོ་ཞེས་པ་དང་། དེ་བཞིན་དུ་མི་རྟག་སྟེ་རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་ནམ་མཁའ་ཆོས་མི་མཐུན་པ་
[299b]
[299b.1]ཉིད་དུ་བྱས་པ་ལ། དཔེར་བྱས་པའི་མི་མཐུན་ཕྱོགས་བུམ་པ་དང་ཆོས་མི་མཐུན་པ་ཉིད་ལས་ལུས་ཅན་མ་ཡིན་པ་ཉིད་ཀྱི་ཕྱིར་རྟག་པར་འགྱུར་རོ་ཞེས་པའོ། །ཡང་ཅིའི་ཕྱིར་ཐུན་མོང་བའི་མ་ངེས་པ་ལྟར་སྣང་བ་ཡིན་ཞེ་ན་གསུངས་པ། སྔ་མའི་ཕྱོགས་ལ་ནི་མ་ཡིན་ཞེས་པ་ལ་སོགས་པའོ། །
[299b.2]གང་གི་ཕྱིར་ཇི་ལྟར་ཕྱི་མའི་ཕྱོགས་ལ་ལུས་ཅན་མ་ཡིན་པ་ཉིད་ཆོས་མཐུན་པ་ཉིད་དམ་ཆོས་མི་མཐུན་པ་ཉིད་མ་ངེས་པ་ཡིན་པ་དེ་ལྟར་སྔ་མའི་ཕྱོགས་ལ་རྩོལ་མ་ཐག་ཏུ་བྱུང་བ་ཉིད་མ་ཡིན་ཏེ། དེའི་ཕྱིར་མཚུངས་པ་ཉིད་མེད་པའི་ཕྱིར་འདི་ནི་ཐུན་མོང་གི་མ་ངེས་པ་ལྟར་སྣང་བའོ། །འགལ་བ་འཁྲུལ་པ་མེད་པ་
[299b.3]འདྲ། །ཞེས་པ་འགལ་བ་མི་འཁྲུལ་བ་ལྟར་སྣང་བའོ་ཞེས་པའི་དོན་ཏེ། འགལ་བ་མི་འཁྲུལ་པ་དང་མཚུངས་པར་འཇུག་གོ་ཞེས་བྱས་ནས་སོ། །འགལ་བ་མི་འཁྲུལ་བ་ནི་མ་ཡིན་ཏེ། ལུས་ཅན་མ་ཡིན་པ་ཉིད་ནི་མ་ངེས་པ་མིན་པ་ཉིད་ཀྱི་ཕྱིར་ཏེ། རྩོལ་མ་ཐག་ཏུ་བྱུང་བ་ཉིད་ནི་མ་ཡིན་ནོ། །
[299b.4]རྗེས་སུ་འགྲོ་མེད་ཕྱིར་ཞེས་ཁྱབ་པ་མེད་པའི་ཕྱིར་ཞེས་པའི་དོན་ཏོ། །ཡང་ཅིའི་ཕྱིར་རྗེས་འགྲོ་མེད་པ་ཡིན་ཞེ་ན་གསུངས་པ། མ་ངེས་པར་སྣང་བ་གཉིས་པོ་དག་ཀྱང་ཞེས་པ་ལ་སོགས་པ་སྟེ། དཔེའི་ཚིག་གིས་ནི་རྗེས་སུ་འགྲོ་བ་དང་ལྡོག་པའི་མཚན་ཉིད་ཅན་གྱི་ཁྱབ་པ་བསྟན་པར་བྱ་སྟེ།
[299b.5]གཞན་དུ་ན་གཏན་ཚིགས་ལ་ཕན་འདོགས་པར་མི་འགྱུར་རོ། །ཆོས་མཐུན་པ་མཚུངས་པའམ་ཆོས་མི་མཐུན་པ་ལ་རྗེས་སུ་འགྲོ་བ་དང་ལྡོག་པ་དག་བསྟན་པ་ཡང་མ་ཡིན་ནོ། །ཇི་ལྟར་ཕྱི་མའི་ཕྱོགས་ལ་ཡིན་པ་དེ་ལྟར་སྔ་མའི་ཕྱོགས་ལ་ཡང་སྟེ། དེས་ན་ཇི་ལྟར་ངེད་ཀྱི་དཔེ་སྐྱོན་ཅན་
[299b.6]ཡིན་པ་དེ་ལྟར་ཁྱོད་ཀྱི་ཡང་ངོ་ཞེས་རྩོད་པར་བྱེད་པ་ནི་དཔེ་ལྟར་སྣང་བར་རྩོད་པར་ཡང་སྦྱར་བར་བྱའོ། །རྗེས་འགྲོ་ཕྱིན་ཅི་ལོག་ཕྱིར་ཡང་། །དཔེ་ལྟར་སྣང་བ་བརྗོད་པ་ཡང་། །ཞེས་དཀྱུས་མ་དང་སྦྲེལ་ལོ། །ཡང་ཅི་ལྟར་ན་རྗེས་སུ་འགྲོ་བ་ཕྱིན་ཅི་ལོག་ཉིད་སྲིད་པར་བྱ་ཞེ་ན་གསུངས་པ། བསྒྲུབ་བྱ་ལ་
[299b.7]དཔེ་འདྲེས་པའི་ཕྱིར་ཞེས་པ་འདྲེས་པར་བྱེད་པ་ནི་འདྲེས་པ་སྟེ། བསྒྲུབ་པར་བྱ་བ་ཆོས་མཐུན་པ་ཉིད་ཀྱི་དཔེ་དང་གཅིག་ཏུ་བྱེད་པའོ། །བུམ་པ་ཇི་ལྟ་བ་དེ་ལྟར་སྒྲའོ་ཞེས་པ་དང་། ཆོས་མི་མཐུན་པ་ཉིད་ཀྱིས་ཀྱང་ནམ་མཁའ་ཇི་ལྟ་བ་དེ་ལྟར་སྒྲ་མ་ཡིན་ནོ་ཞེས། ནམ་མཁའ་དང་ཆོས་
[300a]
[300a.1]མཐུན་པ་ཉིད་བཀག་པས་བུམ་པ་དང་ཆོས་མཐུན་པ་ཉིད་ཁོ་ནར་གཞུང་འཛུགས་སོ། །ཕལ་ཆེར་གྱིས་ཞེས་པ་ལ་སོགས་པས་བསྲེ་བའི་རང་གི་ངོ་བོ་སྟོན་ཏེ། ཉེ་བར་སྦྱོར་བ་ནི་བསྲེ་བའོ་ཞེས་པའི་དོན་ཏོ། །གལ་ཏེ་དེ་ལྟར་ཉེ་བར་སྦྱོར་བར་བྱེད་ན། དེ་ལས་ཅི་ཞེ་ན་གསུངས་པ།
[300a.2]དེ་ལ་འདིར་ཞེས་པ་ལ་སོགས་པའོ། །དེ་ལྟར་འགྱུར་མོད་ཀྱི། རྗེས་སུ་འགྲོ་བ་ཕྱིན་ཅི་ལོག་པ་ཉིད་ན་ནི་བུམ་པ་ཇི་ལྟ་བ་དེ་བཞིན་དུ་སྒྲ་སྟེ། ནམ་མཁའ་ཇི་ལྟ་བ་དེ་བཞིན་སྒྲ་མ་ཡིན་ནོ་ཞེས་པ་དེ་ལྟར་ཉེ་བར་སྦྱོར་བ་བྱ་བར་མི་ནུས་པ་ཁོ་ནའོ། །དེའི་ཕྱིར་ཉེ་བར་སྦྱོར་བ་བྱ་བར་འདོད་པས་ཕྱིན་ཅི་ལོག་ཏུ་
[300a.3]རྗེས་སུ་འགྲོ་བ་བྱ་བ་མ་ཡིན་ནོ། །དེས་ན་དེ་ག་ལ་སྲིད་ཅེ་ན་གསུངས་པ། དེ་ལྟར་ན་ཡང་ནི་ཞེས་པ་ལ་སོགས་པའོ། །གང་གི་ཕྱིར་དེ་ལྟར་བྱས་པ་ན་ཡང་། དེ་བཞིན་དུ་ཞེས་ཉེ་བར་བསྡུ་བའམ། དེ་བཞིན་དུ་མ་ཡིན་ཞེས་སྦྱོར་བ་ཁོ་ན་སྟེ། ཅི་ལྟར་ཞེ་ན། ནམ་མཁའ་ལུས་ཅན་མ་ཡིན་
[300a.4]པ་རྟག་པ་དེ་བཞིན་དུ་སྒྲ་སྟེ། དེ་ལྟར་བུམ་པ་ལུས་ཅན་མི་རྟག་པར་མཐོང་བ་དེ་བཞིན་དུ་སྒྲ་མ་ཡིན་ནོ་ཞེས་པའོ། །དེ་ལྟར་ན་རྗེས་སུ་འགྲོ་བ་ཕྱིན་ཅི་ལོག་ཏུ་བྱས་པ་ན་ཡང་དེ་བཞིན་ཞེས་ཉེ་བར་བསྡུ་བའང་རིགས་པ་ཁོ་ནའོ། །གང་ལས་དེ་ལྟར་སྣང་བ་ཉིད་དུ་འགྱུར་བ་ཅི་ལྟར་ན་སྐྱོན་འདི་སྔ་མའི་ཕྱོགས་
[300a.5]ལ་བསྒྲུབ་པར་ནུས་ཤེ་ན། མཚུངས་པ་ཉིད་ཀྱི་ཕྱིར་ཇི་ལྟར་ཡང་ཞེས་པ་ལ་སོགས་པ་སྟེ། སྔ་མ་དང་ཕྱི་མའི་ཕྱོགས་དག་མཚུངས་པ་ཉིད་ཀྱི་ཕྱིར། ཇི་ལྟར་ཕྱི་མའི་ཕྱོགས་ལ་རྗེས་སུ་འགྲོ་བ་ཕྱིན་ཅི་ལོག་མཚུངས་པ་ཉིད་དུ་ཐལ་བར་འགྱུར་བའི་ཕྱིར་ན་རྗེས་འགྲོ་ཕྱིན་ཅི་ལོག་ཉིད་དུ་རྩོད་
[300a.6]པ་ནི་དཔེ་ལྟར་སྣང་བར་རྩོད་པར་ཡང་འཐད་དོ། །འདི་ཁོ་ན་གསལ་བར་བྱེད་པ་གསུངས་པ། གང་གི་ཕྱིར་དཔེ་སྟོན་པ་ཙམ་ནི་ཞེས་པ་ལ་སོགས་པའོ། །འཇིག་རྟེན་པ་རྣམས་ཀྱིས་ནི་ཇི་སྲིད་ཙམ་དུ་དཔེར་བསྟན་པ་བུམ་པ་ལ་སོགས་པ་དེ་སྲིད་ཙམ་དཔེ་ཉིད་དུ་འདོད་དེ། དེའི་ཕྱིར་དེ་
[300a.7]སྲིད་ཙམ་དཔེ་ཉིད་ཡིན་ན་སྔ་མ་དང་ཕྱི་མའི་ཕྱོགས་དག་རྗེས་སུ་འགྲོ་བ་ཕྱིན་ཅི་ལོག་ཏུ་མཚུངས་སོ། །ཅིའི་ཕྱིར་ཞེ་ན། དེ་ལྟར་ནི་ཞེས་པ་ལ་སོགས་པའོ། །གང་གི་ཕྱིར་ཕྱོགས་སྔ་མ་ལ་ཇི་ལྟར་བུམ་པ་ཆོས་གཉིས་དང་སྟེ། བསྒྲུབ་པར་བྱ་བ་དང་སྒྲུབ་པར་བྱེད་པའི་མཚན་ཉིད་ཅན་དང་
[300b]
[300b.1]ལྡན་པ་དེ་བཞིན་དུ་ཕྱི་མའི་ཕྱོགས་ལ་ཡང་ནམ་མཁའ་ལུས་ཅན་མ་ཡིན་པ་ཉིད་དང་རྟག་པ་ཉིད་ཀྱི་མཚན་ཉིད་ཀྱི་ཆོས་གཉིས་དང་ངོ་། །ལྷན་ཅིག་གྱུར་པ་ཡང་བསྒྲུབ་པར་བྱ་བ་དང་། སྒྲུབ་པར་བྱེད་པ་དག་དཔེས་བསྟན་པར་བྱའོ། །དེ་ཡང་རྗེས་སུ་འགྲོ་བ་ཕྱིན་ཅི་ལོག་ལ་ཡང་དཔེར་བྱས་པ་བུམ་པ་
[300b.2]ལ་སོགས་པ་ལ་རབ་ཏུ་སྟོན་པར་ནུས་པ་ཁོ་ན་སྟེ། དེའི་ཕྱིར་དཔེ་ལྟར་སྣང་བར་རྩོད་པར་འཐད་དོ་ཞེས་པ་དགོངས་པའོ། །འོ་ན་ཇི་ལྟར་ལྟག་ཆོད་སྨྲ་བ་པོས་སྦྱོར་བས་གཏན་ཚིགས་ཀྱི་མེད་ན་མི་འབྱུང་བ་ཉིད་ཉེ་བར་མི་སྟོན་པ་དེ་ལྟར་ཕྱོགས་སྔ་མ་སྨྲ་བ་པོས་ཀྱང་ངོ་། །དེའི་ཕྱིར་འཇིག་རྟེན་པའི་
[300b.3]སྦྱོར་བའི་ངོར་སུན་འབྱིན་པ་ཁོ་ནར་འདི་དག་རིགས་ཏེ། ཡོངས་སུ་གནས་པར་མཚུངས་པའི་ཕྱིར་རོ། །དེས་ན་ཅིའི་ཕྱིར་སུན་འབྱིན་པ་ལྟར་སྣང་བ་ཉིད་ཡིན་ཞེ་ན། དེའི་ཕྱིར་གསུངས་པ། འདི་ཡང་ཞེས་པ་ལ་སོགས་པའོ། །འདི་སྐད་སྟོན་པར་བྱེད་དེ། ཇི་སྐད་སྨྲས་པ་འདི་བདེན་མོད། དེ་ལྟ་ན་ཡང་
[300b.4]ངེས་པ་ཉིད་ཀྱི་གཏན་ཚིགས་ལ་མ་ངེས་པ་ཉིད་ཀྱིས་དོད་ཟླར་གནས་པ་མི་རིགས་སོ་ཞེས་པ་འདི་ཙམ་ཁོ་ནས་གཉིས་པོ་འདི་ལན་ལྟར་སྣང་བ་ཉིད་དུ་བཤད་དོ་ཞེས་པའོ། །དེ་བདག་ཉིད་དེ་ངེས་པ་པའི་རང་བཞིན་ཉིད་དོ། །དེ་ལས་ཐ་དད་པ་ནི་བཟློག་པ་ཉིད་ཀྱིས་ཏེ་མ་ངེས་པ་ཉིད་ཀྱིས་ཞེས་པའི་དོན་ཏོ། །
[300b.5]རྒྱུ་དེས་གཉིས་ཀ་འཁྲུལ་བར་སྣང་བ་ཡིན་པར་བརྗོད་དོ། །སྦྱོར་བ་སྔ་མ་གཏན་ཚིགས་ནི། །ངེས་པ་པ་ཉིད་བྱས་པ་མེད། །ཅེས་པ་ངེས་པ་པ་ཉིད་དུ་བསྟན་པ་མ་ཡིན་ནོ་ཞེས་པའི་དོན་ཏོ། །འཇིག་རྟེན་པའི་སྦྱོར་བའི་རྗེས་སུ་འཇུག་པས་ནི་ཞེས་པ་གང་ལས་འཇིག་རྟེན་པའི་སྦྱོར་བ་ཁོ་ན་ལ་དེ་དག་གི་
[300b.6]སྐབས་ཡིན་པར་འཇིག་རྟེན་པའི་སྦྱོར་བའི་ངོར་བྱས་པས་སོ། །ངེད་ཀྱི་སྦྱོར་བ་ལ་ནི་མ་ཡིན་ཏེ། །དེ་ལ་ངེས་པ་པ་ཉིད་དུ་བསྟན་པ་ཉིད་ཀྱི་ཕྱིར་རོ། །ཅི་ལ་བསམས་ནས་འདི་མ་ངེས་པ་ལྟར་སྣང་བར་བརྗོད་ཅེ་ན་གསུངས་པ། རྩོལ་མ་ཐག་ཏུ་བྱུང་བའི་གཏན་ཚིགས་ཀྱི་ཞེས་པ་ལ་སོགས་པའོ། །གཏན་ཚིགས་
[300b.7]སྤྱིས་ཤེ་ན་གསུངས་པ། ཕྱིན་ཅི་ལོག་གིས་ཞེས་པའོ། །ཕྱིན་ཅི་ལོག་པ་ཉིད་ཀྱང་། ངེས་པའི་མ་ངེས་པ་ཉིད་དོ། །འདིས་ནི་དེའི་བདག་ལས་ཐ་དད་པས་ཞེས་པ་འདིའི་དོན་ཉེ་བར་བསྟན་ཏོ། །ཇི་ལྟར་ཁོ་བོ་ཅག་གི་སྦྱོར་བ་དེ་ལྟར་སྦྱོར་བ་བྱ་བ་ན་ནི་ཞེས་པའི་དོན་ཏོ། །ཆོས་མཐུན་པ་ཉིད་མཚུངས་པ་ལ་སོགས་
[301a]
[301a.1]པ་རྣམས་ཞེས་པའི་སོགས་པའི་སྒྲས་ཆོས་མི་མཐུན་པ་ཉིད་དང་རྣམ་པར་རྟོག་པ་དང་ཁྱད་པར་མཚུངས་པ་ལ་སོགས་པ་རྣམས་གཟུང་བར་བྱའོ། །མ་འབྲེལ་པ་རྣམས་ཁོ་ནའོ་ཞེས་པ་དེ་སྐྱེད་པར་བྱེད་པ་མི་སྲིད་པའི་ཕྱིར་རོ། །ཆོས་མཐུན་ཉིད་ལའང་ཁྱད་པར་བརྗོད། །ཅེས་པ་མཚན་ཉིད་དོ། །
[301a.2]ཆོས་མཐུན་པ་ཉིད་ལ་ཁྱད་པར་བརྗོད་པ་ཡང་ལྟག་ཆོད་དེ། ཕྲད་དང་མ་ཕྲད་མཚུངས་པ་ལ་སོགས་པ་རྣམས་སུ་མ་ཟད་ཅེས་པ་ཡང་གི་སྒྲའི་དོན་ཏོ། །རྣམ་རྟོག་མཚུངས་ཡིན་ཞེས་པ་མཚོན་བྱའོ། །སྔ་མ་བཞིན་ལ་བུམ་པ་ཆོས་མཐུན་པ་ཉིད་ཀྱིས་མི་རྟག་པ་ཉིད་དུ་བྱས་པ་ལ་ཞེས་པ་དམ་བཅས་པ་ནའོ། །འདི་ལྟ་སྟེ་སྒྲ་མི་
[301a.3]རྟག་སྟེ་བརྩལ་མ་ཐག་ཏུ་བྱུང་བ་ཉིད་ཀྱི་ཕྱིར་བུམ་པ་བཞིན་ཞེས་པ་ལ་ལྟག་ཆོད་སྨྲ་བ་པོས་སྨྲས་པ། འདི་ལ་ཆོས་མཐུན་པ་ཉིད་ཡོད་ན། བུམ་པ་ཁོ་ན་ཚོས་པར་བྱ་བ་དང་མིག་གིས་གཟུང་བར་བྱ་བས་ཏེ། དེས་ན་བུམ་པ་ཁོ་ན་མིག་གིས་གཟུང་བར་བྱ་བ་ཉིད་ཀྱི་ཕྱིར་དང་ཚོས་པར་བྱ་བ་ཉིད་ཀྱི་ཕྱིར་ཡང་མི་
[301a.4]རྟག་པར་འགྱུར་གྱི། སྒྲ་ནི་མ་ཡིན་ཏེ། སྒྲ་ཁོ་ན་མིག་གིས་གཟུང་བྱ་མ་ཡིན་པ་དང་ཚོས་པར་བྱ་བ་མ་ཡིན་པ་དང་མཉན་པར་བྱ་བ་ཡིན་གྱི་བུམ་པ་ནི་མ་ཡིན་ཏེ། དེས་ན་སྒྲ་ཁོ་ན་མིག་གིས་གཟུང་བར་བྱ་བ་མ་ཡིན་པ་ཉིད་ལ་སོགས་པ་ཉིད་ཀྱི་ཕྱིར་རྟག་པར་འགྱུར་གྱི་བུམ་པ་ནི་མ་ཡིན་ནོ་ཞེས་པ། གང་བསྒྲུབ་
[301a.5]པར་བྱ་བ་མི་རྟག་པ་སྟེ། དེ་ལས་བཟློག་པ་རྟག་པ་ཉིད་དུ་རྟོགས་པ་ནི་རྣམ་རྟོག་མཚུངས་པའོ། །དཔེ་བརྗོད་ལས་གཞན་པ་ཡང་ཞེས་པ། དཔེ་བརྗོད་ནི་བུམ་པ་སྟེ། དེ་ལས་གཞན་ཁམ་ཕོར་ལ་སོགས་པ་ལ་ཡང་དང་ཆུ་ལ་སོགས་པ་ལ་ཡང་བྱས་པ་ཉིད་དུ་མཚུངས་པ་ལ་ཇི་ལྟར་ཚོས་པར་བྱ་བ་དང་
[301a.6]ཚོས་པར་བྱ་བ་མ་ཡིན་པ་ཉིད་ཀྱི་བྱེ་བྲག་མཐོང་བ་དེ་ལྟར་སྒྲ་དང་བུམ་པ་དག་ལ་ཡང་བྱས་པ་ཉིད་དང་ཆོས་མཐུན་པ་ཉིད་ཡོད་ན་ཡང་རྟག་པ་དང་། མི་རྟག་པ་ཉིད་ཀྱི་ཁྱད་པར་དུ་འགྱུར་རོ། །འཁྲུལ་པ་ཅན་གྱི་ཁྱད་པར་གྱིས། །ཞེས་པ་ཚོས་པ་མ་ཡིན་པ་ཉིད་ཀྱིས་སོ། །དེ་ནི་བུམ་པ་ལས་སྒྲའི་ཁྱད་པར་དུ་
[301a.7]འགྱུར་ཞིང་འཁྲུལ་པ་ཅན་ཡང་སྟེ། མི་རྟག་པ་ལས་གཞན་ལ་ཡང་ཡོད་པའི་ཕྱིར་རོ། །སྤྱི་མིན་གྱིས་ཀྱང་ཞེས་པ་ཐུན་མོང་མ་ཡིན་པ་མཉན་པར་བྱ་བ་ཉིད་ལ་སོགས་པས་སོ། །རྟག་པར་ཐལ་ཕྱིར་དེ་སྣང་ཉིད། །ཅེས་པ་གཉིས་ཀ་ལ་སྦྲེལ་བར་བྱའོ། །འདི་སྐད་བཤད་པར་འགྱུར་ཏེ། ཚོས་པར་བྱ་བ་མ་
[301b]
[301b.1]ཡིན་པ་ཉིད་ལ་སོགས་པའི་ཁྱད་པར་གྱིས་སམ། མཉན་པར་བྱ་བ་ཉིད་ལ་སོགས་པ་ཐུན་མོང་མ་ཡིན་པའི་ཆོས་ཀྱིས་མི་རྟག་པ་ཉིད་དུ་ཐལ་བར་བྱེད་པའི་ཕྱིར་དེ་ལྟར་སྣང་བ་ཉིད་དོ་ཞེས་པའོ། །རང་གི་ཕྱོགས་ལ་མ་གྲུབ་པ་བཞིན་དུ་ཞེས་པ་ལ་སོགས་པ་ནི་སྔ་མའི་ཕྱོགས་ལ་ཡང་ཐུན་མོང་དང་ཐུན་མོང་མ་ཡིན་པའི་མ་
[301b.2]ངེས་པའི་ཆོས་ཉིད་དུ་སྒྲོ་བཏགས་ནས་སོ་སོར་གནས་ཏེ། ཇི་ལྟར་ངེད་ཀྱི་འཁྲུལ་པ་ཅན་གྱི་ཐུན་མོང་བ་དང་ཐུན་མོང་མ་ཡིན་པའི་ཆོས་དག་གིས་རྟག་པ་ཉིད་འགྲུབ་པ་མེད་པ་དེ་ལྟར་ཁྱོད་ཀྱི་ཡང་ཞེས་པའོ། །དེ་ལྟར་རང་གི་ཕྱོགས་མ་གྲུབ་པ་བཞིན་དུ་ཕ་རོལ་ལ་མ་གྲུབ་པར་སྟོན་པའི་ཕྱིར། སུན་འབྱིན་པར་མི་འགྱུར་
[301b.3]རམ། སྒྲུབ་པར་བྱེད་པར་ཡིན། རང་གི་ཕྱོགས་ཀྱི་ཞེས་བརྟག་པར་བྱའོ། །སྒྲུབ་བྱེད་ཡིན་ན་འགལ་བ་དང་མ་ངེས་པ་ལྟར་སྣང་བའོ་ཞེས་པ། གལ་ཏེ་ཚོས་པར་བྱ་བ་མ་ཡིན་པ་ཉིད་ལ་སོགས་པ་རང་གི་ཕྱོགས་འགྲུབ་པའི་དོན་ཁོ་ནར་རབ་ཏུ་སྦྱོར་ན། དེ་ལས་འགལ་བ་མི་འཁྲུལ་བ་ཅན་ལྟར་སྣང་
[301b.4]བ་ཉིད་དེ། སྟོབས་མཚུངས་པ་མ་ཡིན་པ་ཉིད་ཀྱི་ཕྱིར་རོ། །གཞན་དུ་ན་ཡང་ཞེས་པ་ལ་སོགས་པ། ཇི་ལྟར་རྫས་མ་ཡིན་པ་དང་ལས་མ་ཡིན་པའི་སྒྲ་བཞིན་ནོ། །མིག་གིས་གཟུང་བྱ་མ་ཡིན་པ་ཉིད་ཡོད་ན། མངོན་སུམ་ཉིད་ལས་ཞེས་པ། མིག་གིས་གཟུང་བྱ་མ་ཡིན་པ་ཉིད་དང་ལྷན་ཅིག་པ་
[301b.5]ཁོ་ནའི་མངོན་སུམ་ཉིད་ནི་གཏན་ཚིགས་ཉིད་དོ། །དེ་ལྟར་ཚོས་པར་བྱ་བ་ཉིད་ལ་སོགས་པ་ལྷན་ཅིག་པ་ཁོ་ནའི་བརྩལ་མ་ཐག་ཏུ་བྱུང་བ་ཉིད་ནི་གཏན་ཚིགས་ཉིད་ཡིན་གྱི། འབའ་ཞིག་པ་ནི་མ་ཡིན་ཏེ། མངོན་སུམ་ཉིད་བཞིན་དུ་འཁྲུལ་པ་ཅན་ཉིད་ཀྱི་ཕྱིར་ཞེས་པ་དེ་ལྟར་གལ་ཏེ་ཚོས་པར་བྱ་བ་
[301b.6]ཉིད་ལ་སོགས་པ་དང་བཅས་པ་གཏན་ཚིགས་ཉིད་སྨྲ་ན། དེའི་ཚེ་རྣམ་པ་འདིས་ཀྱང་མ་ངེས་པ་ལྟར་སྣང་བའོ། །ཅིའི་ཕྱིར་ཞེ་ན་གསུངས་པ། འབའ་ཞིག་པ་ནི་ཞེས་པ་ལ་སོགས་པ་སྟེ། མངོན་སུམ་ཉིད་དང་མིག་གིས་གཟུང་བྱ་མ་ཡིན་པ་ཉིད་དག་གི་འབའ་ཞིག་པ་དག་གཏན་ཚིགས་ཉིད་མ་ཡིན་
[301b.7]གྱི་ལྷན་ཅིག་པ་ཉིད་དག་ཁོ་ན་གཏན་ཚིགས་སོ། །རྩོལ་མ་ཐག་ཏུ་བྱུང་བ་ཉིད་ནི་འབའ་ཞིག་པ་ཡང་གཏན་ཚིགས་ཉིད་དོ་ཞེས་པ་ཚོགས་པའི་དོན་ཏོ། །གཅིག་ཉིད་དུ། ཐལ་ཕྱིར་ཁྱད་པར་མེད་པར་བྱེད། །ཅེས་པ་མཚན་ཉིད་དོ། །བསྒྲུབ་པར་བྱ་བ་དང་དཔེའི་ཆོས་ཅན་དག །མི་རྟག་
[302a]
[302a.1]པ་ཉིད་ལ་སོགས་པར་ཆོས་མཐུན་པ་ཉིད་ཀྱིས་གཅིག་ཉིད་དུ་ཐལ་བར་འགྱུར་བའི་ཕྱིར། གཏན་ཚིགས་ཆོས་གཞན་རྣམས་ཀྱིས་ཀྱང་གང་གཅིག་ཉིད་དུ་བྱེད་པ་དེ་ནི་ཁྱད་པར་མེད་པ་བྱེད་པའོ། །མདོ་འདིར་འདི་དང་ལྷན་ཅིག་འདིའི་ཁྱད་པར་མེད་པའོ་ཞེས་མ་བརྗོད་ཅེས་པ་དེའི་
[302a.2]ཕྱིར། ཅི་ཞིག་ནི་ཅི་ཞིག་དང་ལྷན་ཅིག་ཁྱད་པར་མེད་པའོ་ཞེས་མི་ཤེས་ཞེས་པ་དེའི་ཕྱིར། དེ་ཡོངས་སུ་ཤེས་པའི་ཆེད་དུ་གསུངས་པ། ཆོས་མཐུན་པ་ཉིད་ཀྱི་དཔེར་བྱས་པའི་སྐབས་ཉིད་ཀྱི་ཕྱིར་ཞེས་པ་ལ་སོགས་པའོ། །རྣམ་པར་རྟོག་པ་མཚུངས་པ་ལ་ནི། ཆོས་མཐུན་ཉིད་ལའང་ཁྱད་པར་
[302a.3]བརྗོད། །ཅེས་པའི་ཚིག་ལས་ཆོས་མཐུན་པ་ཉིད་ཀྱི་དཔེའི་སྐབས་སོ། །གང་ཕྱིར་བརྩལ་མ་ཐག་ཏུ་བྱུང་བ་ཉིད་ནི་སྒྲའི་ཆོས་མཐུན་པ་ཉིད་ཀྱི་དཔེ་བུམ་པ་ལ་སོགས་པ་དང་ཆོས་མཐུན་པ་ཉིད་དེ། གཞན་དང་ནི་མ་ཡིན་ནོ། །དེ་ལྟ་ན་ཡང་ཅི་ཞིག་དང་ལྷན་ཅིག་ཅི་ཞིག་གཅིག་ཉིད་དུ་ཐལ་བར་འགྱུར་
[302a.4]བ་མི་ཤེས་སོ་ཞེ་ན། དེའི་ཕྱིར་གསུངས་པ། དོད་ཟླར་སྦྱོར་བའི་མཉན་པ་མེད་པའི་ཕྱིར་ཞེས་པ་ལ་སོགས་པའོ། །བསྒྲུབ་པར་བྱ་བ་ལས་གཞན་ནི་འདིར་རེ་ཞིག་དོད་ཟླར་སྦྱོར་བ་ཉིད་དུ་རྟོགས་པར་བྱར་ནུས་པ་མ་ཡིན་ཏེ། དེ་མ་ཐོས་པ་ཉིད་ཀྱི་ཕྱིར་རོ། །བསྒྲུབ་པར་བྱ་བ་ཉིད་ཀྱང་སྐབས་ཡིན་པ་
[302a.5]ཉིད་ཀྱི་ཕྱིར་ཉེ་བ་ཉིད་དེ། དེའི་ཕྱིར་དེའི་ཞེས་རྟོགས་པར་བྱའོ། །ཁྱད་པར་མེད་པར་ཐལ་བར་འགྱུར་ཞེས་པ་དུ་མའི་དོན་ཅན་ཉིད་ཀྱི་ཕྱིར་བྱེད་པ་ནི་འདིར་ཐལ་བར་འགྱུར་བའི་དོན་དུ་རྣམ་པར་ཤེས་པར་བྱའོ་ཞེས་སྟོན་ཏོ། །དེ་ལྟར་བསྒྲུབ་པར་བྱ་བའི་ཆོས་ཅན་ནི། ཆོས་མཐུན་པ་ཉིད་ཀྱི་དཔེ་
[302a.6]དང་གཅིག་ཉིད་དུ་ཐལ་བར་འགྱུར་བའི་ཕྱིར་ཁྱད་པར་མེད་པར་ཐལ་བར་འགྱུར་བར་བྱེད་པ་ནི་ཁྱད་པར་མེད་པ་མཚུངས་པའོ་ཞེས་བཤད་པར་འགྱུར་རོ། །ཅི་ཞིག་གི་ཅི་ཞིག་དང་ལྷན་ཅིག་ཁྱད་པར་མེད་ཅེས་པ། ཅི་བུམ་པ་ཁོ་ན་དང་སྒྲ་ཁྱད་པར་མེད་དམ། འོན་ཏེ་སྣམ་བུ་ལ་སོགས་པ་
[302a.7]གཞན་དང་ཡང་ཡིན། ཡང་ན་ཅི་བུམ་པའི་ཆོས་གཅིག་དང་སྒྲ་ཁྱད་པར་མེད་པའམ། འོན་ཏེ་བུམ་པའི་ཆོས་རྣམས་ཐམས་ཅད་དང་ཡིན་ཞེས་པ་འདིའི་ཕྱིར་གསུངས་པ། ཁྱད་པར་དུ་མ་བྱས་པ་ཉིད་ཀྱི་ཕྱིར་ཐམས་ཅད་ཀྱི་ཐམས་ཅད་དང་ངོ་ཞེས་པ། འདིར་ཁྱད་པར་ཉེ་བར་བླངས་པ་ཅུང་ཟད་ཀྱང་མེད་
[302b]
[302b.1]དེ་དེའི་ཕྱིར་དངོས་པོ་ཐམས་ཅད་ཀྱི་ཆོས་རྣམས་ཐམས་ཅད་དང་། ཕན་ཚུན་ཁྱད་པར་མེད་པར་རིག་པར་བྱའོ། །གལ་ཏེ་བུམ་པ་དང་ཆོས་མཐུན་པ་ཉིད་མཐོང་བ་ལས་གཞན་ཡང་ཁྱད་པར་མེད་པར་བྱ་ན་ཞེས་པ་འདིས་དེའི་ལུགས་ལ་ཧ་ཅང་ཐལ་བ་སྟོན་པར་བྱེད་དེ། གང་གི་དབང་གིས་ཁྱད་པར་མེད་པར་
[302b.2]ཐལ་བར་འགྱུར་བའོ། །བུམ་པའི་ཆོས་ཐམས་ཅད་ཅེས་པ་ལ་སོགས་པས་དེ་ཁྱད་པར་མེད་པར་ཐལ་བར་འགྱུར་བའོ། །ཐམས་ཅད་ཀྱི་ཕན་ཚུན་ཆོས་མཐུན་པ་ཉིད་ལས་ཞེས་པ་གཞལ་བྱ་ཉིད་ལ་སོགས་པ་ལས་འགྲོ་བ་ཐམས་ཅད་གཅིག་ཉིད་དུ་ཐལ་བར་འགྱུར་ཏེ། ཁྱད་པར་མེད་པ་ཉིད་དུ་ཐལ་བར་འགྱུར་རོ་ཞེས་པ་
[302b.3]འདི་ཁྱད་པར་མེད་པར་མཚུངས་པའོ། །ཤིན་ཏུ་ཐ་དད་པ་མ་ཡིན་པ་ཞེས་པ་ནི་རྣམ་རྟོག་མཚུངས་པ་ལ་ནི་དངོས་སུ་ཁྱད་པར་སྟོན་ཅིང་། འདིར་ནི་ཁྱད་པར་མེད་པར་ཐལ་བར་འགྱུར་བའི་སྒོ་ནས་སོ་ཞེས་པ་སྦྱོར་བ་ཙམ་ཐ་དད་ཀྱི་དོན་ནི་མ་ཡིན་ནོ། །དེའི་ཕྱིར་ཤིན་ཏུ་ཐ་དད་པ་མ་ཡིན་པ་སྟེ། དེའི་ཕྱིར་དེ་བཞིན་དུ་མ་ངེས་པ་ལྟར་སྣང་བའོ། །
[302b.4]ཤིན་ཏུ་ཡོད་པ་མ་ཡིན་པ་ཉིད་ཀྱི་ཕྱིར་ཞེས་པ། བརྩལ་མ་ཐག་ཏུ་བྱུང་བ་ཉིད་དང་མི་རྟག་པ་ཉིད་ཀྱང་གཉིས་ཀ་ཤིན་ཏུ་ཡོད་པ་མ་ཡིན་པ་ཁོ་ནའོ། །དེ་ལྟར་ནི་བརྩལ་མ་ཐག་ཏུ་སྐྱེ་བ་ཉིད་ནི་བརྩལ་མ་ཐག་ཏུ་འབྱུང་བ་ཉིད་དེ། དེ་ཡང་ཤིན་ཏུ་ཡོད་པ་མ་ཡིན་པ་ཁོ་ན་སྟེ། རྩོལ་བ་ལས་སྔར་མེད་པའི་ཕྱིར་རོ། །མི་རྟག་
[302b.5]པ་ཉིད་ཀྱང་གཏན་ནས་ཡོད་པ་མ་ཡིན་པ་ཁོ་ནའོ། །དེའི་ཕྱིར་བསྒྲུབ་བྱ་དང་སྒྲུབ་བྱེད་དག་ཐ་དད་མེད་པའི་ཕྱིར་དམ་བཅའ་བའི་དོན་གྱི་ཕྱོགས་གཅིག་གཏན་ཚིགས་སོ་ཞེས་པས་མ་གྲུབ་པ་ཉིད་དོ། །འདི་ཡང་མ་གྲུབ་པ་ལྟར་སྣང་བ་སྟེ། ཅིའི་ཕྱིར་ཞེ་ན་གསུངས་པ། སྐྱེ་བ་ལས་སྔར་མེད་པ་ཞེས་པ་ལ་སོགས་
[302b.6]པའོ། །སྐྱེ་བ་ལས་སྔར་མེད་པ་གང་གི་ཡིན་པ་དེ་སྐྱེ་བ་ལས་སྔར་མེད་པའོ། །ཡང་དེ་ཅི་ཞེ་ན་སྐབས་ཉིད་ཀྱི་ཕྱིར་བརྩལ་མ་ཐག་ཏུ་བྱུང་བ་སྟེ། དེ་ནི་རྩོལ་བ་ལས་སྔར་སྐྱེ་བ་མེད་པའོ་ཞེས་པ་འདི་ནི་རབ་ཏུ་གྲགས་པའོ། །དེ་བསྒྲུབ་བྱའི་རང་བཞིན་ཉིད་དུ་སྒྲོ་བཏགས་ནས་བསྒྲུབ་བྱ་དང་སྒྲུབ་བྱེད་
[302b.7]དག་ཁྱད་པར་མེད་པར་ཐལ་བར་བྱེད་པའི་ཕྱིར་འདི་ནི་མ་གྲུབ་པར་ལྟར་སྣང་བའོ། །སྐྱེ་བ་ལས་སྔར་མེད་པ་ཡང་བསྒྲུབ་པར་བྱ་བ་ཉིད་དུ་སྒྲོ་བཏགས་པས་བསྒྲུབ་བྱའི་ཆོས་ལས་ཐ་དད་པར་སྟོན་ཏོ། །བསྒྲུབ་བྱའི་ཆོས་ནི་མི་རྟག་པ་ཉིད་དེ། སྔ་མའི་གནས་སྐབས་ལས་ཁྱད་པར་དུ་བྱུང་བའོ། །
[303a]
[303a.1]རྩོལ་མ་ཐག་ཏུ་བྱུང་བ་ཉིད་ནི་བརྩལ་མ་ཐག་ཏུ་སྐྱེ་བའམ་མངོན་པར་གསལ་བ་ཤེས་པའི་མཚན་ཉིད་ཅན་གྱི་ཆོས་གཞན་ཁོ་ནའོ། །འདིར་ནི་དེ་གྲུབ་ཟིན་པ་ཉིད་ཀྱི་ཕྱིར་བསྒྲུབ་པར་བྱ་བ་ཡང་མ་ཡིན་གྱི། འོ་ན་ཅི་ཞེ་ན་གྲུབ་པ་དེས་མི་རྟག་པ་ཉིད་དུ་སྟེ། ཞི་གནས་མེད་པའི་རྣམ་གྲངས་
[303a.2]ཅན་གནས་སྐབས་ཀྱི་ཁྱད་པར་གྱི་བདག་ཉིད་དོ། །གང་གསུངས་པ། གྲུབ་པ་ཡིས་ཞེས་པ་ལ་སོགས་པའོ། །མི་རྟག་པ་བཞིན་དུ་ཆོས་གཞན་སྒྲུབ་པར་བྱེད་པ་ཡང་ཞེས་པ། བརྩལ་མ་ཐག་ཏུ་བྱུང་བ་ཉིད་ནི་ཇི་ལྟར་མི་རྟག་པ་ལ་མཐོང་བའི་ཕྱིར་མི་རྟག་པ་ཉིད་སྒྲུབ་པར་བྱེད་པ་དེ་ལྟར་ཚོས་པར་
[303a.3]བྱ་བ་ཉིད་ལ་སོགས་པ་བསྒྲུབ་བྱའི་ཁྱད་པར་དང་འགལ་བ་ཆོས་གཞན་ཡང་སྟེ། དེ་དང་ལྡན་པ་བུམ་པ་ལ་སོགས་པ་ལ་མཐོང་བའི་ཕྱིར་རོ། །དེ་ལས་ཀྱང་བསྒྲུབ་པར་བྱ་བ་དང་ཅིག་ཤོས་ཀྱི་ཆོས་དག་གི་སྒྲུབ་པར་བྱེད་པ་ཉིད་དུ་ཁྱད་པར་མེད་པའི་ཕྱིར་ཁྱད་པར་མེད་པའོ། །འདི་ཡང་ཞེས་པ་ལ་
[303a.4]སོགས་པ་བསྒྲུབ་པར་བྱ་བའི་ཆོས་ལ་གནོད་པར་བྱེད་པ་ནི་བསྒྲུབ་པར་བྱ་བ་ལ་གནོད་པར་བྱེད་པ་སྟེ་འགལ་བའི་ཆོས་སོ། །དེའི་སྒྲུབ་པར་བྱེད་པ་ནི་བསྒྲུབ་བྱ་ལ་གནོད་པར་བྱེད་པ་སྒྲུབ་པར་བྱེད་པ་སྟེ། དེའི་དངོས་པོ་ནི་བསྒྲུབ་བྱ་ལ་གནོད་པར་བྱེད་པ་སྒྲུབ་པར་བྱེད་པ་ཉིད་དོ། །འདིར་ནི་དེར་རྩོད་པ་ལ་བསྒྲུབ་བྱ་
[303a.5]ལ་གནོད་པར་བྱེད་པ་སྒྲུབ་པར་བྱེད་པ་ཉིད་ཀྱི་སྒྲ་བལྟ་བར་བྱ་སྟེ། འགལ་བའི་གཏན་ཚིགས་སུ་རྩོད་པར་བྱེད་པ་ཉིད་ཀྱིས་ན་འགལ་བ་ལྟར་སྣང་བའོ་ཞེས་པའི་དོན་ཏོ། །ཅིའི་ཕྱིར་ཞེ་ན་གསུངས་པ། ཚོས་པར་བྱ་བ་ལ་སོགས་པ་རྣམས་ལ་ངེས་པ་ལས་ཞེས་པ། ཇི་ལྟར་རྟག་པ་ཉིད་བསྒྲུབ་པར་བྱ་བ་ལ་
[303a.6]བརྩལ་མ་ཐག་ཏུ་བྱུང་བ་ཉིད་ནི་ངེས་པ་ཉིད་དེ་དེ་ལྟར་ཚོས་པ་ལ་སོགས་པ་རྣམས་ལའོ། །དེའི་ཕྱིར་འདི་ནི་འགལ་བ་ལྟར་སྣང་བའོ། །བཤད་པ་ཡང་ཞེས་དེ་མ་ཐག་ཏུ་བཤད་པའི་དོན་ཚིགས་སུ་བཅད་པས་སྡུད་དོ། །བསྒྲུབ་བྱ་གནོད་བྱེད་ཆོས་ལ་ཡང་། །མཚུངས་པ་ཉིད་ཀྱིས་ཁྱད་མེད་བྱེད། །རྩོད་པ་ལའོ་ཞེས་
[303a.7]པ་ལྷག་མའོ། །བསྒྲུབ་པར་བྱ་བ་ལ་གནོད་པར་བྱེད་པའི་ཆོས་ལ་མཚུངས་པ་ཉིད་ཀྱིས་གཏན་ཚིགས་ཀྱིས་ཁྱད་པར་མེད་པར་བྱེད་དེ་ཐལ་བར་འགྱུར་བར་བྱེད། གཏན་ཚིགས་ལ་རྩོད་པ་གང་ཡིན་པ། ཇི་ལྟར་གཏན་ཚིགས་འདི་འདོད་པའི་ཆོས་ལ་སྒྲུབ་པར་བྱེད་པ་ཉིད་ཡིན་པ་དེ་ལྟར་
[303b]
[303b.1]བསྒྲུབ་པར་བྱ་བ་ལ་གནོད་པར་བྱེད་པ་ལ་ཡང་ངོ་ཞེས་པ་འདི་ལྟ་བུའི་རྣམ་པ་ཅན་དེ་ནི་གཏན་ཚིགས་སྐྱོན་ལ་འགལ་བར་སྣང་བའི་ཁྱད་པར་མེད་པ་མཚུངས་པའི་ལྟག་ཆོད་དུ་འགྱུར་རོ། །བསྒྲུབ་པར་བྱ་བ་དང་གཏན་ཚིགས་ཁྱད་པར་མེད་པ་འབའ་ཞིག་ལས་ཡིན་པར་མ་ཟད་ཀྱི་འོ་ན་ཅི་ཞེ་ན་རྣམ་པ་འདིས་
[303b.2]ཀྱང་ངོ་ཞེས་གསལ་བར་བྱ་བའི་ཆེད་དུ་ཡང་གི་སྒྲའོ། །སྐྱོན་མེད་ན་ནི་གཏན་ཚིགས་ལ་རྩོད་པ། དེ་སུན་འབྱིན་པར་འགྱུར་རོ་ཞེས་པ་འདི་ཚིགས་སུ་བཅད་པའི་དོན་ཏོ། །ཡང་ཅི་ཆོས་མཐུན་པ་ཉིད་དང་། ཆོས་མི་མཐུན་པ་ཉིད་དང་། རྣམ་པར་རྟོག་པ་དང་ཁྱད་པར་མེད་པ་མཚུངས་པ་འདི་རྣམས་ཐམས་ཅད་དུ་
[303b.3]ལན་ལྟར་སྣང་བ་རྣམས་ཁོ་ནར་འགྱུར་རམ་འོན་ཏེ་འབའ་ཞིག་ཏུ་ལན་རྣམས་སུ་ཡང་ཡིན་ཞེ་ན། དེའི་ཕྱིར་གསུངས་པ། ལན་རྣམས་འགྱུར་ཞེས་པ་ལ་སོགས་པའོ། །མཐའ་གཅིག་ཏུ་ངེས་པ་དང་ལྡན་པའི་སྔ་མའི་ཕྱོགས་ལའོ། །གལ་ཏེ་འདི་རྣམས་མཐའ་གཅིག་པ་རྣམས་ཀྱིས་སོ་སོར་གནས་
[303b.4]པར་གྱུར་ན། དེའི་ཚེ་འདི་རྣམས་སུན་འབྱིན་པ་ཁོ་ན་རྣམས་སུ་འགྱུར་རོ། །སོ་སོར་གནས་པ་མཚུངས་པའི་ཕྱིར་ན། དེ་ལྟར་སྣང་བ་རྣམས་སུ་མ་ཡིན་ནོ། །རྣམ་པ་གཞན་གྱིས་ཀྱང་ལན་རྣམས་སུ་འགྱུར་བར་སྟོན་པ་གསུངས་པ། ཕྱོགས་སྔ་མ་ལ་ཡང་མ་ངེས་པ་ཉིད་དང་ལྡན་ན་ཞེས་པ་ལ་
[303b.5]སོགས་པ་སྟེ། མ་ངེས་པ་དང་ལྡན་པའི་ཕྱོགས་སྔ་མ་ལ། གལ་ཏེ་དེ་སྐད་བརྗོད་པའི་འཁྲུལ་པ་ཆོས་མཐུན་པ་ཉིད་མཚུངས་པ་ལ་སོགས་པ་དང་དོད་ཟླར་གནས་པར་གྱུར་ན། དེ་ལྟ་ན་ཡང་དེ་སུན་འབྱིན་པ་རྣམས་སུ་འགྱུར་རོ། །འདི་ཉིད་སྟེན་ཏེ། དེའི་ཕྱིར་སུན་འབྱིན་པའི་སྒོ་ནས་སམ་ཞེས་པ་
[303b.6]ལ་སོགས་པས་སོ། །དེ་ལ་ཆོས་མཐུན་པ་ཉིད་དང་ཆོས་མི་མཐུན་པ་ཉིད་མཚུངས་པ་དག་ལ་ནི་མ་ངེས་པ་དང་ལྡན་པའི་ཕྱོགས་སྔ་མ་ལ་མ་ངེས་པ་དང་ལྡན་པ་ཁོ་ནས་དོད་ཟླར་གནས་པའི་ཕྱིར། སུན་འབྱིན་པའི་སྒོ་ནས་ཐུན་མོང་གི་མ་ངེས་པར་རྩོད་པའི་ཕྱིར་དང་། མཐའ་གཅིག་པ་དང་ལྡན་
[303b.7]པ་ལ་མཐའ་གཅིག་པས་དོད་ཟླར་གནས་པའི་ཕྱིར་སྒྲུབ་པར་བྱེད་པའི་སྒོ་ནས་འགལ་བ་དང་མ་ངེས་པར་རྩོད་པ་ལས་སོ། །རྣམ་རྟོག་མཚུངས་པ་ལ་ནི་ཐུན་མོང་བ་དང་ཐུན་མོང་མ་ཡིན་པའི་མ་ངེས་པ་དང་ཕྱོགས་སྔ་མ་ལ། ཐུན་མོང་དང་ཐུན་མོང་མ་ཡིན་པ་དག་གིས་དོད་ཟླར་གནས་པའི་ཕྱིར།
[304a]
[304a.1]སུན་འབྱིན་པའི་སྒོ་ནས་ཐུན་མོང་དང་ཐུན་མོང་མ་ཡིན་པའི་མ་ངེས་པར་རྩོད་པ་ལས་དང་། མཐའ་གཅིག་པ་དང་ལྡན་པ་ལ་མཐའ་གཅིག་ཏུ་གནས་པ་མ་ཡིན་པས་དོད་ཟླར་གནས་པའི་ཕྱིར་སྒྲུབ་པར་བྱེད་པའི་སྒོ་ནས་འགལ་བ་དང་མ་ངེས་པར་རྩོད་པ་ལས་སོ། །དེ་བཞིན་དུ་ཁྱད་པར་མེད་
[304a.2]པ་མཚུངས་པ་དང་པོ་ལ་སྟེ། གསུམ་པ་ལ་ནི་ངེས་པ་དང་ལྡན་པ་ལ་ངེས་པ་ཉིད་ཀྱིས་དོད་ཟླར་གནས་པའི་ཕྱིར་སུན་འབྱིན་པའི་སྒོ་ནས་བསྒྲུབ་བྱ་ལ་གནོད་པར་རྩོད་པའི་ཕྱིར། འདི་རྣམས་ནི་སུན་འབྱིན་པ་ཁོ་ན་རྣམས་སུ་འགྱུར་རོ། །གལ་ཏེ་མཐོང་ལ་གནོད་མེད་ན། །ཞེས་པ་བསྒྲུབ་པར་བྱ་བ་ལ་གནོད་པར་རྩོད་པ་ལ་
[304a.3]དམིགས་ཀྱིས་བསལ་བ་གསུངས་སོ། །མཐོང་བ་ནི་ཚད་མས་རབ་ཏུ་གྲུབ་པའོ། །ཇི་ལྟ་བུར་མཐོང་བས་གནོད་པ་ཅི་ཞིག་ཏུ་ཡིན་ཞེ་ན་གསུངས་པ། ཇི་ལྟར་ན་ཞེས་པ་ལ་སོགས་པའོ། །དམ་བཅའ་བའི་སྐྱོན་ཁོ་ན་ལས་ཞེས་པ། གལ་ཏེ་རྣ་བའི་རྣམ་པར་ཤེས་པས་གྲུབ་པའི་སྒྲའི་རང་གི་མཚན་ཉིད་མེད་ཅེས་
[304a.4]དམ་འཆའ་ན། དེའི་ཚེ་མངོན་སུམ་གྱིས་རབ་ཏུ་གྲུབ་པས་གནོད་པའི་ཕྱིར་དམ་བཅའ་བ་མི་འགྲུབ་བོ། །ཅི་སྟེ་མཉན་པར་བྱ་བའི་སྒྲའི་བརྗོད་བྱ་སྒྲ་རུ་མི་འགྱུར་རོ་ཞེས་པ་དེ་ལྟ་ཡང་གྲགས་པས་གྲུབ་པས་སོ། །གང་ལ་ཞེས་པ་ལ་སོགས་པ་སྟེ། རྡུལ་གཉིས་པ་ཅན་ནི་རྡུལ་སྔོན་མ་ཅན་ཡིན་ཏེ། རགས་པ་ཉིད་
[304a.5]ཀྱི་ཕྱིར་བུམ་པ་བཞིན་ཞེས་བྱས་པ་ལ། ཇི་ལྟར་གཏན་ཚིགས་འདིས་རྡུལ་སྔ་མ་ཅན་ཉིད་དུ་སྒྲུབ་པར་བྱེད་ཅིང་། འདི་ལྟར་རགས་པའི་རྡུལ་སྔོན་མ་ཅན་ཉིད་དུ་ཡང་ཞེས་པ། ཤིན་ཏུ་རགས་པ་ལ་ལྟོས་པས་གང་རྡུལ་ཡིན་པ་དེ་རགས་པའི་རྡུལ་ལོ། །དེ་ལྟ་ན་ཡང་རྡུལ་ཕྲ་རབ་རྣམས་རགས་པ་ཉིད་དུ་ཡང་
[304a.6]འགྲུབ་སྟེ། འདིར་ཚད་མ་འགའ་ཞིག་གིས་ཀྱང་རྡུལ་ཕྲ་རབ་རྣམས་རགས་པ་ཉིད་དུ་བསྒྲུབ་པར་བྱ་བཞིན་པ་ལ་གནོད་པའང་མ་ཡིན་ནོ། །དེ་ལ་ལན་ཅི་ཡིན་ཞེ་ན་གསུངས་པ། གནོད་བྱེད་མེད་ན་འགལ་བ་ཉིད། །ཅེས་པའོ། །ཅིའི་ཕྱིར་ཞེ་ན་གསུངས་པ། བསྒྲུབ་བྱ་གནོད་བྱེད་སྒྲུབ་བྱེད་ཕྱིར། །ཅེས་པའོ། །
[304a.7]ཡང་ཅི་ལྟར་རགས་པ་ཉིད་ལ་རགས་པའི་རྡུལ་སྔོན་མ་ཅན་ཉིད་ཀྱིས་ཁྱབ། ཇི་སྲིད་དུ་འདིར་འབྲེལ་པ་འགའ་ཞིག་ཀྱང་ཡོད་པ་མ་ཡིན་ཏེ། དེ་ལས་ཀྱང་རགས་པ་ཡང་འགྱུར་ཞིང་རགས་པ་མ་ཡིན་པའི་རྡུལ་སྔོན་མ་ཅན་ཡང་ངོ་ཞེས་པས། ཅི་ཞིག་ལས་འགལ་བ་ཉིད་ཡིན་ཞེ་ན། ཇི་ལྟར་
[304b]
[304b.1]འགལ་བ་དེ་ལྟར་བརྗོད་པར་བྱ་སྟེ། ཡན་ལག་ཅན་གྱི་རྫས་ནི་མཚུངས་པའི་ཡུལ་ས་ཅན་ནོ་ཞེས་པའི་གཞུང་ལས། ཇི་སྲིད་དུ་ནམ་མཁའི་ཡུལ་ཕྱོགས་ཡན་ལག་གི་རྫས་ཐོབ་པ་དེ་སྲིད་ཁོ་ནར་ཡན་ལག་ཅན་གྱི་རྫས་ཀྱང་སྟེ། དེའི་ཕྱིར་རྡུལ་གཉིས་པ་ཅན་རགས་པ་ཉིད་དུ་འདོད་པ་པོས་དེ་རྩོམ་པར་བྱེད་
[304b.2]པའི་རྡུལ་གཉིས་པ་ཅན་ཡང་མ་ཡིན་ཏེ། དེ་དང་མཚུངས་པའི་ཡུལ་ཕྱོགས་ཅན་ཉིད་ཀྱི་ཕྱིར་རམ། ཡུལ་ཕྱོགས་ཐ་དད་པ་ཉིད་ན་རྡུལ་ཕྲན་ནི་དེའི་ཡན་ལག་ཏུ་མི་འགྱུར་རོ། །དེའི་ཕྱིར་རྡུལ་གཉིས་པ་ཅན་རགས་པ་ཉིད་དུ་ཁས་ལེན་པ་པོས་གདོན་མི་ཟ་བར་དེའི་ཡན་ལག་ཀྱང་ཁས་བླང་
[304b.3]བར་བྱའོ་ཞེས་པས་འགལ་བ་ཉིད་དོ། །དམིགས་པ་མཚུངས་པ་ཞེས་པ་མཚོན་བྱ་སྟེ། ལྷག་མ་མཚན་ཉིད་དོ། །གཏན་ཚིགས་གཞན་གྱིས་ཀྱང་ཞེས་པའི་ཀྱང་གི་སྒྲ་ནི་ངེས་པར་གཟུང་བའི་དོན་ཅན་ཏེ། གཏན་ཚིགས་གཞན་ཁོ་ནས་ཞེས་པའི་དོན་ཏོ། །གལ་ཏེ་གློག་ལ་སོགས་པ་ལ་གཞན་
[304b.4]ལས་མི་རྟག་པ་ཉིད་འགྲུབ་མོད། དེ་ལས་གང་གིས་དེ་མི་རྟག་པའི་གཏན་ཚིགས་སུ་མི་འགྱུར་བ་བརྩལ་མ་ཐག་ཏུ་བྱུང་བ་ཉིད་ལ་ཅི་ཞིག་འོངས་ཤེ་ན་བཤད་པ། དེ་ནི་མ་ཡིན་ཞེས་པ་ལ་སོགས་པ་སྟེ། རྒྱུ་ནི་བྱེད་རྒྱུའོ། །རྒྱུའི་སྒྲས་བསྣན་པ་ལས། བྱེད་པ་ཅན་གྱི་ཆོས་ཤེས་པར་བྱེད་པའི་རྒྱུ་ལ་
[304b.5]སྒྲོ་བཏགས་ནས། གང་ཞིག་གང་མེད་ཀྱང་འགྱུར་བ་དེའི་དེ་རྒྱུ་མ་ཡིན་ཏེ། དཔེར་ན་ཆུ་མེའི་བཞིན། མི་རྟག་པ་ཉིད་ཀྱང་བརྩལ་མ་ཐག་ཏུ་བྱུང་བ་ཉིད་མེད་པར་འགྱུར་རོ་ཞེས། རྒྱུ་དང་རྒྱུ་དང་ལྡན་པའི་དངོས་པོའི་ཐ་སྙད་དགག་པའི་ཆེད་དུ་རྒྱུ་དང་འགལ་བ་བཤད་དོ། །འདི་ནི་མི་རྟག་པ་
[304b.6]ཉིད་ལ་གཏན་ཚིགས་མ་ཡིན་ཏེ། ཁྱབ་བྱེད་མ་ཡིན་པ་ཉིད་ཀྱི་ཕྱིར་ཞེས་པ། གང་ཞིག་གང་གི་ཁྱབ་པར་བྱེད་པར་མི་འགྱུར་བ་དེ་ནི་དེའི་གཏན་ཚིགས་མ་ཡིན་ཏེ། དཔེར་ན་སེམས་པ་དང་བཅས་པའི་ཉལ་བ་བཞིན། རྩོལ་མ་ཐག་ཏུ་བྱུང་བ་ཉིད་ཀྱང་མི་རྟག་པ་ཉིད་ཀྱི་ཁྱབ་
[304b.7]པར་བྱེད་པ་མ་ཡིན་ནོ། །ཁྱབ་བྱེད་མི་དམིགས་པའི་གཟུགས་བརྙན་ནོ། །བསྒྲུབ་བྱར་མ་ངེས་སྒྲོ་བཏགས་ནས། །ཞེས་པ་ལ་སོགས་པ་སྟེ། བསྒྲུབ་བྱའི་གང་མ་ངེས་པ་འཁྲུལ་པ་སྟེ། དེར་རྩོལ་མ་ཐག་ཏུ་བྱུང་བ་ཉིད་ཀྱི་གཏན་ཚིགས་ལ་སྒྲོ་བཏགས་ནས། གཏན་ཚིགས་འཁྲུལ་
[305a]
[305a.1]པ་ཉིད་དུ་རྩོད་པའི་ཕྱིར། དེའི་གཟུགས་བརྙན་ཉིད་མ་ངེས་པ་ལྟར་སྣང་བ་ཉིད་དོ་ཞེས་པའི་དོན་ཏོ། །བྱེད་པ་ཅན་གྱི་རྒྱུ་ལ་ནི་ཞེས་པ་ལ་སོགས་པས། བྱེད་པའི་ཆོས་གཞན་ཡིན་ཞིང་། ཤེས་པར་བྱེད་པའི་ཆོས་གཞན་ཏེ། དེའི་ཕྱིར་རྒྱུའི་ཐ་སྙད་ཙམ་མཚུངས་པ་
[305a.2]ལས་བྱེད་པའི་ཆོས་ཤེས་པར་བྱེད་པ་ལ་མི་འགྱུར་ཞེས་སྟོན་ཅིང་། གཏན་ཚིགས་སྔ་མ་དུ་བ་ལ་སོགས་པ་རྣམས་ཀྱིས་མ་ངེས་པར་གསལ་བར་བྱེད་དོ། །དེ་ལྟར་ནི་དུ་བ་ལ་སོགས་པ་མེད་ཀྱང་མེ་ལ་སོགས་པ་རྣམས་འགྱུར་མོད། དེ་སྟེ་ཡང་དེ་རྣམས་ནི་དེ་རྣམས་ཀྱི་གཏན་ཚིགས་རྣམས་སོ། །
[305a.3]གཉིས་པ་ལ་ཡང་གཏན་ཚིགས་མ་གྲུབ་པ་ཉིད་དུ་གསལ་བར་བྱེད་པ་གསུངས་པ། མ་ཁྱབ་པ་ཉིད་ཀྱིས་ཞེས་པ་ལ་སོགས་པའོ། །གཏན་ཚིགས་ཏེ་བརྩལ་མ་ཐག་ཏུ་བྱུང་བ་ཉིད། །མ་ཁྱབ་པ་ཉིད་ཀྱིས་གང་མཐུན་པའི་ཕྱོགས་ཀྱི་ཕྱོགས་གཅིག་ལ་མེད་པ་སྟེ། བསྒྲུབ་བྱ་སྟེ།
[305a.4]ཆོས་ཅན་སྒྲ་ལ་རྣམ་པར་རྟོག་པར་བྱེད་དེ། དེའི་ཕྱིར་མ་གྲུབ་པ་ལྟར་སྣང་བའོ། །འོ་ན་བསྒྲུབ་པར་བྱ་བ་གློག་ལ་སོགས་པ་ལ་བརྩལ་མ་ཐག་ཏུ་བྱུང་བ་ཉིད་མེད་པ་ཡོད་པ་ཁོ་ན་ཡིན་ནམ། དེས་ན་རྣམ་པར་རྟོག་པར་བྱེད་ཅེས་བརྗོད་ཅེ་ན། དེའི་ཕྱིར་གསུངས་པ། སྒྲར་གནས་པས་ཐམས་ཅད་སྒྲུབ་པར་
[305a.5]བྱེད་པ་མ་ཡིན་ཞེ་ན། གང་གི་ཕྱིར་སྒྲའི་རྗེས་སུ་སོན་པའི་བརྩལ་མ་ཐག་ཏུ་བྱུང་བ་ཉིད་ཀྱིས་གློག་ལ་སོགས་པ་རྣམ་པ་ཐམས་ཅད་མི་རྟག་པ་ཉིད་དུ་བསྒྲུབ་པར་བྱ་བ་མ་ཡིན་པས་སོ་ཞེས་པའི་དོན་ཏོ། །ཡང་ཅིའི་ཕྱིར་མ་གྲུབ་པར་སྣང་བ་ཡིན་གྱི་སུན་འབྱིན་པ་ཁོ་ན་ནི་མ་ཡིན་ཞེ་ན། དེའི་ཕྱིར་གསུངས་པ།
[305a.6]བསྒྲུབ་པར་བྱ་བ་ཁོ་ན་ལ་མེད་པའི་ཕྱིར་མ་གྲུབ་པར་འགྱུར་རོ་ཞེས་པའོ། །དེ་འགྱུར་མོད་ཀྱི་དེ་ལ་ཡང་མེད་དོ་ཞེ་ན། དེའི་ཕྱིར་གསུངས་པ། སྒྲ་ལ་གཏན་ཚིགས་དེ་མེད་པ་ཡང་མ་ཡིན་ནོ་ཞེས་པའོ། །ཐེ་ཚོམ་ཞེས་བྱ་ཞེས་པ་ལྟག་ཆོད་ཀྱི་མིང་ངེས་པར་སྟོན་པའོ། །དོན་ཐ་དད་པས་ཞེས་
[305a.7]པ་ལ་སོགས་པ་མཚན་ཉིད་དོ། །དོན་ནི་རྣམ་པ་གཉིས་ཏེ། དམ་བཅའ་བའི་དོན་དང་གཏན་ཚིགས་ཀྱི་དོན་ཏོ། །དེ་ཐ་དད་ནི་བརྗོད་པར་འདོད་པའི་དོན་ལས་དོན་གཞན་ཉིད་དེ་དེས་གཏན་ཚིགས་ལ་གང་ཐེ་ཚོམ་རྩོད་པ་ཐེ་ཚོམ་དུ་རྗོད་པར་བྱེད་པ་དེ་ཐེ་ཚོམ་མཚུངས་པའི་ལྟག་ཆོད་དོ། །གང་དུ་དམ་
[305b]
[305b.1]བཅས་པའི་དོན་བརྟགས་པས་སམ་ཞེས་པ། བརྗོད་པར་འདོད་པའི་དམ་བཅའི་དོན་ལས་དམ་བཅའ་བའི་དོན་གཞན་བརྟགས་པས་སོ། །གཏན་ཚིགས་ཀྱི་དོན་བརྟགས་པས་ཞེས་པ་བརྗོད་པར་འདོད་པའི་གཏན་ཚིགས་ཀྱི་དོན་ལས་གཞན་པའི་གཏན་ཚིགས་ཀྱི་དོན་བརྟགས་པས་སོ། །རྩོལ་མ་
[305b.2]ཐག་པ་ནི་གསལ་བ་དང་སྐྱེ་བ་མཐོང་བའི་ཕྱིར་ཐེ་ཚོམ་ཟའོ་ཞེས་པ། སྐྱེ་བའི་དོན་དུ་དམ་བཅའི་དོན་བརྟགས་ནས་སུན་འབྱིན་པར་བྱེད་དེ། བརྩལ་མ་ཐག་ཏུ་གསལ་བ་ཡང་མཐོང་སྟེ། དཔེར་ན་རྩ་བའི་ཆུ་ལ་སོགས་པ་རྣམས་ལྟ་བུའོ། །སྐྱེ་བ་ཡང་བུམ་པ་ལ་སོགས་པ་རྣམས་སོ། །དེས་ན་
[305b.3]ཅི་འདི་རྩ་བའི་ཆུ་ལ་སོགས་པ་ལྟར་གསལ་བར་བྱ་བའམ། འོན་ཏེ་བུམ་པ་ལ་སོགས་པ་བཞིན་བསྐྱེད་པར་བྱ་བ་ཡིན་ཞེས་མ་ངེས་པ་སྟེ། དེའི་ཕྱིར་མི་རིགས་ཞེས་པ་ལ་སོགས་པའོ། །གང་གི་ཕྱིར་དེ་ལྟར་ཐེ་ཚོམ་ཟ་བ་དེའི་ཕྱིར་ན་བརྩལ་མ་ཐག་ཏུ་བྱུང་བ་ཉིད་ཀྱི་གཏན་ཚིགས་འདི་ལས་སྒྲ་ནི་སྐྱེས་པར་
[305b.4]མི་རིགས་སོ་ཞེས་པ་ངག་གི་དོན་ཏོ། །བསྒྲུབ་བྱར་སྒྲོ་བཏགས་ན་མ་ངེས། ལྟར་སྣང་ཞེས་པ་བསྒྲུབ་པར་བྱ་བ་མི་རྟག་པ་ཉིད་བསྐྱེད་པར་བྱ་བར་སྒྲོ་བཏགས་ན་ནི་མ་ངེས་པ་ལྟར་སྣང་བའོ་ཞེས་པའི་དོན་ཏོ། །དེ་ལ་ཡང་ཞེས་པ་བསྐྱེད་པར་བྱ་བ་ལའོ། །ཅིའི་ཕྱིར་ཐེ་ཚོམ་ཟ་ཞེ་ན། བཤད་པ། དེ་
[305b.5]ལྟར་ནི་ཞེས་པ་ལ་སོགས་པའོ། །ཅིའི་ཕྱིར་མ་ངེས་པ་ལྟར་སྣང་བ་ཡིན་ཞེ་ན་གསུངས་པ། འཇིག་པ་ཉིད་བསྒྲུབ་པར་བྱ་བ་ཉིད་ཀྱི་ཕྱིར་ཞེས་པ་དང་། གསལ་བར་བྱ་བ་རྣམས་ལ་ཡང་འཇིག་པ་ཉིད་ཡོད་དོ་ཞེས་པ། འཇིག་པ་ཉིད་བསྒྲུབ་པར་བྱ་བ་ལ་རྩ་བ་ཆུ་ལ་སོགས་པ་རྣམས་ཀྱིས་
[305b.6]མ་ངེས་པ་ཉིད་མེད་དོ་ཞེས་སྟོན་ཏོ། །སྒྲོ་བཏགས་ན་འཇུག་གོ་ཞེས་པ། བསྒྲུབ་བྱ་སྒྲོ་བཏགས་ནས་ཞེས་པ་འདིར་བཤད་པའི་སྒྲོ་བཏགས་པ་སྨོས་པ་འདིར་ཡང་རྗེས་སུ་འཇུག་གོ། །གལ་ཏེ་གཏན་ཚིགས་སྒྲོ་བཏགས་ནས། །ཞེས་པ་ལ་སོགས་པ། བརྩལ་མ་ཐག་ཏུ་ཉེ་བར་
[305b.7]དམིགས་པ་པའི་མཚན་ཉིད་ཅན་གཏན་ཚིགས་སུ་བརྗོད་པ་ལ། གལ་ཏེ་བརྩལ་མ་ཐག་ཏུ་སྐྱེ་བར་སྒྲོ་བཏགས་ནས་སུན་འབྱིན་པར་བྱེད་དེ། བརྩལ་མ་ཐག་པ་ཅན་ཉིད་ཀྱི་ཕྱིར་ཞེས་པས་ཅི་བརྗོད་པར་འགྱུར་ན། བརྩལ་མ་ཐག་ཏུ་སྐྱེ་བའི་ཕྱིར་རོ་ཞེས་པ་སྟེ།
[306a]
[306a.1]སྐྱེ་བ་དེ་ཡང་དེ་ལ་མ་གྲུབ་པོ་ཞེས་པ། དེའི་ཕྱིར་མ་གྲུབ་པ་ལྟར་སྣང་བའོ། །ཅིའི་ཕྱིར་ཞེ་ན་གསུངས་པ། བརྩལ་མ་ཐག་ཉེ་བར་དམིགས་པ་ཞེས་པ་ལ་སོགས་པའོ། །མི་མཐུན་ཕྱོགས་ལ་དོན་གྱིས་ནི། །མི་འདོད་བརྗོད་པ་ཞེས་པ་མཚན་ཉིད་དོ། །ལྷག་མ་
[306a.2]མཚོན་བྱའོ། །སྔ་མ་བཞིན་དུ་སྒྲུབ་བྱེད་བྱས་པ་ལ་སྨྲས་པ། འདི་སྐད་སྨྲ་བའི་ཁྱོད་ཀྱི་དོན་གྱིས་བརྩལ་མ་ཐག་བྱུང་བ་ནི་རྟག་པའོ་ཞེས་བརྗོད་པར་འགྱུར་རོ། །དེ་ལས་ཀྱང་གློག་ལ་སོགས་པ་རྣམས་ཀྱིས་མ་ངེས་པའོ་ཞེས་སོ། །གཞན་བསྒྲུབ་བྱ་ཉིད་ལ་འཁྲུལ་པ་ཞེས་པ་མི་རྟག་པ་ཉིད་ལས་གཞན་
[306a.3]རྟག་པ་ཉིད་དེ་དེ་རྩོལ་མ་ཐག་པ་ཅན་མ་ཡིན་པ་ཉིད་ཀྱིས་བསྒྲུབ་པར་བྱ་བ་ལ། གཏན་ཚིགས་འཁྲུལ་པ་སྟེ། མི་རྟག་པ་ཉིད་ལ་བརྩལ་མ་ཐག་ཅན་གྱིས་ནི་མ་ཡིན་ནོ། །དེའི་ཕྱིར་མ་ངེས་པ་ལྟར་སྣང་བའོ། །ཅིའི་ཕྱིར་ཞེ་ན་གསུངས་པ། གཏན་ཚིགས་རྟག་པ་ལ་ཡང་ཡོད་པ་ནི་མ་ཡིན་
[306a.4]ནོ་ཞེས་སོ། །ཡང་ན་ཞེས་པ་རྣམ་པ་གཞན་སྟོན་པའོ། །འདིར་ནི་སྒྲོ་བཏགས་པའི་ངེས་པའི་འཁྲུལ་པ་གང་ཡིན་པ་དེ་གཏན་ཚིགས་ལ་སྒྲོ་བཏགས་ནས་རྩོད་པ་ལས་མ་ངེས་པ་ལྟར་སྣང་བར་འགྱུར་རོ་ཞེས་རིག་པར་བྱའོ། །ཐལ་འགྱུར་མཚུངས་པ་ཞེས་པ་མཚོན་བྱ་དང་། ལྷག་མ་མཚན་ཉིད་དོ། །རབ་ཏུ་གྲུབ་
[306a.5]པའི་དཔེ་ལ་ཡང་། གཉིས་དག་ནི་རྒོལ་བ་དང་ཕྱིར་རྒོལ་བ་དག་གོ། །གང་གིས་གཏན་ཚིགས་ཚོལ་བར་བྱེད་པའོ། །བུམ་པ་ཁོ་ན་རེ་ཞིག་མི་རྟག་པའོ་ཞེས་པ་འདི་ལ་གཏན་ཚིགས་ཅི་ཞིག་ཅེས་པ་འདི་ནི་ཐལ་འགྱུར་མཚུངས་པའོ། །དཔེ་ལྟར་སྣང་བ་བཞིན་འདི་ཡིན། །ཞེས་པ།
[306a.6]བསྒྲུབ་པར་བྱ་བ་དང་ལྡན་པ་ཉིད་དུ་གྲུབ་པའི་བུམ་པ་ལ་ཡང་བསྒྲུབ་བྱ་དང་བྲལ་བ་ཉིད་དུ་རྩོད་པའི་ཕྱིར་རོ། །ཡང་འབྲས་བུ་མཚུངས་པ་ལས་འདིའི་ཁྱད་པར་ཅི་ཞིག་སྟེ། ཇི་ཙམ་དུ་དེར་ཡང་སྒྲའི་འབྲས་བུ་ཉིད་བུམ་པ་ལ་མེད་དོ་ཞེས་རྩོད་པའི་ཕྱིར་དཔེའི་སྐྱོན་ལྟར་སྣང་བར་བརྗོད་པ་ཁོ་ནའོ་ཞེ་ན་དེའི་
[306a.7]ཕྱིར་གསུངས་པ། སྔ་མ་ནི་ཞེས་པ་ལ་སོགས་པའོ། །དེར་ནི་སྒྲའི་འབྲས་བུ་ཉིད་བུམ་པ་ལ་མེད་དོ་ཞེས་གཏན་ཚིགས་རྗེས་སུ་འགྲོ་བ་མེད་པས་དཔེའི་སྐྱོན་ལྟར་སྣང་བ་ཉིད་དུ་བཤད་ཅིང་། འདིར་ནི་བསྒྲུབ་པར་བྱ་བ་རྗེས་སུ་འགྲོ་བ་མེད་པས། དེ་ལྟར་སྣང་བ་ཉིད་དུའོ་ཞེས་
[306b]
[306b.1]པ་ཁྱད་པར་རོ། །འདི་ནི་ཕྱོགས་ཙམ་ཞེས་པ་ལ་སོགས་པ། འདི་ནི་ངེད་ཀྱིས་ལྟག་ཆོད་རྣམས་ལ་ཕྱོགས་ཙམ་ཉེ་བར་བསྟན་པ་སྟེ། གཏན་ཚིགས་མ་ཚང་བ་ཉིད་ལ་སོགས་པ་ལྟར་སྣང་བའི་ཕྱིར། དེ་རྣམས་ནི་མ་ཚང་བ་ཉིད་ལ་སོགས་པ་ལྟར་སྣང་བ་ཉིད་ཀྱིས་ན་ལན་ལྟར་སྣང་བ་ཉིད་དུ་ཤེས་པའི་དོན་
[306b.2]དུའོ། །ཕྱོགས་འདིས་གཞན་རྣམས་ལ་ཡང་མི་རིགས་པའི་ལན་ཉིད་དུ་རིག་པར་བྱའོ། །མ་ཚང་བ་ཉིད་ལ་སོགས་པ་ལྟར་སྣང་བ་ཉིད་ཀྱིས་ཞེས་པ། སོགས་པའི་སྒྲས་མ་གྲུབ་པ་ཉིད་ལ་སོགས་པ་རྣམས་གཟུང་ངོ་། །འཕེལ་བ་དང་འགྲིབ་པ་མཚུངས་པ་ལ་སོགས་པ་རྣམས་ལ་ཞེས་པ་འདིར་
[306b.3]ཡང་སོགས་པའི་སྒྲ་བསྒྲགས་བྱ་དང་། བསྒྲགས་བྱ་མ་ཡིན་པ་དང་། འཐད་པ་དང་ཟླ་བོའི་དཔེ་དང་སྐབས་མཚུངས་པ་ལ་སོགས་པ་རྣམས་སོ། །ཡང་ཅི་ལྟར་ཕྱོགས་ཙམ་གྱིས་གཞན་ལ་ཡང་མི་རིགས་པའི་དོན་ཉིད་དུ་ཤེས་པར་ནུས་ཤེ་ན་གསུངས་པ། འདི་རྣམས་ཁོ་ན་ཞེས་པ་ལ་སོགས་པ་སྟེ།
[306b.4]ཙམ་སྨོས་པས་ནི་སྦྱོར་བའི་ཁྱད་པར་ཁོ་ན་ལས་རབ་ཏུ་དབྱེ་བ་མཐའ་ཡས་པ་སྐྱེའི། དོན་གྱི་ཁྱད་པར་ལས་ནི་མ་ཡིན་ནོ་ཞེས་སྟོན་ཏོ། །དེ་ཉིད་ཀྱི་ཕྱིར་དོན་ཐ་མི་དད་པ་ཉིད་ཀྱི་ཕྱིར་ན་དེ་རྣམས་ལ་ཇི་སྐད་བརྗོད་པའི་ཕྱོགས་ཀྱིས་མ་ཚང་བ་ཉིད་ལ་སོགས་པ་ལྟར་སྣང་བ་ཉིད་ཀྱིས་ན་མི་རིགས་པའི་ལན་
[306b.5]ཉིད་དུ་ཤེས་པར་ནུས་སོ། །དེ་ལ་འཕེལ་བ་མཚུངས་པ་ནི་སྦྱོར་བ་སྔ་མ་བཞིན་བྱས་པ་ལ་ལྟག་ཆོད་སྨྲ་བ་པོས་སྨྲས་པ། གལ་ཏེ་བརྩལ་མ་ཐག་ཏུ་བྱུང་བ་ཉིད་དུ་ཆོས་མཐུན་པ་ལས་ཇི་ལྟར་བུམ་པ་མི་རྟག་པ་དེ་ལྟར་སྒྲ་ཡང་འདོད་ན་བུམ་པ་དང་འདྲ་བ་ཁོ་ནར་སྒྲ་ཡང་ལུས་ཅན་དུ་འཐོབ་བོ་ཞེས་
[306b.6]པའོ། །འདི་ནི་བསྒྲུབ་པར་བྱ་བ་ལ་དཔེའི་ཆོས་འཕེལ་བར་བྱེད་པའི་ཕྱིར་འཕེལ་བ་མཚུངས་པའོ། །ཡང་ན་བུམ་པ་མཉན་བྱ་མ་ཡིན་ཏེ། དེའི་ཕྱིར་སྒྲ་ཡང་མཉན་བྱ་ཡིན་པར་མི་འགྱུར་རོ་ཞེས་པ་འདི་ནི་བསྒྲུབ་བྱ་ལ་ཆོས་གཞན་འགྲིབ་པར་བྱེད་པའི་ཕྱིར་འགྲིབ་པ་མཚུངས་པའོ། །བསྒྲགས་
[306b.7]པར་འོས་པ་ནི་བསྒྲགས་བྱ་སྟེ། བསྒྲུབ་བྱའོ་ཞེས་པའི་དོན་ཏོ། །ཇི་ལྟར་སྒྲ་བསྒྲགས་བྱ་ཡིན་པ་དེ་ལྟར་བུམ་པ་ཡང་ངོ་ཞེས་པ་བསྒྲགས་བྱ་མཚུངས་པའོ། །ཡང་ན་བུམ་པ་བསྒྲགས་བྱ་མ་ཡིན་པ་དེ་ལྟར་ཡང་ངོ་ཞེས་པ་བསྒྲགས་བྱ་མ་ཡིན་པ་མཚུངས་པའོ། །བཞི་པོ་འདི་རྣམས་ཀྱང་ཁྱད་པར་
[307a]
[307a.1]མེད་པ་མཚུངས་པ་དང་། རྣམ་རྟོག་མཚུངས་པར་ནང་དུ་འདུའོ། །གལ་ཏེ་མི་རྟག་པའི་འཐད་པ་རྩོལ་མ་ཐག་ཏུ་བྱུང་བ་ཉིད་ལས་སྒྲ་མི་རྟག་པ་ཡིན་ན། རྟག་པའི་འཐད་པ་ལུས་ཅན་མ་ཡིན་པ་ཉིད་ལས་རྟག་པར་འགྱུར་རོ་ཞེས་པ་འཐད་པ་མཚུངས་པ་སྟེ། འདི་ཡང་རྟག་པར་
[307a.2]ཆོས་མཐུན་པ་ཉིད་དམ། མི་རྟག་པར་ཆོས་མི་མཐུན་པ་ཉིད་ཀྱིས་མ་ངེས་པར་དགྲ་ཟླར་གནས་པར་བྱེད་པའི་ཕྱིར་ཆོས་མཐུན་པ་ཉིད་དང་། མི་མཐུན་པ་ཉིད་མཚུངས་པ་དག་གི་ནང་དུ་འདུའོ། །དཔེའི་ཟླ་བོ་མཚུངས་པ་ནི་གལ་ཏེ་མི་རྟག་པ་བསྒྲུབ་པར་བྱ་བ་ལ་བུམ་པ་ལ་སོགས་པའི་དཔེ་ཡོད་དོ་ཞེས་པས་སྒྲ་མི་
[307a.3]རྟག་པ་ཡིན་ན། རྟག་པ་བསྒྲུབ་པར་བྱ་བ་ལ་ཡང་ནམ་མཁའ་ལ་སོགས་པའི་དཔེ་ཡོད་དོ་ཞེས་པས་ལུས་ཅན་མ་ཡིན་པ་ཉིད་ཀྱི་ཕྱིར་ནམ་མཁའ་ལ་སོགས་པ་བཞིན་དུ་རྟག་པར་འགྱུར་རོ་ཞེས་པའོ། །འདི་ནི་ཆོས་མི་མཐུན་པ་མཚུངས་པའི་ནང་དུ་འདུ་སྟེ། གལ་ཏེ་བུམ་པའི་ཆོས་མི་མཐུན་
[307a.4]པ་ཉིད་དུ་དོད་ཟླར་གནས་པར་བྱེད་ནའོ། །ཅི་སྟེ་ནམ་མཁའི་ཆོས་མཐུན་པ་ཉིད་དུ་ཡིན་ན་དེའི་ཚེ་ཆོས་མཐུན་པ་ཉིད་མཚུངས་པར་རོ། །སྐབས་མཚུངས་པ་ནི་འདི་ལྟ་སྟེ། སྔ་མ་བཞིན་བྱས་པ་ལ། རྩོལ་མ་ཐག་ཏུ་བྱུང་བ་ཉིད་འདི་ཡོད་པ་ལ། སྐབས་འདི་བརྩམས་ན། ཅིས་ན་རྟག་པ་མི་རྟག་པ་ཡིན་
[307a.5]ཞེས་པ་སྟེ། རྩོལ་མ་ཐག་ཏུ་བྱུང་བ་ནི་གསལ་བྱ་དང་བསྐྱེད་བྱ་དག་གིས་རྟག་པ་དང་མི་རྟག་པ་དག་ལ་མཐོང་བའི་ཕྱིར་རོ། །དེའི་ཕྱིར་གཏན་ཚིགས་སྐབས་ལས་མི་འདའོ་ཞེས་པ་འདི་ཡང་ཅུང་ཟད་ཙམ་གྱི་ཁྱད་པར་ཐ་དད་པ་སྟེ། ཐེ་ཚོམ་མཚུངས་པར་ནང་དུ་འདུའོ། །དེ་ལྟར་གཞན་ལ་ཡང་
[307a.6]ནང་དུ་འདུས་པ་ཤེས་པར་བྱའོ། །འོ་ན་མ་ཚང་བ་ཉིད་ལ་སོགས་པ་རྣམས་བརྗོད་པར་བྱ་བའི་ཆོས་མ་ཡིན་ནམ། དེ་ཅི་ལྟར་ལྟག་ཆོད་ཀྱི་ལན་མ་ཚང་བ་ཉིད་ལ་སོགས་པ་ལྟར་སྣང་བར་བཤད་ཅེ་ན། གསུངས་པ། འདིར་གང་ཁོ་བོ་ཅག་གིས་ཞེས་པ་ལ་སོགས་པའོ། །གཞན་དུ་ན་ཞེས་པ་
[307a.7]གལ་ཏེ་ཉེ་བར་བཏགས་པ་མ་བྱས་པར་བརྗོད་ན་ཞེས་པའི་དོན་ཏོ། །གལ་ཏེ་འདི་ལྟར་བརྗོད་ན་སྐྱོན་ཅི་ཞིག་ཏུ་འགྱུར་ཞེ་ན་གསུངས་པ། དེ་ལྟ་ན་ཡང་ཞེས་པ་ལ་སོགས་པའོ། །ཐམས་ཅད་ཉེ་བར་སྡུད་པ་རྣམས་ལ་མཚུངས་པར་ཐལ་བར་འགྱུར་བའི་ཕྱིར་ཞེས་པ། ཇི་ལྟར་ཁོ་ནར་འདི་ཁྱོད་ཀྱི་སྒྲུབ་བྱེད་
[307b]
[307b.1]ཡིན་པ་དེ་ལྟར་ངའི་ཡང་འདི་ལན་ནོ་ཞེས་པ་འདི་ལྟར་སྔ་མ་དང་ཕྱི་མའི་ཕྱོགས་ཐམས་ཅད་ལ་མཚུངས་པ་ཉིད་དུ་འབྱུང་བར་བྱེད་པའི་ཕྱིར་རོ། །ཕྱིན་ཅི་ལོག་དང་མི་བདེན་ཉིད། །ཅེས་པ་ལ་སོགས་པ་སྟེ། དང་གི་སྒྲ་ནི་བསྡུ་བ་ལའོ། །ནིའི་སྒྲ་ནི་ངེས་པར་འཛིན་པ་ལ་སྟེ། འདི་ལ་ཁྱད་པར་མཚོན་པ་
[307b.2]མེད་པ་ཁོ་ནའོ། །ཡང་ན་སྐྱོན་གསུམ་ཁོ་ནའོ་ཞེས་རིམ་པ་གཞན་དུ་སྦྱར་བར་ཤེས་པར་བྱའོ། །དེ་ལ་ཕྱིན་ཅི་ལོག་ནི་སྔ་མའི་ཕྱོགས་ལ་རབ་ཏུ་སྦྱར་བའི་གཏན་ཚིགས་མཚན་ཉིད་དང་བྲལ་བའོ། །མི་བདེན་པ་ནི་བརྫུན་པ་སྟེ། གང་གི་དོན་ཇི་ལྟར་དམ་བཅས་པ་དེ་ལྟར་མ་ཡིན་པའོ། །འགལ་བ་ནི་གང་གི་དོན་
[307b.3]ལྷན་ཅིག་མི་གནས་པའོ། །དེ་ལ་རེ་ཞིག་ཕྱིན་ཅི་ལོག་ཅེས་པ་ལ་སོགས་པ། སོགས་པའི་སྒྲས་ནི་དེའི་རྣམ་པ་ཅན་གཞན་ཡང་གཟུང་ངོ་། །དེ་ལ་གཞི་རྣམས་ཞེས་པ་ཆོས་མཐུན་པ་མཚུངས་པ་ལ་སོགས་པ་རྣམས་ཀྱིའོ། །མ་ངེས་པ་ཆོས་མཐུན་པ་ཉིད་ལ་སོགས་པས་ཞེས་པ་ཆོས་མཐུན་པ་ཉིད་དང་ཆོས་མི་
[307b.4]མཐུན་པ་ཉིད་མཚུངས་པ་དག་གི་ལུས་ཅན་མ་ཡིན་པ་ཉིད་ཀྱིས་དང་། རྣམ་པར་རྟོག་པ་དང་ཁྱད་པར་མེད་པ་མཚུངས་པ་དག་གི་ཚོས་བྱ་མ་ཡིན་པ་དང་། མིག་གིས་གཟུང་བྱ་མ་ཡིན་པ་ཉིད་ལ་སོགས་པས་སོ། །ངེས་པ་ལ་ནི་ཞེས་པ་ལ་སོགས་པས་ཐ་མི་དད་པ་སྟོན་ཏོ། །ལྷན་ཅིག་མི་
[307b.5]གནས་པའི་ཕྱིར་ཞེས་པ། ངེས་པ་དང་མ་ངེས་པ་དག་ལྷན་ཅིག་གནས་པ་ཡོད་པ་ནི་མ་ཡིན་པས་ཏེ། དེ་ལྟར་ནི་ངེས་པ་ཡོད་ན་མ་ངེས་པ་ལྡོག་གོ། །རྣམ་པར་རྟོག་པ་མཚུངས་པ་ལ་ནི་འདི་མི་རིགས་ཏེ་ཞེས་པ། རྩོད་པ་སྒྲུབ་པར་ནི་ཚོས་པར་བྱ་བ་ཉིད་མ་ངེས་པ་ཉིད་དུ་བསྟན་པའི་
[307b.6]ཆེད་དུ་བཤད་དེ། མི་རྟག་པ་ཉིད་མེད་པར་བརྩལ་མ་ཐག་ཏུ་བྱུང་བ་ཉིད་མཐོང་བ་མེད་དེ། མེ་དང་དུ་བ་བཞིན་ནོ། །རྗེས་སུ་དཔག་པའི་ཆེད་དུ་དེ་བཤད་དོ། །ཚོས་བྱ་ཉིད་ལ་སོགས་པ་མེད་པར་རླུང་གཡབ་ཀྱི་རླུང་ལ་སོགས་པ་རྣམས་ལ་མི་རྟག་པ་ཉིད་མཐོང་བ་མེད་པ་ནི་མ་ཡིན་ཏེ།
[307b.7]དེའི་ཕྱིར་འདི་ཕྱིན་ཅི་ལོག་གོ་ཞེས་སོ། །དེ་འདི་མི་རིགས་སོ། །ཅི་ལྟར་མི་རིགས་ཤེ་ན་གསུངས་པ། ཕ་རོལ་པོས་ནི་ཞེས་པ་ལ་སོགས་པ། ཚོས་བྱ་ཉིད་ལ་སོགས་པས་བུམ་པ་ལ་མི་རྟག་པ་ཉིད་དུ་བརྗོད་པ་མ་ཡིན་ཞེས་སྦྲེལ་ལོ། །ཅིའི་ཕྱིར་བརྗོད་པ་མ་ཡིན་ཞེ་ན། བུམ་པ་ལ་མི་རྟག་པ་ཉིད་གཉིས་ཀ་
[308a]
[308a.1]ལ་གྲུབ་ཟིན་པ་ཉིད་ཀྱི་ཕྱིར་རོ། །དེ་ལ་ཞེས་པ་ཚོས་པར་བྱ་བ་མ་ཡིན་པ་ཉིད་ལ་སོགས་པ་རྟག་པ་ཉིད་སྒྲུབ་པར་བྱེད་པ་ལའོ། །དེ་ལྟར་གཞན་གྱི་ཕྱོགས་ལ་མ་ངེས་པ་ཉིད་དུ་བཤད་པར་འགྱུར་རོ་ཞེས་པ་མི་མཐུན་པའི་ཕྱོགས་ལ་ཡང་ཚོས་བྱ་མ་ཡིན་པ་ཉིད་ལ་སོགས་པ་མཐོང་བའི་ཕྱིར་རོ། །
[308a.2]སྔ་མ་ལ་ནི་མ་ཁྱབ་པ་ཉིད་ཅེས་པ། རེ་ཞིག་ཕ་རོལ་པོས་ཚོས་བྱ་ཉིད་ལ་སོགས་པས་མི་རྟག་པ་ཉིད་དུ་བརྗོད་པ་མ་ཡིན་ཞིང་། དེ་ལྟར་བརྗོད་པ་ཡོད་ན་ཡང་མ་ངེས་པ་ཉིད་དུ་འདི་ལྟར་བསྟན་པར་འགྱུར་བ་མ་ཡིན་གྱི། འོ་ན་ཅི་ཞེ་ན། གཏན་ཚིགས་བསྒྲུབ་བྱ་ལ་མ་ཁྱབ་པ་ཉིད་དུའོ། །མ་ཁྱབ་པ་
[308a.3]གོ་བར་བྱེད་པ་མ་ཡིན་པ་ཡང་མ་ཡིན་ཏེ། ཇི་ལྟར་བརྩལ་མ་ཐག་ཏུ་བྱུང་བ་ཉིད་མི་རྟག་པ་ཉིད་ལ་བཞིན་ནོ། །ཕ་རོལ་པོས་ཤེས་པ་ལ་སོགས་པ་སྟེ། རྩོད་པ་སྒྲུབ་པར་བཤད་པ་མཉན་པར་བྱ་བ་ཉིད་ཀྱང་སྒྲ་དང་རྩོལ་མ་ཐག་ཏུ་བྱུང་བ་ཉིད་ཀྱིའང་ཡོད་པ་ལ་མཐོང་སྟེ། དེ་ལས་ཐལ་བར་འགྱུར་ཡང་འདི་
[308a.4]ལས་མཉན་པར་བྱ་བ་མ་ཡིན་པ་ཉིད་རྗེས་སུ་དཔག་པ་ནི་མཐོང་བའི་ནུས་པ་ལས་ལྡོག་གོ། །རྩོལ་མ་ཐག་ཏུ་བྱུང་བ་ཉིད་ཀྱིའང་ཡོད་པ་འདི་རྟག་པ་ཉིད་དུ་མཐོང་ཞིང་། གང་ནུས་པ་ལས་མི་རྟག་པ་ཉིད་རྗེས་སུ་དཔག་པ་ལྡོག་པ་ནི་མ་ཡིན་ནོ། །དེའི་ཕྱིར་འདི་ཕྱིན་ཅི་ལོག་ཁོ་ནའོ་ཞེས་སོ། །འདི་ཡང་མི་
[308a.5]རིགས་ཏེ། གང་གི་ཕྱིར་ཕ་རོལ་པོས་སྒྲ་ལ་རྩོལ་མ་ཐག་ཏུ་བྱུང་བ་ཉིད་ཀྱི་ཕྱིར་མཉན་པར་བྱ་བ་མ་ཡིན་པ་ཉིད་རྗེས་སུ་དཔག་པར་བྱས་པ་མ་ཡིན་གྱི། འོ་ན་ཅི་ཞེ་ན། མཉན་པར་བྱ་བ་ཉིད་ཀྱི་ཕྱིར་ན། བརྩལ་མ་ཐག་ཏུ་བྱུང་བ་ཉིད་ཡོད་ན་ཡང་སྒྲ་ཁོ་ན་རྟག་པར་འགྱུར་རོ་ཞེས་པས་ལན་ཕྱོགས་
[308a.6]སྔ་མ་དང་འབྲེལ་པ་མ་ཡིན་ཏེ། །འདི་བདེན་པར་ཞེས་པ་རྩོད་པ་སྒྲུབ་པར་བྱེད་པའོ། །འདིར་མ་ངེས་པ་ཉིད་རྣམ་པ་གཉིས་སུ་རྩོད་དོ། །ཆོས་མཐུན་པས་ནི་མི་མཐུན་ཕྱོགས་ལ་ཡང་གཏན་ཚིགས་ཡོད་པ་ཉིད་དུ་རབ་ཏུ་བསྟན་པ་ལས་སམ། ཆོས་མི་མཐུན་པ་ཉིད་ཀྱི་བསྒྲུབ་བྱ་ལྡོག་པ་ན་
[308a.7]གཏན་ཚིགས་ལྡོག་པ་མེད་པར་བསྟན་པ་ལས་སོ། །དེ་ལ་གལ་ཏེ་ངེད་ཀྱིས་ཚོས་བྱ་ཉིད་ནི་ཆོས་མཐུན་པ་ཉིད་ཀྱིས་མ་ངེས་པ་ཉིད་དུ་བརྗོད་ན་དེའི་ཚེ་འདི་བདེན་མོད། ཚོས་བྱ་ཉིད་ལ་སོགས་པ་མེད་པར་མི་མཐོང་བ་ནི་མ་ཡིན་ཞེས་པ་ལ་སོགས་པའི་ལན་ཕྱོགས་སྔ་མ་དང་འབྲེལ་པ་མ་ཡིན་ནོ། །ཆོས་མཐུན་པ་ཉིད་ཀྱིས་
[308b]
[308b.1]བརྗོད་པ་ནི་མ་ཡིན་གྱི་འོ་ན་ཅི་ཞེ་ན། ཆོས་མི་མཐུན་པ་ཉིད་ཀྱིས་ཏེ། ཕ་རོལ་པོས་ཚོས་བྱ་མིན་པ་ཉིད་ལ་སོགས་པས་སྒྲ་རྟག་པ་ཉིད་དུ་བརྗོད་དེ། དེ་ལ་བསྒྲུབ་བྱ་མེད་པ་ལ་གཏན་ཚིགས་མེད་པ་ཉེ་བར་བསྟན་པར་བྱ་ན། ཚོས་པར་བྱ་བ་མ་ཡིན་པ་ཉིད་བསྒྲུབ་བྱ་རྟག་པ་ཉིད་མེད་པ་ལ་མེད་པར་ཡང་མ་ཡིན་ཏེ། དེའི་
[308b.2]ཕྱིར་མ་ངེས་པའོ་ཞེ་ན། དེ་མི་རིགས་ཏེ། དེ་འདི་སྐད་དུ་ཚོས་བྱ་ཉིད་ལ་སོགས་པ་མེད་པར་རླུང་གཡོབ་ཀྱི་རླུང་ལ་སོགས་པ་རྣམས་ལ་མི་རྟག་པ་ཉིད་མ་མཐོང་བ་ནི་མ་ཡིན་ཞེས་པས་ཚོས་བྱ་མིན་པ་ཉིད་དང་། མི་རྟག་པ་ཉིད་དག་རླུང་གཡོབ་ཀྱི་རླུང་ལ་སོགས་པ་རྣམས་ལ་ལན་ཅིག་འབྱུང་བ་མཐོང་བའི་ཕྱིར་
[308b.3]བསྒྲུབ་པར་བྱ་བ་ལྡོག་པ་ན། གཏན་ཚིགས་ལྡོག་པ་མ་ཡིན་ནོ་ཞེས་པའི་དོན་ཏོ། །འདི་ལ་སློབ་དཔོན་གྱིས་གསུངས་པ། འདི་ཡོད་དོ་ཞེས་པ་ལ་སོགས་པའོ། །རྗེས་སུ་འགྲོ་བ་ནི་ཁྱབ་པའོ། །དེའི་བཟློག་པ་ནི་ཆོས་མཐུན་པ་ཉིད་ཀྱིས་གཏན་ཚིགས་ཀྱི་རྗེས་སུ་བསྒྲུབ་པར་བྱ་བས་འགྲོ་བ་དང་ཆོས་
[308b.4]མི་མཐུན་པ་ཉིད་ཀྱིས་ནི་བསྒྲུབ་བྱ་མེད་ན་གཏན་ཚིགས་མེད་པའོ། །རྗེས་སུ་འགྲོ་བའི་རྣམ་གྲངས་ཀྱིས་གང་གི་དཔེ་གཉིས་པོ་བརྗོད་པར་བྱ་བ་དེ་ཁོ་ནའི་སོ་སོར་སྒྲུབ་པ་འདི་རིགས་ན། དེ་ལྟར་ནི་རྩོད་པ་སྒྲུབ་པར་མ་ཡིན་ཏེ་ཞེས་པ། དེར་རྣམ་པ་འདིས་དཔེ་གཉིས་བརྗོད་པར་བྱ་བ་མ་
[308b.5]ཡིན་ཏེ། དེ་ལྟར་མཚན་ཉིད་མ་བརྗོད་པའི་ཕྱིར་རོ། །དེ་དག་གིའམ་དེའི་མི་མཐུན་པའི་ཕྱོགས་དག་གི་འབྲེལ་པ་སྟོན་པ་དཔེའི་ཞེས་པའི་ཚིག་ལས་ཏེ། མཚན་ཉིད་ཇི་ལྟ་བ་བཞིན་ཡང་སྦྱོར་བའི་ཕྱིར་རོ། །གང་བཤད་པ་ཞེས་པ། དེར་ནི་འདི་བཤད་དེ། གང་ཆོས་མཐུན་པ་
[308b.6]ཉིད་དང་ཆོས་མི་མཐུན་པ་ཉིད་དག་ལས། རྟག་པ་ཉིད་དུ་རྗེས་སུ་དཔོག་པ་ལ། མཉན་པར་བྱ་བ་ཉིད་འགའ་ཞིག་རྟག་པ་ཉིད་དུ་དང་མཉན་བྱ་མ་ཡིན་པ་ཉིད་ཀྱང་ངེས་པར་མི་རྟག་པ་ཉིད་དུ་མཐོང་བ་ནི་མ་ཡིན་ནོ། །དེའི་ཕྱིར་འདི་ཕྱིན་ཅི་ལོག་པའོ་ཞེས་སོ། །དེ་མི་རིགས་པ་
[308b.7]ཉིད་དུ་སྟོན་པ་གསུངས་པ། དེ་འདིར་ཞེས་པ་ལ་སོགས་པའོ། །སྒྲ་རྟག་སྟེ་མཉན་པར་བྱ་བ་ཉིད་ཀྱི་ཕྱིར། མཉན་བྱ་མིན་པ་མི་རྟག་པར་མཐོང་སྟེ། དཔེར་ན་བུམ་པ་བཞིན་ཞེས་ཆོས་མི་མཐུན་པ་ཉིད་ཀྱི་དཔེ་འདི་ཡོད་པ་ཁོ་ནའོ། །དེ་ལས་ཀྱང་རྟག་པ་ཉིད་གྲུབ་པར་
[309a]
[309a.1]འགྱུར་རོ། །འདི་འདྲ་བས་ནི་ཞེས་པ། འདི་འདྲ་བ་ནི་གང་གིས་གཏན་ཚིགས་ཀྱི་མི་མཐུན་ཕྱོགས་བསྒྲུབ་བྱའི་མི་མཐུན་ཕྱོགས་ཁོ་ན་ལ་ཡོད་པར་བསྟན་པར་བྱ་བ་ཁྱོད་ཀྱི་ཆོས་མི་མཐུན་པ་ཉིད་ཀྱི་སྦྱོར་བར་འདོད་པའོ། །དེ་འདྲ་བས་ནི་གློག་རྟག་སྟེ། རྩོལ་
[309a.2]མ་ཐག་ཏུ་མ་བྱུང་བ་ཉིད་ཀྱི་ཕྱིར་རོ་ཞེས་པ་འདི་སྒྲུབ་བྱེད་དུ་སྐྱོན་མེད་པར་འགྱུར་རོ། །ཅི་ལྟར་ཞེ་ན་གསུངས་པ། རྩོལ་མ་ཐག་ཏུ་མ་བྱུང་བ་ནི་མཐོང་ཞེས་པ་ལ་སོགས་པའོ། །གཏན་ཚིགས་མེད་པ་ཁོ་ན་ཕ་རོལ་པོས་བརྩད་པ་ཞེས་པ་སྐྱེ་བ་ལས་སྔར་མེད་པ་སྒྲུབ་བྱེད་ཉིད་དུ་སྒྲོ་འདོགས་པའི་
[309a.3]ཕྱིར་གཏན་ཚིགས་དང་བསྒྲུབ་བྱ་དག་ཁྱད་པར་མེད་པ་ཉིད་དུ་བརྗོད་དེ། ཕ་རོལ་པོས་གཉིས་ཀ་དག་གཏན་ནས་མེད་པ་ཉིད་མ་ཡིན་ཞེས་སོ། །དེ་ལྟར་ན་ཡང་གཏན་ཚིགས་མེད་པ་ཁོ་ནར་བརྩད་པར་འགྱུར་ཏེ། བསྒྲུབ་བྱ་ལས་ལོགས་པར་མེད་པ་ཉིད་ཀྱི་ཕྱིར་རོ། །དེའི་ཕྱིར་ཕྱིན་ཅི་ལོག་པ་ཉིད་
[309a.4]མེད་པའི་ཕྱིར་སྐྱོན་གཞན་དུ་བརྗོད་པར་བྱ་བའི་ཕྱིན་ཅི་ལོག་ཉིད་མ་ཡིན་ནོ། །དེ་བཞིན་དུ་ཕྲད་པ་དང་མ་ཕྲད་པ་གཏན་ཚིགས་མ་ཡིན་པར་མཚུངས་པ་དག་ལ་ཕྱིན་ཅི་ལོག་མེད་པ་ཉིད་ཀྱི་ཕྱིར་ཕྱིན་ཅི་ལོག་ཉིད་ལས་སྐྱོན་གཞན་དུ་བརྗོད་པར་བྱ་སྟེ། གཏན་ཚིགས་ཐམས་ཅད་ལ་སྐུར་པ་འདེབས་
[309a.5]པའི་ཕྱིར་རོ། །མེད་པ་ཉིད་དུ་རྩོད་པས་ཕྱིན་ཅི་ལོག་ཏུ་མངོན་པར་བརྗོད་པར་འགྱུར་བ་ནི་མ་ཡིན་པས་སོ། །དེ་ལྟར་འགྱུར་མོད་ཀྱི་སྔ་མའི་ཕྱོགས་སྨྲ་བས་ཤེས་པར་བྱེད་པ་གཏན་ཚིགས་སུ་བརྗོད་ཅིང་། ཕ་རོལ་གྱི་བྱེད་པ་པོར་སྒྲོ་བཏགས་ནས་སུན་འབྱིན་ཏོ། །དེའི་ཕྱིར་ཕྱིན་ཅི་ལོག་
[309a.6]ཏུ་བརྗོད་དེ། ཤེས་བྱེད་ཀྱི་རྒྱུ་ལས་བཟློག་པར་རྩོད་པའི་ཕྱིར་ཞེ་ན། དེའི་ཕྱིར་གསུངས་པ། འདི་ཡང་མ་ཡིན་ཞེས་པ་ལ་སོགས་པ་སྟེ། འདི་ཡང་ལྟག་ཆོད་སྨྲ་བ་པོས། དམ་བཅའི་དོན་སྐྱེད་པ་ལ་བྱེད་པ་པོའི་རྒྱུ་ལ་སྐྱོན་སྨྲས་པ་མ་ཡིན་གྱི། འོ་ན་ཅི་ཞེ་ན། ཤེས་པར་བྱེད་པའི་རྒྱུ་
[309a.7]ཁོ་ན་ལའོ། །ཅི་ལས་ཤེ་ན། གང་གི་ཕྱིར་དེ་ལ་ཡང་སྟེ་ཤེས་པར་བྱེད་པ་ལ་ཕྲད་པར་བྱ་བ་མ་ཕྲད་པ་ན་སྐྱོན་འབྲེལ་པ་ཁོ་ན་སྟེ། གལ་ཏེ་གཏན་ཚིགས་འདི་ཕྲད་ནས་སྒྲུབ་པར་བྱེད་པ་ན། བསྒྲུབ་བྱ་དང་ཁྱད་པར་མེད་པར་འགྱུར་རོ་ཞེས་པ་ལ་སོགས་པས་གང་བཤད་པའོ། །དམིགས་པ་མཚུངས་
[309b]
[309b.1]པ་ཡང་ཞེས་པ་ལ་སོགས་པ། ཕ་རོལ་པོས་འདི་མི་རྟག་པ་ཉིད་ལ་གཏན་ཚིགས་མ་ཡིན་ཏེ། གློག་པ་ལ་སོགས་པ་མངོན་སུམ་ཉིད་ལ་སོགས་པ་གཞན་ལས་མི་རྟག་པར་འགྲུབ་པའི་ཕྱིར་ཞེས་བརྗོད་པ་ན། རྩོད་པ་བསྒྲུབ་པར་བཤད་པ། འདི་སྐད་རྩོལ་མ་ཐག་ཏུ་བྱུང་བ་ཉིད་ཁོ་ནས་མི་རྟག་པ་
[309b.2]ཉིད་འགྲུབ་ཀྱི་རྣམ་པ་གཞན་དུ་མ་ཡིན་ཞེས་ངེད་མི་སྨྲའི། དེ་གལ་ཏེ་ཤེས་པར་བྱེད་པ་གཞན་ཡང་ཡོད་ན་དགའ་བར་བྱེད་དོ་ཞེས་པས་འདི་ཕྱིན་ཅི་ལོག་ཡིན་ཏེ། བརྩལ་མ་ཐག་ཏུ་བྱུང་བ་ཉིད་ཀྱི་ཕྱིར་མི་རྟག་པ་ཁོ་ནའོ་ཞེས་བརྗོད་པར་འདོད་པ་ན། བརྩལ་མ་ཐག་ཏུ་བྱུང་བ་ཉིད་ཁོ་ནའི་ཕྱིར་མི་རྟག་གོ་ཞེས་སྒྲོ་
[309b.3]བཏགས་པའི་ཕྱིར་ཞེའོ། །འདི་ལས་གསུངས་པ། འདི་ཡང་ཕྱིན་ཅི་ལོག་མ་ཡིན་གྱི། ཅིའི་ཕྱིར་ཞེ་ན་གསུངས་པ། ཕ་རོལ་པོས་འདི་ལྟར་ཞེས་པ་ལ་སོགས་པའོ། །གང་གི་ཕྱིར་ཕ་རོལ་པོས་འདི་ལྟར་མི་རྟག་པ་ཉིད་ལ་གཏན་ཚིགས་གཞན་ཡང་ཡོད་དོ་ཞེས་བརྩད་པ་མ་ཡིན་གྱི། འོ་ན་ཅི་ཞེ་ན། འཁྲུལ་པར་བསྟན་
[309b.4]པས་གཏན་ཚིགས་མ་ཡིན་པ་ཉིད་དུ་བརྗོད་དེ། འདི་མེད་ན་ཡང་བསྒྲུབ་བྱ་འགྲུབ་པའི་ཕྱིར་འདི་གཏན་ཚིགས་མ་ཡིན་ཞེས་སོ། །དེ་འཁྲུལ་པར་སྟོན་པ་གསུངས་པ། དེ་དེའི་མ་ཡིན་ཞེས་པ་ལ་སོགས་པའོ། །དེ་ལྟར་ན་འདི་ལན་དུ་འགྱུར་རོ་ཞེས་པ་གལ་ཏེ་དེ་མ་ཐག་ཏུ་བརྗོད་པའི་རྣམ་པས་གཏན་ཚིགས་མ་ཡིན་
[309b.5]པར་བརྗོད་ནའོ། །གཞན་དུ་ན་སྒྲ་མི་རྟག་སྟེ་བརྩལ་མ་ཐག་ཏུ་བྱུང་བ་ཉིད་ཀྱི་ཕྱིར་ཞེས་པའི་ཕྱོགས་སྔ་མ་འདི་ལས་ཕྱོགས་གཞན་བརྗོད་པར་འགྱུར་ཏེ། གློག་ལ་སོགས་པ་རྣམས་མི་རྟག་སྟེ་མིག་གིས་གཟུང་བྱ་ཉིད་ཀྱི་ཕྱིར་ཞེས་སོ། །དེའི་ཕྱིར་སུན་འབྱིན་པར་སྣང་བ་མེད་པའི་
[309b.6]ཕྱིར་ལྟག་ཆོད་ཀྱི་ལན་དུ་མི་འགྱུར་རོ། །གཉིས་པ་ལ་ཡང་གཏན་ཚིགས་ཕྱིན་ཅི་ལོག་མ་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་དེ་ལ་གཏན་ཚིགས་མ་ཁྱབ་པ་ཉིད་ཁོ་ནར་བརྩད་ཀྱི། ཕྱིན་ཅི་ལོག་ཅུང་ཟད་བཟློག་པའི་གཏན་ཚིགས་གཞན་ཉེ་བར་བཀོད་པ་ནི་མ་ཡིན་ནོ། །ཐེ་ཚོམ་
[309b.7]མཚུངས་པ་ཡང་གང་གིས་གཏན་ཚིགས་ཕྱིན་ཅི་ལོག་ཉིད་ཀྱི་སྐྱོན་དུ་འགྱུར་བ་ཕ་རོལ་པོས་གཏན་ཚིགས་ཕྱིན་ཅི་ལོག་ཏུ་བརྗོད་པ་མ་ཡིན་གྱི། འོ་ན་ཅི་ཞེ་ན་བསྒྲུབ་བྱ་དང་གཏན་ཚིགས་སྒྲོ་བཏགས་པ་སྟེ། སྐྱེ་བ་ཅན་ནི་བསྒྲུབ་བྱ་ཉིད་དུ་སྒྲོ་བཏགས་ནས་དང་བརྩལ་མ་ཐག་ཏུ་བྱུང་བ་
[310a]
[310a.1]ཡང་གཏན་ཚིགས་ཉིད་དུ་སྟེ། དགྲ་ཟླར་གནས་པར་བྱས་པའོ། །དེ་ལྟར་གྱུར་ན་ཅི་ལས་གཏན་ཚིགས་ཕྱིན་ཅི་ལོག་པ་ཉིད་དུ་འགྱུར་བར་འདོད། དམ་བཅའ་བ་ཕྱིན་ཅི་ལོག་ཏུ་བརྗོད་པའི་ཕྱིར། ལན་ཕྱིན་ཅི་ལོག་གོ། །དེ་ལྟར་ནི་སྒྲ་མི་རྟག་གོ་ཞེས་དམ་བཅའ་བ་ན། ཕ་རོལ་
[310a.2]པོས་བརྗོད་པ། བསྐྱེད་པར་བྱ་བ་ནི་རྟག་གོ་ཞེས་པ་དེའི་ཕྱིར་གསུངས་པ། དམ་བཅའ་བ་ཕྱིན་ཅི་ལོག་པས་ཀྱང་ཞེས་པ་ལ་སོགས་པའོ། །གལ་ཏེ་དམ་བཅའ་བ་བཟློག་པས་བརྗོད་པ་ན་ཕྱིན་ཅི་ལོག་པ་ཉིད་དུ་རྟོག་ན། དེ་ལྟར་གྱུར་ན་ཐམས་ཅད་ཕྱིན་ཅི་ལོག་ཉིད་དུ་ཐལ་བར་འགྱུར་ཞིང་། དོན་གྱིས་གོ་བ་
[310a.3]མཚུངས་པ་ལ་སོགས་པ་རྣམས་ལ་ཡང་ཐལ་བར་འགྱུར་ཏེ། དམ་བཅའ་ཕྱིན་ཅི་ལོག་པ་ཁོ་ནས་དགྲ་ཟླར་གནས་པར་རོ། །དེ་ལས་ཕྱིན་ཅི་ལོག་ཉིད་ཙམ་སྐྱོན་དུ་འགྱུར་རོ། །མ་བརྗོད་པ་མཚུངས་པ་ལ་ཡང་ཞེས་པ་ལ་སོགས་པ་ལྟག་ཆོད་སྨྲ་བ་པོས་བརྗོད་པ་ལས་སྔར་གཏན་ཚིགས་
[310a.4]མེད་པས་བསྒྲུབ་བྱ་མེད་པར་ཐལ་འགྱུར་བྱས་ཏེ། གལ་ཏེ་བརྩལ་མ་ཐག་ཏུ་བྱུང་བ་ཉིད་ཀྱི་ཕྱིར་ཞེས་པ་གཏན་ཚིགས་འདི་ལས་སྒྲ་མི་རྟག་པ་ཡིན་ན། བརྗོད་པ་ལས་སྔར་གཏན་ཚིགས་མེད་པའི་ཕྱིར་མི་རྟག་པ་མ་ཡིན་ནོ་ཞེས་འཐོབ་སྟེ། དེའི་ཕྱིར་སྔར་རྟག་པར་ཡོད་པ་ཅི་ལྟར་མི་རྟག་པར་བྱེད་ཅེས་སོ། །འདི་
[310a.5]ལ་རྩོད་སྒྲུབ་བྱེད་པས་སྨྲས་པ། འདི་ནི་ཕྱིན་ཅི་ལོག་པ་སྟེ། གང་གི་ཕྱིར་ཤེས་པར་བྱེད་པ་ཞེས་བྱས་ནས་གཏན་ཚིགས་སུ་བརྗོད་ཀྱི། འཇིག་པར་བྱེད་པའོ་ཞེས་ནི་མ་ཡིན་ཞིང་། ལྟག་ཆོད་སྨྲ་བ་པོས་ནི་འཇིག་བྱེད་དུ་བྱས་ནས་སུན་འབྱིན་པས་སོ་ཞེས་སོ། །འདི་ལ་གསུངས་པ། འདི་ཡང་གཏན་ཚིགས་
[310a.6]ཕྱིན་ཅི་ལོག་མ་ཡིན་ཏེ་ཞེས་སོ། །ཅིའི་ཕྱིར་ཞེ་ན་གསུངས་པ། ཕ་རོལ་པོས་ཞེས་པ་ལ་སོགས་པ་སྟེ། གང་གི་ཕྱིར་ལྟག་ཆོད་སྨྲ་བ་པོས་འཇིག་པར་བྱེད་པ་སྒྲ་ལ་གཏན་ཚིགས་སོ་ཞེས་བསམས་ནས་ཚིག་ལས་སྔར་དེ་མེད་པ་ཉིད་བཤད་པ་མ་ཡིན་ནོ། །འདི་ཅི་ལྟར་རྟོགས་པར་བྱ་ཞེ་ན་གསུངས་
[310a.7]པ། མ་གྱུར་ཅིག་ཅེས་པ་ལ་སོགས་པ་སྟེ། ལྟག་ཆོད་སྨྲ་བ་པོས་ནི་གཏན་ཚིགས་བརྗོད་པའི་དུས་སུ་ཡང་། སྒྲ་མི་རྟག་པ་ཉིད་དུ་འདོད་པ་མ་ཡིན་པ་ཁོ་ན་སྟེ། གལ་ཏེ་འཇིག་པར་བྱེད་པ་གཏན་ཚིགས་སུ་ཡོངས་སུ་བརྟགས་ནས་དེ་བརྗོད་པ་ལས་སྔར་མེད་པ་ཉིད་དུ་སྨྲས་པར་འགྱུར་ན་དེ་ལྟར་
[310b]
[310b.1]ན་བརྗོད་པའི་དུས་སུ་གཏན་ཚིགས་དེ་ཡོད་དོ་ཞེས་སྒྲ་མི་རྟག་པར་འགྱུར་རོ་ཞེས་པ་འདི་ཕྱིན་ཅི་ལོག་མ་ཡིན་ནོ། །འབྲས་བུ་མཚུངས་པ་ཡང་ཞེས་པ་ལ་སོགས་པ་སྟེ། གང་སྤྱིའི་རྣམ་པ་དེས་གང་བྱས་པ་དེ་མི་རྟག་གོ་ཞེས་བསྒྲུབ་པར་བྱ་བ་ལ། བུམ་པའི་འབྲས་བུ་ཉིད་ལ་སོགས་པའི་ཁྱད་པར་གྱི་
[310b.2]དོད་ཟླར་གནས་པར་བྱེད་པའི་ཕྱིར་འདི་ཕྱིན་ཅི་ལོག་པའོ་ཞེས་རྩོད་སྒྲུབ་བྱེད་པས་སེམས་སོ། །དེ་ཡང་མི་རིགས་ཏེ། གང་གི་ཕྱིར་གཏན་ཚིགས་ཕྱིན་ཅི་ལོག་ཏུ་བརྗོད་པ་མ་ཡིན་གྱི། འོ་ན་ཅི་ཞེ་ན། གཏན་ཚིགས་འབྲས་བུའི་སྤྱི་དེ་ཁོ་ནའི་ནང་དུ་འདུས་པའི་ཁྱད་པར་གང་ཡིན་པ་དེས་སོ། །དེའི་ནང་དུ་
[310b.3]འདུས་པ་ཁོ་ན་ཕྱིན་ཅི་ལོག་ཏུ་འགྱུར་བ་ཡང་མ་ཡིན་ནོ། །ཐལ་འགྱུར་དང་དོན་གྱིས་གོ་བ་མཚུངས་པ་ལ་སོགས་པ་ནི་ཡང་དག་པ་མ་ཡིན་པའོ་ཞེས་པ་ལ་སོགས་པའི་སྒྲས་དེའི་རིགས་ཅན་གཞན་བསྡུའོ། །སྒྲ་མི་རྟག་སྟེ་རྒྱུ་མཚན་ཅན་ཉིད་ཀྱི་ཕྱིར་བུམ་པ་བཞིན་ཞེས་བྱས་པ་ལ། ལྟག་
[310b.4]ཆོད་སྨྲ་བ་པོས་སྨྲས་པ། རེ་ཞིག་བུམ་པ་ཁོ་ན་མི་རྟག་ཅེས་པ་འདི་ལ་གཏན་ཚིགས་ཅི་ཞིག་ཅེས་པ་འདི་ལ་རྩོད་སྒྲུབ་བྱེད་པས་བཤད་པ་འདི་ནི་ཡང་དག་པ་མ་ཡིན་པའོ་ཞེས་སོ། །ཅིའི་ཕྱིར་ན་མཐོང་བའི་དོན་ཡང་གཏན་ཚིགས་ཀྱི་བསྒྲུབ་བྱར་བརྗོད་པས་ནི་མ་ཡིན་ཏེ། བདག་ཉིད་ཀྱིས་མཐོང་བའི་
[310b.5]ཡང་སྟེ། རྒྱུ་མཚན་ཅན་གྱི་བུམ་པ་ནི་ཤིན་ཏུ་འབྱུང་བ་མ་ཡིན་ནོ་ཞེས་སོ། །འདི་ལ་ཁྱད་པར་མེད་པ་སྟོན་པ་གསུངས་པ། འདི་ལ་ཡང་ཕྱིན་ཅི་ལོག་པ་ཞེས་པ་ལ་སོགས་པའོ། །དེ་ལ་ཕྱིན་ཅི་ལོག་ཏུ་བརྗོད་པར་ནུས་པ་ཡིན་ཏེ། མཚན་ཉིད་དང་བྲལ་བའི་ཕྱིར་རོ། །འགལ་བ་ཡང་སྟེ་ལྷན་
[310b.6]ཅིག་མི་གནས་པ་ཉིད་ཀྱི་ཕྱིར་རོ། །དོན་གྱིས་གོ་བ་མཚུངས་པ་ཡང་དེ་བཞིན་ཞེས་པ། བདག་མེད་དེ་མ་དམིགས་པའི་ཕྱིར་མོ་གཤམ་གྱི་བུ་བཞིན་ཞེས་བྱས་པ་ལ། ལྟག་ཆོད་སྨྲ་བ་པོས་སྨྲས་པ། དོན་གྱིས་ཉེ་བར་དམིགས་པ་རྣམས་ཡོད་པ་ཉིད་དུ་འཐོབ་ཅིང་། ཉེ་བར་དམིགས་
[310b.7]བཞིན་པ་ཡིན་ཡང་མགལ་མེའི་འཁོར་ལོ་ལ་སོགས་པ་ཅུང་ཟད་ནི་མེད་པ་ཁོ་ནའོ་ཞེས་པའོ། །འདི་ཡང་དག་པ་མ་ཡིན་པའོ་ཞེས་རྩོད་སྒྲུབ་སྟེ། ཉེ་བར་དམིགས་པ་ནི་ཡོད་པ་ཉིད་དུ་རྟོགས་སོ་ཞེས་སྒྲོ་བཏགས་པའི་ཕྱིར་རོ་ཞེས་སོ། །འདི་ལ་འདྲེས་པར་སྟོན་པ་གསུངས་པ། ཇི་ལྟར་ཞེས་
[311a]
[311a.1]པ་ལ་སོགས་པའོ། །མེད་པ་རྟག་གོ་ཞེས་པ་འདི་ནི་འགལ་བ་སྟེ་ཞེས་པ་མེད་པ་ཉིད་དང་རྟག་པ་ཉིད་དག་གཅིག་ཏུ་མི་གནས་པའི་ཕྱིར་རོ། །འདི་ལ་ཁྱད་པར་མེད་པ་གསུངས་པ། ཕྱིན་ཅི་ལོག་པ་ཡང་འདི་སྟེ་ཡང་དག་པ་མ་ཡིན་པ་ཡང་ངོ་ཞེས་པའོ། །
[311a.2]ཅི་ལྟར་ཞེ་ན་གསུངས་པ། ཡོད་པའི་དོན་རྟག་པ་ཉིད་ཀྱི་ཕྱིར་ཞེས་པ་ལ་སོགས་པ་སྟེ། གང་གི་ཕྱིར་ཡོད་པ་ཁོ་ནའི་དོན་རྟག་པ་ཉིད། དེའི་ཕྱིར་མེད་པ་ལ་རྟག་པ་ཉིད་ནི་ཕྱིན་ཅི་ལོག་པ་སྟེ། མཚན་ཉིད་དང་བྲལ་བ་ཉིད་ཀྱི་ཕྱིར་དང་། གང་ཕྱིར་མེད་པ་རྟག་པ་ཉིད་ནི་མི་བདེན་པ་སྟེ།
[311a.3]དེའི་ཕྱིར་ཡང་དག་པ་མ་ཡིན་པའོ། །རྟག་པ་མཚུངས་པ་ལ་ཡང་འགལ་བར་བཤད་དོ། །ཅི་ལྟར་གྱུར་ཀྱང་མི་རྟག་པ་ཁོ་ན་ཡིན་པ་དེ་རྟག་པར་འགྲུབ་པར་འགྱུར་ཞེས་སོ། །འདི་ལ་གསུངས་པ། རྟག་པ་མཚུངས་པ་ཡང་ཞེས་པ་ལ་སོགས་པའོ། །དེ་ལ་ཕྱིན་ཅི་ལོག་པ་ཉིད་དེ། སྔ་མ་བཞིན་དུ་མེད་པ་
[311a.4]ཉིད་མེད་ན་རྟག་པ་ཉིད་མེད་པ་ཉིད་ཀྱི་ཕྱིར་རོ། །དེའི་ཕྱིར་ཞེས་པ་ནི་གང་གི་ཕྱིར་དེ་ལྟར་ཐམས་ཅད་ལ་སྐྱོན་ཐམས་ཅད་སྦྱོར་ཏེ། དེའི་ཕྱིར་ལྟག་ཆོད་རྣམས་སུ་མ་འདྲེས་པས་ཏེ། ཡུལ་རྣམ་པར་དབྱེ་བས་ཕྱིན་ཅི་ལོག་ལ་སོགས་པའི་སྐྱོན་རྣམས་བརྗོད་པར་ནུས་པ་མ་ཡིན་ནོ། །རིགས་པ་ཕྲར་ཡང་
[311a.5]ཞེས་པ་ལ་སོགས་པ་སྟེ། རིགས་པ་ཕྲ་མོ་རཀྵ་ཡཱ་ད་ཡིས་བརྗོད་པའི་ལྟག་ཆོད་རྣམས་མཚན་ཉིད་སྐྱོན་ཅན་ཉིད་དང་། ལན་བྱས་པ་ཉིད། རྒྱས་པར་རིགས་པ་བརྟག་པར་ཤེས་པར་བྱ། ཅི་སྟེ་མ་ཐ་རའི་བུ་ལ་སོགས་པས་བྱས་པའི་ལྟག་ཆོད་རྣམས་ལ་ཅི་ལྟར་མཚན་ཉིད་དང་ལན་སྐྱོན་ཅན་ཉིད་དུ་
[311a.6]ཤེས་པར་བྱ་ཞེ་ན་དེའི་ཕྱིར་གསུངས་པ། ཕྱོགས་དེས་ཞེས་པ་ལ་སོགས་པའོ། །ཆོས་མཐུན་པ་ཉིད་དང་ཆོས་མི་མཐུན་པ་ཉིད་དག་གིས་དགྲ་ཟླར་གནས་པ་ཞེས་པ་འདི་རིགས་པ་ཕྲ་མོར་ལྟག་ཆོད་ཐམས་ཅད་ཀྱི་མཚན་ཉིད་དོ། །དགྲ་ཟླར་གནས་ཏེ་གང་གིས་ཕྱིན་ཅི་ལོག་པར་གནས་པར་བྱེད་པ་དེ་དོད་ཟླར་
[311a.7]གནས་པའི་ཚིག་སྟེ་ལྟག་ཆོད་དོ། །དེ་ལྟ་ན་ནི་ཆོས་མཐུན་པ་དང་ཆོས་མི་མཐུན་པ་མཚུངས་པ་གཉིས་པོ་དག་ཁོ་ན་ལྟག་ཆོད་དུ་འགྱུར་རོ་ཞེས་པ་འདིའི་ཕྱིར་གསུངས་པ། དེའི་རྣམ་པར་རྟོག་པ་ལས་ལྟག་ཆོད་མང་པོ་ཉིད་དུ་ཞེས་པ། སྒྲུབ་བྱེད་རྣམས་ལ་དོད་ཟླར་གནས་པ་ནི་སྦྱོར་བའི་དབྱེ་བ་
[311b]
[311b.1]ལས་རྣམ་པ་དུ་མ་སྟེ། དེས་ན་དེའི་བྱེ་བྲག་དུ་མ་ཅན་ཉིད་ཀྱི་ཕྱིར་ལྟག་ཆོད་རྣམས་མང་པོ་ཉིད་དོ། །དེ་ཡང་མཚན་ཉིད་འདི་ཞེས་པ་ལ་སོགས་པས་མཚན་ཉིད་མ་ཁྱབ་པ་ཉིད་དུ་གསུངས་སོ། །སོགས་པའི་སྒྲས་མི་སྐྱེ་བ་མཚུངས་པ་ལ་སོགས་པ་རྣམས་གཟུང་བར་བྱའོ། །འདིར་དཔེ་བརྗོད་དང་ཆོས་
[311b.2]མཐུན་པ་དང་ཆོས་མི་མཐུན་པས་རྩོད་ཟླར་གནས་པ་སྲིད་པ་མ་ཡིན་པས་ཏེ། གཏན་ཚིགས་མེད་པ་ཙམ་དུ་རྩོད་པའི་ཕྱིར་རོ། །བ་ལང་ཉིད་ཀྱི་ཕྱིར་བ་ལང་དུ་གྲུབ་པ་བཞིན་གྲུང་པོ་ཞེས་པ་ཆོས་མཐུན་པ་ཉིད་དང་ཆོས་མི་མཐུན་པ་ཉིད་མཚུངས་པ་དག་གིས་ལན་ཏེ། ཇི་ལྟར་བ་ལང་ཉིད་ཀྱི་ཕྱིར་བ་ལང་གི་
[311b.3]དངོས་པོ་གྲུབ་པ་ན་ཁྲ་བོ་ཉིད་ལ་སོགས་པ་དང་ཆོས་མི་མཐུན་པ་ཉིད་ལས་དེ་ལྡོག་པ་མ་ཡིན་པ་དེ་བཞིན་དུ་ཆོས་མཐུན་པ་ཉིད་ཀྱི་ཕྱིར་མི་རྟག་པ་ཉིད་དུ་གྲུབ་ན། བུམ་པ་དང་ཆོས་མི་མཐུན་པ་ཉིད་ལས་ལུས་ཅན་མ་ཡིན་པ་ཉིད་ཀྱི་ཕྱིར་དེ་ལྡོག་པ་མ་ཡིན་ནོ། །ཆོས་མཐུན་པ་ཉིད་མཚུངས་པ་ལ་ནི་བཟློག་
[311b.4]པས་སྦྱར་བར་བྱ་སྟེ། ཇི་ལྟར་ཁྲ་བོ་ཉིད་ལ་སོགས་པ་དང་ཆོས་མི་མཐུན་པ་ཉིད་ལས་ཁྱད་པར་གྲུབ་ན། བ་ལང་ཉིད་དུ་ཆོས་མཐུན་པ་ལས་དེ་ལྡོག་པ་མ་ཡིན་པ་དེ་ལྟར་རྟག་པ་དང་། ཆོས་མི་མཐུན་པ་ཉིད་ལས་དབང་པོས་གཟུང་བྱ་ཉིད་ལས་མི་རྟག་པ་ཉིད་གྲུབ་པ་ན། ནམ་མཁའ་ལ་སོགས་
[311b.5]པ་དང་། ཆོས་མཐུན་པ་ཉིད་ལས་ལུས་ཅན་མ་ཡིན་པ་ཉིད་ལས་དེ་ལྡོག་པ་མ་ཡིན་ནོ་ཞེས་པའོ། །འདི་ཡང་ལན་མ་ཡིན་ཏེ་གང་གི་ཕྱིར་འདི་ནི་ཆོས་མཐུན་པ་དང་། ཆོས་མི་མཐུན་པ་དག་ལས་མི་རྟག་པ་ཉིད་འགྲུབ་པར་ཁས་བླངས་ནས་ཁས་བླངས་འགལ་བར་མ་གྱུར་ཅིག་ཅེས་པས་བཟློག་
[311b.6]པ་ལས་ལྡོག་པར་བྱེད་པ་ནི་མ་ཡིན་གྱི། འོ་ན་ཅི་ཞེ་ན། འདི་ཁོ་ན་མཚུངས་པར་དགྲ་ཟླར་གནས་པ་ལས་མི་འགྲུབ་བོ་ཞེས་སྨྲས་པའོ། །བཟློག་པ་ལ་མཚུངས་པ་ཉིད་ཀྱི་ཕྱིར་ཡང་ལན་མ་ཡིན་ནོ། །འདི་ལ་ལྟག་ཆོད་སྨྲ་བ་པོས་བརྗོད་པར་ནུས་ཏེ། གལ་ཏེ་ཁྱེད་ཀྱི་ཆོས་མཐུན་པ་ཉིད་དང་ཆོས་མི་མཐུན་
[311b.7]པ་ཉིད་ཙམ་ལས་མི་རྟག་པ་ཉིད་འགྲུབ་ན། དེ་ལྟར་གྱུར་ན་ངའི་ཡང་འགྲུབ་པོ་ཞེས་སོ། །དེའི་ཕྱིར་འདི་ལ་རྣམ་པ་གཞན་དུ་ལན་བརྗོད་པར་བྱའོ། །སོགས་པ་སྨོས་པ་ལས་འཕེལ་བ་དང་འགྲིབ་པ་མཚུངས་པ་ལ་སོགས་པ་རྣམས་ཀྱི། ཅུང་ཟད་ཆོས་མཐུན་པ་ལས་ཉེ་བར་བསྡུ་བ་འགྲུབ་པའི་ཕྱིར།
[312a]
[312a.1]ཆོས་མི་མཐུན་པ་ལས་དོད་ཟླར་མི་གནས་པ་ཞེས་པ་འདི་ལྟ་བུ་ལ་སོགས་པ་རྣམས་བསྡུའོ། །ཅུང་ཟད་ཆོས་མཐུན་པ་ཉིད་ལ་ཉེ་བར་སྡུད་པ་འགྲུབ་པ་མཐོང་སྟེ། བ་ལང་ཇི་ལྟ་བ་དེ་ལྟར་བ་མེན་ནོ་ཞེས་སོ། །བ་ལང་གི་ཆོས་རྣམས་ཐམས་ཅད་བ་མེན་ལའམ། བ་མེན་གྱི་ཆོས་རྣམས་བ་
[312a.2]ལང་ལ་འཐོབ་པ་མ་ཡིན་ནོ། །དེའི་ཕྱིར་ཐལ་བར་འགྱུར་བ་འདི་མ་ཡིན་ནོ་ཞེས་པ་འདི་ལྟ་བུ་ལ་སོགས་པ་རྣམས་ཐམས་ཅད་མི་རིགས་པ་ཉིད་དུ་རིགས་པ་བརྟག་པ་ལས་ཤེས་པར་བྱའོ། །དེ་བཞིན་དུ་བསྟན་བཅོས་གཞན་དུ་བྱས་པའི་ལྟག་ཆོད་དང་ལན་རྣམས་ལ་ཡང་དགག་པའི་ཆེད་དུ། གང་རིགས་པ་
[312a.3]བརྟག་པར་བསྟན་པ་འདི་ཁོ་ན་ཕྱོགས་ཙམ་སྟེ། དེའི་ཕྱིར་དེ་རྣམས་ཀྱང་ཕྱོགས་འདི་ཁོ་ནས་དགག་པར་བྱའོ། །རིགས་པ་བརྟག་པ་ལ་སོགས་པ་རྣམས་སུ་གཞལ་བྱ་དགག་པ་བྱས་པར་མ་ཟད་ཀྱི། འདི་ཡང་དོན་གྱིས་བྱས་པའོ་ཞེས་སྟོན་པ་གསུངས་པ་ཐམས་ཅད་ཀྱི་ཡང་ཞེས་པ་ལ་སོགས་པའོ། །
[312a.4]ཅིའི་ཕྱིར་མངོན་སུམ་གྱི་རྟོགས་པར་བྱ་བར་མི་འགྱུར་ཞེ་ན་གསུངས་པ། དེས་ཡོངས་སུ་བརྟག་པའི་ཚིག་གི་དོན་རྣམས་ཞེས་པ་ལ་སོགས་པ་སྟེ། གཙོ་བོ་དང་སྐྱེས་བུ་དང་ཕྱོགས་དང་དུས་དང་འཕྲད་པ་འདུ་བ་ལ་སོགས་པ་རྣམས་མངོན་སུམ་ཡིན་པ་ཉིད་ཀྱིས་ན་རྟགས་ཀྱིས་ཡོད་པ་ཉིད་དུ་རྣམ་པར་འཇོག་པའི་
[312a.5]ཕྱིར་རྟོག་གིས་རྟོགས་པར་བྱ་བ་ཉིད་དོ། །བརྟག་བཟོད་པ་མ་ཡིན་ནོ་ཞེས་པ་རྣམ་པར་དཔྱད་པར་མི་བཟོད་དོ་ཞེས་པའི་དོན་ཏོ། །ཇི་ལྟར་དཔྱད་བཟོད་པ་མ་ཡིན་པ་དེ་ལྟར་ཡང་བསྒྲུབས་ཟིན་ཏོ། །དེའི་ཕྱིར་ཞེས་པ་གང་གི་ཕྱིར་རྟོག་གེ་ནི་བརྟག་པར་བཟོད་པ་མ་ཡིན་པ་དེའི་ཕྱིར་དེས་རྟོགས་པར་བྱ་བའི་
[312a.6]གཞལ་བྱ་ཡང་དོན་གྱིས་དགག་པ་འདིར་བྱས་པ་ཁོ་ནར་རིག་པར་བྱའོ་ཞེས་པའོ། །ཚད་མ་དང་གཞལ་བྱ་བྱེད་དཀའ་བ་ཉིད་ཀྱིས་ཞེས་པ་ལ་སོགས་པས་བསྟན་བཅོས་རྩོམ་པའི་དགོས་པ་ཅན་སྟོན་ཏོ། །སྔར་ཚད་མ་འགྲུབ་པ་ནི་དངོས་ཀྱི་དགོས་པར་བརྗོད་ཅིང་། འདི་ནི་བརྒྱུད་པས་
[312a.7]སོ། །འོ་ན་ཕྱིན་ཅི་མ་ལོག་པའི་ལམ་ཉེ་བར་སྟོན་པ་ལས། དེ་བཞིན་གཤེགས་པའི་བསྟན་པ་ལ་རྗེས་སུ་འཇུག་པའི་དོན་ཅན་དུ་ཡང་འདི་རྩོམ་པ་འགྱུར་བ་མ་ཡིན་ནམ། དེ་ལྟར་ནི་མིག་དྲི་མ་མེད་པ་ཉིད་དུ་བསྒྲུབས་པ་ན་གཟུགས་ཀྱང་ཕྱིན་ཅི་མ་ལོག་པར་དོན་གྱིས་ཉེ་བར་བསྟན་པར་
[312b]
[312b.1]འགྱུར་བ་ཇི་ལྟ་བ་དེ་ལྟར་ཚད་མ་བྱེ་བྲག་ཏུ་རྟོགས་པར་བྱས་པ་ན། ཕྱིན་ཅི་མ་ལོག་པའི་དེ་ཁོ་ན་ཉིད་ལ་རྗེས་སུ་འཇུག་པའི་ལམ་ཡང་ངོ་ཞེ་ན། དེའི་ཕྱིར་གསུངས་པ། འདི་ཙམ་གྱིས་ནི་མ་ཡིན་ཞེས་པ་ལ་སོགས་པའོ། །ཅིའི་ཕྱིར་ཞེ་ན། གསུངས་པ། དེའི་ཆོས་ནི་རྟོག་གེའི་ཡུལ་མ་
[312b.2]ཡིན་པ་ཉིད་ཀྱི་ཕྱིར་ཞེས་སོ། །རྟོག་གེ་སྨོས་པ་ནི་ཐ་སྙད་པའི་ཚད་མ་ཉེ་བར་མཚོན་པའི་དོན་དུ་སྟེ། འཇིག་རྟེན་ལས་འདས་པ་ཁོ་ནའི་ཚད་མའི་ཡུལ། བཅོམ་ལྡན་འདས་ཀྱི་ཆོས་ནི་སོ་སོ་རང་གིས་རིག་པར་བྱ་བ་ཡིན་གྱི། ཐ་སྙད་པའི་ནི་མ་ཡིན་ནོ་ཞེས་པའི་དོན་ཏོ། །གལ་ཏེ་དེ་ལྟར་ན་ཅི་ལོག་
[312b.3]པ་དེ་རྣམས་ཀྱིས་གལ་ཏེ་ལོག་ཀྱང་ཆོས་ཉིད་མི་རྟོགས་སམ་ཞེ་ན། དེའི་ཕྱིར་གསུངས་པ། ལོག་པ་རྣམས་ནི་ཞེས་པ་ལ་སོགས་པ་སྟེ། མ་ལོག་པ་རྣམས་ནི་དེ་ཁོ་ན་ལ་སྙིང་པོར་ལྟ་བ་ཉིད་ཀྱིས་དེ་བཞིན་གཤེགས་པའི་བསྟན་པ་ཉན་པར་ཡང་མི་སྤྲོ་ཞིང་། ལོག་པ་རྣམས་ནི་དེ་བཞིན་གཤེགས་
[312b.4]པའི་བསྟན་པ་ལ་གང་ཆོས་རྣམས་ཀྱི་ཆོས་ཉིད་ཡོངས་སུ་གསལ་བར་བྱས་པ་དེ་ཐོས་པ་དང་བསམ་པ་དང་ཡང་དག་པར་བསྒོམ་པའི་རིམ་པས་འབད་པ་མེད་པ་ཁོ་ནར་རྟོགས་པར་འགྱུར་རོ། །ཆོས་ཉིད་ནི་ཆོས་རྣམས་ཀྱི་ཕྱིན་ཅི་མ་ལོག་པའི་རང་བཞིན་ཏེ། དེ་ཁོ་ན་ཉིད་ཅེས་པའི་ཐ་ཚིག་གོ། །
[312b.5]ཡང་ཅིའི་ཕྱིར་མུ་སྟེགས་པའི་ལུགས་ཐོས་པར་བྱས་ཀྱང་ཆོས་ཉིད་མི་རྟོགས་ཀྱི། དེ་བཞིན་གཤེགས་པའི་བསྟན་པ་ཐོས་ནས་རྟོགས་ཤེ་ན། གསུངས་པ། བར་ཤིན་ཏུ་རིང་བའི་ཕྱིར་ཞེས་པ་སྟེ། དེ་ཡང་ལེགས་པར་བྱས་པ་དང་ཉེས་པར་བྱས་པ་ཉིད་ཀྱིས་སོ། །ཐུབ་པའི་དབང་པོའི་བསྟན་པ་ནི་
[312b.6]ལེགས་པར་བྱས་པ་སྟེ། དེར་ཆོས་རྣམས་ཀྱི་ཕྱིན་ཅི་མ་ལོག་པའི་བདག་མེད་པ་ཉིད་ལ་སོགས་པའི་རང་བཞིན་རབ་ཏུ་གསལ་བར་བྱེད་པའི་ཕྱིར་དང་། མུ་སྟེགས་པའི་ལུགས་ནི་ཉེས་པར་བྱས་པ་སྟེ་བཟློག་པའི་ཕྱིར་རོ། །དེའི་ཕྱིར་བདེ་བར་གཤེགས་པའི་བསྟན་པ་ལ་བརྟེན་པ་ཁོ་ནས་དེ་ཁོ་ན་ཉིད་རྟོགས་
[312b.7]པར་འགྱུར་གྱི་ཅིག་ཤོས་ཀྱི་ནི་མ་ཡིན་ནོ། །བར་ཤིན་ཏུ་རིང་བ་ཉིད་ཁོ་ནར་བསྟན་པའི་ཆེད་དུ་ཚིགས་སུ་བཅད་པ་གསུངས་པ། རྟོག་གེ་ཙམ་སྟོབས་ཅན་རྣམས་ཞེས་པ་ལ་སོགས་པའོ། །རྟོག་གེ་ཙམ་གྱི་སྐྱབས་ཅན་ནི་མུ་སྟེགས་པ་རྣམས་ཏེ། དོན་གང་རྣམས་ཀྱི་ཕྱིན་ཅི་མ་ལོག་པའི་རང་བཞིན་
[313a]
[313a.1]རྟོགས་པ་ལས་འབའ་ཞིག་པ་ཉིད་ཐོས་པར་འགྱུར་བ་བདག་ལ་སོགས་པ་དེ་རྣམས་རྟོག་གེ་ཙམ་ལས་རྟོགས་པའི་ཕྱིར་རོ། །འོ་ན་ཁྱེད་ཀྱི་ཡང་བདག་མེད་པ་ཉིད་རྟོག་གེས་རྟོགས་པར་བྱ་བ་ཁོ་ན་སྟེ། དེས་ན་འདི་ལ་ཁྱད་པར་ཅི་ཞེ་ན་གསུངས་པ། དེ་ཡང་ཞེས་པ་ལ་སོགས་པ་སྟེ། གང་ཕྱིན་
[313a.2]ཅི་མ་ལོག་པའི་མཚན་ཉིད་དེ་མ་བསྟན་པའི་ཕྱིར། མཚན་ཉིད་མ་བསྟན་ཅིང་ངོ་། །རང་གི་སྦྱོར་བ་དང་འགལ་བ་ཡང་སྟེ་རང་ཉིད་ཀྱི་བ་ཁོ་ནའི་སྦྱོར་བ་དང་འགལ་བའོ། །དེ་ལྟར་ནི་གྲངས་ཅན་པ་རྣམས་ཀྱི་ནི་འབྲེལ་པ་གཅིག་ལས་མངོན་སུམ་ལས་ལྷག་མ་འགྲུབ་པའོ་ཞེས་པ་རྗེས་སུ་དཔག་པའི་མཚན་ཉིད་དོ། །
[313a.3]སྦྱོར་བ་ནི་གཙོ་བོ་ཡོད་དེ་ཁྱད་པར་རྣམས་ལ་རྗེས་སུ་འགྲོ་བ་མཐོང་བའི་ཕྱིར་རོ་ཞེས་པ་ལ་སོགས་པའོ། །རྗེས་སུ་འགྲོ་བ་མཐོང་བ་ནི་གཙོ་བོ་དང་འབྲེལ་པ་ཡོད་པ་ནི་མ་ཡིན་པས་སོ། །བྱེ་བྲག་པ་རྣམས་ཀྱི་ཡང་འདིའི་འདི་འབྲས་བུ་དང་རྒྱུའོ་ཞེས་པ་ལ་སོགས་པའི་མཚན་ཉིད་ཀྱི་རྗེས་སུ་དཔག་པའི་རང་གི་ངོ་བོ་
[313a.4]བཤད་པ་ནི། དེའི་རྒྱུ་ཉིད་ཀྱི་ཕྱིར་དང་འབྲས་བུ་ཉིད་ཀྱི་ཕྱིར་སྒྲ་མི་རྟག་གོ་ཞེས་པ་ལ་སོགས་པའི་རང་གི་སྦྱོར་བ་དང་འབྲེལ་པ་ཡང་མ་ཡིན་ཏེ། ཇི་ལྟར་བཤད་པའི་འབྲེལ་པ་རྣམས་ཀྱི་གང་ཡང་རུང་བ་ཡང་མི་སྲིད་པའི་ཕྱིར་རོ། །གལ་ཏེ་ཡང་ཅི་ཞིག་ལྟར་ཡང་རང་གི་སྦྱོར་བ་དང་འབྲེལ་པ་དེ་ལྟ་ན་
[313a.5]ཡང་སྐྱོན་དང་ལྡན་པ་ཁོ་ནའོ་ཞེས་སྟོན་པ་གསུངས་པ། འདོད་དོན་སྒྲུབ་པར་བྱེད་པའང་མིན། །ཞེས་པའོ། །ཇི་ལྟར་སྒྲུབ་པར་བྱེད་པ་མ་ཡིན་པ་དེ་ལྟར་དོན་དམ་པ་བདུན་ཅུ་པ་ལ་སོགས་པ་རྣམས་སུ་དང་འདིར་ཡང་བསྟན་ཏོ། །ཆེས་རིང་ཉམས་པ་རྣམས་ཞེས་པ་ལམ་གོལ་བ་ལ་
[313a.6]ཞུགས་པ་ཉིད་ཀྱི་ཕྱིར་རོ། །གང་ཞིག་རྟོག་གེའི་ལམ་གྱིས་ཆོས་ཉིད་རྣམ་པར་ངེས་པར་བྱེད་པ་དེ་རྣམས་ནི་ཐུབ་དབང་བསྟན་ལས་ཆེས་རིང་ཉམས་པ་ཡིན་ཏེ། དེ་རྟོག་གེའི་ཡུལ་མ་ཡིན་པ་ཉིད་ཀྱི་ཕྱིར་རོ། །གལ་ཏེ་ཡང་འདི་དེ་ལྟར་ཡིན་པ་དེ་ལྟ་ན་ཡང་དེ་བཞིན་གཤེགས་པའི་ཆོས་
[313a.7]ཀྱི་མཚན་ཉིད་ནི་གལ་ཏེ་རྣམ་པར་འགྱུར་བར་འགྲོ་བར་བྱེད་ན་བརྟག་པར་གྱིས། མུ་སྟེགས་པས་བརྟགས་པའི་ཚེག་གི་དོན་བཞིན་ནོ། །འདི་སྐད་བཤད་པར་འགྱུར་ཏེ། མུ་སྟེགས་པ་རྣམས་ཀྱིས་རྟོག་གེའི་ཡུལ་ཉིད་དུ་ཁས་བླངས་པའི་བདག་ལ་སོགས་པའི་ཚིག་གི་དོན་རྣམས་ཀྱང་
[313b]
[313b.1]རྟོག་གེས་རྣམ་པར་དཔྱད་ན་རྣམ་པར་འགྱུར་ཏེ། བསྟན་བཅོས་སུ་དེ་རྣམས་ཇི་ལྟར་རྣམ་པར་གཞག་པར་བྱས་པ་དེ་ལྟར་མི་གནས་སོ་ཞེས་པའི་དོན་ཏོ། །དེ་བཞིན་གཤེགས་པ་རབ་ཏུ་རིག་པར་མཛད་པའི་ཆོས་རྣམས་ཀྱི་རང་བཞིན་ཕྱིན་ཅི་མ་ལོག་པ་བདག་མེད་པ་ལ་སོགས་པ་ནི་རྣམ་པར་དཔྱད་པ་ན་རྣམ་
[313b.2]པར་མི་འགྱུར་ཏེ། ཇི་ལྟར་བསྟན་པ་བཞིན་དུ་ཐ་སྙད་པའི་བདག་ཉིད་ཀྱིས་དེ་ལྟ་ཁོ་ནར་ཉེ་བར་དམིགས་སོ་ཞེས་པའི་དོན་ཏོ། །འདིས་ནི་གལ་ཏེ་ཡང་རྟོག་གེ་དོན་དམ་པའི་ཡུལ་ཅན་དུ་མི་འགྱུར་བ་དེ་ལྟ་ན་ཡང་། ཇི་ལྟར་གནས་པའི་དངོས་པོ་སྤྱིའི་ཚུལ་གྱིས་གསལ་བར་བྱེད་ཅིང་དེ་ཁོ་ན་
[313b.3]ཉིད་རྟོགས་པ་དང་རྗེས་སུ་མཐུན་པར་འགྱུར་རོ་ཞེས་གསལ་བར་བྱས་སོ། །ཚད་མའི་ཕུང་པོའི་ཞེས་པ། རང་དང་ཕ་རོལ་པོ་མངོན་པར་འདོད་པའི་ཚད་མ་རྣམས་ཀྱི་ཕུང་པོ་སྟེ་ཚོགས་པའོ། །རང་མངོན་པར་འདོད་པའི་ཚད་མ་རྣམས་རྣམ་པར་འཇོག་ཅིང་ཕ་རོལ་པོ་མངོན་པར་
[313b.4]འདོད་པ་རྣམས་སུན་འབྱིན་པར་བྱེད་དོ་ཞེས་བྱས་ནས་སོ། །དེ་ལ་རང་མངོན་པར་འདོད་པ་རྣམས་ཀྱི་ཡོན་ཏན་རྣམས་དང་། ཕ་རོལ་པོ་རྣམས་ཀྱི་སྐྱོན་རྣམས་ཏེ། །དེ་རྣམས་རྒྱས་པ་ནི་ཡོན་ཏན་སྐྱོན་རྒྱས་པའོ། །དེ་རྟོགས་པར་བྱེད་པ་ནི་བརྩད་པ་དང་བཅས་པའི་ལན་གྱི་གཞུང་གི་ཕུང་པོའོ། །དེ་གསལ་བར་བྱས་
[313b.5]ལས་གང་དགེ་བ་སྟེ། །བསོད་ནམས་བདག་གིས་བསགས་པ་སྟེ། །ཉེ་བར་བསགས་པ་དེས་ཏེ་དགེ་བའོ། །འཇིག་རྟེན་གྱི་རྣམ་ཐར་ཏེ་མྱ་ངན་ལས་འདས་པ་དང་སྐྱེ་བ་ནི་འབྱུང་བ་སྟེ། དེ་དག་གི་ཡོན་ཏན་ཡོན་ཏན་མིན་པ་དག་སྟེ་ཡོན་ཏན་དང་སྐྱོན་དག་གོ། །དེ་ཤེས་པར་གྱུར་པའི་མཐར་བྱས་ཞི་བའི་ཆེད་དུ་ཤོག་
[313b.6]སྟེ་བྱུར་ཅིག་པའོ། །ཐར་པའི་ཡོན་ཏན་ཤེས་པའི་དང་སྐྱེ་བ་ལ་སྐྱོན་ཤེས་པའི་ཡང་ཞེས་འདི་སྒྲུབ་པ་ཡིན་གྱི་རྗེས་སུ་རྗོད་པ་ནི་མ་ཡིན་ཏེ། གཞན་དུ་ནི་ཉི་ཚེ་བའི་ཡོངས་སུ་བསྔོ་བར་འགྱུར་རོ། །ཐར་པ་དང་སྐྱེ་བ་དག་གི་ཡོན་ཏན་དང་ཡོན་ཏན་མ་ཡིན་པ་ཤེས་པར་གྱུར་པ་ནི་མཐར་བྱས་ཞི་བ་ཐོབ་པར་གྱུར་ཅིག་ཅེས་པ་ངག་གི་
[313b.7]དོན་ཏོ། །མཐར་བྱས་ནི་ཕྱིན་ཅི་ལོག་བཞིའི་མཚན་ཉིད་ཅན་ཏེ། གང་ཕྱིར་དེས་ཐར་པའི་གགས་ཉིད་ཀྱིས་འགྲོ་བ་མཐའ་སྟེ་ཡོངས་མཐར་བྱས་ཏེ། བདག་ལ་སོགས་པའི་ཕྱིན་ཅི་ལོག་གིས་རབ་ཏུ་བསྒོས་པ་ཉིད་ཀྱི་ཕྱིར་རོ། །འཁོར་བའི་སྡུག་བསྔལ་མཐའ་དག་ཟད་པའི་ངོ་བོ་ནི་ལྡོག་པ་སྟེ་དེ་ཞི་བའོ་ཞེས་པའོ། །གང་
[314a]
[314a.1]ལ་འཇམ་པའི་དཔལ་འདིས་རང་ཉིད་ཀྱིས་ནི་རྗེས་སུ་གཟུང་བ་མཛད་ཅིང་བློ་གྲོས་ལྡན། །ཕྱོགས་ཀྱི་གླང་པོ་དེ་ཡིས་ཚད་མ་འགྲུབ་པའི་ཆེད་དུ་མཛད་པའི་བསྟན་བཅོས་གང་ཡིན་དེ། །ཀུན་ནས་ཕྱེ་སྟེ་རྒྱལ་བའི་དབང་པོའི་བློ་ལྟར་དེ་ཉིད་དོན་ཅན་བཤད་པ་འདི་བྱས་ལས། །བདག་ལ་དགེ་བ་
[314a.2]ཡང་དག་བྱུང་གང་དེ་ལས་འགྲོ་བས་དེ་ཁོ་ན་ཉིད་རྟོགས་གྱུར་ཅིག །ཅེས་པ་ཡངས་པ་དང་དྲི་མ་མེད་པ་དང་ལྡན་པ་ཞེས་བྱ་བ་ཚད་མ་ཀུན་ལས་བཏུས་པའི་འགྲེལ་བཤད། །བྱང་ཆུབ་སེམས་དཔའི་ཡུལ་པ་སློབ་དཔོན་རྒྱལ་བའི་དབང་པོའི་བློ་གྲོས་ཀྱི་ཞབས་ཀྱིས་མཛད་པ་རྫོགས་སོ།། །།ཤློ་ཀ་སྟོང་ཕྲག་
[314a.3]དགུ་པའོ་ཞེས་རྒྱད་པའི་མཇུག་ཏུ་འབྱུང་ངོ་། །ཚུལ་འདི་ནི་ཆོས་ཀྱི་རྗེ་ཤོང་སྟོན་ལོ་ཙཱ་བ་རྡོ་རྗེ་རྒྱལ་མཚན་གྱིས་ལེགས་པར་བཤད་པའི་སྲོལ་ལ་སོགས་པ་ལ་བརྟེན་ནས་ལེགས་པར་སྦྱར་བ་བརྡ་སྤྲོད་པའི་ཚུལ་ལ་བློའི་སྣང་བ་ཆེར་རྒྱས་པ། དཔང་ལོ་ཙཱ་བ་དགེ་སློང་དཔལ་ལྡན་བློ་གྲོས་བསྟན་པས། པཎྜི་
[314a.4]ཏ་ལ་མ་ལྟོས་པར་རང་ཉིད་ཀྱིས་རྒྱ་དཔེ་ལ་བལྟས་ནས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།དཔལ་ལྡན་རྒྱལ་བའི་དབང་པོའི་བསྟན་པའི་ཁང་བཟངས་ཕན་བདེའི་མཛོད་ལྡན་དམ་པའི་སྒོ་འཕར་མཆོག །དཔལ་ལྡན་ཕྱོགས་ཀྱི་གླང་པོའི་གཞུང་ལུགས་རང་གི་སྡེ་པས་བརྟགས་
[314a.5]པའི་རྟོག་གེ་ངན་སེལ་ཞིང་། །རྒྱལ་བ་རྒྱལ་དཔོག་རྐང་མིག་གཟེགས་ཟན་སེར་སྐྱ་འཇིག་རྟེན་མིག་གི་རྗེས་སུ་འཇུག་རྣམས་ཀྱི། །རྟོག་གེ་ངན་པ་རྨེག་མེད་བྱེད་དེའི་འགྲེལ་བཤད་མཆོག་འདི་སྔོན་མེད་བསྒྱུར་ཅིང་ཞུ་ཆེན་བྱས། །གཞུང་འགྲེལ་འགྲེལ་བཤད་བཅས་པ་རྣམས། །ཚིག་བརླིང་
[314a.6]དོན་ཡང་གཏིང་དཔག་དཀའ། །དེ་སླད་ལེགས་པར་རབ་འབད་ཀྱང་། །འདི་ལ་འཁྲུལ་མེད་ཤིན་ཏུ་དཀོན། །འཕགས་བློ་མ་ཐོབ་བློ་གྲོས་སྐྱོན། །རྣམ་གཡེང་ལེ་ལོ་སྦྱོར་བའི་སྐྱོན། །མཁས་ལས་མ་ཐོས་སྐལ་བའི་སྐྱོན། །འདི་ཡི་སྐྱོན་ལྡན་བཟོད་པར་མཛོད། །བློ་མཆོག་སྦྱོར་བ་རབ་རྒྱས་ཤིང་། །གཟུ་བོར་
[314a.7]གནས་པའི་དགེ་མཚན་ལྡན། །ལེགས་བཤད་དོན་གཉེར་དུས་སྐབས་ཅན། །དེ་རྣམས་རིགས་པའི་དགའ་སྟོན་མཛོད། །འདིར་འབད་དགེ་བས་འགྲོ་བ་ཀུན། །རིགས་པ་དམ་པའི་དཔུང་བསགས་ཏེ། །བདུད་དང་མུ་སྟེགས་ཀུན་བཅོམ་ནས། །རྒྱལ་བའི་དབང་པོ་མྱུར་ཐོབ་ཤོག། །།