[1a]
[1b]
[1b.1]{T4223}༄༅༅། །རྒྱ་གར་སྐད་དུ། པྲ་མཱ་ཎ་བར་ཏི་ཀ་ཊཱི་ཀ །བོད་སྐད་དུ། ཚད་མ་རྣམ་འགྲེལ་གྱི་འགྲེལ་བཤད། བམ་པོ་དང་པོ། ཐམས་ཅད་མཁྱེན་པ་ལ་ཕྱག་འཚལ་ལོ། །སྲིད་གསུམ་
[1b.2]འཕེན་པར་བྱེད་པ་ཡི། །ཟག་པ་མ་ལུས་ལས་རྒྱལ་བ། །བདེ་གཤེགས་གང་དག་སྲིད་པ་དང་། །ངེས་འབྱུང་ལེགས་པར་རྟོགས་པ་དང་། །དེ་ཆོས་ཡང་དག་གཟིགས་ལས་བྱུང་། །མཁས་པས་
[1b.3]སོ་སོ་རང་རིག་བྱ། །ལེགས་གསུངས་རིམས་བྲལ་དང་དགེ་འདུན། །འཕགས་པའི་གང་ཟག་བརྒྱད་པོ་རྒྱལ། །བློ་གྲོས་ཆེན་པོའི་བཞེད་པ་གཏིང་རྙེད་མ་ཡིན་ཞིང་། །འབད་བྱས་པས་ཀྱང་གསལ་
[1b.4]བར་རྟོགས་པ་མེད་པ་འདི། །ཚིག་དོན་ཙམ་གྱི་རང་བཞིན་རབ་ཏུ་བསྟན་པ་ཡིས། །གནའ་རབས་རྣམས་ཀྱིས་གསལ་བ་ཉིད་དུ་བྱས་གྱུར་པ། །དེས་ན་འདིར་ནི་དེ་ཉིད་རྟོགས་ཕྱིར་འབད་པས་ནི། །
[1b.5]གསལ་བར་བྱ་སྟེ་དེ་བསྟན་པ་ཡང་ཕན་ཕྱིར་ཡིན། །འགྲོ་བ་མ་རྟོགས་པ་ནི་རྟོགས་པར་བྱ་བའི་ཕྱིར། །འདི་ལ་འབད་པ་བྱས་པ་ངལ་བའི་འབྲས་བུ་ཡིན། །རྟོག་པའི་དྲ་བ་རྣམ་བསལ་ཅིང་། །ཞེས་
[2a]
[2a.1]བྱ་བ་ལ་སོགས་པས་ནི་རབ་ཏུ་བྱེད་པ་ལ་གུས་པ་བསྐྱེད་པའི་དོན་དུ་ལྷ་དང་དྲང་སྲོང་གི་སྐྱེ་བོས་ཞབས་ཀྱི་པདྨ་ལ་ཕྱག་བྱས་པའི་བཅོམ་ལྡན་འདས་དེ་བཞིན་གཤེགས་པ་ལ་ཕྱག་བྱེད་པའོ། །འཇིག་རྟེན་ནི་ཆེར་
[2a.2]འདོད་པའི་བྱ་བ་ལ་འཇུག་པ་ན་རང་འདོད་པའི་ལྷ་ལ་ཕྱག་བྱེད་པ་སྔོན་དུ་འགྲོ་བ་ཅན་ཉིད་ཀྱིས་ཡིན་ནོ། །དེ་བཞིན་དུ་སློབ་དཔོན་གྱིས་ཀྱང་རབ་ཏུ་བྱེད་པ་མཛད་པ་ན་དོན་ཆེན་པོ་ཉིད་ཀྱིས་དགོས་པ་ཆེན་པོ་དང་ལྡན་པར་བསྟན་པ་ཡིན་ནོ། །
[2a.3]གལ་ཏེ་འཇིག་རྟེན་གྱི་ཕྱག་བྱེད་པའི་འཇུག་པ་འདི་ལྟ་བུ་ནི་ཕུན་སུམ་ཚོགས་པ་ཉིད་ཀྱིས་མ་ཡིན་ནམ་ཞེ་ན། དགོས་པ་ཆེན་པོ་ཉིད་ཀྱིས་མངོན་པར་འདོད་པ་གྲུབ་པ་ཉིད་ཀྱིས་ཡིན་མོད། དེས་ན་འདིར་ནི་དེ་ཉིད་བསྟན་པར་
[2a.4]འདོད་པ་ཡིན་ནོ། །དགོས་པ་ཆེན་པོ་ཉིད་ཀྱང་གཏན་དུ་སྡུག་བསྔལ་དང་བྲལ་བ་ཡིན་ཏེ། དེ་ནི་གང་ཟག་དང་ཆོས་ལ་བདག་མེད་པ་རྟོགས་པའི་ཕྱིར་འདི་ལས་འགྲུབ་པོ། །ཡང་ཅི་སྟེ་འདི་རང་གི་ངག་གིས་མི་བརྗོད། ཕྱག་
[2a.5]བྱས་པས་ནི་གུས་པར་བྱ་བ་ཡིན་ལ་དེ་ཡང་སྲིད་པ་དང་བྲལ་བ་ཡིན་པའི་ཕྱིར་མཆོད་པས་དོན་ཅི་ཡོད་ཅེ་ན། འདིར་ནི་སློབ་དཔོན་གྱི་གུས་པའི་རོ་སྟོན་པ་ཉིད་ཀྱིས་ཏེ། དོན་བསྟན་པར་བྱ་བ་ཡིན་ཡང་སྙིང་གི་རོ་ཡོངས་སུ་རྒྱས་པ་ཉིད་
[2b]
[2b.1]ཀྱིས་སྟོན་པ་ཡང་འཇལ་བ་པོའི་ཆོས་ཡིན་ནོ། །གུས་པ་ཡང་འདུད་པའི་འབྲས་བུ་ཅན་ཡིན་ལ། དེ་ཡང་ཕྱག་བྱེད་པ་ཡིན་ནོ། །གུས་པ་ལ་ཡང་དགོས་པ་ཅི་ཡོད་ཅེ་ན། འདི་བསྒྲུབ་པར་བྱ་བ་ནི་མ་ཡིན་ཏེ། བྲལ་བ་ཉེ་བར་སྟོན་པས་ཕན་འདོགས་པ་ལ་རང་བཞིན་གྱིས་གྲུབ་པ་ཡིན་
[2b.2]པའི་ཕྱིར་རོ། །རང་བཞིན་གྱིས་གྲུབ་པ་ཡང་འདོད་ཆགས་ལ་སོགས་པ་ཉེས་པའི་འབྲས་བུ་ཅན་ནི་བཟློག་པར་བྱ་ལ། སྙིང་རྗེ་དང་ཡིད་བྱུང་བ་ལ་སོགས་པ་ཉེས་པ་མེད་པ་ནི་འཇུག་པར་བྱ་བ་ཡིན་ནོ། །དེ་བཞིན་དུ་བཅོམ་ལྡན་འདས་ལ་ཕན་འདོགས་པ་ལས་བྱུང་བའི་སེམས་ཀྱི་ཁྱད་པར་བྱ་
[2b.3]བ་ཉིད་ཡིན་ཏེ། བླ་ན་མེད་པའི་འབྲས་བུ་འཕེན་པར་བྱེད་པའི་ཕྱིར་བརྩེ་བ་ལ་སོགས་པ་ཉིད་བཞིན་ནོ། །འདི་ལྟར་ལམ་མི་འཛིན་པ་དང་། ལམ་ནོར་བ་དང་། ལམ་ལ་ཐེ་ཚོམ་ཟ་བ་ནི་འགྲོ་བ་པོའི་འབྲས་བུ་ཐོབ་པའི་བར་ཆད་ཀྱི་རྒྱུ་ཡིན་པའི་ཕྱིར་ཁམས་གསུམ་པ་ལས་ངེས་པར་འབྱུང་བར་འདོད་
[2b.4]པ་ནི་ཐེ་ཚོམ་མེད་པར་ལམ་ལ་བརྟེན་པ་ཉིད་དུ་བྱའོ། །ལེའུ་གཉིས་པར་བཤད་པའི་ཚུལ་གྱིས་ལམ་གཞན་ཡང་མེད་དེ། དེས་ན་ལམ་ཉིད་འཛིན་པར་འདོད་པས་དེ་ཉེ་བར་སྟོན་པར་མཛད་པ་བཅོམ་ལྡན་འདས་ལ་གཞན་ཡོངས་སུ་སྤངས་ཏེ་གུས་པས་བསྒྲུབ་པར་བྱ་ཞིང་སྐྱེ་བ་གཞན་དག་
[2b.5]ཏུ་ཡང་མུ་སྟེགས་པ་གཞན་གྱིས་བསྟན་པའི་དོན་འཛིན་པར་མ་གྱུར་ཅིག་ཅེས་དེ་རྗེས་སུ་དྲན་པ་དང་། མངོན་པར་དགའ་བ་དང་མཆོད་པ་དང་རྗེས་སུ་འཇུག་པ་ལ་སོགས་པས་ཐེ་ཚོམ་བཟློག་པའི་ཕྱིར་གོམས་པར་ཡང་བྱའོ། །དེའི་ཕྱིར་བྱ་བ་གཞན་ཡང་དག་པས་རབ་ཏུ་བྱེད་པའི་བྱ་བ་ཁྱད་དུ་
[2b.6]འཕགས་པར་བསྟན་པའི་ཕྱིར་བཅོམ་ལྡན་འདས་ཀྱི་ཡུལ་ལ་བསམ་པའི་ཁྱད་པར་གྱིས་རབ་ཏུ་བཅུག་པ་བཅོམ་ལྡན་འདས་ལ་ཕྱག་བྱ་བ་ནི་གདོན་མི་ཟ་བར་བྱ་བ་ཡིན་ནོ་ཞེས་དྲུག་པོ་ཡོན་ཏན་བརྗོད་པ་སྔོན་དུ་འགྲོ་བ་ཅན་ཕྱག་བྱ་བའི་ཡུལ་ཉེ་བར་བསྟན་པ་ན་བསྟོད་པ་ཡང་རབ་ཏུ་སྦྱོར་རོ། །དེ་ལ་
[2b.7]བཅོམ་ལྡན་འདས་ལ་ཕྱག་བྱ་བ་ལ་མདོར་བསྡུས་ནས་རྒྱུ་དང་འབྲས་བུ་ཕུན་སུམ་ཚོགས་པས་ཡོན་ཏན་རྣམ་པ་གཉིས་སོ། །རྒྱུ་ནི་བསམ་པ་དང་སྦྱོར་བ་ཡོངས་སུ་རྫོགས་པའོ། །བསམ་པ་ནི་ཐུགས་རྗེའི་བདག་ཉིད་ཡིན་ལ་དེ་དང་རྗེས་སུ་མཐུན་པར་འཇུག་པ་ནི་སྦྱོར་བའོ། །འབྲས་
[3a]
[3a.1]བུ་ཡང་རང་དང་གཞན་གྱི་དོན་ཕུན་སུམ་ཚོགས་པ་ཡིན་ནོ། །གལ་ཏེ་འབྲས་བུ་ནི་རྒྱུ་དང་མཐུན་པར་ངེས་པའི་ཕྱིར་ཇི་སྐད་བརྗོད་པའི་རྒྱུ་ལས་འབྲས་བུ་རང་གི་དོན་ཕུན་སུམ་ཚོགས་པ་གང་ལས་ཤེ་ན། མ་ཡིན་ཏེ། རང་གི་དོན་ཕུན་སུམ་ཚོགས་པ་ནི་གཞན་གྱི་དོན་
[3a.2]གྲུབ་པ་ལ་འཁྲུལ་པ་མེད་པའི་ཕྱིར་མི་འདོད་ཀྱང་འགྲུབ་པའི་ཕྱིར་རོ། །ཇི་སྐད་དུ། གང་ཕྱིར་འགྲོ་བ་མྱ་ངན་མ་འདས་པར་ཁྱོད་མྱ་ངན་འདས་པར་མི་བཞེད་པ། །ཚུལ་འདི་བདེ་བར་གཤེགས་པའི་གོ་འཕང་མ་ཐོབ་པར་ནི་ནུས་པ་མ་ཡིན་པ། །དེ་ཕྱིར་ཁྱོད་ནི་ཐམས་ཅད་མཁྱེན་པ་ཡོན་
[3a.3]ཏན་གཏེར་གྱུར་ཐོབ་པར་ངེས་འགྱུར་ཏེ། །ཁྱོད་ལ་སྟོབས་བཅུའི་ཡོན་ཏན་རྣམས་ཀྱིས་བྱ་བ་གཞན་ནི་ཅུང་ཟད་ཀྱང་མི་མངའ། །ཞེས་གསུངས་པ་བཞིན་ནོ། །འབྲས་བུ་བརྗོད་ན་རྒྱུ་འགྲུབ་པ་ཉིད་ནི། དེས་ན་ཕྱེད་སྔ་མས་ནི་རང་གི་དོན་ཕུན་སུམ་ཚོགས་པ་བརྗོད་ལ་ཕྱི་མས་ནི་གཞན་
[3a.4]གྱི་དོན་ཕུན་སུམ་ཚོགས་པའོ། །རྟོག་པ་ནི་གང་ཟག་དང་ཆོས་སུ་རྟོག་པ་ཡིན་ལ་ཆོས་སུ་རྟོག་པ་ཡང་གཟུང་བར་སྣང་བ་མེད་ན་མི་འབྱུང་བ་ཉིད་ཡིན་ཏེ། དེས་ན་རྟོག་པའི་དྲ་བ་རྣམ་པར་བསལ་བ་ཉིད་ཀྱིས་ནི་གཉིས་སུ་མེད་པའི་རང་བཞིན་ཙམ་གྱི་སྐུ་བདག་དང་མི་འདྲ་བར་བརྗོད་པ་ཡིན་ནོ། །
[3a.5]དེ་ཉིད་ཀྱི་ཕྱིར། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །ཞེས་གསུངས་སོ། །ཟབ་པས་ནི་གཞན་གྱིས་ཤེས་པར་བྱར་མེད་པ་ཐམས་ཅད་མཁྱེན་པ་ཉིད་ལ་སོགས་པའི་ཡོན་ཏན་དཔག་ཏུ་མེད་པའི་རྟེན་ཉིད་དུ་བརྗོད་དོ། །བཅོམ་ལྡན་འདས་ཀྱི་ཡོན་
[3a.6]ཏན་ནི་དཔག་ཏུ་མེད་དེ། ཇི་སྐད་དུ། གལ་ཏེ་དེ་བཞིན་གཤེགས་པའི་ཆོས། །འདི་དག་བསྟན་དུ་ཡོད་གྱུར་ན། །མཁར་ཡང་མི་ཤོང་ཡོན་ཏན་མཚོ། །ཁྱོད་ཀྱི་ཡོན་ཏན་མཐའ་ལས་འདས། །ཞེས་གསུངས་པ་དང་། དེ་བཞིན་དུ། རྣམ་གྲོལ་མཉམ་པ་ཐོབ་རྣམས་དང་། །གང་
[3a.7]ཟག་དེ་ལས་གཞན་རྣམས་དང་། །སངས་རྒྱས་ཆོས་ཀྱི་མཉམ་མེད་ཁྱོད། །བར་ན་ཁྱད་པར་ཤིན་ཏུ་ཆེ། །ཞེས་སོ། །རྒྱ་ཆེ་བས་ནི་གཞན་དང་མཚུངས་པ་མེད་པས་བླ་ན་མེད་པ་ཉིད་བརྗོད་དོ། །ལམ་གཞན་མེད་པའི་ཕྱིར་རེ་ཞིག་ཉོན་མོངས་པ་དང་བྲལ་བ་ལ་ནི་དེ་ལ་མིའམ་ལྷ་གང་གིས་ཀྱང་
[3b]
[3b.1]བསྒྲུན་དུ་དེ་མེད་པ་ཉིད་དོ། །རང་བཞིན་གྱིས་གྲུབ་པའི་ནུས་པ་ཡང་མེད་པས་ཕྱི་རོལ་པ་རྣམས་ཀྱིས་གནོན་པ་ལ་སོགས་པའི་ནུས་པ་དང་ལྡན་པ་ཡང་བསོད་ནམས་ཀྱི་མངོན་པར་འདུ་བྱེད་པ་ལས་སྐྱེས་པར་བརྗོད་པར་བྱའོ། །བསོད་ནམས་ཀྱི་ཚོགས་བསགས་པ་ཡང་དེ་བཞིན་
[3b.2]གཤེགས་པ་ལས་གཞན་ནི་མི་སྲིད་དེ། སྦྱིན་པ་དང་ཚུལ་ཁྲིམས་ལ་སོགས་པ་ཡོངས་སུ་རྫོགས་པའི་ཕྱིར་རོ། །དེས་ན་དེ་ལ་བླ་ན་མེད་པའི་ནུས་པ་དང་ལྡན་པར་དེ་དང་དེར་བཤད་དོ། །རྣམ་པ་དེ་ལྟ་བུའི་སྐུའི་རང་བཞིན་གང་ལ་མངའ་བའི་བཅོམ་ལྡན་འདས་དེ་ལ་ཕྱག་འཚལ་བའོ། །
[3b.3]ཀུན་ཏུ་བཟང་པོ་ཞེས་བྱ་བས་ནི་གཞན་གྱི་དོན་གྲུབ་པ་བརྗོད་དོ། །ཀུན་ཏུ་ལེགས་པ་ནི་དེ་ལས་འབྱུང་བའི་ཕྱིར་ཏེ་བཅོམ་ལྡན་འདས་ཀྱི་ལེགས་པ་ནི་ལེགས་པ་མ་ཡིན་པ་དང་མ་འདྲེས་པ་ཡིན་ནོ་ཞེས་བྱ་བའི་ཐ་ཚིག་གོ། །གཞན་ལ་གནོད་པ་སྙིང་པོར་གྱུར་པའི་ཕན་འདོགས་པ་མངོན་པར་
[3b.4]མི་སྒྲུབ་པའི་ཕྱིར་ཏེ། ཐུགས་རྗེས་འཇུག་པའི་ཕྱིར་དང་། དེ་ཡང་ཐམས་ཅད་ལ་ཁྱད་པར་མི་མངའ་བའི་ཕྱིར་རོ། །གནོད་པ་བྱེད་པའི་སྙིང་པོར་གྱུར་པའི་ཕན་འདོགས་པ་ནི་འདོད་ཆགས་ལས་སྐྱེས་པ་ཉིད་དེ། འགའ་ཞིག་ལྷ་མ་ཡིན་བསད་པས་ལྷ་ལ་སོགས་པ་དག་
[3b.5]པར་བྱེད་པ་བཞིན་ནོ། །གང་ལ་དེ་ལྟ་བུའི་རང་བཞིན་མངའ་བ་དེ་བརྗོད་པ་ནི། འོད་ཟེར་དག་ཀུན་ནས་འཕྲོ་ཞེས་བྱ་སྟེ། འདིས་ནི་དོན་ཐམས་ཅད་ཁྱབ་པའི་གསལ་བ་ཉིད་བརྗོད་དོ། །ཐམས་ཅད་མཁྱེན་པ་ཞེས་བྱ་བའི་ཐ་ཚིག་གོ། །རྩོམ་པའི་ཁྱད་པར་གྱིས་གཙོ་བོའི་དགོས་པ་
[3b.6]རྟོགས་ཀྱང་གཞན་གྱི་དབང་དུ་བྱས་ནས་ཉེ་བར་བསྟན་པ་མ་ཡིན་པར་བརྟགས་ཏེ་གོམས་པ་ཙམ་གྱིས་རབ་ཏུ་བཅུག་པ་ཉིད་རྩོམ་པའི་འབྲས་བུ་ཡིན་པར་བཤད་པ་ནི། སྐྱེ་བོ་ཕལ་པོ་ཆེར་ཞེས་བྱ་བ་ལ་སོགས་པ་ཡིན་ནོ། །བདག་ལ་རྩོམ་པར་འདོད་པའི་གཞུང་འདི་ནི་གཞན་ལ་ཕན་པ་ཡིན་
[3b.7]ཞེས་བསམ་པ་མེད་པ་ཡིན་ཡང་། སེམས་ནི་ཡུན་རིང་པོར་སྐྱེས་བུའི་དོན་གྱི་གཙོ་བོའི་ཡན་ལག་ཏུ་གྱུར་པའི་ལེགས་བཤད་གང་ཡིན་པ་དེ་གོམས་པས་ལྷུར་ལེན་སྐྱེད་ཕྱིར་སྐབས་སུ་བབ་པའི་གཞུང་སྦྱར་བ་འདི་ལ་དགའ་བ་སྐྱེས་སོ། །ཅིའི་ཕྱིར་གཞན་ལ་ཕན་པ་མ་ཡིན་ཞེ་ན། རྒྱུ་
[4a]
[4a.1]བཤད་པ། སྐྱེ་བོ་མང་དུ་ནི་འཇིག་རྟེན་པའི་ཐ་སྙད་ཉེ་བར་སྟོན་པའི་རང་བཞིན་གྱི་གཞུང་ལ་ཆགས་སོ། །དེ་ལྟར་གྱུར་ཀྱང་འཇིག་རྟེན་པ་ལ་སྙིང་པོ་མེད་པར་མཐོང་བས་འཇིག་རྟེན་ལས་འདས་པའི་ལམ་ལ་འཇུག་པར་འགྱུར་རོ་ཞེ་ན། ཤེས་རབ་རྩལ་མེད་
[4a.2]པས་ན་ཞེས་སྨོས་ཏེ། བླུན་པོ་ཉིད་ཀྱི་སྙིང་པོ་དང་སྙིང་པོ་མ་ཡིན་པ་རྣམ་པར་འབྱེད་པའི་མཐུ་མེད་པས་དོན་འཛིན་པར་མི་ནུས་སོ། །གལ་ཏེ་ཡང་འགའ་ཞིག་ལ་རྩལ་མེད་པ་དེ་ལྟ་ན་ཡང་དོན་དུ་མི་གཉེར་བས་སྡང་བར་གྱུར་ཏོ། །རང་གི་རིགས་ཀྱི་རྒྱུན་ཁས་བླངས་པ་འགའ་ཞིག་ལ་
[4a.3]བདག་གི་བ་ཉིད་ཀྱི་དངོས་པོར་ཞེན་པ་ནི་བྱམས་པས་ཕན་འདོགས་པ་ཙམ་གྱིས་རབ་ཏུ་སྦྱར་བའི་བསྟན་བཅོས་གཞན་ལ་གཞན་གྱི་ཡིན་པའི་བློས་ཡོན་ཏན་མཐོང་ཡང་ཕྲག་དོག་གི་དྲི་མ་སྐྱེས་པ་ནི་སྡང་བ་སྐྱེད་པར་བྱེད་དོ། །དེའི་ཕྱིར་རྒྱུ་འདིས་ནི་འདི་གཞན་ལ་ཕན་པ་ཉིད་མ་ཡིན་ཏེ་དེའི་ཕྱིར་
[4a.4]གཙོ་བོར་གྱུར་པའི་དགོས་པ་ཡན་ལག་ཡིན་ཡང་འདི་གོམས་པས་འཇུག་པ་ཡིན་ནོ། །འདིར་ཡང་ཚད་མར་གྱུར་པ་ཞེས་བྱ་བ་ལ་སོགས་པའི་གཞུང་གི་འགྲེལ་པར་དམིགས་པའི་ཕྱིར་ཚད་མ་ཀུན་ལས་བཏུས་པའི་འགྲེལ་པ་ཡིན་ཡང་དེའི་རིམ་པ་དོར་ཏེ་ཕྱོགས་ཆོས་ཞེས་བྱ་བ་ལ་
[4a.5]སོགས་པས་དང་པོར་རྗེས་སུ་དཔག་པ་བརྗོད་པ་གང་ཡིན་པ་དེ་མི་རིགས་པར་མི་འགྱུར་བར་བྱ་བའི་ཕྱིར་འགྲེལ་པས་དགོས་པ་བཤད་པ་ནི་དོན་དང་ཞེས་བྱ་བ་ལ་སོགས་པ་ཡིན་ནོ། །དོན་ནི་དོན་དམ་པར་ཡོད་པའི་ངོ་བོའོ། །དོན་མ་ཡིན་པ་ནི་དེ་ལས་བཟློག་པ་སྟེ། གཟུགས་
[4a.6]ལ་སོགས་པ་ཀུན་རྫོབ་ཏུ་ཡོད་པའམ། གཙོ་བོ་དང་དབང་ཕྱུག་དང་རི་བོང་གི་རྭ་ལ་སོགས་པ་མེད་པ་ཉིད་དོ། །དེ་དག་རྣམ་པར་འབྱེད་པ་ནི་དེའི་ཡུལ་ཅན་གྱི་དཔྱོད་པ་སྟེ་ཇི་ལྟར་སྣང་བའམ་ཇི་ལྟར་ཁས་བླངས་པ་རྟོགས་པའི་ཆོས་ཀྱི་བདག་ཉིད་དུ་གྱུར་པའི་ཆོས་དོན་དམ་པར་ཡོད་པའམ་
[4a.7]ཡོད་པ་མ་ཡིན་པ་གང་ཡིན་པ་དེའི་རྗེས་སུ་འཇུག་པའོ། །གང་ཞིག་གང་གི་བདག་ཉིད་ཅན་དུ་གྱུར་པའི་ཆོས་དེ་རྣམ་པར་དཔྱད་པ་ན་དེ་རྟོག་པར་འགྱུར་ཏེ། དཔེར་ན་ཤ་པ་ཉིད་རྣམ་པར་དཔྱད་པས་ཤིང་བཞིན་ཞེས་འབྲེལ་པ་བསྟན་པར་སྟོན་པར་འགྱུར་རོ། །དེ་ནི་རྗེས་སུ་དཔག་
[4b]
[4b.1]པ་ལ་བརྟེན་པ་ཡིན་ནོ། །རྗེས་སུ་དཔག་པ་ལ་དེ་གནས་པ་སྟེ། དེ་རྩ་བར་གྱུར་པས་རྗེས་སུ་དཔག་པ་རང་གི་ངོ་བོ་ཐོབ་པའི་ཕྱིར་རོ། །རྗེས་སུ་དཔག་པ་ནི་འབྲེལ་པ་མངོན་དུ་འགྲོ་བ་ཅན་ཡིན་པའི་ཕྱིར་ན་རྗེས་སུ་དཔག་པ་ནི་དེ་ལྟ་བུའི་སྤྱོད་པའི་རྩ་བ་ཅན་ཡིན་ནོ། །ཆོས་གཞན་གྱི་བདག་
[4b.2]ཉིད་དུ་རྟོགས་པས་རྣམ་པར་བརྟགས་པ་ན་ཆོས་གཞན་རྟོགས་པར་བྱེད་དེ། དེས་ན་འབྲེལ་པ་ཉིད་རྣམ་པར་དཔྱད་པ་ན་དེ་ལྟར་རྟོགས་པའི་ཕྱིར་དེའི་རྩ་བ་འབྲེལ་པ་ཡིན་ནོ། །དེས་ན་དེ་ནི་རྗེས་སུ་དཔག་པ་བསྟན་པ་ཉིད་ཀྱིས་བསྟན་པར་འགྱུར་རོ། །དེའི་དོན་ནི་འདི་ཡིན་ཏེ། སློབ་
[4b.3]དཔོན་གྱི་བཞེད་པ་འཆད་པར་གཞལ་བྱ་གྲུབ་པའི་འབྲས་བུ་ཅན་ཉིད་ཀྱི་ཚད་མ་རྣམ་པར་འཇོག་པ་ན་གདོན་མི་ཟ་བར་ཐབས་འགའ་ལ་བསྟེན་པར་བྱའོ། །དེ་ལ་གཞལ་བྱ་གྲུབ་པའི་ཐབས་ནི་ཚད་མ་ཡིན་ནོ། །དངོས་པོ་རང་ཉིད་ནི་རིག་པ་མེད་པའི་རང་བཞིན་ཉིད་ཀྱིས་མི་འགྲུབ་པའི་
[4b.4]ཕྱིར། དེ་གསལ་ན་རང་གི་ངོ་བོ་འགྲུབ་པར་འགྱུར་བའི་ཕྱིར་རྟོགས་པས་དངོས་པོ་རྣམ་པར་གཞག་པ་ཡིན་ནོ། །དེ་ལྟ་ན་ཡང་རྟོགས་པ་ཁྱད་པར་མེད་པར་སྒྲ་ལས་བྱུང་བ་ལ་སོགས་པའི་ཚད་མ་ལས་ཀྱང་། རྫས་དང་བྱ་བ་ལ་སོགས་པའི་གཞལ་བྱ་ཡིན་པའི་ཕྱིར།
[4b.5]འཇིག་རྟེན་པར་གྱུར་པའི་རྟོག་པར་བྱེད་པ་དག་གིས་གཞག་པར་བྱ་བས་ཡོངས་སུ་རྟོག་པའི་ངལ་བ་དོན་མེད་དོ། །འདི་ལྟར་རྟོགས་པ་རྟོགས་པ་ཉིད་དུ་གྲུབ་པ་རྟོགས་པ་མ་ཡིན་ནོ་ཞེས་རྟོགས་པ་གཞན་གྱི་རྣམ་པར་གཞག་པ་མ་ཡིན་པ་གང་ཡིན་པའམ། ཡང་ན་ཐེ་ཚོམ་གྱི་རང་བཞིན་ཉིད་ཀྱིས་གང་
[4b.6]ཡང་རུང་བའི་ཆར་གནས་པ་མ་ཡིན་པའི་ཕྱིར་རང་ཉིད་རྣམ་པར་མི་གནས་པར་མ་སྐྱེས་པ་སྔོན་པོ་ལ་སོགས་པའི་རྟོགས་པ་དེ་ཉིད་ཀྱིས་འཇིག་རྟེན་པའི་དོན་རྣམ་པར་འཇོག་པར་བྱེད་ཀྱི། རྨི་ལམ་ལ་སོགས་པའི་ཤེས་པ་ནི་མ་ཡིན་ནོ། །དབང་པོའི་ཤེས་པ་བཞིན་དུ་རྣམ་པར་རྟོག་པའི་ཤེས་པ་ལས་
[4b.7]ཀྱང་ཡིན་ཞིང་སྒྲ་དང་ཉེ་བར་འཇལ་བ་ལ་སོགས་པ་དག་ལས་ཀྱང་ཡིན་ནོ། །འོན་ཏེ་འཇིག་རྟེན་པའི་ཚད་མས་གྲུབ་པ་འཇིག་རྟེན་པའི་དོན་རྣམ་པར་འཇོག་པ་གང་ཡིན་པ་འདི་ནི་རྒྱན་ཉིད་ཡིན་ནོ་ཞེ་ན་བདེན་ཏེ་འོན་ཀྱང་བསྟན་བཅོས་ནི་རྩིས་པས་བྲིས་པའི་འགྲོ་ཡིག་དང་འདྲ་བར་འགྱུར་རོ། །འོན་ཏེ་
[5a]
[5a.1]འཇིག་རྟེན་པས་གྲུབ་པ་ཉིད་ཕྱིན་ཅི་ལོག་ཏུ་རྟོགས་པའི་མི་མཁས་པའི་དབང་དུ་བྱས་ནས་བསྟན་བཅོས་འཇུག་གོ་ཞེ་ན། དེ་ཡང་འཇིག་རྟེན་པའི་དངོས་པོ་བསྟན་པའི་འབྲས་བུ་ཅན་ཉིད་ཀྱིས་སྔར་བརྗོད་པའི་རྣམ་པ་ཉིད་དོ། །དོན་དུ་གཉེར་བ་ཡོད་ན་ནི་དེ་འཇིག་རྟེན་
[5a.2]ཉིད་ལས་རྟོག་པར་འགྱུར་བས་བསྟན་བཅོས་དོན་མེད་པ་ཉིད་ལ། དེ་ལྟ་མ་ཡིན་ན་བསྟན་བཅོས་ལས་ཀྱང་དེ་བཞིན་ནོ། །ཕྱིན་ཅི་ལོག་ཏུ་གྱུར་པ་ནི་མཐོང་བ་ལ་ཡང་རྨོངས་པར་ཐལ་ལོ་ཞེ་ན། འཇིག་རྟེན་པའི་ཚད་མས་རྙེད་པའི་མཐོང་བ་ལ་རྨོངས་པ་ལྡོག་པ་ནི་འཇིག་རྟེན་ཉིད་ལས་
[5a.3]དོན་དུ་གཉེར་བ་རྟོགས་པར་འགྱུར་རོ། །གལ་ཏེ་དེ་ལ་ཕྱིན་ཅི་ལོག་ཏུ་འགྱུར་བར་རིགས་པས་འཇིག་རྟེན་པའི་ལམ་རྟོགས་པའི་དོན་དུ་བསྟན་བཅོས་འཇུག་གོ་ཞེ་ན། གལ་ཏེ་རིགས་པ་དེ་ཡང་འཇིག་རྟེན་པའི་རྟོག་པའི་རང་བཞིན་ཡིན་ན་ནི་བསྟན་བཅོས་དོན་མེད་ལ། གཞན་དུ་
[5a.4]གྱུར་པ་ཡིན་ན་ཡང་གང་ལས་རྟོགས། དེའི་བུ་ཉིད་ལ་སོགས་པ་དག་ལ་རྗེས་སུ་དཔག་པར་འཁྲུལ་པ་བཟློག་པའི་འབྲས་བུ་ཡིན་ན། གལ་ཏེ་དེ་དག་གི་དེ་འཇིག་རྟེན་པ་ཡིན་ན་བཟློག་པར་མི་ནུས་སོ། །གཞན་དུ་ཡིན་ན་འཇིག་རྟེན་ཉིད་ལས་ལྡོག་གོ། །དེའི་ཕྱིར་དངོས་པོ་མ་
[5a.5]ཡིན་པ་མཐོང་བ་དང་། མཐོང་བ་ལ་མི་མཁས་པའི་འཇིག་རྟེན་ཉེ་བར་དམིགས་པ་ན་མཁས་པ་རྟོགས་པ་དང་རྟོགས་པར་བྱ་བ་བརྟག་པའི་ཕྱིར་བསྟན་བཅོས་སྦྱོར་ལ། དེ་ལ་ཡང་ཐབས་དངོས་པོའི་འཇུག་པ་རྗེས་སུ་རྟོགས་པ་ཡིན་ནོ། །དེ་ནི་རྗེས་སུ་དཔག་པ་བཤད་པས་བཤད་པར་
[5a.6]བྱས་པ་ཡིན་ཏེ། རང་རྒྱུད་དུ་ཚད་མ་གཞན་ཡིན་པར་དོགས་པ་བཟློག་པའི་ཕྱིར་རོ། །དེའི་ཕྱིར་སོ་སོར་ངེས་པའི་ཚད་མ་རྣམ་པར་བཞག་ནས་ངེས་པའི་གཞལ་བྱ་རྟོགས་པའི་ཕྱིར་དང་པོ་ཐབས་བསྟན་པའི་དོན་དུ་རྗེས་སུ་དཔག་པ་བཤད་པ་ཡིན་ནོ། །དེ་ལྟ་མ་ཡིན་ན་རྣམ་པར་རྟོག་པའི་
[5a.7]ཡུལ་ཡང་གཞལ་བྱ་དང་། སྒྲ་ལ་སོགས་པ་ཚད་མར་འགྱུར་རོ། །འོན་ཏེ་མང་དུ་རྗེས་སུ་དཔག་པ་དང་། དེའི་རྟེན་རྟོགས་སོ་ཞེ་ན། དེ་ཡང་མ་ཡིན་ནོ་ཞེས་བཤད་པ་ནི་དེ་ལ་ལོག་པར་རྟོགས་པས་ཞེས་བྱ་བའོ། །འཇིག་རྟེན་དང་འཇིག་རྟེན་པའི་ལམ་གྱི་རྗེས་སུ་འབྲང་བའི་བསྟན་
[5b]
[5b.1]བཅོས་ལ་དངོས་པོ་གནས་པའི་རྗེས་སུ་འགྲོ་བའི་ཚད་མ་མེད་པས་ན་དེ་དག་ནི་རྗེས་སུ་དཔག་པ་ལ་ལོག་པར་རྟོགས་པ་ཡིན་ནོ། །དེས་ན་རྗེས་སུ་དཔག་པ་རྣམ་པར་གཞག་པའི་ཕྱིར་བཤད་པ། ཕྱོགས་ཆོས་ཞེས་བྱ་བ་བསྒྲུབ་བྱའི་ཆོས་ཅན་གྱི་ཆོས་དང་། དེ་ཆས་ཁྱབ་པ་བསྒྲུབ་བྱའི་ཆོས་ཀྱིས་
[5b.2]ཁྱབ་པ་ནི་གཏན་ཚིགས་ཏེ། བསྒྲུབ་པར་བྱ་བའི་ཆོས་མེད་ན་མེད་པའི་ཕྱིར་དང་། དེ་ཡོད་ན་ནི་བསྒྲུབ་པར་བྱ་བའི་ཆོས་ཡོད་པའི་ཕྱིར་རོ། །ཅི་འདི་དངོས་པོའི་རང་བཞིན་རྗེས་སུ་བརྗོད་པ་ཙམ་དུ་ཟད་དམ། འོན་ཏེ་དེ་ལྟ་བུའི་རང་བཞིན་དུ་གྲུབ་པ་ཉེ་བར་བཀོད་པ་ཡིན། དེ་ལ་དངོས་པོ་ལ་
[5b.3]དེ་དེ་ལྟ་བུར་གྱུར་པའི་ཕྱིར་ནི་དེ་རྟོགས་པའི་འབྲས་བུ་ཉིད་མ་ཡིན་པའི་ཕྱིར། དེའི་རང་བཞིན་དུ་རྟོགས་པ་བརྗོད་པར་བྱ་བ་ཡིན་ནོ། །དེས་ན་དེའི་ཆས་ཁྱབ་པར་རྟོགས་པ་སྒྲུབ་བྱེད་ཡིན་པར་བརྗོད་པའི་ཕྱིར་གང་དུ་གཏན་ཚིགས་ཀྱི་རང་བཞིན་འདི་གྲུབ་པ་དེར་རང་བཞིན་འདི་ཉེ་བར་བསྡུ་བའི་ཕྱིར་
[5b.4]བཤད་པ། ཇི་སྐད་བརྗོད་པའི་རང་བཞིན་ཅན་གྱི་གཏན་ཚིགས་དེ་ནི་རྣམ་གསུམ་ཉིད་དེ་རྣམ་པ་གསུམ་ཁོ་ནའོ། །ཅིའི་ཕྱིར་ཞེ་ན། མེད་ན་མི་འབྱུང་ངེས་ཕྱིར་རོ། །དེའི་ཆས་ཁྱབ་པའི་མཚན་ཉིད་མེད་ན་མི་འབྱུང་བ་ངེས་པ་ནི་རྣམ་པ་གསུམ་ཉིད་ལ་ཡོད་པའི་ཕྱིར་ཏེ། དེ་ཉིད་རང་གི་བསྒྲུབ་བྱ་དང་
[5b.5]འབྲེལ་པའི་ཕྱིར་རོ། །འབྲེལ་པའི་རང་བཞིན་ཅན་གྱི་གཏན་ཚིགས་ནི་རྣམ་པ་གསུམ་ཡིན་ནོ། །དེས་ན་འདི་སྐད་དུ་བརྗོད་པ་ཡིན་ཏེ་མེད་ན་མི་འབྱུང་བ་ནི་འབྲེལ་པའི་བདག་ཉིད་ངེས་པ་ཡིན་ལ། དེ་ངེས་པའི་ཕྱིར་ཡང་རྣམ་པ་གསུམ་ཉིད་གཏན་ཚིགས་ཡིན་ནོ། །མེད་ན་མི་འབྱུང་བ་ངེས་པ་ནི་རྣམ་
[5b.6]པ་གསུམ་ལ་འདོད་པ་ཡིན་ལ་དེ་ལས་ནི་དེ་གཏན་ཚིགས་ཉིད་དུ་ངེས་པ་ཡིན་ནོ། །དེ་ལྟར་རྣམ་པ་གསུམ་ལ་མེད་ན་མི་འབྱུང་བ་ངེས་པར་སྒྲུབ་པ་ན། འདིར་དེའི་ཆས་ཁྱབ་པ་ཁས་ལེན་པ་དངོས་པོ་རྗེས་སུ་བརྗོད་པ་ཙམ་ནི་མ་ཡིན་གྱི། འོན་ཀྱང་འདི་ནི་དེ་ལྟ་བུའི་དངོས་པོར་བསྒྲུབ་པར་ནུས་པ་ཡིན་པས་
[5b.7]གང་གིས་གྲུབ་པ་དེ་ཉིད་དེར་དེའི་སྒྲུབ་པར་བྱེད་པ་ཡིན་ནོ་ཞེས་བརྗོད་པ་ཡིན་ནོ། །དེ་ལྟ་ན་འོ་ན་སྒྲུབ་པར་མི་ནུས་པ་བཞི་པ་ལ་སོགས་པ་དངོས་པོ་ལ་དེའི་ཆས་ཁྱབ་པ་ཡོད་པར་འགྱུར་རོ་ཞེ་ན་མ་ཡིན་ནོ་ཞེས་བཤད་པ་ནི་གཏན་ཚིགས་ལྟར་སྣང་བ་རྣམ་པ་གསུམ་ལས་གཞན་བཞི་པ་ལ་སོགས་པ་ཡིན་ནོ། །
[6a]
[6a.1]འདིའི་དེ་སྲེད་པའི་རྒྱུ་མཚན་དུ་བརྗོད་པ་གང་ཡིན་པ་དེ་ནི་གསུམ་ཉིད་ལ་ཡོད་ཀྱི་གཞན་དག་ལ་ཡང་མ་ཡིན་པས་གཏན་ཚིགས་ལྟར་སྣང་བའོ། །འདི་ཉིད་འདིར་མཚན་ཉིད་དུ་རིགས་ཏེ། རྟགས་ནི་བསྒྲུབ་བྱ་རྟོགས་པའི་འབྲས་བུ་ཅན་ཡིན་པའི་ཕྱིར་རོ། །གང་གི་ཚེ་གྲུབ་པར་
[6a.2]བྱེད་པ་ཡོད་ན་བསྒྲུབ་པར་བྱ་བ་ཡོད་པ་དེའི་ཚེ་དེར་དེ་ལས་བསྒྲུབ་བྱ་རྟོགས་པ་རིགས་པས་ན་བསྒྲུབ་བྱ་རྟོགས་པར་འགྱུར་རོ། །དེ་ལས་དེར་རྟོགས་པ་ནི་ཕྱོགས་ཀྱི་ཆོས་ཉིད་ལས་སོ། །སྒྲུབ་པར་བྱེད་པ་ཡོད་ན་བསྒྲུབ་བྱ་རྟོགས་པ་དེ་ཡོད་པ་ནི་རྗེས་སུ་འགྲོ་བ་ཡིན་ནོ། གལ་ཏེ་དེ་མ་ངེས་པ་ནི་རྟོགས་
[6a.3]པར་མི་འགྱུར་རོ། །མ་ངེས་པ་ཡང་སྒྲུབ་བྱེད་ཡོད་ཀྱང་རེས་འགའ་བསྒྲུབ་བྱ་མེད་པའི་ཕྱིར་རོ། །གང་གི་ཚེ་ལྡོག་པས་བསྒྲུབ་བྱ་མེད་ན་སྒྲུབ་བྱེད་མེད་པ་ལ་གྲུབ་པ་དེའི་ཚེ་ན་སྒྲུབ་བྱེད་ཡོད་ན་བསྒྲུབ་བྱ་རྟོགས་པ་ལ་རྩོད་པ་མེད་དོ། །དེའི་ཕྱིར་བསྒྲུབ་བྱ་རྟོགས་པའི་ཡན་ལག་ནི་ཚུལ་གསུམ་པོ་ཁོ་
[6a.4]ནའོ། །གལ་ཏེ་མེད་ན་མེད་པ་རང་བཞིན་མ་ཡིན་ཏེ་རྟགས་དངོས་པོར་གྱུར་པ་ལ་དངོས་པོ་མེད་པའི་རང་བཞིན་མེད་པའི་ཕྱིར་རོ་ཞེ་ན། གང་གིས་མེད་པ་དེ་ལྟར་མི་འགྱུར་བ་འདིར་དངོས་པོའི་རང་བཞིན་ནི་རྟགས་ཀྱི་ཆོས་སུ་བསྟན་པ་མ་ཡིན་ཏེ། རྗེས་སུ་འགྲོ་བ་ཡང་དངོས་པོའི་ཆོས་
[6a.5]ཉིད་མ་ཡིན་པའི་ཕྱིར་རོ། །འདི་ལྟར་མེ་ཡོད་ན་དུ་བ་འབྱུང་བའི་རང་བཞིན་ཉིད་ནི་དངོས་པོའི་ཆོས་སུ་འགྱུར་གྱི། དུ་བ་ཡོད་ན་མེ་ཡོད་དོ་ཞེས་བྱ་བ་འདི་ནི་དངོས་པོའི་ཆོས་མ་ཡིན་ཏེ། སྐད་ཅིག་སོ་སོ་ལ་མེད་པའི་ཕྱིར་དང་། རྒྱུན་གཞན་ཡང་མ་གྲུབ་པའི་ཕྱིར་རོ། །དེས་ན་སྐད་ཅིག་ལ་
[6a.6]བརྟེན་པའི་དངོས་པོ་ངེས་པ་ལ་བརྟེན་ནས་རྒྱུན་དུ་གྱུར་པ་འདི་ནི་དེ་ཡོད་ན་ཡོད་པ་ཡིན་ནོ། །འབྲེལ་པ་རྩ་བར་གྱུར་པ་ཉིད་ཀྱིས་དོན་སོ་སོར་ངེས་པ་གྲུབ་ན་རྟོགས་པའི་རྣམ་པ་ཅི་ཞིག་ལྟར་འབྱུང་བ་ནི་མི་འགལ་བའི་ཕྱིར་རོ། །རང་བཞིན་གྱི་གཏན་ཚིགས་ལ་ནི་ཆོས་ཐ་དད་པ་ཉིད་མེད་པའི་ཕྱིར་
[6a.7]གཞན་ཡོད་ན་གཞན་འགྱུར་བའི་ཆོས་ཉིད་ཡོད་པར་ག །ལ་འགྱུར་ཏེ། གཞན་ཉིད་མེད་པའི་ཕྱིར་རོ། །གལ་ཏེ་དེ་ལྟ་ན་དངོས་པོའི་ཆོས་འབྲེལ་པ་ཉིད་ཕྱོགས་ཀྱི་ཆོས་དང་ལྷན་ཅིག་རང་བཞིན་ཡིན་པར་འགྱུར་མོད། དངོས་པོ་མ་ཡིན་པའི་རྗེས་སུ་འགྲོ་བ་དང་ལྡོག་པས་ཅི་བྱ་ཞེ་ན། དེ་ལྟར་
[6b]
[6b.1]འགྱུར་བར་ནི་མི་ནུས་ཏེ། འབྲེལ་པ་ཡོད་ཀྱང་དེ་ལྟར་མ་རྟོགས་པའི་རྗེས་སུ་དཔག་པ་མི་འགྲུབ་པའི་ཕྱིར་རོ། །གང་གི་ཕྱིར་དུ་བ་མེའི་རྒྱུ་ཅན་ཡིན་ཞིང་བྱས་པ་ཉིད་ཀྱང་མི་རྟག་པའི་བདག་ཉིད་ཅན་ཡིན་པ་དེའི་ཕྱིར་ཐམས་ཅད་དུ་དུ་བ་ཡོད་ན་མེ་ཡོད་ལ་བྱས་པ་ཡིན་ན་མི་རྟག་པ་ཡིན་ནོ་ཞེས་
[6b.2]ཆོས་ཅན་ཐམས་ཅད་ལ་ངེས་པ་རྟོགས་ནས་སྐབས་ཀྱི་ཆོས་ཅན་ལ་རྟོགས་པའི་ཕྱིར་རོ། །དེ་ལྟ་མ་ཡིན་ཏེ་ཇི་སྲིད་དུ་རྒྱུ་མཚན་འདི་ལས་དུ་བ་ཡོད་ན་མེ་ཡོད་ལ་མེད་ན་དུ་བ་མི་འབྱུང་ངོ་ཞེས་མ་རྟོགས་ན། གང་གི་ཕྱིར་མེ་ལས་དུ་བ་འབྱུང་བ་དེའི་ཕྱིར་དུ་བ་མཐོང་ནས་མེ་རྟོགས་པར་ཇི་ལྟར་
[6b.3]འགྱུར། ཆོས་ཅན་གཅིག་ལ་བརྟེན་ནས་དེ་ལྟར་རྟོགས་པ་ཡང་མ་ཡིན་ཏེ་འོན་ཀྱང་ཐམས་ཅད་དུ་ཡིན་ནོ། །དེ་ལྟ་བུའི་ངོ་བོར་རྟོགས་པ་ཉིད་ཀྱིས་ཐམས་ཅད་ཁོངས་སུ་བསྡུས་པས་ཆོས་ཅན་ལ་ལྐོག་ཏུ་གྱུར་པ་བསྒྲུབ་པར་བྱ་བའི་ཆོས་སུ་རྟོགས་པ་ཡིན་ནོ། །དེས་ན་རྣམ་པ་འདི་ལྟ་བུ་རྟོགས་
[6b.4]པས་ཆོད་ནས་རྟོགས་པའི་ཕྱིར་འབྲེལ་པ་རྟགས་ཀྱི་མཚན་ཉིད་དུ་མ་བརྗོད་ཀྱི་འོན་ཀྱང་ཚད་མ་ཉིད་བརྗོད་པ་ཡིན་ནོ། །དེ་ནི་མདོ་འདི་ཉིད་དོན་གྱི་སྒོ་ནས་སྟོན་པ་ནི་ཕྱོགས་ནི་ཞེས་བྱ་བ་ལ་སོགས་པའོ། །འདིར་ཕྱོགས་ཆོས་ཞེས་བྱ་བ་ཕན་ཚུན་འབྲེལ་པ་འགལ་བའི་ཕྱིར་ཏེ། ཕྱོགས་ཞེས་བྱ་བའི་སྒྲ་ནི་
[6b.5]བསྒྲུབ་བྱ་བརྗོད་པའི་ཕྱིར་དང་། ཆོས་ནི་ཆོས་ཅན་ལ་བསྒྲུབ་པར་བྱ་བ་ཡིན་པའི་ཕྱིར་ན་ཆོས་ལ་ཆོས་གང་ལ་འཐད། དེས་ན་བྲམ་ཟེའི་ཁྱེའུ་ལ་སེང་གེ་ཞེས་བྱ་བ་ལྟར་མ་འབྲེལ་པས་ཕྱོགས་ནི་ཆོས་ཅན་ནོ་ཞེས་སྨོས་སོ། །ཆོས་ཅན་ལ་ཕྱོགས་སུ་བརྗོད་པ་ཡིན་གྱི། གང་གི་ཆོས་ཀྱི་སྒྲ་དང་ཆོས་མ་
[6b.6]འབྲེལ་པར་འགྱུར་བ་གཉི་ག་བརྗོད་པ་ནི་མ་ཡིན་ནོ། །སྒྲ་དོན་གཞན་ལ་འཇུག་པ་ནི་ཉེ་བར་བཏགས་པ་ལས་འཇུག་པ་ཡིན་ནོ། །དེ་ཡང་འདོད་པའི་དབང་གིས་དེར་འཇུག་པ་ན་དངོས་ཉིད་དུ་འགྱུར་ཏེ། དེ་ལ་ཡང་འདོད་པའི་དབང་གིས་ཞུགས་པའི་ཕྱིར་རོ། །དེའི་ཕྱིར་དོན་ཉིད་དོན་གཞན་
[6b.7]ལ་ཉེ་བར་འདོགས་པ་ཡིན་ལ་དེར་རང་གི་སྒྲ་ནི་རང་གི་དོན་ཉིད་ཀྱིས་འཇུག་པ་ཡིན་ནོ་ཞེས་སྨོས་པ་ནི། ཡན་ལག་ལ་སྤྱི་ཉེ་བར་བཏགས་པའི་ཕྱིར་རོ་ཞེས་བྱ་བའོ། །གལ་ཏེ་ཡང་ཆོས་ཆོས་ཅན་ལ་བསྒྲུབ་པར་བྱ་བ་ཡིན་གྱི་སྤྱི་ནི་མ་ཡིན་ཏེ། ཇི་སྐད་དུ། དེའི་ཕྱིར་ཆོས་ཉིད་ཆོས་ཅན་ལ་བསྒྲུབ་
[7a]
[7a.1]པར་བྱ་བའམ་ཕྱིན་ཅི་ལོག་ཏུ་བྱ་བ་ཡིན་ནོ་ཞེས་བཤད་པ། དེ་ལྟ་ན་ཡང་འབྲས་བུར་ཆོས་ཅན་ཆོས་དེ་དང་མ་འབྲེལ་པ་རྣམ་པར་བཅད་པས་བྱ་བ་འགྲུབ་པའི་ཕྱིར་ན་གང་ལས་དེ་ལ་ཕྱོགས་ཀྱི་སྒྲའི་དོན་ཉེ་བར་བཏགས་པས་དེའི་སྒྲ་འཇུག་པ་འགྲུབ་པ་སྤྱི་བསྒྲུབ་བྱར་བརྗོད་པ་ཡིན་ནོ། །
[7a.2]དོན་གཞན་ཉེ་བར་བཏགས་པས་དོན་གཞན་གོ་བར་བྱེད་པའི་ཐ་སྙད་འདོགས་པར་བྱེད་པ་པོ་ནི་མི་འདྲ་བར་བསྟན་པས་དགོས་པ་ཉིད་འགའ་ཞིག་འདོད་པ་ཡིན་ནོ་ཞེས་བཤད་པ་ནི་གལ་ཏེ་ཞེས་བྱ་བ་ལ་སོགས་པའོ། །མ་འབྲེལ་བའི་ཕྱིར་ཉེ་བར་གདགས་པར་བྱ་བ་ཡིན་པར་གནས་པས་ན་འདི་ཉེ་
[7a.3]བར་བཏགས་པ་ཡིན་པ་འགོག་པ་ནི་མ་ཡིན་གྱི། འོན་ཀྱང་སྒྲའི་དོན་གཞན་སྒྲོ་བཏགས་པའི་སྒོ་ནས་ཉེ་བར་བཏགས་པ་ལས་གཞན་ཉེ་བར་གདགས་པར་མི་བྱ་བ་རང་གི་སྒྲས་བརྗོད་པ་དེ་བྱ་བ་ཡིན་ནོ། །ཅིའི་ཕྱིར་ཞེ་ན་དགོས་པ་མེད་པའི་ཕྱིར་རོ། །འདི་སྐད་བརྗོད་པ་ཡིན་ཏེ། ཆོས་ཅན་རང་
[7a.4]གི་ཚིག་གིས་བརྗོད་པར་བྱ་བ་ཡིན་གྱི། ཚིག་དོན་གཞན་ཉེ་བར་བཏགས་པས་ནི་མ་ཡིན་ཏེ་དེ་ལྟར་བསྟན་པ་ལ་དགོས་པ་མེད་པའི་ཕྱིར་རོ། །ཇི་ལྟར་ལྷས་བྱིན་ལ་སེང་གེའི་དོན་ཉེ་བར་བཏགས་པས་དཔའ་བ་ལ་སོགས་པར་སྒྲུབ་པ་དེ་བཞིན་དུ་འདིར་འགའ་ཡང་མ་ཡིན་ནོ། །དེ་ཉིད་ཀྱི་ཕྱིར་
[7a.5]འདི་ལྟ་བུའི་བརྗོད་པ་ནི་ཡོན་ཏན་བསྟན་པའི་འབྲས་བུ་ཅན་ཉིད་ཀྱིས་ན་སྒྲ་རང་གི་དོན་ལ་འཇུག་ཀྱང་ཕལ་བར་བརྗོད་པ་ཡིན་གྱི། ཡོན་ཏན་བརྗོད་པའི་ཕྱིར་ནི་མ་ཡིན་ནོ། །འདི་བཟློག་པའི་ཕྱིར་བཤད་པ་ཉེ་བར་གདགས་པར་མི་བྱ་བ་མ་ཡིན་ཏེ། ཅིའི་ཕྱིར་ཞེ་ན་ཆོས་ཅན་གྱི་ཆོས་ཐམས་
[7a.6]ཅད་ཡིན་པ་དགག་པའི་ཕྱིར་རོ། །དེ་ཡང་ཅིའི་ཕྱིར་ཞེ་ན། བཤད་པ། དེར་ཉེ་བར་གདགས་སུ་རུང་བའི་ཆོས་ཅན་ཡིན་པར་རྟོགས་པར་བྱ་བའི་ཕྱིར་རོ། །ཉེ་བར་བཏགས་པའི་དགོས་པ་ཅན་གྱི་ཆོས་ཐམས་ཅད་ཡིན་པ་དགག་པ་ནི་ཕྱོགས་སུ་ཉེ་བར་གདགས་སུ་རུང་བའི་ཆོས་ཅན་ཡིན་པར་
[7a.7]བསྟན་པའི་ཕྱིར་རོ་ཞེས་བྱ་བའི་དོན་ཏོ། །ཉེ་བར་མ་བཏགས་པ་ནི་ཆོས་ཅན་རང་གི་ཚིག་གིས་བརྗོད་པ་ཡིན་ལ། དེ་ལྟ་ན་ཡང་ཆོས་ཅན་ཆོས་ཞེས་བསྟན་པ་ན་བསྒྲུབ་བྱ་དང་དཔེ་དང་གཉི་ག་མ་ཡིན་པའི་རང་བཞིན་གྱི་ཆོས་ཅན་ཡོད་པས་ཆོས་ཅན་གྱི་སྒྲ་སྤྱི་བརྗོད་པ་ཡིན་པའི་ཕྱིར་བསྒྲུབ་བྱ་དང་
[7b]
[7b.1]སྒྲུབ་བྱེད་དང་གཉི་ག་མ་ཡིན་པའི་ཆོས་ཅན་གྱི་ཆོས་ཀྱང་བརྗོད་པར་འགྱུར་རོ། །དེ་ཡང་གཏན་ཚིགས་སུ་བརྗོད་པར་འདོད་པའི་ཕྱིར་རྣམ་པ་དེ་ལྟ་བུ་དག་གཏན་ཚིགས་སུ་འགྱུར་རོ། །དེས་ན་དེ་ལྟར་ཉེ་བར་མ་བཏགས་ན་ཉེས་པ་གང་དུ་འགྱུར་བ་དེ་ཉེ་བར་བཏགས་པས་བཀག་པ་ཡིན་ནོ། །
[7b.2]ཉེ་བར་བཏགས་པ་དེ་ཡང་ངེས་པའི་ཆོས་ཅན་རྟོགས་པར་བྱེད་པ་ན་ཉེ་བར་མ་བཏགས་ན་ཐལ་བར་འགྱུར་བ་ཆོས་ཅན་ཀུན་གྱི་ཆོས་ཉིད་ཡིན་པས་འགོག་པར་བྱེད་དོ། །འདིར་ཆོས་ཅན་ཐམས་ཅད་ཀྱི་ཆོས་ཡིན་པ་བཀག་པས་ངེས་པའི་ཆོས་ཅན་རྟགས་པར་བྱེད་པ་ནི་མ་ཡིན་གྱི་འོན་ཀྱང་ཉེ་བར་
[7b.3]བཏགས་པས་དེར་རུང་བའི་ཆོས་ཅན་དུ་རྟོགས་ན་ཆོས་ཅན་ཐམས་ཅད་ཀྱི་ཆོས་ཡིན་པར་ཐལ་བར་མི་འགྱུར་བ་ཡིན་ནོ། །དེ་ལྟ་ན་ཡང་ཆོས་ཅན་གྱི་ཆོས་ཐམས་ཅད་ཡིན་པ་བཀག་པའི་དོན་ཉིད་ཀྱིས་དེར་ཉེ་བར་གདགས་སུ་རུང་བའི་ཆོས་ཅན་རྟོགས་པར་བྱ་བའི་དོན་ཡིན་པར་བརྗོད་པ་གང་
[7b.4]ཡིན་པ་དེ་ནི་ཉེ་བར་མ་བཏགས་པར་ཆོས་ཅན་གྱི་ཆོས་ཐམས་ཅད་ཡིན་པར་ཐལ་བ་བསྟན་པའི་ཕྱིར་རོ། །ཉེ་བར་མ་བཏགས་ན་ཐལ་བ་དེ་ནི་ཉེ་བར་བཏགས་པས་བཀག་པ་ཡིན་ནོ། །དེ་ལྟ་ན་འོ་ན་དེར་ཉེ་བར་གདགས་སུ་རུང་བའི་ཆོས་ཅན་ཡིན་པར་རྟོགས་པའི་དོན་གྱིས་ཆོས་ཅན་གྱི་ཆོས་
[7b.5]ཐམས་ཅད་ཡིན་པ་བཀག་པའི་དོན་གྱིས་འགྱུར་ཏེ། ངེས་པ་རྟོགས་ན་གཞན་དགག་པ་ཤུགས་ཀྱིས་རྟོགས་པའི་ཕྱིར་རོ། །བཟློག་པ་ནི་མ་ཡིན་ནོ་ཞེ་ན། གལ་ཏེ་དེར་ཉེ་བར་གདགས་སུ་རུང་བའི་ཕྱིར་ཆོས་ཅན་ཡིན་པར་རྟོགས་པའི་དོན་ཉིད་གཙོ་བོའི་དགོས་པ་མ་ཡིན་ན་དེ་ལྟར་འགྱུར་རོ། །
[7b.6]དེ་ལྟ་ན་ནི་ཆོས་ཅན་གྱི་ཆོས་ཐམས་ཅད་ཡིན་པ་བཀག་པའི་དོན་ཉིད་གཙོ་བོའི་དགོས་པར་འགྱུར་རོ། །འོ་ན་གཉི་ག་དགོས་པ་རང་རྒྱུད་པར་འགྱུར་རོ་ཞེ་ན་མ་ཡིན་ཏེ་བསྡུ་བ་མེད་པའི་ཕྱིར་རོ། །དེའི་ཕྱིར་ཉེ་བར་མ་བཏགས་ན་ཐལ་བའི་སྐྱོན་བསལ་བའི་འབྲས་བུ་ཅན་དུ་གྱུར་པ་ན། ཉེ་བར་བཏགས་
[7b.7]པས་ངེས་པའི་ཆོས་ཅན་རྟོགས་པར་བྱེད་པ་ཡིན་ནོ་ཞེས་བརྗོད་པའི་ཕྱིར་དེ་ལྟར་ཉེ་བར་བཀོད་དོ། །དེ་དགོས་པར་གནས་ན་ནི་བཟློག་པར་འགྱུར་ཏེ་ཕྱོགས་ཉེ་བར་བཏགས་པས་བསྟན་པའི་ཆོས་ཅན་གང་ཡིན་པ་དེ་རྟོགས་ན་གཞན་འགོག་པའི་ཕྱིར་རོ། །གང་ཞིག་དེར་ཉེ་བར་བཏགས་པར་རྟོགས་
[8a]
[8a.1]པར་བྱ་བ་དེ་ཡང་གང་ཡིན་ཞེ་ན། དེར་ཉེ་བར་གདགས་པར་འོས་པ་གང་ཡིན་པ་ཉིད་དོ། །དེ་ཡང་གང་ཡིན་ཞེ་ན། དེའི་ཕྱོགས་གཅིག་ཡིན་པའི་ཕྱིར་ཞེས་སྨོས་སོ། །ཕྱོགས་ནི་སྤྱི་ཡིན་ལ་དེ་ནི་ཕྱོགས་གཅིག་ཆོས་ཅན་ལ་ཉེ་བར་འདོགས་པ་ཡིན་ནོ། །དེས་ན་གང་
[8a.2]ཞིག་འདིའི་ཕྱོགས་གཅིག་ཡིན་པ་དེ་ཉིད་ཉེ་བར་གདགས་པར་འོས་པ་ཡིན་པའི་ཕྱིར་བསྒྲུབ་བྱའི་ཆོས་ཅན་ངེས་པ་དེ་ཉིད་རྟོགས་ཏེ་དེ་ཉིད་དེའི་ཕྱོགས་ཡིན་པའི་ཕྱིར་རོ། །དེའི་ཕྱིར་ཕྱོགས་སུ་གདགས་པར་འོས་པའི་ཆོས་ཅན་རྟོགས་པར་བྱ་བའི་ཕྱིར་ཉེ་བར་གདགས་པར་བྱས་ལ། དེ་ལྟ་
[8a.3]ཡིན་དང་སྒྲ་མི་རྟག་སྟེ་མིག་གི་གཟུང་བར་བྱ་བ་ཡིན་པའི་ཕྱིར་བུམ་པ་བཞིན་ནོ་ཞེས་བྱ་བ་དེ་ལྟ་བུ་ལ་སོགས་པ་ཆོས་ཅན་གྱི་ཆོས་ཞེས་སྨོས་ན་ཐལ་བར་འགྱུར་བ་དག་འཛིན་པ་གསལ་བ་ཡིན་ཏེ་མིག་གི་གཟུང་བྱ་ཉིད་ནི་སྒྲུབ་པར་བྱེད་པའི་ཆོས་ཅན་གྱི་ཆོས་ཡིན་པའི་ཕྱིར་རོ། །སོགས་པ་སྨོས་པས་
[8a.4]ནི་གཞི་ཐ་དད་པ་གཉི་ག་མ་ཡིན་པའི་ཆོས་ཅན་ལ་བརྟེན་པ་གསལ་བའོ། །ཕ་རོལ་པོ་ཉེ་བར་མི་གདགས་པ་གཞུང་འཇུག་པ་ན་ཇི་སྐད་བརྗོད་པའི་ཐལ་བར་འགྱུར་བ་མེད་པར་སྟོན་པ་ནི་གལ་ཏེ་ཆོས་ཞེས་བརྗོད་པས་ཀྱང་ཞེས་བྱ་བའོ། །ཆོས་ཅན་ཡང་ཡིན་ལ་གཞི་ཡང་ཡིན་པ་དེ་ནི་ཆོས་ཞེས་བརྗོད་
[8a.5]པས་ཀྱང་འགྲུབ་བོ། །ཆོས་ཅན་གྱི་སྒྲ་ནི་ཆོས་ཅན་ཙམ་བརྗོད་པ་ཡིན་ནོ། །དེས་ནི་ཆོས་ཅན་ཞེས་བྱ་བས་ཆོས་ཅན་དང་འབྲེལ་པའི་ཆོས་ཙམ་ཞིག་བརྗོད་པར་འགྱུར་གྱི། ཁྱད་པར་ལྷག་པ་ནི་མ་ཡིན་ལ་དེ་ནི་ཆོས་ཀྱི་རང་གི་ངོ་བོ་ཉིད་ཀྱིས་འགྲུབ་བོ། །དེས་ན་ཆོས་ཞེས་བརྗོད་པས་འདིའི་
[8a.6]རྟེན་ཆོས་ཅན་རྟོགས་པར་འགྱུར་ཏེ་དེ་ལ་བརྟེན་པ་མ་ཡིན་ན། ཆོས་ཅན་ཉིད་དུ་མི་འགྲུབ་པའི་ཕྱིར་རོ། །དེས་ན་སྤྱི་ཙམ་བརྗོད་པ་ཆོས་ཅན་གྱི་སྒྲ་དགོས་པ་བདེ་བར་འགྱུར་རོ། །ཁྱད་པར་བརྗོད་པར་འདོད་ན་ནི་ཆོས་ཅན་སྨོས་པ་དོན་དང་ལྡན་པར་འགྱུར་ཏེ། ཁྱད་པར་ཅན་གྱི་ཆོས་ཅན་ལ་བརྟེན་པའི་
[8a.7]ཆོས་ནི་ཆོས་ཀྱི་རང་བཞིན་ཉིད་ལས་མི་འགྲུབ་པའི་ཕྱིར་རོ། །དེའི་ཕྱིར་ཆོས་ཅན་ཞེས་སྨོས་པའི་ཤུགས་ཀྱིས་བསྒྲུབ་པར་བྱ་བའི་ཆོས་ཅན་ཡིན་པར་འགྲུབ་པོ། །བསྒྲུབ་བྱའི་ཆོས་ཅན་ཁྱད་པར་ཅན་ཉིད་ཀྱི་དབང་དུ་བྱས་ནས་འདིར་ཆོས་ཅན་སྒྲ་སྦྱར་བ་འཐད་ཀྱི་ཆོས་ཙམ་ལ་ནི་མ་ཡིན་ནོ་ཞེས་བྱ་བའི་
[8b]
[8b.1]ཐ་ཚིག་གོ། །ཁྱད་པར་ཅན་གྱི་ཆོས་ཅན་ཡང་ཆོས་ཅན་ཉིད་ཡིན་པས་སྤྱིའི་ཚིག་གིས་ཀྱང་བརྗོད་པར་ནུས་པ་ཡིན་ལ་སྦྱར་བ་ལ་མི་ལྟོས་ཀྱང་སྦྱར་བས་ནི་ཁྱད་པར་བརྗོད་པར་འདོད་པ་ཡིན་ཏེ་དོན་མེད་པ་མ་ཡིན་པའི་ཕྱིར་རོ། །དེ་ལ་ཡང་ཇི་སྒྲུབ་པར་བྱེད་པ་དང་གཉི་ག་མ་ཡིན་པའི་ཆོས་ཅན་ཡིན་པར་
[8b.2]ཐལ་བར་མི་འགྱུར་བ་དེ་སྟོན་པ་ནི་ཉེ་བ་ཡིན་པའི་ཕྱིར་ཞེས་བྱ་བ་ཡིན་ནོ། །ཁྱད་པར་ལ་བརྟེན་པར་གྲུབ་པ་ན་ཁྱད་པར་ངེས་པར་འཛིན་པ་ནི་སྒྲ་ལས་མི་འགྲུབ་པའི་ཕྱིར་རྒྱུ་མཚན་གཞན་ལས་ཡོངས་སུ་གཟུང་བར་གྲུབ་པ་སྤང་བ་ལ་ཚད་མ་མེད་དོ། །དེས་ན་འདིར་ཆོས་ཅན་གྱི་ཚིག་གིས་ནི་བསྒྲུབ་བྱའི་
[8b.3]ཆོས་རྟོགས་པའི་དོན་དུ་གཟུང་བའི་ཆོས་ཅན་ཉིད་སྨོས་པར་འཐད་པ་ཡིན་ནོ། །དེས་ན་བསྒྲུབ་བྱའི་ཆོས་ཅན་གྱི་ཆོས་ཉིད་དུ་གྲུབ་པ་ན་ཉེ་བར་བཏགས་པས་དོན་མེད་དེ། ཆོས་ཅན་ཆོས་ཞེས་ཉེ་བར་མ་བཏགས་པ་ཉིད་དུ་སྦྱར་བར་རིགས་སོ་ཞེ་ན། དགོས་པ་ནི་དགག་པའི་ཕྱིར་སྨོས་པ་ནི་མ་ཡིན་ཏེ་
[8b.4]ཞེས་བྱ་བའོ། །དེ་ལྟར་བསྒྲུབ་བྱའི་ཆོས་ཅན་འགྲུབ་པ་ནི་མ་ཡིན་ནོ། །ཅིའི་ཕྱིར་ཞེ་ན་ཐུན་མོང་མ་ཡིན་པའི་ཕྱིར་རོ། །དེ་སྨྲས་པ་ནི་དཔེའི་ཆོས་ཅན་ཡང་ཞེས་བྱ་བའོ། །རྒྱུ་མཚན་གཞན་ལས་གྲུབ་པ་འཛིན་པས་ན་ཉེ་བར་གྱུར་པ་ཉིད་ཆོས་ཅན་གྱི་ཚིག་གིས་སྨོས་པས་གཉི་ག་མ་ཡིན་པའི་
[8b.5]བདག་ཉིད་ཀྱི་ཆོས་ཅན་གསལ་བར་གྲུབ་ཏུ་ཆུག་མོད་བསྒྲུབ་བྱ་དང་སྒྲུབ་བྱེད་ཀྱི་ཆོས་ཅན་སྨོས་པ་ལ་ནི་ཁྱད་པར་དུ་བྱེད་པའི་རྒྱུ་ཡོད་པ་མ་ཡིན་ཏེ། དཔེའི་ཆོས་ཅན་ཡང་སྒྲུབ་བྱེད་ཀྱིས་འཛིན་པར་ཁྱད་པར་མེད་པའི་ཕྱིར་རོ། །འདིར་དེའི་ཆས་ཁྱབ་པ་ཞེས་བྱ་བས་ཞེས་སྨྲས་ཏེ། ཆོས་ཅན་ཞེས་སྨོས་
[8b.6]པ་ན་གཟུང་བའི་ཆོས་ཅན་ལ་འཇུག་པར་ངེས་པར་བྱ་བ་ཡིན་པས་དེ་ལ་ཡོད་པ་ཉིད་དུ་བསྟན་པར་བྱ་བ་ཡིན་ནོ། །དཔེའི་ཆོས་ཅན་ལ་ནི་ཆོས་ཡོད་པར་གྲུབ་པ་ཉིད་ཡིན་ཏེ། འདི་ལྟར་དེའི་ཆས་ཁྱབ་པ་ཞེས་བྱ་བ་ནི་རྗེས་སུ་འགྲོ་ལྡོག་བརྗོད་པ་ཡིན་ལ། དེ་ཉིད་ཀྱང་གཅིག་གི་སྒོ་ནས་དཔེས་
[8b.7]བསྟན་པར་བྱ་བ་ཡིན་ཏེ། དེས་ན་སྒྲུབ་པར་བྱེད་པའི་ཆོས་དེ་ལ་ཡོད་པ་ནི་གྲུབ་པ་ཉིད་དོ། །དེའི་ཕྱིར་དེ་ནི་ཉེ་བ་ཡིན་ཡང་ཆོས་ཅན་གྱི་ཚིག་གིས་སྨོས་པ་དོན་མེད་པས་ངག་ལ་དོན་ཡོད་པར་བསྟན་པ་བསྒྲུབ་པར་བྱ་བའི་ཆོས་ཅན་དེ་ཉིད་འདིར་སྨོས་པ་ཡིན་ནོ་ཞེ་ན། འདི་དགག་པའི་ཕྱིར་གྲུབ་བཞིན་
[9a]
[9a.1]དུ་ཞེས་སྨོས་སོ། །དེའི་ཆས་ཁྱབ་པ་ཞེས་བྱ་བས་གཏན་ཚིགས་དཔེའི་ཆོས་ཅན་ལ་ཡོད་པར་གྲུབ་བཞིན་དུ་ཡང་ཡོད་པར་བསྟན་པ་ནི། དེ་ཉིད་ཀྱི་ཆོས་གང་ཡིན་པ་དེ་ཁོ་ན་གཏན་ཚིགས་ཡིན་ནོ་ཞེས་བརྣན་པའི་ཕྱིར་ཡིན་པར་འགྱུར་ཏེ། དེ་ལྟ་ན་ཡང་ཡང་བསྒྲུབ་པ་
[9a.2]འབྲས་བུ་དང་བཅས་པའི་ཕྱིར་རོ། །གལ་ཏེ་བསྒྲུབ་པ་འབྲས་བུ་མེད་པ་ཉིད་མ་ཡིན་པའི་ཕྱིར་བརྣན་པར་དོགས་པ་མེད་པ་མ་ཡིན་ནམ། འདི་ལྟར་དེའི་ཆས་ཁྱབ་པ་ཞེས་བྱ་བས་ནི་དེ་དཔེའི་ཆོས་ཅན་གྱི་ཆོས་ཀྱིས་ཁྱབ་པར་བརྗོད་པ་ཡིན་ལ་དཔེའི་ཆོས་ཅན་གྱི་ཆོས་གཏན་ཚིགས་སོ་ཞེས་བྱ་བ་འདིས་
[9a.3]ནི་གཏན་ཚིགས་ཉིད་དུ་ཡིན་ཏེ། དེ་ན་དཔེའི་ཆོས་ཅན་གྱི་ཆོས་དཔེའི་ཆོས་ཅན་གྱི་ཆོས་ཀྱིས་ཁྱབ་པ་ཞེས་བྱ་བ་འདི་ལ་སྒྲུབ་པ་དོན་མེད་པ་མ་ཡིན་པའི་ཕྱིར་བརྣན་པའི་ཕྱིར་ཡིན་པར་དོགས་པར་མི་འགྱུར་རོ་ཞེ་ན། བདེན་ཏེ་ཁས་བླངས་ནས་ཉེ་བར་བཀོད་པ་ཡིན་ནོ། །རྣམ་པ་འདི་ལྟ་བུའི་ཡུལ་
[9a.4]ལ་བརྣན་པ་ཁས་ལེན་པ་ཡོད་དོ་ཞེས་སྟོན་པ་ནི་མཐུན་པ་ཁོ་ན་ལ་ཞེས་བྱ་བ་ཡིན་ནོ། །མཐུན་པ་ཁོ་ན་ལ་ཡོད་པ་ཞེས་བྱ་བ་འདིས་མཐུན་པའི་ཕྱོགས་ལ་ངེས་པར་ཡོད་པ་ཉིད་དུ་བསྟན་པས་མཐུན་པའི་ཕྱོགས་མ་ཡིན་པ་ལས་ལྡོག་པ་གྲུབ་མོད་ཀྱི་དེ་མེད་པ་ལ་མེད་པ་ཞེས་མི་མཐུན་པའི་ཕྱོགས་
[9a.5]ལས་ལྡོག་པ་སྟོན་པར་བྱེད་པ་གང་ཡིན་པ་འདིས་ནི། བསྒྲུབ་པར་བྱ་བ་མེད་པ་ལ་མེད་པ་སྨོས་པ་དེ་བཞིན་ནོ། །དེ་ནི་འཆད་པ་པོ་དག་གིས་ངེས་པའི་ཕྱིར་ཡིན་པར་བཤད་དོ། །མི་མཐུན་པའི་ཕྱོགས་རྣམ་པ་གསུམ་པོ་དེ་ལས་གཞན་པ་དང་དེ་དང་འགལ་བ་དང་དེ་མེད་པའི་རང་བཞིན་ལས་དེ་
[9a.6]མེད་པ་ལ་མེད་པ་ཉིད་ཡིན་གྱི་གཞན་ལ་མེད་པ་ལ་ནི་མ་ཡིན་ནོ་ཞེའོ། །དེས་ན་དེ་ལྟར་བསྒྲུབ་བྱ་སྒྲུབ་བྱེད་མ་ཡིན་པ་ནི་རང་བཞིན་གྱི་ཆོས་ཅན་བསལ་ཀྱང་དཔེའི་ཆོས་ཅན་ཡིན་པར་ཡོངས་སུ་འཛིན་པ་ནི་གསལ་བར་མི་ནུས་པས་ཆོས་ཅན་ཞེས་སྨོས་པས་བསྒྲུབ་བྱའི་ཆོས་ཅན་མི་རྟོགས་པའི་ཕྱིར་ཉེ་བར་
[9a.7]གདགས་པར་བྱ་བ་ཉིད་པས་ཕྱོགས་ཞེས་སྨོས་པ་ཡིན་ནོ། །གལ་ཏེ་སྤྱི་ཙམ་བརྗོད་པའི་ཆོས་ཅན་གྱི་ཚིག་སྦྱར་བ་དོན་མེད་པའི་ཕྱིར་ཁྱད་པར་བརྗོད་པར་འདོད་པར་གྲུབ་པ་ནི་དཔེའི་ཆོས་ཅན་ཉིད་ནི་ཁྱད་པར་ཡིན་པར་མི་འགྱུར་བ་མ་ཡིན་ནམ། དེ་ལ་ཡོད་པ་ནི་གཞན་དུ་རྟོགས་པའི་ཡན་ལག་ཏུ་ཉེ་བར་བསྟན་
[9b]
[9b.1]པ་ཡིན་ཏེ་དེའི་ཆས་ཁྱབ་པ་ཉིད་ཀྱིས་གཏན་ཚིགས་ཉིད་དུ་གྱུར་པའི་ཕྱིར་རོ། །དཔེའི་ཆོས་ཅན་ལ་ནི་ཡོངས་སུ་ཟིན་ཀྱང་གཏན་ཚིགས་གཏན་ཚིགས་ཉིད་མ་ཡིན་ཏེ་དཔེར་མ་རྟོགས་པ་རྟོགས་པར་བྱེད་པའི་བདག་ཉིད་ཤེས་པར་བྱེད་པའི་ཆོས་མེད་པའི་ཕྱིར་རོ། །དེས་ན་དེའི་ཆས་ཁྱབ་པའི་གཏན་
[9b.2]ཚིགས་གང་ལ་ཡོད་པས་གཏན་ཚིགས་ཀྱི་དངོས་པོ་ཉིད་དུ་འགྱུར་བ་དེའི་ཆས་ཁྱབ་པ་ཉིད་ཀྱིས་ངེས་པར་བྱེད་པའི་དངོས་པོའི་ཡན་ལག་ཏུ་གྱུར་པས་རྟོགས་པར་བྱ་བའི་ཆོས་ཉིད་ཀྱི་ཆོས་ཅན་ཤེས་པར་བྱེད་པའི་རྟེན་དུ་གྱུར་པ་འགའ་ཞིག་འཕངས་པ་ཉིད་དོ། །དེས་ན་ཆོས་ཅན་གྱི་གཏན་ཚིགས་
[9b.3]ཞེས་བྱ་བས་མ་རྟོགས་པ་རྟོགས་པར་བྱེད་པའི་ཡན་ལག་དེའི་ཆས་ཁྱབ་པ་ལ་ལྟོས་པ་ཆོས་ཅན་དེ་ལ་ཡོད་པ་ན་གཏན་ཚིགས་ཀྱི་དངོས་པོར་བརྗོད་པ་ཡིན་ནོ། །གཞི་ཐ་དད་པ་ལ་ཡང་ཐལ་བ་མ་ཡིན་ཏེ། རྟོགས་པར་བྱ་བའི་ཆོས་ཉིད་ཀྱིས་ཆོས་ཅན་འཕངས་པའི་ཕྱིར་རོ། །དོགས་པ་འདི་ལ་
[9b.4]བརྗོད་པ་ནི་ཤུགས་ཀྱིས་ཞེས་བྱ་བ་ཡིན་ནོ། །འབད་པས་ཐོབ་པར་བྱ་བའི་དོན་ངེས་པའི་ཚིག་སྦྱར་བ་ནི་སྨྲ་བ་ལ་བཟོ་བ་མ་ཡིན་ནོ། །དེས་ན་ཇི་སྐད་བརྗོད་པའི་ཤུགས་ཀྱིས་བསྒྲུབ་པར་བྱ་བའི་ཆོས་ཅན་གྱི་དོན་གོ་ན་རྟོགས་པར་དཀའ་བར་འགྱུར་ཏེ་རིགས་པས་གོ་བའི་ཕྱིར་རོ། །དོན་གྱི་རྗེས་སུ་འབྲང་
[9b.5]བས་བྱས་པའི་དཀའ་བ་སྤངས་ནས་སྒྲས་རྟོགས་པར་བྱ་བའི་ཕྱིར་བསྟན་བཅོས་ཡིན་ནོ། །དེས་ན་རྟོགས་པར་དཀའ་བ་ཡོངས་སུ་སྤངས་པའི་ཕྱིར་ཡང་ཕྱོགས་ཞེས་སྨོས་པ་ཡིན་ནོ། །གལ་ཏེ་ཕྱོགས་བསྒྲུབ་བྱའི་ཆོས་ཅན་གྱི་ཆོས་ཉིད་ཡིན་ན། ཆོས་ཅན་གཞན་ལ་མེད་པའི་ཆོས་ཐུན་མོང་མ་ཡིན་པ་
[9b.6]ཉིད་ཡིན་ནོ། །གཏན་ཚིགས་སྨྲས་པ་ནི་དེའི་ཁྱད་པར་ལ་ལྟོས་པ་ཞེས་བྱ་བ་ཡིན་ནོ། །གང་གི་ཚེ་ཆོས་འདི་ཕྱོགས་ཀྱི་ཡིན་པ་དེའི་ཚེ་དེ་མེད་པར་མི་སྲིད་པས་གཞན་ལ་ཡང་འདི་ཡོད་པས་ཆོས་ཅན་དེ་དང་ལྡན་པ་ཉིད་དུ་འགྱུར་བ་ཡིན་ནོ། །ཆོས་ཅན་གཞན་གྱིས་རྣམ་པར་བཅད་པ་དེ་ནི་ཆོས་ཅན་གཞན་
[9b.7]ལ་འཇུག་པར་མི་སྲིད་པས་ན་ཐུན་མོང་མ་ཡིན་པ་ཉིད་དོ། །ཅི་སྟེ་གང་གི་རྣམ་པ་དེ་ལྟ་བུ་ཉིད་གཞན་ལ་ཡོད་པར་དོགས་པ་ཕྱོགས་ཀྱིས་རྣམ་པར་བཅད་པ་དེས་རྣམ་པར་བཅད་པ་མི་འདོར་རོ་ཞེས་བྱ་བ་འདི་ལ་རིགས་པ་ཅི་ཡོད་ཅེ་ན། ཆོས་ཉིད་ཀྱིས་ཆོས་ཅན་དང་འབྲེལ་པ་འཕངས་པའི་ཆོས་ཉིད་ནི་ངེས་པ་མེད་པར་བསྒྲུབ་བྱའི་ཆོས་
[10a]
[10a.1]ཅན་གྱི་ཡིན་པའམ། སྒྲུབ་བྱེད་ཀྱི་ཆོས་ཅན་གྱི་ཡིན་པར་འགྱུར་རོ། །དེ་གང་གི་ཚེ་སྒྲུབ་བྱེད་ཀྱི་ཆོས་ཅན་གྱི་ཆོས་ཡིན་པ་དེའི་ཚེ་བསྒྲུབ་བྱའི་ཆོས་ཅན་གྱི་མ་ཡིན་ཏེ། དེས་ན་མི་འགྱུར་བ་དེ་ཉིད་སེལ་བས་སྒྲ་འདི་དོན་དང་བཅས་པར་འགྱུར་བས་དེ་ལ་ཡོད་པ་ཆོས་
[10a.2]ཅན་གཞན་ལ་མེད་པའི་ཕྱིར་ངེས་པ་གྲུབ་པས་ཐུན་མོང་མ་ཡིན་པ་ཉིད་དོ་སྙམ་ན། དོགས་པ་འདི་སློབ་དཔོན་གཞན་དུ་ངེས་པ་སྲིད་པ་སྟོན་པ་ནི་མ་ཡིན་ཏེ་ཞེས་བྱ་བ་ཡིན་ནོ། །ངེས་པ་རྟོགས་ཀྱང་འདི་ལྟར་འདིར་མི་འཐད་དོ། །གལ་ཏེ་སྒྲུབ་བྱེད་ཀྱི་ཆོས་ཅན་ལ་ཡོད་པ་དང་བསྒྲུབ་བྱའི་ཆོས་ཅན་
[10a.3]ལ་ཡོད་པ་འགལ་ན་དེའི་ཚེ་ཆོས་ཅན་གཞན་ལ་ཡོད་ན་བསྒྲུབ་བྱའི་ཆོས་ཅན་ལ་མེད་པར་འགྱུར་བའི་ཕྱིར་མེད་པ་དེ་ཉིད་ལ་ལྟོས་ནས་སྒྲ་སྦྱར་བ་ནི་ཆོས་ཅན་གཞན་ལ་ཡོད་པ་འགལ་བས་དེ་ལ་ཡོད་པར་བརྗོད་པ་དེ་ཉིད་ལ་ཡོད་པ་ཞེས་བྱ་བའི་དོན་འདིར་འགྱུར་བ་ཞིག་ན་གང་གི་ཚེ་ཆོས་ཐུན་མོང་གི་རང་
[10a.4]བཞིན་ཡིན་པའི་ཕྱིར་ཆོས་ཅན་མང་པོ་དག་ལ་གཅིག་པར་ཡང་ཡོད་པར་སྲིད་པ་དེའི་ཚེ་གང་ཞིག་སྒྲས་བརྗོད་པར་བྱ་བ་ཆོས་ཉིད་ཀྱིས་མ་འཕངས་པའི་ཆོས་ཅན་ལ་ཡོད་པ་ནི་ཡོད་པ་མ་ཡིན་ནོ། །ཆོས་ནི་ཆོས་ཅན་ཐམས་ཅད་ལ་ཡོད་པར་འགྱུར་བའི་ངེས་པ་མེད་པའི་ཕྱིར་ཏེ། མིག་གིས་
[10a.5]གཟུང་བྱ་ཉིད་ནི་དཔེ་ཉིད་ལ་ཡོད་པའི་ཕྱིར་དང་མཉན་བྱ་ཉིད་ནི་བསྒྲུབ་བྱ་ཉིད་ལ་ཡོད་པའི་ཕྱིར་དང་། ཆོས་ཉིད་ཀྱིས་ཆོས་དང་ཆོས་ཅན་འབྲེལ་པས་མ་བསལ་བ་འདོད་རྒྱལ་བའི་མེད་པ་ལ་ལྟོས་ནས་སྒྲའི་སྦྱོར་བ་འཇུག་པ་ནི་མི་ལྡན་པ་རྣམ་པར་གཅོད་པ་ཉིད་ཀྱིས་མཐར་ཐུག་པར་འགྱུར་བ་ཡིན་གྱི།
[10a.6]གཞན་དང་ལྡན་པ་རྣམ་པར་གཅོད་པ་ནི་མ་ཡིན་ནོ། །དེར་འདོད་རྒྱལ་བའི་མེད་པ་བསལ་བ་ནི་ཆོས་ཅན་གཞན་ལ་ཡང་ཡོད་པ་མི་འགལ་བའི་ཕྱིར་རོ། །ཡོད་པ་ལ་ནི་མེད་པ་འགལ་བའི་ཕྱིར་དེ་རྟོགས་པ་ན་མ་འབྲེལ་བ་རྣམ་པར་གཅོད་པ་ཉིད་ཡིན་ནོ་ཞེས་བཤད་པ་ནི་མི་ལྡན་པ་རྣམ་པར་གཅོད་པས་
[10a.7]ཁྱད་པར་དུ་བྱས་པའི་ཕྱིར་ཡིན་གྱི་ཞེས་བྱ་སྟེ། འདོད་རྒྱལ་བའི་མེད་པ་བཟློག་པས་ཕྱོགས་ཀྱི་ཆོས་ཁོ་ན་ཡིན་ཀྱི་ཆོས་མ་ཡིན་པ་ནི་མ་ཡིན་ནོ་ཞེས་ཆོས་ཕྱོགས་དང་མ་འབྲེལ་བ་རྣམ་པར་བཅད་པས་འབྲེལ་པར་བྱེད་པའི་ཕྱིར་རོ། །མི་ལྡན་པ་རྣམ་པར་བཅད་པའམ་གཞན་དང་ལྡན་པ་རྣམ་པར་བཅད་པ་
[10b]
[10b.1]ཡང་ཇི་ལྟ་བུར་གྱུར་པ་དག་ཅིག་ཅེ་ན། འཇིག་རྟེན་པའི་དཔེས་སྟོན་པ་ནི། དཔེར་ན་ནག་པ་ཞེས་བྱ་བ་ལ་སོགས་པ་ཡིན་ནོ། །ཕྱོགས་ཆོས་ཞེས་བྱ་བ་རྣམ་པར་བཀྲལ་ནས། དེ་ཆས་ཁྱབ་པ་ནི་ཞེས་བྱ་བ་རྣམ་པར་འབྲེལ་པ་ནི་དེའི་ཆ་ནི་དེའི་ཆོས་ཡིན་གྱི་ཞེས་བྱ་བ་སྟེ། ཉེ་བར་བཏགས་པའི་ཕྱིར་
[10b.2]ན་ཆའི་སྒྲ་འདི་ན་ཆོས་ཀྱི་དོན་ཡིན་ནོ་ཞེས་བྱ་བའི་ཐ་ཚིག་གོ། །དེའི་ཕྱོགས་གཅིག་ནི་མ་ཡིན་ཏེ་ཞེས་བྱ་བ་ནི་དངོས་ཀྱི་དོན་ལ་འཇུག་པ་ཉིད་འགོག་པའོ། །དོན་དེ་ལ་གནོད་པ་བརྗོད་པ་ནི་ཕྱོགས་ཞེས་བྱ་བའི་སྒྲ་སྤྱི་ལ་སྤྱི་བྱ་བའི་ཕྱིར་རོ་ཞེས་བྱ་བ་ཡིན་ནོ། །དེ་ཞེས་བྱ་བ་འདིས་ནི་ཕྱོགས་བཟུང་བ་ཡིན་ལ་
[10b.3]དེ་ལ་ནི་ཕྱོགས་གཅིག་སྲིད་པ་མ་ཡིན་ཏེ་སྤྱིའི་རང་བཞིན་མ་ཡིན་པའི་ཕྱིར་རོ། །དེས་ན་འདིར་ཆའི་སྒྲ་ནི་ཕྱོགས་གཅིག་ཏུ་སྒོ་བཏགས་ནས་ཆོས་ལ་འཇུག་པ་ཡིན་ནོ། །གང་ཞིག་ཉེ་བར་གདགས་པའི་སྦྱོར་བ་ཁས་ལེན་པ་དེའི་ཆོས་ཀྱིས་ཁྱབ་པ་ཞེས་མ་བརྗོད་པ་ཡང་ཅི་སྟེ་ཞེ་ན་སྨྲ་བ་པོའི་བསམ་པའི་
[10b.4]དབང་གིས་ཞེས་སྨོས་སོ། །འདིར་སྨྲ་བ་པོའི་བསམ་པ་ནི་ཡོད་པ་ཡིན་ནོ། །དེ་ཡང་གང་ཞེ་ན་སྐབས་སུ་གྱུར་པ་ཉིད་ཀྱིས་ན་མ་བརྗོད་པ་གང་ཡིན་པའོ། །དེ་ལྟ་ཡིན་དང་། ཇི་ལྟར་འདིར་སྤྱིར་བརྗོད་པ་ཉིད་ཀྱིས་འདོད་པ་རྟོགས་པར་བྱེད་པ་མ་ཡིན་པའི་ཕྱིར་ཆོས་ཅན་གྱི་ཚིག་སྦྱོར་བ་བཀག་པ་དེ་
[10b.5]བཞིན་དུ་ཆོས་ཀྱི་ཚིག་ཀྱང་ཡིན་ནོ། །བསྒྲུབ་པར་བྱ་བ་བཞིན་དུ་བསྒྲུབ་བྱ་མ་ཡིན་པའི་ཆོས་ཀྱང་ཆོས་ཉིད་ཡིན་པའི་ཕྱིར་དེས་ཁྱབ་པ་ཡང་གཏན་ཚིགས་སུ་རྟོགས་པར་འགྱུར་ཏེ། དཔེར་ན་འདི་ནི་ཤིང་ཡིན་ཏེ་བྱས་པའི་ཕྱིར་ཞེས་བྱ་བ་ལྟ་བུའོ། །ཤིང་བསྒྲུབ་པར་བྱ་བ་ལ་བྱས་པ་ཉིད་བསྒྲུབ་པར་
[10b.6]བྱ་བའི་ཆོས་ཅན་གྱི་ཆོས་བསྒྲུབ་པར་བྱ་བའི་ཆོས་མ་ཡིན་པ་མི་རྟག་པ་ཉིད་ཀྱང་ཁྱབ་པ་ཡིན་ལ། བརྗོད་པར་འདོད་པ་ནི་བསྒྲུབ་བྱའི་ཆོས་ཡིན་པས་ན་བསམ་པ་དེའི་དབང་གིས་ཕྱོགས་གཅིག་ཏུ་སྒྲོ་བཏགས་ནས་ཆོས་བསྟན་པ་ཡིན་གྱི་རང་གི་སྒྲས་ནི་མ་ཡིན་ནོ། །དེ་ལྟར་བསྒྲུབ་བྱའི་ཆོས་རྟོགས་
[10b.7]པར་ཡང་ཇི་ལྟར་འགྱུར་ཞེ་ན། འདི་སྐད་བརྗོད་དེ། འདིར་སྤྱིར་གང་ཞིག་སྒྲོ་བཏགས་ནས་ཆོས་ཅན་བསྟན་པ་དེའི་ཕྱོགས་གཅིག་སྒྲོ་བཏགས་པས་ཆོས་བསྟན་པ་ཡིན་ཏེ། ཕྱོགས་གཅིག་གཞན་མི་རྟོགས་པའི་ཕྱིར་རོ། །ཕྱོགས་ཀྱི་ཕྱོགས་གཅིག་པ་ནི་བསྒྲུབ་བྱའི་ཆོས་སམ་བསྒྲུབ་བྱའི་
[11a]
[11a.1]ཆོས་ཅན་ཡིན་ཏེ། དེས་ན་བསྒྲུབ་པར་བྱ་བའི་ཆོས་ཅན་གྱི་ཆོས་ཕྱོགས་ཀྱི་ཕྱོགས་གཅིག་གིས་ཁྱབ་པ་ཡིན་ནོ་ཞེས་བརྗོད་པ་ན་བསྒྲུབ་བྱའི་ཆོས་ཀྱིས་ཁྱབ་པ་རྟོགས་པར་འགྱུར་རོ། །ཆོས་ཅན་ཡང་དེའི་ཕྱོགས་གཅིག་མ་ཡིན་ནམ་ཞེ་ན། བདེན་མོད་ཀྱི། དེས་ཁྱབ་པ་
[11a.2]ནི་མི་སྲིད་དེ། དེ་ནི་ཁྱད་པར་གྱི་རང་བཞིན་ཡིན་པའི་ཕྱིར་རོ། །གལ་ཏེ་ཁྱད་པར་ལ་ཁྱབ་པ་མི་རྟོགས་པ་ཡིན་གྱི་མེད་པ་ནི་མ་ཡིན་ནོ་ཞེ་ན། མ་ཡིན་ཏེ་ཁྱབ་པ་ནི་རྗེས་སུ་འགྲོ་ལྡོག་གི་རང་བཞིན་ཡིན་པའི་ཕྱིར་དང་། དེ་དག་ཀྱང་ཐམས་ཅད་ན་ཡོད་པའི་རང་བཞིན་པའི་ཕྱིར་དང་། དེ་ཡང་ཁྱད་
[11a.3]པར་མི་སྲིད་པའི་ཕྱིར་རོ། །དེས་ན་བསྒྲུབ་བྱའི་ཆོས་ཅན་གྱི་ཆོས་བསྒྲུབ་བྱའི་ཆོས་ཀྱིས་ཁྱབ་པ་ནི་གཏན་ཚིགས་ཡིན་ནོ་ཞེས་བྱ་བའི་དོན་འདི་རྟོགས་པར་འགྱུར་རོ། །ཕྱོགས་ཆོས་དེའི་ཆས་ཞེས་བྱ་བ་བཤད་ནས། ཁྱབ་པ་བཤད་པའི་ཕྱིར་ཁྱབ་པ་ཞེས་བྱ་བ་སྨོས་སོ། །ཁྱབ་པར་བྱེད་པས་
[11a.4]ཁྱབ་པར་བྱ་བ་ཁྱབ་པ་ཡིན་པའི་ཕྱིར་ཁྱབ་པ་ཡིན་ནོ། །དེ་བརྗོད་པ་ནི་དེ་དག་གིས་སོ་སོར་ངེས་པའི་རང་བཞིན་ཁྱད་པར་ཅན་བརྗོད་པར་བྱ་བ་ཡིན་ནོ། །དེས་ན་ཁྱབ་པར་བྱེད་པའི་ཁྱད་པར་ཇི་ལྟ་བུ་ཡིན་པ་དེ་ཉིད་དེ་ལྟར་བརྗོད་པ་ཡིན་གྱི། བྱ་བ་ཞེས་བྱ་བ་ནི་འགའ་ཡང་ཡོད་པ་མ་ཡིན་ནོ། །འདིར་
[11a.5]ཚིག་གསུམ་ལ་ངེས་པར་གཟུང་བར་བྱ་བ་ནི་དེ་ཁོ་ན་ལ་ཞེས་བྱ་བ་དང་། ཁྱད་པར་བྱེད་པ་ཁོ་ན་ལ་ཞེས་བྱ་བ་དང་། ཡོད་པ་ཁོ་ན་ཞེས་བྱ་བ་རྣམ་པ་གསུམ་སྲིད་པར་འགྱུར་རོ། །དེ་ལ་ཁྱབ་པར་བྱེད་པ་གོ་བར་བྱ་བ་ལ་ཁྱད་པར་བྱ་བ་གོ་བར་བྱེད་པ་ཉིད་དུ་འཐད་པས་ན། དེའི་ཆས་ཁྱབ་པ་གཏན་
[11a.6]ཚིགས་ཡིན་ནོ་ཞེས་བསྟན་ཏོ། །ཁྱད་པར་བྱེད་པ་ཉིད་ལ་ཁྱབ་པར་བྱ་བ་རྗེས་སུ་འགྲོ་བ་དང་ལྡོག་པ་ཡོད་པའི་ཕྱིར་དང་། གཏན་ཚིགས་གོ་བར་བྱེད་པ་ཉིད་དུ་ཡང་། དེ་དག་ཉིད་སྒྲུབ་པར་བྱེད་པའི་ཕྱིར་རོ་ཞེས་བསྟན་པ་ཡིན་ནོ། །དེས་ན་སྒྲུབ་པར་བྱེད་པ་ཡོད་ན་བསྒྲུབ་བྱ་ཡོད་པར་སོ་སོར་
[11a.7]ངེས་པས་ན་གཏན་ཚིགས་གོ་བར་བྱེད་པ་ཡིན་ནོ་ཞེས་གོ་བར་བྱེད་པའི་རང་བཞིན་བརྗོད་པ་ན། དེ་ལ་ཁྱབ་པར་བྱེད་པ་ཡོད་པ་ཁོ་ན་ཞེས་བརྗོད་པར་བྱ་བ་ཡིན་ནོ། །དེ་ལ་ཁྱབ་པར་བྱེད་པ་ཁོ་ན་ཡོད་པ་ཞེས་ངེས་པར་བཟུང་ན་ནི་གོ་བར་བྱེད་པའི་ཆོས་བསྟན་པར་མི་འགྱུར་ཏེ། ཁྱབ་པར་བྱ་བ་ཉེ་བར་གནས་
[11b]
[11b.1]པ་ལ་ཁྱབ་པར་བྱེད་པ་མ་ཡིན་པ་ཡོད་ཀྱང་དེ་ཡོད་པ་ལ་སོ་སོར་ངེས་པར་གྱུར་པའི་ཁྱབ་པར་བྱེད་པའི་རྟོགས་པ་མི་འགལ་བའི་ཕྱིར་རོ། །དེ་བཞིན་དུ་དེ་ཁོ་ན་ལ་ཁྱབ་པར་བྱེད་པ་ཡོད་པ་ཞེས་གཞན་དང་ལྡན་པ་རྣམ་པར་གཅོད་པ་ཡང་ཡན་ལག་མ་ཡིན་ཏེ། ཇི་ལྟར་བརྗོད་པའི་ཚུལ་ཉིད་གཏན་ཚིགས་
[11b.2]སུ་གྲུབ་པའི་ཕྱིར་ན། གཏན་ཚིགས་ལས་གཞན་ལ་མེད་པས་སྒྲུབ་པར་བྱེད་པ་མ་ཡིན་པའི་ཕྱིར་རོ། །གང་གི་ཚེ་དེ་ཁྱབ་བྱ་མེད་པར་ཡང་ཡོད་པ་དེའི་ཚེ་མི་རྟོགས་པ་ཞེས་བྱ་བར་འགྱུར་རོ། །གཏན་ཚིགས་ཀྱི་སྐྱོན་ནི་དེ་ལས་རྟོགས་པས་ན་དེ་མེད་པའི་ཕྱིར་བསྒྲུབ་བྱ་ལ་འཁྲུལ་པ་མ་ཡིན་པས་
[11b.3]གཞན་དང་ལྡན་པ་རྣམ་པར་བཅད་པ་ནི་དོན་མེད་དོ། །ཁྱབ་པར་བྱེད་པ་གཞན་དང་ལྡན་པ་ཅན་ཉིད་ཡིན་ཡང་གོ་བར་བྱེད་པའི་དངོས་པོར་རིགས་པའི་གོ་བར་བྱེད་པ་དེའི་དངོས་པོ་ཡིན་པ་ཡང་བཀག་པའི་ཕྱིར་འགལ་བ་ཡང་ཡིན་ནོ། །ཁྱད་པར་བྱ་བ་མེད་པར་ཡང་འགྱུར་ལ། ཁྱབ་པར་
[11b.4]བྱ་བ་ལ་ཡང་སོ་སོར་ངེས་པའི་ཕྱིར་དེ་ལས་རྟོགས་པ་མི་འགལ་བའི་ཕྱིར་ཏེ་རྩོལ་བ་ལས་བྱུང་བ་ཉིད་ཡིན་ནོ། །མི་རྟག་པ་ཉིད་རྩོལ་བ་ལས་བྱུང་བ་ཉིད་མེད་པར་འགྱུར་ཡང་རྩོལ་བ་ལས་བྱུང་བ་ལ་ངེས་པར་ཡོད་པའི་ཕྱིར་དེ་ལས་མི་རྟོགས་པར་ཇི་ལྟར་འགྱུར། དེས་ན་མི་ལྡན་པ་རྣམ་
[11b.5]པར་གཅོད་པ་ཉིད་འཐད་པ་ཡིན་ཏེ་བརྗོད་བྱ་ཇི་ལྟ་བར་རྗོད་པར་བྱེད་པ་སྦྱོར་བའི་ཕྱིར་རོ། །ཁྱབ་པར་བྱ་བའི་རང་བཞིན་དུ་གྱུར་པའི་ཁྱབ་པའི་མཚན་ཉིད་ཀྱང་སྟོན་པ་འདི་ཡང་ན་དེ་ཁོ་ན་ལ་ཞེས་བྱ་བ་ཡིན་ནོ། །དེ་ཁོ་ན་ལ་ཁྱབ་པར་བྱ་བ་ཡོད་པ་ནི་ཁྱབ་པ་ཡིན་ནོ། །འདིར་ཡང་སྔ་མ་
[11b.6]བཞིན་ངེས་པར་བཟུང་བ་རྣམ་པ་གསུམ་སྲིད་པ་ལས་གཞན་དང་ལྡན་པ་རྣམ་པར་གཅོད་པ་ཉིད་འདོད་པ་ཡིན་ཏེ། དེ་ཁྱབ་པར་བྱེད་པ་སྤངས་ནས་གཞན་ན་ཡོད་ན་དེ་ལས་རྟོགས་པ་མི་བརྟེན་པས་རྗེས་སུ་དཔོག་པར་མི་འགྱུར་བའི་ཕྱིར་དང་། དེ་ཁོ་ན་ལ་ཡོད་ན་ནི་བཟློག་པའི་ཕྱིར་རོ། །
[11b.7]གཞན་བཞིན་དུ་དེར་ཡང་ཡོད་པ་ཡིན་ནོ་ཞེ་ན། ཡོད་མོད། དེ་ཉིད་ཀྱི་ཕྱིར་དེ་ཡོད་པ་ན་དེ་དང་དེ་མ་ཡིན་པ་དག་ཡོད་པར་ཐེ་ཚོམ་ཟ་བར་ཐལ་ལོ། །ཁྱབ་པར་བྱེད་པ་གཉི་ག་ལ་ཡོད་པས་ཀྱང་ཇི་ལྟར་ཐེ་ཚོམ་མི་ཟ་ཞེ་ན། དེ་ཡོད་ན་ཡོད་པར་སོ་སོར་ངེས་པའི་ཕྱིར་རོ་ཞེས་བཤད་ཟིན་ཏོ། །
[12a]
[12a.1]གཞན་དུ་མེད་པས་གོ་བར་བྱེད་པ་ཉིད་དུ་འཐད་པའི་ཕྱིར་ཁྱབ་པར་བྱ་བ་མ་ཡིན་པ་ཡོད་པ་མི་འགལ་བས་ན་དེ་ལ་ཁྱབ་པར་བྱ་བ་ཁོ་ན་ཡོད་པ་ཞེས་བྱ་བ་ནི་ཡན་ལག་མ་ཡིན་པ་དང་ཡང་རྟོགས་པར་བྱེད་པ་མ་ཡིན་པ་ཡང་མ་ཡིན་ནོ། །ཁྱབ་པར་བྱེད་པ་ཡོད་པ་ལ་ཡོད་
[12a.2]པར་ངེས་པ་དེ་ལ་ཁྱབ་པར་བྱ་བ་ཡོད་པ་ཁོ་ན་ཞེས་བྱ་བ་ཡང་དོན་མེད་པ་ཡིན་ཏེ། དེ་མེད་པར་མི་རྟོགས་པའི་ཕྱིར་དང་། རྟོགས་ན་འཁྲུལ་པ་མེད་པའི་ཕྱིར་རོ། །ངེས་པས་མེད་ཀྱང་རྟོགས་པར་བྱེད་པ་ཡོད་པའི་ཕྱིར་གཏན་ཚིགས་ཀྱི་དངོས་པོར་འཐད་པ་ཡང་འགོག་པར་ཐལ་བའི་ཕྱིར་ཏེ་དཔེར་ན་
[12a.3]རྩོལ་བ་ལས་བྱུང་བ་ཉིད་བཞིན་ནོ། །མི་རྟག་པ་ལ་ནི་དེ་ལས་བཟློག་པ་ཡང་ཡོད་པའི་ཕྱིར་རོ། །ཡང་ཇི་ལྟར་ན་འདིར་མི་ལྡན་པ་རྣམ་པར་བཅད་ན་མཐུན་པའི་ཕྱོགས་ཀྱི་ཕྱོགས་གཅིག་ལ་ཡོད་པ་གཏན་ཚིགས་མ་ཡིན་པར་ཐལ་གྱི། ཁྱབ་པར་བྱེད་པ་ཡང་ནི་མ་ཡིན། དེར་ནི་གཞན་དང་ལྡན་པ་རྣམ་
[12a.4]པར་བཅད་ན་འགྱུར་གྱི། འདི་ནི་མ་ཡིན་ཞེ་ན་མཚུངས་པ་ཉིད་དུ་འགོག་པ་ཡིན་པ་མ་ཡིན་པའི་ཕྱིར། འདི་གཉིས་མི་འཐད་པ་མ་ཡིན་པའི་ཕྱིར་རོ། །ཁྱབ་པར་བྱ་བ་ཡོད་པ་ལ་ཁྱབ་པར་བྱེད་པ་མ་འབྲེལ་པ་རྣམ་པར་བཅད་ན་དེ་དེ་དང་མི་ལྡན་པར་མི་འགྱུར་བ་ཉིད་དོ། །དེ་ལྟར་ན་ཁྱབ་པར་བྱེད་
[12a.5]པ་མི་ལྡན་པ་རྣམ་པར་བཅད་ན་ཐལ་བ་མ་ཡིན་གྱི་ཁྱབ་པར་བྱ་བ་ནི་མ་ཡིན་ནོ། །དེའི་ཕྱིར་དེ་ལྟར་ཁྱབ་པར་བྱེད་པ་ཁྱབ་པར་བྱ་བ་ཡོད་ན་ཡོད་ཅེས་བྱ་བས་ནི་རྗེས་སུ་འགྲོ་བ་བཤད་ནས་ཁྱབ་པར་བྱ་བ་ཁྱབ་པར་བྱེད་པ་ཁོ་ན་ལ་ཡོད་པ་ཞེས་བྱ་བས་ནི་ལྡོག་པ་སྟེ་དེས་ན་ཚུལ་གསུམ་ཉིད་གཏན་ཚིགས་
[12a.6]སུ་འཐད་པའི་ཕྱིར། དེའི་ཆས་ཁྱབ་པ་ཞེས་བྱ་བ་རྗེས་སུ་འགྲོ་བ་དང་ལྡོག་པ་དག་བརྗོད་པ་ཡིན་ནོ། །དཔེར་ན་ཚད་མ་རྣམ་པར་ངེས་པར་མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ་ཡོད་པ་དང་མེད་པ་དག་གིས་བརྗོད་པ་བཞིན་ནོ། །འདིར་དེའི་ཆས་ཁྱབ་པ་དང་ཕྱོགས་ཀྱི་ཆོས་ཉིད་ཀྱི་
[12a.7]དངོས་པོ་ལ་ཡོད་པ་ཙམ་གྱི་གཏན་ཚིགས་ཀྱི་ཚུལ་གསུམ་བརྗོད་པ་ནི་མ་ཡིན་ཏེ་ཤེས་པའི་ཚུལ་གསུམ་ཉིད་རྟགས་ཀྱི་ཆོས་ཡིན་པའི་ཕྱིར་རོ། །འདིར་ནི་མཚན་ཉིད་ལ་ཤེས་པ་སྨོས་པ་མ་བྱས་པས་དེ་ཇི་ལྟར་རྟོགས་པར་འགྱུར་ཞེས་དོགས་པ་ལ། འདིས་ནི་ཞེས་བཤད་པ་ཙམ་མོ།། །།
[12b]
[12b.1]བམ་པོ་གཉིས་པ། ཕྱོགས་ཀྱི་ཆོས་དང་རྗེས་སུ་འགྲོ་ལྡོག་བརྗོད་པ་འདིས་ནི་རྗེས་སུ་འགྲོ་བ་དང་ལྡོག་པ་ངེས་པ་དག་ཀྱང་བཤད་ལ་ཕྱོགས་ཀྱི་ཆོས་ངེས་པ་ཡང་བཤད་པ་ཡིན་ནོ། །ངེས་པའི་ཐབས་མཚུངས་པ་ཉིད་ཀྱི་རྗེས་སུ་འགྲོ་ལྡོག་དག་ཕྱོགས་ཀྱི་ཆོས་ཉིད་ལས་རྣམ་པར་ཕྱེ་
[12b.2]ནས་བསྟན་ཏོ། །འདིར་རྗེས་སུ་འགྲོ་བ་དང་ལྡོག་པ་དག་ཀྱང་བཤད་དོ་ཞེས་བྱ་བའི་དོན་འདི་ནི་མ་ཡིན་ནོ། །གང་དུ་གཞན་རྟོགས་པ་ཡང་གཞན་རྟོགས་པའི་འབྲས་བུ་ཅན་དུ་འགྱུར་བ་དེར་འདི་ལྟར་བརྗོད་པར་རིགས་ཀྱི། གང་གིས་གང་ཁོ་ན་བརྗོད་པ་དེ་བཤད་ནས་ཀྱང་། ཡང་འདི་ལྟར་
[12b.3]བརྗོད་པ་ནི་དོན་དང་ལྡན་པར་མི་འགྱུར་རོ། །དེའི་ཆས་ཁྱབ་པ་རྟོགས་ན་ཡང་དེ་བརྗོད་པའི་དོན་དུ་ཡིན་ནོ་ཞེ་ན། མ་ཡིན་ཏེ་ཁྱབ་པ་ནི་ཞེས་བྱ་བ་ལ་སོགས་པས་ཇི་ལྟར་འདིའི་རང་བཞིན་བརྗོད་པ་དེ་ལྟར་དེ་དག་རྟོགས་པའི་ཕྱིར་རོ། །ཕྱོགས་ཀྱི་ཆོས་ཉིད་ལ་ཡང་གཞན་རྟོགས་པ་ཅི་ཞིག་ཡོད་ན།
[12b.4]ཕྱོགས་ཀྱི་ཆོས་ཀྱང་བཤད་པ་ཡིན་ནོ་ཞེས་གང་བརྗོད་པར་འགྱུར་རོ། །དེའི་ཕྱིར་ངེས་པ་སྨོས་པ་མ་བྱས་པར་བསྟན་ཀྱང་ངེས་པ་ཉིད་བརྗོད་པ་ཉིད་དོ་ཞེས་བྱ་བའི་དོན་འདི་ཉིད་ཉེ་བར་བཀོད་པ་ཡིན་ནོ། །འདིར་ངེས་པ་ཇི་ལྟ་བུ་ཞིག་ཡིན་ཞེ་ན་གང་ལ་དེ་ཡོད་པ་དེར་ཚུལ་གསུམ་པོ་དེ་བསྡུ་བའི་
[12b.5]ཕྱིར་དེ་དག་ནི་ཞེས་སྨོས་ཏེ། ཕྱོགས་ཀྱི་ཆོས་དང་དེའི་ཆས་ཁྱབ་པ་དེ་དག་ནི་འབྲས་བུ་དང་རང་བཞིན་དང་མི་དམིགས་པའི་མཚན་ཉིད་ཅན་གྱི་གཏན་ཚིགས་གསུམ་ཡིན་ནོ། །ཇི་སྐད་དུ་བརྗོད་པའི་རྟགས་གསུམ་པོ་དཔེས་སྟོན་པ་ན་འབྲས་བུ་ལ་སོགས་པ་གསུམ་ནི་ཇི་ལྟར་འདི་དང་འདིའོ་ཞེས་
[12b.6]བཤད་པ་ནི་དཔེར་ན་ཞེས་བྱ་བ་ནས་བཤད་པ་ཡིན་ནོ་ཞེས་བྱ་བའི་བར་རོ། །དེས་ན་ཇི་སྐད་བརྗོད་པའི་རིམ་པའི་རྗེས་སུ་འབྲང་སྟེ། དང་པོ་འབྲས་བུ་ཉེ་བར་བཀོད་ལ་གཉིས་པ་ནི་རང་བཞིན་ནོ། །ཐ་མར་ནི་མི་དམིགས་པའོ། །གཏན་ཚིགས་དང་བསྒྲུབ་བྱ་གཉིས་བཀོད་པ་ནི་རྒྱུ་དང་འབྲས་
[12b.7]བུའི་རང་བཞིན་ཉིད་ཉེ་བར་བསྟན་པའི་ཕྱིར་རོ། །རང་བཞིན་གྱི་གཏན་ཚིགས་ནི། ཤིང་ཤ་པ་ཡིན་པའི་ཕྱིར་ཞེས་བྱ་བའོ། །འདིར་ཡང་གཉི་ག་ཉེ་བར་བསྟན་པ་ནི་རང་བཞིན་གྱི་གཏན་ཚིགས་ཉིད་དུ་རབ་ཏུ་བསྟན་པའི་ཕྱིར་ཏེ། དེ་གཉིས་གཅིག་གི་བདག་ཉིད་དུ་གྲུབ་པའི་ཕྱིར་རོ། །མི་
[13a]
[13a.1]དམིགས་པ་ནི་ཕྱོགས་ཀྱི་ཁྱད་པར་ཞེས་བྱའོ། །ཕྱོགས་ཀྱི་ཁྱད་པར་ནི་ཕྱོགས་ཁྱད་པར་ཅན་ཡིན་གྱི་ཐམས་ཅད་ནི་མ་ཡིན་ལ་དེ་ཡང་སོ་སོར་ངེས་པ་ཡིན་ནོ། །དེ་ཅི་འདི་ཉིད་དམ་འོན་ཏེ་གཞན་ཉིད་ཅེས་མི་ཤེས་པས་ན་འགའ་ཞིག་ན་ཞེས་སྨོས་ཏེ། འདི་ཡང་ཁྱད་པར་ངེས་པར་ཉེ་བར་བཀོད་པ་ཉིད་དོ། །དེས་ན་སྔ་
[13a.2]མས་ནི་ཐམས་ཅད་དུ་ཡིན་པ་བཀག་ལ་འདིས་ནི་ཁྱད་པར་དེའི་ངོ་བོ་རྣམ་པར་འཇོག་པར་བྱེད་པའི་གཅོད་པ་པོ་རྟོག་པ་ཡིན་ནོ། །དེ་ཡང་སྒྲུབ་བྱེད་ཉེ་བར་སྟོན་པ་ན་ཕྱོགས་ལ་སོགས་པ་ཤེས་པར་འདོད་པའི་བྱེ་བྲག་ཅན་ཚད་མས་རྟོགས་པ་ཡིན་པར་ཁོང་དུ་ཆུད་པ་ཉིད་དོ། །ཆོས་ཅན་དེ་ན་བུམ་པ་མེད་དེ་ཞེས་བྱ་བ་ནི་བུམ་པའི་དངོས་པོ་
[13a.3]མེད་པ་ཉིད་དོ། །གཏན་ཚིགས་བརྗོད་པ་ནི་མི་དམིགས་པའི་ཕྱིར་རོ་ཞེས་བྱ་བ་སྟེ། དམིགས་པ་མེད་པའི་ཕྱིར་རོ། །གཞན་མི་དམིགས་པས་ནི་གཞན་མེད་པར་མི་སྒྲུབ་པས་ན་སྐབས་ཀྱི་བུམ་པ་ཉིད་མི་དམིགས་པ་ཡིན་ནོ། །གང་མི་དམིགས་སོ་ཅོག་དེ་མེད་པ་ནི་མ་ཡིན་ཏེ། སྔ་ན་མེད་པ་དང་
[13a.4]འཇིག་རྟེན་གཞན་ལ་སོགས་པ་མི་དམིགས་ཀྱང་མི་ལྡོག་པའི་ཕྱིར་དང་། ཡུལ་དང་དུས་ལ་སོགས་པས་བསྐལ་པའི་བུམ་པ་ལ་སོགས་པ་ཡང་མེད་པར་ངེས་པར་མི་ནུས་པའི་ཕྱིར་རོ། །དེས་ན་དངོས་པོ་ཙམ་ནི་མི་དམིགས་པ་ཙམ་གྱིས་མེད་པར་བསྒྲུབ་པར་མི་ནུས་པས་སྒྲུབ་པར་བྱེད་པ་ཡང་ངེས་
[13a.5]པ་དགོས་པ་ཡིན་ལ། བསྒྲུབ་པར་བྱ་བ་ཡང་ཡིན་ནོ། །དེས་ན་དམིགས་པའི་མཚན་ཉིད་ཀྱིར་གྱུར་པ་ཞེས་སྨོས་སོ། །འདིས་མཚོན་ཅིང་གསལ་བར་བྱེད་པས་ན་མཚན་ཉིད་དོ། །དམིགས་པ་ཉིད་མཚན་ཉིད་ཡིན་པས་དམིགས་པའི་མཚན་ཉིད་དེ་དེར་གྱུར་པའམ། དེས་གྱུར་ཅིང་
[13a.6]ཐོབ་པའི་ཡུལ་དུ་བྱས་པའོ། །དངོས་པོ་རྟགས་ལ་སོགས་པ་མཚོན་པས་དེ་རྣམ་པར་བཅད་པའི་ཕྱིར་དམིགས་པ་སྨོས་སོ། །དེ་དག་གི་རྟོགས་པར་བྱ་བའི་དངོས་པོ་ནི་རྟོགས་པ་མི་འཇུག་པས་མེད་པར་མི་འགྲུབ་པའི་ཕྱིར་རོ། །མངོན་དུ་བྱེད་པའི་དམིགས་པའི་ཡུལ་གྱི་དངོས་པོ་ནི་རྟོགས་པ་
[13a.7]མེད་པས་མེད་པ་ཉིད་དོ། འདིར་མི་དམིགས་པ་ནི་སྐབས་ཀྱིས་བསྒྲུབ་བྱ་དང་འབྲེལ་པ་ཉིད་བཟུང་བ་ཡིན་ཞིང་དེ་ཡང་དམིགས་པའི་མཚན་ཉིད་ཀྱིར་གྱུར་པ་དང་འབྲེལ་པས་ཁྱད་པར་དུ་བྱས་པ་ཡིན་པ་དེས་ན་བུམ་པ་དེ་ཡང་དམིགས་པའི་མཚན་ཉིད་དུ་གྱུར་པ་ཡིན་ནོ། །དེས་ན་བུམ་པ་མེད་དོ་
[13b]
[13b.1]ཞེས་བྱ་བ་ནི་གསལ་བ་ཉིད་ཀྱི་བུམ་པ་དགག་པར་བྱ་བ་ཡིན་ནོ། །རྒྱུའི་ནང་དུ་རྟོགས་པ་ཙམ་གྱིས་ནི་དགག་པ་མ་ཡིན་ཏེ། ཟླ་བ་གཉིས་སུ་སྣང་བ་ཟླ་བ་ལ་ཡང་ཐལ་བའི་ཕྱིར་རོ། །མི་དམིགས་པ་ཡང་རྣམ་པ་དེ་ལྟ་བུ་དང་འབྲེལ་པ་ཡིན་གྱི། མི་དམིགས་པ་ཙམ་ནི་མ་ཡིན་ནོ། །དེ་ན་འདི་ནི་
[13b.2]གཏན་ཚིགས་ཀྱི་ཁྱད་པར་ཡིན་ཡང་གཉི་ག་ཉེ་བར་བྱེད་པ་ཡིན་ནོ། །གལ་ཏེ་འདི་ནི་དམིགས་པའི་མཚན་ཉིད་ཀྱིར་གྱུར་པའི་བུམ་པ་མེད་དེ་མ་དམིགས་པའི་ཕྱིར་རོ་ཞེས་བྱ་བས་ཀྱང་རྟགས་ཁྱད་པར་དུ་བྱས་པར་འགྱུར་བ་ཉིད་དེ། དེ་དང་འབྲེལ་པ་ཉིད་དུ་ཉེ་བར་བཀོད་པའི་ཕྱིར་རོ། །དེས་ན་དེ་ལྟར་
[13b.3]ཡང་ཅི་སྟེ་མི་སྟོན་ཞེ་ན་བརྗོད་པ་སྒྲུབ་པར་བྱེད་པ་ཉེ་བར་དགོད་པ་ལ་བསྒྲུབ་བྱ་བསྟན་པ་ཡན་ལག་མ་ཡིན་པའི་ཕྱིར་ན། དེ་དེ་ལ་གནས་པར་མི་རྟོགས་པས་ཁྱད་པར་ཁོང་དུ་ཆུད་པར་མི་འགྱུར་བའི་ཕྱིར་རོ། །འོ་ན་འདིར་ཅིའི་དོན་དུ་བསྒྲུབ་པར་བྱ་བ་བསྟན་ཞེ་ན། སྦྱོར་བ་གསལ་བའི་དོན་ཉིད་དུའོ། །
[13b.4]འདིར་ནི་གཏན་ཚིགས་ཀྱི་རང་བཞིན་ཙམ་བརྗོད་པར་འདོད་པ་ཡིན་གྱི་བསྒྲུབ་བྱ་གྲུབ་པ་ནི་མ་ཡིན་ནོ། །དེས་ན་རྗེས་སུ་འགྲོ་བ་ལ་སོགས་པ་མ་བསྟན་པས་བསྒྲུབ་བྱ་མི་རྟོགས་པའི་ཕྱིར་མི་དམིགས་པའི་རང་བཞིན་འདི་ནི་གཏན་ཚིགས་མ་ཡིན་ནོ་སྙམ་དུ་རྟོགས་པར་འགྱུར་རོ། །མི་དམིགས་པ་ནི་
[13b.5]དངོས་པོ་དངོས་པོ་མེད་པར་བསྒྲུབ་པ་ལ་རྟོགས་པ་མེད་པ་ཡིན་ནོ། །དེ་བཞིན་དུ་བཤད་པའི་སྦྱོར་བ་གཉིས་ལ་ཡང་རྟོགས་པར་བྱའོ། །ཡང་ཇི་ལྟར་ན་གང་ཞིག་མེད་པ་དེ་དམིགས་པའི་མཚན་ཉིད་ཀྱིར་གྱུར་པ་ཡིན། དེ་ལྟར་ཡིན་ན་ཡང་ཇི་ལྟར་མེད་པ་ཉིད་དུ་བརྗོད་ཅེ་ན། འདི་ནི་རྨོངས་པའི་
[13b.6]ཡུལ་ཅན་བརྩད་པར་བྱ་བ་མ་ཡིན་པ་རྩོད་པ་ཡིན་ཏེ་བུམ་པ་མེད་དོ་ཞེས་བྱ་བ་འདིར་བུམ་པ་ཡང་དེ་ལྟར་ཐལ་བར་འགྱུར་བའི་ཕྱིར་རོ། །གང་ཞིག་མེད་པ་དེ་ནི་བུམ་པ་མ་ཡིན་ལ། བུམ་པ་གང་ཡིན་པ་དེ་ཡང་མེད་པ་མ་ཡིན་ཏེ། དེ་ལྟར་མ་ཡིན་ན་ཇི་ལྟར་བུམ་པ་མེད་ཅེས་འགོག །དེ་ནི་རིགས་པ་
[13b.7]མ་ཡིན་ཏེ། གང་གི་ཕྱིར་གང་གིས་འགལ་བར་འགྱུར་བ་བུམ་པ་རྣམ་པར་གཞག་ནས་དགག་པ་བསྒྲུབ་པ་ནི་མ་ཡིན་གྱི། འོན་ཀྱང་དེ་ནི་བུམ་པ་མེད་པར་རྟོགས་པ་ཉིད་དོ། །འོན་ཀྱང་དེར་བུམ་པ་ནི་ཡུལ་ཉིད་ཀྱིས་རྟོགས་པ་ལ་ཉེ་བར་མཁོ་བར་ཟད་དེ། དེས་ན་རྟོགས་པ་འཇུག་པ་ཙམ་འགལ་བ་
[14a]
[14a.1]ཡིན་གྱི་རྟོགས་པར་བྱ་བ་འགལ་བ་ནི་མ་ཡིན་ནོ། །དེ་ནི། དེ་འདྲ་མེད་པར་ཆོས་ཅན་དེ། །དེ་དག་དང་ནི་འབྲེལ་པར་སྣང་། །ཞེས་རྣམ་པར་ངེས་པ་ཡང་ཕྱི་རོལ་ལ་བརྟེན་པ་ཉིད་བཀག་པ་ཡིན་ནོ། །དེའི་ཕྱིར་བུམ་པ་མེད་དོ་ཞེས་བྱ་བ་དང་། བལྟར་རུང་བའི་བུམ་པ་མེད་དོ་ཞེས་
[14a.2]འགོག་པ་ལ་ནི་ཁྱད་པར་མེད་དོ། །རེས་འགའ་སྐྱེས་བུ་མེད་དོ་ཞེའམ། རེས་འགའ་སྐྱེས་བུ་དཀར་ཤམ་མེད་དོ་ཞེས་ཁྱད་པར་སྟོང་ཕྲག་གིས་ཉེ་བར་བསྒྱུར་བ་འགོག་ཀྱང་རུང་སྟེ། དངོས་པོ་གང་དང་གང་མེད་པ་དེ་དང་དེ་མེད་པར་སྒྲུབ་པ་ན་དེ་ཇི་ལྟ་བུར་གྱུར་པ་དེ་ལྟ་བུར་གྱུར་པ་ཉིད་ཁྱད་པར་དང་བཅས་
[14a.3]པའམ། ཁྱད་པར་མེད་པ་ཡིན་ཡང་རུང་སྟེ། ཡུལ་ཉིད་དུ་འཇོག་པ་ཡིན་ནོ། །ཁྱད་པར་ཅན་སྒྲུབ་པ་ན་དེའི་ཁྱད་པར་ཐབས་གཞན་གྱིས་གྲུབ་པ་མ་ཡིན་ཏེ། འོན་ཀྱང་ཇི་ལྟར་ཙནྡན་གྱི་དུ་བ་རྟོགས་ན་དེ་ཉིད་ལས་དེའི་མེ་གྲུབ་པ་དེ་བཞིན་དུ། བལྟར་རུང་བའི་བུམ་པ་མེད་པ་གྲུབ་པར་བྱེད་པ་ནི་
[14a.4]བལྟར་རུང་བ་མི་དམིགས་པ་ཡིན་ནོ། །འདིར་ནི་འདི་ཙམ་ཞིག་བརྗོད་པར་བྱ་བར་ཟད་དེ། གཏན་ཚིགས་མ་གྲུབ་པ་ནི་སྒྲུབ་བྱེད་ཀྱི་ཡན་ལག་མ་ཡིན་པས་ན་དེ་ཇི་ལྟ་བུ་ཡིན་པ་དེ་ལྟ་བུ་ནི་རྣམ་པ་ཉིད་དུ་གྲུབ་པ་ལ་ལྟོས་པ་ཡིན་ཏེ། ཙནྡན་གྱི་དུ་བ་བཞིན་ནོ། །དེས་ན་འདིར་བལྟར་རུང་བ་ཇི་ལྟར་གྲུབ་ཅེས་དཔྱོད་པ་
[14a.5]ནི་རིགས་ཀྱི་བུམ་པ་བལྟར་རུང་བ་ཇི་ལྟར་ཡིན་ཞེས་ནི་མ་ཡིན་ནོ། །ཤེས་པ་གཅིག་གིས་བཟུང་བ་དག་ལས་གཅིག་དམིགས་པ་ན་གཞན་མི་དམིགས་པ་ནི་བལྟར་རུང་བ་མི་དམིགས་པ་ཞེས་བྱ་བར་གྲུབ་པ་ཁོ་ནའོ། །ཇི་སྐད་བཤད་པའི་ཁྱད་པར་གྱི་ཁྱད་པར་ཅན་དུ་གྱུར་པའི་གཏན་ཚིགས་ཉིད་འཁྲུལ་པ་མེད་
[14a.6]པ་ཡིན་གྱི། གཞན་གྱི་ནི་མ་ཡིན་ནོ་ཞེས་སྟོན་པ་ན་ཁྱད་པར་ཉེ་བར་བཀོད་པའི་འབྲས་བུ་འཆད་པ་ནི། གལ་ཏེ་ཡོད་ན་ཞེས་བྱ་བ་ཡིན་ནོ། །གལ་ཏེ་བུམ་པ་ཡོད་པར་གྱུར་གྱི་མེད་པ་ནི་མ་ཡིན་ནོ། །དེའི་ཚེ་དམིགས་པའི་མཚན་ཉིད་དུ་གྱུར་པའི་ཡོད་པ་ཁོ་ནར་འགྱུར་ཏེ། བལྟར་རུང་བ་ཁོ་ནར་འགྱུར་
[14a.7]གྱི། བལྟར་མི་རུང་བ་ནི་མ་ཡིན་ནོ། །གང་གི་ཕྱིར་འདི་དམིགས་པའི་མཚན་ཉིད་དུ་གྱུར་པ་ཉིད་དམིགས་པ་ཡིན་པ་དེས་ན་འདིར་རང་གི་བསྒྲུབ་པར་བྱ་བ་དངོས་པོ་མེད་པ་དངོས་པོ་ཡོད་པའི་མཚན་ཉིད་ལ་འགྱུར་བ་མ་ཡིན་ནོ། །དམིགས་པའི་མཚན་ཉིད་དུ་གྱུར་པའི་དངོས་པོ་ནི་མངོན་སུམ་པ་ལ་བརྗོད་
[14b]
[14b.1]དོ། །གལ་ཏེ་དེ་ཡོད་ན་ནི་མངོན་སུམ་ཁོ་ནར་འགྱུར་བ་དེས་ན་འདིར་ནི་མི་དམིགས་པར་མི་འགྱུར་ཏེ། རྟོགས་པ་ཡོད་པའི་ཕྱིར་རོ། །དེས་ན་ཁྱད་པར་དང་བཅས་པའི་གཏན་ཚིགས་ནི་འཁྲུལ་པ་མེད་དོ། །དེ་ཉིད་ཀྱི་ཕྱིར་དེས་ན་ཞེས་སྨོས་སོ། །བསམ་པ་འདི་ཡིན་ཏེ། དམིགས་པའི་མཚན་ཉིད་
[14b.2]ཀྱིར་གྱུར་པ་ཞེས་བྱ་བས་ནི་འདིར་དངོས་པོའི་རང་བཞིན་ངེས་པ་ཅན་བཟུང་བ་ཡིན་ནོ། །དམིགས་པའི་མཚན་ཉིད་ཀྱིར་གྱུར་པ་ནི་དམིགས་པས་བཟུང་བའི་རང་བཞིན་ཁྱད་པར་ཅན་གྱི་དངོས་པོ་བལྟར་རུང་བ་བརྗོད་པ་ཡིན་ཏེ་དེས་ན་མཐོང་བས་བཟུང་བའི་རང་བཞིན་མཐོང་བའི་རྒྱུ་མཚན་དུ་ངེས་པ་གང་
[14b.3]ཡིན་པ་དེ་མཐོང་བ་མེད་པར་ཇི་ལྟར་འགྱུར་དེས་གང་ལ་དམིགས་པ་མི་འཁྲུལ་བར་འགྱུར་བ་ན་ཁྱད་པར་གྱི་དངོས་པོའི་རང་བཞིན་ངེས་པར་བྱས་པ་ཡིན་ནོ། །དེ་མེད་ན་ནི་དངོས་པོའི་རང་བཞིན་ངེས་པ་རྗེས་སུ་ཞུགས་པ་མེད་པས་ཡོད་པའི་དངོས་པོ་ལ་ཡང་མི་དམིགས་པར་འགྱུར་རོ། །གལ་ཏེ་མི་
[14b.4]དམིགས་པ་རྣམས་ཀྱི་ཡང་མེད་པ་ནི་དངོས་པོ་མེད་པ་སྒྲུབ་པར་བྱེད་པ་མ་ཡིན་ཏེ། དེས་ན་འདིར་ཡང་དངོས་པོ་ཉིད་ལས་དངོས་པོ་འགྲུབ་པའི་ཕྱིར་དང་། དེ་ཡང་འབྲས་བུ་དང་རང་བཞིན་ལས་མི་འདའ་བའི་ཕྱིར། འབྲས་བུ་དང་རང་བཞིན་ཉིད་རང་གི་བསྒྲུབ་པར་བྱ་བ་ལ་ཉེ་བར་དགོད་པར་རིགས་ཀྱི་མི་
[14b.5]དམིགས་པ་ནི་མ་ཡིན་ནོ། །དེ་ལས་ཞེས་སྨོས་སོ། །ཇི་སྐད་ཉེ་བར་བསྟན་པའི་གཏན་ཚིགས་གསུམ་ལས་འབྲས་བུ་དང་། རང་བཞིན་གཉིས་ནི་དངོས་པོ་སྒྲུབ་པ་ཡིན་ཏེ། འདི་གཉིས་ཀྱིས་ནི་འདི་ན་མེ་ཡོད་དོ། །འདི་ནི་ཤིང་ཡིན་ནོ། །དངོས་པོ་གྲུབ་ཀྱི། འགའ་ཞིག་དངོས་པོ་མེད་
[14b.6]པར་རྟོགས་པར་བྱ་བ་ལ་ནི་འདི་གཉིས་ཉེ་བར་སྦྱོར་བ་མ་ཡིན་ནོ། །དེས་ན་བུམ་པ་མེད་པ་ལ་སོགས་པའི་གཞལ་བྱ་དག་ལ་ནི་འདི་གཉིས་སྦྱོར་བ་མི་སྲིད་པས་ན་དགག་པའི་གཏན་ཚིགས་ལོགས་སུ་བཀོད་དོ། དེ་ལྟ་མ་ཡིན་ན་ནི་དེ་མི་རྟོགས་པའི་ཕྱིར་རོ། །དེ་ཡང་མི་དམིགས་པ་ཡིན་ནོ། །
[14b.7]འོན་ཀྱང་དེ་ནི་གང་ལས་འདིའི་དགག་པ་རྟོགས་པར་འགྱུར་བ་ཉིད་དོན་གཞན་གྱི་བདག་ཉིད་ཅན་འཇིག་རྟེན་པའི་རྟོག་པའི་རྗེས་སུ་འགྲོ་བའི་དགག་པ་ཉིད་ཡིན་ཏེ། དེས་ན་དངོས་པོའི་སྒྲུབ་པར་བྱེད་པ་ཉིད་ལས་མ་ཉམས་སོ་ཞེས་སྟོན་པར་འགྱུར་རོ། །དེས་ན་དེ་ལྟར་ངེས་པར་འགྱུར་བའི་ཚུལ་གསུམ་གྱིས་
[15a]
[15a.1]ཟིན་པ་བཤད་པར་རིགས་པར་བྱ་བ་ཡིན་པས་ཕྱོགས་ཀྱི་ཆོས་ཉིད་ནི་མངོན་སུམ་ལ་སོགས་པས་ཀྱང་ཤེས་པར་བླ་བའི་ཕྱིར་རྗེས་སུ་འགྲོ་བ་དང་ལྡོག་པ་དག་བསྟན་པའི་ཕྱིར་ཚུལ་གསུམ་པོ་གསུམ་ལ་ཉེ་བར་བསྡུས་ཏེ་དེ་གསུམ་སྟོན་པ་ཡིན་ནོ། །ད་ནི་གསུམ་ལ་ཇི་ལྟར་འགྲུབ་
[15a.2]པ་དེ་བསྟན་པའི་ཕྱིར་རང་བཞིན་འབྲེལ་པ་ཡོད་ན་ཞེས་སྨོས་སོ། །གང་གི་ཕྱིར་རང་བཞིན་འབྲེལ་པ་ཞེས་བྱ་བ་རག་ལས་པ་དང་གཞན་གྱི་དབང་དུ་གྱུར་པ་དེ་ཡོད་ན། རྟགས་ཀྱི་མཚན་ཉིད་ཀྱི་དོན་གྱིས་རྟགས་ཅན་གྱི་དོན་འཁྲུལ་པ་མེད་དོ། །མི་འཁྲུལ་བ་ཡང་རྗེས་སུ་འགྲོ་བ་དང་ལྡོག་པའི་བདག་ཉིད་
[15a.3]ཅན། དེ་ལ་སྒྲུབ་པར་བྱེད་པ་ཡོད་ན་བསྒྲུབ་པར་བྱ་བ་ཡོད་པ་དང་བསྒྲུབ་པར་བྱ་བ་མེད་ན་མེད་པར་བརྗོད་དོ། །དེས་ན་གང་གི་ཚེ་གང་གི་རང་བཞིན་གང་གི་གཞན་གྱི་དབང་དུ་གྱུར་པ་དེ་ཉིད་རྗེས་སུ་འགྲོ་བ་དང་ལྡོག་པ་དག་ཏུ་འཐད་པ་དེའི་ཚེ་གསུམ་ཉིད་ལ་ཚུལ་གསུམ་ཡོད་པ་ཡིན་ཏེ། གཞན་ལ་རྗེས་
[15a.4]སུ་འགྲོ་བ་དང་ལྡོག་པ་མེད་པའི་ཕྱིར་རོ། །གསུམ་ལ་ཚུལ་གསུམ་འབྲེལ་པས་གྲུབ་པར་སྟོན་པ་ན་དེ་དག་ཉིད་ལ་རྗེས་སུ་འགྲོ་བ་དང་ལྡོག་པ་བསྒྲུབ་པར་ནུས་པ་ཡིན་ནོ་ཞེས་བསྟན་པ་ཡིན་ནོ། །དེས་ན་དེ་རྣམས་ལ་དེ་གཉིས་ཀྱི་ངེས་པའི་རྒྱུ་ནི་འདི་ཉིད་ཡིན་ནོ་ཞེས་བཤད་པ་ཡིན་ནོ། །འདི་ལྟར་
[15a.5]ཡོད་པ་དང་བྱས་པ་ལ་སོགས་པའི་གཏན་ཚིགས་རྣམས་ནི་གསུམ་པོ་དག་ལས་གཞན་མ་ཡིན་ལ། གསུམ་པོ་རྣམས་ལ་ཡང་རྗེས་སུ་འགྲོ་བ་དང་ལྡོག་པ་དག་རང་བཞིན་འབྲེལ་པས་བསྒྲུབ་པར་བྱ་བ་ཡིན་པའི་ཕྱིར་རོ། །དེ་དག་ཀྱང་དེའི་རྩ་བ་ཅན་ཉིད་ཀྱིས་གྲུབ་པར་བརྗོད་པ་ཡིན་ནོ། །དེ་
[15a.6]ལྟར་ན་ཡང་འབྲས་བུ་དང་རང་བཞིན་དང་མི་དམིགས་པ་གསུམ་གཏན་ཚིགས་ཡིན་པ་ག་ལས་ཤེས་དོགས་ན་རང་བཞིན་འབྲེལ་པ་གསུམ་ལ་ངེས་པར་བསྟན་པའི་ཕྱིར་རྩོམ་པ་ནི་དེ་ནི་ཞེས་བྱ་བའོ། །རྟགས་རྟགས་ཅན་ལ་རང་བཞིན་འབྲེལ་པར་བཤད་པ་གང་ཡིན་པ་དེ་ནི་དེའི་བདག་ཉིད་ཡིན་པའི་
[15a.7]ཕྱིར་རོ། །གང་ཞིག་གང་ལ་མི་འཁྲུལ་པ་དེ་ནི་དེའི་རང་བཞིན་ཡིན་པའི་ཕྱིར་ཏེ། སྒྲུབ་པར་བྱེད་པ་ནི་བསྒྲུབ་པར་བྱ་བ་ཆོས་ཀྱི་རང་བཞིན་ཡིན་པའི་ཕྱིར་རོ་ཞེས་བྱ་བའི་དོན་ཏོ། །གོ་བར་བྱེད་པའི་དབང་དུ་བྱས་ནས་དེའི་བདག་ཉིད་དུ་བསྟན་པའི་ཕྱིར། །གོ་བར་བྱེད་པ་ནི་ཆོས་ཉིད་དོ། །དེས་ན་སྒྲུབ་པར་
[15b]
[15b.1]བྱེད་པ་ཉིད་བསྒྲུབ་པར་བྱ་བའི་རང་བཞིན་དུ་བརྗོད་པ་ཡིན་ནོ། །དེས་ན་གང་ལ་ཁྱབ་པར་བྱ་བ་དང་ཁྱབ་པར་བྱེད་པའི་རང་བཞིན་ངེས་པར་མ་བསམས་པའི་བློ་ཅན་གཞན་དག་ལན་འདེབས་པར་སེམས། །གོ་བར་བྱ་བ་དང་གོ་བར་བྱེད་པ་ཁྱད་པར་མེད་པར་རྩོད་པའི་སྐབས་ནི་ཡོད་པ་མ་ཡིན་ནོ། །གང་ཞིག་
[15b.2]ཉིད་གང་གི་རང་བཞིན་མ་ཡིན་པ་དེ་ཉིད་རང་གི་ངོ་བོ་དེ་གོ་བར་བྱེད་པ་ཡིན་ལ། གང་ཞིག་དེའི་རང་བཞིན་མ་ཡིན་པ་དེ་ནི་དེ་གོ་བར་བྱེད་པ་མ་ཡིན་ཏེ། འབྲེལ་པ་མེད་པའི་ཕྱིར་རོ། །གང་གི་ཕྱིར་དེ་འདིའི་རང་བཞིན་ཡིན་པ་དེའི་ཕྱིར་དེ་འདིར་རང་བཞིན་འབྲེལ་པ་ཡིན་ཏེ། རང་གི་ངོ་བོ་རང་གི་བདག་ཉིད་ཀྱི་
[15b.3]གཞན་གྱི་དབང་དུ་གྱུར་པའི་ཕྱིར། །ཤ་པའི་ཡལ་ག་དང་ལྡན་པ་ཉིད་བཞིན་ནོ། །ཤ་པ་ཉིད་ནི་ལོ་མ་ལ་སོགས་པ་དང་ལྡན་པའི་ཁྱད་པར་ཉིད་ཡིན་ཏེ། དེས་ན་ཁྱད་པར་གཞན་དུ་གྱུར་པ་མ་ཡིན་པ་ལོ་མ་ལ་སོགས་པ་དང་ལྡན་པའི་བདག་ཉིད་དུ་གྱུར་པའི་ཤ་པའི་རང་བཞིན་ནི་ཤིང་ཉིད་ཡིན་ཏེ་དེས་ན་དེ་ནི་
[15b.4]དེའི་གཞན་གྱི་དབང་ཉིད་དུ་གྱུར་པ་ཡིན་ནོ། །ཁྱད་པར་ཅན་དུ་གྱུར་པའི་ལོ་མ་ལ་སོགས་པ་དང་ལྡན་པའི་ཤ་པ་ཉིད་གང་ཡིན་པ་དེའི་རང་བཞིན་ནི་ལོ་མ་ལ་སོགས་པ་དང་ལྡན་པ་ཡིན་ཏེ་དེས་ན་ལོ་མ་ལ་སོགས་པ་དང་ལྡན་པ་ཡིན་ནོ། །ཁྱད་པར་དུ་གྱུར་པ་དེ་ཡང་ཤ་པ་ཡིན་པའི་ཕྱིར་དེ་ཤིང་ཉིད་ལ་འཁྲུལ་
[15b.5]པ་མེད་དོ། །ཤིང་ཉིད་ཀྱི་རང་བཞིན་ནི་ཤ་པ་ཡིན་པའི་ཕྱིར་དེ་ནི་དེའི་གོ་བར་བྱེད་པ་མ་ཡིན་ནོ། །ལོ་མ་ལ་སོགས་པ་དང་ལྡན་པ་ཙམ་གྱི་རང་བཞིན་ཡིན་པས་ཁྱད་པར་ངེས་པ་ལ་མི་ལྟོས་པའི་ཕྱིར་ན་ཁྱད་པར་གཞན་དང་གཅིག་པ་མི་སྲིད་པའི་ཕྱིར་རོ། །རྩོལ་བ་ལས་བྱུང་བ་ཉིད་ཀྱང་མི་རྟག་པའི་བདག་
[15b.6]ཉིད་ཅན་ཡིན་གྱི་བཟློག་པ་ནི་མ་ཡིན་ནོ། །དངོས་པོ་རྣམས་ནི་འཇིག་པ་ལ་ལྟོས་པ་མེད་པ་ལས་བྱུང་མ་ཐག་ཏུ་ངེས་པས་འཇིག་པ་ཡིན་ལ། དངོས་པོ་ཡང་རྩོལ་བ་ལས་བྱུང་བ་ཡིན་པའི་ཕྱིར། འདིའི་འཇིག་པ་ནི་ངེས་པ་ཉིད་ཡིན་པས་ན། འདི་ནི་འཇིག་པའི་ངང་ཅན་གྱི་བདག་ཉིད་ཡིན་
[15b.7]ནོ། །མི་རྟག་པ་ཉིད་ནི་རྩོལ་བ་ལས་བྱུང་བའི་རང་བཞིན་ཅན་ཉིད་མ་ཡིན་ནོ། །དེ་བཞིན་དུ་བྱས་པ་ཉིད་ལ་སོགས་པ་ཡང་ངོ་། །མི་རྟག་པ་ཉིད་ཡོད་པའི་རང་བཞིན་ལས་ནི་མི་འདའ་བའི་ཕྱིར་མི་རྟག་པ་ཉིད་ཀྱིས་ཡོད་པ་ཞེས་རྟོགས་པར་འགྱུར་བ་ཉིད་དེ་དཔེར་ན་ཡོད་པས་མི་རྟག་པའོ་ཞེས་བྱ་བ་བཞིན་
[16a]
[16a.1]ནོ། །དེ་བཞིན་དུ་བུམ་པ་ཉིད་ཀྱང་ཡོད་པའི་བདག་ཉིད་ཅན་ཡིན་ལ་ཡོད་པ་ནི་བུམ་པས་སྟོང་པ་ཉིད་དོ། །དེ་བཞིན་དུ་སའི་རང་བཞིན་དང་དངུལ་དག་ཀྱང་ཡིན་ཏེ། གཞན་ཡང་དེ་བཞིན་དུ་རྟོགས་པར་བྱའོ། །གལ་ཏེ་བྱས་པ་དང་མི་རྟག་པ་ལ་སོགས་པའི་རང་བཞིན་དངོས་
[16a.2]པོ་དངོས་སུ་ཐ་མི་དད་པ་ཉིད་མ་ཡིན་ནམ། དེས་ན་དངོས་པོའི་གནས་པ་ལ་སོགས་པ་ལ་མི་ལྟོས་པར་རང་གི་བག་ཆགས་ཀྱི་རྗེས་སུ་འབྲང་བའི་རྣམ་པར་རྟོག་པས་ཐ་དད་པས་རྟོགས་པ་ཡིན་ནོ། །དེས་ན་དེའི་རང་བཞིན་དང་བཟློག་པའི་རྣམ་པར་དབྱེ་བ་འདི་གལ་ཏེ་དངོས་པོའི་རང་བཞིན་ལ་ལྟོས་པ་ཡིན་
[16a.3]ན་ནི་དེའི་ཚེ་ནུས་པ་མ་ཡིན་ཏེ་དེ་ལ་བྱས་པ་དང་མི་རྟག་པའི་རྣམ་པར་དབྱེ་བ་མེད་པའི་ཕྱིར་རོ། །དེ་མེད་ན་མི་རྟག་པ་ཉིད་འདི་ནི་གཞན་གྱི་རང་བཞིན་ཡིན་ལ། དེ་ནི་འདི་མ་ཡིན་ནོ་ཞེས་བྱ་བར་ག་ལ་འགྱུར། འོན་ཏེ་རྣམ་པར་རྟོག་པས་ཀུན་བརྟགས་པའི་ཆོས་ལ་ལྟོས་པ་ཡིན་ན། འོ་ན་ནི་རྣམས་
[16a.4]པར་རྟོག་པས་བྱས་པ་ཡིན་པའི་ཕྱིར་དེ་ལས་དངོས་པོ་རྣམ་པར་གནས་པ་མ་ཡིན་ནོ། །འདིས་གཞན་གཞན་གྱི་རང་བཞིན་དུ་ཇི་ལྟར་བརྟགས་པ་གང་ཡིན་པ་དེ་ནི་དེ་ཁོ་ན་ལྟར་ཡིན་ནོ་ཞེས་བྱ་བའི་ངེས་པ་ཅི་ཞིག་ཡོད། དེ་ལྟ་ན་འོ་ན་དངོས་པོ་ལ་ཁྱད་པར་མེད་པའི་ཕྱིར་དང་། བརྟགས་པ་ལ་ཡང་དངོས་པོ་
[16a.5]མ་ཡིན་པའི་ཕྱིར་དེའི་བདག་ཉིད་གཏན་ཚིགས་ཅན་གྱི་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་ལ་བསྒྲུབ་བྱ་སྒྲུབ་བྱེད་ཀྱི་ངེས་པ་མེད་པར་འགྱུར་རོ་ཞེ་ན། ཇི་ལྟར་ངེས་པ་མེད་པ་གང་གི་ཕྱིར་དངོས་པོ་ལ་ཐ་དད་པ་མེད་པའི་ཕྱིར་མི་འཁྲུལ་པར་ངེས་པ་ཉིད་ཀྱིས་སོ། །དེའི་བདག་ཉིད་ཅན་ནི་མེད་པར་
[16a.6]མི་འབྱུང་བའི་ཕྱིར་འཁྲུལ་པ་མེད་པས་རང་གི་མཚན་ཉིད་ཀྱི་བདག་ཉིད་ཀྱི་རྩོལ་བ་ལས་བྱུང་བ་དང་མི་རྟག་པ་གང་ཡིན་པ་དེ་དག་ནི་མི་འཁྲུལ་པ་ཉིད་དོ། །རྩོལ་བ་ལས་བྱུང་བའི་རྫས་ཀྱི་བདག་ཉིད་དུ་གྱུར་པའི་མི་རྟག་པ་ཉིད་ནི་རྩོལ་བ་ལས་བྱུང་བ་ཉིད་འདོར་བ་མ་ཡིན་ལ། དེ་ཡང་འདིས་མི་འདོར་རོ། །དེ་
[16a.7]བཞིན་དུ་བུམ་པ་དང་རྡུལ་དག་ཀྱང་རྫས་གཞན་ལ་དེ་ལྟ་མ་ཡིན་པར་འགྱུར་ཡང་རྫས་གང་ལ་བདག་གཅིག་ཏུ་གྱུར་པའི་རྫས་དེ་ལ་འཁྲུལ་པ་མེད་པ་ཉིད་དོ། །དེ་དང་དེ་མ་ཡིན་པའི་རྫས་ལ་ཡོད་པའི་ཆོས་གཉིས་པོ་དེ་ནི་གསལ་བ་ཐ་དད་པ་ཁོ་ནའོ། །དེས་ན་གཞན་འཁྲུལ་པས་གཞན་དེ་ལྟར་མི་འགྱུར་བའི་
[16b]
[16b.1]ཕྱིར་དེའི་བདག་ཉིད་ལ་འཁྲུལ་པ་མེད་དོ། །འོ་ན་ཇི་ལྟར་གོ་བར་བྱ་བ་དང་གོ་བར་བྱེད་པའི་དངོས་པོ་མ་ཡིན་ཞེ་ན། འདིར་བརྗོད་པ། གོ་བར་བྱ་བ་དང་གོ་བར་བྱེད་པའི་དངོས་པོ་ནི་རྣམ་པར་རྟོག་པ་ལ་གནས་པ་ལ་ལྟོས་པ་ཡིན་ཏེ། རྣམ་པར་རྟོག་པ་ལ་མི་གནས་པའི་དངོས་པོ་ནི་རྟོག་པར་བྱེད་པ་
[16b.2]མ་ཡིན་པའི་ཕྱིར་རོ། །རྣམ་པར་རྟོག་པ་ཡང་ཆོས་འགའ་ཞིག་ནི་དེ་དང་དེ་མ་ཡིན་པའི་དངོས་པོར་ངེས་པར་བྱེད་དེ་དཔེར་ན་རྩོལ་བ་ལས་བྱུང་བའི་བདག་ཉིད་ཅན་གྱི་མི་རྟག་པ་ཉིད་དེ་ལ་མི་འཁྲུལ་པ་ཡིན་ཡང་། རྩོལ་བ་ལས་བྱུང་བ་དང་རྩོལ་བ་མ་ཡིན་པའི་རང་བཞིན་དུ་ངེས་པར་བྱེད་པའི་ཕྱིར་
[16b.3]དེའི་ཞེན་པས་བྱས་པ་མི་འཁྲུལ་པ་དེ་གོ་བར་བྱེད་པ་མ་ཡིན་ནོ། །དེ་བཞིན་དུ་ཤིང་ཉིད་ཀྱང་ཤ་པ་དང་ཤ་པ་མ་ཡིན་པའི་རང་བཞིན་ཡིན་ལ་བུམ་པ་དང་རྡུལ་ཉིད་དག་ཀྱང་དེ་དང་དེ་མ་ཡིན་པའི་རང་བཞིན་ཡིན་ནོ། །ཤ་པ་ཉིད་དང་བརྩལ་མ་ཐག་ཏུ་བྱུང་བ་ཉིད་ནི་ཤིང་དང་མི་རྟག་པར་འགྱུར་བ་ཁོ་ནའོ། །
[16b.4]བྱས་པ་ཉིད་ལ་སོགས་པ་ཡང་དེ་བཞིན་ཏེ་གོ་བར་བྱེད་པ་ནི་དེའི་ངོ་བོ་ཉིད་དུ་ངེས་པ་ཡིན་ནོ། །དེའི་ཕྱིར་འཁྲུལ་པ་མེད་པ་ཡིན་ཡང་རྣམ་པར་རྟོག་པའི་ཉེས་པས་འཁྲུལ་པ་དང་མི་འཁྲུལ་པ་གཅིག་ཏུ་ངེས་པའི་ཕྱིར་འཁྲུལ་པ་དང་བཅས་པར་འགྱུར་ཏེ། དེའི་ཕྱིར་གང་ལ་སྐུར་པ་འདི་མེད་པ་
[16b.5]དེ་ནི་འབྲེལ་པའི་དབང་གིས་གོ་བར་བྱེད་པ་ཉིད་དོ་ཞེས་སོ། །འདི་ཡང་གཅོལ་མེད་པ་ཉིད་དེ་རང་གི་མཚན་ཉིད་ཀྱི་བདག་ཉིད་ཀྱི་ཆོས་དེའི་བདག་ཉིད་དུ་གྱུར་པ་རྣམས་ནི་མི་འཁྲུལ་པར་སྦྱོར་བར་བྱེད་པ་མ་ཡིན་པའི་ཕྱིར་བརྗོད་པར་མི་འོས་པ་ཉིད་དོ། །གོ་བར་བྱ་བ་དང་གོ་བར་བྱེད་པའི་དངོས་པོ་
[16b.6]ནི་རང་གི་མཚན་ཉིད་གཞན་གྱི་མཐར་ཐུག་པ་ཉིད་དེ། བསྒྲུབ་པར་བྱ་བའི་ཆོས་ཅན་རང་གི་མཚན་ཉིད་གཞན་ཡིན་པའི་ཕྱིར་རོ། །གལ་ཏེ་དེ་དག་ཆོས་ཅན་གཅིག་ལ་བདག་ཉིད་དུ་གཅིག་ཏུ་ཟིན་ཀྱང་དེ་ལྟར་རང་གི་མཚན་ཉིད་གཞན་ལ་མ་ངེས་པ་མ་ཡིན་པ་དེའི་ཚེ་དེ་མི་འཁྲུལ་པའི་རྒྱུ་མ་ཡིན་
[16b.7]ནོ། །ཐམས་ཅད་དུ་དེ་ལྟ་བུར་གྱུར་པའི་མཚན་ཉིད་ཀྱི་མི་འཁྲུལ་པ་ནི་མཐོང་བ་དང་མ་མཐོང་བའི་རྒྱུ་ཅན་ཉིད་ཡིན་པ་བསལ་ནས་འབྲེལ་པའི་རྒྱུ་མཚན་ཅན་དུ་རྣམ་པར་འཇོག་པར་འགྱུར་རོ། །གལ་ཏེ་དེའི་བདག་ཉིད་ཡིན་ཏེ་བུམ་པ་རྡུལ་ཡིན་ཞེས་ངེས་པ་མེད་ན་དེ་ལས་མི་འཁྲུལ་པ་མ་ཡིན་ནོ། །
[17a]
[17a.1]རང་གི་མཚན་ཉིད་གཅིག་གི་མཐར་ཐུག་པའི་ངེས་པས་ནི་ཐམས་ཅད་དུ་ཡིན་ནོ་ཞེས་ནུས་པ་མ་ཡིན་ནོ། །འོན་ཏེ་རྡུལ་ལ་བརྟེན་པ་ཉིད་ཡིན་ན། དེའི་ཚེ་རྡུལ་གང་ཡིན་པ་དེ་ནི་རྡུལ་ཉིད་ཡིན་ནོ་ཞེས་ལུགས་ལོག་པར་བསྟན་ཏོ། །དེའི་ཕྱིར་བདག་ཉིད་གཅིག་ལ་མི་འཁྲུལ་
[17a.2]པར་བརྗོད་པ་ནི་ཕོངས་པ་སྒྲུབ་པར་བྱེད་པ་ཙམ་དུ་ཟད་ཀྱི། དངོས་པོ་སྒྲུབ་པར་བྱེད་པ་ནི་མ་ཡིན་ནོ། །གང་ཞིག་རྣམ་པར་རྟོག་པས་བདག་གཅིག་ཏུ་རྟོགས་པར་འགྱུར་བ་ཤ་པའི་བདག་ཉིད་ཅན་གྱི་ཤིང་གཅིག་དེར་ངེས་པ་ཡིན་ཡང་གལ་ཏེ་ལོ་མ་ལ་སོགས་པ་དང་ལྡན་པ་དེའི་རང་བཞིན་ཅན་མ་
[17a.3]ཡིན་པ་གཞན་ཉིད་ཡོད་པ་ཡིན་ན། དེའི་ཚེ་ཤ་པ་ཉིད་ཀྱང་ཤིང་ལ་འཁྲུལ་བར་འགྱུར་ཏེ། དེའི་ཕྱིར་གཞན་མེད་དོ་ཞེས་ཇི་ལྟར་རྟོག །དེའི་བདག་ཉིད་ནི་གཅིག་ཉིད་ལ་ངེས་པར་བྱེད་པ་ཡིན་ཏེ། དེས་ན་དེའི་རིགས་ཅན་གྱི་ཆོས་གཞན་ནི་བཅད་པར་མི་ནུས་སོ། །དེའི་ཕྱིར་ཇི་ལྟར་བྱས་པ་ཉིད་
[17a.4]མི་རྟག་པའི་བདག་ཉིད་ཅན་ཡིན་པ་དེ་བཞིན་དུ་གཞན་ཡང་ཡོད་པར་འགྱུར་ཞིང་དེ་ཡང་རྣམ་པར་རྟོག་པས་གཅིག་ཏུ་ངེས་པའི་ཕྱིར། གཞན་གྱི་རང་བཞིན་གྱི་བྱས་པ་མ་མཐོང་ཡང་འཁྲུལ་པ་མེད་པར་ངེས་པ་མེད་དོ། །གནོད་པར་བྱེད་པས་གཞན་ལ་འཇུག་པ་གཅོད་དོ་ཞེ་ན། འབྲེལ་པ་ཉེ་བར་བཀོད་པས་
[17a.5]ཅི་ཡང་བྱར་མེད་དོ། །དེ་གཉིས་ཀྱིས་མི་མཐུན་པའི་ཕྱོགས་ལ་མེད་པ་རྟོགས་པས་ན། བསྒྲུབ་བྱ་སྒྲུབ་བྱེད་ཀྱི་དངོས་པོར་རྣམ་པར་གནས་པའི་ཕྱིར་རོ། །དངོས་སུ་ན་བསྒྲུབ་བྱ་སྒྲུབ་བྱེད་དག་ཐ་མི་དད་པའི་ཕྱིར་རོ་ཞེ་ན། ཐ་མི་དད་པ་དེ་ནི་ཡོད་ཀྱང་གོ་བར་བྱེད་པའི་ཡན་ལག་མ་ཡིན་ཏེ། ཐ་དད་ཀྱང་
[17a.6]གནོད་པར་བྱེད་པ་ཉིད་ཀྱིས་མི་མཐུན་པའི་ཕྱོགས་ལ་འཇུག་པ་རྣམ་པར་བཅད་པ་ནི་གོ་བར་བྱེད་པ་ཁོ་ན་ཡིན་ལ་དེ་ནི་བསྒྲུབ་པར་བྱ་བའི་རྟོགས་པ་ལ་ཡང་གྲུབ་པའི་ཕྱིར་རོ། །ཐ་དད་པ་མེད་པའི་ཕྱིར་ཆོས་རྣམས་དེའི་བདག་ཉིད་དུ་གྲུབ་བོ་ཞེ་ན། འོ་ན་དེ་ཐ་དད་པ་བཀག་པ་ཉིད་ཀྱིས་མཐར་ཕྱིན་པའི་ཕྱིར་
[17a.7]འབྲེལ་པ་བསྟན་པས་ཅི་ཞིག་བྱ། དེས་ན་འདིར་ནི་བརྗོད་པར་མི་བྱ་བ་ཉིད་དུ་འགྱུར་རོ། །དེའི་ཕྱིར་གོ་བར་བྱེད་པ་གོ་བར་བྱ་བའི་བདག་ཉིད་ཡིན་པའི་ཕྱིར་དེའི་བདག་ཉིད་དུ་བརྗོད་དོ། །འདི་ཡང་ཇི་ལྟར་འགྲུབ་ཅེ་ན། མི་འགྲུབ་པར་ཇི་ལྟར་འགྱུར། གང་གི་ཕྱིར་འདི་ལ་དངོས་པོ་རྣམས་རང་བཞིན་ཕན་
[17b]
[17b.1]ཚུན་ཐ་དད་པ་ཉིད་ཀྱི་རྗེས་སུ་འགྲོ་བ་མེད་པའི་ཕྱིར། གཅིག་གི་རང་བཞིན་གང་ཡིན་པ་དེ་གཞན་ལ་མེད་པ་དེ་ནི་འཁྲུལ་པ་དང་མི་འཁྲུལ་པའི་དཔྱོད་པ་འདིའི་རྟེན་མ་ཡིན་ནོ། །དེ་ལ་ཡོད་པའི་རང་བཞིན་མེད་པ་གཞན་ལ་ཡོད་ན་འཁྲུལ་པ་ཡིན་ཏེ། དཔེར་ན་སྒྲ་བྱས་པ་དེ་ལ་ཡོད་པའི་བྱས་པ་ཉིད་སྒྲ་མེད་པར་
[17b.2]བུམ་པ་ལ་ཡོད་པ་ན་སྒྲ་ལ་འཁྲུལ་པ་བཞིན་ནོ། །འདི་ནི་ཡོད་པ་མ་ཡིན་ཏེ། །གཅིག་ཉིད་དུ་ཐལ་བས་ན་སྒྲ་ནི་བུམ་པ་ལ་མེད་པའི་ཕྱིར་རོ། །དེའི་ནི་འགའ་ཡང་དེ་ལ་མེད་པའི་ཕྱིར་འདི་ཇི་ལྟར་འཁྲུལ་པ་ཡིན། དེས་ན་གལ་ཏེ་དེའི་རང་བཞིན་གཞན་ལ་སྲིད་པ་མ་ཡིན་པ་དེ་ལྟ་ན་བྱས་པ་ཉིད་ནི་དེ་ལ་ཡོད་པ་
[17b.3]ཡིན་ཏེ། འོན་ཀྱང་དེ་ལ་ཡོད་པ་གང་ཡིན་པ་དེ་ཉིད་ནི་མ་ཡིན་ནོ། །རྗེས་སུ་འགྲོ་བ་མེད་ཀྱང་བྱས་པ་ཙམ་ཡོད་པ་ལ་ལྟོས་ཏེ་འཁྲུལ་པ་ཡིན་ནོ། །འདི་ལྟར་རྒྱུའི་བྱེད་པ་ལ་གྲུབ་པ་གང་ཡིན་པ་དེ་བྱས་པ་ཡིན་པའི་ཕྱིར་སྒྲ་བཞིན་དུ་བུམ་པ་ཡང་དེ་ལྟ་བུ་ཡིན་ནོ། །དེས་ན་དེ་ལྟར་དེའི་རང་བཞིན་གང་
[17b.4]ཡིན་པ་དེ་གཞན་ལ་མེད་པ་ཡིན་གྱི་བྱས་པ་ཉིད་ནི་ཡོད་པ་ཉིད་དོ། །དེས་ན་རྒྱུའི་དེ་མ་ཐག་ཏུ་འབྱུང་བ་ཉིད་ཀྱིས་བྱས་པ་ཉིད་ཡིན་ཡང་ཉན་པས་བཟུང་བའི་བདག་ཉིད་བུམ་པ་ལ་མེད་པའི་ཕྱིར་ཏེ། དཔེར་ན་སྒྲའི་རང་བཞིན་ཉིད་མ་ཡིན་ནོ། །དེ་བཞིན་དུ་གལ་ཏེ་སྒྲ་བཞིན་དུ་བུམ་པ་ཡང་བྱུང་མ་ཐག་ཏུ་
[17b.5]འཇིག་པ་མ་ཡིན་ནོ། །བྱས་པ་མི་རྟག་པ་དང་འཁྲུལ་པར་འགྱུར་ཏེ། དཔེར་ན་སྒྲའམ་བུམ་པ་རྟག་པར་ཐེ་ཚོམ་ཟ་བ་ན་མི་རྟག་པ་ཉིད་ལས་དེ་ལ་བསྟན་པར་མི་འགྱུར་རོ། །དེས་ན་ཇི་ལྟར་བུམ་པ་བྱས་པ་ཡིན་པ་ལྟར་སྒྲ་ཡང་ཡིན་པས་ན་བྱས་པ་ཉིད་མ་ཡིན་ནོ་ཞེས་བྱ་བར་མི་ནུས་པ་དེ་བཞིན་དུ་
[17b.6]བྱས་པ་ཉིད་མི་རྟག་པའི་ལུས་ཅན་ཡིན་པའི་ཕྱིར་དེ་ཡོད་ན་མི་རྟག་པ་ཉིད་མེད་པ་མ་ཡིན་པའི་ཕྱིར་ཆོས་བདག་ཉིད་གཅིག་པ་དེའི་བདག་ཉིད་ཉེ་བར་འགོད་པ་ཡིན་ནོ། །དངོས་པོ་ཐ་མི་དད་པ་ལ་ནི་ཇི་ལྟར་བུམ་པས་སྟོང་ཡང་སྒྲ་བྱས་པ་ཡིན་པ་དེ་བཞིན་དུ། མི་རྟག་པས་སྟོང་པར་ཡང་འགྱུར་
[17b.7]བའི་ཕྱིར་བྱས་པ་ཉིད་ལས་དེ་མི་རྟག་པར་འགྱུར་རེ་སྐན། ད་ནི་ཇི་ལྟར་ཆོས་ཅན་ཐ་མི་དད་ཅེ་ན་ཇི་ལྟར་ཞེས་ཅི་སྟེ་བརྗོད། ཆོས་ཇི་ལྟ་བ་བཞིན་དུ་ཆོས་ཐ་དད་པ་ཡང་མ་ཡིན་ནམ། འདི་ལྟར་འཁྲུལ་པ་དང་མི་འཁྲུལ་པ་རྣམ་པར་དཔྱོད་པ་ན་གདོན་མི་ཟ་བར་བྱས་པ་ཉིད་ལ་སོགས་པའི་རང་བཞིན་
[18a]
[18a.1]35 བསྟན་པར་བྱ་བ་ཡིན་ཏེ། དེ་ལྟ་མ་ཡིན་ན་གང་ཞིག་གཞན་ལ་ཡོད་པ་དང་མེད་པས་འཁྲུལ་པ་དང་མི་འཁྲུལ་པ་དག་ཏུ་འགྱུར། རང་བཞིན་ངེས་པར་བརྟགས་པ་གཉིས་པོ་དེ་ནི་གཅིག་ལ་ཇི་ལྟར་ཡོད་པ་ལྟར་གལ་ཏེ་གཞན་ལ་ཡང་འགྱུར་བ་ཡིན་ན། དེའི་ཚེ་མི་འཁྲུལ་
[18a.2]པ་མིན་ནོ། །འོན་ཏེ་གཅིག་ཡོད་ལ་གཞན་མ་ཡིན་ན་དེས་ན་གཅིག་གིས་གཞན་ལ་འཁྲུལ་པ་མ་ཡིན་ནོ། །དེ་ལ་བྱས་པ་ཞེས་བྱ་བ་ནི་རྒྱུ་དང་འབྲེལ་པའི་བདག་ཉིད་ཀྱི་རང་བཞིན་ཡིན་པས་རྣ་བས་གཟུང་བ་ལ་སོགས་པའི་རང་བཞིན་མ་ཡིན་པའི་ཕྱིར་སྒྲ་མ་ཡིན་ཡང་བུམ་པའམ་བུམ་པ་མ་ཡིན་ཡང་
[18a.3]སྒྲ་བྱས་པར་འགྱུར་བ་ཡིན་གྱི། འདི་མི་རྟག་པ་ཉིད་ལས་འདའ་བ་མ་ཡིན་ནོ། །བྱས་པ་ཉིད་ནི་དངོས་པོའི་ཆོས་རྒྱུས་བྱས་པ་ཞེས་བྱ་བ་ཡིན་ལ་རྒྱུ་རྣམས་ཀྱང་འཇིག་པའི་ངང་ཅན་སྐྱེས་པར་བྱེད་པ་ཡིན་པའི་ཕྱིར་འཇིག་པའི་ངང་ཅན་སྐྱེས་པར་བྱེད་པ་ལ་སྐྱེས་པའི་བྱས་པ་ཉིད་འཇིག་པའི་ངང་ཅན་མ་ཡིན་པར་མི་འགྱུར་རོ། །དེས་ན་འདི་གང་དང་གཅིག་
[18a.4]པར་གྱུར་པ་དེ་བྱས་པ་བཞིན་དུ་འཇིག་པའི་ངང་ཅན་དུ་འགྱུར་རོ། །དེ་བཞིན་དུ་ཤ་པ་ཉིད་ཀྱང་ལོ་མ་ལ་སོགས་པ་དང་ལྡན་པའི་ཁྱད་པར་གྱི་རང་བཞིན་ཡིན་པའི་ཕྱིར་ཤིང་ཉིད་ཀྱི་རང་བཞིན་ཡིན་གྱི་ཤིང་ཉིད་ནི་ཤ་པའི་བདག་ཉིད་ཅན་མ་ཡིན་ནོ། །གལ་ཏེ་ཤིང་གཅིག་ཉིད་མ་ཡིན་ནམ། ཤིང་གང་ཡིན་
[18a.5]པ་དེ་ཤ་པའི་བདག་ཉིད་ཅན་ཡིན་ན་ཤ་པའི་བདག་ཉིད་མ་ཡིན་པའི་ཤིང་ཉིད་གཞན་གང་ཞིག་ཡིན། རང་གི་མཚན་ཉིད་ལ་ནི་ཤིང་ལ་སོགས་པའི་བདག་ཉིད་ཅན་འགའ་ཞིག་ནི་གཞན་གྱི་བདག་ཉིད་ཅན་མ་ཡིན་ལ། འགའ་ཞིག་ནི་གཞན་གྱི་རང་བཞིན་མ་ཡིན་པ་ཡོད་པ་མ་ཡིན་ཏེ། དེ་ལ་ཆོས་རྣམ་པར་
[18a.6]དབྱེ་བ་མེད་པའི་ཕྱིར་རོ། །གལ་ཏེ་དེ་ལྟ་ན་ཐམས་ཅད་བདག་ཉིད་གཅིག་པ་ཡིན་ཡང་དེ་ཡོངས་སུ་སྤངས་ནས་ཡོད་པར་འགྱུར་བའི་ཕྱིར་དེའི་བདག་ཉིད་འཁྲུལ་པར་འགྱུར་ཏེ། དེས་ན་ཤ་པ་ཡང་ཤིང་གི་བདག་ཉིད་ཅན་ཡིན་པར་འགྱུར་རོ། །གལ་ཏེ་དངོས་པོ་ལ་དེའི་ཆོས་རྗེས་སུ་འགྲོ་བའམ་
[18a.7]ཆོས་རྣམ་པར་དབྱེ་བ་འགའ་ཡང་མེད་དོ་ཞེས་འཆད་པར་འགྱུར་བ་མ་ཡིན་ནམ། རྣམ་པར་དབྱེ་བ་ཡོད་ན་ཤིང་གཉིས་སུ་འགྱུར་རོ། །རྣམ་པར་དབྱེ་བ་མེད་ན་ཡང་དེའི་རང་བཞིན་ཅན་མ་ཡིན་པའི་ཆོས་ཅན་གཞན་ལ་ཡོད་པའི་ཕྱིར་དེའི་བདག་ཉིད་ལ་ངེས་པ་ཉིད་དོ། །དོན་གཞན་ལ་ཡོད་པའི་
[18b]
[18b.1]ཤིང་ཉིད་དང་ཤ་པ་ཉིད་ནི་གཞན་ཉིད་ཡིན་ནོ། །དེས་ན་ཇི་ལྟར་ཤིང་ཡིན་ཡང་སེང་ལྡེང་དུ་གྱུར་པ་དེ་བཞིན་དུ་ཤ་པ་ཡང་ཤིང་མ་ཡིན་པར་འགྱུར་རོ། །འདི་ལ་བརྗོད་པ་ཤིང་ཞེས་བྱ་བ་ནི་ལོ་མ་ལ་སོགས་པ་དང་ལྡན་པ་ལ་བརྗོད་དེ། དེས་ན་འདི་སེང་ལྡེང་ལ་ཡང་འགྱུར་རོ། །ཤ་པ་ཞེས་བྱ་བ་ནི་ལོ་མ་ལ་
[18b.2]སོགས་པའི་ཁྱད་པར་དེ་ཇི་ལྟར་ཤིང་མ་ཡིན་པར་འགྱུར་རོ། །དེ་བཞིན་དུ་བྱས་པ་ཞེས་བྱ་བ་ནི་འཇིག་པའི་ངང་ཅན་གྱི་རྒྱུའི་དངོས་པོའི་ཆོས་ཡིན་པས་དེ་ཡང་ཇི་ལྟར་འཇིག་པའི་ངང་ཅན་མ་ཡིན་པར་འགྱུར། དེ་ལྟར་ཡང་སྟོན་པར་འགྱུར་རོ། །རིང་པོ་ཉིད་དང་ཤ་པ་ཉིད་དག་ནི་ཕན་ཚུན་བདག་ཉིད་དུ་གྱུར་པ་
[18b.3]མ་ཡིན་ཏེ། དེས་ན་གང་ཞིག་གང་གི་བདག་ཉིད་ཅན་ཡིན་པ་དེ་དེ་ལ་མི་འཁྲུལ་པའི་ཕྱིར་ཆོས་ཀྱི་བདག་ཉིད་དེའི་བདག་ཉིད་ཡིན་པར་འབྲེལ་པ་རིགས་པ་དག་སེམས་སོ། །ཡང་ཇི་ལྟར་ན་འགའ་ཞིག་གི་རང་བཞིན་ཡིན་ཞེས་རྟོགས་ཤེ་ན། འདི་ནི་མདུན་དུ་འཆད་པར་འགྱུར་རོ། །གལ་ཏེ་གོ་བར་བྱེད་པ་གཅིག་
[18b.4]གི་བདག་ཉིད་ཡིན་ན་དེའི་ཚེ་སྒྲུབ་པར་བྱེད་པ་གང་ཡིན་པ་དེ་ཉིད་བསྒྲུབ་པར་བྱ་བར་འགྱུར་ཏེ། ཤ་པའི་རང་བཞིན་ཤིང་ཉིད་ཡིན་པའི་ཕྱིར་དང་། དེ་བཞིན་དུ་བྱས་པ་མི་རྟག་པའི་བདག་ཉིད་ཡིན་པའི་ཕྱིར་དེ་ལྟར་ནི་རིགས་པ་མ་ཡིན་ཏེ། སྒྲུབ་པར་བྱེད་པ་དང་བསྒྲུབ་པར་བྱ་བ་དག་ཕན་ཚུན་འགལ་བའི་
[18b.5]ཕྱིར་རོ། །སྒྲུབ་པར་བྱེད་པའི་རང་བཞིན་ནི་གྲུབ་པ་ཡིན་ལ་བསྒྲུབ་པར་བྱ་བ་ནི་དེ་ལས་བཟློག་པ་ཡིན་ཏེ། དེས་ན་སྒྲུབ་པར་བྱེད་པ་དང་བསྒྲུབ་པར་བྱ་བ་དག་བདག་ཉིད་གཅིག་པར་འཐད་པ་མ་ཡིན་ནོ། །འདི་ཉིད་སྨྲས་པ་ནི་གལ་ཏེ་དེའི་བདག་ཉིད་ཡིན་ན་ཞེས་བྱའོ། །དེའི་ཞེས་བྱ་བ་ནི་གོ་བར་བྱ་བའོ། །གང་
[18b.6]ལ་དེའི་བདག་ཉིད་ཡོད་པ་དེ་ལ་དེ་སྐད་བརྗོད་དེ་དེ་ཡང་གོ་བར་བྱེད་པའོ། །དེའི་དངོས་པོ་ཉིད་དེ་དེ་ཡིན་ན་བསྒྲུབ་པར་བྱ་བ་དང་སྒྲུབ་པར་བྱེད་པ་བྱེ་བྲག་མེད་དོ་ཞེ་ན། དོགས་པ་འདི་བསལ་བའི་ཕྱིར་མ་ཡིན་ཏེ་ཞེས་སྨོས་ཏེ་བྱས་པ་དང་མི་རྟག་པ་ལ་སོགས་པའི་ཆོས་ཀྱི་བྱེ་བྲག་ཀུན་བརྟགས་པའི་ཕྱིར་རོ། །
[18b.7]རྟོགས་པ་ནི་རྣམ་པར་རྟོག་པའི་བྱེད་པར་རིག་པ་སྟེ། གཏན་ཚིགས་དེའི་ཕྱིར་རོ། །རྣམ་པར་རྟོག་པས་ཆོས་ཐ་དད་པ་རིག་པའི་ཕྱིར་རོ་ཞེས་བྱ་བའི་ཐ་ཚིག་གོ། །གལ་ཏེ་བྱས་པ་མི་རྟག་པའི་བདག་ཉིད་ཡིན་པ་དེ་ལྟ་ན། རྣམ་པར་རྟོག་པས་དེ་དག་ཐ་དད་པར་རིག་པ་དེའི་ཕྱིར་བྱས་པའི་བདག་ཉིད་དེ་
[19a]
[19a.1]ཞེས་མ་རྟོགས་པ་དག་བྱས་པ་གྲུབ་ཀྱང་མི་རྟག་པ་མི་རིགས་པའི་ཕྱིར་གྲུབ་པ་དང་མ་གྲུབ་པ་སྒྲུབ་པ་དང་བསྒྲུབ་བྱའི་བྱེ་བྲག་རྗེས་སུ་མཐུན་པ་ཉིད་དོ། །འདི་ཡང་ཕྱིས་འཆད་པར་འགྱུར་རོ། །འདིར་འདོད་ཉིད་ནི་མ་ཡིན་ཏེ། སློབ་དཔོན་གྱིས་ཀྱང་དེ་ལྟར་ཞལ་གྱིས་བཞེས་པའི་ཕྱིར་
[19a.2]ཞེས་བཤད་པ་ནི། དེ་སྐད་དུ་ཡང་ཞེས་བྱ་བའོ། །རྗེས་སུ་དཔག་པ་དང་རྗེས་སུ་དཔག་པའི་ཐ་སྙད་ནི་རྟོགས་པ་པོའི་དེ་ལ་བརྟེན་པའི་བྱེད་པ་སྟེ། རྗེས་སུ་དཔག་པས་རྗེས་སུ་དཔག་པར་བྱ་བ་རྗེས་སུ་དཔོག་པ་འདི་ཐམས་ཅད་ནི་བློ་ལ་ཡོད་པའི་ཆོས་དང་ཆོས་ཅན་གྱི་བྱེ་བྲག་ཁོ་ནས་ཡིན་ནོ། །ཆོས་
[19a.3]ཅན་འདིའི་ཆོས་ནི་འདི་ཡིན་ནོ་ཞེས་དེ་ལྟ་བུའི་རང་བཞིན་གྱི་ཚུལ་གྱིས་རྗེས་སུ་དཔག་པ་འཇུག་ལ། དེ་ཡང་ཐམས་ཅད་དུ་བློ་ལ་ཡོད་པ་ཁོ་ན་ཡིན་ནོ། །སྒྲ་དང་ས་ཕྱོགས་ཆོས་ཅན་ཉིད་དང་བྱས་པ་དང་དུ་བ་དག་གམ། མི་རྟག་པ་དང་མེའི་ཆོས་ཉིད་བློས་བྱས་པ་ཁོ་ནའོ། །ཆོས་དང་ཆོས་ཅན་གྱི་དངོས་
[19a.4]པོ་ནི་འདི་འདིའི་ཡིན་ནོ་ཞེས་འབྲེལ་པ་རྟོགས་པ་ལས་ཡིན་ནོ། །དེ་ལས་ཐ་དད་པ་རྣམས་ཀྱི་ནི་འབྲེལ་པ་ཉིད་བཏགས་པ་ཡིན་ལ་ཐ་མི་དད་པ་ལ་ནི་ཐ་དད་པ་མེད་པར་ཆོས་དང་ཆོས་ཅན་གྱི་དངོས་པོ་མི་འགྲུབ་པའི་ཕྱིར། དེ་བློ་ལ་ཡོད་པ་ཞེས་བྱ་བས་བྱེ་བྲག་རྟོགས་པས་རྟོགས་པ་ཡིན་ནོ་ཞེས་འཆད་པར་
[19a.5]འགྱུར་བའི་ཕྱིར་ཤེས་པར་བྱེད་པའི་གཞུང་འདིའི་ཡུལ་ནི་ཆོས་ཐ་དད་པར་རྟོགས་པ་ཡིན་ནོ། །གལ་ཏེ་བྱས་པ་མི་རྟག་པའི་བདག་ཉིད་ཡིན་ཡང་དེ་ལས་བཟློག་པ་རྟོགས་ན། འོ་ན་ནི་དེ་ལས་ཐ་དད་པའི་ཕྱིར་དེ་ལྟ་བུ་བདེན་པའི་རང་བཞིན་མ་ཡིན་པས་ཟླ་བ་གཉིས་བཞིན་དུ་དེ་སྒྲུབ་པར་བྱེད་པ་མ་ཡིན་ཞེས་བྱ་བའི་
[19a.6]དོགས་པ་འདི་བསུ་ནས་ཆོས་དང་ཆོས་ཅན་ཉིད་དུ་ཞེས་སྨོས་སོ། །ཆོས་དང་ཆོས་ཅན་ཉིད་དུ་ཐ་དད་པ་བློའི་རྣམ་པས་བྱས་ཏེ། རྣམ་པར་རྟོག་པའི་བློས་མི་བདེན་པར་རྟོག་པ་ཡིན་གྱི་མི་རྟག་པ་ཉིད་ལ་སོགས་པའི་མཚན་ཉིད་ཀྱི་དོན་ཀྱང་ནི་མ་ཡིན་ཏེ། དེ་ནི་ཕྱི་རོལ་ན་ཡོད་པའི་ཕྱིར་རོ། །རྣམ་པ་བཏགས་
[19a.7]པ་ནི་གཙོ་བོ་ལ་སོགས་པ་བཞིན་དངོས་པོ་ལ་ཡོད་པ་མ་ཡིན་པ་ཡིན་ནོ། །རྣམ་པ་དེ་ལྟ་བུའི་བྱས་པ་མི་རྟག་པ་ལས་ཐ་དད་པ་ཡིན་གྱི། ཇི་ལྟར་དངོས་པོ་རྣམས་ཀྱིས་རྟག་པ་བཞིན་དུ་བྱས་པ་ཉིད་ཀྱང་དངོས་པོ་ལ་མེད་པ་ནི་མ་ཡིན་ནོ། །གལ་ཏེ་ཇི་སྐད་བརྗོད་པའི་ཚུལ་གྱིས་འདིའི་ཕྱི་རོལ་གྱི་བྱས་པ་ཉིད་དང་
[19b]
[19b.1]མི་མཐུན་པ་མ་ཡིན་ནམ། དེ་ཇི་ལྟར་ན་དེ་ཡང་དངོས་པོ་མེད་པར་མི་འགྱུར་ཞེ་ན། བློའི་བྱེ་བྲག་ཅེས་སྨོས་སོ། །འདི་བརྗོད་པ་ཡིན་ཏེ་གལ་ཏེ་རྣམ་པར་རྟོག་པ་དོན་གྱི་གཞན་གྱི་དབང་ཡིན་པའི་ཕྱིར་དོན་གྱི་ཡུལ་ཅན་དུ་གྱུར་པ་ཡིན་ན། དེའི་ཚེ་ཕྱིན་ཅི་ལོག་གི་རང་བཞིན་གྱི་དོན་རྟོགས་ན་དངོས་པོའི་ཡུལ་
[19b.2]ཉིད་ཉམས་པར་འགྱུར་བའི་ཕྱིར། དེས་རྟོགས་པར་བྱ་བ་དངོས་པོ་མ་ཡིན་པར་འགྱུར་ཏེ། རྣམ་པ་ཐམས་ཅད་དུ་དོན་གྱི་ཡུལ་ཅན་ཉིད་བཀག་པའི་ཕྱིར་རོ། །གང་གི་ཚེ་རང་དབང་དུ་གྱུར་པའི་ཕྱིར་འདི་དག་དོན་གྱི་ཡུལ་ཅན་མ་ཡིན་པ་དེའི་ཚེ་ནི་ཉེས་པ་མེད་དོ། །དོན་གྱི་ཡུལ་ཅན་གྱི་ཤེས་པ་དོན་དེ་ལ་དེའི་རང་
[19b.3]བཞིན་མ་ཡིན་པར་རྟོགས་པ་ནི་ངེས་པ་ཁོ་ནར་དོན་དམ་པ་མ་ཡིན་པའི་རང་བཞིན་སྣང་བར་འགྱུར་རོ། །གང་ཞིག་དངོས་པོ་ལ་རྟེན་པ་མེད་པ་རང་གི་ངོ་བོ་ཐོབ་པ་དེ་ནི་ཉེ་བར་ལེན་པ་ཙམ་གྱི་གཞན་དབང་ཡིན་པའི་ཕྱིར་དོན་གྱི་གཞན་གྱི་དབང་མ་ཡིན་པས་རང་དབང་དུ་གྱུར་པ་ནི་མི་སྲིད་པ་རྟོགས་པ་གང་ཡིན་པ་དེ་ནི་རྣམ་པར་
[19b.4]རྟོག་པའི་ཉེ་བར་ལེན་པའི་སྟོབས་ཀྱིས་ཡིན་པའི་ཕྱིར་ཆོས་ཐ་དད་པ་ལྟར་དེ་ནི་མེད་པ་ཁོ་ན་ཡིན་ལ། གནོད་པ་མེད་པའི་རྟོགས་པ་གང་ཡིན་པ་དེ་ནི་དངོས་པོའི་ཉེ་བར་ལེན་པའི་ལས་ཡིན་པའི་ཕྱིར་རྣམ་པར་རྟོག་པ་རྣམས་དངོས་པོ་ལ་བརྟེན་པ་མ་ཡིན་པ་ཉིད་ཀྱིས་ན། བྱས་པའི་བདག་ཉིད་ཀྱི་དོན་ཀྱང་བཏགས་
[19b.5]པ་ནི་མ་ཡིན་ནོ། །གལ་ཏེ་དངོས་པོར་ཡོད་པ་མ་ཡིན་པ་ཆོས་ཀྱིས་རྣམ་པར་བཅད་པ་ནི་བྱས་པ་ཉིད་ཕྱི་རོལ་མ་ཡིན་པ་ཉིད་མ་ཡིན་ནམ། དེས་ན་བློ་ལ་ཡོད་པའི་ཉེ་བར་ལེན་པའི་སྟོབས་ལས་འོངས་པ་ཡང་མི་བདེན་པ་ཉིད་དེ། དེས་ན་ཟླ་བ་གཉིས་ལ་སོགས་པ་བཞིན་དུ་དེ་རྟགས་མ་ཡིན་པ་ཉིད་དོ། །
[19b.6]འདི་ལ་བཤད་པ་ནི་དེ་དག་གིས་བརྟགས་པའི་ཡུལ་གྱིས་ཞེས་བྱ་བའོ། །དེ་དག་གིས་བརྟགས་པའི་ཡུལ་བློ་དེ་ལ་རྣམ་པར་གནས་པའི་ཆོས་གང་ཡིན་པ་དེས་དོན་གོ་ན་སྟེ། དེ་རྟགས་ཉིད་ཡིན་ན་ནི་དོན་མི་ཐོབ་པ་ཁོ་ནར་འགྱུར་རོ། །འདི་བརྗོད་པ་ཡིན་ཏེ་བློ་ལ་རྣམ་པར་གནས་པའི་ཆོས་ཉིད་ནི་རྟགས་མ་
[19b.7]ཡིན་ཏེ། དེ་རྟགས་ཡིན་ན་དོན་ཐོབ་པ་མེད་པར་འགྱུར་བའི་ཕྱིར་རོ། །འོན་ཀྱང་དངོས་པོ་ཉིད་ཡིན་ནོ། །དེས་ན་རྣམ་པར་རྟོག་པའི་སྣང་བ་མི་བདེན་པ་ཉིད་ཡིན་ཡང་འགལ་བ་ཅི་ཡོད། འོ་ན་ཇི་ལྟར་ཆོས་ཐ་དད་པར་རྟོགས་པ་ཉེ་བར་བཀོད་ཅེ་ན། ཆོས་ཐ་དད་པར་བརྟགས་པ་ཅན་གྱི་རྣམ་པར་རྟོག་པས་
[20a]
[20a.1]དེ་རྟོགས་པའི་ཕྱིར་རོ། །དེ་ལྟ་བུར་རྟོགས་ན་གྲུབ་པ་དང་བསྒྲུབ་པར་བྱ་བའི་རྣམ་པར་དབྱེ་བ་འཐོབ་པའི་ཕྱིར་བསྒྲུབ་བྱ་དང་སྒྲུབ་པའི་དངོས་པོ་འཐད་པ་དེས་ན་དེ་ལྟར་རྟོགས་པའི་དངོས་པོ་ཉིད་སྒྲུབ་པར་བྱེད་པ་ཡིན་ནོ། །དེ་ཉིད་ཀྱི་ཕྱིར་འབྲེལ་པའི་རྒྱུ་མཚན་ཅན་གྱི་མི་འཁྲུལ་པ་གྲུབ་པ་ཡིན་ནོ། །འོ་ན་
[20a.2]ཇི་ལྟར་ཕྱི་རོལ་དང་མི་འདྲ་བའི་བྱས་པ་རྟོགས་པའི་རང་བཞིན་གྱི་རྣམ་པར་རྟོག་པ་དེ་རྟོགས་པ་ཡིན་ཞེ་ན། རྣམ་པར་རྟོག་པ་ནི་དེ་རྟོགས་པ་མ་ཡིན་གྱི་མངོན་སུམ་ཉིད་དོ། །གལ་ཏེ་མངོན་སུམ་གྱིས་རྟོགས་པའི་བྱས་པ་ཉིད་མི་རྟག་པ་ལས་ཐ་མི་དད་པའི་ཕྱིར་ཇི་ལྟར་སྒྲུབ་པ་དང་བསྒྲུབ་པར་བྱ་བའི་དངོས་པོར་འགྱུར་
[20a.3]ཞེ་ན། བརྗོད་པ་བྱས་པ་ལས་མི་རྟག་པ་ཐ་མི་དད་པ་ཡིན་ཡང་མངོན་སུམ་བྱས་པ་ཞེས་བྱ་བར་རྗེས་སུ་འཇུག་གི། མི་རྟག་པ་ཉིད་ནི་མ་ཡིན་པའི་ཕྱིར་ཆོས་ཐ་དད་པར་རྟོགས་པར་འཐད་པ་ཡིན་ནོ། །གལ་ཏེ་མངོན་སུམ་ཉིད་ཀྱིས་རྟགས་རྟོགས་པ་ཡིན་ན། །འོ་ན་ཇི་ལྟར་བློ་ལ་ཡོད་པའི་ཞེས་བཤད་ཅེ་ན།
[20a.4]འདི་ན་བཤད་ཟིན་ཏེ། བློ་ལ་ཡོད་པའི་ཆོས་ཀྱི་བྱེ་བྲག་གང་ཡིན་པ་འདི་ནི་མངོན་སུམ་གྱི་རྗེས་སུ་འཇུག་པ་ཡིན་ཏེ། དེས་ན་མངོན་སུམ་གྱིས་གྲུབ་པ་ལས་འདས་པ་ཡང་མ་ཡིན། ཆོས་ཐ་དད་པ་ཉམས་པ་ཡང་མ་ཡིན་ནོ། །དེ་ལྟར་རང་བཞིན་འབྲེལ་པས་དོན་གོ་བར་བྱེད་པ་ཉིད་དུ་བརྗོད་ནས། དེའི་རྣམ་པ་
[20a.5]གཅིག་བཤད་པ་ཡིན་ནོ། །རྣམ་པ་གཞན་ཡང་བཤད་པ་ནི། འབྲས་བུ་ཡང་ཞེས་བྱ་བའོ། །དེའི་བདག་ཉིད་འབའ་ཞིག་དེར་རང་བཞིན་འབྲེལ་པར་ནི་མ་ཟད་དེ། འབྲས་བུ་ཇི་སྲིད་པ་ཡང་རང་བཞིན་འབྲེལ་པ་ཡིན་ནོ། །འབྲས་བུ་ཡང་རག་ལས་པའི་རང་བཞིན་ཡིན་ནོ། །འདི་ལ་རང་བཞིན་འབྲེལ་པ་
[20a.6]ཡོད་ན་དོན་གྱིས་དོན་འཁྲུལ་པ་མེད་དོ་ཞེས་བྱ་བས་གོ་བར་བྱེད་པ་གོ་བར་བྱ་བ་ལ་རག་ལས་པ་ཉིད་ཀྱིས་དེར་མི་འཁྲུལ་བར་བརྗོད་ལ། དེ་ནི་དེའི་བདག་ཉིད་ཡིན་པའི་ཕྱིར་རོ་ཞེས་བྱ་བས་ནི་གོ་བར་བྱ་བའི་བདག་ཉིད་ཅེས་བྱ་བའི་རྒྱུ་མཚན་རྣམ་པ་གཅིག་གིས་གོ་བར་བྱེད་པའི། །གོ་བར་བྱ་བ་ལས་མི་འཁྲུལ་པར་
[20a.7]བཀོད་པ་ཡིན་ནོ། །རང་བཞིན་འབྲེལ་པའི་ཕྱིར་གང་ལ་འཁྲུལ་པ་མེད་པ་དེའི་རང་བཞིན་འབྲེལ་པ་དེ་འབྲས་བུ་ཡིན་ནོ་ཞེས་བཤད་པ་ན་ཡང་དོན་གང་ཞིག་དོན་གང་ལ་འཁྲུལ་པ་མེད་པ་དེ་ནི་དེ་ལ་ལྟོས་ནས་འབྲས་བུ་ཡིན་ནོ་ཞེས་བརྗོད་པར་འགྱུར་བས་དེ་རྒྱུ་ཉིད་དུ་རྟོགས་པར་འགྱུར་རོ། །དེའི་དོན་ནི་འདི་ཡིན་ཏེ།
[20b]
[20b.1]དེའི་བདག་ཉིད་ཀྱི་རང་བཞིན་དང་དེ་ལས་བྱུང་བའི་རང་བཞིན་འབྲེལ་པས་དོན་གྱིས་དོན་འཁྲུལ་པ་མེད་པ་ཡིན་ནོ་ཞེས་སོ། །དེའི་བདག་ཉིད་ལ་ནི་བདག་ཉིད་གཅིག་པ་ཉིད་རང་བཞིན་འབྲེལ་པ་ཡིན་པས་དེ་ཉིད་ལས་འཁྲུལ་པ་མེད་པར་འགྱུར་བ་ཡིན་ན་འབྲས་བུ་གོ་མི་འཁྲུལ་བའི་ཡུལ་ལ་བདག་ཉིད་
[20b.2]འབྲེལ་པ་ཇི་ལྟར་འགྱུར་ཞེ་ན། དེའི་རང་བཞིན་ཞེས་སྨོས་སོ། །དངོས་པོ་རྣམས་སྐྱེས་པ་ལས་སྔར་ནི་ཡོད་པ་མ་ཡིན་ཏེ། འདི་ནི་ཡོད་པ་ཉིད་ན་སྐྱེ་བ་ལས་ཡིན་ནོ། །འབྲས་བུ་དང་འབྲེལ་པའི་རང་བཞིན་གྱི་སྐྱེ་བ་དེ་ཡང་གང་ལ་འདིའི་འཁྲུལ་པ་མེད་པ་དེ་ལས་ཡིན་ཏེ། གཏན་ཚིགས་དེའི་ཕྱིར་འབྲས་
[20b.3]བུ་རང་བཞིན་འབྲེལ་པ་ཡིན་ནོ། །གང་གིས་དེ་ལྟ་བུའི་རང་བཞིན་འབྲེལ་པའི་གཏན་ཚིགས་ལས་སྐྱེས་པའི་རྗེས་སུ་དཔག་པ་ཚད་མར་འགྱུར་བ་དེ་ལྟར་རང་བཞིན་འབྲེལ་པ་རྣམ་པ་གཉིས་སྟོན་པའི་རྒྱུ་ཅི་ཡིན་ཞེ་ན། རྗེས་སུ་དཔག་པར་བྱ་བ་ཤེས་པ་ཞེས་སྨོས་སོ། །གང་གིས་དེ་ལྟ་བུའི་གོ་བྱེད་ཀྱི་ཤུགས་
[20b.4]ཀྱིས་རང་བཞིན་ཐོབ་པའི་རྗེས་སུ་དཔག་པ་ཚད་མར་གྱུར་པ་གཏན་ཚིགས་ཀྱི་རྗེས་སུ་དཔག་པར་བྱ་བ་ལ་མི་འཁྲུལ་པ་རྗེས་སུ་འགྲོ་བ་དང་། ལྡོག་པའི་མཚན་ཉིད་མེད་ན་མི་འབྱུང་བའི་དོན་འདི་བསྟན་པ་ཡིན་ནོ། །གཏན་ཚིགས་ཉིད་ནི་ཚད་མ་མ་ཡིན་ཏེ། འོན་ཀྱང་རྗེས་སུ་དཔག་པའི་ཤེས་པ་ཡིན་ནོ། །
[20b.5]དེས་ན་དེའི་འཁྲུལ་པ་མེད་པས་དེ་ལྟ་བུའི་དངོས་པོ་གྲུབ་པ་ན་དེའི་རྩ་བ་ཅན་གྱི་ཤེས་པ་དོན་ཡོད་པ་ཅན་དུ་བསྟན་པ་ཡིན་ནོ། །དེ་ན་རྣམ་པ་འདིས་རྗེས་སུ་དཔག་པར་བྱ་བ་ཤེས་པ་རྣམ་པ་གཉིས་ཚད་མ་ཡིན་ནོ། །རྗེས་སུ་དཔག་པར་བྱ་བ་ཤེས་པ་འདི་གཉིས་ནི་ཞེས་གང་བརྗོད་པ་རྗེས་སུ་དཔག་པར་བྱ་བའི་
[20b.6]ཤེས་པ་གཉིས་ཀྱང་གང་དུ་བརྗོད་ཅེ་ན། ཇི་ལྟར་མ་བརྗོད། འདི་ལྟར་རྗེས་སུ་དཔག་པར་རྣམ་པར་གཞག་པའི་ཕྱིར་བཤད་པ་ཞེས་སྐབས་བརྩམས་ནས་ཕྱོགས་ཆོས་ཞེས་བཤད་པ་ཡིན་ལ། དེ་རྣམ་པར་གཞག་པ་ན་ཡང་རྟགས་ཀྱི་མཚན་ཉིད་བརྗོད་པ་ཡན་ལག་ཡིན་ཏེ། དེ་རྟགས་ལས་སྐྱེས་པ་ཡིན་
[20b.7]པའི་ཕྱིར་རོ། །དེའི་མཚན་ཉིད་ནི་ཚུལ་གསུམ་ཡིན་ལ། དེ་ཡང་གསུམ་ལ་ཡོད་པ་ཡིན་ནོ། །གསུམ་པོ་ཡང་འབྲེལ་པ་རྣམ་པ་གཉིས་ལས་གཉིས་ཡིན་པའི་ཕྱིར། དེ་ལྟ་བུར་གྱུར་པའི་གཏན་ཚིགས་ཀྱིས་བསྐྱེད་པ་རྗེས་སུ་དཔག་པར་བྱ་བ་ཤེས་པ་ནི་གཉིས་ཡིན་ལ། རྗེས་སུ་དཔག་པར་བྱ་བ་
[21a]
[21a.1]ཤེས་པ་ནི་རྗེས་སུ་དཔག་པར་བྱ་བ་ཁོ་ནའོ། །རང་བཞིན་འབྲེལ་པ་རྣམ་པ་གཉིས་དང་ལྡན་པའི་རྟགས་ཀྱིས་བསྐྱེད་པ་འདི་གཉིས་ཚད་མ་ཡིན་ནོ། །ཅིའི་ཕྱིར་ཞེ་ན། དེ་ལས་སྐྱེས་པའི་ཕྱིར་རོ། །རེ་ཞིག་ངེས་པར་གྱུར་པའི་རྟགས་ལས་རྗེས་སུ་དཔག་པ་སྐྱེས་པ་ཞེས་བྱ་བ་ནི་
[21a.2]རྟོགས་པ་ཉིད་དོ། །ཇི་སྐད་བཤད་པའི་རང་བཞིན་འབྲེལ་པའི་རྟགས་ལས་སྐྱེས་པ་ན་ཡང་རྗེས་སུ་དཔག་པར་བྱ་བ་ཤེས་པ་རྗེས་སུ་དཔག་པར་བྱ་བ་ལས་ཀྱང་སྐྱེས་པ་ཡིན་པ་ཉིད་དོ། །འདི་ལྟར་རྗེས་སུ་དཔག་པར་བྱ་བའི་བདག་ཉིད་ཀྱི་རྟགས་ལས་སྐྱེས་པ་ནི་རྗེས་སུ་དཔག་པར་བྱ་བ་ལས་ཀྱང་སྐྱེས་པ་ཁོ་
[21a.3]ནའོ། །རྗེས་སུ་དཔག་པར་བྱ་བའི་འབྲས་བུར་གྱུར་པའི་རྟགས་ལས་སྐྱེས་པ་གང་ཡིན་པ་དེ་ཡང་དེ་བཞིན་ཉིད་དོ། །ཤེས་པ་དེ་རྗེས་སུ་དཔག་པར་བྱ་བའི་དོན་ལ་སྐྱེས་པ་ན་ཡང་དེས་ངེས་པར་ཡོད་པའི་ཕྱིར་དེ་ཉིད་གསལ་བའི་རང་བཞིན་ཡིན་པའི་ཕྱིར་དོན་གསལ་བ་ཉིད་ཀྱིས་འདི་གཉིས་ཚད་མ་ཡིན་ནོ། །
[21a.4]ཇི་ལྟར་གསལ་བའི་དོན་མེད་ན་ནི་དོན་གསལ་བར་མི་འགྱུར་ན་དེ་ནི་འདི་ལྟར་སྲིད་པ་མ་ཡིན་ནོ། །དེ་སྨྲས་པ་ནི། དེར་འཁྲུལ་པ་མེད་པ་དག་ཡིན་ཏེ་ཞེས་བྱའོ། །དེའི་འབྲས་བུ་ཉིད་ཀྱི་དོན་དང་ལྡན་པ་ལས་མི་འདའ་བའི་ཕྱིར་གསལ་བར་ངེས་པ་ཡིན་ནོ། །མངོན་སུམ་བཞིན་ནོ་ཞེས་བྱ་བ་ནི་དཔེ་སྟེ། དཔེར་
[21a.5]ན་དོན་ལས་སྐྱེས་པས་དོན་ལ་འཁྲུལ་པ་མེད་པའི་ཕྱིར་དོན་གསལ་བའི་རང་བཞིན་ཚད་མ་ཡིན་པ་དེ་བཞིན་དུ་འདི་གཉིས་ཀྱང་ངོ་། །དེ་ནི་དོན་ལས་སྐྱེས་པའི་ཕྱིར་ཤེས་པ་དེ་གཉིས་ཀྱང་དོན་ལ་མངོན་སུམ་ཉིད་ཡིན་ནམ། དོན་ཉིད་རྣམ་པར་ཤེས་པ་བསྐྱེད་པ་ནི་བདག་གསལ་བར་བྱེད་པ་ཡིན་ནོ། །དེས་ན་རྗེས་
[21a.6]སུ་དཔག་པར་བྱ་བས་བསྐྱེད་པ་རྗེས་སུ་དཔག་པར་བྱ་བ་ཤེས་པ་གཉིས་ནི་མངོན་སུམ་བཞིན་དངོས་པོ་ཉིད་དུ་ན་དོན་གསལ་བར་བྱེད་པར་འགྱུར་རོ་ཞེ་ན། དེ་སྣང་བ་ཉིད་མ་ཡིན་ཡང་ཞེས་སྨོས་སོ། །གང་གིས་འདི་གཉིས་དངོས་སུ་ན་དངོས་པོ་གསལ་བའི་ཕྱིར་དེ་ལ་མངོན་སུམ་དུ་འགྱུར་བ་རྗེས་སུ་དཔག་པར་བྱ་བ་
[21a.7]ཤེས་པ་འདི་གཉིས་རྗེས་སུ་དཔག་པར་བྱ་བ་སྣང་བ་ནི་མ་ཡིན་ནོ། །ཇི་ལྟར་ན་དངོས་པོ་སྣང་བའི་རྒྱུ་ཁྱད་པར་མེད་པ་ལས་འདི་གཉིས་ནི་དངོས་པོ་སྣང་བ་མ་ཡིན་པར་འགྱུར་ལ་མངོན་སུམ་ནི་མ་ཡིན་ཞེ་ན་དངོས་ལས་མ་སྐྱེས་པའི་ཕྱིར་ཞེས་སྨོས་སོ། །གང་གིས་འདི་གཉིས་མངོན་སུམ་བཞིན་དུ་དངོས་པོ་གསལ་བ་
[21b]
[21b.1]ཉིད་དུ་འགྱུར་བ་རྗེས་སུ་དཔག་པར་བྱ་བ་ཤེས་པ་རྗེས་སུ་དཔག་པར་བྱ་བ་དག་ལས་དངོས་སུ་སྐྱེས་པ་ནི་མ་ཡིན་གྱི། འོན་ཀྱང་མི་རྟག་པ་བྱས་པའི་རང་བཞིན་དུ་གྱུར་པ་ཡིན་ཡང་བྱས་པ་ཉམས་སུ་མྱོང་བས་བར་ཆོད་པས་རྣམ་པར་རྟོག་པའི་ཤེས་པ་སྐྱེད་པར་བྱེད་དོ། །རྟགས་སམ་རྟགས་ཅན་གྱི་རྣམ་པར་
[21b.2]རྟོག་པ་དངོས་སུ་དོན་ལས་སྐྱེ་བ་འགའ་ཡང་མེད་དོ། །དེ་བཞིན་དུ་མེ་ཡང་རང་གི་འབྲས་བུ་དུ་བ་མྱོང་བས་བར་ཆོད་པས་རང་གི་ཤེས་པའི་རྒྱུ་ཡིན་ནོ། །དེས་ན་དོན་ནི་འདི་ཡིན་ཏེ། ཇི་སྐད་བརྗོད་པའི་འབྲེལ་པ་དང་ལྡན་པའི་ཕྱིར་རྟགས་རྗེས་སུ་དཔག་པར་བྱ་བ་ལ་འཁྲུལ་པ་མེད་པས་ན། དེ་ཡོད་ན་བསྒྲུབ་
[21b.3]བྱ་ཡོད་པར་ངེས་པར་རྟོགས་ནས་རྟོགས་པ་པོ་རྗེས་སུ་དཔག་པར་འཇུག་པར་བྱེད་པ་ནི་ཚད་མ་ཉིད་འཇུག་པར་བྱེད་པ་ཡིན་ཏེ་དེ་ལྟ་བུར་གྱུར་པའི་དོན་དེ་ཉིད་དེ་ལྟར་རྟོགས་པའི་ཕྱིར་རོ། །འདི་ལྟར་རྗེས་སུ་དཔག་པ་ནི་མངོན་སུམ་བཞིན་དུ་རྒྱུ་རྐྱེན་གྱི་ནུས་པ་ཙམ་ལས་སྐྱེས་པ་ནི་མ་ཡིན་གྱི། འོན་ཀྱང་མ་
[21b.4]རྟོགས་པའི་དོན་རྟོགས་པར་བྱ་བའི་ཕྱིར་རྗེས་སུ་དཔག་པའི་རིགས་པ་རྩོལ་བ་ཡིན་ནོ། །དེ་ཡང་འདི་ལྟར་འཐད་པ་ཡིན་ཏེ། དེ་དོན་གཞན་ལས་རྟོགས་པ་ན་དོན་གཞན་དེ་མི་འཁྲུལ་པར་ངེས་པས་དེ་ལས་དེ་རྟོགས་པར་འཐད་པའི་ཕྱིར་རོ། །དེ་ལྟར་གྱུར་པའི་དོན་དེ་ལྟ་བུ་ཉིད་དུ་རྟོག་པ་ནི་ཚད་མ་ཡིན་
[21b.5]ནོ། །དོན་གཞན་འཁྲུལ་པ་མེད་པར་ངེས་པར་མ་རྟོགས་ན་ནི་བརྟག་པར་མི་བྱ་བའམ། ཐེ་ཚོམ་དུ་འགྱུར་བའི་ཕྱིར་རྟོགས་པ་ཚད་མ་མ་ཡིན་ནོ། །འོན་ཏེ་འབྲེལ་པ་མ་བརྟགས་པ་འཁྲུལ་པ་ལས་ངེས་པ་ཉིད་དུ་འགྱུར་བ་ཡིན་ན་དེ་ལྟ་ན་ཡང་ངེས་པ་ཙམ་ལས་ནི་རྣམ་པར་རྟོག་པ་ཚད་མ་མ་ཡིན་ཏེ་
[21b.6]མངོན་སུམ་བཞིན་དུ་རང་བཞིན་ཉིད་ཀྱིས་དོན་གསལ་བ་མ་ཡིན་པའི་ཕྱིར་རོ། །དོན་གསལ་བ་ལ་ནི་དོན་གྲུབ་པའི་རྩ་བ་ཅན་ཡིན་པས་དོན་མ་གྲུབ་ཀྱང་ངེས་པ་ཙམ་ལས་ག་ལ་འགྱུར། དེའི་ཕྱིར་དོན་གྱི་འབྲས་བུ་ཉིད་ཀྱིས་དོན་ལ་སོ་སོར་ངེས་པས་དོན་ཇི་ལྟར་རྟོགས་པ་དེ་བཞིན་དུ་ཡོད་པའི་ཕྱིར་རྗེས་སུ་དཔག་
[21b.7]པ་ཚད་མ་ཡིན་པ་དེ་བས་ན་རང་བཞིན་འབྲེལ་པ་རྣམ་པ་གཉིས་ཉེ་བར་བཀོད་དོ། །དེས་ན་དེ་ལྟར་འབྲེལ་པ་ཉེ་བར་བཀོད་པ་གཞུང་བཙུགས་པ་ཡིན་ནོ། །དེ་ངེས་པ་ཉིད་ནི་རྒྱུ་དང་འབྲས་བུའི་དངོས་པོའམ་ཞེས་བྱ་བ་ལ་སོགས་པས་གཞན་མེད་པ་ཉིད་ཀྱིས་འཇོག་པར་འགྱུར་རོ། །གང་གིས་དེ་དེ་དང་མཚུངས་པར་
[22a]
[22a.1]རྗེས་སུ་དཔག་པ་ཡང་དེ་ལྟར་འགྱུར་བ་མངོན་སུམ་དོན་ལ་འཁྲུལ་པ་མེད་པས་ནི་ཚད་མ་མ་ཡིན་གྱི་འོན་ཀྱང་རང་གི་རྒྱུའི་ནུས་པ་ཉིད་ལས་དངོས་པོ་གསལ་བའི་རང་བཞིན་གྱིས་དངོས་པོ་ལ་ཚད་མ་ཡིན་ནོ། །དེ་ཉིད་ཀྱི་ཕྱིར་ཆོད་པ་མེད་པར་སྔོན་པོ་མཐོང་ནས་སྔོན་པོའོ་ཞེས་རྟོགས་ཀྱི་རྗེས་
[22a.2]སུ་དཔག་པ་ལྟར་སྔོན་པོ་ལ་མི་འཁྲུལ་པའི་རྗེས་སུ་འཇུག་པས་ནི་མ་ཡིན་ནོ་ཞེས་དོགས་པ་འདི་བསུ་ནས་མངོན་སུམ་གྱི་ཚད་མ་ཉིད་ཀྱང་ཞེས་སྨོས་སོ། །གང་གི་ཕྱིར་རྗེས་སུ་དཔག་པ་འབའ་ཞིག་ཏུ་མི་ཟད་ཀྱི། མངོན་སུམ་གྱི་ཚད་མ་ཇི་སྲིད་པ་ཡང་དོན་འཁྲུལ་པ་མེད་པ་ཡིན་ན་ཡིན་ནོ། །ཡང་འཁྲུལ་
[22a.3]པ་མེད་པ་ཞེས་བྱ་བ་འདི་ཅི་ཞིག་ཚད་མ་ཡིན་ནམ། འོན་ཏེ་ཚད་མའི་རྒྱུ་ཡིན་ནམ། དེ་སྟེ་ཚད་མ་རྣམ་པར་འཇོག་པར་བྱེད་པ་ཡིན། རེ་ཞིག་ཚད་མ་ནི་མ་ཡིན་ཏེ། ཚད་མ་སླུ་བ་མེད་པ་ཅན་གྱི་ཤེས་པ་ཞེས་དོན་གསལ་བའི་རང་བཞིན་ཙམ་གྱིས་རྣམ་པར་འཇོག་པའི་ཕྱིར་རོ། །རྒྱུ་ཡང་མ་ཡིན་ཏེ། ཚད་
[22a.4]མའི་རྒྱུ་ཉིད་ལས་ཚད་མའི་དེ་ཉིད་འགྲུབ་པའི་ཕྱིར་རོ། །རྣམ་པར་འཇོག་པར་བྱེད་པ་ཡང་མ་ཡིན་ཏེ། འཁྲུལ་པ་མེད་པའི་དོན་དམིགས་པ་ཉིད་ལས་དོན་ངེས་པས་ཚད་མ་རྣམ་པར་འཇོག་པས་དོན་མེད་པའི་ཕྱིར་རོ། །དེ་བཞིན་དུ་དོན་ངེས་པའི་བདག་ཉིད་ཀྱི་མངོན་སུམ་ཡང་རང་གི་རྒྱུ་ཉིད་ལས་ཡིན་ནོ། །
[22a.5]ཚད་མ་ཉིད་དུ་རྣམ་པར་གཞག་པ་ཡིན་ཡང་དོན་གསལ་བའི་རང་བཞིན་གྱིས་ཀྱང་གཞག་པར་ནུས་པ་ཡིན་ནོ། །གལ་ཏེ་དོན་མེད་ན་མི་འབྱུང་བའི་ཕྱིར་དོན་ལ་མི་བསླུ་བ་མངོན་སུམ་དང་རྗེས་སུ་དཔག་པ་ཚད་མར་འཇོག་པ་ཡིན་ལ་དེ་ཡང་དོན་ལ་འཁྲུལ་པ་མེད་པའི་རང་བཞིན་ཉིད་དོ་ཞེས་བྱ་བའི་བསམ་
[22a.6]པས་དེ་སྐད་བརྗོད་དོ་ཞེ་ན། དེ་ཡང་མི་རིགས་ཏེ། ཡུལ་ཉིད་སྟོན་པར་བྱེད་པ་འདི་གཉིས་ནི་དོན་ལ་མི་བསླུ་བ་ཉིད་ལ་བརྟེན་པར་འགྱུར་བས་མི་བསླུ་བ་དེ་ཉིད་རྣམ་པར་འཇོག་པའི་ཡན་ལག་ཏུ་འགྱུར་བས་དོན་ལ་མི་འཁྲུལ་བས་ཅི་བྱ་སྟེ། དེ་ཉིད་ཀྱི་ནང་གི་ཡན་ལག་ཡིན་པའི་ཕྱིར་རོ། །དེ་ནི་འདི་དག་ལ་
[22a.7]བདག་ཉིད་ཇི་ལྟ་བར་ཁྱད་པར་ཅན་དུ་གྲུབ་པ་ཡིན་ནོ། །དེའི་ཕྱིར་འདིར་བསམ་པ་ནི་འདི་ཡིན་ཏེ། དངོས་པོའི་མཐུ་ལ་མི་ལྟོས་པ་འདི་དག་གིས་རབ་ཏུ་བསྟན་པ་ཉིད་མཐར་ཕྱིན་པར་མི་འགྱུར་བས་ཤེས་པ་དང་དོན་དག་ཐ་དད་པའི་ཕྱིར་དེའི་བདག་ཉིད་མེད་ན་ཇི་ལྟར་མྱོང་བའི་དོན་མེད་ན་མི་འབྱུང་བ་ཉིད་དངོས་
[22b]
[22b.1]པོའི་ནུས་པ་ཡིན་ནོ། །དེའི་ཕྱིར་མངོན་སུམ་མམ་རྗེས་སུ་དཔག་པས་དོན་རྟོགས་པར་བྱེད་པས་ནི་གདོན་མི་ཟ་བར་དེའི་དོན་མེད་ན་མི་འབྱུང་བ་རྟོགས་པར་བྱའི། གལ་ཏེ་མངོན་སུམ་གྱིས་དོན་བར་མ་ཆོད་པ་ཉིད་དུ་རྟོགས་སོ་ཞེས་བརྗོད་པ་མ་ཡིན་ནམ། མངོན་སུམ་འབའ་ཞིག་ཏུ་ནི་མ་ཟད་དེ། ཚད་
[22b.2]མ་མེད་པ་ཡང་ཡུལ་གཞན་ན་ཁྲོན་པའི་ཆུ་ལ་སོགས་སོ། །རྟོགས་པ་ཙམ་ནི་དེ་ལྟ་མ་ཡིན་པར་མི་འགྱུར་བའི་ཕྱིར་འཐད་པ་ལ་ལྟོས་པར་བྱ་བ་ཡིན་ནོ། །དངོས་པོ་མ་བརྟགས་པའི་ཤེས་པ་ཉིད་ནི་དོན་སྒྲུབ་པར་བྱེད་པ་མ་ཡིན་ནོ། །འོན་ཏེ་ཤེས་པས་དོན་དམིགས་པའི་ཕྱིར་དེ་ལས་དེ་འགྲུབ་པོ་ཞེ་
[22b.3]ན། དེ་ཡང་རྣམ་པར་ངེས་པར་མཐོང་བ་ལས་དོན་འགྲུབ་བོ་ཞེ་ན་ཞེས་བྱ་བ་ལ་སོགས་པས་གསལ་བ་ཡིན་ཏེ། དེ་ཉིད་དུ་གཏན་ལ་ཕབ་པ་ཡིན་ནོ། །དེ་ལྟ་ན་འོ་ན་དོན་གྱི་དོན་འཁྲུལ་པ་མེད་ཀྱི་རྗེས་སུ་དཔག་པའི་དོན་གྲུབ་པས་ན་དེ་དོན་ལ་འཁྲུལ་པ་མེད་པར་བསྟན་པས་ཅི་བྱ། འདི་ལྟར་དོན་དེ་ཉིད་
[22b.4]ཀྱིས་ཡོད་པར་གྲུབ་པའི་དོན་རྟོགས་པ་ཡིན་ནོ་ཞེ་ན། དེ་ནི་བདེན་མོད་ཀྱི། དེའི་ཚད་མ་ཉིད་ཀྱང་རྣམ་པར་གཞག་པར་བྱ་བ་ཡིན་ནོ། །དེ་ནི་རང་གི་ཆོས་ཀྱིས་གཞག་པར་ནུས་པ་ཡིན་ཏེ། གཞན་གྱི་ཆོས་ནི་གཞན་གྱི་རང་བཞིན་རྣམ་པར་འཇོག་པར་བྱེད་པ་མ་ཡིན་པའི་ཕྱིར་རོ། །གལ་ཏེ་ཚད་མ་ཉིད་དོན་
[22b.5]ལ་འཁྲུལ་པ་མེད་པས་ངེས་པ་ཡིན་ན་བདག་ཐོབ་པའི་རྗེས་སུ་དཔག་པ་ཡང་ཚད་མར་གཏན་ལ་མ་ཕེབས་པའི་ཕྱིར་ཐེ་ཚོམ་དུ་འགྱུར་རོ་ཞེ་ན། རྗེས་སུ་དཔག་པ་མ་སྐྱེས་པ་དངོས་པོའི་མཐུ་ཉིད་ཀྱིས་སྐྱེ་བ་ནི་མ་ཡིན་གྱི། འོན་ཀྱང་འདི་ནི་ཚད་མ་ཡིན་ཏེ་དོན་ལ་མི་འཁྲུལ་པའི་ཕྱིར་དོན་རྟོགས་པར་ནུས་པ་ཡིན་
[22b.6]ནོ་ཞེས་བྱ་བས་སྐྱེ་བ་ཡིན་ནོ། །མངོན་སུམ་གྱི་ཚད་མ་ཉིད་འཁྲུལ་པ་མེད་པ་ཁོ་ན་ཇི་ལྟར་ཡིན་ཞེས་དོགས་ན། ཕྱོགས་གཞན་ལ་ཚད་མ་མ་ཡིན་པར་བཤད་པ་ནི་དེ་མེད་པར་ཞེས་བྱ་བ་ཡིན་ནོ། །དོན་མེད་པར་འབྱུང་བ་ནི་དོན་དེར་འཁྲུལ་པའི་ཕྱིར་ཏེ། ཕྱིན་ཅི་ལོག་ཏུ་འགྱུར་བའི་ཕྱིར་རོ། །ཕྱིན་ཅི་ལོག་ནི་
[22b.7]ཇི་ལྟར་རྟོག་པའི་དོན་མེད་པ་ཡིན་ཏེ། དེ་ཡོད་ན་ཤེས་པ་ཕྱིན་ཅི་ལོག་ཏུ་འགྱུར་བ་མ་ཡིན་ནོ། །དེའི་ཕྱིར་འཁྲུལ་པ་མེད་པ་ཉིད་ཚད་མ་ཡིན་ནོ། །དེས་ན་དེ་ལྟར་འཁྲུལ་ན་ཚད་མ་མ་ཡིན་པའི་ཕྱིར་མངོན་སུམ་གྱི་ཚད་མ་ཉིད་མི་འཁྲུལ་པའི་རྩ་བ་ཅན་དུ་བསྒྲུབས་ནས་དེ་ཡང་དེ་ལས་བྱུང་བའི་རྩ་བ་ཅན་དུ་
[23a]
[23a.1]བསྟན་པའི་ཕྱིར་གཞན་གྱི་ཞེས་སྨོས་སོ། །ཤེས་པ་ནི་དོན་ལས་གཞན་ཡིན་ནོ། །དངོས་པོ་ཐ་དད་པ་གཞན་གྱི་མི་འཁྲུལ་པ་དེ་ཡང་དེ་ལས་སྐྱེས་པ་ལས་གཞན་ཅི་ཞིག་ཡོད། དེ་ལས་སྐྱེས་པའི་རྒྱུ་མཚན་ཅན་ཉིད་ཡིན་པའི་ཕྱིར་ཉེ་བར་བཏགས་ནས་ཐ་མི་དད་པར་བསྟན་ཏོ། །
[23a.2]འཁྲུལ་པ་མེད་པ་ཞེས་བྱ་བ་ནི་གཉིས་ཀྱི་ཆོས་ཡིན་པའི་ཕྱིར་གཞན་ལ་ཞེས་རྟོགས་པ་ཉིད་མ་བརྗོད་དོ། །འདིར་ཡང་མི་འཁྲུལ་པའི་རྒྱུ་མཚན་དེ་ལས་སྐྱེས་པ་ཡིན་པར་སྒྲུབ་པ་ན་རྒྱུ་མཚན་གཞན་མེད་པར་བརྗོད་པར་བསྒྲུབ་པ་ནི་རག་མ་ལས་པའི་ངོ་བོ་རྣམས་ནི་ཞེས་བྱ་བ་ཡིན་ནོ། །གང་དག་གི་ངོ་བོ་རག་
[23a.3]ལས་པ་མེད་པ་དེ་རྣམས་ནི་དེ་ལས་དེ་ཐོབ་པའི་ཕྱིར་གང་ལ་ངོ་བོ་རག་ལས་པ་དེ་དང་ལྷན་ཅིག་འབྱུང་བར་ངེས་པ་རག་ལས་པ་དེ་ཡོད་ན་ཡོད་པར་འགྱུར་རོ་ཞེས་བྱ་བ་དེ་ལྟ་བུའི་རང་བཞིན་གྱི་མི་འཁྲུལ་པ་དེ་མེད་པའི་ཕྱིར་རོ། །དེ་ལས་དེའི་རང་གི་ངོ་བོ་གྲུབ་པ་མ་ཡིན་པའི་ཕྱིར་དེ་མེད་ཀྱང་ཡོད་པས་ན་དེ་ཡོད་
[23a.4]ན་དེ་ཡོད་པར་མི་འགྱུར་བའི་ཕྱིར་ལྷན་ཅིག་འབྱུང་བ་མེད་པ་ཡིན་ནོ། །དེས་ན་དེ་ལྟར་མེད་ན་མི་འབྱུང་བའི་རྒྱུ་མཚན་དེ་བཞིན་འབྲེལ་པ་ཡིན་པའི་ཕྱིར་གསུམ་ལ་ཚུལ་གསུམ་སྲིད་པས་གཏན་ཚིགས་ཉིད་བསྒྲུབས་ནས་ད་ནི་གོ་རིམས་བཞིན་དུ་དེ་དག་ལ་བསྒྲུབ་བྱ་སྒྲུབ་བྱེད་ཀྱི་རང་བཞིན་གྱིས་ཁྱད་
[23a.5]པར་བསྟན་པའི་ཕྱིར་གལ་ཏེ་ཞེས་རྩོད་པ་སློང་བར་བྱེད་དོ། །གལ་ཏེ་ཇི་སྐད་བཤད་པ་དེ་ལས་སྐྱེས་པའི་མཚན་ཉིད་ཀྱི་གཏན་ཚིགས་ཀྱི་ཕྱིར་འབྲས་བུ་རྟོགས་པའི་རྒྱུ་མཚན་གོ་བར་བྱེད་པ་ཡིན་ན། དེའི་ཚེ་རྣམ་པ་ཐམས་ཅད་གོ་བར་བྱ་བ་དང་གོ་བར་བྱེད་པའི་ངོ་བོ་ཡིན་པར་འགྱུར་རོ།། །།
[23a.6]བམ་པོ་གསུམ་པ། ཇི་ལྟར་དུ་བ་དེའི་བདག་ཉིད་དེ་ལས་སྐྱེས་པའི་ཕྱིར་དུ་བ་ཞེས་དུ་བའི་བདག་ཉིད་དུ་བསྟན་པ་གོ་བར་བྱེད་པ་ཡིན་པ་དེ་བཞིན་དུ་གཞན་ཡང་དེའི་བདག་ཉིད་ཀྱིས་རང་གི་ངོ་བོ་ཉིད་ཡིན་པའི་ཕྱིར་བདག་ཉིད་ཇི་ལྟ་བར་གྱུར་པས་དེ་དག་ཀྱང་གོ་བར་བྱེད་པ་ཉིད་དུ་འགྱུར་ཏེ། འདི་ན་མེ་ཡོད་དེ།
[23a.7]དངོས་པོའི་ཕྱིར་རོ། །ཐོགས་བཅས་ཀྱི་ཕྱིར་དང་། མི་རྟག་པའི་ཕྱིར་རོ་ཞེས་བྱ་བའོ། །དེ་བཞིན་དུ་འདི་ན་དངོས་པོ་འམ་ཐོགས་བཅས་སམ་མི་རྟག་པ་ཡོད་དེ་དུ་བ་ཡོད་པའི་ཕྱིར་རོ། །འགྱུར་ན་དེ་ལྟ་ཡང་མ་ཡིན་ཏེ། དེའི་ཕྱིར་འབྲས་བུས་རྒྱུ་རྗེས་སུ་དཔག་པར་མི་ནུས་སོ། །དངོས་པོ་ལས་མེ་རྟོགས་
[23b]
[23b.1]པའམ། དུ་བ་ལས་དངོས་པོ་རྟོགས་པར་ནུས་པ་ནི་མ་ཡིན་ཏེ་ཆུ་ལ་སོགས་པའི་དངོས་པོ་ཡོད་ཀྱང་མེ་མེད་པའི་ཕྱིར་རོ། །དེས་ན་དེ་ལས་སྐྱེས་པ་ནི་འཁྲུལ་པ་མེད་པ་ཉིད་ཀྱིས་རྗེས་སུ་དཔག་པར་བྱ་བ་གྲུབ་པར་བྱ་བའི་ཕྱིར་བརྗོད་པར་མི་བྱའོ་སྙམ་དུ་བསམས་པའོ། །ཅི་སྟེ་ཐམས་ཅད་ལས་བདག་
[23b.2]ཉིད་ཐམས་ཅད་ཀྱིས་དེ་ལ་སྐྱེས་པ་ཉིད་མ་ཡིན་ནོ་ཞེས་བརྗོད་ན་དེ་ནི་མི་རིགས་སོ་ཞེས་སྨྲས་པ་ནི་རྣམ་པ་ཐམས་ཅད་དུ་ཞེས་བྱ་བའོ། །གང་གི་ཕྱིར་མེ་ལས་དངོས་པོ་ལ་སོགས་པའི་བདག་ཉིད་རྣམས་ལས་ཀྱང་དུ་བ་དངོས་པོ་ལ་སོགས་པའི་རང་བཞིན་ཅན་དུ་སྐྱེ་བ་ཡིན་གྱི། མེ་ཙམ་ལས་དུ་བ་ཙམ་དུ་སྐྱེ་བ་
[23b.3]ནི་མ་ཡིན་ནོ་ཞེ་ན། རེ་ཞིག་འདི་གོ་བར་བྱ་བ་ལ་ལྟོས་ནས་སྤང་བའི་ཕྱིར་མདོའི་འབྲེལ་པ་གཞི་འཆའ་བར་བྱེད་པ་ནི་མ་ཡིན་ཏེ་ཞེས་བྱ་བའོ། །མེའི་ཆོས་གང་ཡིན་པ་དེ་དག་ཡོད་ན་དུ་བ་འབྱུང་བའམ། དེ་མེད་ན་དུ་བ་ལྡོག་པ་ནི་མ་ཡིན་ནོ། །རེ་ཞིག་ལྡོག་པར་མི་ནུས་པའི་ཆོས་དངོས་པོ་དང་མི་རྟག་
[23b.4]པ་ལ་སོགས་པ་རྣམས་ནི་རྗེས་སུ་འགྲོ་བ་བཀག་པ་ཉིད་ཀྱི་རྒྱུ་མ་ཡིན་པ་ཉིད་དོ། །འདི་ལྟར་བུད་ཤིང་དང་བཅས་པའི་དངོས་པོ་གཞན་ནམ་མི་རྟག་པ་ཡོད་ཀྱང་དུ་བ་མི་སྐྱེའོ། །གཞན་འབར་བ་ཅན་དང་བུད་ཤིང་གི་ཁྱད་པར་ལས་སྐྱེས་པ་ལ་སོགས་པ་རྣམས་ནི་མེད་ཀྱང་བུད་ཤིང་སྲེག་པར་ནུས་པ་
[23b.5]ཙམ་ཡོད་ན་འབྱུང་བའི་ཕྱིར་དུ་བ་ཙམ་གྱི་རྒྱུ་ཅན་མ་ཡིན་ནོ། །དེའི་ཕྱིར་གང་མེད་པར་འབྲས་བུ་འབྱུང་བ་དེ་ལས་འདི་སྐྱེ་བའི་མཚན་ཉིད་ངེས་པ་མེད་པའི་ཕྱིར་དེ་ལས་སྐྱེས་པའི་ཕྱིར་འབྲས་བུ་གོ་བར་བྱེད་པ་ཡིན་པ་ལ་ཇི་སྐད་བཤད་པའི་སྐྱོན་ཡོད་པ་མ་ཡིན་ནོ། །གང་གི་ཕྱིར་དེ་བས་ན་འབྲས་བུ་ནི་གཏན་ཚིགས་
[23b.6]ཡིན་ནོ། །བསྒྲུབ་པར་བྱ་བ་གང་ཡིན་ཞེ་ན། བཤད་པ་གང་དག་རྒྱུ་ལ་རང་བཞིན་རྒྱུའི་དངོས་པོ་གང་ཡིན་པ་དེ་དག་ཇི་སྙེད་ཅིག་མེད་ན་མི་འབྱུང་སྟེ་དེ་དག་གིས་ནི་ཡིན་ནོ། །འདིས་ནི་འབྲས་བུའི་བསྒྲུབ་པར་བྱ་བའི་ཁྱད་པར་བསྟན་ཏོ། །རྗེས་སུ་འགྲོ་བ་དང་ལྡོག་པ་དག་ལས་རྒྱུའི་དངོས་པོར་རྟོགས་པའི་རྒྱུའི་
[23b.7]ཆོས་གང་ཡིན་པ་དེ་དག་ཉིད་འབྲས་བུས་གོ་བར་བྱེད་པ་ཡིན་ནོ། །དེས་ན་དུ་བ་ལས་དངོས་པོ་དང་མི་རྟག་པའམ་རྩྭ་ལས་བྱུང་བ་རྟོག་པ་མ་ཡིན་གྱི་འོན་ཀྱང་མེ་ཞེས་བྱ་བ་སྟེ་འདི་ནི་སྲེག་པར་བྱེད་པ་བརྗོད་པ་ཡིན་པའི་ཕྱིར་རོ། །འདི་ནི་འབྲས་བུ་ཉིད་ཀྱིས་གོ་བར་བྱེད་པ་ཡིན་ལ་འབྲས་བུ་ཡང་གང་དག་མེད་ན་མི་འབྱུང་
[24a]
[24a.1]བ་དེ་དག་ཁོ་ནའི་ཡིན་ཏེ། དེས་ན་འདི་ནི་དེ་ཉིད་ཀྱི་གཏན་ཚིགས་ཀྱི་དངོས་པོར་རིགས་སོ། །དེ་སྨྲས་པ་ནི་གང་དག་མེད་ན་འབྲས་བུ་མི་འབྱུང་བ་དེ་དག་གི་འབྲས་བུ་ཉིད་དུ་འདི་ངེས་པ་ཡིན་ཏེ། དེའི་ཕྱིར་རོ། །དེ་ལྟར་འབྲས་བུའི་གཏན་ཚིགས་ཀྱི་བསྒྲུབ་བྱ་བསྟན་པས་རྣམ་པ་ཐམས་ཅད་
[24a.2]དུ་གོ་བར་བྱ་བ་ཉིད་དུ་ཐལ་བ་སྤངས་ནས་སྒྲུབ་པར་བྱེད་པའི་ཁྱད་པར་བསྟན་པས་རྣམ་པ་ཐམས་ཅད་དུ་གོ་བར་བྱེད་པ་ཉིད་ཡིན་པ་ཡང་སྤང་བའི་ཕྱིར། གང་དག་ཅེས་སྨོས་སོ། །ཅིའི་ཕྱིར་མདོར་མ་བསྟན་ཞེ་ན་མ་བསྟན་ཞེས་སུས་སྨྲས། འདིར་རྒྱུ་ཡོད་པ་ལ་རང་བཞིན་ཇི་སྙེད་ཅིག་མེད་ན་མི་འབྱུང་བའི་
[24a.3]འབྲས་བུ་ནི་གཏན་ཚིགས་ཡིན་ནོ་ཞེས་བརྗོད་པར་ནུས་པ་ཡིན་ནོ། །འདིའི་རང་བཞིན་རྒྱུ་མེད་ན་མི་འབྱུང་བ་གང་ཡིན་པ་མ་ཡིན་གྱི། གཞན་དུ་ན་ཡང་ཡོད་པ་མ་ཡིན་ཏེ། དངོས་པོ་ལ་སོགས་པ་ནི་མེ་མེད་ཀྱང་ཡོད་པའི་ཕྱིར་རོ། །དེ་ཉིད་ཀྱི་ཕྱིར་དེ་དག་གི་ཞེས་བྱ་བ་དང་། དེ་དག་ཁོ་ན་ཞེས་མདོར་
[24a.4]འབྲེལ་པར་འགྲེལ་པ་བྱེད་པ་ཉིད་ཀྱིས་བརྗོད་དོ། །མདོར་ན་འབྲས་བུ་ནི་ཞེས་བྱ་བ་འདི་ཙམ་ཞིག་བརྗོད་དོ། །དེ་ལ་གོ་བར་བྱ་བ་ལ་ལྟོས་ནས་འདི་དག་གིས་ཞེས་འབྲེལ་ལ། གོ་བར་བྱེད་པ་ལ་ལྟོས་ནས་ནི་དེ་ཁོ་ན་ནས་ཞེས་འབྲེལ་ཏོ། །དེ་ཉིད་ཀྱི་ཕྱིར་གཞུང་འདི་ལྟོས་པ་དང་བཅས་པ་ཉིད་དུ་ཉེ་བར་བཀོད་
[24a.5]དེ། འབྲས་བུ་ནི་དེ་དག་ཁོ་ནས་གཏན་ཚིགས་ཡིན་ནོ། །རང་བཞིན་བྱ་བ་འདི་བཤད་པ་ནི་ཆོས་དེ་དག་བྱ་བ་ཡིན་ལ། མེད་ན་མི་འབྱུང་ཞེས་བྱ་བའི་བཤད་པ་ནི་གང་དག་དེ་དག་མེད་ན་མི་འབྱུང་བ་ཞེས་བྱ་བ་ཡིན་ནོ། །དེ་བཞིན་དུ་དེ་མེད་པར་འབྱུང་བ་ནི་དེ་ལས་སྐྱེ་བར་ངེས་པ་མེད་པའི་ཕྱིར་རོ་ཞེས་བྱ་བ་
[24a.6]འདི་ཡང་བཤད་པར་བྱའོ། །འདིར་ཕ་རོལ་པོ་སྔར་བཤད་པའི་རང་གི་ཕྱོགས་སྒྲུབ་པར་བྱེད་པར་སྟོན་པ་ནི་གལ་ཏེ་གང་དག་རྒྱུ་ལ་ཡོད་པའི་ཆོས་འགའ་ཞིག་ཉིད་མེད་ན་མི་འབྱུང་བ་འབྲས་བུ་ལ་ཡོད་པའི་ཆོས་འགའ་ཞིག་ཉིད་གོ་བར་བྱེད་པ་ཡིན་ནོ་ཞེ་ན། ཆ་ཤས་ཀྱིས་བསྐྱེད་པར་བྱ་བ་དང་སྐྱེད་པར་བྱེད་པ་
[24a.7]ཡིན་པར་འགྱུར་རོ། །དེ་ཉིད་ཀྱི་ཕྱིར་གང་གི་ཚེ་རྒྱུའི་ཆོས་དེ་དག་ཉིད་ཀྱིས་འབྲས་བུའི་ཆོས་སྐྱེད་པ་དེའི་ཚེ། དངོས་པོ་ཉིད་ལ་སོགས་པ་རྒྱུ་ལ་གནས་པ་སྐྱེད་པར་བྱེད་པ་མ་ཡིན་ལ། འབྲས་བུ་ལ་གནས་པ་ཡང་བསྐྱེད་པར་བྱ་བ་མ་ཡིན་པའི་ཕྱིར་རྒྱུ་མེད་པ་ཉིད་དུ་ཐལ་བར་འགྱུར་རོ། །དེ་ལྟ་ཡིན་དང་
[24b]
[24b.1]འགལ་བའི་ཆོས་གནས་པའི་ཕྱིར་རྒྱུ་ལ་ཡོད་པའི་ཆོས་རྣམས་ཐ་དད་པར་འགྱུར་ལ། འབྲས་བུ་ལ་ཡོད་པ་འགའ་ཞིག་རྒྱུ་མེད་པར་འགྱུར་ཏེ། དེ་བས་ན་སྐྱོན་འདིར་འགྱུར་རོ། །རྣམ་པ་ཐམས་ཅད་དུ་བསྐྱེད་པར་བྱ་བ་དང་སྐྱེད་པར་བྱེད་པ་ཡིན་ན་ཡང་རྣམ་པ་ཐམས་ཅད་དུ་གོ་བར་བྱ་བ་དང་གོ་བར་བྱེད་པའི་དངོས་
[24b.2]པོར་རྣམ་པར་གནས་པ་ཉིད་དོ་ཞེ་ན། འདི་བཟློག་པའི་ཕྱིར་མ་ཡིན་ཏེ། དེས་བསྐྱེད་པར་བྱ་བའི་ཁྱད་པར་དང་ཞེས་སྨོས་སོ། །འབྲས་བུ་ནི་ཆོས་གང་ཞིག་རྒྱུ་ལ་ཡོད་པའི་ཆོས་གང་དག་མེད་ན་མི་འབྱུང་བ་དེ་དག་ཁོ་ནས་དེ་དག་ཁོ་ནའི་གཏན་ཚིགས་ཡིན་ནོ་ཞེས་ཁས་བླངས་པ་ན་ཆ་ཤས་ཀྱིས་བསྐྱེད་པར་བྱ་བ་དང་སྐྱེད་
[24b.3]པར་བྱེད་པ་ཡིན་པར་ཐལ་བར་འགྱུར་རོ་ཞེས་བརྗོད་པ་འབྲས་བུ་དེ་དག་གིས་བསྐྱེད་པར་བྱ་བའི་ཁྱད་པར་གང་ཡིན་པ་དེ་བཟུང་ན་ཡིན་པར་འདོད་པ་ཉིད་དོ། །རྒྱུའི་ཆོས་ནི་རྣམ་པ་གཉིས་ཏེ་དངོས་པོ་ཉིད་ལ་སོགས་པ་རྗེས་སུ་འགྲོ་བ་སྤྱིའི་ཆོས་དང་། རྩྭ་ལས་བྱུང་བ་ལ་སོགས་པ་རྗེས་སུ་འགྲོ་བ་མེད་པ་ཁྱད་པར་གྱི་
[24b.4]ཆོས་སོ། །དེ་ལ་སྤྱིའི་ཆོས་རྣམས་རྗེས་སུ་དཔོག་པར་ཐལ་བ་ནི་ཤིན་ཏུ་འགལ་བ་མ་ཡིན་ཏེ་ཁས་བླང་བར་ནུས་པའི་ཕྱིར་རོ། །བྱེ་བྲག་གི་ཆོས་རྣམས་ནི་ཁས་བླང་བར་མི་ནུས་པ་ཉིད་ཀྱིས་དེ་ལས་སྐྱེས་པ་ཙམ་ལ་བརྟེན་ནས་རྗེས་སུ་དཔག་པར་བྱ་བ་ཡིན་ན་འགལ་བར་འགྱུར་རོ། །དེ་ལ་བརྗོད་པ་ནི་རྩྭ་
[24b.5]ལས་བྱུང་བ་ལ་སོགས་པའི་ཁྱད་པར་ཐ་དད་པ་ཡང་དུ་བ་ཁྱད་པར་གཞན་ལ་ཡོད་པའི་ཕྱིར་ཁྱད་པར་དེ་ལས་སྐྱེས་པ་མ་ཡིན་པ་དེ་ལྟ་ན་ཡང་རྒྱུ་ལ་ཡོད་པའི་ཁྱད་པར་འབྲས་བུའི་བདག་ཉིད་ལ་བྱེད་པ་མེད་པ་ཁོ་ནའོ་ཞེས་བྱ་བར་ནི་མི་ནུས་ཏེ་ཆ་ཤས་ཀྱིས་སྐྱེད་པར་བྱེད་པ་ཉིད་དུ་ཐལ་བའི་ཕྱིར་རོ། །དེས་ན་ཁྱད་
[24b.6]པར་དེ་འབྲས་བུའི་བདག་ཉིད་ལ་ཡང་ཁྱད་པར་ཙམ་མོ་ཞེས་འདོད་པ་ཡིན་ཏེ། རྒྱུ་ཁྱད་པར་མེད་པར་འབྲས་བུའི་ཁྱད་པར་ཡོད་པའི་ཉེས་པར་འགྱུར་བར་བྱ་བའི་ཕྱིར་རོ། །རྒྱུའི་ཁྱད་པར་དེ་ཡང་གང་གི་ཚེ་རྗེས་སུ་འགྲོ་བ་རྟོགས་པར་གྱུར་པ་དེའི་ཚེ་རྣམ་པ་ཐམས་ཅད་དུ་གོ་བར་བྱ་བ་ཡིན་པ་ཉིད་དོ་ཞེས་བྱ་བའོ། །
[24b.7]འདི་ལ་འདིའི་དཔྱད་པ་བྱ་སྟེ། དེ་ལྟ་ན་ཡང་ཆ་ཤས་ཀྱིས་བསྐྱེད་པར་བྱ་བ་དང་། སྐྱེད་པར་བྱེད་པར་འགྱུར་བ་ལྡོག་པ་མ་ཡིན་ནོ། །མེ་ཙམ་གྱི་བདག་ཉིད་ཀྱིས་ཡིན་གྱི། ཁྱད་པར་བཏང་སྙོམས་པ་སྟོན་པ་ཡིན་ན་དེར་ཐལ་བར་འགྱུར་གྱི་ཁྱད་པར་གྱིས་ཀྱང་ཁྱད་པར་སྐྱེད་པ་ལ་ནི་མ་ཡིན་ནོ་ཞེ་ན། མ་ཡིན་
[25a]
[25a.1]ཏེ་སྤྱི་ཉིད་ལས་སྤྱི་ཡིན་ཏེ་ཁྱད་པར་ནི་མ་ཡིན་ནོ། །དེ་ནི་ཁྱད་པར་ཉིད་མ་ཡིན་ནོ་ཞེས་ཁས་བླངས་པ་ན་འདི་ཁྱད་པར་སྤྱིའི་བདག་ཉིད་ལ་བཏང་སྙོམས་སུ་གནས་པའི་ཕྱིར་རོ། །དངོས་པོའི་བདག་ཉིད་ཆ་ཤས་དང་བཅས་པར་ཐལ་བ་ཉིད་ནི་འདི་ཉིད་སྐྱོན་དུ་འགྱུར་བ་ཡིན་ཏེ།
[25a.2]དེ་ལྟ་མ་ཡིན་ན་ཁྱད་པར་གྱི་རང་བཞིན་བཏང་སྙོམས་སུ་གནས་པ་ལ་ཡང་སྐྱོན་མེད་པར་འགྱུར་རོ། །དངོས་པོ་ནི་ཆོས་ངེས་པ་རྣམས་བྱ་བའི་ཡུལ་ཐ་དད་པ་ཉིད་ན་ཇི་ལྟར་ཆ་ཤས་ཉིད་དུ་མི་འགྱུར། འོན་ཏེ་རྩྭ་ལས་བྱུང་བ་ལ་སོགས་པའི་རང་བཞིན་གཅིག་ཏུ་གྱུར་པ་ཉིད་ཀྱི་མེ་ནི་མེའི་རྣམ་པ་ཡིན་ལ། དེ་
[25a.3]བཞིན་དུ་དུ་བའི་རྣམ་པ་ཡང་དེ་ལས་བསྐྱེད་པར་བྱ་བའི་ཁྱད་པར་རྣམ་པར་དབྱེར་མེད་པའི་རང་བཞིན་ཡིན་ནོ། །དེ་ལྟ་བུའི་རྒྱུ་དེ་ལས་དེ་ལྟ་བུར་གྱུར་པ་དེ་སྐྱེ་བ་ན་རྣམ་པ་ཐམས་ཅད་ལས་རྣམ་པ་ཐམས་ཅད་དུ་སྐྱེ་བར་འགྱུར་རོ། །འོན་ཀྱང་ཆོས་ཐ་དད་པར་ངེས་པའི་རྣམ་པར་རྟོག་པས་མེའི་ཆ་ལས་ཁྱད་པར་གྱི་ཆ་ཐ་དད་པར་བྱེད་པར་ཟད་དོ། །དེས་
[25a.4]ན་གང་གིས་ཁྱད་པར་གྱི་ཆ་མེད་ཀྱང་དེ་ལྟར་རྗེས་སུ་འགྲོ་བའི་རང་བཞིན་ཡོད་ན་ཡོད་པའི་དུ་བ་དེ་མེད་པར་འབྱུང་བ་ནི་ཞེས་ཁྱད་པར་གྱི་རྒྱུ་ཅན་ཡིན་པ་སེལ་བར་འགྱུར་བ་འགའ་ཞིག་ནི་ཆོས་ཅན་གཞན་ལ་ཡོད་པ་ཉིད་ཀྱི་དེ་དང་གཅིག་ཏུ་བྱས་ནས་ངེས་པས་རྗེས་སུ་འགྲོ་བར་བརྗོད་པ་ཡིན་ལ་གཞན་ནི་ལྡོག་པ་ཡིན་ནོ། །
[25a.5]དངོས་པོ་ལ་ནི་རྒྱུ་དང་འབྲས་བུར་གྱུར་པའི་རང་གི་མཚན་ཉིད་གཉིས་པོ་དེ་རྒྱུ་དང་འབྲས་བུར་གྱུར་པ་གཞན་དག་ལས་གཞན་ཉིད་ཡིན་པའི་ཕྱིར་མི་འདྲ་བའི་མཚན་ཉིད་ལས་སྐྱེ་བས་ན་ཆ་ཤས་ཀྱིས་བསྐྱེད་པར་བྱ་བ་དང་སྐྱེད་པར་བྱེད་པ་ཡོད་པ་མ་ཡིན་ནོ། །དེ་བཞིན་དུ་སྤྱི་དང་ཁྱད་པར་གྱི་ཆོས་གཞན་དག་ལ་ཡང་
[25a.6]བརྗོད་པར་བྱའོ་ཞེ་ན། དེ་ཡང་མི་རིགས་ཏེ། མ་ཡིན་ཏེ་དེ་མེད་པར་འབྱུང་བ་ནི་ཞེས་བྱ་བ་ལ་སོགས་པའི་གཞུང་མི་བརྗོད་པར་ཐལ་བའི་ཕྱིར་རོ། །དེ་བཞིན་དུ་གཏན་ཚིགས་ཐིགས་པའི་རྫ་མཁན་ལས་ནི་འཇིམ་པའི་ངོ་བོ་ཉིད་མ་ཡིན། འཇིམ་པ་ལས་ནི་དབྱིབས་ཀྱི་ཁྱད་པར་མ་ཡིན་ཞེས་བྱ་བ་ཡང་
[25a.7]མི་འཐད་པར་འགྱུར་ཏེ་འཇིམ་པ་དང་རྫ་མཁན་གཉིས་ཀ་ལས་འཇིམ་པ་དང་དབྱིབས་ཀྱི་ཁྱད་པར་ཆ་མེད་པའི་དངོས་པོ་འབྱུང་བའི་ཕྱིར་རོ། །དེ་ལ་འདི་ནི་བདག་ཉིད་ཐམས་ཅད་ཀྱིས་གཅིག་ལས་ཀྱང་འབྱུང་ལ་གཞན་ལས་ཀྱང་འབྱུང་བ་མ་ཡིན་ནོ། །དེས་ན་འདི་ནི་རྫ་མཁན་ལས་ཀྱང་འཇིམ་པའི་ངོ་བོ་ཉིད་ཡིན་
[25b]
[25b.1]ལ། འཇིམ་པ་ལས་ཀྱང་དབྱིབས་ཀྱི་ཁྱད་པར་ཡིན་ནོ། །རྫ་མཁན་མ་ཡིན་པའི་སྐྱེས་བུ་དང་འཇིམ་པ་དང་བསྐྱེད་པར་བྱ་བ་སོ་ཕག་ལ་སོགས་པ་གང་ཡིན་པ་དེ་ཡང་མི་འདྲ་བ་ཉིད་མི་འདྲ་བའི་ཚོགས་པས་བསྐྱེད་པ་ཡིན་གྱི། དེར་འཇིམ་པ་ཡོད་ཀྱང་རྫ་མཁན་མེད་པའི་ཕྱིར་བུམ་པའི་དབྱིབས་མེད་
[25b.2]པ་ནི་མ་ཡིན་པའི་ཕྱིར་རྫ་མཁན་དེ་རྒྱུ་ཉིད་དོ་ཞེས་བྱ་བར་ནུས་པར་འགྱུར་རོ། །ལྷན་ཅིག་བྱེད་པ་མི་འདྲ་བ་དང་ལྡན་པའི་འཇིམ་པ་དང་རྫ་མཁན་དག་འབྲས་བུ་མི་འདྲ་བར་བྱེད་པའི་ཕྱིར་ཆ་ཤས་ཀྱི་རྗེས་སུ་འགྲོ་བ་དང་ལྡོག་པ་རྟོགས་པ་མ་ཡིན་ནོ། །རྣམ་པར་རྟོག་པས་ཉེ་བར་བཏགས་པའི་ཆོས་རྗེས་སུ་
[25b.3]འགྲོ་བ་ལ་བརྟེན་པའི་རྗེས་སུ་འགྲོ་བ་དང་ལྡོག་པ་ལ་བརྟེན་ནས་དེ་སྐད་བཤད་པ་ཡིན་ནོ་ཞེ་ན་མ་ཡིན་ཏེ་བཏགས་པ་ལ་བརྟེན་པ་ནི་ལྡོག་པའི་རྟེན་མ་ཡིན་པའི་ཕྱིར་རོ། །དེ་བཞིན་དུ་མིག་ཀྱང་མིག་ལ་སོགས་པའི་ཚོགས་པ་ཁྱད་པར་ཅན་ལས་སྐྱེ་ལ། བདེ་བ་ལ་སོགས་པ་ཡང་མ་ཡིན་པའི་ཕྱིར།
[25b.4]དེ་དང་དེ་མིན་དངོས་རང་བཞིན། །ཞེས་མི་བརྗོད་པར་འགྱུར་རོ། །མིག་ལ་སོགས་པ་ཡང་ཤེས་པའི་རང་བཞིན་དུ་ཐལ་བའི་ཕྱིར་རོ། །ཇི་ལྟར་རྟོགས་བཞིན་པའི་རྗེས་སུ་འགྲོ་ལྡོག་གི་རྗེས་སུ་འབྲངས་ན་ནི་མིག་ཚོགས་པ་དེ་མེད་ཀྱང་སྔར་ཡང་ཡོད་པའི་ཕྱིར་ཚོགས་པ་དེའི་རྒྱུ་མཚན་ཅན་མ་ཡིན་
[25b.5]པས་བདེ་བ་ལ་སོགས་པ་དང་རྒྱུ་མི་མཚུངས་པ་ཉིད་ཀྱིས་དེ་དང་འདྲ་བར་ཤེས་པ་ཉིད་དུ་ཐལ་བར་མི་འགྱུར་རོ། །གང་གི་ཚེ་ཁྱད་པར་གྱི་རྟེན་པ་ཉིད་ཀྱིས་རྗེས་སུ་འགྲོ་བ་དང་ལྡོག་པའི་རྗེས་སུ་འབྲང་བ་དེའི་ཚེ། དེ་ཕྱིས་མི་འབྱུང་བའི་ཕྱིར་དུ་བ་ལ་སོགས་པ་མེ་ལ་སོགས་པའི་ཚོགས་པས་བསྐྱེད་པར་བྱ་བར་ངེས་པ་
[25b.6]དོན་མེད་པ་ཉིད་དོ། །འོན་ཏེ་གཅིག་དུ་བ་ཡིན་པ་ཉིད་ན་གཞན་ཡང་དུ་བ་ཡིན་པའི་ཕྱིར་དུ་བ་ལ་བརྟེན་ནས་ངེས་པར་བརྟེན་པ་ཡིན་ཞེ་ན། ད་ནི་དུ་བ་གཞན་མེ་ལ་ཡོད་པའི་ཁྱད་པར་ལས་ངེས་པ་མ་ཡིན་ཏེ་དེ་མེད་ཀྱང་ཡོད་པའི་ཕྱིར་རོ། །དེས་ན་དུ་བ་ཁྱད་པར་གྱི་རྒྱུ་ཅན་དུ་ཇི་ལྟར་འགྱུར་དེ་བཞིན་དུ་མེ་ལས་ནི་
[25b.7]དུ་བ་གཞན་འབྱུང་ལ། བརྒྱ་བྱིན་གྱི་སྤྱི་བོ་ལས་དུ་བ་རྣམ་པ་གཞན་འབྱུང་བ་ཡིན་ནོ་ཞེས་བྱ་བར་ཡང་འགྱུར་རོ། །དེའི་ཕྱིར་རྗེས་སུ་འགྲོ་བ་དང་ལྡོག་པ་འམ་ཆ་ཤས་ཀྱིས་བསྐྱེད་པར་བྱ་བ་དང་སྐྱེད་པར་བྱེད་པ་མ་ཡིན་པ་འདི་བརྗོད་པར་བྱའོ་ཞེ་ན། འདི་ལ་བརྗོད་པ་འདི་དུ་བ་ལ་སོགས་པའི་བདག་ཉིད་ཀྱི་དོན་
[26a]
[26a.1]ལན་ཅིག་ཀྱང་རྒྱུ་ཉེ་བར་གནས་པ་རྩ་བར་གྱུར་པ་ཉིད་ཀྱིས་རང་གི་ངོ་བོ་ཐོབ་པར་བྱེད་པ་ན་དུ་བ་ལ་སོགས་པ་ཐམས་ཅད་དེ་ལྟ་བུའི་རྒྱུ་ཅན་ཉིད་དུ་ངེས་པར་བྱེད་དོ། །གཅིག་ཅིག་དེ་མེད་པར་འབྱུང་ན་ཡང་ལན་ཅིག་ཀྱང་དེ་ལྟར་གྱུར་པར་མི་འགྲུབ་པའི་ཕྱིར་རོ། །དེས་ན་འཆད་
[26a.2]པར་འགྱུར་བའི་རིགས་པ་ལ་ལྟོས་ནས་དུ་བའི་རང་གི་མཚན་ཉིད་གཅིག་ཅིག་ཀྱང་མེའི་ཁྱད་པར་མེད་པར་འབྱུང་བ་ཡིན་ན་དུ་བ་མེའི་ཁྱད་པར་གྱི་རྒྱུ་ཅན་དུ་མི་འགྱུར་རོ། །འོན་ཏེ་ཡང་ཆ་ཤས་ཀྱིས་སྐྱེད་པར་བྱེད་པ་ཉིད་ཡིན་ན། དེ་ཡང་མ་ཡིན་ཏེ། གང་གི་ཕྱིར་གང་གིས་སྤྱིའི་ཆ་ནི་དེར་ནུས་པ་ཡིན་
[26a.3]ལ་ཁྱད་པར་གྱི་ཆ་མ་ཡིན་པའི་ཕྱིར་འགལ་བའི་ཆོས་གནས་པར་འགྱུར་བ་མེའི་སྤྱིའི་ཆ་ཁྱད་པར་གྱི་ཆ་ལས་ཐ་དད་པ་ནི་ཡོད་པ་མ་ཡིན་ཏེ། རྩྭ་ལས་བྱུང་བ་ཉིད་དང་མེ་ཉིད་གཉིས་ཕན་ཚུན་ཁྱད་པར་མེད་པའི་ཕྱིར་ཏེ་སྣང་བ་ཐ་དད་པར་མ་གྲུབ་པའི་ཕྱིར་རོ། །དེས་ན་རྩྭ་ལས་བྱུང་བ་དང་མེ་ཆ་མེད་པའི་བདག་
[26a.4]ཉིད་ཀྱིས་རྩྭ་ལས་བྱུང་བའི་དུ་བ་ཆ་མེད་པར་སྐྱེད་པར་བྱེད་དོ། །དེ་བཞིན་དུ་ལོ་མ་ལས་བྱུང་བ་ལས་ཀྱང་ལོ་མ་ལས་བྱུང་བའི་ཕྱིར་རང་གི་མཚན་ཉིད་ཁོ་ན་ལས་རང་གི་མཚན་ཉིད་འབྱུང་བ་ན་གང་གིས་འདིར་ཆ་རྣམས་ཆོས་འགལ་བ་ལ་གནས་པའི་ཕྱིར་ཐ་དད་པར་འགྱུར་བ་ཆ་ཤས་ཀྱིས་སྐྱེད་པར་བྱེད་པ་ཉིད་
[26a.5]དུ་ག་ལ་འགྱུར། བསམ་པ་འདི་ཉིད་ཀྱིས་ན་དེས་བསྐྱེད་པར་བྱ་བའི་ཁྱད་པར་བཟུང་ན་ཞེས་བཤད་པ་ཡིན་ཏེ་རྣམ་པ་དེ་ལྟ་བུའི་དངོས་པོ་ཡོད་ན་དེ་ལྟ་བུར་གྱུར་པ་ཡོད་པར་འགྱུར་རོ་ཞེས་བྱ་བའི་དོན་ཏོ། །ཇི་ལྟར་རྩྭའི་བུད་ཤིང་དུ་བསྐྱེད་པ་ན་ས་བོན་ལ་སོགས་པ་ཚོགས་པ་མྱུ་གུ་སྐྱེད་པ་དེ་བཞིན་དུ་ལོ་མའི་བུད་
[26a.6]ཤིང་ལས་ཀྱང་དེས་བསྐྱེད་པའི་དུ་བ་སྐྱེད་པ་ནི་མ་ཡིན་ཏེ། འོན་ཀྱང་དུ་བ་དེ་དེ་ལས་སྐྱེ་བ་ཡིན་ནོ། །དེ་ཇི་ལྟ་བ་ཉིད་ཀྱང་མ་ཡིན་གྱི་འོན་ཀྱང་ཁྱད་པར་གཞན་དང་ལྡན་པའི་ཚོགས་པ་ལས་ཁྱད་པར་གཞན་དང་ལྡན་པའི་དུ་བ་ཉིད་སྐྱེ་བ་ཡིན་ནོ། །དེས་ན་འདིར་ཁྱད་པར་དུ་བྱེད་པའི་རང་བཞིན་གང་ཡིན་པ་ཞེས་
[26a.7]བརྩལ་བས་ན། བུད་ཤིང་ཁྱད་པར་དུ་བྱེད་པ་ཡིན་པར་བརྗོད་དོ། །ཚོགས་པ་དེར་བུད་ཤིང་ཉིད་ཁྱད་པར་ཡིན་པའི་ཕྱིར་རོ། །དེས་ན་དུ་བ་ཙམ་ལ་ལྟོས་ཏེ་བུད་ཤིང་གི་ཁྱད་པར་སྦྱོར་བར་བྱེད་པ་མ་ཡིན་ཏེ། དེས་མེད་པར་འབྱུང་བ་ནི་དེ་ལས་སྐྱེ་བར་ངེས་པ་མེད་པའི་ཕྱིར་རོ་ཞེས་མེད་ཀྱང་འབྱུང་བར་བཤད་དོ། །
[26b]
[26b.1]དེ་བཞིན་དུ་འབར་བ་ལ་སོགས་པའི་ཁྱད་པར་དག་ཀྱང་ངེས་པར་བྱའོ། །དེ་ཙམ་གྱིས་སྐྱེད་པར་བྱེད་པ་མ་ཡིན་པ་ཡང་མ་ཡིན་ཏེ་ཐམས་ཅད་ལས་ཁྱད་པར་ཐམས་ཅད་འབྱུང་བའི་ཕྱིར་རོ། །གལ་ཏེ་ཐམས་ཅད་ལས་ཁྱད་པར་ཐམས་ཅད་སྐྱེ་ན་ཚོགས་པ་དེ་དང་དེ་དག་ཏུ་ཕན་ཚུན་ཐ་དད་པའི་རང་བཞིན་ཆ་མེད་པའི་དུ་བ་ཉིད་
[26b.2]ཆ་མེད་པའི་མེ་ལས་སྐྱེ་སྟེ་དེས་ན་ཁྱད་པར་དེ་མེད་ཀྱང་ཚོགས་པ་གཞན་ལ་དུ་བ་ཡོད་པས་དེ་མེད་ཀྱང་ཡོད་པའི་ཕྱིར་རྒྱུ་མ་ཡིན་པའི་ཕྱིར་དང་། མེ་ཡོད་ཀྱང་དུ་བ་བཞིན་དུ་ཁྱད་པར་དེ་མི་སྐྱེ་བའི་ཕྱིར་དེ་དེས་བསྐྱེད་པ་མ་ཡིན་པའི་ཕྱིར། སྲེག་པའི་ནུས་པ་ཙམ་ལས་ནི་དུ་བ་ཙམ་སྐྱེ་ལ། ཁྱད་པར་ལས་ནི་ཁྱད་པར་ཡིན་ནོ་ཞེས་
[26b.3]དེ་ལྟར་རྣམ་པར་ཕྱེ་བས་ཇི་ལྟར་འགྱུར་ཞེ་ན། བརྗོད་པའི་ཚོགས་པ་གཞན་ལ་ལྟོས་ནས་རྣམ་པར་ཕྱེ་བ་ཡིན་གྱི་དངོས་པོ་དེ་ནི་རྣམ་པར་དབྱེ་བའི་རྟེན་མ་ཡིན་ནོ། །ཁྱད་པར་མེད་ཀྱང་ཚོགས་པ་གཞན་ལ་ཡོད་པའི་ཕྱིར་ཁྱད་པར་དེ་རྒྱུ་མ་ཡིན་པའི་རྟག་པ་ཡིན་གྱི། དངོས་པོ་དེ་ཉིད་ལ་ནི་ཆོས་འགའ་ཞིག་ཆོས་
[26b.4]འགའ་ལ་བཏང་སྙོམས་པར་རྟེན་པ་མི་འཐད་དོ། །གལ་ཏེ་དེ་ལྟ་ན་རྩྭ་ལས་བྱུང་བའི་བདག་ཉིད་ཁྱད་པར་ཡིན་ཡང་དེར་དུ་བའི་རྒྱུ་ཉིད་དུ་གྲུབ་པས་གཞན་དུ་ཇི་ལྟར་ཡོད་ཅེ་ན། འདི་ལ་བཤད་ཟིན་ཏེ་དངོས་པོ་ལ་ཆོས་རྣམས་ཕན་ཚུན་ཁྱད་པར་མེད་པའི་ཕྱིར་འདི་ནི་འདི་ལའོ་ཞེས་རྣམ་པར་དབྱེ་བ་མ་གྲུབ་པའི་
[26b.5]ཕྱིར་རོ། །འོན་ཀྱང་བསལ་བ་ཐ་དད་པ་དག་ལ་དེའི་རྒྱུར་གྱུར་པའི་ཚོགས་པ་རྣམས་ཀྱི་ཐ་དད་པའི་རྒྱུ་རྗེས་སུ་འགྲོ་བ་དང་ལྡོག་པ་དག་ལས་རྟོགས་ནས་ཁྱད་པར་དེ་དང་ལྡན་པའི་འབྲས་བུ་སྒྲུབ་པར་བྱེད་པའི་དོན་དུ་གཉེར་བ་དེ་ལྟ་བུའི་རྒྱུ་འཛིན་པའམ་ཁྱད་པར་ཅན་གྱི་འབྲས་བུ་དམིགས་པ་ལས་ཁྱད་པར་ཅན་
[26b.6]གྱི་རྒྱུ་རྗེས་སུ་དཔོག་པ་ལ་འཇུག་པ་ཡིན་ནོ། །དེའི་ཕྱིར་རང་གི་མཚན་ཉིད་ཐ་དད་པའི་རྗེས་སུ་སོང་བའི་རྣམ་པར་དབྱེ་བ་ལ་ལྟོས་ནས་ནི་མ་ཡིན་ཏེ། དེ་མེད་པར་འགྱུར་བ་ནི་དེ་ལས་སྐྱེ་བར་ངེས་པ་མེད་པའི་ཕྱིར་རོ་ཞེས་བརྗོད་ལ། ཆ་མེད་པ་ཉིད་ཆ་མེད་པ་ལས་སྐྱེ་བ་ལས་བསམས་ནས་ནི་བསྐྱེད་པར་བྱ་བའི་
[26b.7]ཁྱད་པར་བཟུང་ནས་བཤད་དེ། དེ་བཞིན་དུ་རྫ་མཁན་ལས་དབྱིབས་ཀྱི་ཁྱད་པར་སྐྱེ་བ་ཡང་ངེས་པར་བྱའོ། །མིག་ལ་སོགས་པ་ཤེས་པ་སྐྱེད་པའི་ཚོགས་པ་ཙམ་ལ་བརྟེན་ནས་འབྱུང་བ་མ་ཡིན་ནོ་ཞེས་ནི་གཞན་དུ་བསྟན་ཟིན་ཏོ། །ད་ནི་འབྲས་བུ་རྒྱུ་མེད་ན་མི་འབྱུང་བའི་ཆོས་དག་ཁོ་ནས་གོ་བར་བྱེད་པར་
[27a]
[27a.1]བཤད་པ་གང་ཡིན་པ་དེར་ཡང་ཆ་ཤས་ཀྱིས་སྐྱེ་བར་ཐལ་བ་སྤོང་བའི་ཕྱིར་རྟགས་ཀྱི་བྱེ་བྲག་གི་ཁྱད་པར་ཅན་གྱི་སྤྱི་རྣམས་བཟུང་ན་ཡིན་པར་འདོད་པའི་ཕྱིར་རོ་ཞེས་སྨོས་སོ། །གོ་བར་བྱ་བ་དང་གོ་བར་བྱེད་པའི་དངོས་པོའི་སྐབས་ཡིན་པས། དེ་ཉིད་དེས་བསྐྱེད་པར་བྱ་བའི་ཁྱད་པར་
[27a.2]དང་། ཇི་སྐད་བཤད་པའི་སྤྱི་རྣམས་བཟུང་ན་ཡིན་པར་འདོད་པའི་ཕྱིར་རོ་ཞེས་བྱ་བའི་དོན་ཏོ། །རྟགས་ཀྱི་སྤྱི་དངོས་པོ་ཉིད་དང་། སྐྱ་བོ་ཉིད་ལ་སོགས་པ་གང་ཡིན་པ་དེ་དག་ཀྱང་རྟགས་ཀྱི་བྱེ་བྲག་གི་ཁྱད་པར་བཟུང་ནས་ཏེ། ཁྱད་པར་ཅན་གྱི་རྟགས་ཀྱི་ཁྱད་པར་རྣམས་རྟོགས་ན་གཏན་ཚིགས་ཀྱི་
[27a.3]དངོས་པོར་འདོད་པ་ཡིན་ནོ། །འདི་དག་ནི་རྟགས་ཀྱི་ཁྱད་པར་དུ་གྱུར་པ་ཡིན་ཏེ། རྟགས་ཀྱི་བདག་ཉིད་ཀྱིས་ན་རྟགས་བཞིན་དུ་དེ་དག་ཀྱང་ཁྱད་པར་ཡིན་པའི་ཕྱིར་རོ། །དུ་བ་ལ་ཡོད་པའི་དངོས་པོ་ཉིད་ནི་བུམ་པ་ལ་ཡོད་པའི་དངོས་པོ་ཉིད་ལས་ཐ་དད་པ་ཡིན་ཏེ། དེས་ན་དུ་བ་ལ་ཡོད་པ་འདི་བུམ་པ་
[27a.4]ལ་ཡོད་པ་དང་མི་འདྲ་བར་བཟུང་ན་མེ་བསྒྲུབ་པར་རིགས་པ་ཉིད་དོ། །གལ་ཏེ་མེ་མེད་པར་ཡང་འབྱུང་བའི་དངོས་པོ་ཉིད་ཇི་ལྟར་མེའི་རྒྱུ་ཅན་དུ་འགྱུར་བ་མ་ཡིན་ཏེ། དངོས་པོ་ཉིད་གཞན་ཡིན་པའི་ཕྱིར་རོ་ཞེ་ན། མེ་མ་ཡིན་པ་ལས་བྱུང་བའི་དུ་བ་ཡང་གཞན་ཉིད་ཡིན་པའི་ཕྱིར་མཚུངས་པར་ཐལ་བར་འགྱུར་
[27a.5]རོ། །མཚུངས་པ་མ་ཡིན་ཏེ། གང་གི་ཕྱིར་འགའ་ཞིག་གིས་འཁྲུལ་པ་དང་། མི་འཁྲུལ་བར་འགྱུར་བ་དངོས་པོ་ཉིད་ཅེས་བྱ་བ་ནི་འབྲས་བུ་མ་ཡིན་གྱི། འོན་ཀྱང་རང་གི་མཚན་ཉིད་ཁོ་ནའོ། །དེ་ཡང་དུ་བ་ཡིན་ཞེས་དབང་ཕྱུག་སེལ་བ་དག་གིས་བསྟན་ཏོ། །ཁྱད་པར་ལ་ལྟོས་པར་ནི་སྤྱི་ཙམ་སྒྲུབ་
[27a.6]བྱེད་མ་ཡིན་ནོ་ཞེས་བཤད་པ་ནི། སྤྱི་ཁྱད་པར་དུ་མ་བྱས་པ་ཞེས་བྱ་བ་ལ་སོགས་པ་ཡིན་ནོ། རྒྱུ་གང་ཞིག་བསྒྲུབ་པར་བྱ་བ་དེས་ནི་རང་གི་འབྲས་བུ་ལ་སྤྱིའི་ཆོས་ཁྱད་པར་གྱི་བདག་ཉིད་དུ་གྱུར་པ་རྣམས་ཉིད་ཀྱི་རང་བཞིན་བསྒྲུབ་པར་བྱ་བ་ཡིན་ཏེ། དེས་ན་དེ་ལྟ་བུར་གྱུར་པ་དེ་དག་གི་སྒྲུབ་པར་བྱེད་པ་ཡིན་པ་
[27a.7]ཉིད་དོ། །རྒྱུས་བྱས་པའི་ཁྱད་པར་ལ་མ་བརྟེན་པར་འབྲས་བུ་གཞན་ལ་ཡོད་པའི་རང་བཞིན་ལ་བརྟེན་ནས། གཏན་ཚིགས་སུ་བྱས་ན་ནི་འཁྲུལ་པ་ཉིད་ཀྱི་ཕྱིར་ན་དེ་དག་གཏན་ཚིགས་སུ་འདོད་དོ། །དེས་ན་དེ་ལྟར་དེའི་རང་བཞིན་དེ་ལས་བྱུང་བའི་ཕྱིར་རོ་ཞེས་འབྲེལ་པ་བསྟན་པ་ཉིད་ཀྱིས་རང་བཞིན་རྟོགས་པའི་
[27b]
[27b.1]འབྲས་བུའི་གཏན་ཚིགས་ཀྱི་བསྒྲུབ་པར་བྱ་བའི་ཁྱད་པར་བསྟན་པའི་ཕྱིར། གལ་ཏེ་དེ་ལས་སྐྱེས་པའི་ཕྱིར་ཞེས་རྒོལ་བ་བཀོད་པ་སྔོན་དུ་འགྲོ་བས་བཤད་ནས། ད་ནི་དེ་ནི་དེའི་བདག་ཉིད་ཡིན་པའི་ཕྱིར་རོ་ཞེས་བྱ་བས་རང་བཞིན་གྱི་གཏན་ཚིགས་ཀྱི་རང་བཞིན་ཉིད་བཤད་ཀྱང་བསྒྲུབ་པར་བྱ་བ་བསྟན་པའི་ཕྱིར་རང་
[27b.2]བཞིན་ཡོད་ཙམ་དང་ཞེས་སྨོས་སོ། །རང་བཞིན་དེ་རང་གི་ངོ་བོ་ཉིད་ལ་དངོས་པོ་གཏན་ཚིགས་ཡིན་ནོ། །རང་བཞིན་དེ་ཡང་ཡོད་པ་ཙམ་དང་རྗེས་སུ་འབྲེལ་བ་ཡིན་ཏེ། ཡོད་ཙམ་ཉིད་ཀྱི་རྗེས་སུ་འཇུག་པ་ཡིན་ནོ། །གང་ཞིག་ཡོད་པའི་ཞེ་ན། སྐབས་ཀྱི་དངོས་པོ་ཉིད་ཡོད་པའི་ཞེས་བྱ་བར་རྟོགས་སོ། །དེའི་
[27b.3]དོན་ནི་འདི་ཡིན་ཏེ་གང་ཞིག་དངོས་པོ་ཡོད་པ་ཙམ་གྱི་རྗེས་སུ་འཇུག་པ་དེ་ལྟ་བུའི་རང་གི་བདག་ཉིད་ལ་དངོས་པོ་གཏན་ཚིགས་ཡིན་ནོ། །དངོས་པོ་ནི་དེའི་བདག་ཉིད་ཡིན་པའི་ཕྱིར་དེ་ཡོད་པ་ནི་རང་གི་བདག་ཉིད་མེད་པར་མི་འགྱུར་བའི་ཕྱིར་ཏེ་ཡོད་ན་གདོན་མི་ཟ་བར་དེའི་རང་བཞིན་ཡོད་པར་འགྱུར་རོ་ཞེས་ངེས་
[27b.4]པས་ན་དངོས་པོ་ཡོད་ན་རང་བཞིན་ཡོད་པ་ཡིན་ནོ། །གལ་ཏེ་འདི་ལྟ་བུའི་དོན་འདི་ནི་རང་བཞིན་འབྲེལ་པ་བརྗོད་པ་ཉིད་ཀྱིས་ངེས་པ་མ་ཡིན་ནམ། དེས་ན་འདི་ཉིད་བསྒྲུབ་པར་བྱ་བ་ཡིན་པ་དེས་ན་འདི་བརྗོད་པས་ཅི་ཞིག་བྱ་ཞེ་ན། དེ་ནི་བདེན་ཏེ། དེ་ཉིད་ཀྱི་ཕྱིར་གཏན་ཚིགས་ཀྱི་དེའི་བདག་ཉིད་ནི་
[27b.5]ཞེས་སྨོས་སོ། །འདིའི་རང་བཞིན་འབྲེལ་པ་ནི་རྣམ་པ་འདི་ལྟ་བུའི་དངོས་པོ་ལ་ཡིན་པར་རིགས་པ་དེའི་ཕྱིར་དེ་ཉིད་བསྒྲུབ་པར་བྱ་བར་འཐད་དོ་ཞེས་བྱ་བའི་དོན་ཏོ། །གལ་ཏེ་དེ་ལྟ་ན་འོ་ན་ཅིའི་དོན་དུ་འདི་བཀོད་ཅེ་ན། གཞན་ལ་རག་ལས་པའི་ནི་མ་ཡིན་ཏེ་ཞེས་སྨོས་སོ། །དེ་ལྟར་རྣམ་པ་ཐམས་ཅད་
[27b.6]དུ་གོ་བར་བྱ་བ་དང་གོ་བར་བྱེད་པ་ཉིད་དུ་འགྱུར་བར་སྨྲ་བ་རྒྱུ་དང་འབྲས་བུའི་རང་བཞིན་བསྟན་པས་བསལ་བ་དེ་བཞིན་དུ་དེའི་བདག་ཉིད་བསྟན་པས་དེ་དང་འགལ་བ་གོ་བར་བྱེད་པར་བརྗོད་པ་བཀག་པ་ཡིན་ནོ། །དེས་ན་གང་དག་གཞན་ལ་རག་ལས་པའི་ཕྱིར་དེས་སྟོང་ཡང་ངོ་བོ་ཡོད་པས་དེའི་བདག་ཉིད་དུ་མ་
[27b.7]གྲུབ་ཀྱང་གོ་བར་བྱེད་པ་ཉིད་དུ་སྨྲ་བ་དེ་དག་འདི་ལྟར་བསལ་བར་བྱ་བ་ཡིན་ཏེ་འཇིག་པ་རྒྱུ་དང་ལྡན་པར་སྨྲ་བ་རྣམས་ཀྱིས་བྱས་པ་ཉིད་བཞིན་ནོ། །མི་རྟག་པ་ཉིད་དེ་ཕྱིས་འབྱུང་ན་ཡོད་ཀྱང་དེའི་རང་བཞིན་མ་ཡིན་པར་འགྱུར་རོ། །དེས་ན་དེའི་བདག་ཉིད་མ་ཡིན་པའི་ཕྱིར་འདི་བྱས་པ་ཉིད་ཀྱིས་བསྒྲུབ་པར་བྱ་བ་མ་
[28a]
[28a.1]ཡིན་ནོ། །དེས་ན་གཞན་ལ་རག་ལས་པ་ཡིན་ན་དེའི་བདག་ཉིད་མེད་པར་འགྱུར་བའི་ཕྱིར་གཏན་ཚིགས་ཉིད་དུ་མི་རིགས་པ་ན། རང་བཞིན་འབྲེལ་པའི་རྟེན་ཉིད་བསྒྲུབ་པར་བྱ་བ་ཡིན་ནོ། །དེ་ལྟར་སྨྲ་བ་ནི་དེའི་བདག་ཉིད་ལས་བྱས་པ་གོ་བར་བྱེད་པ་སྨྲ་བ་ནི་མ་ཡིན་ཏེ། དེའི་
[28a.2]ཕྱིར་དེ་ཇི་ལྟར་དེ་མེད་པ་ཉིད་ཀྱིས་འདི་བསྒྲུབ་པར་བྱ་བ་ཉིད་ཡིན་པ་དགག་ཅེས་དོགས་ན། བྱས་པ་ཉིད་ཡོད་པ་ན་འདི་མེད་ན་གོ་བར་བྱེད་པ་ཉིད་དུ་མི་རིགས་སོ་ཞེས་བསྟན་པའི་ཕྱིར་དེ་ཡོད་ན་ཡོད་པར་མ་གྱུར་པའི་ཞེས་སྨོས་སོ། །བྱས་པ་ཉིད་ལ་སོགས་པ་དེ་ལ་གོ་བར་བྱེད་པ་ཉིད་དུ་འདོད་པའི་ངོ་བོ་གང་ཡིན་པ་དེ་
[28a.3]ཡོད་ན། གཞན་ལ་རག་ལས་པའི་ཕྱིར་ཡོད་པར་མ་གྱུར་པའི་ཕྱིས་འབྱུང་བ་ལ་ནི་ངེས་པ་མེད་དོ། །གཏན་ཚིགས་ནི་དེ་ཡོད་ན་དེ་གདོན་མི་ཟ་བར་ཡོད་པའི་ཕྱིར་བསྒྲུབ་པར་བྱ་བ་ངེས་པར་བྱེད་པ་ཡིན་ནོ། །དེ་གང་གི་ཚེ་གཏན་ཚིགས་ཡོད་ཀྱང་ཡོད་པར་མ་གྱུར་ན། འོ་ན་འདིས་ངེས་པར་གང་ལ་བརྟེན་
[28a.4]ནས་ཕྱིས་འབྱུང་བར་འགྱུར། དེ་ནི་དེ་རེ་ཞིག་དེ་མེད་པར་ཡོད་པར་འགྱུར་ཏེ་དེའི་ཚེ་བཞིན་ནོ། །དེས་ན་དེ་ཡང་ཡོད་ལ་ཕྱིས་ཀྱང་སྔར་བཞིན་མི་འབྱུང་བའི་ཕྱིར་འདི་ངེས་པ་མེད་པ་ཁོ་ནའོ། །འོ་ན་ཡོད་པར་འགྱུར་བ་ཡང་དགག་པ་མེད་པ་ཉིད་དོ་ཞེ་ན་མེད་མོད། ངེས་པ་མེད་ན་རྗེས་སུ་དཔག་པ་མི་འབྱུང་བའི་
[28a.5]ཕྱིར་ཐེ་ཚོམ་ཉིད་དུ་འགྱུར་རོ། །གཞན་ཡང་གང་ལ་རག་ལས་ནས་འདི་ཡོད་པར་འགྱུར་བ་དེ་ཉིད་ལས་ཡོད་པ་འབྱུང་བར་འགྱུར་བ་མ་ཡིན་པའི་ཕྱིར། དེ་ཇི་ལྟར་ཕྱིས་ཀྱང་ཡོད་པར་འགྱུར་ཞེས་བཤད་པ་ནི་རྒྱུ་རྣམས་ནི་ཞེས་བྱ་བ་ཡིན་ནོ། །རྒྱུ་རྣམས་ནི་འབྲས་བུ་ལ་འཁྲུལ་པ་ཡིན་ནོ། །འབྲས་བུ་མེད་
[28a.6]ཀྱང་འབྱུང་བ་ཡིན་ཏེ་གདོན་མི་ཟ་བར་བྱེད་པ་མ་ཡིན་ནོ་ཞེས་བྱ་བའི་ཐ་ཚིག་གོ། །ད་ནི་འབྲེལ་པ་རྟོགས་པ་མེད་པས་རང་བཞིན་གྱི་གཏན་ཚིགས་ལས་ཐ་དད་པར་བྱེད་པ་མེད་པར་མི་དམིགས་པའི་རང་བཞིན་བརྗོད་པ་སྔོན་དུ་འགྲོ་བ་ཅན་གྱི་བསྒྲུབ་པར་བྱ་བ་བསྟན་པ། ཚད་མ་རྣམས་ནི་
[28a.7]ཞེས་སྨོས་སོ། །མངོན་སུམ་དང་རྗེས་སུ་དཔག་པ་དང་ལུང་གི་ཚད་མ་རྣམས་མི་འཇུག་པ་མི་དམིགས་པ་ཡིན་ནོ། །འདི་ནི་འདིའི་རང་བཞིན་གྱི་གཏན་ཚིགས་ལས་ཁྱད་པར་ཡིན་ནོ་ཞེས་གཏན་ཚིགས་ཀྱི་ཁྱད་པར་སྟོན་པར་བྱེད་པ། ནིའི་སྒྲས་རྣམ་པར་དབྱེ་བ་ཡིན་ནོ། །ཚད་མ་འཇུག་པ་
[28b]
[28b.1]ཉིད་ཀྱིས་རྟོགས་པའི་མི་དམིགས་པ་དེ་ནི་མི་དམིགས་པ་ཡིན་ནོ་ཞེས་འགྲེལ་པར་བཤད་དོ། །ཚད་མ་ཉིད་དམིགས་པ་ཡིན་པའི་ཕྱིར་དེ་ལྡོག་པ་མེད་པ་ནི་མི་དམིགས་པ་ཡིན་ནོ། །རང་གི་ངོ་བོ་བསྟན་ནས་བསྒྲུབ་པར་བྱ་བ་བཤད་པ་ནི། མེད་ལ་མི་འཇུག་འབྲས་བུ་ཅན། །ཞེས་བྱ་བ་ཡིན་ནོ། །
[28b.2]གང་དུ་ཚད་མ་འདི་དག་མི་འཇུག་པ་དེ་ཉིད་ལ་དེ་མི་དམིགས་པ་དེའི་བྱེད་པ་འཇུག་པར་བརྗོད་པར་བྱའོ། །དེ་ཉིད་ཀྱི་ཕྱིར་མི་དམིགས་པར་གྱུར་པ་དེ་ཉིད་མེད་ལ་ཞེས་ཡུལ་ཉིད་དུ་བསྟན་ཏོ། །དེ་ཡང་དོན་ཡོད་པ་ནི་དམིགས་པ་ཡིན་པའི་ཕྱིར་དམིགས་པ་མེད་ན་ཡོད་པ་མེད་པས་མེད་པ་ཞེས་བརྗོད་དོ། །གང་གི་
[28b.3]ཕྱིར་དེ་མེད་པ་ཡིན་པ་དེས་ན་མེད་པ་དེ་ལ་མི་འཇུག་པ་ནི་འདིའི་འབྲས་བུ་ཡིན་ཏེ་མི་འཇུག་པ་སྒྲུབ་པར་བྱེད་པ་ཡིན་ནོ་སྙམ་དུ་དགོངས་པའོ། །འཇུག་ན་ནི་དོན་གདོན་མི་ཟ་བར་རྣམ་པར་རྟོག་པ་འབྱུང་བ་མི་ལྡོག་སྟེ། མཐོང་བ་དོན་གྱིས་བསྒྲུབ་པར་བྱ་བའི་འབྲས་བུ་འདོད་པས་འབྱུང་བའི་གཡོ་བ་བརྩམས་
[28b.4]པ་ལ་ནི་གདོན་མི་ཟ་བར་འདི་འདི་ལྟ་བུའོ་སྙམ་པའི་རྟོག་པར་འགྱུར་བའི་ཕྱིར་རོ། །དེས་ན་གལ་ཏེ་འཇུག་པ་ཞེས་བྱ་བ་འབྱུང་བ་ལས་གྱུར་པའི་བྱེད་པ་བརྗོད་པ་དེ་ལྟ་ན་ཡང་འཇུག་པ་བཀག་པ་དང་། དེ་མེད་ན་མི་འབྱུང་བའི་སྒྲ་བཀག་པ་བྱས་པར་འགྱུར་རོ། །འཇུག་པ་ལ་ནི་དོན་ཡོད་པར་དོགས་
[28b.5]པའི་རྩ་བ་ཅན་ཡིན་ཏེ། དེས་ན་འཇུག་པ་བཀག་ན་དེ་ལས་འཇུག་པ་བཞིན་དུ་རྣམ་པར་རྟོག་པ་དེའི་རྩ་བ་ཅན་གྱི་སྒྲ་ཡང་བཀག་པར་འགྱུར་བ་ཡིན་ནོ། །དེ་ཉིད་ཀྱིས་ན་ཡོད་པའི་ཤེས་པ་དང་ཞེས་བྱ་བ་ལ་སོགས་པའི་འགྲེལ་པ་བཤད་དོ། །ཐ་སྙད་ཅེས་བྱ་བ་ནི་དོན་དུ་གཉེར་བས་འབྱུང་བ་བསྐྱེད་པའོ། །
[28b.6]ཅི་ཚད་མ་མེད་ན་ཡོད་པའི་ཤེས་པ་ལ་སོགས་པ་འགོག་ཅེ་ན། དེ་དག་ནི་དམིགས་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ་ཞེས་སྨོས་སོ། །ད་ནི་འཚེ་བ་ལ་སོགས་པ་སྤོང་བ་ལ་སོགས་པ་ལ་ཡང་འཇུག་པར་མི་འགྱུར་རོ་ཞེ་ན་དེ་ཉིད་ཀྱི་ཕྱིར་ཚད་མ་རྣམས་ཞེས་སྨོས་པ་སྟེ། དེ་ལ་ལུང་ལས་
[28b.7]དམིགས་པ་ཡོད་པའི་ཕྱིར་དང་། དེ་ཡང་རྣམ་པ་འདི་ལྟ་བུའི་དོན་ལ་ཚད་མ་ཡིན་པ་དང་། རྗེས་སུ་དཔག་པ་ལས་ཕྱི་རོལ་དུ་གྱུར་པ་མ་ཡིན་པའི་ཡང་ཕྱིར་རོ། །གལ་ཏེ་མདོ་ལས་མེ་ལ་ཞེས་དོན་མེད་པ་ཙམ་རྒྱུ་ཉིད་དུ་བརྗོད་པ་མ་ཡིན་ནམ། དེ་ཇི་ལྟར་ན་དམིགས་པ་སྔོན་དུ་འགྲོ་བ་ཅན་ཡིན་པའི་
[29a]
[29a.1]ཕྱིར་ཞེས་བསྟན་ཅེ་ན། དེ་ལྟར་འདི་ནི་ཞེས་སྨོས་སོ། །རྣམ་པ་འདིས་ཡོད་པའི་ཤེས་པ་ལ་སོགས་པ་དགག་པའི་འབྲས་བུ་ཅན་འདི་ནི་ཡོད་པ་དང་མེད་པ་དགག་པ་དང་སྒྲུབ་པའི་གཏན་ཚིགས་དག་གི་འདྲ་བ་ཁྱད་པར་མེད་པའི་ངོ་བོ་ཉིད་ཡིན་ནོ། །ཡོད་པའི་ཤེས་པ་ལ་སོགས་པའི་
[29a.2]གཏན་ཚིགས་ནི་ཇི་སྐད་བཤད་པ་ཉིད་ལ་མེད་པའི་ཤེས་པ་ལ་སོགས་པ་སྒྲུབ་པའི་གཏན་ཚིགས་ནི་འཆད་པར་འགྱུར་རོ། །འདི་སྐད་བརྗོད་པ་ཡིན་ཏེ། ཇི་སྐད་བཤད་པའི་རྒྱུ་ཉིད་སྦྱོར་བྱེད་དུ་བྱ་སྟེ་ཇི་སྐད་བཤད་པའི་ཤེས་པ་ལ་སོགས་པ་འགོག་པའི་འབྲས་བུ་ཅན་དུ་བསྟན་ཏོ། །འདི་གཅིག་པུར་ནི་
[29a.3]མ་ཟད་དེ་འཆད་པར་འགྱུར་བའི་བར་དུ་ཡང་ཡིན་ནོ། །འདི་ཉིད་གཞུང་འཛུགས་པ་ན་རྒྱུ་ཉིད་དུ་བསྟན་པའི་མེད་པ་ཇི་སྐད་བཤད་པའི་རྒྱུའི་རྩ་བ་ཉིད་དུ་སྟོན་པ་ནི་འདི་ལྟར་ཞེས་བྱ་བའོ། །དམིགས་པ་ནི་ཡོད་པ་ཡིན་ཏེ། དམིགས་པ་དེ་ལས་ཡོད་པའི་ཤེས་པ་དང་སྒྲ་དང་ཐ་སྙད་འཇུག་པའི་ཕྱིར་རོ། །
[29a.4]ཡོད་པའི་དོན་གྱི་རང་བཞིན་ཉིད་ཡིན་གྱི་དམིགས་པ་ནི་མ་ཡིན་ཏེ་དོན་དང་དམིགས་པ་ཐ་དད་པ་ཉིད་ཀྱི་ཕྱིར་ཕན་ཚུན་ཡོད་པ་མ་ཡིན་ནོ། །དེ་ལྟ་མོད་ཀྱི་དམིགས་པ་ཡོད་པར་བརྗོད་པ་ཡིན་ནོ། །དེས་ན་ཚིག་གི་དོན་གཞན་གྱིས་གཞན་ལ་བརྗོད་པ་འདི་ནི་ཉེ་བར་བཏགས་པ་ལས་ཡིན་ནོ། །ཡོད་པ་ལ་གནས་
[29a.5]པའི་ཉེ་བར་བཏགས་པ་དེ་ཡང་མི་དམིགས་པ་ལ་ཡིན་ཏེ་དེ་ལ་དམིགས་པ་ཉིད་ཀྱིས་ཡོད་དོ་སྙམ་དུ་ཤེས་པ་འཇུག་པའི་ཕྱིར་དང་། དེ་ལྟར་རྟོགས་པ་དེའི་དབང་དུ་བྱས་ཏེ་ཐ་སྙད་འཇུག་པའི་ཕྱིར་རོ། །དམིགས་པ་དེ་ཡང་གང་ཡིན་ཞེན། དངོས་པོ་རུང་བའི་མཚན་ཉིད་ཅེས་སྨོས་སོ། །རྣམ་པར་
[29a.6]ཤེས་པའི་ཡུལ་གྱི་རང་བཞིན་གྱི་དངོས་པོའམ། རྣམ་པར་ཤེས་པའི་ཡུལ་གྱི་རང་བཞིན་གྱི་དངོས་པོ་ནི་རྣམ་པར་ཤེས་པ་མ་ཡིན་ཏེ། རྒྱུ་དང་འབྲས་བུའི་དངོས་པོ་ནི་ཐ་དད་པ་ལ་བརྟེན་པ་ཡིན་ནོ། །དེས་ན་འདི་ཡང་ཁྱད་པར་ཅན་གྱི་ཡུལ་ཡོད་པ་དམིགས་པ་ལ་ཉེ་བར་བཏགས་ནས་བསྟན་པ་ཡིན་
[29a.7]ནོ། །དེས་ན་དམིགས་པ་ཡོད་པ་ཉིད་དང་། ཡོད་པ་ཉིད་དམིགས་པ་ཡིན་ནོ་ཞེས་གཉི་ག་ཉེ་བར་བཏགས་ནས་བརྗོད་དོ། །དེའི་རྟེན་ཅན་གྱི་ཤེས་པ་འཇུག་པ་ཞེས་བྱ་བ་ནི་དམིགས་པའི་དོན་དངོས་ཉིད་དོ། །གང་དག་བྱ་བ་ནི་བྱེད་པ་པོ་དང་ལས་ལ་གནས་པའི་ཕྱིར་དམིགས་པ་གཉི་གར་བསྟན་ཏོ་ཞེས་
[29b]
[29b.1]ཟེར་བ་དེ་དག་ནི་དུམ་བུ་ཉིད་ཡིན་གྱི་རྟོག་གེ་ནི་མ་ཡིན་ནོ། །ཤེས་པ་ནི་བྱ་བའམ། དངོས་པོའི་ཆོས་མ་ཡིན་ལ་ཡུལ་ལས་ཀྱང་མ་ཡིན་ཏེ། དེས་ན་འདི་ནི་གཞན་གྱི་ལུགས་ཀྱི་དྲི་མས་བསྒྱུར་བ་ཙམ་དུ་ཟད་དོ། །གང་གི་ཕྱིར་དམིགས་པ་ཡོད་པ་ཡིན་པ་དེའི་ཕྱིར་མ་དམིགས་པ་མེད་པ་ཞེས་བྱ་བ་
[29b.2]འགྲུབ་པར་འགྱུར་རོ། །གང་དག་དེ་ལྟར་གྱུར་པ་དེ་དག་ཀྱང་མེད་པ་ཡིན་ནོ་ཞེས་བཤད་པ་ནི་མི་དམིགས་པ་ནི་ཞེས་སྨོས་སོ། །མི་དམིགས་པ་ནི་མེད་པ་ཡིན་ལ་དེ་ཡང་མེད་པ་རྣམས་ཀྱི་མེད་པ་ཡིན་ནོ། །དེས་ན་འདིར་དོན་འདི་ཡིན་ཏེ། གང་དག་མ་དམིགས་པ་དེ་དག་ནི་མེད་པ་ཡིན་ལ་དེ་ཡང་
[29b.3]དམིགས་པ་ཉིད་ཡོད་པ་ཡིན་པའི་ཕྱིར་རོ། །ཡོད་པ་དེ་ཡང་ཡོད་པའི་ཤེས་པ་ལ་སོགས་པ་དེ་ལ་བརྟེན་པའི་ཕྱིར་རོ། །དེས་ན་འདི་དང་འཆད་པར་འགྱུར་བའི་གཏན་ཚིགས་སུ་རང་གི་རྒྱུ་མཚན་མེད་པའི་ཕྱིར་ཡོད་པ་ལ་སོགས་པ་འགོག་པ་ཡིན་ནོ། །གལ་ཏེ་དེ་ལྟ་ན་ཡོད་པའི་ཤེས་པ་ལ་སོགས་
[29b.4]པ་རྣམས་དམིགས་པ་སྔོན་དུ་འགྲོ་བ་ཅན་ཡིན་པའི་ཕྱིར་རྒྱུ་མཚན་མེད་པ་ཙམ་གྱིས་དགག་པ་ཐོབ་པར་འགྱུར་ཏེ། རང་གི་རྒྱུ་མཚན་མེད་པ་ཉིད་རྒྱུ་མཚན་ཡོད་པ་འགོག་པ་ལ་རིགས་པ་ཡིན་པའི་ཕྱིར་རོ། །དེས་ན་མི་དམིགས་པ་མེད་པས་ཅི་ཞིག་བྱ། མེད་པ་ཉིད་མེད་པ་ཡིན་མོད། དེ་ལྟ་ན་ཡང་རྒྱུ་མེད་ན་
[29b.5]འབྲས་བུ་མེད་པར་འགྲུབ་པ་ཁོ་ནའོ། །དེ་བཞིན་དུ་གཉི་ག་ལྟར་ཉེ་བར་བཏགས་ནས་བསྟན་པ་ཡང་མེད་པར་འགྱུར་རོ་ཞེ་ན་འདི་ལ་བརྗོད་པ། ལྡོག་པའི་མཚན་ཉིད་ཀྱི་མེད་པ་གང་ཡིན་པ་དེ་ནི་བསྒྲུབ་པར་བྱ་བ་མ་ཡིན་ལ། སྒྲུབ་པར་བྱེད་པ་ཡང་མ་ཡིན་གྱི། འཆད་པར་འགྱུར་བའི་ཚུལ་གྱིས་དངོས་པོ་གཞན་
[29b.6]ཉིད་དངོས་པོ་མེད་པ་ཡིན་པའི་ཕྱིར་དེ་བསྒྲུབ་པར་བྱ་བ་དང་སྒྲུབ་པར་བྱེད་པ་ཡིན་ནོ། །གང་གི་ཚེ་ཤེས་པ་ཉིད་འདི་ཤེས་པ་གཞན་མེད་པ་ཡིན་པ་དེའི་ཚེ་དེ་དངོས་པོ་མེད་པར་ཡང་ཡིན་པར་འགྱུར་ཏེ། རིགས་པ་ཁྱད་པར་མེད་པའི་ཕྱིར་རོ། །དངོས་པོ་གཞན་དོན་དངོས་པོ་མེད་པ་ཉིད་ན་ཡང་ཤེས་པ་དངོས་པོ་མེད་པ་
[29b.7]ཡང་དེ་ཉིད་ཡིན་པར་འགྱུར་ཏེ། དེས་ན་ཤེས་པ་དང་ཤེས་བྱའི་མཚན་ཉིད་མི་དམིགས་པ་གྲུབ་པ་ཡིན་ལ་ཤེས་པ་མེད་པར་གྲུབ་པའི་ཕྱིར་དེ་ལོགས་སུ་བསྒྲུབ་པར་བྱ་བ་མ་ཡིན་ནོ། །དེས་ན་དོན་དམ་པ་འདི་ཙམ་ཞིག་གཉི་གར་བཏགས་པ་དོན་དམ་པ་མ་ཡིན་པས་བསྟན་པ་ཡིན་ནོ། །དོན་དང་ཤེས་པ་དག་
[30a]
[30a.1]ཐ་དད་པ་མེད་པར་བཏགས་ན་ནི་ཤེས་པ་མེད་པ་ཡིན་པ་བཞིན་དུ། ཤེས་པ་མེད་པ་ཡང་ཡིན་པར་འགྲུབ་སྟེ་དེས་ན་ཤེས་པ་དང་ཤེས་བྱའི་མཚན་ཉིད་མི་དམིགས་པ་འགྲུབ་བོ། །དོན་ཀྱང་ཤེས་པ་ཉིད་ཡིན་པས་ན་ཤེས་པ་མེད་པ་བཞིན་དུ་དོན་མེད་པ་ཡང་ཤེས་པ་མེད་པ་ཡིན་པའི་
[30a.2]ཕྱིར་རོ། །དེ་བཞིན་དུ་དོན་མེད་པ་དོན་ཡིན་པ་ལྟར་དོན་མེད་པ་ཤེས་པ་མེད་པ་ཡང་ཡིན་པའི་ཕྱིར་མི་དམིགས་པ་གྲུབ་ན་གྲུབ་པའི་ཕྱིར་དོན་མེད་པ་ལོགས་སུ་བསྒྲུབ་པར་བྱ་བ་གྲུབ་བོ། །དེས་ན་རིགས་པས་གྲུབ་པའི་དངོས་པོ་འདི་བསྟན་པའི་ཕྱིར་དོན་ཤེས་པ་ཡིན་ལ། ཤེས་པ་ཡང་དོན་ཡིན་ནོ་
[30a.3]ཞེས་དངོས་པོ་མ་ཡིན་པ་བསྟན་ཏེ། ཇི་སྐད་བཤད་པའི་ཚུལ་གྱིས་དེ་བསྟན་པའི་ཐབས་ཡིན་པའི་ཕྱིར་རོ། །དེས་ན་དེ་ལྟར་རང་བཞིན་གྱིས་བསྐལ་པ་རྣམས་ལ་ཡང་ཡོད་པའི་ཤེས་པ་ལ་སོགས་པ་འགོག་པ་ཡིན་ཏེ། རྒྱུ་མཚན་མེད་པའི་ཕྱིར་རོ། །འདི་མེད་པ་ནི་དམིགས་པ་ཡོད་པ་ཡིན་པའི་
[30a.4]ཕྱིར་དང་དེ་ཡང་འདིར་མེད་པའི་ཕྱིར་གྱི་མེད་པ་ཉིད་ནི་མ་ཡིན་ནོ། །འཆད་པར་འགྱུར་བའི་གཏན་ཚིགས་ལ་ནི་མི་དམིགས་པ་མེད་པ་ཉིད་ཀྱི་མེད་པ་ཡིན་ནོ། །འོ་ན་ཇི་ལྟར་འདི་མེད་པ་ཉིད་མ་ཡིན་ཞིང་མི་དམིགས་པ་མེད་པ་ཡིན། བརྗོད་པ། ཡོད་པའི་ཤེས་པ་ལ་སོགས་པ་དགག་པ་ཙམ་སྒྲུབ་པ་ལ་ནི་རྒྱུ་
[30a.5]མཚན་མེད་པ་ཙམ་གྱིས་དེ་མེད་པར་བསྟན་པའི་ཕྱིར་དེའི་རྒྱུ་མཚན་ཙམ་ལས་དམིགས་པ་ཡོད་པའི་རང་བཞིན་དུ་བསྟན་གྱི། དེ་མེད་ན་དོན་མེད་པའི་ཕྱིར་རོ། །དེ་ཡོད་པ་དང་མི་འཁྲུལ་པས་ནི་མ་ཡིན་ནོ། །ཡོད་པའི་ཤེས་པ་ལ་སོགས་པའི་རྒྱུ་ཡིན་པའི་ཕྱིར་ནི་དེའི་རང་བཞིན་ལ། དེ་མེད་པ་ཡང་མེད་
[30a.6]པའི་རང་བཞིན་ཡིན་ནོ། །དངོས་པོ་མེད་པ་ནི་མ་ཡིན་གྱི་འོན་ཀྱང་རྒྱུ་མཚན་མེད་པ་ཉིད་དོ། །དེ་ནི་མི་དམིགས་པ་གཉི་ག་ལ་ཡང་ཁྱད་པར་མེད་པའི་ཕྱིར་དེ་བཞིན་དུ་མེད་པའི་འབྲས་བུ་ཡང་ཁྱད་པར་མེད་དོ། །མེད་པ་སྒྲུབ་པའི་གཏན་ཚིགས་ལ་ནི་རྣམ་པ་དེ་ལྟ་བུའི་དམིགས་པ་ཡོད་པ་དང་འཁྲུལ་
[30a.7]པ་མེད་པའི་ཕྱིར་དང་། ཡོད་པའི་ཤེས་པ་ལ་སོགས་པའི་རྒྱུ་ཡིན་པའི་ཕྱིར་དེ་མེད་པའི་བདག་ཉིད་མེད་པའི་རང་བཞིན་ཉིད་དུ་བརྗོད་དོ། །དེ་ཉིད་ཀྱི་ཕྱིར་འདི་གཉི་ག་སྒྲུབ་པར་བྱེད་པ་ཡིན་ནོ། །ཡང་གང་དུ་ཡོད་པ་ཤེས་པ་ལ་མི་འཁྲུལ་པའི་ཕྱིར་དེ་ཡོད་པར་བརྗོད་ཅེ་ན། དངོས་པོ་རུང་བ་ཉེ་བར་
[30b]
[30b.1]བཏགས་པར་རོ། །གཞན་དུ་ནི་དངོས་པོ་ཙམ་ཉེ་བར་བཏགས་པར་འགྱུར་རོ། །ཤེས་པ་ལ་མི་འཁྲུལ་པ་དེ་ལྟར་བསྟན་ན་ནི་དེ་མེད་ན་དངོས་པོ་མེད་པར་ངེས་པ་ཡིན་ནོ། །དེའི་ཕྱིར་དེར་མི་དམིགས་པ་མེད་པ་ཉིད་དོ་ཞེས་བྱ་བ་འདི་འཐད་པ་ཉིད་དོ། །བསྒྲུབ་པར་བྱ་བའི་བྱེ་བྲག་གི་མི་དམིགས་པ་སྔ་
[30b.2]མ་ལས་གཞན་པའི་རང་བཞིན་གྱི་མི་དམིགས་པ་ཡང་བསྟན་པའི་ཕྱིར་བཤད་པ། ཚད་མ་རྣམས་མི་འཇུག་པ་ལས་ལ་ལ་མེད་པའི་ཤེས་པ་འབྲས་བུ་ཅན་ཡིན་ནོ། །ཚད་མ་རྣམས་མི་འཇུག་པ་ནི་མི་དམིགས་པ་ཡིན་ནོ་ཞེས་བརྗོད་ཟིན་ཏོ། །འདི་དག་ལས་ལ་ལ་ནི་མེད་པའི་ཤེས་པ་གྲུབ་པར་བྱེད་པ་
[30b.3]ཡིན་ནོ། །མེད་པའི་ཤེས་པ་ཇི་ལྟ་བུ་སྒྲུབ་པར་བྱེད་པ་དེ་ལྟར་བསྟན་པས་གཏན་ཚིགས་ཀྱི་བྱེ་བྲག་ལ་ལྟོས་ནས་ཁྱད་པར་ཅན་དུ་སྟོན་པར་བྱེད་དོ། །གཏན་ཚིགས་ཀྱི་བྱེ་བྲག་ནི་གཏན་ཚིགས་གཞན་ལ་ལྡོག་པ་སྟེ། དེ་ལ་ལྟོས་ནས་སོ། །གཏན་ཚིགས་ནི་འདི་ཉིད་དེ་འདི་ཉིད་ཀྱི་སྐབས་ཡིན་པའི་ཕྱིར་
[30b.4]རོ། །བྱེ་བྲག་ཀྱང་ཚད་མ་རྣམས་མི་འཇུག་པ་ཉིད་ལས་སོ། །དེས་ན་ཚད་མ་རྣམས་མི་འཇུག་པ་གཞན་ལས་བྱེ་བྲག་ཏུ་གྱུར་པ་ལ་བརྟེན་ནས་མི་འཇུག་པ་ལ་ལ་མེད་པ་ཤེས་པ་སྒྲུབ་པར་བྱེད་པ་ཡིན་ནོ། །བྱེ་བྲག་དེ་ཡང་དེ་དག་ལས་ཁྱད་པར་དང་ལྡན་པ་ཡིན་ན་འགྱུར་རོ། །དེའི་ཤུགས་ཀྱིས་ཐོབ་པའི་
[30b.5]འབྲས་བུ་ནི་འགྲེལ་པ་དེའི་བྱེ་བྲག་ནི་ཁྱད་པར་ཏེ་གཞན་བསྟན་ཏོ། །ཁྱད་པར་ཡང་དམིགས་པའི་མཚན་ཉིད་ཀྱིར་གྱུར་པའི་མཚན་ཉིད་ཡོད་པ་ཅན་ཡིན་ནོ། །དེས་ན་གལ་ཏེ་ཚད་མ་རྣམས་མི་འཇུག་པ་ལ་ཞེས་བྱ་བས་ངེས་པའི་ཚད་མ་ལོག་པ་མི་རྟོགས་ཀྱི། འོན་ཀྱང་གཅིག་པ་འགའ་ཞིག་མི་འཇུག་
[30b.6]པ་ཡིན་ནོ་ཞེས་ཐམས་ཅད་ལ་རྟོགས་པར་འགྱུར་བ་དེ་ལྟ་ན་ཡང་ཇི་སྐད་བརྗོད་པའི་ཁྱད་པར་དང་ལྡན་པའི་མངོན་སུམ་གཅིག་པུ་ཉིད་འགའ་ཞིག་མི་འཇུག་པ་ཡིན་པར་འགྱུར་གྱི་རྗེས་སུ་དཔག་པ་དང་ལུང་གཉིས་ནི་མ་ཡིན་པས་དེ་ཉིད་དེ་ཡང་གཏན་ཚིགས་ཡིན་ནོ། །ལ་ལ་ཞེས་བྱ་བ་འདིར་མི་དམིགས་
[30b.7]པ་ཞེས་བྱ་བར་ནི་འབྲེལ་པ་རིགས་པ་མ་ཡིན་ཏེ། མདོར་ནི་མདོས་ཟིན་པའི་ཚིག་ཉིད་དང་འབྲེལ་པར་རིགས་ཀྱི་གཞན་དང་མ་ཡིན་པས་ཇི་སྐད་བརྗོད་པ་ཉིད་བཤད་པའི་ཚུལ་ཡིན་ནོ། །མདོ་ཚིག་གོ་རིམས་བཞིན་བགྲོལ་བའི་ཕྱིར། གཏན་ཚིགས་ནི་ཞེས་སྨོས་སོ། །སྐབས་ཀྱི་གཏན་ཚིགས་ནི་
[31a]
[31a.1]མེད་པའི་ཤེས་པ་ལ་སོགས་པ་སྒྲུབ་པའི་ཚད་མ་རྣམས་ལྡོག་པ་ཡིན་ལ། དེ་ཡང་མི་དམིགས་པ་ཡིན་ལ་ཞེས་སྔར་བཀྲོལ་ཟིན་པའི་ཕྱིར་མི་དམིགས་པའི་ཞེས་སྨོས་སོ། །བྱེ་བྲག་གི་སྒྲའི་དོན་བཤད་པ་ནི། བྱེ་བྲག་ནི་ཞེས་བྱ་བ་སྟེ་ཇི་སྐད་བཤད་མ་ཐག་པ་བཞིན་ནོ། །
[31a.2]དེས་ན་གཏན་ཚིགས་བྱེ་བྲག་ལ་ལྟོས་ནས་ཞེས་བྱ་བའི་དོན་ནི་བདག་ཉིད་ཀྱི་ཁྱད་པར་ལ་ལྟོས་ནས་ཞེས་བྱ་བ་འདི་ཡིན་ནོ། །གལ་ཏེ་དམིགས་པའི་མཚན་ཉིད་ཀྱིར་གྱུར་པ་དང་འབྲེལ་པ་ཉིད་མི་དམིགས་པའི་ཁྱད་པར་མ་ཡིན་གྱི་འོན་ཀྱང་དོན་གྱིས་ཡིན་ནོ། །མི་དམིགས་པས་ནི་དེ་ལྟ་བུའི་དོན་དང་
[31a.3]འབྲེལ་པ་ཡིན་ཏེ། དེ་ཉིད་ཀྱི་ཕྱིར་དམིགས་པའི་མཚན་ཉིད་ཀྱིར་གྱུར་པའི་ཞེས་བཤད་པ་ཡིན་ན། དམིགས་པའི་མཚན་ཉིད་ཀྱིར་གྱུར་པ་དང་འབྲེལ་པའི་དམིགས་པ་ཞེས་བརྗོད་པ་ཡིན་ནོ་ཞེ་ན། དེ་ནི་བདེན་ཏེ། མི་དམིགས་པས་ནི་དམིགས་པའི་མཚན་ཉིད་ཀྱིར་གྱུར་པའི་དོན་ཁྱད་པར་
[31a.4]ཅན་ཉིད་མེད་པར་བསྒྲུབ་པར་ནུས་ཀྱི་གཞན་ནི་མ་ཡིན་ཏེ། དེས་ན་དོན་ཉིད་མི་དམིགས་པའི་ཁྱད་པར་དུ་བཀོད་དོ། །དེས་ན་ཁྱད་པར་རབ་ཏུ་སྦྱར་བ་ནི་དོན་ལ་གནས་པ་ཉིད་དུ་ཡང་བསྒྲུབ་པར་ནུས་པ་ཡིན་ཏེ། དཔེར་ན་ཕྱོགས་ཀྱི་ཁྱད་པར་འགའ་ཞིག་ན་དམིགས་པའི་མཚན་ཉིད་ཀྱིར་གྱུར་པའི་
[31a.5]བུམ་པ་མེད་པ་དེ། མ་དམིགས་པའི་ཕྱིར་རོ་ཞེས་བྱ་བ་ལྟ་བུའོ། །དེས་ན་ཁྱད་པར་འདི་ནི་དོན་ལ་བརྟེན་པ་ཉིད་ཡིན་པའི་ཕྱིར་དོན་ལ་བརྟེན་པ་ཉིད་དུ་བསྟན་ཏོ། །བསྒྲུབ་པར་བྱ་བ་བསྟན་པ་ནི་ཡན་ལག་མ་ཡིན་པའི་ཕྱིར་གཏན་ཚིགས་ལ་བརྟེན་པ་ཉིད་དུ་ཉེ་བར་སྦྱར་ཏེ། དེ་ལྟར་བརྗོད་པས་ཀྱང་དེ་
[31a.6]ལྟ་བུར་གྱུར་པ་ཉིད་དང་འབྲེལ་པ་ཉིད་ཀྱིས་དེ་ལྟར་རྟོགས་པ་ཉིད་དེ། དེས་ན་སྐྱོན་མེད་དོ། །ད་ནི་མེད་ཅེས་བྱ་བ་ལ་སོགས་པ་གཞུང་གཟུགས་པའི་ཕྱིར། འདིར་ཞེས་བྱ་བ་ལ་སོགས་པ་སྨོས་སོ། །མེད་པ་ནི་མེད་པར་ཤེས་པ་དེ། གལ་ཏེ་དེ་གྲུབ་པ་འདིའི་འབྲས་བུ་ཡིན་ན་འདིར་དེ་མེད་པ་སྒྲུབ་
[31a.7]པར་བྱེད་པར་འགྱུར་རོ། །འོན་ཏེ་ཤེས་པ་དེ་རང་གི་ངོ་བོས་འབྲས་བུ་ཡིན་གྱི་ཡུལ་གྲུབ་པའི་སྒོ་ནས་མ་ཡིན་ན། འདིར་དེ་ཙམ་ཞིག་བསྒྲུབ་བྱ་ཡིན་པར་འགྱུར་ཏེ། མེད་པ་ནི་མ་ཡིན་ནོ། །དེས་ན་ཐ་སྙད་བསྒྲུབ་པར་བྱ་བར་འགྱུར་རོ། །དེས་ན་འདིར་ཇི་ལྟར་ཤེས་པ་ཞེས་རང་ཉིད་ཀྱིས་བཏགས་ནས་རང་གི་
[31b]
[31b.1]ཕྱོགས་གཞག་པའི་ཕྱིར་འདི་བརྗོད་དོ། །ཤེས་པ་མེད་པས་དོན་མེད་པ་སྒྲུབ་པར་བྱེད་ན། ཤེས་པ་མེད་པ་དེ་ཡང་མེད་པ་ཉིད་དུ་ཁྱད་པར་མེད་པའི་ཕྱིར་ཤེས་པ་མེད་པ་གཞན་གྱིས་བསྒྲུབ་པར་འགྱུར་རམ། ཡང་ན་དེ་མེད་ཀྱང་གྲུབ་པ་དེ་དོན་མེད་པ་བསྒྲུབ་པ། དེ་ལ་དང་པོ་ཁས་ལེན་ན་ཤེས་པ་མེད་པ་མ་
[31b.2]གྲུབ་པ་འདི་ཉིད་ནི་སྒྲུབ་པར་བྱེད་པ་མ་ཡིན་པའི་ཕྱིར་མི་དམིགས་པ་གཞན་གྱིས་བསྒྲུབ་པར་བྱའོ། །དེ་ལ་དེ་ལྟར་བརྒལ་ཞིང་བརྟགས་པ་ན་ཐུག་པ་མེད་པར་འགྱུར་རོ། །རྟོགས་པ་ཡང་ཐུག་པ་ཡོད་ན་འགྱུར་བ་ཡིན་པའི་ཕྱིར་མི་རྟོགས་པར་འགྱུར་རོ། །དེ་སྨྲས་པ་ནི་དམིགས་པ་མེད་པ་ཡང་ཞེས་བྱ་བ་
[31b.3]ཡིན་ནོ། །མི་དམིགས་པ་རྟོགས་ན་མེད་པ་རྟོགས་པར་འགྱུར་བ་ཡིན་ལ། མི་དམིགས་པ་ཡང་རང་སྒྲུབ་པར་བྱེད་པའི་མི་དམིགས་པ་རྟོགས་ན་ཡིན་ནོ། །གཞན་དེ་ཡང་དེ་བཞིན་པས་འགའ་ཡང་རྟོགས་པ་མཐར་ཐུག་པ་མེད་པའི་ཕྱིར་རྩ་བ་ཡང་མི་རྟོགས་པར་འགྱུར་རོ། །འོན་ཏེ་ཡང་ཕྱོགས་
[31b.4]གཉིས་པ་ཡིན་ན་ཇི་ལྟར་མེད་པར་ཁྱད་པར་མེད་ཀྱང་འདི་གྲུབ་པ་དེ་བཞིན་དུ་དོན་མེད་པ་ཡང་ཡིན་པས་མི་དམིགས་པ་དོན་མེད་དོ་ཞེས་བཤད་པ་ནི་འོན་ཏེ་ཞེས་བྱ་བ་ཡིན་ནོ། །གང་གིས་ཐུག་པ་མེད་པར་འགྱུར་བ་མི་དམིགས་པ་གཞན་གྱིས་བསྒྲུབ་པར་བྱ་བ་ནི་མ་ཡིན་གྱི་འོན་ཀྱང་མངོན་སུམ་གྱིས་གྲུབ་པ་
[31b.5]དེས་དངོས་པོ་ངོ་བོ་མེད་པར་སྒྲུབ་པ་ཡིན་ཏེ་དུ་བས་མེ་བཞིན་ནོ། །འདི་སྨྲས་པ་ནི་ཅི་སྟེ་ཞེས་བྱ་བ་ཡིན་ནོ། །མི་དམིགས་པ་ནི་མངོན་སུམ་གྱིས་གྲུབ་ལ། དངོས་པོ་བཞིན་དུ་མངོན་སུམ་གྱིས་རང་བཞིན་མེད་པ་ནི་རྟོགས་པར་མི་ནུས་པས་འདི་མངོན་སུམ་གྱིས་གྲུབ་པའི་ཚུལ་གང་ཡིན་པ་དེ་
[31b.6]བརྗོད་པ་ནི། བུམ་པ་ལ་སོགས་པ་དེ་དང་མི་མཐུན་པ་ལས་གཞན་དམིགས་པས་མི་དམིགས་པ་གྲུབ་པས་ཏེ། དེ་ལྟར་རྣམ་པ་འདིས་མི་དམིགས་པ་མངོན་སུམ་གྱིས་གྲུབ་བོ། །འདི་སྐད་བརྗོད་པ་ཡིན་ཏེ། བུམ་པ་དམིགས་པས་སྟོང་པའི་ཕྱོགས་དམིགས་པ་མེད་པ་མངོན་སུམ་གྱི་རྣམ་
[31b.7]པར་འཇོག་པ་ཡིན་ནོ་ཞེས་སོ། །དེ་འགོག་པ་ནི་དེ་བཞིན་དུ་སྟེ་རྣམ་པ་གཉིས་སོ། །རྣམ་པ་དེ་ཉིད་བརྗོད་པ་ནི་བུམ་པ་ལ་སོགས་པ་དགག་པར་བྱ་བ་ལས་གཞན་ཤེས་པར་བྱ་བ་ཕྱོགས་ཡོད་ཀྱང་མེད་པ་ཅི་སྟེ་མི་འགྲུབ་ཇི་ལྟར་དམིགས་པ་གཞན་མྱོང་བ་ལས་དམིགས་པ་མེད་པར་ངེས་པ་དེ་
[32a]
[32a.1]བཞིན་དུ་དངོས་པོ་གཞན་མྱོང་བ་ལས་ཀྱང་དེ་ལས་གཞན་མེད་པར་ཇི་ལྟར་འགྲུབ་པར་མི་འགྱུར། སྨྲས་པ། རྒོལ་བ་དང་ལན་འདི་གཉིས་ཀ་ཡང་མ་འབྲེལ་ཏེ། དམིགས་པ་ཡང་གཞན་མྱོང་ཡང་། དམིགས་པ་གཞན་དག་མེད་པར་མི་འགྲུབ་པའི་ཕྱིར་རོ། །ཤེས་པ་
[32a.2]ལས་ཡུལ་དུ་མ་བྱས་པའི་དོན་གནས་པ་ནི་མེད་དེ་དེས་ན་གལ་ཏེ་ཕྱོགས་དམིགས་པ་མྱོང་བ་ན་ཕྱོགས་དམིགས་པ་ཉིད་མྱོང་བར་འགྱུར་བ་ཉིད་མངོན་སུམ་གྱིས་གྲུབ་མོད། དེ་ལས་གཞན་དམིགས་པ་མེད་པ་གང་གིས་གྲུབ་ཤེས་པ་དམིགས་པས་ན་མ་ཡིན་ཏེ། རང་གི་བདག་ཉིད་མཐར་ཐུག་
[32a.3]པའི་ཕྱིར་རོ། །དོན་བཞིན་དུ་དམིགས་པ་གཞན་གྱིས་ཀྱང་མ་ཡིན་ཏེ། དོན་བཞིན་དུ་རང་བཞིན་ཡོད་པ་མ་ཡིན་པས་དམིགས་པའི་ཡུལ་ཉིད་མེད་པའི་ཕྱིར་རོ། །ངེས་པའི་ཤེས་པ་གཞན་མྱོང་ན་གཞན་མེད་པས་འགྲུབ་པོ་ཞེ་ན། ངེས་པ་ཞེས་བྱ་བ་འདི་ཅི་ཞེ་ན་གལ་ཏེ་རང་གི་ངོ་བོ་ཉིད་ཙམ་ཉིད་
[32a.4]ཡིན་ཏེ། དེ་གྲུབ་ཀྱང་མེད་པ་ལ་ཅི་ཕན། དམིགས་པ་གཞན་མེད་པ་དེ་ཉིད་ངོ་བོ་ཡིན་ནོ་ཞེ་ན། མ་ཡིན་ཏེ། དེའི་ངོ་བོ་དམིགས་པ་ལོག་པ་ཙམ་ཡིན་པའི་ཕྱིར་རོ། །དམིགས་པ་གཞན་ནི་དམིགས་པ་ལོག་པ་མ་ཡིན་ནོ། །དེ་ནི་ངོ་བོ་ཉིད་མེད་པ་ཙམ་ཡིན་ལ་དམིགས་པ་ནི་
[32a.5]ངོ་བོ་ཉིད་ཡིན་པས་དེ་ཇི་ལྟར་གཞན་མེད་པ་ཡིན་འོན་ཏེ་དེ་ངེས་པ་ཉིད་ནི་མེད་པའི་ཁྱད་པར་ཅན་ཡིན་ནོ་ཞེ་ན། དེ་ལྟ་ན་ཡང་ཁྱད་པར་ལ་མངོན་སུམ་གྱི་བྱེད་པ་མེད་པ་ཉིད་དེ། དེ་ལ་ཡུལ་དུ་བྱ་བ་མེད་པས་དེའི་ཡུལ་མ་ཡིན་པའི་ཕྱིར་རོ། །དེའི་ཕྱིར་གང་ལ་བརྟེན་ནས་དམིགས་པ་འཇུག་པ་
[32a.6]དེ་དངོས་པོ་གཞན་ཡོད་པ་དང་མེད་པའམ་ཐེ་ཚོམ་ཟ་བ་ལ་མི་ལྟོས་ཁོ་ནར་འདིར་ངེས་པར་བྱེད་དོ། །ཡུལ་མ་ཡིན་པ་ལ་ནི་རྡུལ་ཙམ་ཡང་འགྲོ་བ་མེད་པའི་ཕྱིར་མྱོང་བའི་རང་གི་ངོ་བོ་ངེས་པ་ན་གཞན་དམིགས་པ་ན་མི་དམིགས་པའམ་གཞན་ཡོད་པས་མེད་པ་འགྲུབ་པར་ཡང་ཇི་ལྟར་འགྱུར།
[32a.7]ཤུགས་ཞེས་བྱ་བ་ཡུལ་དུ་མ་བྱས་པ་རྣམ་པར་འཇོག་པར་བྱེད་པའི་ཚད་མའི་བྱེད་པ་ཡང་ཚད་མ་དང་ལྡན་པས་ཁས་བླང་བར་ནུས་པ་མ་ཡིན་ཏེ། དེས་ན་འདི་བརྗོད་དགོས་སོ་ཞེ་ན། འདིར་སྨྲས་པ། འདི་ལ་དངོས་པོ་མེད་པ་ཞེས་བྱ་བ་ནི་དངོས་པོ་གཞན་ལྡོག་པ་ཙམ་ཡིན་པའི་ཕྱིར་
[32b]
[32b.1]ཚད་མའི་ཡུལ་མ་ཡིན་ཏེ། བུམ་པ་མེད་དོ་ཞེས་བྱ་བ་དེ་མེད་པ་ནི་དངོས་པོ་འགའི་ཡང་མཐར་ཐུག་པ་མ་ཡིན་ནོ། །དེས་ན་ཇི་ལྟར་ངོ་བོ་མེད་པས་ན་དེ་ཡོད་ན་འགའ་ཡང་འབྱུང་བ་མེད་པའི་ཕྱིར་དང་རྒྱུའི་རང་བཞིན་ཡང་དེ་ལྟ་བུ་ཡིན་པའི་ཕྱིར་འདི་ལ་རྒྱུའི་རང་བཞིན་མི་སྲིད་པ་དེ་བཞིན་དུ་དེ་ལས་
[32b.2]ཚད་མ་ཡང་ལྡོག་པ་ཉིད་དོ། །དོན་དམ་པའམ་ཀུན་རྫོབ་ཏུ་ཡང་རུང་སྟེ་ཚད་མ་ཞེས་བྱ་བ་ནི་གསལ་བར་བྱེད་པ་ལ་བརྗོད་དོ། །གང་ལ་བདག་ཉིད་འགའ་ཞིག་ཡོད་པ་དེ། དེའི་བདག་ཉིད་དུ་གསལ་བ་དེ་ནི་གསལ་བ་ཉིད་དུ་འགྱུར་གྱི། འདི་ལ་ནི་དངོས་པོའི་ངོ་བོ་མེད་པས་ཅི་ཡང་མ་ཡིན་པའི་
[32b.3]ཕྱིར་འདི་གང་གིས་གསལ་བ་ཡིན་དེས་ན་འདི་ལ་གཞལ་བྱ་ཉིད་ཅི་ཞིག་ཡོད། དེས་ན་ཇི་ལྟར་འདི་ལ་རྒྱུ་མེད་པ་དེ་བཞིན་དུ་ཚད་མ་ཡང་མེད་དོ། །འོ་ན་ཇི་ལྟར་བུམ་པ་མེད་དོ་ཞེའམ། དབང་ཕྱུག་དང་གཙོ་བོ་དང་བདག་མེད་དོ་ཞེས་རྣམ་པར་གཞག་ཅེ་ན། དེ་རྣམ་པར་གཞག་པས་
[32b.4]ཀྱང་ཅིར་ཡང་བྱར་མེད་དོ། །དགོས་པའི་ཡན་ལག་ཉིད་ཀྱིས་རྣམ་པར་འཇོག་པའམ་དེ་ལྟ་བུ་ནི་ཡན་ལག་མ་ཡིན་ཡང་ཡོད་པ་ཡིན་ནོ་ཞེས་རང་གི་ངོ་བོ་ཡོད་པས་རྣམ་པར་འཇོག་གྲང་ན། དེ་ནི་དངོས་པོ་མེད་པ་ལ་མེད་དོ། །དེའི་ཕྱིར་དེ་ལྟར་རྣམ་པར་གཞག་པར་འོས་པའི་ཡོད་པ་
[32b.5]དགོས་པའི་ཡན་ལག་ཏུ་གྱུར་པའམ། རང་གི་ངོ་བོ་ཉིད་ཀྱིས་རང་གི་བདག་ཉིད་འཛིན་པའི་ཚད་མ་སྐྱེད་པར་བྱེད་པ་གང་ཡིན་པ་དེ་དག་ཉིད་བུམ་པ་འདི་ལ་ཡོད་དོ། །སེམས་འདོད་ཆགས་དང་བྲལ་བའམ། འཇིག་རྟེན་གཞན་ཡོད་དོ་ཞེས་ཚད་མས་ཡུལ་དུ་བྱེད་དོ། །གང་དག་ཡོད་པ་
[32b.6]མ་ཡིན་པ་དེ་དག་ནི་ཇི་ལྟར་གནས་བཞིན་པའི་ངོ་བོ་རྟོགས་པ་ལ་མི་གནས་ཤིང་ཤེས་པར་འདོད་པར་འོས་པ་མ་ཡིན་པས་དེ་དག་ཇི་ལྟར་ཡང་རྣམ་པར་གཞག་པར་མི་རུང་ངོ་། །དེའི་ཕྱིར་ཡོད་པ་ཉིད་རྣམ་པར་གཞག་པར་བྱ་བ་ཡིན་ནོ། །གཞན་དུ་ནི་འཇལ་བར་བྱེད་པ་ལས་ཚད་མ་བཏང་
[32b.7]སྙོམས་པ་ཉིད་པས་རང་གི་ངོ་བོ་ཅན་རྣམ་པར་གནས་པ་ཡིན་ནོ། །དངོས་པོ་མེད་པ་ནི་ངོ་བོ་མེད་དོ་ཞེས་བྱ་བ་དེ་ཉིད་ཇི་ལྟར་རྣམ་པར་གཞག་ཅེ་ན་ཅི་ངོ་བོ་མེད་པར་རྣམ་པར་གཞག་པ་ན་རྣམ་པར་གནས་པ་ཅུང་ཞིག་ཡོད་དམ་གལ་ཏེ་དེ་ལྟ་ན་ནི་ངོ་བོ་མེད་པ་ཉིད་དུ་རྣམ་པར་གནས་པར་མི་འགྱུར་ཏེ།
[33a]
[33a.1]བདག་ཉིད་དེ་ཉིད་ངོ་བོ་ཡིན་པའི་ཕྱིར་རོ། །ཅི་ཡང་གནས་པ་མེད་ན་ཡང་ངོ་བོ་མེད་པ་ཉིད་དུ་ཇི་ལྟར་རྣམ་པར་གཞག་ཅེས་བྱ་བའི་བརྒལ་བ་ཅི་ཞིག །འོ་ན་ཇི་ལྟར་རང་གི་ངོ་བོ་མེད་པ་ཉིད་དངོས་པོ་མེད་པ་ཡིན་ཞེས་བརྗོད་ཅེ་ན། དེ་སྐད་བརྗོད་པར་ཟད་ཀྱི་དེ་ཙམ་
[33a.2]གྱིས་ཚད་མའི་ཡུལ་ཉིད་མ་ཡིན་ཏེ། དཔེར་ན་རྟག་པ་ནི་ལྡོག་པ་མེད་པའི་རང་བཞིན་ཅན་དུས་གསུམ་དང་འབྲེལ་པ་ཡིན་ནོ་ཞེས་བྱ་བ་བཞིན་ནོ། །དེ་ནི་ཚད་མའི་ཡུལ་མ་ཡིན་ལ། རྣམ་པར་གཞག་པ་ཡང་མེད་དེ། དེ་ལྟ་བུ་མི་སྲིད་པའི་ཕྱིར་རོ། །བརྗོད་པ་འགལ་བ་ཡང་མ་
[33a.3]ཡིན་ཏེ་རིགས་པ་སྟོན་པ་ཙམ་གྱི་རང་བཞིན་ཡིན་པའི་ཕྱིར་རོ། །གང་དག་དངོས་པོ་མེད་པ་རང་བཞིན་གཞན་དང་ལྡན་པ་ཡིན་ནོ་སྙམ་དུ་རྨོངས་པ་དེ་དག་ལ་རིགས་པ་འདི་བརྗོད་པ་ཡིན་ནོ། །དངོས་པོ་ལྡོག་པར་ཁས་ལེན་ན་དེ་ཉིད་དངོས་པོ་མེད་པ་ཡིན་ཏེ། གཞན་གྱིས་ཅི་ཞིག་བྱ།
[33a.4]དེ་ནི་དོན་གཞན་ཉིད་དུ་འགྱུར་གྱི་དངོས་པོ་མེད་པ་ནི་མ་ཡིན་ཏེ་ལྡོག་པ་ནི་གཞན་ཡིན་པའི་ཕྱིར་རོ། །དེ་ཁས་མི་ལེན་ན་ཡང་དེ་ཉིད་ཡོད་པ་ཡིན་པའི་ཕྱིར་དངོས་པོ་མེད་པ་ཞེས་བྱ་བ་འདི་ཅི་ཞིག །འདི་ལ་ཡང་ངོ་བོ་ཅུང་ཟད་ཡོད་པ་མ་ཡིན་ཏེ། དེ་མེད་དོ་ཞེས་བྱ་བ་དེ་ཙམ་དུ་ཟད་
[33a.5]པའི་ཕྱིར་རོ། །དེས་ན་དམིགས་པ་མེད་པ་ཞེས་བྱ་བ་འདི་ནི་གཞལ་བྱ་མ་ཡིན་ལ། དོན་དངོས་པོ་མེད་པ་ཡང་གཞལ་བྱ་མ་ཡིན་ནོ། །ངོ་བོ་ཉིད་ཀྱིས་འབྱུང་བའི་ཚད་མ་ནི་ཡོད་པ་ཉིད་ལས་སྐྱེས་པ་ཡིན་ལ། ངོ་བོ་ཉིད་ཀྱིས་འབྱུང་བ་མ་ཡིན་པས་ཀྱང་ཡོད་པ་ཉིད་ཡོད་དོ་ཞེས་འཇལ་བར་
[33a.6]བྱེད་དོ། །མེད་པ་གང་ཡིན་པ་དེའམ་དེ་མེད་པ་ནི་ཚད་མ་སྐྱེད་པའམ་ཡོད་དོ་ཞེས་གཞལ་བར་བྱ་བ་མ་ཡིན་ནོ། །དེ་ནི་མེད་དོ་ཞེས་གཞལ་བར་བྱ་བ་ཡིན་ནོ་ཞེ་ན། དེ་འམ་དེ་མེད་པ་ཅུང་ཟད་ཀྱང་མེད་པའི་ཕྱིར་གང་ཞིག་གཞལ་བར་བྱ། དེས་ན་གང་ཡང་མེད་པ་དེ་ནི་དེར་དངོས་པོའམ་དངོས་
[33a.7]པོ་མེད་པ་ཇི་ལྟར་ཡང་གཞལ་བར་བྱ་བ་མ་ཡིན་ནོ། །དེས་ན་བུམ་པས་སྟོང་པའི་ཕྱོགས་སུ་དམིགས་པ་དང་བཅས་པའི་བུམ་པ་ཡལ་བར་དོར་ཏེ། ཕྱོགས་དང་དེའི་དམིགས་པ་ཉིད་གཞལ་བར་བྱ་བ་ཡིན་ནོ། །གལ་ཏེ་བུམ་པ་མེད་པར་ཐེ་ཚོམ་ཟ་ན་དེས་དབེན་པའི་ཕྱོགས་ཉིད་ངེས་པར་
[33b]
[33b.1]མི་འགྱུར་བ་མ་ཡིན་ནམ་ཞེ་ན། དེས་དབེན་པ་ཞེས་བྱ་བ་འདི་ཅི་ཞིག །གལ་ཏེ་ཕྱོགས་ཀྱི་རང་བཞིན་ཡིན་ནོ་ཞེ་ན། ངེས་པ་ཉིད་དོ། །འོན་ཏེ་བུམ་པས་སྟོང་པ་ཉིད་དོ་ཞེ་ན། དེ་ནི་ངེས་པ་མ་ཡིན་པའི་ཕྱིར་ཏེ། མ་ངེས་པ་ནི་ཉེས་པ་མ་ཡིན་ཏེ་ཡུལ་མ་ཡིན་པའི་ཕྱིར་ཏེ། འོ་ན་ཇི་ལྟར་
[33b.2]མི་དམིགས་པ་ལས་དངོས་པོ་མེད་པ་འགྲུབ་ཅེ་ན། བརྗོད་པ། གལ་ཏེ་དེ་ལྟ་ཡིན་པ་དེ་ལྟ་ན་ཡང་འདི་ནི་ཤེས་པ་རྣམས་ཀྱི་ཡོད་པའི་དོན་ངེས་ན་འགྱུར་བ་ཡིན་ནོ། །གང་གི་ཚེ་མེད་པ་མེད་ཀྱང་འབྲས་བུ་དང་ལྡན་པར་དམིགས་པར་དྲན་པར་གྱུར་པ་དེའི་འབྲས་བུ་ལ་འདོད་པ་དང་སྡང་བ་དག་གིས་
[33b.3]འདི་ན་བུམ་པ་ཡོད་དམ་ཞེས་ཆུ་བཅུ་བ་དང་དོགས་པ་མེད་པར་འགྲོ་བར་འདོད་པས་ཚོལ་བ་དེའི་ཚེ་བུམ་པ་དངོས་པོ་མེད་པའི་ཡུལ་རྟོགས་པ་ལ་ལྟོས་པ་ཡིན་ནོ། །ཐེ་ཚོམ་ཟ་བ་དང་ཕྱིན་ཅི་ལོག་ལ་ཡང་དེ་བཞིན་ནོ། །དེས་ན་རྟོགས་པ་ལ་ལྟོས་པ་འདི་ནི་རྟོགས་པ་པོ་རྣམས་ཀྱིས་བྱས་པ་ཡིན་ནོ། །
[33b.4]བུམ་པ་མེད་དོ་ཞེས་མ་རྟོགས་པར་དོགས་པ་མེད་པར་མི་འཇུག་པའི་ཕྱིར་དང་། འདི་ནི་རྡུལ་མ་ཡིན་ནོ་ཞེས་ཉ་ཕྱིས་མི་ངེས་པའི་ཕྱིར་དང་། མཐོ་ཡོར་ཡིན་གྱི་སྐྱེས་བུ་ནི་མ་ཡིན་ནོ་ཞེས་ཐེ་ཚོམ་ཟ་བ་མེད་པའི་ཕྱིར་དེ་རྟོགས་པ་ལ་ལྟོས་པ་ཉིད་ཀྱིས་རྣམ་པར་གཞག་པ་དང་། དེ་རྟོགས་པས་རྣམ་
[33b.5]པར་གཞག་པར་བྱ་བར་བརྗོད་དོ། །འདི་ལྟར་འདི་དག་གི་དངོས་པོ་མེད་པར་རྟོགས་པ་ནི་དངོས་པོ་གཞན་དུ་རྣམ་པར་གནས་པའི་གཞི་ཅན་ཡིན་གྱི་དངོས་པོ་རྟོགས་པ་ལྟར་རང་དབང་དུ་རང་གི་ཡུལ་ལ་འཇུག་པ་ནི་མ་ཡིན་ནོ། །ཇི་ལྟར་རང་གི་རྒྱུས་བསྐྱེད་པའི་རྟོགས་པས་བུམ་པ་རྟོགས་པ་དེ་
[33b.6]བཞིན་དུ་དངོས་པོ་མེད་པ་ཡང་མེད་པའི་རྟོགས་པ་རྟོགས་པ་ནི་མ་ཡིན་ནོ། །གལ་ཏེ་འདི་ན་བལྟར་རུང་བའི་བུམ་པ་ཡོད་ན་སྣང་བ་ཁོ་ནར་འགྱུར་ན་སྣང་བ་ནི་མེད་དོ་ཞེས་རང་དབང་དུ་མཐོང་བ་མེད་པར་མི་འགྲུབ་པའི་ཕྱིར་རོ། །ཕྱོགས་དེའི་ཤེས་པ་དག་དངོས་པོ་མེད་པ་ཉིད་དུ་མ་གྲུབ་པའི་
[33b.7]ཕྱིར་ཏེ། དེ་ཙམ་གྱི་མཐར་ཐུག་པ་དེའི་མངོན་སུམ་གྱིས་དེ་མ་རྟོགས་པའི་ཕྱིར་རོ། །དེའི་ཐ་སྙད་ཀྱི་རྟེན་ཡིན་པའི་ཕྱིར་དེ་དག་དངོས་པོ་མེད་པ་ཉིད་དོ་ཞེས་ཉེ་བར་བཏགས་པ་ཙམ་ལས་དངོས་པོ་དེ་ཉིད་མེད་པའི་ཕྱིར་རོ། །གང་གི་ཕྱོགས་དག་པ་དམིགས་པ་བུམ་པ་དང་བཅས་པའི་
[34a]
[34a.1]ཕྱོགས་དམིགས་པ་ཡིན་ན་བུམ་པ་དང་བཅས་པའི་ཕྱོགས་དམིགས་པ་ཉིད་དུ་མྱོང་བར་འགྱུར་བ་ཞིག་ན་ཕྱོགས་ཙམ་དམིགས་པར་མྱོང་བ་ཡིན་ནོ་ཞེས་དམིགས་པ་གཉིས་གཞན་ཉིད་དུ་ངེས་པ་དེའི་ཚེ། ཉེ་བར་མཁོ་བའི་སྙིང་པོ་ཅན་དགག་པའི་དོན་རྟོགས་པ་
[34a.2]བཞིན་དུ་མེད་པའི་ཐ་སྙད་བྱེད་པ་ཉིད་ཀྱིས་མཐར་ཕྱིན་པར་འགྱུར་བ་ཡིན་ནོ། །འདི་ནི་བུམ་པ་དང་བཅས་པ་དང་ཅིག་ཤོས་ཀྱི་ཕྱོགས་དམིགས་པ་དག་ཤེས་པ་ཉིད་ཡིན་ཏེ་དེས་ན་ཕྱོགས་དམིགས་པ་ན་ཤེས་པ་ཅིག་ཤོས་དམིགས་པ་དང་ལས་གཞན་ཉིད་དུ་ཤེས་པ་ཁོ་ནའོ། །སྔོན་མ་མཐོང་བ་
[34a.3]ཤ་ཟ་ལ་སོགས་པ་གང་ལ་ཤེས་པ་མེད་པ་དེ་ལ་ཡང་མཐོང་བ་ལས་བཟློག་པ་ཤེས་པར་བླ་བའི་ཕྱིར་ཏེ། དེས་ན་མཐོང་བའི་དམིགས་པ་མཐོང་བ་ལས་བཟློག་པའི་དམིགས་པ་ལས་གཞན་ཉིད་དུ་ཤེས་པ་ཁོ་ནའོ། །གཞན་དུ་རྟོགས་པ་མེད་པ་རྟོགས་པ་ལ་ལྟོས་པ་དང་བཅས་པ་ཡང་མ་
[34a.4]ཡིན་ནོ། །རང་གི་ངོ་བོ་ཁོ་ནས་བུམ་པ་སྣམ་བུ་ལས་གཞན་ཡིན་གྱི། འདིའི་རང་བཞིན་དེ་དངོས་པོ་མེད་པས་བྱས་པ་ནི་མ་ཡིན་ཏེ། དེ་ན་རྣམ་པ་དེ་ལྟ་བུའི་རང་བཞིན་རྟོགས་པ་གཞན་ཉིད་དུ་རྟོགས་པ་ནི་དངོས་པོ་མེད་པར་རྟོགས་པ་ལ་ལྟོས་པ་མ་ཡིན་ནོ། །དེའི་ཕྱིར་མངོན་སུམ་སྒྲུབ་པར་བྱེད་
[34a.5]པ་ཉིད་ཡིན་པས་ན་དངོས་པོ་ཐ་དད་པར་གྲུབ་པའི་ཕྱིར་བྱིས་པ་གང་དག་དེ་འགོག་པར་བྱེད་པ་མ་ཡིན་ན་ཐ་དད་པར་མི་འགྲུབ་པར་འགྱུར་རོ་སྙམ་དུ་སེམས་པ་དེ་བསལ་བ་ཡིན་ནོ། །གལ་ཏེ་དག་པ་དམིགས་པ་ཅིག་ཤོས་དམིགས་པ་ལ་ལྟོས་ནས་གཞན་ཡིན་ལ་རག་མོད། གཞན་
[34a.6]ཉིད་ཀྱིས་ན་ཐ་དད་པ་ཙམ་དུ་འགྲུབ་ཀྱི་གང་གི་ཚེ་ཐ་དད་པ་ཉིད་ཀྱིས་བུམ་པ་དམིགས་པ་དངོས་པོ་མེད་པར་ཤེས་པར་བྱ་བ་དེའི་ཚེ་ཇི་ལྟར་འགྲུབ་དམིགས་པ་ཡོད་པ་ནི་མྱོང་བ་ལ་མི་འཁྲུལ་པའི་ཕྱིར་དམིགས་པ་གཞན་མེད་པ་ལས་མེད་པ་ཡིན་ནོ་ཞེ་ན། ཡོད་པ་མྱོང་བ་ལ་འཁྲུལ་པ་མེད་པ་
[34a.7]མེད་དོ་ཞེས་མྱོང་བ་དམིགས་པ་ལས་འགྱུར་བ་ཡིན་ན། གང་གིས་མྱོང་བ་མེད་པ་ལས་ན་མེད་དོ་ཞེས་བྱ་བར་འགྱུར་བ། མྱོང་བ་མེད་པ་གོ་ག་ལས་རྟོགས། འདི་དེ་མྱོང་བ་ཤེས་པ་ཉིད་ཡིན་པ་དེས་ན་དེ་ལས་བཟློག་པ་མྱོང་བ་ཡང་ཤེས་པ་ཉིད་དོ་ཞེ་ན་བདེན་ཏེ། མྱོང་བ་དམིགས་ན་དེ་ལས་
[34b]
[34b.1]བཟློག་པ་དེ་ལས་གཞན་ཉིད་དུ་རྣམ་པར་འཇོག་པ་ན་མྱོང་བ་མེད་པ་ཡང་གཞན་ཉིད་དུ་རྣམ་པར་འཇོག་པ་ཡིན་ན། གང་གི་ཚེ་དེ་ཉིད་རྟོགས་པར་བྱ་བ་དེའི་ཚེ་རང་འཛིན་པའི་ཚད་མ་མེད་པར་ཇི་ལྟར་རྟོགས། དེས་ན་བུམ་པ་དམིགས་པ་ཕྱོགས་དམིགས་པ་ཡོད་པ་དང་གཞན་ཉིད་དུ་གྲུབ་ཀྱང་
[34b.2]དངོས་པོ་མེད་པ་ཉིད་ནི་མི་འགྲུབ་པོ་ཞེ་ན་རེ་ཞིག་བུམ་པ་དང་ལྡན་པའི་ཕྱོགས་སུ་ནི་བུམ་པ་དམིགས་པ་ཕྱོགས་དམིགས་པ་ལས་ཐ་དད་པ་ཉིད་མ་ཡིན་པ་ཁོ་ན་སྟེ། དེ་གཉིས་ཤེས་པ་གཅིག་གི་ཡུལ་ཡིན་པའི་ཕྱིར་རོ། །དེས་ན་བུམ་པ་དང་བཅས་པའི་ཕྱོགས་དམིགས་པ་ཕྱོགས་དག་པ་
[34b.3]དམིགས་པ་ལས་ཐ་དད་པར་གྲུབ་ན། དེ་ཡོད་ན་དེ་ཉིད་དེ་ལྟར་གསལ་བར་འགྱུར་བ་ཞིག་ན་རང་བཞིན་གཞན་དུ་གསལ་བ་ཡིན་ནོ་ཞེས་བྱ་བར་འགྱུར་བའི་ཕྱིར་དངོས་པོ་མེད་པར་གྲུབ་པ་ལས་གཞན་ཅི་ཞིག་ཡིན། འོ་ན་མྱོང་བ་ཐ་དད་པ་གཅིག་པར་མི་ནུས་པ་གང་ཡིན་པ་དེ་ཇི་ལྟར་
[34b.4]མེད་པར་ཤེས་པར་བྱ་སྟེ། གཟུགས་རིག་པ་ན་སྒྲ་རིག་པ་ཡིན་ནོ། །འདི་ལ་ནི་གཞན་ཉིད་དུ་གྲུབ་ཀྱང་དེར་འགྱུར་རོ། །རིག་པ་ལ་འཁྲུལ་པ་མེད་པ་ལས་རིག་པ་མེད་པའི་ཕྱིར་དེ་མེད་པ་ཡང་མ་ཡིན་ཏེ། དེ་མེད་པར་མ་གྲུབ་པའི་ཕྱིར་རོ་ཞེ་ན། བརྗོད་པ། དེར་ཡང་སྨྱོ་བ་དང་
[34b.5]བརྒྱལ་བ་ལ་སོགས་པའི་གནས་སྐབས་མ་གཏོགས་པར་སྒྲ་རིག་པ་ཡོད་ན་དམིགས་པའི་ཡུལ་ལས་མི་འདའ་སྟེ་དེས་ན་གནས་སྐབས་དེ་མ་ཡིན་པར་གྲུབ་པར་བྱ་བའི་ཕྱིར། རིག་པ་གཞན་དམིགས་པ་ལ་ལྟོས་པར་བྱ་བ་ཡིན་ནོ། །དེས་ན་རིག་པ་ཡོད་ན་ངས་དམིགས་པར་འགྱུར་རོ་ཞེས་
[34b.6]རིག་པ་གཞན་རྟོགས་པར་ཤེས་པར་བྱ་སྟེ། དམིགས་པའི་མཚན་ཉིད་དུ་གྱུར་པ་དགག་པར་བྱ་བའི་རིག་པ་གཞན་མེད་པར་ངེས་པ་ཡིན་ནོ། །དེ་ལྟ་ཡིན་དང་འདི་ལྟར་རྟོགས་སོ། །གཟུགས་མཐོང་བའམ་རྣམ་པར་རྟོག་པ་ན་སྒྲ་རྟོགས་པ་ཡོད་ན་གཉིས་དམིགས་པ་ངེས་པ་ཡིན་ལ། གཅིག་
[34b.7]དམིགས་པ་ནི་དེ་ལས་གཞན་ཡིན་ནོ། །དེས་ན་རྟོགས་པ་ཅིག་ཤོས་ཡོད་ན་གཉིས་པ་ངེས་པ་དང་། དམིགས་པ་གཅིག་མེད་པ་ཡང་ངེས་པར་བྱ་སྟེ། གལ་ཏེ་འདི་ལ་དམིགས་པ་གཞན་ཡོད་ན་དམིགས་པར་འགྱུར་ན་གཅིག་དམིགས་པ་ཡང་ཡིན་ནོ་ཞེས་གཞན་དུ་རྟོགས་པར་འགྱུར་རོ། །
[35a]
[35a.1]དེས་ན་ཇི་ལྟར་དམིགས་པ་གཞན་དམིགས་པ་མྱོང་བ་མེད་པ་ན་དེ་ཡོད་པ་མི་སྲིད་པ་དེ་བཞིན་དུ་ཕྱོགས་བུམ་པ་དང་བཅས་པ་དམིགས་པ་ལས་གཞན་དམིགས་པ་ཡོད་ན་ཡང་དེ་ཡོད་མི་སྲིད་པ་ཉིད་དོ། །ཇི་ལྟར་གལ་ཏེ་ཡོད་ན་དམིགས་པ་ཞིག་ན་དམིགས་པ་ཡང་
[35a.2]མེད་དོ་ཞེས་མེད་པ་ཉིད་དུ་ངེས་པ་དེ་བཞིན་དུ་གལ་ཏེ་ཡོད་ན་དེའི་བདག་ཉིད་དུ་དམིགས་པ་ཞིག་རང་གི་བདག་ཉིད་དུ་ཡང་དམིགས་སོ་ཞེས་མེད་པ་ཉིད་དུ་འགྲུབ་པ་ཁོ་ནའོ། །འདིར་ནི་འདི་བསམ་པར་བྱ་བ་ཡིན་ཏེ། ཅི་དམིགས་པ་མེད་པ་ཉིད་མེད་པ་ཉིད་ཀྱིས་རྟོགས་པའི་རྟེན་ཡིན་ནམ་འོན་ཏེ་
[35a.3]དམིགས་པ་གཞན་ཉིད་ཡིན། དེ་ལ་དམིགས་པ་གཞན་ལས་ནི་གཞན་དམིགས་པ་མེད་པ་ཉིད་རྟོགས་པར་མི་འཐད་དེ། དེ་དེའི་རང་བཞིན་མ་ཡིན་པའི་ཕྱིར་དང་། དེ་བཞིན་དུ་འབྲེལ་པ་མེད་པའི་ཕྱིར་རོ། །འོན་ཏེ་དེ་ཡོད་ན་དེའི་བདག་ཉིད་དུ་དམིགས་པར་ཐལ་བ་ཞིག་ན་རང་གི་བདག་
[35a.4]ཉིད་དུ་ཡང་དམིགས་པས་སོ་ཞེས་བྱ་བའི་རིག་པ་འདི་ཉིད་ཀྱིས་མེད་པར་སྒྲུབ་པོ་ཞེ་ན། དེ་ལྟ་ན་ཡང་ཡུལ་བཀག་པས་ཚད་མ་ཉིད་བཀག་པ་ན་རྟོགས་པ་ཙམ་གྲུབ་པ་ཉིད་ཀྱི་མཐར་ཐུག་པར་འགྱུར་རོ། །དེས་ན་རྟོགས་པ་ཙམ་གྱི་མཐར་ཐུག་པ་ཅན་སྒྲུབ་པར་བྱེད་པ་ནི་ཇི་ལྟར་སྟོན་པར་འགྱུར་བ་
[35a.5]བཞིན་དུ་ཐ་སྙད་སྒྲུབ་པར་བྱེད་པ་ཡིན་ནོ། །འོ་ན་དེ་ཉིད་ཡིན་ལ་རག་མོད་ཅེ་ན་དེ་ལྟར་ཡང་མི་ནུས་ཏེ། འདི་ལྟར་དེར་ཡང་རྟོགས་པ་དེ་ཡོད་པ་ནི་དངོས་པོ་གཞན་ཉིད་རྣམ་པར་གནས་པའི་གཞི་ཅན་ཁོ་ནའོ། །གང་གི་ཚེ་གཞན་གཞན་ལ་སྒྲོ་བཏགས་ཏེ་དེའི་བདག་ཉིད་ཙམ་དམིགས་པས་རྣམ་པར་
[35a.6]ཕྱེ་ནས་ཅི་ཞེས་དེར་རྣམ་པར་རྟོག་པར་བྱེད་པ་དེའི་ཚེ་མེད་དོ་སྙམ་པའི་ཤེས་པ་སྐྱེ་བ་ཡིན་ནོ། །དེའི་ཕྱིར་དངོས་པོ་གཞན་ཉིད་མེད་པ་ཉིད་དུ་སྒྲོ་བཏགས་པའི་ཐ་སྙད་དུ་བྱ་བ་ཡིན་པའི་ཕྱིར། གཞན་དམིགས་པ་ཉིད་མི་དམིགས་པར་བརྗོད་དོ། །དེས་ན་བསམ་པ་འདིས་ན་ཅི་སྟེ་གཞན་
[35a.7]དམིགས་པས་མི་དམིགས་པ་འགྲུབ་པས་མི་དམིགས་པ་མངོན་སུམ་གྱིས་འགྲུབ་པོ་ཞེ་ན་ཞེས་བཤད་དོ། །དེས་ན་རིགས་པ་ཁྱད་པར་མེད་པའི་ཕྱིར་དོན་མེད་པ་ཡང་ཅི་སྟེ་མི་འགྲུབ་ཅེས་བཤད་པ་ནི། དེ་བཞིན་དུ་གཞན་ཡོད་པས་ཀྱང་ཞེས་བྱ་བ་ཡིན་ནོ། །བུམ་པ་ནི་དམིགས་པའི་
[35b]
[35b.1]མཚན་ཉིད་དུ་གྱུར་པ་ཡིན་ཏེ། དེས་ན་ཕྱོགས་བུམ་པ་དང་བཅས་པ་ཡིན་ན་བུམ་པ་དང་བཅས་པ་ཉིད་དུ་སྣང་བ་ངེས་པ་ཡིན་པའི་ཕྱིར་ཕྱོགས་ཙམ་དུ་སྣང་བ་ན་བུམ་པ་དང་བཅས་པ་དང་། བུམ་པ་མེད་པ་གཉིས་བཞིན་དུ་རྣམ་པར་གནས་པ་ན། ཇི་ལྟར་བུམ་པ་དང་བཅས་པའི་
[35b.2]ཕྱོགས་ཙམ་ལས་གཞན་ཡིན་ཞིང་ཕྱོགས་ཙམ་ཡང་བུམ་པ་དང་བཅས་པ་ལས་གཞན་ནོ་ཞེས་ཕན་ཚུན་རང་བཞིན་བཟློག་པ་ཕན་ཚུན་གྱི་རང་བཞིན་ལས་གཞན་ཡིན་པའི་ཕྱིར་རྣམ་པར་གཞག་པ་དེ་བཞིན་དུ་དེ་གཉིས་ཀྱི་དངོས་པོ་མེད་པ་ཡང་གཞན་ཉིད་ཀྱི་རྣམ་པར་གནས་པ་ཡིན་ནོ། །དེའི་རང་
[35b.3]བཞིན་དེའི་རང་བཞིན་ལས་བཟློག་པ་གཞན་ཡིན་པ་ཡང་རང་གི་ལྡོག་པ་ཙམ་གྱི་རང་བཞིན་ནམ་རང་བཞིན་གཞན་དང་ལྡན་པ་ཡིན་ནོ། །དེའི་རང་བཞིན་ལྡོག་པ་ནི་དེའི་རང་བཞིན་ལས་བཟློག་པ་ཡིན་ཏེ། རང་བཞིན་གཞན་བཞིན་ནོ། །དེས་ནི་ཇི་ལྟར་ཕྱོགས་ཙམ་ལས་བུམ་པ་དང་བཅས་
[35b.4]པ་གཞན་ཡིན་པ་དེ་བཞིན་དུ་དེའི་དངོས་པོ་མེད་པ་ཡང་ཡིན་ཏེ། དེས་ན་བུམ་པ་དང་བཅས་པ་ལ་དེའི་ངོ་བོ་ལྡོག་པ་དེ་མེད་པར་འགྱུར་རོ། །དེ་བཞིན་དུ་ཇི་ལྟར་ཕྱོགས་ཙམ་བུམ་པ་དང་ལྡན་པ་ལས་གཞན་ཡིན་པ་དེ་བཞིན་དུ་བུམ་པ་དང་བཅས་པ་མ་ཡིན་པར་ཡང་འགྱུར་བའི་ཕྱིར་ཕྱོགས་
[35b.5]ཙམ་ལ་དེ་མེད་པ་ཡིན་ཏེ། གཉི་ག་ཡང་གཞན་ཡིན་པའི་ཕྱིར་རོ། །དེས་ན་དངོས་པོ་རྟོགས་པ་ན་གཉི་ག་གཞན་དུ་རྣམ་པར་གཞག་པ་ཡིན་ནོ། །དེའི་རང་བཞིན་ལས་བཟློག་པ་གཞན་ཉིད་དུ་རྣམ་པར་གནས་པ་ན་དེའི་རང་བཞིན་བཟློག་པ་དང་། རང་བཞིན་གཞན་མེད་པ་ཡིན་ནོ། །
[35b.6]གལ་ཏེ་དངོས་པོ་མེད་པ་དེ་ལ་རང་བཞིན་རྟོགས་པ་ནི་ཡོངས་སུ་གཅོད་པ་ཡིན་ལ། གཞན་ཉིད་དུ་རྣམ་པར་འཇོག་པ་རྣམ་པར་གཅོད་པ་ཡིན་ནོ། །དེར་ཡང་གཞན་རང་བཞིན་དང་ལྡན་པ་ནི་རང་གི་ཚད་མས་ཀྱང་རྟོགས་ཀྱི་དངོས་པོ་མེད་པ་རྟོགས་པ་ནི་རང་གི་ཚད་མ་ལ་བརྟེན་པ་མ་ཡིན་
[35b.7]ནོ། །གལ་ཏེ་དངོས་པོ་མེད་པ་མ་རྟོགས་ན་རྟོགས་པ་འདི་ཇི་ལྟར་ཡིན་ཞེ་ན་འདི་ལ་བཤད་ཟིན་ཏོ། །མཐོང་བ་ལས་བཟློག་པ་ནི་གཉི་ག་ལྟར་ཡང་རྟོགས་པའི་ཕྱིར་རོ། །རྣམ་པར་བཅད་པ་རང་གི་ཚད་མས་བཟུང་བས་ནི་ཅི་ཡང་བྱར་མེད་དོ། །རྟོགས་པ་ཉིད་ལ་དེ་ལྟར་འགྱུར་བའི་
[36a]
[36a.1]ཕྱིར་རོ། །རྗེས་སུ་འགྲོ་བ་མེད་པ་དང་འཇིག་པ་རྟོགས་པ་ན་ཡང་དངོས་པོ་མེད་པ་རྟོགས་པ་ཡོད་པ་ཉིད་འོན་ཀྱང་དེ་གཞལ་བྱའི་མཐར་ཐུག་པ་མ་ཡིན་པའི་ཕྱིར་ཚད་མ་ནི་མ་ཡིན་ནོ། །ཐ་སྙད་ནི་མེད་ན་མི་འབྱུང་བའི་ཕྱིར་ཐ་སྙད་བསྒྲུབ་པར་བྱ་བ་ཉིད་དུ་བསྟན་ཏོ། །
[36a.2]འདིར་ཡང་བདག་ཉིད་གཅིག་རྟོགས་པ་ན་དེ་གཞན་གྱི་བདག་ཉིད་ཡིན་པ་རྣམ་པར་གཅོད་པ་ལ་མངོན་སུམ་ཉིད་ཚད་མ་ཡིན་ནོ། །དེ་ཉིད་ཀྱི་ཕྱིར་གལ་ཏེ་གཅིག་ཡོངས་སུ་བཅད་པ་ཉིད་ཀྱིས་གཞན་རྣམ་པར་བཅད་པ་འགྲུབ་ན། ཁྱད་པར་མེད་པས་དེ་ལས་གཞན་ཐམས་ཅད་མེད་པར་འགྲུབ་
[36a.3]པར་འགྱུར་གྱི་མཚུངས་པར་རུང་བའི་རང་བཞིན་ཁོ་ན་ནི་མ་ཡིན་ནོ། །ཁྱད་པར་བརྗོད་པར་བྱ་བ་མ་ཡིན་ནོ་ཞེས་བྱ་བ་ལ་སོགས་པ་རྩོད་པ་བཀོད་དེ་དེའི་བདག་ཉིད་ངེས་པར་སྣང་བའི་ཤེས་པས་གཅིག་གི་བདག་ཉིད་ཡོངས་སུ་བཅད་པ་ལས་དེ་དེའི་བདག་ཉིད་ཡིན་པ་རྣམ་པར་བཅད་པར་
[36a.4]འགྱུར་རོ་ཞེས་རྣམ་གཅོད་ཡོངས་གཅོད་གཉིས་ཚད་མ་གཅིག་གིས་བྱེད་པ་ཡིན་པར་བསྒྲུབ་པ་དེའི་ཕྱིར་དེ་ལྟར་དམིགས་པས་དེ་དེ་ལས་གཞན་གྱི་བདག་ཉིད་ཡིན་པ་རྣམ་པར་བཅད་པར་འགྱུར་རོ་ཞེས་མཇུག་བསྡུས་པ་ཡིན་ནོ། །དེའི་ཡུལ་དང་དུས་དག་ཏུ་གཞན་གྱི་དངོས་པོ་ཐམས་ཅད་
[36a.5]བཀག་པ་ནི་མ་ཡིན་ནོ་ཞེས་བྱ་བ་ནས་བརྩམས་ཏེ་དེའི་ཕྱིར་འགའ་ཞིག་ཏུ་འགའ་ཞིག་གི་ཚེ་འགའ་ཞིག་དགག་པ་ནི་ཇི་སྐད་བཤད་པའི་ཚུལ་གྱིས་མི་དམིགས་པ་ལས་ཡིན་ནོ་ཞེས་དེའི་བདག་ཉིད་མ་ཡིན་པའི་ཡུལ་ལ་ནི་མི་སྣང་བ་མི་དམིགས་པའི་བྱེད་པ་བཤད་པ་ཡིན་ནོ། །དེས་
[36a.6]ན་དངོས་པོ་ནི་གཅིག་གི་རང་བཞིན་དུ་ངེས་པ་ཉིད་དུ་ཉམས་སུ་མྱོང་བས་རྟོགས་པ་ཡིན་ནོ། །གང་གི་ཚེ་བལྟར་རུང་བ་འམ་མི་རུང་བའི་རང་བཞིན་གཞན་གྱིས་དུ་མའི་རང་བཞིན་དུ་དོགས་པ་ན་གཅིག་དུ་མར་འགྱུར་བ་མ་ཡིན་ནོ་ཞེས་རང་བཞིན་གཅིག་ཉམས་སུ་མྱོང་བ་ཉིད་ཀྱིས་འགོག་གོ། །
[36a.7]དེས་ན་འདི་ལྟར་རུང་བ་འགོག་པ་ལ་བལྟར་རུང་བ་ཉིད་ནི་ཡན་ལག་མ་ཡིན་ན། དེ་ཇི་ལྟར་བལྟར་མི་རུང་བ་ནི་བལྟར་མི་རུང་བ་ཉིད་ཀྱི་ཕྱིར་བཀག་པར་མི་འགྱུར་རོ་ཞེས་བྱ་བར་འགྱུར། བལྟར་རུང་བ་ལ་ནི་བལྟར་མི་རུང་བའི་བདག་ཉིད་མེད་པའི་ཕྱིར་བལྟར་རུང་བར་ཁས་བླངས་ནས་འགོག་
[36b]
[36b.1]གོ་ཞེས་བྱ་བ་གང་ཡིན་པ་དེ་ནི་སྐྲ་བྲེགས་ཟིན་ནས་སྐར་མ་རྟོགས་པ་དང་མཚུངས་སོ། །གལ་ཏེ་འདི་ལ་ཡང་འགའ་ཞིག་རྨོངས་ནས་འགལ་བ་གཅིག་ཉིད་བལྟར་རུང་བའི་དམིགས་པས་བལྟར་མི་རུང་བ་དེའི་བདག་ཉིད་ཡིན་པ་འགོག་པར་བྱེད་པའི་ཕྱིར་འགལ་བ་མེད་དོ། །དེ་ནི་
[36b.2]ཤེས་པ་རང་བཞིན་གཞན་དུ་དོགས་པ་ན་ཡང་འགྱུར་བ་ཡིན་ནོ། །དེ་བཞིན་དུ་ས་ཕྱོགས་དམིགས་ཀྱང་བུམ་པ་མེད་པར་ཐེ་ཚོམ་ཟ་བར་མ་ཡིན་པ་ན་མངོན་སུམ་ཉིད་ཀྱིས་དེ་མེད་པའི་ཐ་སྙད་དུ་འགྱུར་ཏེ། དེ་ལྟ་མ་ཡིན་ན་ཤེས་པ་ཡང་གཞན་རྨོངས་པར་མི་འགྱུར་རོ། །དེས་ན་དེ་ལྟར་དངོས་
[36b.3]པོ་གཞན་ཉིད་དུ་རྣམ་པར་གནས་པ་ཉིད་དུ་ཉེ་བར་མཁོ་བའི་དགོས་པ་ཅན་དངོས་པོ་མེད་པ་བསྒྲུབ་པའི་ཕྱིར་དེ་དམིགས་པས་དགག་པའི་དོན་རྟོགས་པ་ཇི་སྐད་བཤད་པའི་ཚུལ་གྱིས་བྱས་པ་ཡང་དེ་ཙམ་གྱིས་ཡུལ་གྱི་མཐར་ཐུག་པ་དེའི་ཐ་སྙད་ཀྱི་རང་བཞིན་ཡིན་ནོ། །གལ་ཏེ་དེ་ཡང་རྟོགས་པ་ཙམ་
[36b.4]གྱི་རང་བཞིན་སྐྱེ་བ་ན་ཡུལ་དང་མི་ལྡན་པ་ཉིད་ཀྱིས་གཞན་གྱི་མཐར་ཐུག་པ་མ་ཡིན་ཡང་གདོན་མི་ཟ་བར་བྱ་བ་ནི་དེ་ལྟ་བུར་འགྱུར་བ་ཉིད་བྱེད་པ་ཡིན་ནོ། །དེས་ན་གཞན་དམིགས་པ་ན་མི་དམིགས་པ་མངོན་སུམ་གྱིས་གྲུབ་པ་ཡིན་ལ་གཞན་ཡོད་པ་ན་ཡང་མེད་པ་མངོན་སུམ་གྱིས་གྲུབ་པ་ཡིན་
[36b.5]ནོ། །དེ་ལྟ་ན་དངོས་པོ་མེད་པ་སྒྲུབ་བྱེད་ལ་ལྟོས་པ་བསལ་ནས་རྟོགས་པའི་མཐར་ཐུག་པ་ཅན་ཉིད་མི་དམིགས་པའི་བྱེད་པ་ཡིན་པར་བསྟན་པའི་ཕྱིར་གང་གི་ཚེ་ཞེས་སྨོས་སོ། །འདིར་ཡང་གཉིས་དག་གཉིས་ཉིད་དུ་རྣམ་པར་འཇོག་པ་ན་མངོན་སུམ་ཉིད་ཀྱིས་ཐ་སྙད་བྱེད་པའི་ཕྱིར་མི་དམིགས་
[36b.6]པ་དོན་མེད་དོ། །དེ་བཞིན་དུ་དངོས་པོ་གཞན་རྣམ་པར་གནས་པའི་གཞི་ཅན་དངོས་པོ་མེད་པར་རྟོགས་པ་ནི་གཞན་གྱི་དངོས་པོའི་མཐར་ཐུག་པ་ཉིད་ཡིན་ཏེ། དེས་ན་གལ་ཏེ་རྨོངས་པས་དེ་ལ་དེ་ལྟར་མི་འཇུག་པ་ལ་མི་དམིགས་པ་གཏན་ཚིགས་ཡིན་པ་དེའི་ཕྱིར་གཞན་ཡོད་པའི་
[36b.7]བདག་ཉིད་ཅན་ཡོད་པ་དེ་ཉིད་བསྒྲུབ་པར་བྱ་བ་ཡིན་པར་འགྱུར་རོ། །དེ་ནི་འདི་ལྟར་བཟློག་སྟེ། གང་གི་ཚེ་མེད་པ་དག་གི་མེད་པ་མི་དམིགས་པ་ཁོ་ན་ཡིན་པ་དེའི་ཚེ། མེད་པའི་མཚན་ཉིད་ཀྱི་ཡུལ་གྲུབ་པ་ཁོ་ན་སྟེ། མི་དམིགས་པ་ཉིད་མེད་པ་ཡིན་པའི་ཕྱིར་རོ། །འོན་ཀྱང་མེད་པའི་
[37a]
[37a.1]མཚན་ཉིད་ཀྱི་ཡུལ་གྲུབ་ཏུ་ཟིན་ཀྱང་མེད་པའི་ཤེས་པ་དང་སྒྲ་དང་ཐ་སྙད་དག་ཁོང་དུ་མ་ཆུད་པ་འཇུག་པར་བྱེད་དོ། །གང་ཁོང་དུ་མ་ཆུད་པ་དེ་ཉིད་རྟོགས་པ་ལ་འཇུག་པར་བྱེད་པ་ཡིན་ནོ། །གང་གིས་ཤེ་ན་ཡུལ་རབ་ཏུ་བསྟན་པས་ཞེས་སྨོས་སོ། །ཡུལ་ནི་མི་དམིགས་པའི་
[37a.2]བདག་ཉིད་ཅན་གྱི་དངོས་པོ་མེད་པ་སྟེ། དེ་རབ་ཏུ་བསྟན་པས་མེད་པའི་ཤེས་པ་དང་སྒྲ་དང་ཐ་སྙད་བསྒྲུབ་པར་བྱ་བ་ཡིན་ནོ། །དེ་བསྒྲུབ་པར་བྱ་བའི་ཕྱིར་མི་དམིགས་པ་དོན་མེད་པ་མ་ཡིན་ནོ། །ཇི་སྐད་བཤད་པའི་དངོས་པོ་མེད་པ་ཡང་བསྒྲུབ་པར་བྱ་བ་མ་ཡིན་ཏེ། དེ་ནི་མི་དམིགས་པའི་
[37a.3]བདག་ཉིད་ཀྱིས་གྲུབ་ཟིན་པའི་ཕྱིར་རོ། །གལ་ཏེ་མངོན་སུམ་གྱིས་གཞན་ཡོད་པས་མེད་པ་གྲུབ་ན་མེད་པའི་ཤེས་པ་དང་སྒྲ་དང་ཐ་སྙད་ཁོང་དུ་མ་ཆུད་པར་ཇི་ལྟར་འགྱུར་ཞེ་ན། རྨོངས་པས་ཞེས་སྨོས་སོ། །རྒྱུ་མཚན་འགའ་ཞིག་ལས་གཞན་ཡོད་པ་ལ་ཡང་མེད་པར་ཁོང་དུ་མ་
[37a.4]ཆུད་པ་དེ་ལྟར་ཁོང་དུ་ཆུད་པར་བྱེད་དོ། །གལ་ཏེ་དོན་གཞན་ཡོད་པ་དངོས་པོའི་ངོ་བོ་མེད་པར་བསྒྲུབ་པར་བྱ་བ་ཡིན་པར་འགྱུར་རོ་ཞེས་བརྗོད་པ་མ་ཡིན་ནམ། གང་གིས་དེ་གྲུབ་ན་དངོས་པོ་མེད་པ་གྲུབ་པར་བརྗོད་པ་དེ་ནི་མི་དམིགས་པ་མ་ཡིན་ཏེ། དམིགས་པ་དངོས་པོ་མེད་པའི་
[37a.5]རང་བཞིན་ཤེས་པ་གཞན་ཡོད་པ་ཉིད་མི་དམིགས་པའི་ངོ་བོ་ཡིན་པའི་ཕྱིར་རོ། །དེས་ན་ཤེས་པ་གཞན་ཡོད་པའི་བདག་ཉིད་མི་དམིགས་པས་དངོས་པོ་གཞན་ཡོད་པའི་བདག་ཉིད་ཅན་གྱི་མེད་པ་བསྒྲུབ་པར་བྱ་བ་མ་ཡིན་ནོ་ཞེ་ན་རྣམ་པ་དེ་ལྟ་བུའི་ཞེས་སྨོས་ཏེ། གཞན་ཡོད་པའི་བདག་ཉིད་ཅན་
[37a.6]ནོ། །གཞན་ཡོད་པ་ཡང་མི་དམིགས་པ་ཉིད་དེ། དེ་གཞན་མེད་པ་ཡིན་པ་བཞིན་དུ་དམིགས་པ་མེད་པའི་རང་བཞིན་ཡང་ཡིན་པའི་ཕྱིར་རོ། །དེས་ན་དོན་འདི་ཡིན་ཏེ་དངོས་པོ་དངོས་པོ་མེད་པ་ནི་མི་དམིགས་པའི་ཚད་མ་མེད་པ་ཅན་ཡིན་ལ་དངོས་པོ་དངོས་པོ་མེད་པ་ཡང་དངོས་པོ་གཞན་ཡོད་པ་ཡིན་
[37a.7]ནོ། །ཡོད་པ་གང་ཞིག་དངོས་པོ་དངོས་པོ་མེད་པ་ཡིན་པ་དེ་ནི་དམིགས་པ་དངོས་པོ་མེད་པ་ཡང་ཡིན་ནོ། །ཤེས་པ་གཞན་ཡོད་པ་དམིགས་པ་དངོས་པོ་མེད་པ་གང་ཡིན་པ་དེ་ཡང་དངོས་པོ་དངོས་པོ་མེད་པ་ཡང་ཡིན་ནོ། །དེའི་ཕྱིར་དངོས་པོ་དངོས་པོ་མེད་པ་སྒྲུབ་པ་ལ་མི་
[37b]
[37b.1]དམིགས་པ་གྲུབ་པ་ལ་ལྟོས་པའི་ཤེས་པ་དང་ཤེས་བྱའི་མཚན་ཉིད་དེ་གྲུབ་པ་ཉིད་ན་གྲུབ་པའི་དངོས་པོ་མེད་པ་ནི་བསྒྲུབ་པར་བྱ་བ་མ་ཡིན་ནོ། །དེ་བས་ན་གཞན་ཡོད་པ་དེ་རང་བཞིན་ཇི་ལྟ་བ་བཞིན་དུ་ཐ་སྙད་དུ་བྱ་བ་ཡིན་ནོ། །རྨོངས་པས་དེར་ཐ་སྙད་མི་བྱེད་པ་ནི་ཡོད་པ་མི་དམིགས་
[37b.2]པར་མི་སྲིད་པའི་ཕྱིར་དམིགས་སུ་རུང་བ་མེད་པར་ཉེ་བར་བསྡུ་བའི་སྒོ་ནས་དངོས་པོ་མེད་པར་ངེས་པའི་མི་དམིགས་པས་འཇུག་པར་བྱེད་དོ། །གཞན་གྱི་དངོས་པོ་ཡོད་པའི་བདག་ཉིད་ཀྱི་དངོས་པོ་མེད་པ་ནི་མི་དམིགས་པ་གྲུབ་པ་ཉིད་ན་གྲུབ་པའི་ཕྱིར་མེད་དོ་ཞེས་བྱ་བར་རྟོགས་པ་ནི་རྟོགས་
[37b.3]ཟིན་པ་ཉིད་རྟོགས་པ་ཡིན་ནོ། །དེས་ན་དངོས་པོ་ལྷག་པ་གྲུབ་པ་མེད་པའི་ཕྱིར་དང་། རྟོགས་པ་འདི་སྔར་གྱི་དེ་རྟོགས་པ་དང་མི་འདྲ་བའི་ཕྱིར་དེ་ཙམ་ཉིད་གྲུབ་པར་འགྱུར་བས་ཐ་སྙད་བསྒྲུབ་པར་བརྗོད་པ་ཡིན་གྱི། ཐ་སྙད་དང་མེད་ན་མི་འབྱུང་བ་གཞན་ནི་ཡོད་པ་མ་ཡིན་ནོ། །ཐ་སྙད་
[37b.4]སྒྲུབ་པར་བྱེད་པའི་གཏན་ཚིགས་ཐམས་ཅད་ལ་ཁྱབ་པ་སྒྲུབ་པའི་ཚུལ་ནི་འདི་ཉིད་ཡིན་ནོ། །གཏན་ཚིགས་གང་གིས་དེ་སྒྲུབ་པ་དེ་ནི་ཐ་སྙད་དུ་བྱ་བའི་དོན་དང་། མེད་ན་མི་འབྱུང་བ་ཡིན་པའི་ཕྱིར་དེ་ཉིད་དེས་རྟོགས་པར་བྱ་བ་ཡིན་ནོ། །རྟོགས་པར་བྱ་བ་དེ་ཡང་ལྷག་པ་མ་ཡིན་པའི་ཕྱིར་
[37b.5]དང་། ལྷག་པ་ཡིན་ཡང་གྲུབ་ཟིན་པའི་ཕྱིར་གྲུབ་པ་ལ་མ་ལྟོས་པས་དེའི་རྟོགས་པ་ཙམ་ཉིད་འགྲུབ་པར་འགྱུར་རོ། །དཔེར་ན་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཉིད་ལས་འབྲས་བུ་གཞན་མ་ཡིན་པའི་ཕྱིར་དེ་གྲུབ་ན་གྲུབ་པ་ཉིད་བཞིན་ནོ། །དེ་ཡོད་པ་ཉིད་ཀྱིས་དེ་དེ་ལྟར་
[37b.6]བསྒྲུབ་པར་བྱ་བ་ན་དངོས་སུ་ཚུལ་སྔ་མས་ཀྱང་རྟོགས་ཟིན་པའི་རྟོགས་པ་པོའི་རྟོགས་པ་མི་འདྲ་བའི་སྤྱོད་ཡུལ་གྱི་དངོས་པོར་ཡང་དག་པའི་འཇོག་པ་ཡིན་ནོ། །དེ་བཞིན་དུ་ཤིང་ཉིད་ཤ་པ་ལས་གཞན་ཡིན་ཡང་བྱས་པ་གྲུབ་པས་མི་རྟག་པ་གྲུབ་པ་ལྟར་ཤ་པ་གྲུབ་ན་གྲུབ་པ་ལས་འདའ་བ་
[37b.7]མ་ཡིན་ནོ། །དེའི་ཕྱིར་ཤ་པ་ཉིད་ནི་ཤིང་གི་བདག་ཉིད་ཡིན་པའི་ཕྱིར་དེས་དེ་སྒྲུབ་པ་ན་དེ་ཡང་གྲུབ་ཟིན་པའི་ཕྱིར་ཤིང་ངོ་ཞེས་བྱ་བ་རྟོགས་པའི་མཐར་ཐུག་པ་ཅན་གྲུབ་པར་འགྱུར་བ་ཡིན་ནོ། །དེ་བཞིན་དུ་འདིར་ཡང་གཞན་ཡོད་པ་ཉིད་དངོས་པོ་མེད་པ་སྒྲོ་བཏགས་པའི་ཐ་སྙད་དུ་བྱ་བ་ཡིན་
[38a]
[38a.1]པའི་ཕྱིར་དེ་གྲུབ་པ་ཉིད་ན་དངོས་པོ་མེད་པར་སྒྲོ་འདོགས་པར་བྱེད་པའི་རྟོགས་པ་འཇུག་པས་རྟོགས་པ་ཉིད་བསྒྲུབས་པའི་འབྲས་བུ་ཡིན་ནོ། །དེ་ཉིད་ཀྱི་ཕྱིར་འདི་རང་བཞིན་གྱི་གཏན་ཚིགས་ཡིན་ཏེ། མི་དམིགས་པ་དང་དོན་མེད་པ་གཉིས་ཐ་མི་དད་པའི་ཕྱིར་རོ། །གལ་ཏེ་གཞན་
[38a.2]ཡོད་པ་ནི་གཞན་དངོས་པོ་མེད་པ་མ་ཡིན་གྱི་འོན་ཀྱང་བལྟར་རུང་བའི་བུམ་པས་རྣམ་པར་བཅད་པའི་ཕྱོགས་ལས་གཞན་དུ་གྲུབ་པས་ཕྱོགས་དག་པ་ཡིན་ནོ། །གལ་ཏེ་འདི་མ་དམིགས་པ་ཡང་ཡོད་པར་རྟོགས་པའི་ཕྱིར་བུམ་པ་དང་བཅས་པ་ལས་གཞན་དུ་མ་རྟོགས་ན་དེ་ཉིད་རྟོགས་པར་བྱ་བ་
[38a.3]ཡིན་ནོ། །དེས་ན་གཞན་གྱི་ཐ་སྙད་ཉིད་བསྒྲུབ་པར་བྱ་བར་འགྱུར་རོ། །འོན་ཏེ་དངོས་པོ་ལ་དེ་ལྟར་ཡིན་ཡང་དགག་པའི་དོན་སྒྲོ་མ་བཏགས་པར་གསལ་བར་རྟོགས་པ་མ་ཡིན་པའི་ཕྱིར་མེད་པའི་ཐ་སྙད་བསྒྲུབ་པར་བྱ་བ་ཡིན་ནོ་ཞེ་ན། དེ་ལྟ་ན་ཡང་གཞན་ཡོད་པ་དངོས་པོ་མེད་པ་ཡིན་ནོ་
[38a.4]ཞེས་རྟོགས་པ་དང་ལྡན་པ་མ་ཡིན་པ་འདིས་ཅི་བྱ། བལྟར་རུང་བའི་དངོས་པོ་ཡོད་པ་ལ་ཤེས་པ་འཁྲུལ་པ་མེད་པ་ལས་མ་མཐོང་བའི་ཕྱིར་མེད་དོ་ཞེས་བྱ་བར་རྟོགས་པས་འཇུག་པ་ཉིད་དེ་ཙམ་གྱིས་མཐར་ཐུག་པ་ཅན་གྱི་སྒྲུབ་པར་བྱེད་པར་འགྱུར་རོ་ཞེ་ན། བརྗོད་པ་རྟོགས་པ་འདི་ནི་རང་གི་
[38a.5]དམིགས་པ་མངོན་དུ་བྱེད་པའམ། རང་གི་དམིགས་པ་འཕེན་པར་བྱེད་པའི་དོན་གཞན་མཐོང་བས་བདག་ཉིད་ལ་བརྟེན་པ་ནི་མ་ཡིན་གྱི། འོན་ཀྱང་དངོས་པོ་གཞན་ཉིད་རྣམ་པར་དཔྱོད་པ་ཉིད་ཀྱིས་ཡིན་པ་དེའི་ཕྱིར་དེ་ཉིད་དེར་སྒྲོ་བཏགས་པ་རྟོགས་པ་ཡིན་པར་བསྟན་ཏེ། ཚད་མའི་ཡུལ་ལ་
[38a.6]དགག་པའི་དོན་མ་ཞུགས་པའི་ཕྱིར་རོ། །དེ་དང་དེའི་ཡུལ་གྱི་ལྷས་བྱིན་ལ་བྱ་བ་སྒྲོ་བཏགས་པས་རྟོགས་པ་བཞིན་ཐ་མི་དད་པ་ལ་ཡང་ཐ་དད་པ་བཞིན་ནོ། །དེས་ན་ཇི་ལྟར་ལྷས་བྱིན་འགྲོ་བ་ལ་བྱ་བ་གཞན་མ་རྟོགས་ཀྱང་བྱ་བའི་རྟོགས་པ་གནོད་པ་མེད་པ་དེ་བཞིན་དུ་འདི་ན་བུམ་པ་མེད་དོ་ཞེས་དགག་
[38a.7]པའི་དོན་ལ་ལྐོག་ཏུ་གྱུར་པ་མ་ཡིན་པའི་འདུ་ཤེས་ཅན་དུ་བ་ལས་མེ་རྟོགས་པ་བཞིན་དུ་དགག་པའི་དོན་ལྷག་པར་རྟོགས་པ་མེད་ཀྱང་གནོད་པ་མེད་པ་ནི་གཞན་ཡོད་པ་ཉིད་ཀྱིས་འབྱོར་པར་འགྱུར་བའི་ཕྱིར་ཚད་མའི་ཡུལ་ལ་བརྗོད་པར་འདོད་པའི་དགག་པའི་དོན་ནི་གཞན་ཡོད་པའི་མཐར་
[38b]
[38b.1]ཐུག་པ་ཉིད་དོ། །དེས་ན་རྟོགས་པ་པོའི་རྟོགས་པ་ལ་ལྟོས་ཏེ་གཞན་ཡོད་པ་དངོས་པོ་དངོས་པོ་མེད་པར་བརྗོད་དོ། །དངོས་པོ་གཞན་གྱི་བསྐྱེད་པ་དང་། དངོས་པོ་གཞན་གྱི་མཐར་ཐུག་པ་ནི་ཆོས་གཞན་སྒྲོ་འདོགས་པའི་སྒོ་ནས་དེ་ལ་དམིགས་པ་ཉིད་ཀྱིས་འཇུག་པ་ཡིན་ནོ་ཞེས་
[38b.2]བྱ་བར་འཐད་དོ། །དེ་ལྟར་འདི་ནི་ངེས་པ་ཉིད་དོ། །འདི་བརྗོད་པར་བྱ་སྟེ། ཤེས་པ་གཞན་ཡོད་པ་ཉིད་ཤེས་པ་དངོས་པོ་མེད་པ་ཡིན་པ་ལྟར་དངོས་པོ་གཞན་ཡོད་པ་ཡང་ཤེས་པ་དངོས་པོ་མེད་པ་ཡིན་པར་ཇི་ལྟར་འགྱུར་ཞེ་ན། ཤེས་པ་གཞན་ཡོད་པ་ཤེས་པ་དངོས་པོ་
[38b.3]མེད་པ་ཡིན་པ་ཇི་ལྟ་བ་དེ་ལྟར་དངོས་པོ་གཞན་ཡོད་པ་ཡང་ངོ་། །མི་མཐུན་པའི་ཟླ་བའི་དངོས་པོ་གཞན་ནི་རང་ཡོད་ན་གཞན་ཡོད་པ་སེལ་བས་དངོས་པོ་གཞན་དངོས་པོ་མེད་པར་བརྗོད་དོ། །དེས་ན་ཇི་ལྟར་ཕྱོགས་འབའ་ཞིག་གི་ཤེས་པ་བུམ་པ་དང་བཅས་པའི་ཕྱོགས་ཤེས་པ་
[38b.4]དང་འགལ་བ་དེས་ན་ཤེས་པ་དེ་ལ་མེད་པར་འདོད་པ་དེ་བཞིན་དུ་ཕྱོགས་ཙམ་ཡོད་པ་ཡང་བུམ་པ་དང་བཅས་པའི་ཕྱོགས་ཤེས་པ་དང་འགལ་བ་ཡིན་ནོ། །འཁྲུལ་པ་མེད་པ་ནི་ཕྱོགས་ཙམ་ལ་ཡང་བུམ་པ་དང་བཅས་པའི་ཕྱོགས་སུ་སྣང་བ་མི་འཐད་དོ། །དེས་ན་ཕྱོགས་ཙམ་གྱི་
[38b.5]ཤེས་པ་བཞིན་ཕྱོགས་ཙམ་ཡང་བུམ་པ་དང་བཅས་པའི་ཕྱོགས་ཀྱི་ཤེས་པ་དངོས་པོ་མེད་པ་ཡིན་ནོ། །དེས་ན་ཇི་ལྟར་དེ་ཙམ་ཤེས་པ་ན་གལ་ཏེ་བུམ་པ་དང་བཅས་པའི་ཕྱོགས་ཤེས་པ་ཡོད་ན་དེ་བཞིན་དུ་གསལ་བར་འགྱུར་བ་ཞིག་ན་དེ་ཙམ་དུ་གསལ་བ་ཡང་གསལ་བ་ཡིན་
[38b.6]ནོ་ཞེས་དངོས་པོ་མེད་པར་རྟོགས་པ་དེ་བཞིན་དུ་འདི་ལ་ཡང་ཡིན་ནོ། །གལ་ཏེ་བུམ་པ་དང་བཅས་པའི་ཕྱོགས་ཤེས་པ་ཡོད་ན་ཕྱོགས་བུམ་པ་དང་བཅས་པ་ཉིད་དུ་སྣང་བར་འགྱུར་བ་ཞིག་ན་ཕྱོགས་ཙམ་ཡང་སྣང་ངོ་ཞེས་སོ། །དེས་ན་ཤེས་པ་དང་ཤེས་བྱའི་མཚན་ཉིད་འདི་ནི་མི་
[38b.7]དམིགས་པ་ཡིན་ནོ། །ཇི་ལྟར་ཤེས་བྱའི་མཚན་ཉིད་མི་དམིགས་ན་དངོས་པོ་དངོས་པོ་མེད་པར་འགྲུབ་པ་དེ་བཞིན་དུ་ཤེས་པའི་མཚན་ཉིད་ལ་ཡང་ཡིན་ནོ། །དེས་ན་དངོས་པོ་མེད་པ་ཡང་ཤེས་པ་དང་ཤེས་བྱའི་མཚན་ཉིད་ཁོ་ནའོ། །འདི་ལྟར་ཕྱོགས་ཙམ་བུམ་པ་དང་བཅས་པ་དང་འགལ་བ་དེ་
[39a]
[39a.1]བཞིན་དུ་ཕྱོགས་ཙམ་གྱི་ཤེས་པ་ཡང་ངོ་། །གང་གི་ཕྱིར་བུམ་པ་ཡོད་ཀྱང་ཕྱོགས་ཙམ་ཤེས་པར་འགྱུར་བ་སྲིད་པ་ཡོད་པ་མ་ཡིན་ནོ། །དེའི་ཕྱིར་གལ་ཏེ་ཕྱོགས་འདི་བུམ་པ་དང་བཅས་པ་ཡིན་ན་བུམ་པ་དང་བཅས་པའི་ཕྱོགས་ཤེས་པ་གསལ་བར་འགྱུར་བ་ཞིག་
[39a.2]ན་ཕྱོགས་ཙམ་ཤེས་པར་གསལ་ལོ་ཞེས་བྱ་བས་ཀྱང་བུམ་པ་མེད་པར་རྟོགས་པ་ཡིན་ནོ། །དེས་ན་ཤེས་པ་ཡོད་པའི་མཚན་ཉིད་མི་དམིགས་པ་ན་ཡང་བུམ་པ་མེད་པར་གྲུབ་བོ། །དེ་ལྟར་རྟོགས་པར་དཀའ་བའི་མི་དམིགས་པ་དེ་ནི་འདི་ཁོ་ན་བཞིན་དུ་རྗེས་སུ་རྟོགས་པར་བྱའོ། །དེའི་ཕྱིར་
[39a.3]མེད་པ་དག་གི་མེད་པ་རྣམ་པ་དེ་ལྟ་བུའི་མི་དམིགས་པ་ཁོ་ན་ཡིན་ནོ་ཞེས་གསུངས་པ་ནི་རིགས་པར་གསུངས་སོ། །དེས་ན་འདི་ལྟར་ཤེས་པ་དང་ཤེས་བྱའི་མཚན་ཉིད་མི་དམིགས་པ། དམིགས་པ་དངོས་པོ་མེད་པར་རྟོགས་པ་དེ་ཉིད་ཇི་སྐད་བཤད་པའི་ཚུལ་གྱིས་དངོས་པོ་དངོས་པོ་མེད་
[39a.4]པ་ཉིད་ཡིན་པས་དངོས་པོ་དངོས་པོ་མེད་པ་ཉིད་དུ་རྟོགས་པ་ཡིན་ནོ། །དེ་ལྟར་དངོས་པོ་མེད་པར་ལྷག་པར་རྟོགས་པ་ནི་མ་ཡིན་གྱི། འོན་ཀྱང་རྟོགས་པ་ཉིད་སྐྱེས་པར་ཟད་དོ། །དེས་ན་ཐ་སྙད་བསྒྲུབ་པར་བྱ་བ་ཉིད་དོ། །རྟོགས་པར་བྱ་བའི་མཐར་ཐུག་པ་ཅན་སྒྲུབ་པའི་བྱེད་པ་
[39a.5]ལ་འབྲས་བུ་དེ་ཙམ་དུ་འགྱུར་མོད། སྒྲ་དང་ཐ་སྙད་གོ་ཇི་ལྟར་སྒྲུབ། གང་གིས་རྟོགས་པ་བཞིན་དུ་འདིའི་དོན་སྒྲུབ་པ་མེད་པར་རང་གི་ཡུལ་ཉེ་བར་གནས་པ་ལ་འགྲུབ་པར་འགྱུར་བ་རང་གི་རྒྱུ་ངེས་པའི་ཕྱིར་རྟོགས་པ་བཞིན་དུ་སྒྲ་ཡང་དོན་ལ་འགྱུར་བ་ནི་མ་ཡིན་ནོ་ཞེ་ན། དེའི་ཕྱིར་བརྡ་
[39a.6]ལ་ཞེས་སྨོས་སོ། །བརྡ་ཡོད་ན་འཇུག་པ་ནི་བརྡ་ཇི་ལྟ་བ་བཞིན་དུ་ངེས་པའི་སྒྲའམ། དོན་སྒྲུབ་པ་ངེས་པར་སྦྱོར་བ་ཁས་བླངས་པ་ཞུགས་པར་འགྱུར་བ་ཉིད་དོ། །འདོད་པའི་འབྲས་བུ་སྒྲུབ་པར་བྱེད་པའི་དོན་བདག་གིར་བྱེད་པའི་མཐར་ཐུག་པ་དོན་ལ་གཞོལ་བའི་བྱེད་པ་ནི་ཐ་སྙད་དོ། །
[39a.7]དེ་ཉིད་ཀྱི་ཕྱིར་སྒྲ་ཙམ་དོན་དམ་པ་ཉིད་དུ་གྱུར་པའི་དཔེར། དཔེར་ན་ཞེས་སྨོས་སོ། །བ་ལང་དང་ལྐོག་ཤལ་ལ་སོགས་པ་འདུས་པ་ནི་དོན་གཅིག་པས་སྒྲ་ཙམ་གྱིས་ཐ་དད་ཀྱི་ཇི་ལྟར་ངོ་བོ་དང་ངོ་བོ་མེད་པ་ཉིད་ཀྱིས་ཐ་དད་པའི་ཕྱིར་དོན་ཡོད་པ་དང་གཞན་མེད་པ་ལྟར་དོན་ནི་སྒྲོ་བཏགས་པ་
[39b]
[39b.1]ཡང་ཐ་དད་པ་མེད་དོ། །དེ་ལྟ་ན་ཡང་འཐད་པ་འདི་ནི་ཡུལ་གྱིས་ཡུལ་ཅན་སྒྲུབ་པ་ཉིད་ལ་བསྟན་པ་ཡིན་ནོ། །ཇི་སྐད་བརྗོད་པའི་ཚུལ་གྱིས་དགག་པའི་དོན་ནི་གཞན་ཡོད་པའི་མཐར་ཐུག་པ་ཡིན་པའི་ཕྱིར་དེ་ལ་རྟོགས་པ་པོ་རྣམས་ཀྱིས་བསྒྲུབ་པར་བྱ་བའི་དོན་སྒྲུབ་པར་དེ་ལྟར་
[39b.2]ཁས་ལེན་པ་ནི་བརྡར་བརྗོད་དོ། །དེ་ལ་ནི་མི་དམིགས་པའི་མཚན་ཉིད་གཞན་དངོས་པོ་མེད་པ་ཡུལ་འདི་བསྟན་ནས་འཇུག་པར་བྱེད་དེ། ལྐོག་ཤལ་ལ་སོགས་པའི་འདུས་པ་བསྟན་ནས་བ་ལང་ཞེས་བྱ་བ་ལ་འཇུག་པ་བཞིན་ནོ། །འདིར་ནི་བ་ལང་ངོ་སྙམ་པའི་ཤེས་པ་གལ་ཏེ་ཡུལ་
[39b.3]ཐ་མི་དད་པའི་ཕྱིར་ལྐོག་ཤལ་ལ་སོགས་པ་འདུས་པའི་ཤེས་པ་ཐ་མི་དད་པ་དེ་ལྟ་ན་ཡང་སྒྲ་ཙམ་ཐ་དད་པ་ཉིད་ཀྱིས་དཔེ་ཡིན་ཏེ་སྔ་མ་བཞིན་ནོ། །ཡང་ན་གང་གི་ཕྱིར་ལྐོག་ཤལ་ལ་སོགས་པ་འདུས་པ་ལ་ཡང་བ་ལང་ངོ་ཞེས་རྟོགས་ཏེ་བ་ལང་གི་བསྒྲུབ་པར་བྱ་བའི་དོན་སྒྲུབ་པ་ཉིད་དུ་ཁོང་དུ་ཆུད་
[39b.4]ནས་འཇུག་གི་ལྐོག་ཤལ་ལ་སོགས་པ་འདུས་པ་ཙམ་རྟོགས་པས་ནི་མ་ཡིན་ཏེ། དཔེར་ན་གཞན་ཡོད་པ་ཉིད་ལ་དངོས་པོ་མེད་པ་ཞེས་རྟོགས་ནས་དབེན་པ་དོན་དུ་གཉེར་བ་འཇུག་པ་བཞིན་ཡིན་པ་དེའི་ཕྱིར་ཤེས་པ་ཐ་དད་པ་ཡོད་པ་ཉིད་དོ། །ཚུལ་འདིས་ནི་ཤེས་པ་དངོས་པོ་མེད་པ་དངོས་
[39b.5]པོ་དངོས་པོ་མེད་པའི་སྒྲུབ་པར་བྱེད་པ་ཡིན་པ་སྤོང་བ་གང་དག་དཔེ་མ་གྲུབ་པར་བརྗོད་པ་དེ་དག་གི་དཔེ་མ་གྲུབ་པར་རྒོལ་བ་དེ་ཡང་བསལ་བ་ཡིན་ནོ། །དེས་སྨོས་པ་ནི་དེ་ལྟ་ཡིན་དང་ཞེས་བྱ་བ་ཡིན་ནོ། །གལ་ཏེ་དངོས་པོ་མེད་པ་མི་དམིགས་པ་གཅིག་པུའི་ཚད་མ་ཅན་ཡིན་ན་གང་གི་
[39b.6]དེར་མི་དམིགས་པ་ཡོད་པ་ན་དངོས་པོ་མེད་པར་རྟོགས་པ་ནས་གཞན་དུ་དེ་ལྟར་རྟོགས་པར་བྱེད་པ། གང་དུ་ཡང་འདི་ཚད་མ་གཞན་གྱི་སྤྱོད་ཡུལ་གྱི་ངོ་བོར་གྱུར་པ་མེད་དོ། །དེ་ལྟ་ཡིན་དང་འདི་ནི་ཚད་མ་གཞན་ཉིད་དོ་ཞེ་ན། གལ་ཏེ་མི་དམིགས་པ་བཞིན་དུ་མངོན་སུམ་གྱིས་ཀྱང་
[39b.7]དངོས་པོ་མེད་པ་མ་རྟོགས་ན་དེ་ལྟར་འགྱུར་རོ། །དེ་ལྟ་ཡིན་དང་ཚད་མ་གཞན་གྱི་ཡུལ་ཉིད་དུ་སྲིད་པའི་ཕྱིར་དཔེ་མ་གྲུབ་པ་མ་ཡིན་ནོ། །ཚད་མ་གཞན་གྱི་ཡུལ་དུ་སྨྲ་བས་ཀྱང་དེའི་ཡུལ་ཅན་གྱི་རྣམ་པར་ཤེས་པ་མ་བཀག་པར་ནི་རང་དབང་དུ་དངོས་པོ་དངོས་པོ་མེད་པར་རྟོགས་པར་ནུས་པ་
[40a]
[40a.1]མ་ཡིན་ཏེ། ཚད་མས་གྲུབ་པ་སྨྲ་རྣམས་ཀྱི། དོན་གྱིས་བཟློག་པ་ཉིད་ལས་མ་གྲུབ་པ་ཡིན་ཞེས་གང་འཆད་པར་འགྱུར་རོ། །ཤེས་པ་ཡང་དེའི་རྣམ་པར་ཤེས་པ་མ་བཀག་པར་དགག་པར་མི་ནུས་སོ། །རྣམ་པར་ཤེས་པ་ཡོད་དམ། འོན་ཏེ་མེད་ཅེས་ཤེས་པར་འདོད་པ་དེའི་
[40a.2]གསལ་བ་ཚོལ་བ་ཉིད་འཇུག་པ་ལ་རྣམ་པར་ཤེས་པ་སྣང་བ་མེད་པའི་ཕྱིར་མེད་དོ་ཞེས་བྱ་བ་ཡིན་ནོ། །དེས་ན་དེར་ཡང་མི་དམིགས་པ་ཚོལ་བ་ན་ཐུག་པ་མེད་པར་འགྱུར་ཏེ། ཇི་སྐད་བཤད་པ་བཞིན་ནོ། །འོན་ཏེ་ཤེས་པ་མེད་པ་མངོན་སུམ་གྱིས་གྲུབ་ན་ཚད་མ་གཞན་གྱི་ཡུལ་ཉིད་བསལ་བའི་ཕྱིར་ཇི་སྐད་
[40a.3]བཤད་པའི་ཡུལ་ཉིད་རྗེས་སུ་རྟོགས་པར་བྱའོ། །གལ་ཏེ་མི་དམིགས་པ་བཞིན་དུ་གཞན་ཡོད་པས་དངོས་པོ་དངོས་པོ་མེད་པར་གྲུབ་པ་ཉིད་ཡིན་པ་དེའི་ཕྱིར་ཚད་མ་གཞན་གྱི་ཡུལ་མ་ཡིན་པ་དང་རྗེས་སུ་འབྲེལ་པ་ཅན་དཔེ་མ་གྲུབ་པ་ཡོད་ན། འོ་ན་ནི་མི་དམིགས་པ་འཇུག་པ་ལ་མི་ལྟོས་པར་འགྱུར་ཏེ་
[40a.4]མངོན་སུམ་གྱིས་གྲུབ་པའི་ཕྱིར་རོ། །དེས་ན་ཉེས་པ་འདིར་མི་འགྱུར་བར་བྱ་བའི་ཕྱིར་མི་དམིགས་པ་ཙམ་སྒྲུབ་པར་བྱེད་པ་ཡིན་པར་བརྗོད་པར་བྱའོ། །དེ་ལྟ་ཡིན་དང་དཔེ་མ་གྲུབ་པ་ཉིད་དེ་མངོན་སུམ་གྱི་གྲུབ་པ་ལ་ཡང་མ་རྟོགས་པ་མི་འཐད་པའི་ཕྱིར་དང་དེ་མེད་ན་ཡང་གཏན་ཚིགས་ཉེ་བར་ལེན་པ་མི་འཐད་
[40a.5]པའི་ཕྱིར་རོ་ཞེ་ན། ཡུལ་རྟོགས་སུ་ཟིན་ཀྱང་ཞེས་སྨོས་སོ། །གལ་ཏེ་གཞན་ཡོད་པས་དངོས་པོ་མེད་པའི་བློར་འགྱུར་བ་དེ་ལྟ་ན་ཡང་གང་དག་དེ་ལ་ཡང་དངོས་པོ་མེད་པར་མ་རྟོགས་པ་འགའ་ཞིག་ཡོད་པ་ཡིན་ཏེ། ཇི་ལྟར་འདི་ནི་བློན་པོ་རྣམས་ཀྱི་གཙོ་བོ་ཡོད་པ་སྐྱེ་བར་སེམས་པས་འོ་མ་ལ་དམིགས་པའི་
[40a.6]མཚན་ཉིད་དུ་གྱུར་པའི་མི་དམིགས་པའི་ཞོ་མེད་པར་མ་རྟོགས་པ་བཞིན་ནོ། །དེའི་ཕྱིར་མངོན་སུམ་ཉིད་ཡིན་ཡང་མི་དམིགས་པ་ལ་ལྟོས་པ་ཡོད་པའི་ཕྱིར་གང་ལས་དཔེ་མ་གྲུབ་པར་འགྱུར་བ་དེ་གཅིག་པུ་ནི་སྒྲུབ་བྱེད་དུ་བརྗོད་པ་མ་ཡིན་ནོ། །ཤེས་པ་ལ་སོགས་པ་དག་ནི་དམིགས་པ་སྔོན་དུ་འགྲོ་བ་ཅན་
[40a.7]ཡིན་པའི་ཕྱིར་མི་དམིགས་པ་གཉིས་ཡོད་པའི་ཤེས་པ་འགོག་པའི་འབྲས་བུ་ཅན་ཉིད་དུ་ཁྱད་པར་མེད་པར་བརྗོད་པ་ཡིན་ནོ། །དེ་འདིར་གཞུང་གཟུགས་པའི་ཕྱིར་དེ་ལྟར་ཞེས་སྨོས་སོ། །ཚུལ་འདིས་ནི་མི་དམིགས་པ་འདི་གཉིས་ནི་ཡོད་པའི་ཐ་སྙད་དགག་པའི་འབྲས་བུ་ཅན་ཉིད་དུ་འདྲའོ། །མྱོང་བའི་རང་
[40b]
[40b.1]བཞིན་མ་ཡིན་པའི་རྣམ་པར་ཤེས་པ་ནི་འགའ་ཡང་ཡོད་པར་མི་སྲིད་དོ། །དེས་ན་འགའ་ཞིག་མྱོང་བཞིན་པའི་རྣམ་པར་ཤེས་པ་མི་དམིགས་པ་གཉིས་སུ་བརྗོད་པ་འཐོབ་བོ། །དེ་ནི་རང་གི་ཡུལ་ལས་ཐ་དད་པ་གཞན་ཐམས་ཅད་མི་དམིགས་པ་ན་དེ་སྣང་བ་དང་མི་སྣང་བ་ན་རྣམ་པ་གཉིས་ལས་མི་འདའ་བའི་ཕྱིར་
[40b.2]དེ་དག་དེར་མི་དམིགས་པ་རྣམ་པ་གཉིས་སུ་འགྱུར་བ་ཡིན་ནོ། །དེ་ལྟར་གཉི་ག་ཡང་ཡོད་པའི་ཐ་སྙད་དགག་པ་སྒྲུབ་པར་བྱེད་པ་ཡིན་ནོ། །དེ་ལྟར་ཞེས་བྱ་བས་ནི་རྣམ་པ་འདིར་བརྗོད་པ་ཡིན་ནོ། །རྣམ་པ་དེ་ཡང་གང་ཞེ་ན་རང་དང་བཟློག་པའི་རྒྱུ་མེད་པ་དང་ཡོད་པ་དག་གི་ཕྱིར་ཞེས་སྨོས་སོ། །བལྟར་
[40b.3]མི་རུང་བ་མི་དམིགས་པ་གཅིག་ལ་ནི་ཡོད་པའི་ཐ་སྙད་རང་གི་རྒྱུ་དམིགས་པ་མེད་ལ། བལྟར་རུང་བ་དམིགས་པ་ལ་ནི་བཟློག་པ་མེད་པའི་ཐ་སྙད་ཀྱི་རྒྱུ་སྣང་བ་མི་དམིགས་པ་ཡོད་པ་ཡིན་ནོ། །བཟློག་པའི་རྒྱུ་ཡང་ཡོད་པའི་ཐ་སྙད་ཀྱི་རྒྱུ་མེད་པར་གྲུབ་པ་ཉིད་དེ། དེ་ལྟ་མ་ཡིན་ན་དེ་ལས་བཟློག་པའི་རྒྱུ་ཡོད་
[40b.4]པ་ཉིད་དུ་མི་འགྲུབ་པའི་ཕྱིར་རོ། །བཟློག་པའི་རྒྱུ་ཡོད་པར་བསྟན་པ་ནི་དེའི་རྒྱུ་མེད་པར་བསྟན་པ་ཉིད་ཀྱི་དོན་ཏེ་གཞན་དུ་ན་གཉི་གར་ཡང་ཡོད་པའི་ཐ་སྙད་འགོག་པར་མཚུངས་པ་ཉིད་དུ་བརྗོད་པ་ན་ཡོད་པའི་ཐ་སྙད་ཀྱི་རྒྱུ་མེད་པ་ཉིད་བརྗོད་པར་བྱ་བར་འགྱུར་བ་དེས་ན། མེད་པའི་ཐ་སྙད་ཀྱི་རྒྱུ་ཡོད་པར་ཐ་སྙད་
[40b.5]པར་ཅི་བྱ། དེ་ཉིད་ཀྱི་ཕྱིར་བཟློག་པའི་སྒྲ་ཉེ་བར་བཀོད་དོ། །རྒྱུ་མེད་པ་ཉིད་དུ་བརྗོད་པར་བྱ་བ་ལས་འདི་ལྟར་བརྗོད་པ་གང་ཡིན་པ་དེས་ནི་སྣང་བ་མི་དམིགས་པ་གཉི་གའི་སྒྲུབ་པར་བྱེད་པ་ཡིན་པ་བསལ་བའི་ཕྱིར་རོ། །འདི་མེད་པའི་ཐ་སྙད་དེའི་རྒྱུ་ཡོད་པ་ལས་བྱེད་པ་དང་། ཡོད་པའི་ཐ་སྙད་དེའི་རྒྱུ་མེད་པ་
[40b.6]ལས་འགོག་པ་ནི་མ་ཡིན་ཏེ། བྱེད་པ་གཉིས་མེད་པའི་ཕྱིར་རོ། །འོན་ཀྱང་མེད་པའི་ཐ་སྙད་གྲུབ་པ་ཉིད་ཡོད་པའི་ཐ་སྙད་བཀག་པ་ཡིན་ཏེ། དེ་གྲུབ་ན་དེ་འཇུག་པར་དོགས་པ་མེད་པའི་ཕྱིར་རོ། །དེས་ན་འདིའི་ཡོད་པའི་ཐ་སྙད་འགོག་པའི་ཚུལ་མི་འདྲ་བ་ཡིན་ཏེ། དེ་ལས་བཟློག་པ་སྒྲུབ་པའི་སྒོ་ནས་རབ་ཏུ་སྒྲུབ་
[40b.7]པའི་ཕྱིར་རོ། །གང་གི་ཕྱིར་ས་ཕྱོགས་དམིགས་པ་ཉིད་བལྟར་རུང་བ་དང་མི་རུང་བ་བུམ་པ་དང་ཤ་ཟ་ལ་སོགས་པ་དེ་དམིགས་པའི་རང་བཞིན་ཡིན་པ་དེའི་ཕྱིར་འདི་ནི་མི་དམིགས་པ་གཅིག་ཉིད་ཡུལ་གཉིས་ལ་ལྟོས་ནས་བལྟར་རུང་བ་དང་མི་རུང་བ་མི་དམིགས་པའི་རང་བཞིན་གྱིས་རྣམ་པ་གཉིས་སུ་གནས་པ་ཡིན་
[41a]
[41a.1]ནོ། །དེས་ན་ཇི་ལྟར་འདི་ཉིད་སྣང་བ་མི་དམིགས་པའི་ངོ་བོ་ཉིད་ཡིན་པ་ན་བསྒྲུབ་པར་བྱ་བ་བུམ་པ་མེད་པའི་རང་བཞིན་ཡིན་པ་དེ་བཞིན་དུ། འདི་ཉིད་ཤ་ཟ་ལ་སོགས་པ་ཡོད་པའི་ཤེས་པ་དང་སྒྲ་ལ་སོགས་པ་མེད་པ་ཡིན་ནོ། །སྒྲུབ་པ་དང་བསྒྲུབ་པར་བྱ་བའི་དངོས་པོ་ནི་རྣམ་པར་
[41a.2]གནས་པའི་རང་བཞིན་གྱི་དོན་གྱི་མཐར་ཐུག་པ་ཡིན་ནོ། །དེས་ན་ཡོད་པའི་ཐ་སྙད་བཀག་པ་ནི་དངོས་པོ་མེད་པ་ཉིད་ཀྱིས་བསྒྲུབ་པར་བྱ་བ་མ་ཡིན་ནོ། །འཇུག་པ་མེད་པ་ནི་འདིའི་འབྲས་བུ་མ་ཡིན་ཏེ། དེ་ནི་ཤེས་པར་བྱེད་པའི་ཆོས་མ་ཡིན་པའི་ཕྱིར་རོ། །འཇུག་པར་བྱ་བ་མ་ཡིན་པའོ་ཞེས་བྱ་བ་ཡང་ཚད་
[41a.3]མའི་བྱེད་པ་མ་ཡིན་ནོ། །དེའི་ཚེ་དེར་བསྒྲུབ་པར་བྱ་བ་གང་ཞིག་ཡིན། འཇུག་པའམ་དེ་མེད་པའམ་བྱ་བའི་དོན་ཡིན་ནོ། །འགའ་ཡང་སྲིད་པ་མ་ཡིན་ཏེ། མི་འདོད་པའི་ཕྱིར་དང་བསྒྲུབ་བྱ་མ་ཡིན་པའི་ཕྱིར་དང་བརྡ་ལས་བྱུང་བའི་སྒྲ་ལ་བརྟེན་པ་ཉིད་ཀྱི་དངོས་པོ་མ་ཡིན་པའི་ཕྱིར་རོ། །དེའི་ཕྱིར་ཡོད་
[41a.4]པའི་ཐ་སྙད་བཀག་པ་ནི་དངོས་པོ་ཉིད་ཡིན་ལ་དེ་ཡང་གང་ཡོད་ན་དེ་མི་སྲིད་པ་དེའི་བཟློག་ཟླར་གྱུར་པ་ཉིད་དོ། །དེ་ཡང་ཕྱོགས་ལ་སོགས་པ་དམིགས་པ་ཉིད་དོ། །ཤེས་པ་དང་ཤེས་བྱའི་རང་བཞིན་ནི་མི་སྣང་བ་མ་དམིགས་པས་ནི་ཡོད་པའི་ཐ་སྙད་མེད་པ་ཡིན་ཏེ། དེ་ལ་མི་སྣང་བ་མི་རྟོགས་པའི་ཕྱིར་
[41a.5]དང་ཡོད་པའི་ཐ་སྙད་མི་སྲིད་པའི་ཕྱིར་རོ། །འོ་ན་དེ་གྲུབ་པའི་ཕྱིར་བསྒྲུབ་བྱ་མ་ཡིན་ནོ་ཞེ་ན། དེ་ལྟར་ཡིན་མོད་འོ་ན་སྒྲུབ་པའི་བྱེད་པ་རྟོགས་པའི་མཐར་ཐུག་པ་ཡིན་པའི་ཕྱིར་ཤེས་པ་ལ་སོགས་པ་མེད་པའི་ཐ་སྙད་ཉིད་བསྒྲུབ་བྱར་འགྱུར་རོ་ཞེ་ན། རིགས་པ་བརྗོད་པ་ན་གལ་ཏེ་ཚེ་དང་ལྡན་པས་དེ་ལྟར་རྟོགས་ན་དེ་
[41a.6]འདོད་པ་ཁོ་ནའོ། །རང་དང་བཟློག་པའི་རྒྱུ་མེད་པ་དང་ཡོད་པ་ཉིད་སྟོན་ཏེ། བལྟར་མི་རུང་བ་མི་དམིགས་པ་གཅིག་ལ་ནི་ཡོད་པར་ཐེ་ཚོམ་ཡོད་པའི་ཕྱིར་ལ། མི་དམིགས་པ་གཞན་ལ་ནི་བཟློག་པའི་ཕྱིར་དེ་མེད་དོ་ཞེས་རྟོགས་པའི་ཕྱིར་རོ། །གལ་ཏེ་འདིར་ཡོད་པའི་ཐ་སྙད་ཀྱི་རྒྱུ་ཡོད་ན་ནི་ཐེ་ཚོམ་ཡོད་པར་མི་འགྱུར་
[41a.7]རོ། །དེས་ན་འབྲས་བུ་མེད་པའི་ཕྱིར་འདིར་རང་གི་རྒྱུ་མེད་པར་བརྗོད་པ་ཡིན་ནོ། །ཕྱི་མར་ཡང་བཟློག་པའི་རྟོགས་པ་ཡོད་པ་ཉིད་ཀྱིས་བཟློག་པའི་རྒྱུ་ཡོད་པར་བསྒྲུབ་པ་ཡིན་ནོ། །གལ་ཏེ་མི་སྣང་བ་མི་དམིགས་པ་ལ་མེད་པའི་ཐ་སྙད་ཀྱི་རྒྱུ་མེད་པ་ཡོད་པ་ཉིད་དེ་དེ་ལ་སྣང་བ་མི་དམིགས་པ་མེད་པའི་ཕྱིར་དང་། དེའི་
[41b]
[41b.1]རྒྱུ་ཡང་དེ་ཉིད་ཡིན་པའི་ཕྱིར་རོ། །དེས་ན་མེད་པའི་ཐ་སྙད་དགག་པའི་འབྲས་བུ་ཅན་དུ་ཡང་བརྗོད་པར་བྱ་བ་ཡིན་ནོ་ཞེ་ན། བདེན་ཏེ་བཀོད་པ་ནི་ཉེ་བར་བསྟན་པའི་དོན་ཡིན་པའི་ཕྱིར་བརྗོད་པ་ཁོ་ནའོ། །རིགས་པ་བརྗོད་པ་ན་དེ་དང་ཁྱད་པར་མེད་པ་མ་བརྗོད་ཀྱང་མི་རྟོགས་པ་ནི་མ་ཡིན་ནོ། །མི་དམིགས་པ་གཉིས་
[41b.2]པོ་དེ་ལ་མི་སྣང་བ་མི་དམིགས་པ་ནི་ཇི་སྐད་བརྗོད་པའི་དོན་ཉིད་ལ་ཚད་མ་ཡིན་གྱི། གཏན་ཚིགས་ཀྱི་ལྡོག་པ་མཐོང་བ་དང་། སྩོགས་པའི་སྒྲས་སེམས་འདོད་ཆགས་དང་བྲལ་བ་ལ་སོགས་པ་མེད་པར་བསྒྲུབ་པ་ལ་ཉེ་བར་སྦྱོར་བ་ནི་མ་ཡིན་ནོ། །ཅིའི་ཕྱིར་ཞེ་ན། ཐེ་ཚོམ་ཡོད་པའི་ཕྱིར་རོ། །མ་རྟོགས་པ་
[41b.3]ཙམ་གྱིས་ནི་འདོད་ཆགས་དང་བྲལ་བའི་སེམས་སམ། བསྒྲུབ་པར་བྱ་བ་མེད་པ་ལ་གཏན་ཚིགས་མེད་དོ་ཞེས་ངེས་པ་ཡོད་པ་མ་ཡིན་ནོ། །གཉིས་པ་ནི་གཏན་ཚིགས་ཀྱིས་ལྡོག་པ་དང་དོན་གཞན་མེད་པ་ལ་སོགས་པ་བསྒྲུབ་པ་དེ་ལ་ཚད་མ་ཡིན་ཏེ། ངེས་པའི་འབྲས་བུ་ཅན་ཡིན་པའི་ཕྱིར་རོ། །ངེས་
[41b.4]པའི་འབྲས་བུ་ཅན་ཉིད་ཚད་མ་ཡིན་ནོ་ཞེས་བྱ་བར་བསམ་པའོ། །གལ་ཏེ་ལྡོག་པ་ནི་རང་བཞིན་མི་དམིགས་པ་ལས་མ་ཡིན་ཏེ། འོན་ཀྱང་རྒྱུ་དང་ཁྱབ་པར་བྱེད་པ་མི་དམིགས་པ་དག་ལས་མ་ཡིན་ནམ་ཞེ་ན། བདེན་ན་འོན་ཀྱང་དེའི་ཁོངས་སུ་འདུས་པའི་ཕྱིར་དེ་གཉིས་འདི་ལྟར་བསྟན་པ་ཡིན་ཏེ།
[41b.5]དེའི་རིགས་ཅན་དེ་ཉིད་ཀྱི་ཁོངས་སུ་བསྡུས་པར་བསྟན་པའི་ཕྱིར་རོ། །དེ་ཡང་ཞེས་བྱ་བ་ནི་གཉིས་པ་སྣང་བ་མི་དམིགས་པ་ཡིན་གྱི་དང་པོ་ནི་མ་ཡིན་ནོ་སྙམ་དུ་བསམ་པའོ། །རྣམ་བཞི་ཞེས་བྱ་བ་ནི་དབྱེ་བ་བཞིའོ། །འདིའི་དབྱེ་བ་ཉིད་དུ་བསྟན་པ་གང་ཡིན་པ་དེ་དག་སྒྲུབ་པར་བྱེད་པ་གཞན་ཉིད་དུ་ཅི་སྟེ་མི་གཞག །
[41b.6]མི་དམིགས་པའི་དབྱེ་བ་ཉིད་དུ་ཅིའི་ཕྱིར་གཞག་ཅེ་ན། སྦྱོར་བའི་བྱེ་བྲག་གིས་ཞེས་སྨོས་ཏེ་འདིར་སྦྱོར་བ་ཁོ་ན་ཐ་དད་ཀྱིས་སྦྱར་བར་བྱ་བ་ནི་མ་ཡིན་པའི་ཕྱིར་དེ་ཐ་དད་མེད་པས་གཅིག་ཉིད་དོ། །སྦྱོར་བ་གཞན་ཉིད་ཀྱིས་ནི་རྣམ་པ་དུ་མ་ཙམ་ཉིད་པས་དེ་ཇི་ལྟར་སྒྲུབ་བྱེད་གཞན་ཉིད་ཡིན། རྣམ་པའི་བྱེ་བྲག་དེ་ཉིད་
[41b.7]བཤད་པ་ནི་འགལ་དང་འབྲས་བུ་དག་ཅེས་བྱའོ། །འགལ་བ་ཉིད་ནི་རང་ཉིད་འཆད་པར་འགྱུར་རོ། །འབྲས་བུ་ཞེས་བྱ་བ་ཡང་ལྟོས་པའི་རང་བཞིན་ཏེ། དེས་ན་གང་གིས་འབྲས་བུ་ཞེས་ལྟོས་པ་དང་བཅས་པ་ནི་སྐབས་སུ་བབ་པའི་འགལ་བ་ཉིད་ལ་ལྟོས་པར་བྱ་བ་ཡིན་ནོ། །དེས་ན་འགལ་བ་དང་འབྲས་བུ་
[42a]
[42a.1]དག་གྲུབ་ཅེས་བྱ་བ་ནི་འགལ་བ་དམིགས་པ་དང་འགལ་བའི་འབྲས་བུ་དམིགས་པ་ཡིན་ནོ། །རྒྱུ་དང་ངོ་བོ་ཁྱབ་པར་བྱེད་པར་མ་གྲུབ་པའོ། །བལྟར་རུང་བའི་བདག་ཉིད་ཅེས་བྱ་བ་ནི་ཁྱད་པར་རོ། །མེད་དོན་ཞེས་བྱ་བ་ནི་བསྒྲུབ་བྱ་བསྟན་པའོ། །དེ་ལྟར་ན་ཐ་སྙད་ཀྱི་དོན་ཅན་ཉིད་
[42a.2]བསལ་བ་ཡིན་ནོ་ཞེས་བྱ་བར་ནི་མི་ནུས་ཏེ། རང་བཞིན་མི་དམིགས་པ་ཉམས་པའི་ཕྱིར་ཏེ། གཅིག་ཉིད་ལ་སྒྲུབ་པ་དང་དགག་པ་མི་རུང་བའི་ཕྱིར་རོ། །དངོས་པོ་མེད་པ་གྲུབ་པ་ནི་དེ་རྟོགས་པ་ཡོད་པ་མེད་ན་ནི་མི་འབྱུང་བ་ཡིན་ལ། ཐ་སྙད་ཀྱང་དེ་ཉིད་ཡིན་ནོ། །དེས་ན་དགག་པར་མི་ནུས་པས་
[42a.3]བསྡུ་བ་ཉིད་རིགས་སོ། །མི་དམིགས་པ་ཉིད་རྗེས་སུ་འཇུག་པ་དེའི་རྣམ་པ་ཉིད་གཞུང་གཟུགས་པའི་ཕྱིར་དགག་པ་གང་ཇི་སྙེད་པ་ཞེས་སྨོས་སོ། །མེད་ན་མི་འབྱུང་བའི་རྟགས་ཀྱིས་ནི་དགག་པ་དང་རྗེས་སུ་དཔག་པར་ནུས་པ་མ་ཡིན་ཏེ། ངོ་བོ་མེད་པས་ཡུལ་གྱི་དངོས་པོར་འགལ་བའི་ཕྱིར་རོ། །འོན་
[42a.4]ཏེ་གཞན་གྱི་དངོས་པོས་བདག་ཉིད་ཀྱང་མེད་པ་རྗེས་སུ་དཔག་པར་བྱ་བ་ཡིན་ནོ་ཞེ་ན། དངོས་པོ་གཞན་རྟོགས་པ་ཉིད་དུ་འགྱུར་གྱི། དགག་པ་རྟོགས་པ་ནི་མ་ཡིན་ནོ། །འོན་ཏེ་གང་རྟོགས་པ་ན་མེད་དོ་ཞེས་རྟོགས་པར་འགྱུར་བའི་གཞན་གྱི་དངོས་པོ་རྗེས་སུ་དཔག་པར་བྱ་བ་ཡིན་ནོ་ཞེ་ན། འོ་ན་དེ་ནི་གང་ཡོད་
[42a.5]ན་མེད་དོ་ཞེས་རྟོགས་པ་ཡོད་པར་མི་འཐད་པ་དེ་ལྟ་བུ་ལས་རྟོགས་པ་ཡིན་ནོ། །དེ་ལྟ་ཡིན་དང་རྟོགས་པར་བྱ་བ་བཞིན་དུ་རྟོགས་པར་བྱེད་པ་དེ་མི་མཐུན་པའི་ཟླ་བོ་ཉིད་དོ། །མི་མཐུན་པའི་ཟླ་མ་ཡིན་པ་གཞན་ཡོད་པར་རྟོགས་པས་ནི་མེད་དོ་ཞེས་བྱ་བར་འགྱུར་བ་མ་ཡིན་ནོ། །མི་མཐུན་པའི་ཟླ་བོ་ཡང་དེ་
[42a.6]ཡོད་ན་དེ་མི་འཐད་པ་ཉིད་ཡིན་པའི་དེ་ནི་དེ་རྟོགས་པར་བྱེད་པ་ཡང་ཡོད་པ་མ་ཡིན་ཏེ། དེ་ལྟ་མ་ཡིན་ན་རྟོགས་པར་བྱེད་པ་ཉིད་དུ་མི་འགྲུབ་པའི་ཕྱིར་རོ། །གང་ཡོད་ན་དེ་ཡང་མི་སྲིད་པ་དེ་ཡོད་ན་དེ་དམིགས་པ་ཡོད་མི་སྲིད་པའི་ཕྱིར་དེ་དམིགས་པ་མེད་པ་ཡང་དེ་ཉིད་ཡིན་ནོ། །དེ་ན་དགག་པ་ཇི་སྙེད་པ་དེ་
[42a.7]ཐམས་ཅད་ནི་མི་དམིགས་པ་ཁོ་ན་ཡིན་ནོ། །ད་ནི་ཐ་ན་ཤེས་པ་མེད་པ་རྟོགས་པ་ན་མངོན་སུམ་ཇི་ལྟར་མི་དམིགས་པ་ཡིན། འདི་ནི་དགག་པ་མ་ཡིན་པ་མ་ཡིན་ན་དེ་ཇི་ལྟར་དགག་པ་གང་ཇི་སྙེད་པ་དམིགས་པ་ལས་ཡིན་ཞེས་བརྗོད་ཅེ་ན། བརྗོད་པ་གང་གིས་མངོན་སུམ་གྱིས་ཀྱང་དགག་པར་
[42b]
[42b.1]འགྱུར་བ་ལ་མངོན་སུམ་དངོས་པོ་མེད་པ་རྟོགས་པར་བྱེད་པ་ནི་མ་ཡིན་གྱི་འོན་ཀྱང་དངོས་པོ་གཞན་གྱི་མཚན་ཉིད་ཐ་དད་པ་ཉིད་དོ། །དངོས་པོ་མེད་པ་ནི་རྟོགས་པར་ནུས་པ་མ་ཡིན་ནོ། །གང་གི་དོན་དུ་འདི་རྟོགས་པ་དེ་ནི་དེ་རྟོགས་པ་མེད་ཀྱང་འགྲུབ་སྟེ། བུམ་པ་དང་བཅས་པའི་ཕྱོགས་ལས་
[42b.2]ཕྱོགས་ཙམ་གཞན་དུ་གྲུབ་ནས། དོགས་པ་མེད་པར་འགྲོ་བ་དང་། ཆུ་བཅུ་བ་དོན་དུ་གཉེར་བའི་འཇུག་པ་དང་ལྡོག་པ་དག་འཐད་པའི་ཕྱིར་རོ། །དེས་ན་མེད་པ་རྟོགས་པས་ནི་ཅི་ཡང་བྱར་མེད་དེ། དངོས་པོ་གཞན་རྟོགས་པ་ཉིད་ཀྱིས་དེའི་འབྲས་བུ་གྲུབ་པའི་ཕྱིར་རོ། །དེ་རྟོགས་པ་ན་མེད་དོ་སྙམ་
[42b.3]པའི་རྟོགས་པ་མཐོང་བ་ལས་བཟློག་པའི་རང་བཞིན་སྒྲོ་འདོགས་པ་རྣམ་པར་རྟོག་པའི་རྣམ་པར་སྐྱེ་བ་དེའི་ཐ་སྙད་ཀྱི་འབྲས་བུ་གང་ཡིན་པ་དེ་ཡང་གཞན་ཉིད་ལ་ཐེ་ཚོམ་མི་ཟ་བ་ན་མངོན་སུམ་ཉིད་ལས་སྐྱེ་བ་ཡིན་ཏེ། གང་གི་ཕྱིར་གཅིག་དམིགས་ཉམས་སུ་མྱོང་བ་ལས་ཞེས་བྱ་བ་ལ་སོགས་པས་བཤད་པ་
[42b.4]ཡིན་ནོ། །དེ་ལྟར་མ་ཡིན་ན་མྱོང་བས་ཡུལ་དུ་མ་བྱས་པ་རྣམ་པར་རྟོག་པས་མི་ནུས་པར་འགྱུར་རོ། །དེས་ན་མངོན་སུམ་ནི་དགག་པ་གྲུབ་པས་མཐར་ཕྱིན་པ་མ་ཡིན་གྱི། འོན་ཀྱང་གཞན་ནི་རབ་ཏུ་སྒྲུབ་པར་བྱེད་པ་ཉིད་དོ། །རྗེས་སུ་དཔག་པ་ཉིད་སྒྲུབ་པའི་བྱེད་པ་དགག་པའི་མཐར་ཐུག་པ་ཉིད་དེ་
[42b.5]བྱ་བའི་རྟོགས་པས་མཐར་འབྱིན་པའི་ཕྱིར་གཞན་ཡོད་པ་ནི་མངོན་སུམ་ཉིད་ཀྱིས་གྲུབ་པ་ཉིད་དོ། །དེར་དགག་པ་འཇུག་པ་ནི་གཞན་ཡོད་པ་ཚད་མའི་ཡུལ་དུ་གྱུར་པ་ཉིད་མེད་ན་མི་འབྱུང་བ་ཡིན་ནོ། །དངོས་པོ་མེད་པ་སྒྲུབ་པའི་ཕྱིར་ཁྱད་པར་བྱེད་པ་མི་དམིགས་པ་ལ་སོགས་པ་གང་དུ་གཞན་ཡོད་པ་
[42b.6]བསྒྲུབ་པར་བྱ་བ་ཡང་དགག་པའི་སྒོ་ཉིད་ཀྱིས་དེ་འཇུག་པ་ཡིན་ནོ། །དེས་ན་སྒྲུབ་པའི་བྱེད་པ་དགག་པས་མཐར་ཕྱིན་པ་ཅན་གང་ཡིན་པ་དེ་ནི་མི་དམིགས་པ་ཁོ་ནའོ། །དེ་ཉིད་ཀྱི་ཕྱིར་རྣམ་པར་ངེས་པའི། འདི་འགའ་ཞིག་ཏུ་དགག་པར་བྱེད་པ་ན་མངོན་སུམ་གྱིས་ནི་བྱ་བར་འོས་པ་མ་ཡིན་ཏེ་ཞེས་
[42b.7]བྱ་བའི་བར་དུ་དེ་ཡང་ལེགས་པར་དྲངས་པར་འགྱུར་རོ། །ཇི་སྐད་བཤད་པ་ཉིད་ཀྱི་དངོས་པོ་གཞུང་གཟུགས་པའི་ཕྱིར་འདི་ལྟར་ཞེས་སྨོས་སོ། །དགག་པ་དེ་ནི་རྣམ་པ་གཉིས་ཀྱིས་བྱེད་དེ་དངོས་པོ་འགའ་ཞིག་བསྒྲུབ་པས། དེ་ཡོད་པར་རྟོགས་པས་སམ། དགག་པ་སྟེ་མེད་པར་རྟོགས་
[43a]
[43a.1]པས་ཏེ་རྣམ་པ་གཞན་མེད་པའི་ཕྱིར་རོ། །རྣམ་པ་གཞན་མེད་པ་ཉིད་ཀྱིས་གཞན་ཡོད་པས་མེད་པ་རྟོགས་པ་ན་གཞན་དེ་འགལ་བའམ་མི་འགལ་བ་ཞིག་ཡིན་ཞེས་བསྒྲུབས་ན་ནི་ཞེས་སྨོས་སོ། །རེ་ཞིག་ཕྱོགས་ཕྱི་མ་ནི་མི་འཐད་དེ། གང་གི་ཕྱིར་མི་འགལ་བ་བསྒྲུབས་
[43a.2]ན་ནི་བཀག་པ་མ་ཡིན་ནོ། །ཅིའི་ཕྱིར་ཞེ་ན། ལྷན་ཅིག་ཡོད་པར་འགལ་བ་མེད་པའི་ཕྱིར་རོ། །དེ་གཉིས་ལྷན་ཅིག་གནས་པར་ཡོད་པ་འཐད་པའི་ཕྱིར་ཇི་ལྟར་དེ་དག་ལས་གཅིག་གིས་གཞན་འགོག་པར་འགྱུར། འགལ་བ་སྒྲུབ་པ་ཡང་མི་དམིགས་པ་མེད་པར་འགལ་བ་མི་རྟོགས་སོ། །འདི་
[43a.3]སྐད་བརྗོད་པ་ཡིན་ཏེ། འགལ་བ་བསྒྲུབ་པ་ནི་དགག་པའི་གཏན་ཚིགས་ཡིན་ནོ། །དེས་ན་འགལ་བ་ཡོད་པ་གཞན་མེད་པ་རྟོགས་པའི་གཏན་ཚིགས་ཡིན་ནོ། །དེ་ཡང་འགལ་བ་ཉིད་ཀྱིས་དེ་དང་མི་མཐུན་པའི་ཟླ་བོར་ནི་དེ་རྟོགས་པ་ཉིད་དེ། དེ་ཡོད་ན་དེ་མེད་པའི་ཕྱིར་རོ། །དེ་ཉིད་ཀྱི་ཕྱིར་
[43a.4]འདི་དགག་པའི་གཏན་ཚིགས་སུ་འགྱུར་རོ། །གང་གི་ཕྱིར་དགག་པའི་གཏན་ཚིགས་ཡིན་པ་དེ་ཉིད་ཀྱི་ཕྱིར་དེ་དང་མི་མཐུན་པའི་ཟླ་ཉིད་ཀྱང་ཡིན་ནོ། །ཇི་ལྟར་འགལ་བའི་ཕྱིར་དེ་ཡོད་པ་དང་མི་མཐུན་པ་དེ་བཞིན་དུ། དེ་དམིགས་པ་དང་མི་མཐུན་པ་དག་ཀྱང་ཡིན་ནོ། །དེ་ཡོད་ན་དེ་མེད་པའི་ཕྱིར་དེ་
[43a.5]དང་འགལ་བ་དེ་དེ་མེད་པར་སྒྲུབ་པར་བྱེད་པ་ཡིན་ལ། དེ་ཉིད་ཀྱི་ཕྱིར་དེ་དེ་དང་མི་མཐུན་པ་ཡིན་ནོ། །དེ་ཡོད་ན་དེ་དམིགས་པ་ཡང་མེད་པ་ཡིན་ཏེ། དེ་ཉེ་བར་གནས་ན་དེ་བཞིན་དུ་དེ་དམིགས་པ་ཡང་མེད་པའི་ཕྱིར་རོ། །དེ་ལྟར་དེ་དམིགས་པ་འབའ་ཞིག་ཏུ་མ་ཟད་ཀྱི། ཇི་སྲིད་དུ་དེ་ཡོད་ན་དེ་མེད་དོ་
[43a.6]ཞེས་རྟོགས་པར་བྱ་བའི་ཕྱིར་དེ་མི་དམིགས་པ་ལ་ཡང་ལྟོས་པར་བྱ་བ་ཡིན་ནོ། །དེ་ཡོད་པ་དམིགས་པ་དང་མི་མཐུན་པ་དེ་ཉིད་བསྟན་པའི་ཕྱིར་གཞུང་གཟུགས་པ་ནི་འདི་ལྟར་ཞེས་བྱ་བའོ། །རྒྱུན་ཆགས་པར་འཇུག་པ་ཅན་འབྱུང་བའི་དངོས་པོ་མེད་པའི་ཕྱིར་འགལ་བར་རྟོགས་སོ། །རྒྱུན་
[43a.7]ཆགས་པར་འཇུག་པ་ཉིད་བསྟན་པའི་ཕྱིར་དེའི་རྒྱུ་མཚན་སྨོས་པ་ནི་རྒྱུ་མ་གཏུགས་པ་ཅན་ཞེས་བྱའོ། །གང་གི་ཕྱིར་འདིའི་རྒྱུ་ཉེ་བར་ལེན་པ་སྔ་མའི་མཚན་ཉིད་གྲང་བའི་སྐད་ཅིག་གཉིས་པ་ལ་སོགས་པའི་རྒྱུན་འཕེན་པར་བྱེད་པ་ཡོད་པ་དེའི་ཕྱིར་ན་འདིའི་རྒྱུན་ཆད་པ་མེད་པ་ཡིན་ནོ། །འོ་ན་རྒྱུའི་ནུས་
[43b]
[43b.1]པས་བྱས་པའི་རྒྱུན་འཇུག་པ་མེད་པ་གང་ལས་ཤེ་ན། གཞན་ཡོད་ན་ཞེས་སྨོས་སོ། །དངོས་པོ་གཞན་མེ་ཡོད་ན་དེ་ཡོད་པའི་རྒྱུ་མཚན་གྱིས་སོ། །དེས་ན་རྒྱུན་ཆགས་པར་འཇུག་པའི་དངོས་པོ་འདི་ལྡོག་པ་དེ་ལས་ནི། འགལ་བར་རྟོགས་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རང་གི་རྒྱུ་
[43b.2]མེད་ན་འབྲས་བུ་མེད་པའི་ཕྱིར་དེ་ཉིད་རང་གི་འབྲས་བུ་ལྡོག་པར་བྱེད་པར་འགྱུར་གྱི། དངོས་པོ་གཞན་གྱིས་གོ་དངོས་པོ་གཞན་གྱིས་བསྐྱེད་པའི་དངོས་པོ་ཇི་ལྟར་བཟློག་ཅེ་ན། དངོས་པོ་གཞན་གྱིས་བསྐྱེད་པ་དངོས་པོ་གཞན་གྱིས་ཀྱང་བསྐྱེད་པ་ཇི་ལྟ་བར་རོ། །གལ་ཏེ་དངོས་པོ་གཞན་གྱིས་ཕན་
[43b.3]འདོགས་པ་ཉིད་ཀྱིས་དེ་དང་ལྷན་ཅིག་ཚོགས་པ་གཅིག་ཏུ་གྱུར་ནས་གཞན་གྱིས་སྐྱེད་པ་ལ་གཞན་ཉེ་བར་སྦྱོར་རོ་ཞེ་ན། གལ་ཏེ་དེ་ལྟ་ན་ཕན་པ་སྒྲུབ་པ་ཉིད་ཀྱིས་ཚོགས་པ་གཅིག་ཏུ་གྱུར་པས་གཉིས་པ་ལ་སོགས་པ་བསྐྱེད་པར་མི་ནུས་པ་སྐྱེད་པས་གཞན་བཟློག་པས་གཞན་ཡང་ཟློག་པར་བྱེད་པར་
[43b.4]འགྱུར་རོ། །ཕན་འདོགས་པས་ནི་སྐད་ཅིག་མར་འཇིག་པར་བསམ་པར་བྱའོ། །དྲོད་ཆུང་ངུ་འམ་སྣང་བ་ཆུང་ངུའི་ཕྱོགས་སུ་གྲང་བ་དང་མུན་པ་དག་ལྷན་ཅིག་ཏུ་གནས་པ་ཡང་ཡོད་པ་མ་ཡིན་ནམ། དེར་དྲོད་དམ་སྣང་བ་ཉིད་ཆུང་བ་ཡིན་ནོ་ཞེས་བྱ་བར་ནི་མི་ནུས་ཏེ། དེ་དང་མི་མཐུན་པ་ཡང་
[43b.5]དམིགས་པའི་ཕྱིར་རོ་ཞེ་ན། བརྗོད་པ་ཆུ་དང་འོ་མའམ་རིགས་མི་མཐུན་པའི་རྫས་ཀྱིས་དྲིའི་རྡུལ་ཕྲ་རབ་སོ་སོར་བྱེད་པ་དག་ཀྱང་འདྲེས་པར་གྱུར་པ་ཕན་ཚུན་བཟློག་པར་བྱ་བ་དང་། ཟློག་པར་བྱེད་པའི་དངོས་པོ་མེད་པར་ཡང་ཡོད་པ་ཡིན་ནོ། །དེ་ཉིད་ནི་ལྷན་ཅིག་གནས་པ་ཞེས་བརྗོད་དོ། །དྲོ་བའི་
[43b.6]རེག་པ་དང་མེ་དག་ནི་གྲང་བ་དང་མུན་པ་བཟློག་ནས་དེའི་ཡུལ་དུ་འོང་བ་ཡིན་ལ་དེ་མ་ནུས་པ་ལ་ལྟོས་ནས་མི་གནས་པར་འགྱུར་བ་ཡིན་ནོ། །དེས་ན་རང་གི་རྒྱུ་ནུས་པ་ཤིན་ཏུ་ཆུང་བ་དང་ལྡན་པས་མང་པོ་འབྱུང་བའི་ཕྱིར་མི་མཐུན་པའི་ཕྱོགས་ཅུང་ཟད་ཙམ་བཟློག་ཀྱང་ཉེ་བ་ཡིན་ཡང་གཞན་མ་བཟློག་པ་གང་
[43b.7]ཡིན་པ་དེ་ཙམ་གྱིས་ནི་འགལ་བ་མི་ཉམས་ཏེ། ཕྱིས་རང་གི་རྒྱུ་ལས་འཕེལ་བར་འགྱུར་བ་ན་རྣམ་པ་ཐམས་ཅད་དུ་སེམས་པའི་ཕྱིར་རོ། །དེས་ན་དེ་ལྟར་གཞན་ཡོད་ན་མེད་པ་རྟོགས་པའི་རྒྱུ་མཚན་ཡིན་ནོ། །དེས་ན་དེའི་རང་བཞིན་ཡང་གཞན་ཡོད་ན་དེ་མེད་པ་ཁོ་ན་ཡིན་ནོ། །དེ་ཉིད་ཀྱི་ཕྱིར་
[44a]
[44a.1]ལྷན་ཅིག་མི་གནས་པའི་མཚན་ཉིད་དུ་བསྟན་ཏོ། །གཞན་ཡོད་ན་མེད་པ་འགལ་བར་རྟོགས་པའི་རྒྱུ་ཡིན་མོད། མེད་པ་དེ་ཉིད་གང་ལས་རྟོགས་ཤེ་ན། དེ་ཡང་ཞེས་སྨོས་སོ། །མེད་པ་དེ་ཡང་མི་དམིགས་པ་ལས་ཡིན་ནོ། །མངོན་སུམ་ལས་ཀྱང་འགྱུར་བ་
[44a.2]མ་ཡིན་ནམ་ཞེ་ན། བདེན་ཏེ་མངོན་སུམ་ལས་ཡོད་དམ་མེད་ཅེ་ན་མི་བརྗོད་ཀྱི་འོན་ཀྱང་མངོན་སུམ་གྱིས་མེ་ཡོད་པ་ན་གྲང་བ་རྟོགས་པར་བྱ་བ་ན་ཡང་དེ་ན་གྲང་བ་མི་དམིགས་པ་ཡོད་པ་ཡིན་ནོ། །དེས་ན་དེ་དེ་ཡོད་པ་དང་འགལ་བ་ལྟར་དེ་དམིགས་པ་དང་ཡང་མི་མཐུན་པ་ཉིད་དོ། །དེས་
[44a.3]ན་འདི་སྐད་བརྗོད་པ་ཡིན་ཏེ། མེ་ཡོད་པ་ན་གྲང་བ་མི་དམིགས་པ་ཡོད་པ་ཡིན་ལ། དེ་ཡང་གཞན་ཡོད་པ་ཉིད་ཡིན་ནོ། དེ་ལྟ་ཡིན་དང་ཁྱིམ་ནང་གི་ནམ་མཁའི་ཆ་དྲོ་བས་ཁེངས་པ་རྟོགས་པ་ན་དྲོ་བ་དེ་ཡོད་པས་གྲང་བ་མི་དམིགས་པར་རྟོགས་པ་བཞིན་ནོ། །དེས་ན་དེ་ཉིད་དང་དེ་འགལ་བའི་
[44a.4]རང་བཞིན་ཉིད་ཀྱིས་དེ་མེད་པ་དང་མི་དམིགས་པའི་རང་བཞིན་ཡིན་ནོ། །ཕྱོགས་སམ་སྣང་བ་དེ་ཉིད་དེས་ན་དབེན་པ་ཡིན་ནོ། །སྣང་བ་ཡང་དེ་ལས་གཞན་ཉིད་ཀྱིས་དེ་ལྟར་རྣམ་པར་གཞག་གོ། །འདི་ནི་གཞན་ཡང་ཡིན་ལ། ཟློག་པར་བྱེད་པ་ཡང་ཡིན་པས་མེད་པ་ཤིན་ཏུ་གསལ་བ་ཁོ་ནའོ། །
[44a.5]དེའི་ཕྱིར་ཇི་ལྟར་འགལ་བ་རྟོགས་པ་ན་དེ་ལྟ་བུའི་ཡུལ་རྟོགས་པས་གྲང་བ་མེད་པ་ཁོང་དུ་ཆུད་པ་དེ་བཞིན་དུ་གྲུབ་པའི་འགལ་བ་སྒྲུབ་པ་ན་ཡང་གང་རྟོགས་པ་ན་སྔོན་མེད་དོ་ཞེས་བྱ་བར་མི་རྟོགས་པ་དེ་ཉིད་གྲུབ་ན་འགྱུར་བ་ཡིན་ནོ། །དེས་ན་སྔོན་བཞིན་དུ་ད་ལྟར་ཡང་དེ་མི་དམིགས་པ་ཉིད་ཁྱད་པར་
[44a.6]ཡོད་པ་མ་ཡིན་ནོ། །འདི་ནི་རིགས་པ་ཡིན་ཏེ་འདི་ལྟར་དགག་པའི་དོན་འགལ་བ་མཐོང་བས་རྟོགས་པར་མི་ནུས་ལ་གཞན་རྟོགས་ན་ནི་མེད་དོ་ཞེས་མི་རྟོགས་པར་མི་འགྱུར་རོ། །དེས་ན་གང་རྟོགས་ན་མེད་དོ་སྙམ་པར་འགྱུར་བ་དེ་རྟོགས་པར་བྱ་བ་ཡིན་ནོ། །དེས་ན་འདིར་མེ་འམ་མེའི་འབྲས་བུའམ།
[44a.7]གཞན་ཡང་རུང་སྟེ་རྟོགས་པ་ན་མེད་དོ་སྙམ་པར་འགྱུར་བའི་ཕྱིར་དེ་ཉིད་དམིགས་པ་ཡིན་ནོ། །གལ་ཏེ་དྲོ་བ་ནི་རེག་པ་གཅིག་པུའི་ཡུལ་ཡིན་པའི་ཕྱིར་དེ་ཡོད་པར་རྟོགས་ན་དམིགས་པའི་མཚན་ཉིད་ཀྱིར་གྱུར་པ་ཉིད་ཀྱི་གྲང་བ་མེད་པར་སྒྲུབ་པར་བྱེད་པར་འགྱུར་ཏེ། ཐག་རིང་པོར་ཡང་མེ་མཐོང་
[44b]
[44b.1]དུ་རུང་བའི་ཕྱིར་ལ་གྲང་བའི་རེག་པ་མ་ཡིན་པ་ནི་མ་ཡིན་ནོ་ཞེ་ན། བདེན་ཏེ་གཟུགས་དམིགས་ཀྱིས་རེག་པ་ནི་མ་ཡིན་ནོ། །དེ་ལྟར་གྱུར་པ་ནི་རེག་པ་ཡིན་པས་དེ་མི་དམིགས་པར་བརྗོད་པ་ཡིན་གྱི། གཟུགས་ནི་མ་ཡིན་ནོ་ཞེ་ན། དེ་དེ་བཞིན་ཁོ་ན་སྟེ་གཟུགས་བཟློག་པར་བྱ་བ་མ་
[44b.2]ཡིན་པས་འགལ་བ་མེད་པའི་ཕྱིར་མེ་ནི་རེག་པ་ཉིད་ཀྱིས་གྲང་བ་དང་འགལ་བ་ཡིན་ཡང་། འབར་བ་རྟོགས་ན་རེག་པ་ལ་ཡོད་པར་ཐེ་ཚོམ་ཟ་བ་ནི་མ་ཡིན་ནོ། །མངོན་སུམ་མམ་ཚོགས་པ་གཅིག་ལ་རག་ལས་པའི་རྗེས་སུ་དཔག་པས་ཀྱང་རུང་སྟེ་མངོན་པར་ཞེན་པས་ཀྱང་ཅི་བྱ།
[44b.3]རེག་པ་རྟོགས་པ་ཉིད་ཀྱིས་གྲང་བ་བཟློག་པ་ཡིན་ནོ། །ཡང་ན་འགལ་བ་དག་གིས་ཕྱོགས་དང་ཕྱོགས་ཅན་གྱི་ཞེན་པས་ཅི་བྱ་སྟེ་འགལ་བའི་འབྲས་བུ་ལ་སོགས་པ་ལ་དེ་མེད་པའི་ཕྱིར་འབར་བའི་བདག་ཉིད་ཀྱི་མེ་ཉིད་གྲང་བ་མེད་པ་ཡིན་མོད། ཇི་ལྟར་ཕྱོགས་ཉིད་ཀྱི་ཕྱོགས་བུམ་པ་
[44b.4]མེད་པ་ཡིན་པ་དེ་བཞིན་དུ་དེའི་རང་བཞིན་མ་ཡིན་ཡང་ཕྱོགས་དམིགས་པར་ཡང་འགྱུར་རོ། །དེ་ནི་དེ་ལྟར་ཡིན་ནོ་ཞེས་མི་མཐུན་པ་ཉིད་ལས་རྣམ་པར་གཞག་སྟེ། བུམ་པ་ཡོད་ན་ཕྱོགས་ཙམ་དམིགས་པ་མི་སྲིད་པའི་ཕྱིར་རོ། །དེས་ན་ཇི་ལྟར་ཕྱོགས་དམིགས་པ་རྟོགས་པ་ན་ཡང་བུམ་པ་མེད་པ་
[44b.5]རྟོགས་པ་དེ་བཞིན་དུ་མེ་དང་མེའི་འབྲས་བུ་གཞན་ལ་ཡང་འགྱུར་རོ། །དེས་ན་དེ་ཐམས་ཅད་མེད་དོ་སྙམ་པའི་རྟོགས་པའི་ཡུལ་དུ་འགྱུར་བ་ན་འདི་དག་འཇུག་པའི་དུ་བས་མེ་བཞིན་དུ་གང་ཡིན་དགག་པའི་དོན་ཉེ་བར་བསྒྲུབ་པ་མ་ཡིན་ནོ། །དེས་ན་འདི་ཐམས་ཅད་མི་དམིགས་པ་ཁོ་ནའོ། །འགལ་བ་
[44b.6]གཞན་ཡང་བཤད་པ་ནི་ཕན་ཚུན་དམིགས་པ་སྤངས་ཏེ། གནས་པའི་མཚན་ཉིད་ཀྱང་འགལ་བ་ཡིན་ནོ། །གང་དག་གི་དམིགས་པའི་རང་བཞིན་གང་ཡིན་པ་དེ་ནི་དེ་དག་གི་ཕན་ཚུན་སྤངས་ཏེ་གནས་པའི་རང་བཞིན་ཏེ། དེ་དམིགས་པ་ནི་གཞན་གྱིས་སྤངས་ལ་གཞན་དམིགས་པ་ཡང་དེ་སྤངས་པ་
[44b.7]དེའི་ཕྱིར་བདག་ཉིད་གཅིག་པར་མི་སྲིད་པ་འགལ་བ་ཞེས་བརྗོད་དོ། །དེ་དང་མི་མཐུན་པ་ཉིད་དུ་གྱུར་པ་རང་གི་བདག་ཉིད་ཀྱི་མཐར་ཐུག་པ་ཙམ་གྱིས་ངོ་བོ་ཉིད་ནི་དེར་དངོས་པོའི་རང་བཞིན་ནོ། །སྔ་མ་ལ་ནི་ལྷན་ཅིག་མི་སྲིད་པ་ལ་བརྟེན་པ་བཟློག་བྱ་ཟློག་བྱེད་ཀྱི་དངོས་པོ་མ་ཡིན་ལ། མི་སྲིད་པ་ནི་མི་
[45a]
[45a.1]འཐད་པ་ཙམ་གྱི་རང་བཞིན་ཉིད་ཀྱིས་དངོས་པོའི་རང་བཞིན་ཉིད་དུ་མ་གྲུབ་པའི་ཕྱིར་རོ། །འགལ་བ་ནི་དཔེར་ན་ཇི་ལྟ་བུ་ཞིག་ཅེ་ན། རྟག་པ་དང་མི་རྟག་པ་བཞིན་ནོ་ཞེས་སྨོས་སོ། །གལ་ཏེ་རྟག་པ་ལ་ནི་དམིགས་པ་འགའ་ཡང་མི་སྲིད་དོ། །དེ་ན་གང་ནའང་མེད་པའི་
[45a.2]ཕྱིར་རོ། །མི་རྟག་པ་ལ་ཡང་མ་ཡིན་ཏེ། མངོན་སུམ་གྱིས་མི་རྟོག་པའི་ཕྱིར་རོ། །རྗེས་སུ་དཔག་པ་ལ་ནི་དངོས་པོ་དམིགས་པ་མེད་པ་ཉིད་དོ། །དེས་ན་སྔོན་པོ་ལ་སོགས་པ་དམིགས་པ་རྟོགས་པ་དག་བཞག་སྟེ་གང་སྤངས་པས་འདི་གཉིས་ཀྱི་རང་བཞིན་གནས་པ་དང་པོར་བཀོད་པ་ཇི་
[45a.3]ལྟར་འདི་དག་དམིགས་པ་ཡིན་ཞེ་ན་བརྗོད་པ་དམིགས་པ་ཉིད་ཡོད་པ་རྣམས་ཀྱིས་ཡོད་པ་ཡིན་ནོ་ཞེས་གནས་པའི་ཐ་སྙད་བློ་ལ་བཞག་ནས་འདི་གཉིས་ཀྱི་རང་བཞིན་ཉིད་དམིགས་པའི་ཐ་སྙད་དུ་བརྗོད་དོ། །དེས་ན་ཕན་ཚུན་བདག་ཉིད་སྤངས་ཏེ་གནས་པའི་རང་བཞིན་ཉིད་འགལ་བ་ཡིན་ནོ་ཞེས་
[45a.4]བརྗོད་པ་ཡིན་ནོ། །འགལ་བ་འདི་ཚད་མ་གང་གིས་རྟོགས་པར་བྱ། རྒྱུ་ཡང་གང་ཞིག་ཡིན་ཞེ་ན། རེ་ཞིག་འདི་ལ་རྒྱུ་ནི་འགའ་ཡང་རྟོགས་པ་མེད་དེ། སྔོན་པོ་ནི་སྔོན་པོའི་བདག་ཉིད་ཡིན་ལ་སེར་པོ་ནི་སེར་པོའི་བདག་ཉིད་ཡིན་ནོ་ཞེས་བྱ་བ་དེ་དག་ཐ་དད་པའི་བདག་ཉིད་ནི་རང་གི་རྒྱུ་ཉིད་ལས་
[45a.5]བྱུང་བའི་ཕྱིར་རོ། །དེ་ཉིད་ཀྱི་ཕྱིར་སྒྲོ་བཏགས་པའི་གཅིག་དགག་པའི་ཕྱིར་གཅིག་པར་འགལ་ལོ་ཞེས་བརྗོད་དོ། །ཕན་ཚུན་ཐ་དད་པའི་ཚད་མ་ནི་བལྟར་རུང་བ་རྣམས་ལ་ནི། མཐོང་བ་ཉིད་གཅིག་འགོག་པའི་སྒྲུབ་བྱེད་ཡིན་ལ། བལྟར་མི་རུང་བ་རྣམས་ཀྱི་རང་བཞིན་ཐ་དད་པའི་འགལ་
[45a.6]བ་ནི་ཐེ་ཚོམ་ཟ་བ་ཉིད་དོ། །རང་གི་ངོ་བོ་ཡོད་ན་ཐ་དད་པ་ཡིན་ལ། ཐ་དད་པ་ཡང་འགལ་བ་ཡིན་པའི་ཕྱིར་རང་གི་ངོ་བོ་ལ་ཐེ་ཚོམ་ཟ་བ་ན་ཐེ་ཚོམ་མི་ཟ་བ་གཞན་ཅི་ཞིག་ཡོད། བལྟར་རུང་བ་དང་བལྟར་མི་རུང་བ་དག་ནི་བལྟར་རུང་བ་རང་ལས་བཟློག་པ་ལས་ཐ་དད་གྲུབ་ན་བལྟར་མི་རུང་བ་
[45a.7]གཞན་ལས་ཐ་དད་པར་མངོན་སུམ་གྱིས་གྲུབ་པ་ཉིད་དེ་ལས་འགལ་བ་མ་ཡིན་ནོ། །བལྟར་མི་རུང་བ་བལྟར་རུང་བ་དང་འགལ་བ་ནི་བལྟར་རུང་བ་ལས་གཞན་ཉིད་ཀྱིས་རྟོགས་པར་བྱེད་དོ། །གཞན་ཉིད་ཀྱང་ཐེ་ཚོམ་ཟ་བ་མ་ཡིན་ནམ་ཞེ་ན། བདེན་མོད་ཀྱི་བལྟར་མི་རུང་བ་གཞན་ཉིད་དུ་ཐེ་ཚོམ་
[45b]
[45b.1]ཟ་བ་བལྟར་རུང་བ་དང་བདག་ཉིད་གཅིག་པར་ཐེ་ཚོམ་ཟ་བ་ལས་སམ། མེད་པ་གཞན་ཉིད་མ་ཡིན་པའི་ཕྱིར་རང་གི་ངོ་བོ་ལས་ཐེ་ཚོམ་ཟ་བ་ལས་འགྱུར། བལྟར་རུང་བ་ཡོད་པ་ཐེ་ཚོམ་ཟ་བ་ལས་གཞན་དུ་ཐེ་ཚོམ་ཟ་བར་འགྱུར་མོད་ཀྱི། དེའི་ངོ་བོར་ཐེ་ཚོམ་ཟ་བ་ནི་མེད་དེ། རང་ལས་བཟློག་པ་
[45b.2]ཐམས་ཅད་ལས་ཐ་དད་པར་གྲུབ་པའི་ཕྱིར་རོ། །དེ་བཞིན་དུ་མི་རྟག་པ་ཉིད་རྗེས་སུ་དཔག་པ་ལས་གྲུབ་ན་དེ་རང་ལས་བཟློག་པ་ལས་ཐ་དད་པ་ཉིད་དུ་སྒྲུབ་པར་བྱེད་པའི་ཕྱིར་གལ་ཏེ་རྟག་པ་ཞེས་བྱ་བ་མེད་པ་དེ་ལྟ་ན་ཡང་དངོས་པོ་དང་དངོས་པོ་མེད་པ་འགལ་བའམ། ཇི་ལྟར་བརྟགས་བཞིན་པའི་
[45b.3]ལྡོག་པ་མེད་པའི་རང་བཞིན་ཅན་ཉིད་ཀྱི་མཚན་ཉིད་ཀྱི་བདག་ཉིད་དང་འགལ་བ་ཉིད་ལས་རབ་ཏུ་གྲུབ་པོ། །དེ་ཡང་ཐ་དད་པ་ལ་བརྟེན་པ་ཡིན་ཏེ། དཔེར་ན་སྔོན་པོ་ལ་སོགས་པ་དང་སེར་པོ་ལྟ་བུ་འམ། དེའི་རང་བཞིན་མ་ཡིན་པ་ཙམ་ལ་བརྟེན་པ་ཡིན་ཏེ། དཔེར་ན་རྟག་པ་དང་མི་རྟག་པ་འམ།
[45b.4]དངོས་པོ་དང་དངོས་པོ་མེད་པ་ལྟ་བུའོ། །ཐ་དད་པར་གྲུབ་པ་དེ་མ་ཐག་པ་ཅན་བལྟར་རུང་བ་བལྟར་མི་རུང་བའི་བདག་ཉིད་ཡིན་པ་བཀག་པ་ནི་བླུན་པོ་ལ་ཡང་མངོན་སུམ་གྱི་གཞི་ལས་མ་ཡིན་ནོ། །ཐ་དད་པའི་བལྟར་མི་རུང་བ་ནི་དགག་ཏུ་མེད་དོ། །དེ་དང་མཚན་ཉིད་མི་མཐུན་པ་ཉིད་ཀྱིས་
[45b.5]བལྟར་རུང་བ་ནི་རྨོངས་པ་ལ་སྣང་བ་མི་དམིགས་པ་ལས་ཡིན་ལ་གཞན་ལ་ནི་མངོན་སུམ་མ་ཡིན་ནོ་ཞེས་མང་དུ་བཤད་ཟིན་ཏོ། །འདི་ལ་གཞུང་ལུགས་ཤེས་པར་རློམ་པ་དག་ཀྱང་གོལ་བའི་ཕྱིར། དེ་གཞན་དུ་ལེགས་པར་བཀག་ཟིན་ཏོ། །འགལ་བ་འདི་ནི་འགལ་བ་བརྗོད་པའི་སྐབས་ཀྱི་འདིར་
[45b.6]བཤད་དོ། །དེ་ནི་རྣམ་པ་གཅིག་ཉིད་དུ་ཟད་དོ་ཞེས་ཤེས་པར་མི་འགྱུར་བར་བྱ་བའི་ཕྱིར་རོ། །མཚན་ཉིད་ལས་གྱུར་པའི་འགལ་བ་ཉེ་བར་མཁོ་བར་ལྷན་ཅིག་མི་གནས་པ་བཞིན་ནོ། །མཚན་ཉིད་ལས་གྱུར་པའི་འགལ་བ་གྲུབ་པས་འགལ་བ་དམིགས་པ་ཉིད་དུ་ཁས་ལེན་ན་རང་བཞིན་མི་
[45b.7]དམིགས་པ་ཡང་འགལ་བ་དམིགས་པ་ཉིད་དུ་འགྱུར་ཏེ། དེར་ཡང་གཞན་ཡོད་པ་ཉིད་ཀྱིས་མེད་པར་རྟོགས་པའི་ཕྱིར་རོ། །བདག་ཉིད་གཅིག་པ་དགག་པའི་དོན་དུ། དེ་དང་འགལ་བའི་རྒྱུ་སྒྲུབ་པ་འགལ་བ་དམིགས་པ་ཉིད་དུ་ཞེ་ན། ད་ནི་ཇི་ལྟར་དུ་མའི་བདག་ཉིད་འགོག་པ་ལྟར་རུང་
[46a]
[46a.1]བ་མ་མཐོང་བའི་ཕྱིར་རོ་ཞེ་ན། ད་དེ་མ་མཐོང་ངོ་ཞེས་བྱ་བ་ག་ལས། དེ་ལས་གཞན་རྟོགས་པ་དམིགས་པའི་ཕྱིར་རོ་ཞེ་ན། དེ་ལས་གཞན་རྟོགས་པ་ཡོད་ཀྱང་དེ་མེད་པའི་རེ་ཞིག་མི་གསལ་བ་མ་ཡིན་ནམ། ཕྱོགས་དམིགས་པ་ན་བུམ་པ་རྟོགས་པ་ཡོད་ན་
[46a.2]རིགས་པར་འགྱུར་ལ། མེད་ན་ནི་རིགས་པ་མེད་པར་འགྱུར་གྱི། རིགས་པ་མེད་དོ་ཞེས་བྱ་བར་མི་འགྲུབ་བོ། །དེས་ན་ཇི་ལྟར་ཤེས་པ་གཞན་ཡོད་ན་ཤེས་པ་གཞན་མེད་པར་རྟོགས་པར་འགྱུར། དེའི་ཕྱིར་བུམ་པ་དང་བཅས་པ་དང་བུམ་པ་མེད་པའི་ཕྱོགས་གཉིས་ཉིད་གཞན་ཡིན་
[46a.3]པ་ན་གཞན་མེད་པ་ལ་འཁྲུལ་པ་མེད་པ་ཅིག་གྲུབ་པ་ནི་གཞན་མེད་པ་རྟོགས་པའི་རྒྱུ་ཡིན་ནོ། །དེ་ལྟ་ཡིན་དང་བུམ་པ་དང་བཅས་པ་དང་བུམ་པ་མེད་པའི་ཕྱིར་བུམ་པ་དང་བཅས་པ་དང་བུམ་པ་མེད་པའི་ཕྱོགས་དག་ལ་འགལ་བ་འདི་ཡོད་པའི་ཕྱིར་ཐམས་ཅད་དུ་འགལ་བ་དམིགས་པ་ཉིད་དུ་
[46a.4]ཐལ་བར་འགྱུར་རོ། །དམིགས་པ་ལས་བལྟར་རུང་བ་བལྟར་མི་རུང་བ་དང་བདག་ཉིད་གཅིག་པ་འགོག་པ་ན་ཡང་འགལ་བ་དམིགས་པ་ཉིད་དུ་འགྱུར་བའི་ཕྱིར་སྣང་བ་མི་དམིགས་པའི་དབྱེ་བ་ཉམས་པར་འགྱུར་ཏེ་འདིར་འགལ་བའི་དམིགས་པ་བལྟར་མི་རུང་བའི་ཡུལ་ཅན་ཡིན་པའི་
[46a.5]ཕྱིར་རོ། །དེའི་ཕྱིར་གཅིག་གི་བདག་ཉིད་འགོག་པ་ནི་མངོན་སུམ་ཉིད་ལས་ཡིན་ལ། ཐ་དད་པ་ལ་ནི་འགལ་བ་དེ་དང་ལྡན་པ་ཡིན་ཡང་རང་བཞིན་མི་དམིགས་པ་ཉིད་ལས་དངོས་པོ་མེད་པ་ཡིན་པའི་ཕྱིར་འགལ་བ་འདི་འགལ་བ་དམིགས་པ་གྲུབ་པར་བྱ་བའི་དོན་དུ་བཤད་པ་ནི་
[46a.6]མ་ཡིན་ནོ། །དེ་ཡང་ཞེས་བྱ་བ་ལ་སོགས་པ་ཡང་གལ་ཏེ་འདི་ལ་གཞུང་གཟུགས་པར་སྦྱོར་ན། སྔ་མ་ལ་དེ་མ་སྒྲུབ་པར་འགྱུར་རོ། །དེས་ན་ཇི་སྐད་བཤད་པ་ཉིད་རིགས་སོ། །དེས་ན་དེ་ལྟར་གཞན་བསྒྲུབས་པས་གཞན་འགོག་པ་ལ་ནི་འགལ་བ་ཉིད་འགོག་པར་བྱེད་པ་
[46a.7]ཡིན་ལ་འགལ་བ་ཉིད་ཀྱང་མི་དམིགས་པ་ལས་རྟོགས་པ་ཡིན་ནོ་ཞེས་འགལ་བ་ཡང་ཞེས་བྱ་བ་ནས་བཟུང་ནས་དེ་ཡང་མི་དམིགས་པ་ལ་ཞེས་པའི་མཐར་ཐུག་པས་བསྒྲུབས་ཏེ། ཇི་ལྟར་བདག་ཅག་གིས་བརྗོད་པ་བཞིན་དུ་བསམ་པ་གང་གིས་དེ་བཤད་པ་དེ་བསྟན་པའི་ཕྱིར་དེ་ལ་
[46b]
[46b.1]ཡང་ཞེས་སྨོས་སོ། །སྐབས་སུ་བབ་པའི་འགལ་བ་སྒྲུབ་པ་དེ་ལ་ཡང་མེ་ལ་སོགས་པའི་འགལ་བ་ཅིག་དམིགས་པས་གྲང་བ་ལ་སོགས་པ་གཞན་མི་དམིགས་པ་ཁོ་ན་སྟེ། རང་བཞིན་མི་དམིགས་པའི་མཚན་ཉིད་དུ་བརྗོད་དོ། །ཇི་ལྟར་འདི་མི་དམིགས་པ་ཁོ་ནར་བརྗོད་དོ། །བཟློག་པར་
[46b.2]བྱ་བ་དང་ཟློག་པར་བྱེད་པ་དག་ལས་གཅིག་ཡོད་པར་བསྒྲུབས་པས་གཞན་མེད་པར་བསྟན་པའི་ཕྱིར་རང་བཞིན་མི་དམིགས་པ་རྟོགས་པས་ནི་མ་ཡིན་ནོ་ཞེས་དོགས་ན། དེ་ལྟ་མ་ཡིན་ན་ཞེས་སྨོས་སོ། །བཟློག་པར་བྱ་བ་དང་། ཟློག་པར་བྱེད་པའི་དངོས་པོ་ཡིན་དུ་ཟིན་ཀྱང་ཟློག་པར་བྱེད་པ་ཉེ་
[46b.3]བ་ལས་བཟློག་པར་བྱ་བ་མེད་པར་གཞལ་བར་མི་ནུས་ཏེ། སྔར་ཇི་སྐད་བཤད་པ་བཞིན་ནོ། །དེའི་ཕྱིར་གང་དམིགས་པ་མེད་པའི་རྟོགས་པ་བསྐྱེད་པ་དེ་དམིགས་པའི་མཐོང་བ་ཉིད་མེད་དོ་ཞེས་བྱ་བའི་རྟོགས་པ་བསྐྱེད་པར་བྱ་བའི་དོན་དུ་བསྒྲུབ་པར་བྱ་བ་ཡིན་ནོ། །དངོས་པོ་མེད་པ་སྒྲུབ་པར་
[46b.4]བྱེད་པ་ཉེ་བར་དགོད་པ་བྱས་པས་སྒྲུབ་པར་མི་ནུས་ལ། དེ་རྟོགས་པ་ཡང་གདོན་མི་ཟ་བར་བྱ་དགོས་པ་ན། དེའི་ཡུལ་བསྟན་པ་ཉིད་ཀྱིས་དེ་བསྒྲུབ་པ་ཡིན་གྱི་རྣམ་པ་གཞན་ནི་སྲིད་པ་མ་ཡིན་ནོ། །དེར་ཡང་དགག་པར་བྱ་བའི་དོན་དང་མི་མཐུན་པའི་དངོས་པོ་ཉེ་བར་བསྟན་པར་བྱ་བ་ཡིན་ཏེ།
[46b.5]ཕྱོགས་དབེན་པ་བཞིན་ནོ། །དེ་ནི་དགག་པར་བྱ་བའི་ཡུལ་ཅན་གྱི་དམིགས་པ་དང་ཡང་མི་མཐུན་པ་ཉིད་དོ། །དེས་ན་གང་ཉེ་བར་བསྟན་པས་མེད་དོ་སྙམ་པའི་རྟོགས་པས་འགྲུབ་པ་དེ་ནི་མི་དམིགས་པ་ཞེས་བརྗོད་དོ། །དེས་ན་དེ་ལྟ་བུ་བསྟན་པས་དམིགས་པ་བཀག་པར་འགྱུར་བ་ཡིན་ནོ། །
[46b.6]དེའི་དོན་ནི་འདི་ཡིན་ཏེ་དམིགས་པ་མ་བཀག་པ་ཅན་དེ་མེད་པར་རྟོགས་པའི་རྟེན་དུ་འགྱུར་བ་མི་མཐུན་པའི་ཟླ་བོ་རབ་ཏུ་མ་བསྟན་པར་མི་འགྲུབ་པའི་ཕྱིར་ཏེ། མེད་དོ་སྙམ་པའི་རྟོགས་པ་མི་འཐད་པའི་ཕྱིར་རོ། །དེས་ན་འགལ་བ་རབ་ཏུ་བསྟན་པས་ཀྱང་ཡུལ་བསྟན་པ་ཉིད་ཀྱི་སྒོ་ནས་མེད་དོ་
[46b.7]ཞེས་བྱ་བར་རྟོགས་པར་བྱེད་པ་ཡིན་ནོ་ཞེས་བྱ་བར་གྲུབ་བོ། །དེས་ན་དེ་ལྟར་འགའ་ཞིག་བསྒྲུབས་པས་འགོག་པ་མི་དམིགས་པ་ཉིད་དུ་བསྒྲུབས་ནས། དགག་པ་ཡང་བཤད་པ་ནི་གཅིག་བཀག་པས་ཞེས་བྱ་བ་ཡིན་ནོ། །སྔར་བཤད་པའི་རིགས་པའི་སྟོབས་ཀྱིས་གྲུབ་པ་ཁོ་ན་
[47a]
[47a.1]ཡིན་ཏེ། དེ་ལ་སྒྲུབ་པར་བྱེད་པ་གཞན་ནི་མི་དགོས་སོ་ཞེས་བྱ་བའི་ཐ་ཚིག་གོ། །གལ་ཏེ་དེར་ནི་འགལ་བའི་དོན་གཞན་མི་དམིགས་པ་ཡིན་ནོ་ཞེས་བསྟན་པ་མ་ཡིན་ནམ། འདིར་གཞན་མེད་པ་སྒྲུབ་པ་ལ་མི་དམིགས་པ་དེ་གང་ཞིག་ཡིན་ཞེ་ན། དགག་པ་ནི་
[47a.2]ཞེས་སྨོས་སོ། །སྐབས་སུ་བབ་པ་གཅིག་བཀག་པ་གང་ཡིན་པ་དེ་ཉིད་གཞན་མེད་པ་སྒྲུབ་པ་ལ་མི་དམིགས་པ་ཡིན་པའི་ཕྱིར་རོ། །གཅིག་བཀག་པ་གཞན་མེད་པའི་བདག་ཉིད་གང་ཡིན་པ་དེ་ཉིད་ཀྱང་དགག་པར་བྱ་བ་མི་དམིགས་པ་གཞན་ཡོད་པའི་རང་བཞིན་ཉིད་དོ། །དགག་པ་ནི་
[47a.3]ཐམས་ཅད་དུ་རང་གི་ཡུལ་གྲུབ་པར་བརྗོད་པ་ཡིན་གྱི། འདི་སྒྲུབ་པར་བྱེད་པ་གཞན་ལས་ནི་གྲུབ་པ་མ་ཡིན་ནོ། །དེས་ན་བཟློག་པར་བྱ་བ་དང་ཟློག་པར་བྱེད་པའི་དངོས་པོ་ལས་འགལ་བ་བཞིན་དུ་རྒྱུ་ལ་སོགས་པ་མེད་པ་ཡང་ཡོད་པར་སྲིད་པ་བཟློག་པ་ཙམ་གྱིས་ནི་སྒྲུབ་པ་མ་ཡིན་པ་ཉིད་
[47a.4]དོ། །དེའི་ཕྱིར་གཞན་ཡོད་པ་གཅིག་བཀག་པའི་བཀག་པ་གང་ཡིན་པ་དེ་ཉིད་བསྒྲུབ་པར་བྱ་བའི་མེད་པ་ཡང་ཡིན་ཏེ། དེ་ཡོད་ན་དེ་བཞིན་དུ་གཞན་ཡང་མེད་པར་མི་འཁྲུལ་པའི་ཕྱིར་རོ། །དེ་ལ་གཞན་གང་ཞིག་མེད་པ་ལ་ངེས་པའི་ཕྱིར། མི་དམིགས་པ་ཉིད་དུ་བསྟན་པ་
[47a.5]གང་ཡིན་པ་དེ་རང་ཉིད་སྟོན་པ་ནི་དོན་གཞན་དགག་པ་ཞེས་སྨོས་སོ། །དེ་ལ་ཡང་རྒྱུ་དང་འབྲས་བུ་དག་དགག་པ་རྒྱུ་དང་འབྲས་བུ་དགག་པའི་གཏན་ཚིགས་ཡིན་པའམ། རྒྱུ་དང་འབྲས་བུ་གཉི་ག་མ་ཡིན་པ་ཞིག་བཀག་པ་གཏན་ཚིགས་ཏེ། ཇི་སྐད་བཤད་པའི་དོན་གཞན་བཀག་
[47a.6]པས་དོན་གཞན་མེད་པ་བསྒྲུབ་པར་བྱ་བ་ཡིན་ནོ་ཞེས་པའི་དོན་ཏེ། ཐ་དད་པ་འགོག་པ་ལ་རྣམ་པ་འདི་ཙམ་ལས་མི་སྲིད་པའི་ཕྱིར་རོ། །དགག་པར་བྱ་བ་སྟེ་འབྲེལ་པ་འམ་མ་འབྲེལ་པ་ཡིན་ལ། འབྲེལ་པ་ཡང་རྣམ་པ་གཉིས་ཡིན་པའི་ཕྱིར་གསུམ་བསྟན་ཏོ། །དེ་ལ་སྲིད་
[47a.7]པ་ཡོངས་སུ་གཟུང་བའི་ཕྱིར་མི་སྲིད་པ་དགག་པ་བཤད་པ་ནི་དེ་ལ་ཞེས་བྱ་བ་ཡིན་ནོ། །དེ་ཞེས་བྱ་བ་ནི་གཉི་ག་མ་ཡིན་ཏེ་དེ་མེད་ན་དགག་པར་བྱ་བའི་དངོས་པོ་གཞན་མེད་པར་འགྱུར་རོ་ཞེས་བྱ་བ་དེར་ལྟ་ག་ལ་འགྱུར་རྒྱུ་དང་འབྲས་བུ་མ་ཡིན་པ་མེད་ན་རྒྱུ་དང་འབྲས་བུ་མ་ཡིན་པ་མེད་པར་
[47b]
[47b.1]འགྱུར་རོ་ཞེས་བྱ་བ་འདི་ལ་གཏན་ཚིགས་མེད་དོ་སྙམ་དུ་དགོངས་པའོ། །གཏན་ཚིགས་མེད་པ་ཉིད་བཤད་པ་ནི། གཉི་ག་མ་ཡིན་པ་ནི་འབྲེལ་པ་མེད་པའི་ཕྱིར་རོ། །དེའི་འབྲེལ་པ་ནི་རྣམ་པ་གཉིས་སུ་འགྱུར་རོ། །དེ་དགག་པར་བྱ་བ་འབྲེལ་པའམ་དགག་པར་བྱ་བ་དེ་འབྲེལ་པའི་
[47b.2]ཕྱིར་རོ། །དེ་ལ་གལ་ཏེ་དགག་པར་བྱ་བ་ལ་དེ་འབྲེལ་པ་ཡིན་ནོ། །དེ་ཙམ་གྱིས་ནི་དེ་མེད་ཀྱང་མེད་པར་མི་འགྲུབ་བོ། །འབྲེལ་པ་བཀག་པས་ནི་འབྲེལ་པའི་ཡུལ་དགག་པ་མི་འགྲུབ་སྟེ་ཁྱབ་པར་བྱ་བ་མེད་ཀྱང་ཁྱབ་པར་བྱེད་པ་མེད་པ་མི་འགྲུབ་པའི་ཕྱིར་རོ། །དེས་ན་འབྲེལ་པ་ནི་དགག་པར་
[47b.3]བྱ་བ་ཡིན་ལ་འབྲེལ་པའི་ཡུལ་ནི་འགོག་པར་བྱེད་པ་ཡིན་ནོ། །དེས་ན་གཉི་ག་མ་ཡིན་པ་ནི་འབྲེལ་པ་མེད་པའི་ཕྱིར་རོ་ཞེས་བྱ་བ་ནི་དེ་ལ་དགག་པར་བྱ་བ་མ་འབྲེལ་པའི་ཕྱིར་རོ་ཞེས་བྱ་བར་མངོན་པར་འདོད་པའོ། །དེ་ལྟ་ན་ཡང་དེ་དང་འབྲེལ་པའི་འབྲེལ་པ་དགག་པར་ནུས་པ་ཉིད་དོ། །
[47b.4]དེའི་དོན་ནི་འདི་ཡིན་ཏེ། གལ་ཏེ་གཉི་ག་མ་ཡིན་པ་ལ་དགག་པར་བྱ་བ་འབྲེལ་པ་ཡིན་ནོ། དེ་དེ་ལ་རག་ལས་པའི་ཕྱིར་ཞེས་བྱ་བའི་གཏན་ཚིགས་འདི་ཉིད་ཀྱིས་དེ་མེད་ན་མེད་དོ་ཞེས་བྱ་བར་སྒྲུབ་པར་འགྱུར་རོ། །འབྲེལ་པ་མེད་ན་ནི་དེ་མེད་ན་དེ་མེད་པར་འགྱུར་རོ་ཞེས་བྱ་བ་དེ་ལྟ་ག་ལ་འགྱུར་འབྲས་
[47b.5]བུ་ལ་ལྟོས་ནས་ཀྱང་བཤད་པ་ནི། འབྲས་བུ་མི་དམིགས་ཀྱང་ཞེས་བྱ་བའོ། །རྒྱུ་ནི་གདོན་མི་ཟ་བར་འབྲས་བུ་དང་ལྡན་པ་མ་ཡིན་པས་དེ་གཏན་ཚིགས་ཀྱིས་སོ། །གང་གི་ཕྱིར་འབྲས་བུ་གོར་མ་ཆག་པར་རྒྱུ་ཉེ་བར་གནས་ན་འགྱུར་བ་མ་ཡིན་པ་དེའི་ཕྱིར་འབྲས་བུ་མེད་ཀྱང་རྒྱུ་མེད་
[47b.6]པ་སྒྲུབ་པ་མ་ཡིན་ནོ། །འདིར་ཁྱད་པར་ཅན་བརྗོད་པར་འདོད་པ་གང་ཡིན་པ་དེ་ནི་སློབ་དཔོན་གྱིས་རྣམ་པར་ངེས་པ་ཉིད་དུ་གཏན་ལ་ཕབ་བོ། །གང་གི་ཕྱིར་ཇི་སྐད་བཤད་པའི་གཅིག་བཀག་པས་གཞན་མེད་པ་མི་འགྲུབ་པ་དེའི་ཕྱིར་རྒྱུ་མི་དམིགས་པ་ཁོ་ན་སྐབས་སུ་བབ་པའི་
[47b.7]མེད་པ་གོ་བར་བྱེད་པ་ཡིན་གྱི་འབྲས་བུ་འམ་གཉི་ག་མ་ཡིན་པ་ནི་མ་ཡིན་ནོ། །གཅིག་བཀག་པས་གཞན་མེད་པར་རྟོགས་པར་བྱ་བ་གང་ཡིན་པ་དེ་ནི་རྒྱུ་མི་དམིགས་པ་ཁོ་ནས་གོ་བར་བྱེད་ཀྱི་གཞན་གྱིས་ནི་མ་ཡིན་ནོ། །མི་དམིགས་པ་རྣམ་པ་བཞི་པོ་འདི་ལ་ཡང་ཁ་ཅིག་ཏུ་ནི་དོན་
[48a]
[48a.1]གཞན་སྒྲུབ་པ་དང་འགོག་པས་དགག་པ་བྱེད་ལ་ཁ་ཅིག་ཏུ་ནི་དངོས་སུའོ། །དེས་ན་དོན་སྒྲུབ་པ་དང་དགག་པ་ལ་བརྟེན་པའི་དགག་པ་ལ་མི་དམིགས་པ་ཉིད་དུ་གཞུང་བཙུགས་པས་སྒྲུབ་པ་ཡིན་ཏེ། དེའི་དབྱེ་བ་ཡིན་པའི་ཕྱིར་རོ། །ད་ནི་དངོས་སུ་འགོག་པའི་དབང་དུ་
[48a.2]བྱས་ནས་རང་བཞིན་ཞེས་བྱ་བ་ལ་སོགས་པ་སྨོས་སོ། །ནིའི་སྒྲ་དང་ངེས་པར་གཟུང་བ་གཉིས་དང་། མེད་པ་ནི་རང་བཞིན་མི་དམིགས་པ་ཁོ་ན་ཡིན་ཏེ་ཞེས་ཇི་ལྟར་བསྟན་པ་བཞིན་མ་ཡིན་པ་དང་རྗེས་སུ་འབྲེལ་ཏོ། །གང་དུ་གཞན་གྱི་སྒོ་ནས་མེད་པ་མ་ཡིན་པ་དེར་འདི་རང་བཞིན་མི་
[48a.3]དམིགས་པ་ཡིན་ནོ་ཞེས་པའི་དོན་ནོ། །འདི་ནི་རྣམ་པ་བཞི་ཡིན་པར་བསྟན་ཏོ། །གལ་ཏེ་ཡང་གསུམ་སྣང་བ་མི་དམིགས་པའི་དབྱེ་བ་ཡིན་ལ། དེ་དང་ལྡན་པ་རང་གི་བྱེ་བྲག་གི་ནང་དུ་བགྲང་བ་མ་ཡིན་པ་དེ་ལྟ་ན་ཡང་མི་དམིགས་པ་ཙམ་སྤྱིའི་དབང་དུ་བྱས་ནས་རྣམ་པ་བཞི་པོ་འདི་དེའི་ཡིན་
[48a.4]པར་བསྟན་ཏོ། །འོ་ན་དེ་མི་སྣང་བ་མི་དམིགས་པར་འགྱུར་རོ་ཞེ་ན་མ་ཡིན་ཏེ། འགལ་ན་དེའི་དབྱེ་བ་ཅན་མ་ཡིན་པའི་ཕྱིར་ཏེ། རྟ་ངང་པ་ལ་སོགས་པ་བ་ལང་ཉིད་ཀྱི་བཞིན་ནོ། །དེས་ན་དངོས་པོ་ལ་སྣང་བ་མ་དམིགས་པ་ཡིན་ཡང་འདི་ནི་ཉེ་བར་དགོད་པའི་ཚུལ་ཡིན་ནོ། །གལ་ཏེ་
[48a.5]རང་བཞིན་མི་དམིགས་པ་ཐ་སྙད་སྒྲུབ་པར་བྱེད་པ་ཉིད་དུ་རྟོགས་པ་ཉིད་ཡིན་པ་དེ་ལྟ་ན་ཡང་འདིར་འདི་ཁོངས་སུ་འདུ་བའི་སྦྱོར་བ་གཞན་ཉིད་དུ་བསྟན་པ་དེས་ན་རྣམ་པར་དཔྱོད་པར་འགྱུར་བ་ཡིན་ཏེ། ཅི་འདི་རང་གི་ངོ་བོ་ཇི་ལྟ་བ་བཞིན་ནང་དུ་འདུས་པར་བསྒྲུབ་བྱ་ཉེ་བར་སྡུད་དམ། འོན་ཏེ་
[48a.6]དེའི་བདག་ཉིད་འཛིན་ཏམ་དེ་སྟེ་བསྒྲུབ་པར་བྱ་བའི་དོན་མཚུངས་པའི་ཕྱིར་འདི་དཔྱད་པར་བྱ་བ་ཡིན་ཞེས་དོགས་ན་ཁོངས་སུ་འདུ་བར་བསྟན་པ་ཡིན་ཡང་ཐམས་ཅད་ཀྱིས་བསྒྲུབ་པར་བྱ་བ་དང་སྒྲུབ་པར་བྱེད་པ་རང་གི་རང་བཞིན་ཇི་ལྟ་བ་ཉིད་དུ་སྟོན་ཏོ། །དེ་ལ་ནི་ཞེས་བྱ་བ་རང་བཞིན་མི་
[48a.7]དམིགས་པས་ནི་ཡུལ་ཅན་ཐ་སྙད་སྒྲུབ་པར་བྱེད་པ་ཡིན་ནོ། །འབའ་ཞིག་ཏུ་ཟད་དོ་ཞེས་བྱ་བ་ནི་དངོས་པོ་མེད་པའི་མཚན་ཉིད་ཀྱི་ཡུལ་ནི་མ་ཡིན་ནོ་ཞེས་བྱ་བའི་དོན་ཏོ། །ཇི་སྐད་བརྗོད་པ་ཡིན་ཏེ་གལ་ཏེ་ཡང་འདིར་བྱེ་བྲག་འགའ་ཞིག་ནང་དུ་འདུ་བ་ཡིན་པ་དེ་ལྟ་ན་ཡང་། གང་གིས་
[48b]
[48b.1]བསྒྲུབ་བྱ་ཐ་མི་དད་པར་འགྱུར་བ་དེ་གཉིས་གཅིག་ཉིད་ནི་མ་ཡིན་གྱི། འོན་ཀྱང་མི་འདྲ་བ་ཡོད་ཀྱང་ཅུང་ཟད་ཆོས་མཐུན་པ་ཙམ་ལ་བརྟེན་ནས་ཁོངས་སུ་འདུ་བར་བསྟན་ཏོ། །བརྗོད་པར་བྱ་བ་ཡོད་པ་ཡིན་ཡང་དེ་ལྟར་ཉེ་བར་བསྟན་པ་ནི་མདོ་ཟོར་ཡང་བར་བྱ་བའི་དོན་གྱི་ཕྱིར་རོ། །ད་ནི་འདིའི་
[48b.2]ཁོངས་སུ་འདུས་པའི་བྱེ་བྲག་འདི་ལ་ཡང་ཞེས་བྱ་བ་སྨྲས་ཏེ། ཡུལ་དུ་གྱུར་པའི་རང་བཞིན་མི་དམིགས་པ་ལའོ། །ཡུལ་དང་ཡུལ་ཅན་གྱི་ངོ་བོ་ཡང་ཁོངས་སུ་འདུ་བ་ལ་ལྟོས་ནས་སོ། །གང་གི་ཚེ་ཁྱབ་པར་བྱེད་པའི་ཆོས་མི་དམིགས་པས་ཁྱབ་པར་བྱ་བ་མེད་པ་སྟོན་པ་དེའི་ཚེ་ནི་མེད་པ་ཡང་
[48b.3]བསྒྲུབ་བྱ་ཡིན་ནོ། །དེས་ན་རང་བཞིན་མི་དམིགས་པ་ནི་ཐ་སྙད་སྒྲུབ་པ་ཡིན་ལ། དེའི་ཁོངས་སུ་འདུ་བ་ཁྱད་པར་བྱེད་པ་མི་དམིགས་པ་ནི་མེད་པ་སྒྲུབ་པར་བྱེད་པ་ཡིན་ནོ། །གལ་ཏེ་གང་ཞིག་སྒྲུབ་པའམ་བཀག་པས་དོན་གཞན་དངོས་པོ་མེད་པར་གྲུབ་པར་བསྟན་པ་དེ་མེད་དོ་ཞེས་བྱ་བར་
[48b.4]རྟོགས་པའི་ཡུལ་ཉིད་ཡིན་པ་དེས་ན་ཕྱོགས་བཞིན་དུ་དེ་ཡང་དངོས་པོ་མེད་པར་འགྱུར་ཏེ། དེ་ལྟ་མ་ཡིན་ན་མི་དམིགས་པ་ཉིད་དུ་མི་འགྲུབ་པའི་ཕྱིར་རོ། །དེས་ན་འདི་ཡང་རང་བཞིན་མི་དམིགས་པ་ཡིན་ཞིང་འདིར་ཡུལ་ཅན་བསྒྲུབ་པར་བྱ་བར་འགྱུར་རོ་ཞེ་ན། དེ་ནི་བདེན་མོད་ཀྱི་རྟེན་གཞན་
[48b.5]ཡོད་པ་དང་མེད་པ་དག་གིས་ཐ་དད་པས་བསྒྲུབ་བྱ་ཐ་དད་པར་འགྱུར་རོ། །དངོས་པོ་མེད་པ་རྟོགས་པ་ལ་དོན་གཞན་བསྒྲུབ་པ་ལ་སོགས་པ་ལྟར་དེ་ལས་གཞན་ལ་ནི་གཞན་པའི་གཞན་ཡོད་པ་མ་ཡིན་གྱི། དེ་ལ་ནི་འགལ་བ་བཞིན་ཕྱོགས་ཀྱང་ཡོད་པ་ཡིན་ནོ། །དེ་ཡང་མེད་པ་ཉིད་དུ་རྟོགས་པ་ཡིན་
[48b.6]པའི་ཕྱིར་ཉེས་པ་འགའ་ཡང་མེད་དོ། །གལ་ཏེ་མ་རྟོགས་པ་ཕྱོགས་ཀྱི་བདག་ཉིད་དུ་གྱུར་པའི་མེད་པ་བསྒྲུབས་ན་སྒྲུབ་པ་སྒྲུབ་པར་བྱེད་པར་འགྱུར་བ་མ་ཡིན་ནམ། ཕྱོགས་དང་ནི་ཁྱབ་པར་བྱེད་པ་མེད་པ་ལ་སོགས་པ་མེད་ན་མི་འབྱུང་བ་འགའ་ཡང་ཡོད་པ་མ་ཡིན་ནོ་ཞེ་ན། བརྗོད་པ་མེད་དོ་
[48b.7]ཞེས་བྱ་བ་ཉིད་དུ་རྟོགས་པ་འགལ་བའི་ཡུལ་ཅན་ཉིད་དུ་སྐྱེ་བ་ན་གང་ལས་འདི་དག་དེ་མི་དམིགས་པ་ཉིད་དུ་འགལ་བ་ལ་སོགས་པ་ཡང་ཡུལ་ཉིད་དུ་རྟོགས་པར་བྱེད་པ་ཡིན་ནོ། །དེས་ན་དངོས་པོ་ལ་ཕྱོགས་བཞིན་དུ་དེ་ཡུལ་ཡིན་ཡང་ཇི་ལྟར་རྟོགས་བཞིན་པའི་ཕྱོགས་ཉིད་དེ་སྟོང་པར་སེམས་
[49a]
[49a.1]པ་དགག་པར་བྱ་བའི་ཡུལ་ཉིད་དགག་པར་བྱ་བས་སྟོང་པར་རྟོགས་པ་ན་སྔར་མ་རྟོགས་པར་མི་མཐུན་པ་ཡུལ་དུ་གྱུར་པའི་ཕྱིར་དངོས་པོ་མེད་པ་གྲུབ་པ་ཡིན་ནོ། །དེས་ན་སྔར་རྟོགས་པའི་འགལ་བ་ལ་སོགས་པ་ལ་ལྟོས་ནས་གྲུབ་པ་དེ་ཉིད་ཐ་སྙད་ཀྱི་རང་བཞིན་དུ་གྱུར་
[49a.2]པ་ཡིན་ཏེ། ཡུལ་གྲུབ་པ་ཟིན་པའི་ཕྱིར་རོ། །དེ་ལྟར་འགལ་བ་དམིགས་པ་ལ་སོགས་པ་ལ་ནི་དངོས་པོ་མེད་པ་དང་དངོས་པོ་མེད་པའི་ཐ་སྙད་གཉི་ག་བསྒྲུབ་བྱ་ཡིན་པར་བརྗོད་དོ། །ཕྱོགས་ལ་ཡང་རང་གི་ངོ་བོ་ཇི་ལྟ་བ་བཞིན་མི་འཇུག་པའི་ཕྱིར་རོ། །གང་གི་རྟོགས་པ་དེ་ལ་
[49a.3]ཕྱོགས་པའི་ཕྱིར་བྱས་པ་ཉིད་ལ་སོགས་པ་ལྟར་དངོས་པོ་སྒྲུབ་པར་བྱེད་པས་ན་འདིར་ཡང་གཉི་ག་སྒྲུབ་པར་མི་འགྱུར་བ་ཚད་མའི་བྱེད་པ་དེའི་མཐར་ཐུག་པ་ཉིད་ནི་མ་ཡིན་གྱི། འོན་ཀྱང་རྟོགས་པ་དེ་འདི་ན་མེད་དོ་སྙམ་པས་འཇུག་པར་བྱེད་ཅིང་མཐར་ནི་ཕྱོགས་ལ་ཐུག་པར་འགྱུར་བ་ཡིན་ནོ། །
[49a.4]ཕྱོགས་ཙམ་རྟོགས་པས་ཀྱང་མེད་པར་རྟོགས་པའི་ཕྱིར་གཉི་ག་སྒྲུབ་པར་བྱེད་པ་ཉིད་ཉམས་པ་མེད་དོ། །དེ་ལྟར་རྣམ་པ་འདིས་དགག་པ་གང་ཇི་སྙེད་པ་ཞེས་བྱ་བ་ལ་སོགས་པ་དགག་པའི་ཡུལ་ཅན་གྱི་མི་དམིགས་པ་འདི་ནི་སྦྱོར་བའི་བྱེ་བྲག་གིས་རྣམ་པ་བཞི་ཡིན་ནོ། །སྦྱོར་བའི་
[49a.5]བྱེ་བྲག་ཇི་ལྟ་བུ་ཞེ་ན། བཤད་པ། འགལ་བ་གྲུབ་པའི་སྦྱོར་བའི་བྱེ་བྲག་གིས་ནི་དཔེར་ན་འདི་ན་གྲང་བའི་རེག་པ་མེད་དེ་ཞེས་བྱ་བ་ལ་གྲང་བ་ཉིད་ཀྱི་རེག་པ་ནི་གྲང་བའི་རེག་པ་སྟེ། ཕྱི་རོལ་གྱི་དངོས་པོའོ། །དེ་འདི་ན་མེད་དེ་དེ་དང་འགལ་བའི་མེ་གྲུབ་པའི་ཕྱིར་རོ། །འགལ་བ་དམིགས་
[49a.6]པའི་སྦྱོར་བ་འདིས་ནི་ཁྱབ་པར་བྱ་བ་མེད་པར་བསྒྲུབ་པ་ལ་དེའི་ཁྱབ་པར་བྱེད་པ་གང་ཡིན་པ་དེ་དང་འགལ་བ་དམིགས་པ་ཡང་བཤད་པར་རིག་པར་བྱ་སྟེ། འགལ་བ་དམིགས་པའི་ཁོངས་སུ་འདུས་པར་གྱུར་པ་ཉིད་དུ་བརྗོད་པ་ཡིན་ནོ། །དེ་ཉིད་སྟོན་པ་ནི་དཔེར་ན་ཞེས་བྱ་བའོ། །
[49a.7]བ་མོ་དང་འབྲེལ་པའི་རེག་པ་ནི་བ་མོའི་རེག་པ་སྟེ་གྲང་བའི་རེག་པའོ། །གྲང་བས་ཁྱབ་པ་དེ་ནི་གྲང་བ་དང་འགལ་བའི་མེས་གྲང་བ་བསལ་ན་ཁྱབ་པར་བྱེད་པ་མེད་པའི་ཕྱིར་མེད་པ་རྟོགས་པ་ཡིན་ནོ། །གཉིས་པ་ཡང་སྦྱོར་བའི་བྱེ་བྲག་གིས་སྟོན་ཏེ་དགག་པར་བྱ་བ་གྲང་བའི་རེག་པ་དང་
[49b]
[49b.1]འགལ་བ་མེའི་འབྲས་བུར་གྱུར་པ་དུ་བ་དམིགས་པས་མེ་ཉེ་བར་འཇོག་པ་ན་གྲང་བའི་རེག་པ་མེད་པར་རྟོགས་པར་བྱེད་དོ། །རྒྱུ་མ་གྲུབ་པ་ནི་ཞེས་བྱ་བ་ནི་གསུམ་པའོ། །དཔེར་ན་འདི་ན་ཞེས་བྱ་བ་ལ། མཚོ་ཆེན་པོ་ལ་སོགས་པའི་ཡུལ་ནི་སྔ་མ་དག་གིས་བསྟན་པ་ཡིན་ནོ། །བཞི་པ་ཡང་རང་
[49b.2]བཞིན་མ་གྲུབ་པ་ནི་ཞེས་བྱ་བ་རང་བཞིན་མི་དམིགས་པས་ནི་དཔེར་ན་འདི་ན་དུ་བ་མེད་དེ་མི་དམིགས་པའི་ཕྱིར་རོ་ཞེས་བྱ་བ་ལྟ་བུའོ། །འདིའི་ནང་དུ་འདུས་པའི་སྦྱོར་བ་གཞན་ཡང་སྟོན་པ་ནི་འདིས་ནི་ཞེས་བྱ་བའོ། །ཁྱད་པར་བྱེད་པ་དང་འབྲེལ་པའི་རང་བཞིན་ཡིན་ནོ། །དཔེར་ཞེས་བྱ་བ་ལ་འདི་
[49b.3]ན་ཤིང་ཤ་པ་མེད་དོ་ཞེས་བྱ་བ་ནི་ཁྱབ་པར་བྱ་བ་མེད་དོ་བསྒྲུབ་པར་བྱ་སྟེ། ཁྱད་པར་ནི་ཉེ་བ་ལ་སོགས་པ་བསྟེན་ནས་འཛིན་པས་མངོན་སུམ་གྱིས་མི་རྟོགས་པའི་ཕྱིར་རོ། །ཤིང་མེད་པའི་ཕྱིར་རོ་ཞེས་བྱ་བ་ནི་ཁྱབ་པར་བྱ་བ་མེད་པར་སྒྲུབ་པར་བྱེད་པ་སྟེ། ལོ་མ་ལ་སོགས་པ་དང་ལྡན་པའི་
[49b.4]ངོ་བོ་ནི་རྒྱང་རིང་པོ་ནས་ཀྱང་རྟོགས་པས་མ་རྟོགས་ན་མེད་པར་ཁོང་དུ་ཆུད་པའི་ཕྱིར་རོ། །དེས་ན་ཡུལ་འདི་ཙམ་ན་ཤིང་ཡོད་ན་དམིགས་པར་འགྱུར་ལ་ཁྱད་པར་ནི་མ་ཡིན་ནོ་སྙམ་པའི་ཤེས་པ་ཁྱད་པར་དགག་པར་འདོད་པ་ནི་སྤྱི་མེད་པ་ཉིད་ཀྱིས་ཁྱབ་པར་བྱེད་པ་མི་དམིགས་པ་ལས་མེད་
[49b.5]པར་རྟོགས་པ་ཡིན་ནོ། །གལ་ཏེ་གཞན་དུ་མེད་པ་གྲུབ་པ་མི་སྲིད་པས་སྣང་བ་མི་དམིགས་པ་ལས་སྦྱོར་བ་ཐ་དད་པ་ཙམ་ཞིག་འདིར་བསྟན་པར་བྱ་བ་མ་ཡིན་ནམ། ཇི་སྐད་བསྟན་པའི་སྦྱོར་བ་དག་ལ་གོ་ཇི་ལྟར་སྣང་བ་མི་དམིགས་པ་སྲིད་དེ་གང་གི་ཕྱིར་འདི་ལ་ཆོད་པ་དང་། བསྐལ་པ་ལ་
[49b.6]སོགས་པ་མི་སྣང་བའི་རྒྱུ་ཡོད་པའི་ཕྱིར་རོ། །བལྟར་མི་རུང་བ་ལ་ནི་སྣང་བ་མི་དམིགས་པ་མ་ཡིན་ནོ། །སྣང་བ་མི་དམིགས་པ་ཉིད་ན་ཡང་མ་གྲུབ་པ་ཉིད་དེ། ཆོད་པས་ཁྱད་པར་མ་གྲུབ་པའི་ཕྱིར་རོ་ཞེ་ན། འདི་སྤངས་པའི་ཕྱིར་མེད་པ་དང་ཐ་སྙད་ཅེས་སྨོས་སོ། །ཁོངས་སུ་འདུ་བ་དང་བཅས་
[49b.7]པའི་སྦྱོར་བ་མེད་པ་དང་། མེད་པ་དང་། མེད་པའི་ཐ་སྙད་ནི་མེད་པ་དང་ཐ་སྙད་དེ་དེ་སྒྲུབ་པའི་མི་དམིགས་པ་འདི་ཐམས་ཅད་ལ་མ་གྲུབ་པ་མི་དམིགས་པར་ཡང་རིག་པར་བྱའོ། །འདིར་གྲུབ་པ་དང་མ་གྲུབ་པར་བྱ་བ་ལ་ཕན་ཚུན་སྡུད་པའི་ཕྱིར་མ་གྲུབ་པ་གྲུབ་པ་ལ་ལྟོས་ནས་སྡུད་ཅིང་གྲུབ་པ་
[50a]
[50a.1]ཡང་མ་གྲུབ་པ་ལ་ལྟོས་ནས་སྡུད་པར་རིག་པར་བྱའོ། །གང་དག་ཅེ་ན་དེ་དག་ཅེས་སྨོས་སོ། །མི་དམིགས་པའི་རྣམ་པའམ་མཐའ་དག་གིས་དགག་པར་བྱ་བ་དག་གོ། །གལ་ཏེ་ཡང་ཆོད་པ་ལ་སོགས་པས་གྲང་བ་ལ་སོགས་པ་སྣང་བ་མ་ཡིན་པ་དེ་ལྟ་ཡང་སྣང་བ་ཉིད་
[50a.2]དུ་རིག་པར་བྱའོ། །དེས་ན་གྲུབ་པར་ཡང་རིག་པར་བྱའོ། །གཏན་ཚིགས་གྲུབ་པ་ཉིད་དུ་ངེས་པར་བྱ་བའི་མ་གྲུབ་པ་ནི་མ་ཡིན་ནོ། །གཏན་ཚིགས་དེ་དག་ཉིད་གྲུབ་པའི་ཡུལ་ཉིད་དུ་སྟོན་པ་ནི་དེ་དག་དང་འགལ་བ་དག་ཅེས་བྱ་བའོ། །འདིར་དེ་དང་འགལ་བ་ལ་སོགས་པ་སྣང་བ་མི་དམིགས་
[50a.3]པའི་རང་བཞིན་གྱི་གཏན་ཚིགས་བརྗོད་པ་གང་ཡིན་པ་དེ་དག་ནི་སྣང་བ་མི་དམིགས་པ་ཉིད་དུ་གྲུབ་པའི་ཕྱིར་མ་གྲུབ་པ་ཉིད་མ་ཡིན་ནོ། །གལ་ཏེ་ཡང་འདིར་ཁྱབ་པར་བྱེད་པ་མེད་པ་ལ་སོགས་པ་འགལ་བ་མ་ཡིན་པ་དེ་ལྟ་ན་ཡང་འདིར་དབྱིག་ཐོགས་འགྲོའོ་ཞེས་བྱ་བ་བཞིན་དུ་འགལ་བའི་སྒྲ་འཇུག་པ་
[50a.4]ཡིན་ཏེ། དང་པོ་ཉིད་ཀྱི་ཐམས་ཅད་ཉེ་བར་མཚོན་པ་ནི་འཐད་པའི་ཕྱིར་རོ། །ཡང་ན་ཁྱབ་པར་བྱེད་པ་མེད་པ་ལ་སོགས་པ་ཁྱབ་པར་བྱ་བ་ལ་སོགས་པ་དང་འགལ་བ་ཉིད་དེ་ལྷན་ཅིག་མི་སྲིད་པའི་ཕྱིར་རོ། །སྒྲུབ་པ་ཁོང་དུ་ཆུད་པ་མ་ཡིན་པས་འགལ་བ་དམིགས་པ་མ་ཡིན་ཡང་འགལ་བར་བྱེད་པ་བརྗོད་
[50a.5]པ་གསལ་བར་མི་སྲིད་པ་ནི་མ་ཡིན་ནོ། །གང་ལས་གཏན་ཚིགས་གྲུབ་པར་འགྱུར་བ་ཇི་ལྟ་ན་འདི་བལྟར་རུང་བའི་བདག་ཉིད་དག་ཁོ་ན་མ་གྲུབ་པ་ཡིན་ཞེ་ན། གཞན་དག་ལ་ནི་ཞེས་སྨོས་སོ། །བལྟར་མི་རུང་བ་དག་ལ་ནི་ཇི་སྐད་བཤད་པའི་མེད་པ་དང་འགལ་བ་མི་འགྲུབ་བོ། །མེད་པ་ནི་འགལ་
[50a.6]བ་གྲུབ་པའི་ཡན་ལག་ཉིད་དུ་བསྟན་པ་ཡིན་ནོ། །དེའི་དོན་ནི་འདི་ཡིན་ཏེ། གལ་ཏེ་དངོས་པོ་དེ་དེའི་ཚེ་བསྐལ་པ་དེ་ལྟ་ན་ཡང་འདིར་མི་དམིགས་པ་ནི་མི་མཐུན་པའི་ཟླ་དངོས་པོ་གཞན་ཡོད་པ་ཡིན་ནོ་ཞེས་བརྗོད་ལ། དེ་ཡང་འགལ་བ་ལ་སོགས་པ་ཉིད་དོ། །དེ་ཡང་བལྟར་རུང་བའི་དངོས་པོའི་
[50a.7]མི་མཐུན་པའི་ཟླ་བ་ཉིད་ཀྱིས་སྣང་བ་མི་དམིགས་པ་ཉིད་དུ་གྲུབ་པ་ཁོ་ན་སྟེ། དེ་ལྟ་མ་ཡིན་ན་འགལ་བ་ཉིད་དུ་མ་གྲུབ་པར་ཐལ་བའི་ཕྱིར་རོ། །མི་འདོད་པ་གསལ་བས་སྦྱོར་བ་གཞན་ནང་དུ་བསྡུ་བའི་ཕྱིར་གལ་ཏེ་ཞེས་སྨོས་སོ། །འགལ་བའི་འབྲས་བུ་བཞིན་དུ་འགལ་བའི་རྒྱུས་ཀྱང་འགལ་བ་ཁོ་
[50b]
[50b.1]ན་སྟེ། དེ་ལྟ་མ་ཡིན་ན་འགལ་བ་ཉེ་བར་འཇོག་པ་ན་འབྲས་བུ་ལས་རྒྱུ་བཞིན་དུ་རྒྱུ་ལས་ཀྱང་འབྲས་བུ་གྲུབ་པའི་ཕྱིར་གྲང་བ་ཡོད་པར་སྒྲུབ་པར་འགྱུར་རོ་ཞེས་བྱ་བར་བསམ་པའོ། །རྩོད་པ་འདི་བསལ་བའི་ཕྱིར་མདོ་དེ་དང་ཞེས་བྱ་བའོ། །གྲང་བའི་རེག་པ་དེ་དང་འགལ་བ་ནི་མེ་ཡིན་ལ། དེའི་རྒྱུ་མཚན་
[50b.2]ནི་ཤིང་ལ་སོགས་པ་སྟེ་དེ་དམིགས་པར་སྦྱོར་བ་གང་ཡིན་པའོ། །འགལ་བ་དང་འབྲས་བུ་ཞེས་བྱ་བ་ལ་སོགས་པའི་མེད་དོན་ཅན་ཞེས་བྱ་བར་འབྲེལ་ཏོ། །མེད་པ་དེ་ཡང་དེ་དང་འགལ་བ་གང་ཡིན་པ་དེ་ཉིད་དོ། །དེ་ནི་འཁྲུལ་པ་ཅན་ཡིན་ནོ། །གྲང་བ་མེད་པའི་དོན་དུ་གྲང་བ་དང་འགལ་བ་མེའི་
[50b.3]རྒྱུ་མཚན་དམིགས་པ་ནི་དེ་ལ་འཁྲུལ་པ་ཅན་ཡིན་ནོ། །ཅི་ཐམས་ཅད་ཀྱི་ཚེ་འམ་ཞེ་ན་མ་ཡིན་ནོ་ཞེས་བཤད་པ་ནི། རྒྱུ་མཚན་དག་ནི་འགལ་བ་ཉིད་མེད་ན་ཞེས་བྱ་བའོ། །མེ་དང་གྲང་བ་གཉིས་ཀྱི་རྒྱུ་མཚན་གཉིས་འགལ་བ་མེད་ནའོ། །དེས་ན་དེ་ལྟར་འགལ་བའི་རྒྱུ་མཚན་དམིགས་པ་གཏན་
[50b.4]ཚིགས་མ་ཡིན་གྱི་འགལ་བ་ནི་མ་ཡིན་ནོ་ཞེས་བརྗོད་པ་ཡིན་ནོ། །གང་གིས་མེའི་རྒྱུའི་ཉེ་བ་ཙམ་གྱིས་འགྲུབ་པའི་ཕྱིར་འགལ་བའི་རྒྱུ་མི་དམིགས་པ་མེད་པའི་དོན་ཅན་དུ་འགྱུར་བ་འབྲས་བུའི་རྒྱུ་བཞིན་དུ་རྒྱུས་ཀྱང་འབྲས་བུ་ཉེ་བར་འཇོག་པ་ནི་མ་ཡིན་ནོ། །འགལ་བ་གང་དག་གི་རྒྱུ་འགལ་བ་ནི་
[50b.5]དེར་འགལ་བའི་རྒྱུས་རྒྱུ་བཟློག་པ་ན་འབྲས་བུ་ཡང་ལྡོག་པར་འགྱུར་རོ། །རྒྱུ་འགལ་བ་དེ་མེད་ན་ནི་འཁྲུལ་པ་ཉིད་དོ། །འཁྲུལ་པ་ཉིད་མདོ་འགྲེལ་པས་སྟོན་པ་ནི། དཔེར་ན་ཞེས་བྱ་བའོ། །འདི་ན་གྲང་བའི་རེག་པ་མེད་དེ་ཞེས་བྱ་བ་ནི་བསྒྲུབ་པར་བྱ་བའོ། །ཤིང་ཡོད་པའི་ཕྱིར་རོ་ཞེས་བྱ་བ་ནི་སྒྲུབ་
[50b.6]པར་བྱེད་པ་རྒྱུ་འགལ་བ་དམིགས་པའོ། །ཤིང་ཡོད་པ་ཙམ་གྱིས་ནི་གྲང་བ་མེད་པ་མ་ཡིན་པའི་ཕྱིར་མེ་དང་གྲང་བའི་རྒྱུ་གཉིས་མི་འགལ་ན་འཁྲུལ་པར་འགྱུར་རོ། །རྒྱུ་མཚན་འགལ་བ་མེད་ན་གཏན་ཚིགས་ཉིད་མེད་པ་མདོར་བཤད་པ་རྒྱུ་མཚན་འགལ་ན་གཏན་ཚིགས་ཉིད་དུ་འགྱུར་རོ་ཞེས་
[50b.7]སྟོན་པ་ནི་རྒྱུ་མཚན་དག་འགལ་ན་ནི་ཞེས་བྱ་བའོ། །དགག་པར་བྱ་བའི་རྒྱུ་མཚན་གང་ཡིན་པ་དང་དེ་དང་འགལ་བའི་རྒྱུ་མཚན་རྒྱུ་འགལ་བ་ཉིད་དུ་ཉེ་བར་བཀོད་པ་དེ་གཉིས་འགལ་ན་ནི་གོ་བར་བྱེད་པ་ཁོ་ན་ཡིན་ནོ། །གང་དུ་བཞིན་ཞེ་ན། དཔེར་ན་ཞེས་སྨོས་སོ། །སྐྱེས་བུ་འདི་ལ་གྲང་བ་སྐྱེད་པའི་སྤུ་
[51a]
[51a.1]ལངས་པ་ལ་སོགས་པའི་ཁྱད་པར་མེད་དོ། །ཅིའི་ཕྱིར་ཞེ་ན། མེའི་ཁྱད་པར་ཏེ། བཟློག་པར་ནུས་པ་འདི་ལ་ཞེས་ཇི་སྐད་བརྗོད་པ་ལ་དེ་ཡོད་ན་དེའི་ཕྱིར་རོ། །འགལ་བ་སྤུ་ལངས་པ་དང་། མེས་གདུངས་པ་དེ་དག་གི་རྒྱུ་མེ་དང་གྲང་བ་དེ་གཉིས་ཀྱང་འགལ་བ་ཡིན་
[51a.2]པ་དེས་ན། མེ་ལས་གྲང་བ་མེད་པ་དེའི་ཕྱིར་དེའི་འབྲས་བུ་སྤུ་ལངས་པ་ལ་སོགས་པ་མེད་པ་ཡིན་ནོ། །གལ་ཏེ་འདིར་ཚུལ་འདི་ལྟར་བཟློག་པ་ཡིན་ན་རྒྱུ་མཚན་གཉིས་འགལ་བ་ཉེ་བར་མཁོ་བ་མེད་ཀྱི། འོན་ཀྱང་སྤུ་ལྡང་བ་ལ་སོགས་པའི་རྒྱུ་གྲང་བ་ཉིད་དང་མི་འགལ་བ་ཉིད་ཡིན་ཏེ་དེ་
[51a.3]ཉིད་ལས་གྲང་བ་མེད་པས་དེའི་འབྲས་བུ་འགོག་པའི་ཕྱིར་རོ། །མེའི་རྒྱུ་མཚན་ཉིད་ཀྱང་དོན་མེ་དེ་གྲང་བ་བསལ་བ་ཉིད་ཀྱིས་སྤུ་ལངས་པ་ལ་སོགས་པ་ཟློག་པར་བྱེད་ཀྱི་ཡོངས་སུ་གདུང་བ་འཇོག་པས་ནི་མ་ཡིན་པའི་ཕྱིར་རོ། །དེ་ལྟར་བཟློག་ན་ཡང་རྒྱུ་མཚན་གཉིས་འགལ་བ་ཡན་ལག་མ་ཡིན་ཏེ་
[51a.4]ཡོངས་སུ་གདུང་བ་ཉིད་ཀྱིས་དེ་དང་འགལ་བ་སྤུ་ལངས་པ་ལ་སོགས་པ་བཟློག་པའི་ཕྱིར་རོ། །མེ་ལས་ཡོངས་སུ་གདུང་བ་རྟོགས་པས་ཆོད་པས་སྤུ་ལངས་པ་ལ་སོགས་པ་མེད་པར་རྟོགས་པ་ནི་མི་སྲིད་དེ་རྒྱུ་ཙམ་ལས་མི་རྟོགས་པའི་ཕྱིར་དང་། མཐའི་གནས་སྐབས་མི་རྟོགས་པའི་ཕྱིར་
[51a.5]དང་། མཐུ་དང་ལྡན་པས་བྱིན་གྱིས་བརླབས་པ་སྲིད་པའི་ཕྱིར་རྒྱུ་ལས་འབྲས་བུ་མི་འགྲུབ་པས་འགལ་བའི་རྒྱུ་དམིགས་པ་ནི་གོ་བར་བྱེད་པ་མ་ཡིན་པ་ཉིད་དོ། །རྒྱུ་འགལ་ན་རྒྱུ་འགལ་བ་དམིགས་པར་འགྱུར་གྱི་འགལ་བའི་རྒྱུ་མི་དམིགས་པ་ནི་མ་ཡིན་ནོ། །དེར་རྒྱུ་མཚན་དག་ཅེས་
[51a.6]བརྗོད་པ་ནི་མི་རིགས་པ་བརྗོད་པ་ཡིན་ནོ་ཞེ་ན། བརྗོད་པ། འགལ་བའི་རྒྱུ་དམིགས་པ་དང་། རྒྱུ་འགལ་བ་དམིགས་པ་གཉིས་པོ་འདི་ཚིག་ཟུར་གཉིས་སུ་བསྟན་པས་བསྟན་པ་ཡིན་ཏེ། ཐ་སྙད་ནི་གཉི་ག་ལྟར་དམིགས་པའི་ཕྱིར་རོ། །དེ་དང་འགལ་བའི་རྒྱུ་མཚན་ནི་ཞེས་བྱ་བ་འགལ་བའི་རྒྱུ་
[51a.7]དམིགས་པའི་དབང་དུ་བྱས་ནས་རྒྱུ་མཚན་དག་འགལ་ན་ནི་ཞེས་བྱ་བས་དེ་ཉིད་ཁས་བླངས་པ་ཡིན་པའི་ཕྱིར་དང་། དེ་ཉིད་ཁོངས་སུ་བསྡུ་བའི་ཕྱིར་དེ་དང་འགལ་བ་གྲུབ་པ་འདི་ཡང་གོང་དུ་རྒྱུ་མ་གྲུབ་པ་ཁོ་ནས་ཞེས་རྒྱུ་འགལ་བ་དམིགས་པ་ཉིད་དུ་བསྟན་པའི་ཕྱིར་རོ། །དེ་ཞེས་བྱ་བས་ནི་རྒྱུ་མ་གྲུབ་པ་
[51b]
[51b.1]ཉིད་དུ་སྨོས་པའི་རྒྱུ་གཟུང་བའི་ཕྱིར་དེ་དང་འགལ་བ་གྲུབ་པ་ཡིན་པས། རྒྱུ་འགལ་བ་དམིགས་པ་ཉེ་བར་བསྟན་པར་འགྱུར་རོ། །དེ་ཉིད་ཀྱི་ཕྱིར་འགལ་བའི་རྒྱུ་དམིགས་པ་ཉིད་སྟོན་པས་གྲང་བ་དང་འགལ་བ་མེའི་རྒྱུ་བརྗོད་དོ། །སྤུ་ལངས་པ་ལ་སོགས་པ་དང་འགལ་བ་ཡོངས་སུ་གདུང་
[51b.2]བའི་རྒྱུ་ཉིད་རྟོགས་པར་བྱ་བའི་ཕྱིར་རྒྱུ་མཚན་དག་ཅེས་སྨོས་ལ། དེ་དང་འགལ་བ་ནི་རྒྱུ་འགལ་བ་དམིགས་པ་ཉིད་ཉེ་བར་བསྟན་པའི་བསམ་པས་ཡིན་ནོ། །མེ་ལས་ཡོངས་སུ་གདུང་བ་སྐྱེ་བའི་གེགས་ནི་འགའ་ཡང་རྟོགས་པ་མེད་དོ། །སྲེག་པའི་ནུས་པ་ཉིད་ཀྱིས་ཡོངས་སུ་གདུང་བར་
[51b.3]བྱེད་པ་ཡིན་པའི་ཕྱིར་རོ། །དེ་ཉིད་ཀྱིས་དུ་བ་སྐྱེད་པའི་ཕྱིར་མེ་དེ་མི་དམིགས་ན་ཡོངས་སུ་གདུང་བ་སྐྱེད་པའི་ནུས་པ་ཐོགས་པ་མེད་པ་རྟོགས་པ་ན། ཡོངས་སུ་གདུང་བ་རྟོགས་པ་ཡིན་ནོ། །རྒྱུ་ལས་འབྲས་བུ་རྟོགས་པར་ཐལ་ཏེ། དུ་བ་ལས་ནུས་པ་ཐོགས་པ་མེད་པ་རྟོགས་པ་ན་ཡོངས་སུ་གདུང་
[51b.4]བའི་རྟོགས་པ་སྐྱེ་བའི་ཕྱིར་རོ་ཞེ་ན། གལ་ཏེ་ཐོགས་པ་མེད་པ་ཉིད་རྗེས་སུ་དཔག་པ་ཁོ་ནས་ཡོངས་སུ་གདུང་བ་རྟོགས་པ་མ་གྲུབ་པ་ན་འགྱུར་རོ་ཞེས་པ་ཚོགས་པ་གཅིག་ལ་རག་ལས་པའི་རྗེས་སུ་དཔག་པར་བཤད་པར་བྱའོ། །འདིས་ནི་སྐྱེད་པར་བྱེད་པའི་མེ་ཉིད་གྲང་བ་སེལ་བར་བྱེད་པ་ཡིན་ན་
[51b.5]སྐྱེད་པར་བྱེད་པ་ཡང་སྐྱེད་པར་བྱེད་པ་ཁོ་ན་ཡིན་ནོ་ཞེས་མི་རྟོགས་ཏེ། སྐྱེད་པར་བྱེད་པ་དེར་ངེས་པའི་ཁྱད་པར་མི་རྟོགས་པའི་ཕྱིར་རོ་ཞེས་འགལ་བ་དམིགས་པ་ལ་འཁྲུལ་པར་དོགས་པ་ཡང་བཀག་པ་ཡིན་ཏེ། དུ་བ་སྐྱེ་བ་ཉིད་ཀྱིས་དྲོ་བའི་ནུས་པ་ཐོགས་པ་མེད་པ་རྟོགས་པ་ན་གྲང་བ་མེད་པར་
[51b.6]གྲུབ་པའི་ཕྱིར་རོ། །འོ་ན་འགལ་བའི་འབྲས་བུ་དམིགས་པ་ཉིད་གོ་བར་བྱེད་པར་འགྱུར་རོ་ཞེ་ན་མ་ཡིན་ཏེ། མེའི་ཁྱད་པར་ཡོངས་སུ་བཅད་པའི་དོན་ཡིན་པས་ན་དེས་མཐར་ཐུག་པ་མ་ཡིན་པའི་ཕྱིར་རོ། །ཚུལ་འདི་གྲུབ་པ་ལ་བརྟེན་པའི་ཕྱིར་རོ། །སྦྱོར་བ་གཞན་པར་གྲུབ་པོ་ཞེས་སྟོན་པ་ནི།
[51b.7]འདིས་ནི་ཞེས་བྱ་བའོ། །དེའི་ཞེས་བྱ་བ་འགལ་བའི་རྒྱུ་མེ་དེའི་འབྲས་བུ་དེ་ལས་ཀྱང་མེ་དེ་དང་འགལ་བ་གྲང་བའི་རེག་པ་དེའི་འབྲས་བུ་སྤུ་ལངས་པ་དེ་མེད་པར་རྟོགས་པ་བཤད་པ་ཡིན་ནོ། །དཔེར་ན་ཕྱོགས་འདི་ན་བ་སྤུ་ལངས་པ་ལ་སོགས་པའི་ཁྱད་པར་དང་ལྡན་པ་ཡང་ཡིན་ལ་སྐྱེས་བུ་ཡང་
[52a]
[52a.1]ཡིན་པ་དེ་ལྟ་བུ་ཅན་མ་ཡིན་ཏེ། དུ་བ་ཡོད་པའི་ཕྱིར་རོ་ཞེས་བྱ་བ་ལྟ་བུའོ། །དེས་ན་འདི་ནི་འགལ་བའི་རྒྱུའི་འབྲས་བུ་དམིགས་པའམ། རྒྱུ་འགལ་བའི་འབྲས་བུ་དམིགས་པའོ། །འདི་ཉིད་ཀྱི་ཁོངས་སུ་བསྡུ་བ་བཤད་པ་ལ། འདི་ཡང་ཞེས་བྱ་བ་ནི་སྐབས་སུ་
[52a.2]བབ་པའོ། །ཅི་རྒྱུ་འགལ་བའི་འབྲས་བུ་དམིགས་པའམ་ཞེ་ན་མ་ཡིན་ནོ་ཞེས་བརྗོད་པ་ནི་དེ་དང་འགལ་བ་གྲུབ་པ་སྟེ། རྒྱུ་འགལ་བ་གྲུབ་པའོ། །རྣམ་པ་བཞིར་བལྟས་པར་ནི་རྒྱུ་མི་དམིགས་པ་ཉིད་དུ་བསྟན་པས། རྒྱུ་འགལ་བའི་འབྲས་བུ་དམིགས་པ་ནི་འདིའི་ཁོངས་སུ་འདུ་ལ། འདི་ནི་
[52a.3]རྒྱུ་མི་དམིགས་པའི་ཁོངས་སུ་འདུ་བ་ཡིན་ནོ། །དེ་ལྟར་ན་གཙོ་བོ་ཉེ་བར་བསྟན་པ་དེའི་ཁོངས་སུ་འདུ་བ་ཚུལ་འདིས། སྣང་བ་མི་དམིགས་པ་འདི་ནི་ཇི་ལྟར་བསྟན་པ་ཉིད་ཀྱིས་རྣམ་པ་བརྒྱད་དུ་བགྲང་བར་བྱའོ། །གལ་ཏེ་ཇི་ལྟར་འགལ་བའི་རྒྱུ་དམིགས་པ་ལ་རྒྱུ་ཙམ་ནི་སྐྱེད་པར་བྱེད་པ་མ་ཡིན་ལ་ཐ་མའི་
[52a.4]གནས་སྐབས་ཀྱང་མི་རྟོགས་པའི་ཕྱིར་འཁྲུལ་པར་དོགས་པས་དེ་ཙམ་གོ་བར་བྱེད་པ་མ་ཡིན་པ་བརྗོད་པ་དེ་བཞིན་དུ་འགལ་བའི་འབྲས་བུ་དམིགས་པ་ཡང་འབྲས་བུ་གོ་བར་བྱེད་པ་མ་ཡིན་པར་འགྱུར་རོ། །དུས་གཞན་དུ་བྱེད་པའི་ཕྱིར་རྒྱུ་བྱེད་བཞིན་པ་ཉིད་མ་ཡིན་པ་ལྟར། སྔར་ཉིད་བྱས་ཟིན་པའི་ཕྱིར་
[52a.5]འབྲས་བུ་ཡང་བྱ་བཞིན་པ་མ་ཡིན་པར་འགྱུར་ཏེ། དེས་ན་གནས་པ་ཐོབ་པར་འགྱུར་རོ། །གནས་པ་ཐོབ་པས་རྒྱུ་ཉེ་བར་གནས་པ་མེད་ཀྱང་སྲིད་པའི་ཕྱིར་རོ། །འདི་ལྟར་དེའི་ཚེ་མི་བྱེད་པའི་ཕྱིར་རྒྱུས་འབྲས་བུ་ཉེ་བར་འཇོག་པ་མ་ཡིན་པ་དེ་བཞིན་དུ་འབྲས་བུས་ཀྱང་རྒྱུ་ཉེ་བར་མི་འཇོག་སྟེ།
[52a.6]དེའི་ཚེ་བྱ་བ་མ་ཡིན་པའི་ཕྱིར་རོ། །དོགས་པ་འདི་བསུ་ནས་བཤད་པ་ནི་མི་དམིགས་པ་རྣམ་པ་བརྒྱད་པོ་དེ་ལ་འགལ་བའི་འབྲས་བུ་དམིགས་པ་བཤད་པ་གང་ཡིན་པ་དེ་ལས་ཏེ། དེར་འགལ་འབྲས་བུ་ལ་ཡང་སྟེ་འགལ་བའི་རྒྱུ་དམིགས་པ་འབའ་ཞིག་ལ་ནི་མ་ཡིན་གྱི་ཇི་སྲིད་དུ་འདི་ལ་ཡང་ཁྱབ་
[52a.7]པར་འདོད་པ་ཡིན་ནོ། །དེ་ཉིད་བརྗོད་པ་ནི། ཡུལ་དང་ནི། དུས་ལ་སོགས་པ་ལ་ལྟོས་པར་འདོད་གང་དུ་གང་གི་གང་དུ་བ་སྐྱེད་པ་དང་སོགས་པ་སྨོས་པས་ཇི་ལྟར་རྟོག་པར་བྱེད་པའི་རང་བཞིན་གྱི་ཁྱད་པར་རོ། །ཇི་སྐད་བརྗོད་པ་ཡིན་ཏེ། དེ་ལས་སྐྱེས་པ་གཞན་གྱི་གཞན་དབང་དུ་གྱུར་པ་མ་
[52b]
[52b.1]ཡིན་པའི་ཕྱིར་ངེས་པར་མི་འགྲུབ་པས་སྐྱེ་བཞིན་པའི་དུ་བ་ཉིད་གོ་བར་བྱེད་པ་ཡིན་གྱི། གནས་པའི་གནས་སྐབས་ནི་མ་ཡིན་ཏེ། དེ་ནི་དུ་བའི་སྐད་ཅིག་སྔ་མ་ལ་བརྟེན་པའི་ཕྱིར་མེའི་རྒྱུ་ཅན་མ་ཡིན་པས་ན་མེ་མེད་ཀྱང་ཡོད་པའི་ཕྱིར་སྐྱེ་བཞིན་པ་ཉིད་ཀྱང་རྒྱུན་མི་འཆད་པར་གྱེན་དུ་འཕྱུར་བ་
[52b.2]མང་དུ་མཆེད་ཅིང་འཕེལ་བ་དང་མ་བྲལ་བ་དེ་ལྟར་འཕེལ་བ་བསྟེན་པ་མི་བཟོད་པ་རྟོགས་ནས་རྟོགས་པར་བྱེད་དོ། །ད་ནི་ཡུལ་དང་དུས་སྨོས་པས་ཅི་བྱ་ཞེ་ན་ཁྱད་པར་གཞན་གྱིས་ཀྱང་དེ་དེའི་ཡུལ་དང་དུས་ཅན་དུ་རྟོགས་པར་བྱེད་པའི་ཕྱིར་ཏེ། ཡུལ་དང་དུས་ཀྱི་ཁྱད་པར་ཅན་དེ་ཉིད་སྒྲུབ་པར་བྱེད་པ་
[52b.3]ཡིན་པའི་ཕྱིར་དེས་བར་དུ་བཅད་པ་ཉིད་ཀྱིས་རྟོགས་པའི་ཕྱིར་རོ། །དེ་ལྟ་མ་ཡིན་ན་འཁྲུལ་པར་དོགས་པར་འགྱུར་རོ་ཞེས་བཤད་པ་ནི། གཞན་དུ་ཞེས་བྱ་བའོ། །དེ་ལ་མི་ལྟོས་པ་ནི་འགལ་བའི་འབྲས་བུ་འཁྲུལ་པར་འགྱུར་ཏེ་ཐལ་བ་བཞིན་ནོ། །དེ་དེ་ལས་སྐྱེ་བཞིན་པ་ཡིན་ཡང་གནས་པའི་
[52b.4]གནས་སྐབས་ན་དེ་ལ་མི་ལྟོས་པ་དང་། གྲུབ་བཞིན་པར་རྟོགས་པར་བྱེད་པའི་ཁྱད་པར་ཡང་རྟོགས་པར་མི་ནུས་པས་གྲང་བ་མེད་པ་སྒྲུབ་པར་བྱེད་པ་མ་ཡིན་ནོ། །དེས་ན་འདི་ལྟར་གཏན་ཚིགས་གསུམ་ཚུལ་གསུམ་དང་ལྡན་པ་ཡིན་པའི་ཕྱིར། དེ་ནི་རྣམ་གསུམ་ཉིད་ཅེས་བརྗོད་པ་དེ་རང་གི་ངོ་བོས་
[52b.5]རྣམ་པ་གསུམ་པའི་མཐར་ཐུག་པ་བཀྲལ་ནས་གཏན་ཚིགས་གཞན་སྲིད་པ་དགག་པའི་དོན་དུ་རྣམ་གསུམ་ཉིད་ཅེས་ངེས་པར་བཟུང་བ་འཁྲུལ་པར་དོགས་པ་བཟློག་པའི་ཕྱིར་རོ། །འོ་ན་ཞེས་རྩོད་པར་བྱེད་དོ། །རྗེས་སུ་དཔོག་པར་བྱེད་པ་གང་ཡིན་པའོ། །དེ་གང་ཞེ་ན། འབྲས་བུ་སྐྱེ་བར་
[52b.6]རོ། །གང་གིས་ཤེ་ན། རྒྱུ་ལ་སོགས་པ་སྟེ་རྒྱུ་གཞན་ལ་ལྟོས་པ་མེད་པ་ལ་སོགས་པ་འབྲས་བུ་སྐྱེ་བ་དེ་ཇི་ལྟར་གཏན་ཚིགས་རྣམ་པ་གསུམ་གྱི་ནང་དུ་འདུ་ཞེ་ན། ཐམས་ཅད་དུ་བསྒྲུབ་བྱ་རྗེས་སུ་དཔོག་པའི་བྱེད་པ་ཅན་གཏན་ཚིགས་བསྟན་པ་ཉིད་ཀྱི་གཏན་ཚིགས་བརྗོད་པ་ཡང་བསྒྲུབ་བྱ་གཙོ་བོར་
[52b.7]བསྟན་པ་ཡིན་ཡང་དེའི་རང་གི་ངོ་བོ་ཕལ་པར་བྱས་པ་ཡིན་ཏེ། འབྲས་བུ་ལ་སོགས་པའི་གཏན་ཚིགས་སྟོན་པ་ནི། འདི་ནི་མེ་ཡོད་དེ་དུ་བ་ཡོད་པའི་ཕྱིར་རོ་ཞེས་བྱ་བ་ལ་སོགས་པ་བཞིན་ནོ། །དེས་ན་རྒྱུ་ཚོགས་པས་འབྲས་བུ་སྐྱེ་བར་རྗེས་སུ་དཔོག་པར་བྱེད་པ་གང་ཡིན་པ་དེ་གང་དུ་འདུ་ཞེས་བྱ་
[53a]
[53a.1]བས་ནི་གཏན་ཚིགས་དེ་ཉིད་ཀྱི་ཁོངས་སུ་འདུ་བ་རྩོད་པ་ཡིན་ནོ། །ཚོགས་པ་ལས་འབྲས་བུ་སྐྱེ་བར་རྗེས་སུ་དཔོག་པ་ན་ནི་དེ་དམིགས་པའི་ཕྱིར་རོ། །འབྲས་བུ་སྐྱེ་བ་ཡིན་ནོ་ཞེས་རྗེས་སུ་དཔག་པར་བྱ་བ་ཡིན་པའི་ཕྱིར་རྗེས་སུ་དཔག་པར་བྱ་བར་འགྱུར་རོ། །སློབ་
[53a.2]དཔོན་གྱིས་ནི་ཇི་སྐད་བརྗོད་པའི་བསྒྲུབ་བྱ་མི་སྲིད་པའི་ཕྱིར་དང་། སྲིད་པའི་བསྒྲུབ་བྱ་ལ་ཡང་རང་བཞིན་གྱི་གཏན་ཚིགས་ཀྱི་མཚན་ཉིད་དང་ལྡན་པའི་ཕྱིར་རང་བཞིན་གྱི་གཏན་ཚིགས་ཉིད་དུ་སྟོན་པས་རྒྱུ་ཚོགས་པ་ཡིས་ཞེས་བྱ་བ་ལ་སོགས་པ་སྨོས་སོ། །རྒྱུ་ཚོགས་པའི་འབྲས་བུ་སྐྱེ་བར་
[53a.3]རྗེས་སུ་དཔོག་པ་གང་ཡིན་པ་དེ་ནི་རང་བཞིན་ཡིན་པར་བརྗོད་དོ། །སྐྱེ་བ་ནི་རྒྱུ་ཡོད་པའམ་འབྲས་བུ་ཉིད་ཡིན་གྱི་བྱ་བའི་བདག་ཉིད་ཅན་གཞན་ནི་འགའ་ཡང་མེད་དོ། །དེས་ན་འབྲས་བུ་ལ་གནས་པའི་རང་བཞིན་གྱི་ཁྱད་པར་རམ། རྒྱུ་ལ་གནས་པའི་རང་བཞིན་གྱི་གཏན་ཚིགས་ཁྱད་པར་ཡིན་ནོ། །
[53a.4]དེ་དེ་ལ་ཕ་རོལ་པོས་ནི་འབྲས་བུ་ལ་གནས་པའི་ཁྱད་པར་རྗེས་སུ་དཔག་པར་བྱ་བ་བརྗོད་པ་ན་འདིར་རྒྱུ་ལ་གནས་པའི་ཁྱད་པར་རྗེས་སུ་དཔོག་པ་ན་རང་བཞིན་གྱི་གཏན་ཚིགས་སུ་བཤད་དོ། །རང་བཞིན་གྱི་གཏན་ཚིགས་ཀྱི་མཚན་ཉིད་བཤད་པ་ནི། དོན་གཞན་ལ་ནི་མི་ལྟོས་ཞེས་བྱའོ། །
[53a.5]རྒྱུ་ལ་གནས་པའི་འབྲས་བུ་སྐྱེ་བའི་མཚན་ཉིད་ནི་རྒྱུ་ཚོགས་པ་ཡོད་པ་ཙམ་ལས་གཞན་ལ་མི་ལྟོས་པ་ཡིན་ནོ། །དེས་ན་རྒྱུ་ཚོགས་པའི་རང་བཞིན་ངོ་བོ་ཉིད་དེ་ཤ་པ་ཡོད་པ་ལས་གཞན་ལ་ལྟོས་པའི་ཤིང་ཉིད་ཤ་པའི་རང་གི་ངོ་བོ་ཡིན་པ་བཞིན་ནོ། །རང་གི་ངོ་བོ་རྗེས་སུ་དཔག་པར་བྱ་བ་ལ་ནི་
[53a.6]ངོ་བོ་རང་བཞིན་གྱི་གཏན་ཚིགས་ཡིན་ནོ། །འདི་ལ་ལྷན་ཅིག་བྱེད་པ་ཐམས་ཅད་ལས་དང་པོ་འབྲེལ་པ་ཉིད་ཀྱི་ཚེ། འབྲས་བུ་མི་སྐྱེ་བར་དམིགས་ནས་ཕྱིས་འགྲུབ་པ་ཁྱད་པར་མ་སྐྱེས་པ་མ་ཡིན་པ་དང་། རིགས་ཀྱིས་ཐོབ་པ་མ་ཡིན་པ་དང་། མི་མཐུན་པ་ཉིད་ལས་སྐྱེའོ་ཞེས་ངེས་པར་བྱེད་དོ། །
[53a.7]ཁྱད་པར་ཐོབ་པ་ལ་མི་ལྟོས་ན་ནི་དང་པོ་འབྲེལ་བ་ཉིད་ན་ཡོད་པར་ཐལ་བའི་ཕྱིར་དང་། དེ་ལས་ཁྱད་པར་མི་སྐྱོན་ཕྱིས་ཀྱང་མེད་པར་འགྱུར་བའི་ཕྱིར་དང་། ཁྱད་པར་རིགས་ཀྱིས་ཐོབ་པར་མ་གྲུབ་ན་སྐད་ཅིག་གཉིས་པ་ཉིད་ལས་ཡོད་པར་ཐལ་བའི་ཕྱིར་དང་། གཅིག་གནས་པ་དོན་མེད་པའི་ཕྱིར་རོ། །དེའི་
[53b]
[53b.1]ཕྱིར་འབྲས་བུ་སྒྲུབ་པར་བྱེད་པ་ཇི་སྲིད་བྱ་བ་བྱེད་པ་ལ་ལྟོས་པ་དེ་དག་ནི་སྔ་མ་སྔ་མ་དང་འབྲེལ་པ་ཕྱི་མ་ཕྱི་མ་ཁྱད་པར་ཅན་དང་ཆེས་ཁྱད་པར་ཅན་དུ་སྒྲུབ་པར་བྱེད་པ་ཡིན་ནོ། །ཁྱད་པར་དེ་ནི་འབྲས་བུ་བསྐྱེད་པའི་མིང་ཅན་རུང་བ་ཞེས་བྱ་བ་ཡིན་ནོ། །དེ་ཡང་ཚོགས་པ་ཙམ་དང་རྗེས་སུ་འབྲེལ་པ་ཡིན་
[53b.2]ཏེ། ཇི་སྐད་བཤད་པ་བཞིན་ནོ། །ཚོགས་པ་ཡོད་པ་ཙམ་དང་རྗེས་སུ་འབྲེལ་པ་དེ་ཚོགས་པ་དག་ལས་རྗེས་སུ་དཔོག་པ་ན་རང་བཞིན་གྱི་གཏན་ཚིགས་ཡིན་ལ། འབྲེལ་བ་ངེས་པའི་ཚུལ་ནི་ཇི་སྐད་བརྗོད་པ་བཞིན་ཡིན་པས་དེ་བཞིན་ཅན་རྗེས་སུ་འགྲོ་བ་དང་ལྡོག་པ་དག་གི་ཚུལ་གསུམ་ཡིན་
[53b.3]ནོ། །དོན་གཞན་ལ་ནི་མི་ལྟོས་ཕྱིར། །ཞེས་བྱ་བ་འདིའི་འགྲེལ་པ་ནི་འདི་ཡང་ཞེས་བྱ་བའོ། །འབྲས་བུ་སྐྱེ་བ་འདི་ཡང་ལན་ཅིག་བྱེད་པ་ཇི་ལྟར་ཉེ་བ་ལས་གཞན་ལ་མི་ལྟོས་ཏེ། དེས་ན་ངོ་བོའི་ཞེས་བྱ་བ་འདི་ལྟར་ཉེ་བའི་རྒྱུའི་དེ་ཙམ་དང་འབྲེལ་བའི་རང་བཞིན་ཡིན་ནོ། །རྒྱུ་ཚོགས་པ་ཡིས་
[53b.4]ཞེས་བྱ་བ་བཤད་པ་ནི། དེ་ལ་ནི་ཞེས་བྱ་བའོ། །རྒྱུ་ཚོགས་པ་ལས་ཞེས་བྱ་བ་ནི་གཏན་ཚིགས་ཏེ། གཏན་ཚིགས་དེའི་ཕྱིར་སྲིད་པ་རྗེས་སུ་དཔོག་པ་ཡིན་ནོ། །ཡང་འདི་གང་གི་སྲིད་པ་རྗེས་སུ་དཔོག །སྲིད་པ་ཞེས་བྱ་བ་འདི་ཡང་ཅི་ཞིག་ཅེ་ན། གཏན་ཚིགས་རྣམས་ཀྱི་ཞེས་སྨོས་སོ། །
[53b.5]གང་གི་ཕྱིར་ཆོས་ཅན་ཚོགས་པ་རྣམས་ཀྱི་རུང་བ་ཉིད་རྗེས་སུ་དཔོག་པའི་རྒྱུ་དེའི་ཕྱིར་ན་རུང་བ་རྗེས་སུ་དཔོག་པ་ཡིན་ནོ། །དེས་ན་སྲིད་པ་ནི་རུང་བ་ཉིད་ཡིན་ནོ་ཞེས་བརྗོད་པར་འགྱུར་རོ། །ཚོགས་པ་ཉིད་ཆོས་ཅན་ཡིན་ཏེ་དེས་ན་ས་ལ་སོགས་པའི་ཆོས་ཅན་དག་ལ་སོགས་པ་ཉིད་ལ་འབྲས་བུ་སྐྱེ་བར་
[53b.6]རུང་བ་ཉིད་རྗེས་སུ་དཔོག་པ་ཡིན་ནོ། །དེ་ལྟ་ཡིན་དང་རང་བཞིན་ཉིད་དུ་འཐད་པ་ཡིན་གྱི་འབྲས་བུའི་ཆོས་སུ་གྱུར་པའི་སྐྱེ་བ་དཔོག་པ་ལ་ནི་མ་ཡིན་ནོ་ཞེས་སྨོས་པ་ནི་རུང་བ་ཉིད་ཀྱང་ཞེས་བྱ་བའོ། །རང་བཞིན་དུ་གྱུར་པ་ཁོ་ནའོ་ཞེས་བྱ་བ་ནི་ཚོགས་པའི་ཞེས་བྱ་བ་ལ་ལྟོས་པ་སྟེ་ཐ་མི་དད་པ་ཞེས་བྱ་བའི་
[53b.7]དོན་ཏོ། །ནུས་པ་ནུས་པ་ཅན་ལས་དོན་གཞན་མ་ཡིན་ཡང་དེ་གྲུབ་ཀྱང་མ་གྲུབ་པས་གོས་དང་ཚོན་བཞིན་དུ་རང་བཞིན་མ་ཡིན་པར་འགྱུར་ན། དེ་ནི་མེད་དོ་ཞེས་བཤད་པ་ནི། ཚོགས་པ་ཙམ་དང་རྗེས་སུ་འབྲེལ་པ་ཡིན་པས་ཞེས་བྱ་བའོ། །འདི་དག་ཇི་སྲིད་ཚོགས་པས་ཐོབ་པ་དེ་
[54a]
[54a.1]སྲིད་དུ་འབྲས་བུ་སྐྱེ་བ་དང་མཐུན་པ་བོགས་འབྱུང་བས་ན་ཁྱད་པར་སྐྱེད་པ་ཡིན་ནོ། །དེས་ན་ཐ་མི་དད་པའི་ཕྱིར་དང་། ཕྱིས་འབྱུང་བ་མ་ཡིན་པའི་ཕྱིར་རང་བཞིན་ཉིད་དུ་རིགས་སོ། །འོ་ན་རུང་བ་ཉིད་རྗེས་སུ་དཔོག་པ་ལ་རང་བཞིན་ཉིད་ཡིན་མོད། གང་གིས་གཏན་ཚིགས་
[54a.2]གཞན་དུ་འགྱུར་བ་འབྲས་བུ་སྐྱེད་པ་ཉིད་གོ་ཅི་སྟེ་རྗེས་སུ་མི་དཔོགས་ཞེས་སྨྲས་པ་ནི། ཡང་ཅིའི་ཕྱིར་ཞེས་བྱ་བ་ཡིན་ནོ། །ཚོགས་པའི་ཞེས་བྱ་བ་ལ་སོགས་པས་ནི་ལན་འདེབས་སོ། །འབྲས་བུ་ཡུལ་ཅན་དུ་གྱུར་པ་ལས་ཚོགས་པའི་གཏན་ཚིགས་མ་ངེས་པ་ཉིད་ཡིན་ནོ་ཞེས་བསྒྱུར་ནས་
[54a.3]འབྲེལ་ཏོ། །མ་ངེས་པ་ཉིད་ཀྱི་རྒྱུ་བསྟན་པའི་ཕྱིར་འབྲས་བུ་ཁྱད་པར་དུ་བྱེད་དེ། མྱུ་གུ་ལ་སོགས་པ་བསྐྱེད་པར་བྱ་བ་ནི་འབྲས་བུ་ཡིན་ལ་དེ་ལ་དང་འབྲས་བུ་སྐྱེད་པར་བྱེད་པའི་མཚན་ཉིད་ཀྱི་ནུས་པ་ནི་འབྲས་བུ་ལ་གནས་པའོ། །ཚོགས་པ་དེ་ནི་དེ་ཉིད་ཀྱི་ཡིན་ཏེ། དེ་ཉིད་སྐྱེད་པར་བྱེད་པ་ཡིན་པའི་
[54a.4]ཕྱིར་རོ། །དེ་རྣམས་འགྱུར་བ་ནི་ཇི་སྐད་བརྗོད་པའི་བོགས་འབྱུང་བ་སྟེ། དེ་དང་འབྲེལ་པའི་འབྲས་བུ་ལའོ། །གང་གི་ཕྱིར་ཕྱི་མ་ཕྱི་མར་ཁྱད་པར་ཐོབ་པ་ཉིད་ཀྱི་ཚོགས་པ་ལས་འབྲས་བུ་སྐྱེ་བ་དེའི་ཕྱིར་འདི་ལ་ཚོགས་པ་རྣམས་མ་ངེས་པ་ཉིད་དེ། དེ་ཡོད་ཀྱང་འབྲས་བུ་འབྱུང་བར་འགྱུར་བ་ལས་འདའ་
[54a.5]བས་གཏན་མེད་པའི་ཕྱིར་རོ། །གང་གི་ཕྱིར་འགྱུར་བ་ལྟོས་ན་མ་ངེས་པ་ཉིད་བཤད་པ་ནི། གགས་བྱེད་པ་དག་ཅེས་བྱ་བ་ཡིན་ནོ། །འདི་སྐད་བརྗོད་པ་ཡིན་ཏེ། གང་གི་ཕྱིར་གང་གིས་སྐྱེད་པར་བྱེད་པའི་རང་བཞིན་སྐྱེད་པར་ངེས་པའི་ཕྱིར། དེ་ཉིད་འབྲས་བུ་འབྱུང་བར་འགྱུར་བ་ཉིད་ལས་མི་འདའ་
[54a.6]བར་འགྱུར་བ་ཚོགས་པ་རྣམས་ཉེ་བ་ཙམ་ཉིད་ལས་འབྲས་བུ་སྐྱེ་བ་མ་ཡིན་གྱི། འོན་ཀྱང་ཕན་ཚུན་ཕུལ་དུ་བྱུང་བའི་ཁྱད་པར་བསྐྱེད་པས་ཆོད་པ་ཡིན་ནོ། །དེས་ན་ཚོགས་པ་དེ་ཙམ་ཉིད་ཉེ་བར་གནས་པ་ལས་ཕྱི་མ་ཕྱི་མ་ཁྱད་པར་དང་བཅས་པ་སྐྱེད་པ་དེ་བཞིན་དུ། དེ་ཉིད་དུ་དངོས་པོ་གཞན་ཉེ་བར་གནས་
[54a.7]པ་ལས་དེའི་ནུས་པ་སྐྱེ་བ་དང་མི་མཐུན་པའི་ཕྱིར་དེ་མི་སྐྱེ་བར་ཡང་འགྱུར་རོ། །དེ་བས་ན་འགྱུར་བ་ལ་ལྟོས་པའི་ཕྱིར་གགས་བྱེད་པ་སྲིད་པ་ཡིན་ནོ། །རྒྱུའི་རྫས་ཞེས་བྱ་བ་ནི་འགྲེལ་པའོ། །འདིས་ནི་ངེས་པ་ཉིད་བརྗོད་དོ། །ཁོ་ནའི་སྒྲ་ནི་ངེས་པར་གཟུང་བ་ཡིན་ཏེ། ཁོ་ནས་ཞེས་བྱ་བས་ནི་
[54b]
[54b.1]གཏན་ཚིགས་འཕེན་པ་ཡིན་ཏེ། དེས་ན་ཚོགས་པ་ཞེས་བྱ་བའི་གཏན་ཚིགས་དེ་ཙམ་ཁོ་ནའི་ཕྱིར་ནི་རྒྱུ་རྣམས་འབྲས་བུ་སྐྱེད་པར་བྱེད་པ་མ་ཡིན་ནོ་ཞེས་བརྗོད་པ་ཡིན་ནོ། །དེས་ན་དེ་དག་ཡོད་པས་འབྲས་བུ་འབྱུང་བར་མ་ངེས་པའི་ཕྱིར་འབྲས་བུ་མི་སྐྱེ་ཡང་དེ་ཡོད་པས་ཚོགས་པ་ཉིད་འབྲས་བུ་སྐྱེ་
[54b.2]བ་ལ་མ་ངེས་པ་ཉིད་དོ། །ཇི་ལྟར་སྐྱེད་པར་བྱེད་པ་མ་ཡིན་ཞེ་ན། འབྲས་བུ་དང་འབྲེལ་པའི་སྐྱེ་བ་གང་ཡིན་པ་དེ་ནི་ཚོགས་པ་ལས་སྐྱེ་བ་ཅན་གྱི་ནུས་པ་གང་ཡིན་པ་དེ་རྣམས་ཀྱི་འགྱུར་བ་ལ་ལྟོས་པའི་ཕྱིར་རོ། །དེ་དེ་ཙམ་ལས་ནི་འབྱུང་བ་མ་ཡིན་ནོ་སྙམ་དུ་བསམས་པའོ། །བར་འདིར་ཏེ་
[54b.3]ཚོགས་པ་ཉེ་བ་དང་འབྲས་བུ་སྐྱེ་བའི་དབུས་ཡོངས་སུ་འགྱུར་བའི་མིང་ཅན་འདིར་གགས་བྱེད་པ་སྲིད་པའི་ཕྱིར་མི་སྐྱེ་བར་འགྱུར་རོ། །དེའི་ཕྱིར་ཚོགས་པ་དག་ཁོ་ནས་རང་གི་འབྲས་བུ་སྐྱེ་བར་བྱེད་པ་མ་ཡིན་ནོ། །དེ་བས་ན་འབྲས་བུ་རྗེས་སུ་དཔག་པ་མ་ཡིན་ནོ། །རུང་བ་ཉིད་རྗེས་སུ་དཔོག་ན་ནི་
[54b.4]དེ་ལྟར་མ་ངེས་པ་ཉིད་མ་ཡིན་ནོ་ཞེས་བཤད་པ་ནི། རུང་བ་ཉིད་ནི་ཞེས་བྱ་བ་ཡིན་ནོ། །འབྲས་བུ་ཡང་རྫས་གཞན་ལ་མི་ལྟོས་པ་མ་ཡིན་ནམ་ཞེ་ན། བདེན་མོད་ཀྱི་འདི་ལྟར་བསམས་པ་ཡིན་ཏེ་ཇི་ལྟར་འབྲས་བུའི་རྒྱུའི་རྫས་ཡོངས་སུ་རྫོགས་པ་ཡིན་ཡང་འགྱུར་བ་ལ་ལྟོས་པས་བར་ཆོད་པར་
[54b.5]འགྱུར་བའི་ཕྱིར་གགས་བྱེད་པའི་རྒྱུ་འཇུག་པ་དེ་བཞིན་དུ་གང་གིས་བར་ཆོད་སྲིད་པས་གགས་བྱེད་པར་འཇུག་པར་འགྱུར་བ། འགྱུར་བ་ཡང་འགྱུར་བ་ལ་ལྟོས་པ་དག་ལས་སྐྱེ་བ་ནི་མ་ཡིན་ཏེ། ཚོགས་པ་རྣམས་འགྱུར་བ་ལ་མི་སྡོད་པར་བྱེད་པ་ཡིན་པའི་ཕྱིར་རོ། །དེ་ལྟ་མ་ཡིན་ན་རྫས་
[54b.6]གཞན་ལ་ལྟོས་པར་ཐར་བའི་ཕྱིར་རོ། །འདི་དག་གི་འབྲས་བུ་སྐྱེད་པའི་ཚོགས་པ་ནི་འདི་ཉིད་ཡིན་ཏེ། ཚོགས་པ་ཙམ་ཉིད་ན་འབྲས་བུ་དང་མཐུན་པའི་ཁྱད་པར་སྒྲུབ་པ་གང་ཡིན་པའོ། །དེ་ཙམ་འབྲེལ་པ་ཙམ་ཉིད་ལས་སྐྱེད་པར་བྱེད་པ་མ་ཡིན་ན་ཁྱད་པར་མེད་པའི་ཕྱིར་ཕྱིས་ཀྱང་སྐྱེད་
[54b.7]པར་བྱེད་པར་མི་འགྱུར་རོ། །ལྷན་ཅིག་བྱེད་པ་ལ་ལྟོས་ན་ནི་དེ་ལྟར་འགྱུར་ཏེ། དེའི་ལྟོས་པར་བྱ་བ་མ་ཚང་བའི་ཕྱིར་དེ་ཁྱད་པར་རྩོམ་པ་མ་ཡིན་པའི་ཕྱིར་རོ། །དེར་ཡང་འབྲེལ་པ་ཙམ་ཉིད་ལས་ཁྱད་པར་སྐྱེ་བར་བརྗོད་པར་བྱ་བ་ཡིན་ཏེ། དེ་ལྟ་མ་ཡིན་ན་ཐལ་བ་དེ་ཉིད་དུ་འགྱུར་རོ། །དེའི་
[55a]
[55a.1]ཕྱིར་ཚོགས་པ་རྣམས་རྫས་གཞན་ལ་མི་ལྟོས་པ་ཁོ་ནར་རུང་བ་སྐྱེད་པ་ན། ལྟོས་པ་དང་བཅས་པས་དེ་བྱེད་པ་ཉིད་དུ་གྲུབ་བོ། །དེ་ཉིད་ཀྱི་ཕྱིར་རུང་བ་ཉིད་དུ་རྗེས་སུ་དཔོག་པ་ལ་ཚོགས་པ་རྣམས་མི་འཁྲུལ་པ་ཡིན་ཏེ། རྒྱུ་ནུས་པ་འབྲས་བུ་ལ་འཁྲུལ་པ་མེད་པའི་ཕྱིར་
[55a.2]རོ། །ཚོགས་པ་རྣམས་རུང་བ་ཉིད་སྐྱེད་པ་ལ་ནི་འབྲེལ་པ་ཙམ་ཉིད་ལས་ནུས་པ་ཡིན་ནོ། །ནུས་པ་དེ་རྟོགས་པ་ནི་དང་པོ་འབྲེལ་པ་ཉིད་མེད་ན་ཕྱིས་ཀྱང་མེད་པར་ཐལ་བའི་ཕྱིར་དང་། ཁྱད་པར་སྐྱེ་བ་ལ་མི་ལྟོས་ན་ཆོད་ནས་བྱེད་པ་མི་སྲིད་པའི་ཕྱིར་རོ། །འབྲས་བུ་སྐྱེ་བ་ལ་ནི་ཆོད་པ་མེད་པ་
[55a.3]ཐ་མའི་གནས་སྐབས་ཐོབ་པར་ངེས་པར་མི་ནུས་སོ་ཞེས་རྣམ་པར་ངེས་པར་བཤད་པ་ཡིན་ནོ། །འོ་ན་འདི་ཉིད་དུ་རྒྱུའི་ཚོགས་པ་སྔ་མ་ལས་ཕྱི་མ་ཁྱད་པར་ཅན་དུ་རུང་བ་ཉིད་དང་ལྡན་པ་རྗེས་སུ་དཔག་པར་བྱ་བར་འགྱུར་རོ། །དེས་ན་རྒྱུ་ལས་འབྲས་བུ་འགྲུབ་བོ་ཞེ་ན། དེ་ནི་མེད་དེ་ནུས་པ་ནི་འབྲེལ་
[55a.4]པ་ཙམ་ལ་བརྟེན་ནས་ཇི་སྐད་བཤད་པའི་རིགས་པ་ཉིད་ཀྱིས་རྟོགས་པའི་ཕྱིར་ཏེ། མངོན་སུམ་ལས་ནི་མ་ཡིན་ནོ། །འོ་ན་རིགས་པས་རྟོགས་པའི་ནུས་པ་དང་ལྡན་པ་ལས་རྗེས་སུ་དཔོག་པར་འགྱུར་རོ་ཞེ་ན། གལ་ཏེ་ཚོགས་པའི་སྐད་ཅིག་སྔ་མ་རྣམས་ཕྱི་མའི་སྐད་ཅིག་ལས་ཐ་
[55a.5]དད་པའི་རང་བཞིན་དུ་རྟོགས་པའི་ཕྱིར་ཡིན་ན་འགྱུར་བ་ཡིན་ནོ། དེ་ལྟ་ན་ནི་མ་ཡིན་ཏེ་སྐད་ཅིག་གི་དབྱེ་བ་མི་རྟོགས་པའི་ཕྱིར་རོ། །དེའི་ཕྱིར་དང་པོ་འབྲེལ་པ་ནས་བརྩམས་ཏེ། སྐད་ཅིག་ཐམས་ཅད་ནུས་པ་དང་ནུས་པ་སྐྱེད་པར་བྱེད་པ་ཞེས་བྱ་བར་གནས་པས་དེ་དག་གི་རང་བཞིན་དེ་ཉིད་ཚོགས་པའི་
[55a.6]མཚན་ཉིད་འབྲེལ་པ་ལས་རྗེས་སུ་དཔོག་པ་ཡིན་ནོ། །དེ་དག་ཙམ་ཉེ་བར་གྱུར་པའི་ཚོགས་པ་ཉིད་ནི་འབྲེལ་པར་བརྗོད་དོ། །རུང་བ་ཉིད་དེ་ཇི་ལྟར་རྗེས་སུ་དཔོག་ཅེ་ན། བཤད་པ་འདི་ཞེས་བྱ་བ་ནི་ཆོས་ཅན་ནོ། །ཚོགས་པ་ཞེས་བྱ་བ་ནི་གཏན་ཚིགས་སོ། །ནུས་པ་ཕྱི་མ་ཕྱི་མ་འགྱུར་བས་འབྲས་
[55a.7]བུ་སྐྱེད་པར་ནུས་པ་ཡིན་ཏེ་ཞེས་བྱ་བ་ནི་བསྒྲུབ་པར་བྱའོ། །ནུས་པ་འགྱུར་བའི་རྐྱེན་གཞན་ལ་ལྟོས་པ་མེད་པའི་ཕྱིར་རོ་ཞེས་བྱ་བ་ནི་ཁྱབ་པར་ངེས་པའོ། །དེ་ལྟར་གཏན་ཚིགས་སྟོན་པ་ཡང་མཐོང་སྟེ། དཔེར་ན་བྱས་པ་འདི་ནི་མི་རྟག་པ་ཡིན་ཏེ། འཇིག་པའི་རྒྱུ་གཞན་ལ་མི་ལྟོས་པའི་ཕྱིར་རོ་
[55b]
[55b.1]ཞེས་བྱ་བ་བཞིན་ནོ། །ནུས་པ་འགྱུར་བའི་རྐྱེན་ལ་ལྟོས་པར་བྱ་བ་གཞན་མེད་པས་ཁྱད་པར་ཕྱི་མ་སྐྱེས་པ་ལ་ལྟོས་པ་མེད་པར་བཤད་པ་ནི་ནུས་པ་འགྱུར་བའི་རྐྱེན་གཞན་ལ་ལྟོས་པར་བྱ་བ་མེད་པའི་ཕྱིར་རོ་ཞེས་བྱ་བའོ། །དེ་ཉིད་ཇི་ལྟར་ཞེ་ན་ནུས་པ་སྐྱེ་ན་ནི་རིགས་སྔ་མ་ཙམ་གྱི་རྒྱུ་ཅན་ཡིན་
[55b.2]པའི་ཕྱིར་རོ་ཞེས་སྨོས་སོ། །རིགས་མཐུན་པའི་སྐད་ཅིག་སྔ་མ་ཙམ་ལས་ལྟོས་པའི་ཚོགས་པ་ལས་རུང་བ་ཉིད་སྐྱེ་བའི་ཕྱིར་ལྟོས་པ་མེད་པ་ཉིད་ཡིན་ནོ། །རྗེས་སུ་དཔོག་པ་གཞན་ཡང་རྣམ་པ་གསུམ་ཉིད་ཀྱི་ཁོངས་སུ་བསྡུ་བའི་ཕྱིར་འོ་ན་ཞེས་རྩོད་པར་བྱེད་དོ། །རྒྱུ་དང་འབྲས་བུར་མ་
[55b.3]གྱུར་པ་ཞེས་བྱ་བ་ནི་འབྲས་བུའི་རྗེས་སུ་དཔོག་པ་དང་རུང་བ་ཉིད་རྗེས་སུ་དཔོག་པ་ལས་ཕྱི་རོལ་དུ་གྱུར་པའོ། །གཞན་ཞེས་བྱ་བ་ནི་རང་བཞིན་གྱི་གཏན་ཚིགས་ལས་ཐ་དད་པའོ། །རོ་ལ་སོགས་པས་གཟུགས་ལ་སོགས་པ་རྟོགས་པ་གང་ཡིན་པ་དེ་ཇི་ལྟར་ཏེ། རྣམ་པ་གང་གིས་ཡིན།
[55b.4]ཇི་ལྟར་བསྟན་པ་ལྟར་ནི་མི་སྲིད་དོ་ཞེས་བྱ་བའི་དོན་ཏོ། །མུན་ཁུང་དུ་མིག་གིས་བྱེད་པ་མེད་པར་རོའི་ཁྱད་པར་མྱོང་བ་ལས་མ་དུ་ལུང་ག་ལ་སོགས་པ་ལ་གནས་པའི་གཟུགས་རྟོགས་པའམ། ཡང་ན་རོ་ལ་གནས་པའི་ཁྱད་པར་རྟོགས་པས་འབྲས་བུ་དག་ལ་སྨིན་པ་དང་མ་སྨིན་པ་ལ་
[55b.5]སོགས་པ་རྟོགས་པ་ན་དེའི་གནས་སྐབས་ན་ངེས་པའི་གཟུགས་རྟོགས་པ་བཞིན་ནོ། །ཡང་དེ་ཇི་ལྟར་ཞེས་བྱ་བ་གཏན་ཚིགས་རྣམ་པ་གསུམ་གྱི་ནང་དུ་འདུ་ཞེས་བྱ་བར་འབྲེལ་ཏོ། །འདི་ལ་ལན་འདེབས་པ་ནི་དེ་ཡང་ཞེས་བྱ་བའོ། །རྩོད་པར་བྱེད་པས་རོ་ལ་སོགས་པས་གཟུགས་ལ་
[55b.6]སོགས་པ་རྟོགས་པར་སྨྲས་པའི་གཟུགས་ལ་སོགས་པ་རྟོགས་པ་དེ་ཡང་ཞེས་བྱ་བ་རྗེས་སུ་བརྗོད་ནས་ཚོགས་པ་གཅིག་ལ་ཞེས་རང་གི་ངོ་བོ་སྟོན་པར་བྱེད་དོ། །གཟུགས་ལ་སོགས་པའི་བསྒྲུབ་པར་བྱ་བ་རོ་ལ་སོགས་པའི་གཏན་ཚིགས་ལས་རྟོགས་པ་ནི་ཚོགས་པ་གཅིག་ལ་རག་
[55b.7]ལས་པ་ཡིན་ནོ། །འདིས་ནི་དེར་མི་འཁྲུལ་པ་བརྗོད་དོ། །དེ་མེད་པར་གཞན་གྱིས་གཞན་རྟོགས་པར་མི་རུང་བའི་ཕྱིར་དང་། ངེས་པར་བརྟགས་པ་འདི་ཉིད་འདིར་འཐད་པའི་ཕྱིར་རོ། །རྒྱུ་གང་ལས་རོ་སྐྱེས་པ་དེ་ཉིད་ལས་གཟུགས་སྐྱེ་བའོ། །དེས་ན་ཇི་ལྟར་འདིའི་རྒྱུ་གཞན་ལས་
[56a]
[56a.1]མི་འབྱུང་བའི་ཕྱིར་ལྡོག་པ་ངེས་པ་དེ་བཞིན་དུ་རང་གི་རྒྱུ་ལས་གདོན་མི་ཟ་བར་དེ་འབྱུང་བའི་ཕྱིར་རྗེས་སུ་འགྲོ་བ་ཡང་ངེས་པ་ཡིན་ནོ། །དེས་ན་ཇི་ལྟར་རོའི་རྒྱུ་དེ་དེ་སྐྱེད་པར་ནུས་པའི་ཕྱིར་རོ། །འབྱུང་བ་དེ་བཞིན་རོའི་རྒྱུ་ཉིད་གཟུགས་ཀྱི་རྒྱུ་ཡིན་པའི་ཕྱིར་དེ་གཟུགས་སྐྱེད་པར་
[56a.2]ཡང་ནུས་པ་ཁོ་ནའོ། །དེས་ན་དེ་ལས་གཟུགས་འབྱུང་བར་ཡང་ངེས་པ་ཉིད་པས་རོ་ཡོད་ན་གཟུགས་ཡོད་པར་འགྱུར་བའི་ཕྱིར་རོ། །གཟུགས་དང་རོ་དག་མེད་ན་ནི་མི་འབྱུང་བར་གྲུབ་བོ། །ཚུལ་འདིས་མེད་ན་མི་འབྱུང་བ་ཡིན་དུ་ཆུག་མོད། རོ་ལས་གཟུགས་རྗེས་སུ་དཔོག་པ་ན་དེ་དེ་ལ་
[56a.3]འབྲས་བུའི་གཏན་ཚིགས་ནི་མ་ཡིན་ཏེ་ལྷན་ཅིག་འབྱུང་བས་དེའི་འབྲས་བུ་དེ་མ་ཡིན་པའི་ཕྱིར་རོ། །རང་བཞིན་ཡང་མ་ཡིན་ཏེ། ཐ་དད་པའི་ཕྱིར་རོ། །དེས་ན་འདི་དག་གི་མེད་ན་མི་འབྱུང་བའི་བསྒྲུབ་པའི་འབྲེལ་པ་གསུམ་པར་འགྱུར་རོ། །གལ་ཏེ་རང་གི་རྒྱུ་ཉིད་དང་འབྲེལ་པ་དེ་གཉིས་དེ་མེད་ན་
[56a.4]མི་འབྱུང་བའི་ཕྱིར་ཤུགས་ཀྱིས་ལྷན་ཅིག་འབྱུང་བར་ངེས་པར་ཡང་རྟོགས་པ་ན་རྟོགས་པ་པོ་གཅིག་ལས་གཞན་རྗེས་སུ་དཔོག་གོ་ཞེ་ན། དེ་ལྟ་ཡིན་དུ་ཟད་མོད། འོན་ཀྱང་གཏན་ཚིགས་འདི་འབྲས་བུ་མ་ཡིན་ཞིང་རང་བཞིན་ཡང་མ་ཡིན་ནོ་ཞེས་བྱ་བར་འགྱུར་རོ། །དོགས་པ་འདི་བསུ་ནས། དེ་ལྟ་ཡིན་
[56a.5]དང་ཡང་འབྲས་བུའི་གཏན་ཚིགས་ལས་ཇི་ལྟར་མ་འདས་པ་དེ་སྟོན་པ་ནི་རྒྱུ་ཆོས་རྗེས་སུ་དཔག་པ་སྟེ་ཞེས་བྱ་བའོ། །དོན་འདི་ཡིན་ཏེ། གང་གིས་དེ་རྗེས་སུ་དཔོག་པ་ན་གཏན་ཚིགས་འདི་གང་ཡིན་ཞེས་བསམ་པ་འདིར་རོ་ལས་གཟུགས་ཆོད་པ་མེད་པར་དངོས་སུ་དཔོག་པ་ནི་མ་ཡིན་གྱི། འོ་ན་
[56a.6]ཀྱང་རོས་ནི་རང་གི་རྒྱུའི་ཆོས་བྱེད་པ་གཟུགས་སྐྱེད་པའི་ནུས་པའི་གེགས་བྱར་མེད་པ་ཉིད་ཅེས་བྱ་བ་གཟུགས་ཀྱི་རྒྱུའི་མཚན་ཉིད་རྗེས་སུ་དཔོག་པར་བྱེད་དོ། །དེ་སྐྱེད་པའི་ནུས་པ་གགས་བྱར་མེད་པ་ཅན་གྱི་རྒྱུ་ཡིན་ན་རོ་དང་དུས་མཚུངས་པར་འགྱུར་བ་གཟུགས་ཡོད་པ་ཉིད་དུ་རྟོགས་པར་འགྱུར་བ་ཡིན་
[56a.7]ནོ། །དེས་ན་ཇི་ལྟར་རོ་ཡོད་པ་ན་གཟུགས་ཡོད་པ་དེ་ལྟ་བུ་ཉིད་དུ་མ་རྟོགས་ན་དེ་ལས་དེ་ལྟར་རྟོགས་པ་མི་འགྱུར་རོ། །དེ་ལྟར་རྟོགས་ན་ནི་འདི་འབྲས་བུ་ཉིད་ལས་རྒྱུ་རྟོགས་པ་ཕྱོགས་གཅིག་ཏུ་རྟོགས་པ་ཡིན་ནོ། །འདིར་རྟོགས་པ་དང་འབྲེལ་པ་གཉི་ག་ཡང་དཔེར་ན་དུ་བས་བུད་ཤིང་འགྱུར་བ་བཞིན་
[56b]
[56b.1]ཞེས་བྱ་བའོ། །དུ་བ་ལ་བུད་ཤིང་གྱི་(གི་)འགྱུར་བ་བཞིན་དུ་ཚོགས་པ་གཅིག་ལ་རག་ལས་པས་རྒྱུའི་ཆོས་རྗེས་སུ་དཔག་པས་རྟོགས་པ་ཡིན་ནོ། །འགྲེལ་པ་ནི། དེ་ལ་ནི་ཞེས་བྱ་བ་ཡིན་ནོ། །རྒྱུ་དེ་ལྟ་བུ་ཁོ་ན་ཞེས་བྱ་བས་ནི་རྒྱུའི་ཆོས་རྗེས་སུ་དཔག་པར་བརྗོད་དོ། །དེ་ཇི་ལྟ་བུར་གྱུར་པ་དེ་སྟོན་
[56b.2]པས་ཚོགས་པ་གཅིག་ལ་རག་ལས་པ་ཉིད་འཆད་པ་ནི་ནུས་པ་ཞུགས་པ་གེགས་བྱར་མེད་པ་གང་ལ་ཡོད་པ་སྟེ། དེ་ལྟ་བུར་གྱུར་པ་གཟུགས་ཀྱི་ཉེ་བར་ལེན་པའི་རྒྱུའོ། །གཟུགས་ཀྱི་སྐད་ཅིག་གང་ལས་གཟུགས་ཀྱི་སྐད་ཅིག་ཕྱི་མ་ལྷན་ཅིག་བྱེད་པ་ཉེ་བས་བསྒྲུབ་པའི་ཁྱད་པར་ཅན་དུ་སྐྱེ་བ་དེ་
[56b.3]ནི་ཉེ་བར་ལེན་པ་ཡིན་ནོ། །རོའི་རྒྱུ་ནི་གཟུགས་ཀྱི་ཉེ་བར་ལེན་པའི་རྒྱུ་དེའི་ལྷན་ཅིག་བྱེད་པའི་རྐྱེན་ཡིན་ཏེ། དེ་ལྟར་རོའི་ཉེ་བར་ལེན་པའི་རྒྱུ་རོ་སྐྱེད་པར་བྱེད་དོ། །ནི་ཞེས་བྱ་བ་ནི་གང་གི་ཕྱིར་གྱི་དོན་ཏེ་གང་གི་ཕྱིར་དེ་ལྟ་ཡིན་པ་དེའི་ཕྱིར་འདིར་གཟུགས་སྐྱེད་པའི་ནུས་པ་གེགས་བྱར་མེད་པ་ཅན་
[56b.4]གཟུགས་ཀྱི་སྐད་ཅིག་སྔ་མའི་ལྷན་ཅིག་བྱེད་པར་གྱུར་པ་གང་ཡིན་པ་དེ་ལྟ་བུའི་རྒྱུ་རྗེས་སུ་དཔོག་པར་བྱེད་པ་ཡིན་ནོ། །འདི་ཉིད་ལ་དཔེར་ན་བུད་ཤིང་གི་འགྱུར་བའི་སོལ་བ་ལ་སོགས་པའི་མཚན་ཉིད་ཀྱི་ཉེ་བར་ལེན་པ་དེ་ཉིད་ཡིན་ནོ། །དེ་ཡང་འབའ་ཞིག་ནི་དེའི་རྒྱུ་མ་ཡིན་གྱི་འོན་ཀྱང་མེ་ལྷན་
[56b.5]ཅིག་བྱེད་པ་ཡིན་ནོ། །མེ་ཡང་དུ་བསྐྱེད་པར་བྱེད་པ་ཡིན་ཏེ། དེ་ལྟར་ན་དེ་ལྟ་བུའི་བུད་ཤིང་གི་ལྷན་ཅིག་བྱེད་པའི་རྐྱེན་དུ་གྱུར་པའི་མེ་ལས་དུ་བ་སྐྱེ་བ་ཡིན་ནོ། །དུ་བ་ལས་དེ་ལྟ་བུའི་མེ་རྗེས་སུ་དཔག་པ་ན་བུད་ཤིང་གི་འགྱུར་བ་ཡང་རྗེས་སུ་དཔག་པར་འགྱུར་བ་ཡིན་ནོ། །དཔེར་ན་ཇི་སྐད་
[56b.6]བརྗོད་པའི་ཁྱད་པར་གྱིས་ཁྱད་པར་དུ་གྱུར་པའི་མེའི་དུ་བ་སྐྱེད་པ་རྗེས་སུ་དཔོག་པ་དེ་བཞིན་དུ་རྒྱུ་དེ་ལྟ་བུ་རྗེས་སུ་དཔོག་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེ་ལྟ་ན་གཟུགས་ཀྱི་སྐྱེད་པར་བྱེད་པའི་ཚོགས་པ་གཟུགས་དང་རོ་དག་རོའི་ཡིན་པར་བརྗོད་པར་མི་འགྱུར་ཏེ། རོ་སྐྱེད་པ་ན་རོ་གཟུགས་
[56b.7]ལ་ལྟོས་པར་མ་བརྗོད་པའི་ཕྱིར་རོ། །དེས་ན་གཟུགས་དང་རོ་དག་ཚོགས་པ་གཅིག་ལ་རག་ལས་པར་ཇི་ལྟར་འགྱུར། རོ་ལས་ནི་རྒྱུར་གྱུར་པའི་རོ་རྗེས་སུ་དཔོག་པར་འཐད་པ་ཡིན་ཏེ། རྒྱུ་མེད་པར་འབྲས་བུ་མི་འབྱུང་བའི་ཕྱིར་རོ། །དེ་རྗེས་སུ་དཔག་པ་ལས་གཟུགས་ཀྱི་རྒྱུར་གྱུར་པའི་
[57a]
[57a.1]གཟུགས་རྗེས་སུ་དཔག་པ་ན། གལ་ཏེ་ཁྱད་པར་རྟོགས་པ་མེད་པར་ཁྱད་པར་ཅན་མི་རྟོགས་པའི་ཕྱིར་འབྲས་བུར་གྱུར་པའི་གཟུགས་ལ་རྟོགས་པ་ཙམ་འདོད་ན། དེར་ནི་འགྱུར་ལ་རག་སྟེ་དེ་ཙམ་གྱི་ཚད་མའི་ཡུལ་ཉིད་ནི་མ་ཡིན་ནོ། །འོན་ཏེ་དེ་ལྟར་རྟོགས་པ་
[57a.2]དེར་ཡོད་པར་མི་འཁྲུལ་པའི་ཕྱིར་ཚད་མའི་ཡུལ་ཉིད་ཡིན་ནོ། །དེ་ནི་མི་ནུས་ཏེ་རྒྱུ་འབྲས་བུ་ལ་ངེས་པ་མེད་པའི་ཕྱིར་དང་ཡོད་ཀྱང་ཤེས་པར་མི་ནུས་པའི་ཕྱིར་རོ། །དེས་ན་ཇི་ལྟར་རྒྱུའི་ཆོས་རྗེས་སུ་དཔག་པས་གཟུགས་རྗེས་སུ་དཔག་གོ། །དོགས་པ་འདི་བསུ་ནས་རེ་ཞིག་གཟུགས་
[57a.3]ལ་འཁྲུལ་པ་མེད་པ་བཤད་པ་ནི། འདི་ལྟར་ཞེས་བྱ་བའོ། །རང་གི་འབྲས་བུ་སྐྱེད་པའི་མཚན་ཉིད་ནི་ནུས་པ་ནི་གགས་བྱར་མེད་པ་ཉིད་དེ་ནུས་པ་འཇུག་པ་དེའོ། །འགྲེལ་པ་ནི་རང་གི་རྒྱུའི་ཞེས་བྱ་བས་ནི་ནུས་པའི་དོན་བཤད་དོ། །འབྲས་བུ་སྐྱེད་པ་ལ་མངོན་སུམ་ཕྱོགས་པ་ཞེས་བྱ་བས་
[57a.4]ནི་འཇུག་པའི་རང་བཞིན་གགས་བྱར་མེད་པ་ཉིད་ཡོད་པར་ངེས་པ་མེད་པར་བཤད་དོ། །ནུས་པ་འཇུག་པ་དེ་ཅི་ཞེ་ན་མེད་པར་ནི་རོ་མེད་ཅེས་བརྗོད་དོ། །ཇི་སྲིད་རོའི་རྒྱུ་སྐྱེད་པ་ལ་ནུས་པ་གགས་བྱར་མེད་པ་མ་ཡིན་པ་དེ་སྲིད་དུ་རོ་མི་འབྱུང་བའོ། །འདི་སྐད་བརྗོད་དེ་གལ་ཏེ་རྒྱུ་འབྲས་བུ་
[57a.5]ལ་ངེས་པ་མ་ཡིན་ན་རོ་ཉིད་ཡོད་པར་ངེས་པ་མེད་པར་འགྱུར་རོ། །འོན་ཏེ་འབྲས་བུ་སྐྱེད་པ་ལ་མངོན་དུ་ཕྱོགས་པའི་རྒྱུ་ལས་འབྲས་བུ་སྐྱེ་བ་ཡིན་ནོ་ཞེས་བྱ་བ་འདི་ཡོད་ན། གཟུགས་ཀྱི་རྒྱུ་ཡང་གཟུགས་སྐྱེད་པར་ངེས་པ་ཁོ་ན་བས་གཟུགས་ཀྱང་གདོན་མི་ཟ་བར་ཡོད་པ་ཉིད་དོ། །གལ་ཏེ་
[57a.6]རོའི་ཉེ་བར་ལེན་པ་ནི་ཉེ་བར་ལེན་པ་ཅན་གྱི་རོའི་སྐད་ཅིག་དམིགས་པ་ལས་ངེས་པར་གྲུབ་ཀྱི། གཟུགས་ཀྱི་ནི་མ་ཡིན་ཏེ། དེའི་ཉེ་བར་ལེན་པ་ལས་བྱུང་བ་མ་གྲུབ་པའི་ཕྱིར་རོ་ཞེ་ན། དེ་ཉིད་གཞན་གྱི་རྒྱུ་ཞེས་སྨོས་སོ། །རོའི་ཉེ་བར་ལེན་པའི་རང་གི་ཉེ་བར་ལེན་པ་ལས་བྱུང་བའི་སྐད་ཅིག་བསྐྱེད་
[57a.7]པར་བྱ་བ་ལ་ནུས་པ་འཇུག་པ་གང་ཡིན་པ་དེ་ཉིད་གཞན་གྱིས་ཞེས་བྱ་བ་གཟུགས་ཀྱི་ཉེ་བར་ལེན་པའི་རྒྱུའི་ནུས་པ་འཇུག་པ་ཡིན་ནོ། །འདིར་ནུས་པ་ཐོགས་པ་མེད་པ་བརྗོད་པར་བྱ་བ་ཡིན་པའི་ཕྱིར་གང་གི་ནུས་པ་འཇུག་པའི་ཕྱིར་དེར་རྒྱུར་ངེས་པར་འགྱུར་བ་རྒྱུར་གྱུར་པའི་གཟུགས་ཉིད་
[57b]
[57b.1]གཞན་གྱི་སྒྲའི་དོན་ཡིན་གྱི་འབྲས་བུའི་ནི་མ་ཡིན་ནོ། །དེ་ལྟ་ན་འོ་ན་ནུས་པ་འཇུག་པ་འདི་གཟུགས་ཀྱི་ཉེ་བར་ལེན་པའི་རང་གི་ངོ་བོའི་རྒྱུ་མ་ཡིན་ཏེ་ལྷན་ཅིག་འབྱུང་བའི་ཕྱིར་རོ་ཞེ་ན་བདེན་ཏེ་འདིར་ནུས་པ་འཇུག་པ་ཞེས་བྱ་བ་འབྲེལ་པ་ཡིན་ནོ། །དེས་ན་རོའི་ཉེ་བར་ལེན་པའི་རྒྱུ་དང་འབྲེལ་པའི་
[57b.2]ནུས་པ་འཇུག་པ་ནི་གཟུགས་ཀྱི་ཉེ་བར་ལེན་པའི་རྒྱུའི་ནུས་པ་འཇུག་པའི་རྒྱུ་ཡིན་ནོ། །ལྷན་ཅིག་འབྱུང་བ་ཡིན་པའི་ཕྱིར་དེ་ལས་འདི་འབྱུང་བ་ཡང་མ་ཡིན་ནོ། །དེས་ན་ཤུགས་ཀྱིས་ལྷན་ཅིག་བྱེད་པའི་རྒྱུ་མ་ཡིན་ནོ་ཞེས་བརྗོད་པར་འགྱུར་རོ། །དེས་ན་དོན་འདི་ཡིན་ཏེ། རོའི་རྒྱུ་རང་གི་འབྲས་
[57b.3]བུ་རོ་སྐྱེད་པ་ན་གཟུགས་གཟུགས་སྐྱེད་པར་ཡང་ལྷན་ཅིག་བྱེད་པ་ཉིད་དུ་རྟོགས་པ་ཡིན་ནོ། །དེས་ན་རོའི་རང་གི་འབྲས་བུ་སྐྱེད་པ་ལ་མངོན་དུ་ཕྱོགས་པ་གང་ཡིན་པ་དེ་ཉིད་གཟུགས་གཟུགས་སྐྱེད་པའི་ཡང་འཇུག་པའི་རྒྱུ་ཡིན་ནོ། །དེས་ན་ཇི་ལྟར་མངོན་དུ་ཕྱོགས་པ་ལས་རོ་སྐྱེ་བ་དེ་
[57b.4]བཞིན་དུ་གཟུགས་ཀྱང་ཡིན་ཏེ། དེས་ན་རོ་རྟོགས་པ་ཉིད་ལས་དེའི་ཚེ་རོའི་ཉེ་བར་ལེན་པའི་རང་གི་འབྲས་བུ་ལ་མངོན་དུ་ཕྱོགས་པ་རྟོགས་ན་གཟུགས་ཀྱི་རང་གི་འབྲས་བུ་སྐྱེད་པ་ལ་བར་ཆད་བྱར་མེད་པ་ཡང་རྟོགས་པར་བྱེད་པའི་ཕྱིར་དུས་མཚུངས་པར་ཡོད་པའི་གཟུགས་ཡོད་པར་
[57b.5]རྟོགས་པར་འགྱུར་རོ། །རང་གི་འབྲས་བུ་སྐྱེད་པར་བྱེད་པ་དེ་རང་གི་འབྲས་བུའི་སྐྱེད་པར་བྱེད་པ་ཡིན་པ་བཞིན་དུ། གཟུགས་ཀྱི་ལྷན་ཅིག་བྱེད་པའི་རྐྱེན་དུ་གྱུར་པ་ཡིན་པའི་ཕྱིར་ཇི་ལྟར་རང་གི་འབྲས་བུ་ལས་རོ་ཉིད་དུ་རྟོགས་པ་དེ་བཞིན་དུ་དེ་ལྟ་བུར་གྱུར་པའི་གཟུགས་ཀྱི་ལྷན་ཅིག་བྱེད་པར་
[57b.6]ཡང་ཡིན་ནོ། །དེས་ན་དེའི་འབྲས་བུ་དུས་མཚུངས་པར་ཡོད་པའི་གཟུགས་མེད་ན་དེའི་འབྲས་བུ་ཉིད་མེད་པར་རོ། །དེ་དེའི་ལྷན་ཅིག་བྱེད་པ་ཡིན་ན་ནི་དེའི་ཡང་རྒྱུར་འགྱུར་བ་ཡིན་ནོ། །ལྷན་ཅིག་བྱེད་པའི་རང་གི་ངོ་བོ་ནི་ལྷན་ཅིག་ཏུ་བྱེད་པ་ཉིད་ཡིན་པའི་ཕྱིར་རོ། །དེས་ན་རྒྱུ་གཅིག་ཉིད་
[57b.7]འབྲས་བུ་གཉིས་སྐྱེད་ནུས་པ་ཁྱད་པར་མེད་པས་ན་དེའི་འབྲས་བུ་གཅིག་ཡོད་པ་བཞིན་དུ་འབྲས་བུ་གཞན་ཡང་ཡོད་པ་ཁོ་ནའོ། །ནུས་པ་གཅིག་འབྲས་བུ་གཉིས་ཀྱི་དོན་དུ་འགྱུར་རོ་ཞེས་བྱ་བ་འདི་ག་ལས་ཤེ་ན། མ་དུ་ལུང་ག་ལ་སོགས་པ་ལ་གཟུགས་དང་རོ་དག་ཕན་ཚུན་གྱི་རང་བཞིན་
[58a]
[58a.1]རྗེས་སུ་བྱེད་པར་མཐོང་བའི་ཕྱིར་དང་སྨིན་པ་ལ་སོགས་པའི་གནས་སྐབས་སུ་རོའི་ཁྱད་པར་བཞིན་གཟུགས་ཀྱང་མཐོང་བའི་ཕྱིར་རོ། །གང་གིས་འདིའི་རང་གི་བདག་ཉིད་ཀྱི་ཁྱད་པར་གང་ཡིན་པ་དེ་རོ་ལ་ཡང་ཡོད་པར་འགྱུར་བ་གཟུགས་ཉིད་ནི་རོ་མ་ཡིན་ནོ། །
[58a.2]དེས་ན་དེའི་ཉེ་བར་ལེན་པ་དག་ཕན་ཚུན་ཉེ་བར་ལེན་པ་ལས་བྱུང་བའི་སྐད་ཅིག་ལ་བརྟེན་པའི་ཁྱད་པར་གྱི་རྒྱུ་མ་ཡིན་པར་གཟུགས་དང་རོ་དག་གི་ཁྱད་པར་ཕན་ཚུན་རྗེས་སུ་བྱེད་པར་ངེས་པ་འདི་མི་འགྲུབ་པའོ། །ཉེ་བར་ལེན་པ་དག་གི་ལྷན་ཅིག་བྱེད་པ་ཡང་དེ་ཉིད་ཡིན་ལ། དེ་ཡང་
[58a.3]ཚོགས་པ་གཅིག་ལ་རག་ལས་པ་ཉིད་དོ། །མདོ་འདི་ཉིད་རྣམ་པར་འགྲེལ་པ་ནི་རང་གི་རྒྱུའི་ཞེས་བྱ་བ་ཡིན་ནོ། །འདིར་ཇི་ལྟར་གཟུགས་ཀྱི་ཉེ་བར་ལེན་པ་རྣམས་གཞན་གྱི་སྒྲའི་དོན་ཡིན་པ་དང་། ཇི་ལྟར་འཇུག་པའི་རྒྱུ་ཉིད་ཡིན་པར་རྟོགས་པ་དེ་ནི་བཤད་ཟིན་ཏོ། །ཚོགས་པ་
[58a.4]གཅིག་ལ་རག་ལས་པ་ཉིད་གྲུབ་པར་བྱ་བའི་དོན་དུ། གཟུགས་ཀྱང་རོའི་ལྷན་ཅིག་བྱེད་པ་ཉིད་དུ་བསྟན་པའི་ཕྱིར་བརྗོད་པ་ནི་གཟུགས་ཀྱི་ཉེ་བར་ལེན་པའི་རྒྱུ་རང་གི་འབྲས་བུ་སྐྱེད་པ་ལ་མངོན་དུ་ཕྱོགས་པའི་མཚན་ཉིད་ཀྱི་འཇུག་པའི་ལྷན་ཅིག་བྱེད་པ་གང་ལ་ཡོད་པ་དེ་ནི་དེ་སྐད་ཅེས་བྱའོ། །དེ་ཡང་
[58a.5]གང་ཞེ་ན་བཤད་པ་སྔར་བརྗོད་པའི་གཟུགས་ཀྱིས་ཉེ་བར་ལེན་པའི་ལྷན་ཅིག་བྱེད་པ་རོའི་ཉེ་བར་ལེན་པའི་རྒྱུ་འཇུག་པ་གང་ཡིན་པ་དེ་ཡང་ངོ་། །དེས་ན་དེ་ལྟར་འདི་གཉིས་ཕན་ཚུན་ལྷན་ཅིག་བྱེད་པ་ཉིད་དུ་བཤད་པ་ཡིན་ནོ། །དེ་ལྟར་མི་འཁྲུལ་པ་བསྒྲུབས་ནས་ཇི་ལྟར་མི་འཁྲུལ་པ་དེ་ཁོ་ན་
[58a.6]ལྟར་རྗེས་སུ་དཔོག་པ་ཡིན་ནོ་ཞེས་བཤད་པ་ནི་དེའི་ཕྱིར་ཞེས་བྱ་བ་ཡིན་ནོ། །གཟུགས་སྐྱེད་པར་བྱེད་པའི་མཚན་ཉིད་ཀྱི་རྒྱུ་ཇི་ལྟ་བུ་ལས་རོ་འབྱུང་བའི་རྒྱུ་དེ་ལྟ་བུའི་རོས་རྗེས་སུ་དཔོག་པར་བྱེད་པ་ན་གཟུགས་རྗེས་སུ་དཔོག་པར་བྱེད་པ་ཡིན་ནོ། །དེ་ཉིད་ཀྱི་ཕྱིར་རོ་ལས་གཟུགས་བར་ཆད་མེད་པར་
[58a.7]རྟོགས་པར་མི་ནུས་ཏེ། རོ་དམིགས་པ་ལས་གཟུགས་ཀྱི་རྒྱུ་ནུས་པ་འཇུག་པ་ཡོད་པ་མ་རྟོགས་པར་གཟུགས་ཡོད་པ་མི་རྟོགས་པའི་ཕྱིར་དང་། རོའི་རྣམ་པ་དེ་ལྟ་བུ་ལས་གཟུགས་ཀྱི་རྒྱུ་ནུས་པ་ཞུགས་པ་ཡོད་པར་རྟོགས་པའི་ཕྱིར་རོ། །དེ་ན་གཟུགས་རྟོགས་པ་ནི་གཟུགས་ཀྱི་རྒྱུར་གྱུར་
[58b]
[58b.1]པའི་རོའི་རྒྱུ་ཡོད་པར་རྟོགས་པར་བྱ་བ་གཟུགས་སྐྱེད་པ་ལ་གེགས་བྱར་མེད་པའི་ནུས་པ་དང་ལྡན་པ་རྟོགས་པའི་ནང་དུ་འདུས་པ་ཁོ་ནའོ། །དེ་ཉིད་ཀྱི་ཕྱིར་རྒྱུ་ཡོད་པར་རྗེས་སུ་དཔག་པ་ན་རྒྱུ་ལས་འབྲས་བུ་རྗེས་སུ་དཔོག་པ་ཡིན་ནོ་ཞེས་ནུས་པ་མ་ཡིན་ཏེ་རྒྱུ་ཉིད་རྗེས་སུ་དཔག་པ་ན་འབྲས་
[58b.2]བུ་ཡོད་པར་རྟོགས་པ་གྲུབ་པའི་ཕྱིར་ཡང་རྗེས་སུ་དཔོག་པ་དོན་མེད་པའི་ཕྱིར་རོ། །འཇིག་རྟེན་དེ་ལྟར་རོ་ལས་གཟུགས་རྟོགས་པ་མེད་དོ་ཞེ་ན། འཇིག་རྟེན་དེ་ལྟར་མི་རྟོགས་ན་ནི་མི་འཁྲུལ་པ་དེ་ལྟར་རྟོགས་པ་མེད་པ་ཉིད་དུ་བརྗོད་པར་འགྱུར་རོ། །དེ་ལྟ་བུ་ནི་དེ་རྟོགས་པ་ཡིན་ཡང་
[58b.3]ཚད་མ་མ་ཡིན་ནོ། །མི་འཁྲུལ་བ་རྟོགས་ན་ཡང་ཇི་སྐད་བཤད་པའི་ཚུལ་ལས་མི་འདའ་བར་འགྲུབ་བོ། །གལ་ཏེ་གང་ལས་ཁྱད་པར་ཉིད་ཀྱི་རྟོགས་པ་སྐྱེས་པ་དེ་རྗེས་སུ་དཔག་པར་བྱ་བ་ཡིན་ན་ཚོགས་པ་ལས་འབྲས་བུ་འགྲུབ་པར་རུང་བ་རྗེས་སུ་དཔོག་པ་ན་ཡང་འབྲས་བུ་རྗེས་
[58b.4]སུ་དཔག་པར་བྱ་བར་འགྱུར་ཏེ། དེ་ཡང་དེར་རྟོགས་པའི་ཕྱིར་རོ་ཞེ་ན་མ་ཡིན་ནོ་ཞེས་བཤད་པ་ནི། ཇི་ལྟར་ཞེས་བྱ་བ་ལ་སོགས་པ་ཡིན་ནོ། །ཇི་སྐད་བཤད་པའི་རྣམ་པ་དེས་ན་འདས་པ་རྣམས་རྟོགས་པ་ཡིན་ཏེ། དཔེར་ན་རོའི་གཟུགས་ཀྱི་ལྷན་ཅིག་བྱེད་པར་རྗེས་སུ་དཔོག་
[58b.5]པ་ན་གཟུགས་དང་རོ་དག་བཞིན་ནོ། །གེགས་བྱར་མེད་པའི་ནུས་པ་རྟོགས་པས་འཕངས་པ་ནི་ལྷན་ཅིག་འབྱུང་བར་རྟོགས་སོ། །དེ་ཕན་ཆད་ནི་གཟུགས་ཀྱི་རྒྱུ་གཟུགས་སྐྱེད་པ་ལ་ནུས་པ་ཆོད་པ་མེད་པར་འགྱུར་བའི་ཚད་མ་མེད་དོ། །དེས་ན་མ་འོངས་པ་རྣམས་ནི་རྟོགས་པ་མ་ཡིན་
[58b.6]ཏེ། ཇི་ལྟར་རོ་འབྲས་བུ་དམིགས་པ་ལས་འོག་རོལ་དུ་ཡང་གཟུགས་ཡོད་པ་བཞིན་ནོ། །འཁྲུལ་པའི་ཕྱིར་རོ་ཞེས་བྱ་བ་ནི་གཏན་ཚིགས་སོ། །དེ་ལྟ་བས་ནི་ཞེས་བྱ་བ་ནི་མཇུག་བསྡུ་བའོ། །དེའི་ཕྱིར་ཞེས་བྱ་བས་ནི་རྣམ་གསུམ་ཉིད་ཅེས་བྱ་བའི་དོན་འདི་གྲུབ་པར་བསྟན་པ་ཡིན་
[58b.7]ནོ། །རང་བཞིན་མ་འབྲེལ་བ་ནི་ཞེས་བྱ་བ་ནི་གཏན་ཚིགས་སོ། །རྒྱུའི་ཆོས་རྗེས་སུ་དཔོག་པ་འདི་ནི་གྲོག་མ་འཕོ་བ་ལ་སོགས་པ་ལས་ཆར་པ་བབ་པ་ལ་སོགས་པ་རྗེས་སུ་དཔོག་པ་ཡང་རྒྱུའི་ཆོས་རྗེས་སུ་དཔག་པའི་རང་བཞིན་དུ་བཤད་པ་ཡིན་ནོ། །དེ་ལ་ཡང་འབྱུང་བར་འགྱུར་བའི་ཆར་པའི་རྒྱུ་ཁོ་ན་
[59a]
[59a.1]གྲོག་མ་ལ་སོགས་པ་འཁྲུལ་པའི་རྒྱུ་ཡིན་ནོ། །འབྱུང་བར་འགྱུར་བ་གང་ལས་ཆར་པ་སྐྱེད་པ་དེ་ཉིད་ལས་གྲོག་མ་ལ་སོགས་པ་འཁྲུལ་པ་ཡིན་ཏེ། ཆར་གྱི་རྒྱུའི་འབྱུང་བ་རྣམས་ཉིད་འགྱུར་བ་ན་གྲོག་མ་ལ་སོགས་པ་ཅུང་ཟད་འཁྲུལ་པར་བྱེད་པ་དེ་འཕེལ་བར་འགྱུར་བ་ན་ཇི་སྲིད་
[59a.2]ཆར་འབབ་པ་དེ་སྲིད་དུ་དེ་ཡང་འཕེལ་བར་འགྱུར་རོ། །དེ་ཡང་ཆར་མི་མཐོང་བ་ལ་ནི་དེའི་རྒྱུ་རུང་བ་ཉིད་རྗེས་སུ་དཔག་པར་བྱ་བ་ཡིན་ལ། ཕྱིས་ནི་ཆར་པ་མངོན་དུ་འགྱུར་ལ་འཁྲུལ་པ་ལ་སོགས་པ་ཡང་ཁྱད་པར་དུ་གྱུར་ན་ནི་ད་ལྟར་བའི་ཆར་རྗེས་སུ་དཔོག་གོ། །འདི་ལ་འདི་ནི་མངོན་
[59a.3]པར་ཞེན་པའི་ཡུལ་མ་གྱི། འོན་ཀྱང་རྒྱུ་དང་འབྲས་བུའི་དངོས་པོ་མ་ཡིན་པ་ཚོགས་པ་གཅིག་ལ་རག་ལས་པ་མེད་པར་དེ་ལྟར་མི་འཐད་དོ་ཞེས་བྱ་བ་འདི་ཙམ་ཞིག་བརྗོད་དོ། །རྣམ་པ་འདི་ལྟ་བུ་ལ་སོགས་པ་དག་ཏུ་ནི་རིགས་པ་ཙམ་ཞིག་བསྟན་པར་བྱ་བ་ཡིན་ཏེ་རྣམ་པ་ལ་མངོན་པར་ཞེན་
[59a.4]པས་ཅི་བྱ། དེས་ན་དེ་ལྟར་ཚུལ་གསུམ་དང་ལྡན་པའི་གཏན་ཚིགས་རྣམ་པ་གསུམ་ཡིན་པའི་ཕྱིར་དེ་ནི་རྣམ་གསུམ་ཉིད་ཅེས་བྱ་བའི་མཐར་ཐུག་པ་བཤད་ནས་གཏན་ཚིགས་ལྟར་སྣང་དེ་ལས་གཞན་ཞེས་བྱ་བ་བཤད་པའི་ཕྱིར། རྒྱུ་མ་ཚོགས་པས་ཞེས་སྨོས་སོ། །མ་ཚོགས་པ་ནི་མ་ཚང་
[59a.5]བའོ། །ལྷན་ཅིག་བྱེད་པ་ཇི་སྙེད་པས་འབྲས་བུ་བསྒྲུབ་པར་བྱ་བ་དེ་སྙེད་པ་དེ་ནི་རྒྱུ་ཚོགས་པ་ཡིན་ནོ། །དེ་ལ་གང་གི་ཚེ་ལྷན་ཅིག་བྱེད་པ་མ་ཚང་བ་དེའི་རྒྱུ་མ་ཚོགས་པ་ཡིན་ནོ། །དེ་ལྟ་བུར་གྱུར་པས་རྗེས་སུ་དཔོག་པའི་རྗེས་སུ་དཔོག་པ་གང་ཡིན་པ་དེ་ནི་ལྷག་མ་དང་ལྡན་པ་ཡིན་ཏེ། མ་མཐོང་
[59a.6]བ་ཙམ་གྱིས་ལྡོག་པར་གྲུབ་པ་གཏན་ཚིགས་སུ་སྦྱར་བ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལྟར་ཡང་། གང་ཞིག་མ་མཐོང་བ་ཙམ་གྱིས། །ལྡོག་པ་རབ་ཏུ་སྟོན་བྱེད་པ། །ཞེས་ལྷག་མ་དང་ལྡན་པའི་མཚན་ཉིད་འཆད་པར་འགྱུར་རོ། །དེས་ན་རྗེས་སུ་དཔག་པ་འདི་ལྷག་མ་དང་ལྡན་པར་བརྗོད་
[59a.7]པས་ལྡོག་པ་མ་མཐོང་བ་ཙམ་གྱིས་གྲུབ་པ་ཉིད་དུ་བརྗོད་པ་ཡིན་ནོ། །དེའི་དོན་ནི་འདི་ཡིན་ཏེ། འབྲེལ་པས་བསྒྲུབ་པར་བྱ་བའི་མེད་ན་མི་འབྱུང་བ་འགྲུབ་པར་བྱ་བའི་ཕྱིར་ཚུལ་གསུམ་ལས་བསྡུ་བ་བྱས་པ་དེས་ན་དེ་ལས་གཞན་གཏན་ཚིགས་སུ་བརྗོད་པ་ནི་མ་མཐོང་བས་འགྲུབ་པའི་ལྡོག་
[59b]
[59b.1]པ་ལ་བརྟེན་ནས་ཡིན་པས་དེར་ནི་མེད་ན་མི་འབྱུང་བ་དེའི་ཚད་མ་ཅན་དུ་བརྗོད་པར་བྱ་བ་ཡིན་ནོ། །དེ་ཡང་གཏན་ཚིགས་ལྟར་སྣང་བ་ཡིན་ཏེ། མ་མཐོང་བ་ལྡོག་པ་འགྲུབ་ན་མང་པོ་མ་ངེས་པ་ཉིད་མི་ལྡོག་པའི་ཕྱིར་རོ། །ལྷག་མ་དང་ལྡན་པ་དེ་ཉིད་སྟོན་པ་ནི་ལུས་ལས་ཞེས་བྱ་བ་ཡིན་ནོ། །ཇི་ལྟར་
[59b.2]འདོད་ཆགས་དང་བྲལ་བར་འདོད་པའི་སྐྱེས་བུའི་ཁྱད་པར་ལ་ཁྱད་པར་དུ་གྱུར་པ་འགའ་ཞིག་ལུས་ལས་འདོད་ཆགས་དང་ལྡན་པ་ཡིན་ནོ་ཞེས་ཁ་ཅིག་ཟེར་བ་ནི་འདོད་ཆགས་མེད་པ་རྡོ་ལ་སོགས་པ་ལ་མ་མཐོང་བའི་ཕྱིར་དང་། སོ་སོའི་སྐྱེ་བོ་བདག་ཉིད་ལ་ལུས་ཡོད་ན་འདོད་ཆགས་ཡོད་པར་
[59b.3]མཐོང་བའི་ཕྱིར་མ་མཐོང་བ་ལས་ལྡོག་པ་གྲུབ་པའི་ཕྱིར་ཉིད་ཀྱིས་ལྷག་མ་དང་ལྡན་པ་ཡིན་པ་བཞིན་ནོ། །ཇི་ལྟར་འདི་ལྷག་མ་དང་ལྡན་པ་ཡིན་གྱི་རྣམ་པ་གསུམ་ཉིད་དུ་ཇི་ལྟར་མི་འདུ་ཞེ་ན། ནུས་མེད་ཕྱིར་ཞེས་སྨོས་སོ། །གལ་ཏེ་ལུས་ལ་སོགས་པ་འདོད་ཆགས་སྐྱེད་པར་ནུས་ན་ནི་དེ་
[59b.4]སྙེད་པ་དེ་དག་ཉིད་ལས་འདོད་ཆགས་སྐྱེ་བའི་ཕྱིར་འབྲས་བུ་ཡལ་བར་དོར་ནས་རུང་བ་ཉིད་རྗེས་སུ་དཔོག་པས་རང་བཞིན་གྱི་ནང་དུ་བསྡུས་ཏེ་རང་བཞིན་གྱི་གཏན་ཚིགས་སུ་བརྗོད་པ་ཞིག་ན། གང་གི་ཕྱིར་དེ་དག་ནུས་པ་མེད་པ་ཉིད་ཡིན་པ་དེའི་ཕྱིར་རྒྱུ་འབྲས་བུ་ཉིད་ཡོད་ཀྱང་སྦྱོར་བར་བྱེད་པ་མ་ཡིན་
[59b.5]པར་བྱས་ཏེ། མཐོང་བ་དང་མ་མཐོང་བ་ཙམ་ལ་བརྟེན་པའི་རྗེས་སུ་འགྲོ་བ་དང་ལྡོག་པ་ལ་བརྟེན་ནས་གཏན་ཚིགས་ཉིད་དུ་བརྗོད་པར་བྱ་བ་ཡིན་ནོ། །དེ་ལྟ་ཡིན་དང་མ་ངེས་པ་ཉིད་མི་ལྡོག་གོ། །རུང་བ་ཉིད་ཀྱང་ཞེས་བྱ་བ་ནི་འགྲེལ་པའོ། །རུང་བ་ཉིད་ཀྱང་ཚོགས་པ་དག་ཁོ་ནས་རྗེས་སུ་དཔོག་
[59b.6]པར་བྱེད་དེ། མ་ཚོགས་པས་ནི་མ་ཡིན་ནོ་ཞེས་བྱ་བས་ནི་ངེས་པར་བཟུང་བའི་དོན་ཏོ། །ཅིའི་ཕྱིར་མ་ཚོགས་པས་མ་ཡིན་ཞེ་ན་མ་ཚོགས་པ་རྣམས་ལ་ནི་ཞེས་སྨོས་སོ། །འབྲས་བུ་རྩོམ་པར་བྱེད་པའི་ཁྱད་པར་ཡང་མི་འགྲུབ་པའི་ཕྱིར་ཤིན་ཏུ་ནུས་པ་མེད་པའི་ཕྱིར་རོ། །འདི་སྐད་བརྗོད་
[59b.7]པ་ཡིན་ཏེ་འདིར་འབྲས་བུ་རུང་བ་ཉིད་རྗེས་སུ་དཔོག་པ་ནི་འབྲས་བུ་རྗེས་སུ་དཔག་པ་ཉིད་ཡིན་པར་བརྗོད་དེ་དེ་ལྟར་ན་རྗེས་སུ་དཔག་པར་བྱ་བ་ཉིད་མ་ཡིན་ཡང་ཁྱད་པར་དུ་གྱུར་པའི་འབྲས་བུ་རྟོགས་པའི་ཕྱིར་རོ། །འདི་ནི་མེད་དོ། །ནུས་པ་ཡོད་ན་མཆོད་པའི་ཕྱིར་དེ་རུང་བའི་ཞེས་བྱ་བར་འགྱུར་
[60a]
[60a.1]ན་མ་ཚོགས་པ་ལ་ནི་མེད་དོ། །དེས་ན་འདིས་ནི་གཏན་ཚིགས་གསུམ་ལས་ཕྱི་རོལ་ཏུ་གྱུར་པར་བརྗོད་དོ། །ལུས་ལས་འདོད་ཆགས་རྗེས་དཔོག་བཞིན། །ཞེས་བྱ་བ་རྣམ་པར་འགྲེལ་པས། དཔེར་ན་ཞེས་སྨོས་སོ། །བཞིན་གྱི་དོན་ནི་དཔེར་ནའི་སྒྲའི་དོན་ཡིན་
[60a.2]ལ་ལུས་ཀྱི་སྒྲ་ཡང་དབང་པོ་ལ་སོགས་པའི་མཚན་ཉིད་ལ་ཡིན་པས། ལུས་ལ་འདོད་ཆགས་རྗེས་དཔོག་བཞིན། །ཞེས་བྱ་བ་ནི་དཔེར་ན་ལུས་དང་དབང་པོ་དང་བློ་དག་ལས་འདོད་ཆགས་ལ་སོགས་པ་རྗེས་སུ་དཔོག་པ་བཞིན་ནོ་ཞེས་བྱ་བར་འགྱུར་རོ། །འདི་ནི་རྒྱུ་མ་ཚོགས་པ་ལས་
[60a.3]རྗེས་སུ་དཔོག་པ་ཡིན་ནོ་ཞེས་གང་བརྗོད་པ་དེ་སྒྲུབ་པས་འདོད་ཆགས་ཀྱི་རྒྱུ་བཤད་པ་ནི་འདོད་ཆགས་ལ་སོགས་པ་ནི་ཞེས་བྱ་བ་ཡིན་ནོ། །འདོད་ཆགས་ལ་སོགས་པ་ཁོང་ཁྲོ་བ་དང་ང་རྒྱལ་ལ་སོགས་པ་གང་དག་ཡིན་པ་སྟེ། དེ་དག་ནི་བདག་དང་བདག་གིར་མངོན་པར་ཞེན་པ་སྔོན་
[60a.4]དུ་འགྲོ་བ་ཅན་ཡིན་ནོ། །འོ་ཞེས་བྱ་བར་རྟོགས་པ་ནི་རྣམ་པར་ཤེས་པ་ལ་སོགས་པ་ཕུང་པོ་མང་པོ་ལས་ཐ་དད་པ་ཡིན་ཏེ། ངའི་རྣམ་པར་ཤེས་པ་ཞེས་རྟོགས་པའི་ཕྱིར་རོ། །དེ་ནི་རྣམ་པར་མ་བརྟགས་པ་ཡིན་པའི་ཕྱིར་བདག་གོ་སྙམ་དུ་འདུ་ཤེས་པ་ཡིན་ནོ། །དེ་ལ་ཡང་རྟོགས་པ་
[60a.5]གཞན་གྱི་ཡུལ་ཡིན་པ་དགག་པའི་དོན་དུ་རྟོགས་པ་དེ་ཉིད་རྟོགས་པའི་རང་བཞིན་གྱིས་མངོན་པར་ཞེན་པ་ཞེས་བརྗོད་པ་ཡིན་ཏེ། དེ་ངེས་པའི་རང་བཞིན་ཡིན་པའི་ཕྱིར་དང་། དེའི་ཚུལ་ཉིད་ཀྱང་དེ་ཡིན་པའི་ཕྱིར་རོ། །བདག་ནི་མེད་པའི་ཕྱིར་དེ་ནི་འགའི་ཡང་སྔོན་དུ་འགྲོ་བ་མ་ཡིན་གྱི་འོན་
[60a.6]ཀྱང་དེ་རྟོགས་པ་ཡིན་པ་དེས་ན་དེ་ལྟར་བཀོད་དོ། །དེ་ལ་ཕན་འདོགས་པ་ལ་དེའི་ཡིན་པར་རྟོགས་པ་ནི་བདག་གིར་མངོན་པར་ཞེན་པའོ། །དེ་ཡང་འགའ་ཞིག་གིས་ཅུང་ཞིག་སྐྱེད་པ་མེད་པར་འགས་ཀྱང་ཅུང་ཟད་ཀྱང་ཕན་འདོགས་པ་མེད་པའི་ཕྱིར་བདག་གི་བ་མེད་པས་དེ་སྔོན་དུ་འགྲོ་
[60a.7]བ་ཅི་ཡང་མེད་པའི་ཕྱིར་རྟོགས་པ་ཉིད་སྔོན་དུ་འགྲོ་བ་ཡིན་ནོ། །གལ་ཏེ་ཡང་འདོད་ཆགས་ལ་སོགས་པ་དང་བདག་ཏུ་ལྟ་བ་འཇུག་པ་འདིའོ་ཞེས་ཐོག་མ་མེད་པ་ཅན་ཡིན་པའི་ཕྱིར་རྗེས་སུ་འགྲོ་བ་དང་ལྡོག་པ་དག་གིས་འདི་རྟོགས་པར་ནུས་པ་མ་ཡིན་པ་དེ་ལྟ་ན་ཡང་རིགས་པས་རྟོགས་པར་
[60b]
[60b.1]ནུས་པ་ཡིན་ནོ་ཞེས་བཤད་པ་ནི་ཉེས་པ་ཐམས་ཅད་ཅེས་བྱ་བ་ཡིན་ནོ། །བདག་ཏུ་ལྟ་བ་དང་དེས་སྐྱེད་པའི་བདག་གིར་ལྟ་བ་ནི་ཕྱིན་ཅི་ལོག་པའི་ཡིད་ལ་བྱེད་པ་ཡིན་ལ་དེ་གཉིས་ལས་ནི་འདོད་ཆགས་ལ་སོགས་པ་སྐྱེད་པ་ཡིན་ནོ། །འདི་ནི་ལེའུ་གཉིས་པར་བསྟན་པ་ཡིན་ཏེ། འདི་ནི་
[60b.2]རིགས་པ་ཙམ་གྱིས་གྲུབ་པར་བརྗོད་པའི་ཕྱིར་རྒྱུར་བསྟན་པ་ཡིན་ནོ། །དེ་ལྟ་ན་ནི་འོ་ན་དེ་ཙམ་ལས་སྐྱེ་བའི་ཕྱིར་འདོད་ཆགས་ལ་སོགས་པའི་རྒྱུ་མ་ཡིན་པ་ཁོ་ནའོ། །མ་ཚང་བ་ཡང་མ་ཡིན་ཏེ་ནམ་མཁའ་མཐའ་ཡས་སྐྱེ་མཆེད་ལ་སོགས་པ་དག་ན་དེ་མེད་ཀྱང་ཡོད་པའི་ཕྱིར་རོ་ཞེ་ན།
[60b.3]ལུས་ལ་སོགས་པ་ཞེས་སྨོས་སོ། །སྔར་བརྗོད་པ་ནི་ཞེས་བྱ་བ་ནི་གང་གི་ཕྱིར་གྱི་དོན་ཏེ། དེས་ན་དེའི་ཕྱིར་ཞེས་བྱ་བ་འཕེན་པ་ཡིན་ནོ། །དེས་ན་འདི་ལྟར་འབྲེལ་ཏེ་གང་གི་ཕྱིར་ནི་འདོད་ཆགས་ལ་སོགས་པ་བདག་དང་བདག་གིར་མངོན་པར་ཞེན་པ་སྔོན་དུ་འགྲོ་བ་ཅན་ཡིན་པ་དེའི་ཕྱིར་
[60b.4]ལུས་ལ་སོགས་པ་རྒྱུའི་དངོས་པོར་མི་འཐད་པ་དག་ཀྱང་རྒྱུ་ཉིད་དུ་ཁས་བླངས་ནས་རྒྱུ་ཉིད་ཡིན་དུ་ཟིན་ཀྱང་བདག་དང་བདག་གིར་མངོན་པར་ཞེན་པས་སྟོང་པ་འབའ་ཞིག་པ་རྣམས་ལ་ནི་ནུས་པ་མེད་དོ། །ཀྱང་གི་སྒྲ་ནི་སྡུད་པའི་དོན་ཡིན་ལ། པས་ཀྱི་སྒྲ་ནི་གཏན་ཚིགས་ཡིན་ནོ། །དེས་
[60b.5]ན་དོན་འདི་ཡིན་ཏེ། འདི་ལྟར་བཤད་པ་ལས་འབའ་ཞིག་པ་རྣམས་རྒྱུ་མ་ཡིན་པའི་ཕྱིར་དང་། རྗེས་སུ་དཔག་པ་ལྷག་མ་དང་ལྡན་པའི་ཕྱིར་ཐེ་ཚོམ་ཟ་བ་ཡིན་ནོ། །དེ་ཙམ་ཉིད་དུ་རྒྱུ་ཡིན་ན་ནི་རུང་བ་ཉིད་དུ་ངེས་པར་འགྱུར་རོ། །དེས་ན་འདོད་ཆགས་དང་བྲལ་བར་འདོད་པ་ལ་ལུས་
[60b.6]ལ་སོགས་པ་ལས་འདོད་ཆགས་རྗེས་སུ་དཔག་གམ་འདོད་ཆགས་སྐྱེད་པར་རུང་བ་རྗེས་སུ་དཔོག་ཀྱང་རུང་ཁྱད་པར་འགའ་ཡང་མེད་དེ་གཉིས་ཀ་ལྟར་ཡང་སྐྱོན་ཡོད་པའི་ཕྱིར་རོ། །རྒྱུ་མ་ཚང་བ་ལས་ནི་མི་རྟོགས་པར་འགྱུར་གྱི་འབྲས་བུ་ལ་ཐེ་ཚོམ་ཟ་བ་ནི་མ་ཡིན་ཏེ། སྦྱང་ན་གནས་པའི་ས་
[60b.7]བོན་ལས་མྱུ་གུ་བཞིན་ནོ། །རྟོགས་པ་ཡོད་ན་ཡང་རྗེས་སུ་དཔག་པ་ལྷག་མ་དང་ལྡན་པའི་ཕྱིར་ཐེ་ཚོམ་ཟ་བ་ཡིན་ནོ། །མི་མཐུན་པའི་ཕྱོགས་ལ་འཇུག་པ་མ་མཐོང་བས་ནི་རྗེས་སུ་དཔག་པ་ལྷག་མ་དང་ལྡན་པ་ཡིན་ལ་དེ་ལྟ་ན་ཡང་ཐེ་ཚོམ་ཟ་བ་ཡིན་ནོ། །འདོད་ཆགས་ལ་སོགས་པས་སྟོང་
[61a]
[61a.1]པའི་རྡོ་བ་ལ་སོགས་པ་ནི་མི་མཐུན་པའི་ཕྱོགས་ཡིན་ལ། །དེ་དག་ལ་ཡང་ལུས་ལ་སོགས་པ་མ་མཐོང་བ་དེས་ན་གང་གི་ཚེ་མི་མཐུན་པའི་ཕྱོགས་ལ་འཇུག་པ་མ་མཐོང་བ་ལ་བརྟེན་ནས་འདོད་ཆགས་སྒྲུབ་པའི་ཕྱིར་ལུས་ལ་སོགས་པ་འགོད་པ་དེའི་ཚེ་མི་མཐུན་པའི་ཕྱོགས་
[61a.2]ལས་ལྡོག་པའི་ངེས་པར་བྱེད་པ་མ་ཡིན་པའི་ཕྱིར་ཐེ་ཚོམ་ཟ་བར་འགྱུར་རོ། །དེ་དག་འདོད་ཆགས་མེད་པ་ལ་མ་མཐོང་ཡང་དེ་ཙམ་གྱིས་དེ་མེད་པ་ལ་མེད་པ་ཁོ་ན་ནི་མ་ཡིན་ཏེ། བདག་ལ་སོགས་པར་མངོན་པར་ཞེན་པ་ཡང་དེ་ལ་མེད་པའི་ཕྱིར་དེ་མེད་པས་འདོད་ཆགས་མེད་དམ་
[61a.3]ལུས་མེད་པས་མེད་པ་ཡིན་ཞེས་ལྡོག་པ་མི་ངེས་པའི་ཕྱིར་རོ། །གལ་ཏེ་གང་གིས་བདག་ལ་སོགས་པར་མངོན་པར་ཞེན་པ་ལ་ཡང་རྒྱུ་ཡིན་པའི་ཕྱིར་ལུས་ལ་སོགས་པ་མ་ཚོགས་པ་ཡིན་པར་བརྗོད་པ་ལུས་ལ་སོགས་པ་རྒྱུ་ཉིད་ཀྱིས་ནི་རྗེས་སུ་དཔོག་པར་བྱེད་པ་མ་ཡིན་གྱི། འོན་
[61a.4]ཀྱང་རྗེས་སུ་འགྲོ་ལྡོག་གྲུབ་པའི་ཕྱིར་རོ། །དེ་ལྟ་ན་ཡང་འདི་དག་མཐུན་པའི་ཕྱོགས་མི་མཐུན་པའི་ཕྱོགས་ལ་ཡོད་པ་དང་མེད་པ་གྲུབ་པ་ཡིན་ནོ་ཞེ་ན་མ་ཡིན་ཏེ། དེ་ལ་ཡང་ལྡོག་པ་ངེས་པ་མེད་པའི་ཕྱིར་ཏེ་སེམས་མེད་པ་དག་ལུས་མེད་པ་བཞིན་དུ་བདག་ལ་སོགས་པར་མངོན་པར་ཞེན་
[61a.5]པ་ཡང་མ་གྲུབ་པའི་ཕྱིར་རོ། །དེས་ན་བདག་ལ་སོགས་པ་མངོན་པར་ཞེན་པ་མེད་པས་སེམས་མེད་པ་རྣམས་ལ་འདོད་ཆགས་ལ་སོགས་པ་མེད་པ་ཡིན་ནམ་འོན་ཏེ་ལུས་མེད་པ་ཡིན་ཞེས་ངེས་པ་མེད་པ་ཁོ་ནའོ། །གསུམ་དུ་མ་འདུས་པའི་གཏན་ཚིགས་ལྟར་སྣང་གཞན་ཡང་བསྟན་པའི་
[61a.6]ཕྱིར་དེ་བཞིན་དུ་ཞེས་སྨོས་སོ། །འདི་གཉི་ག་ལྷག་མ་དང་ལྡན་པ་ཉིད་བརྗོད་པས་རྟོགས་པའི་ཕྱིར་ཇི་ལྟར་རྒྱུ་མ་ཚོགས་པ་མི་མཐུན་པའི་ཕྱོགས་ལ་མ་མཐོང་བ་ཙམ་གྱིས་འབྲས་བུ་རྗེས་སུ་དཔོག་པ་ཚད་མ་ལྟར་སྣང་བ་ཡིན་པ་དེ་བཞིན་དུ་འབྲས་བུ་
[61a.7]ཙམ་ལ་མ་མཐོང་བ་ཐུན་མོང་གི་འབྲས་བུ་དམིགས་པ་ལས་གཏན་ཚིགས་ཤེས་པ་ཡང་ཚད་མ་ལྟར་སྣང་བ་ཡིན་ནོ། །དཔེ་ཇི་ལྟ་བུ་ཞེ་ན། ཚིག་ལས་ཞེས་སྨོས་སོ། །དོན་འདི་ཡིན་ཏེ། །གཞན་དག་ཚིག་ལས་ལ་ལར་འདོད་ཆགས་རྗེས་སུ་དཔོག་པ་དེ་ནི་གཏན་ཚིགས་གསུམ་དུ་གཏོགས་པ་མ་ཡིན་ནོ། །གལ་ཏེ་ཡང་
[61b]
[61b.1]སེམས་མེད་པ་དག་ལ་འདོད་ཆགས་མེད་ན་ཚིག་མ་མཐོང་བའི་ཕྱིར་འདི་ལ་འབྲས་བུའི་གཏན་ཚིགས་འཁྲུལ་པ་ཡིན་པ་དེ་ལྟ་ན་ཡང་ཚིག་ཐུན་མོང་གི་འབྲས་བུ་ཡིན་པས་འདི་མི་མཐུན་པའི་ཕྱོགས་ལ་མ་མཐོང་བ་ཡིན་ནོ། །ཚིག་ནི། བརྗོད་པར་འདོད་པ་ཙམ་ཁྱད་པར་མེད་པས་བསྐྱེད་པ་ཡིན་ཏེ།
[61b.2]འདོད་ཆགས་དང་བཅས་པ་འམ་འདོད་ཆགས་ཀྱིས་སྟོང་པ་ཡང་བླངས་ཏེ། འདི་ནི་དེས་སྐྱེད་པའི་ཕྱིར་རོ། །དེས་ན་མི་མཐུན་པའི་ཕྱོགས་ལ་བརྗོད་པར་འདོད་པ་ཙམ་མེད་པས་ཚིག་མ་མཐོང་བ་ཡིན་ནམ་འདོད་ཆགས་མེད་པས་ཡིན་ཞེ་ན། འབྲས་བུའི་གཏན་ཚིགས་སྲིད་པ་མ་ཡིན་ནོ། །
[61b.3]དེའི་ཕྱིར་འབྲས་བུ་མ་ཡིན་པ་ཉིད་ལས་རྒྱུ་མ་ཡིན་པ་རྗེས་སུ་དཔོག་པ་བཞིན་དུ་ལྡོག་པ་མ་ངེས་པས་ན་མ་ངེས་པའི་གཏན་ཚིགས་ལྟར་སྣང་བ་ཡིན་ཏེ་ཐུན་མོང་དང་ཐུན་མོང་མ་ཡིན་པ་དག་བཞིན་དུ་ངེས་པ་མེད་པ་ལས་ཀྱང་མ་ངེས་པ་ཉིད་དུ་གྱུར་པའི་ཕྱིར་རོ། །འབྲས་བུའི་སྤྱི་ཉིད་གཞུང་
[61b.4]གཟུགས་པའི་ཕྱིར་གཡོ་བ་དང་ཞེས་སྨོས་སོ། །གང་གི་ཕྱིར་བྱ་བ་དང་ཚིག་ལ་སོགས་པ་ནི་འདོད་ཆགས་ཁོ་ནའི་འབྲས་བུ་མ་ཡིན་ནོ། །སོགས་པ་སྨོས་པས་ནི་ཁོང་ཁྲོ་བ་ལ་སོགས་པ་བཟུང་ངོ་། །འདོད་ཆགས་ལ་སོགས་པ་ཡོད་པ་ཉིད་ན་ཚིག་གི་རང་བཞིན་སྔོན་མེད་མཐོང་བ་ནི་མ་
[61b.5]ཡིན་ཏེ། འདོད་ཆགས་མེད་པར་ཡང་ཡོད་པ་སྲིད་པའི་ཕྱིར་རོ། །གལ་ཏེ་ཚིག་འདོད་ཆགས་ཀྱི་འབྲས་བུ་མ་ཡིན་ན། འོ་ན་དེ་ལན་ཅིག་ཀྱང་འབྱུང་བར་མི་འགྱུར་ཏེ། རྒྱུ་མ་ཡིན་པ་ལས་ལན་ཅིག་ཀྱང་མི་འབྱུང་བའི་ཕྱིར་རོ་ཞེ་ན། བརྗོད་པར་འདོད་པ་སྤྱིའི་ཞེས་སྨོས་སོ། །འདོད་
[61b.6]ཆགས་ནི་བརྗོད་པར་འདོད་པ་ཙམ་གྱི་རྒྱུ་རྐྱེན་ཡིན་ལ། བརྗོད་པར་འདོད་པ་དེ་ཡང་རྣམ་པར་ཤེས་པ་ཡིན་ནོ། །དེ་ཡང་སྐད་ཅིག་སོ་སོར་འདོད་ཆགས་ལ་སོགས་པ་ཡོད་པ་དང་མེད་པའི་བདག་ཉིད་ཁྱད་པར་དུ་མའི་རང་བཞིན་ཡིན་ནོ། །དེ་ནས་རང་བཞིན་འདོད་ཆགས་དང་བཅས་པའི་
[61b.7]རྣམ་པར་ཤེས་པ་ལས་འབྱུང་ཞིང་རེས་འགའ་ནི་ཞེ་སྡང་དང་ལྡན་པ་ལས་རེས་འགའ་དེ་གཉི་ག་དང་བྲལ་བ་ལས་ཡིན་པས་ཁྱད་པར་ལས་ཚིག་འཁྲུལ་པ་ཡིན་ཡང་འཁྲུལ་པ་མེད་པའི་ཕྱིར་འདོད་པ་ཙམ་རྒྱུ་ཡིན་པར་རྟོགས་པར་འགྱུར་ཏེ། དུ་བ་ལས་མེ་ཙམ་ཉིད་བཞིན་ནོ། །འདོད་ཆགས་
[62a]
[62a.1]ཙམ་ནི་མ་ཡིན་ནོ། །དེས་ན་ཇི་ལྟར་དུ་བ་མཐོང་བ་ལས་ལོ་མ་ལས་བྱུང་བའི་མེ་ཉིད་རྗེས་སུ་དཔོག་པ་མ་ཡིན་པ་དེ་བཞིན་དུ་ཚིག་ལས་ཀྱང་འདོད་ཆགས་ཉིད་ནི་མ་ཡིན་གྱི་འོན་ཀྱང་བརྗོད་པར་འདོད་པ་ཙམ་ཡིན་ནོ། །ཅི་སྟེ་ཡང་འདོད་ཆགས་བརྗོད་པར་འདོད་པའི་ཁྱད་
[62a.2]པར་ནི་མ་ཡིན་གྱི་འོན་ཀྱང་བརྗོད་པར་འདོད་པ་ཉིད་འདོད་ཆགས་ཡིན་ནོ། །དེས་ན་འདོད་ཆགས་རྗེས་སུ་དཔོག་པ་ཉིད་ལས་འདོད་ཆགས་རྗེས་སུ་དཔོག་པར་འགྲུབ་བོ་ཞེ་ན། དོགས་པ་འདི་གལ་ཏེ་དེ་ཉིད་ཅེས་བྱ་བས་བསུ་ནས་འདོད་པ་ཡིན་པའི་ཕྱིར་ཞེས་བྱ་བས་དོགས་པ་སེལ་བར་བྱེད་དོ། །
[62a.3]བརྗོད་པར་འདོད་པ་ཙམ་ཡིན་ན་འདོད་ཆགས་ཡིན། དོན་དམ་པར་འདོད་ཆགས་དེའི་རང་བཞིན་ཅན་ཡིན་པའམ་བརྗོད་པར་འདོད་པ་དོན་དམ་པར་འདོད་ཆགས་ཀྱི་རང་བཞིན་ཅན་ཡིན་པར་འགྱུར། རྟོགས་པ་སྔ་མ་ནི་རེ་ཞིག་མི་འཐད་དོ་ཞེས་བརྗོད་པ་ནི་འདོད་པ་ཡིན་པའི་ཕྱིར་ཞེས་བྱ་བ་ཡིན་
[62a.4]ནོ། །བརྗོད་པར་འདོད་པ་ཙམ་ཚིག་ལས་རྗེས་སུ་དཔོག་པ་ན་འདོད་ཆགས་དང་བྲལ་བ་ལ་དེ་དང་འགལ་བའི་རང་བཞིན་སྡུད་པས་ནི་ཅུང་ཟད་ཀྱང་གནོད་པར་མི་འགྱུར་རོ། །མི་འདོད་པ་གྲུབ་ན་ནི་གནོད་པར་འགྱུར་གྱི་འདོད་པ་ཐོབ་ཀྱང་གནོད་པའི་དོན་དུ་འགྱུར་བ་ནི་འགའ་ཡང་མེད་དོ། །འོན་
[62a.5]ཏེ་ཡང་འདོད་ཆགས་ཀྱི་རང་བཞིན་གང་ཡིན་པ་དེ་ཙམ་གྱི་རང་གི་ངོ་བོ་བརྗོད་པར་འདོད་པ་ཡིན་པར་འདོད་ན། དེ་བསལ་བའི་ཕྱིར་འདོད་ཆགས་ཀྱི་རང་བཞིན་བསྟན་ནས་འདོད་པའི་རང་བཞིན་དེ་ལས་བཟློག་པར་བརྗོད་པ་ནི་འདོད་ཆགས་ནི་ཞེས་བྱ་བ་ནས་སྙིང་རྗེ་ལ་སོགས་པ་ནི་ཞེས་བྱ་བའི་
[62a.6]མཐར་ཐུག་པའོ། །ཟག་པ་དང་བཅས་པའི་ཆོས་ནི་ཉོན་མོངས་པ་དང་བཅས་པ་སྟེ། ཉེ་བར་ལེན་པའི་ཕུང་པོ་ལྔ་བརྗོད་དོ། །དེ་དག་ཀྱང་འཆད་པར་འགྱུར་བའི་སྡུག་བསྔལ་ཉིད་ཀྱི་སྡུག་བསྔལ་གཅིག་པུའི་རང་བཞིན་ཉིད་དོ། །དེ་དག་ལ་སེམས་ཀྱི་མངོན་པར་ཞེན་པ་ཆགས་པ་ནི་འདོད་
[62a.7]ཆགས་ཡིན་པར་སྨྲའོ། །དེ་ལ་སེམས་ཀྱི་ཆགས་པ་བྲལ་བར་མི་འདོད་པ་དེ་དང་གཅིག་ཏུ་མི་འབྲལ་བར་དགའ་བ་དེ་ནི་ཆགས་པར་འགྱུར་རོ། །གལ་ཏེ་སྡུག་བསྔལ་བའི་ལེན་པའི་ཕུང་པོ་རྣམས་ལ་ཆགས་པར་མི་འགྱུར་བ་མ་ཡིན་ནམ། སྡུག་བསྔལ་ནི་མངོན་པར་དགའ་བའི་གནས་མ་ཡིན་པའི་ཕྱིར་
[62b]
[62b.1]རོ་ཞེས་དོགས་ན། རྒྱུའི་ཁྱད་པར་སྟོན་པར་བྱེད་དོ། །ལྟ་བའི་སྒྲ་ནི་རྟག་པ་ལ་སོགས་པ་སོ་སོར་འབྲེལ་ཏོ། །ཟག་པ་དང་བཅས་པའི་ཕུང་པོ་རྣམས་ལ་ཡང་བདེ་བར་ལྟ་བས་འཕངས་པ་མི་འབྲལ་བར་འདོད་པ་ཉིད་དོ། །དེས་ན་སྡུག་བསྔལ་ཇི་ལྟ་བ་བཞིན་རྟོགས་པ་ཉིད་ཀྱིས་ནི་མངོན་པར་
[62b.2]ཆགས་པ་མ་ཡིན་ཏེ། འོན་ཀྱང་བདེ་བ་ཉིད་དུ་ཕྱིན་ཅི་ལོག་པ་ལས་ཡིན་ནོ་ཞེས་བརྗོད་པ་ཡིན་ནོ། །འདི་ནི་རྟག་པར་ལྟ་བས་འཕངས་པ་ཡང་ཡིན་ཏེ་མཐོང་བའི་དངོས་པོ་འབྲེལ་པར་རྟོགས་པ་མེད་པར་བདེ་བ་ཉིད་མེད་པའི་ཕྱིར་དེ་སྲིད་གཅིག་པ་ཉིད་དུ་རྟོགས་པས་མངོན་པར་ཞེན་པ་ཡིན་
[62b.3]ནོ། །དེ་བཞིན་དུ་རང་གི་བདག་ཉིད་ལ་འབྲས་བུ་རྩོམ་པ་པོ་དང་འབྲས་བུའི་ལོངས་སྤྱོད་པ་པོའི་གནས་སྐབས་གཉིས་གཅིག་པ་ཉིད་དུ་མི་བཟུང་བར་འབྲས་བུ་སྒྲུབ་བྱེད་ལ་མངོན་པར་ཞེན་པ་མེད་ལ། དེ་ལྟ་བུ་ཡང་བདག་ཅེས་བརྗོད་དེ་བྱེད་པ་པོ་དང་ཟ་བ་པོའི་མཚན་ཉིད་ཡིན་པའི་ཕྱིར་རོ། །
[62b.4]དེ་ཡང་ངའོ་ཞེས་ཕུང་པོ་ལྔ་ལས་ཐ་དད་པར་རྟོགས་པ་ཡིན་ནོ། །མདོ་ལས་ཕུང་པོ་ལྔ་པོ་དག་ལས་བདག་དང་བདག་གིར་མངོན་པར་ཞེན་པ་ཞེས་ཐ་སྙད་དུ་བྱེད་པ་ནི་སྒྲོ་བཏགས་པའི་ཡུལ་ཡིན་པའི་ཕྱིར་ཏེ་ཉ་ཕྱིས་ལ་དངུལ་དུ་སྒྲོ་བཏགས་སོ་ཞེས་བྱ་བ་ལ་སོགས་པ་བཞིན་ནོ། །འདོད་
[62b.5]ཆགས་ནི་བདག་གིར་ལྟ་བས་ཞུགས་པ་ཡང་ཡིན་ཏེ་ངའོ་ཞེས་བྱ་བས་དེ་འཇུག་པའི་ཕྱིར་རོ། །བདག་ལ་བརྟེན་པའི་ཕན་པ་སྒྲུབ་པར་བྱེད་པ་བདག་གི་དོན་གྱི་དངོས་པོ་གཞན་ཉིད་བདག་གི་ཡིན་པར་བརྗོད་ཀྱི་བདག་པོའི་དབང་དུ་གྱུར་པ་ཉིད་ནི་མ་ཡིན་ཏེ། དེས་ན་བདག་པོ་གཞན་དང་ལྡན་པ་
[62b.6]ཡིན་ནོ། །དེས་ན་དེ་ལྟར་དོན་མི་རྟག་པ་དང་བདག་ཀྱང་སྟོང་པ་ཉིད་དང་། ཕུང་པོ་རྣམས་ཀྱང་རྒྱུ་དང་འབྲས་བུའི་རྒྱུན་ཙམ་གྱི་རང་བཞིན་ཡིན་པས་ན་རང་གི་བདག་ཉིད་ལ་གནས་པ་རྟོགས་པ་མེད་པ་ནི་འབྲས་བུ་སྒྲུབ་པ་ལ་བཏང་སྙོམས་ཉིད་དུ་འགྱུར་བ་ཡིན་ནོ། །དེས་ན་འདོད་ཆགས་ནི་བདག་
[62b.7]གིར་མངོན་པར་ཞེན་པ་ལ་སོགས་པ་སྔོན་དུ་འགྲོ་བ་ཅན་ཉིད་དོ། །གལ་ཏེ་མ་རིག་པས་འཕངས་པ་མ་ཡིན་པའི་ཡོན་ཏན་ལ་མངོན་པར་ཞེན་པ་ཡིན་གྱི་བདག་ཏུ་ལྟ་བས་འཇུག་པ་ནི་མ་ཡིན་ནོ་ཞེ་ན། དེ་ལྟ་ན་ཡང་འོ་ན་ཟླ་བ་གཉིས་ལ་སོགས་པ་ཤེས་པ་ཡང་འདོད་ཆགས་སུ་འགྱུར་བ་སྟེ། དེ་མ་
[63a]
[63a.1]རིག་པ་ལ་བརྟེན་པའི་ཕྱིར་དང་། གནོད་པར་བྱེད་པ་སྐྱེས་པའི་སྔ་རོལ་དུ་བདེན་པའི་མཚན་ཉིད་ཀྱིས་ཡང་དག་པ་མ་ཡིན་པའི་ཡོན་ཏན་ལ་མངོན་པར་ཞེན་པའི་ཕྱིར་རོ། །རང་གི་བདག་ཉིད་ལ་གནས་པའི་འབྲས་བུ་ལོངས་སྤྱོད་པའི་བསམ་པས་ནི་ཟག་པ་དང་བཅས་པའི་
[63a.2]དངོས་པོ་ལ་འཇུག་པ་བཞིན་དུ་གང་དུ་ཡང་འདོད་ཆགས་ཀྱི་རྒྱུ་མཚན་ཉིད་ལས་མི་འདའོ། །དེ་ནས་དེ་ལྟར་འདོད་ཆགས་ཀྱི་རང་གི་ངོ་བོ་བསྟན་ནས་བརྗོད་པར་འདོད་པ་ཉིད་དེ་ལས་བཟློག་པར་བརྗོད་པ་ནི། སྙིང་རྗེ་ལ་སོགས་པ་ནི་ཞེས་བྱ་བ་ཡིན་ནོ། །སྙིང་རྗེ་ལ་སོགས་པ་ནི་བདག་ལ་སོགས་
[63a.3]པར་མངོན་པར་ཞེན་པ་སྔོན་དུ་འགྲོ་བ་ཅན་མ་ཡིན་ནོ། །སོགས་པའི་སྒྲས་ནི་བྱམས་པ་ལ་སོགས་པའོ། །གལ་ཏེ་བརྗོད་པར་འདོད་པ་ནི་དེ་ལྟ་བུ་ཡིན་ནོ་ཞེས་ཇི་སྐད་བརྗོད་པའི་ཚུལ་གྱིས་བརྗོད་པར་བྱ་བ་མ་ཡིན་ནམ་སྙིང་རྗེ་ལ་སོགས་པ་ཅི་སྟེ་བརྗོད་ཅེ་ན། བདེན་ཏེ་འོན་ཀྱང་འདོད་ཆགས་དང་བྲལ་
[63a.4]བ་ལ་སྨྲ་བའི་རྒྱུ་མཚན་ཉིད་ནི་མེད་པ་མ་ཡིན་ལ་སྨྲ་བ་གཞན་གྱི་དོན་ཡིན་པའི་ཕྱིར་དེའི་དོན་འགྲུབ་པའི་བསམ་པས་དེ་བརྗོད་པར་འཐད་པའི་ཕྱིར་རོ། །དེས་ན་འདི་བརྗོད་པར་འདོད་པ་ཉིད་ནི་སྙིང་རྗེའི་བདག་ཉིད་ཁོ་ན་ཡིན་པ་དེས་ན་སྙིང་རྗེའི་རང་བཞིན་ཉིད་ཀྱིས་བསྟན་ཏོ། །དེ་ལྟ་ན་འོ་ན་གཞན་
[63a.5]ལ་ཕན་པར་སེམས་པའི་རང་བཞིན་ཉིད་ཀྱིས་སྙིང་རྗེ་ཉིད་ཚིག་གི་རྒྱུ་ཡིན་གྱི་བྱམས་པ་ལ་སོགས་པ་ནི་མ་ཡིན་ཏེ། དེ་དག་ནི་བསམ་པའི་ཁྱད་པར་ཙམ་གྱི་རང་བཞིན་ཡིན་པའི་ཕྱིར་རོ། །དེས་ན་སོགས་པའི་སྒྲས་ཅི་བྱ་ཞེ་ན། བདེན་མོད་ཀྱི་འདོད་ཆགས་དང་བྲལ་བ་ལ་ཡོད་པའི་བྱམས་
[63a.6]པ་ལ་སོགས་པའི་སེམས་ཀྱི་ཆོས་ཀྱང་འདོད་ཆགས་ཀྱི་བདག་ཉིད་མ་ཡིན་ནོ་ཞེས་བརྗོད་པའི་དོན་དུ་དེ་སྐད་བརྗོད་དོ། །དེ་ཉིད་ཀྱི་ཕྱིར་རིམ་པ་ལས་བརྒལ་ཏེ་སྙིང་རྗེ་སྨོས་སོ། །ཅིའི་ཕྱིར་དེ་ལྟ་བུ་མ་ཡིན་ཞེ་ན་གཞན་དུ་ཡང་ཞེས་སྨོས་སོ། །བྱམས་པ་དང་སྙིང་རྗེ་དང་དགའ་བ་དང་བཏང་
[63a.7]སྙོམས་རྣམས་ནི་བདག་དང་བདག་གིར་ལྟ་བ་ལ་མི་ལྟོས་པར་གོམས་པ་ཙམ་ལས་འབྱུང་བའི་ཕྱིར་རོ་ཞེས་ལེའུ་གཉིས་པར་བསྟན་པར་བྱའོ། །གོམས་པའི་རྩ་བ་ཅན་ཡིན་ཡང་བདག་ལ་སོགས་པར་ལྟ་བས་མ་འཕངས་པ་ཇི་ལྟར་ཞེ་ན། དེའི་རྩ་བ་ཅན་ཡིན་ཡང་འདོད་ཆགས་ལ་སོགས་
[63b]
[63b.1]པ་བཞིན་དུ་རང་གི་ངང་གིས་འཇུག་པའི་ཕྱིར་འབད་པས་སྒྲུབ་པ་ལ་མི་ལྟོས་པར་ཐལ་བའི་ཕྱིར་རོ། །དེ་ལྟར་གནས་པ་ཇི་ལྟར་ཆགས་པ་སྨྲ་བ་ལྟར་འདོད་ཆགས་དང་བྲལ་བ་ཡང་དེ་དང་འདྲ་སྟེ། འདི་གཉིས་ཀ་བརྗོད་པར་འདོད་པ་འདོད་པ་ཉིད་དུ་རྟོགས་པས་ན་བརྗོད་པར་འདོད་པ་ཆགས་པ་
[63b.2]དང་ཆགས་པ་དང་བྲལ་བའི་ཁྱད་པར་དུ་གནས་པ་ནི་མ་ཡིན་ནོ། །དེས་ན་ཁྱད་པར་ནི་འབྲས་བུའི་སྤྱི་ལས་མི་རྟོགས་ཞེས་འཆད་པ་ནི་ཚིག་ཙམ་ལས་ནི་སྟེ་ཚིག་གི་སྤྱི་ལས་ནི་མི་རྟོགས་སོ། །འོན་ཏེ་འདོད་ཆགས་ཀྱི་རང་བཞིན་གྱི་བརྗོད་པར་འདོད་པས་འཁྲུལ་པའི་ཕྱིར་རོ། །གང་
[63b.3]ལས་འཆོལ་བར་འགྱུར་བ་ཅིའི་ཆེད་དུ་དེ་ལྟ་བུ་མ་ཡིན་པ་དེ་ལྟར་ཐ་སྙད་བྱེད་ཅེ་ན། བསམ་པ་ནི་ཞེས་སྨོས་སོ། །འདོད་ཆགས་དང་བྲལ་བ་ཆགས་པ་ཅན་ལྟ་བུའམ། ཆགས་པ་ཅན་འདོད་ཆགས་དང་བྲལ་བ་ལྟ་བུར་ཐ་སྙད་བྱེད་པའི་བསམ་པ་མི་ཤེས་སོ། །དེ་ལྟར་ན་སྒྲ་འཆོལ་
[63b.4]བའི་རྒྱུ་ནི་འདོད་པ་ཙམ་གྱི་རྒྱུ་ཅན་ཉིད་ཡིན་པར་བརྗོད་པ་ཡིན་ནོ། །དེ་ཡང་མི་ཤེས་པས་དེ་ལྟ་བུའི་འདོད་པ་རྟོགས་པ་སྔོན་དུ་འགྲོ་བ་ཅན་གྱིས་རྟོགས་པ་བསལ་བ་ཡིན་ནོ། །གལ་ཏེ་ཡང་འདོད་པ་ཙམ་རྒྱུ་ཡིན་པའི་ཕྱིར་སྒྲའི་ཁྱད་པར་སེམས་ཀྱི་ཁྱད་པར་ལ་ངེས་པ་མེད་པ་དེ་ལྟ་ན་ཡང་འདོད་
[63b.5]ཆགས་དང་བྲལ་བ་ལ་སྨྲ་བ་མེད་པ་ཚད་མ་གཞན་གྱིས་རྟོགས་ནས་ཚིག་གིས་འདོད་ཆགས་རྗེས་སུ་དཔོག་པར་བྱེད་པ་ཁོ་ནའོ། །གང་གི་ཕྱིར་འདི་ལ་རྟག་པར་རྟོགས་པ་མེད་པའི་ཕྱིར་སྒྲུབ་པར་བྱེད་པ་དང་དེའི་འབྲས་བུ་མཚམས་མི་སྦྱོར་བས་ན་སྨྲ་བ་ལ་དགོས་པ་མེད་དོ། །མཚམས་སྦྱོར་ན་
[63b.6]ཡང་རྟག་པ་ཉིད་དུ་རྟོགས་པ་ཡིན་ནོ་ཞེ་ན། དོགས་པ་འདི་གལ་ཏེ་དགོས་པ་མེད་པའི་ཕྱིར་ཞེས་བྱ་བས་བསུ་ན་མ་ཡིན་ཏེ་ཞེས་སྨོས་སོ། །དགོས་པ་མེད་པ་མ་ཡིན་ཏེ་འདོད་ཆགས་དང་བྲལ་བ་ནི་གཞན་གྱི་དོན་དུ་སྨྲ་བ་ལ་འཇུག་པའི་ཕྱིར་རོ། །རང་གི་དགོས་པ་དོན་དུ་གཉེར་ན་ནི་རྟག་པ་
[63b.7]ཉིད་དུ་རྟོགས་པར་འགྱུར་ཞིང་འབྲས་བུའི་དོན་དུ་གཟུང་བའི་སྒྲུབ་པ་ལ་འཇུག་པས་ན་བྱེད་པ་པོ་དང་སྤྱོད་པ་པོ་དང་དེ་སྡོམ་པར་ཡང་ངེས་པ་ཡིན་ནོ། །བདག་ཐ་དད་པ་མཐོང་བ་མེད་པ་ནི་ངར་འཛིན་པ་དང་བྲལ་ཞིང་དོན་དམ་པར་གྱུར་པའི་ཕུང་པོ་རྣམས་ཀྱང་རྟེན་ཅིང་འབྲེལ་པར་འབྱུང་བ་
[64a]
[64a.1]ཙམ་གྱི་རང་བཞིན་ཡིན་པས་ན་འབྲས་བུའི་རྒྱུ་ཕུང་པོའི་ཚོགས་རྒྱུ་གཞན་གྱིས་ཉེ་བར་བསྒྲུབས་པ་གང་ཡིན་པ་འདི་སྐད་ཅིག་མ་ཉིད་ཀྱིས་འབྲས་བུ་བདག་གིར་བྱེད་པར་ནུས་པ་མ་ཡིན་པའི་ཕྱིར་ན་འཕགས་པའི་བདེན་པ་བཞི་མཐོང་བ་རང་གི་དོན་དུ་འཇུག་པ་མེད་དོ། །
[64a.2]གཞན་དག་ཀྱང་བདག་བཞིན་དུ་སྔར་འབྲས་བུ་དང་འབྲེལ་པས་སྟོང་པ་ཕྱིས་འབྲས་བུའི་བདག་ཉིད་དུ་བྱ་བར་མི་ནུས་སོ་ཞེ་ན་མ་ཡིན་ཏེ་དངོས་པོ་ལ་དེ་ལྟར་ཡིན་ཡང་གཞན་དག་ཡོད་པ་ཉིད་དུ་རྟོགས་པའི་ཕྱིར་བརྩམས་ཤིང་རྫོགས། བདག་གིར་ཡང་བྱས་སོ་སྙམ་དུ་རྟོགས་པའི་ཕྱིར་དང་།
[64a.3]སྙིང་རྗེ་ཅན་ཡང་དེའི་དོན་ཉིད་འཇུག་པའི་ཕྱིར་རོ། །ཐར་པའི་དོན་ལ་ནི་གཞན་ཡང་བདག་ཉིད་བཞིན་དུ་འཇུག་པར་བྱེད་དོ། །གལ་ཏེ་གཞན་ལ་ཕན་བཏགས་པས་ཀྱང་བདག་གི་དོན་དུ་འགྱུར་བར་མི་སེམས་པ་ནི་དགོས་པ་མེད་པར་འཇུག་པ་རིགས་པ་མ་ཡིན་ལ། སེམས་ན་ཡང་བདག་
[64a.4]ཏུ་རྟོགས་པ་འཇུག་པའི་ཕྱིར་རིགས་པ་མ་ཡིན་ནོ་ཞེས་དོགས་ན་མ་ཡིན་ནོ་ཞེས་སྨོས་སོ། །རྣམ་པ་ཐམས་ཅད་དུ་བདག་གི་འབྲས་བུ་སེམས་པས་སྟོང་པ་གཞན་ལ་གནས་པ་ཉིད་ཀྱི་དགོས་པ་འདོད་པའི་སྙིང་རྗེ་ཅན་འཇུག་པར་འཐད་པའི་ཕྱིར་རོ། །གལ་ཏེ་ཕན་གདགས་པར་བྱ་བ་ཉིད་ཀྱིས་གཞན་
[64a.5]དག་ཆགས་པའི་གནས་སུ་གྱུར་པས་ན་འདིའི་སྙིང་རྗེ་གང་ཡིན་པ་དེ་ཉིད་འདོད་ཆགས་སུ་འགྱུར་བ་མ་ཡིན་ནམ། འདོད་ཆགས་ནི་ཆགས་པ་ཡིན་ལ། བཅོམ་ལྡན་འདས་གཞན་གྱི་དོན་གཙོ་བོར་མཛད་པས་ཐར་པ་ཞལ་གྱིས་བཞེས་པ་ཡང་ཆགས་པ་ཡིན་ཏེ། དེས་ན་རང་གི་གཉེན་ལ་ཆགས་
[64a.6]པ་དང་སེམས་ཅན་ཐམས་ཅད་ལ་ཕན་འདོགས་པའི་ཆགས་པ་ལ་ཁྱད་པར་ཅི་ཡོད་ཅེས་དོགས་པ་ལ་འདོད་པ་ཡིན་ཏེ་ཞེས་སྨོས་སོ། །སྙིང་རྗེ་ལ་འདོད་ཆགས་ཞེས་ཟེར་ན་འདོད་པ་ཉིད་དོ། །གལ་ཏེ་འདོད་ན་འོ་ན་རྩོད་པ་མེད་དོ་ཞེ་ན། རྩོད་པ་མེད་པ་མ་ཡིན་ཏེ་རང་བཞིན་མི་འདྲ་བའི་ཕྱིར་རོ། །འདི་
[64a.7]ལྟར་སྙིང་རྗེ་ནི་ཉེས་པ་མེད་པ་ཡིན་ཏེ། འདོད་ཆགས་བཞིན་དུ་འཁོར་བའི་སྡུག་བསྔལ་འཕེན་པས་སེམས་ཀྱི་རྒྱུན་ཉེས་པར་བྱེད་པ་མ་ཡིན་ནོ། །གཏན་ཚིགས་སྨྲས་པ་ནི་ཕྱིན་ཅི་མ་ལོག་པ་ལས་བྱུང་བའི་ཕྱིར་རོ། །ཕྱིན་ཅི་ལོག་ནི་བདག་ཏུ་འཛིན་པ་སྟེ་དེ་ལས་བྱུང་བ་མ་ཡིན་པའི་ཕྱིར་རོ། །དེས་ན་དེ་
[64b]
[64b.1]ལྟར་སྙིང་རྗེ་འདོད་ཆགས་དང་རང་བཞིན་མི་འདྲ་བར་བརྗོད་པ་ན་སྙིང་རྗེ་ནི་འདོད་ཆགས་ཡིན་ནོ་ཞེས་སྙིང་རྗེ་ལ་འདོད་ཆགས་ཀྱི་སྒྲ་འཇུག་པ་ཙམ་ཞིག་ལུས་པ་ཡིན་ནོ། །དེ་ལ་ཡང་འདི་འདོད་པར་བརྗོད་པ་ཡིན་ནོ། །དེ་ཉིད་ཀྱི་ཕྱིར་རྣམ་པར་ངེས་པར་མིང་ནི་མི་དགག་གོ་ཞེས་བཤད་དོ། །དེའི་དོན་
[64b.2]ནི་འདི་ཡིན་ཏེ། བདག་ཏུ་མངོན་པར་ཞེན་པའི་རྩ་བ་ཅན་མ་ཡིན་པའི་ཕྱིར་སྙིང་རྗེ་ནི་འཁོར་བ་འཕེན་པའི་རྒྱུ་མ་ཡིན་ནོ། །འཆད་པར་འགྱུར་བའི་ཚུལ་གྱིས་རང་དབང་ཉིད་དུ་འཇུག་པའི་ལས་ཀྱི་རྣམ་པར་སྨིན་པ་སྐྱེ་བ་ན་སྲིད་པ་དང་ལས་སྲིད་པ་འཕེན་པའི་རྒྱུ་ཡིན་ནོ། །བདག་ཏུ་ལྟ་བ་ཟད་ན་ནི་
[64b.3]འབྲས་བུ་སེམས་པ་མེད་པའི་ཕྱིར་མི་འཇུག་པའི་ལས་རྣམ་པར་སྨིན་པའི་རྒྱུ་མ་ཡིན་ནོ། །དེས་ན་འདོད་ཆགས་བཞིན་དུ་སྙིང་རྗེ་ཉེས་པ་བྱེད་པ་མ་ཡིན་པས་ཉེས་པ་བྱེད་པ་མེད་དོ། །ཇི་ལྟར་སྙིང་རྗེ་ཕྱིན་ཅི་ལོག་ལས་མ་བྱུང་། གང་གི་ཕྱིར་གཞན་གྱི་སྡུག་བསྔལ་མི་བཟོད་པའི་རྣམ་པ་ཅན་གྱིས་
[64b.4]སེམས་ཀྱི་ཁྱད་པར་དེ་གསལ་བར་འདོད་པའི་རྣམ་པའི་བདག་ཉིད་ནི་སྙིང་རྗེར་འདོད་དོ། །དེས་ན་བདག་གིས་འདི་དག་སྡུག་བསྔལ་ལས་བསྒྲལ་བར་བྱའོ་ཞེས་འདི་ལ་བདག་ཏུ་མངོན་པར་ཞེན་པར་འགྱུར་བ་ཡིན་ནོ། །སྡུག་བསྔལ་བའི་སེམས་ཅན་ལ་དམིགས་པའི་རྣམ་པ་ཅན་གྱི་སྙིང་རྗེ་
[64b.5]ཉིད་ཀྱིས་ནི་སྡུག་བསྔལ་བཟློག་པ་ཉིད་མ་ཡིན་ཏེ། འོན་ཀྱང་འདི་འཇུག་པ་གང་ཡིན་པའོ། །དེ་ཡང་ངའོ་སྙམ་པར་རྟོགས་པ་ཡིན་ནོ། །དེས་ན་འདོད་པ་དང་བཅས་པ་བར་དུ་ཞུགས་ཤིང་མཐར་འབྲས་བུ་དམིགས་པ་གཅིག་ཏུ་རྟོགས་ཤིང་སྡུག་བསྔལ་བཟློག་པ་ལ་འཇུག་པ་ཡིན་ཏེ། གཞན་
[64b.6]དུ་མི་འཐད་པའི་ཕྱིར་རོ། །དམིགས་པ་འཇུག་པའམ་འཇུག་པ་འབྲས་བུ་དང་མ་འབྲེལ་པར་མ་ཡིན་ནོ། །དེས་ན་གསུམ་པོ་འདི་གཅིག་ཏུ་རྟོགས་པར་འགྱུར་བ་ཡིན་ནོ། །དེས་ན་གལ་ཏེ་འདི་མི་རྟག་པ་ཡིན་ཡང་རྟག་པ་གཞན་དང་འབྲེལ་པས་རྟག་པར་རྟོགས་པ་ན་བདག་གཞན་རྟོགས་པར་
[64b.7]འགྱུར་བ་ཡིན་ནོ། །བདག་ཏུ་རྟོགས་པ་དང་བྲལ་བ་ལ་ཡང་གནས་སྐབས་འདི་གསུམ་རྟོགས་པས་གཅིག་ཏུ་མཚམས་སྦྱོར་བ་ནི་འདི་བདག་ཏུ་རྟོགས་པ་ཉིད་གཞན་དུ་བརྗོད་པར་འགྱུར་རོ། །རྣམ་པ་ཐམས་ཅད་དུ་གཅིག་ཏུ་སེམས་པ་མེད་པར་ནི་སྙིང་རྗེ་ཅན་འཇུག་པར་མི་འཐད་དོ་ཞེ་ན། དོགས་
[65a]
[65a.1]པ་འདི་བསུ་ནས་སྙིང་རྗེ་ཞེས་སྨོས་སོ། །བདག་ཏུ་འཛིན་པ་མེད་ཀྱང་སེམས་ཅན་སྡུག་བསྔལ་བ་མཐོང་བས་དེ་མི་བཟོད་པའི་རྣམ་པ་ཅན་སྡུག་བསྔལ་དེ་བསལ་བའི་བསམ་པ་སྐྱེ་བ་ཡིན་ནོ། །འདི་ལྟར་སེམས་དང་པོ་བསྐྱེད་པ་ནས་བརྩམས་ཏེ་སྙིང་རྗེ་བཞིན་དུ་བདག་མེད་པ་
[65a.2]ཡང་གོམས་པར་བྱེད་པ་དེ་གཉི་གའི་བདག་ཏུ་གྱུར་པ་ན་རྒྱུ་འབྲས་ཀྱི་རྒྱུན་ཙམ་གྱི་རང་བཞིན་དུ་གཟུགས་ལ་སོགས་པའི་ཕུང་པོ་ལྔ་པོ་མཐོང་བ་ལ་བརྩེ་བའི་བདག་ཉིད་ཀྱི་རིགས་ཡང་འཇུག་སྟེ། གཉི་ག་ཡང་སྒོམ་པའི་ཕྱིར་རོ། །དེས་ན་གོམས་པ་ལས་བདག་མེད་པ་མཐོང་བ་ལ་བརྩེ་བའི་རང་
[65a.3]བཞིན་ཉིད་ཀྱང་ཡོད་པ་ཁོ་ནའོ། །དེས་ན་སེམས་ཅན་གྱི་སྡུག་བསྔལ་ཡིན་པའི་ཕྱིར་སྡུག་བསྔལ་གྱི་ཁྱད་པར་སེམས་ཅན་མཐོང་བ་ཙམ་གྱིས་སྙིང་རྗེ་འཇུག་པ་ཡིན་ནོ། །སེམས་ཅན་མཐོང་བ་ཉིད་གོམས་པ་ལས་སྡུག་བསྔལ་དང་བྲལ་བར་འདོད་པའི་རྣམ་པ་ཡིན་ནོ། །གང་ལས་དམིགས་
[65a.4]པ་ཙམ་གྱི་རང་བཞིན་སྙིང་རྗེ་འཇུག་པ་ན་རྟག་པར་རྟོགས་པར་འགྱུར་བ་བདག་ཉིད་གཞན་གྱི་སྡུག་བསྔལ་བཟློག་པའི་བྱེད་པ་པོར་རྟོགས་པ་ནི་མ་ཡིན་གྱི། འོན་ཀྱང་སྡུག་བསྔལ་བཟློག་པའི་བསམ་པས་དེ་ཟློག་པར་བྱེད་པའི་རྒྱུ་སྐྱེད་པར་བྱེད་པ་ཡིན་ནོ། །དེ་ཡང་ཆོས་ཀྱི་དེ་ཁོ་ན་འཆད་
[65a.5]པའི་རང་བཞིན་འཕགས་པའི་བདེན་པ་བཞི་སྟོན་པ་ཡིན་ནོ། །རྒྱུ་དང་འབྲས་བུའི་སེམས་ཀྱི་སྐད་ཅིག་དེ་ཉིད་ལ་རྟོགས་པ་ཡིན་ཏེ། དེ་ནི་འདས་པ་དང་མ་འོངས་པའི་དངོས་པོའི་ཡུལ་ཅན་ཡིན་པའི་ཕྱིར་རོ། །སྔོན་མ་བྱུང་བ་གཞན་དག་གཞན་ཉེ་བར་གནས་ན་གསལ་བའི་ཕྱིར་རོ། །དེས་ན་
[65a.6]འདོད་པའི་བདག་ཉིད་ཀྱི་སེམས་དེ་ཉིད་རྒྱུ་དང་འབྲས་བུའི་རྟོགས་པའི་རང་བཞིན་ཡིན་པའམ་ཤེས་ནས་རྒྱུ་རྟོགས་ཏེ་སྐད་ཅིག་གསུམ་པ་ལ་བརྗོད་པར་འདོད་པར་འགྱུར་ཡང་རུང་སྟེ་རྣམ་པ་ཐམས་ཅད་དུ་གང་གིས་འདི་མཐོང་བའི་དེས་རྒྱུ་བཙལ་ཏེ་དེ་རྟོགས་པར་བྱའོ་སྙམ་དུ་སེམས་པ་ནི་མེད་ཀྱི་འོན་ཀྱང་
[65a.7]མཐོང་བ་ལས་རྒྱུ་རྟོགས་པ་སྐྱེ་ལ། དེ་ལས་ནི་བརྗོད་པར་འདོད་པ་ཉིད་ཡིན་ནོ། །རྒྱུ་རྟོགས་པ་མཐོང་བ་བྱེད་པ་མཚམས་སྦྱོར་བའམ། བརྗོད་པར་འདོད་པ་ལ་རྒྱུ་རྟོགས་པ་མཚམས་སྦྱོར་བ་ཡོད་པ་ནི་མ་ཡིན་ནོ། །དོན་ཐམས་ཅད་དམིགས་པ་ལ་དབང་འབྱོར་པ་རྟོགས་པ་དོན་དུ་གཉེར་ཡང་རྟོགས་
[65b]
[65b.1]པ་མི་སྐྱེ་ན། དེ་ལ་དབང་འབྱོར་པ་ཉམས་པར་འགྱུར་བའི་ཕྱིར་དྲན་པར་བྱ་བ་འདས་པ་ལ་མཐོང་བ་ཉིད་སྔོན་དུ་བྱེད་པའི་བདག་ཉིད་ནི་ཐམས་ཅད་མཁྱེན་པ་ཡིན་ནོ། །དེ་བས་བརྗོད་པར་འདོད་པ་ཉིད་ཡིན་ཡང་གཉེན་པོ་དང་བཅས་པའི་སྡུག་བསྔལ་རིག་པའི་བདག་ཉིད་ཡིན་ནོ། །འདིས་ནི་ཁ་
[65b.2]ཅིག་ན་རེ་བཅོམ་ལྡན་འདས་གསུང་བར་ཁས་ལེན་ན་རྣམ་པར་རྟོག་པ་ཁས་བླངས་པར་འགྱུར་ལ། དེ་ཡང་ལོག་པའི་ཤེས་པ་ཡིན་ནོ་ཞེས་འཛེར་བ་དེ་སྤངས་པ་ཡིན་ནོ། །དེ་སྐད་དུ་ཡང་སྙན་དངགས་པ་གང་དག་བདེ་བར་གཤེགས་པ་གསུང་བར་རྟོགས་པ་ཞེས་རྒྱས་པར་བརྗོད་པ་ཡིན་ནོ། །
[65b.3]གང་གི་ཕྱིར་རྟོགས་པར་མི་ནུས་པ་ནི་སྔར་རྟོགས་པའི་འདུ་བྱེད་སད་པ་ལས་རྟོགས་པ་དོན་དུ་གཉེར་བའི་རྣམ་པར་བརྟག་པར་བྱ་བར་འགྱུར་བར་བྱ་བ་ཡིན་ན། ཐམས་ཅད་མཁྱེན་པ་དམིགས་པ་ལ་དབང་འབྱོར་པ་ནི་དེ་ལྟར་འགྱུར་བར་ནུས་པ་མ་ཡིན་ནོ། །དེས་ན་དྲན་པར་བྱ་བ་འདས་པ་དང་བརྟག་པར་བྱ་
[65b.4]བ་མ་འོངས་པ་ལ་མངོན་སུམ་ཉིད་འཇུག་པ་ཡིན་ཏེ། དེས་ན་འདི་ལ་རྣམ་པར་རྟོག་པའི་ཆ་འགའ་ཡང་ཡོད་པ་མ་ཡིན་ནོ། །མི་བདེན་པ་རྟོགས་པ་ཡང་ཡོད་པ་མ་ཡིན་ཏེ་ཐམས་ཅད་མཁྱེན་པ་ཡིན་པའི་ཕྱིར་རོ། །རྣམ་པར་རྟོག་པ་མེད་པར་སྒྲ་མི་སྦྱོར་རོ་ཞེ་ན་མ་ཡིན་ཏེ། བརྗོད་བྱ་རྗོད་བྱེད་ཀྱི་རྟོག་པ་
[65b.5]མེད་ཀྱང་འདི་ལ་སྒྲ་འདིས་རྣམ་པར་རྟོག་པ་འདི་སྐྱེད་དོ་ཞེས་གཞན་གྱི་རྒྱུད་ལ་བརྟེན་པའི་རྒྱུ་དང་འབྲས་བུའི་དངོས་པོ་མངོན་དུ་བྱེད་པ་ནི་གཞན་གྱི་བསམ་པ་ཉིད་ཀྱིས་འཇུག་པའི་ཕྱིར་རོ། །ལོག་པའི་ཤེས་པ་མངོན་དུ་བྱེད་ཀྱང་ལོག་པའི་ཤེས་པ་ཉིད་ནི་མ་ཡིན་ནོ། །གང་གིས་འདི་ཉིད་མི་འགྲུབ་པར་འགྱུར་
[65b.6]བ་ཇི་ལྟར་ཁ་ཅིག་སེམས་པ་ལྟར་དོན་དམིགས་པ་རྟོགས་པ་ལ་ལྟོས་པ་ཡང་མ་ཡིན་ཏེ། ཕྱིར་ལ་རྣམ་པར་རྟོག་པ་ཉིད་དོན་དམིགས་པ་ལ་ལྟོས་པ་ཡིན་ཏེ་དེའི་འདུ་བྱེད་པ་ལ་བརྟེན་པའི་ཕྱིར་དང་། དེའི་བྱེད་པ་མ་རྫོགས་པར་མི་འགྲུབ་པའི་ཕྱིར་རོ། །འོ་ན་ཇི་ལྟར་འབྲས་བུ་ཉིད་དང་སྐད་ཅིག་མ་ཉིད་
[65b.7]ལ་སོགས་པ་རྟོགས་ཤེ་ན། དེ་ཡོད་ན་གཞན་ཡོད་པར་དམིགས་པ་ཉིད་རྒྱུ་དང་འབྲས་བུའི་དངོས་པོ་རྟོགས་པ་ཡིན་ཏེ་སྐད་ཅིག་གཅིག་རྟོགས་པར་བྱ་བ་ཉིད་ན་འདས་པ་དང་མ་འོངས་པ་རིག་པའི་ཕྱིར་རོ། །དེ་བཞིན་དུ་སྐད་ཅིག་གཅིག་སྡོད་པ་དང་སྐད་ཅིག་གཞན་སྐྱེ་བ་ཡང་དེ་ཁོ་ན་བཞིན་གསལ་བ་ཡིན་
[66a]
[66a.1]ཏེ། དེར་རྣམ་པར་རྟོག་པས་ནི་དགོས་པ་ཅི་ཡང་མེད་དོ། །རྣམ་པར་རྟོག་པ་མེད་ན་འདི་ནི་སྔོན་པོ་ཞེས་རང་བཞིན་ངེས་པར་མ་བརྟགས་པར་འགྱུར་རོ་ཞེ་ན། ངེས་པར་བརྟགས་ཀྱང་མྱོང་བའི་ཁྱད་པར་འགའ་ཡང་མེད་པའི་ཕྱིར་མྱོང་བའི་རང་བཞིན་ལ་ངེས་པར་
[66a.2]བརྟགས་པས་ཅི་བྱ། གཞན་ཡང་ལྷག་པར་ཞེན་པ་འཁྲུལ་པའི་ཕྱིར་རྣམ་པར་རྟོག་པ་འཁྲུལ་པར་བརྗོད་དེ། རང་གི་སྣང་བ་དོན་མེད་པ་ལ་དོན་དུ་ལྷག་པར་ཞེན་ནས་འཇུག་པའི་ཕྱིར་རོ། །དོན་མི་སྣང་བ་ཡང་ཚུ་རོལ་མཐོང་བ་རྣམས་ལ་དབང་པོ་བྱེད་པ་མེད་པར་དོན་སྣང་བ་མེད་པའི་ཕྱིར་
[66a.3]རོ། །དེ་ལྟ་བུའི་རང་བཞིན་མ་ཡིན་པ་ལ་དེ་ལྟ་བུའི་ལྷག་པར་ཞེན་པ་ཡང་དོན་ཉམས་སུ་མྱོང་བའི་བག་ཆགས་ཀྱི་དབང་གིས་འབྱུང་བ་ཡིན་ནོ། །མངོན་པར་རློམ་པའི་རང་བཞིན་ལྷག་པར་ཞེན་པ་ཞེས་བྱ་བ་ཡང་བདེ་བ་ལ་སོགས་པ་བཞིན་དུ་རྣམ་པར་ཤེས་པའི་རང་གི་ངོ་བོ་ཡིན་ནོ་ཞེས་བསྟན་པར་
[66a.4]བྱའོ། །དེས་ན་དབང་པོ་ལ་སོགས་པའི་བྱེད་པ་མེད་པར་དོན་རྟོགས་པར་ནུས་པ་དོན་སྣང་བ་ལ་དོན་དུ་ལྷག་པར་ཞེན་པ་ནི་དོན་ཉིད་ལ་ཡིན་གྱི་འཁྲུལ་པའི་རྒྱུ་ནི་མ་ཡིན་ནོ། །དོན་ལས་བཟློག་པའི་རྣམ་པ་ནི་མི་སྣང་བའི་ཕྱིར་གསལ་བའི་དོན་ལ་དོན་དུ་ལྷག་པར་ཞེན་པ་ནི་དོན་ལ་བརྟེན་པ་ཉིད་
[66a.5]ཡིན་པར་འགྱུར་གྱི་ཚུ་རོལ་མཐོང་བའི་ལྟར་སྣང་བ་ལ་བརྟེན་པ་ནི་མ་ཡིན་ནོ། །དེས་ན་བཅོམ་ལྡན་འདས་ཀྱིས་སྔོན་པོ་ལ་སྔོན་པོར་ལྷག་པར་ཞེན་པ་ནི་ཕྱིན་ཅི་མ་ལོག་པའི་ཡུལ་ཅན་ཡིན་ཏེ། དེ་སྔོན་པོ་ཉིད་ཡིན་པའི་ཕྱིར་དང་། རྟག་པ་ལ་སོགས་པར་ཕྱིན་ཅི་ལོག་མེད་པའི་ཕྱིར་རོ། །
[66a.6]དེས་ན་རྣམ་པར་རྟོག་པའི་ཆོས་འདི་ཙམ་ཞིག་དང་འདོད་པའི་རང་བཞིན་ནི་རྣམ་པར་མི་རྟོག་པ་ལ་ཡང་མི་འགལ་ལོ། །འདི་ཉིད་ལུང་གིས་ཟིན་པ་ཡིན་ནོ་ཞེས་སྟོན་པ་ནི་འདི་ལྟར་ཞེས་བྱ་བ་ཡིན་ནོ། །སོགས་པའི་སྒྲ་གཅིག་གིས་ནི་སྙིང་རྗེ་དང་དགའ་བ་དང་བཏང་སྙོམས་བཟུང་ལ།
[66a.7]སོགས་པའི་སྒྲ་ཕྱི་མས་ནི་དམིགས་པ་མེད་པ་བཟུང་བ་ཡིན་ནོ། །དེ་ལ་སེམས་ཅན་ལ་དམིགས་པ་ནི་སེམས་དང་པོ་བསྐྱེད་པ་ནས་བཟུང་སྟེ་ཇི་སྲིད་སློབ་པའི་གནས་སྐབས་ཡོངས་སུ་རྫོགས་པའི་བར་རོ། །ཆོས་ལ་དམིགས་པ་ནི་དགྲ་བཅོམ་པ་ཡིན་ནོ། །ཆོས་ནི་གཟུགས་ལ་
[66b]
[66b.1]སོགས་པ་ཕུང་པོ་ལྔ་སྟེ་དེ་དག་ལ་ངའི་གཟུགས་ཞེས་བྱ་བ་ལ་སོགས་པར་ཐ་དད་པར་བདག་གི་ཆོས་ཉིད་དུ་ཞེན་པའི་ཕྱིར་རོ། །དེས་ན་བདག་མེད་ན་ཆོས་ཁོ་ན་ལུས་པར་འགྱུར་རོ། །དེས་ན་བདག་མེད་པ་རིག་པའི་བྱམས་པ་ལ་སོགས་པ་ནི་ཆོས་ལ་དམིགས་པའོ། །དམིགས་པ་མེད་པ་ནི་
[66b.2]ཆོས་བདག་མེད་པ་མཁྱེན་པ་སངས་རྒྱས་བཅོམ་ལྡན་འདས་ཉིད་དང་བྱང་ཆུབ་སེམས་དཔའ་རྣམས་ཀྱི་ཡིན་ནོ། །འདི་ལྟར་ཤེས་རབ་དང་ཐུགས་རྗེ་གཉི་ག་གོམས་པས་ན་ཤེས་རབ་ཀྱི་སྟོབས་ཀྱིས་ནི་ཞུགས་ཀྱང་མེད་པའི་གཟུང་བ་མི་སྣང་ལ། ཐུགས་རྗེའི་སྟོབས་ཀྱིས་ནི་བདག་ཉིད་དུ་གྱུར་
[66b.3]པ་མི་ལྡོག་གོ། །སྡུག་བསྔལ་མཐོང་བ་མེད་པར་སྙིང་རྗེ་མེད་དོ་ཞེ་ན། གཉིས་ཀྱི་བག་ཆགས་དང་བྲལ་བས་གཉིས་མེད་པ་མངོན་དུ་བྱས་པ་ན་ལོག་པའི་ཤེས་པ་དང་བྲལ་བ་བག་ཆགས་ལ་བརྟེན་པ་རང་དབང་མི་བདེན་པ་སྔོན་པོ་ལ་སོགས་པ་དང་བྲལ་བ་ཡིན་ཡང་། ཐམས་ཅད་མཁྱེན་
[66b.4]པ་ཐོབ་པའི་ཕྱིར་ཡོད་པའི་དོན་མངོན་དུ་བྱེད་པ་ལ་དབང་འབྱོར་པ་ནི་ལྡོག་པ་མ་ཡིན་ནོ། །གཞན་གྱི་རྒྱུད་ཀྱང་མི་བདེན་པ་ཉིད་མ་ཡིན་པའི་ཕྱིར་དོན་དམ་པར་ཡོད་པ་མངོན་དུ་བྱེད་པར་ནུས་པའི་ཉམས་སུ་མྱོང་བ་སྐྱེད་པའི་ཉེ་བར་ལེན་པའི་དབང་གིས་དེ་འབྱུང་བ་མི་ལྡོག་གོ། །དེ་ཉིད་ཀྱི་ཕྱིར་ཕྱིའི་
[66b.5]དོན་མེད་པར་གྲུབ་པ་ཡིན་ནོ། །དེ་བདེན་ན་གཉིས་མེད་པར་གོམས་ཀྱང་དངོས་པོའི་རང་བཞིན་གྱིས་གྲུབ་པ་མིག་ལ་སོགས་པ་ལས་དོན་སྣང་བ་ཇི་ལྟར་ལྡོག་པར་འགྱུར། དེས་ན་ཡོད་པའི་དོན་མངོན་དུ་བྱེད་པ་ཉམས་པར་བྱེད་པ་དང་འགལ་བ་ཐམས་ཅད་མཁྱེན་པའི་ས་བོན་ཐོབ་པ་ན་ཕྱིའི་
[66b.6]དོན་དུ་སྣང་བ་བཞིན་གཞན་གྱི་རྒྱུད་དུ་སྣང་བ་སྐྱེ་བ་ནི་དགག་པར་མི་ནུས་སོ། །རྣམ་པར་ཤེས་པ་རང་བཞིན་གཉིས་སུ་མི་འགྱུར་རམ། བྱམས་པ་ལ་སོགས་པ་དམིགས་པ་མེད་པ་ཉིད་འདི་ནི་རྣམ་པར་ཤེས་པ་གཉིས་མེད་པའི་ཕྱོགས་ལ་ཉེ་བར་བཀོད་པ་ཡིན་ནོ་ཞེ་ན། འགྱུར་མོད། འགལ་
[66b.7]བ་འགའ་ཡང་མེད་དོ། །དེ་ཁོ་ན་མཐོང་བ་ལོག་པའི་ཤེས་པ་དང་འགལ་བ་ཡིན་ནོ། །སྔོན་པོ་ལ་སོགས་པ་ཕྲ་མོ་དང་རགས་པའི་རྣམ་པར་རྟོག་པ་མི་བཟོད་པ་ཉིད་ཀྱི་རང་དབང་དུ་ཡོད་པས་མི་སྲིད་པས་དོན་དེ་ལྟ་བུ་མ་ཡིན་ལ་ཤེས་པ་ཡང་དེ་ཙམ་གྱི་རང་བཞིན་མ་ཡིན་ནོ། །དེས་ན་འགལ་
[67a]
[67a.1]བའི་རང་བཞིན་གཞན་དང་མི་ལྡན་པའི་རྣམ་པར་ཤེས་པ་དེ་ལྟ་བུའི་རང་བཞིན་ལོག་པར་ཤེས་པ་ཉིད་ནི་བག་ཆགས་ཀྱི་རྒྱུ་ཅན་དུ་ཉེ་བར་བསྟན་ཏོ་དེ་ལྟ་བུར་གྱུར་པའི་དངོས་པོ་ནི་གཉིས་སུ་མེད་པའི་ཡེ་ཤེས་ལ་མེད་ཀྱི་རྣམ་པ་དེ་ལྟ་བུའི་རྒྱུད་གཞན་གྱི་ཤེས་པ་མངོན་དུ་བྱེད་
[67a.2]པ་ཉིད་ནི་མི་འགལ་ཏེ། དེ་ལྟ་བུར་གྱུར་པའི་ཤེས་པ་ཡོད་པར་མི་འགལ་བའི་ཕྱིར་རོ། །ལོག་པའི་ཤེས་པ་འཛིན་པ་ནི་ལོག་པའི་རང་གི་བདག་ཉིད་ཡོད་པའི་ཕྱིར་དང་ཇི་ལྟར་སྣང་བཞིན་པའི་དངོས་པོ་མ་བཀག་པ་ལོག་པའི་ཤེས་པ་ཉིད་མི་འཐད་པའི་ཕྱིར་རོ། །དེ་ལྟ་བུར་གྱུར་པའི་
[67a.3]རྣམ་པ་དང་ལྡན་པའི་ཕྱིར་གཞན་གྱི་རྒྱུད་ལ་ཡོད་པའི་ཤེས་པ་དེ་ལྟ་བུར་གྱུར་པའི་དོན་གསལ་བར་འགྱུར་བ་ནི་དེ་ལྟ་བུར་གྱུར་པའི་དོན་མེད་པའི་ཕྱིར་ལོག་པའི་ཤེས་པ་ཉིད་ཡིན་གྱི། བཅོམ་ལྡན་འདས་ཀྱི་མཁྱེན་པ་ནི་མ་ཡིན་ཏེ། དེ་ལྟ་བུར་གྱུར་པའི་ཤེས་པ་ཡོད་པར་མི་འགལ་བའི་ཕྱིར་
[67a.4]དང་། དེ་ཡང་དེའི་ཡུལ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་ལོག་པའི་ཤེས་པ་བདག་རིག་པ་ལ་སོགས་པའི་ཤེས་པ་མ་ཡིན་ཏེ། འཁྲུལ་པའི་ཕྱིར་རིག་པ་མངོན་སུམ་མ་ཡིན་པར་ཐལ་བའི་ཕྱིར་རོ། །དེ་ལྟ་ན་འོ་ན་ཕྱིའི་དོན་ཁས་བླངས་པ་དང་འདྲ་བར་དོན་དམ་པར་ཡོད་པའི་གཞན་གྱི་
[67a.5]རྒྱུད་སྣང་བ་ཡིན་ན་གཉིས་སུ་མེད་པ་གཟིགས་པ་ཉིད་དུ་མི་འགྱུར་རོ་ཞེ་ན། ཇི་ལྟར་མི་འགྱུར་གང་གི་ཕྱིར་གཉི་ག་ལ་རང་དབང་བརྙེས་པས་ན་དོན་ཐམས་ཅད་གཟིགས་པ་ལ་ཡང་གནས་པས་ནི་ཐམས་ཅད་གཟིགས་པ་ཉིད་ཡིན་ལ་གཉིས་སུ་མེད་པའི་གཟིགས་པ་ལ་ཡང་གནས་པས་ནི་གཉིས་
[67a.6]སུ་མེད་པའི་གཟིགས་པ་ཡིན་ནོ། །དེ་ཉིད་ཀྱི་ཕྱིར་ཆོས་ཀྱི་དབྱིངས་ཀྱི་ཡེ་ཤེས་ཀྱི་གཟུགས་བརྙན་གྱིས་ཤེས་བྱ་མཐའ་དག་ལ་སྤྱི་བོར་འཛིན་པ་ཞེས་བྱ་བ་ནས་བཟུང་སྟེ་གཉིས་སུ་མེད་པའི་ཏིང་ངེ་འཛིན་ལ་མངའ་བརྙེས་པ་ཞེས་བྱ་བས་བསྟོད་པ་ཡིན་ནོ། །དེ་ཇི་ལྟར་དམིགས་པ་མེད་པའི་ཐུགས་
[67a.7]རྗེར་བརྗོད་ཅེ་ན། རྒྱུ་དང་འབྲས་བུ་བཞིན་དུ་ཤེས་པ་དང་ཤེས་བྱ་དག་འབྲེལ་པ་མེད་པའི་ཕྱིར་རོ། །གཉི་ག་ཡང་རང་གི་མཐར་ཐུག་པའི་ཕྱིར་རྣམ་པར་རྟོག་པ་འབའ་ཞིག་གི་སྤྱོད་ཡུལ་དུ་གྱུར་པའི་ཤེས་པ་དང་ཤེས་བྱ་བཅོམ་ལྡན་འདས་ལ་མི་མངའ་བས་ན་གཞན་གྱི་སེམས་དམིགས་པ་མ་ཡིན་ལ་དེ་
[67b]
[67b.1]ཤེས་པ་ཡང་འགལ་བ་ཡང་མ་ཡིན་ནོ། །ཇི་ལྟར་ཚད་མ་དང་བྱ་བ་ཕན་ཚུན་འབྲེལ་པར་མི་འཐད་པ་ཞེས་བྱ་བ་དེ་ལྟར་ཡང་རྗེས་སུ་དཔག་པ་ཚད་མ་ཉིད་ཡིན་པར་བསྟན་པར་བྱའོ། །གལ་ཏེ་སྙིང་རྗེ་གོམས་པའི་སྟོབས་ལས་སྐྱེས་པ་མ་ཡིན་ནམ། དེས་ན་འདིར་ཅི་ཞིག་གོམས་པར་བྱེད་སྙིང་
[67b.2]རྗེ་ཉིད་དམ་འོན་ཏེ་གཞན་ཉིད་གཞན་གོམས་པས་གཞན་སྐྱེ་བ་ཡང་ཡོད་པ་ཁོ་ན་སྟེ། བདག་མེད་པ་གོམས་པས་འདོད་ཆགས་དང་བྲལ་བར་འགྱུར་བ་བཞིན་ནོ་ཞེ་ན། དེ་དག་ཀྱང་ཞེས་སོ། །བྱམས་པ་དང་སྙིང་རྗེ་ལ་སོགས་པ་དག་ཀྱང་རིགས་མཐུན་པ་གོམས་པ་ལས་བྱུང་བ་ཡིན་
[67b.3]ཏེ། བྱམས་པ་ལ་སོགས་པའི་སེམས་ཡང་ནས་ཡང་དུ་བསྐྱེད་པ་ལས་བྱུང་བ་ཡིན་གྱི་འདོད་ཆགས་ལ་ལྟོས་པ་ཅན་ནི་མ་ཡིན་ནོ། །རང་གི་ངང་གིས་འཇུག་པ་ནི་མ་ཡིན་གྱི་འོན་ཀྱང་རྩོལ་བས་བསྒྲུབ་པར་བྱ་བ་ཡིན་ནོ་ཞེས་བྱ་བའི་དོན་ཏོ། །འདོད་ཆགས་ནི་བདག་ཏུ་ལྟ་བ་ཡིན་ཏེ།
[67b.4]བདག་ཏུ་ཞེན་པའི་རང་བཞིན་ཡིན་པའི་ཕྱིར་རོ། །དེ་ལ་ལྟོས་པ་ཡིན་ན་ནི་འདོད་ཆགས་ལ་སོགས་པ་བཞིན་དུ་རང་གི་ངང་གིས་འཇུག་པའི་ཕྱིར་རིགས་མཐུན་པ་གོམས་པ་ལ་མི་ལྟོས་པར་ཐལ་བར་འགྱུར་བའི་ཕྱིར་རོ། །ཅི་སྟེ་ཡང་འདོད་ཆགས་ལ་སོགས་པ་ཡང་སེམས་ཅན་དང་ཆོས་དང་
[67b.5]དམིགས་པ་མེད་པ་ཅན་དུ་ཅི་སྟེ་མི་འདོད། དེས་ན་དེ་དག་ཀྱང་སྙིང་རྗེ་ལ་སོགས་པ་ལྟར་འགྱུར་རོ། །འདི་ལྟར་འདོད་ཆགས་ཉིད་གོམས་པ་ལས་བདག་མེད་པར་འགྱུར་ལ། སྟོང་པ་ཉིད་གོམས་པས་ཀྱང་དེར་འགྱུར་བས་བདག་ཏུ་འཛིན་པ་དང་། གཟུང་བ་དང་འཛིན་པའི་རྣམ་པར་རྟོག་པ་མེད་
[67b.6]ཀྱང་འགྱུར་རོ་ཞེ་ན་མི་འགྱུར་ཞེས་བརྗོད་པ་ནི་འདོད་ཆགས་ལ་སོགས་པ་ནི་ཞེས་བྱ་བ་ཡིན་ནོ། །འདོད་ཆགས་ལ་སོགས་པ་ནི་སྙིང་རྗེ་ལ་སོགས་པ་ལྟར་ཆོས་ལ་དམིགས་པའམ་དམིགས་པ་མེད་པ་མ་ཡིན་ཏེ་བདག་ལ་སོགས་པར་འཛིན་པ་ཕྱིན་ཅི་ལོག་མེད་ན་མེད་པའི་ཕྱིར་རོ། །རྒྱུ་དང་འབྲས་བུའི་
[67b.7]རྒྱུན་གྱི་རང་བཞིན་ཚོར་བ་ལ་སོགས་པ་རྣམས་ལ་བདག་ཏུ་མཐོང་བ་མེད་པར་གང་གིས་དེ་བསྒྲུབ་པ་ཆགས་པར་འགྱུར་བའམ་དེ་དང་མི་མཐུན་པ་ལ་སྡང་བར་འགྱུར་བ་རང་གི་བདག་ཉིད་ལ་གནས་པའི་འབྲས་བུ་ཉེ་བར་སྤྱོད་པར་ཇི་ལྟར་འགྱུར། དེའི་འབྲས་བུ་སྤྱོད་པ་པོ་ཉིད་མེད་ན་ནི་ཡུལ་དེ་ལ་བཏང་
[68a]
[68a.1]སྙོམས་ཉིད་ཀུན་དུ་སྤྱོད་པར་རིགས་ཀྱི་འདོད་ཆགས་ལ་སོགས་པ་ནི་མ་ཡིན་ནོ། །གལ་ཏེ་འདོད་ཆགས་དང་བྲལ་བས་དོན་ཐམས་ཅད་ལ་མི་སྡུག་པའི་འདུ་ཤེས་ཅན་བཏང་སྙོམས་འབའ་ཞིག་གི་ཆོས་ཅན་ཡིན་པའི་ཕྱིར་སྙིང་རྗེ་ཅན་ཡང་རྩོམ་པ་མེད་པ་ཉིད་མ་ཡིན་ནམ།
[68a.2]རྩོམ་ན་ནི་མི་སྡུག་པ་ལ་སོགས་པ་ལས་བཟློག་པར་ཐལ་བའི་ཕྱིར་དང་། དེ་ཡང་དེ་ལ་མེད་པའི་ཕྱིར་དང་། ཇི་སྐད་དུ། བླང་དང་དོར་བ་བཅོམ་པའི་ཕྱིར། །ཞེས་བྱ་བ་ལ་སོགས་པ་འཆད་པར་འགྱུར་བ་ཡིན་ནོ་ཞེ་ན། གལ་ཏེ་སྙིང་རྗེ་ཅན་གྱི་ཞེས་བྱ་བས་དོགས་པ་དེ་བསུ་ནས་མ་ཡིན་ནོ་ཞེས་
[68a.3]བྱ་བ་ལ་སོགས་པས་ལན་འདེབས་སོ། །འདི་སྐད་བརྗོད་པ་ཡིན་ཏེ་འདོད་ཆགས་དང་བྲལ་བའི་ཕྱིར་བཅོམ་ལྡན་འདས་རང་གི་དོན་ལ་བཏང་སྙོམས་པ་ཡིན་གྱི། གཞན་གྱི་དོན་ལ་ནི་མ་ཡིན་ཏེ། ཐུགས་རྗེ་ཅན་ཡིན་པའི་ཕྱིར་རོ། །དེ་ལ་ནི་བླང་བར་བྱ་བ་འགའ་ཡང་མི་མངའོ། །རེ་ཞིག་
[68a.4]ཆོས་ནི་མ་ཡིན་ཏེ། བཏང་སྙོམས་དོན་དམ་པར་འགྱུར་བ་ཡིན་པའི་ཕྱིར་རོ། །སེམས་ཅན་མ་ཡིན་ཏེ་དེ་དག་ཀྱང་སྤང་བྱ་ཡིན་པའི་ཕྱིར་རོ། །འོན་ཀྱང་དེ་དག་ཀྱང་རང་གི་བདག་ཉིད་ཀྱི་མཐར་ཐུག་པའི་དངོས་པོ་མཐའ་དག་ལ་བཏང་སྙོམས་སྐྱེད་པའི་ཕྱིར་རྩོལ་བ་ཡིན་ནོ། །དེ་དག་ལ་
[68a.5]ཕན་པ་ཡང་དེ་ཉིད་ཡིན་ནོ། །དེ་ཉིད་ཀྱི་ཕྱིར་སྙིང་རྗེ་ཆགས་པའི་རང་བཞིན་མ་ཡིན་པའི་ཕྱིར་དང་། དེ་ཉིད་འབྲས་བུ་ཡིན་པའི་ཕྱིར་བཏང་སྙོམས་པ་འབྲས་བུ་ལ་མི་ལྟོས་པའི་ཕྱིར་འབྲས་བུ་མེད་པའི་རྩོམ་པ་འདོར་བ་ཡོད་པ་མ་ཡིན་པ་ཉིད་དོ། །གཞན་གྱི་དོན་འབྲས་བུ་མ་ཡིན་པ་ཡང་
[68a.6]མ་ཡིན་ཏེ་འབྲས་བུའི་མཚན་ཉིད་ནི་འདོད་པ་ཡིན་པའི་ཕྱིར་རོ། །གང་ལ་འདོད་པ་ཡོད་པ་དེ་ནི་འབྲས་བུ་ཡིན་ནོ་ཞེས་འབྲས་བུ་འདོད་པས་མཚོན་པ་ཡིན་ན་དེ་ལྟ་ན་ཡང་བརྗོད་པར་འདོད་པ་དང་། དགོས་པ་འདོད་པ་དང་། རྩོམ་པ་ཡང་རུང་སྟེ་རྣམ་པ་ཐམས་ཅད་ཀྱི་སྒོ་ནས་ཡང་དག་པ་མ་
[68a.7]ཡིན་པའི་སྒྲོ་འདོགས་པ་འགའ་ཡང་གྲུབ་པ་མེད་པའི་ཕྱིར་སྨྲ་བ་ནི་ཉེས་པ་མེད་པ་ཡིན་ནོ་ཞེས་བཤད་པ་ཡིན་ནོ། །རྣམ་པ་ཐམས་ཅད་དུ་ཞེས་བྱ་བ་ཡིན་ནོ། །ཉེས་པ་ནི་ཉོན་མོངས་པ་སྟེ། ཉེས་པར་བྱེད་པའི་རང་བཞིན་ཡིན་པའི་ཕྱིར་དེ་ལྟར་རྣམ་པ་འགས་ཀྱང་ཉེས་པ་དང་འབྲེལ་པ་མ་ཡིན་ནོ། །
[68b]
[68b.1]དེ་ལས་གཞན་པས་ཞེས་བྱ་བ་ནི་གལ་ཏེ་ཡང་དག་པ་མ་ཡིན་པར་སྒྲོ་འདོགས་པ་ལས་གཞན་བརྗོད་པར་འདོད་པ་ཉིད་ལ་སོགས་པ་ཉེས་པ་དང་ལྡན་པ་ཉིད་དུ་བརྗོད་ན་ནི་དེས་ན་མི་འདོད་པ་ཅུང་ཟད་མེད་དོ། །ཉེས་པར་བྱེད་པའི་རང་བཞིན་མ་ཡིན་པ་ཡང་སྲིད་པ་འཕེན་པའི་ནུས་པས་སྟོང་པས་ཉེས་
[68b.2]པ་དང་ལྡན་པ་ཉིད་དུ་བསྒྲུབས་ན་ནི་མི་འདོད་པ་ཅུང་ཟད་ཀྱང་མེད་དོ། །ཉེས་པ་མ་ཡིན་པ་ལ་ཡང་ཉེས་པའོ་ཞེས་མིང་དུ་འདོགས་པ་ཉེས་པ་ཅན་དུ་མི་འགྱུར་བའི་ཕྱིར་རོ་ཞེས་བྱ་བ་ནི་མཇུག་བསྡུ་བའོ། །དེའི་ཕྱིར་དེ་ལྟར་ཚད་མ་གཞན་གྱིས་བརྗོད་པར་འདོད་པ་ཉིད་ཁྱད་པར་གྱི་མཐར་ཐུག་པ་
[68b.3]ཡིན་པར་བསྒྲུབ་པ་གསལ་བ་ཡིན་ནོ། །ད་ནི་རྒྱུ་དང་འབྲས་བུས་དངོས་པོ་ལ་བརྟེན་ནས་བརྗོད་པར་འདོད་པ་ཙམ་རྒྱུ་ཡིན་པར་གྲུབ་པའི་ཕྱིར་ཚིག་ལས་འདོད་ཆགས་རྗེས་སུ་དཔོག་པ་མི་འཐད་པ་ཞེས་བྱ་བ་ཡིན་མོད། སྨྲ་བ་པོ་ལ་འདོད་ཆགས་མཐོང་བས་ཁྱབ་པའི་ཕྱིར་རྒྱུ་དང་འབྲས་
[68b.4]བུ་སྤངས་ཏེ་ཚིག་ལས་འདོད་ཆགས་རྗེས་སུ་དཔོག་གོ་ཞེས་གཞན་འདོད་པའི་དོགས་པ་བསུ་ནས་ལན་འདེབས་པ་ནི་སྨྲ་བ་པོ་བདག་ལ་ཞེས་བྱ་བ་ཡིན་ནོ། །གང་གི་ཕྱིར་སྨྲ་བ་པོ་བདག་ལ་འདོད་ཆགས་ལ་སོགས་པ་མཐོང་བ་དེའི་ཕྱིར་ཚིག་ཡོད་ན་འདོད་ཆགས་ལ་སོགས་པ་ཡོད་པས་
[68b.5]གཞན་ལ་ཚིག་མཐོང་བས་འདོད་ཆགས་ལ་སོགས་པ་རྗེས་སུ་དཔོག་ན་ནི་ཧ་ཅང་ཐལ་བར་འགྱུར་རོ། །སྔོ་བསངས་ཉིད་ལ་སོགས་པ་བདག་ཉིད་ལ་ཚིག་ཡོད་ན་མཐོང་ཞིང་སེམས་མེད་པ་དག་ལ་ཚིག་མེད་ན་མ་མཐོང་བའི་ཆོས་མཐའ་དག་སྨྲ་བ་པོ་མཐའ་དག་ལ་རྗེས་སུ་དཔོག་པར་
[68b.6]འགྱུར་རོ། །འཁྲུལ་པའི་ཕྱིར་ཞེས་བྱ་བ་ནི་གཞན་གྱི་ཚིག་ལས་གཞན་རྗེས་སུ་མི་དཔོགས་ཏེ་གང་གི་ཕྱིར་དེ་དེ་ལ་འཁྲུལ་པ་ཡིན་པའི་ཕྱིར་རོ། །འདི་ལ་ཞེས་བྱ་བ་ནི་ལན་འདེབས་པའོ། །རིགས་པ་མཚུངས་པ་ལས་གལ་ཏེ་དེར་འཁྲུལ་ན་འདི་ལ་དེ་མེད་དོ་ཞེས་བྱ་བའི་ངེས་པ་ཅི་ཞིག་ཡོད།
[68b.7]འོན་ཏེ་ཆོས་གཞན་རྗེས་སུ་དཔོག་པ་ལ་ནི་འཁྲུལ་པ་མཐོང་ལ་འདི་ལ་ནི་མ་མཐོང་ངོ་ཞེས་བརྗོད་ན། དེ་ཡང་མི་འཐད་དེ། མ་མཐོང་ཡང་ཐེ་ཚོམ་མི་ལྡོག་པས་ཐེ་ཚོམ་ཟ་བའི་མ་ངེས་པ་ཉིད་དུ་འགྱུར་གྱི་ཐུན་མོང་ཉིད་ནི་མ་ཡིན་ནོ། །ངེས་པ་མེད་པ་ཉིད་བསྟན་པར་བྱ་བའི་ཕྱིར་ཚིག་གིས་
[69a]
[69a.1]ནི་ཞེས་སྨོས་སོ། །ནི་ཞེས་བྱ་བ་ནི་གང་གི་ཕྱིར་ཏེ། ཚིག་གིས་བྱེད་པའི་ཡོན་ཏན་བྱ་བ་ལས་སུ་རུང་བ་དང་། བརྗོད་པར་འདོད་པ་ཉིད་དག་རྗེས་སུ་དཔོག་པར་བྱེད་དོ། །རྒྱུ་དང་འབྲས་བུའི་དངོས་པོའི་ཕྱིར་དེར་མི་འཁྲུལ་པ་ཡོད་པའི་ཕྱིར་རོ། །འདོད་ཆགས་
[69a.2]ལ་ནི་དེ་ལས་བཟློག་པའི་ཕྱིར་མི་འཁྲུལ་པར་ངེས་པ་མེད་དོ། །གལ་ཏེ་གང་ལ་བརྗོད་པར་འདོད་པ་ཉིད་སྤྱིར་རྗེས་སུ་དཔོག་པར་འགྱུར་བ་ཤེས་པར་འདོད་པ་རྗེས་སུ་དཔག་པར་བྱ་བ་ཡིན་ན་ཡང་འདིའི་རང་བཞིན་འདི་འདོད་ཆགས་ལ་སོགས་པའི་ཐུན་མོང་བ་རྗེས་སུ་དཔག་པར་བྱ་བ་མ་
[69a.3]ཡིན་ནམ། གལ་ཏེ་འདོད་ཆགས་མེད་ཀྱང་ཁྱད་པར་གཞན་དང་ལྡན་པའི་བརྗོད་པར་འདོད་པའི་ཚིག་གི་རྒྱུ་དམིགས་ན་དེའི་ཕྱིར་འདིར་འགྱུར་བ་ཡིན་ནོ། །དེས་ན་གལ་ཏེ་ཡང་འདོད་ཆགས་ལ་སོགས་པས་སྟོང་པའི་སེམས་ཀྱི་གནས་སྐབས་ཀྱིས་བསྐྱེད་པའི་ཚིག་ཡོད་པ་དེ་ལྟ་ན་
[69a.4]ཡང་དེ་ཙམ་གྱི་སེམས་འདོད་ཆགས་དང་བྲལ་བ་ནི་མ་ཡིན་ཏེ། འདོད་ཆགས་ལ་སོགས་པ་མ་སྐྱེས་ཀྱང་སྐྱེ་བོའི་སེམས་ཅན་ཐམས་ཅད་ཉོན་མོངས་པ་ཅན་དུ་ཁས་བླངས་པའི་ཕྱིར་རོ། །དེས་ན་དེ་ནི་ཉོན་མོངས་པ་སྐྱེད་པར་རུང་བ་ཉིད་ཀྱིས་ཉོན་མོངས་པ་ཅན་དུ་བརྗོད་དོ། །དེས་ན་ཇི་
[69a.5]ལྟར་བརྗོད་པར་འདོད་པ་ཙམ་རྒྱུ་ཡིན་ཏེ་ཉོན་མོངས་པ་ཅན་མ་ཡིན་པའི་སེམས་ཀྱི་གནས་སྐབས་མ་དམིགས་པའི་ཕྱིར་རོ་ཞེ་ན། འདོད་ཆགས་སྐྱེད་པར་རུང་བ་ཉིད་དང་བྲལ་བ་ལ་ཞེས་སྨོས་སོ། །ཚིག་ནི་མཐོང་ན་འདོད་ཆགས་སྐྱེད་པར་རུང་བ་ཉིད་དང་བྲལ་བ་ལ་ནི་མ་ཡིན་ཏེ། དེས་
[69a.6]ན་ཚིག་འདོད་ཆགས་སྐྱེད་པར་རུང་བ་ཉིད་ཀྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་བརྗོད་དོ། །དེས་ན་ཚིག་ལས་འདོད་ཆགས་རྗེས་སུ་དཔོག་ན་ཧ་ཅང་ཐལ་བར་འགྱུར་རོ། །འདི་སྐད་བརྗོད་པ་ཡིན་ཏེ། གལ་ཏེ་དོན་ཇི་སྙེད་ཉེ་བར་གནས་པ་ན་འབྲས་བུ་སྔར་མེད་པ་དམིགས་
[69a.7]པ་དེ་སྙེད་རྒྱུ་ཡིན་པར་བརྗོད་ན། སྔོ་བསངས་ལ་སོགས་པ་ཡང་རྒྱུ་ཡིན་པའི་ཕྱིར་ཉོན་མོངས་པ་བཞིན་དུ་སྔོ་བསངས་ལ་སོགས་པ་ཡང་སྨྲ་བ་པོ་ལ་རྗེས་སུ་དཔོག་ལ་རག་ན། འོན་ཀྱང་དུ་བ་ལ་ཡང་ཡུལ་དེ་ན་ཉེ་བར་གནས་པ་གཅིག་ལ་སོགས་པ་རྒྱུ་ཡིན་པར་འགྱུར་རོ། །འོན་
[69b]
[69b.1]ཏེ་དེ་ལས་གཅིག་མེད་ན་ཡང་མ་དམིགས་པ་ཞེས་བྱ་བའི་ཚུལ་འདིས་རྒྱུ་དེ་ཙམ་ཉིད་ཡིན་པར་ངེས་པར་བྱ་བའི་ཕྱིར་ཡང་ལྡོག་པ་ཚོལ་བ་ཡིན་ནོ་ཞེ་ན། རུང་བ་ཉིད་དང་ལྡོག་པ་མ་གྲུབ་སྟེ་རྡོ་བ་ལ་སོགས་པ་དག་ལ་རུང་བ་བཞིན་དུ་སེམས་ཀྱང་མེད་པའི་ཕྱིར་རོ། །གལ་ཏེ་སེམས་ཡོད་ཀྱང་རུང་
[69b.2]བ་མེད་ན་ཚིག་མེད་པར་གྲུབ་ན་དེའི་ཕྱིར་དེར་འགྱུར་བ་ཡིན་ཏེ། དཔེར་ན་བུད་ཤིང་མེད་ན་ཤིང་ཡོད་ཀྱང་དུ་བ་མེད་པའི་ཕྱིར་བུད་ཤིང་དང་བཅས་པའི་མེ་རྒྱུ་ཡིན་པར་རྟོགས་པ་བཞིན་ནོ། །དེས་ན་གལ་ཏེ་ལྡོག་པ་ཚོལ་ན་འདི་རྗེས་སུ་དཔག་པ་མ་ཡིན་ནོ། །འོན་ཏེ་སྔ་མ་བཞིན་དུ་ཡོད་པ་
[69b.3]ཙམ་ལ་རྟོགས་ན་ནི་དེས་ན་ཧ་ཅང་ཐལ་བར་འགྱུར་རོ། །དེས་ན་འདིར་ནི་ཧ་ཅང་ཐལ་བར་འགྱུར་བར་བརྗོད་ལ། རྣམ་པར་ངེས་པ་ནི་རྒྱུ་ཉིད་མ་གྲུབ་པར་འགྱུར་རོ་ཞེས་བྱ་བ་ནི་ཁྱད་པར་རོ། །དེར་རུང་བ་དང་བྲལ་བའི་སེམས་ཀྱི་གནས་སྐབས་མ་དམིགས་པར་བརྗོད་པར་འདོད་པ་ཙམ་རྒྱུ་ཡིན་
[69b.4]པར་ཡང་ཇི་ལྟར་རྟོགས་ཤེ་ན། འདོད་ཆགས་ཀྱིས་ཞེས་སྨོས་སོ། །རུང་བ་ཉིད་རྒྱུ་ཡིན་ནོ་ཞེས་སྨྲ་བ་ནི་ཚིག་ཉོན་མོངས་པ་ཅན་གྱི་སེམས་ཀྱི་རྒྱུན་ཅན་ཡིན་ནོ་ཞེས་བྱ་བ་བརྗོད་པར་བྱ་བ་ཡིན་ཏེ། ཉོན་མོངས་པ་ཅན་གྱི་སེམས་མ་གཏོགས་པར་རུང་བ་ཉིད་ཅེས་བྱ་བ་གཞན་ནི་འགའ་ཡང་
[69b.5]མེད་དོ། །སེམས་ནི་ཉོན་མོངས་པ་རྣམ་པ་གཉིས་ཀྱིས་ཉོན་མོངས་པ་ཡིན་ཏེ། བག་ལ་ཉལ་དང་ཀུན་ནས་ལྡང་བས་སོ། །དེ་ལ་མ་སད་པའི་ཉོན་མོངས་པ་ནི་བག་ལ་ཉལ་ཡིན་ལ་སད་པའི་ནི་ཀུན་ནས་ལྡང་བ་ཡིན་ནོ་ཞེས་བྱ་བར་ཁས་བླངས་པའི་ཕྱིར་རུང་བ་ཉིད་ནི་བག་ལ་ཉལ་གྱི་
[69b.6]དངོས་པོ་ལ་བརྗོད་དོ། །དེ་སྐྱེས་ན་ནི་དེ་ཀུན་ནས་ལྡང་བ་ཡིན་ནོ། །དེས་ན་གལ་ཏེ་འདིར་འདོད་ཆགས་ཉིད་ཀྱིས་ཕན་འདོགས་པར་གྲུབ་ན་དེའི་ཚེ་རྣམ་པ་གཉིས་ཀྱིས་ཉེ་བར་སྦྱོར་བ་ཡིན་པར་འགྱུར་བ་ན། དེས་ན་ཕན་འདོགས་པ་ཉིད་ནི་བཀག་པ་ཡིན་ཏེ། གཉེན་པོ་བསྒོམས་པས་
[69b.7]སེམས་ཀྱི་རྒྱུན་ཉོན་མོངས་པ་མེད་པར་བྱས་ཀྱང་སྙིང་རྗེས་ཀྱང་འཇུག་པའི་ཕྱིར་རོ། །བྱེད་པ་ངེས་པར་སྦྱོར་བ་ན་འདོད་པ་ལ་བརྟེན་པ་ཡིན་ནོ། །དེས་ན་འདོད་ཆགས་མེད་ཀྱང་སྙིང་རྗེ་ཅན་གྱི་འདོད་པ་ལ་ནི་འགལ་བ་མེད་དོ། །དེས་ན་ཉོན་མོངས་པས་ཕན་མི་འདོགས་ན་ཉོན་མོངས་པའི་
[70a]
[70a.1]ནུས་པས་ཕན་འདོགས་པ་མ་ཡིན་ནོ། །གལ་ཏེ་ནུས་པ་ལས་ཉོན་མོངས་པ་གཞན་ཉིད་མ་ཡིན་ནམ། དེ་ཇི་ལྟར་ཉོན་མོངས་པ་ནུས་པའི་ཕྱིར་ནུས་པ་ནུས་པར་བརྗོད་ཅེ་ན། ནུས་པས་ཕན་འདོགས་ན་ནི་ཞེས་སྨོས་སོ། །གལ་ཏེ་ནུས་པ་ཉེ་བར་སྦྱོར་བ་ཡིན་ན་
[70a.2]ནི་འདོད་ཆགས་ཉིད་ཀྱིས་ཉེ་བར་སྦྱོར་བར་འགྱུར་བ་ཞིག་ན། འདོད་ཆགས་ནི་ཉེ་བར་སྦྱོར་བ་མ་ཡིན་པ་དེས་ན་ནུས་པས་ཕན་འདོགས་པ་ཉིད་མ་ཡིན་ནོ། །གལ་ཏེ་ནུས་པ་རང་གི་ངོ་བོས་ཕན་འདོགས་པར་འགྱུར་བ་མ་ཡིན་ནམ་ཞེ་ན་མ་ཡིན་ཏེ་སྙིང་རྗེས་ཀྱང་འཇུག་པར་བརྗོད་པའི་
[70a.3]ཕྱིར་རོ། །འོ་ན་ཅིའི་ཕྱིར་འདི་ཉེ་བར་བཀོད་ཅེ་ན་འདོད་ཆགས་ཀྱིས་ཕན་འདོགས་པ་ཡོད་པའི་རྒྱུ་ཁྱད་པར་མེད་པར་བསྟན་པའི་ཕྱིར་རོ། །དེ་ལྟ་ན་ཡང་འདོད་ཆགས་མེད་ཀྱང་འདོད་ཆགས་དང་ལྡན་པའི་ཐ་སྙད་དུ་གྲུབ་པ་དེས་ན། གནས་སྐབས་དེ་ཉིད་བག་ལ་ཉལ་ཡིན་གྱི།
[70a.4]མ་སད་པའི་དོན་གཞན་ནི་འགའ་ཡང་མེད་དོ་ཞེས་བསྒྲུབས་པ་ཡིན་ནོ། །དེ་ལྟ་བས་ན་ཞེས་བྱ་བ་ནི་མཇུག་སྡུད་པའོ། །གལ་ཏེ་ཡང་འབྲས་བུ་མེད་ན་མི་འབྱུང་བ་མ་ཡིན་པ་མི་སྲིད་པ་དེ་ལྟ་ན་ཡང་འབྲས་བུའི་སྤྱི་རྒྱུའི་ཁྱད་པར་དག་དང་མེད་ན་མི་འབྱུང་བ་མ་ཡིན་པའི་ཕྱིར་རོ། །
[70a.5]ཁྱད་པར་དེ་དག་རྒྱུ་ཡིན་ནོ་ཞེས་དེ་ལ་ལྟོས་ནས་འབྲས་བུ་ཉིད་དུ་བརྗོད་པ་ཡིན་ན་ཁྱད་པར་མེད་ན་མི་འབྱུང་བ་ནི་མ་ཡིན་ཏེ། དེ་མེད་ཀྱང་ཡོད་པའི་ཕྱིར་རོ། །དེས་ན་མེད་ན་མི་འབྱུང་བ་ཁོ་ནས་རྒྱུ་རྗེས་སུ་དཔོག་པར་བྱེད་ཀྱི། མེད་ན་མི་འབྱུང་བ་མ་ཡིན་པས་ནི་མ་ཡིན་ཏེ་ཚིག་གི་འདོད་
[70a.6]ཆགས་བཞིན་ནོ། །ཅིའི་ཕྱིར་ཞེ་ན། དེ་ལ་རག་ལས་པ་ཡིན་པའི་ཕྱིར་རོ་ཞེས་སྨོས་སོ། །འདི་གང་མེད་ན་མི་འབྱུང་བ་དེ་ཉིད་ལ་འབྲེལ་པ་ཡིན་ཏེ། འབྲས་བུའི་སྤྱི་རྒྱུའི་སྤྱི་ཉིད་ལ་བཞིན་ནོ། །ཁྱད་པར་ལ་ནི་མ་ཡིན་ཏེ། དེ་མེད་ཀྱང་ཡོད་པའི་ཕྱིར་རོ། །དེ་བཤད་པ་ནི་གཞན་
[70a.7]ནི་མ་ཡིན་ཏེ་ཞེས་བྱ་བའོ། །ཁྱད་པར་དང་མེད་ན་མི་འབྱུང་བ་མ་ཡིན་པའི་ཕྱིར་རོ། །གལ་ཏེ་ཕྱོགས་ཀྱི་ཆོས་དང་རྗེས་སུ་འགྲོ་བ་དང་ལྡོག་པ་དག་གིས་གཏན་ཚིགས་ཚུལ་གསུམ་པར་བརྗོད་པ་མ་ཡིན་ནམ་ཚུལ་གསུམ་པོ་དེ་ཡང་ཚད་མས་གྲུབ་པར་འགྱུར་བ་ཡིན་ཏེ། གཞལ་
[70b]
[70b.1]བྱ་གྲུབ་པ་ནི་ཚད་མ་ལ་རག་ལས་པའི་ཕྱིར་རོ། །གཏན་ཚིགས་ཀྱི་ཚུལ་རྣམས་ལ་ནི་མཐར་ཡང་མངོན་སུམ་གདོན་མི་ཟ་བར་ཚད་མར་འགྱུར་བ་ཡིན་ཏེ། གཞན་དུ་ན་ཐུག་པ་མེད་པར་ཐལ་བའི་ཕྱིར་རོ། །དེས་ན་ཚིག་གི་མཚན་ཉིད་ཀྱི་གཏན་ཚིགས་ཀྱི་ཁྱབ་པ་མངོན་སུམ་ཉིད་ཀྱིས་
[70b.2]རྟོགས་པས་ན་ཇི་ལྟར་གཏན་ཚིགས་མ་ཡིན་པ་ཉིད་ཡིན། དེ་ལྟར་ཡང་བདག་རང་ཉིད་ལ་ཚིག་དོན་ཡོད་ན་འདོད་ཆགས་དམིགས་ལ་སེམས་མེད་པ་དག་ལ་འདོད་ཆགས་མེད་ན་ཚིག་མེད་པ་ཡིན་ནོ། །ཇི་སྟེ་དེ་ལྟ་ན་ཧ་ཅང་ཐལ་བར་བརྗོད་ན་དེ་ནི་དུ་བ་ལས་མེ་རྗེས་སུ་དཔོག་པ་ལ་
[70b.3]ཡང་ཧ་ཅང་ཐལ་བར་ཇི་ལྟར་མི་འགྱུར་ཚང་བང་གི་ཆོས་རྣམས་རི་ལ་ཡང་འགྱུར་བའི་ཕྱིར་རོ། །དེས་ན་རྗེས་སུ་དཔག་པ་ཚད་མ་མ་ཡིན་པའམ། ཡང་ན་སྨྲ་བ་པོ་འདོད་ཆགས་ཅན་དུ་ཐལ་བ་ཡང་སྤང་དཀའོ་ཞེས་བྱ་བའི་དོགས་པ་བསུ་ནས་ཁྱབ་པ་མངོན་སུམ་གྱིས་གྲུབ་ཀྱང་གཏན་
[70b.4]ཚིགས་ཉིད་མ་ཡིན་པར་བརྗོད་པ་ནི། མི་མཐུན་པའི་ཕྱོགས་ལ་མ་མཐོང་ཡང་མ་ཡིན་ནོ་ཞེས་བྱ་བའོ། །གལ་ཏེ་ཡང་འདི་མི་མཐུན་པའི་ཕྱོགས་ལ་འཇུག་པ་མ་མཐོང་བ་ཡིན་པ་དེ་ལྟ་ན་ཡང་ཚིག་ནི་བརྗོད་པར་འདོད་པ་ཙམ་གྱི་རྒྱུ་ཅན་ཡིན་པའི་ཕྱིར་དེ་ཡལ་བར་དོར་ནས་མ་མཐོང་བས་
[70b.5]གྲུབ་པའི་ལྡོག་པ་ལ་བརྟེན་ཏེ་བརྗོད་པར་འདོད་པའི་ཁྱད་པར་རྗེས་སུ་དཔོག་པར་བྱེད་པར་མི་ནུས་སོ། །ཇི་ལྟར་མི་ནུས་གང་གི་ཕྱིར་གཏན་ཚིགས་མི་མཐུན་པའི་ཕྱོགས་ལ་མེད་པ་ནི་ལྡོག་པ་ཡིན་ལ། དེ་ཡང་མ་མཐོང་བའི་མཚན་ཉིད་ཀྱི་ཚད་མས་གྲུབ་པ་ཡིན་ནོ་ཞེ་ན་ཐམས་ཅད་གཟིགས་པའི་
[70b.6]ཞེས་སྨོས་སོ། །འདི་སྐད་བརྗོད་པ་ཡིན་ཏེ་གལ་ཏེ་མ་མཐོང་བས་མི་མཐུན་པའི་ཕྱོགས་ལ་མེད་པ་རྟོགས་པར་བྱེད་ན་སུ་ཞིག་དེ་ལ་མ་མཐོང་ཡང་གཏན་ཚིགས་ཉིད་ཡིན་པ་སྤོང་། དེ་ལྟར་ནི་མ་ཡིན་ཏེ། གང་གི་ཕྱིར་གང་འགའ་ཞིག་ལ་བསྒྲུབ་པར་བྱ་བ་མེད་པ་དེ་མཐའ་དག་མི་མཐུན་པའི་
[70b.7]ཕྱོགས་ཡིན་པ་ལ་དེ་མེད་པའི་ཆོས་ཅན་ངེས་པ་འགའ་ཞིག་ནི་ཡིན་པར་མི་འཐད་དོ། །དེ་ལ་ཡང་ཐམས་ཅད་ཉིད་ལ་མེད་པར་རྟོགས་པར་བྱ་བ་ཡིན་གྱི་འགའ་ཞིག་ཁོ་ན་ལ་ནི་མ་ཡིན་ནོ། །གལ་ཏེ་བསྒྲུབ་པར་བྱ་བ་མེད་པ་དང་ལྡན་པ་མཐའ་དག་པ་ཉིད་མི་མཐུན་པའི་ཕྱོགས་ཡིན་པར་མ་
[71a]
[71a.1]གྱུར་རམ། དེ་ལ་གཏན་ཚིགས་མེད་པར་ངེས་པར་བྱ་བ་མ་ཡིན་ན། དེའི་ཚེ་ལ་ལར་མེད་པ་གྲུབ་ཀྱང་ཐམས་ཅད་ལ་དེ་མེད་པར་ཐེ་ཚོམ་ཟ་བས་ན་ཡུལ་ལ་སོགས་པས་ཆོད་པའི་ཆོས་ཅན་སྔར་མ་མྱོང་བ་བཞིན་དུ་བསྒྲུབ་བྱ་ཡོད་པ་དང་མེད་པར་མ་མཐོང་བ་ཉམས་སུ་
[71a.2]མྱོང་བའི་ཆོས་ཅན་དག་ལ་ཡང་དེ་མེད་ན་གཏན་ཚིགས་མེད་པར་ཐེ་ཚོམ་ཟ་བར་འགྱུར་བ་ཁོ་ནའོ། །དེས་ན་མེ་ཡོད་པ་དང་མེད་པར་ཐེ་ཚོམ་ཟ་བ་བསྒྲུབ་པར་བྱ་བའི་ཆོས་ཅན་ཉིད་ལ་དུ་བ་དམིགས་པ་ན་འདིར་མེ་མེད་ཀྱང་ཡོད་དམ་ཡོད་པ་ན་ཡོད་པ་ཡིན་ཞེས་ཐེ་ཚོམ་མི་ཟ་ཞེས་སུ་སྨྲ་མཐུན་
[71a.3]པའི་ཕྱོགས་དང་མི་མཐུན་པའི་ཕྱོགས་དག་ལ་མཐོང་བ་དང་མ་མཐོང་བས་ནི་བསྒྲུབ་པར་བྱ་བའི་ཆོས་ཅན་ལ་ཐེ་ཚོམ་ཟ་བའི་བསྒྲུབ་བྱ་ངེས་པར་བྱེད་དོ་ཞེ་ན། ཇི་ལྟར་བྱེད་གང་གི་ཕྱིར་དེ་ལྟར་བསྒྲུབ་བྱ་མེད་ན་མེད་པ་ཉིད་ཀྱིས་བསྒྲུབ་བྱའི་ཆོས་ཅན་ལ་ཡང་མེད་པར་འགྱུར་རོ་ཞེས་ངེས་པར་མི་
[71a.4]ནུས་སོ། །ཆོས་ཅན་གཞན་ལ་འདི་བསྒྲུབ་བྱ་མེད་ན་མེད་པར་འཛིན་པའི་ཚད་མ་གང་ཡིན་པ་དེ་ཉིད་ཀྱིས་དེ་གཞན་དུ་ཡང་དེ་ལྟ་ཡིན་པར་འཛིན་པ་ནི་མ་ཡིན་ཏེ། ཚད་མ་རྣམས་ནི་ཡུལ་ངེས་པ་ཅན་ཡིན་པའི་ཕྱིར་རོ། །གང་ལ་དེ་དག་ཞུགས་པ་དེ་ཉིད་དུ་དེ་ལྟར་ངེས་པར་བྱེད་པ་ཡིན་ནོ། །ཞུགས་
[71a.5]པ་དེས་གཞན་དུ་དེ་ལྟར་རྣམ་པར་འཇོག་པར་བྱེད་པར་མི་འཐད་དོ། །དུ་བ་འམ་ཆོས་ཅན་གཅིག་ཏུ་ཇི་ལྟ་བ་དེ་བཞིན་དུ་གཞན་དུ་ཡང་ཡིན་ནོ་ཞེས་ནི་ངེས་པར་ནུས་པ་མ་ཡིན་ནོ། །དེ་ལ་གནས་པ་དེ་ལྟ་བུའི་རང་བཞིན་གྱི་ཁྱད་པར་འགའ་ཞིན་མ་གྲུབ་པའི་ཕྱིར་རོ། །དེའི་ཕྱིར་ཐམས་ཅད་དུ་བསྒྲུབ་
[71a.6]པར་བྱ་བ་མེད་ན་མེད་དོ་ཞེས་ངེས་ན་དུ་བ་མི་དམིགས་པ་ལས་མེ་ངེས་པར་ནུས་པ་ཡིན་ནོ། །དེའི་ཕྱིར་གང་ལ་ལར་བསྒྲུབ་པར་བྱ་བ་མེད་པ་དེ་མཐའ་དག་མི་མཐུན་པའི་ཕྱོགས་ཡིན་ལ་དེ་ལ་མེད་པར་ངེས་པར་བྱ་བ་ཡང་ཡིན་ནོ། །ཐམས་ཅད་གཟིགས་པ་མ་ཡིན་པའི་མཐོང་བ་ལོག་པས་ནི་མི་མཐུན་པའི་
[71a.7]ཕྱོགས་ཐམས་ཅད་ལ་མེད་པ་གོ་བར་བྱེད་པ་མ་ཡིན་གྱི་འོན་ཀྱང་ཐམས་ཅད་གཟིགས་པ་ཉིད་ཀྱིའོ། །ཚུ་རོལ་མཐོང་བས་ནི་ཡུལ་དང་དུས་ཀྱིས་ཆོད་པའི་ཆོས་ཅན་བསྒྲུབ་བྱས་སྟོང་པ་རྟོགས་པའི་སྤྱོད་ཡུལ་དུ་བྱེད་པར་ནུས་པ་མ་ཡིན་ནོ། །དེས་ན་ཇི་ལྟར་དེ་དག་ལ་གཏན་ཚིགས་མེད་པར་ངེས་
[71b]
[71b.1]པར་བྱེད། ཇི་ལྟར་གཅིག་ལ་ཡོད་པ་དེ་བཞིན་དུ་འདི་ཐམས་ཅད་དུ་ཡོད་པར་ནི་མི་འགྱུར་རོ་ཞེས་བསྟན་པའི་ཕྱིར། ལ་ལ་ན་ཞེས་སྨོས་སོ། །དེ་ལྟར་རང་བཞིན་འགའ་ཞིག་གིས་མཐོང་བ་རྣམས་ཀྱང་ཡུལ་ལ་སོགས་པའི་ཁྱད་པར་ལས་གཞན་དུ་སྣང་བའི་ཕྱིར་ཏེ། དཔེར་ན་འབྲས་བུ་
[71b.2]སྐྱུར་པོ་ཅན་སྐྱུ་རུ་རའི་ཤིང་དག་ཀྱང་འདུ་བྱེད་པའི་ཁྱད་པར་ལས་འབྲས་བུ་མངར་པོ་ཆགས་པར་འགྱུར་ལ། ལན་མང་དུ་དེ་ལྟར་མ་མཐོང་ཡང་ཡིན་པ་བཞིན་ནོ། །གལ་ཏེ་འགའ་ཞིག་ཏུ་དེ་ལྟར་མཐོང་བ་ནི་རྣམ་པ་དེར་ངེས་པ་མ་ཡིན་ནམ་དུ་བ་དུ་བའི་རྣམ་པར་ངེས་པ་བཞིན་ནོ་ཞེ་ན། རང་
[71b.3]བཞིན་ངེས་པ་མེད་པར་ནི་སུ་ཡང་མི་སྨྲའོ། །བསྒྲུབ་བྱ་མེད་ན་དུ་བ་མེད་པ་ནི་དུ་བ་ཉིད་བཞིན་དུ་རང་བཞིན་མ་ཡིན་ནོ། །དུ་བའི་རང་བཞིན་དེ་མེད་ན་མེད་པའི་ཆོས་ཉིད་མཐོང་བས་ངེས་པར་བྱས་པ་ཡིན་ནོ་ཞེ་ན། དེ་མེད་ན་མེད་པ་ཙམ་ལས་ནི་མེད་པའི་ཆོས་རང་བཞིན་ཡིན་པར་ནི་མི་འགྱུར་ཏེ། བུམ་
[71b.4]པ་ལ་སོགས་པ་མེད་པ་འགའ་ཞིག་ཏུ་ཡང་ལན་དུ་མར་ཡང་མེད་པའི་ཕྱིར་རོ། །དེ་ཉིད་ཀྱི་ཕྱིར་འབྲེལ་པ་ཁས་བླང་བར་བྱ་བ་ཡིན་ནོ་ཞེས་སྟོན་པར་འགྱུར་རོ། །དེ་བས་ན་འབྲེལ་པ་བཞག་ནས་མ་མཐོང་བས་གྲུབ་པའི་ཁྱབ་པ་ལ་ཚིག་གིས་འདོད་ཆགས་དཔོག་པར་བྱེད་ནུས་པ་ནི་མ་ཡིན་ནོ། །
[71b.5]དེས་ན་ཞེས་བྱ་བ་ནི་གཏན་ཚིགས་དེས་ནའོ། །འདི་སྐད་དུ་བདག་ལྟ་བུའི་སྨྲ་བ་པོ་ནི་འདོད་ཆགས་ཅན་ཡིན་ནོ་ཞེས་བརྗོད་པར་རིགས་པར་འགྱུར་ཏེ། བདག་ལྟ་བུ་ཡིན་པའི་ཕྱིར་ཆོས་ཅན་སྨྲ་བ་པོ་ལ་འདོད་ཆགས་བསྒྲུབ་པར་བྱ་བ་དེས་ན་དེ་ལྟར་འཐད་པ་ཡིན་ནོ། །ཇི་སྐད་བཤད་པའི་རྣམ་
[71b.6]པ་ཅན་གྱི་འདོད་ཆགས་ལ་བདག་ལྟ་བུ་ཉིད་འབྲེལ་པའི་ཕྱིར་རོ། །འབྲེལ་པ་ཉིད་སྟོན་པ་ནི་འདོད་ཆགས་སྐྱེ་བའི་རྐྱེན་གྱི་ཁྱད་པར་ཞེས་བྱ་བའོ། །བདག་ཏུ་ལྟ་བའི་མཚན་ཉིད་ཚུལ་བཞིན་མ་ཡིན་པ་ཡིད་ལ་བྱེད་པ་ལོག་པའི་ཤེས་པ་ཡིན་ལ། དེ་ཡང་འདོད་ཆགས་སྐྱེ་བའི་རྐྱེན་ཁྱད་པར་
[71b.7]ཅན་ཡིན་ནོ། །རྐྱེན་གཞན་ཡོད་ཀྱང་འདི་རྒྱུ་ཁྱད་པར་ཅན་ཡིན་ཏེ་གཞན་རྣམས་འདིའི་རྗེས་སུ་འགྲོ་བའི་ཕྱིར་རོ། །དེ་དང་ལྡན་པའི་ཕྱིར་ཏེ། གཏན་ཚིགས་དེའི་ཕྱིར་ན་བདག་དང་འདྲ་བ་ཉིད་ཀྱིས་ཚུལ་བཞིན་མ་ཡིན་པ་དང་ལྡན་པ་ནི། འདོད་ཆགས་ཅན་ཡིན་ནོ། །བདག་ལྟ་བུ་ཉིད་ནི་ཚུལ་བཞིན་མ་
[72a]
[72a.1]ཡིན་པ་ཡིད་ལ་བྱེད་པའི་བདག་ཉིད་ཅན་ཡིན་པ་དེས་ན་འདོད་ཆགས་དང་ལྷན་ཅིག་དེའི་བདག་ཉིད་དུ་བསྒྲུབ་པོ། །དེའི་ཚེ་ཡང་སྨྲ་བ་དཔེར་བརྗོད་པ་ནི་དོན་མེད་དེ། སྨྲ་བ་པོ་སྨོས་པ་ནི་དོན་དང་མི་ལྡན་ནོ་ཞེས་བྱ་བའི་ཐ་ཚིག་སྟེ། བདག་ལྟ་བུ་གང་ཡིན་པ་དེ་འདོད་ཆགས་
[72a.2]ཅན་ཡིན་ནོ་ཞེས་བྱ་བ་ཉིད་ཀྱིས་བསྒྲུབ་པའི་ཕྱིར་རོ། །དེས་ན་དེ་ལྟར་ལུས་དང་ཚིག་དག་གཏན་ཚིགས་རྣམ་པ་གསུམ་ལས་གཞན་ཡིན་པ་ན་འབྲེལ་པ་དང་མི་ལྡན་པའི་ཕྱིར་གཏན་ཚིགས་ལྟར་སྣང་བ་ཉིད་དུ་བསྒྲུབས་ནས། དེའི་ཕྱིར་ཞེས་མཇུག་སྡུད་པར་བྱེད་དོ། །མི་མཐུན་པའི་ཕྱོགས་ལ་མ་
[72a.3]མཐོང་བ་གང་ཡིན་པ་དེ་གཏན་ཚིགས་མ་ཡིན་པ་དེ་བས་ན་གཏན་ཚིགས་རྣམ་པ་གསུམ་ཁོ་ནའོ་ཞེས་གཞུང་བཙུགས་པ་ཡིན་ནོ། །ཡང་ཅིའི་ཕྱིར་མངོན་སུམ་གྱིས་གྲུབ་པའི་ཁྱབ་པ་ཉིད་གཞན་ནས་འབྲེལ་པ་ལ་བརྟེན་པ་ཉིད་གཏན་ཚིགས་ཡིན་པ་ན། གཏན་ཚིགས་རྣམ་པ་གསུམ་ཁོ་ནར་བསྟན་གྱི་རྣམ་པ་
[72a.4]འདི་ལྟ་བུ་དག་ཀྱང་གཏན་ཚིགས་མིན་པར་མི་འགྱུར་ཞེས་བྱ་བར་དོགས་པ་བསུ་ནས་སུན་དབྱུང་ཞིང་འབྲེལ་པ་བསྒྲུབ་པའི་ཕྱིར། མི་མཐུན་པའི་ཕྱོགས་ལ་ཞེས་སྨོས་སོ། །མི་མཐུན་པའི་ཕྱོགས་ལ་མ་མཐོང་བ་ཙམ་གྱིས་མཐུན་པའི་ཕྱོགས་ལ་མཐོང་བ་ལ་ནི་འཁྲུལ་པ་མེད་པ་རྗེས་སུ་འགྲོ་བ་དང་ལྡོག་
[72a.5]པ་དང་ལྡན་པ་ཉིད་མ་ཡིན་ནོ། །གཏན་ཚིགས་མཐོང་ལ་མི་མཐུན་པའི་ཕྱོགས་ལ་མ་མཐོང་བའི་ཕྱིར་མཐུན་པའི་ཕྱོགས་ལ་མཐོང་བར་ཡང་བརྗོད་དོ། །དེ་ཉིད་ཀྱི་ཕྱིར་མང་པོ་ཞིག་ཚོགས་པར་མཐོང་དུ་ཟིན་ཀྱང་ཞེས་འཆད་པར་འགྱུར་རོ། །ཇི་ལྟར་ཚད་མས་དེ་ལྟར་རྟོགས་ཀྱང་མི་འཐད་ཅེ་ན།
[72a.6]བཤད་པ། གལ་ཏེ་ཡང་འདིར་མི་མཐུན་པའི་ཕྱོགས་ལ་མཐོང་བ་མེད་པ་དེ་ལྟ་ན་ཡང་འཁྲུལ་པ་སྲིད་པ་ཅན་ཉིད་དོ། །མི་མཐུན་པའི་ཕྱོགས་ལ་མཐོང་ན་ནི་གྲུབ་པ་ཁོ་ནར་འགྱུར་རོ། །མ་མཐོང་ན་ནི་གྲུབ་པ་མ་ཡིན་ལ་བསལ་བ་ཡང་མ་ཡིན་པའི་ཕྱིར་འཁྲུལ་པ་སྲིད་པ་ཡིན་ནོ། །གལ་ཏེ་ཡང་རྟག་པ་
[72a.7]ལ་འགར་ཡང་བྱས་པ་ཉིད་མ་མཐོང་བ་དེ་ལྟ་ན་ཡང་རྣམ་པ་དེ་ལྟ་བུའི་བྱས་པ་འགའ་ཞིག་རྟག་པར་ཡང་འགྱུར་བ་གང་ཡིན་པ་དེ་ནི་ཡོད་སྲིད་དོ་ཞེས་བྱ་བར་འགྱུར་རོ། །མི་མཐུན་ཕྱོགས་ལ་འཇུག་པ་མ་མཐོང་ཡང་འཁྲུལ་པ་མཐོང་བ་ཡང་ཡོད་པ་ཡིན་ནོ་ཞེས་བཤད་པ་ནི་ཕྲུ་བའི་འབྲས་ནི་ཚོས་པ་
[72b]
[72b.1]བཞིན་ཞེས་བྱའོ། །ཇི་ལྟར་ཕྲུ་བའི་ནང་དུ་ཆུད་པའི་གཏན་ཚིགས་ཀྱིས་འབྲས་ཚོས་པར་སྒྲུབ་པ་དེ་བཞིན་དུ་འདི་ལ་ཡང་འགྱུར་རོ། །ཕྲུ་བའི་ནང་དུ་ཆུད་པ་ཉིད་ནི་མ་ཚོས་པ་ལ་མཐོང་བ་མེད་དེ། ཕྱི་རོལ་ན་གནས་པའི་མ་ཚོས་པ་རྣམས་ཕྲུ་བར་ཚུད་པ་མེད་པའི་ཕྱིར་དང་། ཕྲུ་བ་ན་གནས་པ་
[72b.2]འགའ་ཞིག་ཀྱང་ཚོས་པར་མཐོང་བའི་ཕྱིར་རོ། །དེ་ལྟ་མོད་ཀྱི་དེའི་ནང་དུ་ཆུད་པ་མཐའ་དག་བསལ་ན། དེ་ལ་འགའ་ཞིག་མ་ཚོས་པར་ཡང་དེ་ཉིད་ཀྱི་ཚེ་མཐོང་བ་ཡིན་ནོ། །དེ་ཉིད་ཀྱི་ཕྱིར་དེ་མཐོང་བ་ཙམ་གྱིས་ཚོས་པ་པོ་མི་ལྡོག་གོ། །དེའི་དོན་ནི་འདི་ཡིན་ཏེ། རང་གི་ཡུལ་ཙམ་གྱི་མཐར་
[72b.3]ཐུག་པའི་ཚད་མས་མཐོང་བ་ལས་ཐ་དད་པ་གཞན་དུ་འབྱུང་བ་མི་སྤོང་བའི་ཕྱིར་མ་མཐོང་དུ་ཟིན་ཀྱང་ཐེ་ཚོམ་དུ་འགྱུར་བར་རིགས་པ་འབའ་ཞིག་ཏུ་ནི་མ་ཟད་དེ་རྣམ་པ་འདི་ལྟ་བུ་ལ་ནི་འཁྲུལ་པ་དམིགས་པ་ཡང་ཡོད་པ་ཉིད་དོ་ཞེས་བྱ་བ་ཡིན་ནོ། །མང་པོ་ཞིག་ཅེས་བྱ་བ་ལ་སོགས་པ་ནི་རྣམ་པར་འགྲེལ་
[72b.4]པའོ། །འདིས་ནི་མཐུན་པའི་ཕྱོགས་ལ་ཡོད་པར་དམིགས་པ་ཉིད་བརྗོད་དོ། །མདོར་སྨོས་ཀྱང་མི་མཐུན་པའི་ཕྱོགས་ལ་མ་མཐོང་བ་ནི་མ་བཤད་དེ། འདིས་དེ་འཕངས་པར་བསྟན་པའི་དོན་དུའོ། །འཕེན་པར་བྱེད་པ་དང་འཕང་བར་བྱ་བའི་དངོས་པོས་ན་མདོའི་མི་མཐུན་པའི་ཕྱོགས་
[72b.5]ལ་མ་མཐོང་བས་མཐུན་པའི་ཕྱོགས་ལ་ཡོད་པ་འཕངས་པ་ཅི་ནས་ཀྱང་རྟོགས་པར་བྱ་བའི་ཕྱིར་རོ། །ཕྲུ་བའི་ནང་ན་འདུག་པ་རྣམས་ལས་མང་པོ་ཞིག་ཚོས་པར་མཐོང་བས་ན་ཕྲུ་བའི་ནང་དུ་ཚུད་པ་ཞེས་བྱ་བ་ཁོ་ནས་ནི་ཚོས་པར་མི་འགྲུབ་སྟེ། ཚོས་པ་མེད་ན་ཕྲུ་བའི་ནང་དུ་ཆུད་པ་ཉིད་དུ་མི་འགྱུར་བའི་
[72b.6]ཕྱིར་དེ་ཡོད་ན་ཚོས་པར་འགྱུར་བ་ཡིན་ནོ་ཞེས་མི་འགྲུབ་བོ། །ཇི་ལྟར་མི་འགྲུབ་ཅེ་ན། འཁྲུལ་པ་མཐོང་བའི་ཕྱིར་རོ་ཞེས་སྨོས་སོ། །གལ་ཏེ་ཕྲུ་བའི་ནང་དུ་ཆུད་པ་ཉིད་ཀྱང་ཚོས་པ་སྐྱེད་པའི་ཚོགས་པ་ཚང་བར་རྟོགས་པར་བྱེད་པ་ན་ཚོས་པ་སྒྲུབ་པར་བྱེད་པ་མ་ཡིན་ནམ། གལ་ཏེ་འདི་རྒྱུ་ཚང་བ་
[72b.7]མ་ཡིན་ན་འགའ་ཡང་ཚོས་པར་མི་འགྱུར་ཏེ། དེ་དག་ཚོས་པ་ཡང་རྒྱུ་མེད་པར་མི་འགྲུབ་པའི་ཕྱིར་རོ། །དེ་རྒྱུ་ཚོགས་པ་ཡིན་ན་ཇི་ལྟར་གཞན་ཡང་མ་ཚོགས་དེས་ན་འདི་ལ་འཁྲུལ་པ་མཐོང་བ་ཇི་ལྟར་འཐད་ཅེ་ན། དོགས་པ་འདི་བསུ་ནས་སྨྲས་པ་ནི་འདི་ལྟར་འདི་ལྟ་བུའི་ཞེས་བྱ་བ་ཡིན་ནོ། །
[73a]
[73a.1]བསམ་པ་འདི་ཡིན་ཏེ། ཕྲུ་བ་ལ་སོགས་པའི་ཚོགས་པ་ཡོངས་སུ་འགྱུར་བ་ལ་ལྟོས་ནས་འབྲས་རྣམས་འབྲས་ཅན་དུ་འགྱུར་བ་ཡིན་ལ། དེ་ཡང་དུས་གནས་པ་ཉིད་དོ། །དེ་ལ་འབྲས་འགའ་ཞིག་ནི་དུས་ཅུང་ཟད་གནས་པ་ལ་ལྟོས་ནས་དེ་ལྟར་འགྱུར་ལ་གཞན་དག་ལ་
[73a.2]ནི་གཞན་དུའོ། །དེས་ན་དེ་ལྟ་བུའི་དངོས་པོར་མཐོང་བ་དག་དང་མཚུངས་པར་གནས་པ་ལ་ལྟོས་པ་དག་ནི་ཚོས་པ་ཁོ་ནར་འགྱུར་ལ་གཞན་ནི་མ་ཡིན་ནོ། །དེ་བཞིན་དུ་གང་དག་དྲོད་དང་ཉེ་བར་འབྲེལ་པ་དེ་དག་ནི་མྱུར་བར་ཚོས་པར་འགྱུར་ལ་གཞན་ནི་མ་ཡིན་པ་དེས་ན་འཁྲུལ་པ་དམིགས་པར་
[73a.3]འཐད་པ་ཡིན་ནོ། །དེས་ན་འདི་བསྟན་པའི་ཕྱིར་དེ་ལྟར་འབྲེལ་པ་རྗེས་སུ་དཔྱོད་པས་རྟོགས་པར་སྟོན་ཏོ། །འདི་ལྟ་བུའི་རང་བཞིན་ཅན་ཡིན་ལ་ཞེས་བྱ་བ་ནི་གནས་པ་ལ་ལྟོས་པ་ཡིན་ནོ། །འདི་དང་ཚོས་པའི་རྒྱུ་འདྲ་བ་ཅན་ཞེས་བྱ་བ་ནི་དྲོད་ཉེ་རིང་ངོ་། །དེས་ན་དེ་ལྟར་འདི་དག་ཚོགས་པ་གཅིག་
[73a.4]ལ་རག་ལས་པར་འགྱུར་རོ། །གང་གི་ཚེ་རྣམ་པ་འདི་ལྟ་བུའི་རིགས་པ་ལ་མི་ལྟོས་པར་དེ་ལྟར་དམིགས་པ་ཙམ་ལ་བརྟེན་པ་དེའི་ཚེ་འདི་རྗེས་སུ་དཔག་པ་མ་ཡིན་པ་ཁོ་ནའོ་ཞེས་བཤད་པ་ནི་དེ་ལྟ་མ་ཡིན་ན་ནི་ཞེས་བྱ་བ་ཡིན་ནོ། །མ་མཐོང་བ་ཙམ་ལ་བརྟེན་ན་ནི་རྗེས་སུ་དཔག་པ་འདི་ལྷག་མ་དང་
[73a.5]ལྡན་པ་ཡིན་ལ་དེས་ན་འཁྲུལ་པ་ཅན་ཡིན་ནོ། །ལྷག་མ་དང་ལྡན་པའི་རང་གི་ངོ་བོ་ནི། ཡང་ལྷག་མ་དང་ལྡན་པ་ཞེས་བྱ་བ་འདི་ཅི་ཞིག་ཅེས་དྲི་བ་སྔོན་དུ་བཏང་བ་ཅན་གྱིས་སྟོན་པར་བྱེད་པ་ནི་གང་ཞིག་ཅེས་བྱ་བ་ལ་སོགས་པའོ། །མ་མཐོང་བ་ཙམ་གྱིས་གང་ཞིག་མ་མཐོང་བ་ཁོ་ནས་
[73a.6]ལྡོག་པ་རབ་ཏུ་སྟོན་པར་བྱེད་པ། དེ་ནི་ལྷག་མ་དང་ལྡན་པ་ཡིན་ནོ་ཞེས་འདྲི་བ་དང་ངག་གཅིག་ཉིད་བསྟན་ཏོ། །ཇི་སྐད་བཤད་མ་ཐག་པ་དེའི་ལྡོག་པ་དེ་ནི་མི་མཐུན་པའི་ཕྱོགས་ལ་མ་མཐོང་བ་ཙམ་གྱིས་མ་ངེས་པའི་གཏན་ཚིགས་ཀྱིས་ན་མི་མཐུན་པའི་ཕྱོགས་ལ་འཇུག་པར་ཐེ་ཚོམ་ཟ་བར་
[73a.7]འགྱུར་རོ། །སློབ་དཔོན་ཕྱོགས་ཀྱི་གླང་པོས་མི་མཐུན་པའི་ཕྱོགས་ལ་འཇུག་པ་དང་ལྡན་པ་ཉིད་ཀྱི་ཕྱིར་ལྷག་མ་དང་ལྡན་པ་ཉིད་དུ་བཤད་དོ། །དེ་ཡང་འདི་ལ་ཡོད་པའི་ཕྱིར་འདི་ཡང་རྣམ་པ་དེ་ལྟ་བུ་ཁོ་ནའོ། །ཕྱོགས་དང་མཐུན་པའི་ཕྱོགས་དང་མི་མཐུན་པའི་ཕྱོགས་ཀྱི་ཆོས་ཅན་རྣམ་པ་
[73b]
[73b.1]གསུམ་ལས། གཅིག་ནི་གཏན་ཚིགས་ཡོད་པ་ཡིན་པས་དེ་ལས་མི་མཐུན་པའི་ཕྱོགས་གཅིག་ཏུ་ལྷག་མ་ཡིན་ནོ། །གཉིས་པ་དེ་ནི་གཏན་ཚིགས་དང་འབྲེལ་པ་ཡིན་ཏེ། དེ་དག་ལས་ལྡོག་པ་མ་ཡིན་པའི་ཕྱིར་རོ། །ལྷག་མ་ནི་ལྡོག་མཚམས་ཡིན་པའི་ཕྱིར་འབྲེལ་པའི་ཡུལ་
[73b.2]མ་ཡིན་ནོ། །དེ་ལས་མི་ལྡོག་པའི་ཕྱིར་འདི་ལ་ནི་དེ་ཡང་ཡོད་པས་ན་ལྷག་མ་དང་ལྡན་པ་ཞེས་བརྗོད་དོ། །ཡང་ཇི་ལྟར་གང་ཞིག་མ་མཐོང་བ་ཙམ་གྱིས་ལྡོག་པ་བརྗོད་པ་དེ་དེ་ལྟར་བརྗོད་ཅེ་ན། བཤད་པ་ལྡོག་པ་སྒྲུབ་པ་མ་མཐོང་བ་ཙམ་ནི་ཐེ་ཚོམ་གྱི་རྒྱུ་ཡིན་པའི་ཕྱིར་རོ། །གལ་
[73b.3]ཏེ་མ་མཐོང་བ་ནི་སྣང་བ་མི་དམིགས་པ་མ་ཡིན་ནམ། བསྒྲུབ་པར་བྱ་བ་མེད་པ་ལ་མེད་པའི་ལྡོག་པ་ཡང་དེས་རྟོགས་པ་ཡིན་པ་དེས་ན་ཇི་ལྟར་འདི་ཐེ་ཚོམ་གྱི་རྒྱུ་ཡིན་ཞེ་ན། འདི་ལ་བཤད་པ་ནི་མི་དམིགས་པ་ཐམས་ཅད་ནི་ཞེས་བྱ་བའོ། །འདི་ལ་ལན་མང་དུ་མ་མཐོང་ཡང་དངོས་པོ་
[73b.4]ཉུང་ཟད་ལ་བསྒྲུབ་པར་བྱ་བ་མེད་ན་སྒྲུབ་པར་བྱེད་པ་མ་མཐོང་བ་བསྒྲུབ་པར་བྱ་བའི་ཆོས་ཅན་ཉིད་ལ། བསྒྲུབ་བྱ་མེད་ན་གཏན་ཚིགས་ཡོད་པ་མ་ཡིན་ནོ་ཞེས་མངོན་སུམ་གྱིས་ནི་ངེས་པར་མི་ནུས་ཏེ། རང་གི་ཡུལ་ཙམ་གྱིས་མཐར་ཐུག་པའི་བྱེད་པ་ཅན་ཉིད་ཀྱི་ཡུལ་དུ་མ་བྱས་པའི་དངོས་པོའི་
[73b.5]རང་བཞིན་ངེས་པར་བྱེད་པ་མ་ཡིན་པའི་ཕྱིར་རོ། །སྣང་བ་མི་དམིགས་པ་ནི་མི་དམིགས་པ་ལས་གཞན་ནི་མ་ཡིན་ནོ། །དེས་ན་འདི་བསྒྲུབ་པར་བྱ་བ་མེད་ན་མེད་པ་ཉིད་ཡིན་ལ་དེ་ཡོད་ན་ཡང་བསྒྲུབ་པར་བྱ་བ་ཡོད་པ་ཉིད་དོ་ཞེས་ངེས་པ་སྐྱེས་པ་བསྒྲུབ་པར་བྱ་བའི་ཆོས་ཅན་ལ་སྒྲུབ་པར་བྱེད་པ་
[73b.6]རྟོགས་པས་བསྒྲུབ་པར་བྱ་བའི་ཆོས་རྟོགས་པར་འགྱུར་རོ། །ཆོས་ཅན་ཐམས་ཅད་ཀྱང་དམིགས་པའི་མཚན་ཉིད་དུ་གྱུར་པ་མ་ཡིན་པ་དེས་འདི་དེ་ལ་མི་སྣང་བ་མི་དམིགས་པ་ཉིད་དུ་འགྱུར་རོ། །དེ་ཡང་དངོས་པོ་མེད་པ་རྟོགས་པར་བྱེད་པ་མ་ཡིན་ནོ། །དེས་ན་མི་དམིགས་པ་ཐམས་
[73b.7]ཅད་ནི་མེད་པ་སྒྲུབ་པར་བྱེད་པ་མ་ཡིན་ནོ་ཞེས་བཤད་དོ། །གལ་ཏེ་བསྒྲུབ་པར་བྱ་བའི་ཆོས་ཅན་ལ་བསྒྲུབ་པར་བྱ་བ་མེད་པའི་ཆོས་ཡོད་པར་དོགས་པ། མཐུན་པའི་ཕྱོགས་དང་མི་མཐུན་པའི་ཕྱོགས་ལ་མཐོང་བ་དང་མ་མཐོང་བ་དག་ཁོ་ནས་བཟློག་པར་བྱ་བ་མ་ཡིན་ནམ། མ་མཐོང་བ་དེ་
[74a]
[74a.1]ཡང་ཚད་མ་ཁོ་ན་ཡིན་པ་དེས་ན་བསྒྲུབ་པར་བྱ་བ་མེད་པ་ལ་མེད་པ་མངོན་སུམ་གྱིས་གྲུབ་པས་ཇི་ལྟར་ཆོས་ཅན་ལ་དེ་ལྟར་ངེས་པར་མི་འགྱུར་ཞེ་ན་འདི་ལ་བཤད་ཟིན་ཏེ། མངོན་སུམ་ནི་རང་གི་རྟེན་ཉིད་ལ་དེ་ལྟ་བུའི་ངོ་བོར་གཅོད་པར་བྱེད་ཀྱི་ཆོས་ཅན་གཞན་ལ་ནི་མ་
[74a.2]ཡིན་ནོ། །དེའི་ཡུལ་འདི་ཇི་ལྟ་བ་བཞིན་དུ་གཞན་ཡང་དེ་ལྟར་འགྱུར་རོ་ཞེས་བྱ་བའི་ངེས་པ་ཡང་མེད་དོ། །དེས་ན་གང་གི་ཕྱིར་འདིར་འདི་བསྒྲུབ་པར་བྱ་བ་མེད་ན་མེད་པར་མངོན་སུམ་གྱིས་མཐོང་བ་དེའི་ཕྱིར་བསྒྲུབ་པར་བྱ་བའི་ཆོས་ཅན་ལ་ཡང་དེ་ལྟ་ཡིན་ནོ་ཞེས་བྱ་བའི་ངེས་པ་ཅི་ཞིག་ཡོད།
[74a.3]གལ་ཏེ་མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ་དེ་ལྟར་མཐོང་བའི་ཕྱིར་དེ་དང་མཐུན་པའི་བསྒྲུབ་པར་བྱ་བའི་ཆོས་ཅན་ལ་རྟོགས་པའི་རྗེས་སུ་དཔག་པ་ཉིད་ངེས་པ་ཉིད་མ་ཡིན་ནམ། དེས་ན་བསྒྲུབ་བྱའི་ཆོས་ཅན་ལ་དེ་ལྟར་འགྱུར་བར་བྱ་བའི་ཕྱིར་ངེས་པ་གཞན་དགོས་པ་མ་ཡིན་
[74a.4]ནོ། །རྗེས་སུ་དཔག་པ་ལ་ཞུགས་པའི་སྔོན་རོལ་དུ་བསྒྲུབ་པར་བྱ་བའི་ཆོས་ཅན་ལ་བསྒྲུབ་པའི་ཆོས་ཡོད་པ་དང་མེད་པར་ཐེ་ཚོམ་འཇུག་ཀྱང་སྐྱོན་ཡོད་པ་མ་ཡིན་ཏེ་ཁྱབ་པ་མ་དྲན་པ་ན་ཐེ་ཚོམ་འཇུག་ཀྱང་དེ་རྗེས་སུ་དཔྱོད་པས་ཆོས་མཐུན་པ་དང་མི་མཐུན་པའི་དཔེ་དག་ལ་མཐོང་བ་དང་མ་མཐོང་བ་
[74a.5]དྲན་པ་ལས་བསྒྲུབ་པར་བྱ་བའི་ཆོས་དང་ལྡན་པར་ངེས་པའི་མཚན་ཉིད་ཅན་གྱི་རྗེས་སུ་དཔག་པ་སྐྱེ་བའི་ཕྱིར་རོ་ཞེ་ན། དེ་ནི་མི་རུང་སྟེ་དེ་བཞིན་དུ་མཐོང་བའི་འདུ་བྱེད་སྐྱེས་པ་བསྒྲུབ་པར་བྱ་བའི་ཆོས་ཅན་ལ་སྒྲུབ་པར་བྱེད་པའི་རྟོགས་པ་སྐྱེས་པ་ཁོ་ན་ལས་དངོས་པོའི་ངོ་བོས་བསྒྲུབ་པར་བྱ་བའི་རྟོགས་
[74a.6]པ་དབང་མེད་དུ་འཇུག་པའི་ཕྱིར་དེར་རྗེས་སུ་དཔག་པ་ཉིད་ངེས་པ་ཡིན་པར་བརྗོད་དམ། ཡང་རྒྱུའི་ཚོགས་པ་ལ་རག་ལས་པ་མེད་པར་འཇུག་པ་རང་དབང་དུ་གྱུར་པའི་རྟོགས་པ་པོ་གཉིས་ལ་དེ་ལྟར་དམིགས་པའི་ཕྱིར་བསྒྲུབ་པར་བྱ་བའི་ཆོས་ཅན་ལ་ཡང་དེ་དེ་ལྟར་འགྱུར་བ་ཡིན་ནོ་ཞེས་རིགས་པ་
[74a.7]ལ་ལྟོས་ནས་རྟོགས་པ་ཡིན་ནོ། །དེ་ལ་རེ་ཞིག་རྟོགས་པ་སྔ་མ་ནི་མི་འཐད་དེ་སྒྲུབ་པར་བྱེད་པ་ཡིན་ནོ། །བསྒྲུབ་པར་བྱ་བའི་ཆོས་ཅན་ལ་བསྒྲུབ་པར་བྱ་བའི་ཆོས་ཡོད་པར་སོ་སོར་ངེས་པ་མ་ཡིན་ན་དངོས་པོའི་མཐུ་ལ་རྟོགས་པ་སྐྱེས་ཀྱང་དངོས་པོའི་རྟེན་དང་ལྡན་པ་ཉིད་དུ་འགྱུར་བ་མ་ཡིན་པའི་ཕྱིར་ཚད་
[74b]
[74b.1]མ་མ་ཡིན་པ་ཁོ་ནའོ། །དུ་བ་དང་བཅས་པའི་ཆོས་ཅན་གཅིག་མེ་དང་ལྡན་པ་ཡིན་པས་གཞན་ཡང་དེ་ལྟར་འགྱུར་བ་ཡིན་ནོ་ཞེས་བྱ་བའི་དངོས་པོ་ཡོད་པའི་ངེས་པ་ནི་མ་གྲུབ་བོ། །མངོན་སུམ་བཞིན་དུ་རྗེས་སུ་དཔག་པའི་ཤེས་པ་སྐྱེས་པ་ཡང་གང་གི་ཚེ་དོན་ཡོད་པ་དེའི་ཚེ་ནི་ཚད་མ་ཡིན་ནོ་ཞེས་དེ་ལྟར་
[74b.2]རྗེས་སུ་དཔག་པ་ཚད་མ་མེད་པར་ནུས་པ་མ་ཡིན་ནོ། །དཔེར་ན་འདིར་ཡང་དངོས་པོ་ཡོད་པའི་ངེས་པ་བསྒྲུབ་པ་ལ་ལྟོས་པར་བྱ་བ་ཡིན་ནོ། །དེ་ཡང་དེ་ལྟར་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་རིགས་པ་ལས་ཀྱང་རྟོགས་པ་མ་ཡིན་ནོ། །དོན་ཡང་ནས་ཡང་མཐོང་བའི་ཕྱིར་དོན་ངེས་པ་རྟོགས་སོ་
[74b.3]ཞེ་ན་གལ་ཏེ་ངེས་པ་ཉིད་རང་བཞིན་གྱི་ཁྱད་པར་གྱི་བདག་ཉིད་ཡིན་ན་ལན་ཅིག་མཐོང་བས་ཀྱང་རྟོགས་པར་འགྱུར་རོ། །དེ་ལྟ་མ་ཡིན་ན་ནི་ཡང་ནས་ཡང་དམིགས་པ་ཡང་སྒྲུབ་པར་བྱེད་པ་མ་ཡིན་ནོ། །མེད་ན་མི་འབྱུང་བ་ནི་ལྷན་ཅིག་ཡོད་པར་ངེས་པ་ཡིན་ལ་དེ་ཡང་ལན་མང་པོར་ལྷན་ཅིག་མཐོང་
[74b.4]བས་རྟོགས་པ་ཡིན་ནོ་ཞེ་ན། གལ་ཏེ་འདི་ཡང་རྒྱུ་དང་བཅས་པ་ཡིན་ན་ལན་ཅིག་ཉིད་རྟོགས་པས་རྟོགས་པར་འགྱུར་རོ། །གཞན་དུ་ན་ནི་མང་དུ་དེ་ལྟར་ཡིན་ཡང་ཇི་སྙེད་དམིགས་པ་དེ་ལྟ་བུའི་ངོ་བོར་དམིགས་པར་གྱུར་གྱི་མ་དམིགས་པ་གཞན་ལ་ནི་དེ་ལྟར་འགྱུར་བ་མ་ཡིན་པའི་ཕྱིར་ངེས་པ་མ་
[74b.5]འགྲུབ་བོ། །འབྲས་བུ་ལ་སོགས་པ་བཞིན་དུ་གང་ངེས་པས་རྗེས་སུ་དཔག་པར་བྱ་བ་རྟོགས་པར་འགྱུར་བ་མི་འཁྲུལ་པ་ཉིད་ཀྱང་དངོས་པོའི་ཆོས་ཡིན་ནོ་ཞེ་ན། མི་འཁྲུལ་བ་དེ་ཅི་ཞིག་དེ་ཡོད་ན་གཞན་ཡོད་ལ་གཞན་མེད་ན་ནི་མེད་པའོ་ཞེ་ན། གལ་ཏེ་དེ་ཉི་ཚེ་བ་ཡིན་ན་ནི་རེས་འགའ་འཁྲུལ་པར་
[74b.6]ཡང་འགྱུར་རོ། །འོན་ཏེ་ཐམས་ཅད་པ་ཡིན་ན་དེ་ལྟར་ན་དེ་ལྟར་འཐད་པ་ཡིན་ན་འདི་རྟོགས་པ་གོ་ཇི་ལྟར་ཡིན་གལ་ཏེ་ཐམས་ཅད་དུ་དེ་ལྟར་རྟོགས་པའི་ཕྱིར་ན། དེ་ནི་དེ་ལྟར་འཐད་མོད་ཀྱི་འོན་ཀྱང་ཐམས་ཅད་དུ་དེ་ལྟར་རྟོགས་པ་ཐམས་ཅད་གཟིགས་པ་མ་ཡིན་པའི་མཐོང་བ་མེད་པའི་ངེས་པ་ནི་མ་ཡིན་
[74b.7]ནོ། །འོན་ཏེ་ཉི་ཚེ་བའི་རྟོགས་པས་ཡིན་ན་དེ་ལྟ་ན་ལ་ལར་འགྱུར་བ་འཁྲུལ་པར་ཡང་མི་འགལ་ཏེ། ལན་མང་དུ་དེ་ལྟར་གྱུར་པ་གང་ཡིན་པ་གཞན་གྱི་ཚེ་དེ་ལྟར་མ་ཡིན་པར་མི་འགྱུར་རོ་ཞེས་ངེས་པར་མི་ནུས་པའི་ཕྱིར་དང་། དེ་ལྟར་མ་ཡིན་ན་འབྲས་བུ་མ་ཡིན་པ་ཉིད་དུ་མི་འགྲུབ་པའི་ཕྱིར་རོ། །
[75a]
[75a.1]འབྲས་བུ་མ་ཡིན་པ་ཉིད་ན་དེ་མེད་ཀྱང་ཡོད་པས་མི་འཁྲུལ་བ་ཉིད་མེད་པའི་ཕྱིར་རོ། །མི་འཁྲུལ་ན་ཡང་འབྲས་བུ་ཉིད་དོ། །ཐ་དད་པ་མེད་པ་བྱས་པ་དང་། མི་རྟོགས་པ་དག་ནི་གཅིག་ལ་ལྟོས་ནས་གཞན་གྱི་ངོ་བོ་རྣམ་པར་འཇིག་པ་མ་ཡིན་པའི་ཕྱིར་གང་ཞིག་གང་དང་མི་
[75a.2]འཁྲུལ་བའི་རང་བཞིན་ཡིན། དེས་ན་མི་འཁྲུལ་བ་ནི་མ་མཐོང་བ་རྟོགས་པར་བྱ་བ་མ་ཡིན་ནོ། །དེ་ལྟར་ན་དེ་ནི་ཐེ་ཚོམ་སྒྲུབ་པར་བྱེད་པ་ཁོ་ནའོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་གཅིག་ཅེས་བྱ་བ་བསྒྲུབ་པར་བྱ་བ་ལོག་པས་དེ་མེད་པས་གཞན་ཞེས་བྱ་བ་སྒྲུབ་པར་བྱེད་པ་ལྡོག་པར་འདོད་པས་
[75a.3]ནི་བསྒྲུབ་པར་བྱ་བ་དང་སྒྲུབ་པར་བྱེད་པ་དེ་གཉིས་རང་བཞིན་འབྲེལ་པ་ཡང་འདོད་པར་བྱ་དགོས་སོ། །སྒྲུབ་པར་བྱེད་པ་བསྒྲུབ་པར་བྱ་བར་འབྲེལ་པ་ཞེས་བྱ་བ་དེ་ལྟ་བུའི་བདག་ཉིད་ཅན་ཡིན་གྱི་གཉིས་ཀ་ཡང་ཕན་ཚུན་རག་ལས་པའི་རང་བཞིན་ནི་མ་ཡིན་ནོ། །དེ་ལྟར་ཁས་མི་ལེན་ན་གཏན་ཚིགས་
[75a.4]གོ་བར་བྱེད་པ་མ་ཡིན་པར་འགྱུར་རོ། །གཞན་ལོག་པས་གཞན་ལྡོག་པར་ཁས་བླངས་ནས་དེ་ཡོད་ན་བསྒྲུབ་བྱ་ཡོད་པ་ཡང་གྲུབ་པ་ཉིད་པས་ལོགས་སུ་མ་བསྟན་ཏེ། འཕེན་པར་བྱེད་པ་དང་འཕང་བར་བྱ་བའི་དངོས་པོས་ན་འདི་གཉིས་ཐ་མི་དད་པར་བསྙད་པའི་ཕྱིར་རོ། །དེ་བས་ན་སྒྲུབ་པར་
[75a.5]བྱེད་པ་ཡོད་པས་བསྒྲུབ་པར་བྱ་བ་ཡོད་པར་འདོད་པས་རང་བཞིན་འབྲེལ་བར་འགྱུར་དགོས་སོ་ཞེས་བྱ་བ་ཡང་བརྗོད་པ་ཉིད་དུ་ངེས་པར་བྱའོ། །མ་མཐོང་བ་ཙམ་གྱིས་གྲུབ་པ་ཉིད་བསལ་བ་འདི་ནི་འདི་ལས་ཕྱི་རོལ་པ་དག་བཞིན་དུ་འདི་པ་དེ་ལྟར་སྨྲ་བ་དག་ལ་ཡང་མཚུངས་པ་ཡིན་ནོ། །འདི་པ་ཉིད་ཀྱི་
[75a.6]དབང་དུ་བྱས་ནས་བཤད་པ་ནི་དེ་ཡིས་ཏེ་རྒྱུ་དེས་ན་གཏན་ཚིགས་ཀྱི་ནི་ཚུལ་གསུམ་ལའང་ཕྱོགས་ཀྱི་ཆོས་ཙམ་ལ་ནི་མ་ཡིན་གྱི་འོན་ཀྱང་རྗེས་སུ་འགྲོ་ལྡོག་གཉིས་ལའང་ངེས་པ་བརྗོད་པར་མཛད་པ་ཡིན་ནོ་ཞེས་བྱ་བ་ནི་འང་གི་སྒྲའི་དོན་ཏོ། །ཉེ་བར་གནས་པའི་ཆོས་ཅན་ཙམ་ལ་བརྟེན་པ་ཕྱོགས་ཀྱི་ཆོས་
[75a.7]ཉིད་ནི་མངོན་སུམ་ཁོ་ནས་ངེས་པར་ནུས་པ་དེ་ལ་ངེས་པར་བརྗོད་པར་རིགས་ཀྱི། རྗེས་སུ་འགྲོ་ལྡོག་ནི་མངོན་སུམ་དང་མངོན་སུམ་མ་ཡིན་པ་ལ་བརྟེན་པ་ཉིད་དུ་ཤེས་པར་བྱ་བ་ཡིན་པའི་ཕྱིར་མཐོང་བ་དང་མ་མཐོང་བ་དག་ལས་ག་ལ་ངེས། དེས་ན་འདི་དེའི་ཡུལ་ཅན་ཉིད་དུ་བརྗོད་པར་བྱ་བ་མ་ཡིན་པར་
[75b]
[75b.1]འགྱུར་རོ། །དེས་ན་ཇི་ལྟར་གང་དག་གི་ཕྱོགས་བསྟན་པ་ཡན་ལག་ཏུ་འདོད་པ་ནི་མ་ངེས་པ་ཉིད་ཡན་ལག་ཡིན་པ་དེ་བཞིན་དུ་རྗེས་སུ་འགྲོ་ལྡོག་དག་ཀྱང་ཡིན་པས་ཚུལ་གསུམ་ཀ་ལ་ངེས་པ་མི་བརྗོད་པར་འགྱུར་རོ། །གང་གི་ཕྱིར་རང་བཞིན་གྱི་འབྲེལ་པར་བཞེད་པ་དེའི་ངེས་པ་བརྗོད་པ་མཛད་དོ། །
[75b.2]འདི་ཡང་བརྗོད་པར་མི་བྱའམ། དོན་གཞན་གྱིས་བསྟན་པ་ནི་མ་ཡིན་ནོ་ཞེས་བརྗོད་པའི་ཕྱིར་སློབ་དཔོན་བཞེད་པ་དེ་ཉེ་བར་བསྟན་པའི་དགོས་པ་སྟོན་ཏོ། །མ་གྲུབ་ཅེས་བྱ་བ་ནི་བསྒྲུབ་པར་བྱ་བའི་ཆོས་ཅན་དང་འབྲེལ་པར་མ་ཤེས་པའོ། །ལྡོག་དོན་ནི་འགལ་བའོ། །འཁྲུལ་པ་ཅན་ནི་མ་ངེས་
[75b.3]པའོ། །དེ་དག་གི་གཉེན་པོར་ཏེ། དེ་དག་བསལ་བའི་དོན་དུ་ཚུལ་གསུམ་ལ་ངེས་པ་གསུངས་པ་ཡིན་ནོ། །འདི་ལྟར་འདིར་ངེས་པ་ཁས་མི་ལེན་ན། འདི་དག་ཀྱང་མ་བསལ་བའི་ཕྱིར་གཏན་ཚིགས་ཉིད་དུ་འགྱུར་རོ། །དེས་ན་ངེས་པར་གདོན་མི་ཟ་བར་འདོད་པར་བྱའོ། །དེ་ཡང་འབྲེལ་
[75b.4]བའི་རྩ་བ་ཅན་ཉིད་ཀྱིས་དེ་ཁས་མ་བླངས་པར་བརྗོད་པར་མི་ནུས་པས་ན་འབྲེལ་པ་ཡང་གྲུབ་བོ། །འབྲེལ་པ་མེད་པ་ཞེས་བྱ་བ་ནི་རྣམ་པར་འགྲེལ་པའོ། །གང་གི་ཕྱིར་འབྲེལ་པ་མེད་ན་རྗེས་སུ་འགྲོ་བ་དང་ལྡོག་པ་ངེས་པ་མ་ཡིན་གྱི་འོན་ཀྱང་ཇི་སྐད་སྔར་བརྗོད་པ་བཞིན་ཐེ་ཚོམ་ཉིད་དུ་འགྱུར་བ་དེས་ན་
[75b.5]མ་མཐོང་བས་གྲུབ་པ་ཉིད་དུ་ཁས་ལེན་ན་དེའི་འབྲས་བུ་ཉིད་ཁས་བླང་བར་རིགས་ཀྱི་གཞན་གྱི་འབྲས་བུ་གཞན་སྟོན་པ་ནི་མ་ཡིན་ནོ། །དེས་འབྲེལ་པའི་འབྲས་བུ་ཞལ་གྱིས་བཞེས་པས་ན་འབྲེལ་པ་ཉིད་སྟོན་པར་མཛད་པ་ན་ངེས་པར་བཤད་པ་ཡིན་ནོ། །གཟུགས་རྟོགས་པའི་འབྲས་བུར་གྱུར་པ་ལ་
[75b.6]བརྟེན་ནས་ཉན་པའི་རྣམ་པར་ཤེས་པ་བསྒྲུབ་པར་ཁས་བླང་བར་ནི་མི་ནུས། མ་གྲུབ་ཅེས་བྱ་བ་ལ་སོགས་པ་རྣམ་པར་འགྲེལ་པ་ནི་དེ་ལ་ཞེས་བྱ་བའོ། །རྗེས་སུ་འགྲོ་བ་ངེས་པས་ནི་འགལ་བ་བསལ་ཏེ་བྱས་པ་ཉིད་རྟག་པར་རྗེས་སུ་འགྲོ་བ་མེད་པའི་ཕྱིར་རོ། །དེས་ན་རྗེས་སུ་འགྲོ་བ་ངེས་པ་གོ་བར་བྱེད་
[75b.7]པར་སྟོན་པར་མཛད་པས་བྱས་པ་ཉིད་རྟག་པའི་སྒྲུབ་པར་བྱེད་པ་མ་ཡིན་ནོ་ཞེས་བརྗོད་པ་ཡིན་ནོ། །གལ་ཏེ་རྗེས་སུ་འགྲོ་བ་ལ་ཐེ་ཚོམ་ཟ་བ་ཡིན་ཡང་འགལ་བ་གཏན་ཚིགས་མ་ཡིན་པ་ཉིད་མ་ཡིན་ནམ། དེས་ན་འགལ་བ་ནི་ངེས་པར་བརྗོད་པ་སྤང་བར་བྱ་བ་མ་ཡིན་ཏེ། བྱས་པ་ཉིད་ནི་བཟློག་པས
[76a]
[76a.1]ཁྱབ་པར་ངེས་པའི་ཕྱིར་རོ། །གལ་ཏེ་འདི་མི་རྟག་པ་ལ་ཐེ་ཚོམ་ཟ་བ་མ་ཡིན་ན། དེའི་ཚེ་རྟག་པའམ་འོན་ཏེ་མི་རྟག་པ་ལ་ཡོད་པ་ཡིན་ཞེས་དེ་རྟག་པ་ལ་ཡང་འགྱུར་བ་ཡིན་ནོ། །དེས་ན་རྗེས་སུ་འགྲོ་བ་ངེས་པ་གཏན་ཚིགས་ཡིན་ན་བྱས་པ་ཉིད་རྟག་པ་ལ་ཐེ་ཚོམ་ཟ་བ་
[76a.2]གཏན་ཚིགས་མ་ཡིན་པ་ཉིད་དུ་འགྱུར་རོ། །གང་གི་ཚེ་འདི་བཟློག་པར་ནུས་པ་དེའི་ཚེ་འདི་རྟག་པ་ལ་ཡང་ཐེ་ཚོམ་མེད་དོ། །དེས་ན་ཐེ་ཚོམ་ཟ་བ་གཏན་ཚིགས་ཡིན་ཡང་འགལ་བ་གཏན་ཚིགས་མ་ཡིན་ནོ། །དེས་ན་ཇི་ལྟར་འདི་ངེས་པ་བརྗོད་པས་གསལ་བར་བྱ་བ་ཡིན། འགལ་
[76a.3]བ་ལ་རྗེས་སུ་འགྲོ་བ་མེད་པའི་ཕྱིར་རྗེས་སུ་འགྲོ་བ་ངེས་པས་སྤོང་བ་ཡིན་ནོ་ཞེ་ན། དེར་ཡང་ངེས་པ་སྨོས་པ་དོན་མེད་དེ་ཐེ་ཚོམ་ཟ་བ་ལ་ཡང་རྗེས་སུ་འགྲོ་བ་མེད་པས་རྗེས་སུ་འགྲོ་བ་སྨོས་པ་ཉིད་ཀྱིས་གསལ་བར་གྲུབ་པའི་ཕྱིར་རོ། །བརྗོད་པ་བཟློག་པས་ཁྱབ་པ་ཡང་མང་དུ་མཐོང་བ་
[76a.4]ལ་བརྟེན་ནས་ངེས་པར་མི་ནུས་པ་ཁོ་ན་སྟེ། དེས་ན་བྱས་པ་མི་རྟག་པ་ལ་ཡང་མ་ངེས་པ་ཁོ་ནའོ། །དེས་ན་ཐེ་ཚོམ་ཟ་བ་གཏན་ཚིགས་ཡིན་ན་འདི་གཏན་ཚིགས་སུ་འགྱུར་བ་ཁོ་ནའོ། །དེ་ལྟར་ན་ངེས་པར་བརྗོད་པར་བཟློག་པར་བྱ་བ་རིགས་པ་ཉིད་དོ། །འགལ་བའི་ཕྱོགས་དང་མཐུན་
[76a.5]པ་ནི་རྗེས་སུ་འགྲོ་བ་མ་ངེས་པ་སྟེ། བཟློག་པ་རྗེས་སུ་འགྲོ་བ་ངེས་པ་མེད་པའི་ཕྱིར་འགལ་བ་ཉིད་མ་ཡིན་ནམ། རྗེས་སུ་འགྲོ་བ་མ་ངེས་པས་བསལ་བར་བྱ་བ་ཡིན་པའི་ཕྱིར་ནི་འགལ་བའི་ཕྱོགས་དང་མཐུན་པ་ཞེས་བརྗོད་དོ། །ལྡོག་པ་ངེས་པས་ནི་མ་ངེས་པ་མི་མཐུན་པའི་ཕྱོགས་ལ་
[76a.6]འཇུག་པ་བསལ་ཏེ། དེ་ནི་མི་མཐུན་པའི་ཕྱོགས་ལ་འཇུག་པ་མེད་པར་ངེས་པར་བསལ་བར་བྱ་བ་ཡིན་པའི་ཕྱིར་རོ། །དེས་ན་དེ་ལྟར་གཉི་ག་ལ་འཇུག་པར་ངེས་པ་ཉིད་བསལ་གྱི་ཐུན་མོང་མ་ཡིན་པ་ནི་མ་ཡིན་ནོ། །དེའི་ཕྱོགས་དང་མཐུན་པ་ལྷག་མ་དང་ལྡན་པ་ལ་སོགས་པ་ཡང་སྤངས་
[76a.7]ཏེ། ལྡོག་པ་ངེས་པས་དགག་པར་བྱ་བ་ཉིད་ཀྱིས་དེའི་ཕྱོགས་དང་མཐུན་པའི་ཕྱིར་དང་མི་མཐུན་པའི་ཕྱོགས་དང་འཇུག་པར་ཐེ་ཚོམ་ཟ་བ་ཡང་ལྷག་མ་དང་ལྡན་པ་ཡིན་པའི་ཕྱིར་རོ། །གཉི་ག་ལ་ཡང་རབ་ཏུ་གྲུབ་པ་ནི་ཞེས་བྱ་བས་གང་ཡང་རུང་བ་ལ་མ་གྲུབ་པ་བསལ་བ་ཡིན་ནོ་ཞེས་
[76b]
[76b.1]བརྗོད་པ་ནི་གཉི་ག་ལ་ཞེས་བྱ་བའོ། །དེ་ལྟར་རྗེས་སུ་འགྲོ་བ་དང་ལྡོག་པར་རྟོགས་པ་ངེས་པར་བརྗོད་པས་གསལ་བར་བྱ་བ་གང་ཡིན་པ་དེ་བསྟན་ནས་རབ་ཏུ་གྲུབ་པ་སྨོས་པའི་བསལ་བར་བྱ་བ་ཡང་བཤད་པ་ནི། རབ་ཏུ་གྲུབ་པ་ཞེས་སྨོས་པས་ནི་ཐེ་ཚོམ་ཟ་བ་དག་ཀྱང་བསལ་ཏོ། །
[76b.2]དེ་དག་ཀྱང་གང་ཞེ་ན་ལྷག་མ་དང་ལྡན་པ་དང་ཐུན་མོང་མ་ཡིན་པ་ཞེས་སྨོས་སོ། །གང་ལ་ཐེ་ཚོམ་ཟ་ཞེ་ན་མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ་ཞེས་བྱ་བས་སྟོན་ཏོ། །ལྷག་མ་དང་ལྡན་པ་ནི་མི་མཐུན་པའི་ཕྱོགས་ལ་ཐེ་ཚོམ་ཟ་ལ་ཐུན་མོང་མ་ཡིན་པ་མཉན་བྱ་ཉིད་ལ་སོགས་
[76b.3]པ་ནི་མཐུན་པའི་ཕྱོགས་དང་མི་མཐུན་པའི་ཕྱོགས་གཉིས་ཀ་ལ་ཡང་ངོ་། །ཡང་ན་གཉི་ག་ཡང་གཉི་ག་ལ་ཐེ་ཚོམ་ཟ་བ་ཡིན་ཏེ་ཕྲུ་བའི་ནང་ན་འདུག་པ་ཉིད་ནི་མཐུན་པའི་ཕྱོགས་ལ་ཡང་ཐེ་ཚོམ་ཟ་བའི་ཕྱིར་རོ། །དེ་ནི་མཐོང་བའི་ཚོས་པ་འགའ་དག་ལ་མཐུན་པའི་ཕྱོགས་ལ་མཐོང་བ་ལྟར་
[76b.4]མི་མཐུན་པའི་ཕྱོགས་ལ་ཡང་མ་མཐོང་བ་ཉིད་དོ། །དེ་ཇི་ལྟར་མ་ངེས་པར་བྱེད་པ་མ་ཡིན་པ་དེ་བཞིན་དུ་མཐུན་པའི་ཕྱོགས་ལ་མཐོང་བ་ཡང་ཡིན་ནོ། །དེ་བཞིན་དུ་ཐུན་མོང་མ་ཡིན་པ་ལ་ཡང་མི་མཐུན་པའི་ཕྱོགས་ལ་ཡང་མ་མཐོང་བ་ཡང་ཡོད་པ་ཡིན་ནོ། །དེས་ན་གཉི་ག་གཉི་ག་
[76b.5]ལ་ཡང་ཡིན་པར་རིགས་སོ། །དེའི་ཕྱིར་ཇི་སྐད་བཤད་པའི་སེལ་བའི་འབྲས་བུ་ཅན་ཉིད་ཀྱི་ངེས་པར་བརྗོད་པ་ནི་འབྲེལ་པ་རྟོག་པར་བྱེད་པའི་འབྲས་བུ་ཅན་ཉིད་རྟོགས་པ་ཡིན་ནོ། །སློབ་དཔོན་འབྲེལ་པ་ཞལ་གྱིས་བཞེས་པར་བསྒྲུབ་པར་བྱ་བའི་ཕྱིར་ཤེས་པར་བྱེད་པ་གཞན་ཡང་
[76b.6]བཤད་པ་ནི་དེ་ལྟར་མ་ཡིན་ཏེ་ཞེས་བྱ་བའོ། །འབྲེལ་པ་སྟོན་པར་བྱེད་པ་ན་ངེས་པ་བཤད་པ་ཡིན་ནོ་ཞེས་བཤད་པ་གང་ཡིན་པ་དེ་ལྟར་མ་གྱུར་ན་ཞེས་བྱ་བའི་ཐ་ཚིག་གོ། །དེའི་ཚེ་ནི་འབྲེལ་པ་མེད་པར་ཡང་མ་མཐོང་བ་ཙམ་གྱིས་ལྡོག་པར་གྲུབ་པ་ཡིན་པར་འགྱུར་རོ། །དེ་བརྗོད་པ་ནི་
[76b.7]འབྲེལ་པ་མེད་ཀྱང་ཞེས་བྱ་བའོ། །དེ་ལྟ་ཡིན་ཡང་ཉེས་པ་གང་ཡོད་པ་དེ་བཤད་པ་ནི་འཁྲུལ་པ་ཅན་གྱི་གཉེན་པོར་ནི་ཞེས་བྱ་བའོ། །མ་མཐོང་བ་ཙམ་གྱི་ལྡོག་པ་ཡིན་ན་འདིས་གང་ཡིན་པ་ཞེས་བྱ་བས་མི་མཐུན་པའི་ཆོས་བརྗོད་པ་བཟུང་ནས་གལ་ཏེ་ཞེས་བྱ་བས་དེའི་དགོས་པ་རྟོགས་པར་བྱ་
[77a]
[77a.1]སྟེ། དེ་ཞེས་བྱ་བས་བསྟན་པ་དེ་མ་སྨོས་ཀྱང་རྟོགས་པར་འགྱུར་ཞེས་དོགས་པ་བཀག་པའི་མཐར་ཐུག་པ་ཉིད་ཀྱིས་ངག་མཐར་ཕྱིན་པར་ཉེ་བར་བསྟན་པར་འགྱུར་རོ། །འབྲེལ་པ་ཡང་མདོའི་མདོ་སྦྱོར་བཞིན་ཁོ་ནར་འབྲེལ་ཏོ། །འཁྲུལ་པ་ཅན་མ་ངེས་པ་སྤོང་བར་མི་མཐུན་
[77a.2]ཆོས་བརྗོད་པ་གང་ཡིན་པའོ། །འདི་ཉིད་རྣམ་པར་འགྲེལ་པ་ནི་རེ་ཞིག་ཅེས་བྱ་བའོ། །ཆོས་མཐུན་པ་དང་མི་མཐུན་པ་གཉི་ག་བརྗོད་པར་བྱ་བ་གང་ཡིན་པའི་དེ་ནི་རིགས་སོ། །རིགས་པ་ཉིད་སྟོན་པས་གཉི་ག་སྒྲུབ་པ་ལ་ཉེ་བར་མཁོ་བ་སྟོན་པ་ནི་འགལ་བ་དང་མ་ངེས་པའི་གཉེན་པོར་
[77a.3]ཞེས་བྱ་བ་ཡིན་ནོ། །བརྗོད་པ་འདི་ནི་འགལ་བ་དང་མ་ངེས་པའི་གཉེན་པོར་གྱུར་པ་ཡིན་ནོ། །ཆོས་མཐུན་པས་རྗེས་སུ་འགྲོ་བ་བསྟན་པས་ན་འགལ་བ་སེལ་བར་བྱེད་དོ། །བསྒྲུབ་བྱ་ཉིད་དང་རྗེས་སུ་འགྲོ་བ་ཡིན་གྱི་བསྒྲུབ་བྱ་ལས་བཟློག་པ་དང་ནི་མ་ཡིན་པའི་ཕྱིར་རོ། །ཆོས་མི་མཐུན་
[77a.4]པས་ནི་ལྡོག་པ་རྟོག་པའི་ཕྱིར་མི་མཐུན་ཕྱོགས་ལ་འཇུག་པའི་མཚན་ཉིད་མ་ངེས་པ་སེལ་བ་ཡིན་ནོ། །ཆོས་མི་མཐུན་པ་སྨོས་པས་ནི་མ་ངེས་པའི་གཉེན་པོར་རོ་ཞེས་བྱ་བ་ནི་ཚིག་ལེའུ་བྱས་པའི་དོན་སྟོན་པའོ། །སྔར་ནི་དོན་འདི་ཁས་བླངས་པའི་རང་བཞིན་སློབ་དཔོན་གྱི་ཚིག་བརྗོད་དོ། །གང་
[77a.5]ཡིན་པ་ཞེས་བྱ་བས་བཟུང་བ་མི་མཐུན་པའི་ཆོས་བརྗོད་པ་དེ་ཞེས་འབྲེལ་པར་འགྱུར་བ་ཡིན་ནོ། །གལ་ཏེ་ཞེས་བྱ་བས་ནི་དེའི་དགོས་པ་དགོས་པར་བྱེད་དོ། །གལ་ཏེ་མི་མཐུན་པའི་ཆོས་བརྗོད་པ་དེས་མ་མཐོང་བའི་འབྲས་བུ་ཅན་ཡིན་ནའོ། །འདི་ཉིད་གལ་ཏེ་མི་མཐུན་པའི་ཆོས་བརྗོད་པ་གང་
[77a.6]ཡིན་པ་དེས་མི་མཐུན་པའི་ཕྱོགས་ལ་མ་མཐོང་བ་སྟོན་པར་བྱེད་ན་ཞེས་བྱ་བས་རྣམ་པར་བཀྲལ་ནས་དེ་མེད་ཀྱང་དགོས་པ་དེ་གྲུབ་པར་མདོས་རྗོད་པར་བྱེད་པ་ནི་དེ་མ་སྨོས་ཀྱང་རྟོགས་པར་འགྱུར་ཞེས་བྱ་བའོ། །མ་མཐོང་བ་དེ་ནི་མི་མཐུན་པའི་ཆོས་བརྗོད་བྱ་རྟོགས་པ་ཁོ་ནའོ། །འདི་སྐད་བརྗོད་པ་
[77a.7]ཡིན་ཏེ་ཇི་སྲིད་དུ་མི་མཐུན་པའི་ཕྱོགས་ལ་མེད་པ་རབ་ཏུ་སྟོན་པར་བྱེད་པའི་ཚད་མ་བསྟན་པ་མ་བྱས་ཀྱི་བར་དུ་མི་མཐུན་པའི་ཕྱོགས་ལ་མེད་པ་ཙམ་ལ་བསྟན་པས་ནི་མི་མཐུན་པའི་ཕྱོགས་ལ་མེད་པར་མི་རྟོགས་སོ། །དེས་ན་ཆོས་མི་མཐུན་པ་བསྟན་པ་ནི་དེ་འཛིན་པར་བྱེད་པའི་ཚད་མའི་ཡུལ་ཅན་
[77b]
[77b.1]གྱི་དྲན་པ་སད་པར་བྱེད་པ་ཉིད་དོ། །དྲན་པའི་ཚད་མ་དེས་ཀྱང་ཚད་མ་དང་ལྡན་པའི་ཆོས་མི་མཐུན་པ་ལ་ཡང་དག་པ་ཁོ་ནར་མ་ངེས་པ་བསལ་བར་འགྱུར་རོ། །ལྡོག་པ་ངེས་པར་བྱེད་པའི་ཚད་མ་ཡང་མཐོང་བ་ཁོ་ན་ཡིན་ལ་དེ་ནི་ཆོས་མི་མཐུན་པ་མ་བརྗོད་ཀྱང་རྟོགས་པ་ཁོ་ནའོ། །འདི་
[77b.2]ལྟར་ཆོས་མཐུན་པ་ཉིད་བརྗོད་པར་བྱ་བ་ཡིན་ཏེ་བསྒྲུབ་པར་བྱ་བ་རྟོགས་པའི་དུས་ན་དེ་ལ་རྗེས་སུ་འགྲོ་བ་འཛིན་པའི་མཐོང་བ་ནི་མེད་དོ། །དེ་མེད་པར་རྗེས་སུ་འགྲོ་བ་མ་མཐོང་བ་གཏན་ཚིགས་ལས་དོན་རྟོགས་པ་མེད་དོ། །དེ་བརྗོད་ན་ནི་ཡུལ་དེ་ལ་སྔོན་ཞུགས་པ་ཁྱབ་པ་འཛིན་པའི་དུས་ན་
[77b.3]ཡོད་པ་མཐོང་བའི་ཡུལ་ཅན་གྱི་དྲན་པ་སྐྱེའོ། །ཆོས་མི་མཐུན་པ་བརྗོད་པས་རྟོགས་པར་བྱ་བ་མཐོང་བ་མེད་པ་ནི་དེ་ཉིད་ཀྱི་ཚེ་ཡོད་པ་ཉིད་དེ་དེས་ན་ཆོས་མི་མཐུན་པ་བསྟན་པས་དོན་ཅི་ཡོད། འདི་ལྟར་བསྒྲུབ་བྱ་རྟོགས་པའི་དུས་ན་ཡང་འདིས་མེ་མེད་པ་འགའ་ཞིག་ཏུ་དུ་བ་མཐོང་བ་ནི་
[77b.4]མེད་ལ། སྔར་གྱི་མ་མཐོང་བ་ཡང་རང་བཞིན་འདི་ཉིད་དུ་ཟད་དོ། །དུ་བ་ཡོད་ན་མེ་ཡོད་པ་ནི་དེའི་ཚེ་མ་དམིགས་ཏེ། དེའི་ཕྱིར་ཆོས་མཐུན་པ་བརྗོད་པར་རིགས་ཏེ། དེ་དེའི་ཚེ་མ་རྟོགས་པའི་ཕྱིར་རོ། །ལྡོག་པ་ནི་དེ་ཉིད་ཀྱི་ཚེ་རྟོགས་པ་ཁོ་ནའོ། །འདི་ཉིད་བཤད་པ་ནི་དེ་ལ་ལྡོག་པ་
[77b.5]བརྗོད་པའི་སྔོན་རོལ་ན་བརྗོད་པས་ལྡོག་པར་འགྱུར་བ་མི་མཐུན་པའི་ཕྱོགས་ལ་མཐོང་བའི་རང་བཞིན་དུ་འཁྲུལ་པ་གང་ཡིན་པ་དེ་ནི་མེད་དོ། །དེའི་ཚེ་ཡང་མ་མཐོང་བ་ཡོད་པ་ཁོ་ན་བས་བརྗོད་པ་དོན་མེད་དོ། །གལ་ཏེ་དེའི་ཚེ་མི་མཐུན་པའི་ཕྱོགས་ལ་མཐོང་བའི་རང་བཞིན་འཁྲུལ་པར་གྱུར་ན་
[77b.6]ནི་དེའི་ཚེ་སྔོན་རྟོགས་པའི་མ་མཐོང་བ་ཉེ་བར་སྟོན་པའི་ཚིག་དེ་གསལ་བའི་ཕྱིར་བརྗོད་པར་ཡང་འགྱུར་བ་ཞིག་ན་གང་གི་ཚེ་འཁྲུལ་པ་ཡང་མེད་པ་དེའི་ཚེ་ཡོད་བཞིན་པ་ཉིད་ཀྱི་མ་མཐོང་བ་ཁྱད་དུ་བསད་དེ་འབྲས་བུའི་མེད་པའི་ཚིག་ཙམ་ཉེ་བར་བཀོད་པ་འདིས་ཅི་ཞིག་བྱ། འདི་ཉིད་རྒྱ་ཆེར་
[77b.7]རྣམ་པར་ཕྱེ་ནས་བསྟན་པའི་ཕྱིར་གལ་ཏེ་ཚིག་གིས་མ་མཐོང་བ་ལས་ཞེས་དོགས་པ་བསུ་ནས། མཐོང་བ་མ་རྟོགས་པ་ནི་ཞེས་བྱ་བས་ལན་འདེབས་སོ། །མཐོང་བ་ནི་མཐུན་པའི་ཕྱོགས་ལ་གཏན་ཚིགས་ཡོད་པའི་ཡན་ལག་ཡིན་ན་དེ་བསྒྲུབ་པར་བྱ་བ་རྟོགས་པའི་དུས་ན་མེད་དོ་ཞེས་
[78a]
[78a.1]སྔོན་ཞུགས་པའི་མཐོང་བ་དྲན་པ་ལ་གནས་པས་རྟོགས་པར་གྱུར་ན་ཡན་ལག་ཡིན་ནོ། །གལ་ཏེ་བསྒྲུབ་པར་བྱ་བ་རྟོགས་པའི་དུས་ན་མཐོང་བ་བཞིན་དུ་མ་མཐོང་བ་ཡང་མེད་དོ་ཞེས་བྱ་བར་འདོད་ན་ནི། དེའི་ཚེ་མི་མཐུན་པའི་ཕྱོགས་ལ་མཐོང་བ་མེད་པས་མཐོང་
[78a.2]བར་འགྱུར་རོ། །དེ་མེད་དོ་ཞེ་ན་ནི་མ་མཐོང་བ་གྲུབ་པའི་ཕྱོགས་བརྗོད་པས་ཅི་བྱ་དེ་བཤད་པ་ནི་མཐོང་བ་ནི་ཞེས་བྱ་བའོ། །གལ་ཏེ་མ་མཐོང་བ་ཡོད་ཀྱང་འདི་མ་བརྟགས་པའི་ཕྱིར་མ་འཕྲིགས་པས་ན་དེའི་དོན་དུ་བརྗོད་དོ་ཞེ་ན་མ་ཡིན་ཏེ། སྒྲུབ་པར་བྱེད་པའི་སྐབས་ཉིད་ཀྱིས་ཡོངས་སུ་རྟོགས་པ་
[78a.3]ཡོད་པའི་ཕྱིར་རོ། །གང་གི་ཚེ་འདི་རང་ཉིད་རྗེས་སུ་དཔག་པ་ལ་འཇུག་གམ་གཞན་གྱིས་བཅུག་པ་དེའི་ཚེ་ཇི་ལྟར་ཕྱོགས་ཀྱི་ཆོས་མཐོང་བ་ན་བཟུང་བའི་རྗེས་སུ་འགྲོ་བ་དྲན་པ་ལ་ལྟོས་པ་དེ་བཞིན་དུ་མི་མཐུན་པའི་ཕྱོགས་ལ་མ་མཐོང་བ་ལ་ནི་མ་ཡིན་ནོ། །དེའི་མཐུན་པའི་ཕྱོགས་ལ་ཡོད་དམ་མེད་ཅེས་
[78a.4]ཐེ་ཚོམ་ཟ་བ་ནི་རང་ཉིད་དེ་ལྟར་དམིགས་པ་དྲན་པའམ་ཆོས་མཐུན་པ་བརྗོད་པས་བཅུག་པ་ལས་ལྡོག་པ་ཡིན་གྱི། མི་མཐུན་པའི་ཕྱོགས་ལ་ཡོད་པ་དང་མེད་པར་ཐེ་ཚོམ་ཟ་བ་དེ་ལ་མ་མཐོང་བས་བཟློག་པར་བྱ་བ་ནི་དེའི་དུས་དུས་ངེས་པའི་མ་མཐོང་བ་ཉིད་ཀྱིས་བཟློག་པ་ཡིན་ནོ། །དེ་ལ་ནི་དྲན་
[78a.5]པའམ་དེ་སད་པར་བྱེད་པའི་ཚིག་གིས་ཅི་ཡང་བྱར་མེད་དོ། །དེའི་ཚེ་མ་དམིགས་ཀྱང་སྔར་ཡང་དམིགས་པར་དོགས་པ་བསལ་བའི་ཕྱིར་མ་དམིགས་པ་དྲན་པའི་དོན་དུ་བརྗོད་དོ་ཞེ་ན། འདི་ལ་སྔོན་བརྗོད་པས་ལྡོག་པར་འགྱུར་བ་མཐོང་བའི་འཁྲུལ་པ་གང་ཡིན་པ་ནི་མེད་དོ་ཞེས་བཤད་ཟིན་ཏོ། །གལ་
[78a.6]ཏེ་ད་ལྟར་ཡོད་ན་སྔོན་གྱི་མ་མཐོང་བ་དྲན་པ་ལ་ལྟོས་པ་ཡིན་ཏེ། ཟླ་བ་གཉིས་ལ་སོགས་པར་ཤེས་བཞིན་དུ་འཁྲུལ་པ་ལ་འཁྲུལ་པར་རྟོགས་ཀྱང་མི་ལྡོག་པའི་ཆོས་ཅན་ཉིད་ཀྱིས་དེའི་ཚེ་མ་མཐོང་བས་མ་ངེས་པ་ཡིན་ཡང་སྔོན་གྱི་མ་མཐོང་བ་ལ་ལྟོས་ནས་ངེས་པའི་ཕྱིར་རོ། །སྔར་མ་མཐོང་
[78a.7]བ་ལ་འཁྲུལ་པར་ཡང་ད་ལྟར་གྱི་ལ་ལྟོས་ནས་ཡིན་ནོ། །འོན་ཏེ་སྔར་མཐོང་བར་ཐེ་ཚོམ་ཟ་བ་ཉིད་འཁྲུལ་པར་བརྗོད་དོ་ཞེ་ན། དེ་ཡང་མི་རིགས་ཏེ་དེ་ཡང་མེད་པའི་ཕྱིར་རོ། །སྒྲུབ་པར་བྱེད་པ་མི་མཐུན་པའི་ཕྱོགས་སམ་མཐུན་པའི་ཕྱོགས་ལ་མཐོང་ངམ་མ་མཐོང་སྙམ་དུ་ཐེ་ཚོམ་ཟ་བ་ནི་མ་ཡིན་
[78b]
[78b.1]གྱི་འོན་ཀྱང་བསྒྲུབ་པར་བྱ་བ་རྟོགས་པའི་དུས་ན་ཐེ་ཚོམ་མེད་པ་ཉིད་ཀྱིས་མཐོང་བ་དང་། མ་མཐོང་བ་གཉིས་མ་རྟོགས་པས་ཁོ་ན་སྟེ། དེ་སྔོན་བརྗོད་པ་ལྡོག་པར་འགྱུར་བ་མཐོང་བའི་འཁྲུལ་པ་གང་ཡིན་པ་ནི་མེད་དོ་ཞེས་བརྗོད་པ་ཡིན་ནོ། །དེ་ལ་འདིར་བརྗོད་པ་མཐོང་བ་ནི་དེའི་དུས་ན་མེད་པའི་ཕྱིར་
[78b.2]དྲན་པར་བྱ་བ་ཉིད་ཀྱིས་ལྟོས་པར་བྱ་བ་ཉིད་དུ་རིགས་པ་ཡིན་ནོ། །མ་མཐོང་བ་ནི་དེའི་ཚེ་ཡང་ཡོད་པ་ཁོ་ན་བས་དེ་ལ་དྲན་པས་ཅི་ཞིག་བྱ། ཅི་སྟེ་ཡང་སྔོན་གྱི་མི་མཐུན་པའི་ཕྱོགས་ལ་མ་མཐོང་བ་ལ་ཐེ་ཚོམ་ཟ་ན་དེ་ལྟ་ན་འོ་ན་ནི་བརྗོད་ཀྱང་དེ་མི་ལྡོག་སྟེ་ཚད་མ་མ་ཡིན་པའི་ཕྱིར་རོ། །ཚིག་ནི་མ་མཐོང་
[78b.3]བ་ངེས་པར་རྟོགས་པའི་འདུ་བྱེད་སད་པར་བྱེད་པ་ཉིད་ཀྱིས་དྲན་པར་བྱེད་པ་ན་ལྡོག་པར་བྱེད་པ་ཡིན་ནོ་ཞེ་ན། མ་ཡིན་ཏེ་འབད་པ་མེད་པར་དྲན་བཞིན་དུ་ཐེ་ཚོམ་ཡང་མེད་པའི་ཕྱིར་རོ། །འབད་རྩོལ་ལས་ནི་དྲན་པའི་ས་བོན་ཡོད་ན་དྲན་པ་ཉིད་ཀྱིས་ཐེ་ཚོམ་མེད་པར་འགྱུར་རོ། །འབད་རྩོལ་ལས་ཀྱང་མི་དྲན་
[78b.4]པའི་ཐེ་ཚོམ་ཟ་བ་གང་ཡིན་པ་དེ་ལ་ནི་ཚིག་གིས་ཕན་པ་མ་ཡིན་ནོ། །དེས་ན་དེའི་དུས་ཀྱི་ཐེ་ཚོམ་མེད་པའི་མ་མཐོང་བ་ཉིད་ལ་བརྟེན་ནས་མི་མཐུན་པའི་ཕྱོགས་ལ་མེད་པ་ངེས་པར་བྱ་བ་ཁོ་ན་ཡིན་ནོ། །ཡང་ནས་ཡང་དུ་མ་མཐོང་བས་ཁྱབ་པ་རྟོགས་པར་བྱ་བ་ཡིན་པའི་ཕྱིར་དེ་ཡང་ནས་ཡང་
[78b.5]དུ་ཡིན་པར་སྒྲུབ་པའི་རྒྱུར་སྔོན་མ་མཐོང་བ་ཡང་དྲན་པར་བྱ་བ་ཡིན་ནོ་ཞེ་ན། མ་མཐོང་བ་ལ་ནི་ཡང་ནས་ཡང་གི་རང་བཞིན་ཡོད་པ་མ་ཡིན་ཏེ། དངོས་པོ་མེད་པའི་ཕྱིར་རོ། །རྟེན་དེ་དང་དེ་དག་ལ་དེས་དབེན་པར་དམིགས་པ་དེ་ཡང་ནས་ཡང་ཉིད་དོ་ཞེ་ན། འདི་ལ་ཡང་ཡོད་པ་ཉིད་དེ་དེའི་ཚེ་ཡང་
[78b.6]རྟེན་དཔག་ཏུ་མེད་པ་ལ་མ་དམིགས་པའི་ཕྱིར་རོ། །སྨྲས་པ་གལ་ཏེ་འདིས་དེའི་ཚེ་ཡང་མི་མཐུན་པའི་ཕྱོགས་ལ་ཡོད་པ་མ་དམིགས་པ་དེ་ལྟ་ན་ཡང་མ་དམིགས་པའི་མི་དམིགས་པ་ཙམ་གྱིས་མེད་དོ་ཞེས་བྱ་བ་མ་ཡིན་པ་ཉིད་པས་དེའི་དོན་དུ་བརྗོད་དོ། །དེས་ནི་འདིའི་འདི་ནི་རྣམ་པ་འགའ་ཞིག་ལྟར་
[78b.7]མ་དམིགས་པ་ཡིན་ནོ་སྙམ་དུ་འདི་ནི་ཐམས་ཅད་དུ་མི་མཐུན་པའི་ཕྱོགས་ལ་མ་དམིགས་པ་ཡིན་ནོ་ཞེས་བྱ་བ་ལ་ལོག་པར་རྟོག་པ་ལྡོག་གོ་ཞེ་ན། གལ་ཏེ་མ་དམིགས་པའི་ཞེས་བྱ་བས་དོགས་པ་དེ་བསུ་ནས། མེད་ཅེས་བྱ་བའི་ཞེས་བྱ་བས་སེལ་བར་བྱེད་དོ། །བསྒྲུབ་པར་བྱ་བ་མེད་པ་ལ་མེད་ཅེས་
[79a]
[79a.1]བྱ་བའི་ཚིག་གང་གིས་བསྒྲུབ་བྱ་མེད་ན་མེད་པར་བརྗོད་པ་སྟེ། དེ་ནི་ཆོས་མི་མཐུན་པའི་ངག་ཉིད་དོ། །ཆོས་མི་མཐུན་པའི་ངག་གིས་ཀྱང་དེ་མེད་པ་ཁོ་ན་ཡིན་ནོ། །འོ་ན་ཇི་ལྟར་མེད་པར་འགྱུར་ཞེ་ན། བཤད་པ་གལ་ཏེ་ཇི་ལྟར་དེ་རྣམ་པ་གང་གིས་མེད་རིགས་བརྗོད་ན།
[79a.2]དེ་ཚེ་མེད་ཅེས་བྱ་བར་རྟོགས། །རྣམ་པ་གང་གིས་མེད་པའི་རིགས་པ་ཞེས་བྱ་བ་ནི་རྣམ་པ་ཉིད་རིགས་པའི་རང་བཞིན་དུ་བཤད་པ་ཡིན་ནོ། །ཚིག་གིས་ནི་མི་མཐུན་པའི་ཕྱོགས་ལ་མེད་པར་སྟོན་པ་ཡིན་ནོ། །མི་མཐུན་པའི་ཕྱོགས་ཀྱང་གང་ལ་བསྒྲུབ་པར་བྱ་བ་མེད་པ་དེ་ཡིན་ནོ། །
[79a.3]བསྒྲུབ་པར་བྱ་བས་སྟོང་པའི་རྟེན་གྱི་ཁྱད་པར་ནི་དེའི་ཚེ་ཡང་དམིགས་པ་ཁོ་ན་ཡིན་ནོ། དེ་དག་ལ་ཡང་སྒྲུབ་པར་བྱེད་པ་མི་དམིགས་པ་ནི་མ་ཡིན་ནོ། །དེས་ན་གང་དུ་མ་དམིགས་པ་ལ་ཡང་ཡིད་མི་ཆེས་པ་དེར་ཚིག་ཀྱང་དེ་སྟོན་པ་ཉིད་ཀྱི་འབྲས་བུ་དང་ལྡན་པ་ཡིན་གྱི་མེད་པ་སྟོན་པ་ནི་མ་
[79a.4]ཡིན་ནོ། །དེ་ལྟར་དེས་ན་དེའི་ཚེ་ཚད་མས་གྲུབ་པ་ཉིད་སྟོན་པའི་ཕྱིར་རོ། །དེའི་ཕྱིར་ཆོས་མི་མཐུན་པ་བརྗོད་པ་ནི་ཚད་མ་སྟོན་པ་གཙོར་བྱེད་པ་ཉིད་དོ། །ཚད་མ་ད་ནི་དེའི་ཚེ་ན་ཡོད་པ་མ་ཡིན་ཡང་ཡིད་བརྟན་དུ་ནུས་པ་མེད་པའི་ཕྱིར། བརྗོད་ཀྱང་དོན་མེད་པ་ཁོ་ནའོ། །དེའི་ཕྱིར་ཚིག་གིས་ཀྱང་
[79a.5]མེད་དོ་ཞེས་མི་རྟོགས་སོ། །འདི་ཉིད་རྣམ་པར་འགྲེལ་པས་བཤད་པ་ནི་གལ་ཏེ་ཞེས་བྱ་བའོ། །འདིས་ནི་མི་དམིགས་པ་ལ་ཡིད་མི་ཆེས་པ་ཉིད་དོ་ཞེས་བཤད་དོ། །དེ་བཞིན་དུ་ཆོས་མི་མཐུན་པ་བརྗོད་པ་ཡང་ཡིན་ནོ་ཞེས་བྱ་བ་ནི་བརྗོད་པས་ཀྱང་ཞེས་བྱ་བའོ། །དེ་ཡང་མི་དམིགས་པ་
[79a.6]རྗོད་པར་བྱེད་པ་ཉིད་དོ། །གལ་ཏེ་བསྒྲུབ་པར་བྱ་བས་གཏན་ཚིགས་ལ་ཁྱབ་པས་ཁྱབ་པར་བྱེད་པ་མེད་པ་ལ་ཁྱབ་པར་བྱ་བ་མེད་པ་ཡིན་ནམ། འདི་དག་གིས་བསྒྲུབ་པར་བྱ་བ་དང་། སྒྲུབ་པར་བྱེད་པའི་དངོས་པོ་དེ་ཡང་སྒྲུབ་པར་བྱེད་པ་རྟོགས་པའི་དུས་ཉིད་ན་རྟོགས་པར་བྱ་བ་མ་ཡིན་གྱི།
[79a.7]འོན་ཀྱང་ཁྱབ་པ་འཛིན་པའི་དུས་སུ་རྟོགས་པ་ཡིན་ནོ། །ཁྱབ་པ་ཡང་དང་ཡང་ཞུགས་པའི་མཐོང་བ་དང་མ་མཐོང་བ་དག་གིས་རྟོགས་པ་ཡིན་ནོ། །དེས་ན་འདི་དག་གིས་ངེས་པའི་བདག་ཉིད་ཀྱི་ཁྱད་པར་ཁྱབ་པ་འཛིན་པའི་དུས་ན་རྟོགས་པ་གང་ཡིན་པ་དེ་བསྒྲུབ་བྱ་རྟོགས་པའི་དུས་ན་ཚིག་
[79b]
[79b.1]གིས་དྲན་པའི་རྟེན་དུ་ཉེ་བར་བསྒྲུབ་པའི་ཕྱིར་བསྒྲུབ་བྱ་རྟོགས་པའི་དུས་ན་མ་མཐོང་བ་ཡོད་ཀྱང་དེར་ཡན་ལག་མ་ཡིན་ནོ། །དེའི་བསྒྲུབ་བྱ་མེད་ན་སྒྲུབ་པར་བྱེད་པ་མེད་པའི་མཚན་ཉིད་ཅན་གྱི་ཁྱད་པར་ནི་ཆོས་མཐུན་པ་བརྗོད་པས་རྟོགས་པར་བྱེད་པ་ཡིན་ནོ་ཞེས་བྱ་བ་འདི་ནི་རིགས་སོ་ཞེས་བྱ་བའི་དོགས་པ་
[79b.2]འདི་བསུ་ནས་བཤད་པ་ནི། བསྒྲུབ་པར་བྱ་བ་གཅིག་མི་དམིགས་པས་གཞན་མེད་པ་སྒྲུབ་པར་བྱེད་པ་མ་ཡིན་ཏེ་ཧ་ཅང་ཐལ་བར་འགྱུར་བའི་ཕྱིར་རོ། །གཞན་ཉིད་དུ་ཁྱད་པར་མེད་པའི་ཕྱིར་བུམ་པ་ལོག་པས་ཀྱང་སྣམ་བུ་ལྡོག་པར་འགྱུར་རོ། །བསྒྲུབ་པར་བྱ་བ་དང་སྒྲུབ་པར་བྱེད་པ་དག་
[79b.3]འབྲེལ་པ་མེད་པར་ནི་གང་ལས་དངོས་པོའི་མཐུ་ཉིད་ཀྱིས་གཅིག་ཡོད་ན་གཞན་ཡོད་པར་འགྲུབ་པ་ཁྱབ་པ་དང་ཁྱབ་པར་བྱེད་པའི་དངོས་པོ་ཡང་མི་འགྲུབ་བོ། །གལ་ཏེ་འབྲེལ་པ་མེད་ཀྱང་གཅིག་མེད་པའི་ཕྱིར་གཞན་མེད་དོ་ཞེས་བྱ་བར་འདོད་པ་ནི་ཧ་ཅང་ཐལ་བར་འགྱུར་རོ། །ཚིག་ནི་
[79b.4]མི་དམིགས་པར་རྗོད་པར་བྱེད་པ་ཉིད་སྤངས་ནས་ཚིག་གི་རང་བཞིན་ཉིད་ཀྱིས་ཡན་ལག་མ་ཡིན་ནོ་ཞེས་བཤད་པ་ནི་མེད་དོ་ཞེས་བརྗོད་པས་ཀྱང་ཞེས་བྱ་བ་ཡིན་ནོ། །ཚིག་གི་རང་བཞིན་ཙམ་ཉིད་ཀྱིས་ནི་ཚིག་གིས་མེད་པར་གོ་བར་བྱེད་པ་མ་ཡིན་གྱི་འོན་ཀྱང་སྔོན་ཞུགས་པའི་ཚད་
[79b.5]མ་སྟོན་པར་བྱེད་པ་ཉིད་ཀྱིས་སོ། །དེས་ན་ཇི་ལྟར་ཞེས་ཇི་ལྟར་ཡང་ཆོས་མི་མཐུན་པ་བརྗོད་པས། མ་ངེས་པ་སྤངས་པ་མ་ཡིན་ཏེ། ཚིག་ཙམ་གྱི་རང་བཞིན་གྱིས་མ་ཡིན། གཞན་མེད་ན་གཞན་མེད་པ་གོ་བར་བྱེད་པ་ཉིད་ཀྱིས་མ་ཡིན། སྔར་ཞུགས་པའི་ཚད་མ་སྟོན་པར་
[79b.6]བྱེད་པ་ཉིད་ཀྱིས་མ་ཡིན་ཏེ་མ་མཐོང་བ་ཙམ་གྱིས་ལུས་ཅན་དེ་ནི་དེའི་ཚེ་ཡང་ཡོད་པའི་ཕྱིར་རོ། །དེ་ལྟ་བས་ན་བསྒྲུབ་པར་བྱ་བ་མེད་པ་ལ་སྒྲུབ་པར་བྱེད་པ་ལྡོག་པར་ཏེ། མེད་པར་འདོད་པས་མ་མཐོང་བ་ཙམ་གྱིས་གྲུབ་པ་སྤངས་ཏེ། གང་གིས་ན་རྟོགས་པ་པོ་དེ་ལ་ལྡོག་པ་ཞེས་བྱ་བར་
[79b.7]རྟོགས་པར་འགྱུར་བའི་རིགས་པ་བརྗོད་དགོས་སོ། །ཉེས་པ་གཞན་ཡང་བསྟན་པའི་ཕྱིར་སྤངས་ཟིན་པ་ཉིད་ཡིན་ཡང་རྩོད་པར་བྱེད་པ་དེས་མེད་པ་ལ་ཞེས་བྱ་བའོ། །བསྒྲུབ་པར་བྱ་བ་དེ་མེད་པ་ལ་སྒྲུབ་པར་བྱེད་པ་དེ་མི་དམིགས་པས་ན་བསྒྲུབ་པར་བྱ་བ་ལ་མེད་པའི་མཚན་ཉིད་ཀྱིས་ལྡོག་
[80a]
[80a.1]པ་གྲུབ་བོ་ཞེ་ན། འདི་དགག་པའི་ཕྱིར་གལ་ཏེ་ཞེས་སྨོས་སོ། །གལ་ཏེ་བསྒྲུབ་པར་བྱ་བ་མེད་པ་ལ་གཏན་ཚིགས་མ་མཐོང་བའི་ཕྱིར་བསྒྲུབ་པར་བྱ་བ་མེད་པ་ལས་ལྡོག་པར་འགྱུར་ན་ཇི་ལྟར་ལྷག་མ་དང་ལྡན་པའི་རྗེས་སུ་དཔག་པ་འཁྲུལ་པ་ཅན་ཡིན། དེ་ལ་ཡང་
[80a.2]མི་མཐུན་པའི་ཕྱོགས་ལ་མ་མཐོང་བ་ཡོད་པའི་ཕྱིར་རོ། །འཁྲུལ་པ་ཅན་དུ་ཡང་སློབ་དཔོན་གྱིས་གསུངས་སོ། །དེས་ན་གཏན་ཚིགས་ཐམས་ཅད་དེ་དང་མཚུངས་པའི་འཁྲུལ་པ་ཅན་དུ་བརྗོད་པར་འགྱུར་རོ། །ལྷག་མ་དང་ལྡན་པ་དེ་ཡང་གང་ཡིན་ཞེ་ན་དེའི་རང་བཞིན་ངོ་བོ་བཤད་
[80a.3]པ་ནི། དཔེར་ན་ཞེས་བྱ་བའོ། །འབྲས་བུ་འདི་དག་ནི་ཆོས་ཅན་སྨིན་པའམ་རོ་བྲོ་བ་ཡིན་ཏེ་ཞེས་བྱ་བ་ནི་བསྒྲུབ་པར་བྱ་བ་གཟུགས་ཁྱད་པར་མེད་པའི་ཕྱིར་རམ། གཅིག་ལས་སྐྱེས་པའི་ཕྱིར་ཞེས་བྱ་བའི་གཏན་ཚིགས་ཟོས་པ་དང་འདྲའོ་ཞེས་བྱ་བ་ནི་དཔེའོ། །ད་ནི་འདི་ཇི་ལྟར་མི་
[80a.4]མཐུན་པའི་ཕྱོགས་ལ་མ་མཐོང་བ་དེ་འཆད་དོ། །ལྷག་མ་དང་ལྡན་པ་འདི་ལ་ཡང་བསྒྲུབ་པར་བྱ་བ་མེད་པ་ལ་གཏན་ཚིགས་མི་དམིགས་པ་ཡོད་པ་ཡིན་ཏེ། དེ་བས་ན་ཇི་ལྟར་འཁྲུལ་པ་ཡིན་འཁྲུལ་པ་ཅན་ནི་ལྡོག་པ་མ་ངེས་པ་ཉིད་ཡིན་ལ། ལྡོག་པ་ངེས་པར་བྱེད་པ་མི་དམིགས་
[80a.5]པ་ཙམ་ཡང་ཡོད་པ་ཉིད་དེས་ན་འཁྲུལ་པ་དང་ལྡན་པར་འགྱུར། ཡལ་ག་དེ་ལས་སྐྱེས་པ་ཉིད་ནི་རོ་དེ་མེད་པ་ལ་དམིགས་པ་མེད་དོ། །འོན་ཏེ་ཡང་གལ་ཏེ་ཟོས་པའི་འབྲས་བུ་ལ་ཡལ་ག་དེ་ལས་སྐྱེས་པ་ཉིད་ཡོད་ན་དེའི་རང་བཞིན་དུ་དམིགས་པ་དེ་ལྟ་ན་ཡང་འབྲས་བུ་གཞན་ལ་དེ་ལས་
[80a.6]སྐྱེས་པ་ཉིད་དེ་མེད་པར་ཡང་འགྱུར་རོ། །གང་གིས་དེ་ལ་རོ་དེར་རྟོགས་པར་འགྱུར་བ་འབྲས་བུ་གཞན་ཡང་ཟོས་པ་ནི་མ་ཡིན་ཏེ། དེས་ན་ལྡོག་པ་ལ་ཐེ་ཚོམ་ཟའོ། །འབྲས་བུ་གཞན་དག་ལ་ནི་དེ་ལས་སྐྱེས་པ་ཉིད་བསྒྲུབ་པར་བྱ་བའི་རོ་དང་ལྡན་པ་ཉིད་ལ་འཇུག་གམ་རོ་གཞན་དང་ལྡན་
[80a.7]པ་ལ་འཇུག་པ་ཡིན་ཞེས་དེ་རྟོགས་པར་བྱེད་མི་ནུས་སོ། །དེ་ཉིད་ཀྱི་ཕྱིར་འདི་ལྷག་མ་དང་ལྡན་པ་ཞེས་བརྗོད་དེ། བསྒྲུབ་པར་བྱ་བ་ཡོད་པ་དང་མེད་པར་ཐེ་ཚོམ་ཟ་བ་འཁྲུལ་པའི་ཡུལ་ངེས་པ་མེད་པའི་འབྲས་བུ་གཞན་ཡོད་པའི་ཕྱིར་རོ་ཞེ་ན། དོགས་པ་འདི་བསུ་ནས་བཤད་པ་ནི། བརྗོད་
[80b]
[80b.1]པར་འདོད་པ་མ་ལུས་པ་ཕྱོགས་སུ་བྱས་ན་ཞེས་བྱ་བའོ། །འདིར་གཏན་ལ་མ་ཕེབས་པས་གཅིག་ཟོས་ཀྱང་ལྷག་མ་འཁྲུལ་པའི་ཡུལ་ཉིད་དུ་བརྗོད་པར་འདོད་པ་གང་ཡིན་པའི་བརྗོད་པར་འདོད་པ་དེ་དག་མ་ལུས་པར་ཕྱོགས་སུ་བྱས་པར་གྱུར་ནའོ། །འདི་སྐད་བརྗོད་པ་ཡིན་ཏེ། འཁྲུལ་
[80b.2]པའི་ཡུལ་ཉིད་དུ་དོགས་པ་ཐམས་ཅད་ཕྱོགས་སུ་བྱས་པ་ལ་ནི་རོ་དེ་དང་དེ་མ་ཡིན་པར་ཐེ་ཚོམ་ཟ་བ་རྗེས་སུ་དཔག་པ་ཉིད་ཀྱིས་བཟློག་པར་བྱ་བ་ཡིན་གྱི་ཕྱོགས་ལས་བསྒྲུབ་པར་བྱ་བའི་ཆོས་ཐེ་ཚོམ་ཟ་བས་ནི་གཏན་ཚིགས་ཀྱི་ལྡོག་པ་མ་ངེས་པ་ཉིད་ཀྱིས་འཁྲུལ་པར་འགྱུར་བ་མ་ཡིན་ནོ། །
[80b.3]ཕྱོགས་ཉིད་ནི་འཁྲུལ་པའི་ཡུལ་མ་ཡིན་ཏེ་དེའི་ཕྱིར་ཟོས་པའི་འབྲས་བུ་ལ་དེ་ལས་སྐྱེས་པ་ཉིད་ཡོད་ན་རོ་དེ་མཐོང་བའི་ཕྱིར་རྗེས་སུ་འགྲོ་བ་རྟོགས་ལ་རོ་དེ་མེད་པར་ནི་འགར་ཡང་དེ་ལས་སྐྱེས་པ་ཉིད་མ་མཐོང་བས་བསྒྲུབ་པར་བྱ་བ་མེད་པ་ལ་དེ་མ་དམིགས་པའི་ཕྱིར་ལྡོག་པར་རྟོགས་
[80b.4]སོ། །གལ་ཏེ་ཁྱབ་པ་འཛིན་པའི་དུས་ན་མཐུན་པའི་ཕྱོགས་དང་ཅིག་ཤོས་ལ་ཡོད་པ་དང་མེད་པར་རྟོགས་པའི་གཏན་ཚིགས་བསྒྲུབ་པར་བྱ་བ་རྟོགས་པའི་དུས་ན་ཡན་ལག་མ་ཡིན་ནམ། འབྲས་བུ་དེ་ཟོས་པའི་དུས་ཉིད་ཁྱབ་པ་འཛིན་པའི་དུས་ཡིན་ནོ་ཞེ་ན། དེའི་ཚེ་ཡང་བསྒྲུབ་པར་བྱ་
[80b.5]བ་མེད་པ་ལ་གཏན་ཚིགས་མེད་པ་མི་མཐུན་པ་ཕྱོགས་ལ་བལྟར་རུང་བ་མཐོང་བས་རྟོགས་པར་བྱ་བ་ཡིན་ན་ལྕེའི་དབང་པོ་བྱེད་པ་མེད་པ་ནི་རོ་བལྟར་རུང་བ་མ་ཡིན་ནོ། །ཡལ་ག་ལ་སོགས་པ་འབྲས་བུ་དེ་ཙམ་ཞིག་སྐྱེད་པ་ཡིན་པའི་ཕྱིར་དེ་ལས་སྐྱེད་པ་ཉིད་གཞན་ལ་མེད་པ་ཡིན་ནམ།
[80b.6]འོན་ཏེ་རོ་དེ་མེད་པས་ཡིན་ཞེས་མ་མཐོང་ཡང་ལྡོག་པ་ལ་ཐེ་ཚོམ་ཟ་བ་ཉིད་དོ་ཞེ་ན། བརྗོད་པ་རོ་གཞན་ཉམས་སུ་མྱོང་བ་ལ་ཡང་རོ་དེ་མེད་པར་དེ་ལས་སྐྱེས་པ་དམིགས་པ་ནི་མེད་དོ། །དེ་ལ་ནི་དེ་ལས་སྐྱེས་པ་ཉིད་དམིགས་པའི་མཚན་ཉིད་དུ་གྱུར་པ་ཁོ་ན་ཡིན་ཏེ། འབྲས་བུ་གཞན་ལས་སྐྱེ་བར་
[80b.7]དམིགས་པའི་ཕྱིར་རོ། །རོ་གཞན་དམིགས་པའི་ཕྱིར་ཡང་དམིགས་པར་རུང་བའི་རོ་དེ་མེད་པ་ཡིན་ནོ། །དེ་ལྟར་སྨྲ་བ་ལ་ནི་བསྒྲུབ་པར་བྱ་བ་དང་སྒྲུབ་པར་བྱེད་པ་སྣང་བ་མི་དམིགས་པས་ཅི་ཡང་བྱར་མེད་དེ་མཐོང་བའི་རྟེན་ཙམ་དངོས་པོ་མེད་པར་སྒྲུབ་པའི་ཡན་ལག་མ་ཡིན་པའི་ཕྱིར་རོ། །ཐམས་
[81a]
[81a.1]ཅད་དུ་དེ་ལྟར་མེད་པ་ནི་ལྡོག་པ་ཡིན་ནོ་ཞེས་བཤད་ཟིན་ཏེ། དེས་ན་འགའ་ཞིག་ཏུ་ཁས་བླངས་ནས་དམིགས་པར་རུང་བ་མི་དམིགས་པ་ཉིད་ཡིན་ཡང་། ཐམས་ཅད་དུ་དེ་ལྟ་བུ་ཡིན་པ་ལ་ནི་དམིགས་པ་ལོག་པ་ཙམ་ཉིད་ཚད་མར་བྱ་བ་ཡིན་ནོ། །དེས་ན་རོ་གཞན་དང་སྐྱེ་བ་
[81a.2]གཞན་མ་དམིགས་ཀྱང་རོ་དེ་མེད་པ་ཉིད་ལ་དེ་ལས་སྐྱེས་པ་ཉིད་དམིགས་པ་མེད་པ་ནི་གྲུབ་པ་ཁོ་ནའོ། །སློབ་དཔོན་གྱི་གཞུང་འཆད་པར་བྱེད་པ་ཁ་ཅིག་ན་རེ་ནི་འདི་ལྟ་སྟེ་མངོན་སུམ་གྱིས་གནོད་པར་དོགས་པའི་འཁྲུལ་པ་ཡིན་ནོ་ཞེས་ཟེར་རོ། །གཏན་ཚིགས་ཀྱིས་ཡུལ་ལ་ཞུགས་སུ་
[81a.3]ཟིན་ཀྱང་འདི་ལ་མངོན་སུམ་གྱིས་གནོད་པར་དོགས་པ་ཡིན་ནོ། །འདི་ལྟར་དེ་ལས་རྗེས་སུ་དཔག་པའི་དོན་ལ་ཞུགས་པ་རེས་འགའ་དེ་ལ་རོ་གཞན་དམིགས་པ་སྲིད་པ་ཡིན་ནོ། །དེ་ལྟར་ཡིན་ཡང་དེའི་འབྲས་བུ་ཉིད་ཀྱི་གཏན་ཚིགས་ཀྱིས་སྔོ་བསངས་ཞེས་རྗེས་སུ་དཔག་པ་ན་དེ་སྔོ་བསངས་
[81a.4]མ་ཡིན་པར་ཡང་མངོན་སུམ་གྱིས་མཐོང་བ་དེ་བཞིན་དུ་འདི་ལ་ཡང་འགྱུར་རོ། །དེ་ཉིད་ཀྱི་ཕྱིར་གཏན་ཚིགས་ལ་ཚུལ་གསུམ་ཡོད་ཀྱང་གནོད་པ་མེད་པའི་ཡུལ་ཅན་ཉིད་ཀྱང་མཚན་ཉིད་དུ་བསྟན་པར་བྱ་བ་ཡིན་ནོ་ཞེ་ན། མ་ཡིན་ཏེ་ཞེས་པས་དེ་འགོག་པར་བྱེད་དོ། །རྗེས་སུ་དཔོག་པའི་དུས་
[81a.5]ན་ཕྱོགས་ལྐོག་ཏུ་གྱུར་པ་ཡིན་པའི་ཕྱིར་ཕྱོགས་སུ་བྱས་པའི་ཡུལ་ལ་མངོན་སུམ་གྱིས་གནོད་པ་མེད་པ་ཁོ་ནའོ། །དེའི་ཕྱིར་རྗེས་སུ་དཔག་པར་བྱ་བའི་ཆོས་ནི་རྗེས་སུ་དཔག་པས་གྲུབ་པ་ཉིད་དོ། །བདེན་ཏེ་རྗེས་སུ་དཔག་པ་འཇུག་པའི་གནས་སྐབས་ན་ཕྱོགས་ལྐོག་ཏུ་གྱུར་པ་ཡིན་པའི་ཕྱིར་
[81a.6]དེ་ལ་ཆོས་མངོན་སུམ་གྱིས་གནོད་པ་མེད་པ་དེ་ལྟ་ན་ཡང་འདིར་ཡོད་པ་ཉིད་ཀྱིས་གནོད་པ་ནི་མ་ཡིན་ཏེ་འོན་ཀྱང་གནོད་པར་དོགས་པ་ཉིད་དོ་ཞེན་ཅི་སྟེ་ཞེས་བྱ་བས་དོགས་པ་འདི་བསུ་ནས་དེ་ལྟ་བུར་དོགས་ན་ཞེས་བྱ་བས་ཟློག་པར་བྱེད་དོ། །གལ་ཏེ་ཡོངས་སུ་དག་པའི་ཚུལ་གསུམ་པ་ཅན་གྱི་རྗེས་
[81a.7]སུ་དཔག་པ་ཡོད་ཀྱང་གནོད་པར་དོགས་པ་འཁྲུལ་པ་ཉིད་ཡིན་ན། ཁྱེད་ཀྱི་ཕྱོགས་ལ་རྗེས་སུ་དཔག་པ་མཐའ་དག་དེ་བཞིན་དུ་འགྱུར་ཏེ་རྗེས་སུ་དཔག་པ་མངོན་སུམ་གྱི་རྩ་བ་ཅན་ཡིན་པའི་ཕྱིར་གྱི་དངོས་པོའི་རྩ་བ་ཅན་ནི་མ་ཡིན་པའི་ཕྱིར་དང་འབྱུང་བར་འགྱུར་བའི་གནོད་པ་ཡང་དེའི་ཚེ་ཉིད་རྟོགས་
[81b]
[81b.1]པར་མི་ནུས་པའི་ཕྱིར་རོ། །དེའི་ཕྱིར་རྗེས་སུ་དཔག་པ་འགའ་ཡང་ཚད་མར་མི་འགྱུར་རོ། །དེ་བཤད་པ་ནི་མེ་ལ་སོགས་པའི་ཡུལ་ཅན་གྱི་རྗེས་སུ་དཔག་པ་གཞན་ལ་ཡང་གནོད་པ་མེད་པར་ངེས་པའི་ཕྱིར་རོ། །དེའི་ཕྱིར་ཚུལ་གསུམ་པ་ལས་སྐྱེས་པའི་རྗེས་སུ་དཔག་པ་ཡང་གནོད་པ་མེད་
[81b.2]པར་གཏན་ལ་ཕབ་པ་ལ་བརྟེན་ནས་ལྟོས་པ་ཉིད་ཡིན་ན་རྗེས་སུ་དཔག་པ་འཇིག་པ་ཉིད་དུ་འགྱུར་རོ། །དེས་ན་གནོད་པ་མེད་པའི་ཡུལ་ཅན་ཉིད་དུ་སྨྲ་བའི་གཞུང་ལ་ཚད་མ་ཞུགས་པ་གནོད་པར་བྱེད་པ་ཡིན་ཏེ་དེ་ཉིད་གནོད་བྱེད་དུ་འཐད་པའི་ཕྱིར་རོ། །མ་ཞུགས་པ་ཐེ་ཚོམ་ཟ་བ་དང་འབྲེལ་པའི་བྱེད་པའི་
[81b.3]ཁྱད་པར་གནོད་པ་ཁས་ལེན་ན་ནི་དེ་ཡོད་པས་རྗེས་སུ་དཔག་པ་མི་འཇུག་པར་ཡང་བརྗོད་པའི་ཕྱིར་རྗེས་སུ་དཔག་པ་ཐམས་ཅད་ལ་ཡིད་བརྟན་དུ་མེད་དེ། གནོད་པར་བྱེད་པ་མེད་པ་ཤེས་པར་མི་ནུས་པའི་ཕྱིར་རོ། །ངེད་ཀྱི་རྗེས་སུ་དཔག་པ་ལ་ནི་ཐལ་བ་འདི་མེད་དེ་དངོས་པོའི་རྩ་བ་ཅན་ཡིན་པའི་ཕྱིར་
[81b.4]རོ། །མངོན་སུམ་ལ་ནི་འགྱུར་བ་ཡིན་ན་དེ་ལ་ཡང་དངོས་པོའི་གནས་ཐབས་རྗེས་སུ་རྟོགས་པ་ཕྱི་མས་སེལ་བ་ཡིན་ནོ། །ཕྱི་རོལ་གྱི་དོན་ལ་མི་སྲིད་ན་ནི། གང་ལ་དེ་མི་སྲིད་པའི་རང་རིག་པ་དེ་ཉིད་རྣམ་པར་དཔྱོད་པ་ལ་མཁས་པ་རྣམས་ཀྱི་ཚད་མ་ཡིན་ནོ། །དེས་ན་དེ་ལྟར་འདིར་ཕྱོགས་སུ་བྱས་
[81b.5]པའི་ཡུལ་ལ་མེད་པར་བརྗོད་པ་ཡིན་ཏེ། ལྐོག་ཏུ་གྱུར་པས་གནོད་པ་འཇུག་པ་མེད་པའི་ཕྱིར་རོ། །གནོད་པ་ཉིད་དུ་དོགས་པས་སྐྱོན་ཅན་དུ་འགྱུར་ན་ནི། རྗེས་སུ་དཔག་པ་ཆད་པར་འགྱུར་རོ། །དེའི་ཕྱིར་མ་བསལ་བ་ཉིད་ཀྱིས་ཕྱོགས་ཕྱོགས་ཀྱི་བདག་ཉིད་ཐོབ་པ་དང་གཏན་ཚིགས་དང་དཔེའི་
[81b.6]ཉེས་པ་རྣམས་མེད་པ་ཡིན་ཡང་སྔོན་གྱི་འཆད་པ་པོ་རྣམས་ཀྱིས་གནོད་པ་མེད་པ་མེད་པའི་ཡུལ་ཅན་ཉིད་བླ་ལྷག་པ་ཉེ་བར་བཀོད་དེ་དེའི་ཕྱིར་དེ་མེད་པར་རྗེས་སུ་དཔག་པ་འདི་འཁྲུལ་པ་ཅན་ཡིན་ནོ་ཞེས་དོགས་པ་བསུ་ནས་སློབ་དཔོན་གྱིས་འདིར་གནོད་པ་མེད་པའི་ཡུལ་ཅན་ཉིད་ཀྱང་གཞུང་གཟུགས་པའི་
[81b.7]ཕྱིར་དོགས་པའི་གནོད་པས་གནོད་པ་ནི་མ་ཡིན་གྱི། འོན་ཀྱང་ཞུགས་པའི་གནོད་པ་དག་ཁོ་ནས་ཡིན་ནོ་ཞེས་དེ་ལྟར་ཉེ་བར་བཀོད་དོ། །གནོད་པ་མ་བྱས་པའི་ཡུལ་ཅན་ཉིད་མེད་པས་ན་ཉེ་བར་བསྟན་པའི་འཇིག་རྟེན་རྒྱས་པར་མཛད་པས་འདི་རྗེས་སུ་དཔག་པར་མི་བཞེད་པ་ཡིན་གྱི། ལྡོག་པ་སྒྲུབ་
[82a]
[82a.1]པར་བྱེད་པ་མ་མཐོང་བ་ཐེ་ཚོམ་གྱི་རྒྱུ་ཡིན་པའི་ཕྱིར་ནི་མ་ཡིན་ནོ་ཞེས་འཆད་པ་པོ་རྣམས་ཀྱིས་འདི་རྣམ་པ་གཞན་དུ་བསལ་ཏོ། །ད་ལྟར་ནི་གཏན་ཚིགས་ཀྱི་ཆོས་ཐམས་ཅད་ཡོད་ཀྱང་གཏན་ཚིགས་མ་ཡིན་པ་ཉིད་དུ་གསུངས་པ་གང་ཡིན་པ་དེ་ནི་མ་མཐོང་བས་རྟོགས་པའི་
[82a.2]ལྡོག་པ་ཅན་ཉིད་ཀྱིས་ཡིན་ནོ་ཞེས་བྱ་བར་ཁོང་དུ་ཆུད་དོ་ཞེས་གྲུབ་པར་འགྱུར་རོ། །དེ་ལྟར་མ་མཐོང་བས་ལྡོག་པ་གྲུབ་པ་ཡིན་ན་ལྷག་མ་དང་ལྡན་པ་འཁྲུལ་པ་ཅན་ཉིད་དུ་མི་འགྱུར་རོ་ཞེས་བསྒྲུབས་ནས་འབྲེལ་པ་ཁས་ལན་ན་འཁྲུལ་པ་ཅན་ཉིད་ཇི་ལྟར་ཡིན་པ་དེ་སྟོན་པ་ནི། ལྡོག་པ་མེད་པ་ནི་
[82a.3]སྟེ་ལྡོག་པ་དང་མི་ལྡན་པ་ནི་ལྷག་མ་དང་ལྡན་པ་ཡིན་ནོ། །ཇི་ལྟར་ཞེ་ན་ཐེ་ཚོམ་ཟ་བའི་ཕྱིར་རོ། །བསྒྲུབ་བྱ་མེད་པ་ལས་གཏན་ཚིགས་མེད་པར་ཐེ་ཚོམ་ཟ་བ་དེའི་ཕྱིར་འདི་ལྡོག་པ་མེད་པ་ཡིན་ནོ། །གང་ཐེ་ཚོམ་ཟ་བ་དེ་ལྡོག་པ་མེད་པ་ཉིད་ཡིན་ནོ་ཞེས་བྱ་བ་དེ་ཉིད་གང་ལས་ཤེ་ན། བཤད་པ་
[82a.4]ནིའི་སྒྲ་ནི་གཏན་ཚིགས་ཏེ། གང་གི་ཕྱིར་ལྡོག་པ་ནི་སྒྲུབ་པ་ཡིན་ལ་དེ་ལ་དེ་ཡང་གྲུབ་པ་ཁོ་ན་ཡིན་ནོ། །དེའི་དོན་འདི་ཡིན་ཏེ་ཐེ་ཚོམ་ཟ་བ་ལྡོག་པ་མེད་པ་ཉིད་དུ་ནི་མི་འགྲུབ་ཀྱི་འོན་ཀྱང་ཐེ་ཚོམ་དུ་གྱུར་པ་ཉིད་ཡིན་པ་དེས་ན་ཇི་ལྟར་ལྡོག་པ་མེད་པར་བརྗོད་ཅེས་བརྩད་པར་འགྱུར་བ་གང་ཡིན་པ་མེད་པ་ཙམ་
[82a.5]ནི་ལྡོག་པར་མི་བརྗོད་ཀྱི་འོན་ཀྱང་འདིར་སྒྲུབ་པར་བྱེད་པའི་ཆོས་སུ་གྱུར་པའི་ལྡོག་པ་བརྗོད་པ་ཡིན་ནོ། །དེ་ཡང་གྲུབ་པ་ཉིད་དེ་ལྟར་འགྱུར་བ་ཡིན་ནོ། །གང་གི་ཕྱིར་འདི་གྲུབ་པ་ཉིད་དེ་ལྟར་འགྱུར་བ་དེའི་ཕྱིར་དེ་ལྟ་བུའི་ངོ་བོ་སྒྲུབ་པར་བྱེད་པ་ཉིད་ནི་ངེས་པ་ལ་ལྟོས་སོ། །འདི་གྲུབ་པ་ནི་ངེས་པ་ཉིད་ཡིན་
[82a.6]ལ། གྲུབ་པ་ཡང་སྒྲུབ་པར་བྱེད་པ་ཡིན་ནོ། །དེས་ན་ངེས་པ་ལ་ལྟོས་པའི་ཕྱིར་ཐེ་ཚོམ་ཟ་ན་ལྡོག་པ་མེད་པར་བརྗོད་དོ། །ཐེ་ཚོམ་ཟ་ན་ལྡོག་པ་མེད་པ་ལ་རག་མོད། འདིར་དེ་ཉིད་ག་ལས་ཤེ་ན། བཤད་པ་དེ་དེར་སྣང་བ་མི་དམིགས་པ་ཡིན་པའི་ཕྱིར་མི་དམིགས་པའི་སྒོ་ནས་བལྟར་རུང་བའི་
[82a.7]ཡུལ་འགའ་ཞིག་ལ་མེད་པར་གྲུབ་ཏུ་ཟིན་ཀྱང་བསྒྲུབ་པར་བྱ་བ་མེད་པ་ལ་སྒྲུབ་པར་བྱེད་པ་མེད་པའི་མཚན་ཉིད་ཀྱིས་མེད་པ་ནི་སྣང་བ་མི་དམིགས་པས་ཀྱང་གྲུབ་པ་ཡིན་ཏེ། འོན་ཀྱང་རྒྱུ་དང་ཁྱབ་པར་བྱེད་པ་མི་དམིགས་པ་དག་ལས་ཡིན་ནོ་ཞེས་དོགས་ནས་ཀྱང་གི་སྒྲ་སྲིད་པ་ལ་ཡིན་ནོ། །འབྲེལ་
[82b]
[82b.1]པ་མེད་པ་ནི་ཐམས་ཅད་ལ་མེད་པ་མི་འགྲུབ་པའི་ཕྱིར་རོ། །བལྟར་རུང་བའི་ཡུལ་འགའ་ཞིག་ལ་མེད་པ་གྲུབ་ཏུ་ཟིན་ཀྱང་སྣང་བ་མི་དམིགས་པ་ཡིན་ཡང་ཐམས་ཅད་དུ་རྣམ་པར་འཇོག་ན་ནི། དེ་ཉིད་ལས་ཐམས་ཅད་ལ་མེད་པར་རྟོགས་པའི་ཕྱིར། བལྟར་མི་རུང་བ་མི་དམིགས་པར་འགྱུར་རོ། །
[82b.2]དེས་ན་མེད་པ་སྒྲུབ་པར་བྱེད་པ་མ་ཡིན་ནོ། །འབྲེལ་པ་ཡོད་ན་ནི་དེ་ལྟར་འགྱུར་བ་ཡིན་ནོ། །དེ་ནི་ཡོད་པ་མ་ཡིན་ནོ། །ལྡོག་པ་མ་མཐོང་བས་སྒྲུབ་པ་མ་ཡིན་པ་ལ་གཏན་ཚིགས་གཞན་ཡང་བསྟན་པའི་ཕྱིར་གལ་ཏེ་མ་མཐོང་བས་ལྡོག་པར་འགྱུར་ཞེས་བྱ་བའི་སྐབས་ལ་གཏན་ཚིགས་
[82b.3]གཞན་སྣོན་འདི་བསྟན་པ་ནི། གཞན་ཡང་ཞེས་བྱ་བ་ཡིན་ནོ། །གལ་ཏེ་མ་མཐོང་བ་ཙམ་གྱིས་མི་མཐུན་པའི་ཕྱོགས་ལས་ལྡོག་ན་དེའི་རྗེས་སུ་འགྲོ་བ་དང་བྲལ་བ་ལྡོག་པ་ཙམ་དང་ལྡན་པ་ཡང་གོ་བར་བྱེད་པའི་གཏན་ཚིགས་སུ་འགྱུར་རོ། །དེ་ཉིད་སྟོན་པ་ནི་གསོན་པོའི་ལུས་འདི་
[82b.4]ནི་ཞེས་བྱ་བ་ཡིན་ནོ། །བདག་མེད་པ་ཡིན་ན་ཞེས་བྱ་བ་ནི་བདག་གིས་སྟོང་ནའོ། །སྲོག་ལ་སོགས་པ་དང་ལྡན་པ་མ་ཡིན་པ་ཉིད་དུ་ཐལ་བར་འགྱུར་བའི་ཕྱིར་རོ། །གལ་ཏེ་གསོན་པོའི་ལུས་བདག་མེད་པ་ཡིན་ན་དེའི་ཚེའི་སྲོག་ལ་སོགས་པ་དང་མི་ལྡན་པས་ཁྱབ་པའི་ཕྱིར་དེ་ཡང་དེ་ལ་ཁྱབ་
[82b.5]པར་འགྱུར་རོ། །དེ་ལྟར་རྣམ་པ་འདིས་དེ་ཞེས་བྱ་བ་སྲོག་ལ་སོགས་པ་དང་མི་ལྡན་པ་སྟེ་དེ་ལོག་པས་ཁྱབ་པར་བྱ་བ་བདག་མེད་པ་ལྡོག་པའི་ཕྱིར་བདག་ཡོད་པ་རྟོགས་པར་འགྱུར་རོ། །སྲོག་ལ་སོགས་པ་དང་མི་ལྡན་པ་ལོག་པ་ནི་སྲོག་ལ་སོགས་པ་ཉིད་ཡིན་ལ་བདག་མེད་པ་ལ་སོགས་པ་
[82b.6]ཡང་བདག་ཉིད་དོ། །དེས་ན་སྲོག་ལ་སོགས་པ་ལས་བདག་རྟོགས་པར་འགྱུར་རོ་ཞེས་བརྗོད་པར་འགྱུར་རོ། །དེ་ལྟར་ལྡོག་པ་ཅན་ཉེ་བར་བཀོད་ནས་ཇི་ལྟར་བདག་མེད་པ་སྲོག་ལ་སོགས་པ་མེད་པའི་ཁྱབ་བྱ་ཡིན་པ་དེ་བསྟན་པའི་ཕྱིར་དེ་ཁྱབ་པར་བྱེད་པ་ཉིད་དུ་ཚད་མས་གྲུབ་པར་སྟོན་པ་ནི་བདག་
[82b.7]མེད་པའི་བུམ་པ་ལ་སོགས་པ་མཐོང་བ་དང་། མ་མཐོང་བ་ཡིན་ལ་དེ་དག་ལ་ནི་སྲོག་ལ་སོགས་པ་མེད་པ་ཡང་མཐོང་བ་དེ་བས་ན་སྲོག་ལ་སོགས་པ་མེད་པ་བདག་མེད་པས་ཁྱབ་པ་ཡིན་ནོ། །དེ་ལྟ་ཡིན་ན་གང་གི་ཕྱིར་བདག་མེད་པ་ལ་སྲོག་ལ་སོགས་པ་མེད་པས་ཁྱབ་པ་གྲུབ་པ་དེའི་ཕྱིར་ཁྱབ་པར་
[83a]
[83a.1]བྱེད་པ་སྲོག་ལ་སོགས་པ་གསོན་པོའི་ལུས་ལ་མེད་པར་མངོན་སུམ་ཉིད་ཀྱིས་གྲུབ་པའི་ཕྱིར་བདག་མེད་པ་ཡང་མེད་པར་རྟོགས་པ་དེ་བས་ན། སྲོག་ལ་སོགས་པ་དག་ལས་བདག་རྟོགས་པར་འགྱུར་རོ། །དེ་ལྟ་ཡིན་དང་སྲོག་ལ་སོགས་པ་བདག་མེད་པ་ལ་མེད་པ་ཞེས་
[83a.2]གྲུབ་པ་ཡིན་ཏེ། སྲོག་ལ་སོགས་པ་མེད་པས་བདག་མེད་པ་ལ་ཁྱབ་པའི་ཕྱིར་དང་། ཁྱབ་པར་བྱ་བ་ཡོད་ན་ཁྱབ་པར་བྱེད་པ་གདོན་མི་ཟ་བར་ཡོད་པའི་ཕྱིར་རོ། །དེའི་ཕྱིར་བདག་མེད་པ་ཡོད་ན་སྲོག་ལ་སོགས་པ་མེད་པ་ཡོད་པའི་ཕྱིར་འདིར་བསྒྲུབ་པར་བྱ་བ་མེད་པ་ལ་སྒྲུབ་པར་བྱེད་པ་མེད་པ་
[83a.3]ལྡོག་པ་གྲུབ་བོ། །སྲོག་ལ་སོགས་པ་ཡོད་པ་ན་བདག་ཡོད་པ་ནི་གྲུབ་པ་མེད་པའི་ཕྱིར་ལྡོག་པ་འབའ་ཞིག་དང་ལྡན་པ་ཡིན་ནོ། །དེས་ན་འདི་དེ་ལྟར་གཏན་ཚིགས་སུ་བསྟན་པ་ཡིན་ནོ། །འགྲེལ་པའི་རིམ་པ་ནི་འདི་ནི་བདག་མེད་པ་མ་ཡིན་ཏེ། སྲོག་ལ་སོགས་པ་དང་ལྡན་པ་མ་ཡིན་པར་ཐལ་
[83a.4]བའི་ཕྱིར་རོ་ཞེས་བྱ་བ་སྲོག་ལ་སོགས་པ་དང་མི་ལྡན་པ་བདག་མེད་པ་དང་རྗེས་སུ་འགྲོ་བ་ཉིད་བརྗོད་པར་འགྱུར་བའི་ཕྱིར་ལྡོག་པ་ཅན་དུ་གསལ་བར་བསྟན་པར་མི་འགྱུར་རོ། །དེའི་ཕྱིར་འདི་ནི་བདག་མེད་པ་མ་ཡིན་ན་ཞེས་ལྡོག་པ་ཉེ་བར་བསྟན་ནས་དེ་ལོག་པས་བདག་ཡོད་པར་རྟོགས་པ་ཞེས་བྱ་བ་འདིས་
[83a.5]འདི་ལ་གཏན་ཚིགས་སུ་བསྟན་པའི་ཕྱིར། འདི་ལྡོག་པ་ཅན་ཡིན་པར་ཤིན་ཏུ་གསལ་བར་བསྟན་ཏོ། །དེས་ན་མ་མཐོང་བས་ལྡོག་པ་གྲུབ་པ་ཡིན་ན་འདི་ཡང་གཏན་ཚིགས་ཉིད་དུ་འགྱུར་རོ། །ཇི་ལྟར་མ་མཐོང་བས་ཐམས་ཅད་དུ་བསྒྲུབ་པར་བྱ་བ་མེད་པ་ལ་མེད་པར་འཇོག་པར་བྱེད་པས་དོན་
[83a.6]དེ་ལ་ཚད་མར་བརྟེན་པ་དེ་བཞིན་དུ་བུམ་པ་ལ་སོགས་པ་ལས་བདག་མེད་པ་ཡང་ཡིན་ནོ། །དེས་ན་བདག་དམིགས་པའི་མཚན་ཉིད་དུ་གྱུར་པ་མ་ཡིན་ཡང་བུམ་པ་ལ་སོགས་པ་བདག་མེད་པར་གྲུབ་པའི་ཕྱིར་འདི་ཁྱབ་པར་བྱ་བ་དང་། ཁྱབ་པར་བྱེད་པའི་དངོས་པོ་གྲུབ་པའི་ཕྱིར་རྗེས་སུ་འགྲོ་བ་མེད་
[83a.7]པའི་གཏན་ཚིགས་ལས་ཀྱང་བསྒྲུབ་པར་བྱ་བ་རྟོགས་པར་འགྱུར་རོ། །གང་གི་ཚེ་མ་མཐོང་བ་ཙམ་ཚད་མ་ཡིན་པ་དེའི་ཚེ་ནི་ཉེས་པ་འདི་མེད་དོ་ཞེས་བཤད་པ་ནི་བལྟར་མི་རུང་བ་མི་དམིགས་པས་མེད་པར་མ་གྲུབ་ན། བུམ་པ་ལ་སོགས་པ་བདག་མེད་པར་མ་གྲུབ་པའོ། །དེའི་ཕྱིར་བདག་མེད་པ་
[83b]
[83b.1]ལ་སྲོག་ལ་སོགས་པ་མེད་པས་ཁྱབ་པ་མ་གྲུབ་པས་བདག་མེད་པ་ཡོད་པས་སྲོག་ལ་སོགས་པ་ལྡོག་པའི་ལྡོག་པ་མེད་དེ་སྔར་བཤད་པ་བཞིན་ནོ། །ཇི་སྐད་བཤད་པའི་ཁྱབ་པ་གྲུབ་པས་དེ་ལྟར་འགྱུར་བ་ཡིན་ན་དེ་ནི་མ་གྲུབ་པ་དེ་འགའ་ཡང་བདག་མེད་པར་མ་གྲུབ་པའི་ཕྱིར་རོ། །དེ་ལྟར་ན་བདག་མེད་པ་མེད་ན་སྲོག་
[83b.2]ལ་སོགས་པ་ལྡོག་པ་མེད་དོ། །གལ་ཏེ་དེ་ལྟར་ན་སྲོག་ལ་སོགས་པ་དང་ལྡན་པ་ཉིད་བདག་མེད་པ་ལ་མ་མཐོང་བ་ཙམ་གྱིས་ཁྱབ་པ་མ་གྲུབ་པར་བརྗོད་པར་མི་འགྱུར་རོ་ཞེ་ན། འདིར་འདི་བསྟན་པར་འདོད་པ་ནི་མ་ཡིན་གྱི་འོན་ཀྱང་སྲོག་ལ་སོགས་པ་དང་ལྡན་པའི་ལྡོག་པ་སྒྲུབ་པར་བྱེད་པའི་ཚད་མ་མཐོང་བ་ཙམ་མི་བྱེད་
[83b.3]ན་བདག་མེད་པ་དང་སྲོག་མེད་པ་ཁྱབ་པ་མ་གྲུབ་པར་འགྱུར་རོ་ཞེས་བྱ་བ་ཡིན་ནོ། །གལ་ཏེ་ཡང་བདག་དམིགས་པའི་མཚན་ཉིད་དུ་གྱུར་པ་མ་ཡིན་པའི་ཕྱིར་བུམ་པ་ལ་སོགས་པ་བདག་མེད་པར་མ་གྲུབ་པ་དེ་ལྟ་ན་ཡང་བདག་མེད་པར་སྨྲས་པ་ལ་བུམ་པ་ལ་སོགས་པ་བདག་མེད་པར་གྲུབ་
[83b.4]པ་ཡིན་ལ་དེ་དག་ལ་སྲོག་ལ་སོགས་པ་མེད་པར་གྲུབ་པ་ཡིན་པ་དེས་ན། ཇི་ལྟར་ཁྱབ་པ་མ་ཡིན་ཞེས་སྨྲས་པ་ནི་གལ་ཏེ་ཁས་བླངས་པའི་ཕྱིར་ཞེས་བྱ་བ་ཡིན་ནོ། །དོགས་པ་འདི་སེལ་བར་བྱེད་པ་ནི་ད་ནི་ཇི་ལྟར་ཞེས་བྱ་བའོ། །འདི་སྐད་བརྗོད་པ་ཡིན་ཏེ་གལ་ཏེ་ཚད་མས་གྲུབ་པ་ལ་མི་ལྟོས་
[83b.5]པར་ངེད་ཀྱིས་ཁས་བླངས་པ་ལས་བུམ་པ་ལ་སོགས་པ་བདག་མེད་པ་ཡིན་ནོ། གསོན་པོའི་ལུས་ལ་ཡང་ཁས་བླངས་པ་ཁྱད་པར་མེད་པའི་ཕྱིར་བདག་དང་བཅས་པ་ཉིད་དུ་མི་འགྱུར་རོ། །གཞན་ཡང་གང་གིས་དེ་ཁས་བླངས་པས་གྲུབ་པར་འདོད་པ་བདག་མེད་པར་སྨྲ་བ་ལ་ཡང་བུམ་པ་
[83b.6]ལ་སོགས་པ་ལ་དམིགས་པའི་མཚན་ཉིད་ཀྱི་མ་གྲུབ་པའི་བདག་མེད་པའི་ཚད་མ་མ་ཡིན་པ་ཇི་ལྟར་འགྲུབ་པར་འགྱུར། འདི་སྐད་བརྗོད་པ་ཡིན་ཏེ། སངས་རྒྱས་པ་ལ་ཡང་མི་དམིགས་པ་ལས་བདག་མེད་པར་གྲུབ་པ་མ་ཡིན་ལ། ཚད་མ་གང་གིས་འདོད་པ་དེ་ནི་གསོན་པོའི་ལུས་ལ་
[83b.7]ཡང་ཉམས་པ་མེད་དོ། །རེ་ཞིག་བདག་མེད་པར་སྨྲ་བས་བུམ་པ་ལ་སོགས་པ་བདག་མེད་པར་ཁས་བླངས་པ་ཡིན་པ་ལ་ནི་འུ་བུ་ཅག་རྩོད་པ་མེད་དོ། །གསོན་པོའི་ལུས་ནི་བདག་ཅག་བདག་དང་བཅས་པས་འདོད་པ་དེས་ན་དེ་ལ་རྩོད་པ་ཡིན་ན། དེས་ན་ཁས་བླངས་པའི་བདག་མེད་པ་
[84a]
[84a.1]ལ་སྲོག་ལ་སོགས་པ་མེད་པའི་ཕྱིར་གོ་བར་བྱེད་པ་ཉིད་དུ་བརྗོད་པས་ནི་བདག་ལུང་ལས་གྲུབ་པ་ཁས་བླངས་པར་འགྱུར་ཏེ། ལུང་གིས་གྲུབ་པའི་དོན་ལ་བརྟེན་ནས་བྱས་པའི་ཁྱབ་པ་གྲུབ་པ་ཅན་ཡིན་པའི་ཕྱིར་རོ། །ལུང་ཙམ་ལས་ཁས་བླངས་པ་ནི་ཚད་མས་སྟོང་པར་
[84a.2]འགྱུར་རོ། །དེ་བཤད་པ་ནི་ཁས་བླངས་པ་ཞེས་བྱ་བ་ལ་སོགས་པ་ཡིན་ནོ། །གང་གི་ཕྱིར་དེ་ལྟ་བས་ན་སྲོག་ལ་སོགས་པ་ནི་རྟོགས་པར་བྱེད་པ་མ་ཡིན་པ་ཉིད་དེ་སྲོག་ལ་སོགས་པ་དང་ལྡན་པ་མ་ཡིན་པ་ཉིད་བདག་མེད་པ་མ་གྲུབ་པའི་ཕྱིར་ཏེ་བདག་དང་ལྡན་པར་མ་མཐོང་བས་བདག་
[84a.3]མེད་པ་མ་མཐོང་བའི་ཕྱིར་རོ། །ལ་ལར་བདག་མེད་པར་གྲུབ་པ་ཡིན་པ་དེ་ལྟ་ན་ཡང་འགའ་ཞིག་ལ་བདག་དེ་ལོག་སྟེ། སྲོག་ལ་སོགས་པ་ལོག་ཀྱང་བདག་མེད་པ་ཐམས་ཅད་ལ་སྐབས་ཀྱིས་སྲོག་ལ་སོགས་པ་ལྡོག་པ་མི་འགྲུབ་བོ། །དེས་ན་བདག་མེད་པ་ལ་སྲོག་ལ་སོགས་པ་མེད་
[84a.4]པའི་ཕྱིར། བདག་མེད་པ་དང་སྲོག་ལ་སོགས་པ་ལྡན་པ་མ་ཡིན་པ་དག་ཁྱབ་པ་མ་གྲུབ་བོ། །ཐམས་ཅད་ལ་ལྡོག་པ་མི་གྲུབ་པའི་གཏན་ཚིགས་ནི་འབྲེལ་པ་མེད་པའི་ཕྱིར་ཞེས་བྱ་བ་ཡིན་ནོ། །གལ་ཏེ་མ་མཐོང་བས་ལྡོག་པར་འགྱུར་ན་དེའི་ཚེ། མ་གྲུབ་སྦྱར་བ་བརྗོད་བྱ་མིན། །དེ་ཡང་ཞེས་བྱ་
[84a.5]བའི་ཡང་གི་སྒྲས་ནི་གཏན་ཚིགས་གཞན་སྡུད་པའོ། །གང་ཡང་ཞེས་བྱ་བ་ནི་མ་མཐོང་བ་ཙམ་གྱིས་ལྡོག་ན་གཞུང་གཞན་མི་འཐད་པའི་བསམ་པས་ཡིན་ནོ། །མ་གྲུབ་སྦྱར་བ་དེ་ཡང་གང་ཞེ་ན་བཤད་པ་དེ་བཞིན་དུ་མཐུན་པའི་ཕྱོགས་ལ་ཡོད་པ་དང་། མེད་པ་ཞེས་བྱ་བ་ལ་སོགས་པ་
[84a.6]ལ་ཡང་ཅི་རིགས་པ་བརྗོད་པར་བྱའོ་ཞེས་བྱ་བ་ལ་སོགས་པའི་རང་བཞིན་ཅན་གྱིས་མ་གྲུབ་པ་སྦྱར་བ་གང་ཡིན་པའོ། །སློབ་དཔོན་གྱིས་ཕྱོགས་ཀྱི་ཆོས་ཉིད་ལ། གཉི་ག་ལ་ཡང་རུང་བ་དང་ཐེ་ཚོམ་ཟ་བ་དང་གཞི་མ་གྲུབ་པའི་མཚན་ཉིད་མ་གྲུབ་པ་རྣམ་པ་བཞི་བསྟན་ནས་མཐུན་པའི་ཕྱོགས་དང་
[84a.7]མི་མཐུན་པའི་ཕྱོགས་གཉིས་ལ་ཡོད་པ་དང་མེད་པ་དང་གཉི་གས་གཏན་ཚིགས་རྣམ་པ་དགུ་ལ་བསྒྲེས་པ་ཕྱོགས་ཀྱི་ཆོས་ལ་ཇི་ལྟ་བ་དེ་བཞིན་དུ་མཐུན་པའི་ཕྱོགས་ལ་ཡོད་པ་ཞེས་བྱ་བ་ལ་སོགས་པ་ལ་ཡང་བརྗོད་པར་བྱའོ་ཞེས་བྱ་བ་འདི་ནི་མ་གྲུབ་པར་སྦྱར་བ་ཡིན་ནོ། །མ་གྲུབ་པ་སྦྱར་བ་དེ་
[84b]
[84b.1]ཡང་བརྗོད་པར་བྱ་བ་མ་ཡིན་པར་འགྱུར་ཏེ། གཏན་ཚིགས་རྣམ་པ་དགུ་ལ་ཇི་ལྟར་བཤད་པའི་མ་གྲུབ་པ་མི་བརྗོད་པར་འགྱུར་རོ། །ཐེ་ཚོམ་ཟ་བའི་མ་གྲུབ་པ་བཞག་སྟེ་མཐུན་པའི་ཕྱོགས་དང་མི་མཐུན་པའི་ཕྱོགས་གཉིས་ལ་མ་གྲུབ་པ་གསུམ་བརྗོད་པར་བྱའོ་ཞེས་དགོངས་པ་ཡིན་ནོ། །མདོར་
[84b.2]མ་གྲུབ་པ་སྦྱར་བ་སྤྱིར་བཀག་པ་ཁྱད་པར་གནས་པར་ངེས་པར་བྱའོ་ཞེས་འབྲེལ་པ་སྟོན་པ་ནི་ཐེ་ཚོམ་དུ་གྱུར་ཡང་མ་བཟློག་པར་འགྱུར་རོ་ཞེས་བྱ་བའོ། །ཐེ་ཚོམ་ཟ་བའི་མ་གྲུབ་པ་བཟློག་པར་བྱ་བ་མ་ཡིན་པར་འགྱུར་རོ། །ཕྱོགས་ཀྱི་ཆོས་ཉིད་དུ་ཉེ་བར་བསྟན་པའི་མ་གྲུབ་པ་སྦྱར་བས་ནི་
[84b.3]ཐེ་ཚོམ་དུ་འགྱུར་བ་བཟློག་པར་འགྱུར་རོ། །མི་དམིགས་པ་ཁོ་ནར་ཟད་ན་ཐེ་ཚོམ་ཟ་ལ་ལྡོག་པ་ཡང་མི་དམིགས་པ་ལས་ཡིན་པའི་གཏན་ཚིགས་ཀྱི་ཕྱིར་མ་དམིགས་པ་ཙམ་གྱི་སྒྲུབ་པར་བྱེད་པ་ནི་ཐེ་ཚོམ་ཟ་བ་ཡིན་ནོ། །ལྡོག་པ་ནི་མི་དམིགས་པས་རྟོགས་པར་བྱ་བ་ཡིན་པའི་ཕྱིར་མཐུན་
[84b.4]པའི་ཕྱོགས་ལ་ཡོད་པའི་མི་མཐུན་པའི་ཕྱོགས་ལ་མེད་པ་ནི་ཐེ་ཚོམ་ཟ་བའི་རང་བཞིན་ཉིད་ཡིན་པ་དེས་ན་ཇི་ལྟར་ཁྱབ་པར་མེད་པར་མ་གྲུབ་པར་སྦྱོར་བར་འགྱུར་མི་དམིགས་པ་ཉིད་ལ་ཐེ་ཚོམ་ངེས་པར་སྟོན་པས་དམིགས་པ་ལ་དེ་མེད་པར་བཤད་པ་ནི་དམིགས་ན་ཞེས་བྱ་བ་ཡིན་ནོ། །ཐེ་ཚོམ་ནི་
[84b.5]ཡོད་པ་མ་ཡིན་པའི་ཕྱིར་དེ་ནི་མི་དམིགས་པ་ཁོ་ན་ལ་ཡིན་པར་རིགས་སོ། །རྟོགས་བཞིན་པ་ཉིད་ཀྱི་ཆོས་ལ་ཐེ་ཚོམ་མེད་པའི་ཕྱིར་ཏེ་ཉམས་སུ་མྱོང་བ་ནི་ཇི་ལྟར་མྱོང་བ་བཞིན་རྟོགས་པ་འཕེལ་བར་བྱེད་པ་ཡིན་པའི་ཕྱིར་རོ། །གལ་ཏེ་ཅི་རིགས་པར་ཞེས་བྱ་བ་ནི་འདི་སྐད་བརྗོད་པ་ཡིན་ཏེ། ཁྱད་པར་
[84b.6]མེད་པར་མ་གྲུབ་པ་སྦྱོར་བ་མ་ཡིན་ཏེ། ཅི་རིགས་པར་ཞེས་སྨོས་པའི་ཕྱིར་རོ། །འདིར་ཐེ་ཚོམ་ཟ་བ་མ་གྲུབ་པ་ནི་དགག་པར་ནུས་པ་མ་ཡིན་ཏེ། མི་དམིགས་པའི་རྩ་བ་ཅན་ཉིད་ཀྱིས་ན་ལྡོག་པ་ཅན་ཐེ་ཚོམ་ཟ་བའི་རང་བཞིན་ཡིན་པའི་ཕྱིར་རོ་ཞེ་ན་དེ་ནི་མ་ཡིན་ཏེ། བརྗོད་པ་གང་ཞིག་གཉི་ག་ལ་
[84b.7]ཡང་ངེས་པ་དེ་ཁོ་ན་ཞེས་བྱ་བ་ལ་སོགས་པ་གསུངས་པའི་ཕྱིར་རོ། །རྒོལ་བ་དང་ཕྱིར་རྒོལ་བ་ལ་ངེས་པ་སྒྲུབ་པར་བྱེད་པ་ཡིན་པ་ཉིད་ཀྱིས་ལྡོག་པ་ལ་ཐེ་ཚོམ་ཟ་བ་སྒྲུབ་པར་བྱེད་པ་མ་ཡིན་ནོ། །ཅི་རིགས་པར་ཞེས་གསུངས་པ་ནི་གཞི་མ་གྲུབ་པ་ཉིད་ལྡོག་པ་ལ་སྐྱོན་དུ་འགྱུར་བ་མ་ཡིན་ནོ་ཞེས་
[85a]
[85a.1]བསྟན་པའི་ཕྱིར་ཡིན་ནོ་ཞེས་སྨྲ་བའོ། །དེས་ནི་དེ་ལྟར་མ་གྲུབ་པ་སྦྱར་བས་ན་སློབ་དཔོན་ཐེ་ཚོམ་དུ་གྱུར་པ་བཟློག་པར་བྱ་བ་བཞེད་པ་ཡིན་ནོ། །དེས་མི་དམིགས་པ་ལྡོག་པ་སྒྲུབ་པར་བྱེད་པ་དགག་པར་བཤད་པ་ཡིན་ནོ་ཞེས་སྨོས་པ་ནི་དེའི་ཕྱིར་མི་དམིགས་པ་
[85a.2]ཡིན་དུ་ཟིན་ཀྱང་མི་མཐུན་པའི་ཕྱོགས་ལས་ལྡོག་པ་མེད་པར་དགོངས་ཏེ། མི་དམིགས་པ་དེ་དགག་པར་བཤད་པ་ཡིན་ནོ། །ཅིའི་ཕྱིར་ལྡོག་པ་མེད་ཅེ་ན་ཐེ་ཚོམ་ཟ་བས་སོ། །མ་མཐོང་བས་ལྡོག་པ་མེད་པ་ལ་གཏན་ཚིགས་གཞན་སྟོན་པ་ནི་གཞན་ཡང་ཞེས་བྱ་བ་ཡིན་ནོ། །རྗེས་
[85a.3]སུ་འགྲོ་བ་དང་ལྡོག་པ་དང་ལྡན་པ་ནི་གོ་བར་བྱེད་པ་ཡིན་པར་བཤད་དོ། །དེས་ན་དེ་མེད་ན་གོ་བར་བྱེད་པ་མེད་པ་ཡིན་ནོ། །མ་ངེས་པ་ལ་ནི་ལྡོག་པ་ཡོད་པ་མ་ཡིན་ནོ། །དེ་ཡང་རྣམ་པ་གཉིས་ཏེ་ཐུན་མོང་དང་ཐུན་མོང་མ་ཡིན་པའོ། །དེ་ལ་ཐུན་མོང་པ་གཅིག་ཏུ་རྗེས་སུ་འགྲོ་བ་དང་
[85a.4]ལྡན་པ་ཉིད་ཀྱིས་ལྡོག་པ་མེད་པ་སྟེ་གཞལ་བྱ་ཉིད་དོ། །ཐུན་མོང་མ་ཡིན་པ་ནི་མཉན་བྱ་ཉིད་དེ། ཐམས་ཅད་ལ་མེད་པའི་ཕྱིར་བསྒྲུབ་པར་བྱ་བ་མེད་པ་བཞིན་དུ་བསྒྲུབ་པར་བྱ་བ་ལས་བཟློག་པ་མེད་པ་ལ་ཡང་དེ་མེད་པ་ཉིད་དོ། །དེས་ན་ལྡོག་པས་ཐོབ་པར་བྱ་བའི་གོ་བར་བྱེད་པའི་
[85a.5]བདག་ཉིད་བདག་གིར་བྱེད་པ་མ་ཡིན་ནོ། །གང་ཞིག་གང་མེད་པ་ལ་མེད་པ་དེ་ནི་ཡོད་པ་ན་དེ་མེད་པ་བཟློག་པ་ན་དེ་གོ་བར་བྱེད་པ་ཡིན་ཏེ། དུ་བས་མེ་མེད་པ་བཞིན་ནོ། །མེ་མེད་པ་ལ་དུ་བ་མེད་ལ་དེ་ན་ནི་ཡོད་པ་ཡིན་པ་དེས་ན་མེ་མེད་པ་ཟློག་པར་བྱེད་པའི་ཕྱིར་རོ། །དེས་ན་མཉན་
[85a.6]བྱ་ཉིད་ཀྱང་གལ་ཏེ་མི་རྟག་པ་བུམ་པ་ལ་སོགས་པ་མེད་པས་རྟག་པ་ཉིད་ཀྱི་སྒྲུབ་བྱེད་དུ་འགོད་ན་དེ་ལ་མེད་པས་རང་ཡོད་པས་དེ་མེད་པའི་གོ་བར་བྱེད་པ་ཡིན་པའི་ཕྱིར་མི་རྟག་པ་ཉིད་གྲུབ་པར་འགྱུར་རོ། །དེས་ན་ནམ་མཁའ་ལ་སོགས་པ་རྟག་པ་ལ་ཡང་མ་མཐོང་བའི་ཕྱིར་རང་ཡོད་པས་
[85a.7]རྟག་པ་ཡང་མེད་པར་སྟོན་པ་ཡིན་ཏེ། དེས་ན་གཅིག་ཏུ་ངེས་པའི་ལྡོག་པ་མེད་པས་གོ་བར་བྱེད་པ་མ་ཡིན་ནོ། །དེ་ལྟར་ན་ཐུན་མོང་མ་ཡིན་པ་ལ་ལྡོག་པས་ཐོབ་པར་བྱ་བའི་རྣམ་པར་གཅོད་པ་རྟོག་པར་བྱེད་པ་མ་ཡིན་པར་བརྗོད་པ་གང་ཡིན་པ་དེ་མ་མཐོང་བ་ལ་བརྟེན་ནས་ལྡོག་པར་བརྗོད་
[85b]
[85b.1]ན་མི་འགྲུབ་བོ། །གང་གིས་ཕྱིར་མཉན་བྱ་ཉིད་ལ་སོགས་པ་ཐུན་མོང་མ་ཡིན་པ་རྟག་པ་དང་མི་རྟག་པ་དག་ལ་མ་མཐོང་བའི་ཕྱིར་རྟག་པ་དང་མི་རྟག་པ་རྣམ་པར་གཅོད་པའི་གཏན་ཚིགས་ཉིད་དུ་ཅི་སྟེ་མི་འགྱུར། གང་ཞིག་གང་མེད་པ་ལ་མ་མཐོང་བ་དེ་ནི་དེ་མེད་པ་ལ་མེད་པ་ཁོ་ན་ཡིན་ནོ། །
[85b.2]དེས་ན་མཉན་བྱ་ཉིད་རྟག་པ་མེད་པ་ལ་མ་མཐོང་བའི་ཕྱིར་རྟག་པ་མེད་པ་ལ་མེད་པ་ཁོ་ནའོ། །དེ་ལྟ་མ་ཡིན་ན་བྱས་པ་ཉིད་ཀྱང་མི་རྟག་པ་མེད་པ་ལ་མེད་པར་ཇི་ལྟར་འགྲུབ། དེས་ན་མཉན་བྱ་ཉིད་སྒྲ་ལ་ཡོད་ལ་དེ་ཡང་རྟག་པ་མེད་པ་ལ་མེད་པ་ཡིན་པའི་ཕྱིར་ཇི་ལྟར་རྟག་པ་མེད་པ་རྣམ་
[85b.3]པར་བཅད་པ་གོ་བར་མི་བྱེད། དེ་བཞིན་དུ་མི་རྟག་པ་མེད་པ་ལ་མ་མཐོང་བའི་ཕྱིར་དེ་མེད་པ་ལ་མེད་པ་ཉིད་ཡིན་པའི་ཕྱིར་དེ་རྣམ་པར་གཅོད་པར་བྱེད་པ་ཉིད་དོ། །འགྲེལ་པ་ནི་མཉན་པར་བྱ་བ་ཉིད་ཀྱང་ཞེས་བྱ་བའོ། །གང་གི་ཕྱིར་དེ་རྟག་པ་དང་མི་རྟག་པ་དག་ལ་མ་མཐོང་བའི་ཕྱིར་དེ་
[85b.4]དག་ལས་ལྡོག་པ་ཡིན་ནོ། །པས་ཞེས་བྱ་བ་ནི་གཏན་ཚིགས་དེ་བས་ན་དེ་དག་རྣམ་པར་གཅོད་པའི་གཏན་ཚིགས་ཉིད་དུ་འགྲུབ་སྟེ་སྔར་ཇི་སྐད་བཤད་པ་བཞིན་ནོ། །དེ་མེད་པ་ལ་མེད་པར་ཡང་གྲུབ་ལ། རང་ཡོད་པས་དེ་རྣམ་པར་གཅོད་པ་ཡང་མ་ཡིན་ནོ་ཞེས་བྱ་བ་འདི་མི་སྲིད་དོ། །
[85b.5]དེས་ན་དེ་རྣམ་པར་གཅོད་པ་ནི་དེ་ལས་ལྡོག་པ་ལས་གཞན་མ་ཡིན་ནོ། །གང་མེད་ན་མེད་པའི་ཕྱིར་གང་ལས་གང་ཞིག་ལྡོག་པ་དེ་ལས་ནི་དེ་རྣམ་པར་བཅད་པ་གཞན་མ་ཡིན་ཏེ། དེ་ཙམ་གྱིས་གྲུབ་པའི་ཕྱིར་རོ། །ཅི་དེ་ལྟར་ན་མཉན་བྱ་ཉིད་གོ་བྱེད་དུ་བཀོད་དམ་ཞེ་ན་མ་ཡིན་ཞེས་སྨྲས་ཏེ་
[85b.6]རྗེས་སུ་འགྲོ་བ་མེད་པའི་ཕྱིར་རོ། །མ་མཐོང་བ་ཙམ་གྱིས་ལྡོག་པ་གཏན་ཚིགས་ཀྱི་ལྡོག་པ་མ་ཡིན་ནོ་ཞེས་བསྟན་པའི་ཕྱིར་འདི་ཉེ་བར་བཀོད་དེ་དེ་ལྟར་ཡིན་ན་མཉན་པར་བྱ་བ་ཉིད་ཀྱང་རྟག་པ་དང་མི་རྟག་པ་མེད་པ་ལ་མ་མཐོང་བའི་ཕྱིར་དང་དེ་དག་མེད་པ་ལ་མེད་པར་གོ་བར་བྱེད་པར་ཐལ་
[85b.7]བའི་ཕྱིར་རོ། །དེས་ན་རང་ཡོད་པས་དེ་མེད་པ་སྟོན་པར་བྱེད་པ་ཉིད་དོ། །མ་མཐོང་ཡང་མེད་པ་མི་འགྲུབ་པའི་ཕྱིར་དེ་མེད་པ་ལ་མ་མཐོང་བ་ལས་ཀྱང་ལྡོག་པ་མི་འགྲུབ་ན་ནི་རྣམ་པར་གཅོད་པ་མ་ཡིན་པར་འགྱུར་བ་ཡིན་ནོ། །གང་གི་ཚེ་གང་མེད་པ་ལ་མ་མཐོང་བ་དེ་མེད་པ་ལ་མེད་པ་ཉིད་དོ་
[86a]
[86a.1]ཞེས་ངེས་པ་ཡིན་ན་ནི། དེའི་ཚེ་གང་ན་འདི་ཡོད་པ་དེར་དེ་མེད་པར་ཇི་ལྟར་འགྱུར། དེ་མེད་པ་ཡིན་ན་ནི་འདི་ཉིད་མེད་པར་འགྱུར་རོ། །ཡོད་པ་ཡང་ཡིན་ཏེ་དེས་ན་ཇི་ལྟར་དེ་མེད་པ་མེད་པར་མི་འགྲུབ། དེ་བཤད་པ་ནི་རྣམ་པར་གཅོད་པ་མ་ཡིན་པ་དེ་ནི་ཞེས་བྱ་བ་
[86a.2]ནས་རྟོག་པར་མི་བྱེད་ཅེས་བྱ་བའི་མཐར་ཐུག་པར་རོ། །ལྡོག་པ་ཉིད་དུ་མ་ངེས་པའི་ཕྱིར་རྣམ་པར་གཅོད་པ་མ་ཡིན་པར་འགྱུར་གྱི། དེས་ན་ནི་རྣམ་པར་གཅོད་པ་ཁོ་ནའོ། །འདི་ཁྱེད་ཀྱིས་རང་གི་གཞུང་ལ་ཡང་མཉན་པར་བྱ་བ་ཉིད་ཇི་ལྟར་རྣམ་པར་གཅོད་པར་བྱེད་པ་མ་ཡིན་ཞེས་
[86a.3]དོགས་པ་བསུ་ནས་དེ་ལ་རིགས་པ་བརྗོད་པ་ནི་མ་ཡིན་ཏེ། རང་གི་གཞུང་ལ་ཚུལ་གསུམ་མེད་པ་ཉིད་ཀྱིས་འདི་གོ་བར་བྱེད་པ་མ་ཡིན་པར་གྲུབ་པས་རྣམ་པར་གཅོད་པར་བྱེད་པ་ཉིད་དུ་ཐེ་ཚོམ་མི་ཟ་བའི་ཕྱིར་རོ། །གལ་ཏེ་གཞན་ལ་ཡང་དེ་ཉིད་ཀྱིས་གོ་བར་བྱེད་པ་མ་ཡིན་པའི་ཕྱིར་ཐེ་ཚོམ་ཟ་
[86a.4]བར་མི་འགྱུར་རོ་ཞེ་ན། བདེན་ཏེ་གོ་བར་བྱེད་པ་མ་ཡིན་པ་མ་མཐོང་བ་ཚད་མར་བྱེད་ན་གཉི་ག་རྣམ་པར་གཅོད་པ་ཅི་སྟེ་མི་འགྲུབ་ཅེས་བྱ་བར་བསྟན་ཏོ། །ངེད་ཀྱི་ལྟར་ན་ནི་གང་གིས་ཐལ་བ་འདིར་འགྱུར་བ་མ་མཐོང་བ་ཚད་མ་མ་ཡིན་ནོ། །དེས་ན་འདི་ལྡོག་པ་མེད་པར་གཞུང་གཟུགས་
[86a.5]པའི་ཕྱིར་མ་མཐོང་བ་ཚད་མ་ཡིན་པ་དགག་པར་བྱེད་པ་ཡིན་ཏེ། དེ་ལྟ་མ་ཡིན་ན་རྣམ་པར་གཅོད་པར་བྱེད་པ་ཉིད་དུ་ཐལ་བར་འགྱུར་རོ། །སྐྱེད་པར་བྱེད་པ་ཐམས་ཅད་ངང་གིས་འཇིག་པ་སྐྱེད་པར་བྱེད་པ་ཡིན་པའི་ཕྱིར་མཉན་པར་བྱ་བ་ཉིད་ཀྱིས་ཀྱང་ངང་གིས་འཇིག་པའི་རང་བཞིན་མི་
[86a.6]རྟག་པ་ཉིད་སྒྲུབ་པར་བྱེད་པ་མ་ཡིན་ནམ་ཞེ་ན་མ་ཡིན་ཏེ། རྗེས་སུ་འགྲོ་བ་མེད་པར་གོ་བར་བྱེད་པ་ཉིད་དུ་མི་སྲིད་དོ་ཞེས་རྣམ་པར་ངེས་པའི་རྗེས་སུ་འབྲང་བར་བཤད་ཟིན་ཏོ། །འདིར་ཕ་རོལ་པོས་སྨྲས་པ་གལ་ཏེ་ཡང་དེ་མེད་པ་ལ་མེད་པར་རྟོགས་པ་དེ་ལྟ་ན་ཡང་གང་གིས་འདིས་གཅིག་
[86a.7]རྣམ་པར་གཅོད་པ་ན་མ་མཐོང་བ་ཁྱད་པར་མེད་པའི་ཕྱིར་གཞན་ཡང་རྣམ་པར་གཅོད་པར་འགྱུར་བ་འདི་ལྡོག་པའི་འབྲས་བུ་རྣམ་པར་གཅོད་པ་དང་ལྡན་པ་མ་ཡིན་ནོ། །དེ་ནི་འཐད་པ་མ་ཡིན་ཏེ། འདི་ལྟར་ཚད་མ་གཞན་གྱིས་གནོད་པ་ཡིན་ནོ། །དོགས་པ་འདི་ཉིད་རྣམ་པར་འགྲེལ་
[86b]
[86b.1]པ་ནི་ཅི་སྟེ་ཞེས་བྱ་བ་ཡིན་ནོ། །གལ་ཏེ་ཞེས་བྱ་བ་ནི་ཅི་སྟེ་ཞེས་བྱ་བ་ཡིན་ནོ། །གཉི་ག་རྣམ་པར་གཅོད་པ་ཞེས་བྱ་བས་ནི་ཚད་མ་གཞན་ཞེས་བྱ་བའི་ཡུལ་བཤད་པ་ཡིན་ནོ། །ཚད་མ་གཞན་གྱིས་གནོད་པ་ཅི་སྟེ་ཞེ་ན་ཡོད་དོ་ཞེས་བརྗོད་དོ། །གནོད་པར་བྱེད་པའི་ཚད་མ་གཞན་
[86b.2]དེ་ཡང་གང་ཞེ་ན་བཤད་པ་ཕན་ཚུན་རྣམ་པར་གཅོད་པའི་ངོ་བོ་ཅན་རྣམས་ནི་ཞེས་སྨོས་སོ། །གང་དག་ལ་ཕན་ཚུན་རྣམ་པར་གཅོད་པའི་ངོ་བོ་ཡོད་པ་སྟེ་རྟག་པ་ཉིད་ནི་མི་རྟག་པ་ཉིད་རྣམ་པར་བཅད་པའི་རང་བཞིན་ཅན་ཡིན་ལ། མི་རྟག་པ་ཡང་དེ་རྣམ་པར་བཅད་པའི་རང་བཞིན་
[86b.3]ཅན་ཡིན་ནོ། །གལ་ཏེ་ཡང་འདི་དག་ལ་ལྡོག་པ་དང་རྗེས་སུ་འཇུག་པའི་ཆོས་ཀྱི་བདག་ཉིད་ཀྱི་རང་བཞིན་གྱི་ངོ་བོ་ཡང་ཡོད་མོད་ཀྱི་དེ་ལྟ་ན་ཡང་ཕན་ཚུན་རྣམ་པར་གཅོད་པའི་ངོ་བོ་ཉིད་ཀྱིས་སྔོན་པོ་དང་སེར་པོ་ལ་སོགས་པ་དང་མི་འདྲ་བར་བརྗོད་པ་ཡིན་ནོ། །སྔོན་པོ་ནི་སེར་པོ་ལས་ལྡོག་
[86b.4]པ་ཡིན་ཡང་། སྔོན་པོ་བཀག་པ་ཙམ་གྱིས་ངོ་བོ་ནི་སེར་པོ་མི་འགྱུར་ཏེ། དེ་བཀག་པས་དཀར་པོ་ཡང་འགྱུར་བའི་ཕྱིར་རོ། །གང་ཞིག་བཀག་པ་གང་གཟུང་བ་མེད་པ་མ་ཡིན་པ་དེ་དག་ཁོ་ནའོ། །རྣམ་པ་དེ་ལྟ་བུའི་ཁྱད་པར་བསྟན་པའི་ཕྱིར་ཕན་ཚུན་བཀག་པའི་ངོ་བོ་ཅན་དུ་ཉེ་བར་
[86b.5]བཀོད་དོ། །དེ་ལ་དངོས་པོ་ལྡོག་པའི་ཆོས་དང་བྲལ་ན་གདོན་མི་ཟ་བར་རྗེས་སུ་འཇུག་པའི་ཆོས་ཉིད་དོ། །དེ་ནི་ཡོད་པའི་རང་བཞིན་ཡིན་ལ། བྱུང་མ་ཐག་ཏུ་འཇིག་པ་མ་ཡིན་པའི་ཕྱིར་འདི་དེ་ལྟ་བུའི་ངོ་བོར་གནས་པར་ཁས་བླངས་པ་ཡིན་ནོ། །དེ་བཞིན་དུ་རང་གི་རང་བཞིན་དུ་གནས་པ་
[86b.6]མ་ཡིན་པའི་ཕྱིར་ལྡོག་པའི་ཆོས་ཉིད་དུ་ཁས་བླངས་པར་འགྱུར་རོ། །དེ་བས་ན་རྣམ་པ་དེ་ལྟ་བུའི་དོན་རྣམས་ནི་གཅིག་རྣམ་པར་བཅད་པས་གཞན་སྒྲུབ་པ་ཡིན་ནོ། །འདི་མེད་པར་དགག་པ་ཙམ་ཡང་མ་ཡིན་ཏེ། སྔོན་པོ་རྟག་གམ་མི་རྟག་ཅེས་བྱ་བ་ནི་དངོས་པོ་གཞན་མ་བསྒྲུབས་པར་
[86b.7]མཐར་ཕྱིན་པར་མི་འགྱུར་ཏེ་དེ་བཀག་ནས་རྟག་པ་འམ་མི་རྟག་པ་རྟོགས་པའི་ཕྱིར་ཇི་སྐད་སྔར་བཤད་པ་བཞིན་ནོ། །དགག་པ་མ་ཡིན་ཏེ་ཞེས་བྱ་བ་སྐབས་ཀྱིས་གཞན་ཉིད་དོ། །འདི་སྐད་བརྗོད་པ་ཡིན་ཏེ། འདི་མི་རྟག་པ་ཡིན་ནམ་ཞེས་མི་རྟག་པ་བཀག་པས་རྟག་པ་བསྒྲུབ་པར་
[87a]
[87a.1]འགྱུར་བ་ཡིན་ཏེ། དེས་ན་འདི་ལ་དེ་ཡང་དགག་པར་ནུས་པ་ནི་མ་ཡིན་ནོ། །དེ་བཞིན་དུ་མཉན་པར་བྱ་བ་ཉིད་ལ་སོགས་པའི་ཆོས་ཀྱང་མ་མཐོང་བའི་ཕྱིར་མི་རྟག་པ་མེད་པ་ལས་ལྡོག་ཀྱང་རང་ཡོད་པས་མི་རྟག་པ་མེད་པ་རྟག་པའི་བདག་ཉིད་སེལ་བ་ན་མི་རྟག་པ་ཉིད་རྟོགས་པར་
[87a.2]བྱེད་ཀྱི་དེ་ཡང་མེད་པར་ཤེས་པར་བྱེད་ནུས་པ་ནི་མ་ཡིན་ནོ། །མི་རྟག་པ་ཉིད་མེད་པ་ལ་མེད་པའི་ཕྱིར་ཡོད་པ་ཉིད་ལས་མི་རྟག་པ་ཉིད་རྟག་པ་ཡིན་ཏེ། དེ་ཉིད་ཀྱི་ཚེ་དགག་པ་མི་རུང་བའི་ཕྱིར་རོ། །དེས་ན་མཉན་བྱ་ཉིད་མི་རྟག་པ་མེད་པ་ལ་མེད་པའི་ཕྱིར་རང་ཡོད་པས་རྟག་པ་འགོག་པ་ན་མི་རྟག་པ་ཉིད་སྒྲུབ་པ་
[87a.3]ཡིན་ཏེ་དེ་ནི་དངོས་པོའི་ཆོས་ཡིན་པའི་ཕྱིར་རོ། །རྟག་པ་མེད་པ་ལ་མེད་པའི་ཕྱིར་ནི་རང་ཡོད་པས་མི་རྟག་པ་སེལ་བ་ན་རྟག་པ་སྒྲུབ་པ་ཡིན་པའི་ཕྱིར་ཆོས་གཅིག་གི་ཡུལ་ཡོད་པ་དང་མེད་པར་རྟོགས་པར་འགྱུར་རོ། །དེ་སྨྲས་པ་ནི་བསྒྲུབ་པ་དང་དགག་པ་དག་ནི་འགལ་བའི་ཕྱིར་རོ་
[87a.4]ཞེས་བྱ་བའོ། །དེས་ན་འདི་མེད་པ་ལ་མེད་པ་ཡིན་ཡང་རྟག་པ་དང་མི་རྟག་པ་དག་གཅིག་ལ་མེད་པ་མི་རུང་བའི་ཕྱིར་གང་གིས་རང་ཡོད་པས་རྣམ་པར་གཅོད་པར་ཡང་བྱེད་པར་འགྱུར་བ་དེ་མེད་པ་རྟོགས་པར་བྱེད་པ་ནི་མ་ཡིན་ནོ་ཞེ་ན། འདི་བཟློག་པའི་ཕྱིར་ད་ནི་ཞེས་སྨོས་སོ། །གལ་
[87a.5]ཏེ་མཉན་པར་བྱ་བ་ཉིད་རྟག་པ་དང་མི་རྟག་པ་ལ་མ་མཐོང་བ་ཡིན་ཡང་རྣམ་པར་གཅོད་པར་བྱེད་པ་ཉིད་དུ་ཐལ་བར་འགྱུར་བའི་ཕྱིར་དེ་མེད་པ་ལ་མེད་པ་མ་ཡིན་ནོ། །དེ་ལྟར་ཡིན་ན་གཉི་ག་ལས་ཕྱི་རོལ་དུ་གྱུར་པ་མི་སྲེད་པ་གནོད་པར་བྱེད་པ་ཡོད་པའི་ཕྱིར་རོ་ཞེས་བྱ་བ་ཡིན་ན། འོ་ན་ནི་
[87a.6]མ་མཐོང་བ་ལ་གནོད་པའི་ཕྱིར་མ་མཐོང་བ་ལས་མེད་པ་ཡིན་ནོ། །འདི་སྐད་བརྗོད་པ་ཡིན་ཏེ། མ་མཐོང་བ་མེད་པའི་སྒྲུབ་པར་བྱེད་པ་ཡིན་པ་མ་བཀག་པར་ནི་གཉི་ག་ལས་ཕྱི་རོལ་དུ་གྱུར་པ་མི་སྲིད་པ་ཉིད་རྣམ་པར་གཅོད་པར་བྱེད་པ་ལ་གནོད་པར་བྱེད་པ་མ་ཡིན་གྱི་འོན་ཀྱང་མ་མཐོང་བ་
[87a.7]མེད་པའི་སྒྲུབ་པར་བྱེད་པ་ཉིད་ལ་གནོད་པ་ཡིན་ནོ། །དེ་ལ་མི་གནོད་པར་ནི་ཇི་སྐད་བཤད་པའི་ཚུལ་གྱིས་དེས་ཉེ་བར་བཞག་པའི་གཉི་ག་རྣམ་པར་གཅོད་པར་བྱེད་པ་ཉིད་དགག་པར་མི་ནུས་པའི་ཕྱིར་རོ། །དེའི་ཕྱིར་གནོད་པར་བྱེད་པའི་ཚད་མས་ནི་མ་མཐོང་བ་ཉིད་རིག་པར་བྱ་བ་ཡིན་ཏེ།
[87b]
[87b.1]དེས་ན་འདི་ལས་མེད་པར་མི་འགྲུབ་བོ། །འགྲེལ་པ་ནི་དེ་ལྟར་ན་ཞེས་བྱ་བ་ཡིན་ནོ། །དེ་ལྟར་རྣམ་པ་འདིས་མ་མཐོང་བ་ནི་ཚད་མ་མ་ཡིན་ཏེ། རང་གི་ཡུལ་མེད་པར་སྒྲུབ་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །སྐབས་སུ་བབ་པའི་རྣམ་པ་དེ་ཉིད་གསལ་བར་བྱེད་པ་ནི་གནོད་པ་
[87b.2]སྲིད་པའི་ཕྱིར་རོ་ཞེས་བྱ་བ་ཡིན་ནོ། །གང་ལ་གནོད་པ་ཡོད་པ་དེར་ཚད་མ་མ་ཡིན་མོད། དེ་ཙམ་གྱིས་ནི་མ་མཐོང་བ་ཙམ་སྤང་བ་མ་ཡིན་ཏེ། ཟླ་བ་གཉིས་པའི་ཤེས་པ་ཚད་མ་མ་ཡིན་པས་དབང་པོའི་ཤེས་པ་ཐམས་ཅད་ཚད་མ་མ་ཡིན་པར་ཐལ་བའི་ཕྱིར་རོ་ཞེ་ན། དེ་བཞིན་དུ་
[87b.3]ཞེས་སྨོས་སོ། །གནོད་པ་མ་མཐོང་བ་གཞན་ལ་ཡང་ཚད་མ་གཞན་གྱིས་གནོད་པ་སྲིད་པ་འདི་ལྟར་གལ་ཏེ་གང་ཞིག་གང་མེད་པ་ལ་མ་མཐོང་བ་དེ་མེད་པ་ལ་མེད་པར་ངེས་པ་ཡིན་ན་འདི་ཡང་རྟག་པ་དང་མི་རྟག་པ་དག་མེད་པས་ན་དེ་མེད་པ་ལ་མེད་དོ་ཞེས་རྟོགས་པར་འགྱུར་རོ། །གནོད་
[87b.4]པར་བྱེད་པ་མཐོང་བ་ལས་ནི་དེ་མེད་པ་ལ་མ་མཐོང་བ་ཡིན་ཡང་དེ་ལྟ་ན་ཡང་དེ་ཡོད་པ་ཡིན་ནོ་ཞེས་རྟོགས་པར་འགྱུར་རོ། །རྣམ་པ་དེ་ལྟ་བུའི་ཁྱད་པར་དང་ལྡན་པ་གནོད་པ་ན་གཞན་གནོད་པ་མ་ཡིན་པར་རྟོགས་པར་འགྱུར་བ་གང་ཡིན་པ་མ་མཐོང་བ་དེ་ལས་མ་མཐོང་བ་གཞན་ཁྱད་པར་ནི་མེད་
[87b.5]དོ། །ཁྱད་པར་མེད་པས་ནི་དེ་བཞིན་དུ་གཞན་ཡང་དེའི་རང་བཞིན་ཅན་ཡིན་པའི་ཕྱིར་ན་ཇི་ལྟར་མ་གནོད་ཅེས་བྱ་བར་འགྱུར། དབང་པོའི་ཤེས་པ་ལ་ནི་ཚོགས་པ་མི་འདྲ་བས་བསྐྱེད་པར་བྱ་བ་ཉིད་ཀྱི་མངོན་སུམ་དང་མངོན་སུམ་མ་ཡིན་པ་དང་ཁྱད་པར་ཡོད་པ་ཁོ་ནའོ། །དེས་ན་མངོན་སུམ་མ་
[87b.6]ཡིན་པས་གནོད་ཀྱང་མངོན་སུམ་ཚད་མ་མ་ཡིན་པར་འགྱུར་རོ། །འགྲེལ་པ་ནི་མཚན་ཉིད་དང་ལྡན་པ་ཞེས་བྱ་བའོ་སྙམ་པར་བྱ་བ་གང་ཡིན་པ་དང་བྱས་པ་ཉིད་ལ་སོགས་པ་གང་ཡིན་པའི་མ་མཐོང་བ་འདི་ནི་ཐ་དད་པ་ཡོད་པ་མ་ཡིན་ལ་དེ་ཡང་བསྒྲུབ་པར་བྱ་བ་མེད་པ་ལ་སྒྲུབ་པར་བྱེད་
[87b.7]པ་མེད་པའི་སྒྲུབ་པར་བྱེད་པ་ཡིན་པ་ལ་གནོད་པ་ཡིན་ནོ་དེས་ན་འདི་ཡང་དེ་བཞིན་དུ་དོགས་སོ། །འདི་ལྟར་མཉན་བྱ་ཉིད་ནི་སྒྲ་གཅིག་པུའི་ཆོས་ཡིན་པས་བུམ་པ་དང་ནམ་མཁའ་དག་ལ་མེད་པ་ཡིན་གྱི་རྟག་པ་དང་མི་རྟག་པ་དག་ལས་ཐ་དད་པ་ནི་མ་ཡིན་པ་དེ་བཞིན་དུ་བྱས་པ་ཉིད་ཀྱང་བུམ་
[88a]
[88a.1]པ་ལ་སོགས་པ་ཉིད་ཀྱི་ཆོས་ཡིན་པས་ནམ་མཁའ་ལ་མེད་པ་ཉིད་ཀྱིས་མི་རྟག་པ་མེད་པ་ནི་མ་ཡིན་ཏེ། དེས་ན་སྒྲ་ལ་དེ་དམིགས་པས་རྟག་པ་བཟློག་པར་མི་རིགས་སོ། །བྱས་པ་མ་མཐོང་བ་གང་ཡིན་པ་དེ་ལས་འདི་གཞན་པ་ཉིད་ནི་མ་ཡིན་ནོ། །བལྟར་
[88a.2]རུང་བ་མ་མཐོང་བ་ལ་སོགས་པའི་ཁྱད་པར་དང་། མ་མཐོང་བ་ཙམ་ནི་འདི་ལ་ཡང་སྦྱར་བར་སླ་བའི་ཕྱིར་རོ། །དེས་ན་ལྡོག་པར་སྒྲུབ་པར་བྱེད་པའི་མ་མཐོང་བ་ལ་ཡོད་པ་མ་མཐོང་བའི་མཚན་ཉིད་ཀྱིས་འདིར་རིགས་པ་མ་ཡིན་ནོ། །དེས་ན་དེ་ལ་གནོད་ན་དེའི་མཚན་ཉིད་སུན་ཕྱུང་བ་ཁོ་ནར་འགྱུར་
[88a.3]ཏེ། མ་དམིགས་པ་ཉིད་ལ་གནོད་པར་བྱས་པར་གྱུར་པས་ཐམས་ཅད་ལ་ཡིད་བརྟན་དུ་མི་རུང་ངོ་། །རབ་རིབ་ལ་སོགས་པ་ལས་སྐྱེས་པ་ལ་གནོད་པས་ནི་མངོན་སུམ་ལ་གནོད་པ་མ་ཡིན་ཏེ། གཞན་གནོད་པས་གཞན་ལ་འགལ་བ་མ་ཡིན་པའི་ཕྱིར་རོ། །བྱིས་པ་མ་ཡིན་པ་སུ་ཡང་
[88a.4]གནོད་པ་མེད་པ་ཉིད་ཀྱིས་ནི་མངོན་སུམ་ཚད་མར་མི་སྨྲའོ། །འོན་ཀྱང་མི་སླུ་བ་དང་ལྡན་པའི་ཕྱིར་རོ། །དེས་ནི་དེའི་ཡུལ་དེ་ཉིད་ཡིན་པར་གྲུབ་པས་མངོན་སུམ་ཚད་མར་འགྱུར་བ་ཡིན་ནོ་ཞེས་གཞན་དུ་བཤད་ཟིན་ཏོ། །གལ་ཏེ་རྗེས་སུ་དཔག་པའི་ཡུལ་ལ་ཡང་མངོན་སུམ་དང་རྗེས་སུ་
[88a.5]དཔག་པ་དང་འགལ་བ་མཐོང་སྟེ་དེ་དག་གི་ཡུལ་ལས་བཟློག་པའི་དོན་རྟོགས་པར་བྱེད་པའི་བདག་ཉིད་ཡིན་པའི་ཕྱིར་རོ། །དེ་བས་ན་ཡིད་བརྟན་དུ་མི་རུང་བར་མཐོང་བར་ཐལ་བར་འགྱུར་རོ། །འདི་ལྟར་སྔོ་བསངས་ཡིན་ཏེ། དེའི་བུ་ཡིན་པའི་ཕྱིར་ཞེས་བྱ་བའི་རྗེས་སུ་དཔག་པ་ནི་
[88a.6]མངོན་སུམ་གྱིས་གནོད་པ་ཡིན་ལ་བྱས་པའི་ཕྱིར་མི་རྟག་གོ་ཞེས་བྱ་བ་ནི་རྟག་སྟེ་མཉན་བྱ་ཡིན་པའི་ཕྱིར་སྒྲ་ཉིད་བཞིན་ནོ་ཞེས་བྱ་བའི་རྗེས་སུ་དཔག་པ་གནོད་པ་ཡིན་ནོ། །དེས་ན་རྗེས་སུ་དཔག་པ་ཡང་ཚད་མ་མ་ཡིན་པར་འགྱུར་རོ། །དེའི་ཕྱིར་དེ་ཡང་གནོད་པ་མེད་པ་ཙམ་གྱིས་ཚད་མ་
[88a.7]མ་ཡིན་པ་དེ་ཡོད་པ་ནི་ཚད་མ་ཡིན་པར་འདོད་པར་བྱ་བ་ཡིན་པ་དེས་ན་མཐོང་བ་ལ་ཡང་ཁྱད་པར་མེད་དོ་ཞེ་ན། འདི་དགག་པའི་ཕྱིར་མ་ཡིན་ཏེ་ཞེས་སྨོས་སོ། །རྗེས་སུ་དཔག་པའི་ཡུལ་ལ་མངོན་སུམ་དང་རྗེས་སུ་དཔག་པ་དང་འགལ་བ་ཡོད་པ་ནི་མ་ཡིན་ནོ། །ཇི་སྐད་བཤད་པ་བུམ་
[88b]
[88b.1]པ་ལྟ་བུ་ལ་ཞེས་བྱ་བ་ནི་འབྲེལ་པ་ལ་བརྟེན་པ་དངོས་པོའི་རང་བཞིན་རྣམ་པར་དཔྱོད་པས་བསྐྱེད་པ་ལའོ། །དེ་དག་གིས་གནོད་པ་གང་ཡིན་པ་དེ་ནི་རྣམ་པ་དེ་ལྟ་བུ་མ་ཡིན་པས་བསྐྱེད་པ་ཡིན་པའི་ཕྱིར་རྗེས་སུ་དཔག་པ་མ་ཡིན་པ་ཉིད་གནོད་པ་ཡིན་ནོ། །དེ་བཤད་པ་ནི་སྲིད་ན་ནི་ཞེས་
[88b.2]བྱ་བའོ་སྲིད་པ་གང་ལ་ཡོད་པ་ནི་སྲིད་པ་ཅན་དེ་ཡང་སྐབས་ཀྱིས་མངོན་སུམ་དང་རྗེས་སུ་དཔག་པ་དང་འགལ་བ་ཁོ་ན་ཡིན་པ་དེས་ན་མངོན་སུམ་དང་རྗེས་སུ་དཔག་པ་དང་འགལ་བ་སྲིད་པ་དང་ལྡན་པ་ཞེས་བརྗོད་པར་འགྱུར་རོ། །དེ་ནི་རྗེས་སུ་དཔག་པའི་མཚན་ཉིད་ལས་ཕྱི་རོལ་དུ་གྱུར་པའི་ཕྱིར་
[88b.3]རོ། །རྗེས་སུ་དཔག་པ་ནི་དངོས་པོའི་མཐུས་བསྐྱེད་པའི་རྟོགས་པ་མ་ཡིན་གྱི་འོན་ཀྱང་རྟོགས་པའི་དོན་དུ་རྟོགས་པ་འདི་ནི་དངོས་པོ་ཡོད་པའི་རིགས་པ་ལ་བརྟེན་པས་ཡིན་ནོ། །དེ་དང་ཁྱད་པར་མེད་པའི་རང་བཞིན་གྱི་རྗེས་སུ་དཔོག་པ་ལ་གནོད་པ་སྲིད་པའི་ཕྱིར་དེ་ལྟ་བུའི་རིགས་
[88b.4]པས་ཡོད་པའི་ཕྱིར་དོན་གཞན་གྱི་རྗེས་སུ་དཔོག་པར་འགྱུར་བ་གང་ཡིན་པ་འདི་ལ་དངོས་པོ་ཡོད་པའི་རིགས་པ་ཡོད་པ་མ་ཡིན་ནོ། །དོན་གྱི་རང་བཞིན་གྱིས་བསྐྱེད་པའི་རྟོགས་པ་ལ་ནི་སྲིད་པར་འགྱུར་རོ། །དེར་ཡང་གནོད་པར་བྱེད་པ་མེད་པའི་ནི་ཚད་མ་མ་ཡིན་ནོ་ཞེས་གཞན་དུ་
[88b.5]བཤད་ཟིན་ཏོ། །གལ་ཏེ་རྗེས་སུ་དཔག་པའི་ཡུལ་ལ་གནོད་པ་མི་སྲིད་ན་སློབ་དཔོན་ཕྱོགས་ཀྱི་གླང་པོས་འགལ་བ་འཁྲུལ་པ་མེད་པ་ཅན་མི་བརྗོད་པར་འགྱུར་རོ་ཞེ་ན། དོགས་པ་འདི་སྤོང་བ་ནི་འགལ་བ་འཁྲུལ་པ་མེད་པ་ཅན་མ་བརྗོད་པ་ནི་འདོད་པ་ཡིན་ཏེ། དེ་ནི་སློབ་དཔོན་གྱིས་
[88b.6]རྗེས་སུ་དཔག་པའི་ཡུལ་ལ་མ་བརྗོད་པའི་ཕྱིར་རོ། །འོ་ན་གང་ལ་བརྗོད་ཅེ་ན་འདིའི་ཡུལ་ནི་བསྟན་པར་བྱའོ་ཞེས་སྨོས་སོ། །སྐབས་སུ་བབ་པ་ཉིད་ཀྱིས་བསྒྲུབ་པར་བྱ་བ་ལ་གཏན་ཚིགས་གཞན་ཡང་བསྣན་པའི་ཕྱིར་གཞན་ཡང་ཞེས་སྨོས་སོ། །མ་མཐོང་བའི་གཏན་ཚིགས་ཀྱི་ཕྱིར་
[88b.7]གྲང་བ་ཡང་མ་ཡིན་དྲོ་བ་ཡང་མ་ཡིན་པའི་རེག་པ་མཐོང་བ་དང་མི་ལྡན་ཏེ་ལྡན་པ་འགོག་པ་འཁྲུལ་པ་མེད་པ་ཅན་དུ་འགྱུར་རོ། །མ་མཐོང་བའི་མཚན་ཉིད་ཀྱི་ཚད་མ་ནི་གྲང་བ་ཡང་མ་ཡིན་དྲོ་བ་ཡང་མ་ཡིན་པ་རེག་པ་རྟོགས་པར་གྱུར་པ་དང་མི་ལྡན་པ་འགལ་བ་མེད་པར་འགྱུར་རོ་ཞེས་བྱ་བའི་དོན་ཏོ། །
[89a]
[89a.1]དེ་དེ་ལྟར་ན་འདི་བཤད་པའི་གཞུང་དང་འབྲེལ་པར་འགྱུར་རོ། །མདོ་འདི་ཉིད་དགྲོལ་བའི་ཕྱིར་སློབ་དཔོན་གྱིས་གཞུང་གང་བསྟན་པའི་དོན་དུ་གཞུང་འདི་ཡིན་པ་དེ་སྟོན་པ་ནི་གལ་ཏེ་ཞེས་བྱ་བ་ཡིན་ནོ། །དགག་པར་རིགས་པ་མ་ཡིན་ནོ་ཞེས་སློབ་དཔོན་གྱིས་གང་
[89a.2]བཤད་པའོ། །དགག་པའི་རང་གི་ངོ་བོ་ཉིད་སྟོན་པས་སློབ་དཔོན་གྱི་གཞུང་གཞན་ཡང་སྟོན་པ་ནི་གལ་ཏེ་མ་མཐོང་བ་ཙམ་གྱིས་མ་མཐོང་བ་ལ་སོགས་པ་དག་ལ་འགོག་པར་བྱེད་ན་མ་མཐོང་བ་ཙམ་གྱིས་འགོག་པ་དེ་ཡང་རིགས་པ་མ་ཡིན་ནོ་ཞེས་བྱ་བའོ། །དགག་པ་དེ་ཇི་ལྟར་རིགས་པ་
[89a.3]མ་ཡིན་ཏེ་རིགས་པ་ཁོ་ནའོ་ཞེས་བྱ་བའི་དོན་ཏོ། །ཇི་ལྟར་ཞེ་ན་མི་དམིགས་པ་ཞེས་སྨོས་སོ། །ཕ་རོལ་པོ་དག་གྲང་བ་དང་དྲོ་བའི་རེག་པ་དག་གི་རྟེན་ས་ལ་སོགས་པར་གྲུབ་པ་ཡིན་པས་ན་དེ་ལས་གཞན་དུ་གྱུར་པའི་རྫས་བསྒྲུབ་པར་བྱ་བའི་དོན་དུ་ཡོན་ཏན་ཉིད་ཀྱིས་ཡོན་ཏན་ཅན་ལ་ལྟོས་པ་
[89a.4]གྲང་བ་ཡང་མ་ཡིན་དྲོ་བ་ཡང་མ་ཡིན་པའི་རེག་པའི་རྟེན་ས་ལ་སོགས་པ་ལས་གཞན་དུ་གྱུར་པའི་རླུང་ལ་རྟེན་པ་ཡིན་ནོ་ཞེས་སྒྲུབ་པའི་ཕྱིར་མཐོང་བ་དང་མ་མཐོང་བའི་ས་ལ་སོགས་པ་རྟེན་ཡིན་པ་ཉིད་འགོག་པས་དེ་དག་ལ་མ་མཐོང་བའི་ཕྱིར་མེད་པ་བརྗོད་དོ། །དེ་ལ་སློབ་དཔོན་གྱི་རེག་པ་ས་ལ་
[89a.5]སོགས་པ་མཐོང་བ་དག་ལ་མ་མཐོང་ཡང་མ་མཐོང་བ་ལ་འགྱུར་རོ། །འོན་ཏེ་དེ་དག་ལ་མ་མཐོང་བ་ཉིད་ཀྱིས་མཐོང་བ་མ་ཡིན་ནོ་ཞེས་བརྗོད་ན། དེ་ལ་སློབ་དཔོན་གྱིས་མ་མཐོང་བ་ཙམ་གྱིས་མ་མཐོང་བ་དག་ལ་འགོག་པ་བསལ་བ་ཡིན་ནོ། །འདི་ནི་མ་མཐོང་བ་ལྡོག་པ་བསྒྲུབ་པར་བྱ་བ་
[89a.6]སྨྲ་བ་ལ་མི་འཐད་དོ། །གང་གི་ཚེ་མ་མཐོང་བས་ལྡོག་པ་གྲུབ་པ་དེའི་ཚེ་ས་ལ་སོགས་པ་ལ་ཡང་གྲང་བ་དང་དྲོ་བ་མ་ཡིན་པའི་རེག་པ་དགག་པ་ཅི་སྟེ་མི་འགྲུབ། དེས་ན་ཇི་ལྟར་སློབ་དཔོན་མ་མཐོང་བ་ཙམ་གྱིས་དགག་པ་རིགས་པ་མ་ཡིན་ཞེས་གསུང་། ཆོས་ཅན་མི་སྣང་བ་ལ་
[89a.7]ཆོས་དགག་པ་མི་རིགས་སོ་ཞེ་ན། ལྡོག་པ་ལ་ཡང་ཆོས་ཅན་ཐམས་ཅད་སྣང་བ་མ་ཡིན་ཏེ་འགའ་ཞིག་ལ་མེད་པ་ཙམ་གྱིས་ལྡོག་པ་མི་འགྲུབ་པའི་ཕྱིར་རོ། །དེ་ལྟར་འདིའི་བར་གྱིས་ནི་མ་མཐོང་བས་མཐོང་བ་དང་མི་ལྡན་པ་སློབ་དཔོན་གྱིས་འགལ་བ་ཉིད་དུ་གསུངས་པ་ཡང་མི་
[89b]
[89b.1]འགལ་བ་ཉིད་དུ་འགྱུར་རོ་ཞེས་བསྒྲུབས་ཏེ། ད་ནི་སློབ་དཔོན་གྱིས་བཞེད་གཞུང་གཟུགས་པའི་དོན་དུ། གཞན་གྱི་འདོད་པ་སུན་འབྱིན་པ་སྟོན་པར་བྱེད་པ་ནི་རེག་པ་ཞེས་བྱ་བ་ཡིན་ནོ། །གྲང་བ་ཡང་མ་ཡིན་དྲོ་བ་ཡང་མ་ཡིན་པའི་རེག་པ་དམིགས་པའི་མཚན་ཉིད་ཀྱིར་གྱུར་པ་ཡིན་
[89b.2]པས་དེ་མ་མཐོང་བས་འགོག་པ་ཡིན་གྱི་མ་མཐོང་བ་ཙམ་གྱིས་ནི་མ་ཡིན་ནམ་དེས་ན་ཇི་ལྟར་མི་རིགས་ཤེ་ན་ཇི་ལྟར་མི་རིགས་པ་མ་ཡིན་གང་གི་ཕྱིར་སྣང་བ་དང་སྣང་བའི་རང་བཞིན་སྣང་བ་དང་རིགས་མཚུངས་པའི་ཡུལ་གང་ཡིན་པ་དེ་ཙམ་གྱིས་རེག་པ་འགོག་པ་མ་ཡིན་པའི་ཕྱིར་རོ། །འདི་སྐད་བརྗོད་པ་ཡིན་
[89b.3]ཏེ། འདི་མཐོང་བས་གཟུང་བའི་ཡུལ་གྱུར་པ་ཙམ་ནི་འགོག་པ་མ་ཡིན་ནོ། །དེ་བྱེད་པ་ནི་མི་སྣང་བའི་ཆོས་ཅན་ལ་བརྟེན་པ་ཉིད་ལ་བྱེད་པར་འགྱུར་རོ། །དེས་ན་འདི་བུམ་པ་ལ་སོགས་པ་ལ་སྣང་བའི་རེག་པ་དེ་འགོག་པ་མ་ཡིན་ལ་སྣང་བ་དང་རིགས་གཅིག་པའི་ཡུལ་ལ་འགོག་པ་
[89b.4]ཡང་མ་ཡིན་ནོ། །མཐོང་བའི་རང་བཞིན་དུ་གྱུར་པ་འགོག་པ་ནི་འདི་ན་གྲང་བ་ཡང་མ་ཡིན་དྲོ་བ་ཡང་མ་ཡིན་པའི་རེག་པ་མེད་ལ་འདི་དང་རིགས་གཅིག་པ་གཞན་ཡང་མེད་དོ་ཞེས་བྱེད་པ་ཡིན་ནོ། །འདི་དེ་དང་རིགས་གཅིག་པ་ཉིད་ཀྱང་ཆོས་ཅན་རྣམ་པ་དེ་ལྟ་བུའི་རང་བཞིན་ཡིན་པ་
[89b.5]ཉིད་ཀྱིས་འགྱུར་ཏེ་འདི་ཉིད་དང་རིགས་གཅིག་པ་ལ་ཡང་མེད་དོ་ཞེས་བྱ་བ་ཡིན་ནོ། །དེས་ན་དེ་ལྟར་སྣང་བ་ལ་ནི་སྣང་བ་མི་དམིགས་པ་ཁོ་ནས་འགྱུར་ལ། དེའི་རིགས་ཅན་ལ་ནི་དེ་དང་རིགས་གཅིག་པ་ཉིད་ཀྱིས་རིགས་པ་ཁོ་ན་ལས་ཡིན་ནོ། །འདི་ལྟར་དེ་ནི་དེས་སྟོང་པ་ཉིད་ཀྱིས་དེ་དང་རིགས་
[89b.6]གཅིག་པ་ཡིན་གྱི་ཆོས་གཞན་གྱིས་ནི་མ་ཡིན་ནོ། །དེས་སྟོང་པ་ཉིད་དུ་རིགས་མཚུངས་པ་གང་ཡིན་པ་དེ་ལ་ནི་གྲང་བ་ཡང་མ་ཡིན་དྲོ་བ་ཡང་མ་ཡིན་པའི་རེག་པ་དགག་པ་གྲུབ་པ་ཁོ་ནའོ། །གཞན་དག་ནི་དེ་ལྟར་དགག་པ་བྱེད་པ་མ་ཡིན་གྱི་འོན་ཀྱང་དེས་ནི་ས་ལ་སོགས་པའི་
[89b.7]སྤྱི་བཟུང་ནས་ཏེ། བལྟར་རུང་བ་དང་དེ་དང་མཚུངས་པའི་རྣམ་པ་སྤངས་ཏེ། ས་ལ་སོགས་པ་ཐམས་ཅད་ལ་དགག་པ་སྨྲས་སོ། །དེ་ལ་ཡང་ས་ལ་སོགས་པ་ཐམས་ཅད་སྣང་བ་མ་ཡིན་ལ་ཐམས་ཅད་མཐོང་བ་དང་རིགས་གཅིག་པར་འགྱུར་རོ་ཞེས་བྱ་བར་ཡང་ངེས་པར་བྱ་ནུས་པ་
[90a]
[90a.1]མ་ཡིན་ནོ། །དེའི་རིགས་ཅན་གང་ཡིན་པ་དེ་ནི་དེ་ལྟ་ཡིན་ནོ་ཞེས་བྱ་བར་འགྱུར་རོ། །མ་མཐོང་བ་དག་ལ་ནི་འདིའམ་ཐམས་ཅད་དེའི་རིགས་ཅན་ཡིན་ནོ་ཞེས་བྱ་བའི་ངེས་པ་ཡོད་པ་མ་ཡིན་ནོ། །གལ་ཏེ་ཇི་ལྟར་སྔོན་པོའི་རང་བཞིན་སེར་པོ་ལས་ལྡོག་པའི་
[90a.2]ཕྱིར། དེ་མ་མཐོང་ཡང་གཞན་དུ་སྲིད་པ་མ་ཡིན་པ་དེ་བཞིན་དུ་ས་ལ་སོགས་པ་ཐམས་ཅད་གྲང་བ་དང་དྲོ་བ་མ་ཡིན་པའི་རེག་པ་ལས་ལྡོག་པར་འགྱུར་བའི་ཕྱིར་ཇི་ལྟར་དགག་པར་མི་རིགས་ཤེ་ན། དེ་ལྟར་ནི་མི་ནུས་ཏེ་སྣང་བ་ལ་ནི་མཐོང་བ་ཉིད་ཀྱིས་གྲུབ་པའི་ཕྱིར་སྔོན་པོ་དང་སེར་པོའི་
[90a.3]རང་བཞིན་ལས་ལྡོག་པ་ཡིན་ནོ་ཞེས་བྱ་བར་འགྱུར་རོ། །མི་སྣང་བ་དག་ལ་ནི་མཐོང་བ་ལ་བརྟེན་ནས་དེ་ལྟར་གྱུར་པ་མ་ཡིན་ཏེ། དེ་དེའི་ཡུལ་མ་ཡིན་པའི་ཕྱིར་དང་ཚད་མ་རྣམས་ཡུལ་མ་ཡིན་པ་ལ་བརྟེན་པ་རྣམ་པར་འཇུག་པའི་ནུས་པས་སྟོང་པའི་ཕྱིར་རོ། །དེའི་ཕྱིར་མ་མཐོང་བ་ལ་ནི་རིགས་
[90a.4]པའི་རྩ་བ་ལས་དེ་ལྟར་ཁས་ལེན་པ་ཡིན་ནོ། །གང་གི་ཕྱིར་སྔོན་པོ་ཞེས་བྱ་བར་མཐོང་བའི་སྔོན་པོ་དང་རིགས་གཅིག་པ་ནི་སེར་པོ་ལས་གཞན་ཉིད་ཡིན་པའི་ཕྱིར་དེ་ལས་ལྡོག་པ་ཡིན་ནོ། །འོན་ཏེ་རིགས་གཅིག་ལ་གཞན་པ་ཡང་མ་ཡིན་ན། དེ་ཉིད་ལ་དེ་ལྟར་མིང་བཏགས་པས་ཇི་ལྟར་ལྡོག་
[90a.5]པར་འགྱུར། དེ་བཞིན་དུ་ས་གཞན་ཡང་གལ་ཏེ་དེའི་རིགས་ཅན་ཡིན་ན་ནི་དེར་གྲུབ་བོ། །འོན་ཏེ་རིགས་མི་གཅིག་པ་ཡིན་ན་དེ་ལྟ་བུ་མ་ཡིན་པ་སུ་ཞིག་འགོག །རིགས་མི་མཐུན་པ་ཉིད་ཀྱང་ཇི་ལྟར་དགག་སྟེ་སྤྲོས་པས་ཆོག་གོ། །མ་མཐོང་བས་སྣང་བ་མ་ཡིན་པ་ལ་དགག་པ་མེད་པ་
[90a.6]འབའ་ཞིག་ཏུ་མ་ཟད་ཀྱི་ཆ་འདི་ནི་སྲིད་པར་འགྱུར་བ་ཡང་ཡིན་ནོ་ཞེས་བཤད་པ་ནི་ས་ལ་སོགས་པ་དེ་ལ་ཡང་གྲང་བ་ཡང་མ་ཡིན་དྲོ་བ་ཡང་མ་ཡིན་པ་ལ་སོགས་པའི་ཁྱད་པར་འགའ་ཞིག་ལ་དོགས་པར་འགྱུར་བ་ཡིན་ནོ། །རིག་པའི་ཁྱད་པར་དེ་ལྟ་བུ་ས་ལ་སོགས་པ་བརྟེན་པར་དོགས་པར་
[90a.7]རིགས་པ་ཡིན་ནོ། །འདི་ཡང་ཞེས་བྱ་བ་འདི་དེས་ནི་ཞེས་བརྗོད་པ་དང་འབྲེལ་ཏེ། འགོག་པར་སྨྲས་པས་ཀྱང་དོགས་པར་བྱ་བ་ཡིན་ནོ་ཞེས་པའི་ཐ་ཚིག་གོ། །ཤིང་བལ་དང་རྡོ་བ་དང་ལོ་མ་ལ་སོགས་པ་དག་ས་ལ་སོགས་པའི་རང་བཞིན་དེ་ཡོད་ཀྱང་འཇམ་པ་དང་རྩུབ་པ་ལ་སོགས་པ་རེག་པའི་
[90b]
[90b.1]རྣམ་པ་མང་པོ་མཐོང་བའི་ཕྱིར་ཚ་གྲང་མ་ཡིན་པའི་བདག་ཉིད་ཀྱིས་རེག་པར་ཡང་འགྱུར་རོ། །འཇམ་པ་ཉིད་ལ་སོགས་པ་ནི་རེག་པའི་ཁྱད་པར་མ་ཡིན་པ་མ་ཡིན་ཏེ། དེའི་མཚན་ཉིད་ནི་ལུས་ཀྱི་དབང་པོས་བཟུང་བ་ཙམ་ཡིན་པའི་ཕྱིར་རོ། །དེའི་ཕྱིར་ཐམས་ཅད་དུ་མ་མཐོང་བ་ཙམ་གྱིས་དགག་
[90b.2]པར་མི་རིགས་སོ། །འདི་ལ་གལ་ཏེ་ཡང་མ་མཐོང་བས་ལྡོག་པ་གྲུབ་ན་ཆོས་མི་མཐུན་པ་མི་སྨོས་པར་ཐལ་བ་དང་། མཉན་པར་བྱ་བ་ཉིད་རྣམ་པར་གཅོད་པར་བྱེད་པ་ཉིད་དང་བསྟན་པ་གཞན་དག་ཀྱང་མུ་སྟེགས་པ་གཞན་དག་ལ་ཡང་ཐལ་བ་ཡིན་པ་དེ་ལྟ་ན་ཡང་ཕལ་ཆེར་ཐུན་མོང་མ་ཡིན་
[90b.3]པར་སུན་འབྱིན་པ་ཡིན་པའི་ཕྱིར་འདི་རང་གི་སྡེ་པའི་དབང་དུ་བྱས་ནས་ཉེ་བར་བཀོད་པ་ཡིན་ནོ་ཞེས་བཤད་པ་ནི་དེ་ལྟར་སློབ་དཔོན་ལ་ཞེས་སྨོས་སོ། །གང་ཡང་རིགས་པས་གྲུབ་པའི་ཁྱབ་པ་རྟོགས་པ་གཞན་མེད་པའི་ཕྱིར་སློབ་དཔོན་པ་མཐའ་དག་དེ་ལྟར་རྟོགས་པ་ཡིན་པ་དེ་ལྟ་ན་ཡང་འགའ་ཞིག་
[90b.4]ཅེས་བྱ་བ་ནི་བདག་ཉིད་སློབ་དཔོན་པ་ཡིན་པ་ལ་ལྟོས་ནས་ཡིན་ནོ། །ད་ནི་མུ་སྟེགས་པ་གཞན་དང་ཐུན་མོང་དུ་སུན་འབྱིན་པ་ཡང་བཤད་པ་ནི་གཞན་ཡང་ཞེས་བྱ་བ་ཡིན་ནོ། །ཡུལ་དང་དུས་དང་འདུ་བྱེད་པའི་ཁྱད་པར་གྱིས་ནུས་པ་ཐ་དད་ཅེས་བྱ་བ་ངོ་བོ་ཉིད་གཞན་དུ་གྱུར་པ་སྣང་ངོ་། །ཡུལ་
[90b.5]གང་ལ་སྣང་ཞེ་ན་རྫས་ལ་སྨོས་སོ། །དེ་ལྟར་སྣང་བའི་ཡུལ་ནི་དེ་ཡིན་ནོ། །གལ་ཏེ་དེ་ལྟར་ཡིན་མོད་དེ་ལས་ཅིར་འགྱུར་ཞེ་ན། དེ་ལ་ཞེས་སྨོས་ཏེ། དེ་ལྟར་ཡིན་དང་ངོ་། །གཅིག་མཐོང་བས་གཅིག་ཅེས་བྱ་བ་ནི་ཉེ་བར་མཚོན་པ་སྟེ་མང་པོ་རྣམས་མཐོང་བས་ཀྱང་མ་མཐོང་བ་གཞན་
[90b.6]དེ་ཡོད་པར་ངེས་པ་རིགས་མ་ཡིན། འདི་སྐད་བརྗོད་པ་ཡིན་ཏེ། ཁྱད་པར་ཅན་གྱིས་རང་བཞིན་དུ་གྱུར་པའི་རྫས་ཀྱི་ཁྱད་པར་ལན་ཅིག་གམ་ལན་ཅིག་མ་ཡིན་པར་དམིགས་ཏེ་དེའི་ཕྱིར་རང་བཞིན་དུ་དམིགས་པ་ན་གཞན་དུ་གྱུར་པའི་རང་བཞིན་ཅན་དུ་མ་དམིགས་པའི་ཕྱིར་རང་བཞིན་དེ་
[90b.7]མེད་ན་རྫས་དེ་མ་དམིགས་པ་ལས་ཤིང་མེད་ན་ཤ་པ་མེད་པ་བཞིན་དུ་དེ་མེད་ན་ལྡོག་པས་ན། ཁྱེད་ཀྱི་འདོད་པས་རྫས་དེ་མཐོང་བས་དེའི་རང་བཞིན་དུ་ངེས་པར་ཐལ་བར་འགྱུར་ན་དེ་ལྟར་མི་འཐད་དོ། །འགའ་ཞིག་རྣམ་པ་དེ་ལྟ་བུ་རང་བཞིན་དང་ལྡན་པ་མ་ཡིན་ཡང་རྒྱུའི་ཁྱད་པར་ལས་
[91a]
[91a.1]དེ་ལྟ་བུ་ཉིད་དུ་གྱུར་པ་གཞན་ལ་རང་བཞིན་ཁྱད་པར་སྲིད་པའི་ཕྱིར་རོ། །འགྲེལ་པ་ནི་གལ་ཏེ་ཞེས་བྱ་བ་ལ་སོགས་པ་ཡིན་ནོ། །ཅི་ཞིག་ལྟར་ཏེ་རྒྱུ་མཚན་འགའ་ཞིག་ལས་སོ། །རྒྱུ་མཚན་དེ་ཡང་ཡོད་པའི་ཡིན་གྱི་ཐམས་ཅད་ལ་ཡོད་པར་ནི་མ་ངེས་སོ། །དེས་ན་མི་མཐུན་
[91a.2]པའི་ཕྱོགས་བསྒྲུབ་པར་བྱ་བ་མེད་པ་ལ་མ་མཐོང་བ་གང་ཡིན་པ་དེ་ཙམ་གྱིས་འབྲེལ་པ་མེད་པ་ཡང་དེར་འཁྲུལ་པ་མེད་དོ་ཞེས་བྱ་བ་གང་མེད་ན་འདི་མ་མཐོང་བ་དེ་མེད་ན་མེད་པའོ། །མི་མཐུན་པའི་ཕྱོགས་ལ་མ་མཐོང་བ་སྨོས་པ་ནི་བསྒྲུབ་པར་བྱ་བ་མེད་པ་ལ་མ་མཐོང་བར་བརྗོད་པར་འགྱུར་བ་དེས་ན་འཁྲུལ་
[91a.3]པ་མེད་པ་ནི་བསྒྲུབ་པར་བྱ་བ་མེད་ན་མེད་པ་ཡིན་ནོ། །དེས་ན་དེ་ལྟར་གལ་ཏེ་ཞེས་བྱ་བས་གཞན་གྱིས་འདོད་པ་ཡིན་ནོ་ཞེས་བྱ་བར་བསྟན་ནས་དགག་པའི་ཕྱིར་ཡུལ་འགའ་ཞིག་ན་ཞེས་བྱ་བ་ལ་སོགས་པ་སྨོས་སོ། །གལ་ཏེ་གང་མེད་ན་མ་མཐོང་བ་དེ་ཡོད་ན་དེ་ཡོད་པར་འགྱུར་རོ་ཞེས་བྱ་བ་དེ་ལྟ་བུ་རྗེས་སུ་
[91a.4]འགྲོ་བ་དང་ལྡོག་པའི་བདག་ཉིད་ཅན་གྱི་མི་འཁྲུལ་པ་མ་མཐོང་བ་ཙམ་ལ་བརྟེན་པ་ཡིན་ན། དེའི་ཕྱིར་གང་དུ་དོན་གང་དག་རྣམ་པ་ཇི་ལྟར་མཐོང་བ་དེ་དག་ལ་རྣམ་པ་དེ་ལྟ་བུ་མེད་པར་མཐོང་བ་ཡོད་པར་མི་འགྱུར་བའི་ཕྱིར་དེའི་རང་བཞིན་ཅན་མཐའ་དག་རྣམ་པ་དེ་ལྟ་བུ་ཉིད་དུ་གྱུར་ན། དེ་ལྟར་
[91a.5]ཡང་མ་ཡིན་ཏེ་གཞན་ན་གཞན་དུ་ཡང་སྣང་བའི་ཕྱིར་རོ། །དེ་དེ་ལྟར་གལ་ཏེ་ཞེས་བྱ་བ་ལ་སོགས་པས་མི་འཁྲུལ་པ་མ་མཐོང་བས་འགྲུབ་པར་གཞན་གྱི་བརྗོད་པ་བསྟན་ནས། ཡུལ་འགའ་ཞིག་ན་ཞེས་བྱ་བས་དེ་ཡོད་ཀྱང་དེ་ལྟ་བུ་ཉིད་མ་ཡིན་པར་བཤད་པའི་ཕྱིར་དེ་ནི་རིགས་པ་མ་ཡིན་ཏེ་ཞེས་བྱ་
[91a.6]བས་དགག་པ་སྔོན་དུ་འགྲོ་བའི་སྒོ་ནས་བརྗོད་ཀྱང་དངོས་སུ་ན་འདིས་ཕྱོགས་བཀག་པ་ཡིན་ནོ། །གང་ཞིག་གང་དུ་ཇི་ལྟར་སྣང་བ་ལྟ་བུ་ཞེ་ན། དཔེར་ན་ཞེས་སྨོས་སོ། །འབྲས་བུ་སྨིན་ནས་ཟད་པར་འགྱུར་བའི་ཕྱིར་སྨན་ཁ་ཅིག་ཞིང་འགའ་ཞིག་ལས་རོ་དང་ནུས་པ་དང་སྨིན་པར་བྱེད་པ་ཁྱད་པར་
[91a.7]ཅན་དུ་འགྱུར་ལ་དེ་དག་ཉིད་ཞིང་གཞན་ལས་ནི་རྣམ་པ་དེ་ལྟ་བུ་མ་ཡིན་པ་ལྟ་བུ་སྟེ་དབྱར་ལ་སོགས་པའི་དུས་དང་ལུས་ལ་སོགས་པའི་མཚན་ཉིད་ཀྱིས་ལེགས་པར་བྱ་བའི་ཁྱད་པར་ལས་ཀྱང་དེ་དང་འདྲའོ། །ཡུལ་གང་དུ་ཞིང་དེ་ལས་དུས་དེར་རོ་ལ་སོགས་པ་དེ་དག་དམིགས་པའི་ཡུལ་དེར་སྐྱེས་
[91b]
[91b.1]པ་དེ་རྣམས་ཀྱིས་དེ་ལྟར་མཐོང་ཞེས་ཏེ། ཐམས་ཅད་དེ་ཉིད་ཀྱི་སྨན་དེ་ཡིན་པ་ཉིད་ཀྱིས་རོ་དང་ནུས་པ་དང་སྨིན་པར་བྱེད་པ་ཁྱད་པར་ཅན་དེ་ལྟ་བུ་ཡིན་པར་ནི་འགྲུབ་པར་མི་འགྱུར་རོ། །དེ་ལ་ནི་རྣམ་པ་དེ་ལྟ་བུའི་སྨན་རོ་ལ་སོགས་པ་དེ་མེད་པ་ལ་མི་དམིགས་པ་ཡོད་པ་ཡིན་ཏེ་ཡུལ་དེ་པ་རྣམས་
[91b.2]ཀྱིས་དེ་ལྟ་བུ་མ་ཡིན་པའི་རོ་ལ་སོགས་པ་དང་ལྡན་པའི་སྨན་དེ་མ་མཐོང་བའི་ཕྱིར་རོ། །ཐམས་ཅད་དུ་དེ་ལྟ་བུ་ཉིད་ཀྱང་མ་ཡིན་ཏེ་གཞན་ནི་གཞན་དུ་འགྱུར་བའི་ཕྱིར་རོ། །གང་ལས་འཁྲུལ་པར་འགྱུར་བ་དེ་དེ་ལྟར་དམིགས་ཀྱང་གཞན་དུ་དེ་ལྟ་མ་ཡིན་པར་འགྱུར་བའི་རྒྱུ་ཅི་ཡིན། གལ་
[91b.3]ཏེ་དེ་ལྟར་སྣང་བ་དེ་ཡང་དེ་ལྟ་མ་ཡིན་པར་འགྱུར་ན་ནི། གང་གིས་ཤ་པ་ལ་སོགས་པ་དག་ཀྱང་དེ་ལྟ་མ་ཡིན་པར་འགྱུར་བའི་ཕྱིར་ཤིང་ལ་སོགས་པ་ལ་འཁྲུལ་པར་འགྱུར་བ་ཤ་པ་ལ་སོགས་པ་དག་ཀྱང་ཇི་སྟེ་དེ་ལྟ་མ་ཡིན་པར་མི་འགྱུར་རམ་ཞེ་ན། དོགས་པ་འདི་བསུ་ན། ཡོན་ཏན་གྱི་ཁྱད་
[91b.4]པར་རྣམས་ནི་ཞེས་སྨོས་སོ། །ཡོན་ཏན་དེ་སྤངས་ནས་ཡོན་ཏན་གཞན་དུ་འགྱུར་བ་ནི་རྒྱུའི་ཁྱད་པར་ལ་ལྟོས་པ་ཡིན་ནོ། །དེའི་ཕྱིར་རྒྱུ་ཁྱད་པར་ཡོད་ན་དེ་ལྟ་མ་ཡིན་པར་འགྱུར་བས་དེ་ལྟ་མ་ཡིན་པར་མ་དམིགས་པའི་ཕྱིར་དེའི་རང་བཞིན་ཅན་ནི་དེ་ལྟ་བུ་ཉིད་དུ་ངེས་པ་འཁྲུལ་པར་བྱེད་དོ། །
[91b.5]ཁྱད་པར་གཞན་དང་ལྡན་པ་ལས་རྒྱུ་དེ་ཉིད་ཀྱིས་དངོས་པོ་དེ་ཉིད་སྔར་མཐོང་བའི་ཁྱད་པར་དང་བྲལ་བར་ཁྱད་པར་གཞན་སྐྱེད་པ་གང་ཡིན་པ་ལ་འགལ་བ་ཅི་ཡོད། དེ་ལྟ་ན་འོ་ན་ཤ་པ་ལ་སོགས་པ་ལ་ཡང་ཡོན་ཏན་གྱི་ཁྱད་པར་རྒྱུའི་ཁྱད་པར་ལ་རག་ལས་པའི་ཕྱིར་ཤིང་མ་ཡིན་པ་ལ་སོགས་པའི་
[91b.6]རང་བཞིན་དུ་ཡང་འགྱུར་རོ། །དེ་དག་ལ་ཡང་ཁྱད་པར་གྱི་རྒྱུ་མི་སྲིད་པ་མ་ཡིན་པའི་ཕྱིར་རོ། །གལ་ཏེ་གཞན་ལ་དེ་ལྟར་དམིགས་པ་དང་། མ་དམིགས་པ་ནི་རང་ཉིད་ཀྱིས་འཁྲུལ་པར་བྱས་པའི་ཕྱིར་རོ། །འདི་ལ་ནི་ཁྱད་པར་གྱི་རྒྱུ་ཡོད་པ་ཡིན་ལ། གཞན་ལ་ནི་མ་ཡིན་ནོ་ཞེས་མི་རྟོགས་
[91b.7]པའི་ཕྱིར་རོ་ཞེ་ན། སྨྲས་པ་ཆོས་གང་ཞིག་གང་གིས་རང་གི་ངོ་བོ་ཡིན་པ་དེ་ལ་ནི་ཡོན་ཏན་གཞན་གྱི་རྒྱུ་ལས་ཀྱང་ངོ་བོ་དེ་སྤངས་ནས་ཡོན་ཏན་གཞན་དུ་འགྱུར་བ་མ་ཡིན་གྱི། འོན་ཀྱང་རྒྱུ་མཚན་དེ་དང་འབྲེལ་པ་ལས་དེའི་བདག་ཉིད་ཀྱིས་ཆོས་དང་མི་འགལ་བར་དངོས་པོའི་ཆོས་གཞན་དང་
[92a]
[92a.1]གཞན་འབྱུང་བ་ཡིན་ནོ། །དེས་ན་རྒྱུའི་ཁྱད་པར་དང་ལྡན་པ་ལས་ཤ་པ་ཤ་པ་མ་ཡིན་པར་འགྱུར་རོ་ཞེས་ནི་ནུས་པ་མ་ཡིན་ཏེ། ས་ལ་སོགས་པའི་ཁྱད་པར་དང་ལྡན་པ་ལས་ནི་རིང་པོ་དང་ཐུང་ངུའི་ཚད་ལ་སོགས་པར་འགྱུར་བ་ཡིན་ནོ། །གང་གི་ཕྱིར་ཤིང་ཉིད་ནི་ཤ་པའི་རྗེས་
[92a.2]སུ་ཞུགས་པ་ཉིད་ཡིན་པ་དེའི་ཕྱིར་བདག་ཉིད་བཞིན་དུ་རྒྱུ་སྟོང་གིས་ཀྱང་འདི་སྤོང་བ་མ་ཡིན་ནོ། །དེས་ན་ཆོས་གང་ཞིག་དོན་གྱི་བདག་ཉིད་དུ་གྱུར་པ་མ་ཡིན་པའི་ཆོས་དེ་སྤངས་ནས་རྒྱུ་གཞན་ལས་ཆོས་གཞན་འབྱུང་བར་འགྱུར་བ་དེས་ན་ཡོན་ཏན་གྱི་ཁྱད་པར་རྒྱུའི་ཁྱད་པར་ལ་ལྟོས་པར་བཤད་
[92a.3]པ་ཡིན་ནོ། །དེའི་ཕྱིར་སྐུ་རུ་ར་ཉིད་རོ་ལ་སོགས་པ་དང་གཅིག་ཏུ་མི་འགྱུར་རོ། །དེ་བས་ན་རྒྱུ་གཞན་གྱི་བྱེད་པ་ནི་དེ་ལ་བརྟེན་པར་འགྱུར་རོ། །གལ་ཏེ་ཆོས་ཐམས་ཅད་ཀྱི་བདག་ཉིད་ཐ་མི་དད་པའི་དོན་ལ་འགའ་ཞིག་ནི་ཆོས་འགའ་ཞིག་དང་གཅིག་ཏུ་གྱུར་པ་ཡིན་ལ།
[92a.4]གཞན་ནི་དེ་ལྟར་མ་ཡིན་ན་ཞེས་བྱ་བ་གང་ལས་ཤེ་ན། དེའི་བདག་ཉིད་ལ་ཇི་ལྟར་རྣམ་པར་དབྱེར་མེད་པ་དེ་ནི་བསྟན་ཟིན་ཏོ། །དེ་བས་ན་ཆོས་དེ་དང་ལྡན་པའི་རང་གི་རྒྱུའི་ནང་དུ་གཏོགས་པའི་ཁྱད་པར་དང་ལྡན་པས་འབྲས་བུ་དེའི་བདག་ཉིད་མ་ཡིན་པའི་ཆོས་ཁྱད་པར་
[92a.5]དུ་འགྱུར་གྱི། གཞན་ནི་མ་ཡིན་ནོ་ཞེས་བྱ་བ་འདི་ནི་འཐད་པར་འགྲུབ་པ་ཡིན་གྱི་དམིགས་པ་དང་མི་དམིགས་པ་ལ་ལྟོས་པ་ནི་མ་ཡིན་ནོ། །དེའི་ཕྱིར་དེ་ལྟར་ཐམས་ཅད་དེ་ཉིད་ཀྱིས་དེ་ལྟ་བུར་ཞེས་བྱ་བ་འདིས་དངོས་པོ་གང་ཞིག་རྒྱུ་ཇི་ལྟ་བུས་བསྐྱེད་པ་དེ་དེ་ལས་བྱུང་བ་ཡིན་ཡང་རྒྱུ་ཁྱད་པར་དང་ལྡན་
[92a.6]པ་ལས་ཁྱད་པར་དང་ལྡན་པར་འགྱུར་བའི་ཕྱིར་རིགས་མཐུན་པའི་རྒྱུས་བསྐྱེད་པ་ཉིད་ཀྱིས་ནི་ཐམས་ཅད་དུ་ཁྱད་པར་མེད་པར་མི་འགྱུར་རོ་ཞེས་བྱ་བའི་རིགས་པ་འདི་རྩ་བར་གྱུར་པས་ཁྱད་པར་གཞན་དང་ལྡན་པའི་དེའི་རང་བཞིན་ཅན་མ་མཐོང་ཡང་དེའི་རང་བཞིན་ལས་ཁྱད་པར་དང་ལྡན་པར་རྟོགས་པར་
[92a.7]མི་ནུས་སོ་ཞེས་བསྒྲུབས་ནས་སྨན་དེའི་རྒྱུ་མ་ཡིན་པ་ལས་དེའི་རང་བཞིན་གྱི་སྨན་མ་མཐོང་བའི་ཕྱིར་སྨན་དེ་ཉིད་ནི་རྒྱུ་དེ་མེད་ན་ལྡོག་པའི་ཕྱིར་དེའི་རང་བཞིན་ལས་དེའི་རྒྱུ་ཅན་དུ་རྟོགས་པས་ཐམས་ཅད་དེ་ཉིད་ཀྱིས་དེ་ལྟར་མི་འགྱུར་བ་མ་ཡིན་པའི་ཕྱིར་ཅི་སྟེ་མི་དགག་ཅེས་དོགས་པ་ལ་རིགས་པས་གྲུབ་པའི་
[92b]
[92b.1]ལྡོག་པ་ཉིད་རྒྱུ་ཁྱད་པར་མེད་ན་ནི་ཞེས་བྱ་བས་འཆད་དོ། །རྒྱུ་ནི་རྣམ་པ་གཉིས་ཏེ། རང་གི་ངོ་བོའི་རྒྱུ་ཞིང་ལ་སོགས་པའི་མཚན་ཉིད་ཁྱད་པར་མེད་པ་ཅན་འབྲས་བུ་ཁྱད་པར་མེད་པ་ཉིད་ཀྱི་སྐྱེད་པར་བྱེད་པ་ཙམ་དུ་གྱུར་པ་དང་རང་གི་ངོ་བོའི་ཁྱད་པར་གྱི་རྒྱུ་སྟེ་རྒྱུའི་ཁྱད་པར་ལས་འབྲས་བུའི་
[92b.2]ཁྱད་པར་མངོན་པར་གྲུབ་པའི་ཕྱིར་རོ། །དེ་ལ་ཁྱད་པར་གྱི་རྒྱུ་བཀག་ན་རང་གི་ངོ་བོའི་རྒྱུ་ལུས་པ་ཡིན་ནོ། །དེས་ན་རྒྱུ་ཁྱད་པར་མེད་པ་རང་གི་ངོ་བོའི་རྒྱུ་དེ་དེ་ལ་རྗེས་སུ་དཔག་པར་འགྱུར་བ་ཡིན་ནོ། །དེའི་དོན་ནི་ཁྱད་པར་གྱི་རྒྱུ་ནི་རྗེས་སུ་དཔག་པར་བྱ་བ་ནི་མ་ཡིན་གྱི་འོན་ཀྱང་རང་གི་ངོ་བོའི་རྒྱུ་
[92b.3]དཔོག་གོ་ཞེས་བྱ་བ་འདི་ཡིན་ནོ། །མ་མཐོང་བ་ཙམ་ལས་ནི་ཁྱད་པར་གྱི་རྒྱུ་ཡང་རྗེས་སུ་དཔོག་པར་འགྱུར་ཏེ། ཞིང་ལ་སོགས་པའི་ཁྱད་པར་ཅན་མེད་ན་འབྲས་བུ་དེ་མ་དམིགས་པ་ལན་འགའ་ཞུགས་པའི་ཕྱིར་རོ། །སྨན་དེ་མཐོང་བས་དེའི་འབྲས་བུ་རྗེས་སུ་དཔོག་གོ། །དེ་ལྟ་ཡིན་དང་ཞིང་ལ་
[92b.4]སོགས་པ་ལ་གནས་པ་མཐོང་བའི་ཁྱད་པར་རྗེས་སུ་དཔོག་པ་ན་ཐམས་ཅད་ཁྱད་པར་མེད་པར་ངེས་པ་ཡིན་པའི་ཕྱིར་ཁྱད་པར་གྱི་རྒྱུ་རྗེས་སུ་དཔག་པ་ནི་སྐབས་སུ་གྱུར་པ་ཕ་རོལ་པོའི་ཕྱོགས་སྒྲུབ་པར་འགྱུར་རོ། །དེ་ལ་རྒྱུ་ཁྱད་པར་མེད་ན་ནི་ཞེས་བྱ་བའི་ངག་འདི་འཇུག་པ་ན་འདིར་དོགས་པའི་ཁྱད་པར་
[92b.5]འདི་ཡང་ཡོད་དེ་ཡུལ་དེ་པ་རྣམས་ཀྱི་ཞེས་བྱ་བ་ལ་སོགས་པས་ཁྱད་པར་མེད་པ་བཀག་པ་ན་ཕ་རོལ་པོ་དག་འབྲེལ་པ་ཁས་བླངས་ཀྱང་ཁྱད་པར་མེད་ན་ཐལ་བར་སྟོན་པས་སྨྲས་པ། འབྲས་བུ་དེའི་རྒྱུ་ལ་ངེས་པའི་ཕྱིར་ཁྱད་པར་ཅན་གྱི་ཞིང་ལ་སོགས་པའི་འབྲས་བུར་དམིགས་པའི་སྨན་རྣམས་
[92b.6]ནི་ཇི་ལྟར་མཐོང་བའི་ཞིང་ལ་སོགས་པའི་རྒྱུ་ཅན་ཉིད་དུ་རེ་ཞིག་ཐམས་ཅད་དུ་ཁྱད་པར་མེད་པར་རྗེས་སུ་དཔག་པར་བྱ་བ་ཡིན་ནོ། །དེས་ན་དེའི་རྒྱུ་ཅན་དུ་ཁྱད་པར་མེད་པས་ན་བདག་ཉིད་ཐམས་ཅད་ཀྱི་དེའི་རང་བཞིན་དུ་འགྱུར་ཏེ། རྒྱུ་ཁྱད་པར་མེད་ན་འབྲས་བུ་ཁྱད་པར་མེད་པའི་ཕྱིར་རོ། །དེས་ན་དེ་ལ་
[92b.7]གཅིག་མ་མཐོང་བས་གཞན་ལ་དེ་ཡོད་པར་ངེས་པ་མེད་དོ་ཞེས་ཅི་སྟེ་བརྗོད་ཅེ་ན། དེ་བསལ་བའི་ཕྱིར་རྒྱུ་ཁྱད་པར་མེད་ན་ནི་ཞེས་བརྗོད་དོ། །རྒྱུ་ཁྱད་པར་མེད་པ་ནི་ཁྱད་པར་མེད་པའི་རྒྱུ་ཉིད་དོ། །རང་གི་ངོ་བོའི་རྒྱུ་ནི་སྤྱི་ཙམ་ཡིན་པའི་ཕྱིར་རོ། །དེས་ན་ཁྱད་པར་མེད་པའི་རྒྱུ་ཉིད་སྤྱི་ཙམ་
[93a]
[93a.1]རྗེས་སུ་དཔག་པར་ནུས་ཀྱི་ཆོས་གཞན་ནི་མ་ཡིན་ནོ་ཞེས་བརྗོད་པར་འགྱུར་རོ། །གཞན་གྱི་འདོད་པ་དགག་པའི་ཕྱིར་སྐབས་སུ་དཔེ་བཞག་སྟེ། དཔེ་གཞན་སྟོན་པ་ནི་བྱེད་པ་པོ་མ་མཐོང་བ་ཅན་གྱི་ཚིག་ཀྱང་ཞེས་བྱ་བའོ། །གཞོན་ནུ་འབྱུང་བ་དང་རིག་བྱེད་ལ་སོགས་པ་
[93a.2]བདག་ཅག་གིས་བྱེད་པ་པོ་མ་མཐོང་བའི་ཚིག་ཀྱང་སྐྱེས་བུའི་འདུ་བྱེད་པ་སྔོན་དུ་འགྲོ་བ་ཅན་ཡིན་ཏེ་ཞེས་བྱ་བ་སྟེ། དེ་ལྟར་འདི་ནི་རྒྱུ་ཁྱད་པར་མེད་པའི་ཡུལ་ཅན་གྱི་རྗེས་སུ་དཔག་པ་ཡིན་ནོ། །ལ་ལར་གཞན་ལས་འགྲུབ་པར་ཁྱད་པར་སྒྲུབ་པར་བྱེད་པ་ཡིན་པའི་ཕྱིར་འདི་དག་ཐམས་ཅད་ཀྱི་
[93a.3]སྒྲུབ་པར་བྱེད་པ་མ་ཡིན་པར་རྣམ་པར་བཞག་པའམ། དེ་རྟག་པར་རང་ཉིད་ཀྱིས་གྲུབ་པ་ཉིད་ཀྱི་ཁྱད་པར་གྱི་རྒྱུར་འགྱུར་བ་གང་ཡིན་པ་སྐྱེས་བུའི་ངག་གི་ཁྱད་པར་གྱི་རྒྱུ་ནི་མ་ཡིན་ནོ། །རང་གི་གྲུབ་པ་ལ་ཁྱད་པར་བསྒྲུབ་པ་མི་སྲིད་ཀྱང་ཁས་བླངས་ནས་བརྗོད་པ་ཡིན་ནོ། །གང་གི་
[93a.4]ཚེ་སྐྱེས་བུ་ངག་གི་རང་གི་ངོ་བོ་ཉིད་ཀྱི་རྒྱུ་ཡིན་པ་དེའི་ཚེ་ནི་ངག་ལས་སྐྱེས་བུ་རྗེས་སུ་དཔོག་པར་རིགས་ཏེ་དུ་བ་ལས་མེ་རྗེས་སུ་དཔོག་པ་བཞིན་ནོ། །དེས་ན་བྱེད་པ་མ་མཐོང་བ་ཡིན་ཡང་སྐྱེས་བུའི་འདུ་བྱེད་པ་སྔོན་དུ་འགྲོ་བ་ཅན་ཡིན་ནོ། །ཚིག་དེ་དང་དེ་དག་སྐྱེས་བུས་བསྡེབས་པའམ་བརྗོད་པ་
[93a.5]ནི་འདུ་བྱེད་པ་ཡིན་ལ་དེ་ཡང་དེའི་སྔོན་དུ་འགྲོ་བ་ཡིན་ནོ། །ཡང་ཇི་ལྟར་ན་སྐྱེས་བུ་ངག་གི་རང་གི་ངོ་བོའི་རྒྱུ་ཡིན་གྱི་ཁྱད་པར་གྱི་ནི་མ་ཡིན་ནོ་ཞེ་ན་ཚིག་ལ་ཞེས་སྨོས་སོ། །གང་ཞིག་སྐྱེས་བུ་དག་གིས་བྱེད་པའི་ངག་གི་ཁྱད་པར་དེ་ནི་ཡོད་པ་མ་ཡིན་ཏེ་དེའི་བདག་ཉིད་ཐམས་ཅད་སྐྱེས་བུ་ལས་
[93a.6]མངོན་པར་འགྲུབ་པའི་ཕྱིར་རོ། །དེ་བཤད་པ་ནི་རྣམ་པ་ཡང་ཡིན་ལ་ཐམས་ཅད་ཀྱང་ཡིན་པ་དེ་དག་ནི་སྐྱེས་བུ་དག་གིས་བྱེད་པར་མཐོང་བའི་ཕྱིར་རོ། །རྟག་པ་ཡང་དེ་ཉིད་ལ་སྐྱེས་བུ་ཉེ་བར་སྦྱོར་བའི་ཕྱིར་ཐམས་ཅད་སྐྱེས་བུས་བྱས་པར་རྟོགས་པ་ཉམས་པར་འགྱུར་བ་རྗེས་སུ་འགྲོ་བ་དང་
[93a.7]ལྡོག་པ་དག་ལས་ཉེ་བར་སྦྱོར་བ་ཁྱད་པར་ལ་བརྟེན་པར་རྟོགས་པ་ནི་མ་ཡིན་ནོ། །དེས་གཞུང་འདི་འདི་ལྟར་བཤད་པར་བྱ་བ་ཡིན་ནོ། །གལ་ཏེ་སྒྲ་རྣམས་ལ་ནི་ཁྱད་པར་མེད་པ་ཉིད་ལ། སྐྱུ་རུ་ར་ལ་སོགས་པ་ནི་ཡོད་པ་ཡིན་ནོ་ཞེས་བྱ་བ་འདི་ཙམ་ཞིག་བརྗོད་པ་ཡིན་ན་དེ་འདི་ལྟར་ཅི་ལྟར་ངེས་
[93b]
[93b.1]པར་བྱ། དེ་ལྟར་དམིགས་པ་དང་མི་དམིགས་པ་དག་ལས་སོ་ཞེ་ན་མ་ཡིན་ཏེ་མ་དམིགས་པ་ཙམ་གྱིས་མེད་པ་མི་རྟོགས་པའི་ཕྱིར་རོ། །གསལ་བ་འགའ་ཞིག་ལ་ཁྱད་པར་གྱི་རྒྱུ་མ་ཡིན་པས་གསལ་བ་གཞན་ལ་ཡང་མེད་པར་མི་ངེས་པའི་ཕྱིར་རོ། །རྒྱུ་ཁྱད་པར་མེད་པ་ཉིད་ལས་ཀྱང་རྒྱུ་གཞན་
[93b.2]རྣམ་པར་གཅོད་པར་འགྱུར་གྱི་རྟག་པ་ཉིད་ནི་མ་ཡིན་ནོ། །དེས་ན་ནེ་ཙོ་དང་རི་སྐེགས་ལ་སོགས་པའི་རྒྱུ་མཚན་ཅན་དུ་མི་འགྱུར་རོ། །གང་ཞིག་དེ་མེད་པས་རྟག་པ་ཉིད་དུ་མི་འགྱུར་བ་ཁྱད་པར་གྱི་རྒྱུས་རྟག་པར་བྱས་པ་ནི་མ་ཡིན་ནོ། །ཁྱད་པར་དགག་པའི་ཕྱིར་རྒྱུའི་ཁྱད་པར་བཀག་པ་ནི་ཁྱད་པར་
[93b.3]མེད་ན་མེད་པ་ཡིན་པས་སྐྱེས་བུས་མ་བྱས་པ་དགག་པའི་དོན་དུ་ཡིན་ནོ་ཞེ་ན། དེ་ལྟར་མཚོན་པས་མཚོན་པ་ལ་ཡང་སྐབས་དང་འབྲེལ་བར་མི་འགྱུར་རོ། །དེའི་ཕྱིར་ཚོགས་ཇི་སྲིད་ཀྱིས་བསྐྱེད་པར་བྱ་བའི་འབྲས་བུ་དེ་དེ་ལས་བསྐྱེད་པར་བྱ་བ་ལས་མི་འདའ་ཡང་ཐམས་ཅད་ཁྱབ་པར་སྤང་
[93b.4]བར་ནི་མི་ནུས་སོ་ཞེས་དཔེར་ན་སྨན་ཁ་ཅིག་ཅེས་བྱ་བར་བརྗོད་ལ། དེ་ལྟ་ཡིན་ཡང་སྐྱེ་བའི་རྒྱུ་མཚན་སྤངས་པའམ་ཐམས་ཅད་དུ་ཁྱད་པར་གྱི་རྒྱུ་ཁྱད་མེད་པས་ཁྱད་པར་མེད་པ་ཉིད་མ་ཡིན་ནོ་ཞེས་འདི་ཉེ་བར་བཀོད་པ་ཡིན་ནོ། །གཞན་དུ་ན་རྒྱུད་མང་དང་གླིང་བུ་ལ་སོགས་པ་སྒྲའི་ཁྱད་
[93b.5]པར་གྱི་རྒྱུ་ཡིན་པའི་ཕྱིར་དེ་མེད་པར་བཤད་པ་འགལ་བར་འགྱུར་རོ། །དེ་ནི་ཡོད་ཀྱང་རྒྱུའི་བྱེད་པ་ཙམ་ལས་སྐྱེས་པ་ཉིད་མི་ལྡོག་པའི་ཕྱིར་རིག་བྱེད་ལ་སོགས་པ་ནི་སྐྱེས་བུས་བྱས་པ་ཉིད་དོ། །གཞན་གྱི་རྨོངས་པ་སྤང་བའི་ཕྱིར་རབ་ཏུ་གྲགས་པའི་སྨན་ལ་སོགས་པ་དང་མཚུངས་
[93b.6]པའི་དཔེ་གཞན་སྟོན་པ་ནི། དེ་ལྟ་བུར་ཞེས་བྱ་བའོ། །ཇི་ལྟར་ངག་རྣམས་ལས་རྒྱུའི་ཁྱད་པར་བཀག་ནས་རང་གི་ངོ་བོའི་རྒྱུ་རྗེས་སུ་དཔོག་པ་གཞན་གྱིས་འདོད་པའི་རྟག་པ་འགོག་པའི་རྒྱུ་ཡིན་པ་དེ་བཞིན་དུ། ངེད་ཀྱིས་འདོད་པ་ཐམས་ཅད་མཁྱེན་པ་ཉིད་ལ་སོགས་པ་དགག་པའི་
[93b.7]ཕྱིར་ཕ་རོལ་པོས་རང་གི་ངོ་བོ་ཙམ་གྱི་རྒྱུ་རྗེས་སུ་དཔོག་པས་སོ་སོའི་སྐྱེ་བོ་དང་འཕགས་པའི་ཆོས་མཚུངས་པར་བསྒྲུབ་མི་ནུས་སོ་ཞེས་བྱ་བའི་དོན་ཏོ། །འདི་ལྟར་སྐྱེས་བུ་དག་ལ་རྒྱུའི་ཁྱད་པར་ཡོད་ཀྱི་ངག་ལ་ནི་མ་ཡིན་ནོ། །གལ་ཏེ་ངག་ལས་ཡང་ནེ་ཙོ་དང་ཤ་རི་ཀ་ལ་སོགས་
[94a]
[94a.1]པ་ཁྱད་པར་གྱི་རྒྱུ་ཡོད་ཀྱི་བརྗོད་པ་མ་ཡིན་ནམ་ཞེ་ན་བདེན་མོད་ཀྱི་ཁྱད་པར་མཐོང་བ་ལས་རྗེས་སུ་དཔག་ཀྱང་གཞན་འདོད་པའི་བརྟག་པ་ཉིད་མི་འགྲུབ་བོ། །འདིར་ནི་ཁྱད་པར་གྱི་རྒྱུ་ཡོད་ན་ངེད་ཀྱི་འདོད་པ་གྲུབ་པ་ཉིད་དོ། །དེས་ན་དེ་ལྟར་རྒྱུ་ཁྱད་པར་མེད་པར་བརྗོད་
[94a.2]དོ། །སྐྱེས་བུ་སྨོས་པས་ནི་ཁ་ཅིག་ལྷ་རྣམས་ཁོ་ན་ཤེས་པ་དང་འདོད་ཆགས་དང་བྲལ་བ་དང་ལྡན་པ་ཡིན་ནོ་ཞེས་འདོད་པ་དང་འགལ་བར་འདོད་པ་དང་གཟུགས་དང་གཟུགས་མེད་པའི་ཁམས་ན་སྤྱོད་པ་རྣམས་ལ་ཅུང་ཟད་འདོད་ཆགས་དང་བྲལ་བ་ཡོད་ཀྱང་གཞན་དུ་དེར་སྤྱོད་པ་ཉིད་མི་འགྲུབ་
[94a.3]པས་གཏན་འདོད་ཆགས་དང་བྲལ་བ་མེད་པའི་ཕྱིར་དང་ལྷ་རྣམས་ཀྱིས་དེ་ལྟ་བུའི་ནུས་པ་དང་ལྡན་པ་ཡང་རིགས་པ་ཡིན་པས་བྱ་རྒོད་བཞིན་དུ་ཐམས་ཅད་མཁྱེན་པ་མ་ཡིན་པའི་ཕྱིར་རང་བཞིན་གྱིས་གྲུབ་པའི་དབང་ཕྱུག་ལ་སོགས་པ་བཀག་པ་ན་སྐྱེས་བུའི་རྩོལ་བས་ཐོབ་པར་བྱ་བ་
[94a.4]ཡིན་ནོ་ཞེས་བསྟན་པའི་ཕྱིར་རོ། །ཁྱད་པར་གྱི་རྒྱུ་མེད་ན་ནི་རང་གི་ངོ་བོ་ཙམ་གྱིས་རྒྱུ་ལས་ཐམས་ཅད་ཁྱད་པར་མེད་པ་ཉིད་ཡིན་པའི་ཕྱིར་ཁྱད་པར་མེད་པ་དང་ཁྱད་པར་གྲུབ་པས་ཚིག་ལ་སོགས་པ་ལས་དེ་རྗེས་སུ་དཔོག་པར་འགྱུར་རོ། །དེ་བཤད་པ་ནི་གང་གིས་ཚིག་ལ་
[94a.5]སོགས་པ་ཞེས་བྱ་བའོ། །ཁྱད་པར་གྱི་རྒྱུ་ནི་ཡོད་པ་ཡིན་ཏེ་དེའི་ཕྱིར་རང་གི་རྒྱུ་ལས་རིགས་མཐུན་པའི་ཕྱིར་འབྲས་བུ་དམིགས་པའི་ཕྱིར་མིའམ་གཞན་དུ་དམིགས་པ་སྐྱེ་ལ་རྒྱུ་གཞན་ལས་ནི་སྐྱུ་རུ་ར་ལ་སོགས་པ་བཞིན་ཇི་སྐད་བཤད་པའི་ཁྱད་པར་འགྲུབ་བོ། །གལ་ཏེ་སྐྱུ་རུ་ར་ལ་
[94a.6]སོགས་པ་དག་སྐྱེད་པར་བྱེད་པའི་ཚོགས་པར་གཏོགས་པའི་ཁྱད་པར་ལྷག་པ་དང་ལྡན་པས་ཁྱད་པར་ཅན་དུ་འགྱུར་གྱི་སྐྱེས་མ་ཐག་ཏུ་ནི་མ་ཡིན་ནོ་ཞེ་ན་འགྱུར་མོད། དེ་ལྟ་ན་ཡང་སྐྱེས་བུ་ཞེས་བྱ་བ་སེམས་ཀྱི་ཁྱད་པར་བརྟག་པ་མ་ཡིན་པ་དེས་ན་འདི་སྐྱེ་བ་ཉིད་ན་རྒྱུའི་ཁྱད་པར་ལ་
[94a.7]བརྟེན་ནས་ཁྱད་པར་དུ་འགྱུར་རོ། །ད་ནི་ཁྱད་པར་དེ་ཉིད་དང་ཁྱད་པར་གྱི་རྒྱུ་ཡང་བསྟན་པའི་ཕྱིར། ལེགས་པར་བྱ་བའི་བྱེ་བྲག་ལས། །ཞེས་སྨོས་སོ། །འདིས་ནི་ཁྱད་པར་གྱི་རྒྱུ་བཤད་དོ། །ཡོན་ཏན་ཐམས་ཅད་ལ་ཞེས་བྱ་བས་ནི་ཡོན་ཏན་གྱི་ཁྱད་པར་དང་ཁྱད་པར་དུ་འཕེལ་བ་
[94b]
[94b.1]ཉིད་བཤད་དོ། །རང་གི་རྒྱུ་ལས་སྐྱེ་བ་ཉིད་ལ་སོགས་པ་བརྗོད་པའི་སེམས་ཀྱི་རྒྱུན་སེམས་གཞན་དུ་གཏོགས་པ་སྐྱེད་པར་བྱེད་པའི་རྒྱུ་ཐ་མི་དད་པ་ཡིན་ཡང་མཚུངས་པ་ཉིད་ནི་མ་ཡིན་པ་ཁོ་ན་སྟེ། རྒྱུ་སོ་སོ་ལ་བཟོ་དང་སྒྱུ་རྩལ་ལ་མཁས་པ་ལ་སོགས་པ་ཐུན་མོང་མ་ཡིན་པར་དམིགས་
[94b.2]པའི་ཕྱིར་རོ། །ཁྱད་པར་མེད་པའི་རྒྱུ་ཙམ་ལས་སྐྱེས་པའི་འབྲས་བུ་ནི་ཁྱད་པར་དང་ལྡན་པར་འགྱུར་བ་མ་ཡིན་ནོ། །དེའི་ཕྱིར་རྗེས་སུ་མཐུན་པའི་རྒྱུས་བསྐྱེད་པར་ཁྱད་པར་མེད་ཀྱང་དེའི་ཁྱད་པར་ལ་བརྟེན་ཏེ་ཁྱད་པར་དུ་འགྱུར་བ་ཡིན་ནོ། །མཁས་པ་དེ་ཡང་མཐའ་མེད་པ་ཉིད་དེ། དེ་ལ་
[94b.3]ཡང་རིམ་གྱིས་སྐྱེ་བ་ན་ཁྱད་པར་དུ་འཕེལ་བ་མཐོང་བའི་ཕྱིར་རོ། །དེ་ཐམས་ཅད་ཀྱང་འདུ་བྱེད་པའི་ཁྱད་པར་ཉིད་ལས་ཁྱད་པར་དུ་འགྱུར་བ་ཡིན་ནོ། །བཟོ་དང་སྒྱུ་རྩལ་ལ་སོགས་པ་གོམས་པས་ནི་གང་ལས་དེ་དག་མི་ཤེས་པའི་རྟོགས་པ་པོ་དག་ཚུལ་མཐའ་དག་ལ་མཁས་པར་
[94b.4]འགྱུར་བ་སེམས་ཀྱི་རྒྱུན་ཁྱད་པར་དུ་འཕགས་པ་སྒྲུབ་པར་བྱེད་པ་ཡིན་ནོ། །དེའི་ཕྱིར་རང་གི་རྒྱུ་ལས་གྲུབ་པའི་སེམས་ལ་རྒྱུའི་ཁྱད་པར་གཞན་ཡོད་པ་ཁོ་ནའོ། །ཅི་ལྟར་འདི་ཡོད་པ་དེ་བཞིན་དུ་ཉོན་མོངས་པ་དང་བྲལ་བ་དང་གཉིས་སུ་མེད་པར་རྟོགས་པ་དང་། ཐམས་ཅད་ཤེས་པ་
[94b.5]ཉིད་ལ་སོགས་པ་གཞན་ལ་ཡང་སྲིད་པའི་ཕྱིར་རོ། །རང་གི་ཚད་མས་རྟོགས་པ་དེ་ཐོབ་པའི་ཐབས་གོམས་པས་དེའི་བདག་ཏུ་འགྱུར་རོ་ཞེས་ལེའུ་གཉིས་པར་སྒྲུབ་པར་འགྱུར་རོ། །མི་སྲིད་པར་སྨྲ་བ་གང་ཡིན་པ་དེ་ལ་ནི་མི་སྲིད་པར་རྗེས་སུ་དཔག་པ་ལ་ཡང་རྒྱུ་མཚན་གནོད་པར་
[94b.6]བྱེད་པའི་ཚད་མ་མེད་དོ། །མི་སྲིད་པ་ལ་རང་བཞིན་ནམ་འབྲས་བུའི་རྗེས་སུ་དཔག་པ་ཡོད་གྲང་ན་རེ་ཞིག་རང་བཞིན་ནི་མེད་དེ། དེ་ནི་གནོད་པར་བྱེད་པས་དེའི་བདག་ཉིད་དུ་གྲུབ་པ་ཉིད་ནི་འགྱུར་བའི་ཕྱིར་རོ། །ཐམས་ཅད་མཁྱེན་པ་ནི་ཐམས་ཅད་མཁྱེན་པ་མ་ཡིན་པ་སྒྲུབ་པས་
[94b.7]གནོད་པའི་ཕྱིར་དེ་ཉིད་དེའི་གནོད་པར་བྱེད་པ་ཡིན་ནོ། །དེས་ན་གལ་ཏེ་སྨ་བ་ལ་སོགས་པ་འགའ་ཞིག་ཐམས་ཅད་མཁྱེན་པ་མ་ཡིན་པ་དང་དེའི་བདག་ཉིད་དུ་གྱུར་པ་ཡིན་ན་དེའི་ཚེ་འདིར་འགྱུར་བ་ཞིག་ན་དེ་ནི་འདི་ལ་མེད་དོ། །ཇི་ལྟར་ཞེ་ན་འདོད་ཆགས་དང་བྲལ་བ་ཞེས་སྨོས་སོ། །
[95a]
[95a.1]འདི་སྐད་བཤད་པ་ཡིན་ཏེ་ཇི་ལྟར་རྟག་པ་ལ་མི་སྲིད་པའི་རིམ་དང་ཅིག་ཅར་ཉིད་དང་ལྡན་པས་ཡོད་པ་མི་རྟག་པའི་རང་བཞིན་དུ་གྱུར་པ་ཉིད་དོ། །ཞེས་རྟོག་པ་དེ་བཞིན་དུ་གང་གིས་འཐད་པ་ལས་བྱུང་བ་ཉིད་ཀྱིས་གནོད་པར་འགྱུར་བ་སྨྲ་བ་ལ་སོགས་པ་ནི་ཐམས་
[95a.2]ཅད་མཁྱེན་པ་མ་ཡིན་པ་དང་འདོད་ཆགས་དང་བྲལ་བ་ལ་སོགས་པ་དང་དེའི་བདག་ཉིད་མ་ཡིན་ནོ། །དེའི་ཕྱིར་གང་གི་ཕྱིར་དེ་ལས་བཟློག་པ་དགག་པའི་ཕྱིར་གནོད་པར་བྱེད་པ་འདི་ཐམས་ཅད་མཁྱེན་པ་མ་ཡིན་པའི་རང་བཞིན་གྱི་གཏན་ཚིགས་སུ་འགྱུར་བ། སྨྲ་བ་ཉིད་དམ་
[95a.3]གཞན་ཐམས་ཅད་མཁྱེན་པ་དང་འདོད་ཆགས་དང་བྲལ་བ་ཉིད་དང་འགལ་བ་ནི་མངོན་སུམ་གྱིས་གྲུབ་པ་ཉིད་དུ་བརྗོད་པར་བྱ་བ་ཡིན་ནོ། །དེའི་ཕྱིར་འདོད་ཆགས་དང་བྲལ་བ་ལ་སོགས་པ་མ་མཐོང་ན་ཆོས་འགའ་དང་ཡང་འགལ་བར་མི་འགྱུར་རོ། །མ་མཐོང་བ་དང་ནི་ཆོས་
[95a.4]འགའ་ཡང་གནོད་པར་བྱ་བ་དང་གནོད་པར་བྱེད་པའི་དངོས་པོར་མི་འགྲུབ་པའི་ཕྱིར་རང་བཞིན་གྱི་གཏན་ཚིགས་དེ་གནོད་པ་མ་ཡིན་ནོ། །གལ་ཏེ་རྟག་པ་དོན་བྱེད་པ་བཞིན་དུ་རིམ་དང་ཅིག་ཅར་དག་གིས་དོན་ཐམས་ཅད་རྟོགས་པར་མི་སྲིད་པ་མ་ཡིན་ནམ། དེས་ན་དོན་བྱེད་པ་ལས་སྐད་
[95a.5]ཅིག་མ་བཞིན་དུ་རེག་པར་བྱ་བ་མངོན་སུམ་དུ་གྱུར་པ་ཉིད་ལས་ཐམས་ཅད་མ་ཡིན་པར་རྗེས་སུ་དཔོག་གོ། །འགྲོ་བའི་ཡུལ་དང་དུས་ཀྱི་དབྱེ་བས་མཐའ་ཡས་སོ། །དེ་ཐམས་ཅད་རིམ་གྱིས་འཛིན་ན་མཐའ་ཡས་པས་འཛིན་པ་མཐའ་ཐུག་པ་མེད་པ་དེའི་ཕྱིར་རིམ་གྱིས་འཛིན་པ་
[95a.6]མ་ཡིན་ནོ། །ཅིག་ཅར་ཡང་མ་ཡིན་ཏེ་མཐའ་ཡས་པ་ཉིད་ཀྱིས་འདི་ཙམ་ཞེས་མི་ངེས་པའི་ཕྱིར་ཐམས་ཅད་རྟོགས་སམ། ཕྱོགས་གཅིག་རྟོགས་ཞེས་མི་འགྲུབ་པའི་ཕྱིར་རོ། །འདི་ནི་འདི་ཙམ་ཁོ་ནར་ཟད་དེ་འདི་ལས་གཞན་ནི་མེད་ལ། དེ་ཡང་རྟོགས་སོ་ཞེས་ཐམས་ཅད་རྟོགས་པ་
[95a.7]འགྲུབ་པའི་ཕྱིར་རོ། །འདི་ཙམ་ཞེས་མ་རྟོགས་ན་ནི་འདི་ཐམས་ཅད་རྟོགས་པ་ཡིན་ནམ། ཕྱོགས་གཅིག་རྟོགས་པ་ཡིན་ཞེས་ཇི་ལྟར་ངེས། འགྲོ་བ་མཐའ་མེད་པ་ལ་འདི་ཙམ་དུ་རྟོགས་པ་མེད་པའི་ཕྱིར་ཇི་ལྟར་འདི་ཐམས་ཅད་འཛིན་པར་འགྱུར་ཞེ་ན་དེ་ནི་མི་འཐད་དེ། གཉི་ག་
[95b]
[95b.1]ལྟར་ཡང་འཛིན་པ་བཀག་པ་མེད་པའི་ཕྱིར་རོ། །སྐྱེས་ཤིང་སྐྱེས་པ་འཛིན་པས་གཞན་དང་གཞན་བཟུང་བ་ཐུག་པ་མེད་པའི་ཕྱིར་ཐམས་ཅད་འཛིན་པར་མི་འགྱུར་བ་གང་ཡིན་པ་དེ་རིམ་གྱིས་འཇུག་ཀྱང་དོན་ཡོད་པའི་དུས་ལས་ལྡོག་པ་མ་ཡིན་ནོ། །འདས་པ་བཟུང་ནས་མ་འོངས་པ་འཛིན་
[95b.2]ལ་དེ་ནས་ནི་ད་ལྟར་འཛིན་པ་འམ་རིམ་པ་གཞན་གྱིས་ཀྱང་རུང་སྟེ་དེའི་ཚེ་སྐྱོན་ཅི་ཞིག་ཡོད། མཐའ་ཡས་པའི་ཕྱིར་མི་འཛིན་ཏོ་ཞེ་ན། རིམ་གྱིས་རྟོགས་པ་ནི་རེ་ཞིག་མ་འབྲེལ་པ་ཡིན་ཏེ། དེ་ལྟར་འཛིན་པ་ཉིད་མི་སྲིད་པའི་ཕྱིར་རོ། །མཐའ་མེད་པ་རྣམས་ལ་འཛིན་པ་མི་འཐད་པ་ཡང་མ་
[95b.3]ཡིན་ཏེ་དེ་ཡོད་པ་དང་མེད་པ་ལ་མི་ལྟོས་པའི་ཕྱིར་རོ། །ཐམས་ཅད་མཁྱེན་པའི་མཁྱེན་པ་ནི་དངོས་པོ་གཞན་གྱི་དབང་དུ་གྱུར་པ་མ་ཡིན་པར་གང་ཞིག་ཇི་ལྟར་བདེན་པ་དེ་དེ་ཁོ་ན་བཞིན་དུ་རྟོགས་པ་ཡིན་ནོ། །དེ་དངོས་པོ་ཡོད་པ་ལ་ལྟོས་པ་ཡིན་ན་ནི་དེ་དག་མཐའ་ཡས་པའི་ཕྱིར་དེའི་ཡུལ་ཅན་གྱི་
[95b.4]འཛིན་པ་མཐར་ཕྱིན་པར་མི་འགྱུར་རོ། །དེ་ཉིད་ཀྱི་ཕྱིར་འདས་པ་དང་མ་འོངས་པ་ཡུལ་ཉིད་དོ། །རྣམ་པར་རྟོག་པ་དུས་ཀྱི་ཁྱད་པར་ཅན་དུ་འཛིན་པ་ཉིད་དེའི་དུས་བར་འཛིན་པ་ནི་མ་ཡིན་གྱི་འོན་ཀྱང་ལྷན་ཅིག་ཏུ་སྣང་བ་ཡིན་ཏེ། ད་ལྟར་བའི་དུས་བཞིན་ནོ། །དུས་ཀྱང་ཉི་མ་འཆར་བ་ལ་
[95b.5]སོགས་པ་ཡིན་གྱི་གཞན་འདོད་པ་ནི་མ་ཡིན་ནོ། །དེས་ན་ངོ་བོ་ཅན་མཐའ་ཡས་ཀྱང་རང་ཉིད་ངེས་པའི་ཡུལ་དང་དུས་ཀྱི་དངོས་པོ་ལ་མི་ལྟོས་པར་སྣང་བའི་སྤྱོད་ཡུལ་དུ་མི་འགལ་ལོ། །དངོས་པོ་གཅིག་ཉིད་མཐའ་ཡས་པའི་དངོས་པོ་རྣམས་ལ་ལྟོས་པ་འམ་ལྟོས་པར་བྱ་བ་མི་འཐད་དོ། །དེས་
[95b.6]ན་བྱིས་པ་ལས་ཀྱང་ལེགས་བཤད་བླང་བ་ཡིན་པས་འདི་བླངས་སོ། །ཚད་ངེས་པར་མ་ཆད་པ་མཐའ་ཡས་པའི་འགྲོ་བ་མཐའ་དག་བྱེད་པ་པོའི་དབང་ཕྱུག་གཅིག་ནི་མི་སྲིད་དོ། །བྱ་བ་མཐའ་མེད་པའི་ཕྱིར་དབང་ཕྱུག་གིས་འགྲོ་བ་ན་གནས་པའི་དངོས་པོ་རྣམས་བྱེད་པ་ན་ཐམས་ཅད་བྱེད་པ་
[95b.7]ཉིད་དུ་མི་འཐད་དེ། འགྲོ་བ་མཐའ་ཡོད་པ་ཉིད་ཡིན་ན་ཐམས་ཅད་བྱ་བར་འགྲུབ་པའི་ཕྱིར་རོ། །མེ་ལོང་ལྟ་བུའི་ཡེ་ཤེས་ནི་དེའི་གཟུགས་བརྙན་ཙམ་དང་ལྡན་པ་ཡིན་པའི་ཕྱིར་ལྟོས་པ་དང་ལྟོས་པར་བྱ་བ་མ་ཡིན་པ་རང་བཞིན་དང་ལྡན་པའི་དངོས་པོ་དང་རྗེས་སུ་འབྲེལ་པའི་རང་བཞིན་
[96a]
[96a.1]ཐ་དད་པ་དང་མཐའ་ཡས་པ་ཡིན་ཡང་ཐ་མི་དད་ཅིང་མཐའ་ཡོད་པའི་འཛིན་པ་ནི་མི་འགལ་ལོ། །མཐའ་ཡས་པ་ནི་ཚད་ཆད་པ་མེད་པའི་ཕྱིར་ཐམས་ཅད་དང་ཕྱོགས་གཅིག་རྟོགས་པ་ཁྱད་པར་མེད་པས་ཐམས་ཅད་རྟོགས་སོ་ཞེས་རྣམ་པར་གཞག་པར་མི་ནུས་སོ་ཞེས་བྱ་
[96a.2]བ་འདི་ཙམ་ཞིག་བྱིས་པའི་ཚིག་སྙིང་པོ་ཡིན་པར་འགྱུར་གྱི་བྱེད་པ་བཞིན་དུ་འཛིན་པ་མི་སྲིད་པར་གྲུབ་པ་ནི་མ་ཡིན་ནོ། །མཐའ་ཡས་པ་འཛིན་པར་བྱེད་པ་ལ་ནི་འགལ་བ་འགའ་ཡང་མེད་དེ། གཟུང་བའི་ཆོས་འཛིན་པའམ་དེའི་ཆོས་གཟུང་བ་ལས་ཐལ་བར་འགྱུར་བ་མེད་པའི་ཕྱིར་གླང་པོའི་
[96a.3]གཟུགས་བརྙན་ལ་གླང་པོའི་ཆོས་སམ། གླང་པོ་ལ་གླང་པོའི་གཟུགས་བརྙན་གྱི་ཆོས་བཞིན་ནོ། །ཚད་ངེས་པར་ཆད་པ་མེད་པས་ཐམས་ཅད་འཛིན་པ་མེད་པ་ཡང་མ་ཡིན་ནོ། །དཔེར་ན་ཁྱིམ་ནང་ན་གནས་པར་རྟོགས་པའི་བུམ་པ་ལྔ་ལ་གཞན་ཡོད་དམ་མེད་ཅེས་ཚད་ངེས་
[96a.4]པ་མ་བརྟགས་པར་ཕྱིར་སོང་བ་བུམ་པ་ཡོད་དོ་ཞེས་རྟོགས་པར་འགྱུར་གྱི་གྲངས་ངེས་པའམ་འདི་ཙམ་ཉིད་མཐོང་ངོ་ཞེས་ནི་མ་ཡིན་པ་བཞིན་ནོ། །དེ་ཡང་བརྩལ་བས་ནི་གྲངས་དང་མ་དམིགས་པའི་ཕྱིར་གཞན་མེད་པས་འདི་ཙམ་ཉིད་དང་དེ་ཐམས་ཅད་ལ་ཡང་རྟོགས་པ་ཞུགས་པས་ན་
[96a.5]ཐམས་ཅད་རྟོགས་པ་ཉིད་དུ་རྟོགས་སོ། །དེ་ཉིད་ཀྱི་ཕྱིར་ཐམས་ཅད་ཅེས་བྱ་བ་ནི་གྲངས་དང་འདྲ་བར་དངོས་པོའི་ཆོས་མ་ཡིན་ཏེ། གཞན་ལ་ལྟོས་པའི་ཕྱིར་རོ། །གྲུབ་པ་དག་ལ་ནི་ལྟོས་པ་ཡོད་པ་མ་ཡིན་ནོ། །དེས་ན་ཐམས་ཅད་མཁྱེན་པ་ཉིད་དུ་རྟོགས་པ་མེད་ཀྱང་དངོས་པོ་མ་རྟོགས་པ་མ་
[96a.6]ཡིན་ནོ། །ཚད་ངེས་པར་ཆད་པ་ཉིད་ནི་ཐམས་ཅད་མཁྱེན་པ་ཉིད་དམ། མི་དམིགས་པ་ཙམ་གྱིས་རྟོགས་པར་བྱ་བར་མི་ནུས་སོ། །སྒྲ་ལ་སོགས་པ་ནི་རྟག་པ་དང་ཁྱབ་པ་ཉིད་ཀྱིས་ཡུལ་དང་དུས་རྣམ་པར་ཆད་པ་མེད་པའི་ཕྱིར་ཚད་ངེས་པ་མེད་པས་ཀྱང་གླེན་པ་ཞིག་སྟེ། མི་སྣང་བ་མི་
[96a.7]དམིགས་པ་ཙམ་གྱིས་ཚད་མ་ཡིན་པ་བཀག་ནས་རྒྱུ་མི་དམིགས་པ་ཁས་བླངས་པའི་ཕྱིར་རྒྱུ་མེད་པ་ལ་ཡང་དེ་ཉིད་རྟོགས་པར་བྱེད་པ་ཤེས་རབ་ཕུལ་དུ་ཕྱིན་པས་རྟོགས་པར་བྱ་བའི་ཐིབས་པོ་ལ་ཁ་ངན་ཟེར་བས་ངན་སོང་ལ་གཞོལ་བའི་སྙིང་རྗེ་བ་ཉིད་དོ། །རྒྱུ་འདི་ཡིན་ནོ་ཞེས་བསྟན་དུ་མེད་པས་ནི་མེད་
[96b]
[96b.1]པར་སྨྲ་མི་ནུས་ཏེ། དེ་ཉིད་ཀྱིས་ཐེ་ཚོམ་ཟ་བའི་ཕྱིར་རོ། །གལ་ཏེ་དོན་ཐམས་ཅད་རིག་པ་རྣམ་པར་ཤེས་པ་ཉིད་ཡིན་པས་དེ་ལ་ཡིད་ལ་སོགས་པ་ཉིད་རྒྱུར་འགྱུར་བ་མ་ཡིན་ནམ། དེ་དག་ལས་ཀྱང་དེ་སྲིད་པ་མ་ཡིན་པ་དེའི་ཕྱིར་མེད་པ་ཁོ་ནའོ་ཞེ་ན། གལ་ཏེ་དེ་ལྟ་ན་དོན་གྱི་ཡུལ་ཅན་གྱི་ཡིད་མི་
[96b.2]སྲིད་པའི་ཕྱིར་དབང་པོའི་ཤེས་པ་ཡང་མེད་པར་འགྱུར་རོ། །མ་ཡིན་ཏེ་དབང་པོ་ལྷན་ཅིག་བྱེད་པ་ཅན་ལས་དེ་འབྱུང་བའི་ཕྱིར་རོ་ཞེ་ན། འོ་ན་ལྷན་ཅིག་བྱེད་པ་གཞན་དང་ལྡན་པས་དོན་ཐམས་ཅད་པའི་ཡུལ་ཅན་དུ་འགྱུར་རོ། །མ་ཡིན་ཏེ་དེ་མེད་པའི་ཕྱིར་རོ་ཞེ་ན། བློ་གྲོས་མེད་པའི་སྒྲིན་ཤས་
[96b.3]ཆོག་གོ། །སྒོམ་པ་ཚད་མའི་ཡུལ་ཅན་ཉིད་ཀྱིས་ནི། མཁོ་བ་ཡོད་པ་མ་ཡིན་ཏེ་མི་གསལ་བའི་རྣམ་པ་གསལ་བར་བྱེད་པས་མཐར་ཕྱིན་པ་ཉིད་ཡིན་པའི་ཕྱིར་རོ་ཞེས་བཤད་པར་བྱའོ། །དེའི་ཕྱིར་མི་སྣང་བ་མི་དམིགས་པ་ཉིད་ཀྱིས་དེ་མེད་པར་བརྗོད་པར་བྱ་བ་ཡིན་ན་དེ་ནི་ཚད་མ་ཡིན་པའི་ཕྱིར་
[96b.4]སྤང་བར་བྱ་བ་མ་ཡིན་ནོ། །དེའི་ཕྱིར་རྒྱུ་མཚུངས་པ་ཡོད་ཀྱང་ཁྱད་པར་གྱི་རྒྱུ་སྤང་དུ་མེད་པའི་ཕྱིར་རིགས་གཅིག་པ་ཡིན་ཡང་སྐྱེས་བུ་དག་ཁྱད་པར་མེད་པ་མ་ཡིན་ལ་རིགས་མཐུན་པའི་རྒྱུ་ལས་ནི་འདའ་བར་དཀའ་བའི་ཕྱིར་སྐྱེས་བུས་མ་བྱས་པ་ནི་མེད་ལ། དོན་ཐམས་ཅད་འཛིན་པར་
[96b.5]རུང་བའི་སེམས་ནི་ཡོད་པ་ཁོ་ནའོ། །གལ་ཏེ་རྒྱུ་རིགས་མི་མཐུན་ན་འབྲས་བུ་རིགས་མི་མཐུན་པ་ཉིད་དུ་འགྱུར་མོད། །དེས་ན་སྐྱེས་བུས་བྱས་པ་གང་ཡིན་པ་དེ་ནི་སྐྱེས་བུས་མ་བྱས་པ་ལས་གཞན་ཁོ་ན་ཡིན་མོད་ཀྱི་དེ་ལ་ཡང་སྐྱེས་བུས་ཁྱད་པར་བཞིན་དུ་ཐ་དད་པ་བྱེད་པའི་ཁྱད་པར་བལྟར་
[96b.6]མི་རུང་བ་ཉིད་ཀྱིས་ཐ་དད་པར་མི་མངོན་པ་ཡིན་ནོ་ཞེ་ན། ཚིག་རྣམས་ནི་ཞེས་སྨོས་སོ། །སྐྱེས་བུའི་ཁྱད་པར་བཞིན་དུ་ཚིག་རྣམས་ནི་ཁྱད་པར་སྤང་བར་འོས་པ་མ་ཡིན་པ་མ་ཡིན་ནོ། །ཅིའི་ཕྱིར་ཞེ་ན་ཁྱད་པར་བལྟར་རུང་བའི་ཕྱིར་རོ། །བལྟར་རུང་བ་མི་སྣང་ན་ནི་མེད་དོ་ཞེས་ངེས་པ་ཁོ་ནའོ། །
[96b.7]ཚིག་གི་ཁྱད་པར་དག་ཀྱང་དེ་ལྟ་བུར་གྱུར་པ་ཡིན་ནོ། །ཁྱད་པར་བལྟར་མི་རུང་བ་ཡིན་པ་དེ་ལྟ་ན་ཡང་འདི་དག་སྐྱེས་བུས་མ་བྱས་པ་ཡིན་ནོ་ཞེས་རྣམ་པར་འཇོག་པ་མི་འཐད་དོ། །དེ་བཤད་པ་ནི་བལྟར་མི་རུང་བ་ཉིད་གཅིག་ཅེས་སྨོས་སོ། །རྒྱལ་བ་སྒྲོགས་པ་ལ་སོགས་པ་ནི་སྐྱེས་བུས་
[97a]
[97a.1]བྱས་པ་ཡིན་ལ། རིག་བྱེད་ནི་སྐྱེས་བུས་མ་བྱས་པ་མ་ཡིན་ནོ་ཞེས་རིགས་མི་མཐུན་པ་ཉིད་མི་འཐད་དོ། །ཅི་སྟེ་ཡང་མངོན་སུམ་ལ་སོགས་པའི་ཚད་མའི་སྤྱོད་ཡུལ་མ་ཡིན་པའི་ཡུལ་ཅན་ཉིད་རིགས་མི་མཐུན་པ་ཡོད་པ་ཡིན་ནོ། །སྐྱེས་བུས་བྱས་པ་ནི་གྲུབ་པའི་རང་
[97a.2]བཞིན་གྱི་དོན་སྟོན་པ་ཡིན་ལ། བྱའོ་ཞེས་བྱ་བ་ཉིད་ནི་རིག་བྱེད་ཀྱིས་རྟོགས་པར་བྱེད་དོ་ཞེ་ན། དེ་ནི་མ་ཡིན་ནོ་ཞེས་བཤད་པ་ནི་དེའི་ཁྱད་པར་རྣམས་ནི་ཞེས་བྱ་བ་ཡིན་ནོ། །དེར་ཁྱད་པར་དུ་འདོད་པ་གང་ཡིན་པ་དེ་ནི་ཞི་བ་ས་ལ་སོགས་པའི་རྒྱུད་གཞན་ལ་ཡང་སྲིད་པ་ཡིན་ནོ། །འདི་དག་
[97a.3]ནི་འདི་ལས་འདིར་འགྱུར་རོ་ཞེས་བྱ་བ་འདི་ལྟར་བྱ་བ་རྟོགས་པར་བྱེད་པ་དག་ལ་ཡང་བྱེད་པ་ཡོད་པ་ཡིན་ལ། གཞན་དག་གི་དགོས་པ་ནི་བྱ་བ་སྟོན་པར་བྱེད་པ་ཁོ་ན་ཡིན་ནོ་ཞེས་བྱ་བ་ལ་སོགས་པ་ཡང་གཞན་ལས་སྐྱེས་བུས་བྱས་པ་དང་མ་བྱས་པའི་ཁྱད་པར་གྲུབ་ན་སྲིད་པ་ཡིན་ནོ། །དེས་ན་དེ་ལྟར་
[97a.4]རྟོགས་པར་བྱེད་པ་ཉིད་ནི་སྐྱེས་བུས་ཀྱང་ཕྱོགས་གཅིག་དམིགས་པ་ཁྱད་པར་དང་ལྡན་པ་ཉིད་དུ་རྣམ་པར་འཇོག་པ་ན། ཅི་འདི་སྒྲ་མཐའ་དག་རྟོགས་སམ་སྒྲའི་ཕྱོགས་གཅིག་ཅེས་འདྲི་བ་ལ་ཐམས་ཅད་རྟོགས་སོ་ཞེས་ལན་འདེབས་པས་སྒྲའི་རང་བཞིན་ཚད་ངེས་པར་རྣམ་པར་བཞག་ནས་དེ་ལ་
[97a.5]དམིགས་པར་ནི་བརྗོད་པར་མི་ནུས་ཀྱིས། འོན་ཀྱང་གཅིག་ཡིན་པའི་ཕྱིར་ཆ་མེད་པ་ཉིད་ཀྱིས་ཐམས་ཅད་རྟོགས་སོ་ཞེས་བྱ་བ་ཡིན་ནོ། །དེས་ན་འགྲོ་བ་མཐའ་ཡས་པ་ཡང་ཚད་ངེས་པར་རྣམ་པར་གཞག་ནས་ཐམས་ཅད་རྟོགས་པར་ནི་མི་སྨྲའི། འོན་ཀྱང་མཐའ་ཡས་ཀྱང་ངོ་བོ་དང་ལྡན་པ་
[97a.6]དེའི་ཡུལ་ཅན་གྱི་རྣམ་པར་ཤེས་པའི་ཡུལ་མ་ཡིན་པ་མི་སྲིད་པས་དུས་གསུམ་དང་ལྡན་པ་མཁྱེན་ཏོ་ཞེས་བརྗོད་དོ། །བླུན་པོའི་བརྟག་པ་ལ་ལན་བཏབ་པས་ཆོག་གི་སྲིད་པ་འགོག་པའི་འབྲས་བུའི་གཏན་ཚིགས་ཀྱང་མེད་པར་བཤད་པ་ནི་འདོད་ཆགས་ལ་སོགས་པའི་འབྲས་བུ་ཞེས་བྱ་བའོ། །
[97a.7]འབྲས་བུའི་གཏན་ཚིགས་ཀྱིས་ནི་འདོད་ཆགས་རྗེས་སུ་དཔག་པ་ཉིད་ཀྱིས་འདོད་ཆགས་དང་བྲལ་བ་འགོག་པའི་ཕྱིར་འདོད་ཆགས་ལ་སོགས་པའི་འབྲས་བུ་འཁྲུལ་པ་མེད་པ་ཅན་མེད་པར་བརྗོད་དེ། ཚིག་ལ་སོགས་པ་ནི་དེ་ལྟ་མ་ཡིན་པས་ཡང་སྲིད་པའི་ཕྱིར་རོ། །རང་བཞིན་མི་དམིགས་
[97b]
[97b.1]པས་མེད་པར་སྒྲུབ་པ་ཡང་སེལ་བ་ནི་སྲིད་ཀྱང་ཐམས་ཅད་མཁྱེན་པ་དང་འདོད་ཆགས་དང་བྲལ་བ་ལ་སོགས་པའི་ཁྱད་པར་རྣམ་པ་བལྟར་མི་ནུས་པའི་ཕྱིར་རོ། །བལྟར་རུང་བ་དག་ལ་མཐོང་བ་མེད་པ་ནི་རང་བཞིན་མི་དམིགས་པ་ཡིན་ན། འདི་ནི་བལྟར་རུང་བ་མ་ཡིན་ནོ། །མི་སྣང་
[97b.2]བ་མི་དམིགས་པ་ཚད་མ་ཡིན་པ་ཉིད་དོ་ཞེས་བཤད་པ་ནི། དེ་ལྟ་བུ་དག་ནི་ཞེས་བྱ་བའོ། །ཡུལ་དང་དུས་དང་རང་བཞིན་གྱིས་བསྐལ་པས་བལྟར་མི་ནུས་པ་དག་ལ་ནི་སྤང་བ་སྲིད་པ་མ་ཡིན་ནོ། །གལ་ཏེ་འཇལ་བ་ཚད་མའི་རྒྱུ་ཅན་མ་ཡིན་ནམ། དོན་ཐམས་ཅད་རབ་ཏུ་གྲུབ་པ་ལ་ནི་རྒྱུ་
[97b.3]ཚད་མ་ཡོད་པ་མ་ཡིན་ཏེ། མིག་ལ་སོགས་པ་ངེས་པའི་ཡུལ་ཅན་ཡིན་པའི་ཕྱིར་དང་ཡིད་ཀྱང་ཐམས་ཅད་ཀྱི་ཚེ་ཕྱི་རོལ་གྱི་གཞན་གྱི་དབང་དུ་གྱུར་པས་དེ་ལ་མ་ལྟོས་པར་མི་འཇུག་པའི་ཕྱིར་དང་སྒོམ་པ་ཡང་ཐོས་པ་དང་དཔག་པའི་ཡུལ་ཅན་ཉིད་ཀྱིས་དོན་ཐམས་ཅད་ཀྱི་ཡུལ་ཅན་དུ་མ་
[97b.4]གྲུབ་པའི་ཕྱིར་རོ། །དེའི་ཕྱིར་དོན་ཐམས་ཅད་འཇལ་བ་འགོག་པའི་ཚད་མ་ནི་རྒྱུ་མི་དམིགས་པ་ཉིད་ཡིན་ནོ་ཞེ་ན། དེ་ནི་མ་ཡིན་ཏེ་ཇི་ལྟར་ཡོངས་སུ་མཐོང་བའི་ཤེས་པའི་རྒྱུ་དག་ཁོ་ན་དོན་ཐམས་ཅད་གཅོད་པའི་རྒྱུ་ཡིན་ནོ། །ཇི་ལྟར་ཡོངས་སུ་མཐོང་བ་ཐམས་ཅད་དོན་ཐམས་
[97b.5]ཅད་འཇལ་བར་འགྱུར་རོ། །རྒྱུ་མ་ཡིན་ན་ཡང་དེ་དག་དེ་ལ་ནུས་པ་མེད་པས་འཇལ་བ་དེ་རྒྱུ་མེད་པར་ཇི་ལྟར་འགྱུར། སྒོམ་པ་རྒྱུ་མ་ཡིན་ནོ་ཞེ་ན། གལ་ཏེ་སྒོམ་པ་རྒྱུའི་དངོས་པོར་རྟོགས་ན་དེ་མེད་ན་དོན་ཐམས་ཅད་འཇལ་བ་མེད་དོ་ཞེས་བྱ་བར་འགྱུར་རོ། །དེ་ལྟར་ན་ཡང་གང་དུ་དེ་
[97b.6]མེད་པ་དེར་མེད་པར་འགྲུབ་ཀྱི་དེ་ཡོད་པར་ནི་མ་ཡིན་ནོ། །འོན་ཏེ་དེ་ཡང་རྒྱུ་ཉིད་དུ་མི་འཐད་དོ་ཞེ་ན། ད་ནི་རྒྱུ་མ་ཡིན་པ་རྒྱུར་འགྱུར་བ་བཀག་ནས་དེའི་རྒྱུ་ཅན་མ་ཡིན་པའི་འབྲས་བུ་ཅི་འགལ། གལ་ཏེ་ཕ་རོལ་པོས་སྒོམ་པ་དེའི་རྒྱུར་ཁས་བླངས་པའི་ཕྱིར་རོ་ཞེ་ན། ད་ནི་ཁས་བླངས་པ་དེ་
[97b.7]ཡང་དག་པ་མ་ཡིན་པར་འགྱུར་གྱི་ཞེས་ཁས་ལེན་མི་ཤེས་པའི་སྤོབས་པ་ཉམས་པས་དོན་ཡང་ཉམས་པར་འགྱུར་བ་ནི་མ་ཡིན་ནོ། །རྨོངས་པས་དུ་བའི་རྒྱུ་ས་བོན་ཡིན་པར་ཁས་བླངས་པ་ལ་གནོད་པས་མེ་ལས་དུ་བ་ཡོད་པར་འགྱུར་བ་ཡང་བཀག་པ་མ་ཡིན་ནོ། །འོ་ན་རྒྱུ་གཞན་གང་ཡིན་
[98a]
[98a.1]ཞེ་ན། གམ་ན་གནས་པ་ཙམ་རིག་པའི་ཕྱུགས་ཀྱང་སྟོང་པ་ཉིད་ལ་འཁྲུལ་པ་ནི་མ་ཡིན་ན་འདི་ནི་ཕྱུགས་མ་བྱས་པ་མ་ཡིན་ནོ། །འཇིག་རྟེན་མཐོང་བ་ཇི་ལྟ་བ་བཞིན་སྣང་བ་ཉིད་སྒྲའི་དོན་ཡིན་ནོ་ཞེས་སྟོན་པར་འགྱུར་རོ། །བྱ་བའམ་དེའི་ཡུལ་ཅན་གྱི་བྱ་བ་སྒྲུབ་པ་ནི་མེད་
[98a.2]དེ། བསྟན་བཅོས་ཀྱི་སྒྲ་རྣམས་མདོར་བསྡུས་ནས་བྱེ་བྲག་ཏུ་རྟོགས་པར་འདོད་པ་རྣམས་ཀྱིས་རང་བཞིན་དང་རྐྱེན་ལ་སོགས་པ་དེའི་དོན་ཅན་མ་ཡིན་པ་དག་ཀྱང་དེའི་དོན་ཅན་དུ་བརྟགས་པའི་ཕྱིར་དང་། བྱེད་པ་པོ་མི་དྲན་པ་ལ་སོགས་པ་ཡང་འགོག་པར་འགྱུར་བའི་ཕྱིར་རོ། །དེས་ན་དེ་ལྟར་
[98a.3]ཁྱད་པར་བལྟར་མི་རུང་བ་ཉིད་དུ་ཁས་བླངས་ནས་ཐ་དད་པར་བྱེད་པའི་ཁྱད་པར་ཡོད་པ་ཉིད་བསལ་བ་ཡིན་ནོ། །ཁྱད་པར་བལྟར་མི་རུང་བ་ཉིད་ཀྱང་སྲིད་པ་མ་ཡིན་ནོ་ཞེས་འཆད་པ་ནི་སྒྲ་མངོན་སུམ་པ་རྣམས་ལ་ཞེས་བྱ་བ་ཡིན་ནོ། །མངོན་སུམ་དུ་གྱུར་པའི་དངོས་པོ་གང་ཡིན་པ་དེ་ལ་རང་གི་
[98a.4]ངོ་བོ་ཉིད་དུ་གྱུར་པའི་མངོན་སུམ་མ་ཡིན་པའི་ངོ་བོ་མི་སྲིད་དོ། །དེ་ཉིད་ལ་རང་གི་རྣམ་པ་གཏད་པ་ཉིད་ཀྱིས་བདག་ཉིད་ལ་རྟོགས་པ་བསྐྱེད་པ་དང་། གཞན་གཉིས་ནི་མི་འཐད་དོ། །དེ་དེ་ཙམ་གྱི་རང་བཞིན་ཉིད་ཡིན་ན། རང་བཞིན་དེ་གཅིག་པུ་ཉིད་དོ། །དེ་ལྟར་ན་ཡང་བལྟར་མི་རུང་
[98a.5]བ་འགལ་ལོ། །རང་བཞིན་གཞན་ཉིད་ན་ཡང་དེའི་རང་བཞིན་མ་ཡིན་ཏེ། དེས་ན་མངོན་སུམ་མ་ཡིན་པ་ནི་མངོན་སུམ་གྱི་རང་བཞིན་མ་ཡིན་ནོ། །འོ་ན་ཇི་ལྟར་སྐད་ཅིག་མ་ཉིད་ལ་སོགས་པ་སྣང་བ་དང་རང་བཞིན་གཅིག་པ་ཡིན་ཡང་མངོན་སུམ་མ་ཡིན་ན། སྐད་ཅིག་མ་ཉིད་ལ་སོགས་
[98a.6]པ་མངོན་སུམ་མ་ཡིན་པ་ནི་ཅུང་ཟད་ཀྱང་མེད་ཀྱི་འོན་ཀྱང་མདུན་དུ་གསལ་བའི་རང་བཞིན་གྱི་རང་བཞིན་ཉིད་དོ། །དེ་སྣང་བ་ན་ཆ་མེད་པ་དེ་ཉིད་མངོན་སུམ་ཉིད་དང་ལྡན་པ་ཡིན་ནོ། །རང་བཞིན་དེ་མཐའ་དག་རྟོགས་ཤིང་དེ་ཁོ་ན་བཞིན་རྗེས་སུ་བརྟགས་པ་ཡིན་ཡང་ཇི་ལྟར་དོན་
[98a.7]སྐད་ཅིག་ཉིད་ལ་སོགས་པའི་ཆོས་སུ་གྱུར་པ་དེ་བཞིན་དུ་རྟོགས་པ་པོ་དག་གིས་རྟོགས་པར་ནི་མི་ནུས་ཏེ། དེས་ན་འཁྲུལ་པའི་རྒྱུ་མཚན་དང་ལྡན་པ་དེ་ལ་རྟོགས་པ་པོའི་འདུ་བྱེད་མེད་པའི་ཕྱིར་དངོས་སུ་ན་མངོན་སུམ་ཡིན་ཡང་རྟོགས་པ་པོ་དེ་ལྟར་རྟོགས་པ་མེད་པའི་ཕྱིར། དེ་
[98b]
[98b.1]ལས་རྣམ་པར་མི་གནས་པས་མངོན་སུམ་མ་ཡིན་པ་ཉིད་དོ་ཞེས་བསྟན་པར་འགྱུར་རོ། །ཚིག་རྣམས་ཁྱད་པར་དང་ལྡན་པ་ཉིད་ལ་ནི་རིགས་པ་འདི་མི་སྲིད་དོ་ཞེས་བསྟན་པའི་ཕྱིར་འཁྲུལ་པའི་རྒྱུ་མཚན་མེད་པའི་ཕྱིར་ཏེ་ཞེས་སྨོས་སོ། །གང་གིས་ན་སྣང་བ་དེ་ཤེས་པ་གཞན་གྱིས་རྗེས་སུ་
[98b.2]རྟོགས་པ་ཉིད་དུ་འགྱུར་བ་སྐྱེས་བུས་མ་བྱས་པའི་ངག་རྣམས་ལ་ཁྱད་པར་ཡོད་ཀྱང་སྐད་ཅིག་མ་ཉིད་བཞིན་དུ་མངོན་སུམ་མ་ཡིན་པར་ནི་མི་སྲིད་དེ། དེ་དང་རང་བཞིན་གཅིག་པ་ཡིན་ཡང་འཁྲུལ་པའི་རྒྱུ་མཚན་དང་ལྡན་པས་མངོན་སུམ་མ་ཡིན་ནོ་ཞེས་བྱ་བར་ནི་མི་སྲིད་དེ། འཁྲུལ་པའི་
[98b.3]རྒྱུ་མཚན་མེད་པའི་ཕྱིར་ཏེ་འདིའོ་ཞེས་བྱ་བ་ཉིད་དུ་སྣང་བ་འདི་ལ་ནི་འཁྲུལ་པའི་རྒྱུ་མཚན་མེད་དོ་རེ་ཞིག་ཁྱད་པར་མེད་པར་སྒྲོ་འདོགས་པའི་མཚན་ཉིད་འཁྲུལ་པ་ནི་ཡོད་པ་ཉིད་དོ། །དེ་ཉིད་ལས་རྒྱུ་མཚན་བརྟག་པར་བྱ་བ་ཡིན་ནོ་ཞེ་ན་འཁྲུལ་པ་མི་འགྱུར་བའི་ཕྱིར་རོ་ཞེས་སྨོས་སོ། །ཁྱད་པར་མེད་པར་
[98b.4]ནི་འཁྲུལ་པ་ཡིན་ནོ་ཞེས་མ་གྲུབ་བོ། །ཅིའི་ཕྱིར་ཞེ་ན་གནོད་པར་བྱེད་པ་མེད་པས་སོ། །ཇི་ལྟར་བུམ་པ་ལ་སོགས་པ་རྟག་པ་ལས་ཁྱད་པར་མེད་པ་ནི་དོན་བྱ་བ་མེད་པ་ཉིད་སྐད་ཅིག་མའི་བདག་ཉིད་ཡིན་པའི་ཕྱིར་འཁྲུལ་པ་ཡིན་ནོ་ཞེས་རྟོགས་པ་དེ་བཞིན་དུ་ངག་གི་ཁྱད་པར་སྒྲུབ་པའི་ཚད་མ་ནི་
[98b.5]མེད་དོ། །འདི་སྐད་བརྗོད་པ་ཡིན་ཏེ། གང་དུ་མངོན་སུམ་གྱིས་གྲུབ་པའི་དོན་ལ་མངོན་སུམ་དེ་དང་མི་འགལ་བར་ཚད་མ་གཞན་གྱིས་ཆོས་གཞན་སྒྲུབ་པར་སྲིད་པ་དེར་ཁྱད་པར་མེད་པར་རྟོགས་པ་འཁྲུལ་པ་ཡིན་ནོ་ཞེས་བྱ་བར་འཐད་ཀྱི་མངོན་སུམ་གྱིས་ཁྱད་པར་མེད་པའི་རང་བཞིན་དུ་
[98b.6]གྲུབ་པའི་ངག་དག་ལ་ནི་དེ་ལྟར་ཁྱད་པར་སྒྲུབ་པར་བྱེད་པའི་ཚད་མ་གཞན་ཡོད་པ་མ་ཡིན་ནོ། །དེའི་ཕྱིར་འདིར་མངོན་སུམ་གྱིས་གྲུབ་པའི་དོན་ལ་དེ་དང་མི་འགལ་བར་ཚད་མ་གཞན་གྱིས་ཁྱད་པར་སྒྲུབ་པར་ནུས་པ་མ་ཡིན་ནོ། །ཁྱད་པར་རྟོགས་པ་མེད་པར་མྱོང་བ་དེ་ལ་བྱེད་པ་མེད་
[98b.7]པའི་ཕྱིར་ཁྱད་པར་རྟོག་པ་ཉིད་མ་སྤངས་པར་གྲུབ་པ་དེ་ལ་ཚད་མ་གཞན་གྱིས་ཁྱད་པར་གྲུབ་ན་རྣམ་པར་རྟོག་པ་ཁྱད་པར་མེད་པར་རྟོགས་པ་འཁྲུལ་པར་འགྱུར་བ་ཡིན་ནོ་ཞེས་བྱ་བའི་དོན་འདི་འདིར་བཞེད་པ་ཡིན་གྱི་གནོད་པར་བྱེད་པ་མེད་པས་ན་འཁྲུལ་པ་མེད་པ་ཉིད་དོ་
[99a]
[99a.1]ཞེས་བྱ་བ་ནི་མ་ཡིན་ནོ། །འོན་ཀྱང་མངོན་སུམ་གྱིས་ཁྱད་པར་མེད་པར་གྲུབ་པ་ལ་ཁྱད་པར་བསྒྲུབ་པའི་ཚད་མ་མེད་པ་ཉིད་དོ། །གནོད་པར་བྱེད་པ་མེད་པ་ནི་ངེས་པར་མི་ནུས་ཏེ། ད་ལྟར་གྱི་དུས་ན་དེ་མེད་པར་རྟོགས་ཀྱི་དུས་གཞན་དུ་ནི་མ་ཡིན་པའི་ཕྱིར་རོ། །
[99a.2]དུས་གཞན་དུ་གནོད་པ་བྱེད་པ་ནི་གནོད་པར་བྱེད་པ་མ་ཡིན་པ་མ་ཡིན་ཏེ་ལན་ཅིག་གནོད་པ་མཐོང་བས་ཕྱིས་གནོད་པ་མཐོང་བ་དོན་ཇི་ལྟ་བ་བཞིན་མ་ཡིན་པར་འགྱུར་བའི་ཕྱིར་རོ། །ཤེས་པར་བྱེད་པ་ཙམ་མེད་པས་ཤེས་བྱ་མེད་པ་ནི་མ་ཡིན་ནོ། །གནོད་པར་བྱེད་པ་ཡང་ཚད་མ་མ་ཡིན་
[99a.3]པའི་ཤེས་པར་བྱེད་པ་ཡིན་གྱི་སྐྱེད་པར་བྱེད་པ་ནི་མ་ཡིན་ནོ། །དེ་ལྟ་ཡིན་ན་ནི་རྗེས་སུ་དཔག་པ་གནོད་པ་མེད་པའི་ཡུལ་ཅན་ཉིད་དུ་ངེས་པ་ཁོ་ནར་འགྱུར་བས་དེ་ལ་སློབ་དཔོན་སུན་འབྱིན་པ་བརྗོད་པ་མི་འཐད་པར་འགྱུར་རོ། །དེས་ན་ཇི་སྐད་བཤད་པ་ཉིད་རིགས་སོ། །སྐྱེས་བུ་དག་ལ་ནི་ཁྱད་པར་
[99a.4]མཐོང་བ་ཉིད་ཁྱད་པར་མེད་པར་རྟོགས་པའི་གནོད་པར་བྱེད་པ་ཡིན་ཏེ་གང་གི་ཕྱིར་སྐྱེས་བུ་དག་གི་ཡོན་ཏན་ཐམས་ཅད་ལ་ཁྱད་པར་མཐོང་བ་དེའི་ཕྱིར་རིག་བྱེད་ཀྱི་ཚད་མ་དང་ཐམས་ཅད་མཁྱེན་པའི་སྒྲུབ་བྱེད་མཚུངས་པ་མ་ཡིན་ནོ། །གལ་ཏེ་མངོན་སུམ་གྱི་དངོས་པོ་ལས་ཐ་མི་དད་
[99a.5]པའི་མངོན་སུམ་མ་ཡིན་པའི་རང་བཞིན་མེད་མོད། ཐ་དད་པ་གང་ཡིན་པ་དེ་གོ་མངོན་སུམ་མ་ཡིན་པར་ཇི་ལྟར་མི་འགྱུར་ཞེ་ན། ཚིག་གི་ཁྱད་པར་གཞན་གྱི་ངོ་བོར་གྱུར་པ་ཞེས་སྨྲས་སོ། །ཚིག་གི་ཁྱད་པར་ཐ་དད་པ་ནི་ཚིག་གི་ཁྱད་པར་མ་ཡིན་གྱི། འོན་ཀྱང་དངོས་པོ་གཞན་ཉིད་དུ་
[99a.6]ཟད་དོ། །དེས་ན་གལ་ཏེ་འདི་དག་དེའི་ཕྱིར་འབྲེལ་པར་གྱུར་པ་དེ་ལྟ་ན་ཡང་དངོས་པོ་དངོས་པོ་གཞན་དང་འབྲེལ་པ་ཞེས་པ་ཙམ་གྱིས་ནི་དེ་དང་འབྲེལ་པ་ལས་མ་རྟོགས་པར་འདིའི་རང་བཞིན་རང་བཞིན་གཞན་ལས་ཁྱད་པར་འགྱུར་བ་མ་ཡིན་ནོ། །དེའི་ཕྱིར་མདུན་ན་གནས་པའི་མེ་ལ་མཆོད་
[99a.7]དོ་ཞེས་བྱ་བ་ལ་སོགས་པ་ཁྱད་པར་མེད་པའི་རང་བཞིན་གྱི་ངག་ཐམས་ཅད་སྐྱེས་བུས་བྱེད་དོ། །ཡང་ན་ནི་འགའ་ཡང་མ་ཡིན་ཏེ། བྱང་ཕྱོགས་ཡུལ་ན་ཞེས་བྱ་བ་ལ་སོགས་པ་དེ་ལྟ་བུ་ཡང་མ་ཡིན་ནོ། །དེས་ན་དེ་ལྟར་གང་ཞིག་རྣམ་པ་ཇི་ལྟ་བུའི་རྒྱུས་བསྐྱེད་པ་དེ་ནི་རྣམ་པ་དེ་ལྟ་བུའི་
[99b]
[99b.1]རྒྱུ་ལས་སྐྱེས་པ་ལས་མི་འདའ་ལ། དེའི་ཁྱད་པར་ནི་ཚོགས་པའི་ཁྱད་པར་ལས་འགྱུར་བ་ཡིན་ནོ། །དེས་ན་སྐྱུ་རུ་ར་ལ་སོགས་པ་དང་སྐྱེས་བུ་དག་ལ་ཁྱད་པར་ཡང་མ་ཡིན་ལ། ངག་ནི་མཐོང་བའི་རྒྱུ་ཅན་ལས་འདའ་བ་མ་ཡིན་ནོ། །དེས་ན་དེ་ལྟར་གཅིག་ལ་མཐོང་བའི་རང་བཞིན་ཐམས་
[99b.2]ཅད་དུ་དེ་ལྟར་ངེས་པ་བསལ་ནས་སྐྱོན་གཞན་ཡང་སྟོན་པས་ཕ་རོལ་པོ་རང་གི་ཁས་བླངས་པ་དང་འགལ་བ་བསྟན་པའི་ཕྱིར། བདག་དང་ཞེས་བྱ་བ་ལ་སོགས་པ་སྨོས་སོ། །བདག་ཏུ་སྨྲ་བ་དག་གིས་འདོད་པའི་བདག་ཀྱང་མི་དམིགས་པ་ཡིན་ལ། མ་དམིགས་ཀྱང་མེད་པར་རྟོགས་པ་
[99b.3]ནི་མ་ཡིན་ནོ། །དེ་བཞིན་དུ་གཞན་དག་ནི་འཇིག་རྟེན་ཕ་རོལ་ཡོད་པ་དགག་པའི་དོན་དུ་ཁུ་བ་དང་ཁྲག་ལ་སོགས་པ་འབྱུང་བ་རྣམས་ཉིད་སེམས་པ་ཡོད་པའི་བདག་ཉིད་ཀྱི་རྣམ་པར་འགྱུར་བ་མངོན་པར་གྲུབ་པ་ཡིན་པར་རྟོགས་སོ། །ལུས་ཞེས་བྱ་བར་མངོན་པར་བརྗོད་པའི་འབྱུང་བ་རྣམས་
[99b.4]ཉིད་ནི་སེམས་པའི་བདག་ཉིད་ཀྱི་ངོ་བོར་སྣང་བ་ཡང་མ་ཡིན་པ་དེའི་ཕྱིར་དེ་མི་དམིགས་པ་ཡོད་པ་ཡིན་ན་མེད་པ་ནི་མ་ཡིན་ནོ། །ས་ཞེས་བྱ་བ་ནི་འབྱུང་བ་ཉེ་བར་མཚོན་པའོ། །སྩོགས་པའི་སྒྲའི་དོན་ནི་རང་ཉིད་སྟོན་པར་འགྱུར་རོ། །མི་དམིགས་པ་གང་ཡིན་པ་དེ་ཁོ་ནའོ། །གཏན་
[99b.5]ཚིགས་མེད་སྒྲུབ་ཡིན་ནམ་ཅི། ཅིའི་ཕྱིར་ཡིན། རང་གི་ངོ་བོ་ཁྱད་པར་མེད་པའི་ཕྱིར་དེ་ཚད་མ་ཡིན་ན། ཐམས་ཅད་ཚད་མ་མ་ཡིན་པའམ། ཡིན་ན་ཡང་ཐམས་ཅད་ཚད་མ་ཡིན་པར་འགྱུར་རོ། །དེས་ན་མི་དམིགས་པའི་ཕྱིར་གཏན་ཚིགས་མི་མཐུན་པའི་ཕྱོགས་ལ་མེད་པར་
[99b.6]རྟོགས་སོ་ཞེས་བྱ་བ་ལ་སོགས་པ་ཡང་འདོད་པར་མི་བྱའོ། །དེ་དག་ལ་མི་དམིགས་ཀྱང་མེད་པར་མ་གྲུབ་ན་མི་མཐུན་པའི་ཕྱོགས་ལ་ཡང་མི་འགྲུབ་བོ། །འགྲེལ་པ་ནི་མི་དམིགས་པ་ཚད་མར་ཞེས་བྱ་བའོ། །མི་དམིགས་པ་སྨྲ་བ་འབྲེལ་བ་མི་འདོད་པར་མི་དམིགས་པ་ཚད་མར་
[99b.7]བྱེད་པ་འདིའི་བདག་ཏུ་སྨྲ་བ་ཡང་གཞི་མེད་པར་འགྱུར་ཏེ། རྟེན་ཡོད་པ་མ་ཡིན་པར་འགྱུར་རོ། །དེའི་རྟེན་བདག་མི་དམིགས་པས་མེད་པར་གྲུབ་པས་ན་ཡོད་པ་མ་ཡིན་པའི་ཕྱིར་རོ། །རྟེན་མེད་པ་ཉིད་ཀྱིས་གཏན་ཚིགས་སྟོན་པས་བདག་ཏུ་སྨྲ་བའི་རྟེན་ལ་དམིགས་པ་མེད་
[100a]
[100a.1]པར་འཆད་པ་ནི། བདག་མངོན་སུམ་མ་ཡིན་པའི་ཕྱིར་ཞེས་བྱའོ། །བདག་དང་གཞན་གྱི་ལུས་ལས་མ་གཏོགས་པ་བདག་རང་ཉིད་མྱོང་བ་ནི་མེད་དེ་དེ་ལས་མ་གཏོགས་པ་འགའ་ཡང་གསལ་བ་མེད་པའི་ཕྱིར་རོ། །གཟུགས་ལ་སོགས་པའི་ཕུང་པོ་
[100a.2]ལས་མ་གཏོགས་པ་རྟོགས་པ་ནི་མེད་དོ། །གལ་ཏེ་ངའོ་སྙམ་དུ་རྟོགས་པས་རིག་པར་བྱ་བ་བདག་མ་ཡིན་ནམ། རིག་བྱ་ཐ་དད་པ་ལ་རིག་པར་བྱེད་པ་འདིའོ་ཞེས་ཐ་དད་པར་རྟོགས་པར་འགྱུར་ཏེ་རིག་པར་བྱ་བ་ཐ་དད་པ་ཁོ་ན་ལ་དེ་ལྟར་རྟོགས་པའི་ཕྱིར་རོ། །གང་གི་ཚེ་རིག་པར་བྱ་བ་རིག་པར་
[100a.3]བྱེད་པའི་རང་གི་བདག་ཉིད་དུ་གྱུར་པ་ཁོ་ན་ཡིན་པ་དེའི་ཚེ་འདི་འཇལ་བར་བྱེད་པ་གཞན་དང་ལྡན་པ་མ་ཡིན་པའི་ཕྱིར་འཇལ་བ་པོའི་རང་གི་བདག་ཉིད་ཐ་དད་པ་མེད་པར་ངའོ་ཞེས་ཐ་དད་པ་མེད་པར་གསལ་བ་ཡིན་ནོ། །དེ་ཉིད་ཀྱི་ཕྱིར་འདིའོ་ཞེས་རྟོགས་པ་དང་མ་འདྲེས་པ་ངའོ་སྙམ་པའི་བཟུང་
[100a.4]བ་ནི་བདག་གོ་ཞེས་རྟོགས་པ་ཡིན་ནོ། །ལུས་ལ་སོགས་པ་ནི་ང་སྐྱེམ་མོ་སྙམ་དུ་ངའོ་སྙམ་པའི་རྟོགས་པ་དང་ལྡན་པ་ཡིན་ཡང་འདི་ནི་ངའི་ལུས་སོ་སྙམ་དུ་འདིའོ་སྙམ་པའི་རྟོགས་པ་དང་ཡང་ལྡན་པའི་ཕྱིར་རོ། །དེ་བཞིན་དུ་ཤེས་པ་ལ་སོགས་པ་ཡང་རྟོགས་པར་བྱའོ་ཞེ་ན། འདི་ལ་བརྗོད་
[100a.5]པ་གལ་ཏེ་འཇལ་བར་བྱེད་པ་པོ་ཉིད་གྲུབ་ན་ཐ་དད་པ་མེད་པའི་འཇལ་བ་པོ་ལ་ནི་ངའོ་སྙམ་དུ་རྟོགས་ལ། དེ་ལས་ཐ་དད་པའི་ཕྱིར་ནི་འདིའོ་ཞེས་བྱ་བར་འགྱུར་རོ། །ཡུལ་གསལ་བ་ནི་ཡུལ་མངོན་དུ་བྱེད་པའི་བདག་ཉིད་ཅན་ཡིན་ནོ། །དེས་ན་གལ་ཏེ་དེ་ལས་བདག་གཞན་ཉིད་ཡིན་ན་དེའི་
[100a.6]ཡུལ་མངོན་དུ་བྱེད་པའི་ངོ་བོ་མ་ཡིན་པའི་ཕྱིར་ཇི་ལྟར་ཡུལ་ལྐོག་ཏུ་གྱུར་པ་ན་རང་ཉིད་འབའ་ཞིག་འཇལ་བ་པོར་འགྱུར་ཏེ་འོན་ཏེ་ཡུལ་མངོན་དུ་བྱེད་པའི་བདག་ཉིད་གསལ་བ་དེ་ཉིད་འཇལ་བ་པོ་ཡིན་ན་དེ་ལྟར་རང་གིས་རིག་པའི་རང་བཞིན་ལ་ལྟོས་ཏེ་ངའོ་སྙམ་དུ་རྟོགས་པར་འགྱུར་
[100a.7]མོད། འོན་ཀྱང་དེ་ལ་ཡང་འདིའོ་སྙམ་དུ་རྟོགས་པར་ཡོད་པས་ན་གང་ལ་ངའོ་སྙམ་པ་ཉིད་དུ་འགྱུར་བ་དེ་ཁོ་ན་བདག་ཡིན་ནོ་ཞེས་བྱ་བར་འགྱུར་རོ། །གང་ལ་རྣམ་པ་འདིར་འགྱུར་བ་གསལ་བར་བྱ་བ་ལ་སོགས་སུ་གསལ་བ་སྣང་བ་ནི་མེད་དོ་ཞེས་བསྟན་པར་བྱའོ། །མངོན་དུ་བྱེད་པ་
[100b]
[100b.1]དེ་དང་འབྲེལ་པའི་ཕྱིར་དོན་དེའི་མངོན་སུམ་ཉིད་དོ་ཞེ་ན་མ་ཡིན་ཏེ་འབྲེལ་ཀྱང་ཐ་དད་པ་མི་ལྡོག་པའི་ཕྱིར་ཡུལ་ནི་གསལ་བ་ཉིད་ཀྱི་མངོན་སུམ་ཡིན་གྱི་དེ་དང་འབྲེལ་པ་ནི་མ་ཡིན་ནོ། །འབྲེལ་པར་ནི་གཞལ་བྱ་ཡང་ཁྱད་པར་ཡོད་པ་མ་ཡིན་ནོ། །ཡུལ་མངོན་དུ་བྱེད་པ་པོ་ཉིད་ཀྱིས་
[100b.2]འཇལ་བར་བྱེད་པ་ཡིན་གྱི། ཡུལ་མངོན་སུམ་དུ་བྱེད་པའི་རང་བཞིན་ཉིད་ཀྱིས་ནི་མ་ཡིན་ནོ་ཞེ་ན། མངོན་སུམ་མ་ཡིན་པའི་བྱེད་པ་པོ་ལ་ཡང་དོན་ལྐོག་ཏུ་གྱུར་པ་ཁོ་ནར་འགྱུར་ཏེ། དོན་མངོན་སུམ་གྱི་རྒྱུའི་མངོན་སུམ་དུ་འགྱུར་བ་ནི་མ་ཡིན་ནོ། །བྱེད་པ་པོ་ཡང་རྒྱུ་ལས་ཁྱད་
[100b.3]པར་ཡོད་པ་མ་ཡིན་ཏེ། བྱ་བ་དང་ལྡན་ཡང་ཁྱད་པར་མི་འགྲུབ་པའི་ཕྱིར་རོ། །བདག་ཁོ་ན་འཇལ་བར་བྱེད་པ་པོ་ཡིན་ནོ་ཞེས་བྱ་བ་ཡང་ག་ལས་འཇལ་བའི་བྱ་བ་དང་ལྡན་པའི་ཕྱིར་རོ་ཞེ་ན། འདི་ལ་ཡང་ཚད་མ་ཅི་ཡོད་ངས་ཤེས་སོ་སྙམ་དུ་རྟོགས་པའི་ཕྱིར་རོ་ཞེ་ན། འདི་ལ་བརྗོད་པ།
[100b.4]གལ་ཏེ་རྟོགས་པའི་ངོ་བོའི་རང་བཞིན་ངའོ་སྙམ་དུ་རྟོགས་པ་འདི་བདག་ཉིད་ཀྱི་ཡིན་ན། བྱ་བ་དེ་ནི་རང་གི་ངོ་བོ་ལས་ཐ་དད་པ་ཡིན་པའི་ཕྱིར་རང་དང་འབྲེལ་པའི་བྱ་བ་མ་རྟོགས་པའི་ཕྱིར་རོ། །དེས་ན་བྱེད་པ་པོ་ཉིད་དུ་ག་ལ་རྟོགས་ཏེ་བྱ་བ་རྟོགས་པ་མེད་པར་དེར་མི་འགྱུར་བའི་ཕྱིར་
[100b.5]རོ། །བདག་དང་ཡིད་འབྲེལ་པ་ལས་དེའི་ཡུལ་ཅན་གྱི་མངོན་སུམ་གྱི་བདེ་བ་ལ་སོགས་པ་བཞིན་འཇལ་བ་དང་ལྡན་པར་འཛིན་ཏོ་ཞེ་ན་མ་ཡིན་ཏེ་ཡིད་དང་འབྲེལ་ཀྱང་བདག་ལ་གསལ་བཞིན་པ་ཉིད་མ་སྐྱེས་ན་ཡིན་གྱི་མངོན་སུམ་ཡིན་པར་མི་འགྲུབ་པའི་ཕྱིར་རོ། །འདི་ལ་
[100b.6]གསལ་བཞིན་པ་ཡང་གཞན་ཡོད་པ་མ་ཡིན་ཏེ་རང་ཉིད་རྟོགས་པའི་རང་བཞིན་ཡིན་པའི་ཕྱིར་རོ། །གསལ་བཞིན་པ་ཉིད་ལ་ནི་གསལ་བཞིན་པ་གཞན་དང་གཞན་འགྲུབ་པ་མ་ཡིན་ནོ། །མིན་ན་ཡང་སྔ་ན་མེད་པའི་བྱ་བ་སྐྱེད་པས་མི་རྟག་པ་ཉིད་དུ་ཐལ་བར་འགྱུར་རོ། །བྱ་བ་དང་བྱེད་པ་པོ་
[100b.7]ནི་འགའ་ཡང་ཡོད་པ་ཡིན་པའི་ཕྱིར་འདི་ནི་འབྲེལ་པ་མ་ཡིན་ནོ། །དེའི་ཕྱིར་གཟུགས་ལ་སོགས་པ་ལས་མ་རྟོགས་པར་གཟུགས་ལ་སོགས་པ་ལྟར་སྣང་ན་བདག་གསལ་བར་འགྱུར་བ་ཡིན་ནོ། །གལ་ཏེ་རེ་ཞིག་ངའོ་སྙམ་དུ་རྟོགས་པ་ཉམས་སུ་མྱོང་བས་གྲུབ་པ་ནི་ཡོད་པ་
[101a]
[101a.1]ཉིད་ལ་གཟུགས་ལ་སོགས་པ་ལས་ཐ་དད་པའི་བདག་གསལ་བ་ཡང་དེ་ཉིད་ཡིན་ནོ། །དེ་ནི་རྣམ་པར་རྟོག་པ་ཡིན་ནོ་ཞེའམ། དེ་ལྟ་བུའི་མྱོང་བ་ཉིད་རྩ་བ་ཡིན་པར་འགྱུར་རོ་ཞེ་ན། འདིར་ཡང་བརྗོད་དེ་དེ་ལྟར་རྟོགས་པར་འགྱུར་བ་རང་ཉིད་གསལ་བ་ཡིན་ན།
[101a.2]བྱ་བ་ལ་སོགས་པ་དང་ལྡན་པར་མ་རྟོགས་པའི་ཕྱིར་བདག་མ་ཡིན་པ་ཁོ་ནའོ། །གསལ་བ་གཞན་གྱི་ཡུལ་ཡིན་ན་ནི་ངོ་བོ་ཞེས་བྱ་བར་མི་འགྲུབ་བོ། །བདག་ཉིད་ཀྱིས་ངའོ་ཞེས་བྱ་བ་དེ་ལྟ་བུའི་རང་བཞིན་དུ་འགྱུར་བ་མ་ཡིན་ཏེ། རྣལ་འབྱོར་པས་གཞན་གྱི་བདག་མངོན་སུམ་དུ་བྱས་པ་
[101a.3]ན་ཡང་དེ་ལྟར་རྟོགས་པར་ཐལ་བའི་ཕྱིར་རོ། །རང་ཉིད་གསལ་བའི་རང་བཞིན་ལ་ཡང་གསལ་བར་བྱ་བ་མེད་པར་ནི་གསལ་བ་མི་འགྲུབ་བོ། །དེ་ལྟར་ཡིན་པར་གྱུར་ན་གསལ་བར་བྱ་བ་ལས་གསལ་བར་བྱེད་པ་ཐ་དད་པར་གྲུབ་པའི་ཕྱིར་མི་འདྲ་བར་རྟོགས་པ་མ་ཡིན་ནོ། །དེའི་
[101a.4]ཕྱིར་བྱ་བ་ལ་སོགས་པ་འབྲེལ་པ་མེད་པར་དེ་ལྟར་སྣང་བཞིན་པ་ཉིད་ལ་ངའོ་སྙམ་པར་རྟོགས་པ་ཡིན་ནོ། །དེ་ལྟར་རྣམ་པར་རྟོག་པའི་རང་བཞིན་ལས་འདའ་བ་མ་ཡིན་པའི་ཕྱིར་ན་བདག་མངོན་སུམ་མ་ཡིན་པ་ཁོ་ནའོ། །ཡང་ན་ཁས་བླངས་པའི་བདག་མ་དམིགས་ཀྱང་རྗེས་
[101a.5]སུ་དཔག་པར་བྱ་བ་ཡིན་པའི་ཕྱིར་མེད་པར་མི་འདོད་པ་གང་ཡིན་པ་དེའི་ཁས་བླངས་པ་ཉིད་ཀྱིས་མི་དམིགས་པའི་ཚད་མ་མ་ཡིན་པས་ན་གཏན་ཚིགས་མེད་པར་ཡང་མི་འགྲུབ་པོ་ཞེས་བརྗོད་པ་ན། གཞན་གྱིས་ཁས་བླངས་པའི་མངོན་སུམ་ཡིན་པ་ཉིད་འབྲས་བུ་གྲུབ་པའི་
[101a.6]ཡན་ལག་ཏུ་ཉེ་བར་བཀོད་པ་ཡིན་ནོ། །གང་དག་མངོན་སུམ་དུ་སྨྲ་བ་དེ་ལ་ནི་མངོན་སུམ་མ་ཡིན་པར་ཡང་སྒྲུབ་པས་དེ་མེད་པ་ཁོ་ནར་འགྱུར་རོ། །རྗེས་སུ་དཔག་པར་བྱ་བ་མ་ཡིན་པ་ཉིད་ཀྱང་འདིས་གྲུབ་པས་ཡང་རྗེས་སུ་དཔག་པར་བྱ་བ་ཡིན་པ་ཉིད་དུ་བརྗོད་པ་དོན་
[101a.7]ཅི་ཡོད། ཅི་སྟེ་ཡང་མི་མཐུན་པའི་ཕྱོགས་ལ་གཏན་ཚིགས་ཀྱི་དམིགས་པ་མཐའ་དག་ལྡོག་པའི་ཕྱིར་དེ་ལ་དེ་མེད་པ་ནི་འཐད་པ་ཁོ་ནའོ། །བདག་ནི་དེ་ལྟར་མ་ཡིན་ཏེ། དེས་ན་དེ་མེད་པ་མ་ཡིན་ནོ། །འདི་ལྟར་གཏན་ཚིགས་ནི་མི་མཐུན་པའི་ཕྱོགས་ལ་རྗེས་སུ་
[101b]
[101b.1]དཔག་པར་ཡང་ནུས་པ་ཡིན་ཏེ། གཞན་དུ་དམིགས་ན་རྗེས་སུ་དཔག་པ་འབྱུང་བའི་ཕྱིར་རོ། །འདི་ནི་ནམ་ཡང་མི་མཐུན་པའི་ཕྱོགས་ལ་རྟོགས་པར་མ་གྱུར་ཏེ། དེས་ན་རྗེས་སུ་དཔོག་པ་ཡིན་ནོ། །བདག་ལ་ནི་རྗེས་སུ་དཔོག་པ་ཡོད་པ་དེའི་ཕྱིར་དེ་ནི་མངོན་སུམ་མ་ཡིན་ཡང་མེད་
[101b.2]པར་ནི་མི་འཐད་དོ་ཞེ་ན། དེ་ནི་མི་རུང་སྟེ། བདག་རྗེས་སུ་དཔག་པར་བྱ་བར་འདོད་པས་ཀྱང་རྗེས་སུ་དཔག་པ་མེད་པར་དེ་ཁས་མི་ལེན་པའི་ཕྱིར་རོ། །རྗེས་སུ་དཔག་པ་མེད་ཀྱང་གལ་ཏེ་ཡོད་ན་སྐྱོན་ཅི་ཡོད་ཅེས་དེ་ལྟར་ནི་བདག་ཏུ་སྨྲ་བ་རྣམས་ཀྱིས་བདག་འདོད་པ་མ་ཡིན་ཏེ།
[101b.3]ཚད་མ་མེད་པར་ཁས་མི་ལེན་པའི་ཕྱིར་རོ། །དེ་ཚད་མ་ལྟར་སྣང་བ་ཞེས་བྱ་བར་གོ་འགྱུར་མོད། འགའ་ཞིག་ལུང་གིས་གྲུབ་པ་ཉིད་དུ་ཡང་འདོད་པའི་ཕྱིར་རོ། །དེས་ན་རྗེས་སུ་དཔག་པ་བསལ་བ་ནི་དོན་མེད་དོ། །བསལ་དུ་ཟིན་ཀྱང་བདག་ཡོད་པར་ཁས་ལེན་པའི་ཕྱིར་
[101b.4]རོ། །མ་བསལ་བ་ན་ཡང་མི་མཐུན་པའི་ཕྱོགས་ལ་གཏན་ཚིགས་ཡོད་པ་དང་མི་འདྲ་བའི་ཕྱིར་རྗེས་སུ་དཔག་པ་ཉིད་ཀྱིས་གྲུབ་བོ། །དེའི་ཕྱིར་འདི་བརྗོད་པར་བྱའོ་ཞེ་ན་བརྗོད་པར་བྱ་བ་བདེན་པས་དེ་བརྗོད་དོ། །མི་དམིགས་པ་ཚད་མར་བྱེད་པ་འདིའི་བདག་ཏུ་སྨྲ་བ་
[101b.5]ཡང་གཞི་དམིགས་པ་མེད་པས་འགྱུར་ཏེ་ཞེས་གསུངས་པ་འདིའི་དགོས་པ་ནི་འདི་ཡིན་ཏེ། མི་དམིགས་པ་ཚད་མ་ཡིན་ན་བདག་ཏུ་སྨྲ་བ་ཕ་རོལ་པོ་དབང་དུ་བྱས་ནས་བདག་སྒྲུབ་པར་བྱེད་པའི་རྗེས་སུ་དཔག་པ་སྦྱོར་བ་དེ་རྟེན་མེད་པར་འགྱུར་ཏེ། གཞི་མ་གྲུབ་པར་འགྱུར་རོ། །
[101b.6]བདག་ཏུ་སྨྲ་བའི་བདག་སྒྲུབ་པར་བྱེད་པ་ཚུལ་གསུམ་བརྗོད་པ་ལས་གཞན་ངག་ཙམ་གྱིས་རང་བཞིན་ནི་འགའ་ཡང་མེད་དེ། །གང་གི་ཚེ་གང་མ་དམིགས་པ་དེ་མེད་དོ་ཞེས་ཁས་ལེན་པ་དེའི་ཚེ་བདག་རི་བོང་གི་རྭ་བཞིན་དུ་མེད་པའི་ཕྱིར་དེ་ཉིད་ནི་ཆོས་ཅན་དུ་བྱ་བར་མི་ནུས་
[101b.7]སོ། །ཆོས་ཅན་ལུས་བདག་དང་བཅས་པར་སྒྲུབ་པ་གང་ཡིན་པ་དེ་ཡང་བསྒྲུབ་པར་བྱ་བའི་ཆོས་ཚད་མས་གནོད་པས་ན་ཕྱོགས་ཀྱི་སྐྱོན་བསལ་བར་འགྱུར་རོ། །དེས་ན་གལ་ཏེ་མི་དམིགས་པ་མངོན་སུམ་གྱི་ཚད་མ་ཡིན་ལ་མངོན་སུམ་གྱིས་བསལ་བ་ཡིན་ལ། དེ་སྟེ་
[102a]
[102a.1]རྗེས་སུ་དཔག་པ་ཡིན་ན་ནི་རྗེས་སུ་དཔག་པས་བསལ་བ་ཡིན་ནོ། །དེས་ན་བདག་ཏུ་སྨྲ་བ་རྟེན་མེད་པ་ཉིད་དེ། དེ་སྒྲུབ་པ་ལ་ཕྱོགས་མེད་པའི་ཕྱིར་རོ། །གལ་ཏེ་དེ་ལྟ་ན་མེ་ལ་སོགས་པ་རྗེས་སུ་དཔག་པ་ལ་ཡང་སྐྱོན་དུ་འགྱུར་རོ་ཞེ་ན་མི་འགྱུར་རོ་ཞེས་ཟེར། དེ་ཉིད་ཀྱི་ཕྱིར་
[102a.2]མདོར་སྩོགས་ཀྱི་སྒྲ་སྨོས་སོ། །འགྲེལ་པའི་འོ་མ་ལ་སོགས་པ་ལ་ཞོ་ལ་སོགས་པ་རྗེས་སུ་དཔོག་པ་ནི་ཉེ་བར་མཚོན་པ་ཡིན་ནོ། །གཏན་ཚིགས་མེད་པའི་ཕྱིར་ཡང་དམ་བཅའ་བ་འདི་སྒྲུབ་པར་ནུས་པ་མ་ཡིན་ཏེ། དེས་ན་འདི་ལས་ཀྱང་བདག་ཏུ་སྨྲ་བ་རྟེན་མེད་དོ་ཞེས་བཤད་པ་ནི། འབྲས་
[102a.3]བུ་མ་གྲུབ་པའི་ཕྱིར་ཞེས་བྱ་བའོ། །གང་གི་ཕྱིར་འདི་མངོན་སུམ་མ་ཡིན་པ་དེའི་ཕྱིར་འབྲས་བུ་མ་གྲུབ་སྟེ། དེས་ན་འབྲས་བུ་ལ་རྗེས་སུ་དཔག་པར་མི་བྱའོ། །དེ་ནི་ཕ་རོལ་པོ་དག་སྲོག་ལ་སོགས་པའི་འབྲས་བུ་ཉིད་ལས་རྗེས་སུ་དཔག་པར་འདོད་པས་དེ་བཀག་པ་ཡིན་ནོ། །གང་
[102a.4]གི་ཕྱིར་དེ་ལས་རྗེས་སུ་དཔག་པར་འགྱུར་བ་དེ་ཡོད་ན་སྔོན་མ་བྱུང་བའི་སྲོག་ལ་སོགས་པའམ་གཞན་འགའ་ཞིག་ཡོད་པར་རྟོགས་པ་ནི་མེད་དོ། །གལ་ཏེ་གང་ཡོད་པར་དམིགས་ན་སྔོན་མ་རྟོགས་པ་གང་ཞིག་ཡོད་པར་དམིགས་པ་དེ་དེའི་འབྲས་བུ་ཡིན་པའི་ཕྱིར་བདག་གི་འབྲས་
[102a.5]བུ་མ་གྲུབ་ན་འོ་ན་ཇི་ལྟར་མིག་དང་གཟུགས་དང་སྣང་བ་དང་ཡིད་ལ་བྱེད་པ་རྣམས་ལས་ཤེས་པ་སྐྱེ་བར་བརྗོད། མིག་མངོན་སུམ་མ་ཡིན་པའི་ཕྱིར་རོ། །གཟུགས་དང་སྣང་བ་དག་ནི་དབང་པོའི་མངོན་སུམ་གྱིས་གཟུང་བར་བྱ་བ་ཡིན་ཡང་དེ་དམིགས་པས་ཤེས་པ་དམིགས་པ་མ་ཡིན་ཏེ།
[102a.6]དེ་དག་ནི་དེ་ཤེས་པ་ཉིད་ཀྱིས་དམིགས་པར་བྱ་བ་ཉིད་ཀྱིས་དེ་སྐྱེས་པའི་སྔར་དེ་མ་གྲུབ་པའི་ཕྱིར་རོ། །དེ་ཡོད་པ་ལས་མངོན་སུམ་ཉིད་ཡིན་ཡང་དེ་ལས་ཤེས་པ་དེ་སྐྱེས་སོ་ཞེས་བྱ་བ་གོ་ག་ལས་ཡིད་ལ་བྱེད་པ་ཡང་རང་རིག་པའི་མངོན་སུམ་གྱིས་གྲུབ་པ་ཡིན་ཡང་དེ་ལས་ཤེས་པ་སྐྱེས་སོ་
[102a.7]ཞེས་བྱ་བར་ནི་མ་གྲུབ་བོ། །དེས་ན་འདི་དག་མངོན་སུམ་ཉིད་ཡིན་ཡང་དེ་འབྲས་བུ་གྲུབ་པའི་ཡན་ལག་ནི་མ་ཡིན་པ་ཁོ་ནའོ་ཞེས་དེ་ལྟར་དོགས་པ་བསུ་ནས། དབང་པོ་ལ་སོགས་པ་ནི་ཞེས་སྨོས་སོ། །སོགས་པ་སྨོས་པས་ནི་གཟུགས་དང་སྣང་བ་ལ་སོགས་པ་གཟུང་ངོ་། །རྣམ་པར་
[102b]
[102b.1]ཤེས་པ་ཉིད་འབྲས་བུ་ཡིན་པས་ན་འབྲས་བུ་རྣམ་པར་ཤེས་པའོ། །ལྟོས་པ་དང་བཅས་པ་གྲུབ་པ་ནི་ལྟོས་པ་དང་བཅས་པའི་གྲུབ་པའོ། །དེས་ན་འདི་ལྟར་འབྲེལ་ཏེ། དབང་པོ་ལ་སོགས་པ་ལྟོས་པ་དང་བཅས་པར་གྲུབ་པས་ཞེས་བྱ་བར་ཏེ་དབང་པོ་ལ་ལྟོས་ནས་གྲུབ་པ་ཞེས་བྱ་བའི་དོན་ཏོ། །
[102b.2]དབང་པོ་ལ་སོགས་པ་ནི་ལྟོས་པ་དང་བཅས་པ་མ་ཡིན་གྱི། འོན་ཀྱང་དེ་དང་འབྲེལ་པ་དེ་ཡིན་ནོ་ཞེས་བྱ་བར་དགོངས་པའོ། །དེས་ན་འདི་ཆོས་ཅན་ལ་ལྟོས་པ་ན་འབྲས་བུ་རྣམ་པར་ཤེས་པ་ཞེས་འབྲེལ་ཏོ། །དེའི་དོན་འདི་ཡིན་ཏེ་གལ་ཏེ་འབྲས་བུ་རྣམ་པར་ཤེས་པ་དབང་པོ་ལ་སོགས་
[102b.3]པ་ལ་ལྟོས་པ་དང་བཅས་པ་ཉིད་དུ་གྲུབ་པས་རབ་ཏུ་གྲུབ་པ་བརྗོད་ན། རྣམ་པར་ཤེས་པ་དབང་པོ་ལ་སོགས་པའི་འབྲས་བུ་ཡིན་ནོ་ཞེས་རྣམ་པར་ཤེས་པ་དེ་ལ་ལྟོས་པས་གྲུབ་པོ། །ཇི་ལྟར་ན་ཇི་སྲིད་དེ་ཡོད་ན་ཡོད་པར་མ་རྟོགས་པར་རྣམ་པར་ཤེས་པ་དབང་པོ་ལ་སོགས་པ་ལ་ལྟོས་
[102b.4]པར་རྟོགས་ཤེ་ན། རེས་འགའ་ཡིན་པའི་ཕྱིར་ཞེས་སྨོས་སོ། །འདི་སྐད་བརྗོད་པ་ཡིན་ཏེ། རྣམ་པར་ཤེས་པ་ནི་རེས་འགའ་བའི་ངོ་བོ་ཡིན་ནོ། །རེས་འགའ་བ་མ་ཡིན་ན་ནི་གཏན་དུ་ཡོད་པའི་ཕྱིར་གཟུགས་མེད་ཀྱང་འགྱུར་བས་ན་གཟུགས་རྒྱུ་ཡིན་པར་མི་འགྱུར་རོ། །གཟུགས་
[102b.5]མེད་ན་མེད་པའི་ཕྱིར་ན་གཟུགས་དང་རྗེས་སུ་འགྲོ་བ་མ་མཐོང་ཡང་གཟུགས་ལ་ལྟོས་པ་ནི་གཟུགས་ཀྱི་འབྲས་བུ་ཉིད་དོ། །དེ་བཞིན་དུ་ཡིད་ལ་བྱེད་པ་ལ་ཡང་རྟོགས་པར་བྱ་སྟེ། དོན་གཞན་ལ་ཆགས་པས་མི་མཐུན་པར་བྱས་ནས་རྣམ་པར་ཤེས་པ་མི་སྐྱེ་བའི་ཕྱིར་རོ། །མིག་
[102b.6]མེད་ན་མེད་པ་ནི་མ་གྲུབ་སྟེ་དེ་མངོན་སུམ་མ་ཡིན་པའི་ཕྱིར་རོ། །གཟུགས་དང་སྣང་བ་དང་ཡིད་ལ་བྱེད་པ་རྣམས་ཡོད་ན་ཡོད་པ་མ་གྲུབ་ཀྱང་མེད་ན་མེད་པ་གྲུབ་པ་ཁོ་ནའོ། །དབང་པོ་ལ་ནི་གཉི་ག་ཡང་མ་གྲུབ་པོ། །འོན་ཀྱང་གཟུགས་དང་སྣང་བ་དང་ཡིད་ལ་བྱེད་པ་ཡོད་ཀྱང་རྣམ་
[102b.7]པར་ཤེས་པ་རེས་འགའ་བ་ཉིད་ཀྱིས་གཞན་ལ་ལྟོས་པ་དང་ལྡན་པར་རྟོགས་ལ་དེ་ཡང་དབང་པོ་ཞེས་བརྗོད་དོ། །དེ་བསྟན་པ་ནི་འདི་ལས་རྒྱུ་ཅི་ཞིག་ཡོད་དོ་ཞེས་བྱ་བ་ཡིན་ནོ། །དེ་ལྟར་རབ་ཏུ་གྲུབ་པའི་རང་བཞིན་གྱི་ཁྱད་པར་ནི་ལུང་ལས་རྟོགས་པ་ཡིན་གྱི་དེར་ཡང་རྗེས་སུ་
[103a]
[103a.1]དཔག་པ་ནུས་པ་མ་ཡིན་ནོ། །མིག་འབྲས་ཕྱེ་ན་རྣམ་པར་ཤེས་པ་སྐྱེ་བའི་ཕྱིར་དེ་ཡོད་ན་ཡོད་པ་ཡང་རྟོགས་པ་པོ་རང་ཉིད་ཀྱི་མངོན་སུམ་ཇི་ལྟར་མ་ཡིན་ཞེ་ན། གལ་ཏེ་ནང་གི་རིག་པ་ཙམ་གྱིས་རང་བཞིན་ཆ་ཤས་གཞན་ལས་དབང་པོའི་འབྲས་བུ་ཁྱད་པར་
[103a.2]ཅན་དུ་རྟོགས་ན་མངོན་སུམ་དུ་འགྱུར་ཏེ། མེ་དང་དུ་བ་བཞིན་དུ་དངོས་པོ་གཞན་ལས་ལོག་པའི་དངོས་པོ་ཡོད་ན་ཡོད་པར་ཁྱད་པར་ཉིད་ཀྱིས་རྟོགས་པ་ཡིན་ནོ། །དེ་བཞིན་དུ་འབྲས་བུ་ནི་རེག་བྱ་གཞན་ལས་ཁྱད་པར་དུ་རྟོགས་པ་མ་ཡིན་པར་ཡུལ་ཐ་དད་པས་ཐ་དད་པར་སྒྲུབ་པའམ་
[103a.3]རེག་བྱ་གཅིག་གི་བདག་ཉིད་ལུས་ཀྱི་ཕྱོགས་གཅིག་ཉིད་ཀྱིས་རྒྱུ་ཉིད་དུ་རྟོགས་སོ་ཞེ་ན་མ་ཡིན་ཏེ་དེ་ཡང་རྒྱུ་མཚན་གཞན་ལས་རྒྱུ་མ་ཡིན་པར་འགྱུར་བ་རྒྱུ་དང་མི་འདྲ་བ་རྟོགས་པ་མེད་པའི་ཕྱིར་རོ། །དེས་ན་མངོན་སུམ་གྱིས་རྒྱུ་དང་རྒྱུ་མ་ཡིན་པར་མི་རྟོགས་ཏེ། དེ་ནི་རྟག་ཏུ་རྣམ་པར་ཤེས་པ་ཡོད་པ་དང་མེད་པ་དག་
[103a.4]གིས་རྟོགས་པ་ཡིན་པའི་ཕྱིར་རོ། །དེ་ལྟ་ན་འོ་ན་སྔགས་ལ་སོགས་པས་ནུས་པའི་གེགས་བྱས་པའི་འབར་བའི་རང་བཞིན་ནུས་པ་གེགས་མ་བྱས་པ་ལས་མི་མཐུན་པར་མི་རྟོགས་པའི་ཕྱིར་དེ་ཡང་མངོན་སུམ་གྱིས་རྒྱུ་དང་འབྲས་བུའི་དངོས་པོ་མི་རྟོགས་པར་འགྱུར་རོ་ཞེ་ན། དེ་ནི་
[103a.5]མེད་དེ་འབྲས་བུ་སྒྲུབ་པའི་ཡན་ལག་ཏུ་གྱུར་པ། གཞན་དུ་གྱུར་པ་ཉིད་གནས་བྱ་བ་ཡིན་པའི་ཕྱིར་རོ། །མེའི་སྲེག་པར་ནུས་པ་ནི་དྲོ་བའི་ནུས་པ་ཉིད་ཡིན་ལ། དེ་མེད་ན་ནི་མངོན་སུམ་ཉིད་ཀྱིས་མི་འདྲ་བར་གྲུབ་པ་ཡིན་ནོ། །དྲོ་བའི་ནུས་པ་ཡོད་ཀྱང་སྲེག་པར་བྱེད་པ་མ་ཡིན་ན་ནི་
[103a.6]རྒྱུ་མ་ཡིན་པ་ཉིད་དུ་འགྱུར་བ་ཁོ་ནའོ། །གལ་ཏེ་འབྲས་བུ་ལས་དབང་པོ་དོན་གཞན་ཡིན་ན། དེ་ལ་མི་ལྟོས་པ་ཁོ་ནར་རྣམ་པར་ཤེས་པ་སྐྱེད་པར་ཐལ་བ་མ་ཡིན་ནམ། གཉིས་ཀ་ཡང་རྒྱུ་ཡིན་ན་ཡང་ལྟོས་པའི་ཁྱད་པར་བསྟན་པར་བྱ་བ་ཡིན་ནོ། །ཐ་དད་པ་མེད་ན་ཡང་འབྲས་
[103a.7]བུ་ཤེས་པ་སྐྱེད་པར་བྱེད་པ་ཉིད་དབང་པོ་ཡིན་ནོ་ཞེས་བྱ་བར་འགྱུར་རོ་ཞེ་ན། བརྗོད་པ་ལམ་འདི་སྲིད་དུ་ནི་རྗེས་སུ་དཔག་པ་འགྲོ་བར་ནུས་པ་མ་ཡིན་ཏེ། དེ་འབྲས་བུ་ལྡོག་པ་ལས་འབྲས་བུ་གཅིག་གམ་རང་ཉིད་རྡུལ་ཕྲ་རབ་ཀྱི་ཚོགས་ཡིན་པའི་ཕྱིར་དབང་པོ་དང་ལྷན་ཅིག་ཏུ་གྱུར་
[103b]
[103b.1]པས་དུ་མ་ཡང་རུང་སྟེ་ལྟོས་པར་བྱ་བ་ལྷག་པར་གྱུར་པ་ཉིད་དོ། །ཐ་དད་པ་དང་ཐ་མི་དད་པ་ནི་གཅིག་དང་དུ་མ་ལས་མི་ལྡོག་གོ། །ཅི་ཞིག་ཅིག་ཅེས་བྱ་བ་ལ་སོགས་པ་ནི། སོགས་པའི་སྒྲའི་དོན་ཉིད་ཀྱིས་གཟུགས་ལ་སོགས་པ་ལ་ཡང་འགྱུར་མོད་ཀྱི་དབང་པོའི་ཡུལ་ཅན་ཉིད་
[103b.2]དོ། །དེ་ཉིད་ཀྱི་འབྲས་བུ་རྣམ་པར་ཤེས་པ་རེས་འགའ་བ་གྲུབ་པས་རབ་ཏུ་གྲུབ་པར་ཞེས་བྱ་བ་ཡང་དབང་པོའི་ཡུལ་ཅན་ཁོ་ནའོ། །གཟུགས་ལ་སོགས་པ་ནི་རྣམ་པར་ཤེས་པའི་འབྲས་བུ་ཅན་ཙམ་ཁོ་ནར་བརྗོད་དོ། །ཤེས་པ་གཟུགས་ལ་སོགས་པའི་འབྲས་བུར་གྲུབ་
[103b.3]པ་ན་མངོན་སུམ་དུ་གྱུར་པ་ཉིད་ཡིན་གྱིས་སྒྲུབ་བྱེད་གཞན་ལ་ལྟོས་པ་ནི་མ་ཡིན་ནོ། །རྣམ་པར་ཤེས་པ་དེ་ནི་དེ་ཙམ་གྱི་རྒྱུ་ཅན་མ་ཡིན་པའི་ཕྱིར་དེ་ཡོད་པ་ལས་དབང་པོ་རྗེས་སུ་དཔོག་པ་ཡིན་ནོ། །དེས་ན་དེ་ལྟར་འདི་ལ་མངོན་སུམ་སྒྲུབ་པར་བྱེད་པ་མ་ཡིན་ཡང་རྒྱུ་དང་འབྲས་བུའི་
[103b.4]དངོས་པོ་དང་རྗེས་སུ་དཔག་པ་ཡོད་པ་ཁོ་ནའི། བདག་ལ་ནི་མ་ཡིན་ནོ་ཞེས་བཤད་པ་ཡིན་ནོ། །ཅི་སྟེ་བདག་མངོན་སུམ་མ་ཡིན་པ་ལ་ཡང་རིགས་པ་འདིར་འགྱུར་རོ་ཞེ་ན། མ་ཡིན་ནོ་ཞེས་བཤད་པ་ནི། བདེ་བ་ལ་སོགས་པའི་འབྲས་བུ་ཅན་རབ་ཏུ་བསྒྲུབ་པས་ནི་ཞེས་སྨོས་
[103b.5]སོ། །བདེ་བ་ལ་སོགས་པའི་འབྲས་བུ་གང་ལ་ཡོད་པ་དེ་རབ་ཏུ་བསྒྲུབ་པས་ནི་དེ་ལྟར་དེ་དབང་པོ་བཞིན་དུའོ། །འདི་ལྟར་ཤེས་པ་རེས་འགའ་བས་དབང་པོ་བསྒྲུབ་པ་དེ་བཞིན་དུ་བདེ་བ་ལ་སོགས་རེས་འགའ་བ་ཉིད་ཀྱིས་འབྲས་བུ་དང་ལྡན་པ་བདག་གི་མཚན་ཉིད་ཀྱི་དངོས་
[103b.6]པོ་བསྒྲུབ་པས་ནི་དོན་ཅུང་ཟད་ཀྱང་རྒྱས་པར་མི་བྱེད་དོ། །འདི་སྐད་བརྗོད་པ་ཡིན་ཏེ། དབང་པོ་བཞིན་དུ་འབྲས་བུའི་ཁྱད་པར་སྒྲུབ་པར་ནུས་པ་ཙམ་གྱིས་ཁྱད་པར་དུ་བྱས་པའི་དངོས་པོ་ཙམ་ནི་ཕ་རོལ་པོ་བདག་གི་དངོས་པོ་ཁས་མ་བླངས་ཀྱི། འོན་ཀྱང་ལོངས་སྤྱོད་པ་
[103b.7]པོ་ལ་སོགས་པའི་ཆོས་ཀྱི་ཁྱད་པར་དུ་བྱས་པ་ཉིད་དོ། །རྣམ་པ་དེ་ལྟ་བུ་ནི་དེ་ལྟར་གྲུབ་པ་མ་ཡིན་ནོ། །ཚད་མ་གཞན་ལས་དེའི་རང་བཞིན་རབ་ཏུ་སྒྲུབ་པོ་ཞེ་ན། གང་ཡང་རུང་བ་ཞེས་སྨོས་སོ། །དེ་ནི་འདི་དང་ལྷན་ཅིག་གཞི་གཅིག་པར་མི་འགྲུབ་སྟེ། བདེ་བ་ལ་
[104a]
[104a.1]སོགས་པའི་རྒྱུ་བྱེད་པ་པོ་ལ་སོགས་པར་མ་གྲུབ་པའི་ཕྱིར་རོ། །དེ་ཉིད་ཀྱི་ཕྱིར་བདེ་བ་ལ་སོགས་པའི་རྒྱུ་དེ་གཞན་དུ་གྲུབ་པར་བྱ་ནུས་སོ་ཞེས་བཤད་པ་ནི་གང་ཡང་རུང་བས་ཞེས་བྱ་བ་ཡིན་ནོ། །དེ་ལྟ་ཡིན་དང་བདག་མི་དམིགས་པ་མེད་པའི་སྒྲུབ་བྱེད་དུ་སྔར་
[104a.2]བརྗོད་པ་གང་ཡིན་པ་དེ་ཉིད་ལུས་པ་ཡིན་ནོ། །ཁས་བླངས་ནས་ཀྱང་རྗེས་སུ་དཔག་པ་སྒྲུབ་པར་མི་ནུས་སོ་ཞེས་བསྟན་པ་ནི་དེ་ལྟ་ཡིན་དང་ཞེས་བྱ་བ་ལ་སོགས་པའོ། །མི་དམིགས་པ་ཡང་ཚད་མ་མ་ཡིན་ནོ། །དེའི་ཕྱིར་མི་དམིགས་པ་དེས་བདག་དེ་སེལ་བ་ན་མི་དམིགས་
[104a.3]པ་བསྒྲུབ་པ་ཡིན་ནོ་ཞེས་རྣམ་པ་འདི་ཅི་སྟེ་བསལ་ཏེ་བསལ་བར་མི་བྱ་བ་ཉིད་དོ། །མི་དམིགས་པ་སྒྲུབ་པ་མ་ཡིན་ན་འདིར་འགྱུར་བ་ཡིན་ནོ། །གལ་ཏེ་དེ་སྒྲུབ་པ་མ་ཡིན་ན་ནི་ལྡོག་པ་ཇི་ལྟར་སྒྲུབ་པར་བྱེད་པ་ཞེས་བྱ་བ་ནི་འབྱུང་བ་ཉེ་བར་མཚོན་པའོ། །ལུས་ཞེས་བརྗོད་པ་འབྱུང་བ་ཆེན་
[104a.4]པོའི་ཚོགས་པ་ལ་ཤེས་པ་ཡོད་པར་ཏེ། སེམས་པ་ཉིད་དུ་ལུས་ཀྱི་རང་གི་ངོ་བོ་ཉིད་རྣམ་པར་ཤེས་པར་མ་དམིགས་ཀྱང་འདོད་བཞིན་དུའོ། །ལུས་ཀྱི་རང་གི་ངོ་བོ་ཉིད་ནི་རིག་པར་དམིགས་པ་མེད་དེ། གཞན་གྱི་ལུས་རིག་ཀྱང་གཞན་གྱི་ལུས་བཞིན་དུ་གཞན་གྱི་རིག་པ་གསལ་
[104a.5]བར་བྱེད་པའི་ཕྱིར་རོ། །འདི་ལྟར་དཀར་ཤམ་ལ་སོགས་པའི་རྣམ་པ་གཞན་གྱི་ལུས་དམིགས་པ་དེའི་ཚེ་གཞན་གྱི་མལ་དང་སྟན་དང་གོས་ལ་སོགས་པའི་འཇམ་པ་དང་རྩུབ་པ་ལ་སོགས་པའི་རེག་པའི་ཁྱད་པར་དམིགས་པའི་ཕྱིར་དེའི་དམིགས་པའི་དེའི་ལུས་དང་ཐ་མི་དད་པ་ཡིན་
[104a.6]ན་ནི་དམིགས་པ་དེ་གསལ་བར་འགྱུར་རོ། །གསལ་བཞིན་པ་ནི་གསལ་བ་ལས་ཐ་དད་པ་མ་ཡིན་པའི་ཕྱིར་གསལ་བར་བྱ་བ་མི་གསལ་ན་རིག་པ་མ་ཡིན་པའི་ཕྱིར་ཡུལ་གྱི་རྣམ་པ་ཅན་གསལ་བར་བྱེད་པ་རིག་པ་ཉིད་ཡུལ་རིག་པ་ཡིན་པའི་ཕྱིར་རེག་པ་དམིགས་པ་རིག་ན་མིག་
[104a.7]གིས་རེག་པ་དམིགས་པར་འགྱུར་རོ། །དེ་བཞིན་དུ་དབང་པོ་གཞན་དང་གཞན་གྱི་དོན་དང་འབྲེལ་པས་འཆོལ་བར་འགྱུར་རོ། །དེའི་ཕྱིར་འབྱུང་བའི་རྣམ་པར་ཤེས་པ་ཡོད་པ་ཉིད་དུ་དམིགས་པ་མ་ཡིན་ནོ། །དེ་མ་དམིགས་ཀྱང་དེ་ལྟར་འདོད་པ་ན་མི་དམིགས་པ་ཚད་མ་མ་
[104b]
[104b.1]ཡིན་པར་བྱས་བཞིན་དུ་མ་མཐོང་བས་ཐམས་ཅད་མཁྱེན་པ་ལ་སོགས་པ་འགོག་པ་ནི་ཚིག་ལ་སོགས་པ་གཏན་ཚིགས་དང་མི་མཐུན་པའི་ཕྱོགས་ལ་ལྡོག་པར་སྨྲའོ། །གཞན་ནི་ཞེས་བྱ་བ་ལ་སོགས་པ་ལ་མི་དམིགས་ཀྱང་འདོད་བཞིན་དུ་ཞེས་བྱ་བ་དང་། སྨྲའོ་ཞེས་རྗེས་སུ་འཇུག་གོ། །
[104b.2]གང་གི་ཚེ་འོ་མ་ལ་ཞོ་མ་དམིགས་ཀྱང་ཡོད་པ་དེའི་ཚེ་མི་དམིགས་པ་ཚད་མ་མ་ཡིན་པའི་ཕྱིར་ཇི་ལྟར་གཏན་ཚིགས་འདུས་པ་ཉིད་གཞན་གྱི་དོན་མ་ཡིན་པ་ལས་ལྡོག །དེ་ཉིད་ཀྱི་ཕྱིར་ངེས་པ་ཅི་ཡོད་ཅེས་གསུངས་སོ། །འདི་ལ་ནི་མི་དམིགས་པ་ཉིད་ངེས་པ་ཡིན་ན་དེ་ཡང་ཚད་མ་
[104b.3]མ་ཡིན་པའི་ཕྱིར་ངེས་པ་མེད་དོ། །ད་ནི་ཞོ་ལ་སོགས་པ་ལ་འོ་མ་ལ་སོགས་པ་རྗེས་སུ་དཔོག་པ་དང་རྣམ་པ་གཞན་གྱིས་རྗེས་སུ་དཔོག་པ་ཡང་བཟློག་པའི་ཕྱིར་འོ་མ་ལ་སོགས་པ་ཞེས་སྨོས་སོ། །འོ་མ་ལ་སོགས་པ་ལ་ཞོ་ལ་སོགས་པ་དམིགས་པ་རྗེས་སུ་དཔག་པ་ཡིན་ཏེ། དེས་
[104b.4]ན་མ་དམིགས་ཀྱང་མེད་པ་མ་ཡིན་ནོ། །རྗེས་སུ་དཔག་པ་དེ་གང་ཞེ་ན་མི་ནུས་པ་ལས་ཞེས་བྱ་བས་སྟོན་ཏོ། །ནུས་པ་ཞེས་བྱ་བ་ནི་འབྲས་བུ་རྒྱུའི་བདག་ཉིད་ལ་མི་གསལ་བའི་རང་བཞིན་དུ་གནས་པའོ། །དེས་ན་མི་ནུས་པ་ལས་ཞེས་བྱ་བ་ནི་འབྲས་བུའི་བདག་ཉིད་ནུས་པའི་ངོ་བོར་རང་གི་བདག་ཉིད་
[104b.5]ལ་མི་གནས་པ་ལས་ཞེས་བརྗོད་པ་ཡིན་ནོ། །རྒྱུའི་བདག་ཉིད་ལ་མངོན་པར་གསལ་བའི་གསལ་བར་གྱུར་པ་ནི་སྐྱེ་བ་ཞེས་བརྗོད་དོ། །དེས་ན་གང་ལ་གང་ཞིག་མི་གསལ་བའི་རང་བཞིན་མེད་པས་དེ་མངོན་པར་གསལ་བའི་རང་བཞིན་སྐྱེ་བ་ཡོད་པར་ག་ལ་འགྱུར། དེ་ལྟར་གྱུར་ན་ནི་གསེག་མ་
[104b.6]ལས་ཀྱང་འབྱུང་བར་འགྱུར་རོ། །དེ་ལྟར་འདི་མི་དམིགས་པ་ཚད་མ་ཡིན་ན་རྗེས་སུ་དཔག་པ་མི་སྲིད་པ་ཉིད་ཀྱིས་སུན་ཕྱུང་བ་ཡིན་ཡང་རྣམ་པ་གཞན་གྱི་སྒོ་ནས་ཀྱང་འགོག་པ་ནི་ཡང་ནུས་པ་འདི་ཞེས་བྱ་བ་ཡིན་ནོ། །རང་བཞིན་གང་གིས་འབྲས་བུ་རྒྱུ་ལ་གནས་པར་འགྱུར་བ་
[104b.7]ནུས་པ་ཞེས་བྱ་བ་འདི་ཅི་ཞིག་ཡིན། ཅི་འབྲས་བུའི་མཚན་ཉིད་ཀྱི་ཡོད་པ་དེ་ཡིན་ནམ་ཞོ་ཉིད་འོ་མའི་བདག་ཉིད་ལ་གནས་པའི་ནུས་པའི་ངོ་བོར་གནས་པ་ཡིན་པར་འགྱུར་རམ། འོན་ཏེ་རང་བཞིན་གཞན་ཉིད་ལ་འོ་མའི་བདག་ཉིད་ལ་འགལ་བ་མེད་པར་ཞོ་སྐྱེད་པར་བྱེད་པ་ཉིད་ཡིན།
[105a]
[105a.1]རྣམ་པ་དང་པོ་ནི་རེ་ཞིག་མི་རུང་ངོ་ཞེས་དེ་ཉིད་དོགས་པར་བྱས་ནས་བཟློག་པ་ནི་དེ་ཁོ་ན་བཞིན་དུ་ཞེས་བྱ་བའོ། །ཞོ་ཉིད་འོ་མའི་བདག་ཉིད་ལ་ཡོད་ན་ནི། འོ་མ་ལ་ཡང་དེ་ཁོ་ན་བཞིན་དུ་དམིགས་པར་འགྱུར་ཏེ་དེའི་བདག་ཉིད་དུ་ཁྱད་པར་མེད་པའི་ཕྱིར་རོ། །མངོན་པར་
[105a.2]མི་གསལ་བའི་ཕྱིར་མ་དམིགས་སོ་ཞེ་ན། མངོན་པར་མི་གསལ་བ་འདི་ཅི་ཞིག་མ་རྟོགས་པའམ། རྣམ་པ་དེ་ལྟ་བུའི་བདག་ཉིད་ལས་རང་བཞིན་གཞན་ཡིན་པས་ཞོའི་བདག་ཉིད་ལས་ངོ་བོ་གཞན་དུ་གྲུབ་པའོ། །གལ་ཏེ་མ་རྟོགས་པ་ཡིན་ན་འོ་མའི་བདག་ཉིད་མ་རྟོགས་པར་མི་
[105a.3]རུང་སྟེ་རྟོགས་པའི་ཕྱིར་རོ། །མངོན་པར་མ་གྲུབ་པ་ཡིན་ན་ཡང་མི་གསལ་བ་དེའི་བདག་ཉིད་ལས་རང་བཞིན་གཞན་ཡིན་པས་ཞོའི་བདག་ཉིད་ལས་ངོ་བོ་གཞན་དུ་འགྲུབ་བོ། །དེ་སྟེ་འོ་མ་དང་རང་བཞིན་གཅིག་པ་ཉིད་ཀྱི་འོ་མའི་བདག་ཉིད་དུ་དམིགས་པ་ཡིན་ནོ་ཞེ་ན། འོ་ན་འོ་
[105a.4]མའི་བདག་ཉིད་ལས་རང་བཞིན་གཞན་མ་ཡིན་པར་གྲུབ་པོ་ཞེས་བཤད་པ་ནི་ཅི་སྟེ་གཞན་ཞིག་ཡིན་ནོ་ཞེ་ན་ཞེས་བྱ་བའོ། །འདི་སྐད་བརྗོད་པ་ཡིན་ཏེ། ཞོ་ཡོད་པར་འདོད་པས་འོ་མ་ཙམ་གྱི་རང་བཞིན་ལ་གུས་པར་བྱ་བ་ནི་མ་ཡིན་ནོ། །དམིགས་པར་ཁས་ལེན་པས་ནི་ཞོའི་
[105a.5]བདག་ཉིད་ཉམས་པའི་ཕྱིར་འཆོལ་བ་མ་གྲུབ་པོ། །དེས་ན་འདི་སྐད་སྨྲ་བའི་འདི་ཉེ་བར་བཏགས་པ་ཙམ་དུ་འགྱུར་རོ་ཞེས་གསུངས་པ་ནི་ཉེ་བར་བཏགས་པ་ཙམ་དུ་ནི་ཞེས་བྱ་བ་ཡིན་ནོ། །དེ་ལྟར་འདི་ནི་མ་མཐོང་བས་ལྡོག་པ་གྲུབ་པར་སྨྲ་བ་འདི་དག་ནི་ཕན་ཚུན་འགལ་བ་སྟེ།
[105a.6]ཕན་ཚུན་གནོད་པ་ཞེས་ཁས་བླངས་པ་ཡིན་ནོ། །དེས་ན་དེ་ལྟར་མེད་ན་མི་འབྱུང་བའི་འབྲེལ་པའི་རྒྱུ་མཚན་ཉིད་ཀྱིས་ངེས་པར་བྱ་སྟེ། དེ་ཁས་མི་ལེན་ན་སྨྲ་བ་ཉིད་འདོད་ཆགས་དང་ལྡན་པ་ལ་སོགས་པའི་གོ་བར་བྱེད་པ་མ་ཡིན་པར་བརྗོད་ནས་མི་མཐུན་པའི་ཕྱོགས་ལ་མ་མཐོང་
[105a.7]བ་ཙམ་གྱིས་ཞེས་བྱ་བ་ལ་སོགས་པས་རང་དང་གཞན་གྱི་ཁས་བླངས་པ་མ་མཐོང་བ་ཙམ་གྱིས་ལྡོག་པ་གྲུབ་པ་བཀག་པ་ཡིན་ནོ། །གལ་ཏེ་མི་མཐུན་པའི་ཕྱོགས་ལ་མ་མཐོང་བ་ཙམ་གྱིས་མི་འཁྲུལ་པ་མ་ཡིན་ན་འོ་ན་ཇི་ལྟར་ལྡོག་པ་གྲུབ་ཅེ་ན། བཤད་པ་དེའི་ཕྱིར་རང་གི་
[105b]
[105b.1]ངོ་བོས་ངོ་བོ་ཉིད་བཟློག་པར་འགྱུར་རོ། །རང་གི་ངོ་བོས་ཞེས་བྱ་བ་དེ་ཅི་ཞིག་ཡིན་ཞེ་ན། ཇི་ལྟར་བསྟན་པ་བཞིན་དེའི་རང་གི་ངོ་བོ་ཁྱད་པར་དུ་སྟོན་པ་ནི་དེ་ཙམ་དང་འབྲེལ་པ་ཞེས་བྱ་བའོ། །གལ་ཏེ་མི་རྟག་པ་ཉིད་རྩོལ་བ་ལས་བྱུང་བ་ཙམ་དང་འབྲེལ་པ་ནི་མ་ཡིན་ཏེ། རྩོལ་བ་ལས་བྱུང་
[105b.2]བ་ལ་ཡང་ཡོད་པའི་ཕྱིར་རོ། །དེས་ན་དེ་ཙམ་དང་འབྲེལ་པ་ཞེས་ཇི་ལྟར་བརྗོད་ཅེ་ན་བདེན་ཏེ། འོན་ཀྱང་འདིར་འབྲེལ་པའི་དོན་རྣམ་པ་དེ་ལྟར་ནི་མི་འདོད་དོ། །དེ་ཙམ་ཡོད་ན་རྒྱུ་མཚན་གཞན་ལ་མི་ལྟོས་པར་གྲུབ་པའི་ཕྱིར་དེ་ཙམ་ཉིད་ན་ཡོད་པ་ཉིད་ནི་དེ་ཙམ་དང་འབྲེལ་
[105b.3]པར་བརྗོད་པ་ཡིན་ནོ། །དེས་ན་སྒྲུབ་པར་བྱེད་པའི་རང་གི་ངོ་བོ་ཉིད་དེ་ཡིན་པའི་ཕྱིར་དེ་དག་ཡོད་ན་ཡོད་པ་ལས་མི་འདའ་བ། སྒྲུབ་པར་བྱེད་པའི་ཆོས་ཡོད་པ་ཙམ་ནི་ཡོད་པའི་རང་གི་ངོ་བོ་གང་ཡིན་པ་དེ་ཉིད་སྒྲུབ་པར་བྱེད་པ་ཟློག་པར་བྱེད་པ་ཡིན་ནོ། །ཇི་ལྟར་ཟློག་པར་བྱེད་ཅེ་ན་
[105b.4]གལ་ཏེ་མ་བརྗོད་པ་དེ་ལྟ་ན་ཡང་དེ་ཙམ་ལ་ཡོད་པའི་ཤུགས་ཀྱིས་ལོག་པས་ལྡོག་པ་ཉིད་དུ་ངེས་པ་ཡིན་ནོ། །དེ་ཡོད་པས་ཟློག་པར་བྱེད་པའམ་མེད་པས་ཡིན། དེ་ཡོད་པས་ཟློག་པར་བྱེད་པ་ཡིན་ན་ནི་དེ་ཙམ་དང་འབྲེལ་པ་འགལ་ལོ། །དེས་ན་མེད་པ་ཉིད་ཀྱིས་ཟློག་པར་
[105b.5]བྱེད་པ་ཡིན་ནོ། །དེས་ན་དེ་ཡོད་པ་ཙམ་ལ་ཡོད་པ་གང་ཡིན་པ་དེ་ལོག་པ་ན་ཡོད་པ་ལྡོག་པར་བྱེད་དེ། དེ་དེའི་རང་གི་ངོ་བོ་ཡིན་པས་ན་དེ་མེད་པར་མི་འགྲུབ་པའི་ཕྱིར་རོ། །འདི་ལ་རྟོག་པ་ནི་རྣམ་པ་གཉིས་ཏེ། རང་གི་ངོ་བོ་མེད་ན་ངོ་བོ་མེད་པར་འགྱུར་རོ་ཞེས་འབྲེལ་པ་ཙམ་ལས་ལྡོག་
[105b.6]པར་འགྲུབ་པའམ་ཡང་ན་དེ་ལྟ་བུའི་རང་གི་ངོ་བོ་ངོ་བོའི་ཁྱབ་པར་བྱེད་པ་ཡིན་པའི་ཕྱིར་ཁྱབ་པར་བྱེད་པ་མེད་ན་ཁྱབ་པར་བྱ་བ་མེད་པའོ། །འམ་སྨོས་པ་ནི་ལྡོག་པ་ཙམ་གྱི་ཕྱོགས་ལ་ལྟོས་ནས་སམ་ངེས་པའི་ཡུལ་ཅན་ཉིད་ཀྱིས་སོ། །ལྡོག་པའི་རྣམ་པ་འདི་གཏན་ཚིགས་
[105b.7]གང་གི་ཡིན་ཞེ་ན་དཔེར་ན་ཤིང་གིས་ཤིང་ཤ་པ་ལྟ་བུ་སྟེ་ཞེས་སྨོས་སོ། །ཤིང་ཤ་པ་ཉིད་ཀྱིས་ཤིང་ཉིད་སྒྲུབ་པ་ན་བསྒྲུབ་པར་བྱ་བ་ཤིང་ལོག་པ་ན་ཤིང་ཤ་པ་ལྡོག་པར་བྱེད་པ་བཞིན་ནོ། །འདིར་ཡང་ཇི་ལྟར་ཟློག་པར་བྱེད་པ་ཡིན་པ་དེ་བསྟན་པའི་ཕྱིར་དེ་ཙམ་དང་འབྲེལ་
[106a]
[106a.1]པ་ཉིད་སྟོན་ཏེ། ཡལ་ག་ལ་སོགས་པ་དང་ལྡན་པའི་ཁྱད་པར་འགའ་ཁོ་ན་ཞིག་ལ་དེ་སྐད་དུ་ཤིང་ཞེས་གྲགས་པའི་ཕྱིར་རོ། །གཏན་ཚིགས་དེའི་ཕྱིར་ན་ཤིང་དེ་ན་ཤ་པ་དེའི་རང་གི་ངོ་བོ་ཡིན་ཏེ་སྔར་ཇི་སྐད་བཤད་པ་བཞིན་ནོ། །རང་གི་ངོ་བོ་ཡོངས་སུ་
[106a.2]བོར་ནས་ཀྱང་ཇི་ལྟར་ངོ་བོ་ཡོད་པར་འགྱུར་ཏེ་གང་གི་ཕྱིར་རང་བཞིན་འབྲེལ་པའི་ཕྱིར་དེ་མེད་ན་མེད་པའི་མཚན་ཉིད་འཁྲུལ་པ་མེད་པ་ཡིན་ནོ། །དེ་ལྟར་རང་བཞིན་གྱི་གཏན་ཚིགས་ཀྱི་ལྡོག་པ་བསྟན་ནས་འབྲས་བུའི་གཏན་ཚིགས་ཀྱི་ཡང་བཤད་པ་ནི། རྒྱུས་ནི་འབྲས་བུ་
[106a.3]བཟློག་པར་འགྱུར་ཞེས་སྦྲེལ་བར་བྱའོ། །འདིར་ཡང་སྔ་མ་བཞིན་རྣམ་པ་གཉིས་སོ། །འདི་ལ་ཇི་ལྟར་རྒྱུ་ཟློག་པར་བྱེད་པ་ཡིན་པ་དེ་སྟོན་པ་ནི་འཁྲུལ་པ་མེད་པའི་ཕྱིར་ཞེས་བྱ་བའོ། །རྒྱུ་མེད་ན་མི་འབྱུང་བ་ནི་འབྲས་བུའི་རང་བཞིན་དེ་ཉིད་ནི་རྗེས་སུ་འགྲོ་བ་དང་ལྡོག་པ་ཙམ་གྱི་
[106a.4]རང་བཞིན་ཡིན་པའི་ཕྱིར་རོ། །རྒྱུ་ཡང་ལྡོག་པ་ཉིད་ཀྱིས་འབྲས་བུ་ལྡོག་པར་བྱེད་པ་ཡིན་ནོ་ཞེས་རྒྱུ་ཉིད་ཀྱིས་ངེས་པ་ཡིན་ཏེ། ཡོད་པ་ཉིད་ནི་ལྡོག་པར་བྱེད་པ་མ་ཡིན་ཏེ་རྒྱུ་ཉིད་མ་ཡིན་པའི་ཕྱིར་རོ། །རྒྱུ་ལོག་པ་ན་ཞེས་བྱ་བ་ནི་སྔ་མའི་ཆ་རྣམ་པར་འགྲེལ་པའོ། །གཞན་དུ་ན་ཕྱི་མ་
[106a.5]ཡིན་ནོ། །དེ་ལྟར་ན་གཞན་ཕྱོགས་པ་དག་གིས་འདོད་པའི་རྣམ་པ་བཀག་པ་ན་རང་བཞིན་འབྲེལ་པ་ཡོད་པ་ན་དོན་གྱིས་དོན་འཁྲུལ་པ་མེད་དོ་ཞེས་བྱ་བ་འདི་ཉིད་གྲུབ་པ་ཡིན་ནོ་ཞེས་ལྷག་དང་བཅས་ཏེ་སྟོན་པ་ནི་རྒྱུ་དང་འབྲས་བུའི་དངོས་པོ་གྲུབ་པ་ནི་ཞེས་བྱ་བ་ཡིན་ནོ། །ནིའི་
[106a.6]སྒྲ་ནི་སྡུད་པའི་དོན་ཏོ། །དེས་ན་དོན་འདི་ཡིན་ཏེ། རྒྱུ་དང་འབྲས་བུའི་ངོ་བོ་གྲུབ་པ་ཡང་ངོ་བོ་ཉིད། ངེས་པར་བྱེད་དེ་མེད་ན་མི་འབྱུང་བར་བྱེད་དོ། །དེས་ན་དེའི་བདག་ཉིད་གྲུབ་པ་ནི་ཞེས་བྱ་བར་ཡང་རྟོགས་པ་ཉིད་དོ། །དེ་བས་ན་ཞེས་པ་དེའི་ཕྱིར་དེ་ཙམ་དང་འབྲེལ་པའི་
[106a.7]ཞེས་བྱ་བ་ལ་སོགས་པའི་རྣམ་པ་འདིས་ན་རང་བཞིན་འབྲེལ་པ་ཁོ་ན་ལྡོག་གོ། །དེ་ལྟར་ཁས་མི་ལེ་ན་ན་ནི་བསྒྲུབ་པར་བྱ་བ་མེད་ན་སྒྲུབ་པར་བྱེད་པ་མེད་པ་ཞེས་བྱ་བ་ཉིད་མི་འགྲུབ་བོ་ཞེས་གསུངས་པ་ནི། དེ་ལྟ་མིན་ན་ཞེས་བྱ་བ་ཡིན་ནོ། །རང་བཞིན་འབྲེལ་པ་ཁས་མི་
[106b]
[106b.1]ལེན་ན་བསྒྲུབ་པར་བྱ་བ་གཅིག་ལོག་པས་ཇི་ལྟར་གཞན་ནི་ཞེས་བྱ་བ་སྒྲུབ་པར་བྱེད་པ་ལྡོག་པར་འགྱུར། གལ་ཏེ་འགྱུར་ན་ནི་དེའི་ཚེ་བྲམ་ཟེའི་ཁྱེའུ་ལ་རྟ་དང་ལྡན་པ་ལོག་ན། ཕྱུགས་དང་ལྡན་པ་ཡང་ལྡོག་པར་འགྱུར་ཏེ་རྟ་ལག་ན་གཞན་ཉིད་དུ་ཁྱད་པར་མེད་པས་
[106b.2]ཕྱུགས་ཀྱང་ལྡོག་པའི་ཕྱིར་རོ། །འབྲེལ་པ་མེད་པ་ལོག་ན་ལྡོག་པར་འདོད་པས་དེ་དེ་ལྟར་ཅི་སྟེ་མི་འདོད་ཅེས་འདྲི་བའི་སྒོ་ནས་དེ་སྟོན་པ་ནི་མི་ལ་རྟ་མི་བདོག་ཅེས་ཏེ་ཞེས་བྱ་བ་ཡིན་ནོ། །དེ་ལྟར་མ་འབྲེལ་པ་ལ་ལྡོག་པ་མེད་པར་བསྟན་ནས་རྗེས་སུ་འགྲོ་བ་ཡང་མེད་པར་
[106b.3]བརྗོད་པ་ནི་དེ་བཞིན་གཅིག་ཅིག་ཅེས་བྱ་བ་ཡིན་ནོ། །གཅིག་ཉེ་བས་གཞན་ཉེ་བ་ནི་ངེས་པ་མ་ཡིན་ཏེ། གཞན་དུ་ན་རྟ་ཉེ་ན་ཡང་བ་ལང་ཉེ་བར་འགྱུར་རོ། །ཆོས་ཅན་གཅིག་གམ་དུ་མས་འགའ་ཞིག་ཇི་ལྟར་གྱུར་པ་དེ་ལྟར་གཞན་དུ་ཡང་འགྱུར་བ་ཡིན་ནོ་ཞེས་བྱ་བའི་ངེས་པ་ཡང་
[106b.4]ཡོད་པ་མ་ཡིན་ནོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །རང་བཞིན་འབྲེལ་པ་ཁོ་ནས་གཏན་ཚིགས་ཀྱིས་བསྒྲུབ་བྱ་གོ་བར་བྱེད་དོ། །དེ་རྟོགས་པའི་རྒྱུ་མཚན་ལ་བརྟེན་པར་འགྱུར་རོ། །གོ་བར་བྱེད་པ་ཉིད་ནི་རྗེས་སུ་འགྲོ་བ་དང་ལྡོག་པ་བདག་ཉིད་ལས་ཡིན་ནོ། །དེ་དག་ཀྱང་
[106b.5]གང་ཞིག་གང་ལ་རག་ལས་པའི་རང་བཞིན་ཡིན་པ་དེ་ལ་དེ་ཡིན་པར་འགྱུར་ཏེ། དེས་ན་རང་བཞིན་འབྲེལ་པ་ཉིད་ཀྱིས་གོ་བར་བྱེད་པ་ཡིན་ནོ། །དེ་ཡང་རྣམ་པ་གཉིས་ཏེ་དེའི་ངོ་བོའི་མཚན་ཉིད་དམ་དེ་ལས་བྱུང་བའི་མཚན་ཉིད་ཡིན་ནོ། །གལ་ཏེ་དེའི་བདག་ཉིད་དང་དེ་ལས་བྱུང་བའི་
[106b.6]དབང་ཁོ་ནས་གཏན་ཚིགས་ཀྱིས་བསྒྲུབ་པར་བྱ་བ་གོ་བར་བྱེད་པ་ཡིན་ན། ད་ནི་དཔེ་ལ་དགོས་པ་ཅི་ཡོད་དེ་ཡང་རང་ཉིད་ཀྱིས་དེ་དང་དེ་དག་ཏུ་བསྟན་པ་ལ་སློབ་དཔོན་གྱིས་ཀྱང་ཚད་མ་ཀུན་ལས་བཏུས་པ་ལ་སོགས་པ་བསྟན་པ་ཡིན་ནོ། །འདི་ནི་རྣམ་པ་ཇི་ལྟར་ཡང་ཉེ་བར་སྦྱོར་བ་ནི་མེད་
[106b.7]དོ། །རེ་ཞིག་རང་བཞིན་གྱི་གཏན་ཚིགས་ལ་ནི་བསྒྲུབ་པར་བྱ་བ་རྟོགས་པ་གཏན་ཚིགས་ཀྱི་རང་བཞིན་རྣམ་པར་དཔྱད་པས་འགྲུབ་པ་ཡིན་ཏེ། དེ་ལྟར་ཡང་བྱས་པ་ཉིད་ལ་སོགས་པ་དག་ཏུ་འཇུག་པར་འགྱུར་རོ། །ཤ་པ་ཉིད་ལ་སོགས་པ་ཡང་ཤ་པ་ཉིད་ཤིང་གི་ཁྱད་པར་ཡིན་པའི་ཕྱིར་
[107a]
[107a.1]ཤིང་ཉིད་རྟོགས་སོ། །ཐམས་ཅད་དུ་དེ་ལྟ་བུ་ཉིད་ཡིན་པའི་རྒྱུ་མཚན་འབྲེལ་པ་དེ་ཉིད་ཀྱིས་རྗེས་སུ་འགྲོ་བའི་རང་བཞིན་མཐུན་པའི་ཕྱོགས་ལ་ཡོད་པ་གང་ལས་ཆོད་པ་མེད་པར་དོན་རྟོགས་པར་འགྱུར་བ་ཡང་འཕེན་པ་ཡིན་ནོ། །ལྡོག་པའི་བདག་ཉིད་མི་མཐུན་
[107a.2]པའི་ཕྱོགས་ལ་མེད་པ་ཡང་དེ་བཞིན་ནོ། །གང་གིས་རྗེས་སུ་འགྲོ་བ་བསྒྲུབ་པའི་ཆོས་ཅན་མཐོང་བའི་ཡུལ་དུ་ཉེ་བར་སྦྱོར་བ་ཆོས་མཐུན་པ་ཉིད་ཅན་གྱི་དཔེར་འགྱུར་བ་དང་། ལྡོག་པ་བསྒྲུབ་པ་མཐོང་བའི་ཡུལ་དུ་སྦྱར་བ་ཆོས་མི་མཐུན་པ་ཉིད་ཅན་གྱི་དཔེར་འགྱུར་བ་དེ་གཉིས་ཆོས་ཅན་
[107a.3]ངེས་པའི་ཡུལ་ཅན་ཉིད་དུ་འཇུག་པ་གྲུབ་པའི་ཕྱིར། དེ་གཉིས་བསྒྲུབ་པར་སྟོན་པས་རྟོགས་པར་འགྱུར་བའི་ཆོས་ཅན་དེ་ཉིད་བསྒྲུབ་བྱ་རྟོགས་པའི་སྐབས་སུ་དྲན་པར་བྱེད་པ་གང་ཡིན་པ་མངོན་སུམ་དང་མི་དམིགས་པས་བསྒྲུབ་པའི་རྗེས་སུ་འགྲོ་བ་དང་ལྡོག་པ་ནི་གོ་བར་བྱེད་པའི་
[107a.4]ཡན་ལག་ཏུ་གྱུར་པ་མ་ཡིན་གྱི་འོན་ཀྱང་འབྲེལ་པས་གྲུབ་པ་དག་ཉིད་ཡིན་ནོ། །དེ་ལ་ནི་ཆོས་ཅན་ངེས་པ་ཉེ་བར་བླངས་པས་ཅུང་ཟད་ཀྱང་བྱར་མེད་དོ། །སྒྲུབ་པར་བྱེད་པའི་རང་བཞིན་རྣམ་པར་དཔྱད་པ་ཙམ་ཉིད་ཀྱིས་རྣམ་པ་འདི་ལྟ་བུ་མཐའ་དག་ནི་འདི་ལྟ་བུ་ཡིན་ནོ་ཞེས་རྣམ་
[107a.5]པར་གཞག་པ་གྲུབ་པས་ནི་དཔེར་ན་འདི་བཞིན་ནོ་ཞེས་པར་བཀོད་པ་དོན་མེད་པའི་ཕྱིར་རོ། །གང་གི་དཔེར་ན་འདི་བཞིན་ནོ་ཞེས་ཉེ་བར་བཀོད་པ་དོན་དང་ལྡན་པར་འགྱུར་བ་ཇི་ལྟར་གཅིག་ལས་དེ་ཡོད་པ་དེ་བཞིན་དུ་འགྱུར་རོ་ཞེས་བྱ་བའི་ངེས་པ་ནི་ཡོད་པ་མ་ཡིན་ནོ། །འབྲས་བུའི་
[107a.6]གཏན་ཚིགས་ལ་ཡང་ཚང་བང་ལ་སོགས་པར་མཐོང་བ་རྒྱུ་དང་འབྲས་བུའི་དངོས་པོར་འཛིན་པ་ལ་ཉེ་བར་མཁོ་བ་ཡིན་གྱི། དེར་མཐོང་བའི་ཕྱིར་རིའི་སྤོ་ལ་དེ་དམིགས་པ་མེ་སྒྲུབ་པར་བྱེད་པ་ནི་མ་ཡིན་ནོ། །ཚང་བང་དུ་དུ་བ་ཡོད་ན་མེ་མཐོང་བ་ཞེས་བྱ་བ་ཙམ་གྱིས་ནི་རིའི་
[107a.7]སྤོ་ལ་ཡང་དེ་ལྟར་འགྱུར་བ་ནི་མ་ཡིན་ཏེ་ཕྱུགས་དང་ལྡན་པ་ཡིན་པའི་ཕྱིར་རྟ་དང་ལྡན་པར་ངེས་པ་ནི་མ་ཡིན་ནོ་ཞེས་འདི་ནི་བསྟན་ཟིན་ཏོ། །དུ་བ་ནི་མེའི་འབྲས་བུ་ཡིན་ལ་རྒྱུ་མེད་པར་ཡང་འབྲས་བུ་མི་སྲིད་པའི་ཕྱིར་དུ་བ་ལས་རི་ལ་ཡང་མེ་རྟོགས་པ་ཡིན་ནོ་ཞེ་ན། འོ་ན་ནི་
[107b]
[107b.1]འབྲས་བུ་ཉིད་ཀྱི་རྒྱུ་མཚན་གྱིས་ཐམས་ཅད་དུ་དེ་ལྟར་འགྱུར་བ་འདི་གཞན་ཉིད་ཡིན་གྱིས། ཚང་བང་དུ་དེ་དེ་ལྟར་མཐོང་བའི་རྒྱུ་མཚན་ཅན་ནི་མ་ཡིན་ནོ། །དེར་དམིགས་པས་ནི་རྒྱུ་དང་འབྲས་བུའི་དངོས་པོར་འགྲུབ་ལ། དེ་ལས་ནི་ཐམས་ཅད་དུ་དེ་ལྟར་འགྱུར་བར་རྟོགས་པའི་ཕྱིར་
[107b.2]འདིར་ཇི་སྐད་བརྗོད་པའི་ཚུལ་གྱིས་ཆོས་ཅན་བསྟན་པ་ཉེ་བར་མཁོ་བ་ཡོད་པ་མ་ཡིན་ནོ། །དེས་ན་ཕྱོགས་འདི་ལ་དཔེ་དགོས་པ་ཅི་ཡོད་ཅེས་རང་གི་འདོད་པ་ལས་ལྟོས་ཏེ་དཔེ་འགལ་བར་དོགས་པ་བསུ་ནས་མེད་ན་མི་འབྱུང་བ་དེ་ཉིད་ཅེས་སྨོས་སོ། །བསྟན་ཟིན་པའི་འབྲེལ་པའི་
[107b.3]རྒྱུ་མཚན་ཅན་རྗེས་སུ་འགྲོ་བ་དང་ལྡོག་པའི་བདག་ཉིད་ཅན་གྱི་མེད་ན་མི་འབྱུང་བ་གང་ཡིན་པ་དེ་ཉིད་དཔེ་དག་གིས་རབ་ཏུ་སྟོན་ཏོ། །དེ་ཡང་འབྲེལ་པ་མ་བསྟན་པར་བསྟན་པར་ནུས་པ་མ་ཡིན་ནོ། །རྒྱུ་མ་བསྟན་པ་ཡང་འབྲས་བུ་བསྟན་པར་འགྱུར་བ་གང་ཡིན་པ་རྒྱུ་ཙམ་གྱིས་
[107b.4]ནི་འབྲེལ་པར་རྗེས་སུ་འགྲོ་བ་དང་ལྡོག་པ་དག་གིས་རྒྱུ་མཚན་མ་ཡིན་གྱི་འོན་ཀྱང་ཚད་མ་ཉིད་ཀྱིས་སོ། །དེས་ན་ཐམས་ཅད་དུ་འདི་ཡོད་ན་ཡོད་པ་ཡིན་ལ་འདི་ལོག་ན་འདི་ལྡོག་གོ་ཞེས་བསྟན་ཀྱང་དེ་སྐད་བརྗོད་པ་ཙམ་གྱིས་ནི་དེ་ལྟར་མི་འགྲུབ་ཀྱི། འོན་ཀྱང་གང་ལས་
[107b.5]དེ་དེ་ལྟར་འགྱུར་བ་དེ་རྟོགས་པ་ཉིད་ཀྱིས་དེ་རྟོགས་པ་ཡིན་ནོ། །དེའི་ཕྱིར་དེའི་བདག་ཉིད་དང་དེ་ལས་བྱུང་བའི་རྒྱུ་མཚན་ཅན་གྱི་རྗེས་སུ་འགྲོ་བ་དང་ལྡོག་པ་དག་སྟོན་པ་ནི་ཆོས་མཐུན་པ་དང་མི་མཐུན་པའི་དཔེ་དག་གི་བྱ་བ་ཡིན་ནོ། །སློབ་དཔོན་ཕྱོགས་ཀྱི་གླང་པོའི་དགོངས་པ་
[107b.6]ཡང་འདི་ཉིད་ཡིན་ནོ་ཞེས་སྟོན་པ་ནི་དེའི་ཞེས་བྱ་བའོ། །གང་གི་ཕྱིར་དཔེ་དག་གིས་འབྲེལ་པ་ལ་བརྟེན་པའི་རྗེས་སུ་འགྲོ་བ་དང་ལྡོག་པ་བརྗོད་པ་དེའི་ཕྱིར་ཆོས་མི་མཐུན་པའི་དཔེ་འདི་ལ་ངེས་པར་གཞི་མི་འདོད་དེ། རེས་འགའ་ཆོས་མི་མཐུན་པའི་དཔེ་དངོས་པོར་གྱུར་པ་
[107b.7]མ་ཡིན་ཡང་བསྒྲུབ་བྱ་སྒྲུབ་པར་བྱེད་པ་སློབ་དཔོན་བཞེད་པ་ཡིན་ནོ། །དེ་ཡང་དཔེའི་དགོས་པ་འདི་ལྟར་ཡིན་ན་འཐད་པར་འགྱུར་གྱི་དེར་དེ་ལྟར་གྲུབ་པའི་རྒྱུ་མཚན་གྱིས་བསྒྲུབ་བྱ་སྒྲུབ་པར་བྱེད་པ་ཡིན་ན་ནི་མ་ཡིན་ནོ། །ཇི་ལྟར་ཞེ་ན་དེ་དག་མེད་ན་འང་ཞེས་སྨོས་སོ། །བསྒྲུབ་
[108a]
[108a.1]པར་བྱ་བ་མེད་ན་སྒྲུབ་པར་བྱེད་པར་མི་འགྱུར་རོ་ཞེས་བརྗོད་པ་ལས་ཀྱང་འབྲེལ་པ་དེ་རྟོགས་པའི་ཕྱིར་རོ། །དཔེ་ནི་འབྲས་བུ་བསྟན་པའི་དོན་དུ་འཇུག་པ་ཡིན་ན་དེ་ནི་དཔེ་མེད་པར་བརྗོད་པས་ཀྱང་འགྲུབ་པ་ཁོ་ནའོ། །དེས་ན་མེད་པའི་དཔེ་ལ་བརྟེན་པའི་ངག་
[108a.2]དང་དཔེ་མེད་པའི་ངག་ཁྱད་པར་འགའ་ཡང་མེད་དོ། །དེའི་ཕྱིར་བརྗོད་པ་ལས་ཀྱང་དེ་རྟོགས་ཕྱིར་གསུངས་སོ། །ད་ནི་གང་གིས་ཆོས་མི་མཐུན་པའི་དཔེ་ལ་གཞི་མི་བཞེད་པ་དཔེར་ཇི་ལྟར་འབྲེལ་པ་ཉེ་བར་སྟོན་པ་དེ་སྟོན་པས་འདི་ལྟར་ཞེས་བྱ་བ་ལ་སོགས་པ་གསུངས་སོ། །དཔེ་
[108a.3]ནི་དེའི་ངོ་བོ་ཞེས་བྱ་བ་དེའི་བདག་ཉིད་དང་རྒྱུའི་དངོས་པོ་སྐྱེད་པར་བྱེད་པ་ཉིད་སྟོན་ཏེ། དེའི་བདག་ཉིད་དང་དེ་ལས་བྱུང་བ་དག་དེ་མི་ཤེས་པ་ལ་རབ་ཏུ་སྟོན་པ་ཡིན་ནོ། །བསྒྲུབ་པར་བྱ་བ་ཉིད་སྒྲུབ་པར་བྱེད་པའི་རང་གི་ངོ་བོ་ཡིན་པའི་ཕྱིར་དེའི་བདག་ཉིད་ནི་བསྒྲུབ་པར་བྱ་བ་ལ་གནས་པའི་
[108a.4]ཆོས་ཡིན་ནོ། །དེ་བཞིན་དུ་རྒྱུའི་དངོས་པོ་ཡང་དེ་ཉིད་ཀྱི་ཕྱིར་འགྲེལ་པར་བསྒྲུབ་པར་བྱ་བའི་ཆོས་ནི་ཞེས་འཆད་པར་འགྱུར་རོ། །འགྲེལ་པ་ནི་དཔེ་ལ་ནི་ཞེས་བྱ་བའོ། །བསྒྲུབ་པར་བྱ་བའི་ཆོས་ནི་དེའི་ངོ་བོར་དེའི་བདག་ཉིད་དུ་སྒྲུབ་པར་བྱེད་པའི་རང་གི་ངོ་བོར་སྟོན་ཏོ། །ཇི་ལྟར་ཞེ་ན་དེའི་རང་གི་ངོ་བོ་
[108a.5]རྒྱུར་གྱུར་པ་ཉིད་ཀྱིས་དེ་ཙམ་དང་འབྲེལ་པས་ཏེ་དེས་སོ། །ཆོས་མཐུན་པའི་དཔེ་ལ་སྒྲུབ་པར་བྱེད་པ་ཡོད་ན་བསྒྲུབ་བྱའི་ཆོས་ཡོད་པར་བརྗོད་པ་ཡིན་ལ་དེ་ཙམ་དང་རྗེས་སུ་འབྲེལ་པ་དེ་ཉིད་ནི་རྗེས་སུ་འགྲོ་བ་ཡིན་ཏེ་ཆོས་མཐུན་པའི་དཔེ་ནི་རྗེས་སུ་འགྲོ་བ་རབ་ཏུ་སྟོན་པ་ཙམ་གྱི་
[108a.6]རང་བཞིན་ཡིན་པའི་ཕྱིར་རོ། །རྗེས་སུ་འགྲོ་བ་དེ་ཡང་དེའི་རང་བཞིན་ངོ་བོ་ཉིད་ཀྱིས་འགྱུར་བ་ཡིན་པ་དེས་ན་རྗེས་སུ་འགྲོ་བ་བསྟན་པས་དེའི་བདག་ཉིད་དུ་རྟོགས་པ་ཡིན་ནོ། །རྗེས་སུ་འགྲོ་བ་བསྟན་པས་དེའི་བདག་ཉིད་བརྗོད་པར་འགྱུར་རོ་ཞེས་བྱ་བ་གང་ཡིན་པ་འདི་ལ་
[108a.7]རིགས་པ་ཅི་ཡོད་ཅེ་ན། བརྗོད་པ་ཅུང་ཟད་བྱས་པ་དེ་ཐམས་ཅད་མི་རྟག་གོ་ཞེས་ཆོས་མཐུན་པའི་དཔེར་རྗེས་སུ་འགྲོ་བ་བསྟན་པ་ན་འབྲས་བུ་བྱས་པའི་ངོ་བོ་ཉིད་སྐྱེད་པར་བྱེད་པའི་རྒྱུ་གང་ཡིན་པ་དེ་ནི་མི་རྟག་པའི་ངོ་བོ་སྐྱེད་པར་བྱེད་དོ་ཞེས་སྐད་ཅིག་གི་འཇིག་པར་སྟོན་པར་
[108b]
[108b.1]འགྱུར་བའི་ཚད་མ་བརྗོད་པར་འགྱུར་བ་ཡིན་ནོ། །དེ་ལྟར་མ་ཡིན་ན་ནི་བྱས་པའི་མཚན་ཉིད་ཀྱི་ཆོས་གཅིག་ཡོད་པ་ན་གཞན་མི་རྟག་པ་ཡང་ཡོད་པར་འགྱུར་རོ་ཞེས་བྱ་བའི་ངེས་པ་མེད་པའི་ཕྱིར་འཁྲུལ་བར་དོགས་པར་འགྱུར་རོ། །དེ་ལྟར་ཡིན་དང་འདི་འཁྲུལ་པ་མེད་པར་
[108b.2]བསྟན་པ་ཉིད་དུ་མི་འགྲུབ་བོ། །དེས་ན་འདི་ཇི་ལྟ་མི་འཁྲུལ་པར་བརྗོད་པ་དེ་གང་ལས་དེ་ལྟ་བུ་ཉིད་དུ་འགྲུབ་པ་དེ་མཚོན་པར་བྱེད་པ་ཉིད་ཡིན་ན་དེ་ལྟར་རྟོགས་པའི་རིགས་པ་དེ་ཉིད་ཀྱིས་བསྟན་པར་བྱས་པ་ཇི་ལྟར་རྟོགས་པ་དེ་ཁོ་ན་བཞིན་དུ་འགྱུར་རོ། །དེ་བཤད་པ་ནི་ཚད་
[108b.3]མ་དེས་ཀྱང་ཞེས་བྱ་བ་ནས་བཀག་པའི་ཕྱིར་རོ་ཞེས་བྱ་བའི་མཐར་ཐུག་པའོ། །གལ་ཏེ་གང་བྱས་པ་དེ་ཐམས་ཅད་མི་རྟག་པ་སྟེ་དཔེར་ན་བུམ་པ་བཞིན་ནོ་ཞེས་བསྟན་པ་ཉིད་ཀྱིས་དེ་ལྟར་འགྲུབ་ན་གཞན་མཚོན་པར་བྱེད་པ་ལ་མི་ལྟོས་པར་འགྱུར་རོ། །ཅི་སྟེ་ཡང་རང་
[108b.4]ཉིད་མ་གྲུབ་ཅིང་ནུས་པ་གཞན་ཡང་མཚོན་པར་མི་བྱེད་པ་ནི་ཐེ་ཙོམ་ཟ་བ་ཡང་ངེས་པ་དང་ལྡན་པ་ཉིད་དུ་བསྟན་པར་འགྱུར་བའི་ཕྱིར་དེ་ཇི་ལྟ་བ་བཞིན་མ་ཡིན་པ་ཁོ་ནར་བསྟན་པར་འགྱུར་རོ། །ནུས་པའི་རིགས་པ་མཚོན་པར་བྱེད་པས་ནི་དེའི་རྩ་བ་ཅན་གྱི་བསྟན་པ་དེ་ལྟ་བུ་
[108b.5]ཁོ་ནའོ་ཞེས་བྱ་བར་གྲུབ་པ་ཁོ་ནའོ། །འདི་ལྟར་དཔེས་ནི་འདི་ན་ཇི་ལྟ་བར་ཐམས་ཅད་དུ་དེ་བཞིན་ནོ་ཞེས་མངོན་སུམ་གྱི་བྱེད་པ་ཉེ་བར་སྡུད་པ་ཡིན་ནོ། །མངོན་སུམ་ཙམ་ནི་ནུས་པ་མ་ཡིན་ཏེ། གཅིག་ཏུ་ཅི་ཞིག་ལྟར་ཉམས་སུ་མྱོང་བས་ཐམས་ཅད་དུ་དེ་ལྟ་བུ་ཉིད་དུ་མི་
[108b.6]འགྲུབ་པའི་ཕྱིར་རོ། །དེས་ན་ཇི་ལྟར་དཔེ་མེད་པའི་སྒྲ་ཉིད་ཀྱིས་བརྗོད་ན་སྒྲ་ནུས་པ་མེད་པའི་ཕྱིར་ཇི་ལྟ་བ་བཞིན་རྟོགས་པ་མེད་པ་དེ་བཞིན་དུ། དཔེས་ཀྱང་ཕྱོགས་གཅིག་པའི་མངོན་སུམ་ཉེ་བར་ལེན་ན་མི་རྟོགས་པ་ཁོ་ནའོ། །དེས་ན་ངག་བཞིན་དུ་མངོན་སུམ་ཡང་
[108b.7]འདི་ལ་ནུས་པ་མེད་པ་དེས་ན་ནུས་པ་མཚོན་པ་ཉིད་དེའི་བྱེད་པ་ཡིན་ནོ། །དཔེ་ནི་འབྲེལ་པ་མཚོན་པར་བྱེད་པ་ཉིད་ཡིན་གྱི་སྟོན་པར་བྱེད་པ་ནི་མ་ཡིན་ཏེ། དེ་བཞིན་དུ་ངེས་པ་དང་ལྡན་པར་རྟོགས་པ་དེ་མེད་ན་མེད་པའི་ཕྱིར་རོ། །བསྟན་པ་ནི་འདིར་ཇི་ལྟ་བ་བཞིན་ནོ་ཞེས་བྱ་
[109a]
[109a.1]བ་འདི་ཙམ་ཞིག་རྟོགས་པ་ཡིན་གྱི་འབྲེལ་པ་ནི་མ་ཡིན་ནོ། །དེར་དེའི་བདག་ཉིད་འཛིན་པའི་ཚད་མ་འཇུག་པ་ཡང་མ་ཡིན་ཏེ། འདིར་ཆོས་གཞན་གཞན་གྱི་བདག་ཉིད་ཀྱི་ཆོས་ཉིད་རྟོགས་ཀྱི། ཆོས་ཅན་ངེས་པ་ལ་བརྟེན་པ་ཉིད་དུ་ནི་མ་ཡིན་པའི་ཕྱིར་རོ། །
[109a.2]ངེས་པའི་ཆོས་ཅན་ཡང་དཔེར་བརྗོད་པ་མ་ཡིན་ནོ། །འབྲས་བུའི་གཏན་ཚིགས་ལ་ཡང་གང་ན་དུ་བ་ཡོད་པ་དེ་ན་མེ་ཡོད་དེ། དཔེར་ན་ཚང་བང་བཞིན་ནོ་ཞེས་བྱ་བ་འདི་ནི་འབྲེལ་པ་མ་ཡིན་ནོ། །དུ་བ་ཡོད་ན་མེ་ཡོད་ན་ནི་འབྲལ་པ་མ་ཡིན་ཏེ། འོན་ཀྱང་མེ་ཡོད་ན་དུ་བ་ཡོད་པའོ། །
[109a.3]གལ་ཏེ་འབྲེལ་པ་འཛིན་པའི་ཚད་མའི་ཡུལ་ཉིད་ཀྱིས་ཚང་བང་ཉེ་བར་ལེན་པ་ཡིན་ན་ནི་འབྲེལ་པ་ཇི་ལྟ་བ་བཞིན་འགྱུར་གྱི་བཟློག་པར་ནི་མ་ཡིན་ནོ། །དེ་ན་འདིར་ཡང་ཆོས་མཐུན་པ་ཉིད་ཅན་གྱི་དཔེས་རྗེས་སུ་འགྲོ་བ་ཉིད་སྟོན་པ་ན་དེ་དག་གཞན་དུ་མི་འཐད་པས་འཕངས་པ་འབྲེལ་
[109a.4]པ་ཉེ་བར་སྟོན་པར་བྱེད་པ་ཡིན་ནོ། །དེ་ཡང་གལ་ཏེ་ཆོས་ཅན་དེ་ཉིད་ལ་མཐོང་བ་ཡིན་ན་དེ་ཉིད་དེ་འཛིན་པའི་ཚད་མའི་ཡུལ་དུ་འགྱུར་རོ། །ཅི་སྟེ་གཞན་དུ་རྒྱུ་དང་འབྲས་བུའི་དངོས་པོ་བཟུང་ལ་དེ་ཡང་ཤེས་བཞིན་པ་ཉིད་གང་ན་དུ་བ་ཡོད་ན་མེ་ཡོད་པར་དམིགས་པར་འགྱུར་
[109a.5]བ་དེ་དཔེར་བྱེད་ན་ནི་དེའི་ཚེ་འབྲེལ་པ་འཛིན་པའི་ཚད་མའི་ཡུལ་གཞན་ཉིད་ཡིན་ལ། དཔེ་ཡང་གཞན་ཉིད་ཡིན་པར་གསལ་ཏེ། གལ་ཏེ་འདི་དཔེ་མེད་པའི་ངག་གིས་ཀྱང་མཚོན་པར་ནུས་པའི་ཕྱིར་དཔེས་དོན་མེད་དོ་ཞེ་ན་མ་ཡིན་ཏེ། དཔེ་ཡོད་ན་ངག་དེར་མཐར་ཐུག་པར་འགྱུར་
[109a.6]བའི་ཕྱིར་རོ། །དཔེས་སྟོང་པ་ནི་ཉེ་བར་དགོད་པ་མ་ཡིན་ཏེ་འགལ་བ་མེད་པའི་ཕྱིར་དང་རྟོགས་པར་བྱེད་པའི་ཚུལ་མི་འདྲ་བའི་ཕྱིར་རོ། །དེའི་ཕྱིར་དེ་སྟོན་པའི་ངག་ལས་ཆོས་མཐུན་པའི་དཔེ་གཞན་མ་ཡིན་ནོ། །དེ་ཉིད་ཀྱི་ཕྱིར་དམ་བཅའ་བ་ལ་སོགས་པ་ལྟར་སྦྱོར་བར་བྱེད་
[109a.7]པ་མ་ཡིན་པས་མི་བརྗོད་པ་གསལ་བ་ཡིན་ཏེ་རྗེས་སུ་འགྲོ་ལྡོག་གི་ངག་གི་རང་བཞིན་ཡིན་པའི་ཕྱིར་རོ། །དེ་བཞིན་དུ་རང་བཞིན་གྱི་གཏན་ཚིགས་ཆ་དེའི་ངོ་བོར་སྟོན་པ་དཔེའི་བྱེད་པ་ཡིན་པར་བསྟན་ནས། འབྲས་བུའི་གཏན་ཚིགས་ལ་བཤད་པ། ཡང་ན་དཔེ་ལ་
[109b]
[109b.1]བསྒྲུབ་པར་བྱ་བའི་ཆོས་ནི་དངོས་པོ་ཐ་དད་པ་ལ་འབྲས་བུའི་མཚན་ཉིད་དོན་གཞན་གྱི་རྒྱུ་དངོས་པོར་སྟོན་ཏོ། །གང་གི་ཚེ་དཔེས་དུ་བ་ཡོད་ན་མེ་ཡོད་པར་བསྟན་ནས་སྔར་བཤད་པའི་ཚུལ་དུ་དུ་བ་ལ་སོགས་པ་དོན་གཞན་དུ་གྱུར་པ་ལ་རྒྱུའི་དངོས་པོ་ཉིད་དུ་བསྟན་པར་གྱུར་པ་ཡིན་ཏེ།
[109b.2]དེ་ལྟར་བཤད་པ་ནི་དེ་ཡོད་པ་ཉིད་ན་ཡོད་པའི་ཕྱིར་རོ་སྟེ། དེ་ཡོད་ན་ཡོད་པ་ཉིད་ཀྱི་ཕྱིར་ཞེས་བྱ་བའི་དོན་ཏོ། །དེ་ལྟར་རྗེས་སུ་འགྲོ་བ་བསྟན་པས་མེ་དུ་བའི་རྒྱུ་ཡིན་ནོ་ཞེས་བྱ་བར་རྟོགས་པ་ཡིན་ཏེ། དེ་ལྟར་རྟོགས་པ་མེད་པར་རྗེས་སུ་འགྲོ་བ་ཉིད་མི་འགྲུབ་པའི་ཕྱིར་རོ། །ད་ནི་
[109b.3]ཆོས་མི་མཐུན་པའི་དཔེས་ཀྱང་འབྲེལ་པ་གྲུབ་པ་ཉིད་དུ་སྟོན་པ་ནི། དེ་ལྟར་ཞེས་བྱ་བའོ། །དེའི་ངོ་བོ་དེའི་བདག་ཉིད་དང་རྒྱུ་དང་འབྲས་བུའི་ངོ་བོ་དེ་དག་རབ་ཏུ་གྲུབ་པ་ཡིན་ན་ཆོས་མི་མཐུན་པའི་དཔེ་ལ་ལྡོག་པ་རབ་ཏུ་གྲུབ་པོ། །ཆོས་མི་མཐུན་པའི་དཔེ་ནི་ལྡོག་པ་བསྟན་པའི་
[109b.4]དོན་ཡིན་ལ། དེ་ཡང་འབྲེལ་བ་གྲུབ་ན་འགྲུབ་བོ། །དེས་ན་དེ་ནི་དེ་ཉིད་མཚོན་པ་ན་ལྡོག་པ་སྟོན་པ་ཡིན་ནོ། །གཏན་ཚིགས་གཉི་གར་ཡང་ལྡོག་པའི་རང་གི་ངོ་བོ་ཉིད་བཤད་པ་ནི། མི་རྟག་པ་ཉིད་མེད་ན་ཞེས་བྱ་བ་ཡིན་ནོ། །དེ་ཡང་འབྲེལ་པའི་རྩ་བ་ཅན་ཉིད་དུ་སྟོན་པ་ནི་འདི་
[109b.5]ལྟར་ཞེས་བྱ་བ་ཡིན་ནོ། །གལ་ཏེ་ཆོས་མཐུན་པ་དང་མི་མཐུན་པ་ཅན་གྱི་ངག་དག་ལས་དེ་དག་གི་དཔེ་ཐ་མི་དད་ན་རང་གི་དོན་གྱི་རྗེས་སུ་དཔག་པ་ལ་མེད་པར་འགྱུར་རོ་ཞེ་ན། འདི་ལ་བཤད་པ། ཇི་ལྟར་སྦྱོར་བ་མཐོང་བ་གོམས་པ་ལས་རང་གི་དོན་གྱི་རྗེས་སུ་དཔག་པར་སྒྲ་
[109b.6]མེད་ཀྱང་སྒྲའི་རྟོགས་པའི་ཚུལ་དུ་འཕེན་པར་བྱེད་པ་དང་འཕང་བར་བྱ་བའི་ངོ་བོར་ཆོས་མཐུན་པའམ་མི་མཐུན་པར་ཁྱབ་པ་རྟོགས་པ་དེ་བཞིན་དུ་དཔེ་སྟེང་ཐོགས་སུ་ངེས་པ་ཇི་ལྟར་བསྟན་པའི་མེད་ན་མི་འབྱུང་བའི་ངོ་བོར་གྱུར་པ་ཡིན་ནོ། །དེའི་ཕྱིར་དཔེ་ལ་ཁྱབ་པ་བརྗོད་པ་
[109b.7]ལས་ལྷག་པའི་ཉེ་བར་སྦྱོར་བ་ནི་མེད་དོ། །དེ་ཉིད་ཀྱི་ཕྱིར། གཏན་ཚིགས་མཚན་ཉིད་གསུམ་ཉིད་ལས། དཔེ་ནི་ལོགས་སུ་བརྗོད་མ་ཡིན། །ཞེས་བཤད་དོ། །རྣམ་པ་འགའ་ཞིག་ལྟར་ཡང་ཉེ་བར་སྦྱོར་ན་ནི་མཚན་ཉིད་གསུམ་བརྗོད་པ་ཡང་ལོགས་སུ་བརྗོད་པར་འགྱུར་
[110a]
[110a.1]རོ། །འབྲེལ་པ་གྲུབ་པས་ལྡོག་པ་གྲུབ་པའི་ཕྱིར་གཞི་མེད་ཀྱང་གཏན་ཚིགས་ཀྱི་ལྡོག་པ་རབ་ཏུ་འགྲུབ་པར་འགྱུར་རོ། །གང་གི་ཚེ་དཔེ་ལ་དེ་ལྟར་དམིགས་པ་དང་མ་དམིགས་པ་དག་གིས་ཁྱབ་པ་འགྲུབ་པ་དེའི་ཚེ་ནི་གཞི་མེད་པར་ལྡོག་པར་མི་འགྱུར་ཏེ།
[110a.2]མི་རྟག་པ་མེད་པའི་ཕྱིར་རྟའི་རྭ་ལ་སོགས་པ་ལ་བྱས་པ་མེད་པ་ཡིན་ནམ་འོན་ཏེ་རྟའི་རྭ་ཉིད་མེད་པའི་ཕྱིར་དངོས་པོའི་ཆོས་ཉིད་ཀྱིས་བྱས་པ་ཉིད་དང་མི་ལྡན་པ་ཡིན་ནོ་ཞེས་སོ། །དེས་ན་དེ་མེད་པའི་ཕྱིར་དེ་ལ་མེད་པའི་ཕྱིར་འདི་ཅིར་ཡང་མི་རུང་ངོ་། །དེ་མེད་པ་ཉིད་ཀྱིས་མི་འཇུག་པ་ཡིན་
[110a.3]གྱི་མི་རྟག་པ་མེད་པའི་ཕྱིར་ནི་མ་ཡིན་ནོ་ཞེས་མི་འཇུག་པ་གཞན་དུ་གྲུབ་པས་ན་ལྡོག་པ་མ་ངེས་པ་ཉིད་དུ་འགྱུར་རོ། །གང་གི་ཚེ་གཞི་ཡོད་ཀྱང་དེ་ཙམ་ལ་བསྒྲུབ་བྱ་མེད་ན་མེད་པ་ངེས་པའི་རྟེན་མ་ཡིན་པའི་ཕྱིར་དཔེ་ལ་གནས་པའི་ངེས་པས་དོན་འགའ་ཡང་མེད་པ་དེའི་ཚེ་དེར་
[110a.4]ཡང་གཉི་ག་འདོད་རྒྱལ་བར་མེད་པ་ཡིན་ནོ་ཞེས་དོགས་ལ་འདིར་ཡང་དངོས་པོའི་ཆོས་ཡིན་པའི་ཕྱིར་མེད་པ་རི་བོང་གི་རྭ་ལ་སོགས་པ་ལ་བྱེད་པ་ཡིན་ནོ་ཞེས་དོགས་པས་གཞི་མེད་ཀྱང་ཁྱད་པར་མེད་ལ། སྒྲ་བཞིན་དུ་མངོན་སུམ་ཡང་རང་ཉིད་ངེས་པའི་རང་བཞིན་ཡིན་པ་ཡལ་བར་
[110a.5]དོར་ཏེ་ངེས་པའི་རྒྱལ་མཚན་མཚོན་པར་བྱེད་པ་ཉིད་ཀྱིས་ངེས་པར་བྱེད་པ་ཡིན་པ་ན་གཞི་ཡོད་པ་དང་མེད་པ་དག་ལ་ཁྱད་པར་ཡོད་པ་མ་ཡིན་ནོ། །གལ་ཏེ་དཔེ་དང་བཅས་པའི་ཁྱབ་པར་བརྗོད་པ་ཡང་དོན་མ་ངེས་པ་ཉིད་ཀྱིས་འབྲེལ་པ་ཉིད་མཚོན་པ་ན་ངེས་པར་འགྱུར་བ་ཡིན་པ་ན་འོ་ན་
[110a.6]འབྲེལ་པ་དེ་ཉིད་མཚོན་པར་བྱ་བའི་ཁྱབ་པ་བརྗོད་པས་ཅི་བྱ་ཞེ་ན། ཇི་ལྟར་འབྲེལ་པ་ཡོད་ཀྱང་རྗེས་སུ་འགྲོ་བ་དང་ལྡོག་པས་ཆོད་པས་བསྒྲུབ་པར་བྱ་བ་རྟོགས་པ་འདི་ནི་གཏན་ལ་ཕབ་ཟིན་ཏོ། །དེས་ན་དེའི་ཡན་ལག་དང་མི་འབྲལ་བའི་ཕྱིར་རང་དབང་མ་ཡིན་ནོ། །དེ་ལྟར་ན་ཕྱོགས་ལ་
[110a.7]སོགས་པའི་རྣམ་པར་དབྱེ་བ་ནི་ངག་ཙམ་གྱི་རང་བཞིན་ཉིད་མ་ཡིན་ནོ། །དངོས་པོའི་ཡན་ལག་ཏུ་མ་གྱུར་པ་བརྡ་ཙམ་གྱིས་ནི་བསྟན་བཅོས་བྱེད་པ་དག་མཚན་ཉིད་སྟོན་པ་མ་ཡིན་ནོ། །འདི་ལྟར་མཐུན་པའི་ཕྱོགས་དང་མི་མཐུན་པའི་ཕྱོགས་ལ་ཡོད་པ་དང་མེད་པས་ནི་རྗེས་སུ་འགྲོ་
[110b]
[110b.1]ལྡོག་གཉིས་བརྗོད་ལ། རྟོགས་པར་བྱ་བའི་ཆོས་ཀྱི་རྟེན་གྱིས་ནི་དེ་དག་ལས་ཕྱོགས་གཞན་ཁོ་ནའོ། །ཁྱབ་པ་སྟོན་པའི་སྐབས་སུ་ནི་ངེས་པའི་ཆོས་ཅན་འཛིན་པ་ཡན་ལག་མ་ཡིན་པའི་ཕྱིར་རྗེས་སུ་དཔག་པར་བྱ་བ་ཉིད་དམ་དཔེ་ཉིད་ལ་ཁྱབ་པར་བརྗོད་པར་བྱའི་ཞེས་བྱ་བ་འདི་གཉི་
[110b.2]ག་ཡང་མ་འབྲེལ་པ་ཡིན་ཏེ། གང་དང་གང་བྱས་པ་དེ་དང་དེ་མི་རྟག་པ་ཡིན་ནོ་ཞེས་ངེས་པ་ཡོངས་སུ་འཛིན་པ་མེད་པས་ན་འདི་གང་གི་ཁྱབ་པ་མ་ཡིན་རྗེས་སུ་དཔག་པར་བྱ་བ་ཙམ་ལ་མི་བརྟེན་པའི་ཕྱིར་རོ། །ཕྱིའི་ཁྱབ་པ་ཡང་མ་ཡིན་ཏེ། དཔེ་ཙམ་ལ་མི་གནས་པའི་ཕྱིར་རོ། །
[110b.3]དེ་ལྟར་སྤྲོས་པས་ཆོག་གོ། །དེ་ལྟར་ན་འོ་ན་རྗེས་སུ་འགྲོ་ལྡོག་བཞིན་དུ་འབྲེལ་པ་ཡང་གཞན་གྱི་དོན་གྱི་རྗེས་སུ་དཔག་པར་བརྗོད་པར་བྱ་བ་ཡིན་པའི་ཕྱིར་ཚིག་ཡན་ལག་གསུམ་པར་མི་འགྱུར་རོ་ཞེ་ན་མ་ཡིན་ཏེ་ཁྱབ་པའི་ཚིག་རྟོགས་ན་འབྲེལ་པ་དོན་གྱིས་གོ་བའི་ཕྱིར་རོ། །
[110b.4]དེ་མ་རྟོགས་ན་ནི་བརྗོད་པའི་ཁྱབ་པ་ཡང་མི་རྟོགས་པས་དེ་བརྗོད་པ་དོན་མེད་པར་འགྱུར་བའི་ཕྱིར་རོ། །འབྲེལ་པ་ནི་གཏན་ཚིགས་ཀྱི་མཚན་ཉིད་མ་ཡིན་གྱི་འོན་ཀྱང་ཚུལ་གསུམ་ཉིད་ཡིན་པས་འདི་ཚུལ་གཞན་དུ་མི་འགྱུར་རོ། །དེས་ན་དེ་ལྟར་དེ་དག་མེད་ནའང་དེ་མེད་ཅེས་བྱ་བ་གཞུང་གཟུགས་པའི་ཕྱིར་
[110b.5]མི་མཁས་པའི་དབང་དུ་བྱས་ཏེ་གཞི་མེད་པར་ཡང་ཞེས་བྱ་བ་འདིའི་མཐར་ཐུག་པར་དཔེའི་དགོས་པ་འབྲེལ་པ་ཙམ་ཡིན་པར་བརྗོད་པ་ཡིན་ནོ། །མཁས་པའི་དབང་དུ་བྱས་ནས་ཀྱང་གཞུང་གཟུགས་པའི་ཕྱིར་གང་དག་ལ་ཞེས་བྱ་བ་སྨོས་སོ། །གང་དག་ལ་དེའི་ངོ་བོ་དང་
[110b.6]རྒྱུའི་དངོས་པོ་དེའི་བདག་ཉིད་དང་དེ་ལས་བྱུང་བ་རབ་ཏུ་གྲུབ་པ་ལའོ། །མཁས་པའི་དབང་དུ་བྱས་ནས་ཚུལ་གཞན་དུ་བསྟན་པའི་ཕྱིར་རོ་ཞེས་སྨོས་སོ། །འབྲེལ་པ་རིག་པའི་མཁས་པ་དེ་རྣམས་ལ་ནི་འབྲེལ་པ་རབ་ཏུ་སྟོན་པའི་ཐབས་དང་འབྲེལ་བ་གཏན་ཚིགས་
[110b.7]འབའ་ཞིག་བརྗོད་པར་ཟད་དོ། །གཏན་ཚིགས་ནི་བརྗོད་ལ་འབྲེལ་པ་རབ་ཏུ་སྟོན་པའི་ཐབས་དང་བྲལ་བ་ཞེས་བྱ་བས་ནི་ཕྱོགས་ཀྱི་ཆོས་ཙམ་འབའ་ཞིག་བརྗོད་པར་བྱའོ་ཞེས་བཤད་པར་འགྱུར་རོ། །ཚུལ་གསུམ་མེད་ན་རྟགས་ཉིད་དུ་མི་འགྱུར་བའི་ཕྱིར་རོ། །འདི་
[111a]
[111a.1]སྐད་བརྗོད་པ་ཡིན་ཏེ། མཁས་པའི་དབང་དུ་བྱས་ནས་ནི་གཏན་ཚིགས་ཙམ་བརྗོད་པ་ཉིད་རིགས་པའི་ཕྱིར་དཔེ་ཉིད་ཀྱིས་ཅུང་ཟད་ཀྱང་བྱར་མེད་པའི་ཕྱིར་གཞིས་ནི་གསལ་བར་ཡང་བྱར་མེད་དོ། །འདི་ལྟར་མེ་དུད་ཀྱི་འབྲེལ་པ་རིག་པའི་མེ་དོན་དུ་གཉེར་
[111a.2]བ་དམིགས་ནས་གང་ན་དུ་བ་འདི་ཡོད་པ་དེར་སོང་ཤིག་ཅེས་བརྗོད་པ་ཡིན་ནོ། །དེས་ན་མི་མཁས་པ་འབྲེལ་པ་མི་རྟོགས་པ་ལ་དེ་དག་མེད་ན་དེ་མེད་ཅེས་བརྗོད་པ་ཙམ་གྱིས་འགྱུར་བའི་ཆོས་མི་མཐུན་པའི་དཔེ་དང་། ཆོས་མཐུན་པའི་དཔེའི་གཞི་དོན་མེད་དོ། །མཁས་པ་ལ་ནི་
[111a.3]བརྗོད་པ་དང་དཔེའམ་དེའི་གཞི་ཡང་རུང་སྟེ། འདི་ཐམས་ཅད་དགོས་པ་མེད་དོ་ཞེས་གང་གི་དོན་དུ་ཞེས་བྱ་བ་ལ་སོགས་པས་འཆད་དོ། །ལྡོག་པ་ནི་འབྲེལ་པ་རབ་ཏུ་བསྟན་པའི་དོན་ཡིན་ན་དེ་ནི་གྲུབ་པ་དེས་ན་དེ་གྲུབ་པ་དེའི་ཚེ་དཔེ་བརྗོད་པས་ཅི་ཞིག་བྱ། དེ་ལྟ་ཡིན་དང་སྐབས་
[111a.4]ཀྱི་དོན་གྲུབ་པ་ཉིད་དོ་ཞེས་བཤད་པ་ནི་དེ་རབ་ཏུ་བསྟན་ན་ཡང་ཞེས་བྱ་བ་ཡིན་ནོ། །དཔེ་བརྗོད་པ་ཉིད་དགོས་པ་མེད་ན་དེ་རབ་ཏུ་བསྟན་པ་ཡིན་ན་འགྱུར་བའི་ཆོས་མི་མཐུན་པའི་དཔེ་གཞི་གང་ཡིན་པ་དེ་ཡང་དོན་མེད་པ་ཁོ་ནའོ། །དཔེ་བརྗོད་ན་དེའི་ཚེ་གཞིའི་ཡུལ་ཅན་གྱིས་
[111a.5]དཔྱོད་པ་འཇུག་པ་ཞིག་ན་དེ་བརྗོད་པ་ཡང་མེད་ན་ནི་གཞི་ཉེ་བར་མཁོ་བ་མེད་པར་གདོན་མི་ཟ་བ་ཁོ་ནའོ། །སློབ་དཔོན་ཡང་འདི་བཞེད་པ་ཡིན་ནོ་ཞེས་བཤད་པ་ནི་སྙམ་དུ་དགོངས་ཤིང་བྱ་བའོ། །འོ་ན་གང་གི་ཚེ་ཕྱིར་རྒོལ་བ་ནམ་མཁའ་ལ་སོགས་པའི་རྟག་པ་ཁས་མི་ལེན་
[111a.6]པའི་ཚེ་ཇི་ལྟར་རྟག་པ་ལ་བྱས་པ་ཉིད་ལྡོག་ཅེ་ན་ཞེས་དོགས་པ་བསུ་ནས་དེའི་ཐེ་ཚོམ་ཉིད་མེད་དེ། དེ་མེད་པས་དེ་ལ་མི་འཇུག་པའི་ཕྱིར་རོ་ཞེས་སློབ་དཔོན་ཕྱོགས་ཀྱི་གླང་པོ་གཞི་སྤོང་བར་མཛད་དོ། །དེས་ན་དེ་ལྟར་དཔེ་མེད་པ་གཞི་སྤོང་བར་གསུངས་པས་འབྲེལ་པ་
[111a.7]བཞེད་པ་ཁོ་ནའོ་ཞེས་བསྟན་ནས་ཚུལ་གཞན་གྱིས་ཀྱང་སློབ་དཔོན་འབྲེལ་པ་ཞལ་གྱིས་བཞེས་པར་སྟོན་པ་ནི་དེ་ཉིད་ཀྱི་ཕྱིར་ཞེས་བྱ་བའོ། །དཔེ་ལ་དེའི་ངོ་བོ་དང་། རྒྱུའི་དངོས་པོ་སྟོན་པའི་མཚན་ཉིད་གང་གིས་གཞི་སྤོང་བར་བཤད་པའི་གཏན་ཚིགས་དེ་ཉིད་ཀྱི་
[111b]
[111b.1]ཕྱིར་གང་གིས་འབྲེལ་པ་ཤེས་པའི་རྟོགས་པ་པོ་དེ་ལ་གཉིས་ལས་ཞེས་བྱ་བ་སྐབས་སུ་བབས་པའི་དཔེ་གཉིས་ཀྱི་ནང་ནས་གང་ཡང་རུང་བ་ཞིག་སྨྲས་པས་དོན་གྱིས་གོ་བས་ཤུགས་ཀྱིས་ཐོབ་པ་དེ་རྒྱུར་གྱུར་པས་དྲན་པ་ཡང་དག་སྐྱེ་བར་འགྱུར་རོ། །འདི་སྐད་བརྗོད་པ་ཡིན་ཏེ་གང་གི་
[111b.2]ཚེ་དཔེ་འབྲེལ་པ་རབ་ཏུ་སྟོན་པར་བྱེད་པ་དེའི་ཚེ་དེ་རྣམ་པ་གཉིས་ཡིན་ཡང་གང་ཡང་རུང་བ་ཞིག་བརྗོད་པས་འབྲེལ་བ་ཤེས་པ་ན་དཔེ་གཉིས་པ་ལས་དྲན་པ་ཉེ་བར་སྐྱེ་བར་འགྱུར་རོ། །འདི་ཉིད་སྟོན་པ་ནི་ཡང་ན་ཞེས་བྱ་བའོ། །ཡང་ན་དོན་གྱིས་གོ་བས་གང་ཡང་རུང་བས་གཉི་ག་
[111b.3]རབ་ཏུ་བསྟན་པའི་ཕྱིར་རོ་ཞེས་བཤད་པ་གང་ཡིན་པ་སྟེ་སྔར་བཤད་པ་འབའ་ཞིག་ཏུ་མ་ཟད་ཀྱི་དེར་ཡང་སློབ་དཔོན་དཔེས་དེའི་ངོ་བོ་དང་རྒྱུའི་དངོས་པོ་སྟོན་པར་དགོངས་ཏེ། དོན་གྱིས་གོ་བས་གཅིག་བརྗོད་པས་དཔེ་ཅིག་ཤོས་འགྲུབ་པར་བཤད་དོ། །ཡང་ཇི་ལྟར་ན་དཔེ་དེའི་ངོ་བོ་དང་
[111b.4]རྒྱུའི་དངོས་པོ་སྟོན་པ་ཡིན་ལ། དོན་གྱིས་གོ་བས་གཞན་དྲན་པར་ཡང་ཇི་ལྟར་འགྱུར་ཞེ་ན་འདི་ལྟར་ཞེས་སྨོས་སོ། །འབྲེལ་པ་ཉེ་བར་སྟོན་པ་མདོར་བསྡུས་ནས་བཤད་ཀྱང་རྒྱས་པར་འཆད་དོ། །གང་བྱས་པ་དེ་ནི་མི་རྟག་པའོ་ཞེས་སྨྲས་ན་ཞེས་བྱ་བས་ནི་ཆོས་མཐུན་པ་
[111b.5]བསྟན་ཏོ། །དཔེའི་སྐབས་ཡིན་ཡང་ཆོས་མཐུན་པ་ཙམ་བརྗོད་པ་ནི་ཇི་སྐད་བརྗོད་པའི་ཚུལ་དུ་དཔེ་ཐ་དད་པ་མ་ཡིན་པར་བསྟན་པའི་དོན་དུའོ། །གསལ་བར་ཏེ་གདོན་མི་ཟ་བར་མི་རྟག་པ་གང་ཡིན་པ་འདི་ནི་བྱས་པ་འདིའི་ངོ་བོ་ཉིད་དོ། །ངོ་བོ་ཞེས་བྱ་བ་འདི་ཅི་ཞིག་ཅེ་ན་བཤད་པ་དེ་ཙམ་དང་
[111b.6]འབྲེལ་པའོ། །གང་ཞིག་གང་ཡོད་པ་ཙམ་དང་འབྲེལ་པ་དེ་ནི་དེའི་ངོ་བོ་ཡིན་ལ། མི་རྟག་པ་ཉིད་ཀྱང་བྱས་པ་ཡོད་པ་ཙམ་དང་འབྲེལ་པ་ཡིན་ནོ། །གལ་ཏེ་གང་བྱས་པ་དེ་ནི་མི་རྟག་པའོ་ཞེས་སྨྲས་ན་ནི་འདིའི་ངོ་བོ་ཉིད་དོ་ཞེས་རྟོགས་པར་ཇི་ལྟར་འགྱུར་ཞེ་ན། དེ་ཡོད་པར་ངེས་
[111b.7]པའི་ཕྱིར་རོ་ཞེས་སྨོས་སོ། །མི་རྟག་པ་དེ་ཡོད་པར་ངེས་པའི་ཕྱིར་འདི་དེའི་ངོ་བོ་ཡིན་ནོ་ཞེས་ཤེས་སོ། །གང་བྱས་པ་དེ་མི་རྟག་པའོ་ཞེས་བྱ་བ་ལ་མི་རྟག་པ་ཉིད་ཡོད་པ་ངེས་པར་རྟོགས་ཏེ། གང་བྱས་པ་ཞེས་བྱས་པ་མཐའ་དག་ཡོངས་སུ་བཟུང་ནས་བསྟན་པའི་ཕྱིར་རོ། །འདི་སྐད་
[112a]
[112a.1]བརྗོད་པ་ཡིན་ཏེ། བྱས་པ་ལས་མི་ལྡོག་པ་ངེས་པར་བསྟན་པས་མི་རྟག་པ་དེ་ཙམ་དང་འབྲེལ་པའི་རང་བཞིན་ངོ་བོ་ཡིན་པར་རྟོགས་པ་ཡིན་ནོ། །དེའི་བདག་ཉིད་དུ་མི་ཤས་ན་དེ་ལྟར་ཉེ་བར་སྟོན་པ་མ་ཡིན་པ་དེས་ན་ཡོད་པ་བཞིན་དུ་དེའི་ངོ་བོར་ཚད་མས་མཐོང་བ་
[112a.2]ཉིད་དུ་དེ་ཉིད་ལས་རྟོགས་སོ། །དེ་བཤད་པ་ནི་ཚད་མས་མཐོང་བ་ཡིན་ནོ་ཞེས་བྱ་བའོ། །གལ་ཏེ་དེའི་བདག་ཉིད་མ་ཡིན་ཡང་དེ་ཡོད་པར་ངེས་པ་ཡོད་པ་མ་ཡིན་ནམ་དེས་ན་ཇི་ལྟར་དེ་ལས་དེ་ཙམ་དང་འབྲེལ་པའི་རང་གི་ངོ་བོར་རྟོགས་ཤེ་ན་དོན་ཐ་དད་པ་མེད་ན་ཞེས་སྨོས་སོ། །རེ་
[112a.3]ཞིག་མི་རྟག་པ་ནི་བྱས་པ་ལས་གཞན་མ་ཡིན་ནོ། །གཞན་མ་ཡིན་པ་དེ་ཡོད་པར་ངེས་པ་གང་ཡིན་པ་དེ་ནི་ཆོས་གཅིག་གི་བདག་ཉིད་དུ་གོ་བར་བྱེད་དོ། །གཞན་མ་ཡིན་ཡང་བྱས་པ་རྩོལ་བ་ལས་བྱུང་བ་ལ་ངེས་པ་མ་ཡིན་པའི་ཕྱིར་རོ། །དེས་ན་ཇི་སྐད་བསྟན་པའི་རྗེས་སུ་འགྲོ་བ་བརྗོད་ན་
[112a.4]དེའི་བདག་ཉིད་དུ་རྟོགས་པར་འགྱུར་རོ། །དེ་བས་ན་དེའི་ངོ་བོ་ཡིན་ནོ་ཞེས་དེའི་བདག་ཉིད་དུ་ཤེས་པས་ན་དོན་གྱི་རང་བཞིན་རྣམ་པར་དཔྱོད་པའི་དོན་གྱིས་གོ་བས་མི་རྟག་པ་ཉིད་མེད་ན་བྱས་པ་ཉིད་མེད་དོ་ཞེས་བྱ་བར་འགྱུར་རོ། །མི་རྟག་པ་ཉིད་མེད་ན་བྱས་པ་མེད་དོ་ཞེས་རྟོགས་
[112a.5]པའི་བྱེད་པ་ཡང་ཡོད་ལ། རྣམ་པ་འདི་ལྟ་བུའི་ངག་གི་དོན་གྱི་རྣམ་པའི་དོན་ཀྱང་ཡོད་པ་ཡིན་ནོ། །དེས་ན་ཞེས་བྱ་བའི་སྒྲ་དོན་འཛིན་པའི་བདག་ཉིད་ཡིན་ན་ནི་དེའི་ངོ་བོར་ཤེས་པ་ལ་དེ་ལྟ་བུའི་དོན་དུ་འགྱུར་བར་བརྗོད་པར་འགྱུར་ན། དེ་ནི་དེའི་ཅི་ཡང་མ་ཡིན་ནོ། །དེས་ན་རྟོགས་པའི་
[112a.6]བྱེད་པ་ཉིད་ཀྱིས་རྣམ་པ་དེ་ལྟ་བུའི་ངོ་བོའི་རྟོགས་པ་བསྟན་པ་ཡིན་ཏེ་རྟོགས་པ་མེད་པ་ལ་དེ་མེད་པའི་ཕྱིར་རོ། །འདིས་ནི་རྗེས་སུ་འགྲོ་བ་བརྗོད་པ་ཉིད་ཀྱིས་ལྡོག་པ་འཕངས་པ་ཡིན་ནོ། །དེས་ན་དེའི་ངོ་བོར་ཤེས་པ་ཞེས་བརྗོད་པར་བྱ་བ་ཁོ་ནའོ། །འདི་ལྟར་གལ་ཏེ་མི་རྟག་པ་
[112a.7]མེད་པར་ཡང་བྱས་པ་ཡོད་ན་ནི་གང་བྱས་པ་དེ་མི་རྟག་པའོ་ཞེས་བྱ་བ་ཉིད་དུ་མི་འགྱུར་ཏེ། བྱས་པ་རྟག་པ་ཡོད་པའི་ཕྱིར་རོ། །དེས་ན་རྗེས་སུ་འགྲོ་བ་ཉིད་ཀྱིས་ལྡོག་པ་འཕངས་པས་འབྲེལ་པ་མདུན་དུ་འགྲོ་བ་ལ་མི་ལྟོས་སོ། །དེ་བཞིན་དུ་རྗེས་ཐོགས་སུ་སྟོན་པར་འགྱུར་
[112b]
[112b.1]བའི་ལྡོག་པ་ཡང་ངོ་ཞེས་དེའི་དགོངས་པ་འདི་ཡིན་ཏེ་གལ་ཏེ་ཡང་འགའ་ཞིག་ཏུ་བྱས་པ་ཡོད་པར་མི་རྟག་པ་ཡོད་པར་འགྱུར་བས་བྱས་པ་དེ་མི་རྟག་པ་ཞེས་བྱ་བ་ཡིན་མོད་ཀྱི། དེ་ལྟ་ན་ཡང་གང་བྱས་པ་ཞེས་དེ་ལྟར་ཁྱབ་པ་མི་འགྲུབ་པོ། །གལ་ཏེ་དེ་ལྟར་བརྗོད་པ་ཙམ་གྱིས་
[112b.2]དེ་ལྟ་ཡིན་པར་འགྱུར་ན་ཁྱབ་པ་བརྗོད་པས་ལྡོག་པ་འཕེན་པར་འགྱུར་རོ་འབྲེལ་པ་ཉིད་ལས་དེ་ལྟར་འགྱུར་བ་ཡིན་ཏེ་དེས་ན་གཅིག་གིས་གཞན་འབྲེལ་བའི་སྒོ་ཁོ་ན་ནས་འཕེན་ཏོ། །དེ་ལྟ་ན་ནི་འབྲེལ་པ་ལས་རྗེས་སུ་འགྲོ་བ་ཡིན་ལ་རྗེས་སུ་འགྲོ་བ་ཉིད་ཀྱིས་ཀྱང་ལྡོག་པ་འཕེན་
[112b.3]པར་འགྱུར་གྱིས་རྗེས་སུ་འགྲོ་བས་ནི་འབྲེལ་པ་རྟོགས་ལ་དེ་ལ་ལྡོག་པ་འཕེན་པ་ནི་མ་ཡིན་ནོ། །འདི་ལྟར་བྱས་པ་ཐམས་ཅད་མི་རྟག་ཅེས་འབྲེལ་པ་ལ་དོན་གྲུབ་ན། གང་གི་ཕྱིར་བྱས་པ་ཐམས་ཅད་མི་རྟག་པ་ཡིན་པ་དེ་ཉིད་ཀྱི་ཕྱིར་མི་རྟག་པ་མེད་ན་བྱས་པ་མེད་དོ་ཞེས་
[112b.4]འགྲུབ་བོ་ཞེ་ན་འདི་ལ་བརྗོད་པ། འདིར་གཅིག་ནི་བརྗོད་པའི་སྒོ་ནས་འཕེན་ལ་གཞན་ནི་ཚད་མའི་སྒོ་ནས་སོ། །དེས་ན་གལ་ཏེ་བྱས་པ་ཐམས་ཅད་མི་རྟག་ཅེས་བྱ་བས་ལྡོག་པ་འཕེན་པ་དེ་ལྟ་ན་ཡང་ཐབས་གང་གི་གཞི་ལས་རྗེས་སུ་འགྲོ་བ་གྲུབ་པ་ཐབས་དེའི་གཞིར་གྱུར་
[112b.5]པ་ཉིད་ཀྱིས་ལྡོག་པ་ཡིན་ནོ། །དེས་ན་དེ་ཉིད་ཀྱི་དེ་འཕེན་ཏོ། །དེ་ཉིད་ཀྱི་ཕྱིར་རང་གི་ངོ་བོར་མེད་པར་ཡོད་པར་འགྱུར་ན་ནི་མ་ཡིན་ཏེ་ཞེས་སྨོས་སོ། །མི་རྟག་པ་བྱས་པའི་རང་གི་ངོ་བོ་ཡིན་པའི་ཕྱིར་དེའི་བདག་ཉིད་དུ་རྟོགས་ན་གང་གི་ཕྱིར་དེའི་རང་གི་ངོ་བོ་ཡིན་པ་དེའི་ཕྱིར་དེ་
[112b.6]མེད་ན་མེད་པར་རྟོགས་པའི་ཕྱིར་དོན་གྱི་གོ་བས་ལྡོག་པ་རྟོགས་སོ། །དེ་དེའི་རང་གི་ངོ་བོ་ཉིད་ཡིན་ན་དེ་དང་ཐ་དད་པ་མེད་པ་ཉིད་ཀྱི་རང་བཞིན་ཡིན་ནོ། །དེས་ན་མི་རྟག་པ་ཉིད་མེད་པ་གང་ཡིན་པ་དེ་ཉིད་བྱས་པ་མེད་པ་ཡིན་ནོ། །གང་གི་ཚེ་དེའི་བདག་ཉིད་རབ་ཏུ་སྟོན་པའི་
[112b.7]རྗེས་སུ་འགྲོ་བས་འབྲས་བུ་ལྡོག་པ་འཕེན་པར་མི་བྱེད་པ་དེའི་ཚེ་ནི་རྗེས་སུ་འགྲོ་བ་ཉིད་མི་འགྲུབ་པོ་ཞེས་བཤད་པ་ནི་དེ་ལྟ་མ་ཡིན་ན་ཞེས་བྱ་བ་ཡིན་ནོ། །ཐ་དད་པ་མེད་པ་མ་ཡིན་ན་བྱས་པ་ཡོད་ན་མི་རྟག་པ་ཉིད་ཡོད་དོ་ཞེས་བྱ་བ་ཉིད་དུ་མི་འགྱུར་རོ། །དེས་ན་དེ་ལྟར་རྗེས་སུ་
[113a]
[113a.1]འགྲོ་བས་འབྲེལ་པ་རྟོགས་པར་བྱེད་པ་ན་ལྡོག་པ་འཕེན་ཏེ། དེ་ལྟ་མ་ཡིན་ན་རྗེས་སུ་འགྲོ་བ་ཉིད་མ་གྲུབ་པར་ཐལ་བའི་ཕྱིར་རོ་ཞེས་བསྒྲུབས་ནས་ཚུལ་འདི་ཉིད་ཆོས་མི་མཐུན་པ་བརྗོད་པ་ལ་ཡང་ཡོད་དོ་ཞེས་བཤད་པ་ནི། དེ་བཞིན་དུ་ཞེས་བྱ་བ་ཡིན་
[113a.2]ནོ། །དེར་ཇི་ལྟ་བ་བཞིན་དུ་འདིར་ཡང་དེ་མེད་ན་དེ་མེད་དོ་ཞེས་སྨྲས་ན་ལྡོག་པ་བརྗོད་པ་ཉིད་ཀྱིས་དེ་རྟོགས་པའི་ཕྱིར་དེའི་ངོ་བོ་ཉིད་དུ་རྟོགས་པས་དེའི་ངོ་བོ་ཉིད་དུ་རིག་པ་ལ་རྗེས་སུ་འགྲོ་བ་དྲན་པ་འབྱུང་ངོ་། །ཆོས་མི་མཐུན་པ་བརྗོད་པ་ལས་དེའི་བདག་ཉིད་དུ་རྟོགས་པ་དེའི་ངོ་
[113a.3]བོ་ཉིད་དུ་རིག་པ་འཐོབ་པོ། །རེ་ཞིག་ཐབས་གཞན་གྱིས་རྗེས་སུ་འགྲོ་བ་རྟོགས་པ་ནི་མ་ཡིན་གྱི། འོན་ཀྱང་དེའི་བདག་ཉིད་ཁོ་ནས་ཡིན་ནོ་ཞེས་བསྟན་པའི་ཕྱིར་དེའི་ངོ་བོ་ཉིད་དུ་རིག་ཅེས་བྱ་བ་དང་དེའི་ངོ་བོ་ཉིད་དུ་རྟོགས་པས་ཞེས་བཤད་དོ། །དེ་ལྟར་བརྗོད་པས་ཇི་ལྟར་དེའི་
[113a.4]ངོ་བོ་ཉིད་དུ་རྟོགས་པ་དེ་བཤད་པ་ནི་འདི་ལྟར་མི་རྟག་པ་ཞེས་བྱ་བའི་ཆོས་འདི་ནི་འདིའི་ངོ་བོ་ཉིད་ཡིན་ཏེ། དེས་ན་མི་རྟག་པ་ཉིད་མེད་ན་བྱས་པ་ཉིད་མེད་པ་ཡིན་ནོ། །དེ་ལྟ་མ་ཡིན་ཏེ་དེའི་བདག་ཉིད་མ་ཡིན་ན་ནི་དོན་གཞན་དེ་མེད་ན་མེད་པར་མི་རུང་བའི་ཕྱིར་རོ། །དེ་ལྟར་རྣམ་པ་
[113a.5]འདིས་དེའི་ངོ་བོ་ཉིད་དུ་རྟོགས་པ་ཡིན་ནོ། །ཇི་སྐད་བཤད་པའི་རྣམ་པ་ཉིད་འབྲས་བུའི་གཏན་ཚིགས་ལ་ཡང་བསྟན་པའི་ཕྱིར་དེ་བཞིན་དུ་ཞེས་སྨོས་སོ། །གང་ན་དུ་བ་ཡོད་པ་དེ་ན་མེ་ཡོད་དོ་ཞེས་སྨྲས་ན། དུ་བ་ནི་མེའི་འབྲས་བུ་ཡིན་ནོ་ཞེས་ཇི་སྐད་བརྗོད་པའི་རྗེས་སུ་འགྲོ་བས་
[113a.6]དེའི་འབྲས་བུ་ཉིད་དུ་ཤེས་པ་དོན་གྱིས་གོ་བས་ལྡོག་པ་རྟོགས་པར་འགྱུར་རོ་ཞེས་ཤིན་ཏུ་རིང་བར་འབྲེལ་ཏོ། །ཇི་ལྟར་དུ་བ་མེའི་འབྲས་བུ་ཡིན་ནོ་ཞེས་རྗེས་སུ་འགྲོ་བས་ཤེས་ཤེ་ན་བཤད་པ། དེས་ན་དུ་བ་ཡོད་ན་གདོན་མི་ཟ་བར་མེ་ཡོད་དོ། །དེ་ལྟ་མ་ཡིན་ཏེ་འབྲས་བུ་ཉིད་མ་
[113a.7]ཡིན་ན་དུ་བ་དེ་དང་འབྲེལ་པ་དེ་ཡོད་ན་ཡོད་པའི་མཚན་ཉིད་དེར་ངེས་པ་མེད་པའི་ཕྱིར་མེའི་མཚན་ཉིད་ཀྱི་ངོ་བོར་རང་དབང་ཅན་དུ་འགྱུར་རོ། །དུ་བ་ཡོད་ན་གདོན་མི་ཟ་བར་ཡོད་པ་སྤངས་ཏེ་དེ་ཡོད་ཀྱང་མེད་པར་འགྱུར་རོ་སྙམ་པར་དོགས་པའོ། །འབྲས་བུ་མ་ཡིན་པ་བྱས་པ་
[113b]
[113b.1]ཡོད་ན་ཡང་མི་རྟག་པ་ཡོད་པ་མ་ཡིན་ནམ་ཞེ་ན། དོན་གཞན་ཞེས་སྨོས་སོ། །དངོས་པོ་ཐ་དད་འབྲེལ་པ་ངེས་པ་མི་འཐད་དོ། །མེ་ཡང་དུ་བ་ལས་ཐ་དད་པ་ཡིན་ནོ། །ད་ལྟ་ཡིན་དང་མེ་མེད་ཀྱང་དུ་བ་ཡོད་པར་འགྱུར་རོ་ཞེས་བཤད་པ་ནི། དེས་ན་ཞེས་བྱ་བའོ། གང་གི་ཕྱིར་མེ་རང་
[113b.2]དབང་དུ་འགྱུར་ཏེ་དུ་བ་ཡོད་པ་ཡིན་ཡང་མེད་པ་དེས་ན་དུ་བ་ཡོད་ཀྱང་མེ་མེད་པའི་ཕྱིར་དུ་བ་འབའ་ཞིག་ཏུ་གྱུར་པས་ན་མེ་མེད་ཀྱང་དུ་བ་མེད་པར་མི་འགྱུར་རོ། །ཅིའི་ཕྱིར་ཞེ་ན། རང་གི་ངོ་བོ་མ་ཚང་བ་མེད་པའི་ཕྱིར་རོ། །གང་གི་ཚེ་མེ་ལས་དུ་བའི་རང་གི་ངོ་བོ་མཐོང་བས་དུ་བ་མེའི་
[113b.3]གཞན་གྱི་དབང་དུ་གྱུར་པ་དེའི་ཚེ་ཇི་སྐད་བསྟན་པའི་གཏན་ཚིགས་ཀྱི་རྗེས་སུ་འགྲོ་བའི་རིགས་པས་དུ་བ་ཡོད་པ་ན་ཡང་མེ་ཡོད་པ་ཡིན་ནོ། །གང་གི་ཕྱིར་ཚུལ་གསུམ་པ་གཏན་ཚིགས་སུ་སྔར་བསྟན་པ་དེས་ན་གདོན་མི་ཟ་བར་ཡོད་པར་ངེས་པ་ཁས་བླངས་པའི་ཕྱིར་
[113b.4]གཞན་གྱི་དབང་དུ་གྱུར་པ་ཁོ་ནའོ། །དེས་ན་མེ་ལས་གདོན་མི་ཟ་བར་འབྱུང་བ་དོར་ན་དུ་བ་ཡང་དེའི་འབྲས་བུ་མ་ཡིན་ཏེ། དེས་ན་འདི་མེ་མེད་ཀྱང་རང་གི་ངོ་བོ་འགའ་ཡང་ཉམས་པ་མེད་པས་ལྡོག་པ་མི་འགྲུབ་པོ། །དེས་ན་ཐམས་ཅད་དུ་དུ་བ་ཡོད་ན་མེ་ཡོད་དོ་ཞེས་རྗེས་
[113b.5]སུ་འགྲོ་བ་སྨྲས་པས་ཀྱང་ལྡོག་པ་འཕེན་པ་མ་ཡིན་ནོ། །དེས་ན་འདི་ལྟར་རྒྱུ་དང་འབྲས་བུའི་དངོས་པོ་ཉེ་བར་བསྟན་པ་མེད་ན་རྗེས་སུ་འགྲོ་བ་མེད་ལ། ལྡོག་པ་དོན་གྱི་འཕེན་པ་ཡང་ཉམས་པ་མེད་དོ་ཞེས་བསྒྲུབས་ནས་རྒྱུ་དང་འབྲས་བུའི་དངོས་པོ་ཡིན་ན་འཐད་དོ་ཞེས་བཤད་པ་ནི་
[113b.6]འབྲས་བུ་ཡིན་ན་ནི་ཞེས་བྱ་བའོ། །འབྲས་བུ་ཡོད་ན་ནི་གདོན་མི་ཟ་བར་རྒྱུ་ཡོད་དོ། །གང་གི་ཕྱིར་རྒྱུ་རྒྱུ་ཉིད་ཡིན་པ་ནི་འདི་ཁོ་ན་སྟེ། འབྲས་བུ་ཞེས་བྱ་བའི་དོན་ཡོད་ན་རང་གི་ངོ་བོ་ཉེ་བར་འཇོག་པ་སྟེ་ཉེ་བར་གནས་པ་གང་ཡིན་པའོ། །ཅིའི་ཕྱིར་དེ་ལྟར་ཡིན་ཞེ་ན། འབྲས་བུ་
[113b.7]ཡང་ཞེས་སྨོས་སོ། །འབྲས་བུ་ཉིད་ནི་དེ་ཡོད་པ་ཉིད་ན་ཡོད་པ་ཡིན་ནོ། །དེས་ན་འབྲས་བུ་ཡོད་པ་རྒྱུ་མེད་ན་མེད་པས་གདོན་མི་ཟ་བར་རྒྱུ་ཡོད་པར་འགྱུར་རོ། །དེས་ན་དེའི་རྩ་བ་ཅན་དོན་གཞན་ཡོད་ན་རང་གི་ངོ་བོ་ཉེ་བར་གནས་པ་ནི་རྒྱུའི་རྒྱུ་ཉིད་ཡིན་ནོ། །འབྲས་བུར་བསྟན་ན་ནི་
[114a]
[114a.1]འདི་འཐད་པ་ཡིན་ན་དུ་བ་ལ་འདི་ཡོད་ཅེས་བྱ་བ་ག་ལས་ཤེ་ན། དེ་ཡང་དུ་བ་ལ་ཡོད་དོ་ཞེས་སྨོས་སོ། །དེ་ཡོད་པ་ཉིད་ནི་ཡོད་པའི་རང་བཞིན་འབྲས་བུ་ཉིད་དུ་བ་ལ་ཡོད་པ་དེ་ལྟ་བས་ན་དུ་བ་ནི་མེའི་འབྲས་བུ་ཡིན་ནོ། །དེས་ན་རྣམ་པ་འདིས་ལྡོག་པས་ཀྱང་
[114a.2]རྗེས་སུ་འགྲོ་བ་གྲུབ་པར་བཤད་པ་ནི་དེ་བཞིན་དུ་ཞེས་བྱ་བའོ། །མེ་མེད་ན་དུ་བ་མེད་དོ་ཞེས་ལྡོག་པ་སྨྲས་ན་གོར་མ་ཆག་པར་མེ་ལས་དུ་བ་འབྱུང་ངོ་ཞེས་རྟོགས་པ་ཉེ་བར་སྐྱེའོ། །དེས་ན་ལྡོག་པ་བརྗོད་པས་མེ་ལས་དུ་བ་འབྱུང་བར་རྟོགས་ཏེ། ཤུགས་ཀྱིས་རྗེས་སུ་འགྲོ་བ་རྟོགས་
[114a.3]པར་འགྱུར་རོ། །གཏན་ཚིགས་བཤད་པ་དེ་ལྟ་མ་ཡིན་ན་ཞེས་བྱ་བ་སྟེ། མེ་ལས་དུ་བ་འབྱུང་བ་མ་ཡིན་ན་ལྡོག་པ་ཉིད་མི་འགྲུབ་པོ། །དེ་གྲུབ་པས་ནི་དེ་ལས་བྱུང་བ་ཉིད་དུ་རྟོགས་པར་བྱེད་ལ། དེ་ལས་ཀྱང་ཤུགས་ཀྱིས་རྗེས་སུ་འགྲོ་བ་རྟོགས་སོ། །ཕ་རོལ་པོ་དག་གང་ཞིག་གང་
[114a.4]མེད་ན་མེད་དོ་ཞེས་རྟོགས་པ་དེས་ན་དེ་ཙམ་གྱིས་འབྲེལ་པ་རྟོགས་པ་མ་ཡིན་ནོ་ཞེས་བསྟན་པའི་ཕྱིར། རྟག་པ་དང་ཞེས་སྨོས་སོ། །ཉན་པའི་ཤེས་པ་མེད་པ་ལས་རྟག་པའི་དོན་ཡོད་ན་མཐོང་བ་ནི་མེད་དེ་ནམ་མཁའ་ལ་མེད་པའི་ཕྱིར་རོ། །དེས་ན་འདི་རྟག་པའི་འབྲས་བུ་མ་ཡིན་ནོ། །
[114a.5]མི་རྟག་པ་ལ་ཡང་མ་ཡིན་ཏེ་བུམ་པ་ལ་མེད་པའི་ཕྱིར་རོ། །དེས་ན་མི་རྟག་པའི་འབྲས་བུ་མ་ཡིན་ནོ། །དེས་ན་ཉན་པའི་ཤེས་པ་གཉི་གའི་འབྲས་བུ་མ་ཡིན་ཡང་གཉི་ག་མེད་ན་ཡང་མེད་པ་ཡིན་ནོ། །དེས་ན་གང་ཞིག་གང་མེད་ན་མེད་པ་དེ་ཙམ་གྱིས་གལ་ཏེ་དོན་གཞན་ཡིན་ན་དེ་དེའི་
[114a.6]འབྲས་བུ་ཡིན་ན་ཉན་པ་ཉིད་རྟག་པ་མེད་པ་བུམ་པ་ལ་མེད་པས་ན་རྟག་པའི་འབྲས་བུར་འགྱུར་རོ། །དེ་བཞིན་དུ་མི་རྟག་པ་མེད་ན་ནམ་མཁའ་ལ་མེད་པས་མི་རྟག་པའི་འབྲས་བུར་འགྱུར་རོ། །འདི་ནི་རྟག་པ་དང་མི་རྟག་པའི་འབྲས་བུ་མ་ཡིན་མོད་ཀྱི་དེ་ལྟ་ན་ཡང་དེ་མེད་ན་མེད་པ་
[114a.7]ཡིན་ནོ། །དེས་ན་དོན་གཞན་དེ་མེད་ན་མེད་པ་ཙམ་གྱིས་ནི་དེའི་འབྲས་བུར་རྟོགས་པ་མ་ཡིན་པས་ན་དེ་བཞིན་དུ་མེ་མེད་ན་དུ་བ་མེད་དོ་ཞེས་སྨྲས་ན་ཞེས་བྱ་བ་ལ་སོགས་པ་མི་འཐད་པར་བརྗོད་པ་ཡིན་ནོ་ཞེས་དེ་དེ་ལྟར་སློབ་དཔོན་ཕྱོགས་ཀྱི་གླང་པོས་མཉན་བྱ་ཉིད་ལྡོག་པ་ཅན་དུ་གསུངས་
[114b]
[114b.1]པའི་ཕྱིར་འདིར་ལྡོག་པ་འབྲེལ་པ་མཚོན་པར་བྱེད་པ་ཉིད་དུ་བརྗོད་པ་ལ། སློབ་དཔོན་གྱི་ལུགས་ཀྱི་རྗེས་སུ་འབྲངས་ནས་གལ་ཏེ་ལྡོག་པས་འབྲེལ་པ་གོ་བར་བྱེད་ན་འདི་ཡང་དེ་བཞིན་དུ་རྟོགས་པར་འགྱུར་རོ་ཞེས་བརྩད་པ་ཡིན་ནོ། །འདི་བཟློག་པའི་ཕྱིར་མེད་པ་ཉིད་མ་ཡིན་ཏེ་ཞེས་གསུངས་
[114b.2]སོ། །རྟག་པ་དང་མི་རྟག་པའི་དོན་མེད་ན་ཉན་པ་ཉིད་མེད་པ་མ་ཡིན་ནོ། །འདི་སྐད་བརྗོད་པ་ཡིན་ཏེ། འདི་ལ་ནི་ལྡོག་པ་གྲུབ་པ་མ་ཡིན་ནོ། །གལ་ཏེ་ཡིན་ན་ནི་དོན་གཞན་ཉིད་ཡིན་པ་འབྲས་བུར་མི་འགྱུར་བ་མ་ཡིན་ནོ། །ལྡོག་པ་མེད་དོ་ཞེས་ཇི་ལྟར་རྟོགས་ཤེ་ན། དེ་ལས་དེ་དག་ཉིད་ལ་
[114b.3]ཞེས་སྨོས་སོ། །སློབ་དཔོན་གྱིས་མཉན་པར་བྱ་བ་ཉིད་ཐུན་མོང་མ་ཡིན་པའི་ཕྱིར་ཐེ་ཚོམ་སྒྲུབ་པར་བྱེད་པ་མ་ངེས་པ་ཉིད་དུ་ཉེ་བར་བཀོད་དོ། །དེས་ན་གལ་ཏེ་འདི་རྟག་པ་དང་མི་རྟག་པ་མེད་ན་མེད་པ་ཡིན་ལ་ཉན་པའི་ཤེས་པ་དེ་ལས་རྟག་པ་དང་མི་རྟག་པ་དག་ལ་ཐེ་ཚོམ་ཟ་བར་མི་འགྱུར་རོ། །
[114b.4]དེ་བཤད་པ་ནི་དེ་ལྟ་བུ་མ་ཡིན་ན་ཞེས་བྱ་བའོ། །གང་ཞིག་གང་མེད་ན་ཞེས་ངེས་པ་དེ་ཡོད་པ་ནི་དེ་ཡོད་པ་མཚོན་པར་བྱེད་པ་ཡིན་པའི་ཕྱིར་ངེས་པ་ཡིན་གྱི་ཐེ་ཚོམ་གྱི་རྒྱུར་ནི་མི་འགྱུར་རོ། །གལ་ཏེ་གཉི་ག་མེད་པར་ཡང་མེད་པ་ན་དེ་མཚོན་པར་བྱེད་པ་ཉིད་དུ་ཐལ་བར་འགྱུར་ལ། གཉི་ག་གཅིག་སྲིད་པ་
[114b.5]ཡང་མ་ཡིན་པ་ངེས་ན་ཐེ་ཚོམ་ཟ་བ་ཡིན་ནོ་ཞེས་དེ་ལྟ་ན་ནི་འོ་ན་གཉི་ག་མེད་ན་མེད་པ་ཉིད་ཅེས་བྱ་བར་མ་གྲུབ་པས་ལྡོག་པ་མེད་དོ། །འོ་ན་འདི་ཇི་ལྟར་སློབ་དཔོན་གྱིས་ལྡོག་པ་དང་ལྡན་པར་གསུངས་ཤེ་ན། ཡོད་པར་ངེས་པ་ཞེས་བྱ་བ་ལ་སོགས་པ་གསུངས་སོ། །འདི་རྟག་པ་དང་མི་
[114b.6]རྟག་པ་ལས་ལྡོག་པར་ངེས་པ་མེད་པར་བསྟན་པའི་ཕྱིར་མེད་དོ་ཞེས་བརྗོད་ཀྱི་དེ་མེད་ན་མེད་པ་ཁོ་ནའོ་ཞེས་བརྗོད་པའི་དོན་དུ་མ་ཡིན་ནོ། །གལ་ཏེ་ནམ་མཁའ་དང་བུམ་པ་དག་ལ་མཉན་པ་མེད་པ་མ་ཡིན་ནམ། ཇི་ལྟར་དེ་མེད་པ་ལ་མེད་པ་ཉིད་དུ་མ་ངེས་ཤེ་ན། ནམ་མཁའ་ལ་
[114b.7]སོགས་པ་ལ་མེད་པ་ཉིད་དུ་ངེས་པ་ནི་བདེན་མོད་ཀྱི་རྟག་པ་དང་མི་རྟག་པ་ལ་ནི་མ་ཡིན་ནོ། །གལ་ཏེ་རྟག་པ་དང་མི་རྟག་པ་དག་ཀྱང་དེ་ལ་མེད་པར་ངེས་པ་མ་ཡིན་ནམ། དེ་ཡང་བདེན་མོད་ཀྱི་རྟག་པ་དང་མི་རྟག་པ་མེད་པའི་ཕྱིར་དེ་ལ་མེད་པ་ཡིན་ནམ་འོན་ཏེ་སྒྲ་གཅིག་པུའི་ཆོས་
[115a]
[115a.1]མ་ཡིན་པས་ཐུན་མོང་མ་ཡིན་པའི་ཕྱིར་ཞེས་ཐེ་ཚོམ་མི་ཟའོ། །དེས་ན་སྒྲ་རྟག་པའམ་མི་རྟག་པ་ཡིན་ཞེས་ཐུན་མོང་མ་ཡིན་པ་གོ་བར་བྱེད་པ་མ་ཡིན་པ་ཉིད་དོ། །ཡོད་པ་བཞིན་དུ་མཉན་བྱ་གོ་བར་བྱེད་པ་མ་ཡིན་ནམ་ཞེས་རྣམ་པར་ངེས་པའི་རྗེས་སུ་འབྲང་བར་གཏན་
[115a.2]ལ་ཕབ་པའོ། །དེས་ན་དེ་ལྟར་དེའི་འབྲས་བུ་ཉིད་མ་ཡིན་ཡང་ཉན་པའི་ཤེས་པ་དེའི་ལྡོག་པའི་རྗེས་སུ་བྱེད་པའི་ཕྱིར་ལྡོག་པས་འབྲས་བུ་ཉིད་དུ་མཚོན་པ་མ་ཡིན་ནོ་ཞེས་བརྗོད་ལ་དེ་ལ་ལྡོག་པ་ཉིད་མེད་པར་བཤད་དོ། །དེ་མེད་པ་ཡང་ཐེ་ཚོམ་སྒྲུབ་པར་བྱེད་པའི་ཕྱིར་རོ། །དེ་མེད་པ་ལ་
[115a.3]མི་དམིགས་པ་ཡོད་ཀྱང་ལྡོག་པ་མེད་ཅིང་དེ་ལས་ཇི་ལྟར་ཐེ་ཚོམ་སྒྲུབ་པར་བྱེད་པ་ཡིན་ཞེས་དོགས་པ་ལ་རྟག་པ་འམ་མི་རྟག་པ་དང་རྒྱུ་དང་འབྲས་བུའི་དངོས་པོ་ཉིད་དུ་མ་གྲུབ་པའི་ཕྱིར་རོ་ཞེས་བསྟན་པའི་ཕྱིར་གང་གི་ཚེ་ཞེས་བྱ་བ་ལ་སོགས་པ་སྨོས་སོ། །དཔེའི་བདག་ཉིད་གཉིས་ཡོད་
[115a.4]པ་ལས་ཆོས་མི་མཐུན་པས་ཞེས་རྗེས་ཐོགས་ཉིད་དུ་ཁྱད་པར་དུ་སྟོན་པའི་ཕྱིར་འདིར་ཁྱད་པར་མེད་ཀྱང་ཆོས་མཐུན་པའི་དཔེ་ཉིད་ཡིན་པར་འགྱུར་རོ། །གང་གི་ཚེ་ཆོས་མཐུན་པའི་དཔེས་མེ་དང་དུ་བ་དག་རྒྱུ་དང་འབྲས་བུའི་དངོས་པོར་མི་སྟོན་པ་དེའི་ཚེ་རྗེས་སུ་འགྲོ་བ་ཉིད་མི་འགྲུབ་
[115a.5]པའི་ཕྱིར་དངོས་པོ་ཉིད་མ་གྲུབ་ན་ཤུགས་འགྲུབ་པར་ག་ལ་འགྱུར། གང་གི་ཤུགས་ཀྱིས་འཕངས་པ་གང་ཡིན་པ་དེ་ནི་དེ་མ་གྲུབ་པར་མི་གྲུབ་པོ། །དེ་བཞིན་དུ་ཆོས་མི་མཐུན་པའི་དཔེས་མེ་དང་དུ་བ་དག་རྒྱུ་དང་འབྲས་བུའི་དངོས་པོར་མི་སྟོན་པ་དེའི་ཚེ་མེད་པ་མི་འགྲུབ་པའི་ཕྱིར་རྗེས་
[115a.6]སུ་འགྲོ་བ་དྲན་པར་ལྟ་ག་ལ་འགྱུར། ཡང་ཅིའི་ཕྱིར་འདི་ལ་བརྟེན་ནས་བསྟན། གང་གི་ཕྱིར་འདི་ལ་འབྲས་བུ་མ་ཡིན་ན་རྗེས་སུ་འགྲོ་བ་མེད་པ་ནི་དེ་ལྟ་མ་ཡིན་ན་དོན་གཞན་དེ་དང་འབྲེལ་པ་ངེས་པ་མེད་པའི་ཕྱིར་བཤད་ཟིན་ལ་དེ་བཞིན་དུ་ལྡོག་པ་མེད་པ་ཡང་དེ་ལྟ་མ་ཡིན་ན་དེ་མེད་
[115a.7]ན་ཅི་སྟེ་ཡོད་པར་མི་འགྱུར་ཞེས་བཤད་ཟིན་པ་མ་ཡིན་ནོ་ཞེ་ན། ལྷ་རྣམས་དགའ་བས་སྐབས་མི་ཤེས་སོ། །ཉན་པའི་ཤེས་པ་ཉིད་ལ་འབྲས་བུ་ཉིད་མེད་པ་ཁོ་ནས་ལྡོག་པ་མེད་པར་བརྗོད་པར་བྱ་བ་ཡིན་ནོ། །གལ་ཏེ་དེ་དེ་ལ་བརྟེན་པ་ཉིད་ཀྱིས་ཅིའི་ཕྱིར་མ་བརྗོད། གཞི་གཞན་
[115b]
[115b.1]ལ་གནས་པར་བརྗོད་པ་ཅི་བྱ་ཞེས་རྩོད་ན། དེ་ལ་འདིར་བརྗོད་པ་རྗེས་སུ་འགྲོ་ལྡོག་དང་ལྡན་པར་རྟོགས་པའི་གཏན་ཚིགས་ལ་ཡང་རྒྱུ་དང་འབྲས་བུའི་དངོས་པོ་མེད་ན་དེ་མེད་པར་བསྟན་པས་རྗེས་སུ་འགྲོ་བ་དང་ལྡོག་པ་ངེས་པ་དེ་འབའ་ཞིག་གི་ཐབས་ཅན་དེ་མེད་ན་མི་འབྱུང་བ་
[115b.2]ཡིན་པའི་ཕྱིར་ཉན་པའི་ཤེས་པ་ཉིད་དོན་གཞན་ཡིན་པ་ན་འབྲས་བུ་ཉིད་དུ་མ་ངེས་པ་ཁོ་ནས་ལྡོག་པ་མེད་པ་ཡིན་པར་འགྱུར་རོ། །དེས་ན་དེ་ལྟར་གཏན་ཚིགས་རྣམ་པ་གསུམ་ཉིད་ཚུལ་གསུམ་དང་ལྡན་པ་ཡིན་ནོ་ཞེས་གཞུང་གཟུགས་པར་བྱ་བ་འབྲེལ་པ་རྣམ་པ་གཉིས་
[115b.3]ཀྱིས་གཉིས་བསྒྲུབས་ནས་གསུམ་པ་ཡང་དེའི་རྩ་བ་ཅན་ཉིད་དུ་བསྟན་པའི་ཕྱིར། གང་གི་ཕྱིར་ཞེས་བྱ་བ་ལ་སོགས་པ་གསུངས་སོ། །ད་ནི་དེའི་ཕྱིར་རྒྱུ་དང་རང་བཞིན་དག་ཅེས་མདོར་སྨོས་པ་དེའི་ཕྱིར་གྱི་སྒྲའི་འབྲེལ་པ་སྒྲུབ་པའི་ཕྱིར་རོ། །དཔེས་རང་བཞིན་འབྲེལ་
[115b.4]པ་འདི་ཁོ་ན་རབ་ཏུ་སྟོན་པ་ཡིན་གྱི་བྱ་བ་གཞན་ནི་མེད་དོ་ཞེས་བྱ་བ་རྒྱུ་གཞན་མེད་པར་བརྗོད་པ་ཡིན་ནོ། །རང་བཞིན་འབྲེལ་པ་ཡང་དེ་ལྟར་མཐོང་བའི་ཕྱིར་དེ་མེད་ན་མི་འབྱུང་བ་ཙམ་ནི་མ་ཡིན་ནོ་ཞེས་བསྟན་པའི་ཕྱིར། ཇི་སྐད་བཤད་པའི་ཞེས་སྨོས་སོ། །དེ་གང་གི་དོན་དུ་
[115b.5]བསྟན་པ་གང་གིས་འདིར་བརྗོད་མ་ཐག་པ་དེ་རྒྱུ་ཉིད་དུ་བསྟན་པའི་ཕྱིར། གཅིག་ཡོད་ན་ཞེས་སྨོས་ཏེ་སྒྲུབ་པར་བྱེད་པ་ཡོད་ན་གཞན་ཞེས་བྱ་བ་བསྒྲུབ་བྱ་རབ་ཏུ་གྲུབ་པར་བྱ་བའི་ཕྱིར་རོ། །དེ་ལྟ་ན་ཡང་དོན་འདི་སྐབས་སུ་བབས་པའི་དོན་གྱི་རྒྱུར་མི་འགྱུར་བའི་ཕྱིར་དེ་
[115b.6]རབ་ཏུ་གྲུབ་པ་ལ་གཏན་ཚིགས་བཤད་པ་ནི་དེ་མེད་ན་ཞེས་བྱ་བ་སྟེ་བསྒྲུབ་བྱ་མེད་ན་སྒྲུབ་བྱེད་མི་སྲིད་པའི་ཕྱིར་རོ། །གཏན་ཚིགས་དེའི་ཕྱིར་རྒྱུ་དང་རང་བཞིན་དག་མེད་པ་སྟེ། སྐྱེད་པར་བྱེད་པ་དང་ཁྱབ་པར་བྱེད་པ་མི་དམིགས་པ་ན། འགའ་ཞིག་དགག་པ་བསྒྲུབ་པར་བྱ་
[115b.7]བའི་ཡང་གཏན་ཚིགས་ཡིན་ཏེ་བསྒྲུབ་པར་བྱ་བ་ཡིན་ནོ། །དགོངས་པ་འདི་ཡིན་ཏེ་གང་གི་ཕྱིར་རང་བཞིན་འབྲེལ་པ་ཡོད་ན་དེ་མེད་ན་ལྡོག་པའི་ཕྱིར་གཞན་ཡོད་ན་གཞན་ཡོད་པ་ཡིན་པ་དེས་ན་འདི་ཇི་ལྟར་བསྒྲུབ་པའི་ཡན་ལག་ཡིན་པ་དེ་བཞིན་དགག་པ་ལ་ཡང་ཡིན་ཏེ་
[116a]
[116a.1]ལྡོག་ན་ལྡོག་པའི་ཕྱིར་རོ། །རང་བཞིན་འབྲེལ་པའི་རྩ་བས་མེད་པར་འགྱུར་ན་ཡོད་པར་ཡང་མི་འགྱུར་རོ། །དེས་ན་ལྡོག་ན་ལྡོག་པར་བྱེད་པ་རང་བཞིན་འབྲེལ་པ་ཡིན་པ་དེས་ན་དཔེས་ཉེ་བར་བསྟན་པ་ན་གཏན་ཚིགས་ཀྱི་ཡན་ལག་
[116a.2]མ་ཡིན་ཡང་གང་ཞིག་དགག་པར་འདོད་པ་དེ་བཀག་པ་ཡང་རང་བཞིན་འབྲེལ་པ་ལ་བརྟེན་པ་ཁོ་ནས་རྟོགས་པ་ཡིན་ནོ། །ཇི་ལྟར་གང་ཞིག་གང་དུ་རང་བཞིན་འབྲེལ་པ་ལྡོག་ན་འབྲེལ་པའི་ཡུལ་གྱི་དོན་ཉེ་བར་གནས་པ་ལས་མི་འདའ་བས་ན་དེ་སྒྲུབ་པའི་གཏན་ཚིགས་འབྲེལ་
[116a.3]པའི་རྩ་བ་ཅན་ཡིན་པ་དེ་བཞིན་དུ་འབྲེལ་པའི་རྟེན་ལོག་ན་ཡང་འབྲེལ་པ་ལོག་པའི་ཕྱིར་དེ་ལོག་པས་འབྲེལ་པ་ལྡོག་པ་རྟོགས་པ་ཁོ་ནའོ། །འབྲེལ་པ་དེ་ཡང་རྣམ་པ་གཉིས་ཏེ། དེའི་བདག་ཉིད་དང་། དེ་ལས་བྱུང་བའི་རང་བཞིན་ནོ། །དེས་ན་ཇི་ལྟར་གཏན་ཚིགས་གཉིས་ཡིན་པ་
[116a.4]དེ་བཞིན་དུ་དེའི་རྩ་བ་ཅན་གྱི་དགག་པ་ཡང་རྣམ་པ་གཉིས་ཁོ་ན་སྟེ། ཁྱབ་པར་བྱེད་པ་དང་། རྒྱུ་མི་དམིགས་པའི་རང་བཞིན་གྱིས་སོ། །དེས་ན་དེ་ལྟར་གཉིས་འབྲེལ་པའི་རྩ་བ་ཅན་དུ་བཤད་པ་དེ་བཞིན་དུ་གསུམ་པ་ཡང་ཡིན་ནོ། །འདི་ཉིད་འཆད་པ་ནི་འབྲེལ་པའི་ཡུལ་
[116a.5]རྒྱུ་དང་ཁྱབ་པར་བྱེད་པ་དེ་དག་ཁོ་ན་ལྡོག་པ་ན་རང་དང་འབྲེལ་པ་འབྲས་བུ་དང་ཁྱབ་བྱ་ཟློག་པར་བྱེད་པས་གཏན་ཚིགས་དེའི་ཕྱིར་རོ། །འདིས་ནི་སྐབས་སུ་བབ་པ་ཇི་ལྟར་གཏན་ཚིགས་ཉིད་དུ་ཉེ་བར་སྦྱོར་བ་དེ་བསྟན་ནས་དེ་ཉིད་དགག་པའི་གཏན་ཚིགས་ལ་ཡང་སྟོན་པ་ནི་དོན་
[116a.6]འགའ་ཞིག་དགག་པ་ལ་ཡང་བསྒྲུབ་པར་འདོད་པས་རྒྱུ་འམ་ཁྱབ་པར་བྱེད་པ་དང་འབྲེལ་པ་ནི་རང་བཞིན་ལྡོག་པ་གཏན་ཚིགས་སུ་བརྗོད་པར་བྱའོ། །འདི་ལྟར་འབྲས་བུ་ཁྱབ་པར་བྱ་བ་དག་དེར་རང་བཞིན་འབྲེལ་པའི་ཕྱིར་གལ་ཏེ་ཡང་ལྡོག་པ་དག་ལ་འབྲེལ་པ་མེད་པ་
[116a.7]དེ་ལྟ་ན་ཡང་འདི་འབྲེལ་པའི་རྩ་བས་གོ་བར་བྱ་བ་དང་གོ་བར་བྱེད་པའི་དངོས་པོས་མི་འཁྲུལ་པར་གྲུབ་པ་ཁོ་ནའོ། །འབྲེལ་པ་མེད་ན་ནི་ཇི་ལྟར་གཅིག་ལོག་པས་གཞན་ལྡོག་པ་སྒྲུབ་པར་བྱེད། དེས་ན་དེ་ལྟར་འབྲེལ་པ་རྣམ་པ་གཉིས་ཀྱིས་སྒྲུབ་པའི་གཏན་ཚིགས་བཞིན་དུ་
[116b]
[116b.1]དགག་པའི་གཏན་ཚིགས་ཀྱང་རྣམ་པ་གཉིས་སུ་འགྱུར་རོ། །དེས་ན་གཙོ་བོའི་སྦྱོར་བ་ལ་ལྟོས་ནས་མི་དམིགས་པ་རྣམ་པ་གཉིས་ཉིད་དུ་འགྱུར་རོ། །དེ་ལྟར་ཡང་ནུས་པ་མ་ཡིན་ཏེ་འདི་གཉིས་ཕན་ཚུན་རྗེས་སུ་མི་འགྲོ་བའི་ཕྱིར་གཅིག་ཉིད་དུ་མ་གྲུབ་པས་གཏན་ཚིགས་རྣམ་
[116b.2]པ་བཞིར་ཐལ་བའི་ཕྱིར་རོ། །སྔར་བཤད་པའི་ཚུལ་གྱིས་རང་བཞིན་མི་དམིགས་པར་ནི་འདི་གཉི་ག་ཡང་བསྟན་པར་ནུས་པ་དེས་ན། དེ་ཡང་གཙོ་བོ་ཉིད་དུ་བསྟན་པའི་ཕྱིར་བཤད་པ། དམིགས་པར་ནི་རིགས་ལྡན་དེ་དམིགས་པའི་མཚན་ཉིད་དུ་གྱུར་པའི་དགག་པར་བྱ་
[116b.3]བ་དེ་མི་དམིགས་པ་ཡང་དགག་པའི་གཏན་ཚིགས་སོ་ཞེས་འབྲེལ་པ་བརྗོད་པའོ། །གཉི་ག་བསྡུས་པའི་དོན་དུ་གཉི་གར་ཡང་། ཡང་གི་སྒྲ་སྦྱར་ཏེ། ཡང་ཇི་ལྟར་རང་བཞིན་མི་དམིགས་པར་ཡང་དག་པའི་གཏན་ཚིགས་ཞེས་འབྲེལ་པར་འགྱུར་ཞེ་ན། དེ་སྟོན་པ་ནི་དགག་
[116b.4]པའི་ཡུལ་ཅན་གྱིས་ཞེས་བྱ་བ་ལ་སོགས་པ་སྨོས་ཏེ། མི་དམིགས་པ་ཉིད་ཀྱིས་དགག་པ་འགྲུབ་པའི་ཕྱིར་རོ། །དེ་ལྟ་ན་འོ་ན་དགག་པའི་གཏན་ཚིགས་ཀྱི་སྒྲའི་དོན་དེའི་ཡུལ་ཅན་གྱིས་ཐ་སྙད་ཀྱི་དོན་ཡིན་པ་དེས་ན་རྒྱུ་དང་རང་བཞིན་མི་དམིགས་པ་ཞེས་བྱ་བ་དེར་
[116b.5]རྗེས་སུ་འགྲོ་བ་འགལ་ལོ་ཞེ་ན། དེའི་ཕྱིར་བཤད་པ་རྒྱུ་དང་ཁྱབ་པར་བྱེད་པ་མི་དམིགས་པ་ནི་དགག་པ་དང་དགག་པའི་ཐ་སྙད་གཉི་གའི་གཏན་ཚིགས་ཡིན་ནོ། །འདི་སྐད་བརྗོད་པ་ཡིན་ཏེ་གང་ཞིག་སྔ་མ་དང་འབྲེལ་པར་མི་འགྱུར་བ་འདིར་དགག་པའི་སྒྲས་ཐ་
[116b.6]སྙད་བརྗོད་པའམ་གང་གིས་ཕྱི་མ་དང་འབྲེལ་པར་མི་འགྱུར་བ་མེད་པ་ཉིད་བརྗོད་པ་ཡང་མ་ཡིན་གྱི་འོན་ཀྱང་མེད་པའི་ཡུལ་ཅན་གྱི་རྟོགས་པ་ཡིན་ནོ། །དེས་ན་རང་བཞིན་མི་དམིགས་པར་མེད་པ་སྒྲུབ་པར་བྱེད་པ་བཀག་པའི་ཕྱིར་རྟོགས་པ་ཙམ་གྱི་མཐར་ཐུག་
[116b.7]པར་འགྱུར་བ་ཡིན་ནོ། །དེ་ལྟར་ཇི་སྐད་བཤད་པའི་ཚུལ་གྱིས་དངོས་སུ་ན་མི་དམིགས་པ་རྣམ་པ་གསུམ་སྟེ། འབྲེལ་པ་རྣམ་པ་གཉིས་ཀྱིས་ལྐོག་ཏུ་གྱུར་པ་མེད་པ་ནི་མི་དམིགས་པ་རྣམ་པ་གཉིས་ཁོ་ནས་རྟོགས་པའི་ཕྱིར་གཉིས་གཙོ་བོ་ཡིན་ནོ། །རང་བཞིན་
[117a]
[117a.1]མི་དམིགས་པ་ལ་ནི་མེད་པ་མངོན་སུམ་ཉིད་ཡིན་ནོ། །འོན་ཀྱང་དེར་དེ་གཉིས་ཀྱང་ཁོངས་སུ་བསྡུ་བའི་གཞི་ཡིན་པས་གཙོ་བོར་བགྲང་བ་ཁོ་ན་སྟེ་དེས་ན་མི་དམིགས་པའི་སྦྱོར་བ་རྣམ་པ་གསུམ་ཁོ་ནའོ། །གལ་ཏེ་རྣམ་པ་གསུམ་ཁོ་ན་ཡིན་ན་སྔར་དབྱེ་
[117a.2]བ་གཞན་དུ་ཡང་བསྟན་ཅེ་ན། བཤད་པ་རྣམ་པ་གསུམ་ཡིན་ཡང་རྣམ་པ་དུ་མར་བཤད་དོ། །གལ་ཏེ་རྣམ་པ་གསུམ་ཉིད་རྣམ་པ་དུ་མ་ཡིན་པའི་ཕྱིར་རྣམ་པ་གསུམ་ཉིད་བཤད་པར་འགྱུར་བ་མ་ཡིན་ནམ། རྣམ་པ་གསུམ་རྣམ་པ་དུ་མར་ཞེས་བརྗོད་པ་ན་དེ་ཉིད་བརྗོད་
[117a.3]པར་འགྱུར་བ་བདེན་མོད་ཀྱི། རྣམ་པ་གསུམ་ཡིན་ཡང་མི་དམིགས་པ་རྣམ་པ་དུ་མ་ཡིན་ནོ་ཞེས་བརྗོད་པ་ན། དེ་ལས་གཞན་པའི་རྣམ་པ་རྟོགས་པར་འགྱུར་བ་ཁོ་ནའོ། །དེ་བཤད་པ་ནི་དེ་དང་དེ་འགལ་ལ་སོགས་པ་ཞེས་བྱ་བ་ཡིན་ནོ། །དེ་མ་རྟོགས་པའི་སྦྱོར་བའི་བྱེ་
[117a.4]བྲག་དང་དེ་དང་འགལ་བ་རྟོགས་པའི་སྦྱོར་བའི་བྱེ་བྲག་གིས་སོ། །གང་དག་མ་དམིགས་པས་མེད་པར་འགྲུབ་པར་བརྗོད་པ་རྒྱུ་མི་དམིགས་པ་ལ་སོགས་པ་དེ་དག་ནི་འདིར་དེ་མ་རྟོགས་པའི་སྒྲས་བསྟན་ལ་འགལ་བ་དམིགས་པ་ལ་སོགས་པ་ནི་རྟོགས་པ་ལ་སོགས་
[117a.5]པའོ། །གང་རྟོགས་པས་མེད་པར་རྟོགས་པ་དེ་དག་ལས་གཅིག་བསྟན་པས་གཞན་ཡོངས་སུ་བཟུང་བའི་དོན་དུ་འདིས་སོགས་པའི་སྒྲ་ཡིན་ནོ། །གང་མ་རྟོགས་པས་མེད་པར་རྟོགས་པ་དེ་ནི་འགའ་ཞིག་བརྗོད་པ་མ་ཡིན་པའི་ཕྱིར་འདིར་སོགས་པའི་སྒྲས་ཅི་
[117a.6]ཡང་བྱར་མེད་དོ། །འདི་ཉིད་རྣམ་པར་འགྲེལ་པ་ནི་དགག་པའི་གཏན་ཚིགས་ནི་གཙོ་བོར་རྣམ་པ་གསུམ་ཁོ་ན་སྟེ། ཇི་སྐད་བཤད་པ་ཡིན་ནོ། །དེ་ལྟར་གྱི་སྒྲ་འཆད་པས་དེ་དག་ཉིད་རང་གི་ངོ་བོས་སྟོན་ཏེ། རྒྱུ་དང་ཁྱབ་པར་བྱེད་པ་དང་རང་གི་བདག་ཉིད་མི་དམིགས་པའོ། །
[117a.7]དེ་དག་ཀྱང་སོ་སོར་དམིགས་སུ་ཡོད་པ་སྟེ་གཞན་དུ་ན་དངོས་པོ་མེད་པ་མི་འགྲུབ་པའི་ཕྱིར་རོ། །དེ་ལྟར་ངེས་པ་ཞེས་བྱ་བ་ནི་ཤེས་པ་གཅིག་ལ་འདྲེན་པ་ཅན་རྟོགས་པས་དམིགས་པའི་མཚན་ཉིད་ཀྱིར་གྱུར་པར་རྟོགས་པ་འོ། །ཚིག་ལེ་འུར་བྱས་པའི་ཕྱེད་འོག་མ་བཤད་
[117b]
[117b.1]པའི་ཕྱིར་དེ་ནི་ཞེས་སྨོས་ཏེ་དེ་དང་དེ་འགལ་ལ་སོགས་པ་རྟོགས་པ་དང་མ་རྟོགས་པ་དབྱེ་བའི་སྒོ་ནས་ཞེས་བྱ་བས་ནི་འདིར་ཇི་ལྟར་གང་ཞིག་གང་དང་འབྲེལ་པ་དེ་སྟོན་ཏོ། །དེ་མ་རྟོགས་པ་ནི་རྒྱུ་ལ་སོགས་པ་མི་དམིགས་པའོ། །དེ་དང་འགལ་བ་རྟོགས་པ་ནི་འགལ་བ་དམིགས་
[117b.2]པའོ། །སོགས་པའི་སྒྲའི་དོན་བརྗོད་པ་ནི་འགལ་བའི་འབྲས་བུ་རྟོགས་ཞེས་བྱ་བ་ལ་སོགས་པའི་ཞེས་བྱ་བ་ཡིན་ནོ། །འདིར་སྦྱོར་བ་རྣམ་པ་གསུམ་དུ་གང་ཞིག་གང་གི་ཁོངས་སུ་འདུ་བར་བསྟན་པ་དེ་ནི་སྔར་བསྟན་ཟིན་ཏོ། །དེས་སྦྱོར་བ་རྣམ་པ་གསུམ་པོ་འདི་ཉིད་རྣམ་པ་དུ་མར་བརྗོད་
[117b.3]པ་ཡིན་ནོ། །གལ་ཏེ་སྔར་ནི་རང་བཞིན་འགལ་བ་དམིགས་པ་རང་རྒྱུད་དུ་བསྟན་གྱི་ཇི་ལྟར་ཉེ་བར་བསྟན་པ་དབྱེ་བ་རྣམ་པ་གསུམ་ལས་གང་རུང་ཞིག་གིས་རྣམ་པར་དབྱེ་བ་ནི་མ་ཡིན་ནོ། །ཁྱབ་པར་བྱེད་པ་མི་དམིགས་པ་ནི་སྔར་རང་རྒྱུད་དུ་མ་ཡིན་པར་བསྟན་ལ། འདིར་ནི་
[117b.4]རང་རྒྱུད་དུ་བསྟན་ཏེ། དེས་ན་ཇི་ལྟར་མི་འགལ་ཞེ་ན། བརྗོད་པ་དབྱེ་བ་མཐའ་དག་རང་བཞིན་མི་དམིགས་པ་ཉིད་ཀྱི་ནང་དུ་འདུ་བའི་ཕྱིར་འདིར་འབྲེལ་པ་བསྟན་པའི་དོན་དུ་ཉེ་བར་བསྟན་པ་ན་འབྲེལ་པ་ལ་རང་དབང་དུ་བསྟན་པས་དེ་ལྟར་བསྟན་པ་མི་འགལ་ལོ། །དེས་ན། །འགལ་
[117b.5]དང་འབྲས་བུ་དག་གྲུབ་དང་། །ཞེས་བྱ་བ་ལ་སོགས་པ་སྦྱོར་བའི་དབྱེ་བ་རྣམ་པ་བཞི་བཤད་པ་ནི་དེ་དག་ཁོངས་སུ་བསྡུ་བའི་གཞི་ཡིན་པའི་ཕྱིར་རོ། །སྦྱོར་བ་གཞན་ཁོངས་སུ་འདུ་བ་ཅན་དེ་དག་ཀྱང་རང་བཞིན་མི་དམིགས་པའི་ཁོངས་སུ་འདུའོ། །འདིར་ནི་འབྲེལ་པ་བསྟན་པའི་ཕྱིར་
[117b.6]གཉིས་བཀོད་ལ་དངོས་པོ་མེད་པ་མངོན་སུམ་དུ་བྱས་པ་ནི་གསུམ་པ་ཡིན་ཏེ། ཐམས་ཅད་ཁོངས་སུ་འདུ་བའི་གཞི་ཡིན་པའི་ཕྱིར་གཏན་ཚིགས་རྣམ་པ་གསུམ་དུ་འགྲུབ་པའི་རྒྱུའི་ཕྱིར་རོ། །འགལ་བ་དམིགས་པ་ཡང་རྒྱུ་དང་འབྲས་བུའི་འབྲེལ་པའི་རྩ་བར་གྱུར་པ་ཅན་ཁོ་ནའོ། །
[117b.7]དེ་ཉིད་ཀྱི་ཕྱིར་དེ་དང་འགལ་བར་གྲུབ་པ་འདི་ཡང་ཁོངས་སུ་རྒྱུ་མ་གྲུབ་པ་ཞེས་རྒྱུ་འགལ་བའི་འབྲས་བུ་དམིགས་པ་རྒྱུ་མི་དམིགས་པ་ཁོངས་སུ་འདུས་པར་བཤད་དོ། །དེ་ལྟར་མ་ཡིན་ན་འགལ་བ་དམིགས་པ་ཉིད་དུ་འཆད་པར་འགྱུར་རོ། །དེས་ན་དེ་ལྟར་རང་གི་དོན་གྱི་རྗེས་
[118a]
[118a.1]སུ་དཔག་པར་རྟགས་ཀྱི་སྦྱོར་བ་རྣམ་པ་འདི་གསུམ་ཁོ་ན་ཡིན་པས་རང་གི་དོན་གྱི་རྗེས་སུ་དཔག་པའི་མཚན་ཉིད་ནི་དེ་ཉིད་དུ་ཉེ་བར་བསྡུ་བར་རིགས་པ་ཡིན་ནོ། །དེས་ན་དེ་ལྟར་གཏན་ཚིགས་ཀྱི་མཚན་ཉིད་དུ་གྱུར་པའི་ཚུལ་གསུམ་དུ་འདུས་པའི་ཕྱིར་དེར་འདུ་བའི་རྒྱུ་རང་བཞིན་འབྲེལ་
[118a.2]པ་ཡིན་པར་བསྟན་པ་ཡིན་ནོ། །དེ་ལ་ཡང་མི་དམིགས་པ་རང་བཞིན་གྱི་གཏན་ཚིགས་ཀྱི་ནང་དུ་འདུ་བའི་ཕྱིར་གཉིས་ཉིད་དུ་ལུས་པར་འགྱུར་རོ། །དེས་ན་ཚུལ་གསུམ་དོན་དམ་པར་གཉིས་སུ་གྱུར་པའི་གསུམ་དུ་བསྡུས་པའི་ཕྱིར་འབྲེལ་པ་རྣམ་པ་གཉིས་ཁོ་ནར་བརྗོད་དོ། །འོན་ཏེ་
[118a.3]ཚུལ་གསུམ་ཙམ་གཏན་ཚིགས་ཀྱི་མཚན་ཉིད་ཡིན་ན་དེ་གསུམ་དུ་ཉེ་བར་བསྡུ་བས་ཅི་དགོས། གསལ་བ་གསུམ་དུ་བསྟན་པའོ་ཞེ་ན། གལ་ཏེ་གསལ་བ་གསུམ་ཁོ་ན་དེ་ལྟ་བུར་གྱུར་པ་ཡིན་ན། མཚན་ཉིད་དེ་དང་ལྡན་པ་ཁོ་ནས་དེ་ལྟར་རྟོགས་པས་ན་གྲངས་ཀྱིས་ཅི་བྱ། འོན་ཏེ་གཞན་ལ་
[118a.4]ཡང་མཚན་ཉིད་དེ་ཡོད་པ་ཉིད་ན་བགྲངས་ཀྱང་དེ་མི་སྤོངས་སོ་ཞེས་དོགས་པ་ལ་རྒྱུ་དང་འབྲས་བུའི་དངོས་པོའམ་ཞེས་བྱ་བ་ལ་སོགས་པ་སྨོས་སོ། །ངེས་པ་ནི་ངེས་པར་བྱེད་པ་ལས་ཡིན་པར་འཐད་དོ། །ངེས་པ་ཡང་མེད་ན་མི་འབྱུང་བ་ཡིན་ཏེ། མེད་ན་མི་འབྱུང་ངེས་པ་སྟེ་ཞེས་གང་བཤད་
[118a.5]པའོ། །མེད་ན་མི་འབྱུང་བ་ཡང་ཡིན་ལ། ངེས་པ་ཡང་ཡིན་ནོ་ཞེས་བྱ་བའི་དོན་ཏོ། །གཞན་ཡང་ངེས་པ་མེད་ན་མི་འབྱུང་བ་ཡིན་ཏེ། མེད་ན་བཤད་དོ། །མེད་ན་མི་འབྱུང་བ་ཡང་རྗེས་སུ་འགྲོ་ལྡོག་ཉིད་དེ། ཇི་སྐད་དུ་མེད་ན་མི་འབྱུང་བ་ནི་ཇི་སྐད་བཤད་པའི་ཁྱབ་པ་ཡིན་ནོ་ཞེས་བཤད་དོ། །
[118a.6]རྗེས་སུ་འགྲོ་བ་ནི་ངེས་པའི་བདག་ཉིད་ཁོ་ན་སྟེ་དེ་ལྟ་མ་ཡིན་ན་སྒྲུབ་བྱེད་ཡོད་ན་བསྒྲུབ་བྱ་ཡོད་པའི་ངེས་པ་མ་གྲུབ་པས་བསྒྲུབ་བྱ་རྟོགས་པར་མི་འགྱུར་བ་ཁོ་ནའོ། །དེ་བཞིན་དུ་ལྡོག་པ་ཡང་ངེས་པ་ཁོ་ན་སྟེ། དེ་ཉིད་ལ་ཁྱབ་པར་བྱ་བ་ཡོད་པ་ཡིན་པའི་ཕྱིར་རོ། །དེས་ན་ངེས་པའི་བདག་
[118a.7]ཉིད་ཀྱི་མེད་ན་མི་འབྱུང་བ་ནི་རྗེས་སུ་འགྲོ་བ་དང་ལྡོག་པ་ཁོ་ནའོ། །དེ་ནི་ངེས་པར་བྱེད་པ་ཁོ་ན་ལས་འགྱུར་རོ། །ངེས་པར་བྱེད་པ་ཡང་རྒྱུ་དང་འབྲས་བུའི་དངོས་པོ་ཡིན་ཏེ་མེའི་རྒྱུན་དུ་བའི་རྒྱུན་འཕེན་པར་བྱེད་པ་ཉིད་ཀྱིས་ན། དུ་བ་ཡོད་ན་ཡོད་པར་མི་འཁྲུལ་བའི་ཕྱིར་དང་། གཞན་
[118b]
[118b.1]ལས་ལན་ཅིག་ཀྱང་མི་འབྱུང་བའི་ཕྱིར་དེ་མེད་ན་མེད་པའི་ཕྱིར་རོ། །རང་བཞིན་ཡང་ངེས་པར་བྱེད་པ་ཡིན་ཏེ། ཆོས་དེ་ཆོས་གཞན་གྱི་བདག་ཉིད་ཡིན་པས་དེ་ཡོད་པ་ན་ཡོད་པའི་ཕྱིར་དང་། མེད་ན་མེད་པའི་ཕྱིར་དེ་ལྟར་རྗེས་སུ་འགྲོ་བ་དང་ལྡོག་པ་གྲུབ་པའི་ཕྱིར་རོ། །དེས་ན་ངེས་པར་
[118b.2]བྱེད་པ་ལ་བརྟན་ནས་ངེས་པ་ཡིན་པ་དེས་ན་དེའི་བདག་ཉིད་དང་དེ་ལས་བྱུང་བ་དག་ཁོ་ན་ལས་རྗེས་སུ་འགྲོ་བ་དང་ལྡོག་པ་དག་ཏུ་འགྱུར་བ་ཡིན་ནོ། །ངེས་པར་བྱེད་པའི་རྒྱུ་མཚན་གྱིས་ངེས་པ་ཡིན་མོད། འདི་རྟོགས་པ་ནི་རང་འཛིན་པའི་རྟོགས་པ་ལ་བརྟེན་པར་འགྱུར་རོ། །ཇི་ལྟར་
[118b.3]འབྲས་བུའི་རང་བཞིན་རྒྱུའི་རྒྱུ་མཚན་ཅན་ནི་གང་གི་ཚེ་རང་གི་ངོ་བོས་རྟོགས་པ་དེའི་ཚེ་རང་འཛིན་པའི་རྟོགས་པ་ལ་ཡིན་ནོ། །དེའི་འབྲས་བུ་ཉིད་ཀྱིས་དུ་བ་མེ་ལ་ངེས་པ་ནི་མངོན་སུམ་ཁོ་ན་སྟེ། དེ་ཡོད་ན་མེ་ཡོད་པར་རྟོགས་པའི་ཕྱིར་དང་དེ་བཞིན་དུ་མེ་མེད་ན་ཡོད་པར་རྟོགས་པ་མེད་
[118b.4]པའི་ཕྱིར་རོ། །འབྲས་བུ་ཉིད་ཀྱིས་འདི་ཡོད་ན་དེ་ཡོད་པ་དང་། དེ་མེད་ན་འདི་ལྡོག་པ་ཡིན་ལ་དེ་ནི་མངོན་སུམ་ཁོ་ནས་རྟོགས་པ་ཡིན་ནོ། །དེ་བཞིན་དུ་ཤ་པ་ཡང་དེའི་བདག་ཉིད་ཁོ་ནས་ཤིང་ལ་ངེས་པ་ཡིན་ལ་ངེས་པར་ཡང་མངོན་སུམ་ཁོ་ནས་རྟོགས་སོ། །དེས་ན་གང་ཞིག་གང་གི་
[118b.5]འབྲས་བུ་ཡིན་པ་དང་གང་གང་གི་རང་བཞིན་ཡིན་པ་དེ་ནི་ཡོད་པ་དང་མེད་པའི་རྗེས་སུ་བྱེད་པ་ལས་མི་འདའ་བའི་ཕྱིར། གནས་པའི་དངོས་པོ་རྟོགས་པར་བྱེད་པའི་ཚད་མ་གཞན་ཁོ་ན་ཡིན་ནོ་ཞེས་དོགས་པ་ལ་དེའི་ཡུལ་ཅན་གྱི་ཚད་མ་གཞན་སེལ་བ་ནི་མ་མཐོང་བ་
[118b.6]ལས་མིན་ཞེས་བྱ་བས་ནི་ལྡོག་པའི་རྟོགས་པ་བསལ་ཏེ། མཐོང་ལས་མིན་ཞེས་བྱ་བས་ནི་རྗེས་སུ་འགྲོ་བའི་རྟོགས་པའོ། །འདི་སྐད་བཤད་པ་ཡིན་ཏེ་འདིར་གོ་བར་བྱེད་པའི་ཡན་ལག་ཏུ་གྱུར་པའི་རྗེས་སུ་འགྲོ་བ་དང་ལྡོག་པའི་སྐབས་ཡིན་ནོ། །དེ་དག་གཏན་ཚིགས་ཤེས་པའི་ཡན་ལག་
[118b.7]མ་ཡིན་ན་ནི་དངོས་པོར་གནས་པ་ཙམ་དུ་བསྟན་པ་དོན་མེད་པ་ཁོ་ནའོ། །དེ་དག་རང་གི་རྒྱུའི་དབང་གི་བདག་ཉིད་གྲུབ་པ་ཡིན་ཡང་དེ་ལྟར་རྟོགས་པར་བྱེད་པའི་ཚད་མ་གང་ཡིན་པ་དེ་ཉིད་བསྟན་པར་བྱ་བ་ཡིན་ཏེ། རྣམ་པ་འདི་ལྟ་བུའི་དངོས་པོ་འདིའི་རྒྱུ་མཚན་ནི་འདི་ཡིན་ནོ་ཞེས་རྣམ་པར་གཞག་
[119a]
[119a.1]པའི་ཡན་ལག་མ་ཡིན་པའི་དོན་བསྟན་པས་ཅི་བྱ་དངོས་པོ་དཔྱོད་པ་ནི་དེ་བསྟན་པར་བྱ་བ་ཡིན་གྱི་རྗེས་སུ་དཔག་པའི་ཡན་ལག་ཏུ་ནི་མ་ཡིན་ནོ། །དེས་ན་འབྲེལ་པའི་རྒྱུ་མཚན་ཅན་གྱི་མེད་ན་མི་འབྱུང་བ་ནི་འབྲེལ་པའི་ཚད་མ་ཅན་ཁོ་ན་ཡིན་ན་འབྲེལ་པ་ཉེ་བར་བཀོད་པ་
[119a.2]ཡིན་ནོ། །འདི་ལྟར་དུ་བ་དང་མེ་ཡོད་པ་དང་མེད་པར་རྟོགས་པར་བྱེད་པའི་མངོན་སུམ་ཙམ་གྱིས་ནི་མེད་ན་མི་འབྱུང་བ་ངེས་པ་མ་ཡིན་གྱི་འོན་ཀྱང་འབྲས་བུ་ཉིད་ཀྱིས་ཏེ། ཐམས་ཅད་དུ་དེ་ལྟར་ཡིན་པར་མངོན་སུམ་གྱིས་མི་རྟོགས་པའི་ཕྱིར་དང་། དེ་མེད་པར་སྐབས་ཀྱིས་སྒྲུབ་པར་
[119a.3]བྱེད་པ་ཉིད་ཀྱང་མེད་པའི་ཕྱིར་རོ། །དེ་བཞིན་ཤ་པ་ཞེས་དེ་ལྟར་རྟོགས་པ་འདི་ཅི་ཡོད་ཞེས་རྣམ་པར་དཔྱོད་པ་ན་གང་གི་ཚེ་ཁྱད་པར་ཅན་གྱི་དབྱིབས་རྟོགས་པ་དེའི་ཚེ། ཤ་པ་འདི་ནི་ཤིང་གི་རང་བཞིན་ཉིད་དོ་ཞེས་རྟོགས་པ་ཉིད་དོ། །ཇི་ལྟར་རྟགས་རྟོགས་པ་བཟུང་བ་དག་ལ་ཆོས་རྣམས་
[119a.4]ཀྱི་རང་བཞིན་ནི་རྣམ་པར་དཔྱད་པར་ནུས་པ་ཁོ་ན་སྟེ། དཔེར་ན་སྐད་ཅིག་མ་ཞེས་བྱ་བར་ལྡོག་པའི་བདག་ཉིད་དུ་རྟོགས་པ་དང་། ནུས་པ་ཞེས་བྱ་བ་དབྱིབས་དང་། དཀར་པོ་ཞེས་བྱ་བ་གཟུགས་སུ་རྟོགས་པ་བཞིན་ནོ། །དེས་ན་ཇི་ལྟར་དཀར་པོའི་དཀར་པོ་ཉིད་ཡིན་པས་དེར་འཁྲུལ་པ་
[119a.5]མེད་པ་དེ་བཞིན་དུ་ཤ་པ་ཉིད་ཀྱང་ཤིང་ལ་མི་འཁྲུལ་ཏེ་ཤ་པ་ཉིད་བཞིན་ནོ་ཞེས་འདི་གཉི་ག་ཡང་འཆད་པར་འགྱུར་རོ། །དེས་ན་གང་ལས་གསུམ་ལ་ཚུལ་གསུམ་ཡོད་པ་དང་། རྟོགས་པའི་རྒྱུ་མཚན་ཡོད་པའི་ཕྱིར་རྟོགས་པར་འགྱུར་བ་དེ་ཉིད་བཤད་པའི་ཕྱིར་གསུམ་ཉིད་ལ་དེ་ཉེ་
[119a.6]བར་བསྡུས་སོ། །དེ་ལ་ཡང་དེ་ཡོད་པ་དང་རྟོགས་པ་དག་གི་རྒྱུ་མཚན་ཡོད་པའི་ཕྱིར་གསུམ་ལ་ཚུལ་གསུམ་ཡོད་མོད། གཞན་ཡང་ཡོད་པར་འགྱུར་བ་དེས་ན་དེ་ནི་རྣམ་པ་གསུམ་ཉིད་ཅེས་བྱ་བའི་ངེས་པ་མི་རིགས་སོ་ཞེ་ན། གཞན་དུ་ཞེས་སྨོས་སོ། །ཇི་ལྟར་བཤད་པའི་ངེས་པར་བྱེད་
[119a.7]པ་མེད་ན། ཐ་དད་པ་གཞན་དོན་ཐ་དད་པ་གཞན་དག་དང་། ངེས་པར་ཡོད་པའི་ངེས་པ་གང་ཡིན་པ་སྟེ་དེ་ལས་རང་གི་ངོ་བོ་ཐོབ་པ་མ་ཡིན་པའི་ཕྱིར་དེ་མེད་ན་ཅི་སྟེ་མེད། དེས་ན་ཇི་ལྟར་ཡོད་པ་ངེས་པ་ཡིན། དོན་གཞན་རྒྱུ་མཚན་ཅན་གྱི་ཆོས་ཞེས་བྱ་བས་ནི། དེ་ཡོད་པ་ཙམ་དང་རྗེས་
[119b]
[119b.1]སུ་འབྲེལ་པ་ཉིད་མེད་པར་བརྗོད་དོ། །དེས་ན་འདི་ཐ་དད་པར་གྱུར་པས་དེའི་བདག་ཉིད་མེད་དོ། །གོས་ལ་ཚོན་བཞིན་ནོ་ཞེས་བྱ་བ་ནི་དེའི་བདག་ཉིད་མེད་ན་གདོན་མི་ཟ་བར་ཡོད་པར་ངེས་པ་མེད་པའོ། །འདིར་གཞན་དུ་ཞེས་བྱ་བ་འབྲེལ་པའི་བདག་ཉིད་ལས་ཀྱང་གཞན་དུ་གྱུར་པ་
[119b.2]ཡིན་པས་ན་རྒྱུ་དང་འབྲས་བུའི་དངོས་པོ་མེད་ན་གཞན་དག་དང་ངེས་པར་ཡོད་པའི་ངེས་པ་མེད་པར་བསྟན་པས་ཐ་དད་པའི་དངོས་པོ་ལ་དེའི་བདག་ཉིད་ཀྱང་མེད་པའི་ཕྱིར་དེའི་བདག་ཉིད་མེད་པ་ཡང་བརྗོད་པར་ནུས་མོད་ཀྱི། དེ་ལྟ་ན་ཡང་ཐ་དད་པ་མེད་པ་ཙམ་ནི་དེའི་བདག་ཉིད་མ་ཡིན་
[119b.3]གྱི་འོན་ཀྱང་ཆོས་གཅིག་གི་བདག་ཉིད་ཡིན་ནོ། །དེས་ན་དེ་མེད་པར་བསྟན་པའི་ཕྱིར་དེ་ཉིད་དེ་ལྟར་བརྗོད་དེ། དེ་ཡོད་ཙམ་དང་རྗེས་སུ་འབྲེལ་པ་འཕེན་པར་བྱེད་པ་ཡིན་པའི་ཕྱིར་རོ། །ཡང་ན་གཞན་དུ་ཞེས་བྱ་བས་ནི་རྒྱུ་དང་འབྲས་བུའི་དངོས་པོ་ཉིད་ལས་ཐ་དད་པར་བརྗོད་པ་ཡིན་
[119b.4]ཏེ། རྒྱུ་དང་འབྲས་བུའི་དངོས་པོ་ལས་མེད་ན་མི་འབྱུང་བ་ངེས་པ་ཡིན་ཏེ། གཞན་དུ་གཞན་ནི་གཞན་དག་དང་། །ངེས་པར་ཡོད་པའི་ངེས་པ་གང་། །ཞེས་འབྲེལ་པའི་ཕྱིར་རོ། །དོན་གཞན་རྒྱུ་མཚན་ཅན་གྱི་ཆོས་ཞེས་བྱ་བས་ནི་དེ་ཙམ་དང་རྗེས་སུ་འབྲེལ་པའི་མཚན་ཉིད་ལས་
[119b.5]ཐ་དད་པའོ། །གོས་ལ་ནི་ཚོན་དོན་གཞན་གྱི་རྒྱུ་མཚན་ཅན་གྱི་ཆོས་ཡིན་ཏེ། དེས་ན་གོས་དེ་ལ་གདོན་མི་ཟ་བར་འགྱུར་བ་ཡིན་ནོ། །གོས་ཡིན་པ་ཙམ་གྱིས་ནི་སྒྲུབ་པར་བརྗོད་མི་ནུས་སོ། །དེས་ན་གོས་ནི་ཚོན་དོན་གཞན་ལས་འགྱུར་བའི་ཕྱིར་དེ་ལ་གོས་མི་འཁྲུལ་པ་མ་
[119b.6]ཡིན་ཏེ། །འབྲེལ་པ་མེད་པའི་ཕྱིར་རོ། །བར་སྐབས་ཀྱི་ཚིགས་སུ་བཅད་པ་ཞེས་བྱ་བ་ནི་མདོ་མ་ཡིན་པར་བརྗོད་པའོ། །དེས་ན་དེ་ལྟར་འབྲེལ་པ་ཉིད་ལས་གཏན་ཚིགས་གོ་བར་བྱེད་པ་ཡིན་པར་བསྒྲུབས་ཏེ། གང་དག་དོན་གཞན་གྱི་རྒྱུ་ཅན་ཡང་དངོས་པོའི་རང་བཞིན་དུ་
[119b.7]ཁས་བླངས་ནས་མི་རྟག་པ་ལ་སོགས་པའི་རང་བཞིན་གྱི་ཆོས་གཅིག་གི་བདག་ཉིད་ཀྱིས་འཐོབ་པ་དེ་ཙམ་དང་རྗེས་སུ་འབྲེལ་པ་ཉིད་སྤོང་བ་དེ་དག་ལ་འབྲེལ་པ་བསྒྲུབ་པའི་དོན་ཉིད་དགག་པའི་ཕྱིར། གཞན་ཡང་ཞེས་སྨོས་སོ། །གང་གི་ཕྱིར་མི་རྟག་པ་ཉིད་ཀྱི་མཚན་ཉིད་
[120a]
[120a.1]ཀྱི་ཆོས་དོན་གཞན་གྱི་རྒྱུ་མཚན་ཅན་ཡིན་ན་དེའི་ཕྱིར་གཞན་ཉིད་ཡིན་པར་འགྱུར་རོ། །དངོས་པོ་བདག་ཉིད་ཐོབ་པའི་མི་རྟག་པ་ཉིད་འཇིག་པ་ཞེས་བྱ་བ་དེ་ནི་འཇིག་པའི་རྒྱུ་ལས་འབྱུང་བ་ཡིན་ནོ། །དེས་ན་འདི་དངོས་པོ་དེའི་རང་བཞིན་དུ་མི་འགྱུར་རོ། །གཞན་དེ་
[120a.2]སྐད་སྨྲ་བས་ནི་རྒྱུ་མཐའ་དག་འཇིག་པའི་བདག་ཉིད་སྐྱེད་པ་ཉིད་ཀྱིས་བྱས་པ་ཉིད་འཇིག་པ་ལས་ཐ་དད་པ་མ་ཡིན་ཏེ། རྒྱུ་དང་འབྲེལ་པས་བྱས་པ་ཡིན་ལ་རྒྱུ་དང་འབྲེལ་པས། མི་རྟག་པ་ཉིད་ཀྱང་ཡིན་ནོ་ཞེས་བྱ་བ་དེའི་བདག་ཉིད་སྤང་བར་འགྱུར་བ་དེ་བཞིན་དུ་མི་རྟག་པ་ཉིད་
[120a.3]ཀྱང་སྤང་བར་འགྱུར་རོ། །འདི་ལྟར་འདི་མི་རྟག་པའི་བདག་ཉིད་དུ་སྐྱེ་བ་ནི་མ་ཡིན་ཏེ། དེ་ལྟར་ཁས་བླངས་ན་དེའི་བདག་ཉིད་དུ་གྲུབ་པའི་ཕྱིར་རོ། །དེས་ན་མི་རྟག་པ་ཕྱིས་འབྱུང་ན་བྱས་པ་ལས་མི་རྟག་པ་ཉིད་གཞན་ཁོ་ནར་འགྱུར་རོ། །གཞན་ནི་གཞན་གྱི་རང་བཞིན་ཅན་
[120a.4]དུ་འགྱུར་བ་མ་ཡིན་ན་དེས་ན་དངོས་པོ་མི་རྟག་པར་མི་འགྱུར་ཏེ། དཔེར་ན་བུམ་པ་སྣམ་བུར་མི་འགྱུར་བ་བཞིན་ནོ། །འགྲེལ་པ་ནི་དེ་གྲུབ་ན་ཞེས་བྱ་བའོ། །དོན་གཞན་གྱི་རྒྱུ་མཚན་ལས་གཉིས་འགྱུར་བ་ཡིན་ཏེ། རྒྱུ་དོན་གཞན་ཡིན་པ་ཉིད་ཀྱིས་དངོས་པོ་གྲུབ་ཀྱང་མི་
[120a.5]རྟག་པ་ཉིད་མ་སྐྱེས་པ་དང་། དེ་བཞིན་དུ་རྒྱུ་ཐ་དད་པའི་ཕྱིར་དེའི་རྒྱུ་གཞན་ཡིན་པར་འགྱུར་བ་དེས་ན་རྒྱུ་གཞན་ཡིན་པས་སྐྱེས་པ་དང་མ་སྐྱེས་པའི་མཚན་ཉིད་ཆོས་འགལ་བ་གནས་པར་འགྱུར་རོ། །རྒྱུ་ཡོད་པ་ཉིད་ན་འབྲས་བུ་འགྲུབ་པའི་ཕྱིར་གཞན་གྱི་རྒྱུ་ཅན་དེ་གྲུབ་ཀྱང་རང་གི་རྒྱུ་
[120a.6]མེད་པས་མ་གྲུབ་པ་ནི་ཕྱིས་ཉིད་ཡོད་པའི་ཕྱིར་རོ། །དེ་བཞིན་དུ་རྒྱུ་ཐ་དད་པ་སྤང་ངོ་། །དེས་ན་གང་སྐྱེས་ཀྱང་མ་སྐྱེས་པ་གང་ཡིན་པ་དེ་དེའི་རང་བཞིན་མ་ཡིན་པའི་ཕྱིར་དངོས་པོ་མི་རྟག་པར་མི་འགྱུར་ཏེ། མི་རྟག་པ་སྟོང་པ་ཉིད་དུ་བདག་ཉིད་ལ་རང་གི་རྒྱུ་ལས་མི་རྟག་པ་ཉིད་མེད་པའི་ཕྱིར་རོ། །
[120a.7]གལ་ཏེ་དེ་དང་འབྲེལ་པའི་ཕྱིར་དེ་དེའི་རང་བཞིན་ཡིན་པ་དེས་ན་དེའི་རང་བཞིན་དུ་རིགས་པ་མ་ཡིན་ན་ཞེས་བྱ་བ་གང་ཡིན་པའི་ཚིག་གི་ཚུལ་ནི་གསོག་ཏུ་འགྱུར་རོ། །འོན་ཏེ་འབྲེལ་པར་རིགས་པ་མ་ཡིན་ནོ་ཞེས་བརྗོད་ན། དེ་ནི་ཅིར་ཡང་མི་རུང་སྟེ། ཐ་དད་པ་ལ་ལྟོས་ནས་སུན་འབྱིན་པ་བརྗོད་
[120b]
[120b.1]པའི་སྐབས་ཡིན་པའི་ཕྱིར་དང་། ཐ་དད་ཀྱང་དེའི་རང་བཞིན་དུ་འཐད་པའི་ཕྱིར་རོ། །བརྗོད་པ་དེའི་རང་བཞིན་དུ་རིགས་པ་མ་ཡིན་ནོ་ཞེས་བྱ་བ་ནི་འདིར་ཐ་མི་དད་པ་འགོག་པ་ཡིན་ནོ། །རང་བཞིན་ཞེས་བྱ་བ་ནི་དངོས་པོའི་རང་གི་ངོ་བོ་ཐ་མི་དད་པ་ལ་བརྗོད་ཀྱི། འབྲེལ་ཀྱང་དངོས་པོ་དངོས་པོ་
[120b.2]གཞན་གྱི་རང་བཞིན་དུ་འགྱུར་བ་ནི་མ་ཡིན་ནོ། །སེར་པོ་དང་སྔོན་པོ་བཞིན་དུ་འབྲེལ་ཞེས་བྱ་བར་འགྱུར་གྱི་རང་བཞིན་དུ་ནི་མ་ཡིན་ནོ། །གྲུབ་པ་དང་མ་གྲུབ་པ་དག་དང་རྒྱུ་ཐ་དད་པའི་ཕྱིར་ཐ་དད་པ་ཡིན་ནོ་ཞེས་བྱ་བ་གང་ཡིན་པ་འདི་ཉིད་ག་ལས་ཤེ་ན། དངོས་པོ་རྣམས་ཀྱི་ཐ་དད་པའམ་
[120b.3]རྒྱུ་ཐ་དད་པ་ནི་འདི་ཁོ་ན་ཡིན་ཏེ་ཞེས་སྨོས་སོ། །གང་ནི་ཐ་དད་པ་ཡིན་ལ་རྒྱུ་ཐ་དད་པ་ཡང་གང་ཡིན་ཞེ་ན་ཆོས་འགལ་བར་གནས་པའམ་རྒྱུ་ཐ་དད་པ་གང་ཡིན་པའོ་ཞེས་བཤད་དོ། །ཆོས་འགལ་བ་གནས་པ་ནི་ཐ་དད་པ་ཡིན་ལ་རྒྱུ་ཐ་དད་པ་ནི་རྒྱུ་ཐ་དད་པ་ཡིན་ནོ། །གང་དག་གི་ཆོས་
[120b.4]ཕན་ཚུན་འགལ་བ་དང་གཅིག་ཏུ་གྱུར་པ་ཆོས་འགལ་བ་གནས་པ་དེ་ཉིད་དེ་དག་གི་ཐ་དད་པ་ཡིན་ནོ། །དེ་བཞིན་དུ་གང་ཞིག་ཚོགས་པ་གཞན་ལ་སྐྱེ་བ་ན་གང་ཞིག་གཞན་ལས་སྐྱེ་བ་རྒྱུ་ཐ་དད་པ་དེ་ནི་དེ་དག་གི་རྒྱུ་ཐ་དད་པ་ཡིན་ནོ། །ཐ་དད་པ་ནི་རྣམ་པ་གཉིས་ཏེ་གསལ་བ་ཐ་དད་པ་དང་།
[120b.5]སྐལ་བ་མཉམ་པ་དང་མི་མཉམ་པ་ཐ་དད་པའོ། །དེ་ལ་གང་གི་རྒྱུ་བྱེད་པ་ན་གང་གི་རྒྱུ་བྱེད་པ་མེད་པ་དེ་ནི་རིགས་པ་མཚུངས་པའམ་དེ་ལྟ་མ་ཡིན་ཡང་བླ་སྟེ། གསལ་བ་ཐ་དད་པར་ངེས་པ་ཡིན་ནོ། །འདིར་ནི་འདི་ཉིད་སྐབས་སུ་བབ་པ་ཡིན་ནོ། །རིགས་མི་མཐུན་པ་ནི་རིགས་མི་མཐུན་པ་
[120b.6]ལས་སྐྱེས་པ་ཡིན་ནོ་ཞེས་འདི་ནི་འཆད་པར་འགྱུར་རོ། །དེ་ལ་གྲུབ་པ་ཉིད་ནི་མ་གྲུབ་པར་མི་འགྱུར་བའི་ཕྱིར་གྲུབ་པ་དང་མ་གྲུབ་པ་དག་ཐ་དད་པ་ཡིན་ནོ། །གང་ཞིག་རྒྱུའི་མཐུ་ལས་བདག་ཉིད་ཐོབ་པ་ན་རྒྱུ་གཞན་ལས་འགྱུར་བ་གང་ཡིན་པ་དེ་ཡང་ཐ་དད་པ་ཁོ་ནའོ། །དེ་དག་ཐ་དད་དོ་ཞེས་
[120b.7]བྱ་བ་འདི་ཉིད་ཇི་ལྟར་རྟོགས། ཚད་མས་དེ་ལྟར་རྟོགས་སོ་ཞེ་ན། གང་ཞིག་དོན་ཐམས་ཅད་ངེས་པར་ནུས་པའི་ཚད་མ་ནི་མེད་དེ་ཇི་སྲིད་རིག་པ་ཙམ་རྣམ་པར་འཇོག་པ་ཡིན་པའི་ཕྱིར་དང་། རིག་པ་མ་ཡིན་པ་རྣམས་ཀྱང་རིག་པ་དང་འདྲ་བའི་ངེས་པ་ཡང་མི་རྟོགས་པའི་ཕྱིར་ཐམས་
[121a]
[121a.1]ཅད་མཁྱེན་པ་མ་ཡིན་པ་ལ་ཐམས་ཅད་རིག་པ་མེད་པའི་ཕྱིར་རོ། །དེས་ན་ལ་ལར་གྲུབ་པ་དང་མ་གྲུབ་པ་ཐ་དད་པར་རིག་ཀྱང་གཞན་དུ་དེ་ལྟ་མ་ཡིན་པར་ཡང་འགྱུར་ཏེ། དེས་ན་ཚད་མ་ཇི་ལྟ་བ་བཞིན་ཁོ་ནར་རྟོགས་པའི་ཕྱིར་ཆོས་འགལ་བར་གནས་པ་ཐ་དད་
[121a.2]པར་བྱེད་པ་མ་ཡིན་ནོ་ཞེ་ན་འདིར་བརྗོད་པ། འདི་ནི་དངོས་པོའི་གནས་ཐབས་ཡིན་གྱི། འདི་ཚད་མའི་བྱེད་པ་ནི་མ་ཡིན་ནོ། །ཡོད་པ་དང་ཁྱད་པར་རྟོགས་པ་དག་ལ་ནི་མངོན་སུམ་དང་རྗེས་སུ་དཔག་པའི་བྱེད་པ་འཇུག་གི །རྣམ་པ་འདི་ལྟ་བུ་ནི་འདི་ལྟར་ཡིན་ནོ་ཞེས་བྱ་བ་གང་ཡིན་པ་
[121a.3]འདི་ནི་དངོས་པོའི་གནས་ཐབས་ཡིན་ཏེ། དཔེར་ན་གང་བྱས་པ་དེ་མི་རྟག་གོ་ཞེས་བྱ་བ་བཞིན་ནོ། །གལ་ཏེ་དངོས་པོའི་གནས་ལུགས་ཀྱང་རང་ཉིད་གསལ་བ་ནི་མ་ཡིན་ལ། དེ་གསལ་བ་གང་ཡིན་པ་དེ་ཡང་ཚད་མ་ཡིན་པ་དེས་ན་འདི་ནི་གང་ཇི་ལྟར་དམིགས་པ་དེ་དེ་ཁོ་ན་ལྟར་
[121a.4]བླང་བར་བྱ་ཞེས་བྱ་བ་དེ་ཉིད་དུ་འགྱུར་རོ། །རྣམ་པ་འདི་ལྟ་བུའི་དངོས་པོ་ཡོད་དོ་ཞེས་བྱ་བ་འདི་ཡང་ཤེས་པ་ཡུལ་དུ་མ་བྱས་པར་རང་ཉིད་གསལ་བར་ནི་མི་འཐད་དོ། །ཚད་མ་མེད་པར་དངོས་པོའི་གནས་པ་གྲུབ་པ་ནི་འགའ་ཡང་མེད་དོ་ཞེ་ན། འདིར་ངེས་པར་གཟུང་བར་གྱིས་
[121a.5]ཤིག །དུས་དེར་གྲུབ་པ་དང་། དུས་གཞན་དུ་གྲུབ་པ་དག་རྟོགས་པ་དེ་ཉིད་ཀྱིས་རྟོགས་སམ་མ་རྟོགས། གལ་ཏེ་མ་རྟོགས་ན་ནི་ཚད་མ་ཉིད་མེད་པར་ཐལ་ལོ། །རྣམ་པར་རྟོག་པ་རྣམས་དངོས་པོའི་ཡུལ་ཅན་མ་ཡིན་པ་ཉིད་ཀྱིས་མ་རྟོགས་པ་ཁོ་ནའོ་ཞེ་ན་མ་ཡིན་ཏེ་དེར་ལྟག་པར་ཞེན་
[121a.6]པའི་ཕྱིར་དང་། དེ་ལྟ་བུ་ཉམས་སུ་མྱོང་བ་ལ་བརྟེན་པའི་ཕྱིར་དོན་དམ་པར་རྟོགས་པ་མ་ཡིན་ཡང་རྟོགས་པར་སྒྲུབ་པར་འགྱུར་བའི་ཕྱིར་རོ། །འོན་ཏེ་རྟོགས་པ་ཡིན་ན་དེ་ལྟ་ན་རྟོགས་པ་དེ་ལ་གནས་པ་འདི་ངེས་པར་བརྟག་ནུས་སོ། །རྣམ་པར་རྟོག་པ་ནི་འདོད་པ་ཙམ་ལ་རག་ལས་ནས་འཇུག་
[121a.7]པའི་ཕྱིར་ཇི་སྲིད་འདོད་པ་རྗེས་སུ་འཇུག་པ་ན་ཡུལ་འདི་ནི་རྣམ་པ་འདི་ལྟ་བུའི་ཞེས་དེས་རྟོགས་པ་ངེས་པར་བརྟག་པར་བྱ་བ་ཁོ་ནའོ། །དེ་ཉིད་ཀྱི་ཕྱིར་བརྗོད་པ་དང་འདྲེར་རུང་བ་ཉིད་རྣམ་པར་རྟོག་པ་ཉིད་དུ་བཤད་དོ། །དེས་ན་ཇི་ལྟར་འདིའི་རྗོད་པར་བྱེད་པ་འདི་ཡིན་ནོ་ཞེས་རང་གི་ངོ་བོར་མ་
[121b]
[121b.1]གྱུར་པའི་ཆོས་དག་ཏུ་ངེས་པར་རྟོགས་པ་དེ་བཞིན་དུ་རང་གི་ངོ་བོར་གྱུར་བས་ཀྱང་ངོ་། །གལ་ཏེ་བདག་ཉིད་གང་དུ་འདི་ངེས་པར་བརྟག་པ་དེ་གལ་ཏེ་འདིའི་བདག་ཉིད་ཡིན་ན་ནི་དེ་རིག་པས་རིག་པ་ཉིད་པས་འདི་ལ་ངེས་པར་རྟོགས་པ་གཞན་གྱིས་ཅི་བྱ། བདག་ཉིད་མ་ཡིན་ན་ཡང་སྒྲོ་འདོགས་པ་
[121b.2]ཙམ་དུ་འགྱུར་གྱི་དེའི་བདག་ཉིད་རྣམ་པར་དཔྱོད་པ་ན་མ་ཡིན་ནོ་ཞེ་ན། བརྗོད་པ་ཆར་ལྷག་པར་ཞེན་པ་ཉིད་ཀྱིས་རྣམ་པར་རྟོག་པ་ཆོས་ཙམ་ལ་བརྟེན་པས་ཀྱང་ཆོས་གང་ཞིག་ཆོས་གཞན་གང་གི་བདག་ཉིད་ཡིན་པ་དེ། དེ་རྟོགས་པ་ན་མ་རྟོགས་ཀྱང་དེ་ལྟ་བུའི་རང་བཞིན་གྱི་ཆོས་དེ་རྟོགས་པ་ལ་
[121b.3]གནས་པ་ན། ཡོད་པ་ཉིད་དོ་ཞེས་རྟོགས་པ་དེས་མ་རྟོགས་ཀྱང་རྟོགས་པ་གཞན་གྱི་ཡུལ་དུ་བྱ་བར་ནུས་སོ། །ཇི་ལྟར་དངོས་པོ་ཆ་མེད་པར་ཡུལ་དུ་བྱེད་པའི་བདག་ཉིད་མངོན་སུམ་གྱིས་སྔོན་པོ་མྱོང་བ་ན། དེ་ཇི་ལྟར་མྱོང་བ་བཞིན་དུ་རྟོགས་པ་པོའི་གཞན་དབང་དུ་གྱུར་པའི་རྟོགས་པ་ལ་གནས་པའི་
[121b.4]ཕྱིར་ངེས་པར་བརྟག་པར་བྱ་བའི་རང་བཞིན་ཡིན་པ་ན་རྣམ་པར་རྟོག་པ་རྣམས་ཕྱིའི་ཡུལ་ཅན་ཡིན་པའི་ཕྱིར་གལ་ཏེ་ཡང་སྤྱིས་དབེན་པའི་རང་བཞིན་ངེས་པ་མ་ཡིན་པ་དེ་ལྟ་ན་ཡང་སྣང་བའི་སྔོན་པོ་རང་བཞིན་གཅིག་ཏུ་སྣང་བ་འདི་རང་གི་ངོ་བོའམ་ངོ་བོ་གཞན་གྱི་རྗེས་སུ་སོང་བར་མི་སྣང་བའི་ཕྱིར་སྤྱིའི་
[121b.5]བདག་ཉིད་མ་ཡིན་པས་བདག་ཉིད་དེ་ལ་སྤྱིས་སྟོང་པ་ཉིད་ཡོད་དོ་ཞེས་དེའི་རང་བཞིན་རྣམ་པར་འབྱེད་པ་ཉིད་ལ་ངེས་པ་བཞིན་ནོ། །དེའི་ཕྱིར་ཆོས་གཞན་གྱི་བདག་ཉིད་ཅན་སྣང་བའི་ཆོས་ཀྱི་རྣམ་པར་དབྱེ་མི་ནུས་པའི་རང་བཞིན་ནི་མི་སྣང་ཡང་རྣམ་པར་དཔྱད་པ་ལས་ངེས་པར་འགྱུར་རོ། །དེ་
[121b.6]བས་ན་རང་གི་རྒྱུ་མཚན་གྱིས་བསྐྱེད་པའི་རྟོགས་པས་རྟོགས་པའི་རང་བཞིན་དེའི་དུས་སུ་གྲུབ་པའམ། དུས་གཞན་དུ་གྲུབ་པ་ལས་ཐ་དད་པའི་བདག་ཉིད་རྟོགས་པ་དེས་མ་རྟོགས་ཀྱང་ཆོས་དེ་དང་བདག་ཉིད་གཅིག་པས་ཡོད་དོ་ཞེས་རྟོགས་པ་གཞན་དག་གིས་རྟོགས་པ་ཡིན་ནོ། །གལ་ཏེ་
[121b.7]རྣམ་པར་རྟོག་པ་རྣམས་དོན་གྱི་ངོ་བོ་ཡོད་པ་ལ་མི་ལྟོས་པའི་ཕྱིར་དེ་རྟོགས་པའི་རང་བཞིན་ལ་ཇི་ལྟར་རྟོགས་བཞིན་པའི་རང་བཞིན་ཉིད་མེད་ན་དེའི་བདག་ཉིད་ཅན་གྱི་རང་བཞིན་གཞན་ཡོད་པར་ལྟ་ག་ལ་འགྱུར། རང་བཞིན་ཡོད་ན་རྟོགས་པར་འགྱུར་བ་ཡིན་ཏེ། དཔེར་ན་ལོགས་གཅིག་རྟོགས་
[122a]
[122a.1]པའི་བུམ་པ་ལ་ལོགས་གཞན་ཡོད་པའི་ཕྱིར་ཡང་རྟོགས་པར་འདོད་ན་དེ་ཡང་རྟོགས་པར་འགྱུར་བ་བཞིན་ནོ། །དེ་བཞིན་དུ་འདི་ནི་མངོན་སུམ་ལ་མི་བརྟེན་པ་དེའི་དུས་སུ་གྲུབ་པར་རྟོགས་པ་ལ་གང་གིས་བདག་ཉིད་དུ་གྱུར་པའི་རང་བཞིན་མ་རྟོགས་ཀྱང་རྟོགས་པར་
[122a.2]འགྱུར་བ་དེ་ཡོད་པ་མ་ཡིན་ནོ་ཞེ་ན། བདེན་མོད་ཀྱི་འོན་ཀྱང་ཕྱི་རོལ་ཇི་ལྟར་རྟོགས་བཞིན་པའི་དོན་ཡོད་པས་དེའི་རང་གི་ངོ་བོས་ཉེ་བའི་རང་བཞིན་གཞན་རྟོགས་པར་མི་སྨྲའི། འོན་ཀྱང་རྟོགས་པ་ལ་དེ་ལྟར་ཡོད་པའི་ཕྱིར་རོ། །ཇི་ལྟར་སྔོན་པོར་རྟོགས་པ་སྐྱེས་པ་ན་དེའི་ཡུལ་དུ་གྱུར་པ་
[122a.3]སྔོན་པོའི་རྣམ་པར་རྟོག་པ་གཞན་གྱིས་ངེས་པར་རྟོགས་པ་དེ་བཞིན་དུ། དེའི་དུས་སུ་གྲུབ་པ་རྟོགས་པ་ན་ཡང་ཇི་ལྟར་རྟོགས་པའི་རང་བཞིན་དེ་ངེས་པར་བརྟགས་པ་དེ་བཞིན་དུ་དེ་ཉིད་ཀྱི་རང་བཞིན་དུ་གྱུར་པའི་རང་བཞིན་གཞན་ཡང་ཡིན་ཏེ། རྟོགས་པ་དང་། མ་རྟོགས་པས་
[122a.4]ཐ་དད་ཀྱང་རང་གི་ངོ་བོས་ཁྱད་པར་མེད་པའི་ཕྱིར་རོ། །རྟོགས་པའི་བདག་ཉིད་ངེས་པར་རྟོགས་པ་ནི་དྲན་པར་འགྱུར་གྱི། མ་རྟོགས་པ་ལ་ནི་དངོས་པོའི་གནས་ཐབས་ཁོངས་སུ་ཆུད་པ་ཡིན་ནོ། །འོ་ན་དེའི་རང་གི་ངོ་བོས་དེ་རྟོགས་པ་ན་རྟོགས་པ་ལ་རྣམ་པར་གནས་པ་གློ་ན་ཉེ་བར་
[122a.5]གནས་པ་ལྟར་རྟོགས་སམ། ཡང་ན་རྟོགས་བཞིན་པ་དེའི་རང་གི་ངོ་བོ་ལས་རྟོགས། རྣམ་པར་རྟོག་པ་སྔ་མ་ལ་ནི་རྟོག་པ་རྣམ་པར་དཔྱོད་པ་དོན་མེད་དོ། །ཕྱི་མ་ལ་ཡང་གང་གིས་དེ་རྟོགས་པ་དང་མ་རྟོགས་པ་དག་གི་འབྲེལ་པར་རྟོགས་པར་བརྗོད་དགོས་སོ། །དེས་ན་ཚད་མ་ཇི་ལྟ་བ་
[122a.6]བཞིན་དངོས་པོ་རྟོགས་པའི་ཚུལ་གཞན་གྱིས་མ་ཡིན་པའི་ཕྱིར་འགལ་བའི་ཆོས་གནས་པ་ཞེས་བྱ་བ་འདི་ཅི་ཞིག་ཅེ་ན་རྣམ་པར་རྟོག་པ་ནི་མངོན་སུམ་བཞིན་དུ་རྟོགས་པ་ཉེ་བར་གནས་པའི་དོན་གྱི་རང་བཞིན་རྟོགས་པ་ནི་མ་ཡིན་ཏེ་སྒྲ་ལ་སོགས་པའི་རྒྱུ་མཚན་མེད་པར་འདོད་པ་ཙམ་གྱིས་
[122a.7]ཉེ་བར་གནས་པར་མི་རྟོགས་པའི་ཕྱིར་རོ། །དེས་ན་མཐོང་བའི་ཆ་སྔོན་མ་མཐོང་བ་མཐོང་བ་ལྟར་རང་གི་རྒྱུ་མཚན་ཉིད་ལ་ནི་རྟོགས་བཞིན་པའི་ཆོས་ཀྱི་བདག་ཉིད་དུ་གྱུར་པ་མ་རྟོགས་པའི་ཆོས་རྟོགས་པ་མ་ཡིན་ནོ། །འོ་ན་ཅི་ལྟར་རྟོགས་ཤེ་ན། རྟོགས་པའི་ཆོས་ཉིད་ལས་སོ། །འབྲེལ་པ་
[122b]
[122b.1]རྟོགས་པ་ལ་ལྟོས་པ་ཡང་མ་ཡིན་ཏེ་ཐ་དད་པ་མེད་པའི་ཕྱིར་རོ། །འོ་ན་ཅི་ལྟར་དེ་རྟོགས་པ་ན་མ་རྟོགས་ཤེ་ན། ཆོས་ཐ་མི་དད་ཀྱང་ལྟོས་པའི་དབང་གིས་ཐ་དད་པར་བརྟགས་པའི་ཕྱིར་རོ། །དཔེར་ན་ལོ་མ་ལ་སོགས་པ་དང་ལྡན་པའི་ཁྱད་པར་ཁོ་ན་ཤ་པའི་ཕྱིར་ཤ་པ་ཞེས་བྱ་བས་ཤིང་ཉིད་ཀྱི་
[122b.2]ནང་དུ་འདུག་པ་ཡིན་ཡང་སེང་ལྡེང་ལ་ཡང་ཡོད་པའི་ཕྱིར་རྣམ་པར་རྟོག་པས་ཐ་དད་པར་བྱེད་པ་དེ་བཞིན་དུ་དེའི་དུས་སུ་གྲུབ་པ་དུས་གཞན་དུ་གྲུབ་པ་ལས་རང་བཞིན་ཐ་དད་པ་ཡིན་ཡང་ཐ་དད་པ་ཙམ་གྱི་ཁྱད་པར་དུ་གྱུར་པ་ཞེས་བྱ་བར་མི་འགྲུབ་པོ། །ཁྱད་པར་དུ་གྱུར་པའི་ཆོས་དེའི་
[122b.3]བདག་ཉིད་ཅན་ཡོངས་སུ་དོར་བར་མི་ནུས་པ་ཡང་རྟོགས་བཞིན་པའི་རང་བཞིན་ཉིད་ཡིན་པ་དེས་ན་དེ་རྟོགས་ན་རྟོགས་པར་འགྱུར་རོ། །ཐ་དད་པ་མེད་ཀྱང་མ་རྟོགས་པའི་ཕྱིར་ཇི་ལྟར་རྟོགས་ཤེ་ན། དེའི་རྣམ་པར་ངེས་པར་བརྟགས་པ་ལས་སོ་ཞེས་བརྗོད་དོ། །ངེས་པར་རྟོགས་པ་
[122b.4]ཞེས་བྱ་བ་འདི་ཅི་ཞིག །སྨྲས་པ་གལ་ཏེ་དེའི་དུས་སུ་གྲུབ་པ་རང་བཞིན་གཅིག་ཏུ་གྱུར་ན་དུས་གཞན་དུ་གྲུབ་པ་བཞིན་དུས་དེར་གྲུབ་པ་དུས་དེར་མི་འགྱུར་བའམ། དུས་གཞན་དུ་གྲུབ་པ་ཡང་དུས་དེ་ཉིད་དུ་འགྱུར་ཏེ་ཐ་དད་པ་མེད་པའི་ཕྱིར་རོ། །གཅིག་ཉིད་ནི་བདག་ཉིད་གཞན་མེད་པ་
[122b.5]ཡིན་ལ་དེ་ཡང་ཐ་དད་པ་མེད་པ་ཡིན་ནོ། །བདག་ཉིད་གཞན་དང་ལྡན་པ་ནི་དུ་མ་ཉིད་དོ། །དེས་ན་དེ་ལྟར་དེས་དེ་དང་དུས་གཞན་དུ་གྲུབ་པ་དག་དུས་ཐ་དད་པ་དང་གཅིག་ཉིད་བདག་ཉིད་གཞན་དང་བྲལ་བའི་རང་བཞིན་ཡིན་པར་རྣམ་པར་ཕྱེ་ནས་དེ་དག་ཐ་དད་པར་ངེས་པ་ཡིན་ནོ། །
[122b.6]རྣམ་པར་འབྱེད་པ་ཞེས་བྱ་བ་འདི་ཅི་ཞིག་ཅེ་ན། མངོན་སུམ་ལ་སོགས་པ་དག་ལས་ཤེས་པའམ། སྒྲ་ལ་སོགས་པས་རྟོགས་པ་རྨོངས་པ་མེད་པའི་རྟོགས་པས་རྣམ་པར་ཕྱེ་ནས་ངེས་པར་སེམས་པའོ། །འདི་ལྟར་འགའ་ཞིག་ཤིང་ཉིད་ལ་སྐྱེས་བུ་ཞེས་རྟོགས་ཏེ་དེས་ན་དེས་ཤིང་ལ་
[122b.7]རྣམ་པར་ཕྱེ་ནས་ངེས་པར་རྟོགས་པ་ན། སྐྱེས་བུའི་བདག་ཉིད་མ་ཡིན་པར་ངེས་པ་ཇི་ལྟར་ཤིང་ནི་ལོ་མ་ལ་སོགས་པ་དང་ལྡན་པ་ཡིན་ལ། སྐྱེས་བུ་ནི་རྐང་ལག་ལ་སོགས་པ་དང་ལྡན་པ་ཡིན་ནོ། །ལོ་མ་ལ་སོགས་པ་ཉིད་ཀྱང་རྐང་ལག་ལ་སོགས་པ་མ་ཡིན་པས་ན། སྐྱེས་བུ་ལས་ཤིང་
[123a]
[123a.1]གཞན་ཡིན་ནོ། །ཤིང་ཉིད་ཀྱང་ལོ་མ་ལ་སོགས་པ་ལས་གཞན་མ་ཡིན་པ་དེས་ན། དེ་ལྟར་ཤིང་ཉིད་རྣམ་པར་ཕྱེ་བ་ཉིད་ཀྱིས་སྐྱེས་བུ་ལས་གཞན་ཉིད་དུ་རྟོགས་པ་དེ་བཞིན་དུ་དེ་དང་དེ་མ་ཡིན་པའི་དུས་སུ་གྲུབ་པ་དག་དང་། དུས་ཐ་དད་པ་ཉིད་ཀྱང་གཞན་མ་ཡིན་ནོ། །
[123a.2]བདག་ཉིད་གཅིག་པ་ལས་ཀྱང་གཅིག་ཉིད་གཞན་མ་ཡིན་ནོ། །ལོ་མ་ལ་སོགས་པ་དང་ལྡན་པ་ཉིད་ཤིང་ཡིན་ནོ་ཞེས་ནི་མངོན་སུམ་ལས་ངེས་ན་གཅིག་ཉིད་རྣམ་པ་གཅིག་པ་ཡིན་ནོ་ཞེས་བྱ་བ་གོ་བ་ལས་མངོན་སུམ་ཉིད་ལས་སོ་ཞེ་ན་འོ་ན་གཞན་དེའི་བདག་ཉིད་མ་ཡིན་པ་ཞེས་བྱ་བར་འགྱུར་རོ་ཞེ་ན། གལ་ཏེ་
[123a.3]དེ་ལྟ་ན་ཤིང་ལོ་མ་ལ་སོགས་པ་དང་མི་ལྡན་པར་འགྱུར་རོ། །དེ་ལྟར་ནི་མི་ནུས་ཏེ་ལོ་མ་ལ་སོགས་པ་དང་མི་ལྡན་པ་གཞན་དག་ཡོད་ཀྱང་ལོ་མ་ལ་སོགས་པ་དང་ལྡན་པ་ལ་ཤིང་ཞེས་ཐ་སྙད་འདོགས་སོ། །དེས་ན་ལོ་མ་ལ་སོགས་པ་དང་ལྡན་པ་གང་ཡིན་པ་དེ་ཉིད་དེ་ལྟ་མ་ཡིན་ནོ་ཞེས་ནི་མི་
[123a.4]ནུས་སོ། །གཞན་ལོ་མ་ལ་སོགས་པ་དང་མི་ལྡན་པ་ཡང་འགོག་པ་ནི་མ་ཡིན་ནོ། །འོན་ཀྱང་དེ་ལ་ཡང་ཤིང་ཞེས་རྟོགས་ན་མིང་ཙམ་གཞན་དུ་འགྱུར་བའི་ཕྱིར་དངོས་པོ་ལ་འགལ་བ་མེད་དོ་ཞེ་ན་དེ་ལྟར་ན་རོ་གཅིག་ནི་བདག་ཉིད་གཅིག་པ་ཅན་དང་། ཐ་མི་དད་པ་ཡིན་ལ་གཞན་དུ་ནི་མ་
[123a.5]ཡིན་ནོ་ཞེས་མངོན་སུམ་ལ་རྟོགས་སམ། སྲིད་པ་རྣམ་པར་གཞག་ཀྱང་རུང་སྟེ་ཕུང་པོ་གཉིས་སུ་ངེས་པའི་ཕྱིར་ཏེ། དེས་ན་ཁྱད་པར་འགའ་ཡང་མེད་དོ། །དེས་ན་གང་ཞིག་གང་གི་བདག་ཉིད་དུ་གྱུར་པའི་ཆོས་དེ་རྟོགས་པ་ན། ཡོངས་སུ་མ་བཏང་བའི་བདག་ཉིད་ཁོ་ནར་རྟོགས་པའི་
[123a.6]ཕྱིར་དེའི་རང་བཞིན་རྣམ་པར་ཕྱེ་བ་ཉིད་ལ་དེ་རྟོགས་པ་ཡིན་ནོ། །དེས་ན་ཆོས་འགལ་བ་གནས་པ་ཐ་དད་པར་བྱེད་པ་ལ་ཚད་མ་ཚོལ་བར་བྱེད་པ་གང་ཡིན་པ་འདིའི་དེའི་བདག་ཉིད་ལ་ཚད་མས་རྟོགས་པ་ལ་ལྟོས་པ་ནི་མ་ཡིན་པ་མ་ཡིན་ནོ། །ཆོས་འགལ་བ་གནས་པ་ཐ་དད་པར་བྱེད་པ་ཉིད་
[123a.7]ལ་གྲུབ་པ་དང་། མ་གྲུབ་པ་དག་ཐ་དད་པའི་བདག་ཉིད་དང་འབྲེལ་བར་ཚད་མ་འགའ་ཞིག་གི་རྟོགས་པ་ལྟོས་པར་བྱ་བ་འགྱུར་བ་ནི་མ་ཡིན་གྱི། འོན་ཀྱང་དེ་ཚད་མའམ་ཚད་མ་ཡིན་པས་རྟོགས་པ་ན་གྲུབ་པ་ཉིད་ཀྱིས་རང་བཞིན་མ་གྲུབ་པ་དང་། ཐ་དད་པ་ནི་རང་གི་ངོ་བོ་རྣམ་པར་
[123b]
[123b.1]འབྱེད་པ་ཉིད་ལས་རྟོགས་པ་ཡིན་ནོ། །དེ་ཉིད་ཀྱི་ཕྱིར་གལ་ཏེ་དོན་བདག་འདི་འདོད་ན་དེ་ལས་བདག་གིས་ཅི་ཞིག་བྱ་ཞེས་བཤད་དོ། །དེས་ན་གསལ་བ་མེད་པར་ནི་དངོས་པོའི་རང་བཞིན་རང་ཉིད་མི་འགྲུབ་ལ་གསལ་བ་ཡང་ཚད་མ་ཡིན་པའི་ཕྱིར་ཚད་མ་ཇི་ལྟ་བ་བཞིན་དོན་གྲུབ་པོ་ཞེས་སྨྲས་པ་
[123b.2]དེ་མི་རིགས་ཏེ་ཚད་མས་རྟོགས་པའི་རང་བཞིན་མ་རྟོགས་པ་ཡང་རྟོགས་པའི་བདག་ཉིད་ལས་རྟོགས་པ་ཡིན་ནོ། །རྟོགས་པ་དང་མ་རྟོགས་པ་འབྲེལ་པ་འཛིན་པའི་ཚད་མ་ལ་ལྟོས་པ་ཡང་མ་ཡིན་ནོ། །རང་གི་ངོ་བོ་ཉིད་ཀྱིས་དེ་ལྟར་འགྱུར་བ་དེ་དེ་ལྟ་མ་ཡིན་པར་སྲིད་པ་ཡང་མ་ཡིན་ཏེ། སྔོན་པོའི་སྔོན་
[123b.3]པོ་ཉིད་བཞིན་ནོ། །དེ་ཉིད་ཀྱི་ཕྱིར་རང་གི་ངོ་བོ་ཉིད་ཀྱིས་དེ་ལྟར་འགྱུར་བ་ལ་གལ་ཏེ་ཚད་མ་དེ་ལྟར་མ་ཡིན་པར་འགྱུར་ན་ཕྱིན་ཅི་ལོག་ཁོ་ནར་འགྱུར་རོ། །དེ་ལྟ་ན་འོ་ན་འདི་རྟགས་ཉིད་ལས་རྟགས་ཅན་རྟོགས་པ་ཞེས་བྱ་བར་འགྱུར་རོ། །ཁྱད་པར་ནི་འདི་ཡིན་ཏེ། འབྲེལ་པ་ཚད་
[123b.4]མ་གཞན་གྱིས་ངེས་པ་མ་ཡིན་ནོ་ཞེས་བྱ་བའོ་ཞེ་ན། བདེན་ཏེ་ངེས་པའི་ཆོས་ཅན་ལ་གནས་པར་རྟོགས་ན་རྗེས་སུ་དཔག་པ་ཉིད་དུ་འགྱུར་རོ། །ཚད་མ་ནི་དངོས་པོ་ལ་བརྟེན་པ་ཡིན་ལ། དངོས་པོ་ཡང་ཡུལ་དང་དུས་དང་རྣམ་པར་ངེས་པ་ཡིན་ནོ། །ཤེས་རབ་ཕུལ་དུ་བྱུང་བས་ཐོབ་
[123b.5]པར་བྱ་བ་དངོས་པོ་རྣམ་པར་དཔྱོད་པའི་རྩ་བ་ཅན་འགའ་ཞིག་ལ་དེ་ལྟར་འགྱུར་བ་གང་ཡིན་པ་དེ་ནི་ཡུལ་ངེས་པ་སྒྲུབ་པ་མ་ཡིན་པའི་ཕྱིར་ཚད་མ་མ་ཡིན་ནོ་ཞེས་རྣམ་པར་གཞག་གོ། །དེའི་ཕྱིར་གྲུབ་པ་མ་ཡིན་པ་དེ་མ་གྲུབ་པ་ལས་ཐ་དད་པ་ཡིན་ནོ་ཞེས་བྱ་བ་འདི་ནི་དངོས་པོ་རྟོགས་པ་
[123b.6]ཙམ་ཡིན་ཏེ་གྲུབ་པ་ཙམ་དུ་རྟོགས་པ་བཞིན་ནོ། །དོན་གང་དག་གིས་གཅིག་པར་མི་སྲིད་པའི་ཆོས་དང་། གཅིག་པ་འགལ་བའི་ཆོས་དང་གཅིག་གི་རང་བཞིན་དུ་གྱུར་པའི་བདག་ཉིད་དེ་ཉིད་དེ་དག་གི་ཐ་དད་པ་ཆོས་འགལ་བར་གནས་པ་ཡིན་ནོ། །དོན་དེ་སྐྱེས་ཀྱང་མ་སྐྱེས་པའི་
[123b.7]མི་རྟག་པ་ཉིད་གང་ཡིན་པ་དེ་ནི་དེ་དང་གཅིག་པ་མ་ཡིན་པའི་ཕྱིར་དངོས་པོ་མི་རྟག་པར་མི་འགྱུར་རོ། །དེ་བཞིན་དུ་རྒྱུ་ཐ་དད་པ་ཡང་སྐྱེད་པར་བྱེད་པ་ཐ་དད་པ་ཡིན་ནོ་ཞེས་བསྟན་པ་ཡིན་ནོ། །འདི་ཐ་དད་པ་བྱེད་པ་ཉིད་ཀྱི་རིགས་པ་གཞན་བསྟན་པའི་ཕྱིར་གལ་ཏེ་དེ་དག་ཀྱང་ཞེས་
[124a]
[124a.1]སྨོས་ཏེ། ཆོས་འགལ་བར་གནས་པ་དང་རྒྱུ་ཐ་དད་པ་དག་ཀྱང་ཐ་དད་པར་བྱེད་པ་མ་ཡིན་ན་རིལ་རྫས་གཅིག་ཏུ་འགྱུར་རོ། །འགལ་བའི་དངོས་པོ་གཞན་དང་གཅིག་ཏུ་གྱུར་པ་ལ་ལྟོས་ནས་དེ་གནས་པ་དང་ལྡན་པའི་དངོས་པོའི་ཐ་དད་པ་ཡང་ཆོས་འགལ་བར་གནས་
[124a.2]པ་ཡིན་ནོ་ཞེས་བྱ་བར་ནུས་ལ། འགལ་བའི་ཆོས་དེ་ལོགས་ཤིག་ཏུ་གྱུར་པ་ལ་ལྟོས་ནས་ནི་ཐ་དད་པར་བྱེད་པ་ཡང་ཡིན་པས་གཉི་ག་ལྟར་བསྟན་ཏོ། །གང་ཞིག་གང་ལ་ལྟོས་ནས་རང་བཞིན་ངེས་པ་གལ་ཏེ་ཐ་དད་དང་ཐ་མི་དད་པ་དང་། རྒྱུ་ཐ་དད་པས་ཀྱང་ཐ་དད་པ་མ་ཡིན་ན་ནི་དངོས་པོ་
[124a.3]མཐའ་དག་བདག་ཉིད་གཅིག་ཏུ་འགྱུར་ཏེ། གཅིག་གི་རང་བཞིན་ནི་དེ་ཡིན་པའི་ཕྱིར་རོ། །གང་གི་ཚེ་ཆོས་འགལ་བ་དང་འབྲེལ་ཀྱང་ཐ་མི་དད་པ་དེའི་ཚེ། དེ་དག་གཅིག་ཉིད་དེ། ཐ་དད་པ་མེད་ན་དངོས་པོ་རྣམས་ལ་ཐ་མི་དད་པ་ཉིད་ངེས་པའི་ཕྱིར་རོ། །ཐ་མི་དད་པ་དེ་ཡང་འགྲོ་བ་མཐའ་
[124a.4]དག་གིས་ཐོབ་པར་འགྱུར་ཏེ་ཆོས་འགལ་བར་གནས་པའི་བདག་ཉིད་ཀྱི་ཐ་དད་པ་དེ་ལ་ཡོད་པའི་ཕྱིར་དང་དེ་ཡང་ཐ་དད་པ་མ་ཡིན་པས་གཅིག་ཏུ་འགྱུར་བའི་ཕྱིར་རོ། །འགྲོ་བ་གཅིག་ཉིད་དུ་ཁས་བླང་བར་ནུས་པ་མ་ཡིན་ནོ་ཞེས་བཤད་པ་ནི་རིལ་གཅིག་ཡིན་པ་དེས་ན་ལྷན་ཅིག་སྐྱེ་བ་དང་འཇིག་
[124a.5]པ་དག་སྟེ། གཅིག་གང་ཡིན་པ་དེ་ཉིད་གཞན་ཡིན་པས་ཇི་ལྟར་དེ་སྐྱེས་པ་ན་སྐྱེས་པ་ཉིད་ཡིན་པ་དང་ཞིག་པ་ན་ཡང་ཞིག་པ་ཉིད་ཡིན་པ་དེ་བཞིན་དུ་དོན་གཞན་དག་ཀྱང་དེ་ཁོ་ན་ལྟར་འགྱུར་ཏེ། དེ་དང་ཐ་མི་དད་པའི་ཕྱིར་རོ། །དེ་བཞིན་དུ་ཐམས་ཅད་ལ་ཐམས་ཅད་ཉེ་བར་སྦྱོར་བར་འགྱུར་རོ། །མེ་ཡང་
[124a.6]གཤེར་བར་བྱེད་ནུས་པར་འགྱུར་ཏེ། དེ་ཆུ་ལས་ཐ་དད་པ་མ་ཡིན་པའི་ཕྱིར་ཆུ་ཉིད་བཞིན་ནོ། །ཆུ་ཡང་འབར་བར་ནུས་པར་འགྱུར་ཏེ། མེ་ཉིད་བཞིན་ནོ། །དེ་བཞིན་དུ་རང་བཞིན་གཅིག་པར་འགྱུར་བ་ལ་སོགས་པ་ཡང་རྟོགས་པར་བྱའོ། །རྣམ་པ་དེ་ལྟ་བུའི་རང་བཞིན་མེད་ན་ནི་གཅིག་
[124a.7]ཉིད་དུ་མི་འགྱུར་རོ། །སོ་སོར་སྐྱེ་བ་དང་འཇིག་པ་དང་ཉེ་བར་སྦྱོར་བ་དང་ལྡན་པ་དང་། རང་བཞིན་ཐ་དད་ན་ནི་རང་བཞིན་ཇི་ལྟ་བ་བཞིན་རྣམ་པར་གནས་པས་གཅིག་ཅེས་བྱ་བར་མི་འགྲུབ་པའི་ཕྱིར་རོ། །དེ་བཤད་པ་ནི་དེ་ལྟ་མ་ཡིན་ན་ཞེས་བྱ་བ་ཡིན་ནོ། །མིང་ཐ་དད་པར་ཟད་དེ་རྣམ་པ་ཐ་
[124b]
[124b.1]དད་པ་ལ་སོགས་པའི་དོན་ཁས་བླངས་ནས་དེ་སྐད་བརྗོད་པའི་ཕྱིར་རོ། །ཆོས་འགལ་བ་དང་ལྡན་པ་ཐ་དད་པར་བྱེད་པ་ཡིན་ན། དེ་དང་ལྡན་པའི་དོན་རྣམས་ཐ་དད་པ་མེད་པའི་ཕྱིར་གཅིག་ཏུ་ཐལ་བར་འགྱུར་རོ། །གལ་ཏེ་རྣམ་པ་དེ་ལྟ་བུའི་རང་བཞིན་དེ་ཐ་དད་པ་མ་ཡིན་ན་འགལ་བ་དང་
[124b.2]ལྡན་པ་གཞན་ཡང་མི་འགྱུར་རོ། །གཅིག་པ་ཉིད་མ་ཡིན་ན་ཡང་ལྷན་ཅིག་སྐྱེ་བ་ལ་སོགས་པར་འགྱུར་རོ་ཞེས་བྱ་བ་འདིའི་མཐར་ཐུག་པ་འདི་ནི་དངོས་པོ་གནས་པའི་འགལ་བའི་ཆོས་དང་འབྲེལ་པ་ཐ་དད་པར་བྱེད་པ་ཉིད་དུ་སྒྲུབ་པའི་ཕྱིར་ཉེ་བར་བཀོད་པ་ཡིན་གྱི་འགལ་བའི་ཆོས་འདུ་བ་
[124b.3]ཐ་དད་པར་བྱེད་པ་མ་ཡིན་ན་འདི་ཡང་རིགས་པ་གཞན་གྱི་རང་བཞིན་མ་ཡིན་པར་འགྱུར་བས་ཉེ་བར་མི་འགོད་པར་འགྱུར་བ་གང་ཡིན་པ་འགལ་བའི་ཆོས་འདུས་པ་ཐ་དད་པ་མ་ཡིན་པའི་ཕྱིར་དེ་བཞག་སྟེ་གལ་ཏེ་དེ་དག་ཀྱང་ཞེས་བྱ་བ་ལ་སོགས་པ་འདི་ཉེ་བར་བཀོད་པ་ནི་མ་ཡིན་ནོ། །དེ་ལྟར་མི་
[124b.4]རྟག་པ་ཉིད་དོན་གཞན་གྱི་རྒྱུ་ཅན་དུ་མི་རིགས་པར་བསྟན་པ་ལ་གཞན་དག་གི་རྒྱུ་དོན་ཐ་དད་པ་ཉིད་མེད་ཀྱང་ཞེས་སྨྲས་སོ། །དོན་གཞན་གྱི་རྒྱུ་མཚན་ཅན་ཡིན་ན་གཞན་ཉིད་དུ་བརྗོད་དོ། །དེ་ལྟར་གྱུར་ན་འབྲས་བུའི་བདག་ཉིད་ལ་གྲུབ་པ་དང་མ་གྲུབ་པའི་མཚན་ཉིད་ཆོས་འགལ་བར་ཐལ་བ་
[124b.5]དང་། རྒྱུ་རྒྱུ་གཞན་ཉིད་དུ་འགྱུར་བས་ཐ་དད་པ་བྱེད་པ་ཡིན་ནོ་ཞེས་བྱ་བ་དེ་ནི་མི་རྟག་པ་ཉིད་གཞན་གྱི་རྒྱུ་མཚན་ཅན་མ་ཡིན་ཡང་འགྱུར་རོ། །ཡོད་པ་ཉིད་ལས་འཇིག་པའི་ངང་ཅན་དུ་སྐྱེ་བའི་ཕྱིར། རྒྱུ་ཐ་དད་པ་ཐ་དད་པའི་རྒྱུ་མེད་མོད་འབྲས་བུའི་རང་གི་ངོ་བོ་ལ་ལྟོས་ཏེ། གྲུབ་པ་དང་མ་
[124b.6]གྲུབ་པའི་མཚན་ཉིད་ཀྱི་ཆོས་འགལ་བ་གོ་ཇི་མེད། དེ་ཉིད་སྟོན་པ་ནི་དངོས་པོའི་དུས་ན་མི་རྟག་པ་ཉིད་མ་གྲུབ་པའི་ཕྱིར་ཞེས་བྱ་བ་ཡིན་ནོ། །མི་རྟག་པ་ཉིད་ནི་དངོས་པོ་ཞིག་པ་ཡིན་ནོ། །འཇིག་པའི་ངང་ཅན་ཉིད་ཀྱང་ཞིག་པ་ཉིད་རབ་ཏུ་སྦྱོར་བར་བྱེད་པ་བྱས་ཏེ་མི་རྟག་པ་ཉིད་དུ་བརྗོད་དོ། །
[124b.7]དེ་ལྟ་མ་ཡིན་ན་འཇིག་པའི་ངང་ཅན་ཡང་དངོས་པོའི་ངོ་བོར་གྱུར་པའི་རང་བཞིན་ཡིན་པས་ཇི་ལྟར་སྔོན་པོ་ལ་སོགས་པ་མི་རྟག་པ་མ་ཡིན་པ་དེ་བཞིན་དུ་འཇིག་པའི་ངང་ཅན་ཉིད་ཀྱང་འགྱུར་རོ། །དེ་བས་ན་དོན་གྱི་མི་རྟག་པ་ཉིད་ན་ཞིག་པ་ཡིན་ནོ། །དེ་ཡང་ཡོད་པའི་དུས་ན་ཡོད་པ་མ་ཡིན་ཏེ།
[125a]
[125a.1]དངོས་པོ་མེད་པའི་རང་བཞིན་ཡིན་པའི་ཕྱིར་དང་། མེད་པ་ཡང་དངོས་པོའི་དུས་ན་མེད་པའི་ཕྱིར་རོ། །དེས་ན་ཐ་དད་པ་ནི་འགལ་བའི་ཆོས་གནས་པ་ཡིན་ལ། དེ་ཡང་དངོས་པོ་དང་མི་རྟག་པ་ལ་ཡོད་པའི་ཕྱིར་རྒྱུ་དོན་ཐ་དད་པ་ཉིད་མེད་ཀྱང་དེའི་རང་བཞིན་མ་
[125a.2]ཡིན་པར་མཚུངས་སོ་ཞེ་ན། དངོས་པོ་ཞིག་པ་ལས་དངོས་པོ་མི་རྟག་པ་ཞེས་བྱ་བའི་དོན་དེ་ཡིན་ཡང་། མི་རྟག་པ་ཉིད་ནི་དངོས་པོའི་རང་བཞིན་ལ་བརྗོད་པར་བྱ་བ་ཡིན་ནོ། །དེས་ན་ཞིག་པ་ནི་མི་རྟག་པ་ཉིད་མ་ཡིན་ཏེ་དེ་ལ་དངོས་པོའི་རང་བཞིན་ཉིད་མེད་པའི་ཕྱིར་རོ། །འོན་ཀྱང་
[125a.3]འཇིག་པར་འགྱུར་བ་གང་ཡིན་པ་དེ་ཉིད་མི་རྟག་པ་ཡིན་ནོ། །དེས་ན་འཇིག་པའི་ངང་ཅན་ཉིད་མི་རྟག་པ་ཡིན་གྱི་མེད་པ་ཙམ་ནི་མ་ཡིན་ནོ་སྙམ་དུ་དགོངས་ནས་མི་རྟག་པ་ཉིད་ཅེས་བྱ་བ་ཞེས་གསུངས་སོ། །གང་ཞིག་དེ་ལྟ་བུར་གྱུར་པའི་མི་རྟག་པ་ཉིད་ཅེས་བྱ་བ་ཕྱིས་འགྲུབ་པར་འགྱུར་
[125a.4]བ་ནི་འགའ་ཡང་མེད་དོ་ཞེས་བྱ་བའི་དོན་ཏོ། །དོན་གཞན་གྱི་རྒྱུ་ཅན་ཉིད་མ་ཡིན་ན་ནི་མི་རྟག་པ་ཉིད་དངོས་པོའི་དུས་ན་གྲུབ་པས་དངོས་པོ་མེད་པར་བརྗོད་མི་ནུས་ཏེ་ཕྱིས་འགྲུབ་པར་འགྱུར་བ་ཡིན་ན་རྒྱུ་གཞན་འཇུག་པ་ལ་བརྟེན་པར་བྱ་བ་ཡིན་པའི་ཕྱིར་རོ། །དེས་ན་རྒྱུ་ཐ་དད་པ་མེད་ན་གྲུབ་པ་དང་
[125a.5]མ་གྲུབ་པའི་མཚན་ཉིད་ཀྱི་ཆོས་འགལ་བ་དང་འབྲེལ་པ་ཡང་མེད་དོ། །དེས་ན་རྒྱུ་དོན་ཐ་དད་པ་ཉིད་མེད་ན་མི་རྟག་པ་ཉིད་ཅེས་བྱ་བ་གང་ཕྱིས་འགྲུབ་པར་འགྱུར་བ་ནི་འགའ་ཡང་མེད་པ་ཉིད་དེ། འོན་ཀྱང་དངོས་པོ་སྐད་ཅིག་མར་གནས་པའི་ཆོས་ཅན་དེ་ཁོ་ན་ཕྱི་མ་ལ་ལྟོས་ནས་རང་གི་ངོ་བོ་མེད་པ་ཡིན་པའི་
[125a.6]ཕྱིར་འཇིག་པའི་ངང་ཅན་ཡིན་ནོ་ཞེས་བརྗོད་པར་འགྱུར་ཏེ། བྱུང་མ་ཐག་ཏུ་མེད་པར་འགྱུར་བ་ལ་དེ་སྐད་བརྗོད་པའི་ཕྱིར་རོ། །དེའི་ཕྱིར་འཇིག་པའི་ངང་ཅན་ཉིད་མི་རྟག་པ་ཡིན་ནོ། །འཇིག་པའི་ངང་ཅན་ཉིད་ཀྱི་བྱུང་མ་ཐག་ཏུ་མེད་པའི་འཇིག་པར་འགྱུར་བ་ལ་མི་རྟག་པ་ཞེས་བརྗོད་དོ། །
[125a.7]འཇིག་པ་དོན་གཞན་གྱི་རྒྱུ་ཅན་ལ་ཡང་གལ་ཏེ་ཐ་དད་པར་བརྗོད་པ་དེ་ལྟ་ན་ཡང་དངོས་པོ་མི་རྟག་པ་ཉིད་ནི་ཉམས་པ་མ་ཡིན་ཏེ། བྱས་པའི་བདག་ཉིད་ཀྱི་མི་རྟག་པ་ཉིད་ཡོད་པ་ཡིན་ཡང་འཇིག་པ་མེད་པའི་ཕྱིར་རོ། །མ་བྱུང་བ་ལས་སྐྱེས་པ་གང་ཡིན་པ་དེ་ཉིད་མི་རྟག་པ་ཡིན་ཏེ། སྔར་མེད་
[125b]
[125b.1]པའི་ཕྱིར་རོ། །ཕྱིས་མེད་པས་ནི་འཇིག་པས་མི་རྟག་པར་འགྱུར་རོ། །དེས་ན་སྔར་མེད་པ་ཐོབ་པ་ལ་ཕྱིས་འབྱུང་བ་དེའི་རང་བཞིན་ཉིད་ཡིན་ཡང་དེའི་མཚན་ཉིད་ཀྱི་མི་རྟག་པ་ཉིད་ཡོད་པ་ཁོ་ནའོ་ཞེ་ན། དེ་ལྟ་བུའི་མི་རྟག་པ་ཉིད་བྱས་པ་གྲུབ་པ་ཉིད་ན་གྲུབ་མོད། ཕྱིས་ཀྱང་མེད་པ་གང་ཡིན་པ་དེ་ནི་
[125b.2]བྱས་པ་གྲུབ་ཀྱང་མ་གྲུབ་པའི་ཕྱིར་ཐ་དད་དེའི་རང་བཞིན་མ་ཡིན་པ་དེ་འདིར་སྒྲུབ་པར་མི་ནུས་སོ། །གལ་ཏེ་མི་རྟག་པ་ཉིད་དངོས་པོའི་ཞིག་པའམ་དེ་དང་འབྲེལ་པ་ཅན་གྱི་སྤྱི་དེ་ལྟ་བུའི་རྟོགས་པའི་རྟེན་དུ་གྱུར་པ་མ་ཡིན་ནམ། དེས་ན་དངོས་པོ་དེ་ཁོ་ན་མི་རྟག་པ་ཉིད་དོ་ཞེས་ཅི་སྟེ་བརྗོད། གལ་ཏེ་
[125b.3]དངོས་པོ་ཉིད་མི་རྟག་པ་ཡིན་ན་ནི་དངོས་པོ་མི་རྟག་པ་སྙམ་དུ་དོན་གཞན་དུ་རྟོགས་པར་མི་འགྱུར་ཏེ། དངོས་པོ་མི་རྟག་པ་ཞེས་ཐ་དད་པ་མེད་པར་རྟོགས་པར་ཐལ་བའི་ཕྱིར་རོ་ཞེ་ན། འདི་ལ་བཤད་པ་ཆོས་དང་ཆོས་ཅན་གྱི་ཚིག་ཐ་དད་པ་ལ་སྟེ། ཚིག་ཐ་དད་པའི་ཡུལ་ལ་ཡང་རྒྱུ་མཚན་
[125b.4]བཤད་པར་བྱའོ། །ཡུལ་དུ་གྱུར་པའི་དངོས་པོ་གཅིག་ཉིད་ལ་འདི་ཇི་ལྟར་ཐ་དད་པ་དེ་ལྟར་ཐ་དད་པ་དེ་ལྟར་ནི་འོག་ཏུ་སྟོན་པར་འགྱུར་རོ། །དེ་དེ་ལྟར་མི་རྟག་པ་ཉིད་ཕྱིས་འགྲུབ་པ་སྤངས་ཏེ། མི་རྟག་པ་དངོས་པོ་ཉིད་ཡིན་ན་ཡང་མི་རྟག་པ་ཉིད་རྟོགས་པའི་དུས་ནི་ཕྱི་ནས་ཡིན་ནོ་ཞེས་
[125b.5]བསྟན་པའི་ཕྱིར་བཤད་པ། ཕྱིས་འདི་ངེས་པའི་དུས་ཡིན་པ་དེས་ན་དེའི་ཚེ་རྟག་པ་ཉིད་དུ་རྣམ་པར་གཞག་གོ། །གང་གིས་དངོས་པོའི་དུས་ན་མ་རྟོགས་པའི་ཕྱིར་མ་གྲུབ་པས་ན་གཞན་དུ་རྣམ་པར་གཞག་པ། གང་གི་ཚེ་རྟོགས་པ་དེ་ཉིད་ཀྱི་ཚེ་སྐྱེས་པ་ནི་མ་ཡིན་ནོ་ཞེས་སོ་སོར་གྲུབ་པ་
[125b.6]དགག་པའི་ཕྱིར་རྟོགས་པ་ཙམ་ཉིད་དུས་ཐ་དད་པར་བཤད་པ་ཡིན་ནོ། །ཡང་ཅིའི་ཕྱིར་ཕྱིས་ངེས་པའི་དུས་ཡིན་ཞེ་ན། བཤད་པ། མི་དམིགས་པས་མི་གནས་པར་རྟོགས་པའི་ཕྱིར་རོ། །གང་གི་ཚེ་འདི་གྱོ་མོའི་གནས་སྐབས་སུ་བུམ་པར་མ་དམིགས་པ་དེའི་ཚེ་འདི་མི་གནས་པར་
[125b.7]རྟོགས་པ་སྐྱེའོ། །གལ་ཏེ་མི་རྟག་པ་ཉིད་དངོས་པོའི་རང་གི་ངོ་བོ་ཉིད་མ་ཡིན་ནམ། དེས་ན་འདིར་མི་དམིགས་པའི་རྩ་བ་ལས་མི་གནས་པར་རྟོགས་པ་ལ་ལྟོས་ཀྱི། སྔོན་པོ་ཉིད་ལ་སོགས་པའི་ཆོས་ལྟར་དངོས་པོ་རང་གི་ངོ་བོ་རྟོགས་པ་ཉིད་ཀྱིས་འདིར་ཇི་ལྟར་ངེས་པར་མ་གྱུར་ཅེ་ན།
[126a]
[126a.1]བཤད་པ། སྐད་ཅིག་མར་གནས་པའི་ཆོས་ཉིད་དེ་ནི་དངོས་པོ་འདིའི་རང་བཞིན་ཏེ། རང་གི་རྒྱུ་ཁོ་ན་ལས་དེ་ལྟར་སྐྱེས་པའི་ཕྱིར་དེ་སྐད་ཅིག་མར་གནས་པའི་ཆོས་ཉིད་དུ་ཡོད་པའི་ཕྱིར་རོ་ཞེས་བྱ་བ་ནི་རང་བཞིན་གྱི་རྒྱུ་མཚན་ནོ། །དེ་ནི་མཐོང་བཞིན་དུ་ཡང་
[126a.2]ཡོད་པ་དམིགས་པས་མི་རྟོགས་སོ། །འདི་སྐད་བརྗོད་པ་ཡིན་ཏེ། གལ་ཏེ་ཡང་འབྲས་བུ་ལ་སོགས་པ་དང་ཁྱད་པར་མེད་པའི་མི་རྟག་པ་ཉིད་གང་ཡིན་པ་རང་བཞིན་གཅིག་ཏུ་གསལ་བ་ཡིན་ལ་རྣམ་པ་ཁྱད་པར་ཅན་གྱི་གསལ་བས་སྟོང་པའི་མངོན་སུམ་ཡང་ངེས་པ་ཐ་དད་པར་བྱེད་པ་མ་
[126a.3]ཡིན་པ་དེ་ལྟར་ན་ཡང་འབྲས་བུ་ཉིད་ཀྱིས་རྗེས་སུ་འགྲོ་བ་དང་ལྡོག་པ་ལྟར་མི་རྟོག་པ་ཉིད་རྟོགས་པའི་རྒྱུ་མཚན་རང་བཞིན་ཁྱད་པར་ཅན་དམིགས་པའི་མཚན་ཉིད་དེའི་རང་བཞིན་མི་དམིགས་པ་ཡོད་པ་ཉིད་དེ། དེས་དབེན་པར་རྟོགས་པས་དེ་མེད་པར་རྟོགས་པའི་ཕྱིར་རོ། །དེས་ན་
[126a.4]གལ་ཏེ་རྒྱུན་མི་འཆད་པར་མིག་བགྲད་ནས་ལྟ་བ་ན་དེ་ལ་ཡང་བུམ་པའི་རྒྱུན་དམིགས་པ་བར་དང་བཅས་པ་ཉིད་དུ་གྱུར་ན་ནི་དེའི་ཚེ་འདི་འབྱུང་ཞིང་མེད་པར་འགྱུར་རོ་ཞེས་མི་རྟག་པ་ཉིད་དུ་རྟོགས་པར་འགྱུར་རོ། །དེས་ན་གང་གི་ཕྱིར་རང་བཞིན་ཁོ་ན་མི་རྟག་པ་ཉིད་ཡིན་པ་དེ་ལྟ་ན་ཡང་
[126a.5]འཇིགས་པ་ཉིད་ལྷུར་གྱུར་པས་དེ་ལྟར་འགྱུར་བའི་ཕྱིར་དེ་རྟོགས་པའི་རྒྱུ་མཚན་ནི་དེ་མེད་པར་དམིགས་པ་ཁོ་ན་ཡིན་ནོ། །འདི་ལ་ནི་ཡོད་པ་དམིགས་པ་ཉིད་ཡོད་ཀྱི་མེད་པ་ནི་མ་ཡིན་ནོ། །གལ་ཏེ་མེད་པ་དམིགས་པ་ཞེས་བྱ་བ་དངོས་པོ་མེད་པ་དམིགས་པ་ནི་མ་ཡིན་ཏེ། དེའི་
[126a.6]རང་བཞིན་དང་བྲལ་བས་དམིགས་པའི་རྟེན་མ་ཡིན་པའི་ཕྱིར་རོ། །འོན་ཀྱང་དངོས་པོ་དེས་དབེེན་པའི་དངོས་པོ་གཞན་དམིགས་པ་ཉིད་དེ། དེ་ནི་སྐད་ཅིག་མ་ལ་ཡང་ཡོད་པ་ཡིན་ཏེ། དེ་ལ་ཡང་སྐད་ཅིག་སྔ་མས་དབེན་པ་སྐད་ཅིག་གཉིས་པ་ལ་ཡོད་པའི་ཕྱིར་རོ། །སྐད་ཅིག་མ་སྐད་
[126a.7]ཅིག་མ་སྔ་མས་དབེེན་པར་རྟོགས་པ་མ་ཡིན་ཞེས་ཀྱང་བརྗོད་པར་མི་ནུས་ཏེ། མི་རྟོགས་པའི་རྒྱུ་ཉིད་བརྗོད་པར་བྱ་བ་ཡིན་པའི་ཕྱིར་རོ་ཞེ་ན། གལ་ཏེ་སྔོན་པོ་རྟོགས་ནས་མ་རྟོགས་པ་ལས་ཡང་རྟོགས་པ་ན་དེའི་ཚེ་སྐད་ཅིག་མ་རྟོགས་པར་འགྱུར་བ་ཁོ་ན་སྟེ། སྐྱེས་པ་ཙམ་ཉིད་ན་མི་
[126b]
[126b.1]མངོན་པར་འགྱུར་བའི་གློག་འགྱུ་བའི་སྔ་མ་བཞིན་ནོ། །དེ་ལྟར་ནི་མ་ཡིན་ཏེ་རྒྱུན་བར་མཚམས་མེད་པའི་ཕྱིར་རོ། །དངོས་པོ་སྐད་ཅིག་བར་ཆོད་ན་ནི་དེའི་རྒྱུན་ལ་བརྟེན་ནས་འབྱུང་བའི་དངོས་པོ་གཞན་སྐྱེ་བར་འགྱུར་ཏེ་རྒྱུ་མེད་པ་ཅན་དུ་ཐལ་བའི་ཕྱིར་རོ། །འོན་ཀྱང་རྒྱུ་ནུས་པ་ཡོད་པ་
[126b.2]ཉིད་ཡིན་ཏེ་དེས་ན། དངོས་པོ་སྐྱེ་བ་ཡིན་ནོ། །དེ་ཡང་རྒྱུའི་དངོས་པོ་ཡོད་པ་དང་བར་མ་ཆོད་པར་སྐྱེ་བའི་ཕྱིར། དེ་ནི་སྐད་ཅིག་མ་གཉིས་ཙམ་དུ་ཟད་ཀྱི་འདི་ལ་དངོས་པོ་མེད་པའི་སྐད་ཅིག་མ་གསུམ་པ་མེད་པ་དེས་ན་རྒྱུ་དང་འབྲས་བུ་བར་མ་ཆོད་པ་ཡིན་ནོ། །དེས་ན་གལ་ཏེ་དངོས་པོ་ལ་སྐད་
[126b.3]ཅིག་མ་གཞན་དག་གིས་དབེན་པ་ཡིན་མོད་ཀྱི། དེ་ལྟ་ན་ཡང་གལ་ཏེ་ཡོད་པ་བར་དང་བཅས་པར་དམིགས་པར་གྱུར་ན་སྐད་ཅིག་མར་འཇིག་པ་ཉིད་རྟོགས་པ་ཉིད་དོ། །བར་མེད་པ་ཡིན་ན་ནི་ལྡོག་པ་མེད་པའི་རང་བཞིན་གཅིག་ཁོ་ན་ཡིན་ནོ། །དངོས་པོ་གཞན་བར་མ་ཆོད་པར་ཡོད་པ་ཡིན་
[126b.4]ཞེས་མ་ངེས་པའི་ཕྱིར་མི་རྟོགས་སོ། །ཡོད་པར་བར་མ་ཆད་པའི་ཕྱིར་ན་སྐད་ཅིག་མ་ཉིད་མ་རྟོགས་པ་ཙམ་དུ་ཡང་མ་ཟད་ཀྱི། འོན་ཀྱང་ཕྱིན་ཅི་ལོག་ཏུ་ཡང་རྟོགས་པར་འགྱུར་རོ་ཞེས་སྟོན་པ་ནི་དངོས་པོ་དེ་རྟག་ཏུ་དེ་ལྟར་ཡོད་པར་གནས་ལ་དོགས་པས་བསླུས་པའོ། །རྟག་པར་རྟོགས་པ་ངེས་
[126b.5]པའི་རང་བཞིན་ཡིན་ཡང་ཚད་མ་མེད་པའི་ཕྱིར་དོགས་ཞེས་བརྗོད་དོ། །འདི་སྐད་བཤད་པ་ཡིན་ཏེ། དངོས་པོ་ཡོད་པ་ཁོ་ན་རྟག་ཏུ་དམིགས་པའི་ཕྱིར་འདི་ནི་ཡོད་པ་ཁོ་ནའོ་ཞེས་ཕྱིན་ཅི་ལོག་ཏུ་གྱུར་ལ་སྐད་ཅིག་མ་ཉིད་དུ་ངེས་པའི་རྒྱུ་མེད་པ་དམིགས་པ་མེད་པས་ནི་མི་རྟག་པ་ཡིན་ནོ། །གལ་ཏེ་སྐད་ཅིག་སོ་སོར་
[126b.6]བར་དུ་རྟོགས་པ་མེད་པ་མེད་པའི་ཕྱིར་ལྡོག་པ་མ་རྟོགས་པས་སྐད་ཅིག་མ་ཉིད་དུ་མི་ངེས་ན་བུམ་པ་ལ་སོགས་པ་ལ་མཐའི་གནས་སྐབས་སུ་མི་འགྱུར་ཏེ། དེ་ཡང་གྱོ་མོ་ལ་སོགས་པ་ཡོད་པ་བར་མ་ཆོད་པར་བྱུང་བ་དམིགས་པའི་ཕྱིར་རོ། །དེ་སྟེ་དེར་དེས་དབེན་པ་དེ་དག་ཉིད་དམིགས་པའི་ཕྱིར་
[126b.7]ལྡོག་པ་མ་རྟོགས་ན་དེ་ལྟར་ན་འདི་ནི་སྔ་མ་ལ་ལྟོས་ཏེ་སྐད་ཅིག་ཕྱི་མ་ཕྱི་མ་རྣམས་ལ་ཡང་ཁྱད་པར་མེད་དོ་ཞེ་ན། འདི་ཟློག་པའི་ཕྱིར་འདྲ་བ་གཞན་དང་གཞན་འབྱུང་བས་བསླུས་པ་ཞེས་གསུངས་སོ། །གྱོ་མོའི་གནས་སྐབས་སུ་མི་འདྲ་བའི་སྐད་ཅིག་སྐྱེ་བ་དམིགས་པའི་ཕྱིར་འཁྲུལ་པ་ལྡོག་
[127a]
[127a.1]གོ། །བུམ་པའི་རྒྱུན་དམིགས་པར་ནི་བུམ་པའི་སྐད་ཅིག་གཉིས་པ་འདྲ་བ་ཁོ་ན་དམིགས་སོ། །དེས་ན་སྐད་ཅིག་གཉིས་པ་ལ་སོགས་པར་བུམ་པའི་སྐད་ཅིག་ཉིད་དམིགས་པས་རྟག་ཏུ་དེ་ཡོད་པར་དགོས་པ་ཡིན་ཏེ། མི་འདྲ་བ་དམིགས་པའི་བདག་ཉིད་དེ་མི་དམིགས་
[127a.2]པ་སྐད་ཅིག་མ་ཉིད་དུ་ངེས་པའི་རྒྱུ་དེ་མེད་པར་རྟོགས་པ་མེད་པའི་ཕྱིར་རོ། །གལ་ཏེ་གྱོ་མོ་ལ་སོགས་པ་དག་ལ་ཡོད་པ་དམིགས་པ་ཡོད་ཀྱང་བུམ་པ་ལ་གནས་པར་རྟོགས་པ་མེད་པ་མ་ཡིན་ནམ། འགྱུར་མོད། གནས་པར་རྟོགས་པའི་རྒྱུ་ཙམ་ཉིད་ཀྱིས་ནི་ཡོད་པ་དམིགས་པ་བསྟན་པ་མ་ཡིན་གྱི།
[127a.3]འོན་ཀྱང་འདི་ནི་མི་རྟག་པ་ཉིད་མི་ངེས་པའི་རྒྱུར་བསྟན་པ་ཡིན་ནོ། །དེ་ལ་ཡང་མེད་པར་མི་དམིགས་པ་མི་རྟག་པ་ཉིད་དུ་ངེས་པའི་རྒྱུར་འཁྲུལ་པ་མེད་དོ། །དེས་ན་ཡོད་པ་དམིགས་ན་དེ་ལྟར་ཡོད་པར་དོགས་པ་འཁྲུལ་པ་ཡིན་ནོ། །ཡོད་པ་དམིགས་པ་ཡོད་ཀྱང་མི་འདྲ་བ་གཞན་བྱུང་ན་མི་
[127a.4]གནས་པར་རྟོགས་པའི་རྒྱུ་ཡིན་པའི་ཕྱིར་འཇིག་པ་རྟོགས་པ་ལ་འདི་གཉི་ག་རྒྱུ་རང་དབང་དུ་གྱུར་པ་ཡིན་ནོ། །གང་གི་ཚེ་རྟོགས་པ་ནང་དུ་མངོན་དུ་ཕྱོགས་པ་ན་དེའི་བདག་ཉིད་དམ་རྣམ་པར་འགྱུར་བ་འགའ་ཡང་མ་དམིགས་པའི་ཕྱིར་རྟོགས་པ་མ་རྟོགས་ཏེ་སླར་ཡང་དེ་ལྟ་བུར་
[127a.5]གྱུར་པ་ཉིད་དམིགས་པ་དེའི་ཚེ་འཐད་པས་གྲུབ་པ་ཉིད་ཀྱི་སྐད་ཅིག་མར་ངེས་པ་འབྱུང་བ་ཡིན་ནོ། །དེ་བཞིན་དུ་མི་འདྲ་བ་གཞན་འབྱུང་བ་ན་བར་ཆད་པ་མེད་པར་ཡོད་པ་ཉིད་གསལ་ཡང་འཇིགས་པ་ཉིད་དུ་རྟོགས་སོ། །དེས་ན་འདི་གཉིས་ན་ཕན་ཚུན་ལྟོས་པ་མ་ཡིན་ནོ། །འདི་གཉིས་
[127a.6]གནས་པར་རྟོགས་པ་བརྗོད་པ་ན་དེ་ལས་བཟློག་པས་ནི་མི་གནས་པར་རྟོགས་པར་བརྗོད་པར་འགྱུར་བ་དེས་ན་དེ་ལ་ལྟོས་ཏེ་འམ་ཞེས་སྨོས་སོ། །གནས་པར་རྟོགས་པ་ལ་ནི་ཡོད་པ་དེ་དམིགས་པ་གཞན་འབྱུང་བ་ལ་ལྟོས་ཏེ། རྒྱུ་མཚན་མ་ཡིན་ཏེ་མཐའི་གནས་སྐབས་ན་ཡོད་པ་དམིགས་
[127a.7]པ་ཡོད་ཀྱང་རྟོགས་པ་མེད་པའི་ཕྱིར་རོ། །གལ་ཏེ་ཡང་སྐྱེས་བུ་དག་ལ་བྱིས་པ་དང་གཞོན་ནུ་ལ་སོགས་པ་མི་འདྲ་བ་ཡོད་ལ། བུམ་པ་ལ་སོགས་པ་ལ་ཡང་གྱོ་མོ་ལ་སོགས་པའི་གནས་སྐབས་སུ་འདྲ་བ་ཡོད་པ་དེ་ལྟར་ན་ཡང་སྔ་མ་ལས་གཅིག་གི་རྒྱུ་མཚན་གྱི་འདྲ་བ་རྗེས་སུ་
[127b]
[127b.1]འཇུག་ལ་གཞན་དུ་ནི་མ་ཡིན་ནོ། །འདྲ་བ་ཐམས་ཅད་དེ་ལྟར་རྟོགས་པའི་རྒྱུ་མ་ཡིན་པའི་ཕྱིར་རོ། །གང་ཇི་ལྟ་བུའི་རྒྱུ་ཡིན་པ་དེ་ནི་རྟོགས་པ་ངེས་པ་ཉིད་ལས་ངེས་པར་བྱ་བ་ཡིན་ནོ། །གལ་ཏེ་བར་དང་བཅས་པའི་ཡོད་པ་མ་དམིགས་པའི་ཕྱིར་དང་བར་མེད་པར་གསལ་བ་ལ་ཡང་
[127b.2]མི་འདྲ་བར་དམིགས་པ་མེད་པའི་ཕྱིར་སྐད་ཅིག་མ་ཉིད་མི་ངེས་ན་རྣལ་འབྱོར་པ་རྣམས་ལ་ཡང་མི་རྟག་པར་རྟོགས་པ་མེད་པར་འགྱུར་རོ་ཞེ་ན། བློ་ཞན་པ་ཞེས་སྨོས་སོ། །བློ་ཞན་པ་ནི་རང་ཉིད་དོན་རྟོགས་པའི་མཐུ་མེད་དོ། །ཚུ་རོལ་མཐོང་བའི་དོན་གྱི་ཕན་པ་ལ་ལྟོས་པ་ཉིད་
[127b.3]ཀྱི་དོན་རྟོགས་པའི་ཕྱིར་རོ། །དོན་རྣམས་ལ་རང་དབང་དུ་དཔྱོད་པ་རྣལ་འབྱོར་པ་རྣམས་ནི་དོན་གྱི་རྒྱུ་མཐའ་དག་ལ་སྔ་མ་དང་ཕྱི་མར་འབྱུང་བའི་སྐད་ཅིག་རྣམས་ཅིག་ཅར་རྟོགས་པ་ན་ཚུ་རོལ་མཐོང་བའི་ཡུལ་དུ་གྱུར་པ་ལ་སོགས་པ་དུས་གཅིག་ཏུ་ཡོད་པ་དག་ཕན་ཚུན་ཐ་དད་པར་
[127b.4]རྟོགས་པའི་ཕྱིར་ཇི་ལྟར་སྐད་ཅིག་ཉིད་དུ་མི་རྟོགས། ཡང་ན་ཕྱི་རོལ་གྱི་རྒྱུ་མཚན་དེ་ལྟར་བསྟན་པ་ཡིན་ནོ། །ཡིད་ཀྱི་འཁྲུལ་པ་ནི་ངེས་པར་ཕྱི་རོལ་གྱི་རྒྱུ་མཚན་ལས་སྐྱེས་པ་མ་ཡིན་ཏེ། ཟླ་བ་གཉིས་ལ་སོགས་པ་བཞིན་ནོ། །དེས་ན་ཡིད་ཉམས་པ་མེད་པར་ཐག་པ་ལ་ཡང་སྦྲུལ་
[127b.5]དུ་འཁྲུལ་པ་མི་འཐད་པའི་ཕྱིར་རོ། །དེ་ན་བློ་ཞན་པ་ཞེས་བྱ་བ་ནི་ནང་གི་རྒྱུ་མཚན་བསྟན་པའི་ཕྱིར་བཤད་པ་ཡིན་ནོ། །འཁོར་བ་ཉིད་ཀྱིས་བདག་དང་བདག་གིར་ལྟ་བའི་ཕྱིར་རྟག་པའི་བག་ཆགས་ཀྱིས་ཉམས་པར་བྱས་པ་ཞེས་བྱ་བའི་དོན་ཏོ། འོ་ན་ཕྱི་རོལ་གྱི་རྒྱུ་མཚན་བསྟན་
[127b.6]པས་དོན་ཅི་ཡོད་ཅེ་ན། ཉམས་སུ་མྱོང་བ་དེ་ལྟར་རིག་པར་བྱེད་པ་ཡིན་ན་དེ་ཡང་མེད་པར་ཐལ་བར་འགྱུར་བའི་ཕྱིར་རོ། །སྐད་ཅིག་མ་ཐ་མ་ནི་གང་གི་དེ་མ་ཐག་པ་ཁོ་ནར་དངོས་པོའི་རང་བཞིན་མི་དམིགས་པར་འགྱུར་བ་སྟེ་དེ་མཐོང་བ་རྣམས་ཀྱིས་ངེས་པའི་ཕྱིར་རོ། །དེའི་ཚེ་ནི་མི་འདྲ་
[127b.7]བ་ཉིད་ཀྱི་དངོས་པོ་གཞན་མེད་པ་དམིགས་པ་ཡིན་ཏེ། ཐམས་ཅད་ཉེ་བར་ལེན་པ་ཅན་མེད་པའི་འཇིག་པ་གྲུབ་པའི་ཕྱིར་རོ། །དངོས་པོའི་རང་བཞིན་དུ་གྱུར་པ་དེ་མཐོང་ཡང་ངེས་པ་མེད་པ་གང་ཡིན་པ་འདི་ནི་མི་རྟག་པ་ཉིད་ཀྱི་རྣམ་པ་ཡིན་པར་མ་ཟད་ཀྱི་འོན་ཀྱང་གཞན་ལ་ཡང་ཡོད་དོ་ཞེས་
[128a]
[128a.1]བསྟན་པའི་ཕྱིར་འབྲས་བུ་སྐྱེད་པའི་ནུས་པ་ཞེས་སྨོས་སོ། །རྒྱུ་མཐོང་ཡང་མ་མཐོང་བར་གྱུར་པ་གང་ཡིན་པ་འབྲས་བུ་སྐྱེད་པའི་ནུས་པ་ནི་རྒྱུ་ལས་གཞན་མ་ཡིན་པ་ཁོ་ནའོ། །འདི་ནི་དེ་ལྟར་མཐོང་ཡང་རྒྱུའི་རང་གི་ངོ་བོ་བཞིན་ངེས་པ་མ་ཡིན་གྱི། འོན་ཀྱང་དེ་ཡོད་
[128a.2]ན་འབྲས་བུ་དམིགས་པ་ཁོ་ན་ལས་སོ། །དེས་ན་འབྲས་བུ་སྒྲུབ་པར་བྱེད་པའི་ནུས་པའི་རྒྱུའི་དངོས་པོ་ཉིད་ཡིན་ཡང་འབྲས་བུ་མ་དམིགས་ན་རྒྱུ་རྟོགས་སུ་ཟིན་ཀྱང་རྟོགས་པ་པོའི་རྒྱུར་རྟོགས་པར་མི་འགྱུར་གྱི་འོན་ཀྱང་འབྲས་བུ་མཐོང་བ་ཁོ་ནས་ཡིན་ནོ། །དེ་བཞིན་དུ་མི་རྟག་པ་ཉིད་དངོས་
[128a.3]པོའི་རང་བཞིན་ཡིན་ཡང་མཐའི་སྐད་ཅིག་མཐོང་བ་ཉིད་ན་རྟོགས་པར་འགྱུར་བ་ཡིན་ནོ། །དེས་ན་མི་རྟག་པ་ཉིད་དེ་རྟོགས་པ་མ་རྟོགས་ཀྱང་དོན་གྱི་རང་བཞིན་དུ་གྱུར་པ་ཁོ་ནར་རིགས་སོ། །དེ་ལྟར་མ་ཡིན་ཏེ་གལ་ཏེ་དངོས་པོ་ཉིད་མི་རྟག་པ་ཡིན་པར་མ་གྱུར་ན་དེའི་ཚེ་མི་རྟག་པ་ཉིད་
[128a.4]ལས་ཐ་དད་པ་ཁོ་ནར་འགྱུར་རོ། །རྒྱུ་མཚན་གང་རྩ་བར་གྱུར་པས་དངོས་པོ་འདི་དེའི་ངོ་བོ་མ་ཡིན་པར་འགྱུར་བའི་རྒྱུ་མཚན་དེ་སྟོན་ཏེ། གཞན་གྱི་རྒྱུ་མཚན་ཅན་ཡིན་ནམ་ཞེས་བྱ་བ་ནི་འཇིག་པ་རྒྱུ་དང་ལྡན་པར་སྨྲ་བའི་འདོད་པས་སོ། །རྒྱུ་མཚན་མེད་པ་ཅན་ཉིད་ཡིན་ཡང་རུང་
[128a.5]སྟེ་ཞེས་བྱ་བས་ནི་འཇིག་པ་འབྱུང་བ་པོ་ཉིད་དུ་དམིགས་ཏེ་རྒྱུ་མེད་པར་འདོད་པ་ཉིད་ལ་ཡིན་གྱི་དངོས་པོ་མ་ཡིན་ཏེ། དངོས་པོ་ནི་འགའ་ཡང་མེད་དོ་ཞེས་བྱ་བ་འདི་ལ་ནི་བརྒལ་བ་འདི་མེད་པ་ཁོ་ནའོ། །དངོས་པོ་མེད་པ་དང་དངོས་པོ་གཞན་དུ་གྱུར་པ་མ་ཡིན་མོད། འོན་ཀྱང་དེ་ནི་
[128a.6]དངོས་པོའི་ངེས་པ་ཉིད་ཡིན་པར་བསྟན་ཏོ། །དངོས་པོ་ནི་ཁྱད་པར་ཉིད་ཀྱི་སྒོ་ནས་བསྟན་པར་འགྱུར་བ་ཡིན་ཏེ། དཔེར་ན་དེ་ཡོད་པ་ཉིད་ཀྱིས་བ་གླང་ངོ་སྙམ་དུ་རྟོགས་པའི་རྟེན་དུ་གྱུར་པའི་ཕྱིར་དེའི་རང་བཞིན་བ་ལང་ཉིད་ལ་སོགས་པས་བསྟན་པ་དེ་བཞིན་དུ་ཕན་ཚུན་མེད་པའི་བདག་
[128a.7]ཉིད་ཀྱིས་ངེས་པ་ཡང་གཅིག་ལ་གཅིག་མེད་པས་བསྙད་པ་ཡིན་ལ་དུས་ངེས་པ་ནི་སྔ་ན་མེད་པ་དང་ཞིག་ནས་མེད་པ་ཡིན་ཏེ། དེས་ན་དོན་གཞན་ཉིད་ཡིན་མོད། ཅི་འགལ་ཞེ་ན། དེ་ལྟ་ན་ནི་ཞེས་སྨོས་སོ། །མི་རྟག་པ་ཉིད་གཞན་ཡིན་ན་དངོས་པོ་དེ་དང་ལྡན་པར་ཏེ་མི་རྟག་པར་མི་
[128b]
[128b.1]འགྱུར་རོ། །ཅིའི་ཕྱིར་ཞེ་ན་མི་དགོས་པའི་ཕྱིར་རོ། །ངེས་པ་ཞེས་བྱ་བའི་དངོས་པོ་མེད་པ་ཡོད་པའི་ཕྱིར་དོན་དེ་ངེས་པར་མི་འགྱུར་རོ། །དངོས་པོ་མེད་པའི་བདག་ཉིད་ཀྱི་ངེས་པ་ཁྱད་པར་ཡིན་ཡང་། དེའི་དངོས་པོ་གཞན་དང་འབྲེལ་པའམ། དུས་གཞན་ཁྱབ་པའི་རང་བཞིན་དེ་ནི་
[128b.2]གཞན་དུ་འགྱུར་བ་མ་ཡིན་ནོ། །དེ་དང་ལྡན་པ་ཉིད་ཀྱིས་ངེས་པ་ཡིན་ནོ་ཞེ་ན། བཤད་ཟིན་ཏོ། །དེ་ལྟ་བུའི་རང་བཞིན་ནི་གཞན་ཡོད་ཀྱང་དེ་ལྟ་མ་ཡིན་པར་མི་འགྱུར་བའི་ཕྱིར་རོ། །འོན་ཏེ་དངོས་པོ་གཞན་ལ་སོགས་པ་དང་མ་འབྲེལ་བ་འདིའི་རང་བཞིན་ཉིད་ཡིན་ན་དངོས་པོ་མེད་
[128b.3]པ་གཞན་གྱིས་ཅི་ཡང་བྱར་མེད་དོ། །འདིའི་དེ་ལ་ཉེ་བར་སྦྱོར་བ་ན་ནི་འདི་ཁོ་ན་སྟེ། དེ་ཡོད་ན་དངོས་པོ་ངེས་པ་ཉིད་གང་ཡིན་པའོ་ཞེ་ན། དེ་ལྟ་ན་ཡང་དེའི་རང་གི་ངོ་བོ་ཉིད་ཡོད་ན་དེ་ལྟར་འགྱུར་བའི་ཕྱིར་ངོ་བོ་ཉིད་ཀྱིས་ནི་དངོས་པོ་མེད་པ་དངོས་པོ་མེད་པ་ལ་ཉེ་བར་སྦྱོར་བ་མ་ཡིན་
[128b.4]གྱི། འོན་ཀྱང་ནུས་པ་ཉིད་ཀྱིས་ཡིན་ནོ། །དེས་ན་དེའི་རྒྱུ་ཉིད་དེ་ལྟ་བུ་སྒྲུབ་པར་ནུས་པར་བརྟགས་ཏེ་ཁྱད་པར་གཞན་དོར་བ་ཁོ་ནར་རིགས་སོ། །དེ་བཤད་པ་ནི། འོན་ཏེ་དགོས་ན་ནི་དངོས་པོ་དེའི་ངེས་པའི་མཚན་ཉིད་ལ་འདི་ཕན་འདོགས་ན་ནི་རང་གི་ངོ་བོ་ཉིད་ཀྱིས་ངེས་པ་ཡིན་
[128b.5]པའི་ཕྱིར་དེ་ཉིད་འདིའི་བདག་ཉིད་དུ་གྱུར་པའི་མི་རྟག་པ་ཡིན་པས་མི་རྟག་པ་གཞན་གྱིས་ཅི་ཞིག་བྱ། ཞིག་པའི་མཚན་ཉིད་ཀྱི་དོན་གཞན་དང་ལྡན་པས་དངོས་པོ་ངེས་པ་འདིར་གྲུབ་པ་གང་ཡིན་པ་འདི་ནི་རིགས་པ་ཡང་མ་ཡིན་ནོ། །ཁྱད་པར་ཉིད་ཀྱིས་དེ་དེ་ལྟ་བུར་འགྲུབ་པ་ལ་
[128b.6]ཉེ་བར་མཁོ་ན་དུས་མཚུངས་པའི་དོན་ལ་བརྟེན་ནས་ཉེ་བར་སྦྱོར་བར་བརྗོད་པར་བྱ་བ་ཡིན་ནོ། །དེས་ན་འདིར་རང་གི་རྒྱུ་ལས་དེ་ལྟ་བུའི་དངོས་པོར་མ་གྲུབ་པ་ཉིད་དོ། །དེས་ན་རང་ཡོད་པའི་དུས་བཞིན་དུ་དུས་གཞན་དང་འབྲེལ་པར་རུང་བའི་ཕྱིར་རང་གི་ངོ་བོས་འཇིག་
[128b.7]པའི་ངང་ཅན་མ་ཡིན་པའི་ཕྱིར་ན་རང་བཞིན་གྱིས་མི་གཡོ་བ་ཡིན་ནོ། །དེ་ལྟ་ཡིན་དང་དོན་གཞན་དང་ལྡན་ཡང་གཡོ་བ་ཉིད་དུ་མི་འཐད་པའི་ཕྱིར་རོ། །དེས་ན་དེ་ལྟར་དོན་གཞན་གྱི་རྒྱུ་མཚན་ཅན་ཡིན་ན་ཆོས་འགལ་བ་གནས་པས་གཞན་ཉིད་དུ་བསྒྲུབས་ཏེ། རྒྱུད་དོན་ཐ་དད་པ་
[129a]
[129a.1]ཉིད་མེད་ཀྱང་ཞེས་བྱ་བ་ལ་སོགས་པས་རང་གི་ཕྱོགས་ལ་ཡང་ཕྱིས་འགྲུབ་པར་འགྱུར་བ་ཉིད་ཀྱིས་གཞན་ཉིད་དུ་མཚུངས་པར་ཐལ་བར་རྟོག་པ་བསལ་ནས་དེ་ལྟ་མ་ཡིན་ན་ཞེས་བྱ་བ་ལ་སོགས་པས་དེ་ཉིད་སྐབས་སུ་བྱས་ཏེ། དེ་ལྟ་ན་ནི་ཞེས་བྱ་བས་མི་འཐད་དོ་ཞེས་
[129a.2]བསྟན་ཏོ། །དེ་ནི་རྣམ་པ་དེ་ལྟ་བུའི་མི་རྟག་པ་ལ་རྗེས་སུ་དཔག་པ་ཡང་མི་སྲིད་དོ་ཞེས་བཤད་པ་ནི། མི་རྟག་པ་ཉིད་ཀྱི་ཆོས་སམ། གཞན་དེ་ཡང་གཞན་ལས་འབྱུང་བ་ནི་བྱས་པ་ཉིད་ལ་སོགས་པ་སྒྲུབ་པར་བྱེད་པའི་རྒྱུ་ཉིད་ཡིན་པར་འགྱུར་ཏེ་དེ་ལས་བྱས་པ་སྐྱེས་པ་དེས་ན་འདིར་རྗེས་སུ་
[129a.3]དཔོག་པའམ། ཡང་ན་བྱས་པས་སྐྱེད་པའི་ཕྱིར་འབྲས་བུ་ཡིན་པ་གཅིག་ཏུ་འགྱུར་གྲང་། འདི་སྐད་བརྗོད་པ་ཡིན་ཏེ་རེ་ཞིག་སྔར་བཤད་པའི་ཚུལ་གྱིས་མི་རྟག་པ་ཉིད་དོན་གཞན་ལས་འབྱུང་ནས་གཞན་ཉིད་དུ་ནི་གནས་པ་ཡིན་ནོ། །རྗེས་སུ་དཔོག་པར་བྱེད་པའི་གཏན་ཚིགས་ཀྱི་འབྲེལ་
[129a.4]པ་ནི་ལྷག་པར་གྱུར་པས་འདི་ལྟར་འགྱུར་བ་ཡིན་ནོ། །རྒྱུ་དང་འབྲས་བུ་གཉི་ག་མ་ཡིན་པ་ཉིད་ཀྱང་ཇི་ལྟར་དོགས་པར་མ་བྱས་ཞེས་བྱ་བ་ནི་རང་ཉིད་སེལ་བར་བྱེད་དེ། གང་ཞིག་རྒྱུ་ཡང་མ་ཡིན་ལ་འབྲས་བུ་ཡང་མ་ཡིན་པ་དེ་ནི་འབྲེལ་པ་མེད་པའི་ཕྱིར་ཇི་སྐད་བརྗོད་པའི་རྣམ་པར་རྟོག་པ་
[129a.5]ཉིད་འཐད་པ་ཡིན་ནོ། །འབྲེལ་པ་མེད་ན་སྐབས་ཀྱི་དོན་དང་འགལ་བ་ཅི་ཞིག་རྒྱུ་དང་འབྲས་བུ་མ་ཡིན་པ་དེ་ལ་འབྲེལ་པ་མེད་པ་ལས་ཡོད་པར་རྗེས་སུ་དཔག་པ་རྟགས་མཐོང་བ་ལས་དེ་ཡོད་པ་ཉིད་དུ་རྟོག་པ་མི་སྲིད་པའི་ཕྱིར་རོ། །དེའི་ཕྱིར་ཕྱོགས་གཉིས་ཉིད་དོགས་པར་བྱ་བ་ཡིན་ནོ། །
[129a.6]རྒྱུ་དང་འབྲས་བུ་ཉིད་སྲིད་པ་དེ་ལ་རེ་ཞིག་རྒྱུ་ནི་མ་ཡིན་ཏེ། ཕྱིས་འབྱུང་བའི་ཕྱིར་རོ། །བྱས་པ་ཉིད་དུ་འདོད་པའི་དངོས་པོ་གང་ཡིན་པའི་ཕྱིས་རྒྱུ་གཞན་ལས་འབྱུང་བའི་མི་རྟག་པ་ཉིད་དེ་ནི། དེའི་རྒྱུ་མ་ཡིན་ཏེ་ཕྱིས་འབྱུང་བའི་ཕྱིར་རོ། །གྲུབ་པའི་དོན་ཡོད་པ་ལ་ལྟོས་ཏེ་ཕྱིས་ཡོད་པར་འགྱུར་
[129a.7]བ་ཡིན་ནོ། །གྲུབ་ཟིན་པའི་རང་བཞིན་གྱིས་དངོས་པོ་ལ་ནི་རྒྱུ་འགའ་ཞིག་ཡོད་པ་མ་ཡིན་ནོ། །དེས་ན་ཕྱིས་འབྱུང་བ་ནི་རྒྱུ་མ་ཡིན་ནོ། །ཅི་སྟེ་ཡང་གྲུབ་པ་དང་རྗེས་སུ་འབྲེལ་པ་རྗེས་སུ་འབྲེལ་པས་འབྲས་བུ་ཉིད་དུ་འདོད་དེ། རྒྱུ་གྲུབ་པ་ཉིད་ལས་འབྲས་བུ་བདག་ཉིད་ཐོབ་པའི་
[129b]
[129b.1]ཕྱིར་རོ་ཞེ་ན། དེ་ལ་ཡང་ག་ལས་ངེས་འབྲས་བུ་ནི་གདོན་མི་ཟ་བར་རྒྱུ་ཡོད་ན་འགྱུར་བ་ཡིན་ནོ་ཞེས་བྱ་བ་དེ་ལྟ་བུའི་བདག་ཉིད་ཀྱི་ངེས་པ་འདི་ཡོད་པ་མ་ཡིན་ནོ། །དེས་ན་འབྲས་བུ་ཡིན་པའི་ཕྱིར་ངེས་པ་མེད་པ་འདི་ལ་རྗེས་སུ་དཔག་པ་སྲིད་པ་མ་ཡིན་ནོ། །མི་རྟག་པ་ཉིད་ལ་སོགས་པའི་ཆོས་
[129b.2]དེ་བྱས་པ་ཉིད་ལ་སོགས་པའི་དངོས་པོ་གྲུབ་ནས་ཕྱིས་གྲུབ་པའི་དངོས་པོ་དེ་གང་ལས་འགྱུར་བ་དེ་ལས་ཐ་དད་པའི་དོན་གཞན་དེ་ལས་འབྱུང་ནའོ། །འདིས་ནི་སྔར་གྲུབ་པར་བསྟན་པས་མདོའི་ཕྱིས་ཀྱི་སྒྲས་རྣམ་པར་བཀྲོལ་ཏེ། ཇི་ལྟར་གྲུབ་ཟིན་པའི་དངོས་པོ་དེའི་རྒྱུ་ཡིན། འབྲས་བུ་ན་ཡང་
[129b.3]ག་ལ་ངེས་ཞེས་བྱ་བ་བཤད་པ་ནི་འབྲས་བུ་ཡང་རྒྱུ་ལ་གདོན་མི་ཟ་བ་མ་ཡིན་པས་ཏེ་རྒྱུ་ཡོད་ན་འབྲས་བུ་གདོན་མི་ཟ་བར་ཡོད་པ་ནི་མ་ཡིན་ནོ་ཞེས་བརྗོད་ཟིན་ཏོ། །གལ་ཏེ་ལྟོས་པ་དང་བཅས་པའི་འབྲས་བུ་རྒྱུ་ལ་གདོན་མི་ཟ་བ་མ་ཡིན་མོད། དེ་ལས་ཅིར་འགྱུར་ཞེ་ན། བཤད་པ།
[129b.4]འབྲས་བུ་དེ་ཡོད་པར་ཏེ་བདོག་པར་གོ་བར་བྱེད་པའི་གཏན་ཚིགས་མ་ངེས་པ་ཉིད་ཡིན་ནོ། །གང་གི་ཚེ་དེ་ཡོད་པ་གོ་བར་བྱེད་པའི་གཏན་ཚིགས་མ་ངེས་པ་ཞེས་གདོན་པ་དེའི་ཚེ་ཡང་རྒྱུ་གོ་བར་བྱེད་པ་མ་ཡིན་པ་ཉིད་དུ་བརྗོད་པར་འགྱུར་བ་ཁོ་ནའོ། །འབྲས་བུའི་ཡུལ་ཅན་ཉིད་ནི་
[129b.5]དེ་ཞེས་སྐབས་སུ་བབ་པ་ཉིད་དོ། །རྗེས་སུ་དཔག་པས་ནི་ཡོད་པའི་རྗེས་སུ་དཔག་པར་བྱ་བ་རྟོགས་པ་ཡིན་ནོ། །གང་གི་ཚེ་འདི་ངེས་པར་རྒྱུ་ཡོད་ན་ཡོད་པ་མ་ཡིན་པ་དེའི་ཚེ་འབྲས་བུ་རྗེས་སུ་དཔག་པར་བྱ་བ་ལ་རྒྱུ་མ་ངེས་པ་ཉིད་དོ། །གང་གི་ཕྱིར་དེ་ལྟར་མ་ཡིན་པ་དེའི་ཕྱིར་
[129b.6]དོན་གཞན་གྱི་རྒྱུ་མཚན་ཅན་གྱི་ཆོས་ནི་གདོན་མི་ཟ་བར་ཡོད་པ་མ་ཡིན་པས་ཡོད་པར་རྗེས་སུ་དཔག་ཏུ་མེད་དེ་རྟགས་ཡོད་པ་མ་ཡིན་ནོ་ཞེས་བྱ་བ་ནི་མཇུག་བསྡུ་བའོ། །དེ་ལྟར་འདི་ཡན་ཆད་ཀྱིས་ནི་དེ་ཉིད་ལ་རང་བཞིན་འབྲེལ་པས་མེད་ན་མི་འབྱུང་བ་ཡིན་པའི་ཕྱིར་ཚུལ་གསུམ་
[129b.7]ཉིད་ལ་འདུས་པ་ཡིན་ནོ་ཞེས་བསྒྲུབས་ཏེ་རྒྱུ་ལ་རང་བཞིན་ཇི་སྙེད་ཅིག་ཅེས་བྱ་བ་ལ་སོགས་པས་གསུམ་པོ་དེའི་བསྒྲུབ་བྱ་བརྗོད་དོ། །དེས་རྒྱུ་མ་ཚོགས་པས་ཞེས་བྱ་བ་དང་མི་མཐུན་ཕྱོགས་ལ་མ་མཐོང་བ་ཞེས་བྱ་བ་ལ་སོགས་པས་དེ་ལས་གཞན་དག་གཏན་ཚིགས་ལྟར་སྣང་
[130a]
[130a.1]བར་བསྟན་པའི་སྒོ་ནས་མཐོང་བ་དང་མ་མཐོང་བའི་རྩ་བ་ཅན་ལྡོག་པ་སྔོན་དུ་འགྲོ་བ་ཅན་འབྲེལ་བའི་རྩ་བ་ཅན་དུ་བསྟན་ཏོ། །འབྲས་བུ་ནི་རྒྱུའི་བདག་ཉིད་ལ་འབྲེལ་ལ་ངོ་བོ་ནི་རང་བཞིན་ལ་ཡིན་ནོ་ཞེས་འབྲེལ་པ་ཉེ་བར་བཀོད་པ་ཉིད་ཀྱིས་བསྒྲུབས་སོ། །དེ་ནི་མི་འཁྲུལ་པ་འབྲེལ་
[130a.2]པའི་རྩ་བ་ཅན་ཡིན་ཡང་ཚད་མ་གང་གིས་གྲུབ་པ་དེ་བརྗོད་དོ། །དེ་རེ་ཞིག་བསྒྲུབ་བྱ་བསྟན་པའི་རིམ་པས་དང་པོ་འབྲས་བུའི་གཏན་ཚིགས་ཀྱི་དབང་དུ་བྱས་ཏེ་བརྗོད་པ་ནི་འོ་ན་གལ་ཏེ་ཞེས་བྱ་བ་ཡིན་ནོ། །མཐོང་བ་དང་མ་མཐོང་བ་དག་གིས་རྗེས་སུ་འགྲོ་བ་དང་ལྡོག་པ་གྲུབ་པ་ནི་བསལ་
[130a.3]བ་ཡིན་ནོ། །གལ་ཏེ་དུ་བ་མེའི་འབྲས་བུ་ཡིན་པ་དེ་ལྟ་ན་ཡང་དེ་ཡོད་ན་མེ་ཡོད་ལ་མེ་མེད་ན་དེ་མེད་དོ་ཞེས་བྱ་བ་དེ་ལྟ་བུའི་བདག་ཉིད་འབྲས་བུར་གྱུར་པ་འདིའི་མི་འཁྲུལ་པ་ནི་དེ་ལྟ་བུ་འཛིན་པར་བྱེད་པའི་མངོན་སུམ་དང་མི་དམིགས་པ་དག་ཁོ་ནས་རྟོགས་པ་ཡིན་ནོ། །དོན་གཞན་ནི་འབྲས་བུ་ཉིད་རྒྱུ་ལ་
[130a.4]མི་འཁྲུལ་ལོ་ཞེས་བྱ་བར་འགྱུར་མོད། མི་འཁྲུལ་པ་དེ་ནི་རྗེས་སུ་འགྲོ་བ་དང་ལྡོག་པའི་ཡུལ་ཅན་ཡིན་པའི་ཕྱིར། མཐོང་བ་དང་མ་མཐོང་བ་མ་རྟོགས་པའི་ཚད་མ་གཞན་གང་གིས་འགྲུབ། འབྲས་བུ་རྒྱུ་ལ་མི་འཁྲུལ་པ་མ་རྟོགས་པར་ནི་དེ་ལྟར་རྣམ་པར་གཞག་པར་མི་
[130a.5]འཐད་ལ། ཚད་མ་མེད་པར་རྟོགས་པ་ཡང་མེད་དོ། །ཚད་མ་ཡང་དེར་ཅི་ཇི་ལྟར་བསྟན་པ་ལས་གཞན་མེད་དེ། དེས་ན་མཐོང་བ་དང་མ་མཐོང་བ་དག་བཀག་པའི་ཕྱིར་རང་དང་གཞན་གྱི་བདག་ཉིད་གང་གིས་རྟོགས་པའི་ཐབས་བཀག་པས་ཇི་ལྟར་འབྲས་བུ་རྒྱུ་ལ་མི་འཁྲུལ་ཏོ་
[130a.6]ཞེས་གཞན་གྱི་དོན་དུ་སྟོན་པར་བྱེད་དེ། དེས་ན་མཐོང་བ་དང་མ་མཐོང་བ་དག་རྗེས་སུ་འགྲོ་བ་དང་ལྡོག་པའི་རྟེན་མ་ཡིན་ན་དུ་བ་མེ་ལ་མི་འཁྲུལ་པ་འགྲུབ་པོ་ཞེ་ན། འདི་དགག་པའི་ཕྱིར་སློབ་དཔོན་དེ་རྟོགས་ན་དེའི་རང་བཞིན་ལས་མི་འཁྲུལ་པར་རྟོགས་པར་བྱ་བ་ཡིན་གྱི་ཚད་མ་
[130a.7]ལ་ལྟོས་པ་ནི་མ་ཡིན་སྙམ་དུ་དགོངས་པས་ཚད་མས་རྟོགས་པའི་རང་བཞིན་གྱི་འབྲས་བུ་ཉིད་སྟོན་པ་ནི། འདི་ལྟར་ཞེས་སྟོན་པ་ཡིན་ནོ། །མེ་ཡི་འབྲས་བུ་དུ་བ་སྟེ། །འབྲས་བུའི་ཆོས་ཀྱི་རྗེས་འཇུག་ཕྱིར་ཏེ། མེའི་འབྲས་བུའི་ངོ་བོ་ཉིད་ཀྱི་རྗེས་སུ་བྱེད་པའི་ཕྱིར་རོ། །གང་གི་
[130b]
[130b.1]འབྲས་བུའི་ཆོས་ཀྱི་རྗེས་སུ་འཇུག །ཅེས་བྱ་བ་ལ་ལྟོས་པ་ན་གང་གི་འབྲས་བུ་ཡིན་པ་དེའི་འབྲས་བུའི་ཆོས་ཀྱི་རྗེས་སུ་འཇུག་པ་ཉིད་རྟོགས་པ་ཁོ་ནའོ། །འབྲས་བུའི་རང་བཞིན་གང་ཡིན་པ་དེ་ནི་མེ་ལ་ལྟོས་ནས་དུ་བ་ལ་ཡོད་དོ། །དེས་ན་དུ་བ་མེའི་འབྲས་བུ་ཡིན་ནོ། །དེ་ལྟ་བུ་ཡིན་པ་
[130b.2]ཉིད་ནི་ཚད་མ་མེད་པར་དེ་ལྟར་གཞག་པར་མི་ནུས་པའི་ཕྱིར་དེའི་རང་བཞིན་དུ་རྣམ་པར་གནས་པར་ཉེ་བར་བཀོད་པ་ཁོ་ནས་འབྲེལ་པ་སྟོན་པའི་ཚད་མ་དོན་གྱིས་སྨོས་པ་ཡིན་ནོ། །འབྲས་བུའི་ཆོས་དེ་ཡང་གང་ཞེ་ན་འབྲས་བུའི་བདག་ཉིད་ལ་བྱེད་པ་ནི་མ་ཡིན་ཏེ། ངོ་བོ་མེད་པའི་དོན་ལ་དེ་
[130b.3]མི་རུང་བའི་ཕྱིར་རོ། །འཇིམ་གོང་ལ་སོགས་པའི་ངོ་བོ་ཉིད་དོ་ཞེ་ན། དེ་ངི་ལྟར་ངོ་བོ་ཡིན་པ་དང་། ཇི་ལྟར་བྱེད་པའི་ཡུལ་ཡིན་པ་དེ་ལྟར་ནི་འབྲས་བུ་མ་ཡིན་ལ་ཇི་ལྟར་འབྲས་བུ་ཡིན་པ་དེ་ལྟར་ནི་ངོ་བོ་དང་བྱེད་པའི་ཡུལ་མ་ཡིན་ནོ། །དེས་ན་འབྲས་བུ་ལ་བྱེད་པ་མ་ཡིན་ནོ། །བྱེད་པ་དང་མ་འབྲེལ་
[130b.4]པ་ནི་འབྲས་བུ་བྱེད་པའི་ཡུལ་དུ་ཡང་མི་འགྱུར་ལ་བྱེད་པ་པོ་མ་ཡིན་ཡང་དངོས་པོ་བྱེད་པ་གཞན་དང་འབྲེལ་པར་མི་འགྱུར་རོ། །དེས་ན་འབྲས་བུ་བྱེད་པ་པོ་ཉིད་ཡིན་པས་འབྲས་བུ་དང་རྒྱུ་དག་ལ་བྱ་བ་འགྲུབ་བོ་ཞེས་བྱ་བར་འགྱུར་གྱི། རྒྱུས་ནི་འབྲས་བུ་ལ་མ་ཡིན་ནོ། །འབྲེལ་
[130b.5]པ་མེད་པར་ནི་ཡུལ་དང་ཡུལ་ཅན་འགའ་ཡང་མེད་དོ། །དེ་ཡང་རྒྱུ་དང་འབྲས་བུའི་དངོས་པོའམ་འཕྲོད་པ་འདུ་བ་ཡིན་པས་དེ་དང་འབྲེལ་པ་ཉིད་ཀྱིས་བྱེད་པ་པོ་རྣམས་བྱེད་པ་པོ་ཉིད་ཡིན་པས་འབྲས་བུ་ཡང་བྱེད་པ་པོ་ཉིད་དམ། ཡང་ན་ནི་བྱེད་པ་པོའི་ཡུལ་ཡང་མ་ཡིན་པའི་ཕྱིར་རྒྱུ་འབྲས་བུ་
[130b.6]ལ་བྱེད་པ་མ་ཡིན་ནོ། །བྱེད་པ་ཉིད་ལས་དེ་སྐྱེ་བའི་ཕྱིར་དེ་ལ་དེ་བྱེད་པ་ཡིན་ནོ་ཞེ་ན། གལ་ཏེ་བྱེད་པས་མ་རེག་པའི་ལུས་ཅན་ཉིད་ཡིན་ན་ནི། བྱེད་པ་ཡོད་ན་འབྱུང་བ་ཉིད་ཡིན་པས་དེ་ལས་སྐྱེས་པར་བརྗོད་པ་རྒྱུ་ཡོད་ན་འབྱུང་བ་ཞེས་བྱ་བར་འགྱུར་རོ། །དེ་སྟེ་རེག་ན་རེག་
[130b.7]པ་ཇི་ལྟ་བུ་འབྲེལ་པའོ། །བྱེད་པ་པོ་ཡང་དེ་ཉིད་ཡིན་པའི་ཕྱིར་འབྲས་བུ་བྱེད་པ་པོ་མ་ཡིན་པ་མ་ཡིན་ནོ། །དེས་ན་བྱ་བ་ཉིད་ཡིན་གྱི་འབྲས་བུ་ནི་མ་ཡིན་ནོ། །དེས་ན་ས་མཐའ་དག་པ་རྟོགས་པའི་ཡན་ལག་ཏུ་ཉེ་བར་བརྟག་པ་བྱ་བ་དང་བྱེད་པ་པོ་ལ་སོགས་པའི་རྗེས་སུ་འགྲོ་བས་རྒྱུས་
[131a]
[131a.1]འབྲས་བུ་བྱེད་དོ་ཞེས་བྱ་བའི་སྒྲས་ཡིད་བསླུས་པ་ནི་དངོས་པོའི་ཆོས་ཡོངས་སུ་མ་ཤེས་པས་ལྷུང་ཚབས་ཆེན་པོར་འགྱུར་རོ། །བྱེད་པ་ཡང་འབྲས་བུ་མ་ཡིན་པ་རྒྱུ་དང་འབྲེལ་པ་ཡིན་ཏེ་མི་རྟག་པའི་ཕྱིར་རོ། །བྱེད་པའི་ཡུལ་མ་ཡིན་པར་ཡང་འབྲས་བུ་མ་ཡིན་
[131a.2]ཏེ་དེས་ན་སྔ་མས་ཐུག་པ་མེད་པ་ཉིད་བརྗོད་པ་ཡིན་ནོ། །དེའི་ཕྱིར་འབྲས་བུའི་ཆོས་ནི་སྔོན་མེད་པ་ཕྱིས་རང་གི་ངོ་བོ་ཡོད་པའི་སྐྱེ་བ་ཉིད་ཡིན་ནོ། །དེ་ནི་རྟག་ཏུ་གྲུབ་པའི་རང་བཞིན་ལ་མེད་དེ། གཏན་དུ་ཡོད་པའི་ཕྱིར་རོ། །རྟག་པར་མེད་པ་ཉིད་ལ་ཡང་མ་ཡིན་ཏེ། དངོས་པོ་མེད་པ་
[131a.3]ཉིད་དུ་རོ་གཅིག་པའི་ཕྱིར་རོ། །དེའི་ཕྱིར་ངོ་བོ་མེད་པའི་ཕྱིར་མེད་པ་ཉིད་ཕྱིས་ཡོད་པ་ནི་དེ་ལས་སྐྱེས་སོ་ཞེས་བརྗོད་དོ། །འཆད་པར་འགྱུར་བའི་ཚུལ་གྱིས་འདིས་རྒྱུ་མེད་པར་ནི་མི་འཐད་པ་དེས་ན་དངོས་པོ་ནུས་པ་ཡོད་པ་ལས་སྐྱེས་པའི་ངོ་བོར་འདོད་པར་བྱའོ། །དེས་ན་ནུས་པའི་
[131a.4]རང་བཞིན་གྱི་དངོས་པོ་དེ་ཡོད་པའི་ཕྱིར་སྔར་མེད་པའི་འབྲས་བུ་ཡང་ཡིན་པས་ན་རྒྱུ་དང་འབྲས་བུའི་དངོས་པོ་ཡིན་ནོ། །དེས་ན་ནུས་པ་ཡང་དོན་གྱིས་གོ་བ་ལ་སོགས་པས་རྟོགས་པར་བྱ་བ་ནི་མ་ཡིན་གྱི་འོན་ཀྱང་ངོ་བོ་འདི་ཉིད་ཡིན་ནོ། །སྐྱེ་བ་ཡང་དེ་བཞིན་ནོ། །དེས་ན་བདེ་བར་
[131a.5]གཤེགས་པ་དག་གི་རྒྱུ་དང་འབྲས་བུའི་དངོས་པོ་ནི་མུ་སྟེགས་གཞན་དག་ལས་ཁྱད་པར་མེད་དེ། འོན་ཀྱང་འདིར་ཉེ་བར་མཁོ་བ་མེད་ཅིང་ཚད་མ་དང་མི་ལྡན་པའི་ལྷག་པ་བརྟགས་པ་གང་ཡིན་པ་དེ་བསལ་ནས་ཁས་བླངས་པས་ཡོངས་སུ་དག་པར་བྱེད་པ་ཡིན་ནོ། །ཕྱི་རོལ་གྱི་
[131a.6]དོན་སྨྲ་བའི་ཁས་བླངས་པ་དེ་ནི་དེ་ཙམ་ཉིད་དོ། །རྣམ་པར་རྟོག་པ་མེད་པའི་ཡུལ་དུ་འགྱུར་བར་ནུས་པ་ཞེས་བྱ་བ་གང་ཡིན་པ་དེ་ནི་གཉི་ག་ལྟར་ཡང་ཁས་བླང་བར་ནུས་ཏེ་བདེན་པ་གཉིས་ཀྱི་ནང་དུ་འདུ་བར་རུང་བའི་ཕྱིར་རོ། །གལ་ཏེ་རྣམ་པ་དེ་ལྟ་བུ་གནོད་པ་མེད་ན་ནི་ཕྱིའི་དངོས་
[131a.7]པོ་དོན་དམ་པ་ཁོ་ནའོ། །དེ་སྟེ་གནོད་པ་ཡོད་པ་ཉིད་དེ་འོན་ཀྱང་རང་གི་ངོ་བོར་མེད་པའི་ཕྱིར་གཞན་གྱི་ངོ་བོར་ཡོད་པས་ཀུན་རྫོབ་ཡིན་ནོ། །རྣམ་པར་རྟོག་པས་ཡུལ་དུ་བྱས་པས་ནི་དོན་དམ་པ་དང་ཀུན་རྫོབ་ཏུ་ཡང་ཡོད་པ་མ་ཡིན་གྱི་འོན་ཀྱང་མེད་པ་ཁོ་ན་སྟེ་བརྟགས་པ་ནི་
[131b]
[131b.1]གཏན་མེད་པ་ཡིན་པའི་ཕྱིར་རོ། །མེད་པ་སྣང་བ་ནི་སེལ་བར་འགྱུར་རོ། ཡོད་པ་དེ་ཡང་སྔོན་ཡོད་པ་དང་སྔོན་མེད་པ་གཉིས་ལས་མ་གཏོགས་པ་གཞན་རྣམ་པར་རྟོག་པ་མེད་པ་ལ་སྣང་བར་མི་ནུས་པའི་ཕྱིར་ཇི་སྐད་བཤད་པ་ཉིད་རྒྱུ་དང་འབྲས་བུའི་དངོས་པོ་ཡིན་ནོ། །དེ་ལྟར་
[131b.2]འབྲས་བུ་སྐྱེས་པའི་སྔོན་རོལ་དུ་མེད་པ་ཡོད་པའི་རང་བཞིན་ཐོབ་པས་དངོས་པོར་གྱུར་པ་ཡང་མ་ཡིན་ཏེ། གང་གི་ཕྱིར་འབྲས་བུ་སྔར་དངོས་པོ་མེད་པའི་རང་བཞིན་དུ་གྱུར་པའི་ཕྱིས་དངོས་པོ་ཉིད་དུ་གྱུར་པ་ནི་མ་ཡིན་ནོ། །འབྲས་བུ་ནི་སྔར་དངོས་པོ་ཡོད་པ་མ་ཡིན་གྱི་གང་ཞིག་
[131b.3]ཡོད་པར་འགྱུར་བ་དངོས་པོ་མེད་པ་ཞེས་བྱ་བ་གཞན་ནི་ཡོད་པ་མ་ཡིན་ནོ། །དེས་ན་འགའ་ཡང་མ་ཡིན་པའི་ཕྱིར་འདིར་གང་ཞིག་གཞན་དུ་འགྱུར། དངོས་པོ་མེད་པར་གྲུབ་ན་ནི་འགྱུར་རོ། །དེའི་དུས་ཉིད་ན་ཡོད་པའི་དངོས་པོ་ལ་སྔར་ཡང་ཡོད་པར་ཐེ་ཚོམ་ཟ་བ་ན་འདི་ཡོད་པ་
[131b.4]བཀག་པ་ཁོ་ནར་ཟད་ཀྱི་དེའི་གནས་སྐབས་ན་མེད་པས་སྒྲུབ་པ་ནི་མ་ཡིན་ཏེ། དེས་ན་ཇི་ལྟར་དངོས་པོ་མེད་པའི་བདག་ཉིད་ཡིན་ཏེ། དངོས་པོའི་བདག་ཉིད་མེད་དོ་ཞེས་བྱ་བ་འདི་ནི་འདོད་པ་ཁོ་ནའོ། །ཇི་སྐད་དུ་དུས་གསུམ་བརྟག་པ་ལས། རྟེན་མེད་པའི་དོན་ལ་ནི་རྒྱུ་ནི་གོམ་པ་
[131b.5]འདོར་བ་མེད། །དེ་ལྟར་ན་ཡང་རྒྱུ་ཡོད་ན། །སྔོན་མེད་དངོས་པོ་ཡོད་པར་མཐོང་། །སྔར་དེའི་གནས་སྐབས་གང་ཡིན་ཞེས། །འདི་ནི་དངོས་ལ་བརྟེན་པ་ཡིན། །སྔར་དེའི་གནས་སྐབས་ཞེས་བྱ་འདིར། །གཉི་ག་འང་མེད་པ་སྲིད་མ་ཡིན། །གང་ཞིག་ཆ་མེད་རིམ་མེད་པ། །དངོས་པོ་
[131b.6]སྔོན་མ་བྱུང་རྣམས་ཀྱི། །བདག་གིས་དེ་ཉིད་གསལ་བ་གང་། །འདི་ནི་ཤིན་ཏུ་ཡ་མཚན་ནོ། །ཞེས་གསུངས་པ་བཞིན་ནོ། །འབྲས་བུ་ལྟོས་པ་སྔར་ཡོད་པའི་དངོས་པོ་དེ་ཡོད་པའི་ཕྱིར་དེ་ལ་བྱེད་པ་མེད་བཞིན་པས་སྐད་ཅིག་གཉིས་པ་ན་ཡོད་པ་བདག་ཉིད་ཡོད་པའི་དུས་ན་རྒྱུ་
[131b.7]ཡོད་མི་དགོས་པའི་ཕྱིར་ཤིན་ཏུ་བསྟན་པའི་ཚད་མས་དེའི་དུས་ན་ཡོད་པ་དང་མེད་པར་རྟོགས་པས་རྟག་པའམ་མི་རྟག་ཀྱང་རུང་སྟེ། རྒྱུ་དང་འབྲས་བུ་དངོས་པོར་ནི་གཉི་ག་ལ་ཡང་ཁྱད་པར་མེད་དོ། །དངོས་པོའི་རང་བཞིན་རྣམ་པ་འདི་ལྟར་ཁས་ལེན་པ་ལ་ནི་གནོད་པ་ཡོད་པ་མ་
[132a]
[132a.1]ཡིན་ལ། མཐོང་བ་ཡང་ཡིན་ནོ། །ཕྱི་རོལ་གྱི་དོན་དུ་སྨྲ་བ་ལ་དངོས་པོ་ཉིད་དུ་ཁས་བླངས་པའི་ཕྱིར་དང་། དེ་ཡང་རྒྱུའི་བྱེད་པ་ལས་མ་སྐྱེས་པར་མི་འཐད་པའི་ཕྱིར་རོ། །རྣམ་པར་ཤེས་པ་སྨྲ་བ་ལས་ཡང་རིག་བཞིན་པ་ཉིད་རིག་པའི་རང་བཞིན་མ་ཡིན་པ་རིག་
[132a.2]པའི་དབང་གིས་མི་འཐད་པའི་ཕྱིར་རོ། །ཀུན་རྫོབ་ཏུ་དེའི་ངོ་བོར་གྱུར་ནས་སྣང་བའི་ཕྱིར་དེ་རྟག་པ་ཡང་མ་ཡིན་ཏེ། དེ་ལྟ་མ་ཡིན་ན་རི་བོང་གི་རྭ་དང་མཚུངས་པར་འགྱུར་བས་ན་རྣམ་པར་འགྱུར་བ་ཉིད་དུ་ངེས་པའི་ཕྱིར་རོ། །དོན་དམ་པར་ནི་སྐྱེ་བའམ་འགག་པ་འགའ་ཡང་ཡོད་
[132a.3]པ་མ་ཡིན་ཏེ་རྣམ་པར་ཤེས་པ་ཙམ་ཡང་མེད་པའི་ཕྱིར་འདི་ནི་ཀུན་རྫོབ་ཁོ་ནའོ་ཞེས་བྱ་བ་ཡང་ལས་དང་དེའི་འབྲས་བུ་དང་ཡང་སྲིད་པ་ལ་སོགས་པ་ལ་སྐུར་བའི་ཕྱིར་ཚུ་རོལ་མཛེས་པ་དག་པས་ཀྱང་ཐུབ་པ་ཡིན་ཏེ་མཐོང་བ་ཡང་སྤོང་བའི་ཕྱིར་རོ། །ཐམས་ཅད་ཀྱང་མེད་པར་ནི་མི་
[132a.4]འཐད་དེ་རྣམ་པར་ཤེས་པ་ཡོད་པར་ཁས་བླངས་པ་རིགས་པས་གྲུབ་པ་ཡིན་པའི་ཕྱིར་རོ། །དེ་བས་ན་གཞན་ལ་སྐྱེ་བ་དང་རང་བཞིན་འཇིག་པ་ཞེས་ཁས་བླངས་པ་འདི་ལ་རེ་ཞིག་རང་གི་ངོ་བོས་ནི་སྤྱི་ཁས་བླངས་པ་བཞིན་འགལ་བ་ཡོད་པ་མ་ཡིན་ལ་རྟག་པ་དང་གཏན་མེད་པ་མི་
[132a.5]འཐད་པའི་ཕྱིར་རིགས་པས་འཐད་པ་ཡང་ཡིན་ནོ་ཞེས་གནས་སོ། །དེས་ན་ཡོད་པ་ཉིད་སྐྱེ་བར་ནི་མི་འཐད་ལ་དངོས་པོ་རྣམས་ལ་བྱ་བ་ལ་སོགས་པ་ཡང་ཡོད་པ་མ་ཡིན་ཏེ། དེས་ན་སྔར་མེད་པ་ཡོད་པ་ཉིད་སྐྱེ་བ་ཡིན་ནོ། །དེ་ཡང་རྒྱུ་ཡོད་པ་མ་ཡིན་པས་དངོས་པོ་གཞན་ཡོད་ན་འབྱུང་བའི་དངོས་པོ་རང་གི་ངོ་
[132a.6]བོ་ཉིད་འབྲས་བུ་ཡིན་ནོ། །དེས་ན་འབྲས་བུའི་ཆོས་འདི་ཉིད་རང་གི་ངོ་བོ་རྣམ་པ་ཇི་ལྟ་བུ་ཡིན་པ་དེ་ལྟ་བུའི་ཚད་མ་འཕེན་པ་ཡིན་ནོ། །སྔོན་མེད་པའི་བདག་ཉིད་དངོས་པོ་གཞན་གྱི་ནུས་པ་ལ་བརྟེན་པའི་ཕྱིར་དེ་ཡོད་ན་ཡོད་པ་ཉིད་ཀྱང་འབྲས་བུ་ཡིན་ནོ། །དེས་ན་གལ་ཏེ་རྒྱུ་ཡོད་པའི་སྔར་མེད་པར་རྟོགས་པ་དེ་དེ་ཡོད་
[132a.7]པར་རྟོགས་ན་དེའི་ཚེ་དེའི་འབྲས་བུའོ་ཞེས་བྱ་བར་རྟོགས་པར་འགྱུར་བ་ཡིན་ནོ། །དེ་མེད་པར་ཡང་རང་བཞིན་མི་དམིགས་པ་ཉིད་ཀྱིས་རྟོགས་པ་ཡིན་ཏེ་ཕྱིས་ཡོད་པའི་ཕྱིར་རོ། །འགལ་བ་དམིགས་པ་ལ་སོགས་པ་ཡིན་ན་ནི་དེའི་ཚེ་ཡང་མེད་པའི་ཕྱིར་རོ། །དེས་ན་རང་བཞིན་
[132b]
[132b.1]མི་དམིགས་པ་ལས་སྔར་མེད་པར་རྟོགས་པ་རྒྱུ་ཡོད་ན་ཡོད་པར་རྟོགས་པས་ན་ཚད་མས་རྟོགས་པའི་རྒྱུ་དང་འབྲས་བུའི་དངོས་པོ་ཡོངས་སུ་རྟོགས་པར་འགྱུར་བ་ཡིན་ནོ་ཞེས་བཤད་པ་ནི། དེའི་མཚན་ཉིད་ཀྱིར་ཀྱུར་པ་ཞེས་བྱ་བ་ཡིན་ནོ། །དེའི་ཞེས་བྱ་བ་ནི་དམིགས་པ་སྟེ་མཚན་ཉིད་དེར་
[132b.2]གྱུར་པ་གང་ཡིན་པའོ། །དམིགས་པའི་མཚན་ཉིད་ཀྱིར་གྱུར་པ་ཞེས་བྱ་བའི་ཐ་ཚིག་གོ། །དེ་ལྟ་བུར་གྱུར་པ་དེ་མི་དམིགས་པ་ལས་མེ་ལ་སོགས་པ་གང་དག་དམིགས་ན་དམིགས་པ་གང་ཡིན་པ་དེ་ནི་དེའི་འབྲས་བུ་ཡིན་ནོ། །དམིགས་པའི་མཚན་ཉིད་དུ་གྱུར་པ་མ་དམིགས་པ་
[132b.3]ལས་གང་དག་དམིགས་ན་དམིགས་པ་དེ་ནི་དག་པའི་འབྲས་བུ་ཡིན་ནོ། །འདིར་འབྲས་བུའི་ཆོས་ཚད་མས་དཔག་པར་བྱ་བའི་རང་བཞིན་དུ་བསྟན་གྱི་རང་གི་ངོ་བོར་ནི་མ་ཡིན་ནོ། །དམིགས་པའི་མཚན་ཉིད་དུ་གྱུར་པ་མི་དམིགས་པས་ནི་ཡོད་པ་ཉིད་མ་ཡིན་པར་རྟོགས་སོ། །
[132b.4]མེད་པ་ནི་གཞན་དམིགས་ན་དམིགས་པའི་ཕྱིར་ཡོད་པ་ཡིན་ནོ། །འབྲས་བུའི་ངོ་བོ་ཡང་དེ་ཡིན་ནོ་ཞེས་བསྟན་ཟིན་ཏོ། །ཇི་སྲིད་རྣམ་པ་འདི་ལྟ་བུའི་རང་བཞིན་མ་བརྗོད་པ་དེ་སྲིད་དུ་རྣམ་པ་དེ་ལྟ་བུའི་ཚད་མ་ཚད་མ་ཉིད་དུ་བསྒྲུབ་པར་མི་ནུས་སོ། །འོ་ན་ཅིའི་ཕྱིར་འདི་བཀོད་ཅེ་ན།
[132b.5]མདོར་ཚད་མ་བརྗོད་པས་སྟོང་པའི་འབྲས་བུ་ཆོས་ཀྱི་ཚད་མ་འཕེན་པར་བྱེད་པར་བསྟན་པའི་ཕྱིར་རོ། །འདི་ལྟར་གཞན་བསྟན་པའི་འབྲས་བུར་རྣམ་པར་འཇོག་པ་ན། ཇི་ལྟར་ཚད་མས་གཞལ་བྱ་འཕེན་པ་དེ་བཞིན་དུ་གཞལ་བྱས་ཀྱང་ཚད་མ་འཕེན་ཏོ། །འགྲོ་བ་མཐའ་
[132b.6]དག་དེ་ལ་ལྟོས་ནས་སྔར་ཡོད་པ་ཡིན་པའི་ཕྱིར་ཁྱད་པར་མེད་པར་འགྱུར་བ་གང་ཡིན་པ་འདིར་སྔར་ཡོད་པ་ཙམ་ཉིད་ནི་རྒྱུ་མ་ཡིན་ནོ། །འོན་ཀྱང་སྔར་མེད་པར་རྟོགས་པ་ཉིད་ཀྱིས་སྔོན་མ་བྱུང་བའི་དངོས་པོ་དེ་ཡོད་ན་ཡོད་པ་གང་ཡིན་པ་དེ་ཉིད་དེ་ལས་འབྱུང་བ་ཡིན་ལ་དེ་ཡང་དེའི་རྒྱུ་ཉིད་དོ། །
[132b.7]འདི་ནི་འདོད་རྒྱལ་བ་ཡང་མ་ཡིན་ཏེ། གྲུབ་པའི་དངོས་པོ་ནི་འགའ་ཞིག་དང་ལྡན་པ་དང་གཞན་དང་བྲལ་བ་འདོད་རྒྱལ་བར་འགྱུར་གྱི། མེད་པ་ཉིད་གང་ཡིན་པ་ནི་རང་ཉིད་འདོད་རྒྱལ་བར་འབྱུང་བ་ཞེས་བྱ་བ་མི་སྲིད་དོ། །གལ་ཏེ་དངོས་པོ་གཞན་གྱིས་བསྒྲུབ་པ་ཡིན་ནོ་ཞེ་ན་ནི།
[133a]
[133a.1]དེ་ལྟ་ན་ཡང་ཡོད་ན་མཐོང་བ་དེ་ཉིད་འདིའི་སྒྲུབ་པར་བྱེད་པར་འགྱུར་རོ། །འདི་ནི་སྔར་མེད་པ་དང་དེ་ཡོད་ན་ཡོད་པར་ངེས་པ་ཡིན་ཏེ། དེས་ན་འདི་ཉིད་གཅིག་ནི་སྐྱེད་པར་བྱེད་པ་ཡིན་ལ། གཞན་བསྐྱེད་པར་བྱ་བ་ཡིན་པའི་ཕྱིར་འདི་ལ་འདོད་རྒྱལ་བའི་
[133a.2]དོན་ཅི་ཞིག་ཡོད། གལ་ཏེ་བལྟར་རུང་བ་མི་སྣང་བ་ལས་འགྲོ་བ་མཐའ་དག་མཐོང་བ་ན་སྣང་བའི་ཕྱིར་ཁྱད་པར་མེད་པ་ཁོ་ནའོ། །མ་ཡིན་ཏེ་མེ་ལས་གཞན་པའི་འགྲོ་བ་ཐོག་མ་ཉིད་ནས་ཡོད་ཀྱང་ཡུལ་དེ་ན་ཡོད་པའི་དུ་བ་མ་མཐོང་བའི་ཕྱིར་རོ་ཞེ་ན། མ་ཡིན་ཏེ་གང་ལས་མ་ཆོད་པར་དུ་བ་
[133a.3]འབྱུང་བའི་སྐད་ཅིག་དེ་ལ་ཡོད་པའི་འགྲོ་བ་སྔོན་ནམ་ཕྱིས་མེད་པའི་ཕྱིར་ཏེ། འདུ་བྱེད་སྐད་ཅིག་མ་རྣམས་ལ་དུས་གཞན་དུ་ཡོད་པའི་བརྒལ་བ་མེད་པའི་ཕྱིར་རོ་ཞེ་ན། ལྷ་རྣམས་དགའ་བས་སྐབས་མ་ཤེས་སོ། །འདི་ལ་དངོས་པོ་རྣམས་ཀྱི་རང་གི་རྒྱུན་གྱི་རྗེས་སུ་འཇུག་པའི་འབྲས་
[133a.4]བུ་སྐད་ཅིག་གཉིས་པ་ལ་སོགས་པ་སྐད་ཅིག་སྔ་མ་སྔ་མ་དང་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ནི་སྐད་ཅིག་མ་ཉིད་ཀྱིས་གྲུབ་པ་ཡིན་གྱི། རྗེས་སུ་འགྲོ་བ་དང་ལྡོག་པ་དག་ལས་ནི་མ་ཡིན་ནོ། །བུམ་པ་ལ་སོགས་པ་དག་དུས་གསུམ་དང་འབྲེལ་པ་སྔ་མ་རང་གི་ངང་
[133a.5]གིས་འགགས་ཏེ་ཕྱིས་མ་སྐྱེས་པའི་ཕྱིར་ཡིན་ནམ་འོན་ཏེ་མི་འཇིག་པའི་ངང་ཅན་ཉིད་ལས་ཡིན། དེ་ལ་སྐད་ཅིག་མར་སྒྲུབ་པར་བྱེད་པའི་ཚད་མ་བསྟན་པས་ན་ཕྱི་མ་ཕྱི་མ་སྐྱེ་བའི་ཕྱིར་རྗེས་སུ་འཇུག་པ་གྲུབ་པ་ཡིན་གྱི། མི་འཇིག་པའི་ཕྱིར་ནི་མ་ཡིན་གྱི་ཕྱི་མ་ཕྱི་མ་སྐྱེ་བ་དེ་ཡང་རྒྱུ་མེད་
[133a.6]པའམ་རྗེས་སུ་འགྲོ་བཞིན་པ་ལ་མི་འཁྲུལ་བའི་རྒྱུ་གཞན་དང་ལྡན་པར་མི་འཐད་པའི་ཕྱིར་དེ་ལྟ་བུའི་དངོས་པོ་ཉེ་བར་ལེན་པ་སྔ་མ་ལས་སྐྱེས་པ་ཡིན་ནོ། །རྣམ་པར་དཔྱོད་པ་འདི་ནི་རྒྱུན་གཞན་རྩོམ་པ་གང་ཡིན་པ་དེར་ཡིན་ནོ། །གལ་ཏེ་རྒྱུན་གྱིས་ནི་གཅིག་པོ་འགའ་ཡང་རྩོམ་པ་མ་
[133a.7]ཡིན་ཏེ། ཅིག་ཅར་མེད་པའི་ཕྱིར། གཅིག་གིས་བརྩམ་པར་བྱ་བ་ཡང་མ་ཡིན་ཏེ། རིམ་གྱིས་དུ་མ་ཡིན་པའི་ཕྱིར་རོ་ཞེ་ན། བདེན་ཏེ་རྫ་མཁན་ལ་སོགས་པའི་རྒྱུན་རང་གི་རྒྱུན་གྱི་སྐད་ཅིག་གང་དང་གང་ཉེ་བར་འཇིག་པ་དེ་ལས་བུམ་པ་ལ་སོགས་པ་དེ་བཞིན་དུ་མངོན་པར་
[133b]
[133b.1]འགྲུབ་པ་དེའི་ཕྱིར་འཇིམ་པ་དང་འཁོར་ལོ་དང་དབྱུ་གུ་དང་རྫ་མཁན་ལ་སོགས་པའི་རྒྱུན་རྣམས་རྒྱུ་ཉིད་དུ་བརྗོད་དོ། །བུམ་པའི་མཚན་ཉིད་ཀྱི་རྒྱུན་འཕེན་པར་བྱེད་པ་བརྩོན་པར་བྱེད་པ་ནི་རྫ་མཁན་ལ་སོགས་པ་ཉིད་ཡིན་པའི་ཕྱིར་དེ་དག་ནི་རྒྱུན་དེའི་རྒྱུ་མཚན་ཡིན་ནོ། །འགའ་
[133b.2]ཞིག་ནི་རྒྱུན་འཕེན་པར་བྱེད་པའི་འབྲས་བུ་སྒྲུབ་པར་བྱེད་ནུས་པ་མ་ཡིན་པ་དག་སྟེ་དབང་པོའི་རྣམ་པར་ཤེས་པ་དང་འབར་བ་ལ་སོགས་པ་ལ་དབང་པོ་དང་བུད་ཤིང་ལ་སོགས་པ་བཞིན་ཏེ། རྒྱུ་དེའི་བྱེད་པ་རྒྱུན་ཆད་ཀྱང་འབྲས་བུ་རྗེས་སུ་འཇུག་པས་བུམ་པ་ལ་སོགས་པ་ལྟར་འཇིག་
[133b.3]པའི་རྒྱུ་དང་ཕྲད་ཀྱི་བར་དུ་གནས་པར་ཐལ་བའི་ཕྱིར་རོ། །དེས་ན་ཇི་ལྟར་མེ་ལ་སོགས་པ་དག་ཉེ་བར་གྱུར་ན་གདོན་མི་ཟ་བར་འབྱུང་བའི་ཕྱིར་སྐད་ཅིག་སོ་སོར་ངེས་པ་ལ་མི་ལྟོས་པར་དུ་བ་རྩོམ་པར་ངེས་པ་ཡིན་པ་དེ་བཞིན་དུ་གལ་ཏེ་དེ་ལས་གཞན་པའི་འགྲོ་བ་དག་ཀྱང་ཡིན་ན་ནི་མེ་ཡོད་པའི་
[133b.4]སྔོན་རོལ་དུ་ཡང་འགྱུར་བའི་ཕྱིར་མི་མཚུངས་སོ། །སྐད་ཅིག་གིས་བྱ་བ་ནི་མངོན་སུམ་དང་མི་དམིགས་པས་མི་འགྲུབ་པས་ན་དེ་འདིར་དབང་དུ་བྱས་པ་མ་ཡིན་པའི་ཕྱིར་རོ། །ཇི་ལྟར་དབང་དུ་བྱས་པ་ལ་ནི་ཁྱད་པར་ཡོད་པ་ཁོ་ནའོ། །འདིས་ནི་དངོས་པོ་གཞན་གྱི་རྒྱུ་ལས་
[133b.5]སྐྱེས་པ་ཉིད་ཀྱང་སྤངས་པ་ཡིན་ཏེ། མེ་ཉེ་བའི་སྔོན་རོལ་དུ་ཡང་དམིགས་པར་ཐལ་བར་འགྱུར་བའི་ཕྱིར་རོ། །མེ་ལ་སོགས་པ་དང་དུས་མཚུངས་པ་ན་ཡོད་པའི་དངོས་པོ་གཞན་རྒྱུ་ཡིན་ན་ནི་ལྷན་ཅིག་བྱེད་པ་བཞིན་དུ་དེ་དག་མཚུངས་པར་རྒྱུ་ཡིན་པ་ཉིད་དུ་འགྱུར་གྱི་དངོས་
[133b.6]པོ་གཞན་ཉིད་ནི་མ་ཡིན་ནོ། །འདིས་ནི་མེ་དང་དུས་མཚུངས་པར་ཡོད་པའི་མི་སྣང་བའི་དོན་རྒྱུ་ཡིན་པ་ཉིད་ཀྱང་བསལ་བ་ཡིན་ཏེ། དེ་ཡོད་ན་ཡོད་པར་ཁྱད་པར་མེད་པའི་ཕྱིར་རོ། །ཅི་དུས་མཚུངས་པར་ཡོད་པ་རྣམས་བསྡོམས་ཏེ་རྒྱུ་ཡིན་ནམ། འོན་ཏེ་གཅིག་འགའ་
[133b.7]ཞིག་ཅེས་བྱ་བའི་དོན་འདི་ལ་ངེས་པར་བྱེད་པ་སྟོན་པ་ནི་དེ་ལས་གཅིག་མེད་ན་ཡང་ཞེས་བྱ་བ་ཡིན་ནོ། །འོན་ཏེ་ཡུལ་གཞན་ནས་འོངས་པའམ། ཡོད་ཀྱང་སྒྲིབ་པ་ལ་སོགས་པའི་རྒྱུ་མཚན་གཞན་གྱི་དབང་གིས་མ་དམིགས་པ་ཡང་དམིགས་པ་ཡིན་ནོ་ཞེས་བརྗོད་ན། དེ་ནི་མ་ཡིན་
[134a]
[134a.1]ཏེ། ཡུལ་གཞན་ནས་རིམ་གྱིས་འོངས་པ་ཡུལ་དེ་དང་འབྲེལ་པར་འགྱུར་བ་ཡུལ་དེ་དང་འབྲེལ་པའི་སྔོན་རོལ་དུ་དེའི་ཐོན་ཀོར་གྱི་ཡུལ་གཞན་དག་དང་འབྲེལ་པ་ནི་དམིགས་པའི་མཚན་ཉིད་དུ་གྱུར་པའི་ཡོད་པ་ཉིད་མ་དམིགས་པ་མ་ཡིན་ནོ། །ཡོད་པ་ཉིད་རྒྱུ་མཚན་
[134a.2]གཞན་གྱི་དབང་གིས་མ་དམིགས་པ་གང་ཡིན་པ་དེ་ལ་ནི་རྒྱུ་འགའ་ཡང་ཡོད་པ་མ་ཡིན་ནོ། །མེད་པ་ཉིད་ཡོད་པ་སྐྱེས་པར་བརྗོད་པ་མ་ཡིན་ལ། དེ་ཡང་བལྟར་རུང་བ་མི་དམིགས་པ་ཁོ་ནས་ཡིན་ནོ། །དེ་འདྲ་བ་ལས་ནི་འདིར་གྲུབ་པ་མ་ཡིན་ནོ་ཞེས་བསྟན་ཟིན་ཏོ། །གལ་ཏེ་དུ་བ་ཡོད་ཀྱང་
[134a.3]མཐུ་དང་ལྡན་པས་བྱིན་གྱིས་བརླབས་པའི་ཕྱིར་མ་མཐོང་བ་ལས་དེའི་དུས་སུ་བྱིན་གྱིས་བརླབས་པ་དང་བྲལ་བས་དམིགས་པ་ཡིན་ནོ་ཞེ་ན། བརྗོད་པ་འདི་ནི་ཤིན་ཏུ་ཆུང་སྟེ་དེར་མེ་ཡང་མཐུ་དང་ལྡན་པས་རྣམ་པར་འགྱུར་བ་སྐྱེད་པའི་དབང་པོས་དམིགས་པ་ཡིན་གྱི་མེ་ཉིད་ནི་མ་
[134a.4]ཡིན་པར་འགྱུར་བ་དེས་ན་རྒྱུ་ཡིན་པར་ག་ལ་འགྱུར། གནོད་པར་བྱེད་པ་མེད་པའི་ཕྱིར་མ་ཡིན་ནོ་ཞེ་ན། མི་དམིགས་པ་ལ་ཡང་གནོད་པར་བྱེད་པ་ཡོད་པ་མ་ཡིན་ནོ། །མ་ཡིན་ཏེ་རྗེས་སུ་དཔག་པ་གནོད་པར་བྱེད་པ་ལ་མི་ལྟོས་པའི་ཕྱིར་རོ་ཞེ་ན། རྗེས་སུ་དཔག་པར་བྱ་བ་ལ་ལྟོས་པ་མེད་
[134a.5]པའི་ཕྱིར་རོ། །འདི་ནི་མི་དམིགས་པ་ཉིད་ལ་ཐེ་ཚོམ་ཟ་བ་ཡིན་པའི་ཕྱིར་མངོན་སུམ་ཉིད་འཕངས་པར་འགྱུར་རོ། །འདི་སྐད་བརྗོད་པའི་རྣམ་པར་འབྱེད་པས་མི་དམིགས་པ་ལ་དེ་རྟོགས་པ་མེད་པའི་ཕྱིར་རོ། །འདི་ཉིད་ལ་ནི་དེའི་སྐྱོན་འདི་ཡོད་པ་མ་ཡིན་གྱི། འོན་ཀྱང་དངོས་པོ་རྣམས་
[134a.6]ལ་ཡང་ངོ་། །གལ་ཏེ་དེ་ལ་གནོད་པ་མེད་པ་རྗེས་སུ་མི་སྒྲུབ་ན་དེ་འདིར་ཡང་རྟོགས་པ་མ་ཡིན་གྱི། འོན་ཀྱང་དངོས་པོ་རྣམས་ལ་ཡང་ངོ་། །གལ་ཏེ་དེ་ལ་གནོད་པ་མེད་པ་རྗེས་སུ་སྒྲུབ་ན་དེ་འདིར་ཡང་རྟོགས་པར་བྱ་བའམ་ཡང་ན་མངོན་སུམ་ཉིད་སྤང་བར་བྱ་བར་འགྱུར་ཏེ་སྤྲོས་པས་ཆོག་གོ། །
[134a.7]དེའི་ཕྱིར་མེད་པར་རྟོགས་པའི་དངོས་པོ་གང་ཡིན་པས་རང་གི་ངོ་བོ་དམིགས་པ་དེ་ནི་དེའི་འབྲས་བུ་ལས་གཞན་མ་ཡིན་ནོ། །གལ་ཏེ་མེ་མེད་ན་མ་བྱུང་བ་མེ་ཡོད་ན་ཡོད་པ་ཚད་མ་དུ་མའི་ཡུལ་མ་ཡིན་ནམ། དེས་ན་ཇི་ལྟར་མི་དམིགས་པའི་གནས་སྐབས་ན་ཚད་མའི་ཡུལ་དུ་མ་གྱུར་པའི་ཕྱིར་
[134b]
[134b.1]ཕྱིས་ཀྱི་དམིགས་པས་གཟུང་བའི་བདག་ཉིད་མ་གྲུབ་པ་དེ་བཞིན་དུ་དམིགས་པའི་གནས་སྐབས་ན་ཡང་བྱུང་བ་ནས་མེད་པའི་ཕྱིར་སྔར་ཡོད་པའི་ཆོས་མ་གྲུབ་པ་དེས་ན་རིམ་གྱིས་འགྱུར་བ་གཉིས་ཚད་མ་གཅིག་གི་ཡུལ་མ་ཡིན་པས་ན་མེད་པ་གང་ཡིན་པ་དེ་གཞན་ཡོད་ན་ཡོད་དོ་ཞེས་བྱ་བ་འདི་
[134b.2]ག་ལས་ཡིན་ཞེ་ན། གལ་ཏེ་ཚད་མ་ཉིད་ཡོད་པའི་དུས་ཙམ་གྱིས་མཐར་ཐུག་པ་ཡིན་ན་ནི་འདི་དེ་ལྟར་འགྱུར་བ་ཞིག་ན་སྐད་ཅིག་ཙམ་ཡོད་པ་ཡིན་ཡང་ཇི་སྲིད་འཇལ་བ་རྟོགས་པ་པོ་ཉིད་དུ་བསྒྲུབས་ཏེ། ད་ལྟར་ཉམས་སུ་མྱོང་བ་བཞིན་གསལ་བ་དེ་སྲིད་དུ་དེ་ཚད་མ་གཅིག་ཡིན་ནོ་ཞེས་གཞན་དུ་རྣམ་
[134b.3]པར་སྤྲོས་ཟིན་ཏོ། །རང་གི་ཡུལ་ལ་དེ་ལྟར་འགྱུར་མོད། ཡུལ་གཞན་ལ་ནི་ཚད་མ་གཞན་ཁོ་ནའོ། །དེས་ན་མེ་མེད་པར་དུ་བ་མི་འབྱུང་བར་རྟོགས་པ་གང་ཡིན་པ་དེ་ཉིད་ནི་དེ་ཡོད་ན་དུ་བ་ཡོད་པ་ཉིད་མ་ཡིན་ནོ་ཞེ་ན། དེ་བདེན་ཏེ། ཚད་མ་ཡོད་པ་ཙམ་གྱིས་མཐར་ཐུག་པ་ནི་མ་ཡིན་གྱི། འོན་
[134b.4]ཀྱང་དེ་དང་ལྡན་པས་བྱས་པ་ཤེས་པ་པོའི་དངོས་པོ་ཁྱད་པར་ཡིན་ནོ། །དེ་ནི་ཚད་མ་གཞན་གྱིས་བསྐྱེད་པ་ཡང་སྲིད་པས་ཚད་མ་གཉི་གས་རིག་པའི་ཡུལ་གྱི་རང་གི་ངོ་བོ་ཤེས་པས་རྒྱུ་དང་འབྲས་བུའི་དངོས་པོ་རྟོགས་སོ། །དེ་བཞིན་དུ་འདི་ནི་རྣམ་པར་ཤེས་པ་ལ་ཡང་ནུས་ཏེ། དེ་ཡང་དེ་
[134b.5]བཞིན་དུ་ཤེས་པ་གཞན་གྱི་རྒྱུ་དང་འབྲས་བུ་ཉིད་དུ་རྟོགས་པར་ནུས་པའི་ཕྱིར་རོ། །གལ་ཏེ་ཚད་མ་ལོག་ཀྱང་དེའི་ཡུལ་ཤེས་པར་བྱེད་པའི་དངོས་པོ་ཞེས་བྱ་བ་འདི་ནི་ཅི་ཞིག་ཡིན། དེས་བྱས་པའི་འདུ་བྱེད་རྗེས་སུ་འཇུག་པའོ་ཞེ་ན། དེ་ལྟ་ན་འོ་ན་དོན་ཇི་ལྟ་བ་བཞིན་མྱོང་བ་གྲུབ་ཀྱང་མྱོང་བ་
[134b.6]ཇི་ལྟ་བ་བཞིན་འདུ་བྱེད་པ་ཅན་དུ་མ་གྲུབ་པས་རྟོགས་པ་པོ་དེའི་གནས་སྐབས་སུ་དེ་ལྟ་བུའི་ངོ་བོ་ཤེས་པར་བྱེད་པའི་དངོས་པོར་སྒྲུབ་པར་བྱེད་པ་མ་ཡིན་ཏེ། སྔར་འདི་ན་དོན་གཞན་ཡོད་ཀྱང་དུ་བ་ཡོད་པར་མ་གྱུར་པ་ལས་མེ་ཡོད་ན་ཡོད་དོ་ཞེས་མི་ངེས་སོ། །དུ་བ་མཐོང་བཞིན་པ་ཉིད་ན་སྔར་དེ་
[134b.7]མེད་པར་མྱོང་བར་སྣང་བ་ནི་མེད་དོ། །དེས་ན་འདི་ཡོད་པར་མ་གྱུར་པ་ལས་དེ་ཉེ་བས་ད་ལྟར་ཡོད་དོ་ཞེས་བྱ་བ་འདིར་ག་ལ་འགྱུར། འདིས་ནི་དྲན་པ་ཉམས་སུ་མྱོང་བའི་འབྲས་བུར་གྲུབ་པ་ཡང་བསལ་བ་ཡིན་ནོ། །མྱོང་བ་འདས་ཀྱང་མྱོང་བའི་རང་བཞིན་དུ་ཤེས་པ་ཉིད་དོན་ཇི་ལྟ་བ་བཞིན་
[135a]
[135a.1]རིགས་པར་གྲུབ་ན་དྲན་པའི་ཤེས་པ་དེའི་འབྲས་བུ་ཉིད་དུ་འགྲུབ་པར་འགྱུར་བ་ཞིག་ན་དེ་ཉིད་ནི་མ་གྲུབ་པ་ཞེས་བརྗོད་པ་ཡིན་ནོ་ཞེ་ན། བརྗོད་པ། ཅི་འདི་མི་འཐད་ཁོ་ནའམ། །འོན་ཏེ་འདི་ཉིད་དུ་མི་འཐད། འདིར་མི་འཐད་དོ་ཞེ་ན། དེ་ག་ལས་འདུ་བྱེད་རྣམས་སྐད་
[135a.2]ཅིག་མ་ཡིན་པའི་ཕྱིར་དང་། དྲན་པའི་རྟོགས་པ་ཡང་དངོས་པོའི་ཡུལ་ཅན་མ་ཡིན་པའི་ཕྱིར་དེའི་མཐུས་འདུ་བྱེད་རབ་ཏུ་གཞག་པ་མི་འགྲུབ་པའི་ཕྱིར་རོ་ཞེ་ན། དེ་ལ་མྱོང་བ་ཡོད་བཞིན་པ་ཉིད་ན་དྲན་པའམ་འདུ་བྱེད་མ་ཡིན་ནོ་ཞེས་ནི་རྟག་པར་སྨྲས་པས་ཀྱང་ཁས་བླང་བར་བྱ་བ་མ་ཡིན་
[135a.3]པའི་ཕྱིར་མྱོང་བ་རྟག་པ་ཉིད་ནི་ཡན་ལག་མ་ཡིན་ནོ། །ལོག་ན་ནི་འཇལ་བ་པོ་རྟག་ཀྱང་ཡུལ་ལྐོག་ཏུ་གྱུར་པ་ཉིད་ཡིན་པའི་ཕྱིར་དོན་གྱི་བདག་ཉིད་ཀྱང་ངོ་། །ཡུལ་ལ་གནས་པའི་གསལ་བ་མེད་ཅིང་སྔར་སྐྱེས་པ་ཡང་ཞིག་པ་ན་ཡུལ་ཉིད་དམ་འཇལ་བ་པོ་ཉིད་དུ་མི་འགྲུབ་པའི་ཕྱིར་རོ། །
[135a.4]དེའི་རང་བཞིན་མཐོང་བ་མེད་བཞིན་དུ་འགའ་ཡང་ལྟ་བ་པོའི་དངོས་པོ་མ་ཡིན་ནོ། །མྱོང་བ་ཡང་མཐོང་བ་ལས་གཞན་མ་ཡིན་ཏེ་དེས་ནི་མྱོང་བ་དང་བྲལ་ན་འཇལ་བ་པོའི་འཇལ་བ་པོ་མེད་པ་ཁོ་ནའོ། །དེས་ན་འདིར་ནི་མྱོང་བ་ལས་དྲན་པའམ། དེའི་འདུ་བྱེད་པ་ཡིན་ནོ་ཞེས་ག་ལས་མྱོང་བ་
[135a.5]གནས་བཞིན་པ་ན་དེ་ལྟར་རྣམ་པར་འཇོག་པ་ཞེས་བྱ་བ་ཡང་མཚུངས་པ་ཉིད་དེ་སྐད་ཅིག་མའི་ཕྱོགས་ལ་ཡང་རྒྱུན་གྱིས་འཇུག་པ་ཉིད་ཀྱིས་རྣམ་པར་གནས་པའི་ཕྱིར་རོ། །དེས་ན་མྱོང་བས་དྲན་པའམ། དྲན་པས་མྱོང་བ་དམིགས་པ་ནི་མ་ཡིན་ལ། གཉི་ག་ལ་དམིགས་པའི་ཤེས་པ་
[135a.6]གཞན་ཡང་མེད་པའི་ཕྱིར་དེར་ཡང་རྒྱུ་དང་འབྲས་བུའི་རང་བཞིན་དུ་འཛིན་པ་མ་གྲུབ་པོ། །དྲན་པ་ཡང་གལ་ཏེ་དངོས་པོའི་ཡུལ་ཅན་ཉིད་དུ་འདོད་པ་ཡིན་མོད་ཀྱི། དེ་ལྟ་ན་ཡང་གལ་ཏེ་འདི་ཉམས་སུ་མྱོང་བ་གསལ་བ་ཉིད་དམ། འོན་ཏེ་དེའི་ཡན་ལག་ཅན་གྱི་དོན་ཡང་རུང་སྟེ་རྣམ་པ་ཐམས་
[135a.7]ཅད་དུ་དེ་དྲན་པ་ཉིད་ཉམས་པར་འགྱུར་རོ། །དེས་ན་དོན་ནམ་མྱོང་བའི་དྲན་པའི་ལྐོག་ཏུ་གྱུར་པ་ཉིད་དུ་བརྗོད་པར་བྱ་བ་ཡིན་ནོ། །དེས་ན་མངོན་སུམ་བཞིན་དུ་དྲན་པའི་ཤེས་པ་དེ་ལྟར་རྟོགས་པས་དེ་ལྟ་བུའི་དངོས་པོར་སྒྲུབ་པ་ནི་མ་ཡིན་ཏེ། དེ་ལྟ་མ་ཡིན་ན་རྟོགས་པ་ཐམས་ཅད་དངོས་པོ་ཡོད་པའི་
[135b]
[135b.1]ཡུལ་ཅན་དུ་སྨྲ་བས་རྗེས་སུ་དཔག་པ་ལ་སོགས་པ་ལ་འབྲེལ་པ་བཙལ་བར་མི་བྱ་བར་འགྱུར་རོ། །དེས་ན་དྲན་པ་དངོས་པོའི་ཡུལ་ཅན་ཡིན་ཡང་། མྱོང་བ་ཇི་ལྟ་བ་བཞིན་དུ་སྐྱེས་པར་གྲུབ་པས་དངོས་པོའི་ཡུལ་ཅན་ཉིད་ཡིན་གྱི། མངོན་སུམ་ལྟར་རྟོགས་པ་ཉིད་སྦྱོར་བ་པོར་གྱུར་པས་ནི་མ་
[135b.2]ཡིན་ནོ། །མྱོང་བ་ཇི་ལྟ་བ་བཞིན་སྐྱེས་པ་ནི་འདིར་ཡང་མ་གྲུབ་པས་ན་འདི་ལ་བརྒལ་ཞིང་བརྟག་པའི་ཡུལ་ཉིད་དུ་བདེ་བར་གཤེགས་པ་རྣམས་མི་རྟག་པར་འདོད་པ་དང་། དེ་ལས་གཞན་དག་མཚུངས་སོ། །གལ་ཏེ་ལྟ་བ་པོ་མ་ཞིག་པས་སྔར་མཐོང་བ་རྗེས་སུ་རྟོགས་པར་བྱེད་པར་རིགས་པ་
[135b.3]མ་ཡིན་ནམ་མ་ཞིག་ཀྱང་མཐོང་བ་བཞིན་སྐྱེད་པའི་འདུ་བྱེད་མེད་པར་རྗེས་སུ་འབྲེལ་པ་མི་རིགས་པ་དེས་ན་མ་ཞིག་པ་ནི་ཡན་ལག་མ་ཡིན་ནོ། །འདུ་བྱེད་ཡོད་ན་ནི་ཞིག་ཀྱང་སྐྱོན་མེད་དོ། །མྱོང་བ་ཇི་ལྟ་བ་བཞིན་འདུ་བྱེད་པ་ཡོད་པས་ནི་དེ་ལྟ་བུ་ཉིད་འགྲུབ་པ་མ་ཡིན་ནོ་ཞེས་གཏན་ལ་ཕབ་ཟིན་ཏོ། །
[135b.4]དྲན་པའི་ཤེས་པ་ལས་དེ་ལྟ་བུའི་དངོས་པོར་འགྱུར་བ་ཡང་བསལ་ཟིན་ཏོ། །མཐོང་བ་མ་ཞིག་ན་ནི་དྲན་པས་ཅི་ཡང་བྱར་མེད་པའམ། མ་ཞིག་པ་ཡང་རྒྱུན་རྗེས་སུ་འཇུག་པས་ཀྱང་གྲུབ་པ་ཡིན་ནོ། །དེས་ན་འདིར་ནི་བརྗོད་པར་བྱ་བ་ཡིན་ཏེ། འགའ་ཞིག་ཏུ་ནི་རྗེས་སུ་འགྲོ་བ་དང་ལྡོག་པ་
[135b.5]དག་གིས་རྒྱུ་དང་འབྲས་བུའི་དངོས་པོར་འགྲུབ་པ་ཡིན་ཏེ། །དཔེར་ན་དུ་བ་དང་། མྱུ་གུ་དང་འབྲས་ཆན་ལ་སོགས་པ་བཞིན་ནོ། །འགའ་ཞིག་ཏུ་ནི་དེ་ལྟར་གྲུབ་པ་མེད་ཀྱང་རིགས་པས་དེ་ལྟར་འགྲུབ་སྟེ། དཔེར་ན་ཁྱད་པར་དང་དངོས་པོ་ལ་སོགས་པ་ལ་ལྷན་ཅིག་བྱེད་པ་དག་བཞིན་ནོ། །
[135b.6]དེས་ན་འབྲས་བུ་གཞན་དང་མི་འདྲ་བའི་རྟོགས་པ་འདིས་རང་གི་རྒྱུ་ཁྱད་པར་ཅན་རྗེས་སུ་དཔོག་པར་བྱེད་ཀྱི་རྒྱུ་ནུས་པ་ཙམ་ནི་མ་ཡིན་ནོ། །འདི་ལྟར་དྲན་པ་འཁྲུལ་བར་གྱུར་པས་ཀྱང་དེ་ལྟ་བུའི་ངོ་བོར་ངེས་པ་དེ་ལྟ་བུའི་མྱོང་བ་རྗེས་སུ་དཔོག་པར་བྱེད་དོ། །འཁྲུལ་པ་ཉིད་དུ་ཁྱད་པར་མེད་ཀྱང་
[135b.7]སོ་སོར་ངེས་པ་འགའ་ཞིག་ཏུ་སྔོན་མེད་པ་རྟོགས་པ་སྐྱེ་ལ་གཞན་དུ་ནི་སྔར་མྱོང་བ་ཉིད་དུ་ཡང་མ་ཡིན་ནོ། །དམིགས་པ་མེད་པ་ཉིད་ཀྱིས་ན་འཁྲུལ་པ་ཡུལ་སྒྲུབ་པར་བྱེད་པ་མ་ཡིན་མོད། རྒྱུ་མེད་པར་མི་སྲིད་པའི་ཕྱིར་རྒྱུ་ངེས་པ་ནི་གསལ་བར་བྱེད་པ་ཁོ་ནའོ། །དེས་ན་རྒྱུ་ཁྱད་པར་
[136a]
[136a.1]མེད་ན་འཁྲུལ་པ་མི་འདྲ་བར་ཇི་ལྟར་འགྱུར། དེ་བཞིན་དུ་ལ་ལ་ནི་སྔོན་པོའི་ཤེས་པ་ཉིད་ངེས་པ་ཡིན་ལ། གཞན་ལ་ནི་སེར་པོ་ཤེས་པ་ཞེས་བྱ་བ་ལ་སོགས་པ་རྗེས་སུ་རྟོགས་པར་བྱའོ། །དེ་བས་ན་ཉམས་སུ་མྱོང་བ་དེ་ལྟ་བུ་ལས་སྐྱེས་པའི་དྲན་པའི་འདུ་
[136a.2]བྱེད་ལས་སྐྱེས་པ་ན་དེ་ལྟར་གྱུར་པ་ཡིན་ནོ། །དེ་ལྟ་ན་ཡང་རྒྱུ་ཙམ་རྟོགས་པར་འགྱུར་གྱི་ཁྱད་པར་ནི་རྟོགས་པ་མ་ཡིན་ནོ་ཞེ་ན། བརྗོད་པ་ཁྱད་པར་ཉིད་དང་འབྲེལ་པ་མཐོང་བའི་ཕྱིར་རོ། །འདི་ལྟར་དེ་དག་གི་འབྲེལ་པ་མྱོང་བ་མེད་པར་ནི་དུ་བ་ལ་མེ་རྟོགས་པར་རིགས་པ་མ་ཡིན་ནོ། །དེས་
[136a.3]ན་རྗེས་སུ་དཔག་པའི་དུས་ན་དུ་བ་ཙམ་ཉིད་མཐོང་གི་མེ་དང་འབྲེལ་པ་མྱོང་བ་ནི་མེད་དོ། །དེས་ན་སྔོན་ཉམས་སུ་མྱོང་བའི་གཞི་ལས་དྲན་པས་ཉམས་སུ་མྱོང་བ་རྗེས་སུ་རྟོགས་པས་ཉམས་སུ་མྱོང་བའི་བྱ་བ་བྱེད་པ་ཡིན་ནོ། །གལ་ཏེ་དུ་བ་མེ་ལ་མྱོང་བ་མེད་ན་དེ་དེ་ལྟར་དྲན་པ་ན་མེ་བརྟགས་
[136a.4]ཏེ་འཇུག་པས་མེ་འཐོབ་པར་མི་འགྱུར་རོ། །དེས་ན་དྲན་པའི་སྒོ་ནས་རྣམ་པར་གནས་པའི་མྱོང་བ་ནི་རྗེས་སུ་དཔག་པའི་རྒྱུ་ཉིད་ཀྱིས་ལྟོས་པར་བྱ་བ་དང་དོན་ཇི་ལྟ་བ་ཡིན་ཏེ་ཐོབ་པའི་ཕྱིར་རོ། །བདེན་ཏེ་མྱོང་བ་ནི་ལྟོས་པར་བྱ་བ་ཁོ་ནའོ། །སྦྱོར་བའི་དུས་ན་ནི་དེ་གྱུར་དུ་ཟིན་ཀྱང་སྔོན་བྱུང་བར་
[136a.5]གྱུར་ཏོ་ཞེས་གྲུབ་པ་མ་ཡིན་ནོ། །དྲན་པ་ནི་མྱོང་བར་འཁྲུལ་པས་རྗེས་སུ་དཔག་པ་འཇུག་པར་བྱེད་པ་ཡིན་ནོ། །ཇི་ལྟར་རྗེས་སུ་དཔག་པ་ལྟ་བུའི་དོན་ཐོབ་པ་ནི་འདོད་རྒྱལ་བའི་མི་སླུ་བ་ཡིན་ནོ། །མ་ཡིན་ཏེ་ལན་ཅིག་མ་ཡིན་པར་ཡོད་པའི་ཕྱིར་རོ་ཞེ་ན། དོན་དེ་ལྟ་མ་ཡིན་པར་མ་གྲུབ་ནས་
[136a.6]ལན་ཅིག་མ་ཡིན་པར་ཡོད་པར་ཡང་ཡན་ལག་མ་ཡིན་ནོ། །རང་ཉིད་འདོད་པ་ཡང་ཡིན་ཏེ་ཁྱབ་པ་སྒྲུབ་པ་ལ་སོགས་པ་དག་ཏུ་ལན་ཅིག་མ་ཡིན་པར་མྱོང་བ་ཡན་ལག་མ་ཡིན་པར་བྱས་པའི་ཕྱིར་རོ་ཞེ་ན། འདི་ལ་བརྗོད་པ་རྣམ་པར་རྟོག་པ་ཉམས་སུ་མྱོང་བའི་རྩ་བ་ཅན་མ་ཡིན་ཏེ།
[136a.7]དེའི་དུས་ཅན་གྱི་རྒྱུ་མཚན་ཉེ་བ་ཙམ་ལས་སྐྱེ་བ་ཡིན་ན་རྣམ་པར་རྟོག་པ་ཉིད་མ་ཡིན་པར་ཐལ་བའི་ཕྱིར་ཏེ། རབ་རིབ་དང་དབང་པོ་ལ་སོགས་པས་བསྐྱེད་པའི་ལོག་པའི་ཤེས་པ་དང་། བཟློག་པ་དག་བཞིན་ནོ། །དེས་ན་རྣམ་པར་རྟོག་པའི་རང་བཞིན་བརྟག་པས་ཇི་ལྟ་བུའི་
[136b]
[136b.1]རྒྱུ་མཚན་མེད་པར་འདི་མི་སྲིད་པའི་རྒྱུ་མཚན་དེ་ཉིད་རྟོགས་པར་འགྱུར་རོ། །འདིར་རྗེས་སུ་འགྲོ་བ་དང་ལྡོག་པ་དག་མེད་པའི་ཕྱིར་འདི་ལྟར་ཡང་ཅི་སྟེ་མི་འགྱུར་བ་ཞེས་བྱ་བར་ནི་བརྟག་པར་མི་ནུས་ཏེ་སྲིད་པ་དང་། ཐར་པ་དག་པ་དག་ཏུ་ལྟ་བ་དང་དེ་མེད་པའི་རྒྱུ་ཅན་ལས་གཞན་དུ་བརྟག་
[136b.2]པར་མི་ནུས་པ་བཞིན་ནོ། །འདི་ལྟར་ཉམས་སུ་མྱོང་བས་འདུ་བྱེད་བསྐྱེད་པས་ཤེས་པ་པོ་ཤེས་པར་བྱེད་པ་ཉིད་ཀྱིས་དངོས་པོར་གྲུབ་པ་ན་རང་འདོད་ཙམ་གྱིས་དེ་སད་པས་དེ་ལྟ་བུའི་རྟོགས་པ་རང་དབང་དུ་གྱུར་པའི་ཕྱིར་ཤེས་པ་གང་དག་སྐྱེ་བ་དེ་དག་དེ་ལྟ་བུའི་འདུ་བྱེད་ཀྱི་གཞི་ཅན་ཉིད་
[136b.3]ཀྱིས་སྔ་མ་དང་ཕྱི་མར་འཛིན་པར་འགྱུར་བ་ནི། རྣམ་པར་རྟོག་པ་དང་བཅས་པར་གྲུབ་པར་འགྱུར་བ་ཡིན་ནོ། །དེའི་དུས་པའི་རུང་བ་ཙམ་ལས་སྐྱེས་པའི་གསལ་བ་ནི་དམིགས་པ་ཡོད་དམ་མེད་ཀྱང་རུང་སྟེ། སྔ་ཕྱི་རྣམ་པར་འབྱེད་པར་མི་ནུས་པས་རྣམ་པར་མི་རྟོག་པ་ཁོ་ནའོ། །
[136b.4]འཁྲུལ་བའི་རྒྱུ་མཚན་འགའ་ཞིག་ཉིད་དེ་ལྟ་བུའི་རྟོགས་པ་སྐྱེད་པར་བྱེད་པ་ཡིན་ནོ་ཞེ་ན་མ་ཡིན་ཏེ་མི་ཤེས་པ་ལས་མེད་པས་ཤེས་པ་ལ་ལྟོས་པ་ཉིད་དུ་རྟོགས་པའི་ཕྱིར་རོ། །མི་ཤེས་པ་ལ་མེད་པར་ཇི་ལྟར་རྟོགས་ཤེ་ན། རྣམ་པར་རྟོག་པ་ཐམས་ཅད་མི་འཇིག་པའི་ཕྱིར་དང་། ངེས་
[136b.5]པ་མེད་པས་དྲན་པར་ཐལ་བའི་ཕྱིར་རོ། །དེ་ལྟ་བུ་ཉམས་སུ་མྱོང་བ་ཡོད་ན་ནི་དེ་ངེས་པ་ཉིད་ལས་ངེས་པ་ཡིན་ནོ། །གཞན་ཡང་ས་བོན་ལ་སོགས་པའི་དོན་རྣམས་ཀྱི་འབྲས་སཱ་ལུ་ལ་སོགས་པའི་དབྱེ་བའི་ནུས་པ་སྣ་ཚོགས་སྲིད་པ་ནི་རྒྱུ་སོ་སོར་ངེས་པས་བསྐྱེད་པས་དེ་ལྟ་བུའི་ངོ་བོར་
[136b.6]འཐད་པ་ཡིན་ལ་སྔོན་པོ་དང་སེར་པོ་ལ་སོགས་པས་དབང་པོ་ལས་སྐྱེས་པའི་བློ་སྣ་ཚོགས་པ་ཡང་ཕྱིའི་དོན་ཡོད་ན་དེ་བྱས་པ་ཁོ་ན་ཡིན་ན། རྣམ་པར་རྟོག་པ་ཡོད་པ་དང་མེད་པ་དང་བུམ་པ་དང་ཆུ་དང་རྩིག་པ་ལ་སོགས་པའི་རང་བཞིན་གྱིས་རིགས་མི་མཐུན་པར་སྣང་བ་གོ་ནུས་པའི་
[136b.7]གཞི་རྩ་གང་ལས་དེ་ལྟ་བ་གྱུར་བུམ་པའི་རྣམ་པར་རྟོག་པ་སྐྱེད་པར་བྱེད་པའི་རྟོགས་པའི་རང་བཞིན་ནི་དངོས་པོ་དང་དངོས་པོ་མེད་པ་ལ་སོགས་པའི་རྒྱུར་མ་ཡིན་ཏེ། རྟོགས་པ་དེ་ཡོད་ཀྱང་བུམ་པ་རྟོགས་པ་མེད་ན། དེ་དེའི་རྒྱུ་མ་ཡིན་པར་ཐལ་བའི་ཕྱིར་རོ། །འབད་རྩོལ་གྱིས་བྱས་
[137a]
[137a.1]པའི་ནུས་པ་སད་པ་ལ་བརྟེན་པས་དེ་ལྟར་འགྱུར་བ་ཡང་མི་རིགས་ཏེ་དེ་ལྟ་བུའི་ནུས་པ་ཅན་གྱི་རྒྱུ་ཡོད་པ་ཉིད་བརྩལ་བར་བྱ་བ་ཡིན་པའི་ཕྱིར་རོ། །དེའི་ཕྱིར་དངོས་པོ་སྣ་ཚོགས་པ་བཞིན་དུ་དེ་ཉམས་སུ་མྱོང་བ་སྣ་ཚོགས་པ་ཡིན་པའི་ཕྱིར་སྣ་ཚོགས་པར་གྱུར་པའི་ཉམས་སུ་
[137a.2]མྱོང་བའི་བག་ཆགས་སྣ་ཚོགས་ཅན་གྱི་རྣམ་པར་རྟོག་པར་བྱེད་པའི་ཕྱིར་ཏེ། སྤྲོས་པས་ཆོག་གོ། །དེས་ན་ཡུལ་གསལ་བར་བྱེད་པའི་ནུས་པ་དང་ལྡན་པ་རང་ཉིད་ཀྱིས་གསལ་བ་མཐོང་བ་འདི་ནི་སྔོན་པོའོ་སྙམ་པ་ལ་སོགས་པའི་རྣམ་པར་རྟོག་པ་དུས་ཀྱི་བྱེ་བྲག་མི་གསལ་བ་ཉིད་ཀྱིས་དྲན་པའི་
[137a.3]དངོས་པོར་རྟོགས་པ་ལ་མི་གནས་པ་ནི་ཉམས་སུ་མྱོང་བའི་འདུ་བྱེད་བར་ཆད་མེད་པ་རྟོགས་པར་བྱེད་པ་དེས་ན་དོན་ཇི་ལྟ་བ་ཉམས་སུ་མྱོང་བ་དེ་ལྟ་བུ་ཡིན་ལ་དེ་ལྟར་ནི་འདུ་བྱེད་པ་ཡིན་ནོ། །དེའི་ཕྱིར་རྒྱུ་དང་འབྲས་བུའི་དངོས་པོ་དང་དེ་འཛིན་པ་རིགས་པ་ཡིན་ནོ། །འདི་ལ་སྟོང་པ་ཉིད་དུ་སྨྲ་བ་དག་གིས་
[137a.4]བཟོད་པ་བཞིན་དུ་དོན་རྣམས་མ་སྐྱེས་པ་དང་མི་འགག་པར་ནི་མ་ཡིན་ཏེ། རྣམ་པར་རིག་པ་ཙམ་ནི་སྐྱེ་བ་དང་འགག་པའི་རང་བཞིན་ཡིན་པའི་ཕྱིར་རོ། །དེ་ཉིད་ཀྱི་ཕྱིར་གལ་ཏེ་ཐམས་ཅད་ནུས་པ་མེད་ན་ཞེས་བཀོད་དེ། །ས་བོན་སོགས་ནི་མྱུག་སོགས་ལ། །ནུས་མཐོང་གལ་ཏེ་དེ་ཀུན་རྫོབ། །
[137a.5]འདོད་ན་ཞེས་བྱ་བས་ཕྱི་རོལ་གྱི་དོན་ལ་བརྟེན་ནས་དེ་ལྟར་མཐོང་བར་བསྟན་པ་ལ། མཐོང་བ་དེ་ཀུན་རྫོབ་པའི་དོན་གྱི་ཡུལ་ཅན་དུ་རྣམ་པར་གཞག་སྟེ། ཀུན་རྫོབ་མེད་པར་མི་འཐད་པའི་ཕྱིར་ཀུན་རྫོབ་ཀྱི་ངོ་བོར་ཡང་རྒྱུ་དང་འབྲས་བུའི་དངོས་པོ་ཡོད་པ་ཉིད་དོ་སྙམ་དུ་དགོངས་ནས་ཇི་ལྟར་དེ་ལྟར་
[137a.6]འགྱུར་ཞེས་ཕྱིས་ཁས་བླངས་པ་ཡིན་ནོ། །དེའི་ཕྱིར་མ་བྱུང་བའི་རང་བཞིན་ལས་ཡོད་པ་ཙམ་ནི་སྐྱེ་བ་ཡིན་ལ་དེ་རྟོགས་པ་ལས་དེ་ཡོད་པས་ཡོད་པར་དམིགས་པ་གང་ཡིན་པ་དེ་ནི་རྟོགས་པ་ཡིན་ཏེ། དེས་ན་རྒྱུ་དང་འབྲས་བུ་དང་དེའི་རྟོགས་པ་མ་ཚང་བ་མེད་པ་ཡིན་པས། མངོན་སུམ་དང་མི་དམིགས་
[137a.7]པ་སྒྲུབ་པར་བྱེད་པ་ཡིན་ནོ། །འོ་ན་དེ་ལ་གཅིག་མེད་ན་ཡང་ཞེས་བྱ་བ་འདི་ཅི་སྟེ་མི་བརྗོད་ཅེ་ན་རྒྱུ་འདི་ཙམ་ཉིད་དོ་ཞེས་ངེས་པ་གཟུང་བའི་དོན་དུ་བརྗོད་དོ། །འདི་ལྟར་དུ་མ་ཅིག་ཅར་ཉེ་བ་ལས་འབྲས་བུ་སྐྱེ་བར་དམིགས་པའམ། ཡང་ན་རིམ་གྱིས་ཉེ་བ་ལས་ཡིན་ཏེ། སྔར་ཉེ་བར་གནས་
[137b]
[137b.1]པ་ཡོད་ཀྱང་མེད་པའི་འབྲས་བུ་ཕྱིས་ཉེ་བར་འོང་བས་ལྟོས་པ་ཡོངས་སུ་རྫོགས་པར་བྱས་པའི་ཕྱིར་དེ་ཉེ་བ་ཉིད་ཀྱིས་སྐྱེད་པ་ཡིན་ནོ། །དེས་ན་གཅིག་གམ་དུ་མ་ཇི་ལྟར་ཉེ་བ་ཉིད་ཀྱིས་འབྲས་བུ་བསྐྱེད་དམ། དེ་སྔར་ཉེ་བར་གནས་པ་དག་ལ་དེ་ཉེ་བར་ལྟོས་པ་ཡོངས་སུ་རྫོགས་པར་བྱེད་པས་ཡིན་ཞེས་
[137b.2]ཐེ་ཚོམ་ཟ་བ་ཕྱིས་ཀྱི་མི་དམིགས་པས་བཟློག་པ་ཡིན་ནོ། །དམིགས་པ་དེ་དག་ལས་གཅིག་མེད་ན་ཡང་མི་དམིགས་པ་ཡིན་ནོ། །འདི་ལྟར་མེ་ཡོད་པ་ན་བུད་ཤིང་མེད་ན་མེ་ཡོད་པར་མཐོང་ཡང་དུ་བ་མེད་པ། དེ་བཞིན་དུ་བུད་ཤིང་ལ་ཡང་མེ་མེད་ན་མེད་པར་འགྱུར་རོ། །དེ་གཉིས་
[137b.3]གནས་ན་ནི་གཞན་མེད་ཀྱང་མི་ལྡོག་གོ། །དེས་ན་དེ་ལྟར་དེ་དག་ཡོད་ན་སྔར་མ་བྱུང་བའི་དུ་བ་ཡོད་པ་ལས་དེ་དེ་དག་གི་རྒྱུ་ཅན་དུ་རྟོགས་པ་ན། རྒྱུའི་ཚོགས་པ་གང་ཞིག་ཉེ་བ་ན་དེ་ཡོད་པ་དེ་ཅི་ཉེ་བར་གནས་པ་རྣམས་ཀྱི་ཁ་སྐོང་ཡིན་ནམ་འོན་ཏེ་དེ་དག་ལས་དོན་འགའ་ཞིག་རྒྱུ་མ་ཡིན་པ་
[137b.4]ཡང་ཡིན་ཞེས་ངེས་པ་ན་འདི་ལྟར་རྟོགས་པ་ཡིན་ནོ། །འབྲས་བུ་ཉིད་དེ་ཡང་དུ་བ་ལ་ཡོད་དོ། །དེས་ན་ཇི་ལྟར་དུ་བས་མེ་མི་འཁྲུལ་ལོ་ཞེས་རྟོགས་ཞེས་གང་བརྗོད་པ་དེ་འདིས་སྤངས་པ་ཡིན་ནོ། །དེས་ན་དེ་ལྟར་རེ་ཞིག་འབྲས་བུའི་འབྲས་བུ་ཉིད་འཁྲུལ་པ་མེད་དོ་ཞེས་བསྟན་པའི་ཕྱིར་
[137b.5]ཚད་མས་རྟོགས་པའི་འབྲས་བུ་ཉིད་བཤད་པ་ཡིན་ནོ། །དེ་ནི་འདི་ལས་ཇི་ལྟར་འཁྲུལ་པ་མེད་པ་དེ་བསྟན་པའི་དེ་མེད་པར་ཡང་ཞེས་སྨོས་སོ། །མེད་པར་ཡང་དུ་བ་དེ་ཡོད་ན་དེ་ལ་འཁྲུལ་ནས་དེ་མེད་ཀྱང་ཡོད་ན་རྒྱུ་དང་ལྡན་པ་ལས་འདས་པར་འགྱུར་ཏེ་དེའི་འབྲས་བུ་ཉིད་དུ་མི་འགྱུར་
[137b.6]རོ་ཞེས་བྱ་བའི་དོན་ཏོ། །དེའི་དོན་འདི་ཡིན་ཏེ། དུ་བ་ནི་འབྲས་བུ་ཡིན་ཏེ་མེའི་འབྲས་བུའི་ཆོས་མཐོང་བའི་ཕྱིར་རོ། །འབྲས་བུ་ཡང་མི་འཁྲུལ་བ་དང་དེའི་བདག་ཉིད་ཀྱི་མཚན་ཉིད་ཀྱིས་འབྲེལ་ཏེ། དེས་ན་ཇི་ལྟར་དུ་བས་མེ་ལ་མི་འཁྲུལ་ལོ་ཞེས་བྱ་བར་རྟོགས་ཞེས་གང་བརྗོད་པ་
[137b.7]སྤངས་པ་ཡིན་ཏེ་རྣམ་པ་འདིས་རྒྱུ་དང་འབྲས་བུའི་རང་བཞིན་རྣམ་པར་དཔྱད་པ་ཁོ་ན་ལས་ཁོང་དུ་ཆུད་པའི་ཕྱིར་རོ། །མ་བྱུང་བ་ཉིད་ལས་ཡོད་པས་ཡོད་པའི་དངོས་པོ་ནི་སྐྱེ་བ་ཞེས་བརྗོད་དོ། །དེ་ཡང་གདོན་མི་ཟ་བར་ནུས་པའི་དངོས་པོ་གཞན་ལ་ལྟོས་པར་བྱ་བ་ཡིན་ཏེ། དེས་ན་འདི་
[138a]
[138a.1]གང་གི་ཚེ་གཞན་གྱི་ཚེ་ཡང་ཡོད་ན་ནི་དེའི་ཚེ་སྐྱེ་བའི་དོན་ཉིད་མེད་དེ། ཇི་ལྟར་ལྷས་བྱིན་ཁྱིམ་དུ་བྱུང་ནས་ཕྱིར་འབྱུང་བར་འགྱུར་ལ། དེར་བྱུང་ནས་ཀྱང་ཡུལ་གཞན་དུ་འབྱུང་བས་དེ་དང་དེའི་རྒྱུན་མངོན་པར་སྐྱེ་བར་མི་བརྗོད་པ་བཞིན་ནོ། །དངོས་པོ་མེད་པའི་
[138a.2]སྔོན་དུ་འགྲོ་བ་ཅན་ཉིད་ཡོད་པ་ནི་སྐྱེ་བ་ཡིན་ནོ། །དེས་ན་གང་གི་ཚེ་འདི་མེད་པར་འབྱུང་བ་དེའི་ཚེ་སྐྱེ་བའི་དོན་ཉིད་མེད་པ་དེ་ལས་འབྱུང་བ་ག་ལས་འགྱུར། མེ་མེད་པར་ཡང་དུ་བ་ཡོད་དེ། དེས་ན་འདི་མེ་ཡོད་ན་སྔ་ན་མེད་པ་ཡོད་པ་ཐོབ་པ་མ་ཡིན་པས་དེ་ཡོད་པས་སྐྱེ་བ་མ་ཡིན་ནོ། །དེས་
[138a.3]ན་དུ་བ་མེའི་རྒྱུ་ཅན་མ་ཡིན་ནོ། །དེའི་ཕྱིར་རྒྱུ་མེད་པར་ཐལ་ལོ། །ཅི་ཞིག་ལྟར་དུ་བ་མེ་ཡོད་ན་དམིགས་པ་དེ་ཙམ་གྱིས་ནི་དེའི་འབྲས་བུར་མི་འགྱུར་རོ། །གལ་ཏེ་ཐམས་ཅད་དུ་དུ་བ་དང་ཐམས་ཅད་ཀྱི་ཚེ་འདི་མེ་ཡོད་ན་འབྱུང་བ་ཡིན་ནོ་ཞེས་ངེས་ན། དེའི་ཚེ་ནི་འབྲས་བུ་ཉིད་དུ་རྟོགས་པར་
[138a.4]འགྱུར་ཏེ། དེ་ལ་ངེས་པར་རྟོགས་པའི་ཕྱིར་རོ། །འདི་ནི་ཐམས་ཅད་མཐོང་བ་མ་ཡིན་པས་རྟོགས་པར་ནུས་པ་མ་ཡིན་ནོ། །དེས་ན་ཇི་ལྟར་སྔར་མ་དམིགས་པ་དམིགས་པ་ཙམ་གྱིས་འབྲས་བུ་ཉིད་དུ་རྟོགས་དེས་ན་འབྲས་བུ་ཉིད་ལ་རྩོད་པ་དང་བཅས་པ་ན། ཇི་ལྟར་མེ་མེད་པར་
[138a.5]ཡང་ཡོད་པའི་ཕྱིར་རྒྱུ་དང་ལྡན་པ་ལས་འདས་པར་འགྱུར་རོ་ཞེ་ན། བཤད་པ། ལན་ཅིག་དེ་ལྟ་བུའི་ངོ་བོར་ངེས་པའི་དུ་བ་མེ་ཡོད་པ་ལ་མཐོང་བས་ཀྱང་མེ་དེའི་འབྲས་བུར་འགྲུབ་བོ། །རེ་ཞིག་དུ་བ་དེ་མེད་པ་ཉིད་ལས་དེའི་ཚེ་ཡོད་པས་སྐྱེས་པར་ནི་རྟོགས་པ་ཡིན་ནོ། །འདི་ནི་ནུས་པ་གཞན་
[138a.6]མེད་པར་རང་ཉིད་ཀྱིས་འབྱུང་བ་མ་ཡིན་ཏེ། རང་བཞིན་མེད་པའི་ཕྱིར་རོ། །ནུས་པ་ཡང་རྒྱུ་ཡོད་པ་ཁོ་ན་ཡིན་ནོ། །དེ་ལས་གཞན་དག་ཡོད་ཀྱང་མེད་པའི་ཕྱིར་དང་། མེ་ཡོད་ན་ཡོད་པའི་ཕྱིར་དེ་དེའི་འབྲས་བུ་དེ་རྟོགས་སོ། །གང་གི་ཚེ་དེ་དག་ཡོད་པ་ཉིད་ན་རྒྱུ་གཞན་ལ་མི་ལྟོག་པར་དུས་
[138a.7]གཞན་ཉིད་དུ་འབྱུང་བ་དེའི་ཚེ་ནི་ཡོངས་སུ་འགྱུར་བ་ལ་ལྟོས་པ་རྣམས་སྐྱེད་པར་བྱེད་པ་ཡིན་པར་རྟོགས་ཏེ། འབྲས་ཆན་སྐྱེ་བ་ལ་ཕྲུ་བ་ལ་སོགས་པ་བཞིན་ནོ། །དེས་ན་སྔར་མེད་པ་འགའ་ཞིག་ལྟར་འགའ་ཞིག་ཡོད་ན་འགྱུར་བ་ཞེས་བྱ་བ་ནི་རྒྱུ་མེད་པར་འཐད་པ་མ་ཡིན་ཏེ། དེ་སྐྱེད་པའི་
[138b]
[138b.1]ནུས་པ་མེད་པར་དེ་ཇི་ལྟར་ཡང་ཡོད་མི་སྲིད་པའི་ཕྱིར་རོ། །དེ་བཤད་པ་ནི། འབྲས་བུ་ཉིད་མ་ཡིན་ན་རྒྱུ་མ་ཡིན་པ་ལས་ལན་ཅིག་ཀྱང་མི་འབྱུང་བའི་ཕྱིར་རོ་ཞེས་བྱ་བའོ། །གང་ཞིག་རང་གི་རྒྱུའི་མཐུ་ལས་གྲུབ་པ་དེ་ནི་གློ་བུར་དུ་རྒྱུ་མ་ཡིན་པ་ཉེ་བ་ན་ཡང་ཡོད་པ་ཡིན་ཏེ། དཔེར་ན་ལྷས་བྱིན་ཡོད་
[138b.2]པ་ན་བུམ་པ་བཞིན་ནོ། །དེས་ན་འདི་ལ་མཐོང་བ་གཞན་ལ་ལྟོས་པ་མེད་དོ། །རྒྱུ་དང་འབྲས་བུ་དག་རང་བཞིན་ཁྱད་པར་ཅན་གྱི་བདག་ཉིད་ཡིན་པས་ན་ལན་ཅིག་ཞུགས་པའི་མངོན་སུམ་ཉིད་ཀྱིས་དེ་ལྟར་འཛིན་པའི་ཕྱིར་སྔོན་པོ་ལ་སོགས་པའི་རང་བཞིན་ལྟ་བུའོ། །ཐམས་ཅད་དུ་སྔོན་པོ་སྔོན་པོ་ཉིད་དུ་
[138b.3]རྟོགས་པ་ལ་ལྟོས་པ་ལན་ཅིག་དམིགས་པ་ཞུགས་པས་དེ་ལྟ་བུའི་ངོ་བོར་མི་རྟོགས་པ་ནི་མ་ཡིན་ནོ། །དེས་ན་རྒྱུ་དང་འབྲས་བུའི་དངོས་པོ་ལ་ནི་ལན་ཅིག་དམིགས་པས་རྟོགས་པར་བྱ་བ་མ་ཡིན་ནོ། །དེས་ན་སྔ་ན་མེད་པའི་རང་བཞིན་ཐོབ་པ་ནི་རྒྱུ་ལ་བརྟེན་པ་ཡིན་པས་རྒྱུ་མེད་པར་འདིའི་རང་གི་ངོ་བོ་འགྲུབ་
[138b.4]པ་མེད་དོ། །དེའི་ཕྱིར་གང་ཞིག་གང་མེད་ན་རང་གི་ངོ་བོ་ཉིད་མེད་པ་དེ་ཇི་ལྟར་དེ་ལ་འཁྲུལ་པར་འགྱུར་ཏེ། དེས་ན་འབྲས་བུ་རྒྱུ་ལ་འཁྲུལ་པ་མེད་དོ། །དེས་ན་དེ་ལྟར་རྒྱུ་དང་འབྲས་བུའི་དངོས་པོ་གྲུབ་པའི་ལྷག་མ་ཉེ་བར་བསྒྲུབས་ཏེ་སྐབས་ཀྱི་མདོ་འགྲེལ་པར་བྱེད་པ་ནི། འབྲས་བུ་ཡང་ཞེས་བྱ་བ་
[138b.5]ཡིན་ནོ། །འབྲས་བུ་རྒྱུ་མེད་པར་ཡོད་ན་ནི་རྒྱུ་དང་ནི་ལྡན་པ་ཁོ་ན་སྟེ། འབྲས་བུ་མ་ཡིན་པ་ཉིད་དུ་འགྱུར་རོ། །གཏན་ཚིགས་བཤད་པ་གང་ཞིག་ཅེས་བྱ་བ་སྟེ། གང་གི་ཕྱིར་གང་ཞིག་གང་མེད་པར་ཡོད་པ་དེ་ནི་དེའི་རྒྱུ་མ་ཡིན་པའི་ཕྱིར་ཏེ། སྔར་མ་བྱུང་བ་ལས་ཡོད་པ་ཉིད་མེད་པའི་ཕྱིར་ཞེས་བཤད་
[138b.6]ཟིན་ཏོ། །མེ་མེད་པར་ཡང་དུ་བ་ཡོད་དེ། དེའི་ཕྱིར་འདི་མེ་ཡོད་པ་སྔོན་མེད་པ་ཡོད་པས་ཐོབ་པ་མ་ཡིན་པས་ན་དེ་ཡོད་པས་སྐྱེས་པ་མ་ཡིན་ནོ། །དེ་བས་ན་མེ་དུ་བའི་རྒྱུ་མ་ཡིན་པར་འགྱུར་རོ། །དེ་མེད་ཀྱང་ཡོད་པའི་ཕྱིར་མེ་དེའི་རྒྱུ་མ་ཡིན་མོད། རྒྱུ་མེད་པ་ཉིད་ནི་མ་ཡིན་ཏེ། གཞན་གྱི་རྒྱུ་
[138b.7]ཅན་ཡིན་པའི་ཕྱིར་རོ་ཞེས་དགོས་པ་སྨྲས་པ་ནི་གལ་ཏེ་ཞེས་བྱ་བའོ། །མ་ཡིན་ཏེ་གཞན་དེ་ལ་ཡང་མཚུངས་པའི་ཕྱིར་ཏེ། འདི་ལྟར་དེ་མེད་ན་ཡང་མེ་ཡོད་ན་ཡོད་པས་སོ། །ཇི་ལྟར་གཞན་ཡོད་ན་ཡང་ཡོད་པའི་ཕྱིར་མི་ལྡོག་པའི་ཆོས་ཅན་ཉིད་ཀྱིས་དངོས་པོ་དེ་ཡོད་པའི་རང་བཞིན་ཡིན་
[139a]
[139a.1]པའི་ཕྱིར་མེའི་འབྲས་བུ་ལས་འདས་པར་འགྱུར་བ་དེ་བཞིན་དུ་གཞན་གྱི་འབྲས་བུ་ཉིད་ལས་ཀྱང་ངོ་། །མེ་ཡོད་ན་ཡང་དེ་ཡོད་པའི་ཕྱིར་འདི་ལ་སྔ་ན་མེད་པའི་ཡོད་པ་ཐོབ་པའི་སྐྱེ་བའི་དོན་མེད་པའི་ཕྱིར་གཞན་ལས་ཀྱང་ཡོད་པར་མི་འཐད་དོ། །དོན་རྣམས་ཀྱི་རྒྱུ་ཉིད་ནི་འགའ་
[139a.2]ཡང་རང་གི་ངོ་བོ་ལས་ཐ་དད་པ་མ་ཡིན་ཏེ། དེས་ན་གལ་ཏེ་མེའི་རྣམ་པ་ཉིད་རྒྱུ་ཡིན་ན། འོ་ན་ནི་གཞན་གྱི་རྣམ་པ་ཉིད་རྒྱུ་མ་ཡིན་པ་ཉིད་དོ། །དེ་སྟེ་རྣམ་པ་གཞན་རྒྱུ་ཡིན་ན་ནི་དེ་ལྟ་ན་མེའི་རྣམ་པ་ཉིད་དུ་བའི་རྒྱུ་མ་ཡིན་ནོ། །དེས་ན་གཞན་སྐྱེད་པར་བྱེད་པ་ཡིན་ན་དེའམ། དེ་དེ་ལྟར་
[139a.3]གྱུར་པ་ཡིན་ན། གཞན་དེ་སྐྱེད་པའི་རང་བཞིན་མ་ཡིན་པ་ལས་ཇི་ལྟར་འབྱུང་བར་འགྱུར། གཏན་ཚིགས་བཤད་པ་གང་ཞིག་རང་གིས་སྐྱེད་པར་བྱེད་པའི་རང་བཞིན་མ་ཡིན་པས་དེ་མི་སྐྱེད་པའི་ཕྱིར་སྐྱེ་བ་དེ་རྒྱུ་མེད་པ་ཉིད་དུ་འགྱུར་རོ། །གང་གི་ཚེ་གཅིག་སྐྱེད་པའི་རང་བཞིན་དང་
[139a.4]ལྡན་པ་ལས་གཞན་དེ་སྐྱེད་པའི་རང་བཞིན་མ་ཡིན་པ་དེས་ན། དེར་འདི་ཡོད་པ་རྒྱུ་མེད་པ་ཅན་དུ་འགྱུར་རོ། །དེ་ལས་བདག་ཐོབ་པ་ནི་མ་ཡིན་ལ། དེ་ཡོད་པ་ཡང་མ་ཡིན་ཏེ། དེས་ན་རྒྱུ་མེད་པ་ཉིད་དོ། །འདི་དེ་རྒྱུ་མེད་པ་ཅན་ཡོད་ན་གཅིག་ཏུ་ཡང་འདིར་རྒྱུ་མེད་པ་ཅན་ཁོ་ནའོ། །
[139a.5]དེས་ན་དེ་ཡང་རྒྱུར་མ་གྲུབ་པས་རྒྱུ་མེད་པ་ཅན་ཉིད་དོ། །དེ་ལ་སྨྲས་པ་གང་གིས་དུ་བ་ནི་ཡོད་པ་ཉིད་ཡིན་ཏེ། གང་གི་ཕྱིར་གཞན་ཡོད་པ་ན་ཡང་ཡོད་པའི་ཕྱིར་ཁྱིམ་ན་ཡང་ཡོད་ལ་ཕྱི་རོལ་ན་ཡང་ཡོད་པའི་ལྷས་བྱིན་བཞིན་དུ་འདི་དེར་སྐྱེས་པ་མ་ཡིན་པར་བརྗོད་པ་གང་ཞིག་མེ་ཡོད་པ་ན་
[139a.6]སྔར་མེད་པ་ཉིད་ལས་ཡོད་པས་སྔོན་མེད་པའི་ཡོད་པ་ཐོབ་པའི་ཕྱིར་སྐྱེས་པའི་དུ་བ་དེ་ཉིད་ནི་མ་ཡིན་ཏེ། འོན་ཀྱང་དེ་དང་འདྲ་བ་དེ་དང་མཚུངས་པ་གཞན་དེར་འབྱུང་བ་ཡིན་ནོ། །དུ་བ་གཅིག་པོ་དེ་སྔོན་མ་བྱུང་བ་ལས་མེས་ཡོད་པར་བསྒྲུབ་པ་ཡིན་པ་དེས་ན་དེ་ལ་སྐྱེ་བའི་དོན་འཐད་པ། རྒྱུ་
[139a.7]ཡང་སྐྱེད་པར་བྱེད་པ་ཡིན་ནོ། །དེས་ན་དུ་བ་དེ་ལ་རང་བཞིན་དེ་ཉིད་སྐྱེད་པར་བྱེད་པ་ཡིན་ལ། དུ་བ་གཞན་སྐྱེད་པ་ནི་གཞན་ཁོ་ནའོ། །དེའི་ཕྱིར་རྒྱུ་དང་འབྲས་བུའི་དངོས་པོ་འཐད་པས་རྒྱུ་མེད་པ་ཉིད་དུ་ཐལ་བ་མ་ཡིན་ནོ། །འབྲས་བུ་ཡིན་པའི་ཕྱིར་འཁྲུལ་པ་མེད་པ་ཡིན་ནོ་ཞེས་བྱ་བ་
[139b]
[139b.1]གང་ཡིན་པ་དེ་ནི་གསལ་བ་ཡིན་ནོ། །གང་གི་ཕྱིར་འདི་རང་གི་མཚན་ཉིད་གཅིག་ལ་ལྟོས་ནས་མི་འཁྲུལ་པར་འཇོག་པ་ནི་མ་ཡིན་ནོ། །གཅིག་ཁོ་ན་ལས་རྗེས་སུ་དཔག་པ་མི་འཇུག་པའི་ཕྱིར་ཏེ། དེ་ནི་མཐུན་པའི་ཕྱོགས་ལ་ཡོད་པ་མ་ཡིན་པའི་ཕྱིར་རོ་ཞེ་ན། ལན་དུ་མི་འདྲ་བ་ལས་
[139b.2]ཏེ། མི་མཚུངས་པ་མེ་མ་ཡིན་པའི་རང་བཞིན་ལས་འབྱུང་བ་ཇི་ལྟར་དེ་དང་འདྲ་བ་ཡིན་ཏེ་འདི་ལྟར། དེ་ནི་དེ་དང་འདྲ་བ་ལས་འབྱུང་བའི་ཕྱིར། ཅི་འདྲ་བ་ཞིག་ལས་ལན་ཅིག་དུ་བ་དམིགས་པ་དེ་དང་མཚུངས་པ་ལས་འབྱུང་བའི་ཕྱིར་དེ་དང་འདྲ་བར་འགྱུར་ཏེ། དུ་བ་ཉིད་མཚུངས་པར་འགྱུར་
[139b.3]རོ། །དོན་གཅིག་རྒྱུ་ཇི་ལྟ་བུ་ལས་སྐྱེས་པའི་གཞན་ཁོ་ན་དེ་དང་འདྲ་བར་འགྱུར་རོ། །འདྲ་བ་ཞེས་བྱ་བ་འདི་ཅི་ཞིག་ཅེ་ན། གཅིག་པོ་འདི་ནི་དུ་བ་ཡིན་ལ། གཞན་འདི་ཡང་དུ་བ་ཡིན་གྱི་བུམ་པ་མ་ཡིན་པ་གང་ཡིན་པ་དེ་བསྟན་པར་བྱའོ། །དེ་འདྲ་བ་ལས་དེ་འདྲ་བ་ཉིད་དུ་འགྱུར་གྱི་གཞན་འདྲ་
[139b.4]བ་ནི་མ་ཡིན་ནོ་ཞེས་བྱ་བ་འདི་ལ་རིགས་པ་ཅི་ཡོད་ཅེ་ན། འབྲས་བུ་གཞན་རིགས་མི་མཐུན་པ་ན་རིགས་མཐུན་པའི་རིགས་མཐུན་པ་དང་མི་མཐུན་པ་དག་རྒྱུ་མཚན་མེད་པར་ནི་མི་འཐད་པ་མ་ཡིན་ནམ། དངོས་པོ་ནི་དེ་ཙམ་གྱི་ངོ་བོ་ཡིན་པའི་ཕྱིར་དངོས་པོའི་རྒྱུ་ཉིད་དེའི་རྒྱུ་ཡིན་ནོ་ཞེས་
[139b.5]རིགས་སོ་དེས་ན་རྒྱུ་ཐ་དད་པས་སཱ་ལུ་དང་ནས་ཀྱི་མྱུ་གུའི་ངོ་བོ་ཉིད་ཐ་དད་པ་ནི་རྒྱུ་ཐ་དད་པ་ལས་ཡིན་ལ། རྒྱུ་མཚུངས་པ་ཅན་སཱ་ལུའི་མྱུ་གུ་དག་གི་གཅིག་པ་ཡང་རྒྱུ་གཅིག་པ་ལས་ཡིན་ནོ། །ཐ་དད་པས་བསྐྱེད་པ་དག་ཀྱང་ངོ་བོ་མཚུངས་ན་ནི་ཐ་དད་པ་དེའི་རྒྱུ་མེད་པར་འགྱུར་བས་དངོས་
[139b.6]པོ་ཉིད་རྒྱུ་མེད་པར་འགྱུར་རོ། །འདིར་སྨྲས་པ་འདྲ་བ་དང་མི་འདྲ་བ་དག་རྒྱུ་མཚན་དང་བཅས་པ་ཡིན་ཡང་རིགས་མཐུན་པའི་རྒྱུ་ནི་མ་ཡིན་ཏེ། རིགས་མི་མཐུན་པ་ལས་སྐྱེ་ཡང་རྒྱུ་མེད་པར་ཐལ་བ་མ་ཡིན་པའི་ཕྱིར་རོ། །མེ་ལས་དུ་བ་མ་ཡིན་པ་ལས་ཐ་དད་པའི་དུ་བ་སྐྱེ་བས་ན་ཐ་དད་
[139b.7]པ་དེ་ཉིད་ལས་སྐྱེ་བ་ཡིན་ནོ། །དེས་ན་གལ་ཏེ་མེ་མ་ཡིན་པ་ལས་ཀྱང་དུ་བ་མ་ཡིན་པ་ལས་ཐ་དད་པའི་དུ་བར་འགྱུར་ན། ཐ་དད་པའི་རྒྱུ་དེ་ཡང་སྤངས་ནས་རྒྱུ་གཞན་ལས་ཀྱང་འབྱུང་བའི་ཕྱིར་རྒྱུ་འཁྲུལ་པས་རྒྱུ་མེད་པ་ཉིད་དུ་འགྱུར་རོ་ཞེ་ན། མ་ཡིན་ཏེ་མི་འཁྲུལ་པ་སྤངས་ན་དེའི་རྒྱུ་ཅན་མ་
[140a]
[140a.1]ཡིན་པར་མི་འཁྲུལ་པའི་ཕྱིར་རོ། །དེའི་རྒྱུ་ཅན་ནི་དེ་ལ་འཁྲུལ་པ་མེད་པར་འགྱུར་རོ་ཞེས་བྱ་བ་གང་ཡིན་པ་དེ་ནི་ད་དུང་ཡང་མི་འགྲུབ་བོ། །དེས་ན་འཁྲུལ་པ་ཡིན་ཡང་ཐ་དད་པ་རྒྱུ་མེད་པ་ཅན་མ་ཡིན་ནོ། །དེས་ན་མེས་བསྐྱེད་པའི་དུ་བའི་དུ་བ་མ་ཡིན་པ་ལས་ཐ་དད་
[140a.2]པ་ནི་མེས་བསྐྱེད་པ་ཡིན་ལ། དེ་ལས་གཞན་གྱིས་བསྐྱེད་པའི་ནི་གཞན་དེ་ལས་གཞན་གྱིས་བསྐྱེད་པ་ཁོ་ནའོ། །དུ་བའི་རང་གི་ངོ་བོ་ལས་མ་གཏོགས་པའི་ཐ་དད་པ་ཞེས་བྱ་བ་དེ་ཉིད་འགའ་ཡང་མེད་དོ། །དེ་ཡང་མེས་བསྐྱེད་པ་ལས་མེ་མ་ཡིན་པས་བསྐྱེད་པ་ཐ་དད་པ་ཁོ་ནའོ། །མེ་
[140a.3]གཞན་གྱིས་བསྐྱེད་པ་གཞན་ཡིན་པ་བཞིན་ནོ། །དེས་ན་ལྡོག་པ་ཉམས་པའི་ཕྱིར་རྒྱུ་མ་ཡིན་པར་འགྱུར་བ་གང་ཡིན་པ་དེ་ཉིད་གཞན་ལས་འབྱུང་བ་ནི་མ་ཡིན་ནོ་ཞེ་ན། དེ་ལྟ་ན་འོ་ན་འདིར་མདོ་སྡེ་པ་ལ་ཁར་ཆད་པ་ཅི་ཡང་མེད་དོ། །འདི་ལྟར་རེ་ཞིག་སྐྱེ་བ་མེད་པར་སྨྲ་བ་ནི་གསལ་བ་ཡིན་
[140a.4]ནོ། །འདི་ཕྱི་རོལ་གྱི་དོན་ལ་དཔྱོད་པ་འགྱོད་པ་ནི་འཇིག་རྟེན་གྱི་བློ་འབའ་ཞིག་གིས་ཡིན་ནོ། །དེ་ལ་གལ་ཏེ་འབྲས་བུའི་གཏན་ཚིགས་མི་འཁྲུལ་པར་མ་གྲུབ་ན་མ་གྲུབ་ལ་རག་མོད། དོན་དམ་པའི་ཚུལ་གྱིས་དབང་དུ་བྱས་ན་ནི་རང་བཞིན་གྱི་གཏན་ཚིགས་གཅིག་པུར་ཟད་དོ། །རང་རིག་
[140a.5]པ་ཉིད་མངོན་སུམ་ཡིན་གྱི་དབང་པོ་ལས་སྐྱེས་པ་ནི་མ་ཡིན་པ་བཞིན་ནོ། །དེ་གལ་ཏེ་དེ་ལྟ་ན་ཅི་ལན་འདི་ཁོ་ནར་བས་སམ་ཞེ་ན། འདི་ཁོ་ནར་བས་སོ་ཞེས་ནི་མི་སྨྲའི། འདི་ནི་གཟུ་བོའི་ཚིག་ཡིན་ཏེ། གུས་པར་བྱ་བ་ནི་མ་ཡིན་ནོ། བདག་ཅག་གི་ལྟར་ན་ནི་ངེས་པར་ཟུང་ཤིག །
[140a.6]མི་འདྲ་བ་ལས་ནི་དེ་འདྲ་བ་འབྱུང་བ་མ་ཡིན་གྱི་དེ་ནི་འདྲ་བ་ཁོ་ན་ལས་དེ་དང་འདྲ་བར་འགྱུར་བར་རིགས་སོ། །སྔོན་མ་བྱུང་བའི་དངོས་པོ་གཞན་ཡོད་ན་རང་གི་ངོ་བོ་ཡོད་པ་ནི་སྐྱེ་བར་བརྗོད་དོ། །དེ་ལ་གང་གི་ཚེ་དུ་བའི་རང་གི་ངོ་བོ་མེ་མེད་ཀྱང་ཡོད་ན་ནི་དེའི་ཚེ་འདི་སྔོན་མ་བྱུང་བ་མ་ཡིན་ནོ་ཞེས་
[140a.7]སྔར་བསྟན་ཟིན་ཏོ། །དེ་ལ་འདི་ནི་དུ་བ་གཞན་སྐྱེས་པ་ཡིན་ནོ་ཞེས་གང་བརྗོད་པ་དེ་ལ་གལ་ཏེ་འདི་ལས་སྐྱེས་པར་གྲུབ་ན་དེའི་ཚེ་འདི་གཞན་སྐྱེས་པ་ཞེས་བྱ་བར་འགྱུར་བ་ཞིག་ན། གང་གི་ཚེ་འདི་ཡོད་པས་སྐྱེས་པ་དེ་ཉིད་མ་གྲུབ་པ་དེའི་ཚེ་ཇི་ལྟར་གཞན་ཉིད་ཡིན། གལ་ཏེ་དེ་ཡོད་
[140b]
[140b.1]པ་ཉིད་ན་ཡོད་པའི་ཕྱིར་མེད་པ་ཉིད་དེ་ལས་འབྱུང་བ་ཡིན་ན་དེའི་ཚེ་དེའི་རྒྱུ་ཅན་དུ་འགྱུར་བ་ཡིན་ན་ནི་གཞན་ལས་ཀྱང་འབྱུང་བའི་ཕྱིར་འདི་དེའི་ཚེ་སྔ་ན་མེད་པ་ཉིད་མ་ཡིན་པ་དེས་ན་སྐྱེ་བ་དོན་མེད་དོ་ཞེས་ལྷས་བྱིན་གྱི་དཔེས་བསྟན་ཟིན་ཏོ། །གལ་ཏེ་སྔར་དམིགས་པའི་མཚན་ཉིད་དུ་གྱུར་པ་མ་ཡིན་
[140b.2]པའི་ཕྱིར་འདི་མེ་ལ་སོགས་པ་ཉེ་བའི་སྔོན་རོལ་དུ་དེ་ན་མེད་པར་རྟོགས་པ་མེད་པ་མ་ཡིན་ནམ་ཞེ་ན། རྟོགས་པ་བདེན་མོད་ཀྱི་འོན་ཀྱང་གཞན་གྱི་ཚེ་ཡང་མེ་མེད་ཀྱང་ཡོད་པར་ཁས་བླངས་པའི་ཕྱིར་འཁྲུལ་པར་འགྱུར་རོ། །གང་གིས་འཁྲུལ་པར་འགྱུར་བ་དེ་ཉིད་འབྱུང་བར་ནི་ཁས་མ་
[140b.3]བླངས་ཀྱི་འོན་ཀྱང་གཞན་ཉིད་དོ་ཞེ་ན། ཡུལ་དང་དུས་ཐ་དད་པ་ལས་ཀྱང་དངོས་པོ་ཐ་དད་པར་གྲུབ་པའི་ཕྱིར་གཞན་མ་ཡིན་པའི་རང་བཞིན་འགའ་ཡང་མེད་པ་མ་ཡིན་ནམ། དེས་ན་བྱེད་པ་གཞན་ཙམ་གྱིས་མཐར་ཐུག་པར་བརྗོད་པ་ན། རྒྱུའི་དོན་དུ་མི་གསལ་བར་འགྱུར་རོ། །
[140b.4]འདི་ལྟར་རྣམ་པར་གནས་པའི་དངོས་པོ་ཡང་རྒྱུའི་བྱེད་པའི་སྤྱོད་ཡུལ་དུ་གྱུར་པར་སྲིད་པ་ཡིན་ནོ། །དེ་སྐད་ཅིག་གི་དབྱེ་བས་ཐ་དད་པའི་ཕྱིར་རོ། །དེས་ན་འདི་སྐད་ཅིག་དེ་སྔར་མེད་པར་འཐད་པའི་ཕྱིར་དེ་ལ་ཡང་རྒྱུའི་བྱེད་པ་སྲིད་པས་ན་ཡོད་པའི་དངོས་པོ་ཡང་རྒྱུའི་རྗེས་སུ་འགྲོ་བར་
[140b.5]འགྱུར་བ་ཁོ་ན་སྟེ། སྐད་ཅིག་གི་དབྱེ་བས་ཐ་དད་པའི་ཕྱིར་རོ། །དེའི་ཕྱིར་དུ་བ་མཐའ་དག་མེ་ཡོད་པ་ཉིད་ན་ཡོད་པ་ཡིན་ན་དེ་ཉིད་ལས་སྔོན་མེད་པ་ཡོད་པ་འཐོབ་པར་གཞུང་གཟུགས་པར་འཐད་ཀྱི། གཞན་དག་གཞན་ལས་ཀྱང་འབྱུང་ན་ནི་སྔར་མེད་པ་ཉིད་དུ་མི་འགྱུར་རོ། །
[140b.6]དེས་ན་མི་འདྲ་བ་ལས་དེ་དང་འདྲ་བ་འབྱུང་བ་སྤངས་པ་ཡིན་ནོ། །སྐད་ཅིག་སྔོན་མེད་པ་ཉིད་ཀྱིས་སྔོན་མེད་པའི་ཕྱིར་རྒྱུས་བྱེད་པར་ནུས་པ་ཡང་མ་ཡིན་ཏེ། རིགས་མཐུན་པའི་སྐད་ཅིག་དང་པོ་ལ་བརྟེན་པ་སྐྱེ་བ་ཡང་འགྲུབ་པའི་ཕྱིར་རོ། །གཞན་ལས་རྣམ་པ་ཐམས་ཅད་དུ་དུ་བ་མི་
[140b.7]འབྱུང་བ་ནི་དེའི་རྒྱུན་འཇུག་པ་ཡང་མ་གྲུབ་པའི་ཕྱིར་དེ་སྐྱེ་བར་ཐལ་བ་ཁོ་ནའོ། །དུ་བ་ཙམ་ལ་ལྟོས་པའི་ཡོད་པ་སྔ་ན་མེད་པར་བརྗོད་པའི་ཕྱིར་རོ། །འོན་ཏེ་འདི་ལྟར་མ་བརྟེན་པར་ངེས་པའི་དུ་བ་ལ་ལྟོས་ན་སྔོན་མེད་པ་ཉིད་དུ་བརྗོད་ན། དེ་ནི་སྐད་ཅིག་ལ་ཡང་ཐལ་བར་འགྱུར་རོ། །
[141a]
[141a.1]གསལ་བ་ཙམ་ལ་བརྟེན་ནས་ངེས་པ་མཐར་ཕྱིན་པ་ནི་མ་ཡིན་ཏེ། འདི་ནི་སྐད་ཅིག་མཐར་ཐུག་པ་ཡང་ཡིན་པའི་ཕྱིར་རོ། །སྐད་ཅིག་ནི་རང་བཞིན་ཉེ་བར་ལེན་པ་ཙམ་ལས་སྐྱེ་བར་གྲུབ་པས་ན་རྒྱུ་གཞན་དོན་མེད་དོ་ཞེ་ན། མ་ཡིན་ཏེ། རིགས་མཐུན་པ་དང་མི་
[141a.2]མཐུན་པ་གཉི་ག་ཡོད་པ་ནི་སྔོན་མེད་པའི་སྐད་ཅིག་དེ་ཡོད་པ་ན་སྐལ་བ་མཉམ་པའི་སྐད་ཅིག་སྔ་མ་ཉིད་རྒྱུ་ཡིན་གྱི་དངོས་པོ་གཞན་ནི་མ་ཡིན་ནོ་ཞེས་ངེས་པ་མ་གྲུབ་པའི་ཕྱིར་རོ། །རྒྱུ་ལ་རྒྱུའི་ངོ་བོ་གཞན་ནི་འགའ་ཡང་ཡོད་པ་མ་ཡིན་ན་གང་གི་སྐལ་བ་མཉམ་པ་འདི་ཉིད་ལས་ངེས་པར་
[141a.3]འགྱུར་གྱི་གཞན་ལ་ནི་མ་ཡིན་ནོ་ཞེས་བྱ་བར་འགྱུར། དེ་ཡོད་ན་སྔོན་མེད་པའི་དོན་ཡོད་པ་ཉིད་ནུས་པ་ཡིན་གྱི་སྐད་ཅིག་མ་ཉིད་ལ་སོགས་པ་ལྟར་རང་བཞིན་གཞན་ནི་མ་ཡིན་ནོ། །དེས་ན་འདི་ནི་དུ་བ་གཉིས་ལ་ཡང་ཡོད་པ་ན་དུ་བ་སོ་སོར་ཁྱད་པར་དུ་འགྱུར་བ་མ་ཡིན་ཏེ། དེས་ན་འདི་ཇི་ལྟར་
[141a.4]སྐད་ཅིག་སྔ་མའི་རྒྱུ་ཅན་དུ་འགྱུར། དེས་ན་གལ་ཏེ་དུ་བ་ཙམ་ལ་ལྟོས་ཏེ་སྔ་ན་མེད་པ་ཉིད་ཡིན་ན་མི་འདྲ་བ་ལས་དེ་དང་འདྲ་བ་མི་འབྱུང་ངོ་། །དེ་སྟེ་ཁྱད་པར་ལ་བརྟེན་པ་ཡིན་ན་རྒྱུ་གཞན་གྱི་རྗེས་སུ་འཇུག་པ་དང་བྲལ་ན་སྐད་ཅིག་སྔ་མ་སྐད་ཅིག་གཉིས་པ་ཙམ་གྱི་རྒྱུར་ནུས་པ་མ་ཡིན་ནོ། །འོ་ན་
[141a.5]རིགས་པ་གང་ཡིན་ཞེ་ན། དུ་བ་ཙམ་ལ་ལྟོས་ཏེ་རྣམ་པར་འཇོག་པའོ། །གཞན་དེ་ཇི་ལྟར་དུ་བ་ཡིན་པ་དེ་བཞིན་དུ་དེའི་འབྲས་བུར་ཡང་ཅི་སྟེ་མི་འགྱུར། འོན་ཏེ་དུ་བ་ཉིད་ལས་ཁྱད་པར་མེད་པར་མི་འདོད་ན། དེའི་རིགས་པ་བརྗོད་དགོས་ཏེ། རྒྱུ་མཚན་མེད་པར་ནི་ཁས་བླངས་པ་རྣམ་པར་
[141a.6]གཞག་པར་མི་ནུས་སོ། །འདི་ལ་ཡང་ངེས་པ་ཅི་ཡོད་ཅེ་ན། འདི་ནི་འོག་ཏུ་བཤད་པར་བྱའོ། །དེ་ཉིད་ཀྱི་ཕྱིར་མེས་སྐྱེད་པའི་དུ་བ་གང་ཡིན་པ་དེ་ནི་སྐད་ཅིག་ཉིད་ཀྱིས་ལོག་པ་དེས་ན་དེ་མེ་མེད་པས་མེད་པར་འགྱུར་བར་མི་ནུས་པའི་ཕྱིར་དེ་ལས་གཅིག་མེད་ན་ཡང་མེད་པ་ཞེས་ཇི་སྐད་
[141a.7]བརྗོད་པ་དེ་ནི་དེ་མེད་པས་མེད་པ་མི་འཐད་པའི་ཕྱིར་རོ་ཞེས་གང་སྨྲས་པ་དེ་ཡང་གསལ་ཏེ། གལ་ཏེ་དུ་བ་མེ་ལས་གཞན་པ་དག་ལས་ཀྱང་འབྱུང་བ་མེ་མེད་པར་ཡོད་པར་གཞན་ཡང་དུ་བ་ཉིད་ཡིན་པས་དུ་བ་སྔ་མ་བཞིན་གཞན་ལས་ཀྱང་འགྱུར་བ་ཡིན་ནོ། །དེས་ན་ཐ་དད་པ་ཡན་ལག་ཏུ་མ་
[141b]
[141b.1]བྱས་པར་དུ་བ་ཙམ་ཡོད་པ་ཡང་མེ་མེད་པར་ཡོད་ན། དེའི་ཡོད་པ་སྔ་ན་མེད་པ་ཉིད་དུ་མི་འགྱུར་རོ། །དེས་ན་མེ་གཅིག་ཉིད་ལས་སྔར་མ་མཐོང་བའི་དུ་བ་དམིགས་པ་ན་མེ་མེད་ན་མེད་དོ་ཞེས་དུ་བ་ཐམས་ཅད་ངེས་པར་བྱེད་དོ། །དེའི་ཕྱིར་མི་འདྲ་བ་ལས་དེ་དང་འདྲ་བ་སྐྱེ་བར་མི་འཐད་དོ། །དེ་
[141b.2]དང་འདྲ་བ་ཉིད་ལས་དེ་དང་འདྲ་བ་འབྱུང་བ་ཡིན་ནོ། །དེས་ན་དེ་ལྟར་དུ་བ་གཞན་མེ་མ་ཡིན་པ་ལས་འབྱུང་བར་སྨྲས་པ་ལ། མི་འདྲ་བ་ལས་འབྱུང་བ་ཇི་ལྟར་དེ་དང་འདྲ་བ་ཡིན་ཞེས་སྐྱེ་བའི་རང་གི་ངོ་བོ་ངེས་པར་གཟུང་བ་ཉིད་ལན་དུ་བཏབ་པ་ཡིན་ནོ། །སུན་དབྱུང་བ་གཞན་དག་ཀྱང་
[141b.3]བཤད་པ་ནི་མི་འདྲ་བ་ལས་ཀྱང་ཞེས་བྱ་བ་ཡིན་ནོ། །མེ་མ་ཡིན་པ་ལས་ཀྱང་དུ་བ་འབྱུང་ན་མེ་དེ་དག་གིས་དུ་བ་སྐྱེད་པར་བྱེད་པའི་ནུས་པ་དེའི་ངེས་པ་གཞན་ལ་མེད་པའི་སྙིང་པོ་ཅན་གྱིས་དེ་ལ་ཡོད་པ་དེ་མེད་པའི་ཕྱིར་ཏེ། མེ་མ་ཡིན་པ་ལས་ཀྱང་དུ་བ་སྐྱེ་བས་དེ་ལ་ཡང་ནུས་པ་གྲུབ་
[141b.4]པའི་ཕྱིར་རོ། །གང་གི་ཕྱིར་ནུས་པ་མ་ངེས་པ་དེ་ཉིད་ཀྱི་ཕྱིར་མི་འདྲ་བ་ལས་དེ་དང་འདྲ་བ་འབྱུང་བ་ཞེས་འདིའི་གཏན་ཚིགས་སུ་བསྟན་པ་ཡིན་ཏེ། ངེས་པ་མེད་པའི་ཕྱིར་དེ་དང་འདྲ་བ་འབྱུང་ན་ཞེས་བྱ་བ་ཡིན་ནོ། །དེ་ལྟ་ཡིན་ན་ནི་རྒྱུའི་ཐ་དད་པ་ཐ་དད་པར་བྱེད་པ་མ་ཡིན་པས་
[141b.5]ཞེས་བྱ་བའི་གཏན་ཚིགས་ཀྱིས་ན་མཐའ་དག་གི་སྣ་ཚོགས་རྒྱུ་མེད་པ་ཅན་དུ་འགྱུར་རོ། །འགྲོ་བ་རྣམ་པ་སྣ་ཚོགས་པ་ནི་རྒྱུ་མེད་པར་འགྱུར་ཏེ། ཐ་དད་པའི་རྒྱུ་མེད་པའི་ཕྱིར་རོ། །དུ་བའི་རང་བཞིན་ནི་དུ་བ་མ་ཡིན་པ་ལས་ལོག་པ་ཡིན་ནོ། །འདིའི་ཐ་དད་པ་དེ་མེས་ནི་བྱས་
[141b.6]པ་མ་ཡིན་ཏེ། མེ་མ་ཡིན་པ་ལས་ཀྱང་ལྡོག་པ་དེ་ཡོད་པའི་ཕྱིར་རོ། །དེས་ན་འདིའི་དུ་བ་མ་ཡིན་པ་ལས་ཐ་དད་པ་འདི་མེའི་རྒྱུ་མཚན་ཅན་མ་ཡིན་ནོ། །དེས་ན་འཐད་པ་རྒྱུ་མེད་པར་འགྱུར་རོ། །གལ་ཏེ་དུ་བ་དེའི་ཐ་དད་པ་ནི་མེ་མ་ཡིན་པའི་རྒྱུ་མཚན་ཅན་ཡིན་ལ་མེས་སྐྱེད་
[141b.7]པའི་ཐ་དད་པ་ནི་མེའི་རྒྱུ་མཚན་ཅན་མ་ཡིན་ནམ། དེས་ན་ཇི་ལྟར་རྒྱུ་མེད་པ་ཅན་ཉིད་ཡིན་ཞེ་ན། འདི་ལ་དུ་བ་གཞན་ལ་ཡང་སོ་སོར་དུ་བ་ཉིད་ཁྱད་པར་ཡོད་པ་མ་ཡིན་ནོ་ཞེས་བཤད་ཟིན་ཏོ། །འདིར་འཐད་པའི་ཁྱད་པར་ཅི་ཞིག་ཡོད་ཅེ་ན། སྔོན་མེད་པ་ཡོད་པའི་མཚན་
[142a]
[142a.1]ཉིད་ཀྱི་སྐྱེ་བའི་རང་བཞིན་ལ་བརྟེན་ནས་དེ་དང་འདྲ་བ་ལས་དེ་དང་འདྲ་བར་སྐྱེ་བར་བཤད་ལ། ཐ་དད་པ་ནི་རྗེས་སུ་འགྲོ་བ་དང་ལྡོག་པ་མེད་པར་བཤད་དོ། །གལ་ཏེ་དུ་བས་བསྐྱེད་པའི་དུ་བ་ཡང་དུ་བ་ཁོ་ན་ཡིན་ལ། མེས་བསྐྱེད་པ་ཡང་ཡིན་ན་ཐ་དད་པ་རྒྱུ་མེད་པ་ནི་
[142a.2]མ་ཡིན་ནོ། །དེས་ན་མེ་མ་ཡིན་པ་ལས་སྐྱེས་པ་ལ་ཡང་ཅི་སྟེ་འགྱུར་ཞེ་ན། མ་ཡིན་ཏེ་རྒྱུན་ཉིད་ཀྱི་རྒྱུ་ལ་ལྟོས་ནས་ཇི་སྐད་བཤད་པའི་རྣམ་པ་བསྟན་པའི་ཕྱིར་རོ། །དུ་བ་ཙམ་གྱི་རྒྱུ་ནི་དུ་བའི་རྒྱུན་གྱི་རྒྱུར་འགྱུར་རོ། །དེ་ལྟ་བུའི་དུ་བའི་རྒྱུན་གྱི་རྒྱུ་ལ་ནི་འབྲས་བུའི་ཆོས་ཇི་སྐད་
[142a.3]བཤད་པ་ལས་འདའ་བ་མེད་དོ། །སྐད་ཅིག་ནི་སྐད་ཅིག་གཞན་གྱི་རྒྱུར་མི་འགྱུར་རོ། །དུ་བས་བསྐྱེད་པའི་དུ་བ་ཇི་ལྟ་བུར་གྱུར་པ་དེ་ལྟ་བུའི་སྐྱེད་པར་བྱེད་པ་ཉིད་ནི་མེ་ལས་མི་ལྡོག་གོ། །འདི་ལྟར་རེ་ཞིག་དུ་བའི་རྣམ་པ་ནི་མེས་སྐྱེད་པར་བྱེད་པ་ཁོ་ནའོ། །གལ་ཏེ་དེའི་དུས་དང་
[142a.4]ཡུལ་དག་ཏུ་ཡང་འགྱུར་བ་ཡིན་པ་དེ་ལྟ་ན་ཡང་སྐྱེད་པར་བྱེད་པ་ཡིན་ནོ། །དུ་བས་དུ་བ་སྐྱེད་པར་བྱེད་པ་ན་མེས་ཀྱང་དུ་བ་སྐྱེད་པར་བྱེད་པ་ཁོ་ནའོ། །དེས་ན་ཡུལ་དེ་དང་དུས་དེར་ཡང་སྐྱེད་པར་བྱེད་པའི་ནུས་པ་དང་བྲལ་བ་མ་ཡིན་ནོ། །གལ་ཏེ་སྐད་ཅིག་དེས་བསྐྱེད་པར་མེས་མ་
[142a.5]བསྐྱེད་པ་མ་ཡིན་ནམ་བདེན་ཏེ། མེ་གཞན་གྱིས་བསྐྱེད་པ་ཡང་སྐྱེད་པར་བྱེད་པ་མ་ཡིན་པ་ཁོ་ནའོ། །འོན་ཀྱང་རྒྱུན་གྱི་རྒྱུ་དུ་བའི་རྣམ་པའི་རྒྱུ་ལས་མི་འདའ་བ་དེས་ན་དུ་བ་མེ་ལ་མི་འཁྲུལ་པར་བརྗོད་དོ། །རྒྱུན་ཡུན་རིང་དུ་གནས་ཀྱང་དེ་དང་ལྡན་པ་འཕེན་པར་བྱེད་པའི་འབྲས་བུ་སྐྱེད་
[142a.6]པར་བྱེད་པ་གང་ཡིན་པ་དེའི་རྒྱུ་ཅན་ལས་འདའ་བ་ནི་མ་ཡིན་ནོ། །ཉེས་པ་གཞན་ཡང་བཤད་པ་ནི་ཐམས་ཅད་ལས་དངོས་པོ་ཐམས་ཅད་སྐྱེ་བར་འགྱུར་རོ། །འདི་སྐད་བརྗོད་པ་ཡིན་ཏེ། དུ་བ་ཉིད་ཀྱིས་ཀྱང་ཁྱད་པར་མེད་པའི་དུ་བ་མ་ཡིན་པ་ལས་ཀྱང་འབྱུང་ན་ནི་དེའི་ཚེ་བུམ་
[142a.7]པ་ལ་སོགས་པ་མེ་ལས་ཐ་དད་དོ་ཅོག་དུ་བ་སྐྱེད་པར་བྱེད་པ་ལ་ཆུ་འཛིན་པ་ལ་སོགས་པ་མེ་མ་ཡིན་པས་བསྒྲུབ་པར་བྱ་བ་ཡང་མེས་བྱེད་པར་འགྱུར་རོ། །གལ་ཏེ་གང་གིས་གདོན་མི་ཟ་བར་བྱེད་པར་འགྱུར་བ་མེ་མ་ཡིན་པའི་བསྒྲུབ་བྱ་སྒྲུབ་པར་བྱེད་པ་འམ་མེ་མ་ཡིན་པ་མེའི་
[142b]
[142b.1]བསྒྲུབ་བྱ་སྒྲུབ་པར་བྱེད་པ་ངེས་པ་ནི་མེད་དོ་ཞེ་ན། མེད་མོད་ངེས་པར་མེད་པ་འགའ་ཞིག་ནི་བྱེད་པར་འགྱུར་རོ། །འོན་ཏེ་འགའ་ཡང་མི་བྱེད་ན་ནི་འོ་ན་རང་གི་བསྒྲུབ་བྱ་ལ་ངེས་པའི་དངོས་པོ་རྣམས་གཞན་གྱི་བསྒྲུབ་བྱ་མི་བྱེད་པར་འགྲུབ་བོ། །འོན་ཏེ་འདི་རང་གི་བསྒྲུབ་བྱ་ལ་ཡང་རང་བཞིན་
[142b.2]འདི་ཁོ་ནའོ་ཞེ་ན། དེས་རྒྱུ་མེད་པ་ཅན་དུ་འགྱུར་རོ། །དེས་ན་འདི་རང་གི་བསྒྲུབ་བྱ་སྒྲུབ་པ་ལྟར་གཞན་གྱི་བསྒྲུབ་བྱ་ཡང་སྒྲུབ་པར་ཐལ་བས་ན་ཐམས་ཅད་ལས་ཐམས་ཅད་སྐྱེ་བར་འགྱུར་རོ། །དེ་ལྟ་ཡིན་དང་མི་འདོད་པ་སྤོང་བར་འདོད་པ་དག་འདོད་པ་ཉིད་ཐོབ་པའི་འབྲས་བུས་
[142b.3]ཐ་སྙད་བྱེད་པར་མི་འགྱུར་རོ། །ཡང་ན་ཐམས་ཅད་ལས་ཐམས་ཅད་སྐྱེ་བ་མ་ཡིན་ནོ། །དེ་ལྟ་ན་ཡང་འབྲས་བུ་འཁྲུལ་པའི་རྒྱུ་རྣམས་ལས་གཞན་ལས་མི་སྐྱེ་བར་མ་ངེས་པས་ན་གང་གིས་འདི་འདོར་བ་དང་། ལེན་པ་ངེས་པའི་ཡུལ་ཅན་དུ་ངེས་པར་འགྱུར་བ་མི་འདོད་པ་འདོད་པའི་
[142b.4]འབྲས་བུ་ཅན་དུ་མི་འགྱུར་བའམ། འདོད་པ་མི་འདོད་པའི་འབྲས་བུ་ཅན་དུ་མི་འགྱུར་རོ་ཞེས་ག་ལས་ཡིན། དེ་ལྟ་བས་ན་རྒྱུ་ཐ་དད་པ་ལས་ནི་འབྲས་བུ་ཐ་དད་པ་ཡིན་ལ། རྒྱུ་ཐ་དད་པ་མ་ཡིན་པ་ལས་ནི་འབྲས་བུ་ཐ་དད་པ་མ་ཡིན་པ་ཡིན་ནོ། །དེ་ལྟར་ཞར་ལ་བྱུང་བ་ཉེ་
[142b.5]བར་བསྡུས་ཏེ། དེ་བས་ན་ཞེས་སྐབས་ཉིད་དུ་མཇུག་སྡུད་དོ། །དུ་བ་ནི་མཐོང་བའི་རྣམ་པ་དང་རིགས་མི་མཐུན་པའི་དོན་ལས་མི་འབྱུང་སྟེ། རྒྱུ་མེད་པ་ཉིད་དུ་ཐལ་བར་འགྱུར་བའི་ཕྱིར་རོ། །འགའ་ཞིག་ཡོད་པ་དང་ལྡན་པ་ན་སྔོན་མ་བྱུང་བ་ཡོད་པ་ནི་རྒྱུ་དང་ལྡན་པ་མ་
[142b.6]ཡིན་ནོ། །གང་གི་ཚེ་འདི་དོན་ཡོད་པ་ན་ཡང་ཡོད་པར་འགྱུར་ན་ནི་དེའི་ཚེ་འདིའི་ཡོད་པ་དེ་སྔོན་མ་བྱུང་བ་མ་ཡིན་ནོ། །གཞན་ལས་དུ་བ་གཞན་འབྱུང་བ་ཡིན་ཡང་གཞན་ཉིད་ནི་ཡན་ལག་མ་ཡིན་ཏེ། གདོན་མི་ཟ་བར་ཡོད་པ་ཡིན་པའི་ཕྱིར་རོ། །དུ་བ་ཉིད་ཡོད་པའི་ཕྱིར་ན་སྔོན་
[142b.7]མེད་པའི་རང་བཞིན་ཉིད་ཉམས་པ་དེས་ན། སྐྱེ་བའི་དོན་འཇིག་པར་རྒྱུ་མེད་པ་ཉིད་དོ། །མེ་ལ་སོགས་པའི་སྔོན་རོལ་དུ་རྟོགས་པ་མེད་པའི་དུ་བ་དེ་སྔོན་དུ་འགྲོ་བས་རང་གི་ངོ་བོ་ཐོབ་པར་རྟོགས་པས་ནི་དོན་གཞན་ལས་འབྱུང་བ་སེལ་བའི་ཕྱིར་མཐོང་བའི་རྣམ་པ་དང་
[143a]
[143a.1]རིགས་མི་མཐུན་པ་ལས་མི་འབྱུང་བར་གྲུབ་པས་འཁྲུལ་པ་མེད་པར་གྲུབ་བོ། །གལ་ཏེ་མཐོང་བའི་རྣམ་པ་དང་རིགས་མི་མཐུན་པ་ལས་མི་འབྱུང་བ་ཞེས་བྱ་བའི་རྣམ་པ་འདི་ལྟ་བུར་གྲུབ་ན། མི་འཁྲུལ་པར་རྟོགས་པ་ཞིག་ན། འདི་ནི་མེ་མ་ཡིན་པའི་
[143a.2]རང་གི་མཚན་ཉིད་མཐའ་དག་མ་མཐོང་བ་སྲིད་པ་མ་ཡིན་ནོ། །ཅི་སྟེ་ལན་ཅིག་ཉིད་སྔོན་མ་བྱུང་བ་ཡོད་པར་དམིགས་པས་འབྲས་བུ་ཉིད་དུ་རྟོགས་ན་དེ་ནི་མེད་དེ། མེ་མ་ཡིན་པ་ལ་ཡང་དེ་བཞིན་དུ་མཐོང་བའི་ཕྱིར་རོ། །འོན་ཏེ་དེ་ལྟར་ན་རྒྱུ་མེད་པར་ཐལ་བར་འགྱུར་ཏེ། དེ་གཉི་
[143a.3]གར་ཡང་དུ་བ་སྔོན་མེད་པ་མ་ཡིན་པའི་ཕྱིར་རོ་ཞེ་ན། ཤིན་ཏུ་གསལ་བར་ལན་ཅིག་མཐོང་བའི་འབྲས་བུར་མི་འགྲུབ་སྟེ། རྒྱུ་མེད་པ་ཡིན་ཡང་དེའི་རྗེས་ཐོགས་སུ་ཡོད་པའི་ཕྱིར་རོ། །དེས་ན་ཅི་འདི་གང་ལས་དེའི་རྒྱུ་ཅན་དུ་འགྱུར་བ་དེ་ཉིད་ལས་རྗེས་ཐོགས་སུ་བྱུང་བ་ཡིན་
[143a.4]ནམ། དེ་སྟེ་གང་གིས་རྒྱུ་མེད་ཀྱང་འདིའི་དེ་མ་ཐག་ཏུ་ཡོད་པར་འགྱུར་བ་གཞན་ཡང་འདི་ལྟར་འགྱུར་བ་ཡིན་ཞེས་ཐེ་ཚོམ་ཟ་བ་ན། གསལ་བ་གཞན་ལ་མེད་པར་དམིགས་པ་ལ། ལྟོས་པར་བྱ་བ་ཡིན་ནོ། །དེས་ན་ཐམས་ཅད་མཁྱེན་པ་མ་ཡིན་པས་འབྲས་བུ་ཉིད་དུ་
[143a.5]གཏན་ལ་ཕེབས་པ་མ་ཡིན་ནོ་ཞེས་དོགས་ན། དེ་ལྟ་མ་ཡིན་ན་ཞེས་སྨོས་ཏེ། རྒྱུ་མེད་པ་ཉིད་ཡིན་ན། རྟག་ཏུ་ཡོད་པ་འམ་མེད་པར་འགྱུར། རྒྱུ་མེད་པའི་དོན་དང་འབྲལ་བའི་ཡོད་པའམ། མེད་པ་གང་ཡིན་པ་དེ་ནི་རྟག་པ་ཉིད་དུ་འགྱུར་གྱི་རེས་འགའ་བར་ནི་མ་ཡིན་ནོ། །
[143a.6]མེ་མ་ཡིན་པ་ལས་འབྱུང་བ་རྒྱུ་མེད་པར་འགྱུར་བ་ཉིད་དོ། །གང་གིས་ལན་ཅིག་དེ་ལྟར་མཐོང་བ་ཡང་དེ་ལྟར་འགྱུར་སྲིད་པའི་ཕྱིར་མེའི་རྒྱུ་ཅན་དུ་མི་ངེས་པར་འགྱུར་བ་དེ་ལྟ་ན་ནི་སྲིད་པ་ཡང་མ་ཡིན་ནོ། །གང་གིས་འདི་འགའ་ཞིག་གི་རྗེས་ཐོགས་སུ་འགྱུར་བ་རྒྱུ་མེད་པར་
[143a.7]ཡོད་པ་ནི་སྔོན་མེད་པར་འཐད་པ་མ་ཡིན་ནོ། །གལ་ཏེ་འདིའི་དེར་འགྱུར་ན་ནི་རྟག་པ་ཁོ་ནར་འགྱུར་བའམ། ཡང་ན་ནི་ནམ་ཡང་མ་ཡིན་པར་འགྱུར་གྱི་འདི་སྔོན་མེད་པ་ལས་མེ་ཡོད་ན་འགྱུར་བ་ནི་མ་ཡིན་ནོ། །དེས་ན་གང་ཞིག་དེ་ལྟར་དམིགས་པ་དེ་ནི་མེའི་འབྲས་བུ་
[143b]
[143b.1]ཡིན་པའི་ཕྱིར་ཁོ་བོ་ཅག་གི་ལྟར་ན་མཐོང་བ་གཞན་ལ་ལྟོས་པའི་གོ་སྐབས་མེད་དོ། །ཡང་ཇི་ལྟར་ན་རྒྱུ་མེད་པ་ཡིན་ན་ཡོད་པ་དང་མེད་པ་དག་རྟག་པ་ཁོ་ནར་འགྱུར་ཞེ་ན་བཤད་པ། རྒྱུ་མེད་པའི་དོན་ནི་གཞན་ལ་མི་ལྟོས་པའི་ཕྱིར་རོ། །ལྟོས་པ་མེད་པའི་ཡོད་པ་དང་མེད་པ་རེས་
[143b.2]འགའ་བ་མ་ཡིན་པར་སྟོན་པས། རེས་འགའ་བ་ཉིད་ལྟོས་པས་བྱས་པར་སྟོན་པའི་ཕྱིར་དངོས་པོ་རྣམས་ནི་ཞེས་བྱ་བ་ཡིན་ནོ། །དུ་བ་དེ་ཞེས་བྱ་བ་ལ་སོགས་པ་ནི་འགྲེལ་པའོ། །དུ་བ་རྒྱུ་ལ་ལྟོས་པ་མེད་པ་ཡིན་ན་ནི་ནམ་ཡང་མི་འབྱུང་བར་མི་འགྱུར་ཏེ་གཏན་དུ་འབྱུང་བར་འགྱུར་
[143b.3]རོ། །རྒྱུ་མེད་པ་ཙམ་ཁོ་ནས་ནི་གཏན་དུ་འབྱུང་བ་མ་ཡིན་པས་ན་ནི་ཞེས་སྨོས་སོ། །གལ་ཏེ་རྒྱུ་མེད་པར་ཡོད་པ་ཡིན་ན་ནི་གཏན་དུ་ཡོད་པར་འགྱུར་རོ་ཞེས་བྱ་བའི་དོན་ཏོ། །གཏན་ཚིགས་བཤད་པ། དངོས་པོ་དེ་འབྱུང་བ་ལ་ཐམས་ཅད་དུ་མ་ཚང་བ་མེད་པའི་ཕྱིར་རོ། །དེས་ན་
[143b.4]ཇི་ལྟར་ཡོད་པར་འདོད་པའི་དུས་བཞིན་དུ་གཏན་དུ་དེ་ལྟར་འགྱུར་རོ། །དུས་གཞན་དུ་ཡང་འདི་ཡོད་པའི་ཡུལ་ཅན་གྱི་མ་ཚང་བ་ནི་མེད་དོ། །གལ་ཏེ་གང་ལས་དེའི་ཚེ་མེད་པར་འགྱུར་བ་འདིའི་མ་ཚང་བ་འགའ་ཞིག་ཡོད་ན་ནི་དེའི་ཚེ་ཡོད་པའི་དུས་བཞིན་དུ་འབྱུང་བར་མི་འགྱུར་རོ། །
[143b.5]ཇི་ལྟར་མ་ཚང་བ་མེད་ཅེ་ན་ལྟོས་པ་མེད་པའི་ཕྱིར་རོ། །འདི་ཡོད་པ་ནི་ཡིན་ལ་ལྟོས་པ་ཡང་ཡོད་པ་མ་ཡིན་པ་དེས་ན་གང་གིས་གཞན་གྱི་ཚེ་མ་ཚང་བས་མི་འབྱུང་བར་འགྱུར་བ་འདི་མ་ཚང་བ་ནམ་ཡང་ཡོད་པ་མ་ཡིན་ནོ། །གང་ཞིག་གཞན་ལ་ལྟོས་པ་ཞེས་བྱ་བར་འགྱུར་བ་དེའི་ནི།
[143b.6]ལྟོས་པར་བྱ་བ་ཡོད་པ་ནི་ཚང་བ་ཡིན་ལ་དེ་ལས་བཟློག་པ་ནི་བཟློག་པར་འགྱུར་གྱི་ལྟོས་པ་མེད་པ་ནི་མ་ཡིན་ནོ། །དེས་ན་དེ་ལྟར་རྒྱུ་མེད་པ་ལྟོས་པ་མེད་པའི་ཕྱིར་རོ། །རྟག་ཏུ་ཡོད་པར་བརྗོད་ནས་རྟག་ཏུ་མེད་པར་བཤད་པ་ནི་ཡང་ན་ནི་འདོད་པའི་དུས་དེའི་ཚེ་ཡང་འབྱུང་བར་མི་འགྱུར་རོ། །
[143b.7]དུས་གཞན་དུ་ན་རེ་ཞིག་འབྱུང་བ་མ་ཡིན་པ་ཁོ་ནའོ། །འདོད་པའི་དུས་སུ་ཡང་མེད་པར་ཐལ་བའི་ཕྱིར་ནི་རྟག་ཏུ་མེད་པར་འགྱུར་རོ། །མེད་པའི་གཏན་ཚིགས་བཤད་པ་ནི་མེད་པའི་དུས་དང་ཁྱད་པར་མེད་པའི་ཕྱིར་རོ་ཞེས་བྱ་བ་ཡིན་ནོ། །དུས་གང་དུ་དངོས་པོའི་རྒྱུ་ཡོད་པ་དེར་དེ་
[144a]
[144a.1]འགྱུར་བའི་ཕྱིར་དུས་གཞན་དུ་མི་འབྱུང་བ་ཡིན་ན་རྒྱུ་མེད་པ་ལ་ནི་ཡོད་པའི་དུས་སུ་རྒྱུ་མེད་ལ་མེད་པའི་དུས་སུ་ཡང་མེད་པའི་ཕྱིར་ན་ཐམས་ཅད་མེད་པའི་ཕྱིར་རོ། །དེས་ན་འདི་ཇི་ལྟར་མེད་པའི་དུས་སུ་མི་འབྱུང་བ་དེ་བཞིན་དུ་ཡོད་པའི་དུས་སུ་ཡང་མི་འགྱུར་བའམ།
[144a.2]དེ་དང་འདྲ་བར་གཞན་གྱི་ཚེ་ཡང་འབྱུང་བར་འགྱུར་རོ། །དེས་ན་རྟག་ཏུ་ཡོད་པའམ་མེད་པར་འགྱུར་རོ། །གལ་ཏེ་རྒྱུ་དང་ལྡན་པར་ཐལ་བའི་ཕྱིར་རྒྱུ་མེད་པ་དུས་ལ་ཡང་ལྟོས་པ་མེད་པ་མ་ཡིན་ནམ། དེ་ཇི་ལྟར་དངོས་པོ་དང་དངོས་པོ་མེད་པ་དག་དུས་ཀྱི་ཁྱད་པར་གྱིས་ཁྱད་པར་
[144a.3]མེད་པས་རྟག་ཏུ་ཡོད་པའམ་མེད་པར་བརྗོད་ཅེ་ན། དུས་ཆོས་དང་ལྡན་པས་རང་ཉིད་ཀྱིས་བསྟན་པ་ནི་མ་ཡིན་ཏེ། དེ་ནི་ཉེ་བར་མཚོན་པ་ཡིན་པའི་ཕྱིར་རོ། །དེས་ན་དེས་ཉེ་བར་མཚོན་པའི་དངོས་པོ་དང་དངོས་པོ་མེད་པ་ཉིད་ཁྱད་པར་མེད་པ་ཡིན་ནོ། །རྒྱུ་མེད་པ་འདི་ལ་ནི་ལྟོས་པར་
[144a.4]བྱ་བའི་རྒྱུ་མེད་པ་དེས་ན། ད་ལྟར་བཞིན་ཐམས་ཅད་དུ་འགྱུར་བའམ། ཡང་ན་སྔོན་བཞིན་ནམ་ཡང་མ་ཡིན་ནོ། །གལ་ཏེ་རྒྱུ་དང་ལྡན་པ་དག་ནི་དེ་ཡོད་ན་རང་གི་ངོ་བོ་འཐོབ་ལ། དེ་མེད་ན་མ་ཡིན་པའི་ཕྱིར་རེས་འགའ་བ་ཉིད་དེ། རེས་འགའ་ཁོ་ན་རྒྱུ་བྱེད་པ་ཡོད་པའི་ཕྱིར་རོ། །
[144a.5]དེ་ལྟ་མ་ཡིན་ན་ནི་ལྟོས་པ་མེད་པ་རེས་འགའ་བ་མ་ཡིན་པའི་སྒྲུབ་བྱེད་དུ་མི་འགྱུར་རོ། །དེས་ན་རྒྱུ་མེད་པ་རྒྱུ་རེས་འགའ་བ་ཉིད་ཀྱིས་དེ་ལྟར་འགྱུར་བ་མ་ཡིན་ཏེ། དེ་ལྟར་ན་ཇི་ལྟར་རང་གི་ངོ་བོ་རྒྱུ་མེད་པ་ཡིན་པ་དེ་བཞིན་དུ་རེས་འགའ་བ་ཡང་འགྱུར་རོ། །འདི་རེས་འགའ་བ་
[144a.6]ཉིད་ཀྱི་རིགས་པ་ཅི་ཡོད་ཅེ་ན། རང་གི་ངོ་བོ་ལ་ཡང་བརྒལ་ཞིང་རྟག་པ་མཚུངས་སོ། །དེ་ལྟར་རྣམ་པར་འཇོག་པར་བྱེད་པ་མེད་པ་ཞེས་བྱ་བ་ཉིད་ཀྱིས་ནི་མི་འཐད་པ་ཉིད་མ་ཡིན་ནོ། །དེ་ལྟར་ན་རྟོག་གེའི་སྤྱོད་ཡུལ་དུ་མི་འགྱུར་གྱི། དེ་ཙམ་གྱིས་མེད་པ་ཉིད་དུ་མི་འགྱུར་རོ། །ལྟོས་
[144a.7]པ་རེས་འགའ་བའི་སྒྲུབ་བྱེད་དུ་སྨྲས་པ་འདི་རེས་འགའ་བའི་ཁྱབ་བྱར་འགྱུར་ན། ཁྱབ་པར་བྱ་བ་མེད་པས་ནི་ཁྱབ་པར་བྱེད་པ་མེད་པ་མ་ཡིན་ནོ་ཞེ་ན་བརྗོད་པ། དགོངས་པ་འདི་ཡིན་ཏེ། དངོས་པོ་ལྟོས་པའི་དེ་ཡོད་ན་རང་གི་ངོ་བོ་ཡོད་པ་ལ་ལྟོས་པའི་དོན་ལྷག་པ་གཞན་ནི་མེད་
[144b]
[144b.1]དོ། །དེས་ན་རྒྱུ་མེད་པའི་ཕྱིར་འདི་མི་ལྟོས་སོ་ཞེས་བྱ་བ་ནི་གལ་ཏེ་སྔར་རང་ཉིད་མ་བྱུང་བ་འགའ་ཞིག་ཡོད་ན། རང་གི་ངོ་བོ་བྱུང་བ་མ་ཡིན་ན་དེ་ལྟ་ན་འདི་ལྟོས་པ་མེད་པར་འཐད་པ་ཡིན་ནོ། །དེ་ཡང་གལ་ཏེ་རྟག་ཏུ་ཡོད་པ་ཉིད་དམ། ཡང་ན་ནམ་ཡང་མ་ཡིན་པ་དེ་ལྟར་འཐད་པར་འགྱུར་
[144b.2]རོ། །གང་གི་ཚེ་རེས་འགའ་འབྱུང་བ་དེའི་ཚེ་གལ་ཏེ་སྔོན་མེད་པ་དངོས་པོ་གཞན་གྱིས་འགྱུར་བར་བྱས་པས་དངོས་པོ་དེ་ཉིད་འདིའི་རྒྱུ་ཡིན་པའི་ཕྱིར་རྒྱུ་མེད་པར་མི་འགྱུར་རོ། །དེས་ན་དེ་ཙམ་གྱི་རང་བཞིན་ཡིན་པའི་ཕྱིར་རྒྱུ་ཡིན་པས་དེ་རྒྱུར་གྱུར་པས་དངོས་པོ་གཞན་ལས་ཡོད་པར་སྲིད་
[144b.3]པ་སེལ་ཏོ། །དེ་ལས་གྲུབ་པས་ཡོད་པ་དེ་གལ་ཏེ་གཞན་ལས་ཀྱང་འབྱུང་བའི་ནི་རྒྱུ་མེད་པ་ཁོ་ནར་འགྱུར་རོ། །དེས་ན་མི་འབྱུང་བ་ཁོ་ན་འམ། ཡང་ན་གཏན་དུ་འགྱུར་ཏེ། དེ་ལྟ་ཡིན་ན་འདི་དེ་ལྟ་བུ་ཡིན་པར་གསལ་བར་འགྱུར་རོ། །གང་གི་ཚེ་དངོས་པོ་གཞན་ཉེ་བ་ན་འབྱུང་བ་
[144b.4]མ་ཡིན་པ་དེའི་ཚེ་ཡང་ཡུལ་དང་དུས་གང་དུ་འབྱུང་བའི་ཡུལ་དང་དུས་དེ་རྒྱུ་ཅན་དུ་འགྱུར་རོ། །རྒྱུ་མེད་པའི་རེས་འགའ་བའི་དངོས་པོ་ཡང་རྒྱུ་མེད་པ་ཡིན་ནོ་ཞེས་སྨྲས་པས་ནི། རྒྱུ་མེད་པར་རྒྱུ་དང་ལྡན་པ་ཡིན་ན་ཞེས་བརྗོད་པར་འགྱུར་རོ། །འདི་ལྟར་སྔོན་མེད་པ་དེ་གང་ཡོད་ན་
[144b.5]འབྱུང་བ་དེ་ཉིད་འདི་སྒྲུབ་པར་བྱེད་པ་ཡིན་ཏེ། དོན་གྱི་ནུས་པ་ནི་དེ་ལས་གཞན་མ་ཡིན་ནོ་ཞེས་བསྟན་ཟིན་ཏོ། །གལ་ཏེ་དོན་དེ་མེད་པར་སྔར་ཡང་ཡོད་ན་དེ་ལྟ་ན་དེ་ན་དེའི་རྒྱུ་ཅན་མ་ཡིན་པར་འགྱུར་བ་ཡིན་ནོ། །སྔར་གྱི་དངོས་པོའམ་སྔར་གྱི་དུས་ཀྱང་འདིའི་རྒྱུ་མ་ཡིན་པའི་ཕྱིར་
[144b.6]ཆེས་སྔ་བར་འགྱུར་བས་རྟག་ཏུ་ཡོད་པར་འགྱུར་རོ། །དེ་བཞིན་དུ་གལ་ཏེ་ཡོད་ན་ཡང་མ་བྱུང་ན་དེ་བཞིན་དུ་སྔ་མ་སྔ་མའི་དོན་ཀྱང་། འདིའི་རྒྱུ་མ་ཡིན་པའི་ཕྱིར། རྟག་ཏུ་མེད་པ་ཁོ་ནའོ། །གལ་ཏེ་ནུས་པ་དང་བྲལ་བ་ན་གང་གི་ཚེ་དེ་ཡོད་པ་ན་ཡོད་པ་དེའི་ཚེ་ཇི་ལྟར་དེ་ཙམ་
[144b.7]ཁོ་ན་ས་དེའི་རྒྱུ་ཅན་ཡིན། དེའི་ནུས་པ་ནི་འདི་ཁོ་ན་སྟེ། འདི་དང་པོ་མེད་པ་ཉིད་ལས་དེ་ཉེ་བས་ཡོད་པ་གང་ཡིན་པའོ་ཞེས་བཤད་ཟིན་ཏོ། །རྒྱུ་མེད་པ་ཡང་ཡོད་ན་ཡོད་པ་མ་བཀག་པས་ནུས་པ་ནི་འདི་ཁོ་ནའོ་ཞེས་བརྗོད་པར་མི་ནུས་མ་ཡིན་ནམ་ཞེ་ན། ཇི་ལྟར་ཡོད་པ་མ་
[145a]
[145a.1]བཀག །འདི་ལྟར་དེ་ཡོད་པ་སྔར་ཡང་ཡོད་པའམ། དེ་ཡོད་ཀྱང་མེད་ན་ནི་དེའི་རྒྱུ་ཅན་མ་ཡིན་པར་འགྱུར་རོ། །སྔར་ཡང་ཡོད་པ་ན་ཡོད་པས་སམ། མེད་པ་ཉིད་ཀྱིས་དངོས་པོ་ཐམས་ཅད་ལས་འདས་པའི་ཡོད་པ་དང་མེད་པ་ནི་རྟག་པ་ཉིད་དུ་ཐལ་བར་འགྱུར་རོ། །དེའི་ཕྱིར་
[145a.2]དངོས་པོ་ལྟོས་པ་མེད་པ་ནི་རྟག་ཏུ་ཡོད་པའམ་མེད་པ་ཁོ་ནར་འགྱུར་རོ། །ལྟོས་པ་དང་བཅས་པ་ཉིད་ཀྱིས་དེ་དག་རེས་འགའ་བར་འཐད་པ་ཡིན་ནོ་ཞེས་བཤད་པ་ནི། དངོས་པོ་ལྟོས་པ་རྣམས་ནི་ཞེས་བྱ་བའོ། །རྒྱུ་མེད་པའི་ཕྱིར་ལྟོས་པ་མེད་པས་ཐམས་ཅད་ལས་འདའ་བར་བྱ་བ་
[145a.3]ཡིན་པའི་ཕྱིར་འདི་རེས་འགའ་ཡོད་པ་དང་མེད་པ་དག་ཏུ་འགྱུར་བ་མ་ཡིན་ནོ། །རེས་འགའ་བར་ནི་ལྟོས་པ་ཉིད་ཀྱིས་འགྱུར་བར་རིགས་སོ། །གང་ཞིག་དངོས་པོ་གཞན་ཡོད་ན་ནི་ཡོད་པའི་ཕྱིར་ལྟོས་པ་ཡོད་པ་དེ་ནི་རེས་འགའ་བར་འགྱུར་བ་ཡིན་ནོ། །གང་ཞིག་དངོས་པོ་གང་ཡོད་པའི་
[145a.4]དུས་དང་མེད་པའི་དུས་གང་ཡིན་པ་དེ་དག་ན་དངོས་པོ་དེ་འབྱུང་བ་ཡོད་པ་དེའི་ཡུལ་ཅན་གྱི་རུང་བ་དང་མི་རུང་བ་དང་ལྡན་པའི་ཕྱིར་རོ། །གང་གི་ཚེ་དངོས་པོ་དེའི་འབྱུང་བར་རུང་བ་དང་ལྡན་པ་ནི་དེ་ཡོད་པའི་དུས་ཡིན་ལ་དེ་ལས་ཟློག་པ་དང་ལྡན་པ་ནི་མི་རུང་བའི་དུས་ཡིན་པ་དེའི་ཚེ་འདི་ནི་
[145a.5]ཡོད་པའི་དུས་ཡིན་ལ་གཞན་དུ་ནི་མ་ཡིན་ནོ་ཞེས་རེས་འགའ་བར་འགྱུར་རོ། །དངོས་པོ་རང་ཉིད་ནི་ལྟོས་པ་འགའ་ཡང་ཡོད་པ་མ་ཡིན་ཏེ། མེད་པའི་ཕྱིར་རོ། །འོན་ཀྱང་དེ་སྐྱེད་པར་བྱེད་པའི་རྒྱུ་ཉེ་བར་ན་འདི་རང་གི་རྒྱུས་མགུལ་ནས་དྲངས་པ་ཉིད་ཀྱིས་ཡོད་པར་བྱེད་པར་ཟད་དོ། །དེས་
[145a.6]ན་འདི་གང་གི་ཚེ་རྒྱུ་ཡོད་པ་དེའི་ཚེ་འབྱུང་ལ་གང་གི་ཚེ་མེད་པ་དེའི་ཚེ་ནི་མི་འབྱུང་བའི་ཕྱིར་རེས་འགའ་བ་ཉིད་དོ། །རུང་བའི་དངོས་པོ་དང་ལྡན་པ་དང་མི་ལྡན་པ་དག་གིས་ནི་དུས་ཀྱི་རུང་བ་དང་མི་རུང་བ་ཉིད་བསྟན་ཏོ། །ཡང་ན་དུས་ཉིད་རང་གི་ཆོས་ཀྱིས་དེ་སྐད་བསྟན་ཏེ་རིགས་པ་བསྟན་པའི་ཕྱིར་རོ། །
[145a.7]གལ་ཏེ་དེ་ཡོད་པ་དང་མེད་པའི་དུས་དག་ནི་དེའི་ཡུལ་ཅན་གྱི་རུང་བ་དང་ལྡན་པ་མ་ཡིན་ན་དེའི་ཚེ་ཡོད་པ་དང་མེད་པའི་ཡུལ་དང་དུས་དག་ན་དེ་དང་ལྡན་པ་དང་མི་ལྡན་པ་དག་ཏུ་ངེས་པ་མི་འཐད་དོ། །གཏན་ཚིགས་བརྗོད་པས་ཁྱད་པར་བཤད་པ་ནི་རུང་བ་དང་མི་རུང་བ་ཉིད་འདྲ་བ་ཅན་དག་
[145b]
[145b.1]ལ་ནི་ཞེས་བྱ་བའོ། །རུང་བ་དང་མི་རུང་བའི་དངོས་པོ་ནི་རུང་བ་དང་མི་རུང་བ་ཉིད་ཀྱིས་ཁྱད་པར་དུ་གྱུར་པའི་ཕྱིར་རོ་སྙམ་དུ་དགོངས་སོ། །དངོས་པོ་རུང་བ་ཉིད་དེ་ཡང་དོན་དེ་ལ་རྒྱུ་ཉིད་དོ། །དེས་ན་དེ་ལྟར་དངོས་པོ་ལྟོས་པ་རྣམས་རེས་འགའ་བར་འགྱུར་ཏེ་ཞེས་སྐབས་བརྩམས་ཏེ། རྒྱུར་
[145b.2]མངོན་པར་འདོད་པའི་རུང་བ་ཉིད་ཡོད་པ་དང་མེད་པ་དག་གིས་དུས་ངེས་པ་དང་ལྡན་པར་བརྗོད་དོ། །དེ་ལྟ་ན་ཡང་རེས་འགའ་བ་ཉིད་ལྟོས་པས་བྱས་པར་བརྗོད་པར་ཇི་ལྟར་འགྱུར་ཞེ་ན། དེའི་ཕྱིར་ཞེས་སྨོས་ཏེ། རུང་བ་དང་མི་རུང་བ་ཉིད་ཇི་སྐད་བཤད་པའི་གཏན་ཚིགས་ཀྱི་ཕྱིར། དེ་
[145b.3]ཡོད་པ་ན་མེད་པའི་ཕྱིར་ཡུལ་དང་དུས་འགའ་ཞིག་སྤངས་ནས་དེ་ཡོད་པ་ན་ཡོད་པའི་ཕྱིར་ཡུལ་དང་དུས་གཞན་དག་ན་ཡོད་པའི་དངོས་པོ་ནི་དེ་དག་ལ་ལྟོས་པ་དང་བཅས་པ་ཞེས་བྱ་བ་ཡིན་ནོ། །འདི་སྐད་བཤད་པ་ཡིན་ཏེ་གཞན་ན་མེད་པའི་དོན་འགའ་ཞིག་ཡོད་ན་ཡོད་པ་གང་ཡིན་
[145b.4]པ་དེ་ཉིད་ལྟོས་པར་བརྗོད་དོ། །འགའ་ཞིག་ཡོད་ན་ཡོད་པ་དེ་ཡང་ཡོད་པར་འདོད་པ་ཙམ་ལ་ནི་མ་ཡིན་གྱི། འོན་ཀྱང་ཡོད་པ་དང་མེད་པའི་དུས་དག་ན་རུང་བ་དང་མི་རུང་བ་དག་ལས་སོ། །དེས་ན་དེའི་དབང་གིས་དེ་ལྟར་འགྱུར་བའི་དངོས་པོ་ནི་དེ་ལ་ལྟོས་པ་དང་བཅས་པར་བརྗོད་
[145b.5]དོ། །དེས་ན་ལྟོས་པ་དང་བཅས་པ་རེས་འགའ་གནས་པའི་ཕྱིར་རེས་འགའ་བ་ཡིན་ནོ། །དེ་ལྟར་གང་གིས་ལྟོས་པར་འགྱུར་བ་དེ་བསྟན་ནས་འདིའི་རང་བཞིན་ཇི་ལྟ་བུར་གྱུར་པ་རེས་འགའ་བའི་བདག་ཉིད་ཡིན་པ་དེ་ཉེ་བར་འགོད་པ་ནི། འདི་ལྟར་ཞེས་བྱ་བ་ཡིན་ནོ། །འགའ་
[145b.6]ཞིག་སྤངས་ནས་གཞན་ན་ཡོད་པ་ཞེས་བྱ་བ་གང་ཡིན་པ་དེ་ཉིད་ལྟོས་པ་ཡིན་པར་བརྗོད་དོ། །ཐམས་ཅད་དུ་གཏན་ཡོད་པའམ་མེད་པ་ལ་ནི་ལྟོས་པའི་དོན་མི་རུང་བའི་ཕྱིར་རོ། །གང་ཞིག་གང་སྤངས་པ་གང་ན་ཡོད་པ་དེ་ནི་དེ་ལ་མི་ལྟོས་ན་དེར་ངེས་པ་མི་སྲིད་དོ་ཞེས་བཤད་པ་ནི་དེ་
[145b.7]དག་གིས་བྱས་པའི་ཞེས་བྱ་བའོ། །གང་ཞིག་གང་གིས་བྱས་པའི་ཕན་པ་ལ་མི་ལྟོས་པ་དེ་ནི་གཞན་ན་མེད་པ་སྔོན་དུ་འགྲོ་བ་ཅན་དེར་ཡོད་པའི་ངེས་པ་མི་རུང་བའི་ཕྱིར་དེ་ལྟར་ཡོད་པ་ཉིད་ལྟོས་པ་ཡིན་ནོ་ཞེས་རིགས་སོ། །དེ་ལ་ལྟོས་པ་དང་རེས་འགའ་བ་ཞེས་བྱ་བ་ནི་དོན་གཞན་མ་
[146a]
[146a.1]ཡིན་ནོ། །དེ་ཉིད་ཀྱི་ཕྱིར་འདི་ཁྱབ་པར་བྱ་བ་ཉིད་དུ་ཉེ་བར་བཀོད་པ་ནི་མ་ཡིན་གྱི། འོན་ཀྱང་དེ་ཉིད་རེས་འགའ་བ་ཡིན་ནོ། །དེ་བས་ན་རྒྱུ་མེད་པ་ཉིད་ཀྱིས་ལྟོས་པ་མེད་པ་དེ་ལྟོས་པ་དང་བྲལ་བ་ཉིད་ཀྱིས་རེས་འགའ་བ་མ་ཡིན་པའི་ཕྱིར་རྟག་ཏུ་ཡོད་པའམ་མེད་
[146a.2]པར་འགྱུར་རོ། །འོ་ན་ཅིའི་ཕྱིར་དགོངས་པ་བརྗོད་པ་ན་རྒྱུ་མེད་པ་ཉིད་ཀྱིས་འདི་གཞན་ཡོད་པ་ལས་འདའ་བས་རྟག་ཏུ་ཡོད་པ་དང་མེད་པར་བསྟན་པར་བྱ་བ་ཡིན་ཞེས་བརྗོད་ཅེ་ན། དགོངས་པ་འདི་མ་བརྗོད་ན་གང་གིས་དེ་ལྟར་ཡོད་པ་ཉིད་ལྟོས་པར་བརྗོད་པ་རུང་བ་ཉིད་ཀྱི་དབང་གིས་དེ་
[146a.3]ཡུལ་དང་དུས་གཞན་སྤངས་ནས་གཞན་ན་ཡོད་པ་ཞེས་བྱ་བ་དེ་ཉིད་མི་འགྲུབ་བོ། །དེས་ན་སྐབས་འདིར་དགོངས་པ་འདི་ཉིད་ཡིན་ཏེ། ཡུལ་དང་དུས་གཞན་སྤངས་ནས་གཞན་ཡོད་པ་ནི་དེ་ལ་བརྟེན་ནས་ཡོད་པ་ཐོབ་པ་ཡིན་ཏེ། གཞན་དུ་ན་བཟློག་པར་འགྱུར་བའི་ཕྱིར་ཞེས་བྱ་བ་
[146a.4]གང་ཡིན་པའོ། །བསྟན་ཟིན་པའི་རིགས་པ་འདི་ཉིད་གཉུག་མའི་དོན་ལ་ཉེ་བར་སྡུད་པ་ནི། གཏན་ཚིགས་དེ་བས་ན་ཡུལ་དང་དུས་གཞན་ན་མེད་པར་ཡུལ་དང་དུས་དེ་དག་ན་ཡོད་པ་ནི་ཡུལ་དང་དུས་ངེས་པ་ཉིད་དོ། །གཏན་ཚིགས་དེའི་ཕྱིར་རོ། །ཡུལ་དང་དུས་དེའི་རྗེས་སུ་འགྲོ་བ་དང་
[146a.5]ལྡོག་པ་རྗེས་སུ་བྱེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །གང་དུ་ལན་ཅིག་མཐོང་ལ་ཞེས་བྱ་བ་ནི་དེའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་དེ་ལ་མཐོང་བ་ཡིན་ནོ། །དེས་ན་དེ་ལྟ་བུར་གྱུར་པའི་དེར་མཐོང་བ་ནི་ཡུལ་དང་དུས་དེར་ངེས་པར་དམིགས་པའི་རང་བཞིན་ཡིན་ཏེ། དེ་ལྟར་
[146a.6]ན་སྒྲུབ་པར་བྱེད་པ་དང་བཅས་པའི་རྗེས་སུ་འགྲོ་བ་དག་ཉེ་བར་བཀོད་པ་ཡིན་ནོ། །མ་ཚང་ན་མ་མཐོང་བ་ནི་ཞེས་བྱ་བས་ནི་རྒྱུ་ངེས་པར་འཛིན་པའི་ཕྱིར་དེས་ཞེས་བྱ་བ་ནི་གང་དུ་མཐོང་བ་དེ་བཟུང་ངོ་། །སྔོན་མེད་པ་ཡོད་པ་ཐོབ་པ་འདི་ནི་དུ་བ་འདི་དེས་བསྐྱེད་པ་ཡིན་ནོ་ཞེས་བྱ་བར་ངེས་པར་འགྱུར་རོ། །ཡུལ་དང་
[146a.7]དུས་དག་གིས་ནི་དངོས་པོ་མཚོན་པ་ཡིན་ནོ་ཞེས་བཤད་ཟིན་ཏོ། །འདི་ཡང་བསྐྱེད་པར་བྱ་བ་ཁོ་ན་ལ་ཡོད་པ་ཡིན་གྱི། རྒྱུ་མེད་པ་ལ་མ་ཡིན་ལ། བྱ་རོག་དང་ཏ་ལ་ལ་སོགས་པའི་ཚུལ་དུ་ཡང་མ་ཡིན་ནོ་ཞེས་བཤད་པ་ནི། གཞན་དུ་ན་ཞེས་བྱ་བའོ། །དངོས་པོ་སྐྱེད་པར་བྱེད་
[146b]
[146b.1]པའི་ཆ་འདིར་ལན་ཅིག་ཞུགས་པས་ཀྱང་གཞན་དུ་སྲིད་པ་མཐའ་དག་འགོག་པར་འགྱུར་རོ། །འདི་ལྟར་སྐྱེ་བ་ནི་འདི་ཉིད་ཡིན་པས་ན་སྐྱེ་བ་ཉིད་བྱ་རོག་དང་ཏ་ལའི་ཚུལ་དུའམ། རྒྱུ་མེད་པ་ཅན་དུ་ནི་མི་འགྱུར་རོ། །དེས་ན་རྒྱུ་དང་འབྲས་བུའི་དངོས་པོ་ནི་ལན་ཅིག་མཐོང་བས་རྟོགས་པར་བྱ་བ་
[146b.2]ཡིན་ནོ། །ལན་ཅིག་རྟོགས་པ་དེས་འཁྲུལ་པ་མེད་པར་ཡང་སྒྲུབ་པར་བྱེད་དོ་ཞེས་བཤད་པ་ནི། དེ་དེར་ངེས་པ་ཡིན་ན་ཞེས་བྱ་བའོ། །དེ་ལ་བརྟེན་ནས་ཡོད་པ་ཐོབ་པ་ཉིད་ཀྱིས་དེར་ངེས་པ་ཡིན་ནོ། །དེས་ན་འདི་འམ་དེའི་རིགས་ཅན་གཞན་ལས་ཀྱང་འབྱུང་ན་ནི་དེ་ལས་ཡོད་པ་ཐོབ་པ་མ་ཡིན་ནོ། །
[146b.3]དེ་ཙམ་གྱིས་ཆོག་པ་ཡང་མ་ཡིན་ཏེ། འོན་ཀྱང་རྟག་ཏུ་ཡོད་པ་དང་མེད་པར་ཡང་འགྱུར་ཏེ་དེས་ན་འཁྲུལ་པ་མེད་པར་འགྲུབ་བོ། །དེ་སྟེ་གཞན་ལས་བྱུང་ན་དེའི་ཕྱིར་འབྱུང་བ་ནི་དེ་དུ་བ་མ་ཡིན་པར་འགྱུར་རོ། །དེ་བཞིན་དུ་དེ་དང་རིགས་མི་མཐུན་པའི་དངོས་པོ་ཡང་དངོས་པོ་གཞན་ལ་ཡོད་པ་
[146b.4]འགྲུབ་པ་དང་འབྲེལ་པ་ནི་མ་ཡིན་ནོ། །དེས་ན་དུ་བའི་རང་གི་ངོ་བོ་གཅིག་ལས་ཐོབ་པར་རྟོགས་པ་ན། རིགས་པས་དངོས་པོ་གཞན་ལས་སྲིད་པ་མ་ཡིན་པར་འགྱུར་རོ། །ཅི་སྟེ་མཐོང་བ་ཡིན་ན་དེས་དེ་དུ་བ་ལས་གཞན་ཉིད་ཡིན་པར་འགྱུར་རོ། །རིགས་པ་ནི་སྐྱེ་བའི་རང་བཞིན་དཔྱད་པ་ཉིད་
[146b.5]དུ་བསྟན་ཟིན་ཏོ། །རིགས་པ་གཞན་ཡང་བཤད་པ་ནི་དུ་བ་ནི་དེས་བསྐྱེད་པའི་ཞེས་བྱ་བའོ། །དུ་བ་ནི་མེ་དེས་བསྐྱེད་པ་དེ་ཡོད་ན་འབྱུང་བའི་རང་བཞིན་གྱི་ཁྱད་པར་ཡིན་ནོ། །ཇི་ལྟར་དུ་བ་དེ་ཡོད་ན་ཡོད་པས་ཉེ་བར་མཚོན་པའི་རང་བཞིན་ཡིན་པ་དེ་བཞིན་དུ་རྒྱུ་མེད་ཀྱང་འབྲས་བུ་དུ་བའི་མཚན་
[146b.6]ཉིད་བསྐྱེད་པའི་རང་བཞིན་ཡིན་ནོ། །གང་ཡོད་ན་དུ་བའི་རང་གི་ངོ་བོ་ཡོད་པར་འགྱུར་བ་དེ་ནི་མེ་ཡིན་ནོ། །འདི་སྐད་བརྗོད་པ་ཡིན་ཏེ། དོན་རྣམས་ཀྱི་བསྐྱེད་བྱ་སྐྱེད་བྱེད་ཀྱི་དངོས་པོ་དང་། ནུས་པ་དང་། སྐྱེ་བ་ནི་རྗེས་སུ་འགྲོ་བ་དང་ལྡོག་པའི་རང་བཞིན་ཡིན་ནོ། །རྗེས་སུ་འགྲོ་བ་དང་ལྡོག་
[146b.7]པ་ཡང་དངོས་པོའི་རང་གི་ངོ་བོ་ལས་དངོས་པོ་གཞན་དུ་གྱུར་པ་མ་ཡིན་ཏེ། དེས་ན་མེ་ཡོད་ན་དུ་བ་ཡོད་པ་ཞེས་བྱ་བ་ནི་མེའི་རྣམ་པའི་རང་གི་ངོ་བོ་ཡོད་ན་དུ་བའི་རྣམ་པའི་རང་གི་ངོ་བོ་ཡོད་པ་ཡིན་ནོ། །དེ་བས་ན་དུ་བ་སྐྱེད་པར་བྱེད་པ་ཞེས་བྱ་བ་ནི་དུ་བ་རྗེས་སུ་འགྲོ་བ་དང་ལྡོག་པའི་རྗེས་སུ་
[147a]
[147a.1]བྱེད་པ་ཡིན་ལ། དུ་བའི་མེས་སྐྱེད་པར་བྱེད་པ་ཞེས་བྱ་བ་ཡང་དེའི་རྗེས་སུ་བྱེད་པ་ཁོ་ནའོ། །དེ་དག་ཀྱང་དེ་དག་ཉིད་ཀྱི་རང་བཞིན་ཡིན་པའི་ཕྱིར་དུ་བའི་རྣམ་པ་ཉིད་ནི་མེས་བསྐྱེད་པར་བྱ་བ་ཡིན་ལ། མེའི་རྣམ་པ་ཉིད་ཀྱང་དུ་བའི་སྐྱེད་པར་བྱེད་པ་ཡང་མེ་ཡིན་ནོ། །དེས་
[147a.2]ན་འདིར་དུ་བ་ཉིད་མེས་བསྐྱེད་པར་བྱ་བ་ཉིད་དང་། མེ་ཉིད་དུ་བ་སྐྱེད་པར་བྱེད་པ་ཡིན་པས་ན་མི་འཁྲུལ་པ་སྒྲུབ་པར་བྱེད་པ་གཞན་མི་དགོས་ཏེ། བྱས་པ་ལས་མི་རྟག་པ་ཉིད་བཞིན་ནོ། །མེས་བསྐྱེད་པར་བྱ་བ་ནི་དུ་བ་ཉིད་ཡིན་ལ། དུ་བ་སྐྱེད་པར་བྱེད་པ་ཡང་མེ་ཉིད་ཡིན་ནོ། །དེས་ན་ཇི་
[147a.3]ལྟར་དུ་བ་གཞན་དུ་བ་ཉིད་ཡིན་པ་དེ་བཞིན་དུ། དུ་བ་ཉིད་མེའི་འབྲས་བུ་ཉིད་ཡིན་པས་མེའི་འབྲས་བུ་ཡང་ཡིན་ནོ། །གང་གི་ཕྱིར་དེ་ལྟ་ཡིན་པ་དེས་ན་ཅིར་འགྱུར་ཞེ་ན། བཤད་པ་དུ་བ་དེ་གཞན་ལས་ཀྱང་འབྱུང་ན་སྟེ་གཞན་གྱི་ཡང་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་ན། དེ་མེའི་
[147a.4]རང་བཞིན་མ་ཡིན་ནོ། །དེ་དངོས་པོ་གཞན་གྱི་རང་བཞིན་དུ་གྱུར་པའི་རྗེས་སུ་འགྲོ་བ་དང་ལྡོག་པ་དེ་དག་ནི་དངོས་པོ་གཞན་ཁོ་ན་ཡིན་གྱི་མེ་ནི་མ་ཡིན་ནོ། །དེས་ན་ཇི་ལྟར་དངོས་པོ་དེ་མེའི་རང་བཞིན་མ་ཡིན་པ་དེ་བཞིན་དུ། རྗེས་སུ་འགྲོ་བ་དང་ལྡོག་པ་དེ་དག་ཀྱང་ངོ་། །དེ་བས་ན་དུ་བ་
[147a.5]སྐྱེད་པར་བྱེད་པ་ཉིད་ཀྱང་དེའི་རང་བཞིན་མ་ཡིན་པར་འགྱུར། དེས་ན་ཇི་ལྟར་མེ་མེ་མ་ཡིན་པར་མི་འགྱུར་བ་དེ་བཞིན་དུ། དུ་བ་སྐྱེད་པར་བྱེད་པར་ཡང་མི་འགྱུར་བས་ལན་འགའ་ཡང་སྐྱེད་པར་མི་འགྱུར་རོ། །འདི་ནི་ལན་ཅིག་ཀྱང་མེ་མ་ཡིན་པར་མི་འགྱུར་རོ། །འོན་ཏེ་རྗེས་སུ་འགྲོ་
[147a.6]བ་དང་ལྡོག་པ་དེ་དག་མེའི་རང་བཞིན་ཉིད་ཡིན་པས་ན་མེ་ཡང་དུ་བ་སྐྱེད་པར་བྱེད་པ་ཁོ་ནའོ་ཞེ་ན། དེའི་ཚེ་ནི་གཞན་ལས་འབྱུང་བ་གང་ཡིན་པ་དེ་དུ་བ་ཉིད་ཡིན་པར་མི་འགྱུར་རོ། །ཡང་ན་གཞན་ལས་འབྱུང་བ་དེ་དུ་བ་མ་ཡིན་ཏེ་དུ་བ་སྐྱེད་པའི་རང་བཞིན་མ་ཡིན་པ་ལས་བྱུང་བའི་ཕྱིར་རོ། །དུ་
[147a.7]བའི་རྗེས་སུ་འགྲོ་ལྡོག་གི་རྟེན་དུ་གྱུར་པ་དུ་བ་བསྐྱེད་པ་ཞེས་བྱ་བ་གང་ཡིན་པ་དེ་ནི་མེ་ཉིད་ཁོ་ན་ཡིན་པས་དུ་བ་ནི་དུ་བ་སྐྱེད་པར་བྱེད་པའི་རང་བཞིན་ལས་གཞན་ལས་མི་འབྱུང་ངོ་། །ཅི་སྟེ་ཡང་དུ་བ་སྐྱེད་པར་བྱེད་པའི་རང་བཞིན་དེ་ནི་ཡོད་པ་ཉིད་ལ་སོགས་པའི་ཆོས་བཞིན་དུ། དེ་དང་གཞན་
[147b]
[147b.1]ལ་ཡང་ཡོད་པ་ཡིན་པ་དེས་ན་དེ་ལས་ཀྱང་དུ་བ་འབྱུང་བ་ཡིན་ནོ་ཞེ་ན། བཤད་པ། དེའི་རང་བཞིན་ཡིན་ན་ནི་སྟེ་དུ་བ་སྐྱེད་པའི་རང་བཞིན་ཡིན་ན་ནི། དེ་ཉིད་མེ་ཡིན་པས་དུ་བ་མེ་ལ་འཁྲུལ་པ་མེད་དོ། །མེ་ཡོད་ན་དུ་བ་ཡོད་པའི་ཕྱིར་མེའི་རང་གི་ངོ་བོ་ཉིད་ཇི་ལྟར་དུ་བ་སྐྱེད་པར་བྱེད་པ་ཡིན་པ་འདི་
[147b.2]ནི་བསྟན་ཟིན་ཏོ། །དེས་ན་གཞན་ཡང་དུ་བ་སྐྱེད་པར་བྱེད་པ་ཉིད་ཡིན་ནོ་ཞེས་བྱ་བས་ནི་མེའི་རྣམ་པ་ཉིད་དུ་བརྗོད་པར་འགྱུར་རོ། །དེ་བས་ན་སྐྱེད་པར་བྱེད་པ་གཞན་གང་ཡིན་པ་དེ་ཉིད་འབར་ཞིང་མདངས་གསལ་བའི་རྣམ་པ་ཅན་གྱི་མེ་ཉིད་ཡིན་པའི་ཕྱིར་མེ་མ་ཡིན་པ་ལ་དུ་བ་མི་འབྱུང་
[147b.3]ངོ་། །གལ་ཏེ་བརྒྱ་བྱིན་སྤྱི་བོ་ཞེས་བྱ་བ་ལ་སོགས་པ་འདི་ཉིད་སྡུད་པར་བྱེད་དོ། །བརྒྱ་བྱིན་ཞེས་བྱ་བ་དབང་པོའི་མཆོད་སྡོང་གི་སྤྱི་བོ་གལ་ཏེ་མེའི་རང་བཞིན་ཏེ་གང་ཡོད་ན་དུ་བ་འབྱུང་བ་དེ་ཉིད་ལས་དེ་འབྱུང་བ་ཡིན་ན། དེའི་ཕྱིར་དེ་ཉིད་མེ་ཡིན་ནོ། །འོན་ཏེ་མེའི་རང་བཞིན་མིན་ནོ་ཞེ་ན།
[147b.4]འོ་ན་ནི་དེ་ཡོད་ན་དུ་བ་སྐྱེ་བ་མ་ཡིན་པས་ན། ཇི་ལྟར་དེ་ལས་དུ་བ་འབྱུང་། འདི་ག་ལས་ཤེ་ན་འདི་ལྟར་དུ་བའི་རྒྱུའི་རང་བཞིན་མེ་དུ་བའི་རྗེས་སུ་འགྲོ་བ་དང་། ལྡོག་པ་རྗེས་སུ་བྱེད་པའི་ཡུལ་ཞེས་བྱ་བ་ནི་མེ་ཉིད་དོ་ཞེས་བྱ་བའི་དོན་ཏོ། །དེ་ཡང་མེའི་རྣམ་པ་ཞེས་བྱ་བ་དེའི་ནུས་པ་ཉིད་ཀྱིས་
[147b.5]དངོས་པོ་གཞན་ལས་བྱེ་བྲག་ཏུ་གྱུར་པ་ཡིན་ནོ། །གལ་ཏེ་ཇི་ལྟར་ནུས་པ་མེའི་རང་གི་ངོ་བོ་ཡིན་པའི་ཕྱིར་མེ་མ་ཡིན་པ་ལ་ཡང་ནུས་པ་དེ་ཡོད་ན། དེ་ཡང་མེ་ཉིད་ཡིན་པར་བརྗོད་པ་དེ་བཞིན་དུ་སྐད་ཅིག་མ་ཉིད་ལ་སོགས་པ་ཡང་མེའི་རང་གི་ངོ་བོ་ཉིད་དོ། །དེས་ན་བརྒྱ་བྱིན་གྱི་ཅོ་དོ་སྐད་ཅིག་
[147b.6]མ་ཉིད་ཡིན་པའི་ཕྱིར་ཡང་མེར་འགྱུར་རོ་ཞེ་ན། མ་ཡིན་ཏེ། སྐད་ཅིག་མ་ཉིད་ལ་སོགས་པ་ནི་མེའི་རྣམ་པའི་ཁྱད་པར་བྱེ་བྲག་ཏུ་གྱུར་པའི་ཕྱིར་རོ། །དེ་ནི་འཇིག་པར་འགྱུར་བའི་ཕྱིར་དེ་ལ་སྐད་ཅིག་མར་བསྟན་ཏོ། །དེ་ལས་གཞན་ཡང་འཇིག་པར་འགྱུར་བ་ཡིན་ན་དེ་ཡང་སྐད་ཅིག་
[147b.7]མར་འགྱུར་རོ། །དེས་ན་སྐད་ཅིག་མའི་ཕྱིར་ནི་དབང་པོའི་ཅོ་དོ་མེར་འགྱུར་བ་མ་ཡིན་ནོ། །རྒྱུ་འདི་ཉིད་ནི་འདིའི་དེ་ལྟར་རྟོགས་པའི་རང་བཞིན་དེ་ཉིད་ལས་མ་གཏོགས་པར་ཁྱད་པར་བྱེ་བྲག་ཏུ་གྱུར་པའི་རང་བཞིན་མ་ཡིན་ཏེ། ཇི་ལྟར་དེ་ཡོད་ན་དུ་བ་ཡོད་པའི་ཕྱིར་དེ་རྒྱུ་ཉིད་ཡིན་ལ།
[148a]
[148a.1]དེ་ཡོད་པ་ཡང་རང་བཞིན་དེ་ཉིད་ཡིན་པ་ནི་བསྟན་ཟིན་ཏོ། །འོ་ན་ཇི་ལྟར་དུ་བ་མི་སྐྱེད་པའི་མེ་མེ་ཉིད་དམ། དུ་བས་བསྐྱེད་པའི་དུ་བ་དུ་བ་ཉིད་དུ་འགྱུར་ཞེ་ན། ཉེས་པ་འདི་མེད་དེ་མེ་དང་དུ་བའི་ཁྱད་པར་དེ་ལྟར་ཁས་བླངས་ཀྱི། མེ་ཙམ་ནི་མ་ཡིན་པའི་ཕྱིར་
[148a.2]རོ། །མེ་མ་ཡིན་པ་རྒྱུ་ཡིན་པ་འགོག་གི །མེ་ཐམས་ཅད་རྒྱུར་འདོད་པ་ནི་མ་ཡིན་ནོ། །ཡང་ན་མ་ཡིན་ཏེ་མེ་དུ་བ་སྐྱེད་པར་རུང་བ་ཉིད་དང་མ་བྲལ་བའི་ཕྱིར་སྐྱེ་བ་ནས་བརྩམས་ཏེ་ཕན་གདགས་བྱ་འདོགས་བྱེད་ཉིད་ལས་མི་འདའོ་ཞེས་གཞན་དུ་བསྟན་ཟིན་ཏོ། །གལ་ཏེ་དུ་བ་སྐྱེད་པར་
[148a.3]བྱེད་པ་མ་ཡིན་པའི་མེ་ཡང་ཡོད་པས་ན། མེ་ཙམ་ཉིད་དུ་བ་སྐྱེད་པར་བྱེད་པ་མ་ཡིན་པ་མ་ཡིན་ནམ། དེས་ན་འདི་ནི་སྐད་ཅིག་མ་ཉིད་ལ་སོགས་པ་བཞིན་ཁྱད་པར་གྱི་བྱེ་བྲག་ཡིན་ནོ་ཞེས་པ་འདི་ཉིད་དུ་འགྱུར་བས་ན་མེ་ཉིད་དང་བྲལ་དུ་ཟིན་ཀྱང་ཁྱད་པར་འགྱུར་བ་འམ། ཡང་ན་རྣམ་པ་གཞན་
[148a.4]གྱིས་དུ་བ་རྒྱུ་མེ་ལ་མི་འཁྲུལ་བར་བརྗོད་པར་བྱའོ་ཞེ་ན། སྨྲས་པ་མེ་ཉིད་ཁྱད་པར་དང་ལྡན་པ་ཡིན་དུ་ཟིན་ཀྱང་རང་གི་ངོ་བོར་གྱུར་པའི་ཁྱད་པར་ཡང་ཡོད་པ་ཁོ་ནའོ། །དེ་ལྟ་མ་ཡིན་ན་ནི་མེ་ཉིད་ཐ་མི་དད་པར་ཁྱད་པར་ཐ་དད་པའི་ཕྱིར་སྤྱི་ཁས་བླངས་པ་ཉིད་དུ་འགྱུར་རོ། །དེས་ན་ཇི་ལྟར་མེ་
[148a.5]ཉིད་ཀྱིས་ཐ་དད་པ་དེ་བཞིན་དུ་དུ་བ་སྐྱེད་པར་བྱེད་པ་དང་། དུ་བ་སྐྱེད་པར་བྱེད་པ་མ་ཡིན་པ་དག་གིས་ཀྱང་ཡིན་པས་སྐྱོན་འགའ་ཡང་མེད་དོ། །གང་གི་ཚེ་བརྒྱ་བྱིན་གྱི་སྤྱི་བོ་མེ་མ་ཡིན་པའི་རང་བཞིན་ཉིད་ཡིན་པ་དེའི་ཚེ། དུ་བ་དུ་བའི་རྒྱུ་མ་ཡིན་པ་བརྒྱ་བྱིན་གྱི་སྤྱི་བོ་ལས་འབྱུང་ན། དེ་
[148a.6]ནི་རྒྱུ་མེར་འགྱུར་རོ། །གལ་ཏེ་མི་འདྲ་བ་ལས་མི་འབྱུང་བའི་ཕྱིར་དང་། རྒྱུ་ཐ་དད་པ་ཐ་དད་པར་བྱེད་པ་ཡིན་པའི་ཕྱིར་དང་། དུ་བ་སྐྱེད་པར་བྱེད་པ་མེའི་རྣམ་པ་ཉིད་ཡིན་པའི་ཕྱིར་དུ་བ་མེ་མ་ཡིན་པ་ལས་མི་འབྱུང་བས་ན། མེ་ལས་མི་འཁྲུལ་བར་བརྗོད་ན། ཇི་ལྟར་ལྷན་
[148a.7]ཅིག་བྱེད་པ་མི་འདྲ་བ་ཐ་དད་པ་དང་། མེ་མ་ཡིན་པ་ལས་དུ་བ་སྐྱེ། དེ་ཉིད་སྨྲས་པ་ནི་འོ་ན་ད་ནི་ལྷན་ཅིག་བྱེད་པ་ཐ་དད་པ་དག་ལས་ཞེས་བྱ་བའོ། །དེ་དག་ནི་ཐ་དད་པ་ཉིད་ཀྱིས་མི་འདྲ་བ་དང་། མེ་མ་ཡིན་པའི་རང་བཞིན་ཡིན་ནོ། །དེས་ནི་ཇི་སྐད་བཤད་པའི་ཚུལ་གྱིས་འབྲས་
[148b]
[148b.1]བུ་སྐྱེ་བར་སྒྲུབ་པ་ན་འདི་ལྷན་ཅིག་བྱེད་པ་དག་ལས་འབྱུང་བར་མི་འགྱུར་རོ། །ཅི་འདྲ་བ་ཞེ་ན་དཔེར་ན་ཞེས་སྨོས་སོ། །མིག་དང་གཟུགས་དང་སྣང་བ་དང་ཡིད་ལ་བྱེད་པ་དག་ལས་རྣམ་པར་ཤེས་པ་གཅིག་སྐྱེ་བ་ལྟ་བུའོ། །དེ་ལ་ནི་བརྒྱ་བྱིན་གྱི་སྤྱི་བོའི་རིགས་པའམ་རྒྱུ་ཐ་དད་པས་འབྲས་
[148b.2]བུ་ཐ་དད་པར་འགྱུར་བ་གང་ཡིན་པ་འདྲ་བ་མེད་པ་ལྷན་ཅིག་ཉིད་ཀྱང་མེད་དོ། །ཅིའི་ཕྱིར་དཀྱུས་མ་ཉིད་བཞག་སྟེ། མིག་དང་གཟུགས་ལ་སོགས་པ་དཔེར་བཀོད་ཅེ་ན། དེ་ལ་ལྷན་ཅིག་བྱེད་པ་རྣམས་ཀྱི་བྱེད་པ་ཐ་དད་པར་བསྟན་པར་ནུས་པའི་ཕྱིར་རོ། །མེ་དང་བུད་ཤིང་ལ་སོགས་པ་ལ་
[148b.3]ནི་འདི་བརྟག་པར་བྱ་བ་ཡིན་གྱི། བསྟན་པར་བྱ་བ་ནི་མི་ནུས་སོ། །གཅིག་ཏུ་སྐྱེད་པའམ་ཞེས་བྱ་བ་ལ་སོགས་པས་ལན་འདེབས་སོ། །གཅིག་པུས་སྐྱེད་པ་སྲིད་པ་ན་མི་འདྲ་བ་ལས་དེ་དང་འདྲ་བ་འབྱུང་བ་འགོག་པའམ། རྒྱུ་ཐ་དད་པ་ལས་འབྲས་བུ་ཐ་མི་དད་པར་ཐལ་བར་འགྱུར་བ་ནི་
[148b.4]མ་ཡིན་ནོ། །དོན་གྱི་རང་བཞིན་ཉིད་རྒྱུའི་ནུས་པ་ཡིན་པའི་ཕྱིར་རོ་ཞེས་དེའི་རང་གི་ངོ་བོ་བརྗོད་པ་གང་ཡིན་པ་དེ་ཡང་གང་གིས་ན་ཇི་སྲིད་བརྒྱ་བྱིན་གྱི་སྤྱི་བོ་དུ་བ་སྐྱེད་ན་མེར་འགྱུར་བར་བརྗོད་པ་དེ་བཞིན་དུ། བུད་ཤིང་ཡང་འགྱུར་ལ་མིག་ལ་སོགས་པ་ཡང་ཤེས་པའི་རང་བཞིན་དུ་
[148b.5]འགྱུར་བ་བརྗོད་པར་འགྱུར་བ་གཅིག་ལ་ལྟོས་ནས་བརྗོད་པ་ནི་མ་ཡིན་ནོ་ཞེས་བཤད་པ་ནི། དེའི་རང་བཞིན་གཅིག་པུས་སྐྱེད་པར་བྱེད་པ་ནི་ཅུང་ཟད་ཀྱང་མེད་དོ། །འོན་ཀྱང་ཚོགས་པས་སྐྱེད་པར་བྱེད་པ་ནི་དེའི་རང་བཞིན་ཡིན་ཏེ་ཞེས་སྨོས་སོ། །དེས་ན་མི་འདྲ་བ་དང་འདྲ་བའི་རྣམ་
[148b.6]པར་དབྱེ་བ་འདི་ནི་ཚོགས་པ་ལ་ལྟོས་པ་ཡིན་ནོ། །དེ་ལྟ་བུའི་ཚོགས་པ་ལ་སྐྱེ་བའི་དངོས་པོ་དེ་ནི་དེ་ལྟ་བུ་ཉིད་ལས་སྐྱེ་བའི་དོན་མི་འདྲ་བ་འབྱུང་ན་ནི་ཞེས་བཤད་པ་ཡིན་ནོ། །འདི་ནི་རིགས་པ་ཡིན་ཏེ། འདི་ལྟར་མི་འདྲ་བ་ལས་སྐྱེ་ན་ནི་རྒྱུའི་ནུས་པ་ཉམས་པར་བཤད་དེ། དེ་བཞིན་དུ་ཡང་
[148b.7]ཡོད་པར་འགྱུར་ན་དེ་ལས་སྐྱེ་བའི་དོན་མི་འགྲུབ་པའི་ཕྱིར་རོ། །ལྷན་ཅིག་བྱེད་པ་དག་ནི་ཐ་དད་ཀྱང་དེ་འབྲས་བུ་ཡོད་པའི་ངོ་བོ་ཉིད་ཡིན་པ་མི་ལྡོག་པ་དེས་ན་སྐྱེ་བའི་དོན་དང་མི་འབྲལ་ལོ། །འདིས་ནི་རྒྱུ་ཐ་དད་པ་ཐ་དད་པར་བྱེད་པ་ཉིད་ཀྱིས་རིགས་པ་གང་ཡིན་པ་དེ་ཡང་འདི་ཉིད་ལ་ཡིན་
[149a]
[149a.1]པར་ངེས་པར་བྱའོ། །དེ་མ་ཡིན་པའི་རང་བཞིན་ལས་ལྡོག་པའི་དོན་སྐྱེ་བའི་རྒྱུ་ནི་དེ་ཙམ་ཡིན་པའི་ཕྱིར་ཏེ། རེ་རེ་དང་བྲལ་ན་གཞན་ལས་མི་འབྱུང་བའི་ཕྱིར་རོ། །ཚོགས་པ་དེ་དེའི་རང་བཞིན་ཡིན་ཏེ། དེས་ན་མིག་དང་གཟུགས་དང་སྣང་བ་དང་ཡིད་ལ་བྱེད་པ་རྣམས་ཇི་
[149a.2]སྙེད་པ་དང་། རྣམ་པ་ཇི་ལྟ་བུའི་རང་བཞིན་ཡིན་པ་དེ་ཤེས་པ་སྐྱེད་པའི་ནུས་པ་ཡིན་པ་དེས་ན། གལ་ཏེ་བརྒྱ་བྱིན་སྤྱི་བོ་མེའི་ཞེས་བྱ་བ་ལ་སོགས་པས་གཞན་རྣམ་པ་དེ་ལྟ་བུ་མ་ཡིན་པ་ལས་དེ་སྐྱེ་ན་དེའི་རང་བཞིན་དུ་ཐལ་བར་བརྗོད་པ་དེ་བཞིན་དུ་མེ་དང་བུད་ཤིང་དག་ཀྱང་དུ་བ་སྐྱེད་པའི་རང་
[149a.3]བཞིན་ཡིན་པའི་ཕྱིར་མེ་ཉིད་དམ་བུད་ཤིང་ཉིད་དུ་མི་འགྱུར་རོ། །བརྒྱ་བྱིན་གྱི་སྤྱི་བོ་ནི་གཉི་གའི་བདག་ཉིད་དུ་ཡང་འགྱུར་རོ། །དེ་ལས་བྱུང་བའི་མཚན་ཉིད་ཀྱི་འབྲེལ་པ་འདི་ནི་ཚོགས་པ་ལ་ལྟོས་པ་ཉིད་ཡིན་ཏེ་འདི་ལྟར་དེ་ཁོ་ན་རྗེས་སུ་དཔག་པར་བྱ་བ་ཡིན་ནོ། །དེས་ནི་འདི་ཐམས་ཅད་
[149a.4]ནི་དེ་ལ་བསམ་པ་ཉིད་ཡིན་པར་རིགས་སོ། །གལ་ཏེ་ཡང་ཚོགས་པ་ཉིད་ཡོད་ན་འབྲས་བུ་བསྐྱེད་པར་མཐོང་ལ་རེ་རེས་མི་ནུས་ན་ཡང་འགའ་ཡང་ནུས་པར་མི་འཐད་པ་རེ་རེས་ནུས་ཀྱང་འགའ་ཡང་དོན་མེད་པ་མ་ཡིན་ཏེ་ཐམས་ཅད་ཉེ་བར་གནས་ནས་འབྲས་བུ་མཐོང་བས་ངོ་བོ་ཉིད་
[149a.5]ཀྱིས་ཐམས་ཅད་ཉེ་བར་སྦྱོར་བའི་ཕྱིར་དང་གཅིག་བྱེད་པ་ན་གཞན་གྱི་བྱ་བ་མི་འགལ་བའི་ཕྱིར་ཚོགས་པ་ཉིད་སྐྱེད་པར་བྱེད་པ་ཡིན་པས་རྒྱུ་ཐ་དད་པ་ལས་ཐ་མི་དད་པར་འགྱུར་བར་ཐལ་བ་ཡང་སྤངས་པ་དེ་ལྟ་ན་ཡང་ཚོགས་པ་ཉིད་སྐྱེད་པར་བྱེད་པ་ཡིན་པ་བསྟན་པར་བྱ་བ་ཡིན་པའི་ཕྱིར་
[149a.6]དང་། བསྟན་པར་སྨྲས་པ་ཚོགས་པའི་ཡན་ལག་རྣམས་ཀྱི་ཉེ་བར་སྦྱོར་བའི་ཁྱད་པར་བསྟན་པའི་ཕྱིར་རྩོམ་པ་ནི་ཚོགས་དེ་ཉིད་ཡུལ་གྱི་རྣམ་པ་ལ་སོགས་པའི་འབྲས་བུའི་རང་གི་ངོ་བོ་གང་ཡིན་པ་དེ་དག་གི་རྟེན་ཡིན་ནོ། །དེ་ལྟར་ཡང་ཡིད་ལ་བྱེད་པ་ལས་ནི་དབང་པོའི་བྱེད་པ་གསལ་
[149a.7]བའི་རང་བཞིན་ཡུལ་ལས་ནི་རྣམ་པ་དང་འབྲེལ་པ་སྟེ་གང་གི་ཕྱིར་འདི་ཡུལ་གསལ་བ་ཡིན་པའི་ཕྱིར་ཞེས་བྱ་བ་ལ་སོགས་པས་རྗེས་སུ་འབྲང་བར་བྱའོ། །འདི་ཇི་ལྟ་བ་དེ་ལྟར་ནི་གཞན་དུ་བསྒྲུབས་ཟིན་པས་འདིར་མི་བརྗོད་དོ། །ལྷན་ཅིག་བྱེད་པ་དག་གི་ཉེ་བར་སྦྱོར་བའི་རྣམ་པར་
[149b]
[149b.1]དབྱེ་བ་བསྟན་པར་མ་རྟོགས་པ་གང་ཡིན་པ་དེ་དག་ཀྱང་དེ་ལྟ་བུ་ཉིད་དུ་ཡོད་དོ་ཞེས་པས་བརྟག་པར་རིགས་པ་ཡིན་ནོ། །གལ་ཏེ་ཚོགས་པའི་ནང་དུ་འདུས་པའི་རྒྱུ་རྣམས་འབྲས་བུའི་ཁྱད་པར་སྒྲུབ་པར་བྱེད་པ་ལ་ཕྱོགས་པར་འདོད་ན་འོ་ན་དེ་དག་སོ་སོར་ཡང་དེ་ལྟ་བུའི་འབྲས་བུ་སྐྱེད་པར་
[149b.2]འགྱུར་རོ་ཞེ་ན། བཤད་པ་གང་གི་ཕྱིར་གཅིག་པུ་སྐྱེད་པར་བྱེད་པའམ་ཞེས་བྱ་བས་ཚོགས་པ་ཉིད་རང་གི་ངོ་བོ་གནས་པའི་རྟེན་དུ་འདོད་པ་དེ་ཉིད་ཀྱི་ཕྱིར་ལྷན་ཅིག་བྱེད་པ་རྣམས་ཀྱང་རྣམ་གྲངས་མེད་པར་སྐྱེད་པར་བྱེད་པ་ཡིན་ནོ། །འདིར་རིགས་སྨོས་པ་ཉེ་བར་མཚོན་པ་རིམ་གྱིས་བྱེད་ན་
[149b.3]གདོན་མི་ཟ་བར་འགྱུར་བའི་ཐ་དད་པ་ཉིད་འགོག་པ་ཡིན་ཏེ་ལྷན་ཅིག་པ་རྣམས་སོ་སོར་སྐྱེད་པར་མི་བྱེད་དོ་ཞེས་བྱ་བའི་དོན་ཏོ། །ཕན་ཚུན་ཕན་འདོགས་པའི་ཕྱིར་ཚོགས་པར་གྱུར་པ་དེ་དག་འབྲས་བུ་གཅིག་བྱེད་པའི་རང་བཞིན་ཉིད་ནི་འབྲས་བུ་གཅིག་དམིགས་པ་ཉིད་ལས་རྟོགས་
[149b.4]པར་བྱའོ། །དེ་ལྟར་རིགས་པས་རིགས་མི་མཐུན་པ་ལས་སྐྱེ་བ་བསལ་ཏེ། དེ་ནི་གང་དུ་དེ་ལྟར་མཐོང་བ་ཡོད་པ་དེར་ཅི་གང་འདི་ལྟ་བུའི་དངོས་པོའི་རྗེས་སུ་འབྲང་བའི་གནོད་པའི་རྩ་བ་ལས་དོན་གཞན་དུ་གྱུར་པའི་ཕྱིར་རྟོགས་པས་འཁྲུལ་པ་ཡིན་ནམ། འོན་ཏེ་དེ་ལྟ་མ་ཡིན་ཞེས་
[149b.5]དོགས་པ་ལ་དེ་སྟོན་པ་ནི་གང་ཡང་ཅུང་ཟད་རིགས་མི་མཐུན་པ་ལས་འབྱུང་བར་མཐོང་བ་དེ་ལ་ཡང་རང་གི་ས་བོན་ལས་རབ་ཏུ་འབྱུང་བ་ཅན་གྱི་དོན་ལ་ལྟོས་ཏེ། རང་གི་ངོ་བོ་ཐ་དད་པ་ཡོད་པ་ཁོ་ནའོ། །ཇི་ལྟར་ཡོད་ཅེ་ན་བཤད་པ་རྒྱུའི་རང་གི་ངོ་བོ་ཐ་དད་པའི་ཕྱིར་རོ། །རྒྱུ་ཐ་དད་
[149b.6]པས་བསྐྱེད་པའི་དངོས་པོ་ནི་ཐ་དད་པ་ལས་མི་འདའོ། །རིགས་མི་མཐུན་པ་གང་ལས་དེ་གང་ཞིག་འབྱུང་བར་མཐོང་ཞེ་ན། དེ་བསྟན་པའི་ཕྱིར་བཤད་པ་ལྕི་བ་ལ་སོགས་པ་ལས་ཨུཏྤ་ལ་ལ་སོགས་པའོ། །ཨུཏྤ་ལ་ལས་ཀྱང་ཨུཏྤ་ལ་འབྱུང་ལ་ཨུཏྤ་ལ་དང་རིགས་མི་མཐུན་པ་
[149b.7]ལྕི་བ་ལས་ཀྱང་འབྱུང་བར་མཐོང་། གལ་ཏེ་ཨུཏྤ་ལ་དང་རིགས་མི་མཐུན་པ་ལྕི་བ་ལས་འབྱུང་བའི་ཨུཏྤ་ལ་ཨུཏྤ་ལ་ལས་སྐྱེས་པའི་ཨུཏྤ་ལ་ལས་ཐ་དད་པ་ཡིན་ན་འོ་ན་དེ་དེ་ཨུཏྤ་ལ་ཉིད་མ་ཡིན་པ་དེས་ན་ཐ་དད་པའི་ཕྱིར་ཇི་ལྟ་ན་དེ་ལྟར་དམིགས་ཤེ་ན་འདི་ལ་བཤད་པ། དེ་སྐད་དུ་བརྗོད་
[150a]
[150a.1]ཀྱང་ཞེས་བྱ་བ་སྟེ། ཨུཏྤ་ལའི་རྣམ་པ་ཡིན་ཡང་ཞེས་བྱ་བའི་ཐ་ཚིག་གོ། །འདི་སྐད་བརྗོད་པ་ཡིན་ཏེ། གལ་ཏེ་ཡང་དེ་ལ་ཨུཏྤ་ལའི་རྣམ་པ་ཡོད་པ་དེ་ལྟ་ན་ཡང་ལྕི་བ་ལ་སོགས་པའི་རྒྱུ་མཚན་ཅན་དེ་ནི་གང་གི་བྱེ་བྲག་གིས་བྱས་པའི་ཐ་དད་པ་ཁོ་ནའོ། །དེས་ན་
[150a.2]རང་བཞིན་དེ་ལྕི་བའི་འབྲས་བུ་ཡིན་གྱི། གང་གིས་བརྒྱ་བྱིན་གྱི་སྤྱི་བོའི་ཚུལ་དུ་ལྕི་བ་ལ་སོགས་པའི་རྒྱུ་ཡང་ཨུཏྤ་ལར་ཐལ་བར་འགྱུར་བ་ཨུཏྤ་ལ་ཙམ་ནི་མ་ཡིན་ནོ། །དཔེར་ན་བུམ་པའི་རྣམ་པའི་དངོས་པོ་ཉིད་རྫ་མཁན་ལས་འབྱུང་བའི་ཕྱིར་དེ་སྣམ་བུའི་བདག་ཉིད་ཐ་ག་པ་ལས་འབྱུང་
[150a.3]བ་ནི་རྒྱུ་ཐ་དད་པར་མི་འགྱུར་བ་བཞིན་ནོ། །ཡུལ་དང་དུས་ཀྱི་དབྱེ་བས་རང་གི་མཚན་ཉིད་དམ་སྐད་ཅིག་གིས་ཐ་དད་གང་ཡིན་པ་དེ་ནི་ཐ་དད་པ་མ་ཡིན་པ་ཉིད་དེ་དེ་ཐ་དད་པའི་སྒྲུབ་པར་བྱེད་པ་ནི་རང་བཞིན་གྱི་ཁྱད་པར་ཉིད་ཡིན་པའི་ཕྱིར་རོ། །དེ་ཡང་གལ་ཏེ་མངོན་སུམ་གྱིས་མ་གྲུབ་ཀྱང་རྒྱུ་ཐ་དད་
[150a.4]པ་ཉིད་ཀྱིས་རྟོགས་པས་ན་སྤང་བར་འོས་པའམ་ཐ་དད་པར་བྱེད་པ་མ་ཡིན་ནོ། །ཨུཏྤ་ལ་ཉིད་རིགས་མི་མཐུན་པ་ལས་སྐྱེ་བ་ལ་དཔེར་བརྗོད་པ་ནི་དཔེར་ན། ཆུ་ཤིང་ས་བོན་དང་སྡོང་བུ་ལས་སྐྱེ་བ་རིགས་མི་མཐུན་པ་ཡིན་པར་མཐོང་བ་བཞིན་ནོ། །དེས་ན་དེར་ཡང་དེ་བཞིན་དུ་རིགས་
[150a.5]མི་མཐུན་པ་ཡིན་པར་དགོངས་པའོ། །ཨུཏྤ་ལ་ལ་སོགས་པའི་ཁྱད་པར་འདི་རྗེས་སུ་དཔག་པར་བྱ་བ་ཉིད་ནི་མ་ཡིན་གྱི་འོན་ཀྱང་དབྱེ་བ་དེ་ལྟ་བུ་ནི་འཇིག་རྟེན་ན་གསལ་བ་ཁོ་ནར་རྣམ་པར་འབྱེད་དོ། །འོ་ན་ཇི་ལྟར་རྒྱུའི་རང་གི་ངོ་བོ་ཐ་དད་པའི་ཕྱིར་ཞེས་བརྗོད་ཅེ་ན། འདི་སྒྲུབ་བྱེད་ཉིད་དུ་
[150a.6]བསྟན་པ་ནི་མ་ཡིན་གྱི། འོན་ཀྱང་དེ་ལྟ་བུར་གྱུར་པའི་ཁྱད་པར་གྱི་རྒྱུ་ཉིད་དུའོ། །ཁྱད་པར་མི་འདྲ་བ་དེ་ནི་རྒྱུ་ཐ་དད་པ་ལས་སྐྱེས་པ་ཡིན་ནོ་ཞེས་བྱ་བའི་ཐ་ཚིག་གོ། །གང་གི་ཕྱིར་བ་ལང་གི་ལྕི་བའི་ཨུཏྤ་ལ་སོགས་པ་རྣམས་རྣམ་པ་ཡང་ཐ་དད་པ་དེའི་ཕྱིར་དེ་དག་ནི་འཇིག་རྟེན་ཡང་རྟོགས་
[150a.7]པ་ཡིན་ནོ། །དེ་ལྟ་བས་ན་འབྲས་བུའི་ཁྱད་པར་ཐམས་ཅད་མ་རྟོགས་པར་རྒྱུ་ཐ་དད་པར་དམིགས་པས་འཁྲུལ་པ་ནོར་བའི་ཕྱིར་ན། ཇི་སྐད་བཤད་པའི་ཁྱད་པར་ངེས་པ་བྱེ་བྲག་ཏུ་མཐོང་བར་རྟོགས་པ་ཤིན་ཏུ་རྣམ་པར་ཕྱེ་བའི་འབྲས་བུ་ནི་རྒྱུ་ལ་འཁྲུལ་པ་མེད་དོ། །གལ་ཏེ་ཡང་རྣམ་
[150b]
[150b.1]པར་ཕྱེ་བ་མེད་ཀྱང་དངོས་སུ་ན་འབྲས་བུ་འཁྲུལ་པ་མེད་པ་ཡིན་པ་དེ་ལྟ་ན་ཡང་རྟགས་ལ་ལྟོས་པ་ཉིད་ཀྱིས་དེ་སྐད་བརྗོད་དོ། །ད་ནི་ཇི་སྐད་བཤད་པའི་དོན་བསྡུས་ནས་སྟོན་ཏོ། རྗེས་སུ་འགྲོ་དང་ལྡོག་པ་ལས། །གང་ཞིག་རང་བཞིན་གང་རྗེས་འཇུག །བྱེད་མཐོང་དེ་ནི་དེ་ཡི་རྒྱུ། །དེ་ཕྱིར་
[150b.2]མི་མཐུན་ལས་མི་འབྱུང་། །ཞེས་བྱ་བ་ལ་འདིར་རབ་ཏུ་བྱེད་པའི་ཡན་ལག་གི་དོན་བར་མ་ཆོད་པ་ཡང་སྡུད་ལ། འདི་གང་གི་ཡན་ལག་ཡིན་པ་རབ་ཏུ་བྱེད་པའི་དོན་གཙོ་བོར་གྱུར་པ་དེ་ཡང་སྡུད་དོ། །དེ་ལ་དང་པོ་བཤད་པ་ནི་དེ་ནི་དེའི་རྒྱུ་ཡིན་ཏེ་སྐྱེད་པར་བྱེད་པ་ཡིན་ནོ། །གང་གི་གང་
[150b.3]ཞེ་ན་བཤད་པ་གང་ཞིག་རང་བཞིན་གང་རྗེས་སུ་འཇུག་བྱེད་དེ་གང་གིས་རང་བཞིན་གང་རྗེས་སུ་འཇུག་པར་བྱེད་ཅིང་གཞན་གྱི་དབང་ཉིད་དུ་འགྱུར་བར་བྱེད་དོ། །དེ་ནི་བསྐྱེད་པར་བྱ་བའི་རང་བཞིན་གྱིས་ན་རང་ངམ་གཞན་ལས་མི་འབྱུང་བའི་ཕྱིར་རོ། །དེ་ཇི་ལྟར་རྗེས་སུ་འཇུག་པར་
[150b.4]བྱེད་པ་ཡིན་ཞེ་ན། དེ་ལས་སྐྱེ་བར་བཤད་པ་ནི། རྗེས་སུ་འགྲོ་བ་དང་ལྡོག་པ་ལས་ཞེས་བྱ་བའོ། །ལྡོག་པས་ནི་རྒྱུ་དང་འབྲེལ་པའི་སྔོན་རོལ་དུ་ཡོད་པ་མེད་པར་བརྗོད་དོ། །རྗེས་སུ་འགྲོ་བས་ནི་རྒྱུ་ཡོད་པ་ན་ཡོད་པ་ཉིད་དོ། །དེས་ན་དེ་ལྟར་ཡོད་པ་རེས་འགའ་འབྱུང་བའི་མཚན་ཉིད་ཀྱི་སྐྱེ་
[150b.5]བ་དེ་གང་ཡོད་ན་འགྱུར་བ་དེ་རྒྱུ་ཡིན་ནོ་ཞེས་བརྗོད་པ་ཡིན་ནོ། །དེས་ན་སྐྱེ་བའི་དོན་རྣམ་པར་དཔྱད་པ་ཉིད་ལས་ཐ་དད་པ་ལས་མི་འབྱུང་བ་ཡིན་ནོ། །དེ་ལྟར་ན་རྒྱུ་དང་འབྲས་བུའི་དངོས་པོ་ངེས་པ་དང་ལྷན་ཅིག་བསྟན་པ་ཡིན་ནོ། །ད་ནི་སྔར་གལ་ཏེ་མཐོང་བ་དང་མ་མཐོང་བ་དག་རྗེས་སུ་
[150b.6]འགྲོ་བ་དང་ལྡོག་པ་རྟོགས་པའི་རྟེན་མ་ཡིན་ནོ། །འོ་ན་དེ་ཇི་ལྟར་དུ་བས་མེ་མི་འཁྲུལ་ལོ་ཞེས་རྟོགས་ཞེས་བརྩད་པ་གང་ཡིན་པ་དེའི་ལན་མཇུག་སྡུད་པ་ནི་དེ་བས་ཞེས་བྱ་བའོ། །རྒྱུ་དང་འབྲས་བུའི་དངོས་པོ་དེས་དེ་རྟོགས་ཏེ་མི་འཁྲུལ་པ་རྟོགས་སོ། །འོ་ན་དེ་གང་ལས་ཤེ་ན། མཐོང་
[150b.7]བ་དང་མ་མཐོང་བ་དག་གིས་ཞེས་སྨོས་སོ། །མི་འཁྲུལ་པ་བཞིན་དུ་དེར་ཡང་མཐོང་བ་དང་མ་མཐོང་བ་དག་ཇི་ལྟར་སྒྲུབ་པར་བྱེད་པ་ལས་མི་ཉམས་ཤེ་ན། ལན་ཅིག་ཅེས་སྨོས་སོ། །འདི་དག་མི་འཁྲུལ་པ་ལ་ནི་ལན་ཅིག་མ་ཡིན་པར་འཇུག་པ་ལ་ལྟོས་པས་སྐྱོན་དུ་འགྱུར་གྱི་
[151a]
[151a.1]འདིར་ནི་མ་ཡིན་ཏེ། ལན་ཅིག་ཞུགས་པ་ཉིད་ཀྱིས་དེ་ལྟར་རྟོགས་པའི་ཕྱིར་རོ། །རྒྱུ་དང་འབྲས་བུ་མ་གཏོགས་པ་རྣམ་པ་གཞན་གྱིས་ནི་དེ་རྟོགས་པ་མ་ཡིན་ནོ་ཞེས་བཤད་པ་ནི་གཞན་དུ་ནི་མ་ཡིན་ཏེ་ཞེས་བྱ་བ་ཡིན་ནོ། །གཏན་ཚིགས་བཤད་པ། རྗེས་སུ་འགྲོ་བ་
[151a.2]དང་ཞེས་བྱ་བའོ། །མ་ལུས་པའི་མཐོང་བ་དང་མ་མཐོང་བ་ནི་མ་ལུས་པར་མཐོང་བ་དང་མ་མཐོང་བའོ། །དེས་ན་གང་གི་ཞེས་བྱ་བ་ལ་ལྟོས་པ་ན་རྗེས་སུ་འགྲོ་བ་དང་ལྡོག་པ་དག་གོ་ཞེས་བྱ་བར་འབྲེལ་ཏོ། །རྟོགས་པ་ནི་དེ་ལ་རག་ལས་པའི་ཕྱིར་རོ་ཞེས་འབྲེལ་ཏོ། །དེའི་དོན་ནི་འདི་ཡིན་ཏེ།
[151a.3]རྣམ་པ་གཞན་གྱིས་མི་འཁྲུལ་པ་ལ་རྟོགས་པ་ནི་མཐོང་བ་དང་མ་མཐོང་བ་དག་ཉིད་ལས་ཡིན་པར་འགྱུར་ན། དེ་ཡང་རྗེས་སུ་འགྲོ་བ་དང་ལྡོག་པ་མ་ལུས་པར་མཐོང་བ་ལ་རག་ལས་པའི་ཕྱིར་ཐམས་ཅད་མཐོང་བ་མ་ཡིན་པ་ལ་མི་སྲིད་དོ། །དེའི་ཕྱིར་རྣམ་པ་གཞན་གྱིས་ནི་རྟོགས་པ་
[151a.4]མ་ཡིན་ནོ། །ཡང་ཅིའི་ཕྱིར་འདི་མ་ལུས་པར་མཐོང་བ་དང་མ་མཐོང་བ་ལ་བརྟེན་པ་ཡིན་གྱི་ལན་མང་དུ་མཐོང་བ་ལས་འདིར་མི་འགྱུར་ཞེ་ན། འགའ་ཞིག་ཏུ་ལུས་ཅན་མ་ཡིན་པ་ཉིད་ལ་རྟག་པ་ཉིད་མཐོང་ཡང་ཞེས་སྨོས་ཏེ། གལ་ཏེ་ནམ་མཁའ་ལ་སོགས་པ་འགའ་ཞིག་ཏུ་ལུས་ཅན་མ་ཡིན་
[151a.5]པ་ཉིད་ལ་རྟག་པ་ཉིད་མཐོང་བ་དེ་ལྟ་ན་ཡང་ལུས་ཅན་མ་ཡིན་པ་ཙམ་གྱིས་རྟག་པ་དང་རྗེས་སུ་འགྲོ་བ་ནི་མ་ཡིན་ཏེ། བློ་ལ་སོགས་པ་གཞན་ལ་ལུས་ཅན་མ་ཡིན་པ་ཉིད་ལ་ཡང་རྟག་པ་ཉིད་མེད་པར་མཐོང་བའི་ཕྱིར་རོ། །དེས་རྗེས་སུ་འགྲོ་བ་མཐའ་དག་མཐོང་བ་མེད་པ་རྗེས་སུ་འགྲོ་བ་མི་རྟོགས་སོ། །
[151a.6]དེ་བཞིན་དུ་ལྡོག་པ་མ་ལུས་པར་མ་མཐོང་ན་ཡང་ལྡོག་པ་ངེས་པ་མ་ཡིན་ནོ་ཞེས་བཤད་པ་ནི་བུམ་པ་ལ་སོགས་པ་འགའ་ཞིག་ལ་ལུས་ཅན་མ་ཡིན་པ་ཉིད་རྟག་པ་ཉིད་མེད་པར་མ་མཐོང་བ་ཡང་བྱ་བ་ལ་སོགས་པ་ལ་ཡང་མཐོང་བའི་ཕྱིར་རོ། །དེས་ན་གལ་ཏེ་འབྲས་བུའི་འབྲས་བུ་ཉིད་དོར་ནས་མི་
[151a.7]འཁྲུལ་པ་ངེས་པ་ནི་མཐོང་བ་དང་མ་མཐོང་བ་དག་ལས་ཡིན་པར་འགྱུར་ན། དེ་ནི་ཡོད་པ་མ་ཡིན་ཏེ། འགའ་ཞིག་ཏུ་དེ་ལྟར་དམིགས་ཀྱང་ཐམས་ཅད་དུ་དེ་ལྟ་བུའི་ངོ་བོར་ངེས་པ་མི་འགྲུབ་པའི་ཕྱིར་རོ། །དེས་ན་དེ་ལྟར་འབྲས་བུའི་གཏན་ཚིགས་ཀྱི་མི་འཁྲུལ་པའི་ཚད་མ་བརྗོད་ནས།
[151b]
[151b.1]རང་བཞིན་གྱི་གཏན་ཚིགས་ཀྱི་ཡང་བརྗོད་པའི་ཕྱིར་རོ། །འབྲས་བུ་ནི་ཞེས་རྩོད་པར་བྱེད་དོ། །འབྲས་བུ་དེ་ལས་སྐྱེ་བའི་མཚན་ཉིད་ཀྱི་ཕྱིར་རྒྱུ་དང་མི་འཁྲུལ་པ་ཡིན་ལ་རག་ན་རང་བཞིན་གྱི་གཏན་ཚིགས་ཇི་ལྟར་རྣམ་པ་གང་གིས་ཚད་མ་གང་གཞིར་གྱུར་པས་མེད་ན་མི་འབྱུང་བ་ཡིན། ད་ཞེས་བྱ་བ་ནི་མེད་ན་
[151b.2]མི་འབྱུང་བ་མངོན་སུམ་ལ་སོགས་པའི་ཡུལ་མ་ཡིན་ནའོ། །དེ་ལྟར་དོགས་པ་ལ་རང་བཞིན་གྱི་གཏན་ཚིགས་རང་གི་ངོ་བོ་སྔར་བཤད་ཟིན་པ་ཉིད་ཚད་མ་བརྗོད་པའི་ཡན་ལག་ཏུ་སྟོན་པ་ནི། རང་བཞིན་ལ་ཡང་ཞེས་བྱའོ། །རང་བཞིན་ལ་ནི་མེད་ན་མི་འབྱུང་བ་མི་འཁྲུལ་པ་ཡོད་པ་ཙམ་དང་འབྲེལ་པ་ལ་དངོས་པོ་ཙམ་
[151b.3]ལ་ལྟོས་པ་ཡིན་ནོ། །མེད་ན་མི་འབྱུང་བ་ནི་གཏན་ཚིགས་ཀྱི་ཆོས་ཡིན་པས་དེས་གཏན་ཚིགས་འཕངས་པའི་ཕྱིར་མ་བསྟན་ཏོ། །དེས་ན་འདི་སྐད་བརྗོད་པ་ཡིན་ཏེ། རང་བཞིན་གྱི་གཏན་ཚིགས་ཀྱི་མེད་ན་མི་འབྱུང་བ་ནི་ཇི་སྐད་བཤད་པའི་ཡོད་པ་ཙམ་དང་རྗེས་སུ་འབྲེལ་པ་ལ་ཡིན་ནོ། །དེ་
[151b.4]ཉིད་ཀྱི་ཕྱིར་གང་ཞིག་ཅེས་སྨོས་སོ། །རང་བཞིན་གང་ཞིག་ཡོད་པ་ཙམ་དང་རྗེས་སུ་འབྲེལ་པའི་རང་བཞིན་དེ་ལ་ནི་ཡོད་པ་མེད་ན་མི་འབྱུང་བར་འདོད་དོ། །རང་བཞིན་ནི་སྐབས་ཀྱིས་ཡོད་པ་ཉིད་ཀྱི་ཡིན་ནོ། །དེས་ན་དེ་ལྟར་རང་བཞིན་གྱི་རང་གི་ངོ་བོ་བསྟན་ནས། དེ་ལས་མེད་ན་མི་འབྱུང་
[151b.5]བ་རིགས་པ་ཁོ་ནའོ་ཞེས་བཤད་པ་ནི་དེ་མེད་ན་ནི་ཡོད་པ་བདག་མེད་པར་འགྱུར་ཏེ་གཏན་ཚིགས་ཀྱི་མི་འཁྲུལ་བ་ནི་རྣམ་པ་དེ་ལྟ་བུའི་དོན་ལ་ཡིན་ནོ། །དེ་མེད་ན་མེད་པ་ཉིད་ན་མེད་ན་འབྱུང་བ་ཁོ་ནའོ། །དེས་ན་དོན་འདི་ཡིན་ཏེ། གང་གི་ཕྱིར་ཡོད་པ་ཙམ་དང་རྗེས་སུ་འབྲེལ་པའི་རང་བཞིན་ལ་
[151b.6]མེད་ན་མི་འབྱུང་བ་ཡིན་པ་དེའི་ཕྱིར་འདི་འདིར་རིགས་པ་ཁོ་ནའོ། །གཏན་ཚིགས་བཤད་པ་ཐ་དད་མེད་ཕྱིར་རོ། །ཐ་དད་པ་མེད་པ་ཉིད་ཀྱི་ཕྱིར་ཡོད་པ་དང་རྗེས་སུ་འབྲེལ་པར་བརྗོད་དོ། །དེས་ན་ཇི་ལྟར་མེད་ན་མི་འབྱུང་བར་མི་འགྱུར། ཅི་སྟེ་ཐ་དད་པ་མེད་པར་ཇི་ལྟར་རྟོགས་ཤེ་ན། ཆོས་
[151b.7]གང་ཞིག་ཅིག་ཤོས་གང་གི་བདག་ཉིད་དུ་གྱུར་པ་དེ་ནི་རྣམ་པར་དཔྱད་པ་ལས་དེ་ལྟ་བུ་རྟོགས་པ་ཁོ་ན་སྟེ། ཐ་དད་པ་ངེས་པ་རྟག་པར་ཇི་སྐད་བཤད་པ་བཞིན་ནོ། །བྱས་པ་ལ་སོགས་མི་རྟག་པ་ལ་སོགས་པའི་རང་བཞིན་དུ་ནི་རང་ཉིད་ཉེ་བར་བཀོད་དེ་སྟོན་པར་འགྱུར་རོ། །གང་ཁོ་ན་
[152a]
[152a.1]ཡོད་པའི་རང་བཞིན་ཞེས་བརྗོད་པ་ཡོད་པ་ཙམ་དང་རྗེས་སུ་འབྲེལ་པ་དེ་ཁོ་ན་འདི་གང་ཡོད་པ་ཙམ་དང་རྗེས་སུ་འབྲེལ་པའི་ཡོད་པ་ཡིན་ནོ། །དེས་ན་འདིར་རྣམ་པ་འདི་ལྟ་བུའི་རིགས་པས་མེད་ན་མི་འབྱུང་བ་འགྲུབ་པ་ཡིན་ནོ། །ཐ་མི་དད་པ་དེའི་རིགས་པ་ཁོང་དུ་ཆུད་
[152a.2]པ་ནི་གཏན་ཚིགས་དེ་དང་དེ་དག་ལ་ཐ་དད་པ་ཡིན་ནོ། །འདི་ལྟར་བྱས་པ་གང་ཡིན་པ་དེ་ཉིད་མི་རྟག་པ་ཡིན་པའི་ཕྱིར་དངོས་སུ་ཐ་དད་པ་མེད་པའི་ཕྱིར་རང་བཞིན་གྱི་གཏན་ཚིགས་ཀྱི་མེད་ན་མི་འབྱུང་བ་ཡིན་ནོ། །རང་གི་མཚན་ཉིད་ཐ་མི་དད་པ་ནི་མ་ངེས་པ་ཁོ་ན་སྟེ། དེ་གཅིག་ལ་འཁྲུལ་པ་མེད་
[152a.3]ཀྱང་རང་གི་མཚན་ཉིད་གཞན་ལ་ཡང་དེ་ལྟར་འགྱུར་བར་ངེས་པ་མེད་པའི་ཕྱིར་རོ། །ཇི་ལྟར་མི་རྟག་པ་གཅིག་རྩོལ་བ་ལས་བྱུང་བ་ཡིན་ཡང་གཞན་རྩོལ་བ་ལས་བྱུང་བ་མ་ཡིན་པར་འགྱུར་བ་བཞིན་ཏེ། དེས་ན་རྩོལ་བ་ལས་བྱུང་བ་ཡང་འགའ་ཞིག་མི་རྟག་པ་མ་ཡིན་པར་འགྱུར་རོ་
[152a.4]ཞེས་ཐེ་ཚོམ་འཇུག་པར་འགྱུར་རོ། །མ་ཡིན་ཏེ་དེའི་བདག་ཉིད་ནི་མི་མཐུན་པའི་ཕྱོགས་ལ་གནོད་པའི་ཚད་མས་འཇུག་པས་བསྒྲུབ་པར་བྱ་བ་ཡིན་པའི་ཕྱིར། གང་ལ་ཡོད་པ་དེ་ཁོ་ནར་འདི་འགྱུར་གྱི། གཞན་དུ་ནི་མ་ཡིན་ནོ་ཞེ་ན། དེ་ལྟ་ན་ནི་འོ་ན་ཐ་མི་དད་པ་ཙམ་དེའི་བདག་
[152a.5]ཉིད་མ་ཡིན་ནོ་ཞེས་གཞན་དུ་གཏན་ལ་ཕབ་ཟིན་ཏོ། །མི་མཐུན་པའི་ཕྱོགས་ལ་གནོད་པའི་ཚད་མ་ཉིད་ཀྱིས་ལྡོག་པ་གྲུབ་ན་རྗེས་སུ་འགྲོ་བ་ཡང་དེའི་ཤུགས་ཀྱིས་འཕངས་པས་གྲུབ་པའི་ཕྱིར་གཏན་ཚིགས་ཀྱི་དངོས་པོར་གྲུབ་པས་ན་དེའི་བདག་ཉིད་ཁས་བླངས་པས་ཅི་བྱ་དེས་
[152a.6]ན་རྒྱུ་དང་འབྲས་བུ་དང་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་གྲུབ་ན་བལྟར་རུང་བའི་ཡུལ་ཅན་གྱི་རྒྱུ་དང་ཁྱབ་པར་བྱེད་པ་མི་དམིགས་པ་དག་གིས་འབྲས་བུ་དང་རང་བཞིན་གྱི་གཏན་ཚིགས་ཀྱི་ལྡོག་པ་ངེས་སོ་ཞེས་བྱ་བ་ཡང་མི་འཐད་པར་འགྱུར་རོ། །འདི་ལྟར་རང་བཞིན་
[152a.7]གྱི་གཏན་ཚིགས་ལ་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་གྲུབ་པ་ཉིད་མི་མཐུན་པའི་ཕྱོགས་ལ་གནོད་པར་བྱེད་པའི་ཚད་མའི་དབང་གིས་ཡིན་ན་མི་མཐུན་པའི་ཕྱོགས་ལ་གཏན་ཚིགས་གནོད་པའི་ཚད་མས་གོ་ལྡོག་པ་ཇི་ལྟར་མི་ངེས། དེས་ཁྱབ་པར་བྱ་བ་དང་ཁྱབ་
[152b]
[152b.1]པར་བྱེད་པའི་དངོས་པོ་ངེས་པའི་སྔོན་རོལ་དུ་ངེས་པར་འགྱུར་བའི་ལྡོག་པ་གང་ཡིན་པ་དེ་གྲུབ་པ་ན་ཁྱབ་པར་བྱེད་པ་མི་དམིགས་པ་གཞན་གྱི་དོན་ཅི་ཡོད། གལ་ཏེ་རྗེས་སུ་འགྲོ་བ་ཉིད་འབྲེལ་པ་ཡིན་ལ་དེ་ཡང་མི་མཐུན་པའི་ཕྱོགས་ལ་གནོད་པའི་ཚད་མས་ལྡོག་པ་སྒྲུབ་པས་བསྒྲུབ་པར་
[152b.2]བྱ་བ་ཡིན་པའི་ཕྱིར་གནོད་པར་བྱེད་པའི་ཚད་མས་འབྲེལ་པ་ངེས་པར་བརྗོད་པ་ཡིན་ནོ་ཞེ་ན། དེ་ནི་མི་རུང་སྟེ། དེ་ལྟ་ན་ཡང་ཇི་སྐད་བཤད་པའི་སྐྱོན་མི་ལྡོག་པའི་ཕྱིར་རོ། །རྗེས་སུ་འགྲོ་བ་འབྲེལ་པ་ལས་གཞན་ཉིད་དོ་ཞེས་ནི་སྔར་བཤད་ཟིན་ཏོ། །དེའི་ཕྱིར་ཆོས་གཅིག་གི་བདག་ཉིད་
[152b.3]ཁོ་ན་འབྲེལ་པ་ཡིན་ལ། དེ་ཡང་དེ་དང་ཆོས་གཅིག་གི་བདག་ཉིད་ཁོ་ན་ལས་དེ་རྟོགས་པ་ན་དེའི་རང་གི་ངོ་བོ་རྣམ་པར་དཔྱད་པས་གྲུབ་པ་ཉིད་དོ་ཞེས་རིགས་སོ། །ད་ནི་འདིར་དོན་ཐ་མི་དད་ཀྱང་ཆོས་ཐ་དད་པར་རྟོགས་པར་བསྒྲུབ་པའི་ཕྱིར། འོ་ན་ད་ནི་ཞེས་རྒོལ་བར་བྱེད་དོ། །གལ་ཏེ་
[152b.4]ཇི་སྐད་བཤད་པའི་ཚུལ་གྱིས་དེ་ཙམ་དང་རྗེས་སུ་འབྲེལ་པའི་རང་བཞིན་ཉིད་ཡོད་པ་ཡིན་པའི་ཕྱིར་བྱས་པ་གང་ཡིན་པ་དེ་ཉིད་མི་རྟག་པ་ཡིན་ན། དེའི་ཚེ་བྱས་པ་དང་མི་རྟག་པ་དག་ཐ་དད་པ་མེད་པའི་ཕྱིར་བསྒྲུབ་བྱའི་ཆོས་ཅན་དང་ཆོས་ཀྱི་སྤྱིའི་མཚན་ཉིད་དམ་བཅས་པའི་དོན་གྱི་ཕྱོགས་
[152b.5]གཅིག་བསྒྲུབ་པར་བྱ་བའི་ཆོས་བྱས་པས་མི་རྟག་པ་སྒྲུབ་པ་ན་གཏན་ཚིགས་སུ་བརྗོད་པར་འགྱུར་རོ། །བྱས་པ་དང་མི་རྟག་པ་གཅིག་པའི་ཕྱིར་བྱས་པ་མི་རྟག་གོ་ཞེས་བྱས་ན་མི་རྟག་པའི་ཕྱིར་མི་རྟག་གོ་ཞེས་བརྗོད་པར་འགྱུར་ལ། དེས་ན་གཏན་ཚིགས་མ་གྲུབ་པར་འགྱུར་ཏེ།
[152b.6]བསྒྲུབ་པར་བྱ་བའི་ཆོས་བཞིན་དུ་དེ་ཡང་མ་རྟོགས་པའི་ཕྱིར་རོ་ཞེ་ན། འདི་སྤངས་པའི་ཕྱིར་ཉེས་པ་དེ་ནི་མེད་དེ་ཞེས་བྱ་བ་ལ་སོགས་པའོ། །གང་ཕྱིར་དངོས་ཀུན་ཏེ། གསལ་བ་འབའ་ཞིག་ཏུ་ནི་མ་ཟད་དེ། སྤྱི་ཡང་ཡིན་ནོ་ཞེས་བྱ་བའི་དོན་ཏོ། །ལྡོག་པ་ལ་ནི་རྟེན་པ་ཅན་དེ་ལྡོག་པ་
[152b.7]དང་ལྡན་པ་ཡིན་ནོ། །གང་ལས་ཤེ་ན། མཐུན་པའི་དངོས་པོ་གཞན་གྱི་དངོས་དག་ལས་སོ། །རང་གི་དངོས་པོ་ནི་མཐུན་དངོས་ཏེ། བདག་གི་བའི་དངོས་པོའོ། །བདག་གི་བ་ཡང་འབྲེལ་པ་ལས་ཡིན་ལ། དེ་ཡང་རིགས་འདྲ་བ་ཉིད་ལས་ཡིན་ནོ། །དེ་བཞིན་དུ་གཞན་རིགས་མི་
[153a]
[153a.1]མཐུན་པ་ནི་གཞན་གྱི་དངོས་པོ་ཡིན་ནོ། །རིགས་མཐུན་དང་རིགས་མི་མཐུན་པ་ལས་ལྡོག་པ་ཡིན་ནོ་ཞེས་བྱ་བའི་ཐ་ཚིག་གོ། །གཏན་ཚིགས་བཤད་པ་ནི་རང་བཞིན་གྱིས་རང་རང་ངོ་བོ་ལ་གནས་ཕྱིར། དེས་ན་དོན་འདི་ཡིན་ཏེ་དངོས་པོ་རང་གི་རང་བཞིན་གྱིས་གང་གི་
[153a.2]ཕྱིར་རང་གི་རང་བཞིན་གྱི་མཐར་ཐུག་པ་ཡིན་གྱི་གཞན་གྱི་བདག་ཉིད་ལ་མི་འགྲོ་བ་དེའི་ཕྱིར་དེ་ལས་འདིའི་རང་བཞིན་དེ་ལྡོག་པ་ཡིན་ནོ། །གང་གི་ཕྱིར་འདི་རང་གི་བདག་ཉིད་དུ་ཡོད་པ་དེའི་ཕྱིར་གཞན་གྱི་བདག་ཉིད་ལ་མེད་པས་ལྡོག་པ་ཡིན་ནོ། །དེས་ན་ཤིང་ཤིང་གི་བདག་ཉིད་ཀྱི་རང་
[153a.3]བཞིན་གྱིས་རང་གི་ངོ་བོ་ལ་གནས་པ་དེས་ན་བ་ལང་ལ་སོགས་པ་ཤིང་མ་ཡིན་པ་ལ་མེད་པ་དེའི་ཕྱིར་ཤིང་མ་ཡིན་པ་ལས་ལྡོག་པ་ལ་བརྟེན་པ་ཡིན་ནོ། །དེ་བཞིན་དུ་དེ་ཉིད་ཤ་པའི་རང་བཞིན་གྱིས་སེང་ལྡེང་ལ་སོགས་པ་ལ་མེད་པས་སེང་ལྡེང་ལ་སོགས་པ་ལས་ལྡོག་པས་ན་རིགས་མཐུན་
[153a.4]པ་ལས་ཀྱང་ལྡོག་པ་ཡིན་ནོ། །གསལ་བ་ནི་གསལ་བའི་བདག་ཉིད་ཁོ་ནས་ལྡོག་པ་ཡིན་གྱི། སྤྱིའི་བདག་ཉིད་ཀྱིས་ནི་འདྲེ་བར་འགྱུར་རོ་ཞེས་བྱ་བའི་དོགས་པ་བཟློག་པའི་ཕྱིར། ཀུན་ཞེས་སྨོས་སོ། །དེ་ལྟར་ཡང་འབྲེལ་བར་སྟོན་པར་འགྱུར་རོ། །དེས་ན་དེ་ལྟར་དངོས་པོ་ལ་
[153a.5]དངོས་པོ་གཞན་མེད་པའི་ཕྱིར་ལྡོག་པ་ཡོད་པར་བསྒྲུབས་ནས་ད་ནི་དེའི་རྒྱུ་མཚན་ཅན་གྱི་རྟག་པ་ཐ་དད་པ་བསྟན་པའི་ཕྱིར་དེ་ཕྱིར་ཞེས་སྨོས་སོ། །གང་གི་ཕྱིར་ལྡོག་པ་ལ་བརྟེན་པ་ཅན་ཡིན་པ་དེའི་ཕྱིར་གང་དང་གང་ལས་དོན་ལྡོག་པ་དོན་ལ་དོན་གང་དང་གང་མེད་པའི་ཕྱིར་ལྡོག་པ་རྣམས་
[153a.6]མང་བ་ཉིད་དུ་བརྗོད་དོ། །དེའི་རྒྱུ་ཅན་གྱིས་ཏེ་དེའི་རྒྱུ་མཚན་ཅན་གྱིས་རིགས་དབྱེ། རྣམ་པར་རྟོག་པའི་ཤེས་པས་རིགས་ཐ་དད་པར་རབ་ཏུ་བརྟགས་པ་ཡིན་ནོ། །འདི་སྐད་བརྗོད་དེ། གང་དང་གང་དོན་ལ་མེད་པ་དེ་དང་དེའི་གཉེན་པོར་གྱུར་པའི་ཆོས་དོན་ལ་སྣང་བ་ཡིན་ནོ། །
[153a.7]མང་པོའི་ཚིག་གིས་ནི་ཆོས་མང་པོར་བསྟན་ཏོ། །དེ་དག་ཀྱང་རྗེས་སུ་འགྲོ་བའི་རང་བཞིན་དུ་སྣང་ངོ་ཞེས་རིགས་ཀྱི་ཚིག་སྦྱར་བས་བསྟན་ཏོ། །བྱས་པ་དང་མི་རྟག་པ་ལ་སོགས་པར་བརྟགས་པའི་ཆོས་དེ་དག་ནི་ཉ་ཕྱིས་ལ་སོགས་པ་ལ་དངུལ་ལ་སོགས་པ་ལྟར་གཏན་མེད་པ་ནི་མ་ཡིན་ནོ་
[153b]
[153b.1]ཞེས་བཤད་པ་ནི། དེའི་ཁྱད་པར་ནི་རྟོགས་འགྱུར་བ་དག་རབ་ཏུ་བྱེད་ཅེས་བྱ་བ་ཡིན་ནོ། །ལྡོག་པའི་མཚམས་སུ་གྱུར་པའི་དངོས་པོ་གཞན་དག་ལས་ཁྱད་པར་དུ་གྱུར་པའི་ཕྱིར་ཁྱད་པར་ཏེ། དངོས་པོའི་རང་བཞིན་དུ་གྱུར་པ་ཐ་དད་པ་དང་འདྲེ་བ་དང་བྲལ་བའི་བྱས་པ་དང་མི་
[153b.2]རྟག་པ་ལ་སོགས་པའོ། །ཐ་དད་པ་དང་རྗེས་སུ་འགྲོ་བའི་མི་རྟག་པ་ལ་སོགས་པ་རང་བཞིན་གྱི་རྟེན་ལ་མེད་ཀྱི་རང་གི་ངོ་བོ་ནི་མ་ཡིན་ཏེ་དེས་ན་བརྟགས་པ་རྟོགས་པའི་སྒོ་ནས་དེ་རྟོགས་པར་རུང་བ་ཡིན་ནོ། །འདི་བསྟན་པ་ན་སྐབས་ཀྱི་ཉེས་པར་ཐལ་བ་མེད་དོ་ཞེས་བཤད་པ་ནི་
[153b.3]དེའི་ཕྱིར་ཞེས་བྱ་བའོ། །དོན་གྱི་རང་བཞིན་མི་རྟག་པ་ཉིད་ཀྱི་མཚན་ཉིད་ཀྱི་ཁྱད་པར་གང་ཞིག་བརྟགས་པའི་རིགས་ཀྱི་དབྱེ་བའི་ཆོས་གང་གིས་གོ་བར་འགྱུར་བའི་ཁྱད་པར་དེ་ཆོས་དེ་ལས་གཞན་གྱིས་གོ་བར་ནུས་པ་མ་ཡིན་ཏེ། དངོས་པོའི་མི་རྟག་པ་གང་ཞིག་མི་རྟག་པ་
[153b.4]ཞེས་བརྟགས་པའི་ཆོས་ཀྱིས་ཆོད་ནས་ཁྱད་པར་གྱིས་རྟོགས་པ་དེ་ནི་བྱས་པ་ཞེས་བྱ་བའི་རྣམ་པ་འདིས་རྟོགས་པར་ནུས་པ་མ་ཡིན་ལ། དེ་བཞིན་དུ་བྱས་པ་ཞེས་བྱ་བས་རྟོགས་པ་ཡང་མི་རྟག་པས་རྟོགས་པ་མ་ཡིན་ནོ། །དེས་ན་དོན་འདི་ཡིན་ཏེ། གང་གི་ཕྱིར་དངོས་སུ་བྱས་པ་ཉིད་ལ་
[153b.5]སོགས་པ་བདག་ཉིད་གཅིག་པ་ཡིན་ཡང་རྣམ་པ་དེ་ལྟ་བུའི་ཚུལ་གྱིས་ནི་རྟོགས་པ་ཐ་དད་པ་ཡོད་པ་ཡིན་ཏེ། གང་གིས་མི་རྟག་པ་མ་གྲུབ་པའི་ཕྱིར་བྱས་པ་ཞེས་བྱ་བར་བརྗོད་པ་ཡང་མ་གྲུབ་པར་འགྱུར་བའམ། དེ་གྲུབ་ན་ཡང་མི་རྟག་པ་ཡང་གྲུབ་པས་དོན་མེད་པར་འགྱུར་བ་བྱས་པར་
[153b.6]རྟོགས་པ་མི་རྟག་པ་ཉིད་ཀྱི་ཡུལ་ཅན་ནི་མ་ཡིན་ནོ། །དངོས་པོ་ལ་གཅིག་ཡིན་ཡང་དངོས་སུ་རྟོགས་པ་མ་ཡིན་པའི་ཕྱིར་རྟོགས་པ་གཅིག་གཟུང་བ་མ་ཡིན་ནོ། །གཞན་སེལ་བའི་ཡུལ་ཅན་ཉིད་ཀྱིས་རྟོགས་པ་ཐ་དད་པར་སྣང་བའི་ཕྱིར་གཅིག་རྟོགས་ཀྱང་གཞན་རྟོགས་པ་མ་ཡིན་ནོ། །
[153b.7]དེ་ལྟ་མོད་ཀྱི་རྣམ་པ་ཐམས་ཅད་དུ་དངོས་པོ་ཡོངས་སུ་དོར་བ་མ་ཡིན་པའི་ཕྱིར་རྣམ་པ་ཅི་ཞིག་ལྟར་ཡང་རྟོགས་པ་གྲུབ་པ་དེས་ན་ཇི་སྐད་བཤད་པའི་ཉེས་པའི་གོ་སྐབས་མེད་དོ། །འགྲེལ་པ་ནི་དངོས་པོ་ཐམས་ཅད་ནི་ཞེས་བྱ་བ་ལ་སོགས་པ་ཡིན་ནོ། །གང་གི་ཕྱིར་དངོས་པོ་ཐམས་ཅད་ནི་
[154a]
[154a.1]རང་གི་ངོ་བོ་ལ་གནས་པ་ཅན་ཁོ་ན་ཡིན་ཏེ། འདི་དག་ལ་རང་གི་ངོ་བོ་ལ་གནས་པ་ཡོད་པ་ཡིན་ནོ། །དོན་གྱི་རང་གི་ངོ་བོ་གང་ཡིན་པ་དེ་ཉིད་འདིའི་ངོ་བོ་ཡིན་ནོ། །དེ་ཙམ་གྱི་ངོ་བོ་ནི་རང་གི་བདག་ཉིད་ཁོ་ན་ལ་གནས་པ་ཡིན་གྱི་གཞན་གྱི་བདག་ཉིད་ལ་ནི་མ་
[154a.2]ཡིན་ནོ། །དེ་ལྟར། རང་རང་ངོ་བོ་ལ་གནས་ཕྱིར། །ཞེས་བྱ་བའི་གཏན་ཚིགས་བཤད་ནས། བསྒྲུབ་བྱ་འཆད་པ་ནི་དེ་ཕྱིར་དེ་དག་ནི་རང་གཞན་དུ་འདྲེ་བར་མི་བྱེད་དོ། །གཞན་ལ་ཡོད་པ་མ་ཡིན་ནོ། །རིགས་མཐུན་པ་དང་རིགས་མི་མཐུན་པ་གཞན་ལས་ལྡོག་གོ་ཞེས་བྱ་བའི་དོན་ཏོ། །
[154a.3]དེ་དག་རང་གི་ངོ་བོ་ལ་གནས་པའི་ཕྱིར་གཞན་གྱི་ངོ་བོ་ལས་ལྡོག་པ་ཡིན་ནོ་ཞེས་བྱ་བ་གང་ཡིན་པ་འདི་ལ་རིགས་པ་ཅི་ཡོད་ཅེ་ན། དེ་གཞན་མ་ཡིན་པ་ཉིད་དུ་ཐལ་བར་གྱུར་པའི་ཕྱིར་རོ་ཞེས་སྨོས་སོ། །གལ་ཏེ་གཞན་དེ་དེ་ཉིད་ཡིན་ན། དེ་ལྟ་ན་འདི་གཞན་གྱི་ངོ་བོ་དང་འདྲེས་པར་འགྱུར་བ་ཡིན་
[154a.4]ནོ། །གང་གི་ཚེ་འདི་གང་ཡིན་པ་ནི་དེ་ཁོ་ན་ཡིན་ལ་གཞན་ནི་གཞན་ཁོ་ན་ཡིན་པ་དེའི་ཚེ་འདྲེས་པའི་དོན་ཅི་ཞིག་ཡོད། དེ་ལྟ་ན་ནི་རང་རང་གི་ངོ་བོ་ལ་གནས་པ་ཉིད་དུ་གསལ་བར་འགྱུར་རོ། །འདྲེས་པར་གྱུར་པས་བྱས་ཏེ་འདི་དག་གཅིག་ཏུ་གྱུར་ན་ཡང་དེ་གཞན་མ་ཡིན་པ་ཕ་རོལ་པོར་མ་
[154a.5]གྱུར་པ་ཉིད་དུ་འགྱུར་བས་དེ་ལྟ་ན་ཡང་གཞན་གྱི་བདག་ཉིད་ལ་འདྲེ་བ་མ་གྲུབ་ཀྱི། འོན་ཀྱང་རང་རང་གི་ངོ་བོ་ཉིད་ལ་རྣམ་པར་གནས་པ་ཁོ་ནར་འགྱུར་རོ། །ཅི་སྟེ་ཡང་རང་བཞིན་ཐ་དད་པ་ཡོད་ཀྱང་རང་བཞིན་འགའ་ཞིག་གིས་གཅིག་པར་འགྱུར་བའི་ཕྱིར་གཞན་གྱི་བདག་ཉིད་དང་
[154a.6]འདྲེས་ཀྱང་གཞན་མ་ཡིན་པར་ཐལ་བར་མི་འགྱུར་ཏེ། དཔེར་ན་བུམ་པ་སྣམ་བུ་ལས་རང་གི་ངོ་བོ་ཐ་དད་ཀྱང་ཡོན་ཏན་གསུམ་གྱི་བདག་ཉིད་ཀྱིས་གཅིག་ཏུ་འགྱུར་རོ་ཞེས་ཁ་ཅིག་སེམས་པ་བཞིན་ནོ། །འདི་ལྟར་བུམ་པ་ཡང་སྙིང་སྟོབས་དང་རྡུལ་དང་མུན་པའི་བདག་ཉིད་ཡིན་ལ་སྣམ་
[154a.7]བུ་ཡང་ཡིན་ནོ། །ཡོན་ཏན་གསུམ་ནི་བུམ་པ་ལས་ཐ་མི་དད་ལ་སྣམ་བུ་ལས་ཀྱང་ཐ་མི་དད་དོ། །དེས་ན་གཞན་ཡིན་ཡང་འདྲེ་བར་འཐད་པ་ཡིན་ནོ་ཞེས་དོགས་པ་ཐམས་ཅད་སྨོས་པའི་འབྲས་བུ་བསྟན་པའི་ཕྱིར་གང་ཡང་ཞེས་སྨོས་སོ། །གང་ཡང་བུམ་པ་ལ་སོགས་པ་འདི་དག་གི་
[154b]
[154b.1]རང་གི་བདག་ཉིད་དུ་གྱུར་པ་ཞེས་བྱ་བ་གསལ་བ་ལས་ཐ་མི་དད་པ་དང་ངོ་བོ་ཐ་མི་དད་པ་ཞེས་བྱ་བ་རྗེས་སུ་འགྲོ་བ་སྟེ། གཞུང་ལུགས་ཇི་ལྟ་བ་བཞིན་ཁས་བླངས་པའོ། །དེ་ནི་བུམ་པ་ལ་སོགས་པ་ཐ་དད་པའི་བདག་ཉིད་དེ་དག་གི་མ་ཡིན་ཏེ། རང་བཞིན་དེ་དག་གི་མ་ཡིན་ནོ་ཞེས་བྱ་བའི་
[154b.2]ཐ་ཚིག་གོ། །ཇི་ལྟར་ཞེ་ན་བཤད་པ་བདག་ཉིད་དུ་གྱུར་པ་ཐ་དད་པ་མེད་པའི་རང་བཞིན་ཡོད་པར་གྱུར་པ་དེའི་ཚེ་བུམ་པ་ལ་སོགས་པ་དག་མེད་པར་འགྱུར་རོ། །འདི་ལྟར་བུམ་པ་ཡོན་ཏན་གསུམ་ལས་ཐ་མི་དད་ན། བུམ་པ་ཉིད་ཡོན་ཏན་གསུམ་ཡིན་པའམ། ཡང་ན་ཡོན་ཏན་
[154b.3]གསུམ་ཉིད་བུམ་པ་ཡིན་པར་འགྱུར་གྱི། བུམ་པ་ཉིད་དང་ཡོན་ཏན་གསུམ་གྱི་བདག་ཉིད་དུ་ཡང་འགྱུར་བ་ནི་མ་ཡིན་ནོ། །དེ་ལྟ་ན་འོ་ན་སྔོན་པོ་སྐད་ཅིག་མ་ཉིད་ལས་ཐ་མི་དད་ན་སྔོན་པོ་ཉིད་སྐད་ཅིག་མ་ཡིན་པའི་ཕྱིར་འཇིག་པ་ཙམ་མམ་གཟུགས་ཙམ་དུ་འགྱུར་གྱི་གཟུགས་
[154b.4]དང་འཇིག་པར་ནི་མི་འགྱུར་རོ། །དེས་ན་ཐ་མི་དད་ཀྱང་གཟུགས་དང་འཇིག་པ་ཡིན་པ་དེ་བཞིན་དུ་བུམ་པ་ཡང་ཡོན་ཏན་གསུམ་གྱི་བདག་ཉིད་དུ་འགྱུར་རོ་ཞེ་ན་མི་མཐུན་པ་ཉེ་བར་བཀོད་པ་སྟེ་གཟུགས་ཉིད་འཇིག་པ་ཡིན་པའི་ཕྱིར་སྔོན་པོ་དང་སྐད་ཅིག་མ་དག་ཐ་དད་མེད་ཀྱང་
[154b.5]འདི་རྣམ་པར་རྟོག་པས་ཐ་དད་པར་རྟོགས་པ་ཡིན་ནོ། །དེ་བཞིན་དུ་གལ་ཏེ་བུམ་པ་ཉིད་ཡོན་ཏན་གསུམ་གྱི་བདག་ཉིད་ཅན་ཡིན་པས་ན་འདི་རང་བཞིན་གཅིག་ཡིན་ན་སྣམ་བུ་ལ་ཡང་ཡོན་ཏན་གསུམ་གྱི་བདག་ཉིད་ཡོད་པའི་ཕྱིར་དེ་ཡང་བུམ་པའི་རང་བཞིན་དུ་འགྱུར་རོ། །བུམ་
[154b.6]པའི་རང་བཞིན་ཡང་ཡིན་ལ་ཡོན་ཏན་གསུམ་ཡང་ཡིན་པའི་ཕྱིར་སྔོན་པོ་དང་སྐད་ཅིག་མ་ལ་སོགས་པ་ལྟར་ཐ་མི་དད་པའི་རང་བཞིན་ཡིན་པའི་ཕྱིར་བུམ་པའི་རང་བཞིན་དང་བྲལ་བའི་ཡོན་ཏན་གསུམ་སྣམ་བུ་ལ་ཡོད་པར་ག་ལ་འགྱུར་ཏེ། དེ་ཡོན་ཏན་གསུམ་ཉིད་མ་ཡིན་པར་
[154b.7]འགྱུར་རོ། །དེ་ལྟ་ན་འོ་ན་སྔོན་པོ་དང་འཇིག་པ་ཞེས་བྱ་བ་རང་བཞིན་གཅིག་ཡིན་པའི་ཕྱིར་སྔོན་པོ་ཉིད་སྤངས་ནས་སེར་པོ་འཇིག་པ་ཡིན་པར་མི་འགྱུར་བའམ། འཇིག་པ་ཡིན་ན་ནི་སྔོན་པོ་ཉིད་དུ་ཐལ་བར་འགྱུར་རོ་ཞེ་ན། དེ་ལྟར་ནི་མི་ནུས་ཏེ། སྔོན་པོའི་བདག་ཉིད་
[155a]
[155a.1]དུ་གྱུར་པའི་འཇིག་པ་ཉིད་སེར་པོ་ལ་ཁས་མ་བླངས་པའི་ཕྱིར་རོ། །དེ་ཡོད་ན་ནི་ཐལ་བ་འདིར་འགྱུར་བ་ཁོ་ན་སྟེ། དེ་སྔོན་པོ་དང་དབྱེར་མེད་པ་ན་སྔོན་པོ་སྤངས་ནས་རྗེས་སུ་འཇུག་པ་མི་སྲིད་པའི་ཕྱིར་རོ། །ཡོན་ཏན་གསུམ་ནི་སྣམ་བུ་ལས་གཞན་དུ་
[155a.2]ཁས་མ་བླངས་སོ། །བུམ་པ་ལ་ཡོད་པ་ནི་བུམ་པ་དང་ཐ་མི་དད་པས་ན་སྣམ་བུ་བུམ་པར་ཐལ་ལོ། །དེས་ན་ཡོན་ཏན་གསུམ་ཙམ་རྗེས་སུ་འཇུག་པ་དེ་བུམ་པ་ལས་གཞན་ཡིན་པར་འགྱུར་རོ། །དེས་ན་བུམ་པ་ཉིད་ཡོན་ཏན་གསུམ་ཡིན་ནོ་ཞེས་ཁས་མི་བླང་ངོ་། །དེས་ན་རྣམ་
[155a.3]པར་རྟོག་པ་སྔ་མ་ལ། བུམ་པ་ཉིད་ཡོན་ཏན་གསུམ་ཡིན་པར་འགྱུར་བའི་ཕྱིར་སྣམ་བུ་བུམ་པ་ཉིད་དུ་ཐལ་ལོ། །འོན་ཏེ་ཡོན་ཏན་གསུམ་གྱི་བདག་ཉིད་ཁོ་ན་བུམ་པ་ཡིན་ནོ། །དེའི་ཚེ་དེ་དག་མེད་པ་ཁོ་ནར་འགྱུར་རོ། །དེ་བཤད་པ་ནི་དེ་ཁོ་ན་ཡིན་པར་འགྱུར་ཏེ་ཞེས་བྱ་བའོ། །
[155a.4]གང་གི་ཕྱིར་ཐ་མི་དད་པ་གསལ་བ་ལ་རྗེས་སུ་འགྲོ་བ་ཡོད་པ་ཡིན་པ་དེའི་ཕྱིར་དེ་ཁོ་ན་ཡིན་པར་འགྱུར་རོ། །གལ་ཏེ་ཇི་ལྟར་ཐ་མི་དད་པ་ཡོད་པ་དེ་བཞིན་དུ་གསལ་བའི་རང་བཞིན་དུ་ཐ་དད་པ་ཡང་ཡོད་པ་མ་ཡིན་ནམ་ཞེ་ན་མ་ཡིན་ནོ་ཞེས་བཤད་པ་ནི་ཐ་དད་པ་ཡང་མེད་པའི་ཕྱིར་རོ་ཞེས་བྱ་
[155a.5]བའོ། །བུམ་པ་ལ་སོགས་པ་གསལ་བའི་བདག་ཉིད་ཐ་དད་པ་ནི་ཡོད་པ་མ་ཡིན་ནོ། །དེ་ཡོད་ན་དེ་ལས་མ་རྟོགས་པ་ཞེས་གཞི་མཐུན་པས་གཏན་ཚིགས་ཡིན་ནོ། །འདི་སྐད་བཤད་པ་ཡིན་ཏེ་གལ་ཏེ་བུམ་པ་ལ་སོགས་པ་ཐ་དད་པ་ཡོད་ལ་ཡོན་ཏན་གསུམ་ཡང་ཐ་མི་དད་པ་ཡིན་ན།
[155a.6]དེའི་ཚེ་དེ་དང་ཐ་དད་པར་འགྱུར་བའི་ཕྱིར་འདི་ཁས་བླང་བར་ནུས་པ་མ་ཡིན་ནོ། །ཇི་སྐད་བརྗོད་པའི་བསམ་པ་ཐ་མི་དད་པ་ལས་ཉེས་པ་བཤད་པ་ནི་དེ་ཉིད་ཐ་དད་པར་ནི་ཞེས་བྱ་བའོ། །གལ་ཏེ་ཡོན་ཏན་གསུམ་གྱི་བདག་ཉིད་ལས་བུམ་པ་ཉིད་ཐ་དད་པ་མ་ཡིན་ན། དེའི་ཚེ་འདི་སྣམ་བུ་ལ་
[155a.7]སོགས་པ་ལས་ཐ་མི་དད་པས་ཇི་ལྟར་ཡང་བུམ་པ་ལ་སོགས་པ་ཐ་དད་པར་འགྱུར། བུམ་པ་དང་ཐ་མི་དད་པའི་ཡོན་ཏན་གསུམ་སྣམ་བུ་ལས་ཐ་དད་པ་མེད་བཞིན་དུ་ཡང་སྣམ་བུ་ལ་སོགས་པའི་རང་བཞིན་གྱིས་ཐ་དད་དོ་ཞེས་ནི་མི་འཐད་དོ། །དེའི་ཕྱིར་ཡོན་ཏན་གསུམ་ཙམ་ཉིད་ཡོད་པ་
[155b]
[155b.1]ལུས་པ་ཡིན་ལ་དེ་ལྟ་ན་ཡང་དངོས་པོ་ཐམས་ཅད་རང་རང་གི་ངོ་བོ་ལ་གནས་སོ་ཞེས་གྲུབ་བོ་ཞེས་སྟོན་པ་ནི། དེ་ཡང་ཞེས་བྱ་བ་ཡིན་ནོ། །གང་གི་ཚེ་ཐ་མི་དད་པར་ཁས་བླངས་པ་གང་ཡིན་པ་དེ་ཁོ་ན་ཡོད་དོ་ཞེས་ལུས་པར་གྱུར་པ་དེའི་ཚེ། གཞན་འགའ་ཡང་མེད་པས་ན་འདི་གང་དུ་འདྲེ་བར་
[155b.2]འགྱུར་ཏེ་དེས་ན་རང་གི་བདག་ཉིད་ལ་རྣམ་པར་གནས་པ་གྲུབ་པའི་ཕྱིར་གཞན་ལ་ལྡོག་པ་ཡིན་ནོ། །འོ་ན་དོན་ཐ་དད་པ་ཡང་ཡོད་པར་འགྱུར་ལ་ཐ་དད་པ་རྣམས་ཀྱི་རང་བཞིན་ཐ་མི་དད་པ་ཡང་ཡོད་པ་ཡིན་ནོ། །གང་གིས་ཇི་སྐད་བཤད་པའི་སྐྱོན་དུ་འགྱུར་བ་ཐ་དད་པ་དག་དང་ཐ་མི་དད་པར་དབྱེར་མེད་པ་ནི་
[155b.3]མ་ཡིན་ཏེ། འོན་ཀྱང་ཐ་དད་པ་ཁོ་ནའོ། །ཐ་མི་དད་པ་དེ་ནི་ཐ་དད་པ་དེ་དག་ལ་འབྲེལ་པ་རྣམ་པར་གནས་པ་ཡིན་ནོ། །དེ་བས་ན་ཐ་དད་པར་རང་གི་བདག་ཉིད་ཀྱིས་རང་རང་གི་ངོ་བོ་ལ་རྣམ་པར་གནས་པའི་ཕྱིར་མ་འདྲེས་ཀྱང་འདི་དག་ལ་ཐ་མི་དད་པའི་རང་བཞིན་ཡོད་པ་གང་ཡིན་པ་དེ་དང་འབྲེལ་
[155b.4]པའི་ཕྱིར་འདི་དག་དེའི་བདག་ཉིད་ཀྱིས་འདྲེ་བ་ཡིན་ནོ། །དེས་ན་བུམ་པ་ལ་སོགས་པ་དག་བུམ་པ་ལ་སོགས་པ་བདག་ཉིད་ཀྱིས་རང་རང་གི་ངོ་བོ་ལ་གནས་ཀྱང་ཡོད་པའི་བདག་ཉིད་ཀྱིས་འདྲེ་བར་འགྱུར་ཏེ། ཡོད་པའི་མཚན་ཉིད་ཀྱི་དེའི་བདག་ཉིད་ནི་དེ་དག་དང་འབྲེལ་བའི་ཕྱིར་ཏེ།
[155b.5]ཐམས་ཅད་ལ་ཡོད་པའི་ཕྱིར་རོ། །དེས་ན་བདག་ཉིད་འགའ་ཞིག་འདྲེ་བར་འགྱུར་བས་ན། གང་ཕྱིར་དངོས་ཀུན་རང་བཞིན་གྱིས། །ཞེས་ཇི་ལྟར་བརྗོད་ཅེ་ན་ཞེས་དོགས་པ་ལ། དོན་གཞན་ཡང་ཞེས་སྨོས་སོ། །དོན་གཞན་ཉིད་ཀྱིས་སྔར་གྱི་སྐྱོན་མེད་པར་བསྟན་ཏོ། །དེ་ལྟ་ཡིན་
[155b.6]ན་དེ་དག་གི་རང་བཞིན་ཡིན་པའི་ཕྱིར་འདྲེ་བར་མི་འགྱུར་རོ་ཞེས་བྱ་བ་བཟློག་པའི་ཕྱིར། དུ་མ་དང་འབྲེལ་ཀྱང་ཞེས་སྨོས་སོ། །དེ་ལྟ་བུར་གྱུར་པས་ཀྱང་དེ་དག་འདྲེ་བ་མ་ཡིན་ནོ་ཞེས་བཤད་པ་ནི། དེ་ནི་དེ་དག་གི་སྤྱི་མ་ཡིན་ཏེ་ཞེས་སྨོས་སོ། །དུ་མ་གང་དག་དང་འདི་འབྲེལ་པ་དེ་དག་གི་
[155b.7]སྤྱི་དེ་མ་ཡིན་ནོ། །གལ་ཏེ་འདི་དག་གིས་སྤྱིར་གྲུབ་ན་ནི་དེའི་ཚེ་འདི་དག་གི་མཚུངས་པ་ཡིན་པའི་ཕྱིར་དེའི་བདག་ཉིད་ཀྱིས་འདྲེ་བར་འགྱུར་བ་ཞིག་ན་དེ་ལྟ་ན་ནི་མ་ཡིན་ནོ། །མ་ཡིན་པར་ཇི་ལྟར་རྟོགས་ཤེ་ན། དེའི་ངོ་བོ་མ་ཡིན་པའི་ཕྱིར་རོ་ཞེས་བརྗོད་དོ། །གལ་ཏེ་འདི་དེ་དག་དང་
[156a]
[156a.1]འབྲེལ་པར་ཁས་བླངས་པའི་ཕྱིར་འདི་དག་གི་ངོ་བོ་ཉིད་མ་ཡིན་ནམ་ཞེ་ན་བདེན་ཏེ་འདི་སྒྲ་དེ་ལྟར་བརྗོད་ཀྱི་དེ་འདི་ལྟར་བརྗོད་པར་འདོད་པ་ནི་མ་ཡིན་ནོ། །དེ་དེ་དག་གི་ཐ་མི་དད་པའི་ངོ་བོ་མ་ཡིན་ནོ་སྙམ་དུ་བསམས་པའི་ཕྱིར་རོ། །དེའི་བསམ་པ་ནི་འདི་ཡིན་ཏེ། གང་གི་ཚེ་རང་བཞིན་
[156a.2]གཅིག་རེ་རེ་ལ་ཡོངས་སུ་རྫོགས་པས་མང་པོ་རྣམས་ཀྱི་ཐ་དད་པ་མེད་པ་ཉིད་ཀྱི་རང་བཞིན་ཡིན་ན་དེའི་ཚེ། འདི་མང་པོ་རྣམས་ཀྱི་མཚུངས་པ་ཡིན་པར་འགྱུར་རོ། །བ་ལང་དུ་རྟོགས་པའི་ཡུལ་གྱི་རང་བཞིན་གང་ཡིན་པ་དེ་དག་གང་གི་ཚེ་ཁྲ་བོ་ལ་སོགས་པ་རེ་རེ་ལ། ལ་ལ་ཐ་དད་
[156a.3]པ་མེད་པར་ཡོད་པ་དེའི་ཚེ་དེ་དག་ཐམས་ཅད་དེ་ལྟ་བུར་མཚུངས་པར་གྲུབ་པའི་ཕྱིར་ཐ་མི་དད་པར་དེ་ཉིད་དེ་དག་གི་སྤྱི་ཡིན་པར་འགྱུར་རོ། །ཐ་དད་པ་གཅིག་ནི་ཡོད་ཀྱང་དེ་དག་གི་རང་བཞིན་གང་མཚུངས་པ་མ་ཡིན་པའི་ཕྱིར་ཇི་ལྟར་འདི་སྤྱིའི་ངོ་བོ་ཉིད་ཡིན་ནོ། །གལ་ཏེ་ཐ་མི་
[156a.4]དད་ན་ཐ་མི་དད་པ་ཡོད་པས་དེ་ལས་ཐ་དད་པ་མེད་པར་ཐལ་བ་མ་ཡིན་ནམ། བདེན་ན་འདིར་འདྲེ་བ་འགོག་པར་འདོད་པ་ཡིན་གྱི། སྤྱི་གཞུང་གཟུགས་པའི་དོན་དུ་ནི་མ་ཡིན་ནོ། །དེས་ན་ཐ་མི་དད་པ་ཁྱད་པར་རྣམ་པ་མེད་པའི་ཕྱིར་དང་། ཐ་དད་ན་ཡང་སྤྱིའི་ངོ་བོ་མ་ཡིན་པའི་ཕྱིར་
[156a.5]འདྲེ་བ་མེད་དོ། །གལ་ཏེ་གཅིག་པུ་དུ་མ་དང་འབྲེལ་པས་མཚུངས་པར་འགྱུར་ན་རིགས་མི་མཐུན་པ་དག་ཀྱང་གཉིས་ལ་སོགས་པ་དང་ལྡན་པའི་ཕྱིར་རམ་ཡན་ལག་རྣམས་ལ་ཡང་ཡན་ལག་ཅན་གཅིག་ཡོད་པའི་ཕྱིར་མཚུངས་པའི་རང་བཞིན་དུ་གྱུར་པའི་ཕྱིར་གཉིས་ཉིད་
[156a.6]ལ་སོགས་པ་ཡང་སྤྱིའི་རང་བཞིན་དུ་འགྱུར་རོ། །དེ་བཤད་པ་ནི་གཉིས་ཉིད་ལ་སོགས་པ་དང་ཞེས་བྱ་བའོ། །དེ་དག་ལ་ཡང་སྤྱིའི་རང་བཞིན་ཉིད་ཐལ་བར་འགྱུར་བའི་ཕྱིར་རོ། །དོན་གཞན་དེའི་ངོ་བོ་མ་ཡིན་ཡང་འབྲེལ་པའི་ཕྱིར་དེ་དག་གི་སྤྱིར་འགྱུར་བ་མ་ཡིན་ནམ་
[156a.7]ཞེ་ན། མ་ཡིན་ནོ་ཞེས་བཤད་པ་ནི་འབྲེལ་པ་ཅན་ཞེས་བྱ་བའོ། །འབྲེལ་པ་ཅན་གཞན་ཐ་དད་པས་ཀྱང་གཞན་དག་མཚུངས་པར་ནི་མི་འགྱུར་རོ། །འདི་ལྟར་གཅིག་ཐ་མི་དད་པ་མ་ཡིན་ན་འདི་དག་གི་རང་བཞིན་མི་འདྲ་བ་ཉིད་དོ། །དེས་ན་རང་བཞིན་མི་འདྲ་བ་རྣམས་ཀྱང་ཐ་དད་
[156b]
[156b.1]གཅིག་དང་འབྲེལ་པས་མཚུངས་པ་ཞེས་བྱ་བར་ཇི་ལྟར་འགྱུར། འོ་ན་ཇི་ལྟར་འགྱུར་ཞེ་ན། དེ་དང་ལྡན་པ་དག་ཏུ་ནི་འགྱུར་ཏེ་ཞེས་སྨོས་སོ། །གཅིག་པོ་དེས་དེ་དང་ལྡན་པ་ཞེས་བྱ་བར་འགྱུར་གྱི། མཚུངས་པ་ནི་མ་ཡིན་ནོ། །རིགས་མི་མཐུན་པའི་འབྱུང་པོ་དག་མགུལ་ཆིངས་
[156b.2]ཀྱིས་དེ་དང་ལྡན་པ་ཡིན་པ་བཞིན་ནོ། །དངོས་པོའི་དེའི་ངོ་བོ་ཉིད་ནི་དེ་དང་རང་བཞིན་གཅིག་པའམ་དེ་དང་འབྲེལ་པ་ལས་འགྱུར་ལ། མགུལ་ཆིངས་ཀྱི་ཚུལ་དུ་འགྱུར་བ་གང་ཡིན་པ་འབྲེལ་ལོ་ཅོག་གིས་ནི་རང་བཞིན་དུ་འགྱུར་བ་མ་ཡིན་ནོ། །དེས་ན་ཇི་ལྟར་འབྲེལ་པ་ཅན་གཅིག་པས་
[156b.3]དེའི་རང་བཞིན་མ་ཡིན་ཡང་འབྲེལ་པ་ཅན་རྣམས་མཚུངས་པར་མི་འགྱུར་ཞེ་ན། ཤེས་པ་ཐ་མི་དད་པའི་ཡུལ་ཡང་མ་ཡིན་ཏེ་ཞེས་སྨོས་སོ། །འབྲེལ་པ་ཅན་གཞན་གྱིས་ཀྱང་ཞེས་འབྲེལ་ཏོ། །འབྲེལ་བ་ཡང་ཐ་དད་པ་དང་འབྲེལ་བ་ནི་མ་ཡིན་ནོ། །དེས་ན་རང་གི་ངོ་བོ་མི་འདྲ་བ་རྣམས་
[156b.4]དེ་ཁོ་ན་བཞིན་རྟོགས་པར་འགྱུར་རོ། །དེས་ན་འབྲེལ་པས་ནི་དེ་དང་ལྡན་པ་ཉིད་དུ་འགྱུར་རོ། །འབྱུང་པོ་བཞིན་ནོ་ཞེས་བྱ་བ་ནི་ཆོས་མཐུན་པའི་དཔེའོ། །ཐ་མི་དད་པའི་དོན་ཉིད་དེའི་རང་བཞིན་ཉིད་ཀྱིས་ནི་ཐ་དད་པ་རྣམས་མཚུངས་པ་མ་ཡིན་གྱི་འོན་ཀྱང་ཐ་མི་དད་པ་དང་འབྲེལ་པས་ཡིན་
[156b.5]ནོ་ཞེ་ན་མ་ཡིན་ཏེ་རེ་ཞིག་དངོས་པོ་ནི་བཤད་ཟིན་ཏོ། །རྟོགས་པ་འདི་ཁོ་ན་ལྟར་ཡིན་ཏེ་གང་གི་ཕྱིར་འབྲེལ་པ་ཅན་དེ་དག་གིས་བདག་ཉིད་ཁོ་ན་སྲེ་ཞིང་སྤྱི་རྟོགས་པར་སྣང་གི །ཇི་ལྟར་འབྱུང་པོ་དག་བཞིན་དུ་འབྲེལ་པ་ཅན་གཅིག་དང་། འབྲེལ་པ་ཅན་དག་གོ་ཞེས་བྱ་བར་ནི་མ་ཡིན་ནོ། །འདི་ལྟར་
[156b.6]ཇི་ལྟར་ཁྱད་པར་གཅིག་བ་ལང་ངོ་ཞེས་བྱ་བར་སྣང་བ་དེ་བཞིན་དུ་གཞན་ཡང་ཡིན་པའི་ཕྱིར་གཅིག་སྣང་བ་གང་ཡིན་པ་དེ་ཉིད་གཞན་སྣང་བ་ཡིན་པ་དེས་ན་འདྲེས་པར་བརྗོད་དོ། །གཞན་དུ་ནི་འདྲེས་པའི་དོན་ཡོད་པ་མ་ཡིན་ནོ་ཞེས་སྟོན་པར་འགྱུར་རོ། །རང་བཞིན་གཅིག་པོ་དེས་གཅིག་གི་
[156b.7]བདག་ཉིད་མྱོང་བ་མེད་པར་ནི་རང་བཞིན་དེ་ཉིད་ཀྱིས་གཅིག་ལ་གཅིག་ཏུ་འཛིན་པར་བྱེད་པ་མི་འཐད་དོ། །ཐ་དད་པ་དེ་དག་དེའི་རང་བཞིན་མ་ཡིན་པའི་ཕྱིར་འབྲེལ་པར་རྟོགས་པ་ཉིད་དུ་ཐལ་བའི་ཕྱིར་རོ། །དེའི་ཕྱིར་ཐ་མི་དད་པ་དང་བདག་ཉིད་གཅིག་པ་ཉིད་ཀྱིས་མཚུངས་པ་ཡིན་གྱི།
[157a]
[157a.1]འབྲེལ་པས་ནི་མ་ཡིན་ནོ། །གལ་ཏེ་འདིར་འཕྲོད་པ་འདུ་བས་སྦྲེལ་བ་ཡིན་ལ་འབྱུང་པོའི་མགུལ་ཆིངས་ལ་སོགས་པ་ལྟར་འདུ་བ་ཅན་དག་ལས་ཐ་དད་པར་འཛིན་པ་ཡང་ཡོད་པ་མ་ཡིན་པ་དེས་ན་ཐ་དད་པ་དང་རྗེས་སུ་འགྲོ་བ་སྤྱི་དང་ཁྱད་པར་དག་དོན་གཅིག་ལ་འགལ་
[157a.2]བས་དེའི་རང་བཞིན་མ་ཡིན་པ་ཡང་ཐ་དད་པར་མ་རྟོགས་པའི་ཕྱིར་དེའི་ངོ་བོ་རྟོགས་པ་ཡིན་ནོ་ཞེ་ན། ཐ་དད་པ་མ་རྟོགས་ཀྱང་གཞན་གཞན་དུ་རྟོགས་པ་ནི་མ་ཡིན་ཏེ། འཁྲུལ་པར་ཐལ་བར་འགྱུར་བའི་ཕྱིར་རོ། །འཁྲུལ་པར་འདོད་པ་ཁོ་ན་སྟེ། འོན་ཀྱང་དེ་སྤྱིས་མཐོང་བའི་རྒྱུ་མཚན་
[157a.3]གྱིས་ཡིན་པའི་ཕྱིར་དོན་གཅིག་མེད་པའི་ཕྱིར་དོན་ཐ་དད་པ་དག་ལ་ཡང་ཐ་མི་དད་པར་རྟོགས་པ་ཡང་འཐད་པ་ཡིན་ནོ་ཞེ་ན། དོགས་པ་འདི་སྨྲས་པ་ནི། གལ་ཏེ་དེ་ནི་དེ་མཐོང་བའི་འཁྲུལ་པ་ཡིན་ནོ་ཞེ་ན་ཞེས་བྱ་བའོ། །ལན་བཏབ་པ་ནི་སྤྱི་དེ་མཐོང་ངོ་ཞེས་བྱ་བ་ག་ལས་དེ་དང་ལྡན་པར་
[157a.4]རྟོགས་ནས་སྤྱིའི་རང་གི་ཚད་མས་གྲུབ་པར་འགྱུར་བ་ཞིག་ན། རྟེན་ཐ་མི་དད་པར་རྟོགས་པ་ན་སྤྱི་མཐོང་ངོ་ཞེས་ག་ལས་ཡིན། འོན་ཏེ་ཇི་སྐད་བཤད་པའི་ཚུལ་གྱིས་རང་རང་གི་ཚད་མས་གྲུབ་པ་མེད་ཀྱང་རྟེན་ཐ་མི་དད་པ་རྟོགས་པ་གྲུབ་པར་བྱ་བའི་ཕྱིར་འདི་ལྟར་བཀོད་པ་ཡིན་ནོ། །
[157a.5]གལ་ཏེ་འཁྲུལ་པས་ས་བོན་མེད་པ་ཅན། །ཞེས་བྱ་བས་དོགས་པ་དེ་བསུ་ནས་འབྲས་བུ་དེ་ཞེས་བྱ་བས་ལན་འདེབས་སོ། །འདི་སྐད་བཤད་པ་ཡིན་ཏེ་དེ་དང་ལྡན་པར་རྟོགས་པ་མེད་པའི་ཕྱིར་ཚད་མས་གྲུབ་པ་མ་ཡིན་པས་ན། གལ་ཏེ་རྟོགས་པ་གྲུབ་པར་བྱ་བ་ཉིད་ཀྱི་ཕྱིར་ཉེ་བར་
[157a.6]རྟོགས་ན། དེ་ནི་རྣམ་པ་གཞན་དུ་ཡང་འགྲུབ་པར་འགྱུར་ཏེ། གསལ་བ་དག་ཉིད་ལ་དེ་ལྟར་རྟོགས་པའི་ཕྱིར་རོ། །ཁྱེད་ཀྱིས་ཐ་མི་དད་པས་ཐ་དད་པ་མེད་པར་རྟོགས་པ་འཁྲུལ་པར་ཁས་བླངས་པ་ཡིན་ཏེ། དེས་དོན་རྣམས་ཐ་མི་དད་པ་མ་ཡིན་པའི་ཕྱིར་རོ། །འདི་ནི་ཐ་དད་པ་
[157a.7]རྣམས་ལ་ཐ་མི་དད་པར་རྟོགས་པ་འཁྲུལ་པ་ཡིན་ལ་དེ་ཡང་གསལ་བའི་བདག་ཉིད་མ་ཡིན་ཏེ། ངོ་ཤེས་པའི་ངོ་བོ་ཉིད་མེད་པའི་ཕྱིར་རོ་ཞེས་བསྟན་པར་བྱའོ། །འདི་ལྟར་ཁྲ་བོ་ཡང་བ་ལང་གི་རང་བཞིན་ཡིན་ལ། སེར་སྐྱ་ཡང་ཡིན་ནོ། །འོན་ཀྱང་དེར་ཐ་མི་དད་པའི་ཐ་སྙད་ཙམ་
[157b]
[157b.1]འཁྲུལ་པ་ཡིན་ནོ། །དེའི་བ་ལང་ཉིད་ཀྱི་རང་བཞིན་ནི་གཞན་གྱི་མ་ཡིན་ནོ་ཞེས་བཤད་པར་བྱའོ། །འདི་ཉིད་འབྲས་བུ་གཅིག་པ་ཅན་ཉིད་ཀྱིས་བསྟན་ཏོ། །ཇི་ལྟར་མང་པོ་རྣམས་འབྲས་བུ་གཅིག་བྱེད་པ་ན་སོ་སོར་དེའི་རྒྱུ་ཉིད་ཕན་ཚུན་ཐ་དད་པ་ཡིན་པ་དེ་བཞིན་དུ་བ་ལང་ཉིད་ཀྱང་
[157b.2]ཡིན་ནོ་ཞེས་སོ། །འཕྲོད་པས་འདུ་བའི་ཕྱིར་ཐ་དད་པར་མ་མཐོང་བའི་གཅིག་པོས་དུ་མ་ཐ་མི་དད་པར་རྟོགས་པ་ཡང་མཐོང་བ་མེད་དོ། །ཇི་ལྟར་གྲངས་དང་བཅས་པ་ལ་སོགས་པའི་རྫས་དག་ལ་བཞིན་ནོ། །འབྲེལ་པ་ཅན་གཞན་གྱིས་ཀྱང་མ་ཡིན་ཏེ། དཔེར་ན་འབྱུང་པོ་ལ་སོགས་
[157b.3]པ་དག་ལ་བཞིན་ནོ་ཞེས་བཤད་པ་ནི་གྲངས་དང་བཅས་པ་ལ་སོགས་པའོ། །དེས་ན་དེ་དེ་ལྟར་ཐ་མི་དད་པ་དོན་གྱིས་དོན་རྣམས་ཀྱི་བདག་ཉིད་དམ་རྟོགས་པ་འདྲེ་བ་ལ་མ་ཡིན་ནོ་ཞེས་དེ་ལྟར་དེའི་བདག་ཉིད་ཀྱིས་འདྲེ་བ་ཉིད་བཀག་པའམ་མཇུག་སྡུད་པ་ནི་དེ་ལྟ་བས་ན་གཞན་གྱི་སྤྱི་ནི་
[157b.4]གཞན་མ་ཡིན་ནོ། །དེ་ལྟར་ཞེས་བྱ་བ་ནི་སྤྱིའི་རང་བཞིན་རྟེན་ཐ་མི་དད་པ་ལས་ཐ་དད་པའི་ཕྱིར་རོ། །བློ་ལ་ཞེན་པ་མེད་པའི་ཕྱིར་ཞེས་བྱ་བ་ནི་བློ་ལ་མི་སྣང་བའི་ཕྱིར་རོ། །ཡང་ན་འདི་དག་གི་སྤྱི་གཞན་ཡིན་དུ་ཟད་དོ། །དེ་ལྟ་ན་ཡང་འདྲེས་པར་གྱུར་པ་ནི་མ་གྲུབ་སྟེ། དེས་ན་གང་
[157b.5]གི་ཕྱིར་དངོས་ཀུན་ཞེས་བྱ་བ་ལ་སོགས་པ་རིགས་པ་ཁོ་ནའོ་ཞེས་བཤད་པ་ནི། ཡོད་དུ་ཆུག་ན་ཡང་ཞེས་བྱ་བ་ཡིན་ནོ། །དེ་འབྲེལ་པའི་ཕྱིར་གཅིག་གི་རང་བཞིན་དུ་གྱུར་པ་དེ་ལྟར་གཞན་ཡང་ཡིན་ནོ་ཞེས་བྱ་བའི་འབྲེལ་པར་འགྱུར་བ་ཉོན་མོངས་པའི་རྣམ་པར་རྟོག་པ་ཡིན་ཏེ།
[157b.6]འབྲེལ་ཀྱང་རང་གི་བདག་ཉིད་ཁོ་ན་ལ་རྣམ་པར་གནས་པའི་ཕྱིར་གཞན་གྱི་ངོ་བོ་མེད་པས་དེའི་བདག་ཉིད་དང་འདྲེ་བ་མ་གྲུབ་པའི་ཕྱིར་རོ། །འབྱུང་པོ་རྣམས་ཀྱང་མགུལ་ཆིངས་ཀྱི་རང་བཞིན་དུ་ཐལ་བར་འགྱུར་བའི་ཕྱིར་རོ། །འཕྲོད་པས་འདུ་བས་ཀྱང་ཐ་དད་པ་སེལ་བ་ནི་མ་ཡིན་ནོ། །དེས་ན་
[157b.7]དེ་ལྟར་དེ་དག་ནི་རང་དང་གཞན་དུ་འདྲེ་བར་མི་བྱེད་དེ་ཞེས་བྱ་བ་གལ་ཏེ་བསྒྲུབ་བྱ་བརྗོད་པ་ཡིན་ན། དེའི་ཚེ་དེ་ལྟ་བས་ན་དངོས་པོ་འདི་དག་ནི་ཞེས་བྱ་བ་མཇུག་བསྡུ་བ་ཡིན་ལ། དེར་ཡང་རིགས་མི་མཐུན་པར་འདོད་པ་དང་ཞེས་བྱ་བ་ནི་བཤད་པ་ཡིན་ནོ། །ཡང་ན་དེ་དག་ནི་རང་དང་གཞན་དུ་
[158a]
[158a.1]འདྲེ་བར་མི་བྱེད་དེ་ཞེས་བྱ་བ་ནི་རང་གི་ངོ་བོ་ལ་གནས་པ་ཅན་ཁོ་ནའི་ཕྱིར་རོ་ཞེས་བྱ་བའི་གཏན་ཚིགས་ཀྱི་བྱེད་པ་བསྟན་པ་ཡིན་ཏེ། དེས་ན་དེ་ལྟ་བས་ན་ཞེས་བྱ་བ་ལ་སོགས་པ་ནི་གཏན་ཚིགས་སྒྲུབ་པ་ན་བསྒྲུབ་བྱ་བརྗོད་པ་ཡིན་ནོ། །གང་གི་ཕྱིར་རང་གི་བདག་ཉིད་
[158a.2]ལ་གནས་པའི་ཕྱིར་མ་འདྲེས་པ་དེ་བས་ན། རིགས་མཐུན་པར་འདོད་པ་དང་། རིགས་མི་མཐུན་པ་ལ་སོགས་པ་ཡིན་ཏེ་ལྡོག་པ་ཡིན་ནོ། །འདོད་པས་སྨོས་པ་ནི་རིགས་མཐུན་པ་ཉིད་གཞན་གྱི་འདོད་པས་ཡིན་པར་བསྟན་པའི་ཕྱིར་རོ། །དངོས་པོ་ནི་དུ་མའི་ངོ་བོ་ཡིན་གྱི་
[158a.3]ཐམས་ཅད་ཀྱི་ངོ་བོ་མ་ཡིན་ཏེ། དེས་ན་དེ་ལྟ་བུའི་བདག་ཉིད་ལ་གནས་པའི་ཕྱིར་བདག་ཉིད་གང་ལ་མི་གནས་པ་དེ་ལས་ལྡོག་པ་ཡིན་ནོ་ཞེས་ཀྱང་དོགས་པར་བྱ་བ་མ་ཡིན་ནོ་ཞེས་གཏན་ཚིགས་གཞན་གྱིས་སྟོན་པ་ནི། རང་གི་ངོ་བོས་ངོ་བོ་གཅིག་པའི་ཕྱིར་རོ་ཞེས་བྱ་བ་ཡིན་ནོ། །
[158a.4]ཚིགས་སུ་བཅད་པ་གཉིས་པའི་དོན་བཤད་པ་ནི་དངོས་པོ་རྣམས་གང་དང་གང་ལས་ཐ་དད་པ་དེ་དང་དེ་ལས་ཐ་དད་པ་རྒྱུ་མཚན་དུ་ཉེ་བར་བརྟེན་ནས་ངོ་བོ་ཉིད་ཐ་མི་དད་ཀྱང་ཆོས་དུ་མ་ཤེས་པར་བྱེད་དོ། །གང་གིས་ཤེས་པར་བྱེད་ཅེ་ན་བཤད་པ། སྒྲ་དག་གིས་སོ། །དེ་དག་གི་
[158a.5]ཤེས་པ་གང་ཡིན་པ་དེ་ནི་རྣམ་པར་རྟོག་པས་ཀྱང་རྟོགས་པར་འགྱུར་བས་ཆོས་དེ་དག་རྣམ་པར་བརྟགས་པར་འགྱུར་བ་ཡིན་ཏེ། དེས་ན་སྒྲ་རྣམས་ཀྱང་ལྡོག་པའི་ཡུལ་ཅན་དུ་བསྟན་པའི་ཕྱིར་རིགས་དབྱེ་ཞེས་བྱ་བ་བརྗོད་པར་འགྱུར་བ་ཡིན་ནོ། །གལ་ཏེ་ལྡོག་པ་ཐ་དད་པའི་ཕྱིར་དེའི་
[158a.6]རྒྱུ་མཚན་གྱིས་ཐ་དད་པར་རྟོགས་ན། འོ་ན་རང་བཞིན་ཐ་མི་དད་པས་དེའི་རྒྱུ་མཚན་གྱིས་ཐ་མི་དད་པར་རྟོགས་པར་འགྱུར་རོ། །དེས་ན་དེའི་རྒྱུ་ཅན་གྱི་རིགས་དབྱེ་ཞེས་ཅི་སྟེ་བརྗོད་ཅེ་ན་ཞེས་དོགས་པ་ལ། མདོའི་ལྡོག་པའི་རྒྱུ་ཅན་གྱི་རིགས་དབྱེ་བ་བརྟགས་པར་བཤད་པ་ནི་
[158a.7]རྣམ་པར་རྟོག་པ་རྣམས་ལྡོག་པའི་ཡུལ་ཅན་ཡིན་པ་ལས་ངེས་པར་བྱའོ་ཞེས་བསྟན་པའི་ཕྱིར་དེའི་ཞེས་སྨོས་སོ། །དབྱེ་བ་ཤེས་པར་བྱ་བའི་ཕྱིར་སྒྲ་བརྡར་བཏགས་པ་ཡིན་ནོ། །དེས་ན་དེ་ཉིད་སྟོན་པ་ན་དེའི་རྒྱུ་མཚན་གྱིས་འཁྲུལ་པས་དངོས་པོ་རྣམས་ལ་ཆོས་ཐ་དད་པར་ཤེས་
[158b]
[158b.1]པར་བྱེད་དོ། །རྣམ་པར་རྟོག་པས་ཡུལ་དུ་བྱས་པའི་དོན་ཉིད་ལ་སྒྲ་སྦྱོར་རོ། །དེས་ན་གལ་ཏེ་འདི་ཐ་དད་པའི་ཡུལ་ཅན་ཡིན་ན་དེའི་ཕྱིར་དེ་བསྟན་པའི་དོན་དུ་སྒྲ་དགོས་པ་ཡིན་ནོ། །དེས་ན་དེ་ལྟར་སྒྲས་བཅད་པས་དེ་ལྟ་བུའི་རྣམ་པར་རྟོག་པའི་རང་བཞིན་བརྗོད་པར་འགྱུར་བ་ཡིན་ནོ། །
[158b.2]དངོས་པོ་གནས་པའི་བྱ་བ་ཡོད་ན། རིགས་པ་དངོས་པོའི་ཡུལ་དུ་འགྱུར་བ་ཡིན་ནོ། །དངོས་པོ་ཡང་སྔོན་པོ་ལ་སོགས་པའི་རང་བཞིན་དུ་ངེས་པ་ཡིན་ནོ། །དེས་ན་དེ་ནི་གསལ་བའི་རང་བཞིན་གྱི་མྱོང་བས་རྟོགས་པ་ཡིན་ནོ། །དེ་ལྟར་གསལ་བ་ན་དོན་ལ་ནི་ཅུང་ཟད་ཀྱང་མ་ཡིན་
[158b.3]གྱི། འོན་ཀྱང་དངོས་པོ་ཇི་ལྟ་བ་དེ་ལྟ་བུའི་གསལ་བ་སྐྱེས་ན་རྟོགས་པ་པོ་དེ་རིག་པ་དང་ལྡན་པའི་ངོ་བོར་མངོན་པར་གྲུབ་པའི་ཕྱིར་འཇལ་བ་པོ་དོན་རིག་པ་ལ་ཉེ་བར་མཁོ་བ་ཡིན་གྱི། དེས་དོན་ལ་ནི་ཅིར་ཡང་མི་འགྱུར་རོ། །དེ་བཞིན་དུ་རིག་པ་འགའ་ཞིག་ནི་རྟོགས་པ་
[158b.4]པོ་དོན་ཕྱིན་ཅི་ལོག་ཏུ་རྟོགས་པར་བྱེད་དོ། །དེས་ཀྱང་རྟོགས་པ་པོ་ལ་དོན་ཕྱིན་ཅི་ལོག་ཏུ་བྱས་པ་ཡིན་ཏེ། དུང་སེར་པོར་ཤེས་པས་དུང་སེར་པོར་བྱས་པ་བཞིན་ནོ། །གལ་ཏེ་འདི་ནི་དུང་སེར་པོ་ཙམ་གྱི་ཡུལ་ཅན་དུང་ལ་མ་རེག་པར་དེ་ལྟར་སྣང་བ་མ་ཡིན་ནམ། རྟོགས་པ་པོ་ལ་
[158b.5]དོན་ཕྱིན་ཅི་ལོག་ཏུ་བྱེད་དོ་ཞེས་ཇི་ལྟར་བརྗོད་ཅེ་ན། བརྗོད་པ་དེའི་རང་བཞིན་གྱི་ཡུལ་ནོན་པ་དང་དེའི་ཐོན་ཀོར་ན་གནས་པ་བྲལ་བ་དང་དོན་དམ་པ་མ་ཡིན་པའི་དེའི་རང་བཞིན་རྟོགས་པ་ལྟ་བུར་སྣང་བ་དེ་དེར་རྗེས་སུ་ཞུགས་པ་ཉིད་ཀྱིས་དེའི་རང་བཞིན་མ་ཡིན་ཡང་དེའི་རང་བཞིན་
[158b.6]དུ་གྱུར་པས་སེར་པོའི་རྣམ་པར་སྣང་བའི་ཕྱིར་རོ། །སྣང་བར་གྱུར་པའི་རང་བཞིན་མཐའ་དག་སྤངས་ནས་སྣང་བར་བཟོད་པ་ནི་མ་ཡིན་ནོ། །དེས་ན་དེ་ལྟ་བུར་གྱུར་པ་མ་ཡིན་ཡང་གང་ཁོ་ན་སྣང་བ་ཞུགས་ནས་གསལ་བ་དེ་ཁོ་ན་འདིས་རྟོགས་པ་པོ་ལ་དེ་ལྟར་བསྟན་པ་ཡིན་ནོ། །
[158b.7]དེས་ན་དངོས་པོ་དེ་ལྟ་བུ་མ་ཡིན་པདག་ཀྱང་དེ་དང་ཐ་མི་དད་པར་འགྱུར་བར་བྱེད་པའི་རྟོགས་པ་འདི་ནི་དངོས་པོ་ལ་གཞོལ་བ་ཉིད་དོ། །འདིར་ཉེ་བར་སྦྱོར་བར་འགྲུབ་པ་ནི་མ་ཡིན་ནོ། །དེ་ཤེས་པ་ཉིད་ཀྱི་དགོས་པ་ཡིན་པའི་ཕྱིར་རོ། །དེའི་ཕྱིར་དངོས་པོ་རང་གི་ངོ་བོས་དེའི་རང་
[159a]
[159a.1]བཞིན་མ་ཡིན་པ་ཡང་དངུལ་ལ་སོགས་པའི་རྟོགས་པས་དེ་ལྟར་དོན་གཞན་དང་ཐ་མི་དད་པར་བྱེད་པ་དེའི་རྟོགས་པ་བསལ་བས་ཐ་མི་དད་པར་ཟློག་པར་བྱེད་པས་ན་ཐ་མི་དད་པའི་དོན་ཅན་ཉིད་ཀྱིས་དོན་འཇལ་བ་པོ་ལ་ཉེ་བར་མཁོ་བ་ཡིན་ནོ། །ཐ་དད་པར་བྱེད་པ་ཉིད་ཀྱིས་
[159a.2]ཅིག་ཤོས་དང་འདྲ་བར་རྟོགས་པར་བྱེད་པ་ཡིན་པས་ན་འདི་ལ་ཡང་དོན་ལ་ཕྱོགས་པའི་བྱེད་པའི་ཡོད་པ་ཉིད་དོ། །དེས་ན་དེ་ལྟར་རྣམ་པ་གཉིས་ཡོད་པ་ལས། གལ་ཏེ་རྣམ་པར་རྟོག་པ་ཉམས་སུ་མྱོང་བ་བཞིན་དོན་རྟོགས་པའི་རང་བཞིན་ཡིན་ནོ། །གལ་ཏེ་འདིར་འགལ་བ་མི་བརྗོད་ན་
[159a.3]འགྱུར་བ་ཁོ་ནའོ། །དངོས་པོའི་རང་བཞིན་རྟོགས་པ་མེད་ཀྱང་ཐ་དད་པར་བྱེད་པ་ཉིད་ཀྱིས་དངོས་པོའི་མཐར་ཐུག་པར་བྱེད་པ་ནི་མི་ཉམས་སོ། །དེ་ལྟར་ཡང་བསྟན་པར་བྱའོ། །དེས་ན་འདིའི་རྟོགས་པ་དང་སྒྲུན་བཟོད་པར་དོན་དམ་པར་དོན་ལ་བྱ་བ་ནི་འདི་ཡིན་ཏེ། དེས་ན་རྣམ་པར་རྟོག་པ་
[159a.4]ཐ་དད་པའི་ཡུལ་ཅན་ཡིན་པའི་ཕྱིར་དེ་ཉིད་ལ་སྒྲ་བརྡར་འདོགས་པ་ཡིན་ནོ། །དེ་ཡང་ཐ་དད་པའི་དོན་ཅན་ཡིན་པའི་ཕྱིར་དུ་མའི་བཟློག་ཕྱོགས་སུ་གྱུར་པའི་དངོས་པོ་གཅིག་ལ་ཡང་བཟློག་ཟླའི་དངོས་པོ་གཞན་རེ་རེ་སྒྲོ་འདོགས་པར་བྱེད་པ་རེ་རེའི་གཉེན་པོར་གྱུར་པས་རེ་རེ་ཞིང་སྐྱེ་བ་ན་དེ་སེལ་
[159a.5]བའི་ཡན་ལག་ཏུ་གྱུར་པ་དེའི་གཉེན་པོའི་དངོས་པོའི་རྣམ་པ་འཛིན་པ་དང་། རང་ལས་བཟློག་པས་བསྐལ་པའི་རྣམ་པ་གཞན་ཡལ་བར་དོར་བས་ཆོས་གཞན་ལས་ཐ་དད་པར་རང་གི་རྟེན་གྱི་ཆོས་རྟོགས་པར་བྱེད་པ་ཡིན་ནོ། །འདི་ལྟར་མ་བྱས་པར་སྒྲོ་འདོགས་པ་བཟློག་པའི་ཕྱིར་མ་བྱས་པའི་གཉེན་
[159a.6]པོར་གྱུར་པ། དངོས་པོའི་བདག་ཉིད་དུ་གྱུར་པའི་བྱས་པ་ལ་བརྟེན་ནས་སྐྱེ་བ་ན། རྟག་པར་སྒྲོ་བཏགས་པས་བསྐལ་པས་མི་རྟག་པ་ཉིད་མ་རྟོགས་པས་མི་རྟག་པ་ལས་བྱས་པ་ཉིད་གཞན་བཞིན་དུ་རྟོགས་པར་འགྱུར་རོ། །དངོས་སུ་ན་ཐ་དད་པར་བྱེད་པ་ཁོ་ནར་གྱུར་པ་དེའི་སྒོ་ནས་དོན་
[159a.7]རྟོགས་པར་བྱེད་པ་དག་ནི་ཐ་དད་པ་རྟོགས་པར་བརྗོད་དེ། འདི་སྔོན་པོ་མ་ཡིན་ཞེས་བྱ་བ་ལ་སོགས་པར་རྟོགས་པ་བཞིན་ནོ། །དེ་དག་ཀྱང་ཇི་སྐད་བཤད་པའི་ཚུལ་ཁོ་ནས་ཐ་དད་པའི་དོན་ཅན་ཉིད་དུ་རྣམ་པ་གཞན་གསལ་བས་བསྟན་པར་བྱའོ། །ཐ་དད་པའི་རྟོགས་པ་གཞན་ནི་ཡོད་
[159b]
[159b.1]པ་མ་ཡིན་ནོ། །ཐ་དད་པ་ཞེས་བྱ་བ་གལ་ཏེ་རང་གི་རང་བཞིན་ལ་གནས་པ་ཡིན་ན། ཐམས་ཅད་ཐ་དད་པར་རྟོགས་པར་འགྱུར་རོ། །འོན་ཏེ་དངོས་པོ་མེད་པ་ཡིན་ན་བུམ་པ་མེད་དོ་སྙམ་པ་ཐ་དད་པ་རྟོགས་པ་ཡིན་པར་འགྱུར་རོ། །ཅི་སྟེ་དངོས་པོ་ལ་དངོས་པོ་གཞན་མེད་པ་ཡིན་ན། དེ་གལ་ཏེ་
[159b.2]དངོས་པོ་ལ་དངོས་པོ་གཞན་ཡོད་པ་མ་ཡིན་ནོ་ཞེས་དངོས་པོ་གཞན་བཀག་པ་ཙམ་ཡིན་ན་ནི་དེའི་ཚེ་དངོས་པོ་དངོས་པོ་གཞན་ལ་ཅུང་ཟད་ཀྱང་མ་ཡིན་པའི་ཕྱིར་ཐ་དད་པ་དངོས་པོའི་རང་བཞིན་ལས་ལྷག་པར་གྱུར་པ་དེ་གང་ཞིག་ཡིན་ན་གང་གིས་ཐ་དད་པར་རྟོགས་པ་རང་གི་ངོ་བོ་རྟོགས་པ་
[159b.3]ལས་བྱ་བ་གཞན་དང་ལྡན་པར་འགྱུར། འོན་ཏེ་དངོས་པོ་ལ་དངོས་པོ་གཞན་མེད་པ་ཉིད་དོ་ཞེ་ན། དངོས་པོ་གཞན་བསལ་བ་ན་དངོས་པོ་ལ་བརྟན་པའི་སྒྲུབ་པའི་སྤྱོད་ཡུལ་དུ་འགྱུར་བ་དངོས་པོ་མེད་པ་ཞེས་བྱ་བ་དེ་གང་ཡིན། དེའི་ཕྱིར་དངོས་པོ་ལ་དངོས་པོ་གཞན་མེད་དོ་ཞེས་བྱ་བ་
[159b.4]འདི་ཙམ་ཁོ་ན་ལྡོག་པ་བརྗོད་པས་ན་ཐ་དད་པའི་རྟོགས་པ་དག་ལ་རྟོགས་པའི་བྱེད་པ་མི་འདྲ་བ་མེད་ཀྱང་ཇི་སྐད་བཤད་པའི་ཚུལ་ཉིད་ཁས་བླང་བར་བྱ་བ་ཡིན་ནོ། །ད་ནི་དེའི་ཁྱད་པར་ནི་རྟོགས་པར་འགྱུར་བ་དག་རབ་ཏུ་བྱེད་ཅེས་བྱ་བ་དེ་འཆད་དོ། །སྒྲ་དེ་དག་ཀྱང་དེའི་རང་བཞིན་མཚན་
[159b.5]ཉིད་སྤྱིའི་ཕྱིན་པ་ཁོ་ནར་འགྱུར་རོ། །སྒྲ་བེམས་པོ་ཡིན་པའི་ཕྱིར་དེ་དག་འགྱུར་བ་འགའ་ཡང་མེད་དོ། །དེས་ན་དེས་སྐྱེད་པའི་རྟོགས་པ་དེའི་རང་བཞིན་ཡིན་པས་དེ་སྐད་བརྗོད་དོ། །འདི་ལ་རང་བཞིན་ཇི་ལྟ་བུར་བརྟག་པ་དེ་ལྟ་བུ་དེ་ལ་ཡོད་པའི་ཕྱིར་དེའི་ཡུལ་ཅན་མ་ཡིན་ཡང་དེའི་
[159b.6]མཐར་ཐུག་པ་འགྱུར་བ་ཡིན་ནོ། །གལ་ཏེ་རང་གི་མཚན་ཉིད་ནི་མི་རྟག་པ་ལ་སོགས་པའི་རང་བཞིན་ཡིན་ལ། རྣམ་པར་རྟོག་པ་ནི་ཆོས་གཅིག་ཙམ་གྱི་ཡུལ་ཅན་ཡིན་པས། ཇི་ལྟར་དེའི་ཡུལ་ཅན་ཡིན་ཞེ་ན། བཤད་པ། གལ་ཏེ་ཡང་འདིར་མི་རྟག་པ་ལ་སོགས་པ་ཐ་དད་
[159b.7]པ་ཐམས་ཅད་མི་འཕེན་པ་དེ་ལྟ་ན་ཡང་བྱས་པ་ཉིད་ལ་སོགས་པ་དེའི་ཐ་དད་པ་གཅིག་སྒྲས་བརྗོད་པ་ཡིན་ནོ། །དེ་གཅིག་ལས་ཀྱང་དེ་ཐ་དད་པ་བྱས་པ་ཉིད་ལ་སོགས་པའི་མཚན་ཉིད་དེ་ཡོད་པ་ཁོ་ནའོ། །དེ་ཐ་དད་པ་ཞེས་ཐ་དད་པར་བསྙད་པ་ནི་རང་བཞིན་གཞན་དང་མི་མཐུན་པ་
[160a]
[160a.1]རང་གི་བདག་ཉིད་ལ་གནས་པའི་རང་བཞིན་བརྗོད་པ་ཡིན་གྱི་ཐ་དད་པ་ཞེས་བྱ་བ་གཞན་ནི་འགའ་ཡང་མེད་དོ། །ཇི་སྐད་བཤད་པ་བཞིན་ནོ། །དེ་ལྟ་བས་ན་ཞེས་བྱ་བ་ལ་སོགས་པས་ནི་བཤད་པའི་ཚིག་ལེའུར་བྱས་པ་གཉིས་ལ་གནས་པའི་དངོས་པོ་ཉེ་བར་
[160a.2]འགོད་པའོ། །དངོས་པོ་གཅིག་ལ་གཞན་གྱི་ངོ་བོ་དེའི་ངོ་བོས་སྟོང་པའི་ངོ་བོ་ཇི་སྙེད་པ་དེ་གཞན་དེ་ལ་ལྟོས་ནས་ལྡོག་པའི་དེ་སྙེད་ཡོད་དོ། །ངོ་བོ་དེ་སྙེད་ལ་དེ་མེད་པའི་ཕྱིར་དེ་ལ་ཡང་ངོ་བོ་དེ་སྙེད་མེད་དོ་ཞེས་བྱ་བའི་དོན་ཏོ། །གཏན་ཚིགས་བཤད་པ་ནི་དངོས་པོ་གཅིག་པོ་དེ་ལ་མེད་པའི་རྒྱུ་
[160a.3]དང་འབྲས་བུ་གང་ལ་ཡོད་པ་གཞན་གྱི་ངོ་བོའོ། །རྒྱུ་དང་འབྲས་བུ་སྨོས་པས་ནི་སྔོན་པོ་ལ་སོགས་པ་རང་བཞིན་ཡང་མཚོན་པ་ཡིན་ནོ། །དེ་ལྟ་བུ་དག་ལས་དངོས་པོ་དེ་ཐ་དད་པའི་ཕྱིར་རོ། །གཅིག་ལ་མེད་པའི་རྒྱུ་དང་འབྲས་བུ་ཅན་དེ་ཉིད་ཀྱིས་ནི་གཞན་དེའི་རང་བཞིན་གྱིས་སྟོང་པར་བརྗོད་
[160a.4]པ་ཡིན་ནོ། །ཐ་དད་པས་ན་འདི་གཞན་ལ་མེད་པའི་ཕྱིར་གཞན་ཡང་འདི་ལ་མེད་པ་ཡིན་ལ་དེ་ཡང་ལྡོག་པ་ཡིན་ནོ། །ལྡོག་པའི་སྙེད་པ་ཞེས་བྱ་བ་ནི་དེ་ལ་ངོ་བོ་ཇི་སྙེད་མེད་པ་སྒྲ་དག་ཀྱང་དེ་སྙེད་དུ་འགྱུར་རོ། །འདི་དག་རང་བཞིན་ངོ་བོ་ཉིད་ཀྱིས་ཡུལ་ཐ་དད་པས་ཐ་དད་པ་ནི་མ་ཡིན་ནོ། །ཞེས་
[160a.5]བཤད་པ་ནི་ཐ་སྙད་ཀྱི་དོན་ཅན་གྱི་ཞེས་བྱ་བའོ། །དགོས་པ་ཡོད་ན་ཡིན་གྱི་མེད་ན་ནི་མ་ཡིན་ནོ། །རང་ཉིད་འགྱུར་བ་ཡིན་ན་ནི་དགོས་པ་ལ་ལྟོས་པར་མི་འགྱུར་ཏེ། མངོན་སུམ་བཞིན་ནོ། །ཐ་དད་པའི་མཐར་ཐུག་པ་རྣམས་ཇི་ལྟར་ཐ་སྙད་ལ་ཉེ་བར་སྦྱོར་བ་དེ་བཤད་པ་ནི། དེའི་རྒྱུ་དང་ཞེས་བྱ་
[160a.6]བའོ། །བརྩལ་མ་ཐག་ཏུ་བྱུང་བ་ཅན་ཞེས་བྱ་བ་ནི་དེའི་རྒྱུ་ཅན་མ་ཡིན་པ་དེ་སྤོང་བའོ། །ཉན་པ་ཅན་ཞེས་བྱ་བ་ནི་དེའི་འབྲས་བུ་ཅན་མ་ཡིན་པ་ནི་ཡོངས་སུ་སྤོང་བའོ། །ཚིག་ལེའུར་བྱས་པ་གསུམ་པའི་དོན་བཤད་པ་ནི། དེའི་ཕྱིར་ཞེས་བྱ་བའོ། །མིང་ཞེས་བྱ་བ་ནི་སྒྲའོ། །ཆོས་ཞེས་བྱ་བ་ནི་
[160a.7]བརྟགས་པའི་རང་བཞིན་ནོ། །གྲོང་རྟ་མི་ཕྱུགས་ཞེས་བྱ་བ་ལ་སོགས་པ་བཞིན་དུ་དང་ཞེས་བསྡུ་བ་ཡིན་ནོ། །ཡང་ན་ཆོས་ཞེས་བྱ་བ་འདི་བཤད་པ་མིང་ཞེས་བྱ་བ་ཡིན་ནོ། །ཆོས་ཀྱི་སྒྲ་ནི་དངོས་པོ་ཙམ་བརྗོད་པ་ཡིན་ཏེ། ཆོས་ཐམས་ཅད་བདག་མེད་པ་ཞེས་བྱ་བ་ལྟ་བུའོ། །རྟོགས་པའི་
[160b]
[160b.1]སྒྲུབ་བྱེད་དུ་ཉེ་བར་བླང་ན་སྒྲ་ལ་འཇུག་གོ། །སྒྲ་དང་རྣམ་པར་རྟོག་པ་རྣམས་ཐ་དད་པའི་དོན་ཅན་ཉིད་ཀྱིས་དེའི་ཡན་ལག་ཡིན་པས་དེ་དང་མཐུན་པར་བརྟགས་པའི་རང་བཞིན་གྱིས་ན་ཡུལ་འཆོལ་བ་མེད་པའི་ཕྱིར་དམ་བཅས་པའི་དོན་གྱི་ཕྱོགས་གཅིག་གཏན་ཚིགས་མ་ཡིན་ནོ་ཞེས་བཤད་
[160b.2]པ་ནི་དེ་བས་ན་ཞེས་བྱ་བའོ། །དེ་དེ་ལྟར་ཐ་དད་པའི་དོན་ཅན་ཉིད་གྲུབ་པ་བཞིན་དུ་ཉེ་བར་སྟོན་ཏོ། །ད་ནི་གཞུང་གཟུགས་པའི་ཕྱིར་ཡང་སྒྲ་དང་ཞེས་རྒོལ་བ་འགོད་དོ། །རང་གི་ངོ་བོ་ལ་གནས་པའི་ཕྱིར་རང་གི་ངང་གིས་དངོས་པོ་གཞན་ལས་ཐ་དད་པ་ཡིན་ཡང་འཁྲུལ་པའི་མཐུས་
[160b.3]དངོས་པོ་གཞན་གྱི་ངོ་བོ་དང་ཐ་དད་པ་མེད་པར་གྱུར་པ་གང་ཡིན་པ་དེ་སེལ་བ་ན་དེའི་རང་གི་ངོ་བོ་རྟོགས་པ་གང་ཡིན་པའི་རྣམ་པར་གཅད་པ་དེ་སྒྲ་དང་རྟགས་དག་གིས་རྟོགས་པར་བྱེད་དོ་ཞེས་བྱ་བ་ཅི་ལྟར་ཤེས། སྒྲུབ་པས་དངོས་པོའི་རང་གི་ངོ་བོ་ཁོ་ན་ནི་མ་ཡིན་ནོ་ཞེས་བྱ་བ་ནི་བསལ་ཟིན་པའི་
[160b.4]སྒོ་ཉིད་སྤང་སྟེ། རང་བཞིན་རྟོགས་པ་ཙམ་གྱི་སྒྲུབ་པས་དངོས་པོ་རྟོག་པ་ཉིད་དོ། །འདི་སྔོན་པོ་ཡིན་ནོ་ཞེས་བྱ་བ་ནི་དངོས་པོའི་རང་བཞིན་ཙམ་རྟོགས་པ་ཡིན་ལ། འདི་སྔོན་པོ་མ་ཡིན་ནོ་ཞེས་བྱ་བ་ནི་སྔོན་པོ་བསལ་བའི་སྒོ་ནས་དེ་རྟོགས་པ་ཡིན་པས་བྱེད་པ་གཉིས་འགྲུབ་ཐ་དད་པར་རྟོགས་
[160b.5]པ་ཡིན་ནོ། །ཁྱེད་ཀྱིས་ནི་ཐམས་ཅད་དུ་རྣམ་པར་གཅད་པ་ཡུལ་ཅན་ཉིད་དུ་སྨྲས་པས་ན་འདི་སྔོན་པའོ་སྙམ་པ་ཡང་དེའི་ཡུལ་ཅན་ཉིད་དུ་བརྗོད་པར་འགྱུར་རོ། །དེས་ན་འདི་ལྟ་བུའི་བདག་ཉིད་ཀྱི་རྣམ་པར་ཤེས་པ་རྣམས་རང་བཞིན་རྟོགས་པ་ཙམ་ནི་མ་ཡིན་གྱི་འོན་ཀྱང་ཐ་དད་པའི་
[160b.6]ཡུལ་ཅན་ཡིན་ནོ་ཞེས་བྱ་བ་འདི་ལ་རིགས་པ་ཅི་ཡོད་ཅེ་ན། དོགས་པ་འདི་བཟློག་པ་ནི། ཚད་མ་གཞན་དང་ཞེས་བྱ་བ་ནི་ལ་སོགས་པའོ། །ཚད་མ་ནི་རྟགས་ཡིན་ལ། སྒྲ་ནི་རང་ཉིད་བརྗོད་པ་ཡིན་ནོ། །དེས་ན་སྒྲ་དང་རྟགས་དག་གིས་རྣམ་པར་གཅོད་པར་རྟོགས་པར་བྱེད་དོ་
[160b.7]ཞེས་ཇི་ལྟར་ཤེས་ཞེས་སྨྲས་པ་གང་ཡིན་པ་དེ་རྟགས་ལ་བརྟེན་ནས་སྤངས་པ་ཡིན་ནོ། །དེས་ན་གང་གི་ཕྱིར་རྟགས་ཚད་མ་གཞན་དང་སྒྲ་གཞན་དུ་གྱུར་པས་འཇུག་པ་དེའི་ཚེ། སྒྲ་དང་རྟགས་དག་རྣམ་པར་གཅོད་པའི་ཡུལ་ཅན་ཉིད་དོ། །རྟགས་ནི་ཐམས་ཅད་དུ་ཆོས་ཅན་
[161a]
[161a.1]གྲུབ་པ་ལ་ལྟོས་པའི་ཕྱིར་མངོན་སུམ་གྱིས་ཡུལ་དུ་བྱས་པའི་དོན་ལ་འཇུག་པ་ཡིན་ནོ། །དེས་ན་འདི་ནི་ཚད་མ་གཞན་དུ་གྱུར་པས་འཇུག་པ་ཡིན་ནོ། །དེ་བཞིན་དུ་མངོན་སུམ་གྱིས་ཡུལ་དུ་བྱས་པའི་ཆོས་ཅན་ལ་བརྟེན་ཏེ་སྒྲ་འཇུག་པ་ན། རྗེས་སུ་དཔག་པ་འཇུག་
[161a.2]པའི་སྒྲ་གང་ཡིན་པ་དེ་སྒྲ་གཞན་ཡིན་ཏེ། དེས་ན་སྒྲ་གཞན་འཇུག་པ་ཡིན་ནོ། །དེས་ན་དོན་གྱི་རང་གི་ངོ་བོ་གཅིག་ཅེས་བྱ་བའི་གཞུང་འདི་དང་མཐུན་པ་འདི་གཏན་ཚིགས་སུ་བཀོད་པ་ཡིན་ནོ། །རྗེས་སུ་དཔག་པ་ལས་ཀྱང་དངོས་པོ་ཞེས་བྱ་བ་དང་། གཞན་དུ་དངོས་པོ་གཅིག་ཉིད་ལ།
[161a.3]སྒྲའམ་བློ་གཅིག་གིས་ཁྱབ་ན་ཞེས་བྱ་བ་ལ་ལྟོས་ཏེ། བརྒལ་ཞིང་བརྟགས་པའི་སྒྲ་དང་རྟགས་དག་ནི། སྒྲ་དང་ཚད་མ་གཞན་འཇུག་པ་ཉིད་ཀྱིས་གཞན་སེལ་བའི་ཡུལ་ཅན་དུ་བསྒྲུབ་པ་ཡིན་ནོ། །སྒྲ་དང་རྟགས་དེ་དག་གིས་ནི་གཞན་སེལ་བ་རྟོགས་པ་ཡིན་ཏེ། རང་གི་ཕྱིར་
[161a.4]དེ་ཡོད་པ་ལ་སྒྲ་དང་ཚད་མ་གཞན་འཇུག་པའི་ཕྱིར་རོ། །དང་པོ་དག་གཞན་སེལ་བའི་ཡུལ་ཅན་དུ་འགྱུར་མོད་སྒྲ་དང་ཚད་མ་གཞན་དག་གོ། །ཇི་ལྟར་ཞེ་ན། དེ་ཉིད་ཀྱི་ཕྱིར་སྔ་མའི་བཤད་པ་དགོད་པ་ཡིན་ནོ། །འོ་ན་སྔ་མར་དང་པོ་དག་ཇི་ལྟར་གཞན་སེལ་བའི་ཡུལ་ཅན་ཡིན་ཞེ་ན།
[161a.5]དེ་ཉིད་ཀྱི་ཕྱིར་ཕྱི་མའི་བཤད་པ་ཉེ་བར་དགོད་དོ། །འདི་ལྟར་སྔ་མ་ཡང་དངོས་པོ་མཐའ་དག་ཁྱབ་པ་མ་ཡིན་ཏེ། གང་གི་ཕྱིར་དེ་ཞུགས་པ་ལ་ཡང་ཕྱིས་འཇུག་པའི་ཕྱིར་རོ། །དེ་བཞིན་དུ་ཕྱི་མ་དག་ཀྱང་སྔར་ཞུགས་པ་ལ་དངོས་པོའི་ཕྱོགས་གཅིག་ལ་དམིགས་པ་ཡིན་ནོ། །
[161a.6]འཆད་པར་འགྱུར་བའི་ཚུལ་གྱིས་འདི་ན་གཞན་སེལ་བའི་ཡུལ་ཅན་མ་ཡིན་པར་མི་འཐད་དོ། །དེས་ན་རིམ་པ་གཉི་ག་ལྟར་ཡང་སྒྲ་དང་རྟགས་འཇུག་པའི་ཕྱིར་གཞན་སེལ་བའི་ཡུལ་ཅན་གྱི་རང་བཞིན་ཉིད་དོ། །དེ་ལྟར་ནི་འདི་ནི་གཞན་སེལ་བའི་ཡུལ་ཅན་ཉིད་ལ་རང་བཞིན་གྱི་
[161a.7]གཏན་ཚིགས་ཡིན་ལ། སྒྲུབ་པས་དངོས་པོའི་རང་གི་ངོ་བོ་རྟོགས་པ་འགོག་པ་ལ་ནི་འགལ་བས་ཁྱབ་པ་དམིགས་པའོ། །གང་ཞིག་ཚད་མ་གཞན་དུ་གྱུར་པས་འཇུག་པའམ་གང་ལ་ཚད་མ་གཞན་འཇུག་པའི་དོན་གཅིག་ལ་འཇུག་པ་དེ་ནི་གཞན་སེལ་བའི་ཡུལ་ཅན་
[161b]
[161b.1]ཡིན་ལ། སྒྲུབ་པས་དངོས་པོ་འཛིན་པ་ནི་མ་ཡིན་ཏེ། འདི་ནི་སྔོན་པོ་མ་ཡིན་ནོ་ཞེའམ་སྐད་ཅིག་མ་མ་ཡིན་པ་མ་ཡིན་ནོ་ཞེས་བྱ་བ་ལ་སོགས་པའི་ཤེས་པ་བཞིན་ནོ། །སྒྲ་མི་རྟག་གོ་སྙམ་དུ་ཤེས་པ་ཡང་ཚད་མ་གཞན་དུ་གྱུར་པས་འཇུག་པའམ། ཚད་མ་གཞན་གྱི་ཡུལ་ལ་
[161b.2]འཇུག་པ་ཡིན་ནོ། །རྗེས་སུ་འགྲོ་བ་དང་ལྡོག་པ་དག་ནི་འབྲེལ་པ་ལས་ཡིན་ལ། དེ་ཡང་ཚད་མ་གཞན་འཇུག་པའི་རང་བཞིན་རྣམ་པར་དཔྱད་པས་རྙེད་དོ། །ཞེས་བརྗོད་པ་ནི། འདི་ལྟར་ཞེས་བྱ་བ་ཡིན་ནོ། །དོན་གྱི་རང་བཞིན་ངོ་བོ་ཚད་མ་རྣམས་ཀྱིས་བརྟག་པར་བྱ་བ་གང་
[161b.3]ཡིན་པའི་ཆ་གཞན་ཅི་ཞིག་ཡོད། བརྟག་པ་དོན་དུ་གཉེར་བས་ཚད་མ་འཇུག་པ་ནི་རང་དབང་མ་ཡིན་ཏེ། དེ་ལ་རག་ལས་པ་ནས་འཇུག་པའི་ཕྱིར་རོ། །དེ་ཡང་རྗེས་སུ་དཔག་པ་ཡིན་ནོ། །དེ་ནི་སོ་སོ་རང་ཉིད་ཀྱི་དམིགས་པ་མ་རྙེད་པར་གྲུབ་པ་མ་ཡིན་ན། དེ་ལྟ་བུར་གྱུར་པའི་
[161b.4]དོན་གྱི་ཆ་དེ་ཡང་གང་ཞིག་ཡིན། དོན་དེ་ཉིད་བརྟག་པར་བྱ་བ་མ་ཡིན་ནམ་དེའི་ཆ་གཞན་གྱིས་ཅི་ཞིག་བྱ་ཞེ་ན། མ་ཡིན་ནོ་ཞེས་བཤད་པ་ནི་མངོན་སུམ་ཡིན་པ་ལ་ཞེས་བྱ་བའོ། །མངོན་སུམ་མ་ཡིན་པའི་དོན་ནི་བརྟག་པར་ནུས་པ་མ་ཡིན་ནོ། །དེས་ན་དེ་མངོན་སུམ་དུ་གྱུར་པ་ནི་
[161b.5]བརྟགས་པའི་རྟེན་དུ་གྱུར་པ་གཞན་བརྗོད་པར་བྱ་དགོས་སོ། །མངོན་སུམ་ལ་མངོན་སུམ་ཡིན་པའི་ཆ་ཡོད་པ་བརྟག་པར་བྱ་བ་ཡིན་ནོ་ཞེ་ན། མ་ཡིན་ནོ་ཞེས་བཤད་པ་ནི་གཅིག་ཅེས་བྱ་བའོ། །གཅིག་ལ་ཡང་ཆ་གཞན་མི་སྲིད་དོ་ཞེས་བྱ་བའི་དོན་ཏོ། །གལ་ཏེ་དོན་བདག་ཉིད་
[161b.6]གསལ་བ་ནི་མ་ཡིན་གྱི་འོན་ཀྱང་དེ་དང་འདྲ་བའི་རྣམ་པ་ཅན་གྱི་ཤེས་པ་གསལ་བ་ཡིན་ནོ། །དེ་ཡང་ཕྱོགས་གཅིག་གིས་འདྲ་བ་ན་དེའི་ཕྱོགས་གཅིག་མངོན་སུམ་དུ་འགྱུར་རོ་ཞེ་ན། མ་ཡིན་ནོ་ཞེས་བཤད་པ་ནི་བདག་ཉིད་ཅེས་བྱ་བ་ཡིན་ནོ། །གཞན་གནས་ལུགས་ཀྱི་སྣང་བ་ན་
[161b.7]དོན་རང་ཉིད་གསལ་བར་འགྱུར་བ་ཡིན་ཏེ། རང་གི་གནས་ལུགས་ཀྱིས་དོན་བྱེད་པ་པོ་ཡིན་པས་ན་བྱེད་པ་པོ་ཉིད་ཡིན་པ་བཞིན་ནོ། །དེས་ན་ཕྱོགས་གཅིག་གིས་གསལ་བ་མ་ཡིན་ཏེ། བྱེད་པ་པོ་བཞིན་ནོ། །འོ་ན་མཐོང་བའི་ཡུལ་ཉིད་བརྟགས་པ་ཡིན་པས་སོ་སོ་རང་གི་ཡུལ་གཞན་
[162a]
[162a.1]རྙེད་པས་ནི་དོན་མེད་དོ་ཞེ་ན་མ་མཐོང་ཞེས་སྨོས་སོ། །མཐོང་བས་ཡུལ་དུ་བྱས་པ་ནི་རྟོགས་ཟིན་པ་ཉིད་ཀྱིས་བརྟག་པ་དོན་མེད་པའི་ཕྱིར་མ་མཐོང་བའི་ཡུལ་ཉིད་བརྟགས་པར་རིགས་པ་ཡིན་ནོ། །འདི་ནི་ཚད་མ་གཞན་སྒྲུབ་པས་དངོས་པོའི་ངོ་བོ་རྟོགས་པར་
[162a.2]བྱེད་པ་ཉིད་བསལ་ཏོ། །དེ་འཇུག་པ་ནི་ངེས་པར་མངོན་སུམ་གྱིས་ཆོས་ཅན་གྲུབ་པ་ལ་ལྟོས་པ་ཡིན་ནོ། །དེས་ན་ཆོས་ཅན་གྱི་ཆོས་མངོན་སུམ་མ་ཡིན་པ་མི་སྲིད་པས་ཐམས་ཅད་རྟོགས་པ་ཁོ་ན་ཡིན་པའི་ཕྱིར་ཚད་མ་གཞན་བསྒྲུབས་པས་ཅི་ཞིག་རྟོགས་པར་བྱེད། དོན་གྱི་ཞེས་བྱ་བ་ལ་
[162a.3]སོགས་པ་ནི་འགྲེལ་པར་བྱེད་པའོ། །དེ་ནི་མངོན་སུམ་མ་ཡིན་ནོ། །གང་ལ་ཚད་མ་གཞན་འཇུག་པའི་དོན་དེ་ནི་གཅིག་པ་དང་མངོན་སུམ་གྱིས་གྲུབ་པ་ཡིན་ནོ། །གྲུབ་པ་ལ་ངེས་པ་བཤད་པ་ནི་ཆོས་ཅན་མ་གྲུབ་ན་ཞེས་བྱ་བའོ། །དཔེར་ན་མི་རྟག་པ་བསྒྲུབ་པར་བྱ་བ་ལ་སྒྲ་
[162a.4]གཅིག་པ་དང་མངོན་སུམ་གྱིས་གྲུབ་པ་ལྟ་བུའོ། །དེས་ཅིར་འགྱུར་ཞེ་ན། དེ་བཤད་པ། དེས་ན་གཅིག་པོ་དེ་ནི་མངོན་སུམ་ཁོ་ནས་གྲུབ་པས་རྣམ་པ་ཐམས་ཅད་གྲུབ་པ་འདིར་འགྱུར་རོ། །དེ་ཉིད་གཞུང་འཛུགས་པ་ནི་དེ་ལ་ཞེས་བྱ་བའོ། །གྲུབ་པ་དེ་ལས་གཞན་ནི་མ་གྲུབ་
[162a.5]པ་སྟེ་སྐབས་ཀྱིས་གཅིག་པོ་དེའི་རྣམ་པ་མེད་པའི་ཕྱིར་རོ། །འོན་ཏེ་མ་གྲུབ་པའི་རྣམ་པ་ཡོད་ན་ནི་གཅིག་པོ་དེའི་ངོ་བོ་ཉིད་མ་ཡིན་ནོ། །མ་གྲུབ་པའི་རྣམ་པ་གང་ཡིན་པ་དེ་ནི་གཅིག་གི་རང་བཞིན་དུ་མི་འགྱུར་རོ། །ཅིའི་ཕྱིར་ཞེ་ན། གང་ཞིག་ཅེས་སྨོས་སོ། །དེ་གྲུབ་ན་གྲུབ་
[162a.6]པ་ཉིད་ཀྱིས་གང་ཞིག་གང་དང་གྲུབ་པ་དང་བདེ་བ་གཅིག་པ་ཅན་མ་ཡིན་པ་དེ་ནི་དེ་དང་རྣམ་པ་གཅིག་པ་མ་ཡིན་པས་དེའི་ངོ་བོ་ཉིད་མ་ཡིན་ནོ། །ཆོས་འགལ་བ་གནས་པ་ཉིད་ཀྱིས་ཐ་དད་པར་གྲུབ་པའི་ཕྱིར་རོ། །དེ་བཤད་པ་ནི་ཐ་དད་པའི་ཐ་སྙད་ཅེས་བྱ་བའོ། །དེ་མངོན་སུམ་གྱིས་
[162a.7]གྲུབ་ན་རྣམ་པ་ཐམས་ཅད་གྲུབ་མོད། དེ་ལས་ཀྱང་ཅིར་འགྱུར་ཞེ་ན། དེའི་ཕྱིར་ཞེས་བཤད་དོ། །དེའི་ངོ་བོ་ཉིད་མཐའ་དག་མ་ཚང་བ་མེད་པར་ཡོངས་སུ་བཅད་པའི་ཕྱིར་དེ་རྣམ་པར་རྟོག་པ་མེད་པས་མྱོང་བའི་ཕྱིར་ཚད་མ་གཞན་འཇུག་པ་མི་འཐད་དོ། །དེས་ན་དེ་ལྟར་སྒྲུབ་པའི་
[162b]
[162b.1]ཕྱོགས་ལ་ཚད་མ་གཞན་འཇུག་པ་མ་ཡིན་པར་བསྒྲུབས་ནས་གཞན་སེལ་བའི་ཕྱོགས་ལ་འཐད་པར་སྟོན་པ་ནི་གཟུགས་ཆོས་ཞེས་བྱ་བའོ། །གལ་ཏེ་འཁྲུལ་པའི་རྒྱུ་མཚན་གྱིས། །ཡོན་ཏན་གཞན་སྦྱོར་མི་བྱེད་ན། །དོན་གྱི་རང་གི་ངོ་བོ་གཅིག །བདག་ཉིད་མངོན་སུམ་ཡིན་
[162b.2]པ་ལ། །ཚད་མ་རྣམས་ཀྱིས་བརྟག་བྱ་གང་། །མ་མཐོང་ཆ་གཞན་ཅི་ཞིག་ཡོད། །ཅེས་བྱ་བའོ། །དེའི་དོན་འདི་ཡིན་ཏེ། གང་གི་ཕྱིར་འཁྲུལ་པའི་རྒྱུ་མཚན་གྱིས་དངོས་པོ་མཐོང་བ་ལ་ཡང་དངོས་པོ་གཞན་སྒྲོ་འདོགས་པ་དེས་ན། དེ་ཚད་མ་རྣམས་ཀྱིས་བརྟག་པར་བྱ་བ་
[162b.3]ཡིན་ནོ། །དེ་བས་ན་རང་བཞིན་གཞན་སྒྲོ་བཏགས་པས་བསྐལ་པའི་དངོས་པོའི་བདག་ཉིད་རྟོགས་པར་བྱ་བའི་ཕྱིར་ཚད་མ་གཞན་འཇུག་སྟེ། དེས་ན་དེ་སྒྲོ་འདོགས་པ་བསལ་བས་རྟོགས་པ་ན་ཐ་དད་པའི་དོན་ཅན་གཞན་སེལ་བའི་ཡུལ་ཅན་དུ་འགྲུབ་པ་ཡིན་ནོ། །གལ་ཏེ་
[162b.4]ཉམས་སུ་མྱོང་བས་རྟོགས་པའི་དངོས་པོ་ཉིད་ལ་མ་མཐོང་བ་ཅུང་ཟད་ཡོད་ན། དེ་ལ་ཚད་མ་གཞན་འཇུག་པར་འགྱུར་བ་ཡིན་ན། ཆ་མེད་པ་དེ་ལ་མ་མཐོང་བ་འགའ་ཡང་མེད་ན་ཚད་མ་གཞན་འཇུག་པ་མེད་པའི་ཕྱིར་སྒྲུབ་པའི་ཚད་མ་གཞན་འཇུག་པ་དགག་པ་ནི་རྣམ་
[162b.5]པར་གཅོད་པའི་ཡུལ་ཅན་ལ་ཡང་མཚུངས་སོ། །འདི་ལྟར་དངོས་པོའི་དེ་ཁོ་ན་ཉིད་མཐའ་དག་མཐོང་བ་ལ་ནི་འཁྲུལ་པའི་རྒྱུ་མཚན་གྱིས་ཡོན་ཏན་གཞན་སྦྱོར་བ་ཉིད་རེ་ཞིག་མི་སྲིད་དེ། རྟག་ཏུ་ཡོད་པར་ཐལ་བའི་ཕྱིར་རོ། །སྲིད་ན་ཡང་མཐོང་བའི་ནུས་པ་མ་ཉམས་
[162b.6]པས་ཡོན་ཏན་གཞན་སྦྱོར་བ་ཁྱད་དུ་བསད་དེ། རང་གི་ཡུལ་ཡོངས་སུ་རྫོགས་པར་བྱ་བ་ཚད་མ་གཞན་ལ་ལྟོས་པ་ཟློག་པར་བྱེད་དོ། །དཔེར་ན་བྲམ་ཟེའི་ཁྱེའུ་ལ་སེང་གེ་ཞེས་དངོས་པོ་མཐའ་དག་མཐོང་བཞིན་དུ་ཡང་སྒྲོ་འདོགས་པ་ཙམ་གྱིས་སྐྱེས་བུ་སེང་གེ་དང་སྦྱོར་བ་རང་
[162b.7]གི་ངོ་བོ་འཛིན་པའི་ཤེས་པ་གཞན་ལ་ལྟོས་ནས་འགྲུབ་པ་མ་ཡིན་པ་བཞིན་ནོ། །དེས་ན་གལ་ཏེ་འཁྲུལ་པའི་རྒྱུ་མཚན་གྱིས་ཞེས་ཅི་སྟེ་བརྗོད། འདི་ལྟར་འཁྲུལ་པའི་རྒྱུ་མཚན་ཡོད་ཀྱང་དེ་ཁོ་ན་ཉིད་མ་ཉམས་ན། ཚད་མ་གཞན་གྱིས་རྟོགས་པ་སྲིད་པ་མ་ཡིན་ནོ་ཞེ་ན། བརྗོད་
[163a]
[163a.1]པ། འདི་ལ་དངོས་པོ་མེད་པར་སྨྲ་བའི་ལྟ་བ་ལ་ཇི་ལྟར་མཐོང་བཞིན་པའི་རང་བཞིན་ཙམ་ཉིད་འཇིག་པ་དང་སྐྱེ་བ་དང་སྐྱེད་པར་བྱེད་པ་ཡིན་པར་རིགས་པ་ལས། དེ་ཉིད་སྐད་ཅིག་མ་ལ་སོགས་པར་གྲུབ་པའི་ཕྱིར་ཉམས་སུ་མྱོང་བའི་དབང་གིས་གཟུགས་དེ་
[163a.2]མདུན་ན་གནས་པའི་རང་བཞིན་དུ་སྣང་བ་ནས་གཟུགས་ཉིད་གསལ་བ་ཡིན་གྱི། སྐད་ཅིག་མ་ལ་སོགས་པ་ནི་མ་ཡིན་ནོ་ཞེས་བརྗོད་པར་མི་ནུས་སོ། །སྐད་ཅིག་མ་ཉིད་ཀྱང་གཟུགས་ཀྱི་བདག་ཉིད་དུ་གསལ་བ་ཡིན་ལ། གཟུགས་ཀྱང་སྐད་ཅིག་མའི་བདག་ཉིད་དུ་ཡིན་ནོ་ཞེས་
[163a.3]བསྙད་པ་ཡོད་པའི་ཕྱིར་རོ། །དེས་ན་དོན་ཇི་ལྟ་བ་དེ་ཁོ་ན་ལྟར་དོན་ཉམས་སུ་མྱོང་བ་དོན་རིགས་པ་འཇུག་པས་དོན་ངོ་བོ་མཐའ་དག་གིས་སྣང་བར་གྲུབ་ཀྱང་ཉམས་སུ་མྱོང་བ་རང་ཡོད་པ་ཙམ་གྱིས་ནི་མཐར་ཕྱིན་པ་མ་ཡིན་གྱི། འོན་ཀྱང་འདུ་བྱེད་སྒྲུབ་པས་རྗེས་སུ་འཇུག་པ་ཡིན་
[163a.4]ནོ། །འདུ་བྱེད་ལས་སྐྱེས་པའི་རྟོགས་པ་ཡང་རྣམ་པར་རྟོག་པ་ཡིན་ནོ། །དེས་ན་གལ་ཏེ་རྣམ་པར་རྟོག་པ་ཡང་ཉམས་སུ་མྱོང་བ་བཞིན་དུ་སྒྲུབ་པའི་ངོ་བོས་དོན་འཛིན་ན། སྔོན་པོ་ལ་སོགས་པ་དང་དབྱེར་མེད་པའི་སྐད་ཅིག་མ་ལ་སོགས་པའི་རྣམ་པ་
[163a.5]སྔོན་པོའི་བདག་ཉིད་དུ་གྱུར་པ་དེའི་རང་གི་ངོ་བོ་ཙམ་འཛིན་པར་འགྱུར་ན་དེ་ལྟར་ཡང་མ་ཡིན་ཏེ། སྔོན་པོ་མྱོང་ན་སྔོན་པོའི་རྣམ་པར་རྟོག་པ་སྐྱེས་པ་ན། སྐད་ཅིག་མ་ལ་སོགས་པ་ལ་ཐེ་ཚོམ་ཟ་བས་ཚད་མ་གཞན་ལ་ལྟོས་པའི་ཕྱིར་རོ། །དེས་ན་འདིས་ནི་བདག་ཉིད་ཐམས་
[163a.6]ཅད་ཀྱིས་ཉམས་སུ་མྱོང་ཞིང་འདུ་བྱེད་པ་ལས་རྟོགས་པར་གྱུར་པ་ཆོས་གཅིག་ཏུ་བྱས་ནས་ངེས་པ་བྱེད་དོ། འདི་ལྟ་སྟེ་གཟུགས་ཉིད་དུའོ། །དེས་ན་འདི་ལྟར་དངོས་པོའི་རང་བཞིན་ཉམས་སུ་མྱོང་བའི་བདག་ཉིད་ཀྱི་རྟོགས་པ་མེད་ཀྱང་འདིར་རང་བཞིན་གཞན་གྱིས་ཀྱང་དངོས་
[163a.7]པོ་ལ་འཇུག་པའི་བྱེད་པ་མེད་པར་གྱུར་ན། དངོས་པོ་ལ་སོགས་པར་རྟོགས་པ་བཞིན་དུ། དངོས་པོ་ལ་བརྟེན་པ་མ་ཡིན་པ་ཁོ་ནར་འགྱུར་རོ། །གང་གི་ཚེ་ཐ་དད་པར་བྱེད་པ་ཉིད་ཀྱིས་དོན་གྱི་ངོ་བོ་སྔོན་པོ་མ་ཡིན་པ་ཙམ་ལས་དབྱེ་བའི་ཕྱིར་དེའི་གཉེན་པོར་གྱུར་པ་དངོས་པོའི་
[163b]
[163b.1]བདག་ཉིད་ཀྱི་སྔོན་པོ་ཙམ་རྟོགས་པས་འཇུག་པ་དེའི་ཚེ་འདི་འཇུག་པ་ཚད་མ་གཞན་གྱིས་གོ་སྐབས་དང་ལྡན་པར་འཐད་པ་ཁོ་ནའོ། །དེའི་ཕྱིར་ཉམས་སུ་མྱོང་བ་དང་འབྲེལ་བའི་མཐོང་བ་སྔོན་པོ་མ་ཡིན་པ་ཙམ་སྤངས་པར་གྲུབ་པ་ན་སྐད་ཅིག་མ་ཡིན་པ་ལ་སོགས་པ་དང་། ཐ་མི་
[163b.2]དད་པ་ལྡོག་པའི་ཚད་མས་གཞན་ལ་ལྟོས་པ་མེད་པ་ཉིད་མ་ཡིན་ནོ། །བློ་ནི་རྣམ་པ་གཉིས་ཏེ། གཅིག་ནི་དོན་གྱི་དབང་གི་དོན་སྣང་བས་དོན་ཇི་ལྟ་བ་བཞིན་ཁོ་ནར་འཇུག་པ་ཡིན་ལ། གཞན་ནི་རྟོགས་པ་པོའི་གཞན་གྱི་དབང་ཡིན་པའི་ཕྱིར་དོན་ལ་མི་ལྟོས་ཏེ། གལ་ཏེ་དོན་གྱི་ཡུལ་
[163b.3]ཅན་མ་ཡིན་པ་ཉིད་ཀྱི་དོན་ལ་དོན་ཇི་ལྟ་བ་བཞིན་མ་རྟོགས་པ་ཡིན་ན། འདིས་དོན་ལ་བརྟེན་པའི་ཐ་སྙད་དུ་མི་འགྱུར་རོ། །དེས་ན་འདི་ནི་གཞན་སེལ་བའི་དོན་ཅན་ཉིད་ཀྱིས་དངོས་པོའི་ཡུལ་ཅན་ཡིན་པའི་ཕྱིར་ཉེས་པ་འགའ་ཡང་མེད་དོ། །དེ་ལྟ་ན་འོ་ན་རྣམ་པར་རྟོག་
[163b.4]པ་ནི་འཁྲུལ་པ་ཉིད་ཀྱི་ཕྱིར་ན། དངོས་པོའི་བདག་ཉིད་སྔོན་པོ་དང་སྐད་ཅིག་མ་ལ་སོགས་པའི་རང་བཞིན་གྱིས་ཐ་དད་པར་རྟོགས་པ་དེས་ན་དོན་གྱི་ངོ་བོའི་ཆོས་མཐའ་དག་གིས་བདག་ཉིད་ཡིན་ཡང་རྣམ་པ་གཅིག་ཏུ་སྣང་བའི་ཕྱིར་ཉམས་སུ་མྱོང་བའི་རྗེས་སུ་འབྲང་
[163b.5]བའི་རྟོགས་པས་ཆོས་གཅིག་གི་བདག་ཉིད་དུ་རྟོགས་སོ། །དེས་ན་ཉམས་སུ་མྱོང་བ་སྐད་ཅིག་མ་ལ་སོགས་པ་རྣམས་རྣམ་པ་གཞན་དུ་རྟོགས་པར་བྱེད་པ་མ་ཡིན་པའི་ཕྱིར་དེའི་རྒྱུ་མཚན་གྱིས་སྐད་ཅིག་མའི་རྣམ་པར་རྟོག་པ་མ་སྐྱེས་པས་ན་ཚད་མ་གཞན་ལ་ལྟོས་
[163b.6]པའི་ཕྱིར་གཞན་སེལ་བའི་ཡུལ་ཅན་གྱིས་ཅི་བྱ། སྒྲོ་འདོགས་པ་མེད་ཀྱང་རྒྱུ་མཚན་མེད་པ་ཉིད་ཀྱིས་མ་རྟོགས་པར་གྲུབ་པ་ན་ཚད་མ་གཞན་འཇུག་པ་འགྲུབ་པའི་ཕྱིར་རོ། །དེ་བས་ན་སྒྲུབ་པའི་ངོ་བོ་ཁོ་ནས་རྟོགས་པ་ཆོས་ཙམ་ལ་བརྟེན་པར་འགྱུར་རོ། །འཁྲུལ་
[163b.7]པའི་ཕྱིར་དེ་མ་རྟོགས་སོ་ཞེ་ན་མ་ཡིན་ཏེ། ཞེན་པ་ལ་ལྟོས་ཏེ་ཁས་བླངས་པའི་ཕྱིར་རོ། །དེ་ལྟ་མ་ཡིན་ན་རྣམ་པར་གཅོད་པའི་སྒོ་ནས་ཀྱང་རྟོགས་པ་མི་འགྲུབ་པའི་ཕྱིར་རོ་ཞེ་ན། དེ་ལྟར་ནི་མི་ནུས་ཏེ། དངོས་པོ་ལ་བརྟེན་པ་ཡིན་ན་དངོས་པོ་ལ་ཡོད་པའི་སྐད་ཅིག་མ་ལ་
[164a]
[164a.1]སོགས་པའི་བདག་ཉིད་ཀྱིས་ཐ་དད་པར་བསླད་པར་མི་འགྱུར་བའི་ཕྱིར་རོ། །དེའི་ཡུལ་གྱི་ཉམས་སུ་མྱོང་བ་ལ་བརྟེན་པའི་ཕྱིར་དེ་ལ་བརྟེན་པ་ཡིན་ན་ཡང་ཐ་དད་པ་མ་ཡིན་པ་བཞིན་དུ་རང་བཞིན་ལ་ཕྱིན་ཅི་ལོག་པར་འགྱུར་ཏེ། དངུལ་ལ་སོགས་པའི་རྣམ་པར་རྟོག་
[164a.2]པ་བཞིན་ནོ། །སྔོན་པོ་མ་ཡིན་པ་ལ་ཡང་སྐད་ཅིག་མ་ཉིད་རྟོགས་པའི་ཕྱིར་ཐ་དད་པ་ལ་འཁྲུལ་པ་ཡིན་ནོ་ཞེ་ན་མ་ཡིན་ཏེ་སྔོན་པོ་དང་སྔོན་པོ་མ་ཡིན་པ་དག་གིས་སྐད་ཅིག་མ་གཅིག་ཉིད་དུ་འཁྲུལ་པ་ཡང་གཞན་སེལ་བ་མ་ཡིན་པར་དངོས་པོ་ལ་བརྟེན་པ་ཉིད་ཡིན་ན། ཐ་དད་པ་བསླད་པ་
[164a.3]བཞིན་མི་འགྲུབ་པར་འཆད་པར་འགྱུར་བའི་ཕྱིར་རོ། །དེའི་ཕྱིར་ཐ་དད་པ་ཙམ་ལ་བྱེད་པ་དང་ལྡན་པའི་རྣམ་པར་རྟོག་པ་ནི་བཟློག་པར་བྱ་བ་མང་པོ་དག་ལས་སྒྲའོ་ཞེས་དེའི་གཉེན་པོར་གྱུར་པའི་དངོས་པོའི་བདག་ཉིད་འཛིན་པས་གཅིག་བཟློག་སྟེ། མི་རྟག་པའོ་ཞེས་དེ་བཞིན་དུ་གཞན་
[164a.4]སེལ་བ་ན་ཐ་དད་པ་ལ་བསླད་པ་མེད་ཀྱང་རང་བཞིན་ལ་བསླད་པར་འགྱུར་རོ། །དེ་ལྟར་ཡང་འོག་ནས་བཤད་པར་བྱའོ། །དེའི་ཕྱིར་དངོས་པོ་རྟོགས་པའི་བདག་ཉིད་ཅན་གྱི་རྣམ་པར་ཤེས་པའི་ཡུལ་ཅན་གྲུབ་པ་ལ་ཡང་ཐ་དད་པའི་དོན་གྱི་རྟོགས་པ་ལ་བརྟེན་ནས་སྒྲོ་འདོགས་སྲིད་པ་དང་
[164a.5]ཚད་མ་གཞན་ལ་ལྟོས་པར་འཐད་པ་ཡིན་ནོ། །དེས་ན་རྒྱུ་མཚན་ངེས་པ་ཉིད་ལས་མ་རྟོགས་པར་གྲུབ་པ་ན་འདི་མི་བརྗོད་པར་འགྱུར་བ་གང་ཡིན་པ་འདིར་མ་མཐོང་བ་སྒྲུབ་པའི་ཕྱིར་འདི་བཀོད་པ་ནི་མ་ཡིན་གྱི་འོན་ཀྱང་སྒྲུབ་པའི་ངོ་བོས་རྟོགས་པ་བསལ་བ་ན་སྒྲོ་འདོགས་ཡོད་ན། དེ་ཟློག་
[164a.6]པར་བྱེད་པ་ཉིད་ཀྱིས་ཚད་མ་དག་གིས་བརྟག་པ་སྲིད་པར་བརྗོད་པ་ཡིན་ཏེ། ཇི་སྐད་བཤད་པའི་ཚུལ་གྱིས་སྲིད་པར་བསྟན་པའི་ཕྱིར་རོ། །གང་ཞིག་དངོས་པོ་གང་ལས་ཐ་དད་པ་དེ་ནི་དེ་ལས་ཡོན་ཏན་གཞན་ཡིན་ནོ། །ངེས་པའི་རང་བཞིན་གྱི་དངོས་པོ་ལྟོས་ནས་ཀྱང་དེ་མ་ཡིན་པའི་
[164a.7]རང་བཞིན་དེ་ལས་ཐ་དད་པ་ཡིན་ནོ། །དེས་ན་སྔོན་པོའི་རང་བཞིན་གྱིས་དངོས་པོ་ལས་སེར་པོ་གཞན་ལ། དེ་བཞིན་དུ་སྐད་ཅིག་མར་འཇིག་པ་ལ་ནི་མི་འཇིག་པ་ངེས་པའི་འབྲས་བུ་བྱེད་པ་ལས་ནི་འབྲས་བུ་མེད་པ་གཞན་ཡིན་ནོ། །འཁྲུལ་པའི་རྒྱུ་མཚན་ཡོད་པ་ལས་ནི་དངོས་པོ་རང་
[164b]
[164b.1]གི་ངོ་བོས་ཇི་ལྟར་གནས་པ་ལས་ཕྱིན་ཅི་ལོག་ཏུ་རྟོགས་པར་འགྱུར་བ་ཡིན་ནོ། །དེས་ན་དོན་གྱི་ངོ་བོ་གཅིག་ཡིན་པའི་ཕྱིར་དེའི་རྟོགས་པ་རང་བཞིན་གཅིག་ཁོ་ནར་འགྱུར་རོ། །འདི་ལ་ཕྱིན་ཅི་ལོག་ཏུ་སྒྲོ་འདོགས་པ་ནི་མང་བ་ཡིན་ཏེ། དེའི་རང་བཞིན་མ་ཡིན་པའི་དོན་རྣམས་མང་བའི་ཕྱིར་
[164b.2]རོ། །དེས་ན་དེ་ལ་ཕྱིན་ཅི་ལོག་ཏུ་དང་ཐ་མི་དད་པ་སེལ་བར་བྱེད་པའི་འབྲས་བུ་ཅན་གྱི་ཚད་མ་དག་ཀྱང་མང་པོ་ཁོ་ནའོ། །ཇི་ལྟར་རང་གི་ངོ་བོས་གཞན་གྱི་རང་བཞིན་གྱིས་སྟོང་པ་གཞན་ལ་གཞན་སྦྱོར། གཞན་གྱི་ངོ་བོས་རྟོགས་པའི་ཕྱིར་རོ་ཞེ་ན་མ་ཡིན་ཏེ། དེ་མ་རྟོགས་པས་དེ་གཞན་གྱི་
[164b.3]ངོ་བོར་རྟོགས་པ་མི་འགྲུབ་པའི་ཕྱིར་ཏེ། གཞན་ཙམ་རྟོགས་པའི་ཕྱིར་རོ། །དེ་རྟོགས་ན་ནི་གཉི་ག་ཡང་རྟོགས་པའི་ཕྱིར་ཁྱད་པར་དང་ཁྱད་པར་ཅན་གྱི་དངོས་པོ་ཉིད་སྦྱོར་བ་ཡིན་པར་འགྱུར་ཏེ། དེས་ན་རྟོགས་པ་ཉིད་ཚད་མ་གཞན་ལ་ཇི་ལྟར་ལྟོས་པར་འགྱུར། དེ་བས་ན་
[164b.4]ཡོན་ཏན་གཞན་སྦྱོར་ཡང་ཚད་མ་གཞན་ལ་ལྟོས་པ་མ་ཡིན་ནོ་ཞེས་དོགས་ན། ཉ་ཕྱིས་ལ་དངུལ་གྱི་རྣམ་པ་ལྟར་ཞེས་སྨོས་སོ། །དཔེར་ན་ཉ་ཕྱིས་ལ་འཁྲུལ་པའི་རྒྱུ་མཚན་གྱིས་དངུལ་གྱི་རྣམ་པར་སྦྱར་བ་བཞིན་ནོ། །ཁྱད་པར་དང་ཁྱད་པར་ཅན་བཞིན་དུ་ཉ་ཕྱིས་རྟོགས་བཞིན་
[164b.5]པའི་རང་བཞིན་དངུལ་གྱི་རྣམ་པ་དང་སྦྱོར་བ་ནི་མ་ཡིན་ལ། མ་རྟོགས་པས་དངུལ་གྱི་རང་བཞིན་དུ་མ་རྟོགས་པ་ཡང་མ་ཡིན་ནོ། །རྟོགས་པ་དེ་རྡུལ་ཙམ་གྱི་ཡུལ་ཡིན་ཡང་ཉ་ཕྱིས་ཀྱི་རང་བཞིན་དུ་རྗེས་སུ་ཞུགས་པར་སྣང་བའི་ཕྱིར་ཉ་ཕྱིས་སུ་གྱུར་པའི་དངུལ་གྱི་རྣམ་པར་
[164b.6]རྟོག་པ་ཉིད་དོ། །གལ་ཏེ་སྐད་ཅིག་མ་ཉིད་ལ་སོགས་པའི་རྣམ་པ་མང་པོ་གཅིག་ཉིད་ངོ་བོ་གཞན་འབྱེད་པ་ལྷུར་ལེན་པའི་རྟོགས་པས་རང་བཞིན་དུ་བྱས་ཏེ། སྐད་ཅིག་མ་ཉིད་ལ་སོགས་པའི་སྤྱོད་ཡུལ་ཅན་ཉམས་སུ་མྱོང་བའི་བྱེད་པ་ཉམས་པར་བྱས་པ་ན་སྒྲོ་འདོགས་པར་
[164b.7]འཐད་ཀྱི་གཞན་དུ་ནི་མདུན་ན་གནས་པའི་རང་བཞིན་དུ་གསལ་བའི་ངོ་བོ་ལ་རང་བཞིན་གཞན་སྒྲོ་འདོགས་པ་མ་ཡིན་ཏེ། རྟག་ཏུ་དེ་ཡོད་པར་ཐལ་བའི་ཕྱིར་རོ། །ཉ་ཕྱིས་ཉམས་སུ་མྱོང་བ་ལ་དངུལ་གྱི་རྣམ་པར་སྒྲོ་འདོགས་པ་ལ་ནི་རྣམ་པ་འདི་སྲིད་པ་མ་ཡིན་ཏེ། རང་
[165a]
[165a.1]གི་རྣམ་པ་འགལ་བས་སྣང་བ་ལ་འགལ་བ་རྟོགས་པ་མེད་པའི་ཕྱིར་རོ། །དེ་ལྟ་མ་ཡིན་ན་གནོད་པར་བྱེད་པ་སྐྱེ་བ་ཉིད་མི་འགྲུབ་པར་འགྱུར་རོ། །སྐད་ཅིག་མ་མ་ཡིན་པའི་རྣམ་པ་ནི་དངོས་སུ་འགལ་བ་ཡིན་ཡང་དངོས་པོའི་རང་བཞིན་ཙམ་དུ་རྟོགས་པས་
[165a.2]ན་འགལ་བ་མེད་པའི་ཕྱིར་འཐད་པ་ཁོ་ནའོ། །དེས་ན་ཇི་ལྟར་ཉ་ཕྱིས་ལ་དངུལ་དུ་སྒྲོ་འདོགས་ཞེས་དོགས་ན། གཟུགས་ཆོས་མཐུན་པ་མཐོང་བ་ལས་ཞེས་སྨོས་སོ། །རྟོགས་པ་པོའི་བསམ་པ་ལ་ལྟོས་ཏེ། དངུལ་གྱི་རང་བཞིན་ཇི་ལྟ་བུ་ཉིད་དེ་ལྟ་བུ་ཉ་ཕྱིས་ལ་ཡང་ཡོད་
[165a.3]པས་ན་ཆོས་མཐུན་པར་བརྗོད་དེ། བ་ལང་དང་བ་མེན་བཞིན་ནོ། །དེ་མཐོང་བའི་ཕྱིར་རོ། །འདི་སྐད་བརྗོད་པ་ཡིན་ཏེ། དཀར་བ་ལ་སོགས་པ་ཆོས་མཐུན་པ་དག་གིས་ཉ་ཕྱིས་ཀྱི་རང་བཞིན་གང་ཡིན་པ་དེ་དངུལ་ལ་ཡོད་པ་ཡིན་ཏེ། བུམ་པ་གཉིས་ལ་ལྟོ་བ་ཡངས་པ་ལ་
[165a.4]སོགས་པའི་རྣམ་པ་ཡོད་པ་བཞིན་ནམ། མཐོ་ཡོར་དང་མི་དག་ལ་གྱེན་དུ་འགྲེང་བའི་རྣམ་པ་ཡོད་པ་བཞིན་ནོ། །དེ་ཙམ་གྱི་རྣམ་པའི་རྗེས་སུ་བྱེད་པའི་མངོན་སུམ་སྐྱེས་པས་དངུལ་གྱི་རྣམ་པ་དང་ཐ་དད་པར་བྱེད་པའི་རྣམ་པ་མ་བཟུང་བའི་ཕྱིར་དངུལ་དུ་སྒྲོ་འདོགས་པར་འཐད་པ་
[165a.5]ཉིད་དོ། །མཐོ་ཡོར་གྱི་ཐུན་མོང་མ་ཡིན་པའི་ཆོས་མ་བཟུང་བས་སྐྱེས་བུར་སྒྲོ་འདོགས་པ་བཞིན་ནོ། །ཐ་དད་པར་བྱེད་པའི་རྣམ་པ་གཟུང་ན་ནི་སྒྲོ་འདོགས་མི་སྲིད་པ་ཁོ་ནའོ། །འཁྲུལ་པའི་རྒྱུ་མཚན་མེད་ན་ནི་གཉི་ག་ལ་ཡང་ཡོད་པའི་ངོ་བོ་ཙམ་བཟུང་བ་ལ་ཐེ་ཚོམ་དུ་འགྱུར་ཏེ་
[165a.6]དཔེར་ན་གྱེན་དུ་འགྲེང་བ་ཉིད་བཟུང་བ་ན་མཐོ་ཡོར་དང་སྐྱེས་བུར་ཐེ་ཚོམ་ཟ་བ་བཞིན་ནོ། །ཉ་ཕྱིས་ལ་ཡང་སྲིད་པའི་ངོ་བོ་གཅིག་ལ་ངེས་པར་གཟུང་བ་ཉིད་འཁྲུལ་པ་བཞིན་ནོ། །ཐ་དད་པར་བྱེད་པའི་རྣམ་པ་མ་བཟུང་བར་ཇི་ལྟར་རྟོགས་ཤེ་ན། མ་རྟོགས་པའི་ཕྱིར་རོ། །དེ་ལྟར་སྣང་
[165a.7]བ་ནི་དེ་རྟོགས་པར་ཐལ་བའི་ཕྱིར་རོ། །འོ་ན་ཇི་ལྟར་དོན་གྱི་རང་གི་ངོ་བོ་གཅིག་ཅེས་བྱ་བ་ལ་སོགས་པ་བཤད་ཅེ་ན། ཆོས་གང་ཞིག་རང་བཞིན་གང་ལ་བརྟེན་ནས་ཚད་མ་དག་གིས་བརྟག་པ་དེ་ནི་དེ་བཟུང་བ་ན་མ་བཟུང་བ་མི་སྲིད་དེ། སྒྲ་ལ་སོགས་པ་བཟུང་བ་སྐད་ཅིག་མ་ཉིད་
[165b]
[165b.1]ལ་སོགས་པ་བཞིན་ནོ་ཞེས་བསྟན་པའི་ཕྱིར་དེ་སྐད་བཤད་དོ། །ཆ་ཤས་ཀྱིས་འདྲ་བ་མི་སྲིད་པ་ནི་མ་ཡིན་ནོ། །དེ་གསལ་བ་ཡང་འདྲ་བ་ཉིད་ཡིན་ནོ། །འགྲེལ་པ་ནི་གལ་ཏེ་ཞེས་བྱ་བ་ཡིན་ནོ། །མདོ་བཞིན་དུ་གཞུང་སྔ་མ་དང་འབྲེལ་ཏོ། །དངོས་པོའི་དེ་བཞིན་ཉིད་ཐམས་ཅད་
[165b.2]མཐོང་བ་ཅན་ལ་ཡང་ཡོན་ཏན་གཞན་སྦྱོར་བར་མི་བྱེད་ནའོ། །ངོ་བོ་གཞན་དང་འགལ་བ་ཉིད་ཀྱིས་རྣམ་པ་གཞན་མདུན་ན་གནས་པའི་རང་བཞིན་དུ་གསལ་བའི་རང་བཞིན་དུ་དེ་ཉེ་བར་ཇི་ལྟར་སྦྱོར་ཞེ་ན། འཁྲུལ་པའི་རྒྱུ་མཚན་གྱིས་ཞེས་སྨོས་སོ། །དེའི་ནུས་པ་བསྟན་པའི་ཕྱིར་
[165b.3]ཁྱད་པར་བླངས་པ་ནི། དེ་ལྟར་ངེས་པའི་གགས་སུ་གྱུར་པ་ཞེས་བྱ་བ་ཡིན་ནོ། །སྣང་བཞིན་པའི་རང་བཞིན་ཉིད་ནི་ཕྱིན་ཅི་ལོག་ཏུ་རྟོགས་པར་སྲིད་པ་མ་ཡིན་ནོ། །དེས་ན་འཁྲུལ་པའི་རྒྱུ་རྣམས་འཁྲུལ་པའི་རྒྱུར་མི་འགྱུར་བ་ཉིད་དོ། །ངེས་པའི་གགས་སུ་གྱུར་པའི་འཁྲུལ་
[165b.4]པའི་རྒྱུ་མཚན་གྱིས་ནི་སྣང་བའི་ཆོས་གཅིག་གི་མཐར་ཐུག་པར་བྱེད་པ་དེས་ན་ཆོས་གཞན་ལ་དོགས་པའམ་འཁྲུལ་པར་འགྱུར་བ་ཁོ་ནའོ། །རྒྱུ་མཚན་དེ་དག་གང་ཡིན་ཞེ་ན། ཆོས་ཐ་མི་དད་པ་ཞེས་བརྗོད་དོ། །དེས་ན་དེ་ལྟར་མངོན་སུམ་གྱིས་འཁྲུལ་པའི་གོ་སྐབས་ཕྱེ་བ་ན།
[165b.5]འཁྲུལ་པ་ལ་སོགས་པའི་རྒྱུ་རྣམས་བདག་ཉིད་ཇི་ལྟ་བུར་རྒྱུར་འགྱུར་བའི་ཕྱིར་དེ་ཉིད་གཙོར་འཁྲུལ་པའི་རྒྱུ་ཡིན་པར་བརྗོད་དོ། །ཇི་ལྟར་གཉི་ག་མི་སྣང་བར་གཞན་གཞན་དུ་སྦྱོར་ཏེ་གཞན་ཙམ་རྟོགས་པའི་ཕྱིར་རོ་ཞེ་ན་ཞེས་སྔ་མ་བཞིན་དུ་དོགས་པ་བསུ་ནས་ལན་འདེབས་པ་ནི་
[165b.6]དེ་ལྟར་ཉ་ཕྱིས་ལ་ཞེས་བྱ་བ་ཡིན་ནོ། །དེར་ཉ་ཕྱིས་སྣང་བ་ཡང་མ་ཡིན་པ་དངུལ་གྱི་རྣམ་པར་མི་སྦྱོར་བ་ཡང་མ་ཡིན་ནོ། །དེ་ཉིད་བཤད་པ་ནི་ཉ་ཕྱིས་ལ་ནི་ཞེས་བྱ་བའོ། །དེ་ལྟར་དངུལ་གྱི་རྣམ་པ་སྦྱར་བའི་ཉ་ཕྱིས་ལ་ངོ་བོ་གཉིས་ཡོད་པ་ནི་མ་ཡིན་ནོ། །རང་བཞིན་གཉིས་པོ་དེ་
[165b.7]ཡང་མཚུངས་པ་དང་སྟེ། གང་བཟུང་ན་དངུལ་དུ་སྒྲོ་འདོགས་པར་འགྱུར་བ་ཉ་ཕྱིས་དང་དངུལ་ལ་ཡང་སྲིད་པ་གང་ཡིན་པ་དེ་ནི་གཅིག་ཡིན་ལ། ཁྱད་པར་ཅན་དང་དངུལ་གྱི་ངོ་བོ་ཉིད་ནི་གཉིས་པའོ། །འདི་སྐད་བརྗོད་པ་ཡིན་ཏེ། འདིར་གཉིས་སྣང་བ་ན་སྦྱོར་བ་ནི་མ་ཡིན་གྱི།
[166a]
[166a.1]འོན་ཀྱང་དངུལ་གྱི་རྣམ་པ་ཙམ་དུ་སྣང་བ་ཡོད་པ་ཡིན་ནོ། །གཏན་ཚིགས་བཤད་པ་ནི་དེ་ལྟར་ཞེས་བྱ་བའོ། །སྤྱིའི་ངོ་བོ་དང་དངུལ་གྱི་རྣམ་པ་གསལ་བར་འགྱུར་ན། དངུལ་ཙམ་ཞིག་གསལ་བ་ཡིན་ནོ། །དེ་ལྟར་མ་ཡིན་ན་གཉིས་སྣང་བར་མི་འགྲུབ་
[166a.2]བོ་ཞེས་བཤད་པ་ནི། བྱེ་བྲག་ཏུ་མ་རྟོགས་ན་ནི་ཞེས་བྱ་བའོ། །འོ་ན་ཉ་ཕྱིས་ལ་དངུལ་གྱི་རྣམ་པར་སྦྱོར་ཞེ་ན། ལྟ་བས་ན་ཞེས་སྨོས་སོ། །རྟོགས་པ་པོ་ཉ་ཕྱིས་ཀྱི་གཟུགས་མཐོང་བས་ཁྱད་པར་ཁོ་ན་མཐོང་ངོ་། །ཁྱད་པར་མ་ཡིན་པའི་ཉ་ཕྱིས་ཀྱི་གཟུགས་མེད་པས་ན་
[166a.3]ཁྱད་པར་གྱི་ཅི་ཞིག་བྱ་ཞེ་ན། འདིར་དོགས་པ་ཡོད་པ་ཡིན་ཏེ། དངུལ་གྱི་ངོ་བོ་ལ་མི་སྲིད་པའི་ཉ་ཕྱིས་ཀྱི་རྣམ་པ་བཟུང་ན་དངུལ་དུ་སྒྲོ་འདོགས་པར་མི་འགྱུར་རོ། །དངུལ་ལ་ཡོད་པ་བཟུང་ཡང་དེའི་ཕྱི་ནི་མ་ཡིན་ནོ་ཞེས་དོགས་པར་བྱ་བ་ཡོད་པའི་ཕྱིར་ཁྱད་པར་ཞེས་སྨོས་སོ། །
[166a.4]གལ་ཏེ་ཡང་དེ་ལྟ་བུ་དངུལ་ཡང་སྲིད་མོད་ཀྱི། དེ་ལྟ་ན་ཉ་ཕྱིས་ལ་ཡོད་པ་གང་ཡིན་པ་དེ་ནི་དངུལ་ལ་ཡོད་པ་མ་ཡིན་ལ་དངུལ་ལ་ཡོད་པ་མ་ཡིན་པ་དེ་ཡང་ཉ་ཕྱིས་ལ་མེད་དོ། །དེ་ལྟར་ན་ཡང་དཀར་ཞིང་འཚེར་བའི་རྣམ་པ་ནི་ཉ་ཕྱིས་ལ་ཡོད་ཅིང་དངུལ་ལ་ཡང་ཡོད་པ་ཁོ་ནའོ། །
[166a.5]དེས་ན་ཁྱད་པར་ཞེས་དེའི་རང་བཞིན་བརྗོད་པ་ཡིན་ནོ། །གཉི་ག་སྲིད་པའི་ངོ་བོ་ནི་ཐ་དད་པར་བྱེད་པ་ཐུན་མོང་མ་ཡིན་པའི་ངོ་བོ་བཟུང་བ་མེད་པར་གསལ་བ་ངེས་པ་ལ་རྟོགས་པ་མ་ཡིན་ཏེ། ཇི་སྐད་བཤད་པ་གྱེན་དུ་འགྲེང་བ་ཉིད་བཞིན་ནོ། །དེ་ལ་ནི་འཁྱོར་བ་དང་ཁོང་གསེང་ཅན་ལ་
[166a.6]སོགས་པའམ། རྐང་ལག་ལ་སོགས་པ་བཟུང་བས་གྱེན་དུ་འགྲེང་བ་དེ་ངེས་པར་རྟོགས་པ་ཡིན་ནོ། །དེ་འདིར་དེ་ལྟ་བུའི་རྣམ་པ་འཛིན་པ་ནི་ཁྱད་པར་གྱི་ངོ་བོར་ངེས་པའི་རྟོགས་པ་ཡིན་ནོ། །དེས་ན་གལ་ཏེ་ཁྱད་པར་གྱི་ངོ་བོ་ཁོ་ན་མཐོང་མོད་ཀྱི་དེ་ལྟ་ན་ཡང་ཁྱད་པར་གྱི་རྣམ་པ་འཛིན་
[166a.7]པའི་ངེས་པའི་རྐྱེན་མ་ཚང་བའི་ཕྱིར་ཁྱད་པར་གྱི་ངོ་བོ་གཏན་ལ་མ་ཕེབས་པས་དེ་དངུལ་ལ་ཡོད་དོ། །དེས་ན་དེའི་སྤྱི་མཐོང་ངོ་སྙམ་དུ་རློམ་པར་བྱེད་དོ་ཞེས་བཤད་དོ། །འདི་སྐད་བརྗོད་པ་ཡིན་ཏེ་ཁྱད་པར་གྱི་རྣམ་པ་དང་འབྲལ་བའི་ཕྱིར་དེར་དེ་ལྟ་བུའི་རང་བཞིན་དུ་སྣང་བ་དངུལ་ལ་
[166b]
[166b.1]ཡང་སྲིད་པ་གང་ཡིན་པ་དེ་རྒྱུ་མཚན་འགའ་ཞིག་ལས་ངེས་པ་ཐོབ་སྟེ། འགལ་བ་མེད་པ་སྣང་བ་ལ་དངུལ་དུ་སྒྲོ་འདོགས་པ་ཡིན་ནོ་ཞེས་བཤད་པ་ཡིན་ནོ། །དེའི་ཕྱིར་དངུལ་དུ་སྒྲོ་འདོགས་སོ་ཞེས་བྱ་བ་ནི་ཇི་ལྟར་སྣང་བཞིན་པ་འགལ་བའི་ཕྱིར་རོ་ཞེས་བྱ་བའི་དོན་ཏོ། །དངུལ་
[166b.2]དུ་སྒྲོ་འདོགས་པ་ནི་ཉ་ཕྱིས་ཀྱི་ཡུལ་གྱིས་རྣམ་པར་བཅད་ནས་དངུལ་དུ་སྣང་བའོ། །དེས་ན་དེ་ལྟར་སྒྲོ་འདོགས་པའི་སྐབས་ཕྱེ་བས་ན་དེ་མྱོང་བ་དེའི་རང་བཞིན་གྱི་ཡུལ་ནོན་པས་དེར་སྣང་བའི་ཕྱིར་མི་སྣང་བ་བཞིན་དུ་ཡོན་ཏན་གཞན་སྒྲོ་འདོགས་པར་འཐད་པ་ཡིན་ནོ་ཞེས་བསྒྲུབས་ཏེ།
[166b.3]སྐབས་སུ་བབ་པའི་ཡུལ་གྱི་དབང་དུ་བྱས་ནས་ཀྱང་བསྟན་པའི་ཕྱིར་དེ་བཞིན་དུ་ཞེས་སྨོས་སོ། །ཉ་ཕྱིས་བཞིན་དུ་གཞན་བུམ་པ་ལ་སོགས་པ་ལ་ཡང་གནས་པར་འཁྲུལ་ལོ། །ངེས་པའི་གགས་སུ་གྱུར་པ་འཁྲུལ་པའི་རྒྱུ་བཤད་པ་ནི་ཐ་དད་པ་ཉིད་དུ་མ་འཕྲིགས་པ་
[166b.4]ཞེས་བྱ་བའོ། །ཆོས་ཀྱི་རང་བཞིན་ནི་རེ་ཞིག་ཐ་དད་པ་མེད་པ་ཉིད་ཀྱི་ཕྱིར་ཐ་དད་པར་མ་རྟོགས་པ་ཡིན་ནོ། །སྐད་ཅིག་གི་དབྱེ་བས་བྱས་པའི་ཐ་དད་པ་ནི་ཚུ་རོལ་མཐོང་བས་མི་རྟོགས་ཏེ། འདས་པ་དང་མ་འོངས་པ་དག་དང་ད་ལྟར་གྱི་སྐད་ཅིག་སྣང་བར་མི་འཛིན་པའི་ཕྱིར་རོ། །
[166b.5]ད་ལྟར་གྱི་རང་བཞིན་འཛིན་པ་ལས་ནི་ཚུ་རོལ་མཐོང་བ་དང་རྣལ་འབྱོར་པ་འཛིན་པ་མཚུངས་པ་ཁོ་ནའོ། །མཐོང་བའི་ཁྱད་པར་མ་བརྗོད་པར་ནི་རྣམ་པར་རྟོག་པ་སྐྱེད་པ་དང་མ་སྐྱེད་པ་བརྗོད་པར་མི་ནུས་སོ། །དེ་ལྟར་ཡང་གལ་ཏེ་ཏིལ་མར་ལ་སོགས་པ་ཟད་པའི་མར་མེ་བཞིན་དུ་
[166b.6]ངོ་བོ་མ་དམིགས་ན་དེ་གནས་པར་འཁྲུལ་པར་མི་འགྱུར་བ་ཞིག་ན་འདྲ་བ་གཞན་སྐྱེས་པས་གནས་པར་འཁྲུལ་པ་ཡིན་ནོ་ཞེས་བཤད་པ་ནི་འདྲ་བ་གཞན་དང་གཞན་སྐྱེ་བས་ཞེས་བྱ་བའོ། །གནས་པར་འཁྲུལ་པ་དེ་ཡང་དེའི་ངོ་བོར་སྒྲོ་འདོགས་པ་ལས་འགྱུར་བ་ཡིན་ཏེ།
[166b.7]དེའི་ངོ་བོར་སྒྲོ་འདོགས་པའི་རང་བཞིན་ཡིན་པའི་ཕྱིར་རོ། །མདུན་དུ་གནས་པའི་དོན་དམིགས་པར་རྣམ་པར་རྟོག་པ་ན། སྐད་ཅིག་མ་ཉིད་ཀྱིས་མེད་པར་གྱུར་ཀྱང་དེའི་ངོ་བོ་ཡང་དེ་ཉིད་ཀྱིས་གཅིག་པ་ཉིད་དུ་འདྲ་བ་གཞན་སྐྱེས་པ་ལ་ཡང་སྒྲོ་འདོགས་པར་བྱེད་དོ། །གནས་
[167a]
[167a.1]པར་འཁྲུལ་པ་ཡང་དེ་ཉིད་ཡིན་ཏེ། ཐ་སྙད་ལ་ལྟོས་ནས་ནི་རྒྱུ་དང་འབྲས་བུའི་དངོས་པོ་ཉིད་དོ། །དེ་ལྟར་བྱས་ན་སྒྲུབ་པའི་ཕྱོགས་བསལ་ཏེ། གཞན་སེལ་བའི་ཕྱོགས་ལ་ཚད་མ་གཞན་གྱིས་བརྟག་པ། ཇི་ལྟར་འགྲུབ་པ་དེ་བཤད་པ་ནི། འདི་ལ་གཞན་
[167a.2]གྱི་དངོས་པོ་ཞེས་བྱ་བ་སྟེ། འདི་ནི་བཤད་ཟིན་ཏོ། །གལ་ཏེ་རྣམ་པར་གཅོད་པར་བྱེད་པའི་རྟོགས་པ་ཡང་སྒྲོ་འདོགས་པ་བསལ་བས་ནང་གི་དོན་ཉིད་རྟོགས་པར་འགྱུར་བ་མ་ཡིན་ནམ། དེས་ན་སྒྲོ་འདོགས་ཟློག་པར་བྱེད་པ་ཡང་སྒྲུབ་པའི་ངོ་བོ་རྟོགས་པ་ཉིད་ལས་མི་འདའ་སྟེ། ཉ་
[167a.3]ཕྱིས་རྟོགས་པ་བཞིན་ནོ། །འདི་ཉ་ཕྱིས་ལ་བརྟེན་ནས་དངུལ་དུ་རྟོགས་པ་སྐྱེས་པ་ན། གང་གི་ཚེ་ཡུལ་ཉེ་བར་ཕྱིན་པ་ལ་སོགས་པས་ཉ་ཕྱིས་ཀྱི་རྟོགས་པ་སྐྱེས་པ་དེའི་ཚེ། འདི་དངུལ་གྱི་རྟོགས་པ་ཟློག་པར་བྱེད་པ་ཡིན་ཡང་སྒྲུབ་པའི་ཡུལ་ཅན་ཉིད་ཡིན་གྱི། རྣམ་པར་
[167a.4]གཅོད་པའི་ཡུལ་ཅན་ནི་མ་ཡིན་ནོ། །འདི་དངུལ་མ་ཡིན་ནོ་ཞེས་བྱ་བར་གྱུར་ན་ནི་རྣམ་པར་གཅོད་པའི་ཡུལ་ཅན་ཡིན་ནོ་ཞེ་ན། དེ་མ་ཡིན་ནོ་ཞེས་བཤད་པ་ནི། རྣམ་པར་གཅོད་པའི་ཞེས་སྨོས་སོ། །ཕྱིན་ཅི་ལོག་དང་བཅས་པའི་ཤེས་པ་དག་ནི་སྒྲོ་འདོགས་ཀྱི་དབང་གིས་
[167a.5]མ་རྟོགས་པའི་དོན་སྒྲོ་འདོགས་བཟློག་ནས་རྟོགས་པར་བྱེད་པ་ནི་མ་ཡིན་ཏེ། དེས་ན་གང་གིས་རྟོགས་པ་འདི་དག་སྒྲུབ་པའི་ཡུལ་ཅན་ཉིད་དུ་འགྱུར་བ་སྒྲོ་འདོགས་ཟློག་པར་བྱེད་པའི་རྟོགས་པ་དག་ནི་དངོས་པོའི་ཆ་མ་རྟོགས་པ་རྟོགས་པར་བྱ་བའི་ཕྱིར་འཇུག་པ་མ་ཡིན་
[167a.6]ནོ། །ཇི་ལྟར་མ་ཡིན་ཞེ་ན། དེ་ནི་མཐོང་ཟིན་པའི་ཕྱིར་རོ་ཞེས་སྨོས་སོ། །སྒྲོ་འདོགས་བསལ་ནས་རྟོགས་པས་དམིགས་པའི་རང་བཞིན་དེ་ནི་སྔར་ཉིད་རྟོགས་ཟིན་ཏེ། ཆོས་ཅན་གྲུབ་པ་ཉིད་ན་སྒྲ་ལ་སོགས་པའི་རྣམ་པ་གསལ་བའི་ཕྱིར་རོ། །གལ་ཏེ་འདི་ཡང་
[167a.7]སྒྲའི་ཆོས་དམིགས་པ་ཉིད་ཀྱིས་འཇུག་ན་ནི་སྔར་གྱི་དེ་གསལ་བ་ཇི་ལྟ་བ་དེ་ལྟ་བུ་ཁོ་ནར་འདི་ཡང་འགྱུར་རོ། །རྟོགས་པ་སྔ་མས་རྟོགས་པ་ལས་མི་རྟོགས་པ་ཉིད་རྣམ་པ་ལྷག་པ་ནི་མེད་དོ། །དེས་ན་འདི་ཡང་མི་རྟག་པ་ཉིད་རྟོགས་ན་སྒྲ་ལ་འཇུག་པ་ཆོས་ཅན་རྟོགས་
[167b]
[167b.1]པ་དང་སྣང་བ་མཚུངས་པར་འགྱུར་རོ། །རྟོགས་པ་དེ་ཡང་སྔར་སྐྱེས་ཟིན་པའི་ཕྱིར་འདིས་ཅི་ཞིག་བྱ། ཅི་སྟེ་ཡང་སྔར་དེའི་རང་གི་ངོ་བོར་གྱུར་པའི་དོན་དམིགས་པ་དེ་ལྟ་ན་ཡང་གང་ལས་འདི་མི་རྟག་པ་ཉིད་ངེས་པས་ཚིམ་པར་འགྱུར་བ། ད་ལྟར་མི་རྟག་པ་དམིགས་པ་
[167b.2]བཀར་ཏེ་རྟོགས་པར་བྱེད་པ་ཡིན་ནོ་ཞེ་ན། དེ་མ་ཡིན་ནོ་ཞེས་བཤད་པ་ནི། ཆ་ཤས་མེད་པ་ལ་ཞེས་སྨོས་སོ། །འདི་སྐད་བརྗོད་པ་ཡིན་ཏེ། གལ་ཏེ་མི་རྟག་པ་ཉིད་སྒྲའི་རྣམ་པ་ལས་ལོགས་ཤིག་ཏུ་ཡོད་ན་ནི་དམིགས་ཀྱིས་བཀར་ཏེ་རྟོགས་པ་ཞིག་ན། སྒྲའི་མི་
[167b.3]རྟག་པ་ཉིད་ཀྱི་རང་བཞིན་ནི་སྒྲ་ཉིད་ཡིན་པའི་ཕྱིར་སྒྲའི་མི་རྟག་པ་ཉིད་རྟོགས་པ་ན་སྒྲའི་རྣམ་པ་གསལ་བ་ཁོ་ནར་འོས་ཀྱི་སྒྲའི་ཆ་ཤས་ཀྱི་རང་བཞིན་མི་རྟག་པ་ཉིད་རྟོགས་པ་ན་མ་རྟོགས་པའི་རང་བཞིན་རྟོགས་པའི་དོན་དུ་ཡིན་པར་ནི་མི་འབྱོར་ཏོ། །འོ་ན་དགག་པ་སྨྲ་བ་ལ་
[167b.4]ཡང་ཇི་ལྟར་རྟོགས་ཤེ་ན། འདི་ནི་མདུན་དུ་བརྟག་པར་བྱའོ། །འོན་ཀྱང་དངོས་པོའི་རང་བཞིན་རྟོགས་པའི་དོན་དུ་འཇུག་ན་འདིར་དངོས་སུ་ནི་རྟོགས་ཟིན་པའི་ཆོས་ཅན་ལ་གང་ཡིན་པ་དེ་རྟོགས་པ་ཡིན་ཏེ། དེས་ན་འདི་ཡང་དེ་ཁོ་ན་བཞིན་དུ་འགྱུར་བ་དོན་མེད་དོ། །
[167b.5]རྟོགས་པའི་དོན་མེད་ཀྱང་འཇུག་པ་ནི་ཉམས་པ་མེད་དེ། སྦྱོར་བའི་རྟོགས་པ་སེལ་བ་ཉིད་ཀྱིས་འཇུག་པའི་ཕྱིར་དངོས་པོའི་ཡུལ་ཅན་ཡང་སྲིད་པར་བཤད་ཟིན་པའི་ཕྱིར་རོ། །རྟོགས་པ་དང་རྣམ་པར་གཅོད་པ་གཉིས་དོན་རྟོགས་པའི་བྱེད་པ་ཁྱད་མེད་པའི་ཕྱིར་རོ། །མི་
[167b.6]རྟག་པ་ལ་སོགས་པའི་རྟོགས་པ་རྣམས་དངོས་པོ་ཙམ་རྟོགས་པ་མ་ཡིན་ཡང་སྒྲོ་འདོགས་རྣམ་པར་གཅོད་པར་བྱེད་པ་ཉིད་ཀྱིས་གཞན་སེལ་བའི་ཡུལ་ཅན་ཉིད་དུ་འགྱུར་བ་གང་ཡིན་པ་སྒྲོ་འདོགས་རྣམ་པར་གཅོད་པ་ཙམ་གྱིས་རྣམ་པར་གཅོད་པའི་ཡུལ་ཅན་ཉིད་དུ་སུ་སྨྲ།
[167b.7]རྟག་པ་མ་ཡིན་ནོ་ཞེས་བྱ་བ་ནི་རྣམ་པར་གཅོད་པ་རྟོགས་པ་ཡིན་ནོ། །ཤེས་པ་རྣམ་པ་གསུམ་ཕན་ཚུན་མི་འདྲ་བར་རྟོགས་པ་ཡིན་ཏེ་འདི་སྔོན་པོའོ་སྙམ་པ་ནི་ངོ་བོ་ཙམ་རྟོགས་པར་རྟོགས་སོ། །སྔོན་པོ་མེད་དོ་སྙམ་པ་ནི་དེ་མེད་པར་རྟོགས་པ་དགག་པ་རྟོགས་པ་ཡིན་ནོ། །
[168a]
[168a.1]འདི་སྔོན་པོ་མ་ཡིན་པ་མ་ཡིན་ནོ་སྙམ་པ་ནི་དངོས་པོ་ལ་བརྟེན་ནས་དངོས་པོ་གཞན་མེད་པར་རྟོགས་པ་ནི་དེ་ལ་དེའི་ངོ་བོ་རྣམ་པར་གཅོད་པའི་ཕྱིར་རྣམ་པར་གཅོད་པའི་རྟོགས་པ་ཡིན་ནོ། །དེས་ན་གལ་ཏེ་དངོས་པོ་རྟོགས་པར་བྱ་བ་ལ་རྟོགས་པའི་བྱེད་པ་རྣམ་པ་གཉིས་ཡིན་པ་དེ་ལྟ་ན་
[168a.2]ཡང་རྣམ་པར་གཅད་པར་བྱ་བའི་ཡུལ་ཅན་དགག་པས་རྣམ་པར་བཅད་པ་ཉིད་རྣམ་པར་གཅོད་པའི་ཡུལ་ལ་རྣམ་པར་གཅོད་པ་ཡིན་པར་བརྗོད་ཀྱི་སྒྲོ་འདོགས་སེལ་བ་ཙམ་ནི་མ་ཡིན་ནོ། །དེས་ན་ཇི་ལྟར་འདི་སྔོན་པོ་ཡིན་ནོ། །སྒྲ་མི་རྟག་པ་ཡིན་ནོ་ཞེས་བྱ་བ་ལ་སོགས་པར་ཤེས་པ་རིགས་མི་
[168a.3]མཐུན་པ་ལ་བརྟེན་པའི་དགག་པའི་དོན་གྱི་སྟོང་པ་དག་དེའི་ཡུལ་ཅན་དུ་འགྱུར། དེས་ན་སྒྲ་དང་ཤེས་པ་སེལ་བའི་ཡུལ་ཅན་ཡིན་ནོ་ཞེས་བྱ་བ་འདི་ཅི་ཞིག་ཡིན། དེ་ཉིད་ཀྱི་ཕྱིར་སངས་རྒྱས་པ་རྣམས་གཞན་སེལ་བས་མདོངས་པ་ཡིན་ནོ་ཞེས་རབ་ཏུ་བརྗོད་དོ་ཞེ་ན། དེ་ལ་འདིར་ལན་
[168a.4]བཏབ་སྟེ། འདི་སྔོན་པོ་མ་ཡིན་ནོ་སྙམ་པ་རྣམ་པར་གཅོད་པ་རྟོགས་པ་ཡང་སྒྲོ་འདོགས་རྣམ་པར་གཅོད་པ་ཉིད་ཀྱི་རྣམ་པར་གཅོད་པའི་ཡུལ་ལ་བྱེད་པ་ཡིན་གྱི། རྣམ་པར་གཅད་པར་བྱ་བ་མེད་པར་རྟོགས་པ་ནི་མ་ཡིན་ནོ། །འདི་ལྟར་འདི་སྔོན་པོ་མ་ཡིན་ནོ་ཞེས་བྱ་བའི་དགག་པ་ནི་
[168a.5]དགག་པར་བྱ་བར་སྔོན་པོ་མ་ཡིན་པ་ཉིད་དང་འབྲེལ་པ་ཡིན་ལ། འདི་ཞེས་བྱ་བ་ནི་མདུན་ན་སྣང་བའི་སྔོན་པོ་ཉིད་ཡིན་ནོ། །དེས་ན་འདིར་རྣམ་པར་གཅོད་པའི་རྟོགས་པ་འདི་ཞེས་བྱ་བ་རྟོགས་བཞིན་པ་ལ་གཞོམ་པར་འགྱུར་བ་གང་ཡིན་པ་ལ་བརྟེན་པའི་དགག་པ་ཞུགས་པ་ན་སྔོན་པོ་
[168a.6]མ་ཡིན་པར་རྟོགས་པའི་སྔོན་པོ་ལ་ཁྱད་པར་ཅི་ཞིག་རྟོགས་པར་འགྱུར། འདི་ཞེས་བྱ་བར་རྟོགས་བཞིན་པ་ཉིད་ཀྱིས་ནི་རྟོགས་པ་འདི་དག་བརྟེན་པར་འགྱུར་བ་མ་ཡིན་གྱི། འོན་ཀྱང་སྔོན་པོ་མ་ཡིན་པ་བཀག་པ་དེ་ལ་བརྟེན་པ་ཉིད་ཀྱིས་སོ། །དེ་བཀག་པ་དེ་ལ་བརྟེན་པ་ཞེས་བྱ་བ་འདི་
[168a.7]ཡང་ཅི་ཞིག་ཡིན། འདི་ལྟར་དགག་པ་ནི་དགག་པར་བྱ་བ་སྔོན་པོ་མ་ཡིན་པ་ཁོ་ན་དང་འབྲེལ་གྱི། འདིའོ་སྙམ་པར་རྟོགས་པའི་རྟེན་སྔོན་པོ་དང་ནི་མ་ཡིན་ནོ། །དེ་དང་འབྲེལ་པ་ལ་རྟོགས་པའི་ཆོས་ཉིད་དེ་ལ་རྟོགས་པར་འགྱུར་བ་ནི་མ་ཡིན་ཏེ། བ་ལང་ཁྲ་བོ་ཞེས་རྟོགས་པ་ན་ཁྲ་བོ་
[168b]
[168b.1]ཉིད་ལྷས་བྱིན་ལ་བཞིན་ནོ། །ཇི་ལྟར་བ་ལང་ཁྲ་བོ་དང་ལྡན་པས་ལྷས་བྱིན་ལ་དེ་ལྟར་ཁྱད་པར་རྟོགས་པ་མ་ཡིན་པ་དེ་བཞིན་དུ། དགག་པའི་ཁྱད་པར་སྔོན་པོ་མ་ཡིན་པའི་ཆོས་ཉིད་ནི་སྔོན་པོའི་ཁྱད་པར་མ་ཡིན་ཏེ། སྔོན་པོ་མ་ཡིན་པའི་ཆོས་ཉིད་དགག་པར་བྱ་བ་ཡིན་པའི་ཕྱིར་དང་།
[168b.2]བཀག་པ་ཉིད་ཀྱིས་དེའི་ཆོས་སུ་མི་འཐད་པའི་ཕྱིར་རོ། །དེ་ལ་བརྟེན་པའི་སྔོན་པོ་མ་ཡིན་པ་བཀག་པ་ན་དེ་བཀག་པའི་ཆོས་སྔོན་པོའི་ཁྱད་པར་ཡིན་ནོ་ཞེ་ན། འདི་སྔོན་པོ་མ་ཡིན་ནོ་ཞེས་རྟོགས་པའི་ཕྱིར་སྔོན་པོ་མ་ཡིན་པ་སྔོན་པོ་ལ་བརྟེན་པ་ཞེས་བྱ་བ་ཡིན་མོད། དགག་པའི་དོན་ནི་
[168b.3]སྔོན་པོ་མ་ཡིན་པ་ལ་བརྟེན་པའི་ཕྱིར། འདི་སྔོན་པོའི་ཅི་ཡིན་པར་འགྱུར། ཁྲ་བོའི་ཡོན་ཏན་ནི་ལྷས་བྱིན་གྱི་ཅི་ཡང་མ་ཡིན་ནོ། །ཀྱེ་དགག་པའི་དོན་གྱི་ཆོས་གཞན་དང་མི་འདྲ་བ་ནི་འདི་ཡིན་ཏེ། དེ་རྟོགས་ཀྱང་གང་དུ་ཡང་ཆོས་དང་ཆོས་ཅན་གྱི་དངོས་པོར་མི་རྟོགས་པ་གང་
[168b.4]ཡིན་པའོ། །འདི་ལྟར་གལ་ཏེ་སྔོན་པོ་ལ་སྔོན་པོ་མ་ཡིན་པ་མེད་པ་ཞེས་བྱ་བའི་ཆོས་འགའ་ཞིག་རྟོགས་ན། འདི་ལ་རྟོགས་པའི་སྔོན་པོ་མ་ཡིན་པ་གང་ཡིན་པ་དེ་དང་འདི་ལྷན་ཅིག་པར་ཡང་རྟོགས་པར་འགྱུར་རོ། །དེ་མི་འགོག་པའི་དངོས་པོ་གཞན་དང་འབྲེལ་ཀྱང་དེས་
[168b.5]དབེན་པར་འགྱུར་བ་མ་ཡིན་ནོ། །འོན་ཏེ་སྔོན་པོ་མ་ཡིན་པ་ལྡོག་པ་ཙམ་ཉིད་དངོས་པོ་མེད་པ་ཡིན་ནོ་ཞེ་ན། དེ་ལྟ་ན་ཡང་དངོས་པོ་མེད་པའི་རང་བཞིན་ནི་འདི་ཉིད་ཡིན་ལ། རྟོགས་པ་འདི་ཙམ་གྱིས་མཐར་ཕྱིན་པ་ཡིན་ཏེ། སྔོན་པོ་མ་ཡིན་པ་མ་ཡིན་ནོ་ཞེས་བྱ་བ་གང་ཡིན་
[168b.6]པ་སྟེ། གཞན་གྱི་ཆོས་ཉིད་དུ་རྟོགས་པར་འགྱུར་བ་འདིའི་རང་བཞིན་གཞན་ཅི་ཞིག་ཡོད། དེས་ན་ཇི་ལྟར་དངོས་པོ་འཇིག་པ་ན་དེ་མེད་པ་ཡིན་གྱི། དེ་མེད་པར་འབྱུང་བ་ནི་མ་ཡིན་པའི་ཕྱིར་དངོས་པོ་མེད་པ་དེ་བཞིན་དུ་དངོས་པོ་མེད་པར་རྟོགས་པ་ལ་འང་སྔོན་པོ་མ་
[168b.7]ཡིན་པ་མ་ཡིན་ནོ་ཞེས་བྱ་བ་འདི་ཙམ་ཉིད་དངོས་པོ་མེད་པ་དང་དེ་རྟོགས་པ་ཡིན་ནོ། །དེས་ན་སྔོན་པོ་མ་ཡིན་པ་མ་ཡིན་ནོ་ཞེས་དེ་མེད་པར་རྟོགས་པ་ན་གང་གིས་འདི་ཁྱད་པར་དུ་འགྱུར་བ་མེད་པ་ཡོད་པར་རྟོགས་པ་ནི་མ་ཡིན་ནོ། །སྔོན་པོ་མ་ཡིན་པ་ནི་ཡོད་པ་མ་ཡིན་པའི་ཕྱིར་
[169a]
[169a.1]དང་སྔོན་པོ་མ་ཡིན་པ་མེད་པ་ཡང་འབྱུང་བར་རྟོགས་པ་མེད་པའི་ཕྱིར་སྔོན་པོ་ལ་ཅུང་ཟད་ཀྱང་མ་རྟོགས་པར་འགྱུར་རོ། །ཇི་ལྟར་རྟོགས་པའི་རང་བཞིན་ངོ་བོ་མེད་པ་ཉིད་ཁྱད་པར་ཡིན་པའི་ཕྱིར་ཉེས་པ་མེད་དོ་ཞེ་ན། མ་ཡིན་ཏེ། དེའི་རང་བཞིན་རྟོགས་པ་
[169a.2]མེད་པའི་ཕྱིར་རོ། །སྔོན་པོ་མ་ཡིན་པ་མེད་དོ་ཞེས་རྟོགས་པ་ན་དེ་མེད་དོ་ཞེས་རྟོགས་ཀྱི་གཞན་འགའ་ཞིག་རྟོགས་པ་ནི་མ་ཡིན་ནོ། །གལ་ཏེ་སྔོན་པོ་མ་ཡིན་པ་ལས་ཁྱད་པར་དུ་རྟོགས་པ་ཡིན་གྱི། སྔོན་པོ་མ་ཡིན་པ་ཙམ་ནི་མ་ཡིན་པས་ན། དེ་ཉིད་ཁྱད་པར་དུ་འགྱུར་རོ་ཞེ་ན།
[169a.3]སྔོན་པོ་མ་ཡིན་པ་ཙམ་རྟོགས་པ་ནི་མ་ཡིན་ལ། ཁྱད་པར་དུ་རྟོགས་པ་ཡང་མ་ཡིན་གྱི་འོན་ཀྱང་སྔོན་པོ་མ་ཡིན་པ་མེད་པ་ཡིན་པའི་ཕྱིར་འདིར་གང་ཞིག་ཁྱད་པར་ཉིད་ཡིན། འདི་སྔོན་པོ་དང་འབྲེལ་པ་མ་ཡིན་ནོ་ཞེས་ནི་བཤད་ཟིན་ཏོ། །གལ་ཏེ་སྔོན་པོ་མ་ཡིན་པ་ལ་ཕྱོགས་པའི་
[169a.4]དགག་པའི་དོན་རྟོགས་པ་ན། དེ་ལ་སྔོན་པོ་མ་ཡིན་པ་མེད་པར་འགྱུར་བས་སྔོན་པོ་མ་ཡིན་པ་ཉིད་དུ་རྟོགས་པའི་སྔོན་པོ་དེས་དབེན་པའི་སྔོན་པོར་རྟོགས་པར་འགྱུར་བ་མ་ཡིན་ནམ་ཞེ་ན། དབེན་པ་དང་ལོག་པ་དང་སྟོང་པ་ཞེས་བྱ་བ་འདི་ཡང་ཅི་ཞིག་དབེན་པ་དང་ལོག་པ་དང་སྟོང་པ་ཉིད་
[169a.5]ཀྱི་ཁྱད་པར་ཅན་ཡིན་ནོ། །དེས་ན་འདི་དག་ཀྱང་དངོས་པོ་གཞན་གྱི་རང་བཞིན་ནམ་ལྡོག་པ་ཙམ་ཡིན་ཡང་རུང་སྟེ། ཇི་སྐད་བཤད་པའི་ཚུལ་གྱིས་དོན་མེད་པ་ཁོ་ནར་རྟོགས་པར་བྱའོ། །འདིས་ནི་དབེན་པ་ལ་སོགས་པའི་རྟོགས་པ་རྣམས་རྣམ་པར་གཅོད་པ་རྟོགས་པ་ཡིན་པ་ཡང་
[169a.6]གསལ་བར་རྟོགས་པར་བྱའོ། །སྔོན་པོ་མ་ཡིན་པ་ལ་ཕྱོགས་པའི་དགག་པའི་དོན་རྟོགས་པས་སྔོན་པོ་སྔོན་པོ་མ་ཡིན་པས་དབེན་པར་རྟོགས་པར་ནུས་པ་ནི་མ་ཡིན་གྱི། འོན་ཀྱང་སྔོན་པོ་ཙམ་རྟོགས་པའི་ཕྱིར་དང་། སྔོན་པོ་མ་ཡིན་པ་མ་རྟོགས་པའི་ཕྱིར་སྔོན་པོ་མ་ཡིན་པ་ལ་
[169a.7]ཕྱོགས་པའི་དགག་པའི་དོན་སྔོན་པོ་ལ་ཇི་ལྟར་འཇུག །དེས་ན་ཇི་སྐད་བརྗོད་པའི་སྐྱོན་མི་སྤོབས་སོ། །དེའི་ཕྱིར་འདི་སྔོན་པོ་མ་ཡིན་ནོ་ཞེས་རྟོགས་ཏེ། སྔོན་པོ་དང་འབྲེལ་པའི་སྔོན་པོ་མ་ཡིན་པ་ལ་བརྟེན་པའི་མེད་པ་རྟོགས་པ་ན་སྔོན་པོ་ལ་བརྟེན་ནས་རྟོགས་པར་བྱ་བའི་རྣམ་
[169b]
[169b.1]པའི་ཁྱད་པར་མེད་ཀྱང་སྔོན་པོ་ལ་བརྟེན་པའི་སྔོན་པོ་མ་ཡིན་པར་རྟོགས་པ་བཟློག་པར་འགྱུར་བའི་ཕྱིར་དེའི་དོན་གྱིས་འདི་དེར་རྣམ་པར་གཅོད་པ་རྟོགས་པར་བརྗོད་དོ། །དེས་ན་སྔོན་པོ་མ་ཡིན་པར་རྟོགས་པ་ཉིད་འདིར་སྒྲོ་འདོགས་ཡིན་ལ་དེ་ཟློག་པར་བྱེད་པས་ནི་རྟོགས་པ་འདི་རྣམ་པར་
[169b.2]གཅོད་པར་བྱེད་པ་ཡིན་ནོ། །དེས་ན་ཇི་ལྟར་འདི་དངུལ་མ་ཡིན་ནོ་སྙམ་པས་ཉ་ཕྱིས་ལ་དངུལ་དུ་སྒྲོ་འདོགས་པ་བཟློག་པ་དེ་བཞིན་དུ་ཉ་ཕྱིས་སུ་རྟོགས་པས་ཀྱང་ཡིན་པས་དེ་ཡང་རྣམ་པར་གཅོད་པའི་ཡུལ་ཅན་ཉིད་དོ། །དེ་བཞིན་དུ་འདི་སྔོན་པོ་ཡིན་ནོ་སྙམ་པ་ལ་སོགས་པ་ཡང་
[169b.3]རྟོགས་པར་བྱེད་དོ། །དེ་ཉིད་ཀྱི་ཕྱིར་སློབ་དཔོན་ཕྱོགས་ཀྱི་གླང་པོས་སྒྲས་ནི་སྒྲ་དང་དོན་གཞན་སེལ་བས་རང་གི་དོན་སྒྲུབ་པར་བྱེད་པ་ཞེས་གསུངས་པས་སྒྲོ་འདོགས་པའི་སྒོ་ནས་སྒྲ་དང་དོན་གཞན་དུ་ཐལ་ལ། དེ་བཟློག་པ་ཉིད་ཀྱིས་ནི་སྒྲ་རང་གི་དོན་ལ་གཞན་སེལ་བར་བརྗོད་
[169b.4]པས་སློབ་དཔོན་རྣམ་འགྲེལ་མཛད་པས་དགོངས་པ་བརྗོད་དོ། །དེས་ན་དེ་ལྟར་འཆད་པ་པོ་གཞན་དག་གི་ཤེས་རབ་ཀྱི་རྟེན་དུ་མ་གྱུར་ཅིང་། རྣམ་པ་གཉིས་ཀྱིས་བཤད་དུ་ཟིན་ཀྱང་མ་རྟོགས་པ་བདག་ཅག་གིས་འབད་དུ་བཀྲལ་ཀྱང་ཤེས་མེད་དད་པ་དང་མི་ལྡན་པ་དག་
[169b.5]གིས་ཇི་ལྟར་རྟོགས་པར་འགྱུར། ཚུལ་འདི་ལ་མ་བརྟེན་པར་ནི་གཞུང་འདི་འམ་དངོས་པོ་ལ་བདེ་བར་གཤེགས་པ་རྣམས་ཀྱི་གཞན་སེལ་བ་ལ། མདོངས་པ་ཡུན་རིང་པོ་ནས་འཁྲས་པ་ཕྱིར་བཅོས་པར་མི་ནུས་སོ། །ཁ་ཅིག་མེད་པར་དགག་པའི་ཡུལ་ཅན་དུ་སྨྲ་བ་ནི་བྱིས་
[169b.6]པ་རང་གི་ལག་པས་མེ་མདག་འདྲེན་པ་བཞིན་དུ་ཡོངས་སུ་ཉོན་མོངས་པས་གདུང་བར་འགྱུར་རོ་ཞེས་གཞན་དུ་རྒྱས་པར་བསྟན་ཟིན་ཏོ། །གཞན་ཡང་སྔོན་པོའོ་སྙམ་པའི་ཤེས་པ་ནི་སྔོན་པོ་མ་ཡིན་པ་མེད་པར་དགག་པའི་ཡུལ་ཅན་དུ་རྟོགས་པ་མེད་དོ། །རྗེས་སུ་དཔག་
[169b.7]པ་ལས་དེའི་ཡུལ་ཅན་ཉིད་ཡིན་ནོ་ཞེ་ན། གང་ཞིག་གང་གི་རྣམ་པ་ཙམ་ཡིན་པ་དེ་ནི་དེ་རྟོགས་ཀྱང་མ་རྟོགས་ན་དེའི་ངོ་བོ་དཔོག་པ་ཡིན་ཏེ། དཔེར་ན་སྒྲའི་རྣམ་པ་ཙམ་གྱི་མི་རྟག་པ་ཉིད་སྒྲས་རྟོགས་ཀྱང་མ་རྟོགས་པ་བྱས་པ་ཉིད་ལས་རྟོགས་པ་བཞིན་ནོ། །སྔོན་པོ་སྔོན་པོ་
[170a]
[170a.1]མ་ཡིན་པ་མེད་པར་དགག་པའི་ངོ་བོ་མ་ཡིན་ནོ། །སྔོན་པོ་མ་ཡིན་པར་བཀག་པ་དེ་ནི་དེ་ལྡོག་པ་ཙམ་ཡིན་ན་སྔོན་པོ་ནི་ལྡོག་པ་མ་ཡིན་ནོ། །ཇི་ལྟར་སྒྲ་ཉིད་འཇིག་པའི་ཕྱིར་མི་རྟག་པ་ཉིད་སྒྲའི་རང་གི་ངོ་བོ་ཡིན་པ་དེ་བཞིན་དུ་སྔོན་པོ་ནི་ལྡོག་པ་ཙམ་མ་ཡིན་ནོ། །
[170a.2]དེའི་ངོ་བོ་ཡིན་ན་ནི་མངོན་སུམ་ཡང་མེད་པར་དགག་པ་དམིགས་པར་འགྱུར་རོ། །དེས་ན་ཟླ་བ་གཉིས་ཀྱི་ཤེས་པ་ཟླ་བའི་རྣམ་པ་འཛིན་པ་ཉིད་གནོད་པར་བྱས་པ་ཡང་རྣམ་པར་རྟོག་པ་བཞིན་དུ་ཟླ་བ་མ་ཡིན་པ་ལས་ལྡོག་པ་ཙམ་གྱི་ཡུལ་ཅན་དུ་འགྱུར་རོ། །རྣམ་པར་རྟོག་པ་ལྡོག་པའི་
[170a.3]ཡུལ་ཅན་དུ་རྗེས་སུ་དཔོག་གོ་ཞེ་ན། རིག་པ་འདིའི་བྱེད་པ་ནི་མངོན་སུམ་ལ་གཞོལ་བར་རྟོགས་ཀྱི་གཞན་ནི་མ་ཡིན་ནོ། །དེས་ན་སྔོན་པོ་དེ་ལྟ་བུར་གྱུར་པ་མ་ཡིན་པར་བྱེད་པ་གཞན་གྱིས་ནི་མེད་པར་དགག་པ་ལ་དམིགས་པར་ནུས་པ་མ་ཡིན་ནོ། །ཅི་སྟེ་ཇི་ལྟར་ཕྱི་རོལ་གྱི་དངོས་པོ་ལ་སྔོན་པོ་
[170a.4]མ་ཡིན་པ་མེད་པ་དེ་བཞིན་དུ་སྒྲོ་འདོགས་པ་ལ་ཡང་མེད་པ་དེས་ན་ངོ་བོ་ཕྱི་རོལ་དང་མི་མཐུན་པའི་ཕྱིར་ལྡོག་པ་ཙམ་སྒྲོ་འདོགས་པར་བརྗོད་དོ་ཞེ་ན། འདི་ལ་བཤད་ཟིན་ཏོ། །སྔོན་པོ་ལ་སྔོན་པོ་མ་ཡིན་པ་མེད་ཀྱི་སྔོན་པོ་མ་ཡིན་པའི་དངོས་པོ་མེད་པ་ནི་མེད་པའི་ཕྱིར་ཇི་ལྟར་ངོ་བོ་ཙམ་ཡིན་པ་དེ་
[170a.5]བཞིན་དུ་སྒྲོ་འདོགས་པ་ཡང་ཡིན་པའི་ཕྱིར་འདིར་མེད་པར་དགག་པ་ག་ལ་ཡོད། གཞན་ཡང་གལ་ཏེ་ཡང་བརྟག་པ་གཞན་མེད་པ་དེ་ལྟ་ན་ཡང་གཞན་ཡང་མེད་པར་རྣམ་པར་རྟོག་པ་དེས་རིག་པ་མ་ཡིན་ཏེ། །དཔེར་ན་དེ་ཉིད་ཀྱི་ཕྱི་རོལ་མ་ཡིན་པ་བཞིན་ནོ། །སྒྲོ་འདོགས་ཀྱི་དངོས་པོ་དོན་དམ་པར་
[170a.6]ཕྱི་རོལ་ཉིད་མ་ཡིན་ཡང་ཕྱི་རོལ་མ་ཡིན་པ་ཞེས་མ་རིག་པའི་དངོས་པོ་ལ་ཕྱི་རོལ་མ་ཡིན་པ་ཡང་རིག་པ་མ་ཡིན་ནོ། །དེས་ན་ཕྱི་རོལ་ལ་དོན་གཞན་བཀག་པ་ཡོད་ཀྱང་ཡོད་པས་རིག་པ་ནི་མ་ཡིན་ཏེ། མངོན་སུམ་གྱིས་ཀྱང་རིག་པར་ཐལ་བའི་ཕྱིར་རོ། །འོན་ཀྱང་དེ་ལྟར་རིག་པས་ཡུལ་
[170a.7]དུ་བྱས་པ་ལས་ཡིན་ནོ། །འདི་ནི་ཕྱི་རོལ་མ་ཡིན་པ་རིག་པ་བཞིན་དགག་པའི་དོན་ཡང་རིག་པ་མེད་དོ། །སྔོན་པོ་རིག་པ་ནི་སྔོན་པོ་མ་ཡིན་པ་རིག་པ་མ་ཡིན་ནོ། །སྤྱི་ནི་སྤྱིའོ་སྙམ་པར་རྟོགས་པ་མེད་ཀྱང་རྗེས་སུ་འགྲོ་བའི་རྣམ་པར་རིག་པ་ཡོད་པ་ཡིན་པས་སྔོན་པོ་རིག་པ་ནི་སྔོན་པོ་མ་
[170b]
[170b.1]ཡིན་པ་རིག་པ་ཡིན་པས་དེར་ནི་སྒྲ་ཙམ་མ་གྲུབ་པར་ཟད་དོ། །དེ་བཞིན་དུ་སྔོན་པོ་རིག་པ་ལ་ནི་ལྡོག་པ་འགའ་ཡང་རྟོགས་པ་མེད་དོ། །དེས་ན་གཞན་སེལ་བའི་ཡུལ་ཉིད་རྟོགས་པས་གནོད་པར་སྨྲ་བ་དག་བྱེ་བྲག་པ་ལ་སོགས་པས་བརྟགས་པ་དང་འདྲ་བའི་རྗེས་སུ་དཔག་པ་ཙམ་
[170b.2]དཔུང་གཉེན་དུ་གྱུར་པ་དག་གིས་ཇི་ལྟར་སྤངས། རྟོགས་པ་ཉིད་ངོ་མ་ཤེས་པར་བརྗོད་པ་ཁོ་བོ་ཅག་གིས་ནི་དེ་བསལ་བ་ཡིན་ནོ། །འདི་ལྟར་ཕྱིར་ལྡང་བ་མེད་པའི་རྣམ་པ་ཉིད་ཀྱིས་ཇི་ལྟར་ལེགས་པར་བསལ་བར་ནི་གསལ་བ་ཁོ་ན་ཡིན་ནོ། །དེའི་ཕྱིར་ཞེས་བྱ་བ་ནི་ཇི་སྐད་བཤད་པའི་
[170b.3]དོན་སྡུད་པའོ། །སྒྲ་ལ་སོགས་པ་དངོས་པོ་མཐོང་བའི་ཡོན་ཏན་མཐའ་དག་སྟེ་མི་རྟག་པ་ཉིད་ལ་སོགས་པའི་ཆོས་མ་ལུས་པར་མཐོང་བ་ཉིད་དོ། །དེ་དག་ངོ་བོ་གང་ཡིན་པ་དག་ནི་དེ་ཉིད་རྟོགས་པར་བྱེད་པའི་ཤེས་པས་རྟོགས་པ་ཡིན་ནོ། །སྒྲ་དང་སྔོན་པོ་ལ་སོགས་པ་དག་གི་ངོ་བོ་
[170b.4]དེ་དག་ཀྱང་སྒྲ་དང་སྔོན་པོ་ལ་སོགས་པ་ཉིད་ཀྱི་ངོ་བོ་ཅན་ཡིན་ནོ། །དེ་ཡང་མཐོང་ཟིན་པའི་ཕྱིར་འདིར་རིག་པར་བྱ་བ་གཞན་མེད་དོ། །དེས་ན་རིག་པའི་དོན་དུ་རྣམ་པར་རྟོག་པ་འཇུག་པ་མ་ཡིན་ཏེ། དེ་ཙམ་ཉིད་རིག་པར་བྱ་བ་ཡིན་པའི་ཕྱིར་མཐོང་བ་ཁོ་ན་བཞིན་འཇུག་པར་ཐལ་བའི་ཕྱིར་
[170b.5]རོ། །མཐོང་དུ་ཟིན་ཀྱང་ཐ་དད་པ་གཅིག་མཐར་ཐུག་པ་རང་བཞིན་གྱིས་ཐ་དད་པར་འཁྲུལ་པ་སྲིད་པས་ངེས་པར་མི་བྱེད་དེ། དེས་ན་དངོས་པོར་ན་འཁྲུལ་པ་ཉིད་བསལ་བར་བྱ་བ་ཡིན་གྱི། ངོ་བོ་རྟོགས་པར་བྱ་བ་ནི་མ་ཡིན་ཏེ། རྟོགས་ཟིན་པའི་ཕྱིར་རོ། །དེ་ལྟ་བས་ན་མ་མཐོང་བས་
[170b.6]གཟུང་བར་བྱ་བའི་ཕྱིར་ཞེས་བྱ་བས་ནི་མངོན་སུམ་ཞུགས་པའི་རྟེན་ཅན་གྱིས་འཇུག་པའི་སྐབས་ཀྱི་མཇུག་སྡུད་པའོ། །དེས་ནི་དེ་ལྟར་གཅིག་ཞུགས་པ་ལ་འཇུག་པ་གཞན་གང་ཡིན་པ་དེ་གཞན་སེལ་བའི་ཡུལ་ཅན་ཉིད་དུ་གཞུང་བཙུགས་པ་ཡིན་ནོ། །ད་ནི་གང་ཞུགས་པ་ལ་ཚད་མ་གཞན་
[170b.7]འཇུག་པར་འགྱུར་བ་དེ་ཡང་གཞན་སེལ་བའི་ཡུལ་ཅན་ཉིད་དོ་ཞེས་བསྒྲུབ་པའི་ཕྱིར་རྗེས་སུ་དཔག་པ་ལས་ཀྱང་ཞེས་སྨོས་སོ། །འདི་ལ་དུ་བ་ལས་མེ་རྟོགས་པ་ན་མེ་ཙམ་གྱི་རང་བཞིན་དུ་རྟོགས་ཀྱི། རྩྭ་ལས་བྱུང་བ་དང་མི་རྟག་པ་ཉིད་ལ་སོགས་པའི་ཆོས་སུ་ནི་མ་ཡིན་ནོ། །དེས་
[171a]
[171a.1]ན་འདི་ལ་ཚད་མ་གཞན་འཇུག་པ་ན་སྔ་མ་ཐ་དད་པའི་དོན་ཉིད་དུ་གོ་བར་བྱེད་དོ། །གང་གི་ཕྱིར་རྗེས་སུ་དཔག་པ་ལས་མེའི་མཚན་ཉིད་ཀྱི་ཆོས་ངེས་པར་འགྱུར་བས་རྩྭ་ལས་བྱུང་བ་ལ་སོགས་པའི་ཆོས་ཀུན་ངེས་པར་འགྱུར་རོ། །ཕྱོགས་གང་ལ་སྐྱོན་
[171a.2]འདིར་འགྱུར་བ་དེ་བཤད་པ་ནི་དངོས་པོ་འཛིན་ནའོ། །རྗེས་སུ་དཔག་པས་དངོས་པོ་འཛིན་ན་ཆོས་གཅིག་ངེས་པས་ཆོས་ཐམས་ཅད་ངེས་པར་འགྱུར་རོ། །འདི་སྐད་བརྗོད་པ་ཡིན་ཏེ་གལ་ཏེ་དུ་བས་མེ་རྟོགས་པ་ན། མེ་མྱོང་བ་ཡིན་ན་དེའི་ཚེ་མེ་ཇི་ལྟ་བར་གྱུར་པ་དེ་ལྟ་བུ་ཉིད་དུ་མྱོང་
[171a.3]བ་ཡིན་ལ། དེ་ཡང་མི་རྟག་པ་ལ་སོགས་པའི་ངོ་བོ་ཡིན་པས་དེ་དག་ཀྱང་འདིར་མྱོང་བར་འགྱུར་རོ། །གང་ཞིག་གང་གི་རང་བཞིན་ཙམ་ཡིན་པ་དེ་ནི་དེ་མྱོང་བ་ན་མྱོང་བ་མ་ཡིན་ནོ་ཞེས་བྱ་བར་ནུས་པ་མ་ཡིན་ཏེ། དཔེར་ན་རང་བཞིན་དེ་ཉིད་བཞིན་ནོ། །མི་རྟག་པ་ལ་སོགས་པ་ཡང་མེའི་རྣམ་
[171a.4]པ་ཙམ་གྱི་རང་བཞིན་ཡིན་པ་དེས་ན་ཇི་ལྟར་མེའི་རྣམ་པ་མྱོང་བ་ན་མ་མྱོང་བར་འགྱུར་རོ། །གྱ་གྱུ་དང་ཁོང་སྟོང་ལ་སོགས་པ་ནི་དབྱིབས་ཡིན་ལ། དེ་ཡང་རྡུལ་ཕྲ་རབ་དུ་མར་གྱུར་པ་ཡིན་པའི་ཕྱིར་ཆོད་པ་དང་མ་ཆོད་པའི་ངོས་གཉིས་བཞིན་དུ་འཛིན་པ་དང་མི་འཛིན་པར་འགྱུར་
[171a.5]གྱི། དེ་ཙམ་གྱི་རང་བཞིན་གང་ཡིན་པ་དེ་ལ་ནི་རྟོགས་པ་འདི་མེད་དོ། །ཇི་ལྟར་མེ་ཉིད་འབར་བ་ཉིད་ཡིན་པ་དེ་བཞིན་དུ། མེ་ཉིད་ཀྱིས་ནི་མི་རྟག་པའི་བདག་ཉིད་མ་ཡིན་གྱི་འོན་ཀྱང་མེ་འཇིག་པར་འགྱུར་བའི་ཕྱིར་མི་རྟག་པ་ཉིད་ནི་འདིའི་ཁྱད་པར་ཡིན་གྱི་མེ་ཙམ་གྱི་རང་བཞིན་
[171a.6]མ་ཡིན་ནོ། །དེས་ན་མེ་ཉིད་དུ་རིག་གི་མི་རྟག་པ་ཉིད་དུ་མ་ཡིན་པས་འགལ་བ་ཅི་ཡོད་ཅེ་ན། ཇི་ལྟར་འགལ་བ་མེད། འདི་ལྟར་རྣམ་གྲངས་ལ་བརྟེན་པའི་ཚུལ་གྱིས་རང་བཞིན་མེད་ཀྱང་། མེ་གང་ཡིན་པ་དེ་ཉིད་འཇིག་པར་འགྱུར་བའི་ཕྱིར་མེ་མི་རྟག་པ་ཉིད་དང་བྲལ་བ་ནི་རིག་པའི་
[171a.7]ཡུལ་དུ་འགྱུར་བར་མི་ནུས་སོ། །དེ་ལྟ་ན་འོ་ན་མེ་གང་ཡིན་པ་དེ་ཉིད་མི་རྟག་པ་ཡིན་པའི་ཕྱིར་རྗེས་སུ་དཔག་པ་ལ་ཡང་མེ་རིག་པ་ཉིད་ཀྱིས་མི་རྟག་པ་ཉིད་རིག་པར་འགྱུར་ཏེ་མངོན་སུམ་བཞིན་ནོ་ཞེ་ན། དེ་ལྟར་ནི་མི་ནུས་ཏེ། མི་རྟག་པ་ཉིད་ནི་མི་རྟག་པ་ཉིད་དོ་ཞེས་རྣམ་པར་རྟོག་
[171b]
[171b.1]པས་རིག་པའི་ཕྱིར་རོ། །རྣམ་པར་རྟོག་པ་ནི་ཆོས་ཐ་དད་པ་ལས་ནི་བརྟེན་པ་ཡིན་པས་དེ་ལོགས་ཤིག་ཉིད་དུ་རིག་པའི་རང་བཞིན་ཡིན་གྱི། དེ་བཞིན་དུ་མངོན་སུམ་ལ་ནི་ཆོས་ཐ་དད་པར་མི་གསལ་བའི་ཕྱིར་དེ་དག་ནི་དོན་ཇི་ལྟ་བ་བཞིན་མྱོང་གི་རྣམ་པར་རྟོག་པ་ནི་མ་ཡིན་ནོ། །དེས་ན་
[171b.2]རྗེས་སུ་དཔག་པ་ལ་ནི་དངོས་པོ་རིག་པའི་བྱེད་པ་ཡོད་པ་མ་ཡིན་ཏེ། ཇི་སྐད་བཤད་པའི་ཉེས་པར་འགྱུར་བའི་ཕྱིར་རོ། །དངོས་པོ་སེལ་བར་བྱེད་པ་ལ་ནི་ཉེས་པ་འདི་མེད་དོ་ཞེས་བཤད་པ་ནི་སེལ་བ་ལ་ཞེས་བྱ་བའོ། །འདིས་ནི་སྒྲོ་བཏགས་ཀྱི་སྒོ་ནས་བྱུང་བའི་མེ་མ་ཡིན་པར་སྒྲོ་
[171b.3]བཏགས་པ་ཙམ་ཞིག་འདིར་གསལ་བ་ཡིན་གྱི། རྩྭ་ལས་བྱུང་བ་མ་ཡིན་པ་ལ་སོགས་པ་ནི་མ་ཡིན་ནོ། །དེས་ན་གང་ལ་ཚད་མ་གཞན་འཇུག་པའི་གོ་སྐབས་ཡོད་པ་དེ་ལ་ནི་ཐ་དད་པར་བྱེད་པ་ལས་གཞན་པའི་བྱེད་པ་མེད་དོ། །གལ་ཏེ་རྗེས་སུ་དཔག་པ་བཞིན་མངོན་སུམ་
[171b.4]ཡང་གཞན་སེལ་བའི་ཡུལ་ཅན་དུ་མི་འགྱུར་རམ། དེ་ལ་ཡང་ཆོས་ཅན་འཛིན་པས་ཞུགས་པས་ན་ཚད་མ་གཞན་གྱི་གོ་སྐབས་ཡོད་པའི་ཕྱིར་རོ། །དེ་ནི་མེད་དེ་མངོན་སུམ་དངོས་པོ་མྱོང་བའི་བདག་ཉིད་ཡིན་ཡང་རྣམ་པར་རྟོག་པའི་སྒོ་ནས་ཐ་དད་པ་ལ་ཕྱོགས་པ་ཉིད་དུ་གྱུར་པ་ན་ཚད་མ་
[171b.5]གཞན་གྱི་གོ་སྐབས་ཡོད་པ་ཡིན་པའི་ཕྱིར་རོ། །མངོན་སུམ་ནི་དངོས་པོ་སྣང་བ་ཉིད་ཀྱིས་དངོས་པོ་འཛིན་པར་བྱེད་པ་ཉིད་དུ་གྲུབ་པོ། །དེ་ཉིད་ཀྱི་ཕྱིར་མངོན་སུམ་ཚད་མ་གཞན་གྱིས་འཇུག་ཀྱང་ཐ་དད་པའི་ཡུལ་ཅན་མ་ཡིན་ཏེ། རྗེས་སུ་དཔག་པ་ལ་རྩྭ་ལ་སོགས་པ་ལས་བྱུང་
[171b.6]བར་མྱོང་བ་བཞིན་ནོ། །རྩྭ་ལས་བྱུང་བ་ཙམ་སྤངས་ནས་དོན་མཐའ་དག་མྱོང་བའི་རང་བཞིན་ཡིན་པའི་ཕྱིར་རོ། །འགྲེལ་པ་ནི་འགའ་ཞིག་ཅེས་བྱ་བ་སྟེ། ཆོས་ཅན་འགའ་ཞིག་མངོན་སུམ་གྱིས་མཐོང་བ་ལ་ཚད་མ་གཞན་མི་འཇུག་པ་འབའ་ཞིག་ཏུ་ཟད་དོ། །འདིས་ནི་ཀྱང་
[171b.7]གི་དོན་བརྗོད་དོ། །དངོས་པོ་འཛིན་ན་ཞེས་བྱ་བ་བཤད་པ་ནི་གང་གི་ཚེ་རྗེས་སུ་དཔག་པས་ཀྱང་ཞེས་བྱ་བའོ། །འདིས་ནི་ཆོས་ཅན་ལ་མངོན་སུམ་གྱི་བྱེ་བྲག་བསྟན་ནས། དོན་སྔར་མ་རྟོགས་པར་བརྗོད་པ་ཡིན་ཏེ། མངོན་སུམ་དང་འདྲ་བར་ཉེ་བར་དགོད་པ་མཚུངས་པར་བསྟན་
[172a]
[172a.1]པའི་ཕྱིར་རོ། །ཡང་ན་སྒྲོ་བཏགས་ཡོད་པར་སྒྲུབ་པའི་ཕྱིར་ས་བོན་བཏབ་པའོ། །ཆོས་གཅིག་ངེས་པར་འགྱུར་བས་ཞེས་བྱ་བ་བཤད་པ་ནི་དེའི་ཚེ་ཞེས་བྱ་བའོ། །མདོར་བསྟན་པའི་དོན་གཞུང་གཟུགས་པའི་ཕྱིར། གཏན་ཚིགས་དེ་དང་ཐ་མི་དད་པའི་ཕྱིར་
[172a.2]ཞེས་བྱ་བའོ། །དེ་ངེས་ན་ཞེས་བྱ་བ་ནི་དེ་ཉིད་གཞུང་འཛུགས་པའོ། །ཚད་མ་གཞན་མི་འཇུག་སྟེ་ཞེས་བྱ་བ་ནི་སྐབས་སུ་བབས་པའི་རྣམ་པ་དང་འབྲེལ་ཏོ། །གཞན་སེལ་བ་ལ་ཉེས་པ་འདི་མེད་དོ་ཞེས་བྱ་བ་ནི་གང་གི་ཚེ་ཞེས་བྱ་བའོ། །དངོས་པོའི་ངོ་བོ་མ་འདྲེས་པ་དག་ཀྱང་རྟོག་པའི་
[172a.3]མཐུས་དངོས་པོ་གཞན་དང་འདྲེས་པ་ཟློག་པར་བྱེད་པ་ཉིད་གཞན་སེལ་བའི་ཡུལ་ཅན་ཉིད་དོ། །ཐམས་ཅད་དུ་རྗེས་སུ་དཔག་པ་གཞན་དང་འདྲེ་བ་སྔོན་དུ་འགྲོ་བས་འཇུག་པ་མ་ཡིན་པའི་ཕྱིར་ཇི་ལྟར་དེར་འཐད་པའི་དོན་ཅན་ཡིན་ཞེས་བསམས་ནས་གཞན་དག་རྩོད་པར་བྱེད་པ་ནི། མ་
[172a.4]རྟོགས་པ་ངེས་པ་ཞེས་བྱ་བའོ། །གློ་བུར་བ་ལས་ཞེས་བྱ་བ་ནི་བབ་ཅོལ་དུ་འམ། ཡང་ན་ཁྱབ་པའི་རྗེས་སུ་འབྲང་བའི་རྒྱུ་མཚན་མེད་པར་འབྲེལ་པ་གོམས་པ་ནི་དུ་བ་མཐོང་མ་ཐག་ཁོ་ནར་རྟོགས་ཀྱི་མེ་མ་ཡིན་དུ་སྒྲོ་འདོགས་པ་སྔོན་དུ་འགྲོ་བ་ཅན་ནི་མ་ཡིན་ནོ། །དེ་སྤང་བའི་ཕྱིར་འདི་
[172a.5]ལ་ཞེས་བྱ་བའོ། །འདི་སྐད་བརྗོད་དེ་རྟོགས་པའི་ཡུལ་ཡང་མ་རྟོགས་པ་ནི་སྒྲོ་འདོགས་པ་ཡོད་པས་བྱས་པ་ཡིན་ནོ། །བསྒྲུབ་པར་བྱ་བའི་ཆོས་ཀྱང་རྟོགས་པའི་ཡུལ་ཏེ། ཆོས་ཅན་དང་དབྱེ་བ་མེད་པས་ཆོས་ཅན་བཟུང་བ་ཡིན་པའི་ཕྱིར་རོ། །འོན་ཏེ་འབྲས་བུའི་གཏན་
[172a.6]ཚིགས་ལ་བསྒྲུབ་པར་བྱ་བ་གཞན་ཉིད་ཡིན་པས་ན་ཚུལ་འདིས་ཡུལ་དུ་བྱེད་པ་མ་ཡིན་ནོ་ཞེ་ན། དེ་ལ་ཡང་བཤད་པ་ནི། འོན་ཏེ་ཐ་དད་ན་ཞེས་བྱ་བའོ། །ཆོས་ཅན་ལས་རྟོགས་པའི་ཡུལ་ཐ་དད་པར་ཁས་ལེན་ན་བསྒྲུབ་པར་བྱ་བའི་ཆོས་ཅན་དང་མ་འབྲེལ་པ་ནི་ཆོས་ཅན་དེ་ལ་རྟོགས་
[172a.7]པ་མེད་པར་འགྱུར་རོ། །འདི་སྐད་བརྗོད་པ་ཡིན་ཏེ། གལ་ཏེ་ཡང་འབྲས་བུའི་གཏན་ཚིགས་ལ་ཆོས་ཅན་ལས་བསྒྲུབ་པར་བྱ་བའི་ཆོས་ཐ་དད་པས་རྟོགས་ན་དེ་རྟོགས་པ་མ་ཡིན་པ་དེ་ལྟ་ན་ཡང་དེ་གདོན་མི་ཟ་བར་བསྒྲུབ་པར་བྱ་བའི་ཆོས་ཅན་དང་འབྲེལ་པར་འགྱུར་ཏེ། དེ་ལྟ་
[172b]
[172b.1]མ་ཡིན་ན་དེ་དེའི་ཆོས་ཅན་ཉིད་དུ་མི་འགྱུར་བའི་ཕྱིར་དེ་དེ་ལྟར་རྟོགས་པ་མ་ཡིན་གྱི། འབྲེལ་བ་ཡང་མེ་དང་ས་ཕྱོགས་རྟེན་དང་བརྟེན་པ་གཉིས་རྒྱུ་དང་འབྲས་བུའི་དངོས་པོ་ཉིད་དོ། །དེ་ལྟར་ཡིན་དང་ཆོས་ཅན་མེའི་རྒྱུ་ཉིད་དུ་བཟུང་བ་ན་མ་བཟུང་བ་སྲིད་པ་མ་ཡིན་ནོ། །གལ་ཏེ་
[172b.2]འདིར་མེའི་རྒྱུ་ཉིད་དུ་རྟོགས་པའི་ཡུལ་དུ་གྱུར་ཀྱང་མ་རྟོགས་པ་ཡིན་གྱི། མེ་ནི་མ་ཡིན་ནོ་ཞེ་ན། བདེན་མོད་ཀྱི། དེ་རྟོགས་ན་མེ་མི་རྟོགས་མི་སྲིད་པའི་ཕྱིར། དེ་ལ་མི་རྟོགས་པའི་སྒྲོ་འདོགས་པ་རྟོགས་པར་བྱེད་པ་ནི་མེ་ལ་ཡང་རྟོགས་པར་བྱེད་པ་ཁོ་ནའོ། །དེ་བཤད་པ་ནི་
[172b.3]དེའི་ཕྱིར་ཞེས་བྱའོ། །དེའི་རང་གི་ངོ་བོ་མ་ངེས་པ་ནི་ཕྱིན་ཅི་ལོག་པས་ཡིན་ནོ་ཞེས་ངག་ཡོངས་སུ་རྫོགས་པར་བྱ་བ་ལས་ཕྱིན་ཅི་ལོག་ལས་ཞེས་དེའི་རང་བཞིན་ངོ་བོ་མི་ངེས་པའི་རྒྱུར་ཉེ་བར་བཀོད་པ་ཉེ་བ་དང་འབྲེལ་པ་ཡིན་པས་དེ་ཉིད་རྒྱུ་ཡིན་པ་ལ་ལྟོས་ནས་རང་ཉིད་ག་ལས་ཤེ་ན་ཞེས་
[172b.4]གསལ་བར་བྱས་ནས་ཕྱིན་ཅི་ལོག་ལས་ཞེས་བཤད་པ་ཡིན་ནོ། །འདིར་སྒྲོ་འདོགས་ཡོད་པར་རྟོགས་པ་མེད་པ་མ་ཡིན་ནམ་མ་རྟོགས་ཀྱང་རིག་པར་བརྟག་པར་འོས་པ་ཡང་མ་ཡིན་ཏེ། ཇི་སྐད་དུ་གང་གིས་ཡོད་ཀྱང་མི་རྟོགས་པར་འགྱུར་བ་རྟོགས་པ་འདི་དག་སྐྱེ་བ་འམ་
[172b.5]འགག་པ་ནི་མ་རིག་པ་མ་ཡིན་ནོ་ཞེས་བཤད་པ་བཞིན་ནོ། །སྒྲོ་འདོགས་པ་ཡང་རྟོགས་པ་ཉིད་ཡིན་ནོ་ཞེས་དོགས་པ་ལ་གཏན་ཚིགས་གཞན་བཤད་པ་ནི་དེ་ཡང་ཞེས་བྱ་བའོ། །བསམ་པ་འདི་ཡིན་ཏེ། དབང་པོ་དག་ལས་མིག་གི་རྣམ་པར་ཤེས་པ་ལ་སོགས་པ་ལྟར་
[172b.6]དངོས་པོའི་དབང་ཉིད་ཀྱིས་གློ་བུར་དུ་དུ་བ་ལས་མེ་རྟོགས་པ་ནི་ཡོད་པ་མ་ཡིན་ཏེ་རྟགས་དང་རྟགས་ཅན་གྱི་རྟོགས་པ་ཉིད་མ་ཡིན་པའི་ཕྱིར་རོ། །དེས་མེ་དོན་དུ་གཉེར་བ་དེ་རྟོགས་པར་འདོད་པ་ལ་དེ་རྟོགས་པ་ཡོད་པ་ཡིན་ནོ། །དེས་ན་འབྲེལ་པ་གོམས་པ་གང་ཡིན་པ་དེ་ཡང་
[172b.7]རྟགས་ཀྱི་དེ་དང་འབྲེལ་བ་འཛིན་པ་དང་། རྗེས་སུ་འགྲོ་བ་དང་ལྡོག་པ་དྲན་པ་ལ་ལྟོས་པར་བྱ་བ་ཡིན་ནོ། །དེས་ན་དེ་ལ་སྒྲོ་འདོགས་པ་ཉིད་དོ། །འདི་ལྟར་རྗེས་སུ་དཔག་པར་འཇུག་པ་ནི་འདོད་པ་སྔོན་དུ་འགྲོ་བ་ཅན་ཡིན་པའི་ཕྱིར་མེ་དོན་དུ་གཉེར་བ་དེ་ལ་རྗེས་སུ་དཔག་པ་
[173a]
[173a.1]འཇུག་པར་བྱེད་པ་ན་ཚད་མ་གཞན་མ་ཞུགས་པ་ཚོལ་ཏེ། དེ་ལྟ་མ་ཡིན་ན་མངོན་སུམ་ཉིད་ཀྱིས་རྟོགས་ན་རྗེས་སུ་དཔག་པ་དོན་མེད་པའི་ཕྱིར་རོ། །དེས་ན་ཆོས་ཅན་འཛིན་པའི་མངོན་སུམ་གྱིས་མ་རྟོགས་པར་ངེས་པར་བྱེད་དོ། །གང་དུ་དམིགས་པའི་
[173a.2]མཚན་ཉིད་དུ་གྱུར་པའི་མེ་མ་དམིགས་པ་དེར་ནི་མེས་དབེན་པར་ངེས་པར་འགྱུར་བ་ཁོ་ནའོ། །དེས་ན་ཕྱོགས་དེ་བློ་མེ་དང་ལྡན་པར་འཛིན་པ་དང་བྲལ་བས་ཞེས་བྱ་བ་ནི་མི་དམིགས་པ་ངེས་པའི་རྒྱུ་བསྟན་ཏོ། །དེས་ན་ཕྱོགས་མེས་སྟོང་པར་ཤེས་པ་ཉིད་མེ་མ་ཡིན་པར་སྒྲོ་འདོགས་
[173a.3]པའི་ཕྱིན་ཅི་ལོག་ཡིན་ནོ། །དེ་ལྟ་ན་འོ་ན་དེར་མེ་རྗེས་སུ་དཔོག་པ་ན་དམ་བཅས་པའི་དོན་མངོན་སུམ་དང་འགལ་བར་འགྱུར་རོ་ཞེ་ན། མ་ཡིན་ཏེ། གང་དུ་མི་དམིགས་པའི་མཚན་ཉིད་དུ་མི་འགྱུར་བ་དེར་རྗེས་སུ་དཔོག་པའི་ཕྱིར་རོ། །དེ་ནི་དེ་ལ་མེ་མེད་པར་སྒྲོ་འདོགས་པ་མེད་
[173a.4]དོ་ཞེ་ན། མ་ཡིན་ཏེ། ཆོས་ཅན་མ་གྲུབ་པར་ཐལ་བའི་ཕྱིར་ཆོས་ཅན་གཅིག་ཏུ་བརྗོད་པར་འདོད་པར་མངོན་སུམ་གྱི་བྱེད་པ་ཁྱད་པར་མེད་པའི་ཕྱིར་རོ། །དེས་ན་དེ་ལྟར་རེ་ཞིག་སྒྲོ་འདོགས་པ་ཡོད་པར་བཤད་པ་ཡིན་ནོ། །འདི་ལ་ནི་ཐེ་ཚོམ་ཡང་གདོན་མི་ཟ་བར་ཡོད་པ་ཡིན་
[173a.5]ནོ། །ཚད་མ་མེད་པ་ལ་འབད་རྩོལ་མེད་པས་ཐེ་ཚོམ་མེད་པ་ཞེས་བྱ་བར་འགྱུར་ཡང་གང་ཞིག་རྟོགས་པར་འདོད་པས་གང་དཔྱོད་པ་ལ་བརྩོན་པ་དེ་ནི་དེར་ཚད་མ་ཞུགས་པའི་སྔོན་རོལ་དུ་ཐེ་ཚོམ་དུ་ཇི་ལྟར་མི་འགྱུར། དེ་བཤད་པ་ནི། དེའི་རྣམ་པར་སྒྲོ་འདོགས་པ་དང་ཞེས་བྱ་བའོ། །
[173a.6]དེའི་རྣམ་པར་སྒྲོ་འདོགས་པར་ལོག་པར་རྟོག་པ་དང་། མེ་ཡོད་དམ་མེད་སྙམ་པའི་ཐེ་ཚོམ་སྟེ་དེ་དང་བྲལ་བ་དེ་རྟོགས་པར་བྱ་བ་ལ་རྟགས་ཀྱི་རྗེས་སུ་འབྲང་བར་མི་བྱེད་དོ། །ཐེ་ཚོམ་དང་ཕྱིན་ཅི་ལོག་བཞིན་དུ་མ་རྟོགས་པས་ཀྱང་རྟགས་ཀྱི་རྗེས་སུ་འབྲང་བ་མ་ཡིན་ནམ་ཞེ་ན་མ་
[173a.7]ཡིན་ཏེ། དེའི་དོན་དུ་རྟགས་ཀྱིས་རྟོགས་པ་ལ་གནས་པའི་དོན་ལ་ཐེ་ཚོམ་ཡོད་པར་ངེས་པའི་ཕྱིར་རོ། །ཡང་ན་ཕྱི་མ་དེ་རྣམ་པར་གཅོད་པའི་ཡུལ་ཅན་ཉིད་ཕྱིན་ཅི་ལོག་གི་ཤེས་པ་ཡོད་པས་བྱས་པ་ཡིན་ནོ་ཞེས་བྱ་བའི་མངོན་པར་ཞེན་པས་ཅི་ཞིག་བྱ། དངུལ་ལ་སོགས་
[173b]
[173b.1]པའི་ཡུལ་ཅན་དུ་སྒྲོ་འདོགས་ཀྱི་ཤེས་པ་ཡང་རྣམ་པར་རྟོག་པ་ཡིན་པའི་ཕྱིར་རྣམ་པར་གཅོད་པའི་ཡུལ་ཅན་ཡིན་པས་དེ་ལས་བཟློག་པའི་ཡུལ་ཅན་གྱི་ཤེས་པ་སྔ་མ་ཡོད་པ་ལ་ལྟོས་པར་ཐལ་བའི་ཕྱིར་རོ། །དེས་ན་དེ་ཡང་རྣམ་པ་དེ་ལྟ་བུ་ཉིད་ཡིན་པའི་ཕྱིར་དེ་ལས་གཞན་ལ་ལྟོས་ནས་
[173b.2]ཐུག་པ་མེད་པར་ཐལ་བར་འགྱུར་རོ། །དེས་ན་སྒྲོ་འདོགས་པ་མེད་ཀྱང་གཞན་སེལ་བའི་ཡུལ་ཅན་དུ་འཇོག་པར་འགྱུར་རོ། །གལ་ཏེ་ཡང་ཚུལ་གསུམ་ཚོལ་བ་ཉིད་རྟགས་ཀྱི་རྗེས་སུ་འབྲང་བ་ཡིན་པ་དེ་ལྟ་ན་ཡང་དེའི་རྗེས་སུ་འགྲོ་བ་དང་ཞེས་སྟོན་པའི་ཕྱིར་རྟགས་ཀྱི་རྗེས་སུ་འབྲང་
[173b.3]བ་ནི་ཕྱོགས་ཀྱི་ཆོས་ཉིད་ཡིན་པར་རྟོགས་སོ། །མ་རྟོགས་པ་ངེས་པར་ཞེས་བྱ་བ་ལ་སོགས་པ་མདོར་མ་གྱུར་པའི་དོན་དེའི་ཕྱིར་ཞེས་བྱ་བ་ལ་སོགས་པའི་བསྡུ་བའི་ཚིགས་སུ་བཅད་པས་སྟོན་ཏོ། །དེ་ལྟར་ཞེས་བྱ་བ་ནི་རྣམ་པ་འདི་ཞེས་གཏན་ཚིགས་སྡུད་པའོ། །རྟགས་སེལ་བའི་ཡུལ་
[173b.4]ཅན་ཡིན་པར་རབ་ཏུ་བསྒྲགས་ཞེས་བྱ་བས་ནི། དེ་ཡང་ཕྱོགས་དེ་ཞེས་བྱ་བ་ལ་སོགས་པ་སྐབས་ཀྱི་དོན་གྱི་དབང་དུ་བྱས་པའོ། །འདི་ལ་ཞེས་བྱ་བ་ལ་སོགས་པ་སྡུད་པ་ནི་གཞན་དུ་ཆོས་ཅན་ཞེས་བྱ་བའོ། །དེ་ལྟར་ན་རྗེས་སུ་དཔག་པ་ནི་སྒྲོ་འདོགས་མེད་པ་ལ་མི་སྲིད་དོ་ཞེས་བརྗོད་པ་ཡིན་ནོ། །
[173b.5]ད་ནི་སྒྲོ་འདོགས་མེད་ཀྱང་སེལ་བའི་ཡུལ་ཅན་དུ་བསྒྲུབ་པའི་ཕྱིར་བཤད་པ། འགའ་ཞིག་ལ་ཤེས་པ་གང་ཞིག་རྣམ་པར་རྟོག་པའོ། །གང་འགའ་ཞིག་ལ་ཞེ་ན། གཞན་གྱི་ཆ་སྒྲོ་མ་བཏགས་པའོ། །གང་དུ་ཕྱིན་ཅི་ལོག་གི་ཆར་སྒྲོ་མ་བཏགས་པ་ལའོ། །དེས་ན་འདི་སྐད་བཤད་པ་
[173b.6]ཡིན་ཏེ། དངོས་པོ་གཞན་སྒྲོ་མ་བཏགས་པ་དངོས་པོ་གཞན་དང་ཐ་མི་དད་པར་མ་བྱས་པའི་ཡུལ་ཅན་རྣམ་པར་རྟོག་པའི་ཤེས་པ་གང་ཡིན་པ་དེ་ནི་དེ་ཙམ་སེལ་བའི་སྤྱོད་ཡུལ་ཅན་ཡིན་ནོ། །དོན་དེ་ལས་གཞན་གང་ཡིན་པ་དེ་གལ་ཏེ་ཡང་སྒྲོ་འདོགས་ཀྱི་ཤེས་པས་བྱས་ན་དོན་དེ་དང་ཐ་མི་དད་པར་
[173b.7]གྱུར་པ་མ་ཡིན་པར་གྱུར་པ་དེ་ལྟ་ན་ཡང་ཤེས་པ་དེ་ནི་དེ་སེལ་བའི་ཡུལ་ཅན་ཉིད་དོ། །གང་གི་སྒྲ་ནི་འདི་ཉིད་དུ་འབྲེལ་ཏོ། །ཅི་འདི་རྣམ་པ་དེ་ལྟ་བའི་རྗེས་སུ་དཔག་པ་ཉིད་འགའ་ཞིག་ཡིན་ནམ་ཞེ་ན། མ་ཡིན་ནོ་ཞེས་བཤད་པ་ནི། སྤྱིའི་དོན་ཅན་ཞེས་བྱ་བ་སྟེ། སྤྱིའི་ཡུལ་ཅན་ནོ། །རྗེས་
[174a]
[174a.1]སུ་དཔག་པ་ཡང་སྤྱིའི་ཡུལ་ཅན་ཡིན་པས། མཐོང་བ་ཞེས་ཁྱད་པར་དུ་བྱེད་དོ། །མཐོང་བའི་ཡུལ་གྱི་སྤྱི་གང་ཡིན་པ་དེའི་ཡུལ་ཅན་ནོ་ཞེས་བྱ་བའོ། །སྔོན་པོ་ལ་སོགས་པ་མངོན་སུམ་གྱིས་མཐོང་བ་ལ་གང་གི་ཚེ་སྔོན་པོ་ལ་སོགས་པར་རྟོགས་པའི་ཤེས་པ་སྐྱེ་བ་དེའི་ཚེ། དེ་
[174a.2]རྣམ་པར་རྟོག་པས་ཡུལ་དུ་བྱས་པ་ན་སྔོན་པོ་ལ་སོགས་པ་སྤྱིར་འགྱུར་བ་ཡིན་ནོ། །དེས་ན་འདིར་རྣམ་པར་རྟོག་པ་མེད་པས་ཡུལ་དུ་བྱས་པའི་རྣམ་པ་ཉིད་ཀྱིས་སྒྲོ་འདོགས་མི་སྲིད་ཀྱང་འདི་སྔོན་པོའོ་སྙམ་པའི་ཤེས་པ་འཇུག་པ་གང་ཡིན་པ་དེ་ནི་སྤྱིའི་ཡུལ་ཅན་མ་ཡིན་ནོ། །དེ་དང་ཐ་མི་དད་པར་མ་
[174a.3]གྱུར་པས་དེ་ལ་སེལ་བའི་འབྲས་བུ་ཅན་ཡིན་ནོ་ཞེས་བརྗོད་པ་ཡིན་ནོ། །འདི་དེ་དང་ཐ་མི་དད་པར་གྱུར་པ་མ་ཡིན་པ་དེ་ལྟ་ན་ཡང་། འདི་དེ་སེལ་བའི་འབྲས་བུ་ཅན་ལས་ཉམས་པ་མ་ཡིན་ནོ། །གལ་ཏེ་དེ་ཡོད་ཀྱང་ཟློག་པ་མེད་པ་ཁོ་ནར་འགྱུར་ན་ནི་དེའི་ཚེ་འདི་དེའི་འབྲས་བུ་ཅན་དུ་མི་འགྱུར་རོ། །
[174a.4]གཞན་ཉིད་ཀྱིས་བཟློག་ཟིན་པས་མེད་པ་ན་ནི་འདི་དེ་ཟློག་པར་བྱེད་པ་མ་ཡིན་པར་མི་འགྱུར་ཏེ། གྲང་བ་མེད་ཀྱང་མེ་ལ་གྲང་བ་ཟློག་པའི་ནུས་པ་མེད་པ་མ་ཡིན་པའི་ཕྱིར་རོ། །རྟོགས་པར་བྱེད་པའི་ཕྱོགས་ལ་རྟོགས་ཟིན་པའི་དོན་ལ་རྟོགས་པར་བྱེད་པའི་འབྲས་བུ་ཅན་ཉིད་མི་ལྡོག་པ་
[174a.5]བཞིན་དུ་མངོན་སུམ་དང་རྗེས་སུ་དཔག་པ་དག་གི་འོག་རོལ་དུ་འཇུག་པའི་རྣམ་པར་རྟོག་པ་འཇུག་པ་ཡང་སྒྲོ་འདོགས་དེ་བསལ་བ་ལ་འཇུག་པ་ཡིན་ནོ། །སྒྲོ་འདོགས་ཀྱི་ཤེས་པ་དང་ཡིད་ཀྱི་རྒྱལ་སྲིད་ལ་སོགས་པའི་རྟོགས་པ་སྒྲོ་འདོགས་ཞུགས་པ་ལ་འཇུག་པ་ཡང་དེ་བཞིན་དུ་དེར་ནུས་
[174a.6]པ་དང་ལྡན་པ་ཡིན་ནོ། །འདི་དག་ཇི་སྲིད་འབྱུང་གི་བར་དུ་དེ་དང་རྒྱུ་མཐུན་པ་དེ་ལས་བཟློག་པའི་ཤེས་པ་མི་འཇུག་གོ། །དེ་བཞིན་དུ་དངུལ་དུ་ཤེས་པ་ཡོད་པའི་སྐབས་ན་ཉ་ཕྱིས་ཀྱི་ཤེས་པ་མི་འཇུག་གོ། །འདི་ཡང་ཚིག་གསུམ་གྱིས་བཟློག་པར་བྱ་བ་རྗེས་སུ་བརྗོད་པ་དང་། དེ་ཙམ་སེལ་
[174a.7]བའི་སྤྱོད་ཡུལ་ཅན་ཞེས་ངག་གཅིག་ཏུ་ལན་བརྗོད་དོ། །འགྲེལ་པར་ནི་གཟུགས་ལ་སོགས་པའི་ཞེས་བྱ་བ་བཟློག་པར་བྱ་བ་ཉིད་དུ་བསྟན་པའི་ཕྱིར་དེ་ཉིད་འདྲི་བར་བཀོད་དེ་བརྗོད་དོ། །གཟུགས་ལ་སོགས་པ་མཐོང་བའི་མཇུག་ཐོགས་སུ་ཞེས་བྱ་བས་ནི་མཐོང་བ་ཞེས་བྱ་བ་བཤད་དོ། །
[174b]
[174b.1]རྟགས་ཅན་མ་ཡིན་པའི་ངེས་པའི་ཤེས་པ་ཞེས་བྱ་བས་ནི་སྤྱིའི་དོན་ཅན་ཞེས་བྱ་བའོ། །དེས་ན་རྣམ་པར་གཅད་པར་བྱ་བ་མེད་པའི་ཕྱིར་ཇི་ལྟར་རྣམ་པར་གཅོད་པའི་ཡུལ་ཅན་ཡིན་ཞེས་བརྗོད་པ་ནི་དེ་ཞེས་བྱ་བ་ཡིན་ནོ། །དེ་ལ་ལན་ནི་སྒྲོ་མ་བཏགས་པའི་ཞེས་བྱ་བའོ། །སྒྲོ་བཏགས་མེད་པའི་
[174b.2]ཡུལ་ལ་ཡོད་པའི་ཕྱིར་རོ། །རྣམ་པར་གཅོད་པའི་ཡུལ་ཅན་ཉིད་དུ་ནི་རྟོགས་པ་ཁོ་ན་བས་འབྲེལ་པར་བྱ་བ་མ་ཡིན་ནོ། །རྣམ་པར་གཅོད་པའི་ཡུལ་ཅན་ཉིད་དུ་གནས་པ་ན་གང་ཞིག་སྒྲོ་གདགས་པར་འོས་པ་ལས་སྒྲོ་མ་བཏགས་པ་དེ་ཉིད་རྣམ་པར་གཅད་པར་བྱ་བ་ཡིན་ནོ། །དེས་ན་
[174b.3]དེ་ཙམ་སེལ་བའི་སྤྱོད་ཡུལ་ཅན་ཞེས་བྱ་བ་མ་བཤད་པ་ཁོ་ནར་རྣམ་པར་གཅོད་པའི་ཡུལ་ཅན་གྱི་གཏན་ཚིགས་ཉིད་བཤད་དོ། །འདི་སྐད་བརྗོད་པ་ཡིན་ཏེ། གལ་ཏེ་སྒྲོ་འདོགས་ཡོད་བཞིན་དུ་འགྱུར་ན་ནི་རྣམ་པར་གཅོད་པའི་ཡུལ་ཅན་དུ་མི་འགྱུར་བ་ཡིན་ན། མེད་པ་ཉིད་ལ་འགྱུར་
[174b.4]བ་མ་ཡིན་པའི་ཕྱིར་ན། དེ་བཟློག་པའི་འབྲས་བུ་ཅན་དུ་ཤིན་ཏུ་གསལ་བར་རྟོགས་སོ། །དེ་མེད་པ་ལ་ངེས་པར་འཇུག་པ་ནི་དེ་དང་འགལ་བར་རྟོགས་པའི་ཕྱིར་དེ་ཟློག་པར་ངེས་པར་བྱེད་པའི་ཕྱིར་རོ། །ཇི་ལྟར་ན་འདི་སྒྲོ་མ་བཏགས་པའི་ཡུལ་ལ་ཡོད་པར་རྟོགས་ཤེ་ན། གང་ལ་ཞེས་
[174b.5]སྨོས་སོ། །དངོས་པོའི་ཆོས་གང་ལ་སྒྲོ་འདོགས་པ་ཡོད་པ་དེ་ལ་ངེས་པ་མེད་པར་འགྱུར་རོ། །ཇི་ལྟར་མི་འགྱུར་ཞེ་ན། ངེས་པ་དང་ནི་ཞེས་བྱ་བ་ལ་སོགས་པ་སྨོས་སོ། །གང་གི་ཕྱིར། ངེས་པ་དང་ནི་སྒྲོ་འདོགས་ཡིད། །གནོད་བྱ་གནོད་བྱེད་ངོ་བོའི་ཕྱིར། །སྒྲོ་འདོགས་ཀྱིས་ངེས་
[174b.6]པ་སྐྱེ་བའི་གགས་བྱེད་ལ། སྟོབས་དང་ལྡན་པའི་རྒྱུ་ལས་བྱུང་བའི་ངེས་པས་ནི་སྒྲོ་འདོགས་ཟློག་པར་བྱེད་པ་དེས་ན། འདི་ཉིད་གནོད་བྱ་གནོད་བྱེད་ཀྱི་ངོ་བོ་ཡིན་ནོ། །གལ་ཏེ་སྐད་ཅིག་མ་ཉིད་ཀྱིས་རྣམ་པར་ཤེས་པ་ལྡོག་པར་གྲུབ་པ་ནི། གང་ལས་སྒྲོ་འདོགས་དང་ངེས་པའི་ཤེས་པ་དག་གནོན་བྱ་
[174b.7]གནོན་བྱེད་ཀྱི་ངོ་བོར་གྱུར་པ་གཞན་གྱིས་བཟློག་པར་བྱར་ཅི་ཡོད་ཅེ་ན། བཤད་པ་རང་གི་ཡུལ་ལ་བདེན་པར་ལྷག་པར་ཞེན་པས་ན་སྐད་ཅིག་མ་ཉིད་ཡིན་ཡང་རྣམ་པར་རྟོག་པའི་ཤེས་པ་ཐམས་ཅད་རྒྱུན་གནས་པར་འགྱུར་བ་ཡིན་ནོ། །སེམས་གཡེངས་པས་འགགས་སུ་ཟིན་ཀྱང་
[175a]
[175a.1]དེ་བཞིན་དུ་བདེན་པར་ངེས་པས་འབད་རྩོལ་ཡོད་ན་དེ་ཁོ་ན་བཞིན་དུ་འཇུག་པའི་ཕྱིར་རོ། །ཉ་ཕྱིས་ལ་དངུལ་ལོ་སྙམ་དུ་རྟོགས་པ་ན་གནོད་པར་བྱེད་པ་སྐྱེས་པའི་སྔོན་རོལ་དུ་དོན་གཞན་ལ་ཆགས་པས་བར་དུ་རྣམ་པར་མི་རྟོགས་ཀྱང་ཡང་མངོན་དུ་ཕྱོགས་པ་ན་དེ་
[175a.2]ཁོ་ན་ལྟར་རྟོགས་པའི་ཕྱིར་རོ། །དེས་ན་རྣམ་པར་ཤེས་པ་གང་ཞིག་དེའི་ཡུལ་རྟོགས་ནས་མི་བདེན་པར་རྟོགས་པར་ནུས་པ་དེ་ཁོ་ན་དེ་ཟློག་པར་བྱེད་པ་ཡིན་ནོ། །དེས་ན་འདི་ནི་ཉ་ཕྱིས་ཡིན་གྱི་དངུལ་ནི་མ་ཡིན་ནོ་ཞེས་དངུལ་མི་བདེན་པ་ཉིད་དུ་རྟོགས་པ་ན་དངུལ་དུ་རྟོགས་པ་ལྡོག་པ་
[175a.3]ཡིན་གྱི། ཉ་ཕྱིས་རྟོགས་པ་ཙམ་གྱིས་ནི་མ་ཡིན་ཏེ། དོན་གཞན་ལ་རྟོགས་པ་ན་དེར་ཕྱོགས་པ་མེད་ཀྱང་ཕྱིས་སྐྱེ་བའི་ཕྱིར་རོ། །འདི་ནི་ཉ་ཕྱིས་ཡིན་གྱི་དངུལ་ནི་མ་ཡིན་པར་རྟོགས་ན་ནི་དེ་ལྟར་འགྱུར་མི་སྲིད་དོ། །དེའི་ཡུལ་ཉིད་དུ་ཉ་ཕྱིས་རྟོགས་པའི་ཕྱིར་རྟོགས་པ་དེ་ལྡོག་པ་ཡིན་
[175a.4]ནོ་ཞེ་ན། མ་སྐྱེས་པས་ནི་ལྡོག་པ་མ་ཡིན་ནོ། །འདི་ནི་བཤད་ཟིན་ཏེ། མ་བྱུང་བ་ཡང་བདེན་པ་ཉིད་དུ་མངོན་པར་ཞེན་པ་ཡིན་ན་སླར་སྐྱེ་བའི་ཕྱིར་རོ། །ཡང་ན་འདིར་དངུལ་ཡོད་པར་གྱུར་ཏོ་ཞེས་ཡོད་པ་ཉིད་དུ་ཐལ་བར་འགྱུར་བའི་ཕྱིར་རོ། །དེས་ན་གང་ཞིག་གང་གི་ཡུལ་དཔྱོད་པར་
[175a.5]ནུས་པ་ཉིད་དེ་ཟློག་པར་བྱེད་པ་ཡིན་ནོ། །དེ་ཉིད་ཀྱི་ཕྱིར་རྣམ་པར་རྟོག་པ་ཉིད་སྒྲོ་འདོགས་ཟློག་པར་བྱེད་པ་ཡིན་གྱི། རྣམ་པར་རྟོག་པ་མེད་པ་ནི་མ་ཡིན་ནོ། །དེར་ནི་དེའི་རྒྱུ་མཚན་ཡོད་པ་དང་མེད་པ་དག་ལས་འབྲས་བུར་གྱུར་པའི་ཤེས་པ་ཡོད་པ་དང་མེད་པ་ཙམ་དུ་ཟད་དོ། །
[175a.6]སྒྲོ་འདོགས་ཀྱི་ཤེས་པ་ཡང་ཇི་སྲིད་རང་གི་ཡུལ་ལ་བདེན་པར་མངོན་པར་འདུ་བྱེད་པ་དེ་སྲིད་ཟློག་པའི་ཤེས་པ་སྐྱེད་པའི་གེགས་བྱེད་དོ། །འགྲེལ་པ་ནི་དངོས་པོ་ཐམས་ཅད་ལས་ཞེས་བྱ་བ་ཡིན་ནོ། །ཉ་ཕྱིས་ལ་སྒྲོ་འདོགས་པ་ཡོད་པའི་ཕྱིར་ཉ་ཕྱིས་ཉིད་དུ་ངེས་པ་ཡོད་པ་མ་
[175a.7]ཡིན་ལ། སྒྲོ་འདོགས་པ་མེད་ན་ནི་ངེས་པར་འགྱུར་རོ་ཞེས་བཤད་པ་ནི་གང་ལ་རྟོགས་པ་པོའི་ཞེས་བྱའོ། །དེས་ནི་དེ་ལྟར་སྔར་བསྟན་ཀྱི་གནས་སྐབས་ན་སྒྲོ་འདོགས་ཡོད་ན་རྣམ་པར་རྟོག་པ་ཟློག་པར་བྱེད་པ་ནི་མ་ཡིན་གྱི། འོན་ཀྱང་གནོད་པར་བྱ་བ་དང་གནོད་པར་བྱེད་པའི་
[175b]
[175b.1]དངོས་པོ་ལས་ཡིན་ནོ་ཞེས་གཞུང་བཙུགས་ཏེ། རྣམ་པར་གཅོད་པའི་ཡུལ་ཅན་ཉིད་བཤད་པ་ནི་སྒྲོ་འདོགས་དབེན་པ་ལ་ཞེས་བྱ་བའོ། །འདི་ནི་ཞེས་བརྗོད་པ་གང་ཡིན་པ་དེའི་ཡུལ་བཤད་པ་ནི། །ངེས་པ་ཞེས་བྱ་བ་ཡིན་ནོ། །ཇི་སྐད་བསྒྲུབ་པའི་དོན་གྱི་གཏན་ཚིགས་ནི། །
[175b.2]ངེས་པ་དང་ནི་སྒྲོ་འདོགས་ཡིད། །ཅེས་བྱ་བ་ཡིན་ནོ། །འགྲེལ་པ་ནི་དེས་ཞེས་བྱ་བའོ། །སྔར་ཇི་སྐད་བཤད་པ་བཞིན་ཏེ། འདི་བ་ལང་མ་ཡིན་པ་མ་ཡིན་ནོ་སྙམ་པ་ལ་སོགས་པའི་ཤེས་པ་དག་ནི་སྲེ་བའི་རྟོགས་པ་དང་བྲལ་བ་ཉིད་ཀྱིས་གཞན་སེལ་བ་ཡིན་ནོ། །གཏན་
[175b.3]ཚིགས་བསྒྲུབས་ནས་དེ་ཙམ་སེལ་བའི་སྤྱོད་ཡུལ་ཅན་ཞེས་གང་བཤད་པ་དེ་མཇུག་སྡུད་པ་ནི་དེ་ལྟ་བས་ན་དེ་ཡང་ཞེས་བྱའོ། །གཞན་སེལ་བའི་དོན་ཅན་ཉིད་དུ་མི་འགྱུར་བ་གང་ཡིན་པ་འདི་སྒྲུབ་པའི་ཚུལ་གྱིས་ནི་གོ་བར་བྱེད་པ་སྲིད་པ་མ་ཡིན་ནོ་ཞེས་བཤད་པ་ནི་དངོས་
[175b.4]པོའི་ཞེས་བྱ་བ་ནས་མི་རུང་བའི་ཕྱིར་རོ་ཞེས་བྱ་བའི་བར་དུའོ། །དེ་ལྟར་ན་སྒྲོ་འདོགས་མེད་ཀྱང་གཞན་སེལ་བའི་ཡུལ་ཅན་དུ་གྲུབ་པ་ཡིན་ནོ། །སྒྲོ་འདོགས་ཟློག་པར་བྱེད་པ་ཉིད་ན་འདིས་ཇི་ལྟ་བུའི་རང་བཞིན་དེ་དང་རིགས་མི་མཐུན་པའི་སྒྲོ་འདོགས་པ་དེ་བཟློག་པའི་དོན་
[175b.5]ཉིད་ཀྱིས་དེའི་གཉེན་པོ་ཙམ་གྱིས་དངོས་པོ་བདག་ཉིད་ལ་བརྟེན་ནས་དེ་ཟློག་པར་བྱེད་པ་ཡིན་པའི་ཕྱིར་དོན་ཐ་མི་དད་པ་ཡང་བཟློག་པར་བྱ་བ་སྒྲོ་འདོགས་པའི་གྲངས་སྙེད་དུ་ཟློག་པར་བྱེད་པའི་རྣམ་པར་རྟོག་པ་ཐ་དད་པར་སྣང་བ་ཡིན་ནོ་ཞེས་བསྟན་པའི་དོན་དུ་བཤད་པ་ནི། ཆ་ཤས་
[175b.6]སྒྲོ་འདོགས་ཇི་སྙེད་པ། །ཞེས་བྱ་བ་ལ་སོགས་པའོ། །ངོ་བོ་རྟོགས་པ་ཡིན་ན་ནི་ངོ་བོ་གཅིག་ཡིན་པའི་ཕྱིར་ཐམས་ཅད་དོན་གཅིག་ལ་བརྟེན་པ་ཉིད་དོ་ཞེས་སྟོན་པ་ནི་གཞན་དུ་ཞེས་བྱ་བའོ། །འདི་ནི་གལ་ཏེ་འཁྲུལ་པའི་རྒྱུ་མཚན་གྱིས་ཞེས་བྱ་བ་འདི་ཉིད་ཀྱི་འགྲེལ་པར་
[175b.7]མདོར་མེད་ཀྱང་གཞན་གྱི་དངོས་པོ་ཇི་སྙེད་པ་ཞེས་བྱ་བ་ལ་སོགས་པ་བཤད་པ་ལ་འདིར་ནི་ཚིགས་སུ་བཅད་པར་བྱ་སྟེ་བརྗོད་དོ། །ཚིགས་སུ་བཅད་པར་བཤད་པ་དེ་བཞིན་དུ་འགྲེལ་པར་ནི་འགྲེལ་པ་ཉིད་དུ་འགྱུར་ལ། མདོར་མེད་པ་འགྲེལ་པར་བཤད་པ་དེ་མ་ཐག་ཏུ་མདོར་
[176a]
[176a.1]བརྗོད་པ་ཡང་བསྡུ་བ་ཉིད་དུ་འགྱུར་ཏེ། དཔེར་ན་མ་རྟོགས་པ་ངེས་པ་ནི་ཞེས་བྱ་བ་ལ་སོགས་པ་བརྒལ་ཏེ། ཉེ་བར་བཀོད་པའི་དངོས་པོ་དེ་ཕྱིར་དེ་ལྟར་རྟགས་སེལ་བའི་ཚིགས་སུ་བཅད་པ་བཞིན་ནོ། །ཆོད་པ་ལ་དེའི་དོན་ཅན་གྱི་མདོར་བྱས་པ་ནི་བསྡུ་བ་མ་ཡིན་
[176a.2]ལ་བཤད་པ་ཡང་མ་ཡིན་ཏེ། འཇུག་པ་ཞུགས་ཟིན་པའི་ཕྱིར་བར་སྐབས་ཀྱི་ཚིགས་སུ་བཅད་པ་ཞེས་བྱ་བའོ། །བར་སྐབས་ཀྱི་ཚིགས་སུ་བཅད་པ་དག་གོ་ཞེས་བྱ་བ་ནི་མདོ་གཞན་གྱི་ནང་དུ་བརྗོད་པ་བཤད་པ་མེད་པའི་ཚིགས་སུ་བཤད་པའོ། །འགྲེལ་པ་བཤད་ཟིན་ན་མདོར་བརྗོད་
[176a.3]པས་ཅི་བྱ་ཞེ་ན། མདོའི་བསྟན་བཅོས་མ་ཚང་བ་མེད་པར་བྱ་བའི་ཕྱིར་ཏེ། གཞན་དུ་བརྗོད་པར་བྱ་བའི་དོན་ཡང་མདོར་མི་སྙེད་པར་འགྱུར་རོ། །དེས་ན་དེ་ལྟར་རང་གི་ཕྱོགས་ལ་རིགས་པས་དོན་གྱི་རང་བཞིན་ཇི་ལྟ་བུར་གྱུར་པ་དེ་ལ་བརྟེན་ཏེ། དོན་གྱི་རང་གི་ངོ་བོ་གཅིག་ཅེས་བྱ་བ་ལ་
[176a.4]སོགས་པས་སྒྲུབ་པས་རྟོགས་པར་བྱེད་པ་ཉིད་བསལ་ནས་རྣམ་པར་གཅོད་པའི་ཡུལ་ཅན་དུ་གཞུང་བཙུགས་པ་ཡིན་ནོ། །ད་ནི་གཞན་གྱི་ཁས་བླངས་པར་རབ་ཏུ་གྲུབ་པའི་དོན་ལ་བརྟེན་ནས་ཀྱང་སྒྲུབ་པའི་ངོ་བོས་རྟོགས་པར་བྱེད་པ་མི་སྲིད་དོ་ཞེས་བསྟན་པའི་ཕྱིར། རྩོམ་པ་ནི་གང་
[176a.5]གི་ལྟར་ན་བློ་ཞེས་བྱ་བ་ལ་སོགས་པའོ། །རྒོལ་བ་གང་གི་ལྟར་ན་བ་ལང་ཉིད་དང་མི་རྟག་པ་ཉིད་ལ་སོགས་པའི་ཁྱད་པར་སྣ་ཚོགས་སུ་གྱུར་པ་གང་ལ་ཡོད་པ་དེ་ལྟ་བུའི་དོན་བློས་འཛིན་པའོ། །ཁྱད་པར་དེ་དག་ལས་ཀྱང་དོན་དེ་ཐ་དད་པ་ཉིད་དོ་ཞེས་བརྗོད་ན་ནི་ཐ་དད་པ་ཞེས་བྱ་བའོ། །
[176a.6]ཡང་ན་ཁྱད་པར་སྣ་ཚོགས་པ་གྱུར་པ་ཉིད་ཁྱད་པར་སྣ་ཚོགས་ཅན་ཏེ་དོན་དེ་ཉིད་འཛིན་པའོ། །འདི་ཡང་སྣ་ཚོགས་པ་ཉིད་ཀྱིས་ཐ་དད་པ་ཡིན་ནོ་ཞེས་བརྗོད་པ་ནི་ཐ་མི་དད་ཅེས་བྱ་བའོ། །སྣ་ཚོགས་པ་ཉིད་ཀྱིས་རྟོགས་པ་ཐ་དད་པ་ན་ཐ་དད་པ་མེད་པའི་ཕྱོགས་ལ་འགྱུར་བའི་སྐྱོན་མེད་དོ་ཞེས་
[176a.7]བསྟན་པའི་དོན་དུ་ཐ་དད་པ་ཉིད་བརྗོད་པ་ཡིན་ནོ། །དེའི་དོན་ནི་འདི་ཡིན་ཏེ། གལ་ཏེ་ཡང་སྒྲ་དང་རྟགས་དག་གིས་བསྒྲུབ་པས་དངོས་པོ་ཉིད་རྟོགས་པ་དེ་ལྟ་ན་ཡང་སྒྲ་དང་ཚད་མ་གཞན་མི་འཇུག་པའི་ཉེས་པ་ནི་མེད་དོ། །མངོན་སུམ་གྱིས་རྟོགས་ཟིན་པའི་ཕྱིར་ཚད་མ་གཞན་གྱིས་ཀྱང་
[176b]
[176b.1]འདི་དེ་ཁོ་ན་ལྟར་རྟོགས་པ་ཡིན་ན་དེས་ཅི་བྱ། དེ་ལྟ་མ་ཡིན་ན་ཡང་མ་རྟོགས་པ་ཉིད་དུ་འགྱུར་རོ་ཞེས་བྱ་བ་གང་ཡིན་པ་དོན་བདག་ཉིད་གཅིག་ཏུ་གྱུར་པ་ཉིད་ནི་མ་ཡིན་གྱི། འོན་ཀྱང་རང་བཞིན་གྱིས་གཅིག་ཡིན་ཡང་དུ་མ་དང་ལྡན་པ་ཡིན་ནོ། །དེས་ན་སྒྲའོ་ཞེས་ཁྱད་པར་འགའ་
[176b.2]ཞིག་གིས་རྣམ་པར་བཅད་དེ་རྟོགས་ཀྱང་མི་རྟག་པའོ་ཞེས་ཁྱད་པར་གཞན་གྱིས་རྣམ་པར་བཅད་དེ་རྟོགས་པ་མེད་པའི་ཕྱིར་རྗེས་སུ་དཔག་པས་རྟོགས་པར་བྱ་བ་ཡིན་ནོ། །སྒྲས་ཀྱང་དེ་དང་འདྲའོ། །ཡང་ན་བཤད་པ་གཉིས་པ་ལྟར་སྒྲ་གཞན་ལ་སོགས་པ་ནི་ཁྱད་པར་འབའ་
[176b.3]ཞིག་ལ་གཞོལ་བ་ཡིན་པས་སྐྱོན་འགའ་ཡང་མེད་དོ། །འགྲེལ་པ་ནི། གང་ཞིག་ཅེས་བྱ་སྟེ། གང་གི་ལྟར་ཞེས་བྱ་བ་བཤད་པའོ། །ཁྱད་པར་རྣམས་ཕན་ཚུན་ཐ་དད་པ་ཁོ་ན་ཡིན་ལ་ཞེས་བྱ་བས་ནི་ཁྱད་པར་ནི་སྣ་ཚོགས་ཅན་ཞེས་བྱ་བ་བཤད་དོ། །རྟེན་ལས་ཞེས་བྱ་བ་ཐ་དད་པའི་ལྡོག་མཚམས་ཉིད་ཀྱིས་ཐ་དད་ཅེས་
[176b.4]བྱ་བ་བཤད་པ་ཡིན་ཏེ། རྟེན་ཉིད་ཀྱི་ཁྱད་པར་སྣ་ཚོགས་ཅན་དོན་གཞན་ཉིད་དོ། །དེའི་རྒྱུ་ཅན་གྱི་མ་ཉན་པ་དག་ནི་དེ་དག་གི་རྟེན་ལ་འཇུག་པ་ཞེས་བྱ་བས་ནི་ཁྱད་པར་གྱིས་ཏེ། ཁྱད་པར་དག་དང་བློས་འཛིན་པར་བྱེད་པ་ཡིན་ནོ། །དེ་དག་ཁོ་ན་ལ་འཇུག་གོ་ཞེས་བྱ་བས་ནི་
[176b.5]དོན་གཞན་སྟོན་པར་བྱེད་པའོ། །དེ་བས་ན་དོན་གྱི་རང་གི་ངོ་བོ་གཅིག་ཅེས་བྱ་བ་ལ་སོགས་པས་བརྗོད་པའི་ཐལ་བ་འདིར་མི་འགྱུར་རོ་སྙམ་དུ་སེམས་པ་གང་ཡིན་པ་དེའི་ལྟར་ན་ཡང་ཁྱད་པར་སྣ་ཚོགས་ལ་ཕན་པའོ། །ཡན་ལག་ཏུ་གྱུར་པའི་ནུས་པ་ལས་མི་གཞན་པའི་
[176b.6]བདག་ཉིད་ཐམས་ཅད་བཟུང་ན་ཕན་པར་བྱ་བའི་ཁྱད་པར་གང་ཞིག་མ་ངེས་པ་ཞེས་བྱ་བར་འགྱུར། ཁྱད་པར་ཐ་དད་པ་དག་ཁོ་ན་ཞེས་བྱ་བ་ལ་སོགས་པ་ནི་འགྲེལ་པའོ། །གང་གི་ཕྱིར་ཐ་དད་པ་དེའི་ཕྱིར་སྒྲ་དང་ཤེས་པ་གཅིག་གིས་ཡུལ་དུ་བྱས་པའི་དོན་དེ་ལ་སྒྲ་གཞན་དང་
[176b.7]ཤེས་པ་གཞན་འཇུག་པ་ཡིན་ནོ། །དེས་ན་འདི་དག་དོན་ལ་སྒྲ་དང་ཤེས་པ་གཞན་དག་གི་རྒྱུ་མཚན་ཡིན་ནོ། །དེ་ལྟ་ན་ཡང་ཁྱད་པར་དེ་དང་ལྡན་པ་གཅིག་པུ་ཉིད་དེ་ནི་སྒྲ་དང་ཤེས་པ་དེ་དག་གིས་ཉེ་བར་ལེན་ཏོ། །དེ་བདག་ཉིད་ཐམས་ཅད་བཟུང་ན་ཁྱད་པར་ཐམས་ཅད་ངེས་
[177a]
[177a.1]པར་འགྱུར་རོ། །འདི་སྐད་བརྗོད་པ་ཡིན་ཏེ། གལ་ཏེ་ཡང་ཁྱད་པར་རྣམས་ཐ་དད་པའི་ཕྱིར་ཐ་དད་པ་ཁོ་ནས་སྒྲ་དང་ཤེས་པ་གཞན་དག་གི་རྒྱུ་མཚན་ཉིད་ཡིན་གྱི། གཅིག་ཉིད་ཀྱིས་ཐམས་ཅད་རྟོགས་པ་མ་ཡིན་པ་དེ་ལྟ་ན་ཡང་ཁྱད་པར་དང་ལྡན་
[177a.2]པ་ནི་རང་གི་ངོ་བོས་གཅིག་ཁོ་ནའོ། །གཅིག་ཡིན་པའི་ཕྱིར་ན་ཐམས་ཅད་བཟུང་བས་བདག་ཉིད་ཐམས་ཅད་འཛིན་པ་ན་ཁྱད་པར་གྱི་བྱེད་པ་ལ་མི་ལྟོས་པ་ཁོ་ནར་ཁྱད་པར་ཐམས་ཅད་འཛིན་པར་བྱེད་པའོ། །གཅིག་པོར་རང་གི་ངོ་བོ་ཙམ་གྱིས་བདག་ཉིད་ཐམས་ཅད་
[177a.3]བཟུང་ན་ཡང་ཁྱད་པར་ཐམས་ཅད་བཟུང་བར་ཇི་ལྟར་འགྱུར་ཞེ་ན། ཁྱད་པར་སྣ་ཚོགས་ལ་ཞེས་སྨོས་ཏེ། ཁྱད་པར་སྣ་ཚོགས་ཕན་པའི་རྟེན་ནུས་པའི་མཚན་ཉིད་ཀྱི་ངོ་བོ་ཉིད་གང་ཡིན་པ་དེ་ནི་ཁྱད་པར་དང་ལྡན་པའི་རང་གི་བདག་ཉིད་ལ་ཐ་དད་པ་མེད་པའི་ཕྱིར་རོ། །ཁྱད་པར་
[177a.4]དང་ལྡན་པའི་ཁྱད་པར་སྣ་ཚོགས་ལ་ཕན་འདོགས་པ་ཞེས་བྱ་བ་གང་ཡིན་པ་དེ་ནི་དེ་ལས་ཐ་མི་དད་པ་ཡིན་ནོ། །དེས་ན་འདིའི་དེ་ལྟ་བུའི་བདག་ཉིད་ཆར་བཟུང་བ་མེད་པས་ཁྱད་པར་སྣ་ཚོགས་ལ་ཕན་འདོགས་པ་ཉིད་དུ་བཟུང་ན། ཇི་ལྟར་ཁྱད་པར་མ་བཟུང་བར་འགྱུར་ཏེ། དབྱུག་
[177a.5]པ་མ་བཟུང་བར་དབྱུག་པ་ཅན་མི་འཛིན་པ་བཞིན་ནོ། །འདིར་ཕན་པར་བྱ་བ་དང་ཕན་པར་བྱེད་པ་ནི་གལ་ཆེ་བ་མ་ཡིན་གྱི། འོན་ཀྱང་དེ་དག་དེའི་ཁྱད་པར་ཡིན་པའི་ཕྱིར་ཁོ་བོ་ཅག་ལ་གྲགས་པའི་དབང་དུ་བྱས་ནས་ཕན་གདགས་བྱ་འདོགས་བྱེད་ཀྱི་རྩ་བ་ཅན་ཡིན་ནོ། །གཞན་
[177a.6]དག་གི་ལྟར་ནི་འབྲེལ་པའི་རྩ་བ་ཅན་ཉིད་དོ། །དེའི་ཕྱིར་འབྲེལ་པ་ཅན་ཡང་ཁྱད་པར་དང་ལྡན་པའི་རང་གི་ངོ་བོ་ལས་ཐ་མི་དད་པ་ཁོ་ནའོ། །འདི་འདོད་པར་མི་བྱ་བ་ཡང་མ་ཡིན་ཏེ། འབྲེལ་པ་ཁས་ལེན་ན་འབྲེལ་པ་ཅན་གདོན་མི་ཟ་བར་ཁས་བླང་བར་བྱ་བའི་ཕྱིར་ཏེ་འབྲེལ་པ་ཅན་
[177a.7]མེད་པར་འབྲེལ་པ་མི་འགྲུབ་པའི་ཕྱིར་རོ། །དེས་ན་དོན་ལ་ཁྱད་པར་ཐམས་ཅད་དང་འབྲེལ་པ་ཅན་དུ་བཟུང་ན་ཇི་ལྟར་ཁྱད་པར་ཐམས་ཅད་མ་བཟུང་བར་འགྱུར། དེ་བཤད་པ་ནི་ཁྱད་པར་ཐམས་ཅད་ལ་ཕན་འདོགས་པར་བྱེད་པ་ཉིད་དུ་ཞེས་བྱའོ། །འབྲེལ་པ་ཅན་ཐ་དད་ན་མ་རྟོགས་
[177b]
[177b.1]པར་འགྱུར་གྱི་ཐ་མི་དད་ན་ནི་མ་ཡིན་ནོ་ཞེས་བཤད་པ་ནི་རང་གི་ངོ་བོར་ཞེས་བྱ་བའོ། །གཞན་མ་ཡིན་པ་ཉིད་ཀྱིས་ན་ཕན་པར་བྱེད་པ་ཉིད་དུ་བཟུང་བའི་རང་བཞིན་ཡིན་ནོ། །འོན་ཏེ་ཡང་སྒྲ་དང་ཚད་མ་ཐམས་ཅད་ཞུགས་ན་ཁྱད་པར་ཐམས་ཅད་རྟོགས་པར་འགྱུར་མོད་ཅེ་ན། དེ་དག་ཅེས་
[177b.2]སྨོས་སོ། །ཁྱད་པར་སྣ་ཚོགས་པ་དང་དེ་ལ་ཕན་འདོགས་པའི་ནུས་པའི་བདག་ཉིད་གཉིས་ཀྱི་ནང་ནས་གཅིག་ཤེས་ན་ནི་གཉིས་ཀ་བཟུང་། རེ་ཞིག་གཅིག་ནི་ཤེས་པ་ཁོ་ནའོ། །དེ་ཤེས་ན་ཅིག་ཤེས་ཀྱང་ཤེས་པའི་ཕྱིར་གཉི་ག་འཛིན་པར་འགྱུར་རོ། །དེ་ཅིའི་ཕྱིར་ཞེ་ན། བདག་ཉིད་
[177b.3]ལ་འབྲེལ་པའི་ཕྱིར་དེ་དག་གི་འབྲེལ་པ་ནི་འདུ་བའི་མཚན་ཉིད་ཡིན་ལ། དེ་ཡང་དེའི་བདག་ཉིད་ལ་ཡོད་པ་ཡིན་གྱི་བདག་ཉིད་གཞན་ལ་ནི་མ་ཡིན་ནོ། །དེས་ན་དེ་དག་ཉིད་འབྲེལ་པ་ཅན་ཡིན་པའི་ཕྱིར་འབྲེལ་པ་ཅན་ནི་འདི་གཉིས་ལས་ཐ་མི་དད་པ་ཁོ་ནའོ། །བདག་ཉིད་གཞན་
[177b.4]ལ་འབྲེལ་པ་ཡོད་པ་ནི་དེ་ཉིད་འབྲེལ་པ་ཅན་དུ་འགྱུར་གྱི་དེ་གཉིས་ནི་མ་ཡིན་ནོ། །དེའི་དོན་ནི་འདི་ཡིན་ཏེ། ཇི་ལྟར་ཁྱེད་ཅག་ཁྱད་པར་གྱི་སྒོ་ནས་ཁྱད་པར་ཅན་རྟོགས་པར་འདོད་པ་དེ་བཞིན་དུ་བདག་ཅག་གིས་ཁྱད་པར་དང་ལྡན་པར་ཁྱད་པར་དང་འབྲེལ་པའི་བདག་ཉིད་ལས་ཁྱད་པར་
[177b.5]རྣམས་ལ་རྟོགས་པར་འགྱུར་བ་ཡང་བསྒྲུབ་པ་ཡིན་ནོ། །འབྲེལ་པ་ཅན་གྱི་བདག་ཉིད་ཡིན་པའི་ཕྱིར་ཁྱད་པར་དང་ལྡན་པ་ཕྱོགས་གཅིག་གིས་རྟོགས་པར་མི་སྲིད་པ་ནི་ཁྱད་པར་དང་ལྡན་པར་རྟོགས་པར་བྱེད་པ་ཡིན་ནོ། །དེ་བཞིན་དུ་ཁྱད་པར་དག་འབའ་ཞིག་ཤེས་པ་ན་ཡང་ཁྱད་པར་
[177b.6]ཅན་དང་འབྲེལ་པའི་བདག་ཉིད་ཡིན་པའི་ཕྱིར་ཆ་མེད་པར་རྟོགས་པ་ལས་ཁྱད་པར་དང་ལྡན་པའི་རྟོགས་པ་འཕེན་པ་ཡིན་ནོ། །དེས་ན་ཁྱད་པར་གཅིག་གི་སྒོ་ནས་དེའི་དོན་ཤེས་པ་ན་ཡང་ཁྱད་པར་ཐམས་ཅད་རྟོགས་པར་ཐལ་ལོ། །ཕ་རོལ་པོས་ཁྱད་པར་སྣ་ཚོགས་ཅན་གྱི་དོན་བློས་
[177b.7]འཛིན་པར་བརྗོད་པ་དེའི་ལྟར་ན་ཞེས་བྱ་བ་ལ་སོགས་པས་ཁྱད་པར་བཟུང་བ་ན་ཁྱད་པར་མཐའ་དག་གཟུང་བར་ཐལ་བར་བརྗོད་དོ། །དེས་ན་ཁྱད་པར་བཟུང་བས་སྟོང་པའི་ཁྱད་པར་དང་ལྡན་པ་འཛིན་པ་མེད་པའི་ཕྱིར་ཇི་ལྟར་དེ་བཟུང་ན་ཐམས་ཅད་བཟུང་བར་འགྱུར་རོ། །ཁྱད་པར་
[178a]
[178a.1]ཐམས་ཅད་བཟུང་བ་ལས་དེ་བཟུང་བ་ན་ནི་མི་འདོད་པ་ཅུང་ཟད་ཀྱང་མེད་དོ་ཞེས་དོགས་པ་བསུ་ནས། དེ་དག་བདག་ཉིད་ལ་འབྲེལ་ཕྱིར། །ཞེས་བྱ་བ་ལ་སོགས་པ་བཤད་དོ། །བདག་ཉིད་ལ་འབྲེལ་པར་རྣམ་པར་གནས་པ་ཉིད་ཀྱིས་གཉི་ག་ཡང་འབྲེལ་
[178a.2]པ་ཅན་ཡིན་པའི་ཕྱིར་དེ་ལྟར་ན་བཟུང་ན་ཅིག་ཤོས་ཀྱི་ཡུལ་ཅན་གྱི་རྟོགས་པ་འཕེན་ནོ། །དེས་ན་ཐབས་གང་ཡང་རུང་བ་ཞིག་གིས་ཁྱད་པར་དང་ལྡན་པར་གྱུར་པ་རྟོགས་པ་ཁྱད་པར་འཛིན་པར་བྱེད་དོ་ཞེས་བྱ་བ་ཡིན་ཏེ། ཁྱད་པར་ཐམས་ཅད་བཟུང་བས་དེ་བཟུང་ན་ནི་རྩོད་པ་མེད་
[178a.3]དོ། །དེས་ན་ཁྱད་པར་གཅིག་གི་སྒོ་ནས་ཀྱང་དེ་ལས་རྟོགས་པས་རེག་པ་ན་མ་རྟོགས་པའི་ཁྱད་པར་མཐའ་དག་རྟོགས་པར་ཐལ་བར་འགྱུར་རོ་ཞེས་བསྟན་པའི་དོན་དུའོ། །དེས་ན་ཟློས་པར་དོགས་པར་མི་བྱའོ། །ཕན་འདོགས་པར་བྱེད་པ་ཐ་མི་དད་པར་བཟུང་མོད། ཐ་དད་པའི་
[178a.4]ཁྱད་པར་ནི་མ་ཡིན་ནོ་ཞེས་ཀྱང་དོགས་པར་བྱས་ནས་སླར་ཡང་འབྲེལ་པ་ཐ་དད་པ་མེད་པ་ཙམ་སྟོན་པ་ནི་འཐད་པ་མ་ཡིན་ཏེ། སྔར་ཉིད་བརྗོད་ཟིན་པའི་ཕྱིར་རོ། །འདི་ལས་ལྷག་པ་ནི་ཅུང་ཟད་ཀྱང་མི་བརྗོད་དོ། །དེས་ན་དོན་འདི་སྔར་ཉིད་གྲུབ་པའམ་ཡང་ན་ད་ལྟ་ཡང་མ་ཡིན་ནོ། །ཁྱད་
[178a.5]པར་དང་ཞེས་བྱ་བ་ལ་སོགས་པ་ནི་འགྲེལ་པའོ། །གང་གི་དོན་དུ་འདི་བཀོད་པ་བཤད་པ་ནི་དེ་ཁྱད་པར་གཅིག་གིས་ཞེས་བྱ་བའོ། །ཁྱད་པར་ལ་ཕན་འདོགས་པ་ཉིད་དུ་ཁྱད་པར་དང་ལྡན་པ་རྟོགས་པ་ན། མདོ་གཉི་གར་ཡང་སྙིང་པོར་བྱས་པའི་ཁྱད་པར་དང་ཁྱད་པར་ཅན་གྱི་ཚུལ་
[178a.6]གང་ཡིན་པ་དེ་གསལ་བར་བྱེད་པ་ནི། ཁྱད་པར་དང་ལྡན་པར་འཛིན་པ་ནི་དེ་འཛིན་པ་མེད་ན་མེད་པའི་ཕྱིར་རོ་ཞེས་བྱ་བའོ། །ཁྱད་པར་ཐམས་ཅད་འཛིན་པ་མེད་ན་མེད་པ་གང་ཡིན་པ་སྟེ། ཁྱད་པར་དང་ལྡན་པར་འཛིན་པ་ནི་དེ་ལྟ་བུ་ཡིན་ནོ། །ཐམས་ཅད་ལ་ཕན་འདོགས་པར་བྱེད་
[178a.7]པ་ཉིད་དུ་བཟུང་བ་ན། ཐམས་ཅད་བཟུང་བ་ཁོ་ནའོ། །དུ་བའི་རྒྱུ་ཉིད་དུ་རྣམ་པར་རྟོག་པས་མེ་བཟུང་བ་ན། དུ་བ་མི་འཛིན་པ་ནི་མ་ཡིན་ནོ། །འཛིན་པ་མེད་ན་མེད་པ་ཡིན་པ་ན་ཕན་གདགས་པར་བྱ་བ་མ་བཟུང་བར་ཁྱད་པར་དང་ལྡན་པ་ཕན་འདོགས་པར་བྱེད་པ་ཉིད་དུ་འཛིན་པར་མི
[178b]
[178b.1]འགྱུར་རོ་ཞེས་བཤད་པ་ནི་གཞན་དུ་ན་ཞེས་བྱ་བའོ། །དེ་ལྟར་ཡང་ཞེས་བྱ་བ་ནི་ཁྱད་པར་དང་ལྡན་པ་ཉིད་དུ་ཡང་ངོ་། །མི་འཛིན་པར་ཡང་འཐད་པ་མ་ཡིན་ནོ་ཞེས་བྱ་བ་བཤད་པ་ནི་གཞན་ལ་ཕན་པར་བྱེད་པ་ཉིད་ཅེས་བྱ་བའོ། །གཞན་ཡིན་ན་ནི་འདིར་འགྱུར་གྱི་གཞན་མ་ཡིན་ན་ནི་མ་
[178b.2]ཡིན་ནོ་ཞེས་བྱ་བའི་ཐ་ཚིག་གོ། །ངེས་པར་ཕན་འདོགས་པར་བྱེད་པ་བཟུང་བ་ན་དེ་ལ་ཕན་འདོགས་པར་བྱེད་པ་ཉིད་དུ་བཟུང་བས་ན་ཕན་གདགས་པར་བྱ་བ་མི་འཛིན་པ་མ་ཡིན་ནོ། །དེ་བཤད་པ་ནི་ཕན་པར་བྱེད་པ་དེ་ལྟར་ཞེས་བྱ་བའོ། །ཕན་གདགས་པར་བྱ་བ་མ་བཟུང་ན་ཕན་འདོགས་
[178b.3]པར་བྱེད་པ་དེ་ཡང་མ་བཟུང་བར་ཐལ་བར་འགྱུར་བའི་ཕྱིར་ཏེ་དཔེར་ན་རྗེ་ཁོལ་བཞིན་ནོ། །ཁོལ་པོ་ཁོལ་པོ་ཉིད་དུ་འཛིན་པ་ན་རྗེ་བོ་མི་འཛིན་པ་མ་ཡིན་ནོ། །འདིར་ཁྱད་པར་དང་ཁྱད་པར་ཅན་གྱི་དངོས་པོ་མེད་མོད་ཀྱི། དེ་ལྟ་ན་ཡང་རྗེ་བོར་འཛིན་པ་ནི། ཁོལ་པོ་འཛིན་པ་ལ་ལྟོས་པ་ནི་མ་
[178b.4]ཡིན་ལ། ཁོལ་པོའི་ཤེས་པ་ལ་རྗེ་བོ་མི་སྣང་ཡང་། ཁོལ་པོར་འཛིན་པ་ཡང་རྗེ་བོ་འཛིན་པ་ལ་ལྟོས་པ་ཡིན་པས་དཔེ་ཉིད་དོ། །སྔ་མ་ལས་ཕྱི་མ་བཞིན་དུ་དེ་ལས་དེ་རྟོགས་པར་ནུས་པ་ཉིད་ཡིན་གྱི་ཁྱད་པར་དང་ཁྱད་པར་ཅན་བཞིན་དུ་ཐ་དད་པར་རྟོགས་པ་ནི་མ་ཡིན་ནོ། །ཕན་
[178b.5]པར་བྱ་བ་དང་ཕན་པར་བྱེད་པ་དག་འཛིན་པ་ནི་ནི་ཁྱད་པར་དང་ཁྱད་པར་ཅན་གྱི་ངོ་བོ་ཡོད་པ་ཡིན་ཏེ། རྒྱུ་དང་འབྲས་བུ་བཞིན་ནོ། །གལ་ཏེ་ཁྱད་པར་གྱི་སྒོ་ནས་ཁྱད་པར་དང་ལྡན་པ་རྟོགས་པ་ན། འདི་བ་ལང་ངོ་ཞེ་འམ་མི་རྟག་པའོ་ཞེས་པ་ལྟར་དེས་ཉེ་བར་བསྒྱུར་བ་དེ་དང་ཐ་མི་དད་
[178b.6]པར་རྟོགས་ལ་ཁྱད་པར་གཞན་གྱི་སྒོ་ནས་རྟོགས་ན་ནི་གང་གི་སྒོ་ནས་དེར་རྟོགས་པ་མ་ཡིན་པའི་ཁྱད་པར་དེ་འབྲེལ་པར་རྟོགས་པར་འགྱུར་ཏེ། སྒྲའི་མི་རྟག་པ་ཉིད་དོ་ཞེས་སོ། །དེས་ན་འདིར་སྒྲ་མི་རྟག་པ་ཉིད་དང་འབྲེལ་ཏོ་ཞེས་རྟོགས་པར་འགྱུར་གྱི། དེའི་ཚེ་མི་རྟག་པ་ཉིད་
[178b.7]ཁྱད་པར་རམ་འབྲེལ་པ་ཅན་ཉིད་ནི་མ་ཡིན་ནོ། །དེ་དེ་ལ་ཐིམ་པ་ཉིད་དུ་རྟོགས་ན་དེ་ཁྱད་པར་དུ་འགྱུར་བ་ཡིན་གྱི་འབྲེལ་པར་རྟོགས་པས་ནི་མ་ཡིན་ནོ། །འདི་ནི་དེའི་རང་བཞིན་གྱི་རྟོགས་པའི་ཐབས་སུ་བརྗོད་དེ། ཁྱོད་ཀྱིས་བཤད་པའི་ཚུལ་གྱིས་ནི་འདི་ལྟར་ཐལ་བ་མ་ཡིན་ནོ། །དེས་
[179a]
[179a.1]ན་ཁྱད་པར་སྣ་ཚོགས་ལ་ཕན་པའི་ཞེས་བྱ་བ་ལ་སོགས་པ་ཅི་སྟེ་བརྗོད་ཅེ་ན། བརྗོད་པ་དེར་ཐིམ་པའམ་དེའི་རང་བཞིན་དུ་སྣང་བ་སྒྲ་ཙམ་སྙིང་པོར་གྱུར་པ་མདུན་དུ་སེལ་བར་འགྱུར་བ་ཞོག་སྟེ་འདི་བསམ་མོ། །སྒྲ་ཞེས་ཁྱད་པར་གཅིག་གི་སྒོ་ནས་རྟོགས་པ་པོ་མི་རྟག་པ་ཞེས་
[179a.2]ཁྱད་པར་གཞན་གྱི་སྒོ་ནས་རྟོགས་པ་ན། ཅི་ཁྱད་པར་ཉིད་ལྷག་པར་རྟོགས་པ་ཡིན་ནམ། འོན་ཏེ་ཁྱད་པར་དང་ལྡན་པའི་ཁྱད་པར་འགའ་ཞིག་རྟོགས། དེ་ལ་འདིར་རང་གི་བདག་ཉིད་ཐ་དད་པ་མེད་པའི་ཕྱིར་སྒྲའི་སྒོ་ཁོ་ན་ནས་བདག་ཉིད་ཐམས་ཅད་རྟོགས་པས་མི་རྟག་པ་ཉིད་ཀྱི་སྒོ་
[179a.3]ནས་དེ་ལ་ཐ་མི་དད་པའི་ཁྱད་པར་གང་ཞིག་རྟོགས་པར་འགྱུར། འདིའི་ཁྱད་པར་ཉིད་ཆར་འགྱུར་བ་ཡིན་ནོ། །དེས་ན་སྒྲ་ཞེས་བྱ་བས་འདིའི་རང་བཞིན་ཐམས་ཅད་རྟོགས་ལ་ཁྱད་པར་ནི་གཅིག་ཡིན་ནོ། །དེས་ན་མི་རྟག་པ་ཞེས་རྟོགས་པ་ན་ཁྱད་པར་ལྷག་པ་རྟོགས་པར་འགྱུར་རོ། །དེ་
[179a.4]ནི་སྒྲ་མི་རྟག་པ་དང་འབྲེལ་པ་ཞེས་བྱ་བར་ཡང་རྟོགས་པ་ཁོ་ནའོ། །དེ་ལྟར་ནི་ཁྱད་པར་མ་ཡིན་ཏེ་ཐ་མི་དད་པར་རྟོགས་པ་མེད་པའི་ཕྱིར་རོ་ཞེ་ན། འདི་སུས་ལན་གལ་ཏེ་ཉེ་བར་སྒྱུར་བར་བྱེད་པ་ལྟར་རྣམ་པར་གནས་པའི་ཁྱད་པར་ནི་ཉེ་བར་སྦྱོར་བས་ཐ་མི་དད་པར་རྟོགས་པར་བཟོད་པ་
[179a.5]ཡིན་ན་གདོན་མི་ཟ་བར་རྟོགས་པར་བྱ་བ་གང་ཡིན་པ་དེ་འབྲེལ་པར་རྟོགས་པ་ན། ཇི་ལྟར་གཞན་དུ་རྟོགས་པར་འགྱུར་ཏེ། རང་གི་ངོ་བོ་ཇི་ལྟ་བ་ཁོ་ནར་རྟོགས་པར་འགྱུར་རོ། །ཟླ་བ་ལ་སོགས་པ་དག་ནི་རྟོགས་པ་པོ་ཡུལ་ཐ་དད་པ་ཅན་གྲངས་མེད་པ་མང་པོ་དག་གི་རྟོགས་པས་རྟོགས་པ་
[179a.6]ན་རང་བཞིན་གཞན་དུ་འཛིན་པ་མ་ཡིན་ནོ། །དེས་ན་གདོན་མི་ཟ་བར་རྟོགས་པར་བྱ་བའི་ཁྱད་པར་རང་གི་ངོ་བོ་ཇི་ལྟ་བ་བཞིན་རྟོགས་པར་འགྱུར་མོད། གཞན་གྱི་སྒོ་ནས་རྟོགས་པའི་ཕྱིར་གཞན་གྱིས་དེ་ལྟར་རྟོགས་པར་མི་འཐད་དོ་ཞེ་ན། འདི་ཡང་ཇི་ལྟར་འཐད། གལ་ཏེ་སྒྲ་
[179a.7]ཞེས་བྱ་བས་དོན་དེ་ལྟར་རྟོགས་ན་ཇི་ལྟར་ཁྱད་པར་ཐམས་ཅད་ཀྱིས་དེ་ལྟར་རྟོགས་པར་མི་འགྱུར། དེས་ན་རྣམ་པ་ཐམས་ཅད་དུ་མི་འཐད་པའི་ཕྱིར་སྨྲ་བ་གཞན་དག་ཀྱང་མི་འཐད་པས་ཇི་ལྟར་གཞན་ལ་ཁྲོ། དེའི་ཕྱིར་ཞེས་བྱ་བ་ལ་སོགས་པ་ནི་མཇུག་སྡུད་པའོ། །དོན་གྱི་རང་གི་ངོ་བོ་གཅིག་
[179b]
[179b.1]ཅེས་བྱ་བ་ལ་སོགས་པ་ཁྱད་པར་དོན་གཞན་མ་ཡིན་པ་ལ་བརྗོད་པའི་ཐལ་བ་གང་ཡིན་པ་དེ་ནི་མཚུངས་པ་ཁོ་ནའོ། །གང་དག་ཆོས་དང་ཆོས་ཅན་དག་ཕན་ཚུན་འབྲེལ་པ་མེད་པར་ཐ་དད་པ་དང་ཐ་མི་དད་པ་ཉིད་དུ་ཁས་ལེན་པ་དེའི་ལྟར་ན་ཡང་ཆོས་ཐམས་ཅད་ཆོས་ཅན་ལས་གཞན་མ་ཡིན་
[179b.2]པའི་ཕྱིར་ཆོས་གཅིག་གི་སྒོ་ནས་རྟོགས་པ་ན་ཆོས་མཐའ་དག་རྟོགས་པར་འགྱུར་ཏེ། དེ་དག་དེ་ལས་ཐ་མི་དད་པའི་ཕྱིར་རོ། །ཆོས་ཀྱི་རང་གི་ངོ་བོས་ཐ་དད་པའི་ཕྱིར་མ་ཡིན་ནོ་ཞེ་ན། མ་ཡིན་ཏེ། ཇི་ལྟར་ཐ་མི་དད་པ་དེའི་བདག་ཉིད་ལ་དེ་དག་དེའི་རང་བཞིན་དུ་ཡོད་པའི་ཕྱིར་རོ། །དེ་ལྟ་
[179b.3]མ་ཡིན་ན་གཞན་ཐ་མི་དད་པ་ལ་གཞན་ཐ་དད་པ་ཡིན་པའི་ཕྱིར་ཆོས་དང་ཆོས་ཅན་ཐ་དད་པ་དང་ཐ་དད་པ་མ་ཡིན་པར་སྨྲ་བར་མི་འགྱུར་རོ། །དེས་ན་ཐ་མི་དད་པའི་རང་བཞིན་རྟོགས་པ་ན་དེ་མ་རྟོགས་པར་ཇི་ལྟར་འགྱུར། དེས་ན་དེ་ལྟར་ཐམས་ཅད་འབྲེལ་པ་ཅན་གྱི་བདག་ཉིད་ཁྱད་པར་
[179b.4]དང་ལྡན་པ་བཟུང་བ་ན། ཁྱད་པར་ཐམས་ཅད་འཛིན་པ་ཉིད་དུ་བསྒྲུབས་ནས་ཕ་རོལ་པོ་དག་ཁྱད་པར་བཞིན་དུ་ཁྱད་པར་དང་འབྲེལ་པ་ཅན་ཉིད་ཀྱང་ཐ་དད་པའི་ཕྱིར་ཇི་སྐད་བརྗོད་པའི་ཐ་དད་པར་འགྱུར་བ་མེད་པར་དོགས་པ་བྱེད་པ་ནི། འོན་ཏེ་ཞེས་བྱ་བའོ། །ལན་འདེབས་པའི་ཕྱིར་
[179b.5]བཤད་པ་ན། ཆོས་ཕན་ཞེས་བྱ་བ་ལ་སོགས་པའོ། །ཆོས་རྣམས་ལ་ཕན་པ་དེ་ཉིད་ནུས་པ་ཡིན་ཏེ། ཆོས་ལ་ཕན་འདོགས་པའི་ནུས་པ་ཉིད་ཕན་པ་ཡིན་ཏེ། བྱ་བ་གཞན་ནི་མེད་དོ། །དེ་ཉིད་ཀྱི་ཕྱིར་གལ་ཏེ་ཁྱད་པར་རེ་རེ་ལ་ཕན་པར་བྱེད་པ་ཉིད་དག་ཡིན་ན་ཞེས་འཆད་པར་
[179b.6]འགྱུར་རོ། །དེ་རྣམས་ཐ་དད་ན་འོ་ན་འདི་དག་གང་ལས་ཐ་དད་དེ་ནི་སྐབས་ཀྱི་ཁྱད་པར་སྣ་ཚོགས་ལ་ཕན་པའི་ཞེས་བྱ་བ་ལ་སོགས་པས་ནུས་པ་དང་ཐ་མི་དད་པ་ཉིད་དུ་བསྟན་པ་ཉིད་ཡིན་ནོ། །ནུས་པ་དེ་དག་དེའི་ཅི་ཡིན་ཏེ། དེའི་ཞེས་བྱ་བ་ནི་འབྲེལ་པ་ལས་འགྱུར་བ་ཡིན་ནོ། །
[179b.7]གལ་ཏེ་ཁྱད་པར་དང་ལྡན་པ་དེ་ལས་དེ་དག་ལ་ཕན་མོད། དེ་ཁྱད་པར་དང་ལྡན་པ་འབྲེལ་པ་ཅན་ཉིད་མ་ཡིན་ན་དེའི་ཚེ་དངོས་པོ་ཐ་དད་པ་དག་དེའི་ནུས་པ་ཞེས་བྱ་བར་མི་འཐད་དོ། །གལ་ཏེ་དེ་ལྟ་ཡིན་མོད། དེ་ལས་ཅིར་འགྱུར་ཞེ་ན་བཤད་པ། དེ་ལྟ་ཡིན་ན་ཐུག་མེད་འགྱུར། །
[180a]
[180a.1]འདི་སྐད་བརྗོད་པ་ཡིན་ཏེ། གལ་ཏེ་ཡང་ཁྱད་པར་དང་འབྲེལ་པ་ཅན་ཁྱད་པར་དང་ལྡན་པ་ལས་ཐ་དད་པ་དེ་ལྟར་ན་ཡང་དེ་དག་ཁྱད་པར་དང་ལྡན་པ་དང་མ་འབྲེལ་པ་ཁོ་ན་ནི་མ་ཡིན་ཏེ། དེ་ལྟ་མ་ཡིན་ན་འབྲེལ་པ་ཅན་དེས་ཁྱད་པར་ཅན་དང་འབྲེལ་པར་མི་འགྱུར་རོ། །
[180a.2]ནུས་པའི་ཕྱོགས་ལ་ནུས་པའོ། །དེས་ན་འབྲེལ་པ་ཅན་དང་འབྲེལ་པ་ཅན་ཉིད་དམ། ནུས་པ་ལ་ཕན་འདོགས་པ་ཉིད་ནི་ནུས་པ་དང་ལྡན་པ་ལས་ཐ་དད་པ་མ་ཡིན་ནོ། །དེས་ན་ཐ་དད་པ་མེད་ན་ཆ་མེད་པར་བཟུང་བའི་ཕྱིར་ཁྱད་པར་ཐམས་ཅད་འཛིན་པར་འགྱུར་བ་སྤང་བའི་དོན་དུ་ཐ་
[180a.3]དད་པར་ཁས་ལེན་པ་ལ་ཐུག་པ་མེད་པར་འགྱུར་རོ། །ཇི་སྐད་བཤད་པའི་ཚུལ་ཡང་ཐ་མི་དད་པར་ཐལ་བར་འགྱུར་བའི་ཕྱིར་དེར་ཐ་དད་པར་རྟོགས་པས་ན་ཐུག་པ་མེད་དོ། །གལ་ཏེ་ཞེས་བྱ་བ་ལ་སོགས་པས་ནི་ཆོས་ཕན་ནུས་པ་རྣམས་ཞེས་བྱ་བ་འཆད་དོ། །ནུས་པ་རྣམས་
[180a.4]རང་གི་བདག་ཉིད་དུ་གྱུར་ན་འབྲེལ་པ་མི་དགོས་པ་ཞིག་ན། ཁྱད་པར་ཐམས་ཅད་རྟོགས་པར་འགྱུར་གྱི་འཇིགས་པས་དེ་ནི་ཁས་མ་བླངས་སོ་ཞེས་བཤད་པ་ནི། དེའི་རང་གི་བདག་ཉིད་དུ་གྱུར་པ་དག་མ་ཡིན་པ་ཁོ་ན་སྟེ་ཞེས་བྱ་བའོ། །དེ་མ་ཡིན་ན་ཡང་འབྲེལ་པ་གྲུབ་པར་
[180a.5]བྱ་བའི་ཕྱིར་ཕན་གདགས་པར་བྱ་བ་ཡིན་ཏེ། དེ་མེད་ན་ནི་འབྲེལ་པ་མེད་པར་ཐལ་བར་འགྱུར་བའི་ཕྱིར་རོ། །དེ་བཤད་པ་ནི། དེ་ལས་ཕན་པ་ཞེས་བྱ་བའོ། །དེ་ལྟ་ཡིན་ན་ཐུག་མེད་འགྱུར། །ཞེས་བྱ་བ་བཤད་པའི་ཕྱིར། འོན་ཏེ་ཕན་ན་ནི་ཞེས་སྨོས་སོ། །མདོར་དོན་འདི་
[180a.6]ཐུག་པ་མེད་པར་བརྗོད་པ་བསྟན་པས། འདིས་རྣམ་པར་འབྱེད་པ་ཡིན་ནོ། །གང་གི་ཕྱིར་ཕན་པ་མེད་ན་འབྲེལ་པ་ཅན་ཉིད་མི་རུང་བ་དེའི་ཕྱིར་ཕན་པ་ཁས་ལེན་ན། འདི་ཁྱད་པར་གཅིག་གིས་བཟུང་ན་ཡང་བདག་ཉིད་ཐམས་ཅད་དེའི་ཁྱད་པར་ཐམས་ཅད་ཀྱི་རང་བཞིན་དུ་བཟུང་
[180a.7]བ་ཁོ་ན་ཡིན་ནོ། །ཇི་ལྟར་དེ་བཟུང་ན་ཁྱད་པར་ཐམས་ཅད་བཟུང་བ་ཡིན་ཞེ་ན། བཤད་པ། རང་གི་བདག་ཉིད་དུ་གྱུར་པའི་ཞེས་སྨོས་སོ། །དེ་དག་ནི་དེ་ལས་ཐ་དད་པའི་ཕྱིར་དེའི་བདག་ཉིད་ཁོ་ན་ཡིན་པའི་ཕྱིར་ཏེ། དེ་ལྟ་བུར་གྱུར་པའི་ནུས་པ་དག་གིས་ཁྱད་པར་ལ་ཕན་
[180b]
[180b.1]འདོགས་པའི་རང་བཞིན་གྱི་ནུས་པ་ལ་ཕན་པར་བྱེད་པ་ཡིན་ནོ། །དེ་ལྟ་ན་ཡང་ཕྱོགས་གཅིག་གིས་འཛིན་པར་འདོད་པའི་ཕྱིར་ཇི་ལྟར་ཁྱད་པར་ཐམས་ཅད་འཛིན་ཞེ་ན། གཅིག་པུས་ཞེས་སྨོས་སོ། །གཅིག་ལ་ནི་ཕྱོགས་གཅིག་སྲིད་པ་མ་ཡིན་ནོ། །དེའི་དོན་ནི་འདི་ཡིན་ཏེ།
[180b.2]ཁྱད་པར་དང་འབྲེལ་པ་ཅན་ཉིད་དམ། ཕན་འདོགས་པར་བྱེད་པ་ཉིད་ཁྱད་པར་དང་ལྡན་པ་ལས་ཐ་དད་པ་མ་ཡིན་པ་དེ་ལྟ་ན་ཡང་འདིའི་ཐ་དད་པ་དེ་དག་དང་འབྲེལ་པ་ཅན་ཉིད་དམ་དེ་དག་ལ་ཕན་འདོགས་པར་བྱེད་པ་ཉིད་ནི་ཐ་མི་དད་པ་ཁོ་ནའོ། །དེས་ན་ཁྱད་པར་གཅིག་གི་སྒོ་ནས་འདི་
[180b.3]ཆ་མེད་པར་བཟུང་བ་ན་ཡང་ཁྱད་པར་ཐ་དད་པ་ལ་ཕན་འདོགས་པ་ཉིད་དུ་བཟུང་བའི་ཕྱིར་ཁྱད་པར་ལ་ཕན་འདོགས་པའི་ནུས་པ་བཟུང་བ་ཡིན་ལ་དེ་ལས་ཀྱང་ཁྱད་པར་འཛིན་པ་ཡིན་ནོ། །ཡང་ན་རང་གི་བདག་ཉིད་དུ་གྱུར་པ་ཁྱད་པར་ལ་ཕན་འདོགས་པའི་ནུས་པ་ལ་ཕན་འདོགས་པ་
[180b.4]བཟུང་བ་ཉིད་ན་ཁྱད་པར་ལ་ཕན་འདོགས་པར་བྱེད་པའི་ནུས་པ་དང་བཅས་པར་གཟུང་བར་འགྱུར་རོ། །དེ་དག་བདག་ཉིད་ལ་འབྲེལ་ཕྱིར། །གཅིག་ཤེས་ན་ནི་གཉི་ག་བཟུང་། །ཞེས་བྱ་བས་འདིར་ཁྱད་པར་དང་ལྡན་པ་གཟུང་བའི་སྒོ་ནས་ཁྱད་པར་འཛིན་པའི་ཚུལ་དེ་ནི་སྔར་ཉིད་
[180b.5]བརྗོད་ཟིན་པ་དེས་ན་དེ་མ་བརྗོད་པར་ཁྱད་པར་འབའ་ཞིག་བཟུང་བའི་སྒོ་ནས་ཁྱད་པར་དང་ལྡན་པར་བཟུང་བར་སྟོན་པ་ནི། འདི་ལྟར་ཞེས་བྱ་བ་ལ་སོགས་པའོ། །ཁྱད་པར་ནི་དེས་ནུས་པས་ཕན་གདགས་པར་བྱ་བའི་རང་བཞིན་ནོ། །དེས་ན་ཇི་ལྟར་ཕན་འདོགས་པར་བྱེད་པ་བཟུང་ན་ཕན་
[180b.6]གདགས་པར་བྱ་བ་འཛིན་པ་དེ་བཞིན་དུ་དེས་ཕན་གདགས་པར་བྱ་བ་བཟུང་བ་ན་ཡང་དེ་ལ་ཕན་འདོགས་པར་བྱེད་པ་འཛིན་ཏོ། །དེས་ན་ཁྱད་པར་བཟུང་ན་དེ་ལ་ཕན་འདོགས་པའི་ནུས་པ་བཟུང་བ་ཡིན་ནོ། །ཚུལ་འདི་ཉིད་ཀྱིས་ནུས་པ་བཟུང་བ་ན་ནུས་པ་ལ་ཕན་པར་བྱེད་པར་དངོས་པོ་
[180b.7]བཟུང་བ་ཡིན་ལ་ཁྱད་པར་ཐམས་ཅད་ལ་ཕན་འདོགས་པར་བྱེད་པའི་ནུས་པ་ལ་ཕན་པའི་བདག་ཉིད་དེ་བཟུང་བ་ན་ཡང་ཇི་ལྟར་ཕན་གདགས་པར་བྱ་བ་གཟུང་བའི་སྒོ་ནས་ཕན་འདོགས་པར་བྱེད་པ་འཛིན་པ་དེ་བཞིན་དུ་ཕན་འདོགས་པར་བྱེད་པ་བཟུང་བས་ཀྱང་ཕན་གདགས་པར་
[181a]
[181a.1]བྱ་བ་འཛིན་པའི་ཕྱིར་ནུས་པ་ཐམས་ཅད་ལ་ཕན་འདོགས་པར་བྱེད་པ་རང་གི་བདག་ཉིད་དུ་གྱུར་པ་བཟུང་བས་ནུས་པ་ཐམས་ཅད་འཛིན་པ་དེ་ལྟ་ན་ཡང་ཁྱད་པར་ཐམས་ཅད་གཟུང་བར་འགྱུར་རོ་ཞེས་བཤད་པ་ནི་དེ་བཟུང་ན་ཞེས་བྱ་བ་ལ་སོགས་པའོ། །ཆོས་
[181a.2]ལ་ཕན་འདོགས་པར་བྱེད་པ་ཐ་དད་པས་སྔར་བཤད་པའི་ཐལ་བ་སྤོང་བ་ལ་ཐུག་པ་མེད་པར་འགྱུར་བ་བསྟན་པའི་ཕྱིར་བཤད་པ། ཆོས་ལ་ཕན་འདོགས་པ་ཐ་དད་པས་ན་ཁྱད་པར་ཐམས་ཅད་བཟུང་བར་ཐལ་བར་འགྱུར་བ་སྤངས་ཀྱང་ནུས་པ་ལ་ཕན་འདོགས་པར་བྱེད་པ་
[181a.3]ཐ་མི་དད་པས་སླར་ཐལ་བ་པོ་ན་འདུག་གོ། །འོན་ཏེ་དེར་ཡང་ཕན་པ་ཐ་དད་པར་བརྟགས་པ་དེ་ཉིད་ཀྱིས་སྤོང་བར་བྱེད་ན། དེའི་ཚེ་མཐར་ཐུག་པ་མེད་དོ། །འདི་ལྟར་ནུས་པ་ལས་ཕན་འདོགས་པར་བྱེད་པའི་ནུས་པ་ཐ་དད་ན་ཕན་འདོགས་པར་བྱེད་པའི་ནུས་པ་ལ་ཕན་འདོགས་
[181a.4]པར་བྱེད་པའི་ནུས་པ་དེ་ཡང་རང་གི་བདག་ཉིད་ཁོ་ནས་ཕན་གདགས་པར་བྱ་བ་ཡིན་པ་དེས་ན་ཐལ་བ་དེ་ཉིད་དུ་འགྱུར་བས་དེ་ལྟར་ན་དེར་ཡང་ཐ་དད་པར་རྟོགས་པའི་ཕྱིར་ཁྱད་པར་དང་དེའི་ནུས་པ་རྣམས་མི་འབྱོར་བའི་ཕྱིར་ཏེ། མི་འཐད་པའི་ཕྱིར་དེ་ལ་ཕན་པའི་བདག་ཉིད་ཁྱད་
[181a.5]པར་ལ་ཕན་འདོགས་པར་བྱེད་པར་གྱུར་པ་ཁྱད་པར་དང་ལྡན་པ་དེ་གཅིག་པུ་ནམ་ཡང་ཁྱད་པར་དང་ནུས་པ་དེ་དག་གིས་མི་འཛིན་པས། དེ་དང་ལྡན་པ་ཉིད་དུ་འཛིན་པར་མི་འགྱུར་རོ། །འདི་སྐད་བརྗོད་པ་ཡིན་ཏེ། གང་གི་ཕྱིར་ཁྱད་པར་དང་དེའི་ནུས་པ་དག་མི་འཐད་པ་
[181a.6]དེས་ན་ནམ་ཡང་ཁྱད་པར་དང་ནུས་པ་དག་གིས་ཁྱད་པར་དང་ལྡན་པ་མི་འཛིན་པར་འགྱུར་རོ། །ཁྱད་པར་མེད་པར་འཛིན་པར་བྱེད་པ་ཉིད་དུ་བརྗོད་པ་ཡང་ཁྱད་པར་ཉེ་བར་སྒྱུར་བར་བྱེད་པ་ཉིད་ཀྱིས་འཛིན་པ་ལ་ཉེ་བར་སྦྱོར་ལ། ནུས་པ་དག་ནི་ཉེ་བར་སྒྱུར་བའི་རྒྱུ་ཉིད་དམ།
[181a.7]འབྲེལ་པར་བྱེད་པ་ཉིད་ཀྱི་ཕྱིར་འབྲེལ་པ་ཅན་ཉིད་དོ། །དེ་ཉིད་ཀྱི་ཕྱིར་གཉི་གའི་རང་བཞིན་མེད་པ་དེ་ཉིད་ཀྱིས་འཛིན་པ་མེད་པར་གསལ་བར་བྱས་པ་ཡིན་ནོ། །དེས་ན་ཕན་འདོགས་པའི་བདག་ཉིད་མ་བཟུང་བ་ནི་ནུས་པར་མི་འཐད་པའི་ཕྱིར་དང་། འབྲེལ་པ་མེད་པས་
[181b]
[181b.1]ཁྱད་པར་དུ་ཡང་མི་འཐད་པའི་ཕྱིར་དེ་དང་ལྡན་པར་འཛིན་པ་མེད་པ་ཡིན་ནོ། །ཡང་ཇི་ལྟར་ཁྱད་པར་དང་དེའི་ནུས་པ་དག་མི་འབྱོར་ཞེ་ན་གཏན་ཚིགས་བཤད་པ་ནུས་པ་གཞན་དང་གཞན་དག་ཁོ་ན་ལ་མཐའ་ཐུག་པ་མེད་པས་སོ། །འབྲེལ་པ་ཅན་ཐ་དད་པ་དང་འབྲེལ་པ་ཅན་ཉིད་ཐ་
[181b.2]མི་དད་ན་ཡང་ཐལ་བ་དེ་ཉིད་དུ་འགྱུར་བས་དེར་ཡང་དེ་ཁོ་ན་བཞིན་ཐ་དད་པ་རྟོགས་པར་ཐལ་བས་ན་ཐུག་པ་མེད་པའི་ཕྱིར་མི་འཐད་དོ། །གལ་ཏེ་དེ་ལྟ་ན་ནུས་པ་མི་འཐད་པར་འགྱུར་གྱི། ཁྱད་པར་བདག་ནི་མ་ཡིན་ནོ་ཞེ་ན་མ་ཡིན་ཏེ། འབྲེལ་པ་མེད་ན་ཁྱད་པར་དག་མི་
[181b.3]འཐད་པའི་ཕྱིར་རོ། །དེ་ཉིད་ཀྱི་ཕྱིར་དེ་དང་ལྡན་པ་ཉིད་དུ་འཛིན་པར་མི་འགྱུར་རོ་ཞེས་བཤད་དོ། །དེས་ན་དེ་ལྟར་གང་གི་ལྟར་བློ་ཁྱད་པར་ཅན་ནི་དོན་ཅེས་བྱ་བ། ཁྱད་པར་སྣ་ཚོགས་གང་ལ་ཡོད། །ཅེས་བྱ་བའི་ཕྱོགས་ལ་སུན་འབྱིན་པ་བརྗོད་ནས། ཁྱད་པར་སྣ་
[181b.4]ཚོགས་ཉིད་དོན་ཡིན་པས་ཁྱད་པར་སྣ་ཚོགས་ཅན་དོན་ཞེས་བྱ་བའི་ཕྱོགས་འདི་དགག་པའི་ཕྱིར་རེ་ཞིག་འདི་ལ་སྔར་བརྗོད་པའི་སྐྱོན་མེད་པར་བཤད་པ་ནི་ཡང་གལ་ཏེ་ཞེས་བྱ་བའོ། །སྒྲ་དང་ཤེས་པ་རྣམས་ཀྱི་ཁྱད་པར་དག་ཉི་ཚེ་ལ་ཉེ་བར་སྦྱོར་ཏེ། ཡུལ་དུ་བྱས་པར་
[181b.5]འགྱུར་གྱི་དེའི་སྒོ་ནས་ཁྱད་པར་དང་ལྡན་པ་ཡང་ཡུལ་དུ་བྱེད་པ་ནི་མ་ཡིན་ན་དེའི་ཚེ་གཅིག་པོ་དེ་ཁྱད་པར་འབའ་ཞིག་ལ་མ་འབྲེལ་པའི་ཕྱིར་ཏེ། མེད་པའི་ཕྱིར་ཁྱད་པར་དང་ལྡན་པ་དེ་རྟོགས་པའི་སྒོ་ནས་ཁྱད་པར་ཐམས་ཅད་རྟོགས་པར་འགྱུར་བ་བརྗོད་པ་གང་ཡིན་པ་དེར་མི་
[181b.6]འགྱུར་རོ། །དེས་ན་བ་ལང་ཞེས་ཁྱད་པར་གཅིག་རྟོགས་པ་ན་མི་རྟག་པ་ཉིད་ལ་སོགས་པའི་ཁྱད་པར་གཞན་རྟོགས་པར་བྱ་བའི་ཕྱིར་མི་རྟག་པ་ལ་སོགས་པའི་སྒྲ་འཇུག་གོ། །གང་གིས་དེ་རྟོགས་པའི་སྒོ་ནས་ཐམས་ཅད་རྟོགས་པར་འགྱུར་བ་ཁྱད་པར་དང་ལྡན་པ་ནི་རྟོགས་
[181b.7]པ་མ་ཡིན་ནོ་ཞེ་ན། འོན་ཀྱང་ཉེས་པ་གཞན་དུ་ཐལ་བར་འགྱུར་རོ་ཞེས་བཤད་པ་ནི། དེའི་ཚེ་ཡང་ཞེས་བྱ་བ་ཡིན་ནོ། །གལ་ཏེ་དེ་དག་བདག་ཉིད་ལ་འབྲེལ་པའི་ཕྱིར་ཞེས་བྱ་བ་བསྟན་པའི་ཚུལ་གྱིས་ན། འབྲེལ་པ་གཉི་ག་ལ་བརྟེན་པའི་ཕྱིར་ཁྱད་པར་འབའ་ཞིག་རྟོགས་པ་
[182a]
[182a.1]ན་ཡང་ཁྱད་པར་དང་ལྡན་པར་འགྱུར་བ་ཉིད་དེ། གཅིག་ཤེས་ན་ནི་གཉི་ག་གཟུང་། །ཞེས་བསྟན་པའི་ཕྱིར་རོ་ཞེ་ན། བདེན་མོད་ཀྱང་འདི་ནི་དེ་ཉིད་དུ་བསྟན་ཟིན་པའི་ཕྱིར་སུན་འབྱིན་པ་གཞན་ཉེ་བར་བཀོད་པ་ཡིན་ནོ། །སྒྲ་དག་གིས་ཁྱད་པར་དང་ལྡན་པ་དེ་མ་
[182a.2]བརྗོད་པའི་ཕྱིར་རྟོགས་པ་པོ་མི་འཇུག་པས་སྒྲ་སྦྱོར་བ་དོན་མེད་པར་འགྱུར་རོ། །གལ་ཏེ་ཁྱད་པར་རྟོགས་པ་སྒྲའི་དོན་ཡིན་གྱི་འཇུག་པ་ནི་མ་ཡིན་པས་ན་ཇི་ལྟར་དོན་མེད་པ་ཡིན་ཞེ་ན་བཤད་པ། བསྒྲུབ་པ་དང་དགག་པ་ཞེས་བྱ་བ་ལ་སོགས་པའོ། །སྒྲུབ་པ་ནི་སྒྲུབ་པར་བྱེད་པའི་སྒྲ་
[182a.3]བུམ་པ་ཡོད་དོ་ཞེས་བྱ་བ་ལྟ་བུ་ཡིན་ལ་དགག་པ་ནི་མེད་ཅེས་དགག་པར་བྱེད་པའོ། །དེ་དག་གི་ཐ་སྙད་གདགས་པ་བུམ་པ་ཡོད་དོ་མེད་དོ་ཞེས་དེ་ལྟ་བུའི་དོན་རྟོགས་པ་གང་ཡིན་པའི་ཐ་སྙད་དེ་ཐམས་ཅད་ནི་དོན་མེད་པའི་རྟེན་ཏེ། རྒྱུ་མཚན་གང་ལ་ཡོད་པའོ། །བསྒྲུབས་པའམ་
[182a.4]བཀག་པའི་དོན་བྱ་བ་སྒྲུབ་པར་བྱེད་པ་ཡིན་པའི་ཕྱིར་སྒྲུབ་པ་དང་དགག་པ་དག་དོན་བྱེད་པའི་རྒྱུ་མཚན་ཅན་ཡིན་ནོ། །འདི་སྐད་བརྗོད་པ་ཡིན་ཏེ་ཇི་ལྟ་བུའི་དོན་ཡུལ་དུ་གྱུར་པས་སྒྲས་བརྗོད་པར་བྱ་བ་དང་རྗོད་པར་བྱེད་པའི་དངོས་པོར་རྟོགས་པ་དེ་ཉིད་འདིའི་བརྗོད་པར་བྱ་བ་ཡིན་ཏེ། དཔེར་
[182a.5]ན་བཞོས་ཤིག་འབྲས་བུས་མཆོད་ཅིག་ཅེས་བྱ་བ་ལྟ་བུའོ། །ཁྱད་པར་རྣམས་ཀྱིས་ནི་དོན་བྱ་བར་མི་ནུས་ཏེ། བ་ལང་ཉིད་བཞོ་བའམ། འབྲས་བུའི་རིགས་ཉིད་མཆོད་པར་བྱར་ཡོད་པ་མ་ཡིན་ཏེ། བརྔོ་བཏགས་བྱ་བ་ལ་སོགས་པའི་དངོས་པོས་དུམ་བུར་གཏུབས་པའི་མཐར་
[182a.6]ཐུག་པ་མ་གྲུབ་པའི་ཕྱིར་རོ། །སྒྲའི་དོན་འབྲེལ་པ་མེད་པར་ཡང་འགྱུར་ཏེ། མེས་སྤོངས་ཤིག་ཅེས་བྱ་བ་བཞིན་ནོ། །དེའི་ཕྱིར་འཇུག་པ་སྲིད་པའི་དོན་ལ་སྒྲ་འཇུག་པས་ན། ཐམས་ཅད་ཁྱད་པར་དང་ལྡན་པའི་ཡུལ་ཅན་ཉིད་དུ་རྟོགས་སོ། །དེ་གཞན་དུ་གྱུར་པ་ལ་འཇུག་ན་ནི་དེ་
[182a.7]དགོས་པ་ཅན་དུ་མི་འགྱུར་རོ། །དེ་བཤད་པ་ནི་ནུས་པ་མི་བརྗོད་པས་སྒྲ་སྦྱོར་བ་དག་གིས་ཅི་ཞིག་བྱ། དེའི་དགོས་པ་ཅན་མ་ཡིན་ཡང་རྟོགས་པ་མ་ཡིན་པ་དེས་ན་ཁྱད་པར་ཉི་ཚེའི་ཡུལ་ཅན་མ་ཡིན་ནོ། །དེ་ལྟར་ན་ཡང་ཁྱད་པར་མ་ཡིན་པར་འགྱུར་རོ། །རང་གིས་ཉེ་བར་
[182b]
[182b.1]བསྒྲུབ་པས་གཞན་རྟོགས་པར་བྱེད་པ་ཁོ་ན་ཁྱད་པར་ཡིན་ཏེ། གཞན་དུ་ན་བུམ་པ་ལ་སོགས་པ་དག་ཀྱང་ཕན་ཚུན་ཁྱད་པར་དུ་འགྱུར་རོ། །འཕྲོད་པ་འདུ་བས་དེ་ལྟར་འགྱུར་ན་ནི་དེ་ཁྱད་པར་དེ་དང་ལྡན་པ་དག་ལ་ཁྱད་པར་མེད་པས་ན་ཁྱད་པར་མེད་པ་ཁོ་ན་ཁྱད་པར་དང་ཁྱད་པར་
[182b.2]ཅན་གྱི་དངོས་པོར་འགྱུར་རོ། །ཁྱད་པར་འབའ་ཞིག་རྟོགས་ན་ནི་ཁྱད་པར་གྱི་ཆོས་མེད་པས་ན་ཁྱད་པར་ཉིད་མ་ཡིན་ནོ། །དེ་བཤད་པ་ནི་འགའ་ཞིག་ལ་ཞེས་བྱ་བ་སྟེ། དེ་ལས་གཞན་པའི་དངོས་པོ་འགའ་ཞིག་ལ་སྒྲ་དང་ཤེས་པ་དག་ཞུགས་ན་ནིའོ། །གང་གི་ཚེ་ཁྱད་པར་ལས་
[182b.3]མ་རྟོགས་པའི་དངོས་པོ་ལ་སྒྲ་དང་ཤེས་པ་ཞུགས་ན་འགྱུར་རོ། །དེ་ལས་ཐ་དད་པ་ལ་ཞུགས་པ་ན། ཇི་ལྟར་དེ་དག་ལ་ཉེ་བར་སྦྱོར་ཞེ་ན། བཤད་པ། རང་གི་ངོ་བོ་ཐ་དད་པར་གྱུར་པའི་གཙོ་བོ་འགའ་ཡན་ལག་ཏུ་གྱུར་པའི་ཕྱིར། གཙོ་བོ་དེའི་ཡན་ལག་ཡིན་པ་ལ་ལྟོས་ནས་ཁྱད་
[182b.4]པར་ཞེས་བརྗོད་དོ། །ཁྱད་པར་དང་ལྡན་པ་ནི། རང་གི་ངོ་བོས་ངེས་པར་མི་རྟོགས་པར་ཁྱད་པར་དག་ཉིད་ཀྱིས་བསྟན་པར་བྱ་བ་ཡིན་པར་དེས་སྨྲ་བ་རྣམས་ཀྱིས་ཁས་བླང་བར་བྱ་སྟེ། དེ་ལྟ་མ་ཡིན་ན་ཆོས་ཅན་ཆོས་ཀྱིས་རྣམ་པར་བཅད་ཀྱང་སོ་སོར་རང་གི་ངོ་བོར་རྟོགས་
[182b.5]པར་འགྱུར་ཏེ་དབྱུག་པ་རྣམ་པར་བཅད་པའི་དབྱུག་པ་ཅན་བཞིན་ནོ། །བ་ལང་ངོ་ཞེས་རྟོགས་པ་ན་ནི་དབྱུག་པའི་རང་བཞིན་ལས་སྐྱེས་བུ་བཞིན་དུ་དེའི་རང་བཞིན་མ་ཡིན་པའི་བ་ལང་ཉིད་དང་ལྡན་པ་འགའ་ཡང་རྟོགས་པ་མེད་དོ། །དེས་ན་འདིའི་རང་གི་ངོ་བོས་མི་རྟོགས་པས་
[182b.6]ཁྱད་པར་གྱི་རང་བཞིན་ཉིད་ཀྱི་རང་བཞིན་དང་ལྡན་པར་སྣང་བ་ཡིན་ནོ། །དེས་ན་ཁྱད་པར་ལ་གནས་པའི་སྒྲ་དང་རྟོགས་པ་དག་དེའི་ངོ་བོ་ཉིད་དུ་ཁྱད་པར་དང་ལྡན་པ་རྟོགས་པ་ལས་ཁྱད་པར་དང་ལྡན་པ་ལ་འཇུག་པའི་ཕྱིར་འདི་དག་ནི་གཙོ་བོ་དེའི་ཡན་ལག་ཏུ་འགྱུར་རོ། །དེ་ཉིད་
[182b.7]ཀྱི་ཕྱིར་འགའ་ཞིག་ལ་དང་འགའ་ཞེས་ཁྱད་པར་དང་ལྡན་པ་ངེས་པར་རྟོགས་པ་མེད་པའི་ངོ་བོར་བསྟན་ཏོ། །ཁྱད་པར་དང་ལྡན་པ་སྒྲའི་ཡུལ་མ་ཡིན་ན་ནི་ཚུལ་འདི་ཡོད་པ་མ་ཡིན་ནོ་ཞེས་བཤད་པ་ནི། སྒྲ་དག་གིས་དེ་ཞེས་བྱ་བའོ། །གལ་ཏེ་དེ་ལ་འཇུག་པར་མ་གྲུབ་པའི་
[183a]
[183a.1]ཕྱིར་ཁྱད་པར་དང་ལྡན་པ་སྒྲའི་ཡུལ་མ་ཡིན་མོད། འོན་ཀྱང་རྣམ་པར་རྟོག་པ་དང་བཅས་པའི་མངོན་སུམ་ལ་སོགས་པས་དེ་ལྟར་རྟོགས་པའི་ཕྱིར་ཇི་ལྟར་ཁྱད་པར་དག་ཏུ་མི་འགྱུར་ཞེ་ན། གལ་ཏེ་རྣམ་པར་རྟོག་པ་དང་བཅས་པ་ལ་དེ་ལྟར་སྣང་ན་འོ་ན་
[183a.2]དེར་ཁྱད་པར་ཅན་རྟོགས་པ་དང་འབྲེལ་པའི་སྐྱོན་དུ་ཇི་ལྟར་མི་འགྱུར། དེ་ལ་སྒྲ་སྲིད་པའི་ཕྱིར་སྒྲ་དེ་ལྟར་འཇུག་པ་ཡང་སུས་འགོག །སྒྲ་སྦྱར་བ་དོན་མེད་པར་འགྱུར་རོ་ཞེས་གང་བརྗོད་པའི་ཉེས་པ་དེ་ནི་མེད་དེ་ཤེས་པར་བྱས་པས་མཚོན་པའི་ཕྱིར་རོ། །སྒྲས་ནི་ཁྱད་པར་མཚོན་
[183a.3]པར་བྱེད་ཅིང་རྟོགས་པར་བྱེད་ལ་ཤེས་པར་བྱེད་པའི་ཁྱད་པར་དེས་ནི་སྒྲ་དེའི་བརྗོད་བྱ་མ་ཡིན་ཡང་ཁྱད་པར་དང་ལྡན་པ་མཚོན་པར་བྱེད་དེ་གང་གཱའི་སྒྲའི་ཞེས་བྱ་བའི་གང་གཱའི་དོན་གྱིས་འགྲམ་བཞིན་ནོ། །གང་གཱ་འབོད་དོ་ཞེས་བྱ་བ་ནི་རྒྱུན་ལ་མི་སྲིད་པས་ན་དེས་མཚོན་པའི་འགྲམ་
[183a.4]དུ་ཡིན་པར་རྟོགས་པ་ཡིན་ནོ། །མཚོན་པའི་སྒྲའི་བྱེད་པའམ་དོན་གྱིས་བྱེད་པ་ཡིན་པ་ནི་ཕ་རོལ་པོ་རང་ཇི་ལྟར་ཁས་བླངས་པ་བཞིན་རྟོགས་པར་བྱའོ། །དེ་བས་ན་བ་ལང་ལ་སོགས་པའི་རིགས་རྗོད་པར་བྱེད་པ་དག་གིས་ཀྱང་མཚོན་པའི་སྟོབས་ཀྱིས་དོགས་བཞིན་དུ་འབྲེལ་པའི་
[183a.5]ཁྱད་པར་དང་ལྡན་པ་ཉིད་རྟོགས་པར་འགྱུར་རོ་ཞེ་ན། དེར་སློབ་དཔོན་སྐབས་རྙེད་ནས་ལངས་པ་ནི། ཐལ་བར་འགྱུར་བར་མཚུངས་ཏེ་ཞེས་བྱ་བའོ། །ཁྱད་པར་དང་ལྡན་པར་བརྗོད་པ་ལ་བཤད་པའི་ཐལ་བ་གང་ཡིན་པ་དེ་ནི་ཁྱད་པར་འབའ་ཞིག་བརྗོད་པ་ལ་ཡང་མཚུངས་སོ། །ཇི་ལྟར་
[183a.6]མཚུངས་པ་དེ་བཤད་པ་ནི་རེ་ཞིག་ཅེས་བྱ་བའོ། །རེ་ཞིག་ཁྱད་པར་གྱིས་ཉེ་བར་མཚོན་པ་གང་ཡིན་པ་དེ་ནི་འདིས་བདག་ཉིད་ཐམས་ཅད་དཔྱིས་ཕྱིན་པར་རྟོགས་པ་ཡིན་ནོ། །དེས་ན་དེ་ཁྱད་པར་དག་གིས་ཉེ་བར་མཚོན་པ་ནི་ཞེས་འཐད་པར་འགྱུར་བ་སོ་ན་འདུག་པར་བརྗོད་པར་བྱ་བ་ཡིན་
[183a.7]ནོ། །ཁྱད་པར་རྣམས་ཀྱི་ཉེ་བར་མཚོན་པའི་བྱེད་པ་དེའི་མཐར་ཐུག་པ་ཡིན་ན། གཅིག་གིས་ཉེ་བར་མཚོན་པ་ཡང་བདག་ཉིད་ཐམས་ཅད་ཉེ་བར་མཚོན་པ་ཡིན་ནོ། །གང་གི་ཚེ་སྒྲས་ཁྱད་པར་གཅིག་གི་སྒོ་ནས་ཉེ་བར་མཚོན་པ་དེའི་ཚེ་འདི་ལ་ཁྱད་པར་གཞན་དག་གི་སྒོ་ནས་
[183b]
[183b.1]མཚོན་པར་བྱ་བའི་རང་བཞིན་གཞན་མ་ལུས་ཀྱི། འོན་ཀྱང་སྒྲ་གཅིག་ཁོ་ནས་ཁྱད་པར་གཅིག་གི་སྒོ་ནས་ཉེ་བར་མཚོན་པར་བྱེད་པ་ན། བདག་ཉིད་ཐམས་ཅད་ཀྱིས་ཉེ་བར་མཚོན་པར་འགྱུར་རོ། །ཇི་ལྟར་ཞེ་ན། མེད་ན་མེད་པའི་ཕྱིར་ཞེས་སྨོས་སོ། །མཚན་ཉིད་ནི་འབྲེལ་པ་
[183b.2]མེད་པ་བརྟེན་ནས་འཇུག་སྟེ། དེས་ན་ཁྱད་པར་རྣམས་ནི་མེད་ན་མེད་པ་ཉིད་ཀྱིས་འདིའི་མཚོན་པར་བྱེད་པར་འགྱུར་རོ། །འདིའི་མེད་ན་མེད་པར་ཡང་གཅིག་གིས་ཡིན་གྱི་འདིར་འགའ་ཞིག་ཆ་འགའ་ཞིག་གིས་མ་ཡིན་ནོ། །མེད་ན་མེད་པས་མཚོན་པར་འགྱུར་བ་ན་འདིར་ཁྱད་
[183b.3]པར་གཅིག་གི་སྒོ་ནས་ཀྱང་བདག་ཉིད་ཐམས་ཅད་འགྱུར་རོ། །གཏན་ཚིགས་དེ་བས་ན་ཐལ་བར་འགྱུར་བ་སོ་ན་འདུག་པ་ཡིན་ནོ། །བློ་ལ་གནས་པའི་ཁྱད་པར་དང་ལྡན་པའི་རང་གི་ངོ་བོ་ཇི་ལྟ་བ་བཞིན་རྟོགས་ན་ཡང་ཁྱད་པར་གཅིག་གི་སྒོ་ནས་ཁྱད་པར་མཐའ་དག་འཛིན་
[183b.4]པར་འགྱུར་རོ། །བློ་ལ་གནས་པ་དེ་ཡང་སྒྲས་རྗོད་པར་བྱེད་པས་བྱེད་ཀྱང་རུང་མཚན་ཉིད་འཇུག་པས་ཀྱང་རུང་སྟེ་ཁྱད་པར་འགའ་ཡང་མེད་དོ། །དེ་བརྗོད་པ་ནི་འདི་སྒྲས་ཉེ་བར་མཚོན་ཀྱང་རུང་ཞེས་བྱ་བའོ། །འདིས་ནི་རྗོད་པར་བྱེད་པའི་ཁྱད་པར་བརྗོད་དོ། །དེས་ཉེ་བར་མཚོན་
[183b.5]པའི་ཁྱད་པར་ངག་གིས་ཉེ་བར་མཚོན་ཀྱང་རུང་ཞེས་བྱ་བས་ནི་མཚན་ཉིད་དོ། །གཉི་ག་ལྟར་ཡང་དེ་ལ་རྟོགས་པ་ཁྱད་པར་མེད་པའི་ཕྱིར་རོ་ཞེས་བཤད་པ་ནི། རེ་ཞིག་དེའི་ཚེ་ཞེས་བྱ་བའོ། །འདིར་མཚོན་པ་ལ་མངོན་པར་ཞེན་པ་མེད་དེ་རྣམ་པ་གང་ཡང་རུང་བས་ཀྱང་ཁྱད་པར་
[183b.6]དང་ལྡན་པ་རྟོགས་པར་ཁས་བླངས་པ་ན་ཁྱད་པར་ཐམས་ཅད་འཛིན་པར་ཐལ་བར་འགྱུར་བ་ཡིན་ནོ། །རེ་ཞིག་ཁྱད་པར་དག་པར་རྟོགས་པར་སྨྲ་བ་ཐམས་ཅད་ཀྱིས་ཀྱང་གསལ་བར་རྟོགས་པ་ལ་ལྟོས་པར་བྱ་བ་ཡིན་ཏེ། གཞན་དུ་ན་སྒྲས་དོན་རྟོགས་པར་མཐར་ཕྱིན་པར་མི་འགྱུར་
[183b.7]བའི་ཕྱིར་རོ། །དེས་ན་རྣམ་པ་གང་གིས་དེ་ལྟར་འདོད་དེ། ཐམས་ཅད་དུ་ཉེས་པ་འདི་ཁྱད་པར་མེད་དོ། །དེའི་ཕྱིར་ཞེས་བྱ་བ་ལ་སོགས་པ་ནི་མཇུག་སྡུད་པའོ། །དེ་ཡང་སྐབས་ཀྱི་དོན་ཉེ་བར་སྡུད་པ་ནི་བསྡུ་བའི་ཚིགས་སུ་བཅད་པ་ཡིན་ནོ། །ཁྱད་པར་གཅིག་པ་ལ་ཕན་པར་བྱེད་
[184a]
[184a.1]པ་གང་ཡིན་པ་ཤེས་པའི་ཡུལ་དུ་གྱུར་པའི་ཕྱིར་བཟུང་ན་ནི། མཐོང་བ་དེ་གཞི་དེ་ལ་ལྟོས་ཏེ། ཁྱད་པར་གཞན་གྱི་ཡུལ་ཅན་གྱིས་མ་མཐོང་བའི་ཕན་པ་དེ་དག་ནི་གཞན་མིན་ནོ། །གལ་ཏེ་དེ་ལྟར་ཡིན་མོད། དེས་ཅིར་འགྱུར་ཞེ་ན། བཤད་པ་གཏན་ཚིགས་དེའི་
[184a.2]ཕྱིར་ཕན་པར་བྱེད་པ་མཐོང་བ་དེར་མ་མཐོང་བའི་ཕན་པ་མེད་དོ་ཞེས་འབྲེལ་ཏོ། །དེ་ལས་ཀྱང་ཅིར་འགྱུར་ཞེ་ན། དེ་བཟུང་ན་ནི་ཐམས་ཅད་བཟུང་། །ཞེས་སྨོས་སོ། །རང་གི་ངོ་བོ་ཁྱད་པར་དང་ལྡན་པ་ལ་ཐམས་ཅད་མ་ཡིན་པ་མི་སྲིད་དེ་ཆ་མེད་པའི་ཕྱིར་རོ། །དེས་ན་ཁྱད་པར་
[184a.3]ཐམས་ཅད་ཀྱིས་ཐམས་ཅད་དུ་འགྱུར་རོ། །དེས་ན་དེ་ལྟར་ཚད་མ་གཞན་འཇུག་པའི་སྟོབས་ཀྱིས་རྣམ་པར་རྟོག་པ་རྣམས་སྒྲུབ་པའི་ཡུལ་ཅན་ཡིན་པ་བཟློག་པ་ན་ཕ་རོལ་པོ་དག་འདིར་ཡང་མངོན་སུམ་བཞིན་དུ་འཛིན་པར་དོགས་པར་བྱེད་པས་དེའི་དོགས་པ་བསུ་བ་ནི་གལ་ཏེ་ཞེས་
[184a.4]བྱ་བའོ། །ཇི་ལྟར་ཁྱོད་ཀྱི་ཕྱོགས་ལ་མངོན་སུམ་གྱིས་ཆོས་ཐམས་ཅད་ཀྱི་བདག་ཉིད་དུ་གྱུར་པའི་དོན་བཟུང་ཡང་འཁྲུལ་པས་རྣམ་པ་བསྐལ་པས་ན་ཚད་མ་གཞན་ལ་ལྟོས་པ་དེ་བཞིན་དུ་རྣམ་པར་རྟོག་པས་ཀྱང་ཐམས་ཅད་ལ་ཕན་འདོགས་པའི་བདག་ཉིད་ཀྱི་དངོས་པོ་བཟུང་བ་
[184a.5]འཁྲུལ་པའི་དབང་གིས་རང་བཞིན་མཐའ་དག་མ་ངེས་པ་ན་ཚད་མ་གཞན་འཇུག་པའི་ཕྱིར་ཉེས་པ་འགའ་ཞིག་མེད་དོ། །འདི་ལྟར་གང་གི་ཚེ་ཁྱད་པར་གཅིག་གི་སྒོ་ནས་ཀྱང་ཁྱད་པར་ཅན་བཟུང་བ་དེའི་ཚེ། གལ་ཏེ་ཡང་ཁྱད་པར་ཐམས་ཅད་ལ་ཕན་འདོགས་པར་བྱེད་པ་དེ་གཟུང་
[184a.6]བའི་ཕྱིར་ཁྱད་པར་ཐམས་ཅད་འཛིན་པ་འཐོབ་པ་དེ་ལྟ་ན་ཡང་ཁྱད་པར་གཞན་ལ་ཕན་འདོགས་པར་བྱེད་པའམ་ཁྱད་པར་གཞན་ལ་འཁྲུལ་པ་ཡོད་པས་དེ་ངེས་པར་མི་འཛིན་པའི་ཕྱིར་ཚད་མ་གཞན་ལ་ལྟོས་སོ། །དེས་ན་ཁྱད་པར་གཞན་དེ་རྟོགས་པར་བྱེད་པས་དེ་ལ་འཇུག་པ་ན་དེ་ལ་འཁྲུལ་པ་ཟློག་པར་
[184a.7]བྱེད་པས་གོ་བར་བྱེད་པ་ཡིན། དེས་ན་ཁྱད་པར་དེ་དང་དེའི་སྒོ་ནས་དོན་རྟོགས་པར་བྱེད་པའི་ཚད་མས་གཞན་རྣམས་དེ་སྲིད་ཙམ་གྱི་ཡུལ་ཅན་གྱི་འཁྲུལ་པ་ཟློག་པར་བྱེད་པ་ཉིད་ཀྱིས་ཚད་མ་གཞན་གྱི་ཡུལ་རྟོགས་པར་བྱེད་པ་མ་ཡིན་ནོ་ཞེས་བྱ་བའོ། །གལ་ཏེ་འདི་སྙམ་དུ་ཞེས་བྱ་བས་ནི་རྣམ་པར་འགྲེལ་
[184b]
[184b.1]ཏོ། །གལ་ཏེ་དེ་ལྟ་ན་ཡང་ཞེས་བྱ་བ་ལ་སོགས་པས་ལན་འདེབས་སོ། །རྣམ་པར་རྟོག་པ་གཅིག་གིས་བཟུང་བ་ལ་ཡང་འཁྲུལ་པས་གཞན་བཟློག་པའི་དོན་དུ་ཞུགས་པའི་ཤེས་པ་གང་ཡིན་པ་དེ་ནི་རྣམ་པར་གཅོད་པའི་ཡུལ་ཅན་དུ་གྲུབ་བོ། །འདི་ལྟར་འཁྲུལ་པ་དེ་བཟློག་པ་ནི་དེས་སྒྲོ་
[184b.2]བཏགས་པའི་དོན་དང་ཐ་མི་དད་པར་བཟློག་པའི་སྒོ་ནས་དོན་རྟོགས་པར་བྱེད་ལ། འདི་ལ་སྔོན་པོ་མ་ཡིན་ནོ་ཞེས་བྱ་བ་ལ་སོགས་པའི་ཤེས་པ་རྣམས་ཀྱི་སེལ་བའི་ཡུལ་ཅན་གྱི་དངོས་པོ་ཡང་འདི་ཁོ་ནར་ཟད་དོ། །ཁྱད་པར་ནི་འདི་ཡིན་ཏེ། ཁོ་བོ་ཅག་གིས་རྟོགས་པའི་ངོ་བོས་ཡུལ་ཅན་དུ་མི་
[184b.3]འདོད་པ་གང་ཡིན་པའོ། །ཁྱེད་དེ་ལྟར་འདོད་པས་ནི་དངོས་པོ་ཡུལ་ཅན་ཉིད་ཀྱང་སེལ་བའི་སྒོ་ནས་ཡིན་པར་བརྗོད་པར་འགྱུར་ཏེ། རང་གི་གཞུང་གིས་འདི་སྔོན་པོ་མ་ཡིན་པ་མ་ཡིན་ནོ་ཞེས་བྱ་བར་རྟོགས་པ་བཞིན་ནོ། །དེ་འཁྲུལ་པ་བཟློག་པ་ན་དོན་རྟོགས་པར་བྱེད་པ་སེལ་བའི་ཡུལ་
[184b.4]ཅན་དུ་འགྱུར་མོད། གང་གི་ཡུལ་ལ་འཁྲུལ་པས་བསྐལ་པ་ན་དེ་འཇུག་པ་དེ་གོ་ཇི་ལྟར་གཞན་སེལ་བའི་ཡུལ་ཅན་ཡིན་ཞེ་ན། དེ་ལས་གཞན་པའམ་ཞེས་སྨོས་སོ། །ཇི་ལྟར་དེ་རྣམ་པར་གཅོད་པའི་ཡུལ་ཅན་ཡིན་པ་དེ་བཞིན་དུ་དེ་ལས་གཞན་ཡང་གྲུབ་པ་ཡིན་ནོ། །ཇི་ལྟར་ཞེ་ན་
[184b.5]སྒྲོ་འདོགས་པ་མེད་པའི་ཞེས་སྨོས་སོ། །སྔར་ཞུགས་པ་སེལ་བར་བྱེད་པ་ཉིད་མ་ཡིན་ཡང་སྒྲོ་འདོགས་ཡོད་ན་འདི་མེད་པ་ཉིད་ཀྱིས་སེལ་བའི་ཡུལ་ཅན་ཉིད་དོ། །མཐོང་བ་འགའ་ལ་ཤེས་པ་གང་ཞེས་བྱ་བ་ལ་སོགས་པ་སྔར་ཇི་སྐད་བཤད་པ་བཞིན་ནོ། །འགྲེལ་པ་ནི་འཁྲུལ་པ་བཟློག་པའི་
[184b.6]ཞེས་བྱ་བ་སྟེ། འདིས་ནི་དེ་རྣམ་པར་གཅོད་པའི་ཡུལ་ཅན་གྲུབ་ཅེས་བྱ་བ་བཤད་པ་ཡིན་ནོ། །དེ་ལས་གཞན་པའམ། དེ་དང་འདྲ་བ་ཞེས་བཤད་པ་ནི། གཞན་ཡང་དེ་དང་འདྲ་སྟེ་ཞེས་བྱ་བ་སྟེ་གཞན་སེལ་བའི་ཡུལ་ཅན་དུ་གྲུབ་ཅེས་འབྲེལ་ཏོ། །སྒྲོ་འདོགས་མེད་པའི་ཡུལ་ལ་ནི་
[184b.7]ཞེས་བྱ་བ་བཤད་པ་ནི། སྒྲོ་འདོགས་པ་མེད་པའི་ཞེས་བྱ་བའོ། །སྒྲོ་འདོགས་པ་མེད་པའི་ཡུལ་ལ་འཇུག་པ་ཉིད་རྗེས་སུ་འགྲོ་བ་དང་ལྡོག་པ་དག་གིས་སྟོན་པ་ནི་གང་ལ་ཞེས་བྱ་བ་ལ་སོགས་པའོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །དེས་ན་དེ་ལྟར་གཞན་གྱིས་
[185a]
[185a.1]བརྗོད་པའི་ལན་གྱིས་ཚུལ་ཁས་བླངས་ནས་གཞན་སེལ་བའི་ཡུལ་ཅན་དུ་ཐལ་བ་བརྗོད་པ་ཡིན་ནོ། །དེ་ནི་འདི་ལ་མངོན་སུམ་དང་མཚུངས་པ་ཉིད་སྲིད་པ་མ་ཡིན་ནོ་ཞེས་བསྟན་པའི་ཕྱིར་གཞན་ཡང་ངོ་བོ་གང་ཞེས་སྨོས་སོ། །རྣམ་པར་རྟོག་པས་ཁྱད་པར་གྱི་སྒོ་ནས་དོན་ལ་
[185a.2]འཇུག་པ་ན་དོན་བདག་ཉིད་ཐམས་ཅད་ཀྱིས་རྟོགས་པ་ཡིན་ནོ། །དེ་འཁྲུལ་པས་དེ་ལྟར་ངེས་པར་མ་ཟིན་པའི་ཕྱིར་ཞེས་བྱ་བ་མངོན་སུམ་དང་འདྲ་བའི་ཚུལ་འདི་ནི་རྣམ་པར་རྟོག་པ་ལ་མི་སྲིད་དོ། །རྣམ་པར་རྟོག་པས་ཁྱད་པར་ཐམས་ཅད་ཀྱི་ཡུལ་ལ་ཕན་པ་སྒྲུབ་པར་བྱེད་པའི་དོན་བདག་
[185a.3]ཉིད་ཐམས་ཅད་བཟུང་ངོ་ཞེས་བྱ་བ་ནི་མི་སྲིད་དེ་རྣམ་པར་རྟོག་པ་རྣམས་ཀྱི་ཡུལ་རྣམ་པར་མ་བཏགས་པ་ནི་མི་སྲིད་པའི་ཕྱིར་རོ། །མྱོང་བ་མྱོང་བཞིན་པར་གྱུར་པ་རྣམ་པ་ཇི་ཞིག་ལྟར་ངེས་པ་ནི་རྣམ་པར་རྟོག་པར་བརྗོད་དོ། །ངེས་པའི་རང་བཞིན་མ་ཡིན་པའི་རྣམ་པར་རྟོག་པ་ནི་མི་
[185a.4]སྲིད་དོ། །དེས་ན་ཁྱད་པར་སོ་སོའི་རང་གི་ངོ་བོ་དང་དེ་ལ་ཕན་འདོགས་པར་བྱེད་པ་ཉིད་དུ་ངེས་པ་མེད་པར་ཁྱད་པར་ཐམས་ཅད་ལ་ཕན་འདོགས་པར་བྱེད་པའི་ཁྱད་པར་དང་ལྡན་པ་རྣམ་པར་རྟོག་པས་བཟུང་བ་ཡིན་ནོ་ཞེས་ཇི་ལྟར་བརྗོད། འདི་ལྟར་བུམ་པ་ལ་སོགས་པའི་མྱོང་བ་
[185a.5]ནས་དངོས་པོ་ལ་སྣང་བ་སྐད་ཅིག་མ་ཉིད་ལ་སོགས་པའི་རང་བཞིན་རང་གི་ངོ་བོར་གྱུར་པ་ཡིན་ཡང་བུམ་པ་ལ་སོགས་པ་རྣམ་པར་རྟོག་པ་ལ་རིག་པ་ན། སྐད་ཅིག་མ་ཉིད་དུ་མ་ངེས་པ་དེས་ན་སྐད་ཅིག་མ་ཉིད་ཀྱིས་རྟོགས་པ་ལོགས་སུ་བཙལ་བར་བྱ་བ་ཡིན་ནོ། །དེས་ན་གང་རྟོགས་པ་
[185a.6]ན་ཇི་ལྟར་རྣམ་པར་རྟོག་པར་འགྱུར་བ་དེ་ནི་དེ་ལྟར་དེའི་ཡུལ་དུ་བརྗོད་པ་ན་མ་ངེས་པ་ནི་རྣམ་པར་རྟོག་པའི་ཡུལ་ཉིད་མ་ཡིན་ན། དེ་ཇི་ལྟར་རྣམ་པར་རྟོག་པས་མ་རྟོགས་པ་ཡང་རྣམ་པར་རྟོག་པའི་ཡུལ་དུ་འགྱུར། ངེས་པ་རྣམས་ཀྱིས་ཞེས་བྱ་བ་ལ་སོགས་པ་ནི་འགྲེལ་པའོ། །
[185a.7]རྣམ་པར་རྟོག་པ་རྣམས་ཀྱི་རང་གི་དོན་རྟོགས་པ་ནི་འདི་ཁོ་ན་ཡིན་ཏེ། དེ་ལ་རྣམ་པར་རྟོག་པ་དེར་ངེས་པ་གང་ཡིན་པའོ། །རྣམ་པར་རྟོག་པ་ནི་ངེས་པ་ཙམ་གྱི་བདག་ཉིད་ཡིན་པའི་ཕྱིར་རོ། །དེས་ན་གང་ཞིག་ངེས་པ་མ་ཡིན་པ་དེ་ནི་རྣམ་པར་རྟོག་པ་མ་ཡིན་པའི་ཕྱིར་འདི་ནི་འདི་ལྟ་
[185b]
[185b.1]བུའོ་ཞེས་ངེས་པར་མ་བྱས་པ་དེ་ནི་རྣམ་པར་བརྟགས་པ་མ་ཡིན་ནོ་ཞེས་བརྗོད་དོ། །དེ་བཤད་པ་ནི་གལ་ཏེ་དེ་ཞེས་བྱ་བའོ། །ཇི་ལྟར་རྣམ་པ་གཞན་མ་ཡིན་པ་དེ་བཞིན་དུ་མ་ངེས་ན་དེས་ན་དེ་བཞིན་དུ་གཞན་ཡང་མ་ངེས་པ་ཡིན་ནོ། །འོན་ཏེ་མ་ངེས་ཀྱང་བཟུང་བ་ཡིན་ན། རྣམ་པ་གཞན་
[185b.2]ཡང་ཅི་སྟེ་མ་བཟུང་། དེས་ན་ཧ་ཅང་ཐལ་བར་འགྱུར་ཏེ། མ་ངེས་པ་ཡང་ཡུལ་ཡིན་ན། རྣམ་པར་རྟོག་པ་གཅིག་གི་ཡུལ་ཡང་དོན་ཐམས་ཅད་ཡིན་པར་འགྱུར་བའི་ཕྱིར་རོ། །མ་ངེས་པ་ཡང་བཟུང་བར་ཕ་རོལ་པོ་དག་གིས་ཁས་བླངས་པའི་ཕྱིར་རོ། །འདི་ཁོ་ན་ཞེས་བྱ་བ་འདི་རྣམ་
[185b.3]པ་གཞན་བཟློག་པའི་ཕྱིར་ངེས་པར་བཟུང་བའི་དངོས་པོ་ཁྱད་པར་ཅན་གཅིག་གི་སྒོ་ནས་འཛིན་པ་ན་གལ་ཏེ་ཁྱད་པར་མཐའ་དག་འཕེན་པར་བྱེད་པའི་བདག་ཉིད་དུ་བཟུང་མོད་ཀྱི། དེ་ལྟ་ཡང་འཁྲུལ་པས་ངེས་པར་མི་ཟིན་ཏོ་ཞེས་བརྗོད་པ་གང་ཡིན་པ་དེ་ནི་མི་འཐད་དེ། གལ་ཏེ་རྣམ་
[185b.4]པར་རྟོག་པས་ཐམས་ཅད་ལ་ཕན་འདོགས་པའི་བདག་ཉིད་དེ་བཟུང་བ་ནི། འདི་ལྟར་ན་བཟུང་བར་འགྱུར་བ་ཡིན་ཏེ། གལ་ཏེ་ཐམས་ཅད་ལ་ཕན་འདོགས་པར་བྱེད་པ་ཉིད་དུ་ངེས་ནའོ། །རྣམ་པར་རྟོག་པ་ནི་ངེས་པ་ཙམ་གྱི་ཡུལ་ཅན་ཡིན་པའི་ཕྱིར་རོ། །ཁྱད་པར་ཐམས་ཅད་མ་ངེས་
[185b.5]པར་ནི་ཁྱད་པར་ཐམས་ཅད་ལ་ཕན་འདོགས་པར་བྱེད་པ་ཉིད་དུ་འཛིན་པ་མེད་པའི་ཕྱིར་རོ། །སྒྲ་དང་ཚད་མ་གཞན་འཇུག་པ་དོན་མེད་པ་འཐད་པ་ཁོ་ནའོ། །གལ་ཏེ་མངོན་སུམ་གྱིས་སྒྲུབ་པའི་ངོ་བོས་དོན་འཛིན་པ་ཞེས་བྱ་བ་ལ་རེ་ཞིག་བརྩད་པ་མེད་དོ། །དེས་ན་འདིར་ཡང་ཁྱད་
[185b.6]པར་ཐ་དད་པའི་ཕྱོགས་ཐམས་ཅད་ལ་ཕན་འདོགས་པའི་དོན་དུ་བཟུང་ན་ཁྱད་པར་ཐམས་ཅད་བཟུང་བ་ཅི་སྟེ་མི་རྩོད་ཅེ་ན། དེ་ལྟར་ནི་བརྩད་པར་མི་ནུས་ཏེ། དོན་ཁྱད་པར་བྲལ་བར་སྨྲ་བ་རང་གི་ཕྱོགས་ལ་ཡང་ཆ་ཤས་ཀྱི་འཛིན་པ་མེད་པའི་ཕྱིར་དོན་གྱི་ཆོས་སུ་གྱུར་པའི་རྒྱུ་ཉིད་མངོན་
[185b.7]སུམ་གྱིས་རྟོགས་པར་ཁས་བླངས་པར་བྱ་བས་དེས་རྒྱུ་བཟུང་བ་ན་འབྲས་བུ་འཛིན་པར་ཐལ་བར་ཇི་ལྟར་མི་འགྱུར། འབྲས་བུ་འཛིན་པ་ན་ཡང་རྒྱུ་བཟུང་བར་ཐལ་བར་འགྱུར་རོ། །གལ་ཏེ་དེར་འབྲས་བུ་ལ་ཕན་འདོགས་པའི་བདག་ཉིད་དུ་རྒྱུ་བཟུང་བ་ན་འབྲས་བུ་མི་འཛིན་
[186a]
[186a.1]ན་ནི་ཁྱད་པར་ལ་ཕན་འདོགས་པར་བྱེད་པ་བཟུང་བ་ན་ཁྱད་པར་འཛིན་པར་ཇི་ལྟར་འགྱུར་ཞེ་ན། ཉེས་པ་འདི་མེད་དོ། །དེ་ནས་འབྲེལ་པ་ཅན་འཛིན་པ་དེའི་ཡན་ལག་ཉིད་ལ་འཁྲུལ་པ་མེད་པ་ཞེས་བྱ་བ་ནི། རྣམ་པར་རྟོག་པའི་ཆོས་ཡིན་གྱི། ཉམས་སུ་
[186a.2]མྱོང་བའི་ངོ་བོ་ནི་མ་ཡིན་ཏེ། དེ་ནི་རང་གི་ངོ་བོ་ཇི་ལྟ་བ་བཞིན་འཛིན་པའི་ཕྱིར་རོ། །དངོས་པོའི་རང་གི་ངོ་བོ་ཉིད་ནི་རང་གི་ངོ་བོ་ཉིད་གཞན་ལ་ལྟོས་པ་མ་ཡིན་ནོ། །དེས་ནི་ཇི་ལྟར་རྒྱུ་ཉིད་ནི་དངོས་པོ་ཙམ་གྱིས་མཐར་ཕྱིན་པ་ཡིན་པའི་ཕྱིར་རྒྱུའི་རང་གི་ངོ་བོ་ཉིད་འབྲས་བུ་ལ་མི་ལྟོས་
[186a.3]པ་དེ་བཞིན་དུ་དེའི་འཛིན་པ་ཡང་རྒྱུའི་རང་གི་ངོ་བོ་རིག་པ་ཁོ་ནའི་འབྲས་བུའི་ཁྱད་པར་ལ་ལྟོས་པ་ནི་མ་ཡིན་ནོ། །རྣམ་པར་རྟོག་པ་ནི་མེ་ལ་སོགས་པ་སོ་སོ་རང་གི་རྣམ་པ་གཞན་གྱིས་རྒྱུ་ཉིད་དུ་མ་གྲུབ་པ་ན་མེ་ལ་སོགས་པའི་རྣམ་པར་རྟོག་པས་རྟོགས་པ་མེ་ལ་སོགས་པའི་རྣམ་པ་དག་ལ་
[186a.4]འབྲས་བུའི་ཁྱད་པར་གྱིས་ཁྱད་པར་དུ་གྱུར་པ་རྟོགས་པར་བྱེད་དོ། །དེས་ན་འདི་ནི་རྣམ་པར་རྟོག་པ་ཉིད་ཀྱིས་ཉེས་པ་ཡིན་གྱི། མངོན་སུམ་གྱིས་ནི་མ་ཡིན་ནོ། །འདི་ཕ་རོལ་པོ་དག་རྣམ་པར་རྟོག་པ་དང་ཉམས་སུ་མྱོང་བ་གཉིས་ཀྱི་རྟོགས་པའི་བྱེད་པ་མི་འདྲ་བ་མ་རྟོགས་པས་
[186a.5]ནི་ཇི་ལྟར་ཞེས་རྩོད་པར་བྱེད་དོ། །རྣམ་པར་རྟོག་པས་མ་ངེས་པ་འཛིན་པར་ཁས་ལེན་ན། ད་ནི་རྣམ་པར་རྟོག་པ་འབའ་ཞིག་ཏུ་མ་ཟད་ཀྱི་མངོན་སུམ་ཇི་སྙེད་པས་ཀྱང་མ་ངེས་པ་ཇི་ལྟར་བཟུང་བ་ཡིན། དེ་ལ་ཡང་ངེས་པ་ལས་གཞན་པའི་བྱེད་པ་ནི་འགའ་ཡང་མེད་དོ། །དེས་ན་ཁྱོད་
[186a.6]ཀྱི་དོན་གྱི་རང་གི་ངོ་བོ་གཅིག་ཅེས་བྱ་བ་ལ་སོགས་པ་ཡང་ཇི་ལྟར་མི་འགལ། དེ་སྐད་ཅིག་མ་ཉིད་ལ་སོགས་པ་དོན་གྱི་ངོ་བོ་ཉིད་མཐའ་དག་ནི་ངེས་པ་ཡོད་པ་མ་ཡིན་ལ་མ་ངེས་པ་ཡང་གཟུང་བར་ཇི་ལྟར་འགྱུར་ཞེ་ན། དེ་བཟློག་པའི་ཕྱིར་བཤད་པ། མངོན་སུམ་ནི་གང་གི་ཡང་
[186a.7]ངེས་པར་བྱེད་པ་མ་ཡིན་ཏེ། རྣམ་པར་རྟོག་པར་བྱེད་པ་མ་ཡིན་ནོ། །མངོན་སུམ་ནི་འགའ་ཡང་རྣམ་པར་རྟོག་པར་བྱེད་པ་མ་ཡིན་པས་མངོན་སུམ་ལ་ནི་རྣམ་པར་རྟོག་པ་དང་བཅས་པའི་རིག་པའི་བྱེད་པ་མེད་དོ། །འོ་ན་ཇི་ལྟར་རིག་པར་བྱེད་པ་ཡིན་ཞེ་ན་དེས་ཞེས་སྨོས་ཏེ་མངོན་སུམ་
[186b]
[186b.1]དེས་གང་ཞིག་འཛིན་པ་དེ་ཡང་ངེས་པ་ནི་མ་ཡིན་ནོ། །འོ་ན་ཅི་ཞེ་ན། དེས་འཛིན་པར་བརྗོད་པ་གང་ཡིན་པ་དེ་ནི་སྣང་བས་སོ། །འདི་སྐད་བརྗོད་པ་ཡིན་ཏེ་དངོས་པོ་རིག་པ་ནི་དངོས་པོ་གསལ་བ་ཡིན་པའི་ཕྱིར་ཏེ། འདི་ལས་གཞན་པའི་བྱེད་པ་ནི་འགའ་ཡང་མེད་དོ། །གསལ་བའི་ཆོས་
[186b.2]ཀྱིས་མ་ཟིན་པར་ཡང་གསལ་བར་འགྱུར་བ་མ་ཡིན་ཏེ། དེ་ནི་ཤེས་པ་ཁོ་ནའི་མཚན་ཉིད་ཡིན་པའི་ཕྱིར་རོ། །ཤེས་པའི་ཆོས་ཀྱིས་ཟིན་པའི་ཡང་ཤེས་པ་ཉིད་ཡིན་པའི་ཕྱིར་སྔོན་པོའོ། །རྣམ་པ་གསལ་བཞིན་དུ་ཤེས་པར་གྱུར་པས་ན་སྔོན་པོ་གསལ་བ་ཡིན་ནོ། །གསལ་བཞིན་པ་
[186b.3]ཉིད་ནི་གཞན་གྱི་སྐབས་ཡིན་པའི་ཕྱིར་ཏེ། ནུས་པ་བཞིན་དུ་རང་གི་གནས་ལུགས་ཡིན་པར་འགལ་བའི་ཕྱིར་རོ། །དེ་ཡང་གསལ་བ་ཞེས་བྱ་བ་བརྗོད་པ་གང་ཡིན་པས་ཏེ། དེས་དེ་ལྟ་བུར་གྱུར་པས་འདི་དོན་རིག་པ་ཡིན་པའི་ཕྱིར་འདི་ནི་སྣང་བས་དངོས་པོ་འཛིན་པ་ཡིན་ནོ། །མངོན་སུམ་ནི་གང་
[186b.4]གི་ཡང་ངེས་པར་བྱེད་པ་མ་ཡིན་ནོ་ཞེས་བརྗོད་ཟིན་པ་མ་ཡིན་ནམ། དེ་ཇི་ལྟར་ན་ངེས་པ་ནི་མ་ཡིན་ནོ་ཞེས་ཡང་བརྗོད་ཅེ་ན་བརྗོད་པ་མངོན་སུམ་ནི་གང་གིས་ཡང་ངེས་པར་བྱེད་པ་མ་ཡིན་ནོ་ཞེས་བརྗོད་ན་གཞན་དག་མངོན་སུམ་རིག་པའི་བྱེད་པ་དང་བྲལ་བར་གོ་བར་འགྱུར་ཏེ། དེས་ན་དེས་གང་
[186b.5]ཞིག་འཛིན་པ་ཞེས་བྱ་བས་རིག་པའི་བདག་ཉིད་དུ་སྒྲུབ་པ་ཉིད་བསྟན་ཏེ་ངེས་པས་ནི་མ་ཡིན་ནོ་ཞེས་བྱ་བས་མི་འདོད་པ་བཀག་ནས་དེར་སྣང་བ་ལས་སོ་ཞེས་བྱ་བས་ཇི་ལྟར་མངོན་པར་འདོད་པ་ཉིད་བསྟན་པ་ཡིན་ནོ། །དེས་ན་ཇི་ལྟར་མ་ངེས་པ་མངོན་སུམ་གྱིས་ཀྱང་བཟུང་ཞེས་སྨྲས་པ་གང་ཡིན་
[186b.6]པ་དེ་མི་རིགས་པར་བརྗོད་པ་ཡིན་ནོ་ཞེས་བསྟན་པ་ནི། དེ་བས་ན་ངེས་པ་དང་ཞེས་བྱ་བའོ། །གང་ཞིག་ངེས་པ་དེ་ནི་བཟུང་བ་ཡིན་ལ། མ་ངེས་པ་གང་ཡིན་པ། དེ་ནི་བཟུང་བ་མ་ཡིན་ནོ་ཞེས་བྱ་བ་འདི་ནི་ཡོད་པ་མ་ཡིན་ནོ། །གལ་ཏེ་ཇི་སྐད་བཤད་པའི་
[186b.7]ཚུལ་དང་སྦྱར་ནས་རྣམ་པར་རྟོག་པ་སྔོན་པོ་ལ་སོགས་པ་རིག་པ་ཉིད་ཀྱང་སྔོན་པོ་ལ་སོགས་པའི་རྣམ་པ་མེད་པར་མི་སྲིད་པ་ཡིན་ཏེ། དེ་ལ་ཡང་སྔོན་པོ་ལ་སོགས་པ་ཡུལ་དུ་གྱུར་པ་རྣམས་གཞན་དུ་གསལ་བར་མི་སྲིད་པའི་ཕྱིར་རོ། །སྲིད་ན་ནི་མངོན་སུམ་ཡང་སྣང་བ་མེད་པར་རིག་པར་
[187a]
[187a.1]ཅི་སྟེ་མི་འགྱུར་ཞེ་ན། དོགས་པ་འདི་བསུ་ནས་བཤད་པ་ནི་ངེས་པ་རྣམས་ཀྱིས་ནི་དེ་ལྟར་མ་ཡིན་ཏེ་ཞེས་བྱ་བ་སྟེ། རྣམ་པར་རྟོག་པ་ནི་སྣང་བའི་དབང་གིས་འཛིན་པ་དང་མི་འཛིན་པ་མ་ཡིན་ནོ། །འདིར་ནི་སྣང་བ་ཡོད་པ་བཀག་པ་མ་བྱས་ཏེ། ཇི་ལྟར་སྔར་མངོན་སུམ་ནི་
[187a.2]གང་གི་ཡང་ངེས་པར་བྱེད་པ་མ་ཡིན་ནོ་ཞེས་ངེས་པར་བྱེད་པ་ཉིད་བཀག་པ་ལྟར་རོ། །འོན་ཀྱང་འདི་ནི་འཛིན་པ་དེའི་བདག་ཉིད་ཡིན་པ་བཀག་པ་ཡིན་ནོ། །དེས་ན་སྣང་བ་ཡོད་ཀྱང་འདི་འཛིན་པ་དང་མི་འཛིན་པ་དེ་བདག་ཉིད་ཀྱིས་ནི་མ་ཡིན་ནོ་ཞེས་བརྗོད་པ་ཡིན་ནོ། །གཏན་ཚིགས་
[187a.3]བཤད་པ། གང་ཞིག་ངེས་ཀྱང་ཞེས་བྱ་བའོ། །བུམ་པ་ལ་སོགས་པའི་རྣམ་པ་ཇི་ལྟ་བ་ཞིག་མངོན་སུམ་གྱིས་མཐོང་བ་ལྟོ་བ་ཡངས་པ་ལ་སོགས་པའི་རྣམ་པ་དེ་ཉིད་བུམ་པའི་རྣམ་པར་རྟོག་པ་མི་གསལ་བ་ཉིད་དུ་དེའི་ཡུལ་ཅན་དང་འགལ་བར་ཁྱད་པར་དུ་འགྱུར་བས་སྣང་བ་ཡིན་
[187a.4]ནོ། །སྐད་ཅིག་མ་ལ་སོགས་པའི་རྣམ་པ་ཡང་དེ་ལྟ་བུར་གྱུར་པ་དེ་ཉིད་ཡིན་ཏེ། དེས་ན་གལ་ཏེ་འདི་སྣང་བས་འཛིན་པར་བྱེད་པ་ཡིན་ན། སྐད་ཅིག་མ་ལ་སོགས་པ་ཡང་འཛིན་པར་ཡང་འགྱུར་ན་དེ་ལྟ་ཡང་མ་ཡིན་ཏེ། བུམ་པ་ལ་སོགས་པའི་ངོ་བོ་འགའ་ཞིག་ངེས་ཀྱང་སྐད་ཅིག་
[187a.5]མ་ཉིད་ལ་སོགས་པའི་ངོ་བོ་གཞན་ལ་མ་ངེས་པར་འཇུག་པ་ཐ་དད་པའི་ཕྱིར་རོ། །ཇི་ལྟར་དེའི་ངོ་བོ་ངེས་པ་དེ་ལྟར་རྟོགས་པ་པོ་འཇུག་གི་ཇི་ལྟར་ངེས་པ་མ་ཡིན་པ་དེ་ལྟར་ནི་མ་ཡིན་ནོ། །འདི་ལྟར་ཆུ་ལྡུགས་པའི་དོན་དུ་གཉེར་བ་བུམ་པ་ཞེས་དེ་ལྟར་ངེས་པ་ལ་འཇུག་གི །མི་རྟག་པའོ་ཞེས་
[187a.6]ནི་མ་ཡིན་ནོ། །ཅི་སྟེ་ཡང་རྣམ་པར་རྟོག་པ་ཡང་མངོན་སུམ་དང་འདྲ་བར་མ་ངེས་ཀྱང་དེ་ལྟ་བུའི་རྣམ་པ་འཛིན་པར་བྱེད་པ་ཡིན་མོད་ཅེ་ན། དེ་ལྟར་ནི་མ་ཡིན་ཏེ། སྣང་བ་ཐ་དད་པས་དངོས་སུ་འཛིན་པར་བྱེད་པ་ཉིད་དུ་མ་གྲུབ་པའི་ཕྱིར་རོ། །མངོན་སུམ་འདྲ་བར་ཏེ་སྣང་བ་ཉིད་ཀྱིས་དངོས་
[187a.7]པོ་ལ་གཞོལ་བར་མི་གྲུབ་པའི་ཕྱིར་རོ། །ངེས་པ་ཉིད་ལ་ལྟོས་ཏེ་འགའ་ཞིག་ལ་འཛིན་པ་ཉིད་དུ་རྣམ་པར་གཞག་པ་ན་ངེས་པ་ཇི་ལྟར་བ་ཁོ་ནར་རིགས་སོ། །ངེས་པ་ཡང་མྱོང་བའི་རང་བཞིན་མ་ཡིན་པ་མྱོང་བའི་ཆོས་ཡིན་ནོ་ཞེས་སྟོན་པར་འགྱུར་རོ། །དེའི་ཕྱིར་ཞེས་བྱ་བ་ནི་མཇུག་
[187b]
[187b.1]སྡུད་པ་སྟེ་ངེས་པ་ཉིད་འཛིན་པར་བྱེད་པ་ནི་ཡིན་གྱི་ཡོད་ཀྱང་སྣང་བ་ནི་མ་ཡིན་ནོ་ཞེས་ངེས་པར་བྱ་བའི་དོན་དུའོ། །གལ་ཏེ་དེ་ལྟར་མི་འདོད་ན་ནི་དེའི་ཚེ་དངོས་སུ་འཛིན་པར་བྱེད་པ་ཉིད་མི་སྲིད་པས་ནི་རྣམ་པར་རྟོག་པའི་ཤེས་པ་གང་གི་མཐར་ཐུག་པ་ཉིད་ཀྱིས་གང་ལ་ཡང་འཛིན་པར་བྱེད་
[187b.2]པ་ཉིད་དུ་མི་འགྱུར་རོ། །འདི་ནི་ཞེན་པའི་དབང་ཉིད་ཀྱིས་ཕྱི་རོལ་ཏུ་ཕྱོགས་པ་ཡིན་ན། དེ་ལྟ་བུའི་ཕྱི་རོལ་ན་མེད་པའི་ཕྱིར་དོན་དམ་པར་ན་ཡུལ་མེད་པ་ཁོ་ནའོ། །རྟོགས་པའི་ངོ་བོར་ནི་དོན་ལ་གཞོལ་བར་བརྗོད་དོ། །དེ་བཤད་པ་ནི་དེ་ལྟ་མ་ཡིན་ན་ཞེས་བྱ་བའོ། །དེས་ནི་དེ་ལྟར་
[187b.3]མངོན་སུམ་གྱི་ཡུལ་དུ་བྱས་པ་འཁྲུལ་པས་ངེས་པར་མི་ཟིན་པ་བཞིན་དུ། རྣམ་པར་རྟོག་པས་ཡུལ་དུ་བྱས་པ་ལས་ཡང་ཚད་མ་གཞན་འཇུག་པ་ཡིན་ནོ་ཞེས་བྱ་བ། ངེས་པ་རྣམས་ཀྱིས་མ་ངེས་གང་། །ཞེས་བྱ་བ་ལ་སོགས་པས་བསལ་བ་ན་མངོན་སུམ་ཡང་ངེས་པའི་ངོ་བོ་ཡིན་
[187b.4]པར་མགོ་མཉམ་པ་དེ་ལས་བཟློག་པར་བསྟན་པས་བསལ་བ་ཡིན་ནོ། །ད་ནི་མངོན་སུམ་ངེས་པའི་བདག་ཉིད་མ་ཡིན་མོད། དེ་ལྟ་ཡང་ཤེས་པ་གཅིག་གི་ཡུལ་དུ་བྱས་པ་ལ་དེའི་རྗེས་སུ་འབྲང་བའི་རྣམ་པར་ཤེས་པ་གཞན་དག་འཇུག་པར་རང་བཞིན་གྱིས་གྲུབ་པ་ཡིན་ཏེ། རྗེས་
[187b.5]སུ་དཔག་པས་ཡུལ་དུ་བྱས་པའི་དོན་བཞིན་ནོ། །དེས་ན་མངོན་སུམ་གྱིས་ཀྱང་སྒྲུབ་པའི་ངོ་བོས་དོན་ཡུལ་དུ་བྱེད་ན་རྣམ་པ་ཐམས་ཅད་ལ་ངེས་པ་སྐྱེད་པའི་ཕྱིར་ཚད་མ་གཞན་འཇུག་པའི་སྐབས་མེད་དོ། །དེ་ལ་སྲིད་ན་ནི་རྣམ་པར་རྟོག་པ་ཡང་འགྱུར་རོ་ཞེས་རྣམ་པ་གཞན་གྱི་སྒོ་
[187b.6]ནས་མགོ་མཚུངས་པར་སྟོན་པས་ཕ་རོལ་པོ་དག་སྤང་བའི་ཕྱིར་ཞེས་སྨྲ་བར་བྱེད་དོ། །ཐམས་ཅད་ལས་ཐ་དད་པའི་དངོས་པོའི་ངོ་བོ་ལ་དེ་ཁོ་ན་བཞིན་དུ་ཉམས་སུ་མྱོང་བ་སྐྱེད་ཀྱང་ཇི་ལྟར་ཉམས་སུ་མྱོང་བ་ཐམས་ཅད་ལས་ཐ་དད་པའི་དངོས་པོ་ལས་སྐྱེ་བ་དེ་ཁོ་ན་བཞིན་དུ་ཅི་སྟེ་ངེས་པ་མི་
[187b.7]འབྱུང་། དངོས་པོ་གཞན་ལས་ཁྱད་པར་དུ་གྱུར་པའི་རང་བཞིན་དང་ལྡན་པ་ཉིད་ཀྱིས་དངོས་པོ་དངོས་པོ་གཞན་ལས་ཐ་དད་པ་ཡིན་ཏེ། དེ་ལྟ་མ་ཡིན་ན་རང་བཞིན་མེད་པ་ཐ་དད་པར་མི་རུང་བའི་ཕྱིར་རོ། །དེས་ན་འདི་བུམ་པ་ཞེས་ཁྱད་པར་ཅན་གྱི་ངོ་བོའི་དབྱིབས་དང་ལྡན་པའི་
[188a]
[188a.1]ཕྱིར་དེའི་ངོ་བོ་དབྱིབས་ཅན་མ་ཡིན་པ་བུམ་པ་མ་ཡིན་པ་ལས་ལྡོག་པ་ཡིན་ལ་རྒྱུའི་བྱེད་པས་བསྒྲུབ་པའི་ཕྱིར་ནི་བྱས་པ་མ་ཡིན་པ་ལས་འཇིག་པའི་ངང་ཅན་གྱིས་ནི་མི་འཇིག་པ་ལས་སོ། །དེས་ན་འདི་དེ་ལྟ་བུ་ལ་སོགས་པའི་བདག་ཉིད་ཁོ་ན་ལ་མ་ངེས་པ་སྐྱེས་པའི་ཕྱིར་
[188a.2]ཚད་མ་གཞན་ལ་ག་ལ་ལྟོས། ཇི་ལྟར་ཉམས་སུ་མྱོང་ཙམ་གྱིས་ངེས་པར་འགྱུར་ན་གང་གིས་འདི་སྐད་རྩོད་པར་བྱེད་ཅེ་ན། དྲན་པའི་ཞེས་སྨོས་སོ། །དེ་ནི་ཉམས་སུ་མྱོང་བའི་འདུ་བྱེད་ཙམ་གྱིས་བསྒྲུབ་པ་ཡིན་ཏེ། རྒྱུ་མཚན་གཞན་མེད་པའི་ཕྱིར་རོ། །དེ་ལྟ་བུའི་རྣམ་པ་ཅན་གྱི་དོན་
[188a.3]མྱོང་བ་ན། དེའི་རྣམ་པ་མཐའ་དག་ངེས་པར་ཅི་སྟེ་མི་སྐྱེ། དེ་ལྟ་མ་ཡིན་ན་ནམ་ཡང་མི་འགྱུར་རོ་ཞེ་ན། དེ་བཟློག་པའི་ཕྱིར། ལྷན་ཅིག་བྱེད་པ་མ་ཚང་བའི་ཕྱིར་རོ་ཞེས་སྨོས་སོ། །འདིར་མི་སྐྱེ་བའི་རྒྱུ་ཅི་ཡིན་ཞེས་འདྲི་བའི་ངག་ཡིན་ན་ནི། ལྷན་ཅིག་བྱེད་པ་མ་ཚང་བའོ་ཞེས་ལན་དུ་
[188a.4]འགྱུར་ན། རྒྱུ་ཅིའི་ཕྱིར་མི་འབྱུང་ཞེས་བྱ་བའི་ངག་ཡིན་ན་ནི། ལྷན་ཅིག་བྱེད་པ་མ་ཚང་བའི་ཕྱིར་མི་འབྱུང་བ་ཡིན་ནོ་ཞེས་བྱ་བར་རིགས་སོ། །གལ་ཏེ་དྲན་པའི་རྣམ་པར་རྟོག་པ་ནི་དོན་དང་དབང་པོ་ལ་སོགས་པའི་ཚོགས་པ་ལ་ལྟོས་པ་མེད་ཀྱང་སྔོན་པོ་ལ་སོགས་པའི་རྟེན་ངེས་པ་ཉིད་དུ་སྐྱེ་བ་ཡིན་ཏེ་
[188a.5]སྔོན་པོ་ཉམས་སུ་མྱོང་བ་ཉིད་ལས་དེས་འདུ་བྱེད་སོ་སོར་ངེས་པ་སྐྱེས་པ་ནི་དེ་ལྟར་འགྱུར་བའི་ཕྱིར་རོ། །དོན་གཞན་ལ་ཆགས་པ་ལ་སོགས་པས་མ་ཉམས་པའི་ཉམས་སུ་མྱོང་བའི་དེ་མ་ཐག་ཏུ་འདས་པ་ན་དྲན་པ་སྐྱེ་བ་ལ་ནི་ལྷན་ཅིག་བྱེད་པ་ལ་ལྟོས་པ་མེད་དོ། །ཉམས་སུ་
[188a.6]མྱོང་བ་ཙམ་ལས་འབྱུང་བའི་ཕྱིར་རོ། །དེས་ན་ལྷན་ཅིག་བྱེད་པ་མ་ཚང་བའི་ཕྱིར་རོ་ཞེས་ཅི་སྟེ་བརྗོད་ཅེ་ན། བརྗོད་པ་ངེས་པ་ཙམ་སྐྱེ་བ་འདྲི་བ་ནི་མ་ཡིན་གྱི། འོན་ཀྱང་ཁྱད་པར་ཐམས་ཅད་ལ་ངེས་པ་སྐྱེ་བ་འདྲི་བ་ཡིན་ནོ། །དེས་ན་འདི་ནི་དེ་ཉིད་ལ་ལན་བཏབ་པ་ཡིན་ཏེ་དེ་ཉིད་ཀྱི་ཕྱིར་
[188a.7]ཐམས་ཅད་ལས་ཐ་དད་པ་ཆ་ཤས་དང་བྲལ་བའི་ངོ་བོ་ཉིད་ཉམས་སུ་མྱོང་མོད་ཀྱི་ཞེས་འཆད་པར་འགྱུར་རོ། །འདི་ཉིད་བརྗོད་པའི་ཕྱིར་སྐབས་སུ་བབ་པ་ཇི་ལྟར་བརྗོད་པ་ཡིན་ནོ། །དེ་ལ་ནི་ལྷན་ཅིག་བྱེད་པ་གཞན་ལ་ལྟོས་པ་ཡོད་པ་ཡིན་ཏེ། ཉམས་སུ་མྱོང་བ་ཙམ་ལས་མི་འབྱུང་བའི་ཕྱིར་
[188b]
[188b.1]རོ། །འདི་ལྟར་བུམ་པ་ལ་སོགས་པའི་དངོས་པོ་མདུན་ན་གསལ་བའི་བདག་ཉིད་ཀྱི་ངོ་བོ་གང་ཡིན་པ་དེ་ནི་མི་རྟག་པ་ལ་སོགས་པའི་རང་གི་ངོ་བོ་ཉིད་དོ་ཞེས་རེ་ཞིག་སྟོན་པར་འགྱུར་རོ། །དེས་ན་ངོ་བོ་ཉིད་སྐད་ཅིག་མ་ཉིད་དང་། ཡོད་པ་ཉིད་དང་རྒྱུ་དང་འབྲས་བུ་ཉིད་ལ་སོགས་པ་ཡིན་ནོ། །
[188b.2]དེ་ཡང་དེ་ལྟར་སྣང་བ་ན་ངེས་པའི་ཤེས་པ་ལ་གནས་པ་ཉིད་དོ། །དེ་ལྟ་བུའི་ངོ་བོའི་དབྱིབས་ཀྱིས་རྣམ་པར་བཅད་པ་དབང་པོའི་ཤེས་པ་ལ་སྣང་བའི་ཕྱིར་དང་། དེ་ལྟ་བུར་གྱུར་པ་ཉིད་བུམ་པ་ལ་སོགས་པའི་རྣམ་པར་རྟོག་པའི་ཕྱིར་རོ། །དེས་ན་མཐོང་བའི་ཆ་གང་ཞིག་རྣམ་པར་
[188b.3]རྟོག་པ་ལ་མི་སྣང་བ་ནི་འགའ་ཡང་མེད་དོ། །དོན་གྱི་ངོ་བོ་ཉིད་ནི་སྐད་ཅིག་མ་ལ་སོགས་པའི་རང་བཞིན་རྣམ་པར་རྟོག་པས་ཡུལ་དུ་མ་བྱས་མོད་ཀྱི། འོན་ཀྱང་ཆོས་ཐམས་ཅད་ཀྱི་བདག་ཉིད་ཅན་ཡང་ཆོས་གཅིག་ཏུ་ངེས་པར་བྱས་པ་ཡིན་ནོ། །དེས་ན་དེ་ལྟར་མཐོང་བའི་འདུ་བྱེད་
[188b.4]ཙམ་ལ་རག་ལས་ནས་སྐྱེ་བའི་དྲན་པའི་རྣམ་པར་རྟོག་པ་ནི་ཆ་ཤས་ཀྱི་སྐྱེ་བ་ཡང་མ་ཡིན་ལ་དེ་ཙམ་གྱིས་ཚད་མ་གཞན་ལ་ལྟོས་པ་མེད་པ་ཡང་མ་ཡིན་ཏེ་ཆོས་གཅིག་གི་བདག་ཉིད་དུ་ངེས་པར་བྱས་པའི་ཕྱིར་ཆོས་གཞན་དག་ལ་ཚད་མ་གཞན་བསྒྲུབ་པས་རྣམ་པར་གཞག་པ་ལ་
[188b.5]ལྟོས་པའི་ཕྱིར་རོ། །གང་གི་ཕྱིར་ལྷན་ཅིག་བྱེད་པ་མ་ཚང་བས་ཐམས་ཅད་ལས་ཐ་དད་པའི་དོན་ལ་ངེས་པ་མ་སྐྱེས་པའི་གཏན་ཚིགས་དེ་བས་ན་རང་གི་མཚན་ཉིད་ཆ་མེད་པའི་བདག་ཉིད་མངོན་སུམ་གྱིས་ནི་བཟུང་བ་ལ་སྟེ། བདག་ཉིད་ཐམས་ཅད་ཀྱིས་བཟུང་བ་ལ་ཞེས་བྱ་བའི་
[188b.6]དོན་ཏོ། །ཆ་ཤས་རྣམས་སྤངས་པ་ནི་ཆ་ཤས་དང་བྲལ་བ་སྟེ། དེ་ལྟ་བུ་ནི་ཚད་མ་མེད་པ་ཁོ་ནར་འཛིན་ཏོ་ཞེས་བརྗོད་པ་ཡིན་ནོ། །དེའི་ཁྱད་པར་སྐད་ཅིག་མ་ཉིད་དང་། བདག་མེད་པ་ཉིད་ལ་སོགས་པ་གང་ཡིན་པ་དེ་དག་གི་ནང་ནས་ཁྱད་པར་གང་ཞིག་ངེས་པ་ལ་རྟོགས་པའི་
[188b.7]རྒྱུ་མཚན་ལྷན་ཅིག་བྱེད་པའི་རྐྱེན་ཡོད་པ་དེ་ནི་རྟོགས་པར་འགྱུར་རོ། །གང་གི་ཕྱིར་ལྷན་ཅིག་བྱེད་པ་མེད་པས་ཐ་དད་པ་ཐམས་ཅད་མ་ངེས་པའི་ཕྱིར་ཁྱད་པར་གང་ཞིག་ངེས་པར་བྱེད་པའི་ལྷན་ཅིག་བྱེད་པའི་རྐྱེན་ཡོད་པའི་ཁྱད་པར་དེ་ངེས་པར་འགྱུར་གྱི། གཞན་ནི་མ་ཡིན་ནོ་ཞེས་བརྗོད་པ་
[189a]
[189a.1]ཡིན་ནོ། །གང་ཞིག་མངོན་སུམ་གྱི་སྟོབས་ཀྱིས་འཕངས་པ་ཇི་ལྟར་ཉམས་སུ་མྱོང་བ་བཞིན་རྣམ་པར་རྟོག་པས་རྟོགས་པ་དག་ལ་ཡང་ངེས་པར་ཇི་ལྟ་བ་བཞིན་ཐམས་ཅད་ཀྱི་ཡན་ལག་ཡིན་གྱི་སྣང་བ་ཇི་ལྟ་བ་བཞིན་མ་ཡིན་པ་དེ་ནི་རང་བཞིན་གྱིས་སྒྲུབ་པའི་ཕྱིར་
[189a.2]བརྗོད་པར་བྱ་བ་མ་ཡིན་ཏེ། རྗེས་སུ་དཔག་པའི་ཤུགས་ཀྱིས་བྱུང་བའི་རྣམ་པར་རྟོག་པ་གཞན་བཞིན་ནོ། །འགྲེལ་པ་ནི་ཐམས་ཅད་ལས་ཞེས་བྱ་བ་ཡིན་ནོ། །ཉམས་སུ་མྱོང་མོད་ཀྱི་འོན་ཀྱང་ཁྱད་པར་ཐམས་ཅད་ངེས་པར་ནི་མི་འགྱུར་རོ། །ཇི་ལྟར་མི་འགྱུར་ཞེ་ན། རྒྱུ་གཞན་ལ་
[189a.3]ལྟོས་པའི་ཕྱིར་རོ། །ཉམས་སུ་མྱོང་བ་ཙམ་གྱིས་ནི་ཁྱད་པར་ཐམས་ཅད་ལ་ངེས་པ་འབྱུང་བ་མ་ཡིན་ཏེ། འོན་ཏེ་རྒྱུ་གཞན་ལས་ཡིན་ནོ། །དེས་ན་ཁྱད་པར་གང་ངེས་པ་ལ་རྒྱུ་ཡོད་པ་དེ་ནི་ངེས་པ་ཡིན་ནོ་ཞེས་འཐད་པ་བརྗོད་པ་སྔོན་དུ་འགྲོ་བ་ཅན་མདོའི་དོན་བཤད་པ་ཡིན་ནོ། །རྒྱུ་གཞན་
[189a.4]དེ་ཡང་གང་ཞིག་ཡིན་ལ་དེ་ལ་ལྟོས་པའི་རྣམ་པར་རྟོག་པ་དེ་ཡང་གང་ཡིན་ཞེ་ན་གཉི་ག་སྟོན་པ་ནི་ཉམས་སུ་མྱོང་བ་ནི་ཞེས་བྱ་བ་ཡིན་ནོ། །རྣམ་པར་རྟོག་པ་གོམས་པ་ལས་མ་འདས་པར་ཉམས་སུ་མྱོང་བ་རྣམ་པར་རྟོག་པ་སྐྱེད་པར་བྱེད་དེ། དེ་ནས་འདིར་ལྷན་ཅིག་བྱེད་པ་ནི་དེ་ཡིན་ནོ། །
[189a.5]གོམས་པ་འདི་གང་གི་ཡུལ་ཅན་ཡིན་པ་དེ་ནི་མ་བརྗོད་དོ། །དེ་ལ་ལྟོས་པའི་རྣམ་པར་རྟོག་པ་བསྟན་པ་ཉིད་ཀྱིས་གོ་བའི་ཕྱིར་རོ། །དེས་ན་རྣམ་པར་རྟོག་པ་གང་ཞིག་གོམས་པར་བྱེད། དེ་ལ་ལྟོས་ན་སྐྱེ་བ་ཡང་གང་ཡིན་ཞེས་གཉི་ག་བརྗོད་པར་བྱ་བ་ལས་དེ་ལ་ལྟོས་པ་ཉིད་བརྗོད་
[189a.6]པས་གོམས་པ་གང་ཡིན་པ་དེ་ཉིད་སྐྱེ་བ་ཡིན་ནོ་ཞེས་བརྗོད་པར་འགྱུར་རོ། །དེ་ཉིད་བསྟན་པའི་ཕྱིར། དཔེར་ན་ཞེས་སྨོས་སོ། །རོ་མྱགས་པ་དང་། ཉལ་པོ་བྱ་བ་དང་བཟའ་བར་བྱ་བའི་རྣམ་པར་རྟོག་པའི་རྣམ་པ་རྣམས་དེ་དག་ཉིད་ལྟོས་པ་ཡིན་ནོ། །སོ་སོར་རྟོགས་པ་ལ་
[189a.7]གནས་པ་བུད་མེད་ལ་སོགས་པ་ལ་མི་མཐུན་པར་གོམས་པར་བྱེད་པ་བུད་མེད་དག་གསོན་པོའི་ལུས་ཤི་རོ་དང་ཁྱད་པར་མེད་པ་དེ་ལྟ་བུ་ཉིད་དུ་སྒོམ་པར་བྱེད་པ་ནི་དེའི་རྣམ་པར་རྟོག་པ་གོམས་པས་ཉམས་སུ་མྱོང་བས་རྣམ་པར་རྟོག་པ་དེ་ཉིད་སྐྱེད་པར་བྱེད་དོ། །འདོད་པ་ཅན་ནི་
[189b]
[189b.1]བདེ་བའི་སྒྲུབ་བྱེད་དུ་གོམས་པས་ཉལ་པོ་བྱ་བའི་རྣམ་པར་རྟོག་པར་འགྱུར་ལ། ཁྱི་དང་ཅེ་སྤྱང་ལ་སོགས་པ་དག་ནི་འགྲངས་པའི་རྒྱུ་ཉིད་དུ་གོམས་པས་བཟའ་བར་བྱ་བའི་རྣམ་པར་རྟོག་པར་འགྱུར་རོ། །འདི་སྐད་བརྗོད་པ་ཡིན་ཏེ་གང་གི་ཚེ་ཆ་ཤས་དང་བྲལ་བའི་དོན་གཅིག་ལ་
[189b.2]ཉམས་སུ་མྱོང་བའི་མཐུས་རང་གི་ངོ་བོ་ཇི་ལྟ་བ་བཞིན་དུ་རྣམ་པར་རྟོག་པར་འགྱུར་བ་ན། དཔེར་ན་དེ་ཡོད་པ་ན་བདེ་བ་དམིགས་པའི་ཕྱིར་བདེ་བའི་སྒྲུབ་པར་བྱེད་པ་ཉིད་དམ། མེ་ལ་སོགས་པ་དུ་བའི་སྒྲུབ་པར་བྱེད་པ་ཉིད་མངོན་སུམ་གྱིས་རྟོགས་པ་ལྟར་དེ་ཆོས་གཅིག་པོ་
[189b.3]གང་གིས་བདག་ཉིད་དུ་ངེས་པར་བྱས་པ་དེ་ལས་གཞན་པའི་ཆོས་རྣམས་དེ་ལ་ཡོད་པར་ཚད་མ་གཞན་གྱི་དབང་ལས་རྟོགས་པར་བྱ་སྟེ། དངོས་པོ་གཅིག་དང་རང་བཞིན་ཉིད། དེ་བཞིན་དུ་ཆོས་གཞན་གྱི་བདག་ཉིད་དོ་ཞེས་དེ་ལྟ་བུར་གྱུར་པ་རྣམ་པ་དེ་ལྟ་བུའི་ཚད་མས་
[189b.4]རྟོགས་པ་དེ་ལྟ་བུའི་ངོ་བོ་ཉིད་དུ་ཡང་ནས་ཡང་དུ་གོམས་པར་བྱེད་པ་དེའི་ཚེ་དེ་དམིགས་པ་ན་རང་བཞིན་དེ་བཞིན་དུ་འདི་ཡང་ངེས་པར་འགྱུར་བ་ཁོ་ནའོ། །རྣམ་པའི་ཁྱད་པར་མི་གསལ་བར་ནི་ཉམས་སུ་མྱོང་བས་ངེས་པར་སྒྲུབ་པར་ནུས་པ་མ་ཡིན་ནོ། །དེས་ན་གོམས་པ་ལ་
[189b.5]ཡོད་ཀྱང་དེས་ཡུལ་དུ་བྱས་པའི་དོན་གྱི་རྣམ་པའི་ཁྱད་པར་གསལ་བ་མེད་པར་སྐྱེ་བའི་རྣམ་པར་རྟོག་པ་ནི་མངོན་སུམ་གྱི་ཡུལ་དུ་བྱས་པའི་དོན་གྱི་མཐར་ཐུག་པར་མི་འགྱུར་ཏེ། དྲན་པ་བཞིན་དུ་དངོས་པོ་གཞན་མཐོང་བ་ལས་དངོས་པོ་གཞན་ལ་གཞོལ་བའམ་སྒྲོ་འདོགས་
[189b.6]པར་འགྱུར་རོ། །རྣམ་པའི་གསལ་བའི་ཁྱད་པར་གསལ་བར་གྱུར་ན་ཡང་གོམས་པ་ལ་ལྟོས་པར་མི་འགྱུར་ཏེ། སྔོན་པོ་ཉིད་ལ་སོགས་པ་རྣམ་པར་རྟོག་པ་བཞིན་དུ་མཐོང་བ་ཙམ་ལས་འགྱུར་བའི་ཕྱིར་རོ་ཞེ་ན། འདི་ལས་ངེས་པ་འདི་ཡིན་ཏེ། གཅིག་གི་བདག་ཉིད་དུ་གྱུར་
[189b.7]པའི་དངོས་པོ་གཅིག་གི་བདག་ཉིད་དུ་ངེས་པར་བྱས་པ་དམིགས་ཤིང་དངོས་སུ་ན་རང་བཞིན་དེ་ཉིད་ཆོས་གཞན་གྱི་བདག་ཉིད་ཡིན་པའི་ཕྱིར། དེའི་རང་བཞིན་དུ་ཚད་མས་ལན་གཅིག་དམིགས་ནས་དེར་གོམས་པའི་དབང་གིས་རང་བཞིན་དེ་ཉིད་ཆོས་གཞན་གྱི་རྣམ་པར་ཡང་འཇོག་
[190a]
[190a.1]པ་ཡིན་ནོ། །དཔེར་ན་མེའི་རྣམ་པ་ཉིད་དུ་བསྐྱེད་པའི་རང་བཞིན་ཡིན་པའི་ཕྱིར་དེ་དུ་བ་དང་འབྲེལ་པར་མྱོང་བ་མེད་ན། མེ་ཞེས་བྱ་བ་ཉིད་དུ་ངེས་པར་མི་འགྱུར་ལ། དེ་ལ་གང་ཞིག་སྣང་བ་ཉིད་ཀྱིས་ངེས་པར་འགྱུར་བ་རྭ་ཅན་བཞིན་དུ་དུ་བ་སྐྱེད་པར་བྱེད་པ་
[190a.2]ཉིད་གཞན་ནི་སྣང་བར་བྱེད་པ་དེས་ན་དུ་བ་དམིགས་པའི་ཕྱིར་མེའི་རྣམ་པ་དེ་ཉིད་དུ་བའི་རྒྱུ་ཡང་ཡིན་ནོ་ཞེས་ཐུན་མོང་བ་ཉིད་དུ་བྱ་སྟེ་ཡང་ནས་ཡང་དེ་ལྟ་བུ་ཉིད་དུ་དམིགས་པ་ལས་རྣམ་པ་དེ་དམིགས་ན་ཇི་ལྟར་མེའོ་ཞེས་ངེས་པ་དེ་བཞིན་དུ། དུ་བའི་རྒྱུའོ་ཞེས་ཀྱང་ངེས་པར་བྱེད་དོ། །
[190a.3]དེ་ནས་དེ་ལྟར་གོམས་པ་ཡང་དགོས་པ་ཡིན་ལ་མེའི་རྣམ་པ་ཉིད་ཀྱང་ཡིན་ནོ། །དེ་ལྟ་མ་ཡིན་ན། རྣམ་པར་རྟོག་པའི་རྟོག་པ་མྱོང་བས་ཡུལ་དུ་བྱས་པའི་ཁྱད་པར་གྱི་རྗེས་སུ་འབྲང་བར་ཇི་ལྟར་འགྱུར། དེ་བཞིན་དུ་རྣལ་འབྱོར་པ་ལ་ཡང་སྔོན་པོའི་རྣམ་པ་ཉིད་སྐད་ཅིག་མ་ཉིད་
[190a.4]ཀྱི་སྣང་བར་འགྱུར་རོ། །དེས་ན་ཉམས་སུ་མྱོང་བ་ནི་ཇི་ལྟར་གཟུགས་དང་དབྱིབས་དག་ལ་འགྱུར་བ་བཞིན་རྟོགས་པ་ཙམ་ལས་རྣམ་པར་རྟོག་པ་སྐྱེད་པར་བྱེད་པའམ། ཡང་ཆོས་གཞན་གྱི་རྣམ་པ་གཞན་གྱི་བདག་ཉིད་དུ་གྱུར་པར་གོམས་པའི་དབང་གིས་ཡིན་ཏེ།
[190a.5]རྣམ་པ་གཞན་ནི་མི་སྲིད་དོ། །གང་དུ་རང་བཞིན་ཁྱད་པར་ཅན་མངོན་སུམ་གྱི་ཚད་མས་རྟོགས་པ་ཡོད་པ་དེར་ནི་རྣམ་པར་རྟོག་པ་ཙམ་སྐྱེ་བ་མངོན་སུམ་གྱི་ཚད་མའི་བྱེད་པ་ཁྱད་པར་དུ་གྱུར་པ་མ་ཡིན་ཏེ། འོན་ཀྱང་མངོན་སུམ་ཉིད་དེ། དཔེར་ན་ནོར་བུའི་གཟུགས་ལ་སོགས་པ་
[190a.6]དག་ལ་བཞིན་ནོ་ཞེས་གཞན་དུ་གཏན་ལ་ཕབ་ཟིན་ཏོ། །གོམས་པར་བྱ་བར་གྱུར་པ་ཉིད་ལ་ལྟོས་པར་བྱ་བ་གཞན་དག་ཀྱང་ཡོད་པར་བཤད་པ་ནི། དེ་ལ་ཞེས་བྱ་བ་སྟེ་གོམས་པ་ཡིན་པར་འགྱུར་བ་དེ་ལའོ། །བློ་གསལ་བ་ནི་ཡིད་ལ་བྱེད་པ་མི་མཐུན་པ་མ་ཡིན་ནོ། །ཡིད་ལ་བྱེད་པ་
[190a.7]མི་མཐུན་པར་གྱུར་ན་ཉམས་སུ་མྱོང་བ་ཉིད་ཀྱང་མི་སྐྱེ་བ་དེ་ལྟ་ན་ཡང་ཉམས་སུ་མྱོང་བའི་དངོས་པོའི་མཐུ་ལས་སྐྱེ་བ་ཡིན་པའི་ཕྱིར་མི་མཐུན་པ་ཁྱད་པར་དུ་འཕགས་པ་ཁོ་ནས་མངོན་སུམ་དུ་སྐྱེ་བའི་གགས་བྱེད་ལ། རྣམ་པར་རྟོག་པ་ནི་ཅུང་ཟད་མི་མཐུན་ན་ཡང་མི་སྐྱེ་སྟེ་དཔྱོད་པའི་རང་
[190b]
[190b.1]བཞིན་ཡིན་པའི་ཕྱིར་རོ། །དཔྱོད་པ་ནི་ཤིན་ཏུ་འཚམ་པ་མེད་པར་ཡོད་པ་མ་ཡིན་ནོ། །དེ་ལ་ཡང་མི་མཐུན་པ་དང་ཆོས་མི་མཐུན་པ་ལ་ལྟོས་པ་ཡོད་པ་མ་ཡིན་ཏེ། རྣམ་པར་དཔྱོད་པ་ཕྲ་མོ་ནི་ཅུང་ཟད་ཤེད་དམས་ཀྱང་ལྡོག་ལ་གཞན་ནི་མ་ཡིན་ནོ་ཞེས་བྱ་བ་ལ་སོགས་པས་རྗེས་སུ་
[190b.2]རྟོགས་པར་བྱའོ། །གལ་ཏེ་གོམས་པ་ཡོད་པ་ཉིད་ལ་དེའི་བག་ཆགས་གོམས་པ་ཞེས་བྱ་བ་འདི་ཇི་ཞིག་ཡིན། དེ་ཡོད་པ་ལ་བློ་གསལ་བ་ཉིད་བཞིན་དུ་འདི་ནི་ཐ་དད་པར་གྱུར་པ་མ་ཡིན་ནོ་ཞེ་ན། བདེན་མོད་ཀྱི་འོན་ཀྱང་སྔར་རྣམ་པར་རྟོག་པ་གོམས་པར་བཤད་པ་གང་ཡིན་པ་
[190b.3]དེ་ཉིད་འདི་ལྟར་ཁྱད་པར་དུ་བྱས་པ་ཡིན་ཏེ། རྣམ་པར་རྟོག་པ་གོམས་པ་ན་བག་ཆགས་གོམས་པར་འགྱུར་གྱི་བག་ཆགས་གོམས་པའི་རྣམ་པ་གཞན་ནི་མེད་ལ་རྣམ་པར་རྟོག་པ་གོམས་པ་ཡང་གཞན་དུ་ཉེ་བར་སྦྱོར་བ་མ་ཡིན་ནོ། །དངོས་པོ་དེ་ལྟར་ཚད་མས་དེའི་ཆོས་ཉིད་
[190b.4]དུ་རྟོགས་པ་ན་བག་ཆགས་སྐྱེ་ལ། དེ་ཡང་ནས་ཡང་དུ་དེ་ལྟར་རྟོགས་པ་ལས་ནི། བག་ཆགས་དེ་གོམས་པར་འགྱུར་བ་ཡིན་ནོ། །དེས་ན་དེ་ལྟར་རྣམ་པར་རྟོག་པ་གོམས་པའི་མྱོང་བ་ལས་རྣམ་པར་རྟོག་པ་སྐྱེ་བ་ཡིན་ནོ། །གལ་ཏེ་བག་ཆགས་གོམས་པ་ལས་རྣམ་པར་
[190b.5]རྟོག་པ་སྐྱེ་ན་བག་ཆགས་རྒྱུ་ཡིན་པར་འགྱུར་གྱི། ཉམས་སུ་མྱོང་བ་ནི་རྒྱུར་མི་འགྱུར་རོ། །དེས་ན་དང་པོའི་སྐད་ཅིག་པ་མི་མཐོང་ལ། གཉིས་པ་ལ་དུ་བའི་འབྲས་བུ་ཅན་གྱི་བག་ཆགས་སད་པ། གསུམ་པ་རྣམ་པར་རྟོག་པ་ཡིན་ནོ་ཞེས་བྱ་བར་འགྱུར་རོ་ཞེ་ན། འབྲས་བུའི་རྣམ་པར་
[190b.6]རྟོག་པ་སྐད་ཅིག་མ་གསུམ་པ་ལ་འགྱུར་རོ་ཞེས་བྱ་བའི་བརྗོད་པ་འདི་ནི་ཤིན་ཏུ་ཆུང་སྟེ་མེའི་རྣམ་པར་རྟོག་པ་ཡང་དེ་བཞིན་ཁོ་ནར་འགྱུར་རོ། །འདི་ལྟར་མེའི་རྣམ་པར་རྟོག་པ་ནི་མེ་ཉམས་སུ་མྱོང་བའི་འདུ་བྱེད་ལས་ཡིན་ཏེ། གཞན་དུ་ན་ནི་ཤེས་པས་ཤེས་པ་གཞན་སྐྱེད་པ་མ་ཡིན་ནོ། །དེས་
[190b.7]ན་དངོས་པོ་ཉམས་སུ་མྱོང་བའི་འདུ་བྱེད་རྣམ་པར་རྟོག་པ་ཡིན་པའི་ཕྱིར་འདི་ཡང་དེ་བཞིན་ཁོ་ནར་ཐལ་བར་འགྱུར་རོ། །འདི་ལ་བརྗོད་པ་ནི། བློ་གཞི་ཚུགས་པའི་འདུ་བྱེད་ཅེས་བརྗོད་དོ། །གཞི་ཚུགས་པ་ཉིད་ནི་རྒྱུ་མཚན་གཞན་ལ་བརྟེན་ནས་ལན་གཅིག་བློ་ཇི་ལྟ་བུ་ཉིད་དུ་སྐྱེས་
[191a]
[191a.1]པ་དེ་ཁོ་ན་བཞིན་དུ་རྒྱུ་མཚན་གཞན་ལ་མི་ལྟོས་པར་མྱོང་བ་གསལ་བའི་མཚན་ཉིད་རང་གི་བདག་ཉིད་ཕུལ་དུ་བྱུང་བ་ཁོ་ན་ལས་སྐྱེ་བ་ཡིན་པའི་ཕྱིར་རོ། །དེས་ན་འདི་ནི་ཡིད་གཏད་པ་ལ། དེ་ལྟ་བུའི་ངོ་བོ་ལས་དེ་མ་ཐག་པ་ཁོ་ནར་དེ་ལྟར་འགྲུབ་སྟེ། དོན་གཞན་
[191a.2]ལ་འགྲོ་བར་མི་འདོད་ཀྱང་དེ་ལྟ་བུས་བསྐྱེད་པའི་ནུས་པ་སྐྱེས་པ་ཡིན་པ་སད་པས་དུས་གཞན་དུ་དེ་ལྟ་བུའི་རྣམ་པར་ཤེས་པ་དྲན་པ་ཞེས་བྱ་བ་སྐྱེད་པར་བྱེད་པའི་ཕྱིར་སྐད་ཅིག་མ་གསུམ་པ་ལ་འབྱུང་བར་ཐལ་བ་མ་ཡིན་ནོ། །འབྲས་བུ་ལ་སོགས་པའི་རྣམ་པར་རྟོག་པ་དག་ཀྱང་དེ་བཞིན་
[191a.3]ནོ། །མེའི་རྣམ་པ་ཉིད་དུ་བའི་འབྲས་བུ་ཅན་ཡིན་ནོ་ཞེས་བསྒོས་པའི་བློ་ཅན་ནི་ཇི་ལྟར་མེའི་རྣམ་པར་ཉམས་སུ་མྱོང་བ་ན་ཉམས་སུ་མྱོང་བ་དེས་མེའོ་སྙམ་པ་སྐྱེད་པ་དེ་བཞིན་དུ་དུ་བའི་རྒྱུའོ་ཞེས་བྱ་བར་ཡང་ཡིན་ནོ། །དེ་སྐབས་ཇི་ལྟར་རྣམ་པར་རྟོག་པའི་རྒྱུ་ཡིན་ཞེ་ན། སྨན་པའི་
[191a.4]སྐབས་སུ་གནས་པར་འགྱུར་བའི་སྐྱེས་བུ་ལ་སྨན་པར་ངེས་པ་ཡིན་ནོ། །གལ་ཏེ་མངོན་སུམ་གྱིས་མ་ངེས་པའི་ཆོས་དེ་དང་ལྡན་པ་རྒྱུ་མཚན་གཞན་གྱིས་དེ་ལྟར་ངེས་པར་ཚད་མ་གཞན་གྱི་རྩ་བ་ལས་ཡིན་གྱི་མངོན་སུམ་ལ་བརྟེན་པ་ནི་མ་ཡིན་ཏེ། སྐད་ཅིག་མ་ཉིད་ལ་སོགས་པ་
[191a.5]བཞིན་ནོ་ཞེ་ན། བརྗོད་པ། བཟོའི་སྦྱོར་བ་དུ་མ་ཤེས་པའི་ཁྱད་པར་ཅན་གྱི་སྐབས་དང་འབྲེལ་པ་ལས་ཁྱད་པར་ཅན་གྱི་ཆོས་དང་ལྡན་པར་ངེས་ཀྱི་གཞན་མ་ཡིན་པས་དེའི་ལྷན་ཅིག་བྱེད་པ་དང་ལྡན་པ་མངོན་སུམ་དེའི་རྒྱུ་མཚན་ཡིན་ནོ། །དེ་ལ་ཆོས་གཞན་གྱི་འདུ་བྱེད་ཡོད་
[191a.6]ཀྱང་སྐབས་ཐ་དད་པའི་ཕྱིར་མི་ངེས་པའི་ཕྱིར་རོ། །དེ་བཞིན་དུ་གཞན་ཡང་ཉམས་སུ་མྱོང་བ་ཇི་ལྟ་བ་བཞིན་རྟོགས་པར་བྱའོ་ཞེས་བྱ་བ་ནི་སོགས་པའི་ཚིག་གི་དོན་ཏོ། །འདི་ལྟར་ཉེ་བ་ལ་ཡང་ལྟོས་ཏེ་ངེས་པ་སྐྱེ་བ་ཡིན་ཏེ། ནོར་བསྲུང་བ་ལ་ངེས་པར་སྦྱོར་བ་དམིགས་ནས་
[191a.7]རང་གི་ཆུང་མ་ཁྱོའི་རྣམ་པར་རྟོག་པ་སྐྱེའི་གཞན་ནི་མ་ཡིན་པ་བཞིན་ནོ། །དེས་ནི་དེ་ལྟར་རྣམ་པར་རྟོག་པ་ལྷན་ཅིག་བྱེད་པ་ལ་ལྟོས་ཏེ་ཡོད་པ་དང་མེད་པར་བསྟན་ནས་སྐྱེ་བ་རྣམས་ལ་ཡང་སྔ་ཕྱིར་སྐྱེ་བ་སོ་སོར་ངེས་པར་རྒྱུ་བཤད་པ་ནི་དེ་ཁོ་ན་ཞེས་བྱ་བ་སྟེ་ངེས་པ་དག་སྔ་ཕྱི་ཉིད་དུ་
[191b]
[191b.1]འགྱུར་ཏེ། རྣམ་པར་རྟོག་པ་ལ་ལ་ནི་སྔར་སྐྱེ་ལ་ལ་ལ་ནི་ཕྱིས་སོ། །ཇི་ལྟར་བྱས་ཏེ་ཞེ་ན། བཤད་པ། ཉེ་བ་དང་ཆེས་ཤིན་ཏུ་ཉེ་བ་ལ་སོགས་པའི་བྱེ་བྲག་གིས་སོ། །ལྷན་ཅིག་བྱེད་པ་རྣམས་ཀྱི་ཁྱད་པར་གྱི་རིམ་པ་ལས་སོ། །དཔེར་ན་བློ་གསལ་བ་དང་ཆེས་ཤིན་ཏུ་གསལ་
[191b.2]བ་ལ་ལྟོས་ནས་ཆོས་རྣམས་ལས་འགའ་ཞིག་ཡོད་པ་དང་མེད་པར་རྣམ་པར་རྟོག་པ་དེ་བཞིན་དུ་སྔ་ཕྱིར་ཡང་མ་ཡིན་ནོ། །དེ་བཞིན་དུ་གོམས་པ་དང་ཆེས་ཤིན་ཏུ་གོམས་པས་ཀྱང་སྔ་ཕྱིར་འགྱུར་རོ། །སོགས་པ་སྨོས་པས་བཟུང་བའི་ལྷན་ཅིག་བྱེད་པ་རྣམས་ཉེ་བར་མཚོན་པའི་དོན་དུ་འདིར་ཉེ་
[191b.3]བ་ཉེ་བར་བཀོད་དོ། །ཕ་ཉིད་ཉེ་བ་ཡིན་གྱི་མཁན་པོ་ཉིད་ནི་མ་ཡིན་ནོ། །དེ་ནི་གོམས་པ་ལས་ཉེ་བ་ངེས་པ་ཡིན་ཡང་ཕའི་འོག་ཏུ་འདིར་ངེས་པ་ཡིན་ནོ། །གོམས་པ་ལ་ཡང་དཔེ་འདི་ཡིན་ནོ། །འདི་ལྟར་གཅིག་ཉིད་སྐྱེད་པར་བྱེད་པ་དང་། འདོན་དུ་འཇུག་པར་བྱེད་པ་ཉིད་དུ་ཁྱད་པར་མེད་
[191b.4]ཀྱང་ཕ་ཉིད་ནི་ཡུན་རིང་དུ་གོམས་པ་ལ་མཁན་པོ་ནི་མ་ཡིན་ནོ། །ཕ་བུའི་སྐྱེད་པར་བྱེད་པ་ཉིད་དུ་མངོན་སུམ་མ་ཡིན་པ་དེ་ལྟ་ན་ཡང་འདིར་ནི་དཔེ་ཙམ་དུ་ཟད་དོ། །གལ་ཏེ་ལྷན་ཅིག་བྱེད་པ་རྣམས་ཡོད་ཀྱང་ཁྱད་པར་ངེས་པ་ཡོད་པ་མ་ཡིན་ཏེ། དཔེར་ན་སྨིག་རྒྱུ་དག་ལ་བཞིན་ནོ། །དེས་ན་
[191b.5]ཇི་ལྟར་ལྷན་ཅིག་བྱེད་པ་རྣམས་ལྷན་ཅིག་བྱེད་པ་ཡིན་ཞེ་ན། དེ་མ་ཡིན་ནོ་ཞེས་བཤད་པ་ནི། ངེས་པ་དེ་ཡང་ཞེས་སྨོས་སོ། །འཁྲུལ་པའི་རྒྱུ་མེད་ན་འགྱུར་རོ། །རྒྱུ་མཚན་དེ་ཡོད་ཙམ་གྱིས་ནི་འགྱུར་བ་མ་ཡིན་ནོ་ཞེས་བྱ་བའི་ཐ་ཚིག་གོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །
[191b.6]དེས་ན་དེ་ལྟར་གང་ཕྱིར་དངོས་ཀུན་ཞེས་བྱ་བ་ལ་སོགས་པས་གཞན་སེལ་བའི་ཡུལ་ཅན་ཉིད་དུ་ཁས་བླངས་པས་དམ་བཅས་པའི་དོན་གྱི་ཕྱོགས་གཅིག་ཉིད་དུ་འགྱུར་བ་སྤངས་པར་བརྗོད་པའི་གཞན་སེལ་བའི་ཡུལ་ཅན་ཉིད་ཀྱི་སྒྲ་དང་ཚད་མ་གཞན་འཇུག་པ་ནི་འདི་ཡན་ཆད་
[191b.7]ཀྱིས་བསྒྲུབ་པ་ཡིན་ནོ། །ད་ནི་གཞོན་ནུ་མ་ལེན་ལ་སོགས་པ་གང་དག་སློབ་དཔོན་ཕྱོགས་ཀྱི་གླང་པོས་གཞན་སེལ་བ་ཞེས་བྱ་བ་དངོས་པོ་ལས་ཐ་དད་པ་དངོས་མེད་ཀྱི་མཚན་ཉིད་སྒྲའི་དོན་དུ་གསུངས་པར་རྟོགས་ནས་སུན་འབྱིན་པ་བརྗོད་པ་དེ་དག་གི་འདོད་པ་བསལ་བའི་ཕྱིར་དེ་ལ་
[192a]
[192a.1]ཞེས་བྱ་བ་ལ་སོགས་པའི་རབ་ཏུ་བྱེད་པས་རང་གི་གཞུང་སྟོན་པར་བྱེད་དོ། །རྣམ་པར་གཅོད་པའི་ཡུལ་ཅན་དེ་ལ་ཡང་གཞན་ལ་སོགས་པར་གྱུར་པས་ན་གཞན་ལས་ལོག་པ་དང་ལྡོག་པར་བྱེད་པས་ན་གཞན་ལས་ལྡོག་པ་ཞེས་བྱ་བའི་སྒྲ་དང་དེ་བཞིན་དུ་ངེས་པ་རྣམ་པར་
[192a.2]རྟོག་པ་ཉིད་གང་ཡིན་པ་དེ་དག་ནི་བརྡའི་རྗེས་སུ་བྱེད་པ་ཡིན་གྱི་དོན་ལ་ལྟོས་པ་ནི་མ་ཡིན་ནོ། །འདི་སྐད་བརྗོད་པ་ཡིན་ཏེ། གཞན་ལས་ལོག་པས་ན་ལོག་པ་ཞེས་བྱ་བ་ནི་དངོས་པོའི་ངོ་བོ་ཉིད་རྟོགས་པ་ཡིན་ལ། འདིའི་གཞན་ལས་ལོག་པར་བྱེད་པའི་ལྡོག་པ་ཡང་གཞན་མེད་པ་ཉིད་དོ། །
[192a.3]དེས་ན་དེ་ལྟར་སྒྲ་དང་ཤེས་པ་དག་རང་གི་བདག་ཉིད་ཁོ་ནས་ཡུལ་ཐ་དད་པར་རྟོགས་པ་ཡིན་ནོ་ཞེས་བྱ་བ་ནི་ཞེས་བྱ་བས་བརྗོད་པ་ཡིན་ཏེ། དེ་ལྟར་སྒྲ་དང་ཤེས་པ་དག་ཡུལ་ཐ་དད་ཀྱང་ཞེས་བྱ་བའི་ཐ་ཚིག་གོ། །དེ་ལྟ་བུ་དེ་དག་ལ་ཡང་ཇི་ལྟར་རྟོགས་པའི་ཡུལ་ཐ་དད་པ་དང་རྗེས་སུ་འབྲེལ་པ་ནི་ཡོད་
[192a.4]པ་མ་ཡིན་ནོ། །གང་ཞིག་བྱེད་པ་པོར་གྱུར་པས་འདི་ལོག་པའམ། ལྡོག་པར་བྱེད་པ་མེད་པར་བྱེད་པ་ཉིད་དུ་འགྱུར་བས་ལྡོག་པར་འགྱུར་བ་བཟློག་པ་ཞེས་བྱ་བ་ནི་འགའ་ཡང་ཡོད་པ་མ་ཡིན་ཏེ། གང་ཞིག་འགའ་ཡང་མེད་ཅེ་ན། བརྗོད་པ་འདི་ལ་རེ་ཞིག་སྒྲ་ནི་རྟོགས་པའི་རྗེས་སུ་
[192a.5]འགྲོ་བ་ཡིན་ཏེ། རྣམ་པར་ཤེས་པ་བཞིན་དུ་རང་ཉིད་ཡུལ་དང་ལྡན་པ་མ་ཡིན་པའི་ཕྱིར་དུ་བ་བཞིན་ནོ། །རྟོགས་པས་དམིགས་པའི་ཡུལ་བསྟན་པར་བྱ་བའི་དོན་དུ་རབ་ཏུ་སྦྱར་བའི་ཕྱིར་རོ། །དེ་ཡང་རྣམ་པར་རྟོག་པ་ཁོ་ནའོ། །རྣམ་པར་རྟོག་པ་ཡང་རང་ཉིད་དབང་པོ་ལ་བརྟེན་པའམ།
[192a.6]དེ་ལ་བརྟེན་པའི་རྣམ་པར་ཤེས་པ་རྗེས་སུ་འཇུག་པ་ཡང་མ་ཡིན་ནོ། །དབང་པོ་བྱེད་པ་དང་བཅས་པ་ལས་བཟློག་པར་བྱ་བའི་བདག་ཉིད་དམ་དངོས་པོ་མེད་པའི་རང་བཞིན་སྣང་བ་མེད་པ་ལ་རྟགས་ཀྱི་རྗེས་སུ་དཔག་པ་དེ་ལྟ་བུ་འགའ་ཡང་ཡོད་པ་མ་ཡིན་ནོ། །ཐ་སྙད་འདི་ཐ་
[192a.7]དད་པའི་རྗེས་སུ་འགྲོ་བ་ཡིན་ཡང་དངུལ་ལ་སོགས་པའི་ཐ་སྙད་ལྟར་མངོན་སུམ་ཉིད་གཞན་དུ་དམིགས་པས་ལྡོག་པ་ཡང་མ་ཡིན་ནོ། །དེའི་ཕྱིར་རང་གི་ངོ་བོ་ཙམ་ལ་གནས་པའི་དོན་གྱི་རང་བཞིན་གཅིག་ཉིད་འདི་ནི་ལོག་པའོ། །འདིའི་ལྡོག་པའོ་ཞེས་འབྲེལ་པ་ཅན་གྱི་དངོས་པོ་གཞན་
[192b]
[192b.1]དུ་སྒྲོ་འདོགས་པའམ། རང་གི་བདག་ཉིད་ལ་བརྟེན་པ་ཡང་དག་པ་མ་ཡིན་པའི་ཆོས་སྒྲོ་འདོགས་པས་རྟོགས་པ་ཡིན་ནོ། །འདིའི་ལྡོག་པ་ཞེས་བྱ་བའི་རྟོགས་པ་ནི་ལྡོག་པའི་མཐར་ཐུག་པ་ཡིན་ཡང་རྟེན་ཐ་དད་པ་མ་གྲུབ་པའི་ཕྱིར་དང་། གནོད་པ་མེད་པའི་ཕྱིར་དེས་སྒོ་འདོགས་པ་
[192b.2]དངོས་པོ་དེའི་མཐར་ཐུག་པ་ཁོ་ནར་རྟོགས་པ་ཡིན་ནོ། །གང་གིས་དེ་ལྟར་རྟོགས་པའི་ཡུལ་མ་གྲུབ་པ་ནི་བག་ཆགས་ཙམ་ལ་བརྟེན་པར་འགྱུར་བ་འདི་ངོ་བོ་ཉིད་ཀྱིས་འབྱུང་བ་ཡང་མ་ཡིན་ཏེ། རྟག་པ་དང་རྫས་གཅིག་པ་ལ་སོགས་པའི་རྣམ་པར་རྟོག་པ་ལྟ་བུ་མ་ཡིན་པའི་ཕྱིར་རོ། །འོན་
[192b.3]ཀྱང་ས་ཐམས་ཅད་པའི་བརྡར་རྣམ་པར་གཞག་པའི་ཡན་ལག་ཉིད་ཀྱིས་དོན་སྟོན་པར་བྱེད་པ་རྣམས་ཀྱིས་ཐམས་ཅད་དེ་ཙམ་ཉིད་ཡིན་པའི་ཕྱིར་རམ། མི་ཤེས་པའི་ཕྱིར་དེ་ལྟར་རྣམ་པར་གཞག་པའི་བྱ་བ་དང་བྱེད་པ་ལ་སོགས་པ་ཐ་དད་པའི་རྗེས་སུ་འགྲོ་བའི་ཕྱིར་ན་བརྡ་ཁོ་ནའོ། །ངེས་པ་ནི་རྣམ་
[192b.4]པ་གཉིས་ཏེ། ཡུལ་སོ་སོར་རྣམ་པར་གནས་པའི་ཡུལ་གྱི་སྐད་ལ་བརྟེན་པ་དེ་ནི་རྟོགས་པ་པོ་རྣམས་ཀྱི་ཐོག་མ་མེད་པ་ཅན་ཡིན་ཏེ། ཐ་སྙད་སྔ་མ་སྔ་མ་མཐོང་ནས་ཕྱི་མ་ཕྱི་མ་ཞུགས་པའི་ཕྱིར་རོ། །དེས་ནི་ཡུལ་གཅིག་པ་རྣམས་ཉིད་ཐ་སྙད་བྱེད་པ་ཡིན་ནོ། །གཞུང་སྡེབ་པ་སྒྲུབ་པ་ལྷུར་ལེན་
[192b.5]པ་རྣམས་བྱེ་བྲག་ཏུ་སྒྲུབ་པར་བྱེད་པ་དང་བསྒྲུབ་པར་བྱ་བའི་དངོས་པོ་ནི་ཡུལ་གྱི་སྐད་ཀྱི་སྒྲ་ལ་བརྟེན་པ་མ་ཡིན་ཏེ། ས་ཐམས་ཅད་པའི་རྟོགས་པ་པོ་ལ་བསྟན་པར་བསམས་ནས་ཞུགས་པའི་ཕྱིར་རོ། །དེ་ལ་ཉེ་བར་མཁོ་བ་ལ་ལྟོས་པའི་ཕྱིར་ཡང་བྷ་བ་ཏ་ལ་སོགས་པའི་སྒྲ་དག་འགའ་ཞིག་གིས་
[192b.6]བྱེ་བྲག་ཏུ་བཤད་པ་ཡིན་ཏེ། དེ་བས་ན་དངོས་པོ་དོན་དམ་པ་རིག་ཀྱང་ཐབས་གཞན་མེད་པའི་ཕྱིར་དེ་ལྟར་བཏགས་པས་ཆོད་པས་དངོས་པོ་ལ་འཇུག་པ་འདི་དག་གི་ཐ་སྙད་བྱེད་པ་ན་ཉེས་པ་དང་བཅས་པ་བརྗོད་པ་ལྟ་བུར་མངོན་ཏེ། དཔེར་ན་སློབ་དཔོན་ཕྱོགས་ཀྱི་གླང་པོས་ལྡོག་པའི་ཡུལ་
[192b.7]ཅན་དུ་གསུང་བ་ན་སྒྲ་ཙམ་གྱི་རྗེས་སུ་འབྲང་བ་དག་གིས་ལོག་པ་ལས་ཐ་དད་པའི་ལྡོག་པའི་ཡུལ་ཅན་དུ་རྟོགས་པ་ལ་དེ་ལྟར་ནི་མ་ཡིན་པ་བཞིན་ནོ། །དེ་བས་ན་ཐ་དད་པ་ནི་བརྡ་ཙམ་ལ་བརྟེན་པ་ཡིན་གྱི། དངོས་པོའི་ཡུལ་ཅན་ནི་མ་ཡིན་ནོ། །གལ་ཏེ་ཡང་རང་གི་བདག་ཉིད་ཙམ་ལ་
[193a]
[193a.1]རྣམ་པར་གནས་པས་ན་དངོས་པོ་ལ་དངོས་པོ་གཞན་མེད་པ་དེ་ལྟ་ན་ཡང་ཇི་ལྟར་མི་དམིགས་པ་ཕྱོགས་བུམ་པ་མེད་པ་ཡིན་པར་བསྟན་པ་དེ་བཞིན་དུ་འདིར་ཡང་དངོས་པོ་ཉིད་ལྡོག་པར་བརྗོད་པ་ཡིན་ཏེ། ཡུལ་ཉིད་ལ་ལྟོས་པ་ན་དངོས་པོ་ཉིད་ཡུལ་ཡིན་པའི་ཕྱིར་
[193a.2]རོ། །ཕན་ཚུན་དུ་ཐ་དད་པ་འདིའི་ས་བོན་ཡིན་ཞེས་མེད་པ་ཙམ་ནི་ས་བོན་དུ་མདུན་དུ་འཆད་པར་འགྱུར་རོ། །འགྲེལ་པ་ནི་དེ་ལ་ཡང་ཞེས་མདོ་རྗེས་སུ་བརྗོད་དོ། གཞན་སེལ་བ་ཞེས་ཡུལ་བསྟན་པ་ཡིན་ནོ། །ལྡོག་པར་བྱེད་ཅིང་སེལ་བར་བྱེད་པའི་རྣམ་པ་ལྡོག་པ་གཞན་ལ་ལོག་པ་ཡང་
[193a.3]གཞན་པ་ཡང་མེད་དོ། །གཞན་འགའ་ཞིག་ལ་ལྟོས་པ་མ་ཡིན་པའི་ཕྱིར་དང་། འདི་གཉི་ག་ལ་གཞན་ཉིད་དུ་བརྗོད་པའི་ཕྱིར་ན་སྐབས་ཀྱི་གཞན་ཉིད་ཕན་ཚུན་ལྟོས་པ་ཉིད་ཡིན་ནོ། །ལྡོག་པ་ནི་ལོག་པ་ལས་གཞན་མ་ཡིན་ལ་ལོག་པ་ཡང་ལྡོག་པ་ལས་གཞན་མ་ཡིན་ནོ་ཞེས་བྱ་བའི་ཐ་ཚིག་གོ། །ཇི་
[193a.4]ལྟར་གཞན་མ་ཡིན་ནོ་ཞེ་ན། རིགས་པ་བཤད་པ་ནི། དེ་ལས་ལྡོག་པ་ལས་ཞེས་བྱ་བའོ། །ལྡོག་མཚམས་ཉིད་དུ་ལྟོས་པའི་དོན་གཞན་ནི་དེ་ཞེས་བྱ་བར་འབྲེལ་པ་ཡིན་ཏེ། རིགས་མི་མཐུན་པ་དེ་ལས་ལྡོག་པ་ལས་ལྡོག་པ་བཟློག་པར་འགྱུར་བ་རིགས་མི་མཐུན་པའི་དངོས་པོ་
[193a.5]ཉིད་དུ་ཐལ་བར་འགྱུར་བའི་ཕྱིར་རོ། །བ་ལང་ལ་ནི་རྟ་མེད་ལ་རྟ་ལ་ཡང་བ་ལང་མེད་པས་ན་རྟ་བ་ལང་ལས་ལྡོག་པ། བ་ལང་ཡང་རྟ་ལས་ལོག་པར་འགྱུར་བ་ཡིན་ནོ། །ལྡོག་པ་ལོག་པ་ལས་གཞན་ཡིན་པའི་ཕྱིར་ནི་བ་ལང་མ་ཡིན་པའི་ཕྱིར་ལྡོག་པ་ལས་ལོག་པ། བ་ལང་མ་ཡིན་པ་
[193a.6]ལས་ལོག་པ་ཡང་བ་ལང་ལས་ལོག་པའི་ཕྱིར་བ་ལང་ལ་བ་ལང་མ་ཡིན་པ་ལས་ལྡོག་པ་མེད་པར་འགྱུར་རོ། །བ་ལང་ལ་བ་ལང་མ་ཡིན་པ་ལས་ལྡོག་པ་ཡོད་དོ་ཞེས་བརྗོད་པས་ནི་བ་ལང་ལ་བ་ལང་མ་ཡིན་པ་མེད་པ་ཡིན་ན། །གལ་ཏེ་འདི་ལ་དེ་མེད་ན་ནི་བ་ལང་ལ་བ་ལང་མ་ཡིན་པ་ཡོད་དོ་
[193a.7]ཞེས་བྱ་བར་འགྱུར་རོ། །ཐ་དད་པ་ནི་འགའ་ཡང་འགའ་ལ་ཡོད་པ་མ་ཡིན་པས་ནི་བ་ལང་མ་ཡིན་པར་ཐལ་བར་འགྱུར་རོ། །དེ་ལྟ་ན་ནི་འགའ་ཡང་གང་ལས་ཀྱང་མི་ལྡོག་པར་འགྱུར་རོ་ཞེས་བཤད་པ་ནི། དེ་ལྟ་ན་ཞེས་བྱ་བའོ། །དེས་ན་གང་དག་ཆོས་ཐ་དད་པ་ཉིད་ཀྱིས་དངོས་པོ་མེད་
[193b]
[193b.1]པ་དངོས་པོ་ཉིད་དུ་འདོད་པ་དེ་དག་བསལ་བ་ཡིན་ནོ། །གཞན་ལ་གཞན་མེད་པའི་མེད་པར་ནི་དེ་ལས་ཐ་དད་དོ་ཞེས་འཐད་པ་མ་ཡིན་ནོ། །དེ་ལ་གཞན་མེད་པ་མེད་ན་ནི་གསལ་བར་གཞན་ཉིད་དོ། །གལ་ཏེ་གཞན་མ་ཡིན་ན་ནི་མི་གཞན་པ་ཞེས་བྱ་བར་འགྱུར་རོ། །ཕྱི་འདིའི་ཡང་རྣམ་པར་ཕྱེ་ནས་
[193b.2]ལུང་བསྟན་པར་བྱ་བ་ཡིན་ཏེ། དངོས་པོའི་གནས་ཐབས་ལ་ལྟོས་ནས་ནི་གཞན་ཡང་མ་ཡིན་ལ། གཞན་མ་ཡིན་པ་ཡང་མ་ཡིན་ནོ། །གལ་ཏེ་དེ་དེ་ལྟ་ན་ལྡོག་པ་ལྡོག་པ་མེད་དོ་ཞེས་བྱ་བ་ཉིད་དུ་འགྱུར་རོ་ཞེ་ན། ལྡོག་པ་ཞེས་བྱ་བ་ཡོད་དོ་ཞེས་སུས་སྨྲས། དངོས་པོ་ལ་དངོས་པོ་གཞན་
[193b.3]མེད་དོ་ཞེས་བྱ་བ་ཡིན་གྱི། དངོས་པོ་ལ་དངོས་པོ་གཞན་མེད་པ་ཡོད་པ་ནི་མ་ཡིན་ནོ། །དེ་ལྟ་ན་ཡང་དངོས་པོ་གཞན་མེད་པ་མེད་དོ་ཞེས་བྱ་བ་འདི་ཉིད་བརྗོད་པ་ཡིན་པའི་ཕྱིར་འཐད་པ་ཁོ་ནའོ། །ཇི་ལྟར་ཕྱོགས་ལ་བུམ་པ་མེད་པ་ཞེས་བསྟན་པ་དེ་ལ་ལྟོས་ནས་ནི་ལྡོག་པ་གཞན་མ་ཡིན་པ་
[193b.4]ཁོ་ནའོ། །ད་ནི་བརྡའི་རྗེས་སུ་བྱེད་པ་ཉིད་བསྟན་པའི་ཕྱིར། དེའི་ཕྱིར་ཞེས་བྱ་བ་ལ་སོགས་པས་དངོས་པོ་ཐ་མི་དད་པར་བཤད་དོ། །བརྡའི་རྗེས་སུ་བྱེད་པ་ཉིད་ལ་ནི། སྒྲ་དང་ཞེས་བྱ་བ་ལ་སོགས་པའོ། །བརྗོད་པར་བྱ་བ་ལ་ནི་ཐ་དད་པ་མེད་དོ་ཞེས་བྱ་བས་བརྡའི་བྱེ་བྲག་ལ་བརྟེན་པའི་གཏན་
[193b.5]ཚིགས་སོ། །འདིར་ཡང་ལྡོག་པ་ནི་གཞན་ཟློག་པར་བྱེད་པའི་རང་བཞིན་ཡིན་ལ། དེས་ལྡོག་པ་ལྡོག་པ་ནི་བྱེད་པ་པོ་ཡིན་ནོ། །འདིའི་ལྡོག་པ་ཞེས་བྱ་བ་ནི་འབྲེལ་པ་ངེས་པ་ཡིན་ནོ། །དེས་ན་འདི་ཙམ་གྱིས་ནི་འདིར་མི་བདེན་པ་ཉིད་སྒྲོ་བཏགས་ནས་རང་གི་ངོ་བོ་ལ་གནས་པའི་དངོས་
[193b.6]པོའི་བདག་ཉིད་ཁོ་ན་རྟོགས་སོ་ཞེས་བརྗོད་པ་ཡིན་ནོ། །གཞན་དག་དེ་མི་བཟོད་པས་བརྗོད་པར་བྱ་བ་ལ་ཐ་དད་པ་མེད་པའི་ཞེས་སྨྲའོ། །ལོག་པ་དང་ལྡོག་པའི་ཚིག་གཉིས་ཀྱིས་བརྗོད་པར་བྱ་བ་གང་ཡིན་པ་དེ་ལ་ཁྱད་པར་མེད་པའི་ཕྱིར་བརྡའི་བྱེ་བྲག་ཀྱང་མི་རུང་ངོ་། །བརྗོད་པར་
[193b.7]བྱ་བ་ཐ་དད་པ་མེད་པའི་གཏན་ཚིགས་སྨྲས་པ་ནི་གཉི་གས་གཅིག་བརྗོད་པའི་ཕྱིར་རོ་ཞེས་བྱ་བ་སྟེ། ཚིག་གཉིས་ཀྱིས་གཅིག་ཁོ་ན་བརྗོད་པའི་ཕྱིར་རོ། །བརྡ་ནི་བརྗོད་པར་བྱ་བ་རྟོགས་པའི་འབྲས་བུ་ཅན་ཡིན་ནོ། །གལ་ཏེ་ཁྱད་པར་མེད་ན་དེ་ལྟར་རྟོགས་པའི་འབྲས་བུ་ཅན་གྱི་བརྡས་
[194a]
[194a.1]ཅི་ཞིག་བྱ། དེར་འབྲེལ་པ་སྒྲོ་བཏགས་པ་ལ་དགོས་པ་ཇི་སྲིད་ཅིག་སྲིད་པ་བསྟན་པའི་ཕྱིར་དེ་ཉིད་དུ་རྩོད་པ་མཐར་ཐུག་པར་སྟོན་པ་ནི་དེ་ལྟར་ན་ཞེས་བྱ་བའོ། །དེ་བཟློག་པའི་ཕྱིར་བཤད་པ་ནི། གཉི་གས་ཞེས་བྱ་བའོ། །གཞན་ལས་ལྡོག་པ་དང་གཞན་ལས་
[194a.2]ལོག་པའི་སྒྲ་གཉི་གས་གཅིག་བརྗོད་པ་ཡིན་མོད་ཀྱི། དེ་དག་གིས་བརྗོད་པར་བྱ་བ་ལ་གནས་པའི་ཤན་ཁྱད་པར་དང་ལྡན་པས་ན་དེ་དག་ལས་གཅིག་ལ་གནས་པའི་ཐ་དད་པའི་དབྱེ་བ་གང་ལ་ཡོད་པ་བརྗོད་པར་བྱ་བ་ཐ་དད་པ་དེ་དང་ལྡན་པས་དེ་ཐ་དད་པའི་དོན་བཞིན་དུ་རྟོགས་
[194a.3]པར་བྱེད་དོ། །རང་གི་བདག་ཉིད་ལ་རྣམ་པར་གནས་པ་ཙམ་གྱི་རང་བཞིན་གྱི་དོན་གཅིག་ཁོ་ནས་གཉི་གས་བརྗོད་པ་ཡིན་ནོ། །དེ་ལྡོག་པའི་སྒྲས་ནི་འདིའི་བ་ལང་མ་ཡིན་པ་ལས་ལྡོག་པ་ཞེས་དྲུག་པས་བརྗོད་པའི་ཐ་དད་པ་བསྒྲུབས་པས་དོན་དེ་རྗོད་པར་བྱེད་དོ། །དེ་ཡང་ལོག་
[194a.4]པའི་སྒྲས་བརྗོད་པར་བྱ་བའི་དོན་སྟོན་པ་ན་དོན་ཐ་དད་པ་ལ་བརྟེན་པར་སྣང་བས་ན་རང་བཞིན་གྱི་སྒྲས་བྱས་སོ། །འདི་དོན་ཐ་དད་པའི་མཐར་ཐུག་པ་ཉིད་ནི་མ་ཡིན་ནོ། །འོན་ཀྱང་བསྟན་པ་ན་དོན་ཐ་དད་པ་ལ་བརྟེན་པ་ལྟ་བུར་མངོན་པ་ཡིན་ནོ། །དེས་ན་ལྡོག་པ་དང་དེའི་འབྲེལ་པ་སྒྲོ་
[194a.5]བཏགས་ནས་ལོག་པའི་དངོས་པོ་ཉིད་ཀྱི་མཐར་ཐུག་པར་འགྱུར་བ་ཡིན་ནོ། །དེའི་དོན་འདི་ཡིན་ཏེ། བརྡ་ཐ་དད་པ་ཞེས་བྱ་བ་གལ་ཏེ་སྒྲ་ཐ་དད་པ་ཙམ་ལས་བརྗོད་ན་དེ་ནི་བརྗོད་པར་བྱ་བ་ལ་གནས་པའི་ཁྱད་པར་མེད་ཀྱང་ཤིང་དང་རྐང་འཐུང་ལ་སོགས་པའི་ཚིག་དག་ལ་དེ་ལྟ་བུའི་ཁྱད་པར་
[194a.6]ཡོད་པར་མཐོང་བ་ཁོ་ནའོ། །འོན་ཏེ་དོན་ཐ་དད་པ་ཉིད་ཡིན་ན་དེ་ནི་མ་གྲུབ་སྟེ། གཅིག་བརྗོད་པའི་ཕྱིར་རོ། །གཅིག་བརྗོད་པ་ཉིད་ནི་ལྡོག་པ་དང་ལྡོག་པའི་སྒྲ་དག་ཐ་དད་པ་དམིགས་པ་མེད་ཀྱང་འགྱུར་བ་ཡིན་ཏེ། འདི་ནི་བ་ལང་མ་ཡིན་པ་ལས་ལོག་པའོ། །འདིའི་བ་ལང་མ་ཡིན་པ་
[194a.7]ལས་ལྡོག་པ་ཞེས་འཇུག་པ་གནོད་པ་མེད་པའི་ཕྱིར་རོ། །དོན་གཞན་དང་ལྡན་པ་གཞན་ལ་འཇུག་ན་ནི་གནོད་པའམ། བཏགས་པར་འགྱུར་ན་འདིར་ནི་དོན་ཐ་དད་པ་མི་དམིགས་ཀྱང་དེ་ལྟར་སྲིད་པ་མ་ཡིན་པས་ཇི་ལྟར་དོན་གཅིག་པ་ཉིད་མ་ཡིན། འོན་ཏེ་འདིར་ནི་འདིའི་ལྡོག་པ་ཞེས་
[194b]
[194b.1]དེ་ལས་བཀོལ་བ་ཐ་དད་པ་ཉིད་རྟེན་དུ་སྣང་བ་གཞན་དུ་ནི་དེ་ཉིད་དོ་ཞེས་བརྗོད་ན་དེ་ནི་མི་རུང་སྟེ། དེའི་མཐར་ཐུག་པ་ཉིད་ན་དེ་ཐ་དད་པ་མི་དམིགས་པའི་ཕྱིར་དང་། གནོད་པ་ཉིད་དུ་ཐལ་བར་འགྱུར་བའི་ཕྱིར་ཏེ། བུམ་པ་མ་ཡིན་པ་ལས་བུམ་པའི་སྒྲ་བཞིན་ནོ། །དེ་གནོད་པ་མེད་པའི་ཕྱིར་ཡུལ་
[194b.2]གཅིག་པོ་ཉིད་ཡིན་ཡང་རྟོགས་པ་ཐ་དད་པའི་ཕྱིར་དོན་ཐ་དད་པ་ལྟ་བུར་མངོན་པ་ཡིན་ནོ་ཞེས་བྱ་བ་བསྟན་ཏོ། །དེའི་རྒྱུ་མཚན་ཡང་བརྗོད་པར་བྱ་བ་ལ་བརྟེན་པའི་ཤན་གྱི་ཁྱད་པར་ཡིན་ནོ། །འདི་དེ་དང་དོན་གཅིག་ཉིད་ཡིན་ཡང་འདིའི་ལྡོག་པ་ཞེས་དོན་དེ་ཉིད་དེ་ལྟར་བྱས་ནས་རྟོགས་པར་བྱེད་དོ། །
[194b.3]ཇི་ལྟར་དེའི་མཐར་ཐུག་པ་ཡིན་ཡང་དོན་ལྟ་བུར་སྣང་བར་འགྱུར་བ་ཡིན་ནོ། །འགྲེལ་པ་ནི་སྒྲ་རྣམས་ཀྱི་ཞེས་བྱ་བའོ། །གལ་ཏེ་འདི་དག་ཡུལ་གྱི་རང་གི་ངོ་བོ་ལ་རག་ལས་ནས་འཇུག་པ་ཡིན་ན་ཐ་དད་པ་མེད་པ་ལ་ཐ་དད་པ་མེད་པ་ཁོ་ནར་གོ་བར་བྱེད་པར་འགྱུར་གྱི། དེ་རྟོགས་པར་བྱེད་
[194b.4]ཀྱང་དོན་ཐ་དད་པ་བཞིན་དུ་མི་འགྱུར་བ་ཞིག་ན་དེ་ལྟར་ཡང་མ་ཡིན་ཏེ་འདོད་པས་ཀྱང་འཇུག་པའི་ཕྱིར་རོ། །དེ་ལྟ་ན་ཡང་རྟོགས་པ་ཐ་དད་པའི་མཚན་ཉིད་ཀྱིས་བརྡའི་བྱེ་བྲག་འདི་ག་ལས་ཤེ་ན་དེ་དག་ཅེས་སྨོས་སོ། །གང་གི་ཕྱིར་དངོས་པོ་ལ་བརྟེན་པ་མ་ཡིན་པ་དེའི་ཕྱིར་ན་གལ་ཏེ་དོན་
[194b.5]ཐ་དད་པའམ་ཐ་དད་པ་མ་ཡིན་པ་ལ་སྦྱོར་ཡང་རུང་སྟེ། དེ་ལྟ་ན་ཡང་དེ་ཉིད་རྟོགས་པར་བྱེད་པ་ཁོ་ནའོ། །གལ་ཏེ་དོན་ཐ་དད་པ་ལ་སྦྱར་ན་དེ་ཉིད་རྟོགས་པར་བྱེད་ལ། གལ་ཏེ་ཐ་དད་པ་མེད་པ་ལ་སྦྱར་ན་ནི་དེ་ཉིད་རྟོགས་པར་བྱེད་དོ། །དཔེར་ན་ཨཀྵའི་སྒྲ་བ་རུ་ར་དང་ཆོ་ལོ་ལ་འཇུག་པ་
[194b.6]བཞིན་ནོ། །གང་གི་ཕྱིར་དེ་ལྟར་ཡིན་པའི་རྒྱུ་དེའི་ཕྱིར་བ་ལང་དང་བ་ལང་ཉིད་ཅེས་བྱ་བས་དངོས་པོ་གཅིག་བརྗོད་མོད་ཀྱི་ཐ་དད་པའི་དོན་ཅན་གྱི་རྣམ་པར་དབྱེ་བས་དོན་ཐ་དད་པ་ལྟ་བུར་སྟོན་པར་སྣང་སྟེ་དེ་ལྟར་སྦྱོར་བ་མཐོང་བ་གོམས་པའི་ཕྱིར་རོ། །འདིའི་བ་ལང་ཉིད་ཅེས་བྱ་བ་ཐ་
[194b.7]དད་པའི་དོན་ཅན་གྱི་རྣམ་པར་དབྱེ་བ་དང་ལྡན་པའི་སྒྲ་འདི་ནི་བ་ལང་ལ་འཇུག་པ་ཡིན་ནོ། །རྣམ་པར་དབྱེ་བ་དེ་ཡང་གཉི་གར་ཡང་བརྡར་བྱས་པ་ཡིན་ཏེ། འདིའི་བ་ལང་ཉིད་ཅེས་བྱ་བ་ནི་ཐ་མི་དད་པ་ལ་ཡིན་ལ། བྲམ་ཟེའི་རིལ་བ་སྤྱི་བླུགས་ཞེས་བྱ་བ་ནི་ཐ་དད་པ་ལའོ། །
[195a]
[195a.1]དེས་ན་ཐ་དད་པ་ལ་སྦྱོར་བ་མཐོང་བ་གོམས་པས་ན་འདིར་དོན་བཞིན་དུ་སྟོན་པར་བྱེད་པར་སྣང་ངོ་། །དེས་ཁྱད་པར་འགའ་ཞིག་ཤེས་པར་བྱ་བའི་ཕྱིར་ཐ་དད་པའི་དོན་ཅན་བཞིན་དུ་སྦྱར་བའི་ཕྱིར་རོ། །དེས་ན་དེ་ལྟར་དོན་གཅིག་ཀྱང་བརྡ་ཐ་དད་པ་ཡིན་ནོ། །དེ་སྲིད་
[195a.2]ཙམ་གྱི་རྟོགས་པ་མི་འདྲ་བ་དང་ལྡན་པས་ནི་ཐམས་ཅད་ལ་ཐ་དད་པ་མ་ཡིན་ཏེ། ཐ་དད་པ་མེད་པ་ལ་ཡང་སྐྱེས་བུའི་འདོད་པའི་དབང་གིས་འཇུག་པ་གེགས་མེད་པའི་ཕྱིར་རོ། །དེ་བཤད་པ་ནི་གཞན་ལ་ཡང་ཞེས་བྱ་བའོ། །སྒྲ་རྣམས་ཀྱི་སྐྱེས་བུ་འདོད་པ་ལ་གེགས་བྱེད་པ་མེད་
[195a.3]པ་དེ་ཉིད་དུ་སྟོན་པ་ནི། དཔེར་ན་ཞེས་བྱ་བའོ། །དངོས་པོ་གཅིག་གི་སྒྲ་ཐམས་ཅད་ཀྱིས་གཅིག་གི་ཚིག་གི་མཐའ་ཅན་གྱིས་སྟོན་ཏོ། །ལྷས་བྱིན་དཀར་ཤམ་མོ། །སྤོམ་མོ་ཞེས་བྱ་བ་བཞིན་ནོ། །དེ་ཉིད་དཀར་ཤམ་ལ་སོགས་པ་བརྗོད་པར་བྱ་བ་མ་བྱས་པར་གུས་པའི་
[195a.4]སྒྲས་བརྗོད་པ་ན་མང་པོའི་ཚིག་གི་མཐའ་ཅན་གྱིས་སྟོན་ཏེ། དེ་ཁོ་ན་ལ་དམིགས་ནས་བླ་མ་འདི་དག་ཅེས་བྱ་བ་ལྟ་བུར་རོ། །དེས་ན་དེ་ལ་མང་པོ་ཉིད་མེད་ཀྱང་སྟོན་པར་བྱེད་པ་དེ་ནི་གེགས་མེད་དོ། །འོན་ཏེ་འདིར་མང་པོ་ཉིད་བརྗོད་ཀྱང་མང་པོའི་ཚིག་མཐའ་ཅན་བརྗོད་པ་ནི་ལེགས་པ་
[195a.5]ཙམ་གྱིས་ཡིན་ནོ། །གཅིག་པོ་དེ་ལ་ནི་མང་པོའི་ཚིག་བསྟན་པ་ཉིད་ལེགས་པར་བརྗོད་དོ་ཞེ་ན། དེ་བཞིན་དུ་ཐ་མི་དད་པ་ལ་ཐ་དད་པར་བརྗོད་པའི་དྲུག་པ་ཡང་དེ་བཞིན་དུ་འགྱུར་རོ། །ད་ནི་བརྗོད་བྱའི་ཤན་གྱི་ཁྱད་པར་གྱིས་ཞེས་ཚིག་ལེའུར་བྱས་པར་བརྗོད་པ་དང་འགྲེལ་པ་
[195a.6]ཡང་ཁྱད་པར་འགའ་ཞིག་ཤེས་པར་བྱ་བའི་ཕྱིར་ཞེས་གང་བརྗོད་པ་དེར་ནི་ཁྱད་པར་དང་བཅས་ཏེ་མ་བསྟན་པས་ན། དེ་བསྟན་པའི་ཕྱིར་དགོས་པ་མེད་པའི་ཕྱིར་ཞེས་སྨོས་སོ། །བརྗོད་པར་བྱ་བ་ཁྱད་པར་མེད་ཀྱང་དགོས་པའི་ཁྱད་པར་གྱིས། བླ་མ་དག་ཅེས་བྱ་བ་ལ་སོགས་
[195a.7]པའི་སྒྲ་དེ་བཞིན་དུ། འདིར་གལ་ཏེ་དགོས་པའི་ཁྱད་པར་མེད་ན་ནི་བརྡའི་བྱེ་བྲག་མེད་པར་འགྱུར་བ་ཞིག་ན་དགོས་པ་དེ་ནི་ཡོད་པ་ཁོ་ན་ཡིན་ནོ། །གལ་ཏེ་བརྗོད་བྱའི་ཆའི་ཁྱད་པར་སྔར་བཤད་ཟིན་པ་མ་ཡིན་ནམ། ཇི་ལྟར་དེ་ཉིད་ད་ལྟར་དགོས་པའི་ཁྱད་པར་དུ་བརྗོད་ཅེ་ན། བརྗོད་པར་
[195b]
[195b.1]བྱ་བ་ལ་བརྟེན་པའི་དགོས་པའི་ཁྱད་པར་དེ་ཉིད་བརྗོད་པའི་ཤན་གྱི་ཁྱད་པར་དུ་བརྗོད་པ་དེ་ཉིད་འདི་ལྟར་ཞེས་བྱ་བ་ལ་སོགས་པས་སྟོན་པར་བྱེད་དོ། །ཁྱད་པར་གཞན་ཞེས་བྱ་བ་ནི། ཁྱད་པར་གཞན་དག་གོ། །ལོག་པ་ཞེས་བྱ་བ་ནི་མ་ལོག་པ་ལས་ཐ་དད་པ་ལ་ལྟོས་ནས་དོན་ལ་སྒྲ་
[195b.2]འཇུག་པ་ཡིན་ཏེ། སྔར་ཇི་སྐད་བཤད་པ་བཞིན་ནོ། །དོན་དེ་ཉིད་ནི་ལྡོག་པའི་ཚིག་གིས་ཀྱང་རྗོད་པར་བྱེད་དོ། །ཁྱད་པར་ནི་འདི་ཡོད་དེ། འདིའི་ལྡོག་པ་ཞེས་བྱ་བའི་སྒྲ་གང་ཡིན་པ་འདི་ནི་དངོས་པོ་དེའི་དཀར་པོ་མ་ཡིན་པ་ལ་སོགས་པ་དག་ལས་ཐ་དད་པ་གང་ཡིན་པ་དེ་དག་སྤང་བས་
[195b.3]འཇུག་པ་ཡིན་ཏེ། འདིའི་བ་ལང་མ་ཡིན་པ་ལས་ལྡོག་པ་ཞེས་རྟོགས་པའི་དོན་ལ་ཡོད་པའི་དཀར་པོ་མ་ཡིན་པ་ལ་སོགས་པ་ལས་ཐ་དད་པ་གང་ཡིན་པ་དེ་དག་དེ་ལྟར་སྤང་བར་འགྱུར་བ་ཡིན་ནོ། །དེ་ལ་རྒྱབ་ཀྱིས་ཕྱོགས་པ་ཇི་ལྟར་རྟོགས་པ་ཙམ་གྱིས་རྟོགས་པ་དོན་དུ་གཉེར་བ་ནི་དེ་
[195b.4]ལྟར་རྟོགས་པའི་ཕྱིར་རོ། །འདི་ལ་བ་ལང་མ་ཡིན་པ་ལས་ལོག་པ་ཞེས་བྱ་བས་ནི་དེ་ལ་བརྟེན་པའི་ཐ་དད་པ་གཞན་སྤོང་བ་མ་ཡིན་ནོ། །དེ་བཞིན་དུ་འདི་ནི་བ་ལང་ངོ་། །འདིའི་བ་ལང་ཉིད་དོ་ཞེས་བྱ་བ་ལ་སོགས་པ་ལ་ཡང་རྟོགས་པར་བྱའོ། །འདི་དག་ཉིད་ལྡོག་པའི་དང་ལོག་པའི་སྒྲ་དེ་
[195b.5]གཉིས་ཀྱིས་ཇི་སྐད་བརྗོད་པའི་སྒྲ་བྱེ་བྲག་གི་གཞི་ཞེས་བྱ་བ་རྟེན་ཡིན་ཏེ། དགོས་པ་དེ་ལ་བརྟེན་པ་ཉིད་ཀྱིས་འཇུག་པའི་ཕྱིར་རོ། །དེ་ལྟར་རྟོགས་པས་དགོས་པ་ཅི་ཞིག་འགྲུབ་ཅེ་ན། རྟོགས་པ་པོའི་འདོད་པའི་རྗེས་སུ་བྱེད་པའི་ཞེས་སྨོས་སོ། །བརྡའི་བྱེ་བྲག་འདི་ནི་རྟོགས་པ་པོའི་
[195b.6]འདོད་པ་ཙམ་གྱི་རྗེས་སུ་བྱེད་པ་ཡིན་གྱི། དངོས་པོ་ལ་ནི་ལྟོས་པ་ཅི་ཡང་མེད་དོ། །ཇི་ལྟར་མང་པོའི་ཚིག་གིས་དཀར་ཤམ་ལ་སོགས་པའི་དངོས་པོ་ལ་ཡོད་པ་ཉིད་རྗོད་པར་བྱེད་པ་དེ་བཞིན་དུ། བརྡའི་བྱེ་བྲག་འདི་ནི་དངོས་པོ་གནས་པའི་ཁྱད་པར་བསྟན་པའི་དོན་མ་ཡིན་ནོ། །འོན་
[195b.7]ཀྱང་རྟོགས་པ་པོ་འགའ་ཞིག་ཅི་ཞིག་ལྟར་རྟོགས་པར་འདོད་པ་ཡིན་ཏེ། དེས་ན་འདི་དེ་ལྟར་རྟོགས་པར་བྱེད་པ་ཡིན་ནོ། །དེ་ཉིད་ཀྱི་ཕྱིར་འདི་རྟོགས་པ་མི་འདྲ་བ་ཡིན་གྱི། འདི་ལ་དངོས་པོའི་དོན་ཁྱད་པར་ནི་ཡོད་པ་མ་ཡིན་ནོ། །འགྲེལ་པ་ནི་གང་གི་ཚེ་ཞེས་བྱ་བ་ཡིན་ནོ། །འདིས་
[196a]
[196a.1]ནི་ཁྱད་པར་གཞན་སྤོང་བ་རྣམ་པར་འགྲེལ་ཏོ། །གང་གི་ཚེ་ཞེས་བྱ་བས་ནི་མི་སྤོང་བའོ། །ཡང་ཇི་ལྟར་འདིར་ནི་ཁྱད་པར་སྤོང་བ་དེར་ནི་མ་ཡིན་ནོ་ཞེ་ན། དེ་ཉིད་ཀྱི་ཕྱིར་ཞེས་སྨོས་སོ། །གང་དུ་ཁྱད་པར་གཞན་དང་འབྲེལ་པར་འགལ་བའི་རང་བཞིན་དུ་རྟོགས་པ་དེར་ནི། ཁྱད་
[196a.2]པར་གཞན་སྤངས་པ་ཁོ་ན་ཡིན་ལ་གང་དུ་འགལ་བ་མེད་པ་དེར་ནི་མ་སྤངས་པ་ཡིན་ནོ། །འགལ་བའི་ཕྱིར་ནི་ཆོས་གཞན་དང་རང་བཞིན་གཅིག་པར་མ་རྟོགས་པས་ནི་གཞི་མཐུན་པ་ཉིད་དམ། ཁྱད་པར་དང་ཁྱད་པར་གྱི་གཞིའི་དངོས་པོ་མ་ཡིན་ནོ། །ཆོས་གཞན་དང་གཅིག་པ་ཉིད་ནི་ཆོས་གཉིས་
[196a.3]ཀྱི་གཞི་མཐུན་པ་ཡིན་ཏེ་དཔེར་ན་ཨུཏྤ་ལ་ཉིད་སྔོན་པོའི་རང་བཞིན་དུ་རྟོགས་པའི་ཕྱིར་ཨུཏྤ་ལ་དང་སྔོན་པོ་གཞི་མཐུན་པ་བཞིན་ནོ། །གཞི་མཚུངས་པས་དེ་དག་གཞི་མཐུན་པ་ནི་མ་ཡིན་ནོ། །གལ་ཏེ་རྫས་གཅིག་ལ་རིགས་དང་ཡོན་ཏན་གཉིས་ཡོད་པ་ཞེས་བྱ་བར་འགྱུར་ན་ནི་དེའི་ཚེ་ཆོས་ཉིད་དང་
[196a.4]དེ་སྟོན་པར་བྱེད་པའི་སྒྲ་གཞི་མཐུན་པར་འགྱུར་ན་དེ་ནི་ཡོད་པ་མ་ཡིན་ཏེ། དེས་ན་ཆོས་གཉིས་འབྲེལ་པར་རྟོགས་པ་ཉིད་གཞི་མཐུན་པ་དང་། ཁྱད་པར་དང་ཁྱད་པར་གྱི་གཞིའི་དངོས་པོ་ཡིན་ནོ། །དེ་ནི་བ་ལང་ཉིད་ལས་ཡོད་པ་མ་ཡིན་ཏེ། ཆོས་གཞན་དང་རང་བཞིན་གཅིག་པར་
[196a.5]འགལ་བ་ཉིད་ཀྱིས་རྣམ་པར་རྟོག་པའི་ཕྱིར་དཔེར་ན་འདིའི་བ་ལང་ཉིད་དཀར་པོ་ཞེས་བྱ་བ་ལྟ་བུའོ། །གཞི་མཐུན་པ་མེད་པ་ཉིད་སྟོན་པ་ནི་དཀར་པོ་ཉིད་ཀྱི་མཚན་ཉིད་དེ་ཙམ་གྱི་ཁྱད་པར་དང་བ་ལང་ཉིད་དེ་ལ་བརྟེན་པར་གྱུར་པའི་བློ་གཅིག་པ་ཉིད་དུ་མི་སྣང་བའི་ཕྱིར་རོ། །བ་ལང་ཉིད་
[196a.6]དང་དཀར་པོ་གཅིག་ཏུ་སྣང་ན་བློ་གཅིག་ཏུ་སྣང་བར་འགྱུར་བ་ཡིན་ནོ། །དེས་ན་གལ་ཏེ་ཨུཏྤ་ལ་དང་སྔོན་པོ་བཞིན་དུ་དཀར་པོ་ཉིད་བ་ལང་ཉིད་དང་རང་བཞིན་གཅིག་པར་སྣང་ན། དེ་ལྟར་ན་བ་ལང་ཉིད་ལ་བརྟེན་པའི་བློ་དཀར་པོ་ཉིད་མཚན་ཉིད་ཀྱི་ཁྱད་པར་དང་གཅིག་པ་ཉིད་དུ་
[196a.7]འགྱུར་རོ། །དེ་ལྟ་མ་ཡིན་ཏེ། འདིའི་འོ་ཞེས་གཟུང་བའི་ཕྱིར། དངོས་པོ་ལས་བ་ལང་ཉིད་དཀར་ཏེ་སྣང་བའི་ཕྱིར་རོ། །དཀར་པོ་ཞེས་བྱ་བ་ནི་དཀར་བའི་མཚམས་སུ་གྱུར་པ་ཉིད་དུ་རྟོགས་པའི་ཕྱིར་རོ། །གལ་ཏེ་བ་ལང་ཉིད་འདིའི་ཡིན་ལ་འདི་ནི་དཀར་པོ་ཡིན་ནོ་ཞེས་དཀར་པོའི་ངོ་
[196b]
[196b.1]བོ་ཉིད་དེའི་དངོས་པོ་ཉིད་དུ་རྟོགས་པའི་ཕྱིར་ཇི་ལྟར་ཁྱད་པར་གཞན་སྤང་ཞེ་ན། ལྷ་རྣམས་དགའ་བས་བསམ་པ་མ་ཤེས་སོ། །དངོས་པོ་ལ་ནི་ཁྱད་པར་གཞན་མ་རྟོགས་པར་མི་བརྗོད་དེ། ཐ་ན་འདི་ཞེས་བྱ་བ་ལ་འདི་ཞེས་བྱ་བར་བཟུང་བས་བ་ལང་ཉིད་ལས་གཞན་པའི་ཆོས་རྟོགས་པའི་ཕྱིར་རོ། །
[196b.2]འོན་ཀྱང་གང་ལ་བརྡའི་བྱེ་བྲག་ཡོད་པ་དཀར་ནས་རྟོགས་པས་དེའི་རང་གི་བདག་ཉིད་བཅད་ནས་རྟོགས་པའི་ཕྱིར་དེ་ལ་ཁྱད་པར་གཞན་དེ་འབྲེལ་པ་མ་ཡིན་ཏེ། སྔར་ཇི་སྐད་བཤད་པ་བཞིན་ནོ། །དེ་ལྟ་ན་ནི་དེར་ཡང་འབྲེལ་པ་ཡོད་པ་ཡིན་ཏེ། འདིའི་བ་ལང་ཉིད་ནི་རྟག་པའོ་ཞེས་བ་ལང་ཉིད་
[196b.3]རྟག་པར་རྟོགས་པའི་ཕྱིར་རོ་ཞེ་ན། བསམ་པའི་ཁྱད་པར་ཡང་མི་ཤེས་པ་ཉིད་དོ། །འདི་ལྟར་འདི་ལོགས་ཤིག་ཏུ་རང་བཞིན་ཁྱད་པར་འགའ་ཞིག་ཏུ་འགྱུར་བ་དཀར་བར་གྱུར་པའི་བ་ལང་ཉིད་ནི་དངོས་པོ་མ་ཡིན་གྱི། འོན་ཀྱང་འདི་ནི་གང་ལས་དཀར་བའི་དངོས་པོ་དེའི་རང་བཞིན་ཁོ་ན་སྟེ།
[196b.4]དེ་ལྟ་མོད་ཀྱི་འདིའི་བ་ལང་ཉིད་ཅེས་ལོགས་སུ་དཀར་ཏེ། རྟོགས་པ་ཙམ་དུ་ཟད་དོ། །དེས་ན་གང་ཞིག་བ་ལང་ཉིད་རྟེན་པར་རྟོགས་པའི་རང་བཞིན་དེ་དག་ནི་དཀར་མཚམས་ཀྱི་དངོས་པོའི་ཆོས་ཡིན་པར་རྟོགས་པར་བྱ་བ་ཡིན་ནོ། །འདིའི་བ་ལང་ཉིད་རྟག་པའོ་ཞེས་དེ་ལྟར་ནི་ནུས་པ་མ་
[196b.5]ཡིན་ཏེ། བ་ལང་ཉིད་རྟག་པར་རྟོགས་པ་ན་དེའི་མཚམས་རྟོགས་པ་མེད་པའི་ཕྱིར་རོ། །འདི་ལྟར་དེ་ནི་མི་རྟག་པ་ཡིན་ལ་འདིའི་བ་ལང་ཉིད་ནི་རྟག་པ་ཡིན་ནོ་ཞེས་རྟོགས་པར་འགྱུར་ན་དེ་ལྟར་ནི་མ་ཡིན་ཏེ། དེ་ཉིད་རྟག་པ་དང་མི་རྟག་པ་ཉིད་ཀྱི་མཚན་ཉིད་འགལ་བའི་ཆོས་དང་ལྡན་པར་རྟོགས་པར་
[196b.6]འགྱུར་བའི་ཆོས་དང་ལྡན་པར་རྟེན་དེ་ལྟར་རྟོགས་པར་འགྱུར་ན་དེ་ལྟ་ན། འདི་ལྟར་རྟོགས་པར་འགྱུར་བ་ཡིན་ནོ། །དེ་བས་ན་དེ་ལྟར་རྟོགས་པའི་བ་ལང་ཉིད་ཀྱི་རང་བཞིན་དོན་དམ་པ་གང་ཡིན་པའི་རང་བཞིན་དེས་ནི་འདི་ཁྱད་པར་གཞན་དང་འབྲེལ་པར་འགྱུར་བ་མ་ཡིན་ནོ་ཞེས་ངེས་པར་བྱའོ། །
[196b.7]དེས་ན་འདིར་རེ་བ་མེད་པ་ཇི་ལྟར་སྣང་བཞིན་པ་ཉིད་ཡིན་པར་ངེས་པར་བྱའོ། །ཅི་སྟེ་དོན་གྱི་རང་བཞིན་ཡིན་པ་དེ་ལྟར་ནི་ལྟོས་པ་འགའ་ཡང་མེད་ལ། ཇི་ལྟར་ལྟོས་པ་དེ་ལྟར་ནི་དོན་གྱི་རང་བཞིན་མ་ཡིན་ནོ། །གཉིས་པ་ལ་ནི་གཞི་མཐུན་པ་ཉིད་དམ་ཁྱད་པར་དང་ཁྱད་པར་གྱི་གཞིའི་
[197a]
[197a.1]དངོས་པོ་ཡོད་དེ་ཞེས་སྔ་མ་དང་འབྲེལ་ཏོ། །དེ་ཉིད་ཀྱི་ཕྱིར་ཞེས་བརྗོད་པའི་སྔ་མ་ལ་ནི་ཞེས་བརྗོད་པའི་ཕྱིར་ན། གཞན་གཉིས་པ་ལ་ཡང་ནི་ཞེས་བརྗོད་པ་ཡིན་ནོ། །བ་ལང་འདི་མི་རྟག་གོ་ཞེའམ། དེ་བཞིན་དུ་ལོག་པ་དང་སྐད་ཅིག་མ་ཡང་ཡིན་ནོ་ཞེས་བྱ་བ་
[197a.2]ཡིན་ནོ། །དེ་བཞིན་དུ་ཨུཏྤ་ལ་སྔོན་པོ་ལ་སོགས་པའི་བློ་ཡང་རྟོགས་པར་བྱའོ། །གཞི་མཐུན་པ་དེ་ཉིད་སྟོན་པར་ནི་འདི་སྟོན་པས་ན་བསྟན་པ་སྟེ་ངག་གོ། །དེས་རྣམ་པར་དབྱེ་བ་དང་ལྡན་པ་ཡང་གཅིག་པ་ལྟ་བུར་སྣང་བའི་ཕྱིར་རོ། །རྣམ་པར་དབྱེ་བ་དང་ལྡན་པ་གང་ཡིན་པ་དེ་བཤད་
[197a.3]མོད་ཀྱི་དེ་ལྟ་ན་ཡང་གང་ཞིག་སྟོན་པས་བསྟན་པ་དེ་ཡིན་པས་རྟོགས་པ་ཁོ་ནའོ། །དེ་ལྟ་ན་ཡང་བ་ལང་དཀར་པོ་ཞེས་བྱ་བ་ལ་སོགས་པའི་ངག་ལ་རྣམ་པར་དབྱེ་བ་དང་ལྡན་ཡང་དེར་གཅིག་པ་ཉིད་དུ་སྣང་བ་ཡིན་ནོ། །གཅིག་པ་ཉིད་བཤད་པ་ནི། བསྡུས་པ་ཞེས་བྱ་བའོ། །ཕན་ཚུན་
[197a.4]འབྲེལ་པར་རྣམ་པར་གནས་པ་སྟེ། བ་ལང་དཀར་པོའི་རང་བཞིན་དུ་རྟོགས་པའི་ཕྱིར་གཉི་ག་ཡང་ཕན་ཚུན་འབྲེལ་པ་ཡིན་པའི་ཕྱིར་རོ། །དེ་དག་ནི་རྣམ་པ་དེ་ལྟ་བུ་ཡང་ཡིན་ལ། རྣམ་པར་གཅོད་པའི་ཆོས་མཐའ་དག་ཀྱང་ཡིན་ཏེ། གཞན་སེལ་ངོ་བོའི་ཚིག་གི་དོན་ཏོ། །ཆོས་
[197a.5]ཀྱི་ངོ་བོ་ཉིད་ཀྱིས་ནི་ཚིག་གི་དོན་འདི་དག་ཐ་དད་པ་ཡིན་ལ། འབྲེལ་པ་རྟོགས་པའི་ཕྱིར་ནི་གཅིག་དངོས་པོ་ཡིན་པས་ན། རྣམ་པར་གཅོད་པའི་ཆོས་མཐའ་དག་བསྡུས་པས་རྣམ་པར་དབྱེ་བ་དང་ལྡན་པ་གཅིག་པ་ལྟ་བུར་སྟོན་པར་སྣང་བ་ཡིན་ནོ། །ཇི་ལྟར་ན་འདི་རྣམ་པར་
[197a.6]དབྱེ་བ་དང་ལྡན་པའི་ཆོས་རྣམས་ཀྱང་ཕན་ཚུན་འདུ་བ་ཡིན་ཞེ་ན། དེ་ལྟ་བུའི་བརྡའི་རྗེས་སུ་འབྲང་བའི་ཕྱིར་ཞེས་སྨོས་སོ། །ངོ་བོ་འདོད་པ་ལྡན་པ་རྟོགས་པ་ནི་ངོ་བོར་རྟོགས་པ་ནི་རུང་བར་ཉེ་བར་གནས་པ་ངོ་བོ་ཉིད་དུ་རྟོགས་པར་བྱའོ་ཞེས་བྱ་བ་ནི་བརྡ་ཉིད་དོ། །ཇི་ལྟར་ཚིག་གི་
[197a.7]དོན་རྟོགས་པ་བརྡ་ལས་བྱུང་བ་ཉིད་ཡིན་པ་དེ་བཞིན་དུ་ཚིག་གི་དོན་གྱི་མཐར་ཐུག་པའི་ངག་གི་དོན་རྟོགས་པར་བྱེད་པ་ཡང་བརྡ་ལས་བྱུང་བ་ཡིན་ནོ། །དེས་ན་ངག་གི་དོན་ཀྱང་བརྡ་ལས་བྱུང་བ་ཁོ་ནའོ། །འདི་ནི་འདི་ལྟར་ཁྱད་པར་གཞན་མ་སྤངས་པ་ལས་འགྱུར་བ་ཡིན་ནོ་ཞེས་
[197b]
[197b.1]བཤད་པ་ནི། རྣམ་པར་གཅོད་པ་གཞན་འདོད་པ་དང་བཅས་པའི་ཕྱིར་རོ་ཞེས་བྱ་བའོ། །དེ་ལྟར་འབྲེལ་པ་སྒྲོ་བཏགས་པའི་དགོས་པ་བསྟན་ནས། ལྡོག་པ་དང་ལྡོག་པའི་ཚིག་གཉིས་ཀྱིས་རང་གི་མཚན་ཉིད་དག་ལ་སྒྲོ་བཏགས་པ་གང་ཡིན་པ་དེར་ཡང་དགོས་པ་དེ་ཉིད་ཉེ་བར་
[197b.2]བསྡུ་བའི་ཕྱིར། ཀུན་ལ་ཞེས་སྨོས་ཏེ། སྐབས་སུ་བབ་པའི་དོན་འབའ་ཞིག་ཏུ་མ་ཟད་ཀྱི། འོན་ཀྱང་གཞན་དུ་ཡང་ཡིན་ནོ་ཞེས་པའོ། །རྫས་བརྗོད་པ་ནི་ལོག་པའི་སྒྲ་སྟེ་དེ་ཡང་བྱེད་པ་པོ་ཉིད་དུ་བརྗོད་པར་འདོད་པ་ཡིན་ཏེ། དངོས་པོའི་ཚིག་དང་འབྲེལ་པའི་ཕྱིར་རོ། །འགྱུར་
[197b.3]བས་ན་དངོས་པོས་ཏེ་བྱ་བ་ཉིད་དོ། །དེ་ཉིད་ཇི་སྐད་བཤད་པའི་ལྡོག་པ་ཉིད་དོ། །ལོག་པ་དང་། ལྡོག་པའི་ཚིག་དག་གི་ཁྱད་པར་ནི་འདི་ཉིད་དོ། །དངོས་པོའི་བདག་ཉིད་བྱ་བའི་རང་བཞིན་དུ་རྟོགས་པར་བྱེད་པ་དག་ནི་བྱ་བར་གྱུར་པའི་དངོས་པོའི་བདག་ཉིད་ལ་ཁྱད་པར་མ་འབྲེལ་པ་
[197b.4]ཞེས་བྱ་བ་དེ་ལྟར་གྱུར་པས་སྟོན་པར་བྱེད་དོ། །འདི་ལྟར་ལྷས་བྱིན་འཚེད་དོ་ཞེས་བྱ་བ་གང་གི་ཚེ་རྟེན་འཛུགས་པ་ལ་སོགས་པའི་བྱེད་པ་དང་ལྡན་པས་དེ་ལྟར་སྟོན་པ་དེའི་ཚེ་འགྲོ་བ་ལ་སོགས་པ་བརྗོད་པ་དེ་དང་དེའི་ཡུལ་ཅན་དང་མི་འདྲ་བའི་དེ་དང་དེའི་ཡུལ་ཅན་འགའ་ཞིག་རྟེན་འཛུགས་
[197b.5]པ་ལ་སོགས་པར་བརྗོད་པ་དེས་ན་འདིའི་རང་གི་ངོ་བོར་གྱུར་པ་ཉིད་དེ་ལྟར་བརྗོད་པ་ན། ཁྱད་པར་གཞན་དང་འབྲེལ་པ་མ་ཡིན་ནོ། །གལ་ཏེ་ཡང་དལ་བུས་འཚོད་དོ་ཞེས་འདི་ཁྱད་པར་གཞན་དང་འབྲེལ་པ་ཡོད་པ་དེ་ལྟ་ན་ཡང་དེ་ཉིད་ཇི་ལྟ་བར་ནི་འབྲེལ་པ་མ་ཡིན་ནོ་ཞེས་བྱ་བ་ལ་
[197b.6]སོགས་པ་ནི་སྔ་མ་བཞིན་དུ་རྟོགས་པར་བྱའོ། །དེ་བཞིན་དུ་ལྷས་བྱིན་གྱི་བྱེད་པ་པོ་ཉིད་སྒྲོ་འདོགས་པ་ཡང་འདི་ལྟ་བུའི་དོན་ཉིད་དེ། དེའི་ངོ་བོ་ཉིད་ཀྱིས་དེའི་བདག་ཉིད་ལ་ཆོས་གཞན་དང་མ་འབྲེལ་བར་བྱ་བའི་ཕྱིར་རོ། །གང་གི་ཚེ་ལྷས་བྱིན་ཤིང་གིས་ཕྲུ་བར་འབྲས་ཆན་འཚེད་དོ་
[197b.7]ཞེས་འཚེད་པ་པོ་བྱེད་པ་པོ་དུ་མའི་ངོ་བོར་སྟོན་པ་དེའི་ཚེ་ཡང་ལྷས་བྱིན་ལ་སོགས་པ་རྣམས་རྒྱུ་ཉིད་དང་། འབྲས་ཆན་འབྲས་བུ་ཉིད་དེ་ལྟ་བུའི་བྱ་བ་དང་འབྲེལ་པར་ཁྱད་པར་གཞན་ལ་རྒྱབ་ཀྱིས་ཕྱོགས་པའི་སྒོ་ནས་བསྟན་པ་ཡིན་ནོ། །འདིས་ལྷས་བྱིན་ལ་སོགས་པའི་རང་
[198a]
[198a.1]བཞིན་ཁྱད་པར་དུ་གྱུར་པ་དག་ཡོད་ན་འབྲས་ཆན་གྱི་མཚན་ཉིད་ཀྱི་དངོས་པོ་མ་དམིགས་པ་ལས་དམིགས་པ་ཡིན་གྱི་འབྲས་ཆན་གྱི་མཐར་ཐུག་པ་དེ་དག་ཉེ་བར་གནས་པ་ན། འཚེད་པའི་དོན་འགའ་ཞིག་སྣང་བ་ནི་མེད་དོ། །ངག་གི་སྦྱོར་བ་འདི་གནོད་པར་
[198a.2]གྱུར་པ་ཡང་མ་ཡིན་ཏེ། ལན་ཅིག་མ་ཡིན་པར་སྦྱོར་བའི་ཕྱིར་རོ། །དེའི་ཕྱིར་ལྷས་བྱིན་ལ་སོགས་པ་ཉིད་ཀྱིས་དེ་སྐྱེད་པར་ངེས་པའི་ཁྱད་པར་ཕུལ་དུ་བྱུང་བ་དང་། དེ་ལྟར་གྲུབ་པའི་འབྲས་ཆན་གྱི་རྣམ་པ་དེ་ལྟར་བྱ་བར་བྱས་པ་ན། དེ་བཞིན་དུ་དེ་དང་འབྲེལ་པར་རྟོགས་པ་ཡིན་ནོ། །
[198a.3]དེས་ན་འདི་དག་གི་རྒྱུ་དང་འབྲས་བུ་ཉིད་དེ་ལྟར་རྟོགས་པ་ན་ཁྱད་པར་གཞན་དང་འབྲེལ་པ་མེད་པ་ཉིད་ཡིན་གྱི། འདི་ལ་དོན་ཐ་དད་པ་ནི་འགའ་ཡང་མེད་དོ། །ཡུལ་གྱི་སྐད་སོ་སོར་དངོས་པོ་འཇིག་པའི་སྦྱོར་བ་ལ་ནི་བྱ་བའམ་བྱེད་པ་པོའམ་གཞན་ཡང་རུང་ཅུང་ཟད་ཅི་ལྟར་བརྟགས་
[198a.4]པ་བཞིན་སྣང་བ་ནི་འགའ་ཡང་མེད་དོ། །གཞན་དུ་ཤིང་རྟ་ལ་སོགས་པ་དག་ལས་བུམ་པ་ལ་སོགས་པ་བྱེ་བྲག་ཏུ་རྟོགས་པ་བཞིན་དུ་སྒྲ་པ་རྣམས་ཀྱིས་གཙུག་ལག་འདི་བྱེ་བྲག་ཏུ་རྟོགས་པར་གྲུབ་པར་འགྱུར་རོ། །ཡུལ་ངེས་པ་འདི་དག་གི་རང་བཞིན་ཐམས་ཅད་པའི་སྒྲའི་རྗེས་སུ་
[198a.5]འགྲོ་བར་རྟོགས་པ་ན་ཟུར་ཆག་པ་ལེགས་པའི་རྩ་བ་ཅན་དུ་སེམས་པས་དེ་ལྟར་འཁྲུལ་པ་འབའ་ཞིག་ཏུ་ཟད་དོ། །བྱ་བ་བརྗོད་པ་དང་མཚུངས་པར་རྟོགས་པ་གང་ཡིན་པ་དེ་ལ་ནི་བྱ་བ་བརྗོད་པ་འཁྲུལ་པ་ཡིན་ཏེ་གཞན་དུ་ཡང་དེ་བཞིན་ནོ། །དེས་ན་འཇིག་རྟེན་པའི་སྒྲས་ནི་ཅི་ཙམ་མངོན་སུམ་གྱིས་རྟོགས་
[198a.6]པར་དེ་ཙམ་ཁོ་ན་རྟོགས་པར་བྱེད་པ་ལ་ཕྲ་བ་ལ་སོགས་པ་ནི་དེ་ལྟར་མ་ཡིན་པས་ཇི་ལྟར་འདི་དག་འཇིག་པའི་སྦྱོར་བ་ལ་གནས་པར་འགྱུར། མངོན་སུམ་གྱི་གཞི་ཙམ་གྱི་ཐ་སྙད་ལ་ཡང་འགྱུར་བ་གང་ཞིག་ཡིན་པ། རྫས་གཅིག་ལ་སོགས་པ་ལྟར་ཐོག་མ་མེད་པའི་བག་ཆགས་ལ་
[198a.7]བརྟེན་པ་ནི་མ་ཡིན་ནོ། །འདི་ནི་བཤད་ཟིན་ཏོ། །དེ་ལྟར་རྟོགས་པ་མ་གྲུབ་པའི་ཕྱིར་རོ། །བུམ་པ་གཅིག་ཅེས་བྱ་བར་ནི་རྟོགས་པ་ཁོ་ནའོ། །འདི་ནི་གཙུག་ལག་གི་ཁྱད་པར་དག་ལ་རག་ལས་ནས་འཁྲུལ་པ་ཡིན་ཏེ། འགྲོ་བ་སྲེད་མེད་ཀྱི་བུ་ལས་བྱུང་བར་འཁྲུལ་
[198b]
[198b.1]པ་བཞིན་ནོ། །འདི་ཉིད་བཤད་པ་ནི། དེ་ལྟ་བས་ན་ཞེས་བྱ་བ་ལ་སོགས་པའོ། །ལྡོག་པ་ནི་ཆོས་ཡིན་ལ་ལྡོག་པ་ཞེས་བྱ་བ་ནི་ཆོས་ཅན་ཡིན་པ་དེ་བཞིན་དུ་གཞན་དུ་ཡང་ཆོས་དང་ཆོས་ཅན་བརྗོད་པའི་བརྗོད་པར་བྱ་བའི་དོན་ལ་ཁྱད་པར་འགའ་ཡང་མེད་དེ། དེ་སྐད་བརྗོད་པ་ན་ཆོས་
[198b.2]བརྗོད་པའི་བརྗོད་བྱ་ནི་ཆོས་ཡིན་ལ། ཆོས་ཅན་བརྗོད་པའི་ཡང་ཆོས་ཅན་ཡིན་ནོ་ཞེས་བྱ་བ་ནི་དེ་དག་གི་བརྗོད་པར་བྱ་བ་ལ་བརྗོད་པར་བྱ་བ་ཉིད་མེད་དོ་ཞེས་ཤེས་པར་མི་འགྱུར་བར་བྱ་བའི་ཕྱིར་ངེས་པའི་ཤེས་པའི་ཡུལ་ཉིད་དུ་ཞེས་ཁྱད་པར་དུ་བྱས་སོ། །ཇི་ལྟར་ཆོས་བརྗོད་པའི་
[198b.3]བརྗོད་པར་བྱ་བའི་དོན་ངེས་པའི་ཤེས་པས་ཡུལ་དུ་བྱེད་པ་དེ་བཞིན་དུ་ཆོས་ཅན་བརྗོད་པ་ཡང་ངོ་། །ཆོས་བརྗོད་པའི་དོན་ནི་ཆོས་ཉིད་དུ་ངེས་པས་ཡུལ་དུ་བྱེད་ལ་ཆོས་ཅན་བརྗོད་པ་ནི་ཆོས་ཅན་ཉིད་དུ་ཡིན་པར་འགྱུར་རོ་ཞེས་དོགས་པ་ལ། གཅིག་གིས་ནི་ཞེས་སྨོས་སོ། །ཆོས་བརྗོད་པའི་སྒྲས་
[198b.4]བརྗོད་པའི་དོན་གང་ཡིན་པ་དེ་ཉིད་ཆོས་ཅན་གྱི་སྒྲས་ཀྱང་ཡིན་ནོ་ཞེས་ཐ་དད་པ་མེད་པའི་དོན་ཉིད་མདོར། དེ་ཕྱིར་དེ་དག་བརྗོད་བྱ་ལས། །ཁྱད་པར་འགའ་ཡང་ཡོད་མ་ཡིན། །ཞེས་བསྟན་ཏོ། །དངོས་པོ་ལས་ཐ་དད་པ་མེད་པའི་གནས་སྐབས་ཀྱི་ཁྱད་པར་ཉིད་དངོས་པོ་ལས་བཀར་
[198b.5]ཏེ་དེ་ལྟར་བསྟན་པས་བྱ་བ་རྟོགས་པས་ན་ཇི་ལྟར་འདི་རང་ཉིད་ཞུགས་པ་ན་དེའི་གནས་སྐབས་རྗེས་སུ་འཇུག་པར་འགྱུར་བའི་གནས་སྐབས་ཀྱི་ཁྱད་པར་དེ་བྱ་བའི་ཁྱད་པར་དུ་སྒྲས་བསྟན་པ་ནས་བསྒྲུབ་པར་བརྗོད་པ་ཡིན་ཏེ། ལྷས་བྱིན་གྱི་ཤིང་ཞེས་བྱ་བ་ལྟ་བུའོ། །དེ་བཞིན་དུ་སྒྲ་ལས་བྱུང་
[198b.6]བའི་དངོས་པོ་མ་བསྐལ་པར་གྱུར་པ་གཞན་དག་ཀྱང་རྗེས་སུ་རྟོགས་པར་བྱའོ། །དེས་ནི་ཇི་ལྟར་སྐབས་སུ་བབ་པ་ལ་ཇི་སྙེད་སྒྲོ་བཏགས་པ་དེའི་དེ་ཉིད་བསྟན་ནས། ཞར་ལ་གཞན་དག་ཀྱང་བསྟན་པའི་ཕྱིར་བཤད་པ། དོན་དེ་ཤེས་པར་བྱེད་འདོད་པས། །ཞེས་བྱ་བའོ། །ཇི་སྐད་བཤད་
[198b.7]པའི་དོན་དེ་ཉིད་ཤེས་པར་འདོད་པས་འཆད་པར་འགྱུར་བའི་དེ་ལ་ཕན་པའམ་བྱེད་པ་དང་ལྡན་པའམ། གལ་ཏེ་སྒྲའི་གཙུག་ལག་ལ་གྲགས་པ་གཞན་གྱིས་བརྗོད་ཀྱང་རུང་། དེའི་ཚེ་ཡང་དེ་ལས་ཁྱད་པར་གཞན་ནི་མེད་དོ། །རང་གི་མཚན་ཉིད་ཁོ་ན་བསྟན་པའི་ཕྱིར་དེ་ལ་ཕན་པ་ལ་སོགས་
[199a]
[199a.1]པ་དོན་མི་འདྲ་བ་ལྟ་བུར་རྟོགས་པར་བྱེད་པ་དག་བསྟན་པ་ན་རང་གི་མཚན་ཉིད་ཁོ་ན་ཁྱད་པར་གཞན་སྤོང་བ་དང་མི་སྤོང་བ་ཙམ་དུ་རྟོགས་པར་བྱེད་པ་ཡིན་ནོ། །འདི་ཉིད་བཤད་པ་ནི། ཁྱད་པར་དེ་ཙམ་ཁོ་ན་ཞེས་བྱ་བ་ཡིན་ནོ། །འཚེད་པ་པོའི་དངོས་པོའི་འཚེད་པ་པོ་
[199a.2]ཉིད་དོ་ཞེས་ཡོན་ཏན་གང་དང་འབྲེལ་པས་འཚེད་པ་པོ་ལ་འཚེད་པ་པོའི་སྒྲ་འཇུག་པར་འགྱུར་བ་དེ་བརྗོད་པ་ཡིན་ནོ་ཞེས་ནི་དོགས་པར་མི་བྱ་སྟེ། འཚེད་པ་པོའི་ཚིག་གིས་བརྗོད་པར་བྱ་བའི་ངོ་བོ་ཉིད་ཀྱི་དངོས་པོའི་ཁྱད་པར་བརྗོད་པའི་ཕྱིར་རོ། །འཚེད་པའི་སྒྲ་ཡང་ཁྱད་པར་གཞན་སྤོང་
[199a.3]བས་འཚེད་པ་པོའི་སྒྲ་དང་དོན་མཚུངས་པ་ཡིན་ཏེ། སྔར་ཇི་སྐད་བཤད་པ་བཞིན་ནོ། །རྒྱུ་མཚན་གཞན་ལ་བརྟེན་ནས་གཞན་ལ་སྒྲ་འཇུག་པ་ནི་མ་ཡིན་ཏེ། བརྗོད་པར་བྱ་བ་མ་ཡིན་ན་རྒྱུ་མཚན་མ་ཡིན་པའི་ཕྱིར་རོ། །བརྗོད་ན་ཡང་གཉིས་སུ་སྣང་བར་ཐལ་བར་འགྱུར་བའི་ཕྱིར་རོ་
[199a.4]ཞེས་བྱ་བ་ལ་སོགས་པ་དཔྱད་པར་བྱའོ། །ཇི་ལྟར་དེ་སྐད་དུ་བརྗོད་པ་ཙམ་གྱིས་དོན་གཞན་པ་ཉིད་དུ་མི་འགྱུར་ཏེ། གང་གི་ཕྱིར་དོན་གཞན་པ་ཉིད་རྟོགས་པ་ཡིན་ནོ་ཞེ་ན། དེ་ལྟ་བུ་ཁོ་ན་ཞེས་སྨོས་སོ། །འདིའི་བརྡ་ཡིན་གྱི་གང་གི་ཉེས་པ་འདིར་འགྱུར་བ་དངོས་སུ་རྟོགས་པའི་རང་
[199a.5]བཞིན་མ་ཡིན་ནོ་ཞེས་བྱ་བའི་དོན་ཏོ། །དེ་འཚེད་པ་པོ་ཉིད་ཅེས་བྱ་བ་འབྲེལ་པ་བརྗོད་པ་མ་ཡིན་ནམ་ཞེས་བྱ་བ་ལ་སོགས་པས་ནི་དོན་གཞན་བརྗོད་པ་ཉིད་དུ་དོགས་པར་བྱེད་པའོ། །འཚེད་པའི་བྱ་བ་དང་འབྲེལ་པས་དེའི་བྱེད་པ་པོ་ལ་འཚེད་པ་པོའི་སྒྲ་ཡིན་པའི་ཕྱིར་འཚེད་པ་པོ་ཉིད་ཀྱི་
[199a.6]སྒྲས་ནི་འཇུག་པའི་རྒྱུ་མཚན་དུ་གྱུར་པ་དེ་ཉིད་བརྗོད་པ་ཡིན་ནོ་ཞེ་ན། འདི་འགོག་པ་ནི་ཇི་སྐད་དུ་བརྗོད་པ་ལྟ་བུར་ཞེས་བྱ་བ་སྟེ། སྒྲ་དག་གིས་ཇི་སྐད་བརྗོད་པ་ལྟར་འཚེད་པ་རྒྱུར་གྱུར་པས་འཚེད་པ་པོ་གང་ཡིན་པ་དེ་སྐབས་ཀྱིས་འཚེད་པ་ཉིད་ལས་གཞན་འགའ་ཁོ་ན་ཞིག་
[199a.7]བརྗོད་པ་ནི་མ་ཡིན་ནོ། །འཚེད་པ་པོ་ཞེས་བྱ་བས་ནི་བྱེད་པ་པོ་རྟོགས་ལ། དེ་ལ་ཡང་འཚེད་པ་འདི་རྒྱུ་ཡིན་པར་འཚེད་པའི་བྱ་བ་བྱེད་པ་ཉིད་ཀྱིས་འགྱུར་བ་ཡིན་ནོ། །གལ་ཏེ་འཚེད་པ་པོ་ཞེས་བྱ་བ་ཉིད་ཀྱིས་འཚེད་པའི་བྱ་བ་བྱེད་པར་རྟོགས་པ་མ་ཡིན་ནམ། དེས་འཚེད་
[199b]
[199b.1]པས་ཞེས་བྱ་བ་འདིས་ཅི་བྱ་ཞེ་ན། བདེན་ཏེ་འོན་ཀྱང་འཚེད་པ་ཐ་དད་པ་མ་ཡིན་པས་ཀྱང་བྱེད་པ་པོར་འགྱུར་རོ་ཞེས་དོགས་པ་བཟློག་པའི་ཕྱིར་འཚེད་པ་རྒྱུ་ཉིད་དུ་བསྟན་ཏེ། རྒྱུ་ཉིད་ནི་གཅིག་པར་འགལ་བའི་ཕྱིར་རོ། །དེ་ཉིད་ཀྱི་ཕྱིར་གཞན་ཞེས་བྱ་བ་འདིར་འཚེད་པ་མཚམས་སུ་
[199b.2]གྱུར་པ་ཡིན་ཏེ། གཞན་དུ་འཚེད་པ་ཞེས་བྱ་བ་འཚེད་པ་པོ་ཉིད་ལ་ལྟོས་ནས་ཡིན་པར་འགྱུར་རོ། །གལ་ཏེ་གཞན་བརྗོད་པ་མ་ཡིན་ན། འོ་ན་ཅི་ཞིག་བརྗོད་པ་ཡིན་ཞེ་ན། འདིའི་ཞེས་སྨོས་སོ། །འདི་སྐད་བརྗོད་པ་ཡིན་ཏེ། གལ་ཏེ་འཚེད་པ་གཞན་དུ་གྱུར་པའི་རྒྱུ་མཚན་
[199b.3]ཅན་ཀྱི་བྱེད་པ་པོ་ཉིད་དང་ལྡན་པའི་དངོས་པོ་འཚེད་པའི་སྒྲས་བརྗོད་པར་འགྱུར་ན་ནི་འཚེད་པ་པོ་ཉིད་ཀྱི་སྒྲས་འབྲེལ་བ་བརྗོད་པར་འགྱུར་བ་ཞིག་ན་གང་གི་ཚེ་འཚེད་པའམ། འཚེད་པ་པོ་ཉིད་ཅེས་བྱ་བས་དངོས་པོ་དེ་ཙམ་ཉིད་བརྗོད་པ་དེའི་ཚེ། འཇུག་པའི་རྒྱུ་མཚན་དུ་
[199b.4]གྱུར་པ་གཞན་ཅི་ཞིག་ཡོད། དེའི་ཕྱིར་འཚེད་པ་དང་འཚེད་པ་པོའི་སྒྲ་དག་གིས་བརྗོད་པའི་དངོས་པོའི་རང་བཞིན་གང་ཡིན་པ་དེ་ཉིད་འཚེད་པ་པོ་ཉིད་ཀྱི་སྒྲས་ཀྱང་ཡིན་ནོ་ཞེས་བསྟན་པའི་ཕྱིར། དེ་ཉིད་འཚེད་པ་པོ་ཉིད་ཀྱིས་ཀྱང་བརྗོད་དོ་ཞེས་སྨོས་སོ། །འཚེད་པ་པོ་ཉིད་
[199b.5]ཀྱིས་ཀྱང་ཞེས་བྱ་བ་ནི་འཚེད་པ་པོ་ཉིད་བརྗོད་པར་འདོད་པའོ། །གལ་ཏེ་འདི་ཐམས་ཅད་ནི་བྱ་བ་ལ་སོགས་པ་དོན་གཞན་མེད་ན་འཐད་པ་ཡིན་ན། དེ་ཉིད་ག་ལས་ཤེ་ན། ཇི་ལྟར་ཞེས་བྱ་བ་ལ་སོགས་པ་སྨོས་སོ། །དེས་ན་དེ་ལྟར་ལྡོག་པ་དང་ལོག་པ་དག་གཞན་མ་ཡིན་
[199b.6]པར་བསྒྲུབས་ཏེ། གང་གི་དོན་དུ་སྒྲའི་དོན་རྟག་པའི་རབ་ཏུ་བྱེད་པ་འདི་ཉེ་བར་བཀོད་པ་དེ་སྟོན་པ་ནི། དེ་ཕྱིར་ཞེས་བྱ་བའོ། །ཇི་སྐད་བཤད་པའི་གཏན་ཚིགས་དེའི་ཕྱིར་རོ། །གཞན་སེལ་བ་ཡང་ཡིན་ལ་ཡུལ་ཡང་ཡིན་པས་གཞན་སེལ་ཡུལ་ལོ། །ཡུལ་ཅན་ལ་མ་
[199b.7]ལྟོས་པར་ཡང་ཡུལ་མ་ཡིན་པར་དེས་ན་སྒྲའི་ཡུལ་གཞན་སེལ་བ་ཞེས་བྱ་བར་རྟོགས་སོ། །དེ་བརྗོད་པ་ལ་དེ་ལྟ་ན་ཕྱོགས་ལ་བརྗོད་པ་གང་ཡིན་པ་མགོ་སྙམས་པར་བསྟན་པའི་ཚུལ་གྱིས་བརྗོད་པ་དེ་བསལ་བ་ཡིན་ནོ། །སློབ་དཔོན་ཕྱོགས་ཀྱི་གླང་པོས་གཞན་སེལ་བ་
[200a]
[200a.1]སྒྲའི་དོན་ཡིན་ནོ་ཞེས་གསུངས་པ་ལ་གཞན་སེལ་བ་དང་ལྡན་པར་བརྗོད་པར་ཐལ་བའི་ཕྱིར་ན་འདིར་ཡང་སློབ་དཔོན་རང་ཉིད་ཀྱིས། རང་དབང་མེད་ཕྱིར་དེ་ལྡན་མིན། །ཞེས་གསལ་བ་གང་ཡིན་པ་དེ་དང་ལྡན་པའི་ཕྱོགས་སུ་འགྱུར་རོ་ཞེས་ཕ་རོལ་པོ་དག་བརྗོད་
[200a.2]དོ། །འདི་ལྟར་སེལ་བར་བྱེད་པ་ན་སེལ་བ་སྟེ། ཟློག་པར་བྱེད་པ་གཞན་གྱི་བདག་ཉིད་མེད་པ་དངོས་པོ་མེད་པ་ཉིད་བརྗོད་པ་ཡིན་ནོ། །གལ་ཏེ་དེ་སྒྲའི་དོན་ཡིན་ན་བུམ་པ་ལ་སོགས་པའི་སྒྲ་རྣམས་དོན་ཁོ་ནར་འགྱུར་ཏེ། མེད་པར་དགག་པ་ལ་ཐ་དད་པ་མེད་པའི་ཕྱིར་རོ། །ཐམས་
[200a.3]ཅད་དུ་དགག་པར་བྱ་བ་ཁོ་ན་ཐ་དད་པར་ཟད་ཀྱི་བཀག་པ་ནི་མ་ཡིན་ཏེ། དངོས་པོ་མེད་པ་ནི་ཁྱད་པར་མེད་པའི་ཕྱིར་རོ། །བསལ་བར་བྱ་བ་ཐ་དད་པས་ཐ་དད་པ་ཡང་མ་ཡིན་ཏེ། ཁྲ་བོ་ལ་བ་ལང་མ་ཡིན་པ་མེད་ལ་ངང་པ་ལ་རྟ་མ་ཡིན་པ་མེད་པའི་ཕྱིར་བ་ལང་དང་རྟ་ཐ་དད་ཀྱང་དགག་
[200a.4]པའི་དོན་ཐམས་ཅད་དུ་ཁྱད་པར་མེད་པའི་ཕྱིར་རོ། །དེས་ན་བ་ལང་མ་ཡིན་པ་ལས་ཐ་དད་པ་ལ་བརྟེན་ནས་བ་ལང་གི་སྒྲ་བ་ལང་ལ་འཇུག་པར་བརྗོད་པ་ཡིན་ཏེ། དཔེར་ན་གཞན་དག་གིས་བ་ལང་ཉིད་ལ་བརྟེན་ནས་བ་ལང་ལ་སྒྲ་འཇུག་གོ་ཞེས་བརྗོད་པ་བཞིན་ནོ། །དེས་ན་གཞན་
[200a.5]སེལ་བའི་ཡུལ་ལ་དེ་དང་ལྡན་པའི་ཕྱིར་ཕྱོགས་སུ་ཐལ་བར་འགྱུར་རོ་ཞེའོ། །འདི་ནི་སློབ་དཔོན་གྱིས་བསྟན་བཅོས་ཀྱི་སྒྲས་ཐ་སྙད་མཛད་པས་ན་དེ་དག་ལ་དོན་འདི་ལྟ་བུར་སྣང་བ་ཡིན་ཏེ། མི་ཤེས་པས་སྒྲ་འཆད་པར་བྱེད་པ་དག་གིས་དེ་ལྟར་བཤད་པའི་ཕྱིར་རོ། །སེལ་བ་ཞེས་བྱ་
[200a.6]བ་སེལ་བའི་སྒྲའི་དོན་དུ་གྱུར་པ་ནི་མེད་ཀྱི། འོན་ཀྱང་དོན་གྱི་རང་གི་ངོ་བོ་ཁོ་ནའོ། །དེས་ན་ཉེས་པ་ནི་མེད་པ་ཁོ་ནའོ། །བུམ་པའི་རྣམ་པ་ཉིད་དུ་བུམ་པའི་སྒྲས་བརྗོད་པ་ཡིན་གྱི་སྒྲ་ཐམས་ཅད་དོན་གཅིག་པ་ཉིད་དུ་འགྱུར་བ་གང་ཡིན་པ་བུམ་པ་མེད་པར་བཀག་པ་ནི་མ་
[200a.7]ཡིན་ནོ། །རིགས་དང་དེ་དང་ལྡན་པ་དག་ནི་ཐ་དད་པའི་ཕྱིར་དེ་ལ་སྐྱོན་འདིར་འགྱུར་རོ། །འགྲེལ་པའི་སྒྲའི་དོན་གཞན་སེལ་བ་གཞན་ལ་ཡང་ཞེས་བྱ་བས་དེ་ཉེ་བར་བརྗོད་པའི་རང་བཞིན་ཉིད་བཤད་པའོ། །དེས་ཁྱད་པར་དུ་བྱ་བ་བརྗོད་པ་མ་ཡིན་པར་ནི་སེལ་བའི་ཡུལ་ཅན་
[200b]
[200b.1]ཉིད་དུ་མི་འཐད་པས་ནི། དེས་ཁྱད་པར་དུ་བྱས་པ་བརྗོད་པའི་ཕྱིར་དེ་དང་ལྡན་པའི་ཕྱོགས་ལ་བརྗོད་པ་ཐམས་ཅད་མཚུངས་པར་འགྱུར་རོ་ཞེས་སྨྲས་པ་གང་ཡིན་པ་སྟེ། སྐྱོན་ཆགས་པའི་ཕྱིར་དེ་དང་ལྡན་པའི་ཕྱོགས་ཉེ་བར་བརྗོད་པའོ་ཞེས་མདོའི་དགོངས་པ་བཤད་པའོ། །
[200b.2]ཁྱད་པར་ཅན་ཉིད་ཀྱང་དབྱིག་པ་ལ་སོགས་པ་བཞིན་དུ་ཁྱད་པར་དུ་བྱ་བ་དང་། ཁྱད་པར་དུ་བྱ་བའི་དངོས་པོས་ནི་མ་ཡིན་གྱི་འོན་ཀྱང་དེར་སྒྲོ་བཏགས་པ་ཉིད་ཀྱིས་འཇུག་པའི་ཕྱིར་རོ། །དེ་དང་ལྡན་པའི་ཕྱོགས་ལ་ཡང་སྤྱི་དང་ལྡན་པའི་རྫས་སྣང་བ་ནི་མེད་ཀྱི། འོན་ཀྱང་དེར་
[200b.3]སྒྲོ་བཏགས་པ་ཉིད་ཀྱིས་སོ། །ཇི་ལྟར་བསལ་ཞེ་ན་དེ་ལ་ནི་ཞེས་སྨོས་སོ། །དོན་གཞན་ལ་བརྟེན་ནས་གཞན་ལ་འཇུག་པ་ལ་གཞན་གྱི་དབང་དུ་འགྱུར་གྱི། ལྡོག་པ་ལ་ནི་ཐ་དད་པ་ཡོད་པ་མ་ཡིན་ནོ། །འདི་ལྟར་གལ་ཏེ་སྤྱི་ཉིད་འདི་ཡུལ་ཡིན་ན། རང་གི་མཚན་ཉིད་ལ་
[200b.4]བསྟན་པ་མེད་པའི་ཕྱིར་དེའི་ཚེ་དེར་སྒྲོ་བཏགས་ནས་རང་གི་མཚན་ཉིད་ལ་འཇུག་པ་ཞེས་བྱ་བ་མི་འགྲུབ་སྟེ་སྒྲོ་བཏགས་ཀྱང་སྤྱི་དེ་ཙམ་ཡུལ་ཡིན་པའི་ཕྱིར་དེའི་གཞན་དབང་དུ་གྱུར་པས་གཞན་ཡུལ་དུ་མི་འགྱུར་བའི་ཕྱིར་རོ། །དེས་ན་སྒྲོ་བཏགས་པའི་དོན་ཀྱང་མི་འཐད་
[200b.5]དོ། །སྩོགས་པའི་སྒྲས་ནི་སློབ་དཔོན་གྱིས་གསུངས་པ་གཞན་དག་རྟོགས་པར་བྱའོ། །ཇི་ལྟར་ལོག་པ་དོན་གཞན་མ་ཡིན་ཞེ་ན། གཉིས་གས་ཞེས་སྨོས་སོ། །ལྡོག་པ་དང་ལོག་པའི་སྒྲ་གཉི་གས་རང་གི་མཚན་ཉིད་ཀྱི་རང་གི་ངོ་བོ་གཅིག་ཁོ་ན་བརྗོད་པའི་ཕྱིར་རོ། །ད་
[200b.6]ནི་བསྒྲུབ་པའི་ཡུལ་ཅན་གྱི་ཕྱོགས་ལས་ཁྱད་ཅི་ཡོད་ཅེ་ན། གཞན་སེལ་བའི་ཡུལ་ཅན་ཉིད་དོ། །གཞན་སེལ་བ་ཞེས་བྱ་བ་འདི་ཅི་ཞིག་ཡིན། གལ་ཏེ་ལྡོག་པའི་ཁྱད་ཅན་གྱི་དོན་ཡིན་ན། གང་ཞིག་ཁྱད་པར་དུ་འགྱུར་བའི་ལྡོག་པ་དེ་ཅི་ཞིག །དེ་ལ་ནི་དངོས་པོ་གཞན་
[200b.7]མེད་ཀྱི། གང་ཞིག་ཁྱད་པར་དུ་འགྱུར་བ་ནི་འགའ་ཡང་མེད་དོ། །འོན་ཏེ་རང་གི་རང་བཞིན་ལ་གནས་པའི་དོན་ཙམ་ཡིན་ནོ། །དེ་ལྟར་ན་སྒྲུབ་པའི་ཡུལ་ཅན་གྱིས་ཀྱང་དེ་ཉིད་ཡུལ་དུ་བྱ་བ་ཡིན་གྱི། གཞན་ནི་འགའ་ཡང་མ་ཡིན་ནོ། །དེས་ན་མངོན་སུམ་ཡང་དེ་ལྟ་
[201a]
[201a.1]བུར་གྱུར་པའི་ཡུལ་ཅན་ཉིད་དོ། །དེའི་ཡུལ་ཅན་ཉིད་ཀྱིས་སེལ་བའི་ཡུལ་ཅན་ཡིན་ན་ནི་དེ་ཡང་སེལ་བའི་ཡུལ་ཅན་དུ་འགྱུར་རོ། །དེ་བས་ན་རིག་པའི་བྱེད་པ་དོན་གྱི་ཡུལ་ཅན་དུ་ཁས་བླངས་ནས་སྒྲུབ་པའི་ཡུལ་ཅན་ལས་འདའ་བ་མ་ཡིན་ནོ། །འདིར་
[201a.2]སྨྲས་པ། འདི་སྔོན་པོ་མ་ཡིན་སྙམ་པའི་རྣམ་པར་ཤེས་པ་འདི་ཇི་ལྟ་བ་བཞིན་སྔོན་པོ་ལ་སོགས་པའི་ཤེས་པ་རྣམས་རྣམ་པར་གཅོད་པའི་ཡུལ་ཅན་ཉིད་དོ། །འདི་ལྟར་འདིར་དགག་པའི་དོན་ཡན་ལག་ཏུ་གྱུར་པས་དེ་ལྟར་རྟོགས་པའི་རང་བཞིན་ཉིད་ནི་བསལ་བ་ཡིན་ནོ། །
[201a.3]དེས་ན་ཤེས་པ་འདི་ནི་སྒྲོ་བཏགས་པའི་སྔོན་པོ་མ་ཡིན་པ་དང་འདྲེ་ལྡོག་པར་བྱེད་པའི་སྒོ་ནས་ངོ་བོ་ཉིད་རྟོགས་པས་རྣམ་པར་གཅོད་པའི་ཡུལ་ཅན་ཉིད་ཡིན་པར་བརྗོད་དོ། །དེ་བཞིན་དུ་སྔོན་པོ་ལ་སོགས་པའི་ཤེས་པ་སྔོན་པོ་ལ་སོགས་པ་དག་ལ་སྔོན་པོ་མ་ཡིན་པར་སྒྲོ་འདོགས་
[201a.4]པ། ཟློག་པར་བྱེད་པ་ཉིད་ཀྱིས་དངོས་སུ་ན་དོན་གྱི་ཡུལ་ཅན་དུ་གྱུར་པ་རྟོགས་པ་པོའི་ཞེན་པ་ལ་ལྟོས་ནས་རྣམ་པར་གཅོད་པར་བྱེད་པ་ཉིད་དུ་རྟོགས་པ་དག་ཀྱང་གཞན་བཟློག་པའི་སྒོ་ནས་རྟོགས་པའི་ཕྱིར་སེལ་བའི་ཡུལ་ཅན་དུ་བརྗོད་དོ། །དེ་ལྟར་ནི་དོན་དེ་ཡང་སེལ་བར་འགྱུར་
[201a.5]བ་ཡིན་ཏེ། ཕྱོགས་ཉིད་བུམ་པ་མེད་པ་ཡིན་པ་བཞིན་ནོ། །རང་གི་ངོ་བོ་ལས་ལོག་པ་ཡིན་ན་ཡང་སྒྲོ་འདོགས་ཀྱི་དབང་གིས་འདྲེས་པར་གྱུར་པས་དེའི་དུས་ན་སྔོན་པོ་མེད་པའི་ལོག་པར་རྟོགས་པའི་ཕྱིར་རོ། །དེས་ན་འདི་གཞན་ལས་ལོག་པ་ཡུལ་དུ་འགྱུར་བའི་ཕྱིར་རྣམ་
[201a.6]པར་རྟོག་པ་ལོག་པའི་ཡུལ་ཅན་དུ་བརྗོད་ཀྱི། མངོན་སུམ་ནི་མ་ཡིན་ཏེ་རང་གི་ངོ་བོ་ཙམ་ལ་རྣམ་པར་གནས་པའི་དངོས་པོའི་རང་བཞིན་ཉིད་ཀྱིས་རྟོགས་པའི་ཕྱིར་རོ། །དེས་ན་ངོ་བོའི་ཡུལ་ཅན་གྱི་རྣམ་པར་རྟོག་པ་ཉིད་གཞན་སེལ་བའི་ཡུལ་ཅན་གྱི། ཇི་ལྟར་མེད་པ་དགག་
[201a.7]པའི་ཡུལ་ཅན་དུ་བློ་ངན་དག་འདོད་པ་ལྟར་ནི་མ་ཡིན་ནོ། །ངོ་བོ་ཡུལ་ཅན་ཉིད་ཀྱིས་རྣམ་པར་གཅོད་པའི་རྟོག་པ་རྣམས་ཀྱི་རྣམ་པར་གཅོད་པའི་ཡུལ་ཅན་ཉིད་འཐད་པའི་ཕྱིར་རོ། །གལ་ཏེ་ངོ་བོ་ཉིད་གཞན་བསལ་བའི་སྒོ་ནས་རྟོགས་པ་སེལ་བ་ཡིན་ན། འོ་ན་སློབ་དཔོན་
[201b]
[201b.1]ཕྱོགས་ཀྱི་གླང་པོས་གཞན་སེལ་བ་པ་སྤྱིའི་མཚན་ཉིད་དུ་ཞལ་གྱིས་བཞེས་པ་མི་འཐད་པར་འགྱུར་རོ། །དེ་སྨྲས་པ་ད་ནི་ཞེས་བྱ་བའོ། །ལོག་པ་གཅིག་གཞན་གྱི་རྗེས་སུ་མི་འགྲོ་བའི་ཕྱིར་གཅིག་གི་སྒྲ་སྦྱོར་བས་ན་དེ་ལ་ལྟོས་ནས་གཉིས་པ་གཞན་ཡིན་ནོ། །དེ་བས་ན་
[201b.2]གཅིག་གཉིས་པ་དང་རྗེས་སུ་འགྲོ་བ་མེད་པའི་ཕྱིར་ཇི་ལྟར་གཞན་ལས་ལྡོག་པ་སྤྱི་ཡིན་ཞེས་བརྗོད་པ་ཡིན་ནོ། །གཞན་སེལ་བ་ནི་ལོག་པའི་དོན་གྱི་རང་གི་ངོ་བོ་ཉིད་ཡིན་ན། ལོག་པ་ཡང་ལོག་པ་གཞན་ལ་རྗེས་སུ་མི་འགྲོའོ། །རྗེས་སུ་འགྲོ་བ་མེད་པར་ཡང་སྤྱིའི་ངོ་བོ་ཉིད་མ་ཡིན་པ་
[201b.3]དེའི་ཕྱིར་ཇི་ལྟར་གཞན་སེལ་བའི་སྤྱི་ཡིན་ན། གང་གིས་སྤྱི་བསལ་ནས་འདི་བརྗོད་པར་བྱ་བ་ཉིད་དུ་བརྟག །འདི་ནི་ཁྱད་པར་གྱི་ངོ་བོར་མི་འཐད་དོ། །སྒྲའི་དོན་ཁྱད་པར་བརྗོད་བྱ་དང་། རྗོད་བྱེད་དུ་ནི་འདོད་པ་མ་ཡིན་ནོ་ཞེས་བྱ་བ་ལ་སོགས་པས་སུན་ཕྱུང་བའི་ཕྱིར་རོ་ཞེ་ན། འདི་
[201b.4]སྤང་པའི་ཕྱིར་དེའི་བློ་ལ་ཞེས་སྨོས་སོ། །གཞན་ལས་ལྡོག་པའི་བློ་ལ་དེ་ལྟར་སྤྱིའི་ངོ་བོ་ཉིད་དུ་སྣང་བའི་ཕྱིར་རོ། །གང་ཞིག་ཅེ་ན། དེའི་བློ་ལ་ཞེས་བྱ་བ་ལ་དེ་ཞེས་བརྗོད་པ་གང་ཡིན་པ་དེ་དང་འབྲེལ་ཏེ་དེའི་བློ་ལ་དེ་དེ་ལྟར་སྣང་བའི་ཕྱིར་རོ་ཞེས་བྱ་བའི་དོན་ཏོ། །ཇི་སྐད་བཤད་པའི་ཚུལ་
[201b.5]དུ་རྣམ་པར་གནས་པ་གཞན་ལས་ལྡོག་པའི་ཡུལ་ཉིད་ཀྱིས་རྣམ་པར་རྟོག་པ་རྣམས་གཞན་སེལ་བའི་བློ་ཉིད་དུ་བསྒྲུབས་པ་ཡིན་ནོ། །དེ་ལ་ཡང་གཞན་སེལ་བ་སྤྱིའི་ངོ་བོར་སྣང་སྟེ། དེས་ན་འདི་སྤྱི་ཞེས་བརྗོད་དོ། །འདི་ཉིད་གཞུང་གཟུགས་པའི་ཕྱིར་སྤྱི་ཞེས་བྱ་བ་ནི་འགའ་
[201b.6]ཡང་མེད་ཀྱི་ཞེས་སྨོས་སོ། །ཇི་ལྟར་གཞན་དག་གིས་བརྟགས་པ་ལྟ་བུ་དངོས་པོར་འགྱུར་བའམ། གཞན་སེལ་བའི་ངོ་བོ་དེ་ལྟར་དོགས་པ་གང་ཡིན་པ་ནི་ཐམས་ཅད་མེད་པའི་ཕྱིར་འགའ་ཡང་ཞེས་བཤད་དོ། །དངོས་པོར་གྱུར་པའམ་ལྡོག་པ་ཡང་བླ་སྟེ། སྤྱི་ཐམས་
[201b.7]ཅད་ནི་ཡོད་པ་མ་ཡིན་ནོ། །ལྡོག་པ་རྗེས་སུ་འགྲོ་བ་དང་ལྡན་པ་ནི་འཐད་པ་མ་ཡིན་ནོ། །གཅིག་ལ་ཡོད་པ་ནི་གཞན་ལ་ཡོད་པ་མ་ཡིན་ཏེ། གཅིག་ལ་ཡང་འདི་ཡོད་པ་པོ་ཉིད་དུ་མ་གྲུབ་པའི་ཕྱིར་རོ། །བ་ལང་མ་ཡིན་པ་ཁྲ་བོ་བཞིན་དུ་སེར་སྐྱ་ལ་ཡང་མེད་པར་ཟད་ཀྱི་དེ་
[202a]
[202a.1]ལྟར་གཉི་ག་ལ་ཡོད་པ་འགའ་ཞིག་ནི་ཁས་བླང་བར་འགྱུར་བ་མ་ཡིན་པས་ན། འདིར་རྗེས་སུ་འགྲོ་བ་ཅི་ཞིག་ཡིན། དངོས་པོར་གྱུར་པ་མེད་པ་ནི་མདུན་ན་འཆད་པར་འགྱུར་རོ། །དེས་ན་དངོས་པོའི་གནས་པས་གཞན་སེལ་བ་སྤྱིར་བཤད་པ་ནི་མ་ཡིན་
[202a.2]ནོ། །དེ་དངོས་པོ་ལ་མེད་པའི་ཕྱིར་སྤྱིའི་བློ་གང་ཡིན་པ་འདི་ནི་གཞན་སེལ་བའི་ཡུལ་ཅན་ཡིན་པས་ན། གཞན་སེལ་བ་སྤྱིའི་ངོ་བོར་ཁས་བླངས་པ་ཡིན་ནོ། །གལ་ཏེ་སྤྱི་འགའ་ཡང་མེད་ན་ཇི་ལྟར་དེ་བློ་ལ་ཡང་མེད་ན་དེ་ལྟར་སྣང་བར་འགྱུར་ཞེ་ན། སྒྲའི་རྟེན་ཅན་གྱི་བློ་ཞེས་
[202a.3]སྨོས་སོ། །བརྗོད་པ་དང་འདྲེར་རུང་བར་སྣང་བ་རྣམ་པར་རྟོག་པ་དང་བཅས་པ་ལ་ཞེས་བྱ་བའི་ཐ་ཚིག་གོ། །བུམ་པ་ལ་སོགས་པའི་དངོས་པོ་རིགས་མཐུན་པ་དང་མི་མཐུན་པ་ལས་ལོག་པ་ཆོས་མ་འདྲེས་པ་དག་ཀྱང་སྲེ་ཞིང་སྐྱེའོ། །འདི་དག་གི་འདྲེ་བ་ཡང་གཅིག་དང་
[202a.4]རྟོགས་པ་གཞན་དག་ངོ་ཤེས་པར་བྱེད་པ་ལྟར་གཅིག་ཏུ་བྱེད་པ་ནི་མ་ཡིན་ནོ། །ཇི་ལྟར་དེ་ཉིད་འདི་ཡིན་ནོ་ཞེས་སྔ་ཕྱི་མཐོང་བ་གཅིག་ཏུ་བྱེད་པའི་རང་བཞིན་གྱིས་ན། ངོ་ཤེས་པ་མཚམས་སྦྱོར་བར་བྱེད་པའི་རང་བཞིན་ཡིན་པ་དེ་བཞིན་དུ་འདིར་ནི་ཁྱད་པར་ཁྱད་པར་གཞན་དང་
[202a.5]མཚམས་སྦྱོར་བ་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་རྣམ་པར་རྟོག་པའི་རྟོག་པ་ཡང་སྤྱི་ཡོད་པར་རིག་པར་བྱེད་པ་མ་ཡིན་ནོ་ཞེས་སྤྱི་སེལ་བའི་རབ་ཏུ་བྱེད་པ་སྟོན་པར་འགྱུར་རོ། །འོ་ན་ཇི་ལྟར་ཁྲ་བོ་གང་ཡིན་པ་ཉིད་སེར་སྐྱ་ཡིན་ནོ་ཞེས་མ་རྟོགས་པར་ཆོས་སྲེ་བར་འགྱུར་ཞེ་ན།
[202a.6]རིག་པའི་བྱེད་པས་དེ་ལྟ་བུའི་དངོས་པོར་མ་གྲུབ་ཀྱང་གཅིག་བཞིན་དུ་རྟོགས་པའི་ཕྱིར་གཅིག་ལ་དམིགས་པའི་སྒྲ་དང་དོན་བྱ་བ་ལ་སོགས་པ་དང་འབྲེལ་བ་དེ་དག་གཞན་ལ་མ་དམིགས་པ་ཡིན་ཡང་དེ་ཉིད་བཞིན་དུ་འཇུག་པའི་ཕྱིར་དོན་དུ་ཞེན་པ་བཞིན་ཐ་མི་དད་པར་ཞེན་པ་འདི་
[202a.7]ཡང་བརྗོད་པར་བྱ་བ་མ་ཡིན་ནོ་ཞེས་འོག་ནས་རྒྱ་ཆེར་སྟོན་པར་འགྱུར་རོ། །ཇི་ལྟར་མ་འདྲེས་པ་དག་ལ་འདྲེས་པར་ཞེན་ཅེ་ན། ཐོག་མ་མེད་པའི་བག་ཆགས་ཀྱི་མཐུ་ཞེས་སྨོས་སོ། །འདི་སྐད་བརྗོད་པ་ཡིན་ཏེ། མ་འདྲེས་པ་དག་ལ་མ་འདྲེས་པ་ཉིད་རྟོགས་པར་འགྱུར་
[202b]
[202b.1]བ་གང་ཡིན་པ་རྣམ་པར་རྟོག་པ་འདི་དངོས་པོ་ཉམས་སུ་མྱོང་བ་བཞིན་དུ་དངོས་པོ་ཉིད་ཀྱིས་དངོས་པོ་སྣང་བ་ཅན་དུ་བསྐྱེད་པ་ནི་མ་ཡིན་གྱི་རང་གི་ཉེ་བར་ལེན་པའི་སྟོབས་ལས་དེ་ལྟར་སྐྱེ་བ་ཡིན་ནོ། །དེ་ལ་ཡང་རྣམ་པར་རྟོག་པ་རྣམ་པར་ཤེས་པ་སྔ་མའི་རྗེས་སུ་བྱེད་པར་རྟོགས་ཏེ། དྲན་
[202b.2]པའི་ཤེས་པ་བཞིན་ནོ། །དྲན་པ་དོན་ལས་སྐྱེ་བ་མ་ཡིན་ཏེ་མེད་པའི་ཕྱིར་རོ། །འདིའི་དེ་ལྟར་སྣང་བ་ནི་ཤེས་པ་སྔ་མའི་འདུ་བྱེད་ཀྱི་གཞི་ལས་ཡིན་ནོ། །དེ་བཞིན་དུ་རྣམ་པར་རྟོག་པ་འདི་ཡང་རྣམ་པར་རྟོག་པ་གཞན་གྱི་འདུ་བྱེད་ཀྱི་རྗེས་སུ་འཇུག་པར་འགྱུར་བས་འབྲེལ་པར་སྣང་
[202b.3]བ་ན་དེ་ལྟར་སྐྱེ་བ་ཡིན་ནོ། །རྣམ་པར་རྟོག་པ་གཞན་དེ་ཡང་རྣམ་པར་རྟོག་པ་གཞན་གྱི་འདུ་བྱེད་ཀྱི་རྗེས་སུ་འཇུག་པའི་ཕྱིར་བག་ཆགས་འདི་ཐོག་མ་མེད་པ་ཅན་ཡིན་ནོ། །དེ་ལ་དྲན་པ་ནི་རྣམ་པར་ཤེས་པ་སྔ་མའི་འདུ་བྱེད་ཀྱི་གཞི་ལས་དེ་ལྟར་སྣང་བ་ཡིན་ལ། རྟོགས་པ་དེ་ཡང་
[202b.4]ཤེས་པ་སྔ་མའི་ཡུལ་ལ་ཕྱིན་ཅི་ལོག་གིས་སྟོང་པའི་ཕྱིར་དྲན་པ་ཉིད་དུ་སྣང་བ་ཡིན་ནོ། །རྣམ་པར་རྟོག་པ་འདི་ནི་རང་དབང་དུ་དངོས་པོར་ཞེན་པའི་བདག་ཉིད་དུ་སྐྱེ་ཡང་དངོས་པོས་བྱས་པའི་རིག་པའི་བྱེད་པས་སྟོང་པའི་ཕྱིར་ན་ཕྱིན་ཅི་ལོག་དེ་ཉིད་ལས་ཤེས་པ་གཞན་གྱི་འདུ་བྱེད་
[202b.5]པས་བྱས་ཏེ་དེ་ལྟར་སྣང་ཡང་དེ་ལྟར་རྟོགས་པ་མ་ཡིན་པའི་ཕྱིར་དྲན་པ་ཉིད་དུ་གསལ་བ་མ་ཡིན་ནོ། །དངོས་པོས་བྱས་པའི་དངོས་པོ་རིག་པའི་བྱེད་པས་སྟོང་ཡང་རྣམ་པ་དེ་ལྟ་བུའི་བག་ཆགས་ལ་བརྟེན་པ་ཞེས་བྱ་བ་འདི་གང་ལས་ཤེ་ན། དངོས་པོས་ཉེ་བར་སྦྱོར་བ་མེད་ཀྱང་ཤེས་
[202b.6]པ་གཞན་གྱི་འདུ་བྱེད་ཀྱི་རྩ་བ་ཅན་ཉིད་ནི་དྲན་པ་ལ་དམིགས་པའི་ཕྱིར་དང་། སྤྱི་རྟོགས་པ་ཉིད་ཀྱིས་རྟོགས་པ་སྔ་མའི་འདུ་བྱེད་ཀྱི་རྗེས་སུ་འཇུག་པར་གྲུབ་པའི་ཕྱིར་དང་འདིའི་མྱོང་བ་མ་ཡིན་པའི་བྱེད་པས་ནི་དེས་གཟུང་བའི་ཡུལ་དང་མཚམས་སྦྱོར་བར་རྟོགས་པའི་ཕྱིར་རོ། །
[202b.7]དེས་ན་དོན་གྱི་ཡུལ་ཅན་གྱི་སྤྱིའི་ཤེས་པ་གང་ཡིན་པ་ད་དག་གི་རྒྱུ་མཚན་ནི་གཉིས་ཡིན་ཏེ། དོན་དམིགས་པར་བྱེད་པའི་རྟོགས་པ་གཞན་དང་འདུ་བྱེད་དེའོ། །དོན་གྱི་ཉེ་བར་སྦྱོར་བ་མེད་ན། འདུ་བྱེད་པ་འབའ་ཞིག་ལུས་པ་ཡིན་ནོ། །དེ་ཡང་སྤྱི་སྨྲ་བ་
[203a]
[203a.1]རྣམས་ཀྱི་ལྟར་ན་ཐོག་མ་དང་བཅས་པ་ཉིད་དོ། །སྤྱི་རྟོགས་པ་མངོན་སུམ་ཉིད་ཡིན་པའི་ཕྱིར་དང་། མངོན་སུམ་གྱི་རྩ་བ་ཅན་ཡིན་པའི་ཕྱིར་རོ། །འདིར་ནི་རྣམ་པར་རྟོག་པ་ཕྱི་མའི་དངོས་པོའི་སྦྱོར་བས་སྟོང་པའི་རྣམ་པར་རྟོག་པའི་རྩ་བ་ཅན་ཡིན་པས་ན་དེ་ཡང་
[203a.2]རྣམ་པར་རྟོག་པ་ཡང་སྔ་མའི་རྩ་བ་ཅན་ཡིན་པའི་ཕྱིར་ཐོག་མ་མེད་པ་ཁོ་ནའོ། །དེས་ན་སྤྱིའི་བློ་འདི་ནི་དེ་ལྟར་སྐྱེ་བ་ཡིན་ནོ། །དེས་ན་དེའི་སྣང་བ་ལ་བརྟེན་ནས་བ་ལང་གི་ཚིག་གི་དོན་སྤྱི་དང་། ཨུཏྤ་ལ་ཉིད་སྔོན་པོ་ཉིད་དང་གཞི་མཐུན་པ་ཉིད་དོ་ཞེས་རྣམ་པར་གཞག་པར་བྱེད་
[203a.3]དོ། །ཕན་ཚུན་རྗེས་སུ་འབྲེལ་བར་རྟོགས་པའི་ཕྱིར་གྱི། །འདིར་གཞིར་གྱུར་པའི་ཆོས་ཅན་གསུམ་པ་ནི་འགའ་ཡང་སྣང་བ་མེད་དོ། །འོ་ན་ཇི་ལྟར་གཞི་མཐུན་པའི་ཚིག་ཐ་དད་པར་འགྱུར་ཞེ་ན། མུ་སྟེགས་གཞན་ལ་གྲགས་པ་ཡིན་པར་རྟོགས་པར་བྱའོ། །དངོས་པོའི་
[203a.4]དབང་གིས་ནི་མ་ཡིན་ནོ་ཞེས་བཤད་པ་ནི། དོན་མེད་བཞིན་དུ་ཡང་ཞེས་སྨོས་སོ། །མེད་པ་ཡང་ཡིན་ལ་དོན་ཡང་ཡིན་པ་དོན་མེད་པ་སྟེ། སྤྱི་དང་གཞི་མཐུན་པ་དག་ཀྱང་དེ་ལྟ་བུ་ཡིན་ནོ། །ཇི་ལྟར་ཞེ་ན་དོན་རྣམས་ལ་ཞེས་སྨོས་སོ། །སྤྱི་དང་གཞི་མཐུན་པའི་རྟོགས་པའི་རྒྱུ་མཚན་ནི་འབྲེལ་པ་དང་
[203a.5]ཐ་དད་པ་ཁོ་ན་ཡིན་ན། དེ་གཉིས་ནི་དོན་རྣམས་ལ་མི་སྲིད་དོ། །ཁྲ་བོ་ལ་སོགས་པ་ཐ་དད་པ་ལས་བ་ལང་ཉིད་གཞན་མ་ཡིན་པར་ཇི་ལྟར་ཁྱད་པར་གཞན་དང་འདྲེ་བར་འགྱུར། དེ་ལྟར་ཡང་སྲིད་པ་མ་ཡིན་ཏེ། ཁྲ་བོ་ལས་གཞན་པའི་བ་ལང་ཉིད་དམ་སེར་སྐྱ་དེ་ཉིད་ཡིན་པ་ནི་
[203a.6]མི་སྲིད་དོ། །དེ་བཞིན་དུ་གཞི་མཐུན་པ་ཡང་ཐ་དད་པ་ལ་བརྟེན་པ་འདྲེ་བའི་མཐར་ཐུག་པ་ཅན་ཡིན་ནོ། །དེ་རྟོགས་པ་ན་མ་རྟོགས་པའི་ཕྱིར་སྔོན་པོའི་མཚན་ཉིད་ཀྱི་ཆོས་ཨུཏྤ་ལའི་མཚན་ཉིད་ལས་ཐ་དད་པར་རྟོགས་པ་ལས། ཡང་དེ་ལྟར་རྟོགས་པ་ན། དེ་ལྟར་རྗེས་སུ་འགྲོ་བ་
[203a.7]ལ་བརྟེན་པས་དེ་དང་རང་བཞིན་གཅིག་ཉིད་དུ། ཨུཏྤ་ལ་སྔོན་པོ་ལ་སོགས་པའི་རྟོགས་པ་རྣམས་ལ་སྣང་བར་འགྱུར་རོ། །དེས་ན་འདི་གཉི་ག་ཡང་དོན་རྣམ་པར་འགྲེལ་པ་དང་ཐ་དད་པའི་རྩ་བ་ཅན་ཡིན་ལ། དེ་གཉིས་ཀྱང་དོན་ལ་སྲིད་པ་མ་ཡིན་ནོ་ཞེས་བསྒྲུབ་པར་འགྱུར་བར་རོ། །
[203b]
[203b.1]དེ་ལྟར་སྤྱི་མེད་ཀྱང་བློ་ལ་དེ་ལྟར་སྣང་ངོ་ཞེས་བསྟན་ནས་བློ་དེ་གཞན་སེལ་བའི་བློ་ཉིད་དུ་བསྟན་པ་ནི་དེ་ཐམས་ཅད་ཀྱི་ཞེས་བྱ་བའོ། །སྤྱི་དང་གཞི་མཐུན་པ་དང་ཁྱད་པར་གྱི་གཞིའི་དངོས་པོ་ལ་སོགས་པ་དེ་ཐམས་ཅད་ཀྱི་རྟེན་ནི་གཞན་དག་ལས་ཐ་དད་པའི་དོན་རྣམས་ཡིན་ནོ། །ཇི་
[203b.2]ལྟར་གཞན་དག་ལས་ཐ་དད་པ་དེ་སྟོན་པ་ནི། དེའི་འབྲས་བུ་དང་རྒྱུ་ཅན་ཉིད་ཀྱིས་ཞེས་སྨོས་སོ། །རྣམ་པར་ངེས་པ་ཅན་ཉིད་ཀྱིས་དོན་རྣམས་དེའི་རང་བཞིན་མ་ཡིན་པས་ན་དེ་ལས་གཞན་པ་ལས་ལྡོག་པ་ཡིན་ནོ། །རྣམ་པར་ངེས་པ་ཉིད་ཀྱང་ཁྱད་པར་ཅན་གྱི་རྒྱུ་ཅན་ཉིད་དམ།
[203b.3]ཁྱད་པར་ཅན་གྱི་འབྲས་བུ་ཅན་ཉིད་དམ། སྔོན་པོ་དང་སེར་པོ་ལ་སོགས་པ་ཁྱད་པར་ཅན་གྱི་རང་བཞིན་གྱིས་ཡིན་ནོ། །དེའི་འབྲས་བུ་དང་རྒྱུ་ཅན་སྨོས་པ་ནི་ཉེ་བར་མཚོན་པ་ཡིན་ནོ། །དབྱེ་བར་བྱ་བའི་དོན་ལ་བརྟེན་པ་ཉིད་ཀྱིས་སྤྱི་ལ་སོགས་པའི་ས་བོན་ནི་ཐ་དད་པ་ཡིན་པར་བརྗོད་
[203b.4]དོ། །དེས་ན་བློ་འདི་ནི་ས་བོན་ལས་རང་གི་ངོ་བོ་ཐོབ་པའི་ཕྱིར་འདི་ལྡོག་པའི་བློ་ཡིན་ནོ། །འདི་ཡང་ཕན་ཚུན་དུ་ཐ་དད་པ་འདིའི་ས་བོན་ཡིན་ཞེས་བྱ་བ་དེར་སྟོན་པར་འགྱུར་རོ། །དེས་ན་འདི་ལྡོག་པའི་བློ་ཡིན་པའི་ཕྱིར་དེ་ལ་སྣང་བཞིན་པ་དང་། ངོ་བོ་གང་གིས་སྣང་བ་དེ་བཞིན་
[203b.5]ལྡོག་པ་ཞེས་བྱའོ། །དངོས་པོ་ལ་དངོས་པོ་གཞན་མེད་པའི་རང་བཞིན་གྱི་ལྡོག་པ་གང་ཡིན་པ་དེ་ནི་ཤེས་པ་འདིའི་ས་བོན་དུ་འགྱུར་བ་ཡིན་པས་ན་འདི་ནི་ལྡོག་པ་རྟོགས་པ་ཡིན་ནོ། །དེ་ནི་སྔར་བཤད་པའི་ཚུལ་གྱིས་དམིགས་པ་ལ་ལྟོས་ནས་ཇི་ལྟར་རྟོགས་པའི་བློ་ཡིན་པ་དེ་བསྟན་
[203b.6]པའི་ཕྱིར་སྒྲས་ཀྱང་ཞེས་སྨོས་སོ། །སྒྲས་ཀྱང་སྒྲོ་འདོགས་པའི་སྒྲོ་ནས་མི་འདོད་པ་སྦྱོར་བ་སྤངས་ཏེ་ཞེས་བྱ་བའི་སྒྲོ་འདོགས་པ་རྣམ་པར་གཅོད་པས་རྟོགས་པ་པོ་འཇུག་པར་བྱེད་དོ། །འཇུག་པ་དེ་ཡང་དེ་ལྟར་རྟོགས་པ་ཡིན་པའི་ཕྱིར་སྒྲོ་འདོགས་པ་རྣམས་གཅད་པས་
[203b.7]རྟོགས་པར་བྱེད་པས་ཞེས་བརྗོད་པ་ཡིན་ནོ། །དེ་ལྟར་རྟོགས་པ་དེ་ཡང་རྣམ་པར་གཅོད་པ་རྟོགས་པ་ཡིན་པས་གཞན་སེལ་བའི་ཡུལ་ཅན་དུ་འདི་ཇི་ལྟར་རྟོགས་ཤེ་ན་ཞེས་རྒོལ་བ་བཀོད་པ་སྔོན་དུ་འགྲོ་བ་ཅན་གྱིས་སྔར་བསྟན་ཟིན་ཏོ། །མེད་དོ་ཞེས་ཀྱང་ཁས་ལེན་པ་དེ་ལྟར་ན་ཡང་
[204a]
[204a.1]བློ་ལ་སྣང་བ་ཡིན་ནོ་ཞེས་བྱ་བ་གང་ཡིན་པ་སྤྱི་ལ་སོགས་པ་དོན་མེད་པ་དེ་གང་ཞིག་ཅེ་ན། དེ་རང་གི་ངོ་བོ་ཉིད་བསྟན་པའི་ཕྱིར། དེ་ལ་ཞེས་སྨོས་ཏེ། དོན་གྱི་ཕན་འདོགས་པ་ལ་མི་ལྟོས་པར། ཐོག་མ་མེད་པའི་བག་ཆགས་ཀྱི་དབང་གིས་དེ་ལྟ་
[204a.2]བུའི་བློ་སྐྱེ་བ་ཞེས་རྣམ་པར་གནས་པ་ལའོ། །གཅིག་པོ་ཞེས་བྱ་བ་ནི་སྤྱིའི་རང་བཞིན་ནོ། །དུ་མ་ལས་ལྡོག་པ་ཞེས་བྱ་བ་ནི་གཞི་མཐུན་པའི་རྟེན་གྱི་དོན་ཏོ། །སྒྲ་རྣམས་ཀྱི་ཡུལ་དུ་བྱེད་ཅིང་དེ་ཡང་བློ་ལ་སྣང་བའི་དབང་གིས་ཏེ་བློ་ལ་སྣང་བར་གྱུར་པའི་མཐུས་ཡིན་ནོ། །གང་
[204a.3]གི་ཕྱིར་བློ་ལ་རྣམ་པ་དེ་ལྟ་བུའི་རང་བཞིན་དུ་སྣང་བ་དེས་ན་སྒྲ་རྣམས་ཀྱི་ཡུལ་དུ་བྱེད་པའི་ཕྱིར་བློ་ལ་སྣང་བའི་དབང་གིས་ཡུལ་དུ་བྱེད་པར་བརྗོད་དོ། །བློ་ལ་སྣང་བ་ཡང་བློའི་རྣམ་པ་ཁོ་ན་ཡིན་པས་དེ་ལྟ་བུར་གྱུར་པའི་དོན་ནི་བློའི་རྣམ་པ་ཉིད་ཡིན་པར་བརྗོད་པ་ཡིན་ནོ། །གལ་ཏེ་དེ་
[204a.4]ལྟ་བུའི་དོན་བློའི་རྣམ་པ་ཉིད་ཡིན་ན། ད་ཇི་ལྟར་སྤྱི་འགའ་ཡང་མེད་ཅེས་བརྗོད་ཅེ་ན། ཕྱི་རོལ་གྱི་དོན་གྱི་དེ་ཁོ་ན་ཉིད་ལ་མི་ལྟོས་པ་ཞེས་སྨོས་སོ། །གལ་ཏེ་ཕྱིའི་དོན་དེ་ལྟ་བུ་འགའ་ཞིག་ཡོད་ན་ནི། དེ་བཞིན་དུ་བློ་ཡང་དེ་ལྟར་སྣང་བའི་ཕྱིར་སྔོན་པོ་ལ་སོགས་པ་བཞིན་དུ་སྤྱི་དངོས་
[204a.5]པོ་ཡོད་པར་འགྱུར་བ་ཞིག་ན། དེ་ནི་མ་ཡིན་པས་ན་སྤྱི་མེད་པར་བརྗོད་པ་འཐད་པ་ཡིན་ནོ། །གལ་ཏེ་ཕྱི་རོལ་དེ་ལྟ་བུ་ཡོད་པ་བློས་རྗེས་སུ་བྱེད་ན་ཕྱི་རོལ་གྱི་དེ་ལྟ་བུ་ཉིད་བློས་མཐོང་བ་ཞེས་བྱ་བར་འགྱུར་བ་མ་ཡིན་ནོ། །ཕྱི་རོལ་མེད་ཀྱང་དེ་ལྟ་བུའི་བློ་ཉིད་སྤྱིར་འགྱུར་མོད་ཅེ་ན།
[204a.6]དེའི་དངོས་པོར་ངེས་པ་ཞེས་སྨོས་སོ། །དེའི་ཞེས་བྱ་བ་ནི་ཕྱི་རོལ་གྱི་དོན་གྱི་དེ་ཁོ་ན་ཉིད་ཅེས་བརྗོད་པ་བཟུང་བ་ཡིན་ནོ། །བློའི་སྣང་བ་ནི་ཕྱི་རོལ་གྱི་དེ་ཁོ་ན་ཉིད་དུ་ངེས་པ་ཡིན་ཏེ། འདི་ཤེས་པའི་རྣམ་པ་ཡང་དོན་གྱི་དེ་ཁོ་ན་ཉིད་དུ་ལྷག་པར་ཞེན་པར་བྱས་པ་ཡིན་ནོ་ཞེས་བྱ་བའི་ཐ་ཚིག་
[204a.7]གོ། །འདི་སྐད་བརྗོད་པ་ཡིན་ཏེ། གལ་ཏེ་གཞན་དང་གཅིག་ཏུ་གྱུར་པའི་ཕྱིར་ཕྱིའི་རང་བཞིན་དུ་གྱུར་པའམ། དུ་མ་ལ་སོགས་པ་འདི་རྟོགས་པའི་རང་བཞིན་ལྟར་རང་གི་བདག་ཉིད་ལ་རྣམ་པར་གནས་པ་ཡིན་ན། དེའི་ཚེ་སྤྱི་ཡིན་པར་འགྱུར་བ་ཞིག་ན། དེ་ལྟར་ནི་མ་ཡིན
[204b]
[204b.1]ནོ། །དེ་ནི་དོན་འདི་ཉིད་དུ་ངེས་པའི་ཕྱིར་འདི་དོན་རྣམས་ཀྱི་རང་བཞིན་གཅིག་ཡིན་པར་ངེས་པ་ཡིན་ན། བློའི་སྣང་བས་ནི་དེ་རྣམས་དེ་ལྟ་བུར་གྱུར་པ་མ་ཡིན་ནོ། །དེའི་ཕྱིར་སྤྱི་ནི་དོན་མེད་པ་ཡིན་ནོ། །འདི་ཐམས་ཅད་ནི་ལྡོག་པའི་སྤྱིའི་ངོ་བོ་ཉིད་ཡིན་པས་ན་མདོར་བསྡུས་ཏེ་བརྗོད་
[204b.2]པ་ཡིན་ནོ། །དེ་ལ་ཇི་ལྟར་སྤྱི་མེད་པ་དང་དངོས་པོ་ཐ་དད་པ་སྤྱིའི་རྒྱུ་མཚན་ཡིན་པ་དང་བློའི་སྣང་བ་སྒྲའི་དོན་དང་སྤྱིའི་རང་བཞིན་ཉིད་དང་དོན་མེད་པ་ཉིད་ནི་འོག་ནས་དེ་དང་དེར་རྒྱས་པར་སྒྲུབ་པར་འགྱུར་རོ། །ཇི་ལྟར་འདི་སྒྲ་རྣམས་ཀྱི་ཡུལ་ཡིན་པ་དེ་བཞིན་དུ་རྣམ་པར་རྟོག་པ་རྣམས་
[204b.3]ཀྱི་ཡང་ཡིན་ནོ་ཞེས་བཤད་པ་ནི། དེ་ཉམས་སུ་མྱོང་བའི་ཞེས་བྱ་བ་ལ་སོགས་པའོ། །ཡང་ན་སྒྲ་རྣམས་ཀྱི་སྒོ་ནས་རྣམ་པར་རྟོག་པ་རྣམས་ཀྱི་ཡུལ་དུ་བྱེད་ཅིང་ཞེས་འབྲེལ་ཏོ། །དེ་ཞེས་བྱ་བ་ནི་ཕྱི་རོལ་གྱི་དེ་ཁོ་ན་ཉིད་འཛིན་པའོ། །དེས་ན་ཕྱི་རོལ་ཉམས་སུ་མྱོང་བའི་བག་ཆགས་
[204b.4]ལས་སྐྱེ་བ་ཅན་གྱི་རྣམ་པར་རྟོག་པ་ཞེས་བྱ་བའི་དོན་འདི་ཡིན་ནོ། །སྔར་ནི་ཐོག་མ་མེད་པའི་བག་ཆགས་ལ་རྟེན་པར་བྱེད་ལ། ཉམས་སུ་མྱོང་བའི་བག་ཆགས་ནི་ཐོག་མ་དང་བཅས་པ་ཡིན་པ་དེས་ན་རྣམ་པར་རྟོག་པ་རྣམས་བག་ཆགས་ཉིད་ལས་བྱུང་བར་བརྗོད་པར་འགྱུར་རོ། །དེ་
[204b.5]ལ་རྣམ་པར་རྟོག་པའི་བག་ཆགས་ཀྱིས་ནི་རྣམ་པར་རྟོག་པ་ཙམ་ལ་སྣང་བ་སྤྱི་ལ་སོགས་པ་རྟོགས་པ་ཡིན་ལ། གཞན་དང་གཞན་ཐ་དད་པར་རྟོགས་པ་ནི་ཉམས་སུ་མྱོང་བའི་བག་ཆགས་ཀྱིས་ཡིན་ནོ། །ཉམས་སུ་མྱོང་བ་ཡང་སྔོན་པོ་མེད་པའི་དོན་རྟོགས་པ་ཙམ་གྱི་རང་
[204b.6]བཞིན་ཡིན་པས་ན་རྣམ་པར་རྟོག་པས་སྔོན་པོ་མེད་པའི་དོན་རྟོགས་པའི་རྒྱུ་ཡིན་ནོ། །དེ་བས་ན་འདིར་མངོན་སུམ་བཞིན་དུ་མངོན་སུམ་མ་ཡིན་པ་ཡང་བག་ཆགས་ཀྱི་རྟེན་ཉིད་ཡིན་པར་འགྱུར་ཏེ། ཟླ་བ་གཉིས་སུ་རྣམ་པར་རྟོག་པ་ལ་ཟླ་བ་གཉིས་སུ་ཤེས་པའམ། རྨི་
[204b.7]ལམ་དུ་མཐོང་བའི་དོན་རྣམ་པར་རྟོག་པ་ལ་རྨི་ལམ་གྱི་ཤེས་པ་བཞིན་ནོ། །དེ་ལྟར་ན་གལ་ཏེ་རྒྱུ་མཚན་གཞན་ལས་ཀྱང་སྔ་ན་མེད་པའི་རང་བཞིན་རྟོགས་པར་འགྱུར་ན། དེའི་ཚེ་དེ་ཡང་བག་ཆགས་འཇོག་པར་བྱེད་པ་ཡིན་པར་འགྱུར་ཏེ། དཔེར་ན་དེ་ལྟར་ཡོངས་སུ་རྟོགས་
[205a]
[205a.1]པར་བྱེད་པ་རྣམས་ཀྱི་གཙུག་ལག་གཙོ་བོ་དང་དབང་ཕྱུག་ལ་སོགས་པའི་རྣམ་པར་རྟོག་པ་རྣམས་ཀྱི་ཡིན་པ་བཞིན་ནོ། །དེ་དག་གིས་བག་ཆགས་དེ་འདྲ་བ་དེ་ཡང་ག་ལས་ཤེ་ན། ལོག་པར་བརྟགས་པའི་རྟགས་ཀྱི་རྩ་བ་ཅན་གྱི་རྗེས་སུ་འབྲང་བ་ལས་
[205a.2]སོ་ཞེས་བརྗོད་དོ། །རྣམ་པར་རྟོག་པ་ནི་སྔོན་པོ་ལ་སོགས་པའི་ཤེས་པ་བཞིན་ནམ། ཟླ་བ་གཉིས་ལ་སོགས་པའི་ཤེས་པ་བཞིན་དུ་སྔ་ན་མེད་པའི་རྟོགས་པར་བྱ་བ་རྟོགས་པར་བྱེད་པ་ཉིད་མ་ཡིན་ཏེ། ཇི་ལྟར་སྔ་ན་མེད་པའི་དོན་སྣང་བ་ཅན་གྱིས་མངོན་སུམ་མམ། དེར་
[205a.3]སྣང་བས་བསྐྱེད་པ་བཞིན་དུ་དེ་ལྟ་བུའི་དངོས་པོའི་ཆོས་ཀྱི་རྗེས་སུ་འབྲང་བ་རྟགས་ཀྱིས་རྟོགས་པ་ལས་ཀྱང་སྐྱེ་བ་ཡིན་ནོ། །དེ་ལྟ་མོད་ཀྱི་དེ་ལྟ་བུའི་དངོས་པོའི་ཆོས་ཀྱི་རྗེས་སུ་འབྲང་བ་ན། མི་ཤེས་པ་ནི་རྗེས་སུ་དཔག་པ་ལྟར་སྣང་བས་སྔ་ན་མེད་པའི་དོན་རྟོགས་ཏེ། གཙོ་
[205a.4]བོ་ལ་སོགས་པ་ཡང་རྟོགས་པ་བཞིན་ནོ། །མཁས་པ་དག་ལ་ནི་ཡང་དག་པའི་རྗེས་སུ་དཔག་པ་སྟེ་མི་རྟག་པ་དང་བདག་མེད་པ་ལ་སོགས་པའི་རྟོགས་པ་བཞིན་ནོ། །དེའི་ཕྱིར་ཉམས་སུ་མྱོང་བའི་སྒྲ་ཐོས་པ་ལས་ཉམས་སུ་མྱོང་བ་ཙམ་ཁོ་ནར་ནི་མཁས་པ་རྣམས་ཀྱིས་
[205a.5]མངོན་པར་ཞེན་པར་བྱ་བ་མ་ཡིན་གྱི། འོན་ཀྱང་ཇི་ལྟར་ཉམས་སུ་མྱོང་བའམ་དེར་སྣང་བ་རང་གི་མཐུས་དངོས་པོ་འམ། དེ་ལས་གཞན་རྟོགས་པར་བྱེད་པ་ན་རང་གི་མཐུས་རྟོགས་པར་མི་ནུས་པའི་རྟོགས་པ་སྐྱེད་པར་བྱེད་པ་དེ་བཞིན་དུ། རྟགས་ཀྱི་རྗེས་སུ་འབྲང་བས་ཀྱང་
[205a.6]རྣམ་པར་རྟོག་པ་སྐྱེ་ལ། དེ་ལྟར་དེ་རང་དབང་དུ་རྟོགས་པ་ཡང་མ་ཡིན་ནོ། །ཉམས་སུ་མྱོང་བའི་བག་ཆགས་ཡོད་པ་ཙམ་གྱིས་རྣམ་པར་རྟོག་པ་སྐྱེ་བ་ཡང་མ་ཡིན་གྱི་འོན་ཀྱང་དེ་སད་པ་ལས་ཡིན་ཏེ། དེ་ལྟ་མ་ཡིན་ན། རྟག་ཏུ་སྐྱེ་བར་ཐལ་བའི་ཕྱིར་རོ། །དེའི་དངོས་པོ་ངེས་པའི་
[205a.7]དོན་ཅེས་དོན་དམ་པར་ཡང་དེའི་དངོས་པོ་ངེས་པ་ཞེས་བྱ་བ་ལ་ཇི་ལྟར་དོགས་པ་བསུས་ཏེ་སྦྱར་བ་དེ་བཞིན་དུ། དོན་དང་ལྷན་ཅིག་པའི་སྒྲས་སྦྱར་བར་བྱའོ། །དེ་བཞིན་དུ་དེའི་དངོས་པོ་ངེས་པའི་དོན་ཅན་རྣམས་ཀྱིས་ཞེས་འདོགས་པ་གཞན་དུ་ཡང་རྟོགས་པར་བྱའོ། །འདིར་
[205b]
[205b.1]འདོན་པ་གཉིས་ཀ་ལས་ཡང་གཅིག་པུ་དུ་མ་ལ་སོགས་པ་སྒྲ་རྣམས་ཀྱིས་ཡུལ་དུ་བྱེད་ཅིང་ཞེས་དེ་ཉིད་ཡུལ་དུ་བརྗོད་པར་འགྱུར་རོ། །དེ་ཡང་བློ་ལ་སྣང་བའི་དབང་གིས་ཞེས་བྱ་བས་བློ་ལ་སྣང་བར་གྲུབ་པ་ན། ཕྱི་རོལ་གྱི་དེ་ཁོ་ན་ཉིད་ལ་མི་ལྟོས་པ་ཞེས་བྱ་བ་ནི་ཕྱི་རོལ་དེ་ལྟ་
[205b.2]བུ་ཉིད་བཀག་ན། བློ་ལ་སྣང་བ་ཙམ་དུ་གྲུབ་པ་ཁོ་ནའོ། །དེ་བཞིན་དུ་དོན་གྱི་སྒྲ་ཡང་ལོགས་སུ་འབྲེལ་པར་རྟོགས་པར་བྱའོ། །ཆོས་དང་ཆོས་ཅན་གྱི་དངོས་པོ་བརྗོད་པ་གང་ཡིན་པ་དེ་ལ་ཕྱི་རོལ་གྱི་དེ་ཁོ་ན་ཉིད་ལ་མི་ལྟོས་པར་བློ་ལ་སྣང་བའི་དབང་གིས་ཡུལ་དུ་བྱས་པ་གང་ཡིན་པ་དེ་ཉིད་
[205b.3]ཡིན་ན་ཞེས་བརྗོད་པར་བསྟན་པའི་ཕྱིར་དེ་ཉིད་ལ་ཞེས་སྨོས་སོ། །འདིའི་བ་ལང་ཉིད་ཅེས་བ་ལང་ཉིད་དང་དེ་དང་ལྡན་པའི་ཆོས་ཅན་གྱི་ཐ་སྙད་གང་ཡིན་པ་དེ་ནི་དེ་ཉིད་དུ་ཡིན་པའི་ཕྱིར་དེ་ཆོས་དང་ཆོས་ཅན་གྱི་ངོ་བོ་ཉིད་ཡིན་པས་ན་དེ་ལ་ཐ་སྙད་དུ་འགྱུར་བ་ཡིན་པའི་ཕྱིར་འདིས་ནི་
[205b.4]འདིའི་ཆོས་དང་ཆོས་ཅན་གྱི་རང་བཞིན་ཉིད་བརྗོད་དོ། །དེས་ན་ཆོས་ཀྱི་ཐ་སྙད་དང་ཆོས་ཅན་གྱི་ཐ་སྙད་འདི་ནི་དེ་ཉིད་ལ་ཡིན་ལ་དེ་ཡང་དེ་ཉིད་དང་གཞན་དག་ཏུ་བརྗོད་པར་བྱ་བ་མ་ཡིན་ནོ། །དེ་ཉིད་ནི་དེའི་རང་བཞིན་ཡིན་ལ་དེ་ལས་ཐ་དད་པ་ནི་གཞན་ཉིད་དོ། །གང་ལ་ལྟོས་ནས་
[205b.5]བརྗོད་པར་བྱ་བ་མ་ཡིན་པ་དེ་བཤད་པ་ནི། ཕན་ཚུན་ཞེས་བྱ་བའོ། །ཆོས་ཀྱི་ཐ་སྙད་གང་ཡིན་པ་དེ་ཉིད་ཆོས་ཅན་གྱི་ཐ་སྙད་ཡིན་ལ། དེ་ཉིད་གང་ཡིན་པ་དེ་ཁོ་ན་གཞན་ཡིན་ནོ་ཞེས་འདི་གཉིས་ཕན་ཚུན་དེའི་རང་བཞིན་ནི་མེད་པ་ཁོ་ནའོ། །གཞན་ཉིད་ཀྱང་དེ་བཞིན་ནོ། །གལ་
[205b.6]ཏེ་དེ་ཉིད་ཀྱི་ཆོས་ཡིན་ལ་དེ་ཉིད་ཆོས་ཅན་ཡིན་ན། དེའི་ཚེ་འདི་གཉིས་ཕན་ཚུན་གཅིག་པ་ཉིད་ན་དེ་དག་གི་ཐ་སྙད་ཀྱང་གཅིག་ཉིད་དུ་འགྱུར་ཏེ། ཆོས་ཀྱི་ཐ་སྙད་དང་། ཆོས་ཅན་གྱི་ཐ་སྙད་ཅེས་བྱ་བའི་ཐ་དད་པ་རྣམ་གྲངས་ཙམ་གྱིས་བྱས་པར་ཐལ་བའི་ཕྱིར་རོ། །
[205b.7]ཐ་དད་ན་ཡང་ཐ་སྙད་ཐ་དད་པའི་ཕྱིར་ཆོས་དང་ཆོས་ཅན་དག་ཕན་ཚུན་དེ་ཉིད་དང་གཞན་དག་ཏུ་བརྗོད་པར་བྱ་བ་མ་ཡིན་ན་ཐ་སྙད་ཀྱང་བརྗོད་པར་བྱ་བ་མ་ཡིན་པ་ཉིད་དུ་བརྗོད་དོ། །དེ་ཉིད་ཀྱི་ཕྱིར་ཆོས་ནི་ཞེས་བྱ་བ་ལ་སོགས་པ་སྨོས་སོ། །ཆོས་ནི་ཆོས་བཀར་བའི་གཞིར་གྱུར་
[206a]
[206a.1]པ་འདི་ཞེས་བསྟན་པའི་ཆོས་ཅན་ལས་གཞན་པ་ཡང་མ་ཡིན་ཏེ། དེ་ནི་དེ་ལས་བཀར་བ་བཞིན་པ་ཉིད་ན་དེ་དང་འབྲེལ་བས་དེ་ལས་གཞན་ཉིད་དུ་སྣང་བ་གཞན་པ་ཡང་མ་ཡིན་ནོ། །ཇི་ལྟར་རྟོགས་ཤེ་ན། ཐ་དད་པའི་རང་བཞིན་གྱི་དོན་གཞན་གང་ཡིན་པ་དེ་ནི་མི་
[206a.2]བརྗོད་པའི་ཕྱིར་རོ། །འདིའི་བ་ལང་ཉིད་ཅེས་རྟོགས་པའི་དོན་ལ་ཐ་དད་པའི་རྗོད་པ་ནི་ཅི་ཡང་མེད་དེ། དེ་ལྟར་རྟོགས་བཞིན་པ་ནི་དེ་ལས་གཞན་མ་ཡིན་པའི་ཕྱིར་རོ། །དེས་ན་དེ་ལྟར་གཞན་དུ་བརྗོད་པར་བྱ་བ་མ་ཡིན་ནོ། །དེ་ཉིད་དུ་ཡང་བརྗོད་པར་བྱ་བ་མ་ཡིན་པར་བཤད་པ་ནི། དེ་ཉིད་
[206a.3]ཀྱང་མ་ཡིན་ཏེ་ཞེས་བྱ་བའོ། །དེ་བརྗོད་པ་དག་ཅེས་བྱ་བ་ནི་ཆོས་ཅན་རྗོད་པ་དག་གོ། །ཆོས་ཅན་རྗོད་པ་ནི་རྣམ་པར་གཅོད་པ་གཞན་འཕེན་པ་ཡིན་ཏེ། དེས་ན་གལ་ཏེ་ཆོས་བརྗོད་པ་ཡིན་ན་དེ་ལྟར་འགྱུར་རོ། །དེ་ལྟར་ནི་མི་འཐད་དོ་ཞེས་བཤད་པ་ནི་དེ་ལྟར་ན་ནི་ཞེས་བྱ་བའོ། །བརྗོད་
[206a.4]པར་བྱ་བ་མ་ཡིན་པ་འདི་གང་ལ་ཡིན་ཞེ་ན་བཤད་པ། བརྗོད་པར་བྱ་བ་མ་ཡིན་པ་ཉིད་འདི་ནི་སྒྲའི་དོན་ལ་ཡིན་གྱི། གཞན་དུ་ནི་མ་ཡིན་ནོ། །དངོས་པོ་ལ་ནི་ཆོས་ཅན་ལས་གཞན་མ་ཡིན་ལ། ཆོས་ཅན་ཡང་ཆོས་ལས་གཞན་མ་ཡིན་ནོ། །སྒྲའི་དོན་ལ་ནི་གཞན་དང་གཞན་མ་ཡིན་
[206a.5]པ་དག་མ་ཡིན་ནོ། །ཆོས་དང་ཆོས་ཅན་ཉིད་སྒྲའི་དོན་ལ་དེ་ལྟར་ཡིན་གྱི། སྤྱི་དང་གཞི་མཐུན་པ་དག་ནི་མ་ཡིན་ནོ། །དེ་ཉིད་བསྟན་པ་ནི་དངོས་པོ་ལ་ནི་ཞེས་བྱ་བའོ། །ནིའི་སྒྲ་ནི་གང་གི་ཕྱིར་གྱི་དོན་ཏེ། གང་གི་ཕྱིར་དངོས་པོ་ལ་རང་གི་མཚན་ཉིད་ལས་སྤྱིའི་མཚན་ཉིད་དེ་ཉིད་དང་གཞན་དག་ཏུ་བརྗོད་པར་བྱ་བ་མ་
[206a.6]ཡིན་གྱི་སྒྲའི་དོན་ལ་ནི་མ་ཡིན་ནོ། །འདི་ལྟར་གང་ཞིག་མེད་པ་དེ་ནི་ཡོད་པ་དང་ལྷན་ཅིག་རང་བཞིན་གཅིག་ཏུ་མི་འགྱུར་ལ། དེ་ལས་གཞན་པར་ཡང་མ་ཡིན་ཏེ་མེད་པ་ཉིད་ཀྱི་ཕྱིར་རོ། །འདི་ལྟར་བསམ་པ་ཡིན་ཏེ། སྒྲའི་དོན་ལ་ཆོས་ཀྱི་སྒྲས་རང་བཞིན་དེ་ཉིད་ཁྱད་པར་གཞན་སྤངས་
[206a.7]པའི་སྒོ་ནས་ཐ་དད་པར་བསྟན་པས་ན། དེ་ཉིད་དང་གཞན་དག་ཏུ་བརྗོད་པར་བྱ་བ་མ་ཡིན་པ་ཉིད་དོ། །སྤྱི་རྣམས་ནི་སྒྲའི་དོན་ལ་གཞན་པ་ཉིད་དེ། བ་ལང་དཀར་པོ་ཞེས་བ་ལང་ཉིད་དང་དཀར་པོ་ཉིད་གཉིས་ཐ་དད་པའི་ཕྱིར་རོ། །དེ་ཉིད་ཀྱི་ཕྱིར་གཞི་མཐུན་པ་ལ་ཆོས་
[206b]
[206b.1]རྣམས་ཐ་དད་པ་ཡོད་པ་ཁོ་ནའོ། །ཇི་ལྟར་རྣམ་པར་རྟོག་པས་བཟུང་བའི་སྤྱིའི་རང་བཞིན་ལ་ལྟོས་ནས་དེ་དངོས་སུ་ན་རང་གི་མཚན་ཉིད་དུ་མེད་པའི་ཕྱིར་དངོས་པོ་ལ་བརྗོད་པར་བྱ་བ་མ་ཡིན་པར་བརྗོད་པ་དེ་བཞིན་དུ། ཆོས་དང་ཆོས་ཅན་དག་ཀྱང་བརྗོད་པར་བྱ་བ་མ་ཡིན་པ་ཁོ་
[206b.2]ནའོ། །ཇི་ལྟར་ཀུན་བརྟགས་པའི་རང་བཞིན་ཉམས་སུ་མྱོང་བས་ཆོད་པས་རྣམ་པ་འགའ་ཞིག་གིས་ཕྱིན་ཅི་ལོག་ཏུ་གྱུར་པ་རྣམ་པར་རྟོག་པ་ཡོད་པ་ལ་ལྟོས་ནས་ནི་ཇི་ལྟར་ངེས་པ་བཞིན་ཕྱི་རོལ་ན་ཡོད་པའི་སྤྱི་རྣམས་དང་ཆོས་དང་ཆོས་ཅན་རྣམས་གཞན་མ་ཡིན་པ་ཁོ་
[206b.3]ནའོ། །དེ་ལ་ཡང་འདི་གཉིས་སུ་འགྱུར་ཏེ། ཆོས་ཅན་ཉིད་དུ་རྟོགས་པ་གང་ཡིན་པ་དེ་ཉིད་ཆོས་ཉིད་དུ་རྟོགས་པས་ན་འདིར་གཞན་མ་ཡིན་པ་ཡིན་ལ། སྤྱི་རྣམས་ནི་དངོས་པོའི་རང་བཞིན་གང་ཞིག་བ་ལང་ཞེས་རྟོགས་པ་དེ་ཉིད་དཀར་པོའོ་ཞེས་རྟོགས་པ་མ་ཡིན་གྱི་འོན་ཀྱང་
[206b.4]དེ་ལས་དེ་ཁྱད་པར་གཞན་ཁོ་ནའོ། །དེ་དག་ཡོད་ཀྱང་དེ་ལ་ཐ་དད་པ་མི་བདེན་པའི་ཕྱིར་སྤྱིར། གཞན་མ་ཡིན་ནོ་ཞེས་རྣམ་པར་སྤྲོས་པར་འགྱུར་རོ། །འདི་ལ་ཆོས་དང་ཆོས་ཅན་དག །ཅེས་སྨོས་ཏེ། ཆོས་དང་ཆོས་ཅན་དག་ཐ་དད་པ་མ་ཡིན་ན། དྲུག་པ་ལ་སོགས་
[206b.5]པ་མི་རུང་ཞེས་འཆད་པར་འགྱུར་བ་དང་བསྒྱུར་ནས་འབྲེལ་ཏོ། །ཇི་ལྟར་མི་རུང་ཞེ་ན། ཐ་དད་པ་ལ་མཐོང་བ་ཞེས་སྨོས་སོ། །འདི་སྐད་བརྗོད་པ་ཡིན་ཏེ། ཆོས་དང་ཆོས་ཅན་དག་གཞན་ཉིད་དུ་བརྗོད་པའི་ཕྱིར་བརྗོད་པར་བྱ་བ་མ་ཡིན་པ་ཉིད་ནི་མ་ཡིན་ནོ། །ཆོས་ནི་ཆོས་ཅན་ལས་
[206b.6]གཞན་པ་ཡང་མ་ཡིན་ཏེ་ཞེས་གང་བཤད་པ་དེ་ནི་མ་ཡིན་ཏེ། འདིའི་བ་ལང་ཉིད་ཅེས་བྱ་བའི་དྲུག་པ་མེད་པར་ཐལ་བའི་ཕྱིར་རོ། །སྩོགས་པའི་སྒྲས་ནི་བ་ལང་ལ་བ་ལང་ཉིད་དོ་ཞེས་བྱ་བ་ལ་སོགས་པ་བཟུང་ངོ་། །ཉེས་པ་གཞན་ཡང་བསགས་པའི་ཕྱིར་བཤད་པ། ཆོས་དང་
[206b.7]ཆོས་ཅན་དག་ཐ་དད་པ་མ་ཡིན་ན། མང་པོའི་ཚིག་གི་བྱེ་བྲག་ཆོས་ཅན་གཅིག་ལ་མི་རུང་ངོ་། །ཆོས་ཅན་གཅིག་ལ་གཅིག་གིས་བསྟན་པས་ནི་ཚིག་གི་བྱེ་བྲག་ནི་དེ་ལ་ལྟོས་པ་ཉིད་ཀྱིས་ནི་མང་པོའི་ཚིག་ལ་སོགས་པའི་རང་བཞིན་ནོ། །ཇི་ལྟར་ཆོས་ཅན་གཅིག་ལ་ཚིག་གི་
[207a]
[207a.1]བྱེ་བྲག་མི་རུང་ཞེ་ན། ཆོས་མང་བའི་ཕྱིར་རོ་ཞེས་སྨོས་སོ། །གང་གི་ཚེ་བ་ལང་ཉིད་དང་དངོས་པོ་ཉིད་དང་མི་རྟག་པ་ཉིད་ལ་སོགས་པ་རྣམས་ནི་བ་ལང་གི་ཆོས་ཡིན་ནོ་ཞེས་ཆོས་ཅན་བ་ལང་གཅིག་གི་ཆོས་མང་བའི་ཕྱིར་མང་པོའི་ཚིག་འཇུག་པ་དེའི་ཚེ་ཁྱེད་ཀྱི་
[207a.2]ལྟ་བ་ལ་འདི་མི་རུང་ངོ་། །གལ་ཏེ་ཚིག་གི་བྱེ་བྲག་འདི་ཆོས་ཅན་ལ་ནི་མ་ཡིན་གྱི་འོན་ཀྱང་ཆོས་རྣམས་ཉིད་ལ་ཡིན་པ་དེས་ན་ཇི་ལྟར་ཆོས་ཅན་གཅིག་ལ་མི་རུང་ཞེས་བརྗོད། འོན་ཏེ་ཆོས་ཅན་གཅིག་ལ་ཆོས་མང་པོ་མི་རུང་ངོ་ཞེས་བྱ་བར་བརྗོད་པ་འདོད་པ་ཡིན་ན་དེའི་ཚེ་དེ་
[207a.3]ཉིད་བརྗོད་པར་རིགས་སོ་ཞེ་ན། བརྗོད་པ་འདི་ལ་བསམ་པ་ནི་འདི་ཡིན་ཏེ། གང་གི་ཚེ་ཆོས་དང་ཆོས་ཅན་དག་ཐ་མི་དད་པ་ཡིན་ཏེ། དེའི་ཆོས་མང་བའི་ཕྱིར་མང་པོའི་ཚིག་གི་བྱེ་བྲག་ཏུ་འགྱུར་བ་གང་ཡིན་པ་དེ་ཆོས་ཅན་ཉིད་ལ་ཡིན་པར་ཐལ་བར་འགྱུར་ན། དེ་ལྟར་
[207a.4]ཡང་མ་ཡིན་ཏེ། ཆོས་ཅན་གཅིག་ལ་དེ་འགལ་བའི་ཕྱིར་རོ། །གལ་ཏེ་ཆོས་མང་མོད། དེ་ཙམ་གྱིས་མང་པོའི་ཚིག་གི་བྱེ་བྲག་ཏུ་ཇི་ལྟར་འགྱུར་ཞེ་ན། བཤད་པ། དེ་ལ་ཞེས་བྱ་བ་མང་པོ་ལ་མཐོང་བའོ། །འདི་བཟློག་པའི་ཕྱིར་བཤད་ཟིན་ཏོ་ཞེས་སྨོས་སོ། །ཅི་
[207a.5]ཞིག་བཤད་ཟིན། གལ་ཏེ་ཁྱད་པར་གཞན་སྤོང་བ་དང་། མི་སྤོང་བ་ཡིན་ན་དྲུག་པ་ཙམ་གཞུང་བཙུགས་པར་འགྱུར་གྱི། ཚིག་གི་བྱེ་བྲག་ལ་ཇི་ལྟར་ལན་དུ་འགྱུར་ཞེས་དོགས་པ་ལ། འདིར་ལན་དུ་ཆེ་བའི་བཤད་ཟིན་པ་གང་ཡིན་པ་དེ་སྟོན་པ་ནི། སྒྲ་རྣམས་ལ་ཞེས་
[207a.6]བྱ་བའོ། །འདི་སྐད་བསྟན་པ་ཡིན་ཏེ། ཁྱད་པར་གཞན་སྤོང་བ་དང་མི་སྤོང་བས་ནུས་ཚད་ཀྱི་རྣམ་པ་ཙམ་ཞིག་བསྟན་མོད་ཀྱི། གཅིག་ཏུ་འཆོལ་བའི་རང་བཞིན་གྱི་སྒྲའི་ཐ་སྙད་ནི་སྒྲུབ་པར་ནུས་པས་ན་འདིར་དངོས་པོའི་ཡུལ་ཅན་མ་ཡིན་པ་ཉིད་ལན་དུ་རིགས་པ་ཡིན་ནོ་ཞེས་བྱ་
[207a.7]བའོ། །འདི་ནི་བདག་ཅག་ལ་སྐྱོན་དུ་འགྱུར་བ་མ་ཡིན་གྱི། འོན་ཀྱང་ཕ་རོལ་པོ་རྣམས་ཉིད་ལ་ཡིན་ནོ་ཞེས་བཤད་པ་ནི་གཞན་ཡང་ཞེས་བྱ་བའོ། །རྒོལ་བ་གང་དག་གི་ལྟར་ན་ཚིག་སྟེ་སྒྲའི་དངོས་པོའི་གཞན་གྱི་དབང་ཡིན་གྱི། ལྷུར་གཙོ་ཆེར་བརྗོད་པར་འདོད་པ་ལ་
[207b]
[207b.1]མི་བརྟེན་པ་བརྗོད་པར་འདོད་པའི་གཞན་གྱི་དབང་མ་ཡིན་པ་དེ་དག་ལ་ནི་ཇི་སྐད་དུ་བརྗོད་པའི་བརྩད་པར་རིགས་པ་ཁོ་ནའོ། །འདིར་ཡང་བརྗོད་པར་འདོད་པ་ལ་ལྷུར་མི་བརྟེན་པ་ནི་དངོས་པོའི་དབང་གི་གཏན་ཚིགས་ཡིན་ནོ། །བརྗོད་པར་འདོད་པ་ནི་སྟོན་པར་བྱེད་པའི་འདོད་པ་ཡིན་ལ།
[207b.2]དེ་ཡང་དངོས་པོ་ལས་གཞན་དུ་གྱུར་པར་ཡང་འགྱུར་བའི་ཕྱིར་དངོས་པོའི་དབང་དང་བརྗོད་པར་འདོད་པ་ལ་བརྟེན་པ་ཉིད་འགལ་བ་ཡིན་ནོ། །དེས་ན་དངོས་པོ་ལ་བརྟེན་པར་འགྲུབ་པ་ཉིད་ནི་དངོས་པོ་ལ་བརྟེན་པ་དང་། འགལ་བ་བརྗོད་པར་འདོད་པའི་གཞན་གྱི་དབང་མ་ཡིན་ན་
[207b.3]འགྱུར་བ་ཡིན་ནོ། །སྒྲ་དག་གི་དོན་གྱི་ཡུལ་རྟོགས་པར་དམིགས་པས་ན་གཉིས་སྲིད་པ་ཡིན་ཏེ། དངོས་པོའི་དབང་གིས་རྟོགས་པའམ། སྟོན་པ་པོ་རྣམས་ཀྱིས་དེ་ལྟར་འགོད་པ་ལའོ། །དེས་ན་སྟོན་པ་པོ་རྣམས་ཀྱིས་མ་བཀོད་ན་དངོས་པོ་གཞན་དབང་ཉིད་དོ། །འདི་
[207b.4]ཉིད་བཤད་པའི་ཕྱིར་དངོས་པོ་དང་འབྲེལ་པ་ལ་ཉེས་པ་དེ་འཇུག་ལ། དངོས་པོ་དང་འབྲེལ་པ་བརྗོད་པར་འདོད་པའི་གཞན་གྱི་དབང་མ་ཡིན་པར་གལ་ཏེ་ཞེས་བྱ་བ་ལ་སོགས་པས་སྟོན་ཏོ། །གལ་ཏེ་གཞན་ལ་རབ་ཏུ་གྲགས་པའི་སྒྲ་གཞན་ལ་དགོད་པར་འདོད་པ་ཡིན་ཡང་དགོད་
[207b.5]པར་བྱ་མི་ནུས་ན་དེའི་ཚེ་དངོས་པོ་དང་གཞན་གྱི་དབང་ཉིད་དུ་ངེས་པར་འགྱུར་བ་ཡིན་ནོ། །དེ་བཤད་པ་ནི་སྐྱེས་བུ་རྣམས་ཀྱིས་རབ་ཏུ་གྲགས་པ་ལས་གཞན་མ་གྲགས་པའི་ཡུལ་འགའ་ཞིག་ལ་བྱ་བར་འདོད་དུ་ཟིན་ཀྱང་བྱས་པ་དོན་མེད་པས་ན་བྱ་བར་མི་ནུས་ནའོ། །འདི་ཡང་ཇི་
[207b.6]ལྟར་འགྱུར་ཞེ་ན། དངོས་པོ་དང་འབྲེལ་པའི་ཕྱིར་ཏེ། དེ་ཉིད་དེར་མི་མཐུན་པར་འགྱུར་བ་མ་ཡིན་པའི་ཕྱིར་རོ། །དེའི་ཚེ་ཇི་ལྟར་དྲུག་པ་ལ་སོགས་པར་འགྱུར་ཞེས་བྱ་བའི་ཀླན་ཀ་འདིར་འགྱུར་རོ། །གང་ཞིག་གང་ལ་མཐོང་བ་དེ་གལ་ཏེ། དེ་དང་འབྲེལ་པ་ལས་
[207b.7]དེར་དེ་ལྟར་དམིགས་པ་ཡིན་ན། དེའི་ཚེ་འདི་གཞན་ལ་མི་འགྱུར་བའི་ཕྱིར་ན། ཐ་དད་པ་ལ་མཐོང་བའི་དྲུག་པ་ལ་སོགས་པ་ཐ་དད་པ་མེད་པ་ལ་ཇི་ལྟར་ཞེས་བྱ་བ་ལ་སོགས་པའི་སྐྱོན་འདིར་འགྱུར་བ་ཡིན་ནོ། །འདི་ལྟར་སྐྱེས་བུ་བརྒྱར་འདོད་ཀྱང་དུ་བ་ཆུ་ལ་མེད་པའི་ཕྱིར་
[208a]
[208a.1]མེ་ལ་མཐོང་བའི་དུ་བ་དེ་ནི་དེར་དངོས་པོའི་འབྲེལ་པས་འབྲེལ་པ་ཡིན་པ་དེས་ན་དེ་གཞན་ལ་ཡོད་དོ་ཞེས་སྨྲ་བའི་རྒོལ་བ་ནི་སུན་དབྱུང་བར་འགྱུར་གྱི་དེ་ལྟར་ནི་མ་ཡིན་ནོ། །དེས་ན་གཞན་དག་ལ་ཉེ་བར་འགྱུར་ཡང་འདིར་ཉེས་པ་འདི་ཇི་ལྟར་མེད་པ་དེ་བསྟན་པའི་ཕྱིར། གང་
[208a.2]གི་ཚེ་ཞེས་སྨོས་སོ། གང་གི་ཚེ་ཚིག་གང་ཞིག་སྨྲ་བ་པོས་ཇི་ལྟ་བུར་རྗོད་པར་བྱེད་པ་ཉིད་དུ་ངེས་པར་སྦྱར་བ་དེ་དེ་བཞིན་དུ་རྗོད་བྱེད་ཡིན་ནོ། །དེའི་ཚེ་ཕྱི་རོལ་དོན་ལ་མི་ལྟོས་པར་བརྗོད་པ་ཡིན་ནོ་ཞེས་གང་གི་ཚེ་ཞེས་བྱ་བས་འཕངས་པ་དེའི་ཚེ་ཉེ་བར་བྱས་ཏེ་ཐ་དད་པ་ཉིད་ཀྱིས་སྦྲེལ་བར་
[208a.3]བྱ་སྟེ། དེ་ལྟ་མ་ཡིན་ན་གང་འདི་མཐར་ཕྱིན་པར་མི་འགྱུར་རོ། །འདིས་ནི་ཇི་ལྟར་འདོད་པ་བཞིན་བསྟན་པར་མི་ནུས་པ་དངོས་པོའི་གཞན་གྱི་དབང་རྩ་བར་གྱུར་པ་ཉིད་ཡིན་པར་བསྟན་ནས། བསྟན་པས་ནུས་པ་ཉིད་ཀྱིས་དངོས་པོ་ལ་མི་ལྟོས་པར་བཤད་པ་ཡིན་ནོ། །དེས་
[208a.4]ན་དངོས་པོའི་གཞན་གྱི་དབང་མ་ཡིན་པའི་ཕྱིར་དུ་བ་ལ་སོགས་པ་དང་མི་འདྲ་བ་ཇི་ལྟར་འདོད་པ་བཞིན་དགོད་པར་ནུས་པ་ཉིད་ཀྱིས་དྲུག་པ་ལ་སོགས་པ་ཐ་དད་པ་ལ་གྲགས་པ་ཡང་ཐ་མི་དད་པ་ལ་མི་ལྡོག་གི །འདོད་པའི་གཞན་གྱི་དབང་ཉིད་ཀྱིས་འཇུག་པ་ཁོ་ནའོ། །འདི་ཉིད་
[208a.5]བཤད་པ་ནི། ཐ་དད་པ་ལ་ནི་ཞེས་བྱའོ། །ཐ་དད་པ་ལ་ནི་དྲུག་པའོ། །མང་པོ་ལ་ནི་རྫས་ལ་སོགས་པའོ་ཞེས་བྱ་བ་དེ་ཡང་རང་ཉིད་ཞུགས་པ་ནི་མ་ཡིན་ནོ། །གལ་ཏེ་ཐ་དད་པ་ལ་དྲུག་པ་དང་། མང་པོ་ལ་རྫས་ལ་སོགས་པ་རང་ཉིད་ཞུགས་པ་ཡིན་ན་དེ་ལྟར་ན་ཐ་དད་
[208a.6]པ་ལ་དྲུག་པ་ཞེས་བྱ་བ་རང་ཉིད་ཞུགས་པར་འགྱུར་རོ། །དེ་ལྟ་མ་ཡིན་ན་ཐ་དད་པ་ལ་དྲུག་པ་འཇུག་པར་མཐོང་ནས་ཐ་དད་པ་ལ་ནི་དྲུག་པའི་ཞེས་བྱ་བ་འདི་སྐྱེས་བུ་རྣམས་ཁོ་ནས་བཅུག་པ་ཡིན་ནོ་ཞེས་བྱ་བ་འདི་ལ་རྩོད་པ་མེད་དོ། །དཔེར་ན་སྔོན་པོ་ལ་མངོན་སུམ་རང་ཉིད་
[208a.7]ཞུགས་པ་ལ་སྔོན་པོ་ལ་མངོན་སུམ་འཇུག་གོ་ཞེས་བྱ་བ་ནི་སྐྱེས་བུས་བཅུག་པ་ཉིད་ཡིན་པ་བཞིན་ནོ། །དེས་ན་དོན་འདི་ཡིན་ཏེ། འདི་དག་ཡོད་ན་དེ་ལྟ་བུའི་དོན་རྟོགས་པར་གཅིག་ཏུ་ངེས་པར་འགྱུར་བ་གང་ཡིན་པ་ཐ་དད་པ་དང་མང་པོ་དག་སྐྱེས་བུས་འདོད་པ་ལ་མི་ལྟོས་
[208b]
[208b.1]པར་རང་ཉིད་དྲུག་པ་དང་རྫས་ལ་སོགས་པ་སྒྲིགས་པར་བྱེད་པ་ནི་མ་ཡིན་ནོ། །འོན་ཀྱང་སྐྱེས་བུས་དེ་དག་ཐ་དད་པ་ལ་སོགས་པ་དེ་ལ་དེ་ལྟར་དྲུག་པ་ལ་སོགས་པ་སྦྱོར་བས་ཐ་དད་པ་ལ་ནི་དྲུག་པའོ། །མང་པོ་ལ་ནི་བྱེད་པ་པོ་རྣམས་སོ་ཞེས་དེ་ལྟར་གོ་བར་འགྱུར་རོ། །འདི་
[208b.2]སྐད་བརྗོད་པ་ཡིན་ཏེ། དོན་གྱི་ཁྱད་པར་ལ་སྐྱེས་བུ་རྣམས་ཀྱིས་སྦྱར་བའི་སྒྲ་རྣམས་དམིགས་ནས་གཞན་དག་དེ་ལྟར་རྟོགས་པར་འགྱུར་ཏེ། དེ་ལྟ་བུར་གྱུར་པའི་དོན་རང་ཉིད་དེ་ལྟར་མི་བརྗོད་པའི་ཕྱིར་རོ། །དེས་ན་སྦྱོར་བ་འདི་དག་གི་རང་དབང་ཡིན་པའི་ཕྱིར་དང་དོན་
[208b.3]རྟོགས་པ་ཡང་དེའི་སྦྱོར་བ་ལ་ལྟོས་པ་ཡིན་པའི་ཕྱིར་ན་ཡུལ་གཞན་ལ་ཡང་སྦྱོར་བ་ལས་དོན་དེ་ཇི་ལྟར་མི་རྟོགས། དེ་བཤད་པ་ནི། དེ་བཞིན་དུ་ཞེས་བྱ་བའོ། །ཅིའི་ཕྱིར་དོན་དེ་ལ་ངེས་པ་ཐེ་ཚོམ་མེད་པའི་རྒྱུས་བརྗོད་པར་སྲིད་བཞིན་དུ་དོན་གཞན་ལ་གྲགས་པའི་ཕྱིར་ངེས་
[208b.4]པར་བྱེད་པ་མ་ཡིན་པ་སྦྱོར་ཞེ་ན། ཇི་ལྟར་ཡང་རུང་ཞེས་གསུངས་ཏེ་རྒྱུ་མཚན་འགའ་ཞིག་ལས་སོ། །རྒྱུ་མཚན་དེ་ཡང་ཆོས་ཐ་དད་པ་དང་མི་ལྡན་པ་མི་ཤེས་པའོ། །དེས་ན་དངོས་པོའི་གཞན་དབང་མ་ཡིན་པའི་ཕྱིར་སྦྱོར་བ་ཙམ་གྱི་གཞན་དབང་དུ་གྱུར་པ་རྣམས་རྨོངས་པས་
[208b.5]ཀྱང་སྦྱོར་བ་སྲིད་པ་ན་ངེས་པར་བྱེད་པ་མ་ཡིན་པ་ཉིད་ལྷས་བྱིན་ལ་མཆོད་སྦྱིན་དུ་ཐ་སྙད་བྱེད་པ་ལྟར། དེ་དང་བྲལ་ན་ལྡོག་པའི་ཆོས་སུ་འགྱུར་བ་རྨོངས་པ་འདི་ལ་མཐའ་ཡོད་པ་ཡང་མ་ཡིན་ནོ། །དེས་ན་གྲགས་པའི་སྦྱོར་བ་ངེས་པའི་རྒྱུ་ཡིན་གྱི་གཞན་ནི་མ་ཡིན་ནོ་ཞེས་བརྗོད་
[208b.6]པར་མི་ནུས་ཏེ། རྨོངས་པ་གཏིང་ཚུགས་པ་ལས་ཀྱང་གྲགས་པ་སྲིད་པའི་ཕྱིར་རོ། །དེས་ན་སྒྲ་རྣམས་ནི་འདི་ལྟར་འཇུག་སྲིད་པའི་ཕྱིར་ན་སྒྲའི་སྦྱོར་བ་ཙམ་ལས་ནི་དངོས་པོའི་རང་བཞིན་རྩད་མ་བཅད་པར་ངེས་པར་བྱ་བ་མ་ཡིན་ནོ་ཞེས་བཤད་པ་ནི། དེ་ལ་ནི་ཞེས་སྨོས་
[208b.7]སོ། །དེ་ལྟར་གནས་པ་དེ་ལ་སྒྲ་རྣམས་ཀྱི་འཇུག་པ་སེམས་པ་གང་དུ་མང་པོ་འཇུག་པའི་བྱ་བ་དེ་ལྟ་བུའི་བདག་ཉིད་ཅན་དང་། འཇུག་པ་དེའི་དབང་གིས་དངོས་པོ་རྣམ་པར་འཇོག་པ་གང་དུ་འཇུག་ཅེས་དཔྱད་ནས་པ་ཎི་ནི་ལ་སོགས་པའི་བརྡའི་རྗེས་སུ་འབྲངས་ཏེ། ཐ་
[209a]
[209a.1]དད་པ་ལ་སོགས་པ་དག་ལ་འཇུག་པ་ངེས་པར་བྱས་ནས་དངོས་པོ་རྣམ་པར་འཇོག་པ་ནི་བླུན་པར་སྟོན་པ་འབའ་ཞིག་ཏུ་ཟད་དོ། །དེ་ལ་རེ་ཞིག་འཇུག་པ་སེམས་པ་མི་འཐད་པ་ཉིད་བཤད་པ་ནི་བརྗོད་པར་བྱ་བའི་ཡུལ་ཅན་ལ་སྐྱེས་བུ་ལ་རག་ལས་ཏེ། འཇུག་
[209a.2]པ་རྣམས་ཀྱང་གང་དུ་འཇུག་ཅེས་སེམས་པ་ནི་གང་དུ་སྐྱེས་བུ་དག་གིས་བཅུག་པར་རོ་ཞེས་བྱ་བས་ཕྱིར་བྱ་བར་ནུས་པ་དེས་ན་འདིའི་འཇུག་པ་ཅི་ཞིག་བྱ། དངོས་པོ་རྣམ་པར་འཇོག་པ་བསལ་བའི་ཕྱིར་བཤད་པ། དངོས་པོ་ཡང་དག་པར་མི་སྟོན་པ་ཞེས་དེ་སྐད་བརྗོད་དོ། །དངོས་
[209a.3]པོ་ཡང་དག་པར་མི་སྟོན་པ་གང་ཡིན་པ་དེ་ལས་ཇི་ལྟར་སེམས་དང་ལྡན་པ། དོན་རྣམ་པར་འཇོག་པར་བྱེད། གལ་ཏེ་དངོས་པོ་ཡང་དག་པར་མི་སྟོན་ན་འདི་དག་ལས་ཐ་སྙད་བྱེད་པ་ཇི་ལྟར་མི་ལྡོག །དངོས་པོ་ཡང་དག་པར་མི་སྟོན་པས་ནི་ཐ་སྙད་གཏིང་ཚུགས་པར་འགྱུར་བ་མ་ཡིན་
[209a.4]ཏེ། ཉ་ཕྱིས་ལ་དངུལ་དུ་བརྗོད་པ་བཞིན་ནོ་ཞེ་ན། ཇི་ལྟར་གོམས་པ་བཞིན་ཞེས་སྨོས་ཏེ། འདི་དག་ནི་རྣམ་པར་རྟོག་པ་ཇི་ལྟར་གོམས་པ་བཞིན་ཏེ། གང་གིས་རྣམ་པར་རྟོག་པ་གང་འཇུག་པར་གོམས་པ་དེས་དེ་འཇུག་པར་བྱེད་དོ། །རྣམ་པར་རྟོག་པ་མི་འཆད་པ་ཉིད་ཀྱིས་ནི་འཆད་
[209a.5]པར་འགྱུར་བ་མ་ཡིན་ནོ། །དེ་ལ་ཆོས་དང་ཞེས་བྱ་བ་སྨྲས་ཏེ། ཆོས་དང་ཆོས་ཅན་ལ་སོགས་པ་སྒྲ་དག་དེ་ལྟར་ཞེས་བྱ་བ་གཞན་ལ་རབ་ཏུ་གྲགས་པ་དེ་དག་ཅི་ཞིག་ལྟར་གཞན་དུ་འགྱུར་རོ་ཞེས་རྣམ་པར་གཞག་པར་བྱས་ཀྱི་ཆོས་ཅན་ལ་སོགས་པ་ལ་ལྡོག་པ་དང་། དངོས་པོ་ཐ་དད་
[209a.6]པའི་སྒོ་ནས་རྣམ་པར་གཞག་པ་ནི་མ་ཡིན་ནོ་ཞེས་བྱ་བ་འདི་ག་ལས་ལྡོག་པ་ལ་གྲུབ་པ་དང་། མང་པོ་ལས་གྲུབ་པའི་རྫས་ལ་སོགས་པ་དེ་དག་ནི་དེར་སྐྱེས་བུ་ལ་རག་ལས་པས་ན་ཆོས་དང་ཆོས་ཅན་ལ་སོགས་པ་ལ་དེ་དག་གིས་ཇི་ལྟར་ཡང་རུང་མེད་བཞིན་དུ་རབ་ཏུ་སྦྱར་བ་ཡིན་གྱི།
[209a.7]དངོས་པོ་ཉིད་དེ་ལྟ་བུར་གྱུར་པ་མ་ཡིན་ནོ་ཞེས་ག་ལས་ཤེས། སྩོགས་པའི་སྒྲས་ནི་གང་དུ་ཆོས་དང་ཆོས་ཅན་གྱི་དངོས་པོར་རྟོགས་པ་མེད་པ་དེ་ལྟ་ན་ཡང་གྲགས་པའི་སྒྲ་དོན་ལས་ཕྱིན་ཅི་ལོག་པ་ཡོད་པ་དཔེར་ན་ད་ཏའི་ཞེས་བྱ་བ་ལ་སོགས་པའི་ཚིག་རྣམས་ཏེ་དེ་བཟུང་ངོ་། །དེ་བཟློག་
[209b]
[209b.1]པའི་ཕྱིར་དེ་ལྟ་ན་ཞེས་སྨོས་སོ། །དངོས་པོ་ཐ་དད་པའི་སྒོ་ནས་རྣམ་པར་གཞག་པར་བྱས་ནས་ཐ་སྙད་མི་རུང་ངོ་། །ཇི་ལྟར་ཐ་སྙད་མི་རུང་ཞེ་ན། ཆོས་དང་ཞེས་སྨོས་ཏེ་ཆོས་དང་ཆོས་ཅན་དག་ཐ་དད་པ་ཡིན་ན་སྤྱི་མི་རུང་ངོ་། །གང་གི་ཚེ་འདིའི་བ་ལང་ཉིད་ཅེས་བ་ལང་ཉིད་ཆོས་ཅན་
[209b.2]ལས་གཞན་མ་ཡིན་པ་དེའི་ཚེ། འདི་འདིའི་སྤྱིའི་ངོ་བོར་བརྗོད་པར་བྱ་བ་ཡིན་ན། ཐ་དད་པ་ཡིན་ན་ནི་སྤྱིར་འཐད་པ་མ་ཡིན་ལ། དེ་དག་གི་འབྲེལ་པ་དང་། འདི་བ་ལང་ཞེས་གཞི་མཐུན་པ་དང་། བ་ལང་དཀར་པོ་ཞེས་ཁྱད་པར་དང་ཁྱད་པར་གྱི་གཞིའི་དངོས་པོ་དག་མི་རུང་
[209b.3]ངོ་། །ཐ་སྙད་མཐའ་དག་ཀྱང་སྤྱི་ལ་སོགས་པའི་ཡུལ་ཅན་ཡིན་པའི་ཕྱིར་ན། ཆོས་དང་ཆོས་ཅན་དག་ཐ་དད་ནས། ཐ་སྙད་མི་སྒྲུབ་ཅིང་མི་དད་པ་ལ་འགྱུར་བ་གང་ཡིན་པ་དེ་ཐ་དད་པར་མི་རུང་མོད། ཐ་མི་དད་པ་ལ་འཐད་པར་མ་མཐོང་བར་གོ། །ཇི་ལྟར་ཐ་དད་པ་
[209b.4]ལ་མི་རུང་ཞེ་ན། དེ་ཉིད་ཀྱི་ངོ་བོ་འམ་ཞེས་སྨོས་སོ། །འདི་སྐད་བརྗོད་པ་ཡིན་ཏེ། ཐ་མི་དད་པ་ལ་ཡང་མི་རུང་བ་ཁོ་ནའོ། །འདི་ལ་འཐད་པས་ཐ་དད་པ་ལ་མི་འཐད་པར་ནི་མི་སྨྲའོ། །འོ་ན་གཉི་ག་ལ་མི་རུང་བར་ཇི་ལྟར་འགྱུར་ཞེ་ན། འཆད་པར་འགྱུར་རོ་ཞེས་སྨོས་སོ། །
[209b.5]རྣམ་པ་དེ་ལྟ་བུའི་དངོས་པོ་ལ་ནི་མི་འཐད་པ་འབའ་ཞིག་ཏུ་ནི་མ་ཟད་དོ། །སྒྲ་རྣམས་དངོས་པོ་ཇི་ལྟ་བ་བཞིན་དུ་འཇུག་པ་ཡིན་ན། དངོས་པོ་ཐ་དད་པ་ལ་དེ་ལྟར་རྣམ་པར་གཞག་པར་བྱས་པར་འགྱུར་རོ། །སྒྲ་རྣམས་དངོས་པོ་ཇི་ལྟ་བ་བཞིན་འཇུག་ན་ནི་སྤྱི་ལ་སོགས་པ་ལ་
[209b.6]ཡང་མི་རུང་ངོ་། །དངོས་པོ་ཇི་ལྟ་བ་བཞིན་འཇུག་ན་ནི་དེའི་བློ་མངོན་སུམ་དང་འདྲ་བར་ཐལ་བས་འཁྲུལ་པས་གཞག་པའི་སྤྱི་ལ་སོགས་པ་མེད་པའི་ཕྱིར་རོ་ཞེས་བྱ་བ་འདི་ཡང་འཆད་པར་འགྱུར་རོ། །དེས་ནི་དེ་ལྟར་ཆོས་དང་ཆོས་ཅན་དག་ཐ་མི་དད་པ་དགག་པའི་ཕྱིར་དྲུག་
[209b.7]པ་ལ་སོགས་པ་མི་རུང་བར་སྒྲུབ་པར་བྱེད་པ་ཉིད་ཡིན་པ་དེ་དག་བརྗོད་པར་འདོད་པ་གཞན་དབང་ཡིན་པས་བསལ་ཏེ། ད་ནི་གཏན་ཚིགས་འདི་མ་ངེས་པ་ཉིད་དུ་བཤད་པ་ནི་གལ་ཏེ་སྒྲ་རྣམས་དངོས་པོ་ཇི་ལྟ་བ་བཞིན་འཇུག་པ་ཡིན་ན། དེ་ལྟར་ན་དྲུག་པ་དང་ཚིག་ཐ་དད་པ་ལ་
[210a]
[210a.1]སོགས་པ་ཐ་དད་པའི་སྒྲུབ་བྱེད་དུ་འགྱུར་བ་ཞིག་ན། འདི་ཡང་གལ་ཏེ་ཐམས་ཅད་དུ་མི་འདོད་ན་སྒྲུབ་པར་བྱེད་པ་མ་ཡིན་པ་ཁོ་ནའོ། །དེ་ལྟར་ཁས་བླང་བར་ཡང་མི་ནུས་སོ་ཞེས་སྨྲས་པ་ནི། གང་ཡང་ཞེས་བྱ་བའོ། །དངོས་པོ་ཐ་དད་ན་ཐ་དད་པའི་ཕྱིར་སྒྲ་
[210a.2]འཇུག་པའི་ཁྱད་པར་དངོས་པོས་བྱས་པ་ཁོ་ནར་འདོད་པ་གང་ཡིན་པ་དེའི་བཙུན་མོ་རྣམས་ཞེས་ཐ་དད་རྣམ་པར་གཞག་པའམ། གྲོང་དྲུག་ཅེས་ཐ་མི་དད་པར་རྣམ་པར་གཞག་པ་འདི་ལ་རྒྱུ་ཅི་ཡོད། འདི་སྐད་བརྗོད་པ་ཡིན་ཏེ། སྒྲ་འཇུག་པའི་ཁྱད་པར་དངོས་པོས་བྱས་ནས་
[210a.3]བཙུན་མོ་རྣམས་གྲོང་དྲུག་ཅེས་བྱ་བ་འདི་ལ་དངོས་པོ་ཐ་དད་པ་དང་ཐ་མི་དད་པར་གཞུང་བཙུགས་པར་བརྗོད་དགོས་སོ། །འདི་ལྟར་བུད་མེད་གཅིག་ལ་ཡང་བཙུན་མོ་རྣམས་ཞེས་མང་པོའི་ཚིག་གི་མཐའ་ཅན་གྱིས་བསྟན་པ་ཡིན་ནོ། །དེས་ན་བུད་མེད་གཅིག་ལ་ཐ་དད་པར་མ་
[210a.4]བསྒྲུབས་པར་ནི་སྒྲ་འཇུག་པའི་ཁྱད་པར་འདི་དངོས་པོ་ཐ་དད་པས་བྱས་པར་མི་འཐད་དོ། །དེ་བཞིན་དུ་གྲོང་དྲུག་ཅེས་གྲོང་ཁྱེར་དྲུག་པོ་དག་གཅིག་གི་ཚིག་མཐའ་ཅན་གྱིས་བརྗོད་པར་ཡང་ཐ་མི་དད་པ་མེད་པར་ཇི་ལྟར་འགྱུར། འདིར་ནི་ཟད་པ་མ་ཡིན་གྱི་ནམ་མཁའི་རང་
[210a.5]བཞིན་ཞེས་ཐ་དད་པར་རྣམ་པར་གཞག་པའམ། མཁའ་ཉིད་ཅེས་ཐ་མི་དད་པར་རྣམ་པར་གཞག་པ་ལ་རྒྱུ་ཅི་ཡོད། །ནམ་མཁའི་རང་བཞིན་ཞེས་བྱ་བའི་དྲུག་པས་ནམ་མཁའ་ལས་ཐ་དད་པའི་རང་བཞིན་བསྟན་པ་ཡིན་ན། གང་ཞིག་འདི་ལྟ་བུ་དྲུག་པས་བསྟན་པར་འགྱུར་བ་
[210a.6]ཐ་དད་པ་དེ་ལ་རྒྱུ་ཅི་ཞིག་ཡོད། །རང་བཞིན་དེ་ཡང་མཁའ་ཉིད་ཅེས་བསྟན་པ་ན། མཁའི་སྒྲ་འཇུག་པའི་རྒྱུར་གྱུར་པ་སྤྱི་ཡིན་པར་འགྱུར་ཏེ། ཡོན་ཏན་གང་ཡོད་པས་རྫས་ལ་སྒྲ་དགོད་པར་འགྱུར་བ་དེ་བརྗོད་པ་ན་ཏྭ་དང་ཏལ་གྱི་རྐྱེན་ཉིད་ཅེས་བྱ་བར་འགྱུར་རོ་ཞེས་འཇུག་
[210a.7]པའི་རྒྱུ་མཚན་བརྗོད་པ་ལ་ཉིད་ཀྱི་རྐྱེན་ཁས་བླངས་པའི་ཕྱིར་རོ། །ཁྱད་པར་དག་ལ་སྒྲ་འཇུག་པའི་རྒྱུ་མཚན་ཡང་སྤྱི་ཁོ་ན་ཡིན་ཏེ། དེས་ན་འདིར་མཁའ་ཉིད་ཅེས་བྱ་བ་དུ་མའི་སྤྱི་ཉིད་རྟོགས་པར་བྱ་བ་ཡིན་ནོ། །སྤྱི་ཡང་ཐ་དད་པ་དག་ལ་ཡོད་པར་བརྗོད་པས་ན། གང་ལ་སྡུད་
[210b]
[210b.1]པར་བྱེད་པའི་མཁའ་ཉིད་ཡོད་པར་འགྱུར་བ་ནམ་མཁའ་ཞེས་བྱ་བ་ཐ་དད་པ་གང་ཞིག་ཡོད། །དེས་ན་གང་གིས་ཐ་མི་དད་པར་བརྗོད་པའི་སྒྲ་འདིར་འགྱུར་བ་མཁའ་ཉིད་ཅེས་བྱ་བ་ཐ་མི་དད་པའི་རྒྱུ་མཚན་བརྗོད་དགོས་སོ། །དོན་འདི་ཉིད་ནི་གང་གི་ཚེ་ཞེས་བྱ་བས་འཆད་དོ། །སྩོགས་
[210b.2]པའི་སྒྲའི་དོན་ནི་བྱེ་མ་གཅིག་ལ་ཡང་ཞེས་བྱ་བའོ། །བུད་མེད་དེ་ལ་གང་གིས་ན་བཙུན་མོ་རྣམས་ཞེས་སྒྲ་འཇུག་པའི་ཁྱད་པར་དེ་ལྟ་བུར་འགྱུར་བའི་མང་པོ་ཉིད་ཅི་ཞིག་ཡོད། འདི་ལ་སྨྲས་པ། གལ་ཏེ་ནུས་པ་ཐ་དད་པ་ཡིན་ནོ་ཞེ་ན། ནུས་པ་ཐ་དད་པས་དེ་ལྟ་བུར་འགྱུར་བ་ཡིན་ནོ་
[210b.3]ཞེས་འབྲེལ་ཏོ། །དོགས་པ་འདི་ལ་ད་ནི་ཞེས་བྱ་བའོ། །འདི་སྐད་བརྗོད་པ་ཡིན་ཏེ་གལ་ཏེ་བུད་མེད་ལ་ནུས་པ་ཐ་དད་པས་འདིར་འདི་ཐ་དད་པའི་རྒྱུ་ཡིན་ལ་ཐ་དད་པ་དེ་ལས་ཀྱང་སྒྲ་འཇུག་པ་ཐ་དད་པ་ཡིན་ན། དེའི་ཚེ་ཤིང་ཞེས་གཅིག་གི་ཚིག་ཏུ་མི་འགྱུར་ཏེ། དེ་ལས་ཡང་ནུས་
[210b.4]པའི་དབྱེ་བ་མང་པོ་ཉིད་ཡོད་པའི་ཕྱིར་རོ། །གང་ལ་གཅིག་གི་ཚིག་ཏུ་འགྱུར་བ་ནུས་པ་གཅིག་པ་ནི་འགའ་ཡང་མེད་དོ། །མང་པོ་ཉིད་ཀྱིས་རྟག་ཏུ་མང་པོའི་ཚིག་གྲུབ་བཞིན་དུ་ལེགས་པར་བསྟན་པའི་ཕྱིར་བཙུན་མོ་ཞེས་བྱ་བ་ལ་སོགས་པའི་ཚེག་རྣམས་མང་པོའི་ཚིག་གི་
[210b.5]མཐའ་ཅན་དུ་སྟོན་པའི་འབད་པ་ཡང་དོན་མེད་དོ་ཞེས་སྟོན་པ་ནི། འབད་པ་ཡང་ཞེས་བྱ་བ་ཡིན་ནོ། །གལ་ཏེ་དངོས་པོ་ཐ་དད་པ་ལ་བརྟེན་ནས་ཤིང་ཞེས་བྱ་བ་ལ་སོགས་པ་དག་ལ་གཅིག་གི་ཚིག་ཏུ་འགྱུར་རོ་ཞེ་ན། བཙུན་མོ་རྣམས་ཞེས་བྱ་བ་འདི་ལ་ཡང་འགྱུར་རོ། །འདི་སྐད་བརྗོད་པ་
[210b.6]ཡིན་ཏེ། ཐ་མི་དད་པ་དང་ནུས་པ་ཐ་དད་པ་ཡིན་པ་ན། གལ་ཏེ་ནུས་པ་ཐ་དད་པ་ལ་བརྟེན་ནས་ནི་མང་པོའི་ཚིག་དངོས་པོའི་ཐ་མི་དད་པ་ལ་བརྟེན་ནས་ནི་གཅིག་གི་ཚིག་ཡིན་ནོ། །དེས་ན་འདིར་རེས་འགའ་བའི་བརྗོད་པར་འདོད་པ་ལ་བརྟེན་ནས་དེ་ལྟ་བུའི་དངོས་པོར་འགྱུར་གྱི། དེའི་
[210b.7]ཚེ་རྟག་ཏུ་མང་པོའི་ཚིག་གི་མཐའ་ཅན་དུ་ནི་མི་འགྱུར་རོ། །ཡང་ན་གང་གི་ཤིང་རྣམས་ཞེས་ཚིག་ཐ་དད་པར་མི་འགྱུར་རོ། །དངོས་པོ་ཐ་མི་དད་པ་མང་པོའི་ཚིག་དང་འགལ་ལོ་ཞེ་ན། བཙུན་མོ་རྣམས་ཞེས་བྱ་བ་འདིར་ཡང་མི་འགྱུར་རོ། །གང་གི་ཕྱིར་དེ་ལྟ་ཡིན་ན་
[211a]
[211a.1]དེའི་ཕྱིར་སྒྲའི་ལེགས་པ་ཉིད་ཀྱི་ངེས་པ་དངོས་པོ་ཐ་དད་པ་མེད་ཀྱང་ཚིག་ཐ་དད་པ་འདི་བྱེད་པ་ན་སྒྲ་རྣམས་ཀྱི་སྦྱོར་བ་ལ་དེ་ལྟར་ངེས་པར་བྱེད་པའི་འདོད་པ་རང་དབང་ཅན་དུ་སྟོན་པ་ཡིན་ནོ། །དངོས་པོ་དེ་ལྟ་བུ་མ་ཡིན་པ་གཞན་དུ་གྱུར་པ་ཡིན་ཡང་འདིར་ངེས་པར་བྱ་ཇི་ལྟར་
[211a.2]ནུས། དེའི་བརྡ་ལ་བརྟེན་ནས་དེང་སོང་བ་རྣམས་ཀྱང་ཐ་སྙད་བྱེད་པ་ཡིན་ཏེ། གཞན་དུ་བརྡ་བརྟགས་ན་ནི་གཞན་དུ་ཡང་འགྱུར་རོ། །གལ་ཏེ་གཅིག་ལ་ཡང་མང་པོའི་ཚིག་མཐའ་ཅན་ལེགས་པ་ཉིད་དུ་ངེས་པ་བྱེད་པ་མ་ཡིན་ནམ་ཞེ་ན། བདེན་མོད་ཀྱི་དེ་ལྟ་ན་ཡང་ཐ་དད་པར་སྟོན་པར་བྱེད་པ་ཡང་འགྱུར་བ་ནི་མ་ཡིན་ཏེ། དེ་ཐ་མི་དད་
[211a.3]པར་སྟོན་པ་ཉིད་ནི་བརྗོད་པར་འདོད་པའི་གཞན་དབང་མ་ཡིན་པར་མི་འགྱུར་རོ། །དེས་ནི་དེ་ལྟར་གང་ལས་ཚིག་ཐ་དད་པར་འགྱུར་བ་ནུས་པ་ཐ་དད་པ་ནི་འདིར་ཐ་དད་པའི་རྒྱུ་མཚན་མ་ཡིན་ནོ་ཞེས་བསྒྲུབ་པས་ཚིག་ཐ་མི་དད་པའི་ཡུལ་ལ་ཡང་ཐ་མི་དད་པའི་རྒྱུ་མཚན་མེད་པར་བཤད་པ་རྣམ་
[211a.4]པར་དགྲོལ་བའི་ཕྱིར། གྲོང་ཁྱེར་དྲུག་ཅེས་བྱ་བ་ཡང་ཞེས་སྨོས་སོ། །གཅིག་གི་ཚིག་ཉིད་བསྡུ་བའི་ཁྱད་པར་ལ་བརྟེན་པར་དོགས་པ་སེལ་བ་ནི། གྲོང་ཁྱེར་ཉིད་ཀྱང་ཞེས་བྱ་བའོ། །འདི་སྐད་བརྗོད་པ་ཡིན་ཏེ། བསྡུ་བའི་ཁྱད་པར་ལ་བརྟེན་ནས། གཅིག་གི་ཚིག་
[211a.5]ཡོད་པ་ཡིན་ན། དེ་ཉིད་ནི་གལ་ཏེ་གཅིག་པོར་འགའ་ཞིག་མེད་ན་བརྡ་ཙམ་དུ་འགྱུར་ཏེ། སྒྲ་རྣམས་སྐྱེས་བུའི་འདོད་པའི་གཞན་གྱི་དབང་དུ་འགྱུར་བའི་ཕྱིར་རོ་ཞེས་བྱ་བ་ཁོ་བོ་ཅག་གི་འདོད་པ་ཉིད་གསལ་བར་འགྱུར་རོ། །དངོས་པོ་གཅིག་ཡོད་ན་ནི་སྒྲ་དོན་ཇི་ལྟ་བ་བཞིན་
[211a.6]འཇུག་པར་འགྱུར་བ་ཞིག་ན་དེ་ནི་ཡོད་པ་མ་ཡིན་ནོ། །འདི་ལྟར་རེ་ཞིག་གྲོང་ཁྱེར་ཉིད་འགའ་ཞིག་བརྗོད་པར་བྱ་སྟེ་དེས་ན་གང་ལ་གཅིག་གི་ཚིག་ཏུ་འགྱུར་བ་དེ་དང་འབྲེལ་པ་ཅན་སྡུད་པ་ཞེས་བྱ་བ་གཞན་ཡོད་པར་འགྱུར་བ་ཡིན་ཏེ། དེ་ཉིད་དེ་ལས་རྟོགས་པའི་ཕྱིར་རོ། །
[211a.7]རྟོགས་པ་མ་ཡིན་ན་ནི་གཅིག་ཡན་ལག་མ་ཡིན་ནོ། །གང་གིས་སྡུད་པ་གཅིག་ཏུ་འགྱུར་བ་གྲོང་ཁྱེར་ཞེས་བྱ་བ་ནི་འགའ་ཡང་མེད་དོ། །ཇི་ལྟར་གྲོང་ཁྱེར་ཞེས་བྱ་བ་ཅུང་ཟད་མེད་ཅེ་ན། ཁང་བཟངས་དང་ཞེས་བྱ་བ་ལ་སོགས་པ་སྨོས་སོ། །གྲོང་ཁྱེར་ཉིད་ཀྱང་ཅུང་
[211b]
[211b.1]ཟད་ཀྱང་མེད་ན་ཞེས་བྱ་བས་མེད་པ་ཉིད་བརྗོད་པ་ནི་མ་ཡིན་གྱི། འོན་ཀྱང་རྫས་མ་ཡིན་ལ་འདི་དག་ལ་ལྡན་པ་ཡང་མེད་དོ་ཞེས་བྱ་བ་ཡིན་ནོ། །གྲོང་ཁྱེར་རྣམས་ཀྱི་ལྡན་པ་སྡུད་པ་ཡིན་པར་འགྱུར་ན། དེ་ནི་གྲོང་ཁྱེར་རྣམས་རྫས་ཀྱི་རང་བཞིན་མ་ཡིན་པས་ལྡན་པ་ཡང་མེད་
[211b.2]པའི་ཕྱིར་སྡུད་པ་ག་ལ་ཡོད། ཁང་བཟངས་དང་སྐྱེས་བུ་ལ་སོགས་པ་རིགས་མི་མཐུན་པ་རྣམས་ཚོགས་པ་ལ་གྲོང་ཁྱེར་དུ་རྟོགས་པ་འབྱུང་བ་ཡིན་ཏེ། ཚོགས་པའི་སྔོན་རོལ་དུ་ནི་འདི་དག་ལ་གྲོང་ཁྱེར་རྟོགས་པ་ཡོད་པ་མ་ཡིན་ནོ། །དེ་དག་ཚོགས་པ་དག་གིས་རྫས་སྐྱེས་པ་
[211b.3]ཞེས་བྱ་བར་འགྱུར་ན། རིགས་མི་མཐུན་པ་རྣམས་ནི་རྫས་རྩོམ་པར་སྨྲ་བ་རྣམས་ཀྱིས་ཁས་མི་ལེན་ཏེ། དེས་ན་གང་ལས་གྲོང་ཁྱེར་རྫས་ཡིན་པར་འགྱུར་བ་ཁང་བཟངས་ལ་སོགས་པ་ནི་རྫས་རྩོམ་པར་བྱེད་པ་མ་ཡིན་ནོ། །ད་ནི་འདི་དག་ལ་ལྡན་པ་མེད་དོ་ཞེས་བསྟན་པའི་ཕྱིར་བཤད་
[211b.4]པ། གང་གི་ཕྱིར་ཁང་བཟངས་ནི་སོ་ཕག་ལ་སོགས་པ་ཚོགས་པའི་རང་བཞིན་ཡིན་པ་དེས་ན་ཚོགས་པ་དང་ལྡན་པའི་རང་བཞིན་ལ་ཁང་བཟངས་ཀྱི་བློར་འགྱུར་བ་ཡིན་ནོ། །དེ་ནི་རང་ཉིད་ལྡན་པའི་བདག་ཉིད་ཡིན་པས། གྲོང་ཁྱེར་གྱི་རང་བཞིན་ཁང་བཟངས་ལ་སོགས་པ་
[211b.5]གཞན་དང་མི་ལྡན་པའི་ཡང་ཕྱིར་ལྡན་པ་མེད་དོ་ཞེས་འབྲེལ་ཏོ། །དེའི་བསམ་པ་ནི་འདི་ཡིན་ཏེ། གལ་ཏེ་གྲོང་ཁྱེར་རྫས་ཡིན་ན་ནི་དེའི་ཚེ། དེ་དག་གི་ལྡན་པ་བསྡུས་པ་ཡིན་པར་འགྱུར་ཏེ་ལྡན་པ་ནི་ཡོན་ཏན་ཡིན་པའི་ཕྱིར་དང་། དེ་འང་རྫས་ལ་བརྟེན་པའི་ཕྱིར་རོ། །གང་གི་ཚེ་
[211b.6]གྲོང་ཁྱེར་ཞེས་བྱ་བ་རྫས་མ་ཡིན་གྱི། འོན་ཀྱང་སོ་ཕག་རྣམས་ཀྱི་ཁང་བཟངས་ལ་སོགས་པའི་བདག་ཉིད་དང་། སྐྱེས་བུ་རྣམས་ཀྱི་འདུས་པའི་མཚན་ཉིད་ཀྱི་ལྡན་པ་ཉིད་ཡིན་པ་དེའི་ཚེ། ལྡན་པའི་བདག་ཉིད་ཀྱི་གྲོང་ཁྱེར་རྣམས་ཀྱི་སྡུད་པ་ལྡན་པ་ཡིན་པར་ག་ལ་འགྱུར་ཏེ། ཡོན་
[211b.7]ཏན་རྣམས་ལ་ནི་ཡོན་ཏན་ཡོད་པ་མ་ཡིན་ནོ། །དེ་སྐད་དུ་ཡང་ཡོན་ཏན་ལ་ཡོན་ཏན་བརྟེན་པར་ནི་མ་བཤད་དོ་ཞེས་སྨྲས་པ་ཡིན་ནོ། །བྱ་བའི་བདག་ཉིད་སྡུད་པ་ཡིན་ཡང་ལྡན་པ་མེད་པ་ཉིད་ཀྱིས་བསལ་བ་ལོགས་སུ་བསལ་བར་བྱ་བ་མ་ཡིན་ནོ། །སྡུད་པར་བྱེད་པ་དེ་ནི་སྦྱོར་བར་བྱེད་པ་ཡིན་
[212a]
[212a.1]ན་འདི་དག་ནི་སྦྱོར་བར་མི་ནུས་པའི་ཕྱིར་ཇི་ལྟར་འདི་དག་ལ་སྡུད་པ་ཡོད་པར་འགྱུར། གལ་ཏེ་རྫས་མ་ཡིན་པའི་ཕྱིར་གྲོང་ཁྱེར་རྣམས་ལ་ཡོན་ཏན་གྱི་བདག་ཉིད་ཀྱི་ལྡན་པ་མེད་ན། གྲངས་དྲུག་ཀྱང་མེད་པར་འགྱུར་ཏེ། དེ་ཡང་ཡོན་ཏན་གྱི་བདག་ཉིད་ཡིན་
[212a.2]པའི་ཕྱིར་རོ་ཞེ་ན། དེ་ཁས་བླངས་པའི་ཕྱིར་དེ་ཉིད་ཀྱི་ཕྱིར་ཞེས་སྨོས་སོ། །གྲངས་ཤེས་པ་མེད་མོད། འདི་ནི་འགལ་བ་གཞན་ཡིན་ནོ། །འདི་ནི་གཞན་ལ་ཡང་རང་གི་འདོད་པ་མི་འཐད་པར་བསྟན་པའི་ཕྱིར་བརྗོད་པ་ཡིན་ནོ། །དངོས་སུ་ན་ནི་གྲོང་ཁྱེར་ཞེས་བྱ་བ་གཅིག་པོ་
[212a.3]འགའ་ཡང་ཡོད་པ་མ་ཡིན་ཏེ། འདི་ལྟར་སྐྱེས་བུ་ལ་སོགས་པ་ཉིད་དོན་དམ་པར་ཡོད་པ་ཡིན་ལ་དེ་དག་ཀྱང་རྡུལ་ཕྲ་རབ་ཀྱི་རང་བཞིན་ཡིན་པའི་ཕྱིར་དུ་མའི་བདག་ཉིད་ཅན་ཡིན་ནོ། །རྡུལ་ཕྲ་རབ་གཅིག་གི་རང་བཞིན་གང་ཡིན་པ་དེ་ཡང་ཐ་སྙད་ཀྱི་ཡུལ་དུ་མི་འགྱུར་བའི་ཕྱིར་དངོས་
[212a.4]པོར་ན་འགའ་ལ་ཡང་གཅིག་གི་ཚིག་ཡོད་པ་མ་ཡིན་ནོ། །སྐྱེས་བུ་དང་ཁང་བཟངས་ལ་སོགས་པ་དང་། ས་ལ་སོགས་པ་ལས་མ་གཏོགས་པའི་གྲོང་ཁྱེར་ཞེས་བྱ་བ་ཡང་འགའ་ཡང་སྣང་བ་མེད་པས་དྲུག་པ་འདི་རྣམས་ལ་དངོས་པོ་གཅིག་ཡོད་པར་གསལ་བ་ག་ལ་ཞིག །དེས་ན་གྲོང་ཁྱེར་
[212a.5]དྲུག་ཅེས་བྱ་བའི་སྒྲ་འདི་ནི་དངོས་པོའི་ཡུལ་ཅན་མ་ཡིན་པ་ཁོ་ནའོ། །དེས་ན་དེ་ལྟར་ལྡན་པ་གྲོང་ཁྱེར་ཡིན་ན་ཐ་མི་དད་པ་བློ་འདི་མེད་པར་བསྒྲུབས་ཏེ། ཡོད་པ་ཡང་གྲོང་ཁྱེར་ཉིད་དུ་མི་རུང་བར་བསྟན་པའི་ཕྱིར། གལ་ཏེ་ཞེས་སྨོས་སོ། །གྲོང་ཁྱེར་ནི་ཡོད་པ་ཡིན་ནོ། །གལ་ཏེ་
[212a.6]དེ་ཡང་ཐམས་ཅད་ཡིན་ན་ནི་ཀུན་དགའ་ར་བ་ལ་སོགས་པ་ཡང་གྲོང་ཁྱེར་ཡིན་པར་འགྱུར་རོ། །དེས་ན་དེ་ཡང་ཡིན་ལ་ལྡན་པ་ཡང་ཡིན་པ་ཁང་བཟངས་ཀྱི་མཚན་ཉིད་ཀྱི་ལྡན་པ་དེ་དང་སྐྱེས་བུ་དེ་གཉིས་ཀྱི་ཁྱད་པར་བྱས་པ་གྲོང་ཁྱེར་ཡིན་ཏེ། ཁང་བཟངས་དང་སྐྱེས་བུའི་ཡོད་པ་གྲོང་
[212a.7]ཁྱེར་ཡིན་ནོ་ཞེས་བྱ་བའི་དོན་ཏོ། །དོགས་པ་འདི་ཞེ་ན་ཞེས་བྱ་བས་བསུ་ནས། བཟློག་པའི་ཕྱིར་བོགས་དབྱུང་དུ་མེད་པ་ཞེས་སྨོས་སོ། །འདི་སྐད་བརྗོད་པ་ཡིན་ཏེ། གང་ཞིག་གཞན་ལས་ཐ་དད་པའི་ངོ་བོ་གང་ཡིན་པ་དེ་ནི་ཐ་དད་པར་བྱེད་པའི་ཁྱད་པར་ཉེ་བར་བླངས་པས་དེ་ལས་
[212b]
[212b.1]ཐ་དད་པར་སྟོན་པར་བྱེད་དོ། །དཔེར་ན་བ་ལང་དཀར་པོ་ཁྱེར་ཤོག་ཅེས་བྱ་བ་བཞིན་ནོ། །གང་ལ་ཐ་དད་པ་ཉིད་མེད་པ་དེ་དག་ཁྱད་པར་ལྡན་པས་ཁྱད་པར་བསྟན་པར་བྱ་བ་ཇི་ལྟར་ཡིན། གང་གིས་ཁྱད་པར་ཉེ་བར་བླངས་པས་བསྟན་པར་བྱ་བ་ཀུན་དགའ་ར་བའི་ཡོད་པ་དང་སྐྱེས་བུ་ལ་
[212b.2]སོགས་པའི་ཡོད་པ་ཐ་དད་པས་ནི་མ་ཡིན་པས་ན། དེས་ཁྱད་པར་བྱེད་པའི་ཡོད་པ་གྲོང་ཁྱེར་ཡིན་ནོ་ཞེས་བྱ་བར་མི་འཐད་དོ། །དེས་ན་གྲོང་ཁྱེར་གྱི་བྱེ་བྲག་ཀྱང་མི་རུང་བས་ན་གྲོང་ཁྱེར་དྲུག་ཅེས་བྱ་བར་ག་ལ་འགྱུར། དེ་ཉིད་ཀྱི་ཕྱིར་ཡོད་པ་ཡང་ཞེས་སྟོན་པར་བྱེད་དོ། །ཡོད་པ་
[212b.3]ནི་གཅིག་ཡོད་པའི་ཕྱིར་ན་དབྱེ་བ་མེད་པས་འཕགས་པའི་གྲོང་ཁྱེར་རོ། །ཀླ་ཀློའི་གྲོང་ཁྱེར་རོ་ཞེས་ཁྱད་པར་བླངས་ཀྱང་ཐ་དད་པར་མི་འགྲུབ་པས་གྲོང་ཁྱེར་མང་པོ་ཉིད་གྲུབ་པའི་ཕྱིར་གྲོང་ཁྱེར་རྣམས་ཤེས་པ་མང་པོའི་ཚིག་ཏུ་མི་འགྱུར་རོ། །དེ་ལྟར་ཡོད་པ་ལ་ཁྱད་པར་
[212b.4]མེད་པའི་ཕྱིར་གྲོང་ཁྱེར་ཉིད་ཡིན་པ་བསལ་བ་ན། ཡོད་པ་དང་སྐྱེས་བུ་ལ་སོགས་པ་ལྷན་ཅིག་པ་ཉིད་གྲོང་ཁྱེར་ཡིན་པར་འགྱུར་ཏེ། ཡོད་པ་ལ་ཁྱད་པར་མེད་ཅིང་ཡོད་པ་འཐོབ་པ་དང་སྐྱེས་བུ་དང་ལྡན་པ་ལ་སོགས་པ་ཡང་གྲོང་ཁྱེར་མ་ཡིན་པས་དེ་ལས་ཁྱད་པར་དུ་གྱུར་པ་
[212b.5]འགའ་ཞིག་དེ་ལྟར་བརྗོད་པར་བྱ་བའི་ཕྱིར་སྐྱེས་བུ་ལ་སོགས་པ་དེ་དག་དང་ཡོད་པ་ལྷན་ཅིག་པའི་དངོས་པོ་གྲོང་ཁྱེར་ཡིན་ནོ། །ཁང་བཟངས་ལ་སོགས་པ་དེ་ཉིད་ལྷན་ཅིག་པའི་དངོས་པོ་གྲོང་ཁྱེར་ཡིན་མོད། ཡོད་པས་ཅི་བྱ་ཞེ་ན་དེ་ལྟར་བརྗོད་པར་ནུས་པ་བདེན་མོད་ཀྱི་འོན་
[212b.6]ཀྱང་སྐྱེས་བུ་ལ་སོགས་པས་ཁྱད་པར་དུ་བྱས་པའི་ཡོད་པའི་གྲོང་ཁྱེར་ཡིན་ནོ་ཞེས་བརྗོད་པས་གང་གི་ཚེ་ཁྱད་པར་དང་ཁྱད་པར་ཅན་གྱི་དངོས་པོ་བསལ་བ་དེའི་ཚེ། དེ་གཉིས་ཁྱད་པར་དུ་བྱ་བ་དང་ཁྱད་པར་དུ་བྱེད་པ་ཡིན་པས་ན་ལྡན་བའི་དངོས་པོ་ཙམ་དེ་ལྟར་ཡིན་ནོ་ཞེས་བྱ་བར་
[212b.7]འགྱུར་རོ། །དེར་གྱུར་པ་དེ་གྲོང་ཁྱེར་མ་ཡིན་པ་བསལ་ན་གཞན་ཡང་བཟློག་པ་གྲུབ་པ་ཁོ་ནའོ། །དེས་ན་འདི་བཟློག་པའི་ཕྱིར་ཕན་པར་བྱ་བ་དང་། ཕན་པར་བྱེད་པ་མ་ཡིན་པ་ཞེས་སྨོས་སོ། །འདི་སྐད་བརྗོད་པ་ཡིན་ཏེ། གང་གིས་འདི་ལྟར་འགྱུར་བ་གྲོགས་བྱེད་པ་
[213a]
[213a.1]ཡང་དངོས་པོ་ཅུང་ཟད་གཅིག་ཏུ་བརྗོད་དགོས་སོ། །དེ་ཡང་ལྡན་པ་ལ་སོགས་པའི་མཚན་ཉིད་དུ་ནི་མི་ནུས་ཏེ། དེ་ནི་རྫས་ལ་ཡོད་པ་ཉིད་ཀྱིས་ཁང་བཟངས་ལ་ཡང་མི་འགྲུབ་པའི་ཕྱིར་རོ། །དེ་ལྟ་ན་ཡང་འདི་དངོས་པོ་ཁྱད་པར་ཅན་དུ་འགྱུར་བའི་རང་བཞིན་
[213a.2]འགའ་ཞིག་ཡིན་པས་ཕན་གདགས་བྱ་འདོགས་བྱེད་ཀྱི་དངོས་པོར་འགྱུར་ན་དེ་ནི་འདིར་མེད་དེ། ཡོད་པ་རྟག་པའི་ཕྱིར་རོ། །ཕན་གདགས་བྱ་འདོགས་བྱེད་ཀྱི་དངོས་པོ་ཡིན་ཡང་རྟོགས་པ་གཅིག་གི་རྟེན་དུ་གྱུར་པའི་དངོས་པོ་ཐ་དད་པ་འགའ་ཡང་མ་གྲུབ་པས་ན་སྐྱེས་བུ་
[213a.3]དང་ཁང་བཟངས་དང་ཡོད་པ་ཙམ་འདིར་ལུས་པ་ཡིན་ན། དེ་ལྟར་ན་ཡང་གྲོང་ཁྱེར་ཞེས་གཅིག་གི་ཚིག་འདིར་ག་ལ་འགྱུར་ཞེས་བཤད་པ་ནི། སྐྱེས་བུ་དང་ཞེས་བྱ་བ་ལ་སོགས་པ་ཡིན་ནོ། །འོན་ཏེ་དེ་དག་འགའ་ཞིག་ཏུ་ནུས་པ་ཐ་མི་དད་པ་ལ་བརྟེན་ནས་གཅིག་གི་ཚིག་གཞུང་
[213a.4]འཛུགས་ན་དེའི་ཚེ་ནུས་པ་ཐ་མི་དད་པའི་ཕྱོགས་ལ་དངོས་པོ་བཞིན་དུ་ཐ་དད་པའི་ཕྱིར་མང་པོའི་ཚིག་ཏུ་འགྱུར་རོ། །ཐ་དད་པའི་ཕྱོགས་ལ་ཡང་ནུས་པ་ལ་ཕན་འདོགས་པའི་ནུས་པ་ཡང་ཐ་དད་པར་ཐུག་པ་མེད་དོ། །དེ་དེ་ལས་ཐ་མི་དད་ན་ནི་ཕན་གདགས་པར་བྱ་བའི་ནུས་པ་ཡང་
[213a.5]ཐ་མི་དད་པས་ན་གཅིག་གི་ཚིག་ཏུ་མི་འགྱུར་རོ། །འདི་ཉིད་ནི་གལ་ཏེ་འདི་ལྟ་བུ་རྣམས་ཞེས་བྱ་བ་ནས་གྱི་ནའོ་ཞེས་བྱ་བའི་བར་གྱིས་བཤད་དོ། །ཕྱེད་ཕྱི་མ་བཤད་པའི་ཕྱིར་ནམ་མཁའི་ཞེས་སྨོས་སོ། །དེ་ལྟར་ཐ་དད་པ་དེ་ཡང་སྤྱི་ཐ་མི་དད་པ་ཉིད་དུ་འགྱུར་བ་ཡིན་ན། དེ་ལ་ནི་ཐ་
[213a.6]མི་དད་པ་མི་འཐད་དོ་ཞེས་བཤད་པ་ནི། དེ་ལ་ཞེས་བྱ་བའོ། །གལ་ཏེ་དེ་ལ་སྤྱི་ལ་ཡོད་ན་དེའི་ཚེ་འདི་ཐ་དད་པར་ཡང་འགྱུར་བ་ཞིག་ན་དེ་ནི་མེད་པའི་ཕྱིར་ནམ་མཁའི་རང་བཞིན་ཉིད་ནམ་མཁའི་རང་བཞིན་ཞེས་བརྗོད་པར་འགྱུར་ན་དེ་ཡང་མི་རུང་ངོ་། །དེས་ནི་དེ་ལྟར་ཐ་དད་པའི་རྒྱུ་
[213a.7]མཚན་ཉིད་བསལ་བ་ཡིན་ནོ། །སྤྱིའི་རང་བཞིན་ཉིད་བསལ་བས་ནི་ཐ་མི་དད་པའི་རྒྱུ་མཚན་ཡང་སྤངས་པར་འགྱུར་བས་ངག་གཅིག་ཏུ་ཉེ་བར་བཀོད་དོ། །ནམ་མཁའ་རྣམས་མང་པོ་ཡིན་ན་ནི་དེ་ལ་སྤྱི་ཡོད་པར་འགྱུར་ན། དེ་ནི་མ་ཡིན་པས་ཇི་ལྟར་དེ་ལ་སྤྱི་ཡོད་པར་འགྱུར།
[213b]
[213b.1]གལ་ཏེ་ཁྱབ་པ་ཉིད་ལ་སོགས་པ་སྤྱིའི་ངོ་བོར་འཐད་པ་མ་ཡིན་ནམ། བདག་ལ་སོགས་པ་བསལ་བ་གཞན་ལ་ཡང་ཡོད་པའི་ཕྱིར་རོ། །དེས་ན་དེ་དག་ཉིད་དེ་ལྟར་ཐ་མི་དད་པར་བསྟན་པར་འགྱུར་རོ་ཞེ་ན། མ་ཡིན་ནོ་ཞེས་བཤད་པ་ནི་ཁྱད་པ་ཉིད་ལ་སོགས་པ་ཞེས་བྱ་བའོ། །
[213b.2]དེ་དག་ལ་ནི་མཁའ་ཉིད་ཅེས་བརྗོད་པ་མ་ཡིན་ནོ། །དོན་གཞན་ལ་ནི་ཞེས་སྨོས་ཏེ། གང་ཞིག་ཡོད་པས་གསལ་བ་དེ་ལ་ནམ་མཁའོ་སྙམ་པར་རྟོགས་པར་འགྱུར་བ་དེ་ནི་ནམ་མཁའ་ཉིད་ཅེས་བྱ་བར་བརྗོད་པ་ཡིན་ཏེ། བ་ལང་ཉིད་ཡོད་པས་ཁྲ་བོ་ལ་སོགས་པ་ལ་བ་ལང་ངོ་སྙམ་པ་བཞིན་ནོ། །དེས་ན་
[213b.3]གལ་ཏེ་ཁྱབ་པ་ཉིད་དང་ལྡན་པས་ནམ་མཁའ་ནམ་མཁར་འགྱུར་ན། བདག་ལ་སོགས་པའི་གཞན་དག་ཀྱང་ཁྱབ་པ་ཉིད་དང་ལྡན་པས་ནམ་མཁའི་ངོ་བོ་ཉིད་དུ་ཐལ་བར་འགྱུར་བའི་ཕྱིར་རོ། །དེ་ལྟར་ནི་རིགས་པ་མ་ཡིན་ཏེ། དེ་དག་ནི་དེའི་རང་བཞིན་ཡིན་པ་ཉིད་དུ་མི་རུང་བའི་
[213b.4]ཕྱིར་རོ། །གཞན་ཡང་ཁྱབ་པ་ཉིད་ཅེས་བྱ་བ་ནི་ཐམས་ཅད་ནི་ཡོད་པ་ཉིད་ལ་བྱ་བའོ། །གལ་ཏེ་དེ་མཁའ་ཉིད་ཡིན་ན་ནི་ཁྱབ་པ་ཉིད་ལ་སོགས་པ་རང་བཞིན་མེད་པ་ཉིད་དུ་ཐལ་བར་འགྱུར་རོ་ཞེས་བཤད་པ་ནི། དེ་དག་ཀྱང་ཞེས་བྱ་བ་ཡིན་ནོ། །དཔེར་ན་རྫས་རང་གི་ངོ་བོས་ནི་
[213b.5]བ་ལང་དང་བ་ལང་མ་ཡིན་པར་རྣམ་པར་གཞག་པར་མི་ནུས་ཏེ། བ་ལང་ཉིད་དང་ལྡན་པས་བ་ལང་དུ་རྣམ་པར་འཇོག་པ་དེ་བཞིན་དུ། ནམ་མཁའ་རང་བཞིན་མེད་པ་ཡང་དེ་ལྟ་བུའི་ངོ་བོ་ཁྱད་པར་དུ་གྱུར་པའི་ནམ་མཁའ་དང་ལྡན་པ་ལས་ཡིན་ནོ། །དེ་ཡང་ཁྱད་པར་ཉིད་ལ་སོགས་
[213b.6]པ་ཡིན་པས་དེ་དག་ཀྱང་རང་བཞིན་མེད་པ་ཉིད་དུ་ཐལ་བར་འགྱུར་རོ། །ཁྱད་པར་རྣམས་ཀྱི་ཁྱད་པར་ཉིད་ནི་རང་གི་ངོ་བོར་རྟེན་ཉེ་བར་སྒྱུར་བ་ཉིད་ཡིན་ནོ། །དེས་ན་ནམ་མཁའ་ཇི་ལྟ་བ་བཞིན་ནམ་མཁའ་ཉིད་ཀྱང་དེ་ལྟ་བུའི་རང་བཞིན་དུ་རྟོགས་པར་བྱ་བའི་ཕྱིར་ནི་འདི་རང་བཞིན་
[213b.7]མེད་པ་ཉིད་ཡིན་ནོ། །འོན་ཏེ་ཁྱབ་པ་ཉིད་ལ་སོགས་པ་ནམ་མཁར་རྟོགས་པའི་རྟེན་དུ་གྱུར་པའི་ཁྱད་པར་རྣམས་རང་བཞིན་མེད་པ་མ་ཡིན་ཡང་ནམ་མཁའ་ཉིད་རང་བཞིན་མེད་པ་ཡིན་ན། དེའི་ཚེ་ཧ་ཅང་ཐལ་བར་འགྱུར་ཏེ། བ་ལང་ཉིད་དང་ལྡན་ཡང་ཁྲ་བོ་ལ་སོགས་པ་
[214a]
[214a.1]བ་ལང་མ་ཡིན་པར་འགྱུར་རོ། །དེ་བཤད་པ་ནི་དེ་ཡང་ཞེས་སྨོས་ཏེ། ཡང་གི་སྒྲ་ནི་སྡུད་པའོ། །དེ་ཞེས་བྱ་བས་ནི་ནམ་མཁའ་བཟུང་བ་ཡིན་ནོ། །དེ་ལྟར་ན་ཡང་རྟོགས་པ་མེད་དོ། །རྟོགས་པའི་ཡུལ་མ་ཡིན་པར་ཐལ་བའོ། །གལ་ཏེ་དེ་ལྟ་བུ་མ་ཡིན་
[214a.2]པའི་ཁྱད་པར་དུ་གྱུར་པའི་སྤྱི་དང་ལྡན་ཡང་རང་བཞིན་མེད་པ་ཡིན་ན་ནི་བ་ལང་ཉིད་དང་ལྡན་ཡང་བ་ལང་ལ་བ་ལང་ངོ་ཞེས་རྟོགས་པར་མི་འགྱུར་ཏེ། དེ་དང་ལྡན་ཡང་བ་ལང་མ་ཡིན་པའི་རང་བཞིན་ཉིད་སྲིད་པའི་ཕྱིར་རོ། །གལ་ཏེ་ཁྱད་པར་ཉིད་ལ་སོགས་པ་ནི་ནམ་མཁའ་ལ་
[214a.3]ཡོད་པ་ཉིད་ཡིན་ནོ། །དེ་ཡང་རང་བཞིན་མེད་པ་ཡིན་པའི་ཕྱིར་ནམ་མཁའ་ཉིད་གཞན་དང་ལྡན་ཡང་དེ་དག་རང་བཞིན་མེད་པ་མ་ཡིན་པར་ཇི་ལྟར་འགྱུར་ཞེ་ན་བརྗོད་པ། ནམ་མཁའི་རང་བཞིན་ནི་རང་བཞིན་མེད་པ་ཡིན་ལ། དེའི་ཁྱད་པར་ཡང་ནམ་མཁའ་ཉིད་ཡིན་ནོ། །
[214a.4]ཁྱབ་པར་བྱེད་པ་ཉིད་ནི་ཁྱབ་པར་བྱེད་པ་ཡིན་ནོ། །དེས་ན་ཁྱབ་པར་བྱེད་པ་ཉིད་ཀྱིས་ནི་རང་བཞིན་མེད་པ་མ་ཡིན་ནོ། །དཔེར་ན་རྫས་གཅིག་ཉིད་བ་ལང་ཉིད་ལས་ནི་བ་ལང་ཉིད་དུ་འགྱུར་ཞིང་ཁྲ་བོ་ཉིད་ལས་ནི་ཁྲ་བོ་ཉིད་ཡིན་གྱི། བ་ལང་ཉིད་ཁྲ་བོ་ནི་མ་ཡིན་པ་བཞིན་ནོ། །དེ་བཞིན་
[214a.5]དུ་དངོས་པོ་དྲུག་གི་ཚོགས་ཞེས་བྱ་བ་ལ་སོགས་པའི་སྒྲ་རྣམས་ཀྱང་དངོས་པོ་དྲུག་གི་ངོ་བོ་རྣམས་ཀྱི་ཚོགས་གཞན་མེད་པས་དངོས་པོ་ཇི་ལྟ་བ་བཞིན་དུ་འཇུག་པར་ཇི་ལྟར་འགྱུར། དེ་ནི་སྤྱི་མ་ཡིན་ཏེ། དྲུག་པོ་དག་ལ་སྤྱི་ཡོད་པའི་ཕྱིར་དང་། སྤྱི་ལ་ཡང་སྤྱི་མེད་པའི་ཕྱིར་རོ། །གྲངས་
[214a.6]དང་ལྡན་པ་ཡང་མ་ཡིན་ཏེ། དེ་རྣམས་ལ་ཡོན་ཏན་ཡོད་པའི་ཕྱིར་དང་། དེ་ཡང་ཡོན་ཏན་མ་ཡིན་པའི་ཕྱིར་རོ། །དེ་བཞིན་དུ་གཞན་དག་ཀྱང་རྟོགས་པར་བྱའོ། །དེ་བཤད་པ་ནི། དེ་བཞིན་དུ་ཞེས་བྱ་བ་ལ་སོགས་པའོ། །དེས་ན་དེ་ལྟར་གང་ཕྱིར་དངོས་ཀུན་ཞེས་བྱ་བ་ལ་སོགས་པས་
[214a.7]དེའི་རང་བཞིན་བརྗོད་པར་སྔོན་དུ་འགྲོ་བ་ན། གཞན་སེལ་བའི་ཡུལ་ཅན་ཉིད་ཀྱི་ཚད་མ་བརྗོད་དེ། དེ་ལ་འང་གཞན་ལས་ལྡོག་པ་དང་ཞེས་བྱ་བ་ལ་སོགས་པས་སློབ་དཔོན་གྱི་སེམས་གཞན་དུ་བརྗོད་པར་དོགས་པ་བརྗོད་པར་རྣམ་པར་གཞག་པ་དྲུངས་ཕྱུང་བ་ཉིད་ཀྱིས་ལན་བཏབ་
[214b]
[214b.1]ནས། ད་ནི་གཞན་སེལ་བའི་སྒོ་ནས་ཡུལ་དུ་བྱེད་པའི་རྣམ་པར་རྟོག་པ་རྣམས་ཀྱི་བྱེད་པ་གང་ཡིན་པ་དེའི་སྐབས་དབྱེ་བའི་ཕྱིར་ད་ནི་ཞེས་བྱ་བ་ལ་སོགས་པ་སྤངས་ཟིན་པའི་རྒོལ་བ་ཉིད་བཀོད་དོ། །ནམ་མཁའི་ཞེས་བྱ་བས་བཤད་ཟིན་པའི་ལན་ཉིད་འདེབས་སོ། །འདི་སྐད་བཤད་པ་
[214b.2]ཡིན་ཏེ། གལ་ཏེ་ཡང་མཁའ་ལས་ཐ་དད་པའི་མཁའ་ཉིད་ཅེས་བྱ་བ་ཡོད་པ་མ་ཡིན་པ་དེ་ལྟ་ན་ཡང་མཁའ་ཞེས་མི་བརྗོད་ཀྱི། འོན་ཀྱང་མཁའ་ཉིད་ཅེས་བརྗོད་པ་གང་ཡིན་པ་དེ་ནི་ནམ་མཁའི་དོན་གཞན་ལས་ལོག་པའི་ངོ་བོ་ངེས་པར་བཟུང་བས་ཁྱད་པར་གཞན་སྤངས་པ་བྱས་
[214b.3]ཏེ། ནམ་མཁའ་ཙམ་གྱི་ངོ་བོ་ཁྱད་པར་གཞན་སྤངས་ནས་ཤེས་པར་འདོད་པ་ལ། མཁའ་ཉིད་ཅེས་བརྗོད་པ་ཡིན་ནོ། །དེ་དེ་ལྟར་དེའི་ངོ་བོ་བརྗོད་པ་བཤད་པ་ཐོབ་ནས། གླགས་རྙེད་དེ་རྩོད་པ་ནི་ཐམས་ཅད་ལས་ཞེས་བྱའོ། །འདི་སྐད་བརྗོད་པ་ཡིན་ཏེ། སྒྲོ་འདོགས་རྣམ་པར་
[214b.4]གཅོད་པར་བྱེད་པ་ཉིད་ཀྱིས་ཐ་དད་པའི་ཡུལ་ཅན་གྱི་དངོས་པོར་འགྱུར་བ་ངོ་བོ་རྟོགས་པར་བྱེད་པར་ཡང་རྣམ་པར་གཅོད་པའི་སྒོ་ཁོ་ནས་བྱེད་པའི་ཕྱིར་འདི་སྔོན་པོ་མ་ཡིན་ནོ་ཞེས་བརྗོད་པ་དང་མཚུངས་པར་འགྱུར་བའི་སྒྲ་རྣམས་ཀྱང་གལ་ཏེ་དངོས་པོ་རྗོད་པར་བྱེད་ན་ཆ་མེད་པའི་དོན་
[214b.5]ཐམས་ཅད་ལས་ལོག་པ་ཉིད་ཤེས་པས་འཛིན་པར་འགྱུར་ཏེ། མིག་ལ་སོགས་པ་བཞིན་ནོ། །དེས་ན་བསྒྲུབ་པའི་ཡུལ་ཅན་ཁོ་ནར་འགྱུར་བས་གཞན་སེལ་བ་ལ་བརྟེན་པའི་སྒྲ་དང་ཚད་མ་གཞན་འཇུག་པ་ཉིད་ཉམས་པར་འགྱུར་རོ། །དེས་ན་དངོས་པོའི་ཡུལ་ཅན་
[214b.6]ཡིན་ན་ཐམས་ཅད་ལས་ལོག་པ་བརྗོད་པར་འགྱུར་ན་དེ་ནི་མི་སྲིད་དོ། །དེ་ཉིད་ཀྱི་ཕྱིར་གཏན་ཚིགས་བརྗོད་པའི་བསམ་པས་ཐམས་ཅད་ལས་ལོག་པ་ཉིད་ཀྱིས་རང་གི་ངོ་བོ་ཁྱད་པར་དུ་བྱས་པའོ། །གང་གི་ཕྱིར་ཐམས་ཅད་ལས་ལོག་པ་དེའི་ཕྱིར། རང་གི་ངོ་བོ་བརྗོད་
[214b.7]པར་མི་སྲིད་དེ་བརྗོད་ན་དེ་ལྟ་བུར་གྱུར་པ་ཉིད་དུ་བརྗོད་པར་ཐལ་བའི་ཕྱིར་ན། རང་གི་ངོ་བོ་རིག་པའི་འབྲས་བུ་ཅན་ཉིད་དུ་འཐད་པས་ཐ་དད་པར་བྱེད་པ་ཉིད་མ་ཡིན་པར་འགྱུར་བའི་ཕྱིར་རོ། །འདི་དགག་པའི་ཕྱིར། སློབ་དཔོན་གྱིས་ངོ་བོ་ཉིད་ཅེས་གསུངས་སོ། །གང་གིས་
[215a]
[215a.1]ན་དེར་སྣང་བའི་བློ་སྐྱེད་པར་བྱེད་པས་དེ་ཉིད་བརྗོད་པར་བྱ་བར་འགྱུར་བ་ངོ་བོ་དེ་ཉིད་དེ། ཐམས་ཅད་ལས་ལོག་པའི་ངོ་བོ་གང་ཡིན་པ་དེ་ཉིད་དེ། སྒྲས་བློ་ལ་འཇོག་པར་ནི་མ་ཡིན་ནོ། །དེ་ཉིད་འཇོག་པ་མ་ཡིན་ནོ་ཞེས་སྨྲས་པས་དེ་ནི་མི་འཇོག་གི་གཞན་ནི་འཇོག་གོ་
[215a.2]ཞེས་བརྗོད་པ་ཡིན་ན། དེ་ལ་རེ་ཞིག་དེ་མི་འཇོག་གོ་ཞེས་བྱ་བ་དེ་གཞུང་གཟུགས་པའི་ཕྱིར་དབང་པོས་མི་སོད་པ་ཉིད་མ་ཡིན་པར་ཐལ་བར་འགྱུར་བའི་ཕྱིར་རོ་ཞེས་བཤད་དོ། །གལ་ཏེ་དངོས་པོ་དེའི་ངོ་བོ་ཉིད་གང་ཡིན་པ་དེ་ཉིད་འདིར་བརྗོད་པས་འཇོག་པར་འགྱུར་ན་ནི་དབང་
[215a.3]པོའི་མངོན་སུམ་དང་འདྲ་བར་གསལ་བར་འགྱུར་རོ། །སྒྲས་དེའི་ངོ་བོ་འཇོག་པ་ནི་དོན་གྱི་རྣམ་པ་ཅན་གྱི་བློ་སྐྱེད་པ་ཡིན་ཏེ། དེའི་བློ་ཉིད་ཀྱི་དོན་དམ་པ་ནི་དེའི་རྣམ་པ་ཙམ་ཡིན་པའི་ཕྱིར་རོ། །སྒྲས་ཀྱང་དོན་གསལ་བར་བྱེད་པ་ན། དོན་གྱི་རྣམ་པ་ཅན་གྱི་རྣམ་པར་ཤེས་པ་ཉིད་
[215a.4]བསྐྱེད་པར་བྱ་བ་ཡིན་ནོ་ཞེས་བྱ་བ་ནི་རྣམ་པར་གནས་པའི་གྲུབ་པའི་མཐའ་ལ་ལྟོས་ནས་བཤད་པ་ཡིན་ནོ། །འདི་མངོན་པར་ཞེན་པའི་ཡུལ་ནི་མ་ཡིན་ནོ། །རྣམ་པ་མེད་པའི་དོན་གྱི་ཡུལ་ཅན་གྱི་རིག་པ་བྱེད་ན་ཡང་དོན་རིག་པའི་རང་གི་ངོ་བོ་ཇི་ལྟ་བུར་གྱུར་པ་ཉིད་དུ་རྟོགས་པ་
[215a.5]དེ་ལྟ་བུའི་རང་བཞིན་ཉིད་དོན་གྱི་ངོ་བོ་དེ་ལྟར་རིག་པར་བྱེད་པས། སྒྲ་དོན་རིག་པ་བྱེད་པ་ཁོ་ནར་འགྱུར་བ་ཁོ་ནའོ། །དཔེར་ན་རྫ་མཁན་བུམ་པ་མངོན་པར་སྒྲུབ་པའམ། སོ་ཕག་བསྐྱེད་པ་ན། བུམ་པའི་རང་གི་ངོ་བོ་ཇི་ལྟ་བུར་གྱུར་པ་ཉིད་དུ། དམིགས་པ་དེ་ལྟ་བུ་
[215a.6]ཉིད་བྱེད་པ་གང་གི་དེ་མ་ཐག་ཏུ་དམིགས་པའི་བྱེད་པ་དེས་འདིས་བུམ་པ་བྱས་སོ་ཞེས་བརྗོད་ལ། ཇི་ལྟ་བུར་གྱུར་པས་གཞན་དུ་གྱུར་པ་དེ་ནི། གཞན་བྱས་པར་འགྱུར་བ་ཡིན་གྱི། རྫ་མཁན་ཡིན་ཞེས་ཏེ་དེ་ལ་འགྱུར་བ་གང་ཡིན་པ་དེ་ཐམས་ཅད་རྫ་མ་ཉིད་དུ་འགྱུར་
[215a.7]བ་ནི་མ་ཡིན་ནོ། །དེ་བཞིན་དུ་རྣམ་པར་རྟོག་པ་དོན་རྟོགས་པར་བྱེད་པའམ། སྒྲ་དོན་རྟོགས་པའི་རྒྱུ་ཡིན་ནོ་ཞེས་ཁས་བླངས་པར་གྱུར་ཀྱང་དོན་རྟོགས་པའི་རང་བཞིན་དཔྱད་པར་བྱ་བ་ཡིན་ནོ། །གལ་ཏེ་འདི་དོན་རྟོགས་པ་ཇི་ལྟ་བུ་ཡིན་པར་དམིགས་པ་དེ་ལྟ་བུ་ཉིད་ཡིན་ན་ནི་དེས་ན་འདི་དོན་
[215b]
[215b.1]རྟོགས་པ་དང་སྒྲ་དོན་རྟོགས་པའི་རྒྱུ་ཡིན་པ་ཉིད་དོ། །དབང་པོ་བྱེད་པ་དང་ལྡན་པས་དོན་རིག་པ་ན་དོན་རྟོགས་པ་དམིགས་པ་ཡིན་ནོ། །གང་ལ་དོན་གསལ་བར་གྱུར་པའི་ངོ་བོ་དེ་ཉིད་དོན་རིག་པ་ཡིན་ལ། མངོན་སུམ་ལ་དོན་གསལ་བ་ནི་རྩོད་པ་མེད་དོ། །དེས་ན་གལ་ཏེ་རྣམ་པར་རྟོག་
[215b.2]པ་ཡང་དོན་རིག་པ་ཡིན་ན་ནི་འདིར་ཡང་དོན་གསལ་བར་འགྱུར་བས་སྒྲ་དང་རྗེས་སུ་དཔག་པའི་ཡུལ་དབང་པོ་ལས་འདས་པར་ཇི་ལྟར་འགྱུར། དབང་པོ་ལས་མ་སྐྱེས་པའི་ཤེས་པ་ཡིན་པའི་ཕྱིར་རོ་ཞེ་ན། གསལ་བཞིན་པའི་དངོས་པོ་ནི་དབང་པོ་ལས་མ་འདས་པའམ། མངོན་སུམ་
[215b.3]དུ་བརྗོད་པ་ཡིན་གྱི། དབང་པོ་འབྲེལ་པ་ཙམ་གྱིས་ནི་མ་ཡིན་ནོ། །འོན་ཀྱང་འདིའི་དེ་ལྟ་བུར་གྱུར་པ་ཉིད་ནི་དབང་པོ་དང་འབྲེལ་པ་ལས་ཡིན་པའི་ཕྱིར་དབང་པོ་ལས་མ་འདས་པར་བརྗོད་པ་ཡིན་ནོ། །དེས་ན་རིག་པས་ཡུལ་དུ་བྱས་པའི་དངོས་པོ་ཉིད་གསལ་བ་དང་། མངོན་དུ་བྱས་པར་
[215b.4]འགྱུར་བ་ཡིན་ནོ། །དེས་ན་གལ་ཏེ་རྣམ་པར་རྟོག་པའི་རིག་པ་ཞུགས་ཀྱང་ཡུལ་གསལ་བར་འགྱུར་བའམ་མངོན་སུམ་དུ་བྱས་པ་མ་ཡིན་ན། འོ་ན་རིག་པས་ཡུལ་དུ་བྱས་ཀྱང་མི་འགྱུར་བ་གང་ཡིན་པ་གསལ་བར་འགྱུར་བའམ། མངོན་སུམ་དུ་བྱས་པ་གཞན་གང་
[215b.5]ཞིག་ཡིན། དེས་ན་དོན་གྱི་ཡུལ་ཅན་ཉིད་ཡིན་ན་དོན་གསལ་བ་ལ་འཁྲུལ་པ་མེད་པའི་ཕྱིར་དོན་གྱི་ཡུལ་ཅན་གྱི་རྟོགས་པ་ཐམས་ཅད་ནི་མངོན་སུམ་ཉིད་དང་། སྒྲ་ལ་སོགས་པ་ཡང་དབང་པོ་དང་མཚུངས་པར་འགྱུར་རོ། །གལ་ཏེ་ངོ་བོ་དེ་བློ་ལ་མི་འཇོག་ན། འོ་ན་གང་འཇོག་
[215b.6]ཅེ་ན། འདི་དེ་ལྟ་བུ་ཞེས་སྨོས་སོ། །སྔ་མས་ནི་དོན་གྱི་རང་བཞིན་འཇོག་པ་བཀག་ལ། འདིས་ནི་རང་བཞིན་གཞན་འཇོག་པར་བཤད་པ་ཡིན་ནོ། །སྨྲ་བ་པོ་འདི་སྐབས་སུ་བབ་པའི་ངོ་བོ་གང་ཡིན་པ་དེ་ལྟ་བུ་དེ་ཤེས་པར་བྱའོ་སྙམ་ནས་ཏེ། རྟོགས་པའི་ཡུལ་དུ་བྱའོ་སྙམ་དུ་
[215b.7]བསམས་ཀྱང་རྣམ་པར་རྟོག་པའི་གཟུགས་བརྙན་གཏོད་པར་བྱེད་པ་འབའ་ཞིག་ཏུ་ཟད་དོ། །དབང་པོའི་ཤེས་པས་རྟོགས་པའི་དོན་ནི་འདིའི་གཟུགས་བརྙན་ཇི་ལྟ་བུར་གྱུར་པ་དེ་ལྟ་བུ་ཉིད་དོ། །བདག་ཉིད་ཀྱི་རྣམ་པ་དེ་དང་འདྲ་བ་ཡིན་ཏེ། མེ་ལོང་གི་གཟུགས་བརྙན་
[216a]
[216a.1]བཞིན་ནོ། །རྣམ་པ་དེ་ལྟ་བུའི་རྣམ་པ་མེད་པར་དེ་རིག་པ་མེད་པའི་ཕྱིར་རོ། །རྣམ་པར་རྟོག་པས་ནི་དོན་ཇི་ལྟར་འགྱུར་བ་དེ་ལྟར་རིག་པ་མ་ཡིན་ཏེ། དབང་པོས་མི་སོད་པ་མ་ཡིན་པར་ཐལ་བའི་ཕྱིར་རོ། །དེས་ན་འདི་ནི་གཞན་དུ་འགྱུར་
[216a.2]བ་རིག་པའི་རང་བཞིན་ཉིད་དོ། །ཇི་ལྟ་བ་བཞིན་དུ་རིག་པའམ། དེ་ལྟ་བུར་གྱུར་པའི་རྣམ་པ་དང་ལྡན་པ་ཉིད་ནི་དེ་རིག་པར་གྲུབ་པར་ངེས་པ་ཡིན་པའི་ཕྱིར་ན་རྣམ་པར་རྟོག་པའི་སྣང་བའི་གཟུགས་བརྙན་དོན་དང་མི་མཐུན་པར་བརྗོད་དོ། །དེས་ན་དོན་འདིས་ན། རྣམ་པར་
[216a.3]རྟོག་པས་གཟུགས་བརྙན་ཁྱད་པར་དུ་བྱས་སོ། །གལ་ཏེ་འདིར་སྔོན་པོ་ལ་སོགས་པའི་རང་བཞིན་དུ་རྟོགས་པ་དེ་ལྟ་ན་ཡང་ཕྱི་རོལ་གྱི་སྔོན་པོ་ལ་སོགས་པའི་རང་བཞིན་ཇི་ལྟ་བུར་གྱུར་པ་དེ་ལྟ་བུ་ཉིད་འདི་ལ་མི་སྣང་སྟེ། མངོན་སུམ་ཉིད་དུ་ཐལ་བའི་ཕྱིར་རོ། །དེས་ན་རྣམ་པར་
[216a.4]རྟོག་པའི་རྣམ་པ་ནི་ཕྱི་རོལ་གྱི་སྔོན་པོ་དང་མི་འདྲ་བ་ཡིན་ན །འདི་ལ་མི་འདྲ་བ་ཅི་ཞིག་ཡོད་ཅེ་ན། ཅི་མི་འདྲ་བ་ནི་མི་ཤེས་ཏེ། གང་དག་མིག་བྱེད་པ་མེད་པ་ན་ཡང་རྣམ་པར་རྟོག་པས་གཟུགས་རྟོགས་པ་ན་བདག་གིས་གཟུགས་མ་མཐོང་ཞེས་བྱ་བར་འགྱུར་བའི་རྟོགས་པ་པོ་ཉིད་
[216a.5]ལ་དྲི་བར་བྱ་བ་ཡིན་ནོ། །དེས་ན་གཟུགས་རྣམ་པར་བཏགས་པ་ལ་ཡང་མ་མཐོང་བར་རྟོགས་པར་འགྱུར་བ་གང་ཡིན་པ་རིག་པའི་ཡུལ་ལས་གཞན་པའི་དམིགས་པ་ཉིད་ཅི་ཞིག་ཡིན། དེའི་ཕྱིར་དེས་ན་མཐོང་བའི་ཡུལ་དུ་གྱུར་པའི་རང་བཞིན་གང་ཡིན་པ་དེ་ནི་འདིར་མི་སྣང་གི་
[216a.6]འོན་ཀྱང་གཞན་ཉིད་སྣང་བ་ཡིན་པའི་ཕྱིར་དེ་ལྟར་རྟོགས་པ་ཡིན་ཏེ། དེས་ན་མི་འདྲ་བ་ནི་དེ་ཉིད་ཡིན་ནོ། །བློ་གྲོས་བླུན་པོ་གང་དག་འདིར་ཡང་རང་གི་ངོ་བོ་མི་འདྲ་བར་བསྟན་པར་མ་ནུས་པས་དོན་བྱ་བར་མི་ནུས་པར་བྱས་པས་མི་མཐུན་པར་སྟོན་པ་དེ་དག་ནི་ཁོ་བོས་གཞན་དུ་རྒྱས་
[216a.7]པར་བཀག་ཟིན་ཏོ། །བརྟགས་པའི་དོན་ཀྱང་རིག་བྱའི་ཕྱིར། །གཞན་རྟོགས་མེད་ཕྱིར་འབྲལ་དབྱེར་མེད། །དེ་ལྟར་ལས་བྱེད་མེད་པ་ལས། །བཟློག་ན་སྒྲོ་འདོགས་ལ་ཤེས་ཉིད། །ཅེས་བཤད་ཟིན་ཏོ། །གལ་ཏེ་དོན་གྱི་རྣམ་པ་དང་མི་འདྲ་བའི་གཟུགས་བརྙན་ཉིད། རྣམ་པར་
[216b]
[216b.1]རྟོག་པའི་གཟུགས་བརྙན་ཡིན་ན། དུང་སེར་པོར་ཤེས་པ་ལ་སོགས་པ་དག་གི་རྣམ་པ་ཡང་རྣམ་པར་རྟོག་པའི་གཟུགས་བརྙན་དུ་འགྱུར་ཏེ། དཀར་པོ་ལ་སོགས་པ་དང་མི་འདྲ་བའི་གཟུགས་བརྙན་ཡིན་པའི་ཕྱིར་རོ། །འདི་དག་རྣམ་པར་རྟོག་པའི་རྣམ་པ་ཡང་མ་ཡིན་ཏེ། དེའི་
[216b.2]ཤེས་པ་རྣམ་པར་རྟོག་པ་མེད་པའི་ཕྱིར་རོ། །དེས་ན་དོན་དང་མི་འདྲ་བའི་གཟུགས་བརྙན་ཉིད་ནི། རྣམ་པར་རྟོག་པའི་གཟུགས་བརྙན་མ་ཡིན་ནོ། །བརྗོད་པ་སེར་པོ་ལ་སོགས་པའི་རྣམ་པ་དག་ནི་དེའི་ཡུལ་དང་དུས་ངེས་པའི་དོན་དང་མི་འདྲ་བ་ཉིད་ཀྱིས་མི་འདྲ་བར་བརྗོད་དེ། དེའི་
[216b.3]ཡུལ་གྱི་རྣམ་པར་བཅད་པར་གསལ་བའི་དུང་སེར་པོ་དེ་ན་མེད་པའི་ཕྱིར་ཏེ། དེ་ནི་དཀར་པོའི་ངོ་བོ་ཡིན་པའི་ཕྱིར་རོ། །དེ་ལྟར་དོན་དེ་གཏན་མི་སྲིད་པའི་ཕྱིར་ནི་མ་ཡིན་ནོ། །སེར་པོའི་རྣམ་པའི་དུང་གཏན་མི་སྲིད་པ་ནི་མ་ཡིན་ཏེ། འོན་ཀྱང་དེ་ན་མེད་པའི་ཕྱིར་དུ་དུང་སེར་པོར་
[216b.4]རྟོགས་པ་དངོས་པོའི་ཡུལ་ཅན་མ་ཡིན་པ་ཉིད་དོ། །རྣམ་པར་རྟོག་པ་ལ་ཇི་ལྟར་སྣང་བའི་རྣམ་པ་དེ་དང་འདྲ་བ་ནི། ཡེ་མི་སྲིད་པ་ཁོ་ན་སྟེ། དེས་ན་རྣམ་པར་རྟོག་པའི་རྣམ་པ་དངོས་པོ་དང་མི་མཐུན་པ་ཡིན་ནོ། །དེ་ཉིད་ཀྱི་ཕྱིར་རྣམ་པར་རྟོག་པ་དངོས་པོ་སྣང་བ་
[216b.5]མ་ཡིན་པས་མངོན་སུམ་ལྟར་སྣང་བར་བཤད་དེ། དངོས་པོ་ཡོད་ཀྱང་རྣམ་པར་རྟོག་པ་དེ་ལྟར་རྟོག་པ་མེད་པའི་ཕྱིར་ལ། ཟླ་བ་གཉིས་ལ་སོགས་པ་ནི་དངོས་པོ་རྟོག་པ་སྲིད་ཀྱང་དེ་ན་རྣམ་པ་དེ་ལྟ་བུ་མེད་པའི་ཕྱིར་རོ། །རྣམ་རྟོག་དངོས་མི་སྣང་ཕྱིར་དང་། །ཉེ་བར་བསླད་པ་སླུ་
[216b.6]བའི་ཕྱིར། །མངོན་སུམ་ལྟར་སྣང་ཞེས་བཤད་དོ། །དེ་ལྟ་བུའི་དངོས་པོ་ཡེ་མི་སྲིད་དོ་ཞེས་བྱ་བར་ཇི་ལྟར་རྟོགས་ཤེ་ན། དེ་སྐྱེས་བཞིན་པ་ཙམ་ན་མངོན་སུམ་ཉིད་དུ་ཐལ་བའི་ཕྱིར་རོ། །ཟླ་བ་གཉིས་ལ་སོགས་པའི་བློ་རྣམས་ནི་སྐྱེས་བཞིན་པ་ན་མངོན་སུམ་ཉིད་དུ་སྲིད་པ་
[216b.7]ཡིན་ཡང་། གནོད་པར་བྱེད་པས་སེལ་བ་ཡིན་ནོ། །འདིར་ནི་སྲིད་པ་ཉིད་མི་འཐོབ་བོ། །རྣམ་པར་རྟོག་པ་དངོས་པོའི་ཡུལ་ཅན་དུ་སྨྲ་བ་རྣམས་ཀྱང་དེ་ལ་ཚད་མ་གཞན་དུ་འཁྲུལ་པ་འཇུག་པའི་ཕྱིར་རོ། །དེས་ན་འདིར་དངོས་པོ་མི་གསལ་བ་ཉིད་ཀྱིས་དངོས་པོ་མངོན་
[217a]
[217a.1]སུམ་དུ་བྱེད་པ་མི་སྲིད་པ་ཡིན་ནོ། །དེས་ན་འཁྲུལ་བ་ཡིན་ཡང་ཟླ་བ་གཉིས་ལ་སོགས་པ་ལས་རྣམ་པར་རྟོག་པ་ཐ་དད་པ་ཡིན་ནོ། །དེ་དག་ནི་དོན་རྟོགས་པའི་བདག་ཉིད་ཅན་ཡིན་ཏེ། དེ་ན་མེད་ཀྱང་དེ་རྟོགས་པའི་ཕྱིར་འཁྲུལ་པ་བརྗོད་ཀྱི་རྣམ་པར་
[217a.2]རྟོག་པ་ནི་ཇི་སྐད་བཤད་པའི་རིགས་པས་དེ་ལྟར་འཁྲུལ་ནས་ཀྱང་དོན་རིག་པའི་རང་བཞིན་སྲིད་པ་མ་ཡིན་ནོ། །དེས་ན་འདི་གཟུགས་བརྙན་ཇི་ལྟ་བུར་གྱུར་པ་དེ་རིག་པའི་བདག་ཉིད་ཀྱིས་ནི་འཁྲུལ་པ་མ་ཡིན་ཏེ། བློའི་ཟླ་བ་རིག་པས་ཟླ་བ་གཉིས་སུ་ཤེས་པ་འཁྲུལ་པ་མ་ཡིན་
[217a.3]པ་བཞིན་ནོ། །འོན་ཀྱང་དེར་ངེས་པ་ཕྱིན་ཅི་ལོག་པ་ལས་ཡིན་ནོ་ཞེས་བརྗོད་པར་བྱའོ། །གལ་ཏེ་འདི་ཅུང་ཟད་ཀྱང་ངེས་པར་བྱེད་པ་མ་ཡིན་ན་ནི་འཁྲུལ་པ་ཉིད་དུ་མི་འགྱུར་ཏེ། གཞན་ཡུལ་ཡིན་པའི་ཕྱིར་རོ། །ཇི་ལྟར་འདིའི་གཟུགས་བརྙན་དོན་དེ་ལྟ་བུ་དང་མི་མཐུན་
[217a.4]པར་རྟོགས་ཤེ་ན། དེའི་རང་གི་ངོ་བོ་དང་མ་འབྲེལ་པ་ཞེས་སྨོས་སོ། །ཇི་ལྟ་བུར་གྱུར་པ་ཞིག་བསྟན་པར་བསམས་ནས་འདི་ཉན་པ་པོ་ལ་བཞག་པ་དེའི་ངོ་བོ་དང་འདི་འབྲེལ་པ་དེའི་རྒྱུ་ཅན་གྱི་མཚན་ཉིད་མེད་དོ། །གལ་ཏེ་འདི་དོན་གྱིས་སྐྱེས་པ་ཡིན་ན། མི་འདྲ་བར་མི་
[217a.5]འགྱུར་བ་ཞིག་ན། རང་གི་ཉེ་བར་ལེན་པའི་རྩ་བ་ཅན་ཉིད་ཀྱིས་མི་འདྲ་བ་ཉིད་དོ། །ཇི་སྐད་དུ་སློབ་དཔོན་ཕྱོགས་ཀྱི་གླང་པོས་དོན་ཀྱང་ཡིན་ལ་མ་མཐོང་བ་ཡང་ཡིན་པས་དོན་མ་མཐོང་བ་སྟེ། ལྐོག་ཏུ་གྱུར་པའི་དངོས་པོ་ལ་བརྗོད་དོ། །དེ་ལ་ནི་དོན་གྱི་རྣམ་པར་རྟོག་པ་ཙམ་
[217a.6]ཡིན་གྱི་གཞན་ནི་འགའ་ཡང་མ་ཡིན་ནོ་ཞེས་བཤད་པ་ལྟ་བུའོ། །རྣམ་པར་རྟོག་པ་ལ་ནི་རྣམ་པ་གཉིས་སྲིད་དེ། རྣམ་པར་རྟོག་པ་དང་། དེའི་ངོ་བོ་ལས་དོན་གྱི་ཡུལ་ཅན་ནོ། །དེ་ལ་འདིར་དོན་དེའི་ཡུལ་ཉིད་བཀག་པས་རྣམ་པར་རྟོག་པ་ཙམ་ཞིག་ལུས་པ་ཡིན་ནོ། །དེ་
[217a.7]ལྟ་ན་ངོ་བོ་ཉིད་བརྗོད་ན་ཐམས་ཅད་ལས་ལོག་པ་བརྗོད་པར་འགྱུར་ལ། དེ་ཡང་སྲེད་པ་མ་ཡིན་ནོ་ཞེས་བརྗོད་པ་གང་ཡིན་པ་དེ་བསལ་བ་ཡིན་ནོ་ཞེས་བཤད་པ་ནི། དེ་ལྟ་ན་ཞེས་བྱའོ། །དེ་ལྟར་དེ་རྣམ་པ་འདིས་རྟོགས་པར་བྱ་བ་དང་རྟོགས་པར་བྱེད་པ་དག་གིས་རང་གི་
[217b]
[217b.1]མཚན་ཉིད་རྟོགས་པ་དང་བསྟན་པ་ནི་མ་ཡིན་ནོ། །གལ་ཏེ་རྟོགས་པའམ་བསྟན་པ་ཡིན་ན་དེ་ཐམས་ཅད་ལ་ལོག་པ་ཡིན་པའི་ཕྱིར་ཐམས་ཅད་ལས་ལོག་པ་བརྗོད་པར་འགྱུར་ལ། དེ་ཡང་འགལ་བ་ཡིན་ནོ། །དེ་ཡུལ་དུ་མ་བྱས་ན་ནི་ཉེས་པ་འདི་ག་ལ་ཡོད་དེ་ཡུལ་དུ་མི་བྱེད་
[217b.2]པ་ཡང་དེ་ལས་གཞན་ཁོ་ན་ཡུལ་དུ་བྱེད་པའི་ཕྱིར་རོ། །དེ་ཡུལ་དུ་བྱེད་ན་དབང་པོས་མི་སོད་པ་མ་ཡིན་པ་ཉིད་དུ་ཐལ་བར་འགྱུར་རོ་ཞེས་བཤད་པ་གང་ཡིན་པ་དེ། ཁྱད་པར་ཅན་གྱི་ཡུལ་དེ་ཉིད་ཀྱིས་གསལ་བར་སྟོན་པར་བྱེད་པ་ནི་མཐོ་རིས་ལ་སོགས་པ་ཐོས་པ་ལ་ཡང་ཞེས་བྱ་
[217b.3]བའོ། །གལ་ཏེ་མཐོ་རིས་ཀྱི་སྒྲས་མཐོ་རིས་བརྗོད་ན་མཐོ་རིས་ཉམས་སུ་མྱོང་བ་དང་འདྲ་བར་རྟོགས་པར་ཐལ་བར་འགྱུར་རོ། །དོན་གྱི་ཡུལ་ཅན་དུ་གྲུབ་ན་རྒྱུ་ཐ་དད་པ་ནི་ཡན་ལག་མ་ཡིན་པའི་ཕྱིར་རོ། །འབྲས་ཆན་གྱིས་འགྲངས་པའམ། ཟན་དྲོན་གྱིས་འགྲངས་
[217b.4]ཀྱང་བླ་སྟེ། ཁྱད་པར་ཡོད་པ་མ་ཡིན་ནོ། །དེ་ལྟ་ན་ནི་སྒྲ་དང་རྣམ་པར་རྟོག་པ་རྣམས་དེའི་ཡུལ་ཅན་མ་ཡིན་པའི་ཕྱིར་རང་གི་མཚན་ཉིད་བརྗོད་པར་བྱ་བ་མ་ཡིན་པ་དེས་ན་གཞན་སེལ་བའི་སྒོ་ནས་ཀྱང་མི་བརྗོད་པར་ཐལ་བར་འགྱུར་རོ། །དེས་ན་ནམ་མཁའ་ཞེས་སྒྲ་འཇུག་
[217b.5]པའི་རྒྱུ་ནི་ངོ་བོ་ཉིད་བརྗོད་དོ་ཞེས་ཇི་ལྟར་བརྗོད། དེ་བཞིན་དུ་གཞན་སེལ་བའི་ཡུལ་ཅན་དུ་ཡང་བརྗོད་པར་མི་བྱ་སྟེ། རྣམ་པ་ཐམས་ཅད་དུ་རང་གི་མཚན་ཉིད་ལ་རིག་པ་མེད་པའི་ཕྱིར། ཟླ་བ་གཉིས་ལ་སོགས་པའི་ཤེས་པ་བཞིན་ནོ། །འོན་ཏེ་ཇི་སྐད་བཤད་པའི་དོན་དམ་པའི་
[217b.6]གཞན་སེལ་བ་བརྗོད་པས་གཞན་སེལ་བའི་ཡུལ་ཅན་ཡིན་ན། དེ་ལྟར་ན་ད་རྗེས་སུ་དཔག་པའི་རྣམ་པར་རྟོག་པ་རྟག་པར་སྒྲོ་འདོགས་པ་སེལ་བའི་འབྲས་བུ་ཅན་ཡིན་ཡང་མི་རྟག་པ་ཉིད་རྟོགས་པར་བྱེད་པ་མ་ཡིན་པའི་ཕྱིར་དོན་མེད་པར་ཐལ་ལོ། །དེས་ན་རྣམ་པར་རྟོག་པ་
[217b.7]གཞན་སེལ་བའི་རིག་པ་དེ་ཇི་ལྟར་རང་གི་མཚན་ཉིད་ལ་རིག་པ་མེད་པར་འགྱུར་བ་བརྗོད་དགོས་སོ་ཞེས་དགོས་པ་ལ། རང་གི་འདོད་པས་སྒྲ་རྣམས་ཇི་ལྟར་དོན་བརྗོད་པར་འདོད་པ་དེ་བསྟན་པའི་ཕྱིར། དེའི་ཕྱིར་ཞེས་སྨོས་སོ། །རྟོགས་པར་བྱེད་པས་དངོས་པོའི་རང་གི་ངོ་བོ་མ་
[218a]
[218a.1]རྟོགས་སུ་ཟིན་ཀྱང་རྣམ་པར་རྟོག་པའི་གཟུགས་བརྙན་དངོས་པོའི་རང་གི་ངོ་བོ་དང་མ་འབྲེལ་པ་དེ་ལྟ་བུ་ཁོ་ན་ལ་སྟེ། དངོས་པོའི་རང་གི་ཇི་ལྟ་བ་བཞིན་མ་རྟོགས་པ་ལ་ཡང་རྣམ་པར་རྟོག་པའི་གཟུགས་བརྙན་འབྱུང་བ་ཡིན་ཏེ། དེ་ལ་དེར་ལྷག་པར་ཞེན་པ་སྟེ།
[218a.2]དངོས་པོའི་རང་གི་ངོ་བོར་ལྷག་པར་ཞེན་པས་རྟོགས་པར་བྱ་བའམ་རྟོག་པར་བྱེད་པ་འདི་མགུ་བར་འགྱུར་རོ། །དངོས་པོའི་རང་གི་ངོ་བོ་མ་རྟོགས་པ་དངོས་པོའི་རང་གི་ངོ་བོར་ལྷག་པར་ཞེན་པ་ཞེས་བྱ་བ་འདི་ཅི་ཞིག་ཡིན་ཞེ་ན། སྨྲས་པ་དངོས་པོའི་ངོ་བོ་རྟོགས་པ་ཉིད་ནི་མ་ཡིན་ཏེ། རྣམ་
[218a.3]པར་རྟོག་པ་ནི་འཁྲུལ་ནས་ཀྱང་དོན་རྟོགས་པའི་བདག་ཉིད་མ་ཡིན་ནོ་ཞེས་སྔར་བསྒྲུབས་ཟིན་པའི་ཕྱིར་རོ། །དེས་ན་འདི་ནི་མེད་པ་ཡུལ་དུ་སྨྲ་བ་ལ་མངོན་པར་ཞེན་པ་ངན་པ་རྩ་བ་མེད་པ་ཅན་བསལ་བ་མཁས་པ་རྣམས་ཀྱི་རང་སྣང་བའི་ཕྱོགས་ཡིན་ནོ། །གང་གི་ཕྱིར་བློ་གྲོས་ངན་པ་
[218a.4]ཅན་རྣམས་ཀྱི་ཕྱི་རོལ་གྱི་དོན་སྣང་བ་མེད་ན། ཕྱི་རོལ་དོན་དུ་མངོན་པར་ཞེན་པ་ཉམས་སུ་མྱོང་བས་གྲུབ་པ་གང་ཞིག་ཡིན་པར་འདོད་གལ་ཏེ་ཕྱི་རོལ་གྱི་དོན་རིག་པ་ཡིན་ནོ། །དེ་ལྟ་ན་འདིར་མེད་པ་ཡུལ་དུ་སྨྲ་བ་འདི་འཐད་པར་འགྱུར་རོ། །གང་གི་ཕྱིར་རིག་པར་བྱ་བ་གང་ཡིན་པ་དེ་
[218a.5]ཉིད་ཡུལ་ཡིན་ཏེ། དེས་ན་དོན་རིག་པ་ནི་དོན་གྱི་ཡུལ་ཅན་ཉིད་དུ་འགྱུར་རོ། །དེས་ན་རྣམ་པར་རྟོག་པ་གཟུགས་བརྙན་དེ་ལྟ་བུ་ཁོ་ན་ལ་དེར་ལྷག་པར་ཞེན་པས་ཞེས་བྱ་བ་འདི་མི་འཐད་པར་འགྱུར་རོ། །འདིས་བདག་ཉིད་རིག་པ་ནི་མ་ཡིན་ན། དེ་ཇི་ལྟར་དངོས་པོ་མེད་པ་
[218a.6]བདག་ཉིད་ལ་རིག་པར་འགྱུར། དངོས་པོ་མེད་པའི་རིག་པས་རིག་པར་འགྱུར་བ་གང་ཡིན་པ་དངོས་པོ་མེད་པ་གང་ཡིན་པ་དེ་ནི་ཇི་ལྟར་ཡང་དངོས་པོ་ཉིད་མ་ཡིན་ནོ། །དེ་བས་ན་དངོས་པོའི་ཡུལ་ཅན་ཉིད་དངོས་པོ་རིག་པ་ཡིན་པའི་ཕྱིར་དངོས་པོ་མ་ཡིན་པ་ལ་དངོས་པོ་ཉིད་དུ་རིག་པར་མི་རུང་ངོ་། །དངོས་
[218a.7]པོ་མ་ཡིན་པ་དང་དངོས་པོའི་ཁྱད་པར་དང་ཁྱད་པར་ཅན་གྱི་ངོ་བོ་ཡང་མ་ཡིན་ནོ། །འོ་ན་ཉ་ཕྱིས་ལ་སོགས་པ་ལ་དངུལ་དུ་ཤེས་པ་ཇི་ལྟར་ཞེ་ན་དེར་ཡང་ཉ་ཕྱིས་ཉིད་ལ་དངུལ་དུ་རིག་པ་ནི་མ་ཡིན་ཏེ། གཞན་ལ་གཞན་དུ་རིག་པ་མི་སྲིད་པའི་ཕྱིར་ཏེ། དེ་ནི་དེའི་རང་བཞིན་མ་ཡིན་པའི་ཕྱིར་
[218b]
[218b.1]རོ། །རིག་པར་གྱུར་པའི་ཆོས་ལས་ལྷག་པ་མེད་པ་རིག་པ་ཡིན་པའི་ཕྱིར། དོན་ཇི་ལྟ་བ་བཞིན་མ་ཡིན་པ་ནི་དོན་ཇི་ལྟ་བ་མ་ཡིན་ནོ། །དེ་ཉིད་ཀྱི་ཕྱིར། ངེས་པ་རྣམས་ཀྱིས་མ་ངེས་གང་། །དེ་ནི་ཇི་ལྟར་དེ་དག་ཡུལ། །ཞེས་བཤད་དོ། །ཉ་ཕྱིས་ལ་སོགས་པ་ལ་ནི་སྒྲོ་
[218b.2]བཏགས་ནས་དེ་ལྟར་བསྙད་པ་ཡིན་ཏེ། མངོན་སུམ་གྱིས་ཉ་ཕྱིས་ཀྱི་ངོ་བོ་མྱོང་ནས་དེ་ལྟར་རྣམ་པར་རྟོག་པའི་ཕྱིར་རོ། །དེ་ལྟ་མོད་ཀྱི་ཡུལ་བསམ་པ་ན་ནི་དངུལ་དུ་རྟོགས་པའི་ཡུལ་དངུལ་ཁོ་ན་ཡིན་གྱི་ཉ་ཕྱིས་ལ་ནི་རེག་པ་མེད་དོ། །གང་གིས་འདི་དོན་ཉིད་དུ་རིག་པར་འགྱུར་
[218b.3]བ་འདི་ནི་བདག་ཉིད་ལ་སྲེད་པ་མ་ཡིན་ནོ། །སྲེད་ན་ཡང་རང་རིག་པའི་ཡུལ་ལ་དོན་ཉིད་དུ་ངེས་པར་འདིའི་ཡུལ་གང་ཡིན་ཞེས་ཡུལ་བསམ་པ་ནས། དོན་ཉིད་ཡིན་པར་བརྗོད་ཀྱི་ཤེས་པ་ནི་མ་ཡིན་ཏེ། དེ་ལྟར་རྟོགས་པ་མེད་པའི་ཕྱིར་རོ། །དོན་རིག་པ་ཉིད་ཤེས་པ་རིག་པར་
[218b.4]འགྱུར་བ་གང་ཡིན་པ་ཤེས་པ་ཉིད་ནི་དོན་མ་ཡིན་ནོ། །དེས་ན་དོན་ཉིད་ཡུལ་ཡིན་གྱི་ཤེས་པ་ནི་མ་ཡིན་ལ། དེ་ཡང་མི་འདོད་པ་གང་ཡིན་པ་ནི་རིག་པ་ཁོ་ནའོ། །དེའི་ཕྱིར་ཤེས་པ་མ་ཡིན་ཏེ་རིག་པ་མེད་པའི་ཕྱིར་རོ། །དོན་མ་ཡིན་ཏེ་རྣམ་པ་དེ་ལྟ་བུ་མེད་པའི་ཕྱིར་རོ། །དེས་ན་
[218b.5]རྣམ་པར་རྟོག་པའི་ཡུལ་ནི་མེད་པ་སྒྲོ་བཏགས་པ་ཁོ་ན་ཡིན་ནོ་ཞེས་ཟེར་བ་དེ་ནི་རང་གི་ཕྱོགས་མཚར་པོའི་སྔ་ཕྱི་བརྟགས་པ་ཁོ་ནའོ། །དེ་ལྟར་ན་འདི་དོན་དུ་ངེས་པ་ཉིད་ལ་བརྟེན་ནས་བདག་སྣང་བ་སྤང་བ་ཡིན་ནོ། །དེ་ལ་གལ་ཏེ་དོན་དུ་ལྷག་པར་ངེས་པ་འདི་དོན་རིག་པ་ཡིན་ན།
[218b.6]དེས་ན་དེ་ཉིད་དོན་རིག་པར་རྟོགས་པས། འདི་ལ་ཡོད་དམ་མེད་ཀྱང་དོན་སྣང་བ་ཡིན་ཏེ། དཔེར་ན་སྔོན་པོར་མྱོང་བཞིན་པ་དེ་ཉིད་སྔོན་པོར་སྣང་བ་བཞིན་ནོ། །སྔོན་པོ་མྱོང་བ་གཞན་ལ་སྣང་བཞིན་པ་དེ་ལྟ་བུ་ཉིད་ཀྱི་རྣམ་པ་ཉིད་དུ་རྟོགས་པའི་ཕྱིར་དོན་དེ་ཡང་བདག་ཅག་གིས་མངོན་སུམ་
[218b.7]རྟོགས་པའི་ཕྱིར་གང་ལ་དེ་ལྟ་བུར་གྱུར་པ་ཉིད་དུ་གསལ་བ་དེ་ཉིད་དོན་རིག་པ་ཡིན་ནོ། །གལ་ཏེ་དེ་ལྟར་གྱུར་པ་དེ་མེད་ན་ནི་མེད་པ་ཉིད་རིག་པར་འགྱུར་བ་ཡིན་ཏེ། རྨི་ལམ་དུ་དམིགས་པའི་སྔོན་པོ་བཞིན་ནོ། །དེ་ལྟ་མ་ཡིན་ན་ཡོད་པ་ཁོ་ནའོ། །རྨི་ལམ་དུ་ཡུལ་མེད་ཀྱང་
[219a]
[219a.1]སྔོན་པོ་མ་ཡིན་པ་རིག་པ་ཉིད་སྔོན་པོར་རིག་པར་འགྱུར་བ་ནི་མ་ཡིན་ནོ། །དེས་ན་འདི་གལ་ཏེ་དོན་རིག་པ་ཉིད་ཡིན་ན་ནི་དོན་ཡོད་དམ་མེད་ཀྱང་བླ་སྟེ། སྔོན་པོ་དང་ཟླ་བ་གཉིས་ལ་སོགས་པའི་ཤེས་པ་ལྟར་དེ་དོན་སྣང་བ་ཇི་ལྟར་འགྱུར་བ་དེ་ལྟ་བུ་ཉིད་དུ་འགྱུར་བ་ཞིག་
[219a.2]ན་རྣམ་པར་རྟོག་པའི་གནས་སྐབས་ན་ནི་དབང་པོའི་ཤེས་པ་བཞིན་དོན་སྣང་བ་མེད་པའི་ཕྱིར་དོན་དུ་ལྷག་པར་ཞེན་པ་ཉམས་སུ་མྱོང་བས་གྲུབ་པ་དེ་གང་ཡིན། གལ་ཏེ་འདིར་དོན་རིག་པ་ཡོད་ན། དངོས་པོ་དེ་ལྟ་བུ་ཡོད་པ་ན། རྗེས་སུ་དཔག་པའི་རྣམ་པ་རྟོག་པའི་ཡུལ་གྱི་དོན་
[219a.3]མངོན་སུམ་པ་ཁོ་ནར་འགྱུར་རོ། །སྒྲོ་བཏགས་པའི་དོན་མེད་པ་ཉིད་ཡུལ་ཡིན་པ་དེའི་ལྟར་ན་ནི་འདི་དོན་ལས་བྱེ་བྲག་མེད་པ་ན། དེ་དོན་ཁོ་ནར་འགྱུར་གྱི་སྒྲོ་བཏགས་ནི་མ་ཡིན་ནོ། །བྱེ་བྲག་ཡོད་ན་ཡང་འདི་སྒྲོ་བཏགས་པ་ཡིན་གྱི་ཤེས་པ་ནི་མ་ཡིན་ནོ་ཞེས་མནའ་ཆུ་བཏུང་
[219a.4]བས་བསྒྲུབ་པར་བྱ་བ་ཡིན་ནོ། །དོན་དང་ཤེས་པ་ཉིད་ནི་འགལ་བས་གལ་ཏེ་དེར་དོན་ཉིད་དོར་ན་ཤེས་པ་ཉིད་དུ་ཡང་རིགས་ལ་མ་ཡིན་ན་ནི་སྒྲོ་བཏགས་པ་ཉིད་དུ་ཡང་ངོ་། །དེས་ན་འདི་དོན་རིག་པ་ལ་བརྟེན་ནས་བདག་སྣང་བ་ལས་ཀྱང་འབྱུང་སྟེ། རྟོགས་པ་དེའི་ཡུལ་དོན་དང་
[219a.5]མི་འདྲ་བ་སྨྲ་བ་ན་དེ་ཉིད་དུ་རྗེས་སུ་སོང་བ་ཡིན་ནོ། །གལ་ཏེ་སྒྲོ་བཏགས་པ་ལ་དོན་རིག་པ་མི་འདོར་བ་དེས་ན་འདི་དོན་མེད་པ་རིག་པ་བརྗོད་དེ། ཤེས་པ་ལ་ནི་དོན་ཉིད་འགལ་ལོ་ཞེ་ན། འདི་ནི་མ་བརྟགས་པར་སྨྲས་པ་ཡིན་ཏེ། འདི་ལྟར་དོན་རིག་པ་གང་ཡིན་པ་དེ་ཉིད་
[219a.6]གལ་ཏེ་སྒྲོ་བཏགས་པ་རིག་པ་ཡིན་ན། གསལ་བ་ཁོ་ནར་མི་འདུ་བས་ན་དོན་རིག་པ་གཞན་ལུས་པ་མེད་པའི་ཕྱིར་འདི་ཤེས་པ་ཉིད་དུ་མི་འགལ་ལོ། །གང་ལས་དོན་རིག་པར་འགྱུར་བ་དེ་ལ་དོན་དང་མི་འདྲ་བ་མེད་པ་ནི་ཅུང་ཟད་ཀྱང་ཡོད་པ་མ་ཡིན་ནོ། །བརྟགས་པ་མཐའ་
[219a.7]དག་ནི། དོན་དང་འགལ་བ་ཐ་དད་པ་དང་ཐ་མི་དད་པ་དག་གིས་སེལ་བ་ཡིན་ནོ། །མི་འདྲ་བ་མེད་པ་ཡོད་པ་ཁོ་ནའོ་ཞེ་ན། འོ་ན་དོན་དང་སྒྲོ་བཏགས་པ་གཉིས་ཀྱིས་རིག་པ་གཅིག་གམ་མི་གཅིག་ཀྱང་བླ་སྟེ། དེའི་དོན་ཏོ་ཞེས་རྟོགས་པ་གང་ཡིན་པ་དེ་ནི་དོན་ཉིད་ཡིན་
[219b]
[219b.1]པར་འགྱུར་བས་དོན་གྱི་ཡུལ་ཅན་དུ་ཐལ་བར་འགྱུར་རོ། །སྒྲོ་བཏགས་པ་ལ་དོན་ཉིད་དུ་རྟོགས་པ་ཡིན་ནོ་ཞེ་ན་རེ་ཞིག་སྒྲོ་བཏགས་ཀྱི་བདག་ཉིད་ནི་ཤེས་པ་དང་མི་འགལ་བས་ཤེས་པ་ཉིད་དེ་ལྟར་རྟོགས་པ་ཡིན་མོད། འཛིན་པ་ཐ་དད་པ་ཡང་སྒྲུབ་བྱེད་མ་ཡིན་ཏེ་མེད་པའི་ཕྱིར་
[219b.2]རོ། །རྣམ་པར་རྟོག་པ་མེད་པ་ལ་ཡང་ཡོད་པས་མ་ངེས་པའི་ཕྱིར་རོ། །དོན་གྱི་ངོ་བོ་རིག་ན་སྒྲོ་བཏགས་པ་གཞན་སྲིད་པ་ནི་ཚད་མ་ཅན་མ་ཡིན་ནོ། །དོན་དེ་ཉིད་འདས་པའི་ངོ་བོ་སྔོན་གྱི་མཐོང་བའི་ཡུལ་ཉིད་དུ་ལྷག་པར་ངེས་པའི་ཕྱིར་མེད་པ་ཡིན་ནོ་ཞེ་ན་མ་ཡིན་ཏེ། དོན་ཇི་ལྟར་
[219b.3]མཐོང་བ་མེད་པས་མེད་པའི་ཡུལ་ཅན་ཡིན་པའི་ཕྱིར་གྱི་ཤེས་པའི་དུས་སུ་མེད་པས་ནི་མ་ཡིན་ཏེ། ཐམས་ཅད་མཁྱེན་པའི་དོན་ཇི་ལྟ་བ་བཞིན་གཟིགས་ཀྱང་མེད་པའི་ཡུལ་ཅན་དུ་ཐལ་བའི་ཕྱིར་རོ། །གཞན་ཡང་འདས་པའི་དུས་རྟོགས་པ་གལ་ཏེ་འདས་པའི་དུས་ཀྱི་ཡུལ་ཉིད་ལ་
[219b.4]དེའི་དུས་ཉིད་དུ་འཛིན་པ་ན་དོན་མེད་པ་ཉིད་དུ་འགྱུར་ན། དེ་ལྟ་ན་ཡང་མི་འདོད་པ་དངོས་པོའི་ཡུལ་ཅན་ཉིད་དུ་འགྱུར་རོ། །ཡུལ་མ་ཡིན་པ་ནི་འདས་པའི་དོན་རྟོགས་པ་མེད་པའི་ཕྱིར་འདས་པ་ཉིད་ཀྱི་ཕྱིར་མེད་པར་ཇི་ལྟར་འགྱུར། དེ་བས་ན་གང་ཞིག་དོན་གྱི་ཡུལ་ཅན་
[219b.5]ཉིད་ཀྱིས་བདག་ཉིད་ཡུལ་མ་ཡིན་པར་འགྱུར་བ་དེ་ལ་དོན་ནི་འགའ་ཡང་རྟོགས་པ་མེད་དོ། །གཞན་ཡང་དོན་སྣང་བཞིན་པ་ན་ཡང་དེ་ལྟར་སྣང་བ་དེ་ཡུལ་གྱི་གཟུགས་བརྙན་རྟོགས་པར་ཡང་ཅིས་མི་འཐད་ན་གང་གིས་རྣམ་པར་ཤེས་པའི་རྣམ་པ་ཉིད་དུ་མི་འདོད། དོན་ཇི་ལྟ་བུ་
[219b.6]དེ་ལྟ་བུར་གྱུར་པ་རྟོགས་པའི་རང་བཞིན་སྲིད་པ་ནི་བདེན་མོད་ཀྱི། དེ་ལྟ་ན་ཡང་ཤེས་པའི་གཟུགས་བརྙན་དེ་ནི་ཤེས་པ་ཁོ་ན་ཡིན་ཏེ། དེ་ལས་དོན་ཉིད་རྟོགས་པ་ཡང་འགལ་བ་ཡིན་ནོ། །དེས་ན་ཆོས་མི་མཐུན་པའི་རྣམ་པ་མཐའ་དག་བརྟགས་ཀྱང་དོན་གྱི་རང་བཞིན་ཡོད་
[219b.7]པར་འདོད་པ་མ་ཡིན་གྱི། སྡང་བས་ནི་མ་ཡིན་ནོ་ཞེ་ན། དེས་ན་སྒྲོ་བཏགས་པ་ཉིད་དུ་ཁས་ལེན་ཏོ་ཞེ་ན། ཡུན་རིང་པོར་བརྟགས་ཤིང་བརྟགས་པའི་ཆ་སོ་སོར་རྣམ་པར་ཕྱེ་ཡང་དངོས་པོ་གསལ་བའི་ཞད་ཙམ་ཡང་མི་འབག་པ་ནི་དོན་རྟོགས་པར་སྨྲ་བའི་རྗོད་བྱེད་ཀྱིས་མ་
[220a]
[220a.1]བཏང་བས་འདི་ལ་ཅི་བྱར་ཡོད། གང་གི་ཚེ་དོན་ལ་གསལ་བ་ཡང་ཤེས་པ་ཉིད་དུ་འཐད་པ་དེའི་ཚེ། གང་གིས་གཟུགས་བརྙན་སྒྲོ་བཏགས་པ་ཉིད་དུ་ཁས་ལེན་པར་བྱེད་པ་འདི་རྒྱུ་མཚན་ཅི་ཞིག་ཁས་བླངས་ནས་གཟུགས་བརྙན་ཉིད་སེལ་བར་བྱེད། དོན་
[220a.2]རྟོགས་པ་ཞེས་བྱ་བ་ནི་ཚིག་ཙམ་མ་ཡིན་ཏེ། འོན་ཀྱང་གསལ་བ་ཁོ་ནའོ། །དེ་ཡང་འགའ་ཞིག་གསལ་བར་མ་གྱུར་པར་མི་འཐད་པས་ན་གང་ཞིག་འདི་ལ་གསལ་བ་དེ་དོན་གྱི་རང་བཞིན་ཐུན་མོང་མ་ཡིན་པ་ཉིད་ཡིན་ན་དེའི་ཚེ་འདི་དོན་ཁོ་ན་ཡིན་གྱི་ཤེས་པ་ནི་མ་ཡིན་ནོ། །གང་གི་ཚེ་དེ་
[220a.3]ལྟར་གསལ་བའི་རང་བཞིན་དེ་ཤེས་པའི་གཟུགས་བརྙན་གྱི་ཆོས་སུ་འཐད་པ་དེའི་ཚེ་ནི་རྣམ་པར་ཤེས་པ་ལས་ཐ་དད་པར་དོན་ཉིད་དུ་ངེས་པར་བྱེད་པ་གང་ཡིན་པ་རང་བཞིན་ཐ་དད་པར་རྣམ་པར་འབྱེད་པ་གང་ཞིག་ཡིན། དོན་བྱ་བ་བྱེད་པ་ཉིད་དོ་ཞེ་ན། དེ་ནི་དོན་བྱ་བ་དང་འབྲེལ་པ་
[220a.4]ལས་ངེས་པར་བྱ་བ་ཡིན་ནོ། །དེས་ན་གང་གི་ཚེ་འདི་རྒྱུ་དང་འབྲས་བུ་གཉིས་ཀྱི་གཟུགས་བརྙན་གྱི་ངོ་བོར་མེ་ལོང་ལ་ཤིང་དང་འབར་བ་དག་བཞིན་དུ་རྣམ་པར་གནས་པར་བཟོད་པ་དེའི་ཚེ། འདི་དག་ནི་རྒྱུ་དང་འབྲས་བུ་ཉིད་ཡིན་གྱི། རྒྱུ་དང་འབྲས་བུའི་གཟུགས་བརྙན་ནི་མ་
[220a.5]ཡིན་ནོ་ཞེས་ག་ལས་རྟོགས་པ་ལ། དེས་ན་རྣམ་པར་རྟོག་པ་སྣང་བའི་རང་བཞིན་གསལ་བཞིན་པ་ལས་ཐ་དད་པ་འམ། གཞན་ཤེས་པའི་རང་བཞིན་ལས་ཐ་དད་པར་དོན་དུ་ངེས་པར་ནི་མི་ནུས་སོ། །གསལ་བའི་རང་བཞིན་ལས་ཐ་དད་པས་དེ་ལྟར་ངེས་པ་དེ་ཤེས་པའོ་སྙམ་
[220a.6]པ་དང་བྲལ་བས་དོན་ཏོ་སྙམ་པ་འཇུག་པའི་ཕྱིར་རོ་ཞེ་ན་དོན་ཏོ་ཞེས་ཤེས་པ་དང་ཐུན་མོང་མ་ཡིན་པར་རྟོགས་པ་དེ་རྟོགས་བཞིན་དུ་ཡང་ཐུན་མོང་མ་ཡིན་པར་ཇི་ལྟར་མི་སྟོན། དེར་ནི་གཟུགས་བརྙན་ཉིད་ལ་ཡང་སྲིད་པ་མ་ཡིན་པར་དེ་བཞིན་དུ་རྟོགས་པ་གང་ཡིན་པ་དེ་ནི་ཡོད་པ་
[220a.7]མ་ཡིན་ནོ། །གལ་ཏེ་ཐུན་མོང་མ་ཡིན་ཡང་ཐུན་མོང་མ་ཡིན་པར་རྟོགས་པ་ནི་ཐུན་མོང་མ་ཡིན་པ་ཁོ་ནར་གྱུར་པ་མ་ཡིན་ནམ་ཞེ་ན། བདེན་ཏེ་ཐུན་མོང་མ་ཡིན་པར་རྟོགས་པ་ནི་ཐུན་མོང་མ་ཡིན་པའི་རང་བཞིན་དུ་རྟོགས་པ་མ་ཡིན་ནོ། །དེ་ལ་རྣམ་པར་ཤེས་པ་དངོས་པོར་
[220b]
[220b.1]མི་སྲིད་པའི་དེ་ལྟར་རྟོགས་པ་གང་ཞིག་ཅེས་དེ་ཉིད་འདིར་བརྒལ་ཞིང་བརྟག་པར་བྱ་བ་ཡིན་ནོ། །དེས་ན་དེ་ལྟར་རིག་པའི་རང་བཞིན་རྟོགས་པ་མེད་པའི་ཕྱིར་ན་ནི། རིག་པ་མེད་པ་ཁོ་ནའོ། །དོན་རྟོགས་པ་ཉམས་སུ་མྱོང་བས་གྲུབ་པ་མ་ཡིན་ནམ། བདེན་ཏེ་རྟོགས་པར་
[220b.2]བྱ་བ་ཐུན་མོང་མ་ཡིན་པའི་རང་བཞིན་གསལ་བ་མེད་པའི་ཕྱིར་དང་རིག་པར་བྱ་བ་ཁྱད་པར་མེད་པར་རིག་པའི་ཁྱད་པར་མི་འགྲུབ་པའི་ཕྱིར་འདི་ནི་དེ་རིག་པའི་བདག་ཉིད་མ་ཡིན་པ་ལྷག་པར་ཞེན་པ་འབའ་ཞིག་གོ་ཞེས་བརྗོད་དོ། །དེ་ཉིད་ཀྱི་མེད་པའི་ཡུལ་ཅན་ཉིད་བཀག་
[220b.3]པ་ཡིན་ནོ་ཞེས་ཞར་ལ་བརྗོད་དོ། །འོ་ན་ཇི་ལྟར་དངོས་པོའི་རང་བཞིན་མ་རྟོགས་པར་དངོས་པོར་ལྷག་པར་ཞེན་པའི་རང་བཞིན་ཞེས་བྱ་བར་འགྱུར་ཞེ་ན། འདི་སྐད་བརྗོད་དོ། །འདི་ལ་དངོས་པོའི་རང་གི་ངོ་བོ་མ་རྟོགས་པ་རྣམ་པར་རྟོག་པའི་གཟུགས་བརྙན་ལ་དངོས་པོའི་
[220b.4]ངོ་བོར་ལྷག་པར་ཞེན་པ་དངོས་པོའི་རང་གི་ངོ་བོར་མངོན་པར་ཞེན་པ་མངོན་པར་རློམ་པ་ཤེས་པའི་ཆོས་སོ། །འདི་ལྟར་ཇི་ལྟར་ལྷག་པར་ཞེན་པ་དེ་ལྟ་བུར་གྱུར་པའི་ཡུལ་ཡང་གསལ་ན་ནི་འདོད་ཆགས་ལ་སོགས་པ་བཞིན་ཤེས་པའི་རང་བཞིན་དེས་ཁྱད་པར་དུ་བྱས་པ་ཉིད་དུ་
[220b.5]འགྱུར་ཏེ། དཔེར་ན་བྱེ་བྲག་པས་ཁས་བླངས་པ་བཞིན་ནོ། །དེ་བཞིན་དུ་ཇི་ལྟར་འདིའི་ཡུལ་གསལ་བ་དེ་ཁོ་ན་བཞིན་མངོན་པར་རློམ་པར་འགྱུར་རོ། །གང་གི་ཚེ་མངོན་སུམ་གྱིས་མཐོང་བའི་རང་བཞིན་དང་མི་འདྲ་བའི་ཕྱིར་དང་། ཤེས་པ་མི་འདྲ་བའི་ཐུན་མོང་མ་ཡིན་པའི་
[220b.6]རང་བཞིན་སྣང་བ་མེད་པའི་ཕྱིར་ཡུལ་གསལ་བའི་ཆ་བཟློག་པར་བྱས་པ་དེའི་ཚེ་མངོན་པར་རློམ་པ་ཙམ་ཁོ་ན་ལུས་པ་ཡིན་ནོ། །དེ་ཡང་འགའ་ཞིག་གསལ་བ་མེད་པར་མི་འཐད་པའི་ཕྱིར་ན་ཤེས་པའི་རང་གི་ངོ་བོར་གྱུར་པ་སྔོན་པོའི་རྣམ་པ་སྣང་བ་ཉིད་ནི་འཇུག་པ་ཡིན་ནོ། །དེས་
[220b.7]ན་རང་གི་རྣམ་པ་ཕྱི་རོལ་མ་ཡིན་པ་ལས་ཡང་ཕྱི་རོལ་དུ་མངོན་པར་རློམ་པས་ཕྱིན་ཅི་ལོག་ཏུ་བརྗོད་དོ། །དེས་ན་འདི་ལྟར་དངུལ་ལ་སོགས་པར་ཕྱིན་ཅི་ལོག་པ་རྣམས་ཀྱི་ཡུལ་གྱི་རང་གི་ངོ་བོ་རྣམ་པར་དཔྱད་པ་དངུལ་ཉིད་ཡུལ་ཡིན་པ་དེ་བཞིན་དུ་ཕྱིན་ཅི་ལོག་འདིའི་ཡུལ་ནི་དོན་ཉིད་
[221a]
[221a.1]མ་ཡིན་ནོ། །འདི་ནི་དེར་མངོན་པར་རློམ་པ་དག་འབའ་ཞིག་ཏུ་ཟད་ཀྱི། དེ་གསལ་བ་ནི་མ་ཡིན་ལ། དེ་གསལ་བ་མེད་པར་ཡང་དེའི་རིག་པ་ཉིད་མ་ཡིན་ནོ། །དཔེར་ན་རྨི་ལམ་ལ་སོགས་པའི་བསླད་པ་རྣམས་ལ་མངོན་པར་འདོད་པའི་ཡུལ་དམིགས་
[221a.2]པ་ནི་དེ་ལྟ་བུའི་ཀུན་དགའ་བ་དེ་ཉིད་ཡིན་གྱི་ཡུལ་དང་བཅས་པའི་ཕྱིན་ཅི་ལོག་ལས་ནི་མ་ཡིན་པ་བཞིན་ནོ། །དེ་བཞིན་དུ་འདིར་རང་གི་བདག་ཉིད་སྣང་བཞིན་པ་ན་ཡང་དོན་དུ་ངེས་པ་ཡིན་གྱི། བདག་ཉིད་སྣང་བ་ནི་ལྡོག་པ་མ་ཡིན་ཏེ། ཟླ་བ་གཉིས་སྣང་བ་ན་ཟླ་བ་སྣང་བ་བཞིན་
[221a.3]ནོ། །ཇི་ལྟར་དེ་ཉིད་དུ་ཟླ་བ་གཉིས་བཞིན་དུ་དོན་རིག་པ་ཡང་མ་ཡིན་ལ། མ་འཁྲུལ་པ་མ་ཡིན་ཏེ། ལྷག་པར་ཞེན་པ་ཕྱིན་ཅི་ལོག་པས་འཁྲུལ་པ་ཉིད་དུ་བརྗོད་པའི་ཕྱིར་ཏེ། རིག་པ་ཕྱིན་ཅི་ལོག་པ་ལས་ནི་མ་ཡིན་ནོ། །གལ་ཏེ་བཟུང་བའི་རྣམ་པ་རང་རིག་པའི་ཡུལ་
[221a.4]ཡིན་གྱི་རྣམ་པར་རྟོག་པའི་ཡུལ་མ་ཡིན་པ་བཞིན་ནོ། །རིག་པ་གཞན་ཡང་ཁས་མི་ལེན་ལ། རང་གིས་རིག་པ་ཡང་རྟོགས་པའི་ཡུལ་མ་ཡིན་ཏེ། རང་རིག་ལ་ཡང་རྟོགས་མི་འདོད། །གཞན་ལ་རྣམ་པར་རྟོག་ཕྱིར་རོ། །ཞེས་གང་བཤད་པ་བཞིན་ནོ། །རིག་པ་གཞན་
[221a.5]ཁས་མ་བླངས་པར་རྟོགས་པ་ཡང་འདིར་གང་ཞིག་ཡིན་པར་འགྱུར། བརྟགས་པ་ཡང་རྗེས་སུ་ཡོད་པ་མ་ཡིན་པར་སློབ་དཔོན་རྣམས་ཀྱིས་བསྟན་ཏེ། དེས་ན་འདིར་ལན་ཅི་ཡོད་ཅེ་ན། འདི་སྐད་བརྗོད་དེ། སྔོན་པོའི་རྣམ་པ་གསལ་བ་བདག་ཉིད་ཀྱི་ངོ་བོ་ལ་དོན་ཉིད་
[221a.6]དུ་མངོན་པར་རློམ་པ་ནི་རྣམ་པར་རྟོག་པ་ཞེས་བརྗོད་དོ། །དེའི་སྔོན་པོའི་རྣམ་པ་ཉིད་གསལ་བ་གང་ཡིན་པ་དེ་ནི་རང་གིས་རིག་པ་ཡིན་པའི་ཕྱིར་རང་གི་ངོ་བོ་ལ་རྣམ་པར་མི་རྟོག་པ་ཡིན་ནོ། །རྣམ་པ་དེ་ལྟ་བུ་དེ་ནི་རང་གི་ངོ་བོ་ཙམ་གྱི་མཐར་ཐུག་པ་ནི་མ་ཡིན་གྱི། འོན་
[221a.7]ཀྱང་དེ་ལྟར་ལྷག་པར་ཞེན་པའི་དབང་གིས་དོན་ལ་བརྟེན་པ་ཉིད་ཡིན་པའི་ཕྱིར་འདི་དག་ལ་རྣམ་པར་རྟོག་པ་ཡིན་ཏེ། དབང་པོའི་ཤེས་པ་ཉིད་མངོན་སུམ་མ་ཡིན་པ་བཞིན་ནོ། །ལྷག་པར་ཞེན་པའི་རང་བཞིན་དེ་ནི་རྣམ་པར་རྟོག་པ་ལས་ཡིན་པའི་ཕྱིར་ཏེ། དེས་ན་དེ་ཉིད་འདི་
[221b]
[221b.1]རྣམ་པར་རྟོག་པ་ཉིད་དོ། །སྔོན་པོ་ཙམ་གསལ་བ་ནི་དབང་པོའི་ཤེས་པ་ལ་ཡང་ཡོད་པའི་ཕྱིར་རོ། །གང་གི་ཕྱིར་འདི་སྔ་མ་དང་ཕྱི་མའི་མྱོང་བའི་འདུ་བྱེད་པ་སད་པའི་རྩ་བ་ཅན་ཡིན་པ་དེ་ཉིད་ཀྱི་ཕྱིར་དོན་ཏོ་སྙམ་དུ་ཤེས་པ་ཡིན་ནོ། །དེ་ཉིད་ཀྱིས་ན་རྣམ་པར་རྟོག་པ་ལྷག་
[221b.2]པར་ཞེན་པ་མེད་པའི་རང་བཞིན་ཡིན་ནོ། །དེའི་ཕྱིར་རྣམ་པར་རྟོག་པ་ནི་ལྷག་པར་ཞེན་པ་ཡིན་པ་དེ་ཡང་སྔོན་པོའི་རྣམ་པ་རང་གི་བདག་ཉིད་ལ་སྔ་མ་དང་ཕྱི་མར་མཐོང་བའི་རང་བཞིན་དུ་ལྷག་པར་ཞེན་པ་ཇི་ལྟ་བུར་གྱུར་པ་ཉིད་དུ་ལྷག་པར་ཞེན་པ་དེ་ལྟ་བུའི་རྣམ་པ་བརྟགས་པ་ཡིན་
[221b.3]པར་བརྗོད་དོ། །སྔ་ཕྱིར་མཐོང་བའི་དོན་གྱི་རང་བཞིན་ཤེས་པའི་བདག་ཉིད་དུ་འགྱུར་བ་ནི་ཡོད་པ་མ་ཡིན་པས་ན། ཀུན་བརྟགས་པ་རྫས་སུ་མེད་པར་བརྗོད་དོ། །དེ་མེད་ཀྱང་མེད་པ་སྣང་བ་ནི་མ་ཡིན་ཏེ། ཞེན་པ་ནི་སྣང་བ་མེད་པའི་བདག་ཉིད་ཡིན་པའི་ཕྱིར་ཏེ་ཇི་སྐད་
[221b.4]བཤད་ཟིན་པ་བཞིན་ནོ། །འགའ་ཞིག་སྣང་བ་མེད་པར་ཡང་ལྷག་པར་ཞེན་པ་མི་འཇུག་པའི་ཕྱིར་རྣམ་པར་རྟོག་པའི་གཟུགས་བརྙན་དེ་ལྟ་བུ་ཁོ་ན་ལ་དོན་དུ་ལྷག་པར་ཞེན་པས་ཞེས་དེ་ལྟ་བུ་ཉིད་ཀྱིས་རང་གི་བདག་ཉིད་ཁོ་ན་ཡུལ་དུ་བརྗོད་པ་ཡིན་ནོ། །མགུ་བ་ཡང་ཤེས་
[221b.5]པའི་ཆོས་ཁོ་ན་སྟེ། ཤེས་པ་དེས་རང་གི་མཚན་ཉིད་མ་རྟོགས་ཀྱང་དེའི་གཟུགས་བརྙན་ལ་རང་གི་མཚན་ཉིད་དུ་ལྷག་པར་ཞེན་པའི་ཕྱིར་དེ་རྟོགས་པའི་དོན་དུ་ཐབས་གཞན་ཚོལ་བ་ལ་རྒྱབ་ཀྱིས་ཕྱོགས་པའོ། །དེས་ན་རྣམ་པ་དེ་ལྟ་བུའི་རང་གི་མཚན་ཉིད་ནི་དེ་ལྟར་ལྷག་
[221b.6]པར་ཞེན་པ་ཙམ་གྱིས་བརྗོད་པར་བྱ་བ་ཡིན་གྱི། གང་གི་ཕྱིར་ཐམས་ཅད་ལས་ལོག་པའི་རང་གི་ངོ་བོ་བརྗོད་པར་བྱ་བར་འགྱུར་བ་འམ། དེ་ལྟར་མ་ཡིན་ན་ནི་བརྗོད་པ་དོན་མེད་པ་ཉིད་དུ་འགྱུར་བ། དོན་དམ་པར་དེའི་ཡུལ་ཡིན་པའི་ཕྱིར་ནི་མ་ཡིན་ནོ། །དེས་ན་ཞེས་བྱ་བ་
[221b.7]ནི་གཏན་ཚིགས་དེས་ནའོ། །དེ་ལྟར་ཞེས་བྱ་བ་ནི། རང་གི་གཟུགས་བརྙན་ལ་རང་གི་མཚན་ཉིད་དུ་ལྷག་པར་ཞེན་པའི་མཚན་ཉིད་ཀྱི་རྣམ་པ་འདིས་ནི་རང་གི་མཚན་ཉིད་བསྟན་ཏོ་ཞེས་བརྗོད་དོ། །གང་གི་ཕྱིར་རང་གི་མཚན་ཉིད་དུ་ལྷག་པར་ཞེན་པའི་རང་བཞིན་གྱི་
[222a]
[222a.1]རྟོགས་པ་སྐྱེད་པ་དེའི་ཕྱིར་རང་གི་མཚན་ཉིད་བརྗོད་ཀྱི། རྣམ་པ་གཞན་གྱིས་ནི་མ་ཡིན་ནོ། །ཅིའི་ཕྱིར་རྣམ་པ་འདི་ཁོ་ནར་ཟད་ཀྱི། གཞན་མེད་ཅེ་ན་བཤད་པ། སྒྲའི་དོན་རྟོགས་པ་ནི་དེ་ལྟ་བུ་ཁོ་ན་ཡིན་པའི་ཕྱིར་རོ། །གང་གི་ཕྱིར་སྒྲ་ལས་དོན་རྟོགས་པ་
[222a.2]གང་ཡིན་པ་ནི་རང་གི་བདག་ཉིད་དེའི་རང་བཞིན་མ་ཡིན་པ་ལ་ཡང་དེ་ལྟར་ལྷག་པར་ཞེན་པས་འཇུག་པ་དེ་ལྟ་བུ་ཁོ་ན་ཡིན་པ་དེའི་ཕྱིར་རྣམ་པ་འདི་ཁོ་ན་ཡིན་ནོ། །རྣམ་པ་གཞན་མེད་པ་ཉིད་བཤད་པ་ནི་རང་གི་ངོ་བོས་སྣང་བ་ནི་ཞེས་བྱ་བའོ། །འདིར་ད་ནི་ཞེས་བྱ་བ་སྨྲས་ཏེ། དོན་
[222a.3]དམ་པར་ཐམས་ཅད་ལས་ལོག་པའི་ངོ་བོ་ཡུལ་དུ་མ་བྱས་པའི་ཕྱིར་གཅིག་བརྗོད་པས་ཀྱང་ཆོས་ཐམས་ཅད་བརྗོད་པར་ཐལ་བའི་ཉེས་པ་རྗེས་སུ་འབྲེལ་པ་མེད་མོད། དེ་ལྟར་ལྷག་པར་ཞེན་པ་ལ་ལྟོས་ནས་ནི་རང་གི་མཚན་ཉིད་ཁོ་ན་བརྗོད་པར་སྨྲས་ལ་དེ་ཡང་གཅིག་ཏུ་ལྡོག་པའི་
[222a.4]ངོ་བོ་ཉིད་ཀྱིས་ན་སྤྱིའི་རྣམ་པ་ཉིད་ག་ལ་ཡོད། དེ་ལྟ་ན་ཡང་དེ་བརྗོད་པ་སྤངས་ཏེ་སྤྱིའི་ཡུལ་ཅན་དུ་ཁས་ལེན་པ་ཇི་ལྟར་མི་འགལ་སྙམ་དུ་བསམས་པའོ། །འདི་ཉིད་སྟོན་པ་ནི་གཅིག་ཏུ་ལོག་པའི་ངོ་བོ་ཅན་རྣམས་ལ་ཞེས་བྱ་བའོ། །གཏན་ཚིགས་སྨྲས་པ་ནི་དེ་དག་ལ་འབྲེལ་
[222a.5]པའི་ཕྱིར་དང་ཞེས་བྱ་བའོ། །རང་གི་ངོ་བོ་མ་འབྲེལ་པས་ནི་ལྡོག་པ་ཉིད་དུ་གྲུབ་བོ། །གཅིག་ཏུ་ཞེས་བྱ་བའི་ཚིག་གི་དོན་སྨྲས་པ་ནི། གཞན་ཡང་མེད་པའི་ཕྱིར་རོ་ཞེས་བྱ་བའོ། །གལ་ཏེ་འདི་དག་ལ་གཞན་ཡོད་ན་ནི་རང་གི་ངོ་བོས་ལོག་པ་རྣམས་ཀྱང་དེའི་བདག་ཉིད་
[222a.6]ཀྱིས་འབྲེལ་པར་འགྱུར་བ་ཡིན་ན། དེ་མེད་པས་ན་གཅིག་ཏུ་ལོག་པ་ཉིད་དོ། །འདི་བཟློག་པའི་ཕྱིར་བཤད་པ་སྤྱི་ཇི་ལྟ་བུ་ཡིན་པ་ནི་བཤད་ཟིན་ཏེ་ཞེས་སྨོས་ཏེ། དེའི་བློ་ལ་དེ་ལྟར་སྣང་བའི་ཕྱིར་རོ་ཞེས་བྱ་བ་ལ་སོགས་པས་སོ། །དེར་ཡང་རྣམ་པ་གཉིས་བཤད་དེ། །དེའི་
[222a.7]བློའི་དབང་གིས་དེ་སྤྱིར་བརྗོད་ལ་དེ་ཡང་གཞན་སེལ་བའི་ཡུལ་ཅན་ཉིད་ཀྱིས་དེ་གཞན་སེལ་བའི་ངོ་བོ་ཡིན་པའོ། །དེ་ལ་བློའི་བསམ་པའི་དབང་གིས་སྤྱི་ཡིན་ནོ་ཞེས་བྱ་བ་འདི་ནི་ཐ་དད་དངོས་རྣམས་ཞེས་བྱ་བ་ལ་སོགས་པས་འདིར་རྒྱས་པར་འཆད་པར་འགྱུར་བའི་ཕྱིར་བཤད་ཟིན་
[222b]
[222b.1]པ་རྣམས་ཀྱིས་བསྟན་པ་མ་ཡིན་གྱི། འོན་ཀྱང་གཞན་སེལ་བའི་ཡུལ་ཅན་ཉིད་དོ་ཞེས་སྟོན་པར་བྱེད་དོ། །མ་འདྲེས་པ་རྣམས་ཀྱི་ཞེས་བྱ་བ་ནི་ཁྲ་བོ་ལ་སོགས་པ་ངང་པ་ལ་སོགས་པའི་གསལ་བ་རྣམས་དང་མ་འདྲེས་པའོ། །དེ་ལ་གཅིག་ཀྱང་ཐམས་ཅད་དང་མ་འབྲེལ་པ་
[222b.2]ཡིན་ནོ། །ཐམས་ཅད་ཀྱང་གཅིག་དང་ངོ་། །དེ་ལ་ཐམས་ཅད་གཅིག་དང་མ་འབྲེལ་པ་ལ་ལྟོས་ནས་ནི་སྤྱི་རྣམ་པར་འཇོག་གོ། །འདི་ལྟར་ཁྲ་བོ་ལ་སོགས་པའི་ཁྱད་པར་མཐའ་དག་རྟ་དང་མ་འདྲེས་པ་ཡིན་ནོ། །དེས་ན་ཁྲ་བོ་ལ་ཡང་རྟ་མེད་ལ། སེར་སྐྱ་ལ་ཡང་མེད་ཅིང་
[222b.3]དེ་བཞིན་དུ་གསལ་བ་གཞན་དག་ལ་ཡང་ངོ་། །རྟ་མ་ཡིན་པའི་གསལ་བ་སོ་སོ་ལ་རྟ་ཞེས་སོ་སོ་རེ་རེ་ལ་མེད་པའི་ཕྱིར་རོ། །བ་ལང་རྣམས་ཀྱི་རྟ་དང་མ་འབྲེལ་བ་ནི་སྤྱིར་འགྱུར་ཏེ། རེ་རེ་ལ་དེ་མེད་པའི་ཕྱིར་རོ། །དེ་བཤད་པ་ནི་མ་འདྲེས་པ་རྣམས་ཀྱི་ཞེས་བྱ་བའོ། །གཅིག་
[222b.4]པོ་དེ་དང་ཐ་དད་པ་རྣམས་ལ་ནི་ཇི་སྐད་བཤད་པའི་ཚུལ་གྱིས་ནི་གཅིག་དང་མ་འབྲེལ་པ་སྤྱིའི་ཆོས་ཡིན་པའི་ཕྱིར་རོ། །དེ་ལྟ་ན་ཡང་ལྡོག་པ་སྤྱིར་འགྱུར་བ་ནི་མ་ཡིན་ཏེ། ཁྲ་བོ་ལ་སོགས་པ་ལ་སོ་སོར་བ་ལང་མ་ཡིན་པ་ལ་མེད་པས་སྤྱིར་བརྗོད་ཀྱི་འགའ་ཞིག་ཡོད་པའི་ཕྱིར་ནི་
[222b.5]མ་ཡིན་ནོ། །བ་ལང་མ་ཡིན་པ་ཞེས་རེ་རེ་ལ་མེད་པ་ཡིན་གྱི། འགའ་ཞིག་བདོག་པ་ནི་མ་ཡིན་ནོ། །དེ་ཉིད་ཀྱི་ཕྱིར་དེ་ལྟ་བུའི་ལྡོག་པ་སྤྱིར་རྟོགས་པའི་ས་བོན་ཡིན་ནོ་ཞེས་སྔར་བསྟན་པ་མདུན་དུ་སྒྲུབ་པར་འགྱུར་རོ། །དེ་ལས་ཐ་དད་པ་རྣམས་གཅིག་དང་མ་འབྲེལ་པར་
[222b.6]མཚུངས་པ་ནི་སྤྱི་ཡིན་ནོ་ཞེས་བྱ་བའི་དོན་ཏོ། །མ་འབྲེལ་པ་ནི་འབྲེལ་པ་མེད་པ་ཙམ་ཡིན་པས་ཇི་ལྟར་དངོས་སུ་སྤྱི་ཡིན་པར་འགྱུར། དེས་ན་རྟོགས་པ་པོའི་བསམ་པ་ལ་ལྟོས་ནས་དེ་དེ་ལྟར་བརྗོད་པ་ཡིན་ནོ། །བཤད་ཟིན་པ་ཉིད་རྒྱས་པར་སྒྲུབ་པའི་ཕྱིར་གཞན་ཡང་
[222b.7]ཞེས་སྨོས་སོ། །བློ་གང་གིས་རང་གི་ངོ་བོས་གཞན་གྱི་ངོ་བོ་སྒྲིབ་པར་བྱེད་པ་དེའི་ལྷག་པར་ཞེན་པ་ལ་བརྟེན་ནས་སྤྱི་ཡོད་པར་ནི་རབ་ཏུ་བསྒྲགས་སོ། །རང་གི་མཚན་ཉིད་ཀྱང་ཞེན་པ་ལ་ལྟོས་ནས་སྒྲའི་དོན་ཉིད་དང་དེ་བཞིན་དུ་རྗེས་སུ་དཔག་པའི་ཡུལ་ཉིད་ཡིན་པ་ན། སྤྱི་
[223a]
[223a.1]སྒྲའི་དོན་ཉིད་དང་རྗེས་སུ་དཔག་པར་བྱ་བ་ཉིད་ལ་སོགས་པར་བརྗོད་པ་གང་ཡིན་པ་དེ་ནི་སྤྱི་ཡོད་པར་བསྒྲགས་པ་ཡིན་ལ་དེ་ཡང་རང་གི་ངོ་བོས་གཞན་གྱི་ངོ་བོ་སྒྲིབ་པར་བྱེད་པའི་བློའི་བསམ་པའི་དབང་གིས་ཡིན་ནོ། །དོན་གཞན་དུ་གྱུར་པ་ཡིན་ཡང་གང་
[223a.2]གིས་རང་གི་རང་བཞིན་དང་རྗེས་སུ་མཐུན་པར་རང་གི་ངོ་བོ་སྒྲོ་བཏགས་ནས་སྟོན་པར་བྱེད་པའི་བློ་དེས་རང་གི་ངོ་བོས་གཞན་གྱི་ངོ་བོ་བསྒྲིབས་པར་བརྗོད་པ་ཡིན་ནོ། །བློ་ལ་ལྟོས་པའི་གཞན་གྱི་ངོ་བོ་ནི་ཕྱིའི་དོན་ཉིད་དོ། །དེ་ཡང་རང་གི་ངོ་བོ་བསྒྲིབ་པ་ཉིད་ཀྱི་ཕྱིར་གཞན་དུ་གྱུར་པ་དེ་ལ་དེ་ལྟ་བུར་
[223a.3]གྱུར་པའི་རང་གི་ངོ་བོ་སྒྲོ་འདོགས་པར་བརྗོད་པ་ཡིན་ནོ། །དོན་གཞན་ཉིད་དུ་གྱུར་པ་ལ་སྒྲོ་བཏགས་པ་གང་ཡིན་པ་འདིའི་རང་གི་ངོ་བོ་ཇི་ལྟར་གྱུར་པ་ཡིན་ཞེ་ན། དོན་གཅིག་ཏུ་ནི་སྣང་བ་ཞེས་གསུངས་སོ། །འདིས་ནི་བློའི་ངོ་བོ་ཐ་མི་དད་པ་ཉིད་དུ་བརྗོད་པ་ཡིན་ནོ། །དངོས་
[223a.4]རྣམས་ལ་ཞེས་བྱ་བ་མང་པོའི་ཚིག་གིས་ནི་འདི་དག་ཕན་ཚུན་ཐ་དད་པ་ཉིད་བརྗོད་དོ། །ཐ་དད་ཅེས་བྱ་བས་ནི་རིགས་མི་མཐུན་པ་ལ་ལྡོག་པ་ཉིད་དོ། །འདིའི་དེ་དག་ལ་བརྟེན་པ་ནི་ཇི་ལྟར་སྔར་བཤད་པའི་ཚུལ་གྱིས་དེ་ལྟར་ལྷག་པར་ཞེན་པ་ཉིད་ཀྱི་ཕྱིར་རོ། །དེའི་དོན་
[223a.5]འདི་ཡིན་ཏེ། བ་ལང་གི་ངོ་བོ་ཕན་ཚུན་ཐ་དད་པ་བ་ལང་གི་གསལ་བ་ཐ་དད་པ་དག་ཁོ་ན་ལ་བ་ལང་སྙམ་པའི་རྣམ་པར་རྟོག་པ་བ་ལང་གི་རང་བཞིན་ཐ་མི་དད་པར་སྣང་བའི་རྣམ་པ་ཅན་སྐྱེས་ལ། དེ་ཡང་དོན་གྱི་ངོ་བོར་ལྷག་པར་ཞེན་པའི་ཕྱིར་ན་དེས་དོན་བསྒྲིབས་པར་འགྱུར་
[223a.6]རོ། །ད་ནི་དེའི་བསམ་པའི་དབང་གིས་སྤྱིར་ཇི་ལྟར་ཁས་བླངས་པ་དེ་སྟོན་ཏེ། རང་གི་ངོ་བོས་གཞན་གྱི་ངོ་བོ་སྒྲིབ་པའི་ངོ་བོ་ཀུན་རྫོབ་དེས་དངོས་པོ་རྣམས་བདག་ཉིད་ཐ་དད་ཀྱང་ཐ་དད་པ་ཉིད་བསྒྲིབས་པའི་དངོས་པོ་རྣམས་བ་ལང་ཉིད་ལ་སོགས་པའི་ངོ་བོས་ཐ་དད་པ་མིན་
[223a.7]པ་ལྟ་བུར་སྣང་ངོ་། །བློའི་ངོ་བོས་གཞན་གྱི་ངོ་བོ་བསྒྲིབས་པའི་ངོ་བོ་ཉིད་ཀྱིས་ན། དངོས་པོ་རྣམས་ཐ་དད་པ་ཡིན་ཡང་ཐ་དད་པ་མེད་པར་བསལ་བ་ན། བློ་དེ་ལ་ལྟོས་ནས་སྤྱིར་ཐ་སྙད་བྱེད་དོ་ཞེས་བྱ་བའི་དོན་ཏོ། །འཁྲུལ་པའི་དབང་གིས་ཐ་དད་པ་རྣམས་ཀྱང་ཐ་དད་པར་
[223b]
[223b.1]སྣང་བའི་ཕྱིར་དེ་ལ་ལྟོས་ནས་སྤྱི་ཡུལ་དུ་བསྟན་པ་ཡིན་ནོ་ཞེས་བྱ་བ་ཉིད་བརྗོད་པར་བྱ་བ་མ་ཡིན་ནམ། རང་གི་ངོ་བོར་གཞན་གྱི་ངོ་བོ་བསྒྲིབས་པར་བརྗོད་པ་དོན་ཅི་ཡོད། ཇི་ལྟར་དོན་མེད། གང་གི་ཕྱིར་འཁྲུལ་པའི་ངོ་བོ་ཡང་བརྗོད་པར་བྱ་བ་ཉིད་དེ། ཇི་ལྟར་འདི་ཐ་དད་པ་ཐ་
[223b.2]མི་དད་པར་རྟོགས་པར་བྱེད། ཐ་མི་དད་པའི་རང་བཞིན་དེ་གལ་ཏེ་ཕྱི་རོལ་ན་མེད་ན་འོ་ན་བསལ་བ་དེ་གང་ཞིག་ཅེས་བརྗོད་པར་བྱ་བ་ན། དོན་གཅིག་ཏུ་ནི་སྣང་བའི་བློ། །ཞེས་བྱ་བས་དེ་བློའི་ངོ་བོར་བཤད་པ་ཡིན་ནོ། །བློ་ཉིད་རྣམ་པ་དེ་ལྟ་བུར་གྱུར་པ་ན་དོན་ཐ་དད་པ་མེད་པར་སྣང་
[223b.3]ངོ་ཞེས་བྱ་བ་འདི་ག་ལས་ཤེ་ན། བློའི་རང་གི་ངོ་བོ་ཉིད་དོན་དུ་མངོན་པར་ཞེན་པའི་ཕྱིར་ཏེ། དེ་ཐ་དད་པ་མེད་པར་གསལ་བ་ན། དོན་ཐ་དད་པ་མེད་པར་སྣང་ངོ་ཞེས་རྟོགས་པའི་ཕྱིར་རོ། །སྤྱི་དེ་ཡང་དོན་ཉིད་མཚུངས་པ་ཡིན་ནོ་ཞེས་རང་བཞིན་འདིས་བློས་ཇི་ལྟར་ཀུན་བརྟགས་
[223b.4]པ་དེ་ལྟར་དེ་དམ་པའི་དོན་དུ་མེད། དེ་དག་ནི་རང་བཞིན་ཐ་དད་པའི་ཕྱིར་རོ། །རེ་ཞིག་ཚིགས་སུ་བཅད་པ་དང་པོ་རྣམ་པར་འགྲེལ་པ་བཤད་པ་ནི། རྣམ་པར་རྟོག་པ་ཅན་གྱི་བློ་ནི་ཞེས་བྱ་བའོ། །ཁྲ་བོ་ལ་སོགས་པ་དེ་དག་ལས་གཞན་པ་རྟ་ལ་སོགས་པ་དེ་ལས་ལྡོག་པ་ཅན་
[223b.5]ཏེ། ཁྲ་བོ་ལ་སོགས་པ་ཉིད་དོ། །འདིས་ནི་ལོག་པ་ཉིད་བརྗོད་དོ། །རྣམ་པར་རྟོག་པ་ནི་དེ་ལྟ་བུར་གྱུར་པའི་དངོས་པོ་རྣམས་ལ་བརྟེན་ནས་སྐྱེ་བ་ཡིན་ནོ། །བརྟེན་པ་ཡང་ཇི་སྐད་བརྗོད་པ་བཞིན་ལྷག་པར་ཞེན་པའི་དབང་གིས་སམ་ཡང་ན་ཉམས་སུ་མྱོང་བས་ཆོས་པས་
[223b.6]རྒྱུ་ཉིད་དུ་འཛིན་པའི་རྣམ་པ་རྟོག་པ་ནི་དངོས་པོ་ཉམས་སུ་མྱོང་བའི་འདུ་བྱེད་ཀྱི་རྗེས་སུ་འབྲངས་ནས་སྐྱེ་བའི་ཕྱིར་དངོས་པོ་ལ་བརྟེན་པ་ཡིན་ནོ། །དངོས་པོ་དེ་དག་གི་ངོ་བོ་ཐ་དད་པ་མི་སྣང་བར་བྱས་ནས་དངོས་པོ་དེ་རྣམས་ཀུན་དུ་སྟོན་ཏོ། །ཇི་ལྟར་ཐ་དད་པར་མི་སྣང་བར་བྱེད་ཅེ་ན།
[223b.7]འདྲེས་པར་བྱེད་པ་སྟེ་དངོས་པོ་རྣམས་སྲེ་བར་བྱེད་པས་ནའོ། །དེ་ཡང་ཇི་ལྟར་ཞེ་ན། བདག་ཉིད་ཀྱི་རྣམ་པ་ཐ་མི་དད་པ་ཞེན་པར་བྱས་ཏེའོ། །དེ་དོན་ཉིད་དུ་ལྷག་པར་ཞེན་པར་བྱས་པ་ན་དོན་བཞིན་དུ་བྱས་པར་འགྱུར་བའི་ཕྱིར་ན། དོན་དེ་ཉིད་དུ་ལྷག་པར་ཞེན་པ་ཉིད་དོན་ལ་ལྷག་
[224a]
[224a.1]པར་ཞེན་པ་ཡིན་ནོ། །དེས་ན་དོན་འདི་ཡིན་ཏེ་བདག་ཉིད་ཀྱི་ཐ་མི་དད་པ་ལ་དོན་དུ་ལྷག་པར་ཞེན་པས་དོན་ཐ་མི་དད་པར་ཞེན་པར་བྱས་པར་འགྱུར་བ་དེས་ན་འདི་དག་འདྲེས་པར་བྱས་པ་ཡིན་ནོ། །གལ་ཏེ་རྣམ་པར་རྟོག་པ་རྣམས་དོན་ཉམས་སུ་མྱོང་
[224a.2]བའི་འདུ་བྱེད་ལ་རྟོགས་པ་ཉིད་ཀྱིས་དོན་ལ་བརྟེན་པ་ཡིན་ན། ཉམས་སུ་མྱོང་བ་ཇི་ལྟ་བ་བཞིན་དུ་དོན་དུ་སྣང་བའི་བདག་ཉིད་དུ་འགྱུར་རོ། །རང་གི་བག་ཆགས་ཀྱི་རང་བཞིན་རྗེས་སུ་འགྲོ་བ་ཡིན་ན་ཡང་དོན་ལ་བརྟེན་པ་ཉིད་ཉམས་པར་འགྱུར་ཏེ། ཕན་ཚུན་འགལ་བའི་
[224a.3]ཕྱིར་རོ། །ཆ་དང་རྗེས་སུ་འབྲེལ་པ་མ་ཡིན་པའི་ཕྱིར་ན་ཉམས་སུ་མྱོང་བ་ལས་ནི་དོན་དུ་སྣང་བ་ཉིད་ཡིན་ལ་རང་གི་བག་ཆགས་ལས་ནི་ཕྱིན་ཅི་ལོག་ཏུ་ཡིན་ནོ་ཞེས་ཀྱང་བརྗོད་པར་མི་ནུས་སོ་ཞེས་དོགས་པ་ལ། བསྒྲུབ་པར་བྱ་བ་དང་ཞེས་སྨོས་སོ། །བསྒྲུབ་པར་བྱ་བ་གཅིག་
[224a.4]པ་ཉིད་ཀྱིས་ཞེས་བྱ་བ་ནི་བཞོ་བ་དང་དགལ་བ་ལ་སོགས་པའི་བསྒྲུབ་པར་བྱའོ། །གལ་ཏེ་གསལ་བ་སོ་སོའི་བཞོ་བ་ཐ་དད་པ་མ་ཡིན་ནམ་ཞེ་ན། བདེན་ཏེ། འདི་ནི་བཞོ་བ་ཉིད་དུ་གྱུར་པ་ན་ཐ་དད་པ་ཡིན་གྱི་ཆུ་འཆུ་བ་ཉིད་ཡིན་པས་ནི་མ་ཡིན་པས་ཐ་མི་དད་པར་བརྗོད་དོ། །དེ་
[224a.5]བཞིན་དུ་བ་ལང་གི་མཚན་ཉིད་ཀྱི་དངོས་པོ་གཅིག་གིས་སྒྲུབ་པའི་ཕྱིར་སྒྲུབ་པ་གཅིག་པ་ཡིན་ཏེ། བ་ལང་ཐམས་ཅད་བ་ལང་གིས་སྒྲུབ་པ་ཡིན་པའི་ཕྱིར་སྒྲུབ་པ་གཅིག་པ་ཅན་ཉིད་ངེས་སོ། །བ་ལང་གི་གསལ་བ་རེ་རེ་ཞིང་སྐྱེད་པར་བྱེད་པའི་བ་ལང་ཐ་དད་པ་ཡིན་ཡང་བ་ལང་
[224a.6]ཉིད་དུ་གྱུར་པས་ཐ་དད་པའི་ཕྱིར་ཐ་མི་དད་པར་བརྗོད་དེ་སྔ་མ་བཞིན་ནོ། །དེས་ན་དོན་འདི་ཡིན་ཏེ་བཞོ་བ་དང་བཀལ་བའི་ནུས་པ་རེ་རེ་ལ་ཕན་ཚུན་རྗེས་སུ་འགྲོ་བ་མེད་པ་ཡོད་པའི་ཕྱིར་རོ། །འདི་ནི་ཉེ་བར་མཚོན་པ་ཡིན་ཏེ། ཇི་ལྟར་མདུན་ནས་འཆད་པ་བཞིན་དུ། འདི་
[224a.7]དག་ལ་རྗེས་སུ་འགྲོ་བ་མེད་པའི་བ་ལང་ཉིད་ཀྱང་ཡོད་པ་མ་ཡིན་ནོ། །དེའི་ཕྱིར་བ་ལང་ངོ་སྙམ་པའི་རྟོགས་པ་བྱེད་པ་ཉིད་ཡིན་ལ། དེ་ལྟ་ཡིན་ན་ཡང་མི་འདྲ་བར་མ་རྟོགས་པའི་ཕྱིར་རྟོགས་པ་ཐ་མི་དད་པའི་ཡིན་ནོ། །དེས་ན་རྣམ་པར་རྟོག་པའི་ས་བོན་དང་ལྡན་པའི་རྣམ་པར་
[224b]
[224b.1]རྟོག་པ་མེད་པ་ལ། དོན་གྱི་རང་བཞིན་གནས་པ་ན་རྣམ་པར་རྟོག་པ་དེ་ལྟ་བུའི་རྣམ་པ་སྐྱེ་བའི་ཕྱིར་དངོས་པོ་ལས་སྐྱེ་བ་འདི་ཐ་དད་པ་མེད་པར་སྣང་བ་གང་ཡིན་པར་སྣང་བ་འདི་ནི་དངོས་པོ་རྣམས་ཀྱི་རང་བཞིན་ཡིན་ནོ། །ཚིགས་སུ་བཅད་པ་གཉིས་པའི་དོན་ཉེ་བར་འགོད་པས་ཀུན་
[224b.2]རྫོབ་ཅེས་བྱ་བ་རྣམ་པར་འགྲེལ་ཏོ། །ཅིའི་ཕྱིར་འདི་རྣམ་པར་འགྲེལ་ཞེ་ན། ཀུན་རྫོབ་ཅེས་བྱ་བ་འདི་བློ་ཞེས་བྱ་བ་འདི་དང་འབྲེལ་པར་བརྟེན་པའི་ཕྱིར་ཏེ། གཞན་དུ་ན་ཀུན་རྫོབ་ཏུ་ཐ་དད་པ་མེད་པ་ཉིད་དུ་སྣང་ངོ་ཞེས་རྟོགས་པར་འགྱུར་རོ། །ཐ་མི་དད་པ་ནི་ཀུན་རྫོབ་ཀྱང་མ་ཡིན་
[224b.3]ཏེ། ཡོད་པར་ཐལ་བའི་ཕྱིར་རོ། །བརྟགས་པ་འདི་མེད་པ་ཉིད་དོ་ཞེས་དེ་ཕྱིར་དོན་ལ་གཅིག་བདག་ཏུ་འཛིན་པའི་རྣམ་རྟོག་འདི་འཁྲུལ་པ་ཞེས་འཆད་པར་འགྱུར་རོ། །རྣམ་པར་རྟོག་པའི་རྣམ་པ་ནི་ཡོད་ཀྱང་ཀུན་རྫོབ་མ་ཡིན་ཏེ་མི་འཐད་པ་མེད་པའི་ཕྱིར་མངོན་སུམ་གྱི་རྣམ་
[224b.4]པ་བཞིན་ནོ། །རྣམ་པར་ཤེས་པར་སྨྲ་བ་ལ་ནི་མངོན་སུམ་གྱི་རྣམ་པ་ཡང་ཀུན་རྫོབ་ཁོ་ནའོ། །བློ་ནི་འཁྲུལ་པའི་ཡུལ་བཞིན་དུ་མི་འཐད་པ་ཉིད་ཀྱིས་ཀུན་རྫོབ་ཏུ་མི་བརྗོད་དེ། དེས་ན་ཇི་ལྟར་གྲགས་པའི་ཀུན་རྫོབ་ཀྱི་དོན་སྤངས་ཏེ་འདི་བསྟན་པ་ཡིན་ནོ་ཞེས་སྟོན་པ་ནི་ཐ་མི་དད་
[224b.5]པ་བཞིན་དུ་སྣང་ངོ་ཞེས་བྱ་བའོ། །དེ་བཞིན་དུ་ཞེས་བྱ་བའི་སྒྲ་སྨོས་པ་ནི། དངོས་སུ་ཐ་མི་དད་པ་རིག་པ་མེད་པའི་ཕྱིར་རོ། །དེ་ལྟར་ཡང་སྟོན་པར་འགྱུར་རོ། །དེ་ནི་དེའི་བསམ་པའི་དབང་གིས་ན་ཞེས་བྱ་བ་འཆད་དོ། །དེ་བས་ན་ཞེས་བྱ་བ་ནི་དེའི་ཕྱིར་རོ། །རྗེས་
[224b.6]སུ་བྱེད་པ་རྣམས་ཀྱིས་བློའི་སྣང་བ་ལ་ཐ་མི་དད་པར་སྣང་བའི་དངོས་པོ་དེ་དག་ཁོ་ནའི་སྤྱི་ཡིན་པར་བརྗོད་དོ། །ཐ་མི་དད་པར་སྣང་བ་ན་ཡང་བློ་ལ་གནས་པ་ཐོབ་པར་འགྱུར་རོ་ཞེས་བཤད་པ་ནི། བློ་ལ་སྣང་བའི་ཞེས་བྱ་བས་སོ། །དེ་བློ་ལ་སྣང་བ་རྣམས་ཁོ་ནའི་སྤྱི་ཡིན་པ་ན་ཇི་ལྟར་
[224b.7]གཞན་གྱི་ངོ་བོས་རང་གི་ངོ་བོ་སྒྲིབ་པར་བརྗོད་པ་དེ་སྟོན་པ་ནི་ཕྱི་རོལ་ལྟ་བུར་ཀུན་དུ་འཕྲོ་བ་ཞེས་བྱ་སྟེ། ཕྱི་རོལ་ཉིད་དུ་ཞེན་པར་བྱས་པ་རྣམས་ཀྱི་ཞེས་བྱ་བའི་དོན་ཏོ། དེ་ཉིད་ཇི་ལྟར་ཞེ་ན། རྣམ་པའི་ཁྱད་པར་ཡོངས་སུ་འཛིན་པའི་ཕྱིར་ཞེས་སྨོས་སོ། །ཕྱིའི་དོན་གྱི་
[225a]
[225a.1]རྣམ་པའི་ཁྱད་པར་གྱི་མྱོང་བའི་ཕྱིར་དེ་རྣམ་པ་དེ་ལྟ་བུར་ཤེས་པ་ལ་རྣམ་པའི་ཁྱད་པར་གསལ་བ་དོན་དུ་ལྷག་པར་ཞེན་པའི་རང་བཞིན་སྐྱེ་བར་འགྱུར་རོ། །གལ་ཏེ་བློའི་བསམ་པ་ལ་ལྟོས་ནས་སྤྱི་ཡིན་ན། གཞན་སེལ་བ་སྤྱིའི་རང་བཞིན་དུ་བརྗོད་པ་
[225a.2]འགལ་ལོ་ཞེས་བརྟན་པའི་ཕྱིར་ཕ་རོལ་པོ་དག་ནི་ཞེས་བརྗོད་དོ། །ལན་བཤད་པ་དེ་ཉིད་ཅེས་བྱ་བ་སྟེ། བློའི་སྣང་བ་ཉིད་གཞན་སེལ་བ་ཡིན་ནོ། །ཇི་ལྟར་བློའི་སྣང་བ་ཉིད་གཞན་སེལ་བ་ཡིན། གང་གི་ཕྱིར་རྟོགས་པ་པོ་སྒྲོ་བཏགས་ཀྱང་རང་བཞིན་དང་གཅིག་ཏུ་འགྱུར་
[225a.3]བའི་དོན་གཞན་ལས་ལོག་པར་འགྱུར་བ་དེས་ན་དེ་ཉིད་གཞན་སེལ་བ་ཡིན་ནོ། །དེས་ན་ཇི་ལྟར་རྣམ་པར་རྟོག་པའི་སྣང་བ་གཞན་སེལ་བ་ཉིད་ཡིན། དེ་ལ་ནི་སྒྲོ་བཏགས་པ་བསལ་བ་སྔོན་དུ་འགྲོ་བ་ཅན་གྱི་གཞན་ལས་ལོག་པ་ཉིད་ཡོད་པ་མ་ཡིན་ནོ། །སྒྲོ་འདོགས་ནི་
[225a.4]དོན་ཉིད་ལ་འཇུག་པའི་ཕྱིར་ཏེ། བློའི་སྣང་བ་ལ་ནི་མ་ཡིན་ནོ། །དེ་བཟློག་པའི་ཕྱིར། དེ་ནི་དེ་ཁོ་ན་ཞེས་སྨོས་སོ། །རང་གི་སྣང་བ་ཉིད་རྟོགས་པ་ན་བློ་འཁྲུལ་པའི་དབང་གིས་དངོས་པོ་འཛིན་པ་ལྟ་བུར་སྣང་སྟེ། རང་གི་བདག་ཉིད་ཁོ་ན་ལ་དངོས་པོར་ལྷག་པར་ཞེན་ནས་
[225a.5]འཇུག་པའི་ཕྱིར་རོ། །དེའི་ཕྱིར་རང་གི་བདག་ཉིད་ཀྱི་སྣང་བ་འཛིན་པ་ན་དངོས་པོ་འཛིན་པ་བཞིན་དུ་སྣང་བའི་ཕྱིར་དེ་ལ་ལྟོས་ནས་དེ་དངོས་པོ་ཡིན་ལ། དངོས་པོ་ལ་སྒྲོ་འདོགས་པའི་ཕྱིར་ནི་གཞན་གྱིས་དབེན་པ་ཡིན་པས་དེ་བས་ན་དེ་འཛིན་པ་ན་གཞན་སེལ་བའི་ཡུལ་
[225a.6]ཅན་ཉིད་དོ། །དེས་ན་སྣང་བ་དངོས་པོ་ལྟ་བུར་སྣང་བའི་ཕྱིར་དེ་དངོས་པོ་ཉིད་ཡིན་པས་ན། དངོས་པོ་གཞན་སེལ་བ་ཉིད་དེ། གཞན་གྱིས་དབེན་པའི་ཕྱིར་རོ། །དེས་ན་བློ་གཞན་སེལ་བའི་བློ་ཉིད་ཡིན་པས་ན་གཞན་སེལ་བ་སྤྱིའི་ངོ་བོ་ཉིད་དུ་རིགས་པ་ཁོ་ནའོ། །དེ་བཤད་
[225a.7]པ་ནི། དེ་ནི་ཞེས་བྱ་བ་ཡིན་ནོ། །དེས་ནི་དེ་ལྟར་རྟོགས་པའི་བསམ་པ་ལ་ལྟོས་ནས་བློའི་སྣང་བ་ཉིད་སྤྱིའི་རང་བཞིན་དུ་བཤད་པ་ཡིན་ཏེ། དེ་དག་གིས་སྤྱིར་རྟོགས་པ་དེ་ལྟར་ཁས་བླངས་པའི་ཕྱིར་རོ། །རང་གི་སྣང་བ་ཉིད་དེ་ལྟར་སྣང་བའི་ཕྱིར་དེ་ཉིད་སྤྱི་ཡིན་ནོ། །དེ་ཡང་གཞན་སེལ་བའི་རང་
[225b]
[225b.1]བཞིན་ཡིན་ཏེ། སྒྲོ་འདོགས་དང་བྲལ་བར་གྱུར་པ་གཞན་གྱིས་དབེན་པ་གང་ཡིན་པ་དེའི་ཡུལ་ཅན་ཉིད་ཀྱིས་ན་བློ་འདི་གཞན་སེལ་བའི་ཡུལ་ཅན་ཡིན་པའི་ཕྱིར་རོ། །དེ་ཡང་དོན་ཁོ་ན་ལ་རང་གི་སྣང་བ་ཡང་དོན་བཞིན་དུ་སྣང་བའི་ཕྱིར་རོ། །དེ་ལ་དངོས་པོ་བཞིན་དུ་སྣང་བའི་
[225b.2]ཕྱིར་དེ་འཛིན་པའི་བློ་དངོས་པོ་འཛིན་པ་ཉིད་དུ་རྟོགས་པའི་ཕྱིར་དངོས་པོ་ཉིད་མ་རྟོགས་པ་ན། གཞན་དག་རྩོད་པར་བྱེད་པ་ནི་ཕྱི་རོལ་ཞེས་བྱ་བའོ། །དེ་ལ་གཞན་གྱིས་དབེན་པའི་དངོས་པོ་རྣམས་ལ་རང་སྣང་བའི་ཡུལ་ཅན་གྱི་བློ་ཡོད་པར་མ་གྲུབ་སྟེ། གང་གི་ཕྱིར་
[225b.3]ཕྱི་རོལ་གྱི་དོན་ཉིད་སྒྲོ་འདོགས་དང་བྲལ་བ་ལས་དབེན་པར་གྱུར་པ་ཡིན་ན་དེ་དག་ལ་ནི་རྣམ་པར་རྟོག་པ་རྣམས་མི་འཇུག་སྟེ། དེས་ན་གང་གི་ཐ་དད་པའི་ཡུལ་ཅན་དུ་གྱུར་པ་ཐ་དད་པ་རྣམས་ལ་བློ་འདི་ཇི་ལྟར་འཇུག་པར་འགྱུར་ཞེ་ན། འདི་བསལ་བའི་ཕྱིར་བཤད་པ། འཆད་
[225b.4]པར་བྱེད་པ་རྣམས་ཞེས་སྨོས་སོ། །གང་དག་དངོས་པོའི་རང་བཞིན་དངོས་པོ་ཉིད་ལས་རྟོགས་ནས་འཆད་པར་བྱེད་པ་དེ་དག་དེ་ལྟར་རྣམ་པ་འབྱེད་དེ། འདི་ལྟ་སྟེ་ཕྱི་རོལ་དག་ལ་རྣམ་པར་རྟོག་པ་མི་འཇུག་གོ་ཞེས་བྱ་བར་རོ། །ཐ་སྙད་འདོགས་པར་བྱེད་པ་རྣམས་ནི་མ་ཡིན་ཏེ་
[225b.5]དེ་དག་ལ་ནི་དངོས་པོའི་རང་བཞིན་རྣམ་པར་དཔྱད་པས་བསྐྱེད་པའི་རྣམ་པར་འབྱེད་པའི་གནས་སྐབས་འགའ་ཡང་མེད་དོ། །དེ་དག་ལ་ནི་གང་ལ་ཇི་ལྟར་རྟོགས་པ་དེ་ལ་དེ་ལྟར་རྟོགས་པ་ལས་མ་རྟོགས་པའི་རྣམ་པར་དཔྱོད་པ་འགའ་ཡང་མེད་དོ། །དེ་དག་ལ་ཡང་
[225b.6]དཔྱོད་པ་འགའ་ཞིག་ཡོད་པ་ཡང་ཡིན་ཏེ། འདི་ལྟར་འདིར་བ་ལང་ཡོད་པའི་རང་བཞིན་ཡང་ཡིན་ལ་མེད་པའི་རང་བཞིན་ཡང་ཡིན་ནོ་ཞེས་སྨྲས་པ་ན། དམུན་པོ་ཡང་གལ་ཏེ་ཡོད་པ་ཁོ་ན་ཡིན་ན། ཇི་ལྟར་མེད་པ་ཡིན་ཞེས་རྣམ་པར་རྟོག་པར་བྱེད་དོ། །འདི་དག་ཤེས་རབ་
[225b.7]ཕུལ་དུ་བྱུང་བས་ཐོབ་པར་བྱེད་པ་དེ་ལྟར་ནི་རྣམ་པར་དཔྱོད་པར་མི་བྱེད་དོ། །ཐ་སྙད་འདོགས་པར་བྱེད་པ་དེ་དག་ནི་སྣང་བ་དག་རྣམ་པར་རྟོག་པར་བྱ་བའི་དོན་དག་གཅིག་ཏུ་བྱས་ནས་འཇུག་གོ་ཞེས་བྱ་བ་ཐ་སྙད་དུ་བྱེད་དོ། །དེ་དག་གཅིག་ཏུ་བྱེད་པ་གང་ཞེ་ན། རང་གི་དམིགས་
[226a]
[226a.1]པ་ཁོ་ན་ཞེས་སྨོས་ཏེ། བདག་ཉིད་ཀྱི་དམིགས་པ་བདག་ཉིད་ཀྱི་རྣམ་པར་རྟོག་པས་རྟོགས་པའི་རང་བཞིན་ཏེ། དེ་ཡང་བདག་ཉིད་ཀྱི་སྣང་བ་སྟེ་འདིས་ནི་རྣམ་པར་བརྟག་པར་བྱ་བར་བརྗོད་དོ། །དེ་ལ་དོན་བྱེད་པར་རུང་བར་སེམས་ཤིང་སྟེ། འདིས་ནི་མཐོང་
[226a.2]བ་དང་གཅིག་ཏུ་བྱེད་པར་བརྗོད་དོ། །དངོས་སུ་སྣང་བ་ལས་རྣམ་པར་བརྟག་པར་བྱ་བ་གཞན་ཡིན་ཡང་འདི་ལ་སྣང་བ་ཉིད་དུ་ངེས་པ་གང་ཡིན་པ་དེ་ཉིད་སྣང་བ་དང་རྣམ་པར་བརྟག་པར་བྱ་བའི་དོན་དག་གཅིག་ཏུ་བྱས་པ་ཡིན་གྱི། དེ་ལྟར་རྣམ་པར་བརྟག་པར་བྱ་བ་མཐོང་བ་ཉིད་
[226a.3]དུ་བྱས་པས་གཅིག་ཏུ་བྱས་པར་ནི་མི་བརྗོད་དོ། །འོན་ཀྱང་སྣང་བ་ཉིད་དུ་ངེས་པས་སྣང་བ་ལྟ་བུར་བསྒྲུབ་པ་ལ་བརྗོད་དོ། །དེའི་དེ་ཡང་འཇུག་པ་ཉིད་ལས་ཤེས་པས་ནི་འཇུག་གོ་ཞེས་བརྗོད་དོ། །འདི་ལྟར་དོན་མི་སྣང་བཞིན་དུ་ཡང་དོན་གྱིས་བསྒྲུབ་པར་བྱའི་དགོས་པ་
[226a.4]དོན་དུ་གཉེར་བར་འཇུག་པ་ནི། དོན་ལས་བཟློག་པ་དེ་ལ་དོན་དུ་ལྷག་པར་ཞེན་པ་མེད་པར་མི་སྲིད་དོ། །དེ་ལྟ་ན་ཡང་ཕྱི་རོལ་རྣམ་པ་ཐ་དད་པ་ལ་ཞེས་བརྩད་པ་ཇི་ལྟར་སྤང་བར་འགྱུར་བ་དེ་བསྟན་པའི་ཕྱིར་དེ་དག་གི་ཞེས་སྨོས་སོ། །ཐ་སྙད་པའི་བསམ་པའི་
[226a.5]དབང་གིས་དེ་སྐད་ཅེས་བརྗོད་དོ། །ཇི་སྐད་བརྗོད་པ་སྟོན་པར་བྱེད་པ་ནི། དེ་བཞིན་དུ་ཞེས་བྱ་བ་དེ་བྱེད་པ་ཉིད་ཀྱི་དེ་བྱེད་པ་མ་ཡིན་པ་ལས་ཐ་དད་པའི་རྣམ་པ་དེ་ཉིད་ཀྱིས་ཏེ་རྒྱུར་གྱུར་པ་གང་དག་དེ་བྱེད་པ་མ་ཡིན་པ་དེ་དག་ལས་ཐ་དད་པ་རྣམས་ཏེ། དེ་བྱེད་པ་མ་ཡིན་
[226a.6]པའི་སྒྲོ་འདོགས་པ་དང་བྲལ་བ་དེ་དག་སྟོན་པར་བྱེད་དོ། །འདི་སྐད་བརྗོད་པ་ཡིན་ཏེ་དངོས་སུ་ན་རང་གི་མཚན་ཉིད་ཁོ་ན་དེ་བྱེད་པ་མ་ཡིན་པ་ལས་ཐ་དད་པ་ཡིན་པ་དེ་ལྟ་ན་ཡང་རྟོགས་པ་པོ་དེ་དག་གིས་དེ་ཉིད་རྣམ་པར་རྟོག་པའི་ཡུལ་ཡིན་པར་ཞེན་པའི་ཕྱིར་རོ། །ཡོངས་
[226a.7]སུ་རྟོགས་པར་བྱེད་པ་རྣམས་ལ་ཡང་ཐ་སྙད་བྱེད་པའི་ཆ་ཡོད་པས་ན་དེ་དག་གི་ཡོངས་སུ་རྟོགས་པ་ལས་ལངས་ཏེ། རྣམ་པར་རྟོག་པ་ཉིད་ཀྱི་དོན་ལ་འཇུག་པའི་ཕྱིར། སྒྲ་རྣམས་ཀྱི་དོན་གྱི་ཡུལ་ཅན་གྱི་ཐ་སྙད་མི་ལྡོག་གོ། དེ་བས་ན་རྣམ་པར་རྟོག་པའི་སྣང་
[226b]
[226b.1]བ་དོན་ཉིད་དང་། དོན་ཡང་རྣམ་པར་རྟོག་པའི་ཡུལ་ཡིན་པའི་ཕྱིར་གཞན་སེལ་བའི་སྤྱིའི་ངོ་བོ་ཉིད་དུ་འཐད་པ་ཡིན་ནོ། །དངོས་སུ་ནི་སྣང་བ་དང་རྣམ་པར་བརྟག་པར་བྱ་བ་དག་ཐ་དད་པ་ཁོ་ན་སྟེ། འདི་ལྟར་ཇི་ལྟར་སྣང་བ་ཉིད་དམིགས་པ་དེ་ལྟར་འདི་གསལ་བ་མ་ཡིན་ལ་གཞི་
[226b.2]མཐུན་པ་ལ་སོགས་པ་ཡང་མི་རུང་ངོ་། །དེ་ཉིད་སྟོན་པར་བྱེད་པ་ནི། དེ་ཁོ་ན་ཉིད་སེམས་པར་བྱེད་པ་རྣམས་ནི་ཞེས་བྱ་བ་ལ་སོགས་པའོ། །དེས་ན་དེ་ལྟར་ལྷག་པར་ཞེན་པ་ལ་ལྟོས་ནས་དོན་གྱི་ཡུལ་ཅན་ཉིད་ཡིན་པ་ན། སྤྱིའི་རང་བཞིན་ཉིད་ཀྱང་ཞེན་པ་ལས་ཡིན་
[226b.3]པར་ངེས་པར་བྱའོ། །གང་གི་ཚེ་ཞེན་པའི་དབང་གིས་དོན་འབྲེལ་པར་འགྱུར་བ་དེའི་ཚེ་དེ་ལ་ལྟོས་ནས་བློའི་སྣང་བ་སྤྱིའི་ངོ་བོར་འཐད་པ་ཡིན་ནོ། །དེ་ཉིད་ཀྱི་ཕྱིར་དོན་གྱི་ངོ་བོ་ཉིད་ཀྱིས་སྤྱི་ཞེས་འཆད་པར་འགྱུར་རོ། །འདིར་གལ་ཏེ་ཞེས་སྨྲས་ཏེ། དེ་ཁོ་ན་ཉིད་བསམ་པ་
[226b.4]ན་ནི་རྣམ་པར་རྟོག་པ་རང་གི་སྣང་བ་ཙམ་གྱི་ཡུལ་ཅན་དུ་བཤད་དོ། །གལ་ཏེ་ལྷག་པར་ཞེན་པ་ལ་ལྟོས་ནས་སྤྱིར་བརྗོད་ན་ནི། དེས་ན་རྟོགས་པ་པོའི་བསམ་པའི་རྗེས་སུ་ཡང་བྱེད་པ་ཡིན་ནོ། །ཁྱོད་ནི་རྟོགས་པ་པོའི་རྟོགས་པ་ལ་མི་ལྟོས་པ་ཁོ་ན་ཡིན་ནོ། །དེ་དག་ཀྱང་གལ་
[226b.5]ཏེ་དེ་རྟོགས་པའི་བསམ་པའི་རྗེས་སུ་ཡང་འཇུག་ན་ནི་གཞན་སེལ་བའི་སྤྱི་ཡིན་པར་མི་འགྱུར་ཏེ། གང་གི་ཕྱིར་དེ་ལྟར་རྟོགས་པ་ནི་མེད་དོ། །དོན་ལ་ལོག་པ་ཉིད་དུ་ཞེན་པ་ནི་མེད་དོ། །སྒྲོ་འདོགས་ཀྱི་དབེན་པ་ལ་ནི་འཇུག་པ་ཡིན་ནོ་ཞེས་བྱ་བ་ལ་སོགས་པའི་ཚུལ་ཁས་བླངས་
[226b.6]པ་མེད་པར་དགག་པ་ཙམ་གྱི་རང་བཞིན་ཁས་མ་བླངས་པའི་ཕྱིར་གཞན་སེལ་བ་མ་རྟོགས་པའི་ཉེས་པ་སྤངས་ཀྱང་རྟོགས་པའི་བསམ་པ་ཁས་ལེན་པ་ལ་ལྟོས་པར་ཐལ་བ་ཡིན་ནོ་ཞེ་ན། འདི་བསལ་བའི་ཕྱིར། དེ་ལྟར་མི་རྟོགས་པ་འབའ་ཞིག་ཏུ་མ་ཟད་ཀྱི་ཞེས་སྨོས་སོ། །
[226b.7]འདི་སྐད་བརྗོད་པ་ཡིན་ཏེ་རྟོགས་བཞིན་པའི་རང་བཞིན་ཐམས་ཅད་རྟོགས་པས་གྲུབ་པར་འགྱུར་བ་ནི་མ་ཡིན་ཏེ། རྟོགས་པའི་རང་བཞིན་གཞན་དུ་མི་སྲིད་པའི་དབང་གིས་འདིའི་རིགས་རྣམ་པར་གཞག་པ་གང་ཡིན་པ་དེ་རྟོགས་བཞིན་པའི་རང་བཞིན་ལས་ཕྱི་རོལ་དུ་གྱུར་པས་མི་
[227a]
[227a.1]སྲིད་པར་བརྗོད་པ་ནི་མ་ཡིན་ནོ། །གལ་ཏེ་དེ་ལྟར་གྱུར་ན་ནི་གཞན་སེལ་བའི་ཡུལ་ཅན་གྱི་ཕྱོགས་ལ་ཇི་ལྟར་ལོག་པར་རྟོགས་པ་མེད་པའི་ཕྱིར་དེ་སྤྱིའི་ངོ་བོ་མ་ཡིན་པར་བརྗོད་པ་དེ་བཞིན་དུ། སྤྱི་ཁས་ལེན་པའི་ཕྱོགས་ལ་ཡང་ཐ་དད་པ་ལ་སོགས་པར་རྟོགས་
[227a.2]པ་མེད་དོ། །དེས་ན་གཞན་སེལ་བའི་རང་བཞིན་ལྟར་དེ་ཡང་འདོད་པར་མི་བྱའོ། །དེས་ན་འདི་ལྟར་འབྲེལ་པ་ཡིན་ཏེ། གཞན་སེལ་བའི་རང་བཞིན་དུ་མི་རྟོགས་པ་འབའ་ཞིག་ཏུ་མ་ཟད་ཀྱི་ཇི་སྲིད་དུ་ཐ་དད་པ་དང་ཐ་མི་དད་པ་ལ་སོགས་པར་ཡང་མི་རྟོགས་པ་ཉིད་དོ། །དེས་ན་
[227a.3]གལ་ཏེ་མ་རྟོགས་པའི་ཕྱིར་གཞན་སེལ་བ་མི་འགྱུར་ཞེས་ཟེར་ན། ཐ་དད་པ་ལ་སོགས་པའི་ངོ་བོར་ཡང་མི་འགྱུར་རོ། །དེ་ལྟར་མཚུངས་པ་ཉིད་བསྒྲུབས་ནས་ལན་འདེབས་པ་ནི་བློ་རྣམ་པ་ཐ་མི་དད་པ་ཅན་ཞེས་སྨོས་ཏེ་ཐ་མི་དད་པ་ཅན་དུ་སྣང་བའོ། །དེ་སྐྱེ་བ་ལ་གཅིག་གིས་
[227a.4]ནི་དེའི་ཡུལ་ཐ་མི་དད་པའི་བདག་ཉིད་ཅན་དངོས་པོར་ཡོད་པའི་སྤྱི་ཡིན་པར་བརྗོད་དོ། །དེ་ལྟར་དེ་ཡང་ཐ་མི་དད་པར་རྟོགས་པའི་རྟེན་དུ་འགྱུར་བ་ཁོ་ནའོ། །དེའི་རང་བཞིན་ཐ་མི་དད་པར་རྟོགས་པ་ཙམ་གྱིས་གྲུབ་པ་ལ་བརྟེན་ནས་དེའི་རང་བཞིན་གཞན་དུ་མི་འཐད་པའི་དབང་གིས་
[227a.5]ཐ་དད་པ་ལ་སོགས་པའི་ཆོས་ཇི་ལྟར་བརྟགས་པ་དེ་བཞིན་དུ། ཁོ་བོ་ཅག་ཀྱང་རྟོགས་པས་གྲུབ་པ་ཐ་མི་དད་པ་ཙམ་གྱི་རང་བཞིན་ལ་བརྟེན་ནས་གཞན་དུ་མི་སྲིད་པའི་དབང་ཁོ་ནས་དེ་སྣང་བ་ཙམ་གྱི་རང་བཞིན་དུ་བརྗོད་ཅིང་དེ་བཞིན་དུ་སྒྲོ་འདོགས་རྣམ་པར་གཅོད་པར་གྲུབ་པའི་རང་བཞིན་
[227a.6]ཉིད་ཀྱི་གཞན་སེལ་བའི་རང་བཞིན་ཉིད་དོ། །དེས་ན་རྒོལ་བ་གཉི་ག་ཡང་རྟོགས་པ་ལ་བྱེ་བྲག་མེད་དོ། །རྟོགས་པས་གྲུབ་པ་འདིས་མ་གཏོགས་པའི་ངོ་བོ་ཁས་བླངས་པར་གྲུབ་པ་བསྒྲུབས་པ་བཞིན་དུ་ངེད་ཀྱིས་ཀྱང་བརྟགས་སོ། །འོན་ཀྱང་ངེད་ཀྱིས་བརྟགས་པའི་ཚུལ་ཁས་མ་བླངས་པར་ནི་ཐ་དད་
[227a.7]པ་ལ་སོགས་པས་ཀྱང་སྤྱི་འགྲུབ་པ་ལེགས་པར་བསྒྲུབ་པར་མི་འགྱུར་བ་དེས་ནི་དེ་སྐད་བརྗོད་པར་ཟད་དོ། །སྤྱི་ཞེས་བྱ་བ་ནི་བསྒྲུབ་པ་མ་ཡིན་གྱི་འོན་ཀྱང་ཐམས་ཅད་དུ་རྟོགས་པ་ཉིད་བསྒྲུབ་པར་བྱ་བ་ཡིན་ནོ། །དེས་ན་འདི་གལ་ཏེ་རང་གྲུབ་པར་བྱ་བའི་དོན་དུ་རྟོགས་པའི་
[227b]
[227b.1]རང་བཞིན་གྲུབ་པ་འཕེན་ན་ནི་དངོས་པོ་འགྲུབ་པོ། །དེ་སྟེ་གྲུབ་པ་དེ་ཉིད་རང་འགལ་ན་ནི་ཡུལ་མེད་པའི་རྟོགས་པ་ཙམ་ཞིག་གྲུབ་པ་ལ་འཆེལ་བར་བྱ་བ་ཡིན་ཏེ། དངུལ་ལ་སོགས་པ་ཤེས་པ་བཞིན་ནོ། །དེའི་ཕྱིར་ངེད་ཀྱི་གཞུང་ཁོ་ན་ལ་མི་རྟོགས་པ་དེ་ལྟར་གྲུབ་པའི་རང་
[227b.2]བཞིན་དུ་བསྒྲུབས་པར་འགྲུབ་པའི་ཕྱིར་བློ་ལ་སྣང་བའི་སྤྱི་གཞན་སེལ་བར་བརྗོད་དོ། །དེ་ཉིད་བཤད་པ་དེ་ནི་ཞེས་བྱ་བའོ། །དངོས་པོ་གཞན་ལས་ལོག་པ་ཡིན་པའི་ཕྱིར་དེ་ལ་གཞན་སེལ་བ་ཡོད་དོ། །སྤྱིའི་ཡུལ་ཅན་ལ་འགོག་པར་བྱེད་པའི་འགལ་བ་ཡོད་པ་ལྟར་གཞན་
[227b.3]སེལ་བའི་ཡུལ་ཅན་ལ་ནི་མེད་དོ། །སྒྲའི་རྟེན་ཅན་གྱི་ཐ་སྙད་ཀྱང་དེ་ལྟར་སྣང་བ་ཡིན་ཏེ། དངོས་པོའི་ཡུལ་ཅན་དུ་དམིགས་པའི་ཕྱིར་དང་དེ་ཡང་གཞན་སེལ་བའི་ངོ་བོ་ཡིན་པའི་ཕྱིར་རོ། །དེ་ལྟར་བསམ་པའི་དབང་གིས་ན་སྤྱི་ཡོད་པ་ཡིན་ནོ་ཞེས་བསྟན་ནས། ད་ནི་དམ་པའི་
[227b.4]དོན་དུ་མེད་ཅེས་བྱ་བ་བཤད་པའི་ཕྱིར་བློ་འདི་ཞེས་སྨོས་སོ། །བསམ་པའི་དབང་གིས་ཐ་དད་པ་མེད་པའི་རྣམ་པ་ཅན་གྱི་བློའི་གཟུང་བ་གཞན་སེལ་བར་བརྗོད་ཀྱི། སྤྱི་ཞེས་བྱ་བ་ནི་མེད་དོ། །ཇི་ལྟར་བློ་རྣམས་ཐ་མི་དད་པ་ཅན་སྐྱེ་བ་དེའི་རྟེན་ཞེས་བྱ་བས་ནི་སྣང་བ་བརྗོད་པ་ཡིན་
[227b.5]གྱི། དེ་དེའི་རྟེན་ཉིད་མ་ཡིན་ནོ་ཞེས་བྱ་བའི་དོན་ཏོ། །ད་ནི་དེའི་གཞུང་གཟུགས་པའི་ཕྱིར། འདི་ལྟར་ཞེས་སྨོས་སོ། །ཁྲ་བོ་ལ་སོགས་པའི་གསལ་བ་རྣམས་ནི་རྗེས་སུ་མི་འགྲོ་ཞིང་ཕན་ཚུན་རྗེས་སུ་འཇུག་པ་མ་ཡིན་ཏེ། ཁྲ་བོ་སེར་སྐྱ་མ་ཡིན་ལ་སེར་སྐྱ་ཡང་ཁྲ་བོ་མ་ཡིན་
[227b.6]ནོ། །རྗེས་སུ་མི་འགྲོ་བར་ཇི་ལྟར་རྟོགས་ཤེ་ན། གསལ་བ་ཉིད་ཀྱི་ཕྱིར་རོ། །སྤྱི་ནི་གསལ་བ་ཡོད་ན་འགྱུར་ཏེ། དེ་ལ་བརྟེན་པའི་ཕྱིར་དང་དེ་ཡང་ཕན་ཚུན་ཐ་དད་པའི་ཕྱིར་རོ། །རྗེས་སུ་འགྲོ་ན་ནི་ཁྲ་བོ་ལ་སེར་སྐྱ་ཡོད་པའི་ཕྱིར་ཁྲ་བོ་གང་ཡིན་པ་དེ་ཉིད་སེར་སྐྱར་འགྱུར་
[227b.7]རོ། །ད་ལྟར་གསལ་བ་རྣམས་གཅིག་པ་ཡིན་ན་སྤྱི་ཉིད་དུ་ག་ལ་འགྱུར། མཚུངས་པ་རྣམས་ཀྱི་དེ་ལྟར་འགྱུར་བའི་རྒྱུ་མཚན་དུ་གྱུར་པའི་རང་བཞིན་ནི་སྤྱི་ཡིན་ན་གཅིག་ཏུ་གྱུར་ན་ནི་མཚུངས་པ་ཞེས་བྱ་བ་ཅུང་ཟད་ཀྱང་མེད་པའི་ཕྱིར་དངོས་པོ་གང་གི་སྤྱིར་འགྱུར། དེའི་
[228a]
[228a.1]ཕྱིར་གསལ་བ་ཉིད་ཀྱིས་གསལ་བ་རྣམས་རྗེས་སུ་མི་འགྲོ་བའི་ཕྱིར་འདིར་རིགས་པ་གཞན་མ་བཤད་དོ། །གསལ་བ་རྣམས་རྗེས་སུ་མི་འགྲོ་མོད། དེ་དག་ལ་རྗེས་སུ་འབྲེལ་པ་མཚུངས་པའི་རྒྱུ་མཚན་གྱི་སྤྱི་གཞན་ཡོད་པར་འགྱུར་རོ་ཞེ་ན། མེད་དོ་
[228a.2]ཞེས་བཤད་པ་ནི་རྗེས་འགྲོ་གཞན་ནི་ཞེས་བྱ་བའོ། །གསལ་བ་དག་ལས་འབྲེལ་ཏོ། །དེས་ན་དེ་ལྟ་བུའི་རྗེས་སུ་འགྲོ་བ་ཅན་གསལ་བ་གཅིག་ལ་ཡོད་པ་གསལ་བ་གཞན་ལ་ཡང་གནས་པར་ནི་སྣང་བ་མེད་དོ། །གསལ་བ་ལ་རྗེས་སུ་འགྲོ་བ་ཅན་ཐ་དད་པ་ནི་འགའ་ཡང་མངོན་སུམ་
[228a.3]ལ་སྣང་བ་མེད་དོ་ཞེས་པའི་དོན་ཏོ། །འདིར་ནི་མངོན་སུམ་དུ་མི་སྣང་བར་སྒྲུབ་པ་ཡིན་ཏེ། ཇི་ལྟར་བརྟགས་པ་ལྟར་ནི་རྣམ་པར་རྟོག་པས་ཀྱང་རྟོགས་པ་མེད་པ་ནི་འོག་ནས་འཆད་པར་འགྱུར་རོ། །རྗེས་སུ་འགྲོ་བ་གཞན་མངོན་སུམ་གྱིས་མ་རྟོགས་སོ་ཞེས་བྱ་བ་ཇི་ལྟར་
[228a.4]རྟོགས། འདི་ལྟར་གསལ་བ་ཐ་དད་པ་དག་ལ་གསལ་བ་དེ་དང་དེ་མཚམས་སྦྱོར་བས་སྟོང་པའི་རྣམ་པ་གཅིག་ཏུ་རྟོགས་པ་ནི་ཡོད་པ་ཡིན་ཏེ། ཁྲ་བོ་བ་ལང་ཡིན་ལ་སེར་སྐྱ་ཡང་བ་ལང་ངོ་ཞེས་བྱ་བ་ཡིན་གྱི། ཁྲ་བོ་གང་ཡིན་པ་དེ་ཉིད་སེར་སྐྱ་ཡིན་ནོ་ཞེས་ནི་མ་ཡིན་ནོ། །དེའི་
[228a.5]ཕྱིར་ཐ་དད་པ་དང་རྗེས་སུ་འབྲེལ་པ་ནི་ཡོད་པ་ཡིན་ཏེ། ཐ་མི་དད་ན་གསལ་བ་མཚམས་སྦྱོར་བར་ཐལ་བའི་ཕྱིར་དང་། མཚམས་སྦྱོར་བ་མེད་ན་ཡང་རྟོགས་པ་གཅིག་པ་མི་འགྲུབ་པའི་ཕྱིར་རོ། །དེ་ནི་རང་གི་ངོ་བོ་ཇི་ལྟ་བ་བཞིན་དུ་འདིའི་བ་ལང་ཉིད་དམ་མི་རྟག་པ་ཉིད་ཅེས་ཐ་
[228a.6]དད་པར་འཛིན་པ་ཁོ་ནའོ། །དེས་ན། རྗེས་འགྲོ་གཞན་ནི་སྣང་བ་མེད། །ཅེས་ཇི་ལྟར་བརྗོད། མངོན་སུམ་གྱིས་སྣང་བ་མེད་པའི་ཕྱིར་རོ་ཞེ་ན་འདི་ཉིད་མངོན་སུམ་མ་ཡིན་ནོ་ཞེས་ག་ལས་རྟོགས། མངོན་སུམ་མ་ཡིན་ན་ནི་ལོང་བ་ལ་ཡང་བ་ལང་ངོ་སྙམ་དུ་རྟོགས་པ་ཡོད་
[228a.7]པར་འགྱུར་རོ། །རྣམ་པར་རྟོག་པའི་ཕྱིར་མངོན་སུམ་མ་ཡིན་ནོ་ཞེ་ན་མ་ཡིན་ཏེ་འགལ་བ་མེད་པའི་ཕྱིར་རོ། །དེ་མེད་ན་ནི་རྟོག་པ་དང་བྲལ་བ་ཉིད་མངོན་སུམ་གྱི་མཚན་ཉིད་དུ་མ་གྲུབ་པའི་ཕྱིར་རོ། །དེས་ན་རྗེས་སུ་འགྲོ་བ་གཞན་མི་སྣང་བར་མ་གྲུབ་བོ་ཞེ་ན། འདི་ལ་བརྗོད་
[228b]
[228b.1]པ་ཐ་དད་པ་དང་རྗེས་སུ་འགྲོ་བ་དག་ནི་མངོན་སུམ་གྱི་ཆོས་སུ་མ་གྲུབ་པའི་ཕྱིར་རོ། །ཐ་དད་པ་དང་རྗེས་སུ་འགྲོ་བའི་རྟོག་པ་མངོན་སུམ་དང་ལྷན་ཅིག་འབྱུང་བ་ཡིན་ཡང་འདི་མངོན་སུམ་དུ་སྣང་བ་ཉིད་དམ། རྟོག་པ་དང་བཅས་པ་དང་། རྟོག་པ་མེད་པའི་ཡིད་གཉིས་ཅིག་ཅར་
[228b.2]འཇུག་པའི་ཕྱིར་ན་རྣམ་པར་རྟོག་པ་ཉིད་ཡིན་ཞེས་རྣམ་པར་དཔྱད་པ་ན་མངོན་སུམ་གྱི་སྣང་བ་དང་མི་འདྲ་བ་ཉིད་ཀྱིས་རྣམ་པར་རྟོག་པ་མངོན་སུམ་ཉིད་ཡིན་པ་བསལ་བས་ན་འདི་ནི་རྣམ་པར་རྟོག་པ་ཡིན་གྱི་ཉམས་སུ་མྱོང་བ་ནི་མ་ཡིན་ནོ་ཞེས་བརྗོད་དོ། །འདི་ལྟར་གང་གིས་
[228b.3]སྔོན་པོ་རིག་པ་མེད་ཀྱང་མིག་བྱེད་པ་མེད་པ་སྔོན་པོ་མངོན་དུ་བྱས་པར་རྟོགས་པ་མེད་ལ། མིག་བྱེད་པ་དང་ལྡན་པ་ལ་ནི་ཡོད་པར་འགྱུར་བ་མངོན་སུམ་དང་། རྣམ་པར་རྟོག་པའི་སྣང་བ་གཉིས་ཀྱི་དབང་པོའི་བྱེད་པ་ཡོད་པ་དང་མེད་པ་དག་གི་རྣམ་པའི་ཁྱད་པར་ནི་ཉེ་བར་མཚོན་
[228b.4]པར་གྱུར་པའི་སྔོན་པོ་རྟོགས་པ་ཡོད་པ་ན་གཏན་ལ་ཕེབས་པ་ཁོ་ནའོ། །དེའི་ཕྱིར་དངོས་པོ་སྣང་བའི་ཉམས་སུ་མྱོང་བ་ཡང་གཞན་དུ་གྱུར་པ་ཡིན་ལ། དེ་མི་སྣང་བའི་རྣམ་པར་རྟོག་པ་ཡང་གཞན་དུ་གྱུར་པ་ཡིན་ནོ། །དེ་བཞིན་དུ་ཐ་དད་པ་སྣང་བ་ཡང་རྣམ་པར་རྟོག་པ་དང་
[228b.5]ཉམས་སུ་མྱོང་བ་དག་ལ་རང་བཞིན་ཐ་དད་པར་རྟོགས་པ་ཁོ་ནའོ། །རྣམ་པར་རྟོག་པ་ལ་སྣང་བའི་བ་ལང་གང་ཡིན་པ་ནི། རང་གི་ངོ་བོ་བཞིན་དུ་ཐ་དད་པ་ཡང་མི་གསལ་བ་ཡིན་ཏེ་དེ་ནི་རང་གི་ངོ་བོ་ལས་ཐ་མི་དད་པའི་ཕྱིར་རོ། །ཉམས་སུ་མྱོང་བ་ལ་ནི་རང་གི་ངོ་བོ་
[228b.6]བཞིན་དུ་གསལ་བ་ཁོ་ན་སྣང་བ་དང་རྣམ་པར་བརྟག་པར་བྱ་བ་དག་གསལ་བ་དང་མི་གསལ་བ་དག་ལས་སྣང་བ་ཐ་དད་པ་ཞེས་བྱ་བ་གང་ཡིན་པ་དེ་ནི་ཐག་རིང་པོས་བསྐལ་པ་མ་ཡིན་པར་རྟོགས་པ་ཡིན་ནོ། །དེ་ཉིད་ཀྱི་ཕྱིར་ཐག་རིང་པོ་ནས་ཉམས་སུ་མྱོང་བའི་མི་གསལ་བ་
[228b.7]ཉིད་ནི་རྣམ་པར་རྟོག་པའི་སྣང་བ་དང་མི་མཐུན་པ་ཉིད་ཡིན་ཏེ། གང་གིས་དེར་ནི་མཐོང་བ་ཉིད་རྟོགས་པ་ཡིན་ལ། རྣམ་པར་རྟོག་པ་ནི་མ་ཡིན་པའོ། །དེས་ན་འདིར་སྔོན་པོ་རྟོགས་པ་ན་འདི་ནི་སྔོན་པོ་ཉིད་ཅེས་ཐ་དད་པར་རྟོགས་པའི་སྔོན་པོ་ཉིད་ཀྱང་གསལ་བར་
[229a]
[229a.1]སྣང་བ་མ་ཡིན་ཏེ། དེ་ཉིད་དུ་ཐ་དད་པའི་དངོས་པོ་གཞན་ཡིན་ནོ། །འདི་དག་གི་ཐ་དད་པ་ནི་མི་གསལ་བ་ཁོ་ནའོ་ཞེ་ན། དངོས་པོ་ནི་མི་གསལ་བ་ཞེས་བྱ་བར་མི་སྲིད་དོ། །ཐག་རིང་པོ་ནས་མི་གསལ་བ་ཉིད་ཀྱི་རང་བཞིན་ནི་བསྟན་ཟིན་ཏོ། །གསལ་བའི་
[229a.2]དངོས་པོ་ལ་མི་གསལ་བའི་ཐ་དད་པ་ཞེས་བྱ་བ་གང་ཞིག་ཡིན། ཐ་དད་པ་ནི་གཉིས་ཀྱི་རང་གི་ངོ་བོ་མཐར་ཐུག་པར་འགྱུར་བ་ཡིན་ནོ། །དེའི་ཕྱིར་སྔོན་པོའི་བདག་ཉིད་ཁོ་ན་ལ། སེར་པོ་ལ་སོགས་པ་འགའ་ཞིག་ལས་ཐ་དད་པར་རང་བཞིན་གཞན་དང་མ་འདྲེས་པའི་རང་
[229a.3]གི་ངོ་བོ་དང་ལྡན་པ་འགའ་ཞིག་གསལ་བ་ཡིན་ཏེ། དེས་ན་ཐ་དད་པར་རྟོགས་པ་ཉམས་སུ་མྱོང་བ་མ་ཡིན་ནོ། །རྗེས་སུ་འགྲོ་བ་ཡང་ཉམས་སུ་མྱོང་བ་མ་ཡིན་པ་ཉིད་དོ། །ཁྲ་བོ་དང་སེར་སྐྱ་དག་བདག་ཉིད་ཐམས་ཅད་ཀྱིས་རང་གི་བདག་ཉིད་དང་རང་གི་ཡུལ་
[229a.4]ལས་གཞན་པའི་བདག་ཉིད་དང་། ཡུལ་དག་ན་སྣང་བ་མེད་པའི་ཕྱིར་རོ། །གསལ་བ་ནི་མི་གསལ་བའི་རྣམ་པས་རྗེས་སུ་འགྲོ་བ་མ་ཡིན་ནོ། །གལ་ཏེ་རང་གི་བདག་ཉིད་དང་རང་གི་ཡུལ་ལས་གཞན་དུ་སྣང་བ་ཡོད་པ་ཡིན་ལ། ཁྲ་བོ་ནི་མ་ཡིན་གྱི་འོན་ཀྱང་
[229a.5]དེ་ལ་ཡོད་པའི་བ་ལང་ཉིད་དོ། །འདི་ལྟར་ཁྲ་བོ་བ་ལང་ཡིན་ལ། སེར་སྐྱ་བ་ལང་ཉིད་དུ་སྣང་བ་ཡིན་ཏེ། བ་ལང་མ་ཡིན་ན་མ་ཧེ་ལ་སོགས་པའི་རང་བཞིན་དུ་སྣང་བར་ཐལ་བར་འགྱུར་རོ། །དེའི་ཕྱིར་གཅིག་ལ་ཡོད་པ་གང་ཡིན་པ་དེ་གཞན་ན་ཡང་ཡོད་པའི་ཕྱིར་
[229a.6]ཇི་ལྟར་རང་བཞིན་རྗེས་སུ་འགྲོ་བ་མེད་ཅེ་ན། འདི་ལ་བརྗོད་པ། བདེན་ཏེ། མ་ཧེ་ལ་སོགས་པ་དང་མི་འདྲ་བའི་རང་བཞིན་དུ་ཁྲ་བོ་དང་སེར་སྐྱ་སྣང་བ་ཡིན་མོད་ཀྱི་ཁྲ་བོ་ལ་ཡོད་པ་གང་ཡིན་པ་དེ་ཉིད་སེར་སྐྱ་ལ་ཡང་ཡོད་པ་ནི་མ་ཡིན་ཏེ། ཡུལ་ལ་སོགས་པ་ཐ་དད་
[229a.7]པའི་ཕྱིར་དེས་ན་བ་ལང་མ་ཡིན་ན། གཉི་ག་ཡང་བ་ལང་མ་ཡིན་པ་ལས་ལྡོག་པར་མི་རུང་བའི་ཕྱིར་རོ། །ཁྲ་བོ་བ་ལང་ཡིན་པ་ན། སེར་སྐྱ་ཡང་བ་ལང་ཉིད་ཡིན་པ་དེ་ལྟ་ན་ཡང་གཅིག་ལ་ཡོད་པའི་བ་ལང་ཉིད་གང་ཡིན་པ་དེས་ནི་གཞན་ལ་ཡོད་པ་མ་ཡིན་ཏེ།
[229b]
[229b.1]ལྷན་ཅིག་སྐྱེ་བ་ལ་སོགས་པར་ཐལ་བའི་ཕྱིར་རོ། །དེའི་ཕྱིར་ཁྲ་བོ་ལ་སོགས་བ་ལང་གི་གསལ་བ་དག་ནི་བ་ལང་ཁོ་ན་སྟེ། བ་ལང་ཉིད་མ་ཡིན་ན། མ་ཧེ་ལ་སོགས་པ་བཞིན་བ་ལང་མ་ཡིན་པ་ལས་ལྡོག་པ་མི་རུང་བའི་ཕྱིར་རོ། །འོན་ཀྱང་གཅིག་གི་བ་ལང་ཉིད་གང་
[229b.2]ཡིན་པ་དེ་ནི་གཞན་ལ་མེད་པས་ན་རྗེས་སུ་འགྲོ་བ་མེད་ཀྱང་བ་ལང་ཉིད་དུ་སྣང་བར་གྲུབ་པོ། །འགྲེལ་པ་ནི་གསལ་བ་འདི་དག་ནི་ཞེས་བྱ་བ་ལ་སོགས་པའོ། །ཕན་ཚུན་རྗེས་སུ་མི་འཇུག་པའི་ཕྱིར་ཐ་དད་པར་འགྱུར་རོ་ཞེས་བཤད་ཟིན་ཏོ། །རྗེས་འགྲོ་གཞན་ཡང་ཞེས་
[229b.3]བཤད་པའི་ཕྱིར་དེ་རྣམས་ལ་ཞེས་སྨོས་སོ། །གང་ལ་ལྟོས་ནས་གཞན་ཡིན་པ་དེ་བསྟན་པ་ནི། དེ་རྣམས་ལས་ཞེས་བྱ་བའོ། །ཐ་དད་པ་ཞེས་བྱ་བ་ནི་དོན་གཞན་དུ་གྱུར་པའོ། །དེ་ལྟར་ཞེས་བྱ་བ་ནི་ཐ་དད་པ་ཉིད་དུའོ། །དེ་ལྟ་ན་ཡང་ཐ་དད་པ་མ་མཐོང་བས་
[229b.4]མེད་པར་བརྗོད་པ་ཡིན་ནོ། །གང་གི་མཐོང་བ་ལ་རྟོགས་པའི་འདུ་བྱེད་ཡོད་པ་དེ་མེད་པར་འགྲུབ་པ་ཡིན་ཏེ། བུམ་པ་ལ་སོགས་པ་ལྟ་བུ་མཐོང་བ་ནི་དམིགས་པ་ག་ལ་བརྟན་པར་གྱུར་པ་དེ་ལ་རྣམ་པར་འཇིག་པའི་ཡན་ལག་ཡིན་ན། དེ་ལྟར་བལྟར་མི་རུང་བའི་སྤྱི་ནི་
[229b.5]ངེས་པར་ནུས་པ་མ་ཡིན་ཏེ། རྣམ་པར་རྟོག་པ་ཉིད་ངེས་པའི་རང་བཞིན་ཡིན་པའི་ཕྱིར་རོ་ཞེ་ན། བརྗོད་པ་སྣང་བ་རང་གི་ངང་གིས་ཇི་ལྟར་མི་རྟོགས་པ་དེ་ལྟར་རྟོགས་པ་མ་ཡིན་ཡང་འདི་ནི་འདི་ལྟར་ཡིན་ནོ་ཞེས་ངེས་པར་བརྟག་པར་ནུས་པ་ཡིན་ནོ། །དཔེར་ན་རྣམ་པར་རྟོག་པའི་མྱོང་བར་
[229b.6]བྱ་བའི་རང་བཞིན་སྣང་བ་ཉིད་དུ་རྟོགས་པ་ཡིན་ཡང་མྱོང་བར་བྱ་བའི་རང་བཞིན་དུ་ངེས་པར་བརྟག་པར་ནུས་པས་ཡོངས་སུ་རྟོགས་པར་བྱེད་པས་སྣང་བ་དང་མི་མཐུན་པར་འཇོག་པ་བཞིན་ནོ། །དེ་བཞིན་དུ་བ་ལང་ལ་སོགས་པ་སྣང་བ་ཡང་གལ་ཏེ་ཐ་མི་དད་པའི་རྣམ་པར་སྣང་
[229b.7]བ་རྟོགས་པའི་མཐར་ཐུག་པར་འགྱུར་བ་དེ་ལྟ་ན་ཡང་ངེས་པར་བརྟག་པར་ནུས་པ་ཐ་དད་པ་དང་རྗེས་སུ་འགྲོ་བའི་ངོ་བོས་སྟོང་པ་ཉིད་རྣམ་པར་འཇོག་པ་ཡིན་ནོ། །དེ་ལྟར་རྣམ་པར་གནས་པ་ཡང་མངོན་སུམ་གྱི་སྣང་བ་ལ་བརྟེན་ནས་རྣམ་པར་གཞག་པར་འགྱུར་བའི་
[230a]
[230a.1]ཕྱིར་ན། འདིར་མངོན་སུམ་ཉིད་ཚད་མར་བྱས་པར་འགྱུར་བ་ཡིན་ནོ། །དེ་བཞིན་དུ་སྣང་བ་དང་རྣམ་པར་བརྟག་པ་དག་སྣང་བ་ཐ་དད་པ་ཡང་མངོན་སུམ་ཉིད་ཀྱིས་རྣམ་པར་གཞག་པར་འགྱུར་བ་ཡིན་ནོ། །གང་དུ་རང་གི་ངང་གིས་འདུ་བྱེད་པ་ཅན་གྱི་མངོན་སུམ་དེར་ཡང་དེ་ལྟ་
[230a.2]བུའི་ཡུལ་སྣང་བ་ཙམ་ལས་འདིའི་བྱེད་པ་གཞན་ནི་འགའ་ཡང་མེད་དོ། །འོན་ཀྱང་དེ་ལྟར་སྣང་ན་ཡང་ཇི་ལྟར་དེའི་རང་བཞིན་ཤེས་པར་ནུས་པ་དེ་ལྟར་འདུ་བྱེད་པ་རབ་ཏུ་ཆགས་པ་འབད་པ་ལ་མི་ལྟོས་པ་ཙམ་དུ་ཟད་དོ། །ཇི་ལྟར་ནུས་པ་མ་ཡིན་པའི་ཕྱིར་འདུ་བྱེད་པ་མེད་པ་
[230a.3]དེ་ལྟར་ངེས་པར་བརྟག་པར་ནུས་པ་ལ་ནི་དེ་སྔོན་དུ་འགྲོ་བ་ཅན་གྱི་རྟོགས་པ་དེ་ཉིད་ལས་ཡིན་ཏེ། ཇི་སྐད་བཤད་པ་བཞིན་ནོ། །ཇི་ལྟར་ངེས་པར་བརྟག་པར་མི་ནུས་པར་དེ་ལྟར་རྟོགས་པ་ནི། དེའི་རྩ་བ་ཅན་མ་ཡིན་པ་ཁོ་ན་སྟེ། སྐད་ཅིག་མའི་རང་བཞིན་ནི་སྣང་བ་མ་ཡིན་ལ། སྣང་
[230a.4]བ་ཉིད་ལས་ངེས་པར་བརྟག་པར་ནུས་པ་མ་ཡིན་པའི་སྣང་བ་ལ་བརྟེན་ནས་རྣམ་པར་གནས་པ་མ་ཡིན་པས་རྟགས་ཉིད་ཀྱི་རྣམ་པར་གཞག་པ་ཡིན་ནོ། །དེའི་ཕྱིར་མེད་པ་ལ་སོགས་པ་ནི་ཡོངས་སུ་རྟོགས་པར་བྱེད་པ་རྣམས་ཀྱི་མངོན་སུམ་ཡིན་གྱི། ཐ་སྙད་པ་རྣམས་ཀྱི་
[230a.5]ནི་མ་ཡིན་ནོ། །གང་ལས་འདི་མི་སྣང་ཡང་མེད་པར་མི་འགྱུར་བ་འདི་ནི་མི་སྣང་བར་ཁས་བླངས་པར་ནུས་པ་ནི་མ་ཡིན་ནོ་ཞེས་བཤད་པ་ནི། མི་སྣང་ན་ཞེས་བྱ་བའོ། །འདི་ལ་ཇི་ལྟར་རང་གིས་སྐྱེ་བའི་རྣམ་པར་ཤེས་པ་ལ་མིག་ལ་སོགས་པ་བཞིན་དུ། དེ་ལྟ་བུར་
[230a.6]གྱུར་པ་ཉིད་ཁྱད་པར་ཁོ་ནར་རྟོགས་པའམ། རྗེས་སུ་དཔག་པ་ཡང་དེར་འགྱུར་བ་གང་ཡིན་པ་སྤྱི་ཐ་དད་པ་ཡང་དོན་དང་འབྲེལ་པ་ཙམ་གྱི་རང་བཞིན་ནི་མ་ཡིན་ནོ། །དེས་ན་རང་བཞིན་ཐ་དད་པ་ཡིན་ཡང་རང་གི་རྟེན་ཐ་མི་དད་པར་གསལ་བ་ཡིན་ནོ། །འདི་བ་ལང་ཞེས་གཞི་མཐུན་
[230a.7]པར་རྟོགས་པའི་ཕྱིར་རོ། །དེས་ན་གསལ་བ་གཞན་ལ་ཡང་རང་བཞིན་དེ་ཉིད་རྟོགས་པ་ཡིན་པའི་ཕྱིར་དེར་ཡང་དེ་ཁོ་ན་བཞིན་རྟོགས་པས་ན་ཐ་མི་དད་པར་རྟོགས་པ་ཡིན་ནོ། །དེས་ན་འདི་ནི་དེ་ལྟར་བདག་ཉིད་དུ་གཞན་འཛིན་པའམ་ཐ་སྙད་འདོགས་པར་བྱེད་པ་ཡིན་ནོ། །
[230b]
[230b.1]རྣམ་པ་དེ་ལྟ་བུ་ནི་མི་སྣང་བར་འགྱུར་བ་མ་ཡིན་ཏེ། དེས་ན་སྣང་བ་ཉིད་དུ་འགྱུར་བ་ལས་དེ་མེད་པའི་ཕྱིར་མེད་པ་ཁོ་ནའོ། །སྤྱི་ཁས་བླངས་ཀྱང་དངོས་པོ་རྣམས་རིགས་མཐུན་པ་དང་། མི་མཐུན་པ་ལས་ལྡོག་པ་བརྗོད་པ་ཡིན་པས་ཉེས་པ་དེའི་སྟོབས་ཀྱིས་ཀྱང་སྤྱི་དངོས་
[230b.2]པོར་གྱུར་པ་ཡོད་པ་མ་ཡིན་ནོ་ཞེས་བཤད་པ་ནི། དེ་དག་དང་འབྲེལ་པ་ཞེས་བྱ་བ་ཡིན་ནོ། །གལ་ཏེ་གཅིག་པོ་དེ་དང་འབྲེལ་པའི་ཕྱིར་འདི་དང་མཚུངས་པར་འགྱུར་ན་ནི་དེའི་ཚེ་དེ་དག་དང་འབྲེལ་པ་གཅིག་ཡོད་པ་ཡིན་པའི་ཕྱིར་སྤྱིར་འགྱུར་བ་ཞིག་ན། དེ་ལྟར་ཡང་
[230b.3]མ་ཡིན་པས་སྤྱིའི་ངོ་བོ་མ་ཡིན་ཏེ། གྲངས་ལ་སོགས་པ་ལ་ཡང་ཐལ་བར་འགྱུར་བའི་ཕྱིར་རོ་ཞེས་བྱ་བའི་དོན་ཏོ། །འདི་བཟློག་པའི་ཕྱིར་ཕ་རོལ་པོ་དག །གལ་ཏེ་ཞེས་བྱ་བ་ལ་སོགས་པས་གྲངས་ལ་སོགས་པ་དག་ལས་སྤྱི་ཁྱད་པར་དུ་བརྗོད་དོ། །གང་
[230b.4]དུ་ཐ་མི་དད་པའི་བརྗོད་པ་དང་། བློའི་རྒྱུ་ཡིན་པ་མི་བརྗོད་པ་དེས་ན། དེ་དག་དང་འབྲེལ་པ་གཅིག་ཡོད་པ་ཞེས་བྱ་བ་དེར་དེ་དང་ཞེས་བརྗོད་པ་དང་། དེ་དག་ལ་ཞེས་རྣམ་པར་འབྱེད་པ་བསྒྱུར་ཏེ་འབྲེལ་ཏོ། །དེ་དག་དང་འབྲེལ་པ་གཅིག་སྤྱིའི་རང་བཞིན་དུ་
[230b.5]བརྗོད་པ་ན། དེ་ཉིད་དུ་བརྗོད་པ་དང་རྟོགས་པ་འཇུག་པའི་རྒྱུ་མཚན་དུ་རིགས་པའི་ཕྱིར་རོ། །དེ་ཉིད་ཀྱི་ཕྱིར་ཇི་ལྟར་གཞན་གྱི་སྒོ་ནས་གཞན་ལ་ཞེས་བྱ་བའི་ལན་ཡང་རུང་བ་ཡིན་ཏེ། དེ་ལྟ་མ་ཡིན་ན། འདི་མ་བརྩད་བཞིན་དུ་བརྒལ་ཞིང་བརྟག་པར་ཇི་ལྟར་
[230b.6]འགྱུར། རང་གི་མཚན་ཉིད་དེ་དག་ལ་ཤེས་བརྗོད་ཐ་མི་དད་པའི་རྒྱུ་མཚན་གཅིག་པོ་གང་ཡིན་པ་དེ་ནི་སྤྱི་ཡིན་ནོ། །གྲངས་ལ་སོགས་པ་ནི་དེ་ལྟ་མ་ཡིན་ཏེ། གཉིས་ཉིད་ཀྱི་གྲངས་བརྟེན་པ་ཡིན་ཡང་རིགས་མི་མཐུན་པ་དག་ལ་ཐ་མི་དད་པའི་བརྗོད་པ་དང་རྟོགས་པ་མེད་པའི་ཕྱིར་རོ། །འདི་
[230b.7]ལ་ཇི་ལྟར་ཞེས་གསུངས་ཏེ། དངོས་པོ་ཐ་དད་པ་གཞན་གྱི་སྒོ་ནས་དོན་གཞན་ལ་ཤེས་པ་འཇུག་པ་ཇི་ལྟར་འགྱུར། དེ་སྐད་དྲིས་པ་ན་གཞན་དག་གལ་ཏེ་ལོག་ན་གནས་པའི་སྤྱིའི་ངོ་བོ་ལས་མིག་ལས་གཟུགས་ཤེས་པ་ལྟར་དེ་དག་ལ་དེ་ལྟར་རྟོགས་པ་སྐྱེད་ན་ནི། དེའི་ཚེ་དེ་དག་ལ་རྣམ་པ་དེ་ལྟ་བུའི་རང་
[231a]
[231a.1]བཞིན་མེད་པའི་ཕྱིར་ན། དམིགས་པ་མེད་པས་འཁྲུལ་པར་ཐལ་ཏེ་རང་གི་ཉེ་བར་ལེན་པའམ་གཞན་ལས་ཀྱང་རུང་ཏེ། རྣམ་པ་དེ་ལྟ་བུར་རྟོགས་པ་ཁྱད་པར་ཅི་ཡོད་སྙམ་དུ་བསམས་ནས། དེ་དང་འབྲེལ་པའི་ཕྱིར་རོ་ཞེས་སྨོས་སོ། །འདི་
[231a.2]སྐད་བརྗོད་པ་ཡིན་ཏེ། གང་གི་ཚེ་ཐ་མི་དད་པའི་དངོས་པོ་འདི་ཐ་དད་པ་དེ་དག་ལ་གནས་པ་དེའི་ཚེ་བདག་ལ་དམིགས་པ་ཐ་མི་དད་པའི་ཤེས་པ་དེ་དག་ལ་འཇུག་པར་བྱེད་པ་ཡིན་ཏེ། དེ་དག་དེ་དང་ཐ་མི་དད་པར་རྟོགས་པའི་ཕྱིར་དེ་དག་ལ་ཐ་མི་དད་པར་རྟོགས་པའི་རྒྱུར་འགྱུར་
[231a.3]བ་ཡིན་ལ་དེ་ལ་དམིགས་པའི་རྟོགས་པས་དེ་དག་ཀྱང་རྟོགས་པ་ཡིན་པ་དེའི་ཚེ་འགལ་བ་འགའ་ཡང་མེད་དོ་ཞེས་བྱ་བ་ཡིན་ནོ། །དེ་ལྟ་ན་འོ་ན་གྲངས་ལ་སོགས་པ་ཡང་རང་བཞིན་དེ་ཉིད་དུ་ཐལ་ལོ་ཞེས་བཤད་པ་ནི། གྲངས་དང་ཞེས་བྱ་བ་ལ་སོགས་པའོ། །དེ་ལ་
[231a.4]བསམ་པ་མ་རྟོགས་པར་སྔར་བརྗོད་པའི་བསམ་པས་རྩོད་པ་ནི། གལ་ཏེ་སྤྱིའི་བདག་ཉིད་མ་ཡིན་པའི་ཕྱིར་ཞེས་བྱ་བའོ། །ཇི་སྐད་བཤད་པ་བཞིན་དུ་འདི་དག་ནི་ཐ་མི་དད་པའི་རྗོད་པ་དང་རྟོགས་པའི་རྒྱུ་མ་ཡིན་པས་ན་གྲངས་ལ་སོགས་པ་ནི་དེའི་རང་བཞིན་མ་ཡིན་པ་
[231a.5]ཉིད་དོ། །ཇི་ལྟར་ཞེས་བྱ་བ་ལ་སོགས་པ་དེ་བསམ་པ་གང་གིས་བརྗོད་པ་དེ་གསལ་བར་བྱེད་པའི་སྒོ་ནས་དེ་བཟློག་པ་ནི་སྤྱིའི་བདག་ཉིད་འདི་གང་ཡིན་ཞེས་དཔྱོད་པ་མ་ཡིན་ནམ་ཞེས་བྱ་བའོ། །ཤེས་པ་དང་བརྗོད་པ་དང་ཐ་མི་དད་པའི་རྒྱུ་མཚན་གཅིག་ནི་སྤྱི་ཡིན་ནོ་ཞེས་
[231a.6]སྤྱིའི་ལུས་བརྗོད་པ་ཡིན་ཏེ། སྤྱིའི་བདག་ཉིད་མ་ཡིན་པ་གྲངས་ལ་སོགས་པ་ཐལ་བར་མི་འགྱུར་རོ་ཞེས་གང་བརྗོད་པ་ཡིན་ནོ། །དེ་སྤྱིའི་བདག་ཉིད་མ་ཡིན་གྱི་གཞན་དུ་འགྱུར་རོ་ཞེས་བྱ་བ་ཇི་ལྟར་ཞེས་དཔྱོད་པ་ཡིན་ནོ། །དཔྱོད་པ་དེ་ལ་སྐབས་སུ་བབ་པའི་སྤྱི་དང་
[231a.7]འབྲེལ་པ་ཡོད་ན། འབྲེལ་པ་ཅན་གཞན་ལ་ཤེས་པ་འཇུག་སྟེ། དེས་ན་སྤྱི་ཡིན་ནོ་ཞེས་སྤྱིའི་བདག་ཉིད་ཡིན་ནོ། །དེ་ལྟ་ན་ཡང་འབྲེལ་པའི་ཕྱིར་རོ་ཞེས་བརྗོད་པ་ཡིན་ནོ། །སྤྱིའི་བདག་ཉིད་དེ་ལྟ་བུ་ཡིན་པ་དེ་ལ་བཤད་པ། དུ་མ་དང་འབྲེལ་པ་ཅན་དག་ལས་
[231b]
[231b.1]ཀྱང་སྟེ། རྫས་ནི་ཡན་ལག་དུ་མ་དང་འབྲེལ་པ་གཅིག་དེ་དག་ལ་ཡོད་པ་ཡིན་ལ། གྲངས་ཀྱང་གྲངས་དང་ལྡན་པ་ལ། བྱ་བ་བྱེད་པ་པོ་རྣམས་ལ་ཡིན་པས་གཅིག་དུ་མ་ལས་ཡོད་པའི་མཚན་ཉིད་རྟོགས་པ་ཐ་མི་དད་པའི་རྒྱུ་ཉིད་ཡོད་པས་ན། དེ་དག་ལས་དུ་མ་ལ་ཤེས་
[231b.2]པ་འཇུག་སྟེ། གཏན་ཚིགས་དེའི་ཕྱིར་དུ་མ་དང་འབྲེལ་པ་ཅན་གྱི་རྫས་ལ་སོགས་པ་རྣམས་སྤྱིའི་བདག་ཉིད་ཡིན་ནོ། །འདི་སྐད་བརྗོད་པ་ཡིན་ཏེ། རང་གི་ཉེ་བར་བསྒྱུར་བའི་སྒོ་ནས་ཤེས་པ་སྐྱེད་པ་ན། ཤེས་པ་འཁྲུལ་པ་མེད་པའི་རྒྱུ་ཉིད་དང་། སྤྱི་ཉིད་དུ་ཡང་འགྱུར་
[231b.3]བ་ཡིན་ནོ། །དེ་དང་འབྲེལ་པས་བྱས་པ་ཡིན་ཏེ། དེ་ལྟ་མ་ཡིན་ན། གཅིག་པོ་གང་ཡིན་པ་དེ་ཉིད་གཅིག་ཉིད་དུ་རྟོགས་པར་འགྱུར་བའི་ཕྱིར་ན་གསལ་བ་རྣམས་ལ་གཅིག་ཏུ་ཤེས་པའི་རྟེན་དུ་མི་འགྱུར་རོ། །དེས་ན་དེ་དག་ལ་འབྲེལ་པས་ན་དེ་དག་ཉིད་དུ་འཛིན་པར་
[231b.4]བྱེད་པ་ཡིན་པས་སྤྱི་ཉིད་ཡིན་པར་རྣམ་པར་གནས་པ་ན་གྲངས་ལ་སོགས་པ་དང་ཁྱད་པར་ཅི་ཡོད། འདི་ལྟར་དེ་དག་ཀྱང་བདག་ཉིད་གཅིག་དུ་མ་ལ་གནས་པ་ཡིན་ནོ། །དེས་ན་རྫས་དང་གྲངས་དང་ལས་ཀྱང་གཅིག་དུ་མ་དང་འབྲེལ་པ་ཡིན་པས་ན། ཇི་ལྟར་རང་
[231b.5]གི་ཉེ་བར་བསྒྱུར་བས་གསལ་བ་འཛིན་པར་བྱེད་པ་མ་ཡིན། གལ་ཏེ་སྤྱི་བ་ལང་ཉིད་ཀྱི་རང་བཞིན་ཡིན་པའི་ཕྱིར་དེས་བ་ལང་ངོ་ཞེས་གསལ་བ་འཛིན་པར་བྱེད་པར་འགྱུར་ན། གྲངས་ཀྱང་གཉིས་ཉིད་ཀྱི་རང་བཞིན་ཡིན་པའི་ཕྱིར་རེ་རེ་ལ་ཡང་གཉིས་གཉིས་སོ་ཞེས་
[231b.6]རྟོགས་པ་སྐྱེད་པར་བྱེད་པར་འགྱུར་ལ། དེ་བཞིན་ཡན་ལག་ཅན་ཡང་ཡན་ལག་རྣམས་སུ་ལས་ཡན་ལག་སོ་སོ་ལ་ཡན་ལག་ཅན་ནོ་སྙམ་པ་དང་བྱ་བ་ཡང་ཤིང་ལ་སོགས་པ་ལ་ཚོས་པ་ཚོས་པ་སྙམ་པའི་རྟོགས་པ་སྐྱེད་པར་འགྱུར་རོ། །འོན་ཏེ་ཡང་རྟོགས་པ་སྐྱེད་པའི་
[231b.7]ནུས་པ་འདི་ནི་སྤྱི་ཁོ་ནའི་ཡིན་གྱི། གྲངས་ལ་སོགས་པ་ལ་ནི་ཡོད་པ་མ་ཡིན་ནོ་སྙམ་ན། དེ་ནི་མ་འབྲེལ་ཏེ། དེ་ལྟར་བརྟགས་པ་ལ་དེ་ལྟ་བུའི་རྟོགས་པ་མཐོང་བའི་ཕྱིར་གཅིག་དུ་མ་དང་འབྲེལ་པ་ལ་དེ་ལྟར་རྟོགས་པ་འཇུག་པའི་ཕྱིར་ལ། དེ་ཡང་དེ་ལྟར་མ་ངེས་པར་
[232a]
[232a.1]བྱས་པ་ཡིན་ཏེ། གལ་ཏེ་གཅིག་དུ་མ་དང་འབྲེལ་པ་འདིར་རང་ལ་བརྟེན་པའི་ཤེས་པ་ཉེ་བར་སྡུད་ན་གྲངས་ལ་སོགས་པས་ཀྱང་སྡུད་པར་འགྱུར་རོ། །གལ་ཏེ་འབྲེལ་ཀྱང་དེ་ཙམ་གྱི་མཐར་ཐུག་པའི་ཕྱིར་དེ་དེ་ལ་བརྟེན་པའི་ཤེས་པ་ཡུལ་གཞན་ལ་ཐོབ་པར་བྱེད་
[232a.2]པ་མ་ཡིན་ན། སྤྱི་ཡང་དེ་ཁོ་ན་བཞིན་དུ་འགྱུར་རོ། །འདི་ལྟར་གལ་ཏེ་ནུས་པ་ལ་ཡང་རྣམ་པ་དེ་ལྟ་བུའི་ཤེས་པ་དམིགས་པ་དང་བཅས་པ་ཉིད་ཡིན་ན། འོ་ན་འདི་དམིགས་པའི་ཆོས་ཉིད་ཡིན་པའི་ཕྱིར་གྲངས་ལ་སོགས་པ་ལ་ཡང་འགྱུར་རོ། །སྔོན་པོ་གཅིག་ལ་སྔོན་པོའོ་
[232a.3]སྙམ་དུ་ཤེས་པ་ནུས་པ་དེ་ལ་བརྟེན་པར་འགྱུར་བའི་ཕྱིར་ཤེས་པར་འགྱུར་བ་གཞན་དག་ལ་ཡང་མི་འགྱུར་བ་ནི་མ་ཡིན་ནོ། །འོན་ཏེ་འདི་དམིགས་པ་དང་བཅས་པ་དང་། མ་འཁྲུལ་བ་མ་ཡིན་ན་ནུས་པ་ལ་ཡང་འགྱུར་རོ། །དེ་བཤད་པ་ནི་དེ་ལྟར་ན་ནི་ཞེས་བྱ་བ་ཡིན་ནོ། །དེ་ལྟར་
[232a.4]ངོ་བོ་འཆོལ་བ་ཡིན་ནོ། །གལ་ཏེ་གཉིས་ཁོ་ན་ལ་གཉིས་སུ་འགྱུར་བ་ཡིན་གྱི། གཅིག་ལ་ནི་མ་ཡིན་པའི་ཕྱིར་ཇི་ལྟར་གཉི་ག་ལ་གཉིས་གཉིས་ཞེས་རྟོགས་པར་འགྱུར། དེས་ན་ཇི་ལྟར་ཤེས་པ་ཐ་མི་དད་པའི་ཡུལ་ཉིད་ཡིན། དེ་བཞིན་དུ་རྫས་ཀྱང་ཡན་ལག་རྣམས་ལ་
[232a.5]ཡན་ལག་རེ་རེ་ལ་ཡན་ལག་ཏུ་འཛིན་པ་འཇུག་པའི་རྒྱུ་མ་ཡིན་ཏེ་སྤྱི་བཞིན་ནོ། །བརྗོད་པ་གཉིས་ཉིད་ལ་གནས་པ་ན། གལ་ཏེ་རེ་རེ་ལ་གནས་པ་མ་ཡིན་ན་ནི་འགའ་ལ་ཡང་གནས་པར་མི་འགྱུར་རོ། །འོན་ཏེ་གནས་ན་ཇི་ལྟར་རེ་རེ་ལ་དེ་ལྟར་མི་རྟོགས་འདི་ལྟར་གལ་ཏེ་གཉིས་རེ་
[232a.6]རེ་ལ་ཡོངས་སུ་རྫོགས་པར་ནི་མི་གནས་པ་དེ་ལྟར་ནི་ཡང་གནས་པ་ཡིན་པའི་ཕྱིར་དེ་ལྟར་རྟོགས་པར་འགྱུར་རོ། །ཆ་མེད་པ་ནི་དུ་མ་ལ་གནས་པ་ན། རེ་རེ་ལ་ཡོངས་སུ་མ་རྫོགས་པར་མི་འགྱུར་ཏེ་ཆ་དང་བཅས་པ་ཉིད་དུ་ཐལ་བར་འགྱུར་བའི་ཕྱིར་རོ། །དེས་ན་དེ་ལྟར་དེ་ནི་
[232a.7]དམ་པའི་དོན་དུ་མེད། །ཅེས་བྱ་བ་བསྒྲུབས་པ་ན། །གང་གིས་རང་གི་ངོ་བོ་ཡིས། །ཞེས་བྱ་བ་ལ་སོགས་པས་སྤྱི་ཐ་དད་པ་བཀག་པའི་སྒོ་ནས་བློའི་སྣང་བ་སྤྱིའི་ངོ་བོར་བཤད་པ་ལ་བརྟེན་ནས། དེ་ནི་དམ་པའི་དོན་དུ་མེད། །ཅེས་བྱ་བ་བཟློག་པའི་ཕྱིར། གཞན་དག་དེ་ལྟ་
[232b]
[232b.1]འོ་ན་ཞེས་སྨྲའོ། །ཇི་སྐད་བཤད་པའི་ཚུལ་གྱིས། ཕྱི་རོལ་གྱི་སྤྱི་མེད་ཀྱང་། བློའི་བསམ་པའི་དབང་གིས་སྤྱི་ཁས་བླངས་པས། བློའི་སྣང་བ་ཁོ་ན་སྤྱི་ཡིན་པར་འགྱུར་རོ། །འདི་ལྟར་བློའི་བསམ་པས་སྤྱིར་བསྟན་པ་ན། བདག་ཉིད་ཀྱི་ཐ་མི་དད་པར་སྣང་བ་སྒྲོ་
[232b.2]བཏགས་ནས་འདྲེས་པར་བཤད་པ་ཡིན་ཏེ། དེས་ན་ཐ་མི་དད་པ་འདི་ཉིད་སྤྱི་ཡིན་ནོ། །དེ་ཡང་ཡོད་པ་ཉིད་ཡིན་པས་དེ་ནི་དམ་པའི་དོན་དུ་མེད་ཅེས་བྱ་བ་མི་རིགས་སོ། །དེ་ཇི་ལྟར་ཡོད་ཅེ་ན། སྨྲས་པ་ཤེས་པའི་ངོ་བོ་ཡིན་པའི་ཕྱིར་རོ་ཞེ་ན། དེ་བཟློག་པའི་དོན་དུ་མེད་པ་ཉིད་
[232b.3]གཞུང་གཟུགས་པའི་ཕྱིར་དེ་ནི་མ་ཡིན་ནོ་ཞེས་སྨྲས་སོ། །གལ་ཏེ་ཡང་ཤེས་པའི་སྣང་བ་ཐ་མི་དད་པ་ཡིན་པ་དེ་ལྟ་ན་ཡང་། འདི་དག་གི་ཕྱིར་འགྱུར་བ་གང་ཡིན་པ་དེས་དོན་མཚུངས་པར་འགྱུར་བ་ནི་མ་ཡིན་ནོ། །དེས་དེ་དག་རྣམས་མཚུངས་པ་མེད་པར་ནི་དེ་དག་གི་
[232b.4]སྤྱིར་འགྱུར་བ་མ་ཡིན་ནོ། །དེ་ཡང་ཡོད་པ་མ་ཡིན་ཏེ། འདི་ལྟར་བློའི་སྣང་བ་ནི་ཤེས་པ་དང་ཐ་དད་པ་མ་ཡིན་ནོ། །ཕྱིའི་དོན་གྱི་དངོས་པོ་ཉིད་ནི་དེ་ལས་ཐ་དད་པ་ཁོ་ན་ཡིན་ནོ་ཞེས་སྟོན་པ་ནི། དོན་གཞན་ཞེས་བྱ་བའོ། །དོན་ཐ་དད་པ་ནི་དོན་གཞན་ཏེ་ཤེས་པ་ལ་ལྟོས་པ་
[232b.5]ཉིད་ཀྱིས་སོ། །དེ་ལྟ་བུར་གྱུར་པ་དེར་འདི་ཇི་ལྟར་འབྲང་བར་འགྱུར་ཏེ་གང་གིས་འདི་དེའི་སྤྱིར་འགྱུར་བ་ཇི་ལྟར་དེ་དང་འདྲེ་བར་འགྱུར། འདི་ཉིད་བཤད་པ་ནི། ཤེས་པའི་ངོ་བོར་ཞེས་བྱ་བའོ། །འདི་ནི་ཤེས་པ་ཡིན་ལ་འདི་དག་ནི་དོན་ཡིན་ནོ་ཞེས་ཐ་དད་པ་བཤད་པ་ཡིན་ནོ། །
[232b.6]ད་ནི་གང་གིས་རང་གི་ངོ་བོ་ཡིས། །ཞེས་བྱ་བ་ལ་སོགས་པའི་གཞུང་དུ་ཤེས་པའི་སྣང་བ་ཇི་ལྟར་སྤྱིའི་རང་བཞིན་དུ་བཤད་པ་དེ་བསྟན་པས་རྩོད་པར་བྱེད་པ་ནི་གལ་ཏེ་དེའི་ངོ་བོ་ཞེས་བྱ་བ་ལ་སོགས་པའོ། །དོན་ཉིད་དུ་ཞེན་པའི་ཕྱིར་དེ་སྐབས་ཀྱི་བློའི་སྣང་བ་ལའོ། །དེ་ལྟར་ཞེས་བྱ་བ་ནི་ཤེས་
[232b.7]པའི་ངོ་བོ་དོན་རྣམས་ཀྱི་ཕྱིར་འཁྲུལ་པས་ཐ་སྙད་འདོགས་སོ་ཞེ་ན། འདི་སྐད་བརྗོད་པ་ཡིན་ཏེ། བ་ལང་ངོ་ཞེས་ཐ་མི་དད་པར་སྣང་བ་ཤེས་པའི་རང་གི་ངོ་བོ་ཡིན་ཡང་དོན་ཉིད་དུ་ངེས་པ་ཡིན་ནོ། །དེས་ན་བ་ལང་ཞེས་བྱ་བའི་རྣམ་པ་འདི་དོན་ཡིན་པར་འགྱུར་ལ། དེ་ཡང་
[233a]
[233a.1]བློའི་སྣང་བ་ཉིད་ཡིན་པས་དེས་དོན་མཚུངས་པར་བརྗོད་པ་ཡིན་ནོ། །འདིར་དེ་ལ་ཞེས་གསུངས་ཏེ། འདིས་ནི་ཇི་ལྟར་བརྩད་པ་མ་བཀག་པས་བརྟན་པ་ཉིད་དུ་བསྟན་ཏོ། །འོན་ཀྱང་བརྒལ་ཞིང་བརྟག་པ་གཞན་གྱིས། རྩོད་པ་པོས་བསྒྲུབ་པར་བྱ་
[233a.2]བའི་དངོས་པོ་གཞན་འཕངས་པར་བྱས་པ་ཡིན་ནོ། །བློའི་སྣང་བ་དེ་ལ་དེ་ལྟར་དེའི་ངོ་བོར་ཞེན་པའི་རང་བཞིན་གྱི་ཤེས་པ་སྐྱེ་བའི་རྒྱུ་གང་ཞིག་ཡིན་ན། གང་གིས་འདི་དོན་རྣམས་ཀྱི་སྤྱིར་འགྱུར། རྒྱུ་མཚན་མེད་བཞིན་དུ་འཁྲུལ་པ་སྐྱེ་ན་ཡང་ཧ་ཅང་ཐལ་བར་འགྱུར་རོ་ཞེས་
[233a.3]བསྟན་པ་ནི། རྟེན་མེད་པར་ཞེས་བྱ་བའོ། །དེས་ན་དེ་ལྟར་བློའི་སྣང་བ་ཐ་མི་དད་ཀྱང་དེ་དོན་རྣམས་ཀྱི་སྤྱི་མ་ཡིན་ནོ་ཞེས་བསྒྲུབས་པ་ཡིན་ཏེ། དེས་ན་སྤྱི་ཐ་དད་པའི་ཚུལ་འདི་ལ་ཡོད་པ་མ་ཡིན་ནོ་ཞེས་བསྟན་པ་ཡིན་ནོ། །ད་ནི་བློའི་སྣང་བའི་སྣང་བ་ཐ་མི་དད་པ་ཉིད་
[233a.4]གསལ་བའི་ཕྱིར་མདོ་འདི་ཉིད་སྦྱོར་བར་བྱེད་པ་ནི། རྣམ་པ་གཅིག་ཏུ་ན་ཞེས་བྱ་བའོ། །ཐམས་ཅད་རང་གི་བདག་ཉིད་ལ་ནི་ཐ་དད་པ་མ་ཡིན་ནོ། །གལ་ཏེ་ཤེས་པའི་སྣང་བ་བློ་གཞན་ལ་ཡོད་པ་ཤེས་པའི་སྣང་བ་གཞན་དང་ཐ་མི་དད་པ་ནི་སྤྱི་ཐ་དད་པར་སྨྲ་བའི་ཕྱོགས་སུ་
[233a.5]འགྱུར་རོ། །ཤེས་པ་གཅིག་པ་ཐ་དད་པ་མ་ཡིན་པ་བློའི་སྣང་བའི་བདག་ཉིད་ཀྱི་སྤྱི་ཇི་ལྟར་ཤེས་པ་གཞན་གྱི་ངོ་བོ་ཡིན། དོན་གཞན་ཞེས་བྱ་བས་ནི་ཤེས་པ་གཞན་བརྗོད་པ་ཡིན་ནོ་ཞེས་བྱ་བའི་དོན་ཏོ། །བ་ལང་ངོ་ཞེས་ཞེས་བྱ་བ་ཤེས་པའི་སྣང་བ་རྟའི་ཤེས་པའི་རང་
[233a.6]བཞིན་མ་ཡིན་མོད། གཞན་ལ་ཡང་བ་ལང་ངོ་སྙམ་པ་ཉིད་ཀྱི་ཤེས་པ་གཉིས་པའི་ནི་ཡིན་ནོ་ཞེ་ན། དེ་དགག་པའི་ཕྱིར་གསལ་བ་གཞན་ལ་འབྱུང་བའི་ཞེས་སྨྲས་སོ། །བ་ལང་ཉིད་ཅེས་བྱ་བའི་སྤྱི་དང་འབྲེལ་པ་ཅན་བ་ལང་གི་གསལ་བ་གཞན་ལས་གཞན་གང་ཡིན་པ་དེ་
[233a.7]ལས་འབྱུང་བ་བ་ལང་ངོ་སྙམ་པར་ཤེས་པ་གཞན་གྱི་ངོ་བོ་མ་ཡིན་ནོ་ཞེས་བྱ་བའི་དོན་ཏོ། །གཞན་ནི་གཞན་གྱི་ངོ་བོ་མ་ཡིན་ནོ། །དེ་ལྟར་རྣམ་པར་ཤེས་པ་ནི་གཉི་ག་ལྟར་ཡང་སྤྱིའི་ངོ་བོར་སྲིད་པ་མ་ཡིན་ནོ་ཞེས་བཤད་པ་བསྡུས་ཏེ་སྟོན་པ་ནི། དེའི་ཕྱིར་ཞེས་བྱ་བ་ཡིན་ནོ། །
[233b]
[233b.1]དེ་ལྟ་མ་ཡིན་ན་དེ་མེད་པར་ཉེ་བར་བཀོད་པ་འདི་ནི་རྣམ་པར་བརྟགས་པ་ཡིན་ནོ་ཞེས་དོགས་པ་ཡིན་ནོ། །ཤེས་པ་གཞན་ཞེས་བྱ་བ་ནི་བཤད་པ་ཕྱི་མའི་ཕྱོགས་ལ་ཡིན་ལ། གསལ་བ་གཞན་ཞེས་བྱ་བ་ནི་སྔ་མ་ལའོ། །འདི་ལྟར་གང་གི་ཚེ་ཤེས་པ་དེ་སྔ་མའི་རང་བཞིན་གྱིས་
[233b.2]གསལ་བ་ལ་རྗེས་སུ་མི་འགྲོ་བ་དེའི་ཚེ། ཇི་ལྟར་དེའི་གསལ་བའི་རང་བཞིན་དེའི་གསལ་བ་གཞན་ལ་རྗེས་སུ་འབྲང་བར་འགྱུར། དེ་ལྟ་བུ་ཉིད་ཀྱི་ཕྱིར་ན་འདི་ནི་སྤྱི་མ་ཡིན་ནོ། །གལ་ཏེ་སྣང་བཞིན་པའི་ངོ་བོ་ནི་དོན་དུ་འགྱུར་རོ། །དོན་མེད་ན་ནི་ཤེས་པ་ཁོ་ན་སྟེ། དེ་ལྟ་བུའི་
[233b.3]རྣམ་པར་ཤེས་པ་ཡོད་པ་ཉིད་ཀྱིས་དེ་སྣང་བའི་ཕྱིར་རོ། །གནོད་པར་བྱེད་པ་དང་ལྡན་པ་ལས་དེ་མེད་ཀྱང་སྣང་བཞིན་པའི་ངོ་བོ་ལ་མི་གནོད་པའི་ཕྱིར་ཤེས་པའི་ངོ་བོའི་མཐར་ཐུག་པར་འགྱུར་རོ། །ཤེས་པའི་རང་བཞིན་དུ་ཡང་ཡོད་པ་སྲིད་པ་མ་ཡིན་ན་ནི་སྤྱི་སྣང་བ་ཉིད་དུ་མི་
[233b.4]འགྱུར་བའི་ཕྱིར་བསམ་པའི་དབང་གིས་ན། སྤྱི་ཡོད་པར་ནི་རབ་ཏུ་བསྒྲགས། །ཞེས་ཅི་སྟེ་བརྗོད། འདི་ལྟར་སྤྱི་ནི་མི་སྣང་བ་ཡིན་ལ། མི་སྣང་ན་ཡང་བློའི་བསམ་པའི་སྤྱི་གང་ཞིག་ཡིན་ཞེས་དེ་ལྟར་དོགས་ན་དེ་བཤད་པ་ནི། དེ་ཕྱིར་ཞེས་བྱ་བའོ། །འདི་ནི་དོན་
[233b.5]རྣམས་ལ་གཅིག་གི་བདག་ཏུ་འཛིན་པ་མངོན་པར་ཞེན་པ་ལྷག་པར་རློམ་པ་ཡིན་གྱི་གསལ་བ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །གལ་ཏེ་སྤྱི་འདི་གསལ་བ་ཡིན་ན་ནི་དེའི་རྣམ་པ་ཅན་གྱི་ཤེས་པ་ལ་དེ་དེ་ལྟར་གསལ་བའི་ཕྱིར་ཤེས་པ་ཉིད་སྤྱིའི་བདག་ཉིད་དུ་འགྱུར་བ་
[233b.6]ཡིན་ཏེ། ཟླ་བ་གཉིས་ལ་སོགས་པའི་ངོ་བོ་བཞིན་ནོ། །གང་གི་ཚེ་ཤེས་པ་ཡང་སྤྱིའི་ངོ་བོར་འགལ་བ་དེའི་ཚེ་འདི་ལ་གསལ་བ་ཉིད་མེད་པའི་ཕྱིར་འདི་སྤྱིར་ཞེན་པ་ཙམ་མོ། །དཔེར་ན་རྣམ་པར་རྟོག་པ་དངོས་པོ་རིག་པ་མ་ཡིན་ཡང་དངོས་པོར་ལྷག་པར་ཞེན་པ་ཉིད་དངོས་པོ་རྟོགས་
[233b.7]པའི་རང་བཞིན་དུ་བརྗོད་ཀྱི་དངོས་པོ་གསལ་བའི་ངོ་བོས་ནི་མ་ཡིན་པ་བཞིན་ནོ། །དེའི་ཕྱིར་རང་གི་མཚན་ཉིད་གཅིག་རྟོགས་པ་ན་བ་ལང་ལ་སོགས་པའི་རྣམ་པ་དེ་ལྟ་བུ་རྟོགས་པ་གང་ཡིན་པ་དེ་ལྟ་བུ་རང་གི་མཚན་ཉིད་གཞན་རྟོགས་ན། དེ་རྣམ་པ་གཅིག་ཏུ་ཞེན་པའི་ཕྱིར་སྤྱིར་
[234a]
[234a.1]བཤད་དོ། །གལ་ཏེ་ཇི་ལྟར་རགས་པའི་རང་བཞིན་ཉིད་གཅིག་མི་སྲིད་ཀྱང་རྣམ་པར་རིག་པ་ཙམ་ལ་ཤེས་པའི་རང་བཞིན་དུ་མི་འགལ་བ་དེ་བཞིན་དུ་སྤྱིའི་ངོ་བོ་ཕྱི་རོལ་ལ་མི་སྲིད་པ་ཡང་ཕྱིའི་སྨྲ་བ་ལ་རྣམ་པར་ཤེས་པར་འགྱུར་རོ་ཞེ་ན། དེ་ལྟར་ནི་མི་ནུས་ཏེ།
[234a.2]ཤེས་པ་གཞན་གྱི་བདག་ཉིད་མ་ཡིན་ན་དེ་ལྟ་བུའི་ངོ་བོར་མི་འགྲུབ་པའི་ཕྱིར་ཏེ་ཡང་མི་རུང་བའི་ཕྱིར་ཏེ། གཅིག་ཡོད་ན་གཞན་ངེས་པར་ཉེ་བ་མ་ཡིན་པའི་ཕྱིར་དང་། དེ་མེད་པར་ཡང་དེ་དེའི་རང་བཞིན་དུ་མི་འཐད་པའི་ཕྱིར་རོ། །དེ་ཉིད་ཀྱི་ཕྱིར་སྤྱི་ནི་རགས་པའི་རྣམ་པ་བཞིན་དུ་ཀུན་རྫོབ་ཏུ་ཡང་
[234a.3]ཡོད་པ་མ་ཡིན་ནོ། །འོན་ཀྱང་རི་བོང་གི་རྭ་བཞིན་མེད་པ་ཁོ་ནའོ། །དེས་ན་ཤེས་པའི་བདག་ཉིད་དང་། ཐུན་མོང་མ་ཡིན་པ་དང་སྐད་ཅིག་མའི་སྔོན་པོ་ལ་སོགས་པའི་རྣམ་པ་འདི་ཕྱི་རོལ་དང་ཐུན་མོང་པ་ཉིད་དང་སྔོན་མཐོང་བ་ཉིད་དུ་རྟོགས་པ་ནི་ལྷག་པར་ཞེན་པ་ཁོ་ན་ཡིན་གྱི།
[234a.4]རིག་པ་ནི་མ་ཡིན་ཏེ། ཤེས་པའི་བདག་ཉིད་ལ་ཇི་སྐད་བརྗོད་པ་ལས་གཞན་དུ་ནི་མི་འཐད་པའི་ཕྱིར་དང་། དེ་ལྟ་བུའི་རྣམ་པ་མ་ཡིན་པ་དེ་དང་དེ་རིག་པ་ཉིད་མེད་པའི་ཕྱིར་རོ། །འདི་ཉིད་བཤད་པ་ནི། དོན་རྣམས་ནི་ཞེས་བྱ་བའོ། །གཞན་གྱི་ཁས་བླངས་པའམ་ཤེས་པའི་བདག་
[234a.5]ཉིད་ནི་ཐ་དད་པ་སྟེ། ཤེས་པའི་བདག་ཉིད་དངོས་པོར་ཡོད་པའི་གཅིག་པ་ཉིད་མ་གྲུབ་པས་སྤྱིའི་ངོ་བོ་མ་ཡིན་པའི་ཕྱིར་རོ། །དོན་རྣམས་ལ་དེ་ལྟར་སྤྱི་ཉིད་དུ་འཛིན་པ་སྟེ་ལྷག་པར་ཞེན་པའི་རྣམ་པར་རྟོག་པ་ནི་ལོག་པ་ཉིད་ཡིན་ནོ། །སྤྱི་བཞིན་དུ་སྔོན་པོ་ལ་སོགས་པའི་རང་བཞིན་
[234a.6]ལ་ཡང་འདི་ལོག་པའི་རྣམ་པར་རྟོག་པ་ཁོ་ན་མ་ཡིན་ནམ། བདེན་མོད་ཀྱི་འོན་ཀྱང་ཕྱི་རོལ་ཉིད་ཀྱིས་ཡིན་གྱི། སྔོན་པོའི་ངོ་བོས་ནི་མ་ཡིན་ཏེ། དེ་ནི་ཤེས་པའི་བདག་ཉིད་ཀྱིས་རང་རིག་པའི་ཡུལ་ཡིན་པས་ལོག་པ་ཉིད་མ་གྲུབ་པའི་ཕྱིར་རོ། །འདི་ཇི་ལྟར་མི་བདེན་པ་དེ་ལྟར་རྟོག་པ་
[234a.7]ནི་ལོག་པའི་རྣམ་པར་རྟོག་པ་ཡིན་ན་ཤེས་པ་ཉིད་དུ་མི་བདེན་པ་མ་ཡིན་ཏེ་ཕྱི་རོལ་གྱི་དོན་དུ་སྨྲ་བའི་ཕྱི་རོལ་བཞིན་དུ་ཤེས་པ་ཉིད་དུ་ཡང་སྔོན་པོ་འགལ་བ་མེད་པའི་ཕྱིར་རོ། །དེ་ཉིད་ཀྱི་ཕྱིར་ལྷག་པར་ཞེན་པའི་བདག་ཉིད་ཁོ་ནས་རྣམ་པར་རྟོག་པ་ལོག་པའི་ངོ་བོ་ཡིན་པའི་ཕྱིར་ན་རྣམ་པར་
[234b]
[234b.1]རྟོག་པ་འཁྲུལ་ཞེས་བྱ་བས་ནི་ཕྱིན་ཅི་ལོག་ཏུ་ལྷག་པར་ཞེན་པ་ཉིད་བརྗོད་པ་ཡིན་ནོ། །གལ་ཏེ་ཡང་མདོའི་འཛིན་པ་ཞེས་བྱ་བ་ཉིད་ཀྱིས་བཤད་པ་དེ་ལྟར་ན་ཡང་དེ་ལྟར་འཛིན་པ་ནི་ལྷག་པར་ཞེན་པའི་རང་བཞིན་ནོ་ཞེས་རྣམ་པར་རྟོག་པ་ནི་འཁྲུལ་པ་ཁོ་ན་ཡིན་ནོ་ཞེས་བྱ་བ་འདིས་བརྗོད་པའི་
[234b.2]ཕྱིར་མཆོག་ཏུ་ལེགས་པ་ཡིན་ནོ། །ད་ནི་དེའི་ངོ་བོར་ཞེན་པའི་ཕྱིར་ཞེས་སྨྲས་པའི་ཕྱོགས་ཁས་ལེན་པས། དེ་ལ་དེ་ལྟར་ཤེས་པ་སྐྱེ་བའི་རྟེན་གང་ཡིན་ཞེས་བྱ་བས་བརྗོད་པར་བྱ་བ་གཞན་ལ་འཕངས་པ་གང་ཡིན་པ་དེ་བསྟན་པའི་ཕྱིར། མིང་དོན་གང་ལྡན་ཞེས་སྨོས་སོ། །འདི་
[234b.3]ལ་ཇི་ལྟར་ཆོས་ཐ་དད་པར་རྣམ་པར་རྟོག་པའི་རྟེན་གཞན་སེལ་བ་ཡིན་པར་སྔར་བཤད་པ་དེ་བཞིན་དུ་ཆོས་རྗེས་སུ་འགྲོ་བར་རྟོགས་པའི་ཡང་ཡིན་པར་འདིས་བརྗོད་པ་ཡིན་ནོ། །དེ་ལ་དངོས་པོ་གང་དང་གང་ལས་ཐ་དད་པ་དེ་དང་ཐ་མི་དད་པར་ཐལ་བ་སེལ་བ་ན་བྱེད་པ་ཐ་དད་པའི་ཡུལ་གྱིས་
[234b.4]རང་བཞིན་ཡང་ཐ་དད་པར་རྣམ་པར་བརྟགས་པ་ཡིན་ནོ་ཞེས་བཤད་པ་ཡིན་ཏེ། དེས་ན་ཆོས་ཐ་དད་པ་འདིའི་ས་བོན་ལྡོག་པ་ཡིན་ནོ། །དེ་བཞིན་དུ་དེ་ལྟ་བུ་མ་ཡིན་པའི་དངོས་པོ་རྣམས་ལ་སྤྱིར་རྟོགས་པ་ཡང་རྒྱུ་མཚན་མེད་པ་ཅན་མ་ཡིན་ཏེ། ཐ་དད་པ་རྒྱུ་མཚན་ཡིན་པའི་ཕྱིར་
[234b.5]རོ། །འདི་ལྟར་ཁྲ་བོ་ལ་སོགས་པ་བ་ལང་གི་རང་བཞིན་རྣམས་ནི་སོ་སོར་བ་ལང་མ་ཡིན་པ་ལས་ཐ་དད་པ་ཡིན་ནོ། །དེས་ན་ཇི་ལྟར་ཁྲ་བོ་བ་ལང་མ་ཡིན་པ་ལས་ཐ་དད་པ་དེ་བཞིན་དུ། སེར་སྐྱ་ཡང་ཡིན་ཞིང་གསལ་བའི་དབྱེ་བ་གཞན་ཡང་དེ་དང་འདྲའོ། །དེས་ན་འདི་དག་རིགས་མི་
[234b.6]མཐུན་པ་དང་། ཐ་མི་དད་པར་ཐལ་བ་ན་གཅིག་ལ་སྒྲོ་བཏགས་པའི་བ་ལང་མ་ཡིན་པ་གང་ཡིན་པ་དེ་ཉིད་གཞན་དུ་ཡིན་པའི་ཕྱིར་དེ་དང་ཐ་མི་དད་པ་བཟློག་པའི་འབྲས་བུ་ཅན་ཉིད་ཀྱིས་བ་ལང་གི་ཁྱད་པར་མཐའ་དག་ལ་བ་ལང་གི་རྣམ་པར་རྟོག་པ་གཅིག་འཇུག་པ་མི་མཐུན་པ་མེད་དོ། །འདི་དག་
[234b.7]གི་རང་བཞིན་ནི་གཅིག་ཏུ་མི་འཐད་པའི་ཕྱིར་ན། དེ་དག་ལ་རང་བཞིན་རྟོགས་པའི་འབྲས་བུ་ཅན་གྱི་རྣམ་པར་རྟོག་པ་ནི་མི་འཇུག་གོ། །དེ་དག་ལས་ཐ་དད་པའི་རང་བཞིན་ནི་གཅིག་ཡིན་ལ། དེ་ཡང་དེ་རྣམས་ལ་ལོག་པའི་ཤེས་པས་རེ་རེ་ལ་སྒྲོ་བཏགས་པ་ཡིན་ནོ། །ཡང་དག་པའི་
[235a]
[235a.1]ཤེས་པ་ནི་ཐ་དད་པ་རྣམས་ལ་ཐ་མི་དད་པར་དམིགས་པ་འགལ་གྱི། གཞན་ནི་མ་ཡིན་ཏེ། ལོག་པ་ནི་ཕྱིན་ཅི་ལོག་སྒྲོ་འདོགས་པ་ཉིད་ཀྱིས་ལོག་པ་ཡིན་པའི་ཕྱིར་རོ། །བ་ལང་གི་ཁྱད་པར་མཐའ་དག་ལས་གཞན་པའི་གཅིག་པོ་ཡང་བ་ལང་མ་ཡིན་པ་ཡིན་ལ། གཅིག་པོ་དེ་ནི་
[235a.2]འཁྲུལ་པ་དེས་དེ་ཐམས་ཅད་ལ་སྒྲོ་བཏགས་ཏེ། དེས་ན་འདི་དེ་ལྟར་འཇུག་པ་འཐད་པའི་ཕྱིར་རང་བཞིན་ལ་ཡང་གཅིག་ཏུ་རྟོགས་པའི་འཁྲུལ་པ་འདིར་འགྱུར་བ་གང་ཡིན་པ་དེ་དང་དབྱེ་བར་བྱ་བའི་དོན་དུ་དེ་དག་ལ་གཅིག་ཏུ་རྟོགས་པ་ཞུགས་པ་ལས་བཟློག་པ་ཡང་འཐད་པ་ཡིན་ནོ། །རང་བཞིན་གཅིག་ཏུ་
[235a.3]མ་རྟོགས་པར་ནི་རྣམ་པར་རྟོག་པ་གཅིག་འཇུག་པ་མ་ཡིན་ནོ། །འདི་གཅིག་འཇུག་པར་འགྱུར་བའི་ཕྱིར་སྤྱིར་ནོར་བ་ནི་འཇུག་པའི་མཐུས་བྱས་པ་ཡིན་ནོ། །འཇུག་པ་ཡང་སྒྲོ་འདོགས་ལ་བརྟེན་པ་ཡིན་ལ་དེ་ཡང་ཐ་དད་པ་ལས་ཡིན་པའི་ཕྱིར་རྟོགས་པ་འདི་ནི་ཐ་དད་པའི་ས་བོན་ཅན་ཡིན་ནོ། །གལ་ཏེ་ཐ་དད་པ་ནི་
[235a.4]སྤྱིར་རྣམ་པར་རྟོག་པའི་དམིགས་པ་ཡིན་གྱི་ས་བོན་ནི་མ་ཡིན་པ་མ་ཡིན་ནམ། བདེན་ཏེ། འོན་ཀྱང་དེ་ནི་དེ་ལའང་གཞན་ལས་ལོག་པ་དང་ཞེས་བཤད་པ་ཁྱད་པར་དག་ལས་ཐ་མི་དད་པའི་རང་བཞིན་ཉིད་ཡིན་ནོ། །ལྡོག་པའི་ངོ་བོ་ཉིད་མེད་ཕྱིར། །ཞེས་འཆད་པར་འགྱུར་བ་དངོས་པོ་གཞན་ལྡོག་པ་ཙམ་གང་
[235a.5]ཡིན་པ་དེ་ནི་དམིགས་པ་མ་ཡིན་གྱི། འོན་ཀྱང་ས་བོན་ཁོ་ན་ཡིན་ཏེ། ཇི་སྐད་བཤད་པ་ཡིན་ནོ། །དེ་ཉིད་ནི་ས་བོན་དུ་འཐད་པ་ཉིད་དོ་ཞེས་བཤད་པ་ནི་མིང་དོན་གང་ལྡན་ཞེས་བྱ་བ་ཡིན་ནོ། །སྒྲ་ནི་གཞན་སེལ་བའི་ཡུལ་ཅན་ཡིན་ཏེ། དེས་ན་གཞན་སེལ་བ་ཉིད་སྤྱིར་ཤེས་པའི་ས་བོན་ཡིན་ནོ། །རྣམ་པར་རྟོག་
[235a.6]པའི་ཡུལ་ཉིད་སྒྲའི་དོན་ཡིན་པའི་ཕྱིར་རོ། །མིང་ནི་ཕན་ཚུན་ཐ་དད་པའི་དོན་ཅན་ཡིན་ནོ་ཞེས་བསྟན་པ་ཡིན་ནོ། །འདིར་མིང་དོན་གང་ལྡན་ཞེས་བཤད་པའི་ཕན་ཚུན་ཐ་དད་པ་ངེས་པ་ཉིད་ས་བོན་ཡིན་པར་བརྗོད་པའི་དོན་དུའོ། །འདི་ལྟར་དངོས་པོ་གཞན་ལ་མེད་པ་ཡང་ཐ་དད་པ་ཁོ་ན་ཡིན་ན། དེ་ནི་རྣམ་པར་
[235a.7]རྟོག་པ་དང་རྟོགས་འབྲེལ་འགའ་ཡང་མེད་དོ། །སྒྲོ་འདོགས་རྣམ་པར་གཅད་པའི་མཚན་ཉིད་ཀྱི་ཐ་དད་པ་གང་ཡིན་པ་དེ་ནི་ས་བོན་ཡིན་ནོ་ཞེས་བྱ་བར་རིགས་ཏེ། སྒྲ་ཡང་དེའི་དོན་དུ་ཡིན་པར་སྔར་བསྟན་ཟིན་ཏོ། །དེས་ན་ཐ་དད་པ་དེའི་ས་བོན་ཡིན་ནོ་ཞེས་བརྗོད་པའི་ཆེད་དུ་མིང་དོན་གང་ལྡན་ཞེས་བཤད་པ་
[235b]
[235b.1]ཡིན་ནོ། །གལ་ཏེ་དེ་དེ་ལ་མེད་པའི་ཕྱིར་ཏེ་སྒྲོ་འདོགས་པར་བྱེད་པར་འཁྲུལ་པ་ཡིན་ལ། དེ་ལྟར་ན་ཡང་དེ་ཟློག་པར་བྱེད་པའི་རྣམ་པར་རྟོག་པ་འཇུག་པའི་ཕྱིར་དེ་ཡང་ས་བོན་ཉིད་དུ་སྲིད་པ་མ་ཡིན་ནམ། བདེན་མོད་ཀྱི་དངོས་ཀྱིས་ས་བོན་གྱི་ངོ་བོ་གང་ཡིན་པ་དེ་ཉིད་བརྗོད་པའི་ཕྱིར་དེ་ལྟར་ཉེ་བར་བཀོད་དོ། །
[235b.2]དེ་ཉིད་ཀྱི་ཕྱིར་རྣམ་པར་འགྲེལ་པ་ཡང་ཕན་ཚུན་ཐ་དད་པ་དེ་ནི་ས་བོན་ཡིན་ནོ་ཞེས་སོ། །དེ་གང་ཡིན་ཞེ་ན། གང་ཞིག་ཤེས་པར་བྱ་བའི་ཕྱིར་ཞེས་སྨོས་སོ། །སྒྲོ་འདོགས་རྣམ་པར་བཅད་པའོ། །ཞེས་བྱ་བའི་དོན་ཏོ། །གལ་ཏེ་ཇི་ལྟར་ཁྲ་བོ་བུམ་པ་ལས་ཐ་དད་པ་དེ་བཞིན་དུ་སེར་སྐྱ་ལས་ཀྱང་ཡིན་པས་ཁྲ་
[235b.3]བོ་དང་བུམ་པ་དག་བཞིན་དུ་ཁྲ་བོ་དང་སེར་སྐྱ་གཉིས་ཀྱང་ཡིན་ཏེ་ཐ་དད་པའམ་ཐ་མི་དད་པའི་ཆོས་འགའ་ཞིག་གིས་སྟོང་པའི་ཕྱིར་རོ། །དེས་ན་ཁྲ་བོ་བ་ལང་ཉིད་ཡིན་པས་ན་དེ་ལས་གཞན་གང་ཡིན་པ་དེ་བ་ལང་མ་ཡིན་པས་བུམ་པ་བ་ལང་མ་ཡིན་པ་ཉིད་ཡིན་ན། སེར་སྐྱ་ཡང་བ་ལང་མ་ཡིན་པ་ཉིད་དུ་འགྱུར་རོ། །
[235b.4]འོན་ཏེ་ཐ་དད་པ་དེ་ཉིད་མ་ཡིན་པའི་ཡན་ལག་མ་ཡིན་ན་ནི་བུམ་པ་ལ་ཡང་བ་ལང་ཁོ་ནར་འགྱུར་རོ། །དེས་ན་གང་གིས་འདིར་སྤྱིའི་བློར་འགྱུར་བ་ཁྲ་བོ་དང་སེར་སྐྱ་གཉིས་བ་ལང་མ་ཡིན་པ་ལས་ལོག་པའི་ཕྱིར་བ་ལང་མ་ཡིན་པར་སྒྲོ་འདོགས་རྣམ་པར་བཅད་པའི་རྟེན་དུ་ཇི་ལྟར་འགྱུར། དེས་ན་ཕན་ཚུན་ཐ་དད་པ་ནི་
[235b.5]ས་བོན་མ་ཡིན་ཏེ་མེད་པ་ཉིད་ཀྱི་ཕྱིར་རོ་ཞེ་ན། དེ་ལྟར་དོགས་པ་འདི་བསུ་ནས་ཇི་ལྟར་ཁྲ་བོ་དང་སེར་སྐྱ་གཉིས་བ་ལང་མ་ཡིན་པ་ལས་ལྡོག་པ་གྲུབ་ཀྱི་ཁྲ་བོ་དང་བུམ་པ་གཉིས་ལ་ནི་མ་ཡིན་པ་དེ་བསྟན་པའི་ཕྱིར། བསྒྲུབ་པར་བྱ་བ་ཐ་མི་དད་པ་ཅན་གྱི་ཞེས་སྨོས་སོ། །བཞོ་བ་དང་དགལ་བ་ལ་སོགས་
[235b.6]པ་བསྒྲུབ་པར་བྱ་བ་ཐ་མི་དད་པ་གང་ལ་ཡོད་པ་རྣམས་ནི་བུམ་པ་ལ་སོགས་པ་དེའི་བསྒྲུབ་པར་བྱ་བ་ཅན་མ་ཡིན་པ་དེ་དག་ལས་ཐ་དད་པས་ཏེ་གཞན་ཉིད་དུ་ཤེས་པར་བྱས་ཏེ། སྒྲོ་འདོགས་ཀྱི་སྒོ་ནས་རབ་ཏུ་འབྲེལ་པ་དེ་དག་ཡོངས་སུ་སྤངས་ནས་ཏེ་རྣམ་པར་བཅད་ནས་འཇུག་པར་འགྱུར་བའི་གཏན་ཚིགས་
[235b.7]ཀྱིས་ན་ཐ་དད་པ་གང་ཞིག་ཤེས་པར་བྱ་བའི་ཕྱིར་བརྡ་བྱེད་པ་སྟེ་དེ་ལྟ་བུ་དེ་ཡང་སྒྲོ་འདོགས་པ་རྣམ་པར་བཅད་པ་ཁོ་ན་ཡིན་ནོ། །དེའི་དོན་ནི་འདི་ཡིན་ཏེ་ཁྲ་བོ་དང་སེར་སྐྱ་གཉིས་རང་བཞིན་གཅིག་དང་ལྡན་པ་མ་ཡིན་པ་དེ་ལྟ་ན་ཡང་གང་ལས་ཐ་དད་ཀྱང་ཐམས་ཅད་ཁྱད་པར་མེད་པར་མི་འགྱུར་བ་དོན་རྣམས་ལ་མི་
[236a]
[236a.1]འདྲ་བ་ཡོད་པ་ཁོ་ནའོ། །འདི་ལྟར་རང་བཞིན་གཅིག་མེད་ཀྱང་ཇི་ལྟར་ཁྲ་བོ་བཞོ་བ་དང་དགལ་བ་ལ་སོགས་པ་ལ་ནུས་པ་དེ་བཞིན་དུ་ཐ་དད་པའི་རང་བཞིན་གྱི་བུམ་པ་ནི་མ་ཡིན་ལ་སེར་སྐྱ་ནི་ཐ་དད་པའི་རང་བཞིན་ཡང་ནུས་པ་ཡིན་ནོ། །དེས་ན་ཐ་དད་པ་ཞེས་བྱ་བ་ཙམ་གྱིས་ནི་ཐ་དད་པ་རྣམས་ཁྱད་
[236a.2]པར་མེད་པ་མ་ཡིན་ཏེ། འགའ་ཞིག་ཁོ་ན་དོན་བྱ་བ་དེ་བྱེད་པའི་ཕྱིར་དང་། ཐམས་ཅད་དམ་ཚིག་ཉིད་ནི་མ་ཡིན་པའི་ཕྱིར་རོ། །འདི་ཡང་ཁྱད་པར་རྣམས་སོ་སོ་རང་གི་རང་བཞིན་ཁོ་ནས་བྱེད་པ་ཡིན་པའི་ཕྱིར་མི་འདྲ་བ་འདི་ནི་ཁྱད་པར་གྱི་བདག་ཉིད་ཁོ་ནའོ། །དེ་ལས་ཐ་དད་པར་ཁྱད་པར་མེད་ཀྱང་དེ་ནི་མི་འདྲ་བའི་
[236a.3]བདག་ཉིད་ཁོ་ན་སྟེ། ཇི་ལྟར་འདི་རྣམས་ཀྱི་མི་འདྲ་བ་ཡིན་པ་དེ་བཞིན་དུ་འགའ་ཞིག་ཁོ་ནའི་ཡིན་ནོ། །ཕན་ཚུན་མ་འབྲེལ་པ་བ་ལང་གི་ངོ་བོ་ཡིན་གྱི་ཐ་དད་ཀྱང་གཞན་ནི་མ་ཡིན་པས་ཉེས་པ་འགའ་ཡང་མེད་དོ། །འདི་ལྟར་ཤེས་བརྗོད་ཐ་མི་དད་པའི་དངོས་པོ་ཉིད་ཀྱི་ཕྱིར་འདི་དག་ལ་སྤྱི་དགོས་པ་ཡིན་གྱི་རང་གི་ངོ་བོའམ།
[236a.4]རང་གི་ངོ་བོས་བསྒྲུབ་པར་བྱ་བའི་འབྲས་བུ་ལ་ནི་མ་ཡིན་ནོ། །འདི་དག་གི་རང་གི་ངོ་བོ་ནི་སྤྱི་ལ་ལྟོས་པ་འགའ་ཡང་མེད་དེ་དེ་ནི་རང་གི་རྒྱུ་ཁོ་ན་ལས་གྲུབ་པའི་ཕྱིར་རོ། །སྤྱིའི་སྟོབས་ཀྱིས་ནི་དེར་ཤེས་པ་ཐ་མི་དད་པར་འགྱུར་བ་འབའ་ཞིག་ཏུ་ཟད་དོ། །དེ་བཞིན་དུ་འབྲས་བུ་ཡང་དེའི་རང་གི་ངོ་བོ་ཡོད་པ་ཉིད་ཙམ་ལ་ལྟོས་
[236a.5]པ་ཡིན་གྱི། སྤྱིས་ནི་དེ་ལ་ཅུང་ཟད་ཀྱང་མི་དགོས་ཏེ་ནུས་པ་ཡོད་པ་ཙམ་ཉིད་ལས་འབྱུང་བའི་ཕྱིར་རོ། །དེས་ན་ཐ་དད་ཀྱང་འདི་ལྟ་བུའི་བདག་ཉིད་ཅན་གྱི་རང་བཞིན་མི་འདྲ་བ་ཡོད་པ་དང་མེད་པ་དག་ནི་ཁྱད་པར་འགའ་ཞིག་ཁོ་ནར་གྲུབ་པ་ཡིན་ནོ། །དེས་ན་ལྡོག་པ་ལ་འགལ་བ་མེད་པའི་ཕྱིར་དེ་སྤྱིའི་རྟོགས་པའི་ས་
[236a.6]བོན་དུ་འཐད་པ་ཡིན་ནོ། །དེ་ཉིད་ས་བོན་དུ་གཞུང་གཟུགས་པའི་ཕྱིར་རྣམ་པར་རྟོག་པ་འདི་ནི་དེ་ཁོ་ན་འཛིན་པ་ན་ཞེས་སྨོས་སོ། །འཛིན་པའི་ཚིག་གི་ཚུལ་གྱིས་ནི་འདིའི་ཐ་མི་དད་པའི་རང་བཞིན་ཉིད་བརྗོད་དོ། །དེ་ཁོ་ན་ཞེས་སྤྱི་ལ་སོགས་པ་མི་འཛིན་པའི་བསམ་པས་ཇི་སྐད་བརྗོད་པའི་ཁྱད་པར་གྱི་བདག་
[236a.7]ཉིད་ཁོ་ན་མི་འདྲ་བ་ཡིན་པ་མི་བཟོད་པས་ཡང་ཇི་ལྟར་ན་ཞེས་སྨྲས་སོ། །ཐ་དད་པ་གང་དག་ཡིན་པ་དེ་རྣམས་ཀྱི་འབྲས་བུ་ཐ་མི་དད་པ་ཇི་ལྟར་ཡིན་ཏེ། ཐ་དད་པར་ཁྱད་པར་མེད་པའི་ཕྱིར། ཐ་དད་པ་ཐམས་ཅད་ཐལ་བར་འགྱུར་རོ་སྙམ་དུ་སེམས་པའོ། །དེས་ན་ཁྱད་པར་རྣམས་ལ་རྣམ་པ་དེ་ལྟ་བུའི་
[236b]
[236b.1]མི་འདྲ་བ་མེད་པའི་ཕྱིར་འགའ་ཞིག་དང་ཐ་དད་པར་ག་ལ་འགྱུར་ཞེས་སྟོན་པ་ནི་གང་གིས་ཞེས་བྱ་བའོ། །དེ་ལ་བཤད་པ་ནི་དངོས་པོ་རྣམས་ཀྱི་ཞེས་བྱ་བའོ། །ཇི་ལྟར་འབྲས་བུ་ཐ་མི་དད། །ཅེས་ཕ་རོལ་པོས་དྲིས་པ་གང་ཡིན་པ་འདི་ནི་དངོས་པོ་རྣམས་ཀྱི་རང་བཞིན་ཡིན་ནོ། །འདི་ཉིད་གཞུང་གཟུགས་པའི་ཕྱིར་
[236b.2]བཤད་པ། འདི་ལྟར་གཅིག་གི་རྟོགས་པ་ནི་གཅིག་རྟོགས་ཏེ་སྤྱིའི་ཤེས་པའོ། །དོན་ཤེས་པ་ནི་ཉམས་སུ་མྱོང་བའོ། །སོགས་པའི་སྒྲས་ནི་བ་ལང་ལ་སོགས་པ་རྣམས་ཀྱི་བཞོ་བ་དང་དགལ་བ་ལ་སོགས་པ་སྟེ། འདི་ལྟ་བུའི་བདག་ཉིད་དོན་ཏེ། དགོས་པ་གཅིག་སྒྲུབ་ལ་ཐ་དད་པ་ཡིན་ཡང་ཁ་ཅིག་རང་བཞིན་
[236b.3]གྱིས་ངེས་པ་ཡིན་གྱི་ཐམས་ཅད་ནི་མ་ཡིན་ནོ། །འདི་སྐད་བརྗོད་པ་ཡིན་ཏེ། དངོས་པོ་ཐམས་ཅད་ཐ་དད་པར་ཁྱད་པར་མེད་ཀྱང་ཁྲ་བོ་ལ་སོགས་པ་ཉིད་བ་ལང་བ་ལང་སྙམ་དུ་སྤྱིར་ཤེས་པ་གཅིག་དང་། དེ་བཞིན་དུ་བ་ལང་གི་རྣམ་པར་སྣང་བའི་མངོན་སུམ་དང་། བཞོ་བ་དང་དགལ་བ་ལ་སོགས་པ་སྐྱེད་པར་བྱེད་པ་ཡིན་གྱི་
[236b.4]ངང་པ་ལ་སོགས་པ་ནི་མ་ཡིན་ནོ། །འདི་ལྟར་དེ་དག་ཉིད་དེ་ལྟ་བུའི་མི་འདྲ་བ་དང་ལྡན་པ་ལ་ནི་སྤྱི་ཉིད་རྒྱུ་མཚན་ཡིན་ནོ། །སྐྱེད་པར་བྱེད་པའི་རང་བཞིན་དུ་རང་གི་རྒྱུ་ལས་སྐྱེས་པ་ཡིན་ལ་རྒྱུ་དེ་དག་ཀྱང་དེ་ལྟ་བུ་སྐྱེད་པར་བྱེད་ནུས་པར་རང་གི་རྒྱུ་ཁོ་ན་ལས་ཡིན་པའི་ཕྱིར་ཐོག་མ་མེད་དོ། །འདི་ལྟར་སྤྱི་ཡོད་ཀྱང་འབྲས་
[236b.5]བུ་སྒྲུབ་པའི་ནུས་པ་ངེས་པ་འདི་ནི་ཁྱད་པར་གྱི་བདག་ཉིད་ཡིན་ནོ། །དེས་ན་འདི་མི་འདོད་པའི་ཁྱད་པར་གཞན་ལ་བརྟེན་པར་ཐལ་གྱི་འདི་བདག་ཉིད་ཀྱི་རང་བཞིན་མ་ཡིན་ནོ་ཞེས་བྱ་བ་ཁས་མ་བླངས་པར་ཡང་བསྒྲུབ་པར་འགྱུར་བ་ཡིན་ནོ། །སྤྱི་དེའི་རྟེན་དུ་འགྱུར་བའི་ཁྱད་པར་རྣམས་ཁོ་ན་ནུས་པ་ཡིན་གྱི་གཞན་
[236b.6]རྣམས་ནི་མ་ཡིན་ནོ་ཞེ་ན། སྤྱི་ཞེས་བྱ་བ་ན་ཐ་མི་དད་པར་ཐ་སྙད་བྱེད་པ་ཡིན་གྱི། ཤེས་པ་ཐ་མི་དད་པ་ལ་སོགས་པ་ལྟར་དེ་དག་གི་ནུས་པ་ཡང་རྒྱུ་མཚན་ལ་བརྟེན་པ་ནི་མ་ཡིན་ནོ། །རང་གི་བདག་ཉིད་ཀྱི་དོན་རྣམས་ཉེ་བར་བསྒྱུར་བར་རྟོགས་པར་བྱེད་པས་ན་རང་གི་རྟེན་ཐ་མི་དད་པའི་ཤེས་པའི་
[236b.7]དམིགས་པར་འགྱུར་བར་བྱེད་པ་ཡིན་ནོ། །ནུས་པ་ནི་སྤྱིའི་རང་བཞིན་མ་ཡིན་ཏེ་དེ་ནི་གསལ་བ་ཁོ་ནའི་ཆོས་ཡིན་པའི་ཕྱིར་རོ། །ཅི་སྟེ་ཡང་རང་བཞིན་ཡིན་པ་དེ་ལྟ་ན་སྤྱི་ཉིད་བྱེད་པ་པོར་འགྱུར་གྱི་གསལ་བ་ནི་མ་ཡིན་ནོ། །འོན་ཏེ་གསལ་བའི་བདག་ཉིད་ཐ་དད་པར་ཁྱད་པར་མེད་ཀྱང་ནུས་པ་མི་འདྲ་བ་
[237a]
[237a.1]འདི་ཡང་གྲུབ་པ་ཡིན་ན། དེས་ཅི་མེད་ཀྱང་འགྱུར་རོ། །ནུས་པ་འདི་ནི་བ་ལང་གི་ཡིན་གྱི་རྟའི་མ་ཡིན་ལ་བ་ལང་ཡང་ཁྲ་བོ་ལ་སོགས་པ་བ་ལང་ཉིད་དང་ལྡན་པའི་ཕྱིར་ཡིན་ཏེ་དེས་ན་ནུས་པ་མེད་ཀྱང་རྣམ་པ་དེ་ལྟ་བུའི་མི་འདྲ་བ་དང་ལྡན་པ་ལ་ནི་སྤྱི་ཉིད་རྒྱུ་མཚན་ཡིན་ནོ་ཞེ་ན། གལ་ཏེ་སྤྱི་རང་
[237a.2]དང་འབྲེལ་པས་ཁྱད་པར་རྣམས་ཀྱི་བདག་ཉིད་ཁྱད་པར་གཞན་དག་ལས་མི་འདྲ་བར་བྱེད་ན། འོ་ན་ནི་ཁྲ་བོ་ལ་སོགས་པ་རྣམས་ཀྱི་ངང་པ་ལ་སོགས་པ་ལས་མི་མཐུན་པ་ཉིད་ཕན་ཚུན་མི་མཐུན་པ་ཁྱད་པར་གྱི་བདག་ཉིད་དུ་རྗེས་སུ་ཞུགས་པའི་ཕྱིར་སྤྱི་ཐ་དད་པར་རྟོགས་པས་ཆོག་སྟེ། རྣམ་པ་དེ་འདྲ་བའི་མི་འདྲ་
[237a.3]བ་དང་ལྡན་པ་འདི་དག་རང་གི་རྒྱུ་དག་ཁོ་ན་ལས་སྐྱེ་བར་འགྱུར་མོད། །འདི་ལྟར་སྤྱི་དང་འབྲེལ་པས་བྱས་པའི་འདི་དག་གི་མི་མཚུངས་པའི་བདག་ཉིད་གལ་ཏེ་སྤྱི་ཉིད་ཡིན་ན། འོ་ན་ནི་ནང་གི་བདག་ཉིད་ལ་ངང་པ་ལ་སོགས་པ་དང་མི་འདྲ་བ་ཡོད་པའི་ཕྱིར་དེ་ལ་མི་སྲིད་པ་ནི་ནུས་པ་དང་ལྡན་པ་མ་ཡིན་པའི་ཕྱིར་ཇི་ལྟར་
[237a.4]འདི་བ་ལང་རྣམས་ཀྱི་ནུས་པ་ཡིན་ཞེས་བསྟན། གལ་ཏེ་བ་ལང་ཞེས་ཁྱད་པར་ཉིད་དེ་བསྟན་པ་ཡིན་ན། ཁྱད་པར་ཅན་གྱི་བདག་ཉིད་ཐུན་མོང་མ་ཡིན་པས་ན། དེ་དག་རྟ་ཞེས་བརྗོད་པའི་ཁྱད་པར་གཞན་དག་ལ་དེ་དག་ཁྱད་པར་དུ་གྱུར་པ་མེད་པའི་ཕྱིར་ཇི་ལྟར་འདི་དག་ཁོ་ནའི་ནུས་པ་ཡིན་གྱི་གཞན་དག་ནི་མ་
[237a.5]ཡིན། འོན་ཏེ་སྤྱི་ཉིད་ཡིན་ན་ཁྱད་པར་ནུས་པ་མེད་པ་ཁོ་ནའོ། །འོན་ཏེ་ཁྱད་པར་གྱི་བདག་ཉིད་ཐུན་མོང་མ་ཡིན་ཡང་། གཅིག་པོ་དེ་དང་འབྲེལ་པ་ལ་ཁྱད་པར་དུ་འགྱུར་ན། དེ་གཞན་ལ་མེད་པ་དེའི་བདག་ཉིད་རྗེས་སུ་ཞུགས་པས་ཁྱད་པར་ཕན་ཚུན་མཚན་ཉིད་མི་འདྲ་བ་ཁྱད་པར་ཐམས་ཅད་ལ་སྲིད་
[237a.6]པ་མ་ཡིན་པ་གསལ་བ་ཉུང་ཟད་ལ་བརྟེན་པ་ཡིན་པའི་ཕྱིར་དེ་དག་དེ་ལྟར་སྒྲུབ་པར་ནུས་པའི་རང་གི་རྒྱུ་དག་ཁོ་ན་ལ་དེ་ལྟར་སྐྱེ་ལ་རག་མོད། དེ་དག་ལ་སྤྱིས་ཅི་བྱ། དེས་ན་གསལ་བ་རྣམས་སོ་སོའི་བདག་ཉིད་ཁོ་ན་གསལ་བ་གཞན་དག་དང་མི་འདྲ་བ་ཡིན་ནོ་ཞེས་གནས་སོ། །དེ་བཞིན་དུ་རྣམ་པ་མཚུངས་པ་
[237a.7]ཉིད་མ་ཡིན་ཡང་མིག་ལ་སོགས་པ་ཕན་ཚུན་མེད་པའི་རང་བཞིན་རྣམས་ལ་མིག་གི་རྣམ་པར་ཤེས་པ་གཅིག་བྱེད་པ་ཉིད་ཡོད་པ་ཁོ་ན་ཐ་དད་པར་ཁྱད་པར་མེད་ཀྱང་རྣ་བ་ལ་སོགས་པ་ནི་མ་ཡིན་ནོ། །གལ་ཏེ་གཅིག་ཏུ་རྟོགས་པ་ཡང་འདིར་ཅིའི་ཆེད་དུ་བགྲང་ཞེ་ན། དོན་རྣམས་རང་གི་ངོ་བོས་ཀྱང་དེ་ལྟར་འཁྲུལ་
[237b]
[237b.1]པ་སྐྱེད་པར་གྱུར་པར་བསྟན་པའི་དོན་དུའོ། །མིག་ལ་སོགས་པ་ལ་མི་སྲིད་པར་ལོག་པར་རྟོགས་པ་མེད་པས་ན་དཔེར་བསྟན་ཏོ། །ཇི་ལྟར་ཞེས་བྱ་བ་ལ་སོགས་པ་ནི་འགྲེལ་པའོ། །དབང་པོ་དང་ཡུལ་དང་སྣང་བ་དང་ཡིད་ལ་བྱེད་པ་རྣམས་སམ། བདག་དང་དབང་པོ་དང་ཡིད་དང་དོན་དང་། དེ་རྣམས་ཕྲད་
[237b.2]པ་ལ་ནི་མཚུངས་པ་ཡོད་པ་མ་ཡིན་ན། བདག་དང་ཞེས་བྱ་བ་ལ་སོགས་པ་ནི་གཞན་དུ་གྲགས་པ་ལ་ལྟོས་པ་ཡིན་ནོ། །དབང་ལ་སོགས་པ་བཞིན་ཞེས་བྱ་བ་བཤད་ནས། གཅིག་རྟོགས་པ་ཞེས་བྱ་བ་ལ་སོགས་པ་བཤད་པའི་ཕྱིར། དེ་བཞིན་དུ་ཞེས་བྱ་བ་ལ་སོགས་པ་སྨོས་སོ། །གཞན་ཞེས་བྱ་
[237b.3]བས་ནི་སོགས་པའི་སྒྲའི་དོན་བཤད་དོ། །ཁ་ཅིག་ཅེས་བརྗོད་པ་འཆད་པ་ནི། ཐ་དད་པར་ཁྱད་པར་མེད་ཀྱང་ཞེས་བྱ་བའོ། །དཔེར་ན་ཤིང་ཤ་པ་དང་སེང་ལྡེང་ལ་སོགས་པ་རྗེས་སུ་འགྲོ་བ་མེད་ཀྱང་ཚོས་པ་ལ་སོགས་པའི་དོན་བྱ་བ་གཅིག་སྐྱེད་པར་བྱེད་ཀྱི། ཆུ་ལ་སོགས་པ་ནི་མ་ཡིན་པ་
[237b.4]བཞིན་ནོ། །དེ་དག་ཀྱང་ཤིང་ཤ་པ་ལ་སོགས་པ་དང་རྗེས་སུ་འགྲོ་བའི་ཕྱིར་རོ། །དེ་བཤད་པ་ནི་ཐ་དད་པར་ཞེས་བྱ་བ་ལ་སོགས་པ་ཡིན་ནོ། །དཔེར་ན་གཟུགས་ལ་སོགས་པ་རྣམ་པར་ཤེས་པའི་རྒྱུ་མཚན་དུ་རྣ་བ་ལ་སོགས་པ་ནི་སྐྱེད་པར་བྱེད་པ་མ་ཡིན་པ་ལྟ་བུའོ། །གཟུགས་ལ་སོགས་
[237b.5]པའི་རྣམ་པར་ཤེས་པ་འབྱུང་བ་ལ་ནི་རྣ་བ་ལ་སོགས་པ་རྣམས་ཀྱི་སྐྱེད་པར་བྱེད་པའི་བྱ་བ་མེད་པ་ཇི་ལྟ་བར་རོ། །ཐ་དད་ཀྱང་མིག་ལ་སོགས་པས་གཟུགས་ཀྱི་རྣམ་པར་ཤེས་པ་སྐྱེད་པར་བྱེད་ཀྱི། རྣ་བ་ལ་སོགས་པས་མ་ཡིན་ནོ། །དཔེར་ན་སྨན་ཁ་ཅིག་ཅེས་བྱ་བ་ནི་དཔེ་གཞན་དགོད་པའོ། །
[237b.6]དཔེར་ན་སྨན་ཁ་ཅིག་ཐ་དད་ཀྱང་ལྷན་ཅིག་པ་ཞེས་བྱ་བ་སྨན་གཞན་དང་ལྷན་ཅིག་པས་སམ། སོ་སོ་ཡིས་ཞེས་བྱ་བ་ཕན་ཚུན་ལྟོས་པ་མེད་པར་རིམས་ལ་སོགས་པ་ཞི་བར་བྱེད་པར་མཐོང་གི་སྤྱིས་ནི་མ་ཡིན་པ་བཞིན་ནོ། །ཤ་རི་བ་དང་ཁ་ར་བ་ལ་སོགས་པ་ནི་ལྷན་ཅིག་པས་ཀྱང་རིམས་སེལ་བར་
[237b.7]བྱེད་ལ། རེ་རེས་ཀྱང་ངོ་། །འདི་དག་སྤྱི་ནི་ཡོད་པ་མ་ཡིན་ནོ། །སྤྱི་མེད་ཀྱང་གཞན་ནི་དེ་ལྟར་འགྱུར་བ་མ་ཡིན་ནོ། །ཡང་ཅིའི་ཕྱིར་དཔེ་གཞན་བསྟན་ཞེ་ན། སྨྲས་པ་མིག་ལ་སོགས་པ་ལ་སྤྱི་སྲིད་པ་ནི་ས་བོན་མེད་པ་ཅན་ཁོ་ནའོ། །འདི་དག་ལ་ནི་སྨན་ཉིད་སྤྱིར་འགྱུར་ཏེ། དེས་ན་དེ་ལྟར་
[238a]
[238a.1]ཕྱོགས་སྔ་མའི་སྐབས་དབྱེ་བའི་ཕྱིར་འདི་ལྟར་བཀོད་དེ། སྤྱི་གཅིག་དང་ལྡན་པས་འདི་དག་ལ་འབྲས་བུ་གཅིག་ཡོད་པ་མ་ཡིན་པར་བསྟན་པའི་དོན་དུའོ། །ཡང་ན་དཔེར་ཞེས་བྱ་བ་ལ་སོགས་པ་ནི་འགྲེལ་པའོ། །གལ་ཏེ་འདི་སྙམ་དུ་ཞེས་བྱ་བ་འདི་ནི་སྐབས་རྙེད་དེ་རྩོད་པར་བྱེད་པའོ། །
[238a.2]འབྲས་བུ་གཅིག་བྱེད་པ་དེ་ལྟ་བུ་དེ་དག་ལས་གང་ལས་དེའི་འབྲས་བུ་ཡིན་པའི་ཕྱིར་གསལ་བ་རྣམས་ལ་འབྲས་བུ་གཅིག་མི་སྲིད་པ་གང་ཡིན། སྔར་བཤད་པའི་སྐྱོན་དུ་འགྱུར་བ་སྨན་ཉིད་ལ་སོགས་པའི་སྤྱི་ཅུང་ཟད་ཅིག་ཡོད་དོ་ཞེ་ན། དགག་པའི་ཕྱིར་དེ་ནི་རིགས་པ་མ་ཡིན་ཏེ་ཞེས་སྨོས་སོ། །ཁྱད་པར་
[238a.3]མེད་པའི་ཕྱིར་ཞེས་བརྗོད་པ་ལ། གང་ཞེས་བྱ་བ་ལ་ལྟོས་པ་ན་སྤྱི་ཡིས་མ་ཡིན་ཞེས་བརྗོད་པ་དང་འགྲེལ་པ་སྟོན་པར་བྱེད་པ་ན་འགྲེལ་པ་ལས་སྤྱི་ཞེས་སྨོས་ཏེ། སྤྱིའི་མ་ཡིན་ནོ་ཞེས་བྱ་བ་ཚིག་ལེའུར་བྱས་པ་སྔ་མའི་ཆ་དང་འབྲེལ་པས་སྟོན་པའོ། །འབྲས་བུ་དེ་བྱེད་པ་ཞེས་བྱ་བ་ནི་རིམས་ལ་སོགས་
[238a.4]པ་ཞི་བར་བྱེད་པའི་སྨན་མཐོང་བའི་ཕྱིར་དེ་དག་འབྲས་བུ་དེ་བརྗོད་པ་ཡིན་ནོ། །དེ་ལ་ཁྱད་པར་མེད་པའི་ཕྱིར་སྤྱིས་རིམས་ལ་སོགས་པ་ཞི་བར་མཐོང་བ་ཞེས་བྱ་བ་དང་འབྲེལ་པས་ན། སྤྱིས་འབྲས་བུ་བྱེད་པ་མ་ཡིན་ནོ་ཞེས་བརྗོད་དོ། །ཇི་ལྟར་ཞེ་ན། དེ་དག་ཞིང་སོགས་ཐ་དད་ཀྱང་། །ཁྱད་པར་
[238a.5]མེད་པར་ཐལ་འགྱུར་ཕྱིར། །ཞེས་སྨྲས་སོ། །འདི་སྐད་བརྗོད་པ་ཡིན་ཏེ། གང་ཞིག་ཡོད་ན་གང་འབྱུང་བ་དེ་ནི་འབྲས་བུ་ཡིན་ནོ། །རིམས་ལ་སོགས་ཞི་བ་ཡང་སྨན་རྣམས་ཡོད་ན་འབྱུང་བའི་ཆོས་ཅན་ཡིན་པ་ན། གལ་ཏེ་ཡང་འདི་གསལ་བ་ཡོད་པ་འབྱུང་བ་ཡིན་ནམ། སྤྱིས་ཡིན་ཞེས་ཁྱད་པར་
[238a.6]དུ་རྗེས་སུ་འགྲོ་ལྡོག་རྟོགས་པ་མེད་པ་དེ་ལྟ་ན་ཡང་རྣམ་པ་གཞན་གྱིས་སྤྱིའི་འབྲས་བུ་ཉིད་བསལ་ནས་དེ་གསལ་བའི་འབྲས་བུ་ཁོ་ནར་ངེས་པར་བྱེད་དོ། །འདི་ལྟར་རྒྱུ་ཁྱད་པར་མེད་ཀྱང་འབྲས་བུ་ཁྱད་པར་དུ་འགྱུར་བ་ན། ཇི་ལྟར་འབྲས་བུ་ཡོད་པ་ན་རྒྱུ་མེད་པ་དེ་བཞིན་དུ། རྗེས་སུ་འགྲོ་བ་དང་
[238a.7]ལྡོག་པའི་རྗེས་སུ་བྱེད་པ་མེད་པ་དེ་ཉིད་ཡིན་ནོ། །སྤྱི་ལ་ནི་ཁྱད་པར་འགའ་ཡང་སྲིད་པ་མ་ཡིན་པ་དེས་ན། དེའི་འབྲས་བུ་ཡིན་ན་སྨན་རྣམས་ཞིང་ལ་སོགས་པ་ཐ་དད་པས་ཐ་དད་པ་ལ། རིམས་ལ་སོགས་པ་ཞི་བ་དེ་ཁྱད་པར་མེད་པར་འགྱུར་རོ། །ཁྱད་པར་ཡང་ཡོད་དེ། ཞིང་འགའ་ཞིག་
[238b]
[238b.1]ལས་སླེ་ཏྲེས་ལ་སོགས་པ་རྣམས་ནུས་པ་གང་ན་ཉིད་ཀྱིས་མྱུར་དུ་བྱེད་པ་མ་ཡིན་པའི་ཕྱིར་ལ། གཞན་ལས་ནི་མ་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་འཆད་པའོ། །འོན་ཏེ་ཞིང་ལ་སོགས་པ་ཐ་དད་པས་སྤྱི་ཁྱད་པར་དུ་མི་འགྱུར་རོ་ཞེས་སྨོས་སོ། །གལ་ཏེ་ཞིང་ཐ་དད་པས་ཀྱང་སྤྱི་
[238b.2]ཁྱད་པར་དུ་འགྱུར་ན་དེར་གསལ་བ་ཐ་དད་པ་རྣམས་ལ་ཐ་དད་པའི་རྒྱུ་མཚན་གྱིས་རྟོགས་པ་ཐ་མི་དད་པར་མི་འགྱུར་ཏེ། དེ་ཐ་དད་པའི་ཕྱིར་རོ། །དེས་ན་རང་གི་ངོ་བོ་ཉམས་པར་ཐལ་བ་ཡིན་ནོ། །སུན་དབྱུང་བ་གཞན་ཡང་བཤད་པ་ནི། བསྟན་པ་ཞེས་བྱ་བའོ། །གང་ཞིག་ཅེས་བྱ་བ་ལྟོས་པ་ན་
[238b.3]སྐབས་སུ་བབ་པའི་སྤྱི་ཉིད་དང་འབྲེལ་པ་ཡིན་ནོ་ཞེས་སྟོན་པ་ནི། སྤྱི་ཞེས་བྱ་བ་ཡིན་ནོ། །གཏན་ཚིགས་དེ་བས་ན་ཕན་འདོགས་མེད་ཕྱིར་ཡང་སྤྱི་ནི་རྟག་པ་ཡིན་པ་དེས་ན་འགྱུར་ཡང་ཕན་འདོགས་པ་མ་ཡིན་ནོ། །དེས་ན་གསལ་བ་རྣམས་བཞིན་དུ་སྤྱི་ཡོད་ན་ཡང་འབྲས་བུ་འབྱུང་བ་ཡིན་ནོ་
[238b.4]ཞེས་ནི་བརྗོད་པར་མི་ནུས་ཏེ། སྤྱི་འབྲས་བུ་མེད་པ་ཉིད་གནོད་པའི་ཕྱིར་རོ། །ཕན་འདོགས་པ་མེད་པ་ཉིད་ནི་གལ་ཏེ་འདི་ཞེས་བྱ་བ་ལ་སོགས་པས་གཞུང་འཛུགས་པར་བྱེད་དོ། །གལ་ཏེ་སྤྱིས་འབྲས་བུ་བྱེད་ན་ལྷན་ཅིག་བྱེད་པ་ལ་མི་ལྟོས་པའི་ཕྱིར་ཅིག་ཅར་ཐམས་ཅད་མངོན་པར་སྒྲུབ་པར་འགྱུར་
[238b.5]རོ། །འདི་ཡང་མངོན་དུ་སྟོན་པར་འགྱུར་རོ། །གལ་ཏེ་སྤྱི་བཞིན་དུ་གསལ་བ་ཡང་སྐད་ཅིག་མ་ཉིད་མ་ཡིན་པས་ན། འགའ་ལ་ཡང་ཕན་འདོགས་པ་མེད་པའི་ཕྱིར། དེ་ལྟར་སྤྱི་ལ་བཏོན་པས་ཁྱད་པར་དུ་འཕགས་པ་ཞིག་བརྗོད་ཅེ་ན། ཇི་ལྟར་ཁྱད་པར་དུ་འཕགས་པ་མེད། འདི་ལྟར་
[238b.6]གསལ་བ་སྐད་ཅིག་མ་མ་ཡིན་པས་ཉེ་བར་མི་སྦྱོར་ན་སྐད་ཅིག་ཉིད་ཀྱིས་ཕན་འདོགས་པར་འགྱུར་རོ། །སྤྱི་ནི་སྐད་ཅིག་མ་ཉིད་མ་ཡིན་ན། རང་གི་ངོ་བོ་ཉིད་མེད་པར་འགྱུར་རོ། །དཔེ་ནི་དེ་ལྟར་སྤྱི་ཁྱད་པར་མེད་པའི་ཕྱིར་དང་ཕན་འདོགས་པ་མེད་པའི་ཕྱིར་འབྲས་བུའི་ཁྱད་པར་གྱི་རྒྱུ་མ་ཡིན་
[238b.7]ནོ་ཞེས་བསྒྲུབས་ནས་གསལ་བ་ཁྱད་པར་དང་ལྡན་པ་ཡིན་པའི་ཕྱིར་དེའི་ཁྱད་པར་གྱི་རྗེས་སུ་བྱེད་པ་ཉིད་དུ་བསྟན་པའི་ཕྱིར། གསལ་བ་དུས་དང་ཡུལ་ཞེས་བྱ་བའོ། །རྒྱུའི་ཁྱད་པར་ལས་ཁྱད་པར་སྒྲུབ་པས་འབྲས་བུའི་ཁྱད་པར་བྱེད་པར་འགྱུར་རོ། །འདི་ཡང་སྐད་ཅིག་མ་ཉིད་དུ་ཡང་མདུན་
[239a]
[239a.1]ནས་སྟོན་པར་འགྱུར་རོ། །དེས་ན་དེ་ལྟར། དཔེར་ན་སྨན་ཁ་ཅིག་ཅེས་བྱ་བ་ལ་སོགས་པ་གཅིག་རྟོགས་དོན་ཤེས་ལ་སོགས་པ། །ཞེས་བྱ་བ་གཞུང་འཛུགས་པ་བརྗོད་ནས། གཅིག་རྟོགས་ཞེས་བྱ་བ་ལ་སོགས་པ་གྲུབ་པར་སྟོན་པ་ནི་དེ་བཞིན་དུ་ཞེས་བྱ་བ་ཡིན་ནོ། །
[239a.2]དེས་ན་དེ་དག་དེའི་འབྲས་བུ་ཅན་མ་ཡིན་པ་དག་ལས་ཀྱང་ཁྱད་པར་མེད་པར་ཐ་དད་པར་གྲུབ་པོ་ཞེས་སྟོན་པ་ནི། དེ་དག་བྱེད་པ་ན་དེ་མི་བྱེད་པ་ཅན་དག་ལས་ཐ་དད་པའི་ཕྱིར་ཐ་མི་དད་པ་ཞེས་བྱ་བའོ། །དེ་རྒྱུ་ཅན་མ་ཡིན་པ་དག་ལས་ཀྱང་ཐ་དད་པའི་ཕྱིར་དེ་དག་ཐ་མི་དད་པར་བཤད་པ་ནི། གཅིག་
[239a.3]གི་ཞེས་བྱ་བའོ། །དེ་དེ་ལྟར་བསམ་པ་ལ་ལྟོས་ན་སྤྱི་ཁས་བླངས་པ་དང་། རྣམ་པར་རྟོག་པ་དངོས་པོའི་ཡུལ་ཅན་མ་ཡིན་པ་དང་། སྤྱི་ཞེས་བྱ་བ་འགའ་ཡང་མེད་དོ་ཞེས་གནས་པ་ན། ཇི་ལྟར་རྣམ་པར་རྟོག་པ་དངོས་པོའི་ཡུལ་ཅན་མ་ཡིན་པ་དག་གིས་ཀྱང་བློ་ལ་ལྟོས་པའི་སྤྱི་ལ་དོན་རྣམ་པར་
[239a.4]གནས་པ་འགྲུབ་པ་དེ་བསྟན་པའི་ཕྱིར་རྩོད་པ་སློང་བར་བྱེད་པ་ནི་ཡང་ཅི་ཞེས་བྱ་བའོ། །གཉི་ག་ལྟར་ཡང་ཉེས་པ་ཅི་ཡོད་ཅེས་རྩོད་པར་བྱེད་པ་ལ་འདྲི་བ་ནི། དེ་ལ་ཅིར་འགྱུར་ཞེས་བྱ་བའོ། །རང་གི་མཚན་ཉིད་རྣམ་པར་རྟོག་པའི་ཡུལ་དུ་མི་སྲིད་པའི་ཕྱིར། གཞན་སེལ་བའི་མཚན་ཉིད་ཀྱི་
[239a.5]སྤྱི་རང་གི་མཚན་ཉིད་ཕྱི་རོལ་གྱི་དངོས་པོ་མཚུངས་པ་ཞེས་བྱ་བར་རྟོགས་པ་ཡིན་ནོ། །ཡང་ན་གཞན་ཕྱི་རོལ་གྱི་དངོས་པོ་མ་ཡིན་པས་ཇི་ལྟར་དོན་བྱེད། འདི་སྐད་བརྗོད་པ་ཡིན་ཏེ་རྣམ་པར་རྟོག་པ་རྣམས་དངོས་པོའི་ཡུལ་ཅན་མ་ཡིན་པའི་ཕྱིར་གལ་ཏེ་འདི་ལྟ་བུའི་བདག་ཉིད་ཀྱི་སྤྱིས་རང་གི་མཚན་
[239a.6]ཉིད་མཚུངས་སོ་ཞེས་རྟོགས་པར་བྱ་བ་མ་ཡིན་གྱི་འོན་ཀྱང་དངོས་པོའི་རང་བཞིན་གཞན་ཁོ་ན་ཡིན་ནོ། །འོ་ན་ཇི་ལྟར་དུ་བས་མེ་རྗེས་སུ་དཔོག་པས་འཇུག་པ་མེས་བསྒྲུབ་པར་བྱ་བ་འཐོབ་པར་འགྱུར། རྣམ་པར་རྟོག་པ་དེ་མེའི་ཡུལ་ཅན་ཡིན་ནོ་ཞེས་མེ་མ་ཡིན་པ་རིག་པས་ཞུགས་པས་
[239a.7]མེས་བསྒྲུབ་པར་བྱ་བའི་དོན་གྲུབ་པ་ནི་མ་ཡིན་ནོ། །དེ་ལྟར་མ་ཡིན་ན། སྨིག་རྒྱུ་ལ་ཆུར་ཤེས་པ་ན་ཡང་ཆུས་བསྒྲུབ་པར་བྱ་བ་འགྲུབ་པར་འགྱུར་རོ། །དེས་ན་རྣམ་པར་རྟོག་པའི་ཡུལ་ལ་དེ་མི་བྱེད་པ་ལས་ཐ་དད་པ་ཡང་རྙེད་པར་དཀའོ། །དེས་ན་ཇི་ལྟར་འདི་དེ་བྱེད་པ་ཉིད་ཀྱི་དེ་མི་བྱེད་པ་དག་
[239b]
[239b.1]ལས་ཐ་དད་པའི་མཚན་ཉིད་ཀྱི་སྤྱི་མཚུངས་སོ་ཞེས་བྱ་བར་ངེས་པར་བྱ། ཉེས་པ་གཞན་ཡང་བརྗོད་པ་ནི། རང་གི་མཚན་ཉིད་ལ་ཡང་ཞེས་བྱ་བའོ། །མི་རྟག་པ་ཉིད་ཀྱི་བདག་ཉིད་ཀྱི་སྤྱིས་རྣམ་པར་རྟོག་པ་རྣམས་རང་གི་མཚན་ཉིད་ཀྱི་ཡུལ་ཅན་མ་ཡིན་པའི་ཕྱིར་གལ་ཏེ་བྱས་པ་ཉིད་ལས་སྒྲ་མི་རྟག་པར་
[239b.2]རྗེས་སུ་དཔོག་པ་ན། སྒྲ་མི་རྟོགས་ན་ནི་དོན་མི་རྟག་པ་ཉིད་དུ་མི་འགྱུར་རོ། །དེ་བཞིན་དུ་བདག་མེད་པ་ཉིད་ལ་སོགས་པར་རྗེས་སུ་དཔག་པ་གཞན་ཡང་མེད་པར་འགྱུར་རོ། །གཞན་ཡང་རྗེས་སུ་དཔག་པའི་དངོས་པོའི་ཡུལ་ཅན་ཡིན་པ་ཉིད་ཀྱིས་མི་རྟག་པ་དང་བདག་མེད་པ་ལ་སོགས་པ་
[239b.3]རྗེས་སུ་དཔག་པ་དེ་ལྟ་བུར་གྱུར་པ་དངོས་པོའི་རང་བཞིན་ཡིན་ནོ་ཞེས་གྲུབ་ན། ཆ་མེད་པའི་དོན་མངོན་སུམ་གྱིས་བཟུང་བ་ན་དེ་དག་བཟུང་བར་འགྱུར་བ་ཞིག་ན། རྗེས་སུ་དཔག་པ་དངོས་པོའི་ཡུལ་ཅན་མ་ཡིན་ན་ནི་འདི་དག་རྣམ་པར་རྟོག་པའི་སྣང་བ་ཁོ་ན་ཡིན་གྱི། དངོས་པོའི་ངོ་བོ་ནི་མ་ཡིན་
[239b.4]ནོ། །དེ་བཤད་པ་ནི། དེ་དག་ཀྱང་ཞེས་བྱ་བ་སྟེ་མི་རྟག་པ་ཉིད་ལ་སོགས་པ་དག་གོ། །དེ་དག་ནི་དངོས་པོའི་ངོ་བོ་མ་ཡིན་ཏེ། བརྟགས་པའི་བདག་ཉིད་ལ་གནས་པའི་ཕྱིར་རོ་ཞེས་བྱ་བའི་དོན་ཏོ། །ལྷག་པར་ཞེན་པ་ལ་ལྟོས་ནས་དོན་གྱི་ཡུལ་ཅན་དུ་བརྗོད་པ་མ་ཡིན་ནམ་ཞེ་ན་བདེན་མོད་
[239b.5]ཀྱི། འོན་ཀྱང་གལ་ཏེ་མི་རྟག་པ་ཉིད་རིག་པ་མ་ཡིན་པ་ཉིད་ཡིན་ན་དེ་ལྷག་པར་ཞེན་པའི་དབང་གིས། མི་རྟག་པ་ཉིད་ཀྱི་ཡུལ་ཅན་དུ་མི་འཐད་དོ། །རིག་པ་ལས་མ་གཏོགས་པར་ནི་ཡུལ་གྱི་དོན་འགའ་ཡང་མེད་དོ། །དེས་ན་མི་རྟག་པ་ཉིད་མི་ཤེས་པ་བཞིན་དུ་རྣམ་པར་ཤེས་པ་མི་རྟག་
[239b.6]པའི་ཡུལ་ཅན་དུ་འགྱུར་བ་ནི་མ་ཡིན་ནོ། །དེ་སྟེ་མི་རྟག་པ་ཉིད་རིག་པ་ཁོ་ན་ཡིན་ན་ནི་རིག་པ་ཉིད་ཀྱིས་མི་རྟག་པའི་ཡུལ་ཅན་ཡིན་གྱི་ཞེན་པས་ནི་མ་ཡིན་ནོ། །དེས་ན་རྣམ་པར་རྟོག་པ་རྣམས་དངོས་པོའི་ཡུལ་ཅན་མ་ཡིན་པར་ཇི་ལྟར་འགྱུར་ཞེ་ན་འདི་བསལ་བའི་ཕྱིར་ཉེས་པ་དེ་ནི་མེད་དེ་ཞེས་སྨོས་སོ། །
[239b.7]དེ་ལྟར་མཚུངས་སོ་ཞེས་རྟོགས་པར་བྱ་བ་ནི་གཞན་ཡིན་གྱི་རང་གི་མཚན་ཉིད་ནི་མ་ཡིན་ནོ་ཞེས་སྟོན་པ་ནི། ཤེས་པ་ལ་སྣང་བ་ཞེས་བྱ་བ་ཡིན་ནོ། །གཞི་མཐུན་པ་ལ་སོགས་པ་ཡང་འདི་ཁོ་ནར་ཡིན་ནོ། །རྣམ་པར་ཤེས་པ་དེ་ཇི་ལྟ་བུར་གྱུར་པ་དང་། དོན་ཡང་ཇི་ལྟ་བུར་གྱུར་པ་དང་། དེ་
[240a]
[240a.1]ལ་སྤྱི་ལ་སོགས་པའི་ཐ་སྙད་ཇི་ལྟར་ཡིན་པ་དེ་སྟོན་ཏེ། ཤེས་པ་སྐྱེ་བ་གང་ཡིན་པ་འདི་ནི་དེ་ལ་ཡོད་པའི་དོན་ཀྱང་རྣམ་པ་གང་ཡིན་པའི་དོན་དེ་དག་མཚུངས་སོ་ཞེས་འཛིན་ཏོ་ཞེས་བྱ་བར་འབྲེལ་ཏོ། །ཤེས་པའི་རང་གི་ངོ་བོ་རྒྱུ་དང་རང་གི་ངོ་བོའི་སྒོ་ནས་སྟོན་པ་ནི། དངོས་པོའི་རང་
[240a.2]གི་ངོ་བོ་འཛིན་པས་ཞེས་བྱ་བའོ། །དེའི་ཡུལ་ཅན་མ་ཡིན་ཡང་དེའི་ཡུལ་ཅན་གྱི་རྒྱུ་མཚན་ནི་དེ་ཉམས་སུ་མྱོང་བ་གཞན་པའི་བག་ཆགས་ལ་བརྟེན་ནས་སྐྱེ་བ་ཡིན་ལ། འབྲས་བུ་ཐ་མི་དད་པའི་དངོས་པོ་ལས་སྐྱེ་བ་ནི་དོན་ཐ་མི་དད་པར་འཛིན་པའི་རྒྱུ་མཚན་ཡིན་ནོ། །གང་གི་ཕྱིར་འདི་ཉམས་སུ་
[240a.3]མྱོང་བའི་དངོས་པོ་ལས་དེའི་འདུ་བྱེད་པའི་དབང་གིས་སྐྱེ་བ་དེའི་ཕྱིར་དངོས་སུ་ནི་དེའི་ཡུལ་ཅན་མ་ཡིན་པ་དེ་ལྟར་ལྷག་པར་ཞེན་པ་ཡིན་ནོ། །དེ་བས་ན་དེའི་ཡུལ་ཅན་མ་ཡིན་ཡང་དེའི་ཡུལ་ཅན་ལྟ་བུ་ཞེས་བྱ་བས་ནི་དེ་མ་ཡིན་པ་ལ་དེར་ལྷག་པར་ཞེན་པ་ཉིད་བརྗོད་པ་ཡིན་ནོ། །དོན་ཐ་མི་དད་པ་འཛིན་པ་
[240a.4]ཞེས་བྱ་བ་འདིར་ཡང་ལྟ་བུའི་སྒྲ་བྱས་པ་ནི་སྤྱི་ལྷག་པར་ཞེན་པའི་རྩ་བ་ཅན་ཡིན་པའི་ཕྱིར་རོ། །དམིགས་པ་མ་ཡིན་ཡང་རང་བཞིན་ཉིད་ཀྱིས་མཚུངས་པར་རྟོགས་པ་དེའི་ས་བོན་ནི་གཞན་ལས་ཐ་དད་པ་ཁོ་ན་ཡིན་ནོ་ཞེས་སྟོན་པ་ནི། དོན་དམ་པར་ཞེས་སྨོས་སོ། །དེ་ཉིད་ཀྱི་ཕྱིར་ཐ་དད་པ་ནི་དེ་དང་འབྲེལ་
[240a.5]པ་ཡིན་ནོ། །ཤེས་པའི་རང་བཞིན་བརྗོད་ནས་དེ་དང་རྗེས་སུ་མཐུན་པར་དེའི་ཡུལ་ཀྱི་རང་བཞིན་བཤད་པ་ནི། དེ་ལ་ཞེས་སྨོས་སོ། །དོན་དེ་ཉམས་སུ་མྱོང་བའི་བག་ཆགས་ལས་སྐྱེས་པའི་ཕྱིར་འདི་ཕྱི་རོལ་ལྟ་བུ་དང་རྣམ་པ་ཐ་མི་དད་པ་འཛིན་པ་ཉིད་ཀྱིས་གཅིག་པ་ལྟ་བུ་དང་། དེའི་ཡུལ་ཅན་
[240a.6]མ་ཡིན་ཡང་དེའི་ཡུལ་ཅན་ལྟ་བུ་ཉིད་ཀྱིས་ནི་དོན་མི་བྱེད་ཀྱང་དེ་བྱེད་པ་ལྟ་བུའོ། །འདི་ཉིད་གཞུང་གཟུགས་པའི་ཕྱིར། ཐ་སྙད་འདོགས་པ་རྣམས་ཞེས་སྨོས་སོ། །དོན་བྱ་བ་བྱེད་པ་ཉིད་དུ་ལྷག་པར་ཞེན་པའི་ཕྱིར་དེའི་ཡུལ་ཅན་ལྟ་བུ་ཞེས་བརྗོད་ལ། ལྷག་པར་ཞེན་པ་དེ་ཡང་ཐ་སྙད་འདོགས་པ་
[240a.7]རྣམས་ལ་ཡོད་པ་ཡིན་ཏེ། གལ་ཏེ་མེད་ན་ནི་འཇུག་པ་ཉིད་དུ་མི་འགྱུར་རོ། །འདི་ལྟར་རིག་པར་མ་གྱུར་པའི་དོན་ལ་གལ་ཏེ་དེར་ཞེན་པ་ཡང་མེད་ན་ནི་གཞན་ལས་ཐ་དད་པ་ལ་མི་འཇུག་པ་ཁོ་ནར་འགྱུར་རོ། །རིགས་མི་མཐུན་པ་ཐ་དད་པའི་ཡུལ་ཅན་ཉིད་ཀྱིས་ཀྱང་དེ་མི་བྱེད་པ་དག་
[240b]
[240b.1]ལས་ཀྱང་ཐ་དད་པ་ལྟ་བུའོ། །གལ་ཏེ་འདིར་ལྡོག་པར་སྣང་བ་མེད་པའི་ཕྱིར་ཇི་ལྟར་ཐ་དད་པ་ལྟ་བུ་ཞེས་བརྗོད་ཅེ་ན། དེ་ནི་དོན་བྱ་བ་བྱེད་པ་ཉིད་དུ་ཞེས་སྨོས་སོ། །དེ་ལྟར་སྣང་བ་ཉིད་དེ་མ་ཡིན་པ་ལས་ཐ་དད་པར་སྣང་བ་ཡིན་ཏེ། ཇི་སྐད་བཤད་ཟིན་པ་བཞིན་ནོ། །རྣམ་པ་དེ་ཉིད་ཀྱང་རྣམ་
[240b.2]པར་རྟོག་པའི་གཟུགས་བརྙན་ཡིན་པའི་ཕྱིར། ཐ་དད་པ་ཞེས་བརྗོད་དོ། །དེ་ཡང་དངོས་པོའི་ངོ་བོ་མ་ཡིན་ནོ་ཞེས་བཤད་པ་ནི། དེ་ཡང་བརྟག་པའི་ཞེས་བྱ་བའོ། །དེ་ནི་སྤྱིའི་ཐ་སྙད་དེ་ལ་བརྟེན་པ་ཉིད་དུ་བཤད་པ་ན་ནི་བློ་ལ་གནས་པའི་དོན་དེ་དག་ནི་ཞེས་བྱ་བ་ཡིན་ནོ། །གལ་ཏེ་ཡང་དོན་རྣམ་པ་
[240b.3]གཅིག་ཉིད་ཀྱི་སྐབས་ཡིན་པ་དེ་ལྟ་ན་ཡང་སྤྱི་ཉིད་གཞན་ལ་ལྟོས་པའི་ཕྱིར་མང་པོའི་ཚིག་ཏུ་བརྗོད་དོ། །དེ་ཞེས་བྱ་བའི་ཐ་དད་པའི་མཚན་ཉིད་སྤྱིས་མཚུངས་སོ་ཞེས་བྱ་བར་འཛིན་ཏོ། །གང་གི་ཕྱིར་འདིར་ལོག་པའི་བདག་ཉིད་དེ་དག་སྣང་བ་ཡིན་ནོ། །རང་གི་མཚན་ཉིད་ནི་མ་ཡིན་ཏེ། ཇི་སྐད་བརྗོད་
[240b.4]པའི་ཤེས་པ་དེ་ལ་མི་སྣང་བ་ཉིད་དོ། །གཞི་མཐུན་པ་ཡང་དེ་ཉིད་ལ་ཡིན་པར་བཤད་པ་ནི། དེ་དག་ཉིད་ཅེས་བྱ་བའོ། །བ་ལང་མ་ཡིན་པ་ལས་ལོག་པར་སྣང་བ་ནི་དཀར་པོ་མ་ཡིན་པ་ལས་ཀྱང་ལོག་པར་སྣང་ངོ་། །དེས་ན་བ་ལང་ཞེས་བྱ་བ་སྣང་བ་གང་ཡིན་པ་དེ་ལ་རྟེན་ཉིད་དུ་དཀར་པོ་
[240b.5]ཞེས་སྣང་བ་ན་དེ་དང་ཐ་མི་དད་པར་སྣང་བ་ཡིན་ཏེ། དེ་ཉིད་དཀར་པོ་ཡིན་པའི་ཕྱིར་རོ། །དེས་ན་རྣམ་པ་འདི་གཉིས་རྣམ་པར་རྟོག་པ་ལ་སོ་སོར་ཐ་དད་པར་སྣང་བ་ཡིན་ཡང་ཕན་ཚུན་འབྲེལ་པས་བྱས་པས་གཅིག་ཏུ་སྣང་བ་འདི་ཉིད་གཞི་མཐུན་པ་ཡིན་གྱི། གང་གིས་འདི་གཉིས་གཞི་མཚུངས་
[240b.6]པ་ཡིན་པའི་ཕྱིར་གཞི་མཐུན་པར་འགྱུར་བ་ཆོས་ཅན་གསུམ་པ་ནི་འདིར་ཡང་སྣང་བ་མེད་དོ། །བ་ལང་ངོ་སྙམ་པ་འདི་ཉིད་དུས་ཅན་རྟོགས་པ་ཡིན་ལ་དེ་ཉིད་ཀྱང་དཀར་པོའི་བདག་ཉིད་དུ་གྱུར་པ་ཡིན་ནོ། །འདི་ལ་ཇི་ལྟར་ཤེས་དང་ཐ་དད་མ་ཡིན་པ་ཞེས་བྱ་བའི་ཚུལ་འདིས་བློའི་དོན་རྣམས་
[240b.7]ལོག་པའི་རྣམ་པར་རྟོག་པ་ལས་བྱུང་བའི་བདག་ཉིད་དུ་བཤད་པ་དེ་བཞིན་དུ། ཐ་དད་པ་རྣམས་འབྲེལ་པར་རྟོགས་པ་ཡང་མ་གྲུབ་པའི་ཕྱིར་གཞི་མཐུན་གཅིག་པ་ཉིད་ཀྱང་ལྷག་པར་ཞེན་པ་ཙམ་གྱི་རང་བཞིན་ལོག་པའི་དོན་ཁོ་ན་ཡིན་ནོ་ཞེས་བསྟན་པའི་ཕྱིར། བདག་ཉིད་ཀྱི་
[241a]
[241a.1]མེད་ཀྱང་ཞེས་སྨོས་སོ། །དོན་དེ་རྣམས་བདག་ཉིད་ཀྱིས་མེད་ཀྱང་ལྷག་པར་ཞེན་པའི་རང་བཞིན་གྱི་བློས་སྤྱི་དང་གཞི་མཐུན་པའི་རང་བཞིན་དེ་ལྟར་སྟོན་པའི་ཕྱིར་ཐ་སྙད་འདི་ནི་དེ་ཁོ་ན་མ་ཡིན་ནོ། །དེས་ནི་དེ་ལྟར་མཚུངས་པ་ཉིད་དུ་རྟོགས་པར་བྱ་བ་གང་ཡིན་པ་དེ་བསྟན་
[241a.2]ནས། ཡང་ན་ནི་གཞན་གྱིས་ཇི་ལྟར་དོན་བྱེད་ཅེས་དངོས་པོ་མེད་པའི་ཡུལ་ཅན་ཉིད་ལ། སུན་འབྱིན་པ་བརྗོད་པ་གང་ཡིན་པ་དེ་སྤང་བའི་ཕྱིར། འདི་ཐམས་ཅད་ནི་ཞེས་བྱ་བའོ། །འདི་ལྟར་བསམ་པ་ཡིན་ཏེ། ཉམས་སུ་མྱོང་བའི་བག་ཆགས་ཀྱི་རྩ་བ་ཅན་ཉིད་ཀྱིས་ན་རྣམ་པར་
[241a.3]རྟོག་པ་ནི་གདོན་མི་ཟ་བར་མཐོང་བའི་དོན་གྱི་རྗེས་སུ་འབྲང་བ་ཡིན་ནོ། །དེས་ཡུལ་དུ་བྱས་པ་ལས་གཞན་འཛིན་ན་ནི། ཉམས་སུ་མྱོང་བའི་བག་ཆགས་ལ་བརྟེན་པ་ཉིད་དུ་མི་འགྱུར་རོ། །དེ་ལ་གང་ལ་ཉམས་སུ་མྱོང་བར་གྱུར་པའི་རང་གི་ངོ་བོ་ཇི་ལྟ་བུར་གྱུར་པ་ཁོ་ན་དེའི་འདུ་བྱེད་པས་བསྐྱེད་
[241a.4]པའི་བློ་ལ་སྣང་བ་ཡིན་ན་ནི། རྣམ་པར་རྟོག་པ་འཁྲུལ་པར་མི་འགྱུར་རོ། །གང་གི་ཚེ་རྣམ་པར་རྟོག་པ་དེའི་འདུ་བྱེད་པས་བསྐྱེད་པ་ཉིད་ཡིན་ཡང་དེའི་འདུ་བྱེད་པས་བསྐྱེད་པ་ཉིད་ཀྱིས་དེ་ཡོངས་སུ་སྤངས་ཏེ་གཞན་རྗེས་སུ་རྟོགས་པར་མི་ནུས་ལ་རྣམ་པར་རྟོག་པའི་རང་བཞིན་གྱིས་ནི་ཇི་ལྟར་ཉམས་སུ་མྱོང་
[241a.5]བ་བཞིན་རྟོགས་པར་ནུས་པ་དང་བྲལ་བས་སྣང་བ་ཐ་དད་པས་ཉེ་བར་མཚོན་པ་དེའི་རང་བཞིན་གཞན་དུ་གྱུར་པ་ལ་དོན་དུ་ལྷག་པར་ཞེན་པའི་རྣམ་པར་རྟོག་པ་སྐྱེ་བ་དེའི་ཚེ་འདི་འཁྲུལ་པ་ཞེས་བརྗོད་པ་ཡིན་ནོ། །མི་འདྲ་བ་ཙམ་གྱི་ནི་གཞན་ཉིད་དུ་འགྱུར་གྱི། འཁྲུལ་པར་ནི་མ་ཡིན་ནོ། །འཁྲུལ་པ་
[241a.6]ཉིད་ནི་མི་འདྲ་བ་ལ་ཡང་དེ་ཉིད་དུ་ཞེན་པས་བྱས་པ་ཡིན་ནོ། །དེའི་འདུ་བྱེད་པའི་རྩ་བ་ཅན་ཉིད་ཀྱིས་འབྲེལ་པའི་སྣང་བ་དང་རྣམ་པར་བརྟག་པ་ཉིད་ཀྱི་སྣང་བ་ལས་རྣམ་པར་བརྟག་པར་བྱ་བ་མི་འདྲ་བ་ཉིད་ནི་ཁྲ་བོ་ལས་སེར་སྐྱ་མི་འདྲ་བ་ལྟ་བུ་ཡིན་གྱི། ཁྲ་བོ་དང་བུམ་པ་མི་འདྲ་བ་ལྟ་བུ་ནི་མ་ཡིན་ནོ། །
[241a.7]དེས་ན་རང་གི་མཚན་ཉིད་ཀྱི་མཐོང་བའི་འདུ་བྱེད་པ་ལས་སྐྱེས་པའི་བག་ཆགས་ཀྱིས་བྱས་པས་ན་འཁྲུལ་པ་འདི་དངོས་པོ་ཇི་ལྟ་བ་བཞིན་པའི་བསླད་པ་ཡིན་པར་བརྗོད་དོ། །འཁྲུལ་པ་གཉིས་ནི་དངོས་པོའི་ཁྱད་པར་སྲིད་པ་དང་མི་སྲིད་པ་དང་ལྡན་པའི་རང་བཞིན་གྱི་དབྱེ་བ་སྟེ། དཔེར་ན་ཟླ་བ་ལ་
[241b]
[241b.1]ཟླ་བ་གཉིས་སུ་སྣང་བའམ། ནོར་བུའི་འོད་ལ་ནོར་བུར་སྣང་བ་བཞིན་ནོ། །ཟླ་བ་གཉིས་དང་ནོར་བུའི་རྣམ་པ་དག་ནི་ཟླ་བ་དང་སྒྲོན་མ་ལ་མེད་པའི་ཕྱིར་རོ། །རང་གི་འོད་འཁྱིམས་པ་ལ་ནོར་བུའི་འོད་ཆེན་པོར་ངེས་པས་ནོར་བུའི་འོད་ལ་ནོར་བུར་ངེས་པ་ནི་སྲིད་པའི་བདག་ཉིད་ཀྱིས་འཁྲུལ་པ་ཡིན་ནོ། །འཁྱིམས་
[241b.2]པའི་ཚད་ཀྱིས་ནོར་བུ་ཆེན་པོར་ངེས་ཀྱང་དེར་ནོར་བུ་ཡོད་པ་མ་བཀག་པའི་ཕྱིར་རོ། །མིག་མི་གསལ་བས་གསལ་བའི་དཀྱིལ་འཁོར་གྱིས་ཡོངས་སུ་བསྐོར་བའི་སྒྲོན་མ་རྟོགས་པ་ལ་དེ་ལྟ་བུའི་ནོར་བུ་ཆེན་པོར་ངེས་པ་ནི་དངོས་པོ་དང་མི་ལྡན་པ་ཁོ་ནའོ། །དེའི་ཕྱིར་དོན་ཇི་ལྟ་བ་བཞིན་དུ་འཁྲུལ་པའི་རྣམ་
[241b.3]པར་རྟོག་པ་ནི་དོན་དེ་དང་འབྲེལ་པས། དེར་མི་འཁྲུལ་པས་ན་རྟོགས་པ་དེ་ལས་འཇུག་པ་དེ་དམིགས་པ་ཉིད་མེད་ཀྱང་། དེ་ཐོབ་པའི་རྩ་བ་ཅན་དེས་བསྒྲུབ་པའི་དོན་བྱ་བ་གྲུབ་པ་མེད་པ་མ་ཡིན་ཏེ། དུ་བ་ལས་མེ་རྟོགས་པ་ན་དེ་དང་མི་མཐུན་པའི་རང་བཞིན་རྟོགས་པ་ཡིན་ཡང་མི་
[241b.4]རྟོགས་པ་ཉིད་མ་སྤངས་པས་ན། ཞུགས་པས་མེ་ཐོབ་པ་ན་བསྲེགས་པ་ལ་སོགས་པ་གྲུབ་པ་བཞིན་ནོ། །ཚུལ་འདི་རྣམ་པར་རྟོག་པ་ཐམས་ཅད་ལ་ནི་ཡོད་པ་མ་ཡིན་ཏེ། རྟག་པ་ལ་སོགས་པའི་རྣམ་པར་རྟོག་པ་རྣམས་གཏན་མེད་པའི་དོན་རྣམ་པར་རྟོག་པ་ཡིན་པའི་ཕྱིར་རོ། །དངུལ་ལ་སོགས་
[241b.5]པའི་རྣམ་པར་རྟོག་པ་རྣམས་ནི་དེའི་ཡུལ་དང་དུས་ན་མེད་པ་རྟོག་པ་ཡིན་ནོ། །དངོས་པོའི་ཡུལ་ལ་མི་སླུ་སྟེ། དེའི་དོན་བྱེད་པ་གནས་པར་གྱུར་པའོ། །ཇི་ལྟར་མཐོང་བའི་ཁྱད་པར་གྱི་རྗེས་སུ་འབྲང་བ་ནི། མཐོང་བ་ཇི་ལྟར་རྟོགས་པའོ། །འདྲ་བ་ཅུང་ཟད་ཙམ་བཟུང་བ་ནི་ཉ་ཕྱིས་ལ་
[241b.6]སོགས་པ་ལ་དངུལ་ལ་སོགས་པ་དང་ཇི་སྐད་བཤད་པ་བཞིན་ནོ། །མི་རྟག་པ་ཉིད་རྟག་པ་དང་འདྲ་བ་ནི་སྔོན་པོ་ཙམ་གྱི་རང་བཞིན་གྱིས། དུས་གསུམ་ཁྱབ་པ་སྟེ། གཅིག་ནི་མི་འཇོག་པའི་ཕྱིར་ལ། གཞན་ནི་རྒྱུན་འདྲ་བ་སྐྱེད་པར་བྱེད་པ་ཡིན་པའི་ཕྱིར་རོ། །འདིར་དཔེ་ནི། མར་མེའི་
[241b.7]འོད་ལ་ནོར་བུར་རྟོགས་པ་ཡིན་ནོ། །དེས་ན་ཡང་ན་ནི་ཇི་ལྟར་གཞན་གྱི་དོན་བྱེད་ཅེས་གང་བརྗོད་པའི་སྐྱོན་མེད་དོ་ཞེས་བཤད་པ་ནི། དེའི་ཕྱིར་ཞེས་བྱ་བ་ཡིན་ནོ། །གལ་ཏེ་འདི་མེ་མ་ཡིན་པར་རིག་པ་ཡིན་ན་མེས་བསྒྲུབ་པར་བྱ་བ་འཁྲུལ་པར་མི་འགྱུར་རོ། །ཡང་ན་མེ་རིག་པ་ཙམ་གྱི་རང་བཞིན་
[242a]
[242a.1]ལས་མེའི་ཡུལ་ཅན་ཡིན་ན་ནི་དངོས་པོ་མེད་པའི་ཡུལ་ཅན་མེ་རིག་པ་ཉིད་དུ་མི་འགྱུར་རོ། །དེ་ལྟ་ན་འོ་ན་སྨིག་རྒྱུ་ལ་ཆུར་རིག་པ་ཡང་ཆུར་རིག་པ་ཉིད་དུ་འགྱུར་རོ་ཞེ་ན་བདེན་མོད་ཀྱི་ཆུ་ནི་མེད་དོ། །དེ་ལྟར་རྗེས་སུ་དཔག་པའི་རིགས་པ་ནི་དོན་མེད་པར་མི་འགྱུར་ཏེ། དོན་ལ་མི་
[242a.2]འཁྲུལ་པའི་ཕྱིར་རོ། །དེའི་ཕྱིར་རྣམ་པར་རྟོག་པའི་ཡུལ་ནི་དོན་གྱི་བྱ་བ་མེད་ཀྱང་དོན་བྱ་བ་འགྲུབ་པ་འཐད་པ་ཡིན་ནོ། །གཞན་དུ་ན་དོན་ཡུལ་དུ་མ་བྱས་པའི་ཕྱིར་དང་། དོན་གྲུབ་པར་འགྱུར་བ་དེས་ན་རྣམ་པར་རྟོག་པའི་ཡུལ་ཉིད་ལས་ཡིན་ནོ་ཞེས་བྱ་བར་འགྱུར་རོ། །དོན་ཉིད་ལས་ཡིན་ན་ནི་
[242a.3]རྣམ་པར་རྟོག་པའི་ཡུལ་དེ་ལྟར་ཐལ་བ་མེད་དོ། །རྣམ་པར་རྟོག་པའི་ཡུལ་ནི་རང་གི་མཚན་ཉིད་ལས་གཞན་པ་ཡིན་པའི་ཕྱིར་དེ་མི་བྱེད་པ་ལས་ཐ་དད་པར་མི་འགྱུར་རོ་ཞེས་སྨོས་པ་གང་ཡིན་པ་དེ་ནི་ཕྱི་རོལ་པ་རྣམ་པ་ཐ་དད་པ་ལ་རྣམ་པར་རྟོག་པ་མི་འཇུག་པ་མ་ཡིན་ནམ་ཞེས་བྱ་བ་དེ་ཉིད་དུ་བསལ་
[242a.4]ཟིན་ཏོ། །སྒྲ་མི་རྟག་པ་ཉིད་དུ་མ་རྟོགས་པའི་ཕྱིར་འདི་ལྟ་བུའི་བདག་ཉིད་སྤྱི་རང་གི་མཚན་ཉིད་མཚུངས་པ་མ་ཡིན་པའི་ཕྱིར་སྒྲ་མི་རྟག་པ་ཉིད་དུ་མི་འགྱུར་རོ་ཞེས་སྨྲས་པ་གང་ཡིན་པ་དེ་ཡང་སྤང་བའི་ཕྱིར་རང་གི་མཚན་ཉིད་ལ་ཞེས་སྨོས་སོ། །རང་གི་མཚན་ཉིད་ཀྱིས་རང་གི་བདག་ཉིད་ལ་
[242a.5]མི་རྟག་པ་ཡོད་པ་ཁོ་ན་སྟེ། འདི་ལྟར་དངོས་པོ་གཡོ་བ་ཉིད་འཇིག་པ་ཞེས་བྱ་བའི་མི་རྟག་པ་ཉིད་ཡིན་གྱི་མི་རྟག་པ་ཉིད་ཅེས་བྱ་བའི་སྤྱི་དང་ལྡན་པ་ནི་མ་ཡིན་ནོ། །དེས་ན་གལ་ཏེ་རྣམ་པར་རྟོག་པ་ལ་སྣང་བའི་མི་རྟག་པ་ཉིད་ཀྱི་རང་བཞིན་གྱི་སྤྱིས་རང་གི་མཚན་ཉིད་མཚུངས་པར་རྣམ་པར་
[242a.6]མི་རྟོག་མོད། དེ་ཙམ་གྱིས་ནི་དེ་ལ་མི་རྟག་པ་ཉིད་མེད་པ་མ་ཡིན་ཏེ། གང་གི་ཕྱིར་དངོས་པོ་སྔོན་མ་བྱུང་བ་བྱུང་ནས་མེད་པར་འགྱུར་བ་དེ་མི་རྟག་པ་ཇི་ལྟར་མ་ཡིན། འདི་ལྟར་མི་རྟག་པར་རྟོགས་པས་ཀྱང་དངོས་པོ་དེ་ལྟ་བུར་གྱུར་པ་ཉིད་རྣམ་པར་འཇོག་པ་ཡིན་ནོ། །དེ་བཤད་པ་ནི། དེ་
[242a.7]དེ་ལྟ་བུ་ལ་སྐད་ཅིག་མར་གནས་པའི་ཞེས་བྱ་བའོ། །དེས་ན་སྐད་ཅིག་མར་གནས་པའི་ཆོས་ཉིད་དུ་གནས་པའི་ཕྱིར་དངོས་པོ་སྐད་ཅིག་མར་གནས་པའི་ཆོས་ཉིད་དུ་འཛིན་པ་ན་འདི་ནི་མི་རྟག་པའོ། །འདི་ནི་མི་རྟག་པ་ཉིད་དོ་སྙམ་དུ་སེམས་པར་འགྱུར་གྱི། གང་གིས་ན་སེལ་བའི་བདག་
[242b]
[242b.1]ཉིད་འདི་གཞན་གྱི་མཐར་ཐུག་པའི་ཕྱིར་དངོས་པོ་དེ་ལྟ་བུ་མི་འགྱུར་བ་སྤྱི་འགའ་ཞིག་དང་ལྡན་པ་ལ་ལྟོས་པ་ནི་མ་ཡིན་པ་དེས་ན་བློ་ཡང་དེ་ཡོད་པ་ལ་མི་ལྟོས་སོ་སྙམ་དུ་བསམས་པའོ། །དེས་ན་དངོས་པོ་དང་རྟོགས་པ་ཡང་འཇིག་པ་ཉིད་མི་རྟག་པ་ཉིད་ཡིན་པའི་ཕྱིར་དངོས་པོ་ལ་མི་རྟག་པ་ཉིད་ལ་
[242b.2]སོགས་པ་ཡོད་པ་ཡིན་ནོ་ཞེས་བསྒྲུབས་ཏེ་དེ་དང་འགལ་བའི་རང་བཞིན་གཞན་དང་ལྡན་པ་ཡིན་ཡང་རྣམ་པར་རྟོག་པ་ལ་ཡང་དེ་ལྟ་བུའི་རང་བཞིན་དུ་སྣང་བ་ནི་ཡོད་པ་ཉིད་དུ་སྟོན་པ་དེའི་ཆོས་ཉིད་ཁོ་ན་ལ་འཇུག་པ་སྟེ། གཟུགས་བརྙན་དང་ལྡན་པས་རང་གི་མཚན་ཉིད་ཀྱི་ངོ་བོ་ཉིད་རྟོགས་པར་བྱེད་པ་
[242b.3]ནའོ། །རྣམ་པར་རྟོག་པ་ནི་མི་རྟག་པ་ཉིད་དུ་སྣང་བར་གྱུར་པ་ན། ཁྲ་བོ་དང་བ་ལང་དང་ཆེན་པོ་ཞེས་དུ་མ་ཉིད་དུ་སྟོན་པར་བྱེད་པར་འགྱུར་ལ་བ་ལང་ཞེས་གཅིག་བསྟན་པ་ནི་ཆོས་ཅན་བསྟན་པར་འགྱུར་ལ། ཐ་དད་པར་བསྟན་ན་ནི་ཆོས་བསྟན་པར་འགྱུར་བ་ཡིན་ནོ། །དེས་ན་དོན་ལ་མི་
[242b.4]སྲིད་པའི་ཆོས་ཀྱིས་རྣམ་པར་བཅད་པའི་མི་རྟག་པ་ཉིད་སྣང་བ་ཡང་ཕྱི་རོལ་སྣང་བ་ན་ནི་མ་ཡིན་མོད་ཀྱི། དེ་ལྟ་ན་ཡང་མི་རྟག་པར་སྣང་བ་མ་སྤངས་པའི་ཕྱིར་མི་རྟག་པ་རྟོགས་པ་མེད་པ་ནི་མ་ཡིན་ནོ། །དངོས་པོ་མེད་པ་ལ་བརྟེན་པ་ཉིད་ཀྱིས་འདི་དག་ཇི་ལྟར་དངོས་པོའི་གཟུགས་བརྙན་དང་
[242b.5]ལྡན་པ་ཉིད་ཡིན་ཞེ་ན། དགོས་པ་འདི་ལ་བཤད་པ་ནི། དེ་རྣམས་རྟེན་མེད་པ་ཡང་མ་ཡིན་ཏེ་ཞེས་བྱ་བའོ། །རང་གི་མཚན་ཉིད་ཀྱི་རྒྱུ་མ་ཡིན་ཡང་དེ་རྣམས་རྟེན་མེད་པ་ནི་མ་ཡིན་ཏེ། དེའི་ཆོས་ཉིད་ལ་འཇུག་པ་ན་མཐོང་བའི་བག་ཆགས་ཀྱིས་དེ་ལྟ་བུའི་གཟུགས་བརྙན་ཉིད་སྐྱེ་བའི་ཕྱིར་
[242b.6]རོ། །དེ་ཉིད་ཀྱི་ཕྱིར་འདི་དག་དངོས་པོ་མེད་པར་འགྱུར་བའི་ཉེས་པ་མེད་དོ་ཞེས་སྟོན་པ་ནི། དངོས་པོ་མེད་པའི་ཆོས་ཉིད་ཀྱང་མ་ཡིན་ཏེ་ཞེས་བྱ་བའོ། །གལ་ཏེ་འདི་དག་དངོས་པོའི་རང་བཞིན་གྱི་རྗེས་སུ་འགྲོ་བ་སྤངས་ནས་སྣང་བ་ཡིན་ན་ནི། དངོས་པོའི་ཆོས་ཉིད་མ་ཡིན་པར་འགྱུར་
[242b.7]བ་ཞིག་ན། གང་གི་ཚེ་ཉམས་སུ་མྱོང་བའི་སྒོ་ནས་ཉེ་བར་འོངས་པ་དངོས་པོའི་ཆོས་སུ་གྱུར་པ་དག་ཁོ་ན་སྣང་བ་དེའི་ཚེ་ཇི་ལྟར་དངོས་པོའི་ཆོས་ཉིད་མ་ཡིན་པར་འགྱུར། གལ་ཏེ་དངོས་པོའི་རང་བཞིན་པ་ཡིན་ན། འོ་ན་ཇི་ལྟར་རྣམ་པར་རྟོག་པ་འཁྲུལ་པ་ཉིད་ཡིན་ཞེ་ན། དངོས་པོ་ལ་
[243a]
[243a.1]ཞེས་སྨོས་སོ། །ཉམས་སུ་མྱོང་བའི་བག་ཆགས་ཀྱི་སྒོ་ནས་དེ་ལྟར་ཉེ་བར་རྟོགས་པའི་དངོས་པོ་ལ་ཐ་དད་པ་ལ་སོགས་པར་རྟོགས་པ་ཉིད་འཁྲུལ་པ་ཡིན་ཏེ། དངོས་པོ་སྣང་བ་ནི་དེའི་སྒོ་ནས་འཁྲུལ་པ་ཡིན་ནོ་ཞེས་བྱ་བའི་ཐ་ཚིག་གོ། །གལ་ཏེ་དངོས་པོར་སྣང་བ་འཁྲུལ་པ་
[243a.2]ཡིན་ན། །དེ་ཇི་ལྟར་མི་རྟག་པ་ཉིད་རྟོག་པ་ཡིན་ཞེ་ན། བདེན་ཏེ་དངོས་སུ་ནི་མ་ཡིན་གྱི་འོན་ཀྱང་ཞེན་པ་ལས་སོ། །འོན་ཏེ་རྟག་པ་ཉིད་མི་སྣང་ན། ལྷག་པར་ཞེན་པས་ཀྱང་དངོས་པོ་ཡུལ་དུ་བྱེད་པར་ནི་མི་ནུས་སོ། །མི་རྟག་པའི་རྣམ་པ་སྣང་བ་ལས་ནི་དེ་ཕྱི་རོལ་དང་མི་མཚུངས་པས་ན་དངོས་སུ་
[243a.3]དེ་རིག་པ་དང་བྲལ་བ་ཡིན་ཡང་དེའི་དངོས་པོར་ལྷག་པར་ཞེན་པ་ལས་རིག་པ་དེ་རིག་པ་མ་ཡིན་པར་བརྗོད་དོ། །འདི་ལྟར་དེ་ནི་མི་རྟག་པ་ཡིན་ལ་མི་རྟག་པ་རིག་པ་འདི་ཡང་དེ་ལྟར་ཞེན་པ་ཡིན་པའི་ཕྱིར་འགལ་བ་མེད་པས་ན་དེ་ལས་དེ་རྣམ་པར་གནས་པར་འགྱུར་བ་ཁས་ལེན་པ་ཡིན་གྱི། དེ་ལྟར་
[243a.4]རྣམ་པར་གནས་པར་གྲུབ་པ་ལ་མངོན་པར་ཞེན་པས་མི་འཐད་ཀྱང་དངོས་པོའི་ཡུལ་ཅན་ཉིད་དུ་འགྱུར་བ་ནི་མ་ཡིན་ནོ། །རྣམ་པར་འཇོག་པར་བྱེད་པ་ནི་དངོས་པོའི་ཡུལ་ཅན་མ་ཡིན་པར་ཡང་རུང་བ་ཁོ་ནའོ། །དེ་ལྟར་རིག་པ་ནི་དེའི་ཡུལ་ཅན་མ་ཡིན་པའི་དངོས་པོར་མ་རྟོགས་པ་ཡིན་ལ་དེ་ཡང་
[243a.5]རྣམ་པ་དེ་ལྟར་རིག་པར་བྱ་བ་ཡིན་པའི་ཕྱིར་དངོས་སུ་དངོས་པོ་རིག་པ་དང་ཁྱད་པར་ཡོད་པ་མ་ཡིན་ནོ། །དངོས་སུ་དེ་ལྟ་བུ་ལ་དེ་ལྟར་རྟོགས་པ་ཡང་དངོས་པོ་ལས་མི་འཁྲུལ་པ་ལས་རྣམ་པ་དེ་ལྟ་བུའི་དངོས་པོ་ཡོད་པའི་ཕྱོགས་གཞན་ལ་ཡང་བྱེ་བྲག་མེད་དོ། །རྟོགས་པ་དང་རྗེས་སུ་མཐུན་
[243a.6]པ་ཙམ་ལས་དེའི་ཡུལ་ཅན་མ་ཡིན་ཡང་དེ་རྣམ་པར་འཇོག་པར་བྱེད་པ་ཡིན་ན། དུང་སེར་པོར་ཤེས་པ་ལ་སོགས་པ་དག་གིས་ཀྱང་རྣམ་པར་འཇོག་པར་འགྱུར་རོ་ཞེ་ན། མ་ཡིན་ཏེ། མངོན་སུམ་འཇུག་པ་མེད་པས་མངོན་སུམ་གྱི་ཆོས་དང་བྲལ་བའི་ཕྱིར་དང་། དེའི་ཡུལ་ཅན་མ་ཡིན་
[243a.7]པར་རྟོགས་པས་ནི་ཚད་མ་གཞན་དང་བྲལ་བ་ཡིན་ནོ། །འཁྲུལ་པ་ཉིད་གཞུང་གཟུགས་པའི་ཕྱིར། དོན་གཅིག་དང་ཞེས་སྨོས་སོ། །འབྲས་བུ་གཅིག་དང་དུ་མ་བྱེད་པ་ལས་འབྲས་བུ་གཅིག་དང་དུ་མ་ཤེས་པར་འདོད་ན་ངོ་བོ་དེ་ཉིད་བསྟན་པའི་ཆེད་དུ་གཅིག་དང་དུ་མ་ཉིད་དུ་བྱེད་པ་ཉིད་
[243b]
[243b.1]དུ་གཞག་པ་བྱས་པའི་གཅིག་དང་དུ་མར་འཛིན་གྱི། དངོས་པོ་གཅིག་དང་དུ་མའི་རང་བཞིན་ཡིན་པའི་ཕྱིར་ནི་མ་ཡིན་ནོ། །གལ་ཏེ་དངོས་པོ་ལ་ཐ་དད་པ་ཡོད་ན་འདི་དུ་མའི་རང་བཞིན་དུ་འགྱུར་བ་ཡིན་ཞིང་ཐ་དད་པ་རྗེས་སུ་འགྲོ་བ་དང་ལྡན་པས་ཀྱང་དངོས་པོ་གཞན་དང་གཅིག་ཏུ་འགྱུར་ལ། དེ་ལྟ་ན་
[243b.2]ཡང་འདི་མ་འཁྲུལ་པར་འགྱུར་རོ། །རྒོལ་བའི་ཡན་ལག་གིས་འདི་འདི་ལྟར་རྣམ་པར་གཞག་པ་ནི་མ་ཡིན་ཏེ། རང་གི་རྒྱུ་ཁོ་ན་ལས་ཡོད་པའི་ཕྱིར་རོ་ཞེ་ན། དེ་ནི་བདེན་ཏེ། རང་གི་རྒྱུ་ཉིད་ལས་ད་ལྟར་འགྱུར་བ་ན་དགོས་པ་འདི་འགྲུབ་པའི་ཕྱིར་དེ་ལྟར་བརྗོད་པ་ཡིན་ནོ། །དངོས་པོ་དེ་ཐ་དད་པ་མ་ཡིན་
[243b.3]ན་ནི་ཆོས་ཐ་དད་པ་ལ་བརྟེན་པའི་དུ་མ་ཉིད་སྲིད་པ་མ་ཡིན་ལ། གང་ལས་སྤྱིའི་བདག་ཉིད་ཀྱིས་གསལ་བ་གཞན་དང་། གཅིག་ཏུ་འགྱུར་བ་སྤྱི་དང་ཁྱད་པར་གྱི་བདག་ཉིད་ཀྱང་མ་ཡིན་ཏེ། དེས་ན་གཅིག་དང་དུ་མར་འཛིན་པ་ནི་འཁྲུལ་པ་ཁོ་ནའོ། །གང་ལས་ཆོས་ཐ་དད་པའམ།
[243b.4]སྤྱི་དང་ཁྱད་པར་གྱི་བདག་ཉིད་མེད་པར་འགྱུར་བ་དངོས་པོ་ཐ་མི་དད་པ་ཉིད་ཇི་ལྟར་ཞེ་ན། གཅིག་པོ་དེ་ལ་ཞེས་སྨོས་སོ། །རེ་ཞིག་ཅིག་ཉིད་ཀྱི་ཕྱིར་དངོས་པོའི་བདག་ཉིད་ལ་དུ་མ་མི་རུང་བའི་ཕྱིར་དངོས་པོ་ཆོས་ཐ་མི་དད་པའི་རང་བཞིན་ནི་མ་ཡིན་ནོ། །དོན་དེ་དག་ནི་དུ་མ་ཉིད་དུ་འགྱུར་
[243b.5]གྱི། དུ་མའི་བདག་ཉིད་གཅིག་ནི་མ་ཡིན་ནོ། །དོན་གཞན་དང་གཅིག་པ་ཉིད་ཀྱང་མི་རུང་སྟེ། དུ་མ་ལ་ཡང་གཅིག་མེད་པའི་ཕྱིར་རོ། །དེའི་ཕྱིར་དངོས་པོ་ནི་ཆོས་ཐ་དད་པའི་བདག་ཉིད་ཅན་མ་ཡིན་ལ། དེའི་བདག་ཉིད་དོན་གཞན་དང་གཅིག་ཏུ་འགྱུར་བ་ཡང་མ་ཡིན་པའི་ཕྱིར་སྤྱི་དང་
[243b.6]ཁྱད་པར་གྱི་རང་བཞིན་ཉིད་མེད་དོ། །འགལ་བའི་ཕྱིར་རང་གི་བདག་ཉིད་ལ་ཐ་དད་པ་དང་ཁྱད་པར་གཞན་དང་གཅིག་ཏུ་གྱུར་པ་ཡང་མེད་མོད། །དངོས་པོ་ཐ་མི་དད་པའི་བདག་ཉིད་ཀྱི་ཆོས་ཉིད་ཐ་དད་པར་འགྱུར་རོ། །དེས་ན་གཅིག་དུ་མ་ཉིད་ནི་མ་ཡིན་ལ་ཕན་ཚུན་ཐ་དད་པ་རྣམས་ཀྱི་བ་ལང་ཉིད་
[243b.7]ལ་སོགས་པའི་ཆོས་གཞན་ཉིད་ཐ་མི་དད་པའི་ཕྱིར་དུ་མ་གཅིག་པ་ཡིན་ནོ་ཞེས་དོགས་པ་ལ་ཐ་དད་པ་ཡང་བཀག་པའི་ཕྱིར་རོ་ཞེས་སྨོས་སོ། །རྗེས་འགྲོ་གཞན་ཡང་སྣང་བ་མེད་ཅེས་ཐ་དད་པ་ནི་བཀག་ཟིན་ཏོ། །དེས་ན་གཅིག་དང་དུ་མར་འཛིན་པ་ནི་འཁྲུལ་པ་ཉིད་དུ་འཐད་དོ། །ཐ་དད་པ་
[244a]
[244a.1]ལ་ཉེས་པ་གཞན་ཡང་བཤད་པ་ནི། དེ་རྣམས་ཀྱི་ཞེས་བྱ་བ་སྟེ། ཐ་དད་པ་རྣམས་ཀྱི་གཞི་མཐུན་པ་ཉིད་མི་རུང་བའི་ཕྱིར་རོ། །བ་ལང་ཉིད་ཀྱི་མཚན་ཉིད་ནི་རིགས་དང་དཀར་པོ་ལ་སོགས་པ་ཡོན་ཏན་རྣམས་ནི་རྫས་ལས་གཞན་ཉིད་ཡིན་པ་དེས་ན། འདི་གཉིས་གཞི་མཐུན་པ་
[244a.2]ཉིད་དུ་མི་རུང་ངོ་། །དེ་བཤད་པ་ནི། རང་བཞིན་ཐ་དད་པའི་ཕྱིར་ཞེས་བྱ་བའོ། །འདི་སྐད་བརྗོད་པ་ཡིན་ཏེ་བ་ལང་ཞེས་བྱ་བར་བཏགས་པ་ནི་དཀར་པོའི་རྣམ་པ་མ་ཡིན་ཏེ། དེ་ལས་གཞན་ཡིན་པའི་ཕྱིར་རོ། །དེས་ན་ཇི་ལྟར་དེ་དེའི་རྣམ་པར་རྟོག་པའི་བདག་ཉིད་གཞི་མཐུན་པར་འགྱུར།
[244a.3]འཁྲུལ་པ་ལ་ལྟོས་ནས་འགྱུར་རོ་ཞེ་ན། མ་ཡིན་ནོ་ཞེས་བཤད་པ་ནི། སྒྲའི་དོན་དོན་དངོས་པོ་ཇི་ལྟ་བ་བཞིན་ཞེས་སྨོས་སོ། །དོན་གྱི་རང་བཞིན་ཇི་ལྟ་བ་དེ་ཁོ་ན་ལྟར་སྒྲར་བརྗོད་དོ་ཞེས་ཁས་ལེན་ན་དཀར་པོ་ཞེས་རྟོགས་པ་བ་ལང་གི་ཚིག་གི་དོན་གྱི་རང་བཞིན་མ་ཡིན་པའི་ཕྱིར་ཇི་ལྟར་ན་དེ་
[244a.4]རྟོགས། དེ་ལྟ་མ་ཡིན་ན་སྣམ་བུ་དང་བུམ་པ་ཞེས་བྱ་བ་ཡང་གཞི་མཐུན་པར་འགྱུར་རོ། །གང་ཞིག་རང་གི་རང་བཞིན་ནོ་ཞེས་བྱ་བར་རྟོགས་པ་དེ་རང་གི་ཚིག་གི་གཟུགས་དང་བྲལ་བས་གཟུགས་ལ་རེ་བ་ན། དེའི་ངོ་བོར་རུང་བ་ཉེ་བར་གནས་པ་དེའི་རང་བཞིན་དུ་རྟོགས་པ་ཡིན་ན་ཐ་དད་པའི་
[244a.5]ཕྱོགས་ལ་ནི། འགའ་ཡང་འགའ་ཞིག་གི་རང་བཞིན་དུ་རྟོགས་པ་མེད་པའི་ཕྱིར་འགའ་ལ་ཡང་རེ་བ་མེད་པས་ན་འགའ་དང་ཡང་འབྲེལ་པ་མ་ཡིན་ནོ། །འོ་ན་གང་ཞིག་གང་གི་རང་བཞིན་དུ་རྟོགས་པ་དེ་རང་གི་ཚིག་གིས་དེས་སྟོང་པར་རྟོགས་པར་མི་ནུས་པའི་ཕྱིར་དེར་ཡང་དེ་རྟོགས་པར་ཇི་ལྟར་
[244a.6]འགྱུར་ཞེ་ན། ཇི་ལྟར་ཡང་མི་འགྱུར་ཏེ། ཐ་དད་པ་དང་ཐ་མི་དད་པའི་ཕྱོགས གཉིས་ཀ་ལ་ཡང་སྒྲའི་དོན་དངོས་པོ་ཇི་ལྟ་བ་བཞིན་དུ་མི་རུང་བའི་ཕྱིར་ཏེ། དེ་ལྟ་ཡིན་ན་དངོས་དོན་རྣམས། །ཞེས་བྱ་བ་ལ་སོགས་པ་བཤད་པ་བཞིན་ནོ། །སྒྲའི་དོན་དངོས་པོ་ཇི་ལྟ་བ་བཞིན་དུ་ཁས་བླངས་ཀྱང་། ཐ་དད་པ་ལ་
[244a.7]གཞི་མཐུན་པར་ཇི་ལྟར་འགྱུར། འདི་ལྟར་དངོས་པོ་གཅིག་རིགས་ལ་སོགས་པའི་ཁྱད་པར་དུ་མ་དང་ལྡན་པ་ཡིན་ནོ། །དེས་ན་འདི་ཁྱད་པར་དུ་མ་དང་ལྡན་པར་དམིགས་པ་ཡིན་པའི་ཕྱིར་བ་ལང་ཞེས་ཁྱད་པར་གཅིག་གིས་བསྟན་པས་ནི་དེ་དང་ལྡན་པར་རྟོགས་པར་འགྱུར་བ་རྣམ་པ་གཞན་ལ་རེ་བ་
[244b]
[244b.1]དང་བཅས་པ་དཀར་པོ་ཞེས་དེ་ལྟར་བསྟན་པས་ནི་དེ་དང་ལྡན་པ་ཉིད་དུ་རྟོགས་པར་འགྱུར་རོ། །དེ་སྨྲས་པ་ནི། གལ་ཏེ་ཁྱད་པར་དེ་དང་ཞེས་བྱ་བའོ། །དེ་དག་ཅེས་བྱ་བས་ནི་སྐབས་སུ་བབ་པའི་ཐ་སྙད་པ་རྣམས་བཟུང་ངོ་། །དེ་ཟློག་པ་ནི་ཕན་མི་འདོགས་པ་རྣམས་ལ་ཞེས་བྱ་བའོ། །ཁྱད་པར་ཞེས་བྱ་
[244b.2]བ་ནི་བདག་ལ་བརྟེན་པའི་བརྗོད་པ་དང་རྟོགས་པ་དག་གིས་དོན་ལ་ཐ་སྙད་དུ་བྱེད་པར་བྱེད་པ་ཡིན་ནོ། །གང་གི་ཚེ་ཁྱད་པར་རྣམས་དེ་ཙམ་གྱི་གཞན་གྱི་དབང་མ་ཡིན་པ་དེའི་ཚེ་མེད་ཀྱང་ཡོད་པའི་ཕྱིར་ཇི་ལྟར་དེས་དེ་ལྟར་ཐ་སྙད་བྱེད་པའམ། དེ་ཉེ་བར་སྒྱུར་བར་བྱེད་པར་འགྱུར་རོ། །ཁྱད་པར་ནི་གདོན་མི་
[244b.3]ཟ་བར་དེའི་གཞན་གྱི་དབང་དུ་འགྱུར་དོགས་ན། འདི་ནི་དེའི་གཞན་གྱི་དབང་དུ་འཐད་པ་མ་ཡིན་ཏེ། ཕན་འདོགས་པར་བྱེད་པ་མ་ཡིན་པའི་ཕྱིར་རོ། །ཁྱད་པར་དང་ལྡན་པ་ནི་ཁྱད་པར་ལ་ཕན་འདོགས་པར་བྱེད་པ་མ་ཡིན་ནོ། །དེ་དང་ལྡན་པ་ནི། བདག་ཉིད་ཉེ་བར་བསྒྱུར་བའམ། ཉེ་བར་བསྒྱུར་བའི་
[244b.4]ཤེས་པ་དེ་ལ་ལྟོས་པའི་ཕྱིར་རོ། །ཁྱད་པར་ལ་ནི་ཁྱད་པར་དང་ལྡན་པས་བྱ་བ་ཡོད་པ་མ་ཡིན་ནོ། །དེས་ན་ཁྱད་པར་དང་ལྡན་པ་ནི་ཕན་འདོགས་པར་བྱེད་པ་ཡིན་ནོ། །ཕན་འདོགས་པ་ཡོད་ན་ནི། དེ་ཉིད་ལ་བདག་ཉིད་ཐོབ་པའི་ཕྱིར་དེའི་གཞན་གྱི་དབང་དུ་འགྱུར་རོ། །འོ་ན་ཉེ་བར་སྒྱུར་བར་བྱེད་པ་
[244b.5]ཡིན་གྱི་ཕྱིར་ཁྱད་པར་གྱིས་དེ་དང་ལྡན་པ་ལ་ཕན་གདགས་པར་བྱ་བར་འགྱུར་རོ་ཞེ་ན། དེ་ལྟར་ནི་མི་ནུས་ཏེ། དེ་ཕན་འདོགས་པར་བྱེད་པ་ཡིན་པས་གཞན་གྱི་དབང་མ་ཡིན་པའི་ཕྱིར་དེ་མེད་ཀྱང་ཡོད་པས་ན་དེ་ལ་བརྟེན་པའི་ཐ་སྙད་ཀྱིས་ཁྱད་པར་འགྲུབ་པའི་ཡན་ལག་མ་ཡིན་པར་ཐལ་བའི་ཕྱིར་
[244b.6]རོ། །དེས་ན་ཁྱད་པར་ཉིད་གཞན་གྱི་དབང་དུ་འཐད་པ་ཡིན་ནོ། །དེ་ལྟར་ཡང་རུང་བ་མ་ཡིན་ཏེ། ལྟོས་པར་བྱ་བ་མ་ཡིན་པའི་ཕྱིར་རོ། །གལ་ཏེ་རྫས་དང་ཁྱད་པར་འདུ་བའི་མཚན་ཉིད་ཀྱི་འབྲེལ་པ་ཡོད་པ་མ་ཡིན་ནམ། །དེ་ནི་རྫས་ལ་བརྟེན་པའི་ཕྱིར་རོ། །དེས་ན་ཇི་ལྟར་གཞན་གྱི་དབང་
[244b.7]མ་ཡིན་ཞེ་ན། དེ་དང་རྟེན་དང་བརྟེན་པའི་དངོས་པོ་ལས་གཞན་གྱི་དབང་དུ་འདུ་བས་བྱས་པ་ནི། འཆད་པར་འདུ་བའི་ཚུལ་གྱིས་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ལས་འདའ་བ་མ་ཡིན་ནོ་ཞེས་བཤད་པ་ནི་གཞན་གྱི་དབང་ཉིད་ཡིན་ན་ཞེས་བྱ་བའོ། །བསྐྱེད་བྱ་སྐྱེད་བྱེད་ཀྱི་དངོས་
[245a]
[245a.1]པོ་ཡིན་ན་ཐ་དད་པས་ལྷན་ཅིག་མི་གནས་པའི་ཕྱིར་བ་ལང་ཞེས་བྱ་བའི་སྒྲས་གཉིས་བརྗོད་པ་མ་ཡིན་པའི་ཕྱིར། བ་ལང་ཉིད་ཀྱིས་ཉེ་བར་བསྒྱུར་བའི་རྫས་བརྗོད་པར་མི་འགྱུར་རོ། །ཁྱད་པར་གྱིས་ནི་རྣམ་པར་གནས་པ་ཁོ་ན་ལ་རང་ལ་བརྟེན་པའི་ཤེས་པ་ཉེ་བར་སྡུད་པ་ཡིན་
[245a.2]ནོ། །རྒྱུ་དང་འབྲས་བུའི་དངོས་པོ་ཉིད་ཡིན་ན་ནི་ཁྱད་པར་གྱི་དུས་ན་ཁྱད་པར་ཅན་མེད་པ་ཉིད་ཀྱི་ཕྱིར་འདི་གང་ཞིག་ལ་ཤེས་པ་ཉེ་བར་སྡུད་པར་བྱེད་པར་འགྱུར། རྟོགས་པའི་བྱེད་པའི་དུས་ན་མེད་པའི་དོན་ཉིད་ནི་བྱེད་པས་ཡུལ་དུ་བྱས་པའི་ཁྱད་པར་གྱིས་དེའི་ངོ་བོར་འཛིན་པ་མ་ཡིན་ནོ། །ཁྱད་
[245a.3]པར་དང་ལྡན་པ་ལོག་པ་ཡང་བློ་ལ་སྣང་བ་ཡིན་ཏེ། རྣམ་པར་རྟོག་པ་རྣམས་ཉེ་བ་ཉིད་འཛིན་པར་མ་ངེས་པའི་ཕྱིར་ཏེ། དྲན་པ་ལ་སོགས་པ་འདས་པ་ཡང་རྟོགས་པའི་ཕྱིར་རོ་ཞེས་དོགས་པ་ལ་བློས་གཅིག་ཅེས་བྱ་བ་སྨོས་སོ། །བློས་སྒྲོ་འདོགས་པའི་ཡུལ་དུ་བྱེད་པ་ཉིད་ཀྱིས་ད་ལྟ་བར་བྱེད་པ་ཉིད་
[245a.4]དོ། །འདི་སྐད་བརྗོད་པ་ཡིན་ཏེ། གང་གི་ཚེ་འདི་ལོག་པ་བློས་ཡུལ་དུ་བྱེད་པ་དེའི་ཚེ་རང་གི་བདག་ཉིད་དུ་གྱུར་པར་སྣང་བས་དེ་སྣང་བ་མ་ཡིན་ནོ། །དེས་ན་དེའི་ཡུལ་ཅན་གྱི་བློ་དངོས་པོའི་ཡུལ་ཅན་མ་ཡིན་ཏེ། དེ་མི་སྣང་བའི་ཕྱིར་རོ། །འོན་ཏེ་བདག་གི་རང་བཞིན་ནི་མ་ཡིན་གྱི། འོན་ཀྱང་དོན་གྱི་
[245a.5]ཤེས་པ་སྣང་བར་བརྗོད་ན། དེ་ལྟ་ན་བློའི་སྣང་བར་ཁས་བླང་བར་བྱ་བ་མ་ཡིན་ཏེ། གཞན་དུ་ན་དེ་དེའི་སྣང་བར་མི་འགྱུར་རོ། །དེ་ལྟ་ན་ཡང་དེ་ཉིད་ཁྱད་པར་གྱི་གཟུགས་ཀྱི་ངོ་བོ་ཉིད་དུ་རྟོགས་པས་ཁྱད་པར་དེ་དང་ལྡན་པ་བདག་དེ་ལྟར་རྟོགས་པར་ཁས་བླང་བར་བྱའོ། །དེས་ན་ཁྱད་པར་དང་དེ་དང་ལྡན་
[245a.6]བདག་གིས་ཞེས་བྱ་སྟེ། བློ་ལ་སྣང་བའི་ཡུལ་ཅན་ཉིད་ཡིན་མོད། དེ་ནི་གདོན་མི་ཟ་བར་ཁས་བླང་བར་བྱ་བ་ཉིད་ཡིན་ནོ། །དེ་བཤད་པ་ནི། བློ་ལ་སྣང་བའི་ཡུལ་ཅན་ཉིད་གཅིག་ཡིན་ན་ནི་ཞེས་བྱ་བའོ། །དེ་ཉིད་དེ་ལྟར་སྣང་བའི་ཕྱིར་རོ་ཞེས་སྟོན་པ་ནི། དེ་ལྟ་བུ་ཡིས་ཞེས་བྱ་བ་ཡིན། འབྲེལ་པ་
[245a.7]ཙམ་ཡོད་ཀྱང་དུས་ཐ་དད་ན་རང་བཞིན་དང་རང་བཞིན་ཅན་ཉིད་མ་ཡིན་པས་ན། བསྐྱེད་བྱ་སྐྱེད་བྱེད་ཀྱི་དངོས་པོ་སྐད་ཅིག་འཇིག་པ་ལ་མི་བརྟེན་པས་ན། རྒྱུ་སྔར་བྱུང་བ་འབྲས་བུའི་དུས་ན་ཡང་མི་འཛིན་པའི་ཕྱིར་ལྷན་ཅིག་པ་ཉིད་ཡོད་པ་ཁོ་ནའོ། །ས་བརྗོད་པ་ནི། གལ་ཏེ་ཁྱད་པར་དང་དེ་དང་ལྡན་པ་
[245b]
[245b.1]དག་ཅེས་བྱ་བའོ། །དེས་ན་དེ་ལས་སྐྱེས་པའི་ཕྱིར་ནི་དེའི་གཞན་གྱི་དབང་ཡིན་ལ། དེ་དང་ལྷན་ཅིག་གནས་པས་ནི་དེ་ཉེ་བར་སྒྱུར་བར་བྱེད་པ་ཉིད་འཐད་པ་ཡིན་ནོ་ཞེས་འདོགས་པ་ལ་བསྐྱེད་བྱ་སྐྱེད་བྱེད་ཀྱི་དངོས་པོ་ཡིན་ཀྱང་གཞན་གྱི་དབང་ཉིད་བཟློག་པའི་ཕྱིར་མ་ཡིན་ཏེ་ཞེས་གསུངས་སོ། །གྲུབ་པ་ཡོད་
[245b.2]པ་ནི་རང་གི་ངོ་བོ་ཐོབ་ཟིན་པས་གཞན་གྱི་དབང་མེད་ལ། མ་གྲུབ་པ་ཡང་མ་ཡིན་ཏེ། རང་གི་ངོ་བོར་མ་རེག་པའི་ཕྱིར་རོ། །དེས་ན་ཡོད་པ་དང་མེད་པའི་གནས་སྐབས་ན་གཞན་གྱི་དབང་མེད་པའི་ཕྱིར། རྣམ་པ་ཐམས་ཅད་གཞན་གྱི་དབང་ཉིད་མེད་པ་ཉིད་དོ། །གཉི་ག་ཡང་ཡོད་པར་ཁྱད་པར་
[245b.3]མེད་པས་གང་གིས་གཞན་གྱི་དབང་ཉིད་དུ་བརྗོད་ཅིང་གང་ཞིག་གཞན་གྱི་དབང་དུ་བརྗོད་དུ་མེད་ན་ཡང་ཅུང་ཟད་མེད་པ་གང་ཡིན་པ་དེ་ནི་འགའ་ཞིག་ཡང་གཞན་གྱི་དབང་དུ་འགྱུར་བ་མ་ཡིན་ནོ། །གལ་ཏེ་རང་གི་ངོ་བོ་གཞན་ལས་གྲུབ་པ་ཉིད་དེ་ལ་རག་ལས་པ་དེ་གཞན་གྱི་དབང་དུ་འགྱུར་བ་དེ་འབྲས་
[245b.4]བུ་ཉིད་རྒྱུ་དང་འབྲེལ་པ་ཡིན་ནོ་ཞེ་ན། དེར་ཡང་སྐྱེ་བ་ཉིད་རག་ལས་པར་བརྗོད་ཀྱི། མི་འཁྲུལ་པའི་ས་བོན་དུ་གྱུར་པ་གཞན་ནི་འགའ་ཡང་མེད་དོ། །འོ་ན་འདི་ཁྱད་པར་ལ་འགྱུར་བ་ཡིན་ནོ་ཞེ་ན་དེ་ལྟར་ནི་མི་ནུས་ཏེ། ངོ་བོ་གཞན་གྱི་དབང་དུ་ཁས་བླངས་པ་མེད་པར་ཁྱད་པར་མ་ཡིན་པའི་ཕྱིར་རོ། །
[245b.5]འདི་ལྟར་ཡོད་པའི་དུས་ཉིད་ན་དེ་དེའི་རང་བཞིན་ཡིན་པའི་ཕྱིར་ཁྱད་པར་ཉིད་དོ། །དེས་ན་གཞན་གྱི་རང་བཞིན་མ་ཡིན་ནོ་ཞེས་བྱ་བ་དེ་ལྟ་བུའི་བདག་ཉིད་ཅན་གྱི་གཞན་གྱི་དབང་གང་ཡིན་པ་དེ་མི་སྲིད་པ་ཉིད་དོ། །དེས་ན་འདི་འདིར་རྣམ་པ་ཐམས་ཅད་དུ་མེད་པར་བརྗོད་དོ། །གལ་ཏེ་འདིའི་
[245b.6]རང་བཞིན་ནི་འདིའི་ཞེས་གཞན་གྱི་དབང་ཉིད་རྟོགས་པ་མ་ཡིན་ནམ་ཞེ་ན། རྟོག་པས་སྒྲོ་བཏགས་ན་ཞེས་སྨོས་སོ། །དེས་ན་དངོས་པོ་ལ་མི་འཐད་པས་རྣམ་པ་ཐམས་ཅད་དུ་གཞན་གྱི་དབང་མེད་པས་རྟོགས་པ་ལ་སྣང་བ་ཡིན་པའི་ཕྱིར་དངོས་པོ་རྣམ་པ་དེ་ལྟ་བུའི་རྗེས་སུ་བྱེད་པ་སྤངས་ཏེ།
[245b.7]དེ་ལྟ་བུའི་ཐ་སྙད་དུ་བློ་ཁོ་ན་ཅི་ཁས་མི་ལེན། འདི་སྐད་བརྗོད་པ་ཡིན་ཏེ། ཅིག་ཁྱད་པར་དུ་མ་བརྗོད་ན། གཞི་མཐུན་པར་མི་འགྱུར་ཏེ་ཁྱད་པར་ཉིད་མི་རུང་བའི་ཕྱིར་རོ། །དངོས་པོ་ལ་མི་འཐད་པ་ན། གལ་ཏེ་རྟོགས་པ་ལས་ཡོད་དོ་ཞེས་འདོད་ན། རྟོགས་པ་ཉིད་ཀྱི་རྗེས་སུ་བྱེད་པར་
[246a]
[246a.1]འགྱུར་ཏེ། དངོས་པོའི་ནི་མ་ཡིན་ནོ། །དངོས་པོའི་ཡུལ་ཅན་ཡིན་ན་ནི། དོན་གྱི་རང་གི་ངོ་བོ་གཅིག་ཅེས་བྱ་བ་ལ་སོགས་པས་སྐྱོན་དུ་མི་འགྱུར་བ་གང་ཡིན་པ་དེ་ཡང་དེ་ལྟར་ནི་མི་འགྱུར་རོ། །དེས་ན་བློ་ཉིད་དེ་ལྟར་ཁས་བླངས་པར་རིགས་སོ། །དེ་སྟོན་པ་ནི་སྒྲ་དང་ཚད་
[246a.2]མ་གཅིག་གིས་ཞེས་བྱ་བ་ལ་སོགས་པའོ། །བློས་དངོས་པོ་རྟོགས་ན་ནི། སྔར་ཇི་སྐད་བཤད་པའི་དངོས་པོའི་དབང་གིས་བྱུང་བའི་ཉེ་བར་འགྱུར་བ་ཉིད་དོ། །གང་གི་ཚེ་དངོས་པོའི་རྗེས་སུ་བྱེད་པ་སྤངས་ནས་བློ་ཉིད་ལ་བརྟེན་པ་དེའི་ཚེ་ནི་དངོས་པོ་མེད་པའི་བློའི་སྣང་བ་ལ། གང་གི་ལྟར་
[246a.3]བློ་ཁྱད་པར་ནི། །སྣ་ཚོགས་ཅན་དོན་ཐ་དད་འཛིན། །ཞེས་བྱ་བ་ལ་སོགས་པའི་སྐྱོན་དུ་མི་འགྱུར་རོ། །དེ་བཤད་པ་ནི་བློ་ལ་སྣང་བ་ནི་དངོས་པོ་མེད་པའི་ཕྱིར་ཞེས་བྱ་བའོ། །བློའི་རྗེས་སུ་བྱེད་པ་ལ། དོན་གྱི་རང་གི་ངོ་བོ་གཅིག །ཅེས་བྱ་བ་ལ་སོགས་པའི་ཉེས་པར་ཐལ་བ་མེད་མོད། སྐབས་
[246a.4]ཀྱི་གཞི་མཐུན་པ་མེད་པའི་ཉེས་པར་ནི་ཇི་ལྟར་མི་འགྱུར་ཞེ་ན། དེ་ཐ་མི་དད་པ་དང་ཞེས་བྱ་བ་ལ་སོགས་སྨོས་སོ། །གཞི་མཐུན་པ་ལ་སོགས་ཇི་ལྟར་ཤེས་པ་བཞིན་མི་འགལ་ལོ། །གཅིག་པོ་དེ་ལ་ཞེས་བྱ་བ་ལ་སོགས་པས་ནི་སྤྱི་མེད་པའི་ཉེས་པ་བརྗོད་པ་ཡིན་ནོ། །གཞི་མཐུན་པ་མེད་པས་ན་
[246a.5]ཁྱད་པར་དང་ཁྱད་པར་གྱི་གཞིའི་དངོས་པོ་མེད་པ་ཡང་ངོ་། །སྤྱི་ལ་སོགས་པ་དེ་དག་རྟོགས་པ་ལས་མ་འདས་པ་ནི་མི་འགལ་ལོ། །དངོས་པོ་ལ་ནི་འགལ་བ་བཤད་ཟིན་ཏོ། །བ་ལང་ཞེས་བྱ་བ་ལ་སོགས་པའི་སྤྱི་ཐ་མི་དད་པ་བློ་ལ་སྣང་བའི་ཕྱིར་སྤྱི་མི་འགལ། བ་ལང་ཞེས་རྣམ་པ་གཅིག་ཡུལ་
[246a.6]དུ་བྱས་ཀྱང་ཅི་འདིར་དཀར་རམ་འོན་ཏེ་གནག་ཅེས་དཀར་པོ་ལ་སོགས་པའི་རྣམ་པ་གཞན་ལ་མ་ངེས་པ་དཀར་པོ་ལ་སོགས་པའི་རྣམ་པ་གཞན་ལ་རེ་བ་དང་བཅས་པའི་བློས་གཟུང་བར་བྱ་བ་དང་། དཀར་པོ་ལ་སོགས་པ་སྒྲའི་དོན་ཐ་དད་པ་སྒྲུབ་པ་དག་ཀྱང་བ་ལང་དཀར་པོ་ཞེས་དཀར་
[246a.7]པོ་ལ་སོགས་ཐ་མི་དད་པར་བློ་ལ་སྣང་བས་ཁྱད་པར་དང་ཁྱད་པར་གྱི་གཞིའི་དངོས་པོ་དང་གཞི་མཐུན་པ་མི་འགལ་ལོ། །གང་གི་ཚེ་གཟུང་བ་ཉིད་ལ་རེ་བ་ན་རུང་བ་ཉེ་བར་གནས་པ་གང་ཡིན་པ་དེ་དང་འབྲེལ་པ་རྟོགས་པའི་ཕྱིར་བརྡའི་དབང་གིས་བ་ལང་དཀར་པོའི་རང་བཞིན་དུ་ངེས་པ་མ་
[246b]
[246b.1]ཡིན་ཏེ། དེས་ན་དེའི་ཡོན་ཏན་དེས་ཡོན་ཏན་གཞན་རྣམ་པར་བཅད་པ་གང་ཡིན་པ་དེ་ནི་ཡོན་ཏན་དང་ཡོན་ཏན་དག་གི་ཁྱད་པར་དང་ཁྱད་པར་གྱི་གཞིའི་དངོས་པོ་ཡིན་ལ། གཞན་དང་འབྲེལ་པ་གང་ཡིན་པ་དེ་ནི་གཞི་མཐུན་པ་ཡིན་ཏེ། དེས་ན་དེ་ལྟར་གཉི་ག་ཉེ་བར་བཀོད་དོ། །དེ་ལྟར་བློ་ལ་
[246b.2]སྣང་བ་གང་ཡིན་པ་འདིའི་ཆོས་དང་ཆོས་ཅན་གྱི་ཁྱད་པར་དག་ཀྱང་རབ་ཏུ་སྟོན་ཏེ། ཇི་ལྟར་ཞེ་ན། བཤད་པ། དེ་ལྟར་སྣང་བའི་དངོས་པོ་དེ་ཁོ་ན་ཆོས་ཞེས་བྱ་བའི་སྒྲ་ཁྱད་པར་གཞན་སྤངས་པས་བརྗོད་ནས་དེ་ཉིད་ལས་ཐ་དད་པ་ལྟ་བུའི་འདིའི་ངོ་བོ་ཉིད་ཆོས་ཉིད་དུ་རྣམ་པར་བཞག་ནས་ཏེ།
[246b.3]འདིས་ནི་ཆོས་སུ་རབ་ཏུ་སྟོན་པ་བརྗོད་དོ། །ཆོས་ཅན་རབ་ཏུ་སྟོན་པ་ཡང་བཤད་པ། ཇི་སྐད་བཤད་པའི་ཁྱད་པར་གཞན་སྤང་བའི་མཚན་ཉིད་ཀྱིས་བྱེ་བྲག་ཏུ་མ་ཕྱེ་བར་ཏེ། ཁྱད་པར་གཞན་མ་སྤངས་པར་ཞེས་བྱ་བའི་དོན་ཏོ། །དཔེར་ན་ཁྲ་བོའི་བ་ལང་ཉིད་ཅེས་བྱ་བ་བཞིན་དུ། འདིའི་
[246b.4]ངོ་བོ་ཉིད་གཞན་ཆོས་ཅན་ཉིད་དུ་རབ་ཏུ་བཞག་ནས་སོ། །ཅིའི་ཕྱིར་དེ་ལྟར་རྣམ་པར་བཞག་ནས་སྟོན་ཅེ་ན། དོན་དུ་མ་ལས་ཐ་དད་པ་ཞེས་སྨོས་ཏེ། དོན་དུ་མ་ལས་ཐ་དད་པ་ཡིན་ཡང་དོན་གཅིག་ལས་ཐ་དད་པ་དེ་ཡོད་དང་མེད་པ་ཤེས་པར་འདོད་པ་ལ་དེ་ཉིད་ཆོས་ཉིད་དུ་རྣམ་པར་གཞག་
[246b.5]སྟེ། འདིའི་ངོ་བོ་ཉིད་འགའ་ཞིག་ཆོས་ཅན་ཉིད་དུ་རྣམ་པར་བཞག་ནས་དགག་པའམ། སྒྲུབ་པར་བྱེད་པ་ཡིན་ཏེ། དཔེར་ན་ཁྲ་བོ་ལ་ནི་བ་ལང་ཉིད་ཡོད་ཀྱི། རྟ་ཉིད་ཤེས་པར་འདོད་པ་ན་བློ་ལ་དེ་ལྟར་ནི་མ་ཡིན་ནོ་ཞེས་བྱ་བ་ལྟ་བུར་རོ། །ཅི་དངོས་པོ་དེ་ལ་དེ་བཞིན་དུ་རྣམ་པར་གཞག་པ་
[246b.6]དངོས་སུ་དེ་ལྟ་ཉིད་ཡིན་པའི་ཕྱིར་རམ་ཞེ་ན། མ་ཡིན་ནོ་ཞེས་བཤད་པ་ནི། བློ་ལ་དེ་ལྟར་སྣང་བའི་ཕྱིར་ཞེས་བྱ་བའོ། །དངོས་པོ་ཅི་ཞིག་ལྟར་ཤེས་པ་འདོད་པ་ན་བློ་ལ་དེ་ལྟར་སྣང་བའི་སྣང་བ་དེ་བཞིན་དུ་རྟོགས་པར་བྱེད་དོ། །ཁྱད་པར་གཞན་སྤོང་བ་དང་མི་སྤོང་བ་ཉིད་ཀྱིས་ཆོས་དང་ཆོས་ཅན་
[246b.7]ཐ་དད་པ་ཡིན་གྱི། དངོས་པོ་ཐ་དད་པ་ནི་མ་ཡིན་ནོ། །བློ་ལ་བརྟེན་པའི་ཆོས་ཐ་དད་པ་ཉིད་ཀྱིས་ན། ཚིག་ཐ་དད་པ་དང་བཅས་པ་ནི་སྒྲུབ་པར་བྱེད་པ་ཡིན་ལ་མི་རྟག་པ་ཉིད་བསྒྲུབ་པར་བྱ་བ་ཡིན་ནོ་ཞེས་བསྒྲུབ་བྱ་དང་སྒྲུབ་བྱེད་ཐ་དད་པ་དངོས་པོའི་མཐར་ཐུག་པ་ཉིད་ཡིན་ནོ་ཞེས་སྟོན་པ་ནི་བྱེད་དོ་ཞེས་
[247a]
[247a.1]བྱ་བའི་མཐར་ཐུག་པའོ། །དེས་ནི་དེ་ལྟར་ཤེས་པ་ལ་སྣང་བའི་དོན་ལ་ཞེས་བྱ་བ་ལ་སོགས་པ་དམ་བཅས་པས་དངོས་པོ་འཛིན་པས་ཞེས་བྱ་བ་ལ་སོགས་པས་ཐམས་ཅད་ཀྱི་ཡུལ་ཅན་མ་ཡིན་པར་ཉེ་བར་བཀོད་ཀྱང་། དངོས་པོ་ལ་དུ་མ་དང་གཅིག་དང་ཐ་དད་པར་འཛིན་པ་ནི་
[247a.2]ཞེས་བྱ་བ་ལ་སོགས་པ་གཞུང་བཙུགས་པ་མཇུག་སྡུད་པས་ཐམས་ཅད་ཀྱི་ཡུལ་ཅན་དུ་བྱས་པ་ཡིན་ནོ། །ཡང་སྤྱི་ཞེས་བྱ་བ་ལ་སོགས་པ་སྤངས་པ་དེ་ཉིད་ཚིགས་སུ་བཅད་པ་རྣམས་ཀྱིས་སྟོན་པར་བྱེད་དོ། །ཅིའི་ཕྱིར་ཞེ་ན་དོན་འདི་མདོ་ལ་མེད་པའི་ཕྱིར་མདོར་མ་ཚང་བར་མི་འགྱུར་བར་བྱ་
[247a.3]བའི་ཕྱིར་རོ། །དངོས་པོ་རང་གི་ངོ་བོ་འཛིན་པས་ཞེས་བྱ་བ་ནས་ནོར་བའི་དོན་ཁོ་ན་ལ་སྤྱི་དང་གཞི་མཐུན་པའི་ཐ་སྙད་འདོགས་སོ་ཞེས་བྱ་བའི་མཐར་ཐུག་པར་བཤད་པའི་དོན་གང་ཡིན་པ་དེ་བརྗོད་པ་ནི། རང་བཞིན་ཞེས་བྱ་བ་ལ་སོགས་པ་ནས་ནོར་དོན་རྒྱས་བྱེད་ཅེས་བྱ་བའི་བར་གྱིས་སོ། །རྣམ་
[247a.4]རྟོག་བློ་སྐྱེ་བ་གང་ཡིན་པ་དེ་ལ་ངོ་བོ་སྣང་བའི་ངོ་བོ། དེ་ལ་སྤྱི་དང་གཞི་མཐུན་པའི་སྤྱོད་ཡུལ་ཅན་གྱི་ཤེས་པ་དང་སྒྲ་དག་གིས་ཐ་སྙད་མེད་པའི་དོན་ཅན་རྒྱས་པར་བྱེད་དོ། །དེའི་འབྲས་བུ་ཅན་ཡིན་པའི་དོན་གང་ཡིན་པ་དེ་ལས་ཐ་དད་པ་དེའི་མཐར་ཐུག་པ་སྟེ། འདིས་ནི་འདིའི་ཡུལ་བརྗོད་དོ། །
[247a.5]ཉམས་སུ་མྱོང་བའི་བག་ཆགས་ཞེས་བྱ་བའི་རྒྱུ་མཚན་བཤད་པའི་ཕྱིར་རང་བཞིན་དེ་འཛིན་ཅེས་སྨོས་ཏེ། དེ་ཞེས་བྱ་བ་ནི་དེའི་འབྲས་བུ་ཅན་མ་ཡིན་པ་ལས་ཐ་དད་པའོ། །ཐ་དད་པ་ཅན་ལས་ཐ་དད་པ་གཞན་མ་ཡིན་པའི་ཕྱིར་ཐ་དད་པ་ཅན་ཉིད་བརྗོད་པ་ཡིན་ནོ། །དེ་འཛིན་པ་ནི་ཉམས་
[247a.6]སུ་མྱོང་བ་སྟེ་དེའི་བག་ཆགས་ཀྱིས་བསྐྱེད་པའི་ཕྱིར་དེ་ལས་སྐྱེ་བ་ཡིན་ནོ། །ངོ་བོ་དེ་ནི་ཕྱི་རོལ་ལྟ་བུ་དང་། གཅིག་པ་ལྟ་བུ་དང་། གཞན་ལས་ལོག་པ་ལྟ་བུ་སྟེ། དེ་ལྟ་བུ་མ་ཡིན་ཡང་དེ་ལྟ་བུར་ཞེན་པའི་ཡུལ་ཡིན་པའི་ཕྱིར་རོ། །དེ་ཉིད་བཤད་པ་ནི། དེ་ཉིད་མིན་ཞེས་བྱ་སྟེ། ཕྱི་
[247a.7]རོལ་ལ་སོགས་པ་དེ་ཉིད་ལས་འདས་པ་ཉིད་དོ། །དེས་ན་དེ་སྐད་བརྗོད་དོ། །ཇི་ལྟར་ཞེ་ན། བརྟག་པའི་ཡན་ལག་མེད་པའི་ཕྱིར་རོ། །བརྟག་པ་ནི་དགོས་པས་རབ་ཏུ་སྦྱར་བ་ཡིན་ན། འདི་ནི་དགོས་པ་སྒྲུབ་པར་བྱེད་པ་མ་ཡིན་ཏེ། དེ་སྒྲུབ་པ་དང་མི་མཐུན་པ་ཉིད་དུ་རིག་པའི་ཕྱིར་རོ། །
[247b]
[247b.1]དེས་ན་བརྟག་པའི་ཡན་ལག་མ་ཡིན་པ་ཉིད་དོ། །གང་གི་ཕྱིར་ལྡོག་པའི་ངོ་བོ་ཅན་ཡིན་པ་དེའི་ཕྱིར་ཐ་དད་པ་ཡིན་ཏེ་དེས་ན་ལྡོག་པའི་ངོ་བོ་ཅན་ཉིད་ཀྱིས་ཐ་མི་དད་པ་ཉིད་དུ་བརྗོད་པ་ཡིན་ནོ། །དེས་ན་དེ་ལྟར་དེ་དག་གི་སྤྱིའི་ཐ་སྙད་བཤད་དོ། །གཞི་མཐུན་པའི་ཐ་སྙད་བཤད་པ་ནི། དེ་ཉིད་གཞན་
[247b.2]ལས་ལོག་པར་ཡང་ཞེས་བྱ་བའོ། །ད་ནི་དངོས་པོའི་ཡུལ་ཅན་མ་ཡིན་པ་ཉིད་ལ་སྐྱོན་སྤོང་བའི་གཞུང་སྡུད་པ། དངོས་པོ་རྣམས་ཀྱི་ཞེས་བྱ་བས་འཆད་དོ། །དེ་ཀུན་ཞེས་བྱ་བ་སྤྱི་ལ་སོགས་པའི་ཡུལ་ཅན་གྱི་ཐ་སྙད་ནི་དོན་ཐ་དད་པ་ལ་བརྟེན་པ་ཡིན་ཏེ། དེ་ཉམས་སུ་མྱོང་བའི་རྩ་བ་ཅན་ཡིན་
[247b.3]པའི་ཕྱིར་རོ། །དེས་ན་རྗེས་སུ་དཔག་པ་རྣམ་པ་གཉིས་པོ་ལ་དངོས་པོའི་ཡུལ་མ་ཡིན་ཡང་དངོས་པོ་རྙེད་པའི་རྒྱུ་མཚན་ཡིན་གྱི་གཞན་དུ་ནི་མ་ཡིན་ནོ། །འདིར་བསམ་པ་ནི། འདི་ཐམས་ཅད་ནི་ཞེས་བྱ་བ་ལ་སོགས་པས་གཞུང་དུ་བཤད་ཟིན་ཏོ། །ཐ་སྙད་འདིའི་ཕན་ཚུན་མེད་པ་ལ་བརྟེན་པ་ཉིད་
[247b.4]བརྟེན་པའི་ཕྱིར་དེ་ལ་ཞེས་བྱ་བ་སྨོས་སོ། །ཁྲ་བོ་ལ་སོགས་པ་དུ་མའང་འབྲས་བུ་གཅིག་པ་ཅན་དག །གང་དག་དེའི་འབྲས་བུ་ཅན་མིན་པ་དེ་ལས་གཞན་ལ་བརྟེན་པའི་བརྗོད་པ་དང་། ཤེས་པས་ཐ་སྙད་གཅིག་ཏུ་ཉེ་བར་བྱེད་ལ། གཅིག་ཀྱང་དུ་མ་བྱེད་པ་ལ་དེའི་རང་བཞིན་བསྟན་པའི་
[247b.5]འབྲས་བུ་ཅན་མ་ཡིན་པའི་དོན་ལས་ཐ་དད་པར་སྣ་ཚོགས་སུ་སྟོན་ཏོ། །དེས་ནི་དེ་ལྟར་གྱུར་པ་ན། དེའི་ཡུལ་ཅན་ཉིད་ཀྱིས་ཐ་སྙད་ཉམས་སུ་མྱོང་བ་ལ་བརྟེན་པ་ཡིན་ཡང་ནོར་བའི་དོན་ཅན་ཉིད་དུ་གཞུང་བཙུགས་པ་ཡིན་ནོ། །ད་ནི་རང་གི་མཚན་ཉིད་ལ་མི་རྟག་པ་ལ་སོགས་པ་མེད་པ་ཡང་
[247b.6]མ་ཡིན་ཏེ་ཞེས་བྱ་བ་ལ་སོགས་པ་བརྗོད་པའི་ཕྱིར། སྒྲ་དོན་འདི་དང་ཞེས་སྨོས་སོ། །སྒྲ་དོན་འདི་ནི་ཡོད་པ་མ་ཡིན་ཡང་ཇི་ལྟར་གྲགས་པ་བཞིན་དུ་བརྗོད་པ་ཡིན་ལ། དེ་ལ་དེ་བཞིན་ཁོ་ནར་བརྟེན་ནས་ནི་བསྒྲུབ་བྱ་སྒྲུབ་པ་ཀུན་དུ་གཞག་པ་དམ་པའི་དོན་ལ་འཇུག་པར་བྱ་བའི་ཕྱིར་རྣམ་
[247b.7]པར་གཞག་པ་ཡིན་ནོ། །འདི་སྐད་བརྗོད་པ་ཡིན་ཏེ། བྱས་པ་ཉིད་དང་མི་རྟག་པ་ཉིད་ལ་སོགས་པ་དངོས་པོ་ཉིད་དུ་རྟོགས་ཀྱང་དངོས་པོར་ཡང་ཡོད་པ་མ་ཡིན་ཏེ། ཤེས་པ་ཉིད་དུ་ཡོད་པའི་ཕྱིར་རོ། །དེས་ན་དེ་ལྟ་བུར་གྱུར་པའི་སྒྲས་བརྗོད་པར་བྱ་བའི་དོན་ལ་བརྟེན་ནས་བྱས་པ་ཉིད་ནི་སྒྲུབ་
[248a]
[248a.1]བྱེད་ལ་མི་རྟག་པ་ཉིད་ནི་བསྒྲུབ་པར་བྱ་བ་ཞེས་ཕྱི་རོལ་ཉིད་རྟོགས་པའི་སྤྱོད་ཡུལ་དུ་བྱེད་དེ་སྔར་ཇི་སྐད་བཤད་པ་བཞིན་ནོ། །དེས་ན་དོན་ལ་མི་རྟག་པ་ཉིད་ལ་སོགས་པ་མེད་པ་མ་ཡིན་ཏེ། དེ་ལྟ་མ་ཡིན་ན་དོན་དམ་པ་ལ་འཇུག་པ་ཉིད་མི་འགྲུབ་པའམ་རྟོགས་པ་མེད་པར་འགྱུར་
[248a.2]རོ། །གཞི་མཐུན་པ་ཡང་སྒྲ་མི་རྟག་ཅེས་བྱ་བ་ལྟ་བུར་བསྒྲུབ་བྱ་དང་སྒྲུབ་པ་གནས་པའི་ཡན་ལག་ཏུ་གྱུར་ལ་ཇི་ལྟར་གྲགས་པ་བཞིན་ཉིད་བཤད་པ་ནི། དངོས་ལ་འདི་ནི་མི་སྲིད་དོ། །ཞེས་བྱ་བ་ཡིན་ནོ། །འདིར་རེས་འགའ་ནི་གཞི་ཐ་དད་པར་ཡང་ཆོས་དང་ཆོས་ཅན་གྱི་དངོས་པོའི་ཡན་
[248a.3]ལག་ཏུ་འགྱུར་ཏེ། དཔེར་ན་འདི་ན་མེའོ་ཞེས་བྱ་བ་བཞིན་ནོ། །དེའི་ཆོས་དང་ཆོས་ཅན་གྱི་དངོས་པོའི་རང་བཞིན་ཉིད་དུ་བཤད་པ་ནི་ཆོས་དང་ཆོས་ཅན་རྣམས་གཞག་པ་ཞེས་བྱ་བའོ། །དེ་བཞིན་ཉིད་དོན་མ་བརྟགས་པ་དེ་ནི་དེ་བཞིན་ཁོ་ནར་ཞེས་འབྲེལ་ཏོ། །དེ་བཞིན་དུ་ཐ་དད་ཐ་དད་མིན་པ་
[248a.4]ཅི་འདྲ་བ་ཞིག་ལྡོག་པའི་ས་བོན་ཡིན་པ་དེ་དེ་བཞིན་ཁོ་ནར་ཞེས་དངོས་པོ་ལ་གཅིག་དང་དུ་མར་འཛིན་པ་ནི་འཁྲུལ་པ་ཡིན་ཏེ་ཞེས་བྱ་བ་ལ་སོགས་བརྗོད་པ་ནི་དམ་པའི་དོན་གྱི་ཞེས་བྱ་བ་ཡིན་ནོ། །ཁྲ་བོ་དང་སེར་སྐྱ་དག་ནི་བ་ལང་ཉིད་ཀྱིས་འདྲེ་བ་ཡིན་ལ། དོན་གཅིག་ལ་ཡང་ཁྲ་བོ་དང་བ་ལང་ངོ་
[248a.5]ཞེས་བྱ་བ་ནི་ཐ་དད་པ་ཡིན་ཏེ། དེ་དག་ནི་དོན་རྣམས་ཀྱི་རང་གི་བདག་ཉིད་ལ་མེད་དོ། །ཇི་ལྟ་ཞེ་ན། གཏན་ཚིགས་ཀྱི་དོན་ལ་དང་གི་སྒྲའོ། །ད་ནི་ཐམས་ཅད་དུ་བློ་དེ་ཁོ་ན་ཅི་སྟེ་མི་སྦྱོར་ཞེས་བྱ་བ་འཆད་པ་ནི། དེས་སྤྱི་ཞེས་བྱ་བའོ། །སྤྱི་དང་ཁྱད་པར་ཞེས་བྱ་བའི་བྱེ་བྲག་སྟེ། བྱེ་བ་འདི་ནི་བློའི་
[248a.6]དོན་ལ་ཡིན་ནོ། །ཇི་ལྟ་ཞེ་ན། དེ་ཉིད་ལ་ཞེས་སྨོས་སོ། །གང་གི་ཕྱིར་དེ་ཉིད་ལ་ཆོས་ཀྱི་དབྱེ་བ་ཀུན་བརྟགས་པ་དེའི་ཕྱིར་ཆོས་ཀྱི་བྱེ་བྲག་འགའ་ཞིག་ནི་རྗེས་སུ་འཇུག་ལ་འགའ་ཞིག་ནི་ལྡོག་པའི་ཕྱིར་སྤྱི་དང་ཁྱད་པར་སྣ་ཚོགས་པར་འགྱུར་བ་ཡིན་ནོ། །ཇི་ལྟར་བློ་ཉིད་ཡིན་གྱི་དོན་མ་
[248a.7]ཡིན་ཞེ་ན། བསྒྲུབ་བྱ་སྒྲུབ་པར་རྟོག་པ་ལ་ཞེས་སྨོས་སོ། །གང་གི་ཕྱིར་ཆོས་ཀྱི་དབྱེ་བ་ནི་བསྒྲུབ་བྱ་སྒྲུབ་བྱེད་དུ་རྟོགས་པ་ལ་ཡོད་པ་ཡིན་ནོ། །གལ་ཏེ་དེ་དོན་ལ་ཡོད་པ་ཉིད་ཡིན་ན་ནི་དེའི་ཚེ་བསྒྲུབ་བྱ་སྒྲུབ་པར་རྟོགས་པ་ལ་དངོས་པོ་མཐོང་བ་ཡོད་པར་འགྱུར་བའི་ཕྱིར་བསྒྲུབ་བྱ་
[248b]
[248b.1]སྒྲུབ་པར་རྟོགས་པ་ཉིད་དུ་མི་འགྱུར་རོ། །དེས་ན་དངོས་པོ་མཐོང་བ་ཉམས་པའི་ཕྱིར་འདི་ནི་བློའི་ཡུལ་ཉིད་དོ། །ཇི་ལྟར་བྱ་བ་འདི་བློ་ཉིད་ལ་མངོན་པར་བརྗོད་དོ། །གང་གི་ཕྱིར་སློབ་དཔོན་ཕྱོགས་ཀྱི་གླང་པོས་བ་ལང་གི་ལྡོག་པའི་ཁྱད་པར་ཅན་རང་གི་མཚན་ཉིད་བཟུང་བར་ཞལ་གྱིས་བཞེས་པའི་
[248b.2]ཕྱིར་རོ་ཞེ་ན། དེ་ནི་མ་ཡིན་ནོ་ཞེས་བཤད་པ་ནི། ཁྱད་པར་ནི་རང་གི་མཚན་ཉིད་ལ། སྤྱི་དང་འདྲེས་ཞེས་བྱ་བ་ནི་ལྡོག་པ་ཁྱད་པར་དུ་བྱས་པའི་རང་གི་མཚན་ཉིད་གཟུང་བར་བྱ་བ་མ་ཡིན་ནོ། །ཇི་ལྟར་ཞེ་ན། བཤད་པ། དེ་ནི་སྤྱི་དང་ཁྱད་པར་ལ་སོགས་པའི་རང་བཞིན་དུ་གཟུང་བར་བྱ་བ་མ་
[248b.3]ཡིན་པའི་ཕྱིར་རོ། །དེ་ཡང་ཅིའི་ཕྱིར་ཞེ་ན་ཞེས་སྟོན་པ་ནི་གཅིག་ལ་ཁྱད་པར་རྣམ་པ་མང་པོ་དག་མི་རུང་བའི་ཕྱིར་རོ། །དེའི་ཕྱིར་རང་གི་མཚན་ཉིད་ནི་སྒྲའི་ཡུལ་མ་ཡིན་ལ་རྣམ་པར་རྟོག་པའི་ཡང་མ་ཡིན་ནོ་ཞེས་བཤད་པ་ནི། དེའི་ངོ་བོ་ཞེས་བྱ་བའོ། །དེས་ན་དེ་ལྟར་དོན་གྱི་རང་གི་ངོ་བོ་
[248b.4]གཅིག་ཅེས་བྱ་བ་ལ་སོགས་པའི་རབ་ཏུ་དབྱེ་བ་འདིའི་མཐར་ཐུག་པས་ནི་དངོས་པོ་ལ་བསྒྲུབ་བྱའི་ཡུལ་ཅན་གྱི་གཉེན་པོར་གྱུར་པ་ཐ་དད་པའི་དོན་ཅན་ཉིད་བཤད་ལ། དེ་ཡང་སྒྲོ་འདོགས་རྣམ་པར་གཅོད་པའི་རང་བཞིན་ཁོ་ནའོ། །དོན་དེ་ལ་ཡང་ལྡོག་པ་ཉིད་ཀྱི་རང་བཞིན་གྱི་ཡུལ་ཡང་དངོས་
[248b.5]སུ་ནི་མ་ཡིན་གྱི། འོན་ཀྱང་ལྷག་པར་ཞེན་པ་ལ་ལྟོས་ནས་ཡིན་ནོ། །དངོས་པོའི་ཡུལ་ཅན་མ་ཡིན་ན་ཡང་རྣམ་པར་གཞག་པ་མི་འགལ་བའི་ཕྱིར་ལྟོས་པ་མཐའ་དག་སེལ་བ་གཞན་སེལ་བའི་ཡུལ་ཅན་ཉིད་ཡོངས་སུ་རྫོགས་པ་རྣམ་པར་གཞག་པ་ཡིན་ནོ། །ད་ནི་རྣམ་པ་གཞན་གྱིས་ཀྱང་
[248b.6]རྣམ་པར་གཞག་པའི་ཕྱིར་སྐབས་དང་འབྲེལ་པ་ཉིད་དུ་བརྗོད་པ་ནི་ཡང་ཅིའི་ཕྱིར་ཞེས་བྱ་བས། དེ་དེ་བཞིན་དུ་རྟོགས་བྱེད་པའི། །སྒྲ་ཡོད་མ་ཡིན་རྟོགས་པ་ཡང་། །ཞེས་བཤད་པ་ལ་རྩོད་པར་བྱེད་དོ། །འདིར་ནི་དེས་སྤྱི་ཁྱད་པར་དུ་ཞེས་བྱ་བའི་བྱེ་བྲག་འདི་ནི་བློ་དོན་ལ་ཞེས་བྱ་བས་དེ་ཉིད་སྒྲ་
[248b.7]དང་རྣམ་པར་རྟོག་པ་དག་གི་ཡུལ་ཡིན་གྱི། རང་གི་མཚན་ཉིད་ནི་མ་ཡིན་ནོ་ཞེས་གནས་པ་ན། དེའི་ཡུལ་ལ་བརྒལ་ཞིང་བརྟག་པར་བྱེད་དོ། །མི་སྦྱོར་བའི་གཏན་ཚིགས་བཤད་པ་ནི། གང་གི་ཕྱིར་ཞེས་བྱ་བའོ། །བརྡར་བཏགས་པའི་ཁྱད་པར་ཅན་སྒྲའི་བརྗོད་པར་བྱ་བར་
[249a]
[249a.1]བསྟན་ཏོ། །དེ་སྟོན་པ་ནི་དེ་ལ་རབ་ཏུ་སྦྱོར་རོ་ཞེས་བྱ་བའི་ཐ་ཚིག་སྟེ། དེ་རྟོགས་པར་བྱེད་པ་ཡིན་པའི་ཕྱིར་རོ། །འདི་སྐད་བརྗོད་པ་ཡིན་ཏེ། གལ་ཏེ་དངོས་པོའི་རང་བཞིན་ཉིད་ཀྱིས་སྒྲ་རྣམས་དོན་ལ་འཇུག་པར་འགྱུར་ན་ནི། དེ་དག་གི་དེ་རང་གི་མཚན་ཉིད་ལས་
[249a.2]འགྱུར་ཏེ། དཔེར་ན་མིག་ལ་སོགས་པ་དེ་བཞིན་ནོ། །གང་གི་ཚེ་དེ་དག་དེར་མཐོང་བ་ལ་ལྟོས་ནས་འཇུག་པ་དེའི་ཚེ་རང་གི་མཚན་ཉིད་ལ་མི་འཇུག་གོ། །དངོས་པོ་ལ་འབྲེལ་པ་ཡོད་ཀྱང་ཐ་སྙད་ལ་དེ་དག་གི་འཇུག་པ་ནི་མཐོང་བ་ལ་ལྟོས་པ་ཡིན་ལ། འབྲེལ་པ་མེད་ན་ནི་ཐ་སྙད་ལ་
[249a.3]མཐོང་བ་དེ་ཉིད་བརྡར་འགྱུར་བ་ཡིན་གྱི་མཐོང་བ་ལ་ལྟོས་པ་ལ་ནི་རྩོད་པ་མེད་པ་ཁོ་ནའོ། །གལ་ཏེ་རང་གི་མཚན་ཉིད་ཁོ་ན་ལ་བརྡར་བྱས་པ་རང་གི་མཚན་ཉིད་ཁོ་ན་ལ་སྦྱོར་བར་འགྱུར་བ་མ་ཡིན་ནམ། ཇི་ལྟར་དེ་ལ་མི་སྦྱོར་ཞེ་ན། དོགས་པ་འདི་བསུ་ནས་བརྡའི་དགོས་པ་སྟོན་པས་དེ་
[249a.4]ལ་མེད་པར་བཤད་པ་ནི། དེ་ནི་ཐ་སྙད་ཆེད་དུ་བྱས། །ཞེས་བྱ་བའོ། །གང་གི་ཚེ་འདི་དགོས་པ་དེ་དག་དེའི་ཚེ་སྒྲ་འདི་ལས་རིག་པར་བྱ་སྟེ། བླང་བའམ་སྤང་བར་བྱའོ་ཞེས་བྱ་བ་འདིའི་དོན་དུ་སྒྲ་དགོད་པ་ཡིན་གྱི། དེ་ལ་སྒྲ་བཀོད་པས་དེ་ཉིད་ཀྱི་ཚེ་རྟོགས་པ་ལ་ནི་དོན་འགའ་ཡང་མེད་
[249a.5]དོ། །ལན་ཅིག་རྟོགས་པས་ནི་དགོད་པའི་གཞིར་གྱུར་ཀྱང་ཇི་སྐད་བརྗོད་པའི་བསམ་པས་དེ་ལ་སྦྱོར་བར་འགྱུར་བ་གང་ཡིན་པ་འགལ་ཡང་སླར་འགྱུར་བ་ཡོད་པ་མ་ཡིན་ནོ། །དེས་ན་རང་གི་མཚན་ཉིད་ལ་བརྡ་མ་ཡིན་པའི་ཕྱིར་དེ་ལ་སྒྲ་སྦྱོར་བ་མེད་དོ། །དེ་ཉིད་བཤད་པ་ནི། སྒྲ་རྣམས་
[249a.6]ཀྱིས་ནི་ཞེས་བྱ་བ་ཡིན་ནོ། །འདིར་མདོ་བཞིན་དགོས་པ་སྦྱར་བར་བྱའོ། །ཐ་སྙད་ཀྱི་དོན་དུ་འདོགས་ན་ཞེས་བརྗོད་པས་ནི་ཅི་ནས་ཀྱང་ཞེས་བྱ་བ་ནི་ཐ་སྙད་ཡིན་ལ། དེ་ལ་ཡང་དེ་ཉེ་བར་མཁོ་བར་བཤད་པ་ཡིན་ནོ། །སྒྲ་དེ་ནི་ཡུལ་ལ་སོགས་པ་ཐ་དད་ལ་མི་འཇུག་པའི་ཕྱིར་ཕྱིས་མི་འཇུག་གོ། །
[249a.7]རང་གི་མཚན་ཉིད་ནི་ཡུལ་དང་དུས་དང་རྣམ་པ་ངེས་པ་ཡིན་ཏེ། དེ་བས་ན་གང་གིས་དེ་ལས་གཞན་ལ་འཇུག་པར་འགྱུར་བ་དེ་ལ་ངེས་པར་སྦྱར་བས་ཡུལ་དང་དུས་དང་རྣམ་པ་སྤོང་བར་ཇི་ལྟར་འགྱུར། རང་གི་མཚན་ཉིད་ལ་མི་སྦྱོར་མོད། འོན་ཀྱང་སྤྱི་ལ་འགྱུར་བའི་ཕྱིར་བློའི་དོན་གྱི་
[249b]
[249b.1]ཡུལ་ཅན་ཉིད་རྩོད་པ་དང་བཅས་པ་ཡིན་ནོ་ཞེས་རྩོད་པ་ནི། འོ་ན་སྤྱི་ཞེས་བྱ་བའོ། །སྒྲ་ནི་མཐོང་བ་ལ་ལྟོས་པ་ཡིན་ནོ། །རང་གི་མཚན་ཉིད་ཡུལ་ཡིན་ན་མཐོང་བའི་རང་གི་མཚན་ཉིད་རྗེས་སུ་མི་འཇུག་པ་དང་། རང་གི་མཚན་ཉིད་གཞན་དུ་ཡང་མ་མཐོང་བས་ན་སྦྱོར་བར་འགྱུར་རོ། །སྤྱི་
[249b.2]ཡུལ་ཡིན་ན་ནི་སྐྱོན་འདི་མེད་དེ། ཁྱབ་པའི་ཕྱིར་ཡང་དང་ཡང་ཉེ་བར་གནས་པ་དེར་ཉེ་བར་མཁོ་བ་ཡོད་ན་སྦྱོར་བའི་རྟེན་ཉིད་དུ་མི་འགལ་བའི་ཕྱིར་རོ་ཞེ་ན། འདི་ཟློག་པར་བྱེད་པ་དེ་ནི་མ་ཡིན་ཏེ་ཞེས་བྱ་བའོ། །འདི་ལྟར་དོན་བྱེད་པར་ནུས་པ་ཤེས་ནས་དོན་བྱེད་པ་བསྒྲུབ་པའི་ཕྱིར་འཇུག་པར་འགྱུར་རོ་
[249b.3]ཞེས་དོན་རྣམས་ལ་རྗོད་པར་བྱེད་པ་སྦྱོར་བར་བྱེད་དོ། །སྔར་ནི་གང་གིས་རང་གི་མཚན་ཉིད་ཀྱི་ཡུལ་ཅན་སྤངས་པར་འགྱུར་བ་ལན་ཅིག་བཀོད་པ་ཡང་རྟོགས་པའི་འབྲས་བུ་ཅན་ཐ་སྙད་ཀྱི་དོན་དུ་བསྟན་པ་ཡིན་ལ། ད་ལྟ་ནི་ཐ་སྙད་དེ་ཉིད་ཀྱི་དགོས་པ་ཇི་ལྟ་བུར་གྱུར་པ་དེ་བརྟགས་པས་ཐ་སྙད་དུ་
[249b.4]བྱས་པའི་དོན་སྤྱིའི་རང་བཞིན་དུ་ཉེ་བར་སྟོན་པས་སྤྱིའི་ཡུལ་ཅན་ཉིད་གསལ་བའི་ཕྱིར་འདི་བརྗོད་དོ། །འདི་ལྟར་གལ་ཏེ་སྒྲ་ངེས་པར་སྦྱར་བའི་ཡུལ་ཇི་ལྟར་རྟོགས་བཞིན་པའི་རང་བཞིན་དེ་ལྟ་བུའི་སྤྱི་སྲིད་ན་ནི། སྤྱི་ཡུལ་དུ་འགྱུར་གྱི། གཞན་དུ་ནི་མ་ཡིན་ནོ། །དེ་ལ་རང་ངམ་གཞན་དོན་བྱ་བ་དོན་དུ་
[249b.5]གཉེར་བས་དོན་བྱ་བ་ནུས་པའི་རང་བཞིན་རྟོགས་པར་བྱ་བའི་ཕྱིར་སྒྲ་སྦྱོར་བ་ཡིན་ནོ། །དེས་ན་སྤྱི་དོན་བྱ་བར་ནུས་པ་ཉིད་ཡིན་ན་རིགས་སྦྱོར་བའི་ཡུལ་དུ་འགྱུར་གྱི། དོན་བྱ་བ་ནུས་པའི་ཡུལ་མ་ཡིན་ན་ནི། སྒྲ་ངེས་པར་སྦྱར་བ་རིགས་ཀྱི་ཡུལ་ཅན་དུ་མི་འགྱུར་རོ། །དེས་ན་འདིས་ནི་ངེས་པར་
[249b.6]སྦྱོར་བ་ནི་དོན་བྱ་བར་ནུས་པའི་ཡུལ་ཅན་ཡིན་ནོ་ཞེས་གཞུང་བཙུགས་པ་ཡིན་ནོ། །འདི་ཉིད་བཤད་པ་ནི་འཇིག་རྟེན་ན་ཞེས་བྱ་བ་ཡིན་ནོ། །རེ་ཞིག་འཇིག་རྟེན་པའི་འཇུག་པ་དང་ལྡོག་པའི་མཚན་ཉིད་ཀྱི་ཐ་སྙད་ཐམས་ཅད་ནི་འབྲས་བུ་འདོད་པ་སྔོན་དུ་འགྲོ་བ་ཅན་ཁོ་ནའོ། །དེས་ན་བརྡ་སྦྱར་བ་
[249b.7]ལས་འབྲས་བུ་འདོད་པའམ་དེ་སྦྱར་བའི་ཡུལ་ལས་འབྲས་བུ་འདོད་པར་འགྱུར་གྲང་ན། དེ་ལ་རེ་ཞིག་རྣམ་པར་རྟོག་པ་དང་པོ་ནི་མ་ཡིན་ཏེ། འཇིག་རྟེན་གྱི་རྟོགས་པ་ནི་དོན་ལ་བརྟེན་པའི་འབྲས་བུ་འདོད་པའི་རྣམ་པ་ཅན་ཡིན་པའི་ཕྱིར་ཡིན་གྱི། ངེས་པར་སྦྱར་བ་ཉིད་ལས་འབྲས་བུ་གྲུབ་པར་
[250a]
[250a.1]རྟོགས་པ་མ་ཡིན་ནོ། །འཇིག་རྟེན་པའི་འདོད་པ་ལས་བཟློག་ནས་ངེས་པར་སྦྱོར་བ་ལ་འབྲས་བུ་འདོད་པ་ནི་ཉམ་ང་བ་ཞེས་བརྗོད་དོ། །རིགས་པ་ནི་འདིར་འཐད་པས་གྲུབ་པ་ཉིད་ཀྱིས་བརྗོད་པ་ནི་མ་ཡིན་གྱི། འོན་ཀྱང་འཇིག་རྟེན་པའི་རྟོགས་པ་དཔྱད་པ་ཉིད་ཀྱིས་བཤད་པ་
[250a.2]ཡིན་ནོ། །འབྲས་བུའི་རང་བཞིན་བཤད་པ་ནི། །དེ་ནི་ཐམས་ཅད་ཀྱང་ཞེས་བྱ་བ་སྟེ། འབྲས་བུ་ནི་ཐམས་ཅད་ཉིད་ནི་འདོད་པ་དང་མི་འདོད་པ་བདེ་བ་དང་སྡུག་བསྔལ་དག་བདག་ཉིད་ལ་འབྲེལ་པ་དང་བཟློག་པ་ཡིན་ཏེ། འདི་ལྟར་འདི་བདག་ཉིད་བདེ་བ་དང་འབྲེལ་པར་འགྱུར་བ་དང་སྡུག་བསྔལ་དང་བྱེ་
[250a.3]བར་བྱས་པ་ནི་འབྲས་བུར་སེམས་པ་ཡིན་ནོ། །དེས་ན་འདི་རང་གི་བདག་ཉིད་དམ་གཞན་ལ་འབྲས་བུ་དེ་བསྐྱེད་པའི་དོན་དུ་དེའི་སྒྲུབ་པར་བྱེད་པ་དང་སྒྲུབ་པར་བྱེད་པ་མ་ཡིན་པ་ཤེས་པ་སྔོན་དུ་འགྲོ་བ་ཅན་གྱི་འཇུག་པ་དང་ལྡོག་པ་དག་ནི་སྦྱར་བའི་འབྲས་བུ་ཡིན་པའི་ཕྱིར་ངེས་པར་སྦྱར་བ་ནི་དོན་བྱ་བར་
[250a.4]ནུས་པའི་ཡུལ་ཅན་དུ་རྟོགས་པ་ཡིན་ནོ་ཞེས་བྱ་བར་གྲུབ་བོ། །དེ་དེ་ལྟར་གནས་པ་ན་རིགས་དེ་ནི་བྱེད་པར་ནུས་པ་མ་ཡིན་ནོ་ཞེས་བསྟན་པའི་ཕྱིར་བཤད་པ་ནི། དེ་ལ་རིགས་དོན་བྱེད་རུང་མིན། །ཞེས་བྱ་བའོ། །འབྲས་བུ་སྒྲུབ་པར་བྱེད་པ་ནི་བྱ་བ་དང་ལྡན་པ་ཡིན་ལ། །བྱ་བ་དང་ལྡན་པ་ཡང་རྫས་ཁོ་ན་
[250a.5]ཡིན་ཏེ། དེས་ན་རིགས་དོན་བྱེད་པ་མ་ཡིན་ནོ། །དོན་བྱ་བ་བྱེད་པར་རྟོགས་པ་ལ་བཀོད་པའི་སྒྲ་དག་ནི་དོན་བྱ་བ་མི་ནུས་པའི་ཡུལ་དུ་རྟོགས་པར་ནུས་པ་ཡང་མ་ཡིན་ནོ། །དེ་ལ་འཁྲུལ་པ་ཡིན་ནོ་ཞེ་ན། འོ་ན་ནི་ཐ་སྙད་རྗེས་སུ་འགྲོ་བའི་སྤྱོད་ཡུལ་ཉིད་དུ་རྟོགས་པ་ཡང་འཁྲུལ་བ་ཡིན་པའི་ཕྱིར་རང་གི་
[250a.6]མཚན་ཉིད་ཀྱི་ཡུལ་ཅན་དུ་འགྱུར་བའམ། རྟོགས་པ་འགའ་ཞིག་འཁྲུལ་པར་མི་འཐད་པ་ཡིན་ན་ནི། རང་གི་ཁོ་ནར་འགྱུར་རོ། །དཔེར་ན། སྒྲ་རྣམས་ཀྱིས་ནི་བརྡར་བཏགས་སྟོན། །ཞེས་བྱ་བས་རྗེས་སུ་འགྲོ་བ་ལ་རྟོགས་པ་ནི་རང་གི་མཚན་ཉིད་ཀྱི་ཡུལ་ཅན་མ་ཡིན་ནོ་ཞེ་ན། བཤད་
[250a.7]པ། དེ་བཞིན་དུ་དོན་བྱ་བར་ནུས་པའི་ཡུལ་ཅན་དུ་རྟོགས་པའི་ཕྱིར་དོན་བྱ་བ་མི་ནུས་པའི་ཡུལ་ཅན་མ་ཡིན་ནོ། །དོན་དུ་ནུས་པར་རྟོགས་པ་འཁྲུལ་པ་ཡིན་ནོ་ཞེ་ན། འོ་ན་ནི་ཐ་སྙད་རྗེས་སུ་འགྲོ་བའི་སྤྱོད་ཡུལ་ཉིད་དུ་རྟོགས་པ་ཡང་འཁྲུལ་པ་དེས་ན་རྟོགས་པ་དེ་རང་གི་མཚན་ཉིད་ཀྱི་
[250b]
[250b.1]ཡུལ་ཅན་དུ་འགྱུར་བའམ་རྟོགས་པ་འགའ་ཞིག་འཁྲུལ་པར་མི་འཐད་ན་ནི། རང་ཉིད་གནོད་པ་མེད་པའི་དམིགས་པ་ཇི་ལྟར་རྟོགས་པ་བཞིན་རྟོགས་པ་ན། དོན་བྱ་བ་ནུས་པའི་བློ་སྤྱི་ལ་དམིགས་པ་མ་ཡིན་ནོ། །དེས་ན་རིགས་ཀྱི་ཡུལ་ཅན་ཉིད་ཀྱི་སྒྲ་འགོད་པ་ནི་མ་ཡིན་ནོ། །རིགས་ནི་
[250b.2]དོན་བྱེད་པར་མི་ནུས་ཀྱང་དོན་བྱེད་པར་ནུས་པ་རྟོགས་པར་བྱ་བ་ཉིད་ཀྱི་ཕྱིར་བརྗོད་པ་ཡིན་ནོ། །རང་གི་མཚན་ཉིད་ནི་ཐ་སྙད་ལ་བརྗོད་པར་མི་ནུས་པ་ཡིན་གྱི་མེད་པ་ནི་མ་ཡིན་པས་ན། རྗེས་སུ་འགྲོ་བ་ནི་དོན་བྱེད་པར་མི་ནུས་ཀྱང་བརྗོད་པར་བྱ་བ་ཡིན་ཏེ། དེ་རྟོགས་པར་འགྱུར་བའི་ཕྱིར་ལ། དེ་
[250b.3]ཡང་དོན་བྱ་བ་བྱེད་པ་ཉིད་དོ་ཞེས་བསྟན་པའི་ཕྱིར་གལ་ཏེ་གསལ་བ་བསྟན་པར་མི་ནུས་པའི་ཕྱིར་ཞེས་སྨོས་སོ། །འདི་བཟློག་པའི་ཕྱིར་བཤད་པ་ནི་འབྲེལ་པ་ཡོད་དུ་ཟིན་ཀྱང་ཞེས་བྱ་བའོ། །ཐ་སྙད་ལ་བསྟན་པར་མི་ནུས་པའི་གསལ་བ་མཚོན་པའི་ཕྱིར་གྱིས་བརྗོད་པ་ཡིན་ན་མཚོན་པ་དེའི་
[250b.4]སྒྲའི་བྱེད་པའམ་རིགས་ཀྱི་བྱེད་པ་ཡིན་པར་འགྱུར། གང་གིས་ན་སྒྲོགས་སོ་ཞེས་བྱ་བར་རྒྱུན་སྟོན་པར་བྱེད་པ་གང་གི་སྒྲ་ནི་དེ་ལ་སྒྲོགས་པ་མི་སྲིད་པས་ན། ཚིག་གི་དོན་གཞན་དང་འབྲེལ་པ་འགལ་བའི་ཕྱིར་གལ་ཏེ་རང་གི་དོན་བསྟན་པ་ལ་དོན་གཞན་དང་འབྲེལ་པར་གོ་བར་བྱེད་པ་དེ་ལྟར་
[250b.5]བསྟན་པ་ཡིན་པའི་ཕྱིར་སྒྲའི་བརྗོད་བྱ་ཉིད་དུ་འགྱུར་བ་དེས་ན། མཚོན་པ་ཞེས་བྱ་བ་དེ་ཅི་ཞིག །དེ་ལྟར་རྟོགས་པ་གཞུང་བཙུགས་པར་ཡང་མི་འགྱུར་རོ། །ཇི་ལྟར་འདིར་དངོས་ཀྱི་དོན་མཚོན་པའི་ཡུལ་ལས་གཞན་ཉིད་དུ་ངེས་པ་དེ་བཞིན་དུ་བ་ལང་ཁྱེར་ལ་ཤོག་ཅེས་བྱ་བ་ལ་བ་ལང་གི་ཚིག་གི་
[250b.6]དོན་ཁྱེར་ཏེ་འོང་བའི་བྱ་བ་དང་འབྲེལ་པ་མེད་པའི་ཕྱིར་གསལ་བ་ལ་ཕྱོགས་པར་རྟོགས་པ་ནི་མ་ཡིན་གྱི། འོན་ཀྱང་དེ་ཉིད་དེ་ལྟར་རྟོགས་པ་ཡིན་པ་དེས་ན་རིགས་ཀྱི་དོན་ཉམས་སོ། །སློབ་དཔོན་གྱིས་ཁས་བླངས་ནས་ཀྱང་རིགས་སྒྲའི་དོན་ཡིན་ན། རྣམ་པ་ཐམས་ཅད་དུ་གསལ་བ་རྟོགས་
[250b.7]པ་མེད་པར་བསྒྲུབ་པར་བྱ་བའི་ཕྱིར་འདི་སྐད་གསུངས་སོ། །མཚོན་པའི་ཡུལ་ནི་སྒྲའི་དོན་མ་ཡིན་པའི་ཕྱིར་འབྲེལ་པ་ཡོད་དུ་ཟིན་ཀྱང་སྒྲས་མ་བརྗོད་པ་དེ་ལ་འཇུག་པར་མི་འཐད་དོ། །གསལ་བའི་སྒྲའི་དོན་ཡིན་མི་སྲིད་པའི་ཕྱིར་དེ་སྒྲས་མ་བརྗོད་པ་ན། རིགས་དེ་དང་འབྲེལ་པའི་ཕྱིར་
[251a]
[251a.1]དེའི་ཅི་ཞིག་ལྟར་རྟོགས་པ་ན། སྒྲ་ལས་རྟོགས་པ་མ་ཡིན་པའི་ཕྱིར་དང་། དེ་ཉིད་ཚད་མ་ཡིན་པའི་ཕྱིར་རམ་བརྗོད་པར་འདོད་པ་སྟོན་པར་བྱེད་པ་ཡིན་པའི་ཕྱིར་ཚད་མས་གྲུབ་པའམ། སྨྲ་བ་པོའི་མངོན་པར་འདོད་པ་དེ་ལྟར་རྟོགས་པ་ན་ཇི་ལྟར་རྟོགས་པ་ཡིན།
[251a.2]འབྲེལ་དུ་ཟིན་ཀྱང་སྒྲ་རྟོགས་པར་བྱེད་པ་མ་ཡིན་ན། དོན་གྱིས་རྟོགས་པ་མ་ཡིན་ནོ་ཞེས་བཤད་པ་ནི། འགའ་ཞིག་ལ་ཁར་བ་ཆོད་ཅིག་ཅེས་སྨྲས་ན་ཞེས་བྱ་བའོ། །ཁར་བ་ཆོད་ཅིག་ཅེས་སྨྲས་ན་ཁར་བ་ལ་གནས་པའི་གཅོད་པ་ནགས་སྒྲས་མ་བརྗོད་པའི་དོན་གྱིས་རྟོགས་པ་ནི་མེད་དོ། །གལ་
[251a.3]ཏེ་ཁར་བ་གཅོད་པ་ནི་སྲིད་པ་ཡིན་གྱི། རིགས་ནི་བླང་བ་ལ་སོགས་པར་སྲིད་པ་མ་ཡིན་ཏེ། དེས་ན་དེ་ནི་མཚོན་པ་མ་ཡིན་གྱི་འོན་ཀྱང་འདི་ཉིད་དུ་ཡིན་ནོ་ཞེ་ན། མི་སྲིད་པའི་ཕྱིར་ཞེས་སྨོས་སོ། །མི་སྲིད་ན་ནི་སྒྲའི་དོན་རྣར་མི་འོང་བར་འགྱུར་གྱི་དེ་ཁྱད་དུ་བསད་ནས་སྒྲའི་དོན་མ་ཡིན་ཡང་གཞན་
[251a.4]ལ་འཇུག་པ་ནི་མ་ཡིན་ཏེ། གླང་བཞོ་བར་བརྗོད་པ་ན་དེ་ལ་མི་སྲིད་པའི་ཕྱིར་གླང་གི་སྒྲ་དེས་བསྐྱེད་པ་བ་ལང་བཞོ་བའི་སྤྱོད་ཡུལ་ཅན་དུ་ངེས་པ་ནི་མ་ཡིན་གྱི་འོན་ཀྱང་མ་འབྲེལ་པ་ཉིད་དུ་ཟད་དོ། །དེ་བཞིན་དུ་གང་ན་འབོད་དོ་ཞེས་བྱ་བ་ལ་སོགས་པ་དག་ཏུ་ཡང་རྟོགས་པར་བྱའོ། །ཅི་སྟེ་ཡང་
[251a.5]རང་གི་དོན་ལ་ཕྱོགས་པ་སྤང་ནས་ཚིག་གི་དོན་གཞན་གཙོར་བྱེད་པའི་ཕྱིར་མ་འབྲེལ་པ་ན་དེ་བརྗོད་པ་ཡིན་ཡང་དེ་ལྟར་སྒྲ་ཉིད་བརྗོད་པ་ཡིན་ནོ་ཞེ་ན། དེ་བཟློག་པའི་ཕྱིར་བཤད་པ་ནི། དོན་གཞན་བརྗོད་ན་ཞེས་བྱ་བའོ། །སྔར་ནི་དོན་གྱི་བྱེད་པ་བཀག་པ་ཡིན་ལ་ད་ལྟར་ནི་སྒྲའི་བྱེད་པ་འགོག་
[251a.6]པའོ། །དེ་ཉིད་ཀྱང་ཕྱིར་འབྲེལ་པ་ཡོད་དུ་ཟིན་ཀྱང་ཁར་བ་ཞེས་བྱ་བས་ཞེས་འཆད་པར་འགྱུར་རོ། །རང་གི་དོན་བརྗོད་པས་དོན་གཞན་མཚོན་པ་ནི་མ་ཡིན་ནོ། །སྒྲ་ཉིད་ལ་དེར་རྟོགས་པ་སྐྱེ་བ་ནི་སྒྲའི་དོན་ཉིད་དུ་ཐལ་བའི་ཕྱིར་ཏེ། སྒྲའི་དོན་གྱི་མཚན་ཉིད་གཞན་མེད་པའི་ཕྱིར་རོ། །
[251a.7]རང་གི་དོན་རྟོགས་པས་བར་དུ་ཆོད་ནས་རྟོགས་པར་བྱེད་པ་ཉིད་ན་མི་འདྲ་བ་ཙམ་དུ་འགྱུར་ལ། དངོས་སུ་བརྗོད་པ་ནི་གཙོ་བོ་ཉིད་དུ་འགྱུར་ཏེ་དེ་ལས་དེ་ལ་རྟོགས་པ་སྐྱེ་ན་དེ་དེ་ལ་ཕྱོགས་པར་མ་ཡིན་པར་མ་གྲུབ་པའི་ཕྱིར་རོ། །གལ་ཏེ་རང་གི་དོན་སྟོན་པར་བྱེད་པ་ཡིན་ཡང་བརྗོད་
[251b]
[251b.1]པར་བྱ་བ་མ་ཡིན་པ་མཚན་ཉིད་པའི་དོན་ལ་གཞོལ་བའི་ཚིག་གི་རིགས་བརྗོད་པ་ཡིན་ཡང་གསལ་བ་ལ་བརྟེན་པའི་ཚིག་ཉིད་དོ་ཞེ་ན། རྗོད་པར་བྱེད་པ་ལས་མ་རྟོགས་པའི་གཞོལ་བ་ཞེས་བྱ་བ་འདི་ཇི་ཞིག་དེ་རྟོགས་པར་བྱེད་པའི་ནུས་པ་དང་ལྡན་ན་ནི་བརྗོད་བྱ་ལས་མི་འདའ་ལ། དེ་ལྟ་མ་ཡིན་
[251b.2]ན་ཡང་མ་རྟོགས་པ་ཉིད་ཀྱི་ཕྱིར་གཞོལ་བ་ཡང་མེད་དོ། །སྟོན་པར་བྱེད་པའི་ནུས་པ་དང་ལྡན་པ་ཉིད་ཀྱི་ཕྱིར་རྟགས་མི་འདྲ་བ་ཙམ་བྱས་པ་མཚོན་པ་ཉིད་ཡིན་ན་ཡང་མཚོན་པས་རྟོགས་པ་ཡང་འབྲེལ་པ་བསྟན་པ་ལ་ལྟོས་པར་འགྱུར་རོ། །མ་ཡིན་ཏེ་བརྗོད་པ་ལ་འབྲེལ་པ་ཡོད་ན་འཇུག་
[251b.3]པའི་ཕྱིར་མཚོན་པ་ཉིད་ཀྱིས་འཇུག་པ་ཡིན་ནོ་ཞེ་ན། དེ་དང་ལྡན་པར་འགྱུར་བའི་ཕྱོགས་ལས་ཁྱད་པར་མེད་པ་ཐལ་བར་འགྱུར་རོ། །མཚོན་པ་ལ་སོགས་པའི་ཡུལ་ལ་ནི་ངོ་བོའི་དོན་ཡན་ལག་མ་ཡིན་པ་ཁོ་ན་སྟེ། ལྷ་སྦྱིན་ཁྲིད་དེ་ཤོག་ཅེས་བྱ་བ་ལ་བ་ལང་ཁྱེར་ཏེ་མི་འོང་བའི་ཕྱིར་
[251b.4]རོ། །དེས་ན་ཕྱུགས་ཀྱི་མཆོད་སྦྱིན་གྱིས་ཤིག་ཅེས་བྱ་བ་ལ་ཕྱུགས་ཡན་ལག་མ་ཡིན་པ་ན་དེ་དང་འབྲེལ་པའི་གསལ་བ་འགའ་ཞིག་རྟོགས་པར་འགྱུར་རོ། །གསལ་བ་ཡང་ཡུལ་དང་དུས་ངེས་པར་མི་འཁྲུལ་པའི་ཕྱིར་གཅིག་འགའ་ཞིག་བརྗོད་དོ་ཞེས་རྟོགས་པར་འགྱུར་ལ། དེ་ཡང་
[251b.5]འདིའི་ཞེས་མ་ཤེས་པའི་མི་འཇུག་པ་ཁོ་ནའོ། །ཐམས་ཅད་བརྗོད་ཀྱང་མཐའ་ཡས་པས་རྗེས་སུ་འགྲུབ་པ་མི་སྲིད་པ་ན་ཚད་མ་མེད་པར་འགྱུར་རོ། །གང་ལ་མཚོན་པ་ཡོད་པར་འགྱུར་བ་རིགས་དང་འབྲེལ་པ་ཙམ་གྱི་སྤྱི་ནི་མེད་དོ། །གསལ་བ་ལ་ཡོད་པ་ནི་འདིའི་ཞེས་བྱ་བར་བརྒལ་
[251b.6]ཞིང་བརྟག་པ་མེད་པར་མཐར་ཕྱིན་པ་མ་ཡིན་པའི་ཕྱིར་མི་སྲིད་པ་ཁོ་ནའོ། །སྒྲའི་བྱེད་པ་འདི་ནི་ཡོད་པ་མ་ཡིན་ནོ་ཞེས་སྟོན་པས། འབྲེལ་པ་ཡོད་དུ་ཟིན་ཀྱང་ཞེས་སྨོས་སོ། །ལྷ་སྦྱིན་ཁར་བ་ཐོགས་པར་བཟུང་བ་ན་དེ་ཁར་བ་དང་འབྲེལ་པའི་ཕྱིར་ཁར་བ་ཞེས་བྱ་བའི་སྒྲ་ལས་ཁར་བ་
[251b.7]ཐོགས་པར་རྟོགས་པར་ཐལ་བའི་ཕྱིར་རོ། །མ་རྟོགས་པར་ནི་འདིའི་ངོ་བོ་ཉིད་ལས་གྱུར་པའི་སྒྲའི་བྱེད་པ་མ་ཡིན་པའི་ཕྱིར་སྒྲའི་དོན་གཙོ་བོ་དང་ཕལ་བ་ཡང་མ་ཡིན་པར་འགྱུར་རོ། །ཚིག་དོན་གཞན་མི་འགྲིགས་ན་རྟོགས་པར་བྱེད་པ་ཉིད་དོ་ཞེ་ན། འདི་ལ་གཙོ་བོ་དང་ཁྱད་པར་
[252a]
[252a.1]མེད་པར་ཐལ་ལོ་ཞེས་བཤད་ཟིན་ཏོ། །དེས་ན་སྒྲ་དོན་གྱི་འབྲེལ་པ་ངོ་བོ་ཉིད་དུ་གྱུར་པའམ། བརྡ་ལས་བྱུང་བ་ཡིན་ཡང་བླ། གལ་ཏེ་ཉིད་ཕལ་པ་ལ་སོགས་པ་ལ་འཇུག་ན་གཙོ་བོ་ཁོ་ནར་འགྱུར་བའི་ཕྱིར་དེ་ལྟ་བུ་ལ་སོགས་པ་དག་ཏུ་ནི་བརྗོད་བྱ་ཉེ་བར་
[252a.2]བཏགས་པ་ཉིད་དུ་བརྗོད་པར་བྱ་སྟེ། ཇི་སྐད་དུ་ཡན་ལག་ལ་སྤྱི་ཉེ་བར་བཏགས་པའི་ཕྱིར་རོ་ཞེས་བཤད་ཟིན་པ་བཞིན་ནོ། །འབྲེལ་པ་མ་ངེས་པའི་ཕྱིར་ཁར་བ་ཐོགས་པ་ལ་སོགས་པ་དག་ལ་མི་རྟོགས་ན་རིགས་ལ་ཡང་མཚུངས་པ་ཉིད་དེ། གལ་ཏེ་འབྲེལ་པ་མ་ངེས་པ་ཅན་ཞེས་བྱ་བ་
[252a.3]ལ་སོགས་པ་བཤད་དོ། །གསལ་བས་སྟོང་པའི་རིགས་ནི་འགའ་ཡང་མེད་དོ་ཞེ་ན། ཐམས་ཅད་ལ་ལྟོས་ནས་ནི་བདེན་ན། རེ་རེ་ལ་བརྟེན་ནས་ནི་དེ་མེད་པར་ཡོད་པ་ཁོ་ན་སྟེ་དེ་མི་རྟག་པའི་ཕྱིར་རོ། །མཚན་ཉིད་ནི་ངེས་པ་གཅིག་གི་ཡུལ་ཅན་དུ་བརྗོད་པར་བྱ་བ་ཡིན་ཏེ། དེ་ཉིད་གསལ་
[252a.4]བའི་ཆོས་ཡིན་པའི་ཕྱིར་རོ་ཞེས་བཤད་ཟིན་ཏོ། །འབྲེལ་པ་ཅན་ཉིད་ཀྱི་རིགས་ཀྱི་སྒྲས་གསལ་བ་རྟོགས་པར་འགྱུར་བ་མ་ཡིན་ནམ། དེ་ལ་མཚོན་པར་བྱེད་པས་ཅི་བྱ་ཞེ་ན། སྤུན་དྲུང་ཞེས་བྱ་བ་ལ་སོགས་པ་སྨོས་སོ། །འབྲེལ་པ་ཅན་གྱི་སྒྲ་དག་ཁོ་ནས་དེ་ལྟར་རྟོགས་ཀྱི། འབྲེལ་པ་
[252a.5]ཡོད་ཀྱང་གཞན་གྱི་ནི་མ་ཡིན་ལ། བ་ལང་ལ་སོགས་པའི་སྒྲ་ཡང་འབྲེལ་པ་ཅན་གྱི་སྒྲ་མ་ཡིན་ནོ། །བདག་ཉིད་གང་གི་རང་བཞིན་གཞན་ལ་ལྟོས་པ་ཉིད་ཡིན་པ་དེ་ཉིད་ཀྱིས་བརྗོད་བྱ་ཡིན་ན་གཞན་དུ་རྟོགས་པ་འཕེན་པར་བྱེད་དེ། དཔེར་ན་སྤུན་གྱི་སྒྲ་བཞིན་ནོ། །དེ་ཉིད་རང་བཞིན་ཙམ་དུ་གྱུར་
[252a.6]པས་ནི་མ་ཡིན་ཏེ། དཔེར་ན་ལྷ་སྦྱིན་གྱི་སྒྲ་བཞིན་ནོ། །བ་ལང་ལ་སོགས་པའི་སྒྲ་ཡང་རང་བཞིན་རྗོད་པར་བྱེད་པ་ཡིན་ཏེ། དེས་ན་འབྲེལ་པ་ཅན་གྱི་སྒྲ་མ་ཡིན་ནོ། །གལ་ཏེ་འདི་དག་འབྲེལ་པ་ཅན་གྱི་སྒྲ་ཡིན་ན། གསལ་བ་བྲལ་བ་དག་ལ་ཡང་རིགས་ཀྱི་ཚིག་དག་ལས་རྟོགས་པར་ཐལ་ཏེ། སྤུན་
[252a.7]དྲུང་ལ་སོགས་པའི་སྒྲ་བཞིན་ཏེ། དེས་ན་དགོས་པའི་ཡན་ལག་ལ་ཉམས་པར་འགྱུར་རོ། །དེ་བཤད་པ་ནི་རིགས་གསལ་བ་དང་བྲལ་བ་ཅན་དག་གིས་ཀྱང་ཞེས་བྱ་བའོ། །འབྲེལ་པར་རུང་བ་ཙམ་རྟོགས་ན་ནི་གསལ་བ་མི་རྟོགས་པ་ཁོ་ནར་འགྱུར་རོ་ཞེས་བཤད་པ་ནི། གལ་ཏེ་དུས་
[252b]
[252b.1]ཐམས་ཅད་དུ་ཞེས་བྱ་བ་སྟེ། གསལ་བ་ཡོད་པ་མ་ཡིན་ན་ནི་རུང་བ་ཉིད་དུ་རྟོགས་ལ་ཡོད་ན་ནི་གསལ་བ་ཉིད་དུ་ཡིན་ནོ་ཞེས་བྱ་བའི་བྱེ་བྲག་མ་གྲུབ་པའི་ཕྱིར་རོ། །འོ་ན་ནི་རིགས་གསལ་བ་དང་འབྲེལ་པ་ཉིད་ཀྱི་བརྗོད་བྱ་ཡིན་པའི་ཕྱིར། འབྲེལ་པ་ཅན་གྱི་སྒྲ་མ་ཡིན་ཡང་གསལ་བར་རྟོགས་སོ་ཞེས་
[252b.2]བྱ་བར་དགོས་པ་གལ་ཏེ་གསལ་བ་དང་འབྲེལ་པ་ཅན་གྱི་ཞེས་བྱ་བས་བསུ་ནས་བཟློག་པའི་ཕྱིར་འོ་ན་ནི་ཞེས་བྱ་བ་སྨོས་སོ། །གསལ་བ་དང་འབྲེལ་པ་ཅན་ཉིད་དུ་རྟོགས་ན་གསལ་བ་ཁྱད་པར་ཉིད་དུ་འཕངས་པའི་ཕྱིར་དེ་དང་ལྡན་པའི་ཕྱོགས་ལས་ཁྱད་པར་མེད་པར་ཐལ་ལོ། །དེ་དང་ལྡན་པའི་
[252b.3]ཕྱོགས་ཞེས་བརྗོད་པ་ནི་དགག་པ་བྱས་པ་ཡིན་ཏེ། གང་ལ་རིགས་ཁྱད་པར་ཉིད་དུ་འགྱུར་བ་དེ་ནི་གཞན་ཉིད་དོ། །འབྲེལ་པ་ཅན་གྱི་སྒྲ་ཉིད་དམ། མཚན་པ་ནི་སྲིད་པ་མ་ཡིན་ཏེ། འབྲེལ་པ་ཉིད་འཆད་པར་འགྱུར་བའི་ཤུགས་ཀྱིས་མེད་པའི་ཕྱིར་རོ་ཞེས་བཤད་པ་ནི་རིགས་དང་
[252b.4]གསལ་བ་དག་ཅེས་བྱ་བའོ། །གལ་ཏེ་རིགས་རང་གི་མཚན་ཉིད་ཀྱི་རང་བཞིན་མ་ཡིན་ནམ་དེས་ན་དེ་བརྗོད་པ་ན་རང་གི་མཚན་ཉིད་ཡུལ་མ་ཡིན་པར་ཇི་ལྟར་འགྱུར་ཞེ་ན། རང་བཞིན་དང་རང་བཞིན་ཅན་དག་གྲུབ་སྟེ་གཅིག་པ་ཉིད་ཡིན་ན་ནི་ཐ་མི་དད་ལ་ཐ་དད་པ་དང་རྗེས་སུ་འབྲེལ་པ་
[252b.5]མེད་པར་འགྱུར་རམ། དེ་ཐ་དད་ན་ནི་ཁྱད་པར་ཙམ་བརྗོད་པ་ན་གསལ་བ་མ་འཕངས་པ་ཁོ་ནའོ། །དེ་ལྟ་བས་ན་ཞེས་བྱ་བ་ནི་མཇུག་བསྡུ་བའོ། །སྒྲ་ནི་འབྲས་བུ་དང་ལྡན་པའི་ཡུལ་ཅན་ཉིད་དུ་རྟོགས་ལ་དེ་ནི་སྒྲའི་དོན་ཡིན་ནོ། །འབྲས་བུ་དང་ལྡན་པའི་ཡུལ་ཅན་ཉིད་དུ་རྟོགས་པའི་ཕྱིར་
[252b.6]འབྲས་བུ་མེད་པའི་རིགས་སྒྲའི་དོན་མ་ཡིན་ནོ། །གལ་ཏེ་འབྲས་བུ་དང་ལྡན་པར་རྟོགས་པའི་ཕྱིར་འབྲས་བུ་དང་ལྡན་པའི་ཡུལ་ཅན་ཡིན་ན་རིགས་དང་ལྡན་པ་སྒྲའི་དོན་དུ་འགྱུར་མོད་ཅེས་དེ་ལྟ་ན་ནི་འོ་ན་ཞེས་བྱ་བས་ཚིག་ལེའུར་བྱས་པའི་འགྲེལ་པ་བྱེད་དོ། །དེ་ཉིད་སྟོན་པ་ནི་དེ་ལྡན་
[252b.7]ནུས་པ་ཞེས་བྱ་བ་ཡིན་ནོ། །གང་དུ་ཞེས་བྱ་བ་མ་ཐོས་པའི་ཕྱིར་དོན་བྱེད་པ་ཞེས་འབྲེལ་པ་བརྗོད་དོ། །དེས་ན་དེ་ལྟར་འབྲས་བུ་དང་ལྡན་པའི་ཡུལ་ཉིད་རྟོགས་པ་རྗེས་སུ་གཟུང་བར་འགྱུར་ལ་རིགས་དེ་དང་ལྡན་པ་ལ་བཀོད་པའི་ཕྱིར་འདི་ཐ་སྙད་ཀྱི་དུས་ན་མི་གནས་པའི་ཉེས་པ་ཡང་མེད་པ་
[253a]
[253a.1]ཡིན་ནོ་སྙམ་དུ་བསམས་པའོ། །སློབ་དཔོན་གྱིས་ནི་འདི་སྲིད་པར། །བསམས་ལན་གྱི་ཆ་དེ་ཡང་ན། །ཅིའི་ཕྱིར་དངོས་སུ་སྦྱར་མི་བྱེད། །ཅེས་འདོགས་པར་མཛད་དོ། །སྒྲ་རྣམས་རྣམ་པ་ཇི་ལྟ་བུར་གྱུར་པའི་རང་གི་ཡུལ་ཅན་དུ་རྟོགས་པ་དེ་ལྟ་བུར་གྱུར་པ་ནི་རང་གི་
[253a.2]མཚན་ཉིད་ལ་ཡོད་པ་ཡིན་པའི་ཕྱིར། དེ་ལ་སྒྲ་འཇུག་པས་ན་རིགས་པས་བཀོད་ཅེས་བྱ་སྟེ། དངོས་སུ་རང་གི་མཚན་ཉིད་ལ་ཇི་སྟེ་མི་སྦྱོར། གལ་ཏེ་ཞེས་བྱ་བ་ནི་རྣམ་པར་འགྲེལ་པའོ། །འདིར་མི་སྦྱོར་བའི་རྒྱུ་བཤད་པ་ནི། གལ་ཏེ་མཐའ་ཡས་ཕྱིར་ཞེས་བྱ་བའོ། །གསལ་
[253a.3]བ་གང་ལ་སྒྲ་བཀོད་པ་དེ་ཉིད་རྟོགས་པར་བྱེད་ཀྱི་གཞན་ནི་མ་ཡིན་ཏེ། དེ་རྟོགས་པར་བྱེད་པའི་ནུས་པ་ནི་དེ་ལྟར་མཐོང་བ་ལ་ལྟོས་པའི་ཕྱིར་ཏེ། མ་མཐོང་བ་རྟོགས་པ་མེད་པའི་ཕྱིར་རོ། །ཐམས་ཅད་ཀྱི་ཚེ་ཐ་སྙད་རྣམས་གསལ་བ་གཅིག་གིས་བསྒྲུབ་པ་ནི་མ་ཡིན་ནོ་ཞེས་གསལ་བ་
[253a.4]གཞན་ཡང་ཉེ་བར་མཁོ་བར་མཐོང་བས་ཡུལ་དང་དུས་གཞན་དང་དེར་ཡང་སྒྲ་མཐོང་བ་ལ་ལྟོས་པར་བྱ་བ་ཡིན་ཏེ་དེས་ན་གསལ་བ་མཐའ་ཡས་པ་ངེས་པར་དགོད་པའམ་མཐོང་བ་མཐའ་ཡས་པར་འགྱུར་རོ་ཞེ་ན། འདི་སྤོང་བར་བྱེད་པ་ནི་མཐའ་ཡས་པ་འདི་ནི་དེ་དང་ལྡན་པའི་ཕྱོགས་
[253a.5]ལ་ཡང་མཚུངས་སོ། །གལ་ཏེ་འདི་སྙམ་དུ་ཞེས་བྱ་བ་རྩོད་པའི་འབྲེལ་པ་ཡིན་ལ་དེ་ལྟ་ཡིན་ན་ཞེས་བྱ་བ་ནི་ལན་གྱི་འགྲེལ་པ་ཡིན་ཞིང་རིགས་ཀྱི་ཞེས་བྱ་བ་ནི་མཚུངས་པ་ཉིད་གཞུང་འཛུགས་པའོ། །དེ་དང་ལྡན་པ་སྒྲའི་དོན་ཡིན་པའི་ཕྱོགས་ལ་ནི་རིགས་ཀྱི་ཁྱད་པར་ཅན་གྱི་གསལ་
[253a.6]བ་ཉིད་སྒྲའི་དོན་ཡིན་གྱི་གང་གིས་དེ་ལ་ཡང་བརྡ་བྱེད་པ་ལ་མི་ལྟོས་པར་འགྱུར་བ་རིགས་ནི་བ་ལང་ཉིད་དང་ལྡན་པའི་གསལ་བ་འདི་བ་ལང་གི་སྒྲས་རྗོད་པར་བྱེད་པ་ཡིན་ཡང་སྟོན་པ་ན་རིགས་དེའི་ཁྱད་པར་ཅན་གྱི་གསལ་བ་གཞན་ལ་དེའི་སྒྲས་བརྗོད་པར་བྱ་བ་ཉིད་དུ་མ་བསྟན་པའི་ཕྱིར་དེར་ཡང་
[253a.7]བསྟན་པར་བྱ་བ་ཉིད་དུ་འགྱུར་རོ། །དེ་ལྟར་ནི་ནུས་པ་མ་ཡིན་ཏེ་མཐའ་ཡས་པའི་ཕྱིར་རོ། །དེ་བཤད་པ་ནི་འབྲེལ་བ་མ་བྱས་པ་ཅན་གྱི་སྒྲ་ནི་རྗོད་པར་བྱེད་པ་མ་ཡིན་པའི་ཕྱིར་རོ། །གལ་ཏེ་དེ་དང་འབྲེལ་པ་ཅན་ལ་ཞེས་བྱ་བས་ནི་མི་མཚུངས་པར་དོགས་པ་བསུ་བའོ། །དེ་དང་ལྡན་པ་འདི་ནི་བ་ལང་གི་
[253b]
[253b.1]སྒྲའི་དོན་ཡིན་ནོ་ཞེས་བསྟན་པ་ནི་མཐའ་ཡས་པར་འགྱུར་བ་ཞིག་ན། སྒྲ་འདི་བརྗོད་པར་བྱ་བ་ནི་འདིས་ཁྱད་པར་ཅན་དུ་གྱུར་པ་ཡིན་ནོ་ཞེས་བསྟན་པས་ན་དེའི་ཁྱད་པར་ཅན་མཐའ་དག་དེའི་དོན་རྟོགས་པར་རོ་ཞེ་ན། འདི་བཤད་ཟིན་ཏོ་ཞེས་བྱ་བས་ལན་འདེབས་སོ། །གལ་ཏེ་ཡང་གསལ་བ་དང་
[253b.2]རིགས་འབྲེལ་པའི་ཕྱིར་རིགས་ཀྱི་ཁྱད་པར་ཅན་ཡིན་པ་དེ་ལྟ་ན་ཡང་རིགས་ཀྱི་ཁྱད་པར་ཅན་དེའི་སྒྲས་བརྗོད་པར་བྱ་བར་སྟོན་པ་ན་དེ་དང་འབྲེལ་པ་ཅན་ཁྱད་པར་རམ་འབྲེལ་པ་ཅན་ལ་རྟོགས་པར་འགྱུར་གྲང་ན། དེ་ལྟ་ན་ཡང་ཁྱད་པར་ཅན་ལ་སོགས་པ་སྤྱི་ཉིད་ཡིན་པར་འགྱུར་བའི་ཕྱིར་རྩོད་པ་
[253b.3]སྔར་བཤད་པ་ཉིད་དུ་འགྱུར་རོ། །རིགས་དེས་རྣམ་པར་གཅད་པའི་གསལ་བ་རྟོགས་ན་ནི་གསལ་བ་གཞན་རྟོགས་པར་ག་ལ་འགྱུར། དེ་བཞིན་དུ་གསལ་བ་ཙམ་ཡང་སྤྱིའི་རང་བཞིན་མ་ཡིན་པ་ཉིད་ཀྱིས་ཡུལ་མ་ཡིན་པ་ཉིད་དོ་ཞེས་གཞུང་གཟུང་བར་བྱའོ། །བ་ལང་ཉིད་ཀྱི་ཁྱད་པར་ཅན་གྱི་བ་ལང་
[253b.4]མཐའ་དག་བ་ལང་གི་ཚིག་གི་དོན་ཡིན་ནོ་ཞེས་སྟོན་པ་ཡིན་ན་ཡང་གསལ་བ་རྣམས་ལ་གསལ་བའོ་ཞེས་མཚུངས་པའི་རང་བཞིན་དུ་རྟོགས་པའི་ཕྱིར་ཐུན་མོང་མ་ཡིན་པའི་ཡུལ་ཅན་ཉིད་མ་ཡིན་ནོ། །སོ་སོ་རང་གི་རང་བཞིན་ཐུན་མོང་མ་ཡིན་ན་ནི་ཐུན་མོང་བས་རྣམ་པར་གཅད་པ་ལ་
[253b.5]བཀོད་ཀྱང་གཞན་ལ་བྱས་པས་གཞན་ལ་ནུས་པར་མི་འགྱུར་རོ། །འདི་ལྟར་འདི་ནི་སྤྱི་དང་ལྡན་པའི་གསལ་བ་ཡིན་ནོ་ཞེས་དེ་རྟོགས་པ་ན། ཇི་ལྟར་སྤྱི་གསལ་བ་རྣམས་ཀྱིས་རང་བཞིན་གཅིག་པ་ཉིད་ཡིན་པ་དེ་བཞིན་དུ་སྤྱི་དེ་དང་ལྡན་པ་ཡང་ཡིན་ཏེ་དེས་ན་དེ་ལྟར་གཅིག་ཏུ་བྱས་
[253b.6]པའི་གསལ་བ་རྣམས་ལ་དེ་ལྟར་དམིགས་པའི་སྒྲ་དགོད་པ་ཡིན་ཏེ། སྤྱི་དང་ལྡན་པ་དེ་ནི་རེ་རེ་ལ་ཡང་ཡོད་པའི་ཕྱིར་རོ། །དེས་ན་སྦྱོར་བའི་ནུས་པ་ནི་སྤྱི་དེ་དང་ལྡན་པའི་སྤྱི་ཉིད་ལ་བཀོད་པར་འགྱུར་རོ། །རྗེས་སུ་འགྲོ་བ་ཞེས་བྱ་བ་དེ་ལས་བཟློག་པ་ལ་ཐ་མི་དད་པ་ཡིན་མོད། དེ་དག་
[253b.7]གི་འབྲེལ་པ་གང་ཡིན་པ་དེ་དག་གི་གང་ལས་རྗེས་སུ་སོང་བར་འགྱུར་ཏེ། དེས་ན་དེ་དང་ལྡན་པའི་སྒྲའི་དོན་ཡིན་ན་གསལ་བ་རྣམས་སྒྲ་གཅིག་གི་རྟེན་དུ་འགྱུར་བ་མ་ཡིན་ནོ། །དེའི་སྤྱི་ཐ་མི་དད་པའི་ཕྱིར་བ་ལང་བ་ལང་ཞེས་གསལ་བ་རྣམས་ཐ་མི་དད་པ་བརྟེན་པ་ཡིན་གྱི། དེ་སྤྱི་ལོགས་སུ་
[254a]
[254a.1]བྱས་པས་ནི་སོ་སོ་རང་གི་བདག་ཉིད་དུ་ཡུལ་དུ་བྱས་པའི་གསལ་བ་ཐ་མི་དད་པར་ཡུལ་དུ་ཇི་ལྟར་བྱེད་ན་གང་གིས་དེ་དང་ལྡན་པ་གཅིག་ཉིད་ལ་བཀོད་པའི་སྒྲས་གཞན་ཐམས་ཅད་བརྗོད་པར་འགྱུར། དེས་ན་མཐའ་ཡས་པ་ཇི་ལྟར་མ་ཡིན། བརྗོད་པ་འཁྲུལ་པ་ཡང་
[254a.2]ཡིན་ཏེ། དེ་གཅིག་མ་རྟོགས་པའི་ཕྱིར་གསལ་བ་སྒྲའི་དོན་གྱི་ཕྱོགས་བཞིན་ནོ། །འབྲེལ་པ་ཡང་མེད་པའི་ཕྱིར་འབྲེལ་པ་ཅན་ལ་བཀོད་པ་མ་ཡིན་ནོ། །དེས་ན་དེ་ལྟར་རང་གི་མཚན་ཉིད་དང་སྤྱི་དང་དེ་དང་ལྡན་པ་སྒྲའི་དོན་མ་ཡིན་པར་བསྟན་ནས། གཞན་སེལ་བ་སྒྲའི་དོན་དུ་བརྗོད་པའི་ཕྱིར་
[254a.3]ཉེས་པ་སྤང་བ་སྲིད་པའི་ཕྱོགས་འདི་ཕ་རོལ་པོའི་ཅི་སྟེ་ཁས་མི་ལེན་ཞེས་འདྲི་བ་ནི་གཞན་ཡང་ཞེས་བྱ་བ་ཡིན་ནོ། །དབྱེ་བའི་དོན་རྣམས་དེ་བྱེད་པ་མ་ཡིན་པ་ལས་ལོག་པའི་ཕྱིར་མཚུངས་པར་གྱུར་པ་ལ། །དེ་ནི་ཐ་སྙད་ཆེད་དུ་བྱས། །ཞེས་བྱ་བའི་སྐབས་སུ་བབ་པ་བརྡ་ཅི་སྟེ་མ་བྱས། །འདི་
[254a.4]སྐད་བརྗོད་པ་ཡིན་ཏེ། སྤྱི་སྒྲའི་དོན་ཉིད་ནི་རང་གི་མཚན་ཉིད་དང་མཚན་མའི་ཆོས་རྟོགས་པ་དང་མི་མཐུན་ལ། རང་གི་མཚན་ཉིད་ནི་རྗེས་སུ་འགྲོ་བའི་རྟོགས་པའི་མི་མཐུན་པའི་ཕྱོགས་ཡིན་ནོ། །དེ་ནི་རང་གི་མཚན་ཉིད་ཁོ་ན་ལ་འཇུག་པས་དེའི་ཆོས་རྟོགས་པའི་འཐད་པ་ཡིན་ལ་ཐ་དད་པ་
[254a.5]ཡང་མཚུངས་པ་ཡིན་པའི་ཕྱིར་རྗེས་སུ་འགྲོ་བ་མེད་པ་སྤངས་པ་ལ་ཇི་ལྟར་གཞན་སེལ་བ་སྒྲའི་དོན་མ་ཡིན། དོན་བྱེད་པ་གང་གི་དབང་དུ་བྱས་ནས་ཞེས་བྱ་བའི་འགྲེལ་པ་ཡང་ཇི་སྐད་བརྗོད་པའི་གསལ་བས་སྦྱར་བར་བྱའོ། །རང་གི་མཚན་ཉིད་དང་སྤྱིའི་སྒྲའི་དོན་དུ་ཁས་བླངས་པའི་ཉེས་པ་
[254a.6]སྤངས་སུ་ཆུག་མོད། དེ་དང་ལྡན་པ་སྒྲའི་དོན་ཡིན་པའི་ཕྱོགས་ཀྱི་ཉེས་པར་གོ་ཇི་ལྟར་མི་འགྱུར་ཞེས་བརྗོད་པ་ནི། གལ་ཏེ་དེ་ལྡན་ཉེས་མཚུངས་ཕྱིར། །ཞེས་བྱ་བའོ། །འདིར་མཐའ་ཡས་པ་དང་འཁྲུལ་པའི་ཉེས་པ་མཚུངས་པར་ཐལ་བར་བྱེད་པའོ། །འདི་ལྟར་དེ་བྱེད་པའི་རང་
[254a.7]བཞིན་གྱིས་རང་གི་མཚན་ཉིད་རྗེས་སུ་འགྲོ་བ་མ་ཡིན་པ་ནི་ཐ་དད་པ་ཉིད་རྗེས་སུ་འགྲོ་བས་ན་དེ་ལྟར་སྒྲས་ཡུལ་དུ་བྱེད་པ་ཡིན་ནོ། །དེས་ན་ཐ་མི་དད་པའི་ཐ་དད་པས་རྣམ་པར་གཅད་པའི་ཁྱད་པར་རྣམས་ལ་དེའི་རང་བཞིན་རྟོགས་པ་དང་རྗེས་སུ་འགྲོ་བ་གཉིས་ལས་ལྡོག་པ་ཁྱད་པར་དུ་བྱས་
[254b]
[254b.1]པར་རྟོགས་པ་ན་སྒྲའི་དོན་ཉིད་དུ་འཐད་པའི་ཕྱིར་འདི་དེ་དང་ལྡན་པ་སྒྲའི་དོན་ཡིན་པའི་ཕྱོགས་ཉིད་ཁས་བླངས་པར་འགྱུར་ཏེ། ལྡོག་པ་དེས་རྣམ་པར་གཅད་པ་གཅིག་ལ་སྒྲ་དེ་བཀོད་ཀྱང་གཞན་ལ་མི་རྟོགས་སོ་ཞེ་ན། དགོས་པ་འདི་སྤོང་བ་ནི་བླ་སྟེ་ཞེས་བྱ་བའོ། །དེ་དང་ལྡན་པའི་ཕྱོགས་
[254b.2]ཀྱི་ཉེས་པ་མཚུངས་པར་གྱུར་ཀྱང་བླ་སྟེ། དེ་ལྟ་ན་ཡང་ལྡོག་པ་དང་ལྡན་པ་དོན་ཉིད་དུ་རིགས་ཀྱི་རིགས་དང་ལྡན་པ་ནི་དོན་དུ་རིགས་པ་མ་ཡིན་ནོ། །མཚུངས་པའི་ཕྱིར་དེ་དང་ལྡན་པའི་ཕྱོགས་ཀྱི་ཉེས་པ་སྤང་བར་མི་ནུས་མོད། རིགས་ནི་དོན་མེད་དོ། །ཡང་ཇི་ལྟར་ན་ཉེས་པ་ཡོད་ཀྱང་
[254b.3]གལ་ཏེ་ལྡོག་པ་དང་ལྡན་པ་དོན་དུ་འཐད་པ་རིགས་དང་ལྡན་པའི་དོན་ཉིད་མ་ཡིན་ཞེ་ན་དེའི་ཕྱིར། རིགས་ཁས་ལེན་པས་ཀྱང་ཞེས་སྨོས་སོ། །རིགས་ཁས་ལེན་ཀྱང་རིགས་མཐུན་པ་རྣམས་རིགས་མི་མཐུན་པ་དག་ལྡོག་པར་བརྟེན་པར་བྱ་དགོས་ཏེ། དེ་ལྟ་མ་ཡིན་ན་འདིའི་ཁྱད་པར་ལ་
[254b.4]རྗེས་སུ་འགྲོ་བའི་རང་བཞིན་ཉིད་དང་ཁྱད་པར་ཅན་གྱི་ཁྱད་པར་ལ་བརྟེན་པ་ཉིད་དུ་མི་འགྱུར་རོ། །དེས་ན་རིགས་དེ་བརྟེན་པས་བྱས་པ་མཚུངས་པར་འགྱུར་བའི་དངོས་པོ་འགའ་ཞིག་པོ་འདི་ཐམས་ཅད་ལ་རེ་རེ་ལ་ཡང་དེ་བརྟེན་པ་མ་ཡིན་པ་དག་ལས་རེ་རེ་ལས་ཐ་དད་པ་ཡོད་པ་ཁོ་ནའོ། །དེས་ན་དེ་
[254b.5]ཉིད་དེ་དག་གི་ཐ་མི་དད་པ་ཡིན་ལ་རག་མོད། དེ་ལས་ཀྱང་རང་གི་མཚན་ཉིད་ཀྱི་རང་བཞིན་རྟོགས་པའི་ཕྱིར་རང་གི་མཚན་ཉིད་ཀྱི་ཡུལ་ཅན་ཉིད་དོ། །དེ་དག་ཀྱང་རིགས་མི་མཐུན་པ་ལས་ཐ་དད་པའི་རང་བཞིན་གཅིག་དང་ལྡན་པའི་ཕྱིར་རྗེས་སུ་འགྲོ་བའི་རྟོགས་པའི་ཡུལ་དུ་གྲུབ་པས་
[254b.6]ཇི་ལྟར་ཁས་བླངས་པའི་རྟོགས་པའི་ཡུལ་ཡིན་པ་ན། རིགས་ཁས་བླངས་པར་དགོས་པ་མེད་དོ། །དེའི་ཉེས་པ་སྤང་བར་མི་ནུས་པ་ཉིད་དང་། རིགས་ཀྱི་དོན་ནི་རྗེས་སུ་འགྲོ་བའི་ཐ་དད་པ་ཉིད་ལས་གྲུབ་པས་རིགས་ཁས་བླངས་པས་ཅི་བྱ་སྟེ། རིགས་མི་མཐུན་གཅིག་ལས་ཐ་དད་
[254b.7]པ་དང་། དེ་ལས་ལོག་པ་རྣམས་ཀྱི་ཐ་དད་པ་དེ་ཉིད་དེ་ལས་ལོག་པ་རྣམས་ལ་ཐ་མི་དད་པར་རྟོགས་པའི་རྒྱུ་ཡིན་ནོ། །སྤྱི་ཁས་བླང་དུ་ནི་དགོས་པ་མེད་པའི་ཕྱིར་རོ། །སྤྱིའི་དགོས་པ་ནི་ཐ་དད་པས་ཀྱང་སྒྲུབ་པའི་ཕྱིར་རོ། །ཐ་དད་པ་ཁས་བླང་བ་ཡང་གདོན་མི་ཟ་བར་བྱ་དགོས་པའི་ཕྱིར་
[255a]
[255a.1]རོ། །ཅི་སྟེ་ཡང་ཐ་དད་པའི་དོན་རྣམས་ཀྱི་ཐ་མི་དད་པ་ཡིན་དུ་ཟད་མོད། འོན་ཀྱང་དེས་སྤྱི་བཞིན་དུ་ཐ་མི་དད་པར་བསྒྲུབ་པར་བྱ་བ་རྟོགས་པའི་རྗེས་སུ་འགྲོ་བ་སྒྲུབ་པར་ནི་མི་ནུས་ཏེ། རྟོགས་པ་དེ་ནི་ཐ་དད་པ་ལ་མི་དམིགས་པ་མ་ཡིན་པའི་ཕྱིར་རོ་ཞེ་ན། དེ་དགག་
[255a.2]པའི་ཕྱིར་གཞན་ཡང་ཞེས་སྨོས་སོ། །གང་ལ་འཇུག་པ་དེ་ལས་གཞན་པ་གང་ཡིན་པ་དེ་ཡོངས་སུ་སྤངས་ནས་འཇུག་པར་འགྱུར་རོ་ཞེས་བྱ་བས་སྒྲ་སྦྱོར་བ་ཡིན་ནོ། །དེས་ན་དེ་ལས་གཞན་པ་རྣམས་ལས་འཇུག་པའི་ཡུལ་རྣམ་པར་མི་གཅོད་ན་སྒྲ་མི་སྦྱོར་བར་འགྱུར་རོ། །འདི་
[255a.3]སྐད་བརྗོད་པ་ཡིན་ཏེ། སྒྲས་ནི་ངེས་པའི་དོན་འགའ་ཞིག་བསྟན་པར་བྱ་བ་ཡིན་གྱི་རང་བཞིན་དང་འདྲེས་པ་ནི་མ་ཡིན་ཏེ། དཔེར་ན་བ་ལང་ཁྱེར་ཤོག་ཅིག་ཅེས་བྱ་བས་བ་ལང་ནི་རང་བཞིན་ངེས་པའི་བ་ལང་མ་ཡིན་པའི་རང་བཞིན་དང་འདྲེས་པ་དང་། ཁྱེར་ནས་འོང་བ་ཡང་ཁྱེར་ནས་
[255a.4]མི་འོང་བ་དང་འདྲེས་པས་སྟོང་པ་ཉིད་བཞིན་ཏེ་དེ་ལྟ་མ་ཡིན་ན་དེ་སྐད་སྨྲས་པ་ན་གང་ཡང་རུང་བ་ཁྱེར་ཏེ་འོངས་པའམ་ཇི་ཡང་རུང་བ་བྱེད་པར་འགྱུར་རོ། །དེས་ན་སོ་སོ་ངེས་པའི་རང་བཞིན་གྱི་དོན་སྒྲས་བརྗོད་པར་བྱ་བ་ཡིན་ནོ། །གལ་ཏེ་ངེས་པ་ཉིད་ཀྱང་རང་གི་བདག་ཉིད་ལ་རྣམ་
[255a.5]པར་གནས་པ་ཡིན་ན་དངོས་པོ་མེད་པ་ཡུལ་རྟོགས་པ་འགའ་ཡང་རྟོགས་པར་མི་འགྱུར་བའི་ཕྱིར་ཕ་རོལ་པོ་དག་གིས་དངོས་པོ་མེད་པའི་ཡུལ་ཅན་གྱི་ཚད་མ་བརྗོད་པར་མི་བྱའོ། །དཔེར་ན་བ་ལང་ཞེས་བྱ་བར་རྟོགས་བཞིན་པའི་དངོས་པོ་བ་ལང་ཉིད་ཀྱི་ཁྱད་པར་ཅན་ཡིན་པ་དེ་བཞིན་དུ་
[255a.6]ངེས་པ་ཉིད་ནི་དངོས་པོ་གཞན་མེད་པ་ཡིན་པའི་ཕྱིར་ལྡོག་པས་ཁྱད་པར་དུ་མ་བྱས་པ་ནི་ངེས་པར་རྟོགས་པ་ཡོད་པ་མ་ཡིན་ནོ། །དེའི་ཕྱིར་ཐ་མི་དད་པ་གཞན་ཐ་དད་པ་དང་ལྡན་པའི་དངོས་པོ་རྣམས་ལ་ཡིན་པ་དེ་བཞིན་དུ་ཐ་མི་དད་པ་དེ་ནི་ཐ་མི་དད་པའི་རྣམ་པར་རྟོག་པས་ཀྱང་ཡུལ་དུ་བྱ་བ་ཡིན་ནོ། །རང་
[255a.7]གི་ཕྱོགས་ལ་ཇི་ལྟར་རྣམ་པར་གཅོད་པའི་ཡུལ་ཅན་ཡིན་པ་དེ་ལྟར་ནི་བཤད་ཟིན་ཏོ། །འདིར་ནི་དེ་དང་ལྡན་པའི་ཕྱོགས་ཀྱི་གཟུགས་བརྙན་ཉིད་ཀྱིས་དེའི་ཉེས་པ་མཚུངས་པ་ཉིད་ཡིན་ཡང་གཞན་ངེས་པའི་ཡུལ་ཅན་ཉིད་དུ་འཐད་དོ་ཞེས་བརྗོད་པའི་དོན་དུ་འདི་སྐད་ཅེས་ངེས་པའི་དོན་
[255b]
[255b.1]ལ་འཇུག་པས་ན་གདོན་མི་ཟ་བར་སྒྲ་རྣམ་པར་གཅོད་པའི་ཡུལ་ཅན་དུ་བརྗོད་དགོས་སོ་ཞེས་བཤད་པ་འབའ་ཞིག་ཏུ་ཟད་དོ། །འགྲེལ་པ་ནི་འདི་དོན་རྣམས་ལ་ཞེས་བྱ་བའོ། །མི་འདོད་པ་ཡོངས་སུ་སྤངས་པ་ནི་སོ་སོར་ངེས་པ་ཡུལ་དུ་བྱེད་པའོ། །དེའི་ཕྱིར་གཞན་ལས་ལྡོག་པའི་མཚན་
[255b.2]ཉིད་ཀྱི་རྣམ་པར་གཅོད་པ་ནི་སྒྲས་ཡུལ་དུ་བྱ་དགོས་སོ། །རྣམ་པར་གཅོད་པའི་མཚན་ཉིད་ཤེས་པར་བྱེད་པའི་ཡུལ་ཡིན་པའི་ཕྱིར་ན། རྣམ་པར་གཅོད་པར་བརྗོད་དགོས་སོ། །ཞེས་རྣམ་པར་གཅོད་པའི་ཚིག་གིས་ལྡོག་པ་བརྗོད་དོ། །ལྡོག་པ་དེ་ཡང་ལྡོག་མཚམས་ལས་གཞག་
[255b.3]པ་ལྡོག་པའི་ཡུལ་དག་ལ་ཐ་མི་དད་པ་ཡིན་ཏེ་བ་ལང་སོ་སོ་ལ་རྟ་མེད་པ་ཡིན་ནོ། །དེའི་ཕྱིར་ཐ་མི་དད་པའི་གདོན་མི་ཟ་བར་ཁས་བླང་བར་བྱ་བ་དང་། །གནོད་མི་ཟ་བར་ཡུལ་དུ་བྱ་དགོས་པ་དང་། ཁྱད་པར་རྣམས་ཀྱི་རྗེས་སུ་འགྲོ་བའི་རྒྱུ་མཚན་ཉིད་ཀྱིས་དོན་བསྒྲུབ་པ་ཡིན་ཏེ། དེ་བས་ན་དེའི་རྗེས་
[255b.4]སུ་འགྲོ་བའི་རྟོགས་པའི་རྟེན་ཉིད་དུ་འགྱུར་བ་ཡོངས་སུ་དོར་ནས་རིགས་ཁས་ལེན་པ་ནི་དོན་མེད་པ་ཁོ་ནའོ་ཞེས་བརྗོད་པ་ནི་དེ་ངེས་པར་ཁས་བླངས་པ་ཅན་དང་ཞེས་བྱ་བ་སྟེ། རིགས་ནི་ཐ་དད་པ་དང་ཐ་མི་དད་པའི་ཕྱོགས་དག་ཏུ་མི་འགྲུབ་པའི་ཕྱིར་རོ། །ཐ་དད་པ་དང་དེ་རྟོགས་པ་ཡང་ཡོད་མོད་
[255b.5]འོན་ཀྱང་དེས་སྤྱི་ཡོད་པས་བསྒྲུབ་པར་བྱའི་དགོས་པ་ནི་སྒྲུབ་པར་མི་བྱེད་པ་མ་ཡིན་ནམ་འདི་ལྟར་རྗེས་སུ་འགྲོ་བ་མ་ཡིན་པ་རྣམས་ཀྱི་རྗེས་སུ་འགྲོ་བ་ནི་རང་བཞིན་ཡིན་པར་རྟོགས་ཏེ་བ་ལང་ཞེས་བྱ་བར་རོ། །སྒྲ་ཡང་དེ་ཉིད་ལ་འཇུག་པ་ན་གསལ་བ་རྟོགས་པར་བྱེད་པ་ཡིན་ནོ། །ཐ་དད་པ་ནི་རྗེས་
[255b.6]སུ་འགྲོ་བ་ཡིན་ཡང་རང་བཞིན་རྟོགས་པ་མི་སྲིད་པ་དེས་ཇི་ལྟར་ཐ་དད་པ་རིགས་ཀྱི་དོན་བསྒྲུབ། དེས་ན་ཐ་མི་དད་པ་གདོན་མི་ཟ་བར་ཁས་བླངས་པ་གདོན་མི་ཟ་བར་བརྗོད་པ་ཡིན་ཡང་རིགས་ཁས་བླངས་པར་རིགས་པ་ཡིན་ནོ་ཞེས་སྨྲས་པ་ནི་རྣམ་པར་གཅོད་པ་མི་བྱེད་པ་ནི་མ་ཡིན་གྱི་
[255b.7]ཞེས་བྱ་བ་ཡིན་ནོ། །འཇུག་པའི་ཡུལ་ཞེས་བྱ་བ་ནི་གང་ལ་སྒྲས་ཐ་མི་དད་པའི་རྣམ་པ་འཇུག་པར་བྱེད་པའོ། །འདི་བཟློག་པའི་ཕྱིར་བཤད་པ་ནི། གལ་ཏེ་འདི་ལ་རྣམ་གཅོད་ཡོད། །ཅེས་བྱའོ། །རྣམ་པར་གཅོད་པ་བློ་གཞན་གྱིས་བསྒྲུབ་པར་བྱ་བ་ཡིན་ན་ནི་བ་ལང་ལ་སོགས་
[256a]
[256a.1]པའི་བློ་རྣམས་སྒྲུབ་པ་ཙམ་ལ་བརྟེན་པའི་ཕྱིར་ཁས་བླངས་པས་དགོས་པ་ཡོད་པར་འགྱུར་བ་ཞིག་ན། གང་གི་ཚེ་འདི་ལ་རྣམ་པར་གཅོད་པ་ཡོད་པ་ཡིན་ཏེ། བསྒྲུབ་པ་འབའ་ཞིག་རྟོགས་པ་ཉིད་མ་ཡིན་པ་དེའི་ཚེ་སྤྱི་ལ་ཡང་སྒྲ་རྣམས་ཀྱི་དགོས་པ་ནི་ཇི་སྲིད་རྣམ་པར་གཅོད་པ་བརྗོད་པ་ཙམ་དུ་ཟད་པ་དེ་བཞིན་དུ་རྣམ་པར་གཅོད་
[256a.2]པ་དང་ལྡན་པའི་ཕྱིར་དོན་རྣམས་མཚུངས་པས་ན་སྤྱི་ལ་ཡང་མཚུངས་པ་ཁོ་ནའོ། །དེས་ན་རྣམ་པ་དེ་ལྟ་བུའི་དགོས་པ་གཞན་གྱིས་ཅི་ཞིག་བྱ། ཡང་ན་གཞན་གྱིས་ཅི་ཞིག་བྱ་ཞེས་བྱ་བ་སྤྱི་ཞེས་ཡང་འབྲེལ་པར་བྱའོ། །དེས་ན་དོན་འདི་
[256a.3]ཡིན་ཏེ། སོ་སོ་རང་གི་རང་བཞིན་དུ་སོ་སོར་ངེས་པའི་དོན་བརྗོད་པ་ན་ལྡོག་པ་གདོན་མི་ཟ་བར་རྟོགས་པ་ན་ལས་ཞེས་བྱ་བར་རྟོགས་པ་ནི་རྟོགས་བཞིན་པའི་ཁྲ་བོ་ལ་སོགས་པ་རྣམས་ཀྱི་རང་གི་ངོ་བོའི་ཡུལ་ཅན་ཉིད་དེ་རང་གི་མཚན་ཉིད་ཀྱི་ཆོས་ཀྱིས་རྣམ་པར་གཅད་པའི་ཕྱིར་རོ་ཞེས་སྔར་ཇི་སྐད་
[256a.4]བཤད་པ་བཞིན་ནོ། །དེས་ན་ཐ་དད་པའི་དོན་རྣམས་ལ་བ་ལང་གི་ཐ་དད་པ་མེད་པར་རྟོགས་པ་འབྱུང་བ་འདི་ནི། གཅིག་ཀྱང་བ་ལང་མ་ཡིན་པ་ལ་སོགས་པ་གཞན་ཡང་ལྡོག་པ་ཞེས་བྱ་བའི་རྒྱུ་མཚན་ལ་བརྟེན་པ་ཡིན་ནོ། །གང་ལ་དེ་མེད་པ་དེ་ལ་ནི་ཐ་མི་དད་པར་རྟོགས་པ་མ་ཡིན་ཏེ།
[256a.5]དཔེར་ན་གཞན་བ་ལང་མ་ཡིན་པའི་རྫས་ལ་བཞིན་ནོ། །དེས་ན་སོ་སོ་རང་གི་རང་བཞིན་དུ་རྟོགས་པའི་བ་ལང་ཐམས་ཅད་གཅིག་ལས་ལྡོག་པའི་ཕྱིར་ཐ་མི་དད་པར་ངེས་པ་ཡིན་ནོ། །ལྡོག་པ་ཐ་མི་དད་པས་རང་བཞིན་ཐ་མི་དད་པ་ལ་ཇི་ཞིག་འབྱུང་ཞེ་ན། སྤྱི་ཐ་མི་དད་པས་ཀྱང་རང་
[256a.6]བཞིན་ཐ་མི་དད་པ་ལ་ཅི་ཞིག་འབྱུང་བར་འགྱུར་ཏེ། དེས་ན་བ་ལང་ཞེས་རྟོགས་པར་མི་འགྱུར་རོ། །འདི་ནི་རྗེས་སུ་སོང་བ་དང་། རྗེས་སུ་སོང་བ་མ་ཡིན་པ་རྟོགས་པ་ནི་མ་ཡིན་གྱི་འོན་ཀྱང་བ་ལང་ཞེས་རྗེས་སུ་སོང་བའི་རང་བཞིན་ཉིད་དུ་སྣང་ངོ་། །དེས་ན་གལ་ཏེ་འདི་སྤྱི་ཁོ་ན་ཡིན་ན་རང་
[256a.7]གི་མཚན་ཉིད་ཀྱི་ཆོས་སུ་རྟོགས་པར་མི་འགྱུར་རོ། །འོན་ཏེ་འདི་དེ་དང་ལྡན་པ་རྟོགས་པ་ཡིན་ན་དེ་ལྟ་བུའི་རྗེས་སུ་འགྲོ་བ་དང་འབྲེལ་པའི་ཕྱིར་དེ་ལས་བཟློག་པ་ཡང་རྗེས་སུ་འགྲོ་བ་ཉིད་དུ་སྣང་བ་དེ་བཞིན་དུ། གལ་ཏེ་ལྡོག་པ་དང་འབྲེལ་པ་ལས་ཀྱང་སྣང་བར་འགྱུར་ན་
[256b]
[256b.1]འགལ་བ་ཅི་ཡོད། དེ་བས་ན་ཐ་དད་ཀྱང་རང་བཞིན་རྗེས་སུ་འགྲོ་བར་རྟོགས་པའི་རྒྱུ་མཚན་ནི་སྤྱི་བཞིན་དུ་ལྡོག་པ་ལ་ཡང་ཁྱད་པར་མེད་དོ་ཞེས་བྱ་བར་རིགས་སོ། །དོགས་པ་གང་བསུ་ནས་འདི་ཉེ་བར་བཀོད་པ་དེ་འདིར་དགག་པའི་ཕྱིར། འཇུག་པའི་ཡུལ་རབ་ཏུ་སྟོན་ཏེ་ཞེས་བྱ་བས་རྗེས་སུ་
[256b.2]འབྲེལ་པར་བྱེད་དོ། །གལ་ཏེ་འདི་ཐ་མི་དད་པ་རྣམ་པར་གཅོད་པ་ཡོད་པ་དེ་ལྟ་ན་ཡང་བ་ལང་བ་ལང་ཞེས་རང་བཞིན་ཐ་མི་དད་པའི་ཡུལ་ཅན་དུ་རྟོགས་པའི་དམིགས་པ་ནི་རང་བཞིན་ཐ་མི་དད་པ་ཉིད་ཡིན་གྱི། རང་བཞིན་མེད་པའི་རྣམ་པར་གཅོད་པ་ནི་མ་ཡིན་ནོ་ཞེ་ན། དེ་མ་ཡིན་ནོ་ཞེས་
[256b.3]བཤད་པ་ནི། སྐད་ནི་སྨྲས་ན་ཞེས་བྱ་བའོ། །ཐ་མི་དད་པར་བྱ་བ་འདི་ནི་རང་གི་མཚན་ཉིད་ཡིན་ཏེ། བ་ལང་བཞོ་བ་དང་དགལ་བར་ནུས་པ་ཡིན་ནོ་ཞེས་རང་གི་མཚན་ཉིད་ཀྱི་ཆོས་དང་མ་འབྲེལ་པར་ཐལ་བའི་ཕྱིར་རོ། །དེས་ན་རིགས་ཉིད་ནི་རྣམ་པ་འདི་ལྟ་བུའི་རྣམ་པར་ཤེས་པ་འཇུག་པའི་
[256b.4]ཡུལ་དུ་རུང་བ་མ་ཡིན་ནོ། །མཚོན་པར་བྱེད་པ་སྣང་བས་ཀྱང་དེ་ལ་འཇུག་པ་མ་ཡིན་ནོ་ཞེས་བཤད་པ་ནི། དེའི་སྒོ་ནས་ཞེས་བྱ་བ་ཡིན་ནོ། །ངག་གི་དོན་མ་འབྲེལ་བར་ཡང་འགྱུར་ཏེ། ཆུའི་བྱེད་པ་ཅན་གྱི་སྣང་བ་བརྗོད་པ་བཞིན་ཏེ། སྔར་ཇི་སྐད་བཤད་པ་བཞིན་ནོ། །དེ་དང་ལྡན་པ་
[256b.5]བརྗོད་ན་རབ་ཏུ་གཅོད་པ་ཡོད་པ་ཡང་བསལ་ཟིན་ཏོ་ཞེས་འབྲེལ་ཏོ། །མཐའ་ཡས་པ་མཚུངས་པས་ན་དངོས་ཀྱི་ཡུལ་ཉིད་དུ་བསྒྲུབ་པའི་ཕྱིར་རོ། །དེ་སྟེ་རང་གི་མཚན་ཉིད་དེའི་ཐ་མི་དད་པ་སྤྱིའི་དབང་གིས་རྗེས་སུ་འགྲོ་བར་སྣང་ངོ་ཞེས་བརྗོད་ན། དེའི་ཐ་མི་དད་པ་རྣམ་པར་གཅོད་པའི་
[256b.6]དབང་གིས་འགྱུར་མོད་ཅེས་ཐམས་ཅད་དུ་མཚུངས་པར་སྟོན་པ་ནི་རིགས་དང་དེ་དང་ལྡན་པ་ཞེས་བྱ་བ་ནས་དེ་ནི་ལྡོག་པ་དང་ལྡན་པ་ལ་ཡང་མཚུངས་སོ་ཞེས་བྱ་བའི་མཐར་ཐུག་པ་ཡིན་ནོ། །དེས་ནི་དེ་ལྟར་གཟུགས་བརྙན་ཉིད་ཀྱི་ཉེས་པ་མཚུངས་ཀྱང་བདག་ཉིད་ཡོན་ཏན་ཁྱད་པར་དུ་གྱུར་པ་
[256b.7]བསྟན་པས་སློབ་དཔོན་ཕྱོགས་ཀྱི་གླང་པོའི་གཞུང་ཇི་ལྟར་ཐོས་བཞིན་པའི་རྗེས་སུ་འབྲངས་ནས་གཞན་སེལ་བའི་ཡུལ་ཅན་དུ་གཞུང་བཙུགས་ཏེ། རང་གིས་རྟོགས་པ་དང་རྗེས་སུ་མཚུངས་པར་རྣམ་པ་ཐམས་ཅད་དུ་ཉེས་པ་ཡོངས་སུ་སྤང་བར་བཞེད་པས་སྔར་བཤད་པའི་ཚུལ་ལ་ལྟོས་ཏེ།
[257a]
[257a.1]བཤད་པ་ནི་ལྡོག་པ་སྨྲ་བ་རྣམས་ཇི་ལྟར་ན་ཞེས་བྱ་བའོ། །རེ་ཞིག་མཐའ་ཡས་པར་ཐལ་བ་ནི་ལྡོག་པ་དང་ལྡན་པ་སྒྲའི་དོན་ཡིན་པ་ལ་མཚུངས་སོ་ཞེས་བརྗོད་པ་གང་ཡིན་པ་དེ་ནི་མ་ཡིན་ཏེ། འདི་ལྟར་ལྡོག་པ་སྨྲ་བ་རྣམས་ཀྱི་ལྟར་ན་ནི་སྒྲའི་རྟོགས་པས་དངོས་པོ་ལས་ཐ་དད་པའི་
[257a.2]དངོས་པོ་མེད་པ་འཛིན་པ་ཡིན་ལ་དེ་ཡང་ལོག་པའི་རྣམ་པར་རྟོག་པའི་བདག་ཉིད་གཅིག་ཏུ་འཛིན་པའི་རང་བཞིན་ཡིན་པ་དེས་ན་ལྐོག་ཤལ་ལ་སོགས་པ་དང་ལྡན་པ་ཞེན་པ་གཅིག་གིས་ཡུལ་དུ་བྱས་པ་རྣམས་ལས་གཅིག་ལ་བརྡ་བྱས་ཀྱང་དེ་ལྟར་ཞེན་པས་ཡུལ་དུ་བྱས་པ་གཞན་ལ་དེ་
[257a.3]ལྟར་རྟོགས་པའི་ཕྱིར་རོ། །དེས་ན་མཐའ་ཡས་པ་ཐལ་བ་མེད་དོ། །དེ་ཉིད་ཀྱི་ཕྱིར་རང་བཞིན་རྗེས་སུ་འགྲོ་བ་ཡང་འཐད་དོ། །ལྡོག་པ་དང་ལྡན་པ་ནི་འགའ་ཡང་མེད་དོ་ཞེས་བྱ་བ་དང་ལྡོག་པ་ནི་སྒྲོ་འདོགས་རྣམ་པར་བཅད་པ་ཡིན་ནོ་ཞེས་བྱ་བ་དང་། རྣམ་པར་འཁྲུལ་པ་དེ་ཇི་ལྟར་ལོག་པའི་རྒྱུ་
[257a.4]མཚན་ཡིན་པ་ཞེས་བྱ་བ་ནི་སྔར་ཉིད་ནས་བསྟན་ཟིན་ཏོ། །ལྡོག་མཚམས་གཅིག་པས་ནི་རང་བཞིན་རྗེས་སུ་འགྲོ་བའི་ཤེས་པ་ཡང་དག་པའི་ཤེས་པར་མི་འཐད་དོ། །དངོས་པོ་མེད་པ་ལ་རང་གི་མཚན་ཉིད་དམ་སྤྱིའི་ཆོས་མ་རྟོགས་པའི་ཕྱིར་མི་འཇུག་པ་ཡང་མ་ཡིན་ནོ་ཞེས་བཤད་པ་དེ་ནི་འཁྲུལ་པའི་དབང་གིས་
[257a.5]ཞེས་བྱ་བ་ཡིན་ནོ། །རང་གི་མཚན་ཉིད་མ་ཡིན་པ་ལ་ཡང་འཁྲུལ་པའི་དབང་གིས་དེ་ལྟར་ཞེན་ཏོ། །གལ་ཏེ་ཡང་དེ་ལ་སྒྲ་མ་བཀོད་ཀྱང་གཅིག་ཏུ་མངོན་པར་ཞེན་པ་ལས་དེ་ལྟར་རྟོགས་ནས་རང་གི་མཚན་ཉིད་གཞན་དམིགས་པ་ལ་ཡང་འདི་ན་བ་ལང་འདུག་གི་ཞེས་རྟོགས་པའམ་
[257a.6]གཞན་ལ་སྟོན་པར་བྱེད་པར་འགྱུར་མོད། དེ་ལྟ་ན་ཡང་བ་ལང་རྙེད་པར་ཇི་ལྟར་འགྱུར་ཞེ་ན། དངོས་པོ་མི་བསླུ་བ་ཟེར་བ་ནི་ཞེས་སྨྲས་སོ། །བ་ལང་ཉིད་ལས་རྗེས་སུ་སྤོང་བའི་བ་ལང་གི་རྟོགས་པ་ཉམས་སུ་མྱོང་བའི་བག་ཆགས་ལ་བརྟེན་ནས་རྗེས་སུ་འགྲོ་བ་ཅན་དུ་སྐྱེ་བའི་ཕྱིར་
[257a.7]རྟོགས་པ་དེ་ལས་དེ་ཐོབ་པ་ཡིན་ནོ། །གལ་ཏེ་སྒྲ་ཚད་མ་མ་ཡིན་པའི་ཕྱིར། ཇི་ལྟར་དེ་ལ་མི་བསླུ་བའི་ཚིག་རིགས་ཤེ་ན། དེ་ནི་བདེན་ཏེ་གལ་ཏེ་བ་ལང་གི་ཤེས་པ་དངོས་པོ་མེད་པ་ཉིད་རྗེས་སུ་འབྲེལ་པའི་རང་བཞིན་རྟོགས་པ་ཡིན་ན། ཅིའི་ཕྱིར་འདི་ན་བ་ལང་འདུག་གོ་ཞེས་བརྗོད་པ་
[257b]
[257b.1]ན་བ་ལང་བརྟེན་པའི་མི་བསླུ་བར་ངེས་པར་འགྱུར་གྱི་བུམ་པ་ལ་མ་ཡིན་ན་ཤེས་པ་དེ་དེའི་ཡུལ་མ་ཡིན་པས་ན་བུམ་པ་རྙེད་པ་ན་ཇི་སྟེ་མི་བསླུ་བ་མ་ཡིན་ལ་གཞན་དུ་བཟློག་པར་འགྱུར་ཞེས་བྱ་བའི་རྩོད་པར་འགྱུར་རོ། །དེ་ལ་བརྗོད་པ་བ་ལང་ཉིད་ལས་བ་ལང་དུ་རྣམ་པར་རྟོག་པ་རྗེས་སུ་འགྲོ་བའི་རྣམ་པ་
[257b.2]ཅན་དུ་འགྱུར་བའི་ཕྱིར་དེ་ལ་མི་བསླུ་བར་འཆད་ཀྱི་བུམ་པ་ལ་ནི་མ་ཡིན་ནོ། །ཇི་སྐད་བཤད་པའི་རྣམ་པས་འདི་མི་བསླུ་བ་ཡིན་གྱི་གཞན་གྱིས་ནི་མ་ཡིན་ནོ། །སྔར་བཤད་པའི་རྣམ་པ་འདིར་སྦྱར་བ་དེ་ལ་རྩོད་པས་དངོས་པོ་ལས་སྐྱེ་ན་ནི་འཁྲུལ་པ་ཉིད་དུ་མི་འགྱུར་ཏེ། ཡང་དག་པར་ཐལ་
[257b.3]བའི་ཕྱིར་རོ། །དེ་སྟེ་འཁྲུལ་པ་ཡིན་ན་ནི་མི་བསླུ་བར་ག་ལས་འགྱུར་ཞེ་ན། དེ་རེ་ཞིག་འཁྲུལ་པ་ཉིད་དུ་བཤད་པ་ནི་མ་ཡིན་ཏེ་ཞེས་བྱ་བས་འཁྲུལ་པ་དང་འགལ་བའི་ཆོས་སྤངས་ཏེ། དེར་ལྷག་པར་ཞེན་པའི་ཕྱིར་ཞེས་བྱ་བས་འཁྲུལ་པ་ཉིད་དུ་གཞུང་བཙུགས་པ་ཡིན་ནོ། །དངོས་པོ་
[257b.4]ལས་སྐྱེས་པ་དེ་སྣང་བ་ཉིད་ཡིན་ན་ཡང་དག་པར་འགྱུར་བ་ཡིན་ན། དེ་ནི་མེད་ལ་དེ་ལྟ་ན་ཡང་དེར་ལྷག་པར་ཞེན་པ་ཡོད་པའི་ཕྱིར་འཁྲུལ་པ་ཡིན་ནོ། །དངོས་པོ་ལས་སྐྱེས་པ་ལ་ཡང་འཁྲུལ་པའི་ཡོད་པ་ཉིད་དོ་ཞེས་བཤད་པ་ནི། འོད་ལ་ནོར་བུ་ནོར་བུར་ཞེས་བྱ་བ་ཡིན་ནོ། །དེ་ནི་འཁྲུལ་པ་སླུ་
[257b.5]བ་ཡིན་པར་འགྱུར་རོ་ཞེས་དོགས་ན་དགག་པའི་ཕྱིར་མ་ཡིན་ཏེ་ཞེས་བཤད་དོ། །ནོར་བུའི་འོད་མཐོང་བས་འཁྲུལ་པར་བརྗོད་དོ། །རིགས་པ་ཡང་བཤད་པ་ནི། འཁྲུལ་པའི་མཚན་ཉིད་ནི་ཞེས་བྱ་བའོ། །འཁྲུལ་པ་ནི་ལོག་པར་སྣང་བ་ཡིན་ལ། མེད་ན་མི་འབྱུང་བས་ནི་མི་བསླུ་བ་ཡིན་
[257b.6]པའི་ཕྱིར་དེར་སྣང་བ་མ་ཡིན་ཡང་མེད་ན་མི་འབྱུང་བ་ཉིད་ཀྱིས་མི་བསླུ་བ་ཡིན་པ་ལ་འགལ་བ་ཇི་ཡོད། སྣང་བ་མེད་པར་མི་བསླུ་བར་མེད་པ་ནི་མ་ཡིན་ཏེ། མེད་ན་མི་འབྱུང་བ་ཉིད་ཀྱིས་དེར་འགྱུར་བའི་ཕྱིར་རོ། །དེས་ན་སྣང་བ་མ་ཡིན་པར་བཤད་དོ། །དངོས་པོ་མི་འཛིན་པ་ཉིད་རིགས་པ་
[257b.7]ཡིན་གྱི། དངོས་པོ་འཛིན་ན་ནི་ཇི་སྐད་བཤད་པའི་ཉེས་པར་འགྱུར་བ་དེ་སྟོན་པས་དངོས་པོ་ལ་ཞེས་སྨོས་སོ། །བྱེད་པ་པོ་མ་ཡིན་པ་ལ་ཡང་བྱེད་པ་པོར་ལྷག་པར་ཞེན་པས་འཇུག་པ་སྤངས་ནས་ངོ་བོ་ཇི་ལྟ་བ་བཞིན་སྒྲས་སེམས་གཏོད་པས་འཇུག་པར་འདོད་ན་ནི་མི་འཇུག་པ་ཁོ་ནར་འགྱུར་ཏེ།
[258a]
[258a.1]དེ་ལ་རང་གི་མཚན་ཉིད་ཀྱི་ཆོས་མེད་པའི་ཕྱིར་རོ། །འོན་ཏེ་རང་གི་མཚན་ཉིད་ཁོ་ན་ལ་སྒྲས་སེམས་གཏོད་པར་བྱེད་དེ། རང་གི་མཚན་ཉིད་དང་མཐུན་པའི་ཆོས་ཀྱིས་རྣམ་པར་གཅད་པའི་དངོས་པོ་རྟོགས་པའི་ཕྱིར་རོ་ཞེ་ན། དེའི་ཚེ་གང་ལ་སྒྲ་མཐོང་བ་དེ་ཉིད་ལ་འཇུག་པར་
[258a.2]འགྱུར་གྱི། གཞན་ལ་ནི་མ་ཡིན་ཏེ། ཧ་ཅང་ཐལ་བའི་ཕྱིར་རོ་ཞེས་བཤད་པ་ནི་གཞན་ལ་ཡང་འཇུག་ན་ནི་ཞེས་བྱ་བ་སྟེ། རྟ་ལ་ཡང་འཇུག་པར་ཐལ་བའི་ཕྱིར་རོ། །འོན་ཏེ་དེ་ལྡན་པ་སྒྲས་འཛིན་ཏོ་ཞེས་བརྗོད་ན་དེའི་ཚེ་མཐའ་ཡས་པ་སྐྱོན་དུ་འགྱུར་བ་མ་ཡིན་ན་སྤྱིས་ཅི་ཞིག་བྱ་བ་ལ་སོགས་
[258a.3]པ་བཤད་ཟིན་པ་ཡིན་ནོ། །སྒྲས་ནི་རིགས་ཉིད་འཛིན་པ་ཡིན་ལ། གཟུང་བར་བྱ་བ་སྤྱིའི་དོན་བྱེད་པ་དང་མི་ལྡན་པའི་ཕྱིར་འཇུག་པར་མི་འགྱུར་རོ་ཞེས་བརྩད་པར་བྱ་བ་ཡང་མ་ཡིན་ནོ་ཞེས་བསྟན་པའི་ཕྱིར། གལ་ཏེ་རིགས་གཟུང་ན་ཡང་ཞེས་སྨོས་སོ། །གང་གིས་ན་རྗེས་སུ་འགྲོ་
[258a.4]བ་འདི་ལ་ནི་སྒྲ་འཇུག་པར་འགྱུར་ལ། དེ་ལས་བཟློག་པ་འདི་ལ་ནི་མ་ཡིན་ནོ་ཞེས་རྗེས་སུ་འགྲོ་བ་མེད་པ་འདི་ལས་ནི་དོན་བྱེད་པ་ལ་དེ་ལས་བཟློག་པ་འདི་ལས་ནི་མ་ཡིན་ནོ་ཞེས་རྟོགས་པར་འགྱུར་བ། རིགས་དང་གསལ་བ་དག་མངོན་སུམ་གྱིས་རྟོགས་པ་ལ་བུམ་པ་དང་སྣམ་བུ་
[258a.5]ལྟར་ཕན་ཚུན་མ་འདྲེས་པའི་རང་བཞིན་ཉིད་དུ་ནི་རྟོགས་པ་མེད་དོ། །གང་གིས་ནི་སྤྱི་རྟོགས་བྱེད་པའི་སྒྲ་ལས་དོན་དུ་གཉེར་བ་མི་འཇུག་པར་འགྱུར་ཏེ། དེ་དག་འཕྲོད་པ་འདུ་བའི་ཕྱིར་འདྲེས་པའི་རང་བཞིན་དུ་རྟོགས་པའི་ཕྱིར་རོ། །གང་ལས་ནི་དོན་བྱེད་ལ་གང་ལས་ནི་མི་བྱེད་ཅེས་
[258a.6]ཐ་དད་པར་རྟོགས་པ་ནི་མེད་དོ། །དེས་ན་རང་གི་མཚན་ཉིད་ཀྱིས་རང་བཞིན་ལ་ལོག་པ་ཞིག་ཏུ་གྱུར་པ་གཞན་རྟོགས་པ་མེད་ཀྱི། འོན་ཀྱང་འཁྲུལ་པ་རྣམས་མི་རྟོགས་པར་འགྱུར་རོ། །དཔེར་ན་བ་ཁྲ་མོ་ལ་སོགས་པ་བཞིན་ཏེ། དེ་སྤངས་ནས་ཀྱང་སྤྱིའི་རྟོགས་པ་ཡོད་པའི་ཕྱིར་
[258a.7]རོ། །གང་ཞིག་མེད་ན་རིགས་ཀྱི་རྟོགས་པ་མེད་པའི་གསལ་བའི་བདག་ཉིད་དེ་དང་ནི་རིགས་ཀྱི་རྟོགས་པ་འདྲེས་པར་སྣང་བ་ལས་འདའ་བ་མ་ཡིན་ཏེ་དཔེར་ན་དོན་བྱ་བ་འམ། གསལ་བའི་རང་བཞིན་ཙམ་བཞིན་ནོ། །དེའི་ཕྱིར་རིགས་ཀྱི་རྟོགས་པ་གསལ་བ་འདི་ནི་ཁ་དོག་
[258b]
[258b.1]གི་རྣམ་པ་གསལ་བ་ཡིན་ནོ། །དེའི་ཕྱིར་རིགས་པ་ན་ཡང་མི་འཁྲུལ་བའི་རང་གི་མཚན་ཉིད་ཀྱི་ཆོས་སྤངས་ནས་རྟོགས་པ་མེད་པའི་ཕྱིར་དོན་བྱ་བ་དོན་དུ་གཉེར་བར་འཇུག་པར་འཐད་པ་ཁོ་ནའོ་ཞེ་ན། དེ་ནི་མ་ཡིན་ནོ་ཞེས་བྱ་བ་ནི། དེའི་ཚེ་ཞེས་བྱ་བའོ། །བློ་ལ་འདྲེས་པར་སྣང་ན་ནི་རིགས་
[258b.2]པ་མ་ཡིན་ལ། དེ་ཉིད་ཀྱི་ཕྱིར་དེ་དང་ལྡན་པ་ཡང་མ་ཡིན་ཏེ། རིགས་སམ་དེ་དང་ལྡན་པའི་རང་གི་ངོ་བོ་རྣམ་པར་གནས་པ་མ་བཟུང་བའི་ཕྱིར་རོ། །འདི་ལྟར་རིགས་ནི་རང་གི་མཚན་ཉིད་ཀྱི་རང་བཞིན་གྱིས་སྟོང་པ་རྗེས་སུ་འགྲོ་བའི་རིགས་ཉིད་ཡིན་ལ། རིགས་དང་འབྲེལ་
[258b.3]པར་མི་འཁྲུལ་པ་ལ་རང་གི་མཚན་ཉིད་ཀྱི་ཆོས་ཀྱང་རྗེས་སུ་འགྲོ་བ་མེད་པ་ཁོ་ནའོ། །དེས་ན་འདྲེས་པར་སྣང་ན་རྗེས་སུ་འགྲོ་བ་སྟོང་པའི་གསལ་བའི་རང་བཞིན་ཡང་རྗེས་སུ་སོང་བར་རྟོགས་པར་འགྱུར་ལ་རིགས་གསལ་བའི་ཆོས་ཀྱིས་སྟོང་པ་ཡང་དེའི་རང་བཞིན་ཡིན་པའི་ཕྱིར་གསལ་བ་
[258b.4]ཉིད་དུ་འཁྲུལ་པ་ཡིན་ལ་དེས་ན་སངས་རྒྱས་པའི་སྨྲ་བ་ལ་བརྟེན་པར་འགྱུར་རོ། །འདི་ལྟར་སྤྱི་དང་སྤྱི་དེ་ཡང་དོན་བྱ་བ་བྱེད་པ་ཞེས་བྱ་བ་རྟོགས་པར་ཇི་ལྟར་འཁྲུལ་པ་མ་ཡིན། སྤྱི་རྟོགས་པས་ཡུལ་དུ་བྱས་པ་ལ་དོན་བྱ་བ་བྱེད་པའོ་ཞེས་བྱ་བར་མ་རྟོགས་པར་ནི་དེ་དོན་དུ་གཉེར་བ་མི་འཇུག་པས་
[258b.5]དེ་ཇི་ལྟར་འཁྲུལ་པ་མ་ཡིན། དེས་ན་དེ་ལྟར་རྣམ་པ་གཞན་གྱིས་ཀྱང་སྤྱིའི་ཡུལ་ཅན་མ་ཡིན་པ་དང་། གཞན་སེལ་བའི་ཡུལ་ཅན་ཡིན་པར་བསྟན་ནས། ཚུལ་གཞན་ཡང་བཤད་པའི་དོན་དུ་སྤྱིའི་རྣམ་པར་ཤེས་པའི་རང་བཞིན་བསྟན་པའི་ཕྱིར། དེ་ལྟ་ན་ནི་འོ་ན་ཞེས་རྩོད་པ་སློང་བར་
[258b.6]བྱེད་དོ། །རྩོད་པ་འདི་ནི་གཞུང་གི་འབྲེལ་པ་ཙམ་བྱེད་པར་ཟད་དོ། །སྤྱི་ཐ་དད་པ་ཁས་བླངས་ཀྱང་དེ་ཉིད་འདི་ཡིན་ནོ་ཞེས་འདོད་པ་ནི་མ་ཡིན་གྱི་འོན་ཀྱང་འདིར་ནི་ངོ་ཤེས་པའི་རྣམ་པ་ཅན་གྱི་སྤྱི་གཞུང་གཟུགས་པར་བྱ་བ་ཡིན་པས་དེ་ཉིད་ལ་དེ་ལྟར་བརྒལ་བར་བྱ་སྟེ། ཉེས་པ་དེ་ནི་མེད་དེ་ཐ་དད་
[258b.7]ཀྱང་ནི་ཞེས་བྱ་བ་ལ་སོགས་པའི་མདོ་བརྗོད་པ་ཡིན་ནོ། །ཐ་དད་པ་ཡིན་ཡང་ཤེས་པ་ལ་སོགས་པ་དོན་བྱ་བ་གཅིག་བྱེད་པའི་དོན་མཐོང་ནས་དེ་དག་གཞན་མཐོང་བ་ན་ཡང་ངོ་ཤེས་པར་བྱེད་དོ། །གལ་ཏེ་སྔར་མཐོང་བ་དག་ལས་ཐ་དད་པ་ཁོ་ནའི་དོན་མཐོང་བ་གང་ཡིན་པ་དེ་ལྟ་ན་ཡང་དེ་ཉིད་
[259a]
[259a.1]འདིའོ་ཞེས་དེ་དག་ལ་ངོ་ཤེས་པར་བྱེད་པ་ཁོ་ན་སྟེ། འདི་ལྟར་སྔ་མ་དག་ལས་དེ་དག་ཐ་དད་ཀྱང་དོན་དེ་བྱེད་པ་ཁོ་ནའོ། །ངོ་ཤེས་པར་བྱེད་པ་ཡང་ལྟ་བར་བྱེད་པ་གང་ཡིན་པ་དེ་ཉིད་འདི་ཡིན་ནོ་ཞེས་བཤད་པར་རིག་པར་བྱ་ལ་ལྟ་བར་བྱེད་པ་ཡང་མཐོང་བ་ཉིད་ཡིན་ཏེ། དེས་ན་
[259a.2]ངོ་ཤེས་པ་ནི་དེ་ཉིད་ལས་སྐྱེ་ཞིང་དེ་ཡང་དོན་དག་ལས་ཡིན་པའི་ཕྱིར་དོན་ཉིད་རྒྱུ་ཡིན་ནོ། །དེ་ཉིད་ཀྱི་ཕྱིར་འགྲེལ་པ་དང་ཡང་རྗེས་སུ་མཐུན་ནོ། །དེ་དེ་ལྟར་དོན་ཉིད་ལས་ངོ་ཤེས་པ་སྐྱེ་བ་ནི་སྤྱི་མེད་པར་བཤད་ནས་དེ་གཞན་སེལ་བའི་ཡུལ་ཅན་ཉིད་དུ་བཤད་པ་ནི་དེ་ལས་གཞན་དང་འབྲེལ་བའི་ཞེས་བྱ་
[259a.3]བ་ཡིན་ནོ། །གང་དག་ཤེས་པ་ལ་དེ་ལྟ་བུར་གྱུར་པའི་དོན་བྱ་བ་མི་བྱེད་པ་དེ་དང་བྲལ་བ་སྟེ་སྒྲོ་འདོགས་ཀྱི་སྒོ་ནས་སྦྱར་བ་དག་གསལ་བ་དེའི་ཡུལ་ཅན་གྱི་སྒྲ་རྣམས་ཀྱི་དོན་ནམ་ངོ་བོ་ཤེས་པ་ལྷན་ཅིག་ཏུ་སྦྱར་ནས་ཏེ། གཉི་ག་ལྟར་ཡང་གཞན་སེལ་བའི་ཡུལ་ཅན་ཡིན་ནོ། །དེའི་དོན་ནི་འདི་
[259a.4]ཡིན་ཏེ། གང་གི་ཕྱིར་འདིས་སྔར་བ་ལང་ཉིད་དམིགས་ལ། ད་ལྟར་ཡང་བ་ལང་ཉིད་དམིགས་པ་ཡིན་ནོ། །བ་ལང་དེ་ཉིད་འདི་མ་ཡིན་པ་དེ་ལྟ་ན་ཡང་བ་ལང་མ་ཡིན་པ་ལས་ཐ་དད་པའི་འབྲས་བུ་རྣམ་པར་རྟོག་པ་གཅིག་འཇུག་པ་ཙམ་ཡིན་གྱི་ངོ་ཤེས་པ་རྣམ་པ་གཅིག་པ་ཅན་ནི་དེའི་
[259a.5]སྟོབས་ཉིད་ལས་ཉམས་སུ་མྱོང་བས་ཆོད་ནས་སྐྱེ་བ་ཡིན་ནོ། །ཇི་ལྟར་ངོ་ཤེས་པ་འདི་འཐད་པར་འགྱུར་ཏེ། གང་གི་ཕྱིར་འདིར་ནི་བ་ལང་གི་རྣམ་པ་ཐ་མི་དད་པ་ཡིན་ནོ། །དེ་ནི་བ་ལང་ཁྲ་བོ་བ་ལང་སེར་སྐྱ་ཞེས་ཁྱད་པར་རྣམས་དང་ཐ་དད་མེད་པར་གྱུར་པ་ཡིན་ཏེ། དེས་ན་བ་ལང་གི་
[259a.6]རྣམ་པ་ངོ་ཤེས་པས་དེ་ཉིད་འདི་ཡིན་ནོ་ཞེས་རྟོགས་པ་ན་ཁྱད་པར་ཡང་ཁྱད་པར་གཞན་དང་གཅིག་ཏུ་བྱས་པར་འགྱུར་ན་ཁྲ་བོ་གང་ཡིན་པ་དེ་ཉིད་ནི་སེར་སྐྱ་མ་ཡིན་ནོ། །ཡང་ན་ཁྲ་བོ་སེར་སྐྱ་ཞེས་བྱ་བ་ལྟ་ཞོག་གི་བ་ལང་གི་རྣམ་པ་ཙམ་གྱིས་ཀྱང་ཁྱད་པར་བཟུང་བ་ན་ངོ་ཤེས་པ་མི་སྲིད་པར་འགྱུར་ཏེ་བ་ལང་
[259a.7]གང་ཡིན་པ་དེ་འདི་ཉིད་དོ་ཞེས་རྟོགས་པ་ན་དེ་ཉིད་འདིའོ་ཞེས་ཁྱད་པར་ཡང་ཁྱད་པར་གཞན་དང་བསྲེས་པར་འགྱུར་ཏེ་ཐ་དད་པ་ལ་བརྟེན་པ་ནི་ཐ་མི་དད་པ་རྟོགས་པར་མི་རུང་བའི་ཕྱིར་རོ། །དེས་ན་ཇི་ལྟར་འདི་ངོ་ཤེས་པ་ཡིན་ཞེ་ན་ཁྱེད་བདེན་ཏེ་རྣམ་པར་རྟོག་པའི་རྟོགས་པས་སྤྱི་རྣམ་པར་འཇོག་མི་
[259b]
[259b.1]ནུས་སོ་ཞེས་བརྗོད་དོ། །སྤྱི་ནི་མི་བསླུ་བའི་ཤེས་པའི་ཡུལ་མ་ཡིན་ནམ། འདི་ལ་ནི་དེ་མི་སྲིད་དོ། །སྤྱི་ནི་ཐ་དད་ཀྱང་ཁྱད་པར་དག་དང་ཐ་མི་དད་པར་རྟོགས་པའི་སྤྱོད་ཡུལ་དུ་གྱུར་པ་ཡིན་པས་དེ་ཇི་ལྟར་ཐ་དད་པ་མ་བཟུང་བར་ཐ་དད་པ་དག་ལ་མཚམས་སྦྱོར་བའི་རྟོགས་པའི་ཡུལ་དུ་འགྱུར།
[259b.2]ཡུལ་དང་དུས་ཀྱི་ཐ་དད་ཀྱང་ཐ་མི་དད་པ་ནི་དེ་ཉིད་འདིའོ་ཞེས་རྟོགས་པར་འགྱུར་ཏེ། དཔེར་ན་བུམ་པ་རྟག་པ་ཉིད་ལ་སྔར་དམིགས་པ་གང་ཡིན་པ་དེ་ཉིད་འདི་ཡིན་ནོ་ཞེས་བྱ་བ་བཞིན་ནོ། །ཁྱད་པར་རྣམས་ནི་དེ་ལྟར་ཐ་མི་དད་པ་མ་ཡིན་ནོ། །གཞི་ཐ་དད་པ་ཡིན་ན་ཡང་དེ་དག་ལ་སྤྱི་ཡོད་
[259b.3]པར་རྟོགས་པར་འགྱུར་རོ། །དེ་ནི་གཞི་ཐ་དད་པར་མ་རྟོགས་པའི་ཕྱིར་དང་། གཞི་མཐུན་པ་མ་ཡིན་ན་ཡང་མཚམས་སྦྱོར་བ་མི་འགྲུབ་པའི་ཕྱིར་ཐ་དད་པ་མེད་པ་གསལ་བར་བྱེད་པ་སྤྱིའི་སྒྲུབ་བྱེད་ནི་འགའ་ཡང་མེད་དོ། །གང་དུ་ཐ་དད་པར་སྣང་བ་ལ་གཅིག་ཏུ་རྟོགས་པར་འགྱུར་བ་རྣམ་
[259b.4]པ་འདི་ལྟ་བུ་འཁྲུལ་པ་ཡང་མི་སྲིད་པ་ནི་མ་ཡིན་ནོ། །འོ་ན་ཇི་ལྟར་ངོ་ཤེས་པ་ཡིན་ཞེ་ན། བརྗོད་པ་ཐ་དད་འཛིན་པའི་རང་བཞིན་གྱི་རྟོགས་པ་འཇུག་པས་ཐ་མི་དད་པར་ཤེས་པ་ནི་ངོ་ཤེས་པ་ནི་མ་ཡིན་གྱི་འོན་ཀྱང་འདི་ནི་བརྟག་པར་མི་ནུས་པ་ཐ་མི་དད་པར་ཞེན་པ་ཁོ་ནའོ། །ཇི་ལྟར་དོན་དུ་ཞེན་པ་
[259b.5]བརྟག་པར་མི་ནུས་པ་བཞིན་ཏེ། དོན་དུ་ཞེན་པ་ནི་རྣམ་པར་རྟོག་པ་མེད་པས་ཡུལ་དུ་བྱས་པའི་དོན་བཞིན་དུ་སྣང་བ་མ་གྲུབ་པའི་ཕྱིར་དོན་གསལ་བ་མེད་པའི་ཕྱིར་ན། ཡུལ་དུ་མ་བྱས་པའི་དོན་ལ་ཡང་དོན་གྱི་ཡུལ་ཅན་གྱི་འཇུག་པའི་ཤུགས་ཀྱིས་དཔག་པར་བྱ་བ་ཡིན་ནོ། །དེ་བཞིན་དུ་དོན་བྱ་བ་ནུས་
[259b.6]པའི་རྟོགས་པ་ནི་དོན་བྱ་བ་དང་འབྲེལ་པ་རྟོགས་པ་ལ་ལྟོས་པ་ཡིན་ཏེ། དེ་ཡོད་ན་འབྲས་བུ་སྐྱེ་བར་དམིགས་པས་འབྲེལ་པ་མ་རྟོགས་པར་ནི་དེ་ལྟར་རྟོགས་པ་སྔོན་དུ་འགྲོ་བ་ཅན་གྱི་དེ་དོན་དུ་གཉེར་བས་འཇུག་པ་མ་གྲུབ་པའི་ཕྱིར་རོ། །དེས་ན་འདི་ནི་དེ་ལྟར་རྟོགས་ལ་ལྟོས་པ་དང་བཅས་པ་
[259b.7]ཡིན་ནོ། །གཅིག་ལ་མཐོང་བ་ནི་འབྲེལ་པ་མ་མཐོང་བ་གཞན་ལ་འཇུག་པ་མ་ཡིན་ཏེ། བ་ལང་ལ་དོན་མཐོང་བ་དང་ལྡན་པའི་དོན་དུ་གཉེར་བ་དེ་ལ་འཇུག་པ་ཡིན་ཡང་རྟ་ལ་མི་འཇུག་པའི་ཕྱིར་རོ། །དེས་ན་བ་ལང་གི་གསལ་བ་གཅིག་ལ་བ་ལང་གིས་བྱ་བའི་དོན་མཐོང་བ་དང་ལྡན་པ་
[260a]
[260a.1]ནི་གཞན་ཡིན་པའི་ཕྱིར་དེ་དོན་སྒྲུབ་ཉམས་སུ་མི་གསལ་བ་གཞན་ལ་འཇུག་པར་མི་རིགས་ཏེ། འབྲེལ་པ་མཐོང་བ་ལ་ལྟོས་པའི་ཕྱིར་དང་། གཞན་མཐོང་བས་གཞན་ལ་མི་འགྲུབ་པའི་ཕྱིར་རོ། །དེ་ལྟ་ཡིན་མོད་ཀྱི་བ་ལང་གི་གསལ་བ་གཞན་ལ་དོན་ཉམས་
[260a.2]སུ་མྱོང་བའི་དོན་དུ་གཉེར་བ་དེ་ཉིད་ལ་གཞན་དུ་མ་མཐོང་བའི་གསལ་བ་གཞན་ལ་ཡང་ཕྱིས་མཐོང་བ་ལ་ལྟོས་པ་མེད་པར་འཇུག་པ་ནི་མཐོང་ངོ་། །རིགས་མཐུན་པར་འདོད་པའི་གསལ་བ་གཞན་ཉིད་ལ་ཡང་མཐོང་བ་ལ་ལྟོས་པ་མེད་པ་ཡིན་གྱི། དོན་དེ་བྱེད་པ་ཡིན་ཡང་རིགས་མི་
[260a.3]མཐུན་པའི་གསལ་བ་གཞན་ལ་ནི་མ་ཡིན་ཏེ། དཔེར་ན་ཤ་རི་བ་ལ་རིམས་ཞི་བའི་ནུས་པ་ཉམས་སུ་མྱོང་བ་ཤ་རི་བ་གཞན་ལ་འཁྲུལ་པ་མེད་པར་ལེན་གྱི་དོན་དེ་སྒྲུབ་པར་ཁྱད་པར་མེད་ཀྱང་པ་རུ་ཤ་ཀ་ལ་ནི་མ་ཡིན་པ་བཞིན་ནོ། །དེའི་ཕྱིར་བ་ལང་གི་གསལ་བ་གཞན་དག་ལ་གསལ་
[260a.4]བ་དེར་ཞེན་པ་ཡོད་མོད་ཀྱི། དེ་ནི་དེ་ཉིད་འདིའོ་ཞེ་འམ་དེ་ལ་འདིའོ་ཞེས་བརྟག་པར་ནི་མི་ནུས་སོ། །དེས་ན་དེ་ལྟར་ཐ་དད་པར་སྦྱོར་བར་བྱེད་པའི་ངོ་ཤེས་པ་འདི་ལྷག་པར་ཞེན་པ་ཙམ་གྱིས་སྙིང་པོ་ཅན་ཉིད་ཀྱིས་ལོག་པའི་རྣམ་པར་རྟོག་པ་ཉིད་ཉེ་བར་བསྟན་ཏེ། དེ་ལྟས་དོན་ལ་
[260a.5]གཅིག་བདག་ཏུ། །འཛིན་པའི་རྣམ་རྟོག་འདི་འཁྲུལ་བ། །ཞེས་ཏེ། ཇི་ལྟར་དོན་དུ་ལྷག་པར་ཞེན་པ་བཞིན་ནོ། །རྟོགས་པ་ལ་ནི་བ་ལང་གི་རྣམ་པ་ཐ་དད་པ་ཁོ་ན་སྟེ། འདི་ནི་བ་ལང་ཡིན་ལ་འདི་ནི་བ་ལང་གཞན་ཡིན་ནོ་ཞེས་རྟོགས་པའི་ཕྱིར། གཅིག་བ་ལང་ཡིན་ཡང་གཞན་
[260a.6]བུམ་པ་བཞིན་དུ་བ་ལང་དུ་མི་འགྱུར་བ་ནི་མ་ཡིན་ཏེ། གཉི་ག་བ་ལང་ཡིན་པའི་ཕྱིར་རོ། །འོན་ཀྱང་དེ་བ་ལང་ཉིད་གང་ཡིན་པ་དེ་གཞན་ལ་མེད་པ་དེའི་བ་ལང་གང་ཡིན་པ་དེ་གཞན་མ་ཡིན་པར་ཟད་ཀྱི་གཞན་ནི་བ་ལང་ཡིན་པ་ཁོ་ནའོ། །བ་ལང་དེ་ཉིད་བ་ལང་དེ་ཡིན་ནོ་ཞེས་
[260a.7]རིགས་པ་ནི་མ་ཡིན་ཏེ། དེས་ན་སྤྱི་ངོ་བོ་ལ་རིགས་པའི་བྱེད་པ་འགལ་བ་མེད་དོ། །བ་ལང་ཉིད་དང་ལྡན་པས་བ་ལང་ཞེས་ཁས་ལེན་ན་གཞན་ལ་དེ་མེད་པར་མི་འགྱུར་བས་འགལ་བར་འགྱུར་གྱི། རང་གི་ངོ་བོར་དེ་ལྟར་འགྱུར་བ་ལ་ནི་མ་ཡིན་ཏེ་ཁྲ་བོ་ལ་སོགས་པའི་བ་ལང་
[260b]
[260b.1]མང་པོ་རྣམས་ཉིད་བ་ལང་ཉིད་དུ་རྟོགས་ཀྱི་རྟ་ངང་པ་ལ་སོགས་པ་གཞན་ལ་ནི་མ་ཡིན་པའི་ཕྱིར་རོ། །ཁྱད་པར་སྲེ་བའི་ངོ་ཤེས་པ་འདིའི་རྒྱུ་མཚན་ཡང་དངོས་པོ་ཉིད་ཡིན་ནོ། །འབྲེལ་པ་ནི་འདི་ལ་བཤད་ཟིན་ཏོ་ཞེས་བྱའོ། །དངོས་པོ་དེ་དག་ལ་ཤེས་པ་ལ་སོགས་པའི་དོན་བྱེད་པ་གཅིག་
[260b.2]མཐོང་བ་ལ་དངོས་པོ་རྣམས་ཀྱི་ཆོས་ཉིད་ཁོ་ནས་དེ་ཉིད་འདི་ཡིན་ནོ་སྙམ་པའི་ལོག་པའི་ཤེས་པ་སྐྱེད་པར་བྱེད་དོ། །དེ་ཉིད་འདིའོ་ཞེས་སྙམ་པ་ནི་རྒྱང་མི་རིང་ཞིང་མ་བསྐལ་བར་ལྷག་པར་ཞན་པའི་རང་བཞིན་བརྗོད་པའོ། །དངོས་པོ་རྣམས་ལ་དངོས་སུ་རྣམ་པར་རྟོག་པ་སྐྱེད་པའི་ནུས་པ་
[260b.3]ནི་ཡོད་པ་མ་ཡིན་ནོ་ཞེས་བཤད་པ་ནི་རང་ཉམས་སུ་མྱོང་བ་ནི་དེ་དག་གི་བདག་ཉིད་ཀྱི་ཡུལ་ཅན་གྱི་རྣམ་པར་ཤེས་པ་དེའི་བག་ཆགས་ཏེ། དེར་རྒྱུར་གྱུར་པས་སོ། །དེ་ལ་འདིར་རེ་ཞིག་ལོག་པ་ཉིད་གཞུང་གཟུགས་པའི་ཕྱིར་བཤད་པ་ནི། དེ་ལྟ་མ་ཡིན་ན་ཞེས་བྱ་བ་སྟེ་ལོག་པ་ཉིད་མ་
[260b.4]ཡིན་ནའོ། །འདིས་ནི་འདི་སྐད་བསྟན་པ་ཡིན་ཏེ། རྗེས་སུ་འགྲོ་བ་འགའ་ཞིག་མེད་པས་ངོ་ཤེས་པ་མི་འཐད་པ་ན་ནི་མ་ཡིན་གྱི། ཕྱིར་ལ་རྗེས་སུ་འགྲོ་བ་ཡོད་ན་མི་འཐད་དོ་ཞེས་སོ། །བློ་ཁྱད་པར་སྲེ་བ་ཅན་ཞེས་བྱ་བ་ནི། ངོ་ཤེས་པའི་རྣམ་པ་ཅན་སྤྱིའི་ཤེས་པ་བསྟན་པ་སྟེ། དེ་ནི་ཁྱད་
[260b.5]པར་སྲེ་བའི་རང་བཞིན་ཡིན་པའི་ཕྱིར་རོ། །འདི་ལྟར་སྤྱི་སྨྲ་བ་རྣམས་ཀྱི་སྤྱི་མཚམས་སྦྱོར་བའི་ཤེས་པའི་སྤྱོད་ཡུལ་དུ་གྱུར་པ་ཡིན་དུ་ཟིན་ཀྱང་ཁྲ་བོ་ལ་མཐོང་བ་གང་ཡིན་པ་དེ་ཉིད་ནི་སེར་སྐྱ་ལ་ཡང་མཐོང་ངོ་ཞེས་ཐ་དད་པ་ཉིད་མཚམས་སྦྱོར་བ་ནི་མ་ཡིན་ཏེ། འདི་བ་ལང་ཞེས་སྤྱི་དང་གསལ་
[260b.6]བ་ཐ་མི་དད་པ་སྣང་གི་འདི་བ་ལང་ཞེས་བྱ་བར་ནི་མ་ཡིན་པའི་ཕྱིར་རོ། །ཁྲ་བོ་བ་ལང་སེར་སྐྱ་ལ། །ཞེས་གཞི་མཐུན་པ་ནི་དེའི་རང་བཞིན་མེད་པར་རྟོགས་པ་མཐར་ཕྱིན་པ་མ་ཡིན་ནོ། །འབྲེལ་པའི་ཕྱིར་གཞན་དེ་ལ་ཡོད་པ་ཡིན་ན་ནི། ལྷ་སྦྱིན་གྱི་བ་ལང་ཞེས་བྱ་བ་བཞིན་དུ་རྟོགས་པར་འགྱུར་
[260b.7]ཏེ། དེ་ཡང་བ་ལང་དང་ལྡན་པའི་ཕྱིར་རོ། །དེས་ན་ཐ་དད་པ་དང་འབྲེལ་པ་ཡིན་ན་བ་ལང་དང་ལྡན་པ་ཞེས་རྟོགས་པར་རིགས་ཀྱི་བ་ལང་ངོ་ཞེས་བྱ་བར་ནི་མ་ཡིན་ནོ། །བ་ལང་ཉིད་ཀྱི་ཉེ་བར་གཞག་པ་ལས་བ་ལང་ཞེས་ཐ་མི་དད་པར་རྫས་ཀྱི་མཐར་ཕྱིན་པར་རྟོགས་སོ་ཞེ་ན། རེ་ཞིག་ཐ་དད་པ་
[261a]
[261a.1]མེད་པར་རྟོགས་པ་ནི་གྲུབ་སྟེ། དེ་ཉིད་ཀྱི་ཕྱིར་ཐ་དད་པའི་དོན་དང་ལོགས་སུ་ཐོབ་པ་མེད་པའི་ཕྱིར་རོ་ཞེས་བཤད་དོ། །དེས་ན་ཐ་དད་པ་ཐ་མི་དད་པ་སྦྱོར་བའི་བདག་གི་ཤེས་པ་ནི་ཐ་དད་པ་མེད་པ་སྲེ་བའི་རང་བཞིན་དུ་མི་འགྱུར་ཏེ། དེ་དང་ཐ་མི་དད་པར་རྟོགས་པ་ནི་དེ་
[261a.2]སྤངས་ནས་རྗེས་སུ་སྦྱར་བར་ནུས་པ་མ་ཡིན་ནོ། །གང་ཞིག་གང་དང་ལྷན་ཅིག་འབྲེལ་པ་དེ་ལ་དེ་མ་འདྲེས་པར་ཇི་ལྟར་འགྱུར། དེའི་ཕྱིར་སྤྱིའི་ཤེས་པ་ནི་ཁྱད་པར་སྲེ་བའི་རྣམ་པ་ཅན་ཡིན་ལ། དེ་ནི་འཁྲུལ་པ་མེད་པར་མི་འགྱུར་རོ། །དེ་སྤྱི་ཐ་དད་པའམ་ཐ་མི་དད་ལ་དམིགས་པ་ཡིན་
[261a.3]ན་ནི་འཁྲུལ་པར་མི་འགྱུར་རོ། །དེ་ལ་ཐ་མི་དད་ཡིན་ན་ཐ་དད་པ་ཉིད་དུ་མི་འགྱུར་མོད། འདི་དག་འདྲེས་པར་གོ་ཇི་ལྟར་འགྱུར། ཐ་དད་ན་ཡང་ཐ་མི་དད་པ་དེ་ཐ་དད་པ་རྣམས་ལ་རྟོགས་པར་འགྱུར་མོད། འདི་དག་འདྲེས་པར་ག་ལ་འགྱུར་ཏེ། །དཔེར་ན་ཁར་བ་ཐོགས་པ་དག་བཞིན་ནོ། །
[261a.4]ཁར་བ་ཐོགས་པ་རྣམས་ཁར་བ་ཐ་མི་དད་པ་དང་ལྡན་དུ་ཟིན་ཀྱང་རང་གི་ངོ་བོ་འདྲེས་པར་སྣང་བ་ནི་མ་ཡིན་གྱི། འོན་ཀྱང་མ་འདྲེས་པ་དེ་དག་ལ་ཁར་བ་གཅིག་འབྲེལ་པར་རོ། །དེས་ན་དེ་འདི་ལའོ་ཞེས་རྟོགས་པར་རིགས་སོ། །ཁྱད་པར་སྲེ་བ་ནི་རྣམ་པ་དེ་ལྟ་བུ་མ་ཡིན་གྱི་འོན་ཀྱང་དེ་ཉིད་འདི་ཡིན་ནོ། །
[261a.5]གལ་ཏེ་ཐ་མི་དད་པ་རྣམས་ལས་ཐ་དད་པར་རྟོགས་ན་ངོ་ཤེས་པར་མི་འགྱུར་ཏེ། དབྱིག་པ་ཐོགས་པ་བཞིན་ནོ། །ཐ་མི་དད་པར་རྟོགས་ན་གོ་ཇི་ལྟར་གཞན་དུ་རྟོགས་པར་འགྱུར་ཞེ་ན། དེ་ནི་མ་ཡིན་ཏེ། སྤྱི་དང་དེ་དང་ལྡན་པ་དག་ཐ་དད་ན། ཐ་མི་དད་པར་རྟོགས་པ་འཁྲུལ་པ་མེད་པ་ཉིད་མི་
[261a.6]འགྲུབ་པའི་ཕྱིར་རོ། །དེར་སྒྲོ་བཏགས་ནས་རྟོགས་པའི་ཕྱིར་ཐ་མི་དད་པར་རྟོགས་སོ་ཞེ་ན། ཇི་ལྟར་མ་འཁྲུལ་པར་གཞན་ལ་གཞན་སྒྲོ་འདོགས་པར་བྱེད། འཁྲུལ་པ་ཉིད་ཡིན་ན་དེ་ལྟར་འཐད་དེ། འདི་ནི་རྡུལ་ཡིན་ནོ་ཞེས་བྱ་བ་བཞིན་ནོ། །དབྱུག་པ་གཅིག་དུ་མ་དང་འབྲེལ་པས་
[261a.7]ཀྱང་དེ་དང་ལྡན་པའི་དབྱུག་པ་ཅན་ཇི་ལྟར་འབྲེལ་པར་མི་འགྱུར་ཞེ་ན། དེ་ནི་དབྱུག་པ་གཅིག་དང་ལྡན་པའི་ཕྱིར་སྒྲོ་བཏགས་པའི་དེ་དང་ལྡན་པ་རང་གི་བདག་ཉིད་དུ་གྱུར་པ་ཁོ་ནས་དེ་དག་འདྲེས་པ་ཡིན་གྱི། དབྱུག་པ་ནི་མ་ཡིན་ནོ། །དེས་ན་ཐ་དད་པ་རྣམས་དངོས་པོ་གཅིག་དང་ལྡན་
[261b]
[261b.1]པས་ནི་འདྲེ་བ་སྲིད་པ་མ་ཡིན་ནོ། །དེ་ཉིད་ཀྱི་ཕྱིར་ཐ་དད་པ་དང་ཐ་མི་དད་པའི་རང་བཞིན་སྤྱི་མ་ཡིན་ཏེ། འདི་བ་ལང་ངོ་ཞེས་བྱ་བ་ལ་ཐ་དད་པ་དང་ཐ་མི་དད་པ་གཉི་ག་སྣང་བ་ཉིད་དུ་ཐལ་བར་འགྱུར་གྱི་ཐ་མི་དད་པར་རོ་གཅིག་པ་ནི་མ་ཡིན་པར་འགྱུར་བའི་ཕྱིར་རོ། །བ་ལང་དང་འདིའོ་ཞེས་བྱ་བའི་ཆ་ཐ་
[261b.2]མི་དད་ན་གཞི་མཐུན་པ་ཉིད་དུ་ཡང་མི་འགྱུར་ཏེ། བ་ལང་བ་ལང་ཞེས་བྱ་བ་བཞིན་ནོ། །དེས་ན་དེ་ཉིད་ཐ་དད་པའི་ཤེས་པ་ཡིན་ནོ་ཞེ་ན། འདི་ཐ་དད་པ་དང་ཐ་མི་དད་པའི་རྟོག་པར་འགྱུར་བ་གང་ཡིན་པ་འདིར་ཐ་དད་པ་སྣང་བ་སྔོན་དུ་འགྲོ་བ་ཅན་གྱི་ཐ་མི་དད་པའི་རྟོགས་པ་ནི་མེད་ཀྱི་འོན་ཀྱང་བ་ལང་
[261b.3]ཞེས་རྟོགས་པ་ནི་འདིའི་ཞེས་བྱ་བའི་ཆ་མ་རྟོགས་པ་རྟོགས་པར་འགྱུར་བ་ཡིད་ལ་དེ་ཡང་ཐ་མི་དད་པ་ཁོ་ན་ཡིན་ཏེ། དེས་ན་འདིར་ཐ་དད་པར་རྟོགས་པ་ནི་འགའ་ཡང་མེད་ཀྱི་འོན་ཀྱང་ཐ་མི་དད་པར་རོ་གཅིག་པ་ཁོ་ནའོ། །དེས་ན་ཇི་ལྟར་ཐ་དད་པ་དང་། ཐ་མི་དད་པ་ཐ་དད་པར་སྣང་སྟེ། དེའི་
[261b.4]ཚེ་འདིས་ཐ་དད་པ་སྤངས་པ་ནི་མ་ཡིན་ནོ། །ཡོད་ཀྱང་སྒྲས་མ་བརྗོད་དོ་ཞེ་ན། མ་ཡིན་ཏེ། ཐ་དད་པ་མེད་ན་འཇུག་པ་དང་མི་འཇུག་པ་མི་རུང་བའི་ཕྱིར་རོ། །གལ་ཏེ་ཐ་མི་དད་པ་ལས་ཐ་དད་པ་གཞན་ཡིན་ན་ནི་འཇུག་པ་དང་ལྡོག་པའི་མྱོང་བ་ཡོད་པར་འགྱུར་གྱི། ཐ་མི་དད་པ་
[261b.5]གང་ཡིན་པ་དེ་ཉིད་ཐ་དད་པ་ཡིན་པའི་ཕྱིར་ཇི་ལྟར་ན་འདིར་འགའ་ཞིག་བླང་བ་དང་གཞན་ནི་དོར་བར་འགྱུར། ཐ་དད་པའམ་ཐ་མི་དད་པ་ཞེས་བྱ་བའི་ཆོས་ནི་འགའ་ཡང་རྟོགས་པར་བྱར་ཡོད་པ་མ་ཡིན་གྱི། འོན་ཀྱང་བ་ལང་གི་དཀར་པོ་རང་བཞིན་ཉིད་དུ་ཐ་མི་དད་པར་རྟོགས་པ་གང་ཡིན་པ་
[261b.6]དེ་ཉིད་ཐ་དད་པ་ལས་རང་བཞིན་མ་ཡིན་པའི་ཕྱིར་དེའི་གནས་སྐབས་སུ་རྟོགས་ཞེས་དྲུག་པའམ་ཆོས་ཅན་གྱི་ཕྱོགས་གཅིག་ཏུ་འགྱུར་རོ། །འདི་བ་ལང་ངོ་ཞེས་འདིའི་བ་ལང་ཉིད་ཅེས་བྱ་བ་འདྲེན་པར་རྟོགས་པ་ནི་མེད་དོ། །རྟོགས་པས་སྟོང་ཡང་ཐ་དད་པ་དང་ཐ་མི་དད་པའི་ཕྱོགས་ཁས་
[261b.7]བླང་བར་ཡང་ཅི་འགྱུར། དེས་ན་རྟོགས་པ་འདི་ནི་རྣམ་པར་དཔྱད་ན་མ་འཁྲུལ་པར་མི་འཐད་ཀྱི་འཁྲུལ་པ་ཉིད་ཡིན་ན་འཐད་དོ། །དེ་བཤད་པ་ནི་འཁྲུལ་པའི་དབང་གིས་ཞེས་བྱ་བའོ། །འཁྲུལ་པ་ནི་གསལ་བའི་ཆ་ལ་ནི་མི་འཐད་ཀྱི་འོན་ཀྱང་ཞེན་པ་ཁོ་ན་ལ་ཡིན་ནོ། །གསལ་བའི་ཆ་ཡང་
[262a]
[262a.1]འཁྲུལ་པ་ནི་མ་ཡིན་ཏེ། གཞན་ཡང་བ་ལང་ཉིད་ཡིན་པས་ན་དེ་ལྟ་བུ་ཁོ་ནར་རྟོགས་པའི་ཕྱིར་རོ། །ཐ་དད་པ་མེད་པར་རྟོགས་པ་མ་གྲུབ་པའི་ཕྱིར་རོ། །བ་ལང་ཞེས་བྱ་བར་རྟོགས་པའི་ཕྱིར་རོ། །དེས་དེ་ལྟར་ལོག་པ་ཉིད་དུ་བསྒྲུབས་ནས་དངོས་པོ་རྣམས་ཀྱིས་དངོས་
[262a.2]པོའི་ཆོས་ཉིད་ཁོ་ནས་སྐྱེད་པར་བྱེད་དོ་ཞེས་བྱ་བའི་གཞུང་གཟུགས་པའི་ཕྱིར་བཤད་པ་ནི། གལ་ཏེ་རྒྱུ་མཚན་མེད་པའི་ཕྱིར། །ཞེས་བྱ་བའོ། །དངོས་པོ་དེ་དག་ཉིད་འཁྲུལ་པའི་རྒྱུ་མཚན་ཡིན་པ་དེ་ཡང་ཐམས་ཅད་ནི་མ་ཡིན་ནོ་ཞེས་བཤད་པ་ནི་དེ་དག་གི་དོན་བྱ་བ་དེ་བྱེད་པ་སྟེ། དཔེར་ན་
[262a.3]ཁྲ་བོ་ལ་སོགས་པས་བ་ལང་གི་རྣམ་པར་རྟོག་པ་བཞིན་ནོ། །དོན་ནི་བག་ཆགས་ཀྱི་རྒྱུ་མ་ཡིན་གྱི་འོན་ཀྱང་ཤེས་པ་ཉིད་ཡིན་ནོ་ཞེས་བཤད་པ་ནི་ཉམས་སུ་མྱོང་བའི་སྒོ་ནས་ཞེས་བྱ་བའོ། །རྣམ་པར་རྟོག་པའི་ཤེས་པ་ཉིད་ལས་རྣམ་པར་རྟོག་པའི་བག་ཆགས་ཡིན་ལ་དེ་དག་ཀྱང་དངོས་པོ་
[262a.4]ཉམས་སུ་མྱོང་བས་སད་པ་ན་དེའི་གནས་སྐབས་སུ་ངེས་པ་སྐྱེད་པར་བྱེད་པ་ཡིན་གྱི། དེས་ན་ཉམས་སུ་མྱོང་བའི་སྒོ་ནས་དོན་རྣམས་རྒྱུ་ཡིན་ནོ། །རྣམ་པར་རྟོག་པའི་བག་ཆགས་ཀྱང་རྣམ་པར་རྟོག་པའི་རྒྱུ་ཡིན་ནོ་ཞེས་བཤད་པའི་དོན་འཁྲུལ་པའི་འབྲས་བུ་ཅན་གྱི་ཞེས་སྨོས་སོ། །གཏན་
[262a.5]ཚིགས་དེས་ན་དངོས་པོ་རྣམས་རྒྱུ་ཉིད་དོ། །དེས་ན་དེ་ལྟར་རིགས་མཐུན་པར་འདོད་པ་རྣམས་ཀྱི་སྤྱིའི་ཤེས་པའི་རྒྱུ་ནི་གསལ་བ་དག་ཁོ་ན་ཡིན་གྱི་སྤྱི་ནི་མ་ཡིན་ནོ་ཞེས་གཞུང་བཙུགས་ནས། རིགས་མི་མཐུན་པ་རྣམས་ལ་ཡང་རང་བཞིན་གཞན་དུ་མཚོན་པའི་འཁྲུལ་པས་དེའི་རིགས་སུ་
[262a.6]གཏོགས་པ་ཉི་ཚེའི་སྤྱིའི་རྒྱུ་ཅན་ཡིན་ནོ་ཞེས་གཞན་གྱི་ཁས་བླངས་པ་དགག་པའི་དོན་དུ་ཡང་དག་པ་དང་། ལོག་པའི་ཤེས་པ་གཉི་ག་ཡང་སྤྱིའི་རྒྱུ་མཚན་ཅན་ཉིད་བསལ་བའི་ཕྱིར། སྨིག་རྒྱུ་ལ་སོགས་པ་ཡང་ཞེས་སྨོས་སོ། །ཆུ་དང་རིགས་མི་མཐུན་པ་སྨིག་རྒྱུ་དག་ལ་ཆུའི་རྟོགས་
[262a.7]པ་འཇུག་པ་ན་ཆུ་དང་རིགས་མཐུན་པར་རྟོགས་པ་ནི་འཁྲུལ་པ་ཡིན་པའི་ཕྱིར་གལ་ཏེ་ཆུའི་སྤྱིའི་རྒྱུ་མཚན་ཅན་མ་ཡིན་པ་དེ་ལྟ་ན་ཡང་རྣམ་པ་ཐམས་ཅད་དུ་སྤྱི་ལ་མི་ལྟོས་པར་ནི་མི་འཐད་དོ། །བུམ་པ་ཡང་དེ་ལྟར་རྟོགས་པའི་དབང་གིས་དེ་ལྟ་བུའི་དངོས་པོར་ཁས་བླངས་པར་ཐལ་བའི་
[262b]
[262b.1]ཕྱིར་རོ། །དེས་ན་སྨིག་རྒྱུ་དག་ཁོ་ན་ལ་ཆུར་ཤེས་པ་དང་། ཐག་པ་ལ་སྦྲུལ་དུ་འཁྲུལ་པ་དང་། ཉ་ཕྱིས་ལ་དངུལ་དུ་ཕྱིན་ཅི་ལོག་པ་ཞེས་བྱ་བ་འདི་ངེས་པ་ཡིན་ན་དེ་ནི་རང་བཞིན་འགའ་ཞིག་ཁོ་ནས་སྤྱི་ལ་བརྟེན་པ་ཡིན་ནོ་ཞེས་བྱ་བ་དེ་ནི་གལ་ཏེ་སྤྱི་མེད་པར་དོན་རྣམས་རྣམ་པ་དེ་ལྟ་བུའི་ཤེས་པ་
[262b.2]སྐྱེད་པར་བྱེད་པར་མི་གྲུབ་ན་འགྱུར་རོ། །དེས་ན་རྣམ་པ་འདི་ལྟ་བུའི་འཁྲུལ་པ་ངེས་པའི་རྟེན་དུ་འགྱུར་བ་གང་ཡིན་པ་འདི་ནི་ཆུ་དང་སྨིག་རྒྱུ་དག་གམ་ཐག་པ་དང་སྦྲུལ་དག་ཁོ་ནའི་རང་བཞིན་ཡིན་ཏེ་འདི་ལ་སྤྱི་གཞན་གྱིས་ཅི་བྱ། འདི་ཉིད་གཞུང་གཟུགས་པའི་ཕྱིར་རེ་ཞིག་སྤྱི་ཇི་ལྟར་རྟོགས་
[262b.3]བཞིན་པ་མེད་པར་བཤད་པ་ནི་དེ་ལ་གང་ཞེས་བྱ་བ་ཡིན་ནོ། །སྨིག་རྒྱུ་དག་ལ་ཆུ་ཉིད་ཡོད་ན་ནི་ཕྱིན་ཅི་ལོག་མ་ཡིན་པ་ཉིད་དུ་ཐལ་བའི་ཕྱིར་རོ། །འཁྲུལ་པ་ཉིད་ཡིན་ན་ཡང་དེ་སྤྱི་འཛིན་པར་མི་གྲུབ་པོ་ཞེས་བཤད་པ་ནི། གལ་ཏེ་ཡང་དག་པ་མ་ཡིན་པའི་རྣམ་པར་ཞེས་བརྒལ་བ་དང་
[262b.4]ལན་དག་གིས་བསྟན་ཏེ། རྣམ་པ་གཞན་མེད་པའི་ཕྱིར་རོ། །སྒྲོ་འདོགས་པ་ནི་གཞན་ལ་གཞན་དུ་འདོགས་པ་ཡིན་ནོ། །དེའི་དམིགས་པ་ནི་དེ་ཉིད་ཡིན་ཏེ། རིག་པ་ནི་རིག་པར་འགྱུར་བའི་ཆོས་ལས་ལྷག་པ་རིག་པར་བྱེད་པ་མ་ཡིན་པའི་ཕྱིར་རོ། །དེས་ན་ཆུའི་ཤེས་པས་
[262b.5]སྨིག་རྒྱུ་དག་ལ་ཡང་དག་པ་མ་ཡིན་པའི་ཆུར་སྒྲོ་འདོགས་པ་ནི་ཆུ་ཉིད་ཡུལ་ཡིན་པའི་ཕྱིར་འདི་སྤྱིའི་རྒྱུ་མཚན་ཅན་མ་ཡིན་ཏེ། དེ་ལ་མེད་པའི་ཕྱིར་རོ། །མེད་པའི་ཕྱིར་ཆུ་ཉིད་སྨིག་རྒྱུ་ལ་ཆུར་ཤེས་པའི་རྒྱུ་མཚན་མ་ཡིན་མོད། འོན་ཀྱང་ཆུ་དང་སྨིག་རྒྱུ་ལ་སོགས་པའི་གསལ་
[262b.6]བའི་རྟེན་ཅན་གཡོ་ཞིང་གསལ་བ་ཉིད་ལ་སོགས་པའི་སྤྱི་གཞན་གང་ཡིན་པ་དེ་ལས་ཆུར་སྒྲོ་འདོགས་པའི་མཚན་ཉིད་ཀྱི་འཁྲུལ་པར་འགྱུར་བ་ཡིན་ཏེ། དེ་ལྟ་མ་ཡིན་ན་ནི་ཧ་ཅང་ཐལ་བར་འགྱུར་རོ་ཞེ་ན། གལ་ཏེ་སྤྱི་འཛིན་པ་ཡོད་ན། །ཞེས་བྱ་བ་ལ་སོགས་པས་དོགས་པ་དེ་
[262b.7]བསུ་ནས་བཟློག་པའི་ཕྱིར་འབྲས་བུ་གཅིག་པ་ཅན་ཞེས་སྨོས་སོ། །ཇི་ལྟར་ཆུའི་གསལ་བ་དོན་ངེས་པར་བྱེད་པ་རྣམས་ཆུའི་རྟོགས་པ་གཅིག་བྱེད་པ་དེ་བཞིན་དུ་ཆུ་དང་སྨིག་རྒྱུ་དག་ལ་ཡང་གང་གི་དབང་གིས་རྟོགས་པ་གཅིག་གི་རྟེན་གྱི་དངོས་པོར་གྱུར་པ་ན། རྨོངས་པར་གསལ་བ་གཞན་ལ་
[263a]
[263a.1]དེ་དང་འབྲེལ་བའི་རྣམ་པ་ལ་ལྟོས་ནས་རིགས་གཞན་གྱི་གསལ་བ་སྒྲོ་འདོགས་པར་འགྱུར་བ་དོན་གཅིག་ལ་ངེས་པ་འགའ་ཞིག་ཡོད་པ་མ་ཡིན་ནོ། །གལ་ཏེ་དངོས་པོ་རང་བཞིན་གྱིས་སྨིག་རྒྱུ་རྣམས་ཆུར་འཁྲུལ་པའི་རྒྱུ་མཚན་ཉིད་ཡིན་ན། གཏན་དུ་འཁྲུལ་པར་འགྱུར་བ་
[263a.2]མ་ཡིན་ནམ་ཞེ་ན། བརྗོད་པ། འདི་ནི་ཏེ་པོར་ཆུ་སྟེ། ཁྲ་བོ་ལ་སོགས་པ་རྣམས་ཀྱང་ངོ་བོ་ཉིད་ཀྱིས་སྤྱིའི་རྟོགས་པ་སྐྱེད་པ་ཡིན་ན། རྣལ་འབྱོར་པ་ལ་ཡང་དེའི་རྟོགས་པ་ཡོད་པར་འགྱུར་རོ། །འོ་ན་ཇི་ལྟར་ཡིན་ཞེ་ན། བརྗོད་པ་འཁྲུལ་པ་རང་གི་རྒྱུ་ལས་འབྱུང་བ་ན།
[263a.3]ཡུལ་ངེས་པར་འགྱུར་བ་དེ་ནི་ཡུལ་གྱིས་འཁྲུལ་པར་བརྗོད་དེ། རབ་རིབ་ཅན་གྱིས་ཟླ་བ་གཉིས་སུ་འཁྲུལ་པ་ཟླ་བས་བསྐྱེད་པར་བྱ་བ་རབ་རིབ་མེད་དམ། ཟླ་བ་མེད་ན་མི་འགྱུར་བ་བཞིན་ནོ། །འདིར་ཡང་རྣམ་པར་རྟོག་པའི་བག་ཆགས་ལས་འགྱུར་བ་ཡིད་ཀྱི་ཉེས་པ་
[263a.4]ལས་སྨིག་རྒྱུ་ལ་སོགས་པ་དག་ལ་འགྱུར་བ་ན་རྣམ་པར་རྟོག་པ་དོན་ཉེ་བར་སྦྱོར་བ་ཡིན་གྱི་དོན་གྱི་རྣམ་པར་རྟོག་པའི་བག་ཆགས་འཇོག་པར་ནུས་པ་ནི་མ་ཡིན་ཏེ། རྣམ་པར་རྟོག་པའི་རྒྱུ་ཡིན་པ་ཉིད་ཀྱི་ཕྱིར་རོ། །དེས་ན་དེ་ལྟར་སྨིག་རྒྱུ་ལ་ཆུར་འཁྲུལ་པ་དངོས་པོའི་རྒྱུ་ཅན་ཉིད་དུ་བསྒྲུབས་ཏེ་སྐབས་ཉིད་ཀྱི་
[263a.5]དབང་དུ་བྱས་ནས་སྤྱིའི་འདོད་པས་ཀྱང་ཞེས་སྨོས་སོ། །འདིས་ནི་ལོག་པའི་རྣམ་པར་རྟོག་པ་ཉིད་དང་། དངོས་པོའི་རྒྱུ་ཅན་ཉིད་དུ་བསྒྲུབས་པ་ན་ཤེས་པ་ལ་སོགས་པའི་དོན་བྱ་བ་གཅིག་པོ་དེ་ཞེས་བྱ་བ་གཞུང་བཙུགས་པ་ཡིན་ནོ། །དོན་གཅིག་བྱེད་པ་ནི་ཕ་རོལ་པོས་ཀྱང་འདོད་པ་ཡིན་ལ་
[263a.6]དེ་ཉིད་ལས་སྤྱིའི་ཤེས་པ་སྐྱེ་བས་ན་སྤྱི་གཞན་གྱིས་ཅི་བྱ། གལ་ཏེ་ལོག་པའི་ཤེས་པ་ཡོད་པ་དེའི་སོ་སོར་ངེས་པའི་ཡུལ་ལ་བརྟེན་ནས་སྐྱེ་བའི་རྒྱུ་ཉིད་ཡིན་པར་འགྱུར་ན། འདི་ལོག་པའི་ཤེས་པ་ཉིད་དུ་ངེས་པ་ནི་ཇི་ལྟར་ཡིན་ཏེ་དངོས་པོ་རང་བཞིན་ཇི་ལྟ་བ་ཉིད་དུ་ངོ་བོ་ཤེས་པའི་རྣམ་པ་
[263a.7]ཅན་མ་ཡིན་པའི་རྣམ་པར་རྟོག་པས་རང་གི་མཚན་ཉིད་རྟོགས་ལ་རག་མོད་ཅེས་རྩོད་པར་བྱེད་པ་ནི་གལ་ཏེ་དངོས་པོ་ཇི་ལྟ་བ་བཞིན་ཞེས་བྱ་བའོ། །རྟོགས་པ་ཁོ་ན་སྟེ་གཅིག་པ་ཉིད་ཡིན་པ་ན་གཞན་ཡང་བ་ལང་ཉིད་བ་ལང་ཁོ་ན་རྟོགས་པའི་ཕྱིར་རོ་ཞེ་ན། ཁྱད་པར་མ་འདྲེས་པ་ཅན་ཞེས་
[263b]
[263b.1]སྨོས་ཏེ། ངོ་ཤེས་པའི་བདག་ཉིད་སྤངས་ནས་སོ། །མ་རིག་པའི་མཐུ་ལས་ཞེས་བྱ་བ་ནི་ལན་ནོ། །མ་རིག་པ་ནི་རྣམ་པར་རྟོག་པའི་བག་ཆགས་ཏེ་དེའི་མཐུ་ལས་འབྱུང་བའི་ཕྱིར་རོ། །དེ་མེད་ན་རྣམ་པར་རྟོག་པ་ཉིད་དུ་མི་འགྱུར་བའི་ཕྱིར་རྣམ་པར་རྟོག་པ་མེད་པའི་ཤེས་པ་ཉིད་ཡིན་པ་
[263b.2]དེས་ན་སྤྱིར་ཞེན་པར་ག་ལ་འགྱུར། རྣམ་པར་རྟོག་པའི་བག་ཆགས་ལ་བརྟེན་པ་ཡིན་ན་དེ་ཇི་ལྟ་བ་བཞིན་རྣམ་པར་རྟོག་པར་འགྱུར་རོ། །གལ་ཏེ་གང་གིས་རིག་པ་ལས་རྣམ་པར་རྟོག་པར་འགྱུར་བ་དམིགས་པ་མེད་ཀྱང་རྣམ་པར་རྟོག་པ་སྔ་མ་འཇུག་པའི་རྗེས་སུ་བྱེད་པའི་རྣམ་པར་ཤེས་པ་
[263b.3]ཐོག་མ་མེད་པ་ནས་རྒྱུ་འཇུག་པ་ཡིན་ནོ་ཞེས་བྱ་བ་འདི་གང་དུ་རྟོགས། ཤེས་པ་ཐམས་ཅད་ནི་དམིགས་པ་ལ་བརྟེན་པ་ཁོ་ན་ཡིན་མོད་ཀྱི་འོན་ཀྱང་དེ་ལ་ཆོས་མཐུན་པ་ལ་སོགས་པས་འཁྲུལ་པར་འགྱུར་བ་ཡིན་ཏེ། ཆུ་ལ་སོགས་པར་ཤེས་པ་བཞིན་ནོ་ཞེས་དོགས་པ་ལ། ཕྱི་རོལ་
[263b.4]གྱི་དོན་ཁོ་ན་ལ་ཞེས་སྨོས་སོ། །དཔེར་ན་སྒྲ་ལ་སོགས་པར་བསླད་པ་རྣམས་དམིགས་པ་ལ་བརྟེན་པའི་ཁྱད་པར་མེད་ཀྱང་ནང་གི་རབ་རིབ་ལ་སྐྱེ་བ་དེ་བཞིན་དུ་འདི་དག་མི་རིག་པའི་མཚན་ཉིད་ནང་གི་ཁྱད་པར་ཁོ་ན་ལས་སྐྱེ་བར་འགྱུར་ན་ཅི་འགལ་སྒྲུབ་པར་བྱེད་པ་མེད་པ་མ་ཡིན་ནམ་
[263b.5]ཞེ་ན། ཇི་ལྟར་མེད་དེ་བདེན་པའི་དམིགས་པ་བཀག་པ་ན་རྣམ་པར་རྟོག་པ་སྔར་གྱི་ཤེས་པའི་རྗེས་སུ་བྱེད་པ་ཉིད་ཀྱིས་སྐྱེ་བ་འགྲུབ་པའི་ཕྱིར་རོ། །དམིགས་པ་མེད་ཀྱང་རྣམ་པར་ཤེས་པ་ཤེས་པ་སྔ་མའི་རྗེས་སུ་བྱེད་པར་སྐྱེ་བ་སྲིད་ན། མིག་ལ་སོགས་པའི་ཤེས་པ་ཡང་རྣམ་
[263b.6]པ་འདི་ཉིད་དུ་འགྱུར་མོད། ཡུལ་དང་དབང་པོ་དང་ཡིད་ལ་བྱེད་པ་ལས་སྐྱེས་པས་ཅི་བྱ་ཞེས་སྟོན་པ་ནི། མ་རིག་པ་ལས་བྱུང་བའི་ཕྱིར་ཞེས་བྱ་བ་ཡིན་ནོ། །དེ་སྤོང་བ་ནི་མ་ཡིན་ཏེ་ཞེས་བྱ་བའོ། །རྣམ་པར་རྟོག་པ་རྣམས་ཀྱི་དམིགས་པ་བཀག་པ་རྣམ་པར་རྟོག་པའི་བག་ཆགས་རྒྱུ་ཉིད་
[263b.7]དུ་རྟོག་པའི་ཕྱིར་རྣམ་པར་རྟོག་པའི་བག་ཆགས་ཉིད་མ་རིག་པར་རྟོགས་པ་ཡིན་ནོ། །དེས་ན་དབང་པོའི་ཤེས་པ་རྣམ་པར་རྟོག་པའི་བག་ཆགས་ལས་སྐྱེ་བ་ཡིན་ན། དེ་རྣམ་པར་རྟོག་པར་འགྱུར་བ་ཁོ་ན་ཞིག་ན། རྣམ་པར་རྟོག་པ་མེད་པའི་ཕྱིར་འདི་དག་མ་རིག་པ་ལས་བྱུང་བ་མ་
[264a]
[264a.1]ཡིན་པ་དེས་ན་བསླད་པ་ཉིད་དོ། །རྣམ་པར་རྟོག་པ་ཉིད་མ་རིག་པ་ཡིན་ཏེ་ཞེས་བྱ་བ་ནི་རྣམ་པར་རྟོག་པའི་བག་ཆགས་ཉིད་ལ་རྣམ་པར་རྟོག་པར་བརྗོད་པ་ཡིན་ནོ། །འོ་ན་ནི་དབང་པོའི་རྣམ་པར་ཤེས་པ་རྣམས་ཀྱང་རྡུལ་ཕྲ་མོ་དང་རགས་པའི་རྣམ་པར་རྟོག་པ་མི་ཟད་པས་
[264a.2]དམིགས་པ་མེད་པས་ན་བག་ཆགས་ལ་བརྟེན་པར་འགྱུར་རོ་ཞེས་དོགས་པ་བསུ་ནས་ཡང་ན་ཞེས་སྨོས་སོ། །གལ་ཏེ་དབང་པོའི་ཤེས་པ་རྣམས་མ་བསླད་པའི་བདག་ཉིད་ཡིན་ན་དེའི་ཚེ་དེ་དག་ལ་ཐལ་བ་འདི་སྐྱོན་དུ་འགྱུར་བ་ཞིག་ན་ཁས་བླངས་ན་ནི་འདི་ཐལ་བ་མ་ཡིན་པས་སྐྱོན་མེད་དོ། །སྐྱོན་
[264a.3]མེད་པ་ཉིད་བཤད་པ་ནི། གཉིས་མེད་པ་ལ་ཞེས་བྱ་བའོ། །དངོས་སུ་ན་ནི་འདི་ཤེས་པ་ཙམ་ཡིན་མོད་ཀྱི་འཁྲུལ་པའི་དབང་གིས་སྔོན་པོ་ཤེས་པའི་རང་བཞིན་དུ་སྣང་ངོ་། །སྔོན་པོ་དང་སྔོན་པོ་མ་ཡིན་པ་དག་ལ་སོགས་པ་དག་སྲིད་པ་ཡིན་ན་ནི་དངོས་པོ་ཁོ་ན་ལ་འདི་དག་སྔོན་པོ་ཤེས་པའི་
[264a.4]རང་བཞིན་དུ་འགྱུར་བས་གཉིས་མེད་པ་མ་ཡིན་ཏེ་སྔོན་པོའི་རྣམ་པ་ཡང་དེ་ལ་དོན་དམ་ཡིན་པའི་ཕྱིར་རོ། །དེ་མེད་ན་ནི་གཉིས་མེད་པ་ཉིད་དོ། །གལ་ཏེ་མིག་ལ་སོགས་པའི་ཤེས་པ་རྣམས་བསླད་པ་ཉིད་ནི་ཇི་ལྟར་ཚད་མའི་ནང་དུ་བགྲང་བར་བྱེད་ཅེ་ན། ཐམས་ཅད་བསླད་པ་ཉིད་ཡིན་ཡང་
[264a.5]ཞེས་སྨོས་སོ། །གལ་ཏེ་རྣམ་པར་ཤེས་པ་ཐམས་ཅད་རྣམ་པར་བསླད་པ་ཁོ་ན་ཡིན་པ་དེ་ལྟ་ན་ཡང་ཚད་མ་དང་དེར་སྣང་བའི་རྣམ་པར་གཞག་པ་ཡོད་པ་ཁོ་ན་སྟེ། དེས་ན་འདི་དག་ཚད་མའི་ནང་དུ་བགྲང་བར་རིགས་པ་ཡིན་ནོ། །ཇི་ལྟར་རྣམ་པར་བསླད་པ་ཉིད་ལ་ཚད་མ་དང་དེར་སྣང་
[264a.6]བ་རྣམ་པར་གཞག་ཅེ་ན། བཤད་པ་ཇི་སྲིད་གནས་ཏེ་བག་ཆགས་ཞེས་བྱ་བ་གཉིས་སུ་སྣང་བའི་རྒྱུར་གྱུར་པ་ལོག་པའི་མཐར་ཐུག་པར་དོན་བྱ་བར་རུང་བར་མངོན་པར་འདོད་པ་ལ་མི་སླུ་བའི་ཕྱིར་ཏེ། དོན་བྱ་བ་གནས་པའི་ཕྱིར་རོ། །འདི་ལྟར་གལ་ཏེ་རྣམ་པར་ཤེས་པ་ཐམས་ཅད་
[264a.7]བསླད་པ་ཉིད་ཡིན་པ་དེ་ལྟ་ན་ཡང་ཇི་སྲིད་གཉིས་ཀྱི་བག་ཆགས་ལས་མ་འདས་པ་དེ་སྲིད་དུ་རུང་བར་མངོན་པར་འདོད་པ་མེའི་དོན་བྱ་བ་བཙོ་བ་དང་། སྲེག་པ་དང་། ཟས་ཟོས་པས་སྐྱེད་པ་བྲུ་བས་གདུངས་པ་ཉེ་བར་ཞི་བ་ཡོད་པ་ཡིན་ནོ། །དེས་ན་རྣམ་པ་འདི་ལྟ་བུའི་རྣམ་པར་ཤེས་
[264b]
[264b.1]པ་ནི་ཚད་མ་ཡིན་ནོ། །འདི་ལྟར་མེ་ལ་སོགས་པའི་ཤེས་པ་རྒྱུན་དུ་འབྱུང་བ་ན་བཀྲེས་པའི་སྡུག་བསྔལ་ལོག་པའི་བདག་ཉིད་ཀྱི་རྣམ་པར་རིག་པ་འབྱུང་བ་ཡིན་ནོ། །ཚད་མ་ལས་གཞན་ནི་ཚད་མ་ཡིན་པའི་ཕྱིར་འདི་ལྟ་བུའི་མཚན་ཉིད་ཅན་ཚད་མ་ཡིན་པ་ན། གང་དུ་མེ་ལ་སོགས་པའི་
[264b.2]ཤེས་པ་རྣམས་ཀྱི་རྒྱུན་རྣམ་པ་འདི་ལྟར་ཀུན་དུ་སྤྱོད་པ་མེད་པ་དེ་ལས་གཞན་ནི་བཟློག་པ་ཚད་མ་མ་ཡིན་ནོ། །དེས་ན་འདི་ན་འཇིག་རྟེན་པའི་མངོན་སུམ་དང་མངོན་སུམ་མ་ཡིན་པའི་ཐུན་མོང་གི་མཚན་ཉིད་ཡིན་ནོ། །ཡང་ཅིའི་དོན་དུ་འདི་རྣམ་པར་གཞག་ཅེ་ན། ལོག་པ་ཉིད་ཡིན་ཡང་
[264b.3]ཞེས་སྨོས་སོ། །ལོག་པས་བྱས་པ་ཡང་འགའ་ཞིག་ཏུ་ཡན་ལག་ཉིད་དུ་འགྱུར་བ་ཡིན་ཏེ། དཔེར་ན་བུད་མེད་ཀྱི་ཁྱད་པར་མར་འདུ་ཤེས་པའི་ཡུལ་ཅན་རབ་ཏུ་ཞི་བའི་ཡན་ལག་བཞིན་ནོ། །དེ་བཞིན་དུ་ཚད་མ་དང་དེར་སྣང་བ་རྣམ་པར་གཞག་པ་འདི་དམིགས་པ་མེད་པ་ཡིན་ཡང་ཚད་མ་
[264b.4]དང་ཚད་མ་མ་ཡིན་པ་བསྒྲུབ་པའི་དགོས་པའི་ཡན་ལག་ཏུ་འགྱུར་བ་ཡིན་ནོ། །མ་ལ་ངོ་བོ་ཉིད་ཀྱི་སྒྲུབ་པའི་རབ་ཏུ་ཞི་བ་གང་ཡིན་པ་དེ་ནི་དེ་ལྟར་མངོན་པར་ཞེན་པ་བྱས་པས་གཞན་ལ་ཡང་འགྲུབ་པ་དེ་ཁོ་ནའོ། །དེ་བཞིན་དུ་ཚད་མ་མ་ཡིན་ཡང་དེ་ལྟར་རྣམ་པར་གཞག་པ་ནི་ཚད་མས་བྱས་པའི་
[264b.5]ཡན་ལག་ཉིད་དུ་འགྱུར་བ་ཡིན་ཏེ། གཅིག་ལ་ནི་བག་ཆགས་བརྟན་པའི་ཕྱིར་དང་། གཞན་ལ་ནི་དེ་མེད་པའི་ཕྱིར་རོ། །རྣམ་པར་རིག་པར་སྨྲ་བ་ནི་འཇིག་རྟེན་པའི་ཚད་མ་དང་། ཚད་མ་མ་ཡིན་པའི་རང་བཞིན་དཔྱད་པ་ན། བག་ཆགས་བརྟན་པ་དང་མི་བརྟན་པ་ཙམ་རྒྱུ་མཚན་དུ་
[264b.6]ཉེ་བར་ལེན་ཏོ། །རང་ཉིད་རྣམ་པར་རིག་པ་ཙམ་དང་བདག་མེད་པ་ལ་སོགས་པའི་དངོས་པོ་རྣམ་པར་འཇོག་པ་ནི་དངོས་པོ་ཡུལ་ཅན་རྗེས་སུ་དཔག་པའི་ཚད་མས་འཇོག་ལ། ཆོས་ཅན་ནི་རང་རིག་པའི་མངོན་སུམ་གྱིས་སོ། །སྨིག་རྒྱུ་ལ་ཆུར་ཞེན་པ་འཁྲུལ་པར་ཁྱད་པར་མེད་ཀྱང་མི་
[264b.7]འདྲ་བར་བསྟན་པའི་ཕྱིར། སྨིག་རྒྱུ་དང་ཞེས་སྨོས་སོ། །སྨིག་རྒྱུ་ཆུ་ལས་ལོག་པ་ཡིན་ན། ཆུ་ཆུ་གཞན་ལས་ལོག་པ་ཡིན་ནོ། །དེས་སྨིག་རྒྱུ་དང་ཆུ་ལ་ཆུར་ཞེན་པ་ནི་ཆུ་ལས་ཐ་དད་པའི་དངོས་པོ་ལ་འབྱུང་བ་ཡིན་པ་དེས་ན་དངོས་པོ་ཐ་དད་པ་ལས་སྐྱེས་པ་ཡིན་ནོ། །དེ་ཉིད་ཀྱི་ཕྱིར་
[265a]
[265a.1]འདི་ནི་འཁྲུལ་པར་ཁྱད་པར་མེད་པ་ཡིན་ནོ། །དེ་ལྟ་མོད་ཀྱི་ཆུ་ལས་སྐྱེས་པའི་ཆུར་ཤེས་པ་ནི་མི་བསླུ་ལ་གཞན་ནི་མ་ཡིན་ནོ། །ཆུ་ཉིད་ལ་ཆུར་ཤེས་པ་སྐྱེས་པ་ན་ཇི་ལྟར་འཁྲུལ་པ་ཉིད་ཡིན་ཞེ་ན། གཞན་ཡིན་ཡང་ཆུ་ཉིད་དུ་ངེས་པའི་ཕྱིར་རོ། །གལ་ཏེ་
[265a.2]ཆུའི་རྣམ་པར་རྟོག་པ་ཆུའི་འབྲས་བུར་རུང་བས་བསྐྱེད་བྱ་ཡིན་ན་མི་རུང་བ་ལས་ཇི་ལྟར་འགྱུར། དེ་སྟེ་མི་རུང་བས་བསྐྱེད་པར་བྱ་བ་ཡིན་ན་རུང་བ་ལ་མི་འགྱུར་རོ། །གཅིག་ཉིད་རིགས་མཐུན་པ་དག་ལས་སྐྱེ་བ་ངེས་པར་ཁས་བླང་བ་ནི་མི་རུང་ངོ་ཞེས་བྱ་བ་དེ་སྨོས་པ་ནི། གལ་
[265a.3]ཏེ་མི་རུང་བ་ལས་ཞེས་བྱ་བའོ། །རུང་བ་ལས་སྐྱེ་བ་ལ་ལྟོས་ནས་མི་རུང་བ་ལས་སྐྱེ་བ་ལ་བརྩད་པ་ནི་ཉེ་བར་མཚོན་པ་སྟེ། དེ་བཞིན་དུ་མི་རུང་བ་ལ་བརྟེན་ནས་ཀྱང་རྟོགས་པར་བྱའོ། །དོགས་པ་འདི་བསུ་ནས་བཤད་པ་ནི་རྣམ་པར་རྟོག་པ་རྣམས་ནི་ཞེས་བྱ་བ་ཡིན་ནོ། །འདི་སྐད་
[265a.4]བརྗོད་པ་ཡིན་ཏེ། གལ་ཏེ་འདི་དག་རུང་བའམ་མི་རུང་བ་ལས་སྐྱེ་བ་ཡིན་ན་འདི་གཉི་ག་ལྟར་ངེས་པ་མ་ཡིན་ནོ་ཞེས་བྱ་བ་ནི་བདེན་པ་ཞིག་ན་འདི་དག་ནི་དོན་ལས་སྐྱེ་བ་མེད་པ་ཉིད་དོ། །ཇི་ལྟ་ཞེ་ན་རྣམ་པར་རྟོག་པ་རྣམས་ནི་དོན་ཇི་ལྟ་བ་བཞིན་ཞེས་སྨོས་ཏེ། གལ་ཏེ་འདི་དག་དོན་
[265a.5]དང་འབྲེལ་པ་ཡིན་ན་དོན་ཇི་ལྟ་བ་བཞིན་ཁོ་ནར་འགྱུར་ཏེ་མངོན་སུམ་བཞིན་ནོ། །དེ་ནི་དོན་གསལ་བའི་རང་བཞིན་གྱིས་ན་དོན་དང་འབྲེལ་པ་ཡིན་ནོ། །རྣམ་པར་རྟོག་པ་ནི་དེ་ལྟ་མ་ཡིན་ཏེ། དེས་ན་འདི་ནི་དོན་དང་འབྲེལ་པ་ངེས་པ་ཡོད་པ་མ་ཡིན་ནོ། །འོ་ན་ཇི་ལྟར་རུང་བ་དང་མི་
[265a.6]རུང་བ་ལས་སྐྱེ་ཞེས་བཤད་ཅེ་ན། ཕྱིར་བཤད་པ་ནི་སྨིག་རྒྱུ་མཐོང་བ་ཡོད་ན་ཞེས་བྱ་བའོ། །སྨིག་རྒྱུ་མཐོང་བ་ལས་ཆུར་འཁྲུལ་པའི་ཕྱིར་སྨིག་རྒྱུ་ལས་སྐྱེས་ཞེས་བྱ་བའི་དོན་དང་འབྲེལ་པའི་ཕྱིར་ནི་མ་ཡིན་ནོ་ཞེས་བཤད་པ་ནི་ཆུ་མ་ཡིན་པ་དང་བྲལ་བའི་དོན་ཅེས་བྱའོ། །དོན་དང་
[265a.7]འབྲེལ་པ་ཡིན་ན་དོན་གསལ་བའི་རང་བཞིན་དུ་དོན་ལས་སྐྱེ་བར་འགྱུར་བ་དེ་ལྟ་ན་ཡང་ཆུ་མ་ཡིན་པ་ལས་ལོག་པའི་དོན་གྱིས་རང་གི་རྣམ་པར་གཞག་པས་དོན་གསལ་བར་འགྱུར་བ་དོན་གྱིས་བསྐྱེད་པར་འགྱུར་ན་དེ་ནི་ཡོད་པ་མ་ཡིན་ནོ། །གལ་ཏེ་འཁྲུལ་པ་ཉིད་ཀྱིས་ཆུ་ལས་མ་
[265b]
[265b.1]སྐྱེས་པར་གྲུབ་པ་མ་ཡིན་ནམ་ཞེ་ན། གལ་ཏེ་དེ་ལྟ་ན་དོན་གསལ་བ་ཉིད་མེད་པར་ཤིན་ཏུ་གསལ་ལོ། །འོ་ན་ནི་དབང་པོའི་ཤེས་པ་ཡང་དོན་དང་འབྲེལ་པར་མི་འགྱུར་ཏེ། ཟླ་བ་གཉིས་ཀྱི་རྣམ་པར་ཤེས་པ་ཟླ་བ་གཉིས་ཀྱི་རང་གི་རྣམ་པར་གཞག་པས་མ་སྐྱེས་པའི་ཕྱིར་རོ་ཞེ་ན། ཟླ་བ་གཉིས་
[265b.2]ཀྱི་ཤེས་པ་དེ་ལྟར་མ་སྐྱེས་པའི་ཕྱིར་མ་འཁྲུལ་པ་ཡང་མ་སྐྱེས་པ་ནི་མ་ཡིན་ཏེ། གཞན་ཡིན་པའི་ཕྱིར་རོ། །དུ་བ་ས་བོན་ལས་མ་སྐྱེས་པས་མྱུ་གུ་མི་སྐྱེ་བར་ཐལ་བའི་ཕྱིར་རོ། །དེ་ལྟ་ན་འོ་ན་རྣམ་པར་རྟོག་པ་ཡང་དོན་དང་འབྲེལ་པ་ནི་མ་འཁྲུལ་པ་ཁོ་ནའོ་ཞེ་ན། དེ་ལྟ་བུ་ནི་ནུས་པ་མ་ཡིན་
[265b.3]ཏེ། སྔོན་པོ་དང་སེར་པོ་ལ་སོགས་པའི་ཤེས་པ་ཡུལ་གྱི་ཁྱད་པར་མྱོང་བའི་རང་བཞིན་ཉིད་ཀྱི་ཁྱད་པར་དུ་བྱས་པ་རྣམས་ཤེས་པ་ཙམ་གྱི་རང་བཞིན་དུ་ཁྱད་པར་མེད་ཀྱང་རྒྱུའི་ཁྱད་པར་སོ་སོར་ངེས་པ་ཡོད་པའི་ཕྱིར་སྔོན་པོ་ཉིད་ལ་ནི་སྔོན་པོའི་རྣམ་པར་ཤེས་པ་ཡིན་ལ། དེ་ལས་གཞན་
[265b.4]ལས་ནི་གཞན་ཡིན་ནོ། །ཆུའི་རྣམ་པར་རྟོག་པ་ལ་ནི་འདི་ཡོད་པ་མ་ཡིན་ནོ། །འདི་ཐམས་ཅད་ནི་ཆུ་གཅིག་རིག་པ་ཉིད་ཀྱིས་སྤྱིའི་ཡུལ་ཅན་ཡིན་པས་ཕན་ཚུན་ཁྱད་པར་མ་གྲུབ་པའི་ཕྱིར་གྲུབ་པ་དང་བདེ་བ་ཐ་མི་དད་པ་ཉིད་ཀྱི་གཅིག་འབྲེལ་པ་མ་ཡིན་ན་ཐམས་ཅད་ཀྱང་མ་འབྲེལ་བ་ཡིན་ནོ། །རང་
[265b.5]གི་མཚན་ཉིད་ཀྱི་ཡུལ་ཅན་གྱི་རྣམ་པར་ཤེས་པ་ནི་རྨི་ལམ་ན་སྔོན་པོ་ཤེས་པ་ཡོད་པས་སད་པའི་སྔོན་པོ་ཤེས་པ་འཁྲུལ་པར་འགྱུར་བ་གང་ཡིན་པ་གཅིག་འཁྲུལ་པས་གཞན་འཁྲུལ་པར་འགྱུར་བ་མ་ཡིན་ནོ། །སྨིག་རྒྱུ་མཐོང་ན་ཤེས་པ་ཉམས་སུ་མྱོང་བས་ཡིན་གྱི་དོན་ལས་མ་ཡིན་
[265b.6]མོད། འཁྲུལ་པ་གོ་ཇི་ལྟར་ཞེ་ན། དེའི་ཞེས་སྨོས་ཏེ། འཁྲུལ་པ་དེ་ནི་ཆུའི་བག་ཆགས་སད་པས་སྐྱེད་པ་ཡིན་ནོ། །གལ་ཏེ་སྨིག་རྒྱུ་མཐོང་ཡང་ཆུའི་བག་ཆགས་སད་ན། ཆུའི་རྣམ་པར་རྟོག་པ་ཁོ་ནར་འགྱུར་གྱི་ནམ་ཡང་སྨིག་རྒྱུའི་རྣམ་པར་རྟོག་པར་ནི་མི་འགྱུར་རོ་ཞེ་ན།
[265b.7]ཁྱད་པར་མཚོན་པ་ལ་མི་གསལ་བའི་ཕྱིར་ཞེས་སྨོས་ཏེ། མངོན་སུམ་གྱིས་ཆུ་དང་སྨིག་རྒྱུ་གཉིས་ཀྱི་འབྱེད་པར་བྱེད་པའི་ཁྱད་པར་འཛིན་པར་མི་ནུས་པའི་ཕྱིར་རོ། །གང་གི་མཐུས་སྨིག་རྒྱུའི་རྣམ་པར་རྟོག་པར་འགྱུར་བ་གཉི་ག་ལ་སྲིད་པའི་རྣམ་པའི་
[266a]
[266a.1]རྗེས་སུ་བྱེད་པ་ཅན་གྱི་མངོན་སུམ་ནི་འབྱེད་པར་བྱེད་པའི་ཁྱད་པར་གསལ་བ་མ་ཡིན་ནོ། །དེ་ལྟ་ན་ཡང་ཆུ་ཁོ་ནའི་བག་ཆགས་སད་པ་ག་ལས་ཡིན་ཏེ། དེ་ཙམ་གྱི་བག་ཆགས་སད་པར་འགྱུར་བ་མ་ཡིན་ནམ་ཞེས་སྐྱོན་ལ་ལྟོས་པས་ཞེས་བཤད་
[266a.2]དོ། །ཆུ་དོན་དུ་གཉེར་བས་ཆུའི་རྣམ་པ་ལས་ཐ་དད་པར་བྱེད་པ་སྨིག་རྒྱུའི་ཁྱད་པར་མ་བཟུང་བ་ན། ཆུ་ལ་སྲིད་པའི་རང་བཞིན་ལ་ཆུར་ཞེན་པ་ཡིན་ནོ། །དེ་བཞིན་དུ་ཐག་པའི་ཡུལ་ལ་སྦྲུལ་དུ་རྟོགས་པ་དང་། ཐོ་ཡོར་ལ་སྐྱེས་བུར་རྟོགས་པ་ལ་སོགས་པ་ལ་ཡང་རིག་པར་བྱའོ། །དེ་ལྟ་
[266a.3]བས་ན་ཞེས་བྱ་བ་ནས་རྗེས་སུ་འགྲོ་བ་མེད་པའི་ཕྱིར་རོ་ཞེས་བྱ་བའི་མཐར་ཐུག་པས་ནི་སྐབས་དེས་ན་དེ་ལྟར་ངོ་ཤེས་པ་ལ་སོགས་པའི་རྣམ་པ་ཅན་སྤྱིའི་རྣམ་པར་ཤེས་པ་འཁྲུལ་པ་ན་གསལ་བ་ཁོ་ན་ལས་སྐྱེས་པ་ཡིན་ནོ་ཞེས་རང་གི་ཕྱོགས་ལ་བསྒྲུབས་ནས། གཞན་གྱིས་ཀྱང་འདི་ཁས་
[266a.4]བླངས་པར་འགྱུར་རོ་ཞེས་བསྒྲུབ་པའི་ཕྱིར་གཞན་ཡང་ཞེས་སྨོས་སོ། །སྤྱི་སྨྲ་བའི་ལྟར་ན་འང་མི་ངོ་ཤེས་པའི་བདག་ཉིད་ཀྱི་བློ་ནི་སྤྱི་འབའ་ཞིག་ལ་དམིགས་པ་མ་ཡིན་ནོ། །དེས་ན་དེ་སྤྱི་ཁོ་ན་ལས་འབྱུང་བ་མ་ཡིན་ནོ། །སྤྱིའི་བློ་ནི་ཁྱད་པར་སྲེ་བའི་རྣམ་པ་ཅན་ཡིན་གྱི་ཐ་དད་པ་
[266a.5]དག་ལ་ཐ་མི་དད་པ་མཚམས་སྦྱོར་བའི་རྣམ་པ་ནི་མ་ཡིན་ཏེ། དེ་འདི་ལའོ་སྙམ་དུ་རྟོགས་པ་མེད་པའི་ཕྱིར་རོ། །དེས་ན་སྤྱིའི་བློས་རང་གི་མཚན་ཉིད་རྣམས་ལས་སྤྱི་ལོགས་སུ་བྱས་ཏེ་མ་དམིགས་པས་གསལ་བ་ཐ་མི་དད་པར་རྟོགས་པ་ན་གསལ་བ་ཡང་རྣམ་པ་ཐ་མི་དད་པར་
[266a.6]འཛིན་པའི་སྤྱོད་ཡུལ་དུ་འགྱུར་བ་ཁོ་ནའི་སྤྱི་འབའ་ཞིག་ནི་མ་ཡིན་ནོ། །གཅིག་ལས་སོ་སོར་ངེས་པར་བྱེད། མི་སྣང་ལ་གཉིས་ཀྱི་ཆོས་སྣང་གང་ཡིན་པ་དེ་ནི་གཅིག་ཁོ་ན་ལ་གཞག་པར་ནུས་པ་མ་ཡིན་ནོ། །དེས་ན་བ་ལང་ངོ་ཞེས་བྱ་བ་ནི་སྤྱི་བཞིན་དུ་བསལ་བའི་བློར་འགྱུར་ཏེ་
[266a.7]དབྱུག་པ་ཐོགས་པ་བཞིན་དུ་རང་གི་རྟེན་མ་རྟོགས་པ་ན་སྤྱི་དང་དེ་དང་ལྡན་པ་དག་ཐ་དད་པར་མ་རྟོགས་པའི་ཕྱིར་རོ། །ཇི་ལྟར་ན་སྤྱི་ཁོ་ནར་རྗེས་སུ་སོང་བར་རྟོགས་པ་གསལ་བ་ཞེས་བྱ་བར་འགྱུར། དེས་ན་འདི་ཁྱད་པར་རྣམས་ཐ་མི་དད་པར་འཛིན་པ་དང་། དེ་ལ་རྟེན་པ་གྲུབ་པའོ། །
[266b]
[266b.1]འགྲེལ་པ་ནི་གཞན་གྱིས་ཀྱང་ཞེས་བྱ་བའོ། །གལ་ཏེ་བ་ལང་སྙམ་པའི་ཤེས་པ་དེ་དང་ལྡན་པའི་བློ་ཡིན་ལ་ཁར་བ་ཐོགས་པ་བཞིན་རྣམ་པར་གཅད་པར་བྱ་བ་དང་། རྣམ་པར་གཅོད་པར་བྱེད་པའི་དངོས་པོ་ཡང་མེད་པ་ཡིན་ན་ནི་ཐ་མི་དད་པའི་བློ་ཁྱད་པར་ལ་དམིགས་པ་ཞིག་ན། འདི་སྤྱི་
[266b.2]ཙམ་ལ་བརྟེན་པ་ཉིད་ཡིན་ན་ནི་འགལ་བ་མེད་དེ་ཞེ་ན། རྟག་ཏུ་དེ་ཙམ་ཞེས་སྨོས་སོ། །རྟག་པ་ཁོ་ནར་སྒྲ་ལས་བྱུང་བའི་ཤེས་པ་དང་མངོན་སུམ་ལ་ཡང་ངོ་། །སྒྲ་ལས་བྱུང་བ་སྤྱིའི་ཡུལ་ཅན་ཡིན་ན་མངོན་སུམ་གྱིས་གསལ་བ་རྟོགས་པར་འགྱུར་རོ། །གང་གི་ཚེ་གཉི་གས་ཀྱང་སྤྱི་
[266b.3]ཁོ་ན་རྟོགས་པ་དེའི་ཚེ་གསལ་བ་མི་ཤེས་པ་ཁོ་ནར་ཐལ་བར་འགྱུར་རོ། །གསལ་བ་སོ་སོ་རང་གི་རང་བཞིན་ཤེས་པ་གཞན་ནི་མེད་དེ་ཁྱད་པར་དང་བྲལ་བའི་ཁྱད་པར་ཅན་གྱི་རང་བཞིན་མ་རྟོགས་པའི་ཕྱིར་རོ། །འདི་ལྟར་བ་ལང་འདི་ནི་ཁྲ་བོའོ་ཞེས་བྱ་བ་ལ་དེ་ཁོ་ན་རྟར་འགྱུར་ཏེ་དེ་ལ་
[266b.4]ཡང་ཁྲ་བོ་ཉིད་ཀྱི་སྤྱིའི་སྒོ་ནས་གསལ་བ་རྟོགས་པ་ཡིན་ནོ། །འདི་ཞེས་བྱ་བ་ཡང་རྟག་ཏུ་རྗེས་སུ་འགྲོ་བ་ཁོ་ནའོ། །དེས་ན་གལ་ཏེ་ཁྱད་པར་གྱི་བློ་ཁྱད་པར་གྱི་མཐར་ཐུག་པ་ཡིན་ན། འགལ་བ་མི་ཤེས་པ་ཁོ་ནའོ། །དེ་སྟེ་ཁྱད་པར་དང་ལྡན་པའི་མཐར་ཐུག་པ་ཡིན་ན། ཁྱད་པར་
[266b.5]རྣམས་ཐ་མི་དད་པའི་རྟེན་དུ་འགྱུར་བ་ཁོ་ན་སྟེ། བ་ལང་ངོ་ཞེས་བྱ་བ་འདི་ལ་གསལ་བའི་རྣམ་པ་གཞན་རྟོགས་པ་མེད་པའི་ཕྱིར་རོ། །མདོ་ཉིད་བཤད་པ་ནི། གལ་ཏེ་བློ་འདི་ཞེས་བྱ་བ་ཡིན་ནོ། །གལ་ཏེ་ཤེས་ན་སྐྱོན་འདིར་འགྱུར་གྱི། མ་ཤེས་ན་སྐྱོན་ཅི་ཡོད་ཅེ་ན། དེའི་ཚེ་ན་
[266b.6]ཞེས་སྨོས་སོ། །བ་ལང་ཞེས་བྱ་བར་ཤེས་པ་སྤྱི་ལ་དམིགས་པས་གསལ་བ་མ་ཤེས་ན་ནམ་ཡང་སྤྱི་དང་ལྡན་པ་སྐབས་ཀྱིས་སྤྱི་དང་འབྲེལ་པ་ངེས་པར་མི་འགྱུར་རོ། །འདི་རང་གི་ཕྱོགས་ལ་སྤྱི་དང་ལྡན་པའི་གསལ་བ་རྣམ་པར་འཇོག་པ་གང་ཡིན་པ་དེའི་ཚེ། ཚད་མ་ཅན་མ་ཡིན་
[266b.7]པར་ཐལ་ལོ་ཞེས་བྱ་བའི་ཐ་ཚིག་གོ། །གསལ་བ་ཤེས་པ་མེད་པར་ནི་གསལ་བའི་ཆོས་རྟོགས་པར་མི་འགྱུར་རོ་ཞེས་བྱ་བའི་ཐ་སྙད་མེད་པར་བརྗོད་པས་སྟོན་པར་བྱེད་དེ། གསལ་བ་མི་ཤེས་པའི་རྒྱུ་དེ་ལས་ན་ཐ་སྙད་མེད་པར་འགྱུར་རོ། །འགྲེལ་པ་ནི་གང་གི་ཚེ་ཞེས་བྱ་བ་ཡིན་
[267a]
[267a.1]ནོ། །ཁྱད་པར་རྣམས་ཞེས་བྱ་བ་འདི་རང་གི་མཚན་ཉིད་དག་གོ། །གལ་ཏེ་སྤྱི་འཛིན་པས་ཁྱད་པར་རྣམས་སོ་སོའི་རང་གི་རང་བཞིན་དུ་དམིགས་པ་དེའི་ཚེ་ཉེས་པ་ཅི་ཡོད། སྔོན་པོ་དང་སེར་པོ་བཞིན་དུ་གཉི་ག་ཤེས་པ་གཅིག་གིས་འཛིན་པར་མི་འགལ་བའི་ཕྱིར་རོ། །
[267a.2]དེས་ན་གཞན་གྱི་ལྟར་ན་འང་ཞེས་བྱ་བ་ལ་སོགས་པ་བརྗོད་པར་བྱ་བ་མ་ཡིན་པར་འགྱུར་རོ། །སྤྱིའི་བློ་ལ་ནི་གསལ་བ་ཡང་སོ་སོར་རང་གི་རང་བཞིན་དུ་སྣང་བ་ལ་འགལ་བ་ཅི་ཡང་མེད་པའི་ཕྱིར་འདི་བརྗོད་པས་ཅི་ཞིག་བྱ། འོན་ཏེ་གསལ་བའི་ཡུལ་ཅན་ཏུ་འགྱུར་དོགས་ན་འཐད་པ་ཡང་མ་ཡིན་པ་
[267a.3]དེས་ན་མི་འཛིན་པར་བརྗོད་པ་ཡིན་ནོ་ཞེ་ན། རྩོད་པ་འདི་ནི་གཞན་དུ་མཐར་ཐུག་པར་འགྱུར་ཏེ། དེས་ན། གལ་ཏེ་དངོས་ཅིག་གྲོགས་བྱེད་པའི། །ཞེས་བྱ་བ་ལ་སོགས་པ་བརྗོད་པར་བྱ་བ་མ་ཡིན་པར་འགྱུར། དེས་ན་འདི་ནི་ཁྱད་པར་རྣམས་ཀྱང་ཐ་མི་དད་པའི་ཤེས་པའི་རྟེན་ཉིད་དུ་བསྒྲུབ་
[267a.4]པ་ལ་ངེས་པ་ཡིན་པས་གལ་ཏེ་དགོས་པ་སོ་སོ་རང་གི་ངོ་བོས་དམིགས་པ་ཉིད་ཡིན་ན་ཉེས་པ་མེད་དོ། །དེ་ལྟ་མ་ཡིན་ན་ནི་དམིགས་པ་དོན་ཅི་ཡིན་ཞིང་དེ་དག་འབྲེལ་པར་གཟུང་ངོ་ཞེས་བྱ་བའི་ཚིག་ཀྱང་ཇི་ལྟར་རིགས་ཏེ་རང་གི་བདག་ཉིད་ཀྱིས་མ་རྟོགས་ན་འབྲེལ་པར་མི་འགྲུབ་པའི་ཕྱིར་རོ་ཞེ་ན། འདི་ལ་
[267a.5]བརྗོད་པ། རེ་ཞིག་ཐ་མི་དད་པའི་རྟོགས་པ་འདི་ནི་གྲུབ་པ་ཡིན་ནོ། །འདི་ཉིད་ནི་གཞན་གྱིས་ཀྱང་ཁྱད་པར་ལ་དམིགས་པར་ཁས་བླང་དགོས་ན། འདི་ལ་ཁྱད་པར་རྣམས་རང་བཞིན་དུ་སྣང་བ་ཡང་མེད་དོ། །དེས་ན་ཁྱད་པར་རྣམས་ཁོ་ན་ཐ་མི་དད་པར་དམིགས་པ་ཡིན་ནོ་ཞེས་བསྒྲུབ་པའི་
[267a.6]ཕྱིར་འདི་བརྗོད་པ་ཡིན་ནོ། །འོ་ན་འཁྲུལ་པ་ཡིན་ནོ་ཞེ་ན། འབད་པ་འདིའི་དོན་འདི་ཉིད་ཡིན་ནོ། །ཚིག་ཐ་མ་བཤད་པ་ནི་དེས་ན་དེ་ལྟར་གཞན་གྱི་ཁས་བླངས་པ་ལ་ཡང་གསལ་བ་རྣམས་སྤྱིའི་ཤེས་པའི་དམིགས་པ་ཉིད་ཡོད་པ་དེས་ན་སྤྱིའི་དོན་མེད་དོ་ཞེས་གཞུང་གཟུགས་པ་ན་གཞན་
[267a.7]དག་སྤྱི་ཡོད་ན་དེ་དམིགས་པ་ཉིད་དུ་འགྱུར་གྱི་གཞན་དུ་ནི་མ་ཡིན་པ་དེས་ན་དེས་ཁས་ལེན་ཏོ་ཞེས་གཞུང་གཟུགས་པའི་ཕྱིར། གལ་ཏེ་དངོས་གཅིག་གྲོགས་བྱེད་པའི། །ཞེས་སྨོས་སོ། །ཁྱད་པར་རྣམས་ཁོ་ན་ཐ་མི་དད་པར་དམིགས་སོ། །དེ་ཡང་འདི་དག་ལས་སྤྱི་མེད་པར་ནི་
[267b]
[267b.1]མི་འགྱུར་རོ། །དེས་ན་དེའི་དོན་ཉིད་དུ་སྤྱི་ཁས་ལེན་པ་ཡིན་ནོ་ཞེས་བྱ་བ་ནི་བསམ་པའོ། །འདི་ཉིད་བཤད་པ་ནི་གལ་ཏེ་འདི་སྙམ་དུ་ཞེས་བྱ་བ་ཡིན་ནོ། །གསལ་བ་རྣམས་རྒྱུ་འབའ་ཞིག་ཡིན་པར་ནི་མ་ཟད་ཀྱང་འོན་ཀྱང་དམིགས་པ་ཡིན་ནོ་ཞེས་དམིགས་པའི་དངོས་པོས་རྒྱུ་ཡིན་ལ་ཞེས་བྱ་བས་
[267b.2]བརྗོད་དོ། །དེ་ལྟ་ཡིན་དང་སྤྱི་རྣམ་པར་ཤེས་པ་དེ་བྱེད་པ་ལ་ལྷན་ཅིག་བྱེད་པ་ཉིད་ཡིན་ནོ། །དེས་ན་དམིགས་པ་ཡང་ལྷན་ཅིག་ཏུ་འགྱུར་བར་བརྗོད་པ་ཡིན་ནོ། །གལ་ཏེ་དངོས་གཅིག་གྲོགས་བྱེད་པའི། །ཞེས་བྱ་བའི་གང་ཡིན་པ་བསྟན་པ་ནི་གང་གི་ཚེ་ཞེས་བྱ་བ་ཡིན་ནོ། །འདི་བཟློག་པའི་
[267b.3]ཕྱིར་བརྗོད་པ་ནི་དངོས་པོ་ཅིག་དེས་དེ་རྣམས་ཀྱི་ཞེས་བྱ་བའོ། །འདིས་ནི་རེ་ཞིག་དམིགས་པའི་དངོས་པོ་ཉིད་གསལ་ཏོ། །གལ་ཏེ་སྤྱི་ཡོད་དུ་ཟིན་ཀྱང་གསལ་བ་རྣམས་གཅིག་ཏུ་གྱུར་པ་ཡིན་ན་སྤྱིས་ཅི་བྱ། དེ་སྟེ་མ་ཡིན་ན་དེ་ལྟ་ན་ནི་འོ་ན་རང་གི་བདག་ཉིད་གཅིག་ཏུ་གྱུར་པ་ཡིན་པའི་ཕྱིར་
[267b.4]གཅིག་པའི་ཡུལ་དུ་འགྱུར་གྱི། གསལ་བ་རྣམས་ནི་མ་ཡིན་ནོ། །དེ་ཉིད་དང་འཕྲོད་པ་འདུ་བ་ལས་ངོ་བོ་ཉིད་དུ་འགྱུར་བའི་ཐ་མི་དད་པས་དེ་དག་ཐ་མི་དད་པའི་རྣམ་པར་ཤེས་པའི་ཡུལ་ཉིད་དུ་འགྱུར་རོ་ཞེ་ན། འབྲེལ་པ་ཡིན་ཡང་གཞན་གཞན་གྱི་ངོ་བོར་འགྱུར་བ་ནི་མ་ཡིན་གྱི་འོན་ཀྱང་
[267b.5]འབྲེལ་པ་ཅན་ཉིད་དུ་འགྱུར་རོ། །རང་གི་ངོ་བོ་ཉིད་ནི་བདག་ཉིད་དུ་གྱུར་པ་ཡིན་ལ། སྤྱི་ནི་བདག་ཉིད་མ་ཡིན་ཏེ་ཐ་དད་པའི་ཕྱིར་རོ། །དེ་ལྟ་མ་ཡིན་ན་ནི་ཐ་མི་དད་པར་ཐལ་བའི་ཕྱིར་རོ། །ཐ་དད་པར་གྱུར་པའི་ཐ་མི་དད་པ་རང་བཞིན་དུ་གྱུར་པ་མ་ཡིན་པས་ནི་ཐ་དད་པར་གྱུར་པ་རྣམས་ཐ་མི་
[267b.6]དད་པར་རྟོགས་པར་ནུས་པ་མ་ཡིན་ཏེ། དེ་དང་ལྡན་པ་ཙམ་དུ་རྟོགས་པར་ཐལ་བའི་ཕྱིར་རོ་ཞེས་བཤད་ཟིན་ཏོ། །རྟོགས་པ་ཇི་ལྟ་བུར་གྱུར་པ་གང་གིས་གང་གི་རང་བཞིན་དེ་ཡིན་པར་རྟོགས་པར་འཐད་པ་དེ་ཉིད་དེ་ལྟར་དེ་ལྟ་བུ་ཉིད་དུ་དེའི་རང་བཞིན་ཉིད་དུ་འགྱུར་རོ། །ཐ་དད་པར་གྱུར་པ་
[267b.7]དང་ནི་འབྲེལ་དུ་ཟིན་ཀྱང་གཞན་དེའི་རང་བཞིན་དུ་རྟོགས་པ་མ་ཡིན་ནོ། །དེའི་ཕྱིར་ཐ་དད་པ་འབྲེལ་པ་ལས་ནི་རང་གི་ངོ་བོར་གྱུར་པ་ཐ་མི་དད་པར་མི་འགྱུར་ཏེ། དེས་ན་ཐ་མི་དད་པར་གྱུར་པའི་རང་བཞིན་ནི་མི་སྲིད་དོ། །དེ་བས་ན་གཅིག་གིས་ཐ་དད་པ་ཉིད་མི་སེལ་བས་ན། དངོས་པོ་
[268a]
[268a.1]གཅིག་གིས་གྲོགས་བྱེད་པའི་གསལ་བ་རྣམས་ཐ་མི་དད་པ་ལ་བརྟེན་པའི་རྣམ་པར་ཤེས་པའི་དམིགས་པ་ཉིད་མ་ཡིན་ནོ། །དེ་ཉིད་དུ་གཞུང་གཟུགས་པའི་ཕྱིར་ཐ་དད་པ་ཉིད་ལ་ནི་རྣམ་པར་ཤེས་པ་གཅིག་འགལ་ལོ་ཞེས་སྟོན་པ་ནི། ཐ་དད་ཕྱིར་ན་དེ་དག་ལ། །ཞེས་བྱ་
[268a.2]བའོ། །རྒྱུར་ཞེས་བྱ་བ་ནི་དམིགས་པར་རོ། །དེ་ཉིད་བཤད་པ་ནི་གཅིག་པུ་དེས་ཞེས་བྱ་བ་ལ་སོགས་པའོ། །དེ་དེ་ལྟར་འདི་དག་དམིགས་པའི་དངོས་པོས་གཅིག་གི་རྣམ་པར་ཤེས་པའི་རྒྱུ་ཡིན་པར་སྨྲ་བ་ལ། དམིགས་པ་ཉིད་བསལ་ནས་རྒྱུའི་དངོས་པོ་བསལ་བའི་ཕྱིར་ཏེ་དུ་མའང་
[268a.3]གཅིག་ལྟོས་ནས་ཞེས་སྨོས་སོ། །དངོས་པོ་དུ་མ་རྣམས་ཀྱང་གལ་ཏེ་གཅིག་ལ་ལྟོས་ནས་ཐ་མི་དད་པར་ཤེས་པར་བྱེད་པ་དེས་ན་དངོས་པོ་གཅིག་གྲོགས་བྱེད་པ་ཅན་གྱི་གསལ་བ་རྣམས་ཤེས་པའི་རྒྱུར་བརྗོད་དོ། །རྩོད་པ་བྱེད་པའི་དོགས་པ་འདི་ཉིད་སྟོན་པ་ནི། ཐ་དད་པའི་ཕྱིར་ཞེས་བྱ་བ་
[268a.4]སྨོས་སོ། །གང་གི་ཕྱིར་ཐ་དད་པ་དེའི་ཕྱིར་དུ་མས་མི་སྐྱེད་དོ་ཞེས་ནི་མི་སྨྲའོ། །ཇི་ལྟར་ཁྲ་བོ་དང་བུམ་པ་གཉིས་ཐ་དད་པའི་ཕྱིར་བ་ལང་གི་ཤེས་པའི་རྒྱུ་མ་ཡིན་པ་དེ་བཞིན་དུ་ཁྲ་བོ་དང་སེར་སྐྱ་དག་ཀྱང་འགྱུར་རོ་ཞེས་གང་གིས་བརྗོད་པར་འགྱུར་བ་ཐ་དད་པས་འབྲས་བུ་སྐྱེད་པ་ལ་འགལ་
[268a.5]བ་མེད་དོ། །འོན་ཀྱང་སྔ་མ་དག་ལ་ནི་རྣམ་པར་ཤེས་པ་དེ་སྐྱེད་པའི་ལྷན་ཅིག་བྱེད་པ་མེད་པ་ལ་འདི་གཉིས་ལ་ནི་ཡོད་པ་འབའ་ཞིག་ཏུ་ཟད་དོ། །དེས་ན་ལྷན་ཅིག་བྱེད་པ་དང་བྲལ་བས་འགལ་བ་ཉིད་དོ། །འདི་ལ་ནི་སྤྱི་གཅིག་ལྷན་ཅིག་བྱེད་པ་ཡོད་པ་ཡིན་ནོ་ཞེ་ན་དེ་བསལ་བའི་ཕྱིར། དེ་ལྟ་
[268a.6]ན་ནི་འོ་ན་ནི་ཞེས་སྨོས་སོ། །འདིས་སྤྱི་ལྷན་ཅིག་བྱེད་པ་ཡིན་ན་གསལ་བ་རྣམས་རྒྱུ་ཡིན་པར་བརྗོད་པ་རྗེས་སུ་འགྲོ་བ་དང་ལྡོག་པ་མེད་པར་བསྟན་པའི་སྒོ་ནས་སེལ་བར་བྱེད་དོ། །དེའི་འབྲས་བུ་ཉིད་དེ་གཅིག་པུའི་ཚད་མ་ཅན་ཡིན་པའི་ཕྱིར་ཏེ། དེ་མེད་ན་དེ་མི་རྟོགས་པའི་ཕྱིར་རོ། །
[268a.7]འགའ་ཞིག་ཡོད་པ་ན་འབྲས་བུ་སྔ་ན་མེད་པ་འབྱུང་བ་གང་ཞིག་མེད་ན་ལོག་ལ་གཞན་དག་ནི་ལོག་ཀྱང་མི་ལྡོག་པ་ནི་ལྷན་ཅིག་བྱེད་པའི་རྐྱེན་དེ་ཙམ་ཚོགས་པས་སྐྱེད་པར་རྟོགས་པ་ཡིན་ནོ། །དེ་ལ་སྤྱི་དང་རང་གི་མཚན་ཉིད་ཉེ་བར་གནས་ན་འབྱུང་བའི་འབྲས་བུ་གལ་ཏེ་གསལ་བ་ཡོད་
[268b]
[268b.1]ཀྱང་སྤྱི་མེད་པར་མི་འབྱུང་བའམ། སྤྱི་ཡོད་ཀྱང་གསལ་བ་མེད་པར་འབྱུང་བ་ཡིན་ནོ། །དེའི་ཚེ་གཉི་གས་བསྐྱེད་པར་བྱ་བ་ཡིན་པར་རྟོགས་པར་འགྱུར་བ་ཞིག་ན། ལྡོག་པ་བསྒྲུབ་པ་དེ་ནི་འདི་ལ་མི་སྲིད་དེ། གསལ་བ་མེད་པར་སྤྱི་ཡོད་པའམ། སྤྱི་ཡོད་པ་ན་གསལ་བ་མེད་པ་བསྟན་
[268b.2]པར་མི་ནུས་པའི་ཕྱིར་རོ། །དེ་ཉིད་ཀྱི་ཕྱིར་སྤྱི་འབའ་ཞིག་ལས་ཤེས་པ་དེ་འབྱུང་ངོ་ཞེས་བརྗོད་པར་མི་ནུས་ཏེ། གསལ་བ་མེད་པར་དེ་ཙམ་ཡོད་པར་བསྟན་པར་མི་ནུས་པའི་ཕྱིར་རོ། །དེས་ན་སློབ་དཔོན་སྤྱི་དང་ལྷན་ཅིག་པའི་གསལ་བ་རྒྱུ་ཉིད་དུ་རྟོགས་པ་ན་དེ་མེད་ཀྱང་འབྱུང་བ་ཉིད་
[268b.3]བཤད་པ་ནི། གསལ་བ་དེ་དག་རེ་རེ་མེད་པར་ཡང་སྤྱི་དེ་གཅིག་པུས་བསྐྱེད་པར་བྱ་བའི་བློ་ལ་གསལ་བ་དེ་རྣམས་ཀྱི་ནུས་པ་མེད་པ་ཡིན་ནོ། །རེ་ཞིག་བ་ལང་ངོ་སྙམ་པའི་རྣམ་པར་ཤེས་པ་ནི་སྤྱི་མེད་ན་མེད་པ་ཡིན་ཏེ། རྟ་ལ་མེད་པའི་ཕྱིར་རོ། །གལ་ཏེ་ཡང་སྤྱི་ཡོད་ན་གསལ་བ་
[268b.4]མེད་ཀྱང་འབྱུང་ངོ་ཞེས་བྱ་བར་མི་ནུས་པ་དེ་ལྟ་ན་ཡང་གསལ་བ་རེ་རེ་མེད་པར་ཅི་ཡོད་ན་འབྱུང་བ་ཁོ་ནའོ། །འདི་ལྟར་ཁྲ་བོ་མེད་པར་སེར་སྐྱའི་གསལ་བ་ལ་བ་ལང་ངོ་སྙམ་པའི་ཤེས་པ་འབྱུང་བ་ཁོ་ནའོ། །དེས་ན་གལ་ཏེ་དམིགས་པ་ཉིད་རྒྱུའི་རྩ་བ་ཅན་ཡིན་པ་དེ་ལྟ་ན་ཡང་དེ་ནི་སྤྱི་དང་ལྷན་
[268b.5]ཅིག་པའི་གསལ་བ་རྣམས་ལ་མེད་དོ་ཞེས་བཤད་པ་ནི་དེ་ཕྱིར། བློ་ཡིས་དེ་རྣམས་འཛིན་པ་མེད་པ་ཡིན། །ཞེས་འབྲེལ་ཏོ། །འགྲེལ་པ་ནི། ད་ནི་ཇི་ལྟར་ཞེས་བྱ་བའོ། །སྤྱི་མེད་ན་རྟ་ལ་བ་ལང་གི་ཤེས་པ་མེད་པའི་ཕྱིར་ལ། སྤྱི་ཡོད་ན་ཁྲ་བོ་ལ་སོགས་པ་ཡོད་པའི་ཕྱིར་རོ། །འདིར་
[268b.6]ནི་ཉེས་པ་མེད་དེ་ཞེས་སྨྲས་ཏེ། སྔོན་པོ་དང་སེར་པོ་ལ་སོགས་པའི་ཚོགས་པ་ནི་རྒྱུ་ཉིད་དེ། ཚོགས་པ་དེ་ནི་མིག་གི་རྣམ་པར་ཤེས་པའི་རྒྱུ་ཉིད་ཡིན་ནོ། །ལྷན་ཅིག་པར་གྱུར་པ་དེ་རྣམས་ལས་རེ་རེ་བསལ་ཀྱང་མིག་གི་རྣམ་པར་ཤེས་པ་མེད་པ་ནི་མ་ཡིན་ཡང་རེ་རེ་བསལ་བ་ཡང་འབྱུང་བ་དེ་
[268b.7]ལ་ལྟོས་ནས་ཚོགས་པ་མིག་གི་རྣམ་པར་ཤེས་པའི་རྒྱུ་མ་ཡིན་པར་ནུས་པ་མ་ཡིན་ནོ། །དེ་བཞིན་དུ་ཁྲ་བོ་ལ་སོགས་པར་བ་ལང་ཞེས་ཐ་དད་པ་མེད་པར་ཤེས་པ་སྐྱེད་པ་ལ་སྤྱིའི་ལྷན་ཅིག་བྱེད་པ་ཅན་དག་ལས་རེ་རེ་མེད་ཀྱང་རྣམ་པར་ཤེས་པ་དེ་ཡོད་པའི་ཕྱིར་ནུས་པ་ཉམས་པར་མི་འགྱུར་རོ་
[269a]
[269a.1]ཞེས་བྱ་བ་ནི་རྩོད་པ་པོའི་བསམ་པ་ཡིན་ཏེ། དེ་ལྟར་ན་དེ་དག་གི་ཚོགས་པ་ལ་ཡང་ནུས་པ་མེད་པ་མ་ཡིན་པ་ཞེས་བྱ་བ་འདིར་ཤིན་ཏུ་འབྲེལ་པར་འགྱུར་བ་ཡིན་ནོ། །འདི་བསལ་བའི་ཕྱིར། མི་མཐུན་པ་ཉེ་བར་བཀོད་པ་སྟེ་ཞེས་སྨོས་ཏེ་སྔོན་པོ་ལ་སོགས་པ་ཉེ་བར་བཀོད་
[269a.2]པ་ནི་སྐབས་དང་མཐུན་པ་མ་ཡིན་ནོ། །དེ་སྟོན་པ་ནི་འདི་ལྟར་ཞེས་བྱ་བའོ། །སྔོན་པོ་ལ་སོགས་པ་ནི་སོ་སོ་རང་གི་རང་བཞིན་གྱིས་མིག་གི་རྣམ་པར་ཤེས་པ་སྐྱེད་པ་ལ་རྒྱུ་ཉིད་དུ་རྟོགས་པའི་རྒྱུ་དེ་ཉིད་ཀྱིས་དེ་དག་ཚོགས་པ་རྒྱུ་ཡིན་ནོ། །དེ་ཉིད་ཀྱི་ཕྱིར་དེ་དག་ལས་གཅིག་མེད་ཀྱང་མིག་གི་རྣམ་
[269a.3]པར་ཤེས་པ་འབྱུང་སྟེ། སྔོན་པོ་བཞིན་དུ་སེར་པོ་ཡང་རྒྱུ་ཡིན་པའི་ཕྱིར་རོ། །སྔོན་པོ་མེད་ཀྱང་རང་གི་རྒྱུ་སེར་པོ་ལས་འབྱུང་བའི་ཕྱིར་དང་། དེ་བཞིན་དུ་སེར་པོ་མེད་ཀྱང་སྔོན་པོ་ལས་འབྱུང་བའི་ཕྱིར་རོ། །དེ་རྣམས་ཚོགས་པ་ན་ཡང་ཡིན་པའི་ཕྱིར་འགལ་བ་ཅི་ཡང་མེད་དོ། །གང་ཞིག་
[269a.4]མེད་ན་ཤེས་པ་མེད་པ་དངོས་སུ་བརྗོད་པར་མི་ནུས་པའི་ཕྱིར་རེ་རེ་མེད་ན་ཤེས་པ་མེད་པ་ལས་དེ་རྒྱུ་མ་ཡིན་པ་ཉིད་དུ་འགྱུར་བ་ཚོགས་པ་ཞེས་བྱ་བ་ནི་གཞན་འགའ་ཡང་ཡོད་པ་མ་ཡིན་ནོ། །དེ་ལ་ཡོད་པའི་ཕྱིར་སྤྱི་ལས་ཤེས་པ་དེ་ཉིད་ཡིན་ནམ་འོན་ཏེ་གཉི་ག་ལས་ཡིན་ཞེས་ཐེ་ཚོམ་ཟ་བའི་ཕྱིར་
[269a.5]གསལ་བ་རྣམས་ནི་ཚོགས་པ་ན་བ་ལང་རྣམས་སོ་ཞེས་རྟོགས་པའམ། སོ་སོར་འདི་ལ་བ་ལང་ཞེས་རྟོགས་པའི་ཤེས་པ་དེའི་རྒྱུ་ཉིད་དུ་གྲུབ་པ་མ་ཡིན་པ་དེ་བས་ན་མི་མཚུངས་སོ། །འགྲེལ་པ་ནི་སྔོན་པོ་ལ་སོགས་པ་ལ་ཞེས་བྱ་བ་ཡིན་ནོ། །སྔོན་པོ་ལ་སོགས་པ་དང་གསལ་བ་རྣམས་མི་
[269a.6]མཚུངས་པར་སྟོན་པ་ནི། གསལ་བ་རྣམས་ནི་ཞེས་བྱ་བ་ཡིན་ནོ། །བསམ་པ་ནི་འདི་ཡིན་ཏེ་གལ་ཏེ་སྤྱིས་སྟོང་པའི་གསལ་བ་རྣམས་རྗེས་སུ་འགྲོ་བའི་རྣམ་པར་ཤེས་པ་བྱེད་ན་ནི་དེའི་ཚེ་སྔོན་པོ་ལ་སོགས་པ་བཞིན་དུ་འདི་དག་རྣམ་པར་ཤེས་པ་དེའི་རྒྱུར་འགྱུར་བ་ཞིག་ན། གསལ་བ་རྣམས་ནི་
[269a.7]སྤྱི་ལ་མ་ལྟོས་པར་ཤེས་པ་སྐྱེད་པ་མ་ཡིན་གྱི་འོན་ཀྱང་སྤྱི་དང་ལྷན་ཅིག་པ་ཁོ་ནས་ཡིན་ནོ། །དེ་ལྟ་ཡིན་དང་རྣམ་པར་ཤེས་པ་འདི་སྤྱི་ལས་འབྱུང་བ་ཡིན་ནམ་ཡང་ན་སྤྱི་དང་རང་གི་མཚན་ཉིད་གཉི་ག་ལས་ཡིན་ཞེས་ཐེ་ཚོམ་ཟ་བ་ཁོ་ནའོ། །དེ་ལྟ་བས་ན་ཞེས་བྱ་བ་ནི་གང་གི་ཕྱིར་གསལ་བ་
[269b]
[269b.1]སོ་སོར་མེད་ཀྱང་སྤྱིའི་ཤེས་པ་འབྱུང་བ་དང་སྔོན་པོ་ལ་སོགས་པ་ཚོགས་པའི་རིགས་པ་ཡང་མ་གྲུབ་པ་དེ་བས་བསལ་བ་རྣམས་ཀྱིས་མི་ནུས་པ་ཁོ་ནའོ། །ཕ་རོལ་པོ་དེ་དག་རེ་རེ་མེད་པར་རྣམ་པར་ཤེས་པ་དེ་འབྱུང་བས་དེའི་འབྲས་བུ་མ་ཡིན་པར་མི་འགྱུར་རོ་ཞེས་བསྟན་པའི་ཕྱིར། གལ་ཏེ་དེ་
[269b.2]དག་འགའ་ཞིག་ལ། །ཞེས་སྨོས་སོ། །གསལ་བ་ལྷན་ཅིག་བྱེད་པ་ཅན་གྱི་སྤྱི་རྗེས་སུ་འགྲོ་བའི་རྣམ་པར་ཤེས་པ་སྐྱེད་པར་བྱེད་དོ། །དེས་ན་གལ་ཏེ་དེ་དག་སོ་སོར་མེད་ཀྱང་སྐྱེད་པར་བྱེད་པ་དེ་ལྟ་ན་ཡང་གསལ་བ་ལ་མ་ལྟོས་པར་ནི་བྱེད་པ་པོ་མ་ཡིན་ཏེ། གསལ་བ་མཐའ་དག་མེད་པར་
[269b.3]དེ་བྱེད་ན་དེ་ལྟར་ཐལ་བའི་ཕྱིར་རོ། །གསལ་བ་གཅིག་མེད་པར་སྐྱེད་པ་ནི་ལྷན་ཅིག་བྱེད་པའི་གསལ་བ་གཞན་ཡོད་པ་ཡིན་པས་དེ་དང་ལྷན་ཅིག་བྱེད་པའི་སྐྱེད་པར་བྱེད་པ་ཡིན་ནོ། །དེས་ན་གསལ་བ་སྤྱིའི་ལྷན་ཅིག་བྱེད་པ་ཅན་ཡིན་དང་། སྤྱི་ཡང་གསལ་བའི་ལྷན་ཅིག་བྱེད་པ་ཅན་གྱི་རྣམ་
[269b.4]པར་ཤེས་པ་དེ་སྐྱེད་པའི་ཕྱིར་གསལ་བ་མེད་དོ། །འདི་ཉིད་བཤད་པ་ནི་འོན་ཏེ་ཞེས་བྱ་བ་ཡིན་ནོ། །ཐ་ག་པ་ཐག་ཟངས་མེད་པར་རས་ཡུག་མི་འཐག་སྟེ། འབའ་ཞིག་གིས་མི་འཐག་པའི་ཕྱིར་རོ། །དེ་ལྟ་མོད་ཀྱི་ཐག་ཟངས་གཅིག་མེད་ཀྱང་ཐག་ཟངས་གཞན་གྱིས་འཐག་ལ། དེ་མེད་ཀྱང་
[269b.5]གཞན་གྱིས་ཡིན་ནོ། །དེས་ན་དེ་དག་རེ་རེ་མེད་ཀྱང་འཐག་པའི་ཕྱིར་ཐག་ཟངས་རྒྱུ་མ་ཡིན་པ་ཉིད་ནི་མ་ཡིན་ཏེ་ཐག་ཟངས་གཅིག་མེད་ཀྱང་ཐག་ཟངས་གཞན་གྱིས་འཐག་པའི་ཕྱིར་རོ། །དེ་ཁོ་ན་ལས་ཞེས་བྱ་བ་ནི་ཐག་ཟངས་དང་བྲལ་བའི་ཐ་ག་པ་འབའ་ཞིག་ལས་སོ། །དེ་བཞིན་དུ་སྤྱི་འབའ་ཞིག་ནི་རྣམ་
[269b.6]པར་ཤེས་པ་དེའི་རྒྱུ་མ་ཡིན་ནོ། །དེ་ལྟར་ཕ་རོལ་པོས་རྗེས་སུ་འགྲོ་བ་དང་ལྡོག་པ་མེད་པ་བསྟན་པར་མི་ནུས་པར་བརྗོད་པ་ཡིན་ནོ། །དེ་ལྟ་ན་ཡང་རྗེས་སུ་འགྲོ་བ་དག་ལ་ཐེ་ཚོམ་ཟ་བ་ཡིན་ཏེ། འདིར་ཐག་ཟངས་ལ་སོགས་པའི་ཚུལ་ཡོད་ཀྱང་མ་ངེས་པའི་ཕྱིར་རོ། །ཇི་ལྟར་ཐག་ཟངས་མེད་
[269b.7]པར་ཐ་ག་པ་འབའ་ཞིག་ལས་མི་འབྱུང་བར་རྟོགས་པ་དེ་བཞིན་དུ་གསལ་བ་མེད་པར་སྤྱི་འབའ་ཞིག་ལས་མི་འབྱུང་བར་རྟོགས་པ་ནི་མ་ཡིན་ཏེ། གསལ་བ་ཐམས་ཅད་ལ་སོང་བར་སྨྲ་བའི་ལྟ་བ་ལ་གསལ་བས་སྟོང་པའི་ཡུལ་ན་དེ་མེད་པའི་ཕྱིར་རོ། །ཐམས་ཅད་ཀྱི་ཐམས་ཅད་མ་སོང་བ་ལ་ཡང་
[270a]
[270a.1]གསལ་བ་མེད་ན་གསལ་བར་མ་གྱུར་པའི་ཕྱིར་རྣམ་པར་ཤེས་པ་དེ་གྲུབ་པར་བྱེད་པ་མ་ཡིན་ནམ། ཡང་ན་ལྷན་ཅིག་བྱེད་པ་མེད་པའི་ཕྱིར་ཡིན་ཞེས་ངེས་པ་མེད་དོ། །ལྷན་ཅིག་བྱེད་པ་ཉིད་ཡིན་ན་ནི་དེ་གཉི་ག་ལས་སྐྱེ་ལ། གསལ་བས་མངོན་པར་གསལ་བར་གྱུར་པ་
[270a.2]ལས་ཡིན་ན་ནི་སྤྱི་འབའ་ཞིག་ལས་སོ། །སྣང་བའི་དེ་མ་ཐག་པ་ཅན་གྱི་དེ་སྐྱེད་པ་ནི་མ་གྲུབ་སྟེ། ཐ་མི་དད་པའི་ཤེས་པ་ལ་གསལ་བ་ན་མ་གྲུབ་པའི་གསལ་བ་དག་ཁོ་ན་རྣམ་པ་གཅིག་ཏུ་སྣང་བ་འཁྲུལ་པ་སྤྱིའི་ཤེས་པའི་རྒྱུ་མཚན་ཡིན་ནོ་ཞེས་བསྒྲུབ་པ་ན་སྤྱི་དང་ལྷན་ཅིག་པའི་གསལ་བ་ཁོ་ན་
[270a.3]རྟེན་གྱི་དངོས་པོར་འཐད་པ་ཡིན་ནོ་ཞེས་གཞན་འདོད་པ་བསལ་བ་ཡིན་ནོ། །དེ་ནི་རྒྱུ་ཉིད་དུ་མ་གྲུབ་ཀྱང་ཁས་བླངས་ནས་ཉེས་པ་གཞན་བཤད་པ་ནི། དེ་ལྟ་ཡིན་ན་ཞེས་བྱ་བའོ། །ཐ་ག་པའི་ཚུལ་ཡོད་པ་ཡིན་ཡང་གསལ་བ་དག་སྤྱི་ལ་ཕན་འདོགས་ན་ཇི་ལྟ་བློ་གཅིག་ཉིད་ལ་ཕན་འདོགས་པ་མ་ཡིན་
[270a.4]འདི་སྐད་བརྗོད་པ་ཡིན་ཏེ། གསལ་བ་དང་ལྷན་ཅིག་བྱེད་པ་ཅན་གྱི་སྤྱི་ཤེས་པ་བྱེད་པ་ཡིན་ནོ། །གསལ་བ་དེ་དག་གིས་ཕན་བཏགས་པའི་སྤྱི་ཤེས་པ་སྐྱེད་པར་བྱེད་པ་ཡིན་པས་གསལ་བ་ཐ་དད་པ་རྣམས་ལ་ཡང་དོན་གཅིག་ལ་ཕན་འདོགས་པ་ཉིད་ཀྱི་རང་བཞིན་དེ་ཁྱད་པར་མེད་པ་ཡིན་ན། གལ་
[270a.5]ཏེ་འདི་དག་གིས་སྤྱི་ལ་ཕན་འདོགས་པའི་རང་བཞིན་སོ་སོ་རང་གི་རང་བཞིན་ལ་ཁྱད་པར་མེད་པ་ཡོད་ན། རྣམ་པ་དེ་ལྟ་བུའི་རང་བཞིན་དེ་ཉིད་ཀྱི་ཤེས་པ་གཅིག་སྐྱེད་པར་འགྱུར་བ་དང་། དེའི་དམིགས་པ་ཉིད་དུ་འགྲོ་ལ་རག་མོད་དོན་བྱ་བ་གཅིག་བྱེད་པ་མི་འགལ་བས་ན་རང་བཞིན་གཅིག་ལས་མི་
[270a.6]ཉམས་པའི་ཕྱིར་རོ། །བློ་ཉིད་ལ་ཕན་འདོགས་ལ་རག་མོད་སྤྱི་ལ་ནི་མ་ཡིན་ནོ་ཞེས་བྱ་བའི་དོན་འདི་ཉིད་ལ་གཏན་ཚིགས་གཞན་བཤད་པ་ནི། ཕན་པ་གང་ཡིན་པ་འདི་ནི་གསལ་བ་རྣམས་ཀྱི་འབྲས་བུར་འགྱུར་ཏེ། དེའི་ཕྱིར་ཡང་བློ་ལ་ཕན་འདོགས་པར་འགྱུར་གྱི་དེ་ལ་ནི་མ་ཡིན་ནོ། །གལ་ཏེ་
[270a.7]ཕན་པ་འབྲས་བུ་ཡིན་མོད། ཇི་ལྟར་བློ་ལ་འདོགས་ཀྱི་སྤྱི་ལ་ནི་མ་ཡིན་ཞེ་ན། གཏན་ཚིགས་གཞན་ཡང་བཤད་པ་ནི། །ཕན་འདོགས་པ་ནི་སྐྱེད་པ་ཡིན། །ཞེས་བྱ་བའོ། །འདིར་ནི་འདི་ལྟར་འབྲེལ་པ་བརྗོད་པར་འདོད་པ་ཡིན་ཏེ་དེ་ལྟ་མ་ཡིན་ན་འདིའི་ཞེས་བྱ་བ་མི་འཐད་དེ། དེའི་སྒྲ་ཡང་
[270b]
[270b.1]སྦྱོར་བ་སྲིད་པའི་ཕྱིར་རོ། །ཆ་སྔ་མ་བཤད་པའི་ཕྱིར་སྔོན་བཞིན་དུ་ཞེས་སྨོས་སོ། །སྤྱིའི་རྣམ་པར་ཤེས་པ་དེ་སྐྱེད་པའི་ནུས་པ་གསལ་བ་ལས་མ་སྐྱེས་ན་དེའི་བདག་ཉིད་ལ་བོགས་འབྱུང་བ་མེད་པར་འགྱུར་རོ། །དེས་ན་གསལ་བ་དང་འབྲེལ་པའི་སྔ་རོལ་ན་འདི་དག་ཉིད་ཇི་ལྟ་བ་ཉིད་དུ་གྱུར་པ་དེ་ཁོ་ན་
[270b.2]ལྟར་གལ་ཏེ་གསལ་བ་དང་འབྲེལ་ཀྱང་ཡིན་ན་ནི། དེ་ལས་ཤེས་པ་སྐྱེད་པའི་ནུས་པ་མ་སྐྱེས་པའི་ཕྱིར་དེའི་ཚེ་ཇི་ལྟར་གསལ་བ་རྣམས་ཕན་པས་ནི་འདིའི་ལྷན་ཅིག་བྱེད་པར་འགྱུར། ཕན་པ་འབྲས་བུ་མ་ཡིན་ཡང་གལ་ཏེ་འགའ་ཞིག་ཕན་འདོགས་པར་བྱེད་པ་ཡིན་ན་ནི་ཧ་ཅང་ཐལ་བར་འགྱུར་
[270b.3]རོ། །གལ་ཏེ་ཕན་པ་ལྷན་ཅིག་བྱེད་པ་དག་གིས་བྱད་པའི་ཕྱིར་ཕན་པ་འབྲས་བུ་ཡིན་མོད། གང་གི་སྤྱི་རྟག་པའི་ཕྱིར་དེ་མེད་པས་ན་བློ་ཉིད་ལ་དེར་འགྱུར་བ་ཕན་འདོགས་པ་ཕན་གདགས་པར་བྱ་བའི་སྐྱེད་བྱེད་ཡིན་ནོ་ཞེས་བྱ་བ་ག་ལས་ཞེས་འདོགས་ན། བསྐྱེད་པར་བྱ་བའི་ཕན་པ་དོན་གཞན་
[270b.4]ཡིན་པ་ཡང་སེལ་བ་ནི་ཕན་གདགས་པར་བྱ་བ་ལ་སོགས་པ་དོན་གཞན་ཞིག་བྱེད་ན་ནི། ཕན་པས་ཕན་པ་བྱ་བ་ལ་ཅི་ཞིག་བྱེད། བོགས་གཞན་ཞིག་ཡིན་ན། དེའི་བོགས་མེད་པ་ཁོ་ནའི་བདག་ཉིད་ཡིན་པའི་ཕྱིར་དེ་ལ་ཕན་པ་དེས་ཅི་ཡང་བྱར་མེད་དོ། །གལ་ཏེ་བོགས་གཞན་ཡིན་ཡང་
[270b.5]བདག་ཉིད་དེ་ལ་སྐྱེས་པ་དེས་ན་བོགས་དེས་འདི་བོགས་དང་བཅས་པ་ཁོ་ནར་འགྱུར་བ་མ་ཡིན་ནམ། དེ་ཇི་ལྟར་ན་དེས་དེ་ལ་ཅི་ཞིག་བྱེད་ཅེས་བརྗོད་ཅེ་ན་ཞེས་དོགས་པ་ལ་དེ་དེའི་རྟེན་ཉིད་ཡིན་ན་ཞེས་སྨོས་ཏེ། སྤྱི་དེ་དེའི་རྟེན་ཉིད་ཡིན་ན་ཕན་པའི་རྟེན་ཉིད་ཡིན་ན་ཞེས་གཞན་གྱི་གཞུང་རྗེས་
[270b.6]སུ་བརྗོད་ནས་ཕན་འདོགས་པ་མེད་པ་ལ་ཞེས་བྱ་བས་སེལ་བར་བྱེད་དོ། །ཕན་འདོགས་པ་མེད་པ་གང་ཡིན་པ་དེ་ནི་རྟེན་མ་ཡིན་ལ་བརྟེན་པ་ཡང་མ་ཡིན་ནོ་ཞེས་བྱ་བའི་ཐ་ཚིག་གོ། །བརྟེན་པས་ཀྱང་ཕན་བཏགས་ནས་རྟེན་རྟེན་ཉིད་དུ་འགྱུར་བ་ཡིན་ལ་རྟེན་གྱིས་ཀྱང་ཕན་བཏགས་པས་བརྟེན་པ་ཉིད་
[270b.7]ཡིན་ནོ་ཞེས་ཁར་གཞོང་དང་རྒྱ་ཤུག་རྣམ་འགྲེལ་དུ་བཤད་པར་འགྱུར་རོ། །དེས་ན་ཕན་འདོགས་པ་མ་ཡིན་པ་གང་ཡིན་པ་དེ་ནི་རྟེན་ཡང་མ་ཡིན་བརྟེན་པ་ཡང་མ་ཡིན་པའི་ཕྱིར་ན་ཕན་འདོགས་པ་མེད་པ་ལ་རྟེན་དང་བརྟེན་པའི་དངོས་པོ་ཅི་ཡང་མེད་དོ། །ཕན་འདོགས་པ་མེད་པ་ལ་རྟེན་དང་
[271a]
[271a.1]བརྟེན་པའི་དངོས་པོ་ཇི་ལྟར་མེད་པ་ནི་མདུན་ནས་སྟོན་པར་འགྱུར་རོ། །ཕན་པ་བྱས་པའི་རང་བཞིན་གྱི་ཁྱད་པར་མེད་ཀྱང་རྟེན་དང་བརྟེན་པའི་དངོས་པོ་ཡིན་ན་ནི་ཧ་ཅང་ཐལ་བར་འགྱུར་རོ། །དེ་སྟེ་ཕན་འདོགས་པ་ཡོད་དོ་ཞེ་ན་དེའི་ཚེ་རྟེན་ལས་ཀྱང་བརྟེན་པ་སྐྱེ་བ་ཡིན་
[271a.2]པའི་ཕྱིར་དེ་ཉིད་ལས་ཕན་པ་འབྱུང་བའམ། གསལ་བས་དེ་བྱེད་པའི་ཕྱིར་ཕན་འདོགས་པས་ཅི་ཞིག་བྱ། འབྲེལ་པ་ནི་སྐྱེ་བའོ། །སྤྱི་འབའ་ཞིག་གིས་བདག་ཉིད་ལ་བརྟེན་པའི་ཕན་པ་སྐྱེད་པར་མི་ནུས་ཏེ། དེས་ན་གསལ་བ་ལ་ལྟོས་ནས་དེ་སྐྱེད་པའི་ཕྱིར་གསལ་བས་ཕན་འདོགས་པར་
[271a.3]བྱེད་པ་ཡིན་ནོ་ཞེས་འདོགས་ན། དེ་ལས་སྐྱེ་བའི་ཆོས་ཅན་ནི་ཞེས་སྨོས་སོ། །ལྟོས་པ་ཞེས་བྱ་བ་ནི་ཅི་ཞིག་ཡིན། སྤྱི་ལ་ནི་དེ་མི་འཐད་དེ་གང་གི་ཕྱིར་ལྟོས་པར་བྱ་བ་དེ་ལས་སྐྱེ་བའི་ཆོས་ཅན་ནི་ལྟོས་པ་ཡིན་ནོ། །ཅིའི་ཕྱིར་ཞེ་ན་རང་བཞིན་འབྲེལ་པའི་ཕྱིར་རོ། །དེས་ན་བསྒྲུབ་པར་བྱ་བའི་རང་
[271a.4]བཞིན་ནི་དེ་ཉིད་ལས་སྐྱེ་བའི་ཕྱིར་དེ་ལ་ལྟོས་པར་རིག་པའི་ཕྱིར་རོ་ཞེས་ཀྱང་སྟོན་པར་འགྱུར་རོ། །འདི་ཡང་ཇི་ལྟར་ཞེས་དོགས་ན་རྣམ་པ་གཞན་མེད་པ་འཆད་པ་ནི། བོགས་དབྱུང་དུ་མེད་པ་ཅན་གྱི་བདག་ཅན་ཞེས་སྨོས་ཏེ། དེ་ལས་དེའི་རང་བཞིན་སྐྱེས་པ་མེད་པས་ནི་དེ་ལ་ལྟོས་པར་འགལ་
[271a.5]བའི་ཕྱིར་རོ། །དེ་ལྟ་བས་ན་ཞེས་བྱ་བས་ནི། བསྒྲུབ་པར་བྱ་བ་མཇུག་སྡུད་པའོ། །གང་ཅུང་ཟད་ཅེས་བྱ་བ་ནི་དེ་ཉིད་ཁྱད་པར་བྱེད་པར་བྱ་བ་སྟེ། གཉུག་མ་ནི་རྟེན་དང་བརྟེན་པའི་དངོས་པོ་ལྟོས་པར་བྱ་བ་ཉིད་ཡིན་ལ། གང་ཅུང་ཟད་གསལ་བ་བྱེད་པ་ལ་སོགས་པ་གཞན་གང་ཡིན་པ་དེ་
[271a.6]ཐམས་ཅད་ཀྱང་བསྐྱེད་པར་བྱ་བའི་བདག་ཉིད་དོ། །གཞན་གྱི་དངོས་པོ་ཞེས་བྱ་བའི་གཏན་ཚིགས་མཇུག་སྡུད་པའོ། །དེས་ན་དེ་ལྟར་བསྒྲུབ་བྱ་དང་སྒྲུབ་བྱེད་ཀྱི་མཇུག་བསྡུས་ནས་སྐབས་ཉིད་མཇུག་སྡུད་པ་ནི། དེའི་ཕྱིར་གསལ་བས་ཞེས་བྱ་བ་ཡིན་ཏེ། འདི་དེ་རྣམས་ཀྱི་འབྲས་བུར་
[271a.7]འགྱུར་ཞེས་བྱ་བར་གྲུབ་པོ། །གསལ་བ་ལ་མི་ལྟོས་ན་ཡང་གསལ་བ་རྣམས་རྣམ་པར་ཤེས་པ་དེའི་གཟུང་བ་མ་ཡིན་པར་འགྱུར་རོ་ཞེས་བཤད་པ་ནི། འབའ་ཞིག་གིས་ཞེས་བྱ་བ་ཡིན་ནོ། །དེ་ལྟར་ནི་མི་འཐད་དོ་ཞེས་བྱ་བ་ནི་བསྟན་ཟིན་ཏོ། །དེ་ལྟར་རྗེས་སུ་འགྲོ་བ་དང་ལྡོག་པའི་
[271b]
[271b.1]རྗེས་སུ་བྱེད་པའོ། །མི་འགྱུར་བའི་ཕྱིར་དང་སྤྱི་ལ་ཕན་འདོགས་པར་བྱེད་པ་ཉིད་མི་སྲིད་པའི་ཕྱིར་དང་། གསལ་བ་རྣམས་ནུས་པ་མེད་པར་བསྒྲུབས་པ་ན་ཕ་རོལ་པོ་དག་ཇི་སྐད་དུ་བརྗོད་པའི་ཚུལ་དོར་ནས་ནུས་པར་སྨྲས་པ་ནི་གལ་ཏེ་རྣམ་པར་ཤེས་པ་ལ་སྣང་བའི་ཕྱིར་ཞེས་བྱ་བའོ། །དངོས་པོ་
[271b.2]གཅིག་དང་ལྷན་ཅིག་པའི་གསལ་བ་རྣམས་ཐ་མི་དད་པའི་ཤེས་པའི་གཞིར་འགྱུར་བ་ཞེས་བྱ་བ་འདི་ཙམ་ཉིད། དེ་ལ་འདི་རྣམས་ཀྱི་ནུས་པ་ཡིན་གྱི་གང་གིས་ན་དེ་མི་སྲིད་པའམ། མི་སྲིད་པས་ན་ནུས་པ་མེད་པར་འགྱུར་བ་དེ་ཡོད་ན་ཡོད་པ་ལས་ནི་མ་ཡིན་ནོ། །ཡུལ་གྱི་རྣམ་པར་ཤེས་པ་ལ་
[271b.3]ནུས་པ་ནི་ཡུལ་དུ་འགྱུར་བ་ཁོ་ན་ཡིན་གྱི། གཞན་འགའ་ཡང་མ་ཡིན་ནོ་ཞེས་བྱ་བ་ནི་བསམ་པའོ། །དེ་མ་ཡིན་ནོ་ཞེས་འཆད་པ་ནི། ཕན་འདོགས་པར་མ་གྲུབ་པ་ཅན་རྣམས་ཞེས་བྱ་བའོ། །གང་གིས་ཡུལ་ཉིད་ནུས་པ་ཡིན་པར་འགྱུར་བ་རྣམ་པར་ཤེས་པ་མི་སྐྱེད་པ་ནི་དོན་ཤེས་
[271b.4]པའི་ཡུལ་དུ་འགྱུར་བ་མ་ཡིན་ནོ། །ཇི་ལྟར་ཞེ་ན་འདི་ལྟར་ཞེས་སྨོས་ཏེ་གལ་ཏེ་དོན་སྐྱེད་པར་བྱེད་པ་མ་ཡིན་བཞིན་དུ། ཤེས་པ་ཉིད་གྲུབ་པའི་ཡུལ་འཛིན་པའི་ནུས་པས་འཛིན་པར་བྱེད་པ་ཡིན་ན་ནི། ཐམས་ཅད་འཛིན་པ་ཉིད་དུ་འགྱུར་བའི་ཕྱིར་ཐམས་ཅད་ཀྱིས་ཐམས་ཅད་ཤེས་
[271b.5]པར་འགྱུར་ཏེ། དེས་ན་ཧ་ཅང་ཐལ་བར་འགྱུར་རོ། །དེས་ན་ཕན་པར་བྱེད་པ་མ་ཡིན་པ་ནི་ཡུལ་མ་ཡིན་ནོ། །གལ་ཏེ་ཡུལ་མ་ཡིན་ནོ་ཞེ་ན་ནི་མི་སྣང་བས་ན་དེ་ཇི་ལྟར་སྣང་བའི་ཕྱིར་ནུས་སོ་ཞེས་ཇི་ལྟར་བརྗོད། གལ་ཏེ་ཡུལ་ནི་རིག་པར་བྱ་བ་ཡིན་ལ། དེ་ཡང་ཕན་འདོགས་པར་བྱེད་པ་ཁོ་ན་ཡིན་པའི་ཕྱིར་དྲན་པ་དང་འདས་
[271b.6]པ་དང་མ་འོངས་པའི་རྟོགས་པ་དང་། རི་བོང་གི་རྭ་ལ་སོགས་པའི་ཤེས་པ་རྣམས་ལ་རིག་པ་ཇི་ལྟ་བ་བཞིན་གྱི་ཡུལ་འགའ་ཡང་མེད་པར་འགྱུར་རོ་ཞེས་སྨྲས་པ་ནི། གལ་ཏེ་ཕན་པ་མེད་པ་ཞེས་བྱ་བ་ཡིན་ནོ། །དེ་ལ་ཤེས་པ་དེ་ནི་ཡུལ་མེད་པ་ཁོ་ནའོ་ཞེས་བཤད་པ་ནི། དེ་དག་གི་
[271b.7]ཤེས་པ་རྣམས་ཡུལ་མེད་དུ་ཟད་མོད་ཅེས་བྱ་བ་ཡིན་ནོ། །ཡུལ་གྱིས་བྱས་པའི་ཡུལ་གསལ་བ་ཉིད་དང་ལྡན་པ་ཡིན་ན་ནི། ཡུལ་གྱིས་ཕན་མ་བཏགས་པའི་རྣམ་པར་ཤེས་པ་རྣམས་ཡུལ་གསལ་བ་མ་ཡིན་པའི་ཕྱིར་རོ། །རང་ཉིད་ཀྱིས་གྲུབ་པའི་དེ་ལ་གསལ་བ་ཡོད་པའི་རྣམ་
[272a]
[272a.1]པར་ཤེས་པ་རྣམས་ནི་དེའི་ཕན་པ་ལ་ལྟོས་པ་མེད་པ་སྟེ། དཔེར་ན་ཐམས་ཅད་མཁྱེན་པའི་མཁྱེན་པ་བཞིན་ནོ། །གལ་ཏེ་ཡུལ་མེད་པ་ཅན་ཡིན་ན་འོན་ཏེ་དེ་དག་གིས་ཅི་རིག་ཅེ་ན། ཡུལ་མེད་དུ་ཟིན་ཀྱང་ཞེས་སྨོས་སོ། །དེ་ལྟ་བུའི་རྒྱུ་མཚན་གྱིས་བསྐྱེད་པ་རང་གི་
[272a.2]བདག་ཉིད་དུ་གྱུར་པའི་སྣང་བ་དང་ལྡན་པ་ན་འདིར་འགའ་ཞིག་སྣང་བ་བཞིན་དུ་རྟོགས་པ་ཡིན་ནོ། །འདི་ལ་ཕྱི་རོལ་གྱི་རིག་པར་བྱ་བ་ནི་ཡོད་པ་མ་ཡིན་གྱི། འོན་ཀྱང་རང་གི་རིག་པ་རང་བཞིན་དུ་གྱུར་པ་ནའོ། །ཤེས་པའི་སྣང་བ་དེ་ནི་དེའི་དུས་ཉིད་ཡིན་མོད་ཀྱི་ལྷག་པར་ཞེན་པའི་དབང་གིས་
[272a.3]འདས་པ་དང་མ་འོངས་པ་དང་རི་བོང་གི་རྭ་ལ་སོགས་པ་ཡུལ་དུ་ངེས་པ་ཡིན་ནོ། །གང་གིས་ན་སྣང་བའི་ཕྱིར་གསལ་བ་རྣམས་ཀྱི་ནུས་པ་ཡིན་ནོ་ཞེས་བརྗོད་པ་སྣང་བ་ཞེས་བྱ་བ་ནུས་པའི་རྒྱུ་མཚན་མ་ཡིན་ནོ་ཞེས་བཤད་པ་ནི། ཡོད་པ་དང་མེད་པའི་ཞེས་བྱ་བའོ། །གང་ཞིག་གང་ཡོད་ན་ཡོད་པ་
[272a.4]དང་། གང་མེད་ན་ནི་མེད་པ་དེར་ནུས་པ་ཡིན་ནོ་ཞེས་ནུས་པའི་དེ་ཁོ་ན་ཉིད་ཡིན་གྱི། སྣང་བ་ཞེས་བྱ་བ་ནི་ནུས་པ་མ་ཡིན་ནོ། །ནུས་པ་ཉིད་རྒྱུ་ཉིད་ཡིན་པར་བརྗོད་པ་ཡིན་ནོ། །དེ་ལ་དེ་སྣང་བ་ཙམ་གྱིས་མི་ནུས་པ་ཡིན་ནོ། །གལ་ཏེ་ཡུལ་རྒྱུ་ཡིན་ན། སྣང་བ་ཡོད་པ་དང་མེད་པའི་རྗེས་སུ་བྱེད་
[272a.5]པ་ཁོ་ནའོ། །རྒྱུ་མ་ཡིན་པ་ཉིད་ཡིན་ན་ཡང་སྣང་བ་ཙམ་ཁོ་ནར་ཟད་ཀྱི་ནུས་པ་ནི་མ་ཡིན་ནོ། །དེ་ཉིད་གཞུང་འཛུགས་པའི་ཕྱིར། མི་སྣང་ཡང་ནུས་པ་དང་སྣང་ཡང་མི་ནུས་པ་སྟོན་པ་ནི་གསལ་བ་ལས་མ་རྟོགས་པ་ཞེས་བྱ་བ་ལ་སོགས་པ་ཡིན་ནོ། །སྤྱིའི་བློ་ཁྲ་བོར་སྣང་བར་ཁས་བླངས་
[272a.6]པའི་ཕྱིར་སྤྱི་རང་བཞིན་གཞན་གྱིས་དབེན་པར་མི་སྣང་བ་ཁོ་ནའོ། །དེ་ལྟ་ན་ཡང་དེ་ནི་ཡོད་པ་ཁོ་ན་ཡིན་ཏེ། ཡོད་པ་ཉིད་ནི་ནུས་པའི་ཁྱད་པར་ཅན་ཡིན་པའི་ཕྱིར། ཡོད་པའི་ཕྱིར་ཞེས་འཆད་པས་ནི་དེ་ཤེས་པ་དེ་ལ་ནུས་པ་ཉིད་དོ་ཞེས་བརྗོད་པ་ཡིན་ཏེ། ཤེས་པ་འདི་ནི་དེ་ལས་འབྱུང་བའི་ཕྱིར་
[272a.7]རོ། །གལ་ཏེ་ཁྲ་བོའི་སྣང་བའི་ཤེས་པ་ལ་མི་སྣང་བར་མ་གྲུབ་སྟེ། ཐ་དད་པར་མི་སྣང་བ་ཙམ་དུ་ཟད་པའི་ཕྱིར་རོ་ཞེས་དོགས་པ་བསུ་ནས། སྣང་ཡང་ནུས་པ་མེད་པར་སྟོན་པར་བྱེད་པ་ནི། སྐྲ་ཤད་ལ་སོགས་པ་ཞེས་བྱ་བའོ། །སྐྲ་ཤད་ལ་སོགས་པ་ཉམས་པ་ནི་སྣང་བ་ཡིན་ན། དེ་
[272b]
[272b.1]དག་ཡོད་པ་ནི་མ་ཡིན་ཏེ་དེས་ན་མི་ནུས་སོ། །དེས་ན་རྣམ་པར་ཤེས་པ་ལ་སྣང་བའི་ཕྱིར་གསལ་བ་རྣམས་ནུས་པ་ཡིན་ནོ་ཞེས་བྱ་བ་མི་རིགས་སོ། །ངོ་ཤེས་པ་ནི་འཁྲུལ་པ་ཁོ་ན་དོན་ལས་སྐྱེ་བ་ཡིན་ནོ་ཞེས་གཞན་གྱིས་ཀྱང་ཁས་བླང་དགོས་ཏེ་སྤྱིའི་ཤེས་པ་ཁྱད་པར་གྱི་ཡུལ་ཅན་དུ་ཡང་ཁས་ལེན་
[272b.2]པའི་ཕྱིར་རོ་ཞེས་རྣམ་པར་གཞག་པ་ན། དངོས་པོ་གཅིག་དང་ལྷན་ཅིག་པ་ཉིད་ཡིན་ན། གསལ་བ་རྣམས་ཤེས་པ་གཅིག་གི་ཡུལ་ཉིད་དུ་འཐད་དོ་ཞེས་བྱ་བ་གཞན་གྱི་ཕྱིར་ཟློག་པ་མི་འཐད་པས་ལན་བཏབ་པ་ཡིན་ནོ། །དེ་ནི་དེའི་སྟོབས་ཀྱིས་སྤྱི་ཀུན་དུ་རྟོགས་པའི་དོན་དུ་ངོ་ཤེས་པ་དེ་ཉིད་ཇི་ལྟ་
[272b.3]བུར་གྱུར་པ་གང་ཡིན་པ་དེ་བསྟན་པའི་ཕྱིར་རྩོད་པར་བྱེད་པ་སློང་བར་བྱེད་པ་ནི། གལ་ཏེ་ཐ་དད་མིན་སྣང་བློ། །ཞེས་བྱ་བས་སོ། །གསལ་བ་རྣམས་འབྲས་བུ་ཤེས་པ་ཅིག་བྱེད་དུ་ཆུག་མོད། འོན་ཀྱང་རང་བཞིན་གཅིག་པ་འདི་ལ་ཤེས་པ་འདི་ཇི་ལྟར་སྣང་བ་དེ་ལྟ་བུར་གྱུར་པ་ནི་རང་གི་མཚན་ཉིད་རྣམས་ལ་
[272b.4]མེད་པ་དེས་ན་ཇི་ལྟར་དེ་ཡུལ་ཡིན་ན་བློ་འདི་ཐ་དད་པ་མེད་པར་སྣང་བ་ཞེས་བྱ་བ་གལ་ཏེ་འདོད་ནའོ། །འདི་ཉིད་བཤད་པ་ནི་དུ་མས་ཞེས་བྱ་བ་ཡིན་ཏེ་འདི་ལ་ད་ལྟར་བདག་ཅག་ལོག་པར་རྟོགས་པ་མེད་དོ་ཞེས་བྱ་བའི་ཐ་ཚིག་གོ། །རྩོད་པའི་ཡུལ་སྨྲས་པ་ན། འོ་ན་ཅི་ཞེ་ན་ཞེས་བྱའོ། །དེ་དག་གི་
[272b.5]རྣམ་པར་གཞག་པ་ཅན་ཞེས་བྱ་བ་ནི་ཐ་དད་པའི་རྣམ་པར་གཞག་པ་སྟེ། དེ་ལྟ་མ་ཡིན་ན་ཡུལ་ཉིད་མི་སྲིད་པའི་ཕྱིར་རོ། །དེས་ན་ཇི་ལྟར་ཐ་མི་དད་པར་སྣང་བར་གྱུར། དེས་ནི་ཤེས་པ་འདི་གསལ་བ་རྣམས་ལས་སྐྱེ་བ་ཡིན་ཡང་དམིགས་པའི་རང་བཞིན་རྣམ་པར་དཔྱད་ན་སྤྱི་ཡུལ་ཡིན་པར་
[272b.6]འགྱུར་རོ་ཞེ་ན། འདི་ལ་རེ་ཞིག་བློའི་རྣམ་པ་ཐ་དད་པ་དེ་ཞེས་རྟོགས་པ་ནི་རང་གི་ངོ་བོ་རྣམ་པར་དཔྱད་པའམ་བརྩམས་པ་ཁོ་ནར་རྣམ་པར་གཞག་པའི་ལུགས་ལ་ལྟོས་ནས་རྩོད་པ་མི་འཇུག་པ་ཉིད་དུ་སྟོན་པ་ནི། སྤྱི་འཛིན་པ་རྣམས་ལ་ནི་ཞེས་བྱ་བ་སྟེ། དངོས་སུ་ཐ་དད་པ་རྣམས་ལ་ཐ་མི་
[272b.7]དད་པར་སྣང་བའི་བློ་མེད་དེ་དེས་ན་འདི་ནི་བརྩད་པར་མི་བྱ་བ་ཉིད་དོ། །དེ་ལྟར་ཡོད་ན་ནི་ཐལ་བ་འདི་སྤྱི་ཀུན་དུ་སྤྱོད་པའི་རྒྱུ་མཚན་དུ་འགྱུར་བ་ཁོ་ནའོ། །འདི་ལྟར་ཐ་མི་དད་པར་སྣང་བའི་བློ་ནི་རང་གི་མཚན་ཉིད་ཀྱི་ཡུལ་ཅན་མ་ཡིན་ཏེ། དེ་ལ་རང་གི་མཚན་ཉིད་རིག་པ་མེད་པའི་ཕྱིར་རོ། །
[273a]
[273a.1]དེ་ཇི་ལྟར་ཞེ་ན་བཤད་པ་རང་གི་མཚན་ཉིད་མེད་ཀྱང་སྤྱིའི་བློ་དག་ཡོད་པའི་ཕྱིར་རོ། །དེ་དག་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མེད་པ་ཁོ་ནར་དེ་འཛིན་པ་ཡང་མ་ཡིན་ནོ་ཞེས་འཆད་པ་ནི། རང་གི་རྣམ་པར་ཤེས་པ་ལ་ཞེས་བྱ་བའོ། །གལ་ཏེ་རྒྱུའི་ཁྱད་པར་གྱིས་
[273a.2]ཅིག་ལ་ཡང་སྣང་བ་ཐ་དད་པར་འགྱུར་བའི་ཕྱིར་དངོས་པོ་གཅིག་ཁོ་ན་སྒྲས་རྣམ་པ་གཞན་དུ་རྟོགས་པར་བྱེད་ལ། དབང་པོས་ཀྱང་རྣམ་པ་གཞན་དུ་སྟེ། རིང་བ་དང་ཉེ་བའི་ཡུལ་ན་གནས་པའི་འཇལ་བ་པོས་ཡུལ་དུ་བྱས་པའི་དངོས་པོ་གཅིག་བཞིན་ནོ་ཞེ་ན། འདི་ནི་བྱིས་པའི་གཏམ་སྟེ།
[273a.3]དངོས་པོ་གཅིག་ཁོ་ན་རིག་པར་བྱ་བ་ཡིན་ན། རྒྱུ་ཐ་དད་ཀྱང་དངོས་པོ་དེ་ཐ་མི་དད་པའི་ཕྱིར་སྣང་བ་ཐ་དད་མི་སྲིད་པའི་ཕྱིར་རོ། །ཐ་དད་ན་ཡང་དངོས་པོ་དེ་སྣང་ངོ་ཞེས་བྱ་བར་མི་འགྱུར་རོ། །འོ་ན་ཇི་ལྟར་རིང་བ་དག་ལ་གསལ་བ་དང་མི་གསལ་བའི་རྣམ་པར་དབྱེ་བར་འགྱུར་ཞེ་ན། ཇི་སྐད་
[273a.4]བརྗོད་པའི་མྱོང་བས་རིག་པར་བྱ་བའི་རང་བཞིན་རྣམ་པར་དཔྱད་ན་འཐད་པ་ཇི་ལྟ་བ་དེ་ཁོ་ན་ལྟར་ངེས་པར་བྱའོ། །གཅིག་ཏུ་རྣམ་པར་རྟོག་པས་ཤེས་པར་བྱ་བའི་རང་བཞིན་ཡང་རང་གི་མཚན་ཉིད་ལ་ཡོད་པ་མ་ཡིན་ནོ་ཞེས་འཆད་པ་ནི་གཅིག་ལ་རྣམ་པ་དུ་མ་ལ་སོགས་པའོ། །རྣམ་པ་དུ་མ་གཅིག་ཡིན་ན་ནི་སྣ་
[273a.5]ཚོགས་བདག་ཉིད་གཅིག་ཏུ་འགྱུར་རོ་ཞེས་བྱ་བ་ནི་ཧ་ཅང་ཐལ་བར་འགྱུར་རོ། །དེས་ན་དངོས་སུ་ན་ཐ་མི་དད་པར་སྣང་བ་འདི་ནི་རང་གི་མཚན་ཉིད་ཀྱི་ཡུལ་ཅན་མ་ཡིན་ནོ་ཞེས་བཤད་པ་ནི་དེའི་ཕྱིར་ཞེས་བྱ་བའོ། །འོ་ན་ཇི་ལྟར་ངོ་ཤེས་པ་འདི་གསལ་བའི་ཡུལ་ཅན་ཉིད་དུ་བརྗོད་དེ། གང་གིས་ན་གཞན་གྱི་ལྟར་ན་
[273a.6]ཞེས་བྱ་བས། སྤྱི་སྨྲ་བ་སྒྲུབ་པར་བྱེད་པ་ན་དེ་མི་སྣང་ཡང་ལྷག་པར་ཞེན་པའི་འཁྲུལ་པས་ཞེས་སྨོས་སོ། །ཐ་མི་དད་པའི་བློ་ལ་དོན་ཐ་དད་མི་སྣང་ཡང་ངོ་། །ལྷག་པར་ཞེན་པའི་འཁྲུལ་པ་ཉིད་བསྟན་པར་བྱ་བའི་ཕྱིར་དེ་ལ་སྣང་བའི་རྣམ་པ་ནི་ཞེས་སྨོས་སོ། །ཐ་མི་དད་པའི་བློ་ལ་སྣང་བའི་རྣམ་
[273a.7]པ་ནི་ཐ་མི་དད་པ་ཁོ་ན་ཡིན་པའི་ཕྱིར་རོ། །དེ་ནི་དོན་རྣམས་ལ་ཡོད་པ་མ་ཡིན་ཏེ། ཐ་དད་པའི་ཐ་མི་དད་པ་ཉིད་ནི་མ་གཏོགས་སོ། །འོ་ན་ནི་ཐ་མི་དད་པའི་རང་བཞིན་དེ་དངོས་པོ་རྣམས་ལ་ཡོད་པར་འགྱུར་རོ་ཞེ་ན། བཤད་པ། ཐ་དད་པ་དེ་མེད་པའི་ངོ་བོ་ཡིན་ཏེ། དེ་སྲིད་པ་ཙམ་གྱིས་ནི་ཐ་མི་
[273b]
[273b.1]དད་པའི་རྣམ་པ་ཁས་བླངས་པ་མ་ཡིན་ནོ། །དེ་ཁོ་ན་ཞེས་བྱ་བ་ནི་ཐ་དད་པ་ཐ་དད་པ་ཉིད་དོ། །འཛིན་པའི་ཚིག་སྦྱར་བ་ནི་རྣམ་པ་དེ་ལྟ་བུའི་རང་བཞིན་དུ་ཀུན་དུ་རྟོགས་པས་སྒྲོ་བཏགས་པས་དངོས་པོ་རྣམས་ཐ་དད་པ་ཉིད་དུ་གྱུར་པས་ལྷག་པར་ཞེན་པ་ལ་ལྟོས་ཏེ་རྣམ་པ་དེ་ལྟ་བུའི་ཡུལ་དུ་གྱུར་པའི་
[273b.2]ཕྱིར་ཞེས་འདི་ཐམས་ཅད་ནི་སྔར་བཤད་ཟིན་ནོ། །སྤྱི་དོན་ཀྱང་གཞན་གྱི་ལྟར་ན་འང་བློ་དེ་ནི་ཞེས་བྱ་བ་ལ་སོགས་པའི་ཚུལ་གྱིས་ཉེས་པ་འདི་མཚུངས་སོ་ཞེས་སྟོན་པ་ནི་གཞན་ཡང་ཞེས་སྨོས་ཏེ། དེའི་ལྟར་ཡང་ཐ་མི་དད་པར་སྣང་བའི་བློས་གསལ་བ་ཡུལ་དུ་བྱེད་པ་ཡིན་ནོ། །ལན་དུ་མཚུངས་
[273b.3]པ་མ་ཡིན་ཏེ་ཞེས་སྨོས་སོ། །དེ་ལ་ནི་ཞེས་བྱ་བ་ལ་ནི་དེ་དག་ལ་སྤྱི་ཐ་མི་དད་པ་ཡང་ཡོད་པ་ཡིན་ཏེ། དེས་ན་གསལ་བ་རྣམས་ལ་ཐ་མི་དད་པའི་བློ་མི་འཐད་པ་མ་ཡིན་ནོ་ཞེ་ན། དེ་དགག་པའི་ཕྱིར་དེ་ལ་ཡོད་ཀྱང་སྨོས་སོ། །སྔར་གྱི་གཞན་གྱི་ལྟར་ན་འང་བློ་དེ་ནི་ཞེས་བྱ་བས་ནི་ཐ་མི་དད་པར་རོ་
[273b.4]གཅིག་པ་ཅན་དུ་སྣང་བའི་རིག་པ་གཉིས་མཚོན་པ་མེད་པ་ཅན་ནི་གསལ་བའི་ཡུལ་ཅན་དུ་ཁས་བླང་བར་བྱ་བ་ཡིན་ནོ་ཞེས་ཉེས་པ་བཀལ་བ་ཡིན་ན་རྣམ་པ་དེ་ཡང་སྤྱིའི་རང་བཞིན་ནམ་གསལ་བའི་རང་བཞིན་ཞེས་གཏན་ལ་མ་ཕེབས་པ་ཡིན་ནོ། །དེ་འདིར་ནི་འདི་ལྟར་ངེས་པ་ཡིན་ཏེ་ཐ་མི་དད་
[273b.5]པར་སྣང་བའི་བློ་དེ་ལ་ནི་ཡོད་པར་ཁས་བླང་ཀྱང་སྤྱི་དེ་ལ་སྣང་བར་རྟོགས་པ་མེད་དོ། །གང་གི་ཕྱིར་ཐ་མི་དད་པར་སྣང་བའི་བློ་ནི་གཟུགས་དང་དབྱིབས་སུ་སྣང་བ་དང་ལྡན་པར་རྟོགས་པ་ཡིན་ནོ། །ཐ་དད་པར་སྣང་བ་དབང་པོའི་འམ་འོན་ཏེ་གཞན་ཡིན་པར་འགྱུར། གཉི་ག་ལ་ཡང་
[273b.6]གཟུགས་དང་དབྱིབས་ལས་མ་གཏོགས་པ་གཞན་ནི་སྣང་བ་མེད་དོ། །གང་དུ་ཐ་མི་དད་པར་རྟོགས་པ་དེ་ནི་གཟུགས་ལ་སོགས་པ་དེ་ཉིད་ཐ་དད་པར་སྣང་ངོ་། །སྤྱི་ནི་དེ་ལྟ་བུ་མ་ཡིན་ཏེ། །གཟུགས་ལ་སོགས་པ་དག་ནི་ཡོན་ཏན་དུ་ཁས་བླངས་པའི་ཕྱིར་རོ། །གང་ཞིག་སྤྱིར་འགྱུར་བ་
[273b.7]དེ་ལས་མ་གཏོགས་པའི་ཐ་མི་དད་པ་གཞན་ནི་སྣང་བ་མེད་དོ། །དེ་ལ་སྤྱིར་ཐ་མི་དད་པར་སྣང་བས་ཀྱང་སྤྱི་གཞན་མི་འགྲུབ་པོ། །འོ་ན་ནི་རྣམ་པ་སྤྱིར་ཁས་བླངས་ན་ཐ་མི་དད་པར་སྣང་བ་དེ་ལྟ་བུར་གྱུར་པ་དེ་ཉིད་སྤྱི་ཡིན་པ་ལ་རག་མོད་ཅེ་ན་རྣམ་པ་སྤྱི་ཡིན་པར་སྨྲ་བ་ལ་སོགས་པ་སྨོས་སོ། །
[274a]
[274a.1]སྤྱི་ཁྱད་པར་ལས་ཐ་མི་དད་པའི་ཕྱིར་ཁྱད་པར་བཞིན་དུ་སྤྱི་ཡང་ཁྱད་པར་གཞན་ལ་མི་འཇུག་པས་ན་རྗེས་སུ་སོང་བའི་རང་བཞིན་གཅིག་གིས་སྟོང་པའི་གསལ་བ་རྣམས་ཐ་དད་པའི་ཕྱིར་ཐ་མི་དད་པའི་བློ་མི་སྲིད་པར་འགྱུར་རོ། །དེ་ལྟར། གལ་ཏེ་ཐ་དད་མི་སྣང་བློ། །ཞེས་རྩོད་པ་འདི་རྣམ་པར་
[274a.2]གཞག་པའི་གྲུབ་མཐའ་ལ་ལྟོས་ཏེ་འཇུག་པ་མེད་པ་ཉིད་དུ་བསྟན་ནས། གང་གིས་འདི་ཉེ་བར་བཀོད་པ་དེ་ཉིད་ཉེ་བར་སྟོན་པས་ཐ་མི་དད་པར་སྣང་བ་ཉིད་སྣང་བ་སྤངས་པའི་ཕྱིར་ཡང་ན་ཞེས་སྨོས་སོ། །ཐ་མི་དད་པར་སྣང་བའི་བློ་ཐ་དད་པ་རྣམས་ལ་མི་འཐད་དོ་ཞེས་སྨྲས་པ་ན་ཐ་མི་དད་པར་སྣང་བའི་བློ་ནི་
[274a.3]ཐ་དད་པ་རྣམས་ལ་མེད་པ་ཁོ་ན་སྟེ། དེ་ནི་རང་གི་མཚན་ཉིད་ཀྱི་ཡུལ་ཅན་མ་ཡིན་པའི་ཕྱིར་རོ་ཞེས་མདོས་མ་ཟིན་པ་ཉིད་ཀྱིས་ལན་བཏབ་པོ། །དེ་ཁས་བླངས་ཀྱང་མདོས་ལན་འདེབས་པ་ནི་བློ་དེའི་ཐ་དད་པ་རྣམས་ཡིན་དུ་ཟད་དེ་ཐ་དད་པར་སྣང་བ་ཉིད་འགའ་ཡང་མེད་དོ། །ཇི་ལྟར་སྣང་བ་ཐ་དད་ཅེ་ན།
[274a.4]བཤད་པ། ཐ་དད་པ་དེ་དག་མཚུངས་ཞེས་འཛིན་ཕྱིར་རོ། །ཐ་མི་དད་པར་སྣང་བ་གཅིག་ཏུ་སྣང་བ་ཡིན་གཅིག་ཉིད་སྣང་བ་ནི་མཚུངས་སོ་ཞེས་བྱ་བར་སྣང་བ་མ་ཡིན་ཏེ། ཕན་ཚུན་ཐ་དད་པ་གཉིས་སྣང་བ་ན་འདིར་ནི་འདི་དང་མཚུངས་སོ་ཞེས་རྟོགས་པར་གྲུབ་པའི་ཕྱིར་རོ། །ཐ་མི་དད་པ་ལ་ནི་
[274a.5]དེ་ལྟར་རྟོགས་པ་མ་ཡིན་ནོ། །ནང་པར་དམིགས་པའི་བུམ་པ་དགོངས་ཀ་དམིགས་པ་ན། དེ་དང་མཚུངས་སོ་ཞེས་རྟོགས་པ་ནི་མེད་ཀྱི་འོན་ཀྱང་དེ་ཉིད་དོ་ཞེས་བྱ་བར་རོ། །དེས་ན་མཚུངས་སོ་སྙམ་པས་འཇུག་པའི་བློ་ལ་ནི་ཐ་དད་པར་སྣང་བ་ཉིད་མེད་པའི་ཕྱིར་ཐ་དད་པའི་ཡུལ་ཅན་ཉིད་དུ་མི་
[274a.6]འགལ་ལོ། །གལ་ཏེ་འདི་བ་ལང་ཡིན་ལ་འདི་ཡང་བ་ལང་ཡིན་ནོ་སྙམ་དུ་རྟོགས་པ་སྐྱེ་བ་ཡིན་གྱི། མཚུངས་སོ་ཞེས་བྱ་བར་ནི་མ་ཡིན་པར་མ་ཡིན་ནམ་ཞེ་ན། བདེན་ཏེ། འོན་ཀྱང་འདི་ཉིད་སྤྱིའི་རྟོགས་པར་བརྗོད་པ་ཡིན་ཏེ། ཕ་རོལ་པོས་སྤྱི་གཞན་དང་ལྡན་པ་ལས་མཚུངས་པར་བྱས་པའི་
[274a.7]དངོས་པོ་རྣམས་ཁོ་ན་ལ་རྣམ་པ་འདི་ལྟ་བུའི་ཤེས་པ་ཁས་བླངས་པའི་ཕྱིར་རོ། །དེར་ཡང་ཐ་མི་དད་པར་སྣང་བ་ཉིད་ཡོད་པ་མ་ཡིན་ཏེ། འདི་བ་ལང་འདི་འདྲ་བ་ལ་དེ་ཞེས་རྟོགས་པའི་ཕྱིར་རོ། །ཐ་མི་དད་པར་སྣང་ན་ནི་བ་ལང་དེ་ཉིད་འདིའོ་ཞེས་བྱ་བར་འགྱུར་རོ། །དེས་འདི་ཐ་མི་དད་པར་སྣང་བ་མ་
[274b]
[274b.1]ཡིན་པས་ཐ་དད་པའི་ཡུལ་ཅན་ཉིད་དང་མི་འགལ་ལོ། །འདི་ཉིད་བཤད་པ་ནི་དེ་དག་ལ་ཐ་མི་དད་པར་སྣང་བ་ནི་མེད་པ་ཁོ་ན་སྟེ་ཞེས་བྱ་བའོ། །འདིར་ཕ་རོལ་པོ་དག་ཐ་མི་དད་པར་སྣང་བ་ཉིད་གཞུང་འཛུགས་པའི་དོན་དུ་ཕྱིར་ཟློག་པ་ནི། གལ་ཏེ་གཉི་ག་ཞེས་བྱ་བ་སྟེ། བསམ་པ་ནི་འདི་ཡིན་ནོ། །གང་དུ་
[274b.2]དངོས་པོ་གཅིག་སྣང་བ་དེར་ནི་བུམ་པ་དེ་ཉིད་འདི་ཡིན་ནོ་ཞེས་རྟོགས་པར་འགྱུར་རོ། །གང་དུ་ཐ་དད་པ་དག་ཁོ་ན་གཉི་ག་རྣམ་པ་འགའ་ཞིག་གིས་སྟོང་པར་སྣང་བ་དེར་ནི་བ་ལང་རྟ་དང་སྐྱེས་བུ་དང་གླང་པོ་ཞེས་མི་འདྲ་བ་ཉིད་དུ་རྟོགས་སོ། །གང་ཞིག་ཐ་མི་དད་ཀྱང་རང་བཞིན་གཅིག་དང་ལྡན་པ་དེར་གསལ་
[274b.3]བ་སོ་སོ་ལ་ཡོངས་སུ་རྫོགས་པའི་སྤྱིའི་དབང་གིས་མཚུངས་པར་གྱུར་པ་རྣམས་ལ་འདི་བ་ལང་འདི་འང་བ་ལང་ངོ་ཞེས་རྟོགས་པ་ཡིན་ཏེ། དེས་ན་མཚུངས་སོ་ཞེས་འཛིན་པའི་ཕྱིར་ཐ་དད་པར་སྣང་བ་ཡིན་ནོ་ཞེས་ཇི་ལྟར་བརྗོད་ཅེ་ན་དེ་མ་ཡིན་ནོ་ཞེས་འཆད་པ་ནི་འོན་ཀྱང་ཞེས་བྱ་བའོ། །གསལ་བ་རྣམས་
[274b.4]ལ་སྤྱི་ཡོད་པ་དང་། རྟོགས་པ་དེ་གཉི་ག་འཛིན་པ་ཡིན་པས་གསལ་བ་མི་འདྲ་བ་རྣམས་ནི་ཐ་དད་པའི་དངོས་པོ་གཅིག་ཡོད་ཀྱང་རང་རང་གི་ངོ་བོར་མཚུངས་པར་མི་འགྱུར་རོ། །དེ་གཉི་ག་བཟུང་ཡང་མཚུངས་སོ་ཞེས་བྱ་བར་ག་ལ་འགྱུར་ཏེ། འོན་ཀྱང་གསལ་བ་འདི་ལ་ཡོད་པ་གང་ཡིན་པ་
[274b.5]དེ་ནི་འདི་ལ་ཡང་ཡོད་དོ་ཞེས་རྟོགས་པར་འགྱུར་རོ། །འདི་བ་ལང་འདིའང་བ་ལང་སྙམ་དུ་རྟོགས་པ་ནི་གཉི་ག་འཛིན་པ་ལ་སྲིད་པ་མ་ཡིན་ཏེ། འོན་ཀྱང་འདི་ལ་བ་ལང་ཉིད་འདི་ལ་ཡང་བ་ལང་ཉིད་ཅེས་བྱ་བར་འགྱུར་རོ། །བ་ལང་ངོ་ཞེས་རང་གི་རྟེན་ལས་ཐ་མི་དད་པར་རྟོགས་པ་ནི་སྤྱི་དེ་དང་ལྡན་པ་
[274b.6]གཉིས་རྟོགས་པར་མི་འཐད་དེ། སྔར་ཇི་སྐད་བཤད་པ་བཞིན་ནོ། །གལ་ཏེ་མཚུངས་པའི་རང་བཞིན་ཉིད་ཀྱི་དངོས་པོ་མཚུངས་པར་འགྱུར་བ་མ་ཡིན་ནམ། མཚུངས་པའི་རང་བཞིན་ཡང་ཇི་ལྟར་ཐ་མི་དད་པ་ཡིན་པ་དེ་བཞིན་ནོ། །ཐ་དད་པ་ཡང་འབྲེལ་པ་ལས་གྱུར་པ་ཡིན་ནོ། །གལ་ཏེ་
[274b.7]འདིར་མཚུངས་པར་ཐ་མི་དད་པའི་རང་བཞིན་ཡིན་ན་ནི་རྫས་གཅིག་ཏུ་ཐལ་བའི་ཕྱིར་གསལ་བའི་དབྱེ་བ་མེད་པར་འགྱུར་ན། དེ་ནི་ཚད་མས་རྟོགས་པ་ཡིན་ནོ། །ཐ་དད་ཡིན་ན་ཡང་འདི་དག་ལ་མཚུངས་པ་ནི་ཡོད། དེའི་ཕྱིར་གསལ་བ་རྣམས་ཀྱི་མཚུངས་པའི་རང་བཞིན་དེ་ནི་ཐ་དད་པ་ཁོ་ན་ཡིན་
[275a]
[275a.1]ལ། དེ་ཡང་སྤྱི་ཡིན་ནོ། །དེ་ལྟར་དོགས་པ་དེ་གལ་ཏེ་དེ་ཉིད་ཅེས་བྱ་བ་ལ་སོགས་པས་བསུ་ནས་ཇི་ལྟར་ཞེས་གསུངས་སོ། །དོན་གཞན་ནི་མཚུངས་པ་ཞེས་བྱ་བར་མི་འཐད་དོ། །གཅིག་ཅན་གཞན་ལ་ཡོད་ཀྱང་དེ་ནི་དེ་དག་གི་མཚུངས་པ་མ་ཡིན་ནོ། །རང་གི་ངོ་བོས་
[275a.2]མི་འདྲ་བ་གང་ཡིན་པ་དེ་ནི་ཐ་དད་པ་གཞན་དུ་ལྡན་ཡང་མཚུངས་པར་འགྱུར་བ་མ་ཡིན་ཏེ་རང་གི་ངོ་བོ་མི་འདྲ་བ་དག་ཐ་དད་པ་གཅིག་དང་ལྡན་པས་ཀྱང་མཚུངས་ན་ནི་གཅིག་པོ་དེ་ཉིད་མཚུངས་པ་དང་མི་མཚུངས་པ་གཉིས་སུ་ཐལ་བའི་ཕྱིར་རོ། །དེས་ན་ཐ་དད་པའི་བ་ལང་ཉིད་གཅིག་ཡོད་ཀྱང་གཅིག་བ་ལང་ཡིན་
[275a.3]པ་ན་གཞན་ཡང་བ་ལང་དུ་འགྱུར་བ་ནི་མ་ཡིན་ཏེ། རང་གི་བདག་ཉིད་བ་ལང་མ་ཡིན་ན་གཞན་ཡོད་ཀྱང་བ་ལང་མ་ཡིན་པའི་ཕྱིར་རོ། །བ་ལང་ཉིད་ཡིན་ན་ཡང་གཞན་དོན་མེད་པའི་ཕྱིར་རོ། །དེས་ན་བ་ལང་ཉིད་གཞན་ཡོད་ཀྱང་བ་ལང་མ་ཡིན་པ་ལ་བ་ལང་ངོ་སྙམ་དུ་ཤེས་པ་མ་ཡིན་གྱི། བ་
[275a.4]ལང་ཉིད་དང་ལྡན་པ་ཞེས་བྱ་བར་ནི་འགྱུར་རོ། །འབྲེལ་པ་བྱས་པས་གཞན་མཚུངས་པའི་རང་བཞིན་ཡིན་པ་གསལ་བའི་ཕྱིར་གལ་ཏེ་དེ་དང་མཚུངས་པའི་ཕྱིར་རོ་ཞེ་ན་ཞེས་བྱ་བ་དོགས་པ་དེ་ཉིད་བསུ་ནས་བཟློག་པའི་ཕྱིར་མ་ཡིན་ཏེ་ཞེས་གསུངས་སོ། །རག་ལས་པས་ཉིད་ནི་འཐད་ཀྱི། འབྲེལ་
[275a.5]པ་ནི་མ་ཡིན་ནོ། །ཧ་ཅང་ཐལ་བ་ཡང་གྲངས་ལ་སོགས་པ་དང་ཞེས་བྱ་བ་ལ་སོགས་པ་བསྟན་ཟིན་ཏོ། །མཚུངས་སོ་ཞེས་བྱ་བར་རྟོགས་པའི་ཕྱིར་གསལ་བ་རྣམས་ལས་བློ་ཐ་མི་དད་པ་ནི་མེད་པའི་ཕྱིར་རོ་ཞེས་བཤད་པ་ནི་ཕ་རོལ་པོ་དག་ཕྱིན་ཅི་ལོག་ཏུ་སྒྲུབ་པར་བསམས་ནས་སླར་ཟློག་
[275a.6]པ་ནི། གལ་ཏེ་དེ་དག་མཚུངས་ན་ནི། །ཞེས་བྱ་བ་ཡིན་ནོ། །གལ་ཏེ་གསལ་བ་རྣམས་མཚུངས་ན་ཇི་ལྟར་ཐ་དད་པའི་བློས་གཟུང་བ་ཡིན་ཏེ་གསལ་བ་དག་ནི་མཚུངས་པ་དང་། ཐ་དད་པའི་བློས་གཟུང་བར་བརྗོད་དེ། དེས་ན་མཚུངས་པའི་བློ་ཉིད་འདི་དག་ནི་ཐ་མི་དད་པའི་བློ་ཡིན་ནོ་ཞེས་སྨྲས་པར་
[275a.7]འགྱུར་རོ། །དེའི་དོན་ནི་འདི་ཡིན་ཏེ། གལ་ཏེ་གསལ་བ་རྣམས་མཚུངས་པའི་བློས་གཟུང་བ་ཡིན་ན་ཇི་ལྟར་འདི་དག་ཐ་མི་དད་པའི་བློས་གཟུང་བ་ཡིན་ནོ། །དེ་ཉིད་སྨྲས་པ་ནི་མཚུངས་པའོ་ཞེས་བྱ་བ་ནི་འདི་ཁོ་ན་སྟེ། འདི་ལྟ་སྟེ་མཚུངས་པ་ཉིད་དུ་རྣམ་པར་ཤེས་པ་གལ་ཏེ་དེ་ཐ་དད་པའི་ཤེས་པ་ཡིན་ན་
[275b]
[275b.1]ནི་བ་ལང་དང་རྟ་དག་ལ་ཡང་འགྱུར་རོ། །དེས་ན་འདི་ཐ་དད་དག་ཉིད་ལས་ལྡོག་པ་ན་ཐ་མི་དད་པར་ཤེས་པ་ཡིན་ནོ། །འདི་ཐ་མི་དད་པའི་ཤེས་པ་ཉིད་བཟློག་པའི་ཕྱིར་འཆད་པ་ནི། དེ་མཐོང་བ་ལ་ཞེས་བྱ་བའོ། །གལ་ཏེ་ཐ་དད་ལ་བརྟེན་པ་ནི་ཐ་མི་དད་པའི་རང་བཞིན་སྣང་བ་ན་མཚུངས་སོ་ཞེས་བྱ་བར་
[275b.2]རྟོགས་པ་ཡིན་ན་ནི་འདི་ཐ་དད་པ་རྣམས་ལ་ཐ་མི་དད་པར་ཤེས་པར་འགྱུར་བ་ཞིག་ན་དེ་ནི་ཡོད་པ་མ་ཡིན་ནོ་ཞེས་བསྟན་ཟིན་ཏོ། །ཐ་དད་པ་རྣམས་ལ་ཐ་མི་དད་པ་ཡོད་ཀྱང་མཚུངས་པ་མེད་པས་དེ་ལྟར་རྟོགས་པ་མ་ཡིན་པའི་ཕྱིར་རོ། །ད་ནི་གང་རྟོགས་ན་མཚུངས་པ་ཉིད་དུ་རྟོགས་པའི་མཚུངས་པ་ཉིད་གང་ཡིན་པ་དེ་
[275b.3]བསྟན་པའི་ཕྱིར། འོ་ན་ཅི་ཞེ་ན་ཞེས་སྨོས་སོ། །དེ་དེ་ལྟར་འགྲེལ་པ་ཉིད་དུ་བྱས་ནས་མདོས་འབྲས་བུ་གཅིག་འདྲ་ཞེས་བྱ་བའོ། །འདི་སྐད་བརྗོད་པ་ཡིན་ཏེ་ཐ་དད་པ་རྣམས་ཀྱིས་མཚུངས་པ་ཉིད་མ་ཡིན་གྱི་འོན་ཀྱང་དེ་དག་གི་རང་གི་ངོ་བོ་ཁོ་ནས་མཚུངས་པ་ཡིན་ནོ། །འདི་ལྟར་ཁྲ་བོ་ཡང་བཞོ་
[275b.4]བ་དང་དགལ་བར་ནུས་པ་ཡིན་པ་དེ་བཞིན་དུ། སེར་སྐྱ་ཡང་ཡིན་ནོ། །འབྲས་བུ་གཅིག་པ་ཉིད་ནི་ཉེ་བར་མཚོན་པ་སྟེ་ཁྲ་བོ་ཡང་བ་ལང་ཡིན་ལ། སེར་སྐྱ་ཡང་བ་ལང་ཡིན་ནོ། །གལ་ཏེ་དེ་ལྟ་ན་ནི་སྤྱི་ཐ་མི་དད་པར་ཁས་བླང་བར་འགྱུར་བ་མ་ཡིན་ནམ་ཞེ་ན། འདིའི་འདི་ལྟར་བརྩད་པ་འདི་ནི་བྱིས་
[275b.5]པའི་ཡིན་གྱི། གང་གི་སྤྱི་ཐ་མི་དད་པར་འགྱུར་བ་ཁྲ་བོའི་བཞོ་བ་དང་དགལ་བ་ནུས་པ་གང་ཡིན་པ་དེ་ཉིད་སེར་སྐྱ་ལ་ཡང་ཡོད་པ་ནི་མ་ཡིན་ནོ། །རང་བཞིན་གཅིག་ཉིད་ཡིན་ན་ནི་མཚུངས་པ་ཉིད་དུ་མི་འཐད་ལ། ཐ་དད་པ་གཞན་དང་ལྡན་པས་ནི་མ་ཡིན་གྱི་འོན་ཀྱང་རང་གི་ངོ་བོ་ཁོ་ནས་
[275b.6]འགའ་ཞིག་བ་ལང་ཡིན་ལ། དེ་ལས་ཐ་དད་པ་ཡིན་ཡང་གཞན་བ་ལང་ཉིད་ཡིན་པའི་ཕྱིར་རང་གི་ངོ་བོ་ཉིད་ཀྱིས་མཚུངས་པ་ཡིན་གྱི། གཞན་གྱི་ངོ་བོས་ནི་མ་ཡིན་ལ། ཐ་དད་པ་ཁོ་ན་ཡིན་གྱི་ཐ་མི་དད་པ་ནི་མ་ཡིན་ནོ། །དེས་ན་སྤྱི་མེད་པ་བཞིན་དུ་མཚུངས་པ་ཉིད་དང་བ་ལང་བ་ལང་ཞེས་བྱ་བར་
[275b.7]རྟོགས་པ་འཐད་པ་མ་ཡིན་ནོ། །དེས་ན་བ་ལང་ཞེས་རྟོགས་པས་ཐ་དད་པའམ་ཐ་མི་དད་པར་དཔག་པ་ནི་མ་ཡིན་གྱི། འོན་ཀྱང་ཐ་དད་དུ་ཟིན་ཀྱང་འདི་ཡང་བ་ལང་ཡིན་འདི་ཡང་ཡིན་ནོ་ཞེས་བྱ་བའི་རྟོགས་པ་དེའི་དམིགས་པ་ནི་སོ་སོ་རང་གི་རང་བཞིན་གྱི་མཐར་ཐུག་པ་དེ་ཙམ་ཞིག་ཡིན་ནོ། །དེས་ན་འདི་
[276a]
[276a.1]བ་ལང་ཞེས་བྱ་བར་རྟོགས་པའི་རང་བཞིན་གྱིས་ནི་ཁྲ་བོ་ལ་སོགས་པ་ལ་རྟོགས་པ་འཁྲུལ་པ་མ་ཡིན་གྱི། འོན་ཀྱང་དེ་མཐོང་བ་ལ་ལྟོས་པ་ལ་སྒྲ་ལ་སོགས་པ་རྟོགས་པ་ན་གཅིག་ལ་དེ་ལྟར་གྱུར་པས་མཐོང་བ་བཞིན་དུ་རྟོགས་པ་ན་ཐ་དད་པ་འཁྲུལ་པར་གྱུར་པའི་རྒྱུ་བརྗོད་དུ་མེད་པའི་
[276a.2]རྟོགས་པ་འགའ་ཞིག་རྗེས་སུ་དཔོག་པར་བྱེད་པ་ནི་དེས་ན་འདིར་སྤྱི་སྨྲ་བའམ་དེ་མེད་པར་མངོན་པར་ཞེན་པ་གང་རྟོགས་པ་ལ་མཁས་པ་ཡིན་ཞེས་ལྟོས། རྟོགས་པའི་རྗེས་སུ་རྟོག་གེ་འབྲང་བ་དང་། རྟོག་གེའི་རྗེས་སུ་ཡང་རྟོགས་པ་འབྲང་བ་ཡིན་ནོ་ཞེས་བྱ་བ་འདི་ཁྱེད་ཀྱིས་མ་བརྗོད་ཅིག །འབྲེལ་
[276a.3]པ་ནི་ཁོ་བོས་ནི་ཞེས་བྱ་བའོ། །དོན་གྱི་ཤེས་པ་ལ་ཞེས་བྱ་བ་ནི་སྤྱིའི་ཤེས་པ་ལའོ། །འདིས་འཁྲུལ་པས་དེ་ལྟར་སྲེ་བར་བྱེད་དོ་ཞེས་བྱ་བ་ནི་ཇི་སྐད་བཤད་པའི་རྟོགས་པ་ཐ་མི་དད་པའི་དབང་གིས་བརྗོད་པ་ཡིན་གྱི་བ་ལང་ངོ་བ་ལང་ངོ་སྙམ་པ་འདི་ལ་ནི་འདྲེས་པར་འགྱུར་བ་ཅི་ཡང་མེད་དེ། ཕྱི་ལ་དེ་ཡོད་
[276a.4]ན་དེ་ལྟར་རྟོགས་པ་མི་རུང་ངོ་ཞེས་བཤད་ཟིན་ཏོ། །འབྲས་བུ་གཅིག་འབྲས་ཞེས་བརྗོད་པ་ལ། གཞན་དག་དེ་ཉིད་ཀྱིས་མི་སྲིད་པར་བསམས་ནས་ཕྱིར་བཟློག་པ་ནི། དེ་དག་གི་འབྲས་བློ་ཞེས་བྱ་བའོ། །བློ་ཞེས་བྱ་བ་ནི་འབྲས་བུ་ཙམ་ཉེ་བར་མཚོན་པའོ། །དེ་ཉིད་ཀྱི་ཕྱིར་བུམ་པ་ལ་སོགས་
[276a.5]པའོ་ཞེས་འཆད་པར་འགྱུར་རོ། །འགའ་ཞིག་ལ་ཐ་མི་དད་པ་ཡང་འགའ་ཞིག་ལས་ཐ་དད་པར་ཕ་རོལ་པོ་དག་གིས་ཁས་བླངས་པ་ཉིད་དེ། བ་ལང་ཉིད་ཁྲ་བོ་ལ་སོགས་པ་དང་རྟ་ལས་བཞིན་ནོ། །དེ་བཞིན་དུ་ཐ་དད་པའི་བློ་ཁྲ་བོ་ལ་སོགས་པ་ལ་ཐ་མི་དད་པར་འགྱུར་ཞེས་དོགས་པ་བསུ་ནས་དངོས་
[276a.6]པོ་རེ་རེ་ལ་ཞེས་གོང་ནས་བྱུང་བ་དང་བཅས་པའི་མདོ་སྦྱོར་རོ། །བློ་གང་ཞིག་གང་ལས་སྐྱེ་བ་དེ་ནི་དངོས་པོ་གཞན་ལས་ཐ་དད་པ་དང་འདྲ་བར་དེ་འཛིན་པའི་བློ་ལས་ཐ་དད་པའི་ཕྱིར་ཁྲ་བོ་ལ་སོགས་པ་དག་བློ་གཅིག་གི་འབྲས་བུ་ཅན་མ་ཡིན་ནོ། །ཚོགས་པ་ལ་ནི་དེ་དག་འཛིན་པ་གཅིག་པར་འགྱུར་
[276a.7]རོ། །ཤེས་པ་གང་ལ་སྣང་བ་དེ་ནི་དེ་ལ་སྣང་བ་གང་ཡིན་པ་དེ་དང་འདྲ་བར་ཐ་དད་པའི་ཕྱིར་ཇི་ལྟར་དེ་དག་འབྲས་བུ་གཅིག་པ་ཅན་ཡིན། སྣང་བཞིན་པ་ལྟར་དེ་ཡང་སྡང་བའི་ཤེས་པ་ཡང་ཐ་དད་པའི་ཕྱིར་ཇི་ལྟར་ཤེས་པ་དོན་རྣམས་ཀྱིས་ཐ་མི་དད་པ་ཡིན་གྱི། ཅིའི་ཕྱིར་ཞེ་ན། དེ་དག་གི་
[276b]
[276b.1]འབྲས་བུ་ནི་དེ་ཡིན་ན་ཞེས་སྨྲས་སོ། །གང་གི་ཕྱིར་དེ་དག་གི་འབྲས་བུ་ནི་ཤེས་པ་ཡིན་ལ་འབྲས་བུ་ཡང་རྒྱུ་ཐ་དད་ན་ཐ་དད་པ་ཞེས་ངེས་པར་བྱ་བ་དང་། ཤེས་པ་བཞིན་དུ་འབྲས་བུ་ཆུ་འཆུ་བ་ལ་སོགས་པ་ཡང་ཐ་དད་པ་དེའི་ཕྱིར་ཐ་དད་རྣམས་ལ་འབྲས་བུའི་གཅིག་པ་མེད་དོ་ཞེ་ན་དེ་གསལ་བའི་ཕྱིར་དེ་ནི་ཉེས་
[276b.2]པ་མེད་ཅེས་སྨོས་སོ། །དོན་གཅིག་ཏུ་རྟོགས་པ་སྤྱི་ལ་དམིགས་པའི་རྣམ་པར་རྟོགས་དེའི་རྒྱུ་ཡིན་པའི་ཕྱིར་བློ་ཐ་དད་པ་མེད་པ་ཡིན་ནོ། །འདི་སྐད་བརྗོད་པ་ཡིན་ཏེ། གང་ལ་ལྟོས་ནས་འབྲས་བུ་གཅིག་པ་ཉིད་ཀྱིས་འདྲ་བར་བརྗོད་པ་དོན་དམ་པར་བློ་ཞེས་བྱ་བའི་དངོས་པོ་གཅིག་གསལ་བ་ཐ་དད་པ་
[276b.3]རྣམས་ལ་ཡོད་པ་ནི་མ་ཡིན་ལ། འདི་སྲིད་པ་ཡང་མ་ཡིན་ཏེ། མིག་ལ་སོགས་པ་རྣམས་འབྲས་བུ་གཅིག་པ་ཉིད་ཡིན་ཡང་ཐ་དད་པའི་ཕྱིར་རོ། །འོན་ཀྱང་ཁྲ་བོ་ལ་སོགས་པ་དེ་དག་ལ་ཉམས་སུ་མྱོང་བློས་གཅིག་ཏུ་རྟོགས་པ་སྐྱེད་ན། བདག་ལ་ནི་བ་ལང་མཐོང་བ་སྐྱེས་སོ་ཞེས་ཐ་མི་དད་པར་
[276b.4]སྣང་བར་ཞེན་པ་ལ་ལྟོས་ནས་དེ་ཐ་མི་དད་པར་བརྗོད་དོ། །དེ་ཉིད་ཀྱི་ཕྱིར་གཅིག་ཏུ་རྟོགས་པ་ཐ་མི་དད་པར་ངེས་པའི་རྒྱུར་གྱུར་པ་ན་ཐ་མི་དད་པར་སྣང་ངོ་ཞེས་འཆད་པར་འགྱུར་རོ། །ཉམས་སུ་མྱོང་བ་རྣམས་འབྲས་བུ་རྣམ་པར་རྟོག་པ་གཅིག་དང་བའི་ཕྱིར་ཐ་མི་དད་པ་ཡིན་ནོ་ཞེས་བྱ་བ་འདི་ནི་འདིར་དོན་
[276b.5]མ་ཡིན་ཏེ་རྟོགས་པ་ལ་ཡང་གཅིག་ཉིད་མེད་པའི་ཕྱིར་ཏེ། ཉམས་སུ་མྱོང་བ་ཐ་མི་དད་པའི་རྒྱུ་ཅན་གྱི་རྣམ་པར་རྟོག་པ་རྣམས་ཐ་མི་དད་པའི་ཕྱིར་རོ། །དེ་དག་ཀྱང་ཡུལ་ཐ་མི་དད་པའི་ཕྱིར་ཐ་མི་དད་པ་ཡིན་ནོ་ཞེ་ན། གལ་ཏེ་རྟག་ཏུ་ཐ་མི་དད་པའི་ཡུལ་དེ་ཡོད་པ་ཡིན་ན་སྤྱི་ཉིད་དུ་འགྱུར། འོན་
[276b.6]ཏེ་མེད་པ་ཁོ་ན་ཡིན་ན། ད་ནི་ཇི་ལྟར་དེ་ལ་དོན་གྱི་ཆོས་ཐ་དད་པ་དང་ཐ་མི་དད་པ་སྲིད་པར་འགྱུར། སློབ་དཔོན་རྟོགས་པ་ཐ་མི་དད་པའི་རྒྱུ་མི་སྟོན་པར་ཡང་ཇི་ལྟར་འགྱུར། དེས་ན་ཐ་མི་དད་པ་འདི་ནི་བསམས་པ་ལས་གྱུར་པ་ཡིན་གྱི་དངོས་པོ་ནི་མ་ཡིན་ནོ། །དེས་ན་དེ་ལྟར་ལྷག་པར་ཞེན་
[276b.7]པས། གཅིག་པ་ཉིད་ཀྱི་བློ་གཅིག་ལ་ལྟོས་ནས་འབྲས་བུ་གཅིག་པོ་དེ་དང་ལྡན་པའི་གསལ་བ་རྣམས་གཅིག་ཉིད་དུ་རྣམ་པར་གཞག་པ་ཡིན་ནོ། །དེ་བཤད་པ་ནི། བློ་གཅིག་རྒྱུ་ཡི་དངོས་པོ་ཡིས། །ཞེས་བྱ་བའོ། །དེས་ནི་གང་གི་འབྲས་བུ་གཅིག་པ་ཉིད་ཀྱི་འདྲ་བར་འགྱུར་བ་བློ་ཐ་དད་
[277a]
[277a.1]པ་འབྲས་བུ་གཅིག་ཇི་ལྟར་ཡིན་ཞེས་གང་སྨྲས་པའི་རྩོད་པ་སྤངས་པ་ཡིན་ཏེ། གཅིག་ཏུ་ལྷག་པར་ཞེན་པ་ལ་ལྟོས་ནས་བློ་གཅིག་ཏུ་བརྗོད་པ། དེ་ལས་ནི་གསལ་བ་རྣམས་ཐ་མི་དད་པ་ཡིན་པའི་ཕྱིར་རོ། །ད་བཞིན་དུ་ཆུ་འཆུ་བ་ལ་སོགས་པ་ལ་ཡང་ཞེན་པར་བྱས་པའི་
[277a.2]གཅིག་ཉིད་ཁས་བླངས་པ་ན་འདྲ་བའི་རྒྱུ་མཚན་དུ་འགྱུར་བ་ཡིན་ནོ། །ད་ནི་གང་གིས་གཅིག་ཏུ་ཞེན་པར་འགྱུར་བ་བློའི་འདྲ་བ་གང་གིས་བྱས། འབྲས་བུ་གཞན་གྱིས་བྱས་སོ་ཞེ་ན། དེ་ལྟ་ན་ནི་ཐུག་པ་མེད་པར་འགྱུར་བའམ། མཐར་དེ་འདི་ན་ཡང་འབྲས་བུ་གཅིག་པས་བྱས་པའི་འབྲས་
[277a.3]བུ་ཅིས་ཤེ་ན། འདི་ལ་བཤད་ཟིན་ཏེ། འབྲས་བུ་གཅིག་པ་ཉིད་ནི་འདྲ་བ་མ་ཡིན་གྱི། འོན་ཀྱང་རང་གི་བདག་ཉིད་ཙམ་གྱི་མཐར་ཐུག་པའི་རང་བཞིན་ལས་ཐ་མི་དད་པ་གསལ་བ་གཞན་ལ་རྗེས་སུ་འགྲོ་བ་དང་བྲལ་བའི་བ་ལང་ཉིད་ཁྲ་བོ་ལ་སོགས་པ་ཕན་ཚུན་ཐ་དད་པ་རྣམས་ཀྱི་འདྲ་བ་ཡིན་
[277a.4]ནོ་ཞེས་སོ། །དེ་ཡང་འབྲས་བུ་གཅིག་བྱེད་པ་ཉིད་ཀྱིས་ཉེ་བར་མཚོན་པ་ཡིན་ཏེ། དེ་རྣམ་པ་འདི་ལྟ་བུའི་ཆོས་དང་ལྡན་པའི་ཕྱིར་རོ། །འདི་ལྟར་ཆུ་འཛིན་པའི་ནུས་པ་ནི་བུམ་པའི་རང་བཞིན་ཉིད་ཡིན་ལ། གཅིག་གི་གང་ཡིན་པ་དེ་ཉིད་ནི་གཞན་གྱི་ཡང་ནི་མ་ཡིན་ནོ། །གཅིག་ཚུལ་
[277a.5]འཛིན་པར་ནུས་པ་ན། དེའི་ཚུལ་འཛིན་པའི་ནུས་པས་སྟོང་པའི་ནུས་པ་གཞན་ཆུ་འཛིན་པར་མི་ནུས་པ་ཡང་མ་ཡིན་ནོ། །དེས་ན་འབྲས་བུ་གཅིག་འདྲ་ཞེས་བྱ་བའི་དོན་ནི་འདི་ཡིན་ཏེ་དོན་རྣམས་ཀྱི་རྣམ་པ་འདི་ལྟ་བུའི་རང་བཞིན་འདྲ་བ་གང་ཡིན་པ་དེ་ནི་དེས་བྱས་པ་ཡིན་ནོ་ཞེས་བྱ་བའོ། །
[277a.6]དེ་ལ་རྟགས་ནི་འདི་ཡིན་ཏེ། བློ་གཅིག་པ་ཉིད་ལ་བརྒལ་ཞིང་བརྟགས་པས་འབྲས་བུ་ཐ་མི་དད་པ་གཞན་མ་བརྗོད་པ་གང་ཡིན་པའོ། །འོན་ཏེ་དེ་ལ་ཡང་རྣམ་པར་རྟོག་པ་འབྲས་བུ་ཉིད་དུ་མངོན་པར་འདོད་པ་ཡིན་ན། དེའི་ཚེ་འདི་ལ་ཡང་འབྲས་བུ་གཞན་ཅི་སྟེ་མ་བསྟན། མེད་པ་ཡིན་
[277a.7]ཡང་མངོན་པར་ཞེན་པའི་ཡུལ་མ་ཡིན་པར་ངེས་པར་བྱའོ། །དེ་ཉིད་གཞུང་འཛུགས་པའི་ཕྱིར་བཤད་པ་ནི། ཇི་ལྟར་དངོས་པོ་རྣམས་ཞེས་བྱ་བ་ལ་སོགས་པའོ། །འདི་སྐད་བརྗོད་པ་ཡིན་ཏེ། གང་གི་བློ་ཡང་གཅིག་ཏུ་འགྱུར་བ་ངོ་བོ་ཉིད་དུ་ན་གཅིག་པ་འགའ་ཡང་མེད་དོ་ཞེས་བྱ་བའོ། །
[277b]
[277b.1]དེ་ནི་འཁྲུལ་པའི་རྒྱུ་མཚན་རྟེན་དུ་གྱུར་པའི་དོན་རིམ་གྱིས་ཞེས་བྱ་བ་སྔར་ཉམས་སུ་མྱོང་བ་བྱས་ནས་རྣམ་པར་རྟོག་པའི་རྒྱུར་གྱུར་པ་རྣམས་ཀྱིས་སྐྱེད་པར་བྱེད་པའོ། །རང་བཞིན་གྱིས་ནི་འབྲེལ་པ་མེད་ཀྱི་འོན་ཀྱང་སྲེ་བའི་རྣམ་པ་ཅན་གྱི་བློ་འཁྲུལ་པ་ཉིད་དོ་ཞེས་བརྗོད་པ། དེ་བྱེད་པའི་སྒྲུབ་པ་ཅན་
[277b.2]གཞན་སེལ་བ་གང་ཡིན་པ་དེ་ནི་དེ་དག་གི་ཐ་མི་དད་པ་བརྗོད་དོ་ཞེས་བཤད་པ་ནི། འདི་དག་གི་ཞེས་བྱ་བ་ཡིན་ནོ། །དེས་ནི་ཐམས་ཅད་དུ་ཐ་མི་དད་པའི་རྣམ་པ་འདི་ལྟ་བུ་ཡིན་ནོ་ཞེས་གཞུང་བཙུགས་ནས། ཚུལ་འདི་ཉིད་ཀྱིས་འབྲས་བུ་ཐ་མི་དད་པ་ཡིན་ནོ་ཞེས་བསྟན་པའི་ཕྱིར་བཤད་པ་ནི་ཤེས་པ་ལ་
[277b.3]སོགས་པ་དེ་ཡང་གཅིག་ཏུ་རྟོགས་པའི་རྒྱུར་གྱུར་པ་ན་ཐ་མི་དད་པར་སྣང་ངོ་། །དེ་ལྟ་བུར་གྱུར་པའི་ལྷག་པ་ཞེས་བྱ་བའི་དབང་ཁོ་ནས་ཤེས་པ་ལ་སོགས་པ་ཐ་མི་དད་པར་རྗོད་པའོ་ཞེས་བྱ་བའི་ཐ་ཚིག་གོ། །ཐ་མི་དད་པར་སྙེམས་པ་ནི་ཐ་མི་དད་པའི་ཡུལ་ཅན་ཡིན་པའི་ཕྱིར་གཅིག་ཏུ་རྟོགས་པའི་དོན་
[277b.4]བརྗོད་པ་ཡིན་ནོ། །གཅིག་ཏུ་རྟོགས་པ་ཡིན་གྱི་རྟོགས་པ་ཡང་ཡིན་ལ། གཅིག་ཀྱང་ཡིན་ནོ་ཞེས་བྱ་བའི་དོན་ཏོ། །དེས་ནི་འདི་ལྟར་གཅིག་ཇི་ལྟར་བློ་གཅིག་ཉིད་ཡིན་པ་དེ་ལྟར་ཕྱེད་སྔ་མ་རྣམ་པར་བཀྲོལ་ནས། བློ་གཅིག་རྒྱུ་ཡི་དངོས་པོ་ཡིས། །ཞེས་བྱ་བ་འགྲེལ་པས་རྟོགས་པ་དེ་ལྟ་
[277b.5]བུའི་རྒྱུ་ཞེས་བྱ་བ་ལ་སོགས་པ་སྨོས་སོ། །གཅིག་ཏུ་སྙེམས་པའི་རྟོགས་པའི་ཐ་མི་དད་པར་སྣང་བའི་ཤེས་པ་ལ་སོགས་པའི་ཞེས་བྱ་བ་འདི་ནི། །བློ་གཅིག་རྒྱུ་ཡི་དངོས་པོ་ཡིས། །ཞེས་བྱ་བ་དེ་ལྟར་གཅིག་པ་དེ་བཤད་པ་ཡིན་ཏེ། གཅིག་པ་ཉིད་ནི་ལྷག་པར་ཞེན་པ་ཙམ་གྱིས་བྱས་པའི་
[277b.6]ཕྱིར་རོ། །གསལ་བ་རྣམས་ཀྱང་ཇི་ལྟར་ཐ་མི་དད་པ་དེ་གསུངས་པ་ནི། གསལ་བ་རྣམས་ཀྱིས་ཀྱང་ཞེས་བྱ་བ་གསུངས་པ་ཡིན་ནོ། །རྣམ་པ་འདི་ལྟ་བུ་གཅིག་གི་རྒྱུའི་དངོས་པོས་རྣམ་པ་འདི་ལྟ་བུའི་གསལ་བ་རྣམས་ཀྱི་ཐ་མི་དད་པ་ཉིད་ནི་དེ་ལྟ་བུར་གྱུར་པའི་ཤེས་པའི་ཡུལ་ཉིད་དོ། །འདི་
[277b.7]འང་འབྲས་བུ་གཅིག་པ་ཉིད་མི་སྲིད་པར་རྟོགས་པས་སྔར་བཤད་པ་ཉིད་བརྗོད་པ་ཡིན་ནོ་ཞེས་གསུངས་པ་ནི་ལན་གཅིག་མ་ཡིན་པར་འདི་ཐམས་ཅད་བཤད་ཟིན་ཏོ་ཞེས་བྱ་བའོ། །ད་ནི་མཉན་པ་ནི་སྒྲ་དང་དོན་གཞན་སེལ་བ་ན། རང་གི་དོན་རྗོད་པར་བྱེད་དོ་ཞེས་བྱ་བས་བྱེད་པ་དང་བརྗོད་པ་
[278a]
[278a.1]རྟོགས་པའི་ཕྱིར་དངོས་སུ་ན་དེ་སྒྲོ་འདོགས་རྣམ་པར་གཅོད་པར་ལྷག་པར་ཞེན་པ་ལ་ལྟོས་ཏེ་གཞན་ལྡོག་པའི་ཡུལ་ཅན་ཉིད་དང་རྗོད་པར་བྱེད་པ་ཉིད་དུ་བཤད་ཀྱང་བྱེད་པ་གཉི་ག་སྟོན་པའི་ཚུལ་གྱིས་གསལ་བར་མ་བཤད་པ་དེས་ན། དེ་ལྟར་བརྗོད་པའི་ཕྱིར་རབ་ཏུ་བྱེད་པ་
[278a.2]ཟློས་པར་བྱེད་པ་ནི་དེ་དེའི་འབྲས་བུ་ཅན་མི་བལ་བ་ཞེས་བྱ་བ་ཡིན་ནོ། །འདི་དག་གི་ཐ་དད་པ་དེ་བྱེད་པ་མ་ཡིན་པའི་ངོ་བོ་ཉིད་པས་ཞེས་བྱ་བ་ལ་སོགས་པས་དེའི་འབྲས་བུ་ཅན་ཡང་སེལ་བ་ཡིན་ནོ་ཞེས་བཤད་ཟིན་པ་ཉིད་ངེས་པར་བྱའི། དོན་དུ་མདོ་སྟོན་པ་ཡིན་ནོ་ཞེས་ཁོང་ནས་དབྱུང་བའི་ངེས་པ་བརྗོད་
[278a.3]པ་ཡིན་ནོ། །ངེས་པར་གཟུང་བའི་དོན་ཉིད་སྒྲུབ་པ་ནི། འདིར་ཕྱི་མའི་ཆ་དེ་དག་ལས་གཞན་རྗེས་སུ་འགྲོ་བའི་ཞེས་བྱ་བ་ཡིན་ནོ། །དངོས་མ་མཐོང་ཕྱིར་ཞེས་བྱ་བས་ནི་སྤྱི་རྟོགས་པར་བྱེད་པའི་ཚད་མ་མེད་པ་ཉིད་བརྗོད་པ་ཡིན་ནོ། །བཀག་པའི་ཕྱིར་ཞེས་བྱ་བས་ནི། ཇི་ལྟར་ཀུན་བརྟགས་
[278a.4]པ་ལ་གནོད་པ་ཉིད་བསྟན་ཏོ། །སྣང་བ་མི་དམིགས་པས་དགག་པ་ནི་བཤད་ཟིན་ལ། དངོས་པོའི་ངོ་བོ་གཅིག་ཉིད་ཕྱིར་ཞེས་བྱ་བ་ལ་སོགས་པའི་ཉེས་པས་འཆད་པར་ཡང་འགྱུར་རོ། །དེ་ལྟ་ན་དེའི་འབྲས་བུ་ཅན་ཉིད་ནི་དེའི་འབྲས་བུ་ཅན་མ་ཡིན་པ་དང་བྲལ་བ་ཉིད་ཡིན་ལ་དེ་ཡང་བློའི་ཡུལ་
[278a.5]ཡིན་ནོ་ཞེས་བཤད་པ་ཡིན་ནོ། །སྒྲའི་ཡུལ་ཡང་དེ་ཉིད་ཡིན་ནོ་ཞེས་བཤད་པ་ནི་གཞན་མེད་པའི་ཕྱིར་དེའི་འབྲས་བུ་ཅན་མ་ཡིན་པ་དང་བྲལ་བར་རིག་པ་ཡང་དེ་ཡིན་ཏེ་དགོས་པ་ཡིན་པའི་ཕྱིར་རོ། །དེ་རིག་དོན་གང་ལ་ཡོད་པ་ནི་དེ་རིག་དོན་ཅན་དེ། བརྡ་ནི་དེ་ལྟ་བུར་གྱུར་པར་རིགས་སོ། །འདི་ཡང་བཤད་ཟིན་པ་ཉིད་ངེས་པར་གཟུང་
[278a.6]བའི་དོན་དུ་བརྗོད་པ་ཡིན་ནོ་ཞེས་ངེས་པར་གཟུང་བས་བསྟན་ཏོ། །བརྡ་དེ་རིག་དོན་ཅན་ཡིན་པ་ཉིད་ཀྱང་ལྷག་པར་ཞེན་པ་ལ་ལྟོས་པ་ཡིན་ནོ། །འགྲེལ་པ་ནི་བརྡ་ཞིག་ཏུ་བྱས་ནས་ཡང་དངོས་པོ་རྣམས་ཀྱི་ཕན་ཚུན་ཐ་དད་པ་གང་ཡིན་པ་དེ་ཁོ་ན་ཤེས་པར་བྱ་བའི་ཕྱིར་བྱེད་ན་མཛེས་ཏེ་ཞེས་བྱ་བའོ། །དེ་
[278a.7]ཉིད་ཀྱི་ཕྱིར་གཏན་ཚིགས་བཤད་པ་དེ་མི་བྱེད་པ་ལས་ཐ་དད་པར་འཇུག་པའི་དོན་ཅན་ཉིད་ཀྱིས་སོ་ཞེས་བྱ་བའོ། །དེ་བྱེད་པའི་དོན་ལ་བྱེད་པ་མ་ཡིན་པའི་སྒྲོ་འདོགས་རྒྱབ་ཏུ་བཏགས་པས་ཐ་དད་པ་ནི། དེ་སེལ་བར་བྱེད་པས་བསལ་བ་སྟེ། དེས་འཇུག་པའི་དོན་རྒྱུར་གྱུར་པས་རྣམ་པར་གཅོད་
[278b]
[278b.1]པའི་འབྲས་བུ་ཅན་ཉིད་ཀྱིས་གཞན་སེལ་བའི་ཡུལ་ཅན་དུ་འཐད་པ་ཁོ་ནའོ། །དེ་ཉིད་བཤད་པ་ནི་གལ་ཏེ་ཞེས་བྱ་བ་སྟེ། འདིས་ནི་ཇི་སྐད་བཤད་པའི་དོན་ལ་གཏན་ཚིགས་ཉིད་དུ་བསྒྲུབ་པ་ཡིན་ནོ། །བརྡ་དེའི་འབྲས་བུ་ཅན་མ་ཡིན་པ་དང་བྲལ་བའི་དོན་ཅན་མ་ཡིན་ན་ནི། ཐ་སྙད་ལ་དེའི་འབྲས་བུ་ཅན་
[278b.2]མ་ཡིན་པ་དང་མ་བྲལ་བ་ཁོ་ན་ལ་འཇུག་པར་འགྱུར་རོ། །དེ་ལྟ་ཡིན་དང་ཉ་ཕྱིས་དོན་དུ་གཉེར་བ་དངུལ་ལོ་ཞེས་རྟོགས་པ་ན། ཉ་ཕྱིས་ལ་འཇུག་པར་འགྱུར་རོ། །དེའི་ཕྱིར་སྒྲོ་འདོགས་སེལ་བས་འཇུག་པའི་ཕྱིར་དེ་ལས་ཐ་དད་པ་ཉིད་སྒྲས་བརྗོད་པ་ཡིན་ནོ། །གང་གི་ཕྱིར་བརྡ་དེ་རིག་དོན་ཅན་
[278b.3]ཉིད་ཡིན་པ་དེ་བས་ན། དེ་ལྟར་བརྡར་བཏགས་པའི་སྒྲའི་དོན་རྟོགས་པ་འཁྲུལ་པ་མེད་པ་ཡིན་ཡང་དོན་ལ་མི་སླུ་བ་དང་བྱེད་པ་གཉིས་ཀྱིས་གཞན་སེལ་བའི་ཡུལ་ཅན་ཡིན་ནོ་ཞེས་བསྟན་པའི་ཕྱིར་མཉན་པ་དེ་ནི་ཞེས་འགྲེལ་པར་བྱས་ནས་དེ་མེད་མིན་ལས་ཞེས་བྱ་བ་བརྗོད་དོ། །རང་གི་རྣམ་པར་
[278b.4]རྟོག་པ་མ་ཡིན་པ་འབྲས་བུ་མི་བྱེད་པ་ལས་དངོས་པོའི་རང་བཞིན་དུ་ལྷག་པར་ཞེན་པའི་བདག་ཉིད་ཅན་ནོ་ཞེས་བཤད་པ་ནི་འབྲས་བུ་བྱེད་པ་དང་འདྲ་བའི་ངོ་བོར་སྣང་བ་ཅན་གྱི་བློ་སྐྱེད་པར་བྱེད་པ་ཡིན་ན་འང་མཉན་པ་དོན་ལ་མི་སླུ་བ་ཡིན་ནོ། །གཏན་ཚིགས་བཤད་པ་ནི་དེ་མི་བྱེད། ཡོངས་སྤོང་
[278b.5]ཡན་ལག་ངོ་བོའི་ཕྱིར་ཏེ། སྒྲོ་འདོགས་པ་རྣམ་པར་གཅོད་པའི་རྒྱུ་ཡིན་པའི་ཕྱིར་ཏེ། ཞེན་པ་ལ་ལྟོས་ནས་རིགས་མི་འདྲ་བ་དང་། འདྲེས་པ་དང་བྲལ་བ་ལས་གྱུར་པ་ཐ་དད་པའི་རང་བཞིན་གྱི་དོན་གྱི་ཡུལ་ཅན་ཡིན་པའི་ཕྱིར་རོ། །དེས་ན་དེ་རིག་པ་ཇི་ལྟ་བ་དེ་ལྟར་དོན་ཡོད་པས་སླུ་བ་
[278b.6]མེད་པ་ཉིད་ཡིན་པས་ན་རྣམ་པ་གཉིས་ཀྱི་གཞན་སེལ་བའི་ཡུལ་ཅན་དུ་འགྱུར་ཏེ། དོན་འབྱེད་པར་བྱེད་པ་ཉིད་ཀྱིས་གཞན་སེལ་བ་བྱེད་པ་པོ་ཡིན་པའི་ཕྱིར་དང་རང་ཉིད་ཀྱི་བྲལ་བ་མ་ཡིན་ཡང་སྒྲོ་འདོགས་ཀྱི་དབང་གིས་དོན་གཞན་དང་འདྲེས་པར་གྱུར་པ་དེ་དང་བྲལ་བ་ལས་གྱུར་པ་སྔ་ན་
[278b.7]མེད་པའི་བྲལ་བའི་རང་བཞིན་གྱི་དོན་རིག་པར་བྱེད་པའི་ཕྱིར་རོ། །དེ་བཤད་པ་ནི། དེའི་ཕྱིར་གཞན་སེལ་ཡུལ་ཅན་དེ། །དེ་བྱེད་སྟོན་པའི་ངོ་བོའི་ཕྱིར། །ཞེས་བྱ་བ་སྟེ། མཉན་པས་ནི་སྒྲ་དང་དོན་སེལ་བ་ན་འཇུག་པ་ཡིན་ནོ་ཞེས་བྱ་བ་དེ་བཤད་པ་ཡིན་ནོ། །འགྲེལ་པ་ནི་ངོ་བོ་ཉིད་གཅིག་
[279a]
[279a.1]དང་བྲལ་བའི་དོན་རྣམས་ལ་ཞེས་བྱ་བ་སྟེ། འདིས་ནི་དེ་བྱེད་མིན་ལ་ཞེས་བྱ་བ་བཤད་པ་ཡིན་ནོ། །དེ་བྱེད་དང་ཞེས་བྱ་ལ་སོགས་པ་བཤད་པ་ནི། ཕྱིན་ཅི་ལོག་ཏུ་སྣང་བའི་ཕྱིར་ཞེས་བྱ་བའོ། །དོན་མེད་ཅེས་བྱ་བ་བརྗོད་པ་ནི། མཚུངས་པ་ཉིད་དུ་ལྷག་པར་ཞེན་པ་ཞེས་
[279a.2]བྱ་བའོ། །དེ་མི་བྱེད་ན། ཡོངས་སྤོང་ཡན་ལག་ངོ་བོའི་ཕྱིར། །ཞེས་བཤད་པ་ནི། དེ་ལས་གཞན་པ་ཡོངས་སུ་སྤོང་བ་ཞེས་བྱ་བ་ལ་སོགས་པའོ། །རྣམ་པ་དེ་ལྟ་བུའི་དངོས་པོ་ཡོད་པའི་སྒོ་ནས་མི་སླུ་བ་ཉིད་བཤད་པ་ནི། འདི་ལྟར་ཞེས་བྱ་བའོ། །དེ་ལྟ་མ་ཡིན་ན་མི་སླུ་བ་མ་ཡིན་ནོ་ཞེས་
[279a.3]བཤད་པ་ནི། ཐ་དད་པའམ་ཞེས་བྱ་བའོ། །དེས་ན་གཞན་སེལ་ཡུལ་ཅན་དེ། །ཞེས་བྱ་བ་བཤད་པའི་ཕྱིར། དེ་ཉིད་ཀྱི་ཕྱིར་ཞེས་བྱ་བའོ། །གཞན་ལས་ལོག་པའི་དོན་རྣམས་ལ་བྱེ་བྲག་མེད་པར་ལྡོག་པའི་ཁྱད་པར་ལ་བརྟེན་ནས་ཞེས་བྱ་བ་ནི་དེས་བརྟེན་པ་ཉིད་དུ་བརྗོད་པ་ཡིན་ལ་ཐ་སྙད་ལ་ཡང་ཞེས་བྱ་བས་ནི་
[279a.4]དེ་བྱེད་པ་ཉིད་དུ་བཤད་དོ། །འདིར་གཞོན་ནུ་མ་ལེན་ལ་སོགས་པ་དོན་གྱི་དེ་ཁོ་ན་མ་རྟོགས་པ་རྣམས་གཞན་སེལ་བ་སྒྲའི་དོན་དུ་བརྗོད་པ་ལ་ཕན་ཚུན་བསྟེན་པའི་སྐྱོན་འགོད་པ་ཡང་སྤང་བའི་ཕྱིར་ཤིང་མ་ཡིན་ལས་ལོག་པར་ཏེ། ཤིང་མ་ཡིན་ལས་ཐ་དད་པར་ཤིང་གི་དོན་འཛིན་ན། གང་ཞིག་
[279a.5]ལྡོག་པ་དང་གང་ལས་ལྡོག་པ་གཉིས་པོ་དེ་ཕན་ཚུན་བསྟེན་པ་ཡིན་པས་ན་ཤིང་ངམ། ཤིང་མ་ཡིན་པ་གཅིག་འཛིན་པའི་ཕྱིར་གཞན་སེལ་བ་ལ་བརྡར་བཏགས་པ་མི་སྲིད་དོ། །ཤིང་མ་ཡིན་པ་རྟོགས་པས་ཡུལ་དུ་མ་བྱས་པར་ནི་དེ་ལས་ལོག་པའི་ཤིང་ངེས་པར་ནུས་པ་མ་ཡིན་ནོ། །ཤིང་གི་
[279a.6]ཤིང་མ་ཡིན་པ་ལས་ལྡོག་པ་དང་། ཤིང་མ་ཡིན་པ་ལས་ཀྱང་ཐ་དད་པ་ནི་ཤིང་མ་ཡིན་པས་སྟོང་པ་ཉིད་ཡིན་ནོ། །དེས་ན་ཤིང་མ་ཡིན་པ་རྟོགས་པས་ཡུལ་དུ་མ་བྱས་པ་ན། གང་རྣམ་པར་གཅད་པས་ཤིང་བཟུང་བ་ཤིང་མ་ཡིན་པ་ལས་ལྡོག་པ་འཛིན་པར་འགྱུར་བ་འདི་གང་ཞིག་མེད་པ་ཡིན།
[279a.7]ཤིང་མ་ཡིན་པ་ལས་ལྡོག་པར་ངེས་ན་ཤིང་མ་ཡིན་པ་ཡིན་པ་ཁོ་ནའོ་ཞེ་ན། བཟུང་མོད་ཀྱི་ཤིང་མ་ཡིན་པ་བཟུང་བས་དེ་ཤིང་ལས་ལྡོག་པར་འཛིན་པར་འགྱུར་རོ། །གལ་ཏེ་ཤིང་མ་ཡིན་པ་ལྡོག་པར་མི་འཛིན་ན་རྣམ་པར་རྟོག་པའི་ཡུལ་ཡིན་ཡང་གཞན་སེལ་བ་མ་ཡིན་པའི་ཕྱིར་གཞན་སེལ་བའི་
[279b]
[279b.1]ཡུལ་ཅན་ཉིད་ཉམས་སོ། །གལ་ཏེ་དེ་ལས་ལྡོག་པ་ཁོ་ནས་འཛིན་ཏོ་ཞེ་ན། དེས་ན་ད་ནི་ཤིང་མ་ཡིན་པ་ནི་ཤིང་ལས་ལོག་པར་གཟུང་བར་བྱ་ལ། ཤིང་ཡང་ཤིང་མ་ཡིན་ལས་ལྡོག་པ་ཡིན་པའི་ཕྱིར་ཤིང་མ་ཡིན་པར་འཛིན་པ་ནི་ཤིང་འཛིན་པ་ལ་ལྟོས་པ་ཡིན་ལ་ཤིང་ཡང་ཤིང་མ་ཡིན་པ་འཛིན་པ་ལ་ལྟོས་པར་
[279b.2]འགྱུར་བ་དེས་ན་གཉིས་ཕན་ཚུན་བསྟེན་པར་འགྱུར་རོ། །དེས་ན་དེ་ལྟར་རང་དབང་དུ་གཅིག་ཀྱང་འཛིན་པར་མི་སྲིད་པས་ན། འཛིན་པ་ཕན་ཚུན་ལྟོས་པས་གཉི་ག་འཛིན་པར་མི་ནུས་པའི་ཕྱིར་དེ་ལ་བརྡ་མི་སྲིད་པས་ན་བརྡ་ཡང་དེ་རིག་དོན་ཅན་ཡིན་པ་ཁོ་ན་ཞེས་ཅི་སྟེ་བརྗོད། འོན་ཏེ་ཤིང་མ་ཡིན་པ་ནི་གཞན་ལ་
[279b.3]ལྡོག་པར་འཛིན་ལ་ཤིང་ནི་ཤིང་མ་ཡིན་པ་ལས་ཕན་ཚུན་བསྟེན་པ་མ་ཡིན་ནོ་ཞེ་ན། དེའི་ཚེ་ཐུག་པ་མེད་པར་ཐལ་ཏེ། གཞན་དེ་འཛིན་པ་ཡང་གདོན་མི་ཟ་བ་དང་། ལྡོག་པའི་ཡུལ་ཅན་ཡིན་པས་ན་གཞན་དང་གཞན་འཛིན་པར་རྟོགས་པ་ལ་མཐར་ཐུག་པ་མེད་པའི་ཕྱིར་རོ། །འདི་ཉིད་བཤད་པ་ནི།
[279b.4]ཁ་ཅིག་ན་རེ་ཞེས་བྱ་བའོ། །ད་ནི་གང་དུ་རྣམ་པར་གཅད་པར་བྱ་བ་མེད་པས། རྣམ་པར་གཅད་ནས་རྣམ་པར་གཅོད་པའི་ཡུལ་འཛིན་པའི་ཕྱིར་རྣམ་པར་གཅད་པར་བྱ་བ་འཛིན་པར་ཐལ་བ་ན། ཇི་སྐད་བརྗོད་པའི་ཉེས་པ་དང་རྗེས་སུ་འབྲེལ་པར་འགྱུར་བ་རྣམ་པ་དེ་ལྟ་བུ་ནི་རྣམ་པར་གཅོད་པ་མ་
[279b.5]ཡིན་ནོ་ཞེས་གཞན་དུ་ཡང་རྣམ་པར་གཅོད་པ་ཁས་བླང་བའི་ཕྱིར་ཕ་རོལ་པོ་ལ་འདྲི་བ་ནི་དེ་དག་གི་ནི་བརྡར་འདོགས་ལ་ཞེས་བྱ་བའོ། །གང་གི་ཚེ་གཞན་སེལ་བ་སྒྲའི་དོན་མ་ཡིན་གྱི། འོན་ཀྱང་ཤིང་ཉིད་ཀྱི་མཚན་ཉིད་ཀྱི་སྤྱི་ཉིད་ལ་བརྡར་འདོགས་པ་དེའི་ཚེ་ཡང་བརྡར་འདོགས་པ་དེ་ལ་འམ་
[279b.6]སྒྲའི་དོན་འཆད་པ་ལ་ཤིང་མ་ཡིན་པ་རྣམ་པར་གཅོད་དམ་འོན་ཏེ་མ་ཡིན། འགྲེལ་པ་ནི་གང་དག་དེ་ལྟར་ཞེས་བྱ་བའོ། །རྣམ་པར་གཅོད་པ་ཁས་ལེན་པའི་ཕྱོགས་ལ་རང་གིས་བརྗོད་པའི་སྐྱོན་དུ་ཐལ་བར་འགྱུར་བ་དེའི་ཕྱིར་བཤད་པ་ནི། གལ་ཏེ་རྣམ་གཅོད་ཅེས་བྱའོ། །རྣམ་པར་གཅོད་པ་ཁས་
[279b.7]ལེན་ན་ནི་ཤིང་གི་རྣམ་པར་གཅོད་པ་ཤིང་མ་ཡིན་པ་རྟོགས་པ་སྔོན་དུ་འགྲོ་བ་ཅན་ཡིན་ལ་ཤིང་མ་ཡིན་པ་ཡང་ཤིང་རྣམ་པར་གཅད་པ་མེད་པ་ཅན་ནི་རྟོགས་པར་མི་ནུས་ཏེ། དེས་ན་གལ་ཏེ་ཤིང་མ་ཡིན་པ་རྣམ་པར་གཅད་པར་འགྱུར་ན་དེ་དག་ཤིང་འཛིན་པ་མེད་པར་གཟུང་མི་ནུས་པའི་ཕྱིར་ཕན་ཚུན་བསྟེན་པ་ཉིད་དོ། །
[280a]
[280a.1]དེ་ཉིད་བཤད་པ་ནི་དེའི་ཚེ་ཞེས་བྱ་བ་སྟེ། རྣམ་པར་གཅད་པའི་ཚེའོ། །ཤིང་དང་ཤིང་མ་ཡིན་པ་ཤེས་པར་བྱ་བའི་ཕྱིར་ཤིང་དང་ཤིང་མ་ཡིན་པ་དོན་དུ་གཉེར་བར་ཉེ་བར་འགྲོ་བའི་ཕྱིར་རོ། །གང་ཞིག་ཤིང་ངམ་ཤིང་མ་ཡིན་པ་སོ་སོ་རང་གིས་རང་བཞིན་ལ་རྣམ་པར་རྟོག་པ་
[280a.2]དོན་དུ་གཉེར་བ་བྱེད་པ་དེས་དེ་དག་གི་ཐུན་མོང་མ་ཡིན་པའི་རང་བཞིན་ཤེས་པ་ནི་རྣམ་པར་གཅོད་པས་བསྒྲུབ་པར་བྱ་བ་ཡིན་པ་ཉིད་ཀྱིས་རྣམ་པར་གཅད་པ་ཁས་བླངས་པ་ཡིན་ཏེ། དེ་ནི་དེའི་ཚད་མ་ཅན་ཡིན་པའི་ཕྱིར་རོ། །དེས་ན་རྣམ་པར་གཅོད་པ་མེད་ན་འདི་གཉིས་ཀྱི་ཤེས་པ་ཡོད་པ་ཡིན་ནོ། །
[280a.3]རྣམ་པར་གཅོད་ན་ཡང་ཕན་ཚུན་བསྟེན་པའི་ཕྱིར་མི་ཤེས་པར་འགྱུར་རོ་ཞེས་སྟོན་པ་ནི། དེ་མི་ཤེས་པ་ནི་དེས་ཞེས་བྱ་བའོ། །དེ་ལྟར་རྣམ་པར་གཅོད་པ་ཁས་ལེན་ན་ཉེས་པ་མཚུངས་པ་ཉིད་བརྗོད་ནས་རྣམ་པར་གཅོད་པ་མ་ཡིན་པའི་ཕྱོགས་ཀྱང་སྤང་བའི་ཕྱིར་བཤད་པ། རྣམ་པར་གཅོད་པ་
[280a.4]མི་རྟོགས་ན་ཡང་ཤིང་དེ་ལས་གཞན་ཤིང་མ་ཡིན་པ་ལ་དགོད་པ་ནི་དེ་ལས་གཞན་དགོད་པའོ། །དེ་ལས་གཞན་པ་ལ་འགོད་པའང་དེ་ཉིད་ལ་ཡོངས་སུ་མ་སྤངས་པ་ཡང་ཡིན་པ་དེ་གང་ལ་ཡོད་པ་སྟེ། སྒྲ་དེ་ལས་ཐ་སྙད་འདོགས་པར་བྱེད་པ་རྣམས་ཤིང་མ་ཡིན་པ་ཡོངས་སུ་སྤངས་ནས་འཇུག་པར་
[280a.5]མི་འགྱུར་རོ། །ཤིང་མ་ཡིན་པ་ལ་དགོད་པ་ན་དེ་རྟོགས་པའི་འབྲས་བུ་ཅན་ཉིད་དུ་རྗོད་པར་བྱེད་པ་ལ་སྦྱོར་བའོ། །ཤིང་གི་སྒྲ་དེ་ནི་ཤིང་མ་ཡིན་པ་དག་ལ་མ་བཀག་པའི་ཕྱིར་དེ་ལས་ཐ་སྙད་འདོགས་པར་བྱེད་པ་རྣམས་དེ་ཡོངས་སུ་སྤངས་ནས་འཇུག་པར་མི་འགྱུར་རོ། །འདི་ལ་ཡང་རྒྱུ་
[280a.6]མཚན་བཤད་པ་ནི་བརྡ་ལ་ཤིང་མ་ཡིན་དེ་དག་ལ་མ་གསལ་བའི་ཕྱིར་རོ། །འདི་སྐད་བརྗོད་པ་ཡིན་ཏེ། རྣམ་པར་གཅོད་པ་མ་གཏོགས་ན་ཤིང་མ་ཡིན་པ་གསལ་བ་ཅན་གྱི་ཤིང་གི་བདག་ཉིད་ཐུན་མོང་མ་ཡིན་པ་ལ་སྒྲ་མ་བཀོད་པ་དེས་ན་ཤིང་ཁྱེར་ཤོག་ཅེས་བྱ་བས་ཤིང་མ་ཡིན་པ་སྤངས་ནས་
[280a.7]ཤིང་ངེས་པར་རྟོགས་པར་ཇི་ལྟར་འགྱུར། གང་ཞིག་གང་ཡོངས་སུ་སྤངས་ནས་མ་བཀོད་པ་དེ་ལས་དེ་ཡོངས་སུ་དོར་བ་མི་འཐད་དེ། དཔེར་ན་འདི་ཉིད་ལ་ཤིང་ཤ་པ་ལ་སོགས་པའི་ཁྱད་པར་བཞིན་ནོ། །དེ་བས་ན་རྣམ་པར་མི་གཅོད་པ་ནི་མི་འཐད་དོ། །འདི་ཉིད་བཤད་པ་ནི། བརྡའི་ཚེ་ཞེས་
[280b]
[280b.1]བྱ་བའོ། །འདིར་ཕ་རོལ་པོ་དག་རྣམ་པར་གཅོད་པས་སྟོང་པའི་སྒྲུབ་པ་ཁས་ལེན་པ་ཉིད་ལ་ཉེས་པ་འདིར་འགྱུར་གྱི་གང་ལས་སྒྲུབ་པ་དང་རྣམ་པར་གཅོད་པ་ཡང་ཡོད་པ་དེ་ལ་ནི་མ་ཡིན་ཏེ། དེའི་ལྟར་ན་ནི་བསྒྲུབ་པའི་དོན་ལ་ཕྱིས་རྣམ་པར་གཅོད་པ་ཡིན་ནོ། །དེས་ན་རང་ལ་བརྟེན་པའི་སྒྲུབ་པས་ངེས་པའི་
[280b.2]ཤིང་དང་ཤིང་མ་ཡིན་པ་གཉིས་ཤེས་པ་འདི་ནི་ཤིང་མ་ཡིན་ཞེའམ། འདི་ནི་ཤིང་ངོ་ཞེས་ཤིང་ལ་ཤིང་མ་ཡིན་པ་རྣམ་པར་གཅོད་ལ་ཤིང་མ་ཡིན་པ་ལ་ཡང་རྣམ་པར་གཅོད་པའི་ཕྱིར་ཏེ། དེས་ན་འདིར་རྣམ་པར་གཅོད་པ་ཡིན་ཡང་ཕན་ཚུན་བསྟེན་པའི་ཉེས་པར་མི་འགྱུར་རོ་ཞེས་སྨྲ་བ་ནི། འོན་ཏེ་ཞེས་བྱ་
[280b.3]བའོ། །འདིར། གལ་ཏེ་མི་སྒྲུབ་གཞན་མི་དགག །ཅེས་འདོན། གནའ་རབས་དག་གིས་རྨོངས་པས་འདོར་རོ། །འདི་མི་འཐད་པ་ནི་མ་ཡིན་ཏེ། རྣམ་པར་གཅོད་པའི་བདག་ཉིད་ཀྱི་སྒྲུབ་པ་སེལ་བར་སྨྲ་བ་རྣམས་ཀྱིས་དེ་ལྟར་འདོད་པ་ཉིད་གཞན་གྱིས་སྤངས་པའི་ཕྱིར་རོ། །རྣམ་པར་
[280b.4]གཅོད་པ་ལ་ནི་གཉིས་རྟོགས་པ་ཡིན་ཏེ། དགག་པ་དང་སྒྲུབ་པའི་ཕྱིར་རོ། །དེ་ཉིད་ཀྱི་ཕྱིར་འབའ་ཞིག་གི་དགག་པ་སྒྲུབ་པ་ལས་གཞན་པའི་བྱེད་པ་ཅན་ནི་རྣམ་པར་གཅོད་པ་ཡིན་ནོ་ཞེས་བརྗོད་དེ་འདི་ནི་ཤིང་མ་ཡིན་པ་མ་ཡིན་ནོ་ཞེས་ཤིང་མ་ཡིན་པ་བཀག་ནས་ཤིང་སྒྲུབ་པ་ནི་རྣམ་པར་གཅོད་པའི་རང་
[280b.5]བཞིན་ཡིན་པའི་ཕྱིར་རོ། །དེས་ན་དགག་པ་གཉིས་ཀྱིས་རྣམ་པར་གཅོད་པ་བཀག་པར་འགྱུར་བའི་ཕྱིར། གལ་ཏེ་མི་སྒྲུབ་གཞན་མི་དགག །ཅེས་བརྗོད་པ་ཡིན་ནོ། །རྣམ་པར་གཅོད་པས་ནི། །ཅིག་ཅར་གཉིས་མེད་པ་ཡིན་ཏེ། དེས་ན་དེ་ལྟར་གྱུར་པའི་འདི་གཉིས་བཀག་པ་ཡིན་ནོ། །
[280b.6]དེ་ལྟར་གཉི་ག་སྒྲུབ་པ་བསལ་ནས་རང་གི་བསམ་པས་སྒྲུབ་པ་དག་པ་ཉིད་སྟོན་པ་ནི། མདུན་གནས་གཅིག་ཅིག་རབ་བསྟན་ནས། །ཞེས་པའོ། །རྣམ་པར་གཅོད་པ་མ་བྱས་ཤིང་སྒྲུབ་པ་འབའ་ཞིག་བྱས་ཏེ། བརྡར་བྱེད་དོ་ཞེས་བྱ་བའི་ཐ་ཚིག་གོ། །དེས་ན། བརྡ་ལ་དེ་དག་མི་སེལ་ན། །ཞེས་བྱ་བས་
[280b.7]རྣམ་པར་མི་གཅོད་པ་ལ་བརྗོད་པའི་སྐྱོན་གང་ཡིན་པ་དེ་མེད་དོ་ཞེས་སྨྲས་པས་ནི་གང་ཁོ་ན་ལ་བརྡར་བྱས་པ་ནི་ཐ་སྙད་འདོགས་པའི་ཚེ་ན་ཡང་དེ་ཁོ་ན་རྟོགས་པར་འགྱུར་ཏེ། དེའི་ཕྱིར་རྣམ་པར་གཅོད་པ་དང་རྣམ་པར་མི་གཅོད་པ་གཉིས་ལ་ཡོད་པའི་ཉེས་པའོ། །གང་གི་ཚེ་གལ་ཏེ་གཞན་བཀག་
[281a]
[281a.1]མི་སྒྲུབ་པར་བྱེད་ཅེས་འདོན་པ་དེའི་ཚེ་ཡང་འདི་རྣམ་པར་གཅོད་པ་འགོག་པ་ཉིད་དོ། །དགག་པ་སྒྲུབ་པའི་རང་བཞིན་ནི་རྣམ་པར་གཅོད་པ་ཡིན་པས་དེ་སྤངས་ཏེ་ཞེས་བྱ་བའི་དོན་ཏེ། དེ་ཉིད་ཀྱི་ཕྱིར་འགྲེལ་པ་སྤྱི་དངོས་པོར་སྨྲ་བའི་ལྟར་ན་འགའ་ཞིག་རྣམ་པར་གཅད་པས་
[281a.2]ཅུང་ཟད་གཅིག་བརྗོད་པ་ནི་མ་ཡིན་ནོ་ཞེས་རྣམ་པར་གཅོད་པ་འགོག་པ་ནི་འདོད་པ་གཉི་གར་ཡང་རྗེས་སུ་མཐུན་ནོ། །ཐ་སྙད་འདོགས་པའི་ཚེ་ན་ཡང་དེ་རྟོགས་པར་འགྱུར་ཏེ་ཞེས་བྱ་བ་བཤད་པ་ནི། འདིས་བརྡའི་དུས་ན་དེ་ལྟར་མཐོང་བའི་ཞེས་བྱ་བའོ། །འདི་དགག་པའི་ཕྱིར་བཤད་པ་མི་
[281a.3]མཚུངས་པ་མ་ཡིན་ཏེ། འདི་ལྟར་སྒྲུབ་པ་ལ་འབའ་ཞིག་པ་དེ་ལ་ཡང་མདུན་དུ་ཉེ་བར་བསྟན་པ་གང་ཡིན། འདི་ཡང་ཤིང་ཡིན་ལ་གཞན་ཡང་ཡིན་པའམ། འོན་ཏེ་འདི་ཁོ་ན་ཡིན་གྱི་གཞན་མ་ཡིན་ཞེས་བྱ་བ་དེ་ལྟར་ཐལ་བ་ཡོད་པ་ཉིད་དེ་དེ་ལ་གལ་ཏེ་འདི་ཡང་ཞེས་སྒྲུབ་པར་བྱེད་ན་ཤིང་
[281a.4]ཙམ་ལ་གཞོལ་བས་འཇུག་པར་མི་འགྱུར་རོ། །འོན་ཏེ་འདི་ཁོ་ན་ཞེས་བྱ་བ་ཡིན་ན། དེའི་ཚེ་ཤིང་སྒྲུབ་པ་ན་ངེས་པར་གཟུང་བའི་དོན་ལ་ལྟོས་པས་འཇུག་པའི་ཕྱིར་དང་། དེ་ཡང་ཤིང་མ་ཡིན་བཟློག་པའི་རང་བཞིན་ཡིན་པའི་ཕྱིར་དང་། དེ་མ་བཟུང་བར་བཟློག་པར་མི་ནུས་པས་ནི་འཛིན་པ་ཕན་
[281a.5]ཚུན་ལྟོས་པར་འགྱུར་རོ། །དེས་ན་ཐལ་བ་མི་མཚུངས་པར་ཇི་ལྟར་འགྱུར། གལ་ཏེ་ཤིང་རྟོགས་པ་ནི་ཅིག་ཤོས་འཛིན་པ་ལ་ལྟོས་པ་མེད་པར་མཐར་ཕྱིན་པར་འགྱུར་བ་མ་ཡིན་ནམ། དེས་ན་འདི་ཡང་ཤིང་ཡིན་ནམ། འདི་ཁོ་ན་ཡིན་ཞེས་བྱ་བ་ལྟོས་ཀྱང་ཤིང་མ་ཡིན་པར་འཛིན་པ་
[281a.6]ལ་ཤིང་འཛིན་པ་ལྟོས་པ་ནི་མ་ཡིན་ཏེ། དེས་ན་ཕན་ཚུན་བསྟེན་པ་ཉིད་མ་ཡིན་ནོ། །འགའ་ཞིག་ཏུ་ནི་འདི་ཡང་ཞེས་སྒྲའི་དོན་རྟོགས་པར་འགྱུར་ཏེ། དཔེར་ན་དོན་དུ་མ་ཅན་ཨཀྵ་ལ་སོགས་པའི་སྒྲ་བཞིན་ནོ། །དོན་གཅིག་པ་ཅན་ཉིད་ཀྱི་སྒྲ་གང་ཡིན་པར་ནི་འདི་ཁོ་ན་ཞེས་བྱ་བའོ། །འོན་
[281a.7]ཏེ་རྣམ་པར་གཅོད་པ་ཤིང་རྟོགས་པ་ཤིང་ཡིན་ན། འོ་ན་ཇི་ལྟར་མཐོང་བ་ལས་བཟློག་པ་ནི་ཤེས་པར་བླ་བའི་ཕྱིར་ཞེས་འཆད་པར་འགྱུར་ཏེ། མཐོང་བའི་དོན་ཉིད་མཐར་ཕྱིན་པ་མེད་པའི་ཕྱིར་གཞན་ཟློག་པར་ཇི་ལྟར་འགྱུར་ཏེ། དེས་ན་ཇི་ལྟར་ཐལ་བ་འདི་མཚུངས་ཤེ་ན། བརྗོད་པ། ཇི་
[281b]
[281b.1]ལྟར་ལྡོག་པའི་སྒྲ་ལ་དངོས་པོ་དངོས་པོ་གཞན་ལ་མེད་པའི་རྟོག་པ་དེ་ལྟ་བུ་རྣམ་པར་རྟོག་པའི་ཡུལ་ཡིན་ན་གཞན་སེལ་བར་སྨྲ་བ་ཚངས་པ་ཡིན་ཡང་ཕན་ཚུན་བསྟེན་པའི་ཉེས་པ་ལས་ལྡོག་པ་མེད་དོ། །གཞན་སེལ་བའི་ཡུལ་རྟོགས་པས་གྲུབ་པར་ཁས་མ་བླངས་ན། རྗེས་སུ་དཔག་པ་ཉིད་ལས་དེ་ལྟ་
[281b.2]བུའི་ངོ་བོར་གྲུབ་པར་བརྗོད་པའི་ཕྱིར་ཕན་ཚུན་བསྟེན་པའི་ཉེས་པ་མེད་དོ་ཞེ་ན། རྟོགས་པའི་ཡུལ་རྗེས་སུ་དཔག་པས་གྲུབ་པོ་ཞེས་བྱ་བ་འདི་ནི་གཟུ་ལུམས་ལྟ་བུ་ཡིན་ནོ། །གལ་ཏེ་དེ་རང་གི་རྟོགས་པས་ལྡོག་པ་ཞེས་བྱ་བ་ཙམ་དུ་རྟོགས་ན། འདི་ལ་རྗེས་སུ་དཔག་པས་ཅི་བྱ། དེ་སྟེ་རང་
[281b.3]བཞིན་ནི་ཞེས་བྱ་བར་ཡིན་ན་རྟོགས་པ་ལས་གཞན་རང་བཞིན་ཉིད་རྟོགས་པའི་ཡུལ་ཡིན་པས་རྗེས་སུ་དཔག་པས་ལྡོག་པའི་ཡུལ་ཅན་ཉིད་རྗེས་སུ་དཔོག་པར་ཇི་ལྟར་བྱེད། ཡང་ན་ནི་མེ་ཡང་དྲོ་བ་མ་ཡིན་པར་རྗེས་སུ་དཔག་པར་བྱ་བར་འགྱུར་རོ། །འོ་ན་ཇི་ལྟར་སྤྱི་སྨྲ་བའི་ལྟར་ན་ཡང་ཤིང་ལ་སོགས་པའི་རྟོགས་
[281b.4]པའི་སྤྱིའི་ཡུལ་ཅན་ཉིད་དུ་མ་རྟོགས་ཀྱང་སྤྱིའི་ཡུལ་ཅན་ཡིན་ཞེ་ན། སྤྱིའི་ཞེས་སྒྲ་ཙམ་གྱིས་མ་རྟོགས་པར་འཐད་དེ་ཤིང་གི་རྣམ་པའི་རང་བཞིན་ནི་སྤྱི་ལ་ཡང་ཡོད་པའི་ཕྱིར་རོ། །ཤིང་མ་ཡིན་པ་ལས་ལྡོག་པ་ནི་ཤིང་གི་རྣམ་པ་དང་ལྡན་པ་མ་ཡིན་ནོ། །རྟོགས་པ་གཉི་གས་ཀྱང་མ་གྲུབ་པ་
[281b.5]དང་། ངེས་པས་ཡུལ་དུ་མ་བྱས་པ་མ་ངེས་སོ་ཞེས་བྱ་བ་ནི་མི་འཐད་དོ། །ཤིང་ངོ་ཞེས་སྒྲོ་འདོགས་པའི་ཤིང་གི་རྣམ་པ་ཤིང་མ་ཡིན་པ་ལས་ལྡོག་པའི་ཕྱིར་ཤིང་མ་ཡིན་པས་སྟོང་པ་དེ་འདིའི་ཡུལ་ཡིན་ནོ་ཞེ་ན། མ་ཡིན་ཏེ་དངོས་པོའི་ཆོས་རྣམས་ནི་དེ་ལྟར་འགྱུར་གྱི། རྟོགས་པ་ལ་ཡོད་པ་
[281b.6]རྟོགས་པ་ཡུལ་ལ་ནི་མ་ཡིན་པའི་ཕྱིར་རོ། །དེས་ན་ཤིང་རྟོགས་པ་ཞེས་བྱ་བ་ཤིང་རྟོགས་པ་མ་ཡིན་པ་ལས་ཐ་དད་ཀྱི་དེའི་ཡུལ་ནི་ཤིང་མ་ཡིན་པའི་ཕྱིར་ཤིང་མ་ཡིན་པ་ལས་ལྡོག་པ་མ་ཡིན་ནོ། །དེ་ལྟ་མ་ཡིན་ན་སྐད་ཅིག་མ་ཡང་ཡིན་པའི་ཕྱིར་སྐད་ཅིག་མ་རྟོགས་པ་ཡང་གྲུབ་པའོ། །
[281b.7]དེས་ན་འདི་ནི་ཤིང་ཙམ་དུ་རྟོགས་པ་ཡིན་གྱི། འདི་ལ་གཞན་ནམ་ཤིང་མ་ཡིན་པ་ལས་ལྡོག་པ་ནི་འགའ་ཡང་མེད་དོ། །དེས་ན་རྟོགས་བཞིན་པའི་ལྡོག་པ་ནི་ལྡོག་མཚམས་མ་རྟོགས་ན་རྟོགས་པར་མི་འགྱུར་བ་དེས་ན་ཕན་ཚུན་བསྟེན་པ་མེད་པར་ཇི་ལྟར་འགྱུར། ཇི་སྐད་བཤད་པའི་
[282a]
[282a.1]ཕྱོགས་ལ་ནི་ཉེས་པ་འདི་མེད་དེ་འདི་ལྟར་ལོག་པ་ལས་ལྡོག་པ་གཞན་མ་ཡིན་དེའི་ཕྱིར་སོ་སོ་རང་གི་རང་བཞིན་ལ་རྣམ་པར་གནས་པའི་སྔོན་པོ་ཉིད་སྒྲོ་འདོགས་ཀྱི་དབང་གིས་དངོས་པོ་གཞན་དང་གཅིག་པར་གྱུར་པ་དེ་སེལ་བར་བྱེད་པས་དང་པོར་གྱུར་པ་ཐ་དད་པ་དེ་རྟོགས་པའི་
[282a.2]བློ་སེལ་བའི་ཡུལ་ཅན་ཡིན་གྱི་གང་ལ་ཡུལ་མེད་པའི་དགག་པ་མི་སྦྱོར་བ་གསལ་བྱ་འཛིན་པར་གདོན་མི་ཟ་བས་ན་དེར་ཡང་དག་པའི་དོན་གྱིས་རྣམ་པར་གཅད་པ་ན་ཕན་ཚུན་བསྟེན་པ་ལ་སོགས་པའི་ཉེས་པར་འགྱུར་བ་དགག་པའི་དོན་གྱིས་རྣམ་པར་གཅད་པའི་དོན་རྟོགས་པའི་རང་བཞིན་ནི་མ་ཡིན་ནོ། །འོ་ན་
[282a.3]ཇི་ལྟར་གཞན་རྩོད་ཅེ་ན། སྨྲས་པ། སློབ་དཔོན་གྱི་བཞེད་པའི་དེ་ཁོ་ན་ཉིད་མ་རིག་བཞིན་དུ་གཞོན་ནུ་མ་ལེན་ལ་སོགས་པ་རྣམས་སུན་འབྱིན་པ་བརྗོད་པ་ཡིན་ཏེ། དེས་ན་རྟོགས་པར་མི་ནུས་པའི་དངོས་པོ་ཉེ་བར་བསྟན་པས་སྤངས་པའི་ཕྱིར་ཇི་ལྟར་གྲགས་པའི་ལུགས་ལ་བརྟེན་ནས་སློབ་དཔོན་
[282a.4]གྱི་གཞུང་དགྲོལ་བས་ཀྱང་འདི་སྤངས་པ་ཡིན་མོད་ཀྱི་མ་སྤངས་པ་དང་འདྲ་བར་དེ་དག་གིས་བརྩད་པར་བྱས་པ་ཡིན་ནོ། །ད་ཇི་ལྟར་ཐལ་བ་མཚུངས་ཤེ་ན། བསམ་པ་འདི་ཡིན་ཏེ། ཤིང་སྒྲུབ་པ་མཐར་ཕྱིན་པ་ཡིན་ཡང་། དེ་མེད་ན་ཤིང་ལ་སོགས་པའི་སྒྲ་རྣམས་ཡུལ་ངེས་པ་ཉིད་ཀྱིས་འཇུག་པ་
[282a.5]མི་འགྲུབ་པའི་ཕྱིར་དང་། ཨཀྵ་ལ་སོགས་པའི་སྒྲའི་དོན་དུ་མ་ཅན་རྣམས་ཀྱང་ཐམས་ཅད་ཀྱི་དོན་མ་ཡིན་པའི་ཕྱིར་ངེས་པར་བཟུང་བ་དོན་ལ་བརྟེན་པར་བྱ་བ་ཉིད་ཡིན་པའི་ཕྱིར་ལ་ངེས་པར་གཟུང་བས་ཀྱང་གཞན་བཟློག་པས་ན་ཇི་ལྟར་ཕན་ཚུན་བསྟེན་པར་མི་འགྱུར། རང་གི་སྒྲུབ་པས་གཟུང་
[282a.6]བའི་བདག་ཉིད་ཤིང་དང་ཤིང་མ་ཡིན་པ་གཉིས་ལས་གཅིག་ལ་གཞན་བཟློག་པ་འཛིན་པ་ཕན་ཚུན་མི་ལྟོས་པའི་ཕྱིར་རོ་ཞེ་ན། ཤིང་དང་ཤིང་མ་ཡིན་པ་དག་རྣམ་པར་རྟོག་པ་ཙམ་གྱིས་ཤེས་པར་བྱ་བ་ནི་མ་ཡིན་ཏེ། དེས་ན་དེ་དག་མངོན་སུམ་གྱི་ཡུལ་ཉིད་ཡིན་པ་ན། ཇི་ལྟར་རང་སྒྲུབ་
[282a.7]པས་མ་བཟུང་བའི་བདག་ཉིད་ཡིན། དེས་ན་མདུན་ན་སྣང་བའི་ཤིང་གི་རང་བཞིན་ཉིད་མངོན་སུམ་གྱི་སྟོབས་ཀྱིས་ཤིང་མ་ཡིན་པ་ལས་ལྡོག་ན་ཕན་ཚུན་བསྟེན་པ་ཞེས་བྱ་བར་ཇི་ལྟར་འགྱུར། དེ་ལྟར་ཡང་འགྲེལ་པར་གསལ་བར་བྱའོ། །གཅིག་རང་དུ་བསྟན་ནས་ཞེས་བྱ་བ་ནི་ངེས་པ་
[282b]
[282b.1]བཟུང་བ་ཁས་ལེན་པ་དང་མི་ལེན་པ་དག་རྣམ་པར་གཅོད་པ་ལ་བརྗོད་པའི་ཉེས་པར་ཐལ་བ་བཤད་པའོ། །ད་ནི་འདིར་ཕ་རོལ་པོ་དག་རྣམ་པར་གཅོད་ཀྱང་ཉེས་པ་མེད་པར་སྟོན་པས་མཐོང་བ་ལས་བཟློག་པ་ནི་ཞེས་སྨྲས་སོ། །གལ་ཏེ་རྣམ་པར་གཅད་པ་ཡིན་ན་ཇི་ལྟར་ཤེས་ཏེ། འདི་ཁོ་ན་ཤིང་ཡིན་
[282b.2]ནོ་ཞེས་ཤིང་ཤེས་པ་ནི་ཤིང་མ་ཡིན་ཤེས་པ་ལ་ལྟོས་པ་ཡིན་ལ་ཤིང་མ་ཡིན་ཤེས་པ་ཡང་ཤིང་ཤེས་པ་ལ་ལྟོས་པ་དེས་ན། ཇི་ལྟར་ཤིང་མ་ཡིན་རྣམ་པར་གཅད་པས་བསྒྲུབ་ཅེས་བྱ་བ་ནི་རྣམ་པར་གཅོད་པ་ལ་བརྗོད་པའི་ཉེས་པ་ཡིན་ནོ། །ཉེས་པ་འདི་ནི་ཡོད་པ་མ་ཡིན་ཏེ་གང་གི་ཕྱིར་ཤིང་ལ་བརྟེན་
[282b.3]པས་རྟོགས་པ་མཐར་ཕྱིན་པ་ན་དེ་ལས་བཟློག་པ་ཤེས་པར་བླ་བའི་ཕྱིར་རྣམ་པར་གཅོད་པས་ཤིང་མི་སྒྲུབ་པར་ཇི་ལྟར་འགྱུར། ཡང་ཇི་ལྟར་སྣང་བ་ལས་བཟློག་པ་ཤེས་པར་བླ་ཞེ་ན། སྨྲས་པ། འདི་ལྟར་གཅིག་འགའ་ཞིག་མཐོང་ཞིང་གཞན་ལ་དེས་གཞན་ནི་ཞེས་དེ་དག་དང་ཆོས་མི་མཐུན་
[282b.4]པར་ངེས་པ་དེ་ལས་འབྱེད་པ་རྣམ་པར་ཕྱེ་ནས་རྣམ་པར་འཇོག་པ་སྐྱེའོ་ཞེས་འབྲེལ་ཏོ། །སྐྱེ་བའི་རྒྱུ་སྨྲས་པ་གཞན་ལ་དེའི་རྣམ་པས་དབེན་པའི་བློ་ཉམས་སུ་མྱོང་བ་ལས་སོ། །འདི་སྐད་བརྗོད་པ་ཡིན་ཏེ་ངེས་པའི་རྣམ་པ་ཅན་གྱི་རྟོགས་པས་བཟུང་བ་འགའ་ཞིག་དམིགས་པ་ན་དེའི་རྣམ་པ་ཅན་
[282b.5]གྱི་བློས་བཟུང་བ་མ་ཡིན་པ་དེ་ལས་བཟློག་པ་ཡིན་པའི་ཕྱིར། གཞན་ཉིད་དུ་ཤེས་པ་རྙེད་པར་བླ་སྟེ། གཞན་ཉིད་མ་ཡིན་ན་དེའི་རྣམ་པ་ཅན་གྱི་ཤེས་པས་གཟུང་བར་ཐལ་བའི་ཕྱིར་རོ། །དེ་ལྟར་མཐོང་བ་ལས་བཟློག་པ་ཤེས་པར་བླ་བར་བསྒྲུབས་ནས། དེ་ནི་ཉེས་པ་མེད་པ་ཉིད་བསྒྲུབ་
[282b.6]པའི་ཕྱིར་སྨྲས་པ། གང་གི་ཕྱིར་འདི་ཁོ་ན་ཤིང་ཡིན་ཞེས་བྱེ་བྲག་ཏུ་ཤེས་པ་དེ་དེ་ལས་བཟློག་པ་སྤངས་ནས་འདི་ནི་ཤིང་ངོ་ཞེས་རྟོགས་པ་ན་དེ་ལས་བཟློག་པ་ན་ཤིང་དུ་རྟོགས་པ་སྤངས་ནས་དེའི་རྣམ་པ་དང་ལྡན་པ་དང་མི་ལྡན་པ་ཁོ་ན་འཇུག་པར་བྱེད་དོ། །དེ་ལ་དེ་ལྟར་ཤིང་ལ་རང་གི་རྟོགས་པའི་
[282b.7]ཡུལ་དང་། ཤིང་མ་ཡིན་པ་ལ་དེས་བཟློག་པར་ཤེས་པ་དེས་ན་འདི་ཁོ་ནའམ། འདི་ཡང་རྟོགས་ཀྱང་རུང་ཏེ་སྔར་བཤད་པ་ཉེས་པ་མེད་དོ། །རྣམ་པར་གཅོད་པའི་ཡུལ་ཅན་དུ་སྨྲས་པ་ལ་ནི་རྣམ་པ་འདི་མི་སྲིད་དོ་ཞེས་སྨྲས་པ་ནི་རྣམ་པར་གཅོད་པ་སྨྲས་པ་ལ་ནི་ཞེས་བྱ་བའོ། །འདིར་ནི་འབའ་ཞིག་ཏུ་
[283a]
[283a.1]ཤིང་མ་ཡིན་པ་དག་སྒྲུབ་པས་ཀྱང་རྟོགས་པས་ན་ཤིང་དང་ཤིང་མ་ཡིན་པ་རང་གིས་རྟོགས་པ་དང་། དེ་ལས་བཟློག་པས་ཡུལ་དུ་བྱེད་པའི་ཤིང་དང་ཤིང་མ་ཡིན་པའི་རྣམ་པར་དབྱེ་བ་ཤེས་པ་གཅིག་ལ་གཞན་རྣམ་པར་གཅོད་པ་ཞེས་བྱ་བར་སྲིད་པ་ཡིན་ཏེ་རང་གི་ངོ་བོ་རྟོགས་ན་རྣམ་པར་
[283a.2]གཅོད་པ་སྲིད་པའི་ཕྱིར་རོ། །གཞན་སེལ་བར་སྨྲ་བ་ལ་ནི་འབའ་ཞིག་པའི་ཤིང་དང་ཤིང་མ་ཡིན་པ་རྟོགས་པའི་རྣམ་པར་རྟོག་པ་ཡོད་པ་མ་ཡིན་ནོ། །འོན་ཏེ་མཐོང་བས་ཤིང་རྟོགས་ནས་དེ་ཉིད་རྣམ་པར་རྟོག་པས་རང་ལས་བཟློག་པ་རྣམ་པར་གཅོད་པས་རྟོགས་པར་བྱེད་དོ་ཞེ་ན། དེ་མ་ཡིན་ནོ་
[283a.3]ཞེས་སྨྲས་པ་ནི་མཐོང་བས་ཤིང་རྟོགས་པའི་གསལ་བ་གཞན་ལ་ཡང་རྟོགས་པར་མི་འགྱུར་བའི་ཕྱིར། གཏན་ཚིགས་སྨྲས་པ་ནི། གཅིག་ལ་མཐོང་བའི་ཞེས་བྱ་བའོ། །དེ་ལྟར་རྣམ་པར་གཅོད་པ་ཡོད་ཀྱང་སྒྲུབ་པ་སྨྲས་པས་ཕན་ཚུན་བསྟེན་པ་མེད་པར་བསྟན་པ་ན་སློབ་དཔོན་རང་གི་
[283a.4]ལུགས་ལ་ཡང་སྤངས་པའི་ཕྱིར་དེ་འོ་ན་ཞེས་གསུངས་སོ། །ཤིང་གི་རྣམ་པ་གཅིག་རྟོགས་པ་ལ་རྣམ་པར་གནས་པའི་རྟོགས་པར་མི་རྟོགས་པ་དེའི་རྒྱུ་དང་རྒྱུ་མ་ཡིན་པ་རྟོགས་པ་དེའི་ཡུལ་དང་ཡུལ་མ་ཡིན་པར་གྱུར་པ་ཤིང་དང་ཤིང་མ་ཡིན་པར་གྱུར་པ་བདག་ཉིད་རྣམ་པར་དབྱེ་བ་བྱེད་དོ། །
[283a.5]འདི་སྐད་བརྗོད་པ་ཡིན་ཏེ། འདི་མཐོང་བས་རྟོགས་པ་ནི་མ་ཡིན་ནོ། །འོན་ཀྱང་རྣམ་པར་རྟོག་པའི་ཤེས་པ་ལ་སྣང་བ་ཉིད་ཀྱི་ཤིང་དང་། དེ་ལས་བཟློག་པའི་རང་བཞིན་ཤིང་མ་ཡིན། རང་ཉིད་ཁོ་ནས་རྟོགས་སོ་ཞེས་བྱ་བ་འདི་ནི་ངེད་ཀྱིས་ཀྱང་སྨྲ་བར་མི་བཟོད་པ་མ་ཡིན་ནོ། །ཇི་ལྟར་
[283a.6]བཟོད་དེ་གང་གི་ཕྱིར་མངོན་སུམ་གྱི་ཡུལ་དུ་བྱས་པའི་ཤིང་དང་ཤིང་མ་ཡིན་པ་ཙམ་གྱི་བདག་ཉིད། གལ་ཏེ་རྣམ་པར་རྟོག་པས་ཀྱང་དེ་ཙམ་གྱིས་རང་བཞིན་དུ་རྟོགས་པར་ནུས་པ་ཡིན་ན་ནི། འོ་ན་ནི་སྒྲུབ་པའི་ཡུལ་ཅན་དུ་འགྱུར་རོ་ཞེ་ན། ལྟ་ངན་འདི་ནི་བསླབ་པར་དཀའ་སྟེ། གང་གི་ཕྱིར་
[283a.7]ཤིང་ཞེས་བྱ་བ་རྟོགས་པ་ཤིང་མ་ཡིན་པ་རྣམ་པར་གཅད་པའི་སྒོ་ནས་རང་གི་རྟེན་ལུས་པས་མཐར་ཕྱིན་པ་ཡིན་ན། ཉེས་པ་འདིར་འགྱུར་བ་ཞིག་ན། རྣམ་པར་གཅོད་པ་ཁོ་ན་རྟོགས་བཞིན་པའི་ཆ་ཤས་སུ་གྱུར་པ། ཤིང་མ་ཡིན་པ་ཞེས་བྱ་བས་རྣམ་པར་གཅད་པ་རྟོགས་པ་ཉིད་ནི་མ་ཡིན་ཏེ།
[283b]
[283b.1]དེ་ལྟ་མ་ཡིན་ན། ཁར་བ་ཅན་ཞེས་བྱ་བ་ཁྱད་པར་གྱིས་རྟོགས་པར་མི་འགྱུར་ཏེ། དེར་ཡང་ཁར་བ་ནི་འབའ་ཞིག་པའི་རང་བཞིན་ཡིན་པའི་ཕྱིར་རོ། །འོན་ཏེ་འདི་དང་ལྡན་པའི་མཐར་ཐུག་པར་འགྱུར་བས་འབའ་ཞིག་པ་མ་ཡིན་ནོ་ཞེ་ན། ཤིང་ཡང་ཤིང་མ་ཡིན་པ་རྣམ་པར་གཅད་པ་ཡིན་
[283b.2]པས་འབའ་ཞིག་པ་མ་ཡིན་པའི་ཕྱིར་ཇི་ལྟར་སྒྲུབ་པའི་ཡུལ་ཅན་ཉིད་ཡིན། འདི་ལྟར་འདི་ནི་ཤིང་མ་ཡིན་ནོ་ཞེས་བྱ་བ་འདི་ནི་ཕ་རོལ་པོས་ཀྱང་རྣམ་པར་གཅོད་པ་རྟོགས་པར་འདོད་པས་བྱ་བ་ཡིན་ན། དེ་ལ་ཤིང་གི་དོན་རྟོགས་པ་མེད་པ་ནི་མ་ཡིན་ནོ། །དེའི་ཕྱིར་ཤིང་དང་ཤིང་མ་ཡིན་པའི་རྣམ་
[283b.3]པར་དབྱེ་བ་རྟོགས་པ་ཤིང་མ་ཡིན་རྣམ་པར་གཅད་པས་ཤིང་རྟོགས་པ་ཡིན་ནོ། །འོ་ན་ཤིང་མ་ཡིན་རྣམ་པར་གཅད་པ་མ་ཡིན་པར་འགྱུར་རོ་ཞེ་ན། ཇི་ལྟར་རྣམ་པར་མ་བཅད་དེ། གང་གི་ཕྱིར་དེ་ལས་བཟློག་པ་ཁོ་ནར་རྟོགས་པ་ཁོ་ནའོ། །ཡང་ན་འདིར་ཤིང་མ་ཡིན་པའི་རྣམ་པར་གཅད་པ་
[283b.4]མ་རྟོགས་མོད། ཇི་འདི་ཙམ་གྱིས་རྣམ་པར་གཅོད་པ་མ་རྟོགས་པར་འགྱུར་རམ། གལ་ཏེ་དེ་ལྟར་ན་ནི་འདི་ཤིང་མ་ཡིན་ནོ་ཞེས་བྱ་བ་ཡང་རྣམ་པར་གཅོད་པར་རྟོགས་པར་མི་འགྱུར་ཏེ། ཤིང་མ་ཡིན་པའི་རྣམ་པར་གཅོད་པ་མེད་པའི་ཕྱིར་རོ། །རྣམ་པར་གཅོད་པའི་རྟོགས་པ་ན་ཐམས་
[283b.5]ཅད་རྣམ་པར་གཅད་པར་བྱ་བ་ནི་མ་ཡིན་ཏེ། ཁྱད་པར་རྟོགས་པ་ན་ཁྱད་པར་གྱི་ཁྱད་པར་བཞིན་ནོ། །དེ་ལྟ་ན་འོ་ན་ཤིང་ཞེས་བྱ་བ་རྟོགས་པར་འགྱུར་ཏེ། ཐམས་ཅད་དུ་འདི་ནི་ཤིང་མ་ཡིན་པ་མ་ཡིན་ནོ་ཞེས་རྟོགས་པར་ཐལ་བའི་ཕྱིར་རོ་ཞེ་ན། འདི་རྣམ་པར་གཅོད་པ་ལ་ཇི་ལྟར་འགལ་བ་
[283b.6]བཤད་ཟིན་ཏེ་ཁས་བླངས་ནས་ཀྱང་དེ་ལྟར་རྟོགས་པ་ལ་ཕན་ཚུན་བསྟན་པ་མེད་པར་བརྗོད་ཀྱི། འདི་ནི་རྣམ་པར་གཅོད་པའི་རྟོགས་པ་མ་ཡིན་གྱི་དེ་ནི་རྣམ་པ་གཞན་དུ་བསྟན་པའི་ཕྱིར་རོ། །དེ་ཉིད་ཀྱི་ཕྱིར་གཅིག་རྟོགས་ཞེས་བྱ་བའི་ཤེས་པ་ནི་ཞེས་བྱ་བས་ཤིང་དང་ཤིང་མ་ཡིན་བསྒྲུབས་ནས་དེའི་
[283b.7]ཞེས་བྱ་བ་ལ་སོགས་པས་ཐ་དད་པའི་ཡུལ་ཅན་དུ་བཤད་པ་ནི། དེ་དང་དེ་མ་ཡིན་པའི་གྱུར་པའི་དོན་རྣམས་རྣམ་པར་འབྱེད་པར་བྱེད་པའི་རྟོགས་པ་པོ་གང་ཡིན་པ་དེ་ནི་བློ་དོན་གཅིག་ཏུ་འཛིན་པ་ཞེས་བྱ་བ་གང་ལ་གནས་ཏེ་རྣམ་པར་འབྱེད་པར་བྱེད་པ་དེ་ལ་ཡོད་པའི་དངོས་པོ་ལྡོག་པའི་མཚན་
[284a]
[284a.1]ཉིད་ཀྱི་ཁྱད་པར་གྱིས་ཐ་དད་པར་ཤེས་པར་འགྱུར་བར་བྱ་བའི་ཕྱིར་ཐ་དད་པ་ལ་སྐད་སྦྱོར་ཏེ། ཤིང་དང་ཤིང་མ་ཡིན་གྱི་རྣམ་པར་དབྱེ་བ་རྟོགས་པ་དེ་ལ་སྣང་བ་ཤིང་མ་ཡིན་ལས་ལྡོག་པའི་ཤིང་ལ་སྒྲ་དགོད་པ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་བཤད་པ་བློའི་རྒྱུ་ཉིད་
[284a.2]དུ་སྣང་བ་དང་། དེའི་རྒྱུ་རྣམ་པར་འབྱེད་པའི་མཐུ་ལས་དང་དེའི་རྒྱུ་མ་ཡིན་པའི་རྣམ་པར་འབྱེད་པའི་དབང་གིས་རྒྱུ་མ་ཡིན་པའི་ངོ་བོ་དང་བྲལ་བ་དང་། གཅིག་ཏུ་རྟོགས་པ་ཞེས་བྱ་བའི་ཤེས་པ་ལ་གནས་པའི་སྣང་བའི་དབང་གིས་རང་ཉིད་ཀྱིས་ངོ་བོ་གཅིག་པ་འདྲ་བར་རོ། །དངོས་སུ་ན་ནི་སྒྲ་ལས་
[284a.3]བློ་ལ་ཡོད་པའི་ཐ་སྙད་རྟོགས་པར་འགྱུར་བ་ཡིན་ཡང་རྟོགས་པ་འཁྲུལ་པའི་དབང་གིས་དངོས་པོ་ལྟར་རྟོགས་སོ། །འགྲེལ་པ་ནི་དེ་རྣམས་ནི་ཞེས་བྱ་བ་ཡིན་ནོ། །དེ་ལ་འགྲེལ་པ་ནི་འདི་ལྟར་ཡིན་ཏེ། རྣམ་པར་རྟོག་པའི་ཤེས་པ་ལ་རྣམ་པར་གནས་པ། རྣམ་པར་ཤེས་པ་དེའི་ཡུལ་དུ་
[284a.4]གྱུར་པ་ཐ་དད་པར་འགྱུར་སྙམ་པ་དེའི་རྒྱུ་མ་ཡིན་པ་དག་ལས་ཐ་དད་པ་ལ་སྒྲ་སྦྱོར་རོ། །སྦྱོར་བའི་རང་གི་ངོ་བོ་ཉིད་བཤད་པ་ནི། འདི་དག་ནི་ཤིང་ཡིན་ནོ་ཞེས་ཀུན་དུ་བསྟན་ནས་ཞེས་བྱ་བ་སྟེ། ཇི་ལྟར་ཉེ་བར་བསྟན་པ་ནི་དེར་སྦྱར་བ་ཡིན་པར་འགྱུར་རོ། །རྟོགས་པར་བྱ་བ་དང་རྟོགས་པར་
[284a.5]བྱེད་པ་དག་གིས་རྟོགས་པའི་དོན་ཁོ་ན་ལས་སྒྲ་སྦྱོར་གྱི་གཞན་དུ་ནི་མ་ཡིན་ནོ། །དེས་ན་རྟོགས་བྱེད་པའི་རྟོགས་པའི་ཡུལ་ཉིད་དུ་བསྟན་པ་ནི། རང་གི་རྟོགས་པའི་རྗེས་འབྲངས་ཏེ། །ཞེས་བྱ་བའོ། །གཞན་གྱི་རྟོགས་པའི་རྗེས་སུ་འབྲངས་པ་ནི་བློ་དེ་ལ་ཡོད་པའི་དངོས་ཞེས་མདོ་ཉིད་དུ་བཤད་པ་ཡིན་ནོ། །
[284a.6]དེ་ཉིད་ཀྱི་ཕྱིར་ཁྱད་པར་རང་དང་གཞན་གྱི་རྣམ་པར་རྟོག་པ་ལ་གཅིག་ཏུ་སྣང་བ་ཞེས་བྱ་བའོ། །གལ་ཏེ་རྣམ་པར་རྟོག་པ་ལ་རྣམ་པར་གནས་པ་ཞེས་བཤད་ཟིན་པ་ལ་ཡང་རང་གི་རྟོགས་པའི་རྗེས་སུ་འབྲངས་ཏེ་ཞེས་བྱ་བ་འདིས་ཅི་བྱ་ཞེ་ན། བརྗོད་པ་གང་ཞིག་རང་དང་གཞན་གྱི་རྣམ་པར་རྟོག་
[284a.7]པའི་རྗེས་སུ་འབྲངས་པས་རྣམ་པར་ཤེས་པ་ལ་རྣམ་པར་གནས་པར་འགྱུར་བ་དེ་འདི་ལྟར་བརྗོད་པ་ཡིན་ཏེ། ཇི་ལྟར་འདི་དག་རང་བཞིན་གྱི་རྣམ་པར་རྟོག་པ་གཅིག་ཏུ་སྣང་བ་དེ་ནི་སྔར་བཤད་པ་ཉིད་རྗེས་སུ་བརྗོད་པ་ཡིན་ནོ། །ཤིང་དེ་རྣམས་དི་གཅིག་ཏུ་རྟོགས་པའི་དབང་གིས་རྗེས་སུ་འགྲོ་བའི་
[284b]
[284b.1]ཕྱིར་རང་བཞིན་ཁོ་ནས་དེ་ལྟ་བུའི་རྣམ་པར་རྟོག་པའི་རྒྱུ་ཡིན་ཏེ། དེ་དག་ནི་རང་གི་ངོ་བོས་རྣམ་པ་དེ་ལྟ་བུའི་རྣམ་པར་རྟོག་པའི་རྒྱུ་ཡིན་ནོ། །དེ་ཡང་རྗེས་སུ་སོང་བར་སྣང་བ་ཡིན་པའི་ཕྱིར་གཅིག་ཏུ་སྣང་བ་ཡིན་ནོ། །ད་ནི་དེ་ཇི་ལྟར་རང་དང་གཞན་གྱི་རྣམ་པར་རྟོག་པ་ལ་སྣང་བ་དེ་སྟོན་པ་ནི། དེའི་
[284b.2]མཐོང་བའི་ཞེས་བྱ་བའོ། །གང་གིས་ཤིང་དེ་དག་མཐོང་བ་དེའི་རྣམ་པར་རྟོག་པའི་བློ་ལ་དེ་དག་གནས་པ་དེས་ན་རང་དང་གཞན་གྱི་ལུས་ཡིན་པའི་ཕྱིར་རོ། །ཤིང་དེ་དག་ཀྱང་ཕྱི་དང་ཤེས་པའི་རང་བཞིན་གྱི་གང་ཡིན་པ་དང་དག་པ་ཁྱད་པར་རྣམ་པར་མ་ཕྱེ་བ་སྟེ། དེ་དག་ནི་ཕྱི་དང་ནང་གི་དབྱེ་བ་
[284b.3]རྟོགས་པ་མེད་པའི་ཕྱིར་རོ། །དེ་ཇི་ལྟར་ཞེ་ན། དེ་ལྟ་བུ་མ་ཡིན་ཡང་ཞེས་སྨོས་ཏེ། ཕྱི་རོལ་མ་ཡིན་ཡང་ཕྱི་རོལ་དུ་ཞེན་པ་བྱས་པའོ། །དེ་ལ་ཡང་རྒྱུ་མཚན་བཤད་པ་ནི། ཤེས་པ་དེ་ཡི་རྒྱུ་ཉིད་དང་། དེ་ལས་གཞན་པ་ལས་ལྡོག་པ། །ཞེས་བྱ་བའོ། །འདི་སྐད་བརྗོད་པ་ཡིན་ཏེ། གང་གི་ཕྱིར་དེ་ཉིད་
[284b.4]ཉམས་སུ་མྱོང་བའི་སྒོ་ནས་བག་ཆགས་སྐྱེས་པས་ན་སྣང་བར་འགྱུར་བ་དང་། དེ་དག་ཉིད་ལ་ལྡོག་པའི་འབྲས་བུ་ཅན་གྱི་བློ་འཇུག་པ་དེའི་ཕྱིར་སྤྱི་སྣང་བ་ཡིན་ཡང་ཕྱི་ནང་གི་བདག་ཉིད་དབྱེ་བ་བསྒྲིབས་པར་འགྱུར་བ་ཡིན་ནོ། །ཇི་ལྟ་བུར་གྱུར་པའི་སྣང་བ་དེ་དག་ལ་སྦྱོར་བའི་སྒྲས་ནི་དེ་ཁོ་ན་
[284b.5]ལྟར་རྟོགས་པར་བྱེད་དོ་ཞེས་སྟོན་པས་དེ་ལས་དེ་རྟོགས་པར་འགྱུར་བའི་བློ་ཞེས་བྱ་བ་འཆད་པ་ནི། དེ་ལས་དེ་རྟོགས་བློ་ཞེས་བྱ་བ་ཡིན་ནོ། །དེ་ནི་འཁྲུལ་པའི་དབང་གིས་དངོས་པོ་གཅིག་ཏུ་སྣང་བ་ཡིན་གྱི། དངོས་པོ་ནི་མ་ཡིན་ནོ་ཞེས་ཇི་སྐད་བཤད་པ་སྟོན་པ་ནི། དེ་ལ་ཐ་དད་པ་མཐོང་ཡང་། །
[284b.6]ཞེས་བྱ་བའོ། །དངོས་པོ་ཐ་དད་པ་ཞེས་བྱ་བ་ནི་མཐོང་བ་ལས་གཞན་པའི་གསལ་བའོ། །སྤྱི་གང་ཞིག་མཐོང་བ་དང་མ་མཐོང་བ་ལས་ནི་ཤིང་ཉིད་ཡིན་ལ། མ་མཐོང་བས་ནི་ཤིང་མ་ཡིན་པའོ་ཞེས་ཤིང་མ་ཡིན་པ་རྣམ་པར་འབྱེད་པར་བྱེད་པའོ། །ཇི་ལྟར་མེད་ཅེ་ན། དེ་ནི་ཞེས་བྱ་བ་ལ་སོགས་
[284b.7]པ་སྨོས་སོ། །རྣམ་པར་ཕྱེ་བར་མ་མཐོང་བ་ནི་ཤིང་དང་ཤིང་མ་ཡིན་པའི་རྣམ་པར་དབྱེ་བར་ཉེ་བར་མཚོན་པར་བྱེད་པར་མི་རུང་ངོ་ཞེས་བཤད་པ་ནི། གཞན་ལས་ཐ་དད་པར་མ་བཟུང་ཡང་ཞེས་བྱ་བའོ། །སྤྱི་ཐ་མི་དད་པ་དང་དེ་དང་ལྡན་པས་གསལ་བ་ཉིད་ཡིན་ན་ཡང་གསལ་བ་གཅིག་ཁོ་ན་ཡིན་
[285a]
[285a.1]པར་འགྱུར་རོ་ཞེས་བཤད་པ་ནི། རྣམ་པ་གཅིག་པ་མཐོང་བ་གང་ཡིན་པ་དེ་གཞན་ལས་ལྟ་བར་མི་ནུས་པའི་ཕྱིར་ཞེས་སྨོས་སོ། །དེ་དང་དེ་མ་ཡིན་པ་དང་ལྡན་པ་དག་ཅེས་བྱ་བ་ནི་རྣམ་པ་དང་རྣམ་པ་མེད་པ་དང་ལྡན་པ་དག་གོ། །གཞན་སེལ་བའི་ཕྱོགས་ལ་གཞན་གྱིས་
[285a.2]བརྗོད་པའི་རྩོད་པ་གཞན་ཡང་གསལ་བའི་ཕྱིར་སྟོན་པར་བྱེད་པ་ནི། བུམ་པ་ལ་སོགས་པའི་ཞེས་བྱ་བའོ། །བུམ་པ་དང་བུམ་པ་མ་ཡིན་པ་དག་ཕན་ཚུན་འགལ་བའི་ཕྱིར་བུམ་པའི་སྒྲ་བུམ་པ་མ་ཡིན་པ་རྣམ་པར་གཅད་པ་ལས་རང་གི་དོན་སྟོན་པས་ན། རྣམ་པར་གཅོད་པའི་དོན་ཅན་དུ་སྲིད་ན།
[285a.3]ཤེས་བྱ་དང་གཞལ་བྱ་ལ་སོགས་པའི་ཚིག་དག་གིས་ནི་རྣམ་པར་གཅོད་པ་བརྗོད་པ་མི་སྲིད་དོ། །གང་གིས་དེ་ལྟ་བུ་རབ་ཉིད་དུ་བརྗོད་པར་འགྱུར་བ་དེ་ཤེས་བྱ་མ་ཡིན་པ་ལས་ལྡོག་པའི་ཤེས་བྱ་ཞེས་བྱ་བ་ནི་འགའ་ཡང་འཐད་པ་མ་ཡིན་ཏེ། ཐམས་ཅད་མཁྱེན་པའི་ཤེས་བྱ་ཉིད་ཀྱིས་ཤེས་
[285a.4]བྱ་མ་ཡིན་པ་མི་སྲིད་པའི་ཕྱིར་རོ། །གང་གིས་དོན་མཐའ་དག་ཁྱབ་པར་བྱེད་པ་ཡིན་ཡང་མེད་པ་ལ་ཡོད་པ་མི་སྲིད་པས་ན། ཡོད་པ་ཉིད་བཞིན་དུ་རྣམ་པར་གཅོད་པ་ཉིད་ཀྱིས་བརྗོད་པར་འགྱུར་བ་ཤེས་བྱ་ཞེས་བྱ་བ་དངོས་པོའི་ཆོས་ནི་མ་ཡིན་གྱི། འོན་ཀྱང་ཐ་སྙད་དུ་བྱ་བའི་རང་བཞིན་ཤེས་
[285a.5]པའི་ཡུལ་ཉིད་ཡིན་ནོ། །དེས་ན་གལ་ཏེ་ཞེས་བྱ་བ་ཡིན་པ་སྲིད་པ་དང་། ཤེས་བྱ་ཡང་དེ་ལས་ཐ་དད་པ་ཡིན་པས་ན་དེ་དེ་ལས་ཐ་དད་པ་ཉིད་དུ་ཡུལ་དུ་བྱེད་པ་ཡིན་ན། རྣམ་པར་ཤེས་པའི་ཡུལ་གྱི་ངོ་བོ་ཐོབ་པ་ཤེས་བྱར་འགྱུར་བའི་ཕྱིར་དེ་དེ་ལས་ཐ་དད་པར་མི་འགྱུར་རོ། །དེ་སྨྲས་པ་ནི་དེ་
[285a.6]ལས་ཐ་དད་པ་ཡུལ་དུ་བྱེད་པ་ཉིད་ཀྱིས་ཞེས་བྱ་བའོ། །འདི་བཟློག་པའི་ཕྱིར་བཤད་པ་ནི། དེ་ནི་ཉེས་པ་མེད་དེ་ཞེས་བྱ་བའོ། །ཅིའི་ཕྱིར་ཞེ་ན་འདིར་བློ་དོན་འགའ་ལས་རྣམ་པ་ཟློག་ནས། དོན་འགའ་ཞིག་ལ་འཇུག་བྱའི་ཕྱིར། །སྒྲ་ནི་རབ་ཏུ་སྦྱོར་བྱེད་དོ། །ཡང་ཇི་ལྟར་འགའ་ཞིག་ལ་
[285a.7]འཇུག་པར་བྱེད་ཅེ་ན། བཤད་པ་དེའི་དོན་ངེས་པར་གཟུང་ཕྱིར་རོ། །བརྡའི་དབང་གིས་སྒྲ་དེའི་དོན་དུ་འགྱུར་བ་གང་ཡིན་པ་དེ་དེས་བློ་ལ་འཛིན་པའི་ཕྱིར་ཏེ། དེས་ན་སྒྲ་བློ་དེ་ལ་གཞག་པ་དེའི་ངེས་པར་བཟུང་བས་ན་འགའ་ཞིག་ལས་ལྡོག་ཏེ། དཔེར་ན་འདི་ཁོ་ན་ཤིང་ཡིན་ནོ་ཞེས་བྱ་བས་
[285b]
[285b.1]ཤིང་གི་བློ་གཞན་ལས་ལྡོག་པ་བཞིན་ནོ། །འདི་ཁོ་ན་ཡིན་གྱི་གཞན་ནི་མ་ཡིན་ནོ་ཞེས་རྟོགས་པའི་ཕྱིར་རོ། །དེ་བཞིན་དུ་འདི་ཤིང་ཁོ་ན་ཞེས་བྱ་བས་འདི་ནི་ཤིང་ཁོ་ན་ཡིན་གྱི་ཤིང་མ་ཡིན་པ་ནི་མ་ཡིན་ནོ་ཞེས་རང་གི་ཡུལ་ལ་རབ་ཏུ་གྲུབ་པ་དེ་ཤིང་མ་ཡིན་པ་ལས་ལྡོག་པའི་ཕྱིར་དེ་ལས་ཤིང་མ་ཡིན་
[285b.2]པའི་བློ་བཟློག་པས་གཞན་ལ་འཇུག་པ་ཡིན་ནོ། །འདི་ལ་དོན་གཞན་ལས་ལྡོག་པ་ལ་འཁྲུལ་པ་མེད་པ་ནི་དངོས་པོའི་རྣམ་པ་དངོས་པོའི་ཆོས་ཡིན་ཏེ། རིགས་མི་འདྲ་བ་དག་བཞིན་དུ་རིགས་འདྲ་བ་དག་ལས་ཀྱང་ཐ་དད་པའི་ཕྱིར་ན་ཤེས་བྱ་མ་ཡིན་པ་མེད་ཀྱང་ཤེས་བྱ་རྣམ་པ་ཉིད་ཐ་
[285b.3]དད་པས་ན། བུམ་པའི་ཤེས་བྱ་ཞེས་བྱ་བས་སྣམ་བུའི་ཤེས་བྱ་ལས་ཐ་དད་པར་རྟོགས་པའི་ཕྱིར་རོ། །འོན་ཀྱང་གཞན་གྱི་རྩོད་པ་འདི་ནི་ཤེས་པ་ཙམ་དྲེགས་པས་བྱས་པ་དངོས་པོའི་ངོ་བོར་གྱུར་པ་མ་ཡིན་པའི་ཤེས་བྱ་ཉིད་དངོས་པོ་མེད་པ་ལ་ཡང་སྲིད་པ་ལ་བརྟེན་པ་ཡིན་པའི་ཕྱིར་སློབ་
[285b.4]དཔོན་གྱིས་དངོས་པོ་རྣམས་ཀྱི་ལྡོག་པ་མེད་ན་མི་འབྱུང་བ་སྒྲུབ་པའི་རིགས་པ། གང་ཕྱིར་དངོས་ཀུན་རང་བཞིན་ཞེས་བྱ་བ་གཞག་ནས་སྒྲ་སྦྱོར་བ་ནི་ངེས་པར་གཟུང་བ་མེད་ན་མེད་པ་ཡིན་ནོ་ཞེས་འདིར་རིགས་པ་གཞན་དངོས་པོ་མེད་པ་ཁྱད་པར་བྱེད་པ་ཡང་བསྟན་པ་ཡིན་ན་དངོས་
[285b.5]པོ་མེད་པ་ཡང་སྒྲའི་བརྗོད་པར་བྱ་བ་ལས་མ་འདས་པའི་ཕྱིར། ཐ་དད་པ་མེད་ཀྱང་ཐ་དད་པར་བརྗོད་པར་བྱ་བས་འདའ་བ་ནི་མ་ཡིན་ནོ། །སྒྲ་སྦྱོར་བ་ནི་ངེས་པར་གཟུང་བ་མེད་ན་མེད་པ་ཞེས་བྱ་བ་གང་ཡིན་པ་འདི་ཉིད་གང་ལས་ཤེ་ན། བཤད་པ། གཞན་དུ་སྦྱོར་བ་དོན་མེད་འགྱུར། །ཞེས་
[285b.6]བྱ་བའོ། །དོན་དེའི་དོན་ངེས་པར་གཟུང་བ་མེད་ན་སྒྲ་སྦྱོར་བ་འབྲས་བུ་མེད་པར་འགྱུར་རོ། །རང་གི་ཚུལ་ཙམ་སྣང་བའི་རང་བཞིན་གྱི་ཚད་མ་ནི་དེ་ཇི་ལྟར་ཡོད་པ་དེ་ལྟར་རྟོགས་པ་ན་རང་གི་ཡུལ་རྟོགས་རང་གི་ཡུལ་གྱི་ངེས་པར་གཟུང་བའམ་རྣམ་པར་གཅོད་པ་ལ་ལྟོས་པ་མ་ཡིན་
[285b.7]ཏེ། དཔེར་ན་མངོན་སུམ་བཞིན་ནོ། །གང་གིས་ན་དེ་བསྒྲུབས་པ་ཁོ་ནས་སྦྱོར་བའི་དགོས་པ་གྲུབ་པ་འདི་མིག་ལ་སོགས་པ་ཡང་དག་པར་ལྡན་བཞིན་དུ་འབྲས་བུ་གཞན་ཚོལ་བ་འཕེན་པར་མི་འགྱུར་བ་སྒྲས་ནི་དེ་ལྟར་རང་གི་ཡུལ་རྟོགས་པར་བྱ་བ་མ་ཡིན་ནོ། །འདི་ལྟར་གལ་ཏེ་སྒྲས་
[286a]
[286a.1]ཤིང་རྟོགས་པ་སྔོན་མ་བྱུང་བ་བྱེད་ན་དེ་ཙམ་གྱིས་དགོས་པ་མཐར་ཕྱིན་པའི་སྒྲ་ལ་ལྟོས་པ་གཞན་སྐྱེས་ན་ངེས་པར་གཟུང་བ་ཚོལ་བ་ཡིན་ཡང་དེ་མེད་པས་སྦྱོར་བ་དོན་མེད་པར་འགྱུར་བ་ནི་ཅུང་ཟད་ཀྱང་མེད་དེ། དཔེར་ན་ཤིང་གི་རྣམ་པ་རྟོགས་པར་བྱེད་པའི་མངོན་སུམ་ལ་
[286a.2]ཚད་མ་གཞན་གྱི་བྱེད་པ་འདི་ཁོ་ནས་ཤིང་ཡིན་གྱི་གཞན་ནི་མ་ཡིན་ནོ་ཞེས་བྱ་བའམ། འདི་ཤིང་ཡིན་པ་ཁོ་ནའོ་ཞེས་བྱ་བ་སྣང་བ་ངེས་པས་བྱེད་ལ་ཉམས་སུ་མྱོང་བའི་དགོས་པ་ནི་ཤིང་གི་རྣམ་པར་རྟོག་པ་ཁོ་ན་ཡིན་པ་བཞིན་ནོ། །དེས་ན། གཞན་དུ་སྦྱོར་བ་དོན་མེད་འགྱུར། །ཞེས་ཇི་ལྟར་བརྗོད།
[286a.3]འདི་ནི་ཤིང་ཡིན་ནོ་ཞེས་ཤིང་གི་སྒྲས་ཤིང་རྟོགས་པར་བྱེད་པ་ན་ངེས་པར་གཟུང་བས་ནི་ཅིར་ཡང་བྱར་མེད་དེ། བློ་འགའ་ཞིག་ལས་མ་བཟློག་ཀྱང་འགའ་ཞིག་ལས་འཇུག་པ་ཉིད་ཀྱི་འབྲས་བུ་དང་བཅས་པའི་ཕྱིར་ཇི་ལྟ་བ་བཞིན་དུ་སྣང་བར་མ་གྲུབ་པས་ན་འབྲས་བུ་མེད་པ་མ་ཡིན་པའི་ཕྱིར་རོ། །
[286a.4]དེའི་ཕྱིར་རྣམ་པར་རྟོག་པ་ནི་འདོད་པ་ཙམ་ལ་རག་ལས་པས་འཇུག་པ་ཡིན་ལ། དེ་ཡང་ལྕགས་ཀྱུ་མེད་པའི་ཕྱིར་ཐམས་ཅད་ལ་ཡོད་པ་ཡིན་ནོ། །འགགས་ཀྱང་མ་བྱས་པ་བྱར་ཡོད་པ་ནི་མ་ཡིན་ཏེ། རྙེད་པར་སླ་བའི་རྒྱུ་མཚན་གྱིས་ན་མ་བྱས་ཀྱང་བྱས་པ་དང་བྱེ་བྲག་མེད་པའི་ཕྱིར་རོ། །དེས་
[286a.5]ན་འདི་འདོད་པས་བྱས་པའི་འཇུག་པ་དང་བྲལ་བས་འགའ་ཞིག་ལས་བཟློག་ནས་འགའ་ཞིག་ལ་འཇུག་པ་ན་སྔ་ན་མེད་པའི་རྒྱུས་བསྒྲུབ་པར་འགྱུར་རོ། །དེ་ལྟ་མ་ཡིན་ན་ནི་ཇི་ལྟ་བ་བཞིན་སྣང་བར་འགྱུར་ཏེ། འདོད་པ་ཇི་ལྟ་བ་བཞིན་དུ་གྱུར་པ་དེ་ལྟ་བུ་ཁོ་ནར་འགྲུབ་པའི་ཕྱིར་རོ། །དེ་ངེས་
[286a.6]པར་གཟུང་བ་མེད་ན་ནི་དེ་ལྟར་མི་སྲིད་པའི་ཕྱིར་སྒྲའི་དོན་ངེས་པར་གཟུང་བར་བྱ་བ་ཁོ་ནའོ། །གལ་ཏེ་འདོད་པས་བྱས་ཀྱང་འདི་ཁོ་ན་ཤིང་ཡིན་ནོ་ཞེས་རྟོགས་པ་མ་ཡིན་ནམ་ཞེ་ན། མ་ཡིན་ཏེ་འདོད་པ་ཉིད་ནི་རང་དང་འགལ་བར་སྒྲུབ་མི་སྲིད་པའི་ཕྱིར་དང་། གཞན་ལ་ཡང་ཤིང་ཞེས་བྱ་བའི་
[286a.7]འདོད་པ་ཡོད་ན་འདི་ཁོ་ནར་ཞེས་བྱ་བ་མི་གྲུབ་པའི་ཕྱིར་དང་། མེད་ན་ཡང་དེ་རྒྱུ་ཉིད་དུ་འགལ་བའི་ཕྱིར་རོ། །དེ་ལ་ཡང་ཤིང་ཤིང་མ་ཡིན་པ་ལས་ཐ་དད་ན་ཤིང་མ་ཡིན་ཡང་ཤིང་ལས་ཐ་དད་པར་གྱུར་པ་ཡིན་ནོ། །དེས་ན་ཤིང་ཞེས་བྱ་བ་ཐ་དད་པ་རྣམ་པ་གཅིག་ཏུ་གྱུར་པ་ནི་ཤིང་གི་སྒྲའི་དོན་
[286b]
[286b.1]ཡིན་ལ། ངེས་པར་གཟུང་བས་ནི་འདི་ཁོ་ན་ཤིང་ཡིན་གྱི་གཞན་ནི་མ་ཡིན་ནོ་ཞེས་དེ་ལས་གཞན་དེས་སྟོང་པར་སྟོན་པ་ཡིན་ནོ་ཞེས་བྱ་བའི་དོན་ཏོ། །འདི་ཤིང་ཁོ་ན་ཞེས་བྱ་བ་ནི་ལོག་པ་ལས་ལྡོག་པ་ལོགས་སུ་བྱས་ནས་བརྗོད་པ་ཡིན་ནོ། །གང་གི་ཕྱིར་དེ་ལྟ་ཡིན་པ་དེས་ན། ཤེས་བྱ་ལ་སོགས་པའི་ཚིག་དག་
[286b.2]ཀྱང་ཐ་སྙད་དུ་འགྱུར་དགོས་སོ། །འགྲེལ་པ་ནི་སྒྲ་རབ་ཏུ་སྦྱོར་བར་བྱེད་པ་ཞེས་བྱ་བའོ། །རྗེས་སུ་འགྲོ་བ་དང་ལྡོག་པ་དག་ཅེས་བྱ་བ་ནི་འཇུག་པ་དང་ལྡོག་པའོ། །དེ་བསྟན་པ་ནི། དེ་ནི་ཞེས་བྱ་བའོ། །བྱེད་པ་གཉིས་པོ་ཉིད་གཞུང་འཛུགས་པ་ནི་གལ་ཏེ་འདིས་ཞེས་བྱ་བའོ། །དེ་མེད་ན་ནི་སྒྲ་
[286b.3]མེད་པ་ལ་བློའི་རང་བཞིན་ཇི་ལྟར་གྱུར་པ་དེ་ཁོ་ན་ལྟར་སྒྲས་བྱས་པ་ཡང་ཡིན་པས་ཇི་ལྟ་བ་བཞིན་སྣང་བར་འགྱུར་རོ། །ངེས་པར་གཟུང་བ་མེད་ན་མེད་པ་ཉིད་བཤད་པ་ནི། དཔེར་ན་ཞེས་བྱ་བའོ། །འདིར་བུམ་པས་ཆུ་འོན་ཅིག་ཅེས་བྱ་བའི་ཚིག་གསུམ་ངེས་པར་གཟུང་བ་མེད་ན་མེད་པར་གཞུང་
[286b.4]འཛུགས་ཏེ། གལ་ཏེ་བུམ་པ་དང་སྙིམ་པས་ཀྱང་རུང་སྟེ་ཆུ་བླང་བར་བརྗོད་པར་འདོད་ན་ནི་བུམ་པས་ཞེས་བྱ་བ་དོན་མེད་པར་འགྱུར་རོ། །དེ་བཞིན་དུ་ལས་དང་བྱ་བ་ལ་ཡང་རྟོགས་པར་བྱའོ། །གང་དུ་བུམ་པ་ཞེས་བྱ་བ་ཉེ་བར་མཚོན་པའི་དོན་དུ་བླངས་པ་དེར་ནི་ཉེ་བར་མཚོན་པས་མཚོན་པར་བྱ་
[286b.5]བ་མཐའ་དག་བདག་ཉིད་ཀྱི་ནང་དུ་བསྡུས་ཏེ། ངེས་པར་གཟུང་བའི་དོན་དུ་འགྱུར་བ་ཡིན་ཏེ། དཔེར་ན་གཞི་བྱ་རོག་ལས་སྲུངས་ཤིག་ཅེས་བྱ་བར་ཉེ་བར་གནོད་པ་ལས་ཡིན་པ་བཞིན་ནོ། །སྦྱོར་བ་རྒྱས་པ་ལ་བྱ་རོག་ཁོ་ན་ལས་སྲུངས་ཤིག་ཅེས་ངེས་པར་གཟུང་ཡང་དབྱུག་པ་བརྡེགས་པ་ལས་
[286b.6]ཀྱང་མི་རུང་བར་བརྗོད་པ་ནི་མ་ཡིན་ནོ། །དེ་བཞིན་དུ་གཞན་དུ་ཡང་རྟོགས་པར་བྱའོ། །གལ་ཏེ་བྱེད་པ་པོ་ཁྱད་པར་ཅན་གྱིས་བསྒྲུབ་པར་བྱ་བའི་ཁྱད་པར་མི་ཤེས་པ་ལ་དེ་བརྟན་པ་ཉིད་ཀྱི་ངག་འབྲས་བུ་དང་བཅས་པར་འགྱུར་བ་མ་ཡིན་ནམ། དེ་ལ་ངེས་པར་གཟུང་བ་མེད་པས་དོན་མེད་པ་འགའ་ཡང་
[286b.7]མེད་དེ། །གལ་ཏེ་ཇི་ལྟར་སྙིམ་པས་ཀྱང་ཁྱེར་ཏེ་མི་འོང་ལ་གཞན་ནམ་བྱ་བ་མེད་པ་ལ་མི་བརྟན་ཞེ་ན་མ་བརྗོད་པ་ཉིད་ཀྱི་ཕྱིར་རོ། །ཇི་ལྟར་བརྗོད་པའི་རྗེས་སུ་སྒྲུབ་པ་ནི་གཞན་གྱིས་གཞན་དུ་བྱེད་པ་མི་སྲིད་པའི་ཕྱིར་དེ་ལ་ངེས་པར་གཟུང་བར་བྱ་བ་དོན་ཅི་ཡོད་སྒྲུབ་པ་ཉིད་ཀྱི་སྦྱོར་བ་དོན་དང་ལྡན་པ་སྒྲུབ་པས་ན་
[287a]
[287a.1]ངེས་པ་དོན་མེད་པའི་ཕྱིར་རོ། །སྒྲུབ་བྱེད་ཉིད་ཀྱི་ཁྱད་པར་གྱིས་བསྒྲུབ་པར་བྱ་བའི་ཁྱད་པར་ཤེས་པ་ལ་ནི་ངག་ངེས་པའི་དོན་ཅན་ཡིན་པར་འགྱུར་ཏེ་དཔེར་ན་ལྟོར་ཀུན་དུ་སྤྱོད་པས་བས་ཉེ་བར་སྤྱོད་ཅིག་ཅེས་བྱ་བ་ལྟ་བུའོ་ཞེ་ན། འདི་ལ་བཤད་ཟིན་ཏེ་སྒྲ་ཉེ་བར་བཀོད་པ་ཉིད་ནི་ངེས་པར་གཟུང་
[287a.2]བའི་སྙིང་པོར་མ་བྱས་པར་ཉེ་བར་དགོད་པར་མི་ནུས་ཏེ། སྒྲའི་བྱ་བ་གཞན་རྟོགས་པ་ལ་གྲུབ་པ་མེད་པའི་ཕྱིར་དང་། ཇི་ལྟར་ཡང་ཉེ་བར་སྦྱོར་འདོད་པ་སྲིད་པའི་ཕྱིར་རོ། །དེས་ན་འདོད་པས་བྱས་པའི་རང་བཞིན་དང་བྲལ་བ་ནི་ངེས་པ་མེད་ན་མི་སྲིད་པའི་ཕྱིར་ངེས་པ་གཅིག་པུ་ཉིད་སྒྲའི་དོན་ཡིན་གྱི་སྒྲུབ་པ་ནི་མ་
[287a.3]ཡིན་ནོ། །ངེས་པ་དང་ལྡན་པ་ཉིད་དོན་དེ་ལྟ་བུ་ཡོད་པའི་རྒྱུ་མཚན་དུ་ཉེ་བར་འཇོག་པ་ན་རྗེས་སུ་དཔག་པ་རྗེས་སུ་ཞུགས་ནས་དོན་ལ་ཚད་མར་སྲིད་པ་ཡིན་ཏེ། དེ་ལྟ་མ་ཡིན་ན་སྙམ་དུ་སེམས་པ་ཡང་ཚད་མར་འགྱུར་རོ། །འདོད་པ་ཙམ་གྱིས་བསྐྱེད་པའི་དོན་རྟོགས་པ་རྒྱུ་མཚན་གཞན་གྱིས་བྱས་པའི་
[287a.4]དོན་གྲུབ་པ་ཅན་ནི་ཚད་མ་ཡིན་པས་སྒྲའི་དོན་རྟོགས་པའི་ཚད་མ་ཉིད་ཁྱད་པར་མེད་པའི་ཕྱིར་རོ། །དེས་ན་དོན་འདི་ཡིན་ཏེ། གལ་ཏེ་ངེས་པར་གཟུང་བ་སྙིང་པོར་མ་བྱས་པ་ཁོ་ནར་བུམ་པའི་ཚིག་གིས་རང་གི་དོན་རྟོགས་པར་བྱེད་པར་འགྱུར་ཞེས་སྙིམ་པ་ལ་སོགས་པ་ཉེ་བར་བླངས་པས་ངེས་པ་ཉེ་བར་བསྟན་ནས་
[287a.5]བུམ་པའི་ཚིག་སྦྱོར་བར་བཤད་པ་ཡིན་ནོ། །དེ་བཞིན་དུ་ཕྱག་དར་རམ་ཞེས་བྱ་བ་ལ་སོགས་པ་དག་ལ་ཡང་དེ་བཞིན་དུ་རྟོགས་པར་བྱའོ། །དེ་ལྟར་གདོན་མི་ཟ་བར་ངེས་པར་གཟུང་བ་ལ་བརྟེན་པར་བྱ་བ་ན། བརྗོད་པར་འདོད་པ་ལས་ངག་ལ་ངེས་པར་གཟུང་བ་ངེས་པ་ཡིན་གྱི། ཚིག་སོ་སོ་ལ་ངེས་པར་
[287a.6]གཟུང་བ་དགོད་པ་ནི་མ་ཡིན་ཏེ། དེ་ལྟ་མ་ཡིན་ན་ཕྱོགས་ཆོས་ཞེས་བྱ་བ་ལ་ཕྱོགས་ཁོ་ནའི་ཆོས་ཁོ་ན་ཞེས་བྱ་བར་འགྱུར་རོ། །དེས་ན་ཤེས་བྱ་ལ་སོགས་ཚིག །ཅེས་བྱ་བ་རྣམ་པར་དགྲོལ་བའི་ཕྱིར་བཤད་པ་ནི། དེ་བཞིན་དུ་ཞེས་བྱ་བའོ། །ཐ་སྙད་དུ་གཏོགས་པ་རྣམས་ཞེས་བྱ་བ་ནི་གཞན་རྟོགས་པའི་དོན་
[287a.7]དུ་སྦྱར་བ་སྟེ། སྒྲ་ཐ་དད་དུ་བཏགས་པ་ནི་གཞན་རྟོགས་པར་བྱ་བའི་དོན་ཁོ་ན་ཡིན་པའི་ཕྱིར་རོ། །འདིས་ནི་རྣམ་པར་གཅོད་པར་བྱ་བ་མེད་པའི་ཉེས་པ་སྤོང་བ་ཡིན་ནོ། །འདི་ལྟར་གལ་ཏེ་གཞན་གྱིས་ཀྱང་འགའ་ཞིག་ལ་ཤེས་བྱ་ཉིད་རྟོགས་པ་ཁོ་ན་ཡིན་ན་དར་དེ་རྟོགས་པའི་དོན་དུ་སྦྱར་བ་ནི་དོན་མེད་པ་ཁོ་ནའོ། །འོན་
[287b]
[287b.1]ཏེ་མ་རྟོགས་ན་དེའི་ཚེ་ཐེ་ཚོམ་གྱི་ཡུལ་གྱི་དངོས་པོར་གྱུར་པ་ནི་གཞན་དུ་རྟོགས་པ་ཁོ་ན་ཡིན་པའི་ཕྱིར་ཏེ། དེས་སྒྲོ་བཏགས་པའི་ཤེས་བྱ་མ་ཡིན་པ་དེ་ཉིད་རྣམ་པར་གཅད་པར་བྱ་བ་ཡིན་ནོ། །ཇི་ལྟར་ཆོས་འདི་སྒྲ་ལས་བྱུང་བ་ཡིན་པ་དེ་བཞིན་དུ་རྣམ་པར་གཅད་པར་བྱ་བ་ཡང་དེའི་བློས་བྱས་པ་ཉིད་ཡིན་གྱི་ཕྱི་རོལ་ན་ནི་མེད་དོ། །
[287b.2]དེ་བཤད་པ་ནི་གཞན་དུ་དོགས་པ་མེད་ན་ཞེས་བྱ་བ་ལ་སོགས་པ་བརྡར་བྱས་པའི་ཕྱི་རོལ་ཞེས་བྱ་བའི་མཐར་ཐུག་པའོ། །འོ་ན་གཞན་རྟོགས་པའི་དོན་མ་ཡིན་པའི་ཤེས་བྱའི་སྒྲ་གང་ཡིན་པ་དེའི་རྣམ་པར་གཅད་པར་བྱ་བ་ཅི་ཡིན་ཏེ། གཞན་སྒྲོ་བཏགས་པའི་ཤེས་བྱ་མ་ཡིན་པ་མེད་པའི་ཕྱིར་རོ་ཞེ་ན། དེ་ནི་མ་ཡིན་
[287b.3]ནོ་ཞེས་བཤད་པ་ནི་ཤེས་བྱ་ལ་སོགས་པའི་ངག་ཅེས་བྱ་བའོ། །ངག་སྦྱར་བ་ནི་གཞན་རྟོགས་པའི་དོན་ཉིད་དུ་ཡིན་པ་དེ་ལ་གནས་པའི་ཤེས་བྱའི་སྒྲའི་དོན་བརྗོད་པ་ཡིན་ནོ། །དེས་ན་ཐ་སྙད་ལས་ཕྱི་རོལ་དུ་གྱུར་པ་ཤེས་བྱའི་སྒྲ་ནི་མེད་དོ། །གཞན་ཉིད་རྟོགས་པར་བྱེད་པ་ན། སྒྲས་སྤྱི་སྟོན་པར་བྱེད་ཅེས་བྱ་བ་ལ་
[287b.4]གཞན་སེལ་བ་སྦྱོར་བའི་ཡུལ་དུ་བརྗོད་དོ། །སྟོན་པར་འདོད་པ་མེད་ན་ནི། སྒྲ་དོན་མེད་པ་ཁོ་ན་སྟེ། ངོ་བོ་ཉིད་ཀྱིས་དོན་དང་ལྡན་པ་མ་ཡིན་པའི་ཕྱིར་རོ་ཞེས་བྱ་བ་ནི། སྒྲ་སྦྱོར་བ་ཞེས་བྱ་བའི་མཐར་ཐུག་པས་བཤད་པ་ཡིན་ནོ། །གལ་ཏེ་འདོད་པ་མེད་ཀྱང་ཚིག་ཙམ་ལས་དོན་རྟོགས་པ་ཡོད་པ་མ་ཡིན་ནམ། དེས་ན་
[287b.5]བརྗོད་པར་འདོད་པ་ཡོད་ན་དོན་དང་ལྡན་པའི་ཕྱིར་དེ་མེད་ན་དོན་མེད་པ་ཡིན་ནོ་ཞེས་ཇི་སྟེ་བརྗོད་ཅེ་ན་སྨྲས་པ། བརྗོད་པར་འདོད་པ་ཡོད་པ་ན་དོན་གོམས་པ་ལས་དེ་ལྟ་མ་ཡིན་པར་ཡང་རྟོགས་པ་ནི་ཉེ་བར་བསླད་པ་ཁོ་ནའོ། །དེ་བཤད་པ་ནི་ཡོད་པ་ཉིད་དོ་ཞེས་བྱ་བའི་མཐར་ཐུག་པའོ། །དེའི་ཕྱིར་ཞེས་བྱ་བ་ནི་མཇུག་
[287b.6]སྡུད་པའོ། །དེ་ནི་ངེས་པར་གཟུང་བ་ལ་གདོན་མི་ཟ་བར་བརྟན་པ་ཉིད་གཞུང་འཛུགས་པའི་ལམ་གྱིས་ཇི་ལྟར་ཉེ་བར་བསྟན་པའི་སྒྲའི་དོན་གཞན་སེལ་བའི་ཕྱོགས་ལ་མི་འགྲིག་པའི་སློབ་དཔོན་གྱི་གཞུང་གི་ཆ་གང་ཡིན་པ་དེ་དག་བཤད་པའི་ཕྱིར་གང་ཞིག་གང་ལས་ཞེས་སྨོས་སོ། །ནིའི་སྒྲ་ནི་གང་ཕྱིར་
[287b.7]ཞེས་བྱ་བའི་དོན་འདིར་འགྱུར་ཏེ་གང་གི་ཕྱིར་གང་ཞིང་གང་ལས་ཐ་དད་པ་དེ་བཟློག་ནས་དེའི་ཐ་དད་པ་ལ་འགོད་པ་ཡིན་ནོ། །ཐ་དད་པ་དེ་ཡང་ཤིང་གི་ཁྱད་པར་རྣམས་ཀྱི་མཚུངས་པའི་ངོ་བོ་ཡིན་ནོ་ཞེས་སྟོན་པ་ནི་ཤིང་མ་ཡིན་པ་ལས་ཁྱད་པར་དུ་གྱུར་པ་ཤ་པ་ལ་སོགས་པ་རྣམས་ཀྱི་རྣམ་པ་མཚུངས་པར་སྣང་བ་
[288a]
[288a.1]ཅན་ཏེ། ཐ་དད་པ་ཞེས་བྱ་བར་འབྲེལ་ཏོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ཐ་དད་པ་དེ་ཉིད་སློབ་དཔོན་ཕྱོགས་ཀྱི་གླང་པོས་ཟློག་པ་གཞན་གྱིས་ནི་དངོས་པོ་དེའི་ཆ་འགའ་ཞིག་རྟོགས་འགྱུར་ཞེས་ཀྱང་རབ་ཏུ་བཤད་པ་ཡིན་ནོ། །ཀྱང་གི་སྒྲ་མ་བཤད་པའི་དོན་བསྡུ་བའི་ཕྱིར་ཏེ།
[288a.2]དེ་ཡང་འགྲེལ་པར་སྟོན་པར་འགྱུར་རོ། །འདིར་ལྡོག་པ་གཞན་དངོས་པོའི་ཆ་འགའ་ཞིག་རྟོགས་སོ་ཞེས་བྱ་བས་ནི་དངོས་པོ་ལས་གཞན་ལྡོག་པ་ཐ་དད་པར་རྟོགས་པ་ཡིན་ལ། དེས་ཀྱང་དངོས་པོའི་ཆ་རྟོགས་པའི་ཕྱིར་ལྡོག་པའི་ཁྱད་པར་གྱི་ཁྱད་པར་དང་ལྡན་པའི་རྫས་ལ་སྒྲ་འཇུག་གོ་ཞེས་བརྗོད་པར་
[288a.3]འགྱུར་ཏེ། དེས་ན་ཇི་ལྟར་སྤྱིའི་ཁྱད་པར་དང་ལྡན་པའི་དོན་ལ་སྒྲ་འཇུག་པ་དེ་བཞིན་དུ་ལྡོག་པའི་ཁྱད་པར་ཅན་ལ་ཡིན་པས་ཁྱད་པར་འགའ་ཡང་མེད་དོ། །སྒྲས་ནི་ལྡོག་པ་དོན་གཞན་གྱིས་ཁྱད་པར་དུ་བྱས་པའི་དངོས་པོ་དག་ཁོ་ན་བརྗོད་དོ་ཞེས་བྱ་བ་ལ་སོགས་པར་ཡང་དོན་དེ་བཞིན་དུ་འགྱུར་རོ། །དེ་ཡང་
[288a.4]རྣམ་འགྲེལ་བྱེད་རྟོགས་པའི་རྗེས་སུ་འགྲོ་བ་ལྡོག་པ་གཞན་མ་ཡིན་པར་སྨྲ་བ་སྒྲོ་འདོགས་རྣམ་པར་གཅད་པའི་གཞན་སེལ་བ་ལ་འགལ་བའི་ཕྱིར་དེ་སློབ་དཔོན་གྱིས་དེ་ལྟར་བཤད་པ་མཛད་དོ། །གང་གི་ཕྱིར་སྒྲས་ཐ་དད་པ་ལ་བློ་སྦྱར་བ་དེའི་ཕྱིར་ཐ་དད་པ་དེ་ཉིད་དངོས་པོའི་ཆ་འགའ་ཞིག་རྟོགས་སོ་ཞེས་
[288a.5]བཤད་པར་ཟད་ཀྱི་ཐ་དད་པ་ལས་དངོས་པོའི་རང་བཞིན་གཞན་པ་ནི་མེད་དོ། །ལྡོག་པ་གཞན་གྱིས་རྟོགས་པར་འགྱུར་རོ་ཞེས་བཤད་པ་གང་ཡིན་པ་དེ་ལ་དེ་ཡང་གང་ལ་སྒྲ་འཇུག་པ་དེར་ལྡོག་པ་གཞན་འགའ་ཞིག་ཁྱད་པར་དུ་གྱུར་པ་ནི་མ་ཡིན་ཏེ། འོན་ཀྱང་གང་གི་ཕྱིར་འདི་ཁོ་ན་ཤིང་ཡིན་གྱི་གཞན་ནི་མ་
[288a.6]ཡིན་ནོ་ཞེས་ངེས་པར་གཟུང་བའི་དོན་ལ་བརྟེན་པའི་ཕྱིར་སྒྲས་བློ་འགའ་ཞིག་ལས་བཟློག་ནས་འགའ་ཞིག་ལ་འཇུག་པར་བྱེད་ལ། དེ་ལྟར་ན་ཡང་ཤིང་མ་ཡིན་ལས་ལོག་པ་ངེས་པ་ནི་མ་ཡིན་གྱི་འོན་ཀྱང་གཞན་གྱི་ཤིང་ལོག་པ་ཉིད་ཡིན་པ་དེའི་ཕྱིར་ཤིང་མ་ཡིན་པ་ལས་ཐ་དད་པའི་ཤིང་ངེས་པ་ན། སྒྲ་སྦྱོར་
[288a.7]བའི་ཤུགས་ཀྱིས་ངེས་པར་འགྱུར་བ་ངེས་པར་བཟུང་བའི་སྟོབས་ཀྱིས་ཤིང་མ་ཡིན་པ་ཤིང་ལྡོག་པར་ངེས་པ་གང་ཡིན་པ་དེ་ནི་ཤིང་གི་སྒྲའི་ཤིང་མ་ཡིན་པ་ལས་ལྡོག་པ་ཙམ་ཉིད་སྟོན་པ་ན། བླ་ལྷག་ཏུ་གྱུར་པའི་ལྡོག་པ་ཡིན་ནོ། །དེས་ན་སྒྲ་ནི་ལྡོག་པ་ཙམ་གྱི་མཐར་ཐུག་པ་རྗོད་པར་བྱེད་པ་ཅན་གྱི། ལྡོག་པའི་
[288b]
[288b.1]ཁྱད་པར་ཅན་གྱི་རྫས་ནི་འགའ་ཡང་བརྗོད་པ་མེད་དེ་ལྡོག་པ་ནི་དེ་དང་ལྡན་པ་ལས་གཞན་མ་ཡིན་པའི་ཕྱིར་རོ། །དེ་ལྟ་ཡིན་ན་ཡང་གཞན་ལྡོག་པས་དངོས་པོ་དེའི་ཆ་འགའ་ཞིག་རྟོགས་སོ་ཞེས་གསུངས་པ་གང་ཡིན་པ་དེར་ཆ་ནི་ལྡོག་པ་དེ་ཉིད་ཡིན་ནོ། །གང་ཡང་ལྡོག་པ་གཞན་གྱིས་རྟོགས། །ཞེས་ལྡོག་པ་
[288b.2]གཞན་ཞིག་བརྗོད་པ་དེ་ནི་ཤིང་མ་ཡིན་ལས་ལྡོག་པ་ཤིང་གི་བདག་ཉིད་བརྗོད་པར་བྱ་བ་ནི་ངེས་པར་གཟུང་བས་བྱས་པ་ཤིང་མ་ཡིན་ལ་ཤིང་ལྡོག་པ་ཡིན་ནོ། །ལོག་པ་ལས་གཞན་མ་ཡིན་ལྡོག་པ་ནི་ཤིང་གི་དོན་ལ་ངེས་པར་གཟུང་བ་ན་ཤིང་མ་ཡིན་པ་ངེས་པར་གཟུང་བའི་དོན་དུ་ཐལ་བར་འགྱུར་རོ་ཞེ་ན། དེ་ལྟར་ནི་
[288b.3]མི་ནུས་ཏེ། ཤིང་ཉིད་ཤིང་མ་ཡིན་པ་ལས་ལྡོག་གོ་ཞེས་བྱ་བ་ནི་དངོས་པོ་ལ་དེ་དེ་ལྟར་སྒྲོ་འདོགས་རྣམ་པར་གཅོད་པ་ངེས་པས་བརྟགས་པས་བརྗོད་པར་བྱ་བ་ཡིན་ལ་ངེས་པར་གཟུང་བ་ལས་ཤིང་མ་ཡིན་ལ་ཤིང་ལྡོག་པ་ནི་རྟོགས་པ་ལས་གྱུར་པ་ཉིད་ཡིན་ཏེ། དེས་ན། ཤིང་མ་ཡིན་པ་ཁོ་ན་ལ་ཤིང་ལྡོག་པ་ནི་མ་ཡིན་ནོ། །
[288b.4]དེས་ན་ལྡོག་པ་གཞན་གྱིས་དངོས་པོ་དེའི་ཆ་འགའ་ཞིག་རྟོགས་སོ་ཞེས་བྱ་བས་ནི་ངེས་པར་གཟུང་བས་བྱས་པ་ཤིང་མ་ཡིན་ལ་ཤིང་ལྡོག་པས་ཤིང་མ་ཡིན་ལས་ལྡོག་པ་རྟོགས་སོ་ཞེས་བཤད་པ་ཡིན་ནོ། །དེས་ན་གཞུང་འདི་རྣམ་པ་དེ་ལྟ་བུའི་དོན་ལ་དེ་ལྟར་རྗོད་པར་བྱེད་པར་བསྒྲུབས་པ་ཡིན་ནོ། །གང་ཞིག་གང་ལས་ཐ་
[288b.5]དད་པས་ཏེ། དཔེར་ན་ཤིང་ཤིང་མ་ཡིན་ལས་ཐ་དད་པ་བཞིན་ནོ། །ཐ་དད་པར་གྱུར་པའི་ཤིང་དེ་ངེས་པར་གཟུང་བས་བཟློག་ནས་ཞེས་ཐ་དད་པར་གྱུར་པ་སྐབས་ཡིན་པས་ན་དེ་ཉིད་དེའི་སྒྲས་གཟུང་བ་ཡིན་ནོ། །དེ་བཟློག་ན་གང་ལ་འགོད་ཅེ་ན་བཤད་པ་ཐ་དད་པར་གྱུར་པའི་ཁྱད་པར་རྣམས་ཀྱི་དེ་ལས་ཐ་དད་པ་རྣམ་པ་
[288b.6]མཚུངས་པར་སྣང་བ་ལ་འགོད་དོ། །ཐ་དད་པར་གྱུར་པས་ནི་གཟུང་བ་ཡིན་ཏེ། གང་ཞིག་གང་ལས་ཐ་དད་པ་ཞེས་བྱ་བའོ། །འོན་ཀྱང་དེ་མང་པོའི་ཚིག་གིས་བསྟན་པ་ནི་དེ་ལ་ཐ་དད་པ་མཚུངས་པ་ཉིད་དུ་རྟོགས་པར་བྱ་བའི་ཕྱིར་རོ། །ཐ་དད་པར་གྱུར་པ་དེ་གང་ལས་ཐ་དད་དེ་ཉིད་ནི་དེ་ལས་ཐ་དད་ཅེས་དེའི་སྒྲས་གཟུང་
[288b.7]བ་ཡིན་ནོ། །དེས་ན་དོན་འདི་ཡིན་ཏེ་གང་ལས་ཐ་དད་པར་གྱུར་པ་ཐ་དད་པ་དེ་ལས་ཐ་དད་པ་ལ་འགོད་པ་ཡིན་ནོ་ཞེས་བྱ་བའོ། །འདི་སྐད་བརྗོད་པ་ཡིན་ཏེ། ཤིང་མ་ཡིན་པ་ལས་ཐ་དད་པའི་ཤིང་ཤིང་མ་ཡིན་པ་ལས་བཟློག་ནས་དེའི་ཤིང་མ་ཡིན་པ་ལས་ཐ་དད་པ་ལ་ཤིང་གི་སྒྲ་དགོད་དོ་ཞེས་པ་ཡིན་ནོ། །འདིར་སྔོན་གྱི་འགྲེལ་
[289a]
[289a.1]པ་བྱེད་པ་དགོད་པ་མི་ཤེས་པ་ཁོ་ནར་དྲང་པོ་མང་པོར་རློམ་པ་དག་ལྡོག་པ་ཉིད་དངོས་པོའི་ཆ་འགའ་ཞིག་རྟོགས་པ་ལ་བྱེད་པ་ཅི་སྟེ་མ་ཡིན་ན་གང་གིས་འདི་ལྟར་འཆད་པར་བྱེད་ཅེས་བྱ་བར་སེམས་པ་ལ། འདི་ལའང་ངོ་བོ་ཅུང་ཟད་མེད་ཅེས་སྨོས་སོ། །ཤིང་ལ་ཤིང་མ་ཡིན་མེད་པར་ཟད་ཀྱི་འགའ་ཞིག་
[289a.2]ཡོད་པ་ནི་མ་ཡིན་ནོ། །དེས་ན་གང་ཞིག་ཤིང་རྟོགས་པའི་ཁྱད་པར་དུ་འགྱུར་བའི་ཐ་དད་པ་དེ་ཅི་ཞིག་ཡིན། གལ་ཏེ་གང་ཐ་དད་པ་དེ་ཐ་དད་པའི་མཚམས་ལས་མ་བཟློག་པ་ཁོ་ནས་དེ་ལས་ཐ་དད་པ་ལ་སྒྲ་ཅི་སྟེ་མི་འགོད་ཅེ་ན། བཤད་པ། སྒྲ་རྣམས་ལས་དེ་རྟོགས་ཉིད་ན། །གཞན་བཟློག་རྟོགས་འགྱུར་ཞེས་བྱ་བ་སྟེ།
[289a.3]སྒྲ་རྣམས་ཀྱིས་ཐ་དད་པ་རྟོགས་པ་ཉིད་ན་ཐ་དད་པར་གྱུར་པ་གཞན་ལས་ལྡོག་པ་རྟོགས་པར་འགྱུར་རོ། །དེ་ནི་གཉི་ག་ལ་བརྟེན་པའི་ཕྱིར་ཏེ། དེ་འདི་ལ་མེད་དོ་ཞེས་བྱ་བའི་དོན་ཉིད་ནི་འདི་དེ་ལ་མེད་དོ་ཞེས་མ་གྲུབ་པར་མི་རྟོགས་པའི་ཕྱིར་རོ། །འོ་ན་གཞན་བཟློག་པའི་ཤུགས་ཀྱིས་རྟོགས་པ་དེ་ཡང་ཁྱད་པར་དུ་འགྱུར་མོད་གང་གི་
[289a.4]ཕྱིར་ལྡོག་པའི་དོན་གཞན་གྱིས་ཁྱད་པར་དུ་བྱས་པ་ཞེས་བྱ་བ་ནི་སྒྲ་ཇི་ལྟ་བ་བཞིན་ནོ་ཞེ་ན། བཤད་པ་ཕན་ཚུན་མེད་པ་དེ་ལ་ནི་དངོས་པོ་མེད་པ་འགའ་ཞིག་ཁྱད་པར་དུ་བྱས་པ་ཤེས་པར་འགྱུར་བ་གཞན་ཞེས་བྱ་བ་ཐ་དད་པར་གྱུར་པ་འགའ་ཡང་མེད་དེ། རང་གི་བདག་ཉིད་ལ་ཤིང་མ་ཡིན་མེད་པ་དང་། གཞན་གྱིས་
[289a.5]བདག་ཉིད་ལ་ཤིང་མེད་པས་ཤིང་དང་ཤིང་མ་ཡིན་པ་དག་ཕན་ཚུན་མེད་པ་ན་ཤིང་ཁྱད་པར་དུ་བྱས་པ་རྟོགས་པ་མ་ཡིན་ནོ་ཞེས་བྱ་བའི་དོན་ཏོ། །བདག་ཉིད་མེད་པ་ཉིད་བདག་ཉིད་ཀྱི་ཁྱད་པར་དུ་མ་གྲུབ་པའི་ཕྱིར་དང་། གཞན་མེད་པ་ཡང་བདག་ལ་ཡོད་པར་མ་གྲུབ་པའི་ཕྱིར་དང་། དགག་པ་བཀག་པའི་འགོག་པ་
[289a.6]སྒྲུབ་པ་མ་ཡིན་པའི་ཕྱིར་རོ། །གལ་ཏེ་ཐ་དད་པར་རྟོགས་པ་ཉིད་ན་གཞན་ལ་ལྡོག་པ་རྟོགས་པའི་ཕྱིར་དེ་འདིར་ལྡོག་པ་ལ་འདི་ཡང་དེར་ལྡོག་གོ་ཞེས་སྒྲས་ལྡོག་པ་གཉི་ག་བརྗོད་པར་འགྱུར་རོ་ཞེ་ན། མ་ཡིན་ནོ་ཞེས་བཤད་པ་ནི། སྒྲ་གཉིས་བྱེད་པའང་མ་ཡིན་ཏེ། །ཞེས་བྱ་བའོ། །ཤིང་མ་ཡིན་པར་སྒྲོ་འདོགས་པ་
[289a.7]བསལ་བས་ཤིང་མ་ཡིན་པ་ལས་ཐ་དད་པར་འགྱུར་བའི་ཤིང་བརྗོད་པ་ཙམ་གྱི་སྒྲ་ལ་ནི་འདི་ཤུགས་ཀྱིས་ངེས་པར་བྱ་བ་ཡིན་ལ། དེ་གསལ་བར་བྱེད་པའི་ངེས་པར་གཟུང་བར་སྦྱར་བ་ལ་ནི་སྒྲ་ལས་བྱུང་བར་འགྱུར་རོ། །དེ་ལྟར་གང་ཞིག་གང་ལས་ཞེས་བྱ་བ་ནས་བརྩམས་ཏེ་འདིའི་མཐར་ཐུག་པར་ཅི་ལྟར་ཉེ་བར་
[289b]
[289b.1]བཀོད་པའི་རང་བཞིན་གྱི་ཐ་དད་པ་དེ་ནི་དངོས་པོ་མེད་པ་ཡིན་ལ། ངོ་བོ་དང་ལྡན་པ་ཉིད་དུ་རྟོགས་པ་ནི་འཁྲུལ་པ་ཡིན་ནོ། །གལ་ཏེ་ཐ་དད་པའི་ངོ་བོ་དང་ལྡན་པར་མ་རྟོགས་པ་མ་ཡིན་ནམ། དེ་ལྟར་ཡང་། འདི་ལའང་ངོ་བོ་ཅུང་ཟད་མེད། །ཅེས་བཤད་པ་ཡིན་ནོ་ཞེ་ན། སྨྲས་པ་ཐ་དད་པར་གྱུར་པ་རྣམས་ཀྱི་མཚུངས་པར་སྣང་བའི་
[289b.2]རྣམ་པ་ནི་ཐ་དད་པ་ཡིན་པར་བརྗོད་དོ། །མཚུངས་པའི་རྣམ་པ་ཡང་ངོ་བོ་ཉིད་ཡིན་པའི་ཕྱིར་ཐ་དད་པར་གྱུར་པ་དེ་ཐ་དད་པར་གྱུར་པ་རྣམས་ལས་གཞན་མ་ཡིན་པར་བཤད་དོ། །དེ་ལ་ནི་ངོ་བོ་ཉིད་དུ་རྟོགས་པ་ཡོད་པ་དེས་ན་ངོ་བོ་མེད་པར་བཤད་པ་ཡིན་ནོ། །དེ་ཉིད་ཀྱི་ཕྱིར་དེ་ལྟར་ཞེས་བྱ་བས་ཇི་ལྟར་ཉེ་བར་བཀོད་པ་ཉེ་བར་
[289b.3]བསྟན་ནས་དངོས་པོ་མེད་པར་བཤད་དོ། །འདི་ལའང་ངོ་བོ་ཅུང་ཟད་མེད། །ཅེས་བྱ་བས་ནི་དངོས་པོ་གཞན་མེད་པ་ཙམ་གྱི་རང་བཞིན་ཉིད་ཀྱིས་ན་ལྡོག་པའི་ངོ་བོ་ཐ་དད་པ་ངོ་བོ་མེད་པར་བཤད་དོ། །གང་ཞིག་གང་ལ་ཞེས་བྱ་བ་ཚིག་ལེའུར་བྱས་པ་དང་པོའི་དོན་བཤད་པ་ནི་དགོད་པར་བྱ་བའི་སྒྲ་ཞེས་བྱ་བ་སྟེ་སྡེབ་སྦྱོར་
[289b.4]ཡང་དེ་ཉིད་ཡིན་ནོ། །གཞན་ཉིད་དུ་གྱུར་པ་བཟློག་པའི་ཕྱིར་སྒྲ་རྣམས་ལས་དེ་ཞེས་བྱ་བའི་ཚིགས་སུ་བཅད་པ་ཕྱེད་བཤད་པ་ནི་ལྡོག་པ་གཞན་འཕེན་པ་ཞེས་བྱ་བའོ། །དེ་ཉིད་ལྡོག་པ་གཞན་གྱིས་ནི། །ཞེས་བྱ་བ་བཤད་པ་ནི་དེ་ཉིད་ཅེས་བྱ་བའོ། །ཀྱང་གི་སྒྲས་བསྡུས་པ་སྟོན་པ་ནི་སྒྲས་ནི་ལྡོག་པ་གཞན་གྱི་ཞེས་བྱ་བའོ། །ཇི་ལྟར་ལྡོག་པ་
[289b.5]ཉིད་དོན་ཡིན་པ་ན་འདི་གཞན་ལ་ལྡོག་པར་བརྗོད་ཅེས་བྱ་བ་གཞུང་གཟུགས་པས་བཤད་པ་ནི་དེ་ནི་ཐ་དད་པ་དེ་ཞེས་བྱ་བ་སྟེ། བརྗོད་བྱར་གྱུར་པའི་ཐ་དད་པར་བརྗོད་པ་ན། བརྗོད་པར་བྱ་བ་ལས་གཞན་པའི་དོན་ལ་བརྗོད་པར་བྱ་བ་རྣམ་པར་གཅོད་པ་འཕེན་པ་ལྟ་བུར་འཇུག་གོ། །གཏན་ཚིགས་བཤད་པ། གཅིག་ལ་
[289b.6]ཡོད་པའི་ཞེས་བྱ་བ་ལ་སོགས་པའོ། །བརྗོད་པར་བྱ་བ་ཐ་དད་པ་དེ་ཉིད་ནི། ལྡོག་པ་དེས་ཞེས་བྱ་བ་བླ་ལྷག་ཏུ་གྱུར་པའི་ལྡོག་པ་དེས་རྟོགས་སོ་ཞེས་བརྗོད་པ་ཡིན་ནོ། །ཁྱད་པར་ཅན་མ་ཡིན་པ་དེ་ཁྱད་པར་དུ་བྱས་པར་ཇི་ལྟར་འགྱུར་ཞེ་ན། དེ་རྟོགས་པ་ནི་ཞེས་སྨོས་ཏེ་ཁྱད་པར་དང་འདྲ་བར་ངེས་པ་རྟོགས་པ་ཉིད་
[289b.7]རྟོགས་པར་བྱ་བའི་ཕྱིར་རོ། །འདི་ལ་ཁྱད་པར་དང་ཁྱད་པར་ཅན་ནི་མེད་དོ་ཞེས་སྟོན་པས་དེ་ལ་ནི་འགའ་ཡིས་ཁྱད་པར་དུ་བྱས་ཞེས་བྱ་བ་འཆད་པ་ནི། དོན་འགའ་ཞིག་ལ་ཞེས་བྱ་བའོ། །འདི་ལྟར་འདིར་ལྡོག་པ་ཁོང་དུ་ཆུད་པ་ནི་རྟོགས་པ་ཙམ་ཡིན་གྱི་ཁྱད་པར་གྱི་དངོས་པོ་ནི་མ་ཡིན་ནོ། །དེ་བརྗོད་པ་ནི་དབྱེ་བ་བྱ་
[290a]
[290a.1]བ་གཉིས་ཀྱི་ཞེས་བྱ་བའོ། །སློབ་དཔོན་གྱིས་དེ་ལྟར་གསུངས་པ་ནི་དོན་འགའ་ཞིག་ལ་འཇུག་པའི་ཕྱིར་ཞེས་བྱ་བས་ཇི་ལྟར་སྦྱོར་བ་འབྲས་བུ་དང་བཅས་པར་བཤད་པ་དེ་ལྟར་བསྟན་པའི་དོན་དུ་ཡིན་ནོ་ཞེས་བརྗོད་པ་ནི། ཐ་དད་པ་གཅིག་བརྗོད་ན་ཡང་ཞེས་བྱ་བ་ལ་སོགས་པའོ། །
[290a.2]སྒྲ་གཉིས་བྱེད་པའང་མ་ཡིན་ཏེ། །ཞེས་བྱ་བ་བཤད་པ་ནི། དེ་ཉིད་ཀྱི་ཕྱིར་ཞེས་བྱ་བ་སྟེ། མེད་ན་མེད་པ་ཉིད་ཀྱིས་ན་རྟོགས་པ་ཡིན་པའི་ཕྱིར་རོ། །ཐ་དད་པ་གཉི་ག་ལ་ཡོད་པ་ཙམ་འབའ་ཞིག་གི་ཕྱིར་འདི་ལྟར་ཡིན་པར་ནི་མ་ཟད་ཀྱི། སྔར་བཤད་པའི་རྣམ་པས་ཀྱང་ཡིན་ནོ་ཞེས་བཤད་པ་ནི།
[290a.3]ལྡོག་པ་མེད་པ་ཅན་གྱི་ཞེས་བྱ་བའོ། །ལྡོག་པ་མེད་པ་ཅན་གྱི་རྗེས་སུ་འགྲོ་བ་ཡང་མེད་ལ་ཞེས་བྱ་བ་ནི། བློ་འགའ་ཞིག་ལ་འཇུག་པ་ན། ཇི་ལྟར་ཉེ་བར་བསྟན་པ་གཞན་ལས་ལྡོག་པའི་ལྡོག་པས་སྟོང་པའོ། །རྗེས་སུ་འགྲོ་བ་མེད་པ་ཅན་གྱི་ལྡོག་པ་ཞེས་བྱ་བ་ནི་འགའ་ཞིག་ལས་ལྡོག་པ་ཡང་
[290a.4]འགའ་ཞིག་ལ་འཇུག་པ་སྟོང་པའོ། །གཏན་ཚིགས་བཤད་པ་ནི། གཅིག་ནི་རྗེས་སུ་འགྲོ་བ་ལ། །ཞེས་བྱ་བ་སྟེ་རྟོགས་པ་སྐྱེ་བ་ཙམ་ནི་སྒྲ་སྦྱོར་བ་དངོས་པོ་མ་ཡིན་པའི་ཕྱིར་རོ། །འགའ་ཞིག་ཏུ་འཇུག་པས་སྟོང་པའི་བློ་ལྡོག་པ་ཙམ་ཡང་མེད་པར་བཤད་པ་ནི་དེ་བཞིན་དུ་ཞེས་བྱ་བ་སྟེ། གཅིག་ཡོངས་སུ་སྤང་
[290a.5]བ་ལ་འགའ་ཞིག་ལ་གནས་པ་སྲིད་པ་ཉིད་མེད་པའི་རྒྱུ་མཚན་གྱིས་ན་རྗེས་སུ་འགྲོ་བ་མེད་པའི་ལྡོག་པ་མེད་དོ། །འདི་སྐད་དུ་འགའ་ཞིག་ལ་འཇུག་པ་མེད་པར་ནི་བློ་འགའ་ལས་ཀྱང་ལྡོག་པར་འགྱུར་བ་མ་ཡིན་པ་དེ་ལས་ལྡོག་པ་རྗེས་སུ་འགྲོ་བས་སྟོང་པར་ག་ལ་འགྱུར་ཞེས་བརྗོད་པ་ཡིན་ནོ། །དེས་ན་
[290a.6]གཞུང་འདི་ནི་དེ་ལྟར་བཤད་པར་བྱ་བ་ཡིན་ཏེ། འདི་ལ་ཚིག་གི་དོན་ཙམ་འཆད་པར་བྱེད་པ་རྣམས་ཀྱིས་ཡང་དག་པ་མ་ཡིན་པ་ནི་རྣམ་འགྲེལ་ཤེས་པ་རྣམས་ཀྱིས་ཤེས་པར་ཟད་དོ། །གང་ཡང་མ་ཡིན་པར་འཇུག་པས་ཤིང་གི་སྒྲའི་བརྗོད་པར་བྱ་བ་ཤིང་གི་དོན་ནི་ཐ་དད་པ་གཅིག་ཡིན་ལ། དེ་རྟོགས་པས་ཤུགས་
[290a.7]ཀྱིས་ངེས་པར་བྱ་བ་ཤིང་ལ་མེད་པར་བཀག་པའི་དངོས་མེད་ནི་ཐ་དད་པ་གཞན་ཡིན་ནོ་ཞེས་བརྗོད་པར་བྱ་བ་ཡིན། འཕང་བར་བྱ་བའི་ཐ་དད་པའི་རྣམ་པར་དབྱེ་བ་གཉིས་སྟོན་པ་གང་ཡིན་པ་དེ་ནི་མུ་སྟེགས་པའི་ལུགས་ཀྱི་རྗེས་སུ་འཇུག་པ་འདྲ་བས་སྙིང་པོ་མེད་དོ། །དེ་དག་གིས་ཀྱང་སྒྲུབ་པའི་ཤུགས་ཀྱིས་
[290b]
[290b.1]འཕངས་པའི་ལྡོག་པ་ཁས་ལེན་པའི་ཕྱིར་རོ། །ཤིང་གི་ཚིག་གི་དོན་ནི་མ་ཡིན་པ་མ་ཡིན་ཏེ། བྲམ་ཟེ་མ་ཡིན་པ་ཞེས་བྱ་བ་ལྟར་དགག་པའི་དོན་གྱིས་རྣམ་པར་གཅད་པ་མ་རྟོགས་པའི་ཕྱིར་རོ། །ལྡོག་པ་ཞེས་བྱ་བ་ཙམ་ཉིད་ནི་མ་ཡིན་པར་མི་འགྱུར་ཏེ། མངོན་སུམ་ཡང་ཐ་དད་པའི་ཡུལ་ཅན་དུ་ཐལ་བའི་ཕྱིར་རོ། །ཤིང་རྟོགས་
[290b.2]པ་ཡིན་ཡང་མེད་པར་དགག་པ་གོ་བ་ཡིན་ན་དེ་ཉིད་སྒྲའི་དོན་དུ་འགྱུར་ལ་རག་མོད། སྒྲུབ་པ་དང་ཁྱད་པར་མེད་པ་གཞན་གྱིས་ཅི་བྱ། ངེས་པར་གཟུང་བ་ལས་བློ་འགའ་ཞིག་ལ་འཇུག་པ་དང་འགའ་ཞིག་ལས་ལྡོག་པ་ནི་རྗེས་སུ་འགྲོ་བ་དང་ལྡོག་པ་ཡིན་ལ། དེ་ཇི་ལྟར་ཤིང་ལ་ཤིང་མ་ཡིན་ཙམ་གྱི་བདག་ཉིད་རྗེས་སུ་འགྲོ་
[290b.3]བ་དང་ལྡོག་པ་དག་ཏུ་འགྱུར། འདི་ཁོ་ན་ཤིང་ངོ་ཞེས་བྱ་བས་ནི་ཤིང་མ་ཡིན་ལས་ལྡོག་པ་ངེས་པ་མ་ཡིན་གྱི། འོན་ཀྱང་གཞན་མ་ཡིན་ནོ་ཞེས་བྱ་བར་རོ། །དེས་ན་གལ་ཏེ་འདིར་འདི་ལྟ་བུ་བརྗོད་པར་མི་འདོད་ན། གཅིག་ལ་ཡོད་པའི་ཐ་དད་པ་བརྗོད་ན་ཡང་ཞེས་ཅི་སྟེ་གསུངས། ཐ་དད་པ་གཅིག་བརྗོད་ན་ཡང་ཞེས་བརྗོད་པར་
[290b.4]བྱ་བར་འགྱུར་རོ། །དེ་བཞིན་དུ་དབྱེ་བར་བྱ་བ་གཉིས་ཀྱི་ཞེས་དབྱེ་བར་བྱ་བ་གཞན་བརྗོད་པ་གང་དུ་ཉེ་བར་མཁོ། ཡང་གང་དག་ཤིང་ཞེས་བྱ་རིགས་པ་ལས་ལྡོག་པའི་རང་བཞིན་ལ་གནས་པ་ཡིན་ཡང་ངེས་པར་གཟུང་བས་ལྡོག་པ་གཞན་སྒྲུབ་པའི་ཕྱིར་དང་ཤིང་གི་དོན་གྱི་ལྡོག་པའི་རང་བཞིན་ནི་ཐ་སྙད་བྱེད་པ་
[290b.5]པོ་དག་གིས་མ་རྟོགས་པས་ན་གཅིག་ཏུ་རྗེས་སུ་དཔག་པར་བྱ་བའི་རང་བཞིན་ཡིན་པའི་ཕྱིར་རྟོགས་བཞིན་པའི་ངེས་པར་གཟུང་བས་གོ་བའི་ལྡོག་པ་ནི་གཞན་ཁོ་ན་ཡིན་པ་དེས་ན་སེལ་བ་ཡང་བསལ་བ་གཞན་དང་ལྡན་པ་ཡིན་ནོ། །དེ་ལྟ་ན་ཤིང་ཞེས་བྱ་བས་རིགས་པ་དེ་ལྟར་གྲུབ་པ་མེད་པར་དགག་པ་ཁོ་ན་བརྗོད་ནས་སྒྲས་
[290b.6]ངེས་པར་བརྗོད་པར་བྱ་བ་ཡིན་པའི་ཕྱིར་ངེས་པར་གཟུང་བ་ལ་བརྟེན་པ་ན་གཞན་སེལ་བ་གཞན་དང་བྲལ་བ་ལ་སྒྲ་འཇུག་པར་སྨྲ་བ་དེའི་ངེས་པར་གཟུང་བའི་དོན་རྟོགས་པ་ཆད་པར་འགྱུར་ཏེ། དེ་ལ་ལྡོག་པ་རྟོགས་པ་མེད་པའི་ཕྱིར་སྔར་ཇི་སྐད་བཤད་པ་བཞིན་ནོ། །བརྡ་འགོད་པའི་དུས་ན་འདི་ཁོ་ན་ཤིང་ཡིན་ནོ་ཞེས་ངེས་པར་མ་
[290b.7]བྱས་པར་ནི་ངེས་པའི་དོན་ལ་སྒྲ་བཀོད་པར་མི་འགྱུར་རོ། །འདི་ཤིང་ཁོ་ནའོ་ཞེས་ངེས་པར་བྱེད་ན་གཞན་ལ་འཇུག་པ་མ་བཀག་པའི་ཕྱིར་ཏེ། འདི་ཡང་ཤིང་ཡིན་འདི་ཁོ་ན་ཞེས་བྱ་བ་ལ་སོགས་པ་གང་བཤད་པ་ཡིན་ནོ། །དེ་ལྟར་ལུང་གི་རྗེས་སུ་འབྲང་བར་རློམ་པ་དང་མཁས་པའི་ང་རྒྱལ་གྱིས་དོན་མེད་པའི་འཛིན་པ་ལ་འཆེལ་བས་
[291a]
[291a.1]ཆོག་གོ། །དེ་ནི་དེ་ལྟར་དེ་ཞེས་བྱ་བ་བཤད་པ་ནི། ཐ་དད་པ་དེ་ཡང་ཞེས་བྱ་བའོ། །ཧ་ཅང་སྤྲོས་པར་ཐལ་བའི་ཕྱིར་འདིར་དེ་དང་དེར་ཚིག་གི་དོན་དགྲོལ་བ་ལ་ནི་མ་བསྒྲིབས་ཏེ། དོན་མ་ཉམས་པ་ཉིད་མཆོག་ཡིན་པའི་ཕྱིར་རོ། །འབད་པ་ཆེན་པོར་ཐོབ་པར་བྱ་བའི་ཚིག་གི་དོན་རྣམ་པར་དགྲོལ་བ་དག་གི་ཕྱོགས་
[291a.2]ཕྱེ་བ་ནི་དང་པོ་ཁོ་ནར་ཡིན་ནོ། །ཡང་ཅིའི་ཕྱིར་འདི་ལྟར་འཆད་ཀྱི། གང་གིས་འདི་ཇི་ལྟར་ཐོས་པ་བཞིན་འཆད་པར་འགྱུར་བ་ལྡོག་པ་ཐ་དད་པ་ཉིད་མ་ཡིན་པ་ཇི་ལྟར་ཞེ་ན། བཤད་པ། དེ་ལ་འང་ངོ་བོ་ཅུང་ཟད་མེད། །ཅེས་བྱ་བའི་གཏན་ཚིགས་དེའི་ཕྱིར་རོ། །དེ་ཉིད་ཕྱིར་འགྲེལ་པ་ནས་དོན་དམ་པ་ནི་ངོ་བོ་ཡིན་ནོ་
[291a.3]ཞེས་ངོ་བོ་ཉིད་ཀྱིས་དོན་དམ་པར་འཆད་པར་འགྱུར་གྱི། ངོ་བོ་ཉིད་དུ་མཐོང་བའི་བློས་བསླད་པ་ཉིད་ཀྱིས་ནི་མ་ཡིན་ནོ། །གང་གི་ཕྱིར་ཐ་དད་པ་ལ་ངོ་བོ་ཅུང་ཟད་མེད་པ་དེ་ཉིད་ཀྱི་ཕྱིར་དོན་དམ་མིན་ཏེ། དེས་ན་ཇི་ལྟར་འདི་ཁྱད་པར་དུ་འགྱུར། གང་ལ་ངོ་བོ་མེད་པ་དེ་ནི་ཡོད་དོ་ཞེས་བརྗོད་པར་མི་ནུས་ཏེ། ཅི་ཡང་མ་ཡིན་པའི་
[291a.4]ཕྱིར་རོ། །གང་ཞིག་ཅི་ཡང་མ་ཡིན་པའི་ཕྱིར་ཡོད་པ་མ་ཡིན་པ་དེ་གོ་ཇི་ལྟར་དངོས་པོའི་ཆ་རྟོགས་པ་ལ་རྣམ་པ་འགའ་ཞིག་ལྟར་ཐབས་སུ་འགྱུར། དངོས་པོ་མེད་དོ་ཞེས་བྱ་བར་ནི་འཐད་ཀྱི་དངོས་པོ་མེད་པ་ཡོད་དོ་ཞེས་བྱ་བར་ནི་མ་ཡིན་ནོ། །དེས་ན་འདི་དོན་དམ་པ་མ་ཡིན་ཏེ། དངོས་པོ་མེད་པ་ཞེས་བྱ་བའི་ཐ་དད་པ་
[291a.5]ནི་འགའ་ཡང་མེད་དོ་ཞེས་བྱ་བའི་ཐ་ཚིག་གོ། །གལ་ཏེ་ཐ་དད་པ་མེད་ན་ཐམས་ཅད་གཅིག་ཉིད་དུ་འགྱུར་བ་མ་ཡིན་ནམ་ཞེ་ན། མ་ཡིན་ཏེ་ཁས་བླངས་པ་ཉིད་རྟོགས་པ་མ་ཡིན་པའི་ཕྱིར་རོ། །ཤིང་མ་ཡིན་ལ་ཤིང་མེད་དོ། །ཞེས་བྱ་བ་ནི་ཐ་དད་པ་ཡིན་པས་དེ་དེ་ལྟར་ཁས་ལེན་པ་ན་ཇི་ལྟར་དངོས་པོ་རྣམས་ཐ་མི་དད་པར་འགྱུར། དེ་
[291a.6]ཡོད་དོ་ཞེས་བྱ་བར་ནི་མི་ནུས་ཏེ། ཤིང་མ་ཡིན་ལ་ཤིང་མེད་དོ། །ཞེས་ཁས་བླངས་པ་ན། མེད་པ་ཞེས་བྱ་བ་ཅུང་ཞིག་ཁས་བླངས་པ་ནི་མ་ཡིན་ནོ། །འོན་ཏེ་རང་རང་གི་ངོ་བོ་ལ་གནས་པའི་དངོས་པོ་རྣམས་ཉིད་ཐ་དད་པ་ཡིན་ན། དེའི་ཚེ་དེ་དག་ཡོད་པ་ཁོ་ན་ཡིན་ན། རྣམ་པ་དེ་ལྟ་བུ་དེ་དག་ཡོད་པས་ན། གང་ཞིག་ཁྱད་པར་དུ་འགྱུར་
[291a.7]བའི་ལྡོག་པ་གཞན་ནི་མི་འགྲུབ་པོ། །དེས་ན་ཐ་དད་པའི་དངོས་པོ་མ་ཡིན་ནོ། །དོན་དམ་པ་ཡིན་ན་སྐྱོན་ཅི་ཡོད་ཅེ་ན། གཞན་དུ་ཞེས་སྨོས་ཏེ། གང་གི་ཕྱིར་ཐ་དད་པ་དོན་དམ་པ་ཡིན་ན། དངོས་པོ་ལས་ལྡོག་པ་དངོས་པོར་འགྱུར་ན། དེ་ལྟར་ཡང་མ་ཡིན་ནོ། །ཅིའི་ཕྱིར་ཞེ་ན། འདི་འདི་ལ་ཞེས་སྨོས་སོ། །བསམ་པ་ནི་འདི་
[291b]
[291b.1]ཡིན་ཏེ། གང་གིས་ན་དངོས་པོ་རྣམ་པ་སྣ་ཚོགས་ལ་བསྙོན་དུ་མེད་པའི་ཕྱིར་བུམ་པ་ལ་སོགས་པ་བཞིན། འདི་ཡང་འགྱུར་བ་ཐ་དད་པ་ཞེས་པ་རང་རྒྱུད་ཅན་ནི་འགའ་ཡང་ཡོད་པ་མ་ཡིན་ནོ། །ཐ་དད་པ་དང་ལྡན་པ་ལས་ནི་དངོས་པོ་དངོས་པོ་གཞན་ལས་ཐ་དད་པར་གྱུར་པར་བརྗོད་པར་བྱ་བ་ཡིན་ཏེ། དེས་ན་འདི་ཅུང་ཟད་ཀྱང་དངོས་པོར་ཡོད་པ་མ་
[291b.2]ཡིན་ནོ་ཞེས་སྨྲའོ། །དངོས་པོར་ཡོད་པ་ཡིན་ན། དངོས་པོ་གཞན་ལ་བསྙད་པར་བྱ་བ་འདི་ཐ་དད་པ་དང་ཐ་མི་དད་པ་ལས་མི་འདའ་བའི་ཕྱིར་འདི་འདི་ལས་ཐ་དད་ཅེས་བྱ་བར་མི་འགྱུར་རོ། །ཐ་མི་དད་པ་ཡིན་ན་ནི། དེ་གཅིག་གི་བདག་ཏུ་གྱུར་པའི་ཕྱིར་འདི་འདི་ལས་ཞེས་བྱ་བར་འཐད་པ་མ་ཡིན་ནོ། །གལ་ཏེ་འདི་གཉིས་ཀྱིས་ཐ་
[291b.3]དད་པ་ཡིན་ན། དེ་ལྟ་ན་འདི་འདི་ལས་ཞེས་བྱ་བར་འགྱུར་གྱི། གཅིག་གི་བདག་ཉིད་ཡིན་ན་ནི་དེ་གཞན་གྱི་མ་ཡིན་པའི་ཕྱིར་འདི་འདི་ལས་ཞེས་བྱ་བར་མི་རུང་ངོ་། །ཐ་དད་པ་ཡིན་ན་ཡང་དངོས་པོ་དེ་ལས་ལྡོག་པའི་ཕྱིར་ཐ་དད་པ་མེད་པས་ན་འདི་འདི་ལ་ཞེས་བྱ་བ་དེ་ཉིད་དུ་མི་འགྱུར་རོ། །གཉིས་ཀ་ལྟར་ཡང་དེ་དེ་ལྟར་འགྲེལ་
[291b.4]པ་ཉིད་དུ་གསལ་བར་འགྱུར་རོ། །བཤད་པའི་ཕྱིར། དོན་དམ་པ་ཞེས་སྨོས་ཏེ། དེ་ཉིད་ཕྱིར་ཞེས་བྱ་བས་ངོ་བོ་ཉིད་མེད་པ་ཉིད་དོན་དམ་པ་མ་ཡིན་པ་ཉིད་ཀྱི་གཏན་ཚིགས་སུ་བཤད་པ་དེ་འདི་ལྟར་སྒྲུབ་པ་ཡིན་ནོ། །དོན་དམ་པ་གང་ཡིན་པ་ནི་བདག་ཉིད་འགའ་ཞིག་དང་ལྡན་པ་ཡིན་ཏེ། དངོས་པོ་ཉིད་ཀྱི་ནི་ངོ་བོ་འགའ་
[291b.5]ཞིག་ཏུ་གྱུར་པ་ཁོ་ན་ཡིན་ནོ། །འོན་ཀྱང་དེ་ནི། དོན་དམ་དོན་བྱེད་ནུས་པ་གང་། །ཞེས་དོན་བྱེད་པ་ཉིད་ཀྱིས་ཉེ་བར་མཚོན་པར་ཟད་དེ། དེ་ཉིད་ནི་དེར་མི་འཁྲུལ་པའི་ཕྱིར་རོ། །དོན་དམ་པ་ཉིད་ནི་ངོ་བོ་ཉིད་ཡིན་ན་ཡིན་ལ། དེ་ལ་ཡང་ཐ་དད་པ་དང་ཐ་མི་དད་པ་ཉིད་ངེས་པ་ཡིན་ཞིང་དེ་དག་ཀྱང་མི་འཐད་པ་དེས་ན་ངོ་བོ་མེད་པའི་
[291b.6]ཕྱིར་དོན་དམ་པ་མ་ཡིན་ནོ་ཞེས་གཞན་དུ་ཞེས་བྱ་བས་བསྒྲུབས་ནས་དོན་དམ་པ་མ་ཡིན་པ་ཉིད་དུ་ཉེ་བར་སྡུད་པར་འགྱུར་རོ། །དེ་རྣམ་པ་གཞན་མི་སྲིད་པའི་ཕྱིར་རོ་ཞེས་བྱ་བ་ནི། དེ་ཞེས་བྱ་བའོ། །དོན་དམ་པར་ཡོད་པ་ནི། ཐ་དད་པར་གྱུར་པ་ཁོ་ན་ཡིན་ཏེ། ཐ་དད་པ་ནི་རང་རྒྱུད་དུ་དངོས་པོར་ཁས་མ་བླངས་
[291b.7]པའི་ཕྱིར་རོ། །དེས་ན་དོན་འདི་ཡིན་ཏེ། གལ་ཏེ་ཐ་དད་པ་རང་གི་བདག་ཉིད་ཀྱིས་ངོ་བོ་འགའ་ཞིག་ཡོད་པ་ཡིན་ན་ཐ་དད་པར་གྱུར་པ་ལས་དེ་ཉིད་དང་། གཞན་ཉིད་ལས་མི་འདའོ་ཞེས་བྱ་བའོ། །དེ་ཉིད་སེལ་བར་བྱེད་པ་ནི་དེའི་ངོ་བོ་ཡིན་ནོ་ཞེས་བྱ་བའོ། །གང་གི་ཚེ་དོན་དམ་པར་ཡོད་པའི་ཐ་དད་པར་གྱུར་པའི་ངོ་བོ་ཐ་དད་པ་ཡིན་
[292a]
[292a.1]ན། དེའི་ཚེ་དེ་ཉིད་ཐ་དད་པ་ཡིན་པས་ཐ་དད་པ་དེ་ལས་གཞན་ཐ་དད་པར་མི་འགྱུར་རོ། །ཐ་དད་པ་ནི་གཉི་ག་ལ་བརྟེན་པ་ཡིན་ཏེ་ཕན་ཚུན་ལྟོས་པས་རྣམ་པར་གཞག་པའི་ཕྱིར་དེ་ལས་ཤིང་དང་ཤིང་མ་ཡིན་པ་དག་ཕན་ཚུན་ཐ་དད་པ་ཡིན་པའི་ཕྱིར་རོ། །གང་གི་ཚེ་ཐ་དད་པ་དེ་ཤིང་གི་བདག་ཉིད་ཡིན་པ་དེའི་ཚེ་
[292a.2]ཤིང་མ་ཡིན་པའི་ཅི་ཡང་མ་ཡིན་པའི་ཕྱིར་ཇི་ལྟར་དེ་གཉིས་ཐ་དད་པ་མེད་པ་ནི་དངོས་པོ་རྣམས་ཀྱི་ཐ་དད་པ་ཡིན་ནོ། །གང་གི་ཚེ་དེ་གཅིག་གི་ཡིན་ན། དེའི་ཚེ་ཟླ་བོ་མ་ཡིན་པས་ཇི་ལྟར་དེ་ཉིད་ཐ་དད་སྔོན་པོ་མ་ཡིན་པ་མེད་པ་ནི་སྔོན་པོའི་རང་བཞིན་ཡིན་ལ། སྔོན་པོ་མེད་པ་ནི་སྔོན་པོ་མ་ཡིན་པའི་རང་བཞིན་ཡིན་ནོ་ཞེ་ན། མ་ཡིན་
[292a.3]ཏེ་སྔོན་པོ་མ་ཡིན་པ་མེད་པ་སྔོན་པོའི་ངོ་བོ་ཡིན་ན། དེ་སྔོན་པོ་མ་ཡིན་པ་ལ་ལྟོས་ནས་ཐ་དད་པར་འཇོག་པ་མི་སྲིད་པའི་ཕྱིར་རོ། །དེ་ནི་སྔོན་པོའི་རང་བཞིན་ཡིན་པའི་ཕྱིར་སྔོན་པོ་མ་ཡིན་པ་དང་ཅིར་འོང་ན་གང་གིས་འདི་དེ་ལ་ལྟོས་ནས་ཐ་དད་པར་འགྱུར། སྔོན་པོ་མ་ཡིན་པ་མེད་དོ་ཞེ་ན། སྔོན་པོ་མ་ཡིན་པ་ནི་སྔོན་པོ་མ་ཡིན་
[292a.4]པ་ཁོ་ནར་ཟད་ལ། མེད་པ་ནི་དེ་ལས་གཞན་ཡིན་པའི་ཕྱིར་དེ་མེད་ཅེས་བྱ་བར་མི་འཐད་དོ། །དེ་བཞིན་དུ་སྔོན་པོ་མ་ཡིན་པ་ལ་སྔོན་པོ་མེད་པར་ཡང་རྟོགས་པར་བྱའོ། །དེ་ལྟ་ན་ཡང་གལ་ཏེ་མེད་པ་གཉིས་ཐ་དད་པར་འདོད་ན་དེ་ཕན་ཚུན་མེད་པ་ཡིན་པར་མི་འགྱུར་ཏེ། གཉིས་ཀྱི་མེད་པ་གཅིག་ཡིན་ན་ནི་ཕན་ཚུན་མེད་
[292a.5]པར་འགྱུར་རོ། །སྔོན་པོ་དང་སྔོན་པོ་མ་ཡིན་པ་དག་གི་མེད་པ་གཉིས་ནི་མ་ཡིན་ཏེ། རང་གི་ངོ་བོ་ལ་ཁྱད་པར་མེད་པའི་ཕྱིར་རོ། །དེའི་ཕྱིར་ཕན་ཚུན་ལྟོས་པའི་ཐ་དད་པ་གལ་ཏེ་གཅིག་གི་བདག་ཉིད་ཡིན་ན་གཞན་གྱིར་མི་འགྱུར་རོ། །གཅིག་གི་རང་གི་ངོ་བོ་གང་ཡིན་པ་དེ་ནི་གཞན་གྱི་མ་ཡིན་པའི་ཕྱིར་དེ་ལ་ལྟོས་
[292a.6]ནས་དེ་དེའི་མེད་པ་ཞེས་བྱ་བར་མི་འཐད་དེ། གལ་ཏེ་གཞན་གྱི་ངོ་བོ་ཡིན་པའི་ཕྱིར་འདི་དེའི་མ་ཡིན་ན་དེ་ལ་ལྟོས་ནས་ཞེས་བྱ་བར་བརྗོད་པ་འདིའི་དོན་ཅི་ཡིན་པར་འགྱུར། འདི་ལྟར་དེ་ནི་ཐ་དད་པར་བྱ་བ་ཉིད་ཀྱི་ངོ་བོ་ཡིན་གྱི་ཟླ་བོ་ནི་མ་ཡིན་ཏེ། དེ་ནི་དེ་ལས་གཞན་ཡིན་པའི་ཕྱིར་དང་། དེའི་རང་གི་ངོ་བོ་གཞན་གྱི་དངོས་པོ་
[292a.7]ཡིན་པར་མི་སྲིད་པའི་ཕྱིར་རོ། །དེ་བཤད་པ་ནི། དེའི་ཞེས་བྱ་བ་སྟེ། སྔོན་པོ་དེའི་ངོ་བོ་སྔོན་པོ་མ་ཡིན་པ་ལས་ཐ་དད་པ་ནི་གཞན་སྔོན་པོ་མ་ཡིན་པའི་ཡིན་པར་མི་འགྱུར་རོ། །འོ་ན་ནི་གཅིག་ལ་གཅིག་མེད་པ་ཐ་དད་པར་གྱུར་པ་ཁོ་ན་ཐ་དད་པར་གྱུར་པ་གཉིས་ཀྱི་ཐ་དད་པ་ཡིན་ནོ་ཞེ་ན། ཐ་དད་པའི་ངོ་བོ་ཉིད་མ་ཡིན་ལ་ཞེས་
[292b]
[292b.1]སྨོས་ཏེ། ཐ་དད་པར་གྱུར་པ་དེ་ཉིད་ནི་ཐ་དད་པའི་ངོ་བོ་མ་ཡིན་ལ། ཐ་དད་པའི་ངོ་བོ་ཡང་ཡིན་ཏེ། དེ་བས་ན་ཐ་དད་པ་ངོ་བོ་གཞན་ཉིད་དུ་འགྱུར་རོ། །ཐ་དད་པར་གྱུར་པ་དག་ལས་ཐ་དད་པར་གྱུར་པ་ཁོ་ནར་འགྱུར་རོ་ཞེས་བྱ་བའི་དོན་ཏོ། །དེ་ལྟར་གྱུར་ན་སྐྱོན་ཅི་ཡོད་ཅེ་ན། དེས་ན་ཞེས་སྨོས་ཏེ་དངོས་པོ་ཐ་དད་
[292b.2]པ་དེ་ལས་ལྡོག་པར་འགྱུར་རོ། །གལ་ཏེ་ཤིང་ཤིང་མ་ཡིན་ལས་ལྡོག་པ་ལས་མ་ལོག་ན་ནི། དེ་ལས་ཐ་དད་པར་གྱུར་པ་ཉིད་མ་ཡིན་པར་འགྱུར་རོ། །དེ་ལ་ཡང་སྐྱོན་ཅི་ཡོད་ཅེ་ན། དེའི་ཕྱིར་ཞེས་སྨོས་ཏེ། འདི་ལས་ཞེས་བྱ་བ་ཤིང་མ་ཡིན་ལས་ཤིང་འདི་ཐ་དད་དོ་ཞེས་བྱ་བར་མི་འགྱུར་ཏེ། ཤིང་མ་ཡིན་ཉིད་དུ་ཐལ་
[292b.3]བའི་ཕྱིར་རོ། །དེ་བསྟན་པ་ནི། གང་ཞིག་ཅེས་བྱ་བ་སྟེ། གང་ཞིག་གང་ལས་ཐ་དད་པ་ལས་ལྡོག་པ་སྟེ། གང་མེད་པ་ལས་ལོག་པ་དེ་ལ་མེད་པའི་ཕྱིར་དེ་ནི་དེ་ཉིད་དུ་འགྱུར་རོ། །ཤིང་ནི་ཤིང་མ་ཡིན་མེད་པས་སྟོང་པའི་ཕྱིར་ཤིང་མ་ཡིན་པ་ཁོ་ནར་འགྱུར་རོ། །ཤིང་མ་ཡིན་མེད་པ་མེད་པ་ནི། དེ་མེད་པས་སྟོང་པ་ཡིན་པའི་ཕྱིར་
[292b.4]ཤིང་ནི་ཤིང་མ་ཡིན་པ་ཁོ་ནར་འགྱུར་བ་དེས་ན་ཇི་ལྟར་ཤིང་མ་ཡིན་ཉིད་ཤིང་མ་ཡིན་ལས་ཐ་དད་པར་འགྱུར་རོ། །རྣམ་པ་གཞན་གྱི་སྒོ་ནས་ཀྱང་འདི་འདི་ལས་ཐ་དད་ཅེས་བྱ་བ་ཐ་དད་པའི་ཕྱོགས་ལ་སྦྱོར་བ་ནི་ལྡོག་པ་དངོས་པོ་ཡིན་ན། འདི་འདི་ལས་ཐ་དད་དོ་ཞེས་བྱ་བར་མི་འཐད་དེ། འབྲེལ་པ་མེད་པའི་ཕྱིར་
[292b.5]རོ། །ཤིང་གི་ཤིང་མ་ཡིན་པ་ལས་ཐ་དད་པ་ཞེས་བྱ་བར་ཐ་དད་པ་རྟོགས་པ་ཡིན་ན། ཐ་དད་པ་དེ་ནི་དེ་ལྟར་ཤིང་གི་ཡིན་པར་མི་འགྱུར་རོ། །འབྲེལ་པ་ཡིན་ན་ཡང་གཞན་མི་སྲིད་པའི་ཕྱིར་རྒྱུ་དང་འབྲས་བུའི་དངོས་པོ་ཉིད་ཡིན་ནོ། །དེ་ལྟ་ན་ཡང་འབྲས་བུ་ཉིད་ཁོ་ནར་འགྱུར་གྱི་ཐ་དད་པར་ནི་མ་ཡིན་ཏེ། ཧ་ཅང་ཐལ་བའི་
[292b.6]ཕྱིར་རོ་ཞེས་བཤད་པ་ནི། འབྲེལ་པ་ཡོད་པ་ཡིན་ན་ཡང་ཞེས་བྱ་བའོ། །ཐ་དད་པ་ཐ་དད་དུ་གྱུར་པ་དེ་ཉིད་ལ་ཉེས་པ་གཞན་ཡང་སྟོན་པས་འདི་ཉིད་ལས། ཐ་དད་ཅེ་ན་བརྗོད་ཕྱིར་རོ། །ཞེས་བྱ་བ་སྦྱོར་བར་བྱེད་པ་ནི་ཐ་དད་པ་ཞེས་བྱ་བའོ། །ཐ་དད་པ་ཐ་དད་པར་གྱུར་པ་ལས་གཞན་ཉིད་ཡིན་ན། ཐ་དད་པ་འདི་གང་ལ་ལྟོས་
[292b.7]ནས་འདི་རང་བཞིན་གཞན་ཉིད་ཡིན་པ་དེ་ལས་ཀྱང་ངོ་། །དེ་ཡང་ཐ་དད་པར་གྱུར་པ་ཁོ་ན་ཡིན་པས་ཐ་དད་པར་གྱུར་པ་ལས་ཐ་དད་དོ། །དེས་ན་ཐ་དད་པ་དེ་ཐ་དད་པར་མི་འགྱུར་རོ། །གང་གི་ཚེ་ཐ་དད་པར་གྱུར་པ་ལས་ཐ་དད་པ་ཐ་དད་པར་གྱུར་ན། དེའི་ཚེ་ཐ་དད་པར་གྱུར་པ་ལ་ཡང་ཐ་དད་པ་ལས་ཐ་དད་པ་ཡོད་པ་ཁོ་ན་སྟེ།
[293a]
[293a.1]དེས་ན་ཐ་དད་པའི་ཐ་དད་པ་ཉིད་ཉམས་སོ། །ཅིའི་ཕྱིར་ཞེ་ན། ཐ་དད་པའི་ཁྱད་པར་ཡིན་པའི་ཕྱིར་ཟླ་བོའི་གཞན་བཞིན་ནོ། །འདི་ལྟར་ཤིང་ཤིང་མ་ཡིན་ལས་ཐ་དད་པ་ཞེས་བྱ་བ་འདི་ལ་ཐ་དད་པའི་ཁྱད་པར་ཉིད་དུ་གྱུར་པའི་ཤིང་མ་ཡིན་ནི་ཤིང་གི་ཐ་དད་པ་མ་ཡིན་པ་དེ་བཞིན་དུ་ཤིང་མ་ཡིན་ལས་ཐ་དད་པ་ཡང་
[293a.2]དེའི་ཐ་དད་པ་ཡིན་པར་མི་འགྱུར་ཏེ། ཤིང་མ་ཡིན་པ་ལས་བཞིན་དུ་དེ་ལས་ཀྱང་འདི་ཐ་དད་པའི་ཕྱིར་རོ། །ཐ་དད་པ་ལས་ཐ་དད་པ་ལ་ཐ་དད་པ་ཡང་ཁྱད་པར་ཡིན་པ་དེས་ན་ཐ་དད་པ་མ་ཡིན་པ་ཉིད་དོ། །དེ་བཤད་པ་ནི་འདི་འདི་ལས་ཞེས་བྱ་བའོ། །ཐ་དད་པར་གྱུར་པ་འདི་ཐ་དད་པ་འདི་ལས་ཐ་དད་པ་ཡིན་ནོ་ཞེས་བསྟན་པར་
[293a.3]བྱ་བ་ཡིན་ན་ཁྱད་པར་དུ་བྱེད་པ་མ་ཡིན་པ་ཉིད་ཀྱང་ཁྱད་པར་མ་ཡིན་པའི་ཕྱིར་ཁྱད་པར་བསྟན་པ་འདི་ལ་ཁྱད་པར་ཉིད་དུ་ཁྱད་པར་དུ་བྱེད་པ་ཡིན་ཏེ། དཔེར་ན་ཤིང་མ་ཡིན་ལས་ཐ་དད་པར་བསྟན་པ་ལ་ཤིང་མ་ཡིན་པ་བཞིན་ནོ། །གལ་ཏེ་ཡང་ཐ་དད་པ་ཐ་དད་པའི་ཁྱད་པར་དེ་ཐ་དད་པའི་འབྱེད་མཚམས་མ་ཡིན་ན། དེའི་ཚེ་
[293a.4]འགའ་ཞིག་གང་ལས་ཀྱང་ཐ་དད་པར་མི་འགྱུར་བའི་ཕྱིར་འགྲོ་བ་ཐ་མི་དད་པ་ཁོ་ནར་འགྱུར་རོ། །ཐ་དད་པ་ནི་ཐ་དད་པའི་དབྱེ་མཚམས་ལ་ལྟོས་པ་ཡིན་ཏེ། དེས་ན་དེ་ཉིད་ཐ་དད་པ་ན་དེའི་དབྱེ་མཚམས་མེད་པའི་ཕྱིར། ཐ་དད་པ་མི་སྲིད་པར་ཐལ་བའི་ཕྱིར་རོ། །དེ་བཤད་པ་ནི། དེའི་ཕྱིར་ཞེས་
[293a.5]བྱ་བའོ། །འདི་འདི་ལས། ཐ་དད་ཅེས་ནི་བརྗོད་ཕྱིར་རོ། །ཞེས་མདོས་ཀྱང་དོན་འདི་བརྗོད་པ་ཡིན་ནོ། །དེས་ན་གལ་ཏེ་ལྡོག་པ་དངོས་པོ་ཡིན་ན། དེའི་ཚེ་ཐ་དད་པའི་ཕྱོགས་ལ་ཐ་དད་པར་གྱུར་པ་འདི་ལྡོག་པའི་མཚན་ཉིད་ཀྱིས་དངོས་པོ་ལས་ཞེས་བརྗོད་པའི་ཕྱིར་རོ། །དེས་ན་
[293a.6]ཐ་མི་དད་པ་ཉིད་དང་ཐ་དད་པ་མི་སྲིད་པར་ཐལ་བར་འགྱུར་རོ། །དེའི་ཕྱིར་ཐ་དད་པ་གཞན་ཡང་མེད་དོ། །རྣམ་པ་གཞན་དུ་ཡང་འདི་དངོས་པོ་ཡོད་པར་མི་སྲིད་པ་དེས་ན་ཐ་དད་པ་ཞེས་བྱ་བ་ནི་ངོ་བོ་འགའ་ཡང་ཡོད་པ་མ་ཡིན་གྱི། འོན་ཀྱང་དངོས་པོ་དངོས་པོ་གཞན་ལ་མེད་པར་ཟད་དོ། །དེ་བཤད་པ་
[293a.7]ནི། དེ་བས་ན་ཞེས་བྱ་བའོ། །རང་གི་ལུགས་ཀྱི་ལྡོག་པའི་ཐ་དད་པ་འགོག་པའི་འབྲས་བུ་ཅན་གྱི་སུན་འབྱིན་པ་འདིས་ནི་གཞན་གྱི་ལུགས་ཀྱང་གསལ་བ་ཁོ་ན་ཡིན་ཏེ། དེས་གང་དག་གཅིག་ལ་གཅིག་མེད་པ་དངོས་པོར་གྱུར་པ་ཉིད་དུ་སྨྲ་བ་དེས་ཀྱང་བཟློག་པ་ཡིན་ནོ།། །།
[293b]
[293b.1]{T4224}༄༅༅།། །།རྒྱ་གར་སྐད་དུ། པྲ་མཱ་ཎ་བཱརྟི་ཀ་སྱ་བྲྀཏྟི་ནཱ་མ། བོད་སྐད་དུ། ཚད་མ་རྣམ་འགྲེལ་གྱི་འགྲེལ་པ་ཞེས་བྱ་བ། བམ་པོ་དང་པོ། བཅོམ་ལྡན་འདས་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །སྲིད་པའི་གནས་འཇུག་ང་རྒྱལ་གྱིས་བྱས་
[293b.2]འབིགས་བྱེད་དེ་ཉིད་ཀྱིས་ཁྱབ་གང་ཡིན་ལ། །རབ་རིབ་དབང་གིས་མི་བཟད་མུན་པ་ལྟར་འཇུག་ཕ་རོལ་ལྟ་བ་འདི་དག་ནི། །འདོད་པས་མྱོས་པ་ལས་རྒྱལ་བ་ཞེས་རབ་གྲགས་དེ་ཁོ་ན་ཉིད་སྣང་བ་ཅན། །འཇིག་རྟེན་མ་ལུས་སྣང་བྱེད་བདུད་རྩིའི་བདེ་བ་དེས་ནི་འཇིག་རྟེན་དག་བྱེད་ཤོག །དེ་
[293b.3]ལྟར་འཕགས་པའི་བདེན་པ་བཞི་ལ་འཇུག་པ་ཡིན་པའི་ཕྱིར་རྗེས་སུ་དཔག་པ་རྣམ་པར་བཞག་ནས་དེ་ཉིད་བསྟན་པར་བྱ་བའི་ཕྱིར་ལེའུ་གཉིས་པས་ཕྱག་འཚལ་བའི་ཚིགས་སུ་བཅད་པ་གསལ་བར་བཤད་པར་མཛད་དོ། །འདིར་ཚད་མའི་མཚན་ཉིད་དང་། བཅོམ་ལྡན་འདས་ཚད་མར་གྱུར་པར་
[293b.4]བཞེད་ནས། སློབ་དཔོན་གྱིས་བསྟན་བཅོས་ཀྱི་དང་པོར་ཚད་མར་གྱུར་པ་ཞེས་པས་བསྟོད་པ་གསུངས་སོ། །ཚད་མར་གྱུར་པ་འགྲོ་ལ་ཕན་མཛད་བཞེད། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ནས། །རང་གི་གཞུང་ལུགས་འཐོར་ལས་འདིར་གཅིག་ཉིད། །ཚད་མ་གྲུབ་པ་ཀུན་
[293b.5]ལས་བཏུས་པ་བརྩམ། །ཞེས་གསུངས་ཏེ། འདིར་ཡང་སྔ་མ་ཕྱེད་ཀྱིས་ནི་རྒྱུ་དང་འབྲས་བུ་ཕུན་སུམ་ཚོགས་པས་ཚད་མར་གྱུར་པའི་བཅོམ་ལྡན་འདས་བསྟན་པར་མཛད་དོ། །དེ་ལ་རྒྱུ་ཕུན་སུམ་ཚོགས་པ་ནི་གཉིས་ཏེ། སྙིང་རྗེ་དང་། ཐབས་སོ། །དེ་ལ་སྙིང་རྗེ་ནི་འགྲོ་ལ་ཕན་པར་བཞེད་
[293b.6]ཅེས་བྱ་བས་བསྟན་ཏོ། །ཐབས་གོམས་པར་བྱ་བ་ནི་སྟོན་པ་ཞེས་བྱ་བས་སོ། །འབྲས་བུ་ཕུན་སུམ་ཚོགས་པ་ཡང་གཉིས་ཏེ། རང་གི་དོན་ཕུན་སུམ་ཚོགས་པ་དང་། གཞན་གྱི་དོན་ཕུན་སུམ་ཚོགས་པའོ། །དེ་ལ་རང་གི་དོན་ཕུན་སུམ་ཚོགས་པ་ནི་བདེ་གཤེགས་ཞེས་པས་བསྟན་ཏེ། དེ་ལ་
[293b.7]བདེ་བའི་སྒྲས་ནི་དོན་གསུམ་ཉེ་བར་འཛིན་ཏེ། རབ་ཏུ་མཛེས་པར་གཤེགས་པ་དང་། ཕྱིར་མི་ལྡོག་པར་གཤེགས་པ་དང་། ལྷག་མ་མེད་པའི་དོན་དུ་གཤེགས་པའི་ཕྱིར། གཟུགས་བཟང་པོ་དང་། རིམས་ནད་ལེགས་པར་བྱང་བ་དང་། བུམ་པ་རབ་ཏུ་གང་བ་བཞིན་ནོ། །གཞན་
[294a]
[294a.1]གྱི་དོན་ཕུན་སུམ་ཚོགས་པ་ཡང་སྐྱོབ་པ་ཞེས་པས་བསྟན་ཏེ། ཡོངས་སུ་མྱ་ངན་ལས་མ་འདས་པའི་ཆོས་ཀྱི་སྐུས་འགྲོ་བ་ཐམས་ཅད་ཡོངས་སུ་སྐྱོབ་པའོ། །དེ་ལྟ་བུར་གང་གྱུར་པ་དེ་ནི་ཚད་མར་འཁྲུངས་པ་ཞེས་བྱའོ། །འོག་མ་ཕྱེད་ཀྱིས་ནི་དགོས་པ་དང་། བསྟན་
[294a.2]བཅོས་ཀྱི་བསྡུས་པའི་དོན་བསྟན་ཏེ། དེ་ལ་ཚད་མ་གྲུབ་པ་ཞེས་བྱ་བའི་ཚིག་གིས་དགོས་པ་བསྟན་ཏོ། །ལྷག་པས་ནི་རང་གི་གཞུང་ལུགས་བསྡུས་པའི་རང་བཞིན་དུ་བསྟན་ཏོ། །དེ་ལྟར་ཚིགས་སུ་བཅད་པའི་དོན་དུ་གནས་པ་ལས་ཁ་ཅིག་རྩོད་པར་བྱེད་དེ། ཚད་མར་གྱུར་པའི་བཅོམ་ལྡན་
[294a.3]འདས་ཅིའི་ཕྱིར་སྒྲུབ་པར་བྱེད། འདི་ལྟར་རིག་བྱེད་པའམ། དེ་ལས་སྐྱེས་པའི་ཤེས་པ་ལ་གནོད་པ་དང་བྲལ་བའི་ཕྱིར་ཚད་མ་ཡིན་ཏེ། མངོན་སུམ་དང་། རྗེས་སུ་དཔག་པ་བཞིན་ནོ། །གནོད་པ་མེད་པའི་ཤེས་པ་ནི་ཚད་མའོ་ཞེས་གལ་ཏེ་ཚད་མའི་མཚན་ཉིད་ལ་རྩོད་པ་དེའི་ལན་གདབ་པར་འདོད་
[294a.4]ནས། རྣམ་པར་འགྲེལ་པ་མཛད་པ་ཐུན་མོང་གི་མཚན་ཉིད་ཉེ་བར་བསྟན་པའི་ཕྱིར། ཚད་མ་སླུ་མེད་ཅན་ཤེས་པ། །ཞེས་བྱ་བ་སྨོས་ཏེ། ཤེས་པ་ནི་ཚད་མ་སྟེ། དེ་ཡོད་ན་ཡོངས་སུ་གཅོད་པ་འགྲུབ་པའི་ཕྱིར་དང་། དབང་པོ་ལ་སོགས་པ་ལ་དེ་བཟློག་པའི་ཕྱིར་རོ། །གང་ལ་སླུ་བ་མེད་པ་ཡོད་
[294a.5]པ་དེའི་ཤེས་པ་ཡོད་པ་དེ་ནི་གདོན་མི་ཟ་བར་ཚད་མ་སྟེ། སླུ་བ་ལ་དེ་བཟློག་པའི་ཕྱིར་རོ། །གཞན་དུ་ན་གལ་ཏེ་དབང་པོ་ལ་སོགས་པ་ཚད་མར་གྱུར་ན་ནི་རབ་རིབ་ཀྱིས་བསྒྲིབས་པའི་དབང་པོ་ཡང་ཚད་མར་ཐལ་བར་འགྱུར་རོ། །རབ་རིབ་ལ་སོགས་པའི་ཉེས་པས་ཉམས་པའི་ཕྱིར་ཇི་ལྟར་ཚད་
[294a.6]མར་འགྱུར་ཞེ་ན། དབང་པོ་ལས་འདས་པའི་ཕྱིར་མིག་རབ་རིབ་དང་བཅས་པར་ཇི་ལྟར་ཤེས། གལ་ཏེ་སླུ་བར་བྱེད་པའི་ཤེས་པ་སྐྱེ་བས་སྐྱོན་དང་བཅས་པར་སྟོན་ངེས་སོ་ཞེས་ཟེར་ན། དེ་ལྟ་ན་འོ་ན་ནི་སླུ་བར་བྱེད་པ་དང་བྲལ་བར་མཐོང་བ་སྐྱེས་པ་ཉིད་ལས་རྒྱུ་དག་པར་ངེས་པའི་ཕྱིར་སླུ་བ་མེད་པའི་
[294a.7]ཤེས་པ་ཉིད་ཚད་མ་ཡིན་ནོ། །སླུ་བ་མེད་པ་སྨོས་པས་ཀྱང་ཚད་མའི་མཚན་ཉིད་གཞན་བཟློག་པ་ཉིད་ཡིན་ནོ། །དེའི་ཕྱིར་བློ་རྟོགས་པའི་བདག་ཉིད་དུ་གྱུར་པ་ནི་ཚད་མ་ཉིད་དུ་ཇི་ལྟར་འགྱུར་ཏེ། གང་གི་ཕྱིར་རྟོགས་པའི་བདག་ཉིད་ཁོ་ནར་གྱུར་པ་ཚད་མར་ཁས་བླངས་པས་ཟླ་བ་གཉིས་སུ་མཐོང་བ་
[294b]
[294b.1]ཚད་མར་འགྱུར་རོ། །འོན་ཏེ་གནོད་པ་མེད་པའི་རྟོགས་པ་ཚད་མ་ཡིན་ན་གནོད་པ་མེད་པའི་ཤེས་པ་ཉིད་གང་གི་ཚེ་མཐོང་བ་དེའི་སྐྱེ་བའམ། འོན་ཏེ་དུས་གཞན་དུ་གནོད་པ་མེད་པའི་ཤེས་པ་སྐྱེ། དེའི་ཚེ་ནི་གནོད་པ་དང་བྲལ་བ་ཉིད་དུ་མ་གྲུབ་པས་ཚད་མའི་མཚན་ཉིད་དུ་ཇི་ལྟར་འགྱུར། དུས་གཞན་དུ་
[294b.2]ཡང་གནོད་པ་ཉིད་དུ་མི་འགྱུར་རོ་ཞེས་བྱ་བ་ངེས་པའི་ཐབས་ཡོད་པ་མ་ཡིན་ནོ། །གཞན་ཡང་ཕྱོགས་དང་པོ་ཁས་ལེན་ན། དེའི་ཚེ་ཡང་མིག་རབ་རིབ་ཀྱིས་ཉམས་པས་ཟླ་བ་གཉིས་སུ་མཐོང་བ་སྐྱེས་པའི་ཚེ་གནོད་པ་མེད་པའི་ཕྱིར། ཟླ་བ་གཉིས་སུ་མཐོང་བའི་ཤེས་པ་ཚད་མར་ཐལ་བར་འགྱུར་རོ། །
[294b.3]འོན་ཏེ་དུས་གཞན་དུ་གནོད་པ་ཅན་མཐོང་བས་ཟླ་བ་གཉིས་སུ་མཐོང་བའི་ཤེས་པ་ཚད་མར་མི་འགྱུར་ན་དེའི་ཚེ་ཡང་ཐུག་པ་མེད་པར་འགྱུར་རོ། །འོན་ཏེ་གནོད་པ་ཅན་ནི་ཚད་མ་ཡིན་པའི་ཕྱིར་གཞན་ལ་མི་ལྟོས་ཀྱི་ལོག་པའི་ཤེས་པ་ཉིད་ནི་གཞན་གྱིས་ངེས་པར་འགྱུར་བའི་ཕྱིར་ཚད་མ་མ་ཡིན་ནོ་
[294b.4]ཞེ་ན། དེ་ནི་མ་ཡིན་ཏེ། གནོད་པ་ཅན་གྱི་ཚད་མ་ལ་གལ་ཏེ་གནོད་པ་མེད་པར་ངེས་ན་དེའི་ཚེ་སྔར་གྱི་ཤེས་པ་ཡང་ཚད་མ་མ་ཡིན་པར་འགྱུར་གྱི་གཞན་དུ་ནི་མ་ཡིན་ནོ། །འོན་ཏེ་གནོད་པ་ཅན་ལ་གནོད་པ་མ་མཐོང་བས་ཚད་མ་ཡིན་ན་ནི་ཡོངས་སུ་ཤེས་པ་ཙམ་གྱིས་ཀྱང་ཚད་མར་མི་འགྱུར་ཏེ།
[294b.5]འོ་ན་ཅི་ཞེ་ན་གནོད་པ་མ་མཐོང་བའི་ཕྱིར་རོ། །དེ་ལ་གནོད་པ་མ་མཐོང་བ་ཙམ་གྱིས་ཀྱང་དུས་གཞན་དུ་གནོད་པ་དང་བྲལ་བའོ་ཞེས་བྱ་བར་ངེས་པ་ཡོད་པ་མ་ཡིན་ནོ། །འོན་ཏེ་གནོད་པ་ཅན་དེ་ལ་གནོད་པ་ཡོད་ན་ནི་དེའི་ཚེ། དང་པོ་ཉིད་ཀྱི་ཤེས་པ་ཡང་ཚད་མར་འགྱུར་ན་དེ་ནི་རིགས་པ་མ་ཡིན་ནོ། །
[294b.6]དེ་ལ་ཡང་གལ་ཏེ་གནོད་པ་ཡོད་ན་ནི་གནོད་པ་སྲིད་པའི་ཕྱིར་ཚད་མར་ངེས་པ་མེད་དོ། །འོན་ཏེ་རྒྱུའི་ཉེས་པ་ཟླ་བ་གཉིས་སུ་མཐོང་བའི་ཤེས་པ་ཚད་མར་འགྱུར་བ་ལ་གནོད་ན་ནི་རབ་རིབ་ལ་སོགས་པའི་སྐྱོན་ཡོངས་སུ་ཤེས་པ་ཡང་སླུ་བ་ཉིད་ཀྱི་ཤེས་པར་འགྱུར་བའི་ཕྱིར་སླུ་བ་མེད་པ་དང་། སླུ་བ་དང་
[294b.7]བཅས་པ་དག་ཉིད་ཚད་མ་དང་། ཅིག་ཤོས་སུ་རྣམ་པར་གཞག་པར་རིགས་ཏེ། དེའི་ཕྱིར་རྩོད་པའི་གཞིར་གྱུར་པའི་ཤེས་པ་ནི་ཚད་མ་མ་ཡིན་ཏེ་སླུ་བ་མེད་པ་དང་བྲལ་བའི་ཕྱིར་བཅོམ་ལྡན་འདས་ཉིད་ཚད་མར་གྱུར་པའོ་ཞེས་འབད་པས་སྒྲུབ་པར་བྱེད་དོ། །འོན་ཏེ་སླུ་བ་མེད་པས་ཤེས་པ་སྔ་མ་
[295a]
[295a.1]ཚད་མར་འདོད་ན་སླུ་བ་མེད་པར་ཤེས་པ་ཉིད་ཚད་མ་ཡིན་ནམ་ཚད་མ་མིན། གལ་ཏེ་ཚད་མ་མ་ཡིན་ན། ཇི་ལྟར་དོན་བྱེད་པར་གནས་འོན་ཏེ་ཚད་མ་ཡིན་ན་ནི་དེའི་ཚེ་དེ་ལ་ཡང་སླུ་བ་མེད་པར་ཤེས་པ་གཞན་དང་ལྡན་པས་ཚད་མ་ཐུག་པ་མེད་པར་འགྱུར་རོ། །གཞན་
[295a.2]ཡང་གལ་ཏེ་སླུ་བ་མེད་པའི་ཤེས་པ་ཚད་མར་ཁས་བླངས་པ་དེའི་ཚེ་རྨི་ལམ་དུ་མཐོང་བ་དང་དུང་དཀར་པོ་ལ་སེར་པོར་ཤེས་པ་ཡང་དོན་བྱ་བ་བྱེད་ནུས་པའི་ཕྱིར་ཚད་མར་འགྱུར་རོ་སྙམ་དུ་སེམས་ན། དེའི་ཕྱིར་དོན་བྱེད་པ་རུ་གནས་པ་ནི་མི་སླུ་བ་ཡིན་ཏེ་ཞེས་བྱ་བ་སྨོས་ཏེ། དོན་ནི་བསྲེག་པ་
[295a.3]དང་བཙོ་བ་ལ་སོགས་པའོ། །བྱེད་པ་ནི་སྒྲུབ་པ་སྟེ། གནས་པ་ནི་ཁོང་དུ་ཆུད་པའམ་མི་འགྱུར་བ་ཉིད་ལ་བྱའོ། །འདི་སྙམ་དུ་གང་ལ་ཐ་དད་པའི་དོན་བྱེད་པ་དེ་ལ་ཇི་སྲིད་དུ་ཚད་མ་དང་འབྲེལ་པའི་ཕྱིར་དང་། གང་དུ་ཐ་མི་དད་པའི་དོན་བྱེད་པ་ཡོད་པ་དེ་ཉིད་ནི་ཤིན་ཏུ་ཡང་ཚད་མ་ཡིན་ནོ། །
[295a.4]འདི་ལྟར་སླུ་བ་མེད་པའི་ཤེས་པ་སྐྱེས་པ་དེའི་ཚེ་དོན་བྱེད་པར་ཁོང་དུ་ཆུད་པར་འགྱུར་བ་དེ་བས་ན་དེ་ཉིད་ལ་སྐྱེས་བུའི་དོན་ཐམས་ཅད་ཡོངས་སུ་གྲུབ་པའི་ཕྱིར་དེ་ལ་ཡོངས་སུ་བརྟག་པས་དགོས་པ་མེད་དོ་སྙམ་དུ་དགོངས་སོ། །འདིས་ནི་དང་པོའི་ཤེས་པ་སླུ་བ་མེད་པར་ཤེས་པ་ལ་ལྟོས་པ་
[295a.5]ཇི་ལྟ་བ་དེ་བཞིན་སླུ་བ་མེད་པའི་ཤེས་པ་ལ་ལྟོས་པས་སོ་ཞེས་ཟེར་བ་དེ་བསལ་བ་ཡིན་ནོ། །དོན་བྱེད་པ་ལས་མི་འགྱུར་བ་ཉིད་དོ་ཞེས་བསྟན་པས་ཀྱང་རྨི་ལམ་དུ་མཐོང་བ་བསལ་བ་ཡིན་ཏེ། དེ་ལ་དོན་བྱེད་པ་ལས་འགྱུར་བའི་ཕྱིར་འདི་ལྟར་རྨི་ལམ་ན་བརྟན་པ་མ་ཡིན་པ་དང་། ལྡོག་པ་ཉིད་
[295a.6]དུ་འགྱུར་གྱི་སད་པའི་ཤེས་པ་ལ་ནི་དེ་ལས་བཟློག་པ་ཡིན་ནོ། །དུང་ལ་སེར་པོར་མཐོང་བ་ཉིད་ཚད་མ་མ་ཡིན་ཏེ་དོན་བྱ་བ་བྱེད་པ་དང་བྲལ་བའི་ཕྱིར་རོ། །དབྱིབས་བསྒྲུབ་པར་བྱ་བའི་དོན་བྱ་བ་བྱེད་པར་འགྱུར་རོ་ཞེ་ན། དེ་ལ་རྗེས་སུ་དཔག་པ་ཉིད་ཚད་མར་འགྱུར་ཏེ། འདི་ལྟར་སྣང་བའི་ཁྱད་
[295a.7]པར་ཉིད་ནི་དེ་ལྟ་བུར་གྱུར་པའི་དབྱིབས་མེད་ན་མི་འབྱུང་བའི་ཕྱིར་དང་། སེར་པོ་སྒྲུབ་པའི་དོན་བྱེད་པ་མེད་པས་མངོན་སུམ་དུ་སེར་པོ་བཟུང་བ་ལ་ཚད་མ་མ་ཡིན་ནོ། །ཡང་ན་གལ་ཏེ་གང་གི་ཚེ། སླུ་བ་མེད་པའི་ཤེས་པ་ཚད་མ་མ་ཡིན་པ་དེའི་ཚེ། ཤེས་པའི་བདག་ཉིད་དུ་གྱུར་པ་དང་།
[295b]
[295b.1]སླུ་བ་མེད་པ་ཉིད་རང་གི་ངོ་བོ་ཡོངས་སུ་གཅོད་པའི་དུས་སུ་གཅོད་པའི་ཕྱིར་རབ་ཏུ་བརྟག་པར་བྱ་བ་མ་ཡིན་ནོ་ཞེས་བྱ་བའམ། འོན་ཏེ་རང་གི་ངོ་བོ་ཡོངས་སུ་མི་གཅོད་ན། དེའི་ཚེ་ཤེས་པ་རང་རིག་པར་མི་འགྱུར་རོ་ཞེས་རྩོད་པར་འགྱུར་དུ་འོང་ངོ་སྙམ་ནས། དོན་བྱེད་པ་རུ་གནས་པ་ནི་མི་སླུ་བ་ཡིན་ཏེ་
[295b.2]ཞེས་བྱ་བ་སྨོས་སོ། །དེས་ནི་འདི་སྐད་དུ་ཤེས་པའི་རང་བཞིན་ཉིད་ལ་མི་སླུ་བ་མ་ཡིན་ཏེ་དོན་བྱེད་པར་ཁོང་དུ་ཆུད་པ་ལ་མི་སླུ་བ་ཡིན་ནོ། །མི་སླུ་བ་དང་འབྲེལ་པས་སླུ་བ་མེད་པ་ཉིད་དོ། །རང་གི་ངོ་བོ་ཡོངས་སུ་གཅོད་པའི་ཚེ་ཤེས་པ་དོན་བྱེད་པར་སྣང་བ་ནི་མ་ཡིན་ལ་ཉམས་སུ་མ་མྱོང་ན་དོན་བྱེད་པ་དེ་
[295b.3]དང་འབྲེལ་པ་ནི་མ་ཡིན་ནོ་སྙམ་དུ་དགོངས་སོ། །དེ་སྐད་དུ་ཡང་འབྲས་བུ་མངོན་སུམ་དུ་མ་གྱུར་པར་རྒྱུར་ངེས་པ་མེད་དོ་ཞེས་བཤད་དོ། །གལ་ཏེ་དོན་བྱེད་པར་གནས་པ་ལ་སླུ་བ་མེད་པ་དེའི་ཚེ་སྒྲའི་ཤེས་པ་དང་ཁྲ་བོ་མཐོང་བ་ནི་ཚད་མར་མི་འགྱུར་ཏེ། ཐ་དད་པའི་དོན་བྱེད་པ་མེད་པའི་ཕྱིར་
[295b.4]མཚན་ཉིད་མ་ཁྱབ་པའི་སྐྱོན་ཡོད་དོ་སྙམ་དུ་སེམས་ན་དེའི་ཕྱིར་བསམ་པ་རྟོགས་པར་བྱེད་པས་ན་སྒྲ་ལས་བྱུང་བའམ་ཞེས་བྱ་བ་སྨོས་ཏེ། སྒྲ་ནི་སྒྲའི་དངོས་པོ་སྟེ་སྒྲ་ལས་བྱུང་བ་ནི་སྒྲའི་ཡུལ་ཅན་གྱི་ཤེས་པ་ཞེས་བྱ་བའི་ཐ་ཚིག་གོ། །འང་གི་སྒྲས་ནི་ཁྲ་བོ་ལ་སོགས་པ་མཐོང་བ་ཡང་གཟུང་
[295b.5]ངོ་། །དེ་ལ་བསམ་པ་ནི་འདོད་པའོ། །རྟོགས་པ་ནི་ཁོང་དུ་ཆུད་པར་བྱེད་པའི་ཕྱིར་རོ། །འདིར་ཡང་བསམ་པའི་ཡུལ་གྱིས་འདོད་པའི་དོན་སྟོན་པའོ། །དེས་ནི་འདི་སྐད་དུ་སྒྲའི་ཤེས་པ་ནི་ཐ་མི་དད་པའི་དོན་བྱེད་པ་དང་ཕྲད་པར་བྱེད་པས་ཚད་མ་སྟེ། འདི་ལྟར་དབྱངས་ཐོས་པ་ཉིད་
[295b.6]དོན་བྱེད་པར་འདོད་པའོ། །ཁྲ་བོ་ལ་སོགས་པ་མཐོང་བ་ཡང་ཁོང་དུ་ཆུད་པའི་དོན་བྱེད་དོ། །དོན་བྱེད་པར་གནས་པ་ཁྱད་པར་མེད་པར་གཟུང་བས་ནི་སླུ་བ་མེད་པ་ཞེས་བསྟན་པ་ཡིན་ནོ། །དེའི་ཕྱིར་འདིས་ནི། ཐོས་པའི་བློ་ནི་ཚད་མ་མིན། །ཅིག་ཤོས་དང་ནི་འབྲེལ་མེད་ཕྱིར། །ཞེས་བྱ་
[295b.7]བ་དེ་བསལ་བ་ཡིན་ནོ། །དེ་ལྟ་མོད་ཀྱི་གང་ལ་ཐ་དད་པའི་དོན་བྱེད་པ་དེ་ལ་དོན་བྱེད་པའི་ཡུལ་ཅན་གྱི་ཤེས་པ་ནི་གཞན་གྱི་ཡུལ་ཅན་གྱི་ཚད་མས་ཇི་ལྟར་རྣམ་པར་གཞག་ཅེ་ན། དེར་ཡང་གཟུགས་དང་། རེག་པ་དང་ཚོགས་པ་གཅིག་ལ་རག་ལས་པའི་ཕྱིར་དེ་དེ་ཉིད་དུ་མངོན་པར་ཞེན་པའོ། །
[296a]
[296a.1]གང་དུ་མཐོང་བ་འཛིན་པ་ཉིད་ཀྱི་དོན་བྱེད་པ་དེར་དེའི་འབྲས་བུས་ཕྲད་པའི་རང་བཞིན་ནི་གཅིག་ཏུ་ཞེན་པ་ཡིན་ཏེ་ཚད་མ་ནི་ཀུན་དུ་ཐ་སྙད་ལ་ལྟོས་པའོ་ཞེས་འོག་ནས་འཆད་པར་འགྱུར་རོ། །གལ་ཏེ་སླུ་བ་མེད་པ་ཚད་མ་མ་ཡིན་ནམ། །སྒྲ་ལས་བྱུང་བའི་ཤེས་པ་ནི་ཚད་མར་མི་འགྱུར་ཏེ།
[296a.2]འདི་ལྟར་ཕྱི་རོལ་གྱི་དོན་དེ་ལ་མི་སླུ་བ་མེད་དེ་འབྲེལ་པ་མེད་པའི་ཕྱིར་རོ། །འོན་ཏེ་བསམ་པ་རྟོགས་པར་བྱེད་པས་སྒྲ་ལས་བྱུང་བ་ཚད་མར་ཁས་ལེན་གྱི། དོན་ལ་མ་ཡིན་ན་དེ་ལྟ་མོད་ཀྱི་བསམ་པ་ནི་ཐ་དད་པའམ། ཐ་དད་པ་མ་ཡིན་པར་དོན་བྱེད་པ་དང་ཕྲད་པར་མི་ནུས་པའི་ཕྱིར་ཇི་ལྟར་ཚད་མ་ཡིན། དེ་ལ་
[296a.3]ཡང་སློབ་དཔོན་གྱིས་སྒྲ་ལས་བྱུང་བ་ནི་ཚད་མ་གཞན་པ་མ་ཡིན་ཏེ། རྗེས་སུ་དཔག་པར་བྱ་བའི་ཕྱིར་རོ་ཞེས་བྱ་བས་ཚད་མ་ཉིད་དུ་སྨྲས་སོ་ཞེ་ན་འདིར་སྨྲས་པ། སྨྲ་བ་པོ་ཡི་བྱེད་པའི་ཡུལ། །བློ་ལ་སྣང་བའི་དོན་གང་ཡིན། །དེ་ལ་སྒྲ་ནི་ཚད་ཡིན་གྱི། །དོན་གྱི་དེ་ཉིད་རྒྱུ་ཅན་མིན། །སྨྲ་བ་པོའི་བྱེད་པ་
[296a.4]བསམ་པའི་ཡུལ་གྱི་དོན་གང་ཡིན་པ་དེའི་སྒྲའི་ཤེས་པ་ལ་གསལ་བ་ནི་རབ་ཏུ་སྣང་བ་སྟེ། སྒྲ་ནི་མངོན་པར་འདོད་པའི་དོན་དེ་ཉིད་ལ་ཚད་མ་ཡིན་གྱི་དོན་གྱི་དེ་ཁོ་ན་ཉིད་ཀྱི་རྒྱུ་ཅན་ནི་མ་ཡིན་ནོ། །འདིའི་དོན་ནི་ཕྱི་རོལ་གྱི་དོན་ལ་སྒྲ་ཚད་མར་ཁས་ལེན་པ་ནི་མ་ཡིན་གྱི་འོན་ཀྱང་བསམ་པ་ལ་སྟེ་
[296a.5]སྨྲ་བ་པོའི་རིགས་པ་ལ་མི་སླུ་བ་གྲུབ་པ་ཡིན་ནོ་ཞེས་བྱ་བར་དགོངས་སོ། །གལ་ཏེ་དེ་ལྟར་མི་སླུ་བས་ཚད་མ་ཡིན་ན་སྲེ་བའི་ཤེས་པ་ཡང་དེ་ཉིད་འདི་ཡིན་ནོ་ཞེས་ངེས་པར་ཞུགས་པས་སྐྱེས་བུའི་དོན་འགྲུབ་པར་འགྱུར་བའི་ཕྱིར། ཇི་ལྟར་སྲེ་བའི་ཤེས་པ་ཚད་མ་མ་ཡིན། འདི་ལྟར་སླུ་བ་མེད་པ་དང་། སྔ་ནས་མེད་
[296a.6]པའི་དོན་འཛིན་པ་ནི་ཚད་མ་ཡིན་ན་འདིར་ཡང་ཆ་ཤས་ཅན་ལ་སོགས་པའི་ཤེས་པ་ཀུན་རྫོབ་ཀྱང་ཚད་མར་འགྱུར་ཏེ། དེ་ལ་ཡང་མི་སླུ་བ་མཐོང་བའི་ཕྱིར་རོ། །འོན་ཏེ་སྲེ་བའི་ཤེས་པ་ཞུགས་པར་གྱུར་པའི་དེ་མ་ཐག་པ་མ་ཡིན་པའི་ཕྱིར་ཚད་མ་མ་ཡིན་ཏེ། འདོད་པ་ཉིད་ཀྱིས་ཆོད་པའི་ཕྱིར་རོ་
[296a.7]ཞེ་ན་ནི། དེ་ལྟ་ན་ཡང་མཐོང་བ་ནི་ཤིན་ཏུ་ཆོད་པའི་ཕྱིར་ཚད་མར་མི་འགྱུར་རོ། །འོན་ཏེ་སྲེ་བའི་ཤེས་པ་གཏོད་པར་བྱེད་པའི་ཤེས་པ་ལས་སྐྱེས་པའི་ཕྱིར་ཚད་མ་མ་ཡིན་ན། དེ་བཞིན་དུ་མཐོང་བ་ཡང་རྟོགས་པ་མེད་པའི་དབང་པོ་ལས་སྐྱེས་པ་དེ་ཉིད་ཚད་མར་མི་འགྱུར་རོ། །དེ་བས་ན་གལ་ཏེ་
[296b]
[296b.1]རྒྱུ་གཞན་ནས་གཞན་དུ་བརྟགས་པ་དེའི་ཚེ་གཏོད་པར་བྱེད་པ་ནི་ཚད་མར་མི་འགྱུར་རོ། །དེ་བས་ན་ཐ་སྙད་དུ་ཕན་འདོགས་པའི་དེ་མ་ཐག་པར་འཇུག་པས་དེའི་ཚེ་རྟོག་པ་དང་བཅས་པ་ཚད་མར་འགྱུར་རོ་ཞེས་སེམས་ན་དེའི་ཕྱིར། གཟུང་བ་འཛིན་ཕྱིར་ཀུན་རྫོབ་ནི། །མི་འདོད་བློ་ནི་ཚད་མ་ཉིད། །བླང་
[296b.2]དང་དོར་བྱའི་དངོས་པོ་ལ། །འཇུག་ལ་དེ་གཙོ་ཉིད་ཕྱིར་རོ། །ཞེས་བྱ་བ་སྨོས་ཏེ། ཀུན་རྫོབ་ཀྱི་ཤེས་པ་ནི་ཚད་མར་འདོད་པ་མ་ཡིན་ཏེ་གཟུང་བ་འཛིན་པའི་ཕྱིར་རོ། །སྲེ་བའི་ཤེས་པ་ནི་རྟག་པ་ལ་གཅིག་ཏུ་མངོན་པར་ཞེན་པས་ཚད་མར་ཁས་ལེན་ན། སྲེ་བའི་ཤེས་པས་རྟག་པ་ཉིད་སྔ་ན་མེད་
[296b.3]པ་མཐོང་བ་མ་ཡིན་ཏེ་མཐོང་བའི་དངོས་པོ་ཉིད་ལ་དེས། མངོན་པར་ཞེན་པའི་ཕྱིར་རོ། །འདི་ལྟར་སྲེ་བ་ཤེས་པའི་ཡུལ་སྔོན་གྱི་དེ་དང་གཅིག་པ་ཉིད་ཡིན་གྱི། ད་ལྟར་བྱུང་བ་ལ་དེ་ཉིད་དུ་ལོག་པར་རྟོགས་པ་ནི་མ་ཡིན་ནོ་ཞེ་ན། སྔར་གྱི་དངོས་པོ་དེ་ཡང་སྔོན་གྱི་རྟོགས་པ་སྟེ། ད་ལྟར་བྱུང་བའི་དུས་ཀྱི་
[296b.4]དངོས་པོ་དང་བྲལ་བ་དང་། ད་ལྟར་གྱི་དངོས་པོ་ནི་ད་ལྟ་ཉིད་དུ་མཐོང་བས་སྔོན་གྱི་དངོས་པོ་དང་བྲལ་བར་རྟོགས་པར་བྱའོ། །དེས་ན་མཐོང་བའི་རྗེས་སུ་འབྲངས་པའི་ངེས་པའི་ཤེས་པས་མཐོང་བས་ཁོང་དུ་ཆུད་པ་ཉིད་ལ་ངེས་པ་ཡིན་ཏེ། གཞན་དུ་ན་སྔར་ཤེས་པ་མེད་པའི་རྟོགས་པ་ངེས་པའི་
[296b.5]ཤེས་པ་འཁྲུལ་པར་ཐལ་བར་འགྱུར་རོ། །མཐོང་བས་ནི་སྔ་མ་དང་ཕྱི་མའི་རང་བཞིན་ཐ་དད་པར་མྱོང་བའི་ཕྱིར་ལ་ངེས་པས་ནི་དེ་ལ་དེ་ཉིད་དུ་གཞག་པའི་ཕྱིར་ཇི་ལྟར་འཁྲུལ་པར་མི་འགྱུར། དེའི་ཕྱིར་དེ་ཉིད་འདི་ཡིན་ནོ་ཞེས་པ་ནི་ཤེས་པའི་ཤེས་པ་ཉིད་དེ། གང་གི་ཕྱིར་དང་པོ་མཐོང་བ་ཉིད་
[296b.6]ཀྱི་རྗེས་སུ་འབྲངས་ནས་ལྐོག་ཏུ་གྱུར་པའི་རང་བཞིན་ལ་ཞེན་པའི་ཕྱིར་ཤེས་པའི་ཤེས་པའོ། །དེ་ནི་ད་ལྟར་གྱི་མཐོང་བའི་སྟོབས་ཀྱིས་ཀྱང་ད་ལྟར་བ་ལ་ཞེན་ནས་དེ་ཉིད་འདིའོ་ཞེས་ཤེས་པའོ། །དེ་བས་ན་རིགས་པ་འདི་ཉིད་ཀྱིས་ཆ་ཤས་ཅན་གྱི་ཤེས་པ་བཀག་པ་ཡིན་ནོ། །དེ་ལ་ཡང་
[296b.7]མིག་དང་རེག་པ་ལས་སྐྱེས་པའི་ཤེས་པ་ཁས་ལེན་ན་མིག་གི་རྣམ་པར་ཤེས་པ་ལ་ནི་ཁ་དོག་གསལ་བའི་རང་བཞིན་སྣང་ལ། རེག་པའི་ཤེས་པ་ལ་ནི་ཚ་བ་ལ་སོགས་པའི་ཁྱད་པར་སྣང་གི །དེ་ལ་ཁ་དོག་དང་། རེག་པ་དང་བྲལ་བའི་ཡན་ལག་ཅན་གྱི་རྫས་སྣང་བ་ནི་མ་ཡིན་ནོ། །དེས་
[297a]
[297a.1]ན་མཐོང་བ་དང་རེག་པ་ལ་ཞེན་པའི་ཤེས་པ་ནི་གང་མཐོང་བ་དེ་ཉིད་རེག་པའོ་ཞེས་གཟུགས་དང་། རེག་པར་ལྡན་པའི་ཆ་ཤས་ཅན་སྣང་བར་མི་འགྱུར་རོ། །གལ་ཏེ་གཅིག་ཏུ་རྟོག་པའི་ཤེས་པ་ཚད་མ་མ་ཡིན་ན་དེའི་ཚེ་སྔ་མ་དང་། ཕྱི་མ་དང་བྲལ་བའི་ད་ལྟར་བྱུང་བའི་
[297a.2]འཛིན་པ་ལས་རྟོག་པ་མེད་པ་མཐོང་བ་ལས་ཇི་ལྟར་འཇུག །འོན་ཏེ་སྔ་ཕྱི་མཚམས་སུ་སྦྱར་བས་རྗེས་སུ་དྲན་པའི་སྒོ་ནས་འཇུག་པར་ཁས་ལེན་ན་ནི། འདི་ལྟར་མངོན་སུམ་དུ་སྣང་བ་ལས་སྐྱེས་བུ་འཇུག་པར་མི་འགྱུར་རོ། །གཞན་དུ་གཟུང་བའི་དངོས་པོ་ལ་འཇུག་པ་ཡོད་པས་སྲེག་པ་
[297a.3]དང་འཚོད་པ་ཉམས་སུ་མྱོང་བས་ཀྱང་རྒྱུན་མི་འཆད་པར་འཇུག་པར་འགྱུར་རོ་ཞེ་ན། དེའི་ཕྱིར་མཐོང་བའི་དངོས་པོ་ལ་འདོད་པ་ཉིད་ཀྱིས་འཇུག་པའི་འབྲས་བུ་ནི་ཤེས་པས་ཡིན་གྱི་དེ་ཉིད་དུ་འཛིན་པ་སྲེ་བའི་ཤེས་པ་ལ་ནི་ཅུང་ཟད་ཀྱང་དགོས་པ་མེད་དེ་གཞན་ལ་ཐ་སྙད་གྲུབ་པའི་ཕྱིར་རོ། །དེ་ལྟ་
[297a.4]ན་འོ་ན་འདོད་པ་ཉིད་ཀྱིས་འཇུག་པའི་ཕྱིར་ཚད་མར་འགྱུར་བ་ཡིན་ནོ་ཞེ་ན། དེ་ལྟར་ནི་འགྱུར་མོད་ཀྱི་མཐོང་བའི་དངོས་པོ་ལ་འདོད་པས་འཇུག་པའི་ཕྱིར་མཐོང་བ་ཉིད་ཚད་མ་མ་ཡིན་ན་དེ་ལྟར་ན་གྲོགས་དག་མིག་ཕྱེ་བས་གཟུགས་མཐོང་བ་ལ་འཇུག་པ་ཡང་ཚད་མར་མི་འགྱུར་རོ། །གཟུང་
[297a.5]བ་འཛིན་པ་འདོད་པའི་ཚད་མ་བཟློག་པར་མི་ནུས་ཏེ། །གང་གི་ཕྱིར་མཐོང་བས་ཁོང་དུ་ཆུད་པ་ཉིད་ནི་དྲན་པས་རྟོགས་པ་མ་ཡིན་གྱི་དྲན་པའི་ཡུལ་དུ་བྱས་པའི་འབྲས་བུ་ནི་ད་ལྟར་བ་དང་འབྲེལ་པའི་ས་ཡུལ་དུ་བྱེད་པའི་ཕྱིར་རོ། །ཡང་ན་བཟུང་བ་འཛིན་པ་ཉིད་ཀྱང་ཐ་སྙད་ཀྱི་དོན་བྱེད་པས་
[297a.6]དབང་པོ་ལ་སོགས་པ་ནི་ཚད་མར་ཁས་བླངས་པར་འགྱུར་ཏེ། གནོད་པ་མེད་པའི་ཕྱིར་རོ་སྙམ་དུ་སེམས་ན་དེ་ནི་ཡོད་པ་མ་ཡིན་ཏེ་བློ་ཉིད་ཚད་མ་ཡིན་གྱི་དབང་པོ་དང་འདོད་པ་ནི་མ་ཡིན་ནོ། །ཅི་སྟེ་ཞེ་ན། བླང་དང་དོར་བྱའི་དངོས་པོ་ལ། །འཇུག་ལ་དེ་གཙོ་ཉིད་ཡིན་ཕྱིར། །ཞེས་བྱ་བ་སྨོས་
[297a.7]ཏེ། བླང་དང་དོར་བྱའི་དངོས་པོ་ལ་འཇུག་པ་ལ་བློ་གཙོ་བོ་ཉིད་ཡིན་ཏེ། དབང་པོ་ཡོད་པ་ཙམ་གྱིས་སུ་ཡང་འཇུག་པ་མེད་པའི་ཕྱིར་རོ། །འདོད་པ་ལས་ཉེ་བར་འཇུག་པ་ཡོད་དུ་ཆུག་ན་ཡང་། དེ་ནི་འཇུག་པའི་ཡུལ་ཉེ་བར་སྟོན་པ་མེད་པའི་ཕྱིར་གཙོ་བོ་མ་ཡིན་ནོ། །ཅི་སྟེ་དེ་འདོད་པ་ལས་
[297b]
[297b.1]འཇུག་པར་འགྱུར་ན་དེ་མེད་པས་འཇུག་པར་མི་འགྱུར་བའི་ཕྱིར། ཅི་སྟེ་གཙོ་བོ་མ་ཡིན་ཞེ་ན། དེ་ལྟ་ན་འོ་ན་ནི་སྟོབས་དང་ལྡན་པ་ལ་སོགས་པ་མ་གཏོགས་པར་འཇུག་པ་མི་དམིགས་པས་ནུས་པ་ལ་སོགས་པ་ཚད་མར་འགྱུར་རོ། །གཞན་ཡང་ཇི་ལྟར་འདོད་པ་མ་གཏོགས་པར་
[297b.2]མཐོང་བའི་དངོས་པོ་ལ་འཇུག་པར་མི་ནུས་ལ་དེ་བཞིན་དུ་འདོད་པ་ཡོད་པ་ལས་ཀྱང་མཐོང་བ་མ་གཏོགས་པར་སོ་སོར་ངེས་པར་འཇུག་པར་མི་འགྱུར་བའི་ཕྱིར་ནུས་པ་མཚུངས་པར་མཐོང་བ་ཡིན་ནོ། །དེ་ལྟ་བས་ན་འཇུག་པར་འགྱུར་བའི་ཤེས་པ་ནི་ཅི་བྱེད་པ་ལས་གཙོ་བོ་ཡིན་ཞེ་ན། ཡུལ་ཉེ་
[297b.3]བར་མཐོང་བའི་ཕྱིར་བློ་ཉིད་གཙོ་བོ་ཡིན་ཏེ་འདོད་པ་ནི་ཐ་སྙད་སྐྱེས་པ་ཙམ་དུ་ཟད་དོ། །དེ་ཡང་ཚད་མ་ཡིན་ན་ཧ་ཅང་ཐལ་ཆེས་པར་བཤད་དོ། །ཡང་བཟླས་ཏེ་གཟུང་བ་འཛིན་པ་ཉིད་ནི་ཚད་མ་ཡིན་ནོ་ཞེ་ན། དེ་ནི་མི་རིགས་ཏེ། གང་གི་ཕྱིར་གཟུང་བ་འཛིན་པ་ནི་ལྷག་པ་མི་བྱེད་པའི་ཕྱིར་དོན་མེད་
[297b.4]པ་ཉིད་དེ་འབྲས་བུ་མེད་པའི་ཚད་མ་བསམ་པར་འོས་པ་མ་ཡིན་ལ་འཇུག་པའི་ཡུལ་ཉེ་བར་སྟོན་པས་ན་བློ་ཉིད་ཐ་སྙད་ལ་གཙོ་བོར་འགྱུར་གྱི་དབང་པོ་དང་འདོད་པའི་ཤེས་པ་ནི་ཚད་མ་མ་ཡིན་ནོ་ཞེས་བྱ་བར་གནས་སོ། །གལ་ཏེ་ཡང་ཚད་མའི་འབྲས་བུ་འཇུག་པའི་མཚན་ཉིད་ཅན་སྐལ་བའི་དབང་པོ་
[297b.5]ལ་མ་ཡིན་ཏེ། འབྲས་བུ་དེ་དང་འབྲེལ་བས། མིག་ལ་སོགས་པ་ཚད་མ་མ་ཡིན་གྱི། འོན་ཀྱང་ཚད་མའི་འབྲས་བུ་མ་ཆོད་པ་རྟོགས་པའི་མཚན་ཉིད་དེ་སྐྱེད་པར་བྱེད་པས་ན་ཚད་མ་ཡིན་ནོ། །རྟོགས་པའི་འབྲས་བུ་འབྱུང་ཞིང་བསྐྱེད་པ་ནི་ཚད་མའི་བྱ་བ་ཡིན་པས་འཇུག་པ་ཉིད་ལ་ཕན་འདོགས་
[297b.6]པར་བྱེད་པས་དབང་པོ་ནི་དེ་བཞིན་དུ་ཚད་མའོ་སྙམ་དུ་སེམས་ན། འདིར་སྨྲས་པ། ཡུལ་ཅན་རྣམ་པ་ཐ་དད་ཕྱིར། །བློ་རྟོགས་ཐ་དད་པ་ཡིན་པས། །ཡུལ་ཉིད་ཀྱི་རྣམ་པར་ནི་ཡུལ་གྱི་རྣམ་པ་སྟེ། དེའི་རྣམ་པ་ཉིད་དམ། ཡུལ་རྟོགས་པའི་རང་བཞིན་དེ་ཉིད་ཐ་དད་པའི་བློས་ཏེ་ཤེས་པའི་རྟོགས་
[297b.7]པ་ཉིད་ཐ་དད་པ་དེ་བས་ན་བློ་ནི་ཚད་མའོ་ཞེས་བྱ་བར་སྙེགས་སོ། །འདི་ལྟར་མིག་ལ་སོགས་པ་བེམས་པོ་ཡིན་པས་ཚད་མ་མ་ཡིན་ནོ། །འོན་ཏེ་གསལ་བ་མ་ཡིན་ཡང་དབང་པོ་ལ་སོགས་པ་ནི་ཤེས་པ་སྐྱེད་པར་བྱེད་པས་ཚད་མ་ཡིན་ན་དེའི་ཚེ་བདག་དང་། ཡུལ་དག་ཀྱང་ཤེས་པ་སྐྱེད་པའི་ཕྱིར་ཚད་མར་འགྱུར་
[298a]
[298a.1]རོ། །བྱེད་པ་པོ་དང་ལས་ཀྱི་མཚན་ཉིད་དང་མི་མཐུན་པའི་ཤེས་པ་ལ་བྱེད་པ་ཡོད་ན་དེ་ཚད་མ་མ་ཡིན་ནམ། སྐྱེས་བུ་ནི་བྱེད་པ་པོ་ཡིན་ལ། ལས་ནི་ཡུལ་ཉིད་དེ་དག་ནི་ཚད་མ་ཡིན་པའི་ཕྱིར་རོ་ཞེ་ན། གལ་ཏེ་དེ་ལྟ་ན་ལས་དེ་ཉིད་ཡུལ་དུ་ཇི་ལྟར་ཤེས། རྣམ་པར་ཤེས་པ་ལ་སྣང་
[298a.2]བས་སོ་ཞེ་ན། འོ་ན་ནི་མཐོང་བ་ཉིད་ཀྱང་ཡུལ་མཐོང་བའི་ཕྱིར་དེ་ཉིད་ཚད་མར་རིགས་པ་ཡིན་གྱི་མིག་ལ་སོགས་པ་ནི་མཐོང་བ་ལས་ཆོད་པའི་ཕྱིར་ཚད་མ་མ་ཡིན་ནོ། །ཅི་སྟེ་ཡང་ཡུལ་གྱི་རྣམ་པ་ཐ་དད་པས་རྟོགས་པ་ཐ་དད་དེ། གང་ཞིག་ཐ་དད་པས་འབྲས་བུ་ཐ་དད་པར་འགྱུར་བ་དེ་ནི་དེའི་སྒྲུབ་བྱེད་དམ་
[298a.3]པའོ། །སྒྲུབ་བྱེད་དམ་པ་ཡང་ཚད་མ་ཡིན་པའི་ཕྱིར། དེའི་རྣམ་པ་ཡོངས་སུ་གཅོད་པར་བྱེད་པས། བྱེད་པ་པོ་ཉིད་དེ་དབང་པོ་ལ་སོགས་པ་ནི་མ་ཡིན་ནོ། །ཤེས་པ་ནི་དེ་དོན་ཐམས་ཅད་ལ་ཐུན་མོང་མ་ཡིན་པའི་ཕྱིར་རྟོགས་པ་ཐ་དད་པར་ནུས་པས་ན་རྣམ་པ་ནི་ཤེས་པའི་བདག་ཉིད་དུ་གྱུར་པའི་ཕྱིར་བློ་
[298a.4]ཉིད་ཚད་མ་ཡིན་ནོ། །དེ་ལྟར་ན་འགྱུར་མོད་ཀྱི་དབང་པོ་ཡང་དག་པ་དང་། མ་དག་པ་ལས་རྟོགས་པ་ཐ་དད་པའི་ཕྱིར་ཇི་ལྟར་སྒྲུབ་བྱེད་མིན་ཞེ་ན། འདིར་སྨྲས་པ། དེ་ཡོད་ན་འདི་ཡོད་པའི་ཕྱིར། །དེའི་རྣམ་པ་ཡོད་པ་ཉིད་ལ་ཡོངས་སུ་གཅོད་པ་འདི་ཡོད་པར་རྣམ་པར་འཇོག་པའི་ཕྱིར་རོ། །དེས་ནི་འདི་སྐད་
[298a.5]དུ་སྟོན་པར་འགྱུར་ཏེ་རྣམ་པ་ཐ་དད་པ་ཉིད་ཀྱིས་བློ་ཐ་དད་པར་འགྱུར་ཏེ། མིག་ལ་སོགས་པ་ནི་འདི་ལྟར་རང་གི་ངོ་བོ་དག་པ་དང་། མ་དག་པ་ཐ་དད་པར་གྱུར་པས་རྟོགས་པ་ཐ་དད་པ་ཉིད་དུ་གྱུར་ཀྱང་། དེ་ལྟར་ཐམས་ཅད་ལ་ཡོད་པ་ཡིན་པས་ཚད་མར་མི་འགྱུར་རོ། །འདི་ལྟར་མིག་ལ་
[298a.6]སོགས་པས་སྦྱངས་པའི་མིག་ལ་སྔོན་པོ་དང་། སེར་པོ་ལ་སོགས་པའི་ཤེས་པ་ཐ་དད་པ་དམིགས་པར་འགྱུར་བ་དེ་ནི་དབང་པོ་ཐ་དད་པས་མ་ཡིན་པའི་ཕྱིར་ཇི་ལྟར་སྒྲུབ་བྱེད་ཉིད་དུ་འགྱུར། ཡང་ན་གལ་ཏེ་དབང་པོ་ནི་ངེས་པར་རྟོགས་པའི་སྒྲུབ་བྱེད་མ་ཡིན་པས་རྒྱུ་མཚན་མ་ཡིན་ཏེ་རྣམ་པས་ཆོད་པའི་ཕྱིར་
[298a.7]རོ། །དེའི་ཚེ་ཡུལ་ལྟར་སྣང་བ་ཡང་ཤེས་པ་ཐ་དད་པར་ངེས་པར་བྱེད་པ་མ་ཡིན་པས་ཚད་མ་ཡིན་ནོ་སྙམ་དུ་སེམས་ན། དེའི་ཕྱིར། དེ་ཡོད་ན་ནི་ཡོད་ཕྱིར་རོ། །ཞེས་བྱ་བ་སྨོས་ཏེ། འདིས་ནི་འདི་སྙམ་དུ་སྔོན་པོ་ལ་སོགས་པའི་གཟུགས་ཀྱི་རྣམ་པར་སྐྱེས་པ་ན་ངེས་པར་ཁོང་དུ་ཆུད་པར་འགྱུར་ཏེ་རྣམ་
[298b]
[298b.1]པ་ནི་རྟོགས་པའི་བདག་ཉིད་ཀྱི་ཕྱིར་རོ་སྙམ་དུ་དགོངས་སོ། །དེ་ལྟ་ན་འོ་ན་ནི་ཐ་དད་པ་མེད་པའི་ཕྱིར་ཚད་མའི་འབྲས་བུ་ཡོད་པར་ཇི་ལྟར་འགྱུར་ཞེ་ན། ཚད་མ་ལས་ཐ་དད་པའི་འབྲས་བུ་ནི་མེད་དོ། །འོན་ཀྱང་ཤེས་པ་ཉིད་སྔོན་པོ་ལ་སོགས་པའི་རྣམ་པས་ཚད་མར་འདོད་ལ་རྟོགས་པའི་རང་བཞིན་
[298b.2]གྱིས་ནི་འབྲས་བུ་ཡིན་པར་ཤེས་པར་བྱའོ། །ཅི་སྟེ་ཕྱོགས་མཐོང་བ་ལས་དེ་དང་ཕྲད་པར་ཇི་ལྟར་ཤེས་པ་ཡིན་ཏེ་མངོན་སུམ་གྱི་ཤེས་པས་མི་སླུ་བ་མཐོང་བ་མ་ཡིན་ཏེ། དེ་དང་ཉེ་བའི་སྔོན་པོ་ལ་སོགས་པའི་རྣམ་པ་ཙམ་སྣང་བའི་ཕྱིར་མི་སླུ་བ་དང་ཅིག་ཤོས་ཀྱི་ཤེས་པ་ཐ་དད་པར་བྱེད་པ་ནི་མ་
[298b.3]ཡིན་ནོ། །གཞན་དུ་ན་ཤེས་པ་སྐྱེས་པའི་དུས་ཉིད་དུ་ཕྲད་པ་དང་ཅིག་ཤོས་ངེས་པའི་ཕྱིར་གང་ཡང་འཁྲུལ་པ་མེད་པ་དང་བཟློག་པ་མཐོང་བའི་ཕྱིར་རོ། །དེ་ལྟར་ནི་འགྱུར་མོད་ཀྱི་གལ་ཏེ་དོན་མེད་ན་མི་འབྱུང་བའི་རིགས་པ་ཉིད་ཚད་མར་འགྱུར་ཏེ། ཁོང་དུ་ཆུད་པའི་རང་བཞིན་ལ་རྟོགས་པར་
[298b.4]གྱུར་པ་དེ་དང་ཐ་དད་པ་མ་ཡིན་པའི་ཕྱིར། འཁྲུལ་པའི་རྒྱུ་ཡོད་པ་ཉིད་ཀྱིས་ཀྱང་ལ་ལར་ངེས་པ་མ་ཡིན་པ་ཉིད་ཀྱིས་དེ་ལ་ནི་གཞན་ལས་ཚད་མ་ཡིན་གྱི་གང་དུ་ཕྲད་པ་ལ་ཤིན་ཏུ་གོམས་པས་འཁྲུལ་པ་སྤངས་ནས་ཤེས་པ་འཇུག་པ་ཅན་དེ་རུ་ཇི་ལྟ་བའི་ཉམས་སུ་མྱོང་བ་སྐྱེད་པའི་ཕྱིར་རང་ཉིད་ཚད་
[298b.5]མ་ཡིན་ནོ། །དེ་བས་ན་དོན་མེད་ན་མི་འབྱུང་བ་ནི་དོན་དང་ཕྲད་པ་ལ་རག་ལས་པས་རྣམ་པར་གཞག་པའམ། ད་ལྟར་གྱི་སྣང་བ་ལ་སོགས་པའི་ཡུལ་ལ་ལྟོས་པ་ཡིན་ཏེ། དེ་ལ་སྔོན་དུ་ཡོད་པས་ཡོངས་སུ་འཛིན་པར་བྱེད་དོ་ཞེས་ཟེར་ན་དེ་ནི་རིགས་པ་མ་ཡིན་ཏེ། དོན་དང་ཕྲད་པར་སྣང་བ་མེད་ན་
[298b.6]དེ་མེད་ན་མི་འབྱུང་བ་མི་འཛིན་པའི་ཕྱིར་རོ། །ཅི་སྟེ་དེའི་ཚེ་ཕྲད་པར་བྱ་བ་སྣང་བ་མ་ཡིན་ཡང་དེ་མེད་ན་མི་འབྱུང་བ་ཉིད་ནི་ཤེས་པའི་རང་བཞིན་ཡིན་པས་ཇི་ལྟར་མི་ཤེས་ཤེ་ན། དེ་ལ་སྨྲས་པ། སླུ་བ་མེད་པ་མ་བཟུང་བར། །མེད་ན་མི་འབྱུང་བ་འཛིན་ནོ། །ཞེས་གལ་ཏེ་རྟོག་ན། ཕྲད་པ་
[298b.7]པ་ལ་བྱེ་བྲག་མེད་པ་དེའི་ཚེ་འདོད་པའི་དོན་བྱེད་པ་ལ་སླུ་བ་མེད་པ་བཞིན་དུ་མི་འདོད་པའི་འབྲས་བུ་ནུས་པ་འཛིན་པའི་ཤེས་པར་འགྱུར་རོ། །དེའི་ཕྱིར་ཤེས་པ་ལ་རང་གི་ངོ་བོ་ཉིད་སྣང་བར་འགྱུར་གྱི་ཕྲད་པའི་དོན་མེད་ན་མི་འབྱུང་བ་ཉིད་ནི་མ་ཡིན་ནོ། །འོན་ཏེ་ཕྱོགས་གཉིས་པ་ཁས་ལེན་པར་
[299a]
[299a.1]བྱེད་ན་དེའི་ཚེ་མདུན་ན་གནས་པའི་དོན་མེད་ན་མི་འབྱུང་བ་ཉིད་ཀྱི་ཟླ་བ་ལ་རྣམ་པ་གཉིས་སུ་མཐོང་བ་དེ་ཡང་ཚད་མར་འགྱུར་རོ། །འོན་ཏེ་དོན་བྱེད་པར་མཐོང་བ་ལས་སྔར་གྱི་ཤེས་པ་ཚད་མར་ངེས་པར་འགྱུར་རོ་ཞེ་ན། དེ་ལྟ་མོད་ཀྱི་གཅིག་ལ་གཅིག་བརྟེན་པའི་ཉེས་པར་
[299a.2]འགྱུར་ཏེ། ཚད་མ་ངེས་པར་འཇུག་པ་དེ་ལས་དོན་བྱ་བ་བྱེད་པར་རྟོགས་པ་དེ་བས་ན་ཤེས་པ་སྔ་མ་ཚད་མ་ཡིན་པའི་ཕྱིར་འཁོར་ལོ་འཁོར་བ་བཞིན་དུ་འཇུག་པར་འགྱུར་རོ། །གཞན་ཡང་དོན་བྱེད་པར་མཐོང་བ་ནི་བཙོ་བ་དང་། སྲེག་པ་ལ་སོགས་པར་སྣང་བ་དང་། སྒྲུབ་བྱེད་སྣང་བའི་ཡུལ་སྔ་
[299a.3]མའི་གཟུགས་ལ་སོགས་པ་ཡིན་པའི་ཕྱིར་ཡུལ་ཐ་དད་པས་ཚད་མ་མ་ཡིན་ནོ། །འོན་ཏེ་དོན་བྱེད་པའི་ཤེས་པ་ཉིད་ཡུལ་གཅིག་པ་དེ་ལྟ་ན་ཡང་དོན་མཚུངས་པའི་ཕྱིར་ཇི་ལྟར་ཤེས་པ་སྔ་མ་ལ་ཐེ་ཚོམ་ཟ་བར་འགྱུར་རོ། །གཞན་ཡང་མི་སླུ་བའི་ཤེས་པ་སྐྱེས་པའི་ཚིག་ཤེས་པ་སྔ་མ་མེད་པ་དེ་བས་ན་ཤེས་པ་
[299a.4]སྔ་མའི་ཡུལ་མེད་པ་ཅན་ལ་བྱེད་པས་དུས་ཕྱིས་འབྱུང་བའི་ཤེས་པ་ཇི་ལྟར་ཚད་མར་ཐོབ་པར་འགྱུར་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །འོན་ཏེ། རྗེས་སུ་དཔག་པ་དོན་བྱེད་པའི་རྟགས་ལས་སྐྱེས་པའི་ཡུལ་མེད་ན་ཡང་ཤེས་པ་སྔ་མས་ཚད་མར་འགྱུར་བ་སྟེ། དུ་བ་ཡོད་པས་མེ་ཡོད་བྱ་བ་
[299a.5]བཞིན་ནོ་ཞེ་ན། རྗེས་སུ་དཔག་པ་དེ་ཡང་ཇི་ལྟར་ཚད་མ་ཡིན་པར་ངེས་པར་བྱེད། དེ་ལྟར་ནི་འགྱུར་མོད་ཀྱི་རྗེས་སུ་དཔག་པ་ནི་ཚད་མར་རང་ཉིད་ཀྱིས་ངེས་པ་སྟེ་འབྲེལ་པ་ངེས་པའི་རྟགས་ཀྱི་སྟོབས་ལས་སྐྱེས་པའི་ཕྱིར་རོ། །མངོན་སུམ་ལ་ནི་འཁྲུལ་པའི་ཚོགས་ཀྱིས་གཡོགས་པར་མཐོང་
[299a.6]བའི་ཕྱིར་ཚད་མར་གཞན་གྱིས་རྟོགས་པར་བྱེད་པ་ཡིན་ནོ་ཞེ་ན། དེ་ནི་མི་བདེན་ཏེ་འདི་ལྟར་རང་གི་རྟགས་ངེས་པ་མངོན་སུམ་གྱིས་ཡིན་ནམ། རྗེས་སུ་དཔག་པ་ལས་ཡིན་གལ་ཏེ་མངོན་སུམ་གྱིས་ཡིན་ན་དེའི་ཚེ་མངོན་སུམ་གྱི་རྟགས་ངེས་པ་དེ་བས་ན་དེ་ལ་རྗེས་སུ་དཔག་པ་དང་། རྗེས་སུ་དཔག་
[299a.7]པ་ལས་མངོན་སུམ་ཚད་མེད་ངེས་པས་གསལ་བར་གཅིག་ལ་གཅིག་བརྟེན་པར་འགྱུར་རོ། །འོན་ཏེ་རྗེས་སུ་དཔག་པ་ལས་རྟགས་ངེས་པ་ཡིན་ན། དེའི་ཚེ་རྗེས་སུ་དཔག་པ་རྟགས་གཞན་ལ་བརྟེན་པས་ཐུག་པ་མེད་པར་འགྱུར་རོ། །གཞན་ཡང་གལ་ཏེ་འགའ་ཞིག་ཏུ་མེའི་གཟུགས་
[299b]
[299b.1]མཐོང་བ་ལས་སྲེག་པ་ལ་སོགས་པའི་དོན་ངེས་པར་བྱེད་དོ་ཞེ་ན། དེ་ལྟ་མོད་ཀྱི་གཞན་དག་ཏུ་ཡང་དེ་ཇི་ལྟར་འགྱུར། དེའི་དོན་མཐོང་བར་བྱེད་པ་ཉིད་ཚད་མ་སྔ་མས་ཡིན་ནོ་ཞེ་ན། གང་དུ་སྔར་དོན་བྱེད་པར་སྣང་བ་ནི་ཚད་མས་གྲུབ་པ་སྟེ། གང་ཚད་མས་མེད་ན་མི་འབྱུང་བ་དེས་དོན་བྱེད་པར་ངེས་སོ། །
[299b.2]གང་དུ་དོན་བྱེད་པ་དེ་ཚད་མ་ཡིན་ནོ་ཞེ་ན། འདིར་དོན་བྱེད་པ་ཚད་མར་མ་གྲུབ་པ་ལས་མཐོང་བ་མ་ཡིན་ནམ། ཚད་མར་མ་གྲུབ་པ་ལ་ངེས་པར་དོན་དང་ཕྲད་པ་མེད་པའི་ཕྱིར་ཇི་ལྟར་དེ་ལ་དོན་བྱེད་པ་ཚད་མ་ཡིན། དེ་ལྟ་མོད་ཀྱི། འོན་ཀྱང་ངེས་པར་དོན་བྱེད་པ་དང་ཕྲད་པ་མེད་པའི་ཕྱིར་ཇི་ལྟར་ཚད་མ་དེ་
[299b.3]ལ་མི་སླུ་བ་མ་གྲུབ་པ་ཡིན། དེའི་ཕྱིར་རང་བཞིན་ཙམ་བཟུང་བ་ལས་ཚད་མར་ངེས་པ་ནི་མ་ཡིན་ནོ། །ཤིན་ཏུ་གོམས་པར་བྱ་བ་ལས་གཟུགས་ཀྱི་ཁྱད་པར་རིག་པ་ཉིད་ལས་སླུ་བ་མེད་པར་ངེས་སོ་ཞེས་བཤད་པ་མ་ཡིན་ནམ་ཞེ་ན། དེ་ནི་རིག་པ་མ་ཡིན་ཏེ། གོམས་པ་དེ་མངོན་སུམ་གྱིས་རྟོགས་པ་
[299b.4]ལ་ཡིན་ནམ། རྗེས་སུ་དཔག་པས་རྟོགས་པ་ལ་འཇུག་པ་ཡིན། དེ་ལ་རྗེས་སུ་དཔག་པས་ཤེས་པ་ལ་ནི་གལ་ཏེ་གོམས་པར་གྱུར་པ་ལས་དོན་བྱེད་པ་མ་འཁྲུལ་པར་གཟུགས་ཀྱི་ཁྱད་པར་རིག་པའི་ཕྱིར་དེའི་ཚེ་རྗེས་སུ་དཔག་པ་ཡང་མངོན་སུམ་མེད་ན་མི་འཇུག་པའི་ཕྱིར་གཅིག་ལ་གཅིག་
[299b.5]བརྟེན་པར་འགྱུར་རོ། །འོན་ཏེ་མངོན་སུམ་གྱི་ཡུལ་དུ་བྱས་པའི་མེའི་གཟུགས་མཐོང་ན། བཙོ་བ་དང་སྲེག་པ་ལ་སོགས་པར་སྣང་བ་ཡང་གོམས་པར་བྱེད་ན་གང་གི་ཚེ་གཟུགས་མཐོང་བའི་དེ་མ་ཐག་ཏུ་དོན་བྱེད་པ་ཉམས་སུ་མྱོང་བས་དེ་ཉིད་ངེས་པ་ཡོད་པ་ཡིན་པས་ཡུལ་གཞན་དུ་ཡང་དེ་བཞིན་
[299b.6]དུ་གཟུགས་དོན་བྱེད་པ་མེད་ན་མི་འབྱུང་བ་ཇི་ལྟར་མི་ངེས། ཐམས་ཅད་མཁྱེན་པ་མ་ཡིན་པའི་མངོན་སུམ་དུ་ཡུལ་དང་དུས་ཐམས་ཅད་དུ་འགྲོ་བ་དང་ལྷན་ཅིག་སྤྱོད་པ་དང་། ཉེ་བར་སྟོན་པ་མ་ཡིན་པ་དེ་བས་ན་མངོན་སུམ་ནི་སླུ་བ་མེད་པ་ངེས་པར་བྱེད་པ་མ་ཡིན་ཞིང་། རྗེས་སུ་དཔག་པས་ཀྱང་
[299b.7]ངེས་པ་མ་ཡིན་ནོ། །དེས་ན་རང་ཉིད་ཚད་མ་ཡིན་པར་རིགས་སོ་སྙམ་དུ་སེམས་ན། འདིར་སྨྲས་པ། རང་ལས་རང་གི་ངོ་བོས་རྟོགས། །ཐ་སྙད་ལས་ནི་ཚད་མ་ཉིད། །ཅེས་བྱ་བ་ལ་རང་མངོན་སུམ་གྱི་ངོ་བོ་ཉིད་ཐུན་མོང་མ་ཡིན་པ་དང་། རང་ཉིད་ཀྱིས་ཉམས་སུ་མྱོང་བ་ཡིན་གྱི་ཚད་
[300a]
[300a.1]མ་མ་ཡིན་ནོ། །འདི་ལ་ཚད་མ་སླུ་བ་མེད་པ་ཉིད་དུ་བརྗོད་པ་ཡང་དེ་ལ་སྣང་བ་ནི་མ་ཡིན་པར་བཤད་དོ། །འོན་ཏེ་རྟོགས་པར་བྱེད་པ་ཉིད་ཚད་མ་ཡིན་ལ། རང་ཉིད་ལས་རྟོགས་པ་སྟེ་དེ་ནི་ཚད་མ་མ་ཡིན་ནོ། །གང་གི་ཕྱིར་སྤྱོད་པ་པའི་ལྟ་བས་ཤེས་པ་ལྐོག་ཏུ་གྱུར་པ་ཡིན་ན། ཇི་
[300a.2]ལྟར་ཚད་མ་དེ་རང་གིས་གྲུབ། ཅི་སྟེ་ཡང་ཤེས་པ་སྐྱེས་པས་ཚད་མ་ཉམས་སུ་མྱོང་བ་ཡིན་ཏེ་དོན་ཉམས་སུ་མྱོང་བ་ལས་གཞན་དུ་མི་འཐད་པའི་ཕྱིར་རོ། །ཤེས་པ་ཁོང་དུ་ཆུད་ནས་ཕྱིས་མི་སླུ་བར་ངེས་པ་ནི་མ་ཡིན་པའི་ཕྱིར་རང་ཉིད་དུ་བརྗོད་པའོ། །དེ་ཉིད་ཀྱི་ཕྱིར་གལ་ཏེ་སླུ་བ་མེད་པའི་མཚན་
[300a.3]ཉིད་ནི་ཚད་མར་ཁས་ལེན་པ་དེ་ལྟ་ན་རང་ཁོང་དུ་མ་ཆུད་ཀྱང་དོན་ཡོངས་སུ་གཅོད་པར་བྱེད་པར་འགྱུར་ལ། ཕྱིས་ནི་དོན་གྱིས་གོ་བར་རྟོགས་པའི་ཕྱིར་ཉེས་པ་ཅི་ཡང་མེད་དོ་ཞེ་ན། དེ་ནི་མི་རིགས་ཏེ། རང་ཉིད་ཚད་མར་ཁས་ལེན་ན་འཁྲུལ་པའི་ཤེས་པ་ཡང་རང་གི་དོན་འཛིན་པར་བྱེད་པ་ནི་གཞན་ལ་
[300a.4]མི་ལྟོས་པས་རང་ཉིད་ཀྱིས་ཚད་མ་མ་ཡིན་པ་ཐོབ་པར་འགྱུར་རོ། །དེ་ཉིད་སྨྲས་པ། ཚད་མ་མིན་པ་དོན་ལ་ནི། །འཛིན་པར་བྱེད་ན་རང་ཉིད་ལས། །ཞེས་སོ། །འོན་ཏེ་དེ་ལ་གནོད་པ་ཡོད་པས་ལོག་པ་ཉིད་དུ་བཟུང་བས་ནི་བཟློག་པའི་ཕྱིར་གཞན་ལས་ཚད་མ་མ་ཡིན་པར་གཞག་གོ་ཞེ་ན། དེ་
[300a.5]ནི་མ་ཡིན་ཏེ། གནོད་པར་བྱ་བ་ཉིད་དང་བྲལ་བའི་ཕྱིར་རོ། །དེ་ཡང་འདི་ལྟར་ཤེས་པ་ལ་གནོད་དམ། ཡུལ་ལ་གནོད་པར་འགྱུར་གྲང་ན། དེ་ལ་ཤེས་པ་ལ་གནོད་པ་མ་ཡིན་ཏེ། དེའི་ཤེས་པ་སྐྱེས་པའི་ཕྱིར་རོ། །ཡུལ་ལ་ནི་མ་ཡིན་ཏེ། ཡུལ་ནི་ཤེས་པ་ལ་བརྟེན་ནས་རང་གི་ངོ་བོ་སྣང་
[300a.6]བའི་ཕྱིར་དེ་ལ་ཅིས་གནོད་པར་འགྱུར། འོན་ཏེ་འཁྲུལ་པའི་ཤེས་པ་ལ་སྣང་བའི་ཡུལ་དེ་ལ་དོན་བྱེད་པ་མི་འཐོབ་པའི་ཕྱིར་བརྫུན་པ་ཞེས་བརྗོད་དོ་ཞེ་ན། དེ་ནི་རིགས་པ་མ་ཡིན་ཏེ། གང་གི་ཕྱིར་དེ་ལ་དོན་བྱེད་པ་མི་འཐོབ་ཏུ་ཆུག་ན་ཡང་དེ་ལྟ་མོད་ཀྱི་སྔར་བཟུང་བ་མཐོང་བ་དེ་ལ་ཅི་
[300a.7]ཞིག་ཏུ་འགྱུར་ན་གང་གིས་བརྫུན་པ་ཞེས། དངོས་པོ་གཞན་དུ་གྱུར་པ་སྣང་བ་དང་བྲལ་བས་ནི་སྔར་གྱི་སྣང་བ་མི་བདེན་པར་རིགས་པ་ནི་མ་ཡིན་ཏེ་ཐལ་ཆེས་པའི་ཕྱིར་རོ། །འོན་ཏེ་དོན་གྱི་བྱ་བ་བྱེད་པ་ཉིད་དང་བྲལ་བ་ཇི་ལྟར་བདེན་ཞེ་ན། རང་གི་ངོ་བོ་ཉིད་སྣང་བ་ཉམས་སུ་མྱོང་བའི་ཕྱིར་
[300b]
[300b.1]རོ། །དེ་ལ་གང་གི་ཕྱིར་ཐ་དད་པའི་དོན་བྱེད་པ་ཉིད་མེད་ཀྱང་རང་གི་ངོ་བོ་ཉིད་སྣང་བ་ནི་ཡོད་དེ་གང་དུ་ཡང་གནོད་པ་ཡོད་པ་མ་ཡིན་པས་སོ། །གཞན་ཡང་གནོད་པ་ཅན་གྱིས་བཟུང་བ་ལ་ནི་ལོག་པའི་ཤེས་པ་ཉིད་ལྡོག་པ་མེད་པའི་ཕྱིར་གཞན་ལས་ཚད་མ་མ་ཡིན་པ་དེའི་ཚེ་ཚད་མ་ཡང་གཞན་ལས་མ་ངེས་
[300b.2]ན་འཇིག་རྟེན་པ་མི་འཇུག་པའི་ཕྱིར། དེ་ཡང་གཞན་ལས་ཡིན་ནོ། །དེ་བས་ན་གལ་ཏེ་སླུ་བ་མེད་པ་ཉིད་ཚད་མ་ཡིན་པའམ། རྟོགས་པའི་ཁྱད་པར་ཚད་མར་འདོད་པ་དེ་ལྟ་མོད་ཀྱི་གཞན་ལ་མ་ལྟོས་པ་ཉིད་ཚད་མ་ཡིན་ནོ་ཞེས་ཟེར་བ་དེ་བསལ་བ་ཡིན་ཏེ། ཡོངས་སུ་ཤེས་པ་མ་གཏོགས་
[300b.3]པར་འཇུག་པའི་ཡན་ལག་མེད་པ་ནི་འབྲས་བུ་ལ་ཕན་མི་འདོགས་པའི་ཕྱིར་རོ། །འོན་ཏེ་དངོས་པོ་ལ་ལྟོས་ནས་རང་ཉིད་ཚད་མ་ཡིན་ནོ་ཞེས་བརྗོད་ན་དེ་ཇི་ལྟར་ཤེས་པ་ཡིན། གང་གི་ཕྱིར་དོན་ཡོངས་སུ་གཅོད་པར་ནུས་པའི་མཚན་ཉིད་ཚད་མ་ཡིན་ན། ནུས་པ་ནི་ཤེས་པ་ལས་སྔར་ཡོད་
[300b.4]པ་མ་ཡིན་ཏེ་རྟེན་མེད་པའི་ཕྱིར་རོ། །མཐོང་བ་དང་ལྷན་ཅིག་སྐྱེ་བ་ཡང་མ་ཡིན་ཏེ། དེའི་ཚེ་ནི་གང་དུ་དེ་བྱེད་པར་རྣམ་པར་གཞག་སྐྱེ་བ་ལས་ཕྱིས་དེའི་ནུས་པ་འབྱུང་བ་ཡང་མ་ཡིན་ཏེ། དེའི་ཚེ་ཤེས་པ་ཉིད་སྐད་ཅིག་མ་ཡིན་པས་ཡོད་པ་ནི་མ་ཡིན་ནོ་ཞེ་ན། དེ་ལྟ་ན་འོ་ན་ནི་ཕྱིན་ཅི་ལོག་གི་དོན་
[300b.5]ཡོངས་སུ་གཅོད་པར་ནུས་པ་ཡང་རང་ཉིད་ཡིན་པས་ཚད་མ་མ་ཡིན་པ་ཡང་རང་ཉིད་ཀྱིས་ཐོབ་པར་འགྱུར་རོ། འོན་ཏེ་རབ་རིབ་ཀྱི་ཉེས་པ་རྗེས་སུ་འགྲོ་བ་དང་། ལྡོག་པ་འཇུག་པས་གཞན་ལས་ཚད་མ་མ་ཡིན་པར་ཁས་ལེན་ན་དེ་ལྟ་ན་ནི་གྲོགས་དག་ཡོན་ཏན་ཅན་གྱི་རྒྱུ་ཡོད་པ་
[300b.6]དང་། མེད་པའི་རྗེས་སུ་འཇུག་པས་གཞན་ལ་ཚད་མར་ཁས་བླང་བར་བྱའོ། །འོན་ཏེ་ཡོན་ཏན་ཅན་གྱི་རྒྱུ་མ་གཏོགས་པར་ཡང་རྒྱུ་ཙམ་ལས་རྗེས་སུ་དཔག་པའི་ཚད་མ་སྐྱེ་བ་མཐོང་ན་དེ་ལ་ཡོན་ཏན་ཅན་གྱི་བྱེད་པ་མེད་པར་འགྱུར་རོ། །དེ་ལྟ་ན་ཡང་ཉེས་པའི་རྒྱུ་མ་གཏོགས་པར་ཡང་རྒྱུ་ཙམ་
[300b.7]གྱིས་བསྐྱེད་པའི་ཐེ་ཚོམ་ཟ་བའི་ཤེས་པ་དང་། ཉ་ཕྱིས་ལ་དུང་དུ་མཐོང་བའི་ཕྱིར། ཚད་མ་མ་ཡིན་པ་ལ་ཉེས་པའི་བྱེད་པ་མེད་པར་འགྱུར་རོ། །འོན་ཏེ་དེ་ལ་ཐེ་ཚོམ་ཟ་བ་དང་། ཕྱིན་ཅི་ལོག་གི་ཤེས་པ་མཐོང་བས་བློ་གཡེར་བག་ཅན་མ་ཡིན་པར་དཔག་གོ་ཞེ་ན་དེ་ལྟ་མོད་ཀྱི་འོན་
[301a]
[301a.1]ཀྱང་རྗེས་སུ་དཔག་པ་ཚད་མར་མཐོང་བ་ལས་རྟགས་ཀྱི་ཡོན་ཏན་གསལ་བར་ངེས་པར་དག་གོ། །དེ་ལྟ་བས་ན་ངེས་པ་མ་གཏོགས་པར་རྟགས་ལས་ཤེས་པ་སྐྱེ་བ་ནི་མ་ཡིན་ནོ། །དེའི་ཕྱིར་རྒྱུའི་ཡོན་ཏན་སྔོན་དུ་སོང་བ་ཉིད་ནི་ཚད་མ་ཡིན་པར་གཞག་གོ། །ཡོན་ཏན་གྱི་
[301a.2]བྱེད་པ་སྐྱོན་ལས་བཟློག་པ་མ་ཡིན་ནམ། ཚད་མ་ལ་ནི་མ་ཡིན་ནོ། །འོ་ན་ཚད་མ་མ་ཡིན་པ་དེར་ཡང་ཉེས་པས་བྱེད་པ་ནི་མ་ཡིན་ཏེ། ཡོན་ཏན་ལོག་པའོ་ཞེས་བྱ་བར་ཅི་སྟེ་རྟོག་པར་མི་བྱེད། དེས་ན་ཡོད་པ་ལ་ལྟོས་ནས་རང་ཉིད་ཚད་མ་མ་ཡིན་ནོ། །གཞན་ཡང་གལ་ཏེ་ནུས་པ་རྒྱུ་མེད་ན་ཅི་སྟེ་
[301a.3]དེ་ཐམས་ཅད་དུ་འཇུག་པར་མི་འགྱུར་ཏེ་རྒྱུ་མེད་ན་ཡུལ་ལ་སོགས་པ་ངེས་པ་མི་འཐད་དོ། །ནུས་པ་ནི་ཆོས་མ་ཡིན་ནམ། ཆོས་ཀྱང་ཆོས་ཅན་མ་གཏོགས་པར་མི་འབྱུང་བས་ཤེས་པའི་ཁྱད་པར་ཉིད་འགའ་ཞིག་ལ་བརྟེན་པ་ཡིན་ནོ་ཞེ་ན། དེ་ལྟ་མོད་ཀྱི་འོན་ཀྱང་ནུས་པ་ནི་རྒྱུ་མེད་པའི་ཆོས་ཅན་གྱི་
[301a.4]དབང་དུ་འགྱུར་བར་མི་རིགས་ཏེ། ཕན་འདོགས་པ་མེད་པའི་ཕྱིར་རོ། །འདི་ལྟར་ནུས་པ་ནི་དངོས་པོ་ལས་གཞན་ན་མེད་དེ། གང་གི་དངོས་པོའི་འབྲས་བུར་འགྱུར། ནུས་པ་འབྲས་བུ་མ་ཡིན་ན་འབྲེལ་པ་མ་གྲུབ་པ་ཡིན་ནོ། །གལ་ཏེ་ནུས་པ་ཐ་དད་པ་དང་། སོ་སོར་ངེས་པའི་རྫས་
[301a.5]ཀྱི་དངོས་པོ་ཡིན་ན། དེའི་ཚེ་དེ་ཡོད་ན་ཡོད་པའི་ཕྱིར་ཡོད་པ་ཁྱད་པར་ཅན་གྲུབ་པ་དང་། གཞན་དུ་ཡང་རྗེས་སུ་འགྲོ་བ་དང་། ལྡོག་པ་འཇུག་པ་རྒྱུ་དང་འབྲས་བུའི་མཚན་ཉིད་ཡིན་པའི་ཕྱིར་དངོས་པོ་ལྟོས་པའམ། ངེས་པ་ལ་ལྟོས་པ་གཉིས་སྲིད་པས་རང་ལས་ཚད་མ་མ་ཡིན་ནོ། །དེ་
[301a.6]ལྟ་བས་ན་དོན་བྱེད་པ་མཐོང་བས་ཚད་མར་རྟོགས་པ་དེའི་ཚེ་ཡང་བཙོ་བ་དང་། སྲེག་པ་ལ་སོགས་པའི་རང་གི་ངོ་བོ་སྣང་བ་དེ་ལ་སྔར་མཐོང་བ་སྔོན་དུ་མི་བྱེད་པའི་ཕྱིར་དེ་ལ་ཇི་ལྟར་ཚད་མར་འགྱུར། སྲེག་པ་ལ་སོགས་པ་ཚོར་བའི་དེ་མ་ཐག་པར་དྲན་པ་སྐྱེ་བས་ཚད་མར་འཇོག་པ་མ་ཡིན་ནམ་
[301a.7]ཞེ་ན། དེ་ནི་རིགས་པ་མ་ཡིན་ཏེ། དྲན་པ་ཡང་མཐོང་བའི་རྗེས་སུ་འབྲངས་ནས་སྐྱེ་ལ། མཐོང་བ་ནི་སྔ་ཕྱིའི་དངོས་པོར་རང་གི་རང་བཞིན་སྣང་བར་ངེས་པ་ཉིད་ཡིན་པ་དེ་བས་ན་དྲན་པས་ནི་དོན་བྱེད་པ་དང་འབྲེལ་པ་མི་མཐོང་ངོ་། །གལ་ཏེ་མཐོང་བས་ཁོང་དུ་མ་ཆུད་པ་ཉིད་འབྲེལ་བར་སྒྲོ་
[301b]
[301b.1]འདོགས་ན་ནི་འཁྲུལ་པར་ཐལ་བར་འགྱུར་རོ། །གང་ཡང་དྲན་པ་ནི་རང་གི་ངོ་བོ་ཉིད་ལ་གནས་པ་མི་གསལ་བའི་རྣམ་པ་མྱོང་བ་དེས་ན་དེར་ཡང་རང་གི་ངོ་བོ་རྟོགས་པ་ཉིད་དོ། །འོན་ཏེ་མི་སླུ་བ་ཉིད་རྗེས་སུ་དཔག་པས་མྱོང་ན། དེར་ཡང་ཡོངས་སུ་གསལ་བ་མ་ཡིན་པ་ཉིད་ཀྱི་དངོས་པོ་མྱོང་བར་
[301b.2]འགྱུར་རོ། །ཡང་རྗེས་སུ་དཔག་པ་མངོན་སུམ་མ་ཡིན་པར་མི་འབྱུང་བ་དེ་བས་ན་འབྲེལ་པ་འཛིན་པ་ནི་མངོན་སུམ་ཉིད་ཡིན་ནོ་ཞེས་བསྟན་ཏོ། །དེས་ནི་རང་གི་ངོ་བོ་ཉིད་ཐམས་ཅད་རིག་པར་སྣང་གི་ཚད་མ་ནི་མ་ཡིན་པའི་ཕྱིར་ངོ་བོ་ཉིད་རང་གིས་རྟོགས་པའོ་ཞེས་བྱ་བར་གནས་སོ། །དེ་ལྟ་ན་
[301b.3]ཚད་མ་ནི་ཚད་མ་ཡིན་པ་ལས་ལོག་པར་ཇི་ལྟར་ཤེས་ཤེ་ན། དེའི་ཕྱིར། ཚད་མ་ཐ་སྙད་ལས་ཡིན་ནོ། །ཞེས་སྨོས་པ་ལ། དེས་ནི་འདི་སྐད་དུ་སྟོན་པར་འགྱུར་ཏེ་ཚད་མ་ནི་ཀུན་དུ་ཐ་སྙད་པའོ། །ཐ་སྙད་ནི་ཇི་ལྟ་ཇི་ལྟར་རྣམ་པར་བརྟགས་པ་དེ་ལྟ་དེ་ལྟར་མེད་པ་སྟེ། འཁོར་བ་གང་དུ་ཡང་དོན་དམ་
[301b.4]པར་ན་མེད་པས་གྲོལ་བ་ཉིད་དུ་ཐལ་བར་འགྱུར་བ་ཉིད་དོ་ཞེ་ན། དེའི་ཕྱིར་རེ་ཞིག་འཁོར་བ་ནི་ཐ་སྙད་དུ་གྲུབ་པར་ཡོད་ལ་དཔྱད་ན་སྟོང་པ་ཡིན་པ་དེ་བཞིན་དུ། ཚད་མ་དང་ཚད་མ་མ་ཡིན་པའི་ཆ་ཡང་ཐ་སྙད་དུ་ཡོད་པའོ། །འོ་ན་དོན་དམ་པ་ལ་ཚད་མ་མེད་དོ་ཞེ་ན། དེ་དེ་བཞིན་ཏེ། ཚད་མ་
[301b.5]གང་ཡིན་པ་ནི་ཀུན་རྫོབ་ཏུ་ཡིན་ནོ་ཞེས་སྨྲས་སོ། །གལ་ཏེ་ཡང་དོན་དམ་པའི་ཚད་མ་མངོན་སུམ་ལས་སམ། རྗེས་སུ་དཔག་པ་ལས་ཡིན་ན། ཐ་སྙད་ཅེས་པའི་ཚིག་ཅི་སྟེ་བརྗོད་ཅེ་ན། དེའི་ཕྱིར་ཚད་མ་ཐ་སྙད་ལས་ཡིན་ནོ་ཞེས་པ་ལ་ཐ་སྙད་དུ་གྲུབ་པའི་རྗེས་སུ་དཔག་པའི་སྟོབས་
[301b.6]ཀྱིས་ངེས་པར་ཤེས་པས་མངོན་པར་འདོད་པའི་དོན་བྱེད་པ་ནི་སྒྲུབ་པར་བྱེད་པ་ཉིད་དུ་འཇུག་ཅིང་གོམས་པ་ཕུལ་དུ་བྱུང་བའི་ཚེ། རྗེས་སུ་དཔག་པ་མེད་པར་ཡང་ཤེས་པ་འཇུག་པའི་ཕྱིར་མངོན་སུམ་ཡང་ཚད་མར་བརྗོད་དོ། །འདི་ལྟར་སྲེག་པ་ལ་སོགས་པའི་དོན་བྱེད་འདོད་པས་བ་
[301b.7]ལང་ལ་སོགས་པ་ཡང་སེམས་ཤིང་སྲེག་པ་ལ་སོགས་པར་དམིགས་ཏེ། ཅིག་ཅར་སྲེག་པ་ལ་སོགས་པ་དང་། བ་ལང་ལ་སོགས་པ་ལ་རྟོག་པ་འཇུག་པ་ནི་མ་ཡིན་པའི་ཕྱིར་རྟོག་པ་མེད་པའི་ཤེས་པ་ཉིད་དེར་འཇུག་པར་བྱེད་པའོ། །ཡང་ན་ཐ་སྙད་ནི་དོན་བྱེད་པའི་ཤེས་པས་ཚད་མར་
[302a]
[302a.1]རྟོགས་པའོ། །ཡང་ན་འདིས་ཐ་སྙད་འདོགས་པར་བྱེད་པས་ཐ་སྙད་ནི་རྗེས་སུ་དཔག་པ་སྟེ། དེས་ན་ཚད་མའོ། །འདི་ལྟར་དེ་ལྟ་བུའི་ཤེས་པ་ནི་སླུ་བ་མེད་པ་ཉིད་དུ་ཤེས་པའོ། །རྗེས་སུ་དཔག་པ་ནི་འབྲེལ་པ་ངེས་པར་བཟུང་བ་ལས་འཇུག་པ་མ་ཡིན་ནམ། འབྲེལ་
[302a.2]པ་འཛིན་པ་ནི་མངོན་སུམ་གྱི་ཚད་མ་ཉིད་དེ། རྗེས་སུ་དཔག་པ་ལས་ཐུག་པ་མེད་པར་འགྱུར་བའི་ཕྱིར་རོ། །དེ་ཚད་མ་ཡིན་པར་ཡང་རྗེས་སུ་དཔོག་པའི་ཕྱིར། གཅིག་ལ་གཅིག་བརྟེན་པའི་ཉེས་པ་ཉིད་དུ་འགྱུར་རོ་ཞེ་ན། དེ་ནི་རིགས་པ་མ་ཡིན་ཏེ། གང་གི་ཕྱིར་འབྲེལ་པ་ངེས་པར་འཛིན་པ་ནི་
[302a.3]གཞན་དག་ཏུ་མངོན་སུམ་དང་མི་དམིགས་པས་སོ། །འདིར་ཡང་གཟུགས་ལ་སོགས་པའི་སྣང་བ་ཡོད་ན་སྲེད་པ་ལ་སོགས་པའི་དགོས་པ་མཐོང་བར་འགྱུར་གྱི། དེ་མེད་ན་དམིགས་པར་མི་འགྱུར་རོ། །དེ་བས་ན་ཡོད་པ་དང་མེད་པར་འཇུག་པས་འབྲེལ་པ་འཛིན་པའི་ཕྱིར་འདིར་རྗེས་སུ་དཔག་པ་ལ་
[302a.4]ཅི་སྟེ་ཐུག་པ་མེད་པར་འགྱུར། རྗེས་སུ་འགྲོ་བ་དང་། ལྡོག་པ་ངེས་པས་ནི་གདོན་མི་ཟ་བར་བསྐྱེད་བྱ་སྐྱེད་བྱེད་ཀྱི་མཚན་ཉིད་དུ་འགྱུར་ཏེ། གཞན་དུ་ན་ཐ་སྙད་རྒྱུན་ཆད་པར་བརྗོད་པར་འགྱུར་རོ། །དེ་ལྟར་ནི་འགྱུར་མོད་ཀྱི། མཐོང་བ་ནི་རེག་པ་ཉམས་སུ་མྱོང་བ་ལ་ད་ལྟར་གྱི་དུས་སུ་མྱོང་བ་
[302a.5]ཕྲད་པའི་རང་བཞིན་ཅན་སྣང་བ་ནི་མ་ཡིན་ཏེ། རང་གིས་མཐོང་བས་ཡུལ་དུ་བྱས་པའི་སྔོན་པོ་ལ་སོགས་པ་ལས་རྒྱུད་གཞན་པ་འཛིན་པ་ཉིད་ཀྱི་ངེས་པ་ནི་མ་ཡིན་ནོ། །དེ་བས་ན་རེག་པ་ལ་སོགས་པའི་ཤེས་པས་གཟུགས་ཀྱི་ཡུལ་ལ་ཚད་མར་ཇི་ལྟར་འགྱུར་ཏེ། ཡུལ་ཐ་དད་པར་འགྱུར་རོ་ཞེས་
[302a.6]བསྟན་པ་ཡིན་ནོ་ཞེ་ན། དེ་ཡང་རིགས་པ་མ་ཡིན་ཏེ། གཟུགས་དང་། རེག་པ་དག་ལ་དེ་ཉིད་དུ་གཅིག་པར་ཐ་སྙད་རྣམ་པར་འཇོག་པ་དེར་ཡང་ཡུལ་ལ་སོགས་པ་ཐ་མི་དད་པའི་ཕྱིར། གཅིག་ཏུ་མངོན་པར་ཞེན་པ་ཡིན་ཏེ། མཐོང་བ་གང་ཡིན་པ་དེ་ཉིད་དང་ཕྲད་པའི་ཕྱིར། ཕྲད་པ་ནི་སྔར་
[302a.7]མཐོང་བ་དེ་དང་ལྷན་ཅིག་རྒྱུད་གཅིག་ལ་འཇུག་པའི་ཕྱིར་དང་། དོན་གཅིག་ལ་འཇུག་པའི་ཕྱིར་མངོན་པར་ཞེན་པ་ལ་ལྟོས་ནས་ཚད་མ་ཡིན་ནོ་ཞེས་བསྟན་ཏོ། །ཕྲད་པར་བྱེད་པ་ཚད་མ་མ་ཡིན་ནམ། དེ་ཡང་ཅི་སྟེ་དོན་བྱེད་པའི་ཤེས་པས་བྱེད་དམ། འོན་ཏེ་མི་བྱེད་པར་ཁས་བླང་བར་བྱ། དེ་ལ་གལ་
[302b]
[302b.1]ཏེ་ཕྱོགས་གཉིས་པ་ལྟར་ན། དེའི་ཚེ་དོན་བྱེད་པའི་ཤེས་པ་མ་གཏོགས་པར་མཐོང་བ་ཇི་ལྟར་དེ་སྐྱེད་པ་ཡིན། འོན་ཏེ་དང་པོ་ལྟར་ན་དེ་ལྟར་ན་ཡང་མཐོང་བའི་དངོས་པོ་ནི་གང་གི་ཚེ་དོན་བྱེད་པར་དམིགས་པར་བྱེད་པ་དེའི་ཚེ། དོན་བྱེད་པར་ཤེས་པ་པོས་ཇི་ལྟར་ཕྲད་པར་ཤེས་པར་བྱ་ཞེ་ན། འདིར་སྨྲས་པ།
[302b.2]གལ་ཏེ་ཐབས་ལས་བྱུང་བ་ལ་ནི་མ་འོངས་པ་ལ་ཚད་མའི་བྱེད་པ་མེད་པས་ཐེ་ཚོམ་ཟའོ། །ད་ལྟ་ན་ཡང་ཐབས་ངེས་པའི་ཕྱིར་དེ་ཉིད་ཚད་མ་ཡིན་ནོ། །འདི་ལྟར་མཐོང་བས་ནི་ཐབས་ཤེས་པར་བྱའི་དོན་བྱེད་པར་བྱ་བ་ནི་མ་ཡིན་ནོ། །རྒྱུ་གཞན་དང་འབྲེལ་པ་ལས་སྲེག་པ་ལ་སོགས་པ་བྱེད་པར་ཇི་
[302b.3]ལྟར་ཤེས་པར་བྱེད་པ་ཉིད་དུ་ནུས། ཐབས་ངེས་པར་གྱུར་ན་ཐབས་ལས་བྱུང་བ་ལ་ཐེ་ཚོམ་ཟ་བ་འཇུག་པ་ཡང་མཐོང་སྟེ། སོ་ནམ་བྱེད་པ་ན་འཁོར་ལས་བྱེད་པ་ལྟ་བུའོ། །དེ་ལྟ་བས་ན་འཁོར་ལོ་ལྟ་བུའི་སྐྱོན་མི་འཇུག་སྟེ། འདི་ལྟར་སྒྲུབ་བྱེད་ངེས་པའི་དོན་ལ་དང་པོ་ཞུགས་པ་ནི་ཚད་མ་ངེས་པ་
[302b.4]མ་གཏོགས་པ་ཡང་སྲིད་པ་ཡིན་ནོ། །སླུ་བ་མེད་པ་ཉིད་ཀྱིས་སྔར་བཟུང་བ་ལ་གོམས་པའི་སྟོབས་ཀྱིས་འཇུག་པ་ཡིན་ཏེ། དེའི་རིགས་ཡིན་པའི་ཕྱིར་རོ།། །།ཚད་མ་རྣམ་འགྲེལ་གྱི་འགྲེལ་པ་ལས། བམ་པོ་གཉིས་པ། གལ་ཏེ་ཡང་ཚད་མ་ངེས་པ་ཉིད་ཐམས་ཅད་དུ་ཐ་སྙད་
[302b.5]པ་ཡིན་ན་གཅིག་ལ་གཅིག་བརྟེན་པར་འགྱུར་རོ་ཞེ་ན། དེ་ཡང་མེད་དེ། འགའ་ཞིག་ཐམས་ཅད་དོན་དུ་གཉེར་བ་མེད་པར་ཡང་སླུ་བ་མེད་པ་དང་པོའི་དུས་སུ་ངེས་པ་སྟེ། འདི་ལྟར་གྲང་བ་དང་ལྡན་པ་འགའ་ཞིག་མེ་ཉེ་བར་གཉེར་ཏེ་དེ་དེར་མེའི་རང་བཞིན་སྲེག་པ་ལ་སོགས་པའི་དོན་བྱེད་པའི་
[302b.6]འབྲེལ་པ་དཔྱོད་པར་བྱེད་དོ། །དེ་བཞིན་དུ་ཇི་ལྟར་མེའི་ཕྱོགས་སུ་འགྲོ་བ་དེས་ཇི་ཞིག་ལྟར་འབྲེལ་པ་ཤེས་པས་ཐམས་ཅད་དུ་ཚད་མས་ངེས་པར་འཛིན་པ་ཅན་འཇུག་པར་བྱེད་པ་ཡིན་ནོ། །འོན་ཏེ་ཡང་དོན་བྱེད་པ་ནི། དུས་དང་རྣམ་པ་ཐམས་ཅད་དུ་རྗེས་སུ་འགྲོ་བ་མ་འཁྲུལ་པའི་རང་བཞིན་གྱིས་མ་
[302b.7]ཡིན་ནམ། དེ་ཇི་ལྟར་ཁོང་དུ་ཆུད་པར་འགྱུར་ཏེ། གང་དུ་མ་འཁྲུལ་བ་ཉམས་སུ་མྱོང་བ་དེ་ཉིད་དུ་འགྱུར་གྱི་ཡུལ་ལ་སོགས་པ་གཞན་དུ་ནི་ཤེས་པའི་བྱེད་པ་མེད་པས་ཇི་ལྟར་ངེས་པ་ཡིན་ཏེ། གང་དུ་དོན་བྱེད་པ་ཉམས་སུ་མྱོང་བ་དེར་ཡང་སྲེག་པ་ལ་སོགས་པ་འབའ་ཞིག་ཉམས་སུ་མྱོང་
[303a]
[303a.1]བའི་ཕྱིར། སྔ་མའི་ཤེས་པ་དོན་བྱེད་པར་མཐོང་བས་སླུ་བ་མེད་པ་ཉིད་ཇི་ལྟར་ཁོང་དུ་ཆུད་པར་འགྱུར། འདི་ལྟར་དེའི་ཤེས་པ་འདས་པ་དེའི་ཚེ་དགོས་པ་རིག་པའི་དུས་ན་ནི་མེད་ལ། གང་དུ་གཟུགས་དང་རེག་པའི་རིག་པ་དག་ལྷན་ཅིག་འབྱུང་བ་ཡིན་པ་དེའི་ཚེ་ཡང་
[303a.2]ཕན་ཚུན་ལོག་པའི་ཡུལ་ཙམ་རྟོགས་པའི་ཕྱིར་ཚད་མར་ངེས་པ་ནི་མ་ཡིན་ནོ། །འོན་ཏེ་དོན་བྱེད་པའི་ཤེས་པ་རྟགས་ལས་བྱུང་བ་ནི་མ་ཡིན་ཞིང་། སྔ་མའི་ཤེས་པ་ཚད་མར་མངོན་སུམ་གྱིས་རྟོགས་པ་ནི་མ་ཡིན་ཏེ། སྔར་མཐོང་བ་འདས་པའི་ཕྱིར་དང་། གསལ་བ་ཉེ་བར་གྱུར་པ་མ་གཏོགས་པར་
[303a.3]ནར་སོན་པའི་ཚད་མ་མི་ཤེས་པའི་ཕྱིར་རོ། །འོ་ན་ཅི་ཞེ་ན། སྲེག་པ་ལ་སོགས་པ་མྱོང་བས་ཚད་མ་ལ་ཐེ་ཚོམ་ཟ་བ་བསལ་ཏོ། །ཚད་མ་ནི་དོན་མེད་ན་མི་འབྱུང་བ་ཉིད་དེ་ཡང་རང་ཉིད་ལས་ཡིན་ནོ་ཞེ་ན། འདིར་སྨྲས་པ། ཐེ་ཚོམ་བཟློག་པ་ཙམ་ལ་རྟོགས་པ་སྔོན་དུ་འགྲོ་བ་དག་འཇུག་པ་ནི་
[303a.4]མ་ཡིན་ཏེ། འོ་ན་ཅི་ཞེ་ན། མངོན་སུམ་དང་། རྗེས་སུ་དཔག་པས་སོ། །དེ་ལ་གལ་ཏེ་མངོན་སུམ་ཉིད་ཀྱིས་འཇུག་ན་དེའི་ཚེ་མངོན་སུམ་ཁོ་ནས་ཚད་མར་ངེས་སོ་ཞེས་བསྟན་པར་འགྱུར་རོ། །དེ་བཞིན་དུ་རྗེས་སུ་དཔག་པས་ཀྱང་ངེས་པར་གདོན་མི་ཟ་བར་ཁོང་དུ་ཆུད་པར་བྱ་སྟེ། གཞན་དུ་ན་
[303a.5]ངེས་པ་མ་གཏོགས་པར་ཐེ་ཚོམ་ཇི་ལྟར་ལྡོག་པར་འགྱུར། གལ་ཏེ་ཡང་དོན་བྱ་བ་བྱེད་པ་ལས་ཐེ་ཚོམ་ལྡོག་ན་གདོན་མི་ཟ་བར་དོན་བྱེད་པ་རྟགས་ཡིན་ནོ། །གང་གི་ཕྱིར་སྒྲོ་བཏགས་པའི་ཐེ་ཚོམ་བཟློག་པ་ཉིད་རྗེས་སུ་དཔག་པ་ཉིད་དེ། དེར་ཡང་འབྲེལ་པ་ངེས་པ་མེད་ན་མེད་དོ་ཞེས་བརྗོད་དོ། །དེའི་ཕྱིར་
[303a.6]ཚད་མ་ཐ་སྙད་ཀྱིས་ཡིན་ནོ་ཞེས་སྨྲས་ཏེ། དེས་ནི་འདི་སྐད་དུ་གང་འབྲེལ་པ་འཛིན་པ་དེ་ནི་ཐ་སྙད་དུ་བཏགས་པས་རྗེས་སུ་འགྲོ་བ་དང་། ལྡོག་པར་འགྱུར་བར་གཞག་གི་ཡོད་པ་དང་མེད་པར་གྱུར་པ་ཉིད་མངོན་སུམ་གྱིས་གྲུབ་པ་ནི་མ་ཡིན་ཏེ། དེ་ལ་སྔ་ཕྱི་འཇུག་པ་མེད་པས་སོ། །དེར་དོན་བྱེད་པའི་ཤེས་
[303a.7]པ་ཚད་མ་ནི་ཐ་མི་དད་པར་དོན་བྱེད་པ་མྱོང་བའི་ཕྱིར། དེའི་བདག་ཉིད་ཀྱི་འབྲེལ་པ་ཡིན་ནོ། །གང་དུ་ཤེས་པ་ལ་ཤིན་ཏུ་བརྟན་པར་གནས་པས་ངེས་པ་དེར་ཡང་སྔར་གྱི་ཤེས་པ་ལ་གནས་པ་གང་ཡིན་པ་དེ་ཉིད་དོན་བྱེད་པའི་རང་བཞིན་གྱིས་ཐ་སྙད་པའི་ལམ་འཇུག་སྟེ། དེས་ན་བཏགས་ནས་དེའི་བདག་
[303b]
[303b.1]ཉིད་ཅེས་བྱ་བར་སྟོན་གྱི། དོན་དམ་པར་ནི་བསྐྱེད་བྱ་སྐྱེད་བྱེད་ཁོ་ནའི་འབྲེལ་པ་སྟེ། སྒྲུབ་པ་དང་། དོན་བྱེད་པ་དག་གི་ཕྱིར་ཚད་མ་ཐ་སྙད་ལས་སོ་ཞེས་བྱ་བར་གནས་སོ་ཞེས་བྱ་བར་སྟོན་ཏོ། །གལ་ཏེ་དེ་ལྟར་ཐ་སྙད་ཀྱིས་ཚད་མར་རྣམ་པར་འཇོག་པ་ཡིན་ན་དེའི་བསྟན་བཅོས་ཀྱིས་ཅི་ཞིག་བྱ་སྟེ། འདི་
[303b.2]ལྟར་བསྟན་བཅོས་ཀྱི་བཤད་པ་ཡང་ཐ་སྙད་ལས་ཚད་མ་ཁོང་དུ་ཆུད་པའི་ཕྱིར་རོ་ཞེ་ན། འདིར་བསྟན་བཅོས་རྨོངས་པ་ཞེས་སྨྲས་ཏེ། རྨོངས་པ་ནི་སྒྲོ་བཏགས་པའོ། །བཟློག་པ་ནི་འདིས་བཟློག་པ་ཡིན་ནོ། འདིའི་དགོངས་པ་ནི་གལ་ཏེ་ཐ་སྙད་ཀྱིས་ཕྱིན་ཅི་མ་ལོག་པའི་ཚད་མའི་རྒྱུར་
[303b.3]གྱུར་པའི་བསྟན་བཅོས་ཀྱི་ཕན་ཚུན་འགལ་བར་ཚད་མའི་མཚན་ཉིད་བསྟན་པ་སེལ་བར་བྱེད་པ་ཡིན་ཏེ། དེ་བས་ན་ཕྱིན་ཅི་ལོག་ཏུ་སྒྲོ་བཏགས་པ་རྣམ་པར་བཅད་པའི་ཕྱིར་བསྟན་བཅོས་བྱས་སོ། །འོན་ཀྱང་ཚད་མའི་མཚན་ཉིད་བསྟན་བཅོས་ལས་བཤད་པ་ལ་འབྲས་བུ་མེད་དེ། བཅོམ་
[303b.4]ལྡན་འདས་ཀྱི་གསུང་རབ་ཉིད་ལས་རྨོངས་པ་ལྡོག་གི་གཞན་ལས་ནི་མ་ཡིན་ནོ་ཞེས་བྱ་བ་དེ་བསལ་བར་འདོད་ནས། མི་ཤེས་དོན་གྱི་གསལ་བྱེད་པའང་། །ཞེས་སྨྲས་སོ། །འོན་ཀྱང་ཚད་མའི་མཚན་ཉིད་ནི། མི་ཤེས་དོན་གྱི་གསལ་བྱེད་འདི་ཡིན་ཏེ། འདིས་གསལ་བར་བྱེད་པས་མ་
[303b.5]བཟུང་བའི་དོན་འཛིན་པའི་ཤེས་པའོ་ཞེས་བྱ་བའི་ཐ་ཚིག་གོ། །མི་ཤེས་པ་ཉིད་སྨོས་པས་དེར་ཀུན་རྫོབ་ཀྱི་ཆ་ཤས་ཅན་གྱི་ཤེས་པ་ལ་སོགས་པ་བསྩལ་ཏོ། །དོན་སྨོས་པས་ནི་དོན་མེད་པར་སྣང་བ་དུང་ལ་སེར་པོར་ཤེས་པ་བསྩལ་ཏོ། །གསལ་བྱེད་ཅེས་སྨོས་པ་ནི་དབང་པོ་ལ་སོགས་པ་ལ་
[303b.6]དེའི་གསལ་བར་བྱེད་པ་ཉིད་མེད་པའི་ཕྱིར་རོ། །སླུ་བ་མེད་པ་སྨོས་པ་མ་གཏོགས་པར་ཟླ་བ་གཉིས་མཐོང་བར་གྱུར་པ་ཡང་ཚད་མར་ཐལ་བར་འགྱུར་བ་མ་ཡིན་ནམ། འོན་ཏེ་དོན་སྨོས་པས་དེ་གསལ་བ་ཡིན་ན། དེ་ལ་དོན་དང་བྲལ་བ་ཇི་ལྟར་རྟོགས། མི་སླུ་བ་ལས་ཡིན་ན། འོ་ན་དེ་ཉིད་
[303b.7]སླུ་བ་མེད་པ་ཚད་མའི་མཚན་ཉིད་དུ་འགྱུར་རོ་ཞེ་ན། དེ་ནི་བདེན་པ་མ་ཡིན་ཏེ། བསམ་པར་བྱ་བ་མཚན་ཉིད་མ་ཡིན་པའི་ཕྱིར་རོ། །གལ་ཏེ་བསམ་པར་བྱ་བ་ཡང་། །ཚད་མའི་མཚན་ཉིད་མི་སླུ་བ་ཉིད་ཡིན་ན། དེའི་ཚེ་དངོས་པོ་ལ་སོགས་པ་ཡང་མཚན་ཉིད་དུ་འགྱུར་རོ། །དེ་ལྟ་
[304a]
[304a.1]བས་ན་གང་དངོས་སུ་བྱུང་བ་དེ་ནི་མཚན་ཉིད་དེ། གཞན་དུ་ཤུགས་ལས་བྱུང་བ་ནི་མ་ཡིན་ནོ། ཅི་སྟེ་ཡང་དངོས་པོ་ནི་ཚད་མའི་མཚན་ཉིད་ལ་མངོན་སུམ་དུ་གྲོགས་བྱེད་པ་མ་ཡིན་ཡང་། གཞན་ནས་གཞན་དུ་བརྒྱུད་པ་ཡང་ཡིན་པ་མ་ཡིན་ནམ། དངོས་པོ་ཡང་ཚད་
[304a.2]མ་ཁོང་དུ་ཆུད་པ་ལ་ཕན་འདོགས་སོ་ཞེ་ན། དེ་ལྟ་ན་ཡང་མི་ཤེས་པའི་དོན་སྨོས་པས་ནི་གཟུང་བ་འཛིན་པའི་ཤེས་པ་བསྩལ་བ་ཡིན་གྱི། མི་སླུ་བ་སྨོས་པས་སེལ་བ་ནི་མ་ཡིན་ཏེ། ཀུན་རྫོབ་དང་། ཆ་ཤས་ཅན་ལ་སླུ་བ་མེད་པ་མཐོང་བའི་ཕྱིར་རོ། །སླུ་བ་མེད་པའི་ཤེས་པ་ཁོ་ནས་དེའི་དོན་
[304a.3]ཉིད་དུ་བྱེད་པ་ནི་མ་ཡིན་ཏེ། གཞན་དུ་ཡང་མཐོང་བ་དང་འབྲེལ་པས་མི་སླུ་བ་སྲིད་པའི་ཕྱིར་རོ། །ཡང་ན་དོན་ནི་དོན་དམ་པ་ལ་བརྗོད་དེ་མི་ཤེས་པའི་དོན་གསལ་བར་བྱེད་པ་ནི་དོན་དམ་པ་རྟོགས་པ་ལ་བཤད་དོ། །དོན་དམ་པ་ནི་གཉིས་སུ་མེད་པ་ཁོ་ནའོ། །ཕྱི་རོལ་གྱི་ཚུལ་ལ་ཡང་འཕགས་
[304a.4]པའི་བདེན་པ་བཞི་ཤེས་པ་ནི། དོན་དམ་པའི་ཚད་མའི་མཚན་ཉིད་དུ་བརྗོད་པ་ནི་མ་ཡིན་ཏེ། གཞན་གྱི་ནི་ཀུན་རྫོབ་ཡིན་ནོ། །གལ་ཏེ་མི་ཤེས་པ་ཉིད་ཀྱི་དོན་གསལ་བ་ཚད་མ་ཡིན་ན་ནི་སྤྱིའི་ཤེས་པ་སྟེ། རིགས་ལ་སོགས་པའི་ཤེས་པ་ཡང་། གཏོད་པར་བྱེད་པའི་ཤེས་པས་མ་
[304a.5]མཐོང་བ་མཐོང་བའི་ཕྱིར་ཚད་མར་ཐལ་བར་འགྱུར་རོ། །དེའི་ཤེས་པ་ནི་དྲན་པའོ་ཞེས་བརྗོད་པར་མི་ནུས་ཏེ་གཏོད་པའི་ཤེས་པས་རིགས་མ་རྟོགས་པའི་ཕྱིར་རོ་ཞེས་པ་དེ་བསྟན་པའི་ཕྱིར། རང་གི་ངོ་བོ་རྟོགས་ལས་གཞན། །སྤྱི་ཡི་ཤེས་པའང་ཐོབ་པར་འགྱུར། །ཞེས་སྨོས་པ་ལ། རང་
[304a.6]གི་མཚན་ཉིད་ཀྱིས་རང་གི་ངོ་བོ་རྟོགས་པ་ལས་གཞན་ཏེ་དུས་ཕྱིས་སྤྱིའི་ཡུལ་གྱི་ཤེས་པ་སྐྱེ་བ་གང་ཡིན་པའི་ཤེས་པ་དེ་ཚད་མར་ཐོབ་པར་འགྱུར་རོ་ཞེས་བྱ་བར་འབྲེལ་ཏོ་ཞེ་ན། འདིར་སྨྲས་པ། རང་གི་མཚན་ཉིད་མི་ཤེས་ན། །ཤེས་པ་གང་ཡིན་བསམས་པ་ལས། །ཞེས་བྱ་བ་ལ།
[304a.7]རང་གི་མཚན་ཉིད་མི་ཤེས་པ་ཤེས་པ་ནི་དོན་བྱེད་པའི་ཤེས་པ་སྐྱེས་པ་གང་ཡིན་པ་དེ་ཚད་མ་ཡིན་ནོ་ཞེས་བྱ་བར་བསམས་ནས། སྤྱིའི་ཤེས་པ་ནི་ཚད་མར་མི་འགྱུར་རོ་ཞེས་བྱ་བར་སྙེགས་སོ། །གཏོད་པར་བྱེད་པའི་ཤེས་པས་ཁོང་དུ་ཆུད་པའི་རང་གི་མཚན་ཉིད་ནི་སྤྱིའི་ཤེས་པས་མ་
[304b]
[304b.1]རྟོགས་པའི་ཕྱིར་ཚད་མ་མ་ཡིན་ནོ། །སྤྱི་སྔ་ན་མེད་པ་འཛིན་པའི་ཕྱིར་མ་ཡིན་ནམ། ཅི་སྟེ་ཚད་མ་མ་ཡིན་ན། ཁོང་དུ་ཆུད་པའི་མཚན་ཉིད་འཛིན་པ་ནི་གནོད་པའི་ཤེས་པ་དང་བྲལ་བའི་ཕྱིར་རོ། །དེ་ལྟ་ན་མཚན་ཉིད་ནི། དེ་ལ་སྔོན་མེད་དོན་ཤེས་པ། །ངེས་ཏེ་གནོད་པ་སྤངས་པ་དང་། །སྐྱོན་མེད་
[304b.2]པ་ལས་སྐྱེས་པ་ནི། །ཚད་མར་འཇིག་རྟེན་པ་འདོད་དོ། །ཞེས་ཟེར་བ་དེ་འདིར་བཟློག་པར་བྱ་བའི་ཕྱིར། རང་གི་མཚན་ཉིད་དཔྱད་ཕྱིར་རོ། །ཞེས་བྱ་བ་ལ། ཡོད་པ་ཉིད་དང་། མེད་པ་ཉིད་ཀྱི་གཞལ་བྱ་མཐོང་བའི་ཤེས་པ་ནི་ཚད་མར་བརྗོད་དོ། །རང་གི་མཚན་ཉིད་ལ་ཡོད་པ་ཉིད་དང་། མེད་
[304b.3]པ་ཉིད་དཔྱོད་དེ། དོན་བྱེད་པ་སྒྲུབ་པའི་ཕྱིར་རོ། །སྤྱི་ལ་ནི་སྲེག་པ་ལ་སོགས་པའི་བྱེད་པ་དང་བྲལ་བའི་ཕྱིར་དེས་ཚད་མ་ལ་ཕན་འདོགས་པ་མེད་དོ། །སྤྱིའི་ཤེས་པ་ནི་སྔར་མེད་པའི་དོན་བཟུང་བ་ལས་ཚད་མ་མ་ཡིན་ཏེ། ཐལ་ཆེས་པའི་ཕྱིར་ཏེ། འདི་ལྟར་ཟླ་བ་གཉིས་སུ་མཐོང་བ་ཡང་
[304b.4]སྔར་མེད་པ་འཛིན་པས་ཚད་མར་འགྱུར་རོ། །འོན་ཏེ་དེ་ལ་གནོད་པ་མཐོང་བས་ཚད་མ་མ་ཡིན་ནོ་ཞེ་ན། འོན་ནི་གནོད་པ་ཅན་གྱིས་ཀྱང་དོན་བྱེད་པའི་དངོས་པོ་དང་བྲལ་བ་ཤེས་པར་བྱེད་པའི་ཕྱིར་རང་གི་མཚན་ཉིད་རྟེན་པར་དཔྱོད་དོ། །དེ་ལྟ་ནི་འགྱུར་མོད་ཀྱི། སྤྱིའི་ཤེས་པ་ནི་དེ་ཉིད་
[304b.5]འདི་ཡིན་ནོ་ཞེས་ངེས་པས་རང་གི་མཚན་ཉིད་ལ་འཇུག་གོ་ཞེ་ན། ཅི་ཞིག་ལྟར་སྤྱིའི་ཞེན་པ་མ་གཏོགས་པར་མཐོང་བ་ཉིད་ལས་འཇུག་པ་ཡོད་པ་མ་ཡིན་ནམ། མཐོང་བ་ལས་མ་གཏོགས་པར་ནི་སྤྱིའི་ཤེས་པས་མི་འཇུག་པའི་ཕྱིར་མཐོང་བ་ཉིད་ཚད་མ་ཡིན་ནོ། །གཞན་ཡང་སྤྱིའི་ཤེས་
[304b.6]པ་རིགས་ལ་འཇུག་པར་འགྱུར་རམ། རང་གི་མཚན་ཉིད་ལ་ཡིན། དེ་ལ། དེ་རིགས་ལ་ནི་མ་ཡིན་ཏེ། །སྤྱི་ཡི་དགོས་པ་ཤེས་པ་དང་། །བརྗོད་པ་ནི་རང་གི་རྟོགས་པ་ཙམ་དུ་གྱུར་པའི་ཕྱིར་རོ། །རང་གི་མཚན་ཉིད་ལ་ཡང་མ་ཡིན་ཏེ། དེ་གཏོད་པར་བྱེད་པའི་ཤེས་པའི་ཡུལ་ཡིན་པའི་
[304b.7]ཕྱིར་རོ། །འོན་ཏེ་སྤྱིའི་ཤེས་པའི་ཡུལ་རང་གི་མཚན་ཉིད་ཡིན་ན། དེ་ལྟ་མོད་ཀྱི་གཟུང་བ་འཛིན་པའི་ཕྱིར་ཚད་མ་མ་ཡིན་ཏེ་དག་པར་མཐོང་བའི་ཤེས་པ་ཉིད་སྤྱི་དང་ལྡན་པར་ཁྱོད་འདོད་པའི་ཕྱིར་རོ། །དེ་ལྟར་ཡང་རྣམ་པར་མི་རྟོག་པའི་བློས། དངོས་པོ་གཉིས་
[305a]
[305a.1]སུ་ཡང་འཛིན་པ་ཡིན་ཞེས་སྨྲས་སོ། །གང་གི་ཚེ་ཡང་དོན་དམ་པའི་ཚད་མའི་མཚན་ཉིད་དུ་འདོད་པ་དེའི་ཚེ་རང་རིག་པའི་ངོ་བོ་ཉིད་ཁོང་དུ་ཆུད་པ་ལས་དེ་ལས་གཞན་པའི་སྤྱི་གཟུང་བ་དང་། འཛིན་པ་ནི་མངོན་པར་ཞེན་པ་ནི་ཡང་དག་པར་རིག་པར་ཁོང་དུ་མ་ཆུད་པ་ནི་གཟུང་བ་
[305a.2]དང་། འཛིན་པ་ལེན་པའི་ཕྱིར་ཚད་མར་འགྱུར་བར་བལྟ་བར་བྱའོ་ཞེ་ན། ཤེས་པའི་རང་གི་མཚན་ཉིད་མི་ཤེས་པར་ཤེས་པ་གང་མངོན་དུ་འཛིན་པ་དེ་ནི་ཚད་མ་མ་ཡིན་ནོ་ཞེས་བྱ་བར་དགོངས་པས་འཛིན་པ་ལ་སོགས་པར་འབྱུང་བ་ནི་མ་ཡིན་ནོ། །འོ་ན་ཇི་ལྟར་བཅོམ་ལྡན་འདས་ཀྱིས་ཕྱི་རོལ་གྱི་དོན་
[305a.3]གསུང་བ་མཛད་ཅེ་ན། གདུལ་བྱའི་སྐྱེ་བོའི་ངོར་ཕྱི་རོལ་གྱི་དོན་ལ་མངོན་པར་ཞེན་པ་གཟུང་བར་བྱ་བའི་ཕྱིར། ཕྱི་རོལ་གྱི་དོན་དུ་བསྟན་ཏེ། དོན་དམ་པ་ལ་ནི་གཟུང་བ་དང་། འཛིན་པ་དང་བྲལ་བས་རང་རིག་པ་ཉིད་ཡིན་ནོ། །དེ་ཉིད་གང་ལས་ཤེས་ཤེ་ན། །རང་གི་མཚན་ཉིད་
[305a.4]དཔྱད་པ་ལས་ཏེ། དཔྱད་ནས་གཟུང་བ་དང་འཛིན་པའི་དངོས་པོ་ཐམས་ཅད་ཉམས་པར་འགྱུར་བས་གཉིས་སུ་མེད་དོ། །དེ་ཉིད་གཉིས་སུ་མེད་པར་དཔྱད་པའི་ཕྱིར་གསུང་རབ་མ་ལུས་པ་ལ་འཇུག་པར་བྱ་སྟེ། ཕྱི་རོལ་གྱི་དོན་ལྷག་པར་བཤད་པ་ནི་དྲང་བའི་དོན་ཉིད་དོ། །འོ་ན་ཇི་ལྟར་ཕྱི་རོལ་
[305a.5]དང་ནང་གི་བྱེ་བྲག་གིས་ཐ་དད་ཅེ་ན། རྟོགས་པ་ཙམ་གྱིས་ཕྱི་རོལ་དང་། ནང་ཐ་དད་པ་ཡིན་ནོ། །མངོན་སུམ་དང་རྗེས་སུ་དཔག་པ་ཐ་དད་པ་ཙམ་དུ་ཚད་མ་མ་ཡིན་ནམ། ཇི་ལྟར་བཅོམ་ལྡན་འདས་ཚད་མར་འགྱུར་ཞེ་ན། བཅོམ་ལྡན་འདས་ནི་ཡང་དག་པའི་ཚད་མ་ཡིན་ཏེ། འདི་ལྟར།
[305a.6]དེ་ལྡན་བཅོམ་ལྡན་ཚད་མ་ཡིན། །ཞེས་སྨོས་པ་ཇི་ལྟར་ན་མངོན་སུམ་དང་། རྗེས་སུ་དཔག་པ་ཚད་མ་ཡིན་པ་དེ་བཞིན་དུ་ཡེ་ཤེས་ཀྱི་གཟུགས་ཅན་བཅོམ་ལྡན་འདས་ཀྱང་མི་སླུ་བར་མཛད་པས་དེ་བཞིན་གཤེགས་པ་ནི། རང་ལས་ངེས་པའི་མངོན་སུམ་གྱི་ཚད་མ་ཁོ་ནའོ། །དེ་བཞིན་
[305a.7]གཤེགས་པ་ཁོ་ན་ཚད་མ་ཡིན་གྱི། རིག་བྱེད་ནི་ཚད་མ་མ་ཡིན་པ་དེ་ག་ལས་ཤེས་ཏེ། དེ་ལ་ཡང་ཕྱོགས་གཅིག་ལ་སླུ་བ་མེད་པའི་ཕྱིར་རོ་ཞེ་ན། དེའི་ཕྱིར། ཡང་དག་མ་ཡིན་བཟློག་ཕྱིར་རོ། །ཡང་དག་པར་བརྗོད་སྒྲུབ་ལ་ལྟོས། །དེ་བས་ཚད་མ་ཉིད་དུ་རིགས། །ཞེས་བྱ་བ་
[305b]
[305b.1]སྨོས་ཏེ། གང་གི་ཕྱིར་ཡང་དག་པ་མ་ཡིན་པ་བཟློག་པ་ནི་སྒྲོ་འདོགས་པ་བཟློག་པ་སྟེ། དེའི་ཕྱིར་ན་བཅོམ་ལྡན་འདས་ནི་ཡང་དག་པའམ། གྱུར་པ་ཞེས་བརྗོད་དེ། བདེན་པའི་དོན་ཏོ། །དེའི་ཕྱིར་བཅོམ་ལྡན་འདས་ཉིད་སྒྲུབ་བྱེད་ལ་ལྟོས་ནས། ཚད་མར་རིགས་སོ། །སྒྲུབ་
[305b.2]བྱེད་ཀྱང་འདིར་བདེན་པ་མི་སླུ་བའི་ཚིག་ཉིད་དེ། དེས་ན་བཅོམ་ལྡན་འདས་ཉིད་ཚད་མ་ཡིན་གྱི་རིག་བྱེད་ནི་མ་ཡིན་ཏེ། ཕྱོགས་གཅིག་ལ་མི་སླུ་བ་ཡིན་ཡང་ཐམས་ཅད་ལ་མ་མཐོང་བའི་ཕྱིར་སྒྲུབ་བྱེད་མ་ཡིན་ནོ། །བཅོམ་ལྡན་འདས་ཀྱི་བདེན་པའི་གསུང་ཉིད་ཚད་མའི་ཡུལ་ལ་
[305b.3]མངོན་སུམ་དང་། རྗེས་སུ་དཔག་པས་མི་གནོད་པའི་ཕྱིར་རོ། །མཐོ་རིས་ལ་སོགས་པའི་ཡུལ་དབང་པོ་ལས་འདས་པ་རང་གི་ཚིག་དང་འགལ་བ་མེད་པས་ཁོང་དུ་ཆུད་པར་བྱའོ། །དེ་ལ་གལ་ཏེ་མངོན་སུམ་དང་རྗེས་སུ་དཔག་པ་དག་ལས་འདས་པའི་ཡུལ་ལ་བྱེད་པ་མེད་དེ། གཅིག་
[305b.4]ནི་དེར་ཉེ་བ་ཙམ་ཡིན་ལ་གཞན་ནི་རྟགས་ལས་སྐྱེས་པའི་ཕྱིར་ཐམས་ཅད་མཁྱེན་པ་སྒྲུབ་པར་བྱེད་ན། དེ་ལྟ་མོད་ཀྱི། རྟག་པ་ཉིད་དང་། དབང་ཕྱུག་ལ་སོགས་པ་ཚད་མ་ཡིན་ཏེ། ཅིའི་ཕྱིར་རྒྱུ་དང་འབྲས་བུར་རྟོགས་པར་བྱེད་ཅེ་ན། དེ་བཟློག་པའི་ཕྱིར། ཚད་མ་རྟག་པ་ཉིད་ཡོད་
[305b.5]མིན། །དངོས་ཡོད་རྟོགས་པ་ཚད་ཕྱིར་དང་། །ཤེས་བྱ་མི་རྟག་པ་ཉིད་དེས། །མི་བརྟན་ཕྱིར་ན་རིམ་སྐྱེས་པ། །རྟགས་ལས་སྐྱེས་པའི་མི་རུང་སྟེ། །ལྟོས་པ་མི་རིགས་པ་ཡི་ཕྱིར། །ཞེས་བྱ་བ་སྨོས་ཏེ། རྟག་པའི་དབང་ཕྱུག་ལ་སོགས་པ་ལ་ནི་ཚད་མ་མེད་དོ། །གང་ལས་ཤེས་ཤེ་ན། །
[305b.6]གང་དུ་ཡང་དེས་ཕན་བཏགས་པ་མཐོང་བའི་ཕྱིར་རོ། །གང་གི་ཕྱིར་དངོས་པོ་ཡོད་པ་ལས་རྟོགས་པ་ནི། ཚད་མ་སྟེ་ཕྱིན་ཅི་ལོག་གི་ཤེས་པ་ཚད་མ་མ་ཡིན་པའི་ཕྱིར་རོ། །དངོས་པོ་ཡོད་པར་རྟོགས་པ་ཡང་ཤེས་བྱ་མི་རྟག་པས་འཇིག་པར་འགྱུར་བ་དེ་བས་ན་འདིར་རྟག་པ་མ་ཡིན་ནོ་ཞེས་
[305b.7]བྱ་བ་ནི་དམ་བཅའ་བའོ། །དངོས་ཡོད་རྟོགས་པ་ཚད་ཕྱིར་དང་། །ཞེས་བྱ་བས་ནི་གཏན་ཚིགས་སྟོན་པའོ། །ཤེས་བྱ་མི་རྟག་པ་ཉིད་དེས། །ཞེས་བྱ་བས་ནི་མི་མཐུན་པའི་ཕྱོགས་ལ་གནོད་པ་ཅན་གྱི་ཚད་མའོ། །དེས་ནི་འདི་སྐད་དུ་སྟོན་ཏེ། རྟག་པ་ནི་ཚད་མ་མ་ཡིན་ཏེ། དངོས་པོ་
[306a]
[306a.1]ཡོད་པ་རྟོགས་པའི་རང་བཞིན་ཡིན་པའི་ཕྱིར་མངོན་སུམ་བཞིན་ནོ། །དབང་ཕྱུག་ལ་སོགས་པའི་ཤེས་པ་ཚད་མ་ཡིན་ན་ནི་རྟག་པ་མ་ཡིན་ཏེ། འདི་ལྟར་ཤེས་པའི་ཚད་མ་ཉིད་ཡུལ་གྱི་བྱེད་པ་ཡིན་ན། དེ་ལས་བྱུང་བའམ། ཡུལ་གྱི་རྣམ་པ་ཡིན་ན། དེ་ལ་གལ་ཏེ་
[306a.2]རྟག་པ་ཉིད་དབང་ཕྱུག་གི་ཤེས་པ་རིམ་གྱིས་གཞལ་བྱ་ལ་བྱེད་ན་དེའི་ཚེ། བྱེད་པ་དང་། མི་བྱེད་པ་ཐ་དད་པའི་ཕྱིར་རྟག་པ་ཉིད་མ་ཡིན་ནོ། །ཅིག་ཅར་བྱེད་པ་ཡང་མ་ཡིན་ཏེ། ཤེས་བྱ་རིམ་པར་ཤེས་པའི་ཕྱིར་རོ། །འོན་ཏེ་ཇི་ལྟར་མེ་ལོང་ལ་སོགས་པ་མི་འགྱུར་བར་གཟུགས་བརྙན་གཞན་
[306a.3]དང་། གཞན་དུ་མཐོང་བ་དེ་བཞིན་དུ་དབང་ཕྱུག་གི་ཤེས་པ་མི་འགྱུར་བ་ཉིད་དུ་གཞན་དང་གཞན་གྱི་དངོས་པོ་འཛིན་ཏོ་ཞེ་ན། དེ་ལྟ་ན་འོ་ན་ནི་ཤེས་བྱ་ལ་ཤེས་པའི་བྱེད་པ་མེད་པས་རང་དབང་ཁོ་ནས་དེ་རིག་པར་འགྱུར་རོ། །དེ་ལྟར་ནི་འགྱུར་མོད་ཀྱི། ཇི་ལྟར་མིག་ཕྱེ་ན་མི་འགྱུར་ཡང་གཞན་
[306a.4]དང་གཞན་གྱི་དངོས་པོ་རུང་བའི་གནས་སུ་འཛིན་པ་དེ་བཞིན་དུ་རྟག་པའི་ཤེས་པ་ཡང་མི་འགྱུར་བ་ཉིད་དུ་ཤེས་བྱ་ཐམས་ཅད་འཛིན་ཏོ་ཞེ་ན། དེ་ནི་བདེན་པ་མ་ཡིན་ཏེ་གང་གི་ཕྱིར་མིག་ལ་དངོས་པོའི་བྱེད་པ་ཡོད་པ་སྟེ། དེ་མེད་ན་ཤེས་པ་མི་སྐྱེ་བས་སོ། །དབང་ཕྱུག་གི་ཤེས་པ་ཡང་རྟག་
[306a.5]པའི་ཕྱིར་ལྡོག་པ་མེད་དོ་ཞེས་འོག་ནས་བཤད་པར་བྱའོ། །དེས་ན་དེ་ལས་བྱུང་བ་དང་དེའི་རྣམ་པ་ཉིད་ནི་རྟག་པ་ཉིད་ལ་མི་སྲིད་དོ། །དབང་ཕྱུག་གི་ཤེས་པ་ནི་མི་རྟག་ཀྱང་དབང་ཕྱུག་རྟག་པ་མ་ཡིན་ནམ་ཞེ་ན། འདིར་སྨྲས་པ། རིམ་གྱིས་སྐྱེ་བའི་ཤེས་པ་གང་ཡིན་པ་དེ་ནི་རྟག་པ་སྟེ། དབང་
[306a.6]ཕྱུག་ལས་སྐྱེ་བར་མི་འཐད་པའི་ཕྱིར་ཏེ་རྒྱུ་དང་མ་བྲལ་བས་སོ། །དེས་ནི་འདི་སྐད་དུ་སྟོན་ཏེ། གལ་ཏེ་རྒྱུ་རྟག་པ་ནི་འབྲས་བུ་རིམ་གྱིས་སྐྱེ་བ་མ་ཡིན་ཏེ། རྒྱུ་རྟག་ཏུ་ཡོད་པའི་ཕྱིར་རོ། །དེ་བས་ན་ཤེས་བྱ་གཞན་ནས་གཞན་དུ་འབྱུང་བ་ན། རིམ་པ་ཉམས་སུ་མྱོང་བར་མི་འགྱུར་རོ། །
[306a.7]དེ་ལྟར་ནི་འགྱུར་མོད་ཀྱི་དབང་ཕྱུག་གི་ཤེས་པ་རྐྱེན་དང་ཕྲད་ནས་ཤེས་པ་སྐྱེད་དོ་ཞེ་ན། དེའི་ཕྱིར་དབང་ཕྱུག་རྟག་པ་ལ་ནི་ལྟོས་པ་མི་རུང་བའི་ཕྱིར་ཏེ། དེ་ལ་ཕན་འདོགས་པ་མེད་པ་ཡིན་ནོ། །འདི་ལྟར་ཕན་འདོགས་པའི་རྒྱུ་དོན་གཅིག་ལ་བྱེད་པ་ཡིན་ནམ། ལྷག་པར་བྱེད་པའི་རྒྱུ་ཡིན་
[306b]
[306b.1]པར་བརྟག་གྲང་ན། དེ་ལ་དོན་གཅིག་ལ་བྱེད་པའི་རྒྱུ་ཉིད་ཀྱིས་ཡུལ་ལ་ཕན་འདོགས་པའི་རྒྱུ་མཚན་ནི་མ་ཡིན་ཏེ། སྔ་མ་ཉིད་དུ་དེ་ཡོད་པའི་ཕྱིར་རོ། །དེ་ལྟ་བས་ན་དེ་དང་བྲལ་བའི་དོན་བྱེད་པ་སྔ་མ་ཉིད་དུ་ཕན་འདོགས་པར་འགྱུར་རོ། །འོན་ཏེ་ཕྱོགས་གཉིས་པ་ལྟར་ན་ཡང་ལྷག་པ་ནི་
[306b.2]ཐ་དད་པ་དང་། ཐ་དད་པ་མ་ཡིན་པར་རྟོགས་པ་མི་འཐད་པས་དེ་ནི་བདེན་པ་མ་ཡིན་ནོ། ལྷག་པ་ནི་ཐ་དད་པའམ། ཐ་མི་དད་པ་ནི་མ་ཡིན་ནོ་ཞེས་འཆད་པར་འགྱུར་རོ། །དེ་བས་ན་རྟག་པ་ལ་ལྟོས་པ་མེད་དེ་ཕན་འདོགས་པའི་རྒྱུ་རྣམས་གཉིས་དང་བྲལ་བའི་ཕྱིར་རོ། །དེ་ལྟ་མོད་ཀྱི་
[306b.3]འོན་ཀྱང་དབང་ཕྱུག་མི་རྟག་པ་ཉིད་ནི་སྦྱིན་པ་ལ་སོགས་པའི་རྐྱེན་ལ་མི་ལྟོས་ཏེ། ངོ་བོ་ཉིད་ཀྱི་ཡེ་ཤེས་དང་། འདོད་ཆགས་དང་བྲལ་བ་དང་། དབང་ཕྱུག་ལ་སོགས་པ་ཕུན་སུམ་ཚོགས་པ་འབྱུང་བར་འགྱུར་ཏེ། སྔ་མ་སྔ་མའི་སྐད་ཅིག་འགྱུར་བ་ཙམ་གཅིག་ལས་སྐྱེས་པའི་ཕྱིར་རོ་
[306b.4]ཞེ་ན། འདིར་སྨྲས་པ། རྣམ་འགས་ཕན་འདོགས་མེད་པའི་ཕྱིར། །མི་རྟག་ན་ཡང་ཚད་མ་མེད། །དབང་ཕྱུག་མི་རྟག་ན་ཡང་ཚད་མར་རིགས་པ་མ་ཡིན་ནོ། །ཅིའི་ཕྱིར་ཞེ་ན། འགའ་ཞིག་གིས་ཕན་འདོགས་པ་ཉིད་མེད་པའི་ཕྱིར་རོ། །གང་གི་ཕྱིར་རྒྱུ་འགའ་ཞིག་གིས་ཕན་
[306b.5]འདོགས་པའམ། གནོད་པ་ཤེས་པ་དེའི་ཚེ་བསྒོམས་པས་འདོད་ཆགས་ལ་སོགས་པའི་གཉེན་པོ་ཡོངས་སུ་ཤེས་པ་ལས་སྲོག་ཆགས་ལ་སྙིང་རྗེ་བས་ཕན་པ་སྟོན་པར་བྱེད་དོ། །གང་གི་ཚེ་ཡང་ངོ་བོ་ཉིད་ཁོ་ནས་དེའི་ཤེས་པ་ཡིན་ན་དེས་གཞན་ལ་གཉེན་པོ་ཇི་ལྟར་སྟོན་པར་བྱེད་དེ།
[306b.6]འདི་ལྟར་རང་གི་རྒྱུད་ལ་འདོད་ཆགས་དང་བྲལ་བའི་ཐབས་ཤེས་པ་མ་ཡིན་ཏེ། དེའི་རང་གི་ངོ་བོ་ཉིད་འདོད་ཆགས་དང་བྲལ་བའི་ཕྱིར་རོ། །རྒྱུད་གཞན་ལ་བསྒོམ་པའི་ཐབས་ཤེས་པས་འདོད་ཆགས་དང་བྲལ་བ་ཐོབ་པར་བྱ་བའི་ཕྱིར། དེ་ལ་སྟོན་པ་མ་ཡིན་ནམ་ཞེ་ན། དེ་ལྟ་མོད་ཀྱི།
[306b.7]འོན་ཀྱང་རྒྱུད་གཞན་པ་ཉིད་ལ་རྒྱུའི་སྟོབས་ཀྱིས་སྐྱེས་པའི་འདོད་ཆགས་ཀྱི་གཉེན་པོ་ཡོངས་སུ་ཤེས་པ་ཅན་གྱི་ཚད་མ་ཡོད་བཞིན་དུ་དབང་ཕྱུག་གིས་ཅི་ཞིག་བྱ། འོན་ཏེ་རྒྱུད་གཞན་དེ་ཉིད་ལ་དབང་ཕྱུག་གིས་སྟོན་ཏོ་ཞེ་ན། འོ་ན་གང་གི་ཚེ་དེ་ལ་དབང་ཕྱུག་གིས་སྟོན་པ་དེའི་ཚེ། འདོད་
[307a]
[307a.1]ཆགས་ལ་སོགས་པའི་གཉེན་པོར་ཇི་ལྟར་ཤེས། གཞན་ཡང་གྲོལ་བའི་བདག་ཉིད་ཅན་ལ་དམིགས་ནས་ཤེས་སོ་ཞེ་ན། དེ་ལྟ་མོད་ཀྱི། འོན་ཀྱང་ཐོག་མ་མེད་པ་ནས་འདོད་ཆགས་དང་བྲལ་བ་བརྒྱུད་པའི་ཕྱིར། རྟག་པ་ནི་ཚད་མར་ཡོད་པ་མ་ཡིན་ནོ་ཞེས་བྱ་བ་ལེགས་
[307a.2]པར་སྨྲས་སོ། །ཡང་ན་གལ་ཏེ་འཛིན་པར་བྱེད་པའི་ཚད་མ་ཡོད་པ་མ་ཡིན་པས་ཚད་མ་མེད་པ་ཅན་ཉིད་དོ། །དེའི་དོན་ནི་དེ་སྒྲུབ་པར་བྱེད་པའི་ཚད་མ་ཡོད་པ་མ་ཡིན་པས་ནམ་ཡང་ཕན་འདོགས་པ་མེད་པའི་ཕྱིར་ཞེས་པ་དེ་ནི་ལྟོས་པ་མེད་པ་དང་ལྡན་པའི་གཏན་ཚིགས་སོ། །འོན་ཏེ་སྡོད་ཅིང་འཇུག་
[307a.3]པ་དང་། དབྱིབས་ཀྱི་ཁྱད་པར་དང་། དོན་བྱེད་པ་ལ་སོགས་པ་དབང་ཕྱུག་སྒྲུབ་པ་མ་ཡིན་ནམ། གང་སྡོད་ཅིང་སྡོད་ཅིང་འཇུག་པ་དེ་ཐམས་ཅད་ནི་བློ་དང་ལྡན་པའི་རྒྱུ་ཡིས་བྱས་པ་སྟེ། སྟ་རེ་ལ་སོགས་པས་གཅོད་པ་བཞིན་ནོ། །གང་གི་ཕྱིར་སྟ་རེ་ལ་སོགས་པ་རང་ཉིད་འཇུག་ན་ནི་རྒྱུན་དུ་འཇུག་པར་
[307a.4]ཐལ་བར་འགྱུར་རོ། །ལུས་དང་། དབང་པོ་དང་། ས་ལ་སོགས་པ་ནི་སྡོད་ཅིང་འཇུག་པའོ། །དེ་བཞིན་དུ་གང་དབྱིབས་ཀྱི་ཁྱད་པར་ལྡན་པ་དེ་ཐམས་ཅད་བྱེད་པ་པོས་བྱས་པ་སྟེ། དཔེར་ན་བུམ་པ་ལ་སོགས་པ་བཞིན་ནོ། །ལུས་དང་དབང་པོ་ལ་སོགས་པ་ཡང་དབྱིབས་ཀྱི་ཁྱད་པར་དང་
[307a.5]ལྡན་པའོ། །དེ་བཞིན་དུ་གང་དོན་བྱ་བ་བྱེད་པ་དེ་ཐམས་ཅད་བྱེད་པ་པོས་བྱས་པ་སྟེ། སྟེའུ་ལ་སོགས་པ་བཞིན་ནོ། །ལུས་དང་། མིག་དང་ས་ལ་སོགས་པ་ཡང་དོན་བྱ་བ་བྱེད་པའི་ཕྱིར་ཞེས་བྱ་བའོ། །སོགས་པའི་སྒྲས་ནི་བྱས་པ་ཉིད་ཉེ་བར་བཟུང་སྟེ། འབྲས་བུ་གང་ཡིན་པ་དེ་
[307a.6]ཐམས་ཅད་ནི་བློ་དང་ལྡན་པའི་རྒྱུ་ལས་བྱུང་བ་སྟེ། ཡལ་ག་ལ་སོགས་པ་བཞིན་ནོ། །རི་ལ་སོགས་པ་ཡང་འབྲས་བུ་ཡིན་ཞེས་ཟེར་ན། འདིར་སྨྲས་པ། སྡོད་འཇུག་དབྱིབས་ཀྱི་ཁྱད་པར་དང་། །དོན་བྱེད་པ་ལ་སོགས་པ་ལ། །འདོད་པ་གྲུབ་པའམ་དཔེ་མ་གྲུབ། །ཡང་ན་ཐེ་
[307a.7]ཚོམ་ཟ་བ་ཡིན། །འདིར་སྡོད་ཅིང་འཇུག་པ་ལ་སོགས་པ་རྣམས་ཀྱི་གཏན་ཚིགས་ནི་སྤྱིར་བློ་དང་ལྡན་པ་རྣམས་ཀྱི་རྒྱུར་སྔོན་དུ་འགྲོ་བ་ཉིད་དུ་སྒྲུབ་བམ། ཕུལ་དུ་བྱུང་བའི་སེམས་པས་བྱིན་གྱིས་བརླབས་པ་ཉིད་ཀྱི་ཁྱད་པར་ཡིན་པར་བརྟག་གྲང་ན། དེ་ལ་གལ་ཏེ་སྤྱི་གྲུབ་པ་དེ་ལྟ་ན་ནི་
[307b]
[307b.1]ཕྱོགས་མ་ཡིན་ཏེ། ཕྱོགས་ནི་མ་གྲུབ་པ་ལ་འདོད་པའི་ཕྱིར་རོ། །སྤྱིར་སེམས་སྔོན་དུ་འགྲོ་བ་ཙམ་ནི་གྲུབ་པ་ཉིད་དེ། དེ་ལྟར་ཡང་གསུངས་པ། ལས་ལས་འཇིག་རྟེན་སྣ་ཚོགས་སྐྱེས། །ལས་ནི་སེམས་པ་དང་དེས་བྱས། །སེམས་པ་ཡིད་ཀྱི་ལས་ཡིན་ནོ། །ཞེས་གསུངས་སོ། །འོན་
[307b.2]ཏེ་ལས་སྣ་ཚོགས་པའི་སྔོན་དུ་སེམས་འགྲོ་བ་ཉིད་དེ། ལས་འཇུག་པ་དང་ལྡོག་པའི་དོན་དུ་དབང་ཕྱུག་ཁས་བླང་བར་བྱ་སྟེ། དེ་ལྟར་ཡང་དེ་ནི་དབང་ཕྱུག་གིས་བསྐུལ་བ་ལས་ཆོས་སྟོན་ཏོ་ཞེས་བཤད་དོ། །དེ་བས་ན་བྱེད་པ་པོས་བྱས་པའི་ལས་སྔོན་དུ་སོང་བའི་ནི་གྲུབ་པ་ལ་སྒྲུབ་པ་ནི་
[307b.3]མ་ཡིན་ཏེ། དབང་ཕྱུག་གིས་བྱས་པའི་ལས་ཁས་བླངས་པའི་ཕྱིར་རོ་ཞེ་ན། དེ་ནི་མ་ཡིན་ཏེ། ལས་ཉིད་སེམས་ཀྱི་རང་བཞིན་ཡིན་པའི་ཕྱིར། སྣ་ཚོགས་ལ་འཇུག་པ་ཉིད་ཡིན་ནོ། །སེམས་མེད་པའི་འབྲས་བུ་གང་ཡིན་པ་དེ་ནི་རང་ཉིད་སྐྱེ་བར་འཇུག་པ་མ་ཡིན་ཏེ། དེ་འདི་ཡིན་
[307b.4]ཞེས་དཔྱད་ནས་འཇུག་པ་མ་ཡིན་པའི་ཕྱིར་རོ། །འདི་ལྟར་རང་ཉིད་དཔྱད་ནས་འཇུག་པ་དཔྱོད་པ་པོས་བསྐུལ་ནས་འཇུག་པར་གྱུར་གྲང་ན། སེམས་མེད་པ་ནི་རང་ཉིད་འཇུག་པ་མ་ཡིན་ནོ། །དེ་ལ་གལ་ཏེ་ལས་སེམས་ཀྱི་ངོ་བོ་ཉིད་ཡིན་ན་གཞན་གྱིས་དཔྱད་པ་དེ་ལ་དགོས་པ་ཅི་
[307b.5]ཡོད། གཞན་དུ་ན་ཇི་ལྟར་ལས་སེམས་ཀྱི་རང་བཞིན་ཡིན་ཡང་། དབང་ཕྱུག་གིས་བསྐུལ་ནས་འཇུག་པ་དེ་བཞིན་དུ་རྫ་མཁན་ཡང་དབང་ཕྱུག་གིས་བསྐུལ་བའི་འབྲས་བུའོ་ཞེས་ཅིའི་ཕྱིར་ཁས་མི་ལེན། འོན་ཏེ་དབང་ཕྱུག་གིས་བྱིན་གྱིས་བརླབས་པའི་འབྲས་བུ་ལ་འཇུག་
[307b.6]པ་ཡིན་ན། འོ་ན་ནི་དབང་ཕྱུག་ཀྱང་དབང་ཕྱུག་གཞན་གྱིས་བྱིན་གྱིས་རློབ་པར་འགྱུར་རོ། །འོན་ཏེ་དབང་ཕྱུག་ནི་རང་ཉིད་ཡོངས་སུ་ཤེས་པས་འཇུག་གི་རྫ་མཁན་ནི་མི་ཤེས་པའི་ཕྱིར། རང་ཉིད་ལ་དཔྱོད་པའི་མཐུ་མེད་པས་དབང་ཕྱུག་གིས་བསྐུལ་ནས་འཇུག་པའོ། །དེའི་
[307b.7]ཕྱིར། མི་ཤེས་སྐྱེ་བོ་རང་དབང་མེད། །བདག་དེས་སྡུག་བསྔལ་དུ་འགྱུར་བ། །དབང་ཕྱུག་གིས་ནི་བསྐུལ་བ་ལས། །མཐོ་རིས་དང་ནི་ངན་འགྲོར་འགྲོ། །ཞེས་སྨྲས་པ། དེ་ནི་བདེན་པ་མ་ཡིན་ཏེ། དེ་ཐམས་ཅད་ཤེས་པར་མི་འགྲུབ་པའི་ཕྱིར་རོ། །འོན་ཏེ་རྒྱུ་ལས་
[308a]
[308a.1]འབྲས་བུ་ཡོངས་སུ་ཤེས་པར་འདོད་པ་དེ་ལྟར་ན་ཡང་གཅིག་ལ་གཅིག་བརྟེན་པར་འགྱུར་ཏེ། ཐམས་ཅད་མཁྱེན་པ་སྒྲུབ་པ་ན། བྱ་བ་བྱེད་པ་ཡིན་ཞིང་བྱ་བ་བྱེད་པ་ཉིད་ལས་ཀྱང་ཐམས་ཅད་མཁྱེན་པ་སྒྲུབ་པའི་ཕྱིར་རོ། །གཞན་ཡང་གལ་ཏེ་དབང་ཕྱུག་གིས་
[308a.2]བསྐུལ་བའི་ལས་ལས་འབྲས་བུ་སྐྱེ་བ་དེ་ལྟ་ན་ཡང་ཆོས་ཉིད་ནི་རྗེས་སུ་གནོད་པར་འགྱུར་གྱི། ཆོས་མ་ཡིན་པ་ཇི་ལྟར་གནོད་པར་འགྱུར། འཁོར་བ་ཉིད་དུ་སྐྱེས་པ་ལ་ལེགས་པ་སྟེར་བས་གཞན་ལ་ཕན་པ་བྱེད་པར་འགྱུར་རོ། དབང་ཕྱུག་ནི་འདོད་ཆགས་དང་བྲལ་བ་དང་
[308a.3]བྱེད་པ་དང་ལྡན་ན། ཡང་ཇི་ལྟར་འཇིག་རྟེན་པ་ལ་ཆོས་མ་ཡིན་པ་གནོད་ཅིང་མི་ཕན་པ་སྟེར་བ་ཡིན། ཆོས་མ་ཡིན་པ་དེ་ནི་འཇིག་རྟེན་ལས་ཀྱིས་བསྐུལ་ཞིང་སྡུག་བསྔལ་བསྐྱེད་པ་མ་ཡིན་ནམ་ཞེ་ན། དེ་ལྟ་ན་ཡང་། འཁོར་བ་དབང་ཕྱུག་ལས་མ་ཡིན་པར་འགྱུར་རོ། །དབང་ཕྱུག་གི་
[308a.4]འདོད་པ་མ་གཏོགས་པར་ལས་གཅིག་པུ་ལས་འབྲས་བུ་སྐྱེ་བ་མ་ཡིན་པར་སྨྲ་ན། དེ་ལྟ་ན་ཡང་ལོག་པར་རྟོགས་པ་ཉིད་དོ། །དེ་ལྟ་བས་ན་སྤྱི་བསྒྲུབ་པར་བྱ་བ་ལ་འདོད་པ་གྲུབ་པའོ། །འོན་ཏེ་ཕུལ་དུ་བྱུང་བའི་བློ་དང་ལྡན་པ་སྔོན་དུ་སོང་བ་ཉིད་སྒྲུབ་པར་བྱེད་ན། དེའི་ཚེ་དཔེ་མ་གྲུབ་
[308a.5]པར་འགྱུར་ཏེ། ཐམས་ཅད་མཁྱེན་པའི་བྱེད་པ་པོ་སྔོན་དུ་འགྲོ་བ་ཉིད་གང་དུ་ཡང་རྗེས་སུ་འགྲོ་བ་མ་ཡིན་ནོ། །འདོད་པའི་ཡུལ་དུ་བྱེད་པའི་བསྒྲུབ་བྱ་ཉིད་ནི་བརྗོད་པ་ཙམ་གྱིས་བྱེད་པ་པོ་སྔོན་དུ་འགྲོ་བར་སྟོན་པ་ནི་མ་ཡིན་ཏེ། དེ་ལ་ལོག་པར་རྟོགས་པ་ལ་རྒྱུ་མེད་པའི་ཕྱིར་རོ། །ད་ནི་
[308a.6]གཏན་ཚིགས་ཀྱི་སྐྱོན་བཤད་པར་བྱ་སྟེ། ཡང་ན་ཐེ་ཚོམ་ཟ་བ་ཡིན་ཞེས་དེ་ལ་སྡོད་ཅིང་འཇུག་པ་དང་། དོན་བྱ་བ་བྱེད་པ་ལ་ནི་ཤིན་ཏུ་གསལ་བར་མ་ངེས་པ་ཉིད་དོ། །དབང་ཕྱུག་ནི་སྡོད་ཅིང་འཇུག་པ་དང་། དོན་བྱེད་པ་ཅན་གྱི་བྱེད་པ་པོ་གཞན་གྱིས་བྱས་པ་ནི་མ་ཡིན་ནོ། །འོན་ཏེ་འདིས་
[308a.7]སེམས་དང་ལྡན་པ་ཡིན་ན། འོ་ན་ནི་བདེ་བ་དང་། སྡུག་བསྔལ་ཉམས་སུ་མྱོང་བའི་སྲོག་ཆགས་ཀྱང་སེམས་དང་ལྡན་ཡང་དབང་ཕྱུག་གིས་བྱིན་གྱིས་བརླབས་པ་མ་ཡིན་ཏེ། ཐམས་ཅད་ཤེས་པ་ནི་རང་དབང་དུ་མ་གྲུབ་པའོ་ཞེས་བསྟན་ཏོ། །དབྱིབས་ཀྱི་ཁྱད་པར་ནི་ཐེ་ཚོམ་ཟ་བའི་མ་
[308b]
[308b.1]ངེས་པ་ཡིན་ཏེ། འདི་ལྟར་དབྱིབས་ཀྱི་ཁྱད་པར་ལ་ཕན་འདོགས་པར་འགྱུར་ཡང་སེམས་དང་ལྡན་པ་བྱིན་གྱིས་བརླབས་པ་མ་ཡིན་པ་འདི་ལ་འགལ་བ་ཅི་ཡོད། དོན་བྱེད་པ་ལ་སོགས་པ་ཡང་ལྷག་མ་དང་ལྡན་པར་མཚུངས་སོ། །མ་ངེས་པ་དེ་དག་དང་ལྡན་པའི་ཕྱིར་དེ་དག་ནི་གཏན་ཚིགས་
[308b.2]སམ། རྟོགས་པར་བྱེད་པ་མ་ཡིན་ནོ། །ཡང་ན་ཐེ་ཚོམ་ཟ་བ་དང་མ་གྲུབ་པར་འགྱུར་རོ། །དབྱིབས་ནི་སེམས་ལས་སྐྱེས་པར་དམིགས་པ་མ་ཡིན་ནམ། རི་ལ་སོགས་པའི་དབྱིབས་ཀྱང་རྒྱུ་སེམས་ལས་མ་རྟོགས་པར་ཇི་ལྟར་སྐྱེ་བར་འགྱུར་ཏེ། དཔེར་ན་མེ་ཡིས་བསྐྱེད་
[308b.3]པའི་དུ་བ་མེ་མ་རྟོགས་པར་སྐྱེ་བ་མ་ཡིན་ཏེ། འབྲས་བུ་ཉིད་མ་ཡིན་པར་ཐལ་བར་འགྱུར་བའི་ཕྱིར་རོ། །དེ་བཞིན་དུ་དབྱིབས་ནི་ཇི་ལྟར་སེམས་མ་རྟོགས་པར་འབྱུང་བར་འགྱུར་ཞེ་ན། འདིར་དེ་བཟློག་པའི་ཕྱིར། བྱིན་རློབ་ཡོད་མེད་རྗེས་འཇུག་ཅན། །བཀོད་སོགས་ཅི་འདྲ་
[308b.4]བར་གྲུབ་ལ། །དེ་ལ་རྗེས་སུ་དཔོག་གང་ཡིན། །དེ་ནི་རིགས་པ་ཉིད་ཡིན་ནོ། །ཞེས་བྱ་བ་ལ་འབྲས་བུ་ཉིད་ཙམ་མམ། དབྱིབས་ཉིད་ཙམ་གྱིས་ནི་མ་ཡིན་ཏེ། མངོན་པར་འདོད་པའི་རྒྱུ་མཚན་རྟོགས་པའི་རྟགས་མེད་ན་མ་ཡིན་ནོ། །འོན་ཀྱང་བཀོད་པ་ལ་སོགས་པ་ཅི་འདྲ་བར་
[308b.5]ངེས་པ་སྟེ། འབྲས་བུ་ནི་བྱིན་གྱིས་རློབ་པ་ཡོད་པ་དང་མེད་པ་དག་གི་རྗེས་སུ་འཇུག་ཅིང་རྗེས་སུ་འགྲོ་བ་དང་། ལྡོག་པ་ལ་རག་ལས་པ་སྟེ་དེ་དང་ལྡན་པའོ། །དེ་བས་ན་བཀོད་པ་ལ་སོགས་པ་ངེས་པ་ལས་གང་བློ་དང་ལྡན་པའི་རྒྱུ་སྔོན་དུ་སོང་བ་ཉིད་ཡང་ཐོག་ལ་སོགས་པ་ལ་རྗེས་སུ་
[308b.6]དཔོག་པ་དེ་ནི་རིགས་པ་སྟེ་མཛེས་པའོ། །འདི་ལྟར་དོན་བྱེད་པར་མ་མཐོང་བར་ཡང་། ཡང་ཐོག་ལ་སོགས་པ་མཐོང་བའི་ཕྱིར་བློ་ཡིས་བྱས་པ་ཡིན་པར་དཔག་གི །རི་ལ་སོགས་པའི་དབྱིབས་ཀྱི་ཁྱད་པར་ཡོད་པ་ནི་སེམས་ཀྱིས་བསྐྱེད་པ་ཉིད་དུ་མཐོང་བ་ནི་མ་ཡིན་ནོ། །དེ་ལྟ་ནི་
[308b.7]འགྱུར་མོད་ཀྱི། གང་གི་ཕྱིར་རི་ལ་སོགས་པའི་དབྱིབས་མཐོང་བར་གྱུར་ཀྱང་། སེམས་ཀྱིས་བསྐྱེད་པ་ཉིད་དུ་ངེས་པར་འགྱུར་བ་ནི་མ་ཡིན་ཏེ། དེ་ལྟ་བས་ན་བསྒྲུབ་པར་བྱ་བ་སྟེ། དཔེར་ན་ཡོད་པའི་དོན་མཐོང་ཡང་། མི་རྟག་པ་ཉིད་དུ་མ་ངེས་པས་རྗེས་སུ་དཔོག་པ་བཞིན་ནོ་ཞེ་ན།
[309a]
[309a.1]ཡོད་པ་ལ་སོགས་པའི་རྟགས་ངེས་པ་ནི་འབྲེལ་པ་ངེས་པར་འཛིན་པ་མེད་པ་ལས་མི་རྟག་པ་ལ་སོགས་པ་ངེས་པ་མ་ཡིན་པའི་ཕྱིར་འདིར་འཁྲུལ་པར་རིགས་པ་མ་ཡིན་ནམ། འདི་ནི་ར་ལ་སོགས་པའི་དབྱིབས་རིགས་པ་ལ་བློ་དང་ལྡན་པའི་རྒྱུ་མེད་ན་མི་འབྱུང་
[309a.2]བ་དབྱིབས་ཀྱི་ཁྱད་པར་དྲན་པར་ཡོད་ན་ཅིའི་ཕྱིར་རྗེས་སུ་དཔོག་པ་འབྱུང་བ་མ་ཡིན། ཚིག་གིས་ཀྱང་ཚུལ་གསུམ་དྲན་པར་བྱེད་དེ་དེ་ནི་སྔོན་དུ་ཡོད་པར་ངེས་པ་འགྲོ་ན། དེ་ཡོད་པ་ནི་མ་ཡིན་ཏེ། དབྱིབས་ཀྱི་ཁྱད་པར་ནི་བྱེད་པ་པོ་མེད་པར་འབྱུང་བས་མ་གྲུབ་པོ། །དེ་དག་གི་ནི་དབྱིབས་ཀྱི་
[309a.3]ཁྱད་པར་རྟགས་མ་ཡིན་པར་བསྟན་ནོ། །དེ་ལྟར་འགྱུར་མོད་ཀྱི་ཁྱད་པར་སྤངས་པའི་སྤྱི་དབྱིབས་ཀྱི་རྟགས་ཡོད་ན་ཁྱད་པར་ནི་རྟགས་མ་ཡིན་པའི་ཕྱིར་ཏེ་རྗེས་སུ་འགྲོ་བ་དང་བྲལ་བས་སོ་སྙམ་དུ་སེམས་ན་དེའི་ཕྱིར། དངོས་ཐ་དད་ལ་རབ་གྲུབ་པ། །སྒྲ་མཚུངས་པས་ཐ་དད་མེད་ཕྱིར། །རྗེས་
[309a.4]དཔོག་རིགས་པ་མ་ཡིན་ཏེ། །རྫས་སྔོན་པོ་ལས་མེ་དཔོག་བཞིན། །ཞེས་བྱ་བ་སྨོས་ཏེ། སྤྱིའི་རྟགས་དེ་ཉིད་ཀྱང་བསྒྲུབ་བྱ་མེད་ན་མི་འབྱུང་བ་དང་། འབྲེལ་པ་མེད་པས་ཡང་དངོས་པོ་ཐ་དད་པ་ལ་སྟེ། ཡོད་པའི་ཁྱད་པར་བུམ་པ་ལ་སོགས་པ་ལ་སེམས་ལས་སྐྱེས་པར་གྲུབ་ཀྱི། རི་ལ་སོགས་
[309a.5]པ་ལ་རྗེས་སུ་དཔོག་པ་ནི་རིགས་པ་མ་ཡིན་ནོ། །ཅིའི་ཕྱིར་ཞེ་ན། སྒྲ་མཚུངས་པ་སྟེ། མངོན་པར་བརྗོད་པ་མཚུངས་པས་གང་ཐ་མི་དད་པ་ནི་རྣམ་པ་གཅིག་ཏུ་ཤེས་པ་སྟེ་དབྱིབས་མཚུངས་པའོ། །དེ་ཇི་ལྟ་བུ་ཞེ་ན། དཔེར་ན་སྔོན་པོར་མཚུངས་པའི་རྫས་ནི་མེ་དཔོག་པའི་རྟགས་མ་
[309a.6]ཡིན་ཏེ། མེ་ངེས་པར་འདོད་པ་ལ་སྔོན་པོའི་ཁྱད་པར་ངེས་པར་གཟུང་བར་བྱས་ན་མེ་མེད་ན་མི་འབྱུང་བའི་དངོས་པོ་ཉིད་གང་ཡིན་པ་དེ་རྟོགས་པར་བྱེད་པ་ཡིན་ནོ། །སྔོན་པོ་ཉིད་ཙམ་མཚུངས་པ་ནི་ཁང་པ་སྐྱ་བོ་ལའང་ཡོད་པའི་ཕྱིར་རྟོགས་པར་བྱེད་པ་མ་ཡིན་ནོ། །རྫས་སྔོན་པོ་ལ་མེ་རྗེས་
[309a.7]སུ་དཔོག་པ་ལ་གནོད་པ་ཡོད་དེ། དེ་དང་འགལ་བའི་མཁར་སྐྱ་བོ་ལ་སོགས་པ་མཐོང་བ་མ་ཡིན་ནམ། དབྱིབས་མཚུངས་པ་འདི་ལ་སེམས་ལས་སྐྱེས་པ་ཉིད་དུ་དཔོག་པ་ལ་གནོད་པ་མ་མཐོང་བའི་ཕྱིར་དེ་ཇི་ལྟར་རྗེས་སུ་དཔོག་པ་མིན་ཞེ་ན། འདིར་སྨྲས་པ། དེ་ལྟ་མིན་ན་རྫ་མཁན་
[309b]
[309b.1]གྱིས། །བུམ་པ་ལ་སོགས་འཇིམ་པ་ཡི། །འགྱུར་བ་འགའ་ཞིག་བྱེད་པའི་ཕྱིར། །གྲོག་མཁར་ཡང་བྱས་དེས་གྲུབ་འགྱུར། །གནོད་པ་མེད་པ་ཉིད་ཀྱིས་རྗེས་སུ་དཔོག་པ་སྐྱེ་བ་ནི་མ་ཡིན་ཏེ། འོན་ཀྱང་འབྲེལ་པ་ངེས་པ་ལས་སོ། །གཞན་དུ་འབྲེལ་པ་ངེས་པ་མ་གཏོགས་པར་དབྱིབས་
[309b.2]མཚུངས་པ་ལས་སེམས་ཀྱིས་བྱས་པ་ཉིད་དུ་རྗེས་སུ་དཔོག་ན། རྫ་མཁན་གྱིས་འགའ་ཞིག་ཏུ་འཇིམ་པའི་འགྱུར་བ་བུམ་པ་ལ་སོགས་པ་བྱས་པ་ན་གྲོགས་མཁར་ལ་རྫ་མཁན་གྱིས་བུམ་པ་བཞིན་བྱས་པར་དཔོག་པར་འགྱུར་ཏེ། འཇིམ་པའི་འགྱུར་བ་ཡིན་པའི་ཕྱིར་རོ། །འདི་སྙམ་
[309b.3]དུ་དགོངས་ཏེ་གྲོག་མཁར་ལ་རྫ་མཁན་གྱིས་བསྐྱེད་པ་ཉིད་ལ་གནོད་པ་མ་མཐོང་བས་རྗེས་སུ་དཔག་པར་འགྱུར་རོ། །རྫ་མཁན་གྱིས་བྱས་པ་ལས་བྱུང་བར་མ་མཐོང་བ་ཉིད་གནོད་པ་ཅན་མ་ཡིན་ནམ་ཞེ་ན། དེ་ལྟ་མོད་ཀྱི། འོན་ཀྱང་ལྗོན་ཤིང་ལ་སོགས་པ་སེམས་ལས་བྱུང་བ་ཉིད་དུ་མ་
[309b.4]དམིགས་པའི་ཕྱིར། དབང་ཕྱུག་གིས་བྱས་པ་ཉིད་ལ་ཇི་ལྟར་གནོད་པ་མེད་པ་ཡིན། དེ་ལྟ་ན་འོ་ན་ནི་དམིགས་པར་མ་གྱུར་པའི་ལས་ཀྱིས་ཀྱང་ཇི་ལྟར་ནུས་པ་ཡིན་ཞེ་ན། འགྲོ་བ་སྣ་ཚོགས་པར་མཐོང་བའི་ཕྱིར། ལས་ཡོད་པར་བཤད་པར་བྱའོ། །དེའི་ཕྱིར་དབྱིབས་མཚུངས་པ་ནི་
[309b.5]རྟགས་མ་ཡིན་ཏེ་འབྲེལ་བ་དང་བྲལ་བའི་ཕྱིར་རོ་ཞེས་བྱ་བར་གནས་སོ། །འདི་ནི་འབྲས་བུ་དང་མཚུངས་པའི་ལྟག་ཆོད་མ་ཡིན་ནམ། དཔེར་ན་བརྩལ་མ་ཐག་ཏུ་འབྱུང་བ་ཉིད་དུ་རྟོགས་པ་འདི་ཅི་སྟེ་བརྩལ་མ་ཐག་ཏུ་འབྱུང་བ་དངོས་པོ་ཡིན་ནམ། འོན་ཏེ་ཤེས་པ་ཡིན། དེ་ལ་བརྩལ་མ་
[309b.6]ཐག་ཏུ་འབྱུང་བ་དངོས་པོ་ཡིན་ན་ནི་མ་གྲུབ་པ་སྟེ། རྟག་པ་ཉིད་དུ་ཁས་བླངས་པ་ལས་རྒྱུ་ཡོད་པ་དང་ལྡན་པ་ནི་རྟག་པའོ་ཞེས་སྨྲས་པས་སོ། །འོན་ཏེ་གསལ་བར་བྱས་པས་ནི་བརྩལ་མ་ཐག་ཏུ་འབྱུང་བ་ཉིད་ཡིན་པ་དེ་ལྟ་ན་ཡང་མི་རྟག་པ་མ་ཡིན་ཏེ། རྩོལ་བས་ཡོད་པ་ཉིད་དུ་གསལ་
[309b.7]བར་བྱེད་པའི་ཕྱིར་རོ། །ཇི་ལྟར་སྒྲོན་མས་བུམ་པ་གསལ་བར་བྱེད་པ་བཞིན་ནོ། །དེ་བཞིན་དུ་དབྱིབས་ཀྱི་ཁྱད་པར་འདིར་ཡང་ཡིན་ཏེ། ཅི་བུམ་པ་ལ་ཡོད་པའི་དབྱིབས་ཡིན་ནམ། འོན་ཏེ་ས་ལ་སོགས་པའི་ཡིན་ཞེས་རྟོགས་པ་ནི་འབྲས་བུ་དང་མཚུངས་པའི་ལྟག་ཆོད་ཡིན་
[310a]
[310a.1]ནོ་ཞེ་ན། འདིར་སྨྲས་པ། བསྒྲུབ་བྱའི་རྗེས་འགྲོ་ཕྱིར་འབྲས་བུ། །སྤྱིས་ཀྱང་སྒྲུབ་པར་བྱེད་ཡིན་ན། །འབྲེལ་པ་ཅན་ནི་ཐ་དད་པས། །ཐ་དད་སྐྱོན་བརྗོད་འབྲས་མཚུངས་འདོད། །ཅེས་བྱ་བ་ལ། སྤྱིས་ཀྱང་རྩོལ་བ་ལས་བྱུང་བའི་འབྲས་བུ་བྱེད་ཀྱི་ཡུལ་ལ་
[310a.2]སྐྱོན་གང་ཡིན་པ་དེ་ནི་འབྲས་བུ་མཚུངས་པར་འདོད་དོ། །སྐྱོན་ཇི་ལྟ་བུ་ཞེ་ན། ཐ་དད་པར་བརྗོད་པའི་སྐྱོན་ཏེ། ཐ་དད་པར་བརྗོད་པ་ནི་བཀོད་པ་སྟེ། འབྲས་བུ་ཞེས་བྱ་བ་ཅི་མངོན་པར་གསལ་བ་ལ་གནས་པ་མ་ཡིན་ནམ། འོན་ཏེ་སྐྱེ་བ་ལ་གནས་པ་ཡིན་ཞེས་འབྲེལ་པ་ཅན་
[310a.3]ཐ་དད་པ་ལས་ཐ་དད་པར་བརྗོད་པའི་སྐྱོན་གང་ཡིན་པ་དེ་ནི། འབྲས་བུ་མཚུངས་པར་འདོད་ཀྱི་ཡང་དག་པའི་སྐྱོན་ནི་མ་ཡིན་ནོ། །ཅིའི་ཕྱིར་ཞེ་ན། བསྒྲུབ་བྱའི་སྟེ། མི་རྟག་པའི་རྗེས་སུ་འགྲོ་བའི་ཕྱིར་ཏེ་ཁྱབ་པའི་ཕྱིར་རོ། །འདིའི་དོན་ནི་འབྲས་བུ་རྩོལ་བ་ལས་བྱུང་བ་ཉིད་ནི་གལ་
[310a.4]ཏེ་སྐྱེ་བ་ལ་གནས་སམ་མངོན་པར་གསལ་བ་ལ་གནས་པ་དེ་ལྟ་ན་ཡང་རྩོལ་བའི་དེ་མ་ཐག་ཏུ་བྱུང་བ་ཉིད་སྤྱིར་རྟག་པ་ལ་མི་སྲིད་དོ། །ཇི་ལྟར་ཡང་རྟག་པ་དང་འགལ་བའི་རྩོལ་བ་ལས་བྱུང་བ་ཉིད་ཇི་ལྟ་བ་དེ་བཞིན་དུ་ལེའུ་བཞི་པ་ལས་རྟོགས་པར་བྱའོ། །དེ་ལྟ་བས་ན་སྤྱི་གཟུང་བའི་
[310a.5]རྩོལ་བ་ལས་བྱུང་བ་ཉིད་འབྲེལ་པ་ཐ་དད་པས། ཐ་དད་པས་བརྗོད་པ་ནི་ལྟག་ཆོད་ཉིད་ཡིན་ཏེ། གལ་ཏེ་ཡང་རྩོལ་བ་ལས་བྱུང་བའི་ཤེས་པ་དང་རྟག་པ་ལ་སོགས་པ་འགལ་བ་མེད་པ་དེའི་ཚེ་མ་ངེས་པ་ཉིད་ཡིན་ནོ། །གལ་ཏེ་བློ་སྔོན་དུ་བྱེད་པའི་རྗེས་སུ་འགྲོ་བའི་ཤེས་པ་ཡོད་པ་ནི་མ་
[310a.6]ཡིན་པ་དེ་ལྟ་ན་ཡང་དབྱིབས་ཀྱི་སྒྲ་བརྗོད་པར་བྱ་བ་ཉིད་ཀྱི་རྗེས་སུ་འགྲོ་བ་ཉིད་དེ། དབྱིབས་དབྱིབས་ཞེས་བྱ་བ་མངོན་པར་རྗོད་པར་བྱེད་པ་མཐོང་བའི་ཕྱིར་རོ། །དེའི་ཕྱིར་དབྱིབས་ཀྱང་འབྲེལ་བ་ཐ་དད་པས་ཅི་དབྱིབས་འདི་བུམ་པ་ལ་གནས་པའི་རྟགས་ཡིན་ནམ། འོན་ཏེ་རི་ལ་སོགས་
[310a.7]པ་ལ་གནས་པ་ཡིན་ཞེས་གཏན་ཚིགས་ལ་རྟོགས་པ་གང་ཡིན་པ་དེ་ནི་སྐྱོན་ལྟར་སྣང་བ་མ་ཡིན་ནམ་ཞེ་ན། འདིར་སྨྲས་པ། རིགས་གཞན་ལ་ནི་རབ་གྲུབ་པའི། །སྒྲ་ཡི་སྤྱི་ནི་མཐོང་བའི་ཕྱིར། །སྒྲུབ་བྱེད་མི་རིགས་ངག་ལ་སོགས། །གོ་ཉིད་ཡིན་ཕྱིར་རྭ་ཅན་གཞན། །ཞེས་བྱ་བ་
[310b]
[310b.1]ལ། ཇི་ལྟར་ཚིག་ལས་ཐ་དད་པའི་རིགས་གཞན་ལ་རབ་ཏུ་གྲུབ་པས་རྭ་དང་ལྡན་ཞེས་ཏེ། ཚིག་ལ་གོ་ཞེས་བྱ་བས་ནི་མ་ཡིན་ཏེ། ཚིག་ལ་ཐ་མི་དད་པར་དཔག་པར་བྱའོ། །དེ་བཞིན་དུ་ལྗོན་ཤིང་ལ་སོགས་པ་དང་མཚན་ཉིད་མི་མཐུན་པ་ལ་སེམས་དང་ལྡན་པར་གྲུབ་ཀྱང་དབྱིབས་ཀྱི་སྒྲ་
[310b.2]མཚུངས་པར་མཐོང་བ་ལས་རི་ལ་སོགས་པ་ལས་སེམས་སྒྲུབ་བྱེད་གྲུབ་པ་ནི་མ་ཡིན་ནོ། །དེའི་ཕྱིར་འདིས་ནི་རྗོད་པར་བྱེད་པ་ནི་རྟགས་མ་ཡིན་པར་བསྟན་ཏེ། དོན་གྱི་སྤྱི་ནི་རྟགས་ཇི་ལྟ་བ་དེ་བཞིན་དུ་བརྗོད་དོ། །སྒྲ་ཡང་དབྱིབས་ཀྱི་ཁྱད་པར་ལས་ཐ་དད་པའི་རི་ལ་སོགས་པ་ལ་ཇི་ལྟར་འཇུག་སྟེ། སྒྲ་
[310b.3]རྣམས་ནི་དོན་དང་འབྲེལ་པའི་ཕྱིར་རོ། །དེས་ན་སྒྲ་ལས་དབྱིབས་ཀྱི་ཁྱད་པར་གྲུབ་པ་མ་ཡིན་ནམ། དེ་ལྟ་བས་ན་སེམས་ཀྱིས་བྱས་པ་ཉིད་དོ་སྙམ་དུ་སེམས་ན་དེའི་ཕྱིར། རྗོད་པར་འདོད་པའི་གཞན་དབང་ཕྱིར། །སྒྲ་རྣམས་དོན་དང་འབྲེལ་མ་ཡིན། །དེ་ཡོད་པས་ནི་དོན་གྲུབ་ན། །
[310b.4]ཐམས་ཅད་ལས་ནི་ཐམས་ཅད་འགྲུབ། །ཅེས་བྱ་བ་ལ་སྒྲ་དེ་དག་སྲིད་པའི་ཕྱིར་མངོན་པར་འདོད་པའི་དོན་འགྲུབ་པ་སྟེ། ངེས་པར་མངོན་པར་འདོད་པའི་དོན་ཐམས་ཅད་སྲོག་དང་བཅས་པའི་འཇིག་རྟེན་ཐམས་ཅད་ཀྱིས་ཐོབ་པར་འགྱུར་རོ། །གང་གི་ཕྱིར་བརྗོད་པར་འདོད་པ་
[310b.5]གཞན་གྱི་དབང་གི་ཕྱིར་ཏེ། རྗོད་པར་འདོད་པ་གཞན་ལ་རག་ལས་པའི་ཕྱིར་སྒྲ་གང་ལ་མེད་པ་ཡིན་ཏེ་ཐམས་ཅད་ལ་ཡོད་དོ་ཞེས་བྱ་བའི་ཐ་ཚིག་གོ། །སྒྲ་དེའི་དོན་འགྲུབ་ན་ནི་སུ་ཡང་ཕོངས་པར་མི་འགྱུར་རོ། །དེའི་ཕྱིར་གཞན་གྱིས་ཁས་བླངས་པའི་སྒྲུབ་བྱེད་ནི་བདེན་པ་མ་
[310b.6]ཡིན་ནོ། །དེས་ནི་མི་རྟག་སྩོགས་པས་ཀྱང་། །སེར་སྐྱ་ལ་སོགས་སེམས་མེད་སོགས། །ཤུན་ལྤགས་བཤུས་ནས་འཆི་བའི་ཕྱིར། །སེམས་དང་ལྡན་པ་དཔྱད་པ་ཡིན། །ཞེས་བྱ་བ་ལས་སྒྲུབ་བྱེད་མ་གྲུབ་པ་དེས་ནི་བརྗོད་པ་མཚུངས་པའི་ཕྱིར་ཞེས་རྟགས་མེད་པ་དེ་མ་ཐག་
[310b.7]པར་བསྟན་པས་སེར་སྐྱ་ལ་སོགས་པ་ཏེ། སོགས་པའི་སྒྲས་ནི་གཅེར་བུ་པ་རྣམས་གཟུང་ངོ་། །མི་རྟག་པ་ལ་སོགས་པའི་སྒྲས་བྱས་པ་ཉིད་བསྟན་པ་ཡིན་ཏེ། སེམས་མེད་པ་ལ་སོགས་པར་དེ་དག་གིས་སྤྱོད་པ་དང་། འཆི་བ་ལ་སོགས་པ་ལས་སེམས་དང་ལྡན་པར་
[311a]
[311a.1]དཔྱོད་པར་བྱེད་དོ། །གྲངས་ཅན་ནི་མི་རྟག་པ་ལ་སེམས་མེད་པ་དང་། གཅེར་བུ་པ་ནི་ཤུན་ལྤགས་ཐམས་ཅད་བཤུས་པས་འཆི་བའི་རྟགས་ལས་ཤིང་རྣམས་སེམས་ཡོད་པར་རོ། །དེ་དག་གཉི་ག་ནི་མ་གྲུབ་པ་ཡིན་ནོ། །གྲངས་ཅན་པ་ཡང་ཡོད་པ་མ་ཡིན་པ་ལས་
[311a.2]སྐྱེ་བ་མ་ཡིན་ཏེ། ཡོད་པ་ཉིད་གསལ་བར་བྱེད་པས་ཁས་ལེན་པའི་ཕྱིར་རོ། །གང་ཡང་དངོས་པོའི་བྱས་པ་ཉིད་གང་ཡིན་པ་དེས་མི་ཤེས་པའི་ཕྱིར་ཚད་མ་མི་ཤེས་པས་རྒོལ་བ་ལ་གྲུབ་པོ་ཞེས་བརྗོད་དོ། །ཇི་ལྟར་སེམས་དང་མི་ལྡན་པ་ལ་རྟགས་མེད་པ་དེ་བཞིན་དུ་བསྟན་པར་བྱའོ། །རྟགས་གཉིས་པ་ནི་ཕྱིར་
[311a.3]རྒོལ་བ་ལ་མ་གྲུབ་པ་ཡིན་ཏེ། འདི་ལྟར་སངས་རྒྱས་པ་ནི་རྣམ་པར་ཤེས་པ་དང་། དབང་པོ་དང་། ཚེ་འགགས་པའི་མཚན་ཉིད་འཆི་བ་ཡིན་གྱི། གལ་ཏེ་ཤིང་ལ་དེ་གྲུབ་ན་ནི་སེམས་དང་ལྡན་པ་གྲུབ་པ་ཉིད་དུ་འགྱུར་བ་དེ་བས་ན་སྐམ་པ་ཙམ་ལ་འཆི་བ་ཞེས་སྨྲ་བ་དེ་ནི་ཤ་སྐམ་པ་ལ་
[311a.4]སོགས་པ་ལ་ཡང་མཐོང་བའི་ཕྱིར་རོ། །སོགས་པའི་སྒྲས་ནི་གཉིད་ལོག་པ་ལ་སོགས་པ་གཟུང་སྟེ་དེ་ནི་མ་གྲུབ་པའོ། །གཉིད་དང་ལྡན་པའི་སེམས་ཀྱི་གནས་སྐབས་ནི་གཉིད་ལོག་པ་ཞེས་བརྗོད་དེ། དེ་ལྟ་བུར་གྱུར་པའི་གཉིད་ལོག་པ་ནི་ཤིང་ལ་གྲུབ་པ་མ་ཡིན་ནོ། །ལོ་མ་འཁུམས་
[311a.5]པ་ལས་གཉིད་ལོག་པའི་སྒྲར་སྨྲ་བ་ནི་སྒྲ་བརྗོད་པ་ཙམ་ལས་དོན་གྲུབ་པ་ནི་མ་ཡིན་ནོ་ཞེས་བསྟན་ཏོ། །གལ་ཏེ་འབྲེལ་པ་ཅན་དུ་རྟོགས་པས་འབྲས་བུ་དང་། དབྱིབས་ནི་སེམས་ཀྱིས་བསྐྱེད་པ་ཉིད་ཀྱི་རྟགས་མ་ཡིན་ན། འོ་ན་ནི་བྱས་པ་ཉིད་ཀྱང་རྟགས་མ་ཡིན་པར་འགྱུར་བ་མ་ཡིན་
[311a.6]ནམ། དེ་ལ་ཡང་ཐ་དད་པར་རྟོགས་པ་ལས་འདི་ཅི་སྟེ་མེད་པ་སྐྱེད་པ་ཡིན་ནམ། འོན་ཏེ་ཡོད་པ་ཉིད་གསལ་བར་བྱེད་པ་ཡིན། དེ་ལ་བརྟག་པ་དང་པོ་ནི་གྲངས་ཅན་ལ་མ་གྲུབ་པ་ཡིན་ཞིང་། གཉིས་པ་ནི་སངས་རྒྱས་པ་ལ་མ་གྲུབ་པའི་ཕྱིར། མ་གྲུབ་པས་བྱས་པ་ནི་རྟགས་མ་ཡིན་
[311a.7]ནོ་ཞེ་ན། ལན་སྨྲས་པ། དངོས་པོའི་རང་བཞིན་མ་གྲུབ་ན། །འདི་རིགས་གཞན་དུ་གྲུབ་ན་ནི། །ཁྱད་པར་གནོད་པ་ཅན་མིན་ཏེ། །སྒྲ་ནི་ནམ་མཁའ་རྟེན་ཡིན་བཞིན། །ཞེས་བྱ་བ་ལ་དངོས་པོ་ནི་སྒྲུབ་བྱེད་དམ། ཆོས་ཅན་གྱི་རང་བཞིན་ལ་མ་གྲུབ་ན་འདི་རིག་པ་ཉིད་ཡིན་ཏེ། དེ་མ་
[311b]
[311b.1]གྲུབ་པའི་མཚན་ཉིད་དུ་བལྟ་བར་བྱའོ། །བྱས་པ་ཉིད་ལ་སོགས་པའི་སྒྲུབ་བྱེད་གྲུབ་ན། ཁྱད་པར་མེད་པ་སྐྱེད་པའམ། ཡོད་པ་གསལ་བ་ཞེས་བྱ་བ་དེ་ལྟ་བུའི་རྣམ་པ་ནི་ཁྱད་པར་གྱིས་གནོད་པ་ཅན་ལ་མ་གྲུབ་པ་ཡིན་ནོ། །དེས་ནི་འདི་སྐད་དུ། རྒྱུ་དང་རྐྱེན་འབྲེལ་པ་ཉིད་ཡོད་པ་དེའི་ཚེ། མེད་པ་
[311b.2]སྐྱེད་པ་ཉིད་ཀྱི་ཕྱིར་རམ། ཡོད་པ་ཉིད་གསལ་བ་ལས་ཁྱད་པར་སེམས་པ་ནི་མཁོ་བ་མ་ཡིན་ནོ། །མི་རྟག་པ་ཉིད་མ་རྟོགས་པར་རྣམ་པ་ཐམས་ཅད་དུ་ནམ་ཡང་དམིགས་པ་མ་ཡིན་པའི་ཕྱིར་བྱས་པ་ནི་རྟོགས་པར་བྱེད་པ་ཡིན་ནོ་ཞེས་བསྟན་པ་ཡིན་ནོ། །གལ་ཏེ་ཡང་རྟག་པ་ལ་གསལ་
[311b.3]བ་མི་སྲིད་པས་གདོན་མི་ཟ་བར་བྱས་པ་ཉིད་གོ་བར་བྱེད་པར་འགྱུར་ཏེ། གྲངས་ཅན་གྱི་གསལ་བ་ཉིད་བྱས་པའི་སྒྲར་བརྗོད་པའི་ཕྱིར་རོ། །དཔེར་ན་སྒྲ་རྣ་བའི་གཟུང་བྱ་ནི་ནམ་མཁའི་ཡོན་ཏན་དུ་མ་གྲུབ་པ་ལས་མ་གྲུབ་པར་འདྲེན་པ་ནི་མ་ཡིན་ནོ། །གྲངས་ཅན་ལ་བྱས་པ་ཉིད་བརྗོད་པ་
[311b.4]ལས་མེད་པ་བསྐྱེད་པ་ནི་གང་དུ་ཡང་མ་གྲུབ་པ་མ་ཡིན་ནམ། དེ་བས་ན་རྗོད་བྱེད་མ་གྲུབ་པས་གཞན་དོན་གྱི་རྗེས་སུ་དཔག་པར་ཇི་ལྟར་རིགས་ཤེ་ན། སྒྲ་མ་གྲུབ་ཀྱང་དངོས་པོ་ནི། གྲུབ་ན་གྲུབ་པར་འགྱུར་ཏེ་དཔེར། །འུག་པ་པ་ལ་སངས་རྒྱས་པས། །ལུས་སོགས་སྒྲུབ་བྱེད་
[311b.5]བཤད་པ་བཞིན། །ཞེས་བྱ་བ་སྨོས་ཏེ། རྗོད་པར་བྱེད་པ་ངེས་པ་མེད་ཀྱང་དངོས་པོ་ལ་རྟགས་ཀྱི་མཚན་ཉིད་གསལ་བྱེད་མི་རྟག་པ་ལ་གྲུབ་པ་ཡིན་ཏེ། རྟག་པ་ལ་གསལ་བ་མི་འཐད་པའི་ཕྱིར་རོ། །དཔེར་ན་འུག་པ་པ་སྟེ། བྱེ་བྲག་པ་ལ་སངས་རྒྱས་པས་ལུས་ལ་སོགས་པའི་
[311b.6]སྒྲུབ་པར་བྱེད་པ་སྟེ། རྟོགས་པར་བྱེད་པ་བཤད་པ་དེ་བཞིན་དུ་དེ་ལ་འདི་ནི་ཚད་མ་ཡིན་ཏེ། རྡུལ་ཕྲ་རབ་ནི་མི་རྟག་པ་སྟེ། ལུས་ཅན་ཡིན་པའི་ཕྱིར་རོ། །སོགས་པའི་སྒྲས་ནི་རེག་པར་བྱ་བ་ཡིན་པའི་ཕྱིར་གཟུང་ངོ་། །དེ་ལ་གལ་ཏེ་བྱེ་བྲག་པ་ལ་སྒྲ་མ་གྲུབ་ན་ཡང་ཀུན་དུ་
[311b.7]འགྲོ་བ་མ་ཡིན་པའི་བོང་ཚོད་ཀྱི་ལུས་ཡིན་པ་དང་། རེག་པར་བྱ་བ་རྫས་ལ་ཐ་དད་པའི་ཡོན་ཏན་སངས་རྒྱས་པས་རེག་པར་བྱ་བ་ཉིད་ལུས་ཅན་གྱི་སྒྲར་བརྗོད་དེ། རེག་པར་བྱ་བའི་སྒྲའི་རྫས་ལས་ཐ་དད་པའི་ཡོན་ཏན་གྲུབ་པ་ནི་མ་ཡིན་ནོ། །རེག་པར་བྱ་བ་དོན་ལ་གྲུབ་
[312a]
[312a.1]པའི་ཕྱིར་སྒྲུབ་བྱེད་ཡིན་ནོ། །ཇི་ལྟར་དོན་མ་གྲུབ་པ་ཉིད་དང་། མ་ངེས་པ་ལ་སོགས་པ་ནི་རྟགས་མ་ཡིན་པ་དེ་བཞིན་དུ་སྒྲ་ཡང་མ་གྲུབ་པའམ། མ་ངེས་ན་གཏན་ཚིགས་མ་ཡིན་པ་ཡིན་ནམ་ཞེ་ན། འདིར་སྨྲས་པ། དེ་ཉིད་འཁྲུལ་ལ་སོགས་ཡིན་ན། །སྒྲ་ནི་
[312a.2]འཁྲུལ་པ་མེད་ན་ཡང་། །སྒྲུབ་བྱེད་སྐྱོན་ལྡན་ཤེས་བྱ་སྟེ། །དངོས་ལས་དངོས་པོ་གྲུབ་ཕྱིར་རོ། །ཞེས་བྱ་བ་ལ་དེ་ཉིད་དེ་དོན་ལ་འཁྲུལ་པའོ། །སོགས་པའི་སྒྲས་ནི་མ་གྲུབ་པའམ། འགལ་བས་སྐྱོན་དང་ལྡན་པའི་སྒྲུབ་བྱེད་དུ་ཤེས་པར་བྱ་བའི་སྒྲ་ལ་མ་ཡིན་ཏེ། དོན་དེ་དང་འབྲེལ་
[312a.3]པ་མེད་པའི་ཕྱིར་རོ་ཞེས་བཤད་དོ། །དོན་ནི་འབྲེལ་པས་གོ་བར་བྱེད་པ་ཡིན་ཏེ། དེ་དང་བྲལ་ན་གོ་བར་བྱེད་པ་མ་ཡིན་པས་དོན་ལ་བརྟེན་པ་ཉིད་ཀྱིས་སྐྱོན་དུ་རྣམ་པར་གཞག་པར་བྱའོ། །ཡང་ན་སྒྲ་རྣམས་འཁྲུལ་པ་མེད་པར་གྲགས་པ་ཡིན་དུ་ཆུག་ན་ཡང་འཁྲུལ་པ་མེད་པའི་སྒྲ་ནི་དངོས་པོ་
[312a.4]དང་བྲལ་ན་སྒྲུབ་བྱེད་སྐྱོན་ཅན་ནོ། །ཅིའི་ཕྱིར་ཞེ་ན། དངོས་པོ་ལས་དངོས་པོ་གྲུབ་པའི་ཕྱིར་ཏེ། དངོས་པོ་ཉིད་དངོས་པོའི་གོ་བྱེད་དེ་འབྲེལ་པའི་ཕྱིར་ཡིན་གྱི། སྒྲ་ནི་མ་ཡིན་ཏེ། འཁྲུལ་པའི་ཕྱིར་རོ། །འོ་ན་ནི་མ་འཁྲུལ་པར་ཇི་ལྟར་འགྱུར་ཞེ་ན། གྲགས་པའི་ཁྱད་པར་ཅན་གྱི་ཡུལ་
[312a.5]ལ་ངེས་པར་བྱེད་པའི་ཕྱིར་རོ། །དེ་ལྟ་བས་ན་རྟོགས་པར་འདོད་པས་འཁྲུལ་པ་མེད་པ་ཉིད་ཡིན་པ་དེ་ལྟ་ན་ཡང་འབྲེལ་པའི་རྒྱུ་དང་བྲལ་བའི་ཕྱིར་སྒྲ་རྣམས་གོ་བར་བྱེད་པ་མ་ཡིན་ནོ། །དེ་ལ་གླང་ཕྲུག་གི་བྱེ་བྲག་ནི་མཆེ་བ་ཅན་ཏེ། ལག་ཅན་ཡིན་པའི་ཕྱིར་རོ་ཞེས་བྱ་བ་འདི་ནི་དཔེར་བརྗོད་
[312a.6]པ་སྟེ། འདིར་ཡང་གཏན་ཚིགས་ཀྱི་དོན་གླང་པོ་ཆེ་དང་འབྲེལ་པ་ལ་བརྗོད་པར་འདོད་དོ། །ལག་པ་དང་ལྡན་པ་ནི་རྭ་ཅན་ལས་ཐ་དད་པའི་སྐྱེས་བུ་ལ་སོགས་པ་ཡོད་པའི་ཕྱིར་རྟགས་འཁྲུལ་པ་ཡིན་ནོ། སྒྲ་ནི་གླང་པོ་ཆེ་ལ་འཇུག་པར་གྲགས་ཏེ། ལག་པ་ཅན་ཙམ་དོན་ནི་མ་ཡིན་
[312a.7]ནོ། །རྟོགས་པ་པོས་མངོན་པར་ཞེན་པའི་དབང་གིས་སྒྲ་མ་འཁྲུལ་པ་ཉིད་ཡིན་ནོ། །དེ་ལྟ་བས་ན་མི་རྟག་ན་ཡང་ཚད་མ་ཡིན་ནོ་ཞེས་བྱ་བ་འདི་ལེགས་པར་གནས་སོ། །ཡང་གི་སྒྲས་ནི་རྟག་པ་ཡང་ངོ་། །གལ་ཏེ་ཡང་དབང་ཕྱུག་ལ་སྒྲུབ་པར་བྱེད་པའི་ཚད་མ་གོ་བྱེད་མེད་པ་དེ་
[312b]
[312b.1]ལྟ་ན་ཡང་དབང་ཕྱུག་གིས་བསྐྱེད་པའི་སྣ་ཚོགས་ལ་གནོད་པར་བྱེད་པ་མེད་པ་མ་ཡིན་ནམ། དབང་ཕྱུག་དེ་ཇི་ལྟར་མེད་པར་ངེས་ཤེ་ན། འདིར་སྨྲས་པ། ཇི་ལྟར་དངོས་དེ་རྒྱུ་ཡིན་ལ། །དེ་ལྟར་དེ་ཉིད་གང་གི་ཚེ། །རྒྱུ་མིན་དེ་ནི་གང་གི་རྒྱུར། །འདོད་ལ་རྒྱུ་མིན་ཅིས་མི་
[312b.2]འདོད།། །།ཚད་མ་རྣམ་འགྲེལ་གྱི་འགྲེལ་པ་ལས། བམ་པོ་གསུམ་པ། ཇི་ལྟར་རང་བཞིན་གང་གིས་སྣ་ཚོགས་པའི་རྒྱུ་དེ་དབང་ཕྱུག་ཅེས་བྱ་བའི་དངོས་པོ་ཡིན་པ་དེ་ལྟར་རང་བཞིན་དེ་ཉིད་ཀྱི་རྒྱུ་མ་ཡིན་པ་དེའི་ཚེ་དེའི་རྒྱུ་ཚད་མ་གང་གིས་འདོད་ཅིང་། རྒྱུ་མ་
[312b.3]ཡིན་པ་ཉིད་དུ་ཅིའི་ཕྱིར་མི་འདོད་འདིའི་དགོངས་པ་ནི་འདོད་ཆགས་ལ་སོགས་པ་དང་བྲལ་བ་དབང་ཕྱུག་རྩོམ་པར་བྱེད་པ་ལ་སྔར་རྒྱུ་མེད་པ་དེ་བཞིན་དུ་རྩོམ་པར་བྱེད་པའི་ཚེ་ཡང་རྒྱུ་མེད་པ་ཉིད་དོ། །དབང་ཕྱུག་གི་སེམས་བྱེད་པ་ལ་ཞུགས་པ་ན། སྲོག་ཆགས་རྣམས་སྡུག་བསྔལ་ལ་
[312b.4]འཇུག་པར་འདོད་པ་ནི་མེད་དོ། །ཡང་ན་ལས་ཀྱི་སྟོབས་ཉིད་ཀྱིས་གསོན་པའི་འཇིག་རྟེན་བདེ་བ་དང་། སྡུག་བསྔལ་བར་འགྱུར་གྱི་དབང་ཕྱུག་གིས་ནི་མ་ཡིན་ནོ། །ལས་ཀྱི་འཇུག་པ་ནི་རང་གི་འབྲས་བུ་སྐྱེད་པས་དབང་ཕྱུག་གི་འདོད་པ་མེད་ན་མེད་པར་བསྟན་པ་མ་ཡིན་ནམ་ཞེ་ན།
[312b.5]དེའི་ཕྱིར་འདོད་ཆགས་དང་བྲལ་བ་ནི་གཟུ་བོ་ཉིད་ཡིན་གྱི་ཅིའི་ཕྱིར་བདེ་བ་དང་། སྡུག་བསྔལ་ལ་སྐུལ་ཞིང་འགྱེགས་པ་ལ་འཇུག་པར་བྱེད་པ་ཡིན། ཡང་ན་ཁྱབ་པ་ཉིད་དང་། གཅིག་པུ་ཉིད་ཀྱི་དབང་ཕྱུག་ཅེས་བྱ་བའི་དངོས་པོ་དེ་ཉིད་ཐམས་ཅད་དུ་རྒྱུ་ཡིན་ན། དེ་བཞིན་དུ་
[312b.6]དེ་ཉིད་ཁྱབ་པ་ཉིད་དང་། གཅིག་པ་ཉིད་ཀྱི་ནམ་མཁའ་ལ་སོགས་པ་ལ་དེ་གང་གི་ཚེ་རྒྱུ་མིན་པ་ཡིན་པ་ན་དེའི་ཚེ། དབང་ཕྱུག་ཅེས་བྱ་བ་ལ་གང་གིས་རྒྱུར་འདོད་པར་བྱ་སྟེ་ནམ་མཁའ་བཞིན་དུ་རྒྱུ་མ་ཡིན་པར་ཅིའི་ཕྱིར་མི་འདོད། འོན་ཏེ་འབྲས་བུ་བྱེད་འདོད་པ་དེ་ལ་ཡོད་ཅིང་
[312b.7]ནམ་མཁའ་ལ་སོགས་པ་ལ་དེ་དང་བྲལ་བའི་ཕྱིར་རྒྱུ་མ་ཡིན་པ་ཉིད་ཅེས་བྱའོ་ཞེ་ན། བྱེད་འདོད་པ་ཙམ་ཉིད་ཀྱིས་སྣ་ཚོགས་དབང་ཕྱུག་གི་འབྲས་བུ་ནི་མ་ཡིན་ནོ། །འོན་ཀྱང་བྱེད་པས་ཡིན་ན། དེ་ཡང་མེད་པར་རྗེས་ཐོགས་སུ་བཤད་པར་བྱའོ། །བྱེད་འདོད་པས་ནི་
[313a]
[313a.1]འབྲས་བུ་འབྱུང་བར་འགྱུར་བ་སྟེས་དབང་དུ་ཡང་མི་སྲིད་དོ། །གལ་ཏེ་ཡང་ཁོ་བོ་ཅག་གིས་དབང་ཕྱུག་བྱ་བ་བྱེད་པར་མ་མཐོང་ཡང་དེ་ཁོ་ན་ཉིད་མཐོང་བས་དེ་གཟིགས་པ་མ་ཡིན་ནམ་ཞེ་ན། དེ་ནི་རིགས་པ་མ་ཡིན་ཏེ། དབང་
[313a.2]ཕྱུག་དུ་མར་རྟོགས་པར་ཐལ་བར་འགྱུར་བའི་ཕྱིར་རོ། །དབང་ཕྱུག་དུ་མར་འགྱུར་མོད་སྐྱོན་ཅི་ཡོད་ཅེ་ན། མཚོན་དང་སྨན་གྱི་འབྲེལ་བ་ལས། །ནག་པའི་རྨ་ནི་འཚོ་བ་ན། །འབྲེལ་མེད་སྡོང་དུམ་ཅི་ཡི་ཕྱིར། །རྒྱུ་ཉིད་དུ་ནི་རྟོག་མི་བྱེད། །ཅེས་བྱ་བ་སྨོས་ཏེ། བདག་
[313a.3]ཅག་ལ་སོགས་པས་བྱེད་པ་མ་མཐོང་བ་ཅན་གྱིས་སྡོང་དུམ་ལ་དབང་ཕྱུག་བཞིན་དུ་རྒྱུ་ཉིད་དུ་ཅིའི་ཕྱིར་མི་རྟོག །གང་གི་འབྲས་བུར་ཞེ་ན། །མཚོན་དང་འབྲེལ་བ་ལས་རྨ་འབྱུང་ཞིང་། སྨན་དང་འབྲེལ་བ་ལས་རྨ་འཚོ་བར་འགྱུར་ཏེ་དབང་ཕྱུག་བཞིན་ནོ། །སྡོང་དུམ་ལ་བྱེད་པ་ལྟར་རུང་བ་མི་
[313a.4]དམིགས་པ་ལས་བདག་གི་དངོས་པོ་ཤེས་པ་ནི་རིགས་པ་མ་ཡིན་ལ། དབང་ཕྱུག་ནི་ལྟར་རུང་བ་མ་ཡིན་ཞིང་། མ་མཐོང་བ་ལས་ཀྱང་བྱ་བ་བྱེད་པ་མི་ལྡན་པ་མ་ཡིན་ནམ་ཞེ་ན། འདི་ལ་ལན་གདབ་པའི་ཕྱིར། རང་བཞིན་ཐ་དད་མེད་པར་ནི། །དོན་བྱེད་པ་ཡང་མི་རུང་ངོ་། །རྟག་ལ་
[313a.5]ལྡོག་པ་ཉིད་མེད་ཕྱིར། །ནུས་པ་ཉིད་ནི་རྟོགས་པར་དཀའ། །ཞེས་བྱ་བ་ལ་རྟག་པ་ནི་རྒྱུན་གྱིས་རྟག་པ་ལས་སམ། གཞན་ཡང་རུང་སྟེ། དབང་ཕྱུག་གིས་བྱེད་པ་མི་རིགས་པའི་ཕྱིར་རོ། །རང་བཞིན་ཐ་དད་པ་མེད་པ་ནི་འབྲས་བུ་ཕུལ་དུ་བྱུང་བ་མེད་པ་སྟེ། གལ་ཏེ་རྫ་མཁན་གྱིས་བྱས་པའི་དབྱིབས་
[313a.6]ལ་སོགས་པའི་ཁྱད་པར་བཞིན། རི་ལ་སོགས་པ་དབང་ཕྱུག་གིས་བྱས་པའི་ཁྱད་པར་དམིགས་ན་ནི་དབང་ཕྱུག་གིས་ནུས་པ་ཡིན་ནོ། །ཡང་གལ་ཏེ་དབང་ཕྱུག་དེ་ཉིད་རང་བཞིན་གཅིག་པ་ཡིན་ན། འབྲས་བུའི་དུས་སུ་རང་བཞིན་གྱིས་ཐ་དད་པར་བལྟ་སྟེ། རྟག་པ་ལ་ཐ་དད་པ་དང་འབྲེལ་
[313a.7]པའི་ཕྱིར། འབྲས་བུ་ལ་ནུས་པ་རིང་དུ་གྱུར་པ་ནི་རྟག་པ་ལ་ཐ་དད་པའི་དངོས་པོ་མེད་དོ། །དེ་ལྟར་ནི་འགྱུར་མོད་ཀྱི། ཐ་དད་པ་ལས་དབང་ཕྱུག་གི་འབྲས་བུ་ནུས་པ་མ་ཡིན་གྱི། འོན་ཀྱང་རྟག་པ་དང་ཁྱབ་པས་འབྲས་བུའི་ཡུལ་དུ་ཉེ་བར་བྱེད་པར་ནུས་པ་ཡིན་ནོ། །སྡོང་དུམ་ལ་ནི་
[313b]
[313b.1]གདོན་མི་ཟ་བར་ཉེ་བ་མེད་པའི་ཕྱིར་རྨ་འཚོ་བའི་རྒྱུ་མེད་དོ་ཞེ་ན་སྨྲས་པ། གང་དག་ཡོད་པས་ཡོད་འགྱུར་ཉིད། །གང་དེ་དག་ལས་གཞན་རྟོག་ན། །དེ་རྒྱུ་ཉིད་དུ་ཐམས་ཅད་ལ། །རྒྱུ་རྣམས་ཐུག་པ་མེད་པར་འགྱུར། །ཞེས་བྱ་བ་ལ་གང་དག་སྟེ་ས་བོན་དང་ཞིང་ས་ལ་སོགས་པའོ། །ཡོད་
[313b.2]པར་འགྱུར་བ་ཉིད་དེ་མེད་ན་ནི་མ་བྱུང་བ་ཡིན་ནོ། །གང་སྟེ་མྱུ་གུ་ལ་སོགས་པའོ། །དེ་དག་ནི་གཞན་དབང་ཕྱུག་གོ། །དེ་རྒྱུ་ཉིད་མྱུ་གུའི་རྒྱུ་ཡིན་པར་རྟོག་ན་ནི་མཐའ་མེད་པར་འགྱུར་བ་དེ་ལྟར་ན་སོ་སོར་ངེས་པའི་རྒྱུ་ཉིད་ངེས་པ་མ་ཡིན་ནོ། །རྟག་པ་ཉིད་དང་ཁྱབ་པ་ཉིད་ཀྱིས་རྒྱུ་ཉིད་བསལ་བ་ཡིན་
[313b.3]ནོ། །འོ་ན་གལ་ཏེ་ས་ཡོངས་སུ་མ་གྱུར་པའི་རང་བཞིན་མྱུ་གུ་ལ་སོགས་པ་སྐྱེད་པར་བྱེད་པ་དེ་བཞིན་དུ་དབང་ཕྱུག་ཀྱང་འབྲས་བུ་གཞན་དང་གཞན་སྐྱེད་པར་བྱེད་དོ་ཞེ་ན་སྨྲས་པ། མྱུ་གུ་སྐྱེ་ལ་ས་ལ་སོགས། །རང་བཞིན་ཡོངས་སུ་གྱུར་ནས་ནི། །རྒྱུ་ཡིན་ལེགས་པར་སྦྱངས་པ་ན། །དེ་ཡི་
[313b.4]ཁྱད་པར་མཐོང་ཕྱིར་རོ། །ཞེས་བྱ་བ་ལ། རང་བཞིན་ཡོངས་སུ་གྱུར་པ་ནི་གོང་ནས་གོང་དུ་འབྲས་བུའི་ཁྱད་པར་སྐྱེད་པའི་རྗེས་སུ་འགྲོ་བ་ཕུལ་དུ་བྱུང་བ་སྟེ། དེས་ན་རྒྱུར་གྱུར་པ་ནི་ས་ལ་སོགས་པའོ། །སོགས་པའི་སྒྲས་ནི་ས་བོན་ལ་སོགས་པ་བཟུང་སྟེ་མྱུ་གུ་ལ་སོགས་པ་སྐྱེད་པའི་རྒྱུ་
[313b.5]ཡིན་ནོ། །རང་བཞིན་མ་གྱུར་པ་ནི་མ་ཡིན་ཏེ། ཅིའི་ཕྱིར་ཞེ་ན། ས་ལ་སོགས་པ་དེ་སྦྱངས་པ་ན། འབྲས་སཱ་ལུ་ལ་སོགས་པ་བཏབ་ན། མྱུ་གུའི་ཁྱད་པར་གཞན་དང་། གཞན་གྱི་རང་བཞིན་མཐོང་བའི་ཕྱིར་རོ། །གལ་ཏེ་ས་ལ་སོགས་པ་མ་གྱུར་པ་ཉིད་མྱུ་གུའི་རྒྱུ་ཡིན་ན་དེའི་ཁྱད་
[313b.6]པར་ལ་ལྟོས་པ་མ་ཡིན་ནོ། །འདིར་སྨྲས་པ། ཇི་ལྟར་ཡུལ་དང་དབང་པོ་ཡིས། །ཚོགས་པ་ཁྱད་མེད་བློ་རྒྱུ་ཡིན། །དེ་ལྟར་འདི་ཡིན་ཞེ་ན་ཞེས་བྱ་བ་ལ། ཇི་ལྟར་མིག་ཕྱེ་ན་གཞན་དང་གཞན་མཐོང་བ་དེ་བཞིན་དུ་གཟུགས་ལ་སོགས་པའི་ཡུལ་གཞན་དང་གཞན་མཐོང་བར་འགྱུར་གྱི་དེ་ལ་
[313b.7]གཞན་དང་གཞན་དུ་འབྱུང་བའི་འབྲས་བུ་འགྱུར་བར་དཔོག་པ་ནི་མ་ཡིན་ནོ། །དེ་ལྟར་མི་འགྱུར་བའི་རང་བཞིན་འཕྲོག་བྱེད་ནི་ས་གསུམ་སྐྱེད་པ་ཡིན་ནོ་ཞེ་ན། མིག་དེ་ལའང་ཁྱད་པར་ཡོད་ཕྱིར་རོ། །ཞེས་བྱ་བ་ལ་མིག་ལ་སོགས་པ་དེ་ལ་ཡང་ཁྱད་པར་ཡོད་པ་ཡིན་ཏེ། འདི་ལྟར་
[314a]
[314a.1]གཟུགས་ཀྱི་ཁྱད་པར་ཡུལ་ཉེ་བ་དང་རིང་བ་ལས་གསལ་བ་དང་། མི་གསལ་བའི་རིག་པ་སྐྱེ་བ་དེ་བཞིན་དུ་མིག་ཅུང་ཟད་ཟུམ་པ་ལས་མི་གསལ་བར་སྣང་བའི་ཕྱིར། མིག་ལ་སོགས་པའི་ཁྱད་པར་ཕུལ་དུ་བྱུང་བར་རྣམ་པར་ཤེས་པ་ལས་གྲུབ་པ་ཡིན་ནོ། །དེ་
[314a.2]ལྟར་ནི་འགྱུར་བ་མོད་ཀྱི། མིག་ལ་སོགས་པ་ལ་གནས་པའི་ཁྱད་པར་མངོན་སུམ་ལས་འདས་པའི་ཕྱིར། ཇི་ལྟར་ངེས་པ་ཡོད་པ་ཡིན་ཏེ། གང་གིས་ན་དེ་ཐ་དད་པས་འབྲས་བུ་ཐ་དད་པར་བྱ་ཞེ་ན། འདིར་སྨྲས་པ། སོ་སོ་སོ་སོར་ནུས་མེད་རྣམས། །རྒྱུན་ལ་ཕུལ་བྱུང་མེད་པ་ན། །
[314a.3]ཚོགས་པ་ཡོད་ནའང་ནུས་མེད་འགྱུར། །དེའི་ཕྱིར་ཕུལ་བྱུང་གྱུར་པ་ཡིན། །ཞེས་བྱ་བ་ལ། གང་གི་ཕྱིར་མིག་ལ་སོགས་པ་རྣམས་སོ། །སོ་སོར་ནི་ནུས་པ་མེད་པས་མིག་ལ་སོགས་པའི་རིག་པ་ནི་རང་བཞིན་སོ་སོར་ངེས་པར་སྐྱེ་བ་ནི་མ་ཡིན་ཏེ། ཡུལ་གྱི་རྣམ་པ་རྟོགས་པའི་རང་བཞིན་
[314a.4]མ་མཐོང་བའི་ཕྱིར་རོ། །ཚོགས་པ་ཡོད་ན་ཡང་རྒྱུན་ཕུལ་དུ་བྱུང་བ་སྟེ། ཁྱད་པར་དུ་གྱུར་པ་མེད་ན་ནུས་པ་མེད་པར་གྱུར་ཏེ་གནས་སྐབས་སོ་སོ་བ་བཞིན་ནོ། །མཐོང་བས་དབང་པོ་འགྲུབ་པ་དེ་བཞིན་དུ་མིག་ལ་སོགས་པ་རྣམས་ལ་ཕུལ་དུ་བྱུང་བ་གྲུབ་པ་ཡིན་ནོ། །འདིའི་དགོངས་པ་ནི་ཇི་
[314a.5]ལྟར་འབྲས་བུ་མཐོང་བས་དབང་པོ་ལ་སོགས་པ་ཡོད་པ་དེ་བཞིན་དུ་འབྲས་བུའི་ཁྱད་པར་མཐོང་བ་ལས་ཕུལ་དུ་བྱུང་བ་ངེས་སོ། །དེ་ཕྱིར་སོ་སོར་ནུས་མེད་གང་། །ཚོགས་ལ་ཡོན་ཏན་སྲིད་འགྱུར་བ། །དེ་དག་རྒྱུ་ཡིན་དབང་ཕྱུག་སོགས། །མ་ཡིན་ཁྱད་པར་མེད་ཕྱིར་རོ། །ཞེས་
[314a.6]བྱ་བ་ལ། གང་གི་ཕྱིར་དེ་ལྟར་ཚོགས་པ་ན་ཡང་ཕུལ་དུ་བྱུང་བ་མ་རྟོགས་པར་འབྲས་བུ་སྐྱེད་པ་མེད་དེ། དེའི་ཕྱིར་སོ་སོར་མི་ནུས་པ་གང་ཡིན་པ་མིག་ལ་སོགས་པ་རྣམས་ལ་ཡོན་ཏན་སྲིད་པར་འགྱུར་ཏེ། གྲོགས་བྱེད་པ་འམ་ཉེ་བར་སྡུད་པར་སྐྱེད་པའོ། །སྡུད་པའི་ཚེ་དབང་ཕྱུག་ལ་སོགས་
[314a.7]པ་ཐ་དད་པ་མེད་པས་རྒྱུ་མ་ཡིན་པ་ཉིད་དོ། །སོགས་པའི་སྒྲས་ནི་དུས་དང་ཕྱོགས་རྣམས་བཟུང་ངོ་། །དེ་ལྟ་བུ་འདིས་ནི་དབང་ཕྱུག་ལ་གནོད་པར་བྱེད་པའི་ཚད་མ་དང་། དོན་བྱེད་པ་ལ་སོགས་པའི་སྒྲུབ་པར་བྱེད་པའི་ཚད་མ་མེད་པར་བསྟན་པ་ཡིན་ནོ། །ཇི་ལྟར་རྟག་པའི་ཚད་མ་ལ་རྒྱུ་དང་རྟགས་མེད་
[314b]
[314b.1]པ་དེ་བཞིན་དུ་མི་རྟག་པའི་ཚད་མ་ལ་ཡང་དེ་བཞིན་དུ་མེད་པ་མ་ཡིན་ནམ། གང་གི་ཕྱིར། ལྐོག་གྱུར་དོན་ཤེས་ཚད་མ་ཡིན། །དེ་ལ་སྒྲུབ་བྱེད་མེད་པའི་ཕྱིར། །འཇུག་པར་བྱེད་པ་ཡོད་མིན་ཞེས། །ཁ་ཅིག་རབ་ཏུ་རྗོད་པར་བྱེད། །ཅེས་བྱ་བ་ལ། ཚད་མ་ནི་ལྐོག་ཏུ་གྱུར་པ་སྟེ། དབང་པོ་ལས་
[314b.2]འདས་པ་ཐམས་ཅད་རིག་པར་ཁས་ལེན་ན་དེ་ཡང་དབང་པོ་ལས་འདས་པའི་རིག་པ་སྒྲུབ་པར་བྱེད་པའི་གཏན་ཚིགས་གང་ཡིན་པ་དེ་མེད་པའི་ཕྱིར་རོ། །ཐམས་ཅད་མཁྱེན་པ་སྒྲུབ་པའི་ཡུལ་ལ་འཇུག་པ་མི་སྲིད་དོ་ཞེས་ཁ་ཅིག་རྗོད་པར་བྱེད་དེ། འདི་ལྟར་ཐམས་ཅད་མཁྱེན་པའི་
[314b.3]གཏན་ཚིགས་མེད་པའི་ཕྱིར་རོ། །འདི་ལྟར་གདོན་མི་ཟ་བ་ཐམས་ཅད་ཤེས་པ་རྟོགས་པའི་རྒྱུ་ངེས་པ་མ་དམིགས་པ་ཡིན་ཏེ། གང་སྔགས་ལ་སོགས་པ་དམིགས་པ་དེ་ནི་གྲུབ་པའི་མཐའ་ཐམས་ཅད་ལ་ཐུན་མོང་བའི་ཕྱིར་གཏན་ཚིགས་ཉིད་དོ་ཞེས་བྱ་བར་ངེས་པ་ནི་མ་ཡིན་ལ། ཐམས་
[314b.4]ཅད་རིག་པར་ངེས་པའི་གཏན་ཚིགས་ཡོད་པ་མ་ཡིན་ཏེ། བདག་ཅག་གིས་མ་དམིགས་པའི་ཕྱིར་རོ། །མངོན་སུམ་གྱི་ངེས་པར་མི་བྱེད་ལ་ཕྱོགས་གཅིག་ཏུ་མྱོང་བ་ལ་ངེས་པ་ཡང་མ་ཡིན་ཏེ། རིག་བྱེད་ལ་སོགས་པ་ལ་ཡང་ཡོད་པའི་ཕྱིར་རོ། །ཤེས་བྱ་ཐམས་ཅད་མངོན་སུམ་དུ་
[314b.5]བྱེད་པར་འགྱུར་བ་ནི་མ་ཡིན་ཏེ། ད་ལྟར་བྱུང་བ་དང་རུང་བའི་ཡུལ་ནི་མིག་ལ་སོགས་པའི་སྟོབས་ཀྱིས་འཛིན་པའི་ཕྱིར་རོ། །གཞན་ཡང་དངོས་པོ་ཐམས་ཅད་མངོན་སུམ་དུ་བྱེད་པ་ཐམས་ཅད་མཁྱེན་པ་ཡིན་ན། མི་གཙང་བ་ལ་སོགས་པའི་རོ་ཡང་མྱོང་བར་འགྱུར་ཏེ། ཕྲད་པ་
[314b.6]འཛིན་པའི་ཕྱོགས་ལ་ཡང་། །ཇི་ལྟར་དབང་པོས་ཐམས་ཅད་རིག །འོན་ཏེ་ཡིད་ཀྱི་རྣམ་པར་ཤེས་པས་ཐམས་ཅད་ཤེས་ན་ནི་དེ་ཡང་དབང་པོའི་ཤེས་པས་གཟུང་བ་དེས་འཛིན་པའི་ཕྱིར་ཏེ། གཞན་དུ་ན་ཡིད་འཁྲུལ་པར་ཐལ་བར་འགྱུར་རོ། །རྗེས་སུ་དཔག་པས་གཟུང་བ་ལ་ཡིད་
[314b.7]འཇུག་པ་ནི་མ་ཡིན་ཏེ། དེ་ནི་ཡུལ་དང་དུས་ཉེ་བ་ཡིན་པའི་ཕྱིར་རོ། །ཡིད་ཀྱི་རྣམ་པར་ཤེས་པ་བསྟན་བཅོས་ཀྱི་ཡུལ་ལ་འཇུག་པ་ནི་མ་ཡིན་ཏེ། དེ་ལས་ཕྱིན་ཅི་ལོག་གི་དོན་ལ་འཇུག་པའི་ཕྱིར་རོ། །ཤེས་བྱ་ཐམས་ཅད་མངོན་སུམ་དུ་བྱེད་པ་ཡང་རིམ་གྱིས་སམ། ཅིག་ཅར་ཡིན་པར་བརྟག་
[315a]
[315a.1]གྲང་ན། དེ་ལ་རིམ་གྱིས་ནི་མ་ཡིན་ཏེ། ཤེས་བྱ་དཔག་ཏུ་མེད་པས་ཡོངས་སུ་མི་རྫོགས་པའི་ཕྱིར་རོ། །ཅིག་ཅར་མངོན་སུམ་དུ་བྱེད་པ་ཡང་མ་ཡིན་ཏེ། རྗེས་ལས་ཐོབ་པའི་ཤེས་པ་གཟུང་བ་འཛིན་པས་ཚད་མ་ཡིན་པར་འགྱུར་བའི་ཕྱིར་རོ། །ཐམས་ཅད་
[315a.2]རིག་པ་འདི་ཡིན་ནོ། །ཞེས་བྱ་བར་ངེས་པའི་ཐབས་ཡོད་པ་ནི་མ་ཡིན་ཏེ། བདག་ཅག་ལ་སོགས་པས་ཤེས་བྱ་མ་ལུས་པ་འཛིན་པ་མེད་ན་ཐམས་ཅད་ཤེས་པ་ངེས་པ་མ་ཡིན་པའི་ཕྱིར་རོ། །ཐམས་ཅད་རིག་པ་མ་གྲུབ་ན་དེའི་སྒྲུབ་པ་ངེས་པ་མེད་པའི་ཕྱིར་འཇུག་པར་མི་འགྱུར་རོ་སྙམ་ན། དེ་
[315a.3]ལ་ལན་བཏབ་པ། མི་ཤེས་སྟོན་པར་བྱེད་པ་ལ། །འཁྲུལ་པར་དོགས་པ་ཅན་རྣམས་ཀྱིས། །དེ་བཤད་དོགས་པར་བྱ་བའི་ཕྱིར། །ཤེས་ལྡན་ཁ་ཅིག་ཚོལ་བར་བྱེད། །ཅེས་བྱ་བ་ལ། ཤེས་པ་དང་ལྡན་པ་ཁ་ཅིག་ཤེས་པ་དང་ལྡན་པ་དེས་བརྗོད་པ་ལ་ཅིའི་ཕྱིར་འཇུག་པ་ན་རྟོགས་པར་བྱ་
[315a.4]བའི་ཕྱིར་ཏེ། ཅི་ཞེ་ན། མི་ཤེས་པ་སྟོན་པར་བྱེད་པ་ལ་འཇུག་ན་འཁྲུལ་པར་དོགས་པའི་ཕྱིར་རོ་ཞེས་སྤྱོད་དེ། དེ་ལྟར་དོགས་པའི་ཐེ་ཚོམ་དང་ལྡན་པ་རྣམས་དོན་དུ་གཉེར་བར་བྱེད་དོ་ཞེས་བྱ་བར་སྙེགས་སོ། །དེའི་དོན་ནི་འདི་ཡིན་ཏེ་གང་དུ་འཇུག་པར་འདོད་པ་དེར་ཡེ་ཤེས་དོན་དུ་གཉེར་བར་
[315a.5]བྱེད་ཀྱི་གཞན་དུ་མི་ཤེས་པ་ལ་མ་ཡིན་ཏེ། འདོད་པའི་དོན་ལ་འཁྲུལ་པ་སྲིད་པའི་ཕྱིར་རོ། །འོན་ཀྱང་མངོན་པར་འདོད་པའི་ཡུལ་ལ་ཡོངས་སུ་ཤེས་པར་འདོད་པ་དེ་ཙམ་ཞིག་ཚད་མར་འགྱུར་ཏེ། འདི་ལྟར་བཅོམ་ལྡན་འདས་ཐམས་ཅད་མཁྱེན་པའི་ཕྱིར་ན་ཚད་མ་མ་ཡིན་གྱི། འོན་
[315a.6]ཀྱང་སླུ་བར་མི་བྱེད་པས་ཚད་མ་མ་ཡིན་ནོ། །དེའི་ཐམས་ཅད་མཁྱེན་པ་ནི་རྗེས་སུ་དཔག་པར་བྱ་བ་སྟེ། འདི་ལྟར་གཙོ་བོར་གྱུར་པ་ནི་སྐྱེས་བུའི་དོན་ཤེས་པ་དང་། ཚད་མས་མཐོང་བའི་དོན་ཤེས་པར་འགྱུར་བའི་ཕྱིར་གཞན་དུ་ཡང་ཡོངས་སུ་ཤེས་པ་ཡོད་དོ། །གང་ཡང་ཚད་
[315a.7]མས་མཐོང་བའི་དོན་གཙོ་བོར་གྱུར་པ་མ་ཤེས་ན། དེ་ཚད་མ་མ་ཡིན་ནོ། །ཇི་སྟེ་ཚངས་པ་ལ་སོགས་པས་བསྟན་ཅེ་ན། རྨོངས་པ་གཅིག་ནས་གཅིག་ཏུ་བསྟན་པའོ། །འོ་ན་བཅོམ་ལྡན་འདས་ཀྱང་ཇི་ལྟར་མངོན་སུམ་དུ་བྱེད་པ་རྗེས་སུ་དཔག་ཅེ་ན། ཚད་མས་མཐོང་བ་གཙོ་བོར་
[315b]
[315b.1]གྱུར་པའི་དོན་སྟོན་པའི་ཕྱིར་རོ། །གལ་ཏེ་ཡང་མངོན་སུམ་དུ་བྱེད་པ་མེད་ན་ཚད་མས་མཐོང་བ་གཙོ་བོར་གྱུར་པའི་དོན་ལ་བཅོམ་ལྡན་འདས་མི་སླུ་བས། དབང་པོ་ལས་འདས་པ་ལ་སོགས་པ་འཇུག་པར་འགྱུར་བ་ན་རྟོགས་པ་སྔོན་དུ་གཏོང་བ་ཡིན་ནོ། །རིག་བྱེད་ལ་ནི་དོན་མངོན་དུ་བྱེད་
[315b.2]པའི་ཚད་མ་མ་མཐོང་ཞིང་། གཙོ་བོར་གྱུར་པའི་དོན་ལ་མི་སླུ་བ་མེད་པའི་ཕྱིར། རྣམ་པ་ཐམས་ཅད་དུ་འཇུག་པ་མ་ཡིན་ནོ། །དེ་ཕྱིར་དེ་ལ་འཇུག་པ་ཡི། །ཤེས་པ་རྣམ་པར་དཔྱད་བྱ་ཡི། །སྲིན་བུའི་གྲངས་ནི་ཡོངས་ཤེས་པ། །དེ་ནི་ཁོ་བོ་ལ་ཅི་མཁོ། །ཞེས་བྱ་བ་ལ། གང་གི་ཕྱིར་
[315b.3]འཇུག་པ་གང་ཡིན་པ་དེ་ཉིད་དུ་ཡོངས་སུ་ཤེས་པ་ཚོལ་བ་དེ་བས་ན་འཕགས་པའི་བདེན་པ་བཞིའི་ཡུལ་ལ་འཇུག་པར་གྱུར་པ་དང་། ལས་དང་འབྲས་བུའི་འབྲེལ་པ་ཡོངས་སུ་ཤེས་པ་དག་བཅོམ་ལྡན་འདས་ལ་དཔྱད་པར་འོས་ཀྱི་སྲིན་བུའི་གྲངས་ཡོངས་སུ་ཤེས་པ་ནི་དེ་བཞིན་གཤེགས་པ་དེ་ལ་ཁོ་
[315b.4]བོ་ཅག་སྟེ། བདག་ཅག་མཐོ་རིས་དང་ཐར་པ་དོན་དུ་གཉེར་བ་རྣམས་ལ་ཅུང་ཟད་ཀྱང་ཉེ་བར་མཁོ་བ་མ་ཡིན་ནོ། །གལ་ཏེ་གཙོ་བོར་གྱུར་པའི་དོན་ལ་སླུ་བ་མེད་པས་བཅོམ་ལྡན་འདས་ཐམས་ཅད་མཁྱེན་པར་བརྗོད་ན། ལོ་གཅིག་ཁྱུད་སྐོར་ལ་ཟླ་བ་བཅུ་གཉིས་ཡོད་པར་མི་སླུ་བས་རིག་བྱེད་ཀྱང་ཚད་
[315b.5]མར་འགྱུར་རོ་ཞེ་ན། འདིར་སྨྲས་པ། བླང་དང་དོར་བྱའི་དེ་ཉིད་ནི། །ཐབས་དང་བཅས་པར་རིག་མཛད་པ། །གང་ཡིན་དེ་ནི་ཚད་མ་སྟེ། །ཐམས་ཅད་རིག་མཛད་མ་ཡིན་ནོ། །ཞེས་བྱ་བ་ལ། དགོས་པ་མེད་པའི་ཕྱོགས་གཅིག་མཁྱེན་པ་ལས་བཅོམ་ལྡན་འདས་ཚད་མ་མ་ཡིན་ནོ། །འོན་
[315b.6]ཀྱང་བླང་བ་དང་དོར་བའི་དེ་ཁོ་ན་ཉིད་ནི་སྡུག་བསྔལ་དང་འགོག་པ་སྟེ། དེའི་ཐབས་ནི་རིམ་པ་བཞིན་ཀུན་འབྱུང་དང་། ལམ་རིག་པར་མཛད་པ་གང་ཡིན་པ་དེ་ནི་ཚད་མར་འདོད་ཀྱི། སྲིན་བུ་ལ་སོགས་པ་ཐམས་ཅད་ཀྱི་གྲངས་ཡོངས་སུ་ཤེས་པ་ལས་ནི་མ་ཡིན་ནོ། །འདིས་ནི་འཕགས་
[315b.7]པའི་བདེན་པ་བཞི་མངོན་དུ་བྱེད་པ་དང་། མཐོ་རིས་ཀྱི་ལམ་རིག་པ་ལས་བཅོམ་ལྡན་འདས་ཚད་མ་ཡིན་པར་སྟོན་ཏོ། །ཅི་ཐམས་ཅད་རིག་པ་མི་སྲིད་དམ་ཡང་ན་དེ་ཡིས་གཅིག་ཏུ་དགོས་པ་མེད་པས་གཙོ་བོར་གྱུར་པའི་དོན་ཡོངས་སུ་ཤེས་པའི་ཚད་མར་བརྟག་ཅེ་ན། སྨྲས་པ། རིང་པོར་མཐོང་
[316a]
[316a.1]ངམ་མ་མཐོང་ཡང་། །འདོད་པའི་དེ་ཉིད་མཐོང་བ་ཡིན། །རིང་མཐོང་ཚད་མ་ཡིན་ན་ནི། །ཚུར་ཤོག་བྱ་རྒོད་བསྟེན་པར་གྱིས། །ཞེས་བྱ་བ་ལ། ཐམས་ཅད་རིག་པ་མེད་པ་ནི་མ་ཡིན་ཏེ། འོན་ཀྱང་ཚད་མ་ལ་ཕན་འདོགས་པ་མེད་དོ། །འདི་ལྟར་རིང་པོར་མཐོང་བའམ། ཐམས་ཅད་མ་མཐོང་ཡང་རུང་སྟེ། འདོད་པའི་
[316a.2]དེ་ཁོ་ན་ཉིད་འཕགས་པའི་བདེན་པ་བཞི་མཐོང་བའི་ཕྱིར་ཚད་མའོ། །འོན་ཏེ་རིང་དུ་མཐོང་བ་ཚད་མ་ཡིན་ན་སྐབས་སུ་བབ་པའི་དོན་མ་ཤེས་པར་དེའི་ཚེ་གྲོགས་དག་སོང་ངམ། ཤོག་ལ་ཐར་པ་འདོད་པ་ལ་མཐོ་རིས་དོན་དུ་གཉེར་བ་ཁྱེད་ཀྱིས་རིང་དུ་མཐོང་བའི་བྱ་རྒོད་བསྟེན་པར་གྱིས་ཤིག །འདིའི་
[316a.3]དོན་ནི་འདི་ཡིན་ཏེ། ཐམས་ཅད་མཁྱེན་པ་རྣམ་པ་ཀུན་ནས་སྤོང་བ་མ་ཡིན་ཏེ། འོན་ཀྱང་ཐབས་དང་བྲལ་བས་ཁོ་བོ་ཅག་ཡོངས་སུ་ཤེས་པའི་ལམ་དུ་འཇུག་པ་ནི་མ་ཡིན་ནོ། །གང་ཞིག་ཚད་མར་གྱུར་པར་འདོད་པ་དེས་ཤེས་བྱ་ཐམས་ཅད་མངོན་སུམ་དུ་བྱ་བ་སྟེ་གཞན་དུ་ན་ཡོངས་སུ་
[316a.4]ཚང་བའི་དོན་མི་སྲིད་པའི་ཕྱིར་རོ། །ཅི་སྟེ་དོན་གྱི་གཙོ་བོ་ཤེས་པ་དང་། ཐམས་ཅད་རིགས་པའི་ཚད་མ་ཉིད་ལ་རྒྱུ་ཅི་ཞིག་ཡོད་ཅེ་ན། དེའི་ཕྱིར་སྒྲུབ་བྱེད་ཐུགས་རྗེ་ཞེས་བྱ་བ་སྨོས་ཏེ། ཕ་རོལ་སྡུག་བསྔལ་དང་བྲལ་བར་འདོད་པའི་སྙིང་རྗེ་དེ་ཡང་རབ་ཀྱི་མཐར་ཕྱིན་པ་སྟེ་དེ་ནི་ཐམས་ཅད་
[316a.5]མཁྱེན་པའི་སྒྲུབ་བྱེད་དོ། །སྙིང་རྗེ་ནི་ཐབས་མ་ཤེས་ན་སྡུག་བསྔལ་གྱི་རྒྱུ་སྒྲུབ་པ་མ་ཡིན་ནམ། འདི་ལྟར་ཇི་སྲིད་དུ་སྲོག་ཆགས་རྣམས་ལ་སྙིང་རྗེ་སྐྱེས་པ་དེ་སྲིད་དུ་སྡུག་བསྔལ་གྱིས་ཉོན་མོངས་པར་འགྱུར་བའི་ཕྱིར། རང་ཉིད་སྡུག་བསྔལ་ན། ཇི་ལྟར་ཐམས་ཅད་མཁྱེན་པ་
[316a.6]འགྲུབ་པར་འགྱུར་ཏེ། སྡུག་བསྔལ་ཅན་ལ་ཕན་འདོགས་པ་དང་བྲལ་བའི་ཕྱིར་རོ། །འོན་ཏེ་དེའི་ཐབས་ཡོངས་སུ་ཤེས་པ་ཡོད་པས་སྙིང་རྗེས་སྡུག་བསྔལ་མི་སྐྱེད་ན། འོ་ན་ནི་ལམ་ཉིད་སྒྲུབ་བྱེད་ཡིན་ན་སྙིང་རྗེས་ཅི་ཞིག་བྱ་སྟེ། འདི་ལྟར་ལམ་མངོན་དུ་བྱས་པས། སྡུག་བསྔལ་
[316a.7]ཐམས་ཅད་ལྡོག་གོ་ཞེ་ན། འདིར་སྨྲས་པ། ཐམས་ཅད་ཤེས་པ་སྐྱེད་པ་སྙིང་རྗེ་ནི་མ་ཡིན་ཏེ། འོན་ཀྱང་ཐབས་གོམས་པ་ཉིད་ཀྱིས་ཐམས་ཅད་མཁྱེན་པ་ཉིད་ཐོབ་བོ། །སྙིང་རྗེས་ཀྱང་ཐམས་ཅད་མཁྱེན་པའི་ཐབས་ལ་སྐྱེས་བུ་འཇུག་པར་བྱེད་པས་སྒྲུབ་བྱེད་དུ་བརྗོད་དོ། །གལ་ཏེ་ཡང་སྲོག་ཆགས་
[316b]
[316b.1]རྣམས་ལ་སྙིང་རྗེ་མེད་ན་ནི་ཐམས་ཅད་མཁྱེན་པའི་ཐབས་ལ་འཇུག་པ་མ་ཡིན་ལ། བདག་དང་བདག་གིར་འཛིན་པ་མེད་ན་འདོད་ཆགས་ལ་སོགས་པ་ཟད་པ་འགྱུར་བའི་ཕྱིར་བདག་མེད་པར་མཐོང་བ་དེ་ནི་གཉེན་པོ་ཡིན་ནོ། །དེའི་ཕྱིར་ཡིད་སྙིང་རྗེ་དང་ལྡན་པར་གྱུར་ན་སྡུག་བསྔལ་ཐམས་ཅད་དང་
[316b.2]བྲལ་ཏེ། ཐམས་ཅད་མཁྱེན་པ་ཉེ་བར་སྐྱེ་བར་འགྱུར་རོ། །རབ་ཀྱི་མཐར་ཕྱིན་པའི་སྙིང་རྗེ་དེ་ཉིད་གང་ལ་སྐྱེ་བར་འགྱུར་ཞེ་ན། དེའི་ཕྱིར། གོམས་པ་ལ་ཞེས་བྱ་བ་སྨོས་ཏེ། སྐྱེ་ཞིང་སྐྱེ་བ་ཐམས་ཅད་དུ་སྙིང་རྗེ་དེ་ཉིད་གོམས་པ་ལས་རབ་ཀྱི་མཐར་ཕྱིན་པར་འགྱུར་ཏེ། འདི་ལྟར་དགེ་བའི་
[316b.3]བཤེས་གཉེན་གྱིས་ཡོངས་སུ་ཟིན་པའམ། རང་ཉིད་ཀྱིས་ཉམས་སུ་མྱོང་བ་ཆེན་པོས་སེམས་ཅན་རྣམས་ལ་སྙིང་རྗེ་སྐྱེས་ཏེ་ཡང་དེ་ཉིད་ལ་མངོན་དུ་བྱས་ནས་སྐྱེ་བ་དུ་མ་རུ་བསྐྱེད་ཅིང་གོམས་པ་མཐར་ཕྱིན་པར་གྱུར་ནས་སྙིང་རྗེས་སྐྱེས་བུ་རྣམས་ལ་ཕན་འདོགས་པའི་ཤེས་པ་འཇུག་པའི་ཕྱིར།
[316b.4]དེ་ཉིད་ཐམས་ཅད་རིག་པའི་སྒྲུབ་བྱེད་དོ། །འདིར་བརྗོད་པ། བློ་ནི་ལུས་ལ་བརྟེན་པའི་ཕྱིར། །གོམས་པ་གྲུབ་པ་མེད་ཅེ་ན། །ཞེས་བྱ་བ་ལ་བློ་ནི་ལུས་འདི་ལ་བརྟེན་པ་སྟེ། འདི་ལྟར་ཕ་དང་མའི་རྗེས་སུ་འབྲང་བའི་གཟུགས་དང་། ཡིད་དང་སྙན་པ་དང་། ཐ་སྙད་ལ་སོགས་པ་བུའི་ཡུལ་
[316b.5]མཐོང་ངོ་། །དཔེར་ན་རི་མོ་མཁན་གྱིས་བྲིས་པའི་རི་མོ་རྩིག་པའི་ལོགས་ལ་གནས་པ་ནི་རྩིག་པ་ལས་གཞན་དུ་བརྟེན་པ་མ་ཡིན་ཞིང་། ཁང་པ་ཞིག་ན་འཇིག་པར་འགྱུར་རོ། །མ་དུ་ལུང་གའི་འབྲས་བུ་ལ་བརྟེན་པའི་གཟུགས་ལ་སོགས་པ་ནི་དེ་ཉམས་ན་འཇིག་པར་འགྱུར་ཏེ། དེའི་
[316b.6]ཡོན་ཏན་ཡིན་པའི་ཕྱིར་དང་། འབྲས་བུ་གཞན་ལ་མི་བརྟེན་པའི་ཕྱིར་རོ། །མེས་སྐྱེད་པའི་ངེས་པར་གྱུར་པའི་དུ་བ་ཡང་དེའི་འབྲས་བུ་ཡིན་པའི་ཕྱིར་དེ་ཞིག་ན་འཇིག་པར་འགྱུར་རོ། །ཆང་གི་ནུས་པ་ཡང་ཆང་གི་རྫས་ལ་བརྟེན་པ་ཉིད་དེ། ཆང་གཞན་ལ་མི་བརྟེན་པས་རང་གི་རྟེན་ཉམས་
[316b.7]ན་ལྡོག་པར་འགྱུར་རོ། །དེ་བཞིན་དུ་བློ་ཡང་ལུས་ལ་བརྟེན་པའི་ཕྱིར། ལུས་ཞིག་ན་འཇིག་པར་འགྱུར་ཏེ། ལུས་གཞན་དང་འབྲེལ་པ་མེད་པའི་ཕྱིར་རོ། །དེས་ན་སྐྱེ་བ་གཞན་ཉིད་མེད་པའི་ཕྱིར་སྐྱེ་བ་གཞན་དུ་གོམས་པས་བསགས་པ་མི་འགྲུབ་པོ་ཞེ་ན། དེ་ནི་རིགས་པ་མ་ཡིན་
[317a]
[317a.1]ཏེ། མིན་ཏེ་རྟེན་ནི་བཀག་ཕྱིར་རོ། །ཞེས་བྱ་བ་ལ། སྔར་གྱི་རྣམ་པར་ཤེས་པ་ལ་མ་ལྟོས་པའི་ལུས་ནི་རྒྱུ་རྒྱུན་ཉིད་ཀྱིས་སམ། ཡོན་ཏན་གྱིས་སམ། ནུས་པའི་རང་བཞིན་གྱིས་རྟེན་དུ་གྱུར་པའི་དངོས་པོ་བཀག་པའི་ཕྱིར་རོ། །ཇི་ལྟར་ལུས་ལ་བརྟེན་པ་མེད་པར་
[317a.2]དེ་ལྟར་ཡང་བཤད་པར་བྱའོ། །ཇི་སྟེ་ཕ་དང་མའི་མིག་ལ་སོགས་པ་དང་འདྲ་བར་བུའི་མིག་ལ་སོགས་པ་དམིགས་པར་གྱུར་པས་འཇིག་རྟེན་གཞན་ལས་འོངས་པ་ཉིད་ནི་མ་ཡིན་ན། དེ་ཇི་ལྟར་འཇིག་རྟེན་ཕ་རོལ་པར་ཡོད་པར་ངེས་ཤེ་ན། འདིར་སྨྲས་པ། སྐྱེ་ཞིང་སྐྱེ་བ་ལེན་པ་ན། །
[317a.3]རང་གི་རིགས་ལ་ལྟོས་མེད་ཅན། །འབྱུང་རྔུབ་དབང་པོ་བློ་རྣམས་ནི། །ལུས་གཅིག་པུ་ལས་མ་ཡིན་ཏེ། །ཐལ་ཆེས་ཕྱིར་རོ་ཞེས་བྱ་བ་ལ་འབྱུང་བ་དང་རྔུབ་པ་དང་། དབང་པོ་དང་། བློ་དེ་དག་གི་གཡོ་བ་ལ་སོགས་པའི་རང་བཞིན་གྱི་ཁྱད་པར་ལས་རང་གི་རིགས་ལ་ལྟོས་པ་མེད་པའི་
[317a.4]ཡུལ་ལས་སྐྱེ་བ་ནི་མ་ཡིན་ཏེ། གང་གི་ཕྱིར་མི་སྲུན་པ་ནི་བདག་དང་བདག་གིར་གོམས་པའི་རྒྱུ་ཅན་ཡིན་གྱི། ཕ་དང་མའི་རང་བཞིན་ཁོ་ནའི་རྒྱུ་ཅན་མ་ཡིན་ནོ། །དམ་པ་མ་ཡིན་པ་དང་འགྲོགས་ན་སྐྱེ་བོ་དམ་པ་ཡིན་པར་སྣང་སྟེ། གཡོ་བ་ལ་སོགས་པ་དེས་སྔོན་མི་སྲུན་པ་ལ་གོམས་
[317a.5]པའི་རྒྱུ་ཅན་ཡིན་ནོ། །མ་ལ་སོགས་པའི་སེམས་ཀྱི་དཔྱོད་པ་ལ་སོགས་པ་བུ་ལ་སྣང་བ་མ་ཡིན་ནམ་ཞེ་ན། མ་ཡིན་ཏེ་ཕ་དང་མའི་རང་བཞིན་འདོད་པའི་སྟོབས་ཉིད་ལས། དེར་ཕ་དང་མ་དག་ཡོངས་སུ་འཛིན་ཏེ་དཔེར་ན་མཁན་པོས་ཆོས་བཤད་པའི་ལུགས་སློབ་མ་དེ་ལ་གོམས་པའི་
[317a.6]ཁྱད་པར་ཉིད་སྣང་སྟེ། མཁན་པོའི་བློ་ལས་སློབ་མ་ཤེས་པ་སྐྱེ་བ་ཅན་དུ་ཁས་ལེན་པ་ནི་མ་ཡིན་ཏེ། སློབ་དཔོན་ནི་གཅིག་ཏུ་བདག་པོ་ཙམ་ཉིད་དོ། །སློབ་དཔོན་གྱིས་བཤད་པ་ལ། རང་འདོད་པ་གོམས་པའི་སྟོབས་ཀྱིས་ཆོས་འཛིན་པར་བྱེད་དོ། །དེ་བཞིན་དུ་མ་ལ་སོགས་པའི་ཆོས་
[317a.7]འཛིན་པ་འདི་ཡང་རང་འདོད་པ་ལ་གོམས་པ་ཉིད་དོ། །གང་མ་ལ་སོགས་པའི་རང་བཞིན་འདོད་པ་ཙམ་ནི་ཕ་ལ་སོགས་པའི་སྤྱོད་པ་འཛིན་པ་མ་ཡིན་ནོ། །དེའི་ཕྱིར་ལུས་འབའ་ཞིག་ལས་སྲོག་ཆགས་རྣམས་སྐྱེ་བ་ནི་མ་ཡིན་ནོ། །འོན་ཏེ་སྲོག་ཆགས་རྣམས་ཀྱི་སྐྱེ་བ་ནི་ལུས་འབའ་ཞིག་
[317b]
[317b.1]ལས་འབྱུང་བར་ཁས་ལེན་ཏེ། གོམས་པ་ལས་མི་སྲུན་པ་ལ་སོགས་པ་མཐོང་བ་ལས་ནི་གནོད་པ་དང་བྲལ་བའི་ཕྱིར་སྲོག་ཆགས་རྣམས་ནི་ལུས་ལས་སྐྱེས་པ་ལ་གནོད་པ་མེད་དོ་ཞེ་ན། དེ་ལྟ་ན་ཡང་སྐྱེ་བ་ཡོངས་སུ་འཛིན་པ་ལ་ཐལ་ཆེས་ཏེ། ད་ལྟར་བྱུང་བའི་དུས་སུ་མི་སྲུན་པ་ལ་སོགས་པ་ལ་
[317b.2]གོམས་པར་འཇུག་པར་མི་འགྱུར་བ་དེ་བས་ན། རྒྱུ་དང་འབྲས་བུའི་དངོས་པོ་ཐམས་ཅད་ཉིད་ཉམས་པར་འགྱུར་རོ། །དེ་ལྟ་བས་ན་འབྲས་བུའི་ཆོས་གང་ཡིན་པ་དེ་ནི་རྒྱུ་མེད་པ་མ་ཡིན་ནོ། །གལ་ཏེ་ཡང་སྔོན་བྱིས་པའི་གནས་སྐབས་ན་མི་སྲུན་པ་ལ་སོགས་པ་མ་གཏོགས་པར་མི་སྲུན་པ་ལ་སོགས་
[317b.3]པ་ལ་གོམས་པ་དང་འབྲེལ་པར་ད་ལྟར་ཡང་སྣང་ངོ་། །དུ་བ་ནི་དུ་བ་ལས་ཀྱང་སྐྱེ་ཞིང་མེ་ལས་ཀྱང་བྱུང་བ་དང་། དེ་བཞིན་དུ་འབྲས་སཱ་ལུ་ནི་སཱ་ལུ་ཉིད་དང་རེས་འགའ་བ་ལང་གི་ལྕི་བ་ལས་འབྱུང་བ་དང་། རི་མོ་ནི་རི་མོ་མཁན་གྱིས་བྱས་པ་དང་། རི་མོ་མཁན་མ་གཏོགས་པར་བྱའི་གཤོག་པ་ལ་སྣང་བ་དེ་
[317b.4]བཞིན་དུ། གོམས་པ་མ་གཏོགས་པ་ཉིད་དུ་མིག་ལ་གཡོ་བ་ལ་སོགས་པ་མཐོང་བའི་མ་ཡིན་ནམ་ཞེ་ན། དེ་ནི་རིགས་པ་མ་ཡིན་ཏེ། གང་གི་ཕྱིར་དུ་བས་བསྐྱེད་པའི་དུ་བའི་རྣམ་པ་བཞིན་དུ། མེ་ལས་འབྱུང་བ་ནི་མ་ཡིན་ཏེ། མེ་ཡིས་བསྐྱེད་པའི་དུ་བ་ནི་རྒྱུན་འཇུག་པ་ཡིན་ལ། དུ་བས་
[317b.5]བསྐྱེད་པའི་དུ་བ་ནི་སྐད་ཅིག་རེ་རེ་ལ་འཇིག་ཅིང་འཇུག་པར་ཤེས་པར་བྱའོ། །འདི་ནི་བྱིས་པའི་དུས་སུ་གོམས་པ་མ་གཏོགས་པར་གོམས་པ་ལས་བྱུང་བའི་གཡོ་བ་ལ་སོགས་པ་ཇི་ལྟ་བ་དེ་བཞིན་གཡོ་བ་ལ་སོགས་པ་ཤེས་པར་བྱ་སྟེ། དེས་ན་སྔོན་རང་གི་རིགས་ལ་གོམས་པ་སྔོན་དུ་འགྲོ་
[317b.6]བ་ཡིན་ནོ། །ཡང་ན་ཐལ་ཆེས་པར་འགྱུར་ཏེ། གལ་ཏེ་ལུས་འབའ་ཞིག་ལས་འབྱུང་འཇུག་ལ་སོགས་པ་འབྱུང་བ་དེའི་ཚེ་ས་ལ་སོགས་པ་ལས་དབུགས་འབྱུང་བར་འགྱུར་ཏེ། འབྱུང་བ་ཉིད་དུ་ཁྱད་པར་མེད་པའི་ཕྱིར་རོ། །དེ་ལྟ་བས་ན་སའི་སྟེང་ཐམས་ཅད་སྲོག་ཆགས་ཀྱི་རང་
[317b.7]བཞིན་དུ་ཐལ་བར་འགྱུར་རོ། །འོན་ཏེ་འབྱུང་བ་ཡོངས་སུ་གྱུར་པའི་ཁྱད་པར་ཉིད་སྲོག་ཆགས་སུ་སྐྱེ་ན་ཡོངས་སུ་གྱུར་པའི་ཁྱད་པར་དེ་ཡང་། ཡོངས་སུ་གྱུར་པའི་ཁྱད་པར་གཞན་ལས་ཡིན་པས་ཡོངས་སུ་གྱུར་པ་གཞན་དང་གཞན་དུ་མཐའ་མེད་པར་འགྱུར་རོ། །ཇི་སྟེ་ཡོངས་
[318a]
[318a.1]སུ་གྱུར་པ་དེ་མཐོང་དུ་རུང་ངམ་མི་རུང་། གལ་ཏེ་མཐོང་དུ་རུང་ན་ནི་མེད་དེ་མི་དམིགས་པའི་ཕྱིར་རོ། །འོན་ཏེ་མཐོང་དུ་མི་རུང་ན་ནི་ཡོད་པར་ཇི་ལྟར་ཤེས། འབྱུང་བ་མ་གཏོགས་པ་གང་ཡང་ཡོངས་སུ་གྱུར་པའི་རྒྱུ་མེད་དེ། གལ་ཏེ་གྱུར་པ་རང་གི་ཉེ་བར་ལེན་པ་ཙམ་དང་
[318a.2]འབྲེལ་པ་ཡིན་ན། ཡུལ་དང་དུས་ཐམས་ཅད་པར་འགྱུར་རོ། །ཇི་སྟེ་འབྱུང་འཇུག་ལ་སོགས་པ་རྣམས་འབྲས་བུར་འགྱུར་བའི་དབང་པོ་ལ་སོགས་པ་སྐྱེ་བ་གཞན་དུ་འཇུག་པ་ནི་གྲུབ་ཏུ་ཆུག་ན་མ་འོངས་པའི་སྐྱེ་བར་འཇུག་པར་ཇི་ལྟར་གྲུབ། འཆི་བའི་གནས་སྐབས་ཀྱི་མིག་ལ་སོགས་
[318a.3]པའི་འཇིག་རྟེན་གཞན་གྱི་ཤེས་པའི་འབྲས་བུ་མ་ཡིན་པ་མ་ཡིན་ནོ་ཞེ་ན། དེ་ནི་བདེན་པ་མ་ཡིན་ཏེ། །གང་གི་ཕྱིར་ན་མཐོང་བ་གང་། །ཉིང་མཚམས་སྦྱོར་བར་ནུས་པ་ནི། །དེ་ཅིར་འགྱུར་ན་ཕྱིས་གང་མེད། །གང་གིས་མཚམས་སྦྱོར་ལྡན་མེད་ཡིན། །ཞེས་བྱ་བ་ལ། སྲོག་ཆགས་ལ་
[318a.4]སོགས་པ་སྔོན་གྱི་དུས་སུ་ཉིང་མཚམས་སྦྱོར་བར་ནུས་པ་དང་ལྡན་པ་གནས་སྐབས་བར་མར་མཐོང་བ་གང་ཡིན་པའམ། འཇིག་རྟེན་གཞན་དུ་འཇུག་པའི་སྲོག་ཆགས་ལ་སོགས་པ་དེ་ནི་སྔར་ཡོད་པ་ལ་ལྷག་པ་ཅི་ཞིག་ཡོད་ན། རྒྱུ་གང་ཞིག་མེད་པ་ཡིན། ཕྱི་ནས་འཆི་བའི་གནས་སྐབས་སུ་
[318a.5]གང་གི་དེ་ལྷག་པའི་རྒྱུ་བ་དང་བྲལ་བས། ཕྱིས་འཆི་བའི་དུས་སུ་འཇིག་རྟེན་གཞན་དུ་འབྱུང་བའི་སྲོག་ལ་སོགས་པས་སྲོག་ལ་སོགས་པ་ཉིང་མཚམས་སྦྱོར་བ་ནི་མ་ཡིན་ཞིང་། དེའི་རྒྱུ་མེད་པ་ཡིན། གཡོ་བ་ལ་སོགས་པས་ནི་མི་གཡོ་བ་གོམས་པ་ལས་འབྱུང་སྟེ་ཉམ་ཆུང་བ་ལ་སོགས་པའི་
[318a.6]མཚན་ཉིད་ལས་ཉམ་ཆུང་བ་ནི་ལུས་ལ་བརྟེན་པ་དེས་ན་སྐྱེ་བ་སྔ་མ་མ་གྲུབ་པ་མ་ཡིན་ནམ། དེ་བས་ན་སྐྱེ་བ་ཐོག་མ་མེད་པ་བརྒྱུད་པ་མ་གྲུབ་པས་ཐོག་མ་མེད་པ་ཉིད་མེད་ཀྱང་དཔེར་ན་དུ་བ་དུ་བ་གཞན་གྱིས་བསྐྱེད་པ་རྒྱུན་ཆད་པ་དེ་བཞིན་དུ་རིགས་མཐུན་པས་བསྐྱེད་པའི་སྲོག་ལ་སོགས་པ་ཡང་ཀུན་དུ་
[318a.7]མི་འཇུག་པའི་ཕྱིར་རོ། །སྲོག་ཆགས་རྣམས་ཐོག་མ་མེད་པ་མ་ཡིན་ནོ། །སྔ་ནི་མེད་པའི་སེམས་ཅན་གྱི་སྐྱེ་བ་ཡང་སྔོན་གྱི་རྒྱུན་འཆད་པའི་ཕྱིར་རོ་ཞེ་ན། འདིར་སྨྲས་པ་སྐྱེ་བ་རྣམས་ཉམ་ཆུང་བ་ལ་སོགས་པ་རང་བཞིན་ཉིད་ཀྱིས་མ་ཡིན་ཏེ། འོན་ཀྱང་རང་གི་རིགས་གོམས་པ་
[318b]
[318b.1]ལས་སོ། །ཇི་ལྟར་གཡོ་བ་ལ་སོགས་པ་དེ་གོམས་པ་ལས་ཡིན་པ་དེ་བཞིན་དུ་ཉམ་ཆུང་བ་ལ་སོགས་པ་ཡང་ལེ་ལོ་གོམས་པ་ལས་ཏེ། འདི་ལྟར་གཉིད་གོམས་པ་ལས་མིག་རྡིབ་པར་འགྱུར་ཞིང་སད་ན་ནི་མི་གཡོ་བའི་ཕྱིར་ལོག་པ་དང་སད་པ་བཞིན་མངོན་དུ་གྱུར་པའི་བག་ཆགས་ལས་
[318b.2]སད་པ་དང་པོ་སྐྱེ་བའི་ཚེ་མིག་ལ་སོགས་པ་དང་ལྡན་ནོ། །ལུས་གཞན་ལ་གནས་པ་ལུས་གཞན་དུ་ཇི་ལྟར་འཕོ་བར་འགྱུར་ཞེ་ན། ཇི་ལྟར་རྫས་གཞན་ལ་གནས་པའི་ནུས་པ་སྔགས་ལ་སོགས་པའི་མཐུས་རྫས་གཞན་ལ་འཕོ་བ་སྟེ། འདི་ལྟར་དུག་གི་ནུས་པ་སྔགས་ཀྱི་སྟོབས་
[318b.3]ཀྱིས་ཁ་ར་ལ་སོགས་པ་ལ་འཕོ་བ་དེ་བཞིན་དུ་ལས་ཀྱི་མཐུས་ལུས་ལ་གནས་པའི་མིག་ལ་སོགས་པ་ལུས་གཞན་ལ་འཕེན་པར་བྱེད་པས་དེ་བས་ན་མིག་ལ་སོགས་པ་ཐོག་མ་མེད་པ་གྲུབ་པ་ཡིན་ནོ། །སྙི་བ་ལ་སོགས་པའི་ཁྱད་པར་བཞིན་འབྱུང་པོའི་ཚོགས་གང་ཡང་རུང་བའི་
[318b.4]སྲོག་ལ་སོགས་པ་ཡང་མ་ཡིན་ནམ་ཞེ་ན། འདིར་སྨྲས་པ། གང་ལ་དྲོད་གཤེར་སོགས་སྐྱེ་བས། །སྐྱེ་བོ་སྐྱེ་བར་མི་འགྱུར་བའི། །ས་སོགས་ཆ་སྟེ་འགའ་ཡང་མེད། །དེའི་ཕྱིར་ཐམས་ཅད་ས་བོན་བདག །ཅེས་བྱ་བ་ལ་ས་ལ་སོགས་པའི་ཆ་འམ། བྱེ་བྲག་འགའ་ཡང་ཡོད་
[318b.5]པ་མ་ཡིན་ཏེ། ས་ལ་སོགས་པའི་ཆ་གང་ཞིག་ཏུ་སྲོག་ཆགས་སྐྱེ་བ་མ་ཡིན་པའོ། ཐ་མ་ན་དྲོད་གཤེར་ལས་སྐྱེ་བ་ནི་མཐོང་བ་སྟེ་སོགས་པའི་སྒྲས་ནི་སྒོ་ང་ལས་སྐྱེ་བ་ལ་སོགས་པ་གཟུང་ངོ་། །འདི་ལྟར་རས་ལ་གཏུམས་པའི་ཆུ་ཡང་ཞག་ཅུང་ཟད་ཅིག་གནས་པ་ན་དེར་སེམས་ཅན་
[318b.6]གནས་ཏེ་རྒྱ་མཚོ་ཆེན་པོ་ན་ནི་སྲོག་ཆགས་ཆ་བྱད་སྣ་ཚོགས་པ་ཐམས་ཅད་སྣང་བ་ཡིན་ནོ། །དེའི་ཕྱིར་དེ་བས་ན། འབྱུང་བའི་སྐྱེད་པ་ཐམས་ཅད་སྲོག་ཆགས་དང་ལྡན་པ་དེའི་ཕྱིར་སྲོག་ལ་སོགས་པ་ནི་ཆ་ཤས་མེད་པ་ཡིན་ནོ། །འོ་ན་ཁྱོད་ཀྱི་ལུགས་ཀྱིས་ཀྱང་ཐམས་ཅད་
[318b.7]སྲོག་ཆགས་དང་ལྡན་པ་མ་ཡིན་ནམ། ས་ལ་སོགས་པ་ཐམས་ཅད་ལ་སྲོག་ཆགས་སྐྱེ་བ་མེད་ཅེ་ན། འདིར་སྨྲས་པ། དེ་ལྟར་དབང་པོ་སོགས་རིགས་ལས། །ལྟོས་མེད་རྣམས་ནི་འབྱུང་བ་ན། །ཇི་ལྟར་གཅིག་ནི་འགྱུར་བ་ཡིན། །ཀུན་འགྱུར་ཁྱད་པར་མེད་ཕྱིར་
[319a]
[319a.1]རོ། །ཞེས་བྱ་བ་ལ་འབྱུང་བ་རྣམས་ལས་སུ་རུང་ཡང་རིགས་མཐུན་པ་ལ་མ་ལྟོས་པར་ཤེས་པ་སྐྱེ་བ་མ་ཡིན་ཏེ། འོན་ཀྱང་ལས་བདག་པོར་གྱུར་པ་ལས་སྲོག་ཆགས་རྣམས་འབྱུང་བ་ཡིན་ནོ། །དེས་ན་བག་ཆགས་སད་པ་སྐྱེ་བ་གང་ཡིན་པ་དེར་སྲོག་ཆགས་རྣམས་སྐྱེ་བ་
[319a.2]ཡིན་ནོ། །ཁྱོད་ལ་ནི་འབྱུང་བ་ལས་མ་གཏོགས་པའི་ལས་ཁས་མི་ལེན་པའི་ཕྱིར་འབྱུང་བ་ཙམ་དང་འབྲེལ་པའི་མིག་ལ་སོགས་པ་རྣམས་འདོད་དོ། །དེ་བས་ན་དབང་པོ་ལ་སོགས་པ་རྣམས་རིགས་མཐུན་པ་ལ་མ་ལྟོས་པར་འབྱུང་ན་ནི་དཔེར་ན་འབྱུང་བའི་ཚོགས་གཅིག་ལ་སྲོག་ཆགས་ཀྱི་གཟུགས་སུ་
[319a.3]གྱུར་པ་དེ་བཞིན་དུ་འབྱུང་བ་རྣམས་ཐམས་ཅད་ལ་ཡང་འགྱུར་རོ། །ནུར་ནུར་པོ་ལ་སོགས་པའི་རིམ་གྱིས་ལུས་ཀྱི་མངལ་དུ་མིག་ལ་སོགས་པ་དམིགས་པ་གྲུབ་པའི་མཐས་གཞག་པ་མ་ཡིན་ནམ། དེར་ཡང་མིག་ལ་སོགས་པའི་ཤེས་པ་རྣམས་སྐྱེ་བ་སྟེ། དེ་ཇི་ལྟར་འཇིག་རྟེན་ཕ་རོལ་
[319a.4]གྱི་དབང་པོ་ལས་ཡིན་པར་བརྗོད་པར་བྱ་ཞེ་ན། འདིར་སྨྲས་པ། དབང་རྣམས་སོ་སོ་ལ་གནོད་ཀྱང་། །ཡིད་བློར་གནོད་པ་ཡོད་མ་ཡིན། །འདི་འཇིག་ན་ནི་དེ་དག་གི །འཇིག་པ་དག་ཀྱང་མཐོང་བར་འགྱུར། །ཞེས་བྱ་བ་ལ། ཡིད་ཀྱི་རྣམ་པར་ཤེས་པས་འཕངས་པ་ཉིད་ཀྱི་མིག་ལ་
[319a.5]སོགས་པ་ནི་རང་གི་བྱ་བ་བྱེད་པ་སྟེ། ཡིད་ཀྱི་རྣམ་པར་ཤེས་པ་དབང་པོ་ལ་བརྟེན་པ་ནི་མ་ཡིན་ནོ། །འཇིག་རྟེན་ཕ་རོལ་གྱི་ཡིད་དེ་ཉིད་ལས་ཡིན་ཏེ། འབྱུང་བའི་ཚོགས་ལ་བརྟེན་པ་ནི་མ་ཡིན་ནོ། །སོ་སོ་པ་ནི་རེ་རེ་བའི་མིག་ལ་སོགས་པ་ལ་གནོད་ཀྱང་དེ་ཡིད་ཀྱི་བློ་ལ་ནི་གནོད་པ་མ་
[319a.6]ཡིན་ཏེ་འགྱུར་བ་ནི་མ་ཡིན་ནོ། །ཡིད་ཀྱི་བློ་དེ་ལ་ནི་མྱ་ངན་ལ་སོགས་པས་འཇིག་པ་སྟེ་གྱུར་ན། མིག་ལ་སོགས་པ་དེ་རྣམས་འཇིག་པས་ཏེ་ཉམས་པ་འམ་འགྱུར་བར་མཐོང་བ་ཡིན་ནོ། །དེ་གྱུར་པས་འགྱུར་བ་ནི་འབྲས་བུ་ཉིད་ཡིན་པ་དེ་བས་ན་ཡིད་ཀྱི་རྣམ་པར་ཤེས་པ་དབང་པོ་ལ་
[319a.7]རྟེན་པ་ནི་མ་ཡིན་ནོ། །འོན་ཀྱང་དེ་ཉིད་དེ་ལ་བརྟེན་པ་ཡིན་ནོ། །གལ་ཏེ་ཡིད་ཀྱི་རྣམ་པར་ཤེས་པ་ལ་མིག་ལ་སོགས་པ་བརྟེན་ན་འོ་ན་ནི་ཡིད་ཀྱི་རྣམ་པར་ཤེས་པ་རྟེན་མེད་པ་ཉིད་དུ་འགྱུར་ཏེ། རྣམ་པར་ཤེས་པ་དྲུག་ནི་རྟེན་དང་བཅས་པར་ཁས་བླངས་པ་མ་ཡིན་ནམ་ཞེ་ན། འདིར་སྨྲས་
[319b]
[319b.1]པ། དེ་ཕྱིར་བློ་གནས་པ་ཡི་རྟེན། །བློ་ཉིད་འགའ་ཞིག་ལ་བརྟེན་ཏེ། །དབང་པོ་རྣམས་ཀྱི་རྒྱུ་མཚན་ཡིན། །དེ་ཕྱིར་བློ་ལས་དབང་པོ་ཡིན། །ཞེས་བྱ་བ་ལ། དབང་པོའི་གནས་པའི་རྟེན་ནི་འཕེན་པར་བྱེད་པའི་ལས་ཡིན་ཏེ། འདི་ལྟར་དགེ་བ་དང་། མི་དགེ་བའི་ལས་ཀྱིས་འཕངས་པའི་
[319b.2]ཡིད་ཀྱི་བློ་སོ་སོར་ངེས་པའི་དུས་སུ་ཡོད་པ་ཡིན་ནོ། །དབང་པོ་རྣམས་ཀྱི་རྒྱུ་མཚན་འཕེན་པར་བྱེད་པའི་ལས་ནི་བློ་གནས་པའི་རྟེན་ཡིན་ནོ། །ལས་དེ་ནི་ལས་ཞེས་བྱ་བ་ཉིད་དེ་དབང་པོའི་རྟེན་ཡིན་ཏེ་སྔོན་གྱི་བློ་ཉིད་ལ་བརྟེན་པ་ཡིན་ནོ། །དེ་ལྟར་ཡང་སེམས་ཀྱི་ལས་ནི་སེམས་ཉིད་ཀྱིས་
[319b.3]བྱེད་པ་ཡིན་ཏེ། འདིས་ནི་ལས་ནི་ཡིད་ཀྱི་བློའི་རྟེན་ཡིན་པར་བསྟན་ཏེ། ལས་ཀྱང་ཡིད་ཀྱི་བློ་སྔ་མ་ཉིད་ཡིན་ནོ། །དེ་ལྟ་བས་ན་ཐོག་མ་མེད་པའི་ལས་ནི་སེམས་ལ་ཉེ་བར་སྦྱར་བའི་ཕྱིར་རོ། །དེའི་ཕྱིར་དབང་པོ་ནི་བློ་ལས་ཡིན་ཏེ་དབང་པོ་ལས་ནི་མ་ཡིན་ཏེ། དེ་ལྟར་ནི་འགྱུར་མོད་ཀྱི་ང་
[319b.4]དང་བདག་གི་རྣམ་པ་ཡིད་ཀྱི་རྣམ་པར་ཤེས་པ་ལས་ད་ལྟར་བྱུང་བའི་སྐྱེ་བ་ཡོངས་སུ་འཛིན་གྱི་མ་འོངས་པའི་སྐྱེ་བ་ཇི་ལྟར་འཛིན་ཅེ་ན། འདིར་སྨྲས་པ། ཅི་སྟེ་འཕེན་བྱེད་ཡོད་གྱུར་ན། །ཕྱིས་ཀྱང་དེ་དང་འདྲ་བར་འགྱུར། །ཞེས་བྱ་བ་ལ་འཇིག་རྟེན་ཕ་རོལ་འདས་པར་གྱུར་པའི་བློ་
[319b.5]ལ་མ་རིག་པ་དང་སྲེད་པར་ལྡན་པ་དེ་ལྟ་བུ་ཡོད་པར་གྱུར་ན་ཚེ་འདིའི་མིག་ལ་སོགས་པ་རྣམས་ལ་འཕེན་པར་བྱེད་པ་ཡོད་པའམ། ད་ལྟར་གྱི་དུས་སུ་ཡིད་ཀྱི་བློ་འཕེན་པ་ཡང་རུང་སྟེ། དེ་བཞིན་དུ་འཆི་བའི་གནས་སྐབས་སུ་ཡང་དབང་པོ་ལ་སོགས་པ་རྣམས་འཇིག་རྟེན་ཕ་རོལ་ཏུ་
[319b.6]འགྲོ་བར་འགྱུར་བའི་འཕེན་པར་བྱེད་པ་ཡོད་པ་ཡིན་ནོ། །དེ་ལྟ་བུས་ནི་གསུང་རབ་ལས་བསྟན་པའི་ཡིད་ཀྱི་རྣམ་པར་ཤེས་པ་ཕྱི་མའི་འཇིག་རྟེན་ཕ་རོལ་དུ་འགྲོ་བར་ནུས་པ་ཡིན་ལ། སྔོན་གྱི་ནི་མཐོང་བ་གང་ཞེས་བྱ་བ་ལ་སོགས་པ་སྟེ་གཡོ་བ་ལ་སོགས་པའི་རང་བཞིན་དང་
[319b.7]ལྡན་པ་མིག་ལ་སོགས་པ་འཇིག་རྟེན་ཕ་རོལ་པོ་ཡིན་པར་མཐོང་བ་གང་ཞེས་པས་བསྟན་ཏོ། །ཡིད་ཀྱི་རྣམ་པར་ཤེས་པ་ཡང་ལུས་ལ་བརྟེན་པར་གསུང་རབ་ལས་གསུངས་པ་མ་ཡིན་ནམ། དེ་དང་ཇི་ལྟར་མི་འགལ་ཞེ་ན། འདིར་སྨྲས་པ། ཤེས་པ་དེ་ཡིས་ཕན་འདོགས་
[320a]
[320a.1]ཕྱིར། །ཡིད་ནི་ལུས་ལ་བརྟེན་པར་བཤད། །ཅེས་བྱ་བ་ལ། དེའི་ཤེས་པ་ནི་ལུས་ཀྱི་ཤེས་པ་སྟེ། མིག་ལ་སོགས་པ་ལས་སྐྱེས་པའོ། །ཕན་འདོགས་ཕྱིར་ཏེ་ཕན་པར་བྱེད་པའི་ཕྱིར་བཅོམ་ལྡན་འདས་ཀྱིས་ཡིད་ནི་ལུས་ལ་བརྟེན་པར་བཤད་ཀྱི། དོན་དམ་པར་ནི་ཡིད་
[320a.2]ལུས་ལ་བརྟེན་པ་ནི་མ་ཡིན་ནོ། །དེའི་ཕྱིར་ངར་འཛིན་པའི་མཚན་ཉིད་ཀྱིས་ཡིད་ཀྱི་རྣམ་པར་ཤེས་པ་ནི་དབང་པོ་དང་ལུས་ལ་བརྟེན་པར་གནས་པ་ནི་མ་ཡིན་ནོ། །ཡང་བདག་དང་བདག་གིར་འཛིན་པའི་ཡིད་དོན་དམ་པར་ལུས་ལ་བརྟེན་པ་ཉིད་དུ་ཅིའི་ཕྱིར་ཁས་མི་ལེན་ཏེ། ལུས་དང་བྲལ་བའི་
[320a.3]རྩིག་པ་ལ་ཡིད་མ་མཐོང་བའི་ཕྱིར་མ་ཡིན་ནམ་ཞེ་ན་དེ་ནི་བདེན་པ་མ་ཡིན་ཏེ། མ་མཐོང་བ་ཙམ་གྱི་འབྲས་བུ་ཉིད་མ་ཡིན་གྱི། འོན་ཀྱང་ཡོད་པ་དང་མེད་པའི་རྗེས་སུ་འབྲང་བའི་ཕྱིར་རོ། །དེ་ཡང་ལུས་ཡིད་ཀྱི་རྣམ་པར་ཤེས་པ་ལ་བརྟེན་པ་ནི་མཐོང་སྟེ། འདི་ལྟར་མྱ་ངན་ལ་སོགས་པ་ཡིད་
[320a.4]གྱུར་ན། ལུས་རིད་པར་གྱུར་པ་དང་། ཡིད་དགའ་བར་གྱུར་ན་ལུས་ཚོན་པོར་གྱུར་ཞིང་ཆེན་པོར་འགྱུར་རོ། །ཡང་ན་ཇི་ལྟར་དབང་པོ་མེད་བློ་མིན། །དེ་མེད་པར་ནི་དེ་དག་ཀྱང་། །དེ་ལྟར་ཕན་ཚུན་རྒྱུ་ཉིད་ཡིན། །དེ་ཕྱིར་ཕན་ཚུན་རྒྱུ་ཅན་ནོ། །ཞེས་བྱ་བ་ལ། གལ་ཏེ་ཡང་དབང་པོ་མེད་
[320a.5]ན་རྩིག་པ་ལ་སོགས་པ་ལ་བློ་མི་འབྱུང་བ་དེ་ལྟར་མིག་ལ་སོགས་པ་དེ་ཡང་ཡིད་ཀྱི་མཚན་ཉིད་ཀྱི་བློ་མེད་ན་འབྱུང་བ་མ་ཡིན་པ་དེས་ན་ཇི་ལྟར་མིག་ལ་སོགས་པ་དང་འབྲེལ་པ་ཅན་གྱི་བློ་འམ། ལུས་དང་འབྲེལ་པ་ཅན་དེ་བཞིན་དུ་མིག་ལ་སོགས་པའི་བློ་དང་འབྲེལ་པ་ཅན་རྣམས་ཡིན་
[320a.6]ནོ། །དེ་ལྟ་ན་ཡང་ཕན་ཚུན་རྒྱུ་ཉིད་ཡིན་ཏེ། ཕན་ཚུན་རྒྱུར་འགྱུར་བ་ཡིན་ནོ། །དེ་ལྟ་བུར་གྱུར་པ་ལ་སྐྱོན་ཅི་ཡོད་ཅེ་ན། དེ་དག་ཕན་ཚུན་རྒྱུ་ཡིན་པའི་ཕྱིར། །དུས་ད་ལྟར་བ་བཞིན་དུ་སྐྱེ་བ་དང་འཆི་བའི་ཚེ་ལུས་དང་ཡིད་ཕན་ཚུན་རྒྱུ་ཉིད་དུ་འགྱུར་བས་འཇིག་རྟེན་ཕ་རོལ་མེད་པ་ནི་
[320a.7]མ་ཡིན་ནོ། །མིག་ལ་སོགས་པ་དང་འབྲེལ་པ་ལ་གནོད་པ་ཅན་བརྗོད་ཀྱི་ལུས་དང་འབྲེལ་པ་ལ་ནི་གནོད་པ་མེད་པ་མ་ཡིན་ནམ་ཐལ་ཆེས་ཕྱིར་རོ་ཞེས་བསྟན་པའི་ཕྱིར་རོ་ཞེ་ན་མ་ཡིན་ཏེ། ཡིད་ཀྱི་རྣམ་པར་ཤེས་པ་རང་བརྒྱུད་པ་འཇིག་རྟེན་ཕ་རོལ་དུ་འགྲོ་བས་སྐབས་སུ་བབ་པའི་
[320b]
[320b.1]ཕྱིར་རོ། །དེ་ཡང་གཡོ་བ་ལ་སོགས་པའི་ཐ་སྙད་རང་གི་རིགས་ལ་གོམས་པ་སྔོན་དུ་འགྲོ་བར་བསྟན་ཏོ་ཞེ་ན། འདིར་སྨྲས་པ། རིམ་པ་མིན་ལས་རིམ་ཅན་མིན། །ཁྱད་པར་ཅན་མིན་ལྟོས་པའང་མིན། །ལུས་ལ་རིམ་པས་བློར་འགྱུར་ན། །དེ་ཡང་རིམ་པ་གསལ་བར་བྱེད། །ཅེས་
[320b.2]བྱ་བ་ལ་ཡིད་ཀྱི་རྣམ་པར་ཤེས་པ་དང་འབྲེལ་པའི་ལུས་བསྟན་ན། ལུས་དབང་པོ་དང་བཅས་པ་ཡང་བསྟན་པ་ཉིད་དེ། ཡིད་ཀྱི་བློ་དང་འབྲེལ་པའི་རིགས་པ་མཚུངས་པའི་ཕྱིར་རོ། །དེ་ལྟར་ཡང་སྨྲས་པ། རྒྱུ་ལུས་ཏེ་རྟག་པ་ཡིན་ནམ་མི་རྟག་པ་ཡིན། །དེ་ལ་མི་རྟག་པ་ཡིན་ན་གང་
[320b.3]གི་ཕྱིར་རིམ་མིན་ལས་ཏེ་རིམ་པ་ཡོད་པ་མ་ཡིན་པའི་ལུས་ལས་རིམ་པ་ཅན་གྱི་རྣམ་པར་ཤེས་པ་སྐྱེ་བ་ཡོད་པ་ནི་མ་ཡིན་ཏེ། རྣམ་པར་ཤེས་པ་རིམ་གྱིས་སྐྱེ་བའི་ཕྱིར་རོ། །ལུས་རྟག་པ་ལས་ཡིན་ན་ནི། དུས་རྟག་ཏུ་འབྲས་བུ་ཅིག་ཅར་བྱེད་པར་འགྱུར་བའི་ཕྱིར་རོ། །དེ་ལྟར་ནི་
[320b.4]འགྱུར་མོད་ཀྱི་ལུས་རྟག་པའི་གྲོགས་བྱེད་པ་ལ་ལྟོས་པ་རྒྱུ་ཉིད་ཡིན་གྱི་ཡན་གར་བ་ནི་མ་ཡིན་ནོ། །གྲོགས་བྱེད་པས་ཀྱང་འབྲས་བུ་རིམ་གྱིས་སྐྱེད་དོ་ཞེ་ན་འདིར་སྨྲས་པ། ཕན་འདོགས་པའི་ཡུལ་ལ་རྟག་པ་སྟེ་ལྟོས་པ་མ་ཡིན་ཏེ། དེ་ལྟ་བུ་ཡིན་ན་ཁྱད་པར་ཅན་མ་ཡིན་པ་སྟེ།
[320b.5]འདི་ལ་ཁྱད་པར་མེད་པའི་ཕྱིར་རོ། །འདིའི་དགོངས་པ་ནི་རྟག་པའི་ལུས་ལ་གྲོགས་བྱེད་པ་ནི་དོན་གཅིག་བྱེད་པས་ཡིན་ནམ་ཕུལ་དུ་བྱུང་བས་འཇོག་པས་ཡིན། དེ་ལ་རྟག་པའི་གྲོགས་བྱེད་པ་དོན་གཅིག་བྱེད་པས་ཡིན་ན། ཚོགས་པའི་དུས་བཞིན་སྔར་ཡང་དུས་སོ་སོར་འབྱུང་
[320b.6]བའི་ཕྱིར་རོ། །དེས་ན་དེ་དང་འབྲེལ་པའི་འབྲས་བུ་དེའི་ཚེ་འཐོབ་པར་འགྱུར་ཏེ། དེ་ལྟར་ཚོགས་པ་ཉིད་ཀྱིས་སྐྱེད་པ་ཡིན། འོན་ཏེ་ལྷག་པར་གཞག་པ་ཡིན་པ་དེའི་ཚེ་ཡང་རྟག་པར་མི་འགྱུར་བ་ཉིད་ཀྱིས་ཡོད་པ་མ་ཡིན་ནོ། །འགྱུར་ན་ནི་མི་རྟག་པ་ཉིད་དོ་ཞེས་བཤད་དོ། །འོན་
[320b.7]ཏེ་ལུས་སྔར་གྱི་བློ་ལ་ལྟོས་ནས་རྣམ་པར་ཤེས་པ་རིམ་གྱིས་སྐྱེད་པ་དེ་ལྟ་ན་ཡང་ལུས་ཀྱང་སྐད་ཅིག་མ་ཉིད་དུ་འགྱུར་ཏེ། དེ་ལྟ་བས་ན་ལུས་བློ་དང་ལྷན་ཅིག་པ་སྔ་མ་སྔ་མའི་ལུས་ནི་བློ་དང་ལྷན་ཅིག་སྐྱེ་བ་ཐོབ་པར་འགྱུར་རོ། །དེ་ལྟ་ན་ནི། སྐད་ཅིག་སྔ་མ་སྔ་མ་ནི། སོ་
[321a]
[321a.1]སོའི་སྐད་ཅིག་སྔར་མེད་དེའི། །རྒྱུར་འགྱུར་དེ་ཡི་ཕྱིར་ན་རྒྱུ། །ཐམས་ཅད་དུ་ནི་མཐོང་བར་འགྱུར། །ཞེས་བྱ་བ་ལ། སྐད་ཅིག་མ་སོ་སོ་སྔ་ན་མེད་པ་ནི་ཤེས་པ་དང་བཅས་པའི་ལུས་དེའི་ཤེས་པ་དང་བཅས་པའི་ལུས་ཉིད་སྔ་མ་སྔ་མ་ལུས་ཀྱི་སྐད་ཅིག་མ་
[321a.2]རྒྱུར་འགྱུར་རོ། །དེ་བས་ན་དུས་དབུ་མ་བཞིན་མཐོང་བ་ཉིད་རྒྱུ་ཡིན་ཏེ། ཤེས་པ་དང་བཅས་པའི་ལུས་བསྐྱེད་པ་སྐྱེ་བ་དང་འཆི་བ་དག་ལ་ཡོད་དེ། འདིས་ནི་ལུས་ཉིད་རྒྱུ་ཡིན་ཡང་འཇིག་རྟེན་ཕ་རོལ་འགྲུབ་པོ་ཞེས་བསྟན་ཏོ། །འཆི་བའི་སེམས་གང་ཡིན་པ་དེ་ཡང་སེམས་གཞན་དང་
[321a.3]ཉིང་མཚམས་སྦྱོར་བ་ནི་མ་ཡིན་ནོ། །དཔེར་ན་ཐ་མའི་སེམས་བཞིན་ནོ། །འཆི་བའི་སེམས་ཀྱང་འཆི། །འཕོ་བའི་དུས་སུ་བདག་ལ་སོགས་པས་རྣམ་པར་ཤེས་པ་མ་ཡིན་ནམ། ཇི་ལྟར་འཇིག་རྟེན་ཕ་རོལ་གྲུབ་ཅེ་ན། དེའི་ཕྱིར་སྨྲས་པ་ཐ་མའི་སེམས་ནི་སེམས་གཞན་དང་མཚམས་
[321a.4]སྦྱོར་བ་ལ་འགལ་བ་ཅི་ཡོད་ཅེས་བྱ་བ་ལ། འཆི་བའི་སེམས་ནི་སེམས་གཞན་ཏེ། འཇིག་རྟེན་ཕ་རོལ་པོར་གྱུར་པ་དང་མཚམས་སྦྱོར་བ་ལ་འགལ་བ་ཅི་ཞིག་ཡོད་དེ། འདི་ལྟར་འཆི་བའི་སེམས་སུ་འང་འགྱུར་ལ། སེམས་གཞན་དང་མཚམས་སྦྱོར་བ་ཡོད་པར་འགྱུར་བ་འདི་ལ་
[321a.5]འགལ་བ་ཅི་ཡོད། འདིས་ནི་ཐེ་ཚོམ་ཟ་བའི་མ་ངེས་པ་ཉིད་བསྟན་པ་ཡིན་ནོ། །འོན་ཏེ་འཆི་བའི་སེམས་གཞན་དང་ཉིང་མཚམས་སྦྱོར་བ་དགྲ་བཅོམ་པ་ལ་འགལ་བར་མཐོང་ངོ་ཞེ་ན། འདིར་སྨྲས་པ། དགྲ་བཅོམ་སེམས་གང་དེ་ཡང་ནི། །གང་ཕྱིར་མཚམས་སྦྱོར་མེད་པར་འདོད། །
[321a.6]ཅེས་བྱ་བ་ལ། དགྲ་བཅོམ་པའི་ཐ་མའི་སེམས་སེམས་གཞན་དང་མཚམས་མི་སྦྱོར་བར་ཚད་མ་གང་གིས་ཤེས་པ་ཡིན་ཏེ། འདིས་ནི་དཔེ་ལ་བསྒྲུབ་བྱ་མ་ཚང་བར་སྟོན་ཏོ། །དེ་ལྟར་ནི་འགྱུར་མོད་ཀྱི། འདོད་ཆགས་དང་བྲལ་བའི་འཆི་བའི་སེམས་སེམས་གཞན་དང་
[321a.7]མཚམས་སྦྱོར་བར་འགྱུར་བ་མ་ཡིན་པར་གྲུབ་པའི་མཐའ་ཉིད་ཀྱིས་སྟོན་པའི་ཕྱིར་རོ། །ཇི་ལྟར། སེམས་ནི་རྣམ་པར་ཐར་བ་ན། །མར་མེ་བཞིན་དུ་མྱ་ངན་འདའ། །ཞེས་གསུངས་སོ་ཞེ་ན། འདིར་སྨྲས་པ། ཚད་མས་མ་གྲུབ་དོན་ཅན་གྱི། །གྲུབ་མཐའ་དོན་དུ་རྟོགས་སམ་
[321b]
[321b.1]ཅི། །ཞེས་བྱ་བ་ལ། ཚད་མས་མ་གྲུབ་པའི་དོན་ཅན་ནི་ཡོངས་སུ་མ་གྲུབ་པའི་དོན་ཅན་གྱི་གྲུབ་པའི་མཐའོ། །དེས་ཇི་ལྟར་རྟོགས་པར་འགྱུར། འདིའི་དོན་ནི་གྲུབ་པའི་མཐའ་ཚད་མ་ཡིན་ནམ་ཚད་མ་མ་ཡིན། དེ་ལ་གལ་ཏེ་ཚད་མ་མ་ཡིན་པ་དེ་ལྟ་ན་ཡང་། ཇི་ལྟར་གྲུབ་པའི་
[321b.2]མཐའ་བསྟན་པའི་འདོད་ཆགས་དང་བྲལ་བའི་སེམས་གཞན་དང་མཚམས་སྦྱོར་བར་མི་འགྱུར་རོ་ཞེས་བཟུང་བ་དེ་བཞིན་དུ་གྲུབ་པའི་མཐའ་བརྗོད་པའི་བདག་ལ་སོགས་པའི་སེམས་སེམས་གཞན་དང་མཚམས་སྦྱོར་རོ་ཞེས་བསྟན་པ་འདི་ཡང་ཅིའི་ཕྱིར་གཟུང་བར་མི་བྱ། འོན་
[321b.3]ཏེ་དེ་ཚད་མ་མ་ཡིན་པ་དེའི་ཚེ་འདོད་ཆགས་དང་བྲལ་བའི་སེམས་མཚམས་སྦྱོར་མེད་དོ་ཞེས་ཇི་ལྟར་ཤེས་པར་བྱ། དེ་ལ་འདོད་ཆགས་དང་བྲལ་བའི་སེམས་ནི་བདག་ཉིད་ཐམས་ཅད་ཀྱི་རྒྱུན་ཆད་པ་མ་ཡིན་ཏེ། འོན་ཀྱང་ཉོན་མོངས་པ་རྒྱུན་འཆད་པ་ཉིད་ཀྱི་ཡོངས་སུ་དག་པའི་
[321b.4]སེམས་ཡོད་དོ། །མར་མེ་བཞིན་དུ་མྱ་ངན་ལས་འདས་པའི་རང་བཞིན་གྱི་ཐར་པ་ནི་ཕྱི་རོལ་གྱི་ཚུལ་ལ་ཡིན་གྱི། དོན་དམ་པར་ནི་མ་ཡིན་ནོ། །ཞེས་བཤད་པར་བྱའོ།། །།ཚད་མ་རྣམ་འགྲེལ་གྱི་འགྲེལ་པ་ལས། །བམ་པོ་བཞི་པ། འདིར་རྒོལ་བའི་ལན་ནི།
[321b.5]དེ་རྒྱུ་མ་ཚང་ཕྱིར་ཡིན་ན། །དེ་ཉིད་འདིར་ནི་ཅིས་མི་བརྗོད། །ཅེས་བྱ་བ་ལ། དེ་ལྟར་འགྱུར་མོད་ཀྱི་རྒྱུ་ནི་མ་རིག་པ་དང་སྲེད་པའི་མཚན་ཉིད་དེ་མ་ཚང་བའི་ཕྱིར་ན་འདོད་ཆགས་དང་བྲལ་བའི་སེམས་དེ་སེམས་གཞན་དང་མཚམས་སྦྱོར་བར་མི་འགྱུར་རོ་ཞེ་ན། དེ་ལྟ་ན་ཡང་རྒྱུ་མ་ཚང་
[321b.6]བ་དེ་ཉིད་འདིར་ཏེ་བདག་ཅག་ལ་སོགས་པ་འཆི་བའི་སེམས་ལ་ཅིའི་ཕྱིར་མི་བརྗོད་དེ། འཆི་བའི་སེམས་ཉིད་ཡིན་པའི་ཕྱིར། །ཞེས་བྱ་བ་ལ་སོགས་པ་མ་ངེས་པའི་གཏན་ཚིགས་ཅི་སྟེ་འགོད་པར་བྱེད། འོ་ན་རྒྱུ་ལུས་ཀྱི་མཚན་ཉིད་འཆི་བའི་དུས་སུ་མ་ཚང་བའི་ཕྱིར་རྒྱུར་ལེན་པར་བྱེད་
[321b.7]པ་ཡིན་ནོ་ཞེ་ན་དེ་ཡང་འདིར་ལྷག་པར་བཀོད་པས་ཅི་བྱ་སྟེ། འོན་ཀྱང་འཆི་བའི་སེམས་ཁོ་ན་འགོད་པར་བྱའོ། །འོན་ཏེ་དེ་ནི་མ་ངེས་པའི་ཕྱིར་མི་འགོད་ན། དེ་ལྟ་ན་ཡང་རྒྱུ་མ་ཚང་བ་ཡང་མ་གྲུབ་པའི་ཕྱིར་མཚུངས་པར་གཏན་ཚིགས་ལྟར་སྣང་བ་ཡིན་ནོ། །རྒྱུ་མ་ཚང་བ་ལ་
[322a]
[322a.1]སོགས་པ་གཏན་ཚིགས་མ་གྲུབ་པ་མ་ཡིན་ཏེ། འདི་ལྟར་ལུས་ཉིད་དབང་པོ་དང་བཅས་པ་ལས་སམ། དབང་པོ་མེད་པ་ལས་ཡིན་ཏེ། སེན་མོ་ལ་སོགས་པ་བཞིན་ཡིད་ཀྱི་ཤེས་པ་སྐྱེ་བ་མ་ཡིན་ནོ། །གང་གི་ཕྱིར་སྙིང་གའི་ཕྱོགས་སུ་སེམས་པ་རྟོགས་པའི་རྣམ་པ་
[322a.2]དམིགས་སོ་ཞེ་ན། འདིར་སྨྲས་པ། དབང་པོ་བཅས་ལ་ཡིད་ཤེས་མིན། །དེ་བློ་བཞིན་འཛིན་ཐོབ་ཕྱིར་རོ། །ཤེས་བསྐྱེད་ནུས་པ་ཐ་དད་ཕྱིར། །ཐམས་ཅད་ལས་ནི་མ་ཡིན་ནོ། །སེམས་ཉིད་མེད་ཕྱིར་གཞན་ལས་མིན། །རྒྱུ་དབྱེར་མེད་པས་ལྷན་ཅིག་གནས། །དབང་བཞིན་གཟུགས་
[322a.3]དང་རོ་བཞིན་ནོ། །དོན་གྱི་སྒོ་ནས་འགྱུར་བ་ཡིན། །ཞེས་བྱ་བ་ལ། ཡིད་ཀྱི་བློའི་རྒྱུ་མཚན་དབང་པོ་དང་བཅས་པའི་ལུས་ཡིན་ནམ། དབང་པོ་མེད་པ་ཡིན། རེ་ཞིག་དབང་པོ་དང་བཅས་པ་ནི་མ་ཡིན་ནོ། །དེ་བཞིན་དེ་དབང་པོའི་བློ་བཞིན་ནོ། །ཡིད་ཀྱི་རྣམ་པར་ཤེས་པ་ཉིད་འཛིན་པར་འགྱུར་ཕྱིར་
[322a.4]ཏེ། སྣང་བ་ཐོབ་པར་ཐལ་བར་འགྱུར་བའི་ཕྱིར་རོ། །དབང་པོ་དང་བཅས་པ་ནི་དབང་པོ་དང་ལྡན་པར་འཇུག་པས། དབང་པོའི་ལུས་སོ། །དེའི་ཕྱིར་ཡིད་ཀྱི་རྣམ་པར་ཤེས་པ་སྐྱེ་བར་འགྱུར་བ་མ་ཡིན་ཏེ། ཇི་ལྟར་མིག་གི་སྟོབས་ཀྱིས་སྐྱེས་པར་གྱུར་པ་གསལ་བར་སྣང་བ་དེ་བཞིན་དུ།
[322a.5]མིག་ལས་སྐྱེས་པའི་ཡིད་ཀྱི་རྣམ་པར་ཤེས་པ་གསལ་བར་སྣང་བར་འགྱུར་རོ་ཞེས་བྱ་བའི་ཐ་ཚིག་གོ། །རྒྱུ་གཅིག་ཉིད་ལས་མཚན་ཉིད་མི་མཐུན་པས་འབྲས་བུ་ཉེ་བར་བསྐྱེད་པ་ནི་མཐོང་བ་མ་ཡིན་ནམ། དཔེར་ན་མེ་ནི་དུ་བ་དང་ཐལ་བ་སྐྱེད་པར་བྱེད་པ་ན་ཚོགས་དེའི་དབྱེ་བས་ཡོད་
[322a.6]པར་འགྱུར་རོ། །དེ་ལ་གཟུགས་ཀྱིས་ཕན་འདོགས་པའི་མིག་གསལ་བར་སོ་སོར་སྣང་བའི་ཤེས་པ་སྐྱེ་ལ་མིག་གཟུགས་དང་བྲལ་བ་ནི་ཡིད་ཀྱི་རྣམ་པར་ཤེས་པ་སྐྱེད་པར་བྱེད་དོ། །དེ་བཞིན་དུ་རྣ་བ་ལ་ཡང་བལྟ་བར་བྱའོ་ཞེ་ན། དེ་ནི་བདེན་པ་མ་ཡིན་ཏེ་མིག་གི་རྗེས་སུ་འབྲངས་
[322a.7]པའི་ཤེས་པ་དབང་པོ་ལས་སྐྱེས་པ་ཡིན་ཏེ། དབང་པོ་ལ་ནི་ཡིད་ཀྱི་ཤེས་པའི་བྱེད་པ་མེད་ན། དེ་ཇི་ལྟར་ཡིད་ཀྱི་རྣམ་པར་ཤེས་པ་དབང་པོས་སྐྱེད་པ་ཡིན། དེའི་བློ་བཞིན་དུ་འཛིན་པ་ཐོབ་པར་འགྱུར་རོ་ཞེས་བྱ་བའི་ཐ་ཚིག་གོ། །དབང་པོའི་བྱེད་པའི་རྗེས་སུ་འབྲང་བ་ལ་ནི་མིག་
[322b]
[322b.1]གི་བློ་ཡིས་དོན་འཛིན་པ་ཡིན་ནོ་ཞེས་ཐ་སྙད་འདོགས་སོ། །གལ་ཏེ་ཡིད་ཀྱི་བློ་ཡང་དབང་པོ་ལས་སྐྱེ་ན། མིག་གི་ཤེས་པ་བཞིན་དུ་དབང་པོ་ལ་བརྟེན་ནས་དོན་རྟོགས་པ་ཡིན་ནོ། །དབང་པོའི་བྱ་བ་དང་བྲལ་ན། ཇི་ལྟར་ཡིད་ཀྱི་ཤེས་པ་དབང་པོ་ལས་སྐྱེས་ཞེས་བརྗོད་པར་བྱ།
[322b.2]མིག་གི་བྱེད་པ་ཡང་ཡིད་ལ་མི་དམིགས་ཏེ། དེས་ན་དབང་པོ་ལ་སྐྱེས་པ་ནི་ཡིད་ཀྱི་ཤེས་པ་མ་ཡིན་ནོ། །དེ་དག་གིས་ནི་སོ་སོར་དབང་པོ་ལས་སྐྱེས་པ་མ་ཡིན་ནོ་ཞེས་བྱ་བར་བསྟན་ཏོ། །དེ་ལྟར་འགྱུར་མོད་ཀྱི་མིག་ལ་སོགས་པའི་ཚོགས་པ་ལས་ཡིད་ཀྱི་རྣམ་པར་ཤེས་པ་སྐྱེ་
[322b.3]བར་འགྱུར་རོ་ཞེ་ན་ཐམས་ཅད་ལས་ཀྱང་མ་ཡིན་པའི་ཕྱིར་ཏེ། དབང་པོ་ལ་སོགས་པའི་ཚོགས་འདུས་པ་ལས་ཀྱང་ཡིད་ཀྱི་ཤེས་པ་སྐྱེ་བ་མ་ཡིན་ནོ། །ཅིའི་ཕྱིར་ཞེ་ན། ཤེས་པ་སྐྱེད་པའི་ནུས་པ་ཐ་དད་པའི་ཕྱིར་ཏེ། ཤེས་པ་སྐྱེད་པའི་ནུས་པ་སོ་སོར་ཐ་དད་པ་སྟེ། ཕན་ཚུན་
[322b.4]ལྟོས་པ་མེད་པར་མིག་ལ་སོགས་པ་ལ་མཐོང་བའི་ཕྱིར་རོ། །གང་དུ་ས་ལ་སོགས་པའི་ཚོགས་པ་ལས་འབྲས་བུ་སྐྱེད་པ་དེ་ཉིད་དུ་རྒྱུ་གཅིག་དང་བྲལ་ན་འབྲས་བུ་འབྱུང་བ་ནི་མ་ཡིན་ནོ། །མིག་ལ་སོགས་པ་འདུས་པ་ཉིད་ལས་ཤེས་པ་སྐྱེ་ན་ནི་རེ་རེ་དང་བྲལ་བས་མི་སྐྱེ་བའི་
[322b.5]ཕྱིར་དབང་པོ་རེ་རེ་བ་དང་བྲལ་ཡང་། དབང་པོ་གཞན་ལས་ཤེས་པ་དང་། །ཡིད་ཀྱི་བློ་མཐོང་བ་ཡིན་ནོ། །དེས་ན་ཚོགས་པ་ལས་ཀྱང་མི་སྐྱེའོ། །ཀྱང་གི་སྒྲས་ནི་གཏན་ཚིགས་སྔ་མ་གཟུང་ངོ་། །འོན་ཏེ་ཡིད་ཀྱི་རྣམ་པར་ཤེས་པ་སེམས་མེད་པའི་ལུས་ལས་འབྱུང་བ་
[322b.6]དེའི་ཚེ་སེམས་མེད་པའི་ཕྱིར་རྒྱུ་མཚན་གཞན་ལས་ཡིད་ཀྱི་རྣམ་པར་ཤེས་པ་སྐྱེ་བ་མ་ཡིན་ནོ་ཞེས་ཟེར་ན། འོ་ན་ཏེ་སེམས་མེད་པའི་ཕྱིར་ཞེས་བྱ་བའི་དོན་ནི་གལ་ཏེ་དབང་པོའི་ཤེས་པ་དང་བྲལ་བའི་ཕྱིར་ཡིན་ན། དེ་ནི་འདོད་པ་ཉིད་དེ། འདི་ལྟར་དབང་པོའི་ཤེས་པ་དང་བྲལ་བར་
[322b.7]གྱུར་ན། དེའི་ཤེས་པ་སྐྲ་དང་སེན་མོ་ལ་སོགས་པ་མི་སྐྱེ་སྟེ། ཡིད་ཀྱི་རྣམ་པར་ཤེས་པ་ནི་སྐྱེའོ། །འོན་ཏེ་ཡིད་ཀྱི་རྣམ་པར་ཤེས་པ་དང་བྲལ་བའི་ཕྱིར་ཡིན་ན། དེ་ལྟ་ན་ཡང་སྐྲ་ལ་སོགས་པ་ལ་ཡིད་ཀྱི་ཤེས་པ་མེད་པ་ནི་བསྒྲུབ་པར་བྱའོ། །ཡིད་ཀྱི་ཤེས་པ་དང་བྲལ་བ་ནི་གཏན་
[323a]
[323a.1]ཚིགས་ཡིན་པའི་ཕྱིར་དམ་བཅའ་བའི་དོན་གྱི་ཕྱོགས་གཅིག་གིས་མ་གྲུབ་བོ་ཞེ་ན། འདིར་སྨྲས་པ་ཇི་ལྟར་སེམས་པ་པོ་རེག་པ་ལ་སོགས་པས་དམིགས་པ་ན་དེ་ཤེས་པ་ཡིན་ཏེ། དེ་བཞིན་དུ་ཡིད་ཀྱི་རྣམ་པར་ཤེས་པས། སྐྲ་དང་། སེན་མོ་ལ་སོགས་པ་ལ་ནི་མ་ཡིན་ཏེ། དེ་དང་
[323a.2]འབྲེལ་པ་ཉིད་ཀྱིས་དེ་མེད་ན་ཡིད་ཀྱི་རྣམ་པར་ཤེས་པ་ཡང་མེད་པར་འགྱུར་རོ། །སེན་མོ་བཏབ་ན་ཡིད་འཁྲུགས་པར་འགྱུར་བས། གལ་ཏེ་ཡིད་ཀྱི་རྣམ་པར་ཤེས་པ་ལུས་ལ་བརྟེན་པ་མ་ཡིན་ན། ཇི་ལྟར་ལུས་དང་། སེམས་དག་ལྷན་ཅིག་པར་འགྱུར་བ་ཡིན་ཞེ་ན། འདིར་
[323a.3]སྨྲས་པ། ལས་ཞེས་བྱ་བའི་རྒྱུ་དེ་དང་ལྷན་ཅིག་གནས་པ་ངེས་པའི་རྒྱུ་ཐ་དད་པ་མེད་པའི་ཕྱིར། ལུས་དང་སེམས་ལྷན་ཅིག་གནས་པ་ཡིན་ཏེ། དབང་པོ་བཞིན་དང་། གཟུགས་དང་རོ་བཞིན་ཏེ། ཇི་ལྟར་དབང་པོ་རྣམས་དང་། གཟུགས་དང་། རོ་དག་ནི་ཕན་ཚུན་བསྟེན་པ་མ་
[323a.4]ཡིན་ཡང་། རྒྱུ་ཐ་དད་མེད་པས་དུས་ཅུང་ཟད་ཅིག་ལྷན་ཅིག་གནས་པ་ཡིན་ནོ། །དེ་ལ་གལ་ཏེ་ཡིད་ཀྱི་བློར་གྱུར་པས་དབང་པོའི་འགྱུར་བ་དེའི་འགྱུར་བ་དེ་ནི། མིག་ལ་སོགས་པ་དེ་ལ་བརྟེན་པ་ཡིན་པ་དེའི་ཚེ། བད་ཀན་ལ་སོགས་པས་ལུས་གྱུར་པ་ན། ཡིད་ཀྱི་རྣམ་པར་ཤེས་པ་
[323a.5]ཡང་འགྱུར་བའི་ཕྱིར་ཡིད་དེ་ལ་བརྟེན་པར་འགྱུར་རོ་ཞེ་ན། དེའི་ཕྱིར་དོན་གྱི་སྒོ་ནས་ཞེས་བྱ་བ་སྨོས་ཏེ་དོན་ནི་གཟུང་བ་སྟེ། མཚོན་ཆ་ལ་སོགས་པ་བཏབ་པའི་སྒོ་ནས་ཏེ། ལུས་འགྱུར་བ་བྱེད་པ་བརྟེན་པ་མེད་ན་ཡང་འགྱུར་རོ། །འདིའི་དགོངས་པ་ནི་རལ་གྲི་ལ་སོགས་པས་
[323a.6]བཏབ་པའི་ལུས་གྱུར་པས་ཡིད་འགྱུར་བར་ཡང་དམིགས་སོ། །ཡིད་འགྱུར་བ་ཙམ་གྱིས་ནི་བརྟེན་པར་འཇོག་པ་མ་ཡིན་ནམ། ཁྲག་ལ་སོགས་པ་མཐོང་བ་ཙམ་གྱིས་ཀྱང་རང་བཞིན་གྱིས་སྡར་མའི་ཡིད་འགྱུར་བར་མཐོང་བའི་ཕྱིར་ཡིན་གྱི། ཕྱི་རོལ་གྱི་ཁྲག་ཙམ་ལ་ཡིད་བརྟེན་པ་ནི་མ་
[323a.7]ཡིན་ནོ། །གཞན་ཡང་ལུས་གྱུར་ན་རྣམ་པར་ཤེས་པ་འགྱུར་བ་ནི་རྒྱུར་གྱུར་པ་ཡིན་ནམ་ཕན་འདོགས་པས་ཡིན་གྲང་ན། དེ་ལ་རྒྱུ་ཉིད་ཀྱིས་ནི་ལུས་ཡིད་ཀྱི་རྣམ་པར་ཤེས་པ་ཟློག་པར་བྱེད་པ་མ་ཡིན་ཏེ། རྒྱུ་ཉིད་མ་ཡིན་པའི་ཕྱིར་རོ། །དེ་ཉིད་སྨྲས་པ། གང་ཞིག་ཡོད་ཉིད་
[323b]
[323b.1]ཕན་འདོགས་བྱེད། །རྟག་ཏུ་དེ་ནི་རྗེས་འཇུག་ཕྱིར། །དེ་རྒྱུ་བདུན་པ་དང་ད་ལས། །སྐྱེ་བ་ཞེས་ནི་བརྗོད་པ་ཡིན། །ཞེས་བྱ་བ་ལ། གལ་ཏེ་རྒྱུ་ལྡོག་པར་བྱེད་པ་པོ་གང་ཞིག་ཡོད་པ་ཉིད་ཕན་འདོགས་པར་བྱེད་པའི་འབྲས་བུ་དེ་ལྡོག་པའི་རྒྱུ་ཡིན་ནོ། །ཇི་ལྟར་ཡོད་པ་ཉིད་ཕན་འདོགས་པ་
[323b.2]ཡིན་ཞེ་ན་རྟག་ཏུ་དེའི་རྗེས་སུ་འཇུག་པའི་ཕྱིར་ཏེ་འབྲས་བུའི་རྗེས་སུ་འཇུག་པའི་ཕྱིར་རོ། །རྗེས་སུ་འཇུག་པ་ནི་འབྲང་བའོ། །རྟག་ཏུ་ནི་རྒྱུན་དུའོ། །རྒྱུ་གང་ཞིག་ཡོད་པ་ཉིད་ཕན་འདོགས་པ་ན་རྟག་ཏུ་འབྲས་བུའི་རྗེས་སུ་འཇུག་པའི་ཕྱིར་ནི་རྒྱུ་ཡིན་ནོ། །དེ་ལོག་ན་འབྲས་བུ་ཡང་ལྡོག་
[323b.3]པར་བྱེད་དེ། གང་ཞིག་རེས་འགའ་ཕན་འདོགས་པ་དེ་མེད་ན། གཞན་དུ་རེས་འགའ་ཕན་འདོགས་ནུས་པ་དེར་འགྱུར་གྱི། དེ་ཉིད་ལྡོག་པར་བྱེད་པ་ནི་མ་ཡིན་ནོ། །དཔེར་ན་ཕུལ་དུ་བྱུང་བའི་རྒྱུ་འབྲས་སཱ་ལུ་ལ་སོགས་པའི་རྒྱུ་ས་བོན་ལོག་པར་བྱེད་པ་མ་ཡིན་པ་དེ་བཞིན་
[323b.4]དུ། ལུས་རྣམ་པར་ཤེས་པའི་འབྲས་བུ་མེད་པ་ནི་ལུས་ཀྱི་འགྱུར་བ་མེད་ན་ཡང་སྔར་གྱི་སེམས་ཙམ་འགྱུར་བ་ལས། རེས་འགའ་འགྱུར་བ་མཐོང་བའི་ཕྱིར་རོ། །དེ་ལྟ་བས་ན་ལུས་ཀྱི་ཡོད་པ་ཉིད་ཡིད་ཀྱི་རྣམ་པར་ཤེས་པ་ལས་ཕན་འདོགས་པར་བྱེད་པ་མ་ཡིན་ནོ། །འདི་ལྟར་
[323b.5]ལུས་ཡིད་ཀྱི་རྣམ་པར་ཤེས་པའི་རྒྱུ་ཉིད་ཡིན་ན། ཤེས་པ་སྐྱེས་ནས་ཤེས་སམ། དེ་ལས་མ་སྐྱེས་པར་ཡིན། དེ་ལས་མ་སྐྱེས་པ་ནི་མ་ཡིན་ཏེ། རྣམ་པར་ཤེས་པ་ཉིད་མེད་པའི་ཕྱིར་རོ། །ཤེས་པ་སྐྱེས་ནས་ཀྱང་རྒྱུ་ལུས་ལས་ཡིད་ཀྱི་རྣམ་པར་ཤེས་པ་ཅན་སྐྱེ་བར་ཤེས་པ་
[323b.6]མ་ཡིན་ནོ། །ང་འམ་བདག་གི་རང་བཞིན་ལ་རང་ལ་དམིགས་ནས། རྣམ་པར་རྟོག་གི་དེ་ལ་མ་དམིགས་པའི་ཤེས་པ་གཞན་འཛིན་པ་མ་ཡིན་ཏེ་ཐལ་ཆེས་པའི་ཕྱིར་རོ། །འོན་ཏེ་མི་གཞན་གྱི་རྣམ་པར་ཤེས་པ་ལས་སྔར་གྱི་ལུས་ཤེས་པ་ནས། དེ་ལས་ལུས་ལ་ཤེས་པ་
[323b.7]སོ་སོར་ངེས་པ་ཡིན་ནོ་ཞེ་ན། གང་དུ་སྐྱེས་བུ་གཞན་གྱིས་ཕ་རོལ་གྱི་ལུས་དམིགས་པ་དེ་རུ་ཕ་རོལ་གྱི་ཤེས་པ་དམིགས་ན་ཡང་ཕ་རོལ་གྱི་ཤེས་པ་ལས་ཐེ་ཚོམ་ཟ་བ་མ་ཡིན་ནམ། དཔེར་ན་གཉིད་ལོག་པའི་འབྲས་བུ་ལུས་ནི་མཐོང་བ་ལས། གཉིད་ལོག་པའི་ཤེས་པ་ལ་
[324a]
[324a.1]ཐེ་ཚོམ་ཟ་བ་བཞིན་ནོ། །དེ་བས་ན་ཕ་རོལ་གྱིས་ཀྱང་ཤེས་པ་ལུས་ཀྱི་འབྲས་བུར་མི་རྟོགས་སོ། །ལྕི་བ་ལས་སཱ་ལུ་སྐྱེ་བ་ཡང་། ལྕི་བའི་ཡོད་པ་ཉིད་ཕན་འདོགས་པར་བྱེད་པས་སཱ་ལུའི་རྗེས་སུ་འབྲང་བ་མ་ཡིན་ཏེ། དེ་ལྟ་ན་ཡང་ལྕི་བ་མེད་པར་སཱ་ལུའི་དངོས་པོ་ཡོད་པ་
[324a.2]མ་ཡིན་ནམ་ཞེ་ན། དེ་ནི་མི་བདེན་ཏེ། ཇི་ལྟར་ལྕི་བ་ལས་སཱ་ལུ་སྐྱེ་བ་དེ་བཞིན་དུ་དེ་ཉིད་ལས་སཱ་ལུ་སྐྱེ་བ་མ་ཡིན་ནོ། །ཡིད་ཀྱི་རྣམ་པར་ཤེས་པ་ནི་གཡེར་བག་དང་ལྡན་པ། སྐྱེ་བ་འདི་དང་ཕྱི་མ་ལ་ངེས་པ་མ་ཡིན་ནོ། །འདི་ཡོད་པས་འདི་ཡོད་པ་འདི་སྐྱེས་པས་འདི་སྐྱེ་བ་རྒྱུ་དང་འབྲས་བུའི་
[324a.3]མཚན་ཉིད་མ་ཡིན་ནམ། དེའི་ཇི་ལྟར་འགལ་བ་མེད་པའི་མཚན་ཉིད་ཡིན་ཞེ་ན། སྨྲས་པ། རྟག་ཏུ་ཕན་འདོགས་པར་བྱེད་པས་བདུན་པར་བརྗོད་དེ། འདི་ཡོད་པས་འདི་ཡོད་ཅིང་། འདི་སྐྱེས་པ་ལས་འདི་སྐྱེ་ཞེས་ལྔ་པས་རྟག་ཏུ་འཇུག་པར་བརྗོད་དོ། །དེ་བས་ན་ལྔ་པ་བདུན་པའི་
[324a.4]མཚན་ཉིད་ཀྱིས་འགལ་བ་མེད་དེ་དོན་གཅིག་པའི་ཕྱིར་རོ། །འོན་ཏེ་ཡིད་ཀྱི་རྣམ་པར་ཤེས་པ་ལ་ཕན་འདོགས་པར་བྱེད་པས་ལུས་ལྡོག་པར་བྱེད་པ་པོ་ཡིན་ནོ་ཞེ་ན། དེ་ལ་སྨྲས་པ། བུམ་སོགས་ལ་ནི་མེ་སོགས་བཞིན། །འགའ་ཞིག་ཚེ་ན་སེམས་རྒྱུན་ལ། །ཕན་འདོགས་བྱེད་
[324a.5]པའང་ཡིན་སླ་སྟེ། །དེ་ཙམ་གྱིས་ནི་ལྡོག་མ་ཡིན། །ཞེས་བྱ་བ་ལ་ཤེས་པ་ལ་ཕན་འདོགས་པར་བྱེད་པ་ལུས་ཡིན་མོད་ཀྱི། དེ་ལྟ་ན་ཡང་ལུས་ལ་སོགས་པ་དེ་ཙམ་གྱིས་ཏེ། ཕན་འདོགས་པ་ཙམ་གྱིས་རྣམ་པར་ཤེས་པ་ལྡོག་པ་ནི་མ་ཡིན་ནོ། །དཔེར་ན་བུམ་པ་ལ་སོགས་ཕན་
[324a.6]འདོགས་པར་བྱེད་པ་མེ་ཡིན་པས་དམར་པོ་ལ་སོགས་པའི་ཡོན་ཏན་འཇོག་པར་བྱེད་པ་དེ་ལྟ་ན་ཡང་ལྡོག་པར་བྱེད་པ་མ་ཡིན་ནོ། །འདི་ལ་བརྗོད་པར་བྱ་སྟེ། ལུས་ལ་གནས་པ་ཡིན་ན་སེམས། ལྡོག་པ་མེད་པར་ཐལ་ཕྱིར་རོ། །དེ་ཡོད་ཡོད་དང་དབང་འགྱུར་ཕྱིར། །དེ་ལས་
[324a.7]འབྱུང་རྔུབ་དེ་མ་ཡིན། །ཞེས་བྱ་བ་ལ། གལ་ཏེ་རྣམ་པར་ཤེས་པའི་རྒྱུ་ལུས་ཡིན་པ་དེ་ལྟ་ན་ཡང་ལུས་ལ་གནས་པ་སྟེ། རྟེན་ཡིན་ཡང་སེམས་ལྡོག་པར་མི་འགྱུར་རོ། །འབྱུང་བ་དང་རྔུབ་པ་ནི་སེམས་ཀྱི་རྒྱུ་མ་ཡིན་ནམ། དེའི་ཕྱིར་འཆི་བའི་ལུས་ལ་འབྱུང་བ་དང་རྔུབ་པ་མ་
[324b]
[324b.1]ཚང་ན། རྣམ་པར་ཤེས་པ་ལྡོག་པའི་ཕྱིར་རོ་ཞེ་ན། འདིར་སྨྲས་པ། འབྱུང་བ་དང་འཇུག་པ་ནི་སེམས་དེ་ཉིད་ལས་ཡིན་པ་དེ་བས་ན། འཇུག་པ་ལ་སོགས་པ་སེམས་དེ་མེད་ན་མ་ཡིན་ནོ། །དེ་ཅིའི་ཕྱིར་ཞེ་ན། དེ་ཡོད་ན་ཡོད་པའི་ཕྱིར་ཏེ། སེམས་ཡོད་ན་འབྱུང་བ་དང་རྔུབ་པ་ཡོད་པ་དང་།
[324b.2]སེམས་མེད་ན་མེད་པ་དེ་བས་ན་འབྱུང་བ་དང་རྔུབ་པ་དེ་ནི་སེམས་དང་འབྲེལ་པའོ་ཞེས་བྱ་བར་ངེས་པ་ཡིན་ནོ། །དབང་དུ་གྱུར་པའི་ཡང་ཕྱིར་ཏེ། འབྱུང་བ་དང་འཇུག་པ་སེམས་ཀྱིས་མ་བསྐྱེད་ན་ནི་དེའི་ཚེ་དབང་དུ་མི་འགྱུར་བ་ལས་འབྱུང་བ་དང་འཇུག་པ་དག་སེམས་ཀྱི་དབང་དུ་གྱུར་
[324b.3]པར་དམིགས་སོ། །གལ་ཏེ་ཡང་འབྱུང་བ་དང་འཇུག་པ་དག་རྒྱུ་གཞན་དག་ལས་སྐྱེ་བ་ཡིན་ན། སེམས་ལ་རག་ལས་པར་མི་འགྱུར་ཏེ། སེམས་ཀྱི་དངོས་པོ་ནི་རྒྱུ་གཞན་དང་འབྲེལ་པ་ལ་དབང་དུ་བྱེད་པ་ནི་མ་ཡིན་ནོ། །འོན་ཏེ་འབྱུང་བ་དང་འཇུག་པ་རྒྱུ་གཞན་ལས་སྐྱེ་བས་
[324b.4]སེམས་ལས་ངེས་པ་མ་ཡིན་ཏེ། དཔེར་ན་ཇོ་བོས་ཁོལ་པོ་བཞིན་ནོ་ཞེ་ན། དེ་ནི་བདེན་པ་མ་ཡིན་ཏེ། ཁོལ་པོར་གྱུར་པའི་སྐྱེ་བ་ནི། རྒྱུ་གཞན་ལས་སྐྱེས་པའི་ཕྱིར། ཇོ་བོས་བསྐྱེད་པ་ནི་མ་ཡིན་གྱི། འབྱུང་བ་དང་འཇུག་པ་ནི་སེམས་མ་གཏོགས་པར་མི་སྐྱེ་བའི་ཕྱིར་སེམས་དང་
[324b.5]འབྲེལ་པ་ཉིད་དོ། །གཉིད་ལོག་པའི་ཚེ་ཡང་འབྱུང་བ་དང་། འཇུག་པ་ཡོད་ན་དེ་ལ་སེམས་མེད་པའི་ཕྱིར་དེ་དག་ཇི་ལྟར་སེམས་དང་འབྲེལ་པར་འགྱུར་སྙམ་དུ་སེམས་ན། དེ་ནི་དེ་ལྟ་མ་ཡིན་ཏེ། སྡུར་པ་དྲག་པོ་ལ་སོགས་པའི་འགྱུར་བ་ཐམས་ཅད་སྔོན་གྱི་རྣམ་པར་ཤེས་པའི་
[324b.6]བག་ཆགས་ཀྱི་ཁྱད་པར་གྱི་རྗེས་སུ་འགྲོ་བ་སྟེ། འདི་ལྟར་དབུགས་གཞན་པ་ལ་གོམས་པས་རྨི་ལམ་དུ་གཞན་པར་རྒྱུ་ཞིང་། ཤིན་ཏུ་རིང་བ་ལ་གོམས་པས་དབུགས་རིང་བར་འགྱུར་རོ། །དེ་ལ་སྨྲས་པ། དབུགས་འབྱིན་པ་དང་འདྲེན་པ་དེའི། །འབད་རྩོལ་མེད་པར་གང་ལས་
[324b.7]འབྱུང་། །ཞེས་བྱ་བ་ལ། གལ་ཏེ་སྲོག་དང་རྩོལ་བའི་འབྲས་བུ་སེམས་ཡིན་ན་དེའི་ཚེ་འབྱུང་བ་དང་རྔུབ་པ་དང་སྤྲོ་བ་དང་། འདྲེན་པ་དག་དེའི་འབད་རྩོལ་མེད་པར་འགྱུར་ན། དེ་ལྟར་རྩོལ་བ་མེད་པར་འབྱིན་པ་དང་། འདྲེན་པ་མ་མཐོང་བའི་ཕྱིར་རོ། །འོན་ཏེ་སྤྲོ་བ་དང་།
[325a]
[325a.1]འདྲེན་པའི་འབྱུང་བ་དང་། རྔུབ་པ་དག་རྩོལ་བ་ལ་རག་ལུས་ཀྱི་ངོ་བོ་ཉིད་མ་ཡིན་ཏེ། དེ་རྒྱུ་གཞན་ལས་འབྱུང་བའི་ཕྱིར་རོ། །དེའི་ཕྱིར་འབྱུང་བ་ལ་སོགས་པའི་ངོ་བོ་ཉིད་ནི་སེམས་ལ་མ་ཡིན་གྱི། སེམས་ལ་འདྲེན་པ་དང་སྤྲོ་བ་ཡིན་ནོ་ཞེ་ན། རླུང་རྟེན་པ་རྒྱུ་
[325a.2]ཡིན་ནམ། མ་ཡིན་པར་བརྟག་ན། གལ་ཏེ་རྒྱུ་མ་ཡིན་ན་དེའི་ཚེ་རྣམ་པར་ཤེས་པ་མི་འགག་པར་འགྱུར་ཏེ་ལུས་ཡོད་པའི་ཕྱིར་རོ། །འོན་ཏེ་རླུང་རྟེན་པ་ཤེས་པའི་རྒྱུ་ཡིན་ན། དེ་ལྟ་ན་ཡང་ཤི་བའི་ལུས་ལ་ཡང་རླུང་རྟེན་པའི་རང་བཞིན་ཡོད་པས། འབྱུང་འཇུག་ནི་རླུང་རྟེན་པའི་འབྲས་བུ་
[325a.3]སྟེ། དེས་ན་དེ་དང་འབྲེལ་པའི་སེམས་ལྡོག་པ་མ་ཡིན་ནོ། །དེའི་ཕུལ་བྱུང་འགྲིབ་པ་ལས། །ཕུལ་བྱུང་འགྲིབ་པ་དག་ཏུ་འགྱུར། །ཕུལ་དུ་བྱུང་བ་དང་འགྲིབ་པ་ལས་སེམས་ཀྱང་འཕེལ་ཞིང་འགྲིབ་པ་ཐོབ་པར་འགྱུར་ཏེ། འབྱུང་བ་དང་འཇུག་པའི་འབྲས་བུ་ཡིན་པའི་ཕྱིར་གདོན་མི་
[325a.4]ཟ་བར་འགྲིབ་པར་འགྱུར་བའམ། འཕེལ་བར་འགྱུར་བ་སྟེ་འབྲས་བུ་ཉམས་པ་དང་སྐྱེ་བར་འགྱུར་གྱི། གཞན་དུ་ན་ཇི་ལྟར་རྒྱུ་རུ་འགྱུར། །དེ་དག་གིས་ནི་འབྱུང་བ་དང་འཇུག་པ་དག་ནི་སེམས་དང་འབྲེལ་པ་བཀག་ནས་སྔ་མའི་ཤེས་པ་དང་འབྲེལ་པར་བསྟན་པ་ཡིན་ལ། ད་ནི་
[325a.5]འབྱུང་བ་ལ་སོགས་པའི་འབྲས་བུ་སེམས་ཡིན་ན། འགག་པར་མི་འགྱུར་རོ་ཞེས་བསྟན་པའི་ཕྱིར། དེ་དག་ཐལ་བར་མཚུངས་ན་ཡང་ཞེས་བྱ་བ་སྨོས་ཏེ། དེ་དག་འབྱུང་བ་དང་འཇུག་པ་དག་དགག་པ་མེད་པར་ཐལ་བར་མཚུངས་པ་ཡིན་ནོ། །ལུས་ལ་བརྟེན་པར་འགྱུར་བའམ།
[325a.6]རླུང་རྟེན་པ་ལ་འབྲེལ་པའི་འབྱུང་བ་དང་འཇུག་པ་དག་ནི་འགག་པ་མེད་པར་འདས་མ་ཐག་པ་ཉིད་དུ་བསྟན་པ་ཡིན་ནོ། །ལུས་དང་འབྲེལ་པ་ཉིད་ཡིན་ཡང་ལུས་ཡོད་ན་འགག་པ་ནི་མ་ཡིན་པ་བཞིན་དུ་སེམས་ཀྱི་རྒྱུ་སེམས་ཡིན་ནམ། འབྱུང་བ་ལ་སོགས་པ་ཡིན་ན་སེམས་འགག་པ་མེད་
[325a.7]པར་ཐལ་བར་འགྱུར་ཏེ། སྔོན་བཞིན་དུ་ཡོད་པའི་ཕྱིར་མ་ཡིན་ནམ་ཞེ་ན། འདིར་སྨྲས་པ། སེམས་རྒྱུ་ཡིན་ཡང་མཚུངས་མ་ཡིན། །གནས་པ་འཕེན་པར་བྱེད་པ་ཡི། །རྒྱུ་གཞན་ཡིན་པར་འདོད་པའི་ཕྱིར། །ཞེས་བྱ་བ་ལ། སྐྱོན་མཚུངས་པ་མ་ཡིན་ཏེ། གང་ལ་ཞེ་ན། སེམས་ནི་སེམས་
[325b]
[325b.1]ཀྱི་རྒྱུ་ཅན་ཡིན་ཡང་ངོ་། །ཅིའི་ཕྱིར་ཞེ་ན་རྒྱུ་མཚན་གང་གི་གནས་པ་ཞེས་བྱ་བ་དུས་ཅུང་ཟད་ཅིག་སྡུད་པའོ། །འཕེན་པར་བྱེད་པའི་རྒྱུ་ལས་སམ། མ་རིག་པ་ཞེས་བྱ་བ་སེམས་ལས་གཞན་པ་ཡང་ཁས་བླངས་པ་ཡིན་ནོ། །དེའི་དགོངས་པ་ནི་འདི་ཡིན་ཏེ། དཔེར་ན་རྨི་ལམ་ནི་གཉིད་དང་རྗེས་སུ་
[325b.2]འབྲེལ་པ་ཡིན་ཀྱང་གཉིད་ལ་རྣམ་པ་སྣ་ཚོགས་པའི་སྣང་བ་འབྱུང་བ་ཉིད་ཡིན་ཏེ། འདི་ལྟར་གཉིད་དུ་མཚུངས་པ་ཡིན་ཡང་། གང་ལ་ལ་ཁ་ཅིག་ཏུ་རྨི་ལམ་མཐོང་བ་ནི་བག་ཆགས་སད་པའི་རྒྱུ་ཉིད་ཀྱི། རྨི་ལམ་གྱི་ཤེས་པ་དེ་དག་སྣ་ཚོགས་པ་ཡིན་པའི་ཕྱིར་སྣ་ཚོགས་པ་མཐོང་བ་ཡིན་ནོ། །
[325b.3]དེ་བཞིན་དུ་ཤེས་པ་ནི་སེམས་ཀྱིས་བསྐྱེད་པ་ཡིན་ཡང་། ལས་ཀྱི་བག་ཆགས་ཀྱི་ཆ་ཡིས་བྱས་པས་སྲོག་ཆགས་རྣམས་འཚོ་བའི་དུས་སུ་ཐ་དད་པ་ཡིན་ནོ། །ཉེས་པས་ཉམས་པས་ལུས་རྒྱུ་མིན། །སྡོང་བུ་ལ་སོགས་བཞིན་ཞེ་ན། །ཞེས་བྱ་བ་ལ་སོགས་པ་བད་ཀན་དང་མཁྲིས་པ་ལ་སོགས་པའི་
[325b.4]ཉེས་པས་ཉམས་པར་ནི་གྱུར་པའི་ལུས་རྒྱུར་མི་འགྱུར་ཏེ། དཔེར་ན་ཆུ་ལ་སོགས་པས་བསླད་པའི་སྡོང་བུ་ནི་མར་མེ་སྐྱེད་པར་བྱེད་པ་མ་ཡིན་ནོ། །དེས་ནི་ལྡོག་པ་མེད་པར་ཐལ་བར་འགྱུར་རོ་ཞེས་བརྗོད་པ་དེ་བསལ་བ་མ་ཡིན་ནམ་ཞེ་ན། འདིར་སྨྲས་པ། ཤི་བའི་ཉེས་པས་ཉམས་གྱུར་ཚེ། །སླར་ཡང་
[325b.5]སྐྱེ་བ་ཉིད་དུ་འགྱུར། །ཞེས་བྱ་བ་ལ། ཤི་བའི་ལུས་ལ་ཉེས་པ་རིམས་དང་དུག་ལ་སོགས་པའི་སྐྱོན་མཉམ་པས་འགག་པར་འགྱུར་ན། སླར་ཡང་དུས་ཕྱིས་ལུས་མ་ཚང་བ་མེད་པ་ཉིད་དུ་འགྱུར་བའི་ཕྱིར་སླར་འཚོ་བ་ཉིད་དུ་ཐལ་བར་འགྱུར་རོ། །ཇི་ལྟར་རླུང་ལ་སོགས་པའི་ཉེས་པས་ཉེས་པའི་
[325b.6]ལུས་ལ་རྣམ་པར་ཤེས་པ་སྐྱེ་བར་མི་འགྱུར། གང་གི་ཚེ་ཤི་བའི་ལུས་ལ་སྐྱོན་དང་བྲལ་བ་དེ་ལྟ་ན་ཡང་ཅིའི་ཕྱིར་རྣམ་པར་ཤེས་པ་སྐྱེད་པར་མི་བྱེད། དཔེར་ན་ལིང་ཏོག་གིས་ཉམས་པའི་མིག་གཟུགས་ཀྱི་རྐྱེན་མི་བྱེད་ཀྱི། ལིང་ཏོག་དང་བྲལ་བར་གྱུར་ན་མིག་གིས་མཐོང་བར་འགྱུར་བ་ལྟ་
[325b.7]བུའོ། །འདིར་བརྩད་པ། གལ་ཏེ་མེ་ནི་ལྡོག་ན་ཡང་། །ཤིང་གི་འགྱུར་བ་མི་ལྡོག་བཞིན། །ཞེས་བྱ་བ་ལ། ཤིང་འགྱུར་བར་བྱེད་པའི་རྒྱུ་མེ་ལོག་པར་གྱུར་ཀྱང་མེ་ཡིས་བྱས་པའི་ཤིང་འགྱུར་བ་ཐལ་བ་ནི། སླར་ལྡོག་པ་མ་ཡིན་པས་ཤིང་གི་དངོས་པོར་ཁས་ལེན་པ་མེད་པ་ཇི་ལྟ་བ་དེ་
[326a]
[326a.1]བཞིན་དུ་ཤི་བའི་ལུས་ལ་སེམས་འགྱུར་བའི་རྒྱུ་རིམས་ལ་སོགས་པ་ལོག་ཀྱང་སེམས་དེ་ལྡོག་པ་ནི་མེད་དོ་ཞེ་ན། མ་ཡིན་གསོ་སྦྱོར་ཡོད་ཕྱིར་རོ། །ཞེས་བྱ་བ་ལ། དེ་ནི་རིགས་པ་མ་ཡིན་ཏེ། །གསོ་བའི་སྦྱོར་བ་ཡོད་པའི་ཕྱིར་རོ། །དེས་ནི་འདི་སྐད་དུ་སྟོན་པར་འགྱུར་ཏེ། གལ་ཏེ་རླུང་ལ་སོགས་པའི་
[326a.2]ཉེས་པ་ཉམས་ནའང་། ཤིང་འགྱུར་བ་བཞིན་དེའི་ཚེ་མེ་ཡིས་ཅུང་ཟད་ཙམ་བསྒྱུར་བས་ཤིང་མི་ལྡོག་པ་དེ་བཞིན་དུ་རིམས་ལ་སོགས་པའི་སྐྱོན་གྱིས་བྱས་པ་ཤིན་ཏུ་ཆུང་ངུས་ཀྱང་ལྡོག་པར་མི་འགྱུར་བའི་ཕྱིར། གསོ་བས་སྐྱོན་སེལ་བ་མ་ཡིན་པར་འགྱུར་བ་ལས་གསོ་བ་ལས་སྐྱོན་ཉམས་
[326a.3]པར་མཐོང་བ་ཡིན་ནོ། །འཆི་བའི་འགྱུར་བ་ལས་སྔ་རུ་ཉེས་པར་ཅུང་ཟད་འགྱུར་བ་ཉིད་དེ་ཉེས་པས་གཞག་པའི་འཆི་བ་སེལ་བར་མི་འགྱུར་རོ། །དེས་ན་རླུང་ལ་སོགས་པའི་ཉེས་པ་འགྱུར་བར་བྱེད་པས་ལྡོག་པ་དང་ལྡོག་པ་མེད་པ་ཡོད་ཅེ་ན། འདིར་སྨྲས་པ། སླར་ཡང་མི་འབྱུང་ཕྱིར་
[326a.4]ལ་ལ། །ཁ་ཅིག་འགྱུར་བ་སྐྱེད་པར་བྱེད། ཁ་ཅིག་བཟློག་པ་ཡིན་ཕྱིར་དཔེར། །ཤིང་དང་གསེར་ལ་མེ་ལྟ་བུའོ། །དང་པོ་ཆུང་ཡང་ལྡོག་པ་མིན། །ཕྱིར་ལྡོག་རུང་བའི་འགྱུར་བ་གང་། །དེ་ནི་སླར་འབྱུང་བ་ཡིན་ཏེ། །གསེར་གྱི་སྲ་བ་ཉིད་བཞིན་ནོ། །ཞེས་བྱ་བ་ལ་འདིའི་དོན་ནི་འདི་
[326a.5]ཡིན་ཏེ། ཆོས་ཅན་ལ་ལ་ལ་སླར་ཡང་མི་འབྱུང་བ་ཡིས་འགྱུར་བ་ཁ་ཅིག་སྐྱེད་པར་བྱེད་དེ། དཔེར་ན་ཤིང་ལ་མེ་ཡིས་སླར་མི་འབྱུང་བའི་འགྱུར་བ་རྩོམ་པར་བྱེད་ལ། ཆོས་ཅན་ཁ་ཅིག་ལ་ནི་བཟློག་ནས་སླར་འབྱུང་བ་ཡིས་འགྱུར་བ་ཁ་ཅིག་སྐྱེད་པར་བྱེད་དེ། དཔེར་ན་མེ་ཉིད་ཀྱིས་གསེར་
[326a.6]ལ་སླར་འབྱུང་བའི་འགྱུར་བ་སྐྱེད་དོ། །འདི་ལྟར་གསེར་ཞུ་བར་གྱུར་ནས་ཡང་སྲ་བར་འགྱུར་ལ། དང་པོ་སྟེ་ཤིང་ཆུང་བ་སྟེ་བག་ཙམ་ཅིག་ཚིག་པ་ཡང་ལྡོག་པ་མིན་ཏེ། སླར་རྣལ་མོར་མི་འགྱུར་ཏེ། འདི་ལྟར་མེས་ཤིང་ཆུང་ངུ་ཅིག་བསྲེགས་ཀྱང་སླར་འབྱུང་བར་མི་འགྱུར་ལ། གསེར་
[326a.7]ཅུང་ཟད་བཞུ་བའི་མཚན་ཉིད་ནི་བསྐྱར་ཏེ། གསེར་དུ་འགྱུར་བས་གང་ཞིག་འགྱུར་བ་ད་ནི་སླར་འབྱུང་ཞིང་སྔོན་གྱི་རང་བཞིན་དུ་འགྲོ་བ་སྟེ། དཔེར་ན་གསེར་གྱི་སྲ་བ་བཞིན་ནོ། །དེ་བས་ན་རིམས་ལ་སོགས་པའི་ཉེས་པས་བྱས་པའི་འགྱུར་བ་ཆུང་ངུ་ལ་ལྡོག་པར་ནུས་པའི་ཕྱིར་
[326b]
[326b.1]འཆི་བའི་མཚན་ཉིད་ཀྱི་འགྱུར་བ་ཆེན་པོ་ཡང་སླར་ལྡོག་པ་སྟེ། སླར་ཡང་འགྱུར་རོ། །འདི་ལྟར་གཉིད་ཀྱིས་བྱས་པའི་སེམས་འགགས་པའི་མཚན་ཉིད་ཀྱི་འགྱུར་བ་ནི་གཉིད་མེད་ན་ལྡོག་པར་འགྱུར་རོ། །འོན་ཏེ་གཉིད་ཀྱི་གནས་སྐབས་སུ་ཤེས་པ་མི་འགག་ན་དེ་བཞིན་དུ་ཉམས་སུ་མ་མྱོང་བའི་
[326b.2]རང་བཞིན་ཤེས་པ་ཡིན་པར་འགལ་བར་འགྱུར་རོ། །གལ་ཏེ་གཉིད་ལོག་པའི་ཤེས་པ་མྱོང་བ་མེད་པ་ཡིན་ན་ནི། ཤི་བའི་རོ་ལ་རིག་པ་མེད་པར་གསལ་བར་ཡང་འདྲ་བར་འགྱུར་ཏེ། རོ་དང་གཉིད་ལོག་པ་དག་ལ་ཁྱད་པར་ཅུང་ཟད་ཀྱང་མེད་པར་འགྱུར་རོ། །དེ་བས་ན་ཇི་ལྟར་གཉིད་ལོག་
[326b.3]པ་སད་པར་ནུས་པ་བཞིན་དུ་རོ་ཡང་སྨན་གྱི་སྦྱོར་བ་ལས་འཚོ་བར་འགྱུར་རོ། །འོན་ཏེ་གཉིད་ལོག་པ་ལ་མྱོང་བ་མེད་ཀྱང་། ནུས་པའི་རང་བཞིན་གྱིས་ཡོད་ན་ནི་ནུས་ཞེས་བྱ་བ་འདི་ཅི་ཡིན། གལ་ཏེ་སེམས་ཉིད་ཡིན་ན་ནི། དེའི་ཚེ་སེམས་ཉིད་ཡོད་པས་ཇི་ལྟར་མྱོང་བ་མེད་པ་ཡིན། འོན་ཏེ་
[326b.4]སེམས་ལས་ནུས་པ་གཞན་ཡིན་ན་ནི། འོ་ན་ལུས་ཉིད་ནུས་པར་འགྱུར་ཏེ། གཉིད་ལོག་དུས་སུ་གཞན་མེད་པའི་ཕྱིར་རོ། །དེ་ལྟར་ན་ནི་ལུས་ནུས་པར་གནས་པས་རོའི་དུས་སུ་ཡང་སེམས་མི་ལྡོག་པར་འགྱུར་རོ། །དེ་བས་ན་དེའི་ཚེ་ནུས་པའི་ལུས་ཞིག་ནས་གཞན་པའི་ནུས་པ་མེད་པ་སྐྱེས་སོ་ཞེ་ན་
[326b.5]ནུས་པ་མེད་པ་འདི་ཅི་ཡིན། ཤེས་པ་དང་བྲལ་བ་ཉིད་དོ་ཞེ་ན། གཉིད་ལོག་པ་ན་ཡང་ཤེས་པ་དང་བྲལ་བའི་ཕྱིར་སད་པའི་ཚེ་མྱོང་བ་སྐྱེ་བར་མི་འགྱུར་རོ། །འོན་ཏེ་གཉིད་ལོག་པའི་ཚེ་འབྱུང་བ་དང་འཇུག་པ་ཡོད་པ་དེ་བས་ན་གཉིད་ལོག་པའི་ཚེ་ལུས་ལ་ཤེས་པ་སྐྱེད་པའི་ནུས་པ་ཡོད་དོ་ཞེ་ན་འོ་ན་ནི་
[326b.6]ཤེས་པ་སྐྱེད་པའི་ཕྱིར་སད་པ་ཉིད་དུ་འགྱུར་རོ། །འོན་ཏེ་འབྱུང་བ་དང་། འཇུག་པའི་གྲོགས་ལས་གཉིད་སད་པར་བྱེད་པ་ལས་སེམས་སྐྱེའོ་ཞེ་ན། གཉིད་ཅེས་བྱ་བ་ནི་ཅི་ཡིན། སེམས་མེད་པའོ་ཞེ་ན། ཤེས་པ་མེད་པའི་རོ་ལ་ཡང་སེམས་ཡོད་པར་འགྱུར་རོ། །འོན་ཏེ་དབུགས་མེད་པས་
[326b.7]ལུས་འབའ་ཞིག་ལས་མི་སྐྱེ་ན་ནི་བརྒྱལ་བ་ལ་སོགས་པ་འགྱུར་བ་ན། དབུགས་ལ་སོགས་པ་མེད་པའི་ཕྱིར་སེམས་མེད་པར་འགྱུར་རོ། །དེས་ན་དབུགས་ལ་སོགས་པ་ནི་ཤེས་པའི་རྒྱུ་མ་ཡིན་ཏེ་འབྱུང་བ་དང་འཇུག་པ་ནི་སེམས་ཀྱི་རྒྱུ་མ་ཡིན་ནོ་ཞེས་སྔར་བསྟན་ཏོ། །གཞན་ཡང་ལུས་
[327a]
[327a.1]ལས་སྐྱེ་བར་མཚུངས་ཀྱང་། གཉིད་ལོག་པ་སད་པའི་ཚེ་སྔར་གོམས་པ་བཞིན་དུ་མྱོང་བར་སྣང་སྟེ། དེས་ན་ལུས་སམ། འབྱུང་འཇུག་ནི་རྒྱུ་མ་ཡིན་ནོ། །སྔར་གོམས་པའི་གྲོགས་བྱེད་པ་ཡོད་ན་ལུས་ལས་ཤེས་པ་སྐྱེ་བ་མ་ཡིན་ནམ་ཞེ་ན། དེ་ནི་མི་བདེན་ཏེ། སད་པའི་ཚེ་གོམས་པ་
[327a.2]ཉིད་ཡོད་པ་མ་ཡིན་པས་ལུས་ཀྱི་གྲོགས་བྱེད་པ་མེད་དེ། ལྷན་ཅིག་བྱེད་པས་སྟོང་པའི་ཕྱིར་རོ། །ཡོད་པ་དང་མེད་པ་ལྷན་ཅིག་པ་ནི་མེད་པའི་ཕྱིར་སྔར་གྱི་ཤེས་པ་ཉིད་སད་པའི་རྒྱུ་ཡིན་གྱི་ལུས་ནི་མ་ཡིན་ནོ། །ཐུན་ལ་སོགས་པ་སད་པའི་རྒྱུ་ཡིན་ནམ་ཞེ་ན། གདོན་མི་ཟ་བར་བརྩངས་པ་ལ་
[327a.3]སོགས་པ་ཁོ་ནས་སད་པ་མ་ཡིན་ཏེ། མ་བརྩངས་པར་ཡང་རང་ཉིད་སད་པར་མཐོང་བའི་ཕྱིར་རོ། །སད་པའི་ཚེ་མཐོང་བའི་དངོས་པོ་དང་འབྲེལ་པས་དང་པོ་དངོས་པོའི་བློ་སྐྱེ་བ་མ་ཡིན་ནམ། དེ་ལ་ད་ལྟར་བ་མཐོང་བ་དང་། སྔར་གྱི་ཤེས་པ་དག་ལ། ཇི་ལྟར་གྲོགས་བྱེད་པ་འཐད་ཅེ་ན། འདི་
[327a.4]ལ་ཡང་ངེས་པ་མེད་དེ། སད་པར་གྱུར་ན་གང་དམིགས་པ་དེ་དང་འབྲེལ་པས་དུས་ཉེ་བར་རྟོགས་པར་འགྱུར་ཏེ། འདི་ལྟར་འཇུངས་པས་ཕངས་ནས་གཉིད་ལོག་པ་གང་ཡིན་པ་དེ་བཞིན་དུ་དེ་ཉིད་ལ་སད་པའི་ཚེ་ཡང་སྐྱེ་བས་ནང་གི་རེག་བྱ་མྱོང་བ་ནི་སད་པའོ། །གང་སྔར་གོམས་པའི་རྐྱེན་ཅི་འདྲ་བ་དེ་
[327a.5]དང་མཐུན་པར་སད་པའི་ཚེ། ལུས་ཀྱི་བདེ་བ་གོམས་པར་འགྱུར་ཏེ། འདི་ལྟར་བྲེད་པར་གྱུར་པའི་ཡིད་འབྲོས་པའི་རྣམ་པའི་རྒྱུ་མཚན་མྱོང་བ་ན་སད་པའི་དུས་སུ་ཡང་། སྡུག་བསྔལ་མྱོང་བར་འགྱུར་བ་དེ་བཞིན་དུ་ཤིན་ཏུ་གདུག་པའི་ཡིད་ཅན་གཞན་ལ་གནོད་པ་དང་མཐུན་པའི་རལ་གྲི་འདོན་པ་
[327a.6]ལ་སོགས་པའི་བདེ་བ་སད་པ་ན་འབྱུང་བ་སྟེ། དེ་བས་ན་སེམས་ནི་ལུས་དང་འབྱུང་འཇུག་གི་རྒྱུ་ཅན་མ་ཡིན་གྱི། འོན་ཀྱང་སྔར་གོམས་པའི་ཤེས་པའི་རྒྱུ་ཅན་ནོ། །གལ་ཏེ་ལུས་རྒྱུ་ཡིན་ན་ལྡོག་པ་མེད་པར་འགྱུར་རོ། །འོན་ཏེ་སྐྱོན་གྱིས་བསྒྱུར་བས་རྒྱུར་མི་འགྱུར་རོ་ཞེ་ན། སྐྱོན་རྣམས་སླར་མི་
[327a.7]འབྱུང་བའི་འགྱུར་བ་རྩོམ་པར་བྱེད་ན་ནི་དེས་བྱས་པའི་འགྱུར་བ་ཆུང་ངུ་རིད་པ་ལ་སོགས་པ་དང་། བརྒྱལ་བ་ལ་སོགས་པས་ཤེས་པ་རྒྱུན་ཆད་པའི་ཚེ་ན་ལྡོག་པ་མེད་པར་འགྱུར་རོ། །རིད་པ་ལ་སོགས་པ་གང་གིས་བྱས་པའི་འགྱུར་བ་དེ་གསོ་བར་རུང་ན། དེ་ཉིད་ཀྱིས་བྱས་པའི་འཆི་བའི་
[327b]
[327b.1]མཚན་ཉིད་ཀྱི་འགྱུར་བ་ཡང་གསོ་བར་རུང་སྟེ། གསེར་གྱི་སྲ་བ་བཞིན་ནོ། །གང་གི་ཕྱིར་གསེར་སྲ་བར་གྱུར་ཀྱང་འགྱུར་བའི་རྒྱུས་འཇུ་ཞིང་སླར་ཡང་སྲ་བར་འགྱུར་རོ། །གསོ་བའི་སྦྱོར་བས་འགྱུར་བ་གསོ་བར་རུང་བ་དང་། གསོ་བར་མི་རུང་བའི་ནད་ཀྱིས་སླར་མི་འབྱུང་བར་བསྒྱུར་བ་མ་ཡིན་ནམ་དེས་ན་སྐྱོན་
[327b.2]མེད་དོ་ཞེ་ན། འདིར་སྨྲས་པ། ཅུང་ཟད་གསོར་མི་རུང་བརྗོད་པ། །འཚོ་བྱེད་རྙེད་དཀའ་ཉིད་ཕྱིར་རམ། །ཚེ་ཟད་ཕྱིར་རོ་ཉེས་པ་ནི། །གཅིག་ཏུ་གསོར་མི་རུང་བ་མེད། ཅེས་བྱ་བ་ལ་རླུང་ལ་སོགས་པའི་ཉེས་པས་བྱས་པའི་འགྱུར་བ་ལྡོག་པར་ནུས་པའི་སྨན་ནམ་འཚོ་བར་བྱེད་པའི་སྨན་
[327b.3]པ་རྙེད་པར་དཀའ་ཞིང་ཕྲད་པར་མི་ནུས་པའི་ཕྱིར་རམ། ཚེ་ཟད་པའི་ཕྱིར་ཅུང་ཟད་གསོ་བར་མི་རུང་བར་བརྗོད་དོ། །ཚེ་ཞེས་བྱ་བ་ནི་ལས་ཀྱི་ཡོད་པའི་མཚན་ཉིད་དེ། དེ་ཟད་པས་ཀྱང་ཅུང་ཟད་ནད་ལ་སོགས་པ་གསོ་བར་མི་རུང་བར་བརྗོད་དོ། །ཡང་ན་དགེ་བ་དང་མི་དགེ་བའི་ལས་ཀྱི་ནུས་པ་ཟད་
[327b.4]པ་ཉིད་ལས་ཟད་དོ། །ལས་དང་བྲལ་ན་རླུང་ལ་སོགས་པའི་ཉེས་པ་ནི་གཅིག་ཏུ་གསོར་མི་རུང་བ་མེད་དེ། སླར་འབྱུང་བའི་འགྱུར་བ་རྩོམ་པར་བྱེད་པའི་ཕྱིར་རོ། །རོའི་ལུས་ལ་རླུང་ལ་སོགས་པས་བྱས་པའི་འགྱུར་བ་ལྡོག་པ་མེད་པ་མ་ཡིན་ནམ། བརྒྱལ་བ་ལ་སོགས་པས་བྱིས་པའི་འགྱུར་
[327b.5]བ་ལྡོག་པ་བཞིན་དུས་གཞན་དུ་འབྱུང་བ་ནི་མ་ཡིན་ཏེ་ལུས་ཉིད་མེད་པའི་ཕྱིར་དང་། བརྒྱལ་བ་ལ་སོགས་པ་ལ་ནི་ལུས་ཡོད་པ་ཡིན་པས་འགྱུར་བ་མེད་ན་ཤེས་པ་འབྱུང་བ་ཡིན་ལ། རོའི་ལུས་དེ་ཉིད་དུ་བསྲེགས་པའི་ཕྱིར་རམ། གཞན་དུ་ཡང་གྱུར་པའི་ཁྱད་པར་དང་ལྡན་པའི་ཕྱིར།
[327b.6]ཉམས་པར་གྱུར་པས་སླར་འཚོ་བ་མ་ཡིན་ནོ་ཞེ་ན། འདིར་སྨྲས་པ། ལུས་སམ་འབྱུང་འཇུག་དག་རྣམ་པར་ཤེས་པའི་རྒྱུ་མ་ཡིན་པར་བསྟན་ཟིན་ལ། ཤེས་པའི་རྒྱུ་ནི་སེམས་ཡིན་པར་གཉིད་ལོག་པ་དང་། སད་པ་བཞིན་སྐྱེ་བ་གཞན་ལེན་ཏོ་ཞེས་བཤད་པར་བྱའོ། །ཡང་ན། རོ་ཡི་དུག་
[327b.7]སོགས་འདུས་པ་ལས། །དེ་ཡི་སོ་རྗེས་བཅད་པས་ཀྱང་། །འགྱུར་བའི་རྒྱུ་དང་བྲལ་ནས་སུ། །དེ་ཅི་སླར་འཚོ་མི་འགྱུར་རམ། །ཞེས་བྱ་བ་ལ། སྲོག་ཆགས་ཀྱི་རོའི་དུག་ལ་སོགས་པ་སོས་བཟུང་བའི་གནས་སུ་འདུས་ཏེ། འདི་ལྟར་ཇི་སྲིད་གསོན་པ་དེ་སྲིད་དུ། ལུས་ཐམས་ཅད་ཁྱབ་པར་དུག་
[328a]
[328a.1]འཇུག་ལ། སྲོག་བཏང་ནས་སོ་རྗེས་སུ་འོང་བར་འགྱུར་རོ། །རྨ་བཏོད་པའི་ལུས་ཀྱི་ཆ་བཅད་ན། སྲོག་ཆགས་རྣམས་མི་འཆི་བ་མཐོང་བའི་ཕྱིར། །དེའི་སོ་རྗེས་བཅད་པའི་རྒྱུ་ལས་ཏེ། །ཀྱང་གི་སྒྲས་ནི་ཨ་གད་ལ་སོགས་པའི་སྦྱོར་བས་སོ། །འགྱུར་བའི་རྒྱུ་དུག་དང་བྲལ་
[328a.2]ནས་ཅིའི་ཕྱིར་སླར་འཚོ་བར་མི་འགྱུར། དེའི་ཕྱིར། ལུས་ནི་གནས་པ་ཡིན་ན་སེམས། །ལྡོག་པ་མེད་པར་ཐལ་ཕྱིར་རོ། །ཞེས་བྱ་བ་འདི་གནས་སོ། །དེ་ལྟར་ནི་འགྱུར་མོད་ཀྱི་ཇི་ལྟར་མེས་བསྒྱུར་བའི་ས་བོན་ནི་མྱུ་གུའི་རྒྱུ་མ་ཡིན་པ་དེ་བཞིན་དུ། འདིར་ཡང་རིམས་ལ་སོགས་པས་བསྒྱུར་བའི་ལུས་ནི། འཆི་
[328a.3]བའི་ཚེ་རྣམ་པར་ཤེས་པའི་རྒྱུ་མ་ཡིན་ནོ་ཞེ་ན། འདིར་སྨྲས་པ། སྐྱོན་རྣམས་སླར་འབྱུང་བའི་འགྱུར་བ་རྩོམ་པའི་ཕྱིར། ཤིན་ཏུ་ཆད་པ་ནི་མ་ཡིན་ནོ། །སཱ་ལུ་ལ་སོགས་པའི་མྱུ་གུ་སྐྱེད་པའི་ནུས་པ་ས་བོན་ལ་སོགས་པ་ལ་བདག་ཉིད་ཐམས་ཅད་ཀྱིས་བརླག་པའི་ཕྱིར་མྱུ་གུ་ལ་སོགས་པ་མེད་པར་
[328a.4]འགྱུར་རོ། །ཡང་ན། ཉེར་ལེན་འགྱུར་བ་མེད་པར་ནི། །ཉེར་ལེན་ཅན་གྱི་འགྱུར་བ་དག །བྱེད་པར་མི་ནུས་དཔེར་འཇི་བ། །འགྱུར་བ་མེད་པར་བུམ་སོགས་བཞིན། །ཞེས་བྱ་བ་ལ། ཉེ་བར་ལེན་པ་འགྱུར་བ་མེད་པར་ནི་ཉེ་བར་ལེན་པའི་ཤེས་པ་འགྱུར་བར་བྱེད་པར་མི་ནུས་ཏེ། འཇི་བ་མ་གྱུར་པར་
[328a.5]བུམ་པ་ལ་སོགས་པ་འགྱུར་བ་མ་མཐོང་བའི་ཕྱིར། རྒྱུར་གྱུར་པ་ལས་འབྲས་བུ་འགྱུར་བ་གང་ཡིན་པ་འདི་ནི་ཉེ་བར་ལེན་པའི་ཆོས་ཡིན་ནོ། །རྒྱུ་མང་པོ་ཉེ་བར་གྱུར་པ་ལས་གང་ཞིག་གང་ལ་ལར་ཁོ་ནའི་ཉེ་བར་ལེན་པའི་རྒྱུ་སྟེ། ལུས་རྒྱུ་ཉིད་ཡིན་ཡང་། ལུས་འགྱུར་བ་ཉིད་ཀྱིས་ཤེས་པ་འགྱུར་
[328a.6]བ་ནི་མ་ཡིན་ནོ། །ལུས་འགྱུར་བ་མེད་པར་འཇིག་པ་དང་། མྱ་ངན་ལ་སོགས་པས་སེམས་འགྱུར་བ་མཐོང་བའི་ཕྱིར་རོ། །ཆུ་གྱུར་པས་ཀྱང་མྱུ་གུ་འགྱུར་བ་མ་ཡིན་ནམ། དེའི་ཉེ་བར་ལེན་པ་ནི་མ་ཡིན་ནོ་ཞེ་ན་མ་ཡིན་ཏེ། རྒྱུན་གྱི་རྒྱུ་ཉེ་བར་ལེན་པ་ཡིན་པའི་ཕྱིར་རོ། །ས་བོན་ཡང་རྒྱུན་གྱི་རྒྱུ་
[328a.7]ཡིན་གྱི། ཆུ་ལ་སོགས་པ་ནི་གནས་སྐབས་ཁྱད་པར་ཅན་དུ་བྱེད་པའི་ཕྱིར་རོ། །ནུས་པ་ལ་སོགས་པ་ནི་ཐུན་མོང་གི་རྒྱུ་ཡིན་པས་རྒྱུན་གྱི་རྒྱུ་ནི་མ་ཡིན་ནོ། །ཆུ་ལ་སོགས་པས་སཱ་ལུའི་རྒྱུན་ལྡོག་པ་ནི་མ་ཡིན་ཏེ། དེ་མེད་ཀྱང་སཱ་ལུའི་རྒྱུན་མི་ལྡོག་པའི་ཕྱིར་རོ། །གང་ཡང་མྱུ་གུའི་གནས་
[328b]
[328b.1]སྐབས་ཆུའི་རྒྱུན་ཅན་དེ་ནི་དེ་མེད་ན་ལྡོག་པར་འགྱུར་བ་ཁོ་ནའོ། །དེའི་ཕྱིར་ལུས་ཉེ་བར་ལེན་པ་མ་ཡིན་པས། དེ་རླུང་ལ་སོགས་པས་ལུས་གྱུར་ཀྱང་སེམས་ལྡོག་པ་མ་ཡིན་ནོ། །འོ་ན་ལུས་དང་སེམས་དག་ཉེ་བར་ལེན་པ་དང་། ཉེ་བར་ལེན་པ་ཅན་མ་ཡིན་པར་ཇི་ལྟར་ངེས་ཤེ་ན། དངོས་
[328b.2]གང་འགྱུར་བ་མེད་པར་ནི། དངོས་པོ་གང་ཞིག་རྣམ་འགྱུར་བ། །དེ་དེའི་ཉེར་ལེན་དུ་མི་རིགས། །བ་ལང་བ་མེན་ལ་སོགས་བཞིན། །ཞེས་བྱ་བ་ལ། དངོས་པོ་གང་ཞིག་སྟེ་ལུས་མ་གྱུར་པས་འགྱུར་བའི་དངོས་པོ་གང་ཡིན་པ་མྱ་ངན་ལ་སོགས་པས་རྣམ་པར་ཤེས་པ་འགྱུར་བ་དེ་ནི། ལུས་
[328b.3]དེའི་ཉེ་བར་བླང་བར་བྱ་བ་མ་ཡིན་ཏེ། དཔེར་ན་བ་ལང་གྱུར་པ་མེད་ཀྱང་བ་མེན་འགྱུར་བས་དེ་དེའི་ཉེ་བར་ལེན་པ་མ་ཡིན་པ་བཞིན་ནོ། །བ་ལང་དང་། བ་མེན་དག་ཉེ་བར་ལེན་པ་དང་། ཉེ་བར་བླང་བར་བྱ་བ་མེད་པས་ལྡོག་པ་དང་ལྡོག་པར་བྱེད་པ་མ་ཡིན་པ་ལས་ལུས་དང་སེམས་ལ་ཅི་ཞིག་མཚུངས་
[328b.4]ཏེ། གཞན་ལ་སྐྱོན་ཡོད་པས་གཞན་སྐྱོན་དང་ཡོན་ཏན་ཅན་དུ་མི་འགྱུར་བའི་ཕྱིར་མ་ཡིན་ནམ་ཞེ་ན། འདིར་སྨྲས་པ། སེམས་དང་ལུས་དག་དེ་བཞིན་ཏེ། །དེ་རྒྱུ་ཅན་འབྲས་བསྐྱེད་པ་ནི། །གྲོགས་བྱེད་ཕྱིར་ན་ལྷན་ཅིག་གནས། །མེ་དང་ཟངས་མའི་ཞུ་ཉིད་བཞིན། ཞེས་བྱ་བ་ལ། དེའི་རྒྱུ་སྟེ་ལུས་
[328b.5]དང་ཤེས་པའི་རྒྱུ་སྔོན་གྱི་དུས་སུ་འབྱུང་བ་ལས། ལུས་དང་ཤེས་པ་ཉིད་འབྲས་བུ་བསྐྱེད་པས་ལུས་ཀྱི་གནས་སྐབས་གོང་ནས་གོང་དུ་ཁྱད་པར་ཅན་དུ་བྱེད་པའི་མཚན་ཉིད་ཅན་ནོ། །གྲོགས་བྱེད་པ་སྟེ་ལྷན་ཅིག་ཏུ་ཕན་འདོགས་པར་བྱེད་པའི་ཕྱིར། ལྷན་ཅིག་ཏུ་གནས་པ་སྟེ་མེ་དང་ཟངས་མའི་
[328b.6]ཞུ་བ་ཉིད་བཞིན་དུ། དཔེར་ན་མེ་དང་ཟངས་མའི་ཞུ་བ་ཉིད་ལྷན་ཅིག་ན་ཡོད་པ་གྲོགས་བྱེད་པ་མེ་ཡོད་པ་ལས་ཟངས་ཀྱི་ཞུ་བ་ཉིད་སྐྱེད་པའི་ཕྱིར་རོ། །དེ་བཞིན་དུ་སེམས་ནི་ལུས་ཀྱི་གྲོགས་བྱེད་པ་ཅན་ནམ། ལུས་ཀྱང་སེམས་ཀྱི་གྲོགས་བྱེད་པ་ཅན་ཏེ། གོང་ནས་གོང་དུ་ལུས་དང་སེམས་སྐྱེད་
[328b.7]པའི་ཕྱིར་ལུས་དང་སེམས་དག་ནི་ལྷན་ཅིག་ཏུ་གནས་པའོ། །དེ་ལྟར་ན་འགྱུར་མོད་ཀྱི་གལ་ཏེ་ལུས་སེམས་ཀྱི་ཉེ་བར་ལེན་པ་མ་ཡིན་ཡང་རྟེན་དུ་ནི་འགྱུར་ཏེ། དེས་ན་ལུས་ཞིག་ན་ཤེས་པ་ལྡོག་པར་འགྱུར་ཞིང་། ལུས་གཞན་ལ་འཕོ་བ་མེད་དེ། དཔེར་ན་རྩིག་པ་ལ་བརྟེན་པའི་རི་མོ་རྩིག་པ་
[329a]
[329a.1]ཞིག་པ་ན་འཇིག་ཅིང་། རྩིག་པ་གཞན་ལ་འགྲོ་བ་མེད་པ་བཞིན་ནོ་ཞེ་ན་དེ་ནི་མི་བདེན་ཏེ། གང་གི་ཕྱིར་རི་མོ་ལ་སོགས་པ་རས་ལ་སོགས་པ་ལ་གནས་པ་ནི་རྟེན་གཞན་ལས་འོངས་པར་ཤེས་པ་མ་ཡིན་གྱི། སེམས་ནི་རྨི་ལམ་གྱི་མཐའ་ཅན་གྱི་ལུས་དང་བྲེད་པ་ལ་སོགས་པའི་ལུས་
[329a.2]ཀྱི་རྗེས་སུ་འབྲང་བ་ལས་སད་པའི་གནས་སྐབས་དང་། དང་པོ་སྐྱེས་པའི་ཚེ་སྐྱེ་བ་གཞན་གྱི་ལུས་ལ་གནས་པའི་འདུ་བྱེད་ཀྱི་རྗེས་སུ་འགྲོ་བར་རྟོགས་པ་ཡིན་པ་དེ་བས་ན། རི་མོ་བཞིན་རྟེན་སོ་སོར་ངེས་པ་ནི་མ་ཡིན་ཏེ། སོ་སོར་ངེས་པའི་རྟེན་ཉིད་ནི་ལུས་ཞིག་ན་འཇིག་པའི་ཕྱིར་རོ། །གཞན་
[329a.3]ཡང་ལུས་སམ་གཞན་ལ་ཡང་རྟེན་ཉིད་མེད་པའི་ཕྱིར་ལུས་ཞིག་ན་འཇིག་པར་ཇི་ལྟར་འགྱུར། རི་མོ་ལ་སོགས་པ་ནི་རྩིག་པ་ལས་ཐ་དད་པ་མ་ཡིན་པ་ཉིད་དེ་བས་ན་རང་བཞིན་ཉིད་ཀྱིས་འཇིག་པར་གྱུར་གྱི་རྟེན་ཞིག་པས་ནི་མ་ཡིན་ནོ། །འོ་ན་ཐ་དད་པ་མེད་པས་རྟེན་དང་བརྟེན་པའི་དངོས་པོར་མ་
[329a.4]གྱུར་མོད། ལུས་དང་སེམས་དག་རྟེན་དང་བརྟེན་པ་ཇི་ལྟར་མི་འགྱུར་ཞེ་ན། འདིར་སྨྲས་པ། ཡོད་མེད་དག་ལ་རྟེན་མེད་ཕྱིར། །རྟེན་ནི་གནས་པའི་རྒྱུ་མ་ཡིན། །ཡོད་པ་ཡིན་ན་འདི་རྟེན་མེད། །གནས་པ་པོ་ལས་གཞན་མིན་ཕྱིར། །ཐ་དད་ན་ཡང་དེ་ཡི་རྒྱུ། །དེ་ཡི་དངོས་པོ་ལ་ཅི་བྱ། །ཞེས་
[329a.5]བྱ་བ་ལ། ཡོད་པ་མ་ཡིན་པ་ལ་ནི་རྟེན་མེད་དེ། ནམ་མཁའི་མེ་ཏོག་ལ་རྟེན་མེད་པའི་ཕྱིར་རོ། །འོན་ཀྱང་རྒྱུ་ལས་སྐྱེ་བ་ཉིད་དུ་འདོད་ལ་ཡོད་པ་མ་ཡིན་པ་མེད་པས་རྒྱུ་ཉིད་མེད་ན་རྟེན་མ་ཡིན་ནོ། །ཡོད་ན་ཡང་གཞན་ལ་རག་མ་ལས་པའི་ཕྱིར། ལུས་རྟེན་མ་ཡིན་ནོ། །ཡོད་ཀྱང་གནས་པའི་
[329a.6]རྒྱུ་ཡིན་པའི་ཕྱིར་རྟེན་མ་ཡིན་ནམ་ཞེ་ན། འདི་ནི་མི་འཐད་དེ། གནས་པ་འདི་གནས་པ་པོ་ལ་ཐ་མི་དད་པའི་ཕྱིར་རོ། །གལ་ཏེ་ལུས་ལ་སོགས་པས་ཤེས་པ་གནས་པ་ཡིན་ན་དེ་ཉིད་ཀྱིས་བྱས་པར་གྱུར་པ་ལས་ཤེས་པ་ནི་ལུས་ལས་སྐྱེས་པ་མ་ཡིན་ནོ་ཞེས་འདི་ནི་སྔར་བསྟན་ཟིན་ཏོ། །དངོས་
[329a.7]པོ་གྲུབ་པ་ལ་ཡང་ཅུང་ཟད་མ་གྲུབ་པའི་ཆ་ཡོད་པ་མ་ཡིན་ནམ། རྒྱུ་དེའི་ཕྱིར་རྟེན་ཡིན་ལ། བདག་ཉིད་ཐམས་ཅད་ཀྱིས་བསྐྱེད་པ་ནི་རྒྱུར་བརྗོད་དོ། །གང་ལ་ལ་ཆོས་སྐྱེད་པ་དེ་ནི་གཞི་ཡིན་གྱི་དངོས་པོ་ལ་བརྟེན་པ་ཐ་དད་པ་མ་ཡིན་ཏེ། ལྟུང་བ་ནི་དངོས་པོ་ཡང་ངོ་བོར་ཡོད་པའི་ཕྱིར་རོ། །
[329b]
[329b.1]གལ་ཏེ་གནས་པ་ཐ་དད་པ་མ་ཡིན་ན། དེའི་ཚེ་ངོ་བོ་ཉིད་ཀྱི་གནས་པ་ནི་རྟག་ཏུ་ཡོད་པར་འགྱུར་བ་དེ་ལྟ་བས་ན་གནས་པ་ཐ་དད་པའོ་ཞེ་ན། འདི་ནི་དེའི་རྟེན་མ་ཡིན་ཏེ། དེ་བས་ན་ཤེས་པའི་དངོས་པོ་ལ་ཅི་ཞིག་བྱེད་ན། གང་གིས་འདི་རྟེན་ཡིན་ཞེ་ན་བརྗོད་པར་བྱ་སྟེ། འདི་ལྟར་གནས་པ་དང་། དངོས་པོ་
[329b.2]ལ་བདག་ཉིད་གཅིག་པ་ཡོད་པ་མ་ཡིན་ཏེ། དངོས་པོ་སྐྱེ་བར་ཐལ་བར་འགྱུར་བའི་ཕྱིར་རོ། །དེ་ལས་བྱུང་བ་ཡང་མ་ཡིན་ཏེ། དངོས་པོ་ཉིད་གནས་པར་སྐྱེད་པའི་ཕྱིར་རོ། །རྟེན་གཞན་པ་རྟགས་པ་དོན་མེད་པའི་ཕྱིར་རོ། །གལ་ཏེ་ཡང་ལུས་སེམས་ཀྱི་རྟེན་ཡིན་ཏེ་གནས་པའི་རྒྱུ་ཡིན་པའི་ཕྱིར་རོ་ཞེ་ན།
[329b.3]དེའི་ཚེ་ལུས་གནས་པ་ན་སེམས་ཀྱང་གནས་པས། འཇིག་པ་མེད་པར་ཐལ་བར་འགྱུར། དེ་འཇིག་རྒྱུ་ལས་འདོད་པ་ནི། །དེ་ཡང་ཐལ་བ་མཚུངས་པ་སྟེ། །གནས་པའི་རྒྱུས་ཀྱང་ཅི་ཞིག་བྱ། །ཅེས་བྱ་བ་ལ།། །།ཚད་མ་རྣམ་འགྲེལ་གྱི་འགྲེལ་པ་ལས། བམ་
[329b.4]པོ་ལྔ་པ། དེ་ལྟར་ནི་འགྱུར་མོད་ཀྱི་སེམས་འཇིག་པ་འཇིག་པའི་རྒྱུ་ལས་ཁས་ལེན་པར་བྱེད་དེ། འགལ་བའི་རྐྱེན་ཡོད་པའི་ཕྱིར་རོ་ཞེ་ན། དེ་ལ་ཡང་རྟག་པ་མཚུངས་པ་ཉིད་དུ་ཐལ་བར་འགྱུར་ཏེ། འཇིག་པ་ཞེས་བྱ་བ་ནི་དངོས་པོ་ལས་ཐ་དད་པ་མེད་པའི་ཕྱིར་རོ། །འཇིག་པ་ཐ་དད་ན་ཡང་འཇིག་
[329b.5]པའི་རྒྱུས་ཅི་ཞིག་བྱེད་དེ། དེའི་ཕྱིར་འཇིག་པའི་རྒྱུས་ཅི་ཡང་མི་བྱེད་དོ། །དེ་བས་ན་མི་འཇིག་པའི་ཕྱིར་རང་ཉིད་གནས་པ་ཡིན་པས་གནས་པའི་རྒྱུས་ཅི་ཞིག་བྱ། གལ་ཏེ་ཡང་ཇི་སྲིད་འཇིག་པའི་རྒྱུས་འཇིག་པ་མི་སྐྱེད་པ་དེ་སྲིད་དུ་རང་ཉིད་གནས་པ་ཡིན་པའི་ཕྱིར་གནས་པའི་རྒྱུས་ཅི་ཞིག་བྱ་སྟེ། ཅུང་
[329b.6]ཟད་ཀྱང་གནས་པའི་རྒྱུས་མི་བྱེད་པ་ཉིད་དོ། །འཇིག་པའི་རྒྱུ་མ་འོངས་པར་དུ་དེ་ལ་གནས་ན་ཞེས་བྱ་བ་ལ། འཇིག་པ་པོ་མ་འོངས་པ་སྟེ། མ་བྱུང་བའི་བར་ཏེ་སྔར་སེམས་ཀྱི་གནས་པ་ལུས་དེ་ལས་ཡིན་ནོ་ཞེ་ན། ལན་སྨྲས་པ། འཇིག་པ་ནི། དངོས་ཆོས་ཉིད་འགྱུར་གནོད་མེད་འདི། །གནས་པའི་རྒྱུ་ཡིས་
[329b.7]ཅི་བྱར་ཡོད། །ཅེས་བྱ་བ་ལ། འོ་ན་དེ་ལྟར་ན་འཇིག་པའི་རྒྱུ་དོན་མེད་དུ་ཐལ་བར་འགྱུར་བའི་ཕྱིར་རང་གི་རྒྱུ་ཉིད་ལས་འཇིག་པའི་རང་བཞིན་ཡིན་པས་ན་འཇིག་པ་དངོས་པོའི་ཆོས་ཉིད་དུ་འགྱུར་ཏེ། དངོས་པོའི་ངོ་བོ་ཉིད་འཇིག་པ་ཡིན་པའི་ཕྱིར། འདི་ལ་འགལ་བ་མེད་པ་སྟེ། འགལ་བ་མེད་པ་འདི་
[330a]
[330a.1]ལ་ཡོད་པས། དངོས་པོའི་ངོ་བོ་ཉིད་གང་གིས་ཀྱང་གཞན་དུ་བྱ་བར་མི་ནུས་པའི་ཕྱིར། གནས་པའི་རྒྱུ་ཡིས་ཅི་ཞིག་བྱེད། འོན་ཏེ་གནས་པའི་རྒྱུ་མེད་ན་འཇིག་པ་དེ་གནས་པའི་རྒྱུ་ཡོད་ན་འཇིག་པ་བཀག་པར་འགྱུར་རོ་ཞེ་ན། དེ་ལྟ་ན་འོ་ན་ནི་འཇིག་པ་འགེགས་པས་འཇིག་པ་
[330a.2]འདི་ལས་གཞན་ལ་བྱེད་པ་ཉིད་དོ། །དེས་ན་འཇིག་པ་ལ་ཅི་ཡང་མ་བྱས་པས་འཇིག་པ་མེད་པ་ཁོ་ནར་འགྱུར་ན། ཇི་ལྟར་སེམས་མི་གནས་པ་ཡིན། ཆུ་ལ་གཞི་མཐོང་བ་མ་ཡིན་ནམ། དེ་ལ་རྟག་པ་རྒྱུས་ཀྱང་གནོད་པ་མ་ཡིན་པ་དེ་བས་ན་རྟེན་ཡིན་ནོ། །དེས་ན་ཡོད་པ་དང་མེད་པར་རྟོག་པ་དོན་
[330a.3]མེད་དོ་ཞེས་བསྟན་པའི་ཕྱིར། དཔེར་ན་ཆུ་ལ་སོགས་པའི་གཞི་བཞིན་ནོ་ཞེ་ན། ཆུ་ལ་སོགས་པའི་གཞི་ས་ཕྱོགས་ན་མཐོང་བ་དེ་བཞིན་དུ། ཤེས་པའི་ཡང་རྟེན་ལུས་ཡིན་ནོ་ཞེ་ན། དེའི་ཕྱིར་སྨྲས་པ། འདི་ལ་འང་མཚུངས། དངོས་རྣམས་སྐད་ཅིག་རེ་རེར་འཇིག །དངོས་རྒྱུན་དེ་ལྟར་སྐྱེ་བའི་
[330a.4]ཕྱིར། །རྒྱུན་ཉིད་ཡིན་ཕྱིར་དེ་རྟེན་ཡིན། །དེ་ལྟར་མིན་ན་རིག་པ་མིན། །འབོ་བ་ཡིས་ནི་གེགས་བྱེད་ཕྱིར། །ཆུ་ལ་སོགས་པའི་རྟེན་འགྱུར་གྱི། །འགྲོ་བ་མེད་ཅན་ཡོན་ཏན་སྤྱི། །ལས་རྣམས་ལ་རྟེན་གྱིས་ཅི་བྱ། ཞེས་བྱ་བ་ལ། འདི་ཡང་ཆུའི་གཞི་སའི་སྟེང་ལ་སོགས་པ་ལ་ཡོད་པ་དང་། མེད་པ་
[330a.5]དག་གི་རྟེན་མ་ཡིན་ཞེས་བྱ་བའི་བརྩད་པ་མཚུངས་པ་ཡིན་ནོ། །ཆུའི་གཞིར་གྱུར་པའི་ས་གཞི་ལ་སོགས་པ་མཐོང་བའི་ཕྱི་མ་ཡིན་ནམ། དེས་ན་བརྩད་པར་མི་རུང་ངོ་ཞེ་ན། དེ་ནི་བདེན་པ་མ་ཡིན་ཏེ། ས་ཕྱོགས་ནི་ཆུ་མི་འབོ་བའི་རྟེན་དུ་གྱུར་པས་རྟེན་ཡིན་གྱི། འབོ་བ་གང་ཡིན་པ་དེའི་ནི་རྟེན་མ་
[330a.6]ཡིན་ལ། རྟེན་གང་ཡིན་པ་དེའི་འབོ་བ་ནི་མ་ཡིན་པའི་ཕྱིར་འབོ་བ་དང་། མི་འབོ་བ་དག་ཕན་ཚུན་སྤངས་པས་གནས་པའི་ཕྱིར་རོ། །སྔར་ནི་འབོ་བ་ལ་ཕྱིས་ནས་མི་འབོ་བ་མ་ཡིན་ནམ་དེས་ན་འགལ་བ་མེད་དོ་ཞེ་ན། དེ་ལྟ་ན་ནི་གང་འབོ་བ་དེའི་རྟེན་མ་ཡིན་ཏེ། མངོན་སུམ་གྱིས་གཡོ་བ་དང་། མི་
[330a.7]གཡོ་བ་དག་གཅིག་པ་ཉིད་དུ་མི་རྟོགས་པའི་ཕྱིར་རོ། །འབོ་བ་དང་མི་འབོ་བ་དུས་གཅིག་པ་ཉིད་དུ་དམིགས་པ་ནི་མ་ཡིན་ནོ། །དུས་མི་གཅིག་ན་ནི་ཇི་ལྟར་གནས་པར་བྱེད་དེ། དུས་གསུམ་དུ་གནས་པར་བྱེད་པས་བཟུང་བ་ཡིན་གྱི། དུས་མང་པོ་དང་འབྲེལ་པ་ཅན་ཉིད་ཅིག་ཅར་འཛིན་པ་མ་
[330b]
[330b.1]ཡིན་ནོ། །རིམ་གྱིས་རྟོགས་པར་བྱེད་དོ་ཞེ་ན། རིམ་པའི་དོན་ཉིད་བསམ་པར་བྱ་སྟེ། འདི་ལྟར་རིམ་པ་ཞེས་བྱ་བའི་ཐ་སྙད་ནི་ཡོད་པ་དང་མེད་པ་དག་སྟེ། དེ་ཡང་ཐ་དད་པའི་དུས་དག་མ་ཡིན་ནམ། ཡོད་པ་དང་མེད་པ་དག་ཀྱང་གཟུང་བའམ་འཛིན་པ་ཡིན། དེ་ལ་བཟུང་བའི་ཡོད་པ་དང་། མེད་པ་
[330b.2]འཇོག་ན་འཛིན་པ་གཅིག་པ་ཉིད་དུ་མི་འགྱུར་རོ། །འཛིན་པ་དུས་མ་ཡིན་ན། གཟུང་བ་ཡང་རིམ་པར་འགྱུར་བའི་ཕྱིར་འཛིན་པའི་གནས་སྐབས་ཅན་གཅིག་པ་ཉིད་མ་ཡིན་པ་དེ་བས་ན། ཆུ་མི་འབོ་བ་ད་ལྟར་འཛིན་ཅིང་། འབོ་བ་ནི་མ་འོངས་པའི་རྟོག་པའི་སྤྱོད་ཡུལ་ཡིན་པས་འབོ་བ་དང་། མི་འབོ་བའི་
[330b.3]གནས་སྐབས་ན་ཡོད་པའི་ཆུ་གཅིག་པ་ཉིད་དུ་མངོན་སུམ་གྱིས་མཐོང་བ་མ་ཡིན་ནོ། །འདིའི་དོན་ནི། །ཡོད་མེད་དག་ལ་རྟེན་མེད་ཕྱིར། །ཞེས་བྱ་བ་ཡིན་ཏེ། རྟེན་དང་བརྟེན་པའི་དངོས་པོ་མཐོང་བ་མ་ཡིན་ནོ། །འོ་ན་ཇི་ལྟར་མཐོང་བ་མ་ཡིན་པར་རྟེན་དང་བརྟེན་པའི་དངོས་པོར་བརྟག་པར་བྱ་ཞེ་ན། དེ་ལྟ་མོད་
[330b.4]ཀྱི་ད་ནི་ཕྱིན་ཅི་ལོག་ཏུ་རྟོག་པ་ལ་ནི་མེད་པར་འགྱུར་གཞན་ཡང་དངོས་པོ་རྣམས་སྐད་ཅིག་རེ་རེ་ལ་འཇིག་པར་ཁས་བླངས་པར་གྱུར་པ་ནི། དངོས་པོའི་རྒྱུན་ཏེ། ངོ་བོའི་རྒྱུན་དེ་ལྟར་བརྟགས་པས་ཉེ་བར་ལེན་པ་དང་མཚུངས་པའི་ཡུལ་དུ་ཆུ་སྐྱེ་བའི་ཕྱིར། ས་ཕྱོགས་དེ་རྒྱུ་ཡིན་པས་རྟེན་ཡིན་ནོ། །དེ་
[330b.5]ལྟར་ན་མ་ཡིན་ཏེ་སྐྱེ་བར་ཁས་མི་ལེན་ན་རྟེན་ཉིད་དུ་དེ་རིགས་པ་མ་ཡིན་ནོ། །ཡང་ན་རྒྱུ་མ་ཡིན་པ་ཡང་རྟེན་ཡིན་ནོ་ཞེས་བྱ་བ་འདི་ཁས་ལེན་ན་དེ་ལྟ་ན་ཡང་འབོ་བའི་ཆོས་ཅན་གྱི་ཆུ་ལ་སོགས་པ་རྣམས་འགྲོ་བའི་གགས་བྱེད་པའི་ཕྱིར་ས་ཕྱོགས་ལ་སོགས་པ་རྟེན་དུ་འགྱུར་གྱི། འགྲོ་བ་དང་བྲལ་བའི་
[330b.6]ཡོན་ཏན་རྣམས་ཇི་ལྟར་རྟེན་ཡིན། རྫས་འབོ་བའི་གགས་བྱེད་པའི་ཕྱིར་རྟེན་དུ་འགྱུར་རོ། །ཡོན་ཏན་ལ་སོགས་པ་ནི་བྱེད་པ་མེད་པའི་ཕྱིར་འབོ་བ་ཡོད་པ་མ་ཡིན་ནོ། །དེ་བས་ན་སེམས་ཡོན་ཏན་ནམ། ལས་སམ། སྤྱིར་གྱུར་པའི་རྟེན་ལུས་མ་ཡིན་ནོ་ཞེས་བྱ་བར་གནས་སོ། །སེམས་ལ་འགྲོ་བ་
[330b.7]མེད་ཀྱང་ཡོན་ཏན་ཡིན་པའི་ཕྱིར་སོ་སོར་ངེས་པའི་ལུས་ལ་བརྟེན་པ་མ་ཡིན་ནམ། དེ་ལོག་ན་ལྡོག་སྟེ། དཔེར་ན་གཟུགས་རང་གི་རྟེན་ཞིག་ན་འཇིག་པ་བཞིན་ནོ་ཞེ་ན། འདིར་སྨྲས་པ། དེས་ནི་འཕྲོད་པ་འདུ་བ་དང་། །འཕྲོད་པ་འདུ་བའི་རྒྱུ་དང་ནི། །རིགས་ལ་སོགས་པའི་རྣམ་གཞག་ཉིད། །
[331a]
[331a.1]རྟེན་མེད་ཕྱིར་ན་གསལ་བ་ཡིན། །ཞེས་བྱ་བ་ལ། འདིས་ནི་འགྲོ་བ་མེད་པར་རྟེན་དང་། བརྟེན་པ་རྟག་པར་རིགས་པ་ནི་མ་ཡིན་ཞིང་། ཡོན་ཏན་མེད་པ་ལ་རྟེན་མེད་དོ་ཞེས་བྱ་བ་བསྟན་པ་ཡིན་ནོ། །རྟེན་དང་བརྟེན་པའི་དངོས་པོ་སྤངས་པ་དེ་དག་གིས་ནི་འཕྲོད་པ་འདུ་བ་ཡང་གསལ་
[331a.2]བ་དང་། འདུ་བའི་རྒྱུ་ཡང་གསལ་བ་ཡིན་ཏེ། འདི་ལྟར་འདུ་བ་ཡིན་ན་རྟེན་དང་བརྟེན་པའི་དངོས་པོ་མ་ཡིན་ཏེ། ཅིག་ཅར་ཡོད་པའི་ཕྱིར་རོ། །འོན་ཏེ་འདུ་བ་མ་ཡིན་ན་དེའི་ཚེ་འཕྲོད་པ་འདུ་བའི་རྒྱུ་ཉིད་མེད་པར་འགྱུར་རོ། །རིགས་ལ་སོགས་པ་སྟེ། སོགས་པའི་སྒྲས་ནི་ནམ་མཁའ་དང་། འགྲོ་
[331a.3]བ་དང་གཅིག་པ་ཉིད་ལ་སོགས་པའོ། །རྣམ་གཞག་ཉིད་ནི་རྫས་ལ་བརྟེན་པ་ཉིད་དེ། འབྲས་བུ་ཉིད་མ་གཏོགས་པར་རྟེན་དུ་བརྗོད་པ་གང་ཡིན་པ་དེ་ཡང་གསལ་བ་ཡིན་ནོ། །གལ་ཏེ་ཡང་རིགས་ལ་སོགས་པ་རྟེན་པ་ཉིད་ཡིན་ཡང་རྫས་ལ་སོགས་པ་སོ་སོར་ངེས་པ་གནས་པ་ཉིད་
[331a.4]བཀག་པ་སྟེ། འདི་ལྟར་གསལ་བ་ལ་བརྟེན་པའི་རིག་གསལ་བའི་ཁྱད་པར་སོ་སོར་ངེས་པ་ཉིད་ལ་བརྟེན་པ་ནི་མ་ཡིན་ཏེ། གསལ་བ་གཞན་གྱི་ཡང་རྗེས་སུ་འགྲོ་བའི་ཕྱིར་རོ། །དེ་བཞིན་དུ་ལུས་ལ་བརྟེན་པའི་སེམས་ལུས་མེད་ཀྱང་ལུས་གཞན་གྱི་རྗེས་སུ་འགྲོ་བའི་ཕྱིར་རོ། །དེ་བས་ན་འཇིག་རྟེན་
[331a.5]ཕ་རོལ་མ་གྲུབ་པ་མ་ཡིན་ནོ། །དེའི་ཕྱིར་བསྐྱེད་པར་བྱ་བ་དང་། སྐྱེད་པར་བྱེད་པ་ལ་མ་གཏོགས་པར་གང་ལ་ཡང་རྟེན་དང་བརྟེན་པའི་དངོས་པོ་ཡོད་པ་མ་ཡིན་ནོ། །འདི་ལྟར། གཞན་ལས་དངོས་པོ་འཇིག་ན་ནི། །དེ་ཡི་གནས་རྒྱུས་ཅི་ཞིག་བྱ། །དེ་གཞན་མེད་པར་འཇིག་ན་ཡང་། །གནས་པའི་
[331a.6]རྒྱུ་རྣམས་ནུས་མེད་འགྱུར། །ཞེས་བྱ་བ་ལ། གལ་ཏེ་ཐོ་བ་ལ་སོགས་པ་གཞན་ཉིད་ལས་དངོས་པོ་འཇིག་ན་ནི། དེའི་ཚེ་འབྲས་བུའི་རྫས་དེའི་ཡོན་ཏན་ལ་སོགས་པ་དེའི་གནས་པའི་རྒྱུ་རྟེན་གྱིས་ཅི་ཞིག་བྱ། འོན་ཏེ་རྫས་ལ་སོགས་པ་དེ་ནི་མི་མཐུན་པའི་སྦྱོར་བ་རྣམས་མེད་པར་ཡང་འཇིག་པར་འགྱུར་ན་ནི། དེ་
[331a.7]ལྟར་ན་འོ་ན་ནི་རང་གི་རྒྱུ་ཉིད་ལས་འཇིག་པར་འབྱུང་བའི་ཕྱིར་རྫས་ལ་སོགས་པ་རྣམ་པར་གནས་པའི་རྒྱུ་སྐྱེད་པའི་རྫས་རྣམས་ལ་ནུས་པ་མེད་པར་འགྱུར་རོ། །འདི་དག་གིས་ནི་ཡོན་ཏན་ལ་སོགས་པ་འགྲོ་བ་དང་བྲལ་བ་རྣམས་ལ་རྟེན་མེད་དོ་ཞེས་བསྟན་པ་ཡིན་ནོ། །དེ་ནི་དངོས་པོ་དང་རྟེན་དང་བཅས་
[331b]
[331b.1]པ་ཉིད་ཡིན་ན་གང་ལ་ཡང་འཇིག་པར་མི་འགྱུར་རོ་ཞེས་བསྟན་པའི་ཕྱིར། རྟེན་བཅས་ཐམས་ཅད་གནས་ལྡན་པས། །སྐྱེ་བ་ཅན་ཀུན་རྟེན་བཅས་ཡིན། །དེ་ཕྱིར་དངོས་པོ་ཐམས་ཅད་ནི། །ནམ་ཡང་འཇིག་པར་མི་འགྱུར་རོ། །ཞེས་བྱ་བ་ལ། དངོས་པོ་གང་ཅུང་ཟད་གནས་པ་དང་ལྡན་པ་དེ་ཐམས་
[331b.2]ཅད་རྟེན་དང་བཅས་པ་སྟེ། རྟེན་དང་ལྷན་ཅིག་འཇུག་པའི་ཕྱིར་རོ། །སྐྱེ་བ་ཐམས་ཅད་ཀྱང་རྟེན་དང་བཅས་པ་སྟེ། སྐྱེ་བ་ཅན་ཡིན་པའི་ཕྱིར་རོ། །འདི་ལྟར་རང་གི་རྒྱུ་ཡོད་པ་དང་། འདུ་བ་ནི་སྐྱེ་བ་སྟེ། དེས་ན་གང་ཅུང་ཟད་སྐྱེ་བ་དེ་ཐམས་ཅད་རང་གི་རྒྱུ་ལ་བརྟེན་པའོ། །དེའི་ཕྱིར་རྡུལ་ཕྲ་རབ་ལ་
[331b.3]སོགས་པ་རྒྱུ་རྟག་པ་ལ་གནས་པས་ཇི་ལྟར་དེ་ལ་བརྟེན་པའི་འབྲས་བུ་ཐམས་ཅད་འཇིག་པར་འགྱུར་ཏེ། འདི་ལྟར་རྟེན་ཞིག་པ་ཉིད་ན་འཇིག་པར་རིགས་ཏེ། གཞན་དུ་ན་རྟེན་དུ་མི་རུང་བའི་ཕྱིར་རོ། །རྟེན་དང་བརྟེན་པའི་དངོས་པོ་ཐམས་ཅད་འགེགས་པ་བསྡུ་བའི་ཚིགས་སུ་བཅད་པ་ནི། གལ་ཏེ་
[331b.4]རང་འཇིག་ངང་ཚུལ་བདག །ཡིན་ན་དེ་གནས་བྱེད་གཞན་གང་། །གལ་ཏེ་རང་འཇིག་ངང་ཚུལ་བདག །མིན་ན་དེ་གནས་བྱེད་གཞན་གང་། །ཞེས་བྱ་བ་ལ། གལ་ཏེ་རང་གི་ངོ་བོ་ཉིད་ཀྱིས་འཇིག་པའི་ངང་ཚུལ་གྱི་བདག་ཉིད་ཅན་གྱི་དངོས་པོ་ཡིན་པ་དེ་ལྟ་ན་ཡང་། དེའི་གནས་པར་བྱེད་པ་སྟེ།
[331b.5]གནས་པའི་རྒྱུ་གཞན་གང་ཞིག་ཡོད་དེ། མེད་ཅེས་བྱ་བའི་ཐ་ཚིག་གོ། །འོན་ཏེ་རང་ཉིད་འཇིག་པའི་ངང་ཚུལ་གྱི་བདག་ཉིད་ཅན་མ་ཡིན་པ་དེ་ལྟ་ན་ཡང་། རང་ཉིད་གནས་པའི་ཕྱིར། དངོས་པོ་ལ་གཞན་གནས་པའི་རྒྱུ་ཡིས་ཅི་ཞིག་བྱ། དེ་ལྟར་ནི་འགྱུར་མོད་ཀྱི། སྒྲོན་མ་དང་། འོད་དག་གཞི་
[331b.6]དང་། གཞི་ཅན་མ་ཡིན་ཡང་རྟེན་དང་བརྟེན་པའི་དངོས་པོ་སྟེ། འོད་འབོ་བའི་གནས་མ་ཡིན་ཡང་གང་གིས་དེའི་རྟེན་སྒྲོན་མར་འགྱུར་བའི་ཕྱིར་རོ། །འོན་ཀྱང་སྒྲོན་མ་ལ་རྟེན་གྱི་དངོས་པོ་ཡིན་ཏེ། དེ་ལོག་ན་འོད་ལྡོག་གི་སྒྲོན་མ་གཞན་ལ་འབོ་བ་ནི་མ་ཡིན་ནོ། །དེ་བཞིན་དུ་ལུས་ལ་བརྟེན་པའི་ཤེས་
[331b.7]པ་ཡང་ལུས་ལོག་ན་དེ་ཡང་ལྡོག་པར་འདོད་ཀྱི། འདི་ན་སྒྲོན་ལ་འཕོ་བ་ནི་མ་ཡིན་ནོ་ཞེ་ན། འདིར་སྨྲས་པ། ལུས་ཀྱི་འཕེལ་འགྲིབ་མེད་པར་ཡང་། །བློ་ཡིས་བྱེད་པའི་ཁྱད་པར་གྱིས། །ཤེས་རབ་ལ་སོགས་ཕུལ་བྱུང་ཞིང་། །འགྲིབ་པ་དག་ཏུ་འགྱུར་བ་ཡིན། །འདི་ནི་སྒྲོན་མ་འོད་ལ་སོགས། །
[332a]
[332a.1]རྟེན་པ་རྣམས་ལ་ཡོད་མ་ཡིན། །སེམས་ལ་ཕན་པ་མི་འདོགས་པས། །དེ་ལས་ཁྱད་པར་དུ་མི་འགྱུར། ཞེས་བྱ་བ་ལ། འདིའི་དོན་ནི་སྒྲོན་མའི་འོད་ནི་དེ་འགྱུར་བས་འགྱུར་བའི་ཕྱིར་རྟེན་དང་བརྟེན་པའི་དངོས་པོ་ཡིན་གྱི། འདིར་ལུས་ཀྱི་ཡོན་ཏན་འཕེལ་བ་དང་འགྲིབ་པ་སྟེ་
[332a.2]ལྷག་པ་དང་འགྲིབ་པ་མེད་པར་ཡང་། བློའི་བྱ་བའི་ཁྱད་པར་གྱིས་ཏེ་འདུ་བྱེད་པའི་ཁྱད་པར་ཅན་གྱི་དབང་གིས་ཤེས་རབ་དང་། ཡིད་གཞུངས་པའི་ལ་སོགས་པས་འཕེལ་བ་དང་། འགྲིབ་པར་འགྱུར་བས་ཏེ། གང་ཡང་ལུས་འདུ་བྱ་བའི་ཁྱད་པར་མེད་པར་ཡང་བློ་སྦྱངས་པས་ཤེས་རབ་ལ་སོགས་པ་
[332a.3]མཆོག་ཏུ་འགྲོ་བ་ན། དེའི་ཚེ་ཇི་ལྟར་ལུས་ལ་ཡིད་བརྟེན་པར་རིགས་ཏེ་དེ་ཡོད་པ་མིན་པར་བསྟན་པའི་ཕྱིར་ལུས་སྦྱངས་པ་མེད་ཀྱང་འདི་སྟེ། སྔོན་དུ་བློ་སྦྱངས་པའི་ཁྱད་པར་གྱི་རྗེས་སུ་འགྲོ་བ་ཉིད་ཀྱི་སེམས་གང་ཡིན་པ་དེ་ལྟར། སྒྲོན་མ་ལ་སོགས་པའི་ཆོས་ཅན་རྣམས་ལ་ཡོད་པ་མ་ཡིན་ནོ། །
[332a.4]འདི་ལྟར་སྦྲུལ་གྱི་སྒྲོན་མའི་འོད་འགྱུར་བར་བྱེད་ཀྱི་དེའི་རྟེན་ནི་མ་ཡིན་ཏེ། སྒྲོན་མ་མ་བསླད་པར་ཡང་། འོད་སྦྲུལ་ལ་སོགས་པ་རྣམས་ཀྱིས་འགྱུར་བ་ཉིད་མ་ཡིན་ནམ་ཞེ་ན་མ་ཡིན་ཏེ། མར་མེ་ཉིད་གྱུར་པ་ཡིན་ཏེ། འོད་མི་གསལ་བའི་མཚན་ཉིད་ཅན་དུ་བྱེད་པས་དེ་བས་ན་སྒྲོན་མ་གྱུར་
[332a.5]པས། རིང་དུ་འཕྲོ་བའི་འོད་འགྱུར་བར་བྱེད་དོ། །བཅུད་ཀྱིས་ལེན་ལ་སོགས་པ་རྣམས་ཀྱིས་ལུས་ཁྱད་པར་ཅན་དུ་བྱས་ན་ཤེས་རབ་ལ་སོགས་པ་ཁྱད་པར་ཅན་དུ་སྣང་བའི་ཕྱིར། ལུས་ཉེ་བར་ལེན་པའམ་རྟེན་དུ་འགྱུར་རོ་ཞེ་ན། འདིར་སྨྲས་པ། སེམས་ལ་ཕན་འདོགས་པར་མི་བྱེད་ན། བཅུད་
[332a.6]ཀྱིས་ལེན་ལ་སོགས་པས་སྦྱངས་པའི་ལུས་དེ་ལས་ཀྱང་ཤེས་རབ་ལ་སོགས་པ་ཁྱད་པར་དུ་མི་འགྱུར་ཏེ། བཅུད་ཀྱིས་ལེན་ལ་སོགས་པས་བཅོས་པའི་ལུས་ལས་སེམས་ལ་ཕན་བཏགས་པའི་སྒོ་ཉིད་ཀྱིས་ཤེས་རབ་ལ་སོགས་པ་སད་པར་བྱེད་དོ་ཞེས་བྱ་བའི་ཐ་ཚིག་གོ། །འདི་ལྟར་བཅུད་ཀྱིས་
[332a.7]ལེན་ལ་སོགས་པ་བརྟེན་པས་ཡིད་མི་འཁྲུགས་ཏེ། ཇི་ལྟར་སྔར་མྱོང་བའི་འདུ་བྱེད་སད་པ་ལས་འགའ་ཞིག་ཁ་ཅིག་ཏུ་ཤེས་རབ་ཁྱད་པར་ཅན་དུ་འགྱུར་རོ། །དཔེར་ན་བཀྲེས་པས་ཉེན་པ་ན། ཆོས་བཤད་པ་འཁྲུག་པ་ཉིད་ལ་སོགས་པ་འབྱུང་ལ། བཀྲེས་པ་ལ་སོགས་པའི་གནོད་པ་ཞི་བ་ན།
[332b]
[332b.1]སྔར་གོམས་པའི་བཤད་པ་འཇུག་པར་འགྱུར་བ་བཞིན་ནོ། །གལ་ཏེ་ཡང་བཅུད་ཀྱིས་ལེན་ལ་སོགས་པ་བརྟེན་ན། སྔར་མེད་པའི་སེམས་གཡེར་བག་ཅན་དུ་འཇུག་པ་དེའི་ཚེ་ཁ་ཅིག་གིས་ཤེས་རབ་ཕུལ་དུ་འབྱུང་བར་འགྱུར་ལ། ཁ་ཅིག་གིས་དེ་བཞིན་པར་གནས་པ་འདི་ནི་ངེས་པ་སྟེ། བཅུད་
[332b.2]ཀྱིས་ལེན་གྱི་སྦྱོར་བ་མཚུངས་པའི་ཕྱིར་དེ་ལྟར་མི་འགྱུར་ཞིང་བསྟན་བཅོས་ལ་ཐམས་ཅད་ཀྱིས་འདྲིས་པར་གྱུར་པ་ལས་ཀྱང་། ཅིའི་ཕྱིར་བསྟན་བཅོས་ལས་ངེས་པ་མེད་པར་ཤེས་པར་སྣང་། དེ་བས་ན་སྔར་གོམས་པར་བྱས་པ་གང་ཡིན་པ་དེ་ཤེས་པར་བཅུད་ཀྱིས་ལེན་ལ་སོགས་པས་བག་
[332b.3]ཆགས་སད་པར་བྱེད་པར་ངེས་པ་ཡིན་ནོ། །འདོད་ཆགས་ལ་སོགས་པ་བློའི་ངོ་བོ་ཉིད་མ་ཡིན་ནམ། དེ་རྣམས་ཀྱང་བཅུད་ཀྱིས་ལེན་ལ་སོགས་པས་ལུས་རྒྱས་ན། གསལ་ཞིང་འཕེལ་བར་འགྱུར་བའི་ཕྱིར་འདོད་ཆགས་ལ་སོགས་པ་བཞིན་བློ་ཡང་ལུས་ལ་བརྟན་པར་འགྱུར་རོ། །དེ་ལྟ་མ་ཡིན་
[332b.4]ན་དེའི་རྗེས་སུ་འགྲོ་བར་མི་འགྱུར་རོ་ཞེ་ན། དེ་ནི་ཡོད་པ་མ་ཡིན་ཏེ། ཆགས་སོགས་ལུས་རྒྱས་ལ་སོགས་པས། །འཕེལ་ཞིང་རེས་འགའ་བདེ་སྡུག་ལས། །སྐྱེ་སྟེ་དེ་དག་ཁམས་སྙོམས་པ། །ལ་སོགས་ནང་དོན་ཉེ་ཕྱིར་རོ། །ཞེས་བྱ་བ་ལས། ལུས་རྒྱས་པ་ལ་སོགས་པ་ལས་འདོད་ཆགས་ལ་
[332b.5]སོགས་པ་འཕེལ་བ་ནི་ཐམས་ཅད་དུ་མ་ཡིན་གྱི་འོན་ཀྱང་རེས་འགའ་བ་ཉིད་དེ། གང་གི་ཚེ་ཚུལ་བཞིན་མ་ཡིན་པ་ཡིད་ལ་བྱེད་པ་ལ་མངོན་དུ་ཕྱོགས་པ་ནའོ། །གང་ཞིག་མི་སྡུག་པ་སྒོམ་པ་དེ་ལ་ནི་དེ་ཉིད་བཟློག་ནས་ཆགས་པ་མེད་པར་འགྱུར་རོ། །འདོད་ཆགས་ལ་སོགས་པ་འཕེལ་བ་དེ་ཡང་བདེ་བ་དང་
[332b.6]སྡུག་བསྔལ་བདག་ལས་ཀྱང་སྐྱེ་སྟེ། བདེ་བ་མྱོང་ན་འདོད་ཆགས་འཕེལ་ལ། སྡུག་བསྔལ་མྱོང་བ་ནི་ཞེ་སྡང་སྐྱེ་བར་འགྱུར་རོ། །ཇི་ལྟར་སྡུག་བསྔལ་བ་ལས་ཞེ་སྡང་སྐྱེ་ཞེ་ན། ཉོན་མོངས་པས་ནི་ཐམས་ཅད་མི་ཕོད་དེ། སྡུག་བསྔལ་དང་བྲལ་བར་འདོད་པ་འདི་དག་ཉིད་ནི་ཞེ་སྡང་ཁོ་ན་ཡིན་པའི་ཕྱིར་རོ། །
[332b.7]འདིར་སྡུག་བསྔལ་བར་གྱུར་ན་ཞེ་སྡང་སྐྱེ་ཞེས་ངེས་པ་ནི་མེད་དེ། ཡོངས་སུ་ཤེས་པ་དང་ལྡན་པ་སྡུག་བསྔལ་བར་གྱུར་ཀྱང་། རང་སྡུག་བསྔལ་མྱོང་བ་ལས་གཞན་གྱི་སྡུག་བསྔལ་དང་བྲལ་བར་འདོད་པ་ལྷག་པར་འཇུག་པའི་ཕྱིར་རོ། །དེ་ལྟར་ནི་འགྱུར་མོད་ཀྱི། བློའི་ངོ་བོ་ཉིད་བདེ་བ་དང་སྡུག་
[333a]
[333a.1]བསྔལ་བ་ཡིན་ན་ནི་གལ་ཏེ་བློ་ལས་ལུས་སྐྱེ་བ་བཞིན་ལུས་ལས་ཀྱང་བློ་ཉིད་སྐྱེ་བར་འགྱུར་རོ་ཞེ་ན། དེ་ནི་མ་ཡིན་ཏེ་བདེ་བ་དང་། སྡུག་བསྔལ་དེ་དག་ཁམས་སྙོམས་པ་ལས་ཀྱང་འབྱུང་སྟེ། སོགས་པའི་སྒྲས་ཁམས་མ་སྙོམས་པ་བཟུང་སྟེ། རྒྱུ་དེ་ལས་ནང་གི་དོན་རེག་བྱའི་བྱེ་
[333a.2]བྲག་གང་ཞིག་ཉེ་བ་དེ་ལས་འཕེལ་བར་འགྱུར་རོ། །འདིའི་དགོངས་པ་ནི་ནང་གི་རེག་བྱའི་བྱེ་བྲག་ལ་དམིགས་ནས་བདེ་བ་སྐྱེའི། རྟེན་གྱི་སྒོ་ནས་ནི་མ་ཡིན་ནོ། །དེ་བས་ན་ལུས་རྟེན་དུ་གྱུར་པ་ལས་བདེ་བ་དང་སྡུག་བསྔལ་བསྐྱེད་པ་ནི་མ་ཡིན་གྱི། འོན་ཀྱང་ཡུལ་དུ་གྱུར་པ་ལས་སོ། །ཡུལ་ཡིན་
[333a.3]པས་བདེ་བ་ལ་སོགས་པ་རྒྱུ་ཉིད་ཀྱི་ཕྱིར་གྱི་རྟེན་ཡིན་ན་ནི་ཕྱི་རོལ་ལ་ཡང་ཡུལ་ཡིན་པས་རྟེན་དུ་ཐལ་བར་འགྱུར་རོ། །གང་གི་ཚེ་ནང་གི་བྱེ་བྲག་དམིགས་པ་ཡིད་དུ་འོང་བ་ལ་སོགས་པ་མཐོང་བ་དེའི་ཚེ་བདེ་བ་དང་སྡུག་བསྔལ་དག་ཕྱི་རོལ་ལ་བརྟེན་པར་འགྱུར་གྱི། ཡུལ་རྟེན་ནི་མ་ཡིན་ཞིང་
[333a.4]དེ་ལོག་ན་ལྡོག་པ་ཡང་མ་ཡིན་ནོ། །ཇི་ལྟར་ནང་གི་ཡུལ་ལ་བདེ་བ་འབྱུང་བ་དེ་བོར་ནས་སྡུག་པ་ཡིད་དུ་འོང་བ་དེ་མཐོང་བའི་ཚེ། ཕྱི་རོལ་གྱི་ཡུལ་ལ་འཕོ་བ་དེ་བཞིན་དུ་འཇིག་རྟེན་ཕ་རོལ་ལ་སོགས་པའི་ལུས་གཞན་ལ་བདེ་བ་འཕོ་བར་འགྱུར་རོ། །མིག་ལ་སོགས་པའི་སྟོབས་ཀྱིས་
[333a.5]རྣམ་པར་ཤེས་པ་སྐྱེ་བ་མ་ཡིན་ནམ། རབ་རིབ་ལ་སོགས་པས་བསྒྱུར་བའི་མིག་གྱུར་པའི་ཕྱིར། མིག་གི་རྣམ་པར་ཤེས་པ་དེ་ལ་བརྟེན་པ་ཡིན་པ་ཇི་ལྟ་བ་དེ་བཞིན་དུ་འདུས་པའི་ནད་ཀྱིས་བསྒྱུར་བའི་ལུས་ལ་ཡིད་འགྱུར་བ་ཡིན་གྱི། དེའི་སྟོབས་ཀྱིས་བསྐྱེད་པ་ཡིན་པའི་ཕྱིར་ཡིད་ལུས་ལ་
[333a.6]བརྟེན་པའོ་ཞེ་ན། འདིར་སྨྲས་པ། དེས་ནི་འདུས་པ་ལ་སོགས་ལས། །དྲན་པ་ཉམས་པ་ལ་སོགས་བཤད། །ནང་གི་ཁྱད་པར་ལས་སྐྱེ་བའི། །བློ་ཉིད་འགྱུར་བར་བྱེད་པ་ཡིན། །ཞེས་བྱ་བ་ལ། འདོད་ཆགས་ལ་སོགས་པ་བདེ་བ་དང་སྡུག་བསྔལ་ལས་སྐྱེས་པ་ཉིད་དུ་བསྟན་པ་དེས་ནི་དྲན་པ་
[333a.7]ཉམས་པ་ལ་སོགས་པ་ཡང་བཤད་པ་ཡིན་ཏེ། སོགས་པའི་སྒྲས་ནི་གླེན་པ་དང་། རྣམ་པར་གཡེང་བ་ལ་སོགས་པ་གཟུང་ངོ་། །དེར་ཡང་འདུས་པ་ལ་སོགས་པས་ནང་གི་དོན་གྱི་ཁྱད་པར་ལ་དམིགས་པའི་བློ་ཉིད་ཀྱིས་ཡིད་འགྱུར་བ་སྐྱེད་པར་བྱེད་པ་ཡིན་གྱི་ལུས་ནི་མ་ཡིན་ཏེ། ལུས་
[333b]
[333b.1]འདུས་པ་ལ་སོགས་པས་བསྒྱུར་པ་ཡིད་ཀྱི་རྣམ་པར་ཤེས་པའི་རྟེན་དུ་མི་འཐད་པའི་ཕྱིར་རོ། །མིག་ལ་སོགས་པ་ནི་རྗེས་སུ་འགྲོ་བ་དང་ལྡོག་པ་དང་དེ་གྱུར་ན་འགྱུར་བའི་ཕྱིར་རྟེན་གྱི་དངོས་པོ་ཡིན་གྱི། ལུས་ནི་རྟེན་གྱི་དངོས་པོར་མི་རིགས་ཏེ། ལུས་འགྱུར་བ་མེད་པར་ཡང་སྲིན་པོ་ལ་སོགས་པ་
[333b.2]མཐོང་བ་ལས་དྲན་པ་ཉམས་པ་ལ་སོགས་པར་འགྱུར་བའི་ཕྱིར་རོ། །ཕྱི་རོལ་ལ་དམིགས་ནས་ཀྱང་ཇི་ལྟར་ཡིད་འགྱུར་བ་ཡིན་ཞེ་ན། སྨྲས་པ། དཔེར་ན་སྡར་མའི་རྒྱུད་ཁ་ཅིག །ཁྲག་སོགས་སྟག་ལ་སོགས་པ་དག །མཐོང་བ་དང་ནི་ཐོས་པ་ལས། །རྨོངས་པ་ལ་སོགས་འབྱུང་བ་བཞིན། །ཞེས་བྱ་
[333b.3]བ་ལ། དཔེར་ན་སྟག་དང་། ཤ་ཟ་ལ་སོགས་པ་ཐོས་པ་དང་། ཁྲག་དང་བུ་ཤི་བ་ལ་སོགས་པ་མཐོང་བ་ལས་ཤིན་ཏུ་སྡར་མའི་སྐྱེས་བུ་ཁ་ཅིག་རྨོངས་པ་ལ་སོགས་པར་འགྱུར་ཏེ། སོགས་པའི་སྒྲས་ཡིད་གཡེང་བ་ལ་སོགས་པ་གཟུང་ངོ་། །ཕྱི་རོལ་གྱི་ཁྲག་ལ་བརྟེན་པ་ནི་མ་ཡིན་པས་དེ་ལོག་ཀྱང་ཡིད་
[333b.4]མི་ལྡོག་པ་དེ་བཞིན་དུ་ནང་གི་དོན་ལ་དམིགས་པ་ཉེ་བ་ལས། འདུས་པ་ལ་སོགས་པའི་དུས་ན། དྲན་པ་ཉམས་པ་ལ་སོགས་པར་འགྱུར་བའི་ཕྱིར་བློ་ལུས་ལ་བརྟན་པ་ནི་མ་ཡིན་ནོ། །དེའི་ཕྱིར་གང་ཞིག་འདུས་བྱས་ཉིད། །ངེས་པར་རྗེས་སུ་འཇུག་པ་ཡི། །སེམས་ནི་དེ་མེད་མི་འབྱུང་སྟེ། །དེའི་ཕྱིར་
[333b.5]སེམས་ལ་བརྟེན་པའོ། །ཞེས་བྱ་བ་ལ། སེམས་གང་ཞིག་འདུས་བྱས་པར་ངེས་པར་རྗེས་སུ་འཇུག་པ་ནི་སེམས་ཡིན་གྱི་ལུས་ནི་མ་ཡིན་ཏེ། རྟེན་ཉིད་དུ་མི་སྣང་བའི་ཕྱིར་རོ། །ཡུལ་གཞན་ལ་ཡེངས་པའི་སེམས་ནི་ཡུལ་གཞན་ལ་གལ་ཏེ་ཐ་མི་དད་ན་ནི་དེའི་ཚེ་རྨ་མཐོང་ན་སྡུག་བསྔལ་ཡང་དམིགས་པར་
[333b.6]འགྱུར་རོ། །འོ་ན་གལ་ཏེ་སྲོག་ཆགས་རྣམས་འབྱུང་བ་ཆེན་པོ་ཙམ་ལས་མ་སྐྱེས་ཀྱི། འོན་ཀྱང་སྐྱེ་བོ་གཞན་ནས་འོངས་པ་ཡིན་ན་དེའི་ཚེ་མི་གཙང་བའི་ཕྱོགས་སུ་སྐྱེ་བར་མི་འགྱུར་ཏེ། རྟོག་པ་སྔོན་དུ་གཏོང་བ་ནི་གནས་ངན་པར་འོང་བར་བྱེད་པ་མ་ཡིན་པའི་ཕྱིར་དང་། དབང་ཕྱུག་གིས་
[333b.7]བསྐུལ་ནས་སྲོག་ཆགས་གནས་ངན་པ་ལེན་པར་ཡང་མི་རིགས་སོ་ཞེ་ན། འདིར་ལན་བཏབ་པ། བདག་ལ་ཆགས་པ་དང་ལྡན་པས། །བདེ་སྡུག་དོར་ཐོབ་འདོད་པ་ཡིས། །སེམས་ཅན་གཞན་གྱིས་བཀྲི་མིན་པར། །དམན་པའི་གནས་ནི་ཡོངས་སུ་ལེན། །སྡུག་བསྔལ་ཕྱིན་ཅི་ལོག་
[334a]
[334a.1]བློ་དང་། །སྲིད་པའི་འཆིང་བ་རྒྱུ་ཡིན་ཏེ། །སྐྱེ་བོ་གང་ལ་དེ་མེད་པ། །དེ་ནི་སྐྱེ་བ་མི་ལེན་ཏོ། །ཞེས་བྱ་བ་ལ། སེམས་ཅན་གཞན་གྱིས་ཁྲིད་པ་མ་ཡིན་པས་སེམས་ཅན་གཞན་གྱིས་བཀྲི་བ་མིན་པའི་སྲོག་ཆགས་དེ་དམན་པའི་གནས་ཅན་མངལ་དུ་ཡོངས་སུ་ལེན་པར་
[334a.2]བདག་ལ་ཆགས་པ་གང་ལ་ཡོད་པ་དེ། ཅི་རིགས་པར་བདེ་བ་དང་སྡུག་བསྔལ་དོར་བ་དང་ཐོབ་པར་འདོད་པ་གང་ཡིན་པར་འགྱུར་རོ། །འདིའི་དགོངས་པ་ནི་གལ་ཏེ་རྟོག་པ་པོ་དང་ལྡན་པ་ཡིན་ན་དེའི་ཚེ་རང་ལ་རང་གི་ངོ་བོ་རྟོགས་ཀྱི་ཐོབ་པར་བྱ་བ་ནི་མ་ཡིན་ཏེ། དེས་ན་སུ་ཡང་གྲོང་ལ་སོགས་པ་
[334a.3]གང་དུ་ཡང་འཇུག་པར་བྱ་བ་མ་ཡིན་ཏེ། འཁོར་བ་པ་མེད་པའི་ཕྱིར་རོ་ཞེས་བསྟན་ཟིན་ཏོ། །འོན་ཀྱང་འབྲས་བུ་འདོད་པས་ཅི་ཞིག་ལྟར་གྲོང་ལ་སོགས་པར་འགྲོ་བའི་རྟོག་པ་སྔོན་དུ་གཏོང་བ་ཅན་ནི་མ་ཡིན་ནོ། །དེ་ལྟ་ན་བདག་ལ་ཆགས་པས་བསྐུལ་བ་ཡང་དམན་པའི་གནས་ལེན་པར་འགྱུར་
[334a.4]ཏེ། དམན་པ་ཡང་ཕྱིན་ཅི་ལོག་གི་དབང་གིས་ལེན་པར་འགྱུར་རོ། །འདི་ལྟ་བུ་ཡང་འདིར་ལས་ཀྱི་ནུས་པ་ཉིད་དེ། གང་གིས་སེམས་ཅན་གཞན་གྱིས་མ་བཀྲིས་པར་ཡང་གཞན་གྱིས་བསྐུལ་བ་བཞིན་དམན་པའི་གནས་སུ་འགྲོ་སྟེ། འདི་ལྟར་དམན་པའི་ལེན་པ་ཡང་སྡུག་བསྔལ་
[334a.5]སྤང་བར་འདོད་པ་དང་། བདེ་བ་བླང་བར་འདོད་ནས་དགེ་སྦྱོང་སྨད་འཚོང་མའི་ཁྱིམ་དུ་འགྲོ་བ་བཞིན་དུ་འབྱུང་ངོ་། །དབང་ཕྱུག་གིས་བསྐུལ་བ་ནི་ཇི་ལྟར་དམན་པའི་གནས་ལེན་པར་མི་རིགས་པ་དེ་བཞིན་དུ་བསྟན་ཏོ། །དེའི་ཕྱིར་བདག་ལ་ཆགས་པ་ཉིད་ནི་དབང་ཕྱུག་སྟེ། དེས་བསྐུལ་བའོ། །གལ་ཏེ་རང་
[334a.6]དབང་ཅན་དང་། མི་གཙང་བའི་གནས་སུ་ཤེས་པ་མ་ཡིན་ནམ། ཇི་ལྟར་འཇུག་སྟེ། མི་ཤེས་ན་ནི་མི་འཇུག་པའི་ཕྱིར་ཇི་ལྟར་འཇིག་རྟེན་ཕ་རོལ་དུ་འགྲོ་ཞེ་ན། འདི་ནི་གལ་ཏེ་ཕྱིན་ཅི་ལོག་མེད་ན་རིགས་པར་འགྱུར་ཏེ། གང་གི་ཕྱིར་སྡུག་བསྔལ་ལ་ཕྱིན་ཅི་ལོག་གི་བློ་ཅན་ཏེ། བདེ་བའི་བློ་ཅན་དང་སྲེད་པས་བསྐུལ་བའི་འཆིང་བ་
[334a.7]ནི་སྐྱེ་བ་གཞན་ལེན་པའི་རྒྱུ་ཡིན་ནོ། །གང་ལ་སྲིད་པ་དང་ཕྱིན་ཅི་ལོག་གི་བློ་དེ་དག་མེད་པ་འདི་ནི་སྐྱེ་བ་ལེན་པར་མི་འགྱུར་རོ། །གལ་ཏེ་འགྲོ་འོང་མ་མཐོང་ན། །དབང་པོ་མི་གསལ་ཕྱིར་མཐོང་བ། །མ་ཡིན་དཔེར་མིག་གསལ་མིན་ཅན། །དུ་བ་ཆུང་ངུ་མི་དམིགས་བཞིན། །ཞེས་བྱ་བ་ལ། གལ་ཏེ་སྐྱེ་བ་སྔ་མ་ནས་འོངས་ཤིང་། མ་འོངས་པའི་སྐྱེ་
[334b]
[334b.1]བར་འགྲོ་བ་མ་ཡིན་ནམ། དེའི་ཚེ་འགྲོ་བ་དང་འོང་བ་དག་མཐོང་བར་འགྱུར་ན། །འགྲོ་བ་དང་འོང་བ་དག་མཐོང་བ་ནི་མ་ཡིན་ནོ་ཞེ་ན། འདིར་སྨྲས་པ། གལ་ཏེ་ཡང་འགྲོ་འོང་མ་མཐོང་ན་ཡང་དེ་ལྟ་མོད་ཀྱི། དེ་དག་མེད་པ་ནི་མ་ཡིན་ཏེ། དབང་པོ་རྣམས་གཡེར་བག་མེད་པས་མཐོང་
[334b.2]བ་སྟེ། དཔེར་ན་མིག་ནི་གསལ་བ་ཅན་གྱི་དུ་བ་ཕྲ་མོ་མི་དམིགས་ལ་སྐྱེ་བ་མ་ཡིན་པའི་ཕྱིར། སེམས་ནི་སེམས་མེད་པར་མི་འབྱུང་བས་སེམས་སྔ་མ་ལ་བརྟེན་པའོ། །འདི་ལྟར་གང་གི་ཚེ་འདུ་བྱེད་པ་སྟོབས་ཅན་དུ་གྱུར་པ་དེའི་ཚེ་གཡེང་བ་ལྡོག་པར་འགྱུར་ལ། གང་གི་ཚེ་གཡེང་བ་སྟོབས་
[334b.3]དང་ལྡན་པ་དེའི་ཚེ་འདུ་བྱེད་པ་ཡོད་ཀྱང་རང་དང་མཐུན་པའི་རྣམ་པར་ཤེས་པ་མི་སྐྱེད་དོ། །དེ་བས་ན་སེམས་ནི་སེམས་སྔ་མའི་རྗེས་ཐོགས་པའི་ཕྱིར། སེམས་ཀྱི་དེ་མ་ཐག་པ་ཡིན་པས་དེ་ལོག་པ་ཉིད་ཀྱིས་དེ་ཡང་ལྡོག་པར་རིགས་པ་མ་ཡིན་ནོ། །འོ་ན་སེམས་ནི་སེམས་ཀྱི་རྟེན་ཡིན་མོད།
[334b.4]དེ་ལྟ་ན་ཡང་འཇིག་རྟེན་ཕ་རོལ་མི་འགྲུབ་ཅིང་འཇིག་རྟེན་འདི་སེམས་ལ་བརྟེན་པ་ནི་གྲུབ་པ་ལ་སྒྲུབ་པ་སྟེ། ཕ་མའི་སེམས་ལ་བརྟེན་པར་འདོད་པའི་ཕྱིར་ལ། འཇིག་རྟེན་ཕ་རོལ་གྱི་སེམས་ལ་བརྟེན་པ་ནི་མ་ངེས་པ་སྟེ། ཕ་མའི་ངོ་བོ་ཉིད་ཀྱི་རྗེས་སུ་འབྲང་བའི་ཕྱིར་རོ་སྙམ་དུ་སེམས་ན། དེའི་ཕྱིར་
[334b.5]གང་ཞིག་ཅེས་བྱ་བ་ལ་སོགས་པ་སྨོས་ཏེ། གདོན་མི་ཟ་བར་ཕ་དང་མའི་ངོ་བོ་ཉིད་ཀྱི་རྗེས་སུ་འཇུག་པ་ནི་མ་ཡིན་ཏེ། ཕ་མའི་སེམས་མ་གྱུར་པར་ཡང་འགྱུར་བ་མཐོང་བའི་ཕྱིར་དང་། དེ་དག་གྱུར་ཀྱང་མི་འགྱུར་བར་མཐོང་བའི་ཕྱིར་རོ། །གལ་ཏེ་ཡང་ཕ་མའི་འདུ་བྱེད་པ་ལས་བྱུང་ན་
[334b.6]མཁས་པ་ལ་སོགས་པའི་ཡོན་ཏན་རྣམས་ཀྱང་འབྱུང་བར་འགྱུར་རོ། །དེ་བས་ན་རང་གི་རྒྱུད་ལ་འཇུག་པའི་ཤེས་པའི་འདུ་བྱེད་པ་སེམས་ལ་འཇུག་པ་ཉིད་ཡིན་གྱི། རྒྱུད་གཞན་གྱི་འདུ་བྱེད་ལ་འཇུག་པ་ནི་མ་ཡིན་ནོ། །མཁན་པོའི་འདུ་བྱེད་སློབ་མ་ལ་འཇུག་པར་མཐོང་བ་མ་ཡིན་
[334b.7]ནམ་ཞེ་ན། མ་ཡིན་ཏེ། རང་གི་རྒྱུད་ཀྱི་ཤེས་པ་སྔ་མ་ཉིད་འདོད་པའི་ཁྱད་པར་ལས་མཁན་པོའི་འདུ་བྱེད་ཀྱིས་བཞག་པ་སྟེ། འདོད་པ་མེད་ན་ནི་མཁན་པོའི་བཤད་པའི་ལུགས་འཛིན་པ་མ་ཡིན་པའི་ཕྱིར་རང་གི་རྒྱུ་ཉིད་རྒྱུད་ནས་བླ་མའི་འདུ་བྱེད་ཀྱི་འཇུག་པ་ཉན་པ་པོ་ལ་གནས་པ་ཡིན་ནོ། །
[335a]
[335a.1]ལུས་དང་སེམས་དག་དབྱེར་མེད་པ་མ་ཡིན་ནམ། ལུས་ལོག་ན་སེམས་སྐྱེ་བ་གཞན་དུ་འཕོ་བ་ནི་མ་ཡིན་ཏེ། སེམས་སྐྱེ་བ་གཞན་དུ་འཕོ་བ་ནི་ཐ་དད་པར་འགྱུར་རོ། །ལུས་དང་སེམས་དག་ཐ་དད་པར་ནི་རིགས་པ་མ་ཡིན་ཏེ། ལུས་ཉིད་ལ་ནང་གི་བདེ་བ་ལ་སོགས་པ་དམིགས་པའི་
[335a.2]ཕྱིར་སེམས་དེ་ལས་ཐ་དད་པ་ནི་མ་ཡིན་ནོ་ཞེ་ན། འདིར་སྨྲས་པ། ལུས་དང་སེམས་དག་ཐ་དད་པ་མེད་ཅིང་འབྱུང་བ་ཆེན་པོར་གྱུར་པ་ཡིན་ན་ཡང་། འཇིག་རྟེན་ཕ་རོལ་གྱི་འབྱུང་བ་ཆེན་པོ་རྗེས་སུ་དཔག་ཏུ་རུང་བ་སྟེ། གཉིད་ལོག་པ་ལས་སད་པ་བཞིན་ནོ། །ཐ་དད་པར་ཡང་མི་རིགས་ཏེ། གང་གི་
[335a.3]ཕྱིར། ཇི་ལྟར་ཐོས་པ་སོགས་འདུ་བྱེད། །བྱམས་པ་སེམས་དང་སེམས་ལས་དུས། །ཀྱིས་གསལ་ཐ་དད་མེད་པའི་ཕྱིར། །དེ་ལྟར་ལུས་ལའང་ཡོན་ཏན་འགྱུར། །ཞེས་བྱ་བ་ལ། གང་དང་གང་ཐོས་པ་ལ་སོགས་པའི་འདུ་བྱེད་སེམས་ལ་བྱས་པ་ནི་རྨི་ལམ་ལ་སོགས་པའི་གནས་སྐབས་ན་མི་
[335a.4]གསལ་བ། སད་པའི་ཚེ་དུས་ཀྱི་གསལ་བ་དེ་བཞིན་དུ་ལུས་ལ་ཡང་མི་གསལ་བ་སེམས་ལྟ་བུར་ཤེས་པར་བྱ་སྟེ་དབྱེར་མེད་པའི་ཕྱིར་རོ། །དཔེར་ན་ལུས་ཀྱི་ཡོན་ཏན་རིག་པ་ལ་སོགས་པ་ཕ་རོལ་གྱི་མཐོང་བ་དེ་བཞིན་དུ། སེམས་ཀྱི་ཡོན་ཏན་ཡང་ཅི་སྟེ་མཐོང་བར་མི་འགྱུར་ཏེ། དེ་ལྟ་ཡིན་ན། དམིགས་
[335a.5]པའི་རིག་བྱར་འགྱུར་བའི་ཕྱིར་རོ། །རྟོག་པ་ནི་ནང་གི་རེག་བྱའི་ཁྱད་པར་གྱི་རང་བཞིན་ཡིན་པས་གཞན་གྱིས་མི་མཐོང་ངོ་ཞེ་ན་མ་ཡིན་ཏེ། ཕྱི་རོལ་གྱི་རེག་བྱ་རྨ་གཞན་གྱིས་མཐོང་ཡང་། དེ་ལ་ཡོད་པའི་སྡུག་བསྔལ་ལ་སོགས་པ་མི་དམིགས་པའི་ཕྱིར་རོ། །དེ་བཞིན་དུ་བར་མ་དོའི་ལུས་དང་བའི་
[335a.6]ཕྱིར་ཉིང་མཚམས་སྦྱོར་བ་དང་འཕོ་བ་མི་མཐོང་ངོ་། །བར་མ་དོའི་སྲིད་པའི་ལུས་གཟུགས་ཅན་ཡིན་པའི་ཕྱིར། ཇི་ལྟར་རྩིག་པ་ལ་སོགས་པ་སྣ་ཚོགས་ཀྱིས་ཆོད་པ་ལ་འགྲོ་བར་འགྱུར་ཏེ། རྩིག་པ་ལ་སོགས་པས་ཆོད་པས་ད་ལྟ་བའི་ལུས་བཞིན་ནོ་ཞེ་ན། འདིར་སྨྲས་པ། ལུས་ཅན་ཡིན་ཡང་ཕྲ་བའི་
[335a.7]ཕྱིར། །སུ་ཡང་ལ་ལར་ཐོགས་བཅས་མིན། །ཆུ་བཞིན་གསེར་ལ་དངུལ་ཆུ་བཞིན། །མ་མཐོང་ཕྱིར་ནའང་མེད་ཉིད་མིན། །ཞེས་བྱ་བ་ལ། བར་མ་དོའི་སྲིད་པའི་ལུས་ཕྲ་བ་སྟེ། དང་བའི་ཕྱིར་ཁྱིམ་ལ་སོགས་པ་ལ་ལར་ཐོགས་པ་མེད་དེ། དཔེར་ན་བུམ་པ་ལ་སོགས་པ་ལ་ཆུ་བཞིན་དང་།
[335b]
[335b.1]ཤེལ་ལ་སོགས་པའི་མདངས་བཞིན་དང་། གསེར་ལ་དངུལ་ཆུ་འཇུག་པ་བཞིན་ནོ། །ཡང་ན་ཆུ་བཞིན་དང་། གསེར་ལ་དངུལ་ཆུ་བཞིན་ཡོད་པ་མ་ཡིན་པ་ཉིད་མ་ཡིན་ནམ། ཡང་སྲིད་པ་བར་མའི་ལུས་མ་མཐོང་བས་མེད་པ་ཉིད་དེ། འདི་ལྟར་འཆི་བ་དང་སྐྱེ་བའི་སྲིད་པ་དག་གི་བར་མ་ནི་བར་མ་
[335b.2]དོའི་སྲིད་པར་འདོད་ཅེ་ན། ངར་འཛིན་པ་དེ་ནི་མེད་པ་ནི་མ་ཡིན་ནོ། །ཆོད་པར་གྱུར་པ་ཡང་། དུས་དང་ཡུལ་དག་ཏུ་སྐྱེ་བའི་ཕྱིར་ཏེ། འདི་ལྟར་རྨི་ལམ་དང་། བར་མ་ཆད་པར་སྔར་པ་ཊ་ལི་པུ་ཏྲ་ལ་སོགས་པར་འགྲོ་བ་ན། བར་ན་ཡོད་པའི་ཡུལ་དང་གྲོང་ཁྱེར་ལ་སོགས་པས་མ་ཆོད་པར་ཁ་ཅིག་
[335b.3]སྐད་ཅིག་ཙམ་ཡུལ་གཞན་དུ་བདག་ཉིད་ཀྱིས་ཕྱིན་པར་མཐོང་བ་དེ་བཞིན་དུ། འགྲོ་བར་བྱ་བའི་ཡུལ་དུ་འཇིག་རྟེན་ཕ་རོལ་དུ་སྲིད་པ་བར་མའི་ལུས་ཐོགས་པ་མེད་པར་འགྲོ་ཞིང་འཕོ་བ་ཡིན་ནོ། །རྨི་ལམ་ནི་མི་བདེན་པས་སྲིད་པ་བར་མའི་ལུས་ཀྱང་ཡོད་པ་མ་ཡིན་པ་མ་ཡིན་ནམ་ཞེ་ན། དཔེ་
[335b.4]དང་དོན་བདག་ཉིད་ཐམས་ཅད་ཀྱིས་མཚུངས་པ་མ་ཡིན་པའི་ཕྱིར་དང་། བག་ཆགས་མཐུག་པོ་ལས་ཡོད་པ་ཉིད་དུ་ཡང་འགྱུར་རོ། །རྨི་ལམ་ལས་སད་པའི་ཚེ་དང་འཇིག་རྟེན་ཕ་རོལ་དུ་བདེ་བ་དང་སྡུག་བསྔལ་མྱོང་བ་ལ་བྱེ་བྲག་མེད་དོ་ཞེས་བཤད་པར་བྱའོ། །དེས་ན་རྨི་ལམ་དུ་གཞན་གྱིས་
[335b.5]འགྲོ་བ་དང་འོང་བ་མི་མཐོང་བ་དེ་ལྟ་ན་ཡང་། དེ་དག་ཡོད་པ་ཉིད་ཀྱི་ཕྱིར་མ་མཐོང་བ་ནི་ངེས་པ་མ་ཡིན་ནོ། །དེ་བས་ན་འགྲོ་བའི་རྟེན་གྱི་དངོས་པོ་མེད་པ་ཉིད་ཀྱང་མ་ཡིན་ནོ། །གཞན་ཡང་གལ་ཏེ་སེམས་ལུས་ལས་ཐ་མི་དད་པ་དེ་ལྟ་ན་ཡང་ལུས་ནི་རྡུལ་ཕྲ་རབ་ཚོགས་པ་ཙམ་ཡིན་པའི་ཕྱིར་རོ། །
[335b.6]རྡུལ་ཕྲ་རབ་ཐམས་ཅད་རིག་པར་འགྱུར་རོ། །འོན་ཏེ་ལུས་རགས་པ་ཡན་ལག་ཅན་ཏེ་དེ་ལྟར་མཐོང་བའི་ཕྱིར་རོ་ཞེ་ན། དེ་ལྟར་ན་ཡང་ལུས་ནི་རྡུལ་ཕྲ་རབ་ལ་གནས་པས་རྡུལ་ཕྲ་རབ་དམིགས་པར་འགྱུར་ཏེ། རྡུལ་ཕྲ་རབ་ལ་རེག་པའི་ཕྱིར་རོ། །འོན་ཏེ་རིག་པ་རྡུལ་རབ་ལས་སྐྱེས་པའོ་
[335b.7]ཞེ་ན། དེ་ལྟར་རྡུལ་ཕྲ་རབ་ལས་སྐྱེས་པའོ་ཞེས་རིག་པར་བྱེད་པ་ཅི་ཞིག་ཡིན་ཏེ། རང་གི་རིག་པ་ནི་ཐ་དད་པ་མི་རིགས་པ་ཡིན་པའི་ཕྱིར་རོ། །གཞན་ཁོ་ན་རིག་པ་སྟེ། རང་རིག་པར་མི་རུང་བ་མ་ཡིན་ནམ། རང་ལས་བྱེད་པ་འགལ་བའི་ཕྱིར་རོ་ཞེ་ན། དེ་ལྟ་ན་ཇི་ལྟར་བདེ་བ་མྱོང་བར་འགྱུར་ཐ་
[336a]
[336a.1]དད་པའི་ཤེས་པས་སོ་ཞེ་ན། བདེ་བ་ལ་སོགས་པ་ལས་གཞན་པའི་རིག་པ་མི་དམིགས་པ་མ་ཡིན་ནམ། དེ་ཇི་ལྟར་བདེ་བ་ལ་སོགས་པ་ཤེས་པ་གཞན་གྱིས་རིག་པར་འགྱུར། །ལུས་ཉིད་བདེ་བ་ལ་སོགས་པའི་རིགས་པའོ་ཞེ་ན། བདེ་བ་ལ་སོགས་པ་དང་། སྔོན་པོ་ལ་སོགས་པ་
[336a.2]ལས་ཐ་དད་པའི་ལུས་མི་དམིགས་པའི་ཕྱིར་རིག་བྱ་ཉིད་ཡིན་གྱི་རིགས་པ་ནི་མ་ཡིན་ནོ། །དེ་ལྟ་ན་འོ་ན་ནི་མིག་ལ་སོགས་པའི་རིག་པའོ་ཞེ་ན། རི་བོང་གི་རྭ་ལ་རིག་པར་ཅི་སྟེ་ཁས་ལེན་པར་མི་བྱེད། འོན་ཏེ་མིག་ལ་སོགས་པ་རྣམས་ལ་ནུས་པ་ཡོད་པས་རིག་པ་པོ་ཡིན་གྱི། རི་བོང་གི་རྭ་ལས་
[336a.3]ནུས་པས་སྟོང་པའི་ཕྱིར་རིག་པ་པོར་མི་རུང་ངོ་ཞེ་ན། མིག་ལ་སོགས་པ་ལ་ནུས་པ་དམིགས་པར་ཇི་ལྟར་ངེས་པ་ཡིན། འབྲས་བུའི་སྒོ་ནས་ནུས་པ་ངེས་སོ་ཞེ་ན། འབྲས་བུ་གང་ཞིག་ཡིན། གཟུགས་ལ་སོགས་པ་དམིགས་པའོ་ཞེ་ན། དམིགས་པ་དེ་ཡང་ནུས་པ་ཡིན་པའི་ཕྱིར་དམིགས་པར་མི་
[336a.4]འགྱུར་རོ། །ལྷག་མར་གྱུར་པའི་ཕྱིར་གཟུགས་ལ་སོགས་པ་ཁོ་ན་རྟགས་ཡིན་ཏེ། དེས་ཀྱང་རྣམ་པར་ཤེས་པའི་ནུས་པ་འབྲས་བུ་སྟེ། མིག་ལ་སོགས་པའི་འབྲས་བུ་ཉིད་ཡིན་ན་སྔར་མི་སྣང་བར་འགྱུར་རོ། །འོན་ཏེ་མཐོང་བར་འགྱུར་བའི་དུས་སུ་གཟུགས་ལ་སོགས་པ་རྣམས་མིག་ལ་
[336a.5]སོགས་པའི་འབྲས་བུའོ་ཞེ་ན། དེ་ལྟ་ན་ནི་རྡུལ་ཕྲ་རབ་ཡོད་ཚད་དམིགས་པར་འགྱུར་ཏེ། རྡུལ་ཕྲ་རབ་རྣམས་ལ་ནི་འདུས་པའི་གནས་སྐབས་དང་། སོ་སོའི་དུས་ལ་ཁྱད་པར་ཅུང་ཟད་ཀྱང་མེད་པའི་ཕྱིར་རོ། །འདུས་པའི་གནས་སྐབས་ན་ནི་ནུས་པ་བསྐྱེད་པ་ཉིད་ཁྱད་པར་ཡིན་ནོ་ཞེ་ན། དེ་ལྟ་ན་
[336a.6]ཡང་། གཅིག་ལ་གཅིག་བརྟེན་པར་འགྱུར་ཏེ། རྡུལ་ཕྲ་རབ་རྣམས་ཀྱི་ཁྱད་པར་ནི་མཐོང་དུ་རུང་བ་ཉིད་ཡིན་ལ། མཐོང་དུ་རུང་བ་མྱོང་བའི་ནུས་པ་དང་ལྡན་པའི་ཕྱིར་ཇི་ལྟར་ནུས་པ་གྲུབ་པ་མེད་པར་རིག་པ་ཉིད་གྲུབ་པར་འགྱུར་ཏེ། མཐོང་དུ་རུང་བ་གྲུབ་ན། ཇི་ལྟར་ནུས་པ་རྗེས་སུ་དཔོག་པ་
[336a.7]ཡིན། སྔོན་པོ་ལ་སོགས་པ་གྲགས་ཚོད་བདེ་བ་ལ་སོགས་པ་ཙམ་ཉིད་ཤེས་པ་སྟེ། ཤེས་པའི་བདེ་བའོ་ཞེས་གཞི་མཐུན་པ་མཐོང་བའི་ཕྱིར་རོ། །སྔོན་པོ་ལ་སོགས་པ་གསལ་བྱར་དམིགས་པ་མ་ཡིན་ནམ། ཇི་ལྟར་ཤེས་པ་ཡིན་ཞེ་ན། རང་གི་ངོ་བོ་མྱོང་བ་ལས་སྔོན་པོ་གསལ་བྱར་མྱོང་བ་
[336b]
[336b.1]ངེས་པ་མེད་པར་ངེས་ཤིང་། སྔོན་པོ་ལས་དེ་མྱོང་བ་ཡོད་པ་ནི་མ་ཡིན་ནོ། །དེ་གསལ་བྱའི་ཐ་སྙད་ཀྱང་ལུས་ལ་ལྟོས་ནས་བརྟགས་པའོ་ཞེས་བཤད་པར་བྱའོ། །དེ་བས་ན་སྔོན་པོ་ལ་སོགས་པ་གཞན་གྱི་ལུས་ལ་འཕོ་བ་དང་ལྡན་པ་ནི་ཤེས་པ་དེའི་བདག་ཉིད་ཀྱིས་ཡིན་པ་དེ་བཞིན་དུ་གཞན་གྱི་ལུས་ཁུ་བ་
[336b.2]དང་། ཁྲག་ལ་ཡང་ཤེས་པ་འཕོ་བ་དང་ལྡན་པ་ཉིད་ཡིན་ནོ། །དེའི་ཕྱིར་ཤེས་པ་ནི་གཟུགས་ལ་སོགས་པའི་རང་བཞིན་ཉིད་ཡིན་པའི་ཕྱིར་རྡུལ་ཕྲ་རབ་རིག་པར་ཐལ་བར་འགྱུར་རོ། །སངས་རྒྱས་པ་ལ་ཡང་ཅི་སྟེ་རྡུལ་ཕྲ་རབ་རིག་པར་མི་འགྱུར་རོ་ཞེ་ན། ཡུལ་གྱི་རྣམ་པ་ཅན་གྱི་ཤེས་པ་ཐ་དད་པ་
[336b.3]མྱོང་བའི་ཕྱིར། དེ་ལྟ་མོད་ཀྱི་ཆ་ཤས་ཅན་གྱི་ཤེས་པའི་ངོ་བོ་ཉིད་ཡོད་ཀྱི། ཤེས་པའི་རྒྱུ་ཕ་རོལ་པོའི་ཡང་རྡུལ་ཕྲ་རབ་ཐ་དད་པར་གྱུར་པ་ཡོད་པ་མ་ཡིན་ནོ་ཞེ་ན། ཆ་ཤས་ཅན་གྱི་ལུས་འབའ་ཞིག་ཡོད་པ་མ་ཡིན་ནམ། དེ་ཡང་གཅིག་པ་ཉིད་ཡིན་ན་ནི། ལག་པ་ལ་སོགས་བསྒུལ་ན་ཀུན། །འགུལ་
[336b.4]བར་འགྱུར་ཏེ་འགལ་བ་ཅན། །ལས་ནི་གཅིག་ལ་མི་རུང་ཕྱིར། །གཞན་དུ་ཐ་དད་གྲུབ་པར་འགྱུར། །གཅིག་ལ་བསྒྲིབས་པས་ཐམས་ཅད་ལ། །བསྒྲིབ་པར་འགྱུར་བའམ་མ་བསྒྲིབས་ན། །མཐོང་འགྱུར་གཅིག་ཚོན་གྱིས་བསྒྱུར་ན། །དམར་པོའང་མི་དམར་བར་རྟོགས་འགྱུར། །ཞེས་བྱ་
[336b.5]བ་ལ། ཡན་ལག་ཅན་གྱི་རྫས་ནི་བྱ་བ་དང་ལྡན་པ་དང་། ཡོན་ཏན་དང་ལྡན་པའི་རྫས་འཕྲོད་པ་འདུ་བའི་རྒྱུ་སྟེ། གལ་ཏེ་དེའི་བྱེད་པ་ཡིན་ན། འདུ་བའི་རྒྱུ་ཡིན་པའི་ཕྱིར་རྫས་ཐམས་ཅད་འགུལ་བར་འགྱུར་བ་དེ་བས་ན་ལུས་ཀྱི་ལག་པ་ལ་སོགས་པ་བསྐྱོད་ཅིང་བསྒུལ་ན་ལུས་ཐམས་ཅད་འགུལ་
[336b.6]བར་འགྱུར་རོ། །འགུལ་བ་དང་མི་འགུལ་བ་ཉིད་ཀྱིས་ཡན་ལག་ཅན་གཅིག་པའོ་ཞེ་ན། དེ་ནི་རིགས་པ་མ་ཡིན་ཏེ། འགལ་བའི་ལས་ཅན་གྱི་ཆ་ཤས་ཅན་གཅིག་པ་ཉིད་མི་རིགས་པའི་ཕྱིར་རོ། །འདིའི་དགོངས་པ་ནི་གལ་ཏེ་འགུལ་བ་དང་བཅས་པ་དང་། འགུལ་བ་མེད་པ་ཡན་ལག་ཅན་གཅིག་
[336b.7]པ་ཉིད་ཡིན་ན། ལྷ་སྦྱིན་དང་མཆོད་སྦྱིན་ལ་སོགས་པའི་རང་བཞིན་ཡང་འགྲོ་བ་པོ་ལ་སོགས་པ་དང་ལྡན་པའི་ཡན་ལག་ཅན་གཅིག་ཏུ་འགྱུར་རོ། །འོན་ཏེ་ལུས་ལ་འགུལ་བ་དང་མི་འགུལ་བར་མཐོང་བའི་ཕྱིར་འགལ་བ་ཅི་ཞིག་ཡོད་ཅེ་ན། གཅིག་པ་ཞེས་བྱ་བ་འདི་ཅི་ཡིན་གལ་ཏེ་སྣང་བ་ཐ་དད་པ་
[337a]
[337a.1]མེད་པ་ཡིན་ན་ནི་དེ་ནི་མེད་དེ། འགུལ་བ་དང་མི་འགུལ་བ་དག་གཅིག་པུ་སྣང་བ་མེད་པའི་ཕྱིར་རོ། །འོན་ཏེ་འབྲས་བུ་གཅིག་པ་ཡིན་ན་ནི་གལ་ཏེ་འབྲས་བུ་གཅིག་པ་དེ་ལྟ་ན་ཡང་། ཡན་ལག་ཅན་གཅིག་པར་ཇི་ལྟར་འགྱུར་ཏེ་གཞན་གཅིག་པས་གཞན་གཅིག་པར་འགྱུར་བའི་ཕྱིར་
[337a.2]རོ། །དེ་ཉིད་ཀྱི་ཕྱིར། གཞན་དུ་ན་གལ་ཏེ་གཅིག་བསྒུལ་བ་ན་ཐམས་ཅད་འགུལ་བར་ཁས་མི་ལེན་ན་ནི། འགུལ་བ་དང་བཅས་པ་དང་མི་འགུལ་བ་དག་ཐ་དད་པར་གྲུབ་ཅིང་། སོ་སོ་བར་གྲུབ་པར་འགྱུར་རོ་ཞེས་བསྟན་ཏོ། །འདིས་ནི་བྱ་བའི་འདུ་བའི་རྒྱུ་ཉིད་རྫས་ཡིན་པ་བཀག་པ་ཡིན་ན། །གཅིག་ཡིན་ན་
[337a.3]སྒྲིབ་པ་ཡིས་ཀྱང་ཐམས་ཅད་ལ་སྒྲིབ་པར་འགྱུར་རོ། །འདྲེས་པའི་བྱེ་བྲག་གིས་ཡན་ལག་ལ་སྒྲིབ་ཀྱི། ཡན་ལག་ཅན་ལ་མ་ཡིན་ནོ་ཞེ་ན། དེ་ལྟ་མོད་ཀྱི་ཡན་ལག་ཅན་ལ་མི་སྒྲིབ་ན་རྫས་ཐམས་ཅད་མཐོང་བར་འགྱུར་རོ། །ཡན་ལག་གི་སྒོ་ནས་སྒྲིབ་ན་ཅུང་ཟད་ཀྱང་མི་མཐོང་བ་ཉིད་དོ། །ཐམས་ཅད་
[337a.4]མི་དམིགས་པར་འགྱུར་རོ། །གཅིག་པ་ཡིན་ཡང་ཐམས་ཅད་མཐོང་བར་མི་ནུས་པ་མ་ཡིན་ནམ་ཞེ་ན། མཐོང་བ་དང་མི་མཐོང་བ་དང་ཇི་ལྟར་གཅིག་པར་འགྱུར། རྒྱ་སྐྱེགས་ལ་སོགས་པའི་ཚོན་གྱིས་གཅིག་ཏུ་བསྒྱུར་བ་ན་ཐམས་ཅད་དམར་པོར་འགྱུར་རོ། །ཕན་འདོགས་པའི་བྱེ་བྲག་གིས་རྫས་
[337a.5]གཞན་པས་ཡན་ལག་དམར་པོར་འགྱུར་བ་ཡིན་གྱི་ཡན་ལག་ཅན་མ་ཡིན་ནོ་ཞེ་ན། དམར་པོ་ཡང་མི་དམར་བའི་རྫས་སུ་འགྱུར་རོ། །གཏན་ཚིགས་དེ་གསུམ་གྱི་ཕྱིར་ཡན་ལག་ཅན་གྱི་རྫས་ཚོགས་པ་གཅིག་ཡོད་པ་མ་ཡིན་ནོ། །གལ་ཏེ་དུ་མ་ཉིད་ཡིན་ནའང་། །མི་རྟོགས་སྔོན་བཞིན་ཁྱད་པར་ནི། །
[337a.6]མེད་ཕྱིར་ཕྲ་ཕྱིར་ཁྱད་མེད་པ། །མི་འགྲུབ་ཁྱད་པར་ཅན་དབང་པོའི། །ཡུལ་འགྱུར་དེ་ཕྱིར་རྡུལ་ཕྲན་མིན། །ཞེས་བྱ་བ་ལ། གལ་ཏེ་ལུས་དུ་མ་ཡིན་ན་དེའི་ཚེ་ལུས་རྟོགས་པ་པོར་མི་འགྱུར་ཏེ། ཅིའི་ཕྱིར་ཞེ་ན། གནས་སྐབས་སོ་སོ་བར་འགྱུར་བའི་ཕྱིར་རོ། །རྡུལ་ཕྲ་རབ་རྣམས་འདུས་པའི་ཚེ་ཡང་
[337a.7]ཁྱད་པར་མེད་པའི་ཕྱིར་དང་། ཐ་དད་པའི་ཡན་ལག་ཅན་ནི་མི་སྐྱེ་བའི་ཕྱིར། སྔ་མ་བཞིན་དུ་ཕྲ་བའི་ཕྱིར། །ཞེས་བྱ་བ་ལ་སྨོས་ན་ནི་ཇི་ལྟར་རྡུལ་ཕྲ་རབ་རྣམས་སོ་སོ་བའི་དུས་ན་མི་དམིགས་པ་དེ་བཞིན་དུ་རྡུལ་ཕྲ་རབ་རྣམས་འདུས་པའི་ཚེ་ཡང་ཁྱད་པར་མེད་པར་མི་འགྲུབ་སྟེ། ཉམས་སུ་མྱོང་བའི་ཚེ་རགས་
[337b]
[337b.1]པར་མཐོང་བར་འགྱུར་བའི་ཕྱིར་རོ། །དེས་ན་ཁྱད་པར་མེད་པ་མཐོང་དུ་མི་རུང་བ་ནི་མེད་དོ། །འདི་ཉིད་ཀྱི་ཕྱིར་ཉམས་སུ་མྱོང་བ་ལ་སྣང་བའི་ཁྱད་པར་ཅན་ནི་དབང་པོའི་ཡུལ་ཉིད་དེ། རྡུལ་ཕྲ་རབ་ཉིད་ནི་གྲོགས་མི་བྱེད་པའི་ཕྱིར་རྡུལ་ཕྲ་རབ་མ་ཡིན་ནོ། །དེ་ལྟ་ན་ནི་ཡུལ་དམིགས་པར་ཇི་ལྟར་འགྱུར་ཞེ་ན། དེའི་
[337b.2]རྣམ་པ་ཅན་གྱི་ཤེས་པ་དམིགས་པ་ཉིད་ཀྱིས་ཡུལ་དམིགས་པར་འགྱུར་རོ། །ཁྱེད་ལ་ཡང་རྡུལ་ཕྲ་རབ་ཀྱི་རྣམ་པ་ཅན་དུ་ཅི་སྟེ་འགྱུར་ཞེ་ན། འདི་ཡང་ལེའུ་གསུམ་པ་ལས་བསྟན་པར་བྱའོ། །སྣ་ཚོགས་རྡུལ་ཕྲ་མོ་ཙམ་དུ་ཁས་ལེན་པ་མ་ཡིན་ནམ། སྒྲིབ་གཡོགས་དང་གགས་
[337b.3]བྱེད་པ་ལ་སོགས་པར་ཇི་ལྟར་འགྱུར་ཏེ། ཇི་སྟེ་འདུས་པའི་ཡན་ལག་ཅན་མ་གཏོགས་པར་རྡུལ་ཕྲ་རབ་ཉིད་གཅིག་པུ་ནི་ཐོགས་པ་མེད་པ་ཕན་ཚུན་རྗེས་སུ་འཇུག་པས་ཇི་ལྟར་སྒྲིབ་པ་ཡིན་ཏེ། སྦྱོར་བ་མེད་པའི་ཕྱིར་རོ། །མ་སྦྱར་བར་སྒྲིབ་ན་ནི་ཐམས་ཅད་ཀྱི་ཐམས་ཅད་ལ་སྒྲིབ་པར་འགྱུར་རོ་ཞེ་ན།
[337b.4]འདིར་སྨྲས་པ། དེ་ནི་སྒྲིབ་བྱེད་ལ་སོགས་པ། །མེད་པ་དག་ཀྱང་གསལ་བ་ཡིན། །གསེར་དང་དངུལ་ཆུ་ལ་སོགས་པའམ། །རྡོ་ཚན་ལ་སོགས་ཇི་ལྟར་སྣང་། །དབང་སོགས་རེ་རེས་ནུས་མེད་རྣམས། །ཇི་ལྟར་རྟོགས་པར་འགྱུར་བ་ཡིན། །ལྡན་པས་ཡིན་ན་འདིར་ཐལ་མཚུངས། །གལ་ཏེ་གསེར་
[337b.5]དང་དངུལ་ཆུ་ཡི། །མ་མཐོང་ཅན་རྟེན་རོ་དང་གཟུགས། །སོགས་འབྲེལ་འགལ་བར་ཇི་ལྟར་ཤེས། །ཉེ་བས་བརྟགས་པ་ལ་འདོད་ན། །བློ་ཡིས་ཐ་དད་ཡོད་བླ་སྟེ། །ཇི་ལྟར་ཕྲེང་རིང་བ་ཞེས་བྱ། །ཞེས་བྱ་བ་ལ། རྡུལ་ཕྲ་རབ་རྣམས་ནི་ཕྲད་པ་དང་བྲལ་བའི་ཕྱིར། ཇི་ལྟར་སྒྲིབ་པར་འགྱུར་ཞེས་རྩོད་པ་
[337b.6]ནི་རིགས་པ་མ་ཡིན་ཏེ། ཡན་ལག་ཅན་དང་འབྲེལ་པའི་སྒྲིབ་གཡོགས་གང་དུ་ཡང་མ་མཐོང་བའི་ཕྱིར་གང་གིས་དེ་མེད་ན་མེད་པ་ཡིན། དེ་ལྟར་གགས་བྱེད་པ་ལ་སོགས་པ་ཡང་ཤེས་པར་བྱའོ། །ཇི་སྟེ་རྡུལ་ཕྲ་རབ་རྣམས་སྦྱོར་བ་མེད་པའི་ཕྱིར་ཇི་ལྟར་སྒྲིབ་པ་ལ་སོགས་པ་ཡིན་ཞེ་ན། དེ་ལྟ་མོད་ཀྱི་
[337b.7]ཁྱོད་ཀྱི་ལྟར་ན། ལྡན་པ་མེད་པའི་རྡུལ་ཕྲ་རབ་ཀྱིས་ཀྱང་ཇི་ལྟར་ཡན་ལག་ཅན་སྐྱེད་པར་བྱེད། འདུས་ནས་སོ་ཞེ་ན། འོ་ན་འདུས་པ་ཡང་བདག་ཉིད་ཐམས་ཅད་ཀྱིས་ཡིན་ནམ། ཕྱོགས་གཅིག་གིས་ཡིན་ཏེ། དེ་ལ་ཕྱོགས་གཅིག་གིས་ནི་མ་ཡིན་ཏེ། རྡུལ་ཕྲ་རབ་རྣམས་ལ་ཕྱོགས་གཅིག་མེད་པའི་
[338a]
[338a.1]ཕྱིར་རོ། །བདག་ཉིད་ཐམས་ཅད་ཀྱིས་འདུས་པ་ཡང་མ་ཡིན་ཏེ། གོང་བུ་ཡང་རྡུལ་ཕྲན་ཙམ་དུ་ཐལ་བར་འགྱུར་བའི་ཕྱིར་རོ། །རྡུལ་ཕྲ་རབ་ཀྱིས་ལྡན་པ་སྐྱེད་དོ་ཞེ་ན། བར་དང་བཅས་པས་ཇི་ལྟར་ལྡན་པ་ཉིད་བསྐྱེད་དེ། དེ་ལྟར་བརྩད་པ་མཚུངས་པ་ཡིན་ནོ། །དེ་ཕྲད་པ་ཡང་མེད་དོ་ཞེས་
[338a.2]བསྟན་ཟིན་ཏོ། །གལ་ཏེ་ཕྲད་པ་ཡོད་ན་ལྡན་པ་དང་ཡན་ལག་ཅན་གཞན་གྱིས་ཅི་ཞིག་བྱ། འོན་ཏེ་བར་དང་བཅས་པས་ལྡན་པ་སྐྱེད་དོ་ཞེ་ན། བར་དང་བཅས་པས་ཇི་ལྟར་ལྡན་པ་ཉིད་བསྐྱེད་དེ། དེ་ལྟ་ན་ཡང་འབྲེལ་པ་ཉིད་ཀྱིས་གེགས་བྱེད་པ་ལ་སོགས་པའི་བྱ་བ་བྱེད་པའི་ཕྱིར་དཔེར་ན་སྐྲ་ཤད་དང་། སྦྲང་
[338a.3]མ་ལ་སོགས་པ་དག་གིས་ཀྱང་བར་མེད་པ་ཉིད་མཐུག་པོའི་རྣམ་པར་སྣང་བ་སྐྱེད་པ་དེ་བཞིན་དུ། རྡུལ་ཕྲ་རབ་ཕྲད་པ་མེད་པ་ཉིད་གེགས་བྱེད་པ་ལ་སོགས་པའི་བྱ་བ་བྱེད་པ་ཡིན་ནོ། །དེའི་ཕྱིར་འདུས་པའི་གནས་སྐབས་ན་ཁྱད་པར་བསྟན་པ་དེས་ནི་སྒྲིབ་པར་བྱེད་པ་དང་། གེགས་བྱེད་པ་ལ་སོགས་
[338a.4]པ་མེད་པར་རྩོད་པ་གང་ཡིན་པ་དེ་ཡང་བསལ་བ་ཡིན་ནོ་ཞེས་བྱ་བ་སྨོས་སོ། །ཡང་ན་གསེར་དང་དངུལ་ཆུ་ལ་སོགས་པ་འདྲེས་པར་གྱུར་ན་ནི། ཡན་ལག་ཅན་མེད་པར་ཇི་ལྟར་གེགས་བྱེད་པ་ལ་སོགས་པའི་རྒྱུར་གྱུར། རྡོ་ཚན་ཏེ་ལ་སོགས་པ་བསྲེག་པ་ལ་སོགས་པའི་བྱ་བ་མཐོང་བ་ཇི་ལྟར་
[338a.5]ཡིན། དེར་ཡན་ལག་ཅན་མི་སྐྱེ་བའི་ཕྱིར་ཏེ། གསེར་དང་དངུལ་ཆུ་དང་རྡོ་དང་མེ་ལ་སོགས་པ་རྣམས་རིགས་མི་མཐུན་པའི་ཕྱིར་རོ། །ཡང་ན་གལ་ཏེ་རྡུལ་ཕྲ་རབ་ལས་ཐ་དད་པའི་རྡུལ་མེད་ཀྱང་། རགས་པ་གཅིག་ཇི་ལྟར་མི་སྣང་བ་ཡིན་ཏེ། དེའི་ཕྱིར་གསེར་དང་དངུལ་ཆུ་ལ་སོགས་པ་ཞེས་སྨོས་
[338a.6]ཏེ། དེའི་དགོངས་པ་ནི་དཔེར་ན་གསེར་ལ་སོགས་པ་དངུལ་ཆུ་དང་འདྲེས་པ་དང་། རྡོ་བ་ལ་སོགས་པ་ཚ་བར་གྱུར་པར་སྣང་བ་དེ་ནི་ཡན་ལག་ཅན་མེད་ཀྱང་དེ་ལྟར་སྣང་བའོ། །སོགས་པའི་སྒྲས་ནི་ཆུ་ཚན་ལ་སོགས་པ་བཟུང་ངོ་། །དེ་བཞིན་དུ་བུམ་པ་ལ་སོགས་པ་ལ་ཡང་རྡུལ་ཕྲ་རབ་ཀྱི་སྟོབས་
[338a.7]ཉིད་ཀྱིས་རགས་པར་སྣང་བ་སྟེ། འདི་ལྟར་ཁྱད་པར་ཅན་གྱི་རྒྱུ་ལས་ཁྱད་པར་ཅན་གྱི་འབྲས་བུ་སྐྱེ་སྟེ། རེ་རེ་སྟེ་སོ་སོར་དབང་པོ་ལ་སོགས་པ་ནུས་པ་མེད་པ་སྣ་ཚོགས་པས་འབྲས་བུ་མིག་གི་རྣམ་པར་ཤེས་པ་སྐྱེད་ཀྱི། མིག་ལ་སོགས་པ་རྣམས་འདྲེ་བ་དང་ལྡན་པས་ཡན་ལག་ཅན་བསྐྱེད་
[338b]
[338b.1]པ་ནི་མ་ཡིན་ནོ། །མིག་ལ་སོགས་པ་རྣམས་ལ་སྦྱོར་བ་ཡོད་ན་ཕྱོགས་ལ་ཡང་སྦྱོར་ཞིང་། ཕྲད་པས་འབྲས་བུ་ཇི་ལྟར་མི་སྐྱེ་ཞེས་བྱ་བའི་བརྩད་པ་མཚུངས་པར་འགྱུར་རོ། །གལ་ཏེ་མིག་ལ་སོགས་པ་ཚོགས་པས་བསྐྱེད་པ་ལ། འདྲེ་བ་གཞན་དགོས་ན་ནི་དེའི་ཚེ་ཐུག་པ་མེད་པར་འགྱུར་རོ། །འོན་ཏེ་
[338b.2]དབང་པོ་ལ་སོགས་པ་ངོ་བོ་ཉིད་ཀྱི་ཤེས་པ་འདྲེས་པ་སྐྱེད་ན་ནི་དེ་ལྟ་ན་ནི་རྡུལ་ཕྲ་རབ་ཀྱིས་ཀྱང་འདྲེ་བ་དང་ཡན་ལག་ཅན་མེད་པར་སྔོན་པོ་ལ་སོགས་པའི་རྣམ་པ་ཅན་གྱི་ཤེས་པ་སྐྱེད་པར་བྱེད་དེ་ཡན་ལག་ཅན་གྱིས་ཅི་ཞིག་བྱ། དེ་ལྟར་ནི་འགྱུར་མོད་ཀྱི་གལ་ཏེ་གསེར་དང་དངུལ་ཆུ་དག་རིགས་མི་མཐུན་པའི་
[338b.3]ཕྱིར་རྫས་བསྐྱེད་པ་མ་ཡིན་ཡང་། དེ་དག་ལྡན་པ་སྣང་བ་ཡིན་ནོ་ཞེ་ན། རྟེན་མ་མཐོང་བ་གང་ཡིན་པ་དེ་ནི་ཇི་ལྟར་ཤེས་པར་འགྱུར་ཏེ། འདི་ལྟར་གསེར་དང་དངུལ་ཆུའི་རྡུལ་ཕྲ་རབ་རྣམས་དབང་པོ་ལས་འདས་པའི་ཕྱིར་དེའི་ལྡན་པ་ཡང་དབང་པོ་ལས་འདས་པ་ཉིད་དོ། །དཔེར་ན་མིག་གི་དབང་པོ་ལྐོག་ཏུ་
[338b.4]གྱུར་པའི་ཕྱིར་དེ་ལ་བརྟེན་པའི་དོན་དང་། འདྲེ་བ་ཡང་ལྐོག་ཏུ་གྱུར་པ་བཞིན་ནོ། །གཞན་ཡང་དབང་པོ་རྩ་དང་འབྲེལ་པ་ལས་ཤེས་པ་སྐྱེ་ལ། གསེར་དང་དངུལ་ཆུ་འདྲེས་པ་ནི་ཡོན་ཏན་ཡིན་པའི་ཕྱིར། འདྲེ་བ་དབང་པོ་ལས་འདས་པ་མ་ཡིན་པའི་ཕྱིར་ཅིའི་ཕྱིར་མཐོང་དུ་རུང་བ་ཉིད་མ་ཡིན། འོན་ཀྱང་རྟེན་དུ་
[338b.5]གྱུར་པའི་རྡུལ་ཕྲ་རབ་འདྲེས་པ་ལས། དེ་ཡང་ལྡན་པ་སྐྱེད་དོ་ཞེ་ན། དེ་ལྟ་མོད་ཀྱི་ལྡན་པ་དང་འཕྲོད་པ་འདུ་བ་ལས་རྡུལ་ཕྲ་རབ་ཀྱི་གཟུགས་ཀྱང་འཛིན་པར་འགྱུར་རོ། །གལ་ཏེ་ཡང་གསེར་དང་དངུལ་ཆུ་ལ་སོགས་པའི་ཕྲད་པ་ཉིད་བལྟར་རུང་བའོ་ཞེ་ན། དེ་ལྟ་ན་ཡང་བཏུང་བ་བཟང་པོ་ལ་སོགས་པ་
[338b.6]ལ་བུ་རམ་ལ་སོགས་པ་འདྲེས་པའི་རང་བཞིན་གཟུགས་དང་རོ་ལ་སོགས་པ་འགལ་ཏེ། བཏུང་བ་བཟང་པོ་མངར་བའོ་ཞེས་བྱ་བ་ལ་སོགས་པའོ། །ཡང་དོན་གཅིག་ལ་འདུས་པའི་གཟུགས་ལ་སོགས་པ་ཉེ་བར་བརྟགས་ནས་ལྡན་པར་འདོད་པ་མ་ཡིན་ནམ་ཞེ་ན། དེ་ལྟ་མོད་ཀྱི་འོན་ཀྱང་རྡུལ་
[338b.7]ཕྲ་རབ་འདྲེས་པ་ཅན་རྣམས་ཀྱི་གཟུགས་ལ་སོགས་པ་གང་ཡིན་པ་དེ་ཉིད་འདྲེས་པའི་གཟུགས་ལ་སོགས་པ་དང་ཐ་དད་པར་སྣང་བར་འགྱུར་རོ། །དེའི་ཕྱིར། བློ་ཡི་ཐ་དད་ཡོད་བླ་སྟེ། །ཞེས་བྱ་བ་གསུངས་སོ། །གཟུགས་དང་རོ་དག་གཅིག་པར་སྣང་བ་ནི་འདྲེས་པ་ལས་ཡིན་ཏེ། ལྕགས་གོང་
[339a]
[339a.1]མེར་བསྲེགས་པ་བཞིན་མ་ཡིན་ནམ་ཞེ་ན། དེ་ལྟ་མོད་ཀྱི་རྫས་གཞན་བརྟགས་ཏེ་ཅི་ཞིག་བྱ་སྟེ། རྡུལ་ཕྲ་རབ་རྣམས་ཉིད་རགས་པ་ལ་སོགས་པའི་གཟུགས་སུ་སྣང་བའོ། །གལ་ཏེ་ཡང་ཁྱེད་རྡུལ་ཕྲ་རབ་ལས་གཞན་པའི་རྫས་འདོད་ན་ནི་དེའི་ཚེ་ཕྲེང་བ་རིང་པོ་ཡོད་པར་མི་འགྱུར་ཏེ། ཕྲེང་བ་ཞེས་བྱ་
[339a.2]བའི་དངོས་པོ་ཅུང་ཟད་ཀྱང་མེད་པའི་ཕྱིར་རོ། །གང་གི་ཕྱིར་འདྲེས་པ་མེད་པའི་ཕྱིར་མ་འདྲེས་པ་དང་། འདྲེས་པ་མེད་པ་ཉིད་ཀྱི་རྫས་ཀྱང་མེད་པ་དང་། རིགས་ཀྱང་མེད་པ་སྟེ་ཕོ་བྲང་གཅིག་ཀྱང་ཕྲེང་བ་ཉིད་དུ་ཐལ་བར་འགྱུར་བའི་ཕྱིར་ཤིང་བཞིན་ནོ། །མེད་པ་ཉིད་ནི་རིང་པོ་ཉིད་དུ་རིགས་པ་མ་ཡིན་
[339a.3]ནོ། །དེ་བས་ན་ཇི་ལྟར་བཀོད་པའི་ཁྱད་པར་གྱིས་ཕྲེང་བའི་བློ་སྐྱེད་པ་དེ་བཞིན་དུ་རྡུལ་ཕྲ་རབ་རྣམས་ལ་རགས་པ་ལ་སོགས་པའི་བློ་འབྱུང་ངོ་། །མངོན་སུམ་ཉིད་ཀྱིས་རྫས་དང་གྲངས་དང་། ལྡན་པ་ལ་སོགས་པ་ཤེས་པ་མ་ཡིན་ནམ། འདི་ལྟར་མིག་གི་བྱེད་པའི་རྗེས་ལ་བུམ་པ་དང་ལྡན་པ་དག་
[339a.4]གཅིག་པའོ་ཞེས་བྱ་བར་རྟོགས་པའོ་ཞེ་ན། འདིར་སྨྲས་པ། གྲངས་དང་ལྡན་པ་ལ་སོགས་ཀྱང་། །དེ་དང་ལྡན་པའི་དངོས་ཉིད་དང་། །བརྗོད་པ་དག་ལས་ཐ་དད་པར། །ངོ་བོ་བློ་ལ་མི་སྣང་ངོ་། །ཞེས་བྱ་བ་ལ། གྲངས་ནི་གཅིག་ཉིད་ལ་སོགས་པའོ། །ལྡན་པ་ནི་ལྡན་པའི་ཤེས་པས་གཟུང་
[339a.5]བའོ། །ལས་ནི་འགྲོ་བ་ལ་སོགས་པའོ། །སོགས་པའི་སྒྲས་ནི་རིགས་ལ་སོགས་པ་གཟུང་བར་བྱའོ། །དེ་དག་དང་ལྡན་པའི་དངོས་པོ་ཉིད་ལས་ཏེ་གྲངས་ལ་སོགས་པ་དེ་གང་ལ་ཡོད་པའི་གཟུགས་ལ་སོགས་པའི་དངོས་པོ་དེ་རྣམས་ལས་ཐ་དད་པར་དབང་པོ་ལས་སྐྱེས་པའམ། རྟོགས་པ་དང་
[339a.6]བཅས་པའི་བློ་ལ་གནས་ཡན་ལག་ཅན་ལ་སོགས་པའི་ངོ་བོ་ཉིད་སྣང་བར་མི་འགྱུར་བའམ། རྫས་ལ་སོགས་པ་རྗོད་པར་བྱེད་པ་ལས་ཐ་དད་པར་རྟོགས་པའི་བློ་ལ་མི་སྣང་སྟེ། འདི་ལྟར་ཡན་ལག་ཅན་ལ་སོགས་པ་མ་ལུས་པ་ཡོན་ཏན་སོགས་པས་སྟོང་པར་འདོད་ཅིང་། མིག་གི་ཤེས་པས་
[339a.7]ཀྱང་ལྡན་པ་ཅན་གཟུགས་ལ་སོགས་པ་རྟོགས་པར་འགྱུར་གྱི་རྫས་ལ་སོགས་པ་ཐ་དད་པ་ནི་མ་ཡིན་ནོ། །རྟོགས་པའི་ཤེས་པ་ལ་ཡང་གསལ་བའི་རང་བཞིན་ཉིད་སྣང་བ་འམ། བརྗོད་པའི་རང་བཞིན་ནང་གི་ཤེས་པས་བརྗོད་པར་འགྱུར་བ་ཉིད་ཡིན་གྱི་རིགས་ལ་སོགས་པ་རྣམས་ཀྱི་ངོ་བོ་ཉིད་
[339b]
[339b.1]ཀྱིས་སྣང་བ་ནི་མ་ཡིན་ནོ། །འདི་དག་གིས་ནི་མི་དམིགས་པ་བསྟན་པ་ཡིན་ནོ། །གལ་ཏེ་རིགས་ལ་སོགས་པ་མངོན་སུམ་གྱིས་མི་ཤེས་པ་དེ་ལྟ་ན་ཡང་བརྗོད་པ་དང་ཤེས་པ་གཅིག་གི་རྣམ་པ་ཅན་མཐོང་བའི་ཕྱིར་རིགས་ལ་སོགས་པ་ངེས་པར་བྱེད་པ་སྟེ། རང་གི་མཚན་ཉིད་ཀྱི་རྒྱུ་མཚན་ལས་རིགས་ལ་སོགས་པ་
[339b.2]མི་རྟོགས་པ་མ་ཡིན་ནམ་ཞེ་ན། དེ་མི་རིགས་ཏེ་གང་གི་ཕྱིར། །དངོས་པོ་ཐ་དད་རྗེས་འབྲང་བའི། །རྣམ་པར་རྟོག་པས་སྒྲ་དང་ཤེས། །བརྟགས་དོན་ཅན་དེ་དཔེར་ཡོན་ཏན། །སོགས་པའམ་ཞིག་དང་མ་སྐྱེས་བཞིན། ཞེས་བྱ་བ་ལ། ཤེས་པ་དང་བརྗོད་པའི་བྱེ་བྲག་མི་འདྲ་བ་ཉིད་ཀྱིས་དངོས་པོ་
[339b.3]ཐ་དད་པ་ནི་མ་ཡིན་གྱི། འོན་ཀྱང་མངོན་སུམ་གྱི་སྣང་བ་ཐ་དད་པས་ཏེ། རྟོགས་པའི་བག་ཆགས་ཀྱི་སྟོབས་ལས་བྱུང་བའི་རྟོགས་པའི་བློ་ནི་རིགས་ལ་སོགས་པ་ཉིད་དུ་སྣང་གི་དངོས་པོའི་རྒྱུ་ཅན་ནི་མ་ཡིན་པའི་ཕྱིར་རོ། །དེས་ན་རྗེས་སུ་འགྲོ་བ་དང་། ལྡོག་པས་ཀུན་དུ་བརྟགས་པའི་ཐ་དད་པ་ལ་
[339b.4]བརྟེན་ནས་རིགས་ལ་སོགས་པའི་བློ་སྐྱེ་སྟེ། འདི་ལྟར་བ་ལང་གི་གོང་བུ་ལ་གཞན་དུ་དཀར་པོ་ཉིད་མཐོང་ཞིང་། དཀར་པོ་ཉིད་ལ་གཞན་དུ་བ་ལང་ནག་པོ་མཐོང་བའི་ཕྱིར་རྗེས་སུ་འགྲོ་བ་དང་། ལྡོག་པ་དེས་རིགས་མི་མཐུན་པ་རྣམ་པར་གཅོད་པའི་དངོས་པོ་ཐ་དད་པའི་རྗེས་སུ་འབྲང་བའི་རྣམ་པར་
[339b.5]རྟོག་པས་བརྟགས་པའི་དོན་ཅན་ཏེ། སྒྲོ་བཏགས་པའི་ཡུལ་ལ་སྒྲ་དང་ཤེས་པ་ཐ་དད་པ་དག་གིས་རིགས་དང་ཡོན་ཏན་ལ་སོགས་པ་ཐ་དད་པར་ཇི་ལྟར་སྒྲུབ་པར་བྱེད་དེ། དཔེར་ན་ཡོན་ཏན་ལ་སོགས་པ་རང་བཞིན་གཅིག་ལ། ཡོན་ཏན་ཉི་ཤུ་རྩ་བཞི་དང་། ལས་ལྔ་ཡོད་ཀྱང་ཡོན་ཏན་ལ་
[339b.6]སོགས་པའི་གྲངས་ཡོད་པ་ལ། གྲངས་ཡོད་པ་ནི་མ་ཡིན་ཏེ། དེ་རྫས་ལ་བརྟེན་པའི་ཕྱིར་རོ། །རྟེན་གྱི་གྲངས་ལ་བརྟགས་ནས་དེ་ལྟར་ཐ་སྙད་གདགས་པར་མི་རུང་སྟེ་རྟེན་ཐ་དད་ཀྱང་གཅིག་པུ་ཉིད་དོ།། །།ཚད་མ་རྣམ་འགྲེལ་གྱི་འགྲེལ་པ་ལས། བམ་པོ་དྲུག་པ། ཞིག་དང་མ་
[339b.7]སྐྱེས་རྣམས་ལ་ཡང་། །ཇི་ལྟར་གཅིག་པུ་ཉིད་དུ་ཤེས། །ཉེ་བར་བཏགས་ལས་འདིར་འདོད་ན། །དེ་རྒྱུ་ཅན་འདོད་གང་ཡིན་པ། །དེ་ཉིད་དངོས་རྣམས་ཐམས་ཅད་ལ། །དེ་དག་གིས་རྒྱུ་ཅིས་མི་འདོད། །ཅེས་བྱ་བ་ལ། གལ་ཏེ་ཞིག་པ་དང་མ་བྱུང་བ་དག་ལ་གཅིག་པ་ཉིད་ཉེ་བར་བཏགས་
[340a]
[340a.1]ནས་ཐ་སྙད་འདོགས་པ་དང་། རྟོགས་པ་ནི་འདས་པ་ལ་སོགས་པ་ལ་ཉེ་བར་བཏགས་པ་འདི་ནི་རྟོགས་པའི་ཤེས་པའི་རྒྱུ་ཅན་ཏེ། ཐོག་མ་མེད་པའི་རྟོགས་པས་ལྷག་པར་གཞག་པ་དེ་ཉིད་དངོས་པོ་རྣམས་ཐམས་ཅད་ལ་སྒྲ་དང་ཤེས་པ་དག་གི་རྒྱུར་འགྱུར་གྱི། དངོས་པོ་རེག་པ་མ་ཡིན་
[340a.2]ནོ། །ཉེ་བར་འདོགས་པའང་ཀུན་དུ་མིན། །གལ་ཏེ་ཐ་དད་ཁྱད་པར་ཅན། །དངོས་ཞེས་བྱ་ནི་འདིས་ཅི་ཤེས། །གལ་ཏེ་ཐ་དད་མེད་པ་དག །ཐ་དད་མེད་དོན་ཅན་ཞེ་ན། །དོན་གཞན་མིན་རྒྱུ་ཅན་ཡིན་ཡང་། །དཀར་པོ་སོགས་ལ་གྲངས་ལ་སོགས། །ལྡན་པ་ཅན་སྒྲ་རྣམ་གྲངས་མིན། །གལ་ཏེ་དེ་ལའང་དོན་
[340a.3]གཞན་ན། །ཡོན་ཏན་དང་རྫས་ཁྱད་མེད་འགྱུར། །ཞེས་བྱ་བ་ལ། དེ་ལྟར་ནི་འགྱུར་མོད་ཀྱི་ཉེ་བར་བཏགས་པ་ཞེས་བྱ་བ་དངོས་ཀྱི་རྒྱུ་ཅན་ཏེ། དེ་ཇི་ལྟར་དངོས་མེད་ན་གདགས་པར་རུང་། དངོས་ནི་ཐ་དད་པར་འཇིག་རྟེན་པ་ལ་གྲགས་པའི་དབྱུག་པ་ཅན་ལ་སོགས་པའི་ཁྱད་པར་ཅན་བཞིན་ལ་ཐ་མི་དད་པའི་ཁྱད་
[340a.4]པར་ཅེས་ནི་བཏགས་པའོ། །སངས་རྒྱས་པ་ནི་སྔ་མ་སྔ་མས་རྟོགས་པས་གཞག་པ་ཙམ་སྟེ། ཁྱད་པར་ཅན་མི་སྲིད་པས། །ཐ་དད་པར་གྱུར་པའི་ཁྱད་པར་ཅན་ཉིད་མེད་ན། དངོས་པོ་མེད་པས་ཀུན་དུ་བཏགས་པར་མེད་པར་འགྱུར་རོ་ཞེ་ན། དེ་ནི་མ་ཡིན་ཏེ། གང་གི་ཕྱི་ཐ་དད་པའི་ཁྱད་པར་ཅན་གང་ཡིན་པ་དེ་ནི་
[340a.5]དངོས་ཞེས་བྱ་ན། དེ་ཡང་ཅིས་ཤེས་ཏེ། ཐ་དད་པའི་ཁྱད་པར་ཅན་དང་བྲལ་བ་ཡང་། རྟོགས་པས་མཐོང་བའི་ཐ་དད་པའི་ཁྱད་པར་ཅན་གྲགས་ཚོད་ཙམ་ནི་དངོས་པོ་ཁོ་ན་སྟེ། མ་བཀྱོགས་པར་རྟོགས་པའི་བློའི་ཡུལ་ནི་དངོས་ཡིན་ལ། བཀྱོགས་པ་ནི་རྟོགས་པ་ཅན་གྱི་ཤེས་པའི་ཡུལ་ནི་བཏགས་པའོ་ཞེ་ན་
[340a.6]འཇིག་རྟེན་པ་ལ་གྲགས་པའོ། །གཞན་ཡང་ཡུལ་ཐ་དད་པ་ཅན་ཉིད་དངོས་ཡིན་ལ། ཅིག་ཤོས་བཏགས་པའོ་ཞེ་ན། དེ་ལྟ་བུ་ཐམས་ཅད་བཏགས་པ་ཉིད་ཡིན་མོད་ཀྱི། ཐ་དད་པའི་ཁྱད་པར་ཅན་མེད་པའི་ཕྱིར་རོ། །འདས་པ་ལ་སོགས་པ་ལ་ནི་ཁྱད་པར་ཡང་མེད་པའི་ཕྱིར་ཉེ་བར་བཏགས་པར་འགྱུར་
[340a.7]རོ། །གལ་ཏེ་ཐ་དད་པའི་ཁྱད་པར་ཅན་མེད་ན། དེའི་ཚེ་ཐ་མི་དད་པའི་བརྗོད་པར་བྱ་བ་ནི་ཐ་དད་མེད་པའི་དོན་ཅན་ཏེ་རྣམ་གྲངས་པའི་རང་བཞིན་ཉིད་དུ་འགྱུར་ཞིང་། བུམ་པ་གཅིག་ཅེས་བྱ་བ་གཞི་མཐུན་པར་ཡང་མི་འགྱུར་ཏེ། རྣམ་པར་དབྱེ་བའི་རྒྱུ་མཚན་ཡོད་ན་དེར་འགྱུར་བའི་ཕྱིར་མ་ཡིན་ནམ་
[340b]
[340b.1]ཞེ་ན་དེ་ནི་མི་བདེན་ཏེ། གང་གི་ཕྱིར་འདི་ལ་དོན་གཞན་པའི་རྒྱུ་མེད་པ་ཅན་དེའི་དངོས་པོ་འདི་ནི་དོན་གཞན་མིན་པའི་རྒྱུ་ཅན་ཏེ། དཀར་པོ་ལ་སོགས་པའི་ཡོན་ཏན་རྣམས་ལ་གྲངས་ལ་སོགས་པའི་ལྡན་པ་ཅན་གཟུགས་གཅིག་ཅེས་བྱ་བ་ལ་སོགས་པའི་སྒྲ་རྣམ་གྲངས་མ་ཡིན་པར་མཐོང་བ་དེ་བཞིན་དུ་རྫས་ལ་
[340b.2]སོགས་པ་རྣམས་ཀྱང་རྣམ་གྲངས་མ་ཡིན་པའོ། །དཀར་པོ་ལ་སོགས་པ་དེ་ལ་ཡང་གྲངས་ལ་སོགས་པ་དོན་གཞན་མ་ཡིན་ནམ་ཞེ་ན། དེ་ལྟ་ན་ནི་རྫས་དང་། ཡོན་ཏན་དག་ལ་ཁྱད་པར་མེད་པར་འགྱུར་ཏེ། འདི་ལྟར་བྱ་བ་དང་ལྡན་པ་དང་། ཡོན་ཏན་དང་ལྡན་པ་དང་། འདུ་བའི་རྒྱུ་ཅན་ནི་རྫས་ཡིན་
[340b.3]ནོ། །གལ་ཏེ་ཡང་ཡོན་ཏན་ལ་སོགས་པ་ལ་ཡང་གྲངས་ལ་སོགས་པ་ལ་ཡོད་ན། དེ་ལྟ་ན་ནི་ཡོན་ཏན་དང་ལྡན་པའི་ཕྱིར་རྫས་ཉིད་དང་གཅིག་ཏུ་འགྱུར་གྱི། ཡོན་ཏན་ལ་སོགས་པ་ཐ་དད་པ་ནི་ཡོད་པ་ནི་མ་ཡིན་ནོ། །གལ་ཏེ་གཞན་གྱི་གཞུང་ལ་དཀར་པོ་ལ་སོགས་པ་ལ་གྲངས་ལ་སོགས་པའི་སྒྲ་མི་
[340b.4]རིགས་པ་དེ་ལྟ་ན་ཡང་ཁྱེད་ཀྱི་ལུགས་ཀྱིས་དོན་ཐ་དད་པར་ཇི་ལྟར་འགྱུར་ཏེ། མི་འགྱུར་བ་མ་ཡིན་ནམ་ཞེ་ན། འདིར་སྨྲས་པ། ལྡོག་པ་ཐ་དད་ཕྱིར་ཐ་དད། །འགྱུར་ཏེ་དོན་གཞན་མིན་དོན་ཅན། །ཡིན་ཡང་ལས་རྫས་མིན་སྒྲ་བཞིན། །ཞེས་བྱ་བ་ལ། སངས་རྒྱས་པའི་ལུགས་ཀྱིས་གྲངས་ལ་
[340b.5]སོགས་པའི་སྒྲ་ཐ་དད་པ་ཡིན་ནོ། །ཇི་ལྟར་ཞེ་ན། ལྡོག་པས་བྱས་པའི་ཐ་དད་པས་ཀུན་དུ་བཏགས་པའི་ཐ་དད་པ་ཅན་གྱི་བརྗོད་པར་བྱ་བ་ཐ་དད་པའི་ཕྱིར། དཔེར་ན་རྫས་ནི་ལས་མ་ཡིན་ལ། ལས་ནི་རྫས་མ་ཡིན་གྱི། འདི་ན་དོན་གཞན་ཡོད་པ་མ་ཡིན་ནོ། །དེ་ལྟར་ན་ཡང་ལས་མ་ཡིན་པ་དང་
[340b.6]རྫས་མ་ཡིན་པའི་སྒྲ་ལ་སོགས་པ་རྣམས། རྣམ་གྲངས་པ་མ་ཡིན་པ་དེ་བས་ན་ལྡོག་པ་ཐ་དད་པ་ཉིད་སྒྲ་དང་ཤེས་པའི་རྒྱུ་ཡིན་གྱི་རིགས་ལ་སོགས་པ་ནི་མ་ཡིན་ནོ། །གལ་ཏེ་རིགས་ལ་སོགས་པ་མེད་ན། འོ་ན་ནི་བ་ལང་དཀར་པོ་དང་བ་ལང་གི་དཀར་པོ་ཉིད་ཅེས་བྱ་བའི་གཞི་མཐུན་པ་དང་། ཐ་
[340b.7]དད་པའི་རྟེན་ཅན་དུ་ཇི་ལྟར་འགྱུར་ཞེ་ན། འདིར་སྨྲས་པ། དངོས་པོ་བརྗོད་པའི་སྒྲ་རྣམས་ཀྱིས། །དེ་དང་ལྡན་ལས་ཐ་དད་བཞིན། །གྲངས་སོགས་བརྗོད་པ་གང་དེ་ཡང་། །ཆོས་གཞན་གཅོད་པར་བྱེད་པ་ཡིན། །དེ་ཙམ་ཤེས་པར་འདོད་པ་ལ། །མ་ལུས་གཞན་ནི་སྤོང་ཅན་སྒྲ། །ཐ་དད་ཆོས་བཞིན་
[341a]
[341a.1]རྗོད་བྱེད་དེ། །ལ་ལར་སོར་མོ་གཤིབས་པ་བཞིན། །དོན་གཅིག་བརྗོད་ཀྱང་ཐམས་ཅད་ནི། །སྤོང་མིན་ཕྱིར་ཆོས་ཅན་བརྗོད་ཅན། །གྲགས་ཏེ་སོར་མོ་གཤིབས་པ་བཞིན། །དེ་ལྟའི་བརྡར་ནི་གནས་པ་ཅན། །ཞེས་བྱ་བ་ལ། གང་ཡང་ཞེས་བྱ་བ་ནི་གྲངས་ལ་སོགས་པའོ། །སོགས་པའི་
[341a.2]སྒྲས་ནི་ལྡན་པ་ལ་སོགས་པ་བཟུང་ངོ་། །གྲངས་ལ་སོགས་པ་གང་ལ་ཡོད་པ་དེ་དང་ལྡན་པའི་ཆོས་ཅན་དེ་ལས་ཐ་དད་པ་བཞིན་དུ་བརྗོད་དོ། །གང་གིས་ཤེ་ན། སྒྲ་རྣམས་ཀྱིས་ཏེ། དངོས་པོ་བརྗོད་པ་ནི་ཆོས་བརྗོད་པ་རྣམས་ཀྱིས་གྲངས་ལ་སོགས་པ་དེ་ཆོས་གཞན་གཅོད་པར་བྱེད་པ་སྟེ་ཐ་དད་པས་གནས་པའོ། །དེ་
[341a.3]ཉིད་ཀྱི་ཕྱིར་ཆོས་གཞན་སྤོང་བའི་ཆོས་དེ་ཙམ་ཞིག་ཤེས་པར་འདོད་པ་སྟེ། བསྟན་པར་བྱ་བ་ལ་སྒྲས་ཐ་དད་པའི་ཆོས་བཞིན་སྟོན་པའོ། །སྒྲ་ཇི་ལྟ་བུ་ཞེ་ན། མ་ལུས་གཞན་སྤོང་བ་ཅན་ཏེ། གཞན་དག་མ་ལུས་པའི་ཆོས་དེའི་བདག་ཉིད་ཀྱིས་སྤོང་བར་བྱེད་པ་གང་ཡིན་པའི་སྒྲ་དེའོ། །འདིར་ཡང་དཔེར་བརྗོད་པ་
[341a.4]ནི་ལ་ལ་ཞིག་ཏུ་སོར་མོ་གཤིབས་པ་བཞིན་ཞེས་བསྟན་པ་ཡིན་ཏེ། ཆོས་བརྗོད་པ་ཅན་དུ་གྲགས་པའི་སྒྲའོ། །སོར་མོ་གཤིབས་པ་བཞིན་ཞེས་བྱ་བ་ནི་ཆོས་ཅན་སྟོན་པའི་སྒྲ་སྟེ། ཇི་ལྟར་ཞེ་ན། ཆོས་རྣམས་ཐམས་ཅད་སྤངས་པས་དེའི་བདག་ཉིད་དུ་སྟོན་པའི་ཕྱིར། དོན་དམ་པར་ན་སོར་མོ་མ་གཤིབས་
[341a.5]པ་རྣམ་པར་བཤད་ནས་དོན་གཅིག་ཏུ་བརྗོད་ཅིང་སྟོན་གྱི། འདིར་ནི་རྣམ་པར་དབྱེ་བར་རྟོགས་པ་མ་ཡིན་པའི་ཕྱིར་རོ། །འོ་ན་དོན་གཞན་སྤོང་བ་དང་། མི་སྤོང་བ་ཉིད་དུ་སྤྱི་མེད་པར་ཇི་ལྟར་ཤེས་ཤེ་ན་དེའི་ཕྱིར། དེ་ཡི་བརྡར་ནི་གནས་པ་ཅན། །ཞེས་བྱ་བ་སྨོས་ཏེ། དེ་ལྟར་ཆོས་གཞན་སྤོང་བ་དང་། མི་སྤོང་བ་
[341a.6]དག་གིས་བྱས་པའི་བརྡར་གནས་པ་གང་ཡིན་པའི་སྒྲ་དེ་དེ་ལྟར་སྣང་བ་ཡིན་ནོ། །འདིར་འདི་དག་གིས་བསྡུས་པའི་དོན་ནི་ཇི་ལྟར་ཤེས་པའི་བརྗོད་བྱ་ཐ་དད་པས་རྣམ་གྲངས་པར་མི་འགྱུར་བ་དེ་བཞིན་དུ་བརྗོད་དོ། །བརྗོད་པར་བྱ་བ་དོན་དམ་པར་ཐ་མི་དད་ཀྱང་ལྡོག་པའི་ཆས་བརྟགས་པ་ཐ་དད་པར་མཐོང་བ་སྟེ།
[341a.7]དཔེར་ན་གཏུན་བུའི་ལུས་དང་། སྐྲ་ཅན་གྱི་མགོ་བོ་ལྟ་བུའོ། །དེ་བཞིན་དུ་བ་ལང་གི་དཀར་པོ་ཉིད་ཀྱང་ཡིན་པའི་ཕྱིར་བ་ལང་གི་རྣམ་པ་གཅིག་ཏུ་རྟོགས་པ་སྐྱེ་བ་ནི་བ་ལང་ཐམས་ཅད་ལ་ཡིན་པར་བརྗོད་ལ། དཀར་པོ་ཞེས་བྱ་བ་ནི་བ་ལང་གི་ཕྱོགས་གཅིག་ཡིན་ཡང་། དཀར་པོར་རྟོགས་པ་སྐྱེད་པ་ནི་
[341b]
[341b.1]དོན་གཞན་ཡང་སྟོན་པ་ནི་མ་ཡིན་ནོ། །དེ་བས་ན་བ་ལང་ཉིད་དང་དཀར་པོ་ཉིད་ནི་རྗེས་སུ་འགྲོ་བ་དང་ལྡོག་པ་དག་གིས་ཐ་དད་པར་བརྟགས་པ་ཡིན་པའི་ཕྱིར། བ་ལང་གི་དཀར་པོ་ཡོན་ཏན་ཡིན་ནོ་ཞེས་ཐ་དད་པའི་རྣམ་པར་དབྱེ་བར་བྱེད་པ་བརྗོད་དེ། གང་གི་ཚེ་བ་ལང་གི་རྣམ་པ་ལ་ཞེན་པ་མེད་པར་
[341b.2]འབྲེལ་པ་ཅན་གྱི་ཁྱད་པར་ཅན་དང་བྲལ་བ་དཀར་པོ་འབའ་ཞིག་ངེས་པར་བྱེད་པ་དེའི་ཚེ་དཀར་པོ་འདི་སུའི་ཡིན་ཞེས་དྲིས་ན། བ་ལང་གི་རྫས་ངེས་པ་ཅན་གྱིས་སྟོན་པར་བྱེད་པས་ཀྱང་བ་ལང་གི་དཀར་པོ་ཞེས་སྟོན་པར་བྱེད་དོ། །དེར་ཡང་དེའི་བདག་ཉིད་ཁོ་ནར་འདོད་པ་ལྡོག་པ་སྟོན་པ་ནི་དང་པོ་དཀར་
[341b.3]པོ་འབའ་ཞིག་ངེས་ཤིང་བ་ལང་གི་གོང་བུ་མ་ངེས་པའི་ཕྱིར་ལྡོག་པ་བསྟན་ཏོ། །གང་གི་ཚེ་ཡང་དཀར་པོ་ཉིད་འབའ་ཞིག་འདོད་པར་མི་འགྱུར་བའི་ཕྱིར་བ་ལང་དཀར་པོའམ། གཞན་གྱི་དཀར་པོ་ཡིན་སྙམ་དུ་འབྲེལ་པ་ཅན་གྱི་ཁྱད་པར་ཤེས་པར་བྱ་བ་ལ། བློ་དམན་པ་ཉིད་ཅན་གྱི་ཉན་པ་པོས་དཀར་
[341b.4]པོ་འདི་བ་ལང་ཡིན་ནམ། གཞན་ཅི་ཞིག་ཡིན་ཞེས་འདྲི་བར་བྱེད་ཅིང་སྨྲ་བ་པོས་ཀྱང་བ་ལང་ཡིན་ཞེས་གཞི་མཐུན་པས་ལན་འདེབས་པར་བྱེད་དེ། ཆོས་ཁོངས་སུ་ཆུད་པ་ཉིད་ཀྱིས་འདྲི་བའི་ཕྱིར་དྲིས་པ་དང་མཐུན་པར་ལན་ཡང་གདབ་པར་རིགས་སོ། །དེའི་ཕྱིར་བ་ལང་དང་། དཀར་པོ་ཉིད་དག་
[341b.5]རྗེས་སུ་འགྲོ་བ་དང་ལྡོག་པ་ངེས་པ་ལས་ཐ་དད་པར་ངེས་པ་སྟེ། རྗེས་སུ་འགྲོ་བ་དང་ལྡོག་པ་དེ་དག་ཀྱང་ཐོག་མ་མེད་པར་གནས་པའོ། །དེ་དག་གིས་ནི་རིགས་དང་ཡོན་ཏན་གྱི་རྗོད་བྱེད་དག་ཐ་དད་པར་བསྟན་པ་ཡིན་ནོ། །གལ་ཏེ་གཟུགས་ལ་སོགས་པ་ལས་ཐ་དད་པའི་ཡན་ལག་ཅན་མེད་ན། དེའི་
[341b.6]ཚེ་བུམ་པ་དང་གཟུགས་ལ་འདི་དོན་གཅིག་པ་ཉིད་དུ་འགྱུར་བ་མ་ཡིན་ནམ་ཞེ་ན། འདིར་སྨྲས་པ། གཟུགས་སོགས་ནུས་པའི་ཁྱད་པར་རྣམས། །སྤོང་བས་དེ་འབྲས་མཚུངས་པ་ཡི། །རྒྱུ་མིན་པ་ནི་རྣམ་གཅོད་ན། །བུམ་པའི་སྒྲ་ནི་འཇུག་པར་གྱུར། །དེའི་ཕྱིར་བུམ་པ་གཟུགས་ཞེས་པ། །གཞི་
[341b.7]མཐུན་པ་ཅན་སྒྲ་མ་ཡིན། །ཞེས་བྱ་བ་ལ། གང་གི་ཕྱིར་བུམ་པ་ལ་གནས་པའི་གཟུགས་ལ་སོགས་པའི་ནུས་པ་ནི་གཉིས་ཏེ། ཆུ་ལེན་པར་བྱེད་པ་དང་སོ་སོར་ངེས་པའི་མིག་ལ་སོགས་པའི་རྣམ་པར་ཤེས་པ་སྐྱེད་པར་བྱེད་པའོ། །དེ་ལ་གང་གཟུགས་ལ་སོགས་པ་ལ་སོ་སོར་ངེས་པའི་ནུས་པའི་ཁྱད་
[342a]
[342a.1]པར་དེ་རྣམས་སྤོང་བ་སྟེ། དེ་མ་བསྟན་པར་བུམ་པའི་སྒྲས་འཇུག་པར་འགྱུར་རོ། །གང་དུ་ཞེ་ན། བུམ་པ་ལ་སོགས་པ་དེ་རྣམས་ཀྱིས་ཆུ་ལེན་པ་ལ་སོགས་པ་འབྲས་བུ་གཅིག་པ་གང་ཡིན་པ་དེའི་རྒྱུ་མ་ཡིན་པ་ཤིང་ལ་སོགས་པ་གང་ཡིན་པ་དེ་ལ་རྣམ་པར་གཅོད་པ་ན་འཇུག་པར་
[342a.2]འགྱུར་ཏེ། རྫས་དུ་མ་ཡོད་ན་ཡང་། ཆུ་ལེན་པའི་ནུས་པ་བསྟན་པའི་ཕྱིར་བརྡར་བྱས་པའི་ཕྱིར་རོ། །གཟུགས་ལ་སོགས་པ་དེ་རྣམས་ལ་ཡང་བུམ་པ་ཞེས་བྱ་བ་ནུས་པ་གཅིག་ལ་ཚིག་གཅིག་རིགས་པ་ཡིན་གྱི། གང་གི་ཕྱིར་དེ་ལྟར་ཐ་དད་པ་དེའི་ཕྱིར་བུམ་པའི་གཟུགས་ཞེས་བྱ་བ་དོན་གཅིག་པ་
[342a.3]ཅན་གྱི་སྒྲ་མ་ཡིན་ཞིང་། གཞི་མཐུན་པ་ཅན་ཡང་མ་ཡིན་ཏེ། གཞི་མཐུན་པ་ནི་རིགས་བརྗོད་པ་དང་། ཁྱད་པར་བརྗོད་པ་ཡོད་ན་ཡིན་ཏེ། གཞི་མཐུན་པས་ཁྱད་པར་འཕེན་པ་ཡིན་ནོ། །ཉེ་བར་བསྡུ་བའི་ཕྱིར། རིགས་དང་ཚོགས་ཀྱི་རྗོད་བྱེད་ཀྱི། །ཁྱད་པར་འདི་ཡང་འདོད་པ་ཡིན། །ཞེས་བྱ་བ་
[342a.4]སྨོས་ཏེ། དེའི་ཕྱིར་ཚོགས་པ་རྗོད་པར་བྱེད་པ་བུམ་པ་ཞེས་བྱ་བ་གཟུགས་ལ་སོགས་པའི་ཚོགས་ལ་ལྟོས་པའི་ཕྱིར་རོ། །རིགས་རྗོད་པར་བྱེད་པ་ནི་གཟུགས་ཞེས་བྱ་བ་སྟེ། དེ་དག་གི་ཁྱད་པར་ནི་སྤོང་བ་དང་མི་སྤོང་བའི་མཚན་ཉིད་འདི་ཉིད་ཡིན་ནོ། །ཚོགས་པ་གཞན་ལ་ལྟོས་ན་བུམ་པའི་སྒྲ་
[342a.5]ཡང་རིགས་བརྗོད་པ་ཉིད་དེ། ཚོགས་པའི་སྒྲ་ཁ་ཅིག་ཚོགས་པའི་རྗོད་བྱེད་ཡིན་ཏེ། དཔེར་ན་འབིགས་བྱེད་ཀྱི་སྒྲ་བཞིན་ནོ། །ཁ་ཅིག་གཉི་གའི་རྗོད་བྱེད་ཡིན་ཏེ། དཔེར་ན་བུམ་པའི་སྒྲ་བཞིན་ནོ། །གལ་ཏེ་དེ་ལྟར་གཟུགས་ལ་སོགས་པ་འབའ་ཞིག་བུམ་པའི་སྒྲའི་བརྗོད་བྱ་ཡིན་གྱི། རྫས་མ་ཡིན་
[342a.6]ན་ནི་དེའི་ཚེ་བུམ་པའི་གཟུགས་ལ་སོགས་པ་ཞེས་བྱ་བ་ཇི་ལྟར་ཐ་དད་པ་ཡིན་ཞེ་ན། འདིར་སྨྲས་པ། བུམ་པའི་གཟུགས་ལ་སོགས་རྣམས་ཞེས། །སྤྱི་དེ་དམིགས་ཀྱིས་དགར་བ་ཅན། །དེ་ཡི་ནུས་པའི་ཁྱད་པར་སྟོན། །ཕྱོགས་འདིས་གཞན་ལ་འང་བརྗོད་པ་ཡིན། །ཞེས་བྱ་བ་ལ།
[342a.7]བུམ་པའི་གཟུགས་ལ་སོགས་པ་ཞེས་བརྡར་བཏགས་པ་འདིས་ནི་བུམ་པའི་སྤྱི་དེ་ཁྱད་པར་དུ་དམིགས་ཀྱིས་འགེར་བ་གང་ཡིན་པའི་གཟུགས་ལ་སོགས་པ་དེ་རྣམས་ཀྱི་ནུས་པ་སོ་སོར་ངེས་པའི་བྱེ་བྲག་མིག་གི་རྣམ་པར་ཤེས་པ་སྐྱེད་པར་བྱེད་པར་སྟོན་ཏེ། གཟུགས་ལ་སོགས་པ་ཆུ་ལེན་
[342b]
[342b.1]པ་ལ་སོགས་པའི་དགོས་པ་ཅན་ཞེས་བྱ་བའི་ཐ་ཚིག་གོ། །ཕྱོགས་འདིས་ནི་ཚོགས་པའི་སྒྲ་གཞན་ལ་ཡང་བརྗོད་པར་བྱ་སྟེ། དཔེར་ན་མེ་ཏོག་གི་དྲི་ཞེས་བྱ་བ་ལྟ་བུའོ། །དེ་ལ་ཡང་མེ་ཏོག་ལས་དྲི་ཞེས་བྱ་བ་གཞན་པའི་རྫས་མེད་དོ། །འོ་ན་ཅི་ཞེ་ན་དྲི་གཞན་དུ་མ་རྣམ་པར་གཅད་པའི་ཕྱིར་མེ་ཏོག་
[342b.2]གི་ངོ་བོ་ཉིད་ཀྱི་དྲིར་བརྗོད་དོ། །ཚིགས་སུ་བཅད་པ་འདི་གསུམ་གྱིས་ནི་ཚོགས་པའི་སྒྲ་རྣམས་ལ་གཞི་མཐུན་པ་མེད་པ་དང་། གཟུགས་ལ་སོགས་པའི་སྒྲ་ཐ་དད་པར་བསྟན་པ་ཡིན་ནོ། །དེའི་ཕྱིར་ཡན་ལག་ཁོ་ན་སྟེ། ཡན་ལག་མ་ཡིན་པ་ནི་མེད་དོ། །གལ་ཏེ་ཡན་ལག་ཅན་མེད་ན་ཡང་དེའི་
[342b.3]ཚེ་ཡན་ལག་རྣམ་པར་ཤེས་པའི་རྒྱུ་ཉིད་ཡིན་མོད་ཅེ་ན། འདིར་སྨྲས་པ། མ་ལུས་རྒྱུ་ཉིད་ཡིན་ན་ཡང་། །ཡན་ལག་གཅིག་དང་བྲལ་ནའང་མིན། །རེ་རེའང་ནུས་པ་ཉིད་ཡིན་ན། །ཅིག་ཅར་མང་པོ་འབྱུང་བར་འགྱུར། །ཞེས་བྱ་བ་ལ། རེ་ཞིག་ལུས་ལས་ཐ་མི་དད་པའི་སེམས་ཡོད་པ་མ་ཡིན་
[342b.4]ཏེ། རྡུལ་ཕྲ་རབ་ཐམས་ཅད་རིགས་པར་ཐལ་བར་འགྱུར་རོ་ཞེས་བསྟན་ཏོ། །འོན་ཏེ་ལུས་ཀྱི་ཡན་ལག་ལས་ཐ་དད་པར་གྱུར་པའི་ཤེས་པ་སྐྱེ་སྟེ། དེས་ན་རྡུལ་ཕྲ་རབ་རྣམས་རྒྱུ་ཉིད་ཡིན་གྱི། རིགས་པ་ནི་མ་ཡིན་ཏེ། དཔེར་ན་མིག་ལ་སོགས་པ་བཞིན་ནོ་ཞེ་ན། དེ་ལ་སྨྲས་པ། ལུས་ཀྱི་ཡན་ལག་
[342b.5]རྣམས་ཚོགས་པའི་མིག་ལ་སོགས་པ་ཉིད་དུ་མྱུ་གུའི་ཡིན་པ་བཞིན་ཡིན་ནམ། དཔེར་ན་མེ་འབར་བ་ལ་རྩྭ་རྣམས་བཞིན་ཡན་ལག་སོ་སོ་བ་ཤེས་པའི་རྒྱུ་ཡིན་གྲང་ན། དེ་ལ་ཡན་ལག་རྣམས་མ་ལུས་པ་ཉིད་ཤེས་པའི་རྒྱུ་ཡིན་ན་ནི་ལག་པ་ལ་སོགས་པའི་ཡན་ལག་གཅིག་མ་ཚང་ན་ཡང་ཡིད་ཀྱི་ཤེས་
[342b.6]པ་མེད་པར་འགྱུར་ཏེ། གང་དུ་ཕན་ཚུན་གྲོགས་བྱེད་པས་དེ་དག་གི་བྱ་བ་འབྲས་བུ་གཅིག་བྱེད་པ་ནི་དེར་གཅིག་མེད་ན་མི་འབྱུང་བའི་ཕྱིར་རོ། །དེ་མེད་པར་འབྲས་བུ་སྐྱེ་ན་ནི་འདི་རྒྱུ་མེད་པར་འགྱུར་རོ། །འོན་ཏེ་ཡན་ལག་ཕན་ཚུན་ལྟོས་པ་མེད་པ་ཉིད་དུ་འབྲས་བུ་སྐྱེད་པས་དེའི་ཕྱིར་ལག་པ་ལ་
[342b.7]སོགས་པ་བཅད་ཀྱང་ཡིད་ཀྱི་རྣམ་པར་ཤེས་པ་འབྱུང་བར་འགྱུར་རོ་ཞེ་ན། དེ་ལྟ་ན་ནི་རེ་རེ་བས་ནུས་པར་འགྱུར་ལ། རེ་རེ་བས་ནུས་པ་དེ་ལ་ནི་ཤེས་པ་མང་པོ་སྐྱེ་བར་ཐལ་བར་འགྱུར་ཏེ། དཔེར་ན་རེ་རེ་བའི་ས་བོན་ནུས་པ་ཅན་མང་པོ་ཡོད་ན་མྱུ་གུ་དུ་མ་འབྱུང་བ་བཞིན་ནོ། །འོན་ཏེ་འབྱུང་བ་དང་རྔུབ་པ་
[343a]
[343a.1]དག་སྐྱེད་པར་བྱེད་པ་ཡིན་གྱི་ཡན་ལག་རྣམས་ནི་གྲོགས་བྱེད་པ་ཉིད་དེ་འབྱུང་བ་དང་རྔུབ་པ་གཅིག་ཡིན་པའི་ཕྱིར། ཡན་ལག་དུ་མ་ཡིན་ཡང་ཤེས་པ་གཅིག་པ་ཉིད་དོ། །ཕན་འདོགས་པའི་རྒྱུ་ཐ་དད་པས་འབྲས་བུ་ཐ་དད་པ་ནི་མ་ཡིན་ཏེ། དཔེར་ན་ཐག་ཤ་གཞན་དང་གཞན་ཡོད་
[343a.2]ཀྱང་སྣམ་བུ་ལ་སོགས་པ་ཐ་དད་པ་མ་ཡིན་པ་ལྟ་བུའོ་ཞེ་ན། དེ་ལ་སྨྲས་པ། དུ་མ་ཉིད་དུ་མཚུངས་པའི་ཕྱིར། །འབྱུང་རྔུབ་དག་ནི་ངེས་བྱེད་མིན། །ཞེས་བྱ་བ་ལ། འབྱུང་བ་དང་རྔུབ་པ་དག་ཀྱང་དུ་མ་ཡིན་པའི་ཕྱིར་ངེས་པར་བྱེད་པ་མ་ཡིན་ནོ། །འོན་ཏེ་ཡན་ལག་ཐམས་ཅད་རྒྱུ་ཉིད་ཡིན་ན། དེའི་ཚེ་ཡན་
[343a.3]ལག་གཅིག་མེད་ན་ཤེས་པ་མི་འབྱུང་ཞིང་། རེ་རེས་ནུས་པ་ནི་ཅིག་ཅར་མང་པོ་འབྱུང་སྟེ། འདི་ལྟར་འབྱུང་རྔུབ་ཀྱང་དུ་མ་ཡིན་པའི་ཕྱིར་ལུས་བཞིན་ནོ། །འོན་ཏེ་འབྱུང་རྔུབ་དག་གཅིག་པ་ཡིན་པ་དེ་བས་ན་ཉེ་བར་ལེན་པ་གཅིག་ལས་ཤེས་པ་གཅིག་ཁོ་ན་སྐྱེའོ་ཞེ་ན། འདིར་སྨྲས་པ། གཅིག་ཉིད་
[343a.4]ཡིན་ནའང་རྟག་གསལ་འགྱུར། །དེ་རྒྱུ་རྟག་ཏུ་ཉེ་ཕྱིར་རོ། །དུ་མ་རྒྱུ་མིན་ཞེ་ན་ནི། །རིམ་པས་ཀྱང་མིན་ཁྱད་མེད་ཕྱིར། །ཞེས་བྱ་བ་ལ། འབྱུང་བ་དང་རྔུབ་པ་དག་གཅིག་པ་ཉིད་ཡིན་ན་ཡང་ཤེས་པ་རྟག་ཏུ་གསལ་བ་སྟེ་སྐྱེ་བར་འགྱུར་བ་དེ་བས་ན་འདོད་ཆགས་ལ་སོགས་པ་རྟག་ཏུ་སྐྱེ་བར་འགྱུར་ཏེ།
[343a.5]འདོད་ཆགས་ལ་སོགས་པ་དེའི་འབྱུང་རྔུབ་དེ་རྟག་ཏུ་ཁོ་ནར་ཉེ་བའི་ཕྱིར་རོ། །གལ་ཏེ་རྒྱུ་ཡོད་ཀྱང་འདོད་ཆགས་ལ་སོགས་པ་མི་འབྱུང་ན། དེ་རྒྱུ་དང་བཅས་པར་མི་འགྱུར་རོ། །འབྱུང་རྔུབ་ཤེས་པ་དུ་མའི་རྒྱུར་མི་འགྱུར་བ་ཉིད་ཡིན་ན་ནི། རྒྱུ་དང་འབྲས་བུར་གྱུར་པ་ནི་ངེས་པ་ཡིན་པའི་ཕྱིར། རྒྱུ་དང་འབྲས་
[343a.6]བུའི་དངོས་པོར་ངེས་པ་ལ་བརྩད་པར་མི་རུང་བའི་ཕྱིར། དཔེར་ན་མེ་ལས་དུ་བ་གཅིག་ཏུ་འབྱུང་བ་བཞིན་ནོ་ཞེ་ན། འདིར་སྨྲས་པ། དེ་ལྟར་ན་ཤེས་པ་དུ་མའི་རྒྱུ་འབྱུང་རྔུབ་མ་ཡིན་ཞིང་། རིམ་པས་ཀྱང་ཤེས་པ་དུ་མའི་རྒྱུ་མ་ཡིན་ནོ། །ཅིའི་ཕྱིར་ཞེ་ན། འབྱུང་རྔུབ་དག་ལ་ཁྱད་པར་མེད་པའི་ཕྱིར་
[343a.7]རོ། །མེས་ནི་སྔོན་གྱི་ངོ་བོ་ཁོ་ན་ལས་དུ་བ་གཞན་དང་གཞན་སྐྱེད་པ་མ་ཡིན་ལ། འབྱུང་རྔུབ་ལས་ནི་སྔར་གྱི་ངོ་བོ་ཉིད་ཁོ་ན་ལས་འབྱུང་བའི་ཕྱིར། རྐྱེན་གཞན་དང་ལྡན་ཡང་ཁྲོ་བ་ལ་སོགས་པའི་སེམས་མི་འབྱུང་ངོ་། །དེ་ལྟ་ན་འོ་ན་ནི་འབྱུང་རྔུབ་གཅིག་པ་ཡིན་ཡང་ཕྱི་རོལ་གྱིས་སད་པར་བྱེད་
[343b]
[343b.1]པ་ངེས་པ་ལས། འདོད་ཆགས་ལ་སོགས་པ་ངེས་པར་འགྱུར་རོ་ཞེ་ན། སད་པར་བྱེད་པའི་རྐྱེན་ཡང་ངེས་པར་བྱེད་པ་མ་ཡིན་ཏེ། སྔར་གོམས་པའི་སྟོབས་རྒྱུ་ཡིན་པའི་ཕྱིར་རོ། །དེ་བས་ན་གལ་ཏེ་འབྱུང་རྔུབ་དེ་ཉིད་སེམས་དེའི་ཅིག་ཅར་བའི་རྒྱུ་མ་ཡིན་ན་ནི་འབྱུང་རྔུབ་ལས་དུས་ཕྱིས་ཀྱང་ཤེས་པ་འབྱུང་
[343b.2]བ་མ་ཡིན་ནོ། །སྔར་གྱི་ལུས་ཤེས་པའི་རྒྱུ་ཉིད་དུ་ཁས་བླངས་ནས་འབྱུང་རྔུབ་ངེས་པར་མི་འགྱུར་བའི་སྐྱོན་བརྗོད་ནས་ད་ནི་ངེས་པ་ཉིད་མེད་དོ་ཞེས་བསྟན་པའི་ཕྱིར། འབྱུང་བ་གཅིག་ལ་དོན་དུ་མ། །འཛིན་བྱེད་དེ་ལས་ངེས་པ་མིན། །བློ་གཅིག་གིས་དུ་མ་ཤེས་པ། །ཉིད་ནའང་དེ་ཉིད་ཅིག་ཅར་
[343b.3]འགྱུར། །འགལ་བ་མེད་ཕྱིར་རིམ་གྱིས་ཀྱང་། །མི་འགྱུར་དེ་ཁྱད་མེད་པའི་ཕྱིར། །ཞེས་བྱ་བ་ལ། དབུགས་དལ་བར་རྒྱུ་བ་ལ་སོགས་པར་འབྱུང་བ་གཅིག་གི་དུས་སུ་ཡང་དོན་དུ་མ་འཛིན་པར་བྱེད་པ་ལས་བློ་དུ་མ་སྐྱེ་བའི་ཕྱིར། འབྱུང་རྔུབ་དེ་ལས་སེམས་སུ་ངེས་པ་མ་ཡིན་ནོ། །འོ་ན་ཇི་ལྟར་
[343b.4]ངེས་ཤེ་ན། ཤེས་པ་ཉིད་སྔ་མ་སྔ་མ་ལས་སེམས་ཕྱི་མ་ཕྱི་མ་ངེས་པའི་རྒྱུ་ཡིན་པའི་ཕྱིར་རོ། །ཤེས་པ་གཅིག་ཁོ་ན་རིམ་པ་དུ་མར་ཞེན་པའི་རང་བཞིན་ཏེ། དེས་ན་བློ་དུ་མར་མི་འགྱུར་བ་མ་ཡིན་ནམ་ཞེ་ན། དེ་ལྟ་ན་ཡང་བློ་གཅིག་གིས་དོན་དུ་མ་རིམ་གྱིས་འཛིན་པར་ཁས་བླངས་ན་ཡིད་ཀྱི་བློས་དོན་དུ་མ་
[343b.5]དུས་གཅིག་ཏུ་འཛིན་པར་འགྱུར་རོ། །འོན་ཏེ་བློ་གཅིག་གིས་ཀྱང་དུས་གཅིག་ཏུ་དོན་དུ་མ་འཛིན་པ་མ་ཡིན་ན། དེའི་ཚེ་རིམ་གྱིས་ཀྱང་དོན་དུ་མ་འཛིན་པར་མི་འགྱུར་ཏེ། ཡིད་ཀྱི་བློ་དེ་ལ་ཁྱད་པར་མེད་པའི་ཕྱིར་རོ། །འདིའི་དགོངས་པ་ནི་གཟུགས་ལ་སོགས་པའི་རྣམ་པ་ལས་མ་གཏོགས་པའི་
[343b.6]ཡིད་གཞན་མེད་དེ། མེ་ལོང་དྲི་མ་མེད་པ་ལྟར་ཡིད་གཅིག་ཉིད་ཡིན་ནོ། །དེ་ཡང་དོན་གྱི་གཟུགས་བརྙན་དང་སྦྱོར་བའོ་ཞེ་ན། གལ་ཏེ་དེ་ལྟ་ན་ནི་དེ་ལ་མ་གཏོགས་པ་ཤེས་པ་ཉིད་སྣང་བ་ཐོབ་ནས་དོན་གྱི་གཟུགས་བརྙན་འབྱུང་སྟེ། དོན་རྣམས་ལ་ཉེ་བ་དང་ཤིན་ཏུ་སྐལ་བ་མེད་པའི་ཕྱིར་ཐམས་ཅད་ཅིག་
[343b.7]ཅར་རིག་པར་འགྱུར་རོ། །འོན་ཏེ་གོམས་པའི་ཁྱད་པར་ཤིན་ཏུ་ལྷག་པ་ལས་ཡིད་རིམ་གྱིས་དོན་རིག་པའོ་ཞེ་ན། དེ་ལྟ་ན་ནི་གོམས་པ་ཉིད་དོན་གྱི་རྣམ་པ་འཛིན་པའི་རྒྱུར་འགྱུར་གྱི་སྲོག་ལ་སོགས་པ་ནི་མ་ཡིན་ནོ། །ཤེས་པ་མེ་ལོང་བཞིན་གནས་པ་ལ་འགལ་བ་མེད་པས་ཅིག་ཅར་དོན་དུ་མ་འཛིན་
[344a]
[344a.1]པར་འགྱུར་རོ། །འོན་ཏེ་དེ་ལ་ཅིག་ཅར་དོན་འཛིན་པའི་ནུས་པ་མེད་ན་ནི་དེ་ལྟ་ན་རིམ་གྱིས་ཀྱང་དོན་དུ་མ་འཛིན་པར་མི་འགྱུར་ཏེ་ཁྱད་པར་མེད་པའི་ཕྱིར་རོ། །གལ་ཏེ་སྲོག་ནི་མང་སྐད་ཅིག །རང་རིགས་མིན་པའི་དུས་ཅན་དག །སེམས་ནི་དེ་འདྲ་བ་དག་གི། །རྒྱུ་ཉིད་ཡིན་པར་རྟོགས་པ་
[344a.2]ན། །ཞེས་བྱ་བ་ལ། འོན་ཏེ་ཡང་སྲོག་ནི་གཅིག་མ་ཡིན་ཏེ། འོན་ཀྱང་མང་པོ་དང་རིམ་གྱིས་འབྱུང་བའོ། །རང་གི་རིགས་ཀྱི་དུས་གཅིག་ལ་ཡོད་པ་མ་ཡིན་པ་དེ་དེ་ལྟར་འགྱུར་ཏེ། རིམ་པ་ཅན་ཡིན་ཞེས་བྱ་བའི་ཐ་ཚིག་གོ། །སྲོག་དེ་དག་དེ་འདྲ་བ་འཇིག་པ་ཅན་ཏེ། རིམ་པ་དང་ལྡན་པ་རྣམས་སེམས་
[344a.3]ཀྱི་རྒྱུར་རྟོགས་པ་སྟེ། དེས་ནི་རིམ་པ་དང་ལྡན་པའི་དོན་དུ་འཛིན་ཏོ་ཞེ་ན། ལན་སྨྲས་པ། གོ་རིམས་ལྡན་པའི་རྒྱུ་མེད་ན། །དེ་དག་རིམ་ལྡན་ཇི་ལྟར་འགྱུར། །རང་རིགས་སྔ་མ་རྒྱུ་ཉིད་ན། །དང་པོ་སྲོག་འབྱུང་མི་འགྱུར་ཏེ། །དེ་རྒྱུ་དེ་འདྲ་ཡོད་མ་ཡིན། །ཡོད་ནའང་དུ་མ་ཉིད་དུ་ངེས། །སྲོག་ནི་ཐ་དད་
[344a.4]ཡུལ་ཅན་ཕྱིར། །དེ་ཕྱིར་བློ་ནི་ཅིག་ཅར་སྐྱེ། །ཞེས་བྱ་བ་ལ། སྲོག་ནི་མང་པོ་དང་འཇིག་པ་ཅན་དུ་ངེས་པ་ཡིན་ན། དེ་དག་ཁྱོད་ཀྱི་གཞུང་ལ་གྲུབ་པ་མ་ཡིན་ནོ། །ཚད་མས་ཁོང་དུ་ཆུད་པའི་ཕྱིར་ཁོ་བོ་ལ་ནི་དེ་དག་གྲུབ་པ་སྟེ། རྟག་པའི་དོན་གཅིག་ལ་རིམ་པ་མི་རིགས་པའི་ཕྱིར་རོ། །དེ་བས་ན་རྒྱུ་
[344a.5]ལ་རིམ་པ་ཡོད་པས་འབྲས་བུ་ལ་ཡང་རིམ་པ་ཡོད་པའི་ཕྱིར། སེམས་རིམ་པ་ཅན་ཉིད་ཡིན་ན་ནི་དེ་ལྟ་ན་ཡང་རིམ་པ་དང་ལྡན་པའི་རྒྱུ་མེད་པས་དེ་ཉིད་ཇི་ལྟར་རིམ་གྱིས་འབྱུང་བ་ཡིན། འོན་ཏེ་སྔར་གྱི་སྲོག་ལ་སོགས་པའི་རྒྱུའི་རིམ་པས་སྲོག་ལ་སོགས་པའི་རིམ་པ་དང་ལྡན་པར་འདོད་ན། དེ་ལྟ་ན་
[344a.6]ཡང་རང་གི་རིགས་སྔ་མའི་རྒྱུ་ཅན་ཡིན་ན། དང་པོའི་སྲོག་ལ་སོགས་པ་འབྱུང་བར་མི་འགྱུར་ཏེ། དེའི་རིགས་ཅན་གྱི་སྲོག་སྔར་མེད་པའི་ཕྱིར་རོ། །སྐྱེ་བ་གཞན་ཁས་བླངས་ན་ནི་མངལ་དུ་འབྱུང་བའི་རྒྱུ་འཇིག་རྟེན་གཞན་གྱི་སྲོག་ཡིན་ནོ། །མ་ལ་སོགས་པའི་འབྱུང་རྔུབ་རྒྱུ་ཡིན་ནོ་ཞེ་ན། འདི་
[344a.7]ནི་མི་རུང་སྟེ། ཕ་མའི་འབྱུང་རྔུབ་ཀྱི་རང་བཞིན་ལས་བུའི་འབྱུང་རྔུབ་སྐྱེ་བར་ཐལ་བའི་ཕྱིར་རོ། །གཞན་ཡང་བློ་ཡང་ཕ་མའི་རྗེས་སུ་བྱེད་པར་འགྱུར་བ་དེ་བས་ན། སྐྱེ་བ་དང་པོའི་སྲོག་གི་རྒྱུ་དེ་ལྟ་བུའི་སྲོག་མེད་པར་འགྱུར་རོ། །ཁས་བླངས་ནས་ཀྱང་བརྗོད་པ་གང་གི་རྒྱུ་ཡོད་ན་ཡང་སྲོག་ཆགས་ཀྱི་
[344b]
[344b.1]འབྱུང་རྔུབ་རྣམས་དུ་མ་ཉིད་དུ་འགྱུར་ཏེ། ཡུལ་ཅན་ཐ་དད་པའི་ཕྱིར་རོ། །ཡུལ་ཐ་དད་པ་དང་ལྡན་པས། འགལ་བའི་ཆོས་རྟེན་པ་སྟེ། དེ་ཡང་ཐ་དད་པའི་སྒྲུབ་བྱེད་དོ། །དེའི་ཕྱིར་ཏེ་སྲོག་རྣམས་དུ་མ་ཡིན་པའི་ཕྱིར་ཡིད་ཀྱི་བློ་ཅིག་ཅར་སྐྱེ་བར་འགྱུར་བ་ལས་སེམས་ནི་རིམ་གྱིས་སྐྱེ་བར་མཐོང་བ་དེ་བས་ནི་
[344b.2]ཤེས་པ་ཁོ་ན་རྒྱུ་ཡིན་ནོ། །འོན་ཏེ་སྲོག་དུ་མས་སེམས་གཅིག་སྐྱེད་པ་ཚོགས་པས་སྐྱེད་པའི་ཕྱིར་རོ་ཞེ་ན། འདིར་སྨྲས་པ། གལ་ཏེ་དུ་མའང་གཅིག་དུས་ཅན། །ཡིན་ལ་སེམས་གཅིག་རྒྱུ་ཡིན་ན། །དལ་བར་རྒྱུ་བ་ལ་སོགས་ན། །གཅིག་མ་ཚང་ནའང་སྐྱེ་བ་མིན། །འོན་ཏེ་ཇི་ལྟའི་དངོས་
[344b.3]རྒྱུ་ན། །ཤེས་པའང་ཁྱད་པར་ཉིད་དུ་འགྱུར། །གང་དང་གང་གི་ཁྱད་པར་ལས། །ཁྱད་པར་མེད་དེ་དེ་འབྲས་མིན། །ཞེས་བྱ་བ་ལ། སྲོག་དུ་མ་ཡིན་ཡང་སེམས་གཅིག་གི་རྒྱུ་ཡིན་ཏེ། དུས་གཅིག་པ་ཅན་ཡིན་པའི་ཕྱིར། དཔེར་ན་ས་ལ་སོགས་པ་མྱུ་གུ་གཅིག་སྐྱེད་པ་བཞིན་ནོ་ཞེ་ན། གལ་ཏེ་དེ་ལྟར་སྲོག་
[344b.4]དུ་མ་ཡིན་ཡང་། ཚོགས་པའི་ངོ་བོ་ཉིད་ཀྱིས་འབྲས་བུ་གཅིག་ཁོ་ན་སྐྱེད་ན་ནི་དེའི་ཚེ་དལ་བར་རྒྱུ་བ་དང་མི་རྒྱུ་བ་ལ་སོགས་པ་ན་སྲོག་གཅིག་མ་ཚང་བས་ཤེས་པ་མི་སྐྱེ་བར་འགྱུར་ཏེ། ཚོགས་པ་དང་བྲལ་བའི་ཕྱིར་རོ། །ཚོགས་པས་བསྐྱེད་པའི་འབྲས་བུའི་ཆོས་ནི་འདི་ཡིན་ཏེ། གང་ཚོགས་པའི་རྒྱུ་མ་
[344b.5]ཚང་ན་མེད་པའོ། །དེ་མེད་ཀྱང་ཡོད་ན་དེའི་འབྲས་བུར་མི་འགྱུར་རོ། །སྲོག་ལ་སོགས་པའི་རྒྱུ་ཉེ་བར་གྱུར་པ་ཇི་ལྟ་བ་ཡིན་གྱི། ཚོགས་པ་ཁོ་ན་མ་ཡིན་པ་མ་ཡིན་ནམ། དེས་ན་ཇི་ལྟ་བའི་དངོས་པོ་སྟེ། ཇི་ལྟར་ཉེ་བར་གྱུར་པའི་སྲོག་ནི་སེམས་ཀྱི་རྒྱུ་ཡིན་ནོ་ཞེ་ན། དེ་ལྟ་ན་འོ་ན་ནི་སྲོག་རྣམས་ཚོགས་པ་
[344b.6]དང་མ་ཚོགས་པའི་དུས་སུ་ཤེས་པ་ཡང་ཁྱད་པར་ཅན་དུ་འགྱུར་རོ། །གང་གི་ཕྱིར་དེའི་འབྲས་བུ་ཤེས་པ་ལ་སོགས་པ་སྲོག་ལ་སོགས་པའི་ཤེས་པ་གང་ཞིག་སྲོག་ལ་སོགས་པ་གང་གི་ཁྱད་པར་ཐ་དད་པའི་ཁྱད་པར་ཅན་དུ་མི་འགྱུར་བ་དེ་བས་ན་སྲོག་ཚོགས་པའི་འབྲས་བུ་ཤེས་པ་སྐྱེ་ཞིང་། མ་
[344b.7]ཚོགས་པའི་ལས་ནི་མ་ཚོགས་པར་འགྱུར་ལ། མེད་པ་ལས་ན་མེད་པར་འགྱུར་ཏེ། དེ་ལྟ་མ་ཡིན་ན་སྲོག་ལ་སོགས་པའི་འབྲས་བུ་གྲུབ་པར་མི་འགྱུར་རོ། །ཁྱད་པར་ཅན་དུ་བྱེད་པས་སྲོག་ལ་སོགས་པ་ཤེས་པའི་རྒྱུ་ཉིད་ནི་མ་ཡིན་ཏེ། འོན་ཀྱང་དེ་ཡོད་ན་ཡོད་པའི་ཕྱིར་རོ་ཞེ་ན། དེ་ལྟ་ན་འོ་ན་ནི་
[345a]
[345a.1]སེམས་ཀྱི་འདོད་ཆགས་ལ་སོགས་པའི་མཚན་ཉིད་ཅན་གྱི་ཁྱད་པར་གང་ཡིན་པ་དེ་རྒྱུ་མེད་པ་ཉིད་དུ་འགྱུར་རོ། །འདོད་ཆགས་ལ་སོགས་པའི་འགྱུར་བ་རྒྱུ་མེད་པ་ཅན་དུ་འགྱུར་ན་ཤེས་པ་གཞན་གང་ཞིག་རྒྱུ་དང་བཅས་པར་འགྱུར། འོན་ཏེ་སྲོག་ལ་སོགས་པ་ལས་འདོད་ཆགས་ལ་སོགས་
[345a.2]པ་འགྱུར་བ་ཉིད་ཡིན་ནོ་ཞེ་ན། འོ་ན་ནི་སྔ་མ་ཉིད་དུ་འདོད་ཆགས་ལ་སོགས་པ་ཁྱད་པར་ཅན་དུ་འགྱུར་ཏེ། རྒྱུ་སྲོག་ཡོད་ན་འབྲས་བུ་མི་སྐྱེ་བ་མི་སྲིད་པའི་ཕྱིར་རོ། །དེ་བས་ན་ཇི་ལྟར་ན་ཁྱད་པར་རྒྱུ་མེད་པ་ཅན་ཡིན་པ་དེ་བཞིན་དུ་ཤེས་པ་ཡང་ཡིན་པའི་ཕྱིར་ཤེས་པ་སྲོག་གི་རྗེས་སུ་འགྲོ་བ་དང་ལྡོག་པའི་རྗེས་སུ་འབྲང་བ་
[345a.3]ཅན་དུ་ཇི་ལྟར་འགྱུར། གང་ཡང་རིམ་གྱིས་འགྱུར་བ་ལ་ལྟོས་པའི་ལུས་ལས་ཤེས་པ་རིམ་གྱིས་སྐྱེ་བར་འགྱུར་རོ་ཞེས་ཟེར་བ་དེ་གསལ་བ་ཡིན་ཏེ། འདི་ལྟར་གྱུར་པའི་རིམ་པ་ཡང་ལུས་ཙམ་ལས་འབྱུང་བ་མ་ཡིན་ཏེ། ལུས་ལས་ཁྱད་པར་མེད་ན་གྱུར་པའི་ཁྱད་པར་དུ་ཇི་ལྟར་འགྱུར། དཔེར་ན་
[345a.4]ལུས་དང་སྲོག་ལ་སོགས་པ་ལ་ཁྱད་པར་མེད་ན་ཤེས་པ་ལ་ཁྱད་པར་མེད་པ་དེ་བཞིན་དུ། ལུས་ལ་ཁྱད་པར་མེད་ན་གྱུར་པ་ལ་ཡང་ཁྱད་པར་མེད་དོ། །འོ་མ་ལ་སོགས་པ་ལ་ཁྱད་པར་མེད་ན་ཡང་། འོ་མ་གྱུར་པའི་ཞོ་དུས་ཀྱི་དབང་ཁོ་ནས་ཁྱད་པར་ཅན་དུ་འགྱུར་བ་མ་ཡིན་ནམ། དེ་བཞིན་དུ་
[345a.5]ལུས་ཀྱང་ཡུན་ལོན་ནས་རྣམ་པར་ཤེས་པ་ཁྱད་པར་ཅན་དུ་འགྱུར་རོ་ཞེ་ན། དེ་ནི་མི་བདེན་ཏེ། མཉམ་པའི་འོ་མ་ལ་སོགས་པ་ཉེ་བར་གྱུར་པ་དང་། དྲོད་ལ་སོགས་པ་མཚུངས་པར་ཡོད་ན། མཚུངས་པ་ཉིད་དུ་ཞོ་ལ་སོགས་པར་འགྱུར་བ་ཡིན་གྱི་མཚུངས་པའི་གནས་སྐབས་དང་། མི་མཚུངས་པའི་
[345a.6]གནས་སྐབས་ན་སྔོན་མངོན་པར་འདུས་བྱས་པ་རྗེས་སུ་མཐུན་པའི་རྣམ་པར་རྟོག་པའི་ཤེས་པའི་ཐ་དད་པ་དང་ཐ་དད་པ་མ་ཡིན་པའི་རྒྱུ་ཡིན་པ་དེ་བས་ན། གྱུར་པའི་རིམ་པས་ཤེས་པ་རིམ་པར་འགྱུར་བ་ནི་མ་ཡིན་ནོ། །འོ་ན་ནི་སེམས་ཁོ་ན་ལས་སེམས་སྐྱེ་བར་འདོད་པ་གང་ཡིན་པ་དེའི་ཤེས་པ་
[345a.7]ཅིག་ཅར་སྐྱེ་བར་ཇི་སྟེ་མི་འགྱུར་ཏེ། རིམ་པས་ཀྱང་སེམས་དེ་ལས་ཤེས་པ་སྐྱེ་བར་འགྱུར་བའི་ཕྱིར་ཡིན་གྱི། སྐད་ཅིག་མ་ཐ་དད་པས་འབྲས་བུ་ཐ་དད་པའི་ཤེས་པ་དུ་མ་ཡིན་ནམ་ཞེ་ན། འདིར་སྨྲས་པ། རྣམ་ཤེས་ནུས་པ་ངེས་པའི་ཕྱིར། །གཅིག་ནི་གཅིག་གི་རྒྱུ་ཡིན་ནོ། །དོན་གཞན་ཆགས་
[345b]
[345b.1]བྲལ་ཤེས་པ་ནི། །དོན་གཞན་འཛིན་པ་མེད་ཕྱིར་རོ། །ཞེས་བྱ་བ་ལ། མཚུངས་པ་དེ་མ་ཐག་པའི་རྐྱེན་གྱི་ངོ་བོ་ཉིད་གཅིག་ནི་སེམས་གཅིག་ཁོ་ནའི་རྒྱུ་ཡིན་ཏེ། སྔར་གོམས་པས་སྦྱངས་པས་མཐུན་པའི་འདུ་བྱེད་དམ། ཡུལ་ཁ་ཅིག་ལ་ཆགས་པའི་ཁྱད་པར་གྱི་ནུས་པ་ངེས་པའི་ཕྱིར་རོ། །དེ་བས་
[345b.2]ན་སྔར་གོམས་པའི་བག་ཆགས་ཀྱི་རྗེས་སུ་མཐུན་པར་ཤེས་པ་སྐྱེ་བའམ། ཆགས་པའི་བྱེ་བྲག་ལས་ཁ་ཅིག་ཁོ་ནར་ཤེས་པ་སྐྱེ་སྟེ། དེ་ལ་མཚུངས་པ་དེ་མ་ཐག་པའི་རྐྱེན་གྱིས་ཤེས་པ་སེམས་ཕྱི་མའི་རྒྱུ་ཡིན་ཞིང་། གོམས་པའི་ཤེས་པ་ནི་སེམས་ཀྱི་བག་ཆགས་བཞག་པ་ལ་གཡེར་བག་
[345b.3]ཅན་ལ་སོགས་པའི་རྒྱུ་ཡིན་ནོ། །དེ་དག་ཇི་ལྟར་ཤེས་ཤེ་ན། མངོན་པར་འདོད་པའི་དོན་གཞན་ལ་ཆགས་པ་དེ་དང་བྲལ་བའི་སེམས་ནི་ཡུལ་གཞན་ཉེ་བར་གྱུར་ཀྱང་འཛིན་པ་མེད་པའི་ཕྱིར་རོ། །རྗེས་སུ་འགྲོ་བ་དང་ལྡོག་པའི་རྗེས་སུ་འབྲང་བས་ཀྱང་རྒྱུ་ཉིད་དུ་ངེས་པ་ཡིན་ནོ། །འདིར་ནི་སྔར་
[345b.4]གོམས་པའི་རྗེས་སུ་མཐུན་པའི་ཡིད་ཀྱི་རྣམ་པར་ཤེས་པ་གཡེར་བག་ཅན་དུ་སྣང་བ་དང་། ཡུལ་གཞན་ལ་ཆགས་པ་དང་བྲལ་བར་བྱེད་པའི་སེམས་ནི་ཡུལ་གཞན་ལ་ཤེས་པ་སྐྱེ་བ་མ་ཡིན་པའི་ཕྱིར། སེམས་ཐམས་ཅད་ནི་སེམས་ཁོ་ན་སྔོན་དུ་འགྲོ་བ་ཡིན་ནོ། །དེ་ལྟར་ནི་འགྱུར་མོད་ཀྱི་
[345b.5]དང་པོའི་ལུས་ཉིད་ལས་ཤེས་པ་སྐྱེ་ཞིང་། དུས་ཕྱིས་ནི་ཤེས་པ་ཉིད་ལས་ཤེས་པ་སྐྱེ་སྟེ། དཔེར་ན་དང་པོ་མེ་ལས་དུ་བ་འབྱུང་ལ། དེ་ནས་དུ་བ་ཉིད་ལས་དུ་བའི་རྒྱུན་འབྱུང་བ་ཡིན་ནོ། །ཇི་ལྟར་དུས་གཞན་དུ་དུ་བའི་རྒྱུན་འགགས་པ་དེ་བཞིན་དུ་དུས་གཞན་གྱི་ཚེ་སེམས་ཀྱི་རྒྱུན་འགག་པར་
[345b.6]འགྱུར་རོ། །ཇི་ལྟར་ཡང་དང་པོའི་ཤེས་པ་ཡུལ་དུ་མ་ལས་སྐྱེ་བ་ཡང་ཆགས་པ་ལས་ཁ་ཅིག་ཏུ་ཤེས་པ་གཅིག་སྐྱེ་བ་དེ་བཞིན་དུ། དང་པོ་སྐྱེས་པའི་ཚེ་ལུས་ལས་ཤེས་པ་དུ་མ་སྐྱེ་ན་ཡང་དུས་གཞན་དུ་ཤེས་པ་ཁོ་ན་ལས་ཤེས་པ་སྐྱེ་སྟེ། དེས་ན་ལུས་དང་སྲོག་ལ་སོགས་པ་རྒྱུ་ཉིད་ཡིན་ཡང་
[345b.7]ཤེས་པ་དུ་མ་སྐྱེ་བ་ནི་མ་ཡིན་ནོ་ཞེ་ན། འདིར་སྨྲས་པ། གལ་ཏེ་ལུས་ལས་ལན་ཅིག་བློ། །སྐྱེ་ཞིང་ཕྱིས་ནི་རང་རིག་ལས། །ངེས་ན་ལུས་ཀྱི་ནུས་པ་ནི། །ཅི་ཡི་ཕྱིར་ན་ལྡོག་པ་ཡིན། །ཞེས་བྱ་བ་ལ། གལ་ཏེ་ལུས་ལས་སྐྱེས་པའི་ཤེས་པ་དུས་ཕྱིས་རང་གི་རིགས་ཁོ་ནའི་སེམས་ལས་ངེས་པ་
[346a]
[346a.1]ཡིན་པ་དེ་ལྟ་ན་ལུས་ཀྱི་ནུས་པས་རྣམ་པར་ཤེས་པ་སྐྱེད་པ་ཅིའི་ཕྱིར་ལྡོག་པ་ཡིན་ཏེ། འདི་ལྟར་གལ་ཏེ་ལུས་ལས་ཤེས་པ་གཅིག་གི་རྒྱུ་ཡིན་ན། ལུས་ཀྱང་ནུས་པ་ཉིད་དུ་གནས་པ་དེ་བས་ན་སེམས་གཞན་དང་གཞན་སྐྱེད་པར་འགྱུར་བའི་ཕྱིར་ཅིག་ཅར་མང་པོ་འབྱུང་བ་འདི་གནས་
[346a.2]པ་ཡིན་ནོ། །འོན་ཏེ་ལུས་ལས་སྐྱེས་པའི་ཤེས་པས་ལུས་ལས་ཤེས་པ་དུ་མ་སྐྱེ་བའི་གགས་བྱེད་པ་དེའི་ཕྱིར་ལུས་ལས་ཤེས་པ་གཞན་དང་གཞན་འབྱུང་བ་མ་ཡིན་ནོ་ཞེ་ན། དེ་ནི་མི་བདེན་ཏེ། གང་གི་ཕྱིར་དེ་ལས་བྱུང་བའི་འབྲས་བུས་དེ་ཉིད་ཀྱི་རྒྱུན་གྱི་ནུས་པ་ལས་གེགས་བྱེད་པ་མ་ཡིན་ཏེ། མེས་
[346a.3]བསྐྱེད་པའི་དུ་བ་སྐྱེད་པར་ནུས་པའི་མེ་ལ་གེགས་མི་བྱེད་པ་དེའི་ཕྱིར་རོ། །དེ་བས་ན་གལ་ཏེ་ཤེས་པ་ལུས་ལས་སྐྱེ་བ་དེའི་ཚེ་ཤེས་པ་སྐྱེས་པས་ཀྱང་ཤེས་པ་སྐྱེད་པ་ལ་གེགས་མི་བྱེད་པའི་ཕྱིར་ཅིག་ཅར་མང་པོ་འབྱུང་བར་འགྱུར་རོ། །དབང་པོའི་ཤེས་པ་དུ་མ་འབྱུང་ཡང་ཆགས་པའི་ཡུལ་ལས་
[346a.4]ཤེས་པ་གཅིག་སྐྱེ་བར་སྨྲས་པ་མ་ཡིན་ནམ་ཞེ་ན། སྨྲས་པ་དེ་ནི་མི་བདེན་ཏེ། གང་གི་ཕྱིར་གོམས་པ་མེད་པའི་སེམས་ཀྱིས་ཤེས་པ་གཞན་སྐྱེད་པར་བྱེད་པ་མ་ཡིན་ཏེ། སྔར་གོམས་པ་མེད་ན་ཡུལ་གཞན་ལ་ཆགས་པ་མེད་པའི་ཕྱིར་རོ། །ཇི་ལྟར་སྔར་སེམས་ལ་གོམས་པ་སྐྱེ་བ་དེ་ཉིད་ལ་སླར་ཡང་ཆགས་
[346a.5]པར་འགྱུར་བ་དེའི་ཕྱིར་སེམས་གཞན་སྐྱེ་བ་ནི་སྔར་གོམས་པ་ཁོ་ན་ལས་ཡིན་གྱི། འཇིག་རྟེན་ཕ་རོལ་མེད་པར་སྨྲ་བ་དེ་ལ་ནི་སྐྱེ་བ་གཞན་དུ་གོམས་པ་མེད་པའི་ཕྱིར་ལས་སྐྱེ་བའི་ཤེས་པ་རྣམས་ལ་སླར་ཡང་འཁོར་ལོ་བཞིན་དུ་སྐྱོན་སྔ་མ་ཉིད་དུ་འགྱུར་རོ། །འོན་ཏེ་ཤེས་པའི་རྒྱུ་ལུས་ཀྱི་སྐད་ཅིག་
[346a.6]མ་དང་པོ་ཡིན་གྱི་དུས་ཕྱི་མའི་ལུས་ཀྱི་སྐད་ཅིག་ནི་རྒྱུ་མ་ཡིན་ནོ་ཞེ་ན། གལ་ཏེ་དེ་ལྟར་ལུས་དང་པོ་ཁོ་ན་ཤེས་པ་སྐྱེད་ན། འོ་ན་ནི་ལུས་ཕྱི་མ་སེམས་ཀྱི་རྟེན་མེད་པར་འགྱུར་ཏེ། སེམས་ཡན་གར་བར་འགྱུར་རོ། །འོན་ཏེ་ལུས་ཕྱི་མའི་གྲོགས་ཅན་གྱི་ཤེས་པས་ཤེས་པ་གཞན་བསྐྱེད་པའི་ཕྱིར།
[346a.7]སེམས་ཡན་གར་བར་མི་འགྱུར་རོ་ཞེ་ན། དེ་ལྟ་ན་ནི་སེམས་ཁོ་ནས་སེམས་བསྐྱེད་པར་འགྱུར་གྱི། ལུས་ནི་གྲོགས་ཡིན་པའི་ཕྱིར་སངས་རྒྱས་པའི་ལུགས་ཉིད་བསྒྲུབ་པར་འགྱུར་རོ། །དང་པོའི་ལུས་ཁོ་ན་ཉེ་བར་ལེན་པའི་རྒྱུ་མ་ཡིན་ནམ། དཔེར་ན་ལྕི་བ་ལས་སཱ་ལུ་སྐྱེ་བ་བཞིན་ནོ། །སཱ་ལུ་ཕྱི་
[346b]
[346b.1]མ་ནི་སཱ་ལུ་ཉིད་ལས་སྐྱེས་པ་ཡིན་ནོ་ཞེ་ན། དེ་ལྟ་ན་ནི་བ་ལང་གི་ལྕི་བ་མེད་པར་དུས་ཕྱིས་སཱ་ལུ་ཉིད་ལས་སཱ་ལུ་སྐྱེ་བ་དེ་བཞིན་དུ། སེམས་ཉིད་ལས་སེམས་སྐྱེ་བའི་ཕྱིར་སེམས་ཡན་གར་བ་སེམས་ཀྱི་གནས་སུ་འགྱུར་རོ། །ལུས་ཀྱང་སེམས་ཀྱི་རྒྱུ་མ་ཡིན་ནམ། དེ་བས་ན་ལུས་དང་སེམས་དག་ལྷན་
[346b.2]ཅིག་གནས་པ་ཡིན་ནོ་ཞེ་ན། བདེན་ཏེ། ལུས་ནི་སེམས་ལ་ཕན་འདོགས་པའི་རྒྱུ་ཡིན་གྱི། ཉེ་བར་ལེན་པ་ནི་མ་ཡིན་ནོ། །འདིར་ལུས་དང་པོ་ནི་ཉེ་བར་ལེན་པ་ཡིན་ལ། ཕྱི་མ་གྲོགས་བྱེད་པ་ཞེས་མ་སྨྲས་སམ་ཞེ་ན། སྔ་མ་ནི་ཉེ་བར་ལེན་པ་ཡིན་ལ། ཕྱི་མ་གྲོགས་བྱེད་པ་མ་ཡིན་ནོ། །འོན་ཏེ་སྔར་ལུས་སམ་
[346b.3]ཉེ་བར་ལེན་པ་ཅན་གྱི་སེམས་ཡིན་ལ། ཕྱིས་ནི་སེམས་སྔོན་དུ་འགྲོ་བའི་སེམས་སུ་སྣང་ངོ་ཞེ་ན། དེ་ནི་མི་བདེན་ཏེ་གཡེར་བག་ཅན་ལ་སོགས་པ་དང་ལྡན་པའི་ཤེས་པ། ཤེས་པ་སྔོན་དུ་འགྲོ་བ་ཅན་ཇི་ལྟ་བ་བཞིན་དུ་མཐོང་བ་དེ་ཁོ་ན་ལྟར་སེམས་དང་པོ་ལ་གཡེར་བག་ཅན་དུ་མྱོང་བར་འགྱུར་བའི་ཕྱིར་
[346b.4]རྟག་ཏུ་ཤེས་པ་ཁོ་ན་ལས་ཤེས་པ་སྐྱེའོ་ཞེས་བྱ་བར་གནས་སོ། །འདི་དག་གིས་ནི་དུ་བའི་རྒྱུན་འགགས་པ་བཞིན་རྣམ་པར་ཤེས་པ་འགག་གོ་ཞེས་ཟེར་བ་དེ་བསལ་བ་ཡིན་ཏེ། དེ་ལ་མེ་ལ་སོགས་པའི་ཚོགས་པ་ཉེ་ན་དུ་བའི་རྒྱུན་འཕེལ་བ་ཅན་དུ་འགྱུར་གྱི། དུ་བས་སྐྱེད་པའི་དུ་བའི་རྒྱུན་ནི་འཛད་པ་
[346b.5]ཅན་ཡིན་པའི་ཕྱིར་རོ། །འདིར་ནི་གོམས་པ་སྔོན་དུ་འགྲོ་བའི་ཡིད་གཡེར་བག་ཅན་གྱི་ཤེས་པ་སྣང་ངོ་། །གལ་ཏེ་ཡང་དང་པོའི་ལུས་ཉིད་ལས་སྐྱེ་ན་གོམས་པ་ཕུལ་དུ་བྱུང་བ་ལས་དེ་བོགས་འབྱུང་བར་སྣང་བར་མི་འགྱུར་ཏེ་དུ་བ་ལས་སྐྱེས་པའི་དུ་བ་འཕེལ་བར་མི་སྣང་བ་ལྟ་བུའོ། །གལ་ཏེ་སངས་
[346b.6]རྒྱས་པའི་ཡང་ཤེས་པ་ལུས་ལ་མི་བརྟེན་ན་ལུས་འགགས་ཀྱང་ཤེས་པ་གནས་པར་འགྱུར་ཏེ། རྒྱུ་མཚན་མེད་པར་ལྷན་ཅིག་པའི་དངོས་པོར་ངེས་པ་སྟེ། གལ་ཏེ་རྟེན་མིན་པ་ཡི་ལུས། །ལོག་པར་གྱུར་ཀྱང་སེམས་འབའ་ཞིག །གནས་འགྱུར་ཞེ་ན་དེ་ཡི་ནི། །རྒྱུ་འཇུག་ཐོབ་ཕྱིར་སེམས་རྒྱུད་གནས། །
[346b.7]རྒྱུ་ནི་ཡན་ལག་མིན་གྱུར་ན། །ཚེ་འདི་ཉིད་ཀྱི་སྐྱེ་མཆེད་ལྔ། །ལུས་གཞན་སྐྱེ་བའི་རྒྱུ་ཡིན་ནོ། །ཞེས་བྱ་བ་སྨྲས་ཏེ། ལུས་ལོག་པར་གྱུར་ན་ཡང་སེམས་འབའ་ཞིག་གནས་པར་འགྱུར་ཏེ། ལུས་དང་སེམས་ལ་རྟེན་དང་བརྟེན་པའི་དངོས་པོ་ངེས་པ་མེད་པའི་ཕྱིར་རོ་ཞེ་ན། ལས་ཞེས་བྱ་བ་དང་།
[347a]
[347a.1]སྲེད་པ་དང་མ་རིག་པ་ནི་སེམས་གནས་པའི་རྒྱུ་ཡིན་ཏེ་སྐྱེ་བ་གཞན་དུ་གྱུར་པའི་ལུས་དེའི་རྒྱུ་ལུས་གཞན་པ་ཡིན་ལ། དེ་ལས་ལུས་གཞན་སྐྱེད་པའི་འཇུག་པ་ཐོབ་པའི་ཕྱིར་རོ། །གལ་ཏེ་ཡན་ལག་སྟེ་རྒྱུ་ཉིད་དུ་མ་གྱུར་ན་ནི་དེའི་ཚེ་སེམས་ཡན་གར་བ་གནས་པར་འགྱུར་རོ་ཞེས་
[347a.2]བྱ་བ་ཚིག་ལྷག་མའོ། །དཔེར་ན་གཟུགས་མེད་པར་སྐྱེས་པའི་སྲོག་ཆགས་ཀྱི་ཤེས་པ་ཡན་གར་བ་ཉིད་དུ་གནས་པ་བཞིན་ནོ། །གང་གི་ཚེ་ཡང་འཇིག་རྟེན་ཕ་རོལ་གྱི་ལུས་གཞན་སྐྱེ་བའི་རྒྱུ་ཚེ་འདི་ཉིད་ཀྱི་སྐྱེ་མཆེད་ལྔ་ཡིན་པ་དེའི་ཚེ་ཅིའི་ཕྱིར་སེམས་ཡན་གར་བ་གནས་པ་ཡིན། གཟུགས་མེད་པའི་
[347a.3]ཁམས་ནས་ཤི་འཕོས་པའི་ལུས་ཅན་རྣམས་ཀྱི་ལུས་སྐྱེ་བ་ཡང་དེ་ཉིད་ཀྱི་ལུས་སྐྱེ་མཆེད་ལྔས་འདུས་བྱས་པའི་བག་ཆགས་རྒྱུར་འགྱུར་རོ། །དེ་ལྟར་ནི་འགྱུར་མོད་ཀྱི། སེམས་ལུས་གཞན་གྱི་རྒྱུར་འགྱུར་བར་མི་དམིགས་ཏེ། ཤི་བའི་འོག་ཏུ་ལུས་གཞན་སྐྱེ་བ་མཐོང་བའི་ཕྱིར་རོ། །གཟུགས་མེད་པའི་ཁམས་ལ་
[347a.4]ནི་ཤིན་ཏུ་ཡང་མ་མཐོང་བའི་ཕྱིར་མེད་དོ་ཞེ་ན། འདིར་སྨྲས་པ། དེ་ཡི་ཡན་ལག་རྒྱུ་ཉིད་ནི། །འགེགས་པ་ཡིས་ནི་མི་དམིགས་པ། །ངེས་བྱེད་མིན་པར་རབ་ཏུ་བཤད། །དབང་སོགས་ཀྱང་ནི་ལྷག་ལྡན་ཡིན། །ཞེས་བྱ་བ་ལ་གལ་ཏེ་འཆི་བའི་སེམས་ཀྱིས་ལུས་གཞན་སྐྱེད་པའི་ཡན་ལག་གི་དངོས་
[347a.5]པོ་རྒྱུ་ཉིད་དེ། གྲོགས་བྱེད་པའི་རྒྱུ་མི་དམིགས་པ་དེ་ལྟ་ན་ཡང་། སེམས་ལ་ལུས་གཞན་སྐྱེད་པའི་ནུས་པ་མེད་པ་ནི་མ་ཡིན་ཏེ། གནོད་པ་བྱེད་པ་མེད་པའི་ཕྱིར་རོ། །འོན་ཏེ་མི་དམིགས་པ་ཉིད་གནོད་པ་བྱེད་པ་ཡིན་ནོ་ཞེ་ན། མ་ཡིན་ཏེ། གང་གི་ཕྱིར་ལུས་གཞན་གྱི་ལྷན་ཅིག་བྱེད་པའི་རྒྱུ་སེམས་
[347a.6]ཡིན་པ་འགེགས་པ་ནི་མི་དམིགས་པ་ངེས་པར་བྱེད་པ་མ་ཡིན་ནོ་ཞེས་བསྟན་ཟིན་ཏོ། །འདིར་མ་མཐོང་བ་ཙམ་གྱིས་སྨྲ་བ་མ་ཡིན་གྱི། འོན་ཀྱང་འབྲེལ་པ་སྔོན་དུ་སོང་བའི་རྗེས་སུ་དཔག་པས་གནོད་པ་ཡོད་པ་མ་ཡིན་ནམ། དབང་པོ་གང་ཡིན་པ་དེ་ལུས་གཞན་གྱི་དབང་པོ་དང་མཚམས་སྦྱོར་བ་ནི་
[347a.7]མ་ཡིན་ཏེ། དཔེར་ན་ལྷ་སྦྱིན་གྱི་མིག་ལ་སོགས་པ་མཆོད་སྦྱིན་གྱི་མིག་ལ་སོགས་པས་བསྐྱེད་པ་མ་ཡིན་པ་དེ་བཞིན་དུ། དབང་པོ་ཡང་སྐྱེ་བ་འདིའི་ལུས་ལ་གནས་པ་ཡིན་ནོ་ཞེ་ན། འདིར་སྨྲས་པ། དབང་པོ་ལ་སོགས་པ་སྒྲུབ་བྱེད་དུ་བཀོད་པ་གང་ཡིན་པ་དེ་ཡང་། ལྷག་མ་དང་ལྡན་པ་
[347b]
[347b.1]སྟེ་ངེས་པར་བྱེད་པ་མ་ཡིན་ཏེ། འདི་ལྟར་དབང་པོ་ཡང་ཡིན་ལ། འཇིག་རྟེན་གཞན་གྱི་དབང་པོ་དང་། ཉིང་མཚམས་སྦྱོར་བ་ལ་འགལ་བ་ཅི་ཞིག་ཡོད། མ་མཐོང་བ་ཙམ་གྱིས་མི་མཐུན་པའི་ཕྱོགས་ལས་ལྡོག་པར་ངེས་པ་ནི་མ་ཡིན་ནོ། །འོན་ཏེ་ཚེ་འདིའི་ལུས་ལ་ཡོད་པའི་དབང་པོ་དང་མཚམས་
[347b.2]སྦྱོར་བའི་མིག་ལ་སོགས་པ་ནི་རྒྱུ་གཞན་ལ་ཡོད་པའི་མིག་ལ་སོགས་པ་སྐྱེད་པར་བྱེད་པ་ནི་མ་ཡིན་ནོ་ཞེ་ན། འདི་ནི་གྲུབ་པ་ལ་སྒྲུབ་པ་སྟེ། དེའི་ཚེ་ལུས་གཞན་ཡང་རྒྱུད་དེ་ཉིད་ཡིན་པའི་ཕྱིར་རོ། །འོ་ན་ཁྲག་དང་ཁུ་བ་ལ་སོགས་པ་ལས་བྱུང་བའི་འཇིག་རྟེན་གཞན་གྱི་ལུས་དེ་ཇི་ལྟར་རྒྱུད་དེ་ཉིད་དུ་
[347b.3]འགྱུར་ཞེ་ན། ཁྲག་དང་ཁུ་བ་གཞན་དུ་གྱུར་པ་ཉིད་ཀྱིས་རྒྱུད་ཁྱད་པར་དུ་འགྱུར་བ་མ་ཡིན་ཏེ། དཔེར་ན་མེའི་ཁྱད་པར་ཅན་གྱི་དུ་བ་དང་བུམ་པའི་ཁྱད་པར་ཅན་གྱི་བྱས་པའི་སྒྲ་དང་དུ་བ་ཡིན་པར་ཅི་ཡང་བྱེད་པ་མ་ཡིན་ནོ། །འོན་ཏེ་མེ་མེད་ན་མི་འབྱུང་བའི་དུ་བ་སྤྱིར་ངེས་པ་ཡིན་གྱི། མིག་ལ་སོགས་པ་ལ་ནི་དེ་མ་
[347b.4]ཐག་པ་མཐོང་སྟེ། དབང་པོ་ལས་འདས་པའི་ཕྱིར་རོ་ཞེ་ན། འདིར་སྨྲས་པ། དབང་པོ་སྔ་མའི་རང་རིགས་ལ། །ནུས་པ་དག་ནི་མཐོང་བ་སྟེ། །འགྱུར་བ་མཐོང་ཕྱིར་གཞན་གཞན་གྱི། །སྐྱེ་བ་དག་ཀྱང་གྲུབ་པ་ཡིན། །ཞེས་བྱ་བ་ཡིན་ཏེ། སྔར་བྱུང་བའི་མིག་ལ་སོགས་པ་རྣམས་ཀྱི་རང་གི་རིགས་དབང་པོ་
[347b.5]ལ་སོགས་པ་ལ་ནུས་པ་མཐོང་སྟེ། འདི་ལྟར་སྔར་གྱི་དབང་པོ་ལ་བརྟེན་པར་དབང་པོ་གཞན་དག་མཐོང་བ་ཡིན་ནོ། །མ་ཤི་བའི་བར་དུ་དབང་པོ་ཚུལ་གཅིག་པ་ཉིད་མ་ཡིན་ནམ་ཞེ་ན་དེ་ནི་མ་ཡིན་ཏེ། ཤེས་པའམ། མིག་ལ་སོགས་པ་རབ་རིབ་ལ་སོགས་པའི་དྲི་མ་དང་བཅས་པའམ། དྲི་མ་མེད་པ་ལ་
[347b.6]སོགས་པའི་འགྱུར་བ་མཐོང་བའི་ཕྱིར་དབང་པོ་རྣམས་གཞན་དང་གཞན་དུ་སྐྱེ་བ་གྲུབ་པ་ཡིན་ནོ། །འདིས་ནི་གསལ་བའི་ཁྱད་པར་ལ་མ་ལྟོས་པ་ཉིད་དུ་འབྲེལ་པ་བཟུང་བར་བསྟན་པ་ཡིན་ནོ། །གཞན་དུ་ན་སུས་ཀྱང་གང་དུ་ཡང་ཐ་སྙད་འདོགས་པར་མི་འགྱུར་ཏེ། ཐ་སྙད་འདོགས་པ་ནི་དོན་བྱེད་པར་རུང་བ་སྔོན་
[347b.7]དུ་འགྲོ་བ་ཅན་ཡིན་པའི་ཕྱིར་དང་། རུང་བར་ངེས་པ་ནི་སྤྱི་ལས་ཡིན་པའི་ཕྱིར་དང་། མིག་ལ་སོགས་པ་མིག་ལ་སོགས་པས་བསྐྱེད་པར་རུང་བར་ངེས་པ་སྟེ། སྒྲིན་པ་ཉིད་ལ་སོགས་པ་མཐོང་བའི་ཕྱིར་ཞེས་བསྟན་ཟིན་ཏོ། །མིག་ལ་སོགས་པ་དང་པོ་སྐྱེ་བ་ནི་ལུས་ལས་སྐྱེ་ལ། དུས་ཕྱིས་ནི་མིག་ལ་
[348a]
[348a.1]སོགས་པ་ཉིད་ལས་མིག་ལ་སོགས་པ་སྐྱེ་བ་མ་ཡིན་ནམ་ཞེ་ན། འདིར་སྨྲས་པ། གལ་ཏེ་ལུས་ལས་དེ་སྐྱེ་ན། །སྔ་མ་བཞིན་དུ་ཐལ་བར་འགྱུར། །སེམས་ལས་ཡིན་ན་དེ་ཉིད་ལས། །ལུས་གཞན་དག་ཀྱང་སྐྱེ་བར་འགྱུར། ཞེས་བྱ་བ་ཡིན་ཏེ། གལ་ཏེ་དང་པོའི་མིག་ལ་སོགས་པ་ལུས་
[348a.2]ལས་སྐྱེ་ན། དེའི་ཚེ་དབང་པོ་དང་བཅས་པ་ལས་ཡིན་ནམ། དབང་པོ་མེད་པ་ལས་ཡིན་གྲང་ན། དེ་ལ་དབང་པོ་དང་བཅས་པ་ལས་སྐྱེ་ན་ནི། སྐྱེ་བ་སྔ་མར་ཡང་མིག་ལ་སོགས་པ་དབང་པོ་དང་བཅས་པ་ཉིད་ལས་སྐྱེས་པའི་ཕྱིར། འཇིག་རྟེན་ཕ་རོལ་གྲུབ་པར་འགྱུར་རོ། །དབང་པོ་མེད་པ་ལས་སྐྱེ་ན་ནི།
[348a.3]རོའི་ལུས་ལས་ཀྱང་སེན་མོ་ལ་སོགས་པ་སྐྱེ་བར་འགྱུར་བའི་ཕྱིར་སྔ་མ་བཞིན་དུ་ཐལ་བར་འགྱུར་བའམ་ཡང་ན་ལུས་ཀྱི་ནུས་པ་ལྡོག་པར་ཇི་ལྟར་འགྱུར་ཞེས་པའི་ཐལ་བ་བསྟན་པ་ཡིན་ནོ། །འོན་ཏེ་རོའི་ལུས་ལ་སེམས་མེད་པས་སེན་མོ་ལ་སོགས་པ་མི་སྐྱེའོ་ཞེ་ན། འོ་ན་ནི་སེམས་ལས་སྐྱེ་བར་འགྱུར་
[348a.4]བ་དེ་བས་ན་སེམས་དེ་ཉིད་ལས་འཇིག་རྟེན་ཕ་རོལ་དུ་གྱུར་པའི་སེམས་དང་ལུས་གཞན་སྐྱེ་བར་འགྱུར་བ་དེ་བས་ན་སེམས་དེ་ཉིད་ལས་འཇིག་རྟེན་ཕ་རོལ་དུ་གྱུར་པའི་སེམས་དང་ལུས་གཞན་སྐྱེ་བར་འགྱུར་རོ། །ཉེ་བར་བསྡུ་བ་སྨྲས་པ། །དེ་ཕྱིར་རྒྱུ་དང་བྲལ་བའི་ཕྱིར། །ཐ་མའི་སེམས་ཉིད་ཐམས་ཅད་
[348a.5]ཀྱི། །མཚམས་སྦྱོར་མིན་མིན་དེ་འདྲ་ཡི། །སྒྲུབ་བྱེད་ལྷ་ལྡན་ཡིན་པར་འདོད། །ཅེས་བྱ་བ་ལ། སྲེད་པ་དང་། མ་རིག་པ་དང་ལྡན་པའི་ལས་ཀྱིས་མངོན་པར་འདུས་བྱས་པའི་སེམས་འདི་ནི་འཇིག་རྟེན་ཕ་རོལ་གྱི་རྒྱུ་ཡིན་ཏེ་དེ་དང་བྲལ་ན་འཆི་ཀའི་སེམས་ཐམས་ཅད་སྐྱེ་བ་གཞན་དང་ཉིང་མཚམས་
[348a.6]སྦྱོར་བའི་མཚམས་སྦྱོར་མེད་པ་སྟེ། རྒྱུད་ཉིད་མ་གྲུབ་པའི་ཕྱིར་རོ། །དེ་བས་ན་འཆི་ཀ་མའི་སེམས་ཡིན་པའི་ཕྱིར་ཞེས་བྱ་བ་འདི་རྟགས་དམ་པའོ་ཟེར་བ་དེ་འདྲ་བ་ནི་ལྷག་མ་དང་ལྡན་པ་ཡིན་པར་འདོད་དེ། མི་དམིགས་པ་ཙམ་གྱིས་ལྡོག་པ་ངེས་པ་མེད་པའི་ཕྱིར་ཞེས་བསྟན་ཟིན་ཏོ།། །།
[348a.7]ཚད་མ་རྣམ་འགྲེལ་གྱི་འགྲེལ་པ་ལས། བམ་པོ་བདུན་པ། གལ་ཏེ་ཡང་འཇིག་རྟེན་འདིའི་སེམས་ནི་འཇིག་རྟེན་གཞན་གྱི་སེམས་སྐྱེད་པ་ཡིན་ཏེ། ལུས་ཐ་དད་པ་ལ་བརྟེན་པ་ཅན་ཡིན་པའི་ཕྱིར། ལྷ་སྦྱིན་གྱི་སེམས་བཞིན་ནོ་ཞེས་ཟེར་བ་དེ་ཡང་མི་བདེན་ཏེ། འདི་ལྟར་ཤེས་པ་ནི་ལུས་ལ་བརྟེན་པ་མ་
[348b]
[348b.1]ཡིན་ནོ་ཞེས་བསྟན་ཟིན་ཏོ། །གཞན་ཡང་རྣམ་པར་ཤེས་པ་ནི་ལུས་གནས་པ་མ་ཡིན་ཏེ། གང་དུ་ཡང་འཇུག་པ་དང་ལྡན་པ་མ་ཡིན་ནོ། །དེས་ན་ལུས་ནི་ཕྱི་འམ་ནང་ཡང་རུང་སྟེ། ཤེས་པའི་ཡུལ་ཡིན་པའི་ཕྱིར། དེ་འདིའི་ལུས་མེད་ཀྱང་སེམས་གཞན་ལ་འཕོ་བ་དང་ལྡན་པ་ཡིན་ཏེ། དཔེར་ན་འགའ་ཞིག་
[348b.2]གི་ཚེ། གཟུགས་ལ་དམིགས་པའི་སེམས་ནི་དེ་མེད་ཀྱང་རང་གི་ལུས་སམ། གཞན་གྱི་ལུས་ལ་དམིགས་པའི་ཕྱིར་ཕན་ཚུན་དུ་དམིགས་པ་བཞིན་དུ་སེམས་ནི་ལུས་གཞན་ལ་འཕོ་བ་དང་ལྡན་པ་ཡིན་ནོ། །ཡང་ན་ཇི་ལྟར་བྱིས་པའི་ལུས་ལ་གོམས་པའི་སེམས་ནི། རྒན་པོའི་ལུས་ལས་སེམས་
[348b.3]གཡེར་བག་ཅན་དུ་འགྱུར། དེ་ལ་ཉེ་བར་ལེན་པ་གཅིག་ཡོད་ལ་སྐྱེ་བ་གཞན་གྱི་ལུས་ལ་ནི་ཁུ་བ་དང་ཁྲག་གཞན་ཉེ་བར་ལེན་པ་ཡིན་ནོ་ཞེ་ན་མ་ཡིན་ཏེ་བྱིས་པ་དང་རྒན་པོའི་ལུས་དག་ཐ་དད་པ་ཙམ་དུ་སྒྲུབ་པའི་ཕྱིར་ལུས་ཐ་དད་པ་ལ་འཇུག་པའི་འདུ་བྱེད་དེ་ཙམ་ཞིག་དཔེར་ན་བྱེད་པ་ཡིན་ནོ། །ཡང་ན་ཇི་ལྟར་
[348b.4]སད་པའི་དུས་ཀྱི་འདུ་བྱེད་ནི་རྨི་ལམ་གྱི་ལུས་རྗེས་སུ་མཐུན་པའི་ཤེས་པའི་རྒྱུ་ཡིན་པ་དང་། རྨི་ལམ་གྱི་ཁྱད་པར་མཐོང་བའི་ལུས་སྐྲག་པ་ལ་སོགས་པའི་འདུ་བྱེད་ནི་སད་པའི་ཚེ་སེམས་སྔང་བ་ལ་སོགས་པའི་རྒྱུ་ཡིན་པ་དེ་བཞིན་དུ། ཚེ་འདི་ལ་དགེ་བ་ལ་སོགས་པའི་འདུ་བྱེད་དང་ལྡན་པའི་སེམས་
[348b.5]ཀྱང་འཇིག་རྟེན་ཕ་རོལ་གྱི་ལུས་ལ་གནས་པའི་སེམས་དེ་དང་རྗེས་སུ་མཐུན་པའི་འདོད་ཆགས་ལ་སོགས་པའི་རྒྱུ་ཡིན་པའི་ཕྱིར་སྐྱེ་བ་སྔ་མ་གོམས་པའི་སྟོབས་ཀྱིས་འཇིག་རྟེན་འདིའི་འདོད་ཆགས་ལ་སོགས་པ་འབྱུང་བ་ཡིན་ནོ། །དེ་བས་ན་ཐོག་མ་མེད་པའི་སེམས་ཀྱི་རྒྱུན་ལ་སྐྱེ་བ་དང་འཆི་བ་ལ་
[348b.6]སོགས་པ་གཅིག་ནས་གཅིག་ཏུ་བརྒྱུད་པ་གྲུབ་པའི་ཕྱིར་གོམས་པ་གྲུབ་པས་ཤེས་རབ་དང་ཡིད་གཞུངས་པ་ལ་སོགས་པའི་ཡོན་ཏན་ཐམས་ཅད་གོམས་པ་ལས་ཡིན་ནོ། །དེའི་ཕྱིར་ཐམས་ཅད་མཁྱེན་པ་འབྱུང་དུ་རུང་བ་ཡིན་ནོ། །འདིར་རྩོད་པར་བྱེད་པས། གལ་ཏེ་གོམས་པས་ཁྱད་ཡིན་ཡང་། །
[348b.7]མཆོངས་དང་ཆུ་ཡི་དྲོད་བཞིན་དུ། །རང་བཞིན་ལས་འདས་མིན་ཞེ་ན། །ཞེས་བྱ་བ་སྨྲས་ཏེ། དེ་ལྟར་ནི་འགྱུར་མོད་ཀྱི་སྐྱེ་ཞིང་སྐྱེ་བར་གོམས་པ་ཡིན་མོད་ཀྱི་དེ་ལྟ་ན་ཡང་ཤེས་རབ་ལ་སོགས་པ་རབ་ཀྱི་མཐར་ཕྱིན་པ་ཕུལ་དུ་བྱུང་བར་མི་འགྱུར་ཏེ། སོ་སོར་ངེས་པའི་ཁྱད་པར་མཐོང་བའི་ཕྱིར་
[349a]
[349a.1]མཆོངས་པ་དང་ཆུ་ཚན་བཞིན་ནོ། །དེ་བས་ན་གོམས་པས་སོ་སོར་ངེས་པའི་ཁྱད་པར་ཡོད་ཀྱང་རང་བཞིན་ལས་འདས་པ་ཐམས་ཅད་མྱོང་བར་མི་འགྱུར་རོ་ཞེ་ན་འདིར་ལན་བཏབ་པ། དེ་བྱས་གྱུར་ན་ཡང་གལ་ཏེ། །འབད་རྩོལ་ལ་ནི་ལྟོས་པ་དང་། །བརྟེན་མིན་རྟེན་ཅན་དུ་གྱུར་
[349a.2]ན། །ཁྱད་པར་ཉིད་ནི་མི་འཕེལ་ཏེ། །རང་བཞིན་དག་ནི་དེ་ལྟ་མིན། །གང་ཕྱིར་ནུས་ཅན་སྒྲུབ་བྱེད་རྣམས། །ཁྱད་པར་ཕྱི་མ་དག་ལ་ནི། །ནུས་པ་མེད་པ་ཉིད་ཕྱིར་དང་། །རྟག་ཏུ་རྟེན་གནས་མེད་ཕྱིར་རོ། །ཞེས་བྱ་བ་ལ། ཁྱད་པར་ཞེས་བྱ་བ་རབ་ཀྱི་མཐར་ཕྱིན་མེད་པར་གནས་པའི་ཆར་གྱུར་པ་ནི་མ་ཡིན་
[349a.3]ཏེ། འདི་ལྟར་དེའི་ཁྱད་པར་མཆོངས་པ་བཞིན་གོམས་པར་བྱས་པ་ནི། གལ་ཏེ་སླར་ཡང་དུས་ཕྱིས་རང་གནས་པ་འབད་པ་ལ་ལྟོས་པར་བྱེད་པ་མ་ཡིན་ཏེ། འདི་ལྟར་འབད་པས་བོགས་ཕྱུང་བའི་མཆོངས་པ་ནི་སླར་འབད་པ་ལ་ལྟོས་པ་དང་། གཞན་ནི་བརྟན་པ་མ་ཡིན་པའི་རྟེན་ཅན་དུ་གྱུར་པ་ཆུ་ཚན་
[349a.4]བཞིན་ནོ་ཞེ་ན། དེ་ལྟ་ན་ནི་ཤེས་རབ་ཀྱི་ཁྱད་པར་ཡང་རབ་ཀྱི་མཐར་ཕྱིན་པར་མི་འགྱུར་བ་ནི། འདི་ལྟར་རབ་ཀྱི་མཐར་མ་ཕྱིན་པར་གནས་པའི་ཆ་ཉིད་སླར་འབད་པ་ལ་ལྟོས་པ་དང་། མི་བརྟེན་པ་ལ་བརྟེན་པས་ཁྱབ་ཀྱི། ཐུགས་རྗེ་ལ་སོགས་པ་ཡིད་ཀྱི་ཡོན་ཏན་རྣམས་བརྟན་པ་ལ་བརྟེན་པ་ཉིད་དང་། སླར་
[349a.5]འབད་པ་ལ་ལྟོས་པ་མེད་པའི་ཕྱིར་མཐར་ཕྱིན་པ་ཉིད་དུ་འགྱུར་རོ། །སླར་ཡང་འབད་པ་ལ་ལྟོས་པ་ཅན་གང་ཡིན་པ་དེ་ནི་ངོ་བོ་ཉིད་དུ་མི་འགྱུར་བ་དེ་བས་ན་གཏན་ཚིགས་འདི་ནི་ཁྱད་པར་དང་བཅས་པ་སྟེ། གང་བརྟན་པ་ལ་བརྟེན་པ་དང་། ངོ་བོ་ཉིད་ཡིན་པ་དེ་ནི་མཐར་ཕྱིན་པ་ཅན་ཏེ། དཔེར་ན་
[349a.6]གཙང་སྦྲ་ཅན་དང་། ཐོད་པ་ཅན་ལ་མི་གཙང་བ་བཞིན་ནོ། །སླར་འབད་པ་ཡོད་ཀྱང་མཆོངས་པ་ཅིའི་ཕྱིར་མཐར་ཕྱིན་པར་མི་འགྱུར་ཞེ་ན། མཆོངས་པ་ལ་སོགས་པ་སྔར་བོགས་ཕྱུང་བ་དེ་ཉིད་ལ་ཕན་འདོགས་པར་ནུས་པ་གང་ཡིན་པ་དེ་དག་སྒྲུབ་པར་བྱེད་པ་རྣམས་ཏེ། ཁྱད་པར་ཕྱི་
[349a.7]མ་དག་ལ་ནི་མཆོངས་པ་རབ་ཀྱི་མཐར་ཕྱིན་པར་མི་འགྱུར་ཏེ་ནུས་པ་མེད་པ་ཉིད་ཀྱི་ཕྱིར་རོ། །ཆུའི་རྟེན་ཡང་རྟག་ཏུ་མི་གནས་པའི་ཕྱིར་རོ། །འབད་པ་ལས་ཀྱང་ཆུའི་ཚ་བའི་ངོ་བོ་ཉིད་དང་། མཆོངས་པ་སོ་སོར་ངེས་པ་འཕེལ་བར་མི་འགྱུར་རམ་ཞེ་ན། དེའི་ཕྱིར། ཁྱད་པར་འཕེལ་བ་
[349b]
[349b.1]ཡིན་ན་ཡང་། །རང་བཞིན་མིན་ཕྱིར་གང་གི་ཚེ། །བོགས་ཕྱུང་སླར་འབད་ལ་མི་ལྟོས། །རྩོལ་གཞན་ཁྱད་པར་བྱེད་པར་འགྱུར། །ཞེས་བྱ་བ་ལ། སླར་འབད་པ་ལ་ལྟོས་པའི་ཁྱད་པར་གང་ཡིན་པ་དེ། གལ་ཏེ་འཕེལ་བར་འགྱུར་བ་དེ་ལྟ་ན་ཡང་མཆོངས་པ་ལ་སོགས་པ་དེའི་ངོ་བོ་ཉིད་དུ་མི་འགྱུར་ཏེ། རྒྱུ་
[349b.2]གཞན་ལ་ལྟོས་པའི་ངོ་བོ་ཉིད་ཡིན་པའི་ཕྱིར། རང་གི་ངོ་བོ་ཉིད་ནི་རང་གི་ངང་གིས་འཇུག་པ་ལ་ཐ་སྙད་འདོགས་པའི་ཕྱིར་རོ། །དེ་བས་ན་མཆོངས་པ་ལ་སོགས་པའི་ཁྱད་པར་ངོ་བོ་ཉིད་མ་ཡིན་པའི་ཕྱིར་འཕེལ་བར་འགྱུར་ཡང་ཕུལ་དུ་བྱུང་བའི་འཕེལ་བ་མ་ཡིན་ནོ་ཞེས་བྱ་བ་ལྷག་མའོ། །གང་
[349b.3]གི་ཚེ་ཡང་ལན་ཅིག་བོགས་ཕྱུང་བའི་ཡིད་ཀྱི་ཡོན་ཏན་ནི་བརྩེ་བ་ལ་སོགས་པའི་འབད་པ་ལ་མི་ལྟོས་པར་རང་ཉིད་གནས་པ་དེའི་ཚེ་རྩོལ་བ་གཞན་ཐུགས་རྗེ་ལ་སོགས་པ་ལ་གནས་པའི་ཁྱད་པར་གྱི་བྱེད་པ་པོར་མི་འགྱུར་རོ། །དེ་ལྟར་འགྱུར་མོད་ཀྱི་སྙིང་རྗེ་ལ་སོགས་པ་ནི་སླར་ཡང་འབད་པ་ལ་ལྟོས་
[349b.4]པས་ཡིན་གྱི། ངང་གིས་འཇུག་པ་མ་ཡིན་ཏེ། དཔེར་ན་མཆོངས་པ་སླར་འབད་པ་ལ་ལྟོས་པ་བཞིན་ནོ་ཞེ་ན། འདིར་སྨྲས་པ། སེམས་ལ་བརྩེ་སོགས་གོམས་སྐྱེས་པ། །རང་གི་ངང་གིས་འཇུག་འགྱུར་ཏེ། །མེ་ལ་སོགས་ལ་ཤིང་དག་དང་། །དངུལ་ཆུ་གསེར་ལ་སོགས་པ་བཞིན། །ཞེས་བྱ་བ་
[349b.5]ལ། དཔེར་ན་མེ་ཡིས་བྱས་པའི་ཤིང་གི་བྱེ་བྲག་ཚིག་པ་ལ་སོགས་པའི་མཚན་ཉིད་ནི་སླར་ཡང་རྩོལ་བ་ལ་མི་ལྟོས་པར་རང་གི་ངང་གིས་འཇུག་པ་དང་། དངུལ་ཆུ་སྦྱངས་པ་དང་། གཟུང་བ་ལ་སོགས་པའི་མཚན་ཉིད་དང་། གསེར་སྲེག་པ་ལ་སོགས་པར་བྱས་པ་ནི། སླར་རྩོལ་བ་ལ་ལྟོས་པ་དེ་
[349b.6]བཞིན་དུ་སེམས་སྔ་མ་སྔ་མར་གོམས་པ་ལས་སྐྱེས་པའི་སྙིང་རྗེ་ལ་སོགས་པ་ཡང་རང་གི་ངང་ཁོ་ནས་འཇུག་གི་ལྡོག་པའི་ཆ་ཅན་ནི་མ་ཡིན་ནོ། །དེ་དག་གིས་ནི་བརྩེ་བ་རང་གི་ངང་གིས་འཇུག་པར་བརྗོད་དོ། །འོན་ཏེ་བརྩེ་བ་ལ་སོགས་པ་ཆུ་ཚན་བཞིན་རང་གི་ངོ་བོ་ཉིད་མ་ཡིན་པའི་ཕྱིར་རབ་ཀྱི་མཐར་
[349b.7]འབྱུང་བ་མ་ཡིན་ནོ་ཞེ་ན། སྨྲས་པ། དེའི་ཕྱིར་དེ་རྣམས་སྐྱེས་ཡོན་ཏན། །དེ་ནི་ངོ་བོ་ཉིད་སྐྱེར་འགྱུར། །དེ་ལས་འབད་རྩོལ་ཕྱི་མ་རྣམས། །ཁྱད་པར་བོགས་འབྱིན་བྱེད་པ་ཡིན། །ཞེས་བྱ་བ་ལ། དེའི་ཕྱིར་ཏེ་རང་གི་ངང་གིས་འཇུག་པའི་ཕྱིར་བརྩེ་བ་ལ་སོགས་པ་དེ་རྣམས་སྐྱེས་པའི་ཡོན་ཏན་གཡེར་
[350a]
[350a.1]བག་ཅན་ལ་སོགས་པ་ནི་ངོ་བོ་ཉིད་ཁོ་ནར་འགྱུར་ཏེ། སྔར་གྱི་རྩོལ་བས་བརྩེ་བ་བསྐྱེད་པ་དེ་ལས་འབད་རྩོལ་ཕྱི་མའི་ཕྱི་མ་གོམས་པ་ཁྱད་པར་དུ་བོགས་འབྱིན་པའི་བྱེད་པ་པོར་འགྱུར་བ་དེ་བས་ན། བརྩེ་བ་ལ་སོགས་པ་ནི་མཐར་ཕྱིན་པ་མེད་པའི་བདག་ཉིད་མ་ཡིན་ནོ། །བརྩེ་བ་ལ་
[350a.2]སོགས་པ་ནི། ལན་དུ་ཕན་འདོགས་པ་ལ་ལྟོས་པ་དང་བཅས་པ་མ་ཡིན་ནམ། གོམས་པ་སྔོན་དུ་འགྲོ་བ་ཅན་ཙམ་ནི་མ་ཡིན་པའི་ཕྱིར། གནོད་པ་བྱེད་པའི་ཞེ་སྡང་ལ་སོགས་པ་བཟློག་པའི་ཆེད་ཡིན་ཏེ། སྔར་གོམས་པར་བྱས་པའི་སྙིང་རྗེ་འབད་རྩོལ་གཞན་གྱིས་བསྟན་པའི་ཕྱིར་རོ་ཞེ་ན། གང་ཕྱིར་
[350a.3]བརྩེ་བ་ལ་སོགས་བློ། །རིགས་མཚུངས་ས་བོན་སྔ་མ་ལས། །འཕེལ་བ་ཅན་གྱུར་དེ་དག་གི། །གོམས་པ་ཡོད་ན་ཅི་ཕྱིར་གནས། །ཞེས་བྱ་བ་ལ། གང་གི་ཕྱིར་རིགས་མཚུངས་པ་ལ་སོགས་པས་བོགས་ཕྱུང་བའི་ས་བོན་སྔ་མ་བརྩེ་བ་ལ་སོགས་པ་གོམས་པ་དེ་ལས། འཕེལ་བ་སྟེ་རབ་ཀྱི་མཐར་
[350a.4]ཕྱིན་པ་གང་ལ་ཡོད་པ་དེ་ནི་བརྩེ་བ་ལ་སོགས་པའི་བློ་ཡིན་པ་དེའི་ཕྱིར་དེ་དག་གི་གོམས་པ་ཡོད་ན་ཅིའི་ཕྱིར་གནས་ཏེ་མི་གནས་ཞེས་བྱ་བའི་ཐ་ཚིག་གོ། །འདིའི་དགོངས་པ་ནི་འདི་ཡིན་ཏེ། བརྩེ་བ་ལ་སོགས་པ་ཉིད་ནི་བརྩེ་བ་ལ་སོགས་པ་གོམས་པ་ལས་སྐྱེས་པ་ཡིན་གྱི། ལན་དུ་ཕན་འདོགས་པ་ལ་
[350a.5]སོགས་པ་ལ་ལྟོས་པ་ནི་མ་ཡིན་ནོ། །དེ་ལྟ་ན་ཡང་དྲན་པ་དང་ཐོས་པས་ཀྱང་བརྩེ་བ་ལ་སོགས་པ་འཇུག་སྟེ། བརྩེ་བ་ལ་སོགས་པས་ཞིང་དུ་བྱས་པའི་རྒྱུད་རྣམས་མི་གསར་དུ་གནོད་པ་བྱེད་པའི་སྲོག་ཆགས་ལ་བརྩེ་བ་ཆུང་བར་མི་འགྱུར་རོ། །དེའི་ཕྱིར་གོམས་པ་དང་ལྡན་པ་སེམས་ལ་ཅིའི་ཕྱིར་
[350a.6]བརྩེ་བ་ལ་སོགས་པ་དམན་པར་ཅི་སྟེ་འགྱུར། མཆོངས་པའི་ཡང་གོམས་པ་རབ་ཀྱི་མཐར་ཕྱིན་པའི་རྒྱུ་ཡོད་པ་མ་ཡིན་ནམ། དེས་ན་དེ་ཡང་རབ་ཀྱི་མཐར་ཕྱིན་པར་ཤེས་རབ་ལ་སོགས་པ་བཞིན་དུ་འགྱུར་རོ་ཞེ་ན། སྨས་པ། དེ་ལྟར་མཆོངས་ཉིད་ལས་མཆོངས་མིན། །དེ་རྒྱུ་སྟོབས་དང་འབད་
[350a.7]རྩོལ་གྱི། །ནུས་པ་ངེས་པ་ཉིད་ཀྱི་ཕྱིར། །མཆོངས་པ་ངེས་པའི་བདག་ཉིད་ཡིན། །ཞེས་བྱ་བ་ལ། སྙིང་རྗེ་ལ་སོགས་པ་རིགས་པ་མཚུངས་པ་ལས་བརྩེ་བ་ལ་སོགས་པ་སྐྱེ་བ་བཞིན། མཆོངས་པ་ཉིད་ལས་མཆོངས་པ་འབྱུང་བ་མ་ཡིན་གྱི། འོན་ཀྱང་སྟོབས་དང་རྩོལ་བ་དག་ལས་མཆོངས་པ་འབྱུང་སྟེ།
[350b]
[350b.1]འདི་ལྟར་མཆོངས་པ་ལེགས་པར་བྱང་ཡང་སྟོབས་དང་རྩོལ་བ་མེད་པར་མཆོངས་ནུས་པ་མ་ཡིན་ནོ། །དེས་མཆོངས་པའི་རྒྱུ་སྟོབས་དང་། རྩོལ་བ་དག་ནི་ནུས་པ་ངེས་པའི་ཕྱིར་མཆོངས་པ་ཡང་གནས་པ་ངེས་པའི་རང་བཞིན་ཉིད་ཡིན་ནོ། །མཆོངས་པའི་ཡུལ་ཅན་གྱི་གོམས་པ་ཉིད་ལས་མཆོངས་
[350b.2]པ་འབྱུང་བ་མ་ཡིན་ནམ་གཞན་དུ་ན་སྟོབས་དང་རྩོལ་བ་ནི་སྔར་ཡོད་པའི་ཕྱིར་དང་པོ་ཉིད་དུ་མཆོངས་པར་འགྱུར་རོ། །འོན་ཏེ་སྟོབས་ཉིད་སྔར་མེད་ལ། གོམས་པ་ཉིད་ལས་སྟོབས་འགྲུབ་པའི་ཕྱིར། སྔར་མཆོངས་པ་མ་ཡིན་ན་ནི་དེ་ལྟ་ན། རང་གི་རིགས་ཀྱི་མཆོངས་པ་བསྐྱེད་ཀྱང་མཆོངས་པ་རབ་
[350b.3]ཀྱི་མཐར་ཕྱིན་པར་མི་འགྱུར་བ་བཞིན་དུ། སྙིང་རྗེ་ལ་སོགས་པ་ཡང་མཐར་ཕྱིན་པར་མི་འགྱུར་རོ་ཞེ་ན། འདིར་སྨྲས་པ། ཕྱི་ནས་བཞིན་དུ་དེ་དང་པོར། །མཆོངས་མིན་ལུས་ནི་ནུས་མེད་ཕྱིར། །རྩོལ་བས་རིམ་གྱིས་མི་ནུས་པ། །བསལ་ན་རང་སྟོབས་ངེས་པ་ཡིན། །ཞེས་བྱ་བ་ལ། འདིའི་དོན་
[350b.4]ནི་འདི་ཡིན་ཏེ། གོམས་པ་ལས་སྟོབས་སྐྱེ་བ་མ་ཡིན་གྱི། འོན་ཀྱང་སྟོབས་ཡོད་པར་གྱུར་ཀྱང་བད་ཀན་ལ་སོགས་པས་བཅོམ་ནས་མཆོངས་པ་མི་ནུས་པ་ཡིན་ནོ་ཞེ་ན། དེ་བས་ན་སྐྱེས་བུ་དེ་བད་ཀན་ལ་སོགས་པས་ལུས་ནུས་པ་མེད་པར་བསྐྱེད་པའི་ཕྱིར་མཆོངས་པར་མི་འགྱུར་ལ་ཕྱིས་གོམས་པ་
[350b.5]ཇི་ལྟ་བ་བཞིན་དུ་མཆོངས་པར་འགྱུར་རོ། །འོན་ཏེ་བཅུད་ཀྱིས་ལེན་དང་ཉེ་བར་སྦྱོར་བས་སྟོབས་དང་ལྡན་པར་འགྱུར་བ་དེ་ལྟ་ན་ཡང་འོན་ཏེ་བཅུད་ཀྱིས་ལེན་མི་ནུས་པ་ངེས་པ་ལས་སྟོབས་ངེས་པར་གདོན་མི་ཟ་བར་འགྱུར་ཏེ། འདི་ལྟར་མི་དང་སྤྲེའུ་དག་མཚུངས་པར་མཆོངས་པ་ཡང་
[350b.6]མཆོངས་པ་མཚུངས་པ་ནི་མ་ཡིན་ནོ། །དེའི་ཕྱིར་གོམས་པ་ཡོད་ཀྱང་མངལ་དང་རིགས་ཀྱི་སྟོབས་ལ་ལྟོས་པ་ཁོ་ན་ལས་མཆོངས་པ་འབྱུང་གི །གོམས་པ་ཙམ་ལ་ལྟོས་པ་ནི་མ་ཡིན་ནོ། །སྙིང་རྗེ་ལ་སོགས་པ་རྣམས་ནི་རང་གི་རིགས་གོམས་པ་ཁོ་ན་ལ་ལྟོས་པ་ཉིད་དོ། །གལ་ཏེ་དེ་ལྟར་
[350b.7]སྔར་རང་གི་རིགས་ཀྱི་བག་ཆགས་ཙམ་ལ་ལྟོས་ནས་བརྩེ་བ་ལ་སོགས་པ་འབྱུང་བ་དེ་ལྟ་ན་ནི་འཁོར་བ་ཡང་ཐོག་མ་མེད་པའི་ཕྱིར་བརྩེ་བ་ལ་སོགས་པའི་རང་བཞིན་ཕུལ་དུ་བྱུང་བར་འགྱུར་ན། ཐམས་ཅད་སྙིང་རྗེ་དང་ལྡན་པ་མ་ཡིན་པའི་ཕྱིར། སྙིང་རྗེ་རང་གི་རིགས་ཀྱི་ས་བོན་ལས་བྱུང་
[351a]
[351a.1]བ་མ་ཡིན་ནོ་ཞེ་ན། འདིར་སྨྲས་པ། བརྩེ་བ་རང་ས་བོན་ལས་བྱུང་། །གལ་ཏེ་རང་ས་བོན་འབྱུང་ཅན། །མི་མཐུན་ཕྱོགས་ཀྱིས་གནོད་མེད་ན། སེམས་ལ་དེ་དག་ཉིད་ཐོབ་འགྱུར། །ཞེས་བྱ་བ་ལ། གལ་ཏེ་བརྩེ་བ་རང་གི་ས་བོན་སྙིང་རྗེ་གོམས་པ་བོགས་བྱུང་བ་ལས་བྱུང་བ་གང་ལ་
[351a.2]ཡོད་པའི་བརྩེ་བ་དེ་དུས་ཐོག་མ་མེད་པ་ཡིན་པ་དེ་ལྟ་ན་བརྩེ་བའི་བདག་ཉིད་དུ་མི་འགྱུར་ཏེ། རང་གི་རྒྱུད་ལ་སྐྱེས་པའི་སྡང་བ་ལ་སོགས་པས་གནོད་པའི་ཕྱིར་རོ། །གལ་ཏེ་ཡང་རང་གི་ས་བོན་ལས་བྱུང་བའི་མི་མཐུན་ཕྱོགས་སྡང་བ་ལ་སོགས་པས་གནོད་པ་མེད་ཅིང་རྒྱུན་མི་འཆད་པར་སྙིང་རྗེ་གོམས་པ་
[351a.3]དེའི་ཚེ། བསྟན་པར་འགྱུར་བའི་སེམས་ལ་རྒྱུན་མི་འཆད་པར་གོམས་པས་ཞེ་སྡང་ལ་སོགས་པ་བཀག་པར་གྱུར་ན། དེའི་བདག་ཉིད་ཕུལ་དུ་བྱུང་བར་འགྱུར་རོ་ཞེས་ཁས་བླངས་པ་འདི་དག་རིགས་པ་ཡིན་ཏེ། འདི་ལྟར་གོམས་པ་སྔ་མ་རྣམས། །བརྩེ་བ་དང་ཆགས་བྲལ་ལ་སོགས། །སེམས་ཀྱི་
[351a.4]ཆོས་ཉིད་གཞན་དག་ནི། །གཡེར་བག་ཅན་གྱི་རྩ་བ་ཡིན། །ཞེས་བྱ་བ་ལ། བརྩེ་བ་ལ་གོམས་པ་སྔ་མ་སྔ་མ་ནི་བརྩེ་བ་ལ་སོགས་པ་ཕྱི་མ་ཕྱི་མའི་སེམས་ཀྱི་ཆོས་གསལ་བར་བྱེད་པའི་རྒྱུའི་རྩ་བ་ཡིན་གྱི། སྐྱེད་པར་བྱེད་པའི་རྒྱུ་ནི་མ་ཡིན་ཏེ། བརྩེ་བ་ལ་སོགས་པ་གྲུབ་པ་ལ་ནི་གཡེར་བག་ཅན་
[351a.5]ཁོ་ནར་གོམས་པས་བྱེད་པ་ཡིན་གྱི། སྐྱེད་པར་བྱེད་པ་མ་ཡིན་ཏེ། སྔ་ནས་ཡོད་པའི་ཕྱིར་རོ། །དེ་བས་ན་རང་གི་དོན་འདོད་པ་མེད་ཅིང་། གཞན་གྱི་དོན་ཁས་བླངས་པའི་བརྩེ་བའི་བདག་ཉིད་གོམས་པ་ཁོ་ན་ལས་ཡིན་ནོ་ཞེས་བསྟན་པའི་ཕྱིར། གོམས་ནས་བརྩེ་བའི་བདག་ཉིད་ཅན། །མི་གཙང་
[351a.6]ཆགས་དང་ཆགས་བྲལ་བཞིན། །ཞེས་བྱ་བ་སྨོས་ཏེ། རྟག་པ་བརྩེ་བ་ལ་གོམས་པར་འདོད་པས་གོམས་པ་ཕུལ་དུ་བྱུང་བ་ལས་བརྩེ་བའི་བདག་ཉིད་ཅན་སྐྱེ་སྟེ། དཔེར་ན་སྐྱེས་བུ་ལ་ལ་སྐྱེ་བའི་ལས་གོམས་པ་ལས་མི་གཙང་བ་བསྐྱེད་པ་བཞིན་དང་། མི་མཐུན་པའི་ཕྱོགས་ཀྱིས་གནོད་པར་མ་གྱུར་
[351a.7]པའི་མི་གཙང་བ་དེའི་བདག་ཉིད་དུ་འགྱུར་ཏེ། འདི་ལྟར་མི་གཙང་བ་མེད་པ་ཉིད་ཡོད་པར་གྱུར་ན། ཉེ་བར་བླང་བར་བྱ་བ་མ་ཡིན་པ་ཅུང་ཟད་ཀྱང་མི་སྣང་བ་བཞིན་དང་། དེ་བཞིན་དུ་ཆགས་པ་དང་བྲལ་བ་དང་། ཆགས་པ་ཉིད་ཀྱང་གོམས་པ་ཉིད་ལས་དེའི་བདག་ཉིད་དུ་འགྱུར་བ་བཞིན་ནོ། །བརྩེ་བ་
[351b]
[351b.1]དང་ལྡན་པ་གཞན་གྱི་སྡུག་བསྔལ་དབྲལ་བར་འདོད་པས། རང་གི་སྡུག་བསྔལ་སྤང་བར་བྱ་བའི་དོན་དུ་བརྩོན་པར་འགྱུར་རོ་ཞེས་བསྟན་པའི་ཕྱིར། བརྩེ་ལྡན་སྡུག་བསྔལ་གཞོམ་པའི་ཕྱིར། །ཐབས་རྣམས་ལ་ནི་མངོན་སྦྱོར་མཛད། །ཅེས་བྱ་བ་སྨོས་ཏེ། བརྩེ་བ་དང་ལྡན་པས་བདག་དང་གཞན་གྱི་
[351b.2]སྡུག་བསྔལ་དབྲལ་བར་བྱ་བའི་ཕྱིར་འབད་པར་བྱ་བར་འོས་ཏེ། བརྩེ་བ་དང་ལྡན་པ་རང་གི་སྡུག་བསྔལ་བྲལ་བ་མེད་པར་གཞན་གྱི་སྡུག་བསྔལ་བཟློག་པར་མི་ནུས་པའི་ཕྱིར་རོ། །དེའི་ཕྱིར་རང་གི་སྡུག་བསྔལ་བྲལ་བར་མངོན་དུ་བྱེད་པ་དང་། ཤེས་བྱ་ཐམས་ཅད་མངོན་དུ་བྱེད་པས་བརྩེ་བ་དང་ལྡན་
[351b.3]པས་ཐབས་ལ་མངོན་པར་སྦྱོར་བར་བྱེད་དོ། །དེ་ཅིའི་ཕྱིར་ཞེ་ན། རང་དང་གཞན་གྱི་སྡུག་བསྔལ་གཞོམ་པའི་ཕྱིར་རོ། །གང་གི་ཕྱིར། ཐབས་བྱུང་ལྐོག་གྱུར་དེའི་རྒྱུ་ཅན། །དེ་བཤད་པར་ནི་དཀའ་བའི་ཕྱིར། །ཞེས་བྱ་བ་ལ་ལྐོག་ཏུ་གྱུར་པའི་ཐབས་ལས་བྱུང་བ་ནི་མཐོ་རིས་དང་ཐར་པའི་མཚན་
[351b.4]ཉིད་དོ། །དེ་དག་རྒྱུ་ནི་སྦྱིན་པ་ལ་སོགས་པ་དང་བདག་མེད་པར་མཐོང་བ་གང་ཡིན་པའི་སྐྱེས་བུ་དེའི་མཐོ་རིས་དང་ཐར་པ་གཞན་ལ་བསྟན་པར་དཀའ་བ་སྟེ། དེ་ལ་དེའི་ནུས་པ་མེད་པའི་ཕྱིར་རོ། །འཕགས་པའི་བདེན་པ་བཞི་ཚད་མས་འཐད་པ་ཉིད་ལས་འཇུག་པར་འགྱུར་བ་མ་ཡིན་ནམ།
[351b.5]མངོན་སུམ་དུ་བྱེད་པས་ཅི་ཞིག་བྱ་ཞེ་ན། གལ་ཏེ་འཕགས་པའི་བདེན་པ་བཞི་རྗེས་སུ་དཔག་པས་ངེས་པ་དེ་ལྟ་ན་ཡང་དམྱལ་བ་ལ་སོགས་པ་སྐྱེད་པའི་ལས་ཀྱི་འབྲས་བུ་འཇིག་རྟེན་གྱི་ཁམས་གཞན་སྟོན་པར་མི་ནུས་པ་ཉིད་དེ། དེའི་ཕྱིར་ཐམས་ཅད་རིག་པ་མངོན་སུམ་དུ་བྱའོ། །རང་དང་
[351b.6]གཞན་གྱི་སྡུག་བསྔལ་བྲལ་བར་བྱེད་པ་དེས་སྡུག་བསྔལ་གྱི་རྒྱུ་བརྟག་པར་བྱ་སྟེ། དེ་བསྟན་པའི་ཕྱིར། ལུང་དང་རིགས་པས་རྣམ་དཔྱོད་པ། །སྡུག་བསྔལ་ཉིད་ཀྱི་ཁྱད་པར་གྱིས། །མི་རྟག་ལ་སོགས་སྡུག་བསྔལ་རྒྱུའི། །ངོ་བོ་དེ་ཡང་བརྟག་པ་མཛད། །ཅེས་བྱ་བ་སྨོས་ཏེ། རིགས་པས་
[351b.7]ནི་རྗེས་སུ་དཔག་པའོ། །ལུང་ནི་རྗེས་སུ་དཔག་པའི་སྤྱོད་ཡུལ་མ་ཡིན་པ་སྟེ། དབང་པོ་ལས་འདས་པའི་དོན་ཅན་གྱི་ཤེས་པའི་རྒྱུ་ཡིན་ནོ། །ཡང་ན་ལུང་ནི་ཤེས་པ་དང་པོའི་རྒྱུ་སྟེ། དེ་ནས་དོན་ངེས་པར་བྱ་བའི་དོན་དུ་རིགས་པ་འཇུག་པ་ཡིན་གྱི། ལུང་ཙམ་ལས་ངེས་པ་ནི་མ་ཡིན་ནོ། །དེས་
[352a]
[352a.1]ན་དང་པོར་ལུང་གིས་དོན་མཐོང་བར་འགྱུར་ལ། དེ་ནས་རིགས་པས་དོན་དེ་བསྟན་པར་བྱེད་ཅིང་། བསྟན་པར་བྱས་པའི་དོན་ལ་བསྒོམས་པས་མངོན་སུམ་དུ་བྱེད་དོ། །དེ་ལ་ལུང་དང་རིགས་པ་དག་གིས་དཔྱོད་པ་ནི་རྒྱུ་དང་ལྡན་པའི་སྡུག་བསྔལ་བྲལ་བར་བྱ་བའི་དོན་
[352a.2]དུ་དང་པོ་རེ་ཞིག་སྡུག་བསྔལ་གྱི་རྒྱུ་ཉིད་རྟོག་པར་བྱེད་དོ། །སྡུག་བསྔལ་གྱི་རྒྱུ་དཔྱད་ནས་ཡང་ཟློག་པར་ནུས་པ་ཉིད་དཔྱད་པའི་དོན་དུ། སྡུག་བསྔལ་གྱི་རྒྱུ་དེ་ཉིད་མི་རྟག་པ་ལ་སོགས་པར་དཔྱད་པར་བྱའོ། །མི་རྟག་པ་ལ་སོགས་པའི་རང་བཞིན་གྱིས་རྒྱུ་མ་དཔྱད་ན་སྡུག་བསྔལ་སྤང་བའི་ཕྱིར་འབད་པ་ཉིད་
[352a.3]དུ་མི་འགྱུར་ཏེ་རྒྱུ་མེད་པའམ། རྒྱུ་རྟག་པ་ཅན་དུ་གྱུར་པ་ནི་སྡུག་བསྔལ་གྱི་རྒྱུ་ཟློག་པའི་དོན་དུ་འབད་པ་འབྲས་བུ་མེད་པར་འགྱུར་ཏེ། འདི་ལྟར་སྡུག་བསྔལ་དང་། སྡུག་བསྔལ་གྱི་རྒྱུ་དག་རྒྱུ་མེད་ལ་ཟད་པར་མི་འགྱུར་ལ། རྟག་ན་ཡང་ཇི་ལྟར་ཟད་པར་འགྱུར། རྒྱུ་མ་ཟད་པར་སྡུག་བསྔལ་ཟད་
[352a.4]པར་མི་ནུས་པའི་ཕྱིར། སྡུག་བསྔལ་གྱི་རྒྱུ་མི་རྟག་པ་ལ་སོགས་པའི་རྣམ་པས་བརྟག་པར་བྱའོ། །ཇི་སྟེ་སྡུག་བསྔལ་གྱི་རྒྱུ་མི་རྟག་པའོ་ཞེས་ཇི་ལྟར་ངེས་པར་བྱེད་ཅེ་ན། འདིར་སྨྲས་པ། སྡུག་བསྔལ་ཉིད་ཀྱི་ཁྱད་པར་གྱིས་ཏེ། མི་རྟག་པ་ལ་སོགས་པ་རྣམས་ཀྱིས་སྡུག་བསྔལ་གྱི་རྒྱུ་མི་
[352a.5]རྟག་པར་བྱ་སྟེ། ཇི་ལྟར་སྡུག་བསྔལ་མི་རྟག་པ་ཡིན་པ་དེ་ལྟར་ཕྱིས་བཤད་པར་བྱའོ། །དེ་ལྟར་ནི་འགྱུར་མོད་ཀྱི་གལ་ཏེ་སྡུག་བསྔལ་མི་རྟག་པ་ཡིན་ན། མི་རྟག་པ་སྡུག་བསྔལ་གྱི་རྒྱུར་ཇི་ལྟར་འགྱུར་ཏེ། འདི་ལྟར་རྟག་པའི་རྒྱུ་ཅན་ཉིད་ཀྱི་སྡུག་བསྔལ་མི་རྟག་པར་འགྱུར་རོ་ཞེ་ན། འདིར་སྨྲས་
[352a.6]པ། གང་ཕྱིར་དེ་ལྟར་རྒྱུ་གནས་པ། །འབྲས་ལྡོག་མཐོང་བ་མེད་པ་སྟེ། །དེ་རྒྱུ་གཞོམ་ཕྱིར་དེ་ཡི་ནི། །མི་མཐུན་ཕྱོགས་ལ་བརྟག་པར་བྱེད། །ཅེས་བྱ་བ་ལ། གལ་ཏེ་དབང་ཕྱུག་ལ་སོགས་པ་རྟག་པ་ཉིད་སྡུག་བསྔལ་གྱིས་སྐྱེད་པར་བྱེད་པར་འགྱུར་བ་དེ་ལྟ་ན་ནི། རྒྱུ་དབང་ཕྱུག་ལ་སོགས་པ་
[352a.7]དེ་ལྟར་གནས་པ་སྟེ་སྡུག་བསྔལ་སྐྱེད་པར་བྱེད་པ་ཉིད་དུ་གནས་པ་ནི། འབྲས་བུ་སྡུག་བསྔལ་འཇིག་པར་མི་འགྱུར་བའི་ཕྱིར་མི་འཇིག་པའི་ངེས་པ་ཡིན་ནོ། །དེའི་ཕྱིར་སྡུག་བསྔལ་མི་རྟག་པ་ཉིད་ཡིན་ནོ། །རྒྱུ་ཡང་མི་རྟག་པ་ཉིད་དུ་ངེས་སོ། །དེ་ལྟར་འདོད་ན་གལ་ཏེ་རྒྱུ་ཟད་པ་ཉིད་ཀྱིས་
[352b]
[352b.1]སྡུག་བསྔལ་འཛད་ན། འོ་ན་ནི་རྒྱུ་ཇི་ལྟར་ཟད་པར་འགྱུར་ཏེ། རང་གི་རྒྱུ་ཟད་པས་རྒྱུ་འཛད་པར་འགྱུར་ན་ནི་དེ་ལྟ་ན་རང་གི་རྒྱུ་ཟད་པ་ཉིད་ཀྱིས་སྡུག་བསྔལ་འཛད་པའི་ཕྱིར་སྡུག་བསྔལ་འཛད་པའི་ཐབས་ལ་འཇུག་པར་བྱ་བ་མ་ཡིན་ནོ་ཞེ་ན། དེ་ནི་མ་ཡིན་ཏེ། སྡུག་བསྔལ་གྱི་རྒྱུ་
[352b.2]གཞོམ་པའི་ཕྱིར་སྡུག་བསྔལ་གྱི་རྒྱུ་དེའི་གཉེན་པོ་གང་ཡིན་པ་དེ་བརྟག་པར་བྱ་བའི་ཕྱིར་རོ། །རྒྱུ་མི་མཐུན་པའི་ཕྱོགས་ཉེ་བ་མེད་པར་ལྡོག་པ་མ་ཡིན་པས་དེ་བརྟག་པར་བྱའོ། །རྒྱུ་མེད་པ་ཉིད་ཀྱིས་ལྡོག་པར་འགྱུར་རོ་ཞེ་ན་རྒྱུ་གང་ཞིག་ཡིན། ལས་ཡིན་ནོ་ཞེ་ན་མ་རིག་པ་ལས་གཞན་དང་
[352b.3]གཞན་པའི་ལས་འབྱུང་བའི་ཕྱིར། ལས་ཟད་པ་ལས་གྲོལ་བར་མི་འགྱུར་བ་མ་ཡིན་ནམ། མ་རིག་པ་ནི་ལས་དང་། སྡུག་བསྔལ་བའི་རྒྱུ་མ་ཡིན་ནོ་ཞེས་བཤད་པར་བྱའོ། །དེའི་ཕྱིར་མ་རིག་པའི་གཉེན་པོ་བདག་མེད་པ་ལ་འབད་པར་བྱའོ། །དེ་ལྟར་ནི་འགྱུར་མོད་ཀྱི། སྡུག་བསྔལ་ལ་
[352b.4]སོ་སོར་ངེས་པའི་རྒྱུ་ཡོད་པ་མ་ཡིན་ཏེ། སྡུག་པ་དང་བྲལ་བ་ལ་སོགས་པའི་རང་བཞིན་དུ་མ་རྒྱུར་འགྱུར་བའི་ཕྱིར་རོ། །དེ་བས་ན་རྒྱུ་བཟློག་པར་མི་ནུས་སོ་ཞེ་ན། འདིར་ལན་སྨྲས་པ། བདག་དང་བདག་གིར་འཛིན་བྱས་པའི། །འདུས་བྱས་སྤྱོད་ཡུལ་ཅན་ཆགས་པ། །རྒྱུ་དེ་གནོད་པ་ཅན་
[352b.5]ཉིད་ནི། བདག་མེད་མཐོང་ན་འགལ་བ་ཡིན། ཞེས་བྱ་བ་སྟེ། བདག་དང་བདག་གིར་འཛིན་པ་ནི། ང་དང་ང་ཡིར་མངོན་པར་ཞེན་པས་བྱས་པའི་ཆགས་པ་སྡུག་བསྔལ་གྱི་རྒྱུ་སྟེ། ཆགས་པ་ལོག་ན། བདག་དང་བདག་གི་བ་ཡང་སྤང་བར་འགྱུར་བས་སྡུག་བསྔལ་མེད་པར་འགྱུར་རོ། །དེ་ལྟར་ནི་འགྱུར་མོད་
[352b.6]ཀྱི། གལ་ཏེ་བདག་དང་བདག་གི་བཅོམ་ནས་ཆགས་པ་མེད་པར་གྱུར་པ་ན། ཡིད་ལ་སྡུག་བསྔལ་མི་འབྱུང་ཡང་ལུས་ཀྱི་སྡུག་བསྔལ་བདག་ཉིད་ལ་ཡོད་པ་ཉིད་དོ་ཞེ་ན། འདིར་སྨྲས་པ། གཞན་ལ་ཕན་པར་བརྩོན་པ་དང་ལྡན་པ་ནི་བདག་ཉིད་སྡུག་བསྔལ་བར་མི་འགྱུར་ཏེ། བདག་དང་བདག་
[352b.7]གིར་མངོན་པར་ཞེན་པའི་ཕྱིར། བུ་ལ་ཆགས་པ་དང་། ལྷག་པར་རང་ལ་ཞེན་པ་ལས་ལུས་ལ་རལ་གྲི་ལ་སོགས་པས་བསྣུན་པའི་སྡུག་བསྔལ་དམིགས་པར་འགྱུར་རོ། །བདག་དང་བདག་གིར་མངོན་པར་ཞེན་པ་ཡང་འཇིག་ཚོགས་ལ་ལྟ་བ་ཡིན་པ་དེ་བས་ན། སྡུག་བསྔལ་གྱི་རྒྱུད་ནི་
[353a]
[353a.1]འཇིག་ཚོགས་ལ་ལྟ་བ་ཡིན་ནོ། །འདུས་བྱས་ནི་ཟག་པ་དང་བཅས་པའི་དངོས་པོ་སྟེ། དེའི་སྤྱོད་ཡུལ་ཅན་འཇིག་ཚོགས་ལ་ལྟ་བའོ། །སྡུག་བསྔལ་གྱི་རྒྱུར་གྱུར་པའི་འཇིག་ཚོགས་ལ་ལྟ་བ་ལ་གནོད་པ་ཅན་བདག་མེད་པ་མཐོང་བ་ནི། དེ་དང་འགལ་བ་ཡིན་ཏེ། བདག་མེད་
[353a.2]པའི་རྣམ་པ་ནི་ཆགས་པའི་རྣམ་པ་དང་འགལ་བ་ཅན་ཡིན་པའི་ཕྱིར། དེའི་གནོད་པ་ཅན་ཡིན་ཏེ། དཔེར་ན། སྣུམ་ལ་སོགས་པ་ནི་རླུང་དང་འགལ་བ་ཡིན་ནོ། །དེ་བས་ན་བདག་མེད་པ་མངོན་དུ་བྱས་པ་ལས་མི་རྟག་པའི་རྒྱུ་འཇིག་ཚོགས་ལ་ལྟ་བ་ལྡོག་པར་འགྱུར་ཏེ། བདག་དང་བདག་གིར་
[353a.3]མངོན་པར་ཞེན་པ་ལོག་ན་སྡུག་བསྔལ་ཐམས་ཅད་ལྡོག་པར་འགྱུར་བ་ཡིན་ནོ། །ཅི་སྟེ་ལུས་བཅད་པ་དང་། བསྲེགས་པ་ལ་སོགས་པས་ཉེན་ན། ཇི་ལྟར་འཆི་བ་ལ་སོགས་པའི་སྡུག་བསྔལ་མེད་པར་མི་འགྱུར་ཞེ་ན། དེ་ནི་བདེན་པ་མ་ཡིན་ཏེ། འཆི་བ་ཞེས་བྱ་བ་ནི། ལུས་གཅིག་དང་བྲལ་
[353a.4]བ་ཡིན་ཞིང་། ལུས་གཞན་དུ་འབྱུང་བ་ནི་སྐྱེ་བ་ཡིན་ཏེ། སྔ་ཕྱིའི་གནས་སྐབས་དག་གོམས་པས་བསྐྱེད་པའི་བློ་གཡེར་བག་ཅན་དྲན་པ་ཡོད་པའི་ཕྱིར་རོ། །དེའི་ཚེ་བྱིས་པ་དང་ལང་ཚོའི་དུས་སྤོང་བ་དང་། ལེན་པ་བཞིན་དང་། གོས་འདོར་བ་དང་སྤྱོད་པ་བཞིན་དེའི་ལུས་ཀྱི་སྐྱེ་བ་ཡང་ཡིན་ནོ། །
[353a.5]ཇི་ལྟར་གོམས་པ་དེ་བཞིན་དུ་འདོད་པའི་རྒྱུ་ཡིན་པ་དང་། བཏང་སྙོམས་པ་ལ་གོམས་ན་ཡང་སྡུག་བསྔལ་དང་། བདེ་བ་གོམས་པར་མི་འགྱུར་བ་བཞིན་ཏེ། དེ་བས་ན་བདག་མེད་པ་གོམས་ན་འཁྲུལ་པའི་རྒྱུ་ཐམས་ཅད་ཀྱིས་འཁྲུག་པ་མ་ཡིན་ནོ། །རྒྱུ་འདོད་ཆགས་ལ་སོགས་པ་ལས་ལོག་
[353a.6]པ་དང་། ཤེས་རབ་རྒྱས་པར་གྱུར་ན་རྣམ་པ་དུ་མ་དང་ལྡན་པའི་ཐབས་མང་པོ་མཐོང་བ་ལས་སྐྱོན་དང་ཡོན་ཏན་རྣམས་གསལ་བར་འགྱུར་བ་ཡིན་པའི་ཕྱིར། ཐམས་ཅད་རིག་པ་སྲིད་པ་ཡིན་ནོ། །གལ་ཏེ་བདག་མེད་པ་མཐོང་བ་ལས་སྡུག་བསྔལ་ཞི་བར་འགྱུར་བ་དེ་ལྟ་ན་ཡང་ཐམས་ཅད་
[353a.7]མཁྱེན་པ་ཡོད་པ་མ་ཡིན་ཏེ། གལ་ཏེ་བདག་མེད་པ་མཐོང་བ་ལས་ཐམས་ཅད་མཁྱེན་པར་འགྱུར་ན། འདོད་ཆགས་དང་བྲལ་བ་དང་རང་སངས་རྒྱས་ཀྱང་ཐམས་ཅད་མཁྱེན་པར་འགྱུར་བ་མ་ཡིན་ནམ་ཞེ་ན། འདིར་སྨྲས་པ། དུས་རིང་པོར་ཡང་རྣམ་མང་པོས། །རྣམ་པ་དུ་མར་ཐབས་
[353b]
[353b.1]གོམས་པ། །དེ་ལྟ་སྐྱོན་དང་ཡོན་ཏན་རྣམས། །རབ་ཏུ་གསལ་བ་ཉིད་འགྱུར་ཏེ། །ཐུགས་ཀྱང་གསལ་བ་དེ་ཡི་ཕྱིར། །རྒྱུ་ཡི་བག་ཆགས་སྤངས་པ་ནི། །ཐུབ་ཆེན་གཞན་དོན་འཇུག་ཅན་གྱི། །བསེ་རུ་སོགས་ལས་ཁྱད་འདི་ཡིན། །ཞེས་བྱ་བ་ལ། གང་འདི་བློ་གསལ་བའི་སྐྱེས་བུ་ཡང་དང་
[353b.2]ཡང་དུ་ཐབས་མང་པོ་ལ་དུས་ཡུན་རིང་པོར་གོམས་པར་བྱས་ན། དེ་ནི་ལམ་དེ་དང་དེའི་མི་མཐུན་པའི་ཕྱོགས་སྐྱོན་དང་ཡོན་ཏན་བསལ་བར་འགྱུར་རོ། །དེ་ལྟར་གོམས་པར་བྱེད་པའི་སྐྱེས་བུ་གོམས་པ་ལས། བློ་གསལ་བ་ལས་རྒྱུ་སྟེ། སྡུག་བསྔལ་གྱི་རྒྱུའི་བག་ཆགས་ཉོན་མོངས་པས་
[353b.3]བྱས་པའི་ལུས་དང་ངག་དང་བློའི་ནུས་པ་ཉམས་པའི་མཚན་ཉིད་ཅན་གྱི་སྤངས་པ་ནི། བཅོམ་ལྡན་འདས་གཞན་གྱི་དོན་དུ་འཇུག་པ་ཅན་བསེ་རུ་ལ་སོགས་པ་ལས་ཁྱད་པར་འདི་ཉིད་ཡིན་ཏེ། ཉོན་མོངས་པ་དང་ཤེས་བྱའི་སྒྲིབ་པ་སྤངས་པའི་མཚན་ཉིད་ཅན་ནོ། །ཉན་ཐོས་ལ་སོགས་པ་
[353b.4]རྣམས་ལ་ནི་ཉོན་མོངས་པའི་བག་ཆགས་ཡོད་པ་ཡིན་ནོ། །ཐབས་ནི་སྤྲོས་ན་རྣམ་པ་མང་པོ་ཡོད་ལ། དེ་ལ་དུས་ཡུན་རིང་པོར་གོམས་པ་ལས་འཁོར་བའི་སྐྱོན་དང་ཡོན་ཏན་མ་ལུས་པ་བསལ་བ་ཡིན་ནོ། །ཕྱོགས་སྔ་མ་སྐྱེ་བ་གཞན་དྲན་པ་མ་མཐོང་བ་མ་ཡིན་ནམ། དེ་མེད་པར་ལས་དང་
[353b.5]འབྲས་བུར་འབྲེལ་པར་ཇི་ལྟར་ཤེས་པ་ཡིན། གོམས་པ་ཡང་མཐོང་བ་དང་དྲན་པའི་དངོས་པོ་ལ་འཇུག་གི །ལས་དང་འབྲས་བུ་ནི་མངོན་སུམ་པ་ཡིན་ཏེ། དུས་ཡུན་རིང་པོས་ཆོད་པའི་ཕྱིར་རོ། །མངོན་སུམ་མེད་ན་རྗེས་སུ་དཔག་པས་ཀྱང་ལས་དང་འབྲས་བུ་སོ་སོར་ངེས་པ་མ་ཡིན་པ་དེ་
[353b.6]བས་ན། དེ་ལ་གོམས་པར་ཇི་ལྟར་འགྱུར། དེ་མེད་པར་ཡང་ལས་དང་འབྲས་བུ་སྤྲོས་པ་མངོན་སུམ་དུ་བྱེད་པ་ཡིན་ནོ། །འཕགས་པའི་བདེན་པ་བཞི་ནི་ཚད་མས་ཡོངས་སུ་བཅད་པའི་ཕྱིར་བསྒོམས་པས་མངོན་སུམ་དུ་བྱ་བར་ནུས་མོད་ཀྱི། འོན་ཀྱང་ཐམས་ཅད་རིག་པ་ནི་མ་ཡིན་ཏེ། འདོད་ཆགས་
[353b.7]དང་བྲལ་བ་ལ་ཡང་བདེན་པ་བཞི་རིག་པ་ཡོད་ཀྱང་ཐམས་ཅད་མཁྱེན་པ་མ་ཡིན་པའི་ཕྱིར་རོ། །དེ་ལྟར་འགྱུར་མོད་ཀྱི་ཤེས་པ་ལ་གེགས་བྱེད་པའི་ཉོན་མོངས་པ་དེ་རྣམས་དང་བྲལ་ན་གེགས་བྱེད་པ་མེད་པའི་ཕྱིར་ཤེས་བྱ་ཐམས་ཅད་མངོན་དུ་བྱེད་པར་གྲུབ་པར་འདོད་ན། དེ་ནི་མི་བདེན་ཏེ། གལ་ཏེ་སོ་སོར་
[354a]
[354a.1]ངེས་པའི་དངོས་པོ་རྣམས་ལ་ཕྱིན་ཅི་ལོག་ཏུ་རྟོག་པའི་རྒྱུ་འདོད་ཆགས་ལ་སོགས་པ་རྣམས་དང་བྲལ་བ་ལས། རུས་པའི་ལུ་གུ་རྒྱུད་ལྟ་བུ་དེ་ལ་ཡང་དག་པའི་ཤེས་པ་སྐྱེ་བར་འགྱུར་ན་ཤེས་བྱ་ཐམས་ཅད་དུ་ཇི་ལྟར་མཐོང་བར་འགྱུར། འོན་ཀྱང་སོ་སོར་ངེས་པའི་དངོས་པོ་བདག་
[354a.2]མེད་པར་མཐོང་བ་ན་བདག་མེད་པར་ཁྱད་པར་མེད་པས་ཐམས་ཅད་མཐོང་བར་འགྲུབ་པ་ཡིན་ན་ནི། དེ་ལྟ་ན་འོ་ན་ནི་བདག་ལ་སོགས་པས་སྔོན་པོ་མཐོང་བ་ན་དངོས་པོ་ཡིན་པའི་ཕྱིར། ཤེས་བྱ་ཐམས་ཅད་མངོན་སུམ་དུ་འགྱུར་རོ། །དེ་བས་ན་གང་དུ་མཐོང་བའི་རྐྱེན་འཇུག་པ་དེ་ཉིད་མཐོང་བར་ནུས་
[354a.3]ཀྱི། འདིར་ནི་བདག་མེད་པ་གང་དུ་གོམས་པ་དེ་ཡིས་ཕུང་པོ་ལྔ་རྣམས་ཀྱི་ཕྱོགས་འགའ་ལ་བདག་མེད་པ་མཐོང་བར་འགྱུར་ཏེ། ལས་དང་འབྲས་བུའི་སྤྲོས་པ་ཤེས་པ་ནི་མ་ཡིན་ནོ། །དེ་ནི་མཐའ་ཡས་པས་གོམས་པ་ཉིད་མི་འཇུག་པའི་ཕྱིར་རོ། །དེ་བས་ན་ལས་དང་འབྲས་བུ་འབྲེལ་པ་དེ་ལ་
[354a.4]རིག་བྱེད་ཉིད་ཚད་མར་འགྱུར་རོ་སྙམ་དུ་སེམས་ན། དེ་ནི་བདེན་པ་མ་ཡིན་ཏེ། གང་གི་ཕྱིར་རེ་ཞིག་བར་མ་དོའི་འཇིག་རྟེན་གྲུབ་པས་སོ། །ཇི་སྟེ་བར་མ་དོའི་འཇིག་རྟེན་ཡོད་ཀྱང་སྐྱེ་བ་གཞན་དྲན་པ་མེད་པའོ་ཞེས་སྨྲས་སོ་ཞེ་ན། སྨྲས་པ་དེ་མི་འཐད་དེ། འདི་ལྟར་གལ་ཏེ་སྐྱེ་བ་གཞན་ཡོད་ལ་སྦྱིན་
[354a.5]པ་ལ་སོགས་པ་སྔར་ཉམས་སུ་མྱོང་བ་དྲན་པ་གོམས་པ་ཉི་མ་རེ་རེར་འཕེལ་བར་གྱུར་པ་དེའི་ཚེ་ཇི་ལྟར་མི་དྲན་པ་ཡིན། དེ་མ་ཐག་ཏུ་ཉམས་སུ་མྱོང་བ་ལ་གོམས་པ་མེད་ན་ནི་དྲན་པ་མེད་པར་མཐོང་བའི་ཕྱིར་རོ། །གང་ལ་དྲན་པ་གོམས་པ་ལས་བློ་གསལ་བ་ཡོད་པ་དེ་ལ་ཡུན་རིང་དུ་འདས་པ་
[354a.6]ཡང་དྲན་པའི་ཡུལ་དུ་འགྱུར་ཏེ། འདི་ལྟར་རྒས་པའི་གནས་སྐབས་ན་བུས་པའི་ཚེ་མྱོང་བ་སྐད་ཅིག་ལ་དྲན་པ་དེ་བཞིན་དུ་གོམས་པ་ཕུལ་དུ་བྱུང་བ་ལས་སྐྱེ་བ་གཞན་དུ་མྱོང་བ་ཡང་དྲན་པའི་ཡུལ་དུ་འགྱུར་བའི་ཕྱིར་དྲན་པ་གོམས་པ་ལ་འབད་པར་བྱའོ། །དེ་ལ་ཡང་དཔེར་ན་ཡུལ་གཞན་ནས་
[354a.7]འོངས་པ་རིག་པ་དེས་ཡུལ་གཞན་དང་འབྲེལ་པས་བསྐྱེད་པའི་ཁྱད་པར་མཐོང་བ་ན། དེ་ནས་འོངས་པར་ངེས་པར་བྱེད་དེ། ལྷ་སྦྱིན་བཞིན་ཡུལ་གཞན་པ་ཡང་རྣམ་པར་གཅོད་པ་ཅན་དུ་ཤེས་པ་ཡིན་ནོ། །དེ་བཞིན་དུ་དྲན་པ་གསལ་བ་ཡོད་ན་འཇིག་རྟེན་གཞན་ནས་འོངས་པའི་སྐྱེས་བུའི་ཡུལ་
[354b]
[354b.1]ཅན་གྱི་ཤེས་པ་ཡོད་ན་སྐྱ་བ་གཞན་ཁྱད་པར་དུ་གྱུར་པ་ཡང་ཤེས་པ་ཡིན་ཏེ། འདི་ནི་ལས་འདི་དང་ཡུལ་འདི་འབྲེལ་པར་སྔོན་ནས་ཡོད་པ་དེ་ལྟ་བུའི་རྣམ་པའི་ངོ་བོ་ཉིད་དང་ལྡན་པ་ལས་སོ་སོར་ངེས་པའི་ལས་དང་འབྲས་བུར་འབྲེལ་བ་རིགས་པ་སྐྱེ་སྟེ། དཔེར་ན་དུ་བའི་ངོ་བོ་ཉིད་ཕྲ་བ་ངེས་ན་རྒྱུ་རྩྭ་དང་
[354b.2]ལོ་མ་ལ་སོགས་པའི་རང་བཞིན་ཡང་ཤེས་པར་འགྱུར་བ་ལྟ་བུའོ། །དེ་བཞིན་དུ་ལས་དང་འབྲས་བུ་དག་གི་ཁྱད་པར་ཅན་གྱི་རང་བཞིན་ཡང་ངེས་ན་རྣམ་པ་ཐམས་ཅད་རྗེས་སུ་དཔོག་གོ། །རྒྱུའི་ངོ་བོ་ཉིད་ཤེས་ན་ཡང་དེའི་འབྲས་བུའི་ངོ་བོ་ཉིད་བརྒྱུད་ནས་ཤེས་པའི་ཕྱིར་ལས་དང་འབྲས་བུའི་འབྲེལ་
[354b.3]པ་ཐམས་ཅད་ཤེས་པར་འགྱུར་རོ། །མཐོ་རིས་དང་ཐར་པའི་ལམ་ཡང་དག་པར་ཤེས་ན་ནི། བཅོམ་ལྡན་འདས་ཐམས་ཅད་མཁྱེན་པ་ཉིད་དུ་འགྱུར་ཏེ། ཕན་ཚུན་རྒྱུ་དང་འབྲས་བུ་ལས་འདས་པར་ཤེས་བྱ་ཐམས་ཅད་སྐྱེ་བ་མ་ཡིན་པའི་ཕྱིར། རྣམ་པ་དུ་མར་རྒྱུ་དང་འབྲས་བུའི་རང་བཞིན་ཤེས་
[354b.4]པ་དེས་ནི་ཤེས་བྱ་ཐམས་ཅད་རིག་པ་ལ་ཁ་ན་མ་ཐོ་བ་མེད་པ་ཡིན་ནོ། །འོ་ན་ན་ནི་གལ་ཏེ་འབྲས་བུའི་རང་བཞིན་ཤེས་པས་རྒྱུའི་རང་བཞིན་ཤེས་པ་དེ་ལྟ་ན་ནི། རྗེས་སུ་དཔག་པའི་རིག་པས་ཇི་ལྟར་ཐམས་ཅད་མཁྱེན་པར་འགྱུར་ཏེ། བཅོམ་ལྡན་འདས་མངོན་དུ་མཁྱེན་པ་ཅན་དུ་ཁས་བླངས་སོ་
[354b.5]ཞེ་ན། འདིས་ནི་ཅིར་ཡང་མི་འགྱུར་བ་ཉིད་དེ་རྣམ་པ་ཐམས་ཅད་དཔོག་པ་ནི་མངོན་སུམ་ལས་ཐ་དད་པ་མ་ཡིན་ནོ། །འདི་ལྟར་དོན་མངོན་དུ་བྱེད་པ་ཅན་གྱི་ཤེས་པ་ལ་མངོན་སུམ་ཞེས་བརྗོད་དེ། གང་གི་ཚེ་གོམས་པ་ཕུལ་དུ་བྱུང་བ་ལས་ཤེས་བྱ་མ་ལུས་པ་ཉིད་དང་། རྣམ་པ་ཐམས་ཅད་གསལ་
[354b.6]བར་སྣང་བ་དེའི་ཚེ་དེ་ཉིད་མངོན་སུམ་བཞིན་ནོ། །གང་ཡང་ཐམས་ཅད་ལ་གོམས་པ་མི་སྲིད་པས་དེ་ཇི་ལྟར་ཐམས་ཅད་མངོན་དུ་བྱེད་པར་འགྱུར་ཞེས་སྨྲས་པ་དེ་ཡང་མི་འཐད་དེ། གང་གོམས་པ་ཙམ་དེ་ཉིད་ཤེས་པ་མ་ཡིན་པའི་ཕྱིར་རོ། །འདི་ལྟར་སྒྲ་ཡོངས་སུ་ཤེས་ན་ཚད་མ་ཤེས་པ་ལ་ཚེགས་
[354b.7]མེད་པ་བཞིན་ཁ་ཅིག་ཐོས་པ་མེད་པར་ཤེས་པ་དང་། བཤད་པའི་དུས་སུ་གོམས་པར་བྱས་པ་ཉིད་རྒོལ་བ་དང་ལན་གྱི་ཚེ་འཇུག་པ་ཡང་ཡོད་དོ། །དེ་དང་འདྲ་བའི་རིགས་ཀྱི་བསྟན་བཅོས་ལ་གོམས་པར་བྱས་ན། དེའི་རིགས་ཉིད་ཀྱི་གཞུང་ཤེས་པ་མ་ཡིན་ནམ་ཞེ་ན། འཁོར་བ་ལ་རིགས་མཚུངས་པ་
[355a]
[355a.1]ཉིད་ཀྱང་ཡོད་པ་མ་ཡིན་ནམ་འདི་ལྟར་ས་ལ་སོགས་པའི་འབྱུང་བ་སྲོག་ཆགས་རྣམས་མཚུངས་པ་དང་། ལས་དང་འབྲས་བུའི་སྤྲོས་པ་དང་། སྐྱེ་བ་དང་འཇིག་པའི་རྣམ་པར་གཞག་པ་ལ་རྟག་ཏུ་རང་བཞིན་གཅིག་པ་ཉིད་ཡིན་ལ། ཁྱད་པར་ཅན་གྱི་བྱེ་བྲག་ནི་བསྟན་བཅོས་ལ་སོགས་པ་
[355a.2]ལ་ཡང་མཚུངས་སོ། །དེ་བས་ན་ཉི་མ་རེ་རེའི་ལྟོ་བ་འགྱུར་བ་དེ་བཞིན་དུ། འཁོར་བ་འགྱུར་བ་ཡང་ཡོད་པའི་ཕྱིར། དུས་ཡུན་རིང་པོར་གོམས་པས་ཐམས་ཅད་རིག་པ་ཡང་སྲིད་དོ། །རྩོད་པ་ལྷག་མ་ནི་ཐམས་ཅད་མཁྱེན་པ་གྲུབ་པར་གསལ་བ་ཡིན་ནོ། །སློབ་དཔོན་གྱིས་བསྟན་བཅོས་སྡུག་བསྔལ་ཞི་
[355a.3]བའི་རྒྱུར་བསྟན་པ་མ་ཡིན་ནམ། དེ་ལྟར་ཡང་། །འགྲོ་ལ་སྟོན་ཕྱིར་བསྟན་བཅོས་སོ། །ཞེས་གསུངས་པའི་ཕྱིར་ཇི་ལྟར་ཐབས་ལ་གོམས་པས་ཡིན་ཞེ་ན། འདིར་སྨྲས་པ། དེ་ཡི་དོན་ཕྱིར་ཐབས་གོམས་པ། །འདི་ཉིད་བསྟན་པ་ཡིན་པར་འདོད། །གྲུབ་པའི་སྔོན་དུ་ཡོད་པའི་ཕྱིར། །གཉིས་པོ་འདི་ནི་རྒྱུ་རུ་
[355a.4]བཤད། །ཅེས་བྱ་བ་ལ། བསྟན་པ་དངོས་སུ་ཚིགས་སུ་བཅད་པས་འདོད་པ་ནི་མ་ཡིན་གྱི། འོན་ཀྱང་ཐབས་ལ་གོམས་པ་ཉིད་བསྟན་པར་འདོད་དོ། །ཇི་ལྟར་ཐབས་ལ་གོམས་པ་བསྟན་པ་ཡིན་ཞེ་ན། དེའི་དོན་གྱི་ཕྱིར་ཏེ། དེའི་དོན་གྱིས་དེའི་སྒྲར་འགྱུར་བའི་ཕྱིར་ཏེ། དཔེར་ན་མར་ནི་སྲོག་ཡིན་ནོ་ཞེས་བྱ་
[355a.5]བ་ལྟ་བུའོ། །བསྟན་པའི་དོན་ཐབས་གོམས་པར་ཇི་ལྟར་འགྱུར་ཞེ་ན། ཐབས་གོམས་པ་དང་། བློ་གསལ་བ་དག་གིས་བསྟན་པར་གྲུབ་པའི་ཕྱིར་རོ། །འདི་དག་ཀྱང་ཇི་ལྟར་ཤེས་ཤེ་ན། འདིར་སྨྲས་པ། གཉིས་པོ་འདི་ནི་རྒྱུ་རུ་བཤད། །ཅེས་བྱ་བ་ལ་གོམས་པ་དང་བསྟན་པ་འདི་གཉིས་ནི་
[355a.6]ཐམས་ཅད་རིག་པའི་རྒྱུར་གསུངས་སོ། །ཇི་སྟེ་རྒྱུར་བཤད་པས་ཀྱང་འདི་དག་ཇི་ལྟར་ཤེས་ཤེ་ན། སྔོན་དུ་ཡོད་པའི་ཕྱིར་ཏེ། ཇི་ལྟར་བསྟན་བཅོས་ཉིད་དངོས་སུ་བདེ་བར་གཤེགས་པའི་རྒྱུ་མ་ཡིན་ཏེ། ཐབས་གང་ཞིག་གོམས་པ་ལས་བཅོམ་ལྡན་འདས་བདེ་བར་གཤེགས་པར་འགྱུར་བའི་
[355a.7]ཕྱིར་རོ། །བདེ་བར་གཤེགས་པ་ཉིད་ཅེས་བྱ་བ་ཡང་ཇི་ལྟ་བུ་ཞེ་ན་སྨྲས་པ། རྒྱུ་སྤངས་ཡོན་ཏན་གསུམ་བདེ་གཤེགས། །ཉིད་ཡིན་སྡུག་བསྔལ་རྟེན་མིན་ཕྱིར། །བསྔགས་པའོ་དེ་ནི་བདག་མེད་པ། །མཐོང་བའམ་རིགས་པ་ཉིད་ཕྱིར་རོ། །ཞེས་བྱ་བ་ལ། སྡུག་བསྔལ་གྱི་རྒྱུ་བདག་དང་
[355b]
[355b.1]བདག་གིར་འཛིན་པས་བྱས་པའི་ཞེན་པའི་རྒྱུ་དེ་སྤངས་པའི་ཡོན་ཏན་གསུམ་སྟེ། རབ་ཏུ་མཛེས་པ་ཉིད་དང་ཕྱིར་མི་ལྡོག་པ་དང་ལྷག་མ་མེད་པར་བཅོམ་པའི་ཕྱིར་ཞེས་བྱ་བའོ། །བཅོམ་པ་ནི་མེད་པ་སྟེ། བདག་དང་བདག་གིར་འཛིན་པ་དེ་མེད་ན་ནི། སྡུག་བསྔལ་གྱི་རྟེན་མ་ཡིན་པའི་ཕྱིར། རབ་ཏུ་
[355b.2]བསྔགས་པ་ཉིད་དོ། །སྤངས་པ་དེ་ཉིད་གང་ལས་འབྱུང་ཞེ་ན། བདག་མེད་པ་མཐོང་བ་ཉིད་ལས་སྟེ། མཐོང་བས་སྤང་བར་བྱ་བའི་ཉོན་མོངས་པ་ནི་མཐོང་བ་ཉིད་ལས་སམ། རིགས་པ་ལས་ཏེ། རིགས་པ་ནི་གོམས་པ་སྟེ། བསྒོམ་པས་སྤང་བའི་ཉོན་མོངས་པའི་ཚོགས་ཟློག་པའི་རྒྱུ་ཡིན་ནོ། །ཡང་ན་
[355b.3]རིགས་པ་ནི་རྣལ་འབྱོར་ཏེ། ཕན་ཚུན་ལྡན་པ་ཉིད་དེ། གཉིས་སུ་མེད་པར་མཐོང་བ་ཞེས་བྱ་བའི་ཐ་ཚིག་གོ། །དེ་ལ་ཁ་ཅིག་ནི་གང་ཟག་གི་བདག་མེད་པས་སྤངས་ལ་གཞན་ནི་ཆོས་ཀྱི་བདག་མེད་པས་སོ། །དེ་ལྟར་རབ་ཏུ་བསྔགས་པ་ཉིད་ཀྱི་ཡོན་ཏན་བསྟན་ནས། ཕྱིར་མི་ལྡོག་པའི་ཡོན་ཏན་ཡང་བརྗོད་པར་བྱ་སྟེ། ཕྱིར་མི་
[355b.4]ལྡོག་པ་ཞེས་བྱ་བ་གང་ཡིན་ཞེ་ན། སྨྲས་པ། སྐྱེ་བ་དང་སྐྱོན་ཀུན་འབྱུང་དག །སླར་ཡང་ལྡོག་ཅེས་བཤད་པ་ཡིན། །བདག་ལྟའི་ས་བོན་སྤངས་པའི་ཕྱིར། །སླར་མི་གཤེགས་པ་ཉིད་ཡིན་ནོ། །ཞེས་བྱ་བ་ལ། སྐྱོན་རྣམས་དང་སྐྱེ་བ་ཀུན་འབྱུང་བ་དག་སླར་མི་ལྡོག་སྟེ། སྐྱོན་མེད་པའི་གནས་
[355b.5]སྐབས་དང་། ཕྱིར་མི་སྐྱེ་བ་ནི་སླར་མི་ལྡོག་པ་ཡིན་ནོ། །དེ་ཉིད་ཇི་ལྟར་འགྱུར་ཞེ་ན། བདག་ཏུ་ལྟ་བ་ཉིད་ས་བོན་ཏེ་རྒྱུའོ། །དེ་སྟོན་པས་ཉོན་མོངས་པ་རྣམས་མི་སྐྱེ་ལ། ཉོན་མོངས་པ་མེད་པས་སྐྱེ་བ་སླར་མི་ལེན་པའི་ཕྱིར་སླར་མི་ལྡོག་པ་ཡིན་ནོ། །ཇི་སྟེ་བདག་མེད་པ་མཐོང་བས། བདག་ཏུ་འཛིན་པ་
[355b.6]ཟློག་པར་ཇི་ལྟར་འགྱུར། རྣམ་པ་ཐ་དད་པས་འཇུག་པའི་ཕྱིར་ཡིན་ན་ནི། དེ་ལྟར་ན་འོ་ན་བདག་ཏུ་ལྟ་བ་ཡང་བདག་མེད་པ་ལས་བཟློག་པ་ཡིན་པའི་ཕྱིར་དེ་བཟློག་པར་བྱེད་པར་འགྱུར་རོ། །དེ་ལོག་ན་ནི་སྐྱོན་དང་སྐྱེ་བ་ཀུན་འབྱུང་བར་འགྱུར་བའི་ཕྱིར། སླར་ལྡོག་པར་ཐལ་བར་འགྱུར་རོ་སྙམ་དུ་སེམས་
[355b.7]ན། འདིར་སྨྲས་པ། དེ་བདེན་ཐ་དད་བདག་ཉིད་ཀྱིས། །ལུས་ངག་སེམས་ཀྱི་གནས་ངན་ལེན། །ཉོན་མོངས་མེད་ཉིད་ནད་མེད་པའམ། །ལམ་བཤད་མི་གསལ་ཉིད་ལུས་པའོ། །ཞེས་བྱ་བ་ལ། བདག་མེད་པ་མཐོང་བ་དེ་ནི་བདེན་པར་འགྱུར་བ་ཉིད་དང་། ཐ་དད་པ་དང་། ངོ་བོ་ཉིད་ཀྱིས་སླར་མི་ལྡོག་པ་
[356a]
[356a.1]ཡིན་གྱི། བདག་ཏུ་ལྟ་བ་ནི་བདག་མེད་པ་ལས་ཕྱིན་ཅི་ལོག་ཡིན་པ་དེ་ལྟ་ན་ཡང་བདེན་པ་མ་ཡིན་པའི་ཕྱིར་ལྡོག་པར་བྱེད་པ་མ་ཡིན་ཏེ། བདག་མེད་པའི་ཕྱིར་རོ། །འོ་ན་ལུས་པ་ཞེས་བྱ་བ་སླར་ལྡོག་པ་མེད་པ་ལས་གཞན་ཅི་ཞིག་ཡིན་ཞེ་ན། སྨྲས་པ། ལུས་དང་ངག་དང་སེམས་ཀྱི་གནས་
[356a.2]ངན་ལེན་ནི་ལུས་པའོ། །ལུས་ལ་སོགས་པའི་གནས་ངན་ལེན་ཇི་ལྟ་བུ་ཞེ་ན། ཡོད་པ་མ་ཡིན་པའི་ཉོན་མོངས་པ་ཅན་ཏེ། དེ་ཉིད་ཀྱི་ཕྱིར་ནད་མེད་ཅིང་སྐྱོན་མེད་པ་སྟེ། འཁོར་བའི་སྡུག་བསྔལ་སྤངས་པའི་ཕྱིར་རོ། །དེ་ལ་ཉོན་མོངས་པ་མེད་པའི་ལུས་ཀྱི་གནས་ངན་ལེན་ནི་དགྲ་བཅོམ་པར་གྱུར་ཀྱང་
[356a.3]གོམས་པའི་དབང་གིས་མཆོངས་ཤིང་འགྲོ་བ་ལ་སོགས་པ་འབྱུང་བ་ཡིན་ནོ། །ངག་གི་གནས་ངན་ལེན་ནི། ང་རྒྱལ་མེད་ཀྱང་བརྙས་པར་སྨྲ་བ་ལ་སོགས་པ་བརྗོད་པའོ། །ཡིད་ཀྱི་གནས་ངན་ལེན་ནི་ཐམས་ཅད་དུ་མི་ཤེས་པ་སྟེ། འདི་གསུམ་ནི་ལུས་པའོ། །ལམ་བཤད་པ་ལ་མི་གསལ་བ་ཡང་
[356a.4]ལུས་པ་སྟེ། ཡུན་རིང་པོར་གོམས་པར་མ་བྱས་པའི་ཕྱིར་བློ་གསལ་བ་མེད་ན་ཚིག་ལ་མཁས་པར་མི་འགྱུར་རོ། །གལ་ཏེ་བདག་མེད་པ་མཐོང་བས་མ་ལུས་པ་སྤོང་བ་མ་ཡིན་ན། འོ་ན་ལུས་པ་དེ་ཅི་ཡིས་སྤོང་བར་འགྱུར་ཏེ། བདག་མེད་པ་མཐོང་བ་ལས་སྤོང་བའི་རྒྱུ་གཞན་མེད་པའི་ཕྱིར་རོ། །ཡང་
[356a.5]ཇི་སྲིད་བརྗོད་པ་དེ་སྲིད་སྐྱོན་སྤངས་པ་མ་ཡིན་ཏེ། སྨྲ་བ་ནི་དཔྱོད་པ་སྔོན་དུ་འགྲོ་བའི་ཕྱིར་དང་། དཔྱོད་པ་ཡང་འཁྲུལ་པའོ་སྙམ་དུ་སེམས་ན་སྨྲས་པ། གོམས་ལས་མ་ལུས་སྤངས་པར་འགྱུར། །ཁ་ཅིག་སྒྲ་སོགས་ཕྱིར་ན་སྐྱོན། །ཟད་མིན་ཞེ་ན་འདི་ལྡོག་པར། །ཐེ་ཚོམ་ཟ་བ་དེ་ཕྱིར་འཁྲུལ། །ཞེས་བྱ་
[356a.6]བ་ལ། བློ་གསལ་བར་བོགས་ཕྱུང་བ་ལ་སོགས་པ་གོམས་པའི་ཕྱིར་བག་ཆགས་ལྡོག་པར་འགྱུར་བའོ་ཞེས་བཤད་པར་བྱའོ། །དེ་བས་ན་གོམས་པ་ལས་མ་ལུས་པ་སྤོང་བར་འགྱུར་རོ། །དེ་ལྟར་ནི་འགྱུར་མོད་ཀྱི། སྨྲ་བ་ལ་སོགས་པའི་ཕྱིར་འདོད་ཆགས་ལ་སོགས་པ་ལུས་ཀྱི་སྐྱོན་རྣམས་
[356a.7]ཟད་པར་མི་འགྱུར་ཏེ། སོགས་པའི་སྒྲས་ནི་ལུས་ལ་སོགས་པ་གཟུང་ངོ་ཞེ་ན། དེ་ནི་མ་ཡིན་ཏེ། གང་གི་ཕྱིར་སྨྲས་པ་ལ་སོགས་པ་དེའི་ལྡོག་པ་ལ་ཐེ་ཚོམ་ཟ་བའི་ཕྱིར་ཏེ། འདིར་སྨྲས་པ་ལ་སོགས་པ་ཡང་ཡོད་ལ་སྐྱོན་ཡང་ཟད་པར་འགྱུར་བ་འདི་ལ་འགལ་བ་ཅི་ཡོད། དེ་ཉིད་ཀྱི་ཕྱིར་ལྡོག་
[356b]
[356b.1]པ་ལ་ཐེ་ཚོམ་ཟ་བའི་ཕྱིར། གཏན་ཚིགས་མ་ངེས་པའོ་ཞེས་ལེའུ་དང་པོར་བསྟན་ཏོ། །སྐྱོན་རྣམས་ཤིན་ཏུ་ཟད་པ་མེད་པ་མ་ཡིན་ནམ། དེའི་ཕྱིར་ཇི་ལྟར་སྐྱོན་མེད་པ་ཡིན་ཏེ། སྐྱོན་ཟད་པ་མེད་པའི་རྒྱུ་མ་མཐོང་བའི་ཕྱིར་སྐྱོན་ཟད་པར་བྱེད་པ་མེད་པ་ཉིད་མ་ཡིན་པའི་ཕྱིར་རོ། །འདིར་སྨས་པ། རྟག་
[356b.2]ཉིད་ཕྱིར་རམ་ཐབས་མེད་ཕྱིར། །ཐབས་མི་ཤེས་པའི་ཕྱིར་ན་ཡང་། །སྐྱོན་རྣམས་མི་ཟད་པ་ཉིད་དུ། །རྟོག་པར་བྱེད་པ་ཡིན་ན་ཡང་། །ཞེས་བྱ་བ་ལ། སྐྱོན་ཟད་པ་མེད་པར་རྟག་པའི་ནི་རྒྱུ་མཚན་མེད་པར་མི་འཇུག་སྟེ། འོན་ཀྱང་གལ་ཏེ་སྐྱོན་དེ་དག་རྟག་པར་གྱུར་ན་དེའི་ཚེ་སྐྱོན་རྣམས་ཟད་པར་
[356b.3]མི་སྲིད་དེ། རྟག་པའི་ཕྱིར་རྟག་པ་ལ་བོགས་དབྱུང་བར་མི་ནུས་སོ། །འོན་ཏེ་ཟད་པའི་ཐབས་མེད་པའམ། མི་ཤེས་པ་དེ་ལྟ་ན་ཡང་མི་ཟད་དོ། །གསུམ་ཆར་མི་སྲིད་ཅེས་བསྟན་པའི་ཕྱིར། རྒྱུ་ལྡན་ཉིད་ཕྱིར་མི་མཐུན་ཕྱོགས། །གོམས་པས་རྒྱུ་ནི་ཟད་པའི་ཕྱིར། །རྒྱུ་ཡི་རང་བཞིན་ཤེས་པ་ཡིས། །
[356b.4]དེ་ཤེས་པ་ཡང་སྒྲུབ་པ་ཡིན། །ཞེས་བྱ་བ་ལ། དེ་ལ་སྐྱོན་རྣམས་རྟག་པ་ཉིད་མ་ཡིན་ཏེ་རྒྱུ་དང་ལྡན་པ་ཅན་ཡིན་པའི་ཕྱིར། རྒྱུ་དང་ལྡན་པ་ནི་སྔ་ན་མེད་པས་རྟག་པ་ཉིད་མ་ཡིན་ནོ། །སྐྱོན་ཟད་པའི་ཐབས་མེད་པ་ཡང་མ་ཡིན་ཏེ། སྐྱོན་གྱི་རྒྱུ་བདག་ཏུ་ལྟ་བའི་གཉེན་པོ་བདག་མེད་པར་མཐོང་བ་གང་
[356b.5]ཡིན་པ་དེ་གོམས་པས་སྐྱོན་རྣམས་ཟད་པར་འགྱུར་བའི་ཕྱིར་བདག་མེད་པར་མཐོང་བ་ནི་ཟད་པའི་ཐབས་ཉིད་དོ། །རྒྱུའི་རང་བཞིན་བདག་དང་། བདག་གི་རྣམ་པ་ཅན་གྱི་ཤེས་པ་ཡོད་ན་དེའི་གཉེན་པོའི་ཤེས་པ་ཡང་སྒྲུབ་པ་ཡིན་ཏེ། གང་གང་ལས་ཕྱིན་ཅི་ལོག་ཏུ་གྱུར་པ་དེའི་གཉེན་པོ་སྟེ།
[356b.6]དཔེར་ན་རླུང་ལ་ཏིལ་མར་བཞིན་དུ་བདག་ཏུ་འཛིན་པ་ལས་བཟློག་པ་ནི་བདག་མེད་པ་མཐོང་བ་ཡིན་ནོ།། །།ཚད་མ་རྣམ་འགྲེལ་གྱི་འགྲེལ་པ་ལས། བམ་པོ་བརྒྱད་པ། གལ་ཏེ་བཅོམ་ལྡན་འདས་བདེ་བར་གཤེགས་པ་ཉིད་ཡིན་པ་དེ་ལྟར་ན་ཡང་རང་གི་དོན་ཕུན་སུམ་ཚོགས་པ་
[356b.7]ཙམ་ལས་གཞན་ལ་ཇི་ལྟར་ཚད་མར་འགྱུར་ཏེ། འདི་ལྟར་བདེན་པའི་དངོས་པོ་སྟོན་པས་ཚད་མ་ཡིན་གྱི། ཕྱིན་ཅི་ལོག་དག་མི་སྟོན་པས་ནི་མ་ཡིན་ནོ་ཞེ་ན། དེ་ནི་མི་བདེན་ཏེ། བརྩེ་བ་ལ་གོམས་པ་དང་། ཐབས་ལ་གོམས་པས་སྐྱོབ་པ་ཉིད་བཅོམ་ལྡན་འདས་ཡིན་ནོ། །ཡང་ཇི་ལྟར་སྐྱོབ་
[357a]
[357a.1]པ་ཡིན་ཞེ་ན། སྨྲས་པ། སྐྱོབ་པ་ཉིད་གཟིགས་ལམ་གསུངས་པ། །འབྲས་བུ་མེད་ཕྱིར་བརྫུན་མི་གསུང་། །ཐུགས་རྗེ་ལྡན་ཕྱིར་གཞན་དོན་ཡང་། །བརྩོན་པ་ཀུན་ལ་གོམས་ཕྱིར་རོ། །ཞེས་བྱ་བ་ལ། མཐོ་རིས་དང་ཐར་པའི་ལམ་ཉིད་ཀྱིས་གཟིགས་ནས་གཞན་ལ་
[357a.2]གསུངས་པ་ནི་སྐྱོབ་པ་སྟེ། གང་ལ་བདེ་བར་གཤེགས་པ་ཉིད་ཡོད་པ་དེ་ལ་འདོད་པ་ཅི་ཡང་མེད་པའི་ཕྱིར་རོ། །འདི་ནི་བརྫུན་མི་གསུང་སྟེ། འབྲས་བུ་མེད་པའི་ཕྱིར་འབྲས་བུ་མ་མཐོང་བར་སུ་ཡང་ཕྱིན་ཅི་ལོག་ཏུ་སྨྲ་བ་མ་ཡིན་ནོ། །ཐུགས་རྗེ་དང་ལྡན་པའི་ཕྱིར་ཐབས་ལ་གོམས་པས་གཞན་གྱི་དོན་བྱེད་པ་དེ་
[357a.3]བས་ན་བཅོམ་ལྡན་འདས་ཕྱིན་ཅི་ལོག་ཏུ་གསུང་བ་མ་ཡིན་ནོ། །དེ་བས་ན་དགོས་པ་མེད་པ་དང་རྒྱུ་མེད་པའི་ཕྱིར་ཕྱིན་ཅི་ལོག་ཏུ་གསུང་བ་མ་ཡིན་ལ། བརྩེ་བ་དང་ལྡན་པ་དང་། འཕེན་པ་ལས་མི་གསུང་བ་ཡང་མ་ཡིན་ནོ། །དེའི་ཕྱིར་བདེ་བར་གཤེགས་པ་སྐྱོབ་པ་ཉིད་ཚད་མ་ཡིན་ནོ། །འོ་ན་མུ་
[357a.4]སྟེགས་བྱེད་པ་ཡང་རང་གི་ལམ་སྟོན་པར་བྱེད་པ་ཡོད་པ་མ་ཡིན་ནམ། དེ་ཡོད་ཚད་མར་འགྱུར་རོ། །འོན་ཏེ་དེ་དག་ལམ་སྟོན་པ་ཉིད་མེད་དེ། དེ་ལམ་མ་ཡིན་པའི་ཕྱིར་ཟེར་ན། ལམ་འདི་ལ་ཡང་ཡིད་རྟོན་པར་བྱེད་ཅེ་ན། འདི་དག་ནི་བདག་མེད་པར་མཐོང་བའམ། དེའི་རིགས་པ་ནི་རིགས་པས་
[357a.5]འཐད་པའི་ལམ་ཡིན་པའི་ཕྱིར་བཅོམ་ལྡན་འདས་ཉིད་ཚད་མ་ཡིན་གྱི། མུ་སྟེགས་བྱེད་རྣམས་ནི་བདག་མེད་པ་མ་མཐོང་ཞིང་རིགས་པ་མེད་པ་ཡིན་པའི་ཕྱིར་དེ་དག་ཚད་མ་མ་ཡིན་ནོ་ཞེས་བསྟན་ཏོ། །བཅོམ་ལྡན་འདས་ནི་དེ་ལས་བཟློག་པའི་ཕྱིར་ཚད་མ་ཡིན་ནོ་ཞེས་བསྟན་པའི་ཕྱིར། དེ་ཕྱིར་
[357a.6]བཅོམ་ལྡན་འདས་ཚད་མ་ཡིན་ཞེས་བསྟན་ཏོ། །སྐྱོབ་པ་ཡང་། བདེན་པ་བཞི་ནི་སྟོན་མཛད་ཡིན། །ཞེས་བྱ་བ་ལ། ཡང་ན་བདེན་པ་བཞི་སྟོན་པ་ནི་སྐྱོབ་པ་ཡིན་གྱི། གཞན་ནི་མ་ཡིན་ནོ། །གལ་ཏེ་སྟོང་པ་དེ་ཉིད་རིག་བྱེད་ལ་སོགས་པ་རྣམས་ལ་སྟོན་པ་ཡོད་པ་དེ་ལྟ་ན་ཡང་བདག་ལ་སོགས་པ་ཡོད་པས་དེ་
[357a.7]དག་གི་ལམ་མ་ཡིན་པ་ཉིད་ཀྱི་ཕྱིར་བདེན་པ་བཞི་སྟོན་པ་ཉིད་སྐྱོབ་པ་ཡིན་ནོ། །དེ་བས་ན་ཐུན་མོང་མ་ཡིན་པའི་དོན་སྟོན་པའི་ཚིག་ཅན་བཅོམ་ལྡན་འདས་ཡིན་ཏེ་བདེན་པ་ཉིད་ཡོད་པའི་ཕྱིར་རོ། །འཕགས་པའི་བདེན་པ་བཞི་གང་ཞེ་ན། སྡུག་བསྔལ་དང་། ཀུན་འབྱུང་དང་། འགོག་པ་དང་ལམ་མོ། །ལས་
[357b]
[357b.1]དང་འབྲས་བུ་འབྲེལ་བའི་འཕགས་པའི་བདེན་པ་བཞི་སྟོན་པ་ཉིད་ཀྱིས་བཅོམ་ལྡན་འདས་སླུ་བ་མེད་པར་ངེས་པ་ཉིད་ཡིན་ནོ། །དེ་བས་ན་བདེན་པ་བཞི་སྟོན་པ་ནི་གཙོར་སྐྱོབ་པ་ཡིན་ནོ། །འདོད་ཆགས་ལ་སོགས་པ་བུད་མེད་ལ་འཁྱུད་པའི་རྒྱུ་ཡིས་བདེ་བའི་རྒྱུ་ཡིན་པའི་ཕྱིར་བདེ་བ་ཉིད་ཡིན་ལ། ཞེ་སྡང་
[357b.2]ཡང་དགྲ་བཅོམ་པའི་རྒྱུ་ཡིན་པས་བདེ་བའི་རྒྱུ་ཡིན་ནོ། །གཏི་མུག་ཀྱང་འཇིག་ཚོགས་ལ་ལྟ་བའི་མཚན་ཉིད་ཅན་བདག་ཏུ་འཛིན་པ་དང་། བདག་ཏུ་ང་རྒྱལ་བ་དང་། དྲེགས་པ་དང་། རྒྱགས་པའི་རྒྱུ་ཡིན་པའི་ཕྱིར་བདེ་བའི་རྒྱུ་ཡིན་པས་ན་བདེ་བ་ཡིན་ནོ། །འདོད་ཆགས་དང་ཞེ་སྡང་ལ་སོགས་པའི་གཞིར་གྱུར་པའི་ཕྱིར་
[357b.3]ལུས་ལ་སོགས་པ་ཡང་བདེ་བ་ཉིད་ཡིན་ཏེ། བདེ་བའི་རྟེན་ཡིན་པའི་ཕྱིར། སྡུག་བསྔལ་ཞེས་བྱ་བ་མེད་ཀྱི་བདེ་བ་ཉིད་དོ། །གལ་ཏེ་སྐོམ་པ་ལ་སོགས་པ་སྡུག་བསྔལ་ཡིན་ན་ཡང་རབ་ཏུ་ཚིམ་པར་བྱེད་པའི་རྒྱུར་ཆེ་བའི་ཕྱིར་སྡུག་བསྔལ་གྱི་བདེན་པ་ཞེས་བྱ་བ་ཡོད་པ་མ་ཡིན་ནོ། །དེ་བས་ན་བཅོམ་ལྡན་
[357b.4]འདས་ཀྱིས་བསྟན་པ་མི་བདེན་པ་ཉིད་པས་སྐྱོབ་པ་མ་ཡིན་ནོ་ཞེ་ན། འདིར་སྨྲས་པ། སྡུག་བསྔལ་འཁོར་བ་ཅན་ཕུང་པོ། །གོམས་ལས་འདོད་ཆགས་སོགས་བསལ་བ། །མཐོང་ཕྱིར་འདོད་རྒྱལ་ཉིད་མ་ཡིན། །རྒྱུ་མེད་སྐྱེ་བ་འགལ་ཕྱིར་རོ། །ཞེས་བྱ་བ་ལ། འཁོར་བའི་ཆོས་དང་
[357b.5]འདྲེས་པ་ལས་དབུགས་མ་ཕྱིན་པའི་སྡུག་བསྔལ་གྱིས་བྱས་པའི་ཕུང་པོ་རྣམས་ཉིད་ནི་སྡུག་བསྔལ་ལ་མི་ཤེས་པས་བདེ་བའི་རང་བཞིན་དུ་མཐོང་ནས། འདོད་ཆགས་སོགས་པ་བདེ་བའི་ཚུལ་ཅན་གྱི་བདེ་བའོ་ཞེས་སྨྲ་བ་དེ་ལ་གོམས་པ་ལས་སྐྱེ་བའི་འདོད་ཆགས་ལ་སོགས་པའི་རྗེས་ཐོགས་
[357b.6]སུ་བདེ་བ་འབྱུང་ངོ་ཞེས་བཤད་དོ། །དེ་ནི་གོམས་པ་ལ་མ་ལྟོས་པའི་དངོས་པོའི་ངོ་བོ་ཉིད་ལས་འདོད་ཆགས་ལ་སོགས་པ་འབྱུང་བས་འདོད་ཆགས་ལ་སོགས་པ་དེ་ཡང་འདོད་རྒྱལ་བ་ཉིད་དུ་སྐྱེ་ན་ནི་རྟག་པར་ཡང་འགྱུར་ན། དེ་ནི་རིགས་པ་མ་ཡིན་ནོ། །གང་གི་ཚེ་འདོད་ཆགས་གོམས་
[357b.7]པ་ཉིད་ལས་དེ་གསལ་བ་མཐོང་བ་ཡིན་པ་དེའི་ཚེ་འདོད་ཆགས་ལ་སོགས་པ་ནི་ཡང་དག་པ་མ་ཡིན་པའི་ཀུན་དུ་རྟོག་པ་ཙམ་ཡིན་པའི་ཕྱིར་འདོད་ཆགས་ལ་སོགས་པ་གོམས་པ་སྤང་བར་རིགས་ཏེ། བྱིས་པའི་རྩེད་མོ་ལ་གོམས་པ་བཞིན་ནོ། །དེ་བས་ན་དངོས་པོ་བདེ་བ་མེད་ཀྱི། སེམས་ཀྱི་མངོན་པར་འདོད་
[358a]
[358a.1]པའི་མཚན་ཉིད་ལ་བདེ་བར་ཞེན་པ་ནི་དེ་ཁོ་ན་ཉིད་ལ་གོམས་པས་སེམས་ལྡོག་པར་འགྱུར་བའི་ཕྱིར་དེ་ཁོ་ན་ཉིད་ལ་གོམས་པ་ཉིད་དུ་རུང་གི་བདེ་བ་ལ་སོགས་པ་གོམས་པ་ལས་སྐྱེ་བས་སྡུག་བསྔལ་གྱི་གདུང་བ་ཐམས་ཅད་བདེ་བར་སྣང་བར་འགྱུར་རོ། །དེ་བས་ན་འདོད་
[358a.2]ཆགས་ལ་སོགས་པ་སྤང་བར་འོས་ཀྱི། འདོད་ཆགས་ལ་སོགས་པ་ནི་རང་བཞིན་གྱི་ཆོས་བུད་མེད་ལ་འཁྱུད་པར་བྱ་བ་ནི་མ་ཡིན་ནོ། །དེ་བས་ན་དེ་ཁོ་ན་ཉིད་ལ་མངོན་པར་དགའ་བའི་བློར་བྱ་བ་འདི་ནི་རིགས་པ་ཡིན་ཏེ། དེ་ཁོ་ན་ཉིད་གང་གིས་ཀྱང་འགྱུར་བ་མེད་པའི་ཕྱིར་རོ། །གང་ཡང་འདོད་ཆགས་
[358a.3]ལ་སོགས་པ་བདེ་བའི་རྒྱུ་ཡིན་པའི་ཕྱིར་བདེ་བའོ་ཞེས་ཟེར་བ་དེ་ལ་སྨྲས་པ། གལ་ཏེ་འདོད་ཆགས་བདེ་བའི་རྒྱུ་ཉིད་ཀྱིས་བདེ་བར་འདོད་ན། དེ་བཞིན་དུ་བདེ་བ་ཡང་སྡུག་བསྔལ་གྱི་རྒྱུ་ཡིན་པའི་ཕྱིར། སྡུག་བསྔལ་དུ་འགྱུར་ཏེ། འདི་ལྟར་བདེ་བ་ཡོངས་སུ་གྱུར་ནས་སྡུག་བསྔལ་ཕུལ་དུ་བྱུང་བའི་རྒྱུར་འགྱུར་
[358a.4]བའི་ཕྱིར། བདེ་བ་ནི་སྡུག་བསྔལ་ཉིད་པས་སྡུག་བསྔལ་འཁོར་བ་ཅན་ཕུང་པོ་ཞེས་བྱ་བ་འདི་གྲུབ་པ་ཡིན་ནོ། །འདོད་ཆགས་ལ་སོགས་པ་གསལ་བར་གོམས་པ་ལས་འདོད་ཆགས་ལ་སོགས་པ་གསལ་བ་དང་ལྡན་པར་འགྱུར་བའི་ཕྱིར་སྣ་ཚོགས་པ་འདི་ནི་རང་གི་རིགས་སྔ་མའི་རྒྱུ་ཅན་ཡིན་པས་འཁོར་
[358a.5]བ་ཅན་ཉིད་དུ་གྲུབ་པོ། །དེ་ལྟར་ནི་འགྱུར་མོད་ཀྱི། འདོད་ཆགས་ལ་སོགས་པ་ནི་གོམས་པ་ཁོ་ན་ལས་ནི་མ་ཡིན་གྱི། ཇི་ཞིག་ལྟར་རམ། རྒྱུ་གཞན་དག་ལས་འདོད་ཆགས་ལ་སོགས་པ་སྐྱེ་བ་དེ་བས་ན་བདེ་བ་ལ་སོགས་པ་དོན་དམ་པ་ཉིད་ཡིན་ནོ། །ཡང་ན་ཇི་ལྟར་བདེ་བ་ལ་སོགས་པ་གོམས་པ་དེ་
[358a.6]ལྟར་སྡུག་བསྔལ་ལ་སོགས་པ་ཡང་གོམས་པ་ལས་འབྱུང་བ་མ་ཡིན་པའི་ཕྱིར། བདེ་བ་ཉིད་འཁོར་བ་ཅན་གྱི་ཕུང་པོར་འགྱུར་རོ་ཞེ་ན། འདིར་སྨྲས་པ། འདོད་རྒྱལ་བའི་ཕྱིར་རྒྱུ་མེད་པའི་སྐྱེ་བར་མི་རུང་སྟེ། དུས་ལ་སོགས་པའི་ཞིང་འདོད་ཆགས་ལ་སོགས་པ་རྒྱུ་གཞན་ལས་ཀྱང་མ་ཡིན་ཏེ་
[358a.7]གོམས་པ་ལས་འདོད་ཆགས་ལ་སོགས་པ་གསལ་བར་མཐོང་བའི་ཕྱིར་རོ། །གང་གིས་སྡུག་བསྔལ་བསྒོམ་པར་འགྱུར་བ་སུ་ཡང་སྡུག་བསྔལ་གོམས་པར་བྱེད་པ་ནི་མེད་དེ། འོན་ཀྱང་གང་གི་ཚེ་བདེ་བ་ལ་སོགས་པས་གསལ་བར་རུང་གི །བདེ་བ་དེ་རྣམས་མེད་ན་སྡུག་བསྔལ་ནི་སུ་ཡང་
[358b]
[358b.1]གོམས་པར་མི་བྱེད་དེ། བདེ་བ་འདོད་ན་ཐམས་ཅད་འཇུག་པའི་ཕྱིར་རོ། །དེ་བས་ན་འབད་པས་བདེ་བ་བསྒྲུབ་པར་བྱ་བའི་སྡུག་བསྔལ་ནི་བདེ་བ་མེད་ཀྱང་ངོ་བོ་ཉིད་ཀྱིས་ཡོད་པའི་ཕྱིར་དངོས་པོ་ལ་ནི་སྡུག་བསྔལ་མེད་པ་ཁོ་ན་སྟེ། སྡུག་བསྔལ་དེ་ཡང་འཇིག་པ་གོམས་པ་ཉིད་ལས་ཡིན་ནོ། །དེ་བས་ན་སྡུག་
[358b.2]བསྔལ་འཇིག་པ་གོམས་པ་ལས་འབྱུང་གི །སྡུག་བསྔལ་ཐམས་ཅད་ལ་བདེ་བར་བརྗོད་པ་མ་ཡིན་ནོ། །ཡང་ན་འདིར་སྡུག་བསྔལ་ནི་འདུ་བྱེད་ཀྱི་སྡུག་བསྔལ་གྱི་མཚན་ཉིད་ཅན་ཡིན་ལ། བདེ་བ་ནི་དོན་དམ་པར་མེད་ཀྱི། འོན་ཀྱང་གོམས་པ་ལ་སོགས་པ་ལས་སྡུག་བསྔལ་ཉིད་འབྱུང་ངོ་། །འདོད་ཆགས་ལ་
[358b.3]སོགས་པ་གོམས་པ་ལས་སྐྱེས་པ་མ་ཡིན་གྱི། འོན་ཀྱང་བད་ཀན་ལ་སོགས་པའི་ཆོས་མ་ཡིན་ནམ། འདི་ལྟར་འདོད་ཆགས་ནི་བད་ཀན་གྱི་ངོ་བོ་ཉིད་ཡིན་ལ། གཏི་མུག་ནི་རླུང་གི་ངོ་བོ་ཉིད་ཡིན་ཞིང་། ཞེ་སྡང་མཁྲིས་པའི་ངོ་བོ་ཉིད་ཅན་ཡིན་པའི་ཕྱིར་རོ། །འདོད་ཆགས་ལ་སོགས་པའི་སྐྱོན་བཞིན་
[358b.4]དུ། སེར་སྣ་ལ་སོགས་པའི་སྐྱོན་གཞན་ཡང་མཁྲིས་པ་ལ་སོགས་པའི་ཆོས་ཉིད་དོ། །མཁྲིས་པ་ལ་སོགས་པའི་ངོ་བོ་ཉིད་ཀྱིས་ཡོད་པས་རྒྱུ་དེ་ལས་སྐྱེས་པའི་ཕྱིར་འདོད་ཆགས་ལ་སོགས་པ་དོན་དམ་པ་ཡིན་པའི་ཕྱིར་རོ་ཞེ་ན། འདིར་སྨྲས་པ། འཁྲུལ་ཕྱིར་རླུང་སོགས་ཆོས་མ་ཡིན། །གལ་ཏེ་
[358b.5]རང་བཞིན་འདྲེས་པའི་ཕྱིར། །སྐྱོན་མེད་ཅེ་ན་དེ་ལས་གཞན། །ཆོས་ཀྱང་ཅི་ཕྱིར་དེ་མི་མཐོང་། །ཞེས་བྱ་བ་ལ། གང་ཞིག་གང་གི་ཆོས་ཡིན་པ་དེ་ནི་དེ་ལ་མི་འཁྲུལ་བ་ཡིན་ཏེ། དཔེར་ན་མར་མེའི་གསལ་བ་བཞིན་ནོ། །གལ་ཏེ་རླུང་ལ་སོགས་པའི་ཆོས་གཏི་མུག་ལ་སོགས་པ་ཡིན་ན་དེ་ལ་འཁྲུལ་
[358b.6]པར་མི་འགྱུར་བ་ལས། འཁྲུལ་པར་ཡང་མཐོང་སྟེ། འདི་ལྟར་རླུང་གི་ངོ་བོ་ཉིད་ཅན་གྱི་འདོད་ཆགས་ཅན་དང་། བད་ཀན་གྱི་ངོ་བོ་ཉིད་ཅན་གྱི་གཏི་མུག་ཅན་མཐོང་བའི་ཕྱིར་རོ། །འོན་ཏེ་བད་ཀན་གྱི་ངོ་བོ་ཉིད་ཡིན་ཡང་གཞན་གཏི་མུག་གི་ངོ་བོ་ཉིད་ཅན་ཡིན་ཏེ། དེ་བས་ན་རྨོངས་ཤིང་སྡང་བར་
[358b.7]འགྱུར་བ་དེ་ལྟ་ན་ཡང་ངོ་བོ་ཉིད་ཕན་ཚུན་འདྲེས་པའི་ཕྱིར་འཁྲུལ་པའི་སྐྱོན་མེད་དོ་ཞེ་ན། དེ་ལྟར་ན་ནི་ཇི་ལྟར་རླུང་གི་ངོ་བོ་ཉིད་ཅན་ལ་མཁྲིས་པ་ཡོད་པའི་ཕྱིར། ཞེ་སྡང་ཡོད་པས་ཁས་བླངས་པ་དེ་བཞིན་དུ། བད་ཀན་གྱི་རང་བཞིན་ཅན་ལ་ཞེ་སྡང་ལས་གཞན་པའི་མཁྲིས་པ་ལས་སྐྱེས་པའི་རྡུལ་
[359a]
[359a.1]ལ་སོགས་པའི་ཆོས་ཅིའི་ཕྱིར་དམིགས་པར་མ་གྱུར། འོན་ཏེ་ཞེ་སྡང་ཉིད་མཁྲིས་པའི་ཆོས་ཡིན་གྱི། རྡུལ་ལ་སོགས་པ་ནི་མ་ཡིན་ནོ་ཞེ་ན། འོ་ན་ནི་གྲོགས་དག་མཁྲིས་པ་ཅན་གྱི་རྡུལ་ཅི་ལས་སྐྱེ་བར་འགྱུར། མཁྲིས་པ་ཉིད་ལས་སྐྱེས་སོ་ཞེ་ན། རླུང་གི་ངོ་བོ་ཉིད་ཅན་ལ་ཡང་
[359a.2]ཞེ་སྡང་བཞིན། མཁྲིས་པ་ཉིད་ལས་རྡུལ་ལ་སོགས་པ་འབྱུང་བར་འགྱུར་རོ། །དེ་ལྟར་ནི་འགྱུར་མོད་ཀྱི། གང་ཇི་ལྟར་མཐོང་བ་དེ་འདོད་ཆགས་ཀྱི་ཆོས་ཡིན་ནོ། །མཁྲིས་པ་ལ་སོགས་པ་ཐམས་ཅད་ལ་འདོད་ཆགས་མཐོང་བ་མ་ཡིན་ནམ། དེ་ཇི་ལྟར་ཐམས་ཅད་ཀྱི་ཆོས་མ་ཡིན་ཟེར་ན།
[359a.3]དེ་ནི་དེ་བཞིན་ཏེ། ཆོས་ཐམས་ཅད་ལ་མཐོང་བའི་ཕྱིར་འདོད་ཆགས་ལ་སོགས་པ་ཐམས་ཅད་ཀྱི་ཆོས་ཡིན་ནོ་ཞེ་ན། འདིར་སྨྲས་པ། ཐམས་ཅད་ཀྱི་ཆོས་ཐམས་ཅད་མིན། །འདོད་ཆགས་མཚུངས་པར་ཐལ་ཕྱིར་རོ། །གཟུགས་ལ་སོགས་བཞིན་སྐྱོན་མེད་ན། །དེ་ལའང་བརྩད་པ་མཚུངས་པ་
[359a.4]ཡིན། །གལ་ཏེ་དེ་ལ་ཁྱད་པར་ཅན། །ལས་རྣམས་བདག་པོ་མིན་ནའོ། །ཞེས་བྱ་བ་ལ། རླུང་ལ་སོགས་པ་ཐམས་ཅད་ཀྱི་ཆོས་སུ་འདོད་ཆགས་ལ་སོགས་པ་མི་འགྱུར་ཏེ། ཐམས་ཅད་ཀྱི་ཆོས་ཉིད་དུ་འདོད་ཆགས་ལ་སོགས་པ་འགྱུར་ན། སྲོག་ཆགས་ཐམས་ཅད་འདོད་ཆགས་མཚུངས་པར་
[359a.5]ཐལ་བར་འགྱུར་ཏེ། འདི་ལྟར་སྲོག་ཆགས་གང་དག་རླུང་ལ་སོགས་པ་གང་ཅུང་ཟད་ཡོད་པ་དེ་ཉིད་སྲོག་ཆགས་ཀྱི་འདོད་ཆགས་ལ་སོགས་པའི་རྟེན་ཡིན་པའི་ཕྱིར་འདོད་ཆགས་ལ་སོགས་པ་མཚུངས་པར་འགྱུར་རོ། །དེ་ལྟར་འདོད་མོད་གཟུགས་ལ་སོགས་པ་འབྱུང་བའི་ཆོས་སུ་ཁས་བླངས་
[359a.6]ན་ཡང་འབྱུང་བའི་ཁྱད་པར་གྱིས་ཁྱད་པར་དུ་འགྱུར་རོ། །དེ་བཞིན་དུ་འདོད་ཆགས་ལ་སོགས་པ་རླུང་ལ་སོགས་པའི་ཆོས་ཡིན་ཡང་དེའི་ཁྱད་པར་གྱིས་ཁྱད་པར་དུ་བྱེད་དོ་ཞེ་ན། ཅི་སྟེ་ཁྱེད་ལ་ཡང་གཟུགས་ལ་སོགས་པ་དེ་ལ་བརྩད་པ་མཚུངས་པ་ཉིད་དེ། གལ་ཏེ་ཁྱད་པར་ཅན་གྱི་ལས་རྣམས་བདག་
[359a.7]པོ་མེད་པ་དེ་བས་ན། འབྱུང་བའི་ཆོས་ཉིད་ལ་གཟུགས་ལ་སོགས་པ་ཁྱད་པར་ཡོད་པར་མི་འགྱུར་རོ་ཞེས་པའི་བརྩད་པ་འདི་ཁྱེད་ལ་ཡོད་པ་ཁོ་ན་ཡིན་གྱི། སངས་རྒྱས་པ་ལ་ནི་བརྩད་པ་ཡོད་པ་མ་ཡིན་ཏེ། ལས་ལ་སོགས་པའི་ཁྱད་པར་ནི། གཟུགས་ལ་སོགས་པའི་ཁྱད་པར་གྱི་རྒྱུ་ཡིན་པའི་ཕྱིར་རོ། །
[359b]
[359b.1]འདོད་ཆགས་ལ་སོགས་པ་བད་ཀན་ལ་སོགས་པ་ཁོ་ནའི་ཆོས་མ་ཡིན་ཏེ། འོན་ཀྱང་རླུང་ལ་སོགས་པའི་རྒྱུ་ཅན་མ་ཡིན་ནམ་ཞེ་ན། འདིར་སྨྲས་པ། སྐྱོན་རྣམས་ཁྱད་པར་ཡོད་ན་ཡང་། །ཁྱད་པར་མེད་ཕྱིར་མ་གྲུབ་པ། །ཉིད་མིན་ཐམས་ཅད་འགྱུར་བ་ཡིས། །འགྱུར་བའི་ཕྱིར་ཀུན་ལ་སྐྱེའང་
[359b.2]མིན། །རྒྱུ་ནི་འཕེལ་བར་གྱུར་ན་ཡང་། །འབྲས་བུ་འགྲིབ་པར་མི་རུང་སྟེ། །ཚ་བ་སོགས་བཞིན་འདོད་ཆགས་སོགས། །འགྱུར་བ་ན་ཡང་བདེ་སོགས་སྐྱེ། །ཞེས་བྱ་བ་ལ། གལ་ཏེ་འདོད་ཆགས་ལ་སོགས་པ་རླུང་ལ་སོགས་པ་ལས་སྐྱེ་ན་ནི། དེའི་ཚེ་བད་ཀན་འཕེལ་ན་འདོད་ཆགས་འཕེལ་བར་
[359b.3]འགྱུར་ན། ཇི་སྲིད་རླུང་ལ་སོགས་པའི་སྐྱོན་རྣམས་ཁྱད་པར་དུ་འཕེལ་བ་ཡོད་ན་ཡང་གཏི་མུག་ལ་སོགས་པ་ཁྱད་པར་མེད་པ་དེའི་ཕྱིར། རླུང་ལ་སོགས་པའི་འབྲས་བུ་འདོད་ཆགས་ལ་སོགས་པ་མ་ཡིན་ནོ། །འོན་ཏེ་ཁྱད་པར་མེད་པའི་ཕྱིར་ཞེས་བྱ་བ་མ་གྲུབ་པའི་གཏན་ཚིགས་ཡིན་ཏེ། འདི་ལྟར་
[359b.4]མཁྲིས་པ་འཕེལ་བར་གྱུར་ན། མཁྲིས་པའི་སྡུག་བསྔལ་གྱིས་མནར་བས་ཞེ་སྡང་ཕུལ་དུ་འབྱུང་ངོ་ཞེ་ན། མ་གྲུབ་པ་ཉིད་མ་ཡིན་ཏེ། རླུང་ལ་སོགས་པ་ཐམས་ཅད་འགྱུར་བ་སྟེ། འཕེལ་བར་འགྱུར་བས་ཞེ་སྡང་ལ་སོགས་པ་འཕེལ་བ་མཐོང་བའི་ཕྱིར་རོ། །ཞེ་སྡང་ཆུང་བ་ནི་རླུང་འཕེལ་བར་
[359b.5]གྱུར་ཀྱང་ཞེ་སྡང་མི་སྐྱེའོ་ཞེ་ན། འདི་དག་མཁྲིས་པ་འཕེལ་བ་ལ་ཡང་བརྩད་པ་མཚུངས་པ་ཡིན་ནོ། །འདོད་ཆགས་ལ་སོགས་པ་ཐམས་ཅད་ལས་སྐྱེ་བ་མ་ཡིན་ནམ། ཐམས་ཅད་གྱུར་ན་འགྱུར་བར་སྣང་བའི་ཕྱིར་རོ་ཞེ་ན། འདོད་ཆགས་ལ་སོགས་པ་ཐམས་ཅད་ལས་སྐྱེ་བ་མ་ཡིན་ཏེ། འདོད་ཆགས་
[359b.6]མཚུངས་པར་ཐལ་བར་འགྱུར་བའི་ཕྱིར་རོ་ཞེས་བསྟན་ཏོ། །གཞན་ཡང་རྒྱུ་བད་ཀན་ལ་སོགས་པ་འཕེལ་བར་གྱུར་ན། འབྲས་བུ་འདོད་ཆགས་ལ་སོགས་པ་འགྲིབ་པར་མི་འགྱུར་ཏེ། དཔེར་ན་ཚ་བ་ལ་སོགས་པ་འཕེལ་བར་འགྱུར་ན་མཁྲིས་པ་འཕེལ་བ་དང་ལྡན་པ་བཞིན་ནོ། །
[359b.7]འོན་ཏེ་འདོད་ཆགས་ཕུལ་དུ་བྱུང་བ་ནི་ཁུ་བའི་རྫས་དང་ཉེ་བར་ལྡན་པའི་བད་ཀན་ཅན་ལ་མཐོང་བ་ཉིད་དོ་ཞེ་ན། དེ་ནི་བདེན་པ་མ་ཡིན་ཏེ། གང་གི་ཕྱིར་འདོད་ཆགས་ལ་སོགས་པའི་འགྱུར་བ་བདེ་བ་ལ་སོགས་པ་ལས་སྐྱེས་པ་ཡིན་གྱི། བད་ཀན་ལ་སོགས་པ་ལས་སྐྱེས་པ་ནི་མ་ཡིན་ནོ། །བདེ་
[360a]
[360a.1]བ་ཡང་ལ་ལ་ལ་ཅི་ཞིག་ལྟར་སྣང་སྟེ། ནང་གི་བག་ཆགས་སད་པ་ལས་སྐྱེ་བའི་ཕྱིར་རོ། །དེ་བས་ན་འདོད་ཆགས་ལ་སོགས་པ་སྐྱོན་ལས་སྐྱེས་པ་ནི་མ་ཡིན་ནོ་ཞེས་བྱ་བར་གནས་སོ། །འོ་ན་གལ་ཏེ་ཡང་བད་ཀན་འཕེལ་བ་ལས་འདོད་ཆགས་མི་སྐྱེ་བ་དེ་ལྟ་ན་ཡང་དེ་
[360a.2]ཙམ་གྱིས་བད་ཀན་རྒྱུ་མ་ཡིན་པ་མ་ཡིན་ཏེ། ཆ་མ་སྙོམས་པ་ལས་སྐྱེས་པའི་སྡུག་བསྔལ་གྱིས་གེགས་བྱས་པའི་ནུས་པ་ཅན་ཡིན་པའི་ཕྱིར་རོ། །གེགས་བྱེད་པས་མི་སྐྱེ་བ་གང་ཡིན་པ་དེ་རྒྱུ་མ་ཡིན་པ་ནི་མ་ཡིན་ཏེ། ཐམས་ཅད་རྒྱུ་མེད་པ་ཅན་དུ་ཐལ་བར་འགྱུར་བའི་ཕྱིར་རོ་ཞེ་ན། འདིར་སྨྲས་
[360a.3]པ། མ་སྙོམས་ལས་སྐྱེས་སྡུག་བསྔལ་གྱིས། །གལ་ཏེ་འདོད་ཆགས་མི་སྐྱེད་ན། །ཅི་སྐྱེད་སྨྲོས་ཤིག་ཆ་མཉམ་ལས། །མྱོས་འཕེལ་དེ་ལས་འདོད་པ་ན། །སྐྱོན་མི་མཉམ་ལའང་ཆགས་ཅན་དང་། །ཆ་མཉམ་ལ་ཡང་གཞན་དུ་སྣང་། །གཞན་དག་ཟད་ནས་ཁྲག་འཛག་ཅིང་། །བུད་མེད་གཅིག་ལ་
[360a.4]ཁུ་ངེས་མེད། །དེས་གཅིག་ལ་ཆགས་བདོ་མི་འགྱུར། །གལ་ཏེ་གཟུགས་སོགས་ཡན་ལག་ནི། །མིན་ཏེ་ཀུན་མ་ངེས་ཕྱིར་རོ། །ངེས་པ་མེད་པར་ཡང་མི་འགྱུར། །ཡོན་ཏན་མི་འཛིན་ཅན་གྱིའང་འགྱུར། །གལ་ཏེ་ཡོན་ཏན་འཛིན་དེ་ཡང་། །ཡན་ལག་ཡིན་ན་ཐམས་ཅད་དག །ཡོན་ཏན་
[360a.5]འཛིན་པ་ཅན་འགྱུར་ཏེ། །རྒྱུ་ལ་ཁྱད་པར་མེད་ཕྱིར་རོ། །གནས་སྐབས་ཅན་གང་ཆགས་ཅན་འདོད། །དེ་འདྲ་འང་ཞེ་སྡང་ཅན་མི་འགྱུར། །དེ་ཡི་ངོ་བོ་མཚུངས་མེད་ཕྱིར། །འདི་ལ་ངེས་པ་མཐོང་མི་འགྱུར། །ཞེས་བྱ་བ་ལ། གལ་ཏེ་བད་ཀན་ལ་སོགས་པ་ཆ་མ་སྙོམས་པ་ལས་སྐྱེས་པའི་སྡུག་
[360a.6]བསྔལ་གྱིས་བད་ཀན་འཕེལ་བའི་དུས་སུ་འདོད་ཆགས་མི་སྐྱེ་ན་ནི་འོ་ན་འདོད་ཆགས་རྒྱུ་གང་ལས་སྐྱེ་བ་ཡང་སྨྲོས་ཤིག །འོན་ཏེ་བད་ཀན་ལ་སོགས་པ་མཉམ་པ་ལས་ནད་མེད་པ་ན་རྒྱས་པ་དེ་ཁུ་བ་འཕེལ་བ་དེ་ལས་འདོད་པ་ཞེས་བྱ་བའི་འདོད་ཆགས་སྐྱེ་བ་ཡིན་ནོ་ཞེ་ན། དེ་ཡང་མ་ཡིན་ཏེ། གང་གི་
[360a.7]ཕྱིར་བད་ཀན་ལ་སོགས་པའི་སྐྱོན་མ་སྙོམས་པ་ལས་ཀྱང་ཁ་ཅིག་འདོད་ཆགས་ཅན་དུ་སྣང་ལ། བད་ཀན་ལ་སོགས་པ་ཆ་མཉམ་པ་གཞན་ལ་ཡང་འདོད་ཆགས་ཆུང་བར་སྣང་བའི་ཕྱིར་སྐྱོན་མཉམ་པར་གྱུར་པའི་ཚེ་འདོད་ཆགས་དང་མི་མཉམ་པའི་ཚེ་ཞེ་སྡང་ཡིན་ནོ་ཞེས་བྱ་བའི་ངེས་པ་ཡོད་པ་
[360b]
[360b.1]མ་ཡིན་ནོ། །གཞན་ཡང་བུད་མེད་ལ་མཆོག་ཏུ་བརྟེན་པའི་ཁུ་བ་ཟད་ནས་ཁྲག་ཀྱང་འབབ་པ་དང་གཞན་དག་ཤིན་ཏུ་འདོད་པ་ཆེ་བ་དེ་དག་ཀྱང་ཁུ་བ་ཟད་ནས་འདོད་པ་མེད་པར་ཐལ་བར་འགྱུར་རོ། །ཁུ་བ་ཡང་བུད་མེད་ཐམས་ཅད་ལ་ཐུན་མོང་བ་ཅན་ཡིན་པའི་ཕྱིར་བུད་མེད་མཛེས་མ་ཅིག་ལ་ཆགས་པར་
[360b.2]འགྱུར་བའི་ངེས་པ་མེད་པ་དེ་བས་ན་ཁུ་བ་མཚུངས་པར་ཡོད་པའི་ཕྱིར་བཙུན་མོ་ཅིག་ལ་ཆགས་པ་བདོ་བར་མི་འགྱུར་རོ། །ཁྱད་པར་ཅན་གྱི་བུད་མེད་ཀྱང་རྒྱུ་མ་ཡིན་ནམ། བུད་མེད་ཀྱི་གཟུགས་ལ་སོགས་པའི་ཁྱད་པར་ལས་ཀྱང་འདོད་ཆགས་ལ་སོགས་པ་ཁྱད་པར་ཅན་དུ་འགྱུར་ཏེ། གཟུགས་
[360b.3]ལ་སོགས་པ་ཡང་རྒྱུ་ཉིད་ཡིན་པའི་ཕྱིར་རོ། །འདི་ལྟར་གཟུགས་མཚར་བ་དང་། ལང་ཚོ་ཕུལ་དུ་བྱུང་བས་ཡིད་དབང་དུ་གྱུར་པ་ཅན་གྱི་འདོད་པ་ཅན་ནི་རང་གི་ཆུང་མ་བོར་ནས་བུད་མེད་གཞན་གྱི་དྲུང་དུ་འགྲོའོ། །རེས་འགར་ཆགས་པ་ཅན་གྱི་རྗེས་སུ་མཐུན་པར་འཇུག་པའི་རྒྱུ་ལས་ཀྱང་ཡིན་གྱི་ཁུ་
[360b.4]བ་འབའ་ཞིག་ནི་འདོད་ཆགས་ཀྱི་རྒྱུ་མ་ཡིན་པས་གྲོགས་བྱེད་པ་ཡོད་པའི་ཕྱིར་གཅིག་ལ་བདོ་བར་འགྱུར་ཞིང་། གཞན་ལ་དམན་པར་འགྱུར་བ་འདི་ལ་སྐྱོན་ཡོད་པ་མ་ཡིན་ནོ་ཞེ་ན་དེ་སྨྲས་པ་མ་ཡིན་ཏེ། གཟུགས་ལ་སོགས་པ་རྣམས་ཐམས་ཅད་ལ་འཁྲུལ་བར་མཐོང་བའི་ཕྱིར་ཏེ། འདི་ལྟར་གཟུགས་
[360b.5]ངན་པ་ལ་ཡང་འདོད་ཆགས་འཇུག་པ་ཡིན་ནོ། །ཉེ་བར་སྤྱོད་པའི་ཆ་ལ་མཁས་པས་དེ་ལ་ཆགས་པར་འགྱུར་རོ་ཞེ་ན། འོ་ན་གཟུགས་རྒྱུ་མ་ཡིན་པར་འགྱུར་རོ། །གཞན་ཡང་ཉེ་བར་སྤྱོད་པ་མི་ཤེས་པའི་གཟུགས་ལས་ཀྱང་འདོད་ཆགས་སྐྱེ་བ་དེ་བས་ན་ཉེ་བའི་སྤྱོད་པ་ཡང་འདོད་པའི་རྒྱུར་མི་རུང་ངོ་། །
[360b.6]གཟུགས་དང་རྗེས་སུ་སྤྱོད་པ་དང་མི་ལྡན་པ་ལ་ཡང་ཁ་ཅིག་འདོད་པ་སྐྱེ་བར་སྣང་བའི་ཕྱིར། གཉི་ག་ཡང་རྒྱུ་མ་ཡིན་ནོ། །འོན་ཏེ་གཟུགས་མ་ངེས་པའི་རྒྱུ་ཅན་དུ་འདོད་ཆགས་འདོད་ན་ནི་གཟུགས་ལ་སོགས་པ་ངེས་པ་མེད་པ་ལས་དེ་མི་སྐྱེ་བར་བསྟན་ཟིན་ཏོ། །གཟུགས་མཛེས་པར་ངེས་པའི་
[360b.7]བཙུན་མོ་གཅིག་ཡོད་ན། མ་བརྟགས་པར་གློ་བུར་དུ་འོངས་པའི་གཟུགས་ངན་པ་ལ་འདོད་པ་མི་འཇུག་པར་འགྱུར་རོ། །གཞན་ཡང་ཡོན་ཏན་མ་ཡིན་པར་འཛིན་པ་མི་སྡུག་པའི་འདུ་ཤེས་ཅན་སོ་སོར་རྟོགས་པ་ལ་སོགས་པ་ལྡན་པ་ཡང་ཆགས་པར་འགྱུར་རོ། །འོན་ཏེ་འདོད་ཆགས་ཀྱི་
[361a]
[361a.1]རྒྱུ་ཡོན་ཏན་འཛིན་པ་ཡིན་ན། དེ་ལྟ་ན་ཡང་ཐམས་ཅད་ཡོན་ཏན་འཛིན་པར་འགྱུར་ཏེ། ཐམས་ཅད་ལ་ཡོན་ཏན་འཛིན་པའི་རྒྱུར་བྱེ་བྲག་མེད་པའི་ཕྱིར་རོ། །འདི་ལྟར་ཕྱི་རོལ་གྱི་གཟུགས་ལ་སོགས་པའི་ཡོན་ཏན་འཛིན་པའི་རྒྱུ་དེ་ཡང་ཐམས་ཅད་ལ་ཁྱད་པར་མེད་པའི་ཕྱིར་ཐམས་
[361a.2]ཅད་ལ་ཡོན་ཏན་འཛིན་པར་ཐལ་བར་འགྱུར་རོ། །འོན་ཏེ་གཟུགས་ལ་སོགས་པའི་ཡོད་པ་ལས་ཡོན་ཏན་འཛིན་པ་མ་ཡིན་ན། འོ་ན་ཡོན་ཏན་ཅི་ཡིས་འཛིན་ཅེ་ན། གལ་ཏེ་ཐོག་མ་མེད་པའི་བག་ཆགས་ལས་དམིགས་པ་མེད་པར་ཡོན་ཏན་རིག་ན་ནི་འདོད་ཆགས་ལ་སོགས་པ་ཡང་གོམས་པ་ཉིད་
[361a.3]ལས་འཐོབ་པར་འགྱུར་རོ། །གཞན་ཡང་གནས་སྐབས་གང་ལ་གནས་པའི་ཆགས་པ་དེའི་གནས་སྐབས་ལ་སྡང་བར་མི་འགྱུར་ཏེ། འདོད་ཆགས་དང་ཞེ་སྡང་དེ་དག་ལ་མཚུངས་པ་མེད་པ་ཡིན་ཏེ། འགལ་བའི་ཕྱིར་རོ། །འགལ་བ་ལ་གནས་པའི་ཚེ་འགལ་བ་གཞན་མི་འབྱུང་ངོ་། །འོན་ཏེ་གནས་
[361a.4]སྐབས་མཚུངས་པའི་འདོད་ཆགས་ལ་སོགས་པ་འགལ་བར་མི་འགྱུར་རོ་ཞེ་ན། དེ་ནི་མ་ཡིན་ཏེ། འདིར་ངེས་པ་མཐོང་བར་མི་འགྱུར་ཏེ། འདི་ལྟར་གང་གི་ཚེ་ཞེ་སྡང་སྐྱེ་བ་དེའི་ཚེ་རེས་འགའ་ཡང་འདོད་ཆགས་སྐྱེ་བ་མ་ཡིན་ནོ། །ཡང་ན་གལ་ཏེ་འདོད་ཆགས་དང་ཞེ་སྡང་ལ་སོགས་པ་གཉི་ག་
[361a.5]ཡང་ངོ་བོ་ཉིད་འགལ་བ་མེད་པ་དང་། དེའི་ཚེ་གཉི་ག་དུས་མཚུངས་པ་ཉིད་དུ་ཐལ་བར་འགྱུར་རོ། །དེ་ནི་དེ་བཞིན་ནོ་ཞེ་ན། མ་ཡིན་ཏེ་ངེས་པ་མ་མཐོང་བའི་ཕྱིར་རོ། །འདིར་དུས་མཚུངས་པ་ཉིད་དུ་ངེས་པར་མ་མཐོང་བའོ། །འདོད་ཆགས་ལ་སོགས་པ་གོམས་པའི་ཁྱད་པར་ལས་སྐྱེ་བ་གང་
[361a.6]ཡིན་པ་དེའི་ཡང་བག་ཆགས་ཡོད་པའི་ཕྱིར་འདོད་ཆགས་དང་ཞེ་སྡང་དུས་མཚུངས་པ་ཉིད་དུ་ཇི་ལྟར་མི་འགྱུར་ཏེ། ཡོན་ཏན་འཛིན་པ་ཉིད་ཀྱི་སྐྱོན་ནི་ཐམས་ཅད་ལ་ཡོད་པ་མ་ཡིན་ནམ་ཞེ་ན་སྨྲས་པ། རིགས་མཐུན་བག་ཆགས་ཁྱད་པར་ནི། །འབྲེལ་པ་ངེས་པར་འཇུག་པ་ཅན། །འདོད་ཆགས་
[361a.7]ལ་སོགས་གང་ཡིན་དེ། །སྐྱོན་དེ་དག་ཏུ་ཐལ་བ་མེད། །ཅེས་བྱ་བ་ལ་སྔར་རིགས་མཐུན་པའི་འདོད་ཆགས་ལ་སོགས་པ་གོམས་པས་བཞག་པའི་བག་ཆགས་དེ་ལས་ཁྱད་པར་དེ། བྱེ་བྲག་དེ་དང་འབྲེལ་པ་ངེས་པར་འཇུག་པ་ཅན་གང་ཡིན་པའི་འདོད་ཆགས་ལ་སོགས་པ་དེ་འདོད་པ་གང་ཡིན་པའི་
[361b]
[361b.1]རྒོལ་བ་དེ་ལ་སྐྱོན་དག་ཏུ་ཐལ་བར་འགྱུར་བ་མེད་དེ། འདི་ལྟར་འདོད་ཆགས་ལ་སོགས་པ་བག་ཆགས་ཀྱི་སྟོབས་ཉིད་ལས་སྐྱེ་བ་སྟེ། གང་ཞིག་གང་དུ་འཇིག་རྟེན་གཞན་དུ་གོམས་པ་དེ་ཉིད་དེར་སད་པར་འགྱུར་བའི་ཕྱིར་གོམས་པ་ངེས་པའི་འདོད་ཆགས་ལ་སོགས་པ་རྣམས་ཡུལ་གཟུགས་ལ་སོགས་པ་ལ་རག་
[361b.2]ལས་པ་མེད་པའི་ཕྱིར་སྔར་གྱི་སྐྱོན་གྱི་གླགས་ཡོད་པ་མ་ཡིན་ནོ། །རླུང་ལ་སོགས་པའི་ཆོས་འདོད་ཆགས་ལ་སོགས་པ་མ་ཡིན་ཡང་འབྱུང་བའི་ཆོས་སུ་ནི་འགྱུར་བ་མ་ཡིན་ནམ་ཞེ་ན། སྨྲས་པ། དེས་ནི་འབྱུང་བའི་ཆོས་ཉིད་དང་། །རྟེན་ཡང་བཀག་པ་ཉིད་ཀྱི་ཕྱིར། །དཀར་པོ་ལ་སོགས་ས་སོགས་
[361b.3]ལ། །བརྟེན་པ་དག་ནི་མ་ཡིན་ནོ། །ཞེས་བྱ་བ་ལ། གང་དག་འདོད་ཆགས་ལ་སོགས་པ་རྣམས་ས་ལ་སོགས་པའི་ཆོས་ཡིན་པར་སྨྲ་སྟེ། འདི་ལྟར་ས་དང་ཆུ་ལྷག་པར་གྱུར་ན་ཆགས་པར་འགྱུར་ལ། མེ་དང་རླུང་ལྷག་པར་གྱུར་ན་སྡང་བར་འགྱུར་ཞིང་། ཆུ་དང་རླུང་ལྷག་ན་རྨོངས་པར་འགྱུར་རོ་ཞེས་
[361b.4]ཟེར་བ་དེ་དག་གི་གཞུང་གིས་འདོད་ཆགས་ལ་སོགས་པ་འབྱུང་བའི་ཆོས་ཉིད་དུ་འདོད་པ་དེ་ཡང་བཀག་པ་ཡིན་ཏེ། ཐམས་ཅད་དུ་མ་ངེས་པ་དེས་ནི། གནས་སྐབས་གང་ལ་ཆགས་ཅན་འདོད། །ཅེས་བྱ་བ་ལ་སོགས་པ་ཉིད་ཀྱིས་བསྟན་ཏོ། །རྟེན་དང་བརྟེན་པའི་དངོས་པོ་ཡང་། །ཡོད་མེད་དག་ལ་རྟེན་
[361b.5]མེད་ཕྱིར། །ཞེས་བྱ་བ་ལ་སོགས་པས་སུན་ཕྱུང་བ་ཡིན་ནོ། །འོན་ཏེ་ཇི་ལྟར་དཀར་པོ་ལ་སོགས་པ་འབྱུང་བ་ཆེན་པོ་ལ་བརྟེན་པ་དེ་བཞིན་དུ། འདོད་ཆགས་ལ་སོགས་པ་ཡང་ཡིན་ནོ་ཞེ་ན་དེ་ནི་མ་ཡིན་ཏེ། དཀར་པོ་ལ་སོགས་པ་ས་ལ་སོགས་པ་ལ་བརྟེན་པ་མེད་པའི་ཕྱིར་རོ། །གལ་ཏེ་དཀར་པོ་ལ་
[361b.6]སོགས་པ་ས་ལ་སོགས་པ་ལ་བརྟེན་ན་ནི་འབྱུང་བ་བཞིར་ཁས་བླངས་པ་ལ་གནོད་པར་འགྱུར་ཏེ། འབྱུང་བ་ལ་སོགས་པའི་གཟུགས་ཁས་བླངས་པའི་ཕྱིར་དེ་དག་ལ་རྟེན་དང་བརྟེན་པའི་དངོས་པོ་མེད་དོ། །འོན་ཏེ་འབྱུང་བ་རྒྱུར་བྱས་ནས་གཟུགས་ལ་སོགས་པ་གནས་སོ་ཞེས་བརྗོད་པའི་ཕྱིར་རྟེན་དང་བརྟེན་
[361b.7]པའི་དངོས་པོ་ཁས་བླངས་པ་ཉིད་དུ་གྲུབ་པའི་མཐའ་ཡིན་ན། དེ་ཇི་ལྟར་འགལ་བར་མི་འགྱུར་ཞེ་ན། འདིར་སྨྲས་པ། དེ་རྒྱུར་བྱས་པའི་སྒྲ་དག་ཀྱང་། །རྒྱུ་ཡི་དོན་ཡིན་རང་རྟེན་དང་། །གཟུགས་སོགས་ཐ་དད་མེད་པར་ནི། །གནས་ཅན་ཕྱིར་རོ་རྟེན་ཉིད་ཀྱང་། །ཞེས་བྱ་བ་ལ། རྒྱུར་བྱས་པའི་དོན་རྟེན་གྱི་
[362a]
[362a.1]དོན་ནི་མ་ཡིན་ནོ། །འོན་ཀྱང་རྒྱུའི་རང་བཞིན་ཁོ་ན་ལ་རྒྱུར་བྱས་པའི་སྒྲར་བརྗོད་པ་དེ་བས་ན་འབྱུང་བ་དང་གཟུགས་ནི་བརྟེན་པའི་དངོས་པོ་མ་ཡིན་ནོ། །དུས་མཚུངས་པར་རྟེན་དང་བརྟེན་པའི་དངོས་པོ་ཡོད་དུ་ཆུག་ན་ཡང་། དེ་ལྟ་ན་ཡང་རང་གི་རྟེན་དང་ཐ་དད་པ་མེད་པར་འཇུག་པའི་ཕྱིར་
[362a.2]གཟུགས་ལ་སོགས་པའི་རྟེན་འབྱུང་བ་ཡིན་པ་བཞིན་འདོད་ཆགས་ལ་སོགས་པ་འབྱུང་བ་དང་ཐ་མི་དད་པར་འཇུག་པ་ཡིན་ན་ནི་དེའི་ཚེ་འབྱུང་བ་ལ་བརྟེན་པར་འགྱུར་བ་ཡིན་ན། གཟུགས་ལ་སོགས་པ་བཞིན་ལུས་ཀྱི་འབྱུང་བ་ཆེན་པོ་དང་ཐ་མི་དད་པར་འཇུག་པ་མ་ཡིན་པའི་ཕྱིར་འདོད་ཆགས་ལ་སོགས་
[362a.3]པ་ནི་ལུས་ལ་བརྟེན་པ་མ་ཡིན་ཏེ། རེས་འགའ་མི་འབྱུང་བའི་ཕྱིར་རོ། །གལ་ཏེ་མྱོས་སོགས་ནུས་པ་བཞིན། །ཐ་དད་ཡིན་ན་དངོས་པོ་ལས། །ནུས་པ་དོན་གཞན་དག་མ་ཡིན། །དངོས་འཇིག་འགྱུར་གྱི་རྟེན་ཚང་བར། །གནས་ན་བརྟེན་པ་འཇིག་མི་འགྱུར། །གལ་ཏེ་དེ་མཚུངས་ཞེ་ན་མིན། །འབྱུང་
[362a.4]སེམས་ཐ་དད་ཉིད་ཡིན་ཏེ། །སྣང་བ་ཐ་དད་ཅན་རྟོགས་ཕྱིར། །ཞེས་བྱ་བ་ལ། ཆང་ལ་སོགས་པའི་རྫས་ལ་བརྟེན་པའི་མྱོས་པའི་ནུས་པ་ཐ་དད་པར་གནས་པ་སྟེ་རྫས་གནས་ཀྱང་ཕྱིར་ལྡོག་པ་དང་ཕྱིས་མི་སྐྱེ་བའི་ཕྱིར་རོ། །སོགས་པའི་སྒྲས་ནི་དུག་ལ་སོགས་པའི་འཆི་བར་བྱེད་པའི་ནུས་པ་བཟུང་ངོ་། །
[362a.5]འདི་ལྟར་བུ་རམ་ལ་སོགས་པའི་རྫས་ཡོད་ན། ནུས་པ་གསལ་བར་འགྱུར་ཞིང་ཡང་འཇིག་པར་འགྱུར་བའི་ཕྱིར། མྱོས་པ་ལ་སོགས་པའི་ནུས་པ་བཞིན། འདོད་ཆགས་ལ་སོགས་པ་རྣམས་རྟེན་དང་ཐ་དད་པ་ཡིན་མོད་ཀྱི། འོན་ཀྱང་འདོད་ཆགས་ལ་སོགས་པ་ལུས་ལ་བརྟེན་པའོ་ཞེ་ན། དེ་
[362a.6]ནི་མི་བདེན་ཏེ་ནུས་པ་དོན་གཞན་དུ་གྱུར་པ་མེད་པའི་ཕྱིར་རོ། །བུ་རམ་ལ་སོགས་པའི་དངོས་པོ་ལས་ནུས་པ་དོན་གཞན་དུ་གྱུར་པར་ཁས་མི་ལེན་ཀྱང་བརྡར་བཏགས་པ་བཞིན་དངོས་པོ་ལས་དངོས་པོའི་ནུས་པ་བཞིན་ཏེ་གང་ཞེས་ཐ་དད་པའི་རྣམ་པར་དབྱེ་སྟེ། དཔེར་ན་མཆི་གུའི་ལུས་བཞིན་ནོ། །
[362a.7]འོ་ན་གལ་ཏེ་མེ་ལ་སོགས་པ་ལ་ནུས་པ་ཐ་དད་མེད་པ་དེའི་ཚེ་སྔགས་ལ་སོགས་པས་ཅི་ཞིག་འཇོམས་པར་བྱེད། རེ་ཞིག་མེ་ནི་མ་ཡིན་ཏེ། གཞན་དུ་མཐོང་བའི་ཕྱིར་རོ། །ནུས་པ་བཀག་ཀྱང་མེ་མ་བཀག་པའི་ཕྱིར་ཐ་དད་པར་རིགས་སོ་ཞེ་ན་དེ་ནི་མ་ཡིན་ཏེ། དངོས་པོ་ཉིད་དེར་འཇིག་པར་འགྱུར་
[362b]
[362b.1]བའི་ཕྱིར་རོ། །རྟེན་མེ་ལ་སོགས་པ་མ་ཚང་བ་མེད་པར་གནས་ན་བརྟེན་པ་མེའི་ནུས་པ་འགག་པར་མི་འགྱུར་ཏེ། རྟེན་ཞིག་པ་ཉིད་ན་བརྟེན་པ་འཇིག་པར་རིག་པའི་ཕྱིར་རོ། །གཞན་དུ་ན་རྟེན་དང་བརྟེན་པའི་དངོས་པོར་མི་རུང་བའི་ཕྱིར་རོ། །འོན་ཏེ་འདིར་ཡང་འབྱུང་བ་དང་སེམས་དག་ཐ་མི་དད་
[362b.2]པར་མྱོས་པ་ལ་སོགས་པའི་ནུས་པ་བཞིན་དུ་ཁས་ལེན་ནོ་ཞེ་ན་མ་ཡིན་ཏེ། འབྱུང་བ་དང་སེམས་དག་ཐ་དད་པའི་ཕྱིར་སེམས་ནི་ནུས་པ་བཞིན་འབྱུང་བ་ལས་ཐ་མི་དད་པ་མ་ཡིན་ནོ། །དེ་ཉིད་ཀྱང་ཅིས་ཤེས་ཤེ་ན། སྣང་བ་ཐ་དད་པ་ཅན་རྟོགས་པའི་ཕྱིར་ཏེ། ཐམས་ཅད་ཐ་དད་པར་སྒྲུབ་པར་བྱེད་པ་ནི་
[362b.3]སྣང་བ་ཐ་དད་པ་ཡིན་པའི་ཕྱིར་དང་། གཞན་ཐ་དད་པའི་རྒྱུ་མེད་པའི་ཕྱིར་རོ། །གལ་ཏེ་དབང་པོ་ཐ་དད་པའི་ཡུལ་ཉིད་ཀྱིས་སོ་ཞེ་ན། སྣང་བ་ཐ་དད་པ་མ་ཡིན་ན་དེ་གཅིག་པ་ཉིད་དེ། ཐ་དད་པར་བྱེད་པ་ནི་ཐ་དད་པར་སྣང་བའི་ཤེས་པ་ཡིན་པའི་ཕྱིར་ཏེ། ཤེས་པའི་རྒྱུད་ཐ་དད་པ་ཡིས་ཐ་དད་པ་ནི་མ་ཡིན་ནོ། །མིག་ལ་
[362b.4]སོགས་པ་རྒྱུད་ཐ་དད་པས་སྣང་བ་ཐ་དད་པ་མ་ཡིན་ནམ་ཞེ་ན། དེ་ལྟ་ན་ནི་དེ་ཉིད་སྣང་བ་ཐ་དད་པས་ཐ་དད་པར་བྱེད་པས་ན་གཞན་དོན་མེད་དོ། །འདིར་ཡང་ཐ་དད་པ་སྣང་བ་ན་ནང་གི་བདེ་བ་ལ་སོགས་པའི་ངོ་བོ་ཉིད་ཤེས་པའི་རིག་པ་ཡིན་ལ་སེམས་པ་ལ་སོགས་པའི་ངོ་བོ་ཉིད་དུ་གཟུང་བར་བྱ་བ་ནི་དོན་རིག་
[362b.5]པའོ། །ནང་གི་རེག་བྱའི་ཁྱད་པར་གྱི་ངོ་བོ་ཉིད་བདེ་ལ་སོགས་པ་མ་ཡིན་ནམ། དེས་ན་རང་རིག་པའི་རང་བཞིན་ཏེ་གང་ཞིག་གང་ན་གནས་པའི་དངོས་པོ་ད་ནི་དེ་ཉིད་དུ་ཉམས་སུ་མྱོང་བར་འགྱུར་བ་སྟེ། དཔེར་ན་ལྗོན་ཤིང་ལ་སོགས་པ་རིང་པོ་དང་ཉེ་བ་ནས་རིག་པ་དེ་བཞིན་དུ་ནང་གི་རེག་བྱའི་ཁྱད་
[362b.6]པར་གྱི་ངོ་བོ་ཉིད་ཀྱང་ནང་གི་ལུས་ལ་གནས་པས་ནང་དུ་མྱོང་བ་ཡིན་ནོ་ཞེ་ན། འདིར་སྨྲས་པ། གལ་ཏེ་འདི་རེག་བྱ་ཉིད་ཡིན་ན་དེའི་ཚེ་རེག་བྱ་དེ་གང་གིས་རིག་པ་ཡིན་གཞན་གྱིས་རིག་ན་ནི་ཐ་དད་པར་འཛིན་པར་གྲུབ་པོ། །འོན་ཏེ་རེག་བྱའི་ཁྱད་པར་དེ་དང་རིག་པ་ཡིན་ན། དེའི་ཚེ་ཉམས་སུ་མྱོང་བའི་རང་
[362b.7]བཞིན་ཏེ། ཤེས་པ་ཉིད་རང་རིག་པ་ཡིན་པའི་ཕྱིར་རོ། །གལ་ཏེ་ཡང་རང་གིས་རིག་པའི་ངོ་བོ་ཉིད་ཡིན་ན་གཞན་དག་གིས་ཀྱང་དེ་བཞིན་དུ་ཅིའི་ཕྱིར་མི་རིག །སྙིང་གའི་ནང་དུ་སོན་པའི་ཕྱིར་མི་རིག་གོ་ཞེ་ན། ནང་གི་རེག་པས་རིག་པར་འགྱུར་ཏེ། ནང་གི་ཡན་ལག་ལ་རེག་པ་ཅན་དེས་གཟུང་བར་
[363a]
[363a.1]འགྱུར་བའི་ཕྱིར་རོ། །ཕྱི་རོལ་ལ་འཁྱུད་པའི་རེག་པ་ཡང་བདེ་བ་ལ་སོགས་པ་ཉིད་དུ་འགྱུར་ཏེ་གཉི་ག་ཕན་ཚུན་རེག་པས་གཉི་གས་ཀྱང་བདེ་བ་མྱོང་བར་འགྱུར་རོ། །ལུས་ཀྱང་རྡུལ་ཕྲ་རབ་ཀྱི་ངོ་བོ་ཉིད་ཀྱིས་ཐ་དད་པར་བྱེད་པ་ཡིན་པའི་ཕྱིར་བདེ་བ་དུ་མ་རིག་པར་འགྱུར་རོ་ཞེས་
[363a.2]བཤད་དོ། །གལ་ཏེ་ཡང་རེག་པར་གྱུར་པ་ཉིད་བདེ་བ་ཡིན་ནོ་ཞེ་ན། ཅིའི་ཕྱིར་མཛའ་བོ་ཡིད་དུ་འོང་བས་རེག་པར་གྱུར་ན་བདེའི་གཞན་གྱིས་མ་ཡིན། མཛའ་བོ་ཡིན་པའི་ཕྱིར་དེ་ཁོ་ན་བདེ་བའི་རྒྱུར་འགྱུར་རོ་ཞེ་ན། མཛའ་བོ་གཅུགས་པ་ཉིད་དུ་ཇི་ལྟར་གྱུར་པ་ཡིན་ཏེ། རང་གི་སྐལ་བ་ཉིད་ལས་ཁ་ཅིག་ལ་
[363a.3]ལའི་སྙིང་དུ་སྡུག་པར་འགྱུར་ལ། དེ་ཡང་སྔོན་གྱི་ལས་ཉིད་ལ་རང་གི་སྐལ་བ་ཞེས་བརྗོད་ཀྱི། ཚེ་འདི་ལ་ནི་དེས་ཕན་བཏགས་པའི་ཁྱད་པར་མ་མཐོང་ངོ་། །དེ་ལྟ་བུས་ཀྱང་སེམས་དང་ལུས་དག་ཐ་དད་པ་མེད་ན་ཡང་འཇིག་རྟེན་ཕ་རོལ་གནས་སོ། །གལ་ཏེ་ཡང་དེའི་མཛའ་བོ་ཉིད་དུ་གཞན་གྱིས་
[363a.4]ཀྱང་ཤེས་པར་འགྱུར་བ་ལས། མཛའ་བོར་དེ་དག་གིས་མི་ཤེས་པའི་ཕྱིར་མཛའ་བོ་ཉིད་མེད་པ་ཡིན་ནོ། །མཛའ་བོ་ནི་ལུས་ཀྱི་ནང་དུ་ཆུད་པ་ཡིན་པས་གཞན་གྱིས་ཇི་ལྟར་ཤེས་པར་འགྱུར་ཞེ་ན། ཕྱི་རོལ་དུ་རྟོགས་པར་འགྱུར་བ་ཇི་ལྟར་ལུས་ཀྱི་ནང་དུ་ཆུད་པར་འགྱུར་ཏེ། གཟུགས་ལ་སོགས་
[363a.5]པའི་སྣང་བ་གཞན་གྱིས་རྟོགས་པའི་ཕྱིར་དང་། རང་རིག་པའི་ངོ་བོ་ཉིད་ནི་ཕྱི་རོལ་ལས་ཐ་དད་པའི་ཕྱིར་རོ། །འོན་ཏེ་གཟུགས་ལ་སོགས་པ་ཡིན་ཡང་གཞན་གྱི་ལུས་ཡིན་པའི་ཕྱིར་རིག་པར་ནི་སྣང་ངོ་ཞེ་ན། འོ་ན་གཞན་གྱི་ལུས་ཀྱང་མི་རིག་པར་འགྱུར་རོ། །ལུས་གཞན་དང་ལྷན་ཅིག་པར་
[363a.6]ངེས་ན་ཤེས་པ་ཡན་གར་བ་ཇི་ལྟར་རྟོགས་པར་འགྱུར་ཏེ། འདི་ལྟར་མུན་ཁུང་ན་གནས་པའི་ལུས་མ་ཤེས་ཀྱང་མཛའ་བོ་དྲན་ཞིང་ལུས་གཞན་མི་རྟོགས་པ་ན་ཡང་། ལུས་ཡན་གར་བ་མྱོང་བ་ཡིན་པའི་ཕྱིར་ལུས་དང་སེམས་དག་ལྷན་ཅིག་དམིགས་པར་ངེས་པ་ནི་མེད་དོ། །ལུས་ལས་སེམས་ཐ་དད་པ་
[363a.7]ཡིན་དུ་ཆུག་ན་ཡང་ལུས་ཉིད་དེའི་རྒྱུའི་ཡིན་ནམ། དེ་བས་ན་བདེ་བ་ལ་སོགས་པ་གོམས་པ་ལས་སྐྱེས་པ་མ་ཡིན་པའི་ཕྱིར་དོན་དམ་པའི་ལུས་ཁུ་བ་དང་ཁྲག་ལ་སོགས་པ་ལས་བྱུང་བའི་ཕྱིར། འཇིག་རྟེན་ཕ་རོལ་མེད་དེ། འཇིག་རྟེན་འདི་བརྒྱུད་པ་ཁོ་ནས་རྫོགས་ཤིང་འཁོར་བ་ཉིད་མ་ཡིན་ནོ་
[363b]
[363b.1]ཞེ་ན། སྨྲས་པ། ལུས་འགྱུར་བ་ཡི་བར་དུ་ཡང་། །གཟུགས་སོགས་བཞིན་དུ་ཡིད་ངོ་བོ། །མཚུངས་འགྱུར་རྣམ་པར་རྟོག་པ་ནི། །དོན་གྱི་གཞན་དབང་ཅན་ཉིད་གང་། །ཞེས་བྱ་བ་ལ། གང་གི་ཚེ་འདོད་ཆགས་ལ་སོགས་པའི་རྒྱུ་ལུས་ཡིན་པའམ། རང་བཞིན་ཡིན་པ་དེའི་ཚེ་ལུས་ཀྱི་འགྱུར་བའི་
[363b.2]སྔོན་དུ་ཡིད་ཚུལ་གཅིག་པ་ཅན་དུ་འགྱུར་ཏེ། རྒྱུ་དང་ངོ་བོ་ཉིད་ཀྱིས་རྟེན་དུ་འགྱུར་བའི་ལུས་མཚུངས་པའི་ཕྱིར་རོ། །གཞན་དུ་ནི་མ་ཡིན་ཏེ། རྟེན་དང་བརྟེན་པའི་དངོས་པོ་འམ་རྒྱུ་དང་འབྲས་བུའི་དངོས་པོ་དེའི་བདག་ཉིད་མེད་པའི་ཕྱིར་རོ། །ལུས་ཀྱི་ངོ་བོ་ཉིད་གཅིག་ཡིན་པའི་ཕྱིར་གཟུགས་ལ་
[363b.3]སོགས་པ་ཐ་དད་པར་སྣང་བ་མ་ཡིན་ནོ། །ཡུལ་གཞན་དང་གཞན་ཉེ་བ་ལས་འདོད་ཆགས་ལ་སོགས་པའི་དངོས་པོ་གཞན་དང་གཞན་དུ་འགྱུར་བ་མ་ཡིན་ནམ་ཞེ་ན། འདིར་སྨྲས་པ། རྣམ་པར་རྟོག་པའི་ཤེས་པ་དང་བདེ་བ་ལ་སོགས་པ་གང་གི་དོན་གྱི་གཞན་དབང་ཅན་དུ་འགྱུར་ཏེ། གོམས་པའི་བག་
[363b.4]ཆགས་སད་པ་ཙམ་དང་འབྲེལ་པའི་ཕྱིར་རོ་ཞེས་བསྟན་ཏོ། །འདོད་ཆགས་ལ་སོགས་པ་རྣམ་པར་ཤེས་པ་དང་འབྲེལ་པ་ཡིན་ཡང་ཇི་ལྟར་མཚུངས་པ་ཉིད་དུ་མི་འགྱུར་ཞེ་ན། འདིར་སྨྲས་པ། གང་ཚེ་ལུས་ལ་ལྟོས་མེད་པར། །ཅུང་ཟད་ལ་ལར་རེས་འགའ་ཞིག །བག་ཆགས་སད་པའི་རྒྱུ་ཅན་གྱིས། །
[363b.5]ཤེས་པ་འགའ་སྐྱེ་དེ་ཕྱིར་རོ། །ཞེས་བྱ་བ་ལ། གང་གི་ཕྱིར་ལུས་རྒྱུ་ཉིད་དུ་གྱུར་ན་སྐྱོན་སྔ་མ་ཡོད་ཀྱི། གང་གི་ཚེ་ལུས་ལ་ལྟོས་པ་མེད་པར་བག་ཆགས་སད་པའི་རྒྱུ་གང་ལ་ཡོད་པའི་ཤེས་པ་དེ་དེའི་ཕྱིར་ལ་ལར་རེས་འགའི་ཚེ་ཡིད་ཀྱི་རྣམ་ཤེས་འགའ་ཞིག་བག་ཆགས་སད་པ་ལས་སྐྱེ་བར་ཁས་
[363b.6]ལེན་པར་བྱེད་ན་ལུས་ངོ་བོ་ཉིད་གཅིག་པ་ཅན་ཡིན་ཡང་འདོད་ཆགས་ལ་སོགས་པ་བག་ཆགས་སད་པའི་རྒྱུ་ཅན་ཡིན་པའི་ཕྱིར་རོ། །གཏན་ཚིགས་གཞན་ཡང་སྨྲས་པ། རྣམ་ཤེས་མིན་པའང་རྣམ་ཤེས་ཀྱི། །ཉེར་ལེན་མིན་ཕྱིར་གྲུབ་པ་ཡིན། །གལ་ཏེ་དངོས་པོ་ཐམས་ཅད་ནི། །རྣམ་ཤེས་ནུས་ལྡན་ཕྱིར་
[363b.7]འདོད་ན། །རྩྭ་མཆོག་རྩེ་ན་གླང་ཆེན་བརྒྱ། །སྔོན་ཆད་མ་མཐོང་ཡོད་དོ་ཞེས། །དེ་སྐད་གྲངས་ཅན་ཕྱུགས་ལས་གཞན། །ངོ་ཚ་ཅན་སུ་སྨྲ་བར་རྩོལ། །རང་བཞིན་གང་ཞིག་སྣང་གྱུར་པ། །རང་བཞིན་དེ་ནི་སྔར་མི་སྣང་། །རྒྱུ་ནི་ལན་བརྒྱར་རྣམ་ཕྱེ་ཡང་། །ཇི་ལྟར་དེ་ནི་ཡོད་པར་འགྱུར། །
[364a]
[364a.1]ཞེས་བྱ་བ་ལ། སེམས་འགྱུར་བ་ཅན་དང་། འགྱུར་བ་མེད་པ་དག་གིས་ཕྱི་མའི་ཡིད་འགྱུར་བ་དང་མི་འགྱུར་བར་མཐོང་བའི་ཕྱིར། གདོན་མི་ཟ་བར་སེམས་སྔ་མ་གྱུར་པའི་རྗེས་སུ་འཇུག་པས་ཤེས་པ་དང་བྲལ་བའི་ལུས་ལ་ཤེས་པ་ཉེ་བར་མི་ལེན་པའི་ཕྱིར་དང་། འདོད་ཆགས་ལ་
[364a.2]སོགས་པ་ཅིག་ཅར་སྐྱེ་བར་ཐལ་བར་འགྱུར་བའི་ཕྱིར་ཡང་འཇིག་རྟེན་ཕ་རོལ་གྲུབ་པ་ཡིན་ནོ། །གལ་ཏེ་ཤེས་པ་ཉིད་ལས་ཤེས་པ་འབྱུང་བ་དེ་ལྟ་ན་ཡང་འཇིག་རྟེན་ཕ་རོལ་མི་འགྲུབ་སྟེ། དངོས་པོ་ཐམས་ཅད་ཤེས་པའི་ནུས་པ་དང་ལྡན་པའི་ཕྱིར་ཤེས་པ་སྐྱེད་པར་བྱེད་པའི་ཤེས་པ་འདོད་པ་མ་ཡིན་
[364a.3]ནམ། འཇིག་རྟེན་ཕ་རོལ་གྱི་འབྲས་བུ་རྩོམ་པ་ཅན་མི་ཤེས་པའི་ནུས་པ་མ་ཡིན་ནོ་ཞེ་ན། གྲངས་ཅན་པའི་ལུགས་འདི་ཁྱེད་ལ་གང་ནས་འོངས་ཏེ། གྲངས་ཅན་ཕྱུགས་ཉིད་བསྟན་བཅོས་གཅིག་པུ་ལ་བརྟེན་པ་ཁྲེལ་མེད་པ་གང་ཡིན་པ་འདི་སྐད་སྨྲ་བར་རྩོལ་བ་ལས་ངོ་ཚ་དང་བཅས་པ་ནི་དེ་སྐད་མི་
[364a.4]སྨྲའོ། །ཅི་ཞིག་ཅེ་ན། སྔོན་ཆད་མ་མཐོང་བ་སྟེ། མཐོང་བ་ལས་འདས་པའི་གླང་པོ་ཆེ་བརྒྱ་རྩྭའི་རྩེ་མོ་ན་ཡོད་ཅེས་སྨྲ་བ་ནི། ཁྲེལ་མེད་པའི་གྲངས་ཅན་ལས་ངོ་ཚ་དང་བཅས་པ་སུ་ཞིག་སྨྲ་བར་བྱེད་དོ། །གང་གི་ཕྱིར་ཞོ་ལ་སོགས་པའི་རང་བཞིན་གང་ཞིག་སྣང་དུ་རུང་བ་དེ་སྔར་སྣང་དུ་རུང་བ་ལས་
[364a.5]དམིགས་པས་ཡོད་པ་མ་ཡིན་ཏེ། ལན་བརྒྱར་གཡེངས་ཏེ་བཙལ་ཡང་རྒྱུ་ལ་མ་མཐོང་བའི་ཕྱིར། དེ་ལ་ཞོ་ལ་སོགས་པའི་རང་བཞིན་ཡོད་པར་ཅི་ལྟར་འགྱུར། གལ་ཏེ་རང་བཞིན་གྱིས་ཡོད་ན་ནི་དེ་ཉིད་ཡོད་དོ་ཞེས་བརྗོད་པར་བྱ་བའོ། །ཤེས་པ་ལས་གཞན་པའི་རང་བཞིན་དུ་ཡོད་ན་སེམས་དེ་
[364a.6]འབྱུང་བ་དེ་རྣམས་ལ་ཇི་ལྟར་ཡོད་པ་ཡིན། འོན་ཏེ་མ་ལ་སོགས་པའི་ཤེས་པ་ལས་སྐྱེ་བར་འདོད་ན་མ་ཡིན་ཏེ། མ་ལ་སོགས་པའི་འདུ་བྱེད་པ་བཞིན་འཇུག་པར་ཐལ་ལོ་ཞེས་བསྟན་ཏོ། །དེ་བས་ན་སེམས་ལས་རང་གི་རྒྱུད་ལ་གནས་པའི་སེམས་སྐྱེ་བའི་ཕྱིར་འཇིག་རྟེན་ཕ་རོལ་གཞན་གྲུབ་པ་
[364a.7]ཡིན་ནོ། །གཞན་ཡང་སྔ་ན་མེད་པ་འབྱུང་བ་ན། ཆགས་སོགས་ངེས་མེད་ཐལ་བར་འགྱུར། །འབྱུང་བའི་བདག་ཉིད་མ་འདས་ཕྱིར། །ཐམས་ཅད་ཆགས་སོགས་དང་ལྡན་ན། །ཐམས་ཅད་འདོད་ཆགས་མཚུངས་ཅན་འགྱུར། །འབྱུང་བ་ཕུལ་དུ་འབྱུང་ཕྱིར་མིན། །འབྱུང་རྣམས་སྲོག་
[364b]
[364b.1]ཆགས་ཁྱད་མེད་ནའང་། །ཁྱད་པར་འདི་ཡི་རྟེན་ཅན་གང་། །དེ་ནི་ཕུལ་བྱུང་འགྲིབ་པར་ལྡན། །དེ་ཡོད་པ་ལས་དེ་ཉམས་འགྱུར། །ཞེས་བྱ་བ་ལ། གལ་ཏེ་ཡང་འཇིག་རྟེན་གཞན་མེད་ན་དེའི་ཚེ་སྔ་ན་མེད་པའི་སེམས་ཅན་འབྱུང་བར་འགྱུར་ན། དེ་ལྟ་ན་ཡང་འདོད་ཆགས་ལ་སོགས་པ་ནི་ངེས་པ་མེད་པར་
[364b.2]འགྱུར་ཏེ། ཐམས་ཅད་འདོད་ཆགས་ཅན་དུ་མི་འགྱུར་ཞིང་། ལ་ལ་འདོད་ཆགས་བྲལ་བར་ངང་གིས་འགྱུར་རོ། །གང་གི་ཚེ་འཇིག་རྟེན་ཕ་རོལ་དུ་འགྲོ་བ་དེའི་ཚེ་སྲེད་པ་ཉིད་སྲོག་ཆགས་རྣམས་སྐྱེ་བའི་རྒྱུ་ཡིན་པའི་ཕྱིར་སྐྱེ་བ་དང་ལྡན་པ་ནི་འདོད་ཆགས་དང་བྲལ་བ་མ་ཡིན་ཏེ། འདོད་ཆགས་ལ་སོགས་པ་
[364b.3]མེད་ན་སྐྱེ་བ་མེད་པའི་ཕྱིར་རོ། །འོན་ཏེ་འབྱུང་བའི་བདག་ཉིད་འདོད་ཆགས་ལ་སོགས་པའི་རྒྱུ་ཡིན་ཏེ། དེ་ཐམས་ཅད་ཀྱིས་མི་འདོར་བའི་ཕྱིར་སྐྱེ་བ་དང་ལྡན་པ་ཐམས་ཅད་འདོད་ཆགས་དང་ལྡན་པར་གྲུབ་པོ་ཞེ་ན། གལ་ཏེ་དེ་ལྟར་འབྱུང་བའི་བདག་ཉིད་ལས་མི་འདའ་བ་དེ་ཉིད་ཀྱི་ཕྱིར་ན་འཇིག་རྟེན་པ་ཐམས་
[364b.4]ཅད་འདོད་ཆགས་མཚུངས་པར་འགྱུར་རོ། །གལ་ཏེ་འབྱུང་བ་རྣམས་ཐམས་ཅད་ཕན་ཚུན་ཕུལ་དུ་བྱུང་བ་མེད་ན། ཐམས་ཅད་འདོད་ཆགས་མཚུངས་པར་སྲིད་པ་མ་ཡིན་ནམ། འབྱུང་བ་ལས་ཕུལ་དུ་བྱུང་བ་རྟོགས་པའི་ཕྱིར་ཐམས་ཅད་འདོད་ཆགས་མཚུངས་པ་མ་ཡིན་ནོ། །འདོད་ཆགས་ལ་
[364b.5]སོགས་པ་མ་ངེས་པར་ཐལ་ལོ་ཞེས་གང་སྨྲས་པ་ནི་འདིར་གྲུབ་པ་ལ་སྒྲུབ་པ་ཉིད་དེ། ས་ལ་སོགས་པ་ཁ་ཅིག་འདོད་ཆགས་དང་བྲལ་བར་འགྱུར་བ་ཉིད་དོ། །སྲོག་ཆགས་རྣམས་འདོད་ཆགས་དང་བྲལ་བར་བརྗོད་པ་མ་ཡིན་ནམ། གང་ཡང་རུང་བ་ལ་སྨྲས་པ་མ་ཡིན་ནོ་ཟེར་ན། སྲོག་ཆགས་
[364b.6]སྲོག་ཆགས་མ་ཡིན་པར་མི་འགྱུར་བ་དེ་བཞིན་དུ་འདོད་ཆགས་དང་བྲལ་བ་ཡང་ཡིན་པའི་ཕྱིར་རྩོད་པ་མེད་དོ། །དེ་ལྟ་ན་འོ་ན་ནི་ཇི་ལྟར་སྲོག་ཆགས་ཉིད་དུ་ཁྱད་པར་མེད་པ་དེ་བཞིན་དུ། འདོད་ཆགས་ཅན་ཉིད་ཀྱང་ཡིན་པའི་ཕྱིར། ཐམས་ཅད་འདོད་ཆགས་མཚུངས་པར་འགྱུར་ཏེ་སྲོག་ཆགས་བཞིན་
[364b.7]ནོ། །ཡང་ན་ཁ་ཅིག་སྲོག་ཆགས་ཡིན་ལ། ཁ་ཅིག་སྲོག་ཆགས་མ་ཡིན་པ་ཇི་ལྟ་བ་དེ་བཞིན་དུ་ཆགས་པ་ཅན་དང་། ཆགས་པ་དང་བྲལ་བར་ཡང་འགྱུར་རོ་ཟེར་ན་ལེགས་སོ། །སྲོག་ཆགས་ཉིད་དུ་ཐ་མི་དད་ལ་འདོད་ཆགས་ཅན་དུ་བྱེ་བྲག་ཡོད་པ་མ་ཡིན་ནམ། དེའི་ཚེ་ས་ལ་སོགས་པའི་འབྱུང་
[365a]
[365a.1]བ་རྣམས་སྲོག་ཆགས་ཉིད་དུ་བྱེ་བྲག་མེད་ཀྱང་འདོད་ཆགས་འཕེལ་བ་དང་། འགྲིབ་པའི་མཚན་ཉིད་ཀྱི་ཁྱད་པར་འདི་ཡང་འབྱུང་བ་ཕུལ་དུ་བྱུང་བས་བྱས་པ་སྔ་མའོ་ཞེ་ན། དེ་ལྟ་ན་འཕེལ་བ་དང་འགྲིབ་པ་དང་ལྡན་པ་ལས་འབྱུང་བ་དེ་ཉམས་པར་འགྱུར་རོ། །ཅིའི་ཕྱིར་ཞེ་ན་འདོད་
[365a.2]ཆགས་ལ་སོགས་པ་རྒྱུ་ལ་ཉམས་པ་ཡོད་པའི་ཕྱིར་རོ། །གལ་ཏེ་ཡང་འདོད་ཆགས་ལ་འཕེལ་བ་དང་འགྲིབ་པ་ཡིན་པ་དེ་ལྟ་ན་ཡང་འདོད་ཆགས་ལ་སོགས་པའི་རྒྱུ་མཚུངས་པ་ཉིད་ཉམས་པར་མི་འགྱུར་བ་མ་ཡིན་ནམ་ཞེ་ན། འདིར་སྨྲས་པ། གལ་ཏེ་ཐ་དད་ཀྱང་ཆགས་སོགས། །རྒྱུ་མཚུངས་
[365a.3]བདག་ཉིད་མི་ཟད་ན། །རྒྱུ་མཚུངས་པ་ཡི་བདག་ཉིད་ཅན། །ཀུན་ལ་འདོད་ཆགས་མཚུངས་པར་འགྱུར། །ཞེས་བྱ་བ་ལ། གལ་ཏེ་རྒྱུ་ཕུལ་དུ་བྱུང་བར་གྱུར་ཀྱང་འདོད་ཆགས་ལ་སོགས་པའི་རྒྱུ་མཚུངས་པ་ཉིད་གང་ཡིན་པ་དེའི་ཕྱིར་འདོད་ཆགས་ལ་སོགས་པའི་རྒྱུ་མཚུངས་པ་ཡིན་ནོ། །དེ་ལྟར་
[365a.4]མཚུངས་པའི་རྒྱུ་ཅན་ཡིན་ན། སྲོག་ཆགས་ཐམས་ཅད་ལ་འདོད་ཆགས་མཚུངས་པར་འགྱུར་ཏེ། རྒྱུ་མཚུངས་པའི་ཕྱིར་རོ། །གལ་ཏེ་རྒྱུ་མཚུངས་ཀྱང་འདོད་ཆགས་མཚུངས་པ་མ་ཡིན་ན། དེའི་ཚེ་འབྱུང་བའི་འབྲས་བུ་ཉིད་དུ་ཡང་མི་འགྱུར་ཏེ། རྗེས་སུ་འགྲོ་བ་དང་ལྡོག་པ་ངེས་པ་མེད་པའི་
[365a.5]ཕྱིར་རོ། །དེ་བས་ན་གང་ལ་ཆེས་ཤིན་ཏུ་བ་ཡོད་པ་དེ་ལ་གཏན་ནས་བྲལ་བ་ཡང་ཡོད་དེ་བྲལ་བ་གོང་ནས་གོང་དུ་བོགས་འབྱུང་བའི་ཕྱིར། དཀར་པོ་ལ་སོགས་པའི་ཡོན་ཏན་བཞིན་ནོ། །རྒྱུ་མཚུངས་པས་ཀྱང་འདོད་ཆགས་མཚུངས་པར་འགྱུར་རོ། །ཅིའི་ཕྱིར་ཞེ་ན། ལ་ལར་བདག་ཉིད་
[365a.6]མཚུངས་པ་ལས། །འབྱུང་ཅན་བ་ལང་ཤེས་པ་ཆེས། །ཤིན་ཏུ་བ་མིན་འདི་ལ་ཡང་། །ས་སོགས་སྲོག་ཆགས་སོགས་ཀྱང་ངོ་། །ཞེས་བྱ་བ་ལ། གང་གི་ཕྱིར་བ་ལང་གི་ཤེས་པ་མཚུངས་པའི་བདག་ཉིད་ལས་འབྱུང་བའི་ཕྱིར་རིགས་མི་མཐུན་པ་ལས་ལོག་པའི་བ་ལང་ཡིན་པའི་ཕྱིར། ཆེས་
[365a.7]ཤིན་ཏུ་བ་དང་ལྡན་པ་ནི་མ་ཡིན་ཏེ། བ་ལང་དང་ལྷག་པའི་བ་ལང་དང་། ཆེས་ཤིན་ཏུ་ལྷག་པ་ཞེས་བྱ་བ་མེད་པའི་ཕྱིར་རོ། །འཇིག་རྟེན་རྒྱང་ཕན་པའི་ལྟ་བ་འདི་ཡང་ས་ལ་སོགས་པ་ལ་སྲོག་ཆགས་དང་། སྲོག་ཆགས་ཤིན་ཏུ་བ་དང་། ཆེས་ཤིན་ཏུ་བའི་སྲོག་ཆགས་ཀྱང་ཡོད་པ་མ་ཡིན་
[365b]
[365b.1]ནོ། །དེ་བས་ན་རྒྱུ་མཚུངས་ན་འདོད་ཆགས་མཚུངས་ལ་འགྲིབ་པས་རྩད་ནས་མེད་པར་ཡང་འགྱུར་རོ།། །།ཚད་མ་རྣམ་འགྲེལ་གྱི་འགྲེལ་པ་ལས། །བམ་པོ་དགུ་པ། །དྲོ་བའི་ཆེས་ཤིན་ཏུ་བ་ཡང་། །ནམ་ཡང་མེ་དྲོ་མ་ཡིན་མིན། །དེ་ལྟར་འདི་ཡིན་ན་མིན་དེ། །མེ་ལས་དྲོ་གཞན་
[365b.2]བཀག་ཕྱིར་རོ། །ཞེས་བྱ་བ་ལ། དྲོ་བ་ལས་ཆེས་ཤིན་ཏུ་བ་ཡོད་པ་མ་ཡིན་ནམ། དྲོ་བ་གཏན་མེད་པ་ནི་མ་ཡིན་ཏེ། དེ་བས་ན་ཇི་ལྟར་དྲོ་བའི་ཆེས་ཤིན་ཏུ་བ་ཡོད་ཀྱང་མེ་དྲོ་བ་དང་བྲལ་བ་ནི་མ་ཡིན་པ་དེ་བཞིན་དུ་འདོད་ཆགས་ལ་སོགས་པ་ལ་ཆེས་ཤིན་ཏུ་བ་ཡོད་ཀྱང་ཤིན་ཏུ་ཆད་པར་གྱུར་པ་ནི་མ་ཡིན་ནོ་
[365b.3]ཞེ་ན། དེ་ནི་མ་ཡིན་ཏེ། འདོད་ཆགས་ལ་སོགས་པ་ལུས་ལས་ཐ་དད་པའི་ཕྱིར་རོ། །མེ་ནི་དྲོ་བ་ལས་ཐ་དད་པ་མ་ཡིན་ཏེ། དྲོ་བ་ཉིད་ལ་མེ་ཞེས་འདོགས་པའི་ཕྱིར་རོ། །དྲོ་བར་མ་གྱུར་པ་གང་ཡིན་པ་དེ་ནི་མེ་རུ་ཡང་མི་འགྱུར་གྱི། འདོད་ཆགས་ལ་སོགས་པ་མེད་ཀྱང་འབྱུང་བ་ཉིད་དུ་མི་
[365b.4]འགྱུར་བ་ཡིན་ནོ། །གལ་ཏེ་ཡང་ཆོས་ཅན་མེ་ཡང་གཞན་ཡིན་ལ། དེའི་ཆོས་དྲོ་བ་ཡང་གཞན་ཡིན་ན་དེའི་ཚེ་དེའི་དྲོ་བ་འཆད་པར་འགྱུར་བ་ཁོ་ནའོ། །གསལ་བ་ལ་མེ་རུ་བཏགས་ཤིང་། དྲོ་བ་ལ་ཆོས་སུ་བཏགས་པ་མ་ཡིན་ནམ། དེ་ལ་ཆེས་ཤིན་ཏུ་བ་ཡོད་ཀྱང་མེ་གཏན་མེད་པར་འགྱུར་བ་ནི་མ་
[365b.5]ཡིན་ནོ་ཞེ་ན། དེ་ནི་རིགས་པ་མ་ཡིན་ཏེ། གང་གི་ཕྱིར་སྔགས་ལ་སོགས་པའི་སྟོབས་ཀྱིས་གསལ་བ་ཡོད་ཀྱང་དྲོ་བ་ཉིད་དུ་མི་འགྱུར་བ་དང་། ནོར་བུ་ལ་གསལ་བ་ཡོད་ཀྱང་དྲོ་བ་མེད་པའི་ཕྱིར། གསལ་བའི་ཆོས་ཉིད་མ་ཡིན་ཞིང་། མེ་མེད་ན་ཡང་དྲོ་བ་མི་སྣང་ལ། དྲོ་བ་དང་བྲལ་བའི་མེ་ཡང་
[365b.6]མ་མཐོང་བའི་ཕྱིར་དང་། གསལ་དང་དྲོ་བ་དག་ལ་མེད་ན་མི་འབྱུང་བ་ངེས་པ་ཡོད་པ་མ་ཡིན་པའི་ཕྱིར། ཆོས་དང་ཆོས་ཅན་གྱི་དངོས་པོ་མེད་དོ། །དེ་བས་ན་རྟགས་ཁྱད་པར་དང་བཅས་པ་སྟེ། གཞན་གང་ལ་ཡོད་ཡོན་ཏན་རྣམས། །ཤིན་ཏུ་བ་མྱོང་ལྡན་པ་ཅན། །དེ་དག་དེ་ལས་ཐ་དད་
[365b.7]དང་། །ལ་ལར་ཆད་འགྱུར་དཀར་སོགས་བཞིན། །ཞེས་བྱ་བ་ལ། གང་ལ་ཡོན་ཏན་གཞན་ཡོད་པ་ཆེས་ཤིན་ཏུ་བ་ཉམས་སུ་མྱོང་བ་དང་ལྡན་པ་དེ་དག་འབྱུང་བའི་ཁྱད་པར་གྱི་ཆོས་ཅན་ལ་ལར་ལྡོག་པར་འགྱུར་ཏེ། དཔེར་ན་སྣམ་བུ་ལ་སོགས་པ་རྣམས་ལ་དཀར་པོ་ལ་སོགས་པ་
[366a]
[366a.1]བཞིན་ནོ། །འོན་ཏེ་དཀར་པོ་ལས་ཐ་དད་པའི་སྣམ་བུ་ལ་སོགས་པ་ཡང་ཡིན་ཏེ། སྣམ་བུ་ལས་དཀར་པོ་ལ་སོགས་པ་ཐ་དད་པར་གང་གིས་འགྱུར་ཞེ་ན། དེ་ནི་དེ་བཞིན་ཏེ། སྣམ་བུ་ལ་སོགས་པ་ནི་རེག་བྱའི་ངོ་བོ་ཉིད་ཡིན་གྱི། དཀར་པོ་ལ་སོགས་པ་ཡོན་ཏན་གྱི་ངོ་བོ་ཉིད་
[366a.2]ནི་མ་ཡིན་ཏེ། དཀར་པོ་ལ་སོགས་པ་མེད་ཀྱང་སྣམ་བུ་ཡོད་པའི་ཕྱིར་རོ། །འདིའི་དོན་ནི་འདི་ཡིན་ཏེ། རྒྱུད་གཞན་ལ་གནས་པས་འགག་པའི་ཆོས་ཅན་དང་། སྐྱེ་བའི་ཆོས་ཅན་རྣམས་དེ་དག་ནི་ཤིན་ཏུ་ཆད་པའི་ཆོས་ཅན་ཏེ། དཔེར་ན་དཀར་པོ་ལ་སོགས་པ་བཞིན་ཞེས་བྱ་བ་ནི་བསྡུས་པའི་དོན་ཏོ། །འོ་ན་ཇི་
[366a.3]ལྟར་གཟུགས་ལ་སོགས་པ་དང་བྲལ་བའི་ས་ལ་སོགས་པ་མ་ཡིན་པ་དེ་བཞིན་དུ་དཀར་པོ་ལ་སོགས་པ་རྣམས་ཀྱི་ཆེས་ཤིན་ཏུ་བ་ཡང་ཡིན་པ་དེ་ལྟར་འདོད་ཆགས་ལ་སོགས་པ་ཆེས་ཤིན་ཏུ་བ་ཡོད་ཀྱང་། སྲོག་ཆགས་རྣམས་འདོད་ཆགས་ལ་སོགས་པ་དང་བྲལ་བ་ནི་མ་ཡིན་ནོ་ཞེ་ན་
[366a.4]སྨྲས་པ། དེ་དག་འབྱུང་བ་ལས་ཐ་དད། །མེད་ཕྱིར་གཟུགས་སོགས་བཞིན་ངེས་མེད། །གལ་ཏེ་དེ་མཚུངས་ཞེ་ན་མིན། །ཆགས་སོགས་ཅིག་ཅར་སྐྱེ་ཐལ་ཕྱིར། །ཞེས་བྱ་བ་ལ། གཟུགས་དང་རོ་ལ་སོགས་པ་བཞིན་འདོད་ཆགས་ལ་སོགས་པ་དེ་དག་འབྱུང་བ་མེད་ན་མི་འབྱུང་བ་མ་ཡིན་
[366a.5]ཏེ་ཅིའི་ཕྱིར་ཞེ་ན་འབྱུང་བ་རྣམས་ལས་ཐ་དད་པར་སྣང་བའི་ཕྱིར་རོ། །འདི་ལྟར་འདོད་ཆགས་ལ་སོགས་པ་མེད་ཀྱང་འབྱུང་བ་རྣམས་མཐོང་བར་འགྱུར་གྱི། གཟུགས་ལ་སོགས་པ་མེད་ན་མ་ཡིན་ནོ། །འདོད་ཆགས་ལ་སོགས་པ་ལ་ཡང་ལུས་ཀྱི་འབྱུང་བ་ཆེན་པོ་དང་ཐ་དད་པ་མེད་པ་ཉིད་མཚུངས་
[366a.6]ཏེ། གཟུགས་ལ་སོགས་པ་བཞིན་ཉིད་མ་ཡིན་ནམ་ཞེ་ན། དེ་ནི་མ་ཡིན་ཏེ། འདོད་ཆགས་ལ་སོགས་པ་དང་ལུས་ལྷན་ཅིག་དམིགས་པར་ཐལ་བར་འགྱུར་བའི་ཕྱིར་རོ། །རྟག་ཏུ་ལུས་དང་འདོད་ཆགས་ལྷན་ཅིག་པ་ནི་མ་ཡིན་ནོ། །གཞན་ཡང་འབྱུང་བ་ཆེན་པོར་སྨྲ་བའི་གཟུགས་ལ་སོགས་
[366a.7]པ་འབྱུང་བ་རྣམས་ལས་ཐ་དད་པར་མི་རུང་སྟེ། དེ་ཁོ་ན་ཉིད་མང་པོར་ཐལ་བར་འགྱུར་བའི་ཕྱིར་རོ། །འདོད་ཆགས་ལ་སོགས་པ་ཡུལ་ལས་སྐྱེ་བ་མ་ཡིན་ནམ། དེས་ན་ཡུལ་མེད་ན། ལུས་ཡོད་ཀྱང་རེས་འགའ་འདོད་ཆགས་མེད་པར་འགྱུར་རོ་ཞེ་ན་དེ་ནི་བདེན་པ་མ་ཡིན་ཏེ། རྣམ་རྟོག་
[366b]
[366b.1]ཡུལ་ཉིད་ཡིན་པའི་ཕྱིར། །ཡུལ་ནི་ངེས་བྱེད་མ་ཡིན་ནོ། །སྐལ་བ་མཉམ་རྒྱུ་མེད་པའི་ཕྱིར། །ཆགས་སོགས་ངེས་པ་མེད་པའམ། །རྒྱུ་ཉེ་ཕྱིར་ན་བློ་རྣམས་ཀུན། །ཐམས་ཅད་དུ་ནི་སྐྱེ་བར་འགྱུར། །ཞེས་བྱ་བ་ལ། འདོད་ཆགས་ལ་སོགས་པ་ཡུལ་གྱི་རྗེས་སུ་འགྲོ་བ་དང་། ལྡོག་པར་འགྱུར་བ་
[366b.2]མ་ཡིན་ཏེ། དེ་མེད་ཀྱང་བག་ཆགས་ལས་ཡོད་པའི་ཕྱིར་རོ། །དེས་ན་གཟུགས་ལ་སོགས་པ་ཡུལ་ནི་ངེས་པར་བྱེད་པ་མ་ཡིན་ཏེ། བདག་དང་བདག་གིར་རྟོག་པས་བསྟན་པའི་ཡུལ་ཅན་ཡིན་པའི་ཕྱིར་རོ། །དེ་བཞིན་དུ་བདག་དང་བདག་གི་བ་ཡོད་ན་འདོད་ཆགས་འཕེལ་བར་འགྱུར་རོ། །
[366b.3]འཇིག་རྟེན་རྒྱང་པན་པ་ལ་ནི་སྐལ་བ་མཉམ་པའི་རྒྱུ་ཡོད་པ་མ་ཡིན་པའི་ཕྱིར། རིགས་མཐུན་པའི་རྒྱུ་མེད་པར་འདོད་ཆགས་ལ་སོགས་པ་ནམ་ཡང་སྐྱེ་བ་མ་ཡིན་ནོ། །དེའི་ཕྱིར་གདོན་མི་ཟ་བར་འདོད་ཆགས་ལ་སོགས་པའི་གྲོགས་ཙམ་བྱེད་པར་འགྱུར་རོ། །ཡང་ན་འདོད་ཆགས་ལ་
[366b.4]སོགས་པའི་བློ་ཐམས་ཅད་ཅིག་ཅར་སྐྱེ་བར་འགྱུར་ཏེ། འདོད་ཆགས་ལ་སོགས་པ་རྣམས་ཀྱི་རྒྱུ་ལུས་ཉེ་བར་མཚུངས་པའི་ཕྱིར་རོ། །འོ་ན་གལ་ཏེ་ད་ལྟར་བའི་ཚེ་འདོད་ཆགས་ལ་སོགས་པ་གོམས་པ་ལས་སྐྱེ་བ་ཡིན་ན། དེ་ལྟ་ན་ཡང་དང་པོ་སྐྱེས་པའི་སེམས་མའི་མངལ་དུ་གོམས་པ་
[366b.5]ལས་སྐྱེས་པར་ཅིས་ཤེས་ཤེ་ན། དེ་ལྟ་ན་འོ་ན་ནི་དུ་བ་ཐམས་ཅད་ཀྱང་མེ་ལས་སྐྱེས་པར་གང་དུ་མཐོང་། འོན་ཏེ་དུ་བ་དེ་ལ་ཡང་མེ་མེད་ན་མི་འབྱུང་བར་ངེས་པ་མེད་དེ། མེའི་རྗེས་ཐོགས་སུ་མཐོང་བའི་དུ་བ་གང་ཡིན་པ་དེ་ཉིད་དེ་ལྟར་ཡིན་ནོ་ཞེ་ན། དེ་ལྟ་ན་ཡང་འཇིག་རྟེན་པའི་ཐ་སྙད་ཐམས་
[366b.6]ཅད་ཆད་པར་ཐལ་བར་འགྱུར་ཏེ། རྒྱུ་དང་འབྲས་བུ་འབྲེལ་པ་ཁས་བླངས་ནས་སུ་ཡང་ཐ་སྙད་འདོགས་པ་མེད་པའི་ཕྱིར་དང་། མངོན་སུམ་ནི་ཐ་སྙད་ཅི་ཡང་བྱེད་པ་མེད་པའི་ཕྱིར་རོ། །མངོན་སུམ་གྱིས་ན་རྩྭ་མཆོག་ལ་གླང་པོ་ཆེ་ཡོད་པར་རྟོགས་པར་མི་ནུས་པ་དེ་བས་ན་ཐ་མི་དད་པར་མཐོང་བ་
[366b.7]ཉིད་རྒྱུ་དང་འབྲས་བུའི་ཐ་སྙད་ཉམས་པར་འགྱུར་རོ། །འོན་ཏེ་བརྡར་བཏགས་པ་སྤོང་བར་མི་ནུས་པའི་ཕྱིར་དེའི་རིགས་དཔགས་པ་ལས་བཏགས་སོ་ཞེ་ན། དེ་ལྟ་ན་ཡང་འཇིག་རྟེན་ཕ་རོལ་ཡང་དེའི་རིགས་དཔགས་པ་ལས་ཐ་སྙད་དུ་འཇིག་རྟེན་ཕ་རོལ་ཡོད་པར་འགྱུར་ཏེ། འཇིག་རྟེན་འདི་
[367a]
[367a.1]བཞིན་ནོ། །དེ་བས་ན་འདོད་ཆགས་ལ་སོགས་པའི་འབྲས་བུ་འདོད་ཆགས་ལ་སོགས་པ་གོམས་པ་ལས་འབྱུང་ཞིང་། གོམས་པ་དེ་ཡང་འདོད་ཆགས་གཞན་གོམས་པ་ལས་སྐྱེས་པའི་ཕྱིར། བདེ་བ་ལ་སོགས་པ་ཐོག་མ་མེད་པའི་བག་ཆགས་ལས་སྐྱེས་པ་སྟེ། དོན་དམ་
[367a.2]པར་མ་ཡིན་ནོ། །དེའི་ཕྱིར་དངོས་སུ་ནི་ཐམས་ཅད་སྡུག་བསྔལ་ཁོ་ན་ཡིན་ཏེ། རེས་འགའ་ཞིག་ནི་དམིགས་ཕྱིར་ཏེ། །མི་བརྟན་ཉེས་ལ་བརྟེན་ཕྱིར་དང་། །རྒྱུ་ཡི་དབང་ཉིད་ཕྱིར་སྡུག་བསྔལ། །བདག་མིན་བྱིན་གྱིས་བརླབས་པའང་མིན། །རྒྱུ་མིན་བྱིན་གྱིས་རློབ་པ་མིན། །རྟག་ནའང་ཇི་ལྟར་རྒྱུ་རུ་
[367a.3]འགྱུར། །དེ་ཕྱིར་དུ་མ་དེ་གཅིག་ལ། །དུས་ཐ་དད་པར་སྐྱེ་མི་འགྱུར། །ཞེས་བྱ་བ་ལ། དེ་ལ་སྡུག་བསྔལ་གྱི་བདེན་པ་ནི། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ལས་རྣམ་པ་བཞིར་བསྟན་ཏོ། །དེ་ལ་སྡུག་བསྔལ་ཏེ་དུས་རེས་འགའ་དམིགས་པའི་ཕྱིར་མི་རྟག་
[367a.4]པ་སྟེ། རྟག་པ་ནི་གཏན་དུ་བ་བལྟར་རུང་བའི་ངོ་བོ་ཡིན་པས་རེས་འགའ་དམིགས་པར་རིགས་པ་མ་ཡིན་ཏེ། བལྟར་རུང་བ་དང་། མི་རུང་བའི་ངོ་བོ་དག་ཕན་ཚུན་སྤངས་ཏེ་གནས་པའི་ཕྱིར་འགལ་བར་འགྱུར་བའི་ཕྱིར་རོ། །རྒྱུའི་དབང་ཉིད་ཀྱི་ཕྱིར་ཡང་སྡུག་བསྔལ་བ་སྟེ། གཞན་གྱི་
[367a.5]དབང་དུ་གྱུར་པ་ཐམས་ཅད་སྡུག་བསྔལ་བའོ་ཞེས་བྱ་བའི་རིགས་པས་སོ། །དང་གི་སྒྲས་ནི་གོམས་པའི་དབང་དུ་གྱུར་པ་ཉིད་ཀྱང་བརྗོད་པར་བྱའོ། །བདག་གི་ངོ་བོ་ཉིད་ཀྱང་མ་ཡིན་ལ། བདག་གིས་བྱིན་གྱིས་བརླབས་པ་ཡང་མ་ཡིན་པའི་ཕྱིར་བདག་ནི་རྒྱུ་མ་ཡིན་ཞིང་བྱིན་གྱིས་རློབ་པ་
[367a.6]ཡང་མ་ཡིན་ཏེ། བྱིན་གྱིས་རློབ་པས་ནི་བྱེད་པ་དང་བཅས་པར་འགྱུར་བའོ། །བྱེད་པ་དང་བཅས་ན་ནི་རྒྱུ་ཡིན་ནོ། །འོ་ན་ཡང་བདག་ནི་རྒྱུ་ཡིན་ནོ་ཞེ་ན། དེ་ནི་མ་ཡིན་ཏེ། གང་གི་ཕྱིར་བདག་ལ་སོགས་པ་རྟག་པ་སྐྱེད་བྱེད་དུ་མི་རུང་ལ། མི་སྐྱེད་ན་ནི་རི་བོང་གི་རྭ་བཞིན་མེད་པར་འགྱུར་
[367a.7]རོ། །དེ་བས་ན་འབྲས་བུ་དུ་མ་དུས་ཐ་དད་པར་བདག་ལ་སོགས་པ་རྟག་པ་ལས་སྐྱེ་བར་མི་འགྱུར་རོ། །འོ་ན་བདག་གིས་བྱིན་གྱིས་མ་བརླབས་པའི་མིག་ལ་སོགས་པས་ཇི་ལྟར་ཤེས་པ་སྐྱེད་པར་བྱེད། དེས་ན་འབྲས་བུ་ཤེས་པ་གཞན་དུ་མི་འཐད་པའི་ཕྱིར། བདག་བྱེད་པ་
[367b]
[367b.1]པོར་དཔག་གོ་ཞེ་ན། འདིར་སྨྲས་པ། རྒྱུ་གཞན་དག་ནི་ཉེ་བ་ནའང་། །འབྲས་བུ་དག་ནི་མི་སྐྱེད་ཕྱིར། །རྒྱུ་གཞན་རྗེས་སུ་དཔོག་འགྱུར་ན། །དེ་ནི་རྟག་རྣམས་ལ་ཡོད་མིན། །ཞེས་བྱ་བ་ལ། གལ་ཏེ་མིག་ལས་གཞན་རྣམས་ཚོགས་ཀྱང་མིག་གི་རྣམ་པར་ཤེས་པ་མི་སྐྱེད་ཅིང་།
[367b.2]མིག་གི་རྣམ་པར་ཤེས་པ་བསྐྱེད་པ་ཡང་ཡིན་པའི་ཕྱིར་རོ། །རྒྱུ་གཞན་པ་རྗེས་སུ་དཔག་པར་བྱ་སྟེ། གང་ཞིག་མེད་པར་འབྲས་བུ་མི་སྐྱེད་པས། མཚུངས་པ་དེ་མ་ཐག་པའི་རྐྱེན་གྱིས་བྱིན་གྱིས་བརླབས་པའི་མིག་ལ་སོགས་པ་ཙམ་ལས་ཤེས་པ་སྐྱེ་བའི་ཕྱིར་རོ། །གང་གིས་བདག་མེད་
[367b.3]ན་ཤེས་པ་མེད་པར་འགྱུར་བའི་བདག་རྟག་པ་དང་། ཁྱབ་པ་ལ་ནི། ནམ་ཡང་གང་དུ་ཡང་བྲལ་བ་མེད་པའི་ཕྱིར་རོ། །འོན་ཏེ་ལྡོག་པ་མེད་པར་ཡང་བདག་ཡོད་པ་ཙམ་གྱིས་བདག་གིས་སྐྱེད་དོ་ཞེ་ན། འོ་ན་ནམ་མཁའ་ལ་སོགས་པ་དག་ཀྱང་མིག་ལ་སོགས་པ་བྱིན་གྱིས་རློབ་པར་བྱེད་པར་
[367b.4]འགྱུར་ཏེ། དེ་དག་ཀྱང་རྟག་པ་དང་ཁྱབ་པས་ཤེས་པ་སྐྱེ་བའི་ཚེ་ཡོད་པའི་ཕྱིར་རོ། །དེ་བས་ན་ཡོད་པ་ཙམ་གྱིས་བདག་རྒྱུར་འགྱུར་བ་མ་ཡིན་ནོ། །རེས་འགའ་འབྱུང་བ་དག་གིས་ནི། །སྡུག་བསྔལ་འདི་རྒྱུ་ཅན་ཉིད་གྲུབ། །རྒྱུ་མེད་གཞན་ལ་མི་ལྟོས་ཕྱིར། །རྟག་ཏུ་ཡོད་པའམ་མེད་པར་
[367b.5]འགྱུར། །ཞེས་བྱ་བ་ལ། ཀུན་འབྱུང་གི་བདེན་པ་ཡང་རྣམ་པ་བཞི་སྟེ། རྒྱུ་དང་། ཀུན་འབྱུང་བ་དང་། རབ་ཏུ་སྐྱེ་བ་དང་། རྐྱེན་གྱི་རྣམ་པ་ལས་ཡིན་ཏེ། དེ་ལ་རྒྱུ་ནི་རྒྱུ་མ་ཡིན་པ་དགག་པའི་ཕྱིར་རོ། །རབ་ཏུ་སྐྱེ་བ་ནི་ནུས་པ་མེད་པ་དགག་པའི་ཕྱིར་ཏེ། དེ་ལས་སྐྱེས་པའི་ཕྱིར་རབ་ཏུ་སྐྱེ་བ་
[367b.6]ཡིན་ནོ། །རྐྱེན་ནི་གཙོ་བོ་དགག་པའི་ཕྱིར་རོ། །དེ་ལ་རེ་ཞིག་སྡུག་བསྔལ་གྱི་རྒྱུ་ཡོད་དོ་ཞེས་བསྟན་པར་བྱ་སྟེ། དུས་ངེས་པ་ཅན་ཡིན་པའི་ཕྱིར། སྡུག་བསྔལ་འདི་ནི་རྒྱུ་དང་བཅས་པར་ངེས་ཏེ། རྒྱུ་དང་བཅས་པ་ཉིད་དུ་འཇུག་པའི་ཕྱིར་རོ། །དེའི་དངོས་པོ་ནི་རྒྱུ་དང་བཅས་པ་ཉིད་དོ། །འོ་ན་
[367b.7]གལ་ཏེ་སྡུག་བསྔལ་ནི་རེས་འགའ་བ་ནི་ཡིན་པ་དེ་ལྟ་ན་ཡང་རྒྱུ་དང་བཅས་པར་ཇི་ལྟར་འགྱུར་ཞེ་ན། གང་གི་ཕྱིར་རྒྱུ་མེད་ན་དངོས་པོ་ནི་རྟག་ཏུ་ཡོད་པའམ་མེད་པར་འགྱུར་ཏེ། རྒྱུ་གཞན་ལ་མི་ལྟོས་པའི་ཕྱིར་རོ། །ལྟོས་པ་མེད་ན་རྒྱུ་དང་བཅས་པ་ཉིད་དུ་བསྟན་པར་འགྱུར་རོ། །ཇི་ལྟར་ཚད་མ་ལ་
[368a]
[368a.1]སོགས་ཀྱི། །རྣོ་བ་ལ་སོགས་རྒྱུ་མེད་པ། །དེ་ལྟར་དེ་དག་རྒྱུ་མེད་འགྱུར། །ཞེས་ནི་ཁ་ཅིག་སྨྲ་བར་བྱེད། །ཅེས་བྱ་བ་ལ། རྒྱུ་མེད་པར་སྨྲ་བ་རྣམས་ནི་ངོ་བོ་ཉིད་ཀྱིས་འབྱུང་བ་ཆེན་པོའི་རང་བཞིན་ཡོད་དེ། འབྱུང་བའི་ཁྱད་པར་ཉིད་དུས་དང་ཡུལ་དང་། གནས་སྐབས་དང་ལྡན་པར་
[368a.2]སྐྱེའོ། །དེ་ལ་ཁྱད་པར་རྣམས་ཀྱང་རྒྱུ་མེད་པ་ཉིད་དུ་སྣང་སྟེ། མདུང་དང་། ལྕགས་མདུང་དང་། ཁབ་ལ་སོགས་པ་རྣམས་མགར་བས་ལྕགས་ཀྱི་ངོ་བོ་ཉིད་དུ་བྱེད་པ་ནི་མ་ཡིན་གྱི། རྣོ་བ་ཉིད་དུ་ཁྱད་པར་དུ་བྱེད་ལ། ལྕགས་བྱེད་ན་ཡང་ས་ལ་སོགས་པ་ནི་བྱེད་པ་ནི་མ་ཡིན་པའི་ཕྱིར་
[368a.3]ལྕགས་ལ་སོགས་པའི་ངོ་བོ་ཉིད་བྱེད་པའི་མགར་བ་མེད་ཀྱང་ཚེར་མ་ལ་སོགས་པ་ལ་རྣོ་བ་ཡོད་པའི་ཕྱིར་རྣོ་བ་ཉིད་མགར་བས་བྱས་པ་ནི་མ་ཡིན་ནོ། །དེ་བཞིན་དུ་སྐྱེར་པ་མེད་ཀྱང་། ལུགས་མདུང་ལ་སོགས་པ་ལ་རྣོ་བ་མཐོང་བའི་ཕྱིར། རྣོ་བའི་རྒྱུ་སྐྱེར་པ་ནི་མ་ཡིན་ནོ། །རྒྱུ་མ་ངེས་པ་ནི་རྒྱུ་མེད་
[368a.4]པ་ཉིད་དོ། །དེ་བཞིན་དུ་འགྲོ་བ་འདི་དག་རྒྱུ་ངེས་པ་མེད་པའི་ཕྱིར། རྒྱུ་མེད་པ་ཅན་ཡིན་ནོ་ཞེ་ན། དེ་ནི་བདེན་པ་མ་ཡིན་ཏེ། གང་ཡོད་ན་ནི་གང་སྐྱེ་བའམ། །འགྱུར་བ་ཡོད་ནའང་འགྱུར་བ་ནི། །དེ་ནི་དེའི་རྒྱུར་རབ་ཏུ་བསྟན། །དེ་དག་དེ་རྣམས་ལ་ཡང་ཡོད། །ཅེས་བྱ་བ་
[368a.5]ལ། འདིའི་དགོངས་པ་ནི་འདི་ཡིན་ཏེ། གལ་ཏེ་ཁྱད་པར་གྱི་ངོ་བོ་ཉིད་བསྐྱེད་པར་བྱ་བ་ཡིན་པ་དེའི་ཚེ་རྒྱུ་མེད་པ་མ་ཡིན་ནོ། །སྐྱེར་པའི་ཚེར་མ་ལ་སོགས་པ་ཡང་། སྐྱེར་པའི་ས་བོན་མེད་པར་མང་པོ་དང་རྣོན་པོ་ཉིད་དུ་འགྱུར་ན་མ་ཡིན་ཏེ། སྐྱེར་པའི་ས་བོན་ཡོད་ན་ཡོད་ལ་དེ་མེད་ན་མེད་པའི་
[368a.6]ཕྱིར། རྒྱུ་མེད་པ་ཉིད་དུ་འཐད་པ་མ་ཡིན་ནོ། །འདི་ལྟར་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་དང་། དེ་གྱུར་ན་འགྱུར་བ་ནི་རྒྱུ་དང་ལྡན་པའི་མཚན་ཉིད་དུ་བསྟན་ཏོ། །དེ་ཡང་ཡོད་པ་དང་མེད་པའི་རྗེས་སུ་བྱེད་པ་དང་། དེ་གྱུར་ན་འགྱུར་བའི་རྣོ་བ་ལ་སོགས་པ་ལ་ཡོད་པའི་ཕྱིར་འབྲས་བུ་ཉིད་
[368a.7]དུ་རིགས་སོ། །མགར་བ་ལ་སོགས་པས་ཀྱང་རྣོན་པོ་ལ་བསྐྱེད་པ་མ་ཡིན་ནམ། དེ་ལས་སྐྱེར་ཚེར་མེ་སྐྱེའོ་ཞེ་ན། དེ་ཡང་མ་ཡིན་ཏེ། གང་གི་ཕྱིར་ཇི་ལྟར་སྐྱེར་ཚེར་གྱི་རྣོ་བ་སྐྱེས་པ་དེ་བཞིན་དུ་ངོ་བོ་ཉིད་མགར་བས་བསྐྱེད་པ་ནི་མ་ཡིན་ཏེ། ཁྱད་པར་གཞན་དུ་མཐོང་བའི་ཕྱིར་རོ། །འོན་ཏེ་གང་
[368b]
[368b.1]ནས་གང་ཡོད་པ་དེ་ནི་དེའི་རྒྱུར་འགྱུར་བ་ཉིད་ཡིན་ན། རེག་བྱ་ཡང་མཐོང་བའི་རྒྱུ་ཉིད་དུ་ཐལ་བར་འགྱུར་ཏེ། རེག་བྱ་མེད་ན་མཐོང་བ་ཡང་མེད་པའི་ཕྱིར་རོ་ཞེ་ན། གཟུགས་རྒྱུ་ཉིད་ཕྱིར་རེག་བྱ་ནི། །མཐོང་བ་ཡི་ཡང་རྒྱུ་མཚན་ཉིད། །ཅེས་བྱ་བ་ལ། འདིའི་དགོངས་པ་ནི་འདི་ཡིན་ཏེ། ཚོགས་པ་
[368b.2]གཅིག་ལ་རག་ལས་པའི་ཕྱིར་གཟུགས་དང་རེག་བྱ་ཉིད་མེད་ན་མི་འབྱུང་བ་ཉིད་ཡིན་ནོ། །དེ་བས་ན་རེག་བྱ་མེད་ན་མཐོང་བ་མི་འབྱུང་སྟེ། རེག་བྱ་མེད་ན་གཟུགས་མི་འབྱུང་བའི་ཕྱིར་དང་། གལ་ཏེ་གཟུགས་ཡོད་ན་ནི་མཐོང་བར་ཡང་འགྱུར་བ་ཉིད་དོ། །ཡང་ན་ཕན་ཚུན་མེད་ན་མི་འབྱུང་བར་
[368b.3]འགྱུར་ན་དུས་མཚུངས་པའི་རེག་བྱ་ནི་གཟུགས་ཀྱི་རྒྱུ་ཉིད་ཡིན་པའི་ཕྱིར། གང་གི་ཚེ་རེག་བྱ་གཟུགས་ཀྱི་རྒྱུ་ཡིན་པ་དེའི་ཚེ་བརྒྱུད་ནས་གཟུགས་ཀྱང་རེག་བྱའི་རྒྱུ་ཉིད་ཡིན་པར་འགྱུར་རོ། །དེ་ལྟར་རྒྱུ་མ་ཡིན་པ་བཀག་ནས་རྒྱུ་ཉིད་དོ་ཞེས་བྱ་བ་གཅིག་པུ་རྣམ་པར་གནས་པ་ཡིན་ནོ། །ཀུན་
[368b.4]འབྱུང་ཞེས་བྱ་བ་རྣམ་པ་གཉིས་པ་བསྟན་པའི་ཕྱིར། རྟག་པ་རྣམས་ནི་བཀག་པའི་ཕྱིར། །དབང་ཕྱུག་སོགས་ལས་འབྱུང་བ་མིན། །ཞེས་བྱ་བ་ལ། སྡུག་བསྔལ་རྒྱུ་དང་བཅས་པ་ཡིན་ན་ཡང་། རྒྱུ་རྟག་པ་གཅིག་པུ་བཀག་པས་ཀུན་འབྱུང་བའི་རྣམ་པ་ཉིད་རྒྱུར་ངེས་པར་བྱེད་དོ། །གལ་
[368b.5]ཏེ་རྟག་པ་གཅིག་པུ་རྒྱུ་ཡིན་པ་དེའི་ཚེ་འབྲས་བུ་དུ་མ་ཅིག་ཅར་སྐྱེ་བར་འགྱུར་རོ། །རྟག་པ་དང་གཙོ་བོ་དེ་དག་ནི་སྔར་བཀག་པར་བྱས་པ་ཉིད་ཡིན་ནོ། །དེ་བས་ན་རྟག་པའི་ཕྱིར་དབང་ཕྱུག་ལ་སོགས་པ་ལས་སྡུག་བསྔལ་འབྱུང་བ་ནི་མ་ཡིན་ཏེ། དབང་ཕྱུག་ནི་རིམ་དང་ཅིག་ཅར་དག་
[368b.6]གིས་དོན་བྱེད་པ་དང་བྲལ་བའི་ཕྱིར་རོ། །རབ་ཏུ་སྐྱེ་བ་ནི་རྣམ་པ་གསུམ་པ་སྟེ། དེ་ཡང་སྲེད་པ་ཡིན་གྱི་ལས་ལ་སོགས་པ་ནི་མ་ཡིན་ནོ་ཞེས་བསྟན་པའི་ཕྱིར། ནུས་པ་མེད་ཕྱིར་དེ་ཡི་རྒྱུ། །སྲིད་ལ་འདོད་པ་འཛིན་པ་ཡིན། །གང་ཕྱིར་ཡུལ་གྱི་ཁྱད་པར་ལེན། །མི་རྣམས་དེ་
[368b.7]ཐོབ་བསམ་པས་བྱས། །ཞེས་བྱ་བ་ལ། རྒྱུ་གཞན་ལས་སམ་མ་རིག་པ་ལ་ནུས་པ་མེད་པའི་ཕྱིར། ལས་དང་ལུས་དང་མ་རིག་པ་ལས་གཞན་ལ་རབ་ཏུ་སྐྱེ་བའི་ནུས་པ་ཡོད་པར་བརྗོད་པར་བྱ་བ་མ་ཡིན་ཏེ། སྲེད་པ་མེད་ན་སྐྱེ་བར་མི་འགྱུར་བའི་ཕྱིར་རོ། །དེའི་ཕྱིར་ལས་ལ་སོགས་
[369a]
[369a.1]པ་གཞན་ལ་ནུས་པ་མེད་པའི་ཕྱིར། སྲིད་པ་ལ་འདོད་པ་ཉིད་སྐྱེ་བའི་རྒྱུ་ཡིན་ཏེ། འདོད་པ་ལ་ལས་རབ་ཏུ་སྐྱེ་བ་མཐོང་བའི་ཕྱིར་རོ། །ཇི་ལྟར་མཐོང་ཞེ་ན་ལེན་པའི་ཕྱིར་ཏེ། ལེན་པ་ནི་ཡུལ་གྱི་ཁྱད་པར་འདོད་པ་སྟེ། བརྗོད་པར་འདོད་པའི་ཡུལ་ཐོབ་པར་སྲེད་པས་བྱེད་པའི་ཕྱིར་
[369a.2]རོ། །ལེན་པ་ནི་སྐྱེ་བ་ལ་སྦྱོར་བ་ཡིན་པ་དེ་བས་ན། སྐྱེ་བ་ལ་སྲེད་པ་ནི་རབ་ཏུ་སྐྱེ་བའོ། །སྲིད་པ་འདོད་པ་ནི་མ་འོངས་པའི་སྐྱེ་བ་ལ་འདུན་པར་བྱེད་པའི་རྣམ་པའོ། །འོན་ཏེ་ཀུན་འབྱུང་གི་བདེན་པ་ནི་བཅོམ་ལྡན་འདས་ཀྱིས་ཡུལ་གྱི་ཁྱད་པར་ལ་འདུན་པར་གསུངས་པ་མ་ཡིན་ཏེ། དེ་ལ་ཀུན་འབྱུང་
[369a.3]གི་བདེན་པ་གང་ཞེ་ན། ཡང་སྲིད་པ་ལ་སྲིད་པ་གང་ཡིན་པ་སྟེ། དགའ་བའི་འདོད་ཆགས་དང་བཅས་པ་དེ་དང་དེ་ལ་མངོན་པར་དགའ་བའོ། །གང་འདི་འདོད་པའི་སྲེད་པ་དང་སྲིད་པའི་སྲེད་པ་དང་བྲལ་བའི་སྲེད་པ་ཞེས་བྱའོ་ཞེས་གསུངས་སོ་ཞེ་ན། །འགལ་བ་མེད་དེ་གང་གི་ཕྱིར། །དེ་ནི་སྲེད་
[369a.4]འདོད་གང་ཡིན་ཡང་། །སྲོག་ཆགས་བདེ་སྡུག་ཐོབ་པ་དང་། །འདོར་འདོད་འཇུག་པ་དེ་དག་ནི། །འདོད་དང་བྲལ་བ་ལ་སྲེད་འདོད། །ཅེས་བྱ་བ་ལ། གང་འདི་ཡང་སྲེད་པ་ལ་དགའ་བའི་འདོད་ཆགས་དང་བཅས་པའི་སྲོག་ཆགས་རྣམས་ནི་དེ་དང་དེ་ལ་མངོན་པར་དགའ་བ་ཅན་གྱི་སྲེད་པ་སྟེ། དེ་
[369a.5]དག་ཐམས་ཅད་ནི་རྣམ་པ་གསུམ་སྟེ། འདོད་པའི་སྲེད་པ་དང་སྲིད་པའི་སྲེད་པ་དང་བྲལ་བའི་སྲེད་པ་ཞེས་བྱའོ། །དེ་ལ་གང་གནས་དང་ཡོ་བྱད་ལ་སོགས་པ་འདོད་པ་ཡོད་པ་དེ་ནི་སྲིད་པའི་སྲེད་པའོ། །གང་བདེ་བ་ལ་སྦྱོར་བ་དེ་ནི་འདོད་པའི་སྲེད་པའོ། །གང་སྡུག་བསྔལ་དང་བྲལ་བར་འདོད་
[369a.6]པ་དེ་ནི་བྲལ་བའི་སྲེད་པའོ། །གང་ལས་སྲོག་ཆགས་རྣམས་འཇུག་པ་སྟེ་ཇི་ལྟ་བུ་ཞེ་ན། ཐོབ་པ་དང་འདོར་བར་འདོད་པའོ། །ཅི་ཞེ་ན་བདེ་བ་དང་། སྡུག་བསྔལ་དག་སྟེ། བདེ་བ་ཐོབ་པ་དང་། སྡུག་བསྔལ་དོར་བ་དོན་དུ་གཉེར་བ་ཞེས་བྱ་བའི་ཐ་ཚིག་གོ། །བདེ་བ་བླང་བ་དང་། སྡུག་
[369a.7]བསྔལ་དོར་བར་འདོད་པ་དེ་དག་ནི་འདོད་པ་དང་བྲལ་བ་དང་། སྲེད་པའི་འདོད་པ་ཡིན་པར་འདོད་པའི་ཕྱིར་ཀུན་འབྱུང་བར་བསྟན་པ་ལ་འགལ་བ་ཅི་ཡང་མེད་དོ། །རྐྱེན་གྱི་རྣམ་པ་བཞི་པ་བསྟན་པའི་ཕྱིར། བདེ་མིན་ལ་བདེར་འདུ་ཤེས་པའི། །ཀུན་ལ་རབ་ཏུ་འཇུག་པ་ལ། །བདག་
[369b]
[369b.1]ལ་ཆགས་པ་རྒྱུ་ཉིད་ཕྱིར། །དེ་ཕྱིར་སྲེད་པ་སྲིད་རྟེན་ཡིན། །ཞེས་བྱ་བ་ལ། བདག་ཏུ་འཛིན་པ་དང་ལྡན་པ་གཅིག་ཏུ་སྒྲོ་འདོགས་པ་ཉིད་ཀྱི་སེམས་ནི་བདག་ཏུ་ཞེན་པ་སྟེ། བདག་དེ་ལ་ཆགས་པ་གང་ཡིན་པ་དེ་ནི་གནས་ཐམས་ཅད་དུ་འཇུག་པའི་རྒྱུའོ། །གང་གི་ཞེ་ན་དོན་དམ་པར་བདེ་བ་
[369b.2]དང་བྲལ་བ་ལ། བདེ་བར་ཕྱིན་ཅི་ལོག་པས་བསླད་པ་ཡིས་ཏེ། དེའི་ཕྱིར་སྲེད་པ་ནི་སྲེད་པའི་རྟེན་ཡིན་གྱི། སྲེད་པ་མེད་ན་གང་གང་དུ་ཡང་མི་འཇུག་པའི་ཕྱིར་རོ། །སྙིང་རྗེས་ནི་སྲེད་པ་མེད་པར་ཡང་སྐྱེ་བ་ལེན་པར་བྱེད་པར་འགྱུར་ཏེ། དེ་ཉིད་ཀྱི་ཕྱིར་རབ་ཏུ་འཇུག་པ་ན་སྲེད་པ་ནི་ལྷན་ཅིག་བྱེད་
[369b.3]པའི་རྒྱུ་ཡིན་པའི་ཕྱིར་རྐྱེན་ཙམ་སྟེ། ཉེ་བར་ལེན་པ་ཉིད་ནི་མ་ཡིན་ཏེ་སེམས་ཉིད་སྐྱེ་བ་ཉེ་བར་ལེན་པ་ཡིན་ཏེ། དེའི་རྐྱེན་ནི་སྲེད་པ་ཡིན་ཞིང་། རེས་འགའ་སྙིང་རྗེ་ཡང་ཡིན་ནོ། །དེ་དག་གིས་ནི་རྐྱེན་གྱི་རྣམ་པ་ཞེས་བྱ་བ་བསྟན་ཏོ། །དེ་ལྟར་ནི་འགྱུར་མོད་ཀྱི། རྐྱེན་གྱི་རྣམ་པ་ཉིད་ནི་ཡོད་ཀྱང་།
[369b.4]སྲིད་པ་ནི་རྐྱེན་མ་ཡིན་གྱི། འོན་ཀྱང་ལུས་ཡིན་པའི་ཕྱིར་ལུས་དང་ལྡན་པ་དག་འདོད་ཆགས་དང་བྲལ་བར་མི་འགྱུར་རོ་ཞེས་བསྟན་པའི་ཕྱིར། ཆགས་བྲལ་སྐྱེ་བ་མ་མཐོང་ཕྱིར། །ཞེས་ནི་སློབ་དཔོན་རྣམས་ཀྱིས་བཤད། །ལུས་མེད་ཆགས་པ་མ་མཐོང་ཕྱིར། །ལུས་ལས་འདོད་ཆགས་
[369b.5]འབྱུང་བར་འགྱུར། །ཞེས་བྱ་བ་སྨོས་ཏེ། ཇི་ལྟར་འདོད་ཆགས་དང་བྲལ་བ་སྐྱེ་བ་མ་མཐོང་བའི་ཕྱིར་འདོད་ཆགས་ནི་སྐྱེ་བའི་རྒྱུ་ཡིན་ནོ་ཞེས་སློབ་དཔོན་གྱིས་བཤད་པ་བཞིན་དུ། ལུས་མེད་པ་ལ་ཆགས་པ་མ་མཐོང་བའི་ཕྱིར་ལུས་ལས་འདོད་ཆགས་འབྱུང་ངོ་ཞེས་ཁོ་བོ་ཡང་སྨྲའོ། །འདིར་
[369b.6]སྨྲས་པ་འདོད་ཆགས་མེད་ཀྱང་སྙིང་རྗེའི་སྟོབས་ཀྱིས་སྐྱེ་བ་འབྱུང་བས། སྐྱེ་བ་གཞན་མངོན་པར་འདོད་པའི་ཡུལ་ནི་སྲེད་པས་བྱས་པ་ཡིན་ནོ། །དགའ་བའི་ཁྱད་པར་གྱི་རྒྱུ་ཡིན་པའི་ཕྱིར། སྲེད་པ་ནི་རབ་ཏུ་སྐྱེ་བ་ཙམ་ཡིན་ནོ། །དེ་བཞིན་དུ་གལ་ཏེ་ལུས་ཀྱང་འདོད་ཆགས་ལ་སོགས་པ་ལྷན་
[369b.7]ཅིག་བྱེད་པའི་གྲོགས་ཙམ་ཡིན་ལ། འཇིག་ཚོགས་ལ་ལྟ་བ་ཁོ་ན་ཉེ་བར་ལེན་པ་ཡིན་ནོ་ཞེ་ན། དེ་ཉིད་འདོད་པ་ཉིད་དུ་བསྟན་པའི་ཕྱིར། རྒྱུ་མཚན་ཁས་བླངས་འདོད་པ་ན། །ཉེར་ལེན་དག་ནི་བསལ་བ་ཡིན། །རིགས་ནི་རྗེས་སུ་འདོད་པ་ན། །རང་གཞུང་རང་གིས་འགེགས་པ་ཡིན། །ཞེས་བྱ་
[370a]
[370a.1]བ་སྨོས་ཏེ། ཚུལ་བཞིན་མ་ཡིན་པ་ཡིད་ལ་བྱེད་པའི་ལུས་ནི་འདོད་ཆགས་ཀྱི་རྒྱུ་ཡིན་པའི་ཕྱིར་ལུས་འདོད་ཆགས་ཀྱི་རྒྱུ་མཚན་དུ་ཁས་བླངས་པའི་ཕྱིར་རྒྱུ་ཉིད་འདོད་པ་ཁོ་ནའོ། །རེས་འགའ་ཡུལ་བཞིན་དུ་ལུས་ཀྱང་བག་ཆགས་སད་པའི་རྒྱུར་འགྱུར་བའི་རིགས་པ་འདིས་
[370a.2]འདོད་ཆགས་ཀྱང་ལུས་ཀྱི་རྒྱུ་ཉིད་དུ་གྲུབ་པར་འགྱུར་ཏེ། འདོད་ཆགས་མེད་ན་ལུས་མ་མཐོང་བའི་ཕྱིར་རོ། །དེས་ན་ལུས་དང་འདོད་ཆགས་ཕན་ཚུན་རྒྱུ་ཡིན་པའི་ཕྱིར། དེ་ལྟར་གྱུར་པ་ཐོག་མ་མེད་པའི་རྒྱུ་མཚན་ཡིན་པའི་ཕྱིར། འཇིག་རྟེན་ཕ་རོལ་གྲུབ་པར་འགྱུར་རོ། །འདིས་ནི་ཚུ་རོལ་མཛེས་
[370a.3]པའི་གཞུང་སུན་བཏོན་པ་ཡིན་ནོ། །རྫས་དང་ཡོན་ཏན་ལྷན་ཅིག་སྐྱེ་བ་མ་ཡིན་ནམ། དེའི་ཕྱིར་ལུས་དང་། འདོད་ཆགས་ཕན་ཚུན་རྒྱུར་འགྱུར་བ་མ་ཡིན་ནོ། །འདིར་སྨྲས་པ། གལ་ཏེ་སྐྱེ་ལ་ཆགས་མཐོང་ཕྱིར། སྐྱེ་དང་ལྷན་ཅིག་འབྱུང་ན་ནི། །སྐལ་མཉམ་སྐྱེ་བར་སྔར་གྲུབ་འགྱུར། །ཞེས་བྱ་
[370a.4]བ་ལ། གལ་ཏེ་འདོད་ཆགས་ལ་སོགས་པ་སྐྱེ་བ་དང་ལྷན་ཅིག་འབྱུང་བའི་ཕྱིར་འདོད་ཆགས་ལ་སོགས་པ་ལུས་ཀྱི་རྒྱུ་མ་ཡིན་ནོ་ཞེ་ན། དེ་ལྟ་ན་ནི་ལུས་ཀྱང་འདོད་ཆགས་ལ་སོགས་པའི་རྒྱུར་མི་འགྱུར་ཏེ་ལྷན་ཅིག་འབྱུང་བའི་ཕྱིར་རོ། །རྒྱུ་མེད་པ་ཉིད་ཀྱང་མ་ཡིན་ཏེ། དེ་བས་ན་རིགས་མཐུན་
[370a.5]པའི་རྒྱུ་ལུས་ལས་སྔོན་དུ་གྲུབ་པའི་ཕྱིར་འཇིག་རྟེན་གཞན་གྲུབ་པ་ཡིན་ནོ། །དེ་ལྟར་ནི་འགྱུར་མོད་ཀྱི་སྲེད་པ་ཉིད་གཅིག་པུ་རྒྱུ་མ་ཡིན་ཏེ། མ་རིག་པ་དང་། སྲེད་པ་དང་། ལས་ཞེས་བྱ་བ་གསུམ་སྐྱེ་བའི་རྒྱུ་ཡིན་པའི་ཕྱིར་རོ། །དེས་ན་ཇི་ལྟར་སྲེད་པ་ཉིད་དེ་དང་དེ་ལ་མངོན་པར་དགའ་བའི་ཕྱིར་
[370a.6]རྒྱུར་བརྗོད་པར་བྱ་ཞེ་ན། འདིར་སྨྲས་པ། སྲིད་ལ་མི་ཤེས་རྒྱུ་ཡིན་ཡང་། །མ་བརྗོད་སྲེད་པ་ཉིད་བཤད་པ། །རྒྱུན་ནི་འཕེན་པར་བྱེད་ཕྱིར་དང་། །དེ་མ་ཐག་ཕྱིར་ལས་ལས་ཀྱང་། །དེ་ཡོད་ན་ཡང་མི་འབྱུང་ཕྱིར། །ཞེས་བྱ་བ་ལ། སྲིད་པའི་རྒྱུར་མ་རིག་པ་དང་། ལས་དག་འགྱུར་ཡང་
[370a.7]མ་ཆོད་པའི་རྒྱུ་ཉིད་མ་ཡིན་ཏེ། སྲེད་པ་ཉིད་དེ་མ་ཐག་པའི་རྒྱུར་འགྱུར་ཏེ། འཁོར་བའི་རྒྱུན་འཕེན་པར་བྱེད་པའི་ཕྱིར་རོ། །གཏི་མུག་དང་ལས་དག་ཡོད་ཀྱང་སྲེད་པ་མེད་པར་གང་དུ་ཡང་འཕེན་པར་བྱེད་པ་མ་ཡིན་ཏེ། དངུལ་དུ་འཁྲུལ་ན་ཡང་སྲེད་པ་མེད་ན་འཇུག་པར་མི་འགྱུར་བའི་
[370b]
[370b.1]ཕྱིར་རོ། །དེ་བས་ན་རྒྱུ་ཡིན་ཡང་མི་ཤེས་པ་སྟེ། མ་རིག་པ་མ་བརྗོད་ཀྱི། འོན་ཀྱང་སྲེད་པ་ཉིད་བརྗོད་དོ། །མ་ཆོད་པར་སྐྱེ་བའི་རྒྱུ་ལས་ཀྱང་མ་ཡིན་ཏེ། ལས་དེ་ཡོད་ཀྱང་སྲེད་པ་མེད་ན་སྐྱེ་བ་མི་སྲིད་པའི་ཕྱིར་རོ། །འདི་ལྟར་ལས་ལས་སྐྱེས་པའི་ནོར་ལ་སྲེད་པ་མེད་ན་ཡོངས་སུ་སྤོང་བར་
[370b.2]བྱེད་དོ། །དེ་ལྟར་རེ་ཞིག་ཀུན་འབྱུང་གི་བདེན་པ་རྣམ་པ་བཞིར་བསྟན་ནས། ད་ནི་འགོག་པའི་བདེན་པ་རྣམ་པ་བཞིར་བསྟན་པའི་ཕྱིར། དེ་ནི་གཏན་དུ་བ་མིན་ཏེ། །རྒྱུ་ལ་གགས་ནི་སྲིད་ཕྱིར་རོ། །འཁོར་བ་ཉིད་ཕྱིར་ཐར་པ་མེད། །འདོད་དང་མ་གྲུབ་ཕྱིར་མ་ཡི། །ཞེས་བྱ་བ་ལ། འགོག་པ་
[370b.3]དང་། ཞི་བ་དང་། གྱ་ནོམ་པ་དང་། ངེས་པར་འབྱུང་བ་ལས་འགོག་པའི་བདེན་པ་རྣམ་པ་བཞི་སྟེ་འགོག་པ་ཉིད་མེད་དོ་ཞེས་སྨྲས་པ་དང་། འགོག་པའི་རྣམ་པར་བརྗོད་དོ། །གྲོལ་བ་རྣམས་ལ་ཡང་འདོད་ཆགས་ལ་སོགས་པ་འབྱུང་ངོ་ཞེས་གཞན་གྱིས་ཁས་བླངས་པ་དེ་དགག་པའི་ཕྱིར་ཞི་བའི་
[370b.4]རྣམ་པའོ། །འདི་ལས་གཞན་པའི་ཐར་པ་ཡོད་དོ་ཞེས་བྱ་བ་དེའི་གཉེན་པོར་གྱ་ནོམ་པའི་རྣམ་པའོ། །གྲོལ་བ་ཡང་མ་གྲོལ་བར་འགྱུར་རོ་ཞེས་ཟེར་བ་དེ་དག་བསལ་བའི་ཕྱིར། ངེས་པར་འབྱུང་བ་ཞེས་བྱ་བ་རྣམ་པ་བཞི་ཡིན་ནོ། །དེ་ལ་རྣམ་པ་དང་པོ་བསྟན་པའི་ཕྱིར་སྡུག་བསྔལ་དེ་གཏན་དུ་
[370b.5]བར་ཡོད་པ་མ་ཡིན་གྱི་འོན་ཀྱང་འགོག་པར་འགྱུར་རོ། །དེ་ཅིའི་ཕྱིར་ཞེ་ན། སྡུག་བསྔལ་གྱི་རྒྱུ་ལ་གེགས་བྱེད་པ་ལ་སོགས་པ་སྲིད་པའི་ཕྱིར་ཏེ། སོགས་པའི་སྒྲས་ནི་རྒྱུ་མ་ཚང་བ་ལ་སོགས་པ་གཟུང་ངོ་། །སྡུག་བསྔལ་གྱི་རྒྱུ་དང་བྲལ་ན་སྡུག་བསྔལ་ཉིད་ཀྱང་ལྡོག་པར་འགྱུར་བའི་
[370b.6]ཕྱིར་འགོག་པར་སྲིད་པ་ཡིན་ནོ། །འོ་ན་གལ་ཏེ་ཤེས་པའི་རྒྱུན་ཆད་པ་ཉིད་ཐར་པ་སྟེ་མེ་བཞིན་དུ་མྱ་ངན་ལས་འདའ་བར་འདོད་ན། འོ་ན་ནི་ཐ་མའི་སེམས་ཡོད་པ་ཉིད་དུ་མི་འགྱུར་ཏེ། དོན་བྱེད་པ་དང་བྲལ་བའི་ཕྱིར་རོ། །འོན་ཏེ་ཐམས་ཅད་མཁྱེན་པའི་ཡེ་ཤེས་སྐྱེད་པར་ནུས་པ་ཐ་མའི་སེམས་ལ་ཡོད་
[370b.7]ན་ནི། འོ་ན་ཐ་མ་ཉིད་དུ་ཡང་མི་འགྱུར་རོ། །འོན་ཏེ་ཐམས་ཅད་མཁྱེན་པའི་ཡེ་ཤེས་ལ་ཐ་མིའི་སེམས་གྲོགས་བྱེད་པ་ཙམ་ཡིན་ཏེ། ཤེས་པ་གཞན་གྱི་ཉེ་བར་ལེན་པར་མི་འགྱུར་བས་ཐ་མ་ཉིད་ཡིན་ནོ། །འོ་ན་ཉེ་བར་ལེན་པའི་རྒྱུ་ཅི་ཡིན། རིགས་མཐུན་པའོ་ཞེ་ན། འདོད་ཆགས་བྲལ་བ་དང་།
[371a]
[371a.1]ཐམས་ཅད་མཁྱེན་པའི་ཡེ་ཤེས་དག་ལ་རིགས་མཐུན་པ་ཡོད་པ་མ་ཡིན་ནམ། ཇི་ལྟར་ཐ་མའི་སེམས་ཉེ་བར་ལེན་པ་མ་ཡིན། གལ་ཏེ་ཡང་དེ་ལ་ནུས་པ་གང་དུ་ཡང་མེད་དོ་ཞེ་ན། དེའི་ཚེ་དངོས་པོ་མེད་པ་ཉིད་དུ་འགྱུར་ལ། དེ་མེད་ན་ཡང་དེའི་གོང་མ་ཡང་མེད་པས་སྔ་མ་སྔ་མ་
[371a.2]མེད་པར་འགྱུར་ཏེ། དོན་བྱེད་པ་མེད་པའི་ཕྱིར་མ་ཡིན་ནམ་ཞེ་ན། དེ་ནི་མ་ཡིན་ཏེ། སྡུག་བསྔལ་འགོག་པ་ཙམ་ཉིད་ཐར་པ་སྟེ། དེ་དག་སྔ་ཕྱིར་རྟོགས་ན་རིགས་པ་མེད་པར་བརྩད་པ་ཡིན་ནོ། །གལ་ཏེ་ཐ་མའི་སེམས་ལ་ཐ་དད་པའི་དོན་བྱེད་པ་མེད་པ་དེ་ལྟ་ན་ཡང་རང་རིག་པའི་ཕྱིར་ཇི་ལྟར་
[371a.3]མེད་པ་ཡིན་འདི་ལྟར་དམིགས་པ་ལ་ཡོད་པར་བརྗོད་དོ། །འོ་ན་ཟླ་བ་གཉིས་སུ་སྣང་བ་ཡང་ཡོད་པར་འགྱུར་རོ་ཞེ་ན། དེ་ལྟར་ཡང་འདི་ཤེས་པའི་ངོ་བོ་ཉིད་ཀྱིས་ཡོད་པའོ་ཞེས་བཤད་པར་བྱའོ། །དོན་བྱེད་པའི་མཚན་ཉིད་ཡོད་པ་ཡང་འདིར་དམིགས་པའི་མཚན་ཉིད་ཀྱི་དོན་འདི་ཉིད་ཡིན་
[371a.4]ནོ། །གཞན་ཡང་ཇི་ལྟར་དོན་བྱེད་པ་ནི་རྒྱུ་ཡོད་པ་དེ་ལྟར་བསྐྱེད་པར་བྱ་བའི་འབྲས་བུ་ཡང་ཡོད་དེ། ཡང་གང་རྒྱུའི་མཚན་ཉིད་ཅན་ཡིན་པས་དངོས་པོའི་ཞེས་གསུངས་སོ། །དེ་བས་ན་ཐ་མས་དོན་བྱེད་པ་མེད་ན་རྒྱུ་དང་འབྲས་བུར་འབྲེལ་པའི་ཡོད་པ་ཡིན། གལ་ཏེ་ཡང་ཐམས་ཅད་
[371a.5]མཁྱེན་པའི་ཡེ་ཤེས་སྐྱེད་པར་ཐ་མའི་སེམས་ལ་ནུས་པ་ཡོད་ན་དེའི་ཚེ་ཐ་མའི་ཉིད་དུ་འགྱུར་བ་མ་ཡིན་ནོ་ཞེས་བརྗོད་པ་དེ་ནི་ཤིན་ཏུ་འབྲེལ་པ་མེད་པ་སྟེ། འདི་ལྟར་ཐ་མའི་སེམས་ཐམས་ཅད་མཁྱེན་པའི་ཡེ་ཤེས་ཀྱི་གྲོགས་བྱེད་པ་སྟེ། དཔེར་ན་མྱུ་གུ་ལ་ས་བཞིན་ནོ། །ས་མྱུ་གུའི་རྒྱུ་ནི་མ་
[371a.6]ཡིན་གྱི། མྱུ་གུ་གནས་ན་སའི་རྒྱུན་འཆད་པ་མ་ཡིན་ཏེ། ས་བོན་ནི་མྱུ་གུ་དང་རྒྱུད་གཅིག་པའོ། །དེ་བཞིན་དུ་འདོད་ཆགས་དང་མ་བྲལ་བའི་རྒྱུན་ཆད་ཀྱང་ཐམས་ཅད་མཁྱེན་པའི་རྒྱུན་འཇུག་པ་ཡིན་ནོ། །གང་ཡང་ཤེས་པ་ཡིན་པའི་ཕྱིར་ཐ་མའི་ཤེས་པ་ནི་ཐམས་ཅད་མཁྱེན་པའི་ཡེ་ཤེས་
[371a.7]ཀྱི་ཉེ་བར་ལེན་པར་འགྱུར་རོ་ཞེས་ཟེར་བ་འདི་ལ་སྨྲས་པ་ནི། སྤྱིར་མཐུན་པ་ཙམ་ཉེ་བར་ལེན་པ་ཉིད་དུ་འདོད་ན། ས་ཡང་སའི་ངོ་བོ་དང་ལྡན་པའི་ཕྱིར་མྱུ་གུའི་ཉེ་བར་ལེན་པར་འགྱུར་རོ། །ཡང་ན་དཔེར་ན་རྒྱུད་གཞན་གྱི་ཤེས་པ་ལ་དམིགས་ནས། རྗེས་སུ་དཔག་པའི་ཤེས་པ་སྐྱེ་བ་དེ་
[371b]
[371b.1]ནི་རྒྱུད་ཐ་དད་པ་ཡིན་པ་དེ་བཞིན་དུ། ཐམས་ཅད་མཁྱེན་པའི་ཡེ་ཤེས་ཀྱང་འདོད་ཆགས་དང་མ་བྲལ་བའི་སེམས་ལ་དམིགས་པ་ཡིན་གྱི། དེའི་ཉེ་བར་ལེན་པ་ནི་མ་ཡིན་པའི་ཕྱིར། སྡུག་བསྔལ་ལོག་པའི་ངོ་བོ་ཉིད་ཐར་པ་ཡིན་ནོ། །གཞན་ཡང་འདོད་ཆགས་ལ་སོགས་པས་དབེན་པའི་
[371b.2]སེམས་ནི་ཐར་པ་སྟེ། རྒྱུན་ཆད་པ་ནི་མ་ཡིན་ནོ། །འདོད་ཆགས་ལ་སོགས་པ་ཉིད་གློ་བུར་བ་ཡིན་པའི་ཕྱིར། རྣམ་པར་ཐར་པའི་རིགས་ཀྱི་སེམས་ནི་ཤེས་པ་སྔ་མ་དང་འབྲེལ་བའི་ཕྱིར་འགག་པར་མི་འགྱུར་རོ། །དེས་ན་ཡོངས་སུ་དག་པའི་སེམས་འདོད་ཆགས་དང་བྲལ་བ་རྟག་ཏུ་ཡོད་པའོ། །
[371b.3]འཁོར་བ་ནི་སྲོག་ཆགས་ཀྱི་ཆོས་མ་ཡིན་ནམ། ཆོས་ཅན་ཡོད་པ་ལ་ཆོས་ཟད་པར་མི་རུང་སྟེ། དེ་བས་ན་འཁོར་བ་ལས་ཐར་པ་མི་འགྲུབ་པོ་ཞེ་ན། དེ་ནི་འདོད་པས་ཉེས་པ་མ་ཡིན་ཏེ། འཁོར་བ་པ་སུ་ལ་ཡང་ཐར་པ་ཡོད་པ་མ་ཡིན་ཏེ། གང་འཁོར་བ་དེ་ནི་མྱ་ངན་ལས་འདས་
[371b.4]པ་མ་ཡིན་པའི་ཕྱིར། འཁོར་བ་ཉིད་ཀྱི་ཕྱིར་རོ། །གྲོལ་བ་ནི་འཁོར་བ་པ་མ་ཡིན་ཏེ། རྟག་ཏུ་དེ་གྲོལ་བའི་ཕྱིར་རོ། །གཅིག་ཏུ་སེམས་རྒྱུད་ནས་མ་དག་པ་ནི་འཁོར་བ་སྟེ། དེ་ཚོགས་པའི་རྐྱེན་གྱི་བྱེ་བྲག་ལས་བརྒྱུད་ནས་སེམས་དག་པའི་རྒྱུད་སྐྱེ་བར་འགྱུར་གྱི། སེམས་གཞན་གྱི་
[371b.5]རྒྱུད་ནི་འཁོར་བ་ཉིད་དུ་གྲུབ་པ་མ་ཡིན་ལ། དོན་དམ་པར་འཁོར་བ་ཅི་ཡང་མེད་དོ། །སྐད་ཅིག་མ་རྣམས་མི་འཁོར་བའི་ཕྱིར་དང་། རྒྱུན་ཡང་དོན་དམ་པར་མེད་པའི་ཕྱིར་རོ། །དེ་བས་ན་འཁོར་བའི་ཕྱིར་ཞེས་པའི་གཏན་ཚིགས་མ་གྲུབ་པ་ཡིན་པའི་ཕྱིར་ཐར་པ་མེད་དོ་ཞེས་ཟེར་བ་འདི་མི་རིགས་
[371b.6]ཏེ། གྲོལ་བ་གང་ཡིན་པའི་གྲོལ་བ་པོ་ཡང་ཡོད་པ་མ་ཡིན་ནོ། །འོ་ན་གལ་ཏེ་འཁོར་བ་པ་གྲོལ་བ་ཉིད་མ་ཡིན། དེའི་ཚེ་གྲོལ་བ་གཞན་ཡིན་ལ། བཅིང་བ་ཡང་གཞན་ཡིན་པར་འགྱུར་ཏེ། གཞན་བཀྲེས་ཤིང་གཞན་འགྲངས་པའི་ཕྱིར། ཇི་ལྟར་དཔྱོད་པ་དང་ལྡན་པ་དག་རྒྱུ་ལ་མངོན་པར་
[371b.7]རྩོལ་བར་འགྱུར་ཞེ་ན། ལན་སྨྲས་པ། ཇི་སྲིད་བག་ཆགས་མ་བཅོམ་ཞིང་། །དེ་ནི་ཡོངས་སུ་གདུང་གྱུར་པ། །དེ་སྲིད་སྡུག་བསྔལ་སྒྲོ་བཏགས་ནས། །རང་བཞིན་དུ་ནི་གནས་པ་མེད། །གྲོལ་བ་པོ་ནི་མེད་ན་ཡང་། །ལོག་པར་སྒྲོ་འདོགས་གཞོམ་ཕྱིར་བརྩོན། །འདོད་ཆགས་བྲལ་བའི་གནས་
[372a]
[372a.1]པ་ནི། །བརྩེ་བ་ཡིས་བསམ་ལས་ཀྱི་ཡིན། །ཞེས་བྱ་བ་ལ་འདིའི་དགོངས་པ་ནི་འདི་ཡིན་ཏེ། གལ་ཏེ་མངོན་སུམ་མཐོང་བ་ལ་འཇུག་པར་མི་འགྱུར་རོ་ཞེས་བརྗོད་པ་དེ་ནི་འདོད་པ་ཁོ་ན་སྟེ། དེ་ཁོ་ན་ཉིད་མཐོང་བ་ནི་བདག་ནི་བློས་གང་དུ་ཡང་འཇུག་པ་མེད་པས་འབད་པར་བྱེད་
[372a.2]པ་མེད་དེ་བླང་པ་དང་། དོར་བ་ལ་བཏང་སྙོམས་པའི་ཕྱིར་རོ། །འོན་ཏེ་བདག་ཅག་ལ་སོགས་པ་འཇུག་པར་མི་འགྱུར་རོ་ཞེས་རྩོད་ན་ནི་དེའི་ཚེ་བདག་ཅག་ལ་སོགས་པ་གཅིག་ཏུ་ཞེན་ནས་དེ་ཉིད་བཅིངས་ཤིང་གྲོལ་ལོ་ཞེས་གཅིག་པ་ཉིད་དུ་ཞེན་པ་ཡོད་པས་འཇུག་པར་རིགས་ཏེ། འདི་ལྟར་
[372a.3]ཇི་སྲིད་བདག་དང་། བདག་གི་བ་ལ་ཆགས་པ་ལོག་པར་མ་གྱུར་པ་དེ་སྲིད་འཁོར་བར་ཡོངས་སུ་གདུང་བར་འགྱུར་ལ། སྡུག་བསྔལ་བ་ཉིད་དུ་སྒྲོ་བཏགས་ནས་རྣལ་དུ་གནས་པ་མ་ཡིན་ནོ། །དེ་བས་ན་གཅིག་ཏུ་སྒྲོ་བཏགས་ནས་ཐ་སྙད་འདོགས་ཀྱི། དོན་དམ་པར་དངོས་པོའི་སྟོབས་ལས་ནི་ཐ་
[372a.4]སྙད་འདོགས་པ་མ་ཡིན་ཏེ། ཐ་སྙད་རྟོགས་པ་དང་འབྲེལ་པའི་ཕྱིར་རོ། །འདི་ལྟར་ཐག་པའི་རྫས་ལ་སྦྲུལ་དུ་སྒྲོ་འདོགས་པ་ལས་སྤང་བའི་དོན་དུ་འབད་པ་ཡོད་པ་ཉིད་ཀྱི་ཕྱིར། བདག་གི་ངོ་བོ་ཉིད་གྲོལ་བ་པོ་མེད་ཀྱང་ལོག་པར་སྒྲོ་འདོགས་པ་གཞོམ་པའི་ཕྱིར་སྒྲོ་འདོགས་པ་གཞོམ་པའི་དོན་དུ་
[372a.5]བརྩོན་པ་འབྱུང་ངོ་། །འོ་ན་གལ་ཏེ་ལོག་པར་སྒྲོ་འདོགས་པ་ལས་འཇུག་ན་ནི་དེ་ཁོ་ན་ཉིད་མཐོང་བ་ལ་ལོག་པར་སྒྲོ་འདོགས་པ་མེད་པའི་ཕྱིར་གནས་པ་དང་ཆོས་སྟོན་པ་ལ་སོགས་པ་ལ་མི་འཇུག་པར་འགྱུར་བ་དེ་བས་ན། བཅོམ་ལྡན་འདས་ཚད་མར་ཇི་ལྟར་འགྱུར་ཞེ་ན། འདོད་ཆགས་དང་
[372a.6]བྲལ་བ་ནི་འཁོར་བའི་མུར་སྙིང་རྗེ་གནས་པ་དང་། ཆོས་སྟོན་པར་འགྱུར་ཏེ། དཔེར་ན་འབངས་ཀྱི་དོན་དུ་རྒྱལ་པོ་རང་གི་རྒྱུད་ལ་ནན་ཏན་བྱེད་པ་བཞིན་ནོ། །ཡང་ན་འདོད་ཆགས་དང་བྲལ་བ་རྣམས་ལས་སྔོན་དུ་བྱེད་པའི་དུས་ཅུང་ཟད་གནས་པ་ཡིན་ནོ། །འདི་ནི་འགོག་པའི་རྣམ་པའོ། །འོ་ན་གལ་
[372a.7]ཏེ་འདོད་ཆགས་དང་བྲལ་བའི་ལས་ཀྱིས་གནས་པར་བྱེད་ན་དེའི་ཚེ་འཇིག་རྟེན་གཞན་དུ་བྱས་པའི་ལས་ཡོད་པའི་ཕྱིར། འཇིག་རྟེན་ཕ་རོལ་དང་མཚམས་སྦྱོར་བར་འགྱུར་བ་མ་ཡིན་ནམ། འོན་ཏེ་ལས་ཏེ་ནུས་པ་མེད་ན་ནི་འདོད་ཆགས་དང་བྲལ་བའི་གནས་པ་དེ་མེད་པར་འགྱུར་རོ་ཞེ་ན། འདིར་
[372b]
[372b.1]སྨྲས་པ། འཕངས་ལ་ལྡོག་པ་མེད་འདོད་ཕྱིར། །སྲིད་པའི་སྲེད་ལས་རྣམ་རྒལ་བའི། །ལས་གཞན་འཕེན་ནུས་ཡོད་མིན་ཏེ། །ལྷན་ཅིག་བྱེད་པ་ཟད་ཕྱིར་རོ། །ཞེས་བྱ་བ་ལ། སྔོན་གྱི་ལས་ཀྱིས་འཕངས་པའི་སེམས་ཀྱི་རྒྱུད་ལྡོག་པ་ལ་འབད་པ་མེད་པར་གནས་ཏེ། འཕངས་པ་ནི་རྩོལ་བ་མེད་པར་
[372b.2]བཟློག་པར་ནུས་པ་མ་ཡིན་ཏེ། འདོད་ཆགས་དང་བྲལ་བའི་འབད་པ་དང་བྲལ་བས་བཏང་སྙོམས་ཀྱིས་དེ་གར་ཡང་གནས་པ་ཡིན་ནོ། །དེ་བས་ན་འབད་པ་མེད་པའི་ལས་འཇིག་རྟེན་གཞན་སྐྱེད་པའི་མ་ཡིན་ཏེ། ལྷན་ཅིག་བྱེད་པ་སྲེད་པའི་མཚན་ཉིད་མེད་པའི་ཕྱིར། དེ་ཉིད་སྲེད་པ་དང་བྲལ་ན་
[372b.3]སྔོན་གྱི་ལས་ཀྱིས་སྐྱེ་བ་གཞན་འཕེན་པར་བྱེད་མི་ནུས་སོ། །སྙིང་རྗེ་ཞེས་བྱ་བ་ནི་སེམས་ཅན་གྱི་སྡུག་བསྔལ་བར་འདོད་པ་མ་ཡིན་ནམ། སེམས་ཅན་གང་མེད་པའི་ཕྱིར། སེམས་ཅན་དུ་འཛིན་པ་འཁྲུལ་པར་གྱུར་ན། ཇི་ལྟར་འདོད་ཆགས་དང་བྲལ་བ་རྣམས་ལ་ཡོད་དེ། སེམས་ཅན་དུ་འཛིན་
[372b.4]པ་ཡོད་ན་ནི། བདག་མེད་པ་མཐོང་བར་མི་འགྱུར་རོ་ཞེ་ན། འདིར་སྨྲས་པ། སྡུག་བསྔལ་ཤེས་ལ་འགལ་མེད་པའི། །འདུ་བྱེད་སྔ་མ་འཇུག་པ་ཅན། །དངོས་ཆོས་བརྩེ་བ་སྐྱེ་བ་དེ། །སེམས་ཅན་རྗེས་འབྲེལ་ཅན་མ་ཡིན། །ཞེས་བྱ་བ་ལ་གང་གི་ཚེ་སྡུག་བསྔལ་གསུམ་དང་ལྡན་པའི་སྡུག་བསྔལ་
[372b.5]མ་ལུས་པ་མངོན་སུམ་དུ་བྱེད་པ་དེའི་ཚེ། སྡུག་བསྔལ་མི་རྟག་པ་ཉིད་ལ་སོགས་པའི་ངོ་བོ་ཉིད་དུ་བཟུང་བ་ན་སྐྱོན་ཐམས་ཅད་སྤངས་པ་འགལ་བ་མེད་པའི་སྙིང་རྗེ་གོམས་པ་ལས་འབྱུང་བའི་བརྩེ་བ་སྐྱེ་བ་ནི། དངོས་པོའི་ཆོས་ཏེ། དངོས་པོའི་ངོ་བོ་ཉིད་ལ་དམིགས་པའི་ཕྱིར་རོ། །བརྩེ་བ་དེ་སེམས་
[372b.6]ཅན་དང་རྗེས་སུ་འབྲེལ་པ་ཅན་མ་ཡིན་ཏེ། སེམས་ཅན་ལ་འཛིན་པ་ཡོངས་སུ་སྤོང་བའི་ཕྱིར། སེམས་པ་གང་ཡིན་པ་དེ་ནི་བརྩེ་བ་སྟེ། དེ་ཡང་འདོད་ཆགས་དང་བྲལ་བའི་ཡིན་གྱི། གཞན་གྱི་ནི་མ་ཡིན་ནོ། །འདོད་ཆགས་དང་བཅས་པ་ནི་སེམས་ཅན་དུ་འཛིན་པ་སྤངས་ནས་སྲོག་ཆགས་
[372b.7]རྣམས་ལ་ཇི་ལྟར་བརྩེ་བར་འགྱུར། དེ་ལྟར་ནི་འགྱུར་མོད་ཀྱི་འདོད་ཆགས་དང་སྙིང་རྗེ་ལ་ཁྱད་པར་ཅི་ཞིག་ཡོད། དེས་ན་བརྩེ་བ་དང་ལྡན་པའི་གདོན་མི་ཟ་བར་འདོད་ཆགས་ཅན་ནོ་ཞེ་ན། དེ་ལ་ཁྱད་པར་སྨྲས་པ། དེ་བདག་མེད་ཅན་ཆོས་ལ་ནི། །བདག་གཞན་སྒྲོ་བཏགས་ཕྱིར་འདོད་ཆགས། །
[373a]
[373a.1]སྡུག་བསྔལ་རྒྱུན་གྱི་འདུས་རེག་ཙམ། །ཉིད་ལས་བརྩེ་བ་སྐྱེ་བ་ཡིན། །ཞེས་བྱ་བ་ལ། བརྩེ་བ་དང་། འདོད་ཆགས་དག་ལ་ཁྱད་པར་ཆེ་སྟེ། རྒྱུ་དང་ཡུལ་ཐ་དད་པའི་ཕྱིར་རོ། །འདི་ལྟར་མི་རྟག་པ་དང་སྡུག་བསྔལ་བ་ལ་སོགས་པའི་རྣམ་པ་ཅན་གྱི་ཆོས་ལ་བདག་གཞན་
[373a.2]ཏེ། ངོ་བོ་ཉིད་གཞན་རྟག་པ་དང་བདེ་བ་ལ་སོགས་པའི་རྣམ་པར་སྒྲོ་བཏགས་པའི་ཕྱིར་རོ། །བརྩེ་བ་ནི་སྡུག་བསྔལ་གྱི་རྒྱུན་ཙམ་མངོན་སུམ་དུ་བྱས་པ་ཉིད་ནི་ལོག་པའི་ཤེས་པ་ལས་བཟློག་པའི་ཕྱིར་རོ། །དེས་ན་སྡུག་བསྔལ་གྱི་རྒྱུན་མཐོང་བ་ཙམ་གྱིས་བརྩེ་བ་སྐྱེ་བའི་ཕྱིར། འདོད་ཆགས་
[373a.3]ལས་ཐ་དད་པ་ཁོ་ན་ཡིན་ནོ། །འོ་ན་འདོད་ཆགས་ཀྱི་ངོ་བོ་ཉིད་དུ་བརྩེ་བ་མ་གྱུར་མོད་ཀྱི་ཞེ་སྡང་གི་ངོ་བོ་ཉིད་དུ་འགྱུར་ཏེ། མི་སྡུག་པ་ལ་སོགས་པ་མཐོང་བ་ལས་ལྡོག་པའི་བློ་སྐྱེ་བའི་ཕྱིར་རོ་ཞེ་ན་འདིར་སྨྲས་པ། སྐྱོན་རྣམས་གཏི་མུག་རྩ་བ་སྟེ། །དེ་ཡང་སེམས་ཅན་འཛིན་པ་དེ། །མེད་ན་ཁྲོ་
[373a.4]རྒྱུ་ཞེ་སྡང་མིན། །དེ་ཕྱིར་བརྩེ་བ་སྐྱོན་ཡིན་ནོ། །ཞེས་བྱ་བ་ལ། གལ་ཏེ་བདག་ལ་འཚེ་བ་མཐོང་བ་དེའི་ཚེ། ཞེ་སྡང་སྐྱེ་སྟེ། བདག་གང་ཡང་མེད་ཀྱི། འོན་ཀྱང་ཡོད་པ་མ་ཡིན་ཡང་བདག་ཏུ་འཛིན་པ་འབའ་ཞིག་ཡོད་པ་དེ་ཉིད་གཏི་མུག་སྟེ། འདོད་ཆགས་ལ་སོགས་པ་ཉེས་པའི་
[373a.5]རྒྱུ་སྟེ་དེ་ཡང་ཡོད་པར་འཛིན་པའོ། །ཡོད་པར་འཛིན་པ་དེ་མེད་ན་ཁྲོ་རྒྱུ་དེ་བདག་ལ་འཚེ་བར་བྱེད་པ་ཞེ་སྡང་མ་ཡིན་ཏེ་སེམས་ཅན་མཐོང་བ་མེད་པའི་ཕྱིར་རོ། །དེའི་ཕྱིར་བརྩེ་བ་ནི་སྐྱོན་ཐམས་ཅད་དང་བྲལ་བ་ཡིན་གྱི། འདོད་ཆགས་ལ་སོགས་པ་ཉེས་པ་ངོ་བོ་ཉིད་ནི་མ་ཡིན་ནོ། །དེ་ལྟར་
[373a.6]ནི་འགྱུར་མོད་ཀྱི། གལ་ཏེ་འདོད་ཆགས་དང་བྲལ་བ་ལུས་དང་བཅས་པར་ཡོད་ན། དེའི་ཚེ་གྲོལ་བར་མི་འགྱུར་རོ་ཞེ་ན། གྲོལ་མེད་མ་ཡིན་སྔོན་འདུ་བྱེད། །ཟད་ན་གཞན་མཚམས་སྦྱོར་མི་བྱེད། །གང་འདུ་བྱེད་ནུས་ཟད་མེད་ཅན། །ཡིན་ན་སྐྱོན་མེད་ཅན་དེ་གནས། །ཞེས་
[373a.7]བྱ་བ་ལ། འདི་དག་ནི་འདོད་ཆགས་ལ་སོགས་པ་དང་བྲལ་བའི་སེམས་གནས་པ་ནི་ཐར་པ་སྟེ། བདག་ཉིད་ཐམས་ཅད་ཀྱི་ཤེས་པ་ལྡོག་པ་ནི་མ་ཡིན་ནོ་ཞེས་བྱ་བས་བསྟན་ཏོ། །གཞན་ཡང་སྐྱེ་བ་སྔ་མའི་ཉིང་མཚམས་སྦྱོར་བ་སྔོན་གྱི་ལས་ཀྱིས་བྱས་པའི་འདུ་བྱེད་ཟད་ན་སྐྱེ་བ་གཞན་དང་མཚམས་
[373b]
[373b.1]མི་སྦྱོར་བས་མི་གྲོལ་བ་མ་ཡིན་ནོ། །སླར་ཡང་ནུས་པ་ཟད་པར་མི་འགྱུར་བ་སྔར་བྱས་པའི་འདུ་བྱེད་ཡོད་པ་གང་ཡིན་པ་དེ་དག་གི་སྡིག་པ་དང་བྲལ་ནས་ཇི་སྲིད་འཁོར་བའི་མཐར་ཐུག་གི་བར་དུ་གནས་པར་འགྱུར་རོ། །འོན་ཏེ་འདོད་ཆགས་དང་བྲལ་བ་དུས་ཅུང་ཟད་གནས་ལ་དེ་བཞིན་དུ་འཁོར་བའི་
[373b.2]མུར་ཅི་སྟེ་མི་གནས་པ་ཡིན་ཞེ་ན། སྨྲས་པ། སྙིང་རྗེ་དམན་པ་ཉིད་ཕྱིར་ཡང་། །གནས་པའི་འབད་རྩོལ་ཆེན་པོ་མེད། །གང་དག་བརྩེ་བ་ཆེན་པོ་པ། །གཞན་གྱི་ངོར་ནི་བཞུགས་པ་ཡིན། །ཞེས་བྱ་བ་ལ། སྔར་གྱི་འདུ་བྱེད་ཟད་པ་དང་སྙིང་རྗེ་དམན་པའི་ཕྱིར་འབད་རྩོལ་ཆེན་པོས་གནས་པར་འདོད་
[373b.3]པ་མེད་པའི་ཕྱིར་རྟག་ཏུ་གནས་པ་མ་ཡིན་ནོ། །གང་དག་དུས་ཡུན་རིང་པོར་གོམས་པ་བྱས་པའི་སྙིང་རྗེ་ཆེན་པོ་ཅན་དེ་དག་སེམས་ཅན་ལ་ཕན་པའི་ངོར་འཁོར་བ་མ་སྟོངས་ཀྱི་བར་དུ་གནས་པར་འགྱུར་རོ། །གལ་ཏེ་འཇིག་ཚོགས་ལྟ་བྲལ་ཕྱིར། །དང་པོས་སྲིད་མེད་འགྱུར་བ་ན། །ལྷན་ཅིག་
[373b.4]སྐྱེས་སྤངས་མེད་ཕྱིར་རམ། །ཡང་ན་སྲིད་པ་གང་ལས་ཡིན། །ཞེས་བྱ་བ་ལ། གལ་ཏེ་ལམ་ལ་ཉོན་མོངས་པ་དང་བྲལ་བར་བྱེད་པའི་ནུས་པ་ཡོད་ན། དེའི་ཚེ་དང་པོ་མཐོང་བའི་ལམ་ཉིད་ཀྱིས་རྒྱུན་དུ་ཞུགས་པའི་སྤང་བྱ་སྤངས་པར་འགྱུར་ཏེ། དེ་ཅིའི་ཕྱིར་ཞེ་ན། འཇིག་ཚོགས་ལ་ལྟ་བ་དང་བྲལ་བའི་
[373b.5]ཕྱིར་རོ། །ཇི་ལྟར་འཇིག་ཚོགས་ལ་ལྟ་བ་རྒྱུན་དུ་ཞུགས་པ་ལ་མི་འབྱུང་སྟེ། ལམ་མངོན་དུ་བྱས་པའི་ཕྱིར་རོ། །སྐྱོན་གྱི་རྩ་བ་གཏི་མུག་ཡིན། །དེ་ཡང་སེམས་ཅན་འཛིན་པའོ། །ཞེས་བསྟན་ཏོ། །དེ་བས་ན་བསྒོམ་པའི་ལམ་དོན་མེད་པར་འགྱུར་རོ་ཞེ་ན། དེ་ནི་མ་ཡིན་ཏེ། ལྷན་ཅིག་སྐྱེས་པའི་
[373b.6]འཇིག་ཚོགས་ལ་ལྟ་བ་མ་སྤངས་པའི་ཕྱིར་དང་མངོན་པར་འདུ་བྱེད་པ་ཉིད་སྤངས་པའི་ཕྱིར་རོ། །ལྷན་ཅིག་སྐྱེས་པའི་འཇིག་ཚོགས་ལ་ལྟ་བ་ནི་ཡོད་པ་ཡིན་ནོ། །མཐོང་བའི་ལམ་ནི་བདེན་པ་མཐོང་བ་ཙམ་ཡིན་པའི་ཕྱིར་མངོན་པར་འདུས་བྱས་པའི་ཉོན་མོངས་པ་རྩ་བ་མ་ཡིན་པའི་བདག་
[373b.7]འཛིན་ཙམ་སྤངས་པ་སྟེ། མངོན་པར་འདུས་བྱས་པའི་འཇིག་ཚོགས་ལ་ལྟ་བ་ཉེ་བར་བརྟེན་པ་ལས་སྐྱེས་པ་ནི་མཐོང་བའི་ལམ་ཉིད་ཀྱིས་བཟློག་པ་ཡིན་གྱི་ལྷན་ཅིག་སྐྱེས་པའི་འཇིག་ཚོགས་ལ་ལྟ་བ་ནི་བརྟེན་པའི་ཕྱིར་དུས་ཡུན་རིང་པོར་གོམས་པར་བྱས་པའི་བསྒོམ་པའི་ལམ་གྱི་
[374a]
[374a.1]གཉེན་པོ་ཉིད་ཀྱིས་སྤོང་བ་ཡིན་ནོ། །གང་དག་ལྷན་ཅིག་སྐྱེས་པའི་ཡང་སྤོང་བར་འདོད་པ་དེའི་ལུས་ཀྱིས་ལྷན་ཅིག་སྐྱེས་པའི་འཇིག་ཚོགས་ལ་ལྟ་བ་མཐོང་བའི་ལམ་ཉིད་ཀྱིས་སྤོང་ན་ཡང་སྲིད་པ་གང་ལས་འབྱུང་བ་ཡིན། ཤེས་རབ་ཕུལ་དུ་བྱུང་བར་གསལ་བ་ལམ་དང་པོ་ཉིད་
[374a.2]སྐྱོན་མ་ལུས་པ་ཟད་པར་བྱེད་པའི་ཕྱིར་མཐོང་བའི་ལམ་དེ་ཉིད་ལམ་ཐམས་ཅད་ཀྱི་ངོ་བོ་ཉིད་ཡིན་ནོ།། །།ཚད་མ་རྣམ་འགྲེལ་གྱི་འགྲེལ་པ་ལས། བམ་པོ་བཅུ་པ། ལྷན་ཅིག་སྐྱེས་པའི་འཇིག་ཚོགས་ལ་ལྟ་བ་གང་དག་བདག་གི་རྣམ་པར་གྱུར་པ་དེའི་བདག་ཉིད་ནི་དེ་ལ་ཉེ་བར་བསྟན་པ་ཉིད་
[374a.3]ཀྱི་བློ་ཡིན་གྱི། དངོས་པོས་སྐྱེད་པར་བྱེད་པ་མེད་པས་དེའི་བློ་ནི་མ་ཡིན་པའི་ཕྱིར། ཉེ་བར་བསྟན་པ་ཉིད་རྒྱུ་མ་ཡིན་ནམ་ཞེ་ན། བདེ་བར་གྱུར་པའམ་སྡུག་བསྔལ་བར། །མ་གྱུར་ཅིག་ཅེས་འདོད་པ་ཡིས། །འདི་ན་ང་ཞེས་བློ་གང་དེ། །འཇིག་ཚོགས་ལྟ་བ་ལྷན་ཅིག་སྐྱེས། །འགའ་ཞིག་ང་ཞེས་མཐོང་མེད་
[374a.4]པ། །དེ་ལྟ་བདག་ལ་ཆགས་པ་མེད། །བདག་ལ་ཆགས་པ་མེད་པར་ཡང་། །བདེ་བ་འདོད་པས་མཐོང་རྒྱུག་མིན། །ཞེས་བྱ་བ་ལ། ངའོ་སྙམ་པའི་ཤེས་པ་ཐོག་མ་མེད་པའི་བག་ཆགས་ལས་སྐྱེས་པ་གང་ཡིན་པ་དེ་ནི་ལྷན་ཅིག་སྐྱེས་པའི་འཇིག་ཚོགས་ལ་ལྟ་བ་སྟེ། བདག་བདེ་བར་གྱུར་ཅིག་
[374a.5]སྙམ་པའམ། སྡུག་བསྔལ་བར་མ་གྱུར་ཅིག་སྙམ་པའི་རྣམ་པ་དེ་ལྟ་བུ་གང་ཡིན་པ་དེ་ནི་ངའོ་སྙམ་པའི་བློ་ཡིན་ནོ། །གང་གི་ཡིན་ཞེ་ན། སྲེད་པ་པོའི་སྟེ་བདེ་བ་འདོད་པའོ། །འདི་ཉིད་ཀྱི་བློ་ནི་འཇིག་ཚོགས་ལ་ལྟ་བའི་ལྷན་ཅིག་སྐྱེས་པ་ཞེས་བརྗོད་དོ། །འཇིག་ཚོགས་ལ་ལྟ་བ་ལྷན་ཅིག་སྐྱེས་པ་དེ་མ་
[374a.6]སྤངས་པས་མེད་པར་མི་འགྱུར་རོ། །འགའ་ཞིག་ང་ཞེས་མ་མཐོང་བ་དེ་ནི་བདག་ལ་ཆགས་པར་མི་བྱེད་ཅིང་། བདག་ལ་ཆགས་པ་མེད་ན་བདེ་བ་འདོད་པས་མངོན་པར་རྒྱུག་པར་མི་འགྱུར་རོ། །གང་ཞིག་ལྷན་ཅིག་སྐྱེས་པའི་འཇིག་ཚོགས་ལ་ལྟ་བ་དེའི་ཆགས་པ་ཡོད་བཞིན་དུ། ཇི་ལྟར་ཡང་སྲིད་
[374a.7]པ་མེད་པར་འགྱུར། དེ་བས་ན་ལྷན་ཅིག་སྐྱེས་པའི་འཇིག་ཚོགས་ལ་ལྟ་བ་ཡོད་པས། ལམ་དང་པོ་ཉིད་ཀྱིས་འཁོར་བ་མེད་པར་བྱེད་པ་མ་ཡིན་གྱི་འོན་ཀྱང་ལྷན་ཅིག་སྐྱེས་པའི་འཇིག་ཚོགས་ལ་ལྟ་བ་ཉིད་བསྒོམ་པའི་ལམ་གྱིས་སྤང་བར་བྱ་བར་གནས་པའོ། །འདིས་ནི་ཞི་བ་ཞེས་བྱ་བའི་རྣམ་པ་
[374b]
[374b.1]བསྟན་ཏོ། །བདག་ཡོད་ན་འཆིང་ཞིང་དེ་ཉིད་ནི་གྲོལ་བ་མ་ཡིན་ནམ། དེས་ན་བདག་ཡོངས་སུ་དགའ་བའི་ཁྱད་པར་ལས་བདག་ཉིད་མ་རིག་པ་དང་བྲལ་ནས་དགའ་བའི་ངོ་བོ་ཉིད་ནི་གྱ་ནོམ་པའི་ཐར་པའོ། །བདག་མེད་ན་འཁོར་བ་དང་། ཕ་རོལ་ཉིད་གྲོལ་བ་ཡང་གཞན་ཁོ་ན་སྟེ། གང་ཡང་གྲོལ་བའི་
[374b.2]ཚེ་ཡོངས་སུ་དགའ་བར་འགྱུར་བ་ན་སུ་ཞིག་དགའ་བར་འགྱུར། བདག་ཏུ་འཛིན་པ་ཡོད་ན་སྐྱོན་དང་བཅས་པར་མི་འགྱུར་བའི་ཐར་པ་རུང་ངོ་ཞེ་ན། འདིར་ལན་སྨྲས་པ། སྡུག་བསྔལ་སྐྱེ་བའི་རྒྱུ་ཉིད་ནི། །འཆིང་བའི་རྟག་པ་དེ་གང་ལས། །སྡུག་བསྔལ་མི་སྐྱེའི་རྒྱུ་ཉིད་ཀྱང་། །ཐར་ཡིན་རྟག་པ་དེ་
[374b.3]གང་ལས། །ཞེས་བྱ་བ་ལ། གལ་ཏེ་བདག་དང་ཁྱབ་པ་ཡིན་ན་དེ་བས་རྗེས་སུ་འགྲོ་བ་དང་ལྡོག་པ་མེད་པའི་ཕྱིར་འདི་ནི་བདག་ཉིད་རང་གི་སྡུག་བསྔལ་སྐྱེད་མི་ནུས་ཏེ། ནམ་མཁའ་བཞིན་ནོ། །གལ་ཏེ་ཡང་རང་རྒྱུད་པ་ནུས་པ་ཅན་ཡིན་ན། ཇི་ལྟར་བདག་གི་སྡུག་བསྔལ་སྐྱེད་པར་བྱེད་དེ། རང་
[374b.4]རླག་པར་བྱེད་པ་ལ་འགོད་པར་དཔྱོད་པ་དང་ལྡན་པ་མི་རིགས་སོ། །འདི་ནི་རྨོངས་པས་སྡུག་བསྔལ་བར་བྱེད་དེ། གང་གི་ཚེ་རྨོངས་པ་ལྡོག་པ་ན་བདག་མཐོང་བར་གྱུར་ན་སྟེ། དེའི་ཚེ་གྲོལ་བ་མ་ཡིན་ནམ། དེ་ལྟ་བས་ན་མ་རིག་པ་ལས་འཁོར་བར་འགྱུར་ལ། རིག་ན་ཐར་པར་འགྱུར་ཞེས་སྨྲ་
[374b.5]བར་བྱེད་ན་འཁོར་བའི་དུས་ན་གལ་ཏེ་བདག་གི་ངོ་བོ་ཉིད་མ་མཐོང་ན་ཇི་ལྟར་ཡོད་པ་ཡིན་ཏེ། མི་དམིགས་པའི་ཕྱིར་འདི་མེད་པར་འགྱུར་བ་མ་ཡིན་ནམ། དེས་ན་མ་རིག་པ་ཉིད་འཁོར་བ་པ་སྟེ། བདག་ནི་མ་ཡིན་ནོ། །འོན་ཏེ་བདག་གི་ངོ་བོ་ཉིད་མ་རིག་པ་ཡིན་ཏེ། ཐ་དད་པ་མ་ཡིན་ན་
[374b.6]གང་གིས་ན་བདག་འཁོར་བ་པར་མི་འགྱུར་ཞེ་ན། དེ་ལྟ་ན་འོ་ན་ནི་རྟག་ཏུ་བདག་མ་རིག་པའི་རང་བཞིན་ཉིད་ཡིན་པའི་ཕྱིར་གྲོལ་བར་མི་འགྱུར་ཏེ། དེ་གནས་ན་དེའི་རང་བཞིན་ཡང་ཟད་པར་བྱ་བར་མི་ནུས་པའི་ཕྱིར་རོ། །གལ་ཏེ་ཡང་མ་རིག་པ་ལྡོག་ན་སྐྱེས་བུ་དག་པ་ཉིད་ཡོད་ཅེ་ན། དེའི་
[374b.7]ཚེ་འཁོར་བ་ཉིད་གཞན་ཁོ་ན་ཡིན་ཞིང་། གྲོལ་བ་ཡང་གཞན་ཁོ་ན་ཡིན་པའི་ཕྱིར་སངས་རྒྱས་པའི་ལྟ་བ་ཉིད་ལ་བརྟེན་པར་འགྱུར་རོ། །འོན་ཏེ་མ་རིག་པ་ནི་ཚངས་པ་ལས་ཐ་དད་པ་མ་ཡིན་ཞིང་ཐ་མི་དད་པ་ཡང་མ་ཡིན་ལ། རྣམ་པ་ཐམས་ཅད་དུ་མེད་པ་ཡང་མ་ཡིན་གྱི། འོན་ཀྱང་ལོག་
[375a]
[375a.1]པར་སྣང་བ་དང་། སྒྱུ་མར་སྣང་བ་མ་རིག་པའོ་ཞེ་ན། ཅི་སྟེ་དེ་ལྟ་ན་ནི་མ་རིག་པ་ཚངས་པ་ལས་ཐ་མི་དད་པ་མ་ཡིན་པར་འགྱུར་ཏེ། དེ་ཡོད་པ་མ་ཡིན་པའི་ཕྱིར་དང་། ཚངས་པ་ནི་དོན་དམ་པ་ཡིན་པའི་ཕྱིར་རོ། །དེས་ན་མ་རིག་པ་ཚངས་པ་ལས་ཐ་མི་དད་པ་མེད་ན། གཞན་ཉིད་
[375a.2]གྲོལ་བར་འགྱུར་བའི་ཕྱིར། ཇི་ལྟར་ཐར་བའི་སྒྲུབ་ཐབས་ལ་འཇུག །ཚངས་པ་དེ་ཡང་རྟག་ཏུ་གྲོལ་བར་གནས་ན་ཅིའི་ཕྱིར་འཇུག་པར་བྱེད། འོ་ན་ཇི་ལྟར་མེ་ལོང་ལ་སོགས་པར་བཞིན་ཕྱིན་ཅི་ལོག་ཏུ་སྣང་བ་དེ་བཞིན་དུ། མ་རིག་པ་ཚངས་པ་ཉིད་གཞན་དུ་སྣང་ངོ་། །གང་གི་ཚེ་མ་རིག་པ་ཟད་པ་དེའི་
[375a.3]ཚེ་ཕྱིན་ཅི་མ་ལོག་པར་སྣང་བས་ཚངས་པ་ཞེས་བྱ་བའི་ཐར་པ་འགྲུབ་པོ་ཞེ་ན་མ་རིག་པའི་ཚེ་ཚངས་པ་མི་སྣང་བ་མ་ཡིན་ནམ། དེ་ཇི་ལྟར་མ་རིག་པ་ཚངས་པའི་བདག་ཉིད་ཡིན། འོན་ཏེ་རིག་བྱེད་ལས་ཤེས་པ་ཚངས་པར་བརྗོད་པ་ཡིན་ནོ་ཞེ་ན། རིག་བྱེད་ལས་ཤེས་པར་གྱུར་པའི་ཚངས་པ་ནི་
[375a.4]ལོག་པའི་ངོ་བོ་ཉིད་ཀྱིས་སྣང་བ་ཡིན་ཏེ། རང་གི་ངོ་བོ་ཉིད་སྣང་བར་གྱུར་ན་དེའི་ཚེ་ཉིད་གྲོལ་བར་འགྱུར་རོ། །གྲོལ་བའི་དུས་སུ་ནི་ཚངས་པའི་ངོ་བོ་ཉིད་རིག་པ་ཐར་པ་ཡིན་ཏེ། དེས་ན་ཇི་སྲིད་ཚངས་པ་མི་ཤེས་པ་དེ་སྲིད་དུ་རྣ་བའི་འདུ་ཤེས་པ་ལ་མི་བདེན་པའི་རང་བཞིན་ཉིད་སྣང་བའི་ཕྱིར་འཁོར་བའོ། །
[375a.5]མ་རིག་པ་ཐམས་ཅད་ལས་ཐར་ན་ནི། དུས་གང་གི་ཚེ་ཚངས་པ་ཉམས་སུ་མྱོང་བ་དེའི་ཚེ། འཁོར་བ་རིག་པ་མ་ཡིན་ན་དེ་ཇི་ལྟར་གྲོལ་བ་དང་། མ་གྲོལ་བ་དག་གཅིག་ཏུ་གཞན་ཡང་མ་རིག་པ་ནི་ཚངས་པའི་རྒྱུ་ཅན་ཡིན་པའི་ཕྱིར། ཚངས་པ་འགགས་ན་མ་རིག་པ་རྒྱུན་ཆད་པར་ཇི་ལྟར་འགྱུར།
[375a.6]འོ་ན་མ་རིག་པ་འཁྲུལ་པ་ཉིད་དེ་རྒྱུ་མེད་པ་ཅན་ཡིན་ནོ་ཞེ་ན། འཁྲུལ་པ་ཡང་རྒྱུ་མེད་པར་མི་སྐྱེ་བ་མ་ཡིན་ནམ། རབ་རིབ་ཀྱི་ནད་མེད་ན་སྐྲ་ཤད་ལ་སོགས་པར་སྣང་བ་མི་སྐྱེ་བའི་ཕྱིར་དང་། སྐྱེ་བ་ཐམས་ཅད་སྣང་བར་ཐལ་བར་འགྱུར་བའི་ཕྱིར་རོ། །ཇི་ལྟར་མ་རིག་པ་མ་ཤེས་པའི་ངོ་བོ་ཉིད་མ་
[375a.7]ཡིན་པ་དེ་ལྟར་བཤད་པར་བྱའོ། །འོན་ཏེ་མ་རིག་པ་ནི་མ་རིག་པ་ཉིད་ལས་ཡིན་ལ། རིག་པ་ལས་མ་རིག་པ་ལྡོག་པར་བྱེད་དོ་ཞེ་ན། འོ་ན་ནི་རིག་པ་ཐར་པར་འགྱུར་ལ། མ་རིག་པ་འཁོར་བར་འགྱུར་བའི་ཕྱིར་ཅིའི་ཕྱིར་བདག་རྟོགས་པ་མ་ཡིན་པ་རྟོགས་པར་བྱེད། གང་མ་རིག་པ་ལས་
[375b]
[375b.1]ཚངས་པ་གཟུགས་བརྙན་བཞིན་སྐྱེའོ་ཞེས་སྨྲས་པ་དེ་ཡང་རིགས་པ་མ་ཡིན་ཏེ། གཟུགས་བརྙན་དང་བཞིན་གཅིག་པ་མ་ཡིན་པའི་ཕྱིར་རོ། །གཟུགས་བརྙན་ལས་བཞིན་རྗེས་སུ་དཔོག་པ་ནི་འབྲེལ་པ་ལས་ཡིན་གྱི། བཞིན་གཉུག་མ་གཟུགས་བརྙན་དུ་སྣང་བ་ནི་མ་ཡིན་ཏེ། དེ་བཞིན་དུ་གལ་
[375b.2]ཏེ་འགྲོ་བ་ཚངས་པའི་གཟུགས་བརྙན་དུ་ཁས་ལེན་ན། དེའི་ཚེ་འཁོར་བ་དང་གྲོལ་བ་ཐ་དད་པའི་ཕྱིར་འཇུག་པར་མི་འགྱུར་རོ། །འོན་ཏེ་མི་ཤེས་པས་ཆོས་མ་ཡིན་པ་སྡུག་བསྔལ་སྐྱེད་ལ་དེ་ལས་འཁོར་བ་ཡིན་ནོ་ཞེ་ན། དེ་ལྟ་ན་ནི་རྟག་པའི་ཡང་རང་སྡུག་བསྔལ་བར་སྐྱེད་པར་བྱེད་པའི་རྒྱུ་ཉིད་འཆིང་
[375b.3]བ་ཡིན་པར་འགྱུར་ན། དེའི་ཚེ་སྡུག་བསྔལ་གྱི་རྒྱུ་དག་རྟག་ཏུ་ཡོད་པའི་ཕྱིར་རྟག་ཏུ་བཅིང་བ་ཉིད་དུ་འགྱུར་རོ། །ལྷན་ཅིག་བྱེད་པའི་གྲོགས་ལ་ལྟོས་ནས་ཀྱང་རྟག་པས་འབྲས་བུ་སྐྱེད་པར་བྱེད་པ་བཀག་པ་ཡིན་ནོ། །སྡུག་བསྔལ་མེད་པ་སྐྱེད་པར་བྱེད་ཅིང་སྡུག་བསྔལ་དང་བྲལ་བར་གནས་ལ།
[375b.4]དགའ་བའི་ངོ་བོ་ཉིད་དུ་གནས་པ་ནི་ཐར་པ་སྟེ། དེ་ལྟ་བུར་རྟག་པ་ལ་ཡོད་པ་མ་ཡིན་ནོ། །བདག་ནི་རྟག་པ་མ་ཡིན་ཏེ། འདས་མ་ཐག་པའི་སྐྱོན་ཡོད་པའི་ཕྱིར་རོ། །མི་རྟག་པ་ཡང་མ་ཡིན་ཏེ། རྟོག་པ་སྔོན་དུ་མི་གཏོང་བའི་སྐྱོན་ཡོད་པའི་ཕྱིར་རོ། །དེ་བས་ན་རྟག་པ་དང་མི་རྟག་པ་དག་ཏུ་བརྗོད་
[375b.5]པར་མི་བྱ་བ་མ་ཡིན་ནམ་ཞེ་ན་སྨྲས་པ། མི་རྟག་བརྗོད་བྱ་མིན་གང་ཡིན། །དེ་ནི་འགའ་ཞིག་གི་རྒྱུ་མིན། །བརྗོད་བྱ་མིན་ན་ནམ་ཡང་ནི། །བཅིང་དང་གྲོལ་བར་མི་འགྱུར་རོ། །ཞེས་བྱ་བ་ཡིན་ཏེ། མི་རྟག་པ་བརྗོད་པར་བྱ་བ་མ་ཡིན་ཞེས་བྱ་བ་འདིས་ནི་འདི་ལ་རྟག་པ་མེད་དོ་ཞེས་བྱ་བའི་དོན་ཏོ། །
[375b.6]མི་རྟག་པ་མེད་ན་ནི་རྟག་པ་སྟེ། འགའ་ཞིག་གི་ཡང་རྒྱུ་མ་ཡིན་ཏེ། རྒྱུ་ཉིད་ལ་མི་རྟག་པ་ཉིད་ཀྱིས་ཁྱབ་པར་བཤད་དོ། །དེ་བས་ཁྱབ་བྱེད་མི་རྟག་པ་མེད་ན་དོན་བྱེད་པ་མེད་པའི་ཕྱིར་བརྗོད་པར་བྱ་བ་མ་ཡིན་ན། བཅིང་བ་ཐར་པར་མི་རུང་ངོ་། །ཡང་གི་སྒྲས་བརྟག་པ་གཅིག་པུའི་སྐྱེས་བུར་མ་
[375b.7]ཟད་པའོ། །འོན་ཏེ་གཉིས་གའི་ངོ་བོ་ཉིད་ཅན་གྱི་སྐྱེས་བུ་ཡིན་ཡང་དེ་ལྟ་བུའི་སྐྱོན་དུ་འགྱུར་ཏེ་གང་གི་ཕྱིར། གང་གི་རང་བཞིན་འཇིག་མེད་པ། །དེ་ལ་མཁས་རྣམས་རྟག་ཅེས་བརྗོད། །ཁྲེལ་བ་སྤངས་པའི་ལྟ་བ་འདི། །དེ་ཕྱིར་དེ་ནི་རྟག་ཅེས་བཤད། ཅེས་བྱ་བ་ལ། རྟག་པ་དང་། འཇིག་
[376a]
[376a.1]པ་ནི་འགལ་བ་སྟེ། གང་གི་རང་བཞིན་འཇིག་པ་མེད་པ་དེ་ནི་མཁས་པ་རྣམས་ཀྱིས་རྟག་པ་ཞེས་བརྗོད་དོ། །འཇིག་པ་དང་། མི་དམིགས་པ་དང་། མེད་པ་ཞེས་བྱ་བ་ནི་དོན་གཅིག་གོ། །མི་འཇིག་པ་དང་རྟག་པ་དང་དམིགས་པ་ཞེས་བྱ་བ་ནི་རྣམ་གྲངས་པར་བཤད་པར་བྱའོ། །འགལ་
[376a.2]བར་འགྱུར་བ་དེའི་ཕྱིར་རྟག་པ་དང་མི་རྟག་པའི་ལྟ་བ་ཅན་ཁྲེལ་སྤངས་པ་དེ་ནི་རྟག་པ་ཞེས་རྗོད་པར་བྱེད་དོ། །འདི་དག་གིས་ནི་གཞན་གྱི་རྟག་པའི་ཐར་པ་བཀག་ནས་འགོག་པའི་བདེན་པ་གྱ་ནོམ་པའི་རྣམ་པ་བསྟན་ཏོ། །དེ་ནི་ལམ་གྱི་ཞར་ལ་འགོག་པའི་རྣམ་པ་བཞི་པ་བསྟན་པའི་ཕྱིར་སྨྲས་པ།
[376a.3]བཤད་ཟིན་ལམ་དེ་གོམས་པ་ལས། །རྟེན་ནི་གནས་གྱུར་པ་ཡིན་ཏེ། །གོམས་ཀྱང་ལམ་བཞིན་སྐྱོན་འབྱུང་ན། །མ་ཡིན་ནུས་པ་མེད་པའི་ཕྱིར། །ཞེས་བྱ་བ་ཡིན་ཏེ། ལམ་གྱི་བདེན་པའི་རྣམ་པ་བཞི་སྟེ། ལམ་དང་། རིགས་པ་དང་། སྒྲུབ་པ་དང་། ངེས་པ་འབྱིན་པའོ། །ལམ་ཉིད་མེད་དོ་ཞེས་རྒོལ་
[376a.4]བ་དེ་ལ་ལམ་ཡིན་ནོ་ཞེས་བསྟན་ཏོ། །ལམ་འདི་ནི་ཚད་མ་དང་ལྡན་པ་མ་ཡིན་ནོ་ཞེ་ན་གཞན་དག་སྨྲ་བར་དེ་བསལ་བའི་ཕྱིར་རིགས་པ་ཞེས་བརྗོད་དོ། །མངོན་སུམ་དུ་བྱེད་པའི་ལམ་ཉིད་འགོག་པའི་རྒྱུ་ཡིན་པའི་ཕྱིར་སྒྲུབ་པ་ཞེས་བརྗོད་དོ། །དེ་ལས་གཞན་པའི་ལམ་བདག་ཏུ་ལྟ་བ་ཡིན་ནོ་ཞེས་སྨྲས་པ་
[376a.5]བསལ་བའི་ཕྱིར་ངེས་པར་འབྱིན་པ་ཞེས་བྱ་བ་རྣམ་པ་བཞི་པ་ཡིན་ནོ། །དེ་ལ་མངོན་སུམ་དུ་བྱེད་པའི་ལམ་ནི་གྲོལ་བའི་རྒྱུ་ཡིན་པའི་ཕྱིར། རྣམ་པ་གསུམ་བརྗོད་དོ། །ཇི་ལྟར་སྔར་བསྟན་པའི་ལམ་དེ་གོམས་པ་ལས་སེམས་ཀྱི་རྒྱུད་དམ། ཀུན་གཞི་པ་ཡོངས་སུ་དགའ་བའི་ངོ་བོ་ཉིད་གནས་གྱུར་པར་
[376a.6]འགྱུར་ཏེ། བདག་ཏུ་འཛིན་པའི་གཉེན་པོར་གྱུར་པ། བདག་མེད་པ་གོམས་པར་གྱུར་ན་ཡང་ཉེས་པ་འབྱུང་བ་སྲིད་དེ་དཔེར་ན། སྐྱོན་དང་ལྡན་པ་ལ་ཡོན་ཏན་འབྱུང་བ་བཞིན་ནོ། །དེའི་ཕྱིར་འཁོར་བ་ལས་ངེས་པར་འབྱུང་བ་མ་ཡིན་ནོ་ཞེ་ན། ཉེས་པ་རྣམས་སླར་འབྱུང་བ་མ་ཡིན་ཏེ། ཡོན་ཏན་རྣམས་
[376a.7]དངོས་པོའི་ངོ་བོ་ཉིད་ཡིན་པའི་ཕྱིར་དང་། སྐྱོན་རྣམས་དངོས་པོའི་ངོ་བོ་ཉིད་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། སྨྲས་པ། རྣམ་ཤེས་ཡུལ་འཛིན་པ་ཡི་ཆོས། །ཇི་ལྟར་དེ་ནི་ཡོད་པ་བཞིན། །འཛིན་གྱུར་ཡོད་པའི་བདག་ཉིད་དེ། །དེ་ཡིས་སྐྱེད་པར་བྱེད་པའང་ཡིན། །ཞེས་བྱ་བ་ལ། སྲོག་
[376b]
[376b.1]ཆགས་རྣམས་ལམ་ལ་འཇུག་པར་བྱེད་པ་རྣམ་པར་ཤེས་པ་ཡིན་ཏེ། དེའི་ཆོས་ཀྱི་ངོ་བོ་ཉིད་ནི་ཡུལ་འཛིན་པའོ། །ཡུལ་ཉམས་སུ་མྱོང་བ་རྣམ་པར་ཤེས་པར་འགྱུར་གྱི། མྱོང་བ་མེད་ན་ནི་རྣམ་པར་ཤེས་པ་མ་ཡིན་ནོ། །ཡུལ་ཇི་ལྟར་ཡོད་པ་བཞིན་དུ་འཛིན་ལ། རྣམ་པ་གཞན་དུ་འཛིན་པ་ནི་མ་
[376b.2]ཡིན་ཏེ་འཁྲུལ་པར་ཐལ་བར་འགྱུར་བའི་ཕྱིར་རོ། །ཡུལ་དེ་ཡང་ཡོད་པར་འགྱུར་བའི་བདག་ཉིད་ཀྱིས་རྣམ་པར་ཤེས་པ་ནི་སྐྱེད་པར་བྱེད་པ་ཡིན་ཏེ། རྣམ་པ་གཏོད་པར་བྱེད་ནུས་པའི་རྒྱུ་ནི་རྣམ་པར་ཤེས་པའི་ཡུལ་ཡིན་ནོ། །དེ་བས་ན་རང་གི་ངོ་བོ་རིག་པ་ནི་རྣམ་པར་ཤེས་པའི་ཆོས་ཏེ། ཡོད་པར་
[376b.3]གྱུར་པའི་ངོ་བོ་ཉིད་དུ་ཤེས་པ་ཉིད་ཡུལ་ཡིན་ནོ། །དེའི་ཕྱིར་མི་རྟག་པ་དང་། བདག་མེད་པ་ལ་སོགས་པའི་ངོ་བོ་ཉིད་ཅན་ཡུལ་ཏེ། རྣམ་པར་ཤེས་པ་ནི་ཡུལ་དེ་འཛིན་པ་ཉིད་ཡིན་ནོ། །གལ་ཏེ་མི་རྟག་པ་དང་བདག་མེད་པ་ལ་སོགས་པའི་འཛིན་པ་ཤེས་པའི་ཆོས་ཡིན་ན། དེའི་ཚེ་རྟག་པ་དང་།
[376b.4]བདག་ཏུ་འཛིན་པར་མི་འགྱུར་བ་མ་ཡིན་ནམ། དེ་བས་ན་དེའི་རྩ་བ་ཅན་གྱི་འདོད་ཆགས་ལ་སོགས་པ་དང་བྲལ་ན་འཁོར་བར་མི་འགྱུར་རོ་ཞེ་ན། འདིར་སྨྲས་པ། དེ་ཡི་ངོ་བོ་ཉིད་འདི་ལས། །རྒྱུ་གཞན་གྱིས་ནི་འཁྲུལ་པར་འགྱུར། །ལྡོག་པ་ཉིད་ནི་རྐྱེན་ལ་ལྟོས། །མི་བརྟན་སྦྲུལ་གྱི་བློ་བཞིན་ནོ། །
[376b.5]ཞེས་བྱ་བ་ལ། བདག་མེད་པ་ཉིད་ལ་སོགས་པ་རིག་པ་དེའི་ངོ་བོ་ཉིད་དེ། རང་བཞིན་རྣམ་པར་ཤེས་པ་འདི་ལས་ཏེ། བདག་མེད་པའི་ངོ་བོ་ཉིད་འཛིན་པ་འདི་ལས་སེམས་དེ་འཁྲུལ་པར་བྱེད་པའི་རྒྱུ་གཞན་འདྲ་བ་གཞན་འབྱུང་བའི་ཕྱིར་རོ། །འོ་ན་གལ་ཏེ་བདག་མེད་པ་འཛིན་པ་ལས་སེམས་
[376b.6]འཁྲུལ་པར་བྱེད་པ་དེའི་ཚེ་དུས་གཞན་དུ་ཡང་སེམས་འཁྲུལ་པར་འགྱུར་བའི་ཕྱིར་རྟག་ཏུ་འཁོར་བར་འགྱུར་གྱི་ཐར་པ་ནི་མ་ཡིན་ནོ་ཞེ་ན། དེ་ནི་མ་ཡིན་ཏེ། གང་གི་ཕྱིར་འཁྲུལ་པ་སླར་ལྡོག་པ་རྐྱེན་གཅིག་ལ་ལྟོས་པས་རྩ་བ་མེད་པ་ཅན་ཡིན་པའི་ཕྱིར་དུས་ཐམས་ཅད་དུ་གནས་པ་ནི་མ་ཡིན་ཏེ། སྦྲུལ་
[376b.7]གྱི་བློ་བཞིན་ནོ། །ཇི་ལྟར་རྟག་པ་ཉིད་དང་། བདག་དང་བཅས་པ་མེད་པ་དེ་ལྟར་སྔར་བསྟན་ཞིང་འོག་ཀྱང་བཤད་པར་བྱའོ། །དེ་བས་ན་ནང་གི་མ་རིག་པས་བསླད་པ་ལས་བྱུང་བའི་དྲི་མ་ནི་གློ་བུར་བ་ཡིན་ནོ། །དེ་སྨྲས་པ། སེམས་འདིའི་རང་བཞིན་འོད་གསལ་ཏེ། །ཞེས་བྱ་བ་ལ། ཤེས་པས་
[377a]
[377a.1]རྟག་པ་དང་བྲལ་བར་འཛིན་པའི་ཕྱིར་སེམས་ནི་ངོ་བོ་ཉིད་ཀྱིས་ཡོངས་སུ་དག་པ་ཡིན་ཏེ། དྲི་མ་རྣམས་ནི་གློ་བུར་བ། །ཞེས་བྱ་བ་ལ། ཡོད་པ་མ་ཡིན་པའི་སྒྲོ་འདོགས་པའི་རྩ་བ་མེད་པ་ཅན་གྱི་དངོས་པོ་མེད་པའི་ཕྱིར། དངོས་པོ་ལ་རྟག་པ་ནི་གང་དུ་ཡང་སྣང་བ་མ་ཡིན་ནོ། །བརྟགས་
[377a.2]པས་སྟོང་པ་དེའི་ཕྱིར་དྲི་མ་རྣམས་ནི་གློ་བུར་བ་ཡིན་ནོ། །དེ་ཕྱིར་སྔར་ནུས་མེད་པ་ཡང་། །ཕྱིས་དེ་རང་བཞིན་ལ་ཅི་ནུས། །ཞེས་བྱ་བ་ལ། དེའི་ཕྱིར་སྔར་ཐོས་པ་དང་། བསམས་པའི་དུས་སུ་དེ་ཁོ་ན་ཉིད་མཐོང་བ་ལ་གགས་བྱེད་པའི་ནུས་པ་མེད་ན་ཕྱིས་ལམ་མངོན་དུ་བྱེད་པའི་ཚེ། སེམས་ཀྱི་རྒྱུད་ལམ་གྱི་ངོ་
[377a.3]བོ་ཉིད་དུ་གྱུར་ན། ཉེས་པ་རྣམས་ལ་སྐྱེ་བའི་ནུས་པ་ལྟ་ག་ལ་ཡོད། དད་པ་ལ་སོགས་པ་དམན་པ་དགྲ་བཅོམ་པར་གྱུར་པ་ཡང་འདོད་ཆགས་དང་བྲལ་བ་ལས་ཉམས་པར་གྱུར་ནས་ལམ་མངོན་དུ་བྱེད་པར་འགྱུར་བ་དང་། ཡུལ་ཉེ་བར་གྱུར་པ་ལས་ཉོན་མོངས་པ་རྣམས་འཇུག་པར་འགྱུར་ཏེ། དེ་བས་
[377a.4]ན་ཇི་ལྟར་ཉོན་མོངས་པ་སླར་མི་སྐྱེ་བ་ཡིན་ཞེ་ན། སྨྲས་པ། ནུས་པ་ཡོད་ནའང་གནོད་པ་ཅན། །སྐྱེས་ནུས་སྙིང་པོ་ཅན་དངོས་ལ། །ལྡོག་པར་སྐྱེད་ནུས་ཡོད་མིན་ཏེ། །འདམ་གྱི་ནང་གི་མེ་བཞིན་ནོ། །ཞེས་བྱ་བ་ལ། གལ་ཏེ་ཡང་དད་པ་དམན་པ་ལ་སོགས་པའི་དགྲ་བཅོམ་པ་ལ་སྐྱོན་རྣམས་སྐྱེ་
[377a.5]ན་ཡང་ནང་དུ་གྱུར་པའི་གནོད་པ་ཅན་སྐྱེད་ནུས་པ་ཅན་གྱི་རྒྱུད་ལ་སྐྱོན་གྱི་ཚོགས་རྣམས་ཤིན་ཏུ་སྐྱེད་པར་ནུས་པ་མ་ཡིན་ཏེ། དཔེར་ན་ས་གཞི་འདམ་བུར་གྱུར་པ་ལ་མེ་སྐྱེད་པའི་ནུས་པ་མེད་པ་བཞིན་ནོ། །འདི་ལྟར། འཚེ་བ་མེད་ལ་ཡང་དག་དོན། །ངོ་བོ་ཉིད་ལ་ཕྱིན་ལོག་གིས། །བརྩོན་དང་ལྡན་
[377a.6]ཡང་གནོད་མེད་དེ། །བློ་ནི་དེ་ཕྱོགས་འཛིན་ཕྱིར་རོ། །ཞེས་བྱ་བ་ལ། ངོ་བོ་ཉིད་ནི་བརྩོན་པ་མེད་པར་བཟློག་པར་ནུས་པ་མ་ཡིན་ཏེ། གང་ཞིག་གིས་སྐྱོན་མཐོང་ནས་ཡོན་ཏན་ལ་འཇུག་པར་བྱེད་ཅིང་ཡོན་ཏན་མཐོང་ནས་སྐྱོན་ལ་འཇུག་པར་མི་བྱེད་དེ། ལམ་ལ་གོམས་པ་ཅན་ནི་ཡོན་ཏན་མཐོང་ནས་
[377a.7]སྐྱོན་ལ་མི་འཇུག་ཅིང་། སྐྱོན་མཐོང་ནས་ཡོན་ཏན་ལ་ལྡོག་པར་མི་བྱེད་དེ། ལམ་གྱི་ཡོན་ཏན་རྣམས་ནི་འཚེ་བ་མེད་པ་ཅན་ཡིན་པའི་ཕྱིར་ཏེ། སྐྱོན་ཐམས་ཅད་དང་བྲལ་པའི་ཕྱིར་དང་། རབ་ཏུ་ཞི་བའི་བདེ་བ་ལས་མི་འགྱུར་བའི་ཕྱིར། འཚེ་བ་མེད་པའི་ལམ་ཡེ་ཤེས་ཀྱི་ངོ་བོ་ཉིད་ཡིན་ནོ། །
[377b]
[377b.1]ངོ་བོ་ཉིད་ནི་བཟློག་པར་མི་ནུས་ཏེ། ཤེས་པ་ཉིད་ཀྱང་མེད་པར་ཐལ་བར་འགྱུར་བའི་ཕྱིར། ལམ་ནི་བདེན་པའི་ཡུལ་ཅན་དེ་བས་ན། ཡུལ་གནས་བཞིན་དུ་ཇི་ལྟར་ལམ་ལྡོག་པར་འགྱུར། དེའི་འཚེ་བ་མེད་པ་ནི་ཡང་དག་པའི་དོན་དང་ངོ་བོ་ཉིད་ཡིན་ཏེ། དེ་ནི་ཕྱིན་ཅི་ལྡོག་གི་སྐྱོན་གྱིས་བཟློག་པར་ནུས་པ་
[377b.2]མ་ཡིན་ནོ། །གཞན་ཡང་སེམས་དེའི་ཕྱོགས་འཛིན་པ་ནི་སྐྱོན་ལ་འཇུག་པ་མ་ཡིན་ཏེ་དེ་བས་ན་སྐྱོན་གྱི་དོན་དུ་བརྩོན་པ་ལ་འཇུག་པ་ནི་མ་ཡིན་ཏེ། དངོས་པོ་མ་ལུས་པའི་ངོ་བོ་ཉིད་ཡོངས་སུ་འཇལ་བར་ནུས་པ་ཅན་ནི་ཡོན་ཏན་དེའི་ཕྱོགས་འཛིན་པའི་ཕྱིར། འབད་པར་བྱས་ཀྱང་ལམ་ལ་
[377b.3]གནོད་པ་ནི་མ་ཡིན་ནོ། །འདི་དག་གིས་ནི་ལམ་ཞེས་བྱ་བའི་ངོ་བོ་ཉིད་བསྟན་ཏོ། །འོ་ན་འདོད་ཆགས་ཀྱང་ཞེ་སྡང་དག་འགལ་བའི་རྣམ་པ་ཅན་དུ་གྱུར་པ་ཡང་གཅིག་ཁོ་ན་ལ་གནོད་པ་མ་ཡིན་ཏེ། གནོད་པར་བྱེད་པའི་འདོད་ཆགས་ལ་ཡང་ཞེ་སྡང་གིས་གནོད་པར་བྱེད་པ་མཐོང་བའི་ཕྱིར་དང་། དེ་བཞིན་དུ་འདོད་ཆགས་ཀྱང་ཞེ་
[377b.4]སྡང་ལ་སླར་གནོད་པ་མཐོང་བའི་ཕྱིར་རོ། །དེ་ལྟར་བདག་དང་། བདག་མེད་པ་མཐོང་བ་དག་ཀྱང་ཕན་ཚུན་གནོད་པ་བྱེད་པ་མ་ཡིན་ནམ། དེ་བས་ན་ལམ་ནི་ཉོན་མོངས་པ་དང་བྲལ་བ་ཐོབ་པར་བྱེད་པ་མ་ཡིན་ནོ་ཞེ་ན། སྨྲས་པ་ནི། བདག་འཛིན་རྒྱུ་གཅིག་ཅན་ཉིད་དང་། །རྒྱུ་དང་འབྲས་
[377b.5]བུའི་ངོ་བོའི་ཕྱིར། །འདོད་ཆགས་ཁོང་ཁྲོ་དག་ཕན་ཚུན། །ཐ་དད་ན་ཡང་གནོད་པ་མེད། །ཅེས་བྱ་བ་ཡིན་ཏེ། འདོད་ཆགས་དང་ཞེ་སྡང་དག་བདག་ཏུ་འཛིན་པའི་རྒྱུ་ཅན་ཡིན་པའི་ཕྱིར། བདག་ཏུ་འཛིན་པ་ཡོད་ན་གཅིག་ཀྱང་གཏན་དུ་ཆགས་པར་མི་འགྱུར་གྱི། ཕན་ཚུན་འགལ་བར་གྱུར་
[377b.6]པ་ཡིན་ཡང་རིམ་པར་སྐྱེ་བ་ཉིད་དུ་འགྱུར་རོ། །གཞན་ཡང་འདོད་ཆགས་དང་། ཞེ་སྡང་དག་ཕན་ཚུན་རྒྱུ་དང་འབྲས་བུའི་དངོས་པོ་ཡིན་པའི་ཕྱིར། འགལ་བ་ཡིན་ཡང་གནོད་པར་མི་བྱེད་དོ། །འདི་ལྟར་གང་དག་ལ་ཁྲོ་བ་དང་འབྲེལ་པའི་སྡུག་བསྔལ་གྱི་རྒྱུ་དེ་ནི་གདོན་མི་ཟ་བར་བདེ་བར་འདོད་དེ། དེ་
[377b.7]བས་ན་དེ་དག་རྒྱུ་དང་འབྲེལ་བ་ཡིན་གྱི་བདེ་བའི་རྒྱུ་ཉེ་བར་བླངས་པ་ན་གདོན་མི་ཟ་བར་གཞན་ལ་གནོད་པ་དང་། ཁྲོ་བ་དང་། འབྲེལ་པ་ཅན་ཡིན་ཏེ། དེ་བས་ན་འདོད་ཆགས་ནི་ཁྲོ་བ་སྐྱེད་པ་ཉིད་ཡིན་ནོ། །བདག་མེད་པ་མཐོང་བ་ནི་ཐམས་ཅད་དུ་བདག་ཏུ་འཛིན་པ་དང་འགལ་བའི་ཕྱིར། འགོག་པ་
[378a]
[378a.1]ཐོབ་པར་བྱེད་པ་ཡིན་ནོ། །བྱམས་པ་ལ་སོགས་པ་ཞེ་སྡང་ལ་སོགས་པའི་གཉེན་པོར་དམ་པའི་ཆོས་ནས་གསུངས་པ་མ་ཡིན་ནམ། དེའི་ཕྱིར། ཇི་ལྟར་བདག་མེད་པ་མཐོང་བ་ཁོ་ན་ལམ་དུ་འགྱུར་ཞེ་ན། འདིར་སྨྲས་པ། བྱམས་པ་སོགས་དང་འགལ་མེད་ཕྱིར། །ཤིན་ཏུ་
[378a.2]ཉེས་པ་ཚར་གཅོད་ཕྱིར། །ཉེས་ཀུན་དེ་ཡི་རྩ་བ་ཅན། །དེ་ཡང་འཇིག་ཚོགས་ལྟ་བ་ཡིན། ཞེས་བྱ་བ་ཡིན་ཏེ། གལ་ཏེ་ཡང་ཞེ་སྡང་གི་གཉེན་པོ་བྱམས་པ་དང་། འདོད་ཆགས་ཀྱི་གཉེན་པོ་མི་སྡུག་པ་དང་། འཚེ་བའི་གཉེན་པོ་སྙིང་རྗེ་དང་། ཕྲག་དོག་གི་གཉེན་པོ་དགའ་བ་དང་། ཐམས་
[378a.3]ཅད་ཀྱི་གཉེན་པོ་བཏང་སྙོམས་ཡིན་པ་དེ་ལྟ་ན་ཡང་བྱམས་པ་ལ་སོགས་པ་ལས་ཤིན་ཏུ་ཉེས་པ་རྣམས་ཚར་གཅོད་པ་མ་ཡིན་ཏེ། གཏི་མུག་དང་འགལ་བ་མེད་པའི་ཕྱིར་རོ། །གཏི་མུག་ཡོད་ཀྱང་ང་རྒྱལ་མེད་པ་ལས་ཉེས་པ་ཐམས་ཅད་སྤོང་བ་མ་ཡིན་ནམ་ཞེ་ན། དེ་ནི་མ་ཡིན་ཏེ། གང་གི་
[378a.4]ཕྱིར་འདོད་ཆགས་ལ་སོགས་པའི་ཉོན་མོངས་པ་ཐམས་ཅད་གཏི་མུག་གི་རྩ་བ་ཅན་ཡིན་པའི་ཕྱིར་རོ། །གཏི་མུག་དེ་ཡང་འཇིག་ཚོགས་ལ་ལྟ་བ་སྟེ། ཉོན་མོངས་པ་ཅན་གྱི་གཏི་མུག་ནི་འཇིག་ཚོགས་ལ་ལྟ་བ་ཡིན་པའི་ཕྱིར་རོ། །དགྲ་བཅོམ་པའི་མི་ཤེས་པ་གང་ཡིན་པ་དེ་ནི་ཉོན་མོངས་པ་
[378a.5]ཅན་མ་ཡིན་པའི་ཕྱིར། དེ་དག་གཏི་མུག་ལས་ཀྱང་གྲོལ་བ་སྟེ། འཇིག་ཚོགས་ལ་ལྟ་བ་དང་བྲལ་བའི་ཕྱིར་རོ། །དེ་ལྟ་ན་ནི་འགྱུར་མོད་ཀྱི། ཤེས་པར་མ་གྱུར་པའི་ངོ་བོ་ཉིད་ཅན་མ་རིག་པ་ཡིན་ལ། འཇིག་ཚོགས་ལ་ལྟ་བ་ནི་ཤེས་པའི་ངོ་བོ་ཉིད་ཅན་ཡིན་ན། དེ་ཇི་ལྟར་འཇིག་ཚོགས་ལ་ལྟ་བ་
[378a.6]ཉིད་མ་ཡིན་ཞེ་ན། སྨྲས་པ་ནི། རིག་པའི་མི་མཐུན་ཕྱོགས་ཉིད་དང་། སེམས་བྱུང་ཉིད་དུ་དམིགས་པའི་ཕྱིར། །ལོག་པར་དམིགས་པ་མི་ཤེས་པའོ། །གསུངས་ཕྱིར་གཞན་ནི་རིགས་ལྡན་མིན། །ཞེས་བྱ་བ་ལ། གལ་ཏེ་མི་གསལ་བའི་ངོ་བོ་ཉིད་མ་རིག་པ་ཡིན་ན། གཟུགས་ལ་
[378a.7]སོགས་པ་ལོག་པ་ཡང་མ་རིག་པར་འགྱུར་ཏེ། གཟུགས་ལ་སོགས་པ་ལས་དེ་ལས་ལྷག་པ་ཅི་ཞིག་ཡོད། དེ་བས་མྱ་ངན་ལས་འདས་པ་དང་། འགོག་པའི་སྙོམས་པར་འཇུག་པ་ཡང་མ་རིག་པར་འགྱུར་རོ། །འོན་ཏེ་མྱ་ངན་ལས་འདས་པ་ནི་ཉོན་མོངས་པའི་རྒྱུ་མ་ཡིན་པའི་ཕྱིར། མ་
[378b]
[378b.1]རིག་པ་མ་ཡིན་ནོ་ཞེ་ན། དེ་ནི་མ་ཡིན་ཏེ། མ་རིག་པ་མི་གསལ་བའི་མཚན་ཉིད་ཀྱི་ངོ་བོ་ཉིད་ཅན་མ་ཡིན་ཏེ། འཇིག་ཚོགས་ལ་ལྟ་བ་ཉོན་མོངས་པའི་རྒྱུ་ཡིན་པའི་ཕྱིར་མ་རིག་པ་སྟེ། རིག་པ་དང་འགལ་བའི་ཕྱིར་རོ། །ཇི་ལྟར་ཡང་ཆོས་གཞན་རྗེས་སུ་འཛིན་པའི་མཚན་ཉིད་ཅན་ཡིན་གྱི། དེ་མེད་
[378b.2]པ་ཙམ་ནི་ཆོས་མ་ཡིན་པ་མ་ཡིན་ཞིང་། དེ་ལས་གཞན་པ་ཙམ་ཡང་མ་ཡིན་ཏེ། འོན་ཀྱང་རྗེས་སུ་མཐུན་པ་དང་འགལ་བ་ལ་གནོད་པ་ནི་ཆོས་མ་ཡིན་པའོ། །དེ་བཞིན་དུ་བདེན་པའི་དོན་གསལ་བར་མེད་པ་ཙམ་ནི་བརྫུན་པ་མ་ཡིན་གྱི། འོན་ཀྱང་མེད་པ་སྟོན་པ་ནི་བརྫུན་གྱི་ཚིག་ཡིན་
[378b.3]ནོ། །དེ་ལྟ་ན་ནི་དངོས་པོ་ཡོད་པ་ཉིད་དུ་གྱུར་ཀྱང་གང་གི་ཚེ་འཁྲུལ་ནས་མེད་པ་ཉིད་དུ་རྟོགས་པར་གྱུར་པས་མེད་པའོ་ཞེས་སྟོན་པར་བྱེད་པ་དེའི་ཚེ་བདེན་པ་ཉིད་མ་ཡིན་པ་དང་། དངོས་པོ་མེད་པ་ཡང་ཡོད་པ་ཉིད་དུ་རྟོགས་ནས་ཡོད་ཅེས་སྟོན་པར་བྱེད་པ་དེའི་ཚེ་བརྫུན་དུ་འགྱུར་བ་མ་ཡིན་
[378b.4]ནམ་ཞེ་ན། དེ་ནི་མ་ཡིན་ཏེ་སྨྲ་བ་ནི་རྣམ་པར་རྟོག་པའི་སྤྱོད་ཡུལ་ཅན་ཏེ། ཕྱི་རོལ་སྟོན་པ་ནི་མ་ཡིན་ནོ། །དེས་ན་དངོས་པོ་གང་ཞིག་ཇི་ལྟར་ཤེས་པ་དེ་དེ་བཞིན་དུ་སྟོན་པ་ནི་བརྫུན་མ་ཡིན་ཏེ། ཕྱིན་ཅི་ལོག་གི་ཚིག་ནི་བརྫུན་ཡིན་ནོ། །དེ་བཞིན་དུ་རིག་པ་དང་འགལ་བ་གཞན་ནི་མ་རིག་པ་སྟེ། དེ་ཉིད་
[378b.5]ཉོན་མོངས་པའི་རྒྱུ་ཡིན་པའི་ཕྱིར་རོ། །མི་སྣང་བར་འགྱུར་བའི་སྟོང་པ་ཉིད་ཇི་ལྟར་གང་ཞིག་གི་རྒྱུར་འགྱུར། མ་རིག་པ་གཏན་མེད་པ་མ་ཡིན་ཞིང་། ཡོད་པ་ཡང་མ་ཡིན་ཏེ། འོན་ཀྱང་ལོག་པ་དང་སྒྱུ་མར་སྣང་བ་སྟེ་ཉོན་མོངས་པ་ཡང་ལོག་པ་དང་སྒྱུ་མར་སྣང་བ་ཉིད་ཡིན་ནམ། དེས་ན་སྐྱོན་འདི་
[378b.6]མེད་དོ་ཞེ་ན། འདིར་སྨྲས་པ། མ་རིག་པ་ཡོད་པ་མ་ཡིན། །ཞེས་བྱ་བ་ཅི་གསལ་བ་མེད་པ་ལ་བརྗོད་དམ། ཕྱིན་ཅི་ལོག་ཏུ་དམིགས་པ་ཡིན་དེ་ལ་གལ་ཏེ་ཕྱོགས་དང་པོ་ཡིན་ན་དེའི་ཚེ་སུ་ལ་ཡང་རྟོགས་པ་མེད་པའི་ཕྱིར། འགྲོ་བ་ལོང་བ་ཉིད་དུ་འགྱུར་རོ། །འོན་ཏེ་ཕྱོགས་གཉིས་པ་ལེན་ན། དེ་ལྟ་ན་
[378b.7]ཡང་ཕྱིན་ཅི་ལོག་ཏུ་དམིགས་པའི་མི་ཤེས་པ་ཡིན་པའི་ཕྱིར། ཇི་ལྟར་མ་རིག་པ་དངོས་པོ་མེད་པར་འགྱུར། རིག་པ་ཡོད་པར་མྱོང་བ་མ་ཡིན་ནམ། དེ་ལྟ་མ་ཡིན་ན། དེ་གཏན་མེད་ན་ནི་དབུ་མའི་ལྟ་བ་ཁས་བླངས་པར་འགྱུར་རོ། །འོན་ཏེ་མ་རིག་པ་ལས་སྣང་བ་གང་ཡིན་པའི་གཟུང་བ་
[379a]
[379a.1]དེ་ནི་བརྫུན་པའི་ཕྱིར་དེ་མེད་པའོ་ཞེ་ན། འོ་ན་གཟུང་བའི་རྣམ་པར་སྣང་བ་ཇི་ལྟར་མེད་པ་ཡིན། དེ་ལྟར་ན་འོ་ན་ནི་ལོག་པའི་ཤེས་པ་སྣང་བ་གང་ཡིན་པའི་གཟུང་བ་དེ་ཡོད་ན་ཇི་ལྟར་མ་རིག་པར་འགྱུར་ཞེ་ན། རྟག་པ་ལ་སོགས་པར་རྟོགས་པ་ཤེས་པ་ལས་ལོག་པ་གཟུང་བར་སྣང་བ་མ་
[379a.2]ཡིན་ཏེ། འོན་ཀྱང་གང་སྣང་བ་དེ་ཐམས་ཅད་དང་རིག་པའོ། །དེ་ལ་འཁྲུལ་པ་ནི་མ་ཡིན་ཏེ། ཚངས་པ་ཡང་འཁྲུལ་པ་ཉིད་དུ་ཐལ་བར་འགྱུར་བའི་ཕྱིར་རོ། །དེ་བས་ན་མ་རིག་པ་ཤེས་པའི་ངོ་བོ་ཉིད་དེ། ཉོན་མོངས་པའི་རྒྱུ་ཡིན་པའི་ཕྱིར་དེ་སྐད་ཅེས་ཐ་སྙད་བཏགས་སོ། །ཇི་ལྟར་ཡང་རིག་པ་འཁྲུལ་
[379a.3]པར་ཐ་སྙད་འདོགས་པ་ལ་ལྟོས་ནས་ཡིན་གྱི། རང་གི་ངོ་བོ་ཉིད་ཀྱིས་ནི་མ་ཡིན་ནོ་ཞེས་བསྟན་ཏོ། །སེམས་ལས་བྱུང་བ་ཉིད་ཀྱི་ཡང་ཕྱིར་དམིགས་པ་སྟེ། མ་རིག་པ་ནི་ལོག་པར་དམིགས་པ་དག་ཡིན་ནོ། །རྟེན་དང་དམིགས་པ་དང་། རྣམ་པ་དང་། རྫས་དང་། དུས་རྣམས་མཚུངས་པས་
[379a.4]མཚུངས་པར་ལྡན་པའི་ཕྱིར་མཚུངས་པར་ལྡན་པའོ་ཞེས་གསུངས་པའི་ཕྱིར་དང་། ཤེས་རབ་ཀྱི་རྣམ་པ་ལས་ཕྱིན་ཅི་ལོག་ཏུ་བ་རྟོགས་པའི་ངོ་བོ་ཉིད་ནི་མ་རིག་པའོ། །ཞེས་མདོ་ལས་གསུངས་པའི་ཕྱིར་དང་། དེ་ལ་མི་ཤེས་པ་དང་བྲལ་བ་གང་ཞེ་ན། ཇི་ལྟར་གྱུར་པའི་ཆོས་རྣམས་ལ་སྒྲོ་
[379a.5]འདོགས་པ་དང་བྲལ་བ་གང་ཡིན་པའོ། །དེ་བཞིན་དུ་གང་སུ་དག་འཇིག་རྟེན་པས་ཉེ་བར་བཏགས་པའི་རིག་པ་དེ་དག་ཐམས་ཅད་བདག་ཏུ་མངོན་པར་ཞེན་པ་ལས་འགྱུར་ཏེ། བདག་ཏུ་མངོན་པར་ཞེན་པ་དང་བྲལ་བ་ནི་མ་ཡིན་ནོ་ཞེས་ཀྱང་གསུངས་པའི་ཕྱིར་ལོག་པར་དམིགས་པ་ནི་མི་ཤེས་པའོ། །
[379a.6]འཇིག་ཚོགས་ལ་ལྟ་བ་མ་རིག་པའི་ཕྱོགས་གཅིག་མ་ཡིན་ནམ། མ་རིག་པ་ཡང་ཉོན་མོངས་པ་ཐམས་ཅད་ཀྱི་རྗེས་སུ་འགྲོ་བ་མི་གསལ་བའི་ངོ་བོ་ཉིད་ཅན་ཡིན་ན། དེ་ཇི་ལྟར་འཇིག་ཚོགས་ལ་ལྟ་བར་བརྗོད་དེ། ཁྱད་པར་གྱི་སྒྲའི་ཡུལ་སྤྱི་མ་ཡིན་པའི་ཕྱིར་རོ། །དེ་བཞིན་དུ་གལ་ཏེ་མ་རིག་པ་ལྟ་
[379a.7]བ་ཉིད་ཡིན་ན། དེའི་ཚེ་མ་རིག་པ་ནི་ལྟ་བ་དང་མཚུངས་པ་དང་ལྡན་པའོ་ཞེས་བྱ་བ་མཚུངས་པར་ལྡན་པའི་དོན་དུ་མི་འགྱུར་ཏེ། ལྡན་པ་ནི་ཐ་དད་པའི་རྒྱུ་ཡིན་པའི་ཕྱིར་རོ་ཞེ་ན། འདིར་སྨྲས་པ་ནི། འགལ་བ་གང་ཡིན་འདིར་བཤད་བྱ། །སྟོང་ཉིད་མཐོང་དང་དེ་འགལ་ཕྱིར། །དེ་ཡི་བདག་ཉིད་སྐྱོན་
[379b]
[379b.1]ཀུན་དང་། །འགལ་བར་རབ་ཏུ་གྲུབ་པ་ཡིན། །ཞེས་བྱ་བ་ཡིན་ཏེ། མཚུངས་པར་ལྡན་པ་ཉིད་ནི་སྤྱི་དང་ཁྱད་པར་ཐ་དད་པར་བརྟགས་པ་མ་ཡིན་ཏེ། དཔེར་ན་ནགས་པ་ལ་ཤ་དང་ལྡན་པ་བཞིན་ཏེ། དངོས་སུ་ན་བ་ལ་ཤའི་ངོ་བོ་ཉིད་ཁོ་ནར་བརྗོད་དོ། །དེ་བཞིན་དུ་ཁྱད་པར་གྱི་སྒྲས་ཀྱང་དེའི་ངོ་བོ་ཉིད་མ་རིག་པ་གླེང་
[379b.2]གཞིར་གྱུར་པའི་གཙོ་བོར་བསྟན་པའི་ཕྱིར། ལྟ་བ་དང་ལྡན་པའི་མ་རིག་པའི་ཞེས་བྱ་བ་ལ་འགལ་བ་མེད་དོ། །གང་གི་ཕྱིར་བདག་ཏུ་ལྟ་བ་མ་རིག་པ་ཡིན་པས། ཉོན་མོངས་པ་ཐམས་ཅད་དེའི་རྩ་བ་ཅན་ཏེ། དེས་ན་བདག་མེད་པ་མཐོང་བ་དེ་དང་། བདག་ཏུ་འཛིན་པ་འགལ་བའི་ཕྱིར། དེའི་
[379b.3]བདག་ཉིད་དེ། བདག་ཏུ་འཛིན་པའི་རྒྱུ་ཅན་ཉོན་མོངས་པ་དང་། སྟོང་པ་ཉིད་མཐོང་བ་འགལ་བ་གྲུབ་པ་ཡིན་ནོ། །དེ་བས་ན་གཏི་མུག་འགགས་ན་འཁོར་བ་མ་ལུས་པ་འགག་པའི་ཕྱིར། ངེས་པར་འབྱུང་བའི་རྣམ་པ་ཉིད་དུ་བརྗོད་དོ། །འདོད་ཆགས་ལ་སོགས་པ་རྣམས་སྲོག་ཆགས་ཀྱི་ཆོས་ཡིན་
[379b.4]པའི་ཕྱིར་ཟད་པར་མི་རིགས་ཏེ། གཟུགས་ལ་སོགས་པ་བཞིན་མ་ཡིན་ནམ་ཞེ་ན་སྨྲས་པ། ཟད་མིན་སྲོག་ཆགས་ཆོས་ཉིད་ཕྱིར། །གཟུགས་སོགས་བཞིན་ནོ་མ་གྲུབ་ཕྱིར། །གཉེན་པོའི་ཕྱོགས་དང་འབྲེལ་ཡོད་ན། །སྤོང་བ་དག་ཀྱང་མཐོང་ཕྱིར་རོ། །ཞེས་བྱ་བ་ལ། གཟུགས་ལ་
[379b.5]སོགས་པ་བཞིན་དུ་འདོད་ཆགས་ལ་སོགས་པ་རྣམས་སྲོག་ཆགས་ཀྱི་ངོ་བོ་ཉིད་ཀྱི་ཆོས་ཡིན་པའི་ཕྱིར་ཟད་པར་མི་འགྱུར་བ་གང་ཡིན་པ་དེ་ནི་མ་ཡིན་ཏེ། སྲོག་ཆགས་ཀྱི་ཆོས་སུ་དེ་ཉིད་མ་གྲུབ་པའི་ཕྱིར་རོ། །སྲོག་ཆགས་འབའ་ཞིག་ཀྱང་ཡོད་པ་མ་ཡིན་ཏེ། འོན་ཀྱང་སྐད་ཅིག་མ་བརྒྱུད་
[379b.6]པའོ་ཞེས་བསྟན་ཏོ། །གཞན་ཡང་འདོད་ཆགས་ལ་སོགས་པའི་གཉེན་པོ་མི་སྡུག་པ་བསྒོམ་པ་ལ་སོགས་པ་དང་འབྲེལ་པ་ཡོད་ན། འདོད་ཆགས་ལ་སོགས་པ་སྤོང་བ་མཐོང་བ་ཡོད་དེ། དེའི་ཕྱིར་མི་ཟད་པ་མ་ཡིན་ནོ། །དེ་དག་གིས་ནི་འགོག་པའི་བཤད་པ་བསྡུས་ནས་བསྟན་ཏོ། །འོ་ན་གསེར་
[379b.7]ཞུ་བར་གྱུར་པ་ཡང་བརྟས་ན་སྲ་བར་གྱུར་པ་དེ་བཞིན་དུ་བདག་མེད་པར་མཐོང་བ་སྐྱེས་ཀྱང་སླར་འདོད་ཆགས་ལ་སོགས་པ་འབྱུང་བར་འགྱུར་རོ་ཞེ་ན། སྨྲས་པ། སྲ་བ་བཞིན་དུའང་སྐྱེ་མིན་ཏེ། །ཉེས་པ་དག་ནི་འགལ་ཅན་གྱི། །དེ་ཡི་བདག་ཉིད་ལྡོག་མེད་དང་། །མ་ངེས་ཕྱིར་ན་ཐལ་བ་བཞིན། །
[380a]
[380a.1]ཞེས་བྱ་བ་ལ་ལམ་མངོན་དུ་བྱེད་པ་དང་འགལ་བ་ཅན་གྱི་ཉེས་པ་རྣམས་གསེར་གྱི་སྲ་བ་བཞིན་དུ་སླར་སྐྱེ་བ་མ་ཡིན་ཏེ། བདག་མེད་པ་མཐོང་བའི་ལས་ལ་གོམས་པ་མི་འཇིགས་པའི་ཕྱིར་རོ། །གཉེན་པོ་ཡོད་པར་གྱུར་ན་ཉེས་པ་འབྱུང་བ་མ་ཡིན་ནོ་ཞེས་བསྟན་ཏོ། །འདི་ཐལ་བ་
[380a.2]ཡིས་ཀྱང་མ་ངེས་པ་ཡིན་ཏེ། འདི་ལྟར་མེའི་སྟོབས་ཀྱིས་ཐལ་བར་གྱུར་པ་སླར་ཤིན་ཏུ་ལྡོག་པ་ནི་མ་ཡིན་ནོ། །དེ་བཞིན་དུ་ལམ་གྱི་ཉོན་མོངས་པ་ལོག་པ་ནི་སླར་ཉེ་བར་སྐྱེ་བ་མ་ཡིན་ནོ། །དེ་དག་གིས་ནི་ལམ་བཤད་པ་བསྡུས་ཏེ་བསྟན་ཏོ། །བདག་བསྒོམས་པས་ཀྱང་ཐར་པར་འགྱུར་བ་མ་
[380a.3]ཡིན་ནམ། བདག་མེད་པ་མཐོང་བ་དེ་ཡིས་ཅི་ཞིག་བྱ། དེ་ལྟར་ལུང་ལས་ཀྱང་བདག་ཏུ་བསམ་པར་བྱའོ་ཞེས་འབྱུང་ངོ་། །དེ་བས་ན་ལམ་ནི་ངེས་པར་འབྱིན་པ་མ་ཡིན་ནོ་ཞེ་ན། འདིར་སྨྲས་པ། གང་ཞིག་ང་ཞེས་བདག་ལྟ་བ། །དེ་ལ་རྟག་པ་ཉིད་དུ་ཆགས། །ཆགས་པས་དེ་ལ་སྲེད་འགྱུར་
[380a.4]ཞིང་། །སྲེད་པ་སྐྱོན་རྣམས་སེལ་བར་བྱེད། །ཅེས་བྱ་བ་ལ། བདག་ཏུ་ལྟ་བ་ཅན་ནི་གདོན་མི་ཟ་བར་བདག་རྟག་པར་ཆགས་པས་བཅིང་བར་འགྱུར་ཏོ། ཆགས་པས་བདེ་བ་ལ་སྲེད་པ་དང་ལྡན་པར་འགྱུར་རོ། །གང་གིས་གང་ལ་ཆགས་པ་དེ་ནི་བདེ་བ་ལ་འདོད་པ་དང་ལྡན་པར་འགྱུར་རོ། །བདག་
[380a.5]ཏུ་ལྟ་བ་ཅན་ཡིན་ཡང་ཆགས་པ་ཡོད་དོ་ཞེས་ཟེར་བ་དེ་ནི་རིགས་པ་མ་ཡིན་ནམ། ཤིང་མཐོང་ཡང་ཤིང་ལ་ཆགས་པ་མེད་པ་དང་། བུད་མེད་མཐོང་བ་ཙམ་གྱིས་ཀྱང་དེ་ལ་ཆགས་པར་མི་འགྱུར་བའི་ཕྱིར་རོ། །གང་གིས་བདག་མཐོང་བ་དེ་ལ་ཆགས་པ་ཡོད་དོ་ཞེས་ཟེར་བ་དེ་ནི་རིགས་པ་མ་
[380a.6]ཡིན་ནོ་ཞེ་ན། འོ་ན་གལ་ཏེ་བདག་ཏུ་ལྟ་བ་ལ་ཆགས་པ་མེད་པ་ན་གང་ལ་ཡང་ཆགས་པ་ཉིད་མེད་པར་འགྱུར་ཏེ། རྒྱུ་གཞན་མེད་པའི་ཕྱིར་རོ། །ཤིང་ལ་ཡང་བདག་ལ་ཕན་འདོགས་པར་མ་མཐོང་བའི་ཕྱིར་ཆགས་པར་མི་འགྱུར་རོ། །གང་ལ་བདག་ལ་ཕན་འདོགས་པ་ཅན་དུ་
[380a.7]ཆགས་པ་དེ་ཇི་ལྟར་བདག་ལ་ཆགས་པ་མེད་པར་འགྱུར་ན། འོན་ཏེ་ཆགས་པའི་ཁྱད་པར་ལས་བདག་ལ་ཆགས་པ་མེད་ལ་གཞན་ལ་ཆགས་པ་ཡོན་ཏན་ཆེ་བ་ལས་སྙིང་རྗེས་ཆགས་སོ་ཞེ་ན། གང་གཞན་ལ་ཆགས་པ་ཡོད་པ་དེ་ལ་བདག་ལ་ཡང་ཆགས་པར་ཅི་སྟེ་མི་
[380b]
[380b.1]འགྱུར། འདི་ལྟར་བདག་ལ་ཆགས་པར་སྣང་བ་ཉིད་མ་ཡིན་ནམ། བདག་ལ་ཆགས་པ་མེད་ན་གཞན་ལ་ཆགས་པར་མི་འཐད་དོ། །གཞན་ཡང་ཡོན་ཏན་ཅན་ཞེས་བྱ་བ་ལ། གལ་ཏེ་གཞན་དག་ལ་ཕན་འདོགས་པ་ཡིན་ན་དེའི་ཚེ་རྟོག་པ་སྔོན་དུ་མ་བཏང་བ་སྟེ། བདག་ཡོངས་སུ་བཏང་ནས་གཞན་ལ་
[380b.2]ཕན་པར་བྱེད་པ་ནི་ཤིན་ཏུ་དགོས་པ་མེད་པར་སྟོན་པའོ། །གཞན་དོན་བྱེད་པ་ཉིད་བདེ་བ་མ་ཡིན་ནམ། ཐར་པར་བདག་གི་དོན་དུ་འབད་རྩོལ་བྱེད་པ་ནི་མ་ཡིན་ནོ་ཞེ་ན། དེ་ལྟ་ན་ནི་བདག་གི་བདེ་བར་འཁྲུལ་པས་འཁྲུལ་པ་དག་གཞན་གྱི་བདེ་བས་ཇི་ལྟར་གྲོལ་བར་འགྱུར། ཇི་ལྟར་ཡང་འཁྲུལ་པས་
[380b.3]གཞན་གྱི་བདེ་བ་སྐྱེད་པ་དེ་བཞིན་དུ། བུད་མེད་ལ་འཁྱུད་པར་བྱེད་པར་ཡང་འགྱུར་ཏེ། ཁྲེལ་དང་བྲལ་བའི་སྤྱོད་པ་ཡིན་ནོ། །ཆགས་པའི་དགའ་བ་འདོད་པ་དག་རང་ལ་ཕན་པ་དོན་དུ་གཉེར་བའི་ཕྱིར་ཁྲེལ་ཡོད་པ་མ་ཡིན་ནོ། །ཇི་ལྟར་བདག་ལ་བསམ་གཏན་བྱེད་པའི་བདེ་བ་འདོད་པ་དེ་བཞིན་དུ། ཆགས་
[380b.4]པའི་བདེ་བ་ཡང་ཡིན་ཏེ། བདེ་བ་དེ་གཉིས་ལ་ཅུང་ཟད་ཀྱང་ཁྱད་པར་མེད་པའི་ཕྱིར་རོ། །ཆགས་པའི་བདེ་བ་མི་བདེན་པས་ཁྱད་པར་ཡོད་དོ་ཞེ་ན་མི་བདེན་པ་མ་ཡིན་ཏེ། བདེ་བ་ཐམས་ཅད་ལ་ཁྱད་པར་མེད་པའི་ཕྱིར་རོ། །ཆགས་པའི་བདེ་བས་དམྱལ་བར་འདྲེན་པས་མི་བྱ་བའི་ཆ་མ་ཡིན་ནམ་ཞེ་ན།
[380b.5]ཡོན་ཏན་ཆེན་པོ་དང་ལྡན་པས་གཞན་གྱི་དོན་དུ་དམྱལ་བར་འགྲོ་བར་ཁས་ལེན་པའི་ཕྱིར་མ་ཡིན་ནོ། །དེ་བས་ན་བདག་ཡོད་ན་སྲེད་པ་སྐྱོན་དང་། སྐྱོན་མེད་པ་མཉམ་པར་བྱེད་པ་ཡིན་ཏེ། དེའི་ཕྱིར་དེའི་སྐྱོན་བསལ་ནས། ཡོན་ཏན་མཐོང་བ་ཡོངས་སུ་སྲེད། །ངའི་སྙམ་དེ་ཡི་སྒྲུབ་བྱེད་ལེན། །དེས་ན་ཇི་
[380b.6]ལྟར་བདག་མངོན་ཆགས། །དེ་སྲིད་དེ་ནི་འཁོར་བ་ཡིན། །ཞེས་བྱ་བ་ལ། བདག་དོན་དམ་པར་ཡོད་པ་ན། གང་ཞིག་བདག་ལ་ཕན་འདོགས་པ་དེ་ཡང་དངོས་པོ་ཉིད་ཡིན་པའི་ཕྱིར་དོན་དམ་པར་ཕན་འདོགས་པ་གང་ཡིན་པ་དེ་ཉིད་ཡོན་ཏན་ཅན་དུ་རྟོགས་པར་བྱའོ། །དེ་བས་ན་ཡོན་ཏན་མཐོང་བ་ནི་འདི་ངའི་
[380b.7]སྙམ་ནས་བདེ་བའི་སྒྲུབ་ཐབས་ཉེ་བར་ལེན་ཏོ། །དེས་ན་བདག་ཏུ་མངོན་པར་ཞེན་པས་འཁོར་བ་ཡིན་པའི་ཕྱིར་བདེ་བའི་སྒྲུབ་ཐབས་སུ་ཕག་མོ་དང་སྦྱོར་བ་ཡང་འགྱུར་རོ། །དེ་བས་ན། བདག་ཡོད་ན་ནི་གཞན་འདུ་ཤེས། །བདག་གཞན་ཆ་ལ་འཛིན་ཅིང་སྡང་། །འདི་དག་དང་ནི་ཡོངས་འབྲེལ་པས། །
[381a]
[381a.1]ཉེས་པ་ཐམས་ཅད་འབྱུང་བར་འགྱུར། །ཞེས་བྱ་བ་ལ། བདག་ཏུ་འཛིན་པ་ཡོད་ན་ནི་གཞན་གྱི་བློ་སྐྱེ་སྟེ། བདག་དང་གཞན་གྱི་ཆ་ལ་ཆགས་པ་དང་སྡང་བ་རྟོགས་པའི་ཕྱིར་རོ། །ཆགས་པ་དང་སྡང་བ་དག་དང་འབྲེལ་པའི་སེར་སྣ་ལ་སོགས་པའི་ཉེས་པ་ཐམས་ཅད་འབྱུང་བར་འགྱུར་རོ་
[381a.2]ཞེས་བྱ་བ་ལ། བདག་ལ་ཆགས་པར་འགྱུར་གྱི། བདག་གིར་མི་ཆགས་པ་མ་ཡིན་ནམ། དེས་ན་བདག་གི་བ་ལ་ཆགས་པ་མེད་པའི་ཕྱིར་ཆགས་པའི་བདེ་བའི་ཐ་སྙད་མེད་པར་འགྱུར་རོ་ཞེ་ན། འདིར་སྨྲས་པ། བདག་ལ་ཆགས་པར་གྱུར་ན་ནི། །ངེས་པར་དེ་ལ་ཆགས་བྲལ་མིན། །སྐྱོན་མེད་བདག་ལ་ཆགས་པ་དང་། །བྲལ་བའི་རྒྱུ་ནི་ཡོད་མ་
[381a.3]ཡིན། །ཞེས་བྱ་བ་ལ། བདག་ལ་ཆགས་པ་ཞུགས་པར་གྱུར་ན་སྐྱོན་མཐོང་བ་ལྡོག་པ་མ་ཡིན་ཏེ། བདག་ལ་ཆགས་པ་དེ་ཡང་བདག་གི་བའི་ཆགས་པར་འགྱུར་རོ། །བདག་ལ་སྐྱོན་མེད་པར་འགྱུར་ན་ཆགས་པ་དང་བྲལ་བའི་རྒྱུ་ནི་ཡོད་པ་མ་ཡིན་ནོ། །དེ་བས་ན་བདག་དང་བདག་གི་བ་ལ་ཆགས་པ་དང་ལྡན་པ་
[381a.4]ནི་སྐྱོན་ཐམས་ཅད་བསལ་ནས་ཐམས་ཅད་དུ་འཇུག་པའི་ཕྱིར་འཁོར་བ་ལས་ལྡོག་པ་ནི་མ་ཡིན་ནོ། །ཆགས་པ་སྐྱོན་དང་བཅས་ཤེ་ན། །དེ་ལས་ཅི་འགྱུར་དེ་སྤངས་ན། །ཞེས་བྱ་བ་ལ། དེ་ལྟར་ནི་འགྱུར་མོད་ཀྱི། བདག་དང་བདག་གིར་ཆགས་པ་ནི་འཁོར་བའི་རྒྱུ་ཡིན་པའི་ཕྱིར་དང་། བདག་གི་བ་ལ་
[381a.5]ཆགས་པ་དང་ལྡན་པ་ནི་སྐྱོན་ཅན་ཡིན་པའི་ཕྱིར། དེ་ལ་ཆགས་པ་མ་ཡིན་ནོ། །གཞན་གྱི་ཉེས་པས་ཀྱང་ཆགས་པ་སྐྱོན་ཅན་དུ་བྱེད་ན་ཆགས་པ་རང་ཉིད་གང་དུ་སྐྱོན་ཅན་ཡིན་པ་དེའི་ཚེ་ཅིའི་ཕྱིར་ཆགས་པར་བྱེད། དེའི་ཕྱིར་ཆགས་པ་སྐྱོན་དང་ལྷན་ཅིག་འཇུག་པས་ཆགས་པར་མི་བྱེད་དོ་ཞེ་ན། གལ་ཏེ་ཆགས་པ་
[381a.6]སྐྱོན་ཅན་དེ་ལས་ཅིར་འགྱུར། དེ་སྐྱོན་ཅན་ཡིན་པའི་ཕྱིར་སྤང་བར་རིགས་སོ་ཞེ་ན་མ་ཡིན་ཏེ། གཞན་གྱི་སྐྱོན་གྱིས་ཆགས་པ་སྐྱོན་ཅན་ཡིན་ན་ཡུལ་གྱི་སྐྱོན་གྱིས་ཆགས་པ་སྤང་བར་རིགས་པའི་ཕྱིར་རོ། །འདི་ཡི་ཡུལ་སུན་མ་ཕྱུང་བར། །དེ་སྤོང་ནུས་པ་མ་ཡིན་ནོ། །ཞེས་བྱ་བ་ལ། ཡུལ་སུན་མ་ཕྱུང་བ་
[381a.7]ནི་བདག་ལ་ཆགས་པ་སྐྱོན་ཅན་ཡིན་པ་མ་ཡིན་ཏེ། བདེ་བའི་རྒྱུ་ལས་ཡོན་ཏན་ཡོད་པའི་ཕྱིར་རོ། །འོན་ཏེ་ཆགས་པ་ཉིད་སྐྱོན་ཅན་ཡིན་ནོ་ཞེ་ན། ཡིན་མོད་དེ་ཅི་ཉེས། སྐྱོན་ཅན་ཡིན་པའི་ཕྱིར་ཆགས་པ་སྤང་བར་བྱ་བ་ཡིན་ནོ་ཞེ་ན། མ་ཡིན་ཏེ་ཡུལ་གྱི་སྐྱོན་མ་གཏོགས་པར་ཆགས་པ་སྤང་བར་མི་ནུས་
[381b]
[381b.1]པའི་ཕྱིར་རོ། །འོན་ཏེ་ཕྱི་རོལ་གྱི་དངོས་པོ་ཡོན་ཏན་དང་ལྡན་པ་ཡིན་ཡང་སྤང་བར་བྱ་བ་དེ་བཞིན་དུ། ཆགས་པ་ཡོན་ཏན་དང་ལྡན་པ་ཡང་སྤང་བར་བྱ་བ་ཡིན་ནོ་ཞེ་ན། འདིར་སྨྲས་པ། ཡོན་ཏན་སྐྱོན་དང་རྗེས་འབྲེལ་པའི། །འདོད་སྡང་ལ་སོགས་སྤང་བ་ནི། །དེ་དག་ཡུལ་ལ་མཐོང་མིན་པ། །གོ་རིམས་གང་
[381b.2]ཡིན་ཕྱི་ལ་མེད། །ཅེས་བྱ་བ་ལ། འདོད་པ་དང་སྡང་བ་ལ་སོགས་པའི་ཡོན་ཏན་དང་སྐྱོན་མཐོང་བ་ལས་ཡོད་པ་ནི་དེ་མེད་པར་འགྱུར་བར་རིགས་སོ། །བདག་ལ་ཕན་པར་བསྒྲུབ་པ་ཉིད་ཀྱི་ཡོན་ཏན་དང་། སྡུག་བསྔལ་བསྒྲུབ་པ་ཉིད་ཀྱི་སྐྱོན་དེ་ཡང་བདག་ཡོད་ན་ཡོད་པར་འགྱུར་རོ། །དེ་བས་ན་འདོད་པ་དང་།
[381b.3]སྡང་བ་ལ་སོགས་པ་སྤོང་བ་ནི་ཡོད་པ་མ་ཡིན་ནོ། །ཕྱི་རོལ་གྱི་དངོས་པོ་རང་གི་རྒྱུ་ལ་རག་ལས་པ་ནི་དེ་མེད་ན་སྤོང་བ་ཡིན་ཏེ། དེའི་ཕྱིར་གལ་ཏེ་སྐྱོན་དང་ཡོན་ཏན་དེ་དག་རང་གི་ཡུལ་ལ་མཐོང་ན་ནི་འདོད་པ་དང་སྡང་བ་ལ་སོགས་པ་སྐྱོན་དང་ཡོན་ཏན་གྱིས་བསྐྱེད་པ་འདི་སྤོང་བ་ཡིན་ཏེ། སྐྱོན་དང་སྐྱོན་མཐོང་བ་ནི་
[381b.4]སྤོང་བའི་རྒྱུ་ཡིན་པའི་ཕྱིར་རོ། །ཕྱི་རོལ་གྱི་དངོས་པོ་ལ་འཇུག་པའི་གོ་རིམས་གང་ཡིན་པ་དེ་ནི་ཆགས་པ་ལ་སོགས་པ་འདི་ལ་ཡང་བལྟ་བར་བྱའོ།། །།ཚད་མ་རྣམ་འགྲེལ་གྱི་འགྲེལ་པ་ལས། །བམ་པོ་བཅུ་གཅིག་པ། ཆགས་པའི་ཡུལ་ལ་སྐྱོན་མེད་ཀྱང་ཆགས་པ་ལ་ཡོན་ཏན་
[381b.5]མ་མཐོང་བའི་ཕྱིར་ཆགས་པ་སྤོང་བར་བྱེད་པ་མ་ཡིན་ནམ། ཡོན་ཏན་མེད་པ་གང་ལ་ཡང་འབད་རྩོལ་བྱེད་པ་མ་ཡིན་ནོ་ཞེ་ན། དེ་ནི་མི་བདེན་ཏེ། ཆགས་ཡོན་ཏན་ལས་ཆགས་པ་མིན། །འོན་ཀྱང་དོན་ཡོན་ཏན་མཐོང་ལས། །ཡིན་ཏེ་རྒྱུ་ཚང་དེ་ལ་ནི། །དེ་ཡི་འབྲས་བུ་གང་གིས་བཟློག །ཅེས་བྱ་བ་ལ།
[381b.6]ཆགས་པའི་ཡོན་ཏན་མཐོང་བ་ལས་ཆགས་པ་མ་ཡིན་ཏེ། འོན་ཀྱང་བདེ་བའི་སྒྲུབ་ཐབས་མཐོང་བ་ལས་ཆགས་པ་སྐྱེ་བའམ། ཆགས་པའི་རྒྱུ་བདེ་བའི་སྒྲུབ་ཐབས་ཚང་བ་དང་། དེ་ལ་བདག་ཡོད་པར་གྱུར་ན་འབྲས་བུ་ཆགས་པ་གང་གིས་ཟློག་པར་བྱེད། དེ་བས་ན་བདག་ཡོད་ན་འཁོར་བ་ཆད་
[381b.7]པར་འགྱུར་བ་མ་ཡིན་ནོ། །གཞན་ཡང་། ཆགས་ལས་སྐྱོན་དང་བཅས་མཐོང་གང་། །རྟག་ཏུ་སྡུག་བསྔལ་རྟེན་ཡིན་ཏེ། དེ་ལྟར་ཡང་འདི་ཆགས་བྲལ་མིན། །རང་གིར་མཐོང་ཕྱིར་དཔེར་བདག་བཞིན། །ཞེས་བྱ་བ་ལ། རང་གི་སྐྱོན་མཐོང་ནས་ཆགས་པ་སྤོང་བར་འགྱུར་བའི་ཆགས་པ་ལ་
[382a]
[382a.1]སྐྱོན་དང་བཅས་པར་མཐོང་བ་གང་ཞིག་ཡིན། འོན་ཏེ་སྡུག་བསྔལ་གྱི་རྟེན་ཆགས་པ་མ་ཡིན་པའི་ཕྱིར་སྤོང་ངོ་ཞེ་ན། སྡུག་བསྔལ་རྟེན་ཡིན་པ་དེ་ལྟ་ན་ཡང་འདིར་ཆགས་པ་སྤོང་བར་མི་རིགས་ཏེ། བདག་གི་བའི་བློ་ཡོད་པའི་ཕྱིར། དཔེར་ན་བདག་མི་སྤོང་བ་བཞིན་ནོ། །དང་པོ་སྡུག་
[382a.2]བསྔལ་གྱི་རྟེན་བདག་ཡིན་པའི་ཕྱིར་དེ་ཡོད་ན་ཕྱིས་ཆགས་པ་སྡུག་བསྔལ་གྱི་རྒྱུ་ཡིན་ནོ། །བདག་གི་བའི་དོན་མེད་ན་གང་ཞིག་སྡུག་བསྔལ་བ་ཡིན། དེ་བས་ན་རྣམ་པ་གཉི་ག་ཡང་སྡུག་བསྔལ་གྱི་རྒྱུ་ཡིན་པའི་ཕྱིར་སྤང་བར་བྱ་ཞིང་ཆགས་པར་ཡང་མི་བྱའོ། །དེ་རྣམས་མེད་ན་བདག་སྡུག་བསྔལ། །རྒྱུ་མིན་དེ་ཡང་དེ་དང་
[382a.3]འདྲ། །དེ་ལྟར་གཉི་གའང་སྐྱོན་མེད་པ། །དེ་ཕྱིར་གཉི་ག་ཆགས་བྲལ་མིན། །ཞེས་བྱ་བ་ལ། འོན་ཏེ་བདག་སྡུག་བསྔལ་གྱི་རྒྱུ་གཞན་དང་སྦྱོར་བར་འགྱུར་གྱི། དེ་རང་ཉིད་ལ་སྐྱོན་འདི་ཡོད་པ་མ་ཡིན་ཏེ། ཆགས་པ་དང་། ཆོས་དང་། ཆོས་མ་ཡིན་པ་དང་། འདུ་བྱེད་པའི་གྲོགས་བྱེད་པ་ཅན་གྱི་བདག་
[382a.4]ནི་སྡུག་བསྔལ་གྱི་རྒྱུ་ཡིན། ཆོས་ལ་སོགས་པ་དེ་རྣམས་དང་བྲལ་ན་བདག་སྡུག་བསྔལ་གྱི་རྒྱུ་མ་ཡིན་ཏེ། དེ་བས་ན་སྤང་བར་བྱ་བ་མ་ཡིན་ནོ་ཞེ་ན། ཆགས་པ་ལ་སོགས་པ་དེ་ཡང་སྐྱེས་བུ་མེད་ན་སྡུག་བསྔལ་གྱི་རྒྱུ་མ་ཡིན་ཏེ། དེས་ན་དེ་དག་ཀྱང་བདག་གཞན་སྐྱོན་དང་བཅས་པ་སྟེ་དེ་ལྟར་གྱུར་ན་
[382a.5]ཆགས་པ་ལ་སོགས་པ་དང་བདག་གཉི་ག་སྐྱོན་མེད་པའི་ཕྱིར་དེ་དག་དང་བྲལ་བ་མི་སྲིད་དོ། །གལ་ཏེ་སྡུག་བསྔལ་བསྒོམས་པ་ཡིས། །སྦྲུལ་གྱིས་ཡན་ལག་གཟུང་བཞིན་འགྱུར། །བདག་གི་བློ་ནི་བཅོམ་པས་འདིར། །དོར་བ་ཡིན་གྱི་བཟློག་ལ་མིན། །དབང་པོ་ལ་སོགས་ལོངས་སྤྱོད་པའི། །རྟེན་
[382a.6]ཉིད་དུ་ནི་བཟུང་བ་ལས། །བདག་གི་བློ་ནི་གང་གིས་བཟློག །དེ་ལ་ཆགས་བྲལ་དེ་གང་ལས། །ཞེས་བྱ་བ་ལ། ཆགས་པའི་རྒྱུ་བདེ་བའི་རྒྱུ་ཉིད་མ་ཡིན་ནམ། སྡུག་བསྔལ་གྱི་རྒྱུ་ཡོད་པ་ལས་ཆགས་པ་དང་བྲལ་བར་འགྱུར་རོ། །གནོད་པར་བྱེད་པ་ལ་ཆགས་པ་མེད་པའི་ཕྱིར།
[382a.7]སྡུག་བསྔལ་བསྒོམས་པས་ཆགས་པ་ལ་སོགས་པ་འཇོམས་པ་ཡིན་ཏེ། དཔེར་ན་སྦྲུལ་གྱིས་ཟོས་པའི་ཡན་ལག་འདོར་བ་དེ་བཞིན་ནོ་ཞེ་ན། བདག་གི་བའི་བློའི་ཡུལ་ནི་སྡུག་བསྔལ་གྱི་རྒྱུ་ཡིན་ཡང་སྤོང་བ་འཇིག་རྟེན་ན་མ་མཐོང་ངོ་། །དེ་བས་ན་བདག་གི་བའི་བློ་དོར་བ་ཉིད་ཀྱིས་འདོད་པར་འགྱུར་
[382b]
[382b.1]གྱི། བདག་ཡོད་པ་ལ་ཆགས་པ་དང་བྲལ་བར་མི་འགྱུར་རོ། །འོན་ཏེ་བདག་གི་བློ་མེད་པ་ཉིད་ལས་མིག་ལ་སོགས་པ་སྤོང་བར་འགྱུར་བ་དེ་བས་ན་མིག་ལ་སོགས་པའི་དབང་པོ་དང་བྲལ་བར་འགྱུར་རོ་ཞེ་ན་མ་ཡིན་ཏེ། མིག་ལ་སོགས་པ་ལོངས་སྤྱོད་པའི་རྟེན་ཉིད་དུ་བཟུང་བ་ལ་བདག་གི་བའི་བློ་གང་གིས་
[382b.2]ཟློག་པར་བྱེད་དེ། འདི་ལྟར་ལྷ་ཐོབ་པར་གྱུར་ཅིག །ཀླུ་ཐོབ་པར་གྱུར་ཅིག་ཅེས་ཁྱད་པར་ཅན་གྱི་ལུས་སུ་སྨོན་པར་བྱེད་དོ། །སྨོན་པའི་བློ་དེ་ལུས་ལ་སོགས་པ་ལ་ཆགས་པ་དང་བྲལ་བར་ཅི་ཡིས་འགྱུར་ཏེ་མི་འགྱུར་རོ། །འདི་ལྟར། ལུས་ལ་སྐྲ་སོགས་བོག་པ་ལས། །བཙོག་བཅས་བློ་ནི་སྐྱེ་འགྱུར་ཞིང་། །
[382b.3]གཞན་ལ་ཆགས་དང་བཅས་འགྱུར་ལྟར། །ཐམས་ཅད་ཀྱིས་ནི་མངོན་སུམ་ཡིན། །ཞེས་བྱ་བ་ལ། གང་གི་ཚེ་སྐྲ་ལ་སོགས་ལ་ལོངས་སྤྱོད་པའི་ཡུལ་དུ་གྱུར་པ་དེའི་ཚེ་ཆགས་པ་དང་བཅས་པའི་ཡུལ་དུ་འགྱུར་ཞིང་བདག་གི་བའི་བློ་སྐྱེད་པར་བྱེད་དོ། །གང་གི་ཚེ་ཡང་ལུས་ལ་ལྷུང་བ་ན་ལོངས་སྤྱོད་པའི་
[382b.4]ཡུལ་དང་བྲལ་བ་དེའི་ཚེ་བཙོག་པ་དང་བཅས་པ་ཁོ་ནའི་བློ་སྐྱེ་བར་འགྱུར་རོ། །གཞན་ཡང་། རིག་པ་ཅན་ལ་སོགས་པ་རྣམས། །དེ་ལ་རང་བློ་འཕྲོད་འདུ་བ། །ལ་སོགས་འབྲེལ་པ་སྐྱེད་པ་ཡིན། །དེ་བཞིན་འབྲེལ་པ་དེ་ཉིད་ནི། །དེ་ལྟར་མཐོང་ཡང་བཅོམ་པ་མིན། །ཞེས་སྨྲས་ཏེ། བདེ་བ་ལ་སོགས་པ་དང་
[382b.5]འཕྲོད་པ་འདུ་བའི་འབྲེལ་པ་དང་། ལུས་དང་ལྡན་པ་དང་། ལུས་ལ་བརྟེན་པའི་གཟུགས་ལ་སོགས་པ་ལྡན་པར་འདུ་བ་དང་། རྣ་བའི་དབང་པོ་དང་ལྡན་པའི་བདག་ཡིན་ཏེ། འཕྲོད་པ་འདུ་བ་ལ་སོགས་པའི་འབྲེལ་པ་ལས་ལུས་ལ་སོགས་པ་དེ་ལ་བདག་གི་བའི་བློ་སྐྱེའོ། །འཕྲོད་པ་འདུ་བ་ལ་སོགས་
[382b.6]པའི་འབྲེལ་པ་དེ་ཡང་། དེ་ལྟར་སྐྱོན་མཐོང་བར་གྱུར་ཀྱང་དེ་བཞིན་དུ་གནས་པའི་ཕྱིར་བདག་གི་བར་འཇོམས་པ་ཡིན་པས་ཆགས་པ་ལས་འཁོར་བར་འགྱུར་རོ། །འོན་ཏེ་ལུས་ལ་སོགས་པ་ལ་ལྡན་པ་ལ་སོགས་པའི་འབྲེལ་པ་ཁས་མི་ལེན་ནོ་ཞེས། འདིར་ལན་སྨྲས་པ། འཕྲོད་པ་འདུ་སོགས་
[382b.7]མེད་པ་ཡང་། །ཐམས་ཅད་ལ་ནི་ཕན་འདོགས་ཡོད། །ཅེས་བྱ་བ་ལ། ཕན་འདོགས་པར་མཐོང་བ་ཐམས་ཅད་ལ་ཆགས་པར་འགྱུར་བ་དེ་བས་ན་བདག་ལུས་ལ་སོགས་པ་དང་འཕྲོད་པ་འདུ་བ་ལ་སོགས་པའི་འབྲེལ་པ་ཁས་མི་ལེན་མོད་ཀྱི། དེ་ལྟ་ན་ཡང་ལུས་ལ་སོགས་པ་ཐམས་ཅད་ལ་ཕན་འདོགས་
[383a]
[383a.1]པ་ཉིད་དུ་ཡོད་པའི་ཕྱིར་འདོད་ཆགས་དང་བྲལ་བ་ཉིད་དུ་མི་འགྱུར་རོ། །གལ་ཏེ་སྡུག་བསྔལ་རྟེན་ཡིན་ཕྱིར། །རང་བློར་མི་འགྱུར་སོར་མོ་བཞིན། །གཅིག་ཏུ་དེ་ནི་སྡུག་བསྔལ་མིན། །ཕལ་ཆེར་དུག་བཅས་ཟས་བཞིན་ནོ། །ཞེས་བྱ་བ་ལ། འོན་ཏེ་སྡུག་བསྔལ་ལ་ཕན་
[383a.2]འདོགས་པའི་ལུས་ལ་སོགས་པ་རྣམས་ནི་བདག་གི་བའི་བློར་མི་འགྱུར་ཏེ། དཔེར་ན་སྦྲུལ་གྱིས་ཟོས་པའི་སོར་མོ་སྡུག་བསྔལ་སྐྱེད་པར་བྱེད་པས་བདག་གི་བའི་བློ་མེད་པ་བཞིན་ནོ་ཞེ་ན། དེ་ནི་བདེན་པ་མ་ཡིན་ཏེ། དེའི་ལུས་ནི་གཅིག་ཏུ་སྡུག་བསྔལ་བར་མི་འགྱུར་ཏེ། ཇི་ལྟར་སྡུག་བསྔལ་བ་དེ་ལྟར་བདེ་
[383a.3]བར་ཡང་འགྱུར་ཏེ། ཟས་དུག་ཅན་བཞིན་ནོ། །དུག་དང་བཅས་པའི་ཁ་ཟས་ནི་སྡུག་བསྔལ་ཁོ་ན་མ་ཡིན་ཏེ། འགྲངས་པས་བདེ་བར་ཡང་བྱེད་པའི་ཕྱིར་རོ། །དེ་བཞིན་དུ་ཕག་ལ་སོགས་པའི་ལུས་སྡུག་བསྔལ་གྱི་ངོ་བོ་ཉིད་ཡིན་ཡང་རེས་འགའ་བདེ་བར་ཡང་འགྱུར་ཏེ། དེའི་ཕྱིར་ལུས་ལ་
[383a.4]སོགས་པ་སྤང་བར་བྱ་བའི་ཡུལ་ཅན་མ་ཡིན་ནོ། །འོན་ཏེ་ཕག་ལ་སོགས་པའི་ལུས་སྡུག་བསྔལ་དང་འདྲེས་པའི་ཕྱིར་སྡུག་བསྔལ་ཉིད་ཡིན་ནོ་ཞེ་ན། འོ་ན་ནི་བདེ་བ་དང་རེས་འགའ་ལྡན་པའི་ཕྱིར་བདེ་བ་ཉིད་དུ་ཡང་འགྱུར་རོ། །འོན་ཏེ་ཇི་ལྟར་དུག་དང་བཅས་པའི་ཁ་ཟས་རེས་འགའ་བདེ་བའི་རྒྱུར་
[383a.5]འགྱུར་ཡང་། ཕལ་ཆེར་སྡུག་བསྔལ་གྱི་རྒྱུ་ཡིན་པའི་ཕྱིར་སེལ་བ་དེ་བཞིན་དུ། ལུས་ལ་སོགས་པ་ཡང་བདེ་བའི་རྒྱུར་འགྱུར་ཡང་ཕལ་ཆེར་སྡུག་བསྔལ་སྐྱེད་པར་བྱེད་པའི་ཕྱིར་སེལ་ཏོ་ཞེ་ན། འདིར་སྨྲས་པ། ཁྱད་པར་ཅན་གྱི་བདེ་ཆགས་ལས། །དེ་འགལ་ན་ནི་ཆགས་པར་འགྱུར། །ཁྱད་པར་
[383a.6]བདེ་བ་ལ་སྲེད་པའི། །བདེ་བ་ཅུང་ཟད་ཡོངས་སུ་སྤངས། །བསམ་པ་མེད་པར་བདག་ཅག་ལས། །ཇི་ལྟར་རྙེད་པ་བཞིན་ལ་འཇུག །བུད་མེད་དག་ནི་མ་རྙེད་པ། །དུད་འགྲོ་ལ་འདོད་སྤྱོད་མཐོང་བཞིན། །ཞེས་བྱ་བ་ལ། གལ་ཏེ་སྡུག་བསྔལ་གྱིས་མ་དཀྲུགས་པ་གང་ཡིན་པའི་ཁྱད་པར་ཅན་གྱི་བདེ་
[383a.7]བ་རྙེད་པ་དེའི་ཚེ། བདེ་བ་ཁྱད་པར་ཅན་ཐོབ་པའི་ཕྱིར་བདེ་བ་ཁྱད་པར་ཅན་དང་འགལ་བའི་ཟས་དུག་ཅན་དང་། ཕག་པ་ལ་སོགས་པའི་ལུས་ལ་ཆགས་པ་དང་བྲལ་བར་འགྱུར་རོ། །གང་གི་ཚེ་ཁྱད་པར་ཅན་གྱི་བདེ་བའི་ཡུལ་མ་རྙེད་པ་དེའི་ཚེ། རྣམ་པ་གཞན་དག་མེད་པའི་ཕྱིར་ཇི་ལྟར་རྙེད་པའི་
[383b]
[383b.1]ཡུལ་མ་བོར་བར་ཡུལ་བདག་ལ་ཆགས་པ་ལས་འཇུག་པར་འགྱུར་ཏེ། དཔེར་ན་ཤིན་ཏུ་ཆགས་པ་ཅན་འདོད་པས་མྱོས་པའི་སྐྱེས་བུ་བུད་མེད་མེད་ན། དུད་འགྲོ་ལ་འདོད་པ་སྤྱོད་པ་མཐོང་བ་དེ་བཞིན་དུ། ཁྱད་པར་ཅན་གྱི་ལུས་མེད་ན་ཕག་པ་ལ་སོགས་པའི་ལུས་སུ་སྨོན་པར་འགྱུར་རོ། །དེ་བས་ན་བདག་
[383b.2]ཡོད་པ་ལ་འཁོར་བ་འཆད་པར་འགྱུར་བ་ནི་མ་ཡིན་ནོ། །གཞན་ཡང་སྤྱོད་པ་དང་བྲལ་བ་དག་ཁྱད་པར་ཅན་མ་ཡིན་པའི་བདེ་བ་ལ་སྲེད་པས་རྟོག་པ་མེད་པ་ཉིད་དུ་སྐྱེའོ། །འོན་ཏེ་སྤྱོད་པ་ཉིད་ལས་སྲེད་པ་དང་བྲལ་བ་ཡིན་ནོ་ཞེ་ན། འོ་ན་ནི་སྤྱོད་པ་ཉིད་སྡུག་བསྔལ་གྱི་རྒྱུར་འགྱུར་བའི་ཕྱིར། དེ་ཁོ་ན་ལས་
[383b.3]ཆགས་པ་དང་བྲལ་བར་རིགས་སོ། །འོན་ཏེ་སྤྱོད་པ་ངེས་པར་རྒྱུའི་སྟོབས་ལས་འབྱུང་ངོ་། །དེ་ལྟར་ན་བདག་མེད་པར་རྟོགས་པ་ལ་ཡང་། སྤྱོད་པ་མི་ལྡོག་པའི་ཕྱིར། བདག་མེད་པ་མཐོང་བ་ལ་ཐར་པར་མི་འགྱུར་རོ་ཞེ་ན། དེ་ལྟ་ན་བདག་གོམས་པ་ཡང་མི་སྲིད་དེ། བདེ་བ་དང་། སྡུག་བསྔལ་དང་།
[383b.4]འདོད་པའི་རྟེན་བདག་བསྒོམས་པར་གྱུར་པ་ཇི་ལྟ་བ་དེ་དང་འདྲ་བར་གྱུར་ན། གང་ལས་ཡོངས་སུ་དག་པར་འགྱུར། འོན་ཏེ་སྐྱེས་བུའི་བྱེད་པས་ཉེས་པ་བྲལ་བ་འདི་བྱེད་དོ་ཞེ་ན། དེ་ནི་མ་ཡིན་ཏེ། ཇི་ལྟར་སོལ་བ་བདར་བ་བྱས་ཀྱང་དཀར་པོར་མི་འགྱུར་བ་དེ་བཞིན་དུ། གཉུག་མའི་འདོད་ཆགས་ལ་
[383b.5]སོགས་པའི་ཉེས་པས་སྐྱོན་ཅན་དུ་གྱུར་པའི་སྐྱེས་བུ་ཇི་ལྟར་སྐྱེས་བུའི་རྩོལ་བས་དག་པར་བྱེད་དེ། རང་ཉིད་སྐྱོན་ཅན་དེ་བཟློག་པར་ནི་མི་ནུས་ཏེ། སྐྱོན་ཅན་སྐྱོན་མེད་པར་ཇི་ལྟར་འགྱུར། དེ་ལྟར་དག་པར་གྱུར་ན་སྐྱོན་ཅན་ལས་ཐ་དད་པར་འགྱུར་རོ། །དེ་ཉིད་སྨྲས་པ། བདག་ཉིད་ལ་ཞེན་གང་ཡིན་ཏེ། །ཇི་ལྟར་དེ་
[383b.6]ནི་འཇིག་པར་འདོད། །ཅེས་བྱ་བ་ལ། གལ་ཏེ་བདག་ངོ་བོ་ཉིད་ཀྱིས་སྐྱོན་ཅན་མ་ཡིན་ན། འདོད་ཆགས་ལ་སོགས་པ་དང་ལྡན་ཡང་ཇི་ལྟར་སྐྱོན་ཅན་དུ་འགྱུར། དབྱུག་པ་དང་ལྡན་པས་ལྷ་བྱིན་དབྱུག་པར་འགྱུར་བ་མ་ཡིན་པའི་ཕྱིར་རོ། །འདོད་ཆགས་ལ་སོགས་པའི་རིགས་པ་མེད་པའི་སྐྱེས་
[383b.7]བུ་འདོད་ཆགས་ཅན་ཉིད་དུ་མི་སྲིད་དོ། །འོན་ཏེ་ཐ་དད་པའི་འདོད་ཆགས་ལ་སོགས་པ་རིག་པས་འདོད་ཆགས་ཅན་ཉིད་ཡིན་ནོ་ཞེ་ན། གྲོགས་དག་འོ་ན་ནི་བུད་མེད་རིག་པ་ལས་བུད་མེད་དང་ལྡན་པར་འགྱུར་རོ། །དེ་བས་ན་འདོད་ཆགས་ལ་སོགས་པ་དང་འབྲེལ་པས་འདོད་ཆགས་ཅན་གྱི་
[384a]
[384a.1]འདོད་ཆགས་ལ་སོགས་པ་རིག་པ་ནི་མ་ཡིན་ནོ། །འདོད་ཆགས་ལ་སོགས་པ་འཛིན་པས་འདོད་ཆགས་ཅན་དུ་འགྱུར་ན་ནི། གཞན་གྱིས་འདོད་ཆགས་འཛིན་པ་ཡང་འདོད་ཆགས་ཅན་དུ་འགྱུར་རོ། །འོན་ཏེ་བདག་དང་འདུ་བས་འབྲེལ་པའི་ཆགས་པ་དེས་འདོད་ཆགས་ཅན་ཡིན་ནོ་
[384a.2]ཞེ་ན། འཕྲོད་པ་འདུ་བ་ཡང་ཐ་དད་པ་མ་ཡིན་ནམ། དེས་ན་ཇི་ལྟར་ཕྲད་པ་ཙམ་ལ་བུད་མེད་དང་ལྡན་པར་མི་བརྗོད་པ་དེ་བཞིན་དུ་འཕྲོད་པ་འདུ་བས་ཀྱང་འདོད་ཆགས་ཅན་དུ་མི་འགྱུར་རོ། །འོན་ཏེ་འདོད་ཆགས་བདག་དང་འདུ་བ་གཅིག་པས་ཐ་དད་པ་མི་རིག་ཅིང་ལྡན་པ་ཅན་ལ་ནི་ཐ་དད་པའི་བློ་སྐྱེའོ་
[384a.3]ཞེ་ན། དེ་ལྟ་ན་འོ་ན་ནི་འདོད་ཆགས་ལས་བདག་ཐ་དད་པར་ཅི་ཡིས་ཤེས། གང་གི་ཚེ་བདག་གི་ངོ་བོ་ཐ་དད་པར་མི་རིག་པར་དེའི་ཚེ་བདག་རིག་པར་ཇི་ལྟར་མི་འགྱུར་ཏེ། རང་རིག་པ་ལས་འཁྲུལ་པ་མེད་དོ་ཞེས་བསྟན་ཏོ། །འོན་ཏེ་བདག་རིག་པར་བྱེད་པ་མ་ཡིན་ལ་རིག་པར་བྱ་བ་སྟེ། ཕྱི་རོལ་བཞིན་
[384a.4]ནོ་ཞེ་ན། འོ་ན་ནི་གཟུང་བྱ་ཡིན་པའི་ཕྱིར་རིག་པར་བྱེད་པ་མེད་པས་ལོངས་སྤྱོད་པ་པོར་མི་འགྱུར་ཏེ། གཟུགས་ལ་སོགས་པ་རྣམས་སྤྱད་པར་བྱ་བ་ཉིད་ལ་སྤྱོད་པ་པོ་མེད་པའི་ཕྱིར་རོ། །དེ་བས་ན་བདག་ལ་ལོངས་སྤྱོད་པ་པོ་ཐ་དད་པར་འགྱུར་རོ། །དེ་ལ་གཞན་དགོས་པས་ཐུག་པ་མེད་པར་འགྱུར་རོ། །འོན་ཏེ་
[384a.5]ལོངས་སྤྱོད་པ་དེར་འདུ་བས་འབྲེལ་པའི་ཕྱིར་ལོངས་སྤྱོད་པ་པོར་འགྱུར་རོ་ཞེ་ན། ལོངས་སྤྱོད་པ་ནི་ཉམས་སུ་མྱོང་བ་ལས་ཐ་དད་པ་ཅི་ཡང་མེད་པ་མ་ཡིན་ནམ། ལོངས་སྤྱོད་པ་ནི་སྤྱད་པར་བྱ་བ་ལ་གནས་པ་ཉིད་དེ། ཇི་ལྟར་བདག་ལོངས་སྤྱོད་པའོ་ཞེས་བྱ་བའི་བློ་སྐྱེ་བ་དེ་བཞིན་དུ། འདི་ནི་བདག་གི་
[384a.6]ལོངས་སྤྱོད་དོ་ཞེས་བྱ་བ་འཇིག་རྟེན་ན་སྣང་ངོ་། །དེ་བས་ན་རྟེན་དང་བརྟེན་པའི་དངོས་པོ་གཉིས་ཀ་ལ་ཡོད་དོ། །འོན་ཏེ་དཔོག་པར་བྱེད་པ་ལས་འདི་ལོངས་སྤྱོད་པ་པོར་བརྗོད་དོ་ཞེ་ན། མངོན་སུམ་མེད་པར་དེ་ལ་རྗེས་སུ་དཔག་པ་ཇི་ལྟར་འགྱུར་འོན་ཏེ་བདག་ཕྲ་བའི་ཕྱིར་རྣལ་འབྱོར་པ་རྣམས་ཁོ་ནས་
[384a.7]ཡུལ་དུ་འགྱུར་གྱི། ད་ལྟར་བདག་ཅག་ལ་སོགས་པ་རྣམས་ཀྱིས་མི་མཐོང་ཞེ་ན། རྣལ་འབྱོར་པས་མཐོང་བར་ཡང་ངེས་པ་འདི་ན་ཅི་ཡང་མེད་དོ། །གཞན་ཡང་བདག་ཅག་ལ་སོགས་པ་མེད་པར་རིག་པ་ཡོད་པའི་ཕྱིར། བདག་ནི་རང་རིག་པའི་ངོ་བོ་ཉིད་ཁོ་ནར་ཁས་བླང་བར་བྱ་
[384b]
[384b.1]སྟེ། དེ་ལྟ་མ་ཡིན་ན་དེ་མེད་པར་ཐལ་བར་འགྱུར་བའི་ཕྱིར་རོ། །དེ་ཡང་བདེ་བ་ལ་སོགས་པ་རིག་པའི་ངོ་བོ་ཉིད་དུ་འགྱུར་ན་ནི་དེ་འཇིག་པ་ཉིད་དུ་འགྱུར་རོ། །གང་ཞིག་བདག་ལ་ཞེན་པ་དེའི་བདག་དེ་ཇི་ལྟར་འཇིག་པར་འདོད་པར་འགྱུར། བདག་དེ་ནི་སྡུག་བསྔལ་མེད་པའི་ངོ་བོ་ཉིད་དུ་
[384b.2]ཁས་བླང་བར་བྱའོ། །གལ་ཏེ་སྡུག་བསྔལ་བ་ཅན་ཡིན་ཏེ། བདེ་བ་ཅན་མ་ཡིན་ན་ནི་སྡུག་བསྔལ་གྱི་སྐབས་ན་བདག་རང་ཉིད་མེད་པར་འགྱུར་རོ། །འོན་ཏེ་བདེ་བ་དང་སྡུག་བསྔལ་གྱི་གནས་སྐབས་ཉིད་འཇིག་ལ་བདག་མ་ཡིན་ནོ་ཞེ་ན། མ་ཡིན་ཏེ། བདེ་བ་ལ་སོགས་པ་མ་གཏོགས་པར་དེ་མི་དམིགས་
[384b.3]པའི་ཕྱིར་ཏེ། བདེ་བ་དང་སྡུག་བསྔལ་ལ་སོགས་པའི་ངོ་བོ་ཉིད་བོར་ན། རིག་པའི་རང་བཞིན་གཞན་དུ་བདག་སྣང་བ་ནི་མ་ཡིན་ནོ། །དེ་བས་ན་ཇི་ལྟར་བདེ་བ་དང་། སྡུག་བསྔལ་ཐ་དད་པ་དེ་བཞིན་དུ་དེའི་ངོ་བོ་ཉིད་ཀྱི་བདག་ཀྱང་ཐ་དད་པར་འགྱུར་རོ། །འོན་ཏེ་རིག་པ་དང་། རིག་པ་པོ་ཞེས་འཛིན་པས་
[384b.4]བདག་ཐ་དད་པ་ཡིན་ནོ་ཞེ་ན། འོ་ན་ནི་མྱོང་བ་དང་མྱོང་བ་པོ་ཞེས་བྱ་བའི་རྟོག་པ་ལས་བདག་ཐ་དད་ན་བདག་གཞན་ལས་ཀྱང་ཐ་དད་པ་ཉིད་དུ་འགྱུར་རོ། །འོན་ཏེ་རང་རིག་པས་གཞན་གྱིས་བདག་མི་རིག་པའི་ཕྱིར་ཐ་དད་དོ། །བདེ་བ་རིག་པས་ཀྱང་སྡུག་བསྔལ་མི་རིག་པའི་ཕྱིར་དེ་རིག་པ་ཐ་དད་པ་ཉིད་ཡིན་ནོ་ཞེ་ན། དེས་
[384b.5]ན་སྔ་ཕྱི་དག་གཅིག་པ་མ་ཡིན་པའི་ཕྱིར་སྡུག་བསྔལ་གྱི་བདག་ཉིད་འཇིག་པར་ཐལ་བར་འགྱུར་ན། བདག་ལ་ཞེན་པ་གང་ཡིན་པ་དེ་ཇི་ལྟར་འཇིག་པར་འདོད་པར་འགྱུར་ཐེར་ཟུག་པའི་རྟག་པ་ཡིན་པས་སྡུག་བསྔལ་གྱི་ངོ་བོ་ཉིད་དུ་གནས་པར་འགྱུར་རོ། །རྟག་པ་ཐེར་ཟུག་པ་ཡང་ཕྱི་མ་ཕྱི་མའི་གནས་
[384b.6]སྐབས་རིག་པ་ནི་མ་ཡིན་པ་མ་ཡིན་ནམ། དེ་ཇི་ལྟར་དེ་ཉིད་དུ་གནས་པའི་རྟག་པ་ཉིད་ཡིན་ཏེ། འགྱུར་བ་དང་རིམ་གྱིས་འབྱུང་བར་དམིགས་པའི་ཕྱིར་རོ། །གལ་ཏེ་དེ་རིམ་གྱིས་དམིགས་པ་ཡིན་ནི་དེའི་ཚེ་འཇིག་པ་ཉིད་ཐོབ་པར་འགྱུར་རོ། །དེ་ལྟར་གྱུར་ན་རིམ་གྱིས་དམིགས་པར་འདོད་ན་འཇིག་པ་ཡང་
[384b.7]འདོད་པར་འགྱུར་རོ། །དེ་ལྟ་ན་ཡང་གང་ལ་བདག་ལ་ཞེན་པ་ཡོད་པ་དེ་ལ་འཇིག་པར་འདོད་པར་ཇི་ལྟར་འགྱུར། འོན་ཏེ་མཚུངས་པ་ངོ་བོ་ཉིད་དུ་དམིགས་པས་སྔ་ཕྱི་གཅིག་པ་ཉིད་ཡིན་ཏེ། ཐ་དད་པའི་ངོ་བོ་ཉིད་མཐོང་ན་ཐ་དད་པ་ཉིད་དུ་གསལ་བའི་ཕྱིར་རོ་ཞེ་ན། དེ་ལྟར་གྱུར་ན་སྔ་མ་འཇིག་པ་དེ་བཞིན་དུ་
[385a]
[385a.1]བདག་ལ་ཞེན་པ་གང་ཡིན་པ་དེ་འཇིག་པར་འདོད་པ་ཇི་ལྟར་འགྱུར། འོན་ཏེ་རྟོག་པའི་ངོ་བོ་ཉིད་ཀྱི་བདག་ལ་ཐམས་ཅད་གཅིག་པ་ཉིད་དེ། དེ་ཡང་ཁྱད་པར་ཅན་ཐ་དད་པས་ཐ་དད་པར་སྣང་བ་སྟེ། དཔེར་ན་ནམ་མཁའ་ཐ་དད་པ་མེད་ཀྱང་བུམ་པའི་ནམ་མཁའ་དང་། སྣམ་བུའི་ནམ་མཁའ་ཞེས་
[385a.2]ཐ་དད་པར་འགྱུར་བ་བཞིན་ནོ། །དེ་བས་ན་བདག་ཐ་དད་པར་མ་རིག་པས་བྱས་པའོ་ཞེ་ན། འདིར་སྨྲས་པ། གལ་ཏེ། ཇི་ལྟར་བུམ་པ་མེད་ན་ནི། །བུམ་པའི་ནམ་མཁའ་མ་ཡིན་ན། །འོ་ན་ནི་བུམ་པ་མེད་ན་ནམ་མཁའ་གཞན་དང་ལྷན་ཅིག་ཏུ་འགྱུར་བའི་ཕྱིར་ནམ་མཁའ་ལ་ཐ་དད་པ་མེད་པ་བཞིན་དུ་བདག་ཀྱང་ཐ་
[385a.3]དད་པ་མེད་པས་རང་དང་གཞན་གྱི་ཆ་ཐ་མི་དད་པར་འགྱུར་བའི་ཕྱིར་བདག་ཉམས་པ་ཉིད་དུ་འགྱུར་རོ། །ངའོ་སྙམ་པ་ནི་གཞན་རྣམ་པར་གཅོད་པའི་བདག་ཉིད་ཡིན་པའི་ཕྱིར་ནམ་མཁའ་ཉིད་ཀྱི་བདག་ཉིད་དུ་གྱུར་པ་ལ་བྱ་བ་དང་། ལོངས་སྤྱོད་པ་ལ་སོགས་པ་མེད་པས་ནམ་མཁའ་བཞིན་ཐ་དད་པ་ཡིན་ནོ། །དེ་ལྟ་ན་ནི་གང་
[385a.4]བདག་ཏུ་ཞེན་པ་དེའི་བདག་དེ་ནི་ཇི་ལྟར་འཇིག་པར་འདོད། འོན་ཏེ་དངོས་པོའི་སྟོབས་ལས་འོངས་པ་ཇི་ལྟར་བརྗོད་ན་ནི་བདག་མེད་པ་ཉིད་དུ་ཐལ་བར་འགྱུར་ཏེ། རང་གི་ངོ་བོ་ཉིད་རིག་པ་ཙམ་ཡོད་པའི་ཕྱིར་རོ། །འོན་ཏེ་རིག་པ་ཉིད་བདག་ཡིན་ཏེ། རྟག་པ་དང་ཁྱབ་པའོ་ཞེ་ན། རིག་པའི་ཁྱབ་པ་ཉིད་འདི་གང་ཞིག་ཡིན།
[385a.5]ཕྱོགས་ཐམས་ཅད་མནན་པ་ནི་ཁྱབ་པ་ཉིད་ཡིན་ཞིང་། དུས་དུ་མ་ལ་ཁྱབ་པ་ནི་རྟག་པར་བརྗོད་པ་མ་ཡིན་ནམ། རང་རིག་པས་ཀྱང་ཡུལ་དང་དུས་ཀྱི་ཁྱད་པར་འཛིན་པའི་ཕྱིར་ཇི་ལྟར་བདག་ཁྱབ་པ་དང་རྟག་པར་འགྱུར། འོན་ཏེ་བུམ་པ་ལ་སོགས་པ་གཞན་གྱི་ངོ་བོ་ཉིད་དུ་བདག་གནས་པའོ་ཞེ་ན། དེ་ལྟ་ན་ཡང་
[385a.6]འཁོར་བ་པར་འགྱུར་ཏེ། ལྷ་སྦྱིན་ལ་སོགས་པའི་ངོ་བོ་ཉིད་དུ་ཡང་གནས་པའི་ཕྱིར་རོ། །དེ་བས་ན་གྲོལ་བར་འགྱུར་ན་སྲོག་ཆགས་ཀྱང་མེད་པར་འགྱུར་ཏེ། དེ་ལྟ་བུའི་ཐར་པས་ནི་དགོས་པ་ཅི་ཡང་མེད་པའི་ཕྱིར་རྟོག་པ་སྔོན་དུ་བཏང་བའི་རྣལ་འབྱོར་པ་རྣམས་ངོ་མཚར་སྐྱེད་པ་ཡིན་ནོ། །དོན་དམ་པར་
[385a.7]བདག་བྱ་བ་དང་ལོངས་སྤྱོད་པ་ལ་སོགས་པ་ལ་བརྟེན་པ་མ་ཡིན་ནམ། དེ་ལྟར་ཡང་དེ་མ་རིག་པའི་བག་ཆགས་ཁོ་ན་ལས་འགྱུར་རོ། །དེ་བཞིན་དུ་ཆགས་པ་ལ་སོགས་པ་ཡང་ཡིན་ནོ་ཞེ་ན། འདིར་སྨྲས་པ། མྱོང་བའི་ཐ་སྙད་ཡོན་ཏན་བདག །ཀུན་གྱི་རྟེན་ནི་ལྡོག་པ་ཅན། །ཆགས་པ་རུ་ནི་ཇི་ལྟར་
[385b]
[385b.1]འདོད། །ཆགས་པའི་རང་བཞིན་དེ་འདྲ་མིན། །ཞེས་བྱ་བ་ལ། གང་ལ་ནམ་མཁའ་བཞིན་མྱོང་བའི་རྗེས་སུ་འབྲང་བའི་ཐ་སྙད་ཐམས་ཅད་ལོག་པ་ཡིན་པ་དང་། ཤེས་རབ་ལ་སོགས་པའི་ཡོན་ཏན་རྣམས་ལོག་པ་ཡོད་པ་དེ་ནི་དེ་ལྟ་བུའི་བདག་གི་རྟེན་གང་ཡིན་པའི་ཆགས་པ་དེ་ཇི་ལྟར་འདོད་པ་ཡིན་ཏེ།
[385b.2]ཆགས་པའི་ངོ་བོ་ཉིད་དེ་འདྲ་བར་མེད་པའི་ཕྱིར་རམ། ཡོད་དུ་ཆུག་ན་ཡང་རྟོག་པ་སྔོན་དུ་མི་གཏོང་བ་ཉིད་དུ་སྟོན་པར་བྱེད་དེ། དེ་བས་ན་འཁོར་བ་དོན་དུ་གཉེར་བ་རུང་བ་ཡིན་ནོ། །འཁོར་བའི་བདེ་བ་ཡོངས་སུ་དགའ་བ་མེད་པའི་ཕྱིར་མི་རིགས་སོ་ཞེ་ན། མྱ་ངན་ལས་འདས་པ་ལ་ཡང་བདེ་བ་ཉིད་ཡོངས་སུ་དགའ་
[385b.3]བར་བྱེད་པ་མ་ཡིན་པ་མ་ཡིན་ནམ། གལ་ཏེ་མྱ་ངན་ལས་འདས་པའི་བདེ་བ་དོན་དུ་གཉེར་བར་བྱེད་པ་ཡིན་ན། དེའི་ཚེ་བདེ་བ་ཐམས་ཅད་ཕུན་སུམ་ཚོགས་པར་གྱུར་ཀྱང་། དེ་ལས་མཆོག་ཏུ་གྱུར་པའི་བདེ་བ་འདོད་པ་ཉིད་དང་། སྔར་གྱི་བདེ་བ་ཉིད་སླར་ཡང་དང་ཡང་དུ་འདོད་པར་འགྱུར་བ་དེ་བས་ན་དེ་མི་འདོད་པ་ནི་མ་
[385b.4]ཡིན་ནོ། །འདོད་ཅིང་དོན་དུ་གཉེར་བ་ཡང་སྲེད་པ་སྟེ། བདག་ཉིད་ཆེན་པོ་རྣམས་ལ་སྡུག་བསྔལ་བ་ཉིད་ཡིན་ནོ། །བདེ་བ་དེ་ཐམས་ཅད་ཡོངས་སུ་དགའ་བ་སྐྱེད་པ་ཁོ་ན་སྟེ། དེའི་ཕྱིར་བདེ་བ་ཅན་མྱ་ངན་ལས་འདའ་བར་མི་འགྱུར་རོ། །གང་གི་ཕྱིར་རྣམ་གྲངས་པར་བདེ་བ་ཐམས་ཅད་འདོད་པ་འདིས་ནི། དེས་
[385b.5]ན་བདེ་བ་དོན་དུ་གཉེར་བའི་སྲེད་པ་ལ་སོགས་པའི་ཕྱིར་འདིར་འཁོར་བ་ཉིད་དུ་གནས་པར་བྱེད་དོ། །འོན་ཏེ་འདོད་ཆགས་དང་བྲལ་བ་ཡང་མཐོང་བ་ཡིན་ནོ་ཞེ་ན། མཐོང་བ་མ་ཡིན་ཏེ། དེ་ཡང་བདེ་བའི་བསམ་པ་ཉིད་ཀྱིས་ཡིན་ཏེ། བདེ་བའི་ཐབས་ཚོལ་བས་ངལ་བར་གྱུར་པའི་ཕྱིར། སྡུག་བསྔལ་ཉིད་སེམས་
[385b.6]པར་འགྱུར་བས། བདེ་བ་ལ་མངོན་པར་ཕྱོགས་ནས་རྣམ་པ་གཞན་འདོད་པས་ཆགས་པ་དང་བྲལ་བ་ལ་ཕྱོགས་པར་བྱེད་ཀྱི། བདག་ལ་ཆགས་པ་མེད་པ་མ་ཡིན་ནོ། །འོན་ཏེ་བདག་ཏུ་ལྟ་བ་ཡོད་ཀྱང་བདག་གི་བ་ལ་སོགས་པ་ལ་ཆགས་པ་མ་ཡིན་ནོ་ཞེ་ན། འདིར་སྨྲས་པ། རྣམ་པ་ཀུན་དུ་བདག་འཛིན་པ། །
[385b.7]བདག་ལ་ཆགས་པ་ཤིན་ཏུ་བརྟེན། །བདག་གི་བར་ཆགས་ས་བོན་ཏེ། །དེ་སྐབས་ཅན་དུ་རྣམ་པར་གཞག །ཅེས་བྱ་བ་ལ། འདིར་འདིའི་དོན་ནི་ཇི་སྲིད་བདག་ཏུ་མངོན་པར་ཞེན་པ་དེ་སྲིད་དུ། བདག་ལ་ཆགས་པའི་ཕྱིར་གྲོལ་བར་མི་འགྱུར་ཏེ། བདག་གི་བ་ལ་ཆགས་པ་ཡང་ཕན་འདོགས་པ་ལ་བརྟེན་ནས་
[386a]
[386a.1]ཡོད་པར་འགྱུར་རོ། །འོན་ཏེ་བདག་ཏུ་འཛིན་པ་ནི་སྤང་བར་བྱ་བ་སྟེ། སྐྱོན་སྤང་བར་བྱ་བ་ཡིན་པའི་ཕྱིར། དེ་སྤངས་ནས་འཇུག་པར་བྱ་སྟེ། དེ་བས་ན་བདག་གི་བ་ལ་ཆགས་པ་ལ་སོགས་པར་ཇི་ལྟར་འགྱུར་ཞེ་ན། གལ་ཏེ་བདག་ཏུ་འཛིན་པ་སྤངས་ན་མེད་དོ། །ཅིའི་ཕྱིར་སྐྱོན་ཟློག་པར་
[386a.2]བྱེད། དོན་དུ་མི་གཉེར་བ་ནི་ཅུང་ཟད་ཀྱང་བྱེད་པ་ལ་འཇུག་པ་མ་ཡིན་ཏེ། དེའི་ཕྱིར་རྣམ་པ་ཐམས་ཅད་དུ་བདག་ལ་ཆགས་ན་བདག་གི་བ་ལ་ཆགས་པ་ཕུལ་དུ་བརྟེན་པར་བྱེད་དོ། །བདག་ཏུ་ལྟ་བ་དེ་ཡང་དེ་བདག་གི་བ་ལ་ཆགས་པའི་ས་བོན་ཏེ། ཐར་པ་འདོད་པ་རྣམས་དེའི་གནས་སྐབས་ཅན་དུ་
[386a.3]གནས་སོ། །དེ་བས་ན་སླར་ཡང་འཁོར་བ་ཡིན་ནོ། །འོན་ཏེ་ཇི་ལྟར་བདག་ཏུ་འཛིན་པ་དེ་ཆགས་པའི་ས་བོན་ཡིན་ཏེ། བདག་གི་བ་ཡང་ས་བོན་བདག་ཏུ་ལྟ་བ་ཡིན་པ་དེ་ལྟ་ན་ཡང་སྐྱོན་མཐོང་བར་འགྱུར་རོ། །བདག་གི་བདེ་ལ་ཡང་སྐྱོན་མཐོང་བ་ཡོད་པའི་ཕྱིར་ཆགས་པ་དང་བྲལ་བར་འགྱུར་རོ་ཞེ་ན།
[386a.4]འདིར་སྨྲས་པ། བདག་གི་བ་ལ་ཆགས་བྲལ་བར། །བརྩོན་ཡང་ཡོན་ཏན་ཆ་རྟེན་ཕྱིར། །འཇུག་དང་ལྡན་པ་གགས་བྱེད་དང་། །དེ་སྐྱོན་ལ་ནི་སྒྲིབ་བྱེད་ཡིན། །ཞེས་བྱ་བ་ལ། གང་ལ་བདག་ཏུ་འཛིན་པ་ཡོད་པ་དེ་ནི་བདག་ལ་ཕན་འདོགས་པར་བྱེད་པའི་ཡོན་ཏན་གྱི་ཆ་ཅུང་ཟད་ཙམ་ལ་བརྟེན་ནས།
[386a.5]བདག་གི་བདེ་ལ་ཆགས་པ་དང་ལྡན་པ་ནི། ཆགས་པ་དང་བྲལ་བ་ལ་མངོན་དུ་ཕྱོགས་པར་འབད་པས་བསྐྱེད་པ་ལ་གགས་བྱེད་པ་ཉིད་དོ། །ཉེས་པ་མཐོང་ན་འཇུག་པ་དང་ལྡན་པའི་ཆགས་པ་དང་བྲལ་བར་འགྱུར་རོ་ཞེ་ན། མ་ཡིན་ཏེ། བདག་གི་བདེ་ལ་ཆགས་པ་དེ་ཉིད་ཡོན་ཏན་ཅུང་ཟད་ཙམ་
[386a.6]གྱི་ཆ་ལ་བརྟེན་པས་སྐྱོན་རྣམས་སྒྲིབ་པར་བྱེད་དོ། །དེ་བས་ན་བདག་ལ་མངོན་པར་ཞེན་པ་ཉིད་ཡོད་ན་བདག་གི་བ་ལ་ཡང་ཆགས་པར་འགྱུར་བ་ཁོ་ནའོ། །བདག་ལ་འང་ཆགས་པ་བྲལ་ན་ནི། །འདི་ན་ཆགས་པ་བྲལ་བ་གང་། །འདི་སྤོང་མ་ཡིན་དཔེར་བདག་བཞིན། །དེ་ཕྱིར་སྡུག་བསྔལ་བསྒོམ་
[386a.7]དོན་མེད། །ཅེས་བྱ་བ་ལ། འོན་ཏེ་བདག་སྤོང་བར་བྱེད་དོ་ཞེ་ན། །སྤང་བར་མི་ནུས་ཏེ། དེ་ཡིས་དེ་ཉིད་སྤང་བར་མི་བྱེད་པའི་ཕྱིར་རོ། །འདི་ལྟར་ཇི་ལྟར་ཡོད་པ་དེ་ལྟར་མི་སྤོང་ལ། ཇི་ལྟར་མེད་པ་དེ་ལྟར་ན་ཡང་མ་ཡིན་པའི་ཕྱིར། བདག་སྤོང་བ་མ་ཡིན་གྱི། འོན་ཀྱང་འདོད་ཆགས་ལ་སོགས་པ་
[386b]
[386b.1]སྤོང་བ་ཡིན་ནོ། །དེ་བས་ན་འདོད་ཆགས་སྤངས་པས་རྟག་ཏུ་བདེ་བ་ཡིན་ནོ། །བདེ་བ་རྣམས་ལ་འཇོག་པར་བརྩོན་པ་འདོད་ཆགས་པ་ཉིད་འཛིན་པའི་མཚན་ཉིད་ཅན་མ་ཡིན་ནམ། དེ་ཡང་བདག་ཏུ་འཛིན་པ་སྔོན་དུ་འགྲོ་བར་བརྟག་གོ། །འོན་ཏེ་དེ་བདག་ལ་ཡང་ཆགས་པ་དང་བྲལ་བ་སྟེ། དཔེར་ན་བདག་གི་བ་
[386b.2]བཞིན་ནོ་ཞེ་ན། ད་ནི་བདག་ལ་ཆགས་པ་དང་བྲལ་བ་གང་ཡིན་པ་མེད་ལ། ལུགས་ཀྱིས་གཞན་ལ་གཞན་དག་ཆགས་པ་དང་བྲལ་བར་འདོད་པའི་ཕྱིར་རོ། །བདག་ཆགས་པ་དང་བྲལ་བའི་ངོ་བོ་ཉིད་ཆགས་པ་དང་བྲལ་བར་འགྱུར་བ་མ་ཡིན་ནམ་ཞེ་ན། འདིར་སྨྲས་པ། བདག་ནི་བདག་ལ་ཆགས་པ་དང་བྲལ་
[386b.3]བ་མ་ཡིན་ཏེ། འདི་ལྟར་འཇིག་རྟེན་བདག་ཡོད་པ་ཇི་ལྟ་བ་དེ་བཞིན་དུ་དེ་ལ་ཆགས་པ་དང་བྲལ་བར་འགྱུར་རམ་འོན་ཏེ། ཇི་ལྟར་མེད་པ་དེ་ལྟར་ཆགས་པ་དང་བྲལ་བར་འགྱུར་བར་བརྟག་གྲང་ན། དེ་ལ་གལ་ཏེ་ཕྱོགས་དང་པོ་ཡིན་ན་དེའི་ཚེ་ཇི་ལྟར་ཡོད་པ་དེ་ལྟར་ཆགས་པ་དང་མི་བྲལ་བར་རིགས་ཏེ། དེ་བཞིན་
[386b.4]དུ་བྱ་བར་མི་ནུས་པའི་ཕྱིར་རོ། །ཇི་ལྟར་མེད་པ་དེ་ལྟ་ན་ཡང་ཆགས་པ་དེ་བྲལ་བར་མི་འགྱུར་ཏེ། དེ་མེད་པ་ཉིད་ཀྱི་ཕྱིར་རོ། །གཉི་ག་ལྟར་ན་ཡང་ཆགས་པ་དང་བྲལ་བའི་བདག་སྤོང་བ་མ་ཡིན་པའི་ཕྱིར་བདག་མེད་པར་མི་འགྱུར་རོ། །དེ་ཡང་ཇི་ལྟར་བདག་སྤངས་པ་དེ་ལྟ་ན་ཡང་སྡུག་བསྔལ་བསྒོམ་
[386b.5]པ་དོན་མེད་པ་ཡིན་ཏེ། རྣམ་པ་གང་ཞིག་གིས་མི་སྤོང་བ་དེ་ལྟ་ན་ཡང་སྡུག་བསྔལ་བསྒོམས་པ་དོན་མེད་པ་ཡིན་ནོ། །ཡང་ན་ད་ལྟར་གང་ཞིག་གང་དུ་མི་སྤོང་བ་དེ་ནི་དེ་ཡིས་དེ་རུ་སྤོང་བར་མི་བྱེད་དེ་དཔེར་ན་བདག་བཞིན་ནོ། །དེའི་ཕྱིར་དངོས་པོ་སྤོང་བའི་སྡུག་བསྔལ་བསྒོམས་པ་དོན་མེད་པ་སྟེ། སྡུག་
[386b.6]བསྔལ་བསྒོམས་པ་ལས་སྤོང་བར་ནུས་པ་མ་ཡིན་ཏེ། ཆགས་པ་དང་བྲལ་བ་ནི་སྤོང་བའི་རྒྱུ་མ་ཡིན་པའི་ཕྱིར་དཔེར་ན་བདག་བཞིན་དུ་བདག་གི་བ་ཡང་ཡིན་ནོ། །དེའི་ཕྱིར་ཆགས་པ་དང་བྲལ་བ་དེ་འདྲ་བས་ནི་གྲོལ་བར་མི་འགྱུར་བ་དེའི་ཕྱིར་འདིས་ཀྱང་སྡུག་བསྔལ་བསྒོམས་པ་དོན་མེད་པར་འགྱུར་རོ། །སྡུག་བསྔལ་
[386b.7]བསྒོམས་པས་ཀྱང་དེ་དག །སྡུག་བསྔལ་བ་ཉིད་རྣམ་བསྒོམ་འགྱུར། །དེ་ནི་སྔར་ཡང་མངོན་སུམ་ཉིད། །དེ་ལྟ་འང་ཆགས་བྲལ་ལྡན་མ་ཡིན། །ཞེས་བྱ་བ་ལ། གལ་ཏེ་སྡུག་བསྔལ་བསྒོམས་པ་དེ་ཆགས་པ་དང་བྲལ་བར་གྱུར་ན། སྡུག་བསྔལ་བསྒོམ་པར་རིགས་ན་དེ་ནི་སྡུག་བསྔལ་དང་བྲལ་བའི་
[387a]
[387a.1]དོན་མ་ཡིན་ནོ། །རྣལ་འབྱོར་པ་སྡུག་བསྔལ་བསྒོམས་པས་སྡུག་བསྔལ་ཉིད་རྣམས་པར་བསྒོམ་པར་འགྱུར་རོ། །སྡུག་བསྔལ་དེ་ཡང་སྔར་འཁོར་བའི་གནས་སྐབས་ན་མངོན་སུམ་ཉིད་དེ། སྡུག་བསྔལ་མངོན་དུ་བྱེད་པ་དེ་ལྟ་ན་ཡང་ཆགས་པ་དང་བྲལ་བར་གནས་པ་ནི་མ་ཡིན་ནོ། །
[387a.2]གལ་ཏེ་སྡུག་བསྔལ་མངོན་སུམ་མ་ཡིན་ན་དེའི་ཚེ་ཐར་པ་འདོད་པ་རྣམས་ཀྱིས་སྡུག་བསྔལ་སྤོང་ཞིང་ཐར་པ་དོན་དུ་གཉེར་བར་མི་འགྱུར་ཏེ། སྡུག་བསྔལ་མངོན་དུ་མ་གྱུར་ན་རྣལ་མར་མི་འགྱུར་ཞིང་། སྡུག་པ་དང་བྲལ་བ་ལ་སོགས་པའི་སྡུག་བསྔལ་ནི་འཇིག་རྟེན་ཐམས་ཅད་ཀྱི་མངོན་སུམ་
[387a.3]ཡིན་པའི་ཕྱིར་རོ། །གལ་ཏེ་ཡང་དེའི་ཚེ་ཆགས་པ་དང་བྲལ་བ་མ་ཡིན་ན། སྡུག་བསྔལ་བསྒོམས་པས་ཇི་ལྟར་ཆགས་པ་དང་བྲལ་བར་འགྱུར། འོན་ཏེ་སྡུག་བསྔལ་བསྒོམས་པས་དྲན་པ་ཐམས་ཅད་བསྲེས་ནས་སྡུག་བསྔལ་གྱི་རྒྱུན་ཆེན་པོ་གོམས་པ་ལ་ཞུགས་པའི་ཕྱིར་ཆགས་པ་དང་བྲལ་བ་
[387a.4]ཉིད་དུ་འགྱུར་རོ་ཞེ་ན། དེ་ནི་མི་བདེན་ཏེ། ཇི་ལྟར་སྡུག་བསྔལ་གྱི་རྒྱུན་དྲན་པས་བསྒོམ་པ་དེ་བཞིན་དུ། བདེ་བ་གཅིག་ནས་གཅིག་ཏུ་བརྒྱུད་པ་དེས་ཆགས་པ་ཅན་དུ་འགྱུར་རོ། །འོན་ཏེ་ཞི་བའི་བདེ་བའི་རོ་ལས་མི་གཡོ་བའི་རྣལ་འབྱོར་པ་འཁོར་བའི་བདེ་བ་འདོད་པ་མ་ཡིན་ནོ་ཞེ་ན། དེ་ནི་མ་ཡིན་ཏེ།
[387a.5]བདག་ཏུ་ལྟ་བ་དང་ལྡན་པ་ནི་མྱ་ངན་ལས་འདས་པ་ཁོ་ན་ལ་སྐྱེ་བའི་རྒྱུ་ཡིན་ནོ། །དུར་ཁྲོད་ན་གནས་པའི་བྱ་རོག་གི་སྐྱེ་བའི་རྒྱུ་ཅི་སྟེ། དེ་ཉིད་མ་ཡིན་ཏེ་འདི་ལྟར་བྱ་རོག་ནི་མི་གཙང་བའི་གནས་ལ་དགའ་བ་སྐྱེ་བ་ཇི་ལྟ་བ་དེ་བཞིན་དུ་པདྨའི་ཚོགས་ལ་དགའ་བ་སྐྱེ་བ་མ་ཡིན་ནོ། །དེས་ན་སྡུག་བསྔལ་
[387a.6]བསྒོམས་པས་སྡུག་བསྔལ་མངོན་སུམ་དུ་བྱས་ཀྱང་འདོད་ཆགས་དང་བྲལ་བ་དང་ལྡན་པར་མི་འགྱུར་བའི་ཕྱིར། སྡུག་བསྔལ་སྒོམ་པ་དོན་མེད་པར་འགྱུར་རོ། །སྡུག་བསྔལ་གྱི་རྒྱུ་སྐྱོན་མཐོང་བ་ལས་ཆགས་པ་དང་བྲལ་བར་མཐོང་བ་མ་ཡིན་ནམ། དེ་ཇི་ལྟར་སྐྱོན་མཐོང་ཡང་སྡུག་བསྔལ་
[387a.7]བསྒོམས་པས་ཆགས་པ་དང་བྲལ་བར་མི་འགྱུར་ཞེ་ན། སྨྲས་པ། གལ་ཏེ་གཅིག་ལའང་ཉེས་པ་ཡིས། །སྐད་ཅིག་དེ་ལ་བློ་ལྡོག་ཀྱང་། །འདོད་ལྡན་བུད་མེད་གཞན་ལ་བཞིན། །དེ་ལའང་ཆགས་བྲལ་ཉིད་མ་ཡིན། །ཞེས་བྱ་བ་ལ། གལ་ཏེ་ཡང་འགྲོ་བ་བཟང་མོ་གཅིག་ལོག་པར་བྱེད་པའི་
[387b]
[387b.1]ཉེས་པ་མཐོང་ནས་སྐད་ཅིག་ཙམ་ཆགས་པ་དང་བྲལ་བར་འགྱུར་བ་དེ་ལྟ་ན་ཡང་བུད་མེད་དེ་ལ་ཐམས་ཅད་དུ་ཆགས་པ་དང་བྲལ་བ་མ་ཡིན་ཏེ། དཔེར་ན་འདོད་པ་དང་ལྡན་པ་དག་འདོད་པ་ཁ་ཅིག་བུ་མོ་ཁ་ཅིག་ལ་ཆགས་པ་ལོག་ཀྱང་བུ་མོ་གཞན་ལ་ཆགས་པ་མི་ལྡོག་པ་སྟེ། རིམ་གྱིས་ཐམས་ཅད་ལ་
[387b.2]ཆགས་པ་ཡོད་པའི་ཕྱིར་རོ། །འོ་ན་གལ་ཏེ་བློ་ལ་ལར་རྣམ་པར་གཡོ་ན་ཡུལ་ཀུན་ལ་ཆགས་པ་ཅི་སྟེ་སྐྱེ་བར་འགྱུར་ཞེ་ན། སྨྲས་པ། བླང་དང་དོར་བའི་ཁྱད་ཡོད་ན། །གཅིག་ཏུ་གྱུར་པའི་ཆགས་གང་ཉིད། །དེ་ནི་རྣམ་གྲངས་ཀྱིས་བསྐྱེད་ཚེ། །ཆགས་པ་རྣམས་ཀྱི་ས་བོན་ཡིན། །ཞེས་བྱ་བ་ལ། གང་
[387b.3]ལ་བླང་བ་དང་དོར་བའི་ཁྱད་པར་ཡོད་པ་དེ་ལ་འདོད་པ་དང་སྡང་བར་འགྱུར་གྱི་ཐམས་ཅད་ལ་ལེན་པ་དང་། འདོར་བ་མ་ཡིན་ཏེ། རྣམ་གྲངས་པས་འདོད་པ་དང་། སྡང་བ་ཕན་ཚུན་རྒྱུ་ཅན་གྱི་རྣམ་གྲངས་པར་འགྱུར་བ་ཁོ་ནའི་ཕྱིར། །བདག་ཏུ་སྨྲ་བ་ཇི་ལྟར་གྲོལ་བར་འགྱུར་དེ་བས་ན་བླང་བ་དང་དོར་བ་དག་མི་
[387b.4]མཐུན་པ་དང་དངོས་པོ་གཅིག་ལ་སྐྱེ་བའི་ངང་ཚུལ་ཅན་གྱི་འདོད་ཆགས་ཞེས་བྱ་བའི་ཞེན་པ་གང་ཡིན་པ་དེ་ཉིད་དངོས་པོ་ཐམས་ཅད་ཀྱི་ས་བོན་ཏེ། ཆགས་པ་སྟེ་འདོད་ཆགས་ལ་སོགས་པའི་ངོ་བོ་ཉིད་རྣམས་རིམ་གྱིས་སྐྱེའོ། །བདག་མེད་པར་མཐོང་བ་ཅན་གྱིས་ནི་ཐམས་ཅད་དུ་བཏང་སྙོམས་ཏེ། བླང་
[387b.5]བ་དང་། དོར་བའི་ཁྱད་པར་ཡོད་པ་ནི་མ་ཡིན་ནོ། །དེ་བས་ན་འདོད་ཆགས་ལ་སོགས་པ་འབྱུང་བ་མ་ཡིན་ཏེ། ཆགས་པའི་རྩ་བ་མེད་པའི་ཕྱིར་རོ། །གཞན་ཡང་ཆགས་པ་དང་བྲལ་བ་ཉིད་དུ་ནི་དངོས་པོ་ངན་པ་ལ་འགྱུར་གྱི། །བདག་ཏུ་ལྟ་བ་ནི་གང་དུ་རང་བཞིན་དམན་པ་མ་ཡིན་པར་བསྟན་པའི་ཕྱིར་རོ། །
[387b.6]ཆགས་པ་སྐྱོན་མེད་ཡུལ་ཅན་ཏེ། །སྒྲུབ་བྱེད་ཀྱང་ནི་སྐྱོན་མེད་ཡིན། །འགྲོ་བ་དེ་ཙམ་ཁོ་ན་ན། །ད་ནི་གང་ལས་ཆགས་བྲལ་འགྱུར། །ཞེས་བྱ་བ་སྨོས་ཏེ། དེ་ལ་བདག་སྐྱོན་དང་བཅས་པ་མ་ཡིན་ཏེ། དེ་དབེན་པའི་ཕྱིར་རོ། །དེའི་ཡུལ་ཅན་ཆགས་པ་ཡང་སྐྱོན་མེད་པའི་ཡུལ་ཅན་ཡིན་པའི་ཕྱིར་སྐྱོན་མེད་
[387b.7]པའོ། །ལོངས་སྤྱོད་པའི་སྒྲུབ་བྱེད་མིག་ལ་སོགས་པ་ཡང་དེ་བཞིན་ཏེ། འགྲོ་བ་ཐམས་ཅད་དེ་ཙམ་ཁོ་ན་ཡིན་ན། ད་ནི་གང་ལ་དེ་ཆགས་པ་དང་བྲལ་བར་འགྱུར། འོན་ཏེ་སྐྱོན་བཅས་ཡིན་ནའང་དེ། །དེར་ནི་བདག་དང་དེ་མཚུངས་ལ། །དེ་སྐྱོན་དེ་ལ་ཆགས་བྲལ་མིན། །དེ་དག་གང་ལ་ཆགས་བྲལ་
[388a]
[388a.1]འགྱུར། །ཞེས་བྱ་བ་ལ། འོན་ཏེ་གཟུགས་ལ་སོགས་པ་ཡུལ་དང་ལུས་ལ་སོགས་པ་དེ་ལ་ཆགས་པ་སྐྱོན་དང་བཅས་པར་སྣང་ན་ནི། བདེ་བའི་རྒྱུ་དེ་དག་སྐྱོན་དང་བཅས་པ་ཉིད་དུ་ཅི་སྟེ་འགྱུར། སྡུག་བསྔལ་གྱི་རྒྱུ་ཉིད་ཡིན་པས་སོ་ཞེ་ན་ཆགས་པ་ནི་བདེ་བ་དང་། སྡུག་བསྔལ་གྱི་རྒྱུ་
[388a.2]ཉིད་དུ་རྣམ་གྲངས་ཀྱིས་འགྱུར་བ་ཡིན་ནོ། །རེས་འགའ་དེ་དག་སྡུག་བསྔལ་གྱི་ཡང་རྒྱུར་འགྱུར་བ་མ་ཡིན་ནམ་ཞེ་ན། གྲོལ་བར་འདོད་པའི་བདག་དེ་ལ་ཡང་སྐྱོན་དང་བཅས་པ་ཉིད་དུ་མཚུངས་པ་མ་ཡིན་ནམ། ཆགས་པ་ལ་སོགས་པ་དང་ལྡན་པའི་བདག་དེ་ལ་ཆགས་པ་དང་མ་བྲལ་ན། ད་ནི་གང་ལ་
[388a.3]ཆགས་པ་དང་བྲལ་བར་འགྱུར། འོན་ཏེ་བདག་སྤང་བར་མི་ནུས་ན་ཞེ་ན། འོ་ན་ནི་བདག་གི་བ་ཡང་སྤོང་བ་མ་ཡིན་ནོ། །འོན་ཏེ་བདག་གི་བ་སྐྱོན་ཡོད་པས་སྤོང་ངོ་ཞེ་ན། འོ་ན་གང་གི་ཚེ་བདག་གི་བ་དེའི་སྐྱོན་མཐོང་བ་དེའི་ཚེ་སྤོང་བར་འགྱུར་གྱི། གང་གི་ཚེ་བདེ་བའི་རྒྱུ་ཉིད་དུ་རྟོགས་པ་དེའི་ཚེ་ཇི་ལྟར་སྤོང་
[388a.4]བ་ཡིན། འོ་ན་གལ་ཏེ་བདེ་བའི་རྒྱུ་མ་སྤངས་པར་བྲལ་བར་གྱུར་ཀྱང་དེའི་ཚེ་བདེ་བ་ཡང་སྡུག་བསྔལ་བར་འགྱུར་བའི་ཕྱིར། བདེ་བའི་རྒྱུ་ཡང་སྤང་བར་རིགས་སོ་ཞེ་ན། དེ་ལྟ་ན་སྡུག་བསྔལ་གྱི་རྗེས་ལ་བདེ་བ་ཆེན་པོ་སྐྱེ་བའི་ཕྱིར་སྡུག་བསྔལ་བླང་བར་བྱ་བ་ཉིད་མ་ཡིན་ནམ། དེ་བས་ན་བདག་ཏུ་ལྟ་བ་
[388a.5]འདི་གང་དུ་ཡང་ཆགས་པ་དང་བྲལ་བར་མི་འགྱུར་རོ། །གཞན་ཡང་། ཡོན་ཏན་མཐོང་ལས་ཆགས་པ་འབྱུང་། །སྐྱོན་མཐོང་བས་ནི་འགེགས་འགྱུར་ན། །དེ་ལྟར་དེ་དབང་སོགས་ལ་མིན། །བུས་པ་སོགས་ལའང་ཡོད་ཕྱིར་དང་། །སྐྱོན་དང་ལྡན་ལའང་ཡོད་ཕྱིར་དང་། །ཡོན་ཏན་ལྡན་པ་
[388a.6]གཞན་དག་ལའང་། །མེད་ཕྱིར་བདག་གི་བ་ཡོད་ནའང་། །འདས་སོགས་ལ་ནི་མེད་ཕྱིར་རོ། །ཞེས་བྱ་བ་ལ། ཡོན་ཏན་མཐོང་བ་ལས་ཆགས་པ་སྐྱེ་ཞིང་སྐྱོན་མཐོང་བས་འགེགས་པར་འགྱུར་རོ་ཞེ་ན། ཆགས་པ་དེ་ཉིད་ཀྱང་མིག་ལ་སོགས་པ་ལས་མི་འབྱུང་སྟེ། འོན་ཀྱང་བདག་གི་བར་
[388a.7]མཐོང་བ་ལས་ཡིན་ནོ། །དེ་བཞིན་དུ་བུས་པ་དང་ཕྱུགས་ལ་སོགས་པ་སྐྱོན་དང་ཡོན་ཏན་མི་སྤྱོད་པ་ཅན་རྣམས་ལ་ཆགས་པ་ཡོད་པའི་ཕྱིར་དང་། རབ་རིབ་ལ་སོགས་པ་དང་ལྡན་པའི་མིག་ལ་སོགས་པ་སྐྱོན་དང་ལྡན་པ་ལ་བདག་གི་བར་ཡོངས་སུ་འཛིན་པའི་དགའ་བ་ཡོད་པའི་ཕྱིར་དང་། གཞན་
[388b]
[388b.1]གྱི་མིག་ལ་སོགས་པ་ཡོན་ཏན་དང་ལྡན་པ་ཡིན་ཡང་བདག་གི་ཡིན་པར་མ་མཐོང་བ་ལ་སུ་ཡང་ཆགས་པ་མེད་པའི་ཕྱིར་དང་། འདས་པ་ལ་སོགས་པ་ཞིག་པ་ལ་བདག་གི་བར་ཆགས་པ་མེད་པའི་ཕྱིར་རོ། །སོགས་པའི་སྒྲས་ནི་མ་ཐོབ་པ་བསྡུའོ། །དེ་བས་ན་སྐྱོན་མཐོང་བ་ལས་ཆགས་པ་ལྡོག་པ་
[388b.2]མ་ཡིན་ནོ། །འོན་ཏེ་སྐྱོན་མཐོང་བ་ལས་བདག་གི་བའི་བློ་ཉིད་ལྡོག་པར་འདོད་ཅིང་། དེ་དང་བྲལ་ན་ཡོན་ཏན་ལས་སྐྱེས་པའི་ཆགས་པ་ཡང་མི་འབྱུང་སྟེ། དེའི་ཚེ་བདག་གི་བར་ལྟ་བ་ནི་སྐྱོན་མཐོང་བས་གསལ་བའི་ཕྱིར་རོ་སྙམ་སེམས་ན། སྨྲས་པ། དེ་ཉིད་ཕྱིར་ནི་བདག་གི་བློ། །ཡོན་ཏན་མཐོང་བའི་རྒྱུ་མ་
[388b.3]ཡིན། །དེ་ཕྱིར་ཡོན་ཏན་མི་མཐོང་ཕྱིར། །དེ་ཡང་ཉམས་པ་མ་ཡིན་ནོ། །ཞེས་བྱ་བ་ལ། དེ་ཉིད་ཀྱི་ཕྱིར་སྐྱོན་དང་ལྡན་པ་ཡིན་ཡང་འགའ་ཞིག་ཏུ་བདག་གི་བའི་བློ་ཡོད་པ་ཉིད་ཀྱི་ཕྱིར་དང་། ཡོན་ཏན་ལྡན་པ་གཞན་དག་ལ་མེད་པའི་ཕྱིར་དང་། འདས་པ་ལ་སོགས་པ་ལ་ཡང་མེད་པའི་ཕྱིར་བདག་གི་
[388b.4]བའི་བློ་ནི་ཡོན་ཏན་མཐོང་བའི་རྒྱུ་མ་ཡིན་ནོ། །དེའི་ཕྱིར་བདག་གི་བའི་བློ་དེ་ཡང་ཉམས་པར་མི་འགྱུར་ཏེ། ཡོན་ཏན་མ་ཡིན་པའི་སྐྱོན་མཐོང་ཡང་ངོ་། །གཞན་ཡང་ཡོན་ཏན་མེད་སྒྲོ་འདོགས། །ཆགས་ལས་དེ་ནི་སྣང་བ་ཡིན། །དེ་ཕྱིར་དེ་རྒྱུ་ལ་གནོད་མེད། །སྒྲུབ་པ་དེ་ལ་ཇི་ལྟར་གནོད། །ཅེས་བྱ་
[388b.5]བ་ལ། གལ་ཏེ་སྐྱོན་མཐོང་བར་ནུས་ན་ནི་སྐྱོན་མཐོང་བ་ན་ཆགས་པ་ལྡོག་པར་འགྱུར་ཏེ། གང་གི་ཕྱིར་ཆགས་པའི་སྟོབས་ཀྱིས་སྐྱོན་མཐོང་བ་ཉིད་དུ་མི་བྱེད་པའི་ཕྱིར། ཡོད་པ་མ་ཡིན་པའི་ཡོན་ཏན་ཉེ་བར་ལེན་པ་བདག་གི་བར་ཆགས་པ་དེ་ལས་མཐོང་བར་འགྱུར་རོ། །གང་གི་ཕྱིར་དེ་ལྟར་
[388b.6]ཡིན་པ་དེའི་ཕྱིར། ཆགས་པའི་རྒྱུ་བདག་ཏུ་འཛིན་པ་ན། མི་གནོད་པའི་སྒྲུབ་པ་གང་ཡིན་པ་སྡུག་བསྔལ་བསྒོམ་པ་ལ་སོགས་པའི་ངོ་བོ་ཉིད་དེ་ཡིས་ཇི་ལྟར་ཆགས་པ་དེ་འགེགས་པར་འགྱུར། དེ་བས་ན་བདག་ཏུ་ལྟ་བ་ནི་གྲོལ་བ་མ་ཡིན་ནོ། །འདི་ལ་གྲངས་ཅན་གྱིས་སྨྲས་པ། བདག་ཏུ་
[388b.7]ལྟ་བ་ནི་སྡུག་བསྔལ་བསྒོམ་པར་འགྱུར་བ་མ་ཡིན་གྱི། འོན་ཀྱང་ངོ་བོ་ཉིད་ཀྱིས་སྐྱེས་བུ་ཐ་དད་པ་ཤེས་པས་གྲོལ་བར་འགྱུར་ཏེ། འདི་ལྟར་སྐྱེས་བུ་ནི་མི་འགྱུར་བའི་ངོ་བོ་ཉིད་ཅན་ནོ། །རང་བཞིན་ནི་བདེ་བ་ལ་སོགས་པ་གཞན་དང་། གཞན་དུ་འགྱུར་བའི་ངོ་བོ་ཉིད་དོ། །དེ་བས་ན་དེ་དག་
[389a]
[389a.1]དཔྱོད་པ་མེད་པས་བཟུང་བའི་ཕྱིར། །བདག་གྲོལ་བ་མ་ཡིན་གྱི། སྐྱེས་བུ་འབའ་ཞིག་ཤེས་པས་གྲོལ་བར་འགྱུར་རོ་ཞེ་ན། སྨྲས་པ། མཆོག་གཞན་དོན་དུ་གཉེར་ཕྱིར་དང་། །སྐྱེ་འཇིག་བློ་ཅན་ཉིད་ཀྱི་ཕྱིར། །སྐྱེ་བོ་འདི་ཡིས་དབང་སོགས་ལས། །བདག་ནི་ཐ་དད་གྱུར་
[389a.2]པར་ཤེས། །དེ་ཕྱིར་གཅིག་ཉིད་མཐོང་བས་ཀྱང་། །ཆགས་མིན་ཆགས་གྱུར་དེ་བདག་དང་། །དམིགས་པའི་ནང་གི་ཡན་ལག་ལ། །ངོ་བོ་ཉིད་ཀྱིས་རྗེས་ཆགས་འགྱུར། །ཞེས་བྱ་བ་ལ། །སྐྱེ་བ་དང་འཇིག་པ་མཐོང་བ་ཉིད་ཐ་དད་པར་འཇིག་པ་སྟེ། རྗེས་སུ་འགྲོ་བ་དང་ལྡོག་པ་ལས་ཐ་དད་
[389a.3]པའི་ཕྱིར་རོ། །བདག་ནི་རྗེས་སུ་འགྲོ་བ་ཅན་ཏེ། བདེ་བ་ལ་སོགས་པའི་རྗེས་སུ་འགྲོ་བ་མ་ཡིན་པ་ཅན་ནོ། །དེ་བས་ན་འགལ་བའི་ཆོས་གནས་པའི་ཕྱིར་ཐ་དད་པ་ཡིན་ནོ། །འོན་ཏེ་ཐ་དད་པ་ཉིད་འཁོར་བ་པས་མ་དཔྱད་པའོ་ཞེ་ན། དེ་ལྟ་ན་འོ་ན་ནི་དཔྱོད་པས་ཞེན་པ་མེད་པའི་ཕྱིར་གྲོལ་བ་
[389a.4]མ་ཡིན་ཏེ། བདེ་བ་དོན་དུ་གཉེར་བས་བདེ་བ་སྤོང་བར་འབད་པ་ནི་མ་ཡིན་པའི་ཕྱིར་བདེ་བ་དང་བྲལ་བའི་བདག་ལ་སུ་ཡང་དོན་དུ་གཉེར་བ་མེད་པའི་ཕྱིར་རོ། །བདག་འབའ་ཞིག་སྐྱེ་བའི་སྔོན་ནས་ཡོད་ན་ནི། འཁོར་བ་མེད་པར་འགྱུར་བའི་ཕྱིར་རོ། །གང་གི་ཚེ་གཙོ་བོ་དང་ལྷན་ཅིག་པར་བདག་མ་
[389a.5]མཐོང་བ་དེའི་ཚེ་གྲོལ་བར་འདོད་ལ། གང་གི་ཚེ་རང་བཞིན་དང་ལྷན་ཅིག་ཏུ་མཐོང་བ་དེའི་ཚེ་འཁོར་བའོ་ཞེ་ན། དེ་ལ་བདག་རྟོག་པའི་ངོ་བོ་ཉིད་ཡིན་ན། ཇི་ལྟར་གཅིག་པ་ཉིད་དུ་འཁྲུལ་བར་འགྱུར། འོན་ཏེ་ཡུལ་ལ་ཞེན་པ་ནི་གྲོལ་བར་མི་འགྱུར་ཏེ། འཁོར་བར་སྐྱེ་བའི་ཕྱིར་རོ་ཞེ་ན། རང་བཞིན་
[389a.6]ལ་འཁྲུལ་པ་མེད་དེ་བེམས་པོ་ཡིན་པའི་ཕྱིར་རོ། །དེ་བས་ན་ཅིའི་ཕྱིར་བདག་ཉིད་ཆེན་པོ་དང་གཅིག་པར་འགྱུར། ཇི་ལྟར་བདག་ལ་འཁྲུལ་པ་མེད་པ་དེ་ལྟར་བསྟན་ཟིན་ཏོ། །འོན་ཏེ་རང་བཞིན་ཡུལ་ཉིད་དུ་མཐོང་ན་ནི། འོ་ན་ཐ་དད་པར་འཛིན་པ་མེད་པར་མི་འགྱུར་རོ། །དེ་བས་ན་རྟོག་པའི་
[389a.7]ངོ་བོ་ཉིད་དང་རང་བཞིན་ལ་ཐ་དད་པར་ཤེས་ཏེ། ཇི་ལྟར་མིག་ལ་སོགས་པ་བཞིན་དང་གཞན་དོན་དུ་གཉེར་བའི་ཕྱིར་དང་། མིག་ལ་སོགས་པ་སྐྱེ་བ་དང་། འཇིག་པ་འཛིན་པའི་ཕྱིར་དབང་པོ་ལ་སོགས་པ་ལས་བདག་ཐ་དད་པར་སྐྱེ་བོ་ཐམས་ཅད་ཀྱིས་འདི་ཤེས་པར་འགྱུར་རོ། །གང་གི་ཕྱིར་
[389b]
[389b.1]དེ་ལྟ་ཡིན་པའི་ཕྱིར། རང་བཞིན་དང་སྐྱེས་བུ་དག་གཅིག་པ་མཐོང་བ་ལས་ཀྱང་བདག་ལ་ཆགས་པར་མི་འགྱུར་རོ། །གལ་ཏེ་བདག་ལ་ཆགས་པ་ཡོད་ན་དེ་ཡང་འཁོར་བ་པའོ་ཞེ་ན། དེ་ལྟ་ན་ནི་དམིགས་པའི་ནང་གི་ཡན་ལག་མིག་ལ་སོགས་པ་རྣམས་ལ་ངོ་བོ་ཉིད་དེ་རང་བཞིན་ཉིད་དུ་རྗེས་སུ་ཆགས་པ་
[389b.2]དང་ལྡན་པར་འགྱུར་གྱི་རེ་འགའ་གྲོལ་བ་ལ་ནི་མ་ཡིན་ནོ། །འོན་ཏེ་སྡུག་བསྔལ་མྱོང་བ་ལས་དམིགས་པ་ཁོ་ནས་ཐ་དད་པར་ཤེས་ན། དེ་ཇི་ལྟར་སྡུག་བསྔལ་མཐོང་བ་ན་ཆགས་པ་དང་བྲལ་བ་མ་ཡིན་ཞེ་ན། འདིར་སྨྲས་པ། སྡུག་བསྔལ་ད་ལྟར་འབྱུང་གང་ལས། །ཡིད་འབྱུང་དེ་འདྲ་སྡང་ཡིན་གྱི། །
[389b.3]ཆགས་བྲལ་མ་ཡིན་དེ་ཚེའང་འདི། །ཆགས་ཡོད་སྐབས་གཞན་ཚོལ་ཕྱིར་རོ། །དེའི་ཕྱིར། ཞེ་སྡང་སྡུག་བསྔལ་རྒྱུ་ཉིད་ཕྱིར། །དེ་ནི་དེ་ཙམ་ཉིད་དུ་གནས། །དེ་ལོག་ན་ནི་རང་ཉིད་ཀྱི། །རང་བཞིན་ཡང་ནི་བསྟན་པར་འགྱུར། །ཞེས་བྱ་བ་སྨོས་ཏེ། གང་ཞིག་དེ་ལྟར་བའི་སྡུག་བསྔལ་ལས་ཡིད་
[389b.4]འབྱུང་བ་དེ་འདྲ་བ་ནི་ཞེ་སྡང་ཡིན་གྱི། ཆགས་པ་དང་བྲལ་བ་ནི་མ་ཡིན་ཏེ། གང་གི་ཕྱིར་ད་ལྟར་བྱུང་བའི་སྡུག་བསྔལ་ཉམས་སུ་མྱོང་བར་གྱུར་པས་ཡིད་འབྱུང་བ་དེའི་ཚེ། སྐྱེས་བུ་འདི་ལ་ཆགས་པ་ཡོད་པ་ཉིད་དོ། །དེ་ཅིའི་ཕྱིར་ཞེ་ན། བདེ་བའི་ངོ་བོ་ཉིད་ཀྱིས་གནས་སྐབས་གཞན་དོན་དུ་གཉེར་བའི་ཕྱིར་
[389b.5]རོ། །འོན་ཏེ་ཞེ་སྡང་ཉིད་རྟག་ཏུ་ཡོད་པས་ཆགས་པ་དང་བྲལ་བར་འགྱུར་ཏེ། དེས་ཀྱང་ཡུལ་སྤང་བའི་ཕྱིར་ཐར་པ་ཡོད་དོ་ཞེ་ན། དེ་ནི་མ་ཡིན་ཏེ་ཞེ་སྡང་སྡུག་བསྔལ་གྱི་རྒྱུ་ཉིད་ཡིན་པའི་ཕྱིར་རོ། །ཞེ་སྡང་དེ་ནི་དུས་ཇི་སྲིད་དུ་སྡུག་བསྔལ་དེ་དེ་སྲིད་དེ་ཙམ་ཉིད་དུ་གནས་པ་དང་ལྡན་པ་ཡིན་ནོ། །སྡུག་
[389b.6]བསྔལ་དེ་ལོག་ན་ནི་ཞེ་སྡང་ཡང་ལྡོག་པའི་ཕྱིར། རང་ཉིད་དུས་ཡུན་རིང་པོར་བདེ་བ་དོན་དུ་གཉེར་བའི་རང་བཞིན་ལ་བརྟེན་པར་འགྱུར་རོ། །དེ་བས་ན་སྡུག་བསྔལ་ནི་ཞེ་སྡང་དང་ལྡན་པས་གྲོལ་བར་མི་འགྱུར་རོ། །འོན་ཏེ་ཡིད་འབྱུང་བ་མེད་པར་གྲོལ་བར་མི་འགྱུར་ཏེ། ཡིད་མ་བྱུང་བ་འགའ་ཞིག་
[389b.7]ཀྱང་འཁོར་བ་ལས་གྲོལ་བར་དོན་དུ་གཉེར་བ་ནི་རང་བཞིན་ལ་བརྟེན་པ་ཡོད་པ་མ་ཡིན་པའི་ཕྱིར་རོ། །སྡུག་བསྔལ་གྱིས་མ་གཟིར་བར་སུ་ཡང་ཡིད་འབྱུང་བར་མི་འགྱུར་རོ་ཞེ་ན། དེ་ནི་མ་ཡིན་ཏེ། བླང་དང་དོར་བ་བཅོམ་པའི་ཕྱིར། །ཀུན་ལ་མཉམ་པར་གནས་པ་ལ། །ཆགས་བྲལ་ཞེས་ནི་བརྗོད་
[390a]
[390a.1]པ་ཡིན། །ཙནྡན་དང་ནི་སྟེའུ་བཞིན། །ཞེས་བྱ་བ་ལ། ཆོས་ཉིད་ཙམ་ཞིག་མངོན་དུ་བྱས་པའི་ཕྱིར་ཆོས་ཐམས་ཅད་ལ་མཉམ་པ་ཉིད་ཐོབ་ནས་བླང་བ་དང་། དོར་བར་བྱ་བའི་དངོས་པོ་ཀུན་ལ་གོ་རིམས་བཞིན་དུ་ལེན་པ་དང་། སྤོང་བ་དག་བཅོམ་པའི་མཉམ་པ་གང་ཡིན་པ་ཐམས་
[390a.2]ཅད་ལ་མཉམ་པ་ཉིད་དེ་ནི་འདོད་ཆགས་དང་བྲལ་བར་བརྗོད་དེ། གང་རྣམས་ཀྱི་ཡིན་ཞེ་ན། སྟེའུས་འཇོག་པ་ལ་ཡང་ཙནྡན་གྱིས་བྱུག་པ་ལྟ་བུར་སེམས་པ་དེ་རྣམས་ཀྱི་ཡིན་ནོ། །འོ་ན་གལ་ཏེ་སྡུག་བསྔལ་བསྒོམ་པ་འདོད་ཆགས་དང་བྲལ་བའི་རྒྱུ་མ་ཡིན་ན་ནི། དེ་ལྟ་ནི་འོ་ན་ཅིའི་ཕྱིར་བཅོམ་ལྡན་
[390a.3]འདས་ཀྱིས་སྡུག་བསྔལ་བསྒོམ་པར་གསུངས་ཏེ། སྡུག་བསྔལ་ནི་སྡུག་བསྔལ་ཉིད་དུ་རིག་པར་བྱའོ་ཞེས་གསུངས་པ་མ་ཡིན་ནམ་ཞེ་ན། འདིར་སྨྲས་པ། འདུ་བྱེད་སྡུག་བསྔལ་ཉིད་མཁྱེན་ནས། །སྡུག་བསྔལ་བསྒོམ་པར་གསུངས་པ་ཡིན། །ཁོ་བོའི་དེ་ཡང་རྐྱེན་ལས་བྱུང་། །དེ་བདག་མེད་
[390a.4]ལྟའི་རྟེན་ཅན་ཡིན། །སྟོང་ཉིད་ལྟ་བས་གྲོལ་འགྱུར་གྱི། །བསྒོམ་པ་ལྷག་མ་དེའི་དོན་ཅན། །དེ་ཕྱིར་མི་རྟག་ལས་སྡུག་བསྔལ། །སྡུག་བསྔལ་ལས་ནི་བདག་མེད་གསུངས། །ཞེས་བྱ་བ་ལ། །སྡུག་བསྔལ་གྱི་སྡུག་བསྔལ་ལ་བརྟེན་ནས་སྡུག་བསྔལ་བསྒོམ་པར་གསུངས་པ་མ་ཡིན་གྱི། འོན་ཀྱང་འདུ་བྱེད་
[390a.5]ཀྱི་སྡུག་བསྔལ་ཉིད་རྒྱུ་དང་འབྲེལ་བ་ཉིད་དུ་མཁྱེན་ནས་སྡུག་བསྔལ་བསྒོམ་པར་གསུངས་པ་ཡིན་ཏེ། འདུ་བྱེད་ཀྱི་སྡུག་བསྔལ་དེ་ཡང་རྒྱུ་དང་རྐྱེན་ལས་སྐྱེས་པའི་ངོ་བོ་ཉིད་དེ། དོན་དམ་པར་བདག་མེད་པར་ལྟ་བ་ལ་བརྟེན་པ་ཅན་ཡིན་ནོ། །དེ་བས་ན་གང་ཟག་དང་ཆོས་སྤོང་བ་ཉིད་དུ་ལྟ་བས་གྲོལ་བ་ཉིད་དུ་
[390a.6]འགྱུར་གྱི། སྡུག་བསྔལ་ལ་སོགས་པ་བསྒོམ་པ་ལྷག་མ་ནི་བདག་མེད་པར་ལྟ་བ་དེའི་དོན་ཅན་ཡིན་ནོ། །བཅོམ་ལྡན་འདས་ཀྱིས་ཆོས་བསྟན་པ་ཐམས་ཅད་ནི་བདག་མེད་པར་ལྟ་བའི་རྩ་བ་ཅན་ཡིན་ནོ། །གང་གི་ཕྱིར་དེ་ལྟར་བདག་མེད་པར་མཐོང་བ་དེ་ཉིད་ཀྱིས་གྲོལ་བར་འགྱུར་བ་དེའི་ཕྱིར་མི་རྟག་པ་ལས་
[390a.7]བཅོམ་ལྡན་འདས་ཀྱིས་སྡུག་བསྔལ་བར་གསུངས་པ་ཡིན་ཏེ། སྡུག་བསྔལ་ལས་ཀྱང་བདག་མེད་པ་ཉིད་དུ་འགྱུར་རོ། །དགེ་སློང་དག་གཟུགས་གང་ཅི་ཡང་རུང་སྟེ། ཐམས་ཅད་མི་རྟག་པ་ཉིད་ཡིན་ནོ། །བཙུན་པ་དག་གང་མི་རྟག་པ་དེ་ནི་སྡུག་བསྔལ་བའམ་བདེ་བ་སྟེ། བཙུན་པ་དག་
[390b]
[390b.1]གང་སྡུག་བསྔལ་བ་དེ་མི་རྟག་པའོ། །གང་མི་རྟག་པ་སྡུག་བསྔལ་བ་དེ་ནི་ཡོངས་སུ་འགྱུར་བའི་ཆོས་ཅན་ནོ་ཞེས་དེ་ལྟར་བལྟའོ་ཞེས་གསུངས་སོ། །འདི་ནི་བདག་གོ། །འདི་དག་ནི་བདག་གིའོ། །བདག་ནི་འདི་ན་ཡོད་པའོ། །འདི་ནི་བདག་ཡིན་ནོ་ཞེས་བྱ་བ་ལ། དེ་ལྟ་བུར་རྒྱུ་དང་། འབྲས་བུའི་དངོས་པོར་
[390b.2]བདག་མེད་པ་ལྟ་བ་ཉིད་གྲོལ་བའི་ཐབས་ཡིན་ནོ་ཞེས་བསྟན་པར་འགྱུར་རོ།། །།ཚད་མ་རྣམ་འགྲེལ་གྱི་འགྲེལ་པ་ལས། །བམ་པོ་བཅུ་གཉིས་པ། བདག་ཏུ་ལྟ་བ་གང་ཡིན་པ་དེ་ནི་འཁོར་བ་པ་ཡིན་ནོ་ཞེས་བསྟན་པའི་ཕྱིར་སྨྲས་པ། ཆགས་བྲལ་མིན་དང་སྲེད་ལྡན་དང་། །རྩོམ་པ་ཀུན་ལ་
[390b.3]བརྟེན་པ་སྟེ། །ཉོན་མོངས་ལས་ལས་གྲོལ་མ་ཡིན། །དེ་འདྲ་འཁོར་བ་པ་ཡིན་ནོ། །ཞེས་བྱ་བ་ལ། བདག་ཏུ་ལྟ་བའི་ས་བོན་གནས་ན་ནི། བདག་གིར་འཛིན་པ་འགྱུར་བ་མེད་པ་ཉིད་འཁོར་བའི་རྒྱུ་ཡིན་ནོ། །དེའི་ཕྱིར་བདག་དང་བདག་གིར་འཛིན་པ་ནི་ཆགས་པ་དང་བྲལ་བ་མ་ཡིན་ཏེ། གདོན་མི་
[390b.4]ཟ་བར་སྲེད་པ་དང་ལྡན་པར་འགྱུར་རོ། །དེ་བས་ན་ལས་རྩོམ་པ་ཐམས་ཅད་ལ་བརྟེན་པ་ཡིན་ཏེ། ཉོན་མོངས་པ་དང་ལས་གྲོལ་བ་མ་ཡིན་གྱི། དེ་འདྲ་བ་འཁོར་བ་པ་ཡིན་ན། ཅིའི་ཕྱིར་བདག་ཏུ་ལྟ་བ་གྲོལ་བར་འགྱུར། འོན་ཏེ་བདག་གི་བ་ཉིད་དངོས་སུ་མེད་པའི་ཕྱིར། གང་ལས་ཆགས་པ་འབྱུང་
[390b.5]བར་འགྱུར། ཆགས་པ་འབྱུང་བ་ནི་ཡུལ་ལ་ཡིན་པའི་ཡུལ་ཡང་དོན་དམ་པར་མེད་པའི་ཕྱིར་ཅི་སྟེ་ཆགས་པར་འགྱུར་ཞེ་ན། དེ་ནི་མི་བདེན་ཏེ། བདག་གི་བ་ཉིད་མི་འདོད་གང་། འདི་ཡི་ཟ་བ་པོ་ཡོད་མིན། །དེ་ཚེ་དེ་ཡི་བྱ་ལོངས་སྤྱོད། །མཚན་ཉིད་ཅན་གྱི་བདག་ཀྱང་མེད། ཅེས་བྱ་བ་ལ། རྟོག་
[390b.6]པར་འགྱུར་བའི་བདག་གི་བ་ཉིད་མེད་པའོ་ཞེས་ངེས་པར་བྱ་བ་ཇི་ལྟར་ནུས། འཁྲུལ་པའི་རྒྱུ་ཅན་ཡིན་པའི་ཕྱིར་བདག་གི་བ་བརྫུན་པ་ཉིད་ཡིན་ནོ་ཞེ་ན་མ་རིག་པ་སྐྱེས་བུ་ལས་གཞན་པ་མ་ཡིན་པ་མ་ཡིན་ནམ། སྐྱེས་བུ་ཉིད་འདི་ཡིན་ནོ་ཞེས་བརྗོད་པའི་ཕྱིར་རོ། །དེ་བས་ན་བདག་ནི་མ་རིག་པའི་ངོ་བོ་
[390b.7]ཉིད་ཡིན་པའི་ཕྱིར་འཁྲུལ་པ་ཉིད་དེ་ནམ་ཡང་ཞིག་པར་འགྱུར་བ་མ་ཡིན་ཏེ། འཁྲུལ་པ་བདག་ཉིད་དུ་གྱུར་པ་འཇིག་པ་མི་རུང་བའི་ཕྱིར་དེ་ཉིད་མེད་པར་ཐལ་བར་འགྱུར་བའི་ཕྱིར་རོ། །གཞན་ཡང་བདག་གི་བ་ཡོད་ན་ལས་རྣམས་དང་བྱ་བ་བདེ་བ་ལ་སོགས་པའི་ལོངས་སྤྱོད་དེ་དག་ཀྱང་ཉམས་པར་འགྱུར་རོ། །འོན་ཏེ་དོན་
[391a]
[391a.1]དམ་པར་བྱ་བ་དང་ལོངས་སྤྱོད་མི་འདོད་ན་འོ་ན་བདག་ཀྱང་དོན་དམ་པར་གང་གིས་སྟོན་པར་བྱེད། འོན་ཏེ་བདག་གིར་ཉམས་སུ་མྱོང་བས་བཅད་པའི་ཕྱིར་ཡོད་པ་ཉིད་དོ་ཞེ་ན། བདག་གི་བར་ཡོངས་སུ་གཅོད་པའི་ཕྱིར་ཡོད་པར་འགྱུར་རོ། །འོན་ཏེ་མ་རིག་པ་གོམས་པ་ལས་རྨི་ལམ་ལ་སོགས་པ་བཞིན་དུ་
[391a.2]བདག་གི་བ་མེད་པ་ཡིན་ནོ་ཞེ་ན། འོ་ན་ནི་དོན་དམ་པར་བདག་ཀྱང་མེད་པར་འགྱུར་ཏེ། རྨི་ལམ་ལ་སོགས་པ་བཞིན་ནོ། །འོན་ཏེ་གཉིས་སུ་མེད་པའོ་ཞེ་ན། དེའི་ཚེ་ཉམས་སུ་མྱོང་བ་ལས་གཉིས་སུ་མེད་པར་འཐད་ཀྱི་རྟག་པ་མ་ཡིན་ཏེ། ད་ལྟར་བྱུང་བའི་དངོས་པོ་ཙམ་འཛིན་པའི་ཕྱིར་དང་། ཉམས་
[391a.3]སུ་མྱོང་བ་ལས་ཐ་དད་པའི་སྔ་ཕྱི་མེད་པར་མི་འཛིན་པའི་ཕྱིར་རོ། །སྔ་ཕྱི་མེད་པར་འཛིན་པ་མེད་ན་ནི་རྟག་པ་ཉིད་འཛིན་པ་མ་ཡིན་ནོ། །དྲན་པས་ཀྱང་གཅིག་ཏུ་འཛིན་པ་མ་ཡིན་ཏེ། དེ་ཚད་མ་མ་ཡིན་པའི་ཕྱིར་རོ། །རྗེས་སུ་དཔག་པ་ཉིད་ཀྱང་མངོན་སུམ་མེད་པར་རྟག་པ་སྒྲུབ་པར་བྱེད་པ་མ་ཡིན་
[391a.4]ནོ། །དེ་བས་ན་བདག་གི་བ་ཐམས་ཅད་བརྫུན་པའོ་སྙམ་དུ་གང་སེམས་པའི་རྒོལ་བ་དེའི་བདེ་བ་ལ་སོགས་པའི་ཟ་བ་པོ་ཡང་མེད་པ་ཉིད་དེ། བཟའ་བར་བྱ་བ་མེད་ན་ཟ་བ་པོ་ཡང་མེད་པའི་ཕྱིར། དེ་བས་ན་ལོངས་སྤྱད་པར་བྱ་བ་མེད་ན་བདག་ཀྱང་མེད་པ་ཁོ་ནར་འགྱུར་ཏེ། ཡོངས་སུ་དག་པའི་བདག་དེ་
[391a.5]ནམ་ཡང་མི་སྣང་བའི་ཕྱིར་རམ། སྣང་ན་ཡང་དེ་བརྫུན་པར་ཐལ་བར་འགྱུར་ཏེ། སྔོན་པོ་ལ་སོགས་པ་བཞིན་ནོ། །དེ་ཕྱིར་གྲོལ་འདོད་ཐོག་མེད་པའི། །རྒྱུད་ནི་རིགས་མཚུངས་ས་བོན་ཅན། །འཇིག་ཚོགས་སུ་ནི་ལྟ་བ་དག །རྩ་བ་ཉིད་ནས་གཞོམ་པར་གྱིས། །ཞེས་བྱ་བ་ལ། རྒྱུད་གང་ཞིག་ལ་
[391a.6]ཐོག་མ་ཡོད་པ་མ་ཡིན་པ་ཅན་དེ་ནི་བདག་ཏུ་འཛིན་པའི་རིགས་མཚུངས་པ་གང་ལ་ཡོད་པའི་ས་བོན་ཅན་ཏེ། དེ་ནི་འཇིག་ཚོགས་སུ་ལྟ་བ་བདག་ཏུ་འཛིན་པའི་བློ་ཅན་དེ་རྩ་བ་ནས་བག་ལ་ཉལ་གཞོམ་པར་ཐལ་བར་འདོད་པ་རྣམས་ཀྱིས་གྱིས་ཤིག་པའོ། །བདག་མེད་པར་མཐོང་བ་ཉིད་ཀྱིས་གྲོལ་བར་
[391a.7]འགྱུར་གྱི། བདག་ཏུ་ལྟ་བས་ནི་མ་ཡིན་ནོ། །འདི་དག་ཐམས་ཅད་ཀྱིས་ནི་ངེས་པར་འབྱིན་པ་ཞེས་བྱ་བ་ལམ་གྱི་རྣམ་པ་བཞི་པ་བསྟན་པ་མ་ཡིན་ནོ། །འོ་ན་གལ་ཏེ་བདག་མངོན་སུམ་དང་། རྗེས་སུ་དཔག་པ་དག་གིས་གོ་བར་བྱ་བ་མ་ཡིན་པ་དེ་ལྟ་ན་ཡང་དེ་ཡོད་པར་ལུང་གིས་རྟོགས་པར་བྱ་སྟེ་དེ་ནི་མ་
[391b]
[391b.1]གྲོལ་བའོ། །ཐར་པ་ནི་གཅིག་ཏུ་བདེ་བའི་ངོ་བོ་ཉིད་དེ། དེ་མེད་པ་མ་ཡིན་ནོ། །འཁོར་བའི་བདེ་ནི་འཇིག་པ་སྟེ། །དེ་ཡིས་མགུ་བར་མི་བྱའོ། །ཐར་པ་ནི་དབང་པོ་ལ་སོགས་པའི་ཆོ་གས་ཐོབ་པར་བྱ་བ་མ་ཡིན་ནོ། །དེ་སྐད་དུ་ཡང་། དབང་པོ་ལས་འདས་མྱོང་མིན་པ། །འཕགས་པའི་མིག་གིས་
[391b.2]གཟིགས་པར་འགྱུར། །གང་གི་དངོས་པོ་དེ་རྣམས་ནི། །ཚིག་གམ་རིགས་པས་ཇི་ལྟར་དགག །ཅེས་བྱ་བ་ལ་སོགས་པ་བརྗོད་དོ་ཞེ་ན་སྨྲས་པ། ལུང་ནི་དེ་ལྟའི་ངོ་བོ་ཡིས། །རྒྱུ་མཚན་མ་མཐོང་རྣམས་ལ་ནི། །ལུང་ཙམ་ཞིག་གིས་གྲོལ་བར་ཡང་། །སྨྲ་སྟེ་ཡོངས་སུ་མགུ་བྱེད་མིན། །ཞེས་
[391b.3]བྱ་བ་ལ། དབང་པོ་ལས་འདས་པ་མཐོང་བའི་ཚིག་ལ་རྗེས་སུ་དཔག་པས་མི་གནོད་པ་དེ་ནི་བདེན་ཏེ། འོན་ཀྱང་དབང་པོ་ལས་འདས་པས། བརྗོད་པའི་ལུས་དང་ལྡན་པའི་རྒྱུ་མཚན་ནི་ཚད་མས་མ་མཐོང་བའི་སྐྱེས་བུ་རྣམས་ལ་མངོན་སུམ་མེད་པས་ལུང་ཙམ་གྱིས་གྲོལ་བར་སྨྲ་ཡང་། ཡོངས་
[391b.4]སུ་མགུ་བར་བྱེད་པ་ནི་མ་ཡིན་ཏེ། སྨྲ་བ་ཙམ་ནི་ལུང་ཐམས་ཅད་ཀྱི་ཐུན་མོང་ཡིན་པའི་ཕྱིར་རོ། །ལུང་གི་མཚན་ཉིད་སྐྱེས་བུའི་རྩོལ་བ་ལས་བྱུང་བ་མ་ཡིན་པའོ་ཞེས་ཟེར་བ་ནི་སྔར་བཀག་ཟིན་ཏོ། །འོན་ཏེ་ས་བོན་ལས་ས་བོན་ལ་སོགས་པ་སྐྱེ་བ་མེད་པའི་ཆོས་ཉིད་ཅན་དུ་དབང་གི་ཆོ་གས་མཐོང་བས་སྐྱེས་
[391b.5]བུ་དེ་རྣམས་ལ་ཡང་སླར་མི་སྐྱེ་བ་ཡིན་ནོ་ཞེ་ན། དེ་ནི་མ་ཡིན་ཏེ། གང་གི་ཕྱིར། ས་བོན་སོགས་གྲགས་ཆོ་ག་ནི། །སྐྱེས་བུ་མི་སྐྱེད་ཕྱིར་ནུས་མེད། །ཏིལ་མར་བསྐུས་སོགས་བསྲེགས་པ་ལ། །སོགས་པའང་གྲོལ་བར་ཐལ་ཕྱིར་རོ། །ཞེས་བྱ་བ་ལ། ས་བོན་ལ་སོགས་པ་དབང་བསྐུར་
[391b.6]བའི་ཆོ་ག་ཡིས་སྐྱེ་བ་མེད་པའི་ཆོས་ཉིད་ཅན་དུ་གྲགས་པ་དེ་བཞིན་དུ་སྐྱེས་བུ་རྣམས་སླར་སྐྱེ་བ་ཉམས་པའི་ཕྱིར། ནུས་པ་མེད་པ་སྟེ་མི་ནུས་པ་ཡིན་ནོ། །འདི་ལྟར་ཏིལ་མར་བསྐུས་པའི་མེ་ཡིས་བསྲེགས་པ་ལ་སོགས་པས་བསྒྱུར་བའི་ས་བོན་མི་སྐྱེ་བར་མཐོང་བའི་ཕྱིར་སྲོག་ཆགས་རྣམས་ཀྱང་
[391b.7]ཏིལ་མར་བསྐུས་པའི་རྒྱུས་གྲོལ་བར་ཐལ་བར་འགྱུར་རོ། །འོ་ན་གལ་ཏེ་དབང་ལ་སོགས་པའི་ཆོ་ག་ལས་ཟད་པར་བྱེད་པ་མ་ཡིན་པ་དེ་ལྟ་ན་ནི་སྔར་ལྕི་བར་སྣང་བ་ལས་དབང་བསྐུར་བའི་རྗེས་ཐོགས་སུ་ལུས་ཡང་བར་སྣང་བར་མི་འགྱུར་རོ་ཞེ་ན། འདིར་སྨྲས་པ། སྔར་ནི་ལྕི་དང་ཕྱིས་ཡང་
[392a]
[392a.1]ཕྱིར། །སྡིག་པ་བཅོམ་པར་བྱས་པ་མིན། །འདི་ཡི་ལྕི་བ་ཉིད་མེད་ཀྱང་། །ལུས་ཅན་མིན་ཕྱིར་སྡིག་ལྗིད་མིན། །ཞེས་བྱ་བ་ལ། གལ་ཏེ་སྔར་ལྕི་བ་ལས་ཕྱིས་ཡང་བར་དབང་གིས་བསྐྱེད་པ་དེ་ལྟ་ན་ཡང་དེ་ཡིས་སྡིག་པ་བཅོམ་པར་རིག་པ་མ་ཡིན་ཏེ། དབང་འདི་ཡིས་ལྕི་བ་
[392a.2]ཉིད་མེད་པར་འགྱུར་བ་ཡིན་མོད་ཀྱི། སྡིག་པ་ནི་ལྕི་བ་མ་ཡིན་པའི་ཕྱིར་འདི་གཞོམ་པར་འཐད་པ་ནི་མ་ཡིན་ཏེ་ལུས་ཅན་མ་ཡིན་པའི་ཕྱིར་རོ། །འདི་ལྟར་ལྕི་བ་དང་ཡང་བ་འགལ་བ་ཅན་དུ་མཐོང་བ་ལས་ལྕི་བ་ཉིད་མེད་པར་ཤེས་པར་བྱའི་སྡིག་པ་མེད་པར་ནི་མ་ཡིན་ཏེ། དེ་ལ་ལྕིད་ཉིད་མེད་
[392a.3]པའི་ཕྱིར་རོ། །འོན་ཏེ་ཁྱོད་ཀྱི་ཕྱོགས་ལ་ཡང་སྟོང་པ་ཉིད་བསྒོམ་པ་ལས་སྲེད་པ་འཆད་པར་འགྱུར་མོད་ཀྱི། ཐར་པ་ཇི་ལྟར་འགྱུར་ཞེ་ན། འདི་ནི་བསམ་པར་མི་རིགས་པ་ཁོ་ན་སྟེ། ལོག་ཤེས་དང་ནི་དེ་ལས་བྱུང་། །སྲེད་དང་སེམས་པའི་དབང་དག་གིས། །དམན་ནས་འགྲོ་བ་སྐྱེ་བ་མིན། །དེ་
[392a.4]ཕྱིར་དེ་བཅད་སྐྱེ་མི་འགྱུར། །དེ་དག་ཙམ་ལས་འབྱུང་བའི་ཕྱིར། །སྐྱེ་ལ་དེ་དག་ནུས་ཉིད་ཕྱིར། །སེམས་པ་དེ་དག་ཡང་ཉིད་ལས། །མིན་ཕྱིར་ཚང་བ་སྐྱེ་རྒྱུ་ཡིན། །ཞེས་བྱ་བ་ལ། ལོག་པའི་ཤེས་པ་ནི་སྡུག་བསྔལ་བ་ལ་བདེ་བའི་བློ་སྟེ། ལོག་པའི་ཤེས་པ་དེ་ལས་འབྱུང་བ་ནི་སྲེད་པའོ། །
[392a.5]དེ་དག་སེམས་པའི་དབང་གིས་དམན་པའི་གནས་སུ་འགྲོ་བར་སྐྱེ་བ་ཡིན་ནོ། །གང་གི་ཕྱིར་སྲེད་པ་དང་ལོག་པའི་ཤེས་པ་དེ་གཅོད་པ་གང་ཡིན་པ་ད་ནི་ཆགས་པ་དང་བྲལ་བར་གྱུར་ནས་སླར་སྐྱེ་བ་མ་ཡིན་ནོ། །གང་ཕྱིར་ལོག་པའི་ཤེས་པ་དང་སྲེད་པ་དང་སེམས་པ་དེ་དག་ཉིད་ལ་སྐྱེ་བའི་ནུས་
[392a.6]པ་ཡོད་པ་ཡིན་ཏེ། དེ་དག་ཁོ་ན་ལས་སྐྱེ་བ་སྲིད་པར་འགྱུར་བའི་ཕྱིར་རོ། །འདི་ལྟར་སྲིད་པའི་དབང་གིས་ཡུལ་གཞན་ཐོབ་པར་སྣང་བ་ཡིན་ནོ། །སྐྱེ་བའི་རྒྱུའི་ལུས་ཀྱང་མ་ཡིན་ནམ། དེས་ཇི་ལྟར་སྲེད་པ་ཙམ་ལས་སྐྱེ་བར་འགྱུར་བ་ཡིན་ཞེ་ན། དེ་ནི་བདེན་པ་མ་ཡིན་ཏེ། །གང་གི་ཕྱིར་ལོག་པའི་ཤེས་པ་
[392a.7]དང་། དེ་ལས་བྱུང་བའི་སྲེད་པའི་ངོ་བོ་ཉིད་ཀྱིས་སེམས་པ་དེ་དག་ཁོ་ན་ལས་ཡིན་པའི་ཕྱིར་ཏེ། སྔོན་གྱི་སེམས་སྦྱིན་པ་ལ་སོགས་པའི་མཚན་ཉིད་ཅན་ནི་ལས་ཡིན་པའི་ཕྱིར་དེས་འདུ་བྱེད་ཉེ་བར་ལེན་པར་བྱེད་དོ། །སྐྱེ་བ་གཞན་ལེན་པར་བྱེད་པའི་སེམས་པ་ནི། དངོས་སུ་རྒྱུ་མ་ཡིན་ཏེ། དེའི་
[392b]
[392b.1]དེ་མ་ཐག་ཏུ་སྐྱེ་བ་འབྱུང་བར་མི་འགྱུར་བའི་ཕྱིར་རོ། །དབང་བསྐུར་བ་ལ་ཡང་དེ་དག་གཉིས་ཡོད་པའི་ཕྱིར། སྐྱེ་བའི་རྒྱུ་ཡོངས་སུ་ཚང་བས་གྲོལ་བ་མ་ཡིན་ནོ། །སྔོན་གྱི་ལས་ནི་རྒྱུའི་རྒྱུ་ཡིན་པའི་ཕྱིར། ཉེ་བར་བཏགས་ནས་རྒྱུ་ཡིན་གྱི། དངོས་ཀྱི་རྒྱུ་ནི་མ་ཡིན་ཏེ། འོན་ཏེ་ཡང་། འགྲོ་དང་རྟོག་པའི་
[392b.2]བྱེད་བརྟེན་ནི། །དེ་དག་མ་མཐོང་བ་ལས་ཡིན། །མ་མཐོང་འཇིག་ཕྱིར་འགྲོ་བ་མེད། །དེ་འདུ་བྱེད་པའི་སེམས་པ་མིན། །ཞེས་བྱ་བ་ལ། འགྲོ་བ་སྟེ་འཇུག་པ་དང་རྟོག་པ་དེ་ཤེས་པའི་བྱེད་པ་ནི་ལག་པ་ལ་སོགས་པ་དང་། མིག་ལ་སོགས་པ་རིམ་པ་བཞིན་དུ་བརྟེན་པ་ཡིན་ནོ། །བྱེད་པ་དེ་དག་མ་མཐོང་
[392b.3]བའི་ལས་ལས་འབྱུང་བ་སྟེ། དབང་བསྐུར་བ་ཡང་མ་མཐོང་བ་འཇིག་པའི་ཕྱིར། སྐྱེ་བ་གཞན་དུ་འགྲོ་བ་མ་ཡིན་ནོ། །དེ་བས་ན་དེའི་འདུ་བྱེད་དེ། ལས་ཀྱི་འདུ་བྱེད་དགེ་བ་བཅུ་དང་མི་དགེ་བ་རྣམ་པ་བཅུ་ཁོ་ན་སེམས་པའི་ངོ་བོ་ཉིད་དེ་མེད་པར་འགྱུར་རོ། །དགེ་བ་དང་མི་དགེ་བའི་ལས་དེ་དག་ཀྱང་
[392b.4]དབང་བསྐུར་བས་འཇིག་པའི་ཕྱིར་ཡང་སྲིད་པར་འཇུག་པ་མ་ཡིན་ནོ་ཞེ་ན། དེ་ནི་མི་བདེན་ཏེ། འདིའི་དོན་མ་གྲུབ་པའི་ཕྱིར་རོ། །བྱེད་པ་སྐྱེད་ཕྱིར་ཡོད་མེད་ཀྱི། །རྗེས་སུ་འཇུག་པས་བླའི་ནུས་པ། །མཐོང་བ་ཡིན་གྱི་གཞན་གྱིས་མིན། །དེ་ཡོད་དེ་དག་ཅི་སྟེ་འགྲོ། །ཞེས་བྱ་བ་ལ། རྗེས་སུ་
[392b.5]འགྲོ་བ་དང་ལྡོག་པའི་རྗེས་སུ་འཇུག་པའི་བློས། མིག་ལ་སོགས་པའི་བྱེད་པ་རྣམས་སྐྱེད་པར་ནུས་པ་ངེས་པ་ཡིན་གྱི། བློ་དང་བྲལ་བའི་ལས་སྔོན་དུ་བྱས་པའི་ནུས་པ་གཞན་ནི་མ་ཡིན་ནོ། །འཆི་བའི་དུས་ཀྱི་བློ་དེ་ནི་དབང་བསྐུར་བ་ལ་ཡང་ཡོད་དོ། །མིག་ལ་སོགས་པ་དེ་དག་ལས་ཀྱི་རྗེས་སུ་
[392b.6]འགྲོ་བར་ཅི་སྟེ་མི་འགྱུར་ཏེ། འདི་ལྟར་མིག་ལ་སོགས་པ་སེམས་པས་བྱིན་གྱིས་བརླབས་ནས། རིགས་མཐུན་པ་ཅན་གྱི་བྱེད་པ་རྣམས་མཐོང་བ་ཡིད་ལ་དབང་བསྐུར་བ་ལ་ཡང་། མ་རིག་པ་དང་སྲེད་པ་དང་ལྡན་པའི་བློ་ཡོད་པའི་ཕྱིར་སྐྱེ་བ་གཞན་ཆད་པ་ནི་མ་ཡིན་ནོ། །འོན་ཏེ་དབང་གིས་ཉེ་བར་
[392b.7]བཅོམ་པའི་མིག་ལ་སོགས་པའི་བློ་ཡིན་པའི་ཕྱིར་སྐྱེ་བ་གཞན་དུ་འབྱུང་བ་མ་ཡིན་ནོ་ཞེ་ན། དེ་ལྟ་ན་ནི། དེ་རྣམས་ནུས་མེད་དབང་ལ་སོགས། །དེ་མ་ཐག་ཏུ་དེ་དག་གི །འཛིན་བསྐུལ་འཁྲུལ་དང་འགོག་པ་དང་། །སེམས་པའི་དབང་གིས་འགྱུར་མ་ཡིན། །ཞེས་བྱ་བ་ལ་གལ་ཏེ་བློ་ལ་སོགས་པ་དབང་
[393a]
[393a.1]གིས་བཅོམ་པ་ཡིན་ན། སྐྱེ་བར་ནུས་པ་མ་ཡིན་ཏེ། དེའི་ཚེ་དབང་བསྐུར་བ་དེའི་དེ་མ་ཐག་པ་ཉིད་དུ་བློ་བཅོམ་པའི་ཕྱིར། ཡུལ་ལ་རང་གི་འདོད་པས་འཇུག་པའི་སེམས་འཛིན་པ་དང་། མངོན་པར་འདོད་པའི་ཡུལ་ལ་ངེས་པར་འཇུག་པས་བསྐུལ་བ་དང་འཁྲུལ་པ་སྟེ། འཁྲུལ་པར་
[393a.2]གྱུར་པ་ཉིད་དང་། འགོག་པ་སྟེ་འཇིག་པ་དེ་དག་མེད་པར་འགྱུར་ཏེ། །དེ་དག་སེམས་དང་འབྲེལ་པའི་ཕྱིར་དང་། སེམས་ལ་སོགས་པ་དེ་རྣམས་དབང་བསྐུར་བའི་མཐུས་གསལ་བར་འགྱུར་རོ། །དེ་ལྟར་གྱུར་ན་ནི་དབང་གིས་དེ་མ་ཐག་ཏུ་ཆད་པར་འགྱུར་རོ། །འོན་ཏེ་མིག་ལ་སོགས་པ་
[393a.3]རྣམས་ཤི་བའི་རྗེས་ལ་ནུས་པ་མེད་པར་འགྱུར་ཏེ། དེ་དག་ཡོངས་སུ་གྱུར་པའི་ཁྱད་པར་ལ་ལྟོས་པའི་ཕྱིར་རོ་ཞེ་ན། དེ་ནི་མ་ཡིན་ཏེ། གལ་ཏེ་དབང་གིས་དེ་མ་ཐག་པར་དབང་གི་མཐུས་ཆད་པར་མི་འགྱུར་ན་ནི་ཡོངས་སུ་གྱུར་པ་ལས་ཕྱིས་ནུས་པ་མེད་པར་འགྱུར་རོ་ཞེས་བྱ་བ་འདི་ལ་ཚད་མ་མེད་
[393a.4]དོ། །འོན་ཏེ་དེ་ཚེ་བློ་མེད་ཕྱིར། །མི་འགྱུར་དྲི་མ་རྣམས་ཀྱི་བློ། །མཚམས་སྦྱོར་དེ་རྣམས་ནུས་མེད་ན། །གསོན་པ་ཉིད་ཀྱིའང་ནུས་མེད་འགྱུར། །ཞེས་བྱ་བ་ལ། དེའི་ཚེ་སྟེ་འཆི་བའི་དུས་ན་བློ་ཉིད་མེད་པའི་ཕྱིར་བྱེད་པ་རྣམས་ཡོད་པར་མི་འགྱུར་ཏེ། འདི་ལྟར་དེའི་ཚེ་མཚམས་སྦྱོར་བ་དང་། བློ་དང་
[393a.5]བྲལ་བར་བྱེད་པ་དང་སེམས་པ་མེད་པས་སླར་སྐྱེ་བ་མེད་པར་འགྱུར་བ་མ་ཡིན་ནམ་ཞེ་ན། བློ་དེ་འདོད་ཆགས་ལ་སོགས་པའི་དྲི་མ་རྣམས་ཀྱིས་མཚམས་སྦྱོར་བ་མ་ཡིན་ནམ། དབང་བསྐུར་བ་ལ་དྲི་མ་ཡོད་པའི་བློ་བཅོམ་པ་ནི་མ་ཡིན་ནོ། །འོན་ཏེ་དབང་བསྐུར་བས་འདོད་ཆགས་ལ་སོགས་པ་བཅོམ་པའི་
[393a.6]ཕྱིར་བློ་སྐྱེད་པར་མི་ནུས་སོ་ཞེ་ན་མ་ཡིན་ཏེ་དེའི་ཚེ་འདོད་ཆགས་ལ་སོགས་པ་དེ་རྣམས་ནུས་པ་མེད་ན་ནི། གསོན་པ་ཉིད་ཀྱི་དྲི་མ་རྣམས་ཀྱང་ནུས་པ་མེད་པར་འགྱུར་བ་དེའི་ཕྱིར་དབང་བསྐུར་བའི་རྗེས་ཐོགས་ཁོ་ནར་གྲོལ་བར་འགྱུར་རོ། །འོན་ཏེ་དབང་བསྐུར་བས་འདོད་ཆགས་ལ་སོགས་པའི་དྲི་མ་མེད་ཀྱི།
[393a.7]འོན་ཀྱང་ཡོངས་སུ་དག་པའི་ཡེ་ཤེས་པ་ཡོད་དོ་ཞེ་ན། དེ་ནི་མ་ཡིན་ཏེ། འགྲིབ་དང་ཕུལ་བྱུང་ཕྱིར་གཉེན་པོ། །དང་ནི་རང་ཕྱོགས་འཕེལ་བ་ན། །རང་གི་ས་བོན་རྒྱུ་ཅན་སྐྱོན། །དབང་བསྐུར་བ་ཡང་བཟློག་པ་མེད། །ཅེས་བྱ་བ་ལ། རང་གི་ས་བོན་ལས་བྱུང་བ་ཅན་གྱི། སྐྱོན་རྣམས་དབང་བསྐུར་བའི་སྐྱེ་བོ་
[393b]
[393b.1]ལ་ཡང་སྐྱེ་བར་འགྱུར་རོ། །རང་གི་ས་བོན་ལས་བྱུང་བའི་སྐྱོན་དུ་ཇི་ལྟར་ཤེས་ཤེ་ན། འགྲིབ་པ་དང་ཕུལ་དུ་བྱུང་བའི་ཕྱིར་ཏེ། གཉེན་པོའི་ཕྱོགས་བདག་མེད་པ་འཕེལ་བ་ན་འགྲིབ་པའི་ཕྱིར་དང་། རང་གི་ཕྱོགས་ཚུལ་བཞིན་མ་ཡིན་པ་ཡིད་ལ་བྱེད་པ་འཕེལ་ན། ཕུལ་དུ་བྱུང་བའི་ཕྱིར། དེ་ལྟ་བུར་གྱུར་པའི་
[393b.2]སྐྱོན་རྣམས་དབང་བསྐུར་བ་ལ་ཡང་བཀག་པ་མེད་པ་ཉིད་ཡིན་ན། ཇི་ལྟར་ཚེ་འདི་ཉིད་དང་གཞན་ལ་འདི་དག་གྲོལ་བར་འགྱུར། གལ་ཏེ་བདག་མེད་པ་མཐོང་བ་ན། གང་ཞིག་གྲོལ་བར་འགྱུར་ཏེ། སྐྱེས་བུ་འདོད་ཆགས་ལ་སོགས་པའི་སྐྱོན་གྱིས་བཅོམ་པ་གང་གི་ཚེ་གང་ཡང་རུང་བས་
[393b.3]དག་པར་འགྱུར་བ་མ་ཡིན་ནམ། དེའི་ཚེ་གྲོལ་བར་འགྱུར་རོ། །འདི་ལྟར་འཆིང་བ་ཞིག་པ་ནི་གྲོལ་བ་སྟེ། བདག་མེད་པ་ལ་ནི་གང་ཞིག་བཅིངས་པ་ཉིད་དེ་དེ་གྲོལ་བར་མི་འགྱུར་ཞིང་། མི་རྟག་པ་ཉིད་ཀྱིས་གཞན་གྲོལ་བ་ཐོབ་པ་ཡིན་ནོ་ཞེ་ན། དེ་ནི་མ་ཡིན་ཏེ། གང་ཞིག་དག་པ་དེ་
[393b.4]ལས་གཞན་པའི་མྱ་ངན་ལས་འདས་པ་མེད་དོ། །འོ་ན་སྒྲོན་མའི་གསལ་བ་ཞེས་ཐ་སྙད་འདོགས་པ་མ་ཡིན་ནམ་ཞེ་ན། དེ་ནི་མ་ཡིན་ཏེ། སངས་རྒྱས་པའི་ཕྱོགས་ལ་ཚིག་ཏུ་སྦྱར་བ་ཙམ་ཉིད་འདི་འཐད་པ་མ་ཡིན་ཏེ། གང་མ་བཅིངས་པ་དེ་གྲོལ་བར་འགྱུར་ལ། དེ་ཡང་དཔེས་སྒྲུབ་
[393b.5]པ་ཡིན་ནོ། །བདག་ཏུ་སྨྲ་བ་ལ་ནི་བཅིང་བ་དང་། གྲོལ་བ་ཉིད་དུ་མི་འཐད་དེ། ཚིག་ཏུ་སྦྱར་བ་ཙམ་གྱིས་བསྒྲུབས་པ་ནི་ཅི་ཡང་མ་ཡིན་ཞིང་། གཙོ་བོའི་དངོས་པོ་མི་འཐད་པའི་ཕྱིར་རོ། །བདག་མྱ་ངན་ལས་འདས་པའི་དཔེ་ནི་ཡོད་པ་མ་ཡིན་ཏེ། དེ་ཉིད་ཀྱི་ཕྱིར་སྨྲས་པ། རྟག་པ་ལྟོས་པ་མེད་པའི་
[393b.6]ཕྱིར། །རིམ་གྱིས་སྐྱེ་བ་འགལ་བ་མིན། །བྱེད་དང་བྱེད་མིན་དུས་དག་ཏུ། །འདྲ་བ་ཡི་ནི་བདག་ཉིད་ཡིན། །ཞེས་བྱ་བ་ལ། གནས་སྐབས་ཐ་དད་ན་ནི་བདག་གི་གྲོལ་བ་ཉིད་མ་དག་པའི་དུས་སུ་ཡོད་པ་དག་པར་འགྱུར་ཏེ། རིམ་གྱིས་སྐྱེ་བའི་བདེ་བ་ལ་སོགས་པ་རྟག་པ་ལ་འགལ་བར་འགྱུར་
[393b.7]རོ། །བདག་རྟག་པ་ནི་ལྟོས་པ་མེད་པའི་ཕྱིར་བདེ་བ་ལ་སོགས་པའི་གནས་སྐབས་ཅིག་ཅར་ཡོད་པར་ཐལ་བར་འགྱུར་རོ་ཞེས་བསྟན་ཟིན་ཏོ། །གཞན་ཡང་བྱ་བ་བྱེད་པ་དང་ཡང་འགལ་ཏེ། གང་ཞེ་ན། བྱེད་པ་དང་མི་བྱེད་པའི་གནས་སྐབས་དག་འདྲ་བའི་བདག་ཉིད་ཡིན་པའི་ཕྱིར་རོ་ཞེས་
[394a]
[394a.1]བསྟན་ཏོ། །རྒྱུ་དང་འབྲས་བུ་གཅིག་ཉིད་ཀྱང་། །དེ་ལས་དེ་དག་ལོག་ན་ནི། །བྱེད་པ་ཟ་བ་པོ་ཉམས་ཤིང་། ནུས་པ་ཉིད་ནི་འགྲུབ་མི་འགྱུར། །ཞེས་བྱ་བ་ལ། གནས་སྐབས་དང་སྐྱེས་བུ་དག་དེའི་བདག་ཉིད་དུ་གྱུར་ན། རྒྱུ་སྔོན་གྱི་ལས་དང་། འབྲས་བུ་བདེ་བ་ལ་སོགས་པ་
[394a.2]དེ་དག་གཅིག་པ་ཐོབ་པར་འགྱུར་ཏེ། བདག་གཅིག་པའི་ངོ་བོ་ཉིད་ཡིན་པའི་ཕྱིར་བདག་གི་རང་བཞིན་ནོ། །དེ་ཡང་འགལ་བ་ཡིན་ནོ། །འོན་ཏེ་ཐ་དད་ན་ནི། དེའི་ཚེ་བདག་དེ་ལ་རྒྱུ་དང་འབྲས་བུ་དེ་དག་གི་འདི་བྱེད་པ་པོ་མ་ཡིན་ཞིང་། ཟ་བ་པོ་ཡང་མ་ཡིན་ཏེ། བྱེད་པ་དང་ཟ་བར་འབྲེལ་པ་མེད་
[394a.3]པའི་ཕྱིར། གཞན་གྱི་བདག་བཞིན་ནོ། །ཉམས་སུ་མྱོང་བ་ལས་ཀྱང་འབྲེལ་བ་མ་ཡིན་ཏེ། བདག་གཞན་བཞིན་ནོ། །འདི་ལྟར་རྣལ་འབྱོར་པས་བྱེད་པ་དང་། ལོངས་སྤྱོད་འཛིན་པའི་ཕྱིར། བྱེད་པ་པོ་དང་ཟ་བ་པོ་ཐལ་བར་འགྱུར་རོ། །འོན་ཏེ་འཕྲོད་པ་འདུ་བའི་འབྲེལ་པ་ཉིད་ཟ་བ་པོ་
[394a.4]ཉིད་དང་། བྱེད་པ་པོ་ཉིད་དེ་བྱེད་པ་དང་། ལོངས་སྤྱོད་རྒྱུ་དང་། འབྲས་བུའི་དངོས་པོ་ཡིན་པས་བདག་བྱེད་པ་པོ་དང་ཟ་བ་པོར་འགྱུར་རོ་ཞེ་ན། དེ་ནི་མ་ཡིན་ཏེ། བདག་དེའི་ནུས་པ་མ་གྲུབ་པོ་ཞེས་བསྟན་ཏོ། །འོ་ན་སྐད་ཅིག་མ་ཡང་དྲན་པ་དང་ལོངས་སྤྱོད་པ་ལ་སོགས་པ་མེད་པར་
[394a.5]འགྱུར་ཏེ། གཅིག་ཏུ་ཉམས་སུ་མྱོང་བ་མེད་པའི་ཕྱིར་རོ་ཞེ་ན། དེ་ནི་བདེན་པ་མ་ཡིན་ཏེ། གཞན་པ་དྲན་དང་ལོངས་སྤྱོད་སོགས། །ཐལ་བའང་གནོད་པ་ཅན་ཡིན་ཏེ། །དེ་ཡིས་གང་ལ་དྲན་མེད་ཕྱིར། །ཉམས་སུ་མྱོང་ལས་དྲན་པ་འབྱུང་། །ཞེས་བྱ་བ་ལ། བདག་མེད་པ་དང་འབྲེལ་པའི་
[394a.6]སྐྱོན་གང་ཡིན་པ་ཉམས་སུ་མྱོང་བའི་ཤེས་པ་ཡང་གཞན་ལ་དྲན་པ་ཡང་གཞན་ཡིན་ན། དེ་ཇི་ལྟར་ཉམས་སུ་མྱོང་བ་ལས། གཞན་གྱིས་དྲན་པ་དང་། འདི་ལྟར་གང་གིས་དགེ་བ་ལ་སོགས་པའི་ལས་བྱས་པ་དེ་དེ་ཉིད་ཀྱི་ཚེ་ཞིག་པའི་ཕྱིར་བྱས་པ་ཉམས་པར་འགྱུར་བ་དང་གང་གིས་འབྲས་
[394a.7]བུ་ལ་ཉེ་བར་སྤྱོད་པ་དེ་གཞན་ཡིན་པའི་ཕྱིར། མ་བྱས་པ་དང་ཕྲད་པས་སྐྱོན་དེ་རྣམས་དང་གང་ལ་ཡང་གནོད་པ་ཅན་མ་ཡིན་ནོ། །གང་གིས་ཉམས་སུ་མྱོང་བར་གྱུར་པ་དེ་ཉིད་ཀྱི་དྲན་པ་མེད་པའི་ཕྱིར། དྲན་པ་པོ་གང་གིས་ཀྱང་དྲན་པ་མ་ཡིན་ཏེ་མེད་པ་ཉིད་ཀྱི་ཕྱིར་རོ། །ལོངས་སྤྱོད་པ་
[394b]
[394b.1]མེད་དེ་ལོངས་སྤྱོད་པ་པོ་མེད་པའི་ཕྱིར་རོ། །འོན་ཀྱང་དྲན་པ་ཉིད་ལ་དྲན་པ་པོ་དང་། དྲན་པ་པོའི་ཡུལ་ཞེས་བྱ་བ་སྟེ། དེ་བཞིན་དུ་བདེ་བ་ཉིད་ལ་ལོངས་སྤྱོད་པར་བྱ་བ་དང་ལོངས་སྤྱོད་པ་པོ་དང་། ལོངས་སྤྱོད་ཅེས་བྱའོ། །དེའི་ཕྱིར་ལོངས་སྤྱོད་པ་པོ་རྟག་པ་མ་ཡིན་ལ། དྲན་པར་བྱ་བ་དེ་ལས་དྲན་པ་འབྱུང་བ་ནི་ཉམས་སུ་མྱང་བའི་
[394b.2]དབང་གིས་སོ། །འོན་ཏེ་གཞན་གྱི་རྒྱུད་ལ་འཇུག་པའི་ཉམས་སུ་མྱོང་བས་དྲན་པ་ཅི་སྟེ་མི་སྐྱེ་ཞིང་། གཞན་གྱི་ལས་ལས་ཀྱང་ལོངས་སྤྱོད་པར་ཇི་ལྟར་མི་འགྱུར་ཞེ་ན། རྒྱུ་དང་འབྲས་བུའི་དངོས་པོར་ངེས་པའི་ཕྱིར་རོ། །འདི་ལྟར་རྒྱ་སྐྱེགས་ཀྱིས་བསྒྱུར་བའི་ས་བོན་དེ་ཉིད་རས་བལ་གྱི་མེ་ཏོག་ལ་སོགས་པ་དང་།
[394b.3]རྒྱུ་དང་འབྲས་བུར་ངེས་པས་དམར་པོར་སྣང་བར་འགྱུར་གྱི། དེ་ལ་གཅིག་པ་ཉིད་མ་ཡིན་ཏེ། མངོན་སུམ་དང་རྗེས་སུ་དཔག་པས་ཐ་དད་པར་གྲུབ་པའི་ཕྱིར་རོ། །དེ་བཞིན་དུ་རྒྱུ་དང་འབྲས་བུའི་དངོས་པོར་ངེས་པས་དྲན་པ་དང་ལས་དང་འབྲས་བུར་འབྲེལ་པ་རྒྱུད་དེ་ཉིད་ལ་ཡིན་ནོ། །བདག་ཏུ་སྨྲས་པ་གཞན་གྱིས་
[394b.4]ཉམས་སུ་མྱོང་བ་གཞན་གྱིས་དྲན་པར་ཅིའི་ཕྱིར་མི་འགྱུར། བདག་ཐ་དད་པའི་ཕྱིར་རོ། །ཐ་དད་པ་དེ་ཉིད་ཀྱང་ཅིས་ཤེས། དྲན་པ་ལ་སོགས་པ་མེད་པའི་ཕྱིར་རོ་ཞེ་ན། མ་ཡིན་ཏེ། ཕན་ཚུན་བརྟེན་པར་ཐལ་བར་འགྱུར་བའི་ཕྱིར་རོ། །གཞན་ཡང་ཇི་ལྟར་བདག་ཁྱད་པར་མེད་ཀྱང་གཞན་ལས་ཀྱང་དྲན་པ་སྐྱེ་བ་
[394b.5]མ་ཡིན་པ་དེ་བཞིན་དུ་ཤེས་པ་ཁྱད་པར་མེད་ཀྱང་རྒྱུད་གཞན་གྱིས་ཤེས་པས་དྲན་པ་ནི་མ་ཡིན་ནོ། །གཞན་ཡང་སེམས་པའི་རྒྱུ་ཐ་དད་པས་ཐ་དད་པའང་སྲིད་དེ་བདག་ལ་ནི་རྒྱུ་མེད་པའི་ཕྱིར་ཅི་ཡིས་ཐ་དད་པར་འགྱུར། འོ་ན་བདག་མེད་ན་བདག་གིས་མཐོང་བ་དང་དྲན་པའོ་ཞེས་བྱ་བའི་བློ་གཅིག་པར་ཇི་ལྟར་འགྱུར་ཞེ་ན།
[394b.6]བདག་ལ་ཡང་སྐྱོན་ནི་འདི་མཚུངས་པ་མ་ཡིན་ནམ། བདག་ནི་དྲན་པ་དང་མཐོང་བའི་བྱ་བ་གཅིག་བྱེད་པར་ཚད་མ་གང་གིས་ཤེས། མངོན་སུམ་གྱིས་ཤེས་སོ་ཞེ་ན། དེ་ནི་སྔ་མ་དང་ཕྱི་མར་མི་འཇུག་གོ་ཞེས་བསྟན་ཏོ། །མངོན་སུམ་མེད་པ་ཉིད་རྗེས་སུ་དཔག་པ་འཇུག་པ་ནི་མ་ཡིན་ནོ། །གལ་ཏེ་སྔར་ཉམས་སུ་
[394b.7]མྱོང་བའི་ངོ་བོ་ཉིད་ཀྱི་བདག་ཉིད་ཀྱིས་བདག་རིག་ན་ནི་སྔར་ཉམས་སུ་མྱོང་བ་ཉིད་མྱོང་བར་མི་འགྱུར་ཏེ། སྔ་མ་ཉིད་རིག་པ་དེ་ལ་མེད་པར་འགྱུར་རོ། །མྱོང་བར་གྱུར་པ་ནི་སྔ་མ་ཉིད་དུ་མི་རུང་བའི་ཕྱིར་དང་། དྲན་པ་ལས་ཀྱང་སྔ་མ་ཞེས་བྱ་བར་མི་རུང་སྟེ། དེ་ཚད་མ་མ་ཡིན་པའི་ཕྱིར་རོ། །འོན་ཏེ་སྔར་ཡུལ་དུ་
[395a]
[395a.1]བྱས་པ་དྲན་ནོ་ཞེ་ན། འོ་ན་ནི་གྲོགས་དག་ཉམས་སུ་མྱོང་བ་སྔ་མ་ཐམས་ཅད་དྲན་པར་འགྱུར་ཞིང་། བདག་གིས་ནི་སྔ་མ་དང་ཕྱི་མ་དཔྱོད་པར་བྱེད་པ་མ་ཡིན་ཏེ། དེས་ན་ཐོག་མ་མེད་པའི་བག་ཆགས་ཀྱི་དབང་གིས་དེ་བདག་ཡིན་ནོ་སྙམ་པའི་ཤེས་པ་སྐྱེའི་བདག་ཡོད་པ་ནི་མ་ཡིན་ནོ། །འོ་ན་
[395a.2]ཇི་ལྟར་བདག་མེད་པར་འཁོར་བར་འཇུག་སྟེ། བདག་མེད་ན་བདག་ཏུ་ལྟ་བ་མེད་པའི་ཕྱིར་དྲན་པ་ཡང་སྔ་མ་དང་ཕྱི་མའི་རང་བཞིན་དང་བྲལ་བའི་ཕྱིར། གཅིག་པ་ཉིད་དང་རྟག་པ་ཉིད་དུ་འཛིན་པར་མི་ནུས་ན། དེ་ཇི་ལྟར་འཁོར་བ་ཡིན་ཞེ་ན། འདིར་སྨྲས་པ། དོན་དམ་པར་ན་འཁོར་བ་ཡོད་པ་མ་ཡིན་ཏེ། རང་ལས་
[395a.3]རང་གི་ངོ་བོ་རྟོགས། །ཞེས་བསྟན་ཏོ། །དེ་ལྟ་ན་ཡང་ཐ་སྙད་ཙམ་དུ་འཁོར་བ་ཡིན་ཏེ། འདི་ལྟར། བདེན་པ་བཞི་ལ་བརྟེན་པ་དང་། །བདེ་དང་ང་དང་བདག་གི་ཞེས། །བྱ་སོགས་ཡང་དག་མིན་བཅུ་དྲུག །སྒྲོ་བཏགས་ནས་ནི་ཡོངས་སུ་སྲེད། །དེ་ཉིད་ལ་ནི་དེ་འགལ་དོན། །དེ་ཉིད་རྣམ་པ་རྗེས་རྟོགས་ཅན། །ལེགས་བསྒོམས་
[395a.4]ཡང་དག་ལྟ་བ་ཡིས། །སྲེད་པ་རྗེས་འབྲང་བཅས་འཇོམས་བྱེད། །ཅེས་བྱ་བ་ལ། ཡོད་པ་མ་ཡིན་པར་གཞག་པ་ཉིད་འཁོར་བ་སྟེ། རང་གི་མཚན་ཉིད་ནི་མ་ཡིན་ནོ། །ཡང་དག་པ་མ་ཡིན་པ་ཡང་རྣམ་པ་བཅུ་དྲུག་སྟེ། སྒྲོ་བཏགས་པ་དེ་ལས་སྲེད་པ་དང་ལྡན་པའི་ལས་ལས་འཁོར་བར་མངོན་པར་ཞེན་པར་འགྱུར་ཏེ།
[395a.5]གཞན་དུ་ན་འཁོར་བ་ཡོད་པ་མ་ཡིན་ནོ། །མངོན་པའི་ང་རྒྱལ་ཞེན་པ་ཡང་རིག་པ་ལས་ཐ་དད་པ་འགའ་ཡང་ཡོད་པ་མ་ཡིན་ནོ། །གཅིག་ཏུ་འབྱུང་བའི་ཕྱག་རྒྱ་ཙམ་ཡིན་པའི་ཕྱིར་བརྟེན་པ་དང་བདེ་བ་དང་། ང་དང་བདག་གིའོ་སྙམ་པ་ནི་སྡུག་བསྔལ་གྱི་བདེན་པ་ལ་ཡང་དག་པ་མ་ཡིན་པའི་རྣམ་པའོ། །ཀུན་འབྱུང་གི་
[395a.6]བདེན་པ་ལ་རྒྱུ་མེད་པ་དང་ཀུན་འབྱུང་བ་མེད་པ་དང་རབ་ཏུ་སྐྱེ་བ་དང་རྐྱེན་མེད་པ་ཞེས་བྱ་བ་ཡིན་ནོ། །འགོག་པ་ལ་ནི་འགོག་པ་མེད་པ་དང་ཞི་བ་མེད་པ་དང་གྱ་ནོམ་པ་མེད་པ་དང་། ངེས་པར་འབྱུང་བ་མེད་པའོ། །ལམ་ལ་ནི་ལམ་མེད་པ་དང་རིགས་པ་མེད་པ་དང་སྒྲུབ་པ་མེད་པ་དང་ངེས་པར་མི་འབྱུང་བ་ཞེས་བྱ་བ་ཡིན་
[395a.7]ནོ། །རྣམ་པ་བཅུ་དྲུག་པོ་དེ་དག་ནི་ཡང་དག་པ་མ་ཡིན་པ་སྟེ། དེ་དག་ཏུ་སྒྲོ་བཏགས་ནས་བདེན་པ་བཞི་ལ་སྲེད་པ་དང་ལྡན་པར་འགྱུར་རོ། །བདེན་པ་བཞི་པོ་དེ་ཉིད་ལ་དག་པ་མ་ཡིན་པའི་རྣམ་པ་དང་འགལ་བ་དོན་དམ་པར་རྣམ་པ་རྗེས་སུ་རྟོགས་པ་ཅན་གྱི་ལྟ་བ་ལེགས་པར་གོམས་པར་བྱས་ན་ནི་སྲེད་པ་རྗེས་
[395b]
[395b.1]སུ་འབྲང་བ་དང་བཅས་པ་འཇོམས་ཏེ། སྲེད་པ་ཟད་པ་དེ་ལས་གྲོལ་བར་འགྱུར་རོ། །ལས་དང་ལུས་གནས་པ་མ་ཡིན་ནོ། །སྲེད་པ་མེད་པས་ཇི་ལྟར་ཐར་བར་འགྱུར་ཞེ་ན་སྨྲས་པ། ལས་དང་ལུས་དག་གནས་ན་ཡང་། །གཅིག་མེད་ཕྱིར་ན་རྒྱུ་གསུམ་ཅན། །སྐྱེ་བ་དག་ནི་མི་འབྱུང་སྟེ། །ས་བོན་མེད་པར་མྱུ་གུ་བཞིན། །
[395b.2]ཞེས་བྱ་བ་ལ། མ་རིག་པ་དང་། ལས་དང་། ལུས་ཀྱི་རྒྱུ་ཅན་གྱི་སྐྱེ་བ་ནི་མི་འབྱུང་སྟེ། ལས་དང་ལུས་གནས་ན་ཡང་སྲེད་པ་ཞེས་བྱ་བའི་རྒྱུ་གཅིག་མེད་པའི་ཕྱིར། དཔེར་ན་ས་བོན་མེད་ན་ས་ལ་སོགས་པ་ཡོད་ཀྱང་མྱུ་གུ་སྐྱེ་བ་མ་ཡིན་པ་བཞིན་ནོ། །འོན་ཏེ་ལས་དང་ལུས་དག་ལས་གཅིག་འགགས་ནས་ཐར་བར་འགྱུར་བ་
[395b.3]ཉིད་དེ། གང་ཞིག་ལས་ཟད་ན་ཐར་བར་འགྱུར་རོ་ཞེས་སྨྲས་སོ། །ལས་དང་ལུས་དག་སྤོང་མིན་ཏེ། །གཉེན་པོ་ཕྱོགས་ནི་མེད་ཕྱིར་དང་། །ནུས་མེད་ཕྱིར་རོ་སྲེད་པ་ནི། །ཡོད་ན་ཡང་ནི་འབྱུང་ཕྱིར་རོ། །ཞེས་བྱ་བ་ལ། སྲེད་པ་དང་བྲལ་བ་མ་ཡིན་པའི་གཉེན་པོ་གཞན་ལས་རང་ལུས་ཟད་པར་བྱེད་པ་མ་ཡིན་ཏེ། དབང་པོ་
[395b.4]ལ་སོགས་པའི་ཆོ་ག་ནི་སུན་ཕྱུང་ཟིན་ཏོ། །དེ་བས་ན་ལས་ཀྱི་གཉེན་པོ་མེད་པའི་ཕྱིར་ལས་དང་ལུས་དག་སྤོང་བར་བྱེད་མི་ནུས་ཏེ། གཉེན་པོ་ཡོད་ན་ཡང་ལས་མི་ཤེས་པའི་ཕྱིར་དེའི་གཉེན་པོ་ལ་འདྲིས་པར་མི་རུང་ཞིང་ལས་ཟད་པར་ཡང་མི་ནུས་པའི་ཕྱིར་སྤོང་བར་རིགས་པ་མ་ཡིན་ནོ། །ལས་བྱེད་པ་ནི་སྲེད་པ་
[395b.5]ཡིན་ཏེ། དེ་ལས་འདོད་ཆགས་ལ་སོགས་པ་ཚེགས་མེད་པ་ཉིད་དུ་འབྱུང་ངོ་། །དེས་ན་སྲེད་པ་ཡོད་ན་སླར་ཡང་འཁོར་བ་འབྱུང་ངོ་། །འོན་ཏེ་ལས་དང་སྲེད་པ་གཉི་ག་ཟད་པར་འགྱུར་རོ་ཞེ་ན། དེ་ནི་མ་ཡིན་ཏེ། གཉིས་ཟད་དོན་དུ་འབད་ན་ཡང་། །ལས་ཟད་ངལ་བ་དོན་མེད་འགྱུར། །ཞེས་བྱ་བ་ལ། སྲེད་པ་དང་
[395b.6]ལས་གཉིས་ཟད་པའི་དོན་དུ་འབད་ན་ཡང་། ལས་ཟད་པར་བྱ་བའི་ཕྱིར་ངལ་བ་ནི་དོན་མེད་པར་འགྱུར་ཏེ། སྲེད་པ་ཉིད་བཟློག་པར་བྱ་བ་བླའི། །ལས་ཀྱང་དགག་པར་བྱ་བ་ཁོ་ནའོ་ཞེ་ན་མ་ཡིན་ཏེ། གཉེན་པོའི་ཕྱོགས་མི་སྲིད་པའི་ཕྱིར་རོ་ཞེས་བསྟན་པས་སོ། །གཞན་ཡང་། འབྲས་བུ་སྣ་ཚོགས་མཐོང་བའི་ཕྱིར། །
[395b.7]ལས་ནུས་སྣ་ཚོགས་རྗེས་སུ་དཔོག །དེ་ཕྱིར་གདུང་བའི་ཉོན་མོངས་ནི། །གཅིག་གི་རང་བཞིན་ཟད་པ་མིན། །ཞེས་བྱ་བ་ལ། བདེ་བ་ལ་སོགས་པའི་འབྲས་བུ་རྣམ་པ་དུ་མ་ཅན་སྣ་ཚོགས་པ་མཐོང་བའི་ཕྱིར། ལས་ལ་སོགས་པའི་ནུས་པ་སྣ་ཚོགས་པར་ངེས་པར་བྱེད་དོ། །དེའི་ཕྱིར་འབྲས་བུ་གཅིག་གི་རྣམ་པ་
[396a]
[396a.1]ཅན་གདུང་བ་ལ་སོགས་པའི་ངོ་བོ་ལོངས་སྤྱོད་པས་ལས་ཟད་པར་ཅི་ལྟར་འགྱུར། གང་གི་ཕྱིར། རྣམ་འགས་དེ་བསྐྱེད་འབྲས་བུ་ནི། །ཆུང་གྱུར་རིགས་མི་མཐུན་ལྡན་མིན། །ཞེས་བྱ་བ་ལ་ལས་གང་ཞིག་གིས་དེའི་རིགས་ཀྱི་འབྲས་བུ་བྱ་བ་དེ་ནི་འབྲས་བུའི་ཆ་ཤས་ཙམ་ཉམས་སུ་
[396a.2]མྱོང་བའི་ཕྱིར་ལས་དེ་ལས་སྐྱེས་པའི་ཕྱིར། འབྲས་བུ་ཉིད་འབྲས་བུ་ཉམས་སུ་མྱོང་བས་ཟློག་པར་བྱེད་ཀྱི། དེ་དང་མི་མཐུན་པའི་འབྲས་བུ་སྐྱེ་བ་ནི་མ་ཡིན་ནོ། །འོན་ཏེ་ཡང་། དཀའ་ཐུབ་ཀྱི་ནི་ནུས་པ་ཡིས། །ནུས་པ་འདྲེ་ཞིང་ཟད་པའི་ཕྱིར། །ཉོན་མོངས་ཆ་ནི་གང་ཞིག་གིས། །ཉོན་མོངས་མ་ལུས་
[396a.3]སྤོང་བར་འགྱུར། །ཞེས་བྱ་བ་ནི། དཀའ་ཐུབ་ལ་ནུས་པ་ཡོད་པ་མ་ཡིན་ནམ། དེའི་ལས་ཀྱིས་ནུས་པ་རྣམས་འདྲེ་བ་སྟེ། འབྲས་བུ་མཚུངས་པར་སྟེར་བའོ། །ཟད་པ་ནི་བདག་ཉིད་ཐམས་ཅད་ཀྱིས་འཇིག་པའོ། །དེས་ན་ཉོན་མོངས་པའི་ཆ་འགའ་ཞིག་གིས་ལས་མ་ལུས་པ་སྤོང་བར་འགྱུར་རོ་ཞེ་ན།
[396a.4]དེ་ལ་ཡང་སྨྲས་པ། གལ་ཏེ་ཉོན་མོངས་ལས་དཀའ་ཐུབ། །དེ་གཞན་ཉོན་མོངས་ཉིད་ཡིན་ན། །དེ་ཡི་ལས་འབྲས་ཕྱིར་འདི་ལས། །ནུས་པའི་འདྲེ་བ་ལ་སོགས་མིན། །ཞེས་བྱ་བ་ལ། གལ་ཏེ་ཡོངས་སུ་གདུང་བ་ལས་གཞན་ཡིན་ན་ནི་དེའི་ཚེ་ཉོན་མོངས་པའི་ཆ་ལས་མ་ལུས་པའི་ལས་སྤོང་བར་
[396a.5]འགྱུར་ཏེ། ནུས་པ་འདྲེས་པའི་ཕྱོགས་ལའོ། །ཟད་པའི་ཕྱོགས་ལ་ནི་ཉོན་མོངས་པའི་མེད་པ་ཉིད་དུ་སྤོང་བ་ཡིན་ནོ། །འོན་ཏེ་ཉོན་མོངས་པའི་ངོ་བོ་ཉིད་དཀའ་ཐུབ་ཡིན་ན། འོ་ན་ནི་ཉོན་མོངས་པའི་ངོ་བོ་ཉིད་ཅན་དཀའ་ཐུབ་ལས་ཀྱི་འབྲས་བུ་ཡིན་པའི་ཕྱིར་དཀའ་ཐུབ་འདི་ལས་ཀྱི་ནུས་པ་མ་འདྲེ་བ་མ་ཡིན་པ་དང་། ཟད་
[396a.6]པར་ཡང་མི་འགྱུར་ཏེ། གྲང་བ་ཉི་མ་བསྟེན་པ་ཅན་གྱི་ཕྱུགས་ལ་སོགས་པ་རྣམས་ཀྱང་ལས་ཟད་པར་ཐལ་བར་འགྱུར་བའི་ཕྱིར་རོ། །འོན་ཏེ་དེ་ནི་ལས་ཀྱི་འབྲས་བུ་མ་ཡིན་ཏེ། འདོད་པས་འཇུག་པའི་ཕྱིར་རོ། །ལས་ཀྱི་འབྲས་བུ་དེ་ནི་འདོད་པ་དང་བྲལ་བར་སྐྱེ་བའོ་ཞེ་ན། དེ་ནི་མི་བདེན་ཏེ། འདོད་པས་རྒྱལ་པོ་ཐོབ་
[396a.7]པ་ལ་སོགས་པ་ལས་ཀྱི་འབྲས་བུར་མི་འགྱུར་རོ། །འོན་ཏེ་རྒྱལ་པོ་ལ་སོགས་པ་ལ་ཞེན་པ་མེད་པར་སྤོང་བར་འགྱུར་ལ་དམྱལ་བ་ལ་སོགས་པ་དབང་མེད་དུ་འབབ་པའི་ཕྱིར་དེ་ཉམས་སུ་མྱོང་བར་འགྱུར་བ་ཁོ་ནའོ། །དེ་བས་ན་གདུང་བ་ཉིད་ལ་དཀའ་ཐུབ་ཏུ་འདོད་དོ་ཞེ་ན། དེ་ལྟ་ན་ནི་དམྱལ་བའི་སྡུག་
[396b]
[396b.1]བསྔལ་ཡང་ཉམས་སུ་མྱོང་བར་འགྱུར་བ་ཁོ་ན་བྱེད་པ་ཇི་ལྟར་དཀའ་ཐུབ་ཀྱིས་དེ་ཟད་པར་འགྱུར། འོན་ཏེ་དཀའ་ཐུབ་ཀྱི་སྡུག་བསྔལ་ཡིན་པའི་ཕྱིར། སྐྲ་འབལ་བ་ལ་སོགས་པའི་དཀའ་ཐུབ་ཀྱི་སྡུག་བསྔལ་བ་ཉིད་ཀྱིས་དམྱལ་བ་ལ་སོགས་པའི་སྡུག་བསྔལ་སྤོང་བར་བྱེད་དེ། སྐྲ་འབལ་བ་ནི་ལས་བྱེད་པར་
[396b.2]འགྱུར་བའི་རྒྱུ་ཡིན་ནོ་ཞེས་བྱ་བ་ལ་ཚད་མ་མེད་པའི་ཕྱིར་ཏེ། སྡུག་བསྔལ་ཡིན་པའི་ཕྱིར་སྡུག་བསྔལ་གཞན་བཞིན་ནོ། །འོན་ཏེ་འདི་ནི་མ་ངེས་པའོ་ཞེ་ན། ཁྱོད་ཀྱིས་སྨྲས་པའི་ཚད་མ་དེ་ལ་མཚུངས་པ་ཉིད་དོ། །འོན་ཏེ་ལས་སྤོང་བར་བྱེད་པའི་དོན་དུ་འཇུག་པ་ཡོད་པའི་ཕྱིར་དང་། ཁྱེད་ལ་ཡང་ལས་ཟད་པར་ཡོད་པའི་ཕྱིར་
[396b.3]ཁས་བླངས་པ་ལ། ཇི་ལྟར་གནོད་པར་མི་འགྱུར་ཞེ་ན། འདིར་སྨྲས་པ། སྐྱེ་འདོད་སྐྱོན་ནི་བཅོམ་པའི་ཕྱིར། །གང་ཡང་སྐྱོན་ནི་འགལ་བ་ཅན། །དེ་སྐྱེས་ལས་ཀྱིས་ནུས་འགྱུར་གྱི། །ཇི་ལྟར་བྱས་པ་སྤོང་བར་འགྱུར། །ཞེས་བྱ་བ་ལ། ལས་ནི་སྤོང་བ་མ་ཡིན་ཏེ། བྱས་པ་འཇིག་པ་མེད་པའི་ཕྱིར་རོ། །འོ་ན་ཇི་ལྟར་
[396b.4]ལས་ཟད་པར་བརྗོད་ཅེ་ན། །འདིར་སྨྲས་པ། ལས་དེ་ནི་རྒྱུ་གཞན་ཡོད་པ་གང་གིས་འབྲས་བུ་སྟེར་བ་དེ་འདྲ་བ་ལ་དེ་འགལ་བ་ཅན་ཉེ་བ་ནི་མ་ཡིན་ནོ། །གང་ཡང་གདོན་མི་ཟ་བར་འབྲས་བུ་སྟེར་ནུས་པ་དེ་ནི་ངེས་པ་ཁོ་ནར་འབྲས་བུ་སྐྱེད་པར་བྱེད་དེ། དེའི་དོན་དུ་ཐུབ་པའི་སྐྱེ་བོ་འབད་པ་ནི་མ་ཡིན་ཏེ། དེ་ནི་སྟོབས་ཁོ་ནས་སྐྱེ་
[396b.5]བའི་ཕྱིར་རོ། །གང་ཡང་འདོད་ཆགས་ལ་སོགས་པ་དང་འགལ་བ་ཅན་བདག་མེད་པར་མཐོང་བ་ལ་སོགས་པ་དེ་ནི་དེ་ལས་སྐྱེས་པ་སྟེ། འདོད་ཆགས་ལ་སོགས་པའི་ཉེས་པ་ལས་སྐྱེད་པའི་མ་འོངས་པའི་ལས་ཟློག་པར་བྱེད་ནུས་པར་འགྱུར་གྱི། བྱས་ཟིན་པ་ནི་བདག་མེད་པར་མཐོང་བས་ཀྱང་སྤོང་བ་ནི་མ་ཡིན་ནོ། །འོ་ན་
[396b.6]ཇི་ལྟར་བྱས་ཟིན་པའི་ཉེས་པ་དང་ལས་ཇི་ལྟར་འཇིག་ཅེ་ན། སྐྱོན་རྣམས་སྐྱེས་པར་འགྱུར་བ་ལ་ནི་ལྡོག་པ་མེད་ཀྱི། འོན་ཀྱང་འབྱུང་བར་འགྱུར་བའི་སྐྱོན་རྣམས་ལས་འགོག་པ་ཡིན་ཏེ། དེ་ཡང་རྒྱུ་ཟད་པས་མི་སྐྱེ་བ་ཡིན་ནོ། །དེ་ནས་དེ་ཡིས་བྱས་པའི་ལས་མི་སྐྱེ་བའི་ཕྱིར། བྱས་པ་རྣམས་སྤང་བར་རིགས་པ་མ་ཡིན་ནོ། །ལྷན་
[396b.7]ཅིག་བྱེད་པ་མ་ཚང་བས་ཀྱང་འདོད་ཆགས་དང་བྲལ་བ་ལས་ནི་འབྲས་བུ་སྟེར་བ་མ་ཡིན་ནོ། །འོ་ན་ཇི་ལྟར་སྲེད་པ་བརྟེན་པར་གྱུར་ན། ལས་སླར་སྐྱེ་བར་འགྱུར་བ་དེ་བཞིན་དུ། ལས་ལ་བརྟེན་ན་ཡང་སྲེད་པ་འབྱུང་བར་མི་འགྱུར་བའི་ཕྱིར་གྲོལ་བར་མི་འགྱུར་རོ་ཞེ་ན། འདི་ནི་རིགས་པ་མ་ཡིན་ནོ། །ཞེས་སྨྲས་པ། ལས་ལས་སྐྱོན་བྱུང་མ་
[397a]
[397a.1]ཡིན་གྱི། །སྐྱོན་ལྡན་བྱེད་འགྱུར་ལྡོག་ལས་མིན། །ལོག་པའི་རྣམ་རྟོག་མེད་ལ་མིན། །བདེ་བ་ལས་ཀྱང་འདོད་མ་ཡིན། ཞེས་བྱ་བ་ལ། སྲེད་པ་ཡོད་ན་འབྲས་བུ་དོན་དུ་གཉེར་བ་རྣམས་ལས་བྱེད་པར་འགྱུར་གྱི། འདོད་ཆགས་ལ་སོགས་པའི་སྐྱོན་མེད་པ་ལས་འབྱུང་བ་ནི་མ་ཡིན་ནོ། །གང་ཆགས་པ་
[397a.2]དང་བྲལ་བ་དེ་ནི་སྲེད་པ་མེད་པས་ལས་བྱེད་པ་མ་ཡིན་ནོ། །འོན་ཏེ་དགེ་བའི་ལས་བདེ་བར་བྱེད་ནུས་པའི་ཕྱིར་བདེ་བ་ལ་རྗེས་སུ་ཆགས་པ་ཅན་གདོན་མི་ཟ་བར་འགྱུར་རོ་ཞེ་ན། བདག་དང་བདག་གིར་མངོན་པར་ཞེན་པ་ལོག་པའི་རྣམ་པར་རྟོག་པ་མེད་པར་ནི་བདེ་བ་ལས་ཀྱང་འདོད་པ་མ་ཡིན་པ་མ་ཡིན་ནམ། དེའི་ཕྱིར་འཇིག་
[397a.3]ཚོགས་ལ་ལྟ་བ་ཟད་པ་ཁོ་ནས་ཐར་བར་འགྱུར་གྱི། གཞན་དུ་ནི་མ་ཡིན་ནོ། །འཕགས་པའི་བདེན་པ་བཞི་སྟོན་པ་ཉིད་སྐྱོབ་པ་ཡིན་པ་དེའི་ཕྱིར་འཕགས་པའི་བདེན་པ་བཞི་སྟོན་པའི་མཚན་ཉིད་ཀྱི་སྐྱོབ་པ་ལས་བདེ་བར་གཤེགས་པ་ཉིད་ངེས་པ་ཡིན་ནོ། །འདིར་སྨྲས་པ། སྐྱོབ་ལས་དེ་ཉིད་དང་བརྟན་དང་། །མ་
[397a.4]ལུས་ཁྱད་པར་མཁྱེན་བསྒྲུབ་དང་། །རྟོགས་པའི་དོན་ཕྱིར་གཤེགས་པ་སྟེ། །ཕྱི་རོལ་སློབ་མའི་སློབ་ལྷག་ཕྱིར། །ཞེས་བྱ་བ་ལ། སྐྱོབ་པ་ལས་བཅོམ་ལྡན་འདས་བདེ་བར་གཤེགས་པ་ཉིད་དུ་ཤེས་པར་བྱ་སྟེ། བདེ་བར་གཤེགས་པ་དེ་ཡང་དེ་ཉིད་དང་། བརྟན་པ་དང་། མ་ལུས་པའི་ཁྱད་པར་མཁྱེན་པ་
[397a.5]སྟེ། རབ་ཏུ་མཛེས་པ་མཁྱེན་པ་ནི་དེ་ཁོ་ན་ཉིད་མཁྱེན་པའོ། །མཁྱེན་པས་སླར་མི་ལྡོག་པ་མཁྱེན་པ་ནི་བརྟན་པར་མཁྱེན་པ་སྟེ། བརྟན་པ་ནི་ཕྱིར་མི་ལྡོག་པའི་ཕྱིར་རོ། །ཁྱད་པར་མ་ལུས་པར་མཁྱེན་པ་ནི་རྣམ་པ་ཐམས་ཅད་མཁྱེན་པ་ཉིད་ཀྱི་མཁྱེན་པ་སྟེ། ལྷག་མ་མ་ལུས་པར་མཁྱེན་པའི་
[397a.6]ཕྱིར་རོ། །རྟོགས་པའི་དོན་གྱིས། གའི་སྐད་ཀྱི་དབྱིངས་ལས་གཤེགས་པར་བཤད་དེ། མཁྱེན་པ་དེ་བཅོམ་ལྡན་འདས་ལ་ཡོད་པའི་ཕྱིར་རོ། །འོ་ན་རྗེས་སུ་དཔག་པ་བརྒྱུད་པས་འདི་ཤེས་པ་ཡིན་ན། བཅོམ་ལྡན་འདས་ཇི་ལྟར་མངོན་སུམ་དུ་གཟིགས་པར་འགྱུར་ཞེ་ན། དེ་ལྟ་ན་ནི་གཞན་དག་གིས་ཀྱང་ཡོངས་སུ་ཤེས་
[397a.7]པར་འགྱུར་བ་མ་ཡིན་ནམ། རྗེས་སུ་དཔག་པ་ནི་ལ་ལ་ཡོད་ཀྱི། ལ་ལ་མེད་པའི་ཆ་ཡོད་པ་མ་ཡིན་པའི་ཕྱིར་རོ། །བཅོམ་ལྡན་འདས་ཀྱིས་ཉེ་བར་བསྟན་པ་མེད་ན་གཅིག་ལ་ཡོད་པ་མ་ཡིན་ནོ། །དེ་བས་ན་དངོས་པོ་ཐམས་ཅད་རྣམ་པ་ཐམས་ཅད་མཁྱེན་པ་ནི་བཅོམ་ལྡན་འདས་ཉིད་ཡིན་ནོ་ཞེས་ཤེས་པར་བྱ་སྟེ། དོན་ཐམས་
[397b]
[397b.1]ཅད་རྣམ་པ་ཐམས་ཅད་ཀྱི་མངོན་སུམ་དུ་བྱ་བ་མ་གཏོགས་པར་དངོས་པོ་ཐམས་ཅད་མི་རྟག་པར་ཞེས་བྱ་བ་ལ་སོགས་པ་ནི་ཡོད་པ་མ་ཡིན་ཏེ། མ་མཐོང་བ་གང་ཡིན་པ་དེ་ཉིད་མ་ངེས་པར་འགྱུར་བའི་ཕྱིར་རོ། །འོན་ཏེ་བདག་ཅག་ལ་སོགས་པ་བསྟན་པ་ལས་ཡོངས་སུ་ཤེས་པ་དེ་བཞིན་དུ། དེའི་ཡང་འབྱུང་བར་འགྱུར་བ་ཡིན་ནོ། །
[397b.2]ཞེ་ན། བདག་ཅག་གིས་ཀྱང་དེ་ཡིས་ཉེ་བར་བསྟན་པ་མེད་ན། ཡོངས་སུ་ཤེས་པ་འབྱུང་བར་མི་འགྱུར་རོ། །དེ་བས་ན་གང་མངོན་སུམ་དུ་གཟིགས་པ་དང་གཞན་ལ་ཡང་སྟོན་པ་གང་ཡིན་པ་དེ་ལ་ནི་འདི་ངེས་པར་འགྱུར་གྱི། གཞན་ནི་མ་ཡིན་ནོ། །དེའི་ཕྱིར་སྐྱོབ་པ་ལས་དེ་ཁོ་ན་ཉིད་དང་། བརྟན་པ་དང་། མ་ལུས་པའི་ཁྱད་པར་
[397b.3]མཁྱེན་པ་འགྲུབ་པར་འགྱུར་རོ། །དེ་ཁོ་ན་མཁྱེན་པས་ནི་ཕྱི་རོལ་མུ་སྟེགས་པ་ལས་ལྷག་པར་ཡིན་ནོ། །བརྟན་པར་མཁྱེན་པས་ནི་རྒྱུན་དུ་ཞུགས་པ་ལས་ལྷག་པར་ཡིན་ནོ། །ཁྱད་པར་མ་ལུས་པར་མཁྱེན་པས་ནི་འདོད་ཆགས་དང་བྲལ་བ་དང་། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་ལས་ལྷག་པ་
[397b.4]ཡིན་ཏེ། བདེ་བར་གཤེགས་པ་ཡིན་པའི་ཕྱིར་རོ། །དེའི་ཕྱིར། གཞན་དོན་མཁྱེན་སྦྱོར་བརྩོན་པ་ཡིས། །བསྟན་པ་དེ་ནི་བརྩེ་བ་ཡིན། །ཞེས་བྱ་བ་ལ། བདེ་བར་གཤེགས་པའི་ཕྱིར་གཞན་གྱི་དོན་མཁྱེན་པར་བརྩོན་པས། བསྟན་བཅོས་ཞེས་བྱ་བའི་མིང་ཅན་བསྟན་པ་རྒྱུར་དཔོག་པར་བྱེད་དོ། །བསྟན་པ་དེ་ལས་ཀྱང་བརྩེ་
[397b.5]བར་རྟོགས་པ་ཡིན་ཏེ། གཞན་དུ་ན་གཞན་གྱི་དོན་མཁྱེན་པར་བརྩོན་པ་ནི་མ་ཡིན་ནོ་ཞེས་བསྟན་ཏོ། །བདེ་བར་གཤེགས་པ་ཉིད་ཙམ་གྱིས་ཚད་མ་མ་ཡིན་ནམ། བརྩེ་བ་ལྡན་པ་ལ་སོགས་པ་བསྒྲུབ་པ་འདི་དག་གིས་ཅི་ཞིག་བྱ་ཞེ་ན། དེ་ནི་བདེན་པ་མ་ཡིན་ཏེ། དེ་ལས་གཞན་དོན་ལ་ལྟོས་པ། །གྲུབ་པའི་དོན་དུ་ངལ་མེད་ཕྱིར། །
[397b.6]ཞེས་བྱ་བ་ལ། ཡེ་ཤེས་ཙམ་གྱིས་བཅོམ་ལྡན་འདས་ཚད་མ་མ་ཡིན་ཏེ། འོན་ཀྱང་སླུ་བ་མེད་པའི་ཕྱིར་ཡིན་ནོ། །བརྩེ་བ་དེ་ལས་གཞན་གྱི་དོན་ལ་རག་ལས་པ་ཉིད་ཀྱི་བཅོམ་ལྡན་འདས་གྲུབ་པས་ན་གཞན་གྱི་དོན་གྱི་ངལ་བ་མེད་པར་འགྱུར་བའི་ཕྱིར་རོ། །བརྩེ་བ་ལས་གཞན་གྱི་དོན་ཐམས་ཅད་བྱེད་པ་ཡིན་གྱི། ཡོངས་
[397b.7]སུ་མྱ་ངན་ལས་འདས་པ་ནི་མ་ཡིན་ནོ། །གཞན་ཡང་བརྩེ་བས་ལེགས་པར་མཛད། །ཡེ་ཤེས་ལས་བདེན་སྒྲུབ་བྱེད་བཅས། །གང་ཕྱིར་དེ་གསུང་བར་མངོན་བརྩོན། །ལྡན་པ་དེ་ཕྱིར་ཚད་མ་ཡིན། །ཞེས་བྱ་བ་ལ། བརྩེ་བ་དང་ལྡན་པས་ལེགས་པར་སྟོན་པར་མཛད་ལ། ཡེ་ཤེས་ལས་བདེན་པ་སྟེ། ཡང་དག་པར་སྟོན་པར་
[398a]
[398a.1]མཛད་དོ། །ཡེ་ཤེས་དང་། སྒྲུབ་པ་དང་ལྷན་ཅིག་འཇུག་པའི་ཕྱིར་སྒྲུབ་བྱེད་བཅས་པ་སྟེ། གང་གི་ཕྱིར་གསུང་བར་མངོན་པར་བརྩོན་པ་དང་ལྡན་པའི་རྒྱུ་བཞི་ཡོད་པའི་ཕྱིར་བཅོམ་ལྡན་འདས་ཚད་མ་ཉིད་དོ། །འོ་ན་ཉེ་བར་བསྟན་པ་བདེན་པས་བསྟོད་པ་ལ་དགོས་པ་ཅི་ཡོད་ཅེ་ན། སྨྲས་པ། དེ་ཡིས་བསྟན་པ་ཉིད་ལ་ནི། །སྟོན་པ་དེ་
[398a.2]ལྟའི་དངོས་བསྟོད་པ། །ཚད་མའི་དེ་ཉིད་གྲུབ་དོན་དུ། །རྗེས་སུ་དཔག་པའང་ཟློག་མེད་ཕྱིར། །ཅུང་ཟད་སྐྱེ་བའི་བདག་ཉིད་ཅན། །གང་དེ་ཐམས་ཅད་འགོག་ཆོས་ཅན། །ཞེས་སོགས་རྣམ་པ་དུ་མར་ཡང་། །འདི་ཡི་སྦྱོར་བ་མཐོང་ཕྱིར་རོ། །ཞེས་བྱ་བ་ལ། ཉེ་བར་བསྟན་པ་དེ་ལྟ་བུའི་དངོས་པོ་ཚད་མའི་མཚན་ཉིད་ཅན་གྱི་བསྟོད་པ་
[398a.3]བཅོམ་ལྡན་འདས་ཀྱིས་ཉེ་བར་བསྟན་པ་ལས་ནི་ཚད་མ་ཉིད་གྲུབ་པ་ཡིན་ནོ་ཞེས་བསྟན་པའི་ཕྱིར་རོ། །བཅོམ་ལྡན་འདས་ཀྱིས་ཉེ་བར་བསྟན་པ་མངོན་སུམ་ཉིད་མ་ཡིན་ནམ། སྔོན་པོའི་ཤེས་པ་ཅན་གྱི་སྐྱེས་བུས་སྔོན་པོ་ཤེས་ཀྱི་སྔོན་པོའོ་ཞེས་ནི་མ་ཡིན་ནོ་ཞེས་གསུངས་སོ་ཞེ་ན། རྗེས་སུ་དཔག་པ་ཡང་བཟློག་པ་མེད་པ་
[398a.4]སྟེ། དེ་ཕྱིར་མངོན་པར་བཞེད་པ་ཉིད་ཡིན་ནོ། །སྒྲ་ལ་སོགས་པ་ནི་བཟློག་པ་ཉིད་ཡིན་ཏེ། གཞན་གྱིས་བརྟགས་པ་ཐམས་ཅད་ནི་སྟོང་པ་ཡིན་གྱི། ང་ཉིད་གཅིག་པུ་དེ་ཁོ་ན་ཉིད་གསུངས་པའོ། །ཞེས་གསུངས་པའི་ཕྱིར་རོ། །ཡང་ན་གཞན་གྱི་དོན་གྱི་རྗེས་སུ་དཔག་པའི་སྦྱོར་བ་གང་ཅུང་ཟད་སྐྱེ་བའི་ཆོས་ཅན་དེ་ཐམས་ཅད་ནི་འགོག་པའི་
[398a.5]ཆོས་ཅན་ཞེས་བྱ་བ་མཐོང་བའི་ཕྱིར་རོ། །དེ་སྨྲས་པ། མེད་ན་མི་འབྱུང་མཚན་ཉིད་ཅན། །རྟགས་ནི་རྗེས་དཔག་རྟེན་ཡིན་ནོ། །བསྒྲུབ་བྱས་གཏན་ཚིགས་ཁྱབ་པར་ནི། །བསྟན་ཕྱིར་དེ་ཡང་གསལ་བར་བཤད། །ཅེས་བྱ་བ་ལ་རྗེས་སུ་དཔག་པ་ལ་བརྟེན་པའི་གཏན་ཚིགས་ཀྱི་མཚན་ཉིད་ནི་མེད་ན་མི་འབྱུང་བ་དང་ལྡན་པ་སྟེ་ཁྱབ་པ་དུ་
[398a.6]མར་བཅོམ་ལྡན་འདས་ཀྱིས་བསྟན་པའི་ཕྱིར། གཏན་ཚིགས་དེ་རྟགས་དང་། བསྒྲུབ་བྱ་ལྷན་ཅིག་མེད་ན་མི་འབྱུང་བ་གསལ་བར་བཤད་པ་ཡིན་པའི་ཕྱིར། བཅོམ་ལྡན་འདས་ཀྱིས་གསུངས་པ་ཁོ་ན་ཚད་མ་ཉིད་ཡིན་ནོ། །བཅོམ་ལྡན་འདས་དེ་ཡང་ཚད་མ་ཉིད་ཡིན་པའི་ཕྱིར་ཇི་ལྟར་མི་རིགས་པར་འགྱུར། དེ་བས་
[398a.7]ན་བཅོམ་ལྡན་འདས་ཀྱིས་ཡོན་ཏན་གྱི་མཆོག་ཚད་མ་ཡིན་པར་དང་པོར་བསྟན་པ་ཡིན་ནོ། །བླ་མ་དམ་པ་དགེ་བའི་བཤེས་གཉེན་ཤེས་རབ་འབྱུང་གནས་ཀྱི་ཞབས་ལ་བཏུད་དེ་བསྟེན་ནས་ཉི་མ་སྦས་པས་སྦྱར་བ་ཚད་མ་རྣམ་འགྲེལ་གྱི་འགྲེལ་པ་ལས། ཚད་མའི་མཚན་ཉིད་ཀྱི་ལེའུ་སྟེ་གཉིས་པའོ།། །།