[1a]
[1a.1]༄༅། །ཡན་ལག་བརྒྱད་པའི་སྙིང་པོ་ཞེས་བྱ་བའི་སྨན་དཔྱད་ཀྱི་རང་འགྲེལ་སྨད་དུམ་བཞུགས་སོ།།
[1b]
[1b.1]༄༅༅། །བཀྲུ་སྨན་དང་སྐྱུག་སྨན་ལ་སོགས་པ་ནད་སྦྱང་བའི་སྨན་སྡེ་སྣ་ཚོགས་འདུས་པར་བཤད་པའི་ལེའུ་བཅོ་ལྔ་པ་བཤད་པར་བྱའོ། །སྐྱུག་སྨན་གྱི་སྡེ་ལ། སྨན་པོ་སོན་ཆ་དང་། ཤིང་མངར་དང་། ཀ་ལམ་པ་དང་།
[1b.2]ནིམ་པ་དང་། བིམ་པི་དང་། བི་ཤ་ལ་དང་། ག་གོན་རོ་ཁ་བའི་ཐོར་ཏོ་དང་། འབྲས་བུ་དང་། ཨིནྡྲ་ཡ་བ་དུག་མོ་ཡུངས་དང་། མུར་བ་དང་། དེ་བ་ཏ་ལི་དང་། ལྟོའི་སྲིན་བུ་གསོད་པའི་བྱི་ཏང་ག་དང་། བི་དུལ་དང་། ཙི་ཏྲ་ཀ།
[1b.3]ཀྲུ་དྲུག་ཏྲེས་དང་། བ་ཏོ་ལའི་ས་བོན་དང་། ཀ་རཉྫ་དང་། པི་པི་ལིང་དང་། ལྕེ་མྱང་ཚ་དང་། ཤུ་དག་དང་། སུག་སྨེལ་དང་། ཡུངས་ཀར་དང་། འདི་རྣམས་ནི་སྐྱུག་སྨན་དུ་གཏོང་བའི་སྨན་གྱི་སྡེའི་རྣམ་གྲངས་སུ་གཏོགས་སོ། །དེ་
[1b.4]ལ་བཀྲུ་སྨན་དུ་གཏོང་པའི་སྨན་ནི། ཏྲི་བི་ད། ཤིང་ཉེ་རོང་། དན་ཏི་དང་། འབྲས་བུ་གསུམ་པོ་ཨ་རུ་ར་དང་། བ་རུ་ར་དང་། སྐྱུ་རུ་ར་དང་། བི་ཤ་ལའི་རྩ་བ་དང་། ཤིང་གི་ཁུ་བ་སྣུ་ཧག་ཤི་ར་དང་། མེ་ཏོག་ཤང་གི་རི་དང་། ནི་ལི་
[1b.5]དང་། རོ་དྷ་སེང་ཕྲོམ་དང་། དོང་ག་དང་། ཀི་བི་ལྱཀ་དང་། སུ་བརྞ་ཤི་ར་དང་། བྱར་ནུ་དང་། བ་གཅིན་དང་། འདི་རྣམས་ནི་བཀྲུ་སྨན་དུ་གཏོགས་སོ། །བཀྲུ་སྨན་མས་གཏོང་བའི་སྨན་གྱི་སྣ་གྲངས་ནི། པོ་སོན་ཆ་དང་། དུག་མོ་
[2a]
[2a.1]ཡུངས་དང་། རུརྟ་དང་། དེ་བ་ཏ་ལི་དང་། ཤིང་མངར་དང་། ཤུ་དག་དང་། རྩ་བའི་སྨན་སྣ་བཅུ་ལ། ས་ལ་པརྞི་དང་། ཀྲྀཥྞ་པརྞི་དང་། ཀཎྜ་ཀ་རི་དང་། བྲི་ཧ་ཏི་དང་། གཟེམ་ཐོག་དྲུང་རྩ་ཐོན་དང་། འདི་རྣམས་ནི་སྨན་གྱི་རྩ་བ་ཕྲ་མོ་ལྔ་ཞེས་བྱའོ། །བིལ་བའི་རྩ་བ་དང་།
[2a.2]ཨག་ནི་མནྠ་དང་། སྱོ་ན་ཀ་དང་། ཏང་བལ་དང་། པ་ཏ་ལི་དང་། འདི་ལྔའི་རྩ་བ་ནི་རྩ་བ་ཆེན་པོ་ལྔ་ཞེས་བྱ་སྟེ། རྩ་བ་ཆེ་ཕྲ་གཉིས་གཅིག་ཏུ་བསྡུས་པ་ནི་རྩ་བ་བཅུ་ཞེས་བྱ་བ་དང་། དེ་བ་ད་རུ་ཐང་ཤིང་དང་། རསྣ་དང་། ཡ་བ་ནི་ལ་ལ་ཕུད་དང་། ཤ་ཏ་པུཥྤ་ཤ་ཏི་དང་། ཀྲི་ཏ་བེ་དྷ་ན་དང་།
[2a.3]རྒྱ་སྲན་ནག་པོ་དང་། སྦྲང་རྩི་དང་། ལྕེ་མྱང་ཚ་འམ། རྒྱམ་ཚ་ཤིང་ཉེ་རོང་འདི་རྣམས་ནི་བཀྲུ་སྨན་མས་གཏོང་བའི་སྡེ་ཚན་དུ་གཏོགས་སོ། །མགུལ་བ་ཡན་ཆད་མགོའི་ནད་དང་། མིག་ནད་དང་། སྣ་ནད་དང་། ལོག་ནད་ལ་སོགས་པ་ཅི་ན་ཡང་རུང་སྟེ། སྨན་སྣ་ནས་བཏང་ཞིང་ནད་སྦྱང་བའི་སྨན་
[2a.4]སྡེ་ལ། བེལ་ལ་དང་། ཨ་པ་མརྒ་དང་། ཚ་བ་རྣམ་པ་གསུམ་པོ་ན་ལེ་ཤམ་དང་། ལི་དོང་གྲ་དང་། པི་པི་ལིང་དང་། སྐྱེར་བའི་རྩ་བ་དང་། སུ་ར་ལའི་ས་བོན་དང་། ཤི་རི་ཤའི་མེ་ཏོག་དང་། འབྲས་བུ་དང་། རྩ་བ་དང་། པྲི་ཧ་ཏིའི་ལོ་མ་དང་། མེ་ཏོག་དང་། འབྲས་བུ་དང་། སྡོང་བུ་དང་།
[2a.5]རྩ་བ་དང་སྣ་ལྔ་དང་། ཤི་ཀྲུའི་ལོ་མ་དང་། མེ་ཏོག་དང་། འབྲས་བུ་དང་། སྡོང་བུ་རྩ་བར་བཅས་པ་ལྔ་དང་། སེང་ལྡེང་དང་། ཤིང་མ་དུ་ཀའི་མེ་ཏོག་དང་། རྒྱམ་ཚ་དང་། མིག་སྨན་སྐྱེར་ཁཎ་དང་། ཕ་བོང་གི་དྲེག་པ་དང་། སུག་སྨེལ་དང་། ལྡུམ་བུ་པྲིས་རྩི་ཀ་དང་། སྨན་སྡེ་འདི་རྣམས་ནི་
[2a.6]མགུལ་བ་ཡན་ཆད་ཀླད་པའི་ནད་ཐམས་ཅད་སེལ་ཞིང་སྦྱོང་པའི་སྨན་དུ་གཏོགས་སོ། །དེ་ལ་རླུང་ནད་སེལ་ཞིང་ཞི་བར་བྱེད་པའི་སྨན་གྱི་རྣམ་གྲངས་ནི། དེ་བ་ད་རུ་ཐང་ཤིང་དང་། རྒྱ་སྤོས་དང་། རུ་རྟ་དང་། སྨན་གྱི་རྩ་བ་བཅུ་རྣམས་དང་། བ་ལ་དང་། ཨ་ཏི་བ་ལ་དང་། སྨན་བི་ར་ཏ་རའི་
[2a.7]སྡེར་གཏོགས་པ་ལ་སོགས་པ་དང་། སྨན་བི་ད་རའི་སྡེར་གཏོགས་པ་རྣམས་ནི་རླུང་ནད་སེལ་ཏོ། །མཁྲིས་པའི་ནད་ཚ་བ་རྣམས་སེལ་བའི་སྨན་གྱི་སྡེ་ནི། རྩྭ་དཱུར་བ་དང་། པཱུརྞ་རྣ་བ་དང་། ནིམ་པ་དང་། སྨན་བ་ཤ་ཀའི་ལོ་མ་དང་། རྩ་བའི་བར་དུ་སྣ་ལྔ་དང་། ཨདྨ་ཀུབ་ཏ་ཁ་སྲལ་ཕྲེའུ་དང་།
[2b]
[2b.1]འོལ་མ་སེའི་རྩ་བ་དང་། ཉེའུ་ཤི་ལ་དང་། ཤི་ཏ་པ་ཀི་དང་། གནྡྷ་པྲི་ཡང་ཀུ་དང་། ཤིང་ནྱ་གྲོ་དྷ་ལ་སོགས་པ་དང་། ཤིང་ཤུག་པ་དང་། སྨན་ཐི་ར་རྣམ་གཉིས་དང་། པདྨའི་ཟེ་བ་དང་། ཐལ་ཏྲེས་ལ་སོགས་པ་འདི་རྣམས་ནི་མཁྲིས་པའི་ནད་སེལ་ཏོ། །བད་ཀན་གྱི་ནད་རྒྱས་པ་ལ་ནི་དོང་
[2b.2]ག་ལ་སོགས་པ་དང་། ཤིང་ཨརྐ་ལ་སོགས་པའི་ལོ་མ་མེ་ཏོག་སྣ་ལྔར་བཅས་པ་དང་། ཤིང་མུས་ཀ་ཀ་ལ་སོགས་པ་རྩ་བ་དང་འབྲས་བུར་བཅས་པ་སྣ་ལྔར་བཅས་པ་དང་། ཤིང་ཨོ་ས་ན་ལ་སོགས་པའི་རྩ་བ་དང་། འབྲས་བུའི་བར་སྣ་ལྔ་དང་། བྱེའུ་རུག་པ་ལ་སོགས་པ་དང་། གླ་སྒང་
[2b.3]ཆེན་པོ་ལ་སོགས་པ་དང་། ཨིནྡྲ་ཡ་བ་དུག་མོ་ཡུངས་ལ་སོགས་པ་སྨན་སྡེ་འདི་རྣམས་བད་ཀན་སེལ་བར་བྱེད་དོ། །སྨན་ཛི་བན་ཏིའི་སྡེར་གཏོགས་པ་ལ། ཛི་བན་ཏི་དང་། རམ་ཉེ་བ་རྣམ་གཉིས་དང་། མེ་ད་དང་། མཧཱ་མེ་ད་རྣམ་གཉིས་དང་། མོན་སྲན་སྡེའུ་མུངྒ་དང་། མོན་སྲན་
[2b.4]མ་ཤ་གཉིས་ཀྱི་ལོ་མ་དང་། ལྡུམ་བུ་རི་ཤ་བྷ་ག་ཟངས་རྩི་བ་དང་། ཛི་བ་ཀ་དང་། ཤིང་མངར་དང་། འདི་བཅུའི་མིང་ནི་འཚོ་བྱེད་ཅེས་བྱའོ། །ཡང་ཁར་ཞིམ་ལ་ལུས་ཀྱི་ཤ་འཚག་ཚོན་པོར་བྱེད་ཅིང་རླུང་ནད་དང་མཁྲིས་པའི་ནད་སེལ་བའི་སྨན་སྡེའི་རྣམ་གྲངས་ལ། བི་ད་ར་དང་།
[2b.5]དོང་ག་དང་། འབྲི་ལྕི་ཀ་ལི་དང་། པུརྞ་རྣ་བ་དང་། དེ་བ་དང་། ས་ཧ་དེ་བ་དང་། བུ་བ་པར་ནྱ་དང་། ཁ་སྲལ་དང་། ཛི་བ་ཏི་ཙ་ཕྲ་མོ་སྣ་བཅུ་དང་། ཤིང་ཤ་རི་བ་ཐལ་ཏྲེས་ཀྱི་རྩ་བ་དང་། ལྕུག་མ་དང་། ཧང་ས་པ་ཏི་དང་། དེ་ལྟར་འདི་རྣམས་ཀྱི་སྤྱིར་བི་ད་རིའི་གྲངས་སུ་གཏོགས་
[2b.6]ཏེ་སྙིང་ལ་ཕན། ཤ་ཚག་བརྟ། རླུང་དང་མཁྲིས་པའི་ནད་སེལ། ལུས་སྐེམ་པ་ཤ་སྐྱེ། སྐྲན་དང་ལྷུ་ཚིགས་དང་། ཉྭ་གཞི་ན་བ་དང་། དབུགས་མི་བདེ་བ་དང་། ལུད་པ་ལུ་བ་དང་། འདི་རྣམས་སེལ་ཞིང་ཕན་པའི་གྲངས་སུ་གཏོགས་སོ། །ཡང་ལུས་ཚ་བ་དང་། ཁྲག་དང་
[2b.7]མཁྲིས་པ་རྒྱས་ཏེ་སྐོམ་དད་ཆེ་ཞིང་རིམས་ཀྱིས་བཏབ་པ་འདི་རྣམས་སེལ་བའི་སྨན་ནི། ཤིང་ཤ་རི་ར་བ་ཐལ་ཏྲེས་དང་། ཨུ་ཤི་ར་དང་། ཀ་མ་རི་དང་པ་ལ། ཤིང་མ་དུ་ཀ་ཞེས་བྱ་བ་དང་། ཙནྡན་དཀར་པོ་དང་། དམར་པོ་སྣ་གཉིས་དང་། ཤིང་མངར་དང་། བ་རུ་ཤ་ཀ་དང་།
[3a]
[3a.1]འདི་རྣམས་ཚ་བའི་ནད་དང་མཁྲིས་པའི་ནད་དང་། ཁྲག་རྒྱས་པ་དང་། སྐོམ་དད་ཆེ་བ་དང་། རིམས་ཀྱིས་བཏབ་པ་ལ་ཕན་ནོ། །ཤིང་ཤུག་པ་དང་། ལི་ཁ་རའི་ཤིང་པུན་ཏྲ་གཉིས་དང་། རིད་དྷི་དང་། བྲིད་དྷི་དང་། རི་དགས་ཀར་ཀ་ཏའི་རྭ་ཤིང་གི་ཞེས་བྱ་བ་དང་
[3a.2]སླེ་ཏྲེས་དང་། ཛི་བ་ན་སྣ་བཅུ་དང་། འདི་རྣམས་ནི་ནུ་ཞོ་སྐྱེ། རླུང་ནད་དང་། མཁྲིས་པའི་ནད་སེལ། ལུས་ཉམ་ཆུང་ཞིང་ཁོང་པ་རྨྱ་བ་ལྟ་བུ་ལ། ཁོང་བརྟ། ཤ་ཆེར་སྐྱེ། ཚོ་བར་བྱེད། བུད་མེད་ལ་ཉལ་ཕོད་པར་འགྱུར་རོ། །ཡང་སྨན་པ་རུ་ཤ་ཀ་དང་། འབྲས་བུ་གསུམ་པོ་ཨ་རུ་ར་
[3a.3]དང་། བ་རུ་ར་དང་། སྐྱུ་རུ་ར་དང་། རྒུན་འབྲུམ་དང་། ཤིང་ནི་རི་ཤི་ཀད་པ་ལའི་ཤུན་པ་དང་། ཤིང་ཀ་ཏའི་འབྲས་བུ་དང་། ཤིང་ཏོག་རཱ་ཛ་དང་། བལ་པོ་སེའུའི་འབྲས་བུ་དང་། རྒྱ་སྣེའུ་དང་འདི་རྣམས་སྐོམ་དད་ཆེ་བ་དང་ཆུ་སྲི་བ་དང་རླུང་ནད་སེལ་ཏོ། །ཡང་ལིག་བུ་མིག་དང་།
[3a.4]གན་དྷ་པྲི་ཡང་ཀུ་དང་། སྤང་སྤོས་དང་། མེ་ཏོག་པདྨ་དང་། མེ་ཏོག་ཨུཏྤ་ལ་དང་། སྐྱེར་ཁཎ་དང་། སུག་སྨེལ་དང་། ཤིང་མངར་དང་། ནཱ་ག་གེ་སར་དང་། འདི་རྣམས་ནི་དུག་ནད་སེལ། ལུས་ཚ་བ་དང་མཁྲིས་པ་རྒྱས་པའི་ནད་སེལ་ཏོ། །པ་ཏོ་ལ་དང་། ཀ་ཏུ་ཀ་རོ་ཧི་ནི་པུ་ཙེ་ཤེལ་
[3a.5]དང་། ཙནྡན་དཀར་པོ་དང་། ཤིང་མངར་དང་། སླེ་ཏྲེས་དང་། ཤིང་པ་ཐ་དང་། འདི་རྣམས་ནི། བད་ཀན་དང་། མཁྲིས་པ་དང་། མཛེ་དང་། རིམས་དང་། དུག་དང་། རྟག་ཏུ་སྐྱུག་བྲོ་བ་དང་། ཟས་ཡི་གར་མི་འོང་བ་དང་། མིག་སེར་གྱི་ནད་དང་འདི་རྣམས་སེལ་ཏོ། །ཡང་གུ་རུ་
[3a.6]ཙེ་སླེ་ཏྲེས་དང་། ཤུག་པ་དང་། ཤིང་ནིམ་པ་དང་། འུ་སུའི་འབྲས་བུ་དང་། ཙནྡན་དམར་པོ་དང་། འདི་རྣམས་ནི་མཁྲིས་པ་དང་། བད་ཀན་རྒྱས་པ་དང་། རིམས་ཀྱིས་བཏབ་པ་དང་། སྐྱུག་བྲོ་བ་དང་། ལུས་ཚ་བ་དང་། སྐོམ་དད་ཆེ་བ་དང་། ནད་འདི་རྣམས་ཀྱང་སེལ་ཏོ། །ཟས་
[3a.7]འཇུ་ཕོ་བའི་དྲོད་སྐྱེ། དོང་ག་དང་། ཨིནྡྲ་ཡ་བདུག་མོ་ཡུངས་དང་། པ་ལིའི་མེ་ཏོག་དང་། ཀ་ཀ་ཏིག་ཏ་དང་། ནིམ་པ་དང་། སླེ་ཏྲེས་དང་། རྩྭ་དཱུར་བ་དང་། ཤིང་མངར་དང་། པ་ཐ་དང་། ཙིར་ཏིག་ཏ་ཞེས་བྱ་བ་ཅི་སྐྲིགས་དང་། ཤིང་ཤེརྒྱ་ཀ་ནཱི་ལ་པུཥྤ་དང་བ་ན་ཞེས་ཀྱང་བྱ་བ་དང་།
[3b]
[3b.1]པ་ཏོ་ལ་དང་། ཀ་ན་ཛ་རྣམ་གཉིས་དང་། སབ་ཏ་ཚ་ཞེས་བྱ་བ་དང་། ཤིང་གི་འདབ་མ་རྣམ་བདུན་དང་། ཙི་ཏྲ་ཀ། ཀྲུ་ཏྲུག་ཏྲེས་དང་། སུ་ཤ་བི་དང་། པོ་སོན་ཆ་དང་། ཤི་བ་ན་དང་། གོན་ཏ་དང་། འདི་རྣམས་ཀུན་འདྲ་སྟེ་དོང་ག་ལ་སོགས་པས་སྐྱུགས་པ་གཅོད། མཛེ་དང་།
[3b.2]དུག་དང་། རིམས་དང་། བད་ཀན་རྒྱས་པ་དང་། གཡན་པ་དང་། གཅིན་སྙི་བ་དང་། རྨ་དེ་བ་འབྱང་ངོ་། །ཡང་ན་སབ་ཏ་ཚ་དང་། ཤིང་ལོ་མ་བདུན་པ་དང་། ཤིང་ཏི་ནི་ཤ་དང་། གྲོ་བ་དང་། ཤྲེ་ཏ་བ་ཧ་དང་། སྲི་ཀི་ཡ་ཀ་དང་། ཤིང་སེང་ལྡེང་དང་། ཤིང་ཀ་ད་ར་དང་།
[3b.3]བྷན་དྷི་དང་། ཤིང་ཤ་པ་དང་། མེ་ཤ་ཤྲཱི་ག་དང་། ཏྲི་ཧི་མ་དང་། ཏལ་དང་། རྒྱ་སྐྱེགས་ཀྱི་ཤིང་དང་། ཨ་ཀ་རུ་དང་། རྒྱ་སྣེའུ་དང་། ཤིང་སཱ་ལ་དང་། ཤིང་དྷ་བ་དང་། ཀ་བུ་ཀ་དང་། ཀ་ལང་ཀ་ཞེས་བྱ་བ་དང་། ཨིནྡྲ་ཡ་བ་དུག་མོ་ཡུངས་དང་། ཚ་ག་ཀརྞ་དང་། ཨ་ཤྭ་
[3b.4]ཀརྞ་ཐ་རམ་དང་། དེ་ལྟར་ཨ་ས་ན་ལ་སོགས་པ་སྨན་འདི་རྣམས་ནི། ཤ་བཀྲ་དང་། མཛེ་དང་། བད་ཀན་གྱི་ནད་དང་། ཁོང་ན་སྲིན་བུ་ཡོད་པ་སེལ། ནད་སྐྱ་རྦབ་དང་། གཅིན་སྙི་བ་དང་། ཚོ་ཆེས་པའི་ཚིལ་ནད་འདི་རྣམས་སེལ་ཏོ། །ཤིང་བ་རའི་མེ་ཏོག་དཀར་པོ་དང་།
[3b.5]ཤིང་ཤེ་རྒྱ་ཀའི་མེ་ཏོག་སྔོན་པོ་ལ་བ་ན་དང་། ཉེའུ་ཤིང་པ་དང་། ཙིཏྲ་ཀ་དང་། མོ་ར་ཏ་དང་། ཤིང་བིལ་བ་དང་། ཨ་ཟ་ཤྭ་གི་དང་། བྲི་ཧ་ཏི་རྣམ་གཉིས་ཀ་རཉྫ་རྣམ་གཉིས། ཛ་ཡ་རྣམ་གཉིས་ལ། ཨག་ནི་མན་ཐ་སྣ་གཉིས་དང་། ཤིང་ཤི་ཀྲུའི་འདབ་མ། བོའུ་པ་ལ་པ་
[3b.6]དང་། རྩྭ་ཀུ་ཤ་དང་། རུ་རྟ་འདི་རྣམས་ནི་ཤིང་བར་ན་ལ་སོགས་པ་ཞེས་བྱ་སྟེ། བད་ཀན་གྱི་ནད་དང་། ཚོ་ཆེས་ཏེ་ཚིལ་སྐྱེས་པའི་ནད་དང་། ཟས་མི་འཇུ་སྟེ་དྲོད་ཆུང་བ་ལས། རླུང་ནད་ཆེར་སྐྱེས་པ་སེལ། ཀླད་པ་ན་བ་ལ་ཕན། སྐྲན་དང་། ཨན་ཏ་བིད་ཏྲ་བྷི་ཁོང་འབྲས་འདི་རྣམས་
[3b.7]སེལ་ཏོ། །ཡང་སྨན་བྲི་ཤ་ཀ་དང་། སྤངས་མ་དང་། ཤིང་ཀུན་དང་། ནག་ཚུར་རྣམ་གཉིས་ཏེ། ནག་ཚུར་དང་། ནག་ཚུར་བྱ་བལ་མ་དང་། རྒྱམ་ཚ་དང་། ཤི་ལ་ཛ་ཏུ་དང་། འདི་རྣམས་ནི་ཆུ་སྲི་བ་དང་། རྡེའུ་ཡོད་པ་དང་། ཁོང་ན་སྐྲན་ཡོད་པ་དང་། ལུས་ཀྱི་ཚིལ་ཆེས་
[4a]
[4a.1]པ་དང་། བད་ཀན་སེལ་ཏོ། །སྨན་བེ་ལན་ཏར་དང་། ཨ་རན་ནི་དང་། སུ་ག་དང་། བྲི་ཤ་དང་། ཨ་ཤམ་བེ་ཏ་སྲུ་སྲུ་དང་། གོ་ཀན་ཏ་གཟེ་མ་དང་། ཀ་ཏ་དང་། ས་ཧ་ར་ཛ་དང་། བ་ན་ནཱི་ལ་པུཥྤ་དང་། རྩྭ་དཱུར་བ་དང་། བྲྀཀྵ་ད་ནི་དང་། ན་ལ་ཀུ་ཤ་རྣམ་
[4a.2]གཉིས་དང་། ཀུན་ཐ་དང་། གུན་དྲ་དང་། བ་ལུ་ཀ་དང་། མོར་ཏ་དང་། ཀ་རུ་ཀ་ཏ་དང་། ཤིང་རམ་པ་དང་། པརྟ་དང་། སྨན་སྡེ་འདི་རྣམས་ནི། རླུང་ནད་དུ་གྱུར་པ་སེལ། ཆུ་སོན་རྡེའུ་ཡོད་པ་དང་། གཅིན་སྲི་སྟེ་འོང་དུ་མི་རུང་བ་དང་། འདི་རྣམས་སེལ་ཏོ། །ཡང་སྨན་ཤ་བ་རཀ་རོ་
[4a.3]སེང་ཕྲོམ་དང་། བད་ཐིཀ་རོ་དྷཱ་དང་། རྒྱ་སྐྱེགས་ཀྱི་ཤིང་དང་། ཛི་ན་ཛི་ནི་དང་། ཐང་ཤིང་པར་ལ་དང་། ཤིང་ཀད་པ་ལའི་ཤུན་པ་དང་། ཀུད་ཙི་ཏམ་པ་དང་། ལྡུམ་བུ་ཆུ་སྐྱེས་ཀྱི་མེ་ཏོག་དང་། མེ་ཏོག་གི་རྩ་བ་དང་། ཤིང་ཨ་ཤྭ་ཀ་དང་། ཤིང་བིཏ་ཤོ་ཀ་དང་། ཨེ་ལ་བ་ལུ་ཀ་
[4a.4]དང་། ས་རི་པེལ་བ་དང་། མོ་ཚ་རྣམས་ཏེ། དེ་ལྟར་སྨན་རོདྷཱ་ལ་སོགས་པ་འདི་དག་ནི་ཚིལ་ཆེ་བ་དང་། བད་ཀན་གྱི་ནད་སེལ་བར་བྱེད། བུད་མེད་ཀྱི་མངལ་ན་བ་ལ་ཕན། འཁྲུ་བ་གཅོད། ཤ་མདོག་བཟང་བར་འགྱུར་རོ། །དུག་ནད་སེལ་ཏོ། །ཤིང་ཨར་ཀའི་རྩ་བ་དང་།
[4a.5]ཤིང་ཨ་ལར་ཀ་དང་། ནག་དན་ཏི་དང་། བིལ་ཤལ་ཡ་དང་། བྷར་གི་དང་། རསྣ་དང་། པྲིས་རྩི་ཀ་ལི་དང་། སྲི་ཀི་རྒྱ་དང་། ཤིང་ཨ་པ་མརྒའི་མེ་ཏོག་དང་། པི་ཏ་ཏེ་ལ་ཞེས་བྱ་བ་ཀ་ཀ་ད་ནི་དང་། ཨུད་ཀིར་ཡང་དང་། མཧཱ་ཤེ་ད་དང་། ཤིང་ཨིང་གུ་དང་། དེ་ལྟར་ཨར་ཀའི་
[4a.6]སྡེར་གཏོགས་པ་སྨན་འདི་རྣམས་ནི་བད་ཀན་རྒྱས་པ་དང་། ཚིལ་ཆེས་པ་དང་། དུག་ནད་རྣམས་སེལ་ཏོ། །ལྟོ་ན་སྲིན་བུ་ཡོད་པ་དང་། མཛེ་ནད་ཞི་བར་བྱེད། ལྷག་པར་ནི་རྨ་རེད་པར་འབྱང་སྟེ་འཚོའོ། །བྱེའུ་རུག་པ་རྣམ་གཉིས་ཏེ་ནག་པོ་དང་། སེར་པོ་དང་། ཀུ་ཐེ་རག་ཞིམ་ཐིག་ལེ་
[4a.7]དང་། ཀ་ལམ་ལ་དང་། སྲིན་བུ་སེལ་བའི་སྨན་བྱི་ཏང་ག་དང་། ཁར་པད་ཏྲ་དང་། བྲི་ཤ་ཀརྞི་དང་། ཀད་པ་ལ་ཞེས་བྱ་བ་རོ་ཧི་ནི་དང་། ཀ་སམ་མར་དཀ་དང་། ཤ་བཀ་དང་། ཤིང་ཀ་པི་ཏའི་ལོ་མ་དང་། བྷར་གྱི་ཀ་སྲའི་རྩ་བ་དང་། རཀྟ་མཉྫ་རི་དང་། ཀ་ཀ་མ་རྩི་མོན་སྣེའུ་
[4b]
[4b.1]དང་། ཀུ་ལ་ཧར་དང་། བི་ཤ་མུསྠི་དང་། བུ་སྲིན་དང་། བུཏ་ཀེ་ཤི་འབམ་པོ་དང་། སྨན་འདི་རྣམས་ནི་བྱེའུ་རུག་པ་ལ་སོགས་པའི་གྲངས་སུ་གཏོགས་ཏེ། བད་ཀན་རྒྱས་པ་དང་། ཚིལ་ཆེ་བ་དང་། ལྟོ་ན་སྲིན་བུ་ཡོད་པ་དང་། འདི་རྣམས་སེལ། ཆམ་པ་ན་བ་དང་། ཟས་ཡི་
[4b.2]གར་མི་འོང་བ་དང་། དབུགས་མི་བདེ་བ་དང་། ལུད་པ་ལུ་བ་དང་། འདི་རྣམས་ལ་ཕན་ཏེ་རྨ་རིད་པ་འབྱང་། མུས་ཀ་ཀ་དང་། སུདྷ་ཤི་རི་དང་། འབྲས་བུ་གསུམ་སྟེ། ཨ་རུ་ར་དང་། བ་རུ་ར་དང་། སྐྱུ་རུ་ར་དང་། ཙི་ཏྲ་ཀ་དང་། རྒྱ་སྐྱེགས་ཤིང་དང་། ཤིང་དྷ་བ་དང་། ཤིང་
[4b.3]ཤ་བ་དང་། འདི་རྣམས་ནི་སྐྲན་དང་། གཅིན་སྲི་བ་དང་། ཆུ་སོན་རྡེའུ་ཡོད་པ་དང་། སྐྱ་རྦབ་ཀྱི་ནད་དང་། ཚིལ་ཆེ་བ་དང་། གཞང་འབྲུམ་གྱི་ནད་དང་། བད་ཀན་དང་། ཁུ་ཆུ་རྣམས་སེལ་བར་བྱེད་དོ། །དུག་མོ་ཡུངས་དང་། ཤིང་མུར་བ་དང་། པུ་ཙེ་ཤེལ་དང་། ན་ལེ་ཤམ་དང་།
[4b.4]ཨལ་བི་ཤ་དང་། གན་དྷི་ར་ཆུ་སྒོག་དང་། སུག་སྨེལ་དང་། བ་ཐ་སྣ་གཉིས་དང་། ཟིར་དང་། ཤིང་ཨར་ལའི་འབྲས་བུ་དང་། ཨ་ཟ་མོ་དང་། ཡུངས་ཀར་དང་། ཤུ་དག་དང་། ཟི་ར་ནག་པོ་དང་། ཤིང་ཀུན་དང་། སྲིན་བུའི་སྨན་བྱི་ཏང་ག་དང་། པ་ཤུ་གནྡྷ་དང་། པཉྩ་ཀོ་ལ་ཞེས་བྱ་
[4b.5]བ་ལ། པི་པི་ལིང་དང་། པི་པི་ལིང་གི་རྩ་བ་ལ་རྩེ་ལག་དང་། དབྱི་མོའི་ལོ་མ་དང་། ཙིཏྲ་ཀ་དང་། ལི་དོང་གྲ་འདི་ལྔ་དང་། སྨན་དེ་རྣམས་ནི་རླུང་དང་། བད་ཀན་དང་། ཚིལ་ཆེས་པ་དང་། ཆམ་པ་དང་། སྐྲན་དང་། རིམས་ན་བ་དང་། གཞང་འབྲུམ་གྱི་ནད་དང་འདི་རྣམས་སེལ་བར་བྱེད་དོ། །
[4b.6]ཤུ་དག་དང་། གླ་སྒང་ཆེན་པོ་དང་། ཐང་ཤིང་དང་། སྒྲོན་ཤིང་དང་། ལི་དོང་གྲ་དང་། བོང་ང་དང་། ཨ་རུ་ར་དང་། སྐྱེར་པ་དང་། ཡུང་བ་དང་། ཤིང་མངར་དང་། ཀྲྀཥྞ་པརྞི་དང་། དུག་མོ་ཡུངས་དང་། སྨན་འདི་རྣམས་ནི་ཤུ་དག་དང་སྐྱེར་པ་ལ་སོགས་པའི་སྨན་སྡེའི་གྲངས་སུ་གཏོགས་ཏེ།
[4b.7]ཟས་མ་ཞུ་བའི་བེའུ་སྣབས་དང་། རབ་ཏུ་འཁྲུ་བའི་ནད་རྣམས་ཞུ་ཞིང་གཅོད་དོ། །ཚིལ་ཆེས་པ་དང་བད་ཀན་རྒྱས་པ་དང་། རླུང་ནད་དང་། བུད་མེད་ཀྱི་ནུ་མ་ན་བ་འདི་རྣམས་སེལ་ཏོ། །གནྡྷ་པྲི་ཡང་ཀུ་དང་། མིག་སྨན་ར་གན་གྱི་དུད་པ་དང་། ལིག་བུ་མིག་དང་། སྟང་ཟིལ་དང་།
[5a]
[5a.1]མེ་ཏོག་པདྨའི་ཟེ་བ་དང་། ལྕིམ་རྩ་དང་། བཙོད་དང་། ཡ་བ་ཤ་ཀ་དང་། ཤིང་ཤལ་མ་ཤི་ལི་དང་། ཤིང་ཤལ་མ་ལིའི་ཁུ་བ་དང་། པུ་ན་ནཱ་ག་དང་། ས་མང་ག་དང་། ཙནྡན་དཀར་པོ་དང་། མེ་ཏོག་དྷ་ཏ་ཀི་དང་། ཨམ་པ་ཤྠ་དང་། ཤིང་མངར་དང་། ནམ་སྐ་རི་
[5a.2]དང་། ནམ་ཏི་བྲི་ག་ཤ་དང་། རྒྱ་སྐྱེགས་ཤིང་དང་། རོ་དྷཱ་སེང་ཕྲོམ་དང་། ད་ཏ་ཀི་དང་། ཤིང་བིལ་བ་དང་། པེ་ཤིང་ཀ་དང་། ཀ་ཏང་ག་དང་། པདྨའི་གེ་སར་ཟེ་བ་དང་། སྨན་འདི་རྣམས་ནི་སྨན་སྡེ་རྣམ་གཉིས་ཏེ། གནྡྷ་པྲི་ཡཾ་ཧང་བུའི་སྡེ་གྲངས་སུ་གཏོགས་པ་དང་། སྨན་ཨམ་
[5a.3]བཤྠ་ལ་སོགས་པ་དེ་རྣམས་ནི་ཁ་ཟས་ཞུ་བའི་ཚད་པར་འཁྲུ་བ་གཅོད་དོ། །སྨན་འདི་དག་ནི་འཁྲུ་བ་ཡང་གཅོད། ནང་གི་ཤ་ཆད་དང་པགས་པའི་ཤ་བྱུང་བ་སླར་འཕྲོས་པ་འབྱོར་བར་བྱེད་དེ་ཕན། མཁྲིས་པ་རྒྱས་པ་ལ་ཕན། རྨ་རེད་པ་ཡང་འཚོ་བར་བྱེད་དོ། །གླ་སྒང་དང་། ཤུ་
[5a.4]དག་དང་། ཙི་ཏྲ་ཀ། ཀྲུ་ཏྲུག་ཏྲེས་དང་། སྐྱེར་པ་དང་། ཡུང་བ་གཉིས། ཁ་བ་རྣམ་གཉིས་ལ། ཀ་ཏུ་ཀ་རོ་ཧི་ནི་པུ་ཙེ་ཤེལ་དང་། ཀ་ཀ་ཏིག་ཏ་དང་། གོ་བྱེ་དང་། པ་ཐ་དང་། འབྲས་བུ་གསུམ་པོ་ཨ་རུ་ར་དང་། སྐྱུ་རུ་ར་དང་། བ་རུ་ར་དང་། བོང་ང་དཀར་པོ་དང་། བོང་ང་ནག་
[5a.5]པོ་དང་། ཁྲ་བོ་དང་། རུ་རྟ་དང་། སུག་སྨེལ་དང་། ཤུ་དག་དང་། འདི་རྣམས་ནི་བུད་མེད་ཀྱི་མངལ་ན་བ་དང་། ནུ་མ་ན་བ་དང་། དྲི་མ་བཤང་གཅི་བ་དང་། རྔུལ་དང་། རྔུ་མ་དང་། རྣ་སྤབས་པ་ལ་སོགས་པ་སེལ་ཅིང་འབྱང་ངོ་། །ཤིང་ནྱ་གྲོ་དྷ་དང་། ཤིང་ཨ་ཤྭཏྠ་དང་། ཤིང་ཨུ་
[5a.6]དུམྦཱ་ར་དང་། པཊྚི་ཀ་རོ་དྷ་སྣ་གཉིས། འཛམ་བུ་གཉིས་ལ། བྲི་ཧད་ཕ་ལ་དང་། དྷས་སྭ་ཕ་ལ་གཉིས། ཤིང་ཨརྫུ་ན་དང་། ཤིང་སོམ་བལ་ཀ་དང་། ཤིང་པྤཀྴ་དང་། ཤིང་ཨམྲ་དང་། ཤིང་མ་བཉྫུ་ལ་དང་། ཤིང་པི་ལ་ཡ་དང་། རྒྱ་སྐྱེགས་ཤིང་དང་། ཤིང་ནན་ཏི་ཀེ་ལི་དང་།
[5a.7]ཤིང་བིར་ལ་དང་། ཤིང་མངར་དང་། ཤིང་མ་དུ་ཀ་དང་། འདི་རྣམས་ནི་ཤིང་ནྱ་གྲོ་ལ་སོགས་པའི་གྲངས་སུ་གཏོགས་ཏེ། རྨ་འཚོ་སྟེ་ཕན། འཁྲུ་བ་གཅོད། ཆག་ཐུར་བྱུང་ན་འབྱོར། ཚོ་སྟེ་ཚིལ་ཆེས་པ་དང་། མཁྲིས་པ་རྒྱས་པ་དང་། ཁྲག་རྒྱས་པ་དང་། སྐོམ་དད་ཆེ་བ་དང་། ལུས་
[5b]
[5b.1]ཀྱི་ཁོང་ཚ་བ་དང་། བུད་མེད་ཀྱི་མངལ་ན་བ་དང་། འདི་རྣམས་སེལ་ཏེ་ཕན་ནོ། །སུག་སྨེལ་དང་། མ་ཧེ་ལ་དང་། ཏུ་རུསྐ་དང་། རུརྟ་དང་། གནྡྷ་པྲི་ཡང་ཀུ་དང་། སྤང་སྤོས་དང་། བ་ལང་བྷྱ་མ་ཀ་དང་། སྤྲིག་ཀ་འབུག་སུག་དང་། ཞོག་ཏང་ཀུ་དང་། ཙོ་ཙ་དང་། གནྡྷ་བྷ་དྲ་དང་། རྒྱ་སྤོས་དང་།
[5b.2]སྟི་ནི་ཡ་དང་། སྤུ་མ་ཞེས་བྱ་བ་སྲི་ཤིང་གི་མེ་ཏོག་གི་ཁུ་བ་དང་། ཉ་ཕྱིས་དང་། རྒྱ་མཚོ་ནས་བྱུང་བའི་ཆུ་སྲིན་གྱི་སེན་མོ་དང་། ཐང་ཤིང་དང་། ཨ་ཀ་རུ་དང་། ཤྲི་བས་ག་དང་། གུར་ཀུམ་དང་། ཙནྡན་དང་། གུ་གུལ་དང་། ས་ཙི་རས་དང་། པོག་དཀར་པོ་ནུ་མ་ཀ་དང་། སུན་ན་མ་དང་།
[5b.3]ནཱ་ག་གེ་སར་དང་། འདི་རྣམས་ནི་སུག་སྨེལ་ལ་སོགས་ཏེ་འདི་དག་དྲི་ཞིམ་པོའི་སྡེར་གཏོགས་ཏེ། རླུང་ནད་དང་བད་ཀན་རྒྱས་པའི་ནད་སེལ། དུག་ཐུབ། པགས་པའི་ཤ་མདོག་བཟང་པོ་སྡུག་གུར་འགྱུར། གཡན་པ་དང་། ཐོར་བུ་དང་། བས་ལྡག་པའི་ནད་འདི་རྣམས་ཀུན་སེལ་ཏོ། །
[5b.4]ཤྱ་མ་དང་། དན་དི་དང་། དྲ་བན་ཏི་དང་། ཀ་མུ་ཀ་དང་། དྲི་བིད་ཤིང་ཉེ་རོང་དང་། ཤང་ཁྲི་ནི་དང་། པ་ཏལ་དང་། སུ་བརྞ་ཤི་རི་དང་། གབ་ག་ཤི་དང་། ཤི་ཁ་རི་དང་། ཀམ་པི་ལྱཀ་དང་། སླེ་ཏྲེས་དང་། ཤིང་ཀ་རཉྫ་དང་། བ་སྟད་ཏྲི་དང་། བྱ་དྷི་ག་ཏ་དང་། བྷ་ལ་དང་། བ་ཧུ་ར་
[5b.5]ས་དང་། ཤིང་རོ་ཚ་བ་རྣམས་ཀྱི་འབྲས་བུ་ནི་སྨན་ཤ་མ་ལ་སོགས་པའི་སྡེར་གཏོགས་ཏེ། སྐྲན་དང་། དུག་འཐུངས་པ་དང་། ཟས་ཡི་གར་མི་འོང་བ་དང་། བད་ཀན་རྒྱས་པ་དང་། སྙིང་ན་བ་དང་། ཆུ་འགགས་པ་དང་། ནད་འདི་རྣམས་སེལ་ཏོ། །དེ་ལྟར་སྨན་གྱི་གྲངས་སུམ་ཅུ་རྩ་
[5b.6]གསུམ་བཤད་པ་ལ། དེ་དག་གི་ནང་ནས་སྨན་ལ་ལ་མ་རྙེད་ན་ཡང་། སྨན་གྱི་རོ་དང་། མཐུ་དང་ཡོན་ཏན་འདྲ་བ་ལས་སྨན་སྣ་སྦྱོར་ཅིག །བཀྲུ་སྨན་དང་སྐྱུག་སྨན་ལ་སོགས་པ་ནད་སྦྱངས་པའི་སྨན་སྣ་ཚོགས་འདུས་པར་བཤད་པ། སྨན་སྡེའི་རྣམ་གྲངས་བཤད་པའི་ལེའུ་བཅོ་ལྔ་པ་
[5b.7]རྫོགས་སོ།། །།སྣུམ་དཔྱད་ཀྱི་ཆོ་གར་བྱ་བ་བཤད་པའི་ལེའུ་བཅུ་དྲུག་བཤད་པར་བྱའོ། །སྣུམ་གྱི་ནང་ན་མཆོག་ནི་རྣམ་པ་བཞི་སྟེ། ཞུན་མར་དང་། རྐང་དང་། ཚིལ་དང་། ཏིལ་མར་དང་བཞིའོ། །དེ་ལྟར་སྣུམ་དེ་དག་ནི་སྤྱིར་ནི་འཇུ་དཀའ་སྟེ་ལྕི། བསིལ། ཁོང་འཁྲུ།
[6a]
[6a.1]ལུས་ཀྱི་ཁོང་སྣུམ་པར་བྱེད། འཇམ་པར་བྱེད་རྩ་ཐམས་ཅད་དུ་འགྲོ་བས་ན་ཞིབ་མཉེན། ལུས་ཀྱི་ཁོང་རླན་པར་བྱེད་དོ། །ཟས་སྣུམ་བག་འདི་དང་འདྲ་བའི་སྨན་སྣུམ་བག་ཅན་དུ་གཏོགས་པ་ཕལ་ཆེར་ཡང་དེ་དང་འདྲའོ། །སྣུམ་དང་སྨན་དེ་དང་མི་འདྲ་བ་
[6a.2]གཞན་ནི་རྩུབ་པ་ཞེས་བྱའོ། །དེ་ལ་ཡང་སྣུམ་དེ་དག་གི་ནང་ན་ཡང་ཞུན་མར་སྨན་དང་སྦྱར་ཏེ་བཙོས་པ་ནི་ཇི་ལྟར་སྦྱར་བ་བཞིན་དུ་ཕན་ནོ། །རྐང་དང་ཚིལ་དང་ཏིལ་མར་གསུམ་ནི་མཁྲིས་པ་དང་བད་ཀན་དང་རླུང་སེལ་ཏོ། །དེ་ལ་ཞུན་མར་བས་ནི་ཏིལ་མར་འཇུ་དཀའོ། །ཏིལ་མར་བས་ནི་
[6a.3]ཚིལ་འཇུ་དཀའོ། །དེ་ལ་སྣུམ་རྣམ་གཉིས་ཞེས་བྱ་བ་ནི་ཞུན་མར་དང་ཏིལ་མར་རོ། །སྣུམ་རྣམ་གསུམ་ཞེས་བྱ་བ་ནི་ཞུན་མར་དང་ཏིལ་མར་དང་རྐང་མར་གསུམ་མོ། །སྣུམ་རྣམ་བཞི་ནི་ཞུན་མར་དང་རྐང་དང་ཚིལ་དང་ཏིལ་མར་བཞི་ལ་སྣུམ་ཆེན་པོ་བཞི་ཞེས་བྱའོ། །དེ་ལ་སྣུམ་གྱི་སྨན་དཔྱད་བྱ་བའི་
[6a.4]ནད་དམིགས་ནི། ཆང་ནད་དུ་གྱུར་པ་དང་། བུད་མེད་ཀྱིས་དུབ་པ་དང་། དྲག་ཤུལ་དང་། ངལ་བའི་ལས་བྱས་པ་དང་། སེམས་ལས་ཆེན་པོ་ལ་ཞུགས་པ་དང་། མི་རྒན་པོ་དང་། བྱིས་པ་དང་། ཉམས་སྟོབས་ཆུང་བ་དང་། སྐེམ་པོ་དང་། ལུས་ཀྱི་ཁོང་ན་སྣུམ་མེད་དེ། རྩུབ་པོར་གྱུར་པ་དང་།
[6a.5]ཁྲག་ཟད་པ་དང་། ཁུ་ཆུ་ཟད་པ་དང་། རླུང་ནད་ཀྱིས་ཉམ་ཐག་པ་དང་། མིག་རབ་རིབ་ཁྱེར་ཏེ་རྟུལ་བ་དང་། རྣ་བ་མི་གསང་སྟེ་ལེགས་པར་མི་ཐོས་པ་དང་འདི་རྣམས་ལྟ་བུ་ལ། སྣུམ་གྱི་བཅུད་ཀྱིས་ལུས་བརྟ་བར་བྱའོ། །བརྟ་བར་བྱ་བ་དེ་ལ་ཡང་ཐོག་མར་དུགས་བྱས་ལ་ཕྱིས་བཀྲུ་སྨན་
[6a.6]གྱིས་བཀྲུས་ཏེ། སྦྱངས་ནས་དེའི་རྗེས་ལ་སྣུམ་གྱི་དཔྱད་བྱའོ། །ཧ་ཅང་ཁོང་པ་མེའི་དྲོད་ཆེས་པ་དང་། ལུས་སྦོམ་པ་དང་། ཉམ་ཆུང་ཞིང་རིད་པ་དང་། བརླ་རེངས་པ་དང་། ཚད་པས་རབ་ཏུ་འཁྲུ་བ་དང་། མ་ཞུ་བེའུ་སྣབས་ཡོད་དེ་མཆིན་པ་ན་བ་དང་། ལྐོག་མ་ན་བ་དང་།
[6a.7]དབྱིག་དུག་གིས་ཕོག་པ་དང་། ལྟོ་བའི་ནང་དམུ་རྫིང་ལྟ་བུ་དང་། བརྒྱལ་བ་དང་། རྟག་ཏུ་སྐྱུགས་པ་དང་། ཟས་ཡི་གར་མི་འོང་བ་དང་། བད་ཀན་གྱི་ནད་ཡོད་པ་དང་། སྐོམ་དད་ཆེ་བ་དང་། ཆང་གིས་ཕོག་སྟེ་ར་རོ་བ་དང་། བུད་མེད་བུ་བཙས་པ་དང་། སྨན་སྣ་ནས་བཏང་བ་དང་། བཀྲུ་
[6b]
[6b.1]སྨན་གྱིས་བཀྲུས་པ་འདི་ལྟ་བུ་ལ་སྣུམ་གྱི་དཔྱད་བྱ་ཞིང་སྦྱིན་དུ་མི་རུང་ངོ་། །དེ་ལ་ཞུན་མར་གྱི་ཡོན་ཏན་ནི་སེམས་རྣོ་མི་བརྗེད་ཅིང་དྲན་པ་དང་། ཡིད་གཞུངས། ལུས་སྐེམ་ཞིང་རིད་པ་འདི་ལྟ་བུ་ལ་ཕན་ནོ། །ཏིལ་མར་ནི་ལྟོ་ན་སྲིན་བུ་ཡོད་པ་དང་། ཚིལ་ཆེས་པ་དང་། རླུང་ནད་ཅན་དུ་གྱུར་
[6b.2]པ་འདི་ལྟ་བུ་ལ་ཏིལ་མར་ཕན་ནོ། །ལུས་ཁོང་ཡང་བ་དང་། ལུས་ཁོང་གྲིམས་ཤིང་ཤ་མཁྲང་བ་དང་། ལྟོ་སྲ་བ་འདི་ལྟ་བུ་ལ་རྐང་ཟོས་ན་ཕན་ནོ། །ལུས་ལ་རླུང་དང་ཉི་ཚན་གྱིས་གདུངས་པ་དང་། ལམ་རིང་པོར་བགྲོད་པས་ཁོང་དུབ་པ་དང་། སྨྲ་མངས་པ་དང་། བུད་མེད་ལ་
[6b.3]དྲགས་པ་དང་། དྲག་ཤུལ་དང་། ལས་ཆེས་པ་དང་། སྲོག་ཟུངས་བདུན་ལྟ་བུ་ཟད་པ་དང་། ལུས་ཀྱི་ཁོང་ན་སྣུམ་མེད་དེ། རྩུབ་པོར་གྱུར་པ་དང་ཉོན་མོངས་པ་བྱས་པས་ལུས་རིད་པ་དང་། ཕོ་བའི་དྲོད་ཧ་ཅང་ཆེས་ཏེ་ཟས་ཧ་ཅང་འཇུ་བ་དང་། རྩ་སྒོ་ཀུན་རླུང་གིས་འགགས་
[6b.4]ཤིང་འཚངས་པ་འདི་ལྟ་བུ་ལ་ཚིལ་ཟོས་ན་ཕན་ནོ། །དེ་ལ་ཚིལ་ནི་ལྷག་པར་རུས་པའི་ཚིགས་ཁ་བྱེ་བ་དང་། རུས་པ་ཆག་པ་དང་གནད་སྣད་པ་དང་། ལྟོ་བའི་ནང་གྲོལ་ན་བ་དང་། མེས་ཚིག་པ་དང་། ལུས་རྨས་ཏེ་རྨ་བྱུང་བ་དང་། རྐང་ལག་གི་ཚིགས་བུར་བ་དང་། མོ་མཚན་
[6b.5]ན་བ་དང་། རྣ་བ་ན་བ་དང་། ཀླད་པ་ན་བ་དང་། འདི་ལྟ་བུ་ལ་ཚིལ་ཕན་ནོ། །ཏིལ་མར་ནི་ལྷག་པར་དབྱར་ཟླ་ཐ་ཆུངས་དང་། སྟོན་ཟླ་ར་བའི་ངོ་ལ་ཕན་ནོ། །ཞུན་མར་ནི་སྟོན་ཟླ་འབྲིང་པོ་དང་། ཐ་ཆུངས་ཀྱི་ངོ་ལ་ཕན་ནོ། །རྐང་དང་ཚིལ་ནི་དཔྱིད་ཀ་ཕན་ནོ། །སྣུམ་འདི་རྣམས་གང་ཡང་
[6b.6]རུང་དུས་ཚིགས་དང་མི་སྦྱོར་བར་འཕྲལ་གང་བབ་དུ་གཏོང་ན། ཚེས་གྲངས་ཀྱི་ཉི་མ་བཟང་བ་དང་། སྲིན་དང་ཡུལ་ངན་མེད་ཅིང་ཡུལ་བཟང་བའི་ཚེ་ཐོང་ཤིག །ཏིལ་མར་ནི་དགུན་ཟླ་གྲང་ལྷགས་ཆེ་བའི་ཚེ་བཏང་ན་ཕན་ནོ། །ཞུན་མར་ནི་དབྱར་ཟླ་ར་བ་དང་། འབྲིང་པོ་ཚ་བའི་དུས་
[6b.7]ན་མཚན་མོ་འཐུངས་ན་ཕན་ནོ། །མཁྲིས་པ་དང་རླུང་ནད་དུ་གྱུར་ན་ཞུན་མར་ནི་མཚན་མོ་ཡང་གཏང་དུ་རུང་ངོ་། །ཡང་རླུང་དང་མཁྲིས་པ་ལྟ་བུ་ནད་སྣ་གཉིས་འདྲེས་པར་ན་ན། ཏིལ་མར་དང་ཞུན་མར་མཚན་མོ་གཏང་བར་རུང་ངོ་། །རླུང་དང་བད་ཀན་གྱི་ནད་དུ་གྱུར་ན། ཞུན་མར་
[7a]
[7a.1]དང་སྨན་དང་སྦྱར་བ་ཉིན་པར་ཐོང་ཤིག །དེ་བས་ན་སྨན་ཞུན་མར་དང་སྨན་དང་སྦྱར་བའི་ཏིལ་དང་ཁ་ཟས་ལ་སོགས་པ་རྣམས་དང་། སྨན་མས་གཏོང་བ་དང་། སྨན་སྣ་ནས་གཏང་བ་དང་། ལུས་མར་གྱིས་བསྐུ་བ་དང་། སྨན་བསྐོལ་བའི་ཁུ་བ་ཁར་བླུགས་ཤིང་དབོ་
[7a.2]བ་དང་། མགོ་དང་རྣ་བ་དང་མིག་ཏུ་སྨན་བསྐུ་ཞིང་བླུགས་པ་ལ་སོགས་པ་རྣམས་ཀྱང་རན་པ་ཙམ་དུ་གཏང་ངོ་། །རོ་རྣམ་དྲུག་ལ་སོགས་པ་སྣ་རེ་རེ་བ་དང་། རོ་སྣ་གཉིས་པ་དང་། རོ་སྣ་གསུམ་པ་དང་། སྣ་བཞི་ས་དང་། སྣ་ལྔ་པ་ལ་སོགས་པ་སྨན་སྦྱར་བའི་རོ་བྲོ་བའི་སྣ་གྲངས་དྲུག་ཅུ་རྩ་བཞི་ལ་
[7a.3]སོགས་པར་ཕྱེ་བ་དེ་ལས། སྣུམ་གྱི་དངོས་པོ་མར་ལ་སོགས་པ་རོ་ལོགས་ཤིག་ན་ཐ་དད་པ་མ་ཡིན་ཏེ། ཇི་ལྟ་ཞེ་ན། སྨན་མར་སྦྱོར་བ་ཡང་། སྨན་སྣ་མང་པོ་སོགས་ལ། མར་ཉུང་ངུ་བྱས་པས་ན། མར་གྱི་རོ་ཟིལ་གྱིས་གནོན་ཏོ། །ལྷག་པར་བྲོ་བ་མེད་པས་ན་རོ་དྲུག་ཅུ་ཉིད་ཀྱི་ནང་དུ་
[7a.4]འདུས་སོ། །དཔེར་ན་ཇི་སྐད་དུ་བསྟན་པ། སྨན་བསྐོལ་བའི་ཁུ་བ་དང་དངས་མ་བཏུང་བའི་རོ་དེ་ཡང་ཆུའི་རོ་ཅི་བྲོ་བ་ལ་སོགས་ཤིག་ན་རྒྱུ་ལྷག་པ་མེད་དེ། རོ་དྲུག་ཅུ་ཉིད་ཀྱི་ནད་དུ་འདུས་སོ། །ཡང་ནི་སྨན་མར་མྱུར་དུ་གང་ཕན་པ་དེ་བཟང་སྟེ། དེ་ལ་ཐུན་ཆུང་ངུ་ཟོས་ན་ཐུན་གཉིས་ཀྱིས་
[7a.5]འཇུའོ། །ཚོད་འབྲིང་དུ་ཟོས་ན་ཐུན་བཞིས་འཇུའོ། །ཚོད་ཆེར་ཟོས་ན་ཉིན་ཞག་གཅིག་གིས་འཇུའོ། །དེ་ལྟར་སྨན་དང་སྦྱར་བའི་ཏིལ་མར་རམ། སྨན་མར་གང་ཟ་ཡང་རུང་སྟེ། མིའི་ཉམས་དང་ནད་ཀྱི་དམིགས་ལ་སྦྱོར་ལ། སྔར་ནི་ཚོད་ཆུང་ངུ་ནས་བཟའ་བར་བྱའོ། །ཡང་བཀྲུ་སྨན་གྱིས་
[7a.6]བཀྲུ་བར་འདོད་ན་ཁར་རྩང་ལྟ་བུ་ཟས་ཟོས་ལ། ད་ནང་ལྟ་བུ་ཞུ་སྟེ་ཁོང་ན་ཡང་། ཞུན་མར་དང་དངས་མ་འབའ་ཞིག་ཚོད་ཆེར་མང་དུ་བཟའོ། །མར་འཐུངས་པས་ནད་ཞི་བར་བྱས་པ་ཞིག་ལ་ཟས་ཀྱང་ཆེར་མ་ཟོས་ཏེ་ཁོང་བཀྲེས་ན་མར་འབྲིང་ཙམ་དུ་ཟོས་ན་ཕན་ནོ། །སྨན་མར་གྱིས་
[7a.7]ཉམས་བཙག་བརྟ་ཞིང་ཤ་སྐྱེ་བར་བྱ་ན། དྲོ་ཁར་སྨན་མར་ཉུང་ཟད་བཞུ་སྟེ། ཤ་ཁུ་གདུས་ལ་དྲོ་ཚ་ཙམ་གྱི་ནང་དུ་བླུགས་ལ་འཐུངས་ནས། དེའི་རྗེས་ཁ་ཟས་སྣུམ་བག་ཟོས་ལ་ཆང་གིས་མནན་ན་ཕན་ནོ། །ཡང་བྱིས་པ་གཞོན་ནུ་ལྟ་བུ་དང་། མི་རྒན་པོ་དང་། རྟག་ཏུ་སྐོམ་དད་ཆེ་
[7b]
[7b.1]བ་དང་། མར་ཟ་བའམ། འཐུང་མི་ཕོད་པ་དང་། ཆང་དད་ཆེ་བ་དང་། རྟག་ཏུ་བུད་མེད་དང་ཕྲད་དེ། རྟག་ཏུ་ཁ་ཟས་སྣུམ་བག་ཟ་བ་ལྟ་བུ་དང་། དྲོད་ཆུང་དེ་ཁ་ཟས་མི་འཇུ་བ་ལྟ་བུ་དང་། སྐྱིད་དེ་བདེ་བར་འདུག་འདུག་པའི་མི་དང་། སྨན་སྟོབས་ཆུང་བའི་མི་ཉོན་མོངས་པས་
[7b.2]འཇིགས་པ་ལྟ་བུ་དང་། ལྟོ་སྙི་བ་དང་། ནད་དཀྱེལ་མི་ཆེ་བ་ལྟ་བུ་དང་། སོ་ག་ཚ་བའི་དུས་དང་། ནད་ཀྱིས་རིད་པར་གྱུར་པ་འདི་རྣམས་ལྟ་བུ་ལ་སྨན་མར་གཏང་བ་ནི། དྲོ་བ་སྨན་མར་ཉུང་ཤས་བཞུ་སྟེ་གཅིག་ཏུ་འཐུང་ངམ། ཁུ་བ་དྲོན་པོས་ཕུལ་ཏེ་འཐུངས་པའི་རྗེས་ལ། ཁ་ཟས་
[7b.3]སྣུམ་བག་དང་ཆང་འཐུང་ཤིག །དེ་ལ་ནད་དམིགས་ཀྱི་རིམ་པ་དང་སྦྱར་ཏེ་སྨན་མར་གཏང་བའི་ཐབས་ནི། ལུས་ཀྱི་སྟོད་ན་ནད་ཡོད་ན་ནི་ཁ་ཟས་ཟོས་པའི་རྗེས་ལ་མར་ཕྱིས་བཏུང་ངོ་། །ཁོང་པའི་ནང་ལུས་ཀྱི་བར་ན་ནད་ཡོད་པ་ནི་ཁ་ཟས་ཕྱེད་ཟོས་ནས་སྨན་མར་བཏུང་ངོ་། །ལུས་
[7b.4]ཀྱི་སྨད་ན་ནད་ཡོད་ན་ནི། དྲོ་ཁར་ལྟོ་སྟོང་ལ་སྨན་མར་བཏང་ན། རྗེས་ལ་ཁ་ཟས་དང་ཚིལ་ནན་འཐུངས་ན་ནད་སེལ་ཏོ། །སྨན་མར་གཏང་བའི་ཐབས་རིམ་པ་འདི་ལྟར་བྱས་ན་ཕན་པའི་སྟོབས་མཐུ་ཡང་། ལུས་ཀྱི་རིམ་པ་བཞིན་དུ་སྐྱེའོ། །དེ་ལྟར་སྨན་མར་འཐུངས་པ་ལས་མར་ཅུང་
[7b.5]ཟད་མ་ཞུ་ན། ཆུ་ཚན་གདུ་གདུ་བའི་དངས་མ་ཁ་ཟས་བཟོད་ཙམ་འཐུངས་ན། མར་བདེ་བླག་ཏུ་འཇུ་བར་འགྱུར་རོ། །སྨན་མར་ལ་སོགས་པ་ཟོས་ཏེ། སྣུམ་ཁའི་ནང་དུ་ཆགས་ན། ཆུ་ཚན་གདུས་པ་ཁས་བཟོད་ཙམ་གྱིས་ཁ་བཀྲུའོ། །ཨེ་རཎྜའི་ཁུ་བ་གདུས་པ་དང་།
[7b.6]བ་ལ་ཏ་ཀ་ཞེས་བྱ་བ་གོ་བེ་དང་། འདི་གཉིས་སུ་གདུས་པའི་ཁུ་བ་ནི་བཏུང་དུ་མི་རུང་ངོ་། །གལ་ཏེ་ཁར་རྩང་ངམ། ཁར་ཉིན་ལྟ་བུ་སྨན་མར་འཐུངས་པ་ལས་ཞུ་འམ་མ་ཞུ་གཏོལ་མེད་དེ་ཐེ་ཙོམ་ཟ་ན། ཆུ་ཚན་གདུ་གདུ་བ་ཡང་འཐུང་ཤིག །དེ་འཐུངས་པར་ཁོང་དུ་མ་ཞུ་
[7b.7]ལ། མ་ཞུ་བའི་གདུང་སྒྲེགས་མནན་པོ་མ་ཡིན་སྒྲེགས་པ་ཡང་ཐ་མལ་པར་འོང་། ཁོང་ཡང་ཞིང་ཟས་ཡི་གར་འོང་བར་གྱུར་ན། ཁ་ཟས་རན་ཙམ་དུ་བཟའ་ཞིང་འཚལ་ནན་ཀྱང་ཅི་རན་དུ་འཐུང་ཤིག །དེ་ལྟར་སྨན་མར་འཐུངས་ནས་ཞུ་བའི་རྗེས་ལ། ཁ་ཟས་བཟའ་བ་
[8a]
[8a.1]ནི་ཁུ་བ་དྲོ་བག་དང་། ཟས་བད་ཀན་དུ་མི་འགྱུར་བ་དང་། ཧ་ཅང་ཟས་སྣུམ་བག་ཉིད་མ་ཡིན་པ་དང་། ཁ་ཟས་གྲང་དྲོ་མ་འདྲེས་པར་བཟའོ། །སྨན་མར་འཐུངས་པ་ལྟ་བུ་ཁ་ལག་ཀྱང་ཆུ་དྲོན་པོས་བཀྲུ། བུད་མེད་དང་འཕྲད་དུ་མི་རུང་། མཚན་མོ་ཡང་གཉིད་
[8a.2]ཉལ། བཤང་གཅི་འོངས་ན་མི་དགག །དྲག་ཤུལ་གྱི་ལས་མི་བྱ། ཁྲོ་ཞིང་ཚིག་པ་ཟ་བ་དང་། མྱ་ངན་དང་། གྲང་བའམ། ཉི་ཚན་ལ་འདུག་པའམ། རླུང་དྲག་པོ་ལངས་པའི་ཁར་འགྲོ་བའམ། རྟ་ཞོན་ཏེ་ཕན་ཚུན་འཁྱམས་པའམ། ལམ་དུ་ཞུགས་པ་དང་། མང་དུ་སྨྲ་
[8a.3]བ་དང་། སྟན་ཧ་ཅང་མཐོ་བ་ལ་འདུག་པ་དང་། སྔས་ཧ་ཅང་མཐོ་བ་འམ། དམའ་བ་འདི་རྣམས་ལྟ་བུ་མི་བྱའོ། །ཉིན་པར་ཉལ་བ་དང་། དུད་པ་དཀུ་བའི་ནང་ན་འདུག་པ་དང་། རྡུལ་ཁྲོད་ན་འདུག་པ་འདི་རྣམས་ཀྱང་མི་རུང་སྟེ། དེ་ལྟ་བས་ན་སྨན་མར་ཅི་སྲིད་འཐུངས་པ་དེ་སྲིད་ཀྱི་
[8a.4]བར་དུ། ཆོ་ག་དེ་ལྟར་བྱ་ཞིང་མི་རུང་བ་རྣམས་སྤང་ངོ་། །སྨན་མར་དང་འདྲ་བར་བཀྲུ་སྨན་བཏང་བ་དང་། སྣ་ནས་བཏང་བ་དང་། སྨན་མས་གཏོང་བ་རྣམས་ཀྱང་ཚུལ་དེ་དང་འདྲ་བར་ནད་བྱང་གི་བར་དུ་ཆོ་ག་ཡུན་དེ་སྲིད་དུ་བསྲུང་བར་བྱའོ། །དེ་ལ་ནད་ཞི་བར་བྱ་བའི་ཕྱིར། སྨན་
[8a.5]མར་གཏང་བའི་ཆོ་ག་ནི་བཀྲུ་སྨན་དང་འདྲ་སྟེ། སྨན་མར་གྱི་ཆོ་ག་ཡང་དེ་བཞིན་དུ་བྱའོ། །དེ་ལ་ལྟོ་སྙི་ན་ནི་སྨན་མར་ཉི་མ་གསུམ་དུ་གཏང་ངོ་། །ལྟོ་སྲན་ནི་ཉི་མ་བདུན་དུ་གཏང་ངོ་། །སྨན་མར་བཏང་བས་ནད་རྩེ་ཞིལ་ཏེ། ཁོང་ལེགས་པར་སྣུམ་པར་གྱུར་ན། དེ་ཕན་ཆད་ཁ་ཟས་ཀྱི་ཆོ་ག་
[8a.6]བྱའོ། །དེ་ལྟར་སྨན་མར་བཏང་བས་ནད་རྩེ་ཞིལ་བར་གྱུར་ན། སྟོད་སྨད་དུ་དབུགས་དབྱུང་བ་ཐ་མལ་པར་འོང་། ཕོ་བའི་མེ་དྲོད་ཆེས་ཏེ་འབར། བཤད་བ་སྣུམ་ལ་མི་སྲི་བ་འབྱུང་། མར་དང་སྣུམ་བག་མི་འདོད་དེ་སྐྱོ། ལུས་སྙོམས་ཏེ་འདི་ལྟར་གྱུར་ན། ནད་རྩེ་ཞིལ་ཞིང་ལུས་ཀྱི་ཁོང་
[8a.7]ལེགས་པར་སྣུམ་པོར་གྱུར་པ་ཡིན་ནོ། །ལུས་ཀྱི་ཁོང་རྩུབ་ན་ནི་ཚུལ་འདི་དང་འདྲ་སྟེ། འདི་ལས་བཟློག་སྟེ་བལྟའོ། །གལ་ཏེ་སྨན་མར་དང་སྣུམ་གྱི་ཚོད་མ་ཟིན་ཏམ། ཕན་པ་མ་ཡིན་པར་ཟོས་སམ། གཏང་བའི་དུས་མ་ཡིན་པར་འཐུངས་སམ། ཁ་ཟས་ལོག་པ་ཧ་ཅང་སྣུམ་ཆེས་
[8b]
[8b.1]པའམ། བསིལ་ཞིང་རྩུབ་པའམ། ཟས་མ་ཞུ་བཞིན་དུ་ཟོས་པའམ། མཚན་མོ་མི་ཉལ་ཞིང་ཉིན་པར་ཕན་ཚུན་འཁྱམ་པ་དང་། མི་མཐུན་པ་ལོག་པ་བྱས་པ་འདི་ལྟ་བུ་ལས་སྨན་མར་མ་ཞུ་སྟེ། སྣུམ་དྲགས་པར་གྱུར་ན། གདོང་པ་དང་ལུས་ཀྱི་ཤ་མདོག་སེར། སྣབས་དང་མཆིལ་མ་
[8b.2]མང་། ཐུར་དུ་ཚད་པར་འཁྲུ་སྟེ། དེ་ལྟ་བུ་ལས་ནད་ནི་ལུས་སྐྲངས་པ་དང་། གཞང་འབྲུམ་ཁྲག་ཚད་དུ་འོང་ངོ་། །ཁོང་རྨྱ་ལུས་དགྱེ་སྒུ་མི་ཤེས་ཏེ། རེངས་བག་ཏུ་འདུག། སེམས་མྱོས་ཏེ་བློང་བག་ཏུ་འདུག །གཡན་བ་དང་། མཛེ་དང་རིམས་ནད་རྟག་ཏུ་སྐྱུགས་པ་
[8b.3]དང་། ཁོང་ན་ལྟོ་སྦོ། མགོ་འཁོར་ལ་སོགས་པ་དང་། འདི་ལྟ་བུའི་ནད་དུ་འགྱུར་རོ། །དེ་ལྟ་བུ་ལ་དཔྱད་བྱ་བ་ནི་ཟས་དང་སྐོམ་དབྲི་ཞིང་བསྡམ་པ་དང་། སྐྱུག་སྨན་གཏང་། དུགས་བྱ། ཟས་དང་སྐོམ་རྣམས་རྩུབ་པའི་བག་གཏང་། འཚལ་ནན་དར་བ་དང་།
[8b.4]ཨ་རུ་ར་དང་། བ་རུ་ར་དང་། འདི་ལྟ་བུ་མནན་པའི་ཁུ་བ་དང་། དར་བ་བསྐོལ་བ་དང་། ནས་དང་། ཙི་ཙེ་རྒོད་དང་། ཁྲེ་རྒོད་དང་། པི་པི་ལིང་དང་། འབྲས་བུ་གསུམ་པོ་ཨ་རུ་ར་དང་། བ་རུ་ར་དང་། སྐྱུ་རུ་ར་གསུམ། སྦྲང་རྩི་ལ་སྦྱར་ཏེ་བཏང་པའམ། ཡང་ན་ཨ་
[8b.5]རུ་ར་བཏགས་པ་དང་། བ་གཅིན་དང་གུ་གུལ་བསྲེས་ནས་འཐུངས་ན་ཕན་ནོ། །མདོར་ན་ནད་དམིགས་ཇི་ལྟར་མི་བདེ་བ་དང་སྦྱར་ལ་དཔྱད་བྱས་ན། མར་དྲགས་པའི་ནད་འབྱང་ངོ་། །ཡང་དེ་ལྟ་བུ་ལ་དཔྱད་དུ་བྱ་བ་ནི་ཁ་ཟས་མི་བཟའ་བ་ནི་བཟའ་བར་སྨྱུང་བ་མི་ནུས་ན་ཡང་།
[8b.6]ཁ་ཟས་རྩུབ་པོ་བཟའ་བའི་དཔྱད་བྱས་ན་སྨྱུང་བ་བྱས་པ་དང་འདྲའོ། །གལ་ཏེ་མར་དྲགས་པའི་ནད་ལས་བཀྲུ་སྨན་གཏང་དགོས་པར་གྱུར་ན། ཉི་མ་གསུམ་གྱི་བར་དུ་ཁ་ཟས་སྣུམ་པ་ཁུ་བ་དྲོད་བག་དང་། ཡུལ་སྐམས་ནས་བྱུང་བའི་ཤ་ལས་ཁུ་བ་དྲོད་པག་ཏུ་བྱས་པ་དང་།
[8b.7]ཁ་ཟས་དྲོད་བག་ཟོས་ལ་ནང་ནུབ་ཏུ་དུགས་བྱ་ཞིང་། ཉི་མ་གསུམ་དུ་སྣུམ་བག་གི་དྲོད་དང་། དུགས་དེ་ལྟར་བྱས་ནས། དེའི་རྗེས་ལ་བཀྲུ་སྨན་གཏང་ངོ་། །སྐྱུག་སྨན་གཏང་བ་ནི་མི་ཤ་དང་ཚིལ་ཆེས། བད་ཀན་མང་། དྲོད་མ་སྙོམས་ཏེ། ཟས་རེས་འགའ་འཇུ།
[9a]
[9a.1]རེས་འགའ་མི་འཇུ་བ་དེ་ལྟ་བུ་ནི་ཉིན་ཞག་གཅིག་བད་ཀན་སྐྱེ་བའི་ཁ་ཟས་སྦྱིན་ལ། ཕྱི་དེ་ཉིན་སྐྱུག་སྨན་ཐོང་ཤིག །ཡང་ཟས་སྣུམ་བག་གིས་བསྐྱེད་བསྐྱེད་པ། བད་ཀན་ཅན་དེ་ལྟ་བུ་ལ་སྔར་ཟས་རྩུབ་པོ་བྱིན་ཏེ། དེའི་རྗེས་ལ་ཁ་ཟས་སྣུམ་བག་གིས་ཁོང་སྣུམ་
[9a.2]པར་བྱས་ནས་བཀྲུ་སྨན་ཐོང་ཤིག །དཔྱད་དེ་ལྟར་བྱས་ན་མར་དང་སྣུམ་བག་ལས་ནད་དུ་གྱུར་པ་འབྱང་བར་འགྱུར་རོ། །མར་དང་སྣུམ་ལྟ་བུར་མ་འཕྲོད་དེ་ནད་དུ་གྱུར་པ་ཁ་ཟས་ཀྱི་དཔྱད་བྱས་པས་མ་བྱང་ན། སྨན་བཏང་བའི་དཔྱད་བྱས་པས་ནད་ཀྱི་དྲི་མ་ཕྱིན་པར་འགྱུར་རོ། །བྱིས་
[9a.3]པ་ཆུང་ངུ་དང་། རྒན་པོ་ལ་སོགས་པ་མར་དང་སྣུམ་བག་སྤོང་མི་ནུས་ལ། ཆོ་ག་དཀའ་ན་འཕྲལ་དུ་སྣུམ་གྱི་དཔྱད་འདི་སྐྱོ་ཞིང་གནོད་པར་ཡང་མི་འགྱུར་གྱི་གྱིས་ཤིག །བྱ་བའི་ཐབས་ལ་མར་བརྔོས་ལ་ཤ་ཁུ་ལས་བཏང་ངམ། ཐུག་པའི་ནང་དུ་བཏབ་ལ་བླུད་དོ། །ཡང་
[9a.4]ན་ཏིལ་བཏགས་པའི་ནང་དུ་མར་བཏབ་ལ། བུ་རམ་བསྐོལ་བའི་ཁུ་བས་བཏང་སྟེ་བཏུང་ངོ་། །ཡང་ན་འབྲས་དང་ཏིལ་མར་དང་སྲན་མ་ཤ་དང་། སྣ་གསུམ་གྱི་ཐུག་པ་ནང་དུ་ཡང་མར་འདི་བཞིན་དུ་བཏབ་ལ་བཏུང་ངོ་། །འོ་མ་བསྐོལ་བ་དྲོན་མོའི་ནང་དུ་མར་བཏབ་པའི་
[9a.5]ཐུག་པའམ་ཞོ་མངལ་མ་ཞོག་ཆུ་བོར་ལ། བུ་རམ་གྱིས་བཏབ་སྟེ་བླུད་པའི་ཐུག་པ་དེ་ལྟ་བུ་རྣམ་པ་དྲུག་དང་། མར་རྐང་ཚིལ་དང་ཏིལ་དང་སྣ་བཞི་འབྲས་དང་སྣ་ལྔའི་ཐུག་པ་དང་། སྤྱིར་དྲུག་དང་། ཡང་ཐུག་པ་རྣམ་པ་ལྔ་པོ་འདི་དག་དང་། ཐུག་པ་སྣ་བདུན་པོ་འདི་རྣམས་ནི་འཕྲལ་
[9a.6]དུ་ལུས་ཀྱི་ཁོང་སྣུམ་པར་འགྱུར་ཏེ། ལན་ཚྭ་ཆེར་གདབ་བོ། ཐུག་པ་འདི་དག་ནི་བད་ཀན་དུ་མི་འགྱུར་རོ། །ལུས་རྩུབ་པར་མི་འགྱུར། ཡང་མཛེ་ནད་ལུས་སྐྲང་བག་དང་། གཅིན་རྟག་ཏུ་འོང་ཞིང་སྙི་བ་འདི་ལྟ་བུ་ལ། བུ་རམ་ཡུལ་གཤེར་ས་ནས་བྱུང་བའི་ཤ་དང་།
[9a.7]ལོ་མ་དང་ཏིལ་དང་། སྲན་མ་ཤ་དང་། ཆང་དང་ཞོ་རྣམས་བཟར་མི་རུང་ངོ་། །སྣུམ་གྱི་ཆོ་ག་དང་། དཔྱད་བྱས་ནས་གནོད་པར་མ་གྱུར་ན། སྨན་འབྲས་བུ་གསུམ་པོ་དང་། པི་པི་ལིང་དང་། ཨ་རུ་ར་དང་། གུ་གུལ་ལ་སོགས་པ་བསྐོལ་ལ་ཐོང་ཤིག །དེ་ལྟར་བཏང་ན་
[9b]
[9b.1]ནད་རྙིང་ལ་ཡང་འབྱང་ལ། ལུས་ཀྱི་ཁོང་ནས་དྲོད་སྐྱེ། ཁོང་པ་ནང་གི་ནད་ཀུན་འབྱང་། སྲོག་ཟུངས་བདུན་འཕྲལ་དུ་བརྟ། ཉམས་སྟོབས་དང་བཞིན་མདོག་བཟང་པོར་འགྱུར། དབང་པོ་རྣམས་བརྟན། རྒན་སྲ། ལོ་བརྒྱ་ཐུབ་པར་འགྱུར་ཏེ། མར་རྟག་ཏུ་བཟའ་བའི་ཡོན་
[9b.2]ཏན་དེ་ནི་དེ་ལྟར་འགྱུར་རོ། །སྣུམ་ལ་དཔྱད་ཀྱི་ཆོ་གར་བྱ་བའི་ལེའུ་སྟེ་བཅུ་དྲུག་པ་རྫོགས་སོ།། །།དེ་ནས་དུགས་བྱ་བའི་ལེའུ་བཤད་པར་བྱའོ། །དེ་ལ་དུགས་ཀྱི་བྱེ་བྲག་ནི་རྣམ་པ་བཞི་སྟེ། དུགས་བྱ་བ་དང་། བག་ཟན་དང་སྨན་དུ་སྦྱར་བས་ལུས་ལ་བཅིང་ཞིང་
[9b.3]དུགས་བྱ་བ་དང་། དུགས་ཐ་མལ་པ་དང་། ཆུ་ལུམས་དང་རྣམ་པ་བཞིའོ། །དེ་ལ་དུགས་ཞེས་བྱ་བ་ནི་མེ་ལ་བསྲོས་པ་ཡིན་ཏེ། དེ་ལ་ཡང་ཇི་ལྟ་ཞེ་ན། མེ་མདག་ལ་གོས་སམ། ཐོང་ལྕགས་སམ་ལག་པའི་ཐལ་མོ་མེ་ལ་བསྲོས་པ་ལ་སོགས་པས་དུགས་བྱའོ། །བག་
[9b.4]ཟན་དང་སྨན་དུ་སྦྱར་བའི་དུགས་ལུས་ལ་གླན་ཅིང་བཅིང་བ་ནི་བག་ཕྱེ་འམ་འབྲུ་སྣ་ཚོགས་བཏགས་ལ་སྨན་ཤིང་ཚ་དང་ཕབས་དང་ཉེའུ་ཤིང་དང་ཐང་ཤིང་དང་གུ་གུལ་དང་། ཨ་རུ་ར་དང་། ལྡུམ་བུ་ར་སྣ་དང་། ཨེ་རཎྜའི་རྩ་བ་དང་། ཡུལ་གཤེར་ས་ནས་བྱུང་བའི་ཤ་དང་།
[9b.5]ཚྭ་དང་། དར་བ་དང་། འོ་མ་དང་། ཞོ་དང་། མར་དང་། འདི་རྣམས་ཀྱིས་སླ་མོར་སྦྲུས་ལ་ལན་ཚྭ་ཆེར་བཏབ་སྟེ་བཙོས་ལ་རས་ཀྱི་སྟེང་དུ་བདལ་ཏེ། ལུས་གར་ན་སར་གླན་ཞིང་བཅིངས་ན་དུགས་འདིས་ནི་རླུང་ནད་འབྱིན་པར་འགྱུར་རོ། །གལ་ཏེ་བད་ཀན་དང་འདྲེས་པའི་ནང་
[9b.6]དུ་གྱུར་ན་ནི་དུགས་དེའི་ནང་དུ་བྱེའུ་རུག་པ་ལ་སོགས་པ་དང་སྦྱར་ལ་དུགས་བྱའོ། །མཁྲིས་པའི་ནད་ལ་ནི་ཤིང་ཤུག་པ་དང་སྦྱར་རོ། །དུགས་གླན་ཏེ་དེ་ལྟར་སྦྱར་བ་ལས། གལ་ཏེ་སླ་བས་ལུས་ལ་མི་ཆགས་ཤིང་རས་ཀྱིས་མི་ཐུབ་ན་མར་དང་ཏིལ་མར་ལ་སོགས་པ་སྣུམ་གྱིས་
[9b.7]བསྣན་ཏེ། ཡང་དང་ཡང་བསྭོ་ཞིང་པགས་པ་མ་རུལ་བ་དྲི་མི་ཞིམ་པ་མ་ཡིན་པས་ཕྱི་རོལ་ནས་དུགས་བྱའོ། །ཕགས་པ་དེ་ལྟ་བུ་མ་རྙེད་ན་སྨན་རླུང་སེལ་བའི་ལོ་མ་ཨ་ཤྭ་གནྡྷའམ། ཨེ་རཎྜའམ། དར་རམ་བལ་སྣམ་མམ་རས་ཀྱིས་གཡོགས་ཤིང་དཀྲིས་ལ་མཚན་མོ་དུགས་བྱས་
[10a]
[10a.1]ན་ནི་ཉིན་པར་མི་དགོས་ཀྱི་ཁྲོལ་ཅིག །ཉིན་པར་དུགས་བྱས་ན་ནི་མཚན་མོ་མི་དགོས་ཀྱི་ཁྲོལ་ཅིག །དེ་ལ་དུགས་ཐ་མལ་པ་ཞེས་བྱ་བ་ནི་བག་ཕྱེ་དང་མར་དང་ཆུར་སྦྱར་ཏེ། བཙོས་པའི་བག་ཟན་སླ་མོས། གང་ན་བའི་ཐོག་ཏུ་གླན་ཅིང་བདུགས་པ་དང་། གྱོ་མོའི་
[10a.2]དུམ་བུ་དང་། ཕག་དུམ་དང་། རྡོ་བ་དང་། ས་ཕྱེ་མ་དང་། གསོ་མའི་ལོ་མ་དང་། འབྲས་ལ་སོགས་པ་འབྲུ་རྣམས་དང་། ལུག་གི་རིལ་མ་དང་བྱེ་མ་དང་། ཕུབ་མ་ལ་སོགས་པ་ཐབས་དུ་མས་བཙོས་སམ། བརྔོས་པའི་དུགས་ཀྱིས་ཡུལ་གྱི་རྣམས་དང་དུས་དང་སྦྱར་ཞིང་དུགས་བྱའོ། །
[10a.3]དེ་ལ་སྨན་ཁུའི་ལུམས་བྱ་བའི་དཔྱད་ནི། ཤིང་ཤི་ཀྲུ་དང་། ཤི་ཀྲུའི་རྩ་བ་དང་། ལོ་མ་དང་། འབྲས་བུ་ལ་སོགས་པ་ཇི་སྙེད་པ་དང་། ཤིང་ཨེ་རཎྜའི་རྩ་བ་དང་། ལོ་མ་ལ་སོགས་པ་དང་། ཀ་རཉྫ་དང་། བྱིའུ་རུག་པ་དང་། ཀརྫ་ཀ་དང་། ཤིང་ཤི་རི་ཤ་དང་། ལྡུམ་བུ་བ་ཤ་
[10a.4]དང་། འོད་མ་དང་། ཤིང་ཨརྐ་དང་། མ་ལི་ཏི་དང་། དིརྒྷ་བིན་ཏ་དང་། གསོ་མའི་ལོ་མ་དང་། ཤུ་དག་ལ་སོགས་པ་དང་། ཡུལ་གཤེར་ས་ནས་བྱུང་བའི་ཤ་དང་། ཉ་དང་། ངང་ངུར་ལ་སོགས་པའི་ཤ་དང་། སྨན་གྱི་རྩ་བ་སྣ་བཅུ་པ་དང་འདི་རྣམས་ལ་སོགས་པ་ནད་དམིགས་
[10a.5]དང་སྦྱར་ལ་ནད་ལྕི་ན་སྨན་འདི་ཀུན་སྣ་ཚང་བར་བསོགས་ཏེ་བརྡུངས་ལ་ཆང་དང་ཚྭ་དང་འོ་མ་དང་ཆུ་ལ་སོགས་པ་དང་སྦྱར་ཏེ་བཙོས་ལ་བུམ་པའི་ནང་དུ་བླུགས་ལ་གང་ན་བར་སྨན་གྱི་རླངས་པ་དྲོན་མོས་གར་ན་བའི་དམིགས་སུ་བདུག་ཅིང་ལུམས་བྱའོ། །ཡང་ན་རླངས་པས་མི་བདུག་པར་སྨན་བཙོ་
[10a.6]བཙོ་བའི་ཁུ་བ་དྲོ་ཚ་ཙམ་བུམ་པའི་ཁ་ཕྲ་མོར་བཏོད་པའམ། སྦུ་གུ་རིང་པོར་བཏོད་པའི། བླུགས་པའི་ཁ་ནས་སྨན་གྱི་ཁུ་བའི་རྒྱུན་བྱུང་ནས་ནད་ཀྱི་སྟེང་དུ་བླུགས་ཤིང་སྨན་ཁུའི་ལུམས་བྱའོ། །དེ་ལྟར་སྨན་ཁུའི་ལུམས་བྱེད་པའི་ཚེ་ལུས་ལ་གོས་ཀྱིས་ཀྱང་གཡོགས་ལ་དེའི་སྟེང་དུ་སྨན་
[10a.7]ཁུའི་ཆུ་ལུམས་ཀྱིས་ལུས་ལ་བདེ་བ་རན་པར་བླུགས་ཤིང་ལུམས་བྱའོ། །ཡང་ན་སྨན་ཁུ་དྲོན་མོ་དེ་གཞོང་ཁུང་ལུས་ཚད་ཆེན་པོའི་ནང་དུ་གང་བར་བླུགས་ལ་དེའི་ནང་དུ་ལུས་ཞུགས་ན་རླུང་ནད་ཐམས་ཅད་ལ་ཕན་པར་འགྱུར་རོ། །ནད་པ་ཆུ་ལུམས་དེ་ལྟ་བུའི་ནང་དུ་ཞུགས་ཏེ་འདུག་
[10b]
[10b.1]ན་གཞང་འབྲུམ་ཁྲག་ཚད་དུ་འོང་བ་དང་ཆུ་འགགས་ཏེ་གཅིན་སྲི་བ་དང་། རླུང་ནད་ལ་སོགས་པ་ལ་ཕན་ནོ། །དེ་ལྟ་བུའི་ལུམས་བྱ་ཞིང་འཇུག་པ་ལ་ཁ་ཟས་སྣུམ་བག་བཟའ་ཞིང་ཟས་ཞུ་ནས་སྔ་དྲོ་ཆུ་ལུམས་བྱའོ། །དེ་ལྟར་ལུམས་བྱ་བའི་ཚད་ནི་ནད་པའི་ནད་དམིགས་ཆེ་ཆུང་དང་།
[10b.2]ཡུལ་རྣམས་དང་དབྱར་དགུན་གྱི་དུས་དང་སྦྱར་ལ་ལུམས་ཆེ་ཆུང་འབྲིང་གང་རན་པ་ཚོད་དེ་ལས་དཔག་སྟེ་བྱའོ། །དེ་ལས་བད་ཀན་གྱི་ནད་དམིགས་ཤས་ཆེ་ན་ནི་སྨན་ཁོང་རྩུབ་པར་འགྱུར་བ་དང་སྦྱར་ལ་ཆུ་ལུམས་བྱའོ། །མི་རང་བཞིན་རླུང་དང་བད་ཀན་ཅན་ཞིག་ལ་རླུང་ནད་སྐྱེས་ཏེ་
[10b.3]རྩུབ་པར་གྱུར་ན། སྨན་རྩུབ་པ་དང་སྣུམ་བག་ཡོད་པ་གཉི་ག་དང་སྦྱར་བའི་ཆུ་ལུམས་བྱའོ། །ཡང་ནད་པ་ཕོ་བའི་ནང་དུ་རླུང་ནད་ཞུགས་པ་ལ། ལོང་ཀའི་ནང་དུ་བད་ཀན་གྱི་ནད་ཞུགས་པར་གྱུར་པ་འདི་ལྟ་བུ་ལ་ནི་སྔར་ཕོ་བའི་གནས་ལ་ཕན་པའི་ལུམས་རྩུབ་མོའི་ལུམས་བྱའོ། །
[10b.4]ལོང་ཀའི་ནང་ན་བད་ཀན་ཡོད་པ་ནི་སོ་སོའི་གནས་ཀྱི་བྱེ་བྲག་དང་སྦྱར་ཏེ་སྣུམ་བག་ཡོད་པའི་ལུམས་བྱའོ། །དེ་ལ་དུགས་དང་ལུམས་གང་བྱེད་ཀྱང་རུང་སྟེ། སྟ་ཟུར་དང་ཆུ་སོའི་བར་དང་། མིག་དང་རླིག་པའི་འབྲས་བུ་དང་། སྙིང་དང་འདི་རྣམས་ལ་དུགས་ཆུང་དུ་བྱའོ། །ཡང་
[10b.5]ན་ནི་མ་བྱེད་ཅིག །ལུམས་ལེགས་པར་བྱས་པའི་ཚུལ་ནི་ཁོང་གྲང་ཞིང་བསིལ་བ་ཀུན་མེད། ཟུག་ཅིང་ན་བ་བྱང་། ལུས་དང་རྐང་ལག་འཇམ་པ་དེ་ལྟ་བུར་གྱུར་ན་ལུམས་ལེགས་པ་ཡིན་ཏེ་ལུམས་ཀྱི་རྗེས་སུ་ལུས་དལ་གྱིས་མཉེ་ཞིང་དེའི་རྗེས་ལ་ཆུ་དྲོན་པོས་ལུས་ཁྲུས་བྱས་ནས་
[10b.6]དེའི་འོག་ཏུ་སྣུམ་གཏོང་བའི་ཆོ་ག་གྱིས་ཤིག །ཡང་ལུམས་ཧ་ཅང་དྲགས་ན་ཉེན་དུ་གྱུར་པའི་ནད་དམིགས་ནི། མཁྲིས་པ་དང་ཁྲག་རྒྱས་ཏེ་ཚ་བའི་ནད་སྐྱེ། སྐོམ་དད་ཆེ། མྱོས་ཤིང་བརྒྱལ་བའམ། བོག་པར་འགྱུར། སྐད་འགགས། རྐང་ལག་ན། མགོ་
[10b.7]འཁོར། རྐང་ལག་གི་ཚིགས་ཀུན་ན། རིམས་ཚ་བས་འདེབས། ལུས་ཀྱི་ཤ་ཚིག་སྟེ་ནག་པོ་དང་དམར་པོ་ཐིག་ཐིག་པོར་སྣང་། ལུམས་ཧ་ཅང་དྲགས་ན་སྐྱུག་བྲོ་བ་འདི་ལྟ་བུའི་ཉེན་དུ་འགྱུར་རོ། །ལུམས་དེ་ལྟར་ཧ་ཅང་དྲགས་ཏེ། ཚ་བ་དང་མགོ་འཁོར་བ་དང་། སྐྱུག་བྲོ་
[11a]
[11a.1]བ་ལ་སོགས་པ་དང་། གཞན་ཡང་དུག་གིས་ཕོག་པ་དང་། ནས་ཚིག་འཁུས་པའི་ཚ་ལ་སོགས་པའི་སྨན་བཏང་ངམ། མེ་བཙའ་བཏབ་བམ། མེས་ཚིག་གམ། ཚད་པས་བཏབ་བམ། སྐྱུག་བྲོ་འམ། སྙིང་མི་དྲན་ཏེ་མྱོས་པ་འདི་རྣམས་ལྟ་བུ་ལ། ལུམས་
[11a.2]རྩི་ཨེཎྜ་དང་། ཉེའུ་ཤིང་ལྟ་བུ་དང་། ཉ་དང་ཆུ་བྱ་སྣ་ཚོགས་ལྟ་བུ་ནི། བསིལ་ཞིང་ལྕི་བའོ། །ཚ་ཞིང་རྣོ་བ་ན་ལེ་ཤམ་ལྟ་བུ་དང་། དྲོད་ཆེ་བའི་སྨན་ཚིད་ཀ་དང་། དབྱི་མོའི་ལོ་མ་འདི་ལྟ་བུ་རྣམས་སྦྱར་ཏེ་སོ་སོའི་ནད་དམིགས་ལ་ལུམས་ཅི་རིགས་པར་བྱས་ན་ནད་དམིགས་ཀྱི་ཉེན་དེ་ལྟ་
[11a.3]བུར་མི་འགྱུར་རོ། །ལུམས་རྩིར་བཟང་བ་ནི་རློན་ཞིང་ཞུ་བ་ཡོད་པ་སྲ་སྟེ་ཚོས་དཀའ་བ་སྤྱི་བག་དང་། འབྱར་བག་ཏུ་འདུག་པ་དང་། སྣུམ་བག་དང་། རྩུབ་པའི་བག་དང་། རྩ་བའི་ནང་དུ་འགྲོར་རུང་བ། ཞིབ་པ་དེ་ལྟ་བུའི་སྨན་ནི་ལུམས་རྩིར་བཟང་ངོ་། །ལུམས་ཀྱིས་ནད་དང་། ཉེན་
[11a.4]དུ་མི་འགྱུར་བའི་སྨན་རྩི་ནི་འཇམ་པ་དང་། རྩུབ་པ་དང་། ཞིབ་པ་དང་། འབྱར་བ་སྤྱི་བག་འདུག་པ་དང་། ཞུ་བ་གཤེར་བག་ཅན་འདི་ལྟ་བུ་ལ་སྦྱར་ན་ལུམས་མ་ལེགས་ཏེ་ནད་དུ་གྱུར་པ་ལས་རྩེ་ཞིལ་ཏེ་ཕན་པར་འགྱུར་རོ། །མདོར་ན་སྨན་ཁ་བ་དང་། བསྐ་བ་དང་། མངར་བག་འདི་
[11a.5]གསུམ་ཡོད་པ་ཕལ་ཆེར་སྦྱར་ན་ལུམས་ཉེས་པའི་ནད་ཐམས་ཅད་རྩེ་ཞིལ་ཞིང་ཕན་པར་འགྱུར་རོ། །དེ་ལྟར་ལུམས་ཧ་ཅང་དྲགས་པ་ལས་ནད་དུ་གྱུར་པ་དེ་སླར་བཅོས་པའི་ཐབས་ཀྱིས་ནད་རྩེ་ཞིལ་བར་འགྱུར་ཏེ། ཕན་པའི་རྟགས་ནི་གང་དུ་ལུམས་དྲགས་པའི་ཉེན་སྨོས་པའི་ནད་རྣམས་
[11a.6]བྱང་ལ། ཉམས་སྟོབས་སྐྱེ་བར་ཚོར་ན་དེ་ནི་ལུམས་དྲགས་པའི་ནད་ཕྱིན་པ་ཞེས་བྱའོ། །ཡང་ལུམས་དྲགས་ཆེས་ཏེ་ནད་དུ་གྱུར་པ་དེ་རྩེ་ཞིལ་བའི་ཐབས་ཧ་ཅང་དྲགས་ཆེས་ན་ཡང་། ཤ་མདངས་ཀྱི་པགས་པ་དང་། ཆུ་བ་དང་། རྐང་ལག་རྣམས་འཁུམས་པར་འགྱུར། སྙིང་
[11a.7]འཕར་ཞིང་ན། སྨྲ་མི་ནུས། འགྲམས་པའི་ཉ་བྱུང་སྟེ་ལྟུང་། མཆུ་དང་། ལག་པ་དང་། རྐང་པ་དང་། པགས་པ་རྣམས་ནག་པོར་འགྱུར་བ་དེ་ལྟ་བུ་ནི་ཧ་ཅང་རྩེ་ཞིལ་དྲགས་པའི་ནད་ཡིན་ནོ། །དེ་ལ་དུགས་བྱར་མི་རུང་བའི་དམིགས་ནི་ཧ་ཅང་ཚོན་པོ་སྦོམ་པོ་དང་། རླུང་ཆེས་
[11b]
[11b.1]ཏེ་ཁོང་རྩུབ་པ་དང་། རིད་པར་གྱུར་ཏེ་ཉམ་ཆུང་བ་དང་། བརྒྱལ་བ་དང་སྔར་ལུམས་དྲགས་པ་ལས་སླར་གསོ་ཞིང་དཔྱད་བྱ་དགོས་པ་དང་། གློ་ན་བ་དང་། གློ་རྡོལ་བ་དང་། སྲོག་ཟུངས་བདུན་པོ་ཟད་དེ་ལུས་སྐམ་པོར་སོང་བ་དང་། ལུས་ཁུར་རམ་ལས་ཀྱིས་དུབ་པ་ལྟ་བུ་དང་།
[11b.2]ཆང་ལས་ནད་དུ་གྱུར་པ་ལྟ་བུ་དང་། མིག་རབ་རིབ་ཟ་བ་དང་། དམུ་རྫིང་དུ་གྱུར་ཏེ་ལྟོ་ཆེར་སྐྱེས་པ་དང་། ཤུ་བ་མཆེད་པ་དང་། མཛེ་ནད་དང་། འོར་ནད་སྐྲང་བག་དང་། ཚ་བ་མཁྲིས་པའི་ནད་ཡོད་པ་དང་། འོ་མ་དང་། ཞོ་དང་མར་འཐུངས་པ་དང་། སྦྲང་རྩི་འཐུངས་
[11b.3]པ་དང་། བཀྲུ་སྨན་བཏང་བ་དང་། ལུས་སྣད་པ་དང་། གཞང་འབྲུམ་ཁྲག་ཚད་འོང་བ་དང་། སེམས་འཁྲུགས་པ་དང་། མྱ་ངན་གྱིས་བཏབ་པ་དང་། འཇིགས་ཤིང་བག་ཚ་བ་ལྟ་བུ་ཡོད་པ་དང་། བཀྲེས་པ་དང་། སྐོམ་པའམ་མིག་སེར་གྱིས་བཏབ་པ་འམ། སྐྱ་རྦབ་
[11b.4]ཀྱི་ནད་ཡོད་པ་འམ་གཅིན་སྙི་སྟེ་རྟག་ཏུ་འོང་བ་འདི་ལྟ་བུ་དང་། སྤྱིར་མཁྲིས་པའི་ནད་ཡོད་པས་ཚ་བའི་ནད་ཆེ་བ་འདི་ལྟ་བུ་ལ་ལུམས་བྱར་མི་རུང་། བུད་མེད་སྦྲུམ་མ་དང་། ཟླ་མཚན་ཟག་པ་དང་། བུ་བཙས་པ་ལྟ་བུ་དང་། འདི་ལྟ་བུ་ལ་ལུམས་བྱར་མི་རུང་ངོ་། །གལ་ཏེ་
[11b.5]སྦྲུམ་མ་འམ་ཟླ་མཚན་ཟག་པ་དང་བུ་བཙས་པ་འདི་ལྟ་བུ་ལ་ལུམས་བྱར་མི་རུང་བ་འམ། དུག་གིས་ཕོག་སྟེ་ལུམས་བྱ་དགོས་ན་ཡང་ལུམས་མི་དྲགས་པ་འཇམ་པོར་གྱིས་ཤིག །དེ་ལ་ལུམས་བྱ་བའི་ནད་ཀྱི་དམིགས་ནི་བད་ཀན་ཆེས་ཏེ་དབུགས་མི་བདེ་བ་དང་། ལུད་པ་ལུ་
[11b.6]བ་དང་། ཆམ་པས་བཏབ་པ་དང་། སྐྱིགས་བུས་བཏབ་པ་དང་། ལྟོ་སྦོས་པ་དང་། བཤང་གཅི་གཉིས་ཀ་འགགས་ཏེ་དབྱུང་དུ་མི་རུང་བ་དང་། མགུལ་སུབས་ཤིང་སྐད་འགགས་པ་དང་། རླུང་ནད་ཀྱིས་བག་ཏུ་མི་བདེ་བ་དང་། བད་ཀན་རྒྱས་པ་དང་། བེའུ་སྣབས་
[11b.7]ཡོད་དེ་མཆིན་པ་ན་བ་དང་། ལུས་དགྱེ་སྒུ་མི་ཤེས་ཏེ་ཁོང་རེངས་པ་དང་། ལུས་ལྕི་བ་དང་། རླིག་རླུགས་ཀྱི་ནད་ཡོད་པ་དང་། མཚན་བར་རྡོལ་བའི་ནད་དང་། ད་རྒན་ལུས་ནང་དུ་སྒུ་བ་འམ། ཕྱིར་དགྱེ་བའི་ནད་ཀྱང་རུང་རླུང་ནད་ཀྱིས་ཟུག་ཐབས་སུ་ན་བ་དང་། ཆུ་
[12a]
[12a.1]འགགས་པ་དང་། ཐོར་བུ་ཆེན་པོ་བྱུང་བའམ། རྨེན་བུ་སྐྲངས་པའམ་པགས་པའི་ནང་དུ་ཐོར་བུ་འབྱུང་ལ་ཕྱིར་རྡོལ་དུ་མི་རུང་བ་ལྟ་བུ་དང་། སྐྱེས་པ་ཁུ་བ་འགགས་ཏེ་འོང་དུ་མི་རུང་བ་དང་རླུང་ནད་ཆེ་བ་དང་། འདི་རྣམས་ལྟ་བུ་ལ་སོ་སོའི་ནད་དམིགས་དང་
[12a.2]མཐུན་པར་སྨན་སྦྱར་ལ་ལུམས་དང་དུགས་བྱའོ། །ཡང་མི་ལ་རླུང་ནད་ཡོད་པའམ་ཚོ་སྟེ་ཚིལ་ཆེས་པའམ། བད་ཀན་རྒྱས་པ་དེ་ལྟ་བུ་ལ་ལུམས་བཙོས་ཤིང་གདུ་གདུ་བ་མི་དགོས་པར་ཁང་པ་རླུང་མེད་པ་དྲོན་པོའི་ནང་དུ་གོས་བསྲོས་ལ་དྲོན་པོ་གྱོན་ཏེ་རྔུལ་དབྱུང་བ་དང་གོས་ལྕི་བར་གྱོན་
[12a.3]ཅིང་རྔུལ་བར་བྱ་བ་དང་། དངང་བར་བྱ་ཞིང་རྔུལ་གདོན་པར་བྱས་ན་ལུམས་བྱ་མི་དགོས་པར་ཕན་ནོ། །ཡང་མེ་ལ་བཙོ་བའི་ལུས་བཙན་པོ་ཆེ་མ་ཡིན་པར་ཐ་མལ་པར་ཟན་དང་། སྨན་དུ་སྦྱར་བས་བཙོས་པས་ལུས་ལ་དཀྲི་ཞིང་བདུགས་པ་དང་། ཆང་མང་དུ་བླུད་ལ་དུགས་བྱས་ན་ཕན་
[12a.4]ནོ། །རྔུལ་མང་དུ་དབྱུང་བའི་ཐབས་དང་། ཁྲོ་བར་བཅས་པས་རྔུལ་དབྱུང་བ་དང་། བཀྲེས་པར་བྱ་བ་དང་། སྐོམ་པར་བྱ་བ་དང་། ཉི་ཚན་ལ་གཞག་པ་འདི་ལྟ་བུས་ཀྱང་བད་ཀན་ལ་སོགས་པའི་ནད་ལུམས་བྱ་མི་དགོས་པར་ཕྱིན་པར་རུང་ངོ་། །དེ་ལྟ་བས་ན་ལུས་དང་ཁོང་པ་ནང་གི་
[12a.5]ནད་ཡོད་པ་ལ་མར་དང་ཏིལ་ལ་སོགས་པ་སྣུམ་གྱི་དཔྱད་ཀྱིས་ནི་ནད་བསྲུལ་ལོ། །ནད་བསྲུལ་དེ་ཁོང་པ་ནང་ཁྲོལ་གྱི་ནང་དུ་སོང་ཡང་རུང་། སྲོག་ཟུངས་བདུན་གྱི་ནང་དུ་སོང་ངམ། རྩའི་ནང་དུ་སོང་ངམ། རྐང་ལག་གི་ནང་དུ་སོང་ངམ། ནད་རུང་བའི་ནང་དུ་ཞེན་ཀྱང་རུང་།
[12a.6]དེ་ལྟ་བུ་ལ་ལུམས་སམ་དུགས་བྱས་ན་སྣུམ་གྱིས་བསྲུལ་བའི་ནད་དེ་སྙི་ཞིང་སླ་བར་གྱུར་ནས་ཁོང་དུ་སྡུད་དོ། །ཁོང་དུ་ནད་ལུས་པ་དང་བཀྲུ་སྨན་གྱིས་བཀྲུས་ཏེ་ནད་ཀྱི་དཔྱིས་དབྱུང་ངོ་། །དུགས་དང་ལུམས་ཀྱི་ཆོ་ག་སྟེ་ལེའུ་བཅུ་བདུན་པ་རྫོགས་སོ།། །།སྐྱུག་སྨན་དང་
[12a.7]བཀྲུ་སྨན་གཏང་བའི་ཆོ་གའི་ལེའུ་བཅོ་བརྒྱད་པ་བཤད་པར་བྱའོ། །བད་ཀན་རྒྱས་པའི་ནད་དམ་བད་ཀན་རྒྱས་པ་རླུང་ངམ་མཁྲིས་པ་དང་འདྲེས་ཀྱང་རུང་སྟེ། དེ་ལྟ་བུའི་སྨན་ལ་སྐྱུག་སྨན་ཐོང་ཤིག །ཚུལ་འདི་དང་འདྲ་བར་མཁྲིས་པ་རྒྱས་པའི་ནད་ལ་ནི་བཀྲུ་སྨན་ཐོང་ཤིག །
[12b]
[12b.1]ཡང་རིམས་གསར་པ་དང་། ཚད་པས་འཁྲུ་བ་དང་། ཐུར་དུ་མཁྲིས་པ་དང་ཁྲག་ཏུ་འཁྲུ་བ་དང་། གློ་གཅོང་ཆེན་པོ་སྐེམ་བྱེད་དང་། མཛེ་དང་གཅིན་སྙི་བ་དང་། འབྲུམ་ཆེན་དང་ཐོར་བུ་འབྱུང་བའི་ནད་དང་། རྐང་པ་ཆེར་སྐྲངས་པའི་ནད་དང་སྙིང་མི་དྲན་ཏེ་མྱོས་པར་གྱུར་པ་དང་།
[12b.2]ལུད་པ་ལུ་བ་དང་། དབུགས་མི་བདེ་བ་དང་། སྙིང་འཕར་བ་དང་། བུད་མེད་ནུ་མ་ན་བ་དང་། རོ་སྟོད་ཡན་ཆད་ཀྱི་ནད་མི་བདེ་བ་འདི་རྣམས་དང་ནད་ཐམས་ཅད་ལ་སྐྱུག་སྨན་བཏང་ན་ཕན་ནོ། །དེ་ལ་སྐྱུག་སྨན་གཏང་དུ་མི་རུང་བའི་ནད་དམིགས་ནི་བུད་མེད་སྦྲུམ་མ་དང་། རླུང་
[12b.3]ནད་ཡོད་དེ་ཁོང་རྩུབ་པ་དང་། བཀྲེས་པ་དང་རྟག་ཏུ་སྡུག་བསྔལ་བ་དང་བྱིས་པ་ཆུང་ངུ་དང་། མི་རྒན་པོ་དང་སྐེམ་པོ་དང་ཚོ་སྟེ་སྦོམ་པོ་དང་། གློ་སྐམ་ན་བ་དང་། མཚོན་གྱིས་རྨས་པ་དང་། ཉམ་ཆུང་བ་དང་། རྟག་ཏུ་སློན་པ་དང་། མཆེར་པ་ན་བ་དང་། མིག་རབ་རིབ་
[12b.4]ཁྱེར་བ་དང་། ལྟོ་ན་སྲིན་བུ་ཡོད་པ་དང་། ཁར་ཁྲག་དང་། རླུང་དུ་འདྲེས་པར་འབྱུང་བ་དང་། སོ་ན་བ་དང་། སྐད་འཛེར་བ་དང་། ཆུ་སྲི་བ་དང་། དམུ་རྫིང་དང་། སྐྲན་དང་། སྨན་བཏང་བ་ཡང་སློན་དུ་མི་རུང་བ་དང་། ཧ་ཅང་དྲོད་ཆེ་བ་དང་། གཞང་འབྲུམ་གྱི་ནད་དང་།
[12b.5]རྟུག་སྐམ་གྱིས་བཏབ་པ་དང་། མགོ་འཁོར་བ་དང་། རྩིབ་ལོགས་རྡོ་བཞིན་དུ་སྲ་བས་རེམ་རེམ་པོར་ནད་དཀྱེལ་ཆགས་པ་དང་གློ་ན་སྟེ་རྩིབ་ལོགས་སུ་ཟུག་པ་དང་། རླུང་ནད་ཀྱི་བག་འདི་ལྟ་བུ་ལ་སྐྱུག་སྨན་གཏང་དུ་མི་རུང་ངོ་། །ཡང་ཁྲག་སྨན་གཏང་དུ་མི་རུང་བ་ནི་བཙན་དུག་
[12b.6]འཐུངས་སམ། དབྱིག་དུག་འཐུངས་སམ་ཁ་ཟས་མ་ཞུ་བ་འམ་ཁ་ཟས་མི་འཕྲོད་པ་ཟོས་པའམ། བེའུ་སྣབས་ལས་རིམས་སུ་གྱུར་ཏམ། རྟག་ཏུ་སྐྱུག་སྨན་བཏང་ཡང་སྐྱུག་ཏུ་མི་རུང་བ་ལ་སྐྱུག་སྨན་མི་གཏང་བར། གོང་དུ་སྨོས་ཀྱང་དུག་འཐུངས་སམ། སྐྱུག་སྨན་མི་བཏང་
[12b.7]དུ་མི་རུང་བའི་ནད་དམིགས་ཞིག་ཡིན་ན་འདི་རྣམས་ལྟ་བུ་ལ་སྐྱུག་སྨན་ཐོང་ཤིག །ནད་དམིགས་གཞན་དང་སྦྱར་ཏེ་སྐྱུག་སྨན་བཏང་བའི་རྗེས་ལ་སྨན་གྱི་དུད་པ་སྦུ་གུ་ནས་བཏང་སྟེ་བདུག་ཏུ་རུང་ངོ་། །བཙན་དུག་དང་དབྱིག་དུག་གིས་ཕོག་པ་དང་། ཟས་མ་ཞུ་བ་འམ། ཁ་ཟས་མི་
[13a]
[13a.1]འཕྲོད་པ་ཟོས་པ་འདི་རྣམས་ལྟ་བུ་ལ་སྐྱུག་སྨན་བཏང་བའི་རྗེས་ལ་དུད་པ་སྦུ་གུ་ནས་བཏང་ཞིང་བདུག་པ་དང་། ཟས་ཀྱི་ཆོ་གས་བསྟན་པ་འདི་རྣམས་བྱར་མི་རུང་ངོ་། །དེ་ལ་བཀྲུ་སྨན་གྱིས་བཀྲུ་ཞིང་གསོར་རུང་བའི་ནད་ནི་སྐྲན་དང་གཞང་འབྲུམ་ཁྲག་ཚད་དང་འབྲུམ་བུ་
[13a.2]དང་གཞོགས་ཕྱེད་ན་སྟེ་བསྐྱོད་མི་ནུས་པ་དང་། མིག་སེར་དང་། རིམས་ཡུན་རིང་དུ་ལོན་ཏེ་བྱིང་བ་དང་། དམུ་རྫིང་དང་། དབྱིག་དུག་དང་། རྟག་ཏུ་སྐྱུག་པ་དང་། མཆེར་པ་ན་བ་དང་། ཤ་མདོག་སེར་པོར་གྱུར་པའི་ནད་དང་། མིག་རབ་རིབ་ཟ་བ་དང་། མིག་སྔོན་པོར་གྱུར་པ་དང་།
[13a.3]མིག་རྩི་བོར་ཟ་བ་དང་། ལོང་ཀ་ན་སྟེ་ལྟེ་བའི་འོག་ཏུ་ན་བ་དང་། མོ་མཚན་ན་བ་དང་། ཕོ་མཚན་ན་བ་དང་། ཁོང་པའི་ནང་ཀུན་ན་བ་དང་། ལྟོ་ན་སྲིན་བུ་ཡོད་པ་དང་། རྨ་རེད་པ་དང་། དྲེག་གམ། ཁར་ཁྲག་དང་རླུང་འདྲེས་པར་སྐྱུག་གམ། མགོ་བོ་ཡན་ཆད་ཀྱི་ནད་དང་། ཁྲག་རྒྱས་
[13a.4]པ་དང་། གཅིན་འགག་ཅིང་སྲི་བ་དང་། རྟུག་སྐམ་གྱིས་བཏབ་པ་འདི་རྣམས་ལྟ་བུ་ལ་བཀྲུ་སྨན་གྱིས་བཀྲུས་ན་ཕན་ནོ། །མཛེ་ནད་དང་། གཅིན་སྙི་སྟེ་ཟ་ཁུར་བྱུང་བ་ལ་ནི། སྐྱུག་སྨན་བཏང་ན་ཕན་ནོ། །རིམས་སར་པ་དང་། ཕོ་བའི་དྲོད་ཆུང་བ་དང་། མཁྲིས་པ་དང་། ཁྲག་ཚད་
[13a.5]བྱུང་བ་དང་། གློ་རྡོལ་ཏམ། ལུས་རྨས་སམ། གཞང་འབྲུམ་ཁྲག་ཚད་འོང་བ་འམ། ཚད་པས་འཁྲུ་བའམ། ཁོང་དུ་མཚོན་ལུས་ཏེ་མ་ཕྱིན་པ་དག་ལྟོ་སྲ་སྟེ་འཁྲུར་མི་རུང་བ་དང་། ལུས་ཚོ་སྟེ་ཚིལ་ཆེ་བ་དང་། སྐེམ་པོ་དང་འདི་རྣམས་ལྟ་བུ་ལ་བཀྲུ་སྨན་བཏང་ཞིང་བཀྲུར་མི་རུང་ངོ་། །དེ་ལ་
[13a.6]སྐྱུག་སྨན་དང་བཀྲུ་སྨན་གཉིས་གང་ཡང་རུང་བའི་དུས་ནི་གྲང་དྲོ་རན་པའི་དུས་ལ་བྱ་སྟེ། དེ་ཡང་དཔྱིད་ཟླ་འབྲིང་པོ་དང་དབྱར་ཟླ་ཐ་ཆུངས་དང་། སྟོན་ཟླ་ཐ་ཆུངས་དང་ཟླ་བ་འདི་རྣམས་ལ་བཀྲུ་སྨན་དང་སྐྱུག་སྨན་གང་ཡང་རུང་བ་གཏང་དུ་རུང་ངོ་། །དུས་འདིའི་ཚེ་སྣུམ་གཏང་བའི་
[13a.7]ཆོ་ག་བཞིན་དུ་ཡང་བྱས། དུགས་དང་ལུམས་ཀྱང་ཆོ་ག་བཞིན་དུ་བསལ། སང་སྐྱུག་སྨན་བཏང་ན་དེང་བད་ཀན་སློང་བའི་ཁ་ཟས་ཉ་དང་ཏིལ་དང་། མ་ཤ་མོན་སྲན་གྲེའུ་དང་བད་ཀན་སྐྱེ་བར་འགྱུར་བའི་ཟས་རྣམས་ཟོས་ལ། མཚན་མོ་གཉིད་ལོག་པར་བྱས་ནས་ཁ་ཟས་
[13b]
[13b.1]ལེགས་པར་ཞུ་བ་དང་། ནང་པར་ལུས་བསྲུང་བའི་བཀྲ་ཤིས་བྱས་ལ་ཁ་ཟས་གཞན་མི་ཟ་བར་སྐྱུག་སྨན་གཏང་། མི་རྒན་པོ་དང་། བྱིས་པ་དང་། ཉམ་ཆུང་ངུ་སྐྱེ་བ་དང་། སྨན་སྟོབས་ཆུང་ཞིང་ཞན་པ་འདི་རྣམས་སོ་སོའི་རིགས་པར་གཏང་བའི་ཐབས་ནི་མཁྲིས་པ་རྒྱས་ཤིང་ཚབ་ཆེ་ན་
[13b.2]འོ་མ་དང་བུ་རམ་ཤིང་གི་ཁུ་བ་འམ། བུ་རམ་གྱི་ཁུ་བ་ལས་ཐོང་ཤིག །རླུང་ནད་ལ་ནི་ཤ་ཁུ་འམ། མར་ཁུའམ། ཐུག་པ་དང་། སྣུམ་བག་ལས་ཐོང་ཤིག །བད་ཀན་རྒྱས་པ་ལ་ནི་སྦྲང་རྩིའི་ཁུ་བ་དང་། ཆང་དང་ཆུ་དྲོན་པོ་ལས་གཏང་ངོ་། །རྒན་གཞོན་དང་ཉམས་ཆེ་ཆུང་གི་
[13b.3]ཐབས་ཀྱང་ཚུལ་འདི་བཞིན་དུ་སྦྱར་རོ། །སྐྱུག་སྨན་བཏང་བ་ཡང་བབས་ཆེར་འཐུངས་ཏེ་གྲེ་བ་མན་ཆད་གང་བར་གྱིས་ལ་སློན་ནོ། །སོ་སོའི་ནད་དམིགས་དང་སྦྱར་ཏེ། སྐྱུག་སྨན་དུ་གཏོང་བ་གང་ཡང་རུང་བའི་ནང་དུ་སྦྲང་རྩི་དང་། རྒྱམ་ཚ་དང་། ལྕེ་མྱང་ཚ་ཡང་བཏབ་ལ་མིའི་
[13b.4]ཚོད་དང་། སྐྱུག་པ་སྲ་སྙིའི་དྲོད་དུ་སྦྱོར་ལ་སྨན་ཐོང་ཤིག །སྨན་གཏོང་བའི་ཚེ་ནད་པ་ཁ་ཤར་ཕྱོགས་སུ་བལྟས་ལ་སྨན་བླུད་དོ། །སྔགས་ཀྱིས་ཀྱང་གདབ་པར་བྱའོ། །བྲ་ཧྨ་དཀྵ་ཤི་བེ། བུད་དྷེན་དྲ། བྷཱ་ཙནྡྲ་ཨརྐ་ནཱི་ལ་ན་ལ། རི་དིར་སུ་མ་བྷཱུ་ཏ་སངྒྷས་ཙ་
[13b.5]པན་ཏུ་པ། ས་ར་ཡེ་ན་མེ་བ་རི་ཥི་ན་མ་དེ་བཱ་ན་མེ་བཱ་མེ་མེར་ཏ་མ་སུ་དྷེ་བོཏྟ་མ་ནཱ་ག་ནཱན་བྷེ་ཥྱ་ཛྱམ་ན་མསྟུ་སྟེ། སྐྱུག་སྨན་འཐུངས་ལ་སྐད་ཅིག་ཅི་རན་དུ་བསྡད་ལ་དེ་ནས་སློན་བྲོ་བའི་སེམས་བསྐྱེད་ལ། དོང་གར་འཁྱིལ་ཞིང་ཁར་མཆིལ་མ་མང་པོ་འོང་བར་གྱུར་ན་བྱ་སྒྲོ་འཇམ་པོའམ།
[13b.6]ཆུ་བ་སྙི་བ་འཇམ་པོ་བཀུག་ཅིང་དྲང་ངོ་། །བཀུག་ཅིང་སློན་པ་ནི་གྲེ་བ་དང་ལྕེ་ཁྱི་བའི་དྲུང་མ་སྨད་པར་སློན་ཏོ། །དེ་ལ་སྐྱུག་མི་བྲོ་བཞིན་དུ་ཡང་ནན་གྱིས་སྐྱུགས་ཤིང་སློན་དུ་མི་རུང་ངོ་། །སྐྱུག་བྲོ་བཞིན་སློན་པར་གྱུར་ན་ཡང་མ་འགེགས་པར་སློན་ཅིག །དེ་ལྟར་སློན་པའི་ཚེ་ན་སྟན་མཐོན་
[13b.7]པོ་པུས་མོའི་ཐད་ཀ་ཙམ་དུ་མཐོ་བའི་སྟེང་དུ་ཙོག་པུར་འདུག་ལ་དཔྲལ་བ་དང་། གློ་གཡས་གཡོན་མིས་བརྟེན་ནས་སློན་ཏོ། །དེའི་ཚེ་སློན་པ་དེ་ལྟེ་བའི་ཐད་ཀར་བཙིར། རྒྱབ་ནས་བཙིར་ཞིང་གྱེན་དུ་ཕུལ་ལ་སློན་ཅིག །དེ་ལ་བད་ཀན་རྒྱས་པའི་སྐྱུག་སྨན་རྣོ་བའི་བག་ལ་ན་ལེ་ཤམ་ལྟ་
[14a]
[14a.1]བུ་དང་། བསིལ་བག་ཏུ་ཨུ་ཤི་རའམ། ཙནྡན་ནམ། ག་པུར་ལྟ་བུ་ལ་སོགས་པ་ལ་སྦྱར་རོ། །དྲོད་ཆེ་བའི་བར་ལ་ཙི་ཏྲ་ཀ །པི་པི་ལིང་གི་རྩ་བ་ལ་སོགས་པ་ལྟ་བུ་དང་། ཚ་བར་གཏོགས་པ་ཚ་བ་རྣམ་གསུམ་དང་། ཤི་ཀྲུ་ལ་སོགས་པ་འདི་ལྟ་བུ་ལས་སྐྱུག་
[14a.2]སྨན་དུ་སྦྱར་ཏེ་གཏང་ངོ་། །མཁྲིས་པ་རྒྱས་པའི་སྐྱུག་སྨན་ནི་རོ་མངར་བག་ཤིང་མངར་འོ་མ་འམ་བུ་རམ་ཤིང་གི་ཁུ་བ་འམ། ཁ་ར་འམ། རྒུན་འབྲུ་ལྟ་བུ་དང་། བསིལ་བག་ཏུ་ཨུ་ཤི་ར་འམ། ཙནྡན་ནམ། ག་པུར་ལ་སོགས་པ་ལ་སྦྱར་རོ། །རླུང་དང་བད་ཀན་དུ་འདྲེས་པའི་ནད་ལ་ནི་
[14a.3]མངར་བག་དང་སྐྱུར་བ་དང་ལན་ཚྭ་ལས་སྦྱར་ལ་གཏང་ངོ་། །དེ་ལྟར་སྐྱུག་སྨན་དུ་སྦྱར་ཏེ་གྱེན་དུ་ཕུལ་ནས་ནད་ཕྱིན་པའི་ཚད་ནི་བད་ཀན་འབྱུང་བ་ཟད་ནས་མཁྲིས་པ་སྣང་གི་བར་དུ་སློན་ཅིང་སྐྱུགས་ཤིག །གལ་ཏེ་སྐྱུག་སྨན་བཏང་བ་ལས་སྨན་གྱི་མཐུ་ཤུགས་ཞན་ཏེ། བབས་ཆེར་མི་
[14a.4]སློན་ཏམ་སྨན་འགའ་ཞིག་སླར་བརྒལ་ན་བསྣན་པའི་དཔྱད་ནི། པི་པི་ལིང་དང་། སྐྱུ་རུ་ར་དང་། ཡུངས་ཀར་རྣམས་ཤེལ་ཚ་དཀར་པོའམ་ལྕེ་མྱང་ཚའི་ཆུར་སྦྱོར་ལ། ཡང་ཡང་སློན་ཅིག །སྨན་གྱིས་དེ་ལྟར་བསྣན་ཀྱང་སློན་དུ་མི་རུང་ན། སྐྱུག་སྨན་ཉེས་པ་ཡིན་ཏེ། དེའི་ཉེན་ནི་
[14a.5]མཆིལ་མ་མང་། གཡན་པར་འགྱུར། ཐོར་བུ་མང་། རིམས་ཀྱིས་འདེབས་པ་ལ་སོགས་པར་འགྱུར་རོ། །སྐྱུག་སྨན་བཏང་ལེགས་ན་དང་པོར་བད་ཀན་འབྱུང་། དེའི་རྗེས་ལ་མཁྲིས་པར་སློན། མཇུག་ཏུ་རླུང་གི་ཚུལ་དབུ་བ་ལྟ་བུ་འབྱུང་བ་ནི་སྐྱུག་སྨན་ལེགས་པ་ཡིན་ནོ། །
[14a.6]དེ་ལ་ཧ་ཅང་སྐྱུག་སྨན་དྲགས་པ་འམ་ནད་དཀྱེལ་ཆེ་ན་མང་དུ་སློན་པའི་རྗེས་ལ་དབུ་བ་དང་ཁྲག་ཚོན་བག་ཅན་དུ་བྱུང་ན་གསོ་དཀའ་བ་ཡིན་ནོ། །དེ་ལྟར་སྨན་དྲགས་ཏེ་མ་ལེགས་སམ་ནད་དཀྱེལ་ཆེས་ཏེ་ཉམ་ཆུང་ལ་སློན་དྲགས་ན་ཁོང་རྨྱ། ལུས་ཚ། གྲེ་བ་སྐམ། མིག་གིས་མི་མཐོང་སྟེ་མུན་
[14a.7]པར་སྣང་། རླུང་ནད་ཡང་བ་ལྡང་། ཁོང་ནས་སྲོག་ཅེས་བྱ་བའི་ཁྲག་ཡོད་པ་དེ་སློན་ཅིང་འབྱུང་ན་མི་འཆི་བར་འགྱུར་རོ། །སྐྱུག་སྨན་བཏང་ལེགས་ན་དེའི་རྗེས་ལ་ཅི་རན་ཅིག་ངལ་བསོ་སྟེ། དེ་ནས་ནད་དམིགས་དང་སྦྱར་ལ། དུད་པ་རྣམ་གསུམ་གང་ཡང་རུང་བ་ཅིག་གིས་བདུགས་ལ་
[14b]
[14b.1]དེའི་འོག་ཏུ་སྣུམ་བག་གཏང་བ་ཡང་གོང་མ་དང་འདྲ་བར་བྱའོ། །དེ་ནས་ཁ་ཟས་བཟའ་བ་ནི་ཕྱི་འཕྲེད་ནུབ་ཀའམ། ཡང་ན་སྨན་ལེགས་པར་མ་ཞུ་འམ། རྗེས་མ་ཆད་ན་ཕྱི་དེ་ནང་པར་ཙམ་ན་གདོད་ཁ་ཟས་ཡི་གར་འོང་ཞིང་བཀྲེས་ན་ཆུ་དྲོན་པོ་རན་པས་ཁྲུས་བྱས་ལ་ཁ་ཟས་ཀྱི་རིམ་པ་
[14b.2]འབྲས་ཐུག་རྐྱང་རྐྱང་པོ་ལ་རིམ་པ་བཞིན་དུ་བཟའ་བར་བྱའོ། །བཟའ་བའི་རིམ་པ་དེ་ཡང་དང་པོ་འབྲས་བརྔོས་པའི་ཐུག་པ་རྐྱང་རྐྱང་པོ་བླུད་དོ། །དེ་ནས་འབྲས་བརྔོས་པའི་ཐུག་པ་ཕྱར་ལངས་ཙམ་དུ་བྱས་ལ་བླུད་དོ། །དེའི་རྗེས་ལ་ཐུག་པ་ཁ་གཟར་གྱིས་བཅུ་རུང་བ་བླུད་དོ། །དེའི་
[14b.3]རྗེས་ལ་སྲན་ཚོད་ཡུ་ཤ་ཞེས་བྱ་བ་བལ་པོ་སེའུ་འབྲུ་དང་སྲན་བུ་དཀར་སྦྱར་བའི་ཚོད་མ་དང་འབྲས་ཆན་དུ་སྤགས་ཤིང་བཟའ། དེ་ནས་སྲན་མུངྒ་དང་། བལ་པོ་སེའུ་འབྲུ་དང་སྤོད་སྣ་ཚོགས་སུ་སྦྱར་བའི་ཚོད་མ་དང་འབྲས་ཆན་དུ་སྤགས་ཤིང་བཟའ། མཇུག་ཏུ་ནི་ཁུ་ཤ་དང་འབྲས་ཆན་
[14b.4]དུ་སྤགས་ཤིང་བཟའོ། །དེ་ལྟར་སློན་པའི་རྗེས་ལ་ཁ་ཟས་ཚོད་ཆེ་ཆུང་བཟའ་བའི་ཚད་སྐྱུག་སྨན་ལེགས་ཏེ། ལེགས་པར་སློན་ལ་དང་ག་སང་སང་པོར་བྱས་ན་ཐུག་པ་དང་། སྲན་ཚོད་ཡུ་ཤ་དང་ཁུ་ཤ་གསུམ་ཆར་ཟོས་ཀྱང་རུང་ངོ་། །འབྲིང་ཙམ་དུ་སློན་ན་ནི་འབྲས་ཐུག་དང་།
[14b.5]སྲན་ཚོད་ཡུ་ཤ་དང་། རྣམ་པ་གཉིས་ཀ་བཟར་རུང་ངོ་། །སློན་པའི་བབས་ཆུང་སྟེ། ཆེན་པོར་མ་སློན་ན་ནི་ཁུ་ཤ་དང་ཁ་ཟས་འབྲས་དང་སྦྱར་ཞིང་སྩལ་ལོ། །དཔེར་ན་མེ་ཕྱུང་སྟེ་གསོ་བ་ནི་ལྕི་བ་དང་། རྟ་རྟུག་དང་། རྩྭ་ལ་སོགས་པས་བགས་ཀྱིས་གསོ་ཞིང་མེ་ཁད་ཀྱིས་
[14b.6]སྦར་ན་མེ་ཆེ་བ་བརྟན་པ་དང་། ཐམས་ཅད་ཚོས་པར་བྱེད་ནུས་པ་དེ་དང་འདྲ་སྟེ། སྐྱུག་སྨན་གྱིས་ནད་བསལ་ཏེ། དང་ག་སལ་སལ་པོར་བྱ་བ་ལ་ཐོག་མར་ཁ་ཟས་དྲགས་ན་མི་རུང་སྟེ། འབྲས་ཐུག་སླ་མོ་ལ་སོགས་པ་རན་པར་སྦྱིན་ཞིང་དྲོད་ཆེར་བྱའོ། །དེ་ལ་སྐྱུག་སྨན་གྱིས་ལན་
[14b.7]བཞི་བཞི་སློན་ན་ཕབས་ཆུང་བའི་ཚད་དོ། །ལན་དྲུག་སློན་ན་སློན་པའི་འབྲིང་ཚད་དོ། །ལན་བརྒྱད་དུ་སློན་ན་སྐྱུག་སྨན་ལེགས་པའི་ཚད་དོ། །དེ་ལ་བཀྲུ་སྨན་གྱིས་བཀྲུས་པའི་ཆུང་ཐང་ནི། ལན་བཅུ་འཁྲུས་པའོ། །འབྲིང་ཚད་ནི་བཅུ་གསུམ་མོ། །ཆེ་ཐང་ནི་ལན་
[15a]
[15a.1]བཅུ་བདུན་ནོ། །དེ་ལས་འཁྲུས་པའི་བབས་ཆུང་ཐང་ནི་དྲུག་ཕུལ་གང་གི་ཚད་དོ། །འབྲིང་ནི་དྲུག་ཕུལ་དོའི་ཚད་དོ། །འཁྲུས་པའི་ཆེ་ཐང་ནི་དྲུག་ཕུལ་བཞི་འགྱུར་རོ། །དེ་ལ་སྐྱུག་སྨན་གྱིས་སློན་ཏེ་ཆོ་གའི་ཚད་ནི་འཁྲུས་པའི་ཕྱེད་ཙམ་སྟེ། མཇུག་ཏུ་
[15a.2]མཁྲིས་པ་བྱུང་ན་ཆོག་ཅིང་རན་པའི་ཚད་དོ། །དེ་ལ་བཀྲུ་སྨན་གྱིས་བཀྲུ་སྟེ། བཀྲུས་པའི་མཇུག་ཏུ་བད་ཀན་བྱུང་ན་རན་ཏེ་ཆོག་གོ། །བཀྲུ་སྨན་བཏང་བའི་ཚེ་དང་པོ་ལ་ཐུར་དུ་ལན་གཉིས་གསུམ་ཙམ་བྱུང་བ་ནི་ཁོང་པའི་དྲི་མ་བཤང་བ་ནི་འཁྲུས་པའི་གྲངས་སུ་མི་བརྩིའོ། །སྐྱུག་
[15a.3]སྨན་བཏང་བ་ནི་སྐྱུག་སྨན་འཐུངས་ནས་བཀྲུས་ཏེ་སློན་པ་དང་། མཇུག་ཏུ་མཁྲིས་པ་འབྱུང་བའི་ཚད་ཀྱིས་གཟུང་ངོ་། །སྐྱུག་སྨན་གྱིས་སློན་པའི་འོག་ཏུ་སྣུམ་བག་བཏང་བ་དང་། དུགས་བྱ་བ་ཡང་ཞག་གསུམ་མམ་ལྔའམ་བདུན་ཆོ་ག་བྱས་ནས་དེའི་རྗེས་ལ་གདོད་བཀྲུ་སྨན་
[15a.4]བཏང་སྟེ། དེ་ཡང་ནང་པར་བད་ཀན་གྱི་དུས་ཡོལ་ཏེ། ལྟོ་སྲ་སྙིའི་ཚོད་བཟུང་ལ་བཀྲུ་སྨན་གཏང་ངོ་། །དེ་ལ་མིའི་རང་བཞིན་མཁྲིས་པ་ཆེ་ཞིང་མང་ལ་ལྟོ་སྙི་སྟེ་འོ་མས་ཀྱང་འཁྲུ་བར་འགྱུར་རོ། །མིའི་རང་བཞིན་རླུང་གི་ཤས་ཆེ་ན་ལྟོ་སྲ་སྟེ་བཀྲུ་སྨན་དྲི་བོང་དང་དན་ཏི་ལ་སོགས་
[15a.5]པས་ཀྱང་བཀྲུ་དཀའོ། །དེ་ལ་མཁྲིས་པ་ཆེ་བ་ལ་སྨན་བཀྲུ་སྨན་རོ་བསྐ་བ་དང་མངར་བ་ལས་གཏང་ངོ་། །བད་ཀན་ཆེ་བ་ལ་སྨན་ཚ་བ་ལས་གཏང་ངོ་། །རླུང་ཆེ་ན་སྣུམ་པ་དང་དྲོད་ཆེ་བ་དང་ལན་ཚྭ་ལས་གཏང་ངོ་། །སྨན་བཏང་ཡང་འཁྲུར་མི་རུང་ན་ཆུ་བསྐོལ་བ་དྲོན་མོ་བླུད་དོ། །
[15a.6]ལག་པའི་ཐལ་མོ་མེ་ལ་བསྲོས་པའམ། གོས་མེ་ལ་བསྲོས་བསྲོས་པས་དུགས་བྱའོ། །བཀྲུ་སྨན་བཏང་བ་ལས་དེ་ཉིན་པར་ཆེན་པོ་མི་འཁྲུ་ན་ཐོང་དེ་ཟན་བྱིན་ལ་ཕྱི་དེ་ཉིན་བཀྲུ་སྨན་ཐོང་ཤིག །གལ་ཏེ་ནད་པ་ཟས་ཡི་གར་མི་འོང་སྟེ་ཁ་ཟས་མི་ཚུད་དམ་ལྟོ་སྲ་བ་ཞིག་ན་སྣུམ་གཏང་
[15a.7]བའི་ཆོ་ག་ཞག་གསུམ་མམ་ལྔའམ་བདུན་དུ་གཏང་བར་བཤད་པ་དེ་བས་ཞག་གྲངས་བསྐྱེད་དེ་ཞག་བཅུའི་བར་དུ་སྣུམ་བག་ཐོང་ཤིག །དེའི་རྗེས་ལ་ལུས་ལ་དུགས་ཀྱི་ཆོ་ག་བྱས་ནས་དེའི་འོག་ཏུ་གདོད་བཀྲུ་སྨན་གཏང་ངོ་། །བཀྲུ་སྨན་བཏང་བ་དེ་ཡང་སྔར་ལན་ཅིག་འཁྲུས་པའི་ཚེ།
[15b]
[15b.1]བཀྲུར་མ་བཏུབ་པ་དེ་དམིགས་ཀྱིས་ཉེས་པ་དང་། ཅི་ལས་གྱུར་པ་ལེགས་པར་བལྟས་ཏེ། སྔར་ཅིས་ཉེས་པ་དྲན་པར་བྱས་ལ་དེ་ལས་ཐབས་ཇི་ལྟར་ལེགས་པར་བཀྲུ་སྨན་གཏང་ངོ་། །བཀྲུ་སྨན་བཏང་བ་ལས་མ་ལེགས་པའི་ནད་དམིགས་སྙིང་ན། ལྟོ་བ་ན། ཟས་མི་འཇུ་
[15b.2]སྟེ། གསུད་སྒྲེགས་མནམ་པོར་འབྱུང་། ཁ་ཟས་ཡི་གར་མི་འོང་། བད་ཀན་མཁྲིས་པ་གཉིས་རྒྱས་པ་སློན་པར་འགྱུར། གཡན་པས་འདེབས། ཚ་བ་སྐྱེ། ལུས་ལ་ཐོར་བུ་འབྱུང་། ཆམ་པས་འདེབས། ཐུར་དུ་དབུགས་མི་འབྱུང་། བཤང་བ་འབྱུང་སྲ་བ་འདི་
[15b.3]ལྟ་བུ་བྱུང་བར་གྱུར་ན་བཀྲུ་སྨན་མ་ལེགས་པ་ཡིན་ནོ། །དེ་ལས་བཀྲུ་སྨན་ལེགས་པའི་ཚུལ་ནི་མ་ལེགས་པའི་གནད་བཤད་པ་ལས་བཟློག་པར་བྱ་སྟེ། དེ་ལ་དང་པོར་ནི་ཁོང་པའི་དྲི་མ་བཤང་བ་ཇེ་འབྱུང་ངོ་། །དེའི་རྗེས་ལ་མཁྲིས་པ་དེ་ནས་བད་ཀན་ཐ་མ་རླུང་འབྱུང་ཞིང་དེ་ལྟར་འཁྲུ་
[15b.4]བ་ནི་ལེགས་པར་བལྟའོ། །དེ་ལ་བཀྲུ་སྨན་བབས་ཆེ་སྟེ་ཧ་ཅང་དྲགས་པ་ནི་བད་ཀན་ཟད་དེ་མེད་པ་དང་། མཁྲིས་པ་ཡང་ཟད་དེ་མེད། ཆུ་སྐྱ་བོར་འཁྲུ། ཆུ་ནག་པོར་འོང་། ཡང་ན་ཤ་བཀྲུས་པ་འདྲ་བ་རྩ་སྣར་བག་ཅན་ནམ་ཆུ་སེར་ལྟ་བུར་འབྱུང་། ཚིལ་ལྟ་བུའི་ནར་ནར་པོའམ།
[15b.5]རུས་བུ་ལྟ་བུ་འབྱུང་། གཞང་ཕྱིར་འབྱུང་ཞིང་ལྟོགས། ཁ་སྐོམ། ཀླད་པ་འཁོར། མིག་ཚགས་ཏེ་ཕུགས་སུ་བྲོས་པ་འདི་ལྟ་བུར་གྱུར་ན་བཀྲུ་སྨན་ཧ་ཅང་དྲགས་པའི་ཚུལ་ཡིན་ནོ། །བཀྲུ་སྨན་དྲགས་པ་དང་སྐྱུག་སྨན་གཏང་བའི་ཟས་ཀྱི་ཆོ་ག་དང་འདྲ་བར་བྱའོ། །སྐྱུག་སྨན་ལྟར་གཏང་བའི་
[15b.6]ཆོ་ག་ལས་དུད་པས་གཏང་བའི་ཆོ་ག་མི་དགོས་སོ། །བཀྲུ་སྨན་གྱི་རྗེས་ལ་ཁ་ཟས་བཟའ་བའི་རིམ་པ་ཡང་སྐྱུག་སྨན་གྱི་ཆོ་གར་བཤད་པ་དང་འདྲ་སྟེ། ཁ་ཟས་རིམ་པས་བཟའ་ཞིང་བགས་ཀྱིས་ཁ་ཟས་ནར་མ་ཡང་ཕྱི་ནས་བཟའོ། །གལ་ཏེ་བཀྲུ་སྨན་བཏང་བ་ལས་དྲོད་ཆུང་བས་བཀྲུ་སྨན་མ་
[15b.7]ཞུ་ཞིང་ནད་མ་ཕྱིན་ལ་ལོང་བརྙས་པ་ནི་མེད། ནད་དཀྱེལ་ནི་ཆེ་བ་ཙམ་མ་ཡིན་ན་སྨན་ཁོང་དུ་མ་ཞུ་བའི་ཚུལ་དེ་ལྟར་གྱུར་ན་འདི་ལྟ་བུ་ལ་དཔྱད་དུ་བགྱི་བ་ནི། བཀྲུ་སྨན་འཐུང་བའི་ཉིན་ཐོག་ཐག་ཟན་མི་ཟ་བར་མཚན་ཡལ་ནས་ནམ་ཞུ་ཞུ་བའི་བར་དུ་བསྡད་ཅིང་ཁ་ཟས་མི་ཟའོ། །ཡང་ན་སྔར་
[16a]
[16a.1]སྣུམ་དང་དུགས་ཀྱི་ཆོ་ག་བྱས་ལ་ཕྱིས་བཀྲུ་སྨན་བཏང་བ་ནད་གཅུང་ལ་གནོད་པར་མི་འགྱུར་རོ། །བཀྲུ་སྨན་བཏང་སྟེ་བཀྲུས་པ་དང་གཏར་ག་བཏབ་པ་དང་། སྣུམ་གྱི་ཆོ་གར་སྦྱར་ཏེ་བཏང་བ་དང་། ཟས་མི་ཟ་བར་སྨྱུང་བར་བྱས་པ་འདི་རྣམས་ཀྱིས་ནི་དྲོད་ཆུང་ཞིང་
[16a.2]ཉམས་པར་འགྱུར་རོ། །དེ་བས་ན་འདི་ལྟ་བུ་ལ་དཔྱད་དུ་བགྱི་བ་ནི་འབྲས་ཐུག་རྐྱང་རྐྱང་པོ་དང་འབྲས་ཐུག་སླ་བ་ལ་སོགས་པ་བླུད་ཅིང་བགས་ཀྱིས་གཏང་ངོ་། །བཀྲུ་སྨན་བཏང་བས་མཁྲིས་པ་དང་བད་ཀན་བྲི་སྟེ་ཆུང་ངུར་གྱུར་པ་དང་། རླུང་དང་། མཁྲིས་པ་ཆེ་བའི་མི་སྐོམ་དད་ཆེ་བ་དེ་ལྟ་བུའི་མི་
[16a.3]ལ་ནི་ཐུག་པ་བླུད་དུ་མི་རུང་སྟེ་དེ་དག་ལ་ཁ་ཟས་བསོད་པ་ལ་སོགས་པ་ཁད་ཀྱིས་བརྟ་བའི་ཆོ་ག་བྱའོ། །ནད་མ་སྨིན་པ་ལ་ནི་སྐྱུག་སྨན་གཏང་ངོ་། །ནད་སྨིན་པར་གྱུར་ཏེ་བཀྲུ་སྨན་གཏང་བའི་དུས་ལ་བབ་ན་བཀྲུ་སྨན་བཏང་སྟེ་ནད་བསལ་བར་བྱའོ། །སྐྱུག་སྨན་གཏང་བ་ནི་བཀྲུ་
[16a.4]སྨན་ལྟར་གཏང་བའི་དུས་ལ་མ་བབ་པར་ནད་སྨིན་པ་ལ་བསྡད་མི་དགོས་པར་རུང་ངོ་། །ཡང་མི་ཉམ་ཆུང་ཞིང་ནད་མང་བ་དེ་ལྟ་བུ་ལ་ནི་ནད་ཉིད་སྨིན་ཅིང་བཀྲུ་སྨན་གཏང་བའི་དུས་ལ་བབ་ན་བཀྲུ་སྨན་གཏང་མི་དགོས་པར་འཁྲུ་བར་འགྱུར་བའི་ཁ་ཟས་ཀྱི་ཆོ་ག་བྱས་ན་འཁྲུ་བར་འགྱུར་རོ། །
[16a.5]སྔར་བཀྲུ་སྨན་བཏང་སྟེ་ཉམ་ཆུང་བ་དང་ནད་ཀྱང་བྲི་སྟེ་ཆུང་དུ་གྱུར་པ་དང་། མི་ཤ་ཆུང་སྟེ་སྐེམ་པ་དང་། ལྟོ་སྲ་སྙི་ཚོད་མ་ཟིན་པ་འདི་ལྟ་བུ་ལ་སྨན་ཐུན་ཆུང་བ་དང་སྨན་འཇམ་པོ་ཐོང་ཤིག །དེ་ལྟ་བས་ན་ཆེས་སྨན་ལན་མང་དུ་འཐུངས་པ་བླའོ། །དོགས་ཤིང་བག་ཚ་བར་གྱུར་པའི་
[16a.6]སྨན་ཐུན་ཆེར་ནི་གཏང་དུ་མི་རུང་ངོ་། །ནད་པ་ཉམ་ཆུང་བ་ལྟ་བུ་ལ་ནི་སྨན་འཇམ་ཞིང་ཐུན་ཆུང་བས་ནད་ཞི་བར་བྱའོ། །ནད་པ་ཉམ་ཆུང་བ་ལ་དེ་ལྟར་དཔྱད་བྱ་སྟེ། ནད་མང་པོ་ཅུང་ཟད་ཁད་ཀྱིས་བྲི་ན་དེ་ཡང་སྨན་བགས་ཀྱིས་བཏང་ཞིང་ནད་ཁད་ཀྱིས་བསྩལ་ལོ། །ནད་དཀྱེལ་ཆེ་བས་ཕྱིན་ཕྱིན་
[16a.7]པས་ནད་པ་ཡུན་རིང་དུ་ཉོན་མོངས་པ་དེ་ལྟ་བུ་དྲོད་ཆུང་། ལྟོ་སྲ་བར་གྱུར་པ་ཡིན་ཏེ་དེ་ལ་དཔྱད་དུ་བྱ་བ་ནི་ཐལ་སྨན་རྣོན་པོས་གཤའ་ར་དང་། ཆེ་ཚ་དང་མར་དུ་སྦྱར་བ་བཏང་ན་ཁོང་པའི་མེ་དྲོད་སྐྱེ་སྟེ། ཟས་འཇུ་རླུང་དང་བད་ཀན་གྱི་ནད་ཀྱང་ཞི་ནས་དེ་ནས་འཁྲུ་སྨན་ཐོང་ཤིག །ནད་པའི་
[16b]
[16b.1]ཉམས་ཆེ་ལ་ཁོང་རྩུབ། རླུང་གི་ཤས་ཆེ། ལྟོ་སྲ་ལ་རྟག་ཏུ་རྩོལ་བའི་ངང་ཚུལ་ཅན། ཁོང་པའི་དྲོད་ཆེ་བ་དེ་ལྟ་བུ་ནི་བཀྲུ་སྨན་བཏང་བ་ཡང་སྨན་ཞུ་བར་འགྱུར་བ་ཡིན་ཏེ། དེ་ལྟ་བུ་ལ་ནི་སྔར་སྨན་མ་བཏང་བ་ལ་ཉམས་བརྟས་ནས་ཕྱིས་བཀྲུ་སྨན་འཇམ་པོ་ཐོང་ཤིག །གལ་ཏེ་འཁྲུར་
[16b.2]མི་རུང་ངམ་ལན་འགའ་ཞིག་འཁྲུས་ནས་སྨན་རྣོན་པོ་ཅུང་ཟད་སྦྱར་བའི་སྨན་རེང་རེང་པོར་མས་བཅུག་ནས། ནད་ཐུར་དུ་འཁྲུས་ཏེ་མ་ཕྱིན་པས་ཁོང་ཡང་འཇམ་ལ་བཀྲུ་སྨན་ལེགས་པ་བདེ་བར་འགྱུར་རོ། །གོང་དུ་བཀྲུ་སྨན་བཏང་ནས་སྔར་སྣུམ་གྱི་ཆོ་ག་བྱ་བར་བཤད་པ་དེ་ཡང་དུག་
[16b.3]གིས་ཕོག་པའི་མི་དང་། མཚོན་གྱིས་རྨས་པ་ལྟ་བུ་དང་། ཐོར་བུ་བྱུང་བ་དང་། མཛེ་ནད་དང་། འོར་ནད་དང་། མེ་དབལ་དང་། མིག་སེར་དང་། སྐྱ་རྦབ་ཀྱི་ནད་དང་། ཟ་ཁུའི་ནད་ཡོད་པ་དང་། འདི་ལྟ་བུ་རྣམས་ལ་ནི་སྣུམ་གྱི་ཆོ་ག་ཧ་ཅང་ཆེར་མི་བྱ་བ་དང་བཀྲུ་སྨན་
[16b.4]ཐོང་ཤིག །དེ་ལ་སྣུམ་བག་གི་ཆོ་ག་བྱ་བ་དང་། བཀྲུ་སྨན་བཏང་བ་དང་ཐམས་ཅད་ལ་ནད་མེད་པའི་ཁོང་སྣུམ་པ་ལ་སྣུམ་གྱི་ཆོ་ག་བྱ་སྟེ་བརྟས་ལ་སྐྱུག་སྨན་དང་། བཀྲུ་སྨན་ལ་སོགས་པ་ལས་བྱ་ཞིང་གང་བཏང་ཡང་རུང་སྟེ། དེ་དག་གི་བར་དང་། སྐབས་སྐབས་སུ་སྣུམ་
[16b.5]གྱི་ཆོ་ག་དང་དུགས་ཀྱི་ཆོ་ག་བྱའོ། །དེ་ལྟར་སྣུམ་བག་གི་ཆོ་ག་བྱས་པའི་རྗེས་ལ་ཁ་ཟས་ཀྱི་ཉམས་འཚག་བརྟས་ནས་བཀྲུ་སྨན་གྱིས་ནད་བསལ་བ་ནི་དཔེར་ན་གོས་དྲི་མ་ཅན་སྦངས་ལ་བཀྲུ་བ་དང་འདྲའོ། །དེ་ལ་སྣུམ་གྱི་ཆོ་ག་དང་དུགས་ལ་སོགས་པ་མ་བྱས་པར་རང་གར་བཀྲུ་སྨན་
[16b.6]གཏོང་བ་དེ་ནི་ཤིང་སྐམ་པོ་དགུག་ཏུ་མི་རུང་བ་བཞིན་དུ་ལུས་མ་རུང་བའི་ཉེན་དུ་འགྱུར་རོ། །དེ་ལ་ཆོ་ག་ཚུལ་བཞིན་དུ་བྱས་པའི་བཀྲུ་སྨན་གཏང་བ་ལེགས་པར་བྱ་བ་ནི་སེམས་གསལ་བ་དང་དབང་པོ་རྣམས་དང་། སྲོག་ཟུངས་རྣམས་བརྟན་པ་དང་ཁོང་དུ་དྲོད་ཆེ། མེ་འབར།
[16b.7]ཟས་མྱུར་དུ་འཇུ། རྒས་སྲ་བར་འོང་སྟེ། བཀྲུ་སྨན་བཏང་ལེགས་པ་ནི་དེ་ལྟ་བུ་ཡིན་ནོ། །སྐྱུག་སྨན་དང་བཀྲུ་སྨན་གཏང་བའི་ཆོ་གའི་ལེའུ་བཅོ་བརྒྱད་པ་རྫོགས་སོ།། །།སྨན་མས་གཏོང་བ་ཉམས་བརྟ་བར་བྱ་བའི་ཆོ་གའི་ལེའུ་བཅུ་དགུ་བཤད་པར་བྱའོ། །རླུང་ནད་
[17a]
[17a.1]ཀྱི་ཤས་ཆེ་བ་དེ་ལྟ་བུ་ལ་ནི་སྨན་མས་གཏོང་ཞིང་བརྟ་སྟེ། ལུས་ཀྱི་ཁོང་སྣུམ་པར་བྱ་བའི་ཆོ་ག་བཟང་ངོ་། །དེ་ལྟ་བས་ན་སྨན་དཔྱད་ཀྱི་བྱ་བ་ཐམས་ཅད་ཀྱི་ནང་ནས་སྨན་མས་གཏོང་ཞིང་ཁོང་སྣུམ་ཞིང་ཉམས་བརྟ་བར་བྱ་བ་འདི་ནི་དཔྱད་ཀྱི་མཆོག་ཡིན་ནོ། །
[17a.2]དེ་ཡང་ནད་རྣམ་པ་གསུམ་སྟེ་ནད་འཁྲུར་རུང་པ་ཁོང་དུ་བསྡུ་བའི་སྨན་མས་གཏོང་བ་དང་། བཀྲུ་སྨན་དྲག་པོ་མས་གཏོང་བ་དང་། འཇམ་རྩི་མས་གཏོང་བ་དང་། རྣམ་པ་གསུམ་མོ། །སྨན་མས་གཏོང་བའི་ཆོ་ག་འདི་གསུམ་གྱིས་སྐྲན་དང་ལྟོ་སྦོས་པ་དང་། རྐང་པ་ན་སྟེ་འཐེང་བ་དང་། མཆེར་པ་ན་
[17a.3]བ་དང་། རླུང་ནད་ཀྱིས་ལྟོ་འཁྲུ་བ་དང་། ལྟོ་ན་བ་དང་། རིམས་བྱིང་བ་དང་། ཆམ་པ་ན་བ་དང་། རླུང་ནད་ཀྱིས་ཁུ་ཆུ་འགགས་པ་དང་། རླུང་ནད་ལས་རྟུག་སྐམ་དུ་གྱུར་ཏེ་འབྱུང་དུ་མི་རུང་བ་དང་། རླིག་རླུགས་དང་། རྡེའུ་ནད་དང་། ཁུ་ཆུ་ལ་ནད་ཡོད་པ་དང་། རླུང་ནད་དཀྱེལ་
[17a.4]ཆེན་པོར་གྱུར་པ་འདི་རྣམས་ལྟ་བུ་ལ་སྨན་མས་གཏོང་བ་རྣམ་པ་གསུམ་གྱིས་ནད་ཀུན་བསལ་བར་བྱའོ། །དེ་ལ་སྨན་མས་གཏོང་ཞིང་བཀྲུར་མི་རུང་བའི་ནད་དམིགས་ནི་སྣུམ་བག་བཏང་ཧ་ཅང་དྲགས་པ་དང་གློ་རྡོལ་བ་དང་ལུས་ཧ་ཅང་སྐེམ་ཆེ་སྟེ་ཉམ་ཆུང་བ་ལྟ་བུ་དང་། མཆིན་པ་ན་སྟེ་བེའུ་
[17a.5]སྣབས་སུ་འཁྲུ་བ་དང་། རྟག་ཏུ་སློན་བྲོ་བ་དང་། བཀྲུ་སྨན་གྱིས་བཀྲུས་ཟིན་པ་ལྟ་བུ་དང་། སྣ་ནས་སྨན་བཏང་ཟིན་པ་དང་། དབུགས་མི་བདེ་སྟེ་རྔམ་པ་དྲག་ཏུ་འབྱུང་བ་དང་། ལུད་པ་ལུ་བ་དང་མཆིལ་མ་མང་སྟེ་རྟག་ཏུ་འདོར་བ་དང་། གཞང་འབྲུམ་ཁྲག་ཚད་ཀྱིས་བཏབ་པ་དང་།
[17a.6]སྐྱིགས་བུས་བཏབ་པ་དང་། ལྟོ་སྦོས་པ་དང་། དྲོད་ཆུང་སྟེ་ཟས་འཇུར་མི་རུང་བ་ལྟ་བུ་དང་། གཞང་ཁ་སྐྲངས་ཏེ་ན་བས་སྨན་མས་གཏོང་དུ་མི་རུང་བ་ལྟ་བུ་དང་། ཁ་ཟས་ཟོས་ཟིན་པ་ལྟ་བུ་དང་། དམུ་རྫིང་གི་ནད་ཀྱིས་རྩ་སྒོ་ཀུན་འགགས་པ་དང་། མཛེ་ནད་དང་ཟ་ཁུ་ཅན་
[17a.7]དུ་གྱུར་ཏེ་གཅིན་སྦྲང་རྩིའི་མདོག་ཏུ་འོང་བ་དང་། བུད་མེད་སྦྲུམ་མ་ཟླ་བ་བདུན་ལས་མ་ལོན་པ་དང་། འདི་རྣམས་ལྟ་བུ་ལ་ནི་སྨན་མས་གཏོང་ཞིང་བྱར་མི་རུང་ངོ་། །དེ་ལ་སྨན་མས་གཏོང་ཞིང་ཉམས་བརྟས་ཏེ་ཁོང་སྣུམ་པར་བྱ་བ་དང་། སྨན་མས་གཏོང་བའི་བཀྲུར་རུང་བའི་ནད་
[17b]
[17b.1]དམིགས་ནི་དྲོད་ཧ་ཅང་ཆེ་བ་དང་། ཁོང་རྩུབ་པ་དང་། རླུང་ནད་འབའ་ཞིག་ན་བ་ལས་དམུ་རྫིང་དུ་གྱུར་པ་ལྟ་བུ་དང་། ཆམ་པས་བཏབ་པ་དང་། ཧ་ཅང་སྦོམ་ཆེས་པ་དང་། ལྟོ་ན་སྲིན་བུ་ཡོད་པ་དང་། རླུང་ནད་ཀྱི་ཤས་ཧ་ཅང་ཆེས་པ་དང་། དབྱིག་དུག་འཐུངས་པ་དང་། འབྲུམ་བུས་
[17b.2]བཏབ་པ་དང་། རྐང་བམ་གྱི་ནད་དང་། ལྦ་བ་ཅན་དང་། འདི་རྣམས་ལྟ་བུའི་ནད་ལ་སྨན་མས་གཏང་ཞིང་བཀྲུར་རུང་ངོ་། །སྨན་མས་གཏོང་བ་དེ་དག་གི་ཆ་སྤྱད་སྦུ་གུ་ནི་གསེར་ལ་སོགས་པ་དང་། ཤིང་དང་། རུས་པ་དང་། འདི་རྣམས་ཀྱིས་གཅེའུ་མ་གས་པ་དྲང་ལ་འཇམ་པ་ཁ་ཟླུམ་
[17b.3]པོར་བྱས་ཏེ། ཚད་ནི་བྱིས་པ་ན་གཞོན་ཏེ་ལོ་གཅིག་མ་ལོན་ན་སྲིད་སོར་ལྔའོ། །ལོ་བདུན་མ་ལོན་ན་སྲིད་སོར་དྲུག་གོ། །ལོ་བདུན་ལོན་ན་སྲིད་སོར་བདུན་ནོ། །ལོ་བཅུ་གཉིས་ལོན་ན་སོར་དགུའོ། །ལོ་ཉི་ཤུ་ལོན་པ་ཕན་ཆད་ལ་སོར་བཅུ་གཉིས་སོ། །དེ་ཡན་ཆད་ལོ་གྲངས་ཀྱི་བྱེ་བྲག་
[17b.4]དང་། ན་ཚོད་དང་། ཉམས་སྟོབས་དང་། ལུས་བོང་ལས་སྦུ་གུའི་ཚད་བསྐྱེད་དོ། །སྦུ་གུའི་ཚད་ཀྱི་སྦོམ་ནི་མཐེ་བོང་ཤོང་བའི་ཚད་དུ་བྱའོ། །རྩེ་མོའི་སྦོམ་ནི་མཐེའུ་ཆུང་གི་ཚད་དུ་བྱའོ། །བྱིས་པ་ཆུང་ངུ་ལོ་གཅིག་ལོན་པ་མན་ཆད་སོར་མོའི་ཚད་ལས་ཕྱེད་ཕྱེད་ཀྱིས་དེ་
[17b.5]བསྐྱེད་དེ་ཞབས་ཀྱི་བུ་གའི་སྦོམ་རབ་ཏུ་ཆེ་བ་དང་། སོར་མོ་གསུམ་གྱི་རྩེ་མོ་ནང་དུ་ཤོང་བ་ཙམ་དུ་བྱའོ། །གཅེའུའི་རྩེ་མོའི་བུ་གའི་ཚད་ནི་མོན་སྲན་སྡེའུ་དང་། སྲན་ཆུང་དང་། སྲན་མ་འདི་རྣམས་བཙོས་པ་ཤོང་བ་དང་། རྒྱ་ཤུག་གི་འབྲས་བུ་ཤོང་བའི་ཚད་ཆེ་ཆུང་གི་རིམ་པ་
[17b.6]དེ་ལྟར་བྱའོ། །གཅེའུའི་རྩེ་མོའི་གོང་དུ་ཁོག་པ་གདགས་པའི་ཚད་ནི་གཅེའུའི་བུ་ག་སྦོམ་པའི་ཚད་དང་མཉམ་པར་བྱའོ། །གཅེའུ་ནས་སྨན་གཏོང་བའི་ཚེ་གཅེའུའི་རྩེ་མོའི་ཁ་བཀབ་པའམ། པགས་པས་བཅད་དེ་མ་བོ་བར་བྱས་ནས་གཏང་ངོ་། །གཅེའུའི་ཞབས་སྦོམ་
[17b.7]པོའི་ཁ་ནས་ཡང་སོར་གཉིས་སུ་གཞལ་བར་ཁོག་པ་ཅན་དེ་ནས་མར་རིམ་པ་གཉིས་སུ་བཏགས་ལ། བུག་པ་གཉིས་ཀྱི་བར་དུ་སྨན་བླུགས་པའི་སྣོད་ལུག་དང་ར་དང་མ་ཧེ་ལ་སོགས་པའི་ལྒང་པ་ལེགས་པར་མཉེས་པ་ཚོན་གྱིས་དམར་པོར་བཙོས་པ་སྲ་བ་ཕུར་མ་ཐག་ཐུག་དང་དྲི་ང་
[18a]
[18a.1]བ་དང་རྩའི་རི་མོ་འདི་རྣམས་མེད་ཅིང་འཇམ་ལ་སྲ་བ་དེ་ལྟ་བུའི་གཅེའུ་དང་སྦྱར་ཏེ་སྲད་བུས་ལེགས་པར་བཅིངས་ལ་སྨན་བླུགས་ནས་བདེ་བར་བྱའོ། །གལ་ཏེ་ལྒང་པའི་རྐྱལ་བུ་མེད་ན་རྒྱལ་པའི་དཔུང་པའམ། བྱིན་པའི་བགས་པའམ། རས་སྟུག་པོ་ཐགས་
[18a.2]བཟང་བ་སྤྲ་ཚིལ་གྱིས་བྱུགས་པ་དེ་ལྟ་བུ་ལ་སྣོད་དུ་བྱའོ། །དེ་ལ་སྨན་མས་གཏོང་སྟེ་བཀྲུ་བའི་ཚད་ནི་བྱིས་པ་ཆུང་ངུ་ལོ་གཅིག་ལ་སྲང་གཅིག་གཏང་ངོ་། །བྱིས་པ་ཆུང་ངུ་དེ་ལྟ་བུ་ལས་ལོ་རེ་རེ་ལོན་ཞིང་སྨན་སྲང་རེ་རེ་བསྐྱེད་དེ། ལོ་དྲུག་ལོན་ནས་སྲང་བཅུ་གཉིས་གཏང་ངོ་། །
[18a.3]དེ་ཡན་ཆད་ཀྱང་ལོ་གྲངས་ལས་སྲང་གཉིས་གཉིས་སུ་བསྐྱེད་དེ་ལོ་བཅུ་གཉིས་ལོན་པ་དང་། ལོ་བཅོ་བརྒྱད་ལོན་པ་ནས་ལོ་བདུན་ཅུ་ལོན་པ་མན་ཆད་ལ་སྤྱིར་སྨན་གཏང་བའི་ཚུལ་ནི་ཐུན་རབ་ཏུ་ཆེ་ན་ཡང་སྲང་ཉི་ཤུ་གཏང་ངོ་། །སྨན་མས་གཏོང་སྟེ་བཀྲུ་བའི་ཐུན་སྲང་ཇི་སྙེད་ཅིག་བཏང་
[18a.4]བ་དེ་ལས་དཔགས་ཏེ་ཉམས་བརྟ་ཞིང་ཁོང་སྣུམ་པར་བྱས་པའི་སྨན་མས་གཏོང་བ་བཞི་ཆ་གཅིག་གི་ཚད་དུ་བྱའོ། །དེ་ལྟ་བས་ན་ཉམས་བརྟ་བའི་སྨན་མས་གཏོང་དུ་རུང་བའི་སྣུམ་བག་བཏང་བ་དང་། དུགས་བྱ་བའི་ཆོ་ག་ཡང་བྱས། བཀྲུ་སྨན་བཏང་སྟེ་ནང་གི་ནད་ཀྱང་བསལ།
[18a.5]འབྲས་ཐུག་སླ་མོ་དང་གར་པོ་ལ་སོགས་པས་ཉམས་འཚག་ཀྱང་བརྟས་ནས་ཉམས་བརྟ་བའི་སྨན་གཏང་དུ་རུང་བར་ཤེས་ན་ཐོག་མ་ཉིད་དུ་ཉམས་བརྟ་བའི་སྨན་མས་གཏང་བར་བྱའོ། །ཉམས་བརྟ་བའི་སྨན་མས་གཏོང་བ་ཡང་དགུན་ཟླ་བཞི་དང་དཔྱིད་ཟླ་གཉིས་ཀྱི་ཚེ་ནི་ཉིན་པར་ཐོང་ཤིག །
[18a.6]ཁ་ཅིག་ན་རེ་ཟླ་བ་འདི་དྲུག་གི་ཚེ་མཚན་མོ་ཡང་གཏང་དུ་རུང་ཞེས་ཟེར་རོ། །སོ་ག་དང་དབྱར་དང་སྟོན་གྱི་ཚེ་ནི་མཚན་མོ་ཐོང་ཤིག །དེ་ལ་ཁོང་སྣུམ་ཞིང་ཉམས་བརྟ་བའི་སྨན་མས་གཏང་བར་བྱ་ན། ཆོ་ག་སྔར་བྱ་བ་ལ་ལུས་མར་གྱིས་བསྐུ་ཞིང་ལྡེ་གུས་དྲིལ་ལ་ཆུ་དྲོན་པོས་ལུས་
[18a.7]དག་པར་བཀྲུ། དྲོའི་ཁ་ཟས་ཀྱི་ཚད་སྔ་ན་ཅི་ཟ་བའི་ཐང་ལས་བཞི་གསུམ་ནི་བཟའ་བཞི་ཆ་ཅིག་ནི་མི་བཟའ། ཁ་ཟས་ཅི་ཟ་བ་ཡར་ཕན་པ་ཡང་བ་སྣུམ་ཆེས་པ་ཡང་མ་ཡིན། རྩུབ་ཆེས་པ་ཡང་མ་ཡིན་པ་དེ་ལྟ་བུ་ཟོས་ལ་ཁུ་བ་ལ་སོགས་པ་སྐོམ་གྱི་གོར་བཏུང་བ་དང་། ཚལ་ནན་ཡང་བཏུང་ངོ་། །
[18b]
[18b.1]ཁ་ཟས་ཟོས་པའི་རྗེས་ལ་བཅག་པར་བྱས་ན་བཤང་གཅི་བསྩལ་ལ་མལ་བདེ་བར་འདུག་ན་སྔས་སྨད་ནས་རོ་སྨད་བསྟོད་དེ། གློ་གཡོན་གྱིས་ཕབ་ནས་རྐང་པ་གཡས་པ་བསྐུམ་རྐང་པ་གཡོན་པ་ནི་རྐྱོང་ཤིག །དེ་ནས་གཅེའུའི་ནང་ནས་སྨན་མས་གཏོང་སྟེ་གཅེའུའི་ཁ་དང་གཞང་ཁ་ཡང་
[18b.2]སྣུམ་གྱིས་བསྐུའོ། །གཅེའུའི་ལྒང་པ་ནང་དུ་སྨན་བླུགས་ལ་དབུགས་ཕྱིར་ཕྱུང་ནས་ཁ་བཅིངས་པ། སྨན་པ་ནད་པའི་རྒྱབ་ལོགས་སུ་འདུག་ནས། རྟབས་བག་ཏུ་སྨན་མྱུར་དུ་བཏང་བའམ། དལ་ཞིང་ཐོགས་པ་མ་ཡིན་པར་བྱ་ཞིང་གཅེའུའི་ནང་ནས་སྨན་ནང་དུ་བཏང་ཞིང་བཙིར་བའི་
[18b.3]ཤུགས་ཧ་ཅང་དྲགས་པའམ། དལ་བ་ཡང་མ་ཡིན་རན་པར་ཅིག་ཅར་ལན་ཅིག་ཏུ་བཙིར་ཅིང་ཐོང་ཤིག །ལྒང་པའི་ཞབས་ན་རླུང་ལུས་པ་ཡོད་ཀྱི་སྨན་གྱི་ལྷག་མ་མ་ལུས་པར་གྱིས་ཤིག །སྨན་བཏང་ཟིན་ནས་བརླ་དང་རྐུབ་ཙོས་ལ་ཐལ་མོས་བརྡབ་ཅིང་གན་རྐྱལ་དུ་བཞག་
[18b.4]ལ་ནད་པ་ཉིད་རང་གི་ལམ་ལ་རྐང་པའི་རྟིང་པས་བརྡུང་བར་བྱའོ། །སྨན་པའམ། ནད་གཡོག་གིས་ནད་པའི་རྐང་པ་ནས་བཏེག་སྟེ་ལན་གསུམ་གསིགས་ཤིག །དེ་ནས་ནད་པ་སྔས་བཅུག་ནས་བརྐྱང་སྟེ། ཉལ་ལ་རྐང་པའི་རྟིང་པར་ནད་གཡོག་གིས་ཁུ་ཚུར་གྱིས་བརྡུང་
[18b.5]བའམ། བརླ་དང་བྱིན་པ་ལ་ཡང་ཁུ་ཚུར་གྱིས་བརྡུང་ཞིང་ལུས་སྣུམ་གྱིས་བསྐུས་ལ་མཉེ་བར་བྱའོ། །ལུས་ལ་བརྡུང་ཞིང་མཉེས་ལ་མི་བདེ་བར་བྱས་པ་དེས། སྨན་སླར་མྱུར་དུ་ཕྱིར་མི་དབྱུང་ངོ་། །གལ་ཏེ་སྨན་སླར་མྱུར་དུ་ཕྱིར་བྱུང་བས་ཕན་མི་བྱེད་པར་གྱུར་ན། སྨན་མར་ཕྱི་
[18b.6]མ་གཞན་ཡང་སྦྱར་ལ་གཏང་ངོ་། །ཁོང་པའི་དྲོད་ཆེ་བས་སྨན་མས་གཏོང་བ་ཞུ་ན་ནུབ་ཀར་ཁ་ཟས་ཀྱང་བཟའོ། །ཟས་ཟོས་ནས་དེ་ཕན་ཆད་མཚོན་ཐོག་ཐག་ཏུ་ཅི་ཡང་མི་བཟའ་མི་བཏུང་བར་ཉོལ་ཅིག །གལ་ཏེ་སྨན་ཕྱིར་འབྱུང་དུ་མ་རུང་ན་སྨན་སྦྱར་བའི་སྟར་བུའམ། སྨན་རྣོན་པོ་
[18b.7]ལྒང་པ་ནས་མས་གཏོང་ཞིང་ཁོང་ན་སྨན་མར་ལུས་པ་ཕྱིར་དབྱུང་ངོ་། །གལ་ཏེ་ཁོང་པའི་ནང་ན་ཧ་ཅང་རྩུབ་ཆེས་པས་སྨན་མ་ཞུ་སྟེ་ཕྱིར་མ་བྱུང་བ་དང་། ཁོང་པའི་དྲོད་ཆུང་བས་སྨན་མ་ཞུ་སྟེ། ཕྱིར་མ་བྱུང་ལ་ནད་དུ་གྱུར་པ་མེད་ན་བསྡད་པར་བྱ་ཞིང་མཚན་མོ་དེ་བཞིན་དུ་
[19a]
[19a.1]འདུག་པར་བྱའོ། །ནང་པར་ལི་དོང་གྲ་དང་། འུ་སུ་བསྐོལ་བའི་ཆུ་འམ་ཡང་ན་ཆུ་འབའ་ཞིག་གདུས་པ་བཏུང་བར་བྱའོ། །ཉམས་བརྟ་བའི་སྨན་མས་གཏོང་ན་ཉི་མ་གསུམ་མམ། ཉི་མ་ལྔ་ལོན་ན་ཡང་ཐོང་ཤིག །གལ་ཏེ་འཇུ་བའི་དྲོད་ཆེ་བས་སྨན་
[19a.2]ཞུ་བའམ། ཡང་ན་རླུང་གི་ཤས་ཧ་ཅང་ཆེས་པ་དང་། རྟག་ཏུ་རྩོལ་ཞིང་བཅག་པར་བྱེད་པ་དང་། མེའི་དྲོད་ཧ་ཅང་ཆེ་བ་དང་། ཁོང་པའི་ནང་རྩུབ་པ་འདི་རྣམས་ལྟ་བུ་ལ་སྨན་མས་གཏོང་བའི་ཉི་མ་རེ་རེ་གཏང་དུ་རུང་ངོ་། །དེ་ལྟར་ཁོང་སྣུམ་ཞིང་ཉམས་བརྟ་བའི་སྨན་མས་གཏོང་བ་
[19a.3]ལན་གསུམ་ལན་བཞི་བཏང་ནས་ལུས་ཀྱི་ཁོང་དང་རྩ་འཇམ་ཞིང་སྣུམ་པར་གྱུར་ནས་ནད་དབྱུང་ཞིང་བསལ་བར་བྱ་བའི་ཕྱིར། བཀྲུ་བའི་སྨན་མས་གཏོང་ཞིང་སྦྱར་བར་བྱའོ། །སྔ་ན་ལུས་ཀྱི་ཁོང་རྩུབ་པ་ལས་སྣུམ་པར་བྱ་བའི་འོག་ཏུ་ཉི་མ་ལྔ་ལོན་ན་ཚེས་གྲངས་བཟང་པོའི་ཉི་མ་
[19a.4]ཅུང་ཟད་ཕྱེད་ཡོལ་ཙམ་ན་སྨན་པས་གཏོར་མ་དང་བཀྲ་ཤིས་ཀྱི་ཚིག་བྱས་ལ་ནད་པ་ལུས་ཏིལ་མར་གྱིས་བྱུགས། དུགས་བྱས། བཤང་གཅིའི་དྲི་མ་བསྩལ་ལ། ཧ་ཅང་བཀྲེས་པ་ཙམ་མ་ཡིན་པར་འདུག་ལ་ནད་ཀྱི་དམིགས་དང་སྨན་ལ་སོགས་པ་ལ་མཁས་པའི་མི་དང་། གང་དེ་
[19a.5]ལ་མཁས་པ་མང་པོ་དང་། ལྷན་ཅིག་ཏུ་འགྲོ་ཞིང་སྨན་མས་གཏོང་བའི་བཀྲུ་སྨན་དྲག་པོ་དེ་ལ་སྨན་གྱི་ཁུ་བ་སྦངས་པ་ཆུ་སྲང་བརྒྱད་ཅུའི་བཞི་ཆ་གཅིག་སྟེ་སྲང་ཉི་ཤུ་དང་། པོ་སོན་ཆའི་འབྲས་བུ་འབྲུམ་བུ་བརྒྱད་དང་སྦྱར་ཏེ་བཙོ་ཞིང་དེའི་ནང་དུ་མར་ནི་སྨན་གྱི་ཁུ་བ་སྲང་ཉི་ཤུའི་བཞི་ཆ་
[19a.6]གཅིག་ནང་དུ་བླུགས་ཏེ་བཙོ་མ་འདི་ནི་རླུང་ནད་ལ་བཏང་ན་ཐབས་དེ་ལྟར་སྦྱར་རོ། །མཁྲིས་པ་ན་བ་ལ་བཏང་བ་དང་། ན་བ་མེད་པ་ཉམས་ཐ་མལ་པ་ལ་བཏང་ན་སྨན་གྱི་ཁུ་བ་སྲང་ཉི་ཤུ་རྩ་དྲུག་ཆ་གཅིག་གི་ཐང་དུ་བླུགས་ཏེ་བཙོ་བར་བྱའོ། །བད་ཀན་གྱི་ནད་ཆེ་བ་ལ་བཏང་ན་སྨན་
[19a.7]གྱི་ཁུ་བ་སྲང་ཉི་ཤུའི་བརྒྱད་ཆ་གཅིག་གི་ཐང་དུ་མར་བླུགས་ཏེ་བཙོ་བར་བྱའོ། །ཡང་ན་ནད་ཐམས་ཅད་ལ་སྨན་གྱི་ཁུ་བའི་བརྒྱད་ཆ་གཅིག་གི་ཐང་དུ་མར་བླུགས་ཏེ་བཙའོ། །བཀྲུ་བའི་སྨན་མས་གཏོང་བ་བཙོ་བ་དེ་ཡང་ཧ་ཅང་མི་སྐ་མི་སླ་བར་སྦྱར་ཞིང་བཙོའོ། །དེའི་ནང་དུ་བུ་རམ་
[19b]
[19b.1]སྲང་གཅིག་ཙམ་དང་སྦྲང་རྩི་དང་། ལྕེ་ཚ་ལ་སོགས་པ་ནད་དམིགས་དང་སྦྱར་ཞིང་ཅི་རིགས་པར་སྦགས་ཏེ། སྨན་ལྷག་མ་སྦྱར་ཏེ། སྨན་དེ་ཐམས་ཅད་སྣོད་ཅིག་ཏུ་བླུགས་ལ། བུམ་པ་ཆུ་ཚན་བསྐོལ་བའི་རླངས་པའི་ཁར་བསྲོ་ཞིང་། སྨན་དཀྲུགས་ལ་གཏོང་བའི་གཅེའུ་རྐྱལ་
[19b.2]པའི་ནང་དུ་བླུགས་ཏེ། ཧ་ཅང་མི་ཚ་མི་གྲང་། ཧ་ཅང་མི་སྣུམ་མི་རྩུབ། ཧ་ཅང་མི་རྣོ་མི་འཇམ། ཧ་ཅང་མི་གར་མི་སླ། ཧ་ཅང་མི་ཉུང་མི་མང་། ཇེ་ཚ་མེད་པའམ་ཚ་བར་ཡང་མི་བྱ། དེ་དང་འདྲ་བར་འབྲས་ཙམ་ཡང་མི་མང་མི་ཉུང་བར་སྦྱར་ཏེ། སྨན་མས་གཏོང་ཞེས་མཁས་
[19b.3]པ་ཁ་ཅིག་ནི་དེ་སྐད་ཟེར་རོ། །ཡང་སྨན་པ་ཁ་ཅིག་ན་རེ་མར་དང་སྦྲང་རྩི་གཉིས་ཀྱི་ཚད་སོ་སོར་སྲང་གསུམ་གསུམ་དང་ན་བ་མེད་ཅིང་ཉམས་ཐ་མལ་པ་ཞིག་ལ་བཏང་ན་ལྕེ་ཚ་ཞོ་གཉིས་པོ་སོན་ཆ་དང་ཤུ་ཏི་ལ་སོགས་པ་སྲང་གཉིས་སྦངས་པའི་ཁུ་བ་དང་ལྷག་མའི་ཁུ་བ་སྲང་བཅུར་
[19b.4]སྦྱར་ཏེ་སྨན་ཁུ་སྦངས་སྦངས་པ་མར་དང་བཙོས་ལ་སྦྲང་རྩི་དང་ལྕེ་ཚར་སྦྱར་ཏེ། རིམ་པ་འདི་ལྟར་བྱས་ལ་སྨན་གཏང་བའི་རྐྱལ་བུར་བླུགས་ལ། བཀྲུ་བའི་སྨན་མས་གཏོང་བའི་ཆོ་ག་དེ་ལྟར་བྱའོ། །དེ་ལ་རླུང་ནད་སེལ་བའི་སྨན་མས་གཏོང་ཞིང་བཀྲུ་བར་སྦྱར་ན་ཤིང་ཉེ་རོང་
[19b.5]དང་ལྕེ་ཚ་སེ་ན་བ་དང་ཉེའུ་ཤིང་པ་དང་། ཨ་ཤྭ་གནྡྷ་དང་། ཨེ་རཎྜའི་ལོ་མ་སྨན་དང་ས་ཤིང་འཇམ་པ་དང་སྐྱུར་བ་དང་དྲོ་བའི་ཁུ་བ་དང་ལྡན་པ་འདི་ལྟ་བུའི་སྨན་རྣམས་ནི་རླུང་ནད་སེལ་བའི་སྨན་མས་གཏོང་བར་བཟང་ངོ་། །མཁྲིས་པའི་ནད་སེལ་བའི་སྨན་མས་གཏོང་ཞིང་བཀྲུ་
[19b.6]བའི་རྣམ་གྲངས་ལ་གཏོགས་པ་ལ་ཤིང་ནྱ་གྲོ་དྷ་དང་། ཤིང་ཨུ་དུམྦཱ་ར་དང་། ཤིང་པླག་ཤ་དང་། ཤ་པ་དང་། ཤིང་མངར་དང་། འོ་མ་དང་། ཉེའུ་ཤིང་དང་། འབྲི་མར་དང་། རོ་མངར་ཞིང་བསིལ་བ་རྣམས་དང་། བུ་རམ་ཤིང་གི་ཁུ་བ་སྦྲང་རྩི་དང་འདི་རྣམས་མཁྲིས་པའི་ནད་
[19b.7]སེལ་བའི་སྨན་མས་གཏོང་ཞིང་བཀྲུ་བར་བཟང་ངོ་། །བད་ཀན་རྒྱས་པའི་ནད་སེལ་བ་ནི་དོང་ག་དང་། དུག་མོ་ཡུངས་དང་། པ་ཏ་ལི་ག་དང་། ཆིས་ཁྲིམས་དང་། ཤིང་ནིམ་པ་དང་། སླེ་ཏྲེས་དང་། པ་ཊ་དང་། ཀ་ཏུ་ཧ་རོ་ཧ་ནི་དང་། ཤིང་གི་ཁུ་བ་ཤེ་ལེ་ཡ་ཁ་དང་། པུ་ཏི་ཀ་རཉྫ་དང་།
[20a]
[20a.1]རཀྟ་ཀ་རཉྫ་དང་། སཔྟ་པརྞི་ཞེས་བྱ་བ་ཚིགས་རེ་ལ་ལོ་མ་བདུན་ཡོད་པ་དང་། སྦྲང་རྩི་དང་བ་གཅིན་དང་། སྨན་རོ་ཚ་ཞིང་རྣོ་བ་དང་དྲོད་ཆེ་བ་རྣམས་དང་ཚ་བ་རྣམས་སྦྱར་ཏེ་བཙོས་ལ་སྨན་མས་གཏོང་ཞིང་བཀྲུས་ན། བད་ཀན་གྱི་ནད་སེལ་ཏོ། །དེ་ལ་རླུང་ནད་དང་
[20a.2]མཁྲིས་པ་དང་བད་ཀན་གསུམ་ཆར་གྱི་ནད་འདུས་པར་གྱུར་ན་ཡང་། དེ་གསུམ་གྱི་སྨན་གོང་དུ་བཤད་པ་ལས་ནད་སོ་སོའི་སྨན་ཅི་རན་དུ་ཤས་ཤས་ཀྱིས་གདུས་པ་བཙོས་པའི་ཐུན་སྤྱིར་མི་ཆེ་བ་རན་པར་མས་གཏོང་བའི་བཀྲུ་སྨན་དྲག་པོ་གཏང་ངོ་། །རྟས་བཀྲུ་བའི་སྨན་མས་བཏང་
[20a.3]ནས་སྔས་ཀྱིས་བརྟེན་ཏེ་གན་རྐྱལ་དུ་སེམས་གུད་དུ་མི་གཡེངས་པར་སྨན་བཏང་བ་དེ་ལ་ཡིད་གཞག་པར་བྱའོ། །དེ་ནས་ཐུར་དུ་བཀྲུ་ཞིང་འོང་བར་གྱུར་ན་ལངས་ཏེ་ཙོག་པུར་འདུག་ལ་བཤང་བར་གྱིས་ཤིག །གལ་ཏེ་འཁྱིམས་ན་སྐད་ཅིག་ཐོགས་ཏེ་ཕོལ་དུ་མ་རུང་ན་སྨན་འདི་ཉེན་ཆེ་
[20a.4]སྟེ་འཆི་བར་འགྱུར་རོ། །འདི་ལྟ་བུ་ཉེན་དུ་གྱུར་པ་ལ་སླར་བཙོས་ཤིང་དཔྱད་དུ་བྱ་བ་ལ་མར་དང་ནས་ཚིག་འཁུས་པའི་ཐལ་སྨན་རྣོན་པོ་དང་། བ་གཅིན་དང་འབྲས་ཀྱི་རྩབས་ཀྱི་ཁུ་བ་སྐྱུར་མོ་དང་སྦྱར་ལ་བཙོས་པ་འཇམ་ཞིང་རྣོ་ལ་དྲོ་བར་སྦྱར་ཏེ། སྨན་མས་གཏོང་བའི་རྐྱལ་བུ་གཞན་
[20a.5]དུ་བླུགས་ཏེ་བཤམས་ལ་མས་གཏོང་ཞིང་ཚིར་ཅིག །ཡང་ན་པོ་སོན་ཆ་ལས་སྦྱར་བའི་སྨན་གྱིས་གདབ་མུ་ལས་གཞུག་པ་བྱ་ཞིང་སྡང་བ་ཡང་བྱའོ། །ཡང་ན་འདི་ལྟར་མ་གྱུར་ཏེ་སྨན་མས་གཏོང་ཡང་འོང་བར་གྱུར་ན་སྨན་ཕྱི་མ་སྦྱར་ཏེ། རྐྱལ་བུར་བླུགས་ལ་ལན་གསུམ་ལན་བཞིའི་
[20a.6]བར་དུ་ཡང་སྨན་དྲག་པོ་མས་གཏོང་ཞིང་ལེགས་པར་བཏང་ནས་དེའི་རྗེས་ལ་ཁ་ཟས་ཀྱི་ཆོ་ག་ནི་བཀྲུ་སྨན་བཏང་བའི་ཆོ་ག་དང་འདྲ་བར་ཤེས་པར་བྱས་ལ་ཁ་ཟས་མ་ཟོས་པའི་སྔོན་རོལ་དུ་ཆུ་དྲོན་པོས་ཁྲུས་བྱས་ནས་ཁ་ཟས་བཟའ་བའི་ཐབས་ནི་འབྲས་ཐུག་རྐྱང་རྐྱང་པོ་དང་། འབྲས་ཐུག་སླ་མོ་
[20a.7]བཏུང་། ཤ་ཁུ་སླ་མོ་དང་འབྲས་ཆན་དུ་སྦྱར་ཏེ་བཟའ། སྨན་དྲག་པོ་མས་གཏོང་སྟེ་བཀྲུས་པས་ཁོང་པའི་དྲི་མ་ནད་ཀུན་ཕྱིན་ན། ཁོང་པ་ནང་འཕྱང་བག་ཏུ་འདུག་པ་དང་། ཉམ་ཆུང་སྟེ་ཁོང་རྨྱ་བ་དེ་ལྟ་བུར་གྱུར་པ་དེ་ལ་ཆུ་དྲོན་པོ་བདེ་བས་ཁྲུས་བྱས་ནས་ཁ་ཟས་ཆོ་ག་བཞིན་དུ་ཟོས་ན་
[20b]
[20b.1]ལུས་ཞིག་ཅིང་རྨྱ་བ་ལ་ཕན་ཏེ། ཞི་བར་འགྱུར་རོ། །གལ་ཏེ་སྨན་དེ་ལྟར་མས་གཏོང་སྟེ། བཀྲུས་པ་ལས་རླུང་ནད་ཀྱི་བར་དུ་ཁོང་པ་སྦོ་བས་གྲང་བར་འགྱུར་ཏེ། མི་བདེ་ན་ཡང་དེའི་མོད་ལ་འཕྲལ་དུ་རླུང་ཞི་བར་འགྱུར་བའི་སྨན་བཙོས་ཏེ་མས་གཏོང་ཞིང་ཁོང་འཇམ་ཞིང་སྣུམ་པར་འགྱུར་
[20b.2]བར་བྱའོ། །སྨན་མས་གཏོང་སྟེ་བཀྲུས་པ་ལེགས་པའི་ཚུལ་དང་། ཧ་ཅང་དྲགས་པ་དང་ཐུན་ཆུང་སྟེ་མ་འཁྲུས་པར་གྱུར་པ་འདི་རྣམས་ཀྱི་ཚུལ་ནི་སྔར་སྣུམ་གྱི་ཆོ་ག་བྱ་ཞིང་བཏང་བ་ལེགས། མ་ལེགས་པར་བཤད་པ་དང་འདྲ་བར་ཤེས་པར་བྱའོ། །སྨན་མས་གཏོང་སྟེ་
[20b.3]བཀྲུས་པའི་རྗེས་རླུང་ནད་དུ་གྱུར་པ་ལ་ཁོང་འཇམ་ཞིང་སྣུམ་པར་གྱུར་པའི་སྨན་མས་གཏོང་བ་ཅུང་ཟད་ཙམ་ཞིག་བསྡད་ན་ཁོང་པའི་དྲི་མ་བཤང་བ་དང་བཅས་ཏེ་སྨན་མར་དང་ཅིག་ཅར་འབྱུང་བར་འགྱུར་རོ། །ཐུར་དུ་དབུག་པ་ཡང་སྨན་མར་ལྷན་ཅིག་འོང་བར་གྱུར་ན། ཁོང་སྣུམ་ཞིང་
[20b.4]འཇམ་པར་འགྱུར་བའི་སྨན་མས་གཏོང་བ་ལེགས་པ་ཡིན་ནོ། །ཡང་བད་ཀན་གྱི་བག་ཆེ་ན་དེ་ལ་ཁོང་བརྟ་བའི་སྨན་མས་གཏོང་བ་ལན་གཅིག་གམ་ལན་གསུམ་གྱི་བར་དུ་ཐོང་ཤིག་མཁྲིས་པ་རྒྱས་པའི་ཤས་ཆེ་ན། བརྟ་བའི་སྨན་མས་གཏོང་བ་ལན་ལྔ་འམ་ལན་བདུན་གྱིས་ཤིག །
[20b.5]རླུང་ནད་ལ་བརྟ་བའི་སྨན་མས་གཏོང་བ་ལན་དགུ་འམ་བཅུ་གཅིག་ཏུ་ཐོང་ཤིག །དེ་ལྟར་བརྟ་བའི་སྨན་མས་གཏོང་བའི་ལན་གྲངས་ཟུང་དུ་མ་གྱུར་པར་བྱས་ནས་གལ་ཏེ་དེའི་རྗེས་ལ་བཀྲུ་བའི་སྨན་མས་གཏོང་བར་འདོད་ན་ཡང་ཐོང་ཤིག །དེ་ལྟར་སྨན་མས་གཏོང་བའི་རྗེས་ལ་
[20b.6]བད་ཀན་དང་མཁྲིས་པ་དང་། རླུང་ནད་སེལ་བའི་ཁ་ཟས་མོན་སྲན་སྡེའུའི་ཚོད་མ་ཁུ་བ་ཅན་དང་། འོ་མ་དང་ཁུ་ཤ་འདི་གསུམ་ཟོས་ན་ནད་ཀྱི་རིམ་པ་བཞིན་དུ་ཕན་ནོ། །དེ་ལ་རླུང་ནད་སེལ་བའི་སྨན་དྲག་པོ་མས་གཏོང་ཞིང་ཁོང་སྣུམ་ལ་བརྟ་བར་བྱ་ན། ཤིང་ཉེ་རོང་དང་ལྕེ་
[20b.7]ཚ་སྣེ་བདའ་བ་དང་སྦྱར་ཏེ་སྣུམ་དང་། མངར་དང་འབྲས་རྩབས་སྐྱུར་བ་དང་། ཤ་ཁུ་དང་དྲོད་ཆེ་བའི་བག་སྦྱར་ཏེ་བསྐོལ་ལ་རྐྱལ་བུར་བླུགས་ཏེ་བཏང་བ་འདི་ནི་རླུང་ནད་གཅིག་པུ་ལ་ཕན་ནོ། །མཁྲིས་པའི་ནད་ལ་ནི་ནྱ་གྲོ་དྷ་ལ་སོགས་པའི་སྨན་སྡེའི་གྲངས་སུ་གཏོགས་པ་དང་།
[21a]
[21a.1]ཤུག་པ་དང་ཁ་ར་དང་། མངར་བག་བསིལ་བག་དང་མར་དང་འོ་མ་དང་བུ་རམ་ཤིང་གི་ཁུ་བ་དང་འདི་རྣམས་སྦྱར་ཏེ་གདུས་ལ་སྦྲང་རྩི་དང་སྦྱར་ཏེ། སྨན་མས་གཏོང་ན་མཁྲིས་པའི་ནད་འབྱང་ཞིང་མེའི་ཁོང་བརྟ་ལ་སྣུམ་པར་འགྱུར་རོ། །བད་ཀན་གྱི་ནད་ལ་དོང་
[21a.2]ག་ལ་སོགས་པ་དང་། དུག་མོ་ཡུངས་ལ་སོགས་པ་དང་། སྨན་རྩུབ་པ་རྣམས་དང་། བ་གཅིན་དང་སྨན་རྣོ་བ་དང་། དྲོད་ཆེ་བ་དང་། རོ་ཚ་བ་དང་། འདི་རྣམས་བསྐོལ་བ་སྦྲང་རྩི་དང་སྦྱར་ཏེ། མས་གཏོང་ན་བད་ཀན་གྱི་ནད་འབྱང་ངོ་། །དེ་ལ་རླུང་ནད་ལ་ནི་ལན་གཅིག་གཏང་ངོ་། །
[21a.3]མཁྲིས་པའི་ནད་ལ་ལན་གཉིས་གཏང་ངོ་། །བད་ཀན་གྱི་ནད་ལ་ལན་གསུམ་གཏང་བར་བྱའོ། །རླུང་དང་བད་ཀན་མཁྲིས་པ་གསུམ་འདུས་པའི་ནད་ལ་ཡང་སྨན་དཔྱད་དེ་གསུམ་རིམ་པས་བཏང་ན་འདུས་པའི་ནད་འབྱང་བར་འགྱུར་རོ། །སྨན་དཔྱད་ཀྱི་སློབ་དཔོན་སྤྱོད་པ་ཅན་ན་རེ།
[21a.4]ཡང་མིའི་ནད་གཞི་ནི་རླུང་དང་བད་ཀན་དང་། མཁྲིས་པ་གསུམ་དུ་ཟད་དེ་ནད་འདི་གསུམ་བསྩལ་བའི་དཔྱད་བཀྲུ་བའི་མས་གཏོང་བ་ལས་གུད་ན་དཔྱད་རྣམ་པ་བཞི་ཞེས་བྱ་བ་མེད་དེ། དེའི་ཕྱིར་སྨན་མས་གཏང་བར་བྱའོ། །རླུང་དང་བད་ཀན་དང་མཁྲིས་པའི་ནད། ཁོང་ནས་བསྐྱོད་
[21a.5]ཅིང་སྡུད་པ་དང་། ནད་བཀྲུ་སྟེ་བྱང་བར་བྱ་བ་དང་། ནད་ཞི་བར་བྱས་ཏེ། འདི་ལྟ་བུ་ཡང་རིམ་གྱིས་བྱ་བ་ཡིན་ཏེ། དེའི་ཕྱིར་ནད་རྣམ་པ་གསུམ་བཀྲུ་བའི་དཔྱད་མས་གཏོང་ཞིང་བཀྲུ་བར་བྱའོ་ཞེས་ཟེར་རོ། །དེ་ལྟར་སྨན་བཏང་བ་ཡང་ནད་དམིགས་དང་སྨན་ལ་སོགས་པའི་མཐུ་དང་།
[21a.6]ནད་པའི་ཉམས་སྟོབས་དང་། དེ་ཐམས་ཅད་ཀྱི་ཚོད་ཟིན་པར་བྱས་ལ་སྨན་གཏང་ངོ་། །བཀྲུ་སྨན་བཏང་བ་ལེགས་པའི་ཚུལ་མཐོང་། མ་དཔགས་ཀྱི་བར་དུ་བཀྲུ་བའི་སྨན་བཏང་བའི་རྗེས་གཅད་དུ་མི་རུང་ངོ་། །ཡང་ཁོང་སྣུམ་ཞིང་འཇམ་པ་བདའ་བའི་སྨན་མས་གཏོང་བ་དང་། བཀྲུ་
[21a.7]བའི་སྨན་མས་གཏོང་བ་གང་ཡང་རུང་སྟེ། ལན་གཅིག་གཏང་ཡང་མི་རུང་ལན་མང་དུ་གཏང་བ་ཡང་མི་རུང་ངོ་། །དེ་ལ་ཁོང་བརྟ་ཞིང་སྣུམ་པའི་སྨན་མས་གཏོང་བ་ནི་ནད་ཁོང་ནས་བསྐྱོད་ཅིང་བསྡུ་བ་དང་། ཁོང་པའི་དྲོད་ནི་ཆུང་བར་འགྱུར་རོ། །བཀྲུ་བའི་སྨན་བཏང་བ་ལ་འཇིག་པའི་
[21b]
[21b.1]རྟེན་ནི་རླུང་ནད་ལྡང་བར་འགྱུར་རོ། །སྨན་མས་གཏོང་བའི་རིམ་པ་ནི་སྔར་ལུས་ཀྱི་ཁོང་འཇམ་ཞིང་སྣུམ་པར་བྱ་བའི་སྨན་དེ་གཏང་ངོ་། །དེའི་འོག་ཏུ་བཀྲུ་བའི་སྨན་མས་གཏོང་ངོ་། །དེའི་རྗེས་ལ་ཁོང་བརྟ་བའི་སྨན་མས་གཏང་བར་བྱའོ། །སྨན་མས་གཏོང་བའི་དཔྱད་བྱས་
[21b.2]པ་ནི་རླུང་ནད་དང་། བད་ཀན་མཁྲིས་པའི་ནད་གསུམ་ཆར་སེལ་ཏེ་ཁོང་སྣུམ་ཞིང་བརྟ་བར་བྱ་བའི་སྨན་མས་གཏོང་བ་དང་། བཀྲུ་བའི་སྨན་མས་གཏོང་བའི་ཆོ་ག་རིག་པར་བྱ་བ་ནི་དེ་ལྟ་བུ་ཡིན་ནོ། །ཡང་སྨན་མར་ཐུན་ཆུང་ངུའི་ཐང་དུ་ཚོད་བཟུང་སྟེ། བཏུང་བ་དང་ཁོང་འཇམ་ཞིང་
[21b.3]བརྟ་བའི་སྨན་མས་གཏོང་བ་ཐུན་ཆུང་ངུའི་ཐང་དུ་ཚོད་བཟུང་སྟེ་རྟག་ཏུ་གཏང་བར་བྱའོ། །དེ་ལ་སྨན་མར་ཐུན་ཆུང་ངུའི་ཐང་དུ་བཏུང་ན། ནད་པའི་དྲོད་དང་ཉམས་ལས་ཀྱང་དཔགས་ཏེ་སྲང་གཅིག་ཙམ་བཏུང་ངོ་། །བརྟ་བའི་སྨན་མས་གཏོང་བ་ནི་སྲང་གཉིས་ཙམ་ཐོང་ཤིག །
[21b.4]དེ་ལ་སྨན་མར་ཐུན་ཆུང་ངུར་བཏང་བའི་མི་ནི་བྱིས་པ་དང་རྒན་པོ་དང་། ལམ་རིངས་ཀྱིས་དུབ་པའི་མི་དང་། ཁུར་གྱིས་དུབ་པ་དང་། བུད་མེད་ལ་བརྟེན་དྲགས་པའི་ལྟ་བུ་དང་། དྲག་ཤུལ་བྱས་པ་ལྟ་བུ་དང་། སེམས་ལས་ཆེ་བ་དང་། རླུང་ནད་ཀྱིས་ལུས་ཞོམ་པ་དང་། རིད་པ་
[21b.5]དང་། དྲོད་ཆུང་བ་དང་། རྒྱལ་པོ་དང་ཕྱུག་པོ་ལྟ་བུ་བདེ་ཞིང་ལོངས་སྤྱོད་པ་དང་། འདི་རྣམས་ལྟ་བུ་ལ་སྨན་མར་ཐུན་ཆུང་ངུ་གཏང་དགོས་ཏེ། ཐུན་ཆུང་ངུ་རྟག་ཏུ་འཐུངས་ན་ནད་ཀུན་སེལ། ཁ་ཟས་ཀྱི་ཆོ་ག་ལ་སོགས་པ་བསྲུང་ཞིང་སྤང་བ་མེད་པ་ལ་ཤ་སྐྱེ། བཤང་གཅི་དྲི་མ་
[21b.6]སྙི་སྟེ་བདེ་བླག་ཏུ་འོང་སྟེ་བདེ་བར་འགྱུར་རོ། །བུད་མེད་རྣམས་ཀྱི་ནད་མོ་མཚན་ན་བ་དང་། མངལ་གྱི་གནས་ན་བ་དང་། སྨན་མས་གཏོང་བའི་རིམ་པ་ནི་དང་པོར་ཁོང་འཇམ་ཞིང་སྣུམ་པར་གྱུར་པའི་སྨན་མས་ཇེ་བཏང་ལ། དེའི་འོག་ཏུ་བཀྲུ་བའི་སྨན་མས་གཏོང་བ་ལན་གཉིས་སམ་
[21b.7]གསུམ་ཐོང་ཤིག །མཇུག་ཏུ་ནི་ཉམས་འཚག་བརྟ་བའི་སྨན་མས་གཏང་བར་བྱའོ། །དེ་ལ་སྐྱེས་པ་ཆུ་སོ་ན་རྡེའུ་ཡོད་པ་ལྟ་བུ་དང་ཆུ་འགགས་པ་ལྟ་བུ་ལ་ཕོ་མཚན་ནས་སྨན་མས་གཏོང་ནས་གཅེའུའི་སྲིད་ཚད་ནི་ནད་པ་ཉིད་ཀྱི་སོར་བཅུ་གཉིས་ཀྱི་ཚད་དུ་གསེར་དངུལ་ལ་སོགས་པ་ལས་
[22a]
[22a.1]བརྡུང་ས་པའི་ཟླུམ་པོ་བ་མཇུག་ལྟ་བུ་ཞབས་དང་བར་གཉིས་ཀའི་རྣ་བ་བཏགས་ལ་རྩེ་མོའི་བུ་ག་ནི་ཡུངས་ཀར་བཙོས་པ་ཤོང་བ་ཙམ་དུ་བཏོད་ལ། །འཇམ་པར་བྱས་ཏེ། གཅེའུའི་རྩེ་མོ་མེ་ཏོག་ཀུན་དའམ། སྲི་ཤིང་གི་མེ་ཏོག་ལྟ་བུ་རྩེ་མོ་བྱིན་གྱིས་ཕྲ་ཞིང་སྲ་
[22a.2]བར་བྱ་ཞིང་། སྨན་གཏོང་བའི་སྣོད་རྐྱལ་བུ་ནི་འཇམ་ཞིང་ཡང་བར་བྱའོ། །ཚད་ནི་ཕོ་རུ་གང་ཤོང་བ་ཙམ་ལས་ཆེ་ཆུང་གང་རིགས་པར་བྱའོ། །དེ་ལྟར་སྨན་མས་གཏོང་བར་བྱེད་པ་སྔར་ཁྲུས་ལ་ཁ་ཟས་འཇུ་སླ་ཞིང་ཡང་བར་ན་པར་ཟོས་ནས་ཁོང་སྣུམ་ཞིང་འཇམ་པའི་སྨན་ཆོ་ག་བཞིན་དུ་ཕོ་
[22a.3]མཚན་ནས་ཐོང་ཤིག །དེ་ལྟར་སྨན་གཏང་བའི་ཐབས་ནི་ཁྲིའུའི་འཕང་པུས་མོ་ཙམ་ལ་དྲང་པོ་བདེ་བར་འདུག་ནས་ཕོ་མཚན་བརྟགས་ལ་དྲང་པོར་བྱས་ནས་ཕོ་མཚན་གྱི་སྦུ་གུའི་ནང་བསྩལ་ཏེ། སྨན་གཏང་བདེ་བར་བྱ་བའི་ཕྱིར། ཕོ་མཚན་བུ་ག་ནས་སྲུབས་ཀྱི་ཐད་ཀའི་ནང་ཐོག་ཐག་
[22a.4]རླིག་པའི་མགོ་ཙམ་དུ་ཐུར་མ་འཇམ་པོ་ཕྲའུ་བཏང་ལ་དེའི་འོག་ཏུ་རྐྱལ་བུའི་གཅེའུ་ལག་པ་མི་འདར་བས་སྨན་མས་གཏོང་བ་བཞིན་དུ་ཐོང་ཤིག །དེ་ལྟར་སྨན་བཏང་ནས་དེའི་རྗེས་བདའ་བའི་སྨན་མས་གཏོང་བ་ཡང་། རིམ་པ་བཞིན་དུ་བྱའོ། །དེ་ཡང་ན་ལན་གསུམ་ཡང་ན་ལན་བཞིའི་
[22a.5]བར་དུ་འཇམ་ཞིང་སྣུམ་པའི་སྨན་ཐོང་ཤིག །འཇམ་ཞིང་སྣུམ་པའི་སྨན་གཏང་བའི་ཆོ་ག་རྒྱས་པར་ནི་སྔར་ཐམས་ཅད་བཤད་པ་བཞིན་དུ་བྱའོ། །བུད་མེད་རྣམས་ཟླ་མཚན་དབྱུང་བའི་ཚེ་མངལ་གྱི་ཁ་ཕྱེ་བ་བུ་ཆགས་པར་འགྱུར་ཏེ། དེའི་ཚེ་སྣུམ་ཞིང་བརྟ་བར་བྱ་བར་འགྱུར་བའི་སྨན་
[22a.6]ཐོང་ཤིག །ན་ན་ནི་ཟླ་མཚན་འབྱུང་བའི་དུས་ལ་མ་བབ་པར་སྨན་གཏང་དགོས་སོ། །མོ་མཚན་གྱི་ནང་གི་མོ་མཚན་ཉམས་པ་དང་། མོ་མཚན་ན་བ་དང་། མོ་མཚན་མ་རུང་བར་འགྱུར་བ་དང་། ཁྲག་འབྱུང་བ་འདི་ལྟ་བུ་ལ་སྨན་མས་གཏོང་ན་ཕན་ཏེ། གཅེའུའི་སྲིད་ནི་སོར་
[22a.7]བཅུའོ། །རྩེ་མོའི་བུ་ག་ནི་མོན་སྲན་བཙོས་པ་ཤོང་བར་བྱའོ། །སྨན་གྱི་གཅེའུ་ནི་བུ་འཆག་པའི་མངལ་གྱི་མངལ་དུ་སོར་བཞི་གཏང་ངོ་། །ཆུས་འགགས་ཏེ་ན་ན་གཅིག་གི་ལམ་དུ་སོར་གཉིས་གཏང་ངོ་། །བུ་མོ་ཆུང་ངུ་དང་བྱིས་པ་རྣམས་ལ་ནི་སོར་གཅིག་གོ །ཐུན་འབྲིང་
[22b]
[22b.1]ནི་སྲང་གཅིག་གོ །བུ་མོ་རྣམས་ལ་ནི་ཕུ་རུམ་གང་གི་ཚད་ཞོ་གཉིས་སོ། །སྨན་གཏང་བའི་ཐབས་ནི་མལ་དུ་གནས་ཏེ་འདུག་ལ་རྐང་པ་དང་བརླ་བསྐུམ་ལ། པུས་མོ་གྱེན་དུ་བསྟོད་ལ་ཉིན་ཞག་གཅིག་ལ་མལ་ལན་གསུམ་མམ་ལན་བཞིར་ཤ་འཚག་བརྟས་པར་གྱུར་པའི་སྨན་
[22b.2]གཏང་སྟེ། དེ་ལྟར་ཞག་གསུམ་དུ་ཐོང་ཤིག །སྨན་མས་གཏོང་བ་དེ་ཡང་བགས་ཀྱིས་ཐུན་ཆུང་ངུ་ནས་བསྐྱེད་ཅིང་གཏང་ངོ་། །སྨན་བཏང་ནས་ཞག་གསུམ་ངལ་བསོས་ལ་དེ་ནས་ཞག་གསུམ་དུ་སྨན་ཐོང་ཤིག །སྨན་དེ་ལྟར་གཏང་ན་སྔར་སྐྱུག་སྨན་བཏང་ནས་ཟླ་བ་ཕྱེད་
[22b.3]ལོན་པ་དང་། བཀྲུ་སྨན་གྱིས་བཀྲུས་ལ་ཡང་ཟླ་བ་ཕྱེད་ལོན་པ་དང་། བཀྲུ་བའི་སྨན་མས་གཏོང་ངོ་། །དཔེར་ན་རས་ཀྱི་ཚོན་ལེབ་རྒན་ཅན་ཆུའི་ནང་དུ་བཀྲུས་ན་དམར་བ་ཕྱིན་ཅིང་མེད་པ་བཞིན་ནོ། །དེ་དང་འདྲ་བར་སྣུམ་པའི་སྨན་མས་གཏོང་བས་ནི་ལུས་ཀྱི་ཁོང་སྣུམ་གྱིས་བརླན་
[22b.4]ཅིང་བངས་པར་གྱུར་པ་དང་། ནད་ཐམས་ཅད་འབྱིན་པར་འགྱུར་ཏེ། ལུས་ཀྱི་ཡན་ལག་དང་། ཁོང་པའི་ནང་གྲོལ་དང་གནད་དང་། མགོ་བོ་མན་ཆད་ལུས་ཀྱི་ཡན་ལག་དང་། ཉིང་ལག་ཐམས་ཅད་ཀྱི་ནད་དང་། རླུང་དང་བད་ཀན་དང་། མཁྲིས་པའི་ནད་དུ་གྱུར་པའི་ནད་གཞི་སེལ་
[22b.5]བའི་སྨན་དཔྱད་འདི་ལས་ལོང་ཤིག །གཞན་ཅུང་ཟད་ཀྱང་མེད་དོ། །བད་ཀན་དང་། མཁྲིས་པ་ལ་སོགས་པའི་ནད་ཁོང་དུ་སོང་ཤིང་དཀྱིལ་སྐྱེས་པ་དང་བཤང་གཅི་དྲི་མ་ཁོང་དུ་བསྩགས་ཏེ་སྐྱེས་པ་དེ་ལྟ་བུ་སེལ་ཞིང་འབྱིན་པའི་ནད་རྐྱལ་བུ་ནས་མས་གཏོང་བ་མེད་ན་སྨན་དཔྱད་དེ་ལས་
[22b.6]གཞན་མེད་དོ། །དེ་བས་ན་སྨན་རྐྱལ་བུ་ནས་མས་གཏོང་བའི་ཚིག་གཅིག་པུའི་ནང་དུ་དཔྱད་ཐམས་ཅད་འདུས་སོ། །སྨན་དཔྱད་གཞན་ནི་སྨན་མས་གཏོང་བའི་ཕྱེད་ཙམ་དུ་ཟད་དོ། །གཞན་ཡང་ནད་རྙིང་དང་། ནད་གསར་པ་དང་གཏར་ག་གདབ་ཅིང་ཁྲག་དབྱུང་བ་ལ་ཡང་སྨན་རྐྱལ་བུ་
[22b.7]ནས་མས་གཏོང་ན་ཕན་པར་འགྱུར་རོ། །སྨན་མས་གཏོང་སྟེ། ཉམས་བརྟ་བར་བྱ་བའི་ལེའུ་སྟེ་བཅུ་དགུ་པ་རྫོགས་སོ།། །།སྨན་སྣ་ནས་གཏང་བའི་ཆོ་ག་ལེའུ་ཉི་ཤུ་པ་བཤད་པར་བྱའོ། །ཐོང་ཀ་ཡན་ཆད་ཀླད་པའི་ནད་ལ་སྨན་སྣ་ནས་བཏང་ན་ལྷག་པར་ཕན་ནོ། །སྣ་ནི་ཀླད་
[23a]
[23a.1]པའི་སྒོ་ཞེས་བྱ་སྟེ། དེ་བས་ན་ཀླད་པའི་ནད་ཐམས་ཅད་ལ་སྣ་ནས་བཏང་སྟེ་བཀྲུས་ཤིང་བསལ་ན་ནད་ཕྱིན་པར་འགྱུར་རོ། །དེ་ལ་ནད་དམིགས་ནི་ཀླད་པ་ན་བ་དང་། ལུས་བློང་བག་ཏུ་གྱུར་པ་དང་། ཁ་དང་སྣ་ནས་བད་ཀན་མང་དུ་འབྱུང་བ་དང་། ལྐོག་མ་ན་བ་དང་།
[23a.2]ཁ་གདོང་དང་ཀླད་པ་སྐྲངས་པ་དང་། ཐོར་བུ་བྱུང་བ་དང་། ལུས་ལ་སྲིན་བུ་ཡོད་པ་དང་། རྩ་མདུད་བྱེར་བ་དང་། མཛེ་དང་སྨྱོ་བག་དང་། ཆམ་པ་ན་བ་དང་། འདི་རྣམས་ལ་སྨན་སྣ་ནས་བཏང་ན་ཕན་པར་འགྱུར་རོ། །མགུལ་པ་ཡན་ཆད་ཀླད་པ་རླུང་གི་བག་ལ་མི་བདེ་བ་ལ་སྨན་
[23a.3]མར་སྣ་ནས་བཏང་ན་ཕན་ཏེ་བརྟ་བར་འགྱུར་རོ། །ནང་པར་ཉི་མ་ཤར་ནས་ཉི་མ་ཕྱེད་ཀྱི་བར་དུ་ཀླད་པ་གཞོགས་ཕྱེད་ན་བ་དང་། སྐད་འགགས་པ་དང་། ཁ་སྣ་བསྐམས་པ་དང་། སྐད་མི་ཕྱིན་པ་དང་། མི་གསལ་ཏེ་གོ་དཀའ་བ་དང་། དཔུང་པ་ལྟུང་བ་སྙམ་དུ་བྱེད་ཅིང་བསྐྱོད་མི་
[23a.4]ནུས་པ་དང་། འདི་རྣམས་ལྟར་མི་བདེ་བ་ལ་སྨན་སྣ་ནས་བཏང་ན་ཕན་ཏེ་ཞི་བར་འགྱུར་རོ། །མིག་གི་འབྲས་བུ་སྔོན་པོར་གྱུར་པ་དང་། དཔུང་པ་བེམ་བེམ་པོར་གྱུར་ཏེ་ཚོར་བ་མེད་ཅིང་བསྐྱོད་མི་ནུས་པ་དང་། སྐྲའི་ནད་དང་། མིག་དམར་པོར་གྱུར་པ་འདི་རྣམས་ལ་དཔྱད་དུ་བྱ་བ་
[23a.5]མགུལ་པ་ཡན་ཆད་རླུང་ནད་དུ་གྱུར་ཏེ་ན་བ་ལ་བཙོད་དང་། ཤིང་མངར་དང་། པྲ་པུཎྜ་རི་ཀ་སྟག་ཚེར་བ་དང་། ཛི་བ་ཀ་རི་ཤ་ཕ་ཀ་དང་། རམ་ཉེ་དང་། བུ་ཚང་རྡོ་དང་། ཤ་རི་བ་དང་། པུརྞ་རྣ་བ་དང་། སྐྱེར་ཁཎྜ་དང་། བྱི་དང་ག་དང་། སླེ་ཏྲེས་དང་། ཀ་ཀ་ན་ས་དང་། སྒྲོན་ཤིང་
[23a.6]དང་། འདི་རྣམས་ཆ་མཉམ་པར་བྱས་ཏེ་ཞིབ་ཏུ་བཏགས་ལ་ཏིལ་མར་སྲང་བརྒྱད་ལ་བཙོན་ནི་སྨན་འདི་རྣམས་སྲང་གཉིས་གཉིས་ཀྱི་ཐང་དུ་བྱ། ཏིལ་མར་སྲང་བཅུ་དྲུག་ལ་བཙོན་སྨན་སྲང་བཞི་བཞིའི་ཐང་དུ་སྦྱར་རོ། །སྨན་བཙོ་བའི་ཆུ་ནི་ཏིལ་མར་ལས་བཅུ་འགྱུར་དུ་བསྐྱེད་དོ། །འོ་མ་ནི་ཏིལ་
[23a.7]མར་དང་ཐང་མཉམ་པར་བྱས་ལ་ཆུ་དང་འོ་མ་དུ་བའི་བར་དུ་བཙོས་ཏེ། ཚོས་པའི་ཚོད་ནི་ཚིགས་མ་དྲིལ་དུ་བཏུབ་ཅིང་དབུ་བ་ཆེར་བྱུང་ན་ཚོས་པའི་ཚད་ཡིན་ཏེ། དེ་ནས་སྨན་མར་བཙགས་ཏེ་བཙིར་ལ་སྣོད་བཟང་པོར་ལུགས་ཤིག །སྨན་འདིའི་མིང་ནི་བཙོད་ལ་སོགས་པ་ལས་སྦྱར་
[23b]
[23b.1]བའི་ཏིལ་མར་ཞེས་བྱའོ། །གལ་ཏེ་མགུལ་པ་ཡན་ཆད་མཁྲིས་པ་རྒྱས་པའི་ནད་དུ་གྱུར་ན་བཙོད་ལ་སོགས་པ་སྨན་འདི་རྣམས་སྔ་མ་དང་འདྲ་བ་འབྲི་མར་རམ་བ་མར་ལས་སྔ་མ་བཞིན་དུ་བཙོས་པའི་ཚད་ནི་ཏིལ་མར་དང་མི་འདྲ་བར་དྲིལ་དུ་བཏུ་ན་ཚོས་པ་ཡིན་ནོ། །དེ་ནས་བཙགས་ཏེ་བཙིར་
[23b.2]ལ་སྨན་མར་སྣོད་བཟང་པོར་བཞག་ལ་མཁྲིས་པའི་ནད་ལ་སྣ་ནས་གཏང་ངོ་། །དེ་ལ་མགུལ་པ་ཡན་ཆད་བད་ཀན་དུ་གྱུར་ཏེ་ན་བའི་སྨན་སྣ་ནས་གཏང་བ་སྦྱར་བ་ནི་སྨན་སྦྱོར་བ་ཕལ་ནི་སྔ་མ་དང་འདྲ་སྟེ། བཙོད་ལ་སོགས་པ་དེ་རྣམས་ཀྱི་སྟེང་དུ་སྤྲང་རྩི་དང་བ་གཅིན་དང་། རྒྱམ་ཚྭ་དང་། །
[23b.3]ཆང་རྣམས་ཀྱིས་བསྣན་ཏེ། སྔ་མ་དང་འདྲ་བར་ཏིལ་མར་ནང་དུ་བཙོས་ལ་བད་ཀན་གྱི་ནད་ལ་སྣ་ནས་ཐོང་ཤིག །དེ་ལྟར་སྨན་འདི་རྣམས་ཀྱིས་རླུང་ནད་དང་། མཁྲིས་པ་དང་བད་ཀན་གྱི་ནད་ལ་སོ་སོར་བཏང་ཞིང་ཁ་ནས་བད་ཀན་ལ་སོགས་པ་དྲང་ཞིང་བཀྲུ་བར་བྱའོ། །སྣ་ནས་
[23b.4]བཏང་བའི་རྗེས་ལ་མགུལ་པ་ཡན་ཆད་བརྟས་ཤིང་བདེ་བར་བྱ་བའི་དཔྱད་སྣ་ནས་གཏང་བ་འུ་སུ་དང་ཤ་ཁུ་དང་ཤ་བཙོས་པའི་ཁུ་བ་དང་འོ་མ་དང་ཆུ་དང་མར་འདི་རྣམས་སྦྱར་ཏེ་སྔ་མ་བཞིན་དུ་བཙོས་ལ། ཚོས་པ་དང་བཙགས་པའི་སྨན་མར་སྣ་གཡས་གཡོན་གྱི་བུ་ག་ནས་བཏང་སྟེ་སྣ་
[23b.5]ནས་གཏང་ངོ་། །ཆོག་ཚད་ནི་མར་གྱི་ནང་དུ་མཛུབ་མོའི་རྩེ་མོ་ནས་མཛུབ་མོའི་ཚིགས་སུ་དབུ་མ་མན་ཆད་ནུབ་པར་བཅུག་པ་ལ་སྨན་མར་ཇི་ཙམ་ཆགས་པའི་ཐུན་དེ་ཙམ་རེ་རེ་སྣ་གཡས་གཡོན་ནས་བཏང་ཞིང་བཀྲུའོ། །ཡང་ཀླད་པ་ན་བ་ལ་ལི་དོང་གྲ་དང་། ན་ལེ་ཤམ་དང་། རྒྱམ་ཚྭ་
[23b.6]དང་། པི་པི་ལིང་དང་འདི་རྣམས་ལ་སོགས་པ་བརྡུངས་ཏེ་ཆུ་དང་འོ་མ་དང་ཏིལ་མར་གྱི་ནང་དུ་མཉེས་ཏེ། བཙགས་ཤིང་བཙིར་བའི་ཁུ་བ་སྣ་ནས་གཏང་ངོ་། །ཡང་ཀླད་པ་ན་བ་ལ་ལི་དོང་གྲ་དང་། པི་པི་ལིང་ལ་སོགས་པ་ཚ་བ་རོ་རྣོ་བ་ཞིབ་ཏུ་བཏགས་ཏེ། སྦུ་གུ་སོར་དྲུག་པ་ཁ་
[23b.7]གཉིས་བཏོད་པའི་ནང་དུ་སྨན་ཕྱེ་མ་བླུགས་ལ། སྣ་གཡས་གཡོན་གྱི་བུ་ག་གཉིས་ཀའི་ནང་དུ་ཁའི་དབུགས་ཀྱིས་བུས་ན་བད་ཀན་ལ་སོགས་པའི་ཀླད་པའི་ནད་རྣམས་འབྱིན་ཅིང་བྱང་བར་འགྱུར་རོ། །དེ་ལྟར་སྨན་ཕྱེ་མ་ཞིབ་ཏུ་བཏགས་པ་སྣ་ནས་བུས་ཏེ་བཏང་བས་ནི་ཀླད་པའི་ནད་ཕལ་ཆེར་སེལ་
[24a]
[24a.1]ཅིང་འབྱང་བར་འགྱུར་རོ། །སྤྱིར་སྨན་མར་ལྟ་བུ་སྣ་ནས་བཏང་བའི་ཚད་ནི་མཛུབ་མོའི་ཚིགས་གཉིས་མན་ཆད་མར་གྱི་ནང་དུ་ནུབ་པར་སྨྱུགས་ཏེ་ཕྱིར་ཕྱུང་བ་ལ་མར་ཐིགས་པ་བཅུའམ་བརྒྱད་དམ་དྲུག་ཆགས་པ་དང་། འདི་རྣམས་གསུམ་ནི་ཐུན་ཆེ་ཐང་ཞེས་བྱ་བ་སྟེ། །
[24a.2]དེ་ལ་སྨན་མར་ཞིག་སྣ་ནས་བཏང་སྟེ་ཆེ་ན་ཐིགས་པ་བཅུ། འབྲིང་ན་ཐིགས་པ་བརྒྱད། ཆུང་ན་ཐིགས་པ་དྲུག་གོ། །ཡང་སྨན་མར་མ་ཡིན་པ་སྨན་གྱི་ཁུ་བ་བཙིར་ཏེ་སྣ་ནས་གཏང་བ་ཆེ་ཐང་གི་རིམ་པ་ནི་ཐིགས་པ་བཅུ་ལས་གཉིས་ཕྲི་སྟེ་བརྒྱད་གཏང་ངོ་། །ཐུན་འབྲིང་ཐིགས་པ་བརྒྱད་ལས་
[24a.3]གཉིས་ཕྲི་སྟེ་དྲུག་གཏང་། ཐུན་ཆུང་དུ་ཐིགས་པ་དྲུག་གཏོང་བ་ལ་ཐིགས་པ་གཉིས་ཕྲི་སྟེ་ཐིགས་པ་བཞི་བཏང་སྟེ། ཐུན་ཆེ་ཐང་གི་བྱེ་བྲག་རིམ་པ་ནི་འདི་ལྟར་སྦྱོར་ཅིག །ཡང་དེ་ལ་སྨན་སྣ་ནས་གཏང་དུ་མི་རུང་བའི་དམིགས་ནི་ཆུ་འཐུངས་པ་དང་། ཆང་འཐུངས་པ་དང་། དུག་
[24a.4]འཐུངས་པ་དང་། མར་འཐུངས་པ་རྣམས་དང་། འཕྲལ་དུ་འཐུང་བར་འདོད་པ་དང་། ཁ་ཟས་ཟོས་པ་དང་། མགོ་བཀྲུ་བ་དང་། ཁྲུས་བྱེད་འདོད་པ་དང་། གཏར་ག་གདབ་པ་དང་། ཆམ་པ་སར་པ་དང་། བཤང་གཅི་འོང་བར་འགྱུར་ཏེ། མི་བདེ་བ་དང་། བུད་མེད་བུ་བཙས་
[24a.5]མ་ཐག་པ་ལྟ་བུ་དང་། དབུགས་མི་བདེ་བ་དང་། ལུད་པས་བཀར་བ་དང་། སྐྱུག་སྨན་དང་། བཀྲུ་སྨན་གྱིས་བཀྲུས་པ་དང་། རྐྱལ་བུ་ནས་སྨན་མས་གཏོང་བ་རྣམས་དང་། དུས་མ་ཡིན་པར་ཆར་འབབ་པ་ལྟ་བུའི་ཚེ་དང་ཡུལ་ངན་འབྱུང་བ་དང་། དུས་འདི་ལྟ་བུའི་ཚེ་སྨན་སྣ་ནས་
[24a.6]གཏང་དུ་མི་རུང་ངོ་། །གལ་ཏེ་ན་བའི་དམིགས་ཀྱི་ཚུལ་གྱིས་སྨན་སྣ་ནས་མི་གཏང་དུ་མི་རུང་བར་གྱུར་ན་ནི་ཉེན་འདི་རྣམས་བསྲུང་མི་དགོས་ཏེ། སྨན་སྣ་ནས་གཏང་བའི་ཆོ་ག་གྱིས་ཤིག །དེ་ལ་མགུལ་པ་ཡན་ཆད་ཀྱི་ནད་ཀྱི་བད་ཀན་གྱི་ཚུལ་དུ་ན་ན་བད་ཀན་གྱི་དུས་ནི་ནད་པར་ཡིན་ཏེ།
[24a.7]ནད་པར་ཐོང་ཤིག །མཁྲིས་པ་ན་ན་དུས་ཉིན་ཕྱེད་ཡིན་ཏེ་ཕྱེད་ན་ཐོང་ཤིག །རླུང་ནད་ཀྱི་བག་ཏུ་ན་ན་ཕྱི་འཕྲེད་དང་སྲོད་ལ་གཏང་བར་བྱའོ། །ན་བ་མེད་ཅིང་ཉམས་ཐ་མལ་པ་ཞིག་ལ་སྨན་སྣ་ནས་བཏང་ན་སྟོན་དང་དཔྱིད་ཀྱི་ཚེ་ནི་སྔ་དྲོ་ནས་གཏང་ངོ་། །དགུན་ནི་ཉི་མ་གུང་གི་ཚེ་ན་
[24b]
[24b.1]ཐོང་ཤིག །སོ་ག་ན་ན་ཕྱི་འཕྲེད་ཀྱི་ཚེ་ན་ཐོང་ཤིག །དབྱར་གྱི་ཚེ་ན་ཉི་མ་དྲོན་པོའི་ཚེ་ན་ཐོང་ཤིག །ཀླད་པ་རླུང་ནད་ཀྱིས་ཐིབས་ཏེ་ཆེར་ན་ན་སྐྱིགས་བུས་བཏབ་པ་དང་། མགོ་འདམ་པ་དང་། གཉེའུ་རེངས་ཀྱིས་བཏབ་པ་དང་། སྐད་འགགས་པ་དང་། འདི་རྣམས་ལྟ་
[24b.2]བུའི་ནད་ལ་ནང་པར་ཉི་མ་ཤར་སྒབ་ཀྱི་འོག་ཙམ་དང་། ནུབ་ཀ་དང་དུས་གཉིས་སུ་ཞག་བདུན་བར་དུ་ཉིན་གཅིག་བཞིན་ཐོང་ཤིག །ནད་འདི་རྣམས་ལྟར་ན་བ་མེད་པ་ལ་སྣ་ནས་བཏང་ན་ནི་ཉིན་གཅིག་བཏང་ལ་ཉིན་གཅིག་བར་བཅད་མི་གཏང་ངོ་། །དེ་ལ་སྨན་སྣ་ནས་གཏང་བའི་
[24b.3]ཆོ་གའི་ཐབས་ནི་སྔར་བཤང་གཅིའི་དྲི་མ་བསལ་ལ་མགོ་བོ་མར་གྱིས་བསྐུ། དུགས་རན་པ་ཙམ་དུ་བྱས་ལ་མལ་རླུང་མེད་པར་དྲོན་པོར་འདུག་ནས། མགུལ་བ་ཡན་ཆད་དུགས་རན་པ་ཙམ་བྱས་ལ། དེ་ནས་ལུས་གན་རྐྱལ་དྲང་པོར་བརྐྱང་ལ་རྐང་ལག་བརྐྱང་། རྐང་པ་ཅུང་
[24b.4]ཟད་ཙམ་བསྟོད་ལ། མགོ་བོའི་སྔས་ཅུང་ཟད་ཅིག་སྨད་ལ་སྣའི་བུ་ག་ཡ་གཅིག་ནས་སྨན་མར་བཏང་སྟེ། དེ་ཡང་སྔར་བཏང་བའི་སྨན་མར་དེ། སྣར་གཏོང་བའི་སྦུ་གུ་ཅན་གྱི་ནང་དུ་བླུགས་ཏེ་ཆུ་དྲོན་པོའི་ནང་དུ་བསྲོས་ལ་གཏང་ངོ་། །སྣར་བླུགས་པ་ནི་སྣོད་མཆུ་ཅན་དུ་བཏོད་པའམ་
[24b.5]ཡང་ན་རས་མས་བླངས་ཏེ་སྣར་གཏིགས་ཤིག །སྣར་བླུགས་ཟིན་ནས་རྐང་མཐིལ་དང་ཕྲག་པ་དང་ལག་པ་དང་རྣ་བ་ལ་སོགས་པ་ཉེས་ཤིག །སྨན་སྣར་བཏང་བ་དེ་མཚུལ་པ་ནས་སྣའི་ནང་དུ་བརྔུབས་ལ་མཆིལ་མ་གློ་གཡས་གཡོན་དུ་བོར་ཅིག །དེ་བཞིན་སྨན་སྣོད་མཆུ་ཅན་གྱི་
[24b.6]ནང་ན་ཡོད་པ་དེ་ཅུང་ཟད་ཀྱི་བར་དུ་སྣ་གཡས་གཡོན་དུ་རེས་ཀྱིས་ལན་གཉིས་ལན་གསུམ་དུ་ཐོང་ཤིག །གལ་ཏེ་སྨན་རྣོ་དྲགས་པས་བརྒྱལ་བར་གྱུར་ན་གདོང་པ་དང་བྲང་དུ་ཆུས་གཏོར་ཅིག །མགོ་བོར་ནི་ཆུས་མ་འདེབས་ཤིག །དེ་ལྟར་སྨན་སྣ་ནས་བཏང་སྟེ་བཀྲུས་པའི་རྗེས་ལ་ནད་ཀྱི་
[24b.7]ཚུལ་དང་ཡང་སྦྱར་ཏེ། རླུང་ནད་དུ་མི་འགྱུར་བར་བྱ་བའི་ཕྱིར། སྨན་མར་སྣུམ་བག་ཏུ་འགྱུར་བ་སྣ་ནས་ཐོང་ཤིག །སྣར་སྣུམ་བཏང་ནས་གྲངས་བརྒྱའི་བར་དུ་གན་རྐྱལ་དུ་འདུག་པར་བྱའོ། །དེ་ནས་དེའི་རྗེས་ལ་སྦུ་གུའི་དུད་པ་ཁ་གསུམ་ཁ་སྣར་བཏང་ཞིང་ཁོང་དུ་བརྔུབས་ནས་གྲེ་བ་
[25a]
[25a.1]མཚུལ་པ་བདེ་ཞིང་དག་པ་སང་སང་པོར་བྱ་བའི་ཕྱིར། ཆུ་དྲོན་པོས་མཁུར་བ་བཀང་ལ་བསྡད་ཅིང་དབོའོ། །དེ་ལྟར་སྣ་ནས་བཏང་ལེགས་པར་གྱུར་ན་དབུགས་བདེ། གཉིད་ལེགས་པར་འོང་། སེམས་གསལ། མིག་གསལ་ལ་རྣོ་བར་འོང་ངོ་། །གལ་ཏེ་སྨན་
[25a.2]སྣ་ནས་བཏང་མ་ལེགས་ན་མིག་རྩུབ། སྐྱ་བོ་ཧར་ཧར་པོར་སྣང་། ཁ་སྣ་སྐམ། ཀླད་པའི་ནང་སྟོང་པར་གྱུར་པ་སྙེམ་བྱེད། གལ་ཏེ་སྣུམ་ཧ་ཅང་བཏང་དྲགས་ན་གཡན་པར་འགྱུར། མགོ་དང་ལུས་ལྕི། སྣབས་དང་མཆིལ་མ་མང་། ཡི་ག་འཆུ། ཆམ་པས་འདེབས་པ་ཉེན་འདི་ལྟ་བུ་
[25a.3]འབྱུང་ངོ་། །སྨན་སྣ་ནས་བཏང་ཞིང་བཀྲུ་ལེགས་ན་མིག་གསལ་ཞིང་རྣོ་ལ་ཡང་ཁའི་ནང་དག་སྟེ་སང་བག་ཅན་དུ་འགྱུར། སྐད་གསལ་བར་འགྱུར་རོ། །སྨན་སྣ་ནས་བཏང་ཞིང་བཀྲུ་མ་ལེགས་ན་མགུལ་པ་ཡན་ཆད་དང་ཀླད་པའི་ནད་སྔ་བས་དཀྱིལ་སྐྱེ་བར་འགྱུར་རོ། །བཀྲུ་བའི་སྨན་
[25a.4]སྣ་ནས་བཏང་དྲགས་ཏེ། ཧ་ཅང་ཆེར་འཁྲུགས་པར་གྱུར་ན་ཁོང་རྨྱ་བར་འགྱུར་རོ། །དེ་ལ་གལ་ཏེ་ནད་པ་གློ་རྡོལ་བ་དང་ཉམ་ཆུང་སྟེ། ཁོང་རྨྱ་བ་དང་བྱིས་པ་ཆུང་ངུ་དང་། མི་རྒན་པོ་དང་། སྐྱིད་ཅིང་ལོངས་པའི་མི་འདི་རྣམས་ལྟ་བུ་ལ་ནི་གོང་དུ་སྣ་ནས་སྨན་པས་ཐང་ཆུང་ངུར་བཤད་
[25a.5]པ་དེ་ལྟར་ཐོང་ཤིག །ནད་དམིགས་དང་སྦྱར་ནས་སྨན་སྣ་ནས་གཏང་དགོས་པར་གྱུར་ན་དབྱར་སྨན་སྣ་ནས་གཏང་བའི་དུས་མ་ཡིན་པར་ཡང་རུང་སྟེ། སྨན་སྣ་ནས་གཏང་བར་བྱའོ། །ཡང་ཆམ་པ་དྲག་པོ་བཏབ་པ་དང་། དེ་བཞིན་དུ་ཆང་འཐུངས་པ་དང་། རྣ་བ་མི་གསང་བ་དང་།
[25a.6]ཀླད་རྒྱས་ཀྱི་ནང་དུ་སྲིན་བུ་ཞུགས་པ་དང་། ནད་ཁོང་ནས་བསྡུས་ལ་ཕྱིར་མ་ཕྱིན་པར་གྱུར་པ་དང་། འདི་རྣམས་ལྟ་བུ་ལ་ནི་སྨན་སྣར་གཏང་བ་ཐུན་ཆུང་བའི་ཐང་དུ་གཏང་དུ་མི་རུང་ངོ་། །སྣར་སྨན་གཏང་བའི་ཆུང་ཐང་ནི་ཡང་ན་བ་མེད་ཅིང་ཉམས་ཐ་མལ་པར་འདུག་པས་སྨན་མར་ཉུང་ཤས་
[25a.7]རྟག་ཏུ་སྣར་གཏང་ངོ་། །དེའི་ཐབས་ནི་ཉིན་པར་ཟས་ཟོས་པའི་རྗེས་དང་སློན་པའི་རྗེས་དང་། ཉིན་པར་གཉིད་ལོག་པའི་རྗེས་ལ་དང་། ལམ་རིངས་འགྲོན་དུ་སོང་བས་དུབ་པ་དང་། བུད་མེད་ལ་དྲགས་པ་དང་། མགོ་བོ་མར་གྱིས་བྱུགས་པ་དང་། ཆུ་དྲོན་པོས་མཁུར་བ་བཀང་
[25b]
[25b.1]ཞིང་བོར་བའི་རྗེས་དང་། བཤད་གཅིའི་དྲི་མ་བསལ་བའི་རྗེས་དང་། སོ་ཤིང་གིས་བཀྲུས་པ་དང་། གད་མོ་དགོད་པའི་རྗེས་དང་འདི་རྣམས་ལྟ་བུ་མར་ཐིགས་པ་རེ་རེ་སྣའི་ནང་དུ་བསྐུས་ན་འདི་རྣམས་ལྟ་བུ་ཀུན་ལ་ཕན་པར་འགྱུར་རོ། །དེ་ལྟར་སྣ་ནས་བཏང་བའི་འདི་ནི་ཆུང་ཐང་ཞེས་
[25b.2]བྱའོ། །སྨན་མར་སྣ་ནས་ལན་ལྔ་བཏང་ན་རྣ་བ་དང་། མིག་ལ་སོགས་པའི་ནང་གི་བུ་ག་ཀུན་ལ་ཕན་པར་འགྱུར་རོ། །སྨན་མར་སྣ་ནས་ལན་གསུམ་བཏང་ན་ངལ་ཞིང་དུབ་པ་རྣམས་མེད་དེ་བརྟས་པར་འགྱུར་རོ། །དེའི་རྗེས་ལ་ཡང་སྣར་ལན་ལྔ་བཏང་ན་མིག་རྣོ་ཞིང་གསལ་བའི་མཐུ་སྐྱེའོ། །
[25b.3]དེའི་འོག་ཏུ་སྨན་མར་སྣ་ནས་བཏང་ན་སོ་བརྟན་ལ་སྟོད་ཀྱི་རླུང་ནད་ཞི་བར་འགྱུར་རོ། །བྱིས་པ་ལོ་བདུན་མ་ལོན་པ་ལ་སྨན་སྣ་ནས་གཏང་དུ་མི་རུང་ངོ་། །ལོ་བརྒྱད་ཅུ་འདས་པའི་རྒན་པོ་ལ་ཡང་སྨན་སྣ་ནས་གཏང་དུ་མི་རུང་ངོ་། །ལོ་བཅོ་བརྒྱད་དུ་མ་ཚང་བ་ལ་དུད་པ་ཁ་སྣ་ནས་གཏང་
[25b.4]དུ་མི་རུང་ངོ་། །བྱིས་པ་ལོ་བཅོ་ལྔ་མ་ལོན་པ་ལ་ཆུ་དྲོན་པོས་མཐུར་བ་བཀང་ཞིང་འདོར་བ་ཡང་མི་རུང་ངོ་། །གཞོན་ནུ་ལོ་བཅུ་མ་ལོན་པ་ལ་བཀྲུ་སྨན་དང་སྐྱུག་སྨན་ལ་སོགས་པ་གཏང་དུ་མི་རུང་ངོ་། །ལོ་བདུན་ཅུ་འདས་པའི་རྒན་པོ་ལ་ཡང་བཀྲུ་སྨན་དང་སྐྱུག་སྨན་ལ་སོགས་པ་གཏང་དུ་
[25b.5]མི་རུང་ངོ་། །སྨན་སྣར་བཏང་བ་ཐང་ཆུང་དུ་གོང་དུ་དམིགས་ཀྱིས་བསྟན་པ་བཞིན་སྣར་བསྐུས་ཏེ་ཡང་ཐུན་ཆེ་ཆུང་རྣམ་པ་བཞིར་ཤེས་པར་བྱའོ། །དེ་ལ་ཐུན་ཆུང་ངུའི་ཆེ་ཐང་ནི་ཐིགས་པ་གཉིས་སྣར་གཏང་ངོ་། །ཐུན་ཆུང་ངུའི་འབྲིང་ཐང་ནི་ཐིགས་པ་རེ་རེ་བས་ཀྱང་ཆུང་བ་ཙམ་ཞིག་སྣ་གཡས་གཡོན་
[25b.6]གྱི་ནང་དུ་བསྐུས་ན་ཀླད་པ་ལྟ་བུ་ནད་དམིགས་ཅི་ཡོད་པ་སྔ་མ་ལངས་པ་ལྡང་བར་མི་བྱེད་པ་ཡིན་ནོ། །ཐུན་ཆུང་ངུའི་རབ་ནི་སྣའི་ནང་དུ་ནད་དམིགས་བསྐུས་ཏེ་སྣབས་མཚུལ་བ་ནས་སྣར་བརྔུབས་ལ་ཕྱིར་བོར་བའི་ནང་ན་མར་མངོན་དུ་སྣང་བར་བྱེད་པ་ནི་ཐུན་ཆུང་ངུའི་ཐང་ཞེས་བྱའོ། །དེ་ལྟར་ཐུན་ཆུང་
[25b.7]ངུ་རྣམས་ལས་གང་རན་པ་ཙམ་ནམ་འཚོ་བའི་བར་དུ་ཚེ་གཅིག་ལ་རྟག་པར་བསྐུ་ཞིང་བཏང་ན་སྣུམ་བརྔུབ་པར་བྱ་བའི་སྨན་མས་གཏང་བ་དང་འདྲ། སྣ་ནས་གཏང་བའི་ཐུན་ཆེ་ཆུང་བསྟན་པ་དང་འདྲ་སྟེ་སྟོད་ཀྱི་ནད་ཅི་ལ་ཡང་ཕན་ཞིང་བདེ་བའི་ཡོན་ཏན་དུ་འགྱུར་རོ། །སྣ་ནས་གཏང་བའི་སྨན་ཆུང་
[26a]
[26a.1]ངུ་རྟག་ཏུ་གཏང་བ་ལ། ཆོ་ག་སྲུང་ཞིང་སྤང་བ་ཡང་མེད། ཉེན་དུ་གྱུར་པའི་ནད་ཀྱི་འཇིགས་པ་ཡང་མེད་དོ། །དེ་ནས་སྨན་མར་ཞེས་བྱ་བ་ནི། དམིགས་ཀྱིས་ཏིལ་མར་ཉིད་ལ་བྱ་སྟེ་ཏིལ་མར་རྟག་ཏུ་བཏང་ན་ཕན་ཏེ་དགེའོ། །ཡང་མགོ་བོ་ནི་བད་ཀན་གྱི་གནས་ཡིན་
[26a.2]པས་ན་ན་བ་མེད་ཅིང་ཉམས་ཐ་མལ་པ་ལྟ་བུ་ལ་སྨན་མར་ཐོང་ཤིག །དེ་ལ་སྣ་ནས་གཏང་བའི་སྨན་མར་སྦྱར་བ་ནི་ཛི་བན་ཏི་དང་། ཛ་ལ་དང་། སྒྲོན་ཤིང་དང་། གླ་སྒང་ཆེན་པོ་དང་། ཤིང་ཚ་དང་། པུ་ཤེལ་ཙི་དང་། གོ་ཡུ་དང་། ཙནྡན་དཀར་པོ་དང་། སྐྱེར་བའི་རྩ་བ་དང་། ཤིང་མངར་
[26a.3]དང་། གླ་བ་དང་། ཨ་ཀ་རུ་དང་། ཉེའུ་ཤིང་དང་། པུན་ད་དང་། བིལ་བ་དང་། ཨུཏྤལ་དང་། དྷ་བན་ཏི་དང་། ཨུ་ར་བྷི་དང་། ཐི་ར་དང་། བྱི་དང་ག་ཞེས་བྱ་བ་སྲིན་བུ་གསོད་པ་དང་། གནྡྷ་བྷ་དྲ་དང་། སུག་སྨེལ་དང་། ཧ་རེ་ཎུ་ཀ་དང་། པདྨའི་ཟེ་བ་གེ་སར་དང་། བ་ལ་དང་། སྨན་
[26a.4]འདི་རྣམས་སྣ་ཚང་བར་ཅི་སྙེད་དུ་སྦྱར་ཏེ་ཆ་སྙོམས་ལ་ཏིལ་མར་ཅི་ཙམ་བཙོ་བ་དེ་ལས་ཆུ་ནི་ཆར་པའི་ཆུ་བརྒྱ་འགྱུར་དུ་བསྐྱེད་པའི་ནང་དུ་སྨན་བརྡུངས་ལ་བཙོས་ཏེ་ཆུའི་ཁུ་བ་སྲང་དགུ་བཅུ་ནི་དུ། ཕྱི་ན་སྲང་བཅུ་ཙམ་ཞིག་ལུས་པ་དང་། བཙགས་པ་སྨན་གྱི་ཁུ་བ་ཕྱིན་བརྒྱའི་བཅུ་ཆ་གཅིག་ལུས་
[26a.5]པ་དེ་ལ་ཏིལ་མར་དང་སྨན་གྱི་ཁུ་བ་བཅུ་ཆ་གཅིག་དང་སྦྱར་ཏེ་བཙོས་ལ་ཚོས་པ་དང་། བཙགས་ལ་ཏིལ་མར་གྱི་ནང་དུ་སྨན་གྱི་ཁུ་བ་ཕྱི་མས་ཀྱང་བསྣན་ལ་བཙོའོ། །འདི་བཞིན་དུ་ལན་གཉིས་ལན་གསུམ་ནས་ལན་དགུའི་བར་དུ་བསྣན་ཅིང་བཙགས་ལ་མཇུག་ཏུ་ལྷག་མ་སྨན་གྱི་ཁུ་བ་བཅུ་
[26a.6]ཆ་དང་ཏིལ་མར་ཅི་ཙམ་ཡོད་པའི་རའི་འོ་མ་དེ་ཙམ་དང་སྙོམས་ཏེ་བཙོས་ལ་ཚོས་པའི་རྟགས་དབུ་བ་བྱུང་བ་དང་བཙགས་པར་བྱའོ། །སྨན་མར་འདིའི་མིང་ནི་ཏིལ་མར་གྱི་འབྲུ་མར་ཐིགས་ཕྲན་ཞེས་བྱའོ། །སྨན་མར་འདི་རྟག་ཏུ་སྣ་ནས་བཏང་བའི་ཕན་ཡོན་ནི་ལུས་བརྟན་ཞིང་དྲང་།
[26a.7]པགས་པའི་ཤ་མདོག་བཟང་ཞིང་གསལ། ཕྲག་པ་དང་མཇིང་པ་དང་། དཔུང་མགོ་དང་འདི་རྣམས་བརྟན་ཞིང་མཁྲེགས་ལ་མ་ཞུམ་པར་མཐོ་བར་འགྱུར། བཞིན་དང་ཁའི་ནང་གསལ་བར་འགྱུར། དབང་པོ་རྣམས་གསལ་ཞིང་བརྟན། སྐྲ་དཀར་མེད་པར་འགྱུར་རོ། །སྨན་སྣ་
[26b]
[26b.1]ནས་གཏང་བའི་ཆོ་ག་སྟེ་ལེའུ་ཉི་ཤུ་པ་རྫོགས་སོ།། །།སྨན་གྱི་དུད་པ་གཏང་བའི་ཆོ་ག་སྟེ་ལེའུ་ཉི་ཤུ་རྩ་གཅིག་པ་བཤད་པར་བྱའོ། །མགུལ་པ་ཡན་ཆད་ཀྱི་ནད་ནི་ཀླད་པ་ན་བ་དང་། རྣ་བ་ན་བ་དང་། ཁ་སྣ་ནས་བད་ཀན་དང་མཆིལ་མ་མང་བ་དང་། མགོ་བོ་ལྕི་བ་དང་། ཀླད་པ་
[26b.2]གཞོགས་ཕྱེད་ན་བ་དང་། ཆམ་པས་བཏབ་པ་དང་། ལུད་པ་ལུ་བ་དང་། དབུགས་མི་བདེ་བ་དང་། ཁ་ཟས་ཅི་ཟོས་ཀྱང་རོ་བྲོ་བར་མི་ཚོར་བ་དང་། ཁ་ནས་བད་ཀན་དང་མཆིལ་མ་ཧ་ཅང་མང་དུ་འོང་བ་དང་། སྐད་འཛེར་ཞིང་འགགས་པ་དང་། སྣ་ནས་རྣག་ཟག་པ་དང་། ཁ་ནས་རྣག་
[26b.3]འོང་བ་དང་། སྐྱིགས་བུས་བཏབ་ནས་མགུལ་པ་ན་བ་དང་། སོ་ན་བ་དང་། ཉམ་ཆུང་ཞིང་རིད་པ་དང་། ཟས་ཡི་གར་མི་འོང་བ་དང་། འགྲམ་པ་ན་བ་དང་། གཉེའུ་རེངས་སུ་གྱུར་པ་དང་། སོ་དང་སྐྲ་དང་ཀླད་པའི་ནང་དུ་སྲིན་བུ་ཞུགས་པ་དང་། མགུལ་པ་ཡན་ཆད་དང་། མགོ་
[26b.4]བོ་གཡའ་བ་དང་། སྐྱ་རྦབ་ཏུ་གྱུར་པ་དང་། སྐྲ་ལ་གཟའ་ཞུགས་པ་དང་། འབྱི་བ་དང་། སྦྲིད་པ་འབྱུང་དུ་མི་བཏུབ་པ་འམ། སྦྲིད་པ་ཧ་ཅང་མངས་སམ། མགོ་ཡང་ཁྱེར་བ་དང་། གཉིད་ཆེ་བ་དང་། འདི་རྣམས་ལ་སོགས་པའི་ནད་ཀུན་ནི་གཞི་རླུང་དང་བད་ཀན་ལས་གྱུར་པའི་ནད་
[26b.5]མ་ཞུ་བར་གྱུར་ཏེ། མི་བདེ་བ་ཡིན་ནོ། །དེ་ལྟ་བུའི་ནད་ཞི་བར་བྱ་བའི་ཕྱིར། དུད་པ་རྣམ་གསུམ་རྔུབ་ཅིང་བཏུང་ངོ་། །རྣམ་གསུམ་ཇི་ལྟར་གཏང་ཞེ་ན་མགུལ་པ་ཡན་ཆད་རླུང་ནད་དུ་གྱུར་ན་སྨན་འཇམ་ཞིང་སྣུམ་པའི་དུད་པ་གཏང་ངོ་། །རླུང་ནད་དང་བད་ཀན་དུ་འདྲེས་པའི་ནད་ལ་སྨན་
[26b.6]གྱི་དུད་པ་མི་འཇམ་མི་རྣོ་བ་རན་པར་གཏང་ངོ་། །བད་ཀན་གྱི་ནད་ལ་ནི་སྨན་རྣོན་པོའི་དུད་པ་གཏང་ངོ་། །དེ་ལ་མཁྲིས་པ་རྒྱས་པ་དང་། ཁྲག་རྒྱས་པའི་ནད་ལ་བཀྲུ་སྨན་བཏང་སྟེ་བཀྲུས་པ་དང་། དམུ་རྫིང་དང་། ཟ་ཁུ་ལ་སོགས་པ་འདི་རྣམས་ལ་ནི་སྨན་གྱི་དུད་པ་གཏང་དུ་མི་རུང་ངོ་། །
[26b.7]མིག་རབ་རིབ་ཁྱེར་བ་དང་མགུལ་པ་ཡན་ཆད་ཀླད་པའི་བར་དུ་རླུང་ཞུགས་པའི་ནད་དང་སྨན་མས་གཏོང་བར་གྱུར་པ་དང་། ལྟོ་སྦོས་པ་དང་། ཉ་ཟོས་པ་དང་། ཆང་འཐུངས་པ་དང་། ཞོ་དང་བུ་རམ་དང་འོ་མ་དང་སྦྲང་རྩི་དང་། མར་འཐུངས་པ་དང་། དུག་འཐུངས་པ་དང་། མགོ་
[27a]
[27a.1]བོ་སྣད་པ་དང་། སྐྱ་རྦབ་ཀྱི་ནད་དང་མཚན་མོ་གཉིད་མ་ལོག་པ་འདི་རྣམས་ལྟ་བུ་ལ་སྨན་གྱི་དུད་པ་གཏང་དུ་མི་རུང་ངོ་། །གལ་ཏེ་འདི་རྣམས་ལྟར་མི་བདེ་བ་ལ་སྨན་གྱི་དུད་པ་བཏང་ན་ཉེན་དུ་གྱུར་པའི་ནད་ཁྲག་དང་མཁྲིས་པའི་ནད་དང་། མིག་ལོང་རྣ་བ་འོན་སྐོམ་དད་ཆེ་བ་
[27a.2]བརྒྱལ་བ་དང་རྨོངས་ཤིང་མྱོས་པར་བྱེད་དོ། །གལ་ཏེ་དུས་མ་ཡིན་པར་དུད་པ་བཏང་ངམ། དུད་པ་ཧ་ཅང་ཆེར་བཏང་དྲགས་ན་དེ་ལ་ནད་དཔྱད་དུ་བྱ་བའི་ཆོ་ག་ནི་སྨན་བསིལ་བས་འཕྲལ་བ་དང་མགོ་བསྐུ། བསིལ་བའི་ཁ་ཟས་ཀྱི་ཆོ་ག་བྱས་ན་ཕན་ནོ། །དེ་ལ་སྨན་གྱི་དུད་པ་གཏང་
[27a.3]བའི་དུས་དང་། དམིགས་ནི་བཀྲེས་པ་དང་། གླལ་བྱུང་བ་དང་། བཤང་གཅི་དྲི་མ་བསལ་བ་དང་། བུད་མེད་ལ་བརྟེན་པ་དང་། གཏར་ག་གདབ་པ་དང་། གད་མོ་དགོད་པ་དང་། སོ་ཤིང་གིས་སོ་དྲུད་པ་འདི་རྣམས་ལྟ་བུ་བྱས་པའི་འོག་ཏུ་དུད་པ་མི་དྲག་པ་འཇམ་པོ་ཆུང་ངུ་
[27a.4]ཞིག་ཐོང་ཤིག །ཡང་བཀྲེས་པ་དང་། གླལ་བྱུང་བ་ལ་སོགས་པའི་དུས་འདི་ལྟ་བུའི་ཚེ་མཚན་མོ་ཁ་ཟས་ཟོས་པ་དང་། སྨན་མར་སྣར་བཏང་བའི་རྗེས་ལ་ཡང་དུད་པ་འབྲིང་ཙམ་སྣ་ནས་གཏང་ངོ་། །ཡང་གཉིད་ལོག་པ་དང་སྨན་མས་གཏང་བ་དང་། མིག་སྨན་གྱིས་བསྐུས་པ་དང་།
[27a.5]ལུས་ཁྲུས་བྱས་པ་དང་། སྐྱུག་སྨན་བཏང་བ་འདི་རྣམས་ལྟ་བུའི་རྗེས་ལ་དུད་པ་སྣར་བཏང་སྟེ་བཀྲུ་བའི་ཆོ་ག་བྱའོ། །དུད་པ་ཁ་སྣར་གཏང་བའི་དཔྱད་ནི་མས་གཏོང་བ་རྐྱལ་བུ་གསེར་དངུལ་ལ་སོགས་པ་ལས་བརྡུངས་པ་དང་འདྲ་བར་བྱས་ཏེ། དེ་ཡང་གཅེའུ་ཁ་གསུམ་པ་དང་དྲང་བ་
[27a.6]ཞབས་ཀྱི་དྲུང་ནི་སྦོམ་མཐེ་བོང་ཤོང་ཙམ་རྩེ་མོའི་སྦོམ་ནི་རྒྱ་ཤུག་གི་ཚི་གུ་ཤོང་ཙམ་དུ་བྱའོ། །གཅེའུ་སྲིད་ནི་སོར་ཉི་ཤུ་རྩ་བཞི་པ་དང་། སོར་སུམ་ཅུ་རྩ་བཞི་པ་དང་། སོར་བཞི་བཅུ་པ་དང་། དེ་ལྟར་ཆེ་ཆུང་རྣམ་གསུམ་དུ་བྱའོ། །དེ་ལ་བད་ཀན་གྱི་ནད་ལ་དུད་པའི་སྨན་རྣོན་པོ་བཏང་
[27a.7]ན། གཅེའུ་སོར་ཉི་ཤུ་རྩ་བཞི་པ་ལས་གཏང་ངོ་། །རླུང་ནད་ལ་སྨན་གྱི་དུད་པ་འཇམ་ཞིང་སྣུམ་པ་བཏང་ན་གཅེའུ་སོར་སུམ་ཅུ་རྩ་གཉིས་པ་ལས་གཏང་ངོ་། །རླུང་དང་བད་ཀན་འདྲེས་པའི་ནད་ལ་སྨན་གྱི་དུད་པ་རྣོ་འཇམ་རན་པ་གཅེའུ་སོར་བཞི་བཅུ་པ་ལས་གཏང་ངོ་། །སྣར་དུད་པ་
[27b]
[27b.1]གཏང་བའི་ཐབས་ནི་དྲང་པོ་ཙོག་པུར་འདུག་ལ་སེམས་གུད་དུ་མི་གཡེང་བར་དུད་པ་གཏང་བ་ལ་བསམས་ཏེ་ཁ་གདངས་ལ་ཁར་དུད་པ་ལན་གསུམ་གཏང་ངོ་། །དེ་ནས་སྣའི་བུ་ག་ཡ་གཅིག་བཀག་ལ་བུ་ག་ཡ་གཅིག་ནས་དུད་པ་བཏང་ཞིང་རྔུབ་བོ། །སྣའི་མཚུལ་པའི་ནད་དང་། ཀླད་
[27b.2]པའི་ནད་དམིགས་ལ་དུད་པ་ཁ་ནས་བཏང་བས་ནད་བསྐྱོད་ཅིང་བསྡུས་པར་གྱུར་པ་དེ་ལ་སྣ་ནས་དུད་པ་བརྔུབས་ན་ནད་དེ་ཕྱིན་ཅིང་སེལ་བར་འགྱུར་རོ། །ཁ་ནས་དུད་པ་བརྔུབས་ན་ནི་སློང་ཞིང་བསྐྱོད་པར་བྱེད་དོ། །ཁ་ནས་གྲེ་བའི་ནང་དུ་སླེབས་པར་དུད་པ་བརྔུབས་ན་ནད་ཞི་བར་བྱེད་
[27b.3]དོ། །དུད་པ་ཁ་ནས་རྔུབ་ཅིང་ཕྱིར་སློན་པའི་ཐབས་སུ་དབྱུང་ངོ་། །སྣར་རྔུབ་ཅིང་ཕྱིར་དབྱུང་བ་ལྟར་བྱས་ན་མིག་ལ་གནོད་དེ་མི་རུང་ངོ་། །ཁར་རྔུབ་ཅིང་སློན་པའི་ཐབས་ནི་ཁར་ལན་ཅིག་གྲེ་བའི་བར་དུ་བརྔུབས་ཏེ་དེ་ནས་ཕྱིར་སློན་པའི་ཐབས་སུ་ཕྱུང་ཤིག་དེ་ལྟར་ལན་གསུམ་གསུམ་
[27b.4]བྱའོ། །སྨན་གྱི་དུད་པ་འཇམ་པོ་ཉིན་པར་སྣར་ལན་ཅིག་གཏང་ངོ་། །རླུང་དང་བད་ཀན་འདྲེས་པ་ལ་སྨན་གྱི་དུད་པ་རྣོ་འཇམ་རན་པ་ནི་ལན་གཉིས་ཐོང་ཤིག །བད་ཀན་སེལ་བར་སྨན་གྱི་དུད་པ་རྣོན་པོ་ནི་ལན་གསུམ་མམ་ལན་བཞིར་ཐོང་ཤིག །དེ་ལ་སྣར་དུད་པ་གཏང་བའི་སྨན་འཇམ་པོ་ནི་
[27b.5]ཨ་ཀ་རུ་དང་། གུ་གུལ་དང་། གླ་སྒང་ཆེན་པོ་དང་། སྠོ་ནེ་ཡ་དང་། ཕ་བོང་གི་དྲེག་པ་དང་། སྤང་སྤོས་དང་། པུ་ཤེལ་ཙི་དང་། བ་ལེ་ཀ་དང་། ཤིང་ཚ་དང་། ཧ་རེ་ཎུ་ཀ་དང་། མེ་ཏོག་བནྡྷུ་ཀ་དང་། ཤིང་བིལ་བ་རྐང་དང་། ཨེ་ལ་བ་ལུ་ཀ་དང་། ཤི་རེ་བེ་སྟ་ཀ་དང་། པོག་ས་ཙི་
[27b.6]རས་དང་། རྒྱ་མ་ཀ་དང་། མ་ཙ་ན་དང་། གླ་བ་དང་། པོག་ནག་པོ་ཤ་ལ་ཡ་ཀི་དང་། གུར་ཀུམ་དང་། མོན་སྲན་གྲེའུ་དང་། ནས་དང་། པོག་དཀར་པོ་ནུ་མ་ཀ་དང་། ཏིལ་དང་། ཤིང་ཏོག་བཟང་པོ་མར་ཡོད་པ་དང་། སྟར་ག་ཨུརྦ་ནི་ཀ་དང་། སྣུམ་བག་ཚིལ་དང་། རྐང་དང་། ལྟོ་
[27b.7]ཚིལ་དང་། མར་དང་། རྐང་དང་འདི་རྣམས་ཡིན་ནོ། །ནད་ཞི་བར་བྱ་བའི་དུད་པའི་སྨན་ནི་པོག་ནག་པོ་ཤ་ལ་ཡ་ཀི་དང་། རྒྱ་སྐྱེགས་དང་། ཕྲི་ཐིར་ཀ་དང་། མེ་ཏོག་པདྨ་དང་། མེ་ཏོག་ཨུཏྤལ་དང་། ཤིང་ནྱ་གྲོ་དྷ་དང་། ཤིང་ཨུ་དུམྦཱ་ར་དང་། ཤིང་ཨ་ཤྭངྠ་དང་། ཤིང་པླག་ཤ་
[28a]
[28a.1]དང་། སེང་ཕྲོམ་དང་། ཤིང་ཚ་དང་། ལི་ཀར་དཀར་པོ་དང་། ཤིང་མངར་དང་། རྔུབ་རྣ་ཤི་རིའི་ཤུན་པ་དང་། ཤུག་པ་དང་། བཙོད་དང་། སྤོད་རུ་རྟ་དང་། རྒྱ་སྤོས་དང་། བད་ཀན་ལ་སྨན་རྣོན་པོའི་དུད་པ་བཏང་བ་ནི་ཛོ་ཏི་སྨ་ཏི་དང་། སྐྱེར་བ་དང་།
[28a.2]ཡུང་བ་སྨན་གྱི་རྩ་བ་བཅུ་དང་། ལྡོང་རོས་དང་། བ་བླ་དང་། རྒྱ་སྐྱེགས་དང་། ཙནྡན་དཀར་པོ་དང་། འབྲས་བུ་གསུམ་དང་། སྨན་སྤོས་དྲི་ཞིམ་པོའི་ནང་ན་རོ་རྣོ་བའི་གྲངས་སུ་གཏོགས་པ་རྣམས་དང་། འདི་རྣམས་ཀྱི་དུད་པ་སྣ་ནས་བཏང་ཞིང་མགོ་བོའི་ནད་བཀྲུ་བར་བྱའོ། །སྨན་
[28a.3]གྱི་དུད་པ་གཏང་བ་སྦྱར་བའི་ཐབས་ནི་སྨན་རྣམས་ཞག་གཅིག་ཆུའི་ནང་དུ་སྤངས་ཏེ་ཆུ་དགས་སུ་ཞིབ་པར་བཏགས་ལ་ཤིང་བུ་དྲང་ཞིང་འཇམ་པོ་སྲ་མོ་སོར་བཅུ་གཉིས་པ་ལ་དུད་པའི་སྨན་ལྡེ་གུ་བཏགས་བཏགས་པ་ལན་ལྔའི་བར་དུ་བྱུགས་ཤིང་གྲིབ་མ་ལ་བསྐམས་ལ་སྨན་གྱི་གདར་བུ་
[28a.4]སྦོམ་མཐེབ་མོ་ཙམ་ཐོག་དྲུང་ཕྲལ། དབུས་སྦོམ་སྟེ་ནས་འདྲ་བར་བྱས་ལ། བསྐམས་པ་དང་རླུང་ནད་དང་བད་ཀན་སོ་སོའི་ནད་ལ་ཕན་པའི་རླུང་གིས་ཀྱང་བྱུགས་ནས་ནང་གི་ཤིང་བུ་ནི་དྲོངས་ལ་ཕྱུང་ཤིག །དེ་ནས་སྨན་གྱི་གདར་བུའི་དྲུང་མེས་བསྲེགས་ལ་ཁམ་ཕོར་
[28a.5]ཁ་སྦྱར་ལ་དབུས་སུ་བུ་ག་ཕུག་པའི་ནང་དུ་བཅུག་སྟེ་དུད་སྨན་གྱི་གདར་བུའི་རྩེ་མོ་གཅེའུ་བུ་གའི་ནང་དུ་བཅུག་ལ་དུད་པ་ཁར་བརྔུབས་ཏེ་ལུད་པ་ལུ་ཞིང་མི་བདེན་བརྡུངས་ཏེ་སོར་བཅུའམ་སོར་བརྒྱད་པ་བྱས་ལ་དུད་པ་བརྔུབས་ན་ལུད་པ་ལུ་བ་དང་། དབུགས་མི་བདེ་བ་དང་ཆམ་
[28a.6]པས་བཏབ་པ་དང་། སྐད་འགགས་པ་དང་། ཁ་སྣ་ནས་རྣག་མནམ་པ་དང་། ཁ་གདོང་ལ་སྐྱ་རྦབ་ཀྱི་ནད་ཡོད་པ་དང་། སྐྲ་ལ་གཟའ་ཞུགས་པའམ། བྱིའམ། རྣ་བ་ན་བ་དང་། མིག་རྫི་བོར་ལྡོངས་ཏེ། མཆི་མ་མང་བ་དང་། མགུལ་བ་ཡན་ཆད་མགོ་བོ་གཡའ་ཞིང་
[28a.7]ཟ་སྟེ། འཕྲུག་འདོད་པ་དང་སློང་བག་ཅན་དུ་གྱུར་པ་དང་། མགོ་ཡུང་ཁྱེར་བ་དང་། སྐྱིགས་བུས་བཏབ་པ་འདི་རྣམས་ལྟ་བུ་ལ་སྨན་གྱི་དུད་པ་འཐུངས་ན་ནད་ཀྱིས་མི་ཚུགས་སོ། །སྣ་ནས་གཏང་བའི་ཆོ་ག་སྟེ་ལེའུ་ཉི་ཤུ་རྩ་གཅིག་པ་རྫོགས་སོ།། །།སྨན་གྱི་
[28b]
[28b.1]ཁུ་བས་མཁུར་བ་བཀང་ལ་མི་བསྐྱོད་པར་མགོ་བསྐྱོད་དེ་བསྡད་པ་དང་སྨན་གྱི་ཁུ་བས་མཁུར་བ་བཀང་སྟེ། འགྲམ་པ་གཡས་གཡོན་དུ་སྤོ་ཞིང་བད་ཀན་ལ་སོགས་པའི་ནད་དྲང་བའི་ཆོ་གའི་ལེའུ་ཉི་ཤུ་རྩ་གཉིས་པ་བཤད་པར་བྱའོ། །སྨན་གྱི་ཁུ་བས་མཁུར་བ་བཀང་བ་རྣམ་པ་
[28b.2]བཞི་སྟེ། ཏིལ་གྱི་འབྲུ་མར་དང་། ཞི་བར་བྱེད་པ་དང་། ཁ་བཀྲུ་ཞིང་སེལ་བར་བྱེད་པ་དང་། རྨ་འཚོ་བར་བྱེད་པའོ། །དེ་ལ་ཏིལ་གྱི་འབྲུ་མར་དང་། ཞི་བར་བྱེད་པ་དང་། བཀྲུ་སྨན་གྱིས་བཀྲུ་ཞིང་བསྩལ་བ་དང་། འདི་གསུམ་གྱིས་ནི་རླུང་དང་མཁྲིས་པ་དང་བད་ཀན་གྱི་
[28b.3]ནད་བསལ་ལོ། །མཐའ་མའི་རྨའི་ནད་གསོ་བས་ནི་རྨའི་ནད་སེལ་ཏོ། །དེ་ལ་ཏིལ་གྱི་འབྲུ་མར་རམ། མར་ལས་སྨན་མར་སྦྱར་བ་ནི་མངར་དང་སྐྱུར་དང་ལན་ཚྭ་དང་། སྨན་དྲོད་ཆེ་བ་རྣམས་བརྡུངས་ལ་བཏགས་ཏེ། ཆུ་དང་སྦྱར་བའི་ཁུ་བ་འམ་འོ་མ་ཡང་རུང་ཤ་
[28b.4]ཁུ་ཡང་རུང་སྟེ་འདི་རྣམས་དང་སྨན་གྱི་ཁུ་བ་དང་ཏིལ་མར་རམ་འབྲི་མར་དང་སྦྱར་ཏེ་བཙོས་ལ་ཚོས་ཏེ་བཙིར་བའི་སྨན་མར་དེ་དྲོན་པོ་ཁས་བཟོད་ཙམ་མཁུར་བ་བཀང་ཞིང་རླུང་ནད་ཞི་བར་བྱའོ། །དེ་ཞི་བར་བྱ་བའི་སྨན་མར་སྦྱར་བ་ནི་སྨན་རོ་ཁ་བ་དང་། བསྐ་བ་དང་། མངར་བ་
[28b.5]དང་། བསིལ་བ་རྣམས་དང་། པ་ཏི་ལ་ཤིང་འཛམ་བུའི་ཤིང་ཐོག་དང་། མེ་ཏོག་མ་ལ་ཏའི་ཡལ་གའི་ལོ་མ་དང་། ཨུཏྤལ་དང་། ཤིང་མངར་དང་། ཁར་དཀར་པོ་དང་། སྦྲང་རྩི་དང་། འོ་མ་དང་། བུ་རམ་ཤིང་གི་ཁུ་བ་དང་མར་ལ་སོགས་པ་འདི་རྣམས་སྦྱར་ཏེ་བཙོས་པའི་མར་
[28b.6]གྱིས་ནི་མཁྲིས་པའི་ནད་ཞི་བར་བྱེད་དོ། །བད་ཀན་གྱི་ནད་སེལ་བ་ནི་སྨན་ཚ་བ་དང་སྐྱུར་བ་དང་། ལན་ཚྭ་དང་སྨན་དྲོད་ཆེ་བ་རྣམས་ཀླད་ནད་བཀྲུ་བ་སྣ་ནས་གཏང་བའི་སྨན་རྣམས། ཚྭ་དང་ཆང་དང་འབྲས་རྩབས་དང་། བ་གཅིན་དང་། གཞན་ཡང་ཚ་བ་དང་སྐྱུར་བ་ལ་སོགས་པའི་སྨན་
[28b.7]རྣམས་ཀྱི་ཁུ་བ་དང་སྦྱར་ཏེ། བཙགས་པའི་དངས་མས་མཁུར་བ་དགང་ཞིང་བོར་ན་བད་ཀན་གྱི་ནད་སེལ་ཞིང་འབྱང་བར་འགྱུར་རོ། །ཁའི་ནང་དུ་རྙིལ་དང་མཁུར་བའི་ནང་གི་རྨ་གསོ་བའི་དཔྱད་ནི་སྨན་རོ་བསྐ་བ་ཨ་རུ་ར་ལྟ་བུ་དང་། གླ་གོར་ཞོ་ཤ་དང་། མངར་བག་ལ་ཤིང་མངར་དང་།
[29a]
[29a.1]སྦྲང་རྩི་ལྟ་བུ་དང་། བསིལ་བག་ལ་ཙནྡན་དང་། པུ་ཤེལ་ཙི་དང་། གླ་སྒང་ཆེན་པོ་དང་། ཅི་ལས་ནད་དུ་གྱུར་པའི་སྨན་སོ་སོར་བཤད་པ་རྣམས་ཀྱིས་ཀྱང་བསྣན་ལ་སྨན་གྱི་ཁུ་བ་ཁར་བླུགས་སོ། །དེ་ལ་རླུང་ནད་དུ་གྱུར་པའི་ནད་ལ་ཏིལ་འབྲུའི་མར་ལ་སྦྱར་ཏེ་
[29a.2]མཁུར་བ་དགང་བ་ནི། ཏིལ་མར་དང་འོ་མ་དང་སྦྲང་རྩི་དང་ཆུ་དང་སྦྱར་བ་དང་། ཚྭ་དང་ཆང་དང་ཤ་ཁུ་དང་བ་གཅིན་དང་། འབྲས་རྩབས་ཀྱི་ཁུ་བ་དང་། འདི་རྣམས་གང་འབྱོར་བ་དང་ནད་སེལ་བའི་དམིགས་སུ་གང་བབ་པ་དེ་ལྟར་སྨན་བཏགས་པའི་ཁུ་བ་ཡང་རུང་། བཙོས་
[29a.3]པའི་ཏིལ་མར་ཡང་རུང་། དྲོན་པོ་ཁ་བཟོད་པ་ཙམ་མཁུར་བ་བཀང་ནས་སོ་བརྩེ་བ་དང་། སོ་འགུལ་བ་དང་རླུང་ནད་ཀྱིས་ཁའི་ནང་ན་བར་གྱུར་པ་དང་། འདི་རྣམས་ལྟ་བུ་ལ་དྲོན་པོ་ཁས་བཟོད་ཙམ་མཁུར་བ་བཀང་ན་ཕན་ནོ། །ཡང་དྲོད་ཆེར་གྱུར་ལ། རྩུབ་པ་དང་། ཚ་བར་གྱུར་པ་
[29a.4]དང་། ཁའི་ནང་ཚོས་པ་དང་། ཁའི་ནང་དུ་རྨ་བྱུང་བ་དང་། ཁའི་ནང་གློ་བུར་དུ་འཕྲལ་ལ་སྣད་པ་དང་། ཁའི་ནང་དུ་དུག་རེག་པ་དང་། ནས་ཚིག་འཁུས་པའི་ཚེ་ཐལ་སྨན་རྣོན་པོས་ཁའི་ནང་ཚིག་པ་དང་། ཁའི་ནང་མེས་བསྲེགས་ཏེ་ཚིག་པ་འདི་རྣམས་ལྟ་བུ་ལ་ཡང་ཞུན་མར་
[29a.5]འཁྱགས་པ་དང་། ལོ་མ་གྲང་མོས་ཁའི་ནང་དུ་དགང་ངོ་། །ཁའི་ནང་ཚིག་པའམ་རྨ་བྱུང་བ་ལས་ཚོར་བ་མེད་ཅིང་ཟས་ཀྱི་རོ་བྲོ་བ་མི་ཚོར་བ་ལྟ་བུ་དང་། ཁའི་ནང་གི་རྨ་བྱུང་བ་ཡང་འདི་ལྟ་བུ་ལས་ཀྱང་མར་དང་འོ་མས་ཁ་བཀང་ན་ཁའི་ནང་ཡང་བག་ཅན་དུ་འགྱུར་བ་དང་། རྨ་འཚོ་
[29a.6]བར་འགྱུར་རོ། །སྦྲང་རྩི་དང་ཆུ་སྦྱར་ཏེ། མཁུར་བ་བཀང་ན་ཁའི་ནང་ཚ་བ་དང་། སྐོམ་དད་ཆེ་བ་ཞི་བར་འགྱུར་རོ། །ཁ་ཟས་རོ་བྲོ་བ་མི་ཚོར་བ་དང་། ཁ་མནམ་པ་དང་། ཁའི་དྲི་མ་ཆེ་བ་འདི་ལྟ་བུ་ལ་འབྲས་རྩབས་མཁུར་བ་བཀང་ཞིང་ཡོན་ཏན་གྱིས་སྐྱོན་སེལ་ཏོ། །འབྲས་
[29a.7]རྩབས་དེ་ཉིད་དང་། རྒྱམ་ཚྭ་དང་། ལྕེ་མྱང་ཚ་གང་ཡང་རུང་བ་དང་སྦྱར་བ་གྲང་མོས་མཁུར་བ་བཀང་ཞིང་ཕོ་ན་ཁ་སྐོམ་པའི་ནད་ལ་རབ་ཏུ་ཕན་པར་འགྱུར་རོ། །བད་ཀན་གྱི་དཀྱེལ་སོགས་ཤིང་སྐྱེས་པར་གྱུར་པ་ལ་ནས་ཚིག་འཁུས་པའི་ཚྭའམ་ཐལ་སྨན་རྣོན་པོ་དང་། ཆུར་སྦྱར་ཏེ་
[29b]
[29b.1]མཁུར་བ་བཀང་ཞིང་ཕོ་ན་བད་ཀན་མྱུར་དུ་སེལ་བར་འགྱུར་རོ། །ཁའི་ནང་ལྕི་ཞིང་ལྡག་ལྡག་པོར་གྱུར་པ་ལ་ཆུ་དྲོན་པོ་ཁས་བཟོད་ཙམ་མཁུར་བ་བཀང་ཞིང་བོར་ན་ཁའི་ནང་ཡང་ཞིང་བདེ་བར་འགྱུར་རོ། །མཁུར་བའི་ནང་དུ་སྨན་ཞུ་འམ་དྲོན་པོས་བཀང་བའི་ཆོ་ག་བྱས་ན་སྔར་རླུང་མེད་པ་
[29b.2]ཉི་མ་དྲོན་པོའི་སར་འདུག་ལ། འཕྲག་སོ་དང་སྐེ་གཡས་གཡོན་དུ་དུགས་བྱ་ཞིང་མཉེས་ལ། དེ་ནས་སྨན་གྱི་ཁུ་བའམ་ཆུ་དྲོན་པོས་མཁུར་བ་བཀང་སྟེ་གདོང་པ་ཕྱིར་བསྐྱེད་དེ་བསྟོད་ལ་འདུག་ཤིག །བསྡད་པའི་ཚེ་ནི་ཁའི་ནང་བད་ཀན་ནམ་གང་གི་བར་དུའམ་ཡང་ན་སྣའི་ནང་
[29b.3]སྣབས་ཀྱིས་གང་ལ་མིག་མཆི་མས་གང་བའི་བར་དུ་བསྡད་དོ། །བད་ཀན་གྱི་ནད་ནི་ལན་གསུམ་ལན་ལྔའམ་ལན་བདུན་དུ་མཁུར་བ་དགང་ངོ་། །མཁྲིས་པའི་ནད་རླུང་ནད་ལ་ནི་དེ་ལྟར་ཁ་དགང་བར་བྱ་བའི་དཔྱད་མི་དགོས་སོ། །དེ་ལ་སྨན་གྱི་ཁུ་བས་ཁར་དགང་ཞེས་བྱ་བ་
[29b.4]ནི་སྨན་གྱི་ཁུ་བ་ཁར་བླུགས་ལ་མཁུར་བ་གཡས་གཡོན་དུ་སྤོ་བ་མེད་པར་གཞག་གོ། །སྨན་ཁུའམ་ཆུ་དྲོན་པོ་ཁར་རྔུབ་པ་ཞེས་བྱ་བ་ནི་ཁར་བརྔུབས་ལ་མཁུར་བ་གཡས་སུ་སྤོའོ། །དེ་ལ་སྨན་ཁུའམ་ཆུ་དྲོན་མོ་མར་བརྔུབས་ལ་མཁུར་བ་གཡས་གཡོན་དུ་སྤོ་བ་བྱས་ན། གཉེའུ་
[29b.5]རེངས་པ་དང་ཀླད་པ་ན་བ་དང་། རྣ་བ་ན་བ་དང་། ཁ་ན་བ་དང་། མིག་ན་བ་དང་། བད་ཀན་རྒྱས་ཏེ་སྣབས་དང་མཆིལ་མ་མང་བ་དང་། གྲེ་བའི་ནང་ན་བ་དང་ཁ་སྐམས་པ་དང་། སྙིང་ན་བ་དང་། གློ་བག་ཅན་དུ་གྱུར་པ་དང་། ཁ་ཟས་ཡི་གར་མི་འོང་བ་དང་། ཆམ་པས་བཏབ་
[29b.6]པ་དང་། འདི་རྣམས་ལ་ཕན་ཏེ་གསོ་སླ་བར་འགྱུར་རོ། །བད་ཀན་གྱི་ནད་ལ་སྨན་ལྡེ་གུ་དང་། སྨན་བཙོས་པའི་ཁུ་བ་དང་། སྨན་རྣམ་གསུམ་ཁར་གཞིབ་ཅིང་མུར་ལ་སྨན་གྱི་ཁུ་བ་ཁར་བླུགས་པ་དང་འདྲ་སྟེ་ཕན་ནོ། །སྨན་གྱིས་གདོང་བྱུགས་པ་ཡང་རྣམ་གསུམ་སྟེ།
[29b.7]རླུང་དང་བད་ཀན་གྱི་ནད་ལ་ནི་དྲོན་པོས་བཀྲུས་ན་དགེའོ། །མཁྲིས་པ་དང་ཁྲག་རྒྱས་པའི་ནད་ལ་ནི་བསིལ་སྨན་བག་གདོང་ལ་བསྐུའོ། །གདོང་བསྐུ་བའི་སྨན་གྱི་ཡོན་ཏན་ནི་རླུང་དང་མཁྲིས་པ་དང་། བད་ཀན་གྱི་ནད་སེལ། དུག་ནད་སེལ་བ་བཞིན་མདོག་བཟང་པོར་འགྱུར་རོ། །
[30a]
[30a.1]སྨན་ལྡེ་གདོང་པ་བསྐུ་བའི་ཚད་ནི་རྣམ་གསུམ་སྟེ་སོར་བཞི་ཆའམ་སུམ་ཆའམ་སོར་གྱི་ཆ་གཉིས་ཙམ་གྱིས་སྟུག་རྔམས་དེ་ཙམ་དུ་བསྐུའོ། །གདོང་སྨན་མ་སྐམས་ཀྱི་བར་དུ་གདོང་ལ་ཆགས་ཏེ་ཕན་ནོ། །སྐམས་ན་པགས་པའི་ཤ་མཐང་ལ་གནོད་ཀྱིས་ཆུས་སྦངས་
[30a.2]ལ་ཁྲུས་ཤིག །བརྐུས་པའི་རྗེས་ལ་མར་རམ་ཏིལ་མར་གྱིས་གདོང་བསྐུས་ལ། ལྡེ་གུས་དྲིལ་ལ་ཕྱིས་ཤིག །གདོང་སྨན་ལྡེ་གུ་དེ་ལྟར་བྱུགས་ན་ཉིན་པར་ཉལ་བ་དང་དྲག་ཏུ་སྨྲ་བ་དང་སྨྲ་བ་མང་བ་དང་། མེ་ཚ་བའམ་ཉི་མ་འདེ་བའམ་བུད་མེད་ལ་ཉལ་བ་འམ་འགྲོ་བའི་བག་ཏུ་མི་
[30a.3]རུང་ངོ་། །དེ་ལྟར་གདོང་ལ་སྨན་གྱིས་བསྐུ་ལེགས་ན་དུས་ལ་མ་བབ་པར་སྐྲ་དཀར་པོར་གྱུར་པ་འམ་དཔུང་པ་ལྷུང་སྟེ་བསྐྱོད་མི་ནུས་པ་དང་གཉེར་མ་མང་བ་དང་། མིག་རབ་རིབ་ཀྱིས་ཁྱེར་བ་དང་། གདོང་པ་ཁབས་ཡོད་པ་དང་། མིག་ནད་སྔོན་པོར་གྱུར་པ་འདི་རྣམས་སེལ་ཏེ་ཕན་ནོ། །
[30a.4]སྨན་ལྡེ་གུས་བྱུག་ཏུ་མི་རུང་བའི་དམིགས་ནི་ཆམ་པས་བཏབ་པ་དང་། ཁ་ཟས་མ་ཞུ་བ་དང་། སྨན་སྣར་བཏང་བ་ལྟ་བུ་དང་། རྙིལ་བ་དང་འགྲམ་པ་ན་བ་དང་། ཟས་ཡི་གར་མི་འོང་བ་དང་། མཚན་མོ་གཉིད་མ་ལོག་པར་གྱུར་པ་འདི་རྣམས་ལྟ་བུ་ལ་སྨན་བསྐུར་མི་རུང་ངོ་། །དེ་ལ་
[30a.5]གདོང་བསྐུ་བའི་སྨན་ལྡེ་གུ་ནི་རྒྱ་ཤུག་གི་ནང་རྐང་དང་བ་ཤ་ཀའི་རྩ་བ་དང་ཤ་བ་རའི་སེང་ཕྲོམ་དང་། ཡུངས་ཀར་འདི་རྣམས་ནི་དགུན་གྱི་ལྡེ་གུས་བྱུག་པའོ། །ཀཎྜ་ཀ་རིའི་རྩ་བ་དང་། ཏིལ་ནག་པོ་དང་། སྐྱེར་པའི་རྩ་བ་དང་། ཤིང་ཚ་དང་། ནས་རྨེའུ་དང་། འདི་རྣམས་ནི་དགུན་
[30a.6]སྨད་ཀྱི་ལྡེ་གུས་བསྐུ་བའོ། །རྩྭ་དཱུར་བའི་རྩ་བ་དང་། ཙནྡན་དང་། ཨུ་ཤི་ར་དང་། ཤིང་ཤི་རི་ཤ་དང་། ཤ་ཏ་པུཥྤ་དང་། འབྲས་དང་འདི་རྣམས་དཔྱིད་ཀྱིའོ། །མེ་ཏོག་ཀུ་མུ་ད་དང་ཨུཏྤ་ལ་དང་། ཀ་ལྷ་ར་དང་། རྩྭ་དཱུར་བ་དང་། ཤིང་མངར་དང་། ཙནྡན་དང་འདི་རྣམས་ནི་
[30a.7]སོས་ཀའི་ཚེ་བསྐུའོ། །ཀ་ལི་མ་ཀ་དང་། ཏིལ་དང་། ཨུ་ཤི་ར་དང་། སྤང་སྤོས་དང་། རྒྱ་སྤོས་དང་། ཤུག་པ་དང་། འདི་རྣམས་དབྱར་གྱི་ཚེ་བསྐུའོ། །བལ་བུ་དང་། ཀུན་ཏྲ་པུན་ཏྲ་ཧ་དང་། ཤིང་མངར་དང་། སཔྟ་པརྞི་དང་། རྒྱ་སྤོས་དང་། འདི་རྣམས་ནི་སྟོན་གྱི་ལྡེ་གུ་བསྐུ་
[30b]
[30b.1]བ་ཡིན་ནོ། །དེ་ལྟར་དུས་ཚིགས་དྲུག་གི་བྱེ་བྲག་དང་སྦྱར་ཏེ་གདོང་བསྐུ་བའི་དཔྱད་ཤེས་པར་བྱའོ། །དེ་ལྟར་རྟག་ཏུ་གདོང་བཀྲུས་ན་མིག་ལ་ཡང་ཕན་ཏེ་ལྟ་བ་ལ་བརྟན་པར་མཐོང་བ་དང་བཞིན་འཇམ་ཞིང་གཉེར་མ་མེད་པ་དང་བཞིན་མདོག་བཟང་པོ་པདྨའི་ལོ་མ་དང་འདྲ་བར་
[30b.2]འགྱུར་རོ། །ཏིལ་དང་མར་གྱིས་ལུས་བསྐུ་བ་ཡང་རྣམ་པ་བཞི་སྟེ་མར་དང་འབྲུ་མར་གྱིས་ལུས་བསྐུ་བ་ཡང་མར་བླུགས་པ་དང་། རས་སམ་ཤིང་བལ་མར་ལ་བསྒྲེས་ཏེ། ཀླད་པར་གཞག་པ་འམ་ཀླད་པར་མར་རམ་ཏིལ་གྱི་འབྲུ་མར་གྱིས་བྱུགས་ལ་སྐྱི་དར་གྱིས་གཡོགས་པ་དང་
[30b.3]བཞིའོ། །དེ་ལྟར་མགོ་བོ་ལ་བསྐུ་བ་རྣམ་པ་འདི་བཞི་ཡང་ལྷག་མ་བས་འོག་མའི་ཡོན་ཏན་ཆེ་ཞིང་མང་སྟེ། གོང་མ་བས་འོག་མ་བཟང་བར་ཤེས་པར་བྱའོ། །དེ་ལ་མར་གྱིས་བྱུག་ཅིང་བསྐུ་ཞེས་བྱ་བ་ནི་མགོ་དང་ལུས་རྩུབ་པ་དང་། མགོ་དང་ལུས་གཡའ་བ་དང་པགས་པ་ཤ་
[30b.4]མདོག་མི་སྡུག་ཅིང་དྲི་མ་ཅན་དུ་གྱུར་པ་འདི་ལྟ་བུར་མར་བྱུག་ཅིང་བསྐུར་བར་བྱའོ། །མགོ་ལ་གློག་པ་ཞུགས་པ་དང་། ཀླད་པ་ཟུག་ཐབས་སུ་ན་བ་དང་། ཀླད་པ་ཚ་བ་དང་། རྨ་རྣགས་པ་འདི་ལྟ་བུ་ལ་ནི་མར་བླུགས་པའི་དཔྱད་བྱའོ། །དེ་ལ་སྐྲ་བྱི་བ་དང་། སྐྲ་ལ་གཟའ་
[30b.5]ཞུགས་པ་དང་། བདུག་པ་བྱས་པའི་རྗེས་དང་མིག་ཧར་ཧར་པོར་གྱུར་པའི་ནད་འདི་ལྟ་བུའི་ནད་པ་ནི་རས་སམ་རས་བལ་མར་གྱི་ནང་དུ་བསྲེས་ཏེ་སྤྱི་བོར་གླན་ནོ། །མགོ་ལ་ཚོར་བའི་བག་མེད་དེ་བེམ་བག་ཏུ་གྱུར་པ་དང་། ཁ་ཡོན་པོར་གྱུར་པ་དང་། གཉིད་མེད་པ་དང་། ཁ་སྣ་
[30b.6]སྐམས་པ་དང་། མིག་རབ་རིབ་ཀྱིས་ཁྱེར་བ་དང་། ཀླད་པ་མི་བཟོད་པར་ན་བ་དང་། འདི་ལྟ་བུ་ལ་ཀླད་པ་ལ་མར་ཆེར་བྱུགས་ཏེ་མར་མི་དབོ་བར་པགས་པས་གཡོགས་པ་འགབ་ཆིངས་ཤིག །དེ་ལྟར་བྱས་པའི་ཆོ་ག་ནི་ལུས་སྣུམ་གྱིས་བྱུགས་ཏེ་ལྡེ་གུས་ཕྱིས་ལ་ཁྲུས་བྱས་ནས་ནུབ་ཀར་
[30b.7]པུས་མོའི་འཕང་ཙམ་གྱི་སྟན་ཁྲིའུ་སྟན་རློན་ཅན་འཇམ་པོ་ལ་འདུག་ནས་མ་ཧེའམ་བ་ལང་གི་ཀོ་བ་སྲིད་ཀླད་པ་འཁོར་བ་ཞེང་སོར་བཅུ་གཉིས་ཡོད་པ་དེ་ལྟ་བུར་བྱས་པ་དཔྲལ་བའི་སྐྲ་མཚམས་ནས་རྣ་དྲུང་ཙམ་དུ་ཕྱིན་པར་བྱས་ཏེ་འགབ་བཅིང་ངོ་། །འགབ་བཅིང་བ་ནི་རས་སམ་རང་གི་སྐྲས་འགབ་
[31a]
[31a.1]བཅིངས་ཀྱང་རུང་ངོ་། །མར་མི་ཟག་པར་སྲན་མ་ཤའི་ལྡེ་གུས་ཀྱང་འགབ་གླན་ཅིང་བསྐུའོ། །དེ་ནས་ནད་ཀྱི་དམིགས་ཅི་འདྲ་བ་ལས་མར་རམ་སྨན་དང་སྦྱར་བའི་ཏིལ་གྱི་འབྲུ་མར་དྲོ་འཇམ་ཙམ་ཀླད་པ་ཁོར་ཡུག་དང་སྤྱི་བོ་མན་ཆད་སྐྲ་དྲུང་སོར་གཅིག་ནུབ་པ་ཙམ་དུ་བླུགས་
[31a.2]ལ་ཁའི་ནང་དང་སྣ་དང་མཚུལ་པར་མར་གྱི་རོ་ནམ་བྲོའི་བར་དུ་བཞག་སྟེ། དེའི་ཚད་ཀྱང་རླུང་ནད་ལ་ནི་སེ་གོལ་བསྐོར་ཞིང་གཏོགས་པ་ལན་ཁྲིའི་བར་དུ་གཞག་གོ། །མཁྲིས་པའི་ནད་ལ་ནི་སེ་གོལ་བརྒྱ་སྟོང་གི་ཡུན་ཚུན་ཆད་དུ་གཞག་གོ། །བད་ཀན་གྱི་ནད་ལ་ནི་སེ་གོལ་དྲུག་སྟོང་ཙམ་གྱི་
[31a.3]བར་དུ་ཞོག་ཤིག །ཡང་སྨན་པ་ཁ་ཅིག་ན་རེ་ནད་ནམ་ཕྱིན་གྱི་བར་དུ་མར་གཞག་ཅེས་འཆད་དོ། །མར་ཟག་པའམ་ལྷག་མས་ནི་ཕྲག་པ་དང་རོ་སྟོད་བསྐུ་ཞིང་མཉེའོ། །ཆོ་ག་འདི་འདྲ་བར་བྱ་བ་ལན་གྲངས་རབ་ཏུ་མང་ན་ཞག་བདུན་བྱའོ། །རྣ་བ་ན་བ་ལ་ཏིལ་མར་ལས་སྦྱར་བའི་སྨན་
[31a.4]རྣ་བའི་ནང་དུ་བླུགས་ཏེ་བཀང་ལ་རྣ་དྲུང་མཉེ་ཞིང་འགྲམ་སོ་བསྐྱོད་དོ། །བཞག་པའི་ཡུན་ནི་ནམ་ནད་རྩེ་ཞིལ་གྱི་བར་དུ་གཞག་གོ། །རྣ་བ་མིན་པ་ལ་མར་བླུགས་ན་སེ་གོལ་བརྒྱའི་ཡུན་གྱི་བར་དུ་གཞག་གོ། །རྣ་བ་ལ་མར་བླུགས་ན་དེ་ལྟར་བགྲང་བའི་ཡུན་གྱི་ཚད་ནི་ལག་པ་གཡས་ཀྱི་
[31a.5]ཐལ་མོ་པུས་མོ་གཡས་པའི་ལྷ་ང་ལ་རྡོ་བ་ལྟ་བུ་དང་། མིག་འབྱེད་ཅིང་འཛུམས་པ་ལྟ་ཙམ་དང་མཉམ་པའི་ཡུན་དེ་ཙམ་གྱིས་བགྲང་ངོ་། །ཀླད་པ་སྨན་དང་སྦྱར་བའི་ཏིལ་མར་གྱིས་བྱུགས་པའི་ཡོན་ཏན་ནི་སྐྲ་འབྱི་བ་དང་། སྐྲ་དཀར་དང་། སྐྲ་ཁམ་པ་དམར་སེར་དུ་གྱུར་པ་
[31a.6]དང་། སྐྲ་ལ་གཟའ་ཞུགས་པ་དང་། ཀླད་པའི་ནང་དུ་རླུང་ཞུགས་པ་དང་འདི་རྣམས་ལྟ་བུ་ལ་ཕན་ནོ། །དབང་པོ་རྣམས་གསལ་བར་འགྱུར་ལ། སྐད་ཀྱི་གདངས་དང་མགྲིན་པ་སྙན་པ་དང་འགྲམ་པ་ན་བ་དང་ཀླད་པ་ན་བ་ལ་ཕན་ལ། ཉམས་སྟོབས་སྐྱེ་ཞིང་ཉམས་
[31a.7]འཚག་བརྟའོ། །སྨན་གྱི་ཁུ་བས་མཁུར་བ་དགང་བའི་དཔྱད་ལ་སོགས་པ་བཤད་པའི་ལེའུ་ཉི་ཤུ་རྩ་གཉིས་པ་རྫོགས་སོ།། །།སྨན་གྱི་ཐིགས་པས་མིག་ཏུ་བླུགས་པ་དང་། སྨན་གྱིས་མིག་བསྐུ་བའི་ཆོ་ག་བཤད་པའི་ལེའུ་ཉི་ཤུ་རྩ་གསུམ་པ་བཤད་པར་བྱའོ། །མིག་
[31b]
[31b.1]ནད་ཐམས་ཅད་ལ་དཔྱད་དུ་བྱ་བ་ནི་མིག་ནད་གསར་པ་ལ་དང་པོར་སྨན་གྱི་ཐིགས་པ་མིག་ཏུ་བླུགས་ན་མིག་རྡོལ་ལ་ཐུག་པ་སྙམ་བྱེད་ཅིང་ན་བ་དང་། མིག་ཏུ་ཟུག་སྟེ་ན་བ་དང་། མིག་གཡའ་བ་དང་། མིག་ལ་དྲུད་པ་སྙམ་བྱེད་པ་དང་། རྫི་བོར་གྱུར་ཏེ་མཆི་མ་ཟག་པ་དང་། མིག་ཚ་བ་དང་།
[31b.2]མིག་དམར་པོར་གྱུར་པ་དང་། འདི་རྣམས་ལྟ་བུའི་ནད་སེལ་ཏེ་ཕན་ནོ། །མིག་རླུང་ནད་ཀྱི་བག་ཏུ་ན་བ་ལ་ནི་སྨན་ཐིགས་དྲོན་པོ་ལྡུགས་ཤིག །བད་ཀན་ལས་མིག་ནད་དུ་གྱུར་པ་ལ་ནི་འཇམ་ཙམ་ལྡུགས་ཤིག །ཁྲག་དང་མཁྲིས་པའི་ནད་ལྟ་བུ་ཚ་བའི་བག་ལ་ནི་སྨན་ཐིགས་ཀྱི་ཆུ་དེ་བསིལ་
[31b.3]བར་གྱིས་ལ་ལྡུགས་ཤིག །སྨན་ཐིགས་བླུགས་པའི་ཆོ་ག་ནི་རླུང་མེད་པའི་གནས་སུ་འདུག་ལ་སྔས་སྨད་དེ་ཉ་ཕྱིས་ཀྱི་ནང་དུ་སྨན་གྱི་ཁུ་བ་སྦྱར་ལ་རས་བལ་ལམ་སྲིན་བལ་ལྟ་བུ་བསྙད་པ་སོར་གསུམ་ཙམ་དྲི་མ་མེད་པ་བཀྲུས། བསྐམས་པ་དེས་ཉ་ཕྱིས་ཀྱི་ནང་ནས་མིག་ཕུགས་ཀྱི་གྲྭ་
[31b.4]སྣ་དྲུང་དུ་ཐིགས་པ་བཅུ་གཉིས་སམ་བཅུ་རས་བལ་ལས་གཏིག་ཅིང་བླུགས་ཏེ་མིག་ཏུ་བླུགས་པའི་འཕང་ནི་སོར་གཉིས་ཙམ་ལས་གཏིག་ཅིང་བླུགས་སོ། །ཁད་ལངས་ཤིང་བསྡད་ལ་སྨན་ཁུ་དེ་མིག་འགྲམ་ནས་མུར་འགྲམ་ལོགས་སུ་ཕོ་ལ་དེ་ནས་གོས་འཇམ་པོས་ཕྱིས་ཤིག །བད་ཀན་
[31b.5]ནམ་རླུང་ནད་ལྟ་བུ་ལ་ནི་མིག་ཕྱིས་པའི་རྗེས་ལ་རས་མ་འཇམ་པོ་ཆུ་དྲོ་འཇམ་ཙམ་གྱི་ནང་དུ་བཅུག་ལ་མིག་ལ་དྲོ་འཇམ་ཙམ་དུ་དུགས་གྱིས་ཤིག །མིག་ཏུ་སྨན་གྱི་ཆུ་བླུགས་པ་དེ་ཧ་ཅང་དྲོ་ཆེ་སྟེ་ཚའམ་རོ་ཚ་བའི་སྨན་དྲོན་པོའམ་འདི་ལྟ་བུའི་བག་བཏང་ན་མིག་རྡོལ་ལ་ཐུག་པ་ཙམ་དུ་ན་བ་དང་།
[31b.6]མིག་དམར་པོར་འགྱུར་བ་དང་། མིག་རྡུལ་འདི་ལྟ་བུའི་བག་ཏུ་འགྱུར་རོ། །མིག་སྨན་ཧ་ཅང་དྲགས་ཆེས་པ་མིག་ཏུ་བླུགས་ན་མིག་ཏུ་ཟུག་ཅིང་ན་བ་དང་། མིག་འཛུམས་མི་ཤེས་ཏེ་ཧར་ཧར་པོར་འགྱུར་བའི་ནད་དུ་འགྱུར་རོ། །མིག་ཏུ་སྨན་གྱི་ཐིགས་པ་བླུགས་པའི་ཐུན་མོང་སྟེ་
[31b.7]དྲགས་ན་མིག་གི་མཆུ་སྡུད་པ་སྙམ་བྱེད་ཅིང་རྩུབ་པ་དང་། མིག་འབྱེད་མི་ནུས་ཤིང་དཀའ་བར་འགྱུར་རོ། །མིག་སྨན་བླུགས་པ་ཧ་ཅང་ཐུན་ཆུང་ན་མིག་ནད་ཀྱི་དཀྱེལ་སྐྱེས་ཏེ་མི་ཕན་ནོ། །མིག་ཏུ་སྨན་བླུགས་པ་ལས་མ་ཕོ་ན་མིག་ནད་ཀྱི་དཀྱེལ་སྐྱེས་ཏེ་སླར་ན་བར་འགྱུར་རོ། །
[32a]
[32a.1]མིག་སྨན་བསྐུ་ལེགས་པ་ནི་ཀླད་པའི་ཡུལ་དང་། སྲུབས་དང་། རྩ་དང་། ཁ་སྣ་དང་། རྩའི་ནང་དང་། མགོ་ཀུན་དུ་སྨན་གྱིས་ཁྱབ་ནས་མིག་གི་ནད་ཀུན་སེལ་བར་འགྱུར་རོ། །ཡང་མིག་སྨན་གྱིས་མིག་ཏུ་བསྐུ་བའི་དཔྱད་ནི་སྔར་སྐྱུག་སྨན་དང་བཀྲུ་སྨན་གྱིས་ནད་
[32a.2]སྦྱངས་ལ་མིག་བཀྲུ་བའི་སྨན་ནི་མིག་ཡོག་པ་ཙམ་གྱི་ཚོད་ཀྱིས་མིག་ལ་བསྐུའོ། །དེ་ལྟར་བསྐུ་བའི་མིག་ནད་ཀྱི་དམིགས་ནི་མིག་ནད་རྙིང་པ་ལྟ་བུའི་བག་ཏུ་གྱུར་པ་ཅུང་ཟད་ཙམ་སྐྲངས་པ་དང་། མིག་རབ་རིབ་ཏུ་གཡའ་བ་དང་། མིག་འབྱར་བག་དང་། མིག་གི་གྲྭར་རྔུལ་མ་ཆགས་
[32a.3]པ་དང་། མིག་རབ་རིབ་ཏུ་རྩུབ་པ་ཙམ་མ་ཡིན་པ་དང་། མཆི་མ་ཟག་པ་དང་། མིག་དམར་པོར་གྱུར་པ་དང་འདི་ལྟ་བུ་ནི་མིག་ནད་རྙིང་པར་གྱུར་པའི་རྟགས་ཡིན་ཏེ་འདི་ལྟ་བུ་ལ་སྨན་མིག་ཏུ་སྐུས་ཤིག །མིག་ནད་མཁྲིས་པ་དང་བད་ཀན་དང་རླུང་ལས་མིག་ནད་དུ་གྱུར་པ་འདི་ལྟ་བུ་ལ་
[32a.4]དམིགས་ཀྱིས་བསྐུ་བའི་དཔྱད་རྣམ་པ་གསུམ་སྟེ། མིག་གི་ནད་ཕྱི་ཞིང་བསལ་བ་དང་། མིག་ནང་རྨ་ལྟ་བུ་གསོ་བ་དང་། མིག་གསལ་བར་མཐོང་བར་བྱའོ། །དེ་ལ་མིག་ནད་བསལ་ཞིང་ཕྱི་བའི་སྨན་གྱིས་བྱུགས་པ་ནི་རོ་བསྐ་བ་དང་། སྐྱུར་བ་དང་། རྒྱམ་ཚ་དང་ན་ལེ་ཤམ་དང་
[32a.5]འདི་རྣམས་སོ། །མིག་གི་རྨ་གསོ་བའི་སྨན་ནི་རོ་ཁ་བས་བསྐུའོ། །མིག་རྣོ་ཞིང་གསལ་བར་བྱ་བའི་སྨན་གྱིས་བསྐུའོ། །སྨན་བསྐུ་བའི་ཐུར་མའི་སྲིད་ནི་སོར་བཅུ་པ་དབུས་ནི་ཕྲ་བའོ། །ཐུར་མའི་ཐོར་ཏོ་ནི་སྲི་ཤིང་གི་མེ་ཏོག་ཁ་འབུས་པ་ལྟ་བུའོ། །མིག་ནད་བསལ་ཞིང་ཕྱི་བའི་ཐུར་
[32a.6]མ་ནི་ཟངས་ལས་བརྡུངས་པ་ནི་བཟང་ངོ་། །མིག་གི་རྨ་གསོ་བའི་ཐུར་མ་ནི་ལྕགས་ནག་པོ་ལས་བརྡུངས་པའི་ཐུར་མ་དང་མཛུབ་མོས་ཕྱི་བ་བཟང་ངོ་། །མིག་རྣོ་ཞིང་གསལ་བར་བྱ་བའི་ཐུར་མ་ནི་གསེར་དངུལ་ལས་བྱའོ། །ཡང་མིག་སྨན་སྐྱེར་ཁཎྜ་ལྟ་བུའི་གདང་བུ་ལྟ་བུ་དང་།
[32a.7]སྨན་དང་སྦྱར་བའི་ཟན་གྱི་ཆང་བུ་དང་། སྨན་དང་སྦྲང་རྩིར་སྦྱར་བ་ལྟ་བུའི་ལྡེ་གུ་དང་། མིག་སྨན་ཕྱེ་མ་དང་རྣམ་པ་གསུམ་ཡོད་དོ། །དེ་ཡང་མིག་ནད་ལྕི་བ་དང་ཡང་བ་དང་ལྕི་བ་ཡང་མ་ཡིན་ཡང་བ་ཡང་མ་ཡིན་པ་འདི་རྣམ་པ་གསུམ་གྱི་ཚུལ་ལས་དཔགས་ཏེ་སྨན་རིམ་པ་བཞིན་
[32b]
[32b.1]དུ་གཏང་ངོ་། །སྨན་དེ་གཏང་བ་ནི་ནུབ་མོ་ཉལ་བའི་ཚེ་དང་མཚན་མོ་དང་། ཉིན་གུང་དང་ཉིན་མཚན་དང་འདི་རྣམས་ལྟ་བུ་ལ་སྨན་གཏང་དུ་མི་རུང་ངོ་། །མིག་སྨན་བླུགས་སམ་བསྐུས་ནས་སླར་བཀྲུ་བ་དྲགས་སམ། བཙིར་ན་མིག་ནད་ཀྱི་དཀྱེལ་སྐྱེ་བར་འགྱུར་རོ། །དེ་བས་ན་སྨན་གཏང་
[32b.2]བའི་དུས་ནི་ནང་པར་དང་ཕྱི་འཕྲེད་ཀྱི་སྲིད་དང་། ལ་ཡུལ་དྲང་བའི་ཚེ་འདི་ལྟ་བུའི་དུས་ལ་མིག་སྨན་གྱིས་རྟག་པར་བསྐུའོ། །སྨན་པ་ཁ་ཅིག་ན་རེ་སྨན་ཚ་བའི་བག་རྣོན་པོས་ནི་ཉིན་པར་མིག་བསྐུར་མི་རུང་ཞེས་ཟེར་རོ། །མིག་སྨན་བཏང་བས་མིག་གི་དྲི་མ་དང་། མཆི་མ་ཕལ་ཆེར་བྱུང་
[32b.3]བས་མིག་བཀྲུས་ཏེ། མིག་ལེགས་པར་ལྟ་བའི་མཐུ་ཆུང་བས་འདི་ལྟ་བུའི་ཚེ་ཉི་མ་ལ་བལྟས་ན་མིག་ལ་གནོད་དེ་མི་རུང་ངོ་། །ཡང་སྨན་པ་ཁ་ཅིག་ན་རེ་ཉིན་པར་ནི་ཉི་མའི་འོད་ཚ་བའི་དུས་ལ་བབ་པས་ཚ་བའི་ཚེ་ཚ་སྨན་བཏང་ཡང་གནོད་དེ་མི་རུང་ངོ་། །མཚན་མོ་ནི་ཟླ་བའི་དུས་ཏེ་བསིལ་
[32b.4]བས་མིག་ལ་ཕན་ཏེ་དེ་བས་ན་ནུབ་མོ་ཉལ་ཀ་དང་། མཚན་མོའི་དུས་སུ་མིག་སྨན་བཏང་ན་མིག་ལ་ཕན་ནོ། །ཇི་ལྟ་ཞེ་ན་མིག་ནི་མེའི་རང་བཞིན་ཡིན། མིག་སྨན་ནི་བསིལ་བ་དང་འཕྲོད་དེ་དཔྱད་འདི་ལྟར་བྱས་ན་མིག་རྣོ་ཞིང་བརྟན་པར་འགྱུར་རོ། །གལ་ཏེ་བད་ཀན་རབ་ཏུ་
[32b.5]སྐྱེས་སམ་མིག་ནད་བསལ་ཞིང་ཕྱི་བའི་དཔྱད་དགོས་པར་གྱུར་ན། འདི་ལྟ་བུའི་དཔྱད་ནི་ཉིན་པར་ཡང་རུང་སྟེ། ཡུལ་རབ་ཏུ་ཚ་བའི་དུས་ལ་མ་བབ་ན་མིག་སྨན་རྣོན་པོས་མིག་བྱུག་པར་བྱའོ། །དཔེར་ན་ལྕགས་ནི་རྡོ་བ་ལས་འབྱུང་མོད་ཀྱི་ལྕགས་པས་རྡོ་བ་དེ་ཉིད་རྣོ་སྟེ་རྡོ་བ་དེས་
[32b.6]ལྕགས་ལ་གནོད་པར་བྱ་ནུས་སོ། །དེ་བཞིན་དུ་མིག་ཀྱང་མེའི་རང་བཞིན་ཡིན་པས་ན་མེ་ལྟ་བུ་ཚ་བ་རྣམས་མིག་ལ་གནོད་དེ་མི་རུང་ངོ་། །ཡང་ན་དགུན་ལྟ་བུ་ལྷགས་པ་རབ་ཏུ་ཆེ་ན་མཚན་མོ་ཡང་མིག་སྨན་ཚ་བ་རྣོན་པོས་མིག་བསྐུས་ན་གནོད་དེ་མི་རུང་ངོ་། །ཇི་ལྟ་ཞེ་ན་དགུན་ཧ་ཅང་
[32b.7]ལྷགས་པ་ཆེ་བའི་ཚེ་ནི། མིག་སྨན་གྱིས་བསྐུས་ཀྱང་མིག་གི་ནད་མཆི་མར་དབྱུང་དུ་མི་རུང་ལ་མིག་འབྱེད་ཅིང་འཛུམས་མི་ཤེས་པ་ཧར་ཧར་པོར་འདུག་གམ་མིག་གཡའ་ལ་མི་གསལ་མི་རྣོ་བ་ལ་སོགས་པ་ཉེན་དུ་འགྱུར་རོ། །ཡང་མིག་སྨན་གྱིས་བྱུག་ཏུ་མི་རུང་བའི་དམིགས་ནི་
[33a]
[33a.1]སྐྲག་པར་འགྱུར་བ་དང་། སྐྱུག་སྨན་བཏང་བ་འམ། བཀྲུ་སྨན་བཏང་ལ་ཁ་ཟས་མ་ཟོས་པ་དང་། བཤང་གཅི་འོང་བར་གྱུར་པའི་དུས་དང་། ཁྲོ་སྟེ་རྔམ་པ་དང་། རིམས་ནད་ཀྱིས་བཏབ་པ་དང་། མིག་ནད་ཀྱིས་བཏབ་པ་འམ། མིག་ཕྱིར་ཕྱུང་སྟེ་རློ་
[33a.2]རློ་བོར་སོང་བ་དང་། ཀླད་པ་ན་བ་དང་། མྱ་ངན་གྱིས་བཏབ་པ་དང་། མཚན་མོ་གཉིད་མ་ལོག་པར་གྱུར་པ་ལྟ་བུ་དང་། ཉི་མ་མཐོང་བ་དང་། མགོ་བོ་བཀྲུས་པ་དང་། སྨན་གྱི་དུད་པ་སྦུ་གུ་ནས་བརྔུབས་པ་དང་། ཆང་འཐུང་འཐུང་བ་ལྟ་བུ་དང་། ཁ་ཟས་མ་ཞུ་བ་དང་། ཉི་ཚན་
[33a.3]ནམ་མེ་ཚན་པོ་ཆེ་ལྟ་བུ་ལ་འདུག་འདུག་པ་དང་། ཉིན་པར་གཉིད་ལོག་པ་དང་། སྐོམ་གྱིས་གདུངས་པ་དང་། འདི་ལྟ་བུ་ལ་མིག་སྨན་བསྐུ་ཞིང་བྱུག་ཏུ་མི་རུང་ངོ་། །མིག་སྨན་ཧ་ཅང་ཚ་ཞིང་རྣོ་བ་དང་། ཧ་ཅང་འཇམ་པ་དང་། ཧ་ཅང་ཐུན་ཆུང་སྟེ་ཉུང་བ་དང་། ཐུན་ཧ་ཅང་
[33a.4]ཆེ་སྟེ་མང་བ་དང་། ཧ་ཅང་སླ་བ་དང་། ཧ་ཅང་སྐ་བ་དང་། ཧ་ཅང་རྩུབ་པ་དང་། ཧ་ཅང་གྲང་སྟེ་བསིལ་བ་དང་། ཧ་ཅང་དྲོད་ཆེས་པར་བྱས་པའི་སྨན་འདི་ལྟ་བུའི་བག་མིག་ལ་བསྐུ་ཞིང་གཏང་དུ་མི་རུང་ངོ་། །མིག་སྨན་བསྐུ་ཞིང་བྱུག་པའི་ཐབས་ནི་མིག་ཅུང་ཟད་ཕྱེ་ལ་སྨན་ཕྱེ་ལ་སྨན་ཕྱེ་མ་ཐུར་
[33a.5]མས་བཅུས་ཏེ་སྣ་དྲུང་གི་མིག་སྒོ་ནས་མིག་འགྲམ་ལོགས་སུ་དལ་གྱིས་བསྐུ་ཞིང་མིག་གི་མཆུའི་ནང་དུ་སྨན་གྱིས་བྱུགས་ཟིན་པ་དང་། མིག་ཅུང་ཟད་བསྐུལ་ཞིང་བསྐྱོད་ན་མིག་སྨན་རྣོན་པོ་དེས་མིག་གི་ནང་ཀུན་དུ་སླེབ་ཅིང་ཁྱབ་པར་འགྱུར་རོ། །མིག་སྨན་གྱིས་བསྐུས་ནས་མིག་ཧ་ཅང་
[33a.6]ཕྱེ་ཞིང་བཙུམ་པའམ། མིག་བཙུམ་སྟེ་མིག་མཆུའི་པགས་པ་བསྡམ་ཞིང་གཟིར་བའི་ཐབས་སུ་བཙུམ་པ་འམ། མིག་ཆུས་བཀྲུ་བའི་བག་འདི་ལྟ་བུ་མ་བྱེད་ཅིག །མིག་སྨན་གྱིས་བྱུགས་པ་ལས་བཀྲུ་བའི་དུས་ཚོད་ནི་མིག་ཏུ་སྨན་གྱིས་བྱུགས་ཤིང་བསྐུས་པ་རྣམས་མིག་གི་ནང་
[33a.7]དུ་སྨན་བསྐུས་པ་བག་ལ་ཞུ་སྟེ་ན་ཞིང་གནོད་པ་ཡང་མེད་དེ། བདེ་བ་དེའི་ཚེ་ནད་གཞི་ནད་དམིགས་དང་དུས་ཚིགས་ཀྱི་ཚུལ་དང་སྦྱར་ལ་ཆུ་དྲོ་འཇམ་ཙམ་ཚ་གྲང་གང་རིགས་པས་བཀྲུ་བར་གྱིས་ཤིག །བཀྲུས་ནས་དར་འཇམ་པོས་ཕྱིའོ། །ཕྱི་བའི་ཐབས་ནི་ལག་པ་གཡས་
[33b]
[33b.1]ཀྱི་མཛུབ་མོ་དང་མཐེ་བོས་མིག་ཅི་རན་དུ་ཕྱེ་ལ་ལག་པ་གཡོན་པས་གོས་འཇམ་པོ་ཐོགས་ལ་ཕྱིས་ཤིག །མིག་གཡས་གཡོན་གཉིས་ཀ་ཡང་ཚུལ་དེ་ལྟར་བྱའོ། །མིག་གཡའ་འམ་རྟུལ་ཏེ་གསལ་བར་མི་མཐོང་བ་ལ་མིག་སྨན་ཚ་བ་རྣོན་པོས་བསྐུས་ལ་དེའི་རྗེས་ལ་མིག་ཚ་བའི་
[33b.2]གནོད་པར་མ་གྱུར་པར་བྱ་བའི་ཐབས་ནི་སྨན་བསིལ་བས་མིག་ལ་བསྐུ་ཞིང་བྱུགས་པར་གྱིས་ཤིག །སྨན་གྱི་ཐིགས་པ་མིག་ཏུ་བླུགས་པ་དང་སྨན་གྱིས་མིག་བསྐུ་བའི་ཆོ་གའི་ལེའུ་སྟེ་ཉི་ཤུ་གསུམ་པ་རྫོགས་སོ།། །།མིག་བརྟ་བའི་ཆོ་ག་ཞུན་མར་མིག་ཏུ་བླུགས་པ་དང་།
[33b.3]སྨན་གྱི་ཕུར་མ་བསྲེགས་ཤིང་བཅོས་པའི་ཁུ་བའི་ཐིགས་པ་མིག་ཏུ་བླུགས་པའི་ལེའུ་ཉི་ཤུ་རྩ་བཞི་པ་བཤད་པར་བྱའོ། །མིག་འཛུམས་མི་ཤེས་ཏེ་ཧར་བག་ཏུ་གྱུར་པ་དང་། མིག་སྐམ་བག་ཏུ་གྱུར་པ་དང་། མིག་གི་ནང་རྩུབ་པོར་གྱུར་པ་དང་། མིག་སྣད་པ་དང་། མིག་རླུང་དང་མཁྲིས་
[33b.4]པའི་ནད་དུ་གྱུར་པ་དང་། མིག་ཞུམ་བག་ཏུ་གྱུར་པ་དང་། མིག་གི་རྫི་མ་བྱི་བ་དང་། མིག་རབ་རིབ་ཁྱེར་ཏེ་སྔོན་དམར་དུ་མཐོང་བ་དང་། མིག་ལེགས་པར་འབྱེད་མི་ནུས་པ་དང་། མིག་གི་རྩ་རྣམས་བརྩེ་བ་དང་། མིག་གིས་མི་མཐོང་བ་དང་། མིག་གི་སྤྲིན་ཁྲག་གིས་རྒྱས་ཏེ་དམར་
[33b.5]པོར་གྱུར་པ་དང་། མིག་རྫི་བོར་ཅན་མཆི་མ་རབ་ཏུ་མང་བ་དང་། རྫི་བོར་གྱི་དཀྱེལ་སྐྱེས་པ་ལས་ཁ་ཟས་མི་འཕྲོད་པ་དང་། གནོད་པའི་བག་བརྟེན་པ་ལས་ཀླད་པ་ན་ཞིང་མིག་གི་ཕྱེད་དང་། མགོ་བོའི་ཕྱེད་ན་སྟེ་དཀྲུགས་པ་སྙམ་བྱེད་པ་དང་། མིག་ལིང་ཏོག་བྱུང་བས་རླུང་ནད་དུ་གྱུར་པ་
[33b.6]དང་། རླུང་ནད་ཀུན་དུ་འགྲོ་བའི་ནད་དང་། མིག་ལིང་ཏོག་བྱུང་བ་དང་། འདི་ལྟ་བུའི་མིག་ནད་ཀྱིས་བཏབ་པ་རྣམས་ལ་མིག་ནད་དམར་པོར་གྱུར་པ་དང་། མིག་རྫི་བོར་ན་སྟེ་མཆི་མ་འཛག་པ་དང་མིག་ན་ཞིང་མིག་སྒོར་རྔུ་མ་ཆགས་ལ་ཅུང་ཟད་རྩེ་ཞིལ་ན། དེ་ལ་དཔྱད་དུ་བྱ་བ་ནི་སྔར་བཀྲུ་
[33b.7]སྨན་དང་། སྐྱུག་སྨན་སྣ་ནས་བཏང་སྟེ། མགུལ་པ་ཡན་ཆད་སྟོད་ཀྱི་ནད་བཀྲུས་ཏེ་བསྩལ་ལ། རླུང་ནད་ཀྱི་དུས་དབྱར་ཟླ་ཐ་ཆུངས་ལྟ་བུའི་ངོ་དང་། སྟོན་ཟླ་འབྲིང་པོ་ལ་མཁྲིས་པའི་ནད་ལྡང་བའི་དུས་དང་བད་ཀན་ལྡང་བའི་དུས་དཔྱིད་ཟླ་འབྲིང་པོའི་ངོ་ལ་བབ་སྟེ་དུས་འདི་དག་གི་ཚེ་
[34a]
[34a.1]སོ་སོའི་ནད་དམིགས་ཀྱི་ཚུལ་དང་སྦྱར་ལ་དེའི་ཚེ་གན་རྐྱལ་དུ་ཉལ། དེ་ནས་སྲན་མ་ཤ་བཏགས་ཏེ་སྦྲུས་པའི་ཆང་བུས་མིག་གི་མཐའ་མ་བསྐོར་ལ། འཕང་སོར་གཉིས་ཙམ་དུ་མཐོ་བ་བརྟན་པོར་བྱས་ན་མིག་ནད་རླུང་ངམ་མཁྲིས་པའམ། བད་ཀན་ཅི་ལས་
[34a.2]གྱུར་པའི་དམིགས་དང་སྦྱར་ཏེ་སྨན་མར་བཙོས་ལ་སྨན་མར་དེ་ལྟ་བུས་མིག་གི་ནང་དུ་ལྡུགས་ལ་ཁོང་ཤིག །མིག་ཏུ་མར་བླུགས་པ་དེ་ནི་མེ་ལ་མི་བསྲོ་བར་ཆུ་ཚན་པོས་སྲོས་ཤིག །ཡང་མཚན་མོ་མིག་གིས་མི་མཐོང་བ་དང་། རླུང་ནད་ལས་གྱུར་ཏེ་མིག་རབ་རིབ་ཁྱེར་བ་དང་། རྣ་བ་
[34a.3]མི་གསང་སྟེ་གོ་དཀའ་བ་འདི་ལྟ་བུ་ལ་ནི་ནང་གི་ལྟོ་ཚིལ་ལས་སྦྱར་བའི་སྨན་གོང་མའི་སྨན་མར་བཏང་བ་དང་འདྲ་བར་མིག་གི་རྫི་མ་མན་ཆད་ནུབ་པར་བཀང་ལ། དེ་ནས་མིག་བསྐྱོད་ཅིང་དབྱེ་བ་དང་འཛུམས་པ་ཡང་བྱས་ལ་སེ་གོལ་གྱི་གྲངས་བགྲང་ཞིང་ཚོད་ཟུང་ཤིག །ཚད་གཟུང་
[34a.4]བའི་དམིགས་ནི་མིག་གི་མཆུའི་པགས་པ་ན་བ་ལ་ནི་གྲངས་བརྒྱའི་བར་དུ་ཞོག་ཤིག །མིག་འགྲམ་གཉིས་ན་ན་གྲངས་སུམ་བརྒྱའི་བར་དུ་གཞག་གོ། །མིག་སྤྲིན་ལ་ནད་ཡོད་ན་གྲངས་ལྔ་བརྒྱའི་བར་དུ་ཞོག་ཤིག །མིག་གི་འབྲས་བུ་ནག་པོར་ནད་ཡོད་ན་གྲངས་བདུན་
[34a.5]བརྒྱའི་བར་དུ་གཞག་གོ། །མིག་གི་འབྲས་བུ་ནག་པོའི་ནང་གི་འབྲས་བུ་ནག་གུ་མཐོང་བར་བྱེད་པ་ལ་ནད་ཡོད་ན་བརྒྱད་བརྒྱའི་བར་དུ་ཞོག་ཤིག །མིག་གི་ཕྱེད་དང་ཀླད་པའི་གཞོགས་ཕྱེད་དཀྲུགས་པ་སྙམ་དུ་བྱེད་ཅིང་ན་བ་ལ་གྲངས་སྟོང་གི་བར་དུ་གཞག་གོ། །རླུང་ནད་ལས་གྱུར་
[34a.6]པའི་མིག་ནད་ལ་གྲངས་སྟོང་གི་བར་དུ་གཞག་གོ། །མཁྲིས་པ་ལས་གྱུར་པའི་མིག་ནད་ལ་གྲངས་དྲུག་བརྒྱར་གཞག་གོ། །ན་བ་མེད་ཅིང་ཉམས་ཐ་མལ་པ་ཞིག་ལ་མིག་སྨན་བླུགས་ན་ཡང་གྲངས་དྲུག་བརྒྱར་གཞག་གོ། །བད་ཀན་ལས་གྱུར་པའི་མིག་ནད་ལ་གྲངས་ལྔ་བརྒྱར་
[34a.7]གཞག་གོ། །དེ་ནས་སོ་སོའི་གྲངས་ཚང་བ་དང་། གླན་པ་བྱོ་སྟེ་མིག་འགྲམ་ལོགས་སུ་བཟུར་ཏེ། སྨན་མར་དེ་གཟག་ཅིང་སྣོད་ཀྱིས་བཟེད་དོ། །དེའི་རྗེས་ལ་སྨན་གྱི་དུད་པ་སྦུ་གུ་ནས་ཁར་རྔུབས་ཤིག །སྨན་དེ་ལྟར་བཏང་ནས་ནམ་མཁའ་ལ་མི་ལྟ། གཟུགས་འོད་ཅན་
[34b]
[34b.1]ལྷང་ལྷང་པོ་ལ་ལྟར་མི་རུང་ངོ་། །རླུང་ནད་ལས་གྱུར་པའི་མིག་ནད་ལྟ་བུ་ལ་ནི་ཆོ་གའི་ཚུལ་དང་འདྲ་བར་ཉིན་གཅིག་བཞིན་གྱིས་ཤིག །མཁྲིས་པ་ལས་གྱུར་པའི་མིག་ནད་ལ་ནི་སྨན་ཉིན་གཅིག་བླུགས་ལ་ཉིན་གཅིག་མི་བླུགས། བར་དུ་གཅོད་དོ། །བད་ཀན་ལས་གྱུར་པའི་མིག་ནད་
[34b.2]དང་མིག་ན་བ་མེད་དེ། ཉམས་ཐ་མལ་པ་ལ་གཏོང་བ་འདྲ་སྟེ། སྨན་ཉིན་གཅིག་བཏང་བ་དེ་ཕན་ཆད་ཉི་མ་གཉིས་ཀྱི་བར་དུ་བཅད་དེ། མི་གཏང་བར་བྱས་ལ་ཉི་མ་བཞི་ལོན་པ་དང་ཡང་གཏོང་བར་སྦྱར་རོ། །མིག་ཏུ་མིག་སྨན་བླུགས་ཤིང་བཏང་བ་ལན་གྲངས་སུ་བཏང་ན་
[34b.3]ཆོག་པའི་ཚད་ནི་མིག་གིས་གསལ་བར་མཐོང་ཤིང་རྟོགས་ནུས་ལ་མིག་ན་བ་མེད་ཅིང་མིག་གི་ནད་སྐྱོན་གྱི་དྲི་མ་མེད་ཅིང་གསལ་བ། མིག་ཡང་བར་ནམ་གྱུར་གྱི་བར་དུ་སྨན་བཏང་བ་དེ་ལྟར་གྱུར་པའི་ཚེ་ན་སྨན་གཏང་མི་དགོས་ཏེ་ཆོག་པའི་ཚད་ཡིན་ནོ། །དེ་ལྟར་མ་གྱུར་གྱི་བར་དུ་ནི་
[34b.4]སྨན་བཏང་བས་མི་ཆོག་པར་བལྟའོ། །མིག་ཏུ་སྨན་བཏང་ཞིང་བླུགས་པ་ཧ་ཅང་དྲགས་ན་ནི་བད་ཀན་གྱི་མིག་ནད་དུ་འགྱུར་རོ། །དེ་ལྟར་མིག་ཏུ་བླུགས་ཏེ་བཏང་བ་དེ་ཡང་དཔེར་ན་མར་འཐུངས་ནས་ལུས་སྙོམ་ཞིང་ལྕི་བ་དེ་དང་འདྲ་སྟེ། མིག་དེ་ཡང་ཅུང་ཞིག་མི་གསལ་བར་འགྱུར་
[34b.5]རོ། །དེ་ལྟར་མིག་ན་བ་ལ་སྨན་མར་བླུགས་ཏེ་མིག་ཏུ་གདབ་པར་བྱ་བའི་ཆོ་ག་བྱས་པའི་རྗེས་ལ་མིག་གིས་མཐོང་བར་བྱ་བའི་ཆོ་ག་བྱ་དགོས་ཏེ། གོང་དུ་སྨོས་པའི་མིག་ནད་མིག་གི་གྲྭ་དང་། མིག་གི་སྤྲིན་ལ་སོགས་པ་རྣམ་པ་ལྔ་ལྟ་བུ་ལ། སྨན་གྱི་ཆུས་མ་བཙོས་པའི་ཐིགས་པ་བཙིར་
[34b.6]ཏེ་མིག་ཏུ་བླུགས་པར་བྱའོ། །དེ་ཡང་རྣམ་པ་གསུམ་སྟེ། དེ་ལ་རླུང་ནད་ལས་གྱུར་པའི་མིག་ནད་ལ་ནི་མར་ལྟ་བུ་སྣུམ་བག་སྨན་ལ་བཙོས་པའི་ཁུ་བ་ཐོང་ཤིག །རླུང་དང་བད་ཀན་དུ་བཅས་པའི་མིག་ནད་ལ་ནི་སྨན་ཚ་ཞིང་རྣོ་བ་ལས་སྦྱར་བས་མིག་ནད་སྲབ་ཅིང་སྦྱང་བ་བྱས་ན་ཕན་ནོ། །
[34b.7]མིག་མཐོང་བའི་མཐུ་ཆུང་བ་དང་། མིག་ལ་རླུང་ནད་དང་མཁྲིས་པའི་ནད་ཡོད་པ་དང་། ཁྲག་ནད་ཀྱིས་མིག་དམར་པོར་གྱུར་པ་དང་། མིག་ན་བ་མེད་པའི་ཉམས་ཐ་མལ་དང་འདི་རྣམས་འདྲ་སྟེ། མིག་རྣོ་ཞིང་གསལ་བར་བྱ་བའི་ཆོ་ག་བྱའོ། །དེ་ལ་མིག་སྨན་སྣུམ་བག་ལས་སྦྱར་བ་ནི་ཁུང་
[35a]
[35a.1]དང་ཕུག་ན་ཉལ་བ་སྦྲུལ་དང་གཅན་གཟན་རྣམས་དང་། ཕྱི་བ་ལ་སོགས་པ་དང་། བྱ་ཁྲ་རྣམས་དང་། ཡུལ་སེར་ཆེ་བའི་ཚིལ་དང་། རྐང་དང་། ལྟོ་ཚིལ་དང་། ཤ་རྣམས་ནི་སྣུམ་བག་ཏུ་སྦྱར་བའི་སྨན་ཡིན་ཏེ། འོ་མ་དང་སྦྱར་བ་ལ་སྨན་ཛི་བནྟིའི་སྡེར་གཏོགས་པའི་
[35a.2]སྣ་བཅུ་ཡང་བརྡུངས། བཏགས་ལ་འདི་རྣམས་དང་ལྷན་ཅིག་སྦྱར་ཏེ་ཨེ་རཎྜའི་ལོ་མ་འམ་ཤིང་འབའ་ཏིའི་འདབ་མའམ་པདྨའི་འཇམ་པོས་དཀྲིས་ལ་འཇིམ་པ་བསྐུས་ཏེ། ཤིང་འདབ་པ་དང་། ལྕི་བའི་མེས་བསྲེགས་ལ་དེའི་ཁུ་བ་བཙིར་བའི་ཐིགས་པ་དྲོ་འཇམ་ཙམ་མིག་ཏུ་བླུགས་
[35a.3]ཤིང་དགང་བ་ནི་གོང་དུ་མིག་བརྟ་བའི་སྨན་བཏང་བ་དང་འདྲ་སྟེ་ཕུར་མའི་ཐིགས་པ་བླུགས་ལ་གྲངས་ཉིས་བརྒྱའམ་སུམ་བརྒྱའི་བར་དུ་སྡོད་ཅིག །འདི་ནི་སྣུམ་བག་ཕུར་མའི་སྨན་དཔྱད་ཡིན་ནོ། །མིག་ནད་དང་། སྲབ་ཅིང་སྦྱང་བའི་དཔྱད་ནི་རི་དགས་དང་། བྱའི་མཆེར་པ་
[35a.4]དང་། ཤ་དང་། ནོར་བུ་མུ་ཏིག་དང་། ལྕགས་དང་། ཟངས་ཀྱི་ཕྱེ་མ་དང་། རྒྱམ་ཚ་དང་། ལིག་བུ་མིག་དང་། དུང་དང་། རྒྱ་མཚོའི་དབུ་བ་དང་། བ་བླ་དང་། འདི་རྣམས་བཏགས་ཏེ་ཞོ་ག་ཆུ་དང་སྦྱར་ལ་གོང་མ་བཞིན་དུ་ཕུར་མར་བྱས་ཏེ་བཙོས་པའི་ཁུ་བ་བཙིར་ཏེ་མིག་ཏུ་
[35a.5]བླུགས་ན་མིག་ནད་ཀྱི་སྐྱོན་སྲབ་ཅིང་འབྱང་བར་འགྱུར་རོ། །མིག་རྣོ་ཞིང་གསལ་བར་བྱ་བའི་དཔྱད་ནི། རི་དགས་དང་བྱའི་མཆེར་པ་དང་། རྐང་དང་། ལྟོ་ཚིལ་དང་། རྒྱུ་མ་དང་། སྙིང་དང་། ཤ་རྣམས་དང་། སྨན་མངར་བག་དང་། མར་དང་། བུད་མེད་ཀྱི་ནུ་ཞོ་དང་སྦྱར་
[35a.6]ཏེ་བཏགས་ལ་གོང་མ་བཞིན་དུ་བྱུག་པ་བྱས་ཏེ་དཀྲིས་ལ་བཅིངས་ཏེ་འཇིམ་པས་གཡོགས་ནས་ཁམ་ཕོར་ཁ་སྦྱར་གྱི་ནང་དུ་བཅུག་སྟེ། ཁམ་ཕོར་གྱི་ཕྱི་རོལ་ཆོས་པའི་ཚད་དུ་བསྲེགས་ལ་ཚོས་པ་དང་། འཇིམ་པ་དང་ཕྱི་ཤུན་བོར་བ་ལ་སྨན་གྱི་ཁུ་བ་བཙིར་ཏེ་དྲོ་འཇམ་ཙམ་
[35a.7]མིག་ཏུ་བླུགས་ལ་ཇི་ཙམ་དུ་བསྡད་པའི་ཡུན་ཀྱང་སེ་གོལ་གྱི་གྲངས་སྔ་མ་བཞིན་དུ་གཟུང་ངོ་། །ཕུར་མ་བསྲེགས་པའི་དཔྱད་དེ་ལྟ་བུ་གང་འབྱོར་ཀྱང་རུང་སྟེ་ཤ་དང་སྨན་ལྟ་བུ་སྣ་རེ་ཡང་སྲང་རེའི་ཐང་དུ་སྦྱར་བར་བྱའོ། །མིག་ནད་ཀྱི་སྐྱོན་བྱང་ཞིང་བསྲབ་པར་བྱ་བ་དང་། རླུང་ནད་
[35b]
[35b.1]ལས་གྱུར་པའི་མིག་ནད་ལ་སྣུམ་བག་གི་སྨན་མིག་ཏུ་བླུགས་པ་ནི་སྔར་འཇམ་ཙམ་དུ་བྱས་ཏེ་བླུགས་ལ་ཕྱི་ནས་བསིལ་བར་བླུགས་སོ། །སྨན་དེ་གཉིས་བཏང་བའི་རྗེས་ལ་དུད་པ་སྦུ་གུ་ནས་བརྔུབ་པར་གྱིས་ཤིག །མིག་རྣོ་ཞིང་གསལ་བར་བྱ་བ་ལ་ནི་དུད་པ་བརྔུབ་མི་དགོས་སོ། །
[35b.2]མིག་བརྟ་བའི་སྨན་དཔྱད་གོང་དུ་བཤད་པ་དང་འདྲ་བར་འདིར་ཡང་མིག་མཐོང་བའི་སྟོབས་བསྐྱེད་པའི་ཆོ་ག་མི་ལྟ་བ་དང་། ཕུར་མ་བསྲེག་ཅིང་བཙོ་བའི་དཔྱད་བྱ་བ་ཡང་དེ་དང་འདྲའོ། །སྨན་སྣ་ནས་བཏང་དུ་མི་རུང་བ་ལ་མིག་བརྟ་བ་དང་། ཕུར་མ་བསྲེགས་པའི་དཔྱད་ཀྱང་བྱར་མི་རུང་
[35b.3]ངོ་། །དེ་ལྟར་མིག་སྨན་འདི་ལྟ་བུ་བཏང་བའི་ཚེ་སྨན་ཞག་གྲངས་སུ་བཏང་བ་དེ་ལས་ཁ་ཟས་བསྡམས་པའི་ཆོ་གའི་གྲངས་ཀྱང་ཉིས་འགྱུར་དུ་བསྐྱེད་དེ་བསྡོམས་ཤིག །མིག་སྨན་དེ་ལྟ་བུ་བཏང་བའི་ཚེ་མེ་ཏོག་དྲི་ཞིམ་པོ་དང་། སྤོས་དྲི་ཞིམ་པོ་ཉིན་མཚན་དུ་ལུས་དང་མགུལ་དུ་ཐོགས་
[35b.4]ཤིག །དེ་ལྟ་བས་ན་མིག་མཐོང་བ་འདི་ཉམས་ཏེ་མ་རུང་བར་གྱུར་ན་དངོས་པོ་སྣ་ཚོགས་དང་། སེམས་ཅན་རྣམས་མུན་པ་དང་འདྲ་བར་ཚུལ་གཅིག་ཏུ་གྱུར་ནས་མཐོང་བ་མེད་ཀྱིས་དེའི་ཕྱིར་མིག་གི་མཐུ་བསྐྱེད་པའི་དཔྱད་སྣ་ནས་གཏོང་བ་དང་། སྨན་གྱིས་མིག་བསྐུ་བ་དང་།
[35b.5]སྨན་མར་གྱིས་མིག་ཏུ་བླུགས་ཏེ་བརྟ་བར་བྱ་བ་ལ་སོགས་པའི་དཔྱད་ལ་ནན་ཏན་དང་། བརྩོན་འགྲུས་ཆེར་གྱིས་ཤིག །མིག་བརྟ་བའི་ཆོ་ག་ཞུན་མར་མིག་ཏུ་བླུགས་པ་དང་། སྨན་གྱི་ཐུམ་པོ་བསྲེག་ཅིང་བཙོས་པའི་ཁུ་བའི་ཐིགས་པ་མིག་ཏུ་བླུགས་པ་ལ་སོགས་པའི་ཆོ་གའི་ལེའུ་སྟེ་
[35b.6]ཉི་ཤུ་རྩ་བཞི་པ་རྫོགས་སོ།། །།གཞང་འབྲུམ་ཁྲག་ཚད་ལ་ཐལ་སྨན་རྣོན་པོ་གཏང་བའི་དཔྱད་དང་། མཚན་པར་རྡོལ་ལ་སྨན་གཏང་བའི་དཔྱད་དང་། ཁོང་དུ་མཚོན་ལུས་པ་ལ་སོགས་པ་དྲང་བའི་དཔྱད་ཀྱི་ཆོ་ག་བཤད་པའི་ལེའུ་ཉི་ཤུ་ལྔ་པ་བཤད་པར་བྱའོ། །དཔྱད་
[35b.7]རྣམ་པ་སྣ་ཚོགས་བཤད་པར་བྱ་སྟེ། ནད་དམིགས་རྣམ་པ་སྣ་ཚོགས་སུན་པ་ལ་དཔྱད་རྣམ་པ་སྣ་ཚོགས་ནད་དམིགས་ཀྱི་ཐོག་ཏུ་བབ་པ་ནང་དུ་བཏང་ལ་ནད་འདྲེན་པར་བྱེད་པའི་ཐབས་དེ་ནི་དཔྱད་ཅེས་བྱ་སྟེ། དེ་ལ་ཡང་གཞང་འབྲུམ་གྱི་ནད་དང་མཚན་པར་རྡོལ་བ་ལ་སོགས་པའི་ནད་ལ་
[36a]
[36a.1]ཐལ་སྨན་རྣོན་པོ་མེ་དང་འདྲ་བ་བཏང་བའི་ཚེ་ནད་དམིགས་བརྟག་ཅིང་དཔྱད་དང་སྨན་པ་དེ་ལུས་ཀྱི་ཤ་གཞན་ལ་མི་གནོད་པའི་དཔྱད་རྣམས་དང་། སྨན་བཏང་བ་དེ་ལུས་ཀྱི་ཤ་གཞན་ལ་མི་གནོད་པའི་བསྲུང་བའི་དཔྱད་དང་། རྐྱལ་བུ་ནས་སྨན་མས་གཏོང་
[36a.2]བའི་ཆ་བྱད་དང་། བུམ་བུ་དང་། ཀུ་བ་དང་། རྭ་དང་ཛམ་པ་པོ་ལ་སོགས་པའི་ཆ་བྱད་ཀྱི་ཚུལ་རྣམ་པ་དུ་མ་སྣ་ཚོགས་བློས་རྣམ་པར་བརྟགས་ཏེ་མདོ་ཅི་རན་ཙམ་དུ་བསྟན་ཏེ། ཆ་བྱད་དེ་རྣམས་ཀྱི་རྩེ་མོ་བྱ་དང་སེང་གེ་དང་དོམ་དང་བྱ་རོག་དང་རི་དགས་ལ་སོགས་པའི་ཁ་མཚུལ་འདྲ་
[36a.3]བར་ཆ་བྱད་བརྡུང་ཞིང་བྱས་ལ་མིང་ཡང་དེ་རྣམས་ལ་གདགས་སོ། །སྤྱད་ནི་ཕལ་ཆེར་ལྕགས་ལས་བརྡུངས་ཏེ་སྲིད་སོར་བཅོ་བརྒྱད་ཡོད་པ་ལ་སོགས་པ་བྱའོ། །ཆ་བྱད་དེ་རྣམས་སྐམ་པ་ལྟ་བུ་བྱས་ལ་གཉིས་ཀྱི་མགུལ་པའི་སྦྲེལ་མཚམས་ཀྱི་གཟེར་བུ་སྲན་ཆུང་གི་དབྱིབས་
[36a.4]དང་ཚད་ཙམ་གདབ་སྟེ། སྐམ་པའི་རྩ་བ་གཉིས་ནི་ལྕགས་ཀྱུ་ལྟར་ཡང་དགུག་པར་བྱ་སྟེ། དེའི་མིང་ནི་བདེ་ལེགས་ཀྱི་ཆ་བྱད་ཞེས་བྱ་སྟེ། སྤྱད་དེས་ནི་རུས་པ་ལ་ཟུག་རྔུ་བརྟན་པར་ཟུག་པ་དེ་འབྱིན་པ་ལ་སྦྱར་རོ། །ཡང་སྐམ་པ་གོང་མ་དང་འདྲ་བ་གཉིས་བྱས་ལ་གཅིག་ནི་ལྷག་
[36a.5]མ་ལྟར་ལྕགས་ཀྱི་གཟེར་བུས་གདབ། གཅིག་གི་གཟེར་ནི་རྩིག་པའི་སྐུད་པའི་གཟུངས་གདབ་སྟེ། དེ་ནི་རྩེ་མོ་བསྒུལ་པར་བདེ་བའི་ཕྱིར་ཡིན་ནོ། །དེ་གཉིས་ཀྱི་སྲིད་དུ་སོར་བཅུ་དྲུག་བྱ་སྟེ་དེས་ནི་པགས་པ་དང་། རྩ་དང་། རྒྱུས་པ་དང་། ཤ་ལས་ཟུག་རྔུ་ཟུག་པ་ལ་སྤྱད་
[36a.6]དོ། །ཡང་སྐམ་པ་སྲིད་དུ་སོར་བཅུ་དྲུག་པ་བྱས་ལ་རྩེ་མོ་རྟ་སྦྲུལ་གྱི་མགོ་འདྲ་བ་བྱས་པ་འགྱེད་ཅིང་གཞུམ་དུ་རུང་བར་བྱས་ཏེ། དེས་ནི་ཟུག་རྔུ་ཕྲ་མོ་དང་མིག་ལ་ཟུག་རྔུ་ཕྲ་མོ་ཟུག་པ་དང་། རྫི་མ་མ་རུངས་པ་འབྱིན་པ་ལ་སྤྱད་དོ། །ཡང་སྐམ་པ་རྩ་བ་གདུ་བུ་ལྟ་བུ་ཟླུམ་པོ་ལ་རྩ་མོ་ཤིན་ཏུ་
[36a.7]ཕྲ་བར་བྱས་པ་དེ་ནི་སྤྱད་མུ་ཙི་ཏྲི་ཞེས་བྱ་སྟེ། དེས་ནི་ཤའི་ནང་དུ་མཚོན་གཏིང་ཟུག་པ་དང་། མིག་མཛེར་སྐྱེས་པ་འབྱིན་པ་ལ་སྦྱར་རོ། །ཡང་ཉིས་ཁ་ལྟ་བུ་ཆ་བྱད་གཉིས་བྱ་སྟེ། དེ་ཡང་བྱའོ། །ལྷག་མ་ནི་གཞང་འབྲུམ་གྱི་ཆ་བྱད་བཞིན་དུ་བྱ་སྟེ། དེས་ནི་སྣ་ནང་གི་འབྲུམ་བུ་དང་།
[36b]
[36b.1]ཐོར་བུ་བཅད་པ་ལ་སྦྱར་རོ། །སྨན་པ་ནད་པའི་ཁ་དང་ལྐོག་མའི་ནང་དུ་སྤྱད་པ་ན་སྨན་པའི་མཛུབ་མོ་སོའམ་ཤིང་ལས་ནང་སྦུབས་སུ་བྱས་ཏེ། དེ་ཡང་དབྱིབས་པའི་ནུ་སོར་འདྲ་བ་སོར་བཞི་པར་བྱས་ཏེ། བུ་ག་གཉིས་པ་བྱས་ལ་སྨན་པའི་མཛུབ་མོ་བཅུག་སྟེ། གཟན་དུ་བྱས་ལ་དེ་ནས་སྐུད་
[36b.2]པ་གཉིས་ཀྱིས་བཏགས་ཏེ་མཁྲིག་མ་ལ་བརྟོད་ཅིང་བཅིང་ངོ་། །མོ་མཚན་གྱི་ནང་གི་ནད་བརྟག་པའི་ཆ་བྱད་ཐུར་མ་བཞི། སྲིད་དུ་སོར་བཅུ་དྲུག་པ་བྱས་ཏེ། གདུ་བུ་རན་པ་ཞིག་ཀྱང་བྱས་ལ་དེའི་ཕྱོགས་བཞི་ནས་ཐུར་མའི་དཀྱིལ་དམ་དུ་བཅིངས་ན། རྩེ་མོ་པདྨ་ཁ་འཛུམས་པ་ལྟར་འགྱུར་ཏེ།
[36b.3]འཛུམས་ཕྱོགས་དེ་མོ་མཚན་གྱི་ནང་དུ་བཅུག་སྟེ་ནང་དུ་ཕྱིན་པ་དང་། ཐུར་མའི་རྩ་བ་བཞི་པོ་ཕྱི་རོལ་ན་ཡོད་པ་ལག་པས་བསྡམས་ཏེ་བཅངས་ན་ནང་གི་རྩེ་མོ་ཁ་གྱེད་པར་གྱུར་ཏེ། ཆ་བྱད་དེ་ནི་མོ་མཚན་གྱི་ནད་བལྟ་བ་ལ་སྦྱར་རོ། །ཡང་ཆ་བྱད་འཇམ་རྩི་སྦུ་གུའི་དབྱིབས་འདྲ་བ་སྲིད་དུ་སོར་
[36b.4]དྲུག་པར་བྱས་ལ་རྩེ་མོའི་བུ་ག་ནི་སྲན་མ་ཤོང་བ་ཙམ་བྱ། རྩ་བ་ལྒང་པའི་ཕྱོགས་ཀྱི་བུ་ག་ནི་མཐེ་བོང་ཤོང་བ་ཙམ་དུ་བྱ་སྟེ། པགས་པ་འཇམ་པོའི་ནང་དུ་སྨན་ཁུ་དང་བཀྲུ་བའི་ཆུ་དང་སྣུམ་དང་བཅས་པ་བཅུག་སྟེ། གག་པའི་རྩ་བར་བཅིངས་ལ་འཇམ་རྩི་ཐབས་སུ་བཏང་བ་དེ་ནི་རྨ་བུག་
[36b.5]འཆོས་ཤིང་འཁྱམས་པ་དང་། རྨ་དག་པའི་ཕྱིར་བཀྲུ་བ་ལ་སོགས་པའི་ཆ་བྱད་དུ་སྦྱར་རོ། །ཡང་ཆ་བྱད་འོ་མ་ལ་སོགས་པའི་སྦུ་གུའམ། རྨ་བྱ་ལ་སོགས་པའི་སྒྲོ་རྩའི་སྦུ་གུ་གོང་མ་གཉིས་ཀ་ནས་ཁ་ཡོད་པ་འདི་ནི་དམུ་ཆུ་དབྱུང་ཞིང་ཟག་པའི་ཆེད་དུ་སྤྱད་དོ། །ཡང་དུ་བ་བརྔུབ་པ་དང་།
[36b.6]མེས་གཏོང་བ་ལ་སོགས་པའི་ཆ་བྱད་རྣམས་ནི་རང་རང་གི་ནད་གསོ་བ་ལས་ལྟོས་ཤིག །དེ་ལས་རྔབས་རུ་ནི་དམའ་ལ་གདབ་ཕྱོགས་ཀྱི་ཁའི་ཞེང་ནི་སོར་གསུམ་ལ་སྲིད་དུ་སོར་བཅུའམ་བརྒྱད་ཡོད་པ། གཞིབ་པའི་བུ་ག་ནི་ཡུངས་ཀར་གྱི་འབྲུ་ཤོང་བ་ཙམ་བྱས་ཏེ། བུ་ག་དེའི་ཕྱི་ཁྱོན་ནི་
[36b.7]ནུ་སོར་གྱི་ཚད་ཙམ་དུ་བྱས་ཏེ། རྭའི་ཕྱི་རོལ་ནས་པགས་པ་སྲབ་མོས་ལེགས་པར་གཡོགས་པར་བྱ་སྟེ། དེ་ནི་རྔབས་རུའི་ཚད་བསྟན་པའོ། །དེ་ལ་ཆ་སྤྱད་ཀུ་བ་ནི་སྲིད་དུ་སོར་བཅུ་གཉིས་ལ་ཁྱུད་འཁོར་དུ་ནི་སོར་བཅོ་བརྒྱད་པ་ལ་དེའི་ཁ་ནི་ཟླུམ་པོ་ཞེང་དུ་སོར་གསུམ་མམ། བཞི་པ་
[37a]
[37a.1]བྱས་ཏེ་དེའི་ནང་དུ་རྩྭ་ཀུ་ཤ་འམ་རས་བལ་ལམ། གྲོ་ག་གང་ཡང་རུང་བ་བསྲེགས་པའི་དུད་པས་བཀང་ལ་དུ་བས་གང་མ་ཐག་ཏུ་དབྱུང་ལོང་མེད་པར་ཡན་ལག་གར་ན་བར་ཁ་སྦུབ་སྟེ་དུ་བ་དང་བཅས་པར་བཞག་ན། བད་ཀན་དང་ཁྲག་ནད་མང་དུ་འདྲེན་པར་བྱེད་དོ། །
[37a.2]དེ་བཞིན་དུ་བུམ་པ་ཡང་སྲིད་དུ་སོར་བཅུ་ཡོད་པར་བྱས་པ་དེ་ནི་ཉ་མགོ་ལྟ་བུའི་ཆ་བྱད་ཞེས་བྱ་སྟེ། འདི་རྣ་བའི་ནང་དུ་མཚོན་ཟུག་པ་དབྱུང་བར་སྤྱད་དོ། །དེ་ལ་སྦུ་གུའི་ཆ་བྱད་ནི་ནང་ཁོང་སྟོང་སྦུ་གུ་ཅན་རྩེ་མོ་གཅིག་གམ་ཡང་ན་དུ་མར་བྱས་ཏེ། སྲིད་ཇི་ཙམ་པར་ཁྱུད་འཁོར་བར་ཡང་དེ་ཙམ་
[37a.3]དུ་བྱས་ཏེ། དེ་ནི་བུ་ག་རྣམས་ཀྱི་ནང་དུ་ཟུག་རྔུ་ཟུག་ཅིང་ཞུགས་པ་དང་། ནང་ན་ནད་ཡོད་པ་རྣམས་བལྟ་ཞིང་ནང་ན་ཡོད་པའི་མཚོན་དང་མེ་དང་ཐལ་སྨན་གྱི་ལས་རྣམས་ཀྱང་ཆ་བྱད་འདི་འདོད་པ་ཡིན་ནོ། །དེས་ནི་བུ་གའི་འཛག་པ་འགགས་པ་ལ་ཡང་སྦྱར་རོ། །ཡང་ཆ་བྱད་སྲིད་དུ་
[37a.4]སོར་བཅུ་པའི་ཐུར་མ་བཞི་བྱས་ལ་ཡུ་བ་གཅིག་པར་བྱས་ཏེ། རྩེ་མོ་བཞི་ལ་གདུ་བུ་ལྟ་བུས་སྤྱི་མདུད་དུ་བྱས་ཏེ། ཞེང་དུ་ཁྱུད་པར་སོར་ལྔས་འཁོར་བར་བྱས་པ་ནི་ཁ་ལྔ་པ་ཞེས་བྱ་སྟེ། ཆ་བྱད་དེ་ནི་གྲེ་བ་དང་མགྲིན་པའི་ཟུག་རྔུ་ཚེར་མ་དང་གྲ་མ་ལ་སོགས་པའི་ཟུག་རྔུ་བལྟ་བ་དག་འབྱིན་
[37a.5]པ་ལ་སྦྱར་རོ། །ཆ་སྤྱད་སྲིད་དང་ཞེང་གི་ཚད་གོང་མ་དང་མཉམ་པ་ལ་འདིར་ཐུར་མ་གཉིས་པ་རྩེ་མོ་གདུ་བུས་བསྐོར་བ་དབྱིབས་གོང་མ་དང་འདྲ་བར་བྱས་ཏེ། འདིས་ཀྱང་མགྲིན་པའི་ཟུག་རྔུ་རུས་ཚལ་ལ་སོགས་པ་བལྟ་བར་བྱའོ། །དེ་བཞིན་དུ་ཆ་བྱད་ཁ་གཅིག་པ་འམ་ཁ་མང་དུ་
[37a.6]ཡང་རུང་སྟེ། ནང་སྟོང་པ་སྦུབས་ཅན་དུ་བྱས་པས་མགུལ་པའི་ཟུག་རྔུ་བལྟ་བར་བྱའོ། །ཡང་ཆ་བྱད་རྩེ་མོ་པདྨའི་སྙིང་པོ་འདྲ་བའི་སྲིད་སོར་བཅུ་གཉིས་ཡོད་པར་བྱས་ལ། རྩེ་མོ་ཕྱོགས་བཞི་ཆ་ཁོང་སྟོང་དུ་བྱས་པ་དེས་ནི་ཟུག་རྔུ་མི་འགུལ་བ་དེ་ལ་ཕུལ་ཞིང་འབྱིན་པ་ཡིན་ནོ། །གཞན་
[37a.7]ཡང་ཆ་བྱད་རྒུན་འབྲུ་འགོ་རྟ་ན་ཞེས་བྱ་བའི་དབྱིབས་འདྲ་བ་སྲིད་དུ་སོར་བཞི་ཞེང་དུ་ཁྱུད་པ་སོར་ལྔ་པ་བྱའོ། །བུད་མེད་ལ་ནི་ཁྱུད་པ་སོར་དྲུག་པ་བྱས་ཏེ། དེ་གཉིས་ཀྱང་ནང་ཁོང་སྟོང་སྦུབས་ཅན་ལ་སྦུ་གུ་གཉིས་པ་བྱའོ། །དེས་ནི་གཞང་འབྲུམ་གྱི་ནད་བལྟ་བར་བྱའོ། །ཡང་ཆ་བྱད་སྦུབས་
[37b]
[37b.1]ཅན་སྲིད་དུ་སོར་གསུམ་པ་ནང་གི་སྦུབས་སྟོང་པས་མཐེ་བོང་ཤོང་ཙམ་བྱས་ཏེ། དེ་ཡང་ནང་དུ་བཅུག་པའི་རྩེ་མོའི་སོར་ཕྱེད་དང་ཕྱིར་ལུས་པའི་རྒྱུས་སོར་ཕྱེད་པའི་པདྨའི་སྙིང་པོ་ལྟ་བུའོ། །ཆ་བྱད་ནང་ཁོང་སྟོང་ལ་གཡས་གཡོན་ནས་བུ་ག་མེད་པ་ཁར་དཀྲོལ་ལྟ་བུར་བྱས་པས་ནི་གཞང་
[37b.2]འབྲུམ་མནན་ཅིང་བཙིར་བ་ལ་སྦྱར་རོ། །མཚན་བར་རྡོལ་བའི་ནད་ནི་པདྨའི་སྙིང་པོ་ལྟ་བུའི་ནད་རྨའི་ཐན་འཁོར་དང་སྟེང་དུ་རྨའི་བུ་ག་མང་དུ་བྱུང་བ་ལ་ནི་རྣམ་པ་ཐམས་ཅད་དུ་ཁར་དཀྲོལ་ལྟ་བུའི་ཆ་བྱད་ཀྱིས་དབྱུང་ཞིང་ཞི་བར་བྱ་བ་མ་གཏོགས་པ་གཞན་གྱིས་ནི་མི་ནུས་སོ། །ཡང་ཆ་བྱད་
[37b.3]སྦུབས་ཅན་བུ་ག་གཅིག་པ་སྲིད་དུ་སོར་གཉིས་ཞེང་དུ་ཁྱུད་པར་མཛུབ་མོའི་ཚད་ཙམ་གཉིས་པ་ཞེང་དུ་འཁོར་བར་སོར་བཅོ་བརྒྱད་པ་ཁ་ཟླུམ་པོ་སོར་གསུམ་མམ་སོར་བཞིར་བྱས་ཏེ། གོང་མའི་རས་བལ་ལ་སོགས་པའི་དུད་པས་བཀང་ལ་གར་ན་བ་གླན་ན་ཕན་ཡོན་གོང་མའི་སྟེང་དུ་སྐྲན་
[37b.4]འཇུ་བར་བྱེད་དོ། །མཚོན་གྱི་ལས་ཀྱི་ཆ་བྱད་སྣ་ཚོགས་པའི་ཚུལ་དེ་ཡང་ཚད་ཇི་ལྟར་རིགས་པ་བཞིན་དུ་བརྗོད་པར་བྱའོ། །དེ་ལ་ཆ་བྱད་དེ་རྣམས་ལ་རྨ་ཚོལ་ནི་གཉིས་བྱ་སྟེ། དེ་ཡང་སྲིན་བུ་གན་རྒྱ་པ་དའི་དབྱིབས་ལྟ་བུའོ། །ཡང་ཆ་བྱད་སྲན་མ་ཆུང་ངུའི་ལོ་མ་ལྟ་བུའི་སོ་ཡོད་པ་
[37b.5]གཉིས་བྱ་སྟེ་དེ་ཡང་གཅིག་གི་སྲིད་ནི་སོར་བརྒྱད་པར་བྱ། ཅིག་ཤོས་ནི་སོར་དགུ་པར་བྱ་སྟེ། འདིས་ནི་བུ་གའི་ནང་དུ་ཟུག་རྔུ་ཟུག་པ་གཟུང་ཞིང་གསལ་བར་བྱའོ། །དེ་ལ་ཡང་དབྱེ་བ་རྣམ་པ་དྲུག་སྟེ་ཕུར་མ་ལྟ་བུའི་ཆ་བྱད་སྲིད་དུ་སོར་བཅུ་དྲུག་པ་དང་། སོར་བཅུ་གཉིས་པ་དང་
[37b.6]གཉིས་བྱའོ། །སྦྲུལ་གྱི་ཁ་ལྟ་བུ་ཐལ་སྨན་གཏང་བའི་ཆ་བྱད་སྲིད་དུ་སོར་བཅུ་གཉིས་པ་དང་སོར་བཅུ་པ་གཉིས་བྱའོ། །ཡང་མདའ་ལྟོང་འདྲ་བའི་ཆ་བྱད་གཉིས་བྱ་སྟེ། གཅིག་གི་སྲིད་སོར་བཅུ་གཉིས་པ་དང་། གཅིག་གི་སྲིད་སོར་བཅུ་པར་བྱ་སྟེ། ཆ་བྱད་དེ་གཉིས་ཀྱིས་ནི་
[37b.7]ཟུག་རྔུ་བསྒུལ་ཞིང་བསྐྱོད་པར་བྱའོ། །ཡང་ཆ་བྱད་ཕུར་པ་གཉིས་བྱ་སྟེ། དེ་ཡང་རྩེ་མོ་ལྕགས་ཀྱུ་གུག་པར་བྱས་པ་དེས་ནི་ཟུག་རྔུ་དྲང་ཞིང་འབྱིན་པ་ལ་སྦྱར་རོ། །ཡང་ཕུར་བུ་སྲིད་དུ་སོར་བརྒྱད་པ་རྩེ་མོ་གུག་པ་དེ་ནི་མངལ་གྱི་ཆ་བྱད་ཀྱི་ཕུར་བུ་ཞེས་བྱ་སྟེ། དེས་ནི་བུ་མངལ་ནང་དུ་ཤི་
[38a]
[38a.1]བ་དྲང་ཞིང་འབྱིན་པར་བྱེད་དོ། །ཡང་ཆ་བྱད་སྦྲུལ་གྱི་མགོ་བོ་གདེངས་པ་བཞིན་དུ་རྩེ་མོ་གུག་པར་བྱས་པ་འདིས་ནི་རྡེའུ་འབྱིན་པར་བྱེད་དོ། །ཡང་ཆ་བྱད་མདའ་ལྟོང་ལྟ་བུ་སྦོམ་ཞིང་རྩེ་མོ་ཟླུམ་པ་སྲིད་སོར་བཞི་པ་བྱས་པ་དེས་ནི་སོ་དྲང་ཞིང་དབྱུང་བར་སྦྱར་རོ། །ཡང་ཆ་བྱད་
[38a.2]དྲུག་བྱས་པ་དེའི་རྩེ་མོ་ཀུན་རས་བལ་གྱིས་དཀྲིས་ཏེ་དེ་ལས་ཀྱང་སྲིད་དུ་སོར་བཞི་དང་བཅུ་གཉིས་པར་བྱས་པ་འཇམ་པ་གཉིས་ཀྱིས་ནི་གཞང་གི་ནང་དུ་ནད་ཉེ་རིང་གང་ན་ཡོད་ཀྱང་རུང་སྟེ། ཐལ་སྨན་དང་སྣགས་པ་ལས་སྦྱང་ཞིང་བསལ་བའི་ལས་བྱའོ། །ཡང་སྲིད་དུ་སོར་དྲུག་པ་དང་། བདུན་
[38a.3]པར་བྱས་པ་གཉིས་ཀྱིས་སྣའི་བུ་གའི་ནང་དུ་སྣགས་པ་དང་། ཐལ་སྨན་གྱི་ལས་དང་སྦྱར་བ་ལ་སྦྱར་རོ། །ཡང་ཆ་བྱད་སྲིད་དུ་སོར་བརྒྱད་པ་དང་། སོར་དགུ་པ་གཉིས་ཀྱིས་ནི་རྣ་བའི་ནད་སྣགས་པ་དང་ཐལ་སྨན་གྱི་ལས་དང་སྦྱར་བ་ལ་སྦྱར་རོ། །ཡང་ཆ་བྱད་ཨ་ཤྭདྠའི་ལོ་མའི་རྩེ་མོ་ལྟ་
[38a.4]བུའམ། བླུགས་གཟར་གྱི་ཁ་ལྟ་བུའི་ཆ་བྱད་དེས་ནི་རྣ་སྤབས་དང་། དྲི་མ་སྦྱང་ཞིང་བསལ་བ་ལ་སྦྱར་རོ། །ཡང་ཆ་བྱད་སོར་རེ་བ་གསུམ་བྱ་སྟེ། དེས་ནི་རྨའི་ཐན་འཁོར་འཛམ་བུ་ལྟར་དམར་བ་ལ་གཙགས་པ་དང་། ཐལ་སྨན་དང་། མེའི་ལས་རེ་རེ་ལ་སྦྱར་རོ། །ཡང་ཆ་བྱད་ཁར་བ་ལྟ་
[38a.5]བུའི་དབྱིབས་ལ་རྩེ་མོ་དང་དབུས་ཟླུམ་པོ་རྩ་བ་ཕྱེད་པ་ལྟར་བྱས་པ་དེས་ནི་མིག་མཛེར་དང་། རྒྱུ་མ་སྦོམ་པོ་དང་ཕྲ་མོ་ལ་རྨ་བྱུང་བ་ལ་སྦྱར་རོ། །རྒྱ་ཤུག་གི་ཚི་གུ་ཕྱེད་བཀས་ལྟ་བུ་ལ། སོ་དང་བཅས་པའི་ཆ་བྱད་ཀྱིས་ནི་སྣའི་ཐོར་བུ་དང་འབྲུམ་བུ་གཅད་པར་བྱའོ། །ཡང་ཆ་བྱད་སྲིད་
[38a.6]དུ་སོར་བརྒྱད་དང་། རྒྱབ་སྒུར་ཞིང་སོར་ཅུང་ཟད་གུག་པ་གསུམ་བྱས་ཏེ། དེའི་སོ་ཡང་མཐེའུ་ཆུང་དང་གུང་མོའི་སེན་མོ་ལྟ་བུའི་སོ་བྱས་པ་དེ་ནི་ཐལ་སྨན་དང་། སྨན་གྱི་བྱུག་པ་དང་། བསྐུ་བ་ལ་སོགས་པ་ལ་སྦྱར་རོ། །ཕོ་མཚན་དང་མིག་སྨན་ལ་སོགས་པའི་ཆ་བྱད་ནི་རང་རང་གི་ལེའུ་ལས་
[38a.7]བསྟན་པ་ཡིན་ནོ། །དེ་ལ་ཉེ་བའི་ཆ་བྱད་ཅེས་བྱ་བ་རྡོ་ཁབ་ལེན་དང་། རྩ་མུན་ཛ་ལ་སོགས་པའི་ཐག་པ་དང་། རས་དང་རྡོ་དང་། ཐོ་བ་དང་། པགས་པ་དང་། སྲོག་ཆགས་ཀྱི་རྒྱུ་མ་དང་། ལྕེ་དང་རྟ་རྔ་དང་། ཤིང་གི་ཡལ་ག་དང་། སེན་མོ་དང་། སོ་དང་། ཉེ་བའི་སྤྱད་དེ་དག་གིས་ཀྱང་།
[38b]
[38b.1]ཕྱི་ནང་དང་། སྨིན་མ་སྨིན་དང་། དུས་དང་། ཡུད་ཙམ་ལ་སོགས་པའི་ཉེ་རིང་དང་། སྙིང་སྟོབས་དང་ལྡན་པའི་ནད་པ་དག་ལ་ཐབས་ཀྱི་བྱེ་བྲག་དང་། སྦྱོར་བ་ལ་མཁས་པའི་སྨན་པས་ནད་ཀྱི་བྱེ་བྲག་ལ་ཇི་ལྟར་འོས་ཤིང་རིགས་པར་སྦྱར་ཞིང་དཔྱད་བྱའོ། །ཆ་བྱད་ཀྱི་ལས་ཀྱང་བརྡུང་བ་དང་། བསྲུབ་
[38b.2]པ་དང་། དགང་བ་དང་། རྒྱུན་སྲད་དག་པར་བྱ་བ་དང་། ཐལ་སྨན་ལ་སོགས་པ་གདབ་པ་དང་། མཚོན་དབྱུང་བ་དང་། བཅིང་བ་དང་། བཙིར་བ་དང་། གཞིབ་པ་དང་། སྨད་པ་དང་། བསྟོད་པ་དང་། རྨ་བཙལ་བ་དང་། དྲང་པོར་བྱ་བ་དང་། དེ་དག་གི་གོང་དུ་བསྟན་པའི་ཆ་བྱད་ཀྱི་ལས་མདོར་
[38b.3]བསྡུས་པ་ཡིན་ནོ། །བྱ་ཀང་ཀའི་མཆུ་ལྟ་བུའི་ཆ་བྱད་ནི་ཆ་བྱད་ཐམས་ཅད་ཀྱི་ནང་ན་གཙོ་བོ་ཡིན་ཏེ། ཡན་ལག་དང་ལུས་དང་གནས་གང་དུ་ཡང་ནད་མེད་ཅིང་འཇུག་པར་བདེ་བ་དང་། ལེགས་པར་ཟུག་རྔུ་འབྱིན་ཅིང་འཛིན་པར་བྱེད་པ་ཡིན་ནོ། །གཞང་འབྲུམ་ཁྲག་ཚད་ལས་ཐལ་སྨན་རྣོན་པོ་གཏོང་
[38b.4]བའི་དཔྱད་དང་། མཚན་པར་རྡོལ་བ་ལ་སྨན་གཏོང་བའི་དཔྱད་དང་། ཁོང་དུ་མཚོན་ལུས་པ་ལ་སོགས་པའི་དྲང་བའི་དཔྱད་ཀྱི་ཆོ་གའི་ལེའུ་ཉི་ཤུ་ལྔ་པ་རྫོགས་སོ།། །།གཏར་སྤྱད་རྣམ་པ་སྣ་ཚོགས་པ་བཤད་པའི་ལེའུ་ཉི་ཤུ་རྩ་དྲུག་པ་བཤད་པར་བྱའོ། །གཏར་སྤྱད་ནི་ཉི་ཤུ་རྩ་དྲུག་
[38b.5]ཡོད་དེ་མགར་བ་མཁས་པས་དཔྱད་བཞིན་དུ་བརྡུངས་ལ། རྣོ་ཁྱད་ནི་སྤུ་ཆོད་པ། གཏར་སྤྱད་ཀྱི་ཚད་ནི་ཕལ་ཆེར་ནི་སོར་དྲུག་པ་ཤ་སྟག་བྱས་ལ། ཚུལ་ལེགས་ཤིང་ངར་གདགས་ལེགས་པ། ཡུ་བ་གཟུང་བདེ་བ་དེ་ལྟ་བུར་བྱའོ། །སོ་ལ་མཐོ་དམན་གྱི་ཡ་ཡོ་མེད་ཅིང་ལྕགས་ཁོང་དུ་
[38b.6]མཁྲེགས་ཤིང་འཐར་ལེགས་པ་རབ་ཏུ་རྣོ་བར་བྱས་པ་མདོག་འཇམ་ཁྱད་མེ་ཏོག་ཨུཏྤལ་དང་འདྲ་བ་དེ་དག་གི་མིང་ཡང་མིང་ཉིད་དང་འདྲ་བར་ཆ་སྤྱད་ཀྱི་ཚུལ་གཟུགས་ཀྱང་དེ་དང་འདྲ་བར་བྱའོ། །གཏར་སྤྱད་སྣ་ཚོགས་ཀྱི་ཡུ་བ་མ་གཏོགས་པར་འབྲས་ཀྱི་ཚད་ནི་སོར་ཕྱེད་དང་བཞི་པར་
[38b.7]བྱའོ། །གཏར་སྤྱད་ཀྱི་འབྲས་ཀྱི་ཚད་ཕལ་ཆེར་སོར་གཉིས་པ་དང་སོར་གསུམ་པར་བྱའོ། །དེ་དག་གི་སོ་སོའི་དབྱིབས་ཀྱི་བྱེ་བྲག་ནི་རྩེ་མོའི་དབྱིབས་དཀྱིལ་འཁོར་འདྲ་ལ་སོ་ནི་མཛུབ་མོའི་སེན་མོའི་ཁའི་དབྱིབས་འདྲ་བར་བྱའོ། །འདིས་ནི་བཞར་ཅིང་གཅོད་པར་བྱེད་དེ། མིག་གི་
[39a]
[39a.1]མཆུའི་ཤ་དང་། རྙིལ་སྐྱེས་པ་དང་། རྙིལ་སྐྲངས་པ་དང་། ཁ་དང་གྲེ་བར་ཤ་ལྷག་སྐྱེས་པ་དང་། ལྕེའུ་ཆུང་བཅད་པ་དང་། ཤ་ལྷག་དང་ཤ་རྨེན་བཞར་བའོ། །འཕེལ་གཙགས་ཞེས་བྱ་བའི་དབྱིབས་ནི་སྤུ་གྲི་འདྲ་སྟེ། དེས་ནི་གཅོད་པ་དང་དྲལ་བ་དང་བརྟོལ་བར་
[39a.2]བྱའོ། །གཙགས་རྩེ་དྲང་པོ་ཞེས་བྱ་བ་ནི་འོར་ནད་དང་སྐྲངས་པ་ལ་གདབ་པོ། །སྐྲངས་པའི་རྔམས་སྟུག་ན་ནི་གཙགས་བུ་དེ་ལས་གཞན་དུ་བསྒྱུར་རོ། །གཙགས་བུ་རྩེ་གུག་ཅེས་བྱ་བ་ལྟག་པ་ནི་རིང་། སོ་ནི་ཐུང་སྟེ་ནད་ཀྱི་ཚུལ་ཅི་འདྲ་ལས་བྱའོ། །གཙགས་བུ་དབྱིབས་མེ་ཏོག་ཨུཏྤ་ལ་འདྲ་
[39a.3]བ། སོའི་སྲིད་ལ་སོར་གཉིས་ཡོད་པ་འདིས་དྲལ་བ་དང་གཅད་པར་བྱའོ། །གཙགས་བུ་ཁ་དབྲག་སྦྲུལ་གྱི་ཁ་ལྟར་འདུག་པ། སོ་ཉི་ཚེ་ལས་སོར་གཉིས་འདུག་པ་འདི་ནི། སྣ་དང་རྣ་བ་ལ་ཐོར་བུ་བྱུང་བ་དང་། གཞང་འབྲུམ་གཅད་པའོ། །ནད་དམིགས་བཙལ་བའི་ཆ་བྱད་རྟ་བླ་བའི་མགོ་བོ་
[39a.4]འདྲ་བར་བྱས་པ་དེས་ནི་བཅལ་ཅིང་དྲལ་བའི་སྔ་རོལ་དུ་བརྟག་པར་བྱའོ། །གཞན་ཡང་ཁབ་རྩེ་ཞེས་བྱ་བ་ཞིག་ཡོད་པ། ཡུ་བ་ཕུག་སྟེ་ཐགས་གཟུངས་བཏགས་ལ་འདིས་ནི་དྲལ་བར་བྱའོ། །སྟར་བུའི་ལོ་མ་འདྲ་བའི་གཙགས་བུས་ནི་དབུག་པར་བྱའོ། །ཁྲག་གཟག་པར་བྱ་བ་མདའི་
[39a.5]བུ་གའི་ཁ་འདྲ་བ་གསུམ་དུ་བྱས་པ་དང་། འཇག་མ་ཀུ་ཤ་དང་། རྩ་ཨ་ཊའི་རྩེ་མོ་འདྲ་བར་བྱས་པ་འབྲས་གཉིས་ཀ་ལ་སོར་གཉིས་ཡོད་པ་དེས་ནི་ཕོ་མཚན་གྱི་ནད་ལ་གདབ་བོ། །གཙགས་བུའི་འབྲས་ཟླ་བ་ཁམ་པ་འདྲ་བར་བྱས་པ་སོ་ནང་དུ་ལྟ་བ། གཙགས་བུའི་ནང་གི་འབྲས་ཀྱི་
[39a.6]སོ་ལ་སོར་ཕྱེད་ཡོད་པ་འདིས་ནི་རྣ་བ་ན་བ་དབུག་པ་དང་། འོར་དུ་སྐྲངས་པ་སྨིན་པ་དང་། མ་སྨིན་པ་གཉིས་ཀ་ལ་གདབ་པར་བྱའོ། །རྩ་དང་ལྟ་བ་ལ་གདབ་པའི་གཙགས་བུའི་དབྱིབས་རྩེ་འབྲས་འདྲ་བ། སོའི་འབྲས་ལ་སོར་ཕྱེད་དང་གཉིས་ཡོད་པ་དེས་གདབ་པོ། །འཕྲལ་རྩ་རུས་
[39a.7]པའི་སྟེང་ན་སྦོམ་པོ་སྣང་བ་ལ་གདབ་པའི་གཙགས་བུ་སྟེ་ར་བ་ལང་གི་མདུན་སོ་འདྲ་བར་བྱས་པ་དེའི་ཡུ་བ་གྱེན་དུ་བསྟན་ལ། འཕྲལ་རྩར་བེམ་ཏོལ་གྱིས་གདབ་པོ། །མོ་མཚན་མ་རུངས་པར་གྱུར་པ་ལ་ཟངས་མའི་ཐུར་མ་ཡ་ཐོག་མ་ཐོག་གི་ཐོར་ཏོའི་དབྱིབས་མེ་ཏོག་ཁ་འདུས་པ་འདྲ་
[39b]
[39b.1]བར་བྱས་པ་དེས། ཕོ་མཚན་གྱི་བུ་ག་ནས་གསུལ་ཏེ་བསལ་ལོ། །ལྕེ་ཁྱི་བ་སྐྲངས་ཏེ་ན་བ་ལ་མཚོན་རྒྱ་འདྲ་བའི་ཐ་མ་ལྷག་པར་ཕྱིར་བྱུང་བར་བྱས་ལ། སོར་ཕྱེད་ཡོད་པ་དེས་རྩེ་མོའི་ཁོར་ཡུག་དཀྱིལ་འཁོར་འདྲ་བ་འམ། ཡང་ན་ཞལ་ཞལ་འདྲ་བའི་ལྕགས་བུ་འདྲ་བར་བྱས་པས།
[39b.2]ལྕེ་ཁྱི་བའི་ཐོར་ཏོ་ལ་རྨ་བྱུང་ངམ། ཡང་ན་བཀས་ཏེ། ཁྲག་དབྱུང་ངོ་། །གྲེ་བ་དང་མགུལ་པ་སྐྲངས་པ་དང་། འབྲུམ་བུ་བྱུང་བ་ལ་མགུལ་རྒྱ་ཡུ་བ་ཅན་དུ་བྱས་ཏེ་སྲད་བུས་བཏགས་ཏེ་མཛུབ་མོའི་ཐོར་ཏོ་ལ་བཏགས་ལ་དྲིལ་ལོ། །ལྕེ་ཁྱི་བ་སྐྲངས་པ་དང་། ཁའི་ནང་དུ་ཤ་ལྷག་གམ་
[39b.3]ཐོར་བུ་ཆེན་པོ་བྱུང་བ་གཟུང་ཞིང་གཅད་པའི་ལྕགས་ཀྱོ་རབ་ཏུ་གུག་པར་བྱས་ལ་དྲང་ཞིང་གཅད་དོ། །རུས་པ་ལྷག་པ་གཅད་པའི་སོག་ལེ་སྲིད་སོར་བཅུ། ཞེང་སོར་གཉིས། སོག་ལེའི་སོ་རབ་ཏུ་ཕྲ་བ་ལས་ཡུ་བ་དམ་པོར་བྱས་པ་དེས་རུས་པ་གཅད་དོ། །རྨ་དང་ཆུ་བ་དང་རྒྱུས་པ་གཅད་པ་
[39b.4]དང་། སྐྲ་བྲེག་པའི་ཆན་པ་བྱའོ། །ཆན་པ་འདྲ་བ་ཡོན་པོ་སོ་དྲང་བ་སོ་གཉིས་པར་འདོད་པའི་སེན་མོ་བྲེག་པ་ལ་མཚོན་སྲིད་སོར་དགུ་པར་བྱས་ལ་དེས་ནི་ཤིང་གི་ཚལ་པ་ཟུག་པ་དབྱུང་བ་དང་། གཅད་པ་དང་། གཟལ་བ་དང་། དྲུད་པ་དག་བྱའོ། །ཕྱི་ཞིང་བདར་བའི་སྤྱད་གྲུ་བཞི་
[39b.5]ལ་སོ་ཡ་གཅིག་བཏོད་ལ་ཁ་ཟླུམ་པོར་བྱས་པ་དེ་ནི་སོ་ཕྱི་ཞིང་བརྡར་བ་དང་། སོའི་དྲེག་པ་ཕྱི་བར་བྱའོ། །ཁབ་ཀྱི་སྲིད་སོར་གསུམ་པ་ལ་མགོ་ཟླུམ་པོ་མིག་གི་ཟབས་ཆེར་བཏོད་པ་ཁ་སྲབ་པར་བྱས་པ་དེ་ལྟ་བུ་གསུམ་དགོས་ཏེ་མི་ཤ་ཆེན་པོ་སར་ནི་མགོ་ཟུར་གསུམ་པ་སྲིད་སོར་གསུམ་
[39b.6]ཡོད་པར་བྱའོ། །ཤ་ཆུང་བ་དང་། རུས་པ་དང་ཚིགས་ཀྱི་བར་ན་རྨ་ཡོད་པ་རྣམས་ལ་སྲིད་སོར་གཉིས་པར་བྱའོ། །ཕོ་བ་དང་ལོང་ཀའི་གནས་ཀྱི་ཕྱིའི་པགས་པ་རྡོལ་ན་འདྲུབ་པའི་ཁབ་རྩེ་ནས་ཀྱི་དབྱིབས་འདྲ་བ་གཞུ་འདྲ་བའི་དབྱིབས་དགུའོ། །སྲིད་སོར་ཕྱེད་དང་གསུམ་པར་
[39b.7]བྱས་པ་དེས་དྲུབ་པོ། །བརྩན་སྔོན་པོ་འམ། སྨུག་པོ་ལྟ་བུའམ་ལག་པ་བུར་ཏེ་བསྐྱོད་མི་ནུས་པ་དང་། སྐྲ་འབྱི་བ་འདི་ལྟ་བུ་ལ་ཁབ་བདུན་ནམ་བརྒྱད་ཀུན་ཀྱང་ཟླུམ་པོར་བྱས་པ་སྲིད་ལ་སོར་བཞི་ཡོད་པ་གཅིག་པུ་སྦམས་ཏེ་ཁྲིའུ་ལ་རྩ་བ་བཙུགས་ལ་དེས་གཙག་ཅིང་ཞལ་ཞལ་བྱས་ཏེ་
[40a]
[40a.1]ཁྲག་ནད་དབྱུང་ངོ་། །ཁབ་བརྒྱད་ཀྱི་སོ་ཟླུམ་པོ་སོར་ཕྱེད་པར་བྱས་ལ། སྦམས་ཏེ་སྣའི་བུ་གར་བཅུག་ལ་ལག་པས་གཙུབ་སྟེ་སྣའི་ཁྲག་དབྱུང་ངོ་། །རྣ་ཤལ་དབུག་པའི་སྨྱུང་བུའི་རྩེ་མོ་ཟླུམ་པོ་མེ་ཏོག་ཡུ་ཏི་ཀ་དང་། མུ་ཁུ་ལ་ཁ་འབུས་པ་འདྲ་བ་སོར་ཕྱེད་པར་བྱས་པ་
[40a.2]དེས་རྣ་བའི་དྲུང་དབུག་གོ །སྨྱུང་བུ་དེའི་ཞབས་སོར་བཞི་པ་བྱའོ། །རྨ་སྐྲངས་པ་གསར་རྙིང་གི་བག་བཙལ་བ་ཡང་འདི་ལས་བྱའོ། །རྨ་དྲུང་གི་ཤ་སྟུག་པོ་ལ་དབུག་པའི་སྨྱུང་བུའི་རྩེ་མོ་ཁ་སྦོམ་ལ་སུམ་ཆ་སྦུ་གུ་ཡོད་པར་བྱས་ཏེ། སྲིད་སོར་གསུམ་པ་དེས་རྣ་བ་ཕུག་ཤིག །གཞན་
[40a.3]ཡང་གཏར་སྤྱད་ཀྱི་མཚོན་མ་ཡིན་པ་སྲིན་བུ་ཛ་ལུ་ཀ་ཞེས་བྱ་བ་ཆུ་ནང་ན་གནས་པ་དང་། ཐལ་སྨན་རྣོན་པོ་གཤའ་ར་དང་། མེ་བཙའ་གདབ་པ་དང་། མེ་ཤེལ་མཆིང་བུའི་དུམ་བུ་དང་། ནོར་བུ་ཀུན་པིན་ཏ་དང་། རྒྱ་མཚོའི་ལྦུ་བ་དང་། རྡོ་བ་དང་། ལྕི་བ་སྐམ་པོ་དང་། སེན་མོ་
[40a.4]གདབ་པ་འདི་རྣམས་ནི། གཏར་གས་གདབ་པའི་མཚོན་གཙགས་བུ་འདྲ་སྟེ། ནད་ཀྱི་དམིགས་དང་སྦྱོར་ལ་གྱིས་ཤིག །གཞན་ཡང་འཁྲུལ་འཁོར་གྱི་ཆ་བྱད་མཁོ་བས་ནད་ཐབས་ཀྱི་དམིགས་དང་སྦྱོར་བ་བྱེད་པས་འདྲེན་ཅིང་འབྱིན་པ་དང་། དྲལ་བ་དང་། དྲུབ་པ་དང་། ནད་
[40a.5]དམིགས་ཚོལ་བར་བྱེད་པ་དང་། ཕྱི་ཞིང་སྣིགས་བྱ་བ་དང་། ཞལ་ཞལ་གདབ་པ་དང་། གཙགས་པ་དང་། གཅད་པ་དང་། གཤེགས་པ་དང་། དབུག་པ་དང་། གཙུབས་པ་དང་། སྐམ་བུས་གཟུང་བ་དང་། མེ་བཙས་གདབ་པའི་ཐབས་བྱའོ། །གཞན་ཡང་གཏར་སྤྱད་
[40a.6]ཀྱིས་མཚོན་གཅད་པ་དང་། དྲལ་བ་དང་། ཕྱི་བརྡར་བྱ་བ་ཐོར་ཏོའི་འབྲས་དང་། རྩ་བའི་བར་དུ་མཛུབ་མོ་དང་། གུང་མོ་དང་། མཐེ་བོང་གསུམ་གྱིས་ལེགས་པར་བཟུང་ལ་གཅད་པ་དང་དྲལ་བ་ལ་སོགས་པ་བྱའོ། །ཁྲག་དབྱུང་བའི་གཙགས་བུའི་རྩེ་མོའི་སོ་འབྲས་འདྲ་བ་དེ་
[40a.7]རྩེ་མོའི་དྲུང་དུ་མཛུབ་མོ་དང་གུང་མོ་དང་མཐེ་བོང་གསུམ་གྱིས་བཟུང་ལ་ཡུ་བ་ཆད་པའི་ནང་དུ་བཅུག་སྟེ་གཏར་ཞིང་ཁྲག་དབྱུང་ངོ་། །གཏར་ཞིང་དབྱུང་བ་ཞིག་ཡོད་ན། ཡུ་བ་ནས་བཟུང་ལ་གདབ་པོ། །གཏར་སྤྱད་སྣ་ཚོགས་ཀྱི་སྣོད་ནི་གསོ་རས་སམ་བལ་གྱི་སྣམ་བུ་འམ་མེན་ཏྲི་འམ།
[40b]
[40b.1]དུ་ཀུ་ལའམ། པགས་པ་འཇམ་པ་རབ་ཏུ་སྟུག་པོར་བྱས་པ་ཞེང་སོར་དགུ་སྲིད་སོར་བཅུ་གཉིས་ཡོད་པ། ནང་སྣམ་བུས་བར་ཚང་ཅན་དུ་བྱས་པའི་བར་དུ་གཙགས་སྤྱད་མ་སྣད་པར་བཞག་ལ། ཁ་དྲུབས་པ་སྒྲོ་གུ་ཅན་དུ་བྱས་ཏེ་དྲུབ་ཏུ་རུང་བར་བྱས་ལ་དེའི་ནང་དུ་གཏར་སྤྱད་
[40b.2]སྩོགས་ཤིག །ཁྲག་དབྱུང་སླ་བར་བྱ་བའི་ཕྱིར་ཆུའི་ནང་ན་གནས་པའི་སྲིན་བུ་པད་པ་ཞེས་བྱ་བ་དེས། ཁྲག་གང་དུ་དབྱུང་བའི་སར་ཁྲག་འཇིབ་ཏུ་གཞུག་གོ། །སྲིན་བུ་པད་པ་དེ་ཆུ་ངན་པའི་ནང་དུ་འདུག་གམ། ཉ་དང་ལྷན་ཅིག་གནས་སམ། སྦལ་པ་ལ་སོགས་པ་དང་། མི་
[40b.3]རོ་དང་ཆུ་རྙོག་མ་ཅན་གྱི་ནང་ནས་བྱུང་བ་པད་པའི་ཁ་དོག་དམར་པོ་དང་དཀར་པོ་དང་། སྲིན་བུ་རབ་ཏུ་གནག་ལ་རོ་རྒོད་ཅིང་སྦོམ་པ་འབྱིལ་བ་དང་འཇའ་ཚོན་ལྟར་འདུག་པ་དང་། རོ་སྟོད་ཚོན་སྣ་ཚོགས་སུ་བཀྲ་བ་དང་པད་པའི་ལུས་ལ་སྤུ་ཡོད་པ་དེ་རྣམས་ནི་དུག་ཡོད་པ་ཡིན་ཏེ་བོར་
[40b.4]ཅིག །གལ་ཏེ་དེ་ལྟ་བུས་ཁྲག་གཞིབས་ན་གཡན་པ་དང་། རྨ་ཁ་སྐྲངས་ཏེ་རྣག་ཟག་པ་དང་། རིམས་དང་མགོ་འཁོར་བར་འགྱུར་རོ། །དེ་ལྟ་བུའི་ནད་ཀྱིས་བཏབ་ན་དུག་བསལ་བའི་སྨན་དཔྱད་དང་། མཁྲིས་པ་དང་ཁྲག་ནད་བསལ་བའི་དཔྱད་ཆོ་ག་བྱའོ། །སྲིན་བུ་པད་པ་
[40b.5]གདུག་པ་མ་ཡིན་པ་ཁྲག་འཇིབ་ཏུ་རུང་བའི་གནས་ཆུ་མདོག་གསལ་བ། ཉ་ལྕིབས་ཡོད་པའི་ནང་ནས་བྱུང་བ་མི་གདུག་པ་མདོག་རྩ་སྣར་བ། ལུས་གཟུགས་ཟླུམ་པ། པད་པའི་ལུས་ཀྱི་སྟོད་སྔོ་བཀྲར་འདུག་པ་རྒྱབ་ངུར་སྨྲིག་གི་ཁ་དོག་ལྟ་བུ་ལ། ལུས་ཕྲ་བ། ལྟོ་ན་ཅུང་ཟད་
[40b.6]ཙམ་སེར་བ་ནི་རུང་ངོ་། །དེ་ཡང་སྔར་ཁྲག་འཐུངས་ཏེ་ལེགས་པར་ཁྲག་མ་སྐྱུགས་པ་དང་། རྟག་ཏུ་ཁྲག་འཐུང་དུ་གཞུག་གཞུག་པ་དང་། ཁྲག་འཐུངས་དྲགས་ཏེ་མྱོས་པ་དང་དེ་ལྟ་བུ་ནི་མི་རུང་གི་བོར་ཅིག །སྲིན་བུ་པད་པ་གདུག་པ་མ་ཡིན་པ་དེ་ལྟ་བུ་རྙེད་ནས། ཡུང་བ་བཏགས་
[40b.7]པ་དང་ཆུ་སྦྱར་བ་འམ་འབྲས་རྩབས་ཀྱི་ནང་ངམ་དར་བའི་ནང་དུ་སྲིན་བུ་པད་པ་དེ་དག་དབུགས་ཕྱུང་སྟེ། དེ་ནས་གང་དུ་ན་བའི་དམིགས་དེར་ཁྲག་འཇིབ་ཏུ་གཞུག་ན། མར་རམ། ལྡེ་གུ་འམ། བུད་མེད་ཀྱི་ནུ་ཞོ་འམ། གཞན་གྱི་ཁྲག་བྱུང་བའི་ཐིགས་པས་བསྐུས་པ་དེ་ལ་སྲིན་བུ་པད་པའི་ཁ་
[41a]
[41a.1]གླན་ཏེ་ཁྲག་འཐུང་དུ་བཅུག་ལ་ཁྲག་འཐུངས་པའི་ཚེ་ན་རོ་སྟོད་མཐོ་བར་གྱུར་ན་ཁྲག་ལེགས་པར་འཐུངས་པ་ཡིན་གྱིས་སྟེང་དུ་རས་སྲབ་མོ་ཞིག་གིས་གཡོགས་ཤིག །སྲིན་བུ་པད་པ་དེ་ནད་ཁྲག་དང་ཁྲག་བཟང་པོ་འདྲེས་པར་འདུག་པ་ལ་དང་པོར་ནད་ཁྲག་འཐུང་བར་
[41a.2]བྱེད་དོ། །དཔེར་ན་ཆུ་དང་འོ་མ་བསྲེས་པ་ལ་ངང་པས་འོ་མ་དང་ཆུ་ཕྱེད་དེ་འོ་མ་འབའ་ཞིག་འཐུང་བ་དང་འདྲའོ། །སྲིན་བུ་པད་པས་ཁྲག་འཐུངས་པ་ལས། ཅི་ཙམ་ན་སྲིན་བུའི་སོས་འདེབས་པས་ནའམ་གཡའ་བར་གྱུར་ན་ཕྱུང་ལ་སྲིན་བུ་དེ་སླར་སྐྱུགས་པ་བྱས་ལ། ལྕེ་མྱང་ཚ་དང་
[41a.3]ཏིལ་མར་དུ་སྦྱར་ལ་སྲིན་བུའི་ཁ་བསྐུས་ཏེ། འབྲས་ཀྱི་ཕྱེ་མ་འཇམ་པོས་སྲིན་བུའི་རྒྱབ་ཏུ་གཏོར་ལ། ཞག་བདུན་གྱི་བར་དུ་སྲིན་བུ་དེ་ཁྲག་གིས་མྱོས་པར་མ་གྱུར་པར་གཞག་གོ། །དེ་ནས་སྲིན་བུ་དེ་ཁྲག་ལེགས་པར་སྐྱུགས་ནས། ལུས་ཕྲ་མོ་གྲིམས་པ་ཡང་བ་སྔ་མཁོ་བཞིན་གྲིམས་
[41a.4]པར་བྱའོ། །སྲིན་བུ་པད་པ་དེ་ཁྲག་ཀྱང་མང་དུ་འཐུངས་དྲགས་ན། སྲིན་བུའི་ལུས་ལྕི་སྟེ་སྙོམ་པའམ་ཡང་ན་འཆི་བར་འགྱུར་རོ། །སྲིན་བུ་པད་པ་སྐྱུགས་མ་ལེགས་པར་གྱུར་ན་སྲིན་བུའི་ལུས་རེང་རེང་པོར་འདུག་པ་ལ་མྱོས་པར་འགྱུར་རོ། །ནད་ཁྲག་འཐུང་དུ་གཞུག་པ་མེད་པའི་ཚེ་ན་ནི། བུམ་པའི་
[41a.5]ནང་དུ་ཆུ་དངས་བླུགས་ལ། དེའི་ནང་དུ་སྲིན་བུ་བླུགས་ཏེ་དུས་དུས་སུ་བུམ་པ་དང་ཆུ་བརྗེས་ཤིག །དེ་ལྟར་བྱས་ན་སྲིན་བུའི་ཁ་ཆུ་དང་སྲིན་བུའི་རྡུལ་བག་བྱང་སྟེ་ཕན་པར་འགྱུར་རོ། །ཡང་ནད་དམིགས་ཀྱི་ནད་ཁྲག་ངན་པ་ཞིག་ཡོད་པ་སྲིན་བུས་ཁྲག་འཐུངས་རྨ་སྐྲངས་ཤིང་བཙན་ཅན་དུ་གྱུར་ཏམ། གཡའ་
[41a.6]འམ་ཁྲག་ལེགས་པར་མི་འབྱུང་ན་སྐྱེར་བ་དང་བུ་རམ་དང་། སྦྲང་རྩི་སྦྱར་ལ་རྨ་ཁར་བསྐུས་ན་ཕན་ནོ། །མར་བཞུ་ཞིང་ཆབ་བྲོམ་གྱི་ཐོག་ཏུ་བླུགས་པ་དེ་ལྟ་བུ་ལན་བརྒྱར་བྱས་པ་དེ་ནི་ལན་བརྒྱར་བཀྲུས་པའི་མར་ཞེས་བྱ་སྟེ། དེས་རྨ་ཁར་རས་མ་འམ་ཡེའུས་བྱུགས་ལ་དེ་ནས་སྨན་བསིལ་བའི་ལྡེ་གུས་ཐོག་ཐག་
[41a.7]ཏུ་བསྐུས་ན་ཆུ་སེར་ངན་པ་ཕྱིན་ལ་བཙན་པོར་འདུག་པ་དང་ན་བ་མེད་པར་འགྱུར་རོ། །སྲིན་བུ་པད་པས་ནད་ཁྲག་གཞིབས་པས་ནད་ཁྲག་ངན་པ་ཁོང་ནས་བརྔུབས་ལ་ཕྱིར་ལ་ཕྱིན་ཏེ། རྨ་ཁ་ན་འདུག་པ་ཞག་ལོན་པ་དང་རྣགས་པར་གྱུར་ན་དེ་ལ་ཡང་སྲིན་བུ་པད་པ་དེ་ནད་ཁྲག་དང་ནད་ཕྱིར་ཡང་འཇིབ་ཏུ་
[41b]
[41b.1]ཆུག་ཤིག །ཁྲག་དང་མཁྲིས་པ་རྒྱས་པའི་ནད་ལ་ཞལ་ཞལ་བྱས་ཏེ་སྒྲོན་མ་དང་ཀུ་བའི་བུམ་པར་སྦྱར་ཏེ། ཁྲག་འདྲེན་པའི་ནད་ལ་ན་བར་འགྱུར་གྱི་མི་རུང་ངོ་། །བད་ཀན་དང་རླུང་ནད་ལས་གྱུར་པའི་ནད་ལ་ནི་ཕན་ཏེ་རུང་ངོ་། །བད་ཀན་ལས་ནད་དུ་གྱུར་པའི་ནད་ཁྲག་རྔབས་རུས་གཞིབས་ན་ཁྲག་
[41b.2]བརྔུབ་པར་འགྱུར་བས་གཞིབ་ཏུ་མི་རུང་ངོ་། །རླུང་མཁྲིས་ལས་ནད་དུ་གྱུར་པའི་ནད་ཁྲག་ནི་རྔབས་རུས་གཞིབས་ན་ཕན་ནོ། །ཞལ་ཞལ་བྱ་བའི་ཐབས་ནི་ཞལ་ཞལ་གང་བྱ་བའི་གོང་དུ་སྲད་བུ་འམ་དར་རམ་རས་ཀྱིས་དམ་པར་མཉམ་པོར་བཅིངས་ལ། ཆུ་བ་དང་། ཚིགས་རུས་པ་དང་གནད་
[41b.3]རྣམས་ནི་དབབ་པར་ཞལ་ཞལ་གདབ་པོ། ཞལ་ཞལ་གདབ་པའི་ཐབས་ནི་ཐུར་དུ་དྲང་པོར་ཤར་ཤར་པོར་ཐོབ་ཤིག །ཞལ་ཞལ་བྱ་བའི་ས་ནི་ནད་དམིགས་གར་འདུས་པའི་ཐོག་ཏུ་གདབ་པོ། །ནད་ཁྲག་རྩ་མདུད་ཅན་དུ་སྣང་ན་སྲིན་བུ་པད་པས་ཁྲག་དབྱུང་ངོ་། །ཁྲག་ནད་ལུས་པ་
[41b.4]ལས་བེམ་བེམ་པར་གྱུར་ན་རྔབས་རུས་ཐོབ་ཤིག །ཁྲག་ནད་ལུས་ཀུན་དུ་མཆེད་དེ་ཁྱབ་ན་རྩར་བཏབ་སྟེ་དྲང་ངོ་། །ཁྲག་ནད་འདུས་པས་ཞལ་ཞལ་གདབ་བོ། །ནད་ཁྲག་ཤའི་ཕྱིའི་པགས་པའི་བར་ན་འདུག་པ་མ་ཡིན་པ་ཤའི་ཁོང་ན་ཡོད་པའི་ནད་ཁྲག་ནི་སྲིན་བུ་པད་པས་དབྱུང་ངོ་། །ནད་ཁྲག་
[41b.5]པགས་པ་ལ་གནས་པ་ནི་ཀུ་བ་དང་། རྗེའུ་དང་། རྔབས་རུས་དབྱུང་ངོ་། །ཁྲག་ནད་ཀྱིས་ལུས་ཀུན་དུ་ཁྱབ་པ་ལ་ནི་རྩར་བཏབ་སྟེ་དྲང་ངོ་། །རླུང་ནད་ལས་གྱུར་པའི་ནད་ཁྲག་དྲང་བ་ནི་རྔབས་རུ་བཟང་ངོ་། །བད་ཀན་ལས་གྱུར་པའི་ནད་ཁྲག་ལ་ནི་ཀུ་བས་བྱའོ། །དེ་རྣམས་གཏར་གའམ་ཞལ་ཞལ་གདབ་
[41b.6]པའི་རྨ་ཁར་སྨན་བསིལ་བས་བསྐུ་བ་ལས་རླུང་ནད་དུ་གྱུར་པ་སྟེ། རྨ་ཁ་ན་ཞིང་གཡའ་ལ་སྐྲངས་ན་རྨ་ཁར་ཞུན་མར་དྲོན་པོས་སྐུས་ཤིག །གཏར་སྤྱད་རྣམ་པ་སྣ་ཚོགས་དང་གཏར་ག་གདབ་པ་དང་ཞལ་ཞལ་ལ་སོགས་པ་གདབ་པ་བཤད་པའི་ལེའུ་སྟེ་ཉི་ཤུ་རྩ་དྲུག་པ་རྫོགས་སོ།། །།གཏར་ག་
[41b.7]གདབ་པའི་ཆོ་གའི་ལེའུ་སྟེ་ཉི་ཤུ་བདུན་པ་བཤད་པར་བྱའོ། །དེ་ལ་མིའི་ཁོང་ན་ནད་མེད་པའི་ཁྲག་བཟང་པོར་བལྟ་བ་ན་ཅུང་ཟད་མངར་ལ་ཆ་བྲོ། ཁྲག་དེ་གྲང་བ་ཡང་མ་ཡིན་ལ། ཁྲག་དེ་སྐ་བ་བསྡུས་པ་ཡང་མ་ཡིན་ལ་ཁྲག་གི་མདོག་མེ་ཏོག་པདྨ་ལེ་བརྒན་གྱི་ཁ་དོག་ལྟ་བུ་དང་། སྲིན་བུ་ལྷམ་བུ་ཆུ་
[42a]
[42a.1]གཤེར་གྱི་མདོག་ལྟ་བུར་སྣང་བ། གསེར་དང་ལུག་དང་རི་བོང་གི་ཁྲག་ལྟ་བུར་མདོག་བཟང་བ་དེ་ནི་ནད་ཁྲག་མེད་དེ་ཁྲག་བཟང་པོ་ཞེས་བྱའོ། །ཁྲག་འདི་འདྲ་བར་བཟང་པོར་འདུག་པ་ནི་ལུས་ཀྱི་ཟུངས་དང་རྟེན་ཡིན་ཏེ་ལུས་ནི་དེ་ལྟ་བུ་ལ་གནས་སོ། །དེ་ལྟར་ལུས་ལ་ཁྲག་བཟང་
[42a.2]པོར་འདུག་པ་ལ། མཁྲིས་པ་དང་བད་ཀན་གྱིས་གནོད་པའི་ནད་དུ་འགྱུར་ན། དེའི་ནད་དམིགས་ནི་མེ་དབལ་དང་འབྲས་དང་མཆེར་པ་ན་བ་དང་། སྐྲན་དང་ཁོང་པ་ནང་གི་དྲོད་ཉམས་པ་དང་། རིམས་ཀྱིས་འདེབས་པ་དང་། ཁའི་ནང་ཁ་བ་དང་། མིག་ན་བ་དང་། ཀླད་པ་ན་བ་དང་། མི་དྲན་ཏེ་མྱོས་
[42a.3]པ་དང་། སྐོམ་དད་ཆེ་བ་དང་། ཁའི་ནང་ལན་ཚྭ་བྲོ་བ་དང་། མཛེ་ནད་དང་རླུང་དང་ཁྲག་ལས་བྱུང་བའི་དྲེག་ནད་དང་། མཁྲིས་པ་དང་སྒྲེགས་པ་ཚ་ཞིང་སྐྱུར་བར་འབྱུང་བ་དང་། ཀླད་པ་འཁོར་བ་འདི་ལྟ་བུའི་ནང་དུ་འགྱུར་ཏེ། དེ་ལྟ་བུ་ལ་ནད་དཔྱད་ཀྱི་ཆོ་ག་བསིལ་བ་དང་ཚ་བ་དང་། སྣུམ་པ་དང་། རྩུབ་
[42a.4]པ་ལ་སོགས་པ་ལེགས་པར་བྱས་ཏེ། གསོ་སླ་བ་འདྲ་བ་ལས་ཀྱང་མ་ཕན་པར་གྱུར་ན་དེ་ལྟ་བུའི་ཁྲག་ལས་ནད་དུ་གྱུར་པ་ཞེས་བྱ་སྟེ། དེ་ནི་ཁྲག་ལུད་པ་ཡིན་པས་རྩ་གཏར་ཏེ་ཁྲག་དྲངས་ན་ཕན་ནོ། །དེ་ལ་ཡང་ན་གཞོན་ཏེ་ལོ་བཅུ་དྲུག་མ་ཚང་བ་དང་། རྒས་པ་ལོ་བདུན་ཅུ་ལོན་པ་ལ་ནི་གཏར་ག་གདབ་
[42a.5]ཏུ་མི་རུང་ངོ་། །མི་ཉམ་ཆུང་སྟེ་ཁོང་ན་སྣུམ་མེད་པ་དང་། དུགས་སམ་ལུམས་བྱས་ཏེ་དྲགས་པ་དང་། རླུང་ནད་ཅན་ལ་དུགས་དང་ལུམས་བྱས་པ་ལྟ་བུ་དང་། བུད་མེད་སྦྲུམ་མ་དང་བུ་བྱུང་བ་དང་། ཁ་ཟས་མ་ཞུ་བ་ལྟ་བུ་དང་། མཁྲིས་པ་དང་། ཁྲག་ནད་དུ་གྱུར་ཏེ་ཐུར་དུ་འཁྲུ་བ་དང་། ཁ་སྣ་ནས་ཁྲག་འོང་
[42a.6]བ་ལྟ་བུ་དང་། དབུགས་མི་བདེ་བ་དང་། ལུད་པས་བཀར་བ་དང་། ཚད་པ་དྲག་པོས་བཏབ་བཏབ་པ་དང་། དམུ་རྫིང་ལྟ་བུ་དང་། རྟག་ཏུ་སློན་པ་དང་། སྐྱ་རྦབ་ཀྱི་ནད་དང་། འོར་ནད་ལུས་ཐམས་ཅད་སྐྲངས་པ་དང་། མར་འཐུངས་པ་དང་། སྔར་སྐྱུག་སྨན་ནམ་བཀྲུ་སྨན་ནམ། སྨན་མས་གཏོང་ངམ། སྨན་སྣ་
[42a.7]ནས་གཏོང་ངམ། གཏར་ག་བཏབ་པ་འདི་ལྟ་བུ་བྱས་པར་གྱུར་པ་ལ་གཏར་ག་གདབ་ཏུ་མི་རུང་ངོ་། །གཏར་ག་གདབ་པའི་ཐབས་ནི་དབང་བུའི་ཕྲག་ཏུ་རྩ་བ་བཙིར་བ་དྲག་ཏུ་མི་རུང་ངོ་། །དབང་བུའི་ཕྲག་ཏུ་རྩ་བཙིར་བ་ཡོན་པོར་གྱུར་པ་འམ། ཡོན་པོར་གདབ་ཏུ་མི་རུང་ངོ་། །རྩ་སྣང་བར་མ་བྱུང་བ་ལ་གདབ་
[42b]
[42b.1]ཏུ་མི་རུང་ངོ་། །ནད་དམིགས་དང་སྦྱར་ན་མྱུང་དུ་གཏར་ག་མི་གདབ་ཏུ་མི་རུང་བ་ལ་གཏོགས་པར་ཧ་ཅང་གྲང་ལྷགས་ཆེ་བའི་ཚེ་དང་རླུང་ཆེ་བའི་ཚེ་དང་། ཚ་བའི་དུས་དང་ནམ་རྨུགས་པ་དང་། འདི་རྣམས་ལྟ་བུའི་དུས་སུ་གཏར་ག་གདབ་ཏུ་མི་རུང་ངོ་། །ཀླད་པ་དང་མིག་ན་བ་ལ་ནི་དཔྲལ་བའི་
[42b.2]རྩ་གཏར་ན་ཕན་ནོ། །མིག་ན་བ་ལ་ནི་མིག་འགྲམ་གྱི་རྩ་དང་། མིག་སྒོ་སྣ་དྲུང་གི་མཆན་ན་ཡོད་པའི་རྩར་ཐོབ་ཤིག །རྣ་བ་ན་ན་ནི་རྣ་བའི་རྒྱབ་བཤལ་ཀའི་མཚན་བུར་ཐོབ་ཤིག །སྣ་ན་ན་སྣའི་རྩེ་མོར་ཐོབ་ཤིག །ཆམ་པ་ན་ན་སྣའི་རྩེ་མོ་དང་དཔྲལ་བའི་དབྱེས་ཀྱི་རྩར་ཐོབ་ཤིག །ཁ་ན་ན་ལྕེའི་
[42b.3]འོག་གི་རྩ་དང་། མ་མཆུའི་ནང་གི་རྩ་དང་། ཡ་མགལ་མ་མགལ་གྱི་རྩ་དང་། རྐན་རྩར་གདབ་བོ། །མགུལ་པ་ཡན་ཆད་ན་སྟེ་མཁུར་བའི་རྩ་མདུད་ཡོད་པ་དང་། མགུལ་པ་དང་རྣ་བ་དང་མུར་འགྲམ་དང་ཀླད་པ་མན་ཆད་ན་བ་ལ་རྩ་མདུད་དང་ནད་དམིགས་སྦྱར་ཏེ་གདབ་བོ། །སྨྱོ་བྱེད་དང་བརྗེད་བྱེད་
[42b.4]ཀྱི་ནད་ལ་བྲང་དང་མིག་འགྲམ་དང་དཔྲལ་བའི་རྩ་དང་། འགྲམ་པའི་མཚམས་སུ་གཏར་ག་ཐོབ་ཤིག །ལུས་ཀུན་ན་བ་ལ་སྨིན་མཚམས་སུ་བྱུང་བའི་རྩར་ཐོབ་ཤིག །འབྲས་དང་རྩིབ་ལོགས་སུ་ཟུག་པ་ལ་རྩིབ་ལོགས་དང་མཆན་ཁུང་དང་ནུ་མའི་བར་གྱི་རྩར་གདབ་བོ། །རིམས་ནད་ཞག་
[42b.5]གསུམ་པ་ལ་ཕྲག་པའི་མཚམས་སུ་གདབ་བོ། །ཞག་བཞི་པའི་རིམས་ནད་ལ་ལྟག་པའི་འོག་ཏུ་གདབ་བོ། །ཚད་པ་བད་ཀན་ཀུན་འཁྲུ་ན་མཇུག་ཏོའི་གོང་སོར་གཉིས་ཙམ་དུ་གཏར་ག་ཐོབ་ཤིག །ཁུ་བའི་ནད་དམ་ཕོ་མཚན་གྱི་ནད་ལ་ནི་ཕོ་མཚན་གྱི་རྩ་ལ་གཏར་ག་གདབ་བོ། །མགུལ་པ་ན་
[42b.6]བ་འམ་ལྦ་བ་བྱུང་བ་དང་བརླན་ན་བརླའི་རྩར་གདབ་བོ། །བརླའི་ཆུ་སུལ་དུ་རླུང་ཞུགས་ཏེ་འགྲོ་མི་ཤེས་ནས་རྐང་ཟུག་འཁུམས་པ་ལ་པུས་མོའི་ལྷ་ང་ན་མར་སོར་བཞི་འམ་ལྷ་ང་ནས་གོང་དུ་སོར་བཞི་བཅལ་ཏེ་གདབ་བོ། །བྱིན་པ་ན་བ་ལ་བྱིན་པའི་ཉྭ་འབུར་འབུར་པོའི་འོག་སོར་གཉིས་སུ་བཅལ་ཏེ་
[42b.7]གདབ་བོ། །རྐུབ་ཙོས་ནས་བརླའི་འོག་ཐོག་ཐག་བྱིན་བའི་བར་དུ་ན་ན་ལོང་བུའི་ནང་རོལ་ན་ཡར་གོང་དུ་སོར་བཞི་བཅལ་ཏེ་གདབ་བོ། །པུས་མོའི་ལྷ་ངའི་འཁོར་སྐྲང་ཞིང་ན་བ་ཡང་དེ་བཞིན་དུ་ལོང་བུའི་གོང་སོར་བཞིར་ཐོབ་ཤིག །རྐང་པ་ཚ་བ་དང་། རྐང་པ་འཐེང་བ་དང་། རྐང་པ་སྦྲིད་པ་དང་། རྟིང་
[43a]
[43a.1]པ་སྣད་དེ་རྡོལ་བ་དང་། མཐེ་བོའི་ཚིགས་ཀྱི་དྲུང་དུ་ཤ་རྨེན་བྱུང་བ་དང་། རྐང་པའི་ཤ་ནང་གི་སྣམ་བུ་ཆད་པ་དང་། འདི་ལྟ་བུ་ལ་རྐང་པའི་བོལ་གྱི་ཚིགས་ནས་གོང་དུ་སོར་གཉིས་སུ་བཅལ་ལ་གདབ་བོ། རྐང་ཟུག་འཁུམས་པའི་ནད་ལ་ཡང་དེ་དང་འདྲ་བར་གདབ་བོ། །ནད་
[43a.2]དམིགས་སོ་སོར་ཇི་སྐད་བསྟན་པ་བཞིན་དུ་ན་བ་ཡང་མ་ཡིན་པ་ལ་ནད་དམིགས་མ་མཐུན་པར་སྣང་ན་ཡང་གནོད་པར་འགྱུར་བའི་ནད་ཞོག་ལ། ནད་དམིགས་གར་བྱུང་ཞིང་གང་དུ་ན་བའི་རྩར་ཐོབ་ཤིག །གཏར་ག་གདབ་པའི་ཆོ་ག་ནི། སྔར་བས་ཁ་ཟས་སྣུམ་བག་དང་དུགས་ཀྱི་དཔྱད་བྱ་སྟེ། །
[43a.3]ལུས་འཇམ་ཞིང་ཡང་བར་བྱས་ནས་གཏར་གའི་ཡོ་བྱད་དང་། གཏོར་མ་གཏང་བ་བྱས་ལ་བཀྲ་ཤིས་ཀྱི་ཆོ་ག་བྱས་ནས་ཁ་ཟས་སྣུམ་བག་དང་ཁུ་ཤ་ལ་སོགས་པ་ཟོས་ལ་མེ་འདེ་བ་དང་། ཉི་མ་དྲོན་པོ་ལ་འདུག་སྟེ། ལུས་དྲོས་པར་བྱས་ནས་ཁྲིའུའི་སྟེང་དུ་ཙོག་ཙོག་པོར་འདུག་ལ། མགུལ་པ་ཡན་ཆད་ཀྱི་
[43a.4]ནང་རྩར་གདབ་ན་དར་རམ་རས་ཀྱིས་བཅིངས་ལ་སྐྲ་ཡང་གྱེན་དུ་བརྫེས་ཏེ་བཅིངས་ལ་པུས་མོའི་ལྷ་ང་གཉིས་ཐོག་ཏུ་ལག་ངར་གྱི་གྲུ་མོས་བརྟེན་ནས་ཆང་པ་གཉིས་ཀྱི་བར་ནང་དུ་ཤིང་བལ་ལྟ་བུའི་རློང་བཅུག་སྟེ་བཅིངས་ལ། མགུལ་པ་ཡང་དར་རམ་རས་འཇམ་པོས་བཅིངས་ལ་ལག་པ་གཉིས་ཀྱིས་
[43a.5]རང་གི་གཉའ་བ་ནས་འཁྱུད་དེ་བཙིར་ཅིག །འགྲམ་སོ་ཡང་སྡོམས་ལ་མཁུར་བ་གཉིས་གང་བར་བུས་ཏེ་ལུད་པ་ཅི་ལུར་ཚིར་ལ་མི་གཞན་གྱིས་རྒྱབ་ནས་ཀྱང་ཚིར་ཅིག །མགུལ་པ་དར་རམ་རས་ཀྱིས་བཅིངས་པའི་ཕྲག་ཏུ་རང་གི་མཛུབ་མོ་གཡོན་པ་བཅུག་སྟེ། མ་འགགས་པ་ཙམ་དུ་བྱའོ། །
[43a.6]ཁོང་པའི་ནང་གི་རྩ་མ་གཏོགས་པར་ཕྱི་རོལ་གྱི་རྩ་རྣམས་བསྡམ་ཞིང་གདབ་པའི་ཆོ་ག་ནི་དེ་ལྟར་བྱའོ། །དེ་ལྟར་བསྡམས་པས་འཕྲལ་རྩ་བྱུང་སྟེ་སྣང་ན་སྨན་པའི་ལག་པ་གཡས་པའི་མཐེ་བོས་བརྟག་ཅིང་མནམས་ལ་སྨན་པའི་ལག་པ་གཡོན་པས་འཕྲལ་གཙགས་སྟ་རེ་ཁ་བཟུང་ལ་རྩའི་དབུས་སུ་
[43a.7]གཏད་དེ། སྨན་པའི་ལག་པ་གཡས་པའི་གུང་མོའི་བེམ་ཏོལ་མ་ཡོ་བ་དང་། གཙགས་བུ་མ་ཡོ་མ་འགུལ་བར་འཕྲལ་རྩ་ཐོབ་ལ་ཁྲག་ཕྱུང་ཤིག །སྣའི་ཐོར་ཏོ་དང་མིག་སྒོ་སྣ་དྲུང་གི་མཚན་གྱི་རྩར་གདབ་ན། གཙགས་བུ་འབྲས་འདྲ་བས་གདབ་ཅིང་ཁྲག་དབྱུང་ངོ་། །ལྕེ་ལྐོག་གི་རྩར་
[43b]
[43b.1]གདབ་ན་ལྕེ་བཏེག་སྟེ་བཟློག་ལ་སོས་མནན་ཏེ། ལྕེའི་འོག་ན་ཡོད་པའི་རྩར་ཐོབ་ཤིག །ནུ་མ་གཉིས་ཀྱི་བར་དང་། མགུལ་པ་ཡན་ཆད་ན་ཡོད་པའི་རྩར་གདབ་ན་ཡང་མཆན་ཁུང་རམ་མགུལ་པ་བསྡམས་ཏེ་རྩར་ཐོབ་ཤིག །ལྟོ་བའི་རྩར་བཏབ་ན་ལྟོ་བ་ཐོག་ཏུ་མཉེས་ལ་ལྟོ་བའི་གོང་མཆན་ཁུང་
[43b.2]དུ་དར་རམ་རས་ཀྱིས་བཅིངས་ཏེ། ལག་པ་གཉིས་ཀྱི་ཆང་པར་རྡོ་བ་ཆོངས་ལ་ལག་པ་བཅངས་ནས་གསུམ་པའི་རྩར་ཐོབ་ཤིག །ལག་ངར་གྱི་གྲུ་མོ་ནང་གི་རྩར་གདབ་ན་བདེ་བར་འདུག་སྟེ། ལག་ངར་མི་བསྐུམ་པར་བརྐྱང་ལ། མཐེ་བོང་ཆང་པར་བཅུག་ལ་རྩར་ཐོབ་ཤིག །གདབ་
[43b.3]པའི་ས་ནས་གོང་དུ་སོར་བཞི་བཅལ་ཏེ་དར་རམ་རས་ཀྱིས་ཆིངས་ཤིག །རྩིབ་ལོགས་གཉིས་ཀྱི་རྩར་གདབ་ན་དཔུང་པ་གཉིས་ཐུར་དུ་བརྐྱང་སྟེ། ཁུ་ཚུར་བཅངས་ལ་རྩར་ཐོབ་ཤིག །ཕོ་མཚན་གྱི་རྩར་གདབ་ན་ཕོ་མཚན་གྱེན་དུ་ཐེག་ལ་ཐོབ་ཤིག །བྱིན་པའི་རྩར་གདབ་ན་བརླ་མན་
[43b.4]ཆད་རྐང་པའི་བར་དུ་མཉེས་ལ་སྒབ་མ་ཅུང་ཟད་བསྐུམས་ཏེ། རྐང་པའི་བོལ་གྱི་ཐོག་ཏུ་རྐང་པ་ཡ་གཅིག་གིས་ཀྱང་མནན་ལ། པུས་མོའི་གོང་དུ་དར་རམ་རས་ཀྱིས་བཅིངས་ལ་ལག་པས་ཀྱང་མནན་ཏེ་རྩར་ཐོབ་ཤིག །ཐབས་འདི་དང་འདྲ་བར་ནད་དམིགས་ཀྱི་གཏར་ག་གདབ་པའི་དམིགས་
[43b.5]མིང་གི་བཤད་པ་གཞན་ལ་ཡང་ནད་གང་དུ་གཏར་ག་གདབ་པའི་དམིགས་ཡོད་པ་དེ་དག་ཏུ་བཅིང་བའི་ཐབས་དེ་བཞིན་ཤེས་པར་གྱིས་ལ་ཐོབ་ཤིག །ཤ་སྣག་བུ་ཆེ་བའི་ཐོག་ཏུ་གཏར་ག་གདབ་པའི་མིང་གིས་མ་བཤད་པ་གཞན་ལ་ཡང་གང་དང་གང་དུ་གཏར་ག་གདབ་པའི་དམིགས་ཡོད་པ་
[43b.6]དེ་དག་ཏུ་བཅིང་བའི་ཐབས་དེ་བཞིན་ཤེས་པར་གྱིས་ལ་ཐོབ་ཤིག །ཤ་སྣག་བུ་ཆེ་བའི་ཐོག་ཏུ་གཏར་ག་འདེབས་ན། གཙགས་བུ་འབྲས་ཀྱི་སྲིད་ཀྱི་ཟབས་ཙམ་དུ་ཐོབ་ཤིག །འཕྲལ་རྩ་བ་རུས་པའི་ཐོག་ལྟ་བུར་གཙགས་བུ་སྟ་རེ་ཁས་འདེབས་ན་ནས་ཀྱི་ཕྱེད་ཙམ་གདབ་བོ། །རྩར་
[43b.7]ལེགས་པར་ཐེབས་ནས་ཁྲག་གཟོགས་ཤིག །རས་སམ་དར་གྱིས་བཅིངས་ལ་ཁྲོལ་ཕན་ཆད་ནི་ཁྲག་མ་གཟགས་ཤིག །གཏར་ག་གདབ་པ་ཉེས་ན་ཁྲག་ཟག་པའི་ཡུན་ཡང་ཐུང་ཁྲག་མང་པོ་མི་འབྱུང་ངོ་། །དེ་ལྟ་བུ་ལ་རྨ་ཁར་ཏིལ་ཞིབ་ཏུ་བཏགས་པས་གདབ་བོ། །གཙགས་བུ་
[44a]
[44a.1]ཧ་ཅང་གདབ་དྲགས་ན་ཁྲག་ཐོར་ཞེས་འབྱུང་བ་དང་། སྒྲ་ཡོད་པར་འབྱུང་སྟེ། ཁྲག་གཅད་ཀྱང་དཀའ་བར་འགྱུར་ལ། སྡང་བ་དང་། འབོག་པ་དང་། ཡང་ན་བསྡམས་པ་ལྷོད་དམ། མཚོན་རྟུལ་ལམ་ཟས་སྐོམ་འགྲངས་ཤིང་ངོམས་ཆེས་སམ། ཡང་ན་ཁོང་རྨྱ་བའམ།
[44a.2]བཤང་གཅིའི་ཤུགས་འོང་བར་གྱུར་ཏམ། དུགས་ལྟ་བུ་དྲགས་ན་ཡང་ཁྲག་དབྱུང་ངུ་མི་རུང་ངོ་། །ཁྲག་དེ་ལྟར་འོང་དུ་མི་རུང་ན། སུག་སྨེལ་དང་། པི་པི་ལིང་དང་། ན་ལེ་ཤམ་དང་། ལི་དོང་གྲ་དང་། སྐྱེར་པ་དང་། རྒྱ་སྤོས་དང་། ཁང་པའི་ཀ་གདུང་ལ་ཆགས་པའི་དུད་པ་དང་། ལྕེ་མྱང་
[44a.3]ཚ་འདི་རྣམས་བཏགས་ཏེ་ཏིལ་མར་དང་སྦྱར་ལ་རྨ་ཁར་སྐུས་ཤིག །ཁྲག་ལེགས་པར་བྱུང་ན་རྨ་ཁར་ཏིལ་མར་དྲོ་འཇམ་ཙམ་དང་། ལྕེ་མྱང་ཚ་སྐུས་ཤིག །གཏར་ག་གདབ་པ་ལ་དང་པོར་ནད་ཁྲག་ཆུ་སེར་ལེ་བརྒན་རྩི་འཁུས་པ་འདྲ་བར་འབྱུང་ངོ་། །ནད་ཁྲག་ལེགས་པར་བྱུང་ནས་ཁྲག་རང་འཆད་
[44a.4]དོ། །ཡང་ན་ཁྲག་བཟང་པོ་བྱུང་ན་དེས་ཆོག་གིས་བཅིངས་པ་ཁྲོལ་ཅིག །གལ་ཏེ་འབོག་སྟེ་བརྒྱལ་ན་བཅིངས་པ་ཁྲོལ་ལ་བསིལ་ཡབ་ཀྱིས་གཡོབས་ཏེ་བརྟས་པ་དང་ཁྲག་སླར་ཡང་ཕྱུང་ཤིག །ཡང་འབོག་པར་གྱུར་ན་ཉི་མ་གཉིས་གསུམ་ངལ་སོས་ལ་ཐོབ་ཤིག །དེ་ལ་རླུང་ནད་ཀྱི་ཁྲག་ནི་གནག་
[44a.5]ལ་རྩ་དམར་བ་དང་། ཁྲག་མདོག་རྩུབ་པ་ཁྲག་དབྱུང་བའི་ཤུགས་དྲག །མདོག་གསལ་ལ་དབུ་པ་ཅན་དུ་འདུག་གོ །མཁྲིས་པའི་ནད་ཁྲག་ནི་བསིལ་ཞིང་སེར་ལ་རྩ་གནག་མནམ་ལ་སྤྱི་བག་ཅན་ཁྲག་སྐ་སྟེ་མྱུར་དུ་མི་འབྱུང་། ཁྲག་དྲོད་ཆེ་སྟེ་ཚ་ལ་ཁ་དོག་ཚོན་ཅན་དུ་སྣང་ངོ་། །བད་ཀན་གྱི་ཁྲག་
[44a.6]ནད་ནི་འཇམ་ལ་ཅུང་ཟད་རྩ་དཀར་ལ་དྲངས་ན་ནལ་ནལ་བྱེད། ལག་པས་མྱངས་ན་འབྱིལ་བའི་འབྱར་བག་ཏུ་བྱེད་པ་སྐའོ། །རླུང་དང་། མཁྲིས་པ་དང་། བད་ཀན་གསུམ་ཆར་འདྲེས་པའི་ནད་ཁྲག་ནི་ངན་ཞིང་དེ་གསུམ་གྱི་ཚུལ་འདྲེས་པར་ཡོད་ལ། ཁྲག་མདོག་གནག་ཅིང་ཀུན་འདྲེས་པར་འདུག་པའོ། །
[44a.7]ནད་པའི་ཁྲག་ངན་ན་ཉམས་ཆེ་ཡང་རུང་ཁྲག་སྲང་བཞི་བཅུ་རྩ་བདུན་ཙམ་ལས་དབྱུང་དུ་མི་རུང་ངོ་། །ཁྲག་ཧ་ཅང་དབྱུང་དྲགས་ན་འཆི་བར་འགྱུར་རོ། །དེ་བས་ན་ཁྲག་དབྱུང་དྲགས་ན་རླུང་ནད་ཀྱི་དཀྱེལ་མི་བཟད་པ་སྐྱེའོ། །དེ་ལ་ལྟག་ཁྲག་དབྱུང་དྲགས་པ་ལས་ལུས་མར་གྱིས་བྱུག་ཅིང་མཉེས་ཏེ།
[44b]
[44b.1]བཅུད་དང་འོ་མ་དང་ཁྲག་བཅུད་དང་ཁ་ཟས་བསོད་པ་བཟའ། རླུང་ནད་ལ་ཕན་པའི་སྨན་གཏང་ངོ་། །གཏར་ག་བཏབ་སྟེ་ཁྲག་ཆོད་པ་དང་ཏིལ་མར་གྱི་ནང་དུ་རས་འཇམ་པོ་འམ། བལ་གྱི་ཡེའུ་སྨྱུགས་ལ་རྨ་ཁར་བསྐུས་ལ། དབང་བུ་འམ། རས་སམ། དར་གྱིས་བཅིངས་པ་དལ་གྱིས་གློད་ལ་
[44b.2]ཆུ་བསིལ་བས་ཁྲུས་ཤིག །ནད་ཁྲག་ཏུ་གྱུར་ཏེ་ཁྲག་ངན་ན་ནི་ཕྱེ་མ་འཕྲེད་བསྐྱར་རོ། །ཡང་ན་ཕྱི་དེ་ཉིན་སྐྱོར་ཅིག །ནད་པ་སྔར་ཉམས་བརྟས་ཏེ་སྣུམ་བག་གི་ཆོ་ག་བྱས་པ་ཞིག་ན་ནི་ཉམས་ཀྱིས་ཐུབ་པ་ཡིན་ཏེ། ཆོ་ག་བྱས་ནས་ཞག་གཉིས་ནས་གཏར་ག་ཐོབ་ཤིག །ནད་པ་ཉམ་ཆུང་ན་ནི་ཟླ་བ་ཕྱེད་
[44b.3]ཙམ་དུ་སྣུམ་བག་གིས་བརྟས་ཏེ། དེ་ནས་གཏར་ག་ཐོབ་ཤིག །གཏར་ག་བཏབ་སྟེ། ནད་ཁྲག་གི་འཕྲོ་ལུས་ཀྱང་ཅུང་ཟད་ཐེ་གེ་བ་ལྟར་བྱེད་ན་ནི་ཁྲག་གི་འཕྲོ་ལྷག་མ་མ་གཏར་ཀྱང་སླ་སྟེ། ཧ་ཅང་དབྱུང་དྲགས་པར་མི་བྱའོ། །གལ་ཏེ་རྔབས་རུས་ཉི་ཚེར་གཞིབས་པའི་དམིགས་ཤིག་ཡོད་ན་ནི་
[44b.4]རྔབས་རུས་ཐོབ་ཤིག །ཡང་ན་ནི་ནད་དབྱུང་ལ། ནད་ཁྲག་ངན་པ་འབྱུང་ཞིང་བསྩལ་བར་འགྱུར་བའི་སྨན་ཐོང་ཤིག་སྨན་གཏང་བའི་དམིགས་ནི་མཁྲིས་པ་རྒྱས་པ་ལས་ཁྲག་ལུད་དེ་ན་བར་འགྱུར་རོ། །དེ་ལྟ་བུ་ལ་དམིགས་ཀྱི་བྱེ་བྲག་ཏུ་བྱ་བ་ནི། བཀྲུ་སྨན་དང་སྐྱུག་སྨན་གྱིས་བཀྲུས་ལ་
[44b.5]མཁྲིས་པ་ཚ་བའི་ནད་ལ་ཕན་པའི་སྨན་བསིལ་བག་ཐོང་ཤིག །ནད་ཁྲག་ངན་པ་ཡིན་གྱིས་ཀྱང་ཁྲག་རྒྱས་པ་ཙམ་དུ་མ་གྱུར་ན་ནད་ཁྲག་འབྱང་ཞིང་བགས་ཀྱིས་དབྱུང་བའི་སྨན་གཏང་བའི་ཐབས་ནི་དེ་ལྟར་བྱའོ། །གཏར་ག་གདབ་པ་ཞིག་ལ་ཁྲག་མི་ཆོད་ན་གཅོད་པའི་སྨན་ནི་རོ་དྲ་སེང་ཕྲོམ་དང་།
[44b.6]གནྡྷ་པྲི་ཡང་ཀུ་དང་རྨ་ཤིང་དང་། མོན་སྲན་མ་ཤ་དང་། ཤིང་མངར་དང་། བཙག་ཡུག་སྣམ་དང་། ས་ནག་པོ་སྤྱི་བ་དང་། གྱོ་མོའི་དུམ་བུ་དང་། ཟར་མ་དང་། སྣག་ཚ་དང་། ཅུག་ཧང་དང་། ཁྲེ་དང་འདི་རྣམས་ཆ་སྙོམས་ཏེ་ཞིབ་ཏུ་བཏགས་ལ་རྨ་ཁར་ཐོབ་ཤིག །བསིལ་བའི་སྨན་ཤུག་པ་ལ་སོགས་
[44b.7]པ་བཏགས་ཏེ་ཆུ་དང་སྦྱར་ལ་བླུད་དོ། །ཡང་ན་དེ་ལྟར་ཁྲག་མི་ཆོད་པ་དང་། རྩ་དེ་གཉིས་ཀྱི་གོང་དུ་གཏར་ག་གདབ་བོ། །ཡང་ན་ཐུར་མ་བསྲེགས་པས་རྨ་ཁར་སྲེགས་ཤིག །གཏར་ག་གདབ་པའི་བཅིང་བ་མ་ལེགས་སམ། དབང་བུ་ལ་གདབ་པ་མ་ལེགས་ཏེ། ཡོ་བས་ནད་ཁྲག་མ་ཕྱིན་ཏམ།
[45a]
[45a.1]ཁྲག་མངས་པ་ལྟ་བུར་གྱུར་པས་རླུང་དང་མཁྲིས་པ་དང་བད་ཀན་གྱི་ནད་རྒྱས་པས་ནད་ཁྲག་ངན་པར་གྱུར་པས་རླུང་དང་མཁྲིས་པ་དང་བད་ཀན་རང་གི་གནས་སུ་མ་ཕེབས་མ་ལོན་གྱི་བར་དུ་ཁ་ཟས་ཕན་ཞིང་འཕྲོད་པ་དང་། བྱེད་ཅིང་བསྐྱོད་པ་ཡང་ཕན་པའི་ཚུལ་དུ་བྱ་ཞིང་བསྟེན་ཏོ། །
[45a.2]ཁ་ཟས་ནི་ཧ་ཅང་ཚ་བ་དང་བསིལ་བ་ཡང་མ་ཡིན། ཡང་ལ་འཇུ་སླ་བ་དེ་ལྟ་བུའི་ཟས་སྐོམ་བཟང་སྟེ། དེ་ལྟར་གཏར་ག་གདབ་པས་དྲོད་ཀྱང་ལྷག་པར་ཆུང་ལ་རླུང་དང་མཁྲིས་པ་དང་བད་ཀན་གསུམ་རང་གི་གནས་སུ་བབས་པ་ན་ཕན་པའི་ཆོ་ག་བྱ་ཞིང་དེ་ལྟར་བསྲུང་དགོས་སོ། །གཏར་ག་ལེགས་
[45a.3]པ་ནི་བཞིན་མདོག་དང་དབང་པོ་རྣམས་དང་ཞིང་གསལ་བ་དང་མིག་ལ་སོགས་པ་དབང་པོ་རྣམས་ཀྱི་ཡུལ་ལ་འཇུག་པར་མོས་ལ་ཁ་ཟས་འཇུ་བའི་དྲོད་ཀྱང་མ་ཉམས་ཤིང་འཇུ་ལ་བཤང་གཅི་ཡང་ཐ་མལ་པར་འོང་ཉམས་བདེ་ལ་ཉམས་འཚག་བརྟས་ཤིང་། སྟོབས་དང་ལྡན་པ་དེ་ལྟ་བུ་ནི་
[45a.4]ཁྲག་ནད་བྱང་སྟེ་ཁྲག་བཟང་པོར་འགྱུར་ཞེས་བྱའོ། །གཏར་ག་གདབ་པའི་ཆོ་གའི་ལེའུ་ཉི་ཤུ་རྩ་བདུན་པ་རྫོགས་སོ།། །།ཁོང་དུ་མཚོན་ལུས་པ་དབྱུང་བའི་ཆོ་གའི་ལེའུ་ཉི་ཤུ་རྩ་བརྒྱད་པ་བཤད་པར་བྱའོ། །མཚོན་ཟུག་རྔུ་ལུས་པ་ནི་རྣམ་པ་ལྔ་སྟེ། ཁོང་ན་ཡོན་པོར་
[45a.5]འདུག་པ་དང་། དྲང་པོར་འདུག་པ་དང་། གྱེན་དུ་འདུག་པ་དང་། ཐུར་དུ་འདུག་པ་དང་རྣམ་པ་ལྔའོ། །དེ་ལ་མདོར་མཚོན་ཁོང་དུ་ལུས་པའི་ཐབས་ནི། སྤྱིར་ནད་དམིགས་ཀྱི་ཐད་ཀར་ཤ་མདོག་ནག་པོར་འདུག་ལ་སྐྲངས་ཤིང་ནད་ཁྲག་ཡང་དང་ཡང་ཟག །སྐྲངས་ཤིང་གློ་
[45a.6]བར་འདུག་པའི་རྨ་ཁ་ཉེན་ཀོར་དུ་ཆུ་བུར་འདྲ་བའི་ཐོར་བུ་ཡོད། ཤ་མཐང་དེ་འཁོར་འཇམ་པོར་གྱུར་ན་དེ་ནི་མདོར་མཚོན་ཁོང་དུ་ལུས་པ་ཞེས་བྱའོ། །པགས་པའི་བར་ན་མཚོན་ནམ་ཤིང་ཚལ་དུམ་བུ་ཡོད་ན་ནི། པགས་པའི་མདོག་གནག་ལ་སྲ་བར་འགྱུར་རོ། །ཤའི་ནང་ན་མཚོན་ནམ་ཤིང་ཚལ་པ་ལུས་
[45a.7]ན་ནི་སྐྲངས་པར་འགྱུར་ཏེ། རྨ་ཁ་ལྷང་ལྷང་བྱེད་ཅིང་སྐྲངས་པའི་ཚབས་ལྷག་པར་ཆེ་སྟེ། བཅིར་བས་མི་བཟོད་ལ་གནག་སྟེ་རྨ་འཚོར་མི་རུང་བ་ཡིན་ནོ། །ཉའི་ནང་དུ་མཚོན་ནམ་ཤིང་ཚལ་ལུས་ན་ཤའི་ནང་དུ་མཚོན་ལུས་པ་དང་འདྲ་སྟེ་སྐྲང་བ་ནི་མ་ཡིན་ནོ། །ཆུ་བ་མང་པོ་དྲང་བའི་ནང་དུ་མཚོན་ནམ་ཤིང་ཚལ་
[45b]
[45b.1]ལུས་ན་འགུལ་ཞིང་བསྐྱོད་པའི་ཚེ་རབ་ཏུ་ན་ལ་ནང་བུ་གའི་སྦུབས་ལ་གནོད་པས་སྦུབས་ཀྱི་རང་རང་གི་ལས་ཀྱི་ཡོན་ཏན་ལ་གནོད་དེ་ཉམས་པར་འགྱུར་ལ་མཚོན་ནམ་ཤིང་ཚལ་དེ་དབྱུང་ཡང་དཀའོ། །མཚོན་ནམ་ཤིང་ཚལ་རྩལ་བབ་པ་ནི་རྩ་སྐྲངས་པར་སྣང་ངོ་། །སྣའི་སྦུ་གུ་ལ་སོགས་ཏེ་སྦུ་གུ་
[45b.2]ལྟ་བུའི་ནང་ན་མཚོན་ལུས་ན་སྦུ་གུ་སོ་སོ་རང་གི་ལས་ཀྱི་ཡོན་ཏན་ཉམས་ཏེ་གནོད་དོ། །རྩ་ཆེན་པོ་བཅུ་ལ་མཚོན་ནམ་ཤིང་ཚལ་བབ་སྟེ་ལུས་ན་རླུང་དང་ཁྲག་དང་དབུ་བར་འདྲེས་ཏེ། རླུང་བྱུང་བ་ནི་དབུགས་སྒྲ་ཅན་དུ་བྱུང་བ་དང་སྙིང་ན། རྐང་ལག་གི་ཡན་ལག་ནའོ། །རུས་པའི་ཚིགས་ཀྱི་མཚམས་
[45b.3]བོག་རེའི་ནང་དུ་མཚོན་ལུས་ན་རུས་པ་བརྩེ་ལ་ན་བའི་ཚབས་ཆེའོ། །མཚོན་རུས་པ་ལ་བབ་སྟེ་ཡོད་པར་གྱུར་ན་ན་བའི་ཚུལ་དང་ཐབས་རུས་པ་གཅིག་པུ་ན་བ་མ་ཡིན་ཏེ། རུས་པ་ཀུན་དུ་ཁྱབ་པར་ན་ལ་སྐྲངས་པར་འགྱུར་རོ། །རུས་པའི་ཚིགས་ལ་མཚོན་ཡོད་པ་དང་འདྲ་བར་རུས་པ་ལ་མཚོན་བབ་ན་
[45b.4]ཡང་བསྐྱོད་ཅིང་འགུལ་བ་མི་ཤེས་ཤིང་གནོད་པ་ཡིན་ནོ། །ནང་གྲོལ་གྱི་རྒྱུ་མ་དང་ལོང་ཀ་ལ་སོགས་པ་ལ་མཚོན་བབ་ན། ཁ་ཟས་དང་ངན་སྐྱུགས་རྨ་ཁར་སྣང་ལ་རྨ་ཕྱིར་སྐྲང་ངོ་། །མཚོན་གནད་ལ་བབ་པར་གྱུར་པ་ནི་ནད་ལ་ཟུག་པའི་ཚུལ་བརྟགས་པས་ཤེས་པར་བྱའོ། །ཤའི་སུལ་དུ་མཚོན་
[45b.5]འཚེབས་ཤིང་འདུག་ན་ནི་ལུས་ལ་རྨ་དང་། སྐྲང་གློའི་བག་ཏུ་མི་མངོན་པར་མདོག་བཟང་པོར་འདུག་གོ །གལ་ཏེ་དེ་ལ་རླུང་ངམ་མཁྲིས་པ་འམ་བད་ཀན་གྱི་ནད་བསླང་ངམ། དྲག་ཤུལ་ལས་སྣད་པར་གྱུར་ན་ནད་ལངས་ཏེ་ན་བར་འགྱུར་རོ། །མཚོན་ནམ་ཤིང་ཚལ་ཟུག་རྔུ་ཕྱིན་པར་གྱུར་ན་རྨ་ཁ་
[45b.6]པགས་པའི་ཤ་མདོག་བཙན་ཅན་མ་རུངས་པར་གྱུར་ན། རྨའི་འཁོར་ན་ཞིང་དམར་ལ་ཚ་བ་དེར་མར་བཞག་ན་འཇུའམ། སྨན་ལྡེ་གུས་བྱུགས་ནས་སྐམས་པར་གྱུར་པ་དེར་མར་གྱིས་བྱུགས་ལ་དུགས་བྱ་ཞིང་མཉེ་སྟེ། མཚོན་ཟུག་རྔུ་ཁོང་དུ་ལུས་པའི་ཆོ་ག་དང་འདྲ་བར་གྱིས་ཤིག །མཚོན་ཟུག་རྔུ་ཁོང་
[45b.7]ན་ལུས་ཏེ་ཤ་མ་རུངས་པར་གྱུར་ན་བཀྲུ་སྨན་དང་སྐྱུག་སྨན་གྱིས་བཀྲུས་ཏེ་ཤ་བྲི་བ་དང་ཟུག་རྔུ་ཡོད་པའི་འཁོར་ན་ཤ་སྙེ་བར་གྱུར་ནས་བསྒུལ་ཞིང་བསྐྱོད་པ་དང་། བཙན་དམར་པོ་ལ་སོགས་པས་ནང་གི་ཟུག་རྔུ་ཐབས་ཇི་ལྟར་འདུག་པ་རྟོགས་ཤིག །དེ་བཞིན་དུ་ནང་གི་ཆུ་བ་ཕྲེའུ་དང་། རུས་པའི་ཚིགས་ཀྱི་
[46a]
[46a.1]བོག་རེ་དང་། ནང་གྲོལ་རྣམས་ལ་ཟུག་རྔུ་ཡོད་པ་དེ་བཞིན་དུ་རྟོགས་ཤིག །མཚོན་ཟུག་རྔུས་རུས་པ་མ་རུངས་པར་གྱུར་པ་བརྟག་པ་ནི། རུས་པ་ལ་མར་རམ་ཏིལ་གྱི་འབྲུ་མར་གྱིས་བྱུག་ཅིང་དུགས་བྱ། བསྡམ་ཞིང་བཙིར་བ་དང་མཉེ་བ་དང་རྐང་ལག་བརྐྱང་བསྐུམ་བྱས་པས་
[46a.2]བརྟག་པར་བྱའོ། །རུས་པའི་ཚིགས་བོག་རེ་བརྟག་པ་ཡང་རུས་པ་དང་འདྲའོ། །ཆུ་བ་དང་རྩ་དང་ལུས་ཀྱི་ལྦུ་བ་དང་། ལུས་ཀྱི་རྩ་ཆེན་པོ་རྣམས་ལ་ཟུག་རྔུ་ཡོད་ན་ཡང་བརྟག་པའི་ཐབས་ནི་ལམ་མཐོན་དམན་མི་མཉམ་པ་ལ་འགྲོ་བ་དང་། ཤིང་རྟ་འགྲུམ་ཞིང་འཆག་པའི་སྟེང་དུ་ཞོན་ལ་དྲག་ཏུ་
[46a.3]སོང་སྟེ་བསྐྱོད་པས་གར་ཟུག་ཅིང་ན་བའི་དམིགས་ལས་ཤེས་པར་བྱའོ། །མཚོན་ཟུག་རྔུ་གནད་དུ་བབ་པ་བརྟག་པ་ལོགས་ཤིག་ཏུ་མ་བཤད་དེ། དེ་དག་ཀྱང་ཤ་ལ་སོགས་པ་ལ་གནས་པ་ཡིན་པས་སྤྱི་ནི་རྐང་ལག་བརྐྱང་བསྐུམ་དང་། གསིག་ཅིང་བསྐྱོད་པའི་ཚེ་གར་ཟུག་ཅིང་ན་བའི་
[46a.4]དམིགས་ལས་ཤེས་པར་བྱའོ། །མཚོན་ཁོང་དུ་ལུས་པའི་དབྱིབས་ཟླུམ་པོ་འམ། ཟུར་བཞི་པ་འམ། ཟུར་གསུམ་པ་འམ། ཆེན་པོ་གང་ཡིན་པ་མདོར་རྨ་ཁའི་དབྱིབས་ལས་བརྟག་པར་གྱིས་ཤིག །མཚོན་ཟུག་རྔུ་དེ་ལྟ་བུ་ཟུག་པ་དབྱུང་བ་ཡང་ཕྱིར་དྲང་བ་དང་། མདུན་ནས་དྲང་བ་དང་།
[46a.5]མཚོན་ཟུག་པའི་རྩ་བ་ནས་དྲང་བ་དང་། མཚོན་གྱི་རྩེ་མོ་ནས་དབྱུང་ཞིང་དྲང་ངོ་། །ཡང་ན་ཐབས་དེ་ལྟ་བུ་མ་ཡིན་པ་མཚོན་གང་ན་ཡོད་པའི་ཐད་ཀར་གློར་དྲལ་ཏེ་དྲངས་ནས་བདེ་བླག་ཏུ་ཕྱིན་ནོ། །མཚོན་བྲང་གི་གནད་ལ་བབ་པ་དང་། མཆན་ཁུང་དང་། བརླ་དྲུང་ཆུ་སོའི་བར་དང་། རྩིབ་
[46a.6]ལོགས་ལྟ་བུར་མཚོན་གྱིས་ཕོག་སྟེ་ཟུག་རྔུ་ལུས་པ་ནི་ཕྱིར་དྲང་ཞིང་དབྱུང་དུ་མི་རུང་ངོ་། །མཚོན་གྱི་རྩེ་མོ་མི་མངོན་ནམ་མཚོན་ཆེའམ་གཅད་དུ་རུང་བར་སྣང་ཡང་གནོད་པའི་ནད་ཡིན་ན་ཕྱིར་དྲང་ཞིང་གཅད་དུ་མི་རུང་ངོ་། །མདེའུ་སྣ་སྦྲང་ལྟ་བུས་ཟུག་པ་ཡང་དབྱུང་དུ་མི་རུང་ངོ་། །ཡང་ན་མདེའུ་ནང་
[46a.7]དུ་ལུས་ཏེ་གནོད་པ་མེད་ན་ཞོག་ཅིག །ཡང་ན་མདེའུ་ལག་གིས་ཟུང་ལ་དྲོངས་ཤིག །མཚོན་སྣང་ལ་ལག་གིས་དྲང་དུ་མི་རུང་ན། དྲང་བའི་སྤྱད་འཁྲུལ་འཁོར་གྱི་མིང་སེང་གེའི་ཁ་ཞེས་བྱ་བ་དང་། ཆུ་སྲིན་གྱི་ཁ་ལྟ་བུ་དང་། སྲོག་ཆགས་འབར་མི་དང་། སྲིན་བུ་ཀར་ཀ་དའི་མཆུ་འདྲ་
[46b]
[46b.1]བས་མཚོན་ཅི་འདྲ་བའི་གཟུགས་བལྟར་མི་སྣང་ཡང་རྨ་ཁའི་དབྱིབས་དང་སྦྱར་ལ་དྲང་བའི་ཆ་བྱད་ཀྱི་འཁྲུལ་འཁོར་གྱིས་དྲངས་ན་ཕྱིན་ཏེ། པགས་པའི་བར་ན་མཚོན་ཡོད་པ་ནི་སྐམ་བུ་བྱ་ཀང་ཀ་དང་། བྱ་བྷྲིང་ག་དང་། བྱ་ཀུ་ར་རིའི་མཆུ་འདྲ་བ་དང་། མདའ་འདྲ་བ་དང་། སྨྱུང་བུ་འདྲ་བ་དང་། བྱ་རོག་གི་
[46b.2]མཆུ་འདྲ་བར་བྱས་པའི་སྐམ་བུས་དྲོངས་ཤིག །གསང་དང་སྦུ་གུ་ལྟ་བུར་མཚོན་ཟུག་པ་ལ་དྲང་བའི་འཁྲུལ་འཁོར་སྒོ་ལྕགས་ལྟ་བུས་དབྱུང་ངོ་། །ཡང་སྦུ་གུ་དང་། གསང་མ་ཕོག་པའི་མཚོན་འདམ་བུའི་སྦུ་གུ་ལྟ་བུས་དབྱུང་ངོ་། །དེ་བཞིན་དུ་མཚོན་ཟུག་རྔུ་ཁོང་དུ་ལུས་པ་གཞན་ཡང་སོ་སོའི་མཚོན་
[46b.3]དབྱིབས་ཇི་འདྲ་བའི་ཚུལ་དང་སྦྱོར་ལ་ལེགས་པར་དབྱུང་ངོ་། །མཚོན་ཟུག་པ་ལག་གིས་དྲང་དུ་མི་རུང་སྐམ་པས་ཀྱང་མི་ཕྱིན་པ་དེ་ནི་རྨ་ཁའི་ཆུ་སེར་དང་ཁྲག་བཙན་ཇི་ཡོད་པ་ལེགས་པར་ཕྱི་ཞིང་བསལ་ལ་མར་དང་སྦྲང་རྩི་སྦྱར་ལ་རྨ་ཁར་བསྐུས་ལ་དུགས་བྱས་ནས་རྨ་ཁ་གཡོགས་ཤིང་གླན་པའམ།
[46b.4]བཅིང་བ་ཅི་ལེགས་པར་བྱས་ན། སྣགས་པ་མཚོན་དུ་དབྱུང་བ་སླ་བར་འགྱུར་རོ། །རྩ་དང་ཆུའི་ནང་དུ་མཚོན་ལུས་པ་ནི་ཐུར་མས་བསྐྱོད་ཅིང་བསྒུལ་ཏེ་དྲོངས་ཤིག །སྙིང་གའི་རུས་པ་ལ་མཚོན་བབ་པ་ནི་ཆུ་གྲང་མོས་གདོང་དུ་བཏབ་སྟེ་སྡངས་པ་དང་། མཚོན་འགུལ་ཏེ་འཕགས་པར་གྱུར་པ་
[46b.5]ལས་ཐབས་ཇི་ལེགས་པར་བྱ་ཞིང་དབྱུང་ངོ་། །མཚོན་ཇི་ལྟར་ཟུག་པ་དེའི་རྨ་ཁའི་བུ་ག་ནས་དབྱུང་དཀའ་བ་ལྟ་བུ་དང་། གཞན་ཡང་དེ་བཞིན་དུ་དབྱུང་ངོ་། །རུས་པ་ལ་མཚོན་ཟུག་པ་དྲང་བ་ནི་རྐང་པས་བརྟེན་ལ་ཕྱུང་ཤིག །དེ་ལྟར་དྲངས་ཏེ་མ་ཕྱིན་ན་མི་སྟོབས་ཆེ་ལ་སྙིང་ཆེ་ཞིང་བརྟན་
[46b.6]པས་ལེགས་པར་དྲོངས་ཤིག །དེ་ལྟར་དྲངས་ཏེ་ཡང་མ་ཕྱིན་ན་མདེའུའི་རྩ་བ་བཀུག་ལ་གཞུ་རྒྱུད་ཀྱིས་ལེགས་པར་བརྟགས་ལ་རྟ་གཡུང་བརྟན་གྱི་རྐང་ལག་དང་མཐུན་ནས་ལེགས་པར་བརྟགས་ཏེ། གཞུ་རྒྱུད་དེ་སྲབ་ཀྱི་ཡང་མིག་ལ་བཏགས་ལ་རྟ་ལྕག་གིས་གཞུས་ཏེ་མགོ་དྲག་ཏུ་བཏེག་
[46b.7]ན་ཕྱིན་ཏོ། །ཡང་ན་ཤིང་ཆེན་པོའི་ཡལ་ག་ཐུར་དུ་བཀུག་པ་ལ་གཞུ་རྒྱུད་ཐོགས་ལ་ཤིང་གི་ཡལ་ག་བཏང་ན་ཕྱིན་ཏོ། །གཞུ་རྒྱུད་ངན་ཏེ་ཆད་དུ་དོགས་ན་སྣོན་ཐག་པ་བཟང་པོ་ཐོགས་ཤིག །རྨ་ཁ་སྐྲངས་མདེའུ་མི་སྣང་ན་སྦུ་གུ་དོང་བུ་ལྟར་འདུག་པས་རྨ་ཁ་ནས་མར་བཙིར་ལ་མཐེའུས་ཅུང་
[47a]
[47a.1]ཟད་རྡོབས་ལ་མདེའུ་རྩ་བ་སྣང་ན་རྩ་བ་ནས་ཟུང་ལ་དེ་བཞིན་དྲོངས་ཤིག །སྦུ་གུ་ཅན་གྱིས་བཙིར་ཞིང་མདེའུའི་རྩ་བ་བཏགས་ལ་མདེའུའི་ཁར་སྣང་དུ་མི་རུང་ན་ཡང་སྦུ་གུ་རྨའི་བུ་གར་མདེའུ་རྩ་གཏད་ཅིང་སྣང་བར་བྱས་ན་མདེའུ་ཟུར་ཁ་ཚོན་ཆེ་སྟེ། དྲུང་དུ་མི་བདེ་ན་
[47a.2]མདེའུ་ཟུར་གྱི་རྣ་བ་གཡས་གཡོན་སྐམ་པས་གཏམས་ལ་ཆུང་ངུར་བྱས་ཏེ་ཕྱུང་ཤིག །མདེའུ་རྣ་བ་ཐོགས་པ་མེད་པ་ལྟ་བུ་ནི་ཁབ་ལོང་ཐོགས་ཏེ་རྨ་ཁ་ཕྱེ་ལ་མདེའུ་དང་ཁབ་ལོང་གཏུག་ཅིང་བསྟན་ན་རང་འབྱུང་བར་འགྱུར་རོ། །ལོང་ཀ་དང་རྒྱུ་མ་ལྟ་བུའི་ནང་དུ་མཚོན་ལུས་ན་བཀྲུ་སྨན་གྱིས་ཁོང་
[47a.3]དུ་ཁྲུས་ལ་ཕྱུང་ཤིག །མཚོན་གྱིས་རྨས་པའི་རྨའམ། སྣད་དེ་རྨ་བྱུང་བ་ལ་རླུང་གིས་ཕོག་གམ། དུག་རེག་གམ། ནུ་མ་ལ་འབྲས་ལྟ་བུ་བྱུང་སྟེ་གནག་ཅིང་ཆུ་སེར་ཟག་པ་དང་། རྨ་ཁ་ན་རྣག་དང་ཁྲག་དང་ཆུ་སེར་ཡོད་པ་དང་། ཆུ་ཤོར་བ་རྣམས་ལ་རྔབས་རུས་གཞིབ་ཅིང་བསལ་ལོ། །གྲེ་
[47a.4]བའི་ནང་དུ་མདེའུའམ་གྲ་མའམ་ཉ་རུས་ལྟ་བུ་ཟུག་ན་པདྨའི་རྩ་བ་ཕྲེའུ་དང་། ཁ་ཟས་ལྷན་ཅིག་ལ་བལྡད་དེ། པདྨའི་རྩ་བའི་ཐོར་ཏོ་ལ་ལག་གིས་བཟུང་ལ་ཐུར་དུ་མིད་པ་དང་མདེའུ་ལ་འཁྲིས་ཏེ་ཐོགས་པ་ལ་ཕྱིར་དྲངས་ན་མདེའུ་ཕྱིན་ཏོ། །རྒྱ་སྐྱེགས་ཀྱི་ཤིང་གི་ཚིགས་མཁར་བཅུག་པ་ལས་གྲེ་བར་
[47a.5]སོང་སྟེ་ཐོགས་ན་ལྕགས་ཐུར་བསྲེགས་ཏེ། སྨྱིག་གུའི་ནང་དུ་བཅུག་སྟེ་གྲེ་བའི་ནང་དུ་བཏང་ལ་ལྕགས་ཐུར་ཚན་པོས་རྒྱ་སྐྱེགས་ལ་ཟུག་སྟེ་དམ་པོར་གྱུར་པ་དང་། ཆུ་གྲང་འཐུངས་པའི་ཕྱིར་དྲངས་ན་ཕྱིན་ནོ། །གྲེ་བར་རྒྱ་སྐྱེགས་མ་ཡིན་པ་གཞན་ཞིག་ཐོགས་ན། རྒྱ་སྐྱེགས་བཞུས་པ་སྦུ་གུ་ནས་
[47a.6]བཏང་སྟེ་རྒྱ་སྐྱེགས་དང་འབྱར་བར་བྱོས་ལ་དྲོངས་ཤིག །གྲེ་བར་སྐྲ་ཤད་ལྟ་བུ་དང་། གྲ་མ་དང་། ཚེར་མ་དང་། ཉ་རུས་ལ་སོགས་པ་གྲེ་བར་ཐོགས་ན་འཕྲལ་ལ་སྲང་བུ་འཇམ་པོ་དང་། ཟས་སུ་བསྲེས་ལ་མིད་ལ་སླར་དྲངས་ན་ཕྱིན་ནོ། །ཁ་སྣར་དྲང་དུ་མི་རུང་ན་སོག་དབྲག་ཏུ་བརྡེག་
[47a.7]ཅིང་ཆུ་བཏུང་ངམ་ཁ་ཟས་ཟོས་ལ་ཐུར་དུ་མིད་པར་གྱིས་ཤིག །མིག་གི་ནང་དུ་སྦུར་མ་སོང་ངམ་རྨ་ཁར་སྦུར་མ་སོང་སྟེ་ན་ན། རྨ་ཁའམ་མིག་ཏུ་ཆུ་ལྡུགས་ལ་སྐྲའམ་བལ་འཇམ་པོས་སོལ་ཅིག །ལྟོར་ཆུ་དྲགས་སམ་ཆུའི་ནང་དུ་སོང་སྟེ་ཁ་སྣ་ཆུས་གང་ན་ཁ་བུབ་ཏུ་བཙིར་ཞིང་སློན་ཏོ། །ཡང་
[47b]
[47b.1]ན་སྐེ་མན་ཆད་ཐལ་བའི་ནང་དུ་ནུབ་པར་བཅུག་ན་ཕན་ནོ། །རྣ་བའི་ནང་ཆུས་གང་ན་ཏིལ་མར་གྱི་འབྲུ་མར་དང་ཆུར་བསྲེས་ཏེ། ལག་པས་དཀྲུགས་ལ་རྣ་བར་བླུགས་ན་དེ་ནས་རྣ་བའི་བུ་གར་ཐུར་དུ་བཏོན་ལ་རྣ་དྲུང་དུ་ལག་པ་བསྡམ་པ་འམ། ཡང་ན་གཞིབ་པར་གྱིས་ཤིག །རྣ་བའི་ནང་དུ་སྡིག་སྦུར་རམ་
[47b.2]སྲིན་བུ་སོང་ན་རྣ་བའི་ནང་དུ་ཚ་ཆུ་དྲོ་འཇམ་ཙམ་མམ་ལན་ཚྭ་དྲོ་འཇམ་ཙམ་གྱིས་དགང་བར་བྱའོ། །སྲིན་བུ་རྣ་བའི་ནང་དུ་ཤི་ན་སྲིན་བུའི་ཁོག་པ་དབྱུང་བའི་ཆོ་ག་གྱིས་ཤིག །རྒྱ་སྐྱེགས་ལྟོར་སོང་བ་དང་། གསེར་དངུལ་ལ་སོགས་པ་ལྟོར་སོང་ངམ། ཁོང་དུ་ལུས་པ་ནི་ཡུན་རིང་དུ་འདུག་གོ །མདེའུ་ལ་སོགས་པ་
[47b.3]མཚོན་དང་ཟུག་རྔུ་གཞན་ཁོང་དུ་ལུས་པ་ནི་ལུས་ཀྱི་དྲོད་གྱིས་འཇུ་བར་འགྱུར་རོ། །ཁོང་པའི་ནང་དུ་ས་དང་། འོད་མའི་ཚལ་པ་དང་། ཤིང་ཚལ་དང་། རྭ་དང་། རུས་པ་དང་། སོ་དང་། སྐྲ་དང་། རྡོ་བ་ལ་སོགས་པ་རྣམས་སོང་བ་ནི་འཇུར་མི་རུང་ངོ་། །རྭ་དང་། འོད་མའི་ཚལ་པ་དང་། ལྕགས་དང་། ཤིང་ཏ་ལའི་
[47b.4]ལོ་མ་དང་། ཤིང་ཚལ་ལ་སོགས་པ་ནི་ཡུན་རིང་དུ་ཡང་མི་འཇུ་སྟེ། དེ་བས་ན་ཤ་དང་ཁྲག་ནི་ཟུག་རྔུའི་དྲོད་ཀྱིས་ཚོས་པར་འགྱུར་གྱི་ཟུག་རྔུས་འཇུ་བ་མེད་ན་སྒུ་བོ་ཅན་དུ་འགྱུར་རོ། །མཚོན་ནས་ཟུག་རྔུའི་ཤའི་ནང་དུ་ཚབས་ཆེར་ཟུག་པས་རྨའི་འཁོར་ཚ་ཞིང་ན་བའང་མེད་པ་དེ་ལྟ་བུ་ལ་མཉེ་ཞིང་དུགས་བྱས་
[47b.5]ལ། བཀྲུ་སྨན་དང་སྐྱུག་སྨན་གྱིས་སྦྱངས་ཏེ་ཤ་དབྲིའོ། །ཤ་དབྲི་དྲགས་ན་ཅུང་ཟད་སླར་བརྟས་ལ། སྨན་ཚ་བ་རྣོན་པོ་དང་སྦྱར་ལ་ཕུར་མའི་དུགས་བྱ་བ་དང་། ཁ་ཟས་ཀྱང་བྱིན། སྐོམ་ཡང་བླུད་ལ། དེ་ལ་ཞལ་ཞལ་བཏབ་སྟེ་ནད་ཁྲག་ཕྱུང་ཤིག །ཕུར་མའི་དུགས་བྱས་ཏེ་ནད་ཁྲག་ཕྱིན་པ་དང་།
[47b.6]རྨ་དང་བཙན་རྣམས་སྨིན་ཏེ་དུས་ལ་བབ་པ་དང་། རྨ་ཁ་དྲལ་ལ་མཚོན་ནམ། ཟུག་རྔུ་གང་ལ་འདུག་པ་བཙལ་ཞིང་བརྟགས་ལ། རྨ་ཁ་བསལ་ཞིང་ཕྱེ་ལ་ཟུག་རྔུ་ཕྱུང་ཤིག །ཁོང་དུ་མཚོན་དང་ཟུག་རྔུ་ལུས་པ་དེ་ཅི་འདྲ་བ་གང་ན་ཡོད། ཇི་ལྟར་འདུག་པ་བརྟགས་ལ། དེའི་ཚུལ་དུ་མཚོན་དབྱུང་བའི་ཆ་སྤྱད་
[47b.7]འཁྲུལ་འཁོར་ཡང་སྣ་མང་པོར་སྦྱོར་ཏེ། སོ་སོའི་ཐབས་དང་སྦྱོར་བ་མཁས་པ་རྣམས་ཀྱིས་གྱིས་ལ་མཚོན་ཟུག་རྔུའི་དམིགས་ཁོང་དུ་ཆུད་པར་གྱིས་ཏེ་མཚོན་ཟུག་རྔུ་ཕྱུང་ཤིག །ཁོང་དུ་མཚོན་དང་ཟུག་རྔུ་ལུས་པ་དབྱུང་བའི་ཆོ་གའི་ལེའུ་སྟེ་ཉི་ཤུ་རྩ་བརྒྱད་པ་རྫོགས་སོ།། །།
[48a]
[48a.1]ཐོར་བུ་ལ་སོགས་པ་སྐྲངས་པ་དང་སྨིན་པ་དང་རྣགས་པ་ལ་གཏར་ག་གདབ་པའི་ཆོ་གའི་ལེའུ་ཉི་ཤུ་དགུ་པ་བཤད་པར་བྱའོ། །ཐོར་བུ་ལྟ་བུ་དང་པོ་སྐྲངས་པ་ལས་སྨིན་ཏེ་རྣགས་པ་དང་བཏོན་ཏེ་རྨ་འབྱུང་ངོ་། །དེ་བས་ན་དེའི་ཆོ་ག་ནི་སྐྲངས་པ་དེ་མ་སྨིན་མ་རྣགས་པར།
[48a.2]སྨན་བསིལ་བའི་ལྡེ་གུ་དང་ཆུས་གདབ་ཅིང་གཏར་ག་གདབ་ལ་ཁྲག་དབྱུང་བ་དང་། བཀྲུ་སྨན་ལ་སོགས་པ་བཏང་བས་འཁྲུ་ཞིང་རྨ་དེ་སྨིན་པར་མི་འགྱུར་བར་སྲུངས་ཤིག །ཐོར་བུ་དེ་མ་སྨིན་པ་ནི་སྐྲངས་པ་ཆུང་ངུ་བྲི་བ་དང་། ཚ་བའི་དྲོད་བྲི་བ་དང་། ཐོར་བུ་མ་སྨིན་པ་དེའི་མདོག་དམར་
[48a.3]པོར་ཡང་མ་གྱུར་ལ་སྲ་ཞིང་བརྟན་པར་འདུག་གོ། །ཐོར་བུ་དེ་སྨིན་པ་ནི་མདོག་འགྱུར་ལ་ནག་པོར་སྣང་། རྐྱལ་བུ་གང་བ་བཞིན་དུ་འདུག་སྟེ། ན་ཞིང་ཟུག་ལ་གྲམ་ཞིང་འཕྲོ། །ལུས་ཀྱི་ཡན་ལག་བརྡུང་བ་སྙམ་བྱེད་ལ་གླལ་འབྱུང་ཞིང་ན། ཟས་ཡི་གར་མི་འོང་། ལུས་ཚ།
[48a.4]རིམས་ཀྱིས་འདེབས། གཉིད་ཆེ། ཐོར་བུ་སྐྲངས་པ་དེ་ཚ་ཁྱད་ནི་མར་གཞག་ན་འཇུ་བ་སྟེ། རྨ་དང་འདྲ་བར་རེག་ན་མི་བཟོད་པ་ཡིན་ནོ། །རྨ་དེ་རྣགས་པ་ལས་ཅུང་ཟད་རྩེ་གཞིལ་བ་ནི་ཐོར་བུ་སྨིན་པ་དེ་ན་བའི་ཤུགས་འབྲི་ལ་རྙིས་བག་ཏུ་འདུག །ཐོར་བུ་དཀར་ལ་གཉེར་མ་ཆུམ་ཆུམ་
[48a.5]བྱེད། ཐོར་བུ་དེའི་ཐ་མ་ནི་ཞུམ་ཞིང་གོང་དབུས་ནི་མཐོ། གཡའ་བ་དང་སྐྲངས་པ་ལ་སོགས་པ་འཇམ་པར་འགྱུར་རོ། །ཐོར་བུ་སྨིན་པ་དེ་ལས་རྣགས་པར་གྱུར་ན་ལག་གིས་མྱངས་ན། རྐྱལ་པའི་ནང་ན་ཆུ་ཡོད་པ་ལྟར་ཕན་ཚུན་རྒྱུར་རུང་ངོ་། །དེ་རླུང་གི་ཤས་ཆེན་ནའོ། །མཁྲིས་པའི་
[48a.6]ཤས་ཆེ་ན་ཚའོ། །བད་ཀན་གྱི་ཤས་ཆེ་ན་སྐྲང་ངོ་། །ཁྲག་གི་ཤས་ཆེ་ན་དམར་པོར་འགྱུར་རོ། །རླུང་དང་མཁྲིས་པ་དང་། བད་ཀན་ལ་སོགས་པ་རྣམས་མེད་ན་དེ་ལྟར་འགྱུར་རོ། །རླུང་དང་། བད་ཀན་དང་། མཁྲིས་པ་དང་། ཁྲག་རྣམས་རྒྱས་པ་ལ་ཐོར་བུ་དེ་སྨིན་པར་འགྱུར་རོ། །
[48a.7]རྨ་སྨིན་པར་གྱུར་པ་དེ་མ་བརྟོལ་གྱི་བར་དུ་རྣག་གིས་ཕག་འཆའ་སྟེ། པགས་པ་སྲབ་པོར་འགྱུར་ལ། ནད་ཀྱིས་ཟོས་ནས་རྡོལ་ལ་ཐུག་སྟེ། གཉེར་མས་གང་བ་དང་། མདོག་ནག་པོར་འགྱུར་ཏེ། ལུས་ཀྱི་ཤ་ཡང་འདྲུལ་བ་དང་། བད་ཀན་གྱི་ཤས་ཆེ་བའི་སྨིན་ཅིང་རྣགས་པ་དེ་ཁོང་དུ་
[48b]
[48b.1]ཟབས་ཆེར་ལྷུང་ལ་རྣག་ཁྲག་གིས་གང་བ་དེ་ལྟར་གྱུར་པ་ནི་ཐོར་བུ་རྣགས་ཤིང་སྨིན་པའི་རྟགས་ཡིན་ནོ། །ཁྲག་གི་ཤས་ཆེ་བའི་སྨིན་ཅིང་རྣགས་པ་ནི་སྐྲང་པ་བསིལ་བར་གྱུར་ཅིང་། པགས་པའི་མདོག་སྔ་མ་བཞིན་མ་གྱུར་ལ། རེག་ན་རྡོ་བ་བཞིན་སྲ་སྟེ། འདི་ལྟ་བུ་ནི་ཁྲག་གིས་སྨིན་
[48b.2]པ་ཡིན་པར་ཐེ་ཚོམ་མེད་པས་མཁས་པས་ཤེས་པར་གྱིས་ཤིག །མི་སྙིང་སྟོབས་ཆུང་སྟེ་ཕོག་སྙ་མེད་པ་དང་། ཉམ་ཆུང་བ་དང་། བྱིས་པ་ལྟ་བུ་ལ་ནི་ཐོར་བུ་སྨིན་ཏེ་རྣག་འཕྱོ་བའི་ཚེ་ན་ཚབས་ལྷག་པར་ཆེའོ། །ནད་དང་རུས་པའི་ཚིགས་བོག་རེ་ལ་སོགས་པའི་མཚམས་སུ་ཐོར་བུ་
[48b.3]བྱུང་བ་ནི་ཉེན་ཆེ་སྟེ་མཚོན་གྱིས་བརྟོལ་དུ་མི་རུང་། དེ་ལྟ་བུ་ལ་ནི་རྡོལ་བར་འགྱུར་བའི་རྩི་སྨན་གྱིས་བསྐུའོ། །ནད་ཀྱིས་ཉེན་ཡོད་པ་མ་ཡིན་པ་གཞན་ལ་ནི་མཚོན་གྱིས་བརྟོལ་ཞིང་དྲལ་དུ་རུང་ངོ་། །ཐོར་བུ་མ་སྨིན་པར་དྲལ་བ་དང་། རྩ་ཆད་པ་དང་། ཆུ་བ་ཆད་པ་ལས་ཁྲག་ཧ་ཅང་
[48b.4]མང་དུ་འབྱུང་བ་ནི་འཆི་བའི་ཉེན་དུ་འགྱུར་བའམ། ཡང་ན་ནད་ཚབས་ཆེན་པོར་འགྱུར་རོ། །ཡང་ན་མཚོན་གྱིས་དྲལ་བའི་རྨའི་འཁོར་དུ་ཐོར་དུ་སྐྲངས་པ་འབྱུང་བར་འགྱུར་རོ། །ཐོར་བུ་མ་སྨིན་པར་རྡོལ་ན་རྨའི་ཐ་མ་དང་། རྩ་དང་། རྒྱུས་པ་དང་། ཤ་ལ་རྣག་དང་ཁྲག་གིས་བཀང་སྟེ།
[48b.5]རྩ་ལ་མེ་མཆེད་པ་བཞིན་རྣག་གི་དཀྱེལ་སྐྱེས་ནས་ཚ་བས་སྲེག་གོ། །མི་བླུན་པོ་མི་ཤེས་པ་ཐོར་བུ་མ་སྨིན་པ་རྡོལ་བ་དང་། ཐོར་བུ་སྨིན་ཏེ་རྣགས་པར་གྱུར་ན་ཡང་མ་རྡོལ་བ་ནི་ཕན་གནོད་ཀྱི་དམིགས་མི་ཕྱེད་པའི་མི་རིགས་ངན་ཁྱི་ཤ་ཟ་བ་དང་འདྲ་བར་བལྟའོ། །རྨ་བརྟོལ་བའི་དཔྱད་ནི། སྔར་ཁ་ཟས་
[48b.6]ཡི་གར་མི་འོང་བ་ཟོས་ལ་འཚལ་ནན་ནི་ཕོག་སྙ་ལ་ཕན་པར་ཆང་བླུད་དོ། །དེ་ལྟར་སྔར་ཐོས་པས་ནི་མི་བརྒྱལ་མི་འབོག་པར་འགྱུར་རོ། །ཆང་འཐུང་བས་ནི་བཟི་སྟེ་ཕོག་སྙ་ཆེ་བ་ལ་ཕན་པར་འགྱུར་རོ། །འདི་ལྟ་བུ་བརྟོལ་བ་མ་གཏོགས་པར་གཞན་བུད་མེད་ཀྱི་རུམ་དུ་བུ་ཤི་བ་དང་། མདེའུ་
[48b.7]དབྱུང་བ་དང་། ཁ་ལྕེ་སྐྲངས་པ་བརྟོལ་བ་དང་། དམུ་རྫིང་བརྟོལ་བ་ལྟ་བུ་ལ་ནི་སྔར་ནད་པ་ལ་ཟས་སྐོམ་མི་སྦྱིན་ཞིང་མི་བླུད་པར་བརྟོལ་ལོ། །རྣག་བརྟོལ་ན་སྨན་པས་ཆ་སྤྱད་སྟ་གོན་བྱས་ལ་ནད་པ་ཁ་ཤར་ཕྱོགས་སུ་བསྟན་ཏེ། མི་སྟོབས་པོ་ཆེས་ནད་པའི་ལུས་དང་རྐང་ལག་མི་འགུལ་བར་
[49a]
[49a.1]བསྡམ་སྟེ། སྨན་པ་མདུན་དུ་འདུག་ལ་གནད་ལ་སོགས་པ་ཉེན་རྣམས་བཞག་སྟེ་བརྟོལ་བའི་སར་ཤའི་ཤུགས་བཞིན་དུ་གཙགས་བུ་རྣོན་པོས་རྣགས་པའི་དཀྱེལ་ཆེ་ཡང་རུང་། རྣག་ཀུན་ཕྱིན་པར་ཅིག་ཅར་ལྷན་ཅིག་ཐོབ་ཤིག །གདབ་པའི་ཚད་ནི་རྨ་ཁ་སོར་
[49a.2]གཉིས་དྲལ་ལ། ཟབས་སུ་ནི་སོར་གསུམ་བཏབ་ལ་དེ་ནས་ཕག་ཅི་ཡོད་པ་ཡང་མཛུབ་མོའམ། པད་མའི་ཆུབ་འམ། ཕག་ཟེའམ་རྟ་རྔ་ཡང་རུང་ཐོག་ཐག་ཏུ་ཕག་གི་ཡང་ཅི་ཡོད་པ་ཚོལ་ཅིག །ཕག་བཙལ་ཏེ་གང་དུ་ཕག་བྱུང་བའི་དམིགས་སུ་ཡང་བཏབ་ལ་རྣག་གི་དཀྱེལ་ཆེ་བ་དང་། རིང་དུ་
[49a.3]མ་མཆེད་ཅིང་ནད་དམིགས་སུ་མ་གྱུར་པར་རྣག་གི་དཔྱིས་ཕྱིན་པར་བྱའོ། །དེ་ལྟ་བུ་བརྟོལ་ཞིང་དབྲལ་བའི་སྨན་པ་ནི་ལ་གོར་མྱུར་ཞིང་མཚོན་རྣོ་བ་མི་གཏར་མི་རྡུལ་ལ་མ་རྨོངས་པ་འདི་ལྟ་བུ་ནི་སྨན་པ་གཙགས་ཀྱིས་འདེབས་པའི་ཡོན་ཏན་དང་ལྡན་པ་ཡིན་ནོ། །དཔྲལ་རྩ་དང་། སྨིན་མཚམས་
[49a.4]དང་། སྙིང་ག་དང་། སྐེ་རྩ་དང་། ལྟོ་བ་དང་། མཆན་ཁུང་དང་། མིག་རྩ་དང་། མིག་ཕུགས་དང་། མཆུ་དང་། མཁུར་ཚོས་དང་། བརླ་དྲུང་དང་ཆུ་སོའི་བར་འདི་རྣམས་སུ་གདབ་པ་ནི་འདྲ་སྟེ། དྲང་པོར་མ་བཏབ་ན་རྩ་དང་ཆུ་བ་ལ་སོགས་པ་ཆད་དེ་མ་རུང་བར་འགྱུར་རོ། །གཙགས་ཀྱིས་
[49a.5]བཏབ་ནས་གལ་ཏེ་འབོག་གམ་བརྒྱལ་ན། ཆུ་གྲང་མོས་ནད་པ་ལ་གདབ་ཅིང་དབུགས་དབྱུང་བ་དང་། ངག་སྙན་པས་ཡིད་བཞོའོ། །གཙགས་ཀྱིས་བཏབ་སྟེ་རྣག་ཁྲག་ཟག་ནས་རྨའི་མཐའ་ཐོག་ཐག་ཏུ་ལག་སོར་གྱིས་རྣག་ཁྲག་དང་ཆུ་སེར་བཙིར་ལ། ཆུ་སེར་ཡན་ཆད་མ་ལུས་པར་བཙིར་
[49a.6]ཏེ། དེ་ནས་ཤིང་མངར་གྱི་ཆུས་བཀྲུ་ཞིང་རྭ་དང་འཇམ་པོའི་ཤིང་ཆུའི་ནང་དུ་བཅུག་པས་ཀྱང་ཕྱིས་ཤིག །དེ་ནས་གདོན་ལ་སོགས་པས་མི་ཚུགས་ཤིང་བསྲུང་བའི་བདུག་པ་དང་། གུ་གུལ་དང་། ཨ་ཀ་རུ་དང་། ཡུངས་ཀར་དང་། ཤིང་ཀུན་དང་། ས་ཅི་རས་འདི་རྣམས་སྦྱར་བས་རྨ་ཁར་
[49a.7]བདུག་གོ། །དེ་ནས་རྨ་ཁར་སྨན་གདབ་ཅིང་གཡོགས་པ་ནི་ལྕེ་མྱང་ཚ་དང་། ཤུ་དག་དང་། ཤིང་ནིམ་པའི་ལོ་མ་དང་། ཏིལ་བཏགས་པ་དང་། ཤིང་མངར་ཕྱེ་དང་། རླུང་ངམ། བད་ཀན་ནམ། མཁྲིས་པ་ཅི་ལས་གྱུར་པའི་སྨན་དང་ཡང་སྦྱར་ལ། མར་དང་བརྫིས་ཏེ་ཆང་བུ་བྱས་པ་རྨའི་ནང་དུ་བཅུག་
[49b]
[49b.1]ཅིང་རྨ་ཁར་སྨན་འདི་བསྐུ། རྨ་ཁ་དང་བཙན་ཀུན་གྱི་སྟེང་དུ་ཡང་སྨན་འདི་ཉིད་ཀྱི་ལྡེ་གུ་མར་དང་ཕྱེར་སྦྱར་བས་བསྐུ་བར་བྱ་སྟེ། སྟུག་ཏུ་གཡོགས་པ་དེའི་ཐོག་ཏུ་གློད་འཇམ་པོས་གཡོག །དེའི་ཐོག་ཏུ་ཡང་ཤིང་བུ་ཕྲ་མོས་གཏམས་ཏེ་གཤིབས་ལ། སྲད་བུའམ་རས་ཀྱིས་རན་པར་
[49b.2]ལེགས་པར་ཆིངས་ཤིག །བཅིངས་པ་དེ་ཡང་གློ་དང་གཡས་གཡོན་དུ་མ་ཡོ། །སྟེང་འོག་ཏུ་མ་སོང་བར་བཅིང་བ་དང་། སྟེང་ཐུར་མ་སྲ་མོས་མནན་པ་ཡང་ཕྲ་ཞིང་སྲབ་བརྟན་པ་འཇམ་པ་མཉེན་པ་མ་འཁུམས་པར་རྨ་ལ་ཕན་པར་གྱིས་ཏེ་ཆིངས་ཤིག །ཞག་གཉིས་ཀྱི་བར་དུ་ནི་རྨ་དེ་བག་
[49b.3]བྱ་ཞིང་མཚན་མོ་བསྲུང་ངོ་། །གཏོར་མ་ཡང་གཏོར་ཅིག །འདྲེ་གདོན་ཐུབ་པར་བྱ་ཞིང་བསྲུང་བའི་སྨན་སྤྱི་བོ་ལ་གདགས་པའི་སྨི་དང་། གུ་ཧང་མ་ཏི་དང་། གུ་ཧ་དང་། ཛཱ་ཏི་ཕ་ལ་དང་། བྲཧྨ་ཙ་རི་ནི་དང་། ཤུ་དག་དང་། ཚད་དྲ་མ་ཏི་དང་། ཚད་དྲ་དང་། རྩྭ་དཱུར་བ་དང་། ཡུངས་ཀར་
[49b.4]དང་། འདི་རྣམས་སྤྱི་བོར་ཡང་གདགས། བསྲེགས་པའི་དུད་པས་ཀྱང་བདུགས་ཤིག །ཟས་སྐོམ་བསྡམ་པའི་ཆོ་ག་དང་འདྲ་སྟེ། ཁ་ཟས་དང་སྐོམ་བསྡམ། བུད་མེད་དང་མི་འཕྲད། ཉིན་པར་ཉལ་དུ་མི་རུང་ངོ་། །བུད་མེད་དང་མ་འཕྲད་ཀྱང་དྲན་ནམ་རེག་གམ་མཐོང་སྟེ་ཁུ་བ་བྱུང་
[49b.5]ན་ཡང་རྨ་ཁ་གཡའ། རྨ་ཁ་དམར་ཞིང་སྣུམ་པོར་འབྱུང་། ན་ཞིང་སྐྲང་། རྣག་འཁྱིམས་ཏེ་བུད་མེད་དང་མ་འཕྲད་ཀྱང་གནོད་པའི་ཉིན་དེ་ལྟར་འགྱུར་རོ། །ཁ་ཟས་ནི་ཅི་དང་ཅི་འཕྲོད་པ་ཟ་སྟེ། ནས་དང་། གྲོ་དང་། འབྲས་ཞག་དྲུག་ཅུས་སྨིན་པ་དང་། སྲན་ཆུང་དང་། མོན་སྲན་སྡེའུ་དང་།
[49b.6]ཏུ་བ་རི་དང་། ཛི་བན་ཏི་དང་། ནི་ཤན་ནཱ་ག་དང་། ལ་ཕུག་གཞོན་ནུ་དང་། བརྟག་དང་། ཏཎྜུ་ལི་ཡ་ག་དང་། རྒྱ་སྣེའུ་དང་། ཀ་ར་བེལ་ལ་ཀ་དང་། ཀར་ཀོ་ཏ་དང་། པ་ཏོ་ལའི་འབྲས་བུ་དང་། ལྕེ་ཚ་དང་། བལ་པོ་སེའུ་དང་། སྐྱུ་རུ་ར་དང་། འདི་རྣམས་གཡོས་སྦྱར་བ་ཞུན་མར་ལ་བརྔོས་
[49b.7]ཏེ། བཙོས་ལ་བསྒྲངས་པ་དང་། འབྲས་དང་འབྲུ་བག་རྙིང་པའི་ཟས་དང་། ཡུལ་སྐམ་སའི་བྱ་ཤ་ཟོས་ན་རྨ་དེ་མྱུར་དུ་འཚོ། ཁ་ཟས་ཚོད་བཟུང་སྟེ་ཆུང་ངུ་བཟའ། ཟས་ཕན་པ་དུས་གཅིག་ཏུ་ཟོས་ན་འཇུ་སྟེ་བདེའོ། །ཁ་ཟས་མ་ཞུ་ན་རླུང་ནད་ལ་སོགས་པ་ལངས་ཏེ། ནད་ཕྱིར་
[50a]
[50a.1]ན་ཞིང་སྐྲངས་པ་དང་། རྣགས་པ་དང་། ཚ་བ་དང་། ཕྱིར་སྐྲང་བར་འགྱུར་རོ། །ཁ་ཟས་དམིགས་ཀྱི་མི་རུང་བ་ནི་འབྲུ་བག་གསར་པ་དང་། ཏིལ་དང་། མོན་སྲན་གྲེའུ་དང་། ཆང་དང་། ཡུལ་སེར་ཆེ་བའི་ཤ་དང་། འོ་མ་དང་། བུ་རམ་ཤིང་དང་། བུ་རམ་ཆང་
[50a.2]དང་། སྐྱུར་བག་དང་། ལན་ཚྭ་ཚ་བའི་བག་དང་། འདི་རྣམས་མི་རུང་སྟེ་སྤང་ངོ་། །ཁ་ཟས་གཞན་ཡང་རྟུག་སྐམ་གྱིས་འདོགས་པར་འགྱུར་བ་དང་། ཚ་བར་འགྱུར་བ་དང་། ཟས་ལྕི་བ་དང་། ཟས་བསིལ་བ་འདི་རྣམས་ལྟ་བུའི་བག་མི་རུང་ངོ་། །འབྲུ་སར་པ་ལ་སོགས་པ་ཀུན་རྨ་རེད་
[50a.3]པར་འགྱུར། ནད་ཐམས་ཅད་སློང་བར་བྱེད་དོ། །ཡང་ལྕི་བ་དང་། ཁ་ཟས་ཚ་བ་དང་། ཁ་ཟས་རྩུབ་པ་དང་། སྐྱུར་བག་རྣམས་ཀྱིས་རྨ་མྱུར་དུ་རེད་ཅིང་གནོད་པར་འགྱུར་རོ། །མི་བྱིབ་པར་བསིལ་ཞིང་སྨན་པ་ལ་དང་། ཨུ་ཤི་རའི་བསིལ་ཡབ་ཀྱིས་གཡོབས་ཤིག །རྨ་ཁར་དྲག་
[50a.4]ཤུལ་གཟུགས་པ་དང་། ཕྲུག་པ་ལ་སོགས་པ་མི་བྱའོ། །བསྐྱོད་ཅིང་འགུལ་བ་ལ་བག་བྱ། བྲམ་ཟེ་ལྟ་བུ་ལ་སོགས་པ་དང་ལྷན་ཅིག་གཏམ་བྱ་ཞིང་རྨ་འཚོ་བའི་གཏམ་གྱིས་ཤིག །དེ་ནས་ཉི་མ་གསུམ་ལོན་པ་དང་། དཔྱད་སྔ་མ་དང་འདྲ་བར་རྨ་ཁ་ཕྲོལ་ཏེ་སྨན་གྱི་ཁུ་བས་བཀྲུ་ཞིང་བཙིར་ལ་
[50a.5]སྔ་མ་བཞིན་དུ་གྱིས་ཤིག །ཐོག་མར་རྣག་བརྟོལ་ཏེ། རྣག་ཁྲག་བཙིར། རྩི་སྨན་གྱིས་བྱུགས་ནས་རྨ་ཁ་གླན་ནས་བྱུག་པ་ཞག་གསུམ་མ་ཚང་བར་ཞག་གཉིས་ལོན་པ་དང་། རྨ་ཁ་དབྱེ་ཞིང་བཅོས་སུ་མི་རུང་ངོ་། །དེ་ལྟར་ཡོང་ནི་རྨ་ཁ་གླན་པ་དང་བཅིང་བ་མ་ལེགས་ན་རྨ་རབ་ཏུ་ན་ལ་རྨ་ཡུན་
[50a.6]རིང་དུ་མི་འཚོའོ། །རྣག་གི་ཕག་མི་འཆའ་བར་བྱ་བའི་དཔྱད་རས་ཀྱི་ཁ་ཚར་འཇམ་པོ་ལ་མར་དང་སྦྲང་རྩིས་བྱུགས་ལ་རྨ་ཁའི་བུ་ག་ནང་དུ་བཞག་པ་དེ་མར་ཧ་ཅང་ཆེས་སམ། སྦྲང་རྩི་ཆེ་ན་ཡང་མི་རུང་། བཅིངས་པ་ལྷོད་དམ་དམ་མམ། ཡ་ཡོ་ཁྱེར་ཏེ་དེ་མ་ལེགས་ན་ཡང་མི་རུང་།
[50a.7]རྨ་ཁར་སྨན་ལྡེ་གུས་གློན་པ་དྲགས་སམ། ཞུན་མར་དང་ཏིལ་མར་དྲགས་ན་ཡང་རྨ་ཆེར་འདྲུལ་ཞིང་རེད་པར་འོང་ངོ་། །བཅིང་བ་ཧ་ཅང་དམ་ན་ཡང་ཤ་ཆད་པར་འགྱུར་རོ། །སྦྲང་རྩི་ལྟ་བུ་དྲགས་ན་རྨ་ཁ་རལ་ཏེ་ཁྲག་འོང་བར་འགྱུར་རོ། །བཅིང་བ་ལྷོད་དམ་ཧ་ཅང་དམ་མམ་མ་
[50b]
[50b.1]ལེགས་ཏེ། ཡ་ཡོ་ཁྱེར་ན་རྨ་ཁ་འདྲུལ་ཏེ་འཇིག་གོ། །བག་ཆས་པའི་ནང་དུ་ཁ་ཚར་འཇམ་པོ་མར་དང་སྦྲང་རྩིས་བསྐུས་ཏེ་བཅུག་པ་ནི་ཤ་རུལ་པ་དང་། ཤ་སྐྲངས་པ་དང་། རྣག་ཕྱིས་པ་དང་། ཕག་རིང་དུ་འཆས་པ་འདི་རྣམས་ལྟ་བུ་མྱུར་དུ་སེལ་ཞིང་འབྱར་བར་བྱེད་དེ་ཕན་ནོ། །ཐོར་བུ་
[50b.2]མ་སྨིན་པར་དྲལ་ཏམ། རྡོལ་ན་སྐྲངས་པར་འགྱུར་ཏེ། དེ་ལ་ལྟ་རྨ་སྨིན་ཅིང་རྣགས་པར་འགྱུར་བའི་སྨན་དང་། ཁ་ཟས་དང་། སྨན་དང་བག་ཟན་དུ་སྦྱར་བའི་དུགས་གླན་ཅིང་བཅིངས་ཏེ་རྨ་ལ་མི་གནོད་པར་བྱའོ། །དྲག་ཤུལ་ལྟ་བུས་སྣད་དེ་རྨ་གསར་དུ་བྱུང་སྟེ་རལ་བ་དྲུབས་པར་
[50b.3]འོས་པ་ལྟ་བུ་དང་། རྨེན་བུ་ཆེན་པོ་བཀས་ཏེ་བྱུང་བའི་རྨ་ལྟ་བུ་དང་། རྣ་བའི་བུ་ག་ཆེ་ཆུང་ཁྱེར་ན་བརྒྱངས་པ་ལས་ཆད་པ་འདི་རྣམས་ལྟ་བུ་དྲུབས་ཤིག །སྣད་དེ་རྨ་བྱུང་བ་ལ་དྲུབ་ཏུ་རུང་བའི་དམིགས་ནི། མགོ་བོ་དང་། མིག་ཕུགས་དང་། སྣ་དང་། མཆུ་དང་། མཁུར་ཚོས་དང་།
[50b.4]རྣ་བ་དང་། བརླ་དང་། དཔུང་པ་དང་། མགུལ་པ་དང་། འཕྲལ་བ་དང་། མུར་འགྲམ་དང་། དཔྱི་དང་། དབུ་དོ་དང་། ཕོ་མཚན་དང་། གཞང་ལ་སོགས་པ་ཤ་རྣག་ཆེ་བ་དང་། མི་འགུལ་མི་གཡོ་ཞིང་བརྟན་པའི་བག་དང་། བུ་ག་ཟབས་ཆེ་བ་འདི་ལྟ་བུའི་བག་ནི་དྲུབས་ན་བཟང་ངོ་། །
[50b.5]དྲུབ་ཏུ་མི་རུང་བའི་དམིགས་ནི། དཔྱི་ཟུར་དང་། ཆུ་སོའི་མདོམས་དབྲག་དང་། མཆན་ཁུང་དང་། ཤ་ཆུང་ཞིང་བསྐྱོད་པར་འགྱུར་བའི་རྨ་འདི་ལྟ་བུ་དང་། ནང་ནས་དབུགས་འོང་བའི་རྨ་དང་། ཤིང་ཚལ་ལམ་མདེའུ་ཁོང་དུ་ལུས་པ་ལྟ་བུ་དང་ཐལ་སྨན་རྣོན་པོ་ཤ་ཀ་རས་རྨ་བྱུང་བ་
[50b.6]དང་། དུག་གམ་མེས་ཚིག་པའི་རྨར་གྱུར་པ་འདི་རྣམས་ལྟ་བུ་ནི་དྲུབ་ཏུ་མི་རུང་ངོ་། །རྨ་དྲུབ་པའི་ཐབས་ནི་རུས་པའི་དུམ་བུ་འཕགས་ཏེ་འགུལ་བ་ཡོད་པ་དང་། ཁྲག་སྐམ་དང་། རྩ་དང་། སྤུའི་བག་རྨའི་ནང་ན་ཅི་ཡོད་པ་ཡལ་ལ་ཤ་བཅད་པའི་དུམ་བུ་འཕྱང་བ་ཡང་རང་གི་སར་གླན་
[50b.7]པ་དང་། རུས་པའི་ཚིགས་བྱུང་བ་ཡང་རྨ་མིག་ཏུ་བཅུག་ལ་ཁྲག་ཟགས་ཏེ་ཆད་པ་དང་། རྒྱུས་པའམ་རས་བལ་གྱི་སྐུད་པ་འམ། ཤིང་ཤུན་གྱི་ཆུ་བ་ཤད་ཤད་པོས་དྲུབས་ཤིག །སྲུབས་ནི་ཁམ་ཆེ་བ་ཡང་མ་ཡིན། ཁམ་ཞིབ་པ་ཡང་མ་ཡིན་ཕལ་ཆེར་དྲུབ་པ་ཡང་མ་ཡིན་ཉུང་ངུ་དྲུབ་
[51a]
[51a.1]པ་ཡང་མ་ཡིན་པར་བྱའོ། །དེ་ལྟར་རྨ་དྲུབ་པའི་ཚེ། ནད་པའི་ཕོག་སྙ་བསྐྱེད་པ་དང་། སྤྲོ་བསྲིང་བར་བྱས་ཏེ། དེ་ནས་རྨ་ཁར་སྦྲང་རྩི་དང་ཞུན་མར་སྦྱར་བ་དང་། མིག་སྨན་སྐྱེར་ཁཎྜ་དང་། ཟར་མའི་མར་མེ་མར་དུ་བུས་པའི་དུད་པ་དང་། ཨ་རུ་ར་དང་།
[51a.2]བ་རུ་ར་དང་། སྐྱུ་རུ་ར་དང་གསུམ་འདི་རྣམས་བཏགས་ཏེ་ལྡེ་གུ་བྱས་ལ་བསྐུས་ནས་ཆོ་ག་གོང་མ་དང་འདྲ་བར་ཆིངས་ཤིག །རྨ་ཁ་སྐམས་ཏེ་ཁྲག་མེད་པས་འབྱོར་དུ་མི་རུང་ན་ཅུང་ཟད་རྨ་ཁ་དྲུད་དེ། ཁྲག་ཕྱུང་ལ་དྲུབ་ན་འབྱོར་བར་འགྱུར་རོ། །རྨ་ཁ་གླན་བཅིང་བ་ལ་སོགས་པ་ནི་
[51a.3]ཡུལ་རྣམས་དང་དབྱར་དགུན་གྱི་དུས་དང་སྦྱར་ཏེ་གར་ལེགས་པར་བྱའོ། །རྨ་ཁ་གླན་པའི་རྒྱུ་ནི། ལུག་ལྤགས་དང་། རི་དགས་ཀྲྀཥྞ་ས་ར་དང་། དར་དང་། འདི་དག་ནི་དྲོད་ཆེ་བ་ཡིན་ནོ། །ཟར་མའི་རས་ནི་བསིལ་ལོ། །བསིལ་བ་ཡང་མ་ཡིན་དྲོད་ཆེ་བའང་མ་ཡིན་པའི་
[51a.4]གཡོགས་མ་ནི་རས་བལ་གྱི་སྣམ་བུ་དང་། ཀར་པ་སའི་སྣམ་བུ་དང་། རྒྱུས་པ་དང་། ཤིང་ཤུན་དང་འདི་རྣམས་ནི་ཚ་གྲང་མེད་དེ་རན་པའོ། །ཚིལ་དང་བད་ཀན་ཆེ་བའི་རྨ་ཁར་ནི་ཟངས་དང་ལྕགས་དང་ཚོན་མོ་སྟེང་དང་ཞ་ཉེ་ལེབ་ལེབ་པོ་གླེན་ན་ཕན་ནོ། །རྐང་ལག་ཆག་ཐུར་བྱུང་བ་ལ་
[51a.5]གློད་ཀྱིས་དཀྲིས་ཏེ་ཤིང་ལེབ་ཀྱི་དབང་བུ་དང་། ཀོ་བ་དང་། ཤིང་ཤུན་ནམ། འཇག་མ་ལ་སོགས་པའི་དབང་འབུར་གྱིས་ལ་ཆིངས་ཤིག །གཞན་ཡང་རུས་པ་ལ་ཆག་ཐུར་ཞིག་བྱུང་ངམ་རྨ་བྱུང་ན་དཀྲི་ཞིང་བཅིང་བའམ། གླེན་པའི་ཐབས་རྣམ་པ་བཅྭ་ལྔ་པོས་དེ་དཀྲི་ཞིང་
[51a.6]བཅིང་བ་དང་། གླན་པའི་ཚུལ་ཅི་འདྲ་བ་ནི་སྔར་དང་མཐུན་པའི་ཚུལ་ལས་ཤེས་པར་བྱའོ། །སྒྲེའུ་ལྟ་བུ་བྱས་པ་ནི་སོར་མོའི་ཚིགས་སྣད་དམ་རྨ་བྱུང་ན་སྒྲེའུ་ལྟ་བུར་ཆུག་ཤིག །རྨ་བྱུང་བ་ལ་གླན་པའི་ཐབས་བཀྲ་ཤིས་ཞེས་བྱ་བ་ནི་རུས་པའི་ཚིགས་དང་། ཆུ་བ་ཆད་དམ། ངར་གདོང་
[51a.7]གི་ཐད་ཀ་སྒྲོག་བཅིང་བའི་ཐད་ཀ་སྣད་དམ། སྨིན་མཚམས་སམ་ནུ་མའི་ཕྲག་གམ་མཆན་ཁུང་ངམ། མིག་གམ། རྣ་བར་སྣད་ན། ཐབས་དེ་འདྲ་བར་གློན་ཅིག །མཐར་ཆགས་སུ་དཀྲི་བ་ཞེས་བྱ་བ་ནི་ལག་ངར་རམ་ལག་སོར་ལྟ་བུ་ཆག་གམ་འཕྲེས་ན་དཀྲིས་པའི་ཐབས་ཡིན་ནོ། །
[51b]
[51b.1]ལྷོད་པར་བཅིང་བ་ཞེས་བྱ་བ་ནི་མགུལ་ནད་དམ། ཕོ་མཚན་ལ་རྨ་ཡོད་ན་ལྷོད་པར་ཆིངས་ཤིག །ཟླུམ་པོ་ཞེས་བྱ་བ་ནི་ལུས་ཀྱི་ཡན་ལག་བརླའམ་བྱིན་པ་འམ། ལག་ངར་རམ། པུས་མོའི་ལྷ་ང་ལྟ་བུ་སྣད་པ་ལ་ཟླུམ་པོ་ཀོར་ཀོར་པོས་གློན་ཅིག །མདའ་ལྕུག་འདྲ་བའི་ལེའུའམ། སྒྱེའུ་
[51b.2]ནི་མཐེ་བོ་འམ། སོར་མོ་འམ། ཕོ་མཚན་གྱི་ཐོར་ཏོ་ལ་རྨ་ཡོད་དམ། ཟ་གུ་ཅན་དུ་གྱུར་ན་སྒྲེའུ་དེ་ལྟ་བུའི་ནང་དུ་ཆུག་ཤིག །ཟུང་དུ་གླན་པ་ཞེས་བྱ་བ་ནི་རྨ་གཉིས་ཤིག་འདབ་ཆགས་སུ་བྱུང་བ་ལ་ཐབས་དེ་ལྟར་གློན་ཅིག །ཁྲེའུ་ཞེས་བྱ་བ་འདི་ནི་འགྲམ་པ་སྣད་དམ་མུར་འགྲམ་སྣད་
[51b.3]དམ། མཁུར་ཚེས་སྣད་པ་ལ་གླན་ཏེ། ཁྲིའམ་སྔས་ལ་ཉལ་དུ་རུང་བ་དང་འདྲ་བར་བྱའོ། །རྒྱ་ཞེས་བྱ་བ་ནི་མིག་འགྲམ་སྣད་པ་ལ་གློན་ཅིག །འགུགས་མི་ཤེས་པར་བཅིང་བ་ཞེས་བྱ་བ་ནི་ལྟོ་བ་དང་། བརླ་དང་། རྒྱབ་སྣད་པ་ལ་ཐབས་དེ་ལྟར་བཅིང་ངོ་། །བླ་རེ་ཞེས་བྱ་བའི་བཅིང་
[51b.4]བ་ནི་གླད་པའི་སྤྱི་བོ་སྣད་པ་ལྟ་བུ་དང་། རོ་སྟོད་ལྟ་བུའི་བག་སྣད་པ་དང་། བླ་རེ་དང་འདྲ་བ་ཆེས་བཀྲིས་ཤིག །སྦྲུལ་མགོ་ལྟ་བུ་འམ། བ་ལང་གི་མགོ་ལྟ་བུས་ནི་སྣ་དང་མཆུ་དང་། ཀོ་སྐོ་དང་། བརླ་སྣད་པ་གླན་ཅིང་བཅིང་ངོ་། །ཡན་ལག་ལྔ་དང་ལྡན་པ་ཞེས་བྱ་བ་ནི་མགུལ་པ་ཡན་
[51b.5]ཆད་སྣད་པ་ལ་གླན་ཅིང་བཅིང་བ་ལ་བྱའོ། །སྲད་བུ་ཞེས་བྱ་བ་ནི་ཕོ་མཚན་ནམ་མོ་མཚན་ནམ་རྐུབ་བམ། མཆན་ཁུང་ལྟ་བུ་ནི་སྲད་བུས་བཅིངས་ཤིང་གླན་ནོ། །གདགས་པའི་བཅིང་བ་ཞེས་བྱ་བ་ནི་གྲུ་མོ་འམ་དཔུང་པ་ལ་བྱུང་ན་ལེགས་པར་བཅིངས་ལ་མགུལ་དུ་བཏགས་ཏེ་འཕྱང་དུ་
[51b.6]གཞུག་གོ། །དེ་བས་ན་མདོར་ནི་གང་དང་གར་སྣད་པའི་དམིགས་དང་སྦྱར་ལ་ཅི་ལེགས་པར་ཆིངས་ཏེ་གློན་ཅིག །རྨའི་སྟེང་དུ་མདུད་པ་མི་དོར། རྨ་ལ་གནོད་ཅིང་ཉམ་ང་བར་མི་བྱའོ། །བརླ་དང་། དཔྱི་དང་། མཆན་ཁུང་དང་། མདོང་མོ་དང་། གླད་པ་འདི་རྣམས་སྣད་པ་ནི་དམ་
[51b.7]དུ་ཆིངས་ཤིག །ཡན་ལག་ལ། ལག་ངར་དང་། སོར་མོ་དང་། རྣ་བ་དང་། བྲང་དང་། རྒྱབ་དང་། རྩིབ་ལོགས་དང་། མགུལ་པ་དང་། ལྟོ་བ་དང་། འདི་རྣམས་ལ་རན་ཙམ་དུ་ཆིངས་ཤིག །ཕོ་མཚན་དང་། རླིག་པ་དང་། མིག་དང་། ཚིགས་རྣམས་སྣད་པ་ལ་ནི་ལྷོད་པར་ཆིངས་
[52a]
[52a.1]ཤིག །ཤ་སྣག་ཆེ་ཞིང་ལྷོད་པ་རླུང་དང་བད་ཀན་དུ་གྱུར་པའི་སར་ནི་རན་པར་ཆིངས་ཤིག །ཤ་ཆུང་མེད་དེ་མཉམ་པར་འདུག་པའི་ལྟ་བུར་ནི་དམ་པོར་ཆིངས་ཤིག །ཁ་མཁྲེགས་པ་ལྟ་བུ་ལ་ནི་རབ་ཏུ་དམ་པོར་ཆིངས་ཤིག །དགུན་ལྷགས་པ་ཆེ་བ་
[52a.2]དང་དཔྱིད་ཀ་ས་ཆུ་དྲོས་པའི་རྨ་ལྟ་བུ་ནི་རྨ་ཞག་གསུམ་གསུམ་ཞིང་ཁྲོལ་ལ་ཆིངས་ཤིག །ཤ་ཕྲ་ཞིང་ཕྲ་བའི་སར་རྨ་བྱུང་བ་ལ་དམ་དུ་བཅིང་བར་གོང་དུ་བཤད་མོད་ཀྱི། མཁྲིས་པ་དང་ཁྲག་གཉིས་རྒྱས་པ་ལས་རྨར་གྱུར་པ་ལ་ལྷོད་པར་ཆིངས་ཤིག །གོང་དུ་རན་པར་ཆིངས་ཤིག་
[52a.3]པ་དེ་བཤད་པ་དེ་ལྟ་བུ་ལ་ཡང་མཁྲིས་པ་དང་ཁྲག་རྒྱས་པའི་རྨར་གྱུར་ན་དེ་བཞིན་དུ་ལྷོད་པར་བྱའོ། །སོ་ག་དང་སྟོན་གྱི་དུས་སུ་མཁྲིས་པ་དང་། ཁྲག་རྒྱས་པ་ལས་ཐོར་བུ་འམ་རྨར་གྱུར་པ་ལྟ་བུ་ཡང་སྔ་དྲོ་དང་ཕྱི་འཕྲེད་གཉིས་ཀའི་དུས་སུ་ཡང་དགྲོལ་ཞིང་ཆོས་ཤིག །ཤ་
[52a.4]སྦྲང་དང་སྦྲང་བུས་ཟོས་ཏེ་རྨ་བྱུང་བ་སེར་བུ་དང་ལྷགས་པ་ཕོག་སྟེ། སྐྲངས་པ་རྨ་མ་གཡོགས་མ་བཅིངས་པ་ལས་རྨ་རེད་ཅིང་རིང་དུ་སྨན་དང་སྣུམ་གྱིས་བསྐུས་ཀྱང་མ་ཕན་ཏེ། རྨ་ཁའི་ཆུ་སེར་དང་རྣག་དང་། ཤ་ནག་པོ་འམ་སྔོན་པོར་གྱུར་པ་འབྱང་ཡང་དཀའ། རྨ་འཚོ་
[52a.5]ཡང་དཀའོ། །རྨ་ཁ་འཚོ་བ་ལྟར་བྱེད་ན་ཡང་མདོག་མི་སྡུག་པར་འགྱུར་རོ། །རུས་པ་ཆག་སྟེ་ཕྱེ་མར་གྱུར་ཏམ། འཕྲེས་སམ། ཚིགས་འབུར་རམ། གཙགས་བུས་བཏབ་སྟེ་རྒྱུས་པ་དང་ཆུ་བ་ཆད་དམ། རྩ་ཆད་ཀྱང་རུང་། དེ་ལྟ་བུའི་བག་གང་ཆད་ཀྱང་རུང་གླན་ཅིང་
[52a.6]བཅིངས་ན་རྨ་བདེ་བླག་ཏུ་མྱུར་དུ་འཚོའོ། །དེ་ལྟར་བཅིང་ལེགས་པར་བྱས་པ་ནི་ལྡང་བ་དང་འདུག་པ་ཀུན་ལ་ཡང་གནོད་པར་མི་འགྱུར་རོ། །རྨ་འཚོ་དཀའ་བ་ནི་རྨ་ཁ་ཆེར་སྐྱེས་ཏེ། སྐྲངས་པ་མི་མཉམ་པའི་འབར་འབུར་དང་སྲ་ལ་རབ་ཏུ་ན་ན་ནི་འཚོ་དཀའོ། །རྨ་འཚོ་སླ་
[52a.7]བ་ནི་སྐྲངས་པའི་འབར་འབུར་མེད་ཅིང་འཇམ་ལ་ན་བ་མེད་པ་ནི་མྱུར་དུ་འཚོའོ། །རྨ་ཡུན་རིང་དུ་ཐོགས་པ་དང་། ཤ་ཆུང་བ་ལྟ་བུའི་བག་ལ་རྨ་ཁར་རླུང་ཤོར་ཏེ་རྩུབ་པོར་གྱུར་ན་མྱུར་དུ་འཚོ་དཀའོ། །བྱི་བའི་སོས་ཟིན་པ་དང་སྡིག་སྦྲུལ་ཁ་གདུག་པས་ཟིན་པ་དང་། ཐལ་སྨན་རྣོན་
[52b]
[52b.1]པོ་ཀྵ་རས་རྨ་བྱུང་བ་དང་། མེས་ཚིག་པ་དང་། དུག་གིས་རེག་པ་འདི་ལྟ་བུ་ལ་རྨ་མི་བཅིང་མི་གླན་ནོ། །ཤ་རུལ་པ་དང་གཞང་ཁ་རྣགས་ཏེ་མི་བཟོད་པར་ན་བ་དང་། མེ་དབལ་བྱུང་སྟེ་ཚ་ཞིང་སྐྲངས་པ་དང་། རུལ་བ་འདི་ལྟ་བུའི་བག་འདྲ་སྟེ། རྨ་ཁ་མི་བཅིང་མི་གླན་པར་
[52b.2]བཞག་ལ་རྨ་ཁར་སྲིན་བུ་དང་སྦྲང་བུ་མ་སོང་མ་ཞུགས་པར་སྲུངས་ཤིག །སྲིན་བུ་དང་སྦྲང་བུ་ཞུགས་ནས་སྣད་པ་དང་སྐྲངས་པ་དང་རྣག་མང་དུ་ཟག་པར་འགྱུར་རོ། །འབུ་ཞུགས་ན་སྨན་བྱིའུ་རུག་པ་ལ་སོགས་པ་བཏགས་ཏེ། དེས་བཀྲུ་ཞིང་རྨ་ཁའི་ནང་དུ་ཁོང་ཤིག །སྨན་
[52b.3]ལོ་མ་བདུན་སཔྟ་པརྞི་ཞེས་བྱ་བ་དང་། ཀ་རཉྫ་དང་། ཤིང་ནིམ་པའི་ལོ་མ་དང་། ཤིང་ཛ་ཏ་ན་དང་། ཤིང་ཚ་དང་། འདི་རྣམས་བཏགས་ལ་བ་གཅིན་དང་སྦྱར་ཏེ་ལྡེ་གུས་བྱུགས་པ་དང་། འདི་དག་གི་ཆུས་གདབ། ཐལ་སྨན་ཀྵ་ར་ཤ་རིའི་ཆུས་བཏབ་ན་ཡང་ཕན། ཤ་རྗེན་
[52b.4]ལེབ་ལེབ་པོས་གླན་ལ་འབུ་ཆགས་པ་མྱུར་དུ་དྲང་ན་ཕྱིན་ནོ། །རྨ་གསོ་བ་སྨྱུར་བ་སླ་ཆོས་སུ་བྱས་པ་ནི་ནང་གི་རྨ་ཆུ་སེར་དང་། རྣག་ཕྱིས་ཀྱང་མི་ཕྱིན་ལ་ཅུང་ཟད་ཅིག་བསྐྱོད་དམ་བྱས་ན་རྨ་ཕྱིར་འགྲམས་ཏེ་ན་བར་འགྱུར་རོ། །རྨ་གསོ་མ་ལེགས་པ་དེ་ལྟ་བུ་ནི་སོས་པ་འདྲ་ཡང་། ཟས་
[52b.5]མ་ཞུ་འམ། དྲག་ཤུལ་ཞིག་བྱས་སམ། བུད་མེད་དང་ཕྲད་ན་ཡང་རྨ་རེད་པར་འགྱུར་གྱི། དེ་ལྟ་བུ་ཡང་མི་བྱའོ། །རྨ་སོས་ཀྱང་ཟླ་བ་བདུན་ནམ། དྲུག་གི་བར་དུ་ཆོ་ག་བྱ་ཞིང་ལེགས་པར་སྲུངས་ཤིག །རྨ་རེད་ཅིང་ན་བར་གྱུར་པ་དེ་ཡང་། རླུང་ནད་དང་མཁྲིས་པ་དང་། བད་
[52b.6]ཀན་གྱི་མཐུ་ལས་རྨ་རེད་ཅིང་ན་བར་གྱུར་པ་ཡིན་ཏེ། དེ་བས་ན་རླུང་དང་མཁྲིས་པ་ལ་སོགས་པའི་ནད་དུ་མི་འབྱུང་ཞིང་རྨ་མི་རེད་པའི་དཔྱད་ལེགས་པར་གྱིས་ཤིག །ཞིབ་ཏུ་ནི་འོག་ནས་འཆད་དོ། །ཐོར་བུ་ལ་སོགས་པ་སྐྲངས་པ་དང་། རྣགས་པ་དང་སྨིན་པ་ལས་གཏར་ག་
[52b.7]གདབ་པའི་ལེའུ་ཉི་ཤུ་རྩ་དགུ་པ་རྫོགས་སོ།། །།ནས་ཚིག་འཁུས་པའི་ཐལ་སྨན་རྣོན་པོར་བྱུག་པ་དང་། མེ་བཙའ་གདབ་པའི་ཆོ་གའི་ལེའུ་སུམ་ཅུ་པ་བཤད་པར་བྱའོ། །ནས་ཚིག་འཁུས་པའི་ཐལ་སྨན་རྣོན་པོ་གཏོང་བ་ནི། གཙགས་བུ་དང་། གཙའ་གབ་དང་།
[53a]
[53a.1]གཙགས་བུའི་གོར་རུང་དང་། མེ་ཤེལ་དང་རས་བལ་ལ་སོགས་པས་ཁྲག་དབྱུང་བ་དང་། མེ་བཙའ་འདེབས་པ་ཐམས་ཅད་ཀྱི་ནང་ན་ཐལ་སྨན་རྣོན་པོ་ཀྵ་ར་གཏོང་བ་ལས་བཟང་བ་མེད་དེ་གཅད་པ་དང་། དྲང་ཞིང་དབུག་བ་ལ་སོགས་པའི་ལས་དཀའ་བ་མང་པོ་
[53a.2]ཀུན་ཀྱང་བྱར་རུང་ངོ་། །གཙགས་བུ་ལ་སོགས་པ་གདབ་པའི་ལས་ནི་དཀའ་སྟེ་ལེགས་པར་མི་འགྲུབ་བོ། །ཐལ་སྨན་གྱི་ནི་ནད་ཡང་བ་ལྟ་བུ་ཐལ་སྨན་སྐོམ་བཏུང་བ་དང་སྦྱར་ཏེ་གཏད་དུ་མི་རུང་ངོ་། །གཞང་འབྲུམ་གྱི་ནད་དང་། ཕོ་བ་གྲང་སྟེ་ཁོང་པ་དྲོད་ཆུང་བ་དང་། ཆུ་སོན་རྡེའུ་
[53a.3]ཡོད་པ་དང་། སྐྲན་དང་དམུ་རྫིང་དང་། དབྱི་གདུག་གིས་ཕོག་པའི་ནད་ལ། ཐལ་སྨན་ཀྵ་ར་ཁོང་དུ་འཐུངས་ན་ཕན་ནོ། །སྨེ་བ་དང་ཤ་བཀྲ་དང་། སྣའི་བུ་གར་ཐོར་བུ་བྱུང་བ་དང་། གཞང་ཁར་སེར་བ་རུས་བྱུང་བ་ལྟ་བུ་དང་། མཛེ་བྱུང་སྟེ་ཚོར་བ་མེད་པ་དང་། མཚན་བར་རྡོལ་
[53a.4]བའི་ནད་དང་། བརླ་དང་བྱིན་པར་འབྲུམ་བུ་ཚག་ཚིག་བྱུང་བ་དང་། སྐྲངས་པ་འདྲ་བ་ཀླ་ཀློ་དང་། རྣག་བག་འཆས་པ་དང་། འདི་རྣམས་ལྟ་བུ་ཐལ་སྨན་བྱུགས་ཤིང་བཏང་ན་སེལ་ཞིང་ཕྱིན་ཏོ། །མཁྲིས་པ་དང་ཁྲག་རྒྱས་པའི་ནད་དང་རླུང་ནད་ཀྱི་དཀྱེལ་སྐྱེས་པ་དང་། འདི་ལྟ་བུའི་བག་ལ་ཐལ་
[53a.5]སྨན་ཀྵ་ར་གཏང་དུ་མི་རུང་ངོ་། །རིམས་དང་ཚད་པ་དང་། སྙིང་ན་བ་དང་། མགུལ་པ་ཡན་ཆད་ཀྱི་ནད་དང་། སྐྱ་རྦབ་ཀྱི་ནད་དང་། ཡི་ག་འཆུས་པ་དང་། མིག་རབ་རིབ་ཁྱེར་བ་དང་། བཀྲུ་སྨན་གྱིས་བཀྲུས་པ་དང་། ལུས་ཐམས་ཅད་སྐྲངས་པའི་འོར་ནད་དང་། ཐལ་སྨན་གྱིས་
[53a.6]སྐྲག་སྟེ་འཐུང་མི་ཕོད་པ་དང་། བུད་མེད་སྦྲུམ་མ་དང་། མོ་མཚན་སྐྲངས་ཏེ་ན་བ་དང་། ཁ་ཟས་མ་ཞུ་བ་དང་། བྱིས་པ་དང་། མི་རྒན་པོ་དང་། རྩ་བོ་ཆེ་རྣམས་དང་། རུས་པའི་ཚིགས་དང་། གནད་དང་། མི་གཞོན་ནུའི་རུས་པ་དང་། རྩ་དང་། ཆུ་བ་དང་། ལྟོ་སྲུབས་ཐོག་ཐག་
[53a.7]དང་། མགུལ་པ་དང་། ལྟེ་བ་དང་། ཤ་གར་ཆུང་བའི་ཉེན་འཁོར་དང་། རླིག་པ་དང་། ཕོ་མཚན་དང་། བུ་གའི་སྦུ་གུ་རྣམས་དང་། སེན་མོའི་ཕྲག་དང་། རླིག་རླུགས་དང་། རྣམ་པ་འདི་རྣམས་ལ་ཐལ་སྨན་ཀྵ་ར་གཏང་དུ་མི་རུང་ངོ་། །མིག་ན་བ་དང་། ལྷགས་པ་ཆེ་བ་དང་།
[53b]
[53b.1]ཆར་པ་བབ་པ་དང་། ཡུལ་ཚ་བ་དང་ཡུལ་ངན་གྱི་དུས་སུ་ཡང་ཐལ་སྨན་ཀྵ་ར་གཏང་དུ་མི་རུང་ངོ་། །ཐལ་སྨན་རྣོན་པོ་སྦྱར་བའི་ཤིང་ནི་ཤིང་ཀ་ལ་མ་སྐ་ཀ་དང་། ཤིང་ཤཾ་མྱ་ཀ་དང་། ལྡུམ་བུ་ཤིང་དང་། ཤིང་བ་རི་པ་དྲ་ཀ་དང་། ཤིང་ཨ་ཤྭ་ཀརྞ་ཀ་དང་། ཤིང་མ་ཧཱ་བྲྀཀྵ་དང་།
[53b.2]རྒྱ་སྐྱེགས་ཤིང་དང་། ཤིང་པོ་ཏ་བྲྀཀྵ་དང་། ཤིང་ཨི་དི་བྲྀཀྵ་དང་། ཤིང་ཨར་ཀ་དང་། ཤིང་ནག་ཏ་མ་ལ་དང་། ཤིང་ཨ་ཤ་མར་ཀ་དང་། ཤིང་ཀ་ཀ་ཛཾ་ག་དང་། ཤིང་ཨ་བ་མར་ག་དང་། ཤིང་ཨགྣི་མནྠ་དང་། ཤིང་ཨགྣི་དང་། ཤིང་ཙི་ཏྲ་ཀའི་རྩ་བ་དང་། ཤིང་ནིམ་པ་
[53b.3]དང་། ཤིང་འདི་རྣམས་ཀུན་འདྲ་སྟེ་རློན་པ་དུམ་བུར་བྱས་པ་དང་། ཤིང་ཀོ་ཤ་ཏ་ཀ་དང་། ནས་ཀྱི་སྦུན་བ་དང་། གྲ་མ་དང་སོག་མར་བཅས་པ་སྣ་བཞི་དང་། ཤིང་མུ་ཀྵ་ཀ་དང་། རྡོ་ཐལ་གྱི་རྡོ་བ་རྣམས་རླུང་མི་ལྡང་བའི་ས་བཟང་པོར་རྡོ་ལེབ་ཀྱི་ཐོག་ཏུ་སོ་སོར་བརྡུངས་ལ་མེས་
[53b.4]སྲེགས་ཤིག །དེ་ནས་མེའི་ནང་དུ་ཏིལ་གྱི་སྡོང་བུ་རྣམས་ཀྱང་སྣོན་ལ་སྲེགས་ཤིག །ཀུན་ཚིག་ནས་མེ་ཞི་བ་དང་། སོ་སོར་མ་འདྲེས་པ་བསལ་ལ་དེ་ནས་རྡོ་ཐལ་གྱི་ཐལ་བ་བྲེ་གང་། ཐལ་བ་གཞན་ཡང་བྲེ་རེ་རེ། ཤིང་མུ་ཀྵ་ཀའི་ཐལ་བ་བྲེ་གང་དང་འདི་རྣམས་མ་འདྲེས་པར་
[53b.5]སོ་སོར་ཕྱེ་ལ་ཆུ་སྲང་སྟོང་སྟོང་དང་། བ་གཅིན་སྲང་སྟོང་སྟོང་དང་། སོ་སོར་བསྲེས་ཏེ་ཚགས་མིག་ཕྲ་མོ་བཟང་པོས་ནམ་མདོག་བཟང་ཞིང་སྤྱི་བ་འབྱར་བག་ཅན་མདོག་དམར་ལ་དང་ཞིང་གསལ་བ་དང་། ཚ་ཞིང་རྣོ་བར་ནམ་གྱུར་གྱུར་གྱི་བར་དུ་ལན་མང་དུ་བཙགས་པའི་དངས་མ་
[53b.6]ལ་སོགས་པ་སྣོད་བཟང་པོའི་ནང་དུ་བཙོས་ཤིང་དཀྲུགས་ཤིག །ཐལ་ཁུ་དངས་མ་དེའི་ནང་རྡོ་བ་བསྲེགས་པའི་དུམ་བུ་དང་། ཉ་ཕྱིས་དང་། ཀྵི་ར་པ་དང་། དུང་གི་ལྟེ་བ་དང་འདི་རྣམས་སྤྱིར་ཕུལ་གང་ཙམ་ལྕགས་ཏོག་ནང་དུ་བླུགས་ལ། མེའི་ནང་དུ་བསེགས་ཏེ་མདོག་དམར་པོར་གྱུར་
[53b.7]པ་དང་། ཐལ་ཁུ་དང་ས་མ་འཚེད་པའི་ནང་དུ་བླུགས་ཏེ། འདི་འདྲ་བར་ལན་མང་དུ་བསྲེགས་ལ་དམར་པོར་གྱུར་པ་དང་། དེའི་ཐལ་ཁུ་དངས་མའི་ནང་དུ་ལུགས་ཤིག །ཕྱིས་ཀྱང་ཞིབ་ཏུ་བཏགས་པར་བྱའོ། །ཡང་ཁྱིམ་བྱ་དང་རྨ་བྱ་དང་། བྱ་རྒོད་དང་། བྱ་ཀང་ཀ་དང་།
[54a]
[54a.1]ཕུག་རོན་དང་འདི་རྣམས་ཀྱི་རྟུག་པ་དང་། བྱ་དང་སྲོག་ཆགས་རྐང་བཞི་པའི་མཁྲིས་པ་དང་། བ་བླ་དང་། ལྡོང་རོས་དང་། ལྕེ་མྱང་ཚ་དང་། འདི་རྣམས་ཀྱང་ཞིབ་ཏུ་འཐགས་ལ་སྤྱིར་ཕུལ་རེ་ཙམ་གྱི་ཚོད་ཐལ་ཁུ་དངས་མ་འཚེད་པའི་ནང་དུ་ཐོབ་ལ་གཟར་བུས་དཀྲུག་ཅིང་
[54a.2]བཙོས་ལ་ངད་པ་ཕལ་ཆེར་བྱུང་། བསྐོལ་ཞིང་བླགས་པས་དུ་སྟེ། ལྡེ་གུ་བཞིན་གར་པོར་གྱུར་པ་དང་། ཐབ་ནས་ཕྱུང་ལ་ལྕགས་སྣོད་ཆུང་ངུའི་ནང་དུ་བྱོ་ལ་ཁ་དེ་ནས་ཀྱི་ཕུང་པོའི་ནང་དུ་ཆུག་སྟེ་ཞོག་ཅིག །ཐལ་སྨན་འདི་ནི་རྣོ་རབ་མ་ཡིན་ཏེ་འབྲིང་པོ་ཞེས་བྱའོ། །དེ་ལ་ཐལ་
[54a.3]སྨན་འཇམ་པོར་སྦྱོར་བ་ནི་རྡོ་ཐལ་གྱི་དུམ་བུ་དང་། ཉ་ཕྱིས་དང་། ཀྵིརྐ་དང་། དུང་གི་ལྟེ་བ་དང་། འདི་རྣམས་མེར་བསྲེག་ཅིང་ཐལ་ཁུའི་ནང་དུ་གསུར་ལ་བཏགས་ཤིང་ནང་དུ་མ་གདབ་པར་ཕྱིར་བོར་ཅིག །དེ་བཞིན་དུ་ཁྱིམ་བྱ་དང་། རྨ་བྱ་ལ་སོགས་པའི་རྟུག་པ་དང་། སྲོག་
[54a.4]ཆགས་དང་བྱའི་མཁྲིས་པ་ཡང་བསྲེག་ཅིང་གསུར་ལ་ཕྱིར་བོར་ཅིག །དེ་ལ་ཐལ་སྨན་རྣོན་པོ་སྦྱར་བ་ནི་རྡོ་ཐལ་གྱི་དུམ་བུ་དང་། ཉ་ཕྱིས་དང་། དུག་གི་སྙིང་པོ་ལ་སོགས་པ་སྔ་མ་བཞིན་དུ་བསྲེག་ཅིང་གསུར་ལ་བཏགས་ཏེ་ནང་དུ་གདབ་པ་དང་། བྱ་རྣམས་ཀྱི་རྟུག་པ་དང་། མཁྲིས་
[54a.5]པ་ལ་སོགས་པ་དེ་བཞིན་དུ་བསྲེག་ཅིང་གསུར་ལ་བཏགས་ཤིང་གདབ་པོ། །དེ་བཞིན་དུ་སྨན་ལང་ཀ་ལིང་ཀ་དང་། དན་ཏི་དང་། ཙི་ཏྲ་ཀ་དང་། བོང་ང་དང་། ཤུ་དག་དང་། བ་ཙ་སརྫི་ཀ་ས་ཞེས་བྱ་བ་དང་། ཐར་ནུ་དང་། ཤིང་ཀུན་དང་། ཀ་རཉྫའི་འདབ་མ་དང་། ཤིང་ཏཱ་
[54a.6]ལའི་ལོ་མ་དང་། ཁ་རུ་ཚ་དང་། འདི་རྣམས་ཀྱང་ཞིབ་ཏུ་བཏགས་ཏེ། ཐལ་ཁུའི་ནང་དུ་བཙོས་ཏེ་ཚོས་ནས་ལྡེ་གུར་གྱུར་པ་དང་། ལྕགས་སྣོད་ཆུང་ངུའི་ནང་དུ་བྱོ་ལ་ཁ་བཅད་དེ་ནས་ཀྱི་ནང་དུ་ཞག་བདུན་གྱི་བར་དུ་ཞོག་ཤིག །ཐལ་སྨན་རྣོན་པོ་འདིས་ནི་རླུང་ནད་དང་བད་ཀན་
[54a.7]གྱི་ནད་དང་། ཚིལ་སྐྱེས་པ་ལས་ཐོར་བུ་བྱུང་བ་དང་། རྨེན་བུ་ལ་སོགས་པ་འདི་རྣམས་སེལ་ཏོ། །ནད་འདི་རྣམས་ལྟ་བུ་ཚབས་མི་ཆེ་བ་སྟེ་འབྲིང་རྣམས་ལ་ནི་ཐལ་སྨན་རྣོན་པོ་མ་ཡིན་པ་འབྲིང་པོ་ཐོང་ཤིག །ནད་འདི་རྣམས་ལྟ་བུ་དཀྱེལ་མི་ཆེ་བ་སྟེ་ཆུང་ལ་ཐལ་སྨན་གྱི་རྣོ་བ་འཇམ་པོ་
[54b]
[54b.1]བཏང་ན་གཞང་འབྲུམ་ཁྲག་ཚད་མཁྲིས་པའི་ས་བོན་གྱིས་ཁྲག་ཏུ་འཁྲུ་བ་དེ་ལྟ་བུ་ལ་ཕན་ནོ། །ཐལ་སྨན་ཅུང་ཟད་བསྐམས་པར་གྱུར་ན་མཐུ་བསྐྱེད་པའི་ཐབས་ནི་ཐལ་སྨན་གདུ་གདུ་བའི་ཆུས་བསྟན་ཏོ། །ཐལ་སྨན་ནི་རབ་ཏུ་རྣོ་བ་ཡང་མ་ཡིན། རབ་ཏུ་རྟུལ་བ་ཡང་མ་ཡིན་ལག་གིས་
[54b.2]མནམས་ན་འཇམ་ཞིང་སྤྱི་བ་མདོག་སྐྱ་བ། ཅི་ལ་བཏང་ཡང་ཕན་པའི་ལས་མྱུར་དུ་བྱེད་པ། འདག་གུ་སྤྱི་བག་ཏུ་འདུག་པ་དེ་ལས་ཅི་རན་ཅིག་བཅད་དེ། གང་དུ་བཞག་ན་རྩེ་མོ་སྨྱུག་སྨྱུག་པོར་འདུག་པ་དེ་ལྟ་བུས་ནི་ནད་བདེ་བླག་ཏུ་སེལ་ཏོ། །ཐལ་སྨན་གྱིས་བྱུགས་པའི་རྨ་ཁ་ནས་
[54b.3]ཁྲག་མང་པོ་མི་འབྱུང་། བྱུགས་ན་ནད་རབ་ཏུ་མི་ཆེ་སྟེ། ཐལ་སྨན་ནི་གཏར་ག་བཅུ་བཏབ་པ་བས་ཕན་ན། མེ་བཙའི་དཔྱད་པས་ཀྱང་ཕན་པར་འགྱུར་རོ། །ཐལ་སྨན་གྱིས་བྱུགས་པ་ནི་ནད་ཀུན་འདྲེན་ཏེ་གཞིབས་པ་དང་འདྲ། ནད་ཀུན་སློང་བས་ན་ལུས་ལ་གནོད་པ་དང་ཡང་
[54b.4]འདྲའོ། །ནད་ཐམས་ཅད་ལ་སྙིགས་ཤིང་འགྲོ་བས་ན། ནད་དོ་ཅོག་དབྱིས་ནས་འབྱིན་ཅིང་སེལ་ཏོ། །ཐལ་སྨན་གྱིས་བྱུགས་ཏེ་ནད་དང་བྲལ་ནས་མི་བདེ་བ་རང་ཞི་བར་འགྱུར་རོ། །ཡང་ན་ཐལ་སྨན་གྱིས་བྱུགས་ཏེ་གསོར་རུང་བའི་ནད་ལྟ་བུ་ནི་མཚོན་གྱིས་གཅད་དམ། མཚོན་
[54b.5]གྱིས་བྲུད་དེ་རྨ་བྱུང་ངམ། གཏར་ཏེ་རྨ་བྱུང་བའི་རྨ་ཁ་དེ་ལྟ་བུ་ལ་ཐལ་སྨན་ཅི་རན་ཅིག་བླངས་ཏེ་ལྕགས་ཀྱི་ཐུར་མའི་ངོས་ལ་གླན་པ་དེས་རྨ་ཁར་གློན་ལ་སེ་གོལ་བརྒྱའི་བར་དུ་བསྡད་དེ། དེ་ནས་ཐལ་སྨན་སླར་ཕྱིས་ཤིག །དེ་ལ་གཞང་འབྲུམ་ལྟ་བུའི་ནད་ལ་ཐལ་སྨན་གྱིས་གཞང་
[54b.6]འབྲུམ་གྱི་ཁར་བསྐུས་ལ། གོས་ཀྱིས་གཞང་ཁ་གློན་ལ་ལེགས་པར་རྟོགས་ཤིག །མིག་གི་མཆུ་ལ་ཐོར་བུ་འམ་ནད་ཡོད་ན་མིག་གི་མཆུ་བཏེག་སྟེ་དྲོངས་ལ་མིག་གི་འབྲས་བུ་ནག་པོ་ཉི་ཚེ་གོས་འཇམ་པོས་གཡོགས་ལ་མིག་གི་སྤྲིན་མ་གཡོགས་པར་ཞོག་ལ་པདྨའི་ལོ་མ་འཇམ་
[54b.7]པོས་ཐལ་སྨན་ཅི་རན་ཙམ་བླངས་ལ་མིག་གི་མཆུར་ཡུགས་ཤིག །སྣའི་པོ་ར་ཀའི་ནང་རོལ་དུ་རྨེན་བུ་ལྟ་བུ་བྱུང་ན། གདོང་ཤར་ཕྱོགས་སུ་ཉི་མ་ལ་སྟོན་ལ་སྣའི་ཐོར་ཏོ་ནས་བཟུང་སྟེ། གྱེན་དུ་བཏེག་ལ་ཐལ་སྨན་ཅི་རན་ཅིག་བསྐུས་ཏེ་སེ་གོལ་བརྒྱ་སྲིད་དུ་ཞོག་ལ་ཕྱིས་ཤིག །
[55a]
[55a.1]རྣ་བ་ལ་རྨེན་བུ་འམ་ཐོར་བུ་བྱུང་ནའང་ཐབས་དེ་དང་འདྲ་བར་གྱིས་ཤིག །ཐལ་སྨན་གྱིས་བྱུགས་པ་འདི་རྣམས་ལེགས་སམ་མ་ལེགས་བརྟག་པའི་ཐབས་ནི་ཐལ་སྨན་ཕྱིས་ལ་ལེགས་པར་ཕྱེ་སྟེ་རབ་ཏུ་ཚིག་གམ་མ་ཚིག་པ་རྟོགས་ཤིག །ཐལ་སྨན་
[55a.2]གྱིས་རབ་ཏུ་ཚིག་པར་གྱུར་ན་མར་དང་སྦྲང་རྩི་དང་འོ་མ་དང་ཞོ་ག་ཆུ་དང་། འབྲས་རྩབས་འདི་རྣམས་བསྲེགས་ལ་སྦྱར་བས་ཐལ་སྨན་གྱིས་བྱུགས་པའི་རྨ་ཁར་བསྐུས་ལ་ཚ་བ་ཞི་བར་གྱིས་ཤིག །དེའི་རྗེས་ལ་སྨན་རོ་མངར་ཞིང་བསིལ་བ་རྣམས་དང་། མར་དུ་བརྫིས་པས་རྨ་
[55a.3]ཁར་སྐུས་ཤིག །ཁ་ཟས་ཀྱི་ཆོ་ག་ནི་རྨ་རྣགས་ཤིང་ཟག་པར་འགྱུར་བ་བད་ཀན་སྐྱེ་བའི་བག་བཟའོ། །གལ་ཏེ་ཐལ་སྨན་གྱིས་བསྲེགས་པའི་འཁོར་སྲ་བར་གྱུར་ཏེ། རྣག་དང་ཆུ་སེར་དུ་མི་ཟག་ན་འུ་སུའི་འབྲས་བུ་དང་། ས་བོན་གྱི་རོ་སྐྱུར་བག་དང་། ཤིང་མངར་དང་ཏིལ་
[55a.4]འདི་རྣམས་བཏགས་ཏེ་རྨ་ཁར་སྐུས་ཤིག །སྨན་འདི་རྣམས་ཀྱིས་རྣག་དང་ཆུ་སེར་མང་དུ་ཕྱུང་ནས་རྨ་གསོ་བའི་སྨན་ཏིལ་བཏགས་པ་དང་། ཤིང་མངར་བཏགས་ལ་མར་དང་སྦྱར་ལ་རྨ་ཁར་སྐུས་ཤིག །དེ་ལ་ཐལ་སྨན་བསྐུས་པས་ཚིག་པ་དང་། མ་ཚིག་པའི་བྱེ་བྲག་
[55a.5]བརྟག་པའི་ཐབས་ནི་ཤིང་ཏོག་འཛམ་བུ་སྨིན་པ་ལྟར་མདོག་ནག་པོར་འདུག་ན་ཐལ་སྨན་གྱིས་ཚིག་པ་ཡིན་ནོ། །ཟངས་ཀྱི་མདོག་འདྲ་བ་དམར་ལ་ཟུག་ཅིང་གཡའ་ལ་ན་ན་ཐལ་སྨན་གྱིས་མ་ཚིག་པ་ཡིན་གྱིས་དེའི་ཕྱིར་ཡང་བསྲེག་དགོས་ཏེ་ཐལ་སྨན་གྱིས་སྐུས་ཤིག །ཐལ་
[55a.6]སྨན་གྱིས་ཧ་ཅང་ཚིག་ཆེས་ན་ནི་ཁྲག་མང་དུ་འབྱུང་། བརྒྱལ། ཚ་བ་སྐྱེ། རིམས་ལ་སོགས་པས་འདེབས་སོ། །གཞང་འབྲུམ་ཧ་ཅང་ཚིག་ཆེས་ན་བཤང་གཅི་ལྷག་པར་སྲི་བའམ་ཡང་ན་རབ་ཏུ་མང་བར་འགྱུར་རོ། །གཞང་གི་ནང་གི་གཞང་འབྲུམ་ལ་ཐལ་སྨན་
[55a.7]དྲགས་ཏེ་ཚིག་ན་ཕོ་མཚན་མ་རུང་བར་གྱུར་ཏེ་འཆི་བ་འམ། ཡང་ན་གཞང་རུལ་བར་འགྱུར་རོ། །སྣའི་ནང་དུ་ཐལ་སྨན་དྲགས་ན་སྣའི་གཟང་འདྲལ་ལམ་འཁུམས་ཏེ་དྲི་མི་ཚོར་བར་འགྱུར་རོ། །རྣ་བ་ལ་སོགས་པ་ལ་ཐལ་སྨན་གྱིས་བྱུགས་པའི་ཉེན་ཡང་དེ་དང་འདྲའོ། །དེ་ལྟ་བུའི་
[55b]
[55b.1]ཉེན་ལས་ནད་དུ་གྱུར་པ་ལ་དཔྱད་དུ་བྱ་བ་ནི། ཤིང་མངར་བཏགས་པ་དང་འབྲས་རྩབས་ལྟ་བུ་དང་། ཏིལ་བཏགས་པའི་ཕྱེ་མ་དང་། མར་དུ་བསྲེགས་པའི་ལྡེ་གུས་སྐུས་ཤིག །ཆོ་གར་བྱ་བ་ནི་རླུང་ནད་སེལ་བ་དང་། མཁྲིས་པ་སེལ་བའི་དཔྱད་དང་བསིལ་བག་ཆོ་
[55b.2]ག་ཤེས་པར་བྱའོ། །ཐལ་སྨན་གྱིས་ཚིག་པ་ནི་སྐྱུར་བག་གིས་བྱུགས་ན་བསིལ་བར་གྱུར་ཏེ་ཕན་ནོ། །སྐྱུར་བག་བསྐུས་པས་ཚ་བ་ཞི་སྟེ་བསིལ་བར་གྱུར་པས་ན་དེའི་ཕྱིར་ཐལ་སྨན་གྱིས་ཚིག་སྟེ་རྨ་ཁ་ཚ་ལ་སྐྱུར་གྱིས་ཆེར་སྐུས་ཤིག །མེ་བཙའ་གདབ་པའི་དཔྱད་ནི་ཐལ་སྨན་གྱིས་བསྐུས་
[55b.3]པ་དང་མི་འདྲ་སྟེ། དེ་ལ་ནད་དུ་འགྱུར་ཞིང་ཉེན་དུ་འགྱུར་བ་མི་སྲིད་དོ། །སྨན་བཏང་བ་དང་ཐལ་སྨན་གྱིས་བྱུགས་པ་དང་། གཏར་ག་བཏབ་སྟེ་མ་ཕན་པའི་རྣམས་ལ། མེ་བཙའི་དཔྱད་ཀྱིས་པགས་པ་དང་། ཤ་དང་། རྩ་དང་། ཆུ་བ་དང་། རུས་པ་དང་། རུས་པའི་
[55b.4]ཚིགས་རྣམས་དང་། སྨེ་བ་དང་རྐང་ལག་སྣད་པ་དང་། ཀླད་པ་ན་བ་དང་། མིག་དང་ཀླད་པའི་གཞོགས་ཕྱེད་ན་བ་དང་། མཛེར་པ་དང་འདི་འདྲ་བ་ལ་མེ་བཙའ་གདབ་བོ། །དེ་ལ་པགས་པ་ལ་མེ་བཙའ་གདབ་ན་རས་བལ་དྲིལ་དྲིལ་བའམ་བ་ལང་གི་སོ་དང་མེ་ཤེལ་དང་
[55b.5]མདའ་སྨྱིག་ལ་སོགས་པས་གདབ་བོ། །གཞང་འབྲུམ་དང་། མཚན་པར་རྡོལ་བའི་ནད་དང་རྨེན་བུ་དང་། མཚོན་འཚེབས་དང་། ཤ་དང་པགས་པའི་བར་དུ་རྣག་འཁྱིམས་པ་འདི་ལྟ་བུ་ནི་ཤ་བསྲེགས་ཏེ་དེ་ལ་སྦྲང་རྩི་འམ་སྤྲ་ཚིལ་ལམ། མར་ལྷིང་ནག་ཏུ་བསྐོལ་བས་བསྲེག །
[55b.6]ཡང་ན་འཁྲུལ་འཁོར་དུ་བྱས་པ་འཛམ་བུའི་མཆུའམ། བུ་རམ་བསྲེགས་པས་སྲེགས་ཤིག །མིག་འབྱར་ཏེ་ཟུམ་པ་དང་། གཏར་ག་བཏབ་སྟེ་ཁྲག་མི་ཆོད་པ་དང་། ནི་ལ་ལ་སོགས་པ་འདི་རྣམས་ལ་སྦྲང་རྩི་དང་སྤྲ་ཚིལ་ལ་སོགས་པས་སྲེགས་ཤིག །གོང་དུ་རྒན་པོ་
[55b.7]དང་། བྱིས་པ་དང་། བུད་མེད་སྦྲུམ་མ་དང་། མཚོན་ཁོང་དུ་ལུས་པ་དང་། ལུས་སམ་ལྟོར་རྨ་ཆེན་པོ་བྱུང་སྟེ། ཁྲག་མང་པོ་ཟག་པ་དང་། རྨ་མང་པོ་བྱུང་བ་འདི་ལྟ་བུ་ལ་མེ་བཙའ་ཡང་མི་འདེབས་མ་སྲེག་ཅིག །མེ་བཙའ་ལེགས་པར་ཚིག་ན་རྨ་ཁར་ཤིང་མངར་བཏགས་པ་དང་།
[56a]
[56a.1]མར་དང་སྨན་སྣུམ་ཞིང་བསིལ་བ་བཏགས་པ་དང་། བཟང་པོར་སྦྱོར་ལ་རྨ་ཁར་སྐུས་ཤིག །མེ་བཙའ་ལེགས་པའི་ཚད་ནི་ཁྲག་མི་འོང་། ཆུ་བུར་ཕྲེའུ་བྱུང་བ་དང་། ཆུ་སེར་ཅུང་ཟད་ཙམ་འབྱུང་། བསྲེགས་པའི་འཕྲོ་བྱ་ཐི་བའི་མདོག་འདྲ་ན་མེ་བཙའ་ལེགས་ཏེ་ནད་མི་ཆེ་
[56a.2]སྟེ། རྨ་མྱུར་དུ་འཚོའོ། །མི་མཁས་པས་དྲོད་མ་ཟིན་ཏེ་མ་ཚོས་པ་དང་བསྲེགས་མ་ལེགས་པ་དང་། ཧ་ཅང་ཚིག་ཆེས་པ་དང་། ཙུད་ཚར་གྱུར་པ་དང་རྣམ་པ་བཞིའོ། །ཙུད་ཚར་གྱུར་པ་ནི་པགས་པའི་མདོག་འགྱུར་ལ་ཚ། ཆུ་བུར་འབྱུང་བ་ནི་མེད་པ་ཡིན་ནོ། །
[56a.3]བསྲེགས་མ་ལེགས་ན་ཆུ་བུར་འབྱུང་། རབ་ཏུ་ཚ་ལ་ནའོ། །ཧ་ཅང་བསྲེགས་དྲགས་ན་ནི་ཤ་ཞིག་སྟེ་འཕྱང་བ་དང་། འཁུམས་པར་འགྱུར་བ་དང་། ཧ་ཅང་ཚ་བ་དང་། ཟུག་ཅིང་ན་བ་དང་། རྩ་ལ་སོགས་པ་མ་རུངས་པར་འགྱུར་བ་དང་། སྐོམ་དད་ཆེ། འབོག །
[56a.4]མེ་བཙའ་བཏབ་པའི་རྨ་ཟབས་སུ་ཁོང་དུ་འབྲོས་པ་དང་། འཆི་བར་ཡང་འགྱུར་རོ། །མེ་བཙས་མ་ཚུགས་ཏེ་མ་ཚོས་པ་ནི་མེ་བཙའ་གདབ་པ་དང་། སྨན་དྲོད་ཆེ་ཞིང་ཚ་བའི་བག་སྦྱར་རོ། །ཁྲག་སྐ་སྟེ་ཟག་ཏུ་མི་རུང་ན་ན་བར་འགྱུར་རོ། །ཁྲག་ཟག་ན་ནི་འབྲི་ཞིང་ཐིམ་
[56a.5]པར་འགྱུར་རོ། །དེ་ལ་བསྲེགས་མ་ལེགས་ན་ནི་བསིལ་བ་དང་དྲོ་བའི་སྨན་གྱིས་བསྐུས་ལ་མཇུག་ཏུ་སྨན་བསིལ་བས་སྐུས་ཤིག །དེ་ལ་མེ་བཙའ་གདབ་ལེགས་ན་ཅུག་ཧང་དང་། ཤིང་པླག་ཤ་དང་། ཙནྡན་དང་། བཙག་ཡུག་སྣམ་དང་། སླེ་ཏྲེས་རྣམས་ཞིབ་ཏུ་
[56a.6]བཏགས་ལ་མར་དང་སྦྱར་ཏེ་རྨ་ཁར་སྐུས་ཤིག །དེའི་རྗེས་ནི་མཁྲིས་པ་རྒྱས་པའི་ནད་དང་མེ་དབལ་གྱི་ནད་ཀྱི་ཆོ་ག་དང་འདྲ་བར་བསིལ་བག་ཏུ་གྱིས་ཤིག །དེ་ལ་མེ་བཙའ་ཧ་ཅང་དྲགས་ཏེ་ཚིག་ནས་མཁྲིས་པ་རྒྱས་པ་དང་། མེ་དབལ་གྱི་ནད་ཀྱི་ཆོ་ག་དང་འདྲ་བར་བསིལ་
[56a.7]བག་ཏུ་གྱིས་ཤིག །མར་དང་སྤྲ་ཚིལ་ལ་སོགས་པ་ལྷིང་ནག་ཏུ་བསྐོལ་བསྐོལ་བས་བསྲེགས་ཏེ་ཚིག་ན་སྨན་རྩུབ་བག་གིས་མྱུར་དུ་སྐུས་ཤིག །ཐལ་སྨན་རྣོན་པོ་གཤའ་རས་བྱུག་པ་དང་མེ་བཙའ་གདབ་པའི་ཆོ་ག་བཤད་པ་རྫོགས་སོ།། །།སྨན་དཔྱད་ཡན་
[56b]
[56b.1]ལག་བརྒྱད་པའི་སྙིང་པོ་བཤད་པའི་མདོའི་གནས་རྫོགས་ཏེ། བཤད་པ་འདི་དག་ནི་གསང་བ་དང་འདྲ་བར་སྨན་དཔྱད་ཀྱི་དམིགས་བཤད་པ་རྣམས་མདོ་ཙམ་ཞིག་བཤད་པས་རྩིང་ངོ་། །ཞིབ་ཏུ་རྒྱས་པར་ནི་འོག་ནས་བསྟན་ཅིང་བཤད་དོ། །སྨན་པའི་བདག་པོ་སེང་
[56b.2]གེ་སྦས་པ་ཞེས་བྱ་བའི་བུ་སྨན་པ་ཆེན་པོ་ཕ་ཁོལ་ཞེས་བྱ་བས་ཡན་ལག་བརྒྱད་པའི་སྙིང་པོ་མཛད་པ་ལས་མདོའི་གནས་ཞེས་བྱ་བ་ལེའུ་སུམ་ཅུ་པ་རྫོགས་ཏེ་ཡན་ལག་བརྒྱད་པའི་སྙིང་པོའི་གནས་དང་པོའོ།། །།སྨན་དཔྱད་ཡན་ལག་བརྒྱད་པའི་སྙིང་པོ་ལས་
[56b.3]ལུས་ཀྱི་གནས་ཞེས་བྱ་བ། བྱིས་པ་རུམ་དུ་ཆགས་པ་དྲུག་ལས་ལེའུ་དང་པོ་བཤད་པར་བྱའོ། །དེ་ལ་སྔོན་གྱི་དྲང་སྲོང་ཆེན་པོ་རྒྱུན་ཤེས་ཀྱི་བུ་ལ་སོགས་པས་བཤད་པ་ན་རེ་ཐོག་མ་སེམས་ཅན་ཇི་སྐད་སྐྱེ་ཞེ་ན། དང་པོ་ཕ་མའི་ཁུ་བ་དང་ཁྲག་རླུང་ལ་སོགས་པའི་སྐྱོན་
[56b.4]མེད་པ་དང་། ལས་དང་ཉོན་མོངས་པ་དང་ལྡན་པའི་རྣམ་པར་ཤེས་པ་དང་། དེ་དང་ལྷན་ཅིག་འབྱུང་བ་ནམ་མཁའ་ལ་སོགས་པའི་འབྱུང་བ་ཆེན་པོ་ལྔ་ཤིན་དུ་ཆ་ཕྲ་བ་དབང་པོའི་ཡུལ་ལས་འདས་པ་རྣལ་འབྱོར་གྱི་ཡུལ་དུ་གྱུར་པ། དེ་དག་སྐད་ཅིག་མངལ་དུ་ཚོགས་
[56b.5]ཤིང་འདུས་པ་ནི་རུམ་དུ་ཆགས་པ་ཞེས་བྱ་སྟེ། དཔེར་ན་གཙུབ་ཤིང་དང་། གཏན་པ་དང་། སྤྲ་བ་དང་། སྐྱེས་བུས་རྩོལ་བའི་ལག་པ་དང་། འདི་དག་ཚོགས་པ་ལས་མེ་འབྱུང་བ་བཞིན་ནོ། །དེ་ལྟར་ཆགས་ནས་ཁ་ཟས་ཟོས་པའི་དངས་མའམ། བཅུད་ཀྱིས་ནུར་
[56b.6]ནུར་པོ་དང་མེར་མེར་པོ་ལ་སོགས་པར་རིམ་གྱིས་འགྱུར་ཞིང་འཕེལ་བར་འགྱུར་རོ། །དེ་ལ་རྣམ་པར་ཤེས་པ་དབང་པོའི་ཡུལ་ལས་འདས་པ་མའི་མངལ་དུ་ཇི་ལྟར་འཇུག་ཏུ་རུང་ཞེ་ན་དེ་ནི་མངོན་སུམ་གྱི་དཔེས་བསྟན་ཏེ། ཇི་ལྟར་ཉི་མའི་འོད་ཟེར་མེ་ཤེལ་ལ་ཕོག་པའི་དབང་
[56b.7]གིས་རྩྭ་དང་ཤིང་ལ་སོགས་པ་བསྲེགས་པར་སྣང་ཡང་། ཤིང་ཡང་མེ་ཤེལ་ལ་རེག་པར་མི་སྣང་ལ་མེ་ཤེལ་ཡང་ཤིང་ལ་རེག་པར་མ་མཐོང་མོད་ཀྱང་ཚིག་པར་སྣང་བ་བཞིན་དུ་རྣམ་པར་ཤེས་པ་མངལ་གྱི་ནང་དུ་ཞུགས་པ་ཡང་མི་སྣང་བའི་སྒོ་ནས་འཇུག་པ་ཡིན་ནོ། །དེ་ལ་རྣམ་
[57a]
[57a.1]པར་ཤེས་པ་དང་། དེ་དང་ལྷན་ཅིག་འབྱུང་བའི་རྒྱུ་འབྱུང་བ་ཆེན་པོ་ལྔ་ནི་སེམས་ཅན་སྐྱེ་བའི་རྒྱུར་གཅིག་ན། སྐྱེ་བ་རྣམ་པ་དུ་མ་སྣང་བའི་ཕྱིར་ཞེ་ན། མཐུན་པའི་དཔེས་བསྟན་ཏེ་ཇི་ལྟར་སྤྲ་ཚིལ་དང་ཟངས་མ་ལ་སོགས་པའི་རྒྱུ་གཅིག་པས་
[57a.2]གཟུགས་ཐ་དད་པ་སྣ་ཚོགས་དགའ་མགུར་བྱར་ཡོད་དེ། ཅིར་ཡང་སྣང་བ་དང་འདྲ་བར་རང་བཞིན་གཅིག་པ་ལས་ཀྱང་ཐ་དད་པར་སྣང་དུ་རུང་ངོ་། །དེ་བས་ན་ཕའི་ཁུ་ཆུའི་ཤས་ཆེ་བ་ལས་ནི་སྐྱེས་པར་འགྱུར་ལ། མའི་ཁྲག་གི་ཤས་ཆེ་བ་ལས་ནི་བུ་མོར་འོང་ངོ་། །ཆ་མཉམ་
[57a.3]པ་ལས་ནི་མ་ནིང་དུ་འགྱུར་རོ། །བུ་མཚེ་མར་འོང་བ་ནི་ཆགས་ནས་མེར་མེར་པོའི་སྐབས་སུ་རླུང་གིས་དུམ་བུར་བཅད་པ་ལས་དུ་མར་གྱུར་ཏེ། དེ་ཡང་ཕོ་མོ་ལ་སོགས་པར་འབྱུང་བ་ནི་ཁུ་ཁྲག་གི་ཤས་ཆེ་ཆུང་གོང་མ་ལྟར་ཤེས་པར་བྱའོ། །ཕ་མའི་ཁུ་ཁྲག་རླུང་ལ་སོགས་
[57a.4]པའི་སྐྱོན་དང་བཅས་པ་ལས་ནི་སྐྱེ་བ་མི་མཐུན་པ་སྦྲུལ་དང་བྱི་བ་ལ་སོགས་པ་འབྱུང་བ་དང་། གཞན་ཡང་ལོང་བ་དང་། འོན་པ་དང་། ཞ་བོ་དང་། གྲུམ་པོ་དང་། ཐེང་པོ་དང་། མིའུ་ཐུང་དང་། ལུས་མི་སྡུག་པ་ལ་སོགས་པ་ལུས་སྐྱོན་དང་བཅས་པར་འབྱུང་བ་ཡིན་ནོ། །
[57a.5]བུད་མེད་ཀྱི་ཟླ་མཚན་ཟླ་བ་གཅིག་ལ་ལན་གསུམ་འབྱུང་ངོ་། །དེ་ཡང་ཐོག་མ་ལོ་བཅུ་གཉིས་ལོན་པ་ནས་ཏེ་ལོ་ལྔ་བཅུ་ཕན་ཆད་ནི་མི་འབྱུང་ངོ་། །སྐྱེས་བུ་གང་ལོ་བཅུ་དྲུག་གམ་ཉི་ཤུ་ཡང་ལོན། མངལ་གྱི་གནས་ཀྱང་དག །ཁུ་བ་དང་ཁྲག་ལ་ཡང་ཉེས་པ་མེད།
[57a.6]རླུང་ལ་སྐྱོན་མེད་ཅིང་ཕ་མ་གཉིས་སེམས་དགའ་བ་དང་བཅས་པའི་བུ་ནི་ཤིན་ཏུ་སྟོབས་དང་ལྡན་པར་འགྱུར་རོ། །གོང་མ་གཉིས་ལས་ལོ་ཉུང་བ་བཅུ་དགུའམ་ལོ་བཅོ་ལྔ་པའི་བུ་ཚ་ནི་ནད་མང་བ་དང་། ཚེ་ཐུང་བ་དང་། མངལ་ཞིག་པར་འགྱུར་རོ། །ཕ་མའི་ཁུ་བ་དང་། ཁྲག་
[57a.7]རླུང་ལ་སོགས་པའི་སྐྱོན་གྱིས་འདྲེས་ན་ནི་ས་བོན་གྱི་རུས་པ་ཞན་པར་འགྱུར་རོ། །དེ་ཡང་མྱགས་པ་དང་། མདུད་པ་ཅན་དང་། རྣག་ལྟ་བུ་དང་། ཟད་བྱེད་དང་། དྲི་མ་ཅན་དང་ལྔའོ། །ལྔ་པོ་དེ་དག་ཀྱང་རླུང་ལ་སོགས་པའི་རང་རང་གི་རྟགས་དང་མཐུན་པར་འབྱུང་སྟེ།
[57b]
[57b.1]དེ་ཡང་རླུང་ལས་གྱུར་པའི་རྟགས་ནི་ཁུ་བ་རྩུབ་པ་དང་། མདོག་སྔོ་བསངས་སུ་འབྱུང་བའོ། །མཁྲིས་པ་ལས་གྱུར་པའི་རྟགས་ནི་ཤིན་ཏུ་སླ་བ་དང་། དྲི་མི་ཞིམ་པ་དང་། མདོག་སེར་སྐྱ་ལ་སོགས་པར་འབྱུང་བའོ། །བད་ཀན་ལ་སོགས་པའི་རྟགས་ནི་ཤིན་ཏུ་དཀར་བ་
[57b.2]ལ་སོགས་པར་འབྱུང་བའོ། །གཞན་ཡང་ཁྲག་ལས་གྱུར་པའི་མཚན་མ་ནི་རོ་མྱགས་ལྟ་བུའི་དྲི་མར་སྣང་བའོ། །བད་ཀན་དང་རླུང་ལས་གྱུར་པ་ནི་ཁུ་བ་དང་། ཁྲག་མདོག་དུད་པ་ལྟར་སྣང་བའོ། ཁྲག་དང་མཁྲིས་པ་ལས་གྱུར་པའི་མཚན་མ་ནི་རྣག་ལྟ་བུའོ། །རླུང་
[57b.3]དང་མཁྲིས་པ་ལས་གྱུར་པ་ནི་ཤིན་ཏུ་རུལ་བའོ། །ནད་གཞི་འདུས་པ་ལས་གྱུར་པ་ནི་དྲི་མ་ལྟ་བུ་སྟེ། དེ་དག་ལས་ཀྱང་འདུས་པ་ལས་གྱུར་པ་དྲི་མ་ལྟ་བུ་ནི་གསོར་མི་རུང་ངོ་། །ལྷག་མ་གསོ་བར་བྱ་སྟེ། རླུང་ལས་གྱུར་པ་ནི་སྣུམ་བག་དང་། དྲོ་བ་དང་། སྐྱུར་བ་དང་། ལན་
[57b.4]ཚྭ་ལ་སོགས་པས་གསོའོ། །མཁྲིས་པ་ལས་གྱུར་པ་ནི་མངར་བ་དང་། བསིལ་བ་དང་། ཁ་བ་དང་། བསྐ་བ་ལ་སོགས་པས་གསོ་བར་བྱའོ། །བད་ཀན་ལས་གྱུར་པ་ནི་རྩུབ་པ་དང་། རྣོ་བ་ལ་སོགས་པ་སྦྱིན་ནོ། །ཁྲག་ལས་གྱུར་པ་ནི་མཁྲིས་པ་གསོ་བའི་ཆོ་གས་
[57b.5]ཞི་བར་ནུས་མོད་ཀྱི། འོན་ཀྱང་ཁྲག་ལས་གྱུར་པའི་མྱགས་པ་ནི་ད་ཏ་ཀའི་མེ་ཏོག་དང་། སེང་ལྡེང་དང་། བལ་པོ་སེའུ་དང་། ཨར་ཛུ་ན་དང་། འདི་རྣམས་མར་དང་ཚུལ་བཞིན་དུ་བསྐོལ་ཏེ་བཏུང་བའམ་ཡང་ན་ཨ་ས་ནའི་སྡེ་ཚན་ཆར་དང་བསྐོལ་ཏེ་འཐུངས་ན་ཞི་བར་
[57b.6]འགྱུར་རོ། །དུད་པ་ལྟར་སྣང་བའི་ནད་ལ་ནི་ཤིང་པ་ལ་ཤ་བསྲེགས་པའི་ཐལ་བ་དང་། སྲུ་སྲུའི་རྩ་བ་འདི་གཉིས་མར་དང་ཚུལ་བཞིན་དུ་བསྐོལ་བ་འཐུངས་ན་ཕན་ནོ། །རྣག་ལྟ་བུའི་ནད་པ་ལ་ནི་པ་རུ་ཤ་ཀ་དང་། ནྱ་གྲོ་དྷའི་སྡེ་ཚན་མར་དང་ཚུལ་བཞིན་བསྐོལ་བ་འཐུངས་ན་
[57b.7]ཞི་བར་འགྱུར་རོ། །ཁུ་བ་ཟད་པའི་ནད་ལ་ནི་རོ་ཙ་བའི་སྨན་དཔྱད་བྱའོ། །དྲི་མ་ལྟ་བུ་ལ་ནི་དང་པོ་སློན་ཁྲུས་ཀྱིས་ལུས་དག་པར་བྱས་ལ་དེ་ནས་ཤིང་ཀུན་དང་། པུ་ཤེལ་ཙེ་དང་། ཀྲུ་ཏྲུག་ཏྲེས་དང་། འདི་རྣམས་མར་དང་ཚུལ་བཞིན་དུ་སྦྱར་བ་འཐུངས་ན་ཕན་ནོ། །བུད་མེད་ཀྱི་ཟླ་
[58a]
[58a.1]མཚན་མདུད་པ་ཅན་ལ་ནི་སྦ་ཐ་དང་། ཚ་བ་གསུམ་དང་། དུག་མོ་ཡུངས་དང་། འདི་རྣམས་ཆུ་དང་བསྐོལ་བའི་ཁུ་བ་བླུད་ན་ཕན་ནོ། །བུད་མེད་ཀྱི་ཟླ་མཚན་རྣག་དང་མྱགས་པ་ལྟ་བུ་ལ་ནི་ཙནྡན་བསྐོལ་བའི་ཁུ་བ་འཐུངས་ན་ཕན་ནོ། །གཞན་ཡང་ཟླ་མཚན་གྱི་
[58a.2]ནད་མོ་མཚན་གསོ་བའི་དཔྱད་འཇམ་རྩི་མས་གཏོང་བ་དང་། སྨན་ལ་སོགས་པ་འོག་ནས་འབྱུང་བ་བཞིན་དུ་ཅི་རིགས་སུ་སྦྱར་རོ། །སྐྱེས་བུ་གང་གི་ཁུ་ཆུ་དཀར་བ་དང་། ལྕི་བ་དང་། སྣུམ་པ་དང་། མངར་བ་དང་། བསྐ་བ་དང་། མང་བ་དང་། གཞན་ཡང་མདོག་སྦྲང་རྩི་ལྟ་བུ་དང་།
[58a.3]མར་དང་འབྲུ་མར་ལྟ་བུ་དང་འདི་དག་ལྟར་སྣང་ན་བུ་བཟང་པོ་སྐྱེ་བའི་རྟགས་སོ། །བུད་མེད་གང་ཟླ་མཚན་རྒྱ་སྐྱེགས་ཀྱི་ཁུ་བ་ལྟ་བུ་དང་། རི་བོང་གི་ཁྲག་ལྟ་བུ་དང་། ནད་མེད་པའི་ཁྲག་དང་། འདི་ལྟ་བུ་ཡོད་ནའང་བུ་བཟང་པོ་སྐྱེ་བའི་རྐྱེན་ཡིན་ནོ། །ཕ་མའི་ཁུ་ཁྲག་སྐྱོན་
[58a.4]མེད་ཅིང་ཆགས་པའི་སེམས་དང་བཅས་པས་འདོད་པ་སྤྱོད་ན་བུ་སྐྱེ་བའི་རྒྱུའོ། །ཐོག་མར་སྐྱེས་པ་དང་། བུད་མེད་དགེ་བའི་སྨན་མར་དང་། འབྲས་བུའི་སྨན་མར་གྱིས་སྣུམ་གྱི་ཆོ་ག་བྱས་ལ། སློན་ཁྲུས་ཀྱིས་ལུས་དག་པར་བྱས་ཏེ་དེའི་འོག་ཏུ་འཇམ་རྩི་བསྟེན་པར་བྱའོ། །
[58a.5]ཁྱད་པར་དུ་སྐྱེས་པ་ལ་ནི་འོ་མ་དང་། མར་དང་། མངར་བ་དང་། སྨན་ཛི་ཝན་ཏི་དང་། རྒུན་འབྲུའི་སྡེ་ཚན་སྦྱར་ལ་སྦྱིན་ནོ། །བུད་མེད་ལ་ནི་འབྲུ་མར་དང་། སྲོག་ཆགས་ཐང་ལ་གནས་པའི་ཤ་དང་ལྷན་ཅིག་སྦྱར་བ་བཟའོ། །དེ་ལ་བུད་མེད་ཟླ་མཚན་དང་ལྡན་པའི་རྟགས་ནི་
[58a.6]རྐྱེན་གཞན་མེད་པར་ལུས་ཉམ་ཆུང་བ་དང་། གདོང་གི་དྲི་མ་མེད་ཅིང་དག་པ་དང་། རྐེད་པ་དང་ནུ་མར་འཕར་བ་དང་། མིག་དང་དཀུ་འགུལ་ཞིང་སྐྱེས་པ་འདོད་པ་དེ་ནི་ཟླ་མཚན་དང་ལྡན་པའི་བུད་མེད་དུ་བལྟའོ། །དེ་ལྟར་པདྨ་ལ་ཉི་ཟེར་གྱིས་ཕོག་ན་ཁ་བྱེ་བ་དང་འདྲ་བར་ཟླ་
[58a.7]མཚན་བྱུང་ནས་ཞག་བཅུ་གཉིས་ཀྱི་བར་དུ་མངལ་གྱི་པདྨ་ཁ་བྱེ་བ་ལྟར་འདུག་གོ། །གནས་སྐབས་དེའི་བར་དུ་སྐྱེས་པ་དང་ཕྲད་ན་ས་བོན་འཛིན་ལ། དེ་ཕན་ཆད་ནི་ཟུམས་པར་འགྱུར་རོ། །ཟླ་མཚན་ཐོག་མ་བྱུང་ནས་ཞག་བཅུ་གཉིས་ཀྱི་བར་དུ་ཟླ་མཚན་གྱི་དུས་དེར་འདོད་པ་སྤྱད་ན་བུ་
[58b]
[58b.1]ཚ་འཆགས་སོ། །ཞག་བཅུ་གསུམ་ཕན་ཆད་ནི་ས་བོན་འཛིན་པའི་མཐུ་མེད་དེ་མི་འཆགས་སོ། །དང་པོ་ཁ་ཟས་ལ་སོགས་པའི་དངས་མ་ལས་ཟླ་བ་གཅིག་གི་བར་དུ་སོགས་པར་འགྱུར་རོ། །དེ་ནས་རླུང་གིས་མངལ་གྱི་ནང་ན་རྩའི་རྒྱུན་གཉིས་ཡོད་དེ། དེས་མོ་མཚན་གྱི་ནང་
[58b.2]ནས་ཕྱིར་འབྱིན་པར་བྱེད་དེ་ཁྲག་མདོག་ཀྱང་ཅུང་ཟད་གནག་ལ་དྲི་མ་མེད་པར་སྣང་ངོ་། །ཟླ་མཚན་ཐོག་མར་བྱུང་བ་ཤེས་ནས་ཞག་གསུམ་པའི་བར་དུ་སེམས་བདེ་ཞིང་དགེ་བ་ལ་བློ་གཏད་པར་བྱའོ། །ཁྲུས་དང་རྒྱན་དང་བསྐུ་བྱུག་ལ་སོགས་པ་སྤང་ངོ་། །རྩྭ་དཱུར་བའི་སྟན་ལ་
[58b.3]འདུག་ཏུ་གཞུག་གོ། །འོག་མ་ལས་གཞི་བླངས་པའི་བཟའ་བ་ཉུང་ཟད་སྦྱིན་ཏེ་ལྟོ་བ་སྦྱང་བར་བྱའོ། །བཟའ་བའི་སྣོད་ཀྱང་ལོ་མའམ་རྫ་སྣོད་དམ། ལག་པའི་སྟེང་དུ་ཟར་གཞུག་སྟེ་སྐྱེས་པ་དང་འཕྲད་པ་སྤང་ངོ་། །དེ་ནས་ཞག་བཞི་པ་ལ་བུད་མེད་ཀྱིས་སྔ་དྲོ་ཁྲུས་བྱས་ལ་གོས་དཀར་
[58b.4]པོ་དང་། མེ་ཏོག་དཀར་པོ་ལ་སོགས་པས་ལུས་བརྒྱན་ལ་གཙང་བར་བྱའོ། །དེ་ནས་བུ་འདོད་པའི་ཕྱིར་ཁྱོའི་མདུན་དྲང་པོ་ནས་ལྟར་བཅུག་ནས་ཕ་དང་འདྲ་བའི་བུ་འོང་བའི་རིགས་སོ། །ཐོག་མ་ཟླ་མཚན་བྱུང་བ་ཤེས་ནས་ཞག་བཅུ་གཉིས་ཀྱི་བར་དུ་ནི་ཟླ་མཚན་རྒྱུ་བའི་དུས་ཏེ་
[58b.5]དེ་ལས་ཀྱང་དང་པོ་ཞག་གསུམ་དང་ཞག་བཅུ་གཅིག་པའི་དུས་སུ་ཉལ་པོ་བྱེད་པ་ནི་སྨད་དོ། །དེ་ལ་ཟུངས་ཐེབས་པའི་ཞག་བཞི་པ་དང་། དྲུག་པ་དང་། བརྒྱད་པ་དང་། བཅུ་པ་དང་། བཅུ་གཉིས་ལོན་པ་དེའི་ཚེ་ནི་བུ་ཕོར་འགྱུར་རོ། །ཟླ་མཚན་རྒྱུས་ནས་ཞག་ལྔ་པ་དང་
[58b.6]བདུན་པ་དང་། དགུ་པ་དང་འདི་དག་གི་ཚེ་ཉལ་པོ་བྱས་ན་བུ་མོར་འགྱུར་རོ། །དེ་ནས་བུད་མེད་དེས་སྲིད་སྲུང་གི་རིག་བྱེད་ཤེས་པའི་བྲམ་ཟེའི་ལུང་བཞིན་དུ་བུ་བསྐྱེད་པའི་ཕྱིར་བསྲུང་བ་འམ་ཆོ་ག་བྱས་ཏེ་བྲམ་ཟེ་དང་། རྒྱལ་རིགས་དང་། དམངས་རིགས་གསུམ་ལ་ནི་བསྟོད་པ་དང་
[58b.7]བཅས་པས་ཕྱག་བྱའོ། །རྗེའུ་རིགས་ལ་ནི་ཕྱག་ཐ་མལ་པ་བྱའོ། །གོང་དུ་བསྟན་པའི་སྦྱོར་བ་ལྟར་ཆོ་ག་མ་བྱས་ན་ནི་ཇི་ལྟར་རང་འདོད་པའི་བུ་མི་འོང་ངོ་། །བུ་འདོད་པའི་མཁས་པ་རྣམས་ཀྱིས་ཤིན་ཏུ་དབེན་པར་ཉལ་པོ་བྱའོ། །ཅིའི་ཕྱིར་ཞེ་ན་ཉམས་རངས་སམ་དགའ་བདེར་
[59a]
[59a.1]སྤྱད་པས་བུ་བཟང་པོར་འགྱུར་བའི་ཕྱིར་རོ། །གལ་ཏེ་དབེན་པར་མ་གྱུར་པའི་གནས་སུ་འདོད་པ་སྤྱད་ན་རུས་རིགས་མཐོན་པོ་ཡིན་ཡང་བུ་ཚ་མ་རབས་སུ་སྐྱེ་སྟེ་རིགས་ཀྱི་མེ་བཞིན་ནོ། །སྐྱེས་བུ་བཟང་པོར་འདོད་པ་རྣམས་ཀྱིས་ཡུལ་ཕྱོགས་ན་གནས་
[59a.2]པའི་སྐྱེ་བོ་བྱད་བཞིན་བཟང་ཞིང་མཛེས་པ་དང་། སྟོབས་དང་ལྡན་ཞིང་དཔའ་བ་དང་། འབྱོར་པ་ཕུན་སུམ་ཚོགས་པ་དང་། རིགས་དང་ཡུལ་ཆོས་ཀྱི་སྤྱོད་ལམ་དང་། དེ་ལ་སོགས་པ་ཡོན་ཏན་གྱི་རྣམ་པ་དང་ལྡན་པ་བུ་ཕོ་དང་། བུ་མོ་གང་འདོད་ཀྱང་རུང་། གོང་མ་ལྟ་བུ་དང་
[59a.3]ལྡན་པར་བསམས་ནས་ཉལ་པོ་བྱས་ཏེ། སྐྱེས་པ་དང་། བུད་མེད་གཉིས་ཀ་ཡང་འབྲས་ཆན་དང་འོ་མ་དང་ལྡན་པར་བཟའོ། །དེ་ནས་སྐར་མཁན་གྱི་དུས་ཚོད་དང་ཁྲི་འམ་མལ་གྱི་སྟེང་དུ་སྐྱེས་པ་ནི་རྐང་པ་གཡས་པས་འཛེག་གོ། །བུད་མེད་ནི་རྐང་པ་གཡོན་པས་འཛེགས་ནས་
[59a.4]ཁྱིམ་ཐབ་ཀྱི་གཡས་ངོས་སུ་བསྙལ་ལ་ཏིལ་མར་དང་མོན་སྲན་གྲེའུ་སྦྱར་བའི་ཚོད་མ་བཏུང་བར་བྱའོ། །དེ་ནས་ཁྲི་ཐོག་ཏུ་ཕྱིན་ནས་སྔགས་ཀྱི་ཚིག་འདི་དག་བརྗོད་པར་བྱའོ། །ཨ་ཧི་ར་སི་ཨཱ་ཡུ་ར་སི་སརྦ་ཏ། པྲ་ཏིཥྛ་སིད་དྷ་ཏྭ་དྷ་ན་བི་དན་ཏུ་བྲ་ཧྨ་བ་ར་ཙ་ས་བྷ་བེ་
[59a.5]ཏི། བྲཧྨ་བྲི་ཏ་སྤ་ཏི་ར་བཥྞུ་སྟོ་མ་སྟུརྱ་སྠ་ན་ཤཱི་ནོ། །བ་གོ་མི་ཏྲ་བ་རུ་ཎོ། །ཚངས་པ་ཆེན་པོ་ལ་སོགས་པའི་ལྷ་ཆེན་པོ་རྣམས་ཀྱིས་བདག་མིང་འདི་ཞེས་བགྱི་བ་ལ་བུ་དཔའ་བ་དང་ཡན་ལག་མཆོག་གི་གཟུགས་དང་ལྡན་པ་བདག་ཅག་ལ་སྩལ་དུ་གསོལ། །དེའི་འོག་ཏུ་ཁྱོ་
[59a.6]ཤུག་གཉིས་གཅིག་ལ་གཅིག་རྗེས་སུ་ཆགས་པར་བྱས་ནས་དགའ་བ་དང་བཅས་པས་ཉལ་པོ་བྱ་སྟེ། དེ་ཡང་བུད་མེད་གན་རྐྱལ་དུ་ཡན་ལག་ལེགས་པར་གནས་པར་བྱ་སྟེ། འདོད་པ་རྩེ་གཅིག་པའི་ཡིད་ཀྱིས་འདུག་པར་བྱའོ། །དེ་ལྟར་ན་ས་བོན་ལེགས་པར་འཛིན་ཅིང་
[59a.7]སྐྱེས་པ་རྣམས་རང་གི་གནས་ན་གནས་པར་བྱའོ། །བུད་མེད་ཀྱི་མངལ་དུ་ས་བོན་ལེགས་པར་ཆགས་པར་གྱུར་ན་འཕྲལ་དེ་མ་ཐག་མཚན་མ་འདི་དགའ་བྱུང་སྟེ། འདོད་པས་ངོམས་པ་དང་། ལུས་ལྕི་བ་དང་། ཡན་ལག་འགུལ་བ་དང་། ཁུ་ཁྲག་འདྲེས་པ་དེ་ཡང་འཁྲུགས་
[59b]
[59b.1]པ་སྙམ་བྱེད་པ་དང་། སྙིང་ཅུང་ཞིག་འཕར་བ་དང་སྙོམ་པ་དང་དུབ་པ་དང་བ་སྤུ་ལངས་པ་དང་། མངོན་རྟགས་དེ་དག་དང་ལྡན་པར་འགྱུར་རོ། །དང་པོ་ཆགས་ནས་ཞག་བདུན་ལོན་པ་དང་། ནུར་ནུར་པོར་འགྱུར་ཏེ། ཟླ་བ་གཅིག་གི་བར་དུ་མི་མངོན་པར་འདུག་
[59b.2]གོ། །ཟླ་བ་གཉིས་པ་ལ་གོང་གི་ནུར་ནུར་པོ་ཅུང་ཞིག་མངོན་པར་འགྱུར་བ་དང་། འོག་ནས་འབྱུང་བའི་སྨན་འདི་དག་གིས་གསོ་བར་བྱའོ། །ཡང་ནི་སྐྱེས་བུའི་ལས་དགེ་བ་དང་མི་དགེ་བ་འདི་རྗེས་སུ་འབྲང་མོད་ཀྱི་འོན་ཀྱང་རྐྱེན་ལ་རག་ལས་པ་ཡང་ཡོད་པས་གསོ་བ་
[59b.3]དང་བསྲུང་བའི་ཆོ་ག་བྱའོ། །དེ་ལ་གསེར་རམ་དངུལ་ལམ་ལྕགས་ནག་པོ་གང་ཡང་རུང་བ་ལ་སྐྱེས་བུའི་གཟུགས་ཆུང་ངུ་བྱས་ཏེ་མེའི་ནང་དུ་བསྲེགས་ལ་དམར་པོར་གྱུར་པ་དང་འོ་མའི་ནང་དུ་སྨྱུགས་ལ་ཁྱོར་གང་བླུད་དོ། །ཡང་ན་གོ་ར་ཌ་ན་ཌ་དང་། ཨ་པ་མརྒ་དང་།
[59b.4]ཛི་བ་ག་དང་། ཟངས་རྩི་བ་དང་། ཤྲི་ཤ་དང་། འདི་རྣམས་ལ་གཉིས་སམ་གསུམ་མམ་མང་དུ་འཚོགས་ཀྱང་རུང་སྟེ། བཏགས་ལ་ཆུ་དང་སྦྱར་ནས་སྐར་མ་རྒྱལ་གྱི་ཉི་མ་ལ་བླུད་དོ། །བུ་ཕོ་འདོད་ན་བྲི་ཧ་ཏི་དཀར་པོའི་རྩ་བ་འོ་མ་དང་སྦྱར་བ་སྣ་ཁུང་གཡས་ལོགས་སུ་བླུགས་
[59b.5]སོ། །བུ་མོ་འདོད་ན་སྣ་ཁུང་གཡོན་ནས་བླུགས་སོ། །ཡང་ན་ལག་སྨ་ནའི་རྩ་བ་བརྡུངས་པ་འོ་མ་དང་སྦྱར་བ་བུ་བརྟན་པར་བྱ་བའི་ཕྱིར་ཁ་འམ་སྣ་ནས་བླུགས་སོ། །ཡང་ན་ནྱ་གྲོ་དྷའི་མྱུ་གུ་བརྒྱད་བརྡུངས་པ་འོ་མ་དང་སྦྱར་བ་གོང་མ་ལྟར་གཏང་ངོ་། །ཡང་ན་འཚོ་བྱེད་སྣ་བཅུའི་
[59b.6]སྨན་གྱིས་བཟའ་བ་དང་། བཏུང་བ་དང་བསྐུ་བ་ལ་སོགས་པ་བྱས་ན་ཁྱིམ་ཐབ་དང་གཡོག་འཁོར་རྣམས་ལ་ཕན་ཞིང་མངལ་ཡང་བརྟན་པོར་འགྱུར་ཏེ་ཀུན་ལ་སྦྱར་རོ། །ཞུན་མར་སར་པ་དང་འོ་མ་ནི་རྟག་ཏུ་བསྟེན་པར་བྱའོ། །དེ་ལྟར་སེམས་དང་ལྡན་པའི་བུད་མེད་ཀྱིས་
[59b.7]ཉལ་པོ་ལྷག་པར་མི་བྱ། རྩོལ་བ་དྲག་པོ་དང་། ཁུར་དང་། གོས་ལྕི་བ་དང་། ནུབ་མོ་གཉིད་མ་ལོག་པ་དང་། ཉིན་པར་གཉིད་ལོག་པ་དང་། འོག་གཞི་མཁྲང་བ་ལ་འདུག་པ་དང་། སྟན་མེད་པ་ལ་འདུག་པ་དང་། མྱ་ངན་དང་། ཁྲོ་བ་དང་། འཇིགས་པ་དང་། སྐྱོ་
[60a]
[60a.1]བ་འབྱུང་བ་དང་། འདོད་པ་དགག་པ་དང་། སྨྱུང་བར་འདུག་པ་དང་། ལམ་དུ་འགྲོ་བ་དང་། ཤིན་ཏུ་ཚ་བའི་ཟས་དང་། དྲོ་བ་དང་ལྕི་བ་དང་ཕྱི་ས་འགགས་པར་འགྱུར་བའི་ཟས་དང་། གོས་དམར་པོ་དང་། གཡང་ས་དང་། ཁྲོན་པར་ལྟ་བ་དང་།
[60a.2]ཤ་དང་ཆང་ཆེར་འཐུངས་པ་དང་། གན་རྐྱལ་དུ་ཉལ་བ་དང་། གང་ཡང་བུད་མེད་མཁས་པས་མི་འདོད་པ་ཐམས་ཅད་སྤང་བར་བྱ་སྟེ། མདོར་ན་སྐྱོན་གོང་མ་དེ་དག་མི་སྤྱད། མི་བསྟེན། མི་བཟའོ། །དེ་བཞིན་དུ་གཏར་ག་དང་། སློན་ཁྲུས་དང་། སྨན་མས་གཏོང་བ་ལ་
[60a.3]སོགས་པ་མི་བྱ། ཅི་སྟེ་དེ་དག་བྱས་ན་ནི་ནང་དུ་དབང་པོ་རྣམས་བསྐམས་པའམ་ཕྱིར་འཕྱིལ་བར་འགྱུར་རོ། །ཟས་དང་སྨན་ལ་སོགས་པ་རླུང་འཁྲུགས་པའི་བག་བསྟེན་པ་ལས་ནི་བུ་ཚ་སྒུར་པོ་དང་། ལོང་བ་དང་། འོན་པ་དང་། མིའུ་ཐུང་དུ་འགྱུར་རོ། །ཟས་དང་སྨན་ལ་
[60a.4]སོགས་པ་མཁྲིས་པ་འཁྲུགས་པའི་བག་བསྟེན་པ་ལས་ནི་བུ་འཕྱིལ་བ་དང་། སེར་སྐྱར་སྣང་བར་འགྱུར་རོ། །བད་ཀན་འཁྲུགས་པའི་ཟས་དང་སྨན་བསྟེན་པ་ལས་ནི་བུ་ཤ་བཀྲ་དང་སྐྱ་རྦབ་ཀྱིས་བཏབ་པར་འགྱུར་རོ། །གཞན་དུ་ནད་གང་ཡང་རུང་བ་སྦྲུམ་པའི་བུད་མེད་ལ་བྱུང་
[60a.5]ན་ཟས་དང་སྨན་འཐུང་བ་འདི་དག་བསྟེན་ཏེ། མར་དང་། ལི་ཁ་ར་དང་། རྒུན་འབྲུམ་ལ་སོགས་པའི་སྨན་དང་། དེ་བཞིན་དུ་དོང་ག་ལ་སོགས་པས་གསོ་བར་བྱའོ། །ཟླ་བ་གཉིས་པ་ལ་བབ་པའི་ཚེ་ན་གོར་གོར་པོར་གྱུར་ན་ནི་སྐྱེས་པར་འགྱུར་ལ། ནར་ནར་པོར་གྱུར་ན་ནི་བུ་
[60a.6]མོར་འགྱུར། ནུར་ནུར་པོར་གྱུར་ན་ནི་མ་ནིང་དུ་འགྱུར། དེའི་ཚེ་བུ་གསལ་པོར་ཆགས་པ་འམ། མངོན་པའི་མཚན་མ་ནི་ཤ་བྲི་བ་དང་། ལྟོ་ལྕི་བ་དང་། བརྒྱལ་བ་དང་། སྐྱུག་པ་དང་། ཟས་ཡི་གར་མི་འོང་བ་དང་། གླལ་བ་དང་། ཆམ་པ་དང་། རྐང་ལག་སྐྱོད་པ་དང་།
[60a.7]ལྟེ་བའི་འོག་གི་སྤུའི་རྒྱལ་པོ་འབྱེས་པ་དང་། སྐྱུར་ལ་དགའ་བ་དང་། ནུ་མ་རྒྱས་པ་དང་། ནུ་སོར་ནག་པོར་འདུག་པ་དང་། རྐང་པ་གཉིས་སྐྲངས་པ་དང་། སྒྲེགས་པ་སྐྱུར་མོ་འབྱུང་བ་དང་། ཟས་སྣ་ཚོགས་ལ་དད་པ་ཡིན་ཏེ། དེ་ཡང་མ་ཟས་གང་ལ་དད་པ་ཁོང་པའི་བུ་ཡང་
[60b]
[60b.1]དེ་ལ་དད་དེ། བུ་དང་སེམས་འབྲེལ་ཡིན་པས་མི་དགག་གོ། །མི་མཐུན་པའི་ཟས་ནི་ཅུང་ཟད་སྦྱིན་ནོ། །གང་འདོད་པའི་ཟས་བཀག་ན་ནི་ནང་གི་བུ་ལུས་འགྱུར་བ་འམ་འཕྱིལ་བར་འགྱུར་རོ། །ཟླ་བ་གསུམ་པ་ལ་བབ་པའི་ཚེ་ནི་ཡན་ལག་ལྔ་དོད་པར་འགྱུར་ཏེ། ཉིང་
[60b.2]ལག་རྣམས་ཀྱང་རིམ་གྱིས་འབྱུང་ལ། བདེ་བ་དང་སྡུག་བསྔལ་ཡང་དེ་ཚུན་ཆད་འབྱུང་ངོ་། །བྱིས་པ་ནང་དུ་སྐྱེ་བ་འམ་འཕེལ་བའི་རྒྱུ་ནི་མའི་སྙིང་དང་བུའི་ལྟེ་བར་འབྲེལ་པའི་རྒྱུན་སྲང་ཡོད་དེ། དེ་ནས་མས་ཟོས་པའི་བཅུད་འཇུག་སྟེ། དཔེར་ན་ཞིང་ལ་ཡུར་བ་ནས་ཆུ་
[60b.3]དྲངས་ནས་བཅུས་ན་ངེས་པར་འཕེལ་ཞིང་རྒྱས་པ་བཞིན་ནོ། །ཟླ་བ་བཞི་པ་ལ་བབ་པའི་ཚེ་ན་ནི་བྱིས་པའི་ཡན་ལག་ཐམས་ཅད་གསལ་པོར་འབྱེས་པར་འགྱུར་རོ། །ཟླ་བ་ལྔ་པ་ལ་ནི་སེམས་ཤིན་ཏུ་གསལ་བར་འགྱུར་རོ། །ཟླ་བ་དྲུག་པ་ལ་ནི་རྩ་དང་། རྒྱུས་པ་དང་།
[60b.4]བ་སྤུ་དང་། སྟོབས་དང་། མདོག་དང་། སེན་མོ་དང་། པགས་པ་དང་འདི་དག་སྐྱེའོ། །ཟླ་བ་བདུན་པ་ལ་བབ་པའི་ཚེ་ལུས་ཐམས་ཅད་རྒྱས་ཤིང་འཕེལ་བར་འགྱུར་རོ། །ནང་དུ་བྱིས་པ་ལ་རླུང་ལ་སོགས་པའི་ནད་བྱུང་ན་དེའི་རྒྱུས་བྱིས་པའི་ལྟེ་བ་ལས་མའི་སྙིང་དུ་འབྲེལ་བའི་
[60b.5]གཞིས་མ་ལ་ཡང་ཐོག་མ་སྙིང་ལ་བསྟེན་ཏེ། དེའི་འོག་ཏུ་བྲང་དང་ནུ་མ་དང་ལྟོ་བ་རྣམས་སུ་གཡན་པའི་ནད་དང་། རྐང་པ་དང་ལག་པ་ལ་ཚ་བ་སྐྱེ་བར་འགྱུར་ཏེ་དེའི་མིང་ནི་ཀིག་ཀི་ཞེས་བྱའོ། །དེ་ལྟར་ཀིག་ཀིའི་ནད་ཀྱིས་བཏབ་པ་ལ་ནི་མར་དང་རྒྱ་ཤུག་གི་འབྲས་བུ་སྦྱར་བའམ།
[60b.6]འཚོ་བྱེད་སྣ་བཅུའི་སྡེ་ཚན་ནམ། རྒུན་འབྲུམ་ལ་སོགས་པའི་སྡེ་ཚན་གོང་མ་ལྟར་སྦྱར་བ་བྱིན་ན་ཕན་ནོ། །ཁ་ཟས་ནི་སྣུམ་པ་དང་། ལན་ཚྭ་ཅུང་ཟད་བཏབ་པ་སྦྱིན་ནོ། །ནུ་མ་དང་། བྲང་དང་། ལྟོ་བ་འདི་དག་ལ་ནི་ཙནྡན་དང་། པུ་ཤེལ་ཙེ་བཏགས་པའི་ལྡེ་གུས་བསྐུའོ། །
[60b.7]ཡང་ན་འབྲས་བུ་གསུམ་བཏགས་པའི་ཕྱེ་མ་དང་། རི་དྭགས་ཨེ་ནེ་ཡ་དང་། ཧ་རི་ན་དང་། རི་བོང་གི་ཁྲག་དང་སྦྱར་བས་བསྐུའོ། །ཡང་ན་ཀ་ར་བཱི་ར་དང་། ཏིལ་མར་དུ་སྦྱར་བས་བསྐུ་མཉེ་བྱའོ། །ཡང་ན་པ་ཏོ་ལ་དང་། ནིམ་པ་དང་། བཙོད་དང་། བྱེའུ་རུག་པ་དང་། འདི་
[61a]
[61a.1]རྣམས་ཆ་སྙོམས་ཏེ་བསྐོལ་བའི་ཆུས་བསྐུ་བ་འམ། ཡང་ན་སྐྱེར་པ་འམ། ཤིང་མངར་བསྐོལ་བའི་ཆུ་དང་། ཁྲུས་དང་བསྐུ་བྱུག་ལ་སོགས་པ་གཙང་སྦྲ་ཆེར་བྱའོ། །ཟླ་བ་བརྒྱད་པ་ལ་ནི་མ་དང་བུའི་གཟི་མདངས་ཕན་ཚུན་ཡང་དང་ཡང་དུ་འཕོ་སྟེ།
[61a.2]གཟི་མདངས་ནི་ལུས་འཛིན་པ་ཡིན་པས་གལ་ཏེ་གཟི་མདངས་འཕོ་བའི་དུས་སུ་བཙས་ན་ནི་ཕལ་ཆེར་མའམ་བུ་གཅིག་འཆི་སྟེ། དེ་ཡང་གཟི་མདངས་མ་ལ་འཕོ་བའི་དུས་ན་ནི་བུ་ལ་གཟི་མདངས་མེད་པས་བུ་འཆི་ལ་བུ་ལ་འཕོ་བའི་སྐབས་སུ་བཙས་ན་ནི་མ་མི་འཚོའོ། །ཟླ་བ་
[61a.3]བརྒྱད་པ་ལ་ནི་འབྲས་ཀྱི་འོ་ཐུག་སྦྱིན་ནོ། །མངར་བའི་སྨན་ཛི་བན་ཏིའི་སྡེ་ཚན་དང་མར་དུ་སྦྱར་བའི་འཇམ་རྩི་མས་གཏོང་ངོ་། །གཞན་ཡང་ཕྱི་ས་རྙིས་པ་དག་པར་བྱ་བའི་ཕྱིར་ལ་ཕུག་སྐམ་པོ་དང་། རྒྱ་ཤུག་སྐྱུར་པོ་དང་། ཤུ་ཏི་དང་། འདི་རྣམས་བཏགས་ལ་མར་དང་།
[61a.4]རྒྱམ་ཚ་དང་སྦྱར་བའི་འཇམ་རྩི་བཏང་བ་བསྔགས་སོ། །ཟླ་བ་བརྒྱད་པོ་འདས་མ་ཐག་གི་ཞག་ལ་བྱུང་ན་དེ་ནི་དུས་སུ་སྐྱེས་པ་ཞེས་བྱ་སྟེ་རབ་ཏུ་བཟང་ངོ་། །ཟླ་བ་དགུའམ་བཅུ་གཉིས་ཚུན་ཆད་སྐྱེས་པ་ནི་ལེགས་པར་སྐྱེས་པ་ཡིན་ལ། དེ་ཕན་ཆད་སྐྱེས་པ་ནི་རླུང་གིས་ལམ་བཀག་
[61a.5]ནས་ངེས་པར་ལུས་མི་བདེ་བར་སྐྱེད་དོ། །ཟླ་བ་དགུ་པ་ལ་བབ་པའི་དུས་སུ་ནི་ཤ་ཚོན་གྱི་ཁུ་བ་འབྲས་ཆན་དང་བཟའ་བའམ། ཡང་ན་འབྲས་ཐུག་སྣུམ་ཤས་ཆེ་བ་དང་སྦྱར་ནས་བཟའ་སྟེ། རླུང་ནད་ཞི་བའི་ཕྱིར་གོང་དུ་སྨོས་པའི་ཨ་ནུ་བ་ས་ནི་རྟག་ཏུ་གཏང་ངོ་། །རླུང་ལ་ཕན་
[61a.6]པའི་སྨན་དང་སྦྱར་བའི་ཏིལ་མར་གྱི་ནང་དུ་སྦངས་པའི་བལ་གྱིས་མོ་མཚན་གྱི་ནང་དུ་བཙངས་ལ་གཞག་གོ། །དེ་ནས་རླུང་འཇོམས་པའི་སྨན་བཙོ་མའི་ལོ་མ་ལ་སོགས་པའི་སྨན་གྱི་ལོ་མ་ཇི་སྙེད་པ་དང་། ཆུ་བསྐོལ་བ་དེ་ནས་བསྒྲངས་པའི་ཁུ་བས་རྟག་ཏུ་ཁྲུས་བྱའོ། །ཟླ་བ་དགུ་པ་ལས་ནི་
[61a.7]ཅི་སྲིད་དུ་འབྱུང་གི་བར་དུ་ཨ་ནུ་བ་ས་ན་ལ་སོགས་པའི་ལུས་ཀྱི་སྣུམ་ཆོས་སྤང་ངོ་། །ནང་ན་བུ་ཁྱེའུ་ཡོད་པའི་རྟགས་ནི་བུད་མེད་ཀྱང་སྐྱེས་པའི་མིང་ཅན་ཐམས་ཅད་ལ་དགའ་ལ། གཏམ་དང་འདྲི་བ་ཡང་སྐྱེས་པའི་ཚིག་དང་ལྡན་པར་སྨྲ་བ་དང་། སྐྱེས་པའི་ནང་དུ་དགའ་བ་དང་། རྨི་ལམ་
[61b]
[61b.1]དུ་ཡང་སྐྱེས་བུ་རྨི་བ་དང་། དཀུ་གཡས་ལོགས་མཐོ་ལ་དེ་ཡང་ཟླུམ་པོར་འདུག་ན་དེ་ནི་བུ་ཕོ་བཙའ་བའི་སྔ་རྟགས་སོ། །གཞན་དུ་ན་དེ་ལས་བཟློག་པ་ནི་བུ་མོ་བཙའ་བའི་རྟགས་ཏེ། ཁྱད་པར་དུ་སྐྱེས་པ་དང་ཉལ་པོ་བྱེད་པར་དགའ་བ་དང་། རོལ་མོ་དང་། གར་དང་། གླུ་དང་།
[61b.2]དྲི་དང་། ཕྲེང་བ་ལ་དགའ་བ་ནི་བུ་མོ་བཙའ་བའི་རྟགས་སོ། །བུ་མ་ནིང་ཡོད་པའི་རྟགས་ནི་གོང་མ་གཉིས་ཀའི་རྟགས་དང་ལྡན་པ་དང་། ཁྱད་པར་དུ་དཀུ་གཡས་གཡོན་གྱི་དབུས་ལྟེ་བའི་འོག་ནས་མཐོན་པོར་འདུག་ན་མ་ནིང་སྐྱེ་བའི་རྟགས་སོ། །བུ་མཚེ་མ་འབྱུང་བའི་
[61b.3]རྟགས་ནི་དཀུ་གཡས་གཡོན་གཉིས་ཀ་མཐོན་པོར་འདུག་ལ། དབུས་སུ་ལུང་པ་ལྟར་གཤོང་བར་འདུག་པའོ། །གོང་གི་ཟླ་བ་དགུ་པ་ནས་བརྩམས་ལ་བུ་བཙའ་བའི་ཁང་པར་འཇུག་པར་བྱ་སྟེ་དེ་ཡང་ས་རྟོག་པ་ལ་མཁས་པའི་མཚན་ཉིད་དང་ལྡན་པའི་སྐྱེས་བུས་ཁྱིམ་ལེགས་
[61b.4]པར་བརྟགས་ལ་དགོས་པའི་ཆ་བྱད་ཡོངས་སུ་བསགས་ཏེ། གཟའ་དང་རྒྱུ་སྐར་དགེ་བ་དང་སྐར་མའི་ཁྱིམ་དང་ཡུད་ཙམ་པ་ལ་སོགས་པ་བརྟགས་ལ་ཁྱིམ་དུ་འཇུག་པར་བྱའོ། །དེ་བསྲུང་བ་ཚུལ་བཞིན་དུ་བྱས་ཏེ་སྔར་གོང་མའི་མ་མ་བུ་བཙའ་བའི་ཆོ་ག་མཁས་པའི་འཁོར་དང་
[61b.5]འདུག་པར་བྱའོ། །དེ་ལ་བུ་བྱུང་བ་ཉེ་བའི་སྔ་རྟགས་ནི་ལུས་དུབ་པ་དང་། དཀུ་དང་མིག་གཉིས་འགུལ་བར་སྣང་བ་དང་རོ་སྨད་ལྕི་བ་དང་། ཟས་ཡི་གར་མི་འོང་བ་དང་། མཆིལ་མ་མང་བ་དང་། གཅིན་མང་བ་དང་། བརླ་དང་། རྐེད་པ་དང་། རྒྱབ་དང་། སྙིང་དང་། ཆུ་
[61b.6]སོ་དང་། བརླ་བྲག་དང་། འདི་དག་ཏུ་ན་བ་དང་། མོ་མཚན་རྒྱ་ཆེན་པོར་གྱུར་ཅིང་རྒྱུན་དུ་ན་བ་དང་། འགུལ་བ་དང་། ཁྲག་དང་། བེའུ་སྣབས་ལྟ་བུ་འབྱུང་བ་དང་། དེ་དག་ལྟར་སྣང་ན། དེང་ངམ་སང་འབྱུང་བའི་རྟགས་སོ། །དེའི་འོག་ཏུ་སྣོད་ལ་ཆུ་འབྱུང་ངོ་། །དེ་ནས་
[61b.7]བྱིས་པ་མངལ་ནས་བྱུང་སྟེ། མོ་མཚན་གྱི་ལམ་དུ་ཕྱིན་པ་དང་། བུད་མེད་ལ་བསྲུང་བའི་འཁོར་ལོས་མགུལ་དུ་གདགས་པ་དང་། བསྲུང་བའི་སྐུད་པས་ལག་པར་གདགས་སོ། །བུད་མེད་ཀྱི་ལག་པ་སྐྱེས་པའི་མིང་ཅན་གྱི་འབྲས་བུ་གླ་གོར་ཞོ་ཤ་ལ་སོགས་པ་བཅང་སྟེ། ཆུ་དྲོན་
[62a]
[62a.1]པོ་ཅུང་ཟད་ཅིག་ལུས་ལ་བསྐུ་བའམ་བླུགས་སོ། །དེའི་འོག་ཏུ་མར་གྱིས་བཏབ་པའི་ཐུག་པ་བྱིན་པ་ས་ལ་མལ་བཅས་ཏེ་འདུག་གོ། །དེ་ནས་བུད་མེད་ཀྱི་བརླའི་ནང་བསྐུ་བའི་རིགས་སོ། །དེའི་འོག་ཏུ་བུད་མེད་གན་རྐྱལ་དུ་བཞག་ལ་རླུང་ནད་
[62a.2]ཞི་བའི་ཕྱིར་བསྐུ་བྱུག་ལེགས་པར་ཡང་དང་ཡང་བྱ་སྟེ། ལྟེ་བ་མན་ཆད་ཁྱད་པར་དུ་མཉེས་ལ་བུད་མེད་གླལ་བྱུང་བ་དང་འཆག་ཏུ་གཞུག་གོ། །སྔར་བྱིས་པ་མའི་སྙིང་ཕྱོགས་སུ་མགོ་བརྟེན་ཏེ་འདུག་པ་ལས་ཁ་སྦུབ་ཏུ་ལོག་སྟེ་རང་གི་སྔར་གྱི་གནས་ནས་འཕགས་ནས་
[62a.3]ཆུ་སོར་ཕྱིན་ཏེ། ཕྱིར་བུ་འབྱུང་ཁར་ཟུག་གཟེར་སྣ་ཚོགས་འབྱུང་བ་ན། མྱུར་བར་ཁྲི་ལེགས་པར་བཅས་ལ་དེའི་སྟེང་དུ་བཞག་སྟེ། བུ་ནང་ནས་བྱུང་བའི་མཚན་གྱིས་ཕུལ་བས་མོ་མཚན་བརྒྱངས་པ་ན་སྣུམ་གྱིས་བསྐུ་བྱུག་ལ་སོགས་པ་བྱའོ། །བུ་མོ་མཚན་གྱི་ཁར་
[62a.4]མ་བྱུང་གི་བར་དུ་རིམ་གྱིས་བཙིར་ལ་སྒོར་ཕྱིན་པ་དང་ཤུགས་དྲག་ཏུ་ཕུལ་ཞིང་བཙིར་རོ། །དེའི་ཚེ་བུ་བཙའ་བའི་བུད་མེད་སྲོག་དང་བྲལ་བ་ཙམ་དུ་སྡུག་བསྔལ་མི་བཟད་པས་ཉེན་པར་འགྱུར་ཏེ། དེའི་དུས་སུ་ཉེ་འཁོར་ན་འདུག་པ་རྣམས་ཀྱིས་སེམས་གསོ་བ་དང་། སྤྲོ་སྲིང་
[62a.5]བ་དང་། ཆུས་གཏོར་བ་དང་། རླུང་ཡབ་ཀྱིས་གཡབ་པ་དང་། བུ་ཚ་སྐྱེ་བའི་ཡོན་ཏན་གྱི་སྒྲ་ཡང་བརྗོད་དོ། །ཇི་སྟེ་མངལ་གྱི་སྒོ་ནས་བུ་ཕྱིར་འབྱུང་དུ་མ་འདོད་ན། སྦྲུལ་ནག་པོའི་པགས་པ་བསྲེགས་པའི་དུད་པས་མངལ་གྱི་སྒོ་ནས་བདུག་གོ། །གསེར་གྱི་མེ་
[62a.6]ཏོག་གི་རྩ་བ་འམ། ཡང་ན་ལྕམ་པའམ། ཡང་ན་བི་ཤ་ལྱ་གང་ཡང་རུང་བས་རྐང་པ་དང་ལག་པར་བཏགས་ན་བུ་འབྱུང་བར་འགྱུར་རོ། །གལ་ཏེ་ཤ་མ་འབྱུང་དུ་མ་འདོད་ན་ཡང་ཆོ་ག་གོང་མ་ལྟར་བྱའོ། །ཁྱད་པར་དུ་ལག་པ་གཉིས་བཏེག་ལ་ལུས་ཀུན་བསྐྱོད་པའམ།
[62a.7]སྤྲུག་པ་བྱས་པས་ཤ་མ་ཕྱིར་འབྱུང་བར་འགྱུར་རོ། །ཡང་ན་ཁུ་ཚུར་གྱིས་རྐེད་པར་བརྡེག་ཅིང་རྐུབ་ཚོས་གཉིས་སུ་བཙིར་བར་བྱའོ། །ཡང་ན་རང་གི་སྐྲ་ཚོམས་ཀྱིས་མགྲིན་པ་དང་། རྐན་ལ་རེག་པར་བྱ་བའམ། དེ་བཞིན་དུ་སྣུ་ཧིའི་འོ་མ་སྤྱི་བོ་ནས་བླུགས་པའམ། ཡང་ན་
[62b]
[62b.1]གྲོ་བའམ། ལང་ཀ་ལི་དང་། ཀུ་བ་དང་། སྦྲུལ་གྱི་པགས་པ་དང་། རུ་རྟ་དང་། ཡུངས་ཀར་དེ་རྣམས་ལ་སྣ་གཉིས་སམ་ཡང་ན་ཐམས་ཅད་རྙེད་ན་ཡང་རུང་སྟེ། མོ་མཚན་གྱི་སྒོ་ནས་བྱུག་པའམ་བདུག་པ་བྱའོ། །ཡང་ན་རུ་རྟ་དང་བལ་བུའི་ཕྱེ་མ་ཆང་གི་སྙིང་ཁུ་དང་བླུད་དོ། །
[62b.2]ཡང་ན་རྒྱ་སྲན་ནམ་བལ་བ་ཛའི་ཁུ་བ་འམ། ཨ་ས་བའི་བཏུང་བ་སྦྱར་བ་གང་ཡང་རུང་བ་བླུད་དོ། །ཡང་ན་ཤུ་ཏི་དང་། ཡུངས་ཀར་དང་། ཨ་ཛ་ཛི་ཞེས་བྱ་བ་ཟི་ར་དང་། ན་ལེ་ཤམ་དཀར་པོ་དང་། ཏ་ཏིཀྵྞ་ཀ་དང་། ཀྲུ་ཏྲུག་ཏྲེས་དང་། ཤིང་ཀུན་དང་། རུ་རྟ་དང་། པོ་
[62b.3]སོན་ཆ་དང་། འདི་རྣམས་ཕྱེ་མར་བྱས་པ། གཅིན་དང་། འོ་མ་དང་། ཡུངས་མར་དང་། འདི་རྣམས་ཚུལ་བཞིན་དུ་བསྐོལ་བའི་མར་གྱིས་བཤང་བའི་ལམ་མམ། མོ་མཚན་གྱི་སྒོ་ནས་ཨ་ནུ་བ་ས་ན་བཏང་ན་རབ་ཏུ་ཕན་ནོ། །ཡང་ན་ཤུ་ཏི་དང་། ཤུ་དག་དང་།
[62b.4]ཡུངས་ཀར་དང་། པི་པི་ལིང་དང་། འདི་རྣམས་ཚུལ་བཞིན་དུ་བཏགས་ལ་ལན་ཚྭ་དང་། མར་དང་བཅས་པ་སྦྱར་བ་ནི་རུ་ཧ་མས་གཏོང་ན་ཤ་མ་འབྱིན་པར་བྱེད་དོ། །གལ་ཏེ་ཤ་མ་མ་བྱུང་ན་ནི་རླུང་ནད་ཀྱི་རྒྱུར་འགྱུར་ལ་ཕྱིར་བྱུང་ན་ནི་རླུང་ཡང་ཕྱིར་འབྱིན་པར་བྱེད་དོ། །གོང་
[62b.5]མའི་ཐབས་གང་གིས་ཀྱང་ཤ་མ་མ་ཐོན་ན་བུད་མེད་མཁས་པ་སྔར་གོམས་པ་ཡོད་པས་ལག་པའི་སེན་མོ་བྲེགས་ལ་སྣུམ་གྱིས་བསྐུས་ཏེ། ལག་པ་ནང་དུ་བཅུག་ལ་དལ་བུས་རིམ་གྱིས་དབྱུང་ངོ་། །དེ་ནས་བུ་དང་ཤ་མ་གཉིས་ཀ་བྱུང་ནས་གྲོལ་བ་ལྟ་ན། ཏིལ་མར་གྱིས་མོ་མཚན་
[62b.6]དང་ལུས་ཐམས་ཅད་བསྐུ་མཉེ་བྱའོ། །བུད་མེད་བུ་བྱུང་བའི་འོག་ཏུ་ནད་མག་ཀ་ཞེས་བྱ་བ་འབྱུང་སྟེ། དེའི་མཚན་མ་ནི་འོག་ནས་ཆུ་སོ་དང་། ལྟོ་བ་དང་། བརླ་བྲག་ཏུ་ཟུག་ཅིང་ན་བ་ཡིན་ཏེ། དེ་ལ་ནི་ནས་ཚིག་འཁུས་པའི་ཐལ་བ་ཞིབ་པར་བཏགས་ཏེ། མར་རམ་ཡང་
[62b.7]ན་ཆུ་དྲོན་པོ་བསྐོལ་བ་གང་ཡང་རུང་བ་དང་སྦྱར་བའམ། ཡང་ན་འུ་སུའི་འབྲས་བུ་བསྐོལ་བ་བུ་རམ་དང་། ཚ་བ་གསུམ་དང་དྲི་སྣ་གསུམ་ཞེས་བྱ་བ་ཤིང་ཚ་དང་། སུག་སྨེལ་དང་། གནྡྷ་བྷ་དྲ་རྣམས་ཀྱི་ཕྱེ་མ་དང་སྦྱར་ལ་བླུད་དོ། །ཡང་ན་སྨན་པ་རྒན་པོ་རྣམས་ན་རེ་དྲི་སྣ་གསུམ་
[63a]
[63a.1]དང་། ཚ་བ་གསུམ་ཞོ་གཉིས་གཉིས་ཀྱི་ཕྱེ་མ་དང་། འུ་སུའི་ཁུ་བ་སྦྱར་ལ་བླུད་དོ་ཞེས་ཟེར་རོ། །འདིར་བུའི་གསོ་བ་ཐམས་ཅད་ནི་བུད་མེད་དམ་མ་མ་གང་ཡང་རུང་བས་བྱིས་པའི་རྒྱུད་ཀྱི་ལེའུ་ལས་འབྱུང་བ་བཞིན་དུ་སྦྱར་བར་བྱའོ། །བུ་བྱུང་བའི་འོག་
[63a.2]ཏུ་མ་ལྟོགས་པར་གྱུར་ན་ནི་མར་རམ་འབྲུ་མར་གང་ཡང་རུང་བ་སྦྱར་བའི་བཟའ་བའམ། ཐུག་པ་སྦྱིན་ནོ། །ལྟོགས་པར་མ་གྱུར་ན་ནི་དང་པོ་ཡི་ག་དབྱེ་བའི་ཕྱིར་ཆུ་བསྐོལ་བའི་ནང་དུ་བུ་རམ་མཉེས་ལ། ཆ་བ་རྣམ་པ་ལྔའི་ཕྱེ་མས་བཏབ་ལ་བླུད་དོ། །རླུང་འཇོམས་པའི་སྨན་
[63a.3]རྩ་བ་བཅུ་ལ་སོགས་པ་བསྐོལ་བ་བླུད་ན་མངལ་གྱི་རླུང་ནད་སེལ་ཞིང་ཁྲག་ངན་དག་པར་བྱེད་དོ། །རིམ་པ་འདི་དག་གིས་ཞག་གཉིས་གསུམ་དུ་བྱའོ། །གཞན་ཡང་བྱིས་པའི་མ་སྣུམ་དང་འཕྲོད་ན་ནི་སྣུམ་དང་བཅས་པའི་བཟའ་བཏུང་སྦྱར་རོ། །སྣུམ་དང་མི་འཕྲོད་ན་ནི་
[63a.4]གོང་གི་ཚ་བ་ལྔ་དང་བཅས་པའི་བཟའ་བཏུང་སྦྱར་རོ། །དེ་ལྟར་གོང་དང་མཐུན་པའི་བཟའ་བཏུང་བྱིན་ནས་རླུང་མི་འཇུག་པར་བྱ་བའི་ཕྱིར། མར་དང་ཏིལ་མར་གྱིས་བསྒོས་པའི་རས་ཀྱིས་ལྟོ་བ་བཅིང་བར་བྱའོ། །དེ་ནས་ཁ་ཟས་ཞུ་བ་དང་ཁྲུས་བྱ་སྟེ། གོང་དུ་སྨོས་
[63a.5]པའི་སྨན་ཚ་བ་ལྔ་འམ། རྩ་བ་བཅུ་པ་ལ་སོགས་པ་དང་སྦྱར་བའི་ཐུག་པ་སྦྱིན་ནོ། །ཞག་གསུམ་ནས་ནི་བི་ད་རིའི་སྡེ་ཚན་དང་སྦྱར་བའི་ཐུག་པ་བླུད་མར་དང་འོ་མ་གོང་དང་མཐུན་པ་དང་སྦྱར་རོ། །ཞག་བདུན་པ་ནས་ནི་རིམ་གྱིས་ཉམས་སྟོབས་བསྐྱེད་པའི་ཁ་ཟས་སྦྱིན་ནོ། །
[63a.6]ཞག་བཅུ་གཉིས་པ་ནས་ནི་སྲོག་ཆགས་ཐང་ལ་གནས་པའི་ཤ་ལས་གཡོས་སུ་བྱས་པའམ། ཤའི་བཟའ་བ་མེའི་དྲོད་དང་སྦྱར་ནས་སྦྱིན་ནོ། །བུ་བཙས་ཟིན་པའི་བུད་མེད་ལ་ནི་དང་པོ་རུམ་དུ་ཆགས་པ་ནས་འཕེལ་བ་ལ་སོགས་པ་དང་། འབྱུང་བའི་སྡུག་བསྔལ་དང་།
[63a.7]ཁྲག་མང་པོ་འབྱུང་བ་དང་། བཙིར་བ་ལ་སོགས་པའི་སྡུག་བསྔལ་གྱི་ནད་དུ་གྱུར་ན་གསོ་དཀའ་བར་བཤད་དེ། དེ་བས་ན་འབད་པ་དང་བཅས་པས་གསོ་བར་བྱའོ། །འོན་ཀྱང་བུ་བྱུང་ནས་ཟླ་བ་ཕྱེད་དང་གཉིས་ཀྱི་བར་དུ་བག་དང་བཅས་པས་སྲུང་བ་ཚུལ་བཞིན་དུ་བྱའོ། །
[63b]
[63b.1]དེ་ཕན་ཆད་ནི་ཅི་བདེར་སྤྱད་དོ། །ཐོག་མ་བུ་བཙས་ནས་ཉམས་བརྟས་ཏེ། ཕྱི་མ་ཟླ་མཚན་བྱུང་ནས་སྐྱེས་བུ་བཙས་ཞེས་བྱ་བའི་མིང་མེད་པ་བཞིན་ནོ། །ལུས་ཀྱི་གནས་ལས་ལེའུ་དང་པོ་རྫོགས་སོ།། །།དེ་ནས་བྱིས་པ་རུམ་དུ་ཆགས་པའི་ནད་ཀྱི་བྱེ་བྲག་
[63b.2]བསྟན་པའི་ལེའུ་གཉིས་པ་བཤད་པར་བྱའོ། །དེ་ལ་བྱིས་པ་རུམ་དུ་ཆགས་པའི་བུད་མེད་དེས་སྤྱད་པར་མི་འོས་པའི་དངོས་པོ་ཉལ་པོ་དང་རྩོལ་བ་ལ་སོགས་བསྟེན་པ་ལས་བྱུང་བའམ། ཡང་ན་ནད་གཞི་འཁྲུགས་པའི་དབང་གིས་མོ་མཚན་ནས་ཁྲག་མང་པོ་བྱུང་
[63b.3]སྟེ། དེ་ཡང་ཆུ་སོ་དང་། རྩིབ་ལོགས་དང་། རྐེད་པ་དང་། མོ་མཚན་གྱི་སྒོར་ཟུག་གཟེར་བྱེད་ན། དེ་ལ་ནི་ལུས་ཕྱི་ནང་གཉིས་ཀ་ནས་སྣུམ་པ་དང་། བསིལ་བའི་བཟའ་བ་དང་། བཏུང་བ་དང་། བསྐུ་བ་དང་། བླུགས་པའི་གསོ་བ་སྦྱར་བར་བྱ་སྟེ། དེ་ཡང་པུ་
[63b.4]ཤེལ་ཙེ་དང་། པདྨ་དང་། ཙནྡན་དང་། ཤིང་འོ་མ་ཅན་གྱི་ཤུན་པ་དང་། འདི་རྣམས་ཀྱི་ཕྱེ་མ་མར་དང་ལྡེ་གུར་བྱས་པས་རས་ལ་བསྐུས་ཏེ། རས་བསྒྲིལ་ལ་ཐམ་བུ་ཐབས་སུ་བྱས་པས། མཚན་གྱི་སྒོ་ནས་བཙངས་ལ་གཞག་གོ། །མར་ཆུ་ནང་དུ་ལན་བརྒྱ་ཙམ་མཉེས་
[63b.5]པས་ལུས་བསྐུའོ། །ཡང་ན་གོང་གི་ཨུ་ཤི་ར་ལ་སོགས་པའི་ཕྱེ་མ་ཆུ་དང་སྦྱར་བའི་ནང་དུ་ལུས་གཞུག་གོ། །ཀ་ར་དཀར་པོ་དང་། སྦྲང་རྩི་དང་། ཀུ་མུ་ད་དང་། ཨུཏྤལ་དང་། པདྨ་གེ་སར་སྦྱར་བའི་ལྡེ་གུ་སྦྱིན་ནོ། །ཤྲི་ཀ་ཊ་ཀ་དང་། ཀ་ཤེ་རུ་ཀ་མར་དང་། འོ་མ་དང་སྦྱར་
[63b.6]བའི་བཟའ་བ་སྦྱིན་ནོ། །ཡང་ན་པྲི་ཡང་ཀུ་དང་། ཨུཏྤ་ལའི་རྩ་བ་དང་། ཨུ་དུམྦཱ་ར་གཞོན་ནུ་འདི་རྣམས་ཕྱེ་མར་བྱས་ཏེ། འོ་མ་དང་། བཏུང་བ་འམ། ཡང་ན་འོ་མ་དང་བསྐོལ་བའི་ཁུ་བ་བླུད་དོ། །ཡང་ན་འབྲས་སཱ་ལུའི་རྩ་བ་དང་། ཀ་ཀོ་ལ་དང་། བ་ལ་རྣམ་གཉིས་དང་།
[63b.7]ཤིང་མངར་དང་། བུ་རམ་ཤིང་འདི་རྣམས་ཆུ་དང་འོ་མ་དང་བསྐོལ་ལ། ཆུ་ནི་དུ་འོ་མ་ལུས་པ་དང་། སྦྲང་རྩི་དང་། ཤ་ཁ་རས་བཏབ་ལ་སྦྱིན་ནོ། །ཡང་ན་ཐང་ལ་གནས་པའི་སྲོག་ཆགས་ཀྱི་ཤ་བསིལ་བའི་ཁུ་བའི་ནང་དུ་སྦྲང་རྩི་དང་། ཤ་ཁ་རས་བཏབ་པ་བླུད་དོ། །གཞན་
[64a]
[64a.1]སློན་ཁྲུས་མ་གཏོགས་པ་ཕྱི་མ་ཁྲག་མཁྲིས་གསོ་བའི་ཆོ་ག་ཐམས་ཅད་སྐབས་འདིར་སྦྱར་རོ། །ཟླ་བ་གསུམ་གྱི་བར་དུ་ཁྲག་དབྱུང་བ་དགག་པའི་གསོ་བ་བྱས་ལ། བུ་ལེགས་པར་བརྟན་པར་བྱ་བའི་ཕྱིར་བུ་གསོ་བ་ལ་འབད་པ་དང་བཅས་པར་བྱའོ། །
[64a.2]ཅི་སྟེ་ཁྲག་དབྱུང་བ་ལ་སོགས་པའི་གསོ་བ་མ་བྱས་ན་ནི་མངལ་དུ་བུ་མི་འཆགས་ཤིང་བརྟན་པོར་མི་འགྱུར་བར་སྨན་དཔྱད་བྱའོ། །གལ་ཏེ་བུད་མེད་ལ་བེའུ་སྣབས་ཀྱི་ནད་བྱུང་ན་དེ་ལ་ནི་ཕན་པའི་སྨན་བསྟེན་པར་བྱ་སྟེ། དེ་ཡང་བཟའ་བ་དང་བཏུང་བ་ནི་བསིལ་བའི་བག་གིས་ལུས་
[64a.3]ཀྱི་ནང་ནས་སྦྱར་རོ། །སྨན་ཡང་ཁ་བ་དང་བསྐ་བའི་རྩུབ་ཆོས་བྱའོ། །གཞན་ཡང་སྨྱུང་བ་བྱ་ཞིང་གླ་སྒང་དང་། པུ་ཤེལ་ཙེ་དང་། སླེ་ཏྲེས་དང་། ཨ་ར་ལུ་དང་། འུ་སུ་དང་། བྱི་ཚེར་བ་དང་། བར་པ་ཏ་དང་། ཙནྡན་དང་། བོང་ང་དཀར་པོ་དང་འདི་རྣམས་ཆུ་དང་བསྐོལ་བའི་ཁུ་བའི་
[64a.4]སྐོམ་དུ་བླུད་དོ། །ཟས་སུ་ནི་འབྲུ་གསུམ་པོ་དང་། ཅི་ཚེ་དང་། ཁྲེ་དང་། ཅི་ཚེ་རྒོད་འདི་དག་གསུམ་ལས་གཡོས་སུ་བྱས་ལ་སྦྱིན་ནོ། །ཡང་ན་མོན་སྲན་སྡེའུ་ལ་སོགས་གང་བུ་ནས་སྐྱེས་པའི་སྲན་མའི་རིགས་ཀྱི་ཨུ་ཤའི་ཁུ་བཅུད་དང་གར་མའི་ཟས་ལྷན་ཅིག་སྦྱིན་ནོ། །སྨན་དང་
[64a.5]ཟས་དེ་དག་གིས་མ་ཞུ་བའི་བེའུ་སྣབས་ཀྱི་ནད་ཞི་བར་གྱུར་ན་གོང་མ་བཞིན་དུ་བསིལ་བ་དང་། སྣུམ་ཆོས་ལ་སོགས་པ་ཕྱི་ནང་གཉིས་ཀ་ནས་བྱའོ། །གལ་ཏེ་བྱིས་པ་ཟླ་བ་མ་ཚང་བར་ཕྱིར་འཕྱིལ་བར་གྱུར་ན་དེའི་ཚེ་ཟུག་གཟེར་དྲག་པོ་མྱོང་སྟེ་དེ་མ་ཐག་ཏུ་ཟུག་གཟེར་མི་དྲན་པ་དང་།
[64a.6]མངལ་བདེ་བར་བྱ་བའི་ཕྱིར། ཆང་བཟང་པོ་ལེགས་པར་སྨིན་པ་ཡོག་ཚད་བུད་མེད་ལ་སྦྱིན་ནོ། །དེ་ནས་རྩ་བ་ཆུང་ངུ་ལྔ་བསྐོལ་བའི་ཁུ་བ་ལས་གཞི་བླངས་པའི་འབྲས་ཐུག་བླུད་དོ། །གལ་ཏེ་ཆང་མི་འཐུང་བ་ཞིག་ཡིན་ན་ནི་ཚ་བ་རྣམ་པ་ལྔ་དང་སྦྱར་བའི་ཐུག་པ་སྦྱིན་ནོ། །དེ་
[64a.7]ནས་བིལ་བ་ལ་སོགས་པའི་རྩ་བ་ཆེན་པོ་ལྔ་བསྐོལ་བའི་ཁུ་བ་ལས་གཞི་བླངས་ལ་གོང་གི་འབྲུ་གསུམ་དང་། ཏིལ་དང་སྦྱར་བའི་ཟན་དྲོན་སྦྱིན་ནོ། །ཅི་སྟེ་བུ་ཟླ་བ་གཅིག་ལོན་པ་ན་འབྱིལ་བར་གྱུར་ན་ཐུག་པ་ལ་སོགས་པའི་ཆོ་ག་གོང་མ་ཞག་གཅིག་གི་བར་དུ་སྦྱིན་ནོ། །དེ་བཞིན་དུ་
[64b]
[64b.1]ཟླ་བ་བཞི་ནས་བརྒྱད་ཀྱི་བར་དུ་ཟླ་གྲངས་དང་ཞག་གྲངས་རེ་རེར་སྦྱར་རོ། །ཁ་ཟས་ཀྱང་ཡང་བག་ཚོད་ཟིན་པར་བཟའ་སྟེ། དེ་ཡང་སྣུམ་དང་ལན་ཚྭ་མེད་པ་མེའི་དྲོད་སྐྱེད་པར་བྱེད་པའི་སྨན་ན་ལེ་ཤམ་ལ་སོགས་པ་ཚ་བ་རྣམ་པ་ལྔ་དང་བཅས་པ་བྱིན་ན་ཕན་ནོ། །གོང་དུ་
[64b.2]བསྟན་པའི་ཟས་དང་སྨན་ལ་སོགས་པའི་ཆོ་ག་བསྟན་པ་ནི་སྲོག་ཟུངས་བདུན་དང་ཆུ་སེར་དང་། རླུང་མཁྲིས་ལ་སོགས་པ་འཁྲུགས་པ་ཞི་ཞིང་བསྐོམ་པའི་ཕྱིར་བཤད་པ་ཡིན་ནོ། །དེ་ནས་དེའི་འོག་ཏུ་སྣུམ་པའི་བཟའ་བ་དང་བཏུང་བ་དང་། ནི་རུ་ཧ་བཏང་ན་སྟོབས་དང་
[64b.3]ལྡན་པ་དང་། མེའི་དྲོད་སྐྱེད་པར་བྱེད་དོ། །གཞན་ཡང་ཛི་བན་ཏིའི་སྡེ་ཚན་འོ་མ་དང་སྦྱར་ལ་བླུད་དོ། །གཞན་ཡང་ཁོང་པའི་ནང་དུ་བུ་ལ་ནད་ཀྱང་མེད། ཉམས་སྟོབས་དང་ལྡན་བཞིན་དུ་མོ་མཚན་ནས་ཁྲག་འཛག་སྟེ་བུ་འཕེལ་ཞིང་རྒྱས་པར་མ་ནུས་པ་ཡང་
[64b.4]ཡོད་དེ། དེ་འཕར་བའམ་འགུལ་བར་མི་སྣང་ན་དེའི་སོ་ན་གནས་པ་ཞེས་བྱ་སྟེ། དེ་ལྟར་ན་བུ་འཕེལ་མ་ནུས་པའི་རྒྱུས་མའི་ལྟོ་བ་ཆེར་སྐྱེ་བར་མི་འགྱུར་བ་ཡང་ཡོད་དོ། །གཞན་མས་མྱ་ངན་སྨྱུང་བ་དང་། རྩུབ་པ་ལ་སོགས་པའི་རྒྱུས་རླུང་འཁྲུགས་པ་འམ། ཁྲག་
[64b.5]མང་པོ་བྱུང་བའི་རྒྱུས་རླུང་འཁྲུགས་པའམ། དེ་གཉིས་གང་ཡང་རུང་བའི་རྒྱུས་བུ་དེ་རིད་ཅིང་སྐེམས་པར་འགྱུར་ལ། དེའི་མིང་ནི་གོ་ད་ར་ཞེས་བྱ་སྟེ། ནང་གི་བུའི་འགྲིབས་པའི་དབང་གིས་སྔར་ལྟོ་བ་ཆེར་སྐྱེས་ན་ཡང་ཕྱིས་འགྲིབ་པར་སྣང་སྟེ། ནང་དུ་འགུལ་བ་
[64b.6]ཡང་ཡུན་རིང་པོ་ནས་ཅུང་ཞིག་འགུལ་པ་ཡིན་ནོ། །དེ་ལ་སོ་ན་གནས་པ་དང་། ནད་གོ་ཏ་ར་ཞེས་བྱ་བ་འདི་གཉིས་ལ་ནི་ཉམས་སྟོབས་སྐྱེད་པའི་སྨན་དང་། རླུང་འཇོམས་པའི་སྨན་དང་། མངར་བའི་སྨན་དང་། མར་དང་། འོ་མ་དང་། རེའུ་བཙས་མ་ཐག་པའི་ཤ་
[64b.7]དང་། འདི་རྣམས་ལེགས་པར་སྦྱར་ལ་མ་ལ་ཚིམ་ཚད་དུ་སྦྱིན་ནོ། །དེའི་འོག་ཏུ་བཞོན་པ་ལ་བསྐྱོན་ཏེ་ཅུང་ཞིག་བསྐུལ་ལོ། །ཁོང་པ་ན་ནང་གི་བུའི་ཚད་སྔོན་པོ་ཞེས་བྱ་བ་འགུལ་མི་ཤེས་པ་ཡོད་དེ། དེ་ལ་ནི་བྱ་ཤེ་ན་དང་། གོ་བད་ཚ་དང་། ཨུག་ཀྲོ་ཤ་དང་། རྨ་བྱ་དང་།
[65a]
[65a.1]འདི་རྣམས་ཀྱི་ཤའི་ཁུ་བའི་ནང་དུ་མར་མང་པོ་བླུགས་པའམ་ཡང་ན་མོན་སྲན་གྲེའུ་དང་། ལ་ཕུག་གི་ཁུ་བའི་ནང་དུ་མར་མང་པོ་བླུགས་ལ་སྦྱིན་པ་འམ། ཡང་ན་བིལ་བ་གཞོན་ནུ་དང་། ཏིལ་དང་། མོན་སྲན་གྲེའུ་དང་། ཕྱེ་དང་འདི་རྣམས་ཆུ་དང་
[65a.2]འོ་མ་དང་བསྐོལ་བའི་ཐུག་པ་བླུད་དོ། །རྐེད་པ་མན་ཆད་ཏིལ་མར་གྱིས་བསྐུ་བྱུག་བྱ་སྟེ། སྲོག་ཆགས་གཞོན་ནུའི་ཤ་ཟོས་ལ། དེ་དང་རྒུན་ཆང་དང་ལྷན་ཅིག་སྦྱིན་ནོ། །བུད་མེད་སྦྲུམ་མ་ལ་ནི་རྟག་ཏུ་འབྱུང་བར་འོང་ངོ་། །ཞེས་དགའ་བའི་སེམས་སྐྱེད་དེ། དེ་ལ་
[65a.3]ཁ་ཟས་ལ་སོགས་པ་མི་མཐུན་པ་བསྟེན་པའི་དབང་གིས་ལུས་ཡོངས་སུ་རྫོགས་ན་ཡང་ལོ་གྲངས་སུ་འདུག་སྟེ། ཤིན་ཏུ་དཀའ་བས་ཉམ་ཐག་སྡེ་མི་འབྱུང་བ་ཡང་ཡོད། ལ་ལ་དག་ནི་འབྱུང་བ་ཡང་ཡོད་དོ། །བུད་མེད་སྦྲུམ་མ་ལའང་རྟུག་པ་འགགས་པའི་ནད་
[65a.4]བྱུང་ན་དེ་ལ་ནི་སྣུམ་ཆེན་པོ་བཞི་གང་དང་འབྱོར་བའི་འཇམ་རྩི་མས་གཏོང་ན་དེ་མ་ཐག་འབྱུང་བའི་རིགས་སོ། །གལ་ཏེ་ནད་གཞི་འཁྲུགས་པའམ་མ་སྔོན་གྱི་ལས་ཀྱིས་མ་བུ་གཉིས་ཀ་འཆི་བ་ཡང་ཡོད་དོ། །དེའི་རྟགས་ནི་ལྟོ་བའི་ནང་གྲང་བ་དང་། རེངས་པ་དང་། སྦོ་བ་དང་།
[65a.5]ནད་ཚབས་ཆེ་བ་དང་། ནང་གི་མི་འགུལ་བ་དང་། མགོ་འཁོར་བ་དང་། སྐོམ་དད་ཆེ་བ་དང་། དབུགས་ཉམ་ཐག་པར་འབྱིན་པ་དང་། ལུས་དུབ་པ་དང་། གནས་ལ་སོགས་པ་ལ་མི་དགའ་བ་དང་། རྟབས་མིག་ཏུ་བལྟ་བ་དང་། རྟགས་དེ་དག་དང་ལྡན་ཞིང་བུ་ཕྱིར་
[65a.6]སྐྱེ་བའི་མཚན་མ་མི་སྣང་ན་ངེས་པར་བུ་ནང་དུ་ཤི་བའི་རྟགས་སོ། །གལ་ཏེ་བུ་ནང་དུ་ཤི་སྟེ་མཐོན་ན་ཆུ་དྲོན་པོས་མངལ་གྱི་སྒོ་ཁྲུས་བྱའོ། །ཕབས་དང་བུ་རམ་དང་ལན་ཚྭ་ལྷན་ཅིག་སྦྱར་བའི་ལྡེ་གུས་མོ་མཚན་གྱི་ནང་དུ་བསྐུ་ཞིང་དེ་ནས་མུ་ཛ་རའི་ཕྱེ་མ་དང་། མར་སྦྱར་བའི་
[65a.7]ལྡེ་གུས་མོ་མཚན་གྱི་ནང་དུ་ཡང་དང་ཡང་ཕུལ་ཞིང་དགང་བར་བྱས་ན་ནང་ནས་དབྱུང་བའི་རིགས་སོ། །ཐབས་དེ་དག་གིས་མ་བྱུང་ན་སྲིད་སྲུང་གི་རིག་བྱེད་ཀྱི་སྔགས་ཀྱིས་བཏབ་ལ་དབྱུང་ངོ་། །དེས་ཀྱང་མ་ཐོན་ན་རྣལ་འབྱོར་བའི་ཏིང་ངེ་འཛིན་བསྒོམ་མོ། །གཞན་ཡང་ཤ་མ་
[65b]
[65b.1]འབྱུང་བའི་སྨན་ལང་ཀ་ལི་ལ་སོགས་པའི་སྦྱོར་བ་ཐམས་ཅད་ཀྱང་སྐབས་འདིར་སྦྱར་རོ། །དེ་དག་གིས་ཀྱང་མ་ཐུབ་ན། རྒྱལ་པོ་ལ་ཞུ་བའི་ཐག་བཅད་དེ། དེའི་འོག་ཏུ་སྨན་པས་སེན་མོ་བྲེགས་ལ་མ་ཛ་རའི་ཕྱེ་མ་མར་དང་སྦྱར་ལ་མོ་མཚན་གྱི་སྒོ་དང་ལག་པ་བསྐུས་
[65b.2]ཏེ། ནང་དུ་བཅུག་ནས་དྲང་པོར་འདུག་ན་ནི་ལག་པས་ཕྲད་མ་ཐག་ཏུ་དབྱུང་། གལ་ཏེ་ལུས་གཞན་དུ་འགྱུར་བའམ་ལུས་གོང་འོག་ཏུ་འཆུགས་པའམ། གང་ལྟར་ཡོད་པ་ལེགས་པར་མྱངས་ཏེ། མོ་མཚན་གྱི་ལམ་དུ་དགུག་གོ། །ཇི་སྟེ་མགོ་དྲང་པོར་ཡར་བལྟས་ཏེ་
[65b.3]འདུག་ན་ཡང་མར་བཟློག་ལ་དབྱུང་ངོ་། །དེ་ཡང་ཕན་ཚུན་བསྡུ་ལ་བཙིར་ཞིང་དབྱུང་སླ་བའི་ཐབས་སྣ་ཚོགས་བྱ་སྟེ། ཅི་ལེགས་སུ་དབྱུང་ངོ་། །གལ་ཏེ་ལག་པ་གཉིས་སྔོན་དུ་བྱུང་ངམ། ཡང་ན་རྐང་པ་སྔོན་དུ་བྱུང་ངམ། མགོ་འབའ་ཞིག་སྔོན་དུ་འབྱུང་སྟེ། དེ་ཡང་འཆུས་
[65b.4]པའམ་ལོག་པར་བྱུང་ན་དེ་ནི་ཤམ་པ་ཞེས་བྱ་སྟེ་ཐབས་ཅི་ཡོད་པས་བརྟགས་ཏེ་ཕྱིར་དབྱུང་ངོ་། །གཞན་ཡང་བུའི་རྐང་པ་གཅིག་ནི་བཤད་པའི་ལམ་དུ་ཞུགས་ལ་གཅིག་ནི་མོ་མཚན་གྱི་ཕྱོགས་སུ་ཞུགས་ཏེ་འདུག་ན། དེ་ཡང་ནི་ཤམ་པ་ཞེས་བྱ་སྟེ། དེ་ནི་ལག་པས་དབྱུང་
[65b.5]བར་མི་ནུས་ཏེ་མཚོན་གྱིས་དབྱུང་བར་འོས་པ་ཡིན་ནོ། །དེ་ཡང་མཚོན་འདི་འདྲ་བ་ལས་བྱ་བར་བསྔགས་ཏེ། མཚོན་གྱི་དབྱིབས་རྩེ་མོ་དཀྱིལ་འཁོར་འདྲ་ལ་སོ་ནི་མཛུབ་མོའི་སེན་མོའི་དབྱིབས་དང་འདྲ་བ་དང་། འཕེལ་བཙགས་ཞེས་བྱ་བ་དབྱིབས་སུ་སྤུ་གྲི་འདྲ་བ་དང་། དཀྱིལ་
[65b.6]འཁོར་གྱི་རྩེ་མོ་འདྲ་བ་དང་དེ་གསུམ་ལས་ཀྱང་འཕེལ་བཙགས་ནི་རྩེ་མོ་རྣོ་བས་ནང་དུ་མི་གཏང་ངོ་། །དེ་བས་ན་སྨན་པ་མཁས་པ་ལས་ཀྱི་བྱ་བ་ལ་གོམས་པས་མཚོན་ལེགས་པར་བྱ་སྟེ། མགོ་བོའམ་རྐང་པ་ལ་སོགས་པ་གང་བདེ་བའི་ཕྱོགས་ན་ཡོད་པ་དེ་ལྕགས་ཀྱུས་དམ་དུ་
[65b.7]བཟུང་སྟེ། མཚོན་གྱིས་བཅད་ཅིང་ལྕགས་ཀྱུས་དྲངས་ལ་དབྱུང་ངོ་། །དེ་བཞིན་དུ་ཡན་ལག་ལྷག་མ་ཡང་བཅད་ཅིང་རིམ་གྱིས་ཕྱིར་དབྱུང་ངོ་། །གལ་ཏེ་བུའི་ནང་ཆལ་སོགས་པ་མའི་ཁོང་པར་ལུས་པའི་མཚན་མ་ནི་ལྟོ་བ་ཅུང་ཞིག་གྲང་བར་འདུག་སྟེ། དེ་ལ་ནི་བུད་མེད་
[66a]
[66a.1]ཀྱི་ལྟོ་བ་དབུགས་ཀྱིས་བཀང་བ་ལྟར་བྱས་ལ་ཕྱིར་བཙིར་ན་འབྱུང་བར་འགྱུར་རོ། །དེས་འབྱུང་དུ་མ་འདོད་ན་ཡང་གོང་མ་ལྟར་བཅད་ཅིང་དབྱུང་ངོ་། །གཞན་ཡང་བུ་མའི་རྐེད་པ་ལ་བརྟེན་ཏེ་འདུག་པ་ཡོད་དོ། །དེ་ནི་རླུང་གིས་དེ་ལ་འབྱར་བར་བྱས་
[66a.2]པ་ཡིན་པས་ཐོག་མར་ཐོད་པ་བཅད་ལ་ལྕགས་ཀྱུས་ཕྱིར་དྲངས་ལ་དབྱུང་ངོ་། །ལག་པ་ཡང་དུམ་བུ་དུམ་བུར་བཅད་ཅིང་དབྱུང་སྟེ། བུད་མེད་ཀྱི་རྒྱུ་མ་ལ་སོགས་པ་ལ་མཚོན་གྱིས་མ་ཕོག་པར་བག་བྱའོ། །རླུང་ཤས་ཆེར་འཁྲུགས་པའི་དབང་གིས་ཁོང་པའི་ནང་དུ་བུ་མི་འགུལ་
[66a.3]ཞིང་རེངས་པ་ལ་སོགས་པ་སྣ་ཚོགས་སུ་འགྱུར་བར་བྱེད་དེ། དེ་བས་ན་སྨན་པ་མཁས་པས་ལེགས་པར་བརྟགས་ཏེ་དཔྱད་བྱ་བ་ཡིན་གྱིས་བློ་ཞན་པའི་སྨན་པ་མི་མཁས་པ་རྩིང་པོ་མ་བརྟགས་པ་རྣམས་ཀྱིས་བླུན་ཆོས་སུ་བྱ་བ་མ་ཡིན་ཏེ། ཅིའི་ཕྱིར་ཞེ་ན་གལ་ཏེ་བུ་མ་ཤི་བར་
[66a.4]དཔྱད་དྲག་པོ་མཚོན་གྱི་ལས་བྱས་ན་ནི། མ་དང་བཅས་པར་འཆི་ལ་གཉིས་ཀ་སྲོག་གཅིག་པར་བལྟ་སྟེ་དེ་མ་ཐག་འཆིའོ། །དེ་བས་ན་ཐོག་མར་མཚོན་གྱི་ལས་མི་བྱ་བར་དྲང་བའི་ཐབས་སྣ་ཚོགས་བྱའོ། །གཞན་དུ་ན་མོ་མཚན་ཞུམ་པར་གྱུར་པ་དང་། མོ་མཚན་ཕྱིར་
[66a.5]ལོག་པ་དང་། དེ་བཞིན་དུ་གོང་དུ་སྨོས་པའི་བརྣག་དཀའ་བའི་ནད་འབྱུང་བ་དང་། དབུགས་མི་བདེ་བས་གཟིར་བ་དང་སྒྲེགས་པ་མནམ་པོ་འབྱུང་བ་དང་། ལུས་གྲང་བ་དང་མཚན་མ་འདི་དག་དང་ལྡན་པའི་བུད་མེད་ཀྱི་ནི་ཡོངས་སུ་སྤང་བར་བྱའོ། །བུད་མེད་བུ་བྱུང་ནས་ཤ་མ་
[66a.6]དབྱུང་དུ་མ་འདོད་ན་གོང་དུ་སྨོས་པའི་གསེར་གྱི་མེ་ཏོག་ལ་སོགས་པའི་སྦྱོར་བ་བྱའོ། །བུ་དང་། ཤ་མ་བྱུང་ཟིན་ནས་ཆུ་དྲོན་པོས་ཁྲུས་བྱས་ལ་སྣུམ་གྱིས་བསྐུ་བྱུག་བྱའོ། །དེ་ནས་མོ་མཚན་གྱི་སྒོ་ནས་སྣུམ་དང་བཅས་པའི་རས་བལ་གྱིས་བཅུག་ན་འཇམ་པར་འགྱུར་ཞིང་ཟུག་
[66a.7]གཟེར་ཡང་ཞི་བར་འགྱུར་རོ། །དེའི་འོག་ཏུ་ལ་ལ་ཕུད་དང་། བོང་ང་གཉིས་དང་། ར་སྣ་དང་། ཤིང་ཀུན་དང་། སུག་སྨེལ་དང་། ཚ་བ་རྣམ་ལྔ་དང་འདི་རྣམས་ཀྱི་ཕྱེ་མ་མར་དང་སྦྱར་བའམ། ཡང་ན་བསྐོལ་བའི་ཁུ་བ་མར་དང་སྦྱར་བ་བཏུང་བར་བྱའོ། །ཡང་ན་པུ་ཙེ་ཤེལ་
[66b]
[66b.1]དང་། བོང་ང་དཀར་པོ་དང་། ཀ་ཊཱ་ག་དང་། ཤིང་ཀུན་དང་། ཏེ་ཛོ་བ་ཏི་དང་འདི་རྣམས་བཏགས་ཏེ་ཕྱེ་མར་བྱས་པའམ། ཡང་ན་བསྐོལ་བ་མར་དང་ལྡན་པར་བླུད་ན་བུད་མེད་ཀྱི་མངལ་ནད་ཁྲག་འཛག་པ་ཞི་བར་བྱེད་དེ་ཞག་གསུམ་གྱི་བར་དུ་བྱའོ། །དེ་ནས་ཞག་གསུམ་
[66b.2]གྱི་བར་དུ་སྣུམ་ལས་གཞི་བླངས་པའི་བཟའ་བ་དང་བཏུང་བ་སྦྱིན་ནོ། །སྨན་བསྐོལ་བའི་ཆང་ངམ། ཨ་ས་བ་ལེགས་པར་སྦྱར་བའི་ཆང་ཕྱི་དྲོའི་དུས་སུ་སྐོམ་དུ་བླུད་དོ། སྨན་ཤི་རི་ཤ་དང་། ཀ་ཀུ་པ་གཉིས་བསྐོལ་བའི་ཁུ་བའི་ནང་དུ་རས་བལ་སྦངས་པ་མོ་མཚན་གྱི་ནང་དུ་
[66b.3]གཞུག་གོ། །དེ་བཞིན་དུ་ནད་གང་ཡང་རུང་། གློ་བུར་དུ་བྱུང་ན། སོ་སོའི་ནད་དང་མཐུན་པའི་སྨན་སྦྱར་རོ། །རླུང་འཇོམས་པའི་སྨན་རྩ་བ་བཅུ་པའོ། །མར་དང་བསྐོལ་བ་ལས་གཞི་བླངས་པའི་བཟའ་བ་སྦྱིན་ནོ། །དེ་ནས་ཞག་བཅུའི་བར་དུ་ཤ་ཁུ་དང་བཅས་པའི་ཟས་
[66b.4]སྦྱིན་ནོ། །དེ་ནས་ཞག་བཅུའི་བར་དུ་ཟས་ཡང་བ་དང་། ཕན་པ་དང་། ཉུང་བའི་བཟའ་བ་སྦྱིན་ནོ། །དེ་ནས་ཟླ་བ་བཞིའི་བར་དུ་བཟའ་བ་ཉུང་ཟད་སྦྱིན་ཞིང་། འོག་ནས་འབྱུང་བའི་སྨན་ལས་སྦྱར་བའི་ཏིལ་མར་བསྟེན་པར་བྱའོ། །དེ་ཡན་ཆད་ནི་ཅི་བདེ་བར་སྤྱད་དེ་བསྲུང་མི་
[66b.5]དགོས་སོ། །སྨན་བ་ལའི་མར་ཞེས་བྱ་བ་ནི་བ་ལ་ཆམ་ཆོམ་བརྡུངས་ཏེ་ཆུ་དང་ཚུལ་བཞིན་དུ་བསྐོལ་ལ་དྲུག་ཆ་ལུས་པ་དང་མཉམ་པའི་དེ་དང་འོ་མ་དང་བསྲེས་པ་དེའི་ནང་དུ་ནས་དང་། རྒྱ་ཤུག་དང་། རྒྱ་སྲན་དང་། རྩ་བ་བཅུ་པ་འདི་རྣམས་ཆ་གཅིག་དང་། ཏིལ་མར་ཆ་བཅུ་བཞི་དང་།
[66b.6]མེ་ད་རྣམ་གཉིས་དང་། ཐང་ཤིང་དང་། བཙོད་དང་། རམ་ཉེ་བ་རྣམ་གཉིས་དང་། ཐལ་ཏྲེས་དང་། རུ་རྟ་དང་། རྒྱ་སྤོས་དང་། ཛི་བ་ཀ་དང་། ཟངས་རྩི་བ་དང་། ལྕེ་མྱང་ཚ་དང་། གླ་སྒང་དང་། རྡོ་དྲེག་དང་། ཤུ་དག་དང་། ཨ་ཀ་རུ་ནག་པོ་དང་། བ་སྤྲུ་བ་རྣམ་གཉིས་དང་།
[66b.7]ཨ་ཤྭ་གནྡྷ་དང་། ཉེའུ་ཤིང་དང་། པ་ཡས་སྱ་དང་། ཤིང་མངར་དང་། བ་ལ་ར་ས་དང་། ཤུ་ཏི་དང་། མུངྒ་པརྞི་དང་། མ་ཤ་པརྞི་དང་། སུག་སྨེལ་དང་། ཤིང་ཚ་དང་། གནྡྷ་བྷ་དྲ་དང་། འདི་རྣམས་ཞིབ་ཏུ་བཏགས་ཏེ་ལྷན་ཅིག་ཏུ་མེ་མི་ཆེ་བས་བསྐོལ་ལ་ཏིལ་མར་འབའ་ཞིག་
[67a]
[67a.1]ལུས་པ་དང་། དེ་ལས་རན་པར་འཐུངས་ན་རླུང་ལས་གྱུར་པའི་ནད་ཐམས་ཅད་ལས་རྒྱལ་ཏེ་ཁྱད་པར་དུ་བུད་མེད་བུ་བཙས་མ་ཐག་པ་དང་། བྱིས་པའི་མིག་གནད་ན་བ་དང་། རུས་པ་ཆག་པ་དང་། འདི་རྣམས་ལ་རབ་ཏུ་བསྔགས་སོ། །གཞན་ཡང་
[67a.2]རིམས་དང་། སྐྲན་དང་། གདོན་དང་། སྨྱོ་བྱེད་དང་། གཅིན་ནད་དང་། རྒྱུ་མ་ཆེར་སྐྱེས་པའི་ནད་ལས་རྒྱལ་བར་བྱེད་པ་ཡང་འདི་ཡིན་ཏེ། མཆོག་ཏུ་མོ་མཚན་རལ་བ་དང་། བུད་མེད་ཀྱི་ནད་ཐམས་ཅད་ལ་ཕན་ནོ་ཞེས་དྲང་སྲོང་ཆེན་པོ་ཐང་ལ་འབར་གྱིས་བཤད་དོ། །དེ་
[67a.3]དེ་ལ་བུ་མ་བཙས་པར་མ་ཤི་བར་གྱུར་ན་དེ་མ་ཐག་མའི་ལྟོ་བ་ལག་པས་མྱངས་ཏེ་བུ་ནང་དུ་འགུལ་ན་དེ་ཁོ་ན་སྐྱེས་པའི་དུས་ཡིན་པས་ཆུ་སོའི་སྒོ་ནས་དྲལ་ཏེ་མྱུར་དུ་བུ་དབྱུང་བར་བྱའོ། །ཐོག་མ་མའི་མངལ་དུ་ཁུ་ཁྲག་ཆགས་ནས་ཟླ་བ་དང་པོ་ལ་བབ་པའི་ཚེ་ན་ཤིང་མངར་དང་། ཤིང་ཤ་
[67a.4]ཀའི་ས་བོན་དང་། པ་ཡས་སྱ་དང་། ཐང་ཤིང་དང་དེ་རྣམས་སྦྱར་རོ། །ཟླ་བ་གཉིས་པ་ལ་བབ་པའི་ཚེ་ན་སྲུ་སྲུའི་རྩ་བ་དང་། ཏིལ་ནག་པོ་དང་། བཙོད་དང་། ཉེའུ་ཤིང་དང་དེ་རྣམས་སྦྱར་རོ། །ཟླ་བ་གསུམ་པ་ལ་བབ་པའི་ཚེ་ན་ནི། པ་ཡས་སྱ་དང་། པྲི་ཡངྐུ་དང་། ཨུཏྤ་ལ་
[67a.5]དང་། ཐལ་ཏྲེས་དང་དེ་རྣམས་སྦྱར་རོ། །ཟླ་བ་བཞི་པ་ལ་བབ་པའི་ཚེ་ན་ནི། བྱི་ཚེར་བ་དང་། ཐལ་ཏྲེས་དང་། ར་སྣ་དང་། པདྨ་ར་ཙི་དང་། ཤིང་མངར་དང་དེ་རྣམས་སྦྱར་རོ། །ཟླ་བ་ལྔ་པ་ལ་བབ་པའི་ཚེ་ན་ནི་བྲི་ཧ་ཏི་རྣམ་གཉིས་དང་། ཏང་བལ་དང་། ཤིང་འོ་མ་ཅན་གྱི་
[67a.6]མྱུ་གུ་དང་། ཤུན་པ་དང་། མར་དང་དེ་རྣམས་སྦྱར་རོ། །ཟླ་བ་དྲུག་པ་ལ་བབ་པའི་ཚེ་ན་ནི། ཀྲྀཥྞ་པརྞི་དང་། པ་ལ་དང་། ན་ལེ་ཤམ་དཀར་པོ་དང་། གཟེ་མ་དང་། སླེ་ཏྲེས་དང་དེ་རྣམས་སྦྱར་རོ། །ཟླ་བ་བདུན་པ་ལ་བབ་པའི་ཚེ་ན་ནི། སྨན་ཤིང་ཀ་ཏྲ་ཀ་དང་། པདྨའི་རྩ་བ་
[67a.7]དང་། རྒུན་འབྲུམ་དང་། ཀ་ཤེ་རུ་དང་། ཤིང་མངར་དང་། ཀ་ར་དཀར་པོ་དང་དེ་རྣམས་སྦྱར་རོ། །དེ་ལྟར་ཟླ་གྲངས་དང་སྦྱར་བའི་སྦྱོར་བ་བདུན་པོ་ཀུན་ལ་འོ་མ་དང་སྦྱར་ལ་བཏང་སྟེ་དེ་ལྟར་ཟླ་བ་བདུན་གྱི་བར་དུ་ཁྲག་འཛག་པ་བསྲུང་བའི་ཕྱིར་གོང་མའི་སྦྱོར་བ་བསྟན་པ་ཡིན་ནོ། །
[67b]
[67b.1]ཟླ་བ་བརྒྱད་པ་ལ་བབ་པའི་ཚེ་ན་ཀ་པིད་ཐ་བིལ་བ་དང་། བྲི་ཧ་ཏི་དང་། བུ་རམ་ཤིང་དང་། ཀཎྜ་ཀ་རི་དང་། འདི་རྣམས་ཀྱི་རྩ་བ་འོ་མ་དང་ལྷན་ཅིག་བསྐོལ་ལ་བླུད་དོ། །ཟླ་བ་དགུ་པ་ལ་བབ་པའི་ཚེ་ན་ནི། ཐལ་ཏྲེས་དང་། ཨ་ནན་ཏ་དང་། པ་ཡས་སྱ་དང་། ཤིང་མངར་
[67b.2]རྣམས་འོ་མ་དང་སྦྱར་ལ་གཏང་ངོ་། །ཟླ་བ་བཅུ་པ་ལ་བབ་པའི་ཚེ་ན་པ་ཡས་སྱ་དང་སྦྱར་བའི་འོ་མ་བླུད་དོ། །ཡང་ན་ཤིང་མངར་དང་བཅའ་སྒ་དང་ཐང་ཤིང་རྣམས་འོ་མ་དང་སྦྱར་ལ་སྦྱིན་ནོ། །ཡང་ན་བུད་མེད་ཀྱི་ཟླ་མཚན་ཟླ་བ་རེ་རེ་འབྱུང་བ་ལས་གལ་ཏེ་མ་བྱུང་ན་དེ་ནི་རླུང་
[67b.3]གིས་ཁྲག་བསྒོངས་པ་ཡིན་པ་ལས། འདིར་མངལ་ཆགས་པའི་མཚན་ཉིད་ལ་མངོན་པར་མི་མཁས་པ་དག་ནི་བུ་འཆགས་པ་ཡིན་ནོ་ཞེས་སྨྲའོ། །དེ་ཡང་སྨན་ཚ་བ་དང་དྲོ་བ་དང་། རྣོ་བ་ཟོས་པ་ལས་ཁྲག་བསྒོངས་པ་ཉི་ཚེ་ཕྱིར་བྱུང་བ་ན། མི་བླུན་པོ་ལ་ལ་དག་བྱིས་པ་
[67b.4]འབྱུང་པོས་ཟོས་པ་ཡིན་ནོ་ཞེས་སྨྲ་མོད་ཀྱི། ལུས་ཅན་མངོན་སུམ་དུ་མ་གྱུར་ཏེ་མེད་དོ། །ཅི་སྟེ་འབྱུང་པོ་ཟ་བ་ཡོད་ན་ཡང་གཟི་བརྗིད་དམ་མདངས་ཙམ་འཕྲོག་གི་ལུས་མངོན་སུམ་དུ་ཆུད་གསོན་པར་སྣང་བ་ནི་མི་སྲིད་དོ། །དེ་བས་ན་ཁྲག་མ་བྱུང་བ་ལ་བུ་ཆགས་པར་འཛིན་པ་ནི་འབྱུང་
[67b.5]པོས་མ་ཟོས་བཞིན་དུ་ཟོས་པའི་རྟོགས་པ་ཡོངས་སུ་སྤང་བར་བྱའོ། །ལུས་ཀྱི་གནས་ལས་ལེའུ་གཉིས་པ་རྫོགས་སོ།། །།བྱིས་པ་རུམ་དུ་ཆགས་པའི་རྐང་ལག་གི་བྱེ་བྲག་བསྟན་པའི་ལེའུ་བཤད་པར་བྱའོ། །དེ་ལ་ལུས་ཞེས་བྱ་བ་འདི་ནི་མདོར་བསྡུ་ན་ཡན་ལག་
[67b.6]དྲུག་ཏུ་འདུས་ཏེ་དེ་ཡང་གང་ཞེ་ན། མགོ་བོ་དང་དཔུང་པ་གཉིས་དང་། བརླ་གཉིས་དང་། ཁོང་པ་དང་དྲུག་གོ། །དྲུག་པོ་དེ་དག་གི་ཉིང་ལག་ཏུ་གཏོགས་པ་གང་ཞེ་ན། མགོ་བོའི་ཉིང་ལག་ནི་མིག་དང་རྣ་བ་ལ་སོགས་པའོ། །ཁོང་པའི་ཉིང་ལག་ནི་སྙིང་དང་ལྟེ་བ་ལ་སོགས་
[67b.7]པའོ། །དཔུང་པ་གཉིས་ཀྱི་ཉིང་ལག་ནི་གྲུ་མོ་དང་ལག་པ་ལ་སོགས་པའོ། །བརླ་གཉིས་ཀྱི་ཉིང་ལག་ནི་རྐང་པ་གཉིས་དང་པུས་མོ་ལ་སོགས་པའོ། །ཡང་སེམས་ཅན་གྱི་ལུས་ལ་འབྱུང་བ་ཆེན་པོ་ལྔ་ཚང་བར་ཡོད་དེ། དེ་གང་ཞེ་ན་ནམ་མཁའ་དང་། རླུང་དང་། མེ་
[68a]
[68a.1]དང་། ཆུ་དང་། ས་དང་ལྔའོ། །ལྔ་པོ་དེ་དག་གི་ཡོན་ཏན་དང་། སྒྲ་དང་། རེག་པ་དང་། གཟུགས་དང་། རོ་དང་དྲི་འདི་དག་གོ་རིམས་བཞིན་དུ་ཡོན་ཏན་དུ་བལྟས་ཏེ། དེ་ཡང་ཇི་ལྟ་ཞེ་ན་རིམ་པ་བཞིན་དུ་ཡོན་ཏན་འོག་མ་རེ་རེ་ཆེ་སྟེ། དེ་
[68a.2]ལ་ནམ་མཁའི་ཡོན་ཏན་ནི་སྒྲའོ། །རླུང་གི་ཡོན་ཏན་ནི་སྒྲ་དང་རེག་བྱའོ། །མེའི་ཡོན་ཏན་ནི་སྒྲ་དང་རེག་བྱ་དང་གཟུགས་སོ། །ཆུའི་ཡོན་ཏན་ནི་སྒྲ་དང་། རེག་བྱ་དང་། གཟུགས་དང་རོའོ། །སའི་ཡོན་ཏན་ནི་སྒྲ་དང་། རེག་བྱ་དང་། གཟུགས་དང་། རོ་དང་། དྲི་སྟེ་
[68a.3]ལྔ་ཆར་དང་ལྡན་པ་ཡིན་ནོ། །དེ་ཡང་ལུས་ཅན་རྣམས་ཀྱི་རྣ་བའི་དབང་པོ་གང་ཡིན་པ་དེ་ལས་འབྱུང་བ་ཆེན་པོ་ནམ་མཁའ་གནས་པའི་ཡོན་ཏན་གྱི་སྒྲ་ཐོས་པ་ཡིན་ཏེ། སྒྲའི་མཚན་ཉིད་ནི་སྟོང་པའོ། །ལུས་ལ་རླུང་གནས་པས་ནི་ལུས་ཀྱི་དབང་པོས་རེག་པ་ཚོར་བར་
[68a.4]བྱེད་པའི་ཡོན་ཏན་དང་དབུགས་གྱེན་དུ་འབྱུང་བར་བྱེད་པའོ། །མེའི་ཁམས་ལུས་ལ་གནས་པས་ནི་མིག་གི་དབང་པོས་མཐོང་བ་དང་གཟུགས་ཀྱི་ཡོན་ཏན་དང་སྨིན་པའོ། །ཆུའི་ཁམས་ལུས་ལ་གནས་པས་ནི་ལྕེའི་དབང་པོ་དང་། རོའི་ཡོན་ཏན་དང་གཤེར་བའོ། །སའི་
[68a.5]ཁམས་ལུས་ལ་ཡོད་པས་ནི་སྣའི་དབང་པོ་དང་། དྲིའི་ཡོན་ཏན་དང་། རུས་པའོ། །གཞན་ཡང་ལུས་ལ་འཇམ་པ་ཐམས་ཅད་ནི་མ་ལས་སྐྱེས་པ་ཡིན་ཏེ་དེ་ཡང་ཁྲག་དང་། ཤ་དང་། རྐང་དང་། གཞང་དང་། སྙིང་དང་། ཕོ་བ་དང་། མངལ་གྱི་གནས་དང་། མཆེར་
[68a.6]པ་དང་། མཆིན་པ་ལ་སོགས་པའོ། །གང་ལུས་ཀྱི་སྲ་བ་ཐམས་ཅད་ནི་ཕ་ལས་སྐྱེས་ཏེ། ཁུ་ཆུ་དང་། ཆུ་བ་དང་། རུས་པ་དང་། སྐྲན་དང་། སེན་མོ་ལ་སོགས་པའོ། །དེ་ལ་ཡིད་གང་ལ་མོས་པ་བཞིན་དུ་མི་དང་། རྟ་དང་། གླང་པོ་ཆེ་ལ་སོགས་པ་འགྲོ་བ་དྲུག་ཏུ་
[68a.7]སྐྱེ་བ་སྣ་ཚོགས་ལེན་པར་འགྱུར་རོ། །ཟས་གང་ལ་དགའ་བ་མ་བཀག་ཅིང་ཟོས་པ་ལས་ནི་ཚེ་རིང་བ་དང་། ནད་མེད་པ་དང་། སྙིང་སྟོབས་དང་། གཟི་བྱིན་དང་ལྡན་པར་འགྱུར་རོ། །དེ་ལ་ཁ་ཟས་ཀྱི་དངས་མ་ལས་ལུས་སྐྱེས་པ་ཡིན་ཏེ། འཕེལ་ཞིང་རྒྱས་པ་ཡང་བཅུད་ལས་
[68b]
[68b.1]གྱུར་པ་ཡིན་ནོ། །བཅུད་ཀྱིས་བསྐྱེད་པའི་མི་ནི་ལོ་བདུན་ཡང་ཆུང་བར་ལྟའོ། །སྙིང་སྟོབས་ཅན་གྱི་རང་བཞིན་གྱི་མི་ནི་ལུས་ངག་ཡིད་གསུམ་དག་པ་དང་། འཇིག་རྟེན་ཕ་རོལ་ཡོད་པར་ལྟ་བ་དང་། དཀར་པོའི་ཆོས་སྦྱིན་པ་ལ་སོགས་པ་ལ་དགའ་བའོ། །རྡུལ་གྱི་རང་
[68b.2]བཞིན་གྱི་མི་ནི་མང་དུ་སྨྲ་བ་དང་། ང་རྒྱལ་ཆེ་བ་དང་། ཁྲོ་བག་ཅན་དང་། ཚུལ་འཆོས་བྱེད་པ་དང་། ཕྲག་དོག་ཅན་ལ་སོགས་པའོ། །མུན་པ་ཅན་གྱི་རང་བཞིན་གྱི་མི་ནི་གཉིད་ཆེ་བ་དང་། ལེ་ལོ་ཆེ་བ་དང་། འཇིགས་སྐྱེན་པ་དང་། རྨོངས་པ་དང་། སེམས་གདུང་བ་ལ་སོགས་
[68b.3]པའོ། །དེ་ཡན་ཆད་སེམས་ཅན་རྣམས་ཀྱི་ལུས་ཀྱི་རང་བཞིན་བསྟན་ཟིན་ཏོ། །ད་ནི་ལུས་ཀྱི་ཚད་བཤད་པར་བྱ་སྟེ། ལུས་ལ་པགས་པ་རིམ་པ་བདུན་ཡོད་དེ། དཔེར་ན་འོ་མ་བསྐོལ་བ་ལས་སྤྲིས་མ་ཆགས་པ་བཞིན་དུ་ཁྲག་ལ་སོགས་པ་ལུས་ཀྱི་ཁམས་བདུན་པོ་ཡང་རང་
[68b.4]རང་གི་དྲོད་ཀྱིས་ཡོངས་སུ་སྨིན་པ་ལས་པགས་པ་རིམ་པ་རེ་རེ་སྐྱེ་སྟེ་དེ་དག་ཀྱང་བད་ཀན་དང་རྒྱུས་པས་གཡོགས་པར་གནས་སོ། །ཁམས་བདུན་པོ་དེ་དག་ཀྱང་གང་ཞེ་ན། ཁྲག་དང་། བད་ཀན་དང་། ཕོ་བ་དང་། མཁྲིས་པ་དང་། ལོང་ཀ་དང་། རླུང་དང་། གཅིན་དང་།
[68b.5]བདུན་པོ་དེ་དག་རླུང་དང་བཅས་པར་ལུས་ཀྱི་སྙིང་པོར་བལྟ་སྟེ་དཔེར་ན་ཤིང་གི་སྙིང་པོ་བཞིན་ནོ། །བུད་མེད་ཀྱི་ལོང་ཀ་དང་མཁྲིས་པའི་བར་ན་མངལ་གྱི་གནས་ཡོད་དེ་བརྒྱད་དུ་བཤད་དེ། ཁོང་པའི་ནང་གི་ཡན་ལག་གཞན་ཡང་སྙིང་དང་། གློ་བ་དང་། མཆེར་པ་དང་།
[68b.6]མཆིན་པ་དང་། ཨན་ད་ཀ་དང་། མཁལ་མ་དང་། ལྟེ་བ་དང་། དྲན་པ་དང་། ལྒང་པའོ། །སྲོག་གི་གནས་བཅུ་ཞེས་བྱ་བ་ནི་མགོ་བོ་དང་། ལྕེའི་ཚོར་བའི་གནས་དང་། མཁྲིས་པ་དང་། ཁྲག་དང་། སྙིང་དང་། ལྟེ་བ་དང་། ཆུ་སོ་དང་། ཁུ་ཆུ་དང་། མདངས་དང་།
[68b.7]བཤང་བའི་ལམ་དང་བཅུ་པོ་དེ་དག་གོ། །ལུས་ལ་ཆུ་བ་ཆེན་པོ་བཅུ་དྲུག་གིས་དྲ་བ་ལྟར་ཁྱབ་པ་ཡོད་དེ་དེ་ཡང་གང་ཞེ་ན་ལྒང་པ་གཉིས་ལ་ཆུ་བ་ཆེན་པོ་གཉིས་གཉིས། ལག་པ་གཉིས་ལ་ཆུ་བ་ཆེན་པོ་གཉིས་གཉིས། མགྲིན་པའི་ཕྱོགས་ནས་བཞི་བཞི་སྟེ་བཅུ་དྲུག་གོ། །
[69a]
[69a.1]ལུས་ལ་ཆུ་བ་ཆེན་པོ་དྲུག་ཡོད་དེ། མགྲིན་པ་དང་། ལག་པ་གཉིས་དང་། རྐང་པ་གཉིས་དང་། ཕོ་མཚན་གྱི་ཆུ་བ་སྟེ་དྲུག་པོ་དེས་སྤུ་གཤིབས་པ་ལྟར་བྱས་པའོ། །ལུས་ལ་རྒྱུས་པ་བདུན་ཡོད་དེ། མགོ་བོ་ལ་ལྔ་དང་། ལྕེ་དང་ཕོ་མཚན་ལ་རེ་རེ་
[69a.2]སྟེ་དེ་དག་ལ་མཚོན་གྱི་ལས་མི་བྱ་བར་བཤད་དོ། །ཐག་པ་ལྟ་བུའི་ཤ་ཆེན་པོ་བཞི་ཡོད་དེ། མདུན་རྒྱབ་ནས་གཉིས་གཉིས་ཏེ་བཞིས་འཛིན་ཐག་ཏུ་བྱས་པའོ། །རུས་པའི་ཚོགས་འདུས་པ་བཅུ་བཞི་སྟེ། ལོང་མོ་གཉིས་དང་། པུས་མོ་གཉིས་དང་། བརླ་བྲག་གཉིས་དང་།
[69a.3]མཁྲིག་མ་གཉིས་དང་། མཆན་ཁུང་གཉིས་དང་། གྲུ་མོ་གཉིས་དང་། མགོ་བོ་དང་། མཇུག་ཏོ་སྟེ་བཅུ་བཞིའོ། །ལུས་ལ་གནད་ཀྱི་ཚིགས་ཆེན་པོ་བཅོ་བརྒྱད་ཡོད་དེ་གང་ཞེ་ན་མགོ་བོ་ལ་ལྔ་དང་། མཇུག་ཏོ་གཅིག་དང་། ལོང་མོ་གཉིས་དང་། པུས་མོ་གཉིས་དང་།
[69a.4]བརླ་བྲག་གཉིས་དང་། མཁྲིག་མ་གཉིས་དང་། མཆན་ཁུང་གཉིས་དང་། གྲུ་མོ་གཉིས་དང་བཅོ་བརྒྱད་དོ། །ལུས་ལ་སོ་དང་སེན་མོ་དང་བཅས་པའི་རུས་པ་སུམ་བརྒྱ་དྲུག་ཅུ་ཡོད་དེ། དེ་ཡང་ཡན་ལག་བཞི་ལ་བརྒྱ་བཞི་བཅུ། ཁོག་པ་ལ་བརྒྱ་ཉི་ཤུ། མགོ་བོ་ལ་བརྒྱའོ། །དྲང་
[69a.5]སྲོང་ཐང་ལ་འབར་གྱི་བཞེད་ཀྱིས་ནི་ལུས་ལ་རུས་པ་སུམ་བརྒྱ་ཡོད་པར་བཞེད་དེ། ལུས་ལ་རུས་པའི་ཚིགས་ཉིས་བརྒྱ་བཅུ་ཡོད་དོ། །ཡན་ལག་བཞི་ལ་དྲུག་ཅུ་རྩ་བརྒྱད། ཁོག་པ་ལ་ལྔ་བཅུ་རྩ་དགུ། ནམ་ཚོང་ཡན་ཆད་ལ་བརྒྱད་ཅུ་རྩ་གསུམ་མོ། །སློབ་དཔོན་རྒྱུན་ཤེས་ཀྱི་བུའི་
[69a.6]བཞེད་ཀྱིས་ནི་ཚིགས་ཉིས་སྟོང་དུ་འདོད་དོ། །དྲང་སྲོང་རྒྱུན་ཤེས་ཀྱི་བུ་ན་རེ་རྩ་དང་རྒྱུས་པ་དང་། ཤ་རུས་ཀྱི་གཟུངས་དང་གསུམ་ལ་ཉིས་སྟོང་ཡོད་དོ་ཞེས་ཟེར་རོ། །ལུས་ལ་རྒྱུས་པ་དགུ་བརྒྱ་ཡོད་དེ། ཡན་ལག་བཞི་ལ་སུམ་བརྒྱ། ནམ་ཚོང་ཡན་ཆད་ལ་བདུན་ཅུ། ཁོག་པ་
[69a.7]ལ་ལྔ་བརྒྱ་སུམ་ཅུའོ། ཤའི་སྤར་ཚད་ནི་ལྔ་བརྒྱ་ཡོད་དེ་དེ་ཡང་ཡན་ལག་བཞི་ལ་བཞི་བརྒྱ། ཁོག་པ་ལ་དྲུག་ཅུ། ནམ་ཚོང་ཡན་ཆད་ལ་བཞི་བཅུ་ཡོད་དོ། །བུད་མེད་ལ་ཉི་ཤུས་ཆེ་སྟེ་དེ་ཡང་ནུ་མ་ལ་བཅུ། མོ་མཚན་ལ་བཅུ་སྟེ་ཉི་ཤུའོ། །སྙིང་ལ་འབྱུང་བའི་རྩ་ཆེན་པོ་
[69b]
[69b.1]བཅུ་ཡོད་དེ། དེ་ལས་གྱེས་པའི་རྩ་བདུན་བརྒྱས་ལུས་ཐམས་ཅད་དུ་ཁྱབ་སྟེ། ཤིང་གི་ལོ་མ་ལྟ་བུའོ། །ཟས་འཇུ་བའི་དངས་མ་དང་། མདངས་ཞེས་བྱ་བའི་སྙིང་ལ་གནས་པ་གཉིས་རྩའི་སྦུབས་ནས་འཇུག་སྟེ་ལུས་ཐམས་ཅད་དུ་དེས་ཁྱབ་པར་བྱེད་དོ། །དེ་ཡང་ཡན་
[69b.2]ལག་བཞི་རེ་རེ་ལ་ཡང་བརྒྱ་བརྒྱ་ཡོད་དེ། དེ་དག་ལས་ཀྱང་མཚོན་གྱིས་དབུག་ཏུ་མི་རུང་བ་ནི་རྩ་བའི་དྲི་མ་འཛིན་པ་ཞེས་བྱ་བའི་རྩ་ཆེན་པོ་བཞི་ནང་ན་ཡོད་དེ། དབུག་ཏུ་མི་རུང་ངོ་། །དབུག་ཏུ་རུང་བ་ནི་ཡན་ལག་བཞི་ལ་རྩ་བཞི་བཞི་སྟེ་བཅུ་དྲུག་གོ། །རྐེད་པ་ལ་སུམ་ཅུ་རྩ་
[69b.3]གཉིས་ཡོད། དེ་དག་ལས་ཀྱང་མཚོན་གྱིས་དབུག་ཏུ་མི་རུང་བ་ནི་རྐེད་པའི་གནས་གཉིས་སུ་གཉིས་གཉིས་དང་། བརླ་བྲག་གཉིས་སུ་གཉིས་ཏེ་བརྒྱད་པོ་འདི་དག་ཏུ་ནི་མཚོན་གྱིས་རེག་ཏུ་ཡང་མི་རུང་སྟེ་བསྲུང་ངོ་། །རྩིབ་ལོགས་གཉིས་སུ་བརྒྱད་བརྒྱད་དེ་བཅུ་དྲུག་ཡོད་
[69b.4]དོ། །དེ་ཡང་གྱེན་དུ་འགྲོ་བའི་རྩ་རྩིབ་ལོགས་ཀྱི་མདུད་པ་ཞེས་བྱ་བ་རེ་རེ་ཡོད་དེ་དེར་མཚོན་མི་གདབ་བོ། །རྒྱབ་ཀྱི་སྒལ་ཚིགས་ལས་གཡས་གཡོས་སུ་གྱེས་པ་བཅུ་གཉིས་ཏེ་ཉི་ཤུ་རྩ་བཞི་ཡོད་དེ། དེ་ལས་གྱེན་དུ་འགྲོ་བའི་རྩ་གཉིས་ཡོད་པ་དེར་མཚོན་གདབ་ཏུ་མི་རུང་ངོ་། །
[69b.5]སྒལ་ཚིགས་ལ་ཇི་ལྟར་ལྟོ་ལ་ཡང་དེ་ལྟར་ཡོད་དེ། དེ་ལས་ལྟེ་བ་ལས་མར་སྤུ་སྐྱེས་པའི་གཡས་གཡོས་སུ་རྩ་གཉིས་གཉིས་གྱེས་པ་བཞི་ཡོད་དེ། དེ་དག་ལ་མཚོན་གདབ་ཏུ་མི་རུང་ངོ་། །བྲང་ལ་རྩ་བཞི་བཅུ་ཐམ་པ་ཡོད་དེ། དེ་དག་ལས་བཞི་ནི་དབུག་ཏུ་མི་རུང་སྟེ། དེ་ལས་
[69b.6]ཀྱང་ནུ་འཇིང་གཉིས་ཀྱི་རྩ་བ་ན་གནས་པའི་རྩ་གཉིས་དང་སྙིང་གི་དྲང་ཐད་བྲང་གི་དཀྱིལ་ན་གཡས་གཡོས་སུ་གྱེས་པའི་རྩ་གཉིས་དང་སྒྲོག་རུས་ཀྱི་སྤྱི་མདུད་ནས་བྲང་གཡས་གཡོས་སུ་གྱེས་པའི་རྩ་གཉིས་དེ་རྣམས་སོ། །མགྲིན་པ་ལ་རྩ་ཉི་ཤུ་རྩ་བཞི་ཡོད་དེ། དེ་ལས་རྩ་བཅུ་
[69b.7]དྲུག་ནི་དབུག་ཏུ་མི་རུང་སྟེ། སྔོན་པོ་ཞེས་བྱ་བའི་རྩ་གཉིས་དང་། སྲོལ་གོང་གཡས་གཡོས་ཀྱི་རྩ་གཉིས་དང་། ལྟག་པའི་རྩ་གཉིས་དང་། སྲོལ་གོང་གི་སྟེང་གི་རྩ་གཉིས་སྣ་རྩ་གཡས་གཡོས་ནས་བྱུང་བའི་རྩ་བཞི་བཞིའོ། །འགྲམ་པ་ལ་རྩ་བཅུ་དྲུག་ཡོད་དེ། དེ་ལ་དབུག་ཏུ་མི་
[70a]
[70a.1]རུང་བ་ནི་འགྲམ་པ་གཉིས་ཀྱི་སྦྲེལ་མཚམས་ན་རྩ་རེ་རེ་ཡོད། ལྕེ་ལ་ཡང་བཅུ་དྲུག་ཡོད་དེ། དེ་ལ་ལྕེ་ཕུགས་ན་རོ་ཚོར་བའི་རྩ་གཉིས་དང་། ལྕེའི་རྩེ་མོ་ན་སྨྲ་བར་བྱེད་པའི་རྩ་གཉིས་ཏེ་བཞི་པོ་དེ་དག་དབུག་ཏུ་མི་རུང་ངོ་། །སྣ་ལ་རྩ་ཉི་ཤུ་རྩ་བཞི་ཡོད་དེ།
[70a.2]དེ་ལས་དབུག་ཏུ་མི་རུང་བ་ནི་གསུམ་ཡོད་དེ། དྲི་ཚོར་བར་བྱེད་པའི་རྩ་གཉིས་དང་། རྐན་དུ་འགྲོ་བའི་རྩ་གཅིག་དང་གསུམ་མོ། །མིག་གཉིས་ལ་རྩ་ལྔ་བཅུ་རྩ་དྲུག་ཡོད་དེ། མིག་འབྱེད་པ་དང་འཛུམས་པའི་ལས་ཅན་ཡིན་ཏེ། དེ་ལས་དབུག་ཏུ་མི་རུང་བ་ནི་དྲུག་ཡོད་དེ། མུར་
[70a.3]འགྲམ་ལོགས་ཀྱི་གྲྭ་གཉིས་ཀྱི་གཉིས་གཉིས་དང་། སྣ་གོང་གི་ཕྱོགས་ཀྱི་མིག་གི་གྲྭ་གཉིས་ཏེ་རེ་རེ་སྟེ་དྲུག་གོ། །དཔྲལ་བ་ལ་རྩ་དྲུག་ཅུ་ཡོད་དེ། དེ་ལ་དབུག་ཏུ་མི་རུང་བ་ནི་བདུན་ཏེ་མིག་གཉིས་ཀྱི་དྲང་པོ་དཔྲལ་བའི་སྐྲ་མཚམས་འཁྱིལ་པ་ན་རྩ་རེ་རེ་དང་། དཔྲལ་བའི་དབྱེས་སྐྲ་
[70a.4]མཚམས་སུ་ཞུགས་པའི་རྩ་བཞི་དང་སྣ་གོང་ནས་དཔྲལ་བའི་དབུས་སུ་འགྲོ་བའི་རྩ་གཅིག་སྟེ་བདུན་ནོ། །རྣ་བ་གཡས་གཡོན་གཉིས་ནས་རྩ་བརྒྱད་བརྒྱད་དེ་བཅུ་དྲུག་ཡོད་དོ། །དེ་ལ་དབུག་ཏུ་མི་རུང་བ་ནི་སྒྲ་ཐོས་པར་བྱེད་པའི་རྩ་སྟོང་པ་རེ་རེའོ། །མུར་འགྲམ་གཉིས་ལ་རྩ་
[70a.5]བརྒྱད་བརྒྱད་དེ་བཅུ་དྲུག་ཡོད་དེ། དེ་ལ་དབུག་ཏུ་མི་རུང་བ་ནི་མུར་འགྲམ་གྱི་མཚམས་སུ་འགྲོ་བའི་རྩ་རེ་རེའོ། །མགོ་བོ་ལ་རྩ་བཅུ་གཉིས་ཡོད་དེ། དེ་ལ་མཚོན་གྱིས་དབུག་ཏུ་མི་རུང་བ་བཞི་བཞི་སྟེ་སྐྲའི་དབྱེ་མཚམས་མཚོག་མ་ནས་སྤྱི་བོའི་སྟེང་དུ་འགྲོ་བའི་རྩ་ལྔ་ལས་དབུས་མ་
[70a.6]དང་ལྡན་པ་གཡས་གཡོས་ནས་སྟེང་དུ་འགྲོ་བའི་རྩ་རེ་རེ་དང་སྤྱི་བོའི་སྟེང་ན་ཡོད་པའི་རྩ་གཅིག་སྟེ། བཞི་པོ་དེ་དག་ནི་དབུག་ཏུ་མི་རུང་ངོ་། །དེ་ལ་སོགས་པ་དབུག་ཏུ་མི་རུང་བའི་རྩ་དགུ་བཅུ་རྩ་བརྒྱད་ལས་མེད་དོ། །གཞན་ཡང་ལུས་ཀྱི་དབུག་པར་མི་བྱ་བའི་རྩ་ནི་རྩ་བ་གཅིག་ལ་
[70a.7]གཅིག་འབྲེལ་བའི་སྟེང་དང་། རྩ་མདུད་པར་འཆས་པའི་སྟེང་། རྩ་ཤིན་ཏུ་ཕྲ་བ་དང་། རྩ་ཡོན་པོའི་སྟེང་དང་། དེ་བཞིན་དུ་ཚིགས་ཀྱི་སྟེང་ན་གནས་པའི་རྩ་དང་། རུས་པའི་སྟེང་ན་གནས་པའི་རྩ་ལ་ཡང་དབུག་ཏུ་མི་རུང་ངོ་། །དེ་ལྟར་རྩ་བདུན་བརྒྱར་བཤད་པ་ལས་ཆ་བཞིར་
[70b]
[70b.1]བགོས་ཏེ་རྩ་བརྒྱ་བདུན་ཅུ་རྩ་ལྔའི་ནང་དུ་ནི་ཁྲག་འབའ་ཞིག་རྒྱུའོ། །བརྒྱ་བདུན་ཅུ་རྩ་ལྔའི་ནང་དུ་ནི་རླུང་མཁྲིས་གཉིས་འདྲེས་པ་རྒྱུའོ། །བརྒྱ་བདུན་ཅུ་རྩ་ལྔའི་ནང་དུ་ནི་རླུང་དང་བད་ཀན་རྒྱུའོ། །དེ་ལ་རླུང་ལ་སོགས་པའི་ནད་གཞི་དེ་དག་ལེགས་པར་གནས་ན་ནི་འཕེལ་ཞིང་རྒྱས་
[70b.2]པར་འགྱུར་རོ། །གཞན་དུ་འགྱུར་ན་ནི་ན་བ་དང་གནོད་པ་སྐྱེད་པར་འགྱུར་རོ། །དེ་དག་ལས་ཀྱང་རླུང་དང་ཁྲག་གཉིས་འདྲེས་པའི་རྩའི་རྟགས་ནི་དམར་ལ་གནག་པའི་མདོག་དང་ལྡན་པའོ། །དེ་བཞིན་དུ་རེས་འགའ་ནི་སྦོམ། རེས་འགའ་ནི་ཕྲ། བར་འགའ་ནི་སྟོང་། བར་འགའ་
[70b.3]ནི་གང་སྟེ། དེ་ཡང་ཤིན་ཏུ་འགུལ་བའོ། །མཁྲིས་པ་དང་ཁྲག་གཉིས་ཀྱི་རྟགས་ནི་རེས་འགའ་ན་ཞིང་ཚ་བ་དང་། དེ་བཞིན་དུ་ཁྲག་ཁྲག་ཏུ་འབྱུང་བ་དང་། མདོག་སྔོ་ཞིང་སེར་པོར་འདུག་པའོ། །བད་ཀན་དང་ཁྲག་གཉིས་འདྲེས་པའི་རྩའི་མདོག་ནི་དཀར་ལ་ཅུང་ཟད་དམར་
[70b.4]བ་དང་། སྣུམ་པ་དང་བརྟན་པ་དང་རེག་ན་གྲང་བའོ། །འདུས་པའི་རྩའི་རྟགས་ནི་མཚན་མ་འཆོལ་བར་སྣང་བའོ། །ནད་མེད་པའི་རྩའི་རྟགས་ནི་རྩ་མི་མངོན་པ་དང་མཉམ་པ་དག་ཏུ་འབྱུང་བ་དང་སྣུམ་པ་དང་། དམར་བའི་མདོག་ཏུ་སྣང་བ་ནི་ཁྲག་དང་བའི་རྟགས་ཡིན་ནོ། །ལྟེ་བ་
[70b.5]ནས་རྩ་སྦུབས་འདྲ་བ་ཉི་ཤུ་རྩ་བཞིར་ཕྱོགས་བཞིར་གྱེས་པ་ཡོད་དེ། དེ་ཡང་དཔེར་ན་ཤིང་རྟའི་ལྟེ་བ་རྩིབས་ཀྱིས་བསྐོར་བ་བཞིན་ནོ། །གཞན་ཡང་ཇི་ལྟར་མཚོ་ཆེན་པོ་ལས་ཡུར་ཆུ་ཀུན་ཏུ་དྲངས་ནས། ས་བོན་འདྲེས་པ་དང་འདྲ་བར་ལྟེ་བ་ལས་གྱེན་དུ་བཅུ། ཐུར་དུ་བཅུ། གཡས་
[70b.6]གཡོས་སུ་གཉིས་གཉིས་སུ་གྱེས་ནས་དེའི་རྒྱུན་སྲང་ཕྱི་རོལ་གྱི་བུ་ག་དགུར་འབྱུང་སྟེ། དེ་ཡང་གང་ཞེ་ན་སྣའི་བུ་ག་གཉིས་དང་། མིག་གཉིས་དང་། རྣ་བ་གཉིས་དང་། ཁའི་བུ་ག་དང་། བཤང་བའི་སྒོ་དང་། གཅིན་གྱི་སྒོ་དང་དགུའོ། །བུད་མེད་ལ་གསུམ་གྱིས་ཆེ་སྟེ། ནུ་མ་གཉིས་
[70b.7]དང་ཟླ་མཚན་འབྱུང་བའི་བུ་ག་སྟེ་བཅུ་གཉིས་པོ་དེ་དག་ཏུ་འབྱུང་ངོ་། །སྲོག་གི་རླུང་ལ་སོགས་པ་རྒྱུ་བའི་རྩའི་རྒྱུན་བཅུ་གསུམ་ཁོང་པའི་ནང་དུ་རྒྱུ་བ་ཡོད་དོ། །དེ་ཡང་སྲོག་ཅེས་བྱ་བ་ནི་རླུང་རྒྱུ་བའི་རྒྱུན་སྲང་དང་། དེ་བཞིན་དུ་དངས་མ་ལ་སོགས་པ་ལུས་ཀྱི་ཁམས་བདུན་རྒྱུ་བའི་རྒྱུན་སྲང་དང་
[71a]
[71a.1]དྲི་མ་རྣམ་གསུམ་གཅིན་དང་སླ་རྩ་དང་རྡུལ་འབྱུང་བའི་རྒྱུན་སྲང་དང་ཆུ་འབྱུང་བའི་རྒྱུན་སྲང་དང་བཅུ་གསུམ་མོ། །ཁ་ཟས་ལ་སོགས་པ་མི་མཐུན་པ་བསྟེན་པའི་རྒྱུས་གོང་མ་དེ་དག་ནའང་འཁྲུགས་པར་བྱས་པ་ལས་ནི་ལུས་ཀྱི་ནད་སྐྱེད་པར་བྱེད་ལ། མཐུན་པ་
[71a.2]བསྟེན་པ་ལས་ནི་ནད་མེད་པ་དང་བདེ་བ་སྐྱེད་པར་བྱེད་དོ། རྒྱུན་སྲང་ངམ་སྦུབས་དེ་དག་གི་མདོག་ཀྱང་སྲོག་ཟུངས་ལ་སོགས་པ་རང་རང་གི་མདོག་ལྟར་སྣང་ངོ་། །དབྱིབས་ཀྱི་བྱེ་བྲག་ཀྱང་ཁ་ཅིག་ནི་ཟླུམ། ཁ་ཅིག་ནི་སྦོམ། ཁ་ཅིག་ནི་ཕྲ། ཁ་ཅིག་ནི་རིང་ངོ་། །རྒྱུན་སྲང་དེ་དག་གི་
[71a.3]རང་བཞིན་ཡང་ཤིང་གི་ལོ་མའི་རྩ་བ་བཞིན་དུ་སྣ་ཚོགས་སུ་འཕྲོ་བར་བལྟའོ། །གཞན་ཡང་ཁ་ཟས་མི་མཐུན་པ་བསྟེན་པ་ལས་ཀྱང་རྒྱུན་སྲང་དེ་དག་འཁྲུགས་པ་ཡིན་ཏེ། དེ་ཡང་རླུང་དང་རྩུབ་བག་ལྷན་ཅིག་བསྟེན་པ་དང་། མཁྲིས་པ་དང་ཚ་བའི་ཟས་ལྷན་ཅིག་བསྟེན་པ་དང་། བད་
[71a.4]ཀན་དང་། སྣུམ་བག་ལྷན་ཅིག་བསྟེན་པས་རང་རང་གི་རྒྱུན་སྲང་འཁྲུགས་པར་བྱེད་དོ། །ཡང་ན་ལུས་ངག་ཡིད་གསུམ་གྱི་སྤྱོད་ལམ་ནད་གཞི་དང་མི་མཐུན་པ་ལྷན་ཅིག་སྤྱད་པ་ལས་ཀྱང་ཚུལ་དེ་ལྟར་བལྟའོ། །ལུས་ཀྱི་ཁམས་བདུན་པོ་རང་རང་དང་མི་མཐུན་པའི་ཁ་ཟས་དང་སྤྱོད་
[71a.5]ལམ་བསྟེན་པ་ལས་རང་རང་གི་རྒྱུན་སྲང་འཁྲུགས་པ་ཡིན་ནོ། །དེ་ལྟར་ཁ་ཟས་དང་སྤྱོད་ལམ་གྱི་མཐུན་པ་བསྟེན་པས་སོ་སོར་རྒྱུན་སྲང་འཁྲུགས་པའི་མཚན་མ་ནི་གཅིན་སྲི་ཞིང་འགགས་པའམ། ཡང་ན་སྙི་ཞིང་མང་དུ་ཟག་པའམ། ཕྱི་ས་ཡང་དང་ཡང་ནི་འཁྲུ་ཞིང་མང་དུ་འབྱུང་བ་དང་།
[71a.6]དེ་བཞིན་དུ་གཞན་དག་ལ་ཡང་དེ་ལྟར་སྦྱར་བར་བྱའོ། །ཡང་ན་རྩ་མདུད་འཆས་པ་དང་། རང་རང་གི་ལམ་སྤངས་ནས་གཞན་ནས་འབྱུང་བ་ཡང་འཁྲུགས་པའི་རྟགས་སོ། །ཇི་ལྟར་པདྨའི་རྩ་བའི་སྦུབས་ཕྲ་མོ་མང་པོ་རླུང་དང་རླན་ལ་སོགས་པ་འགྲོ་བཞིན་དུ་གོང་དུ་སྨོས་པའི་རྒྱུན་
[71a.7]སྲང་ནི་སྦུབས་ཕྲ་མོ་ལུས་ཐམས་ཅད་དུ་ཁྱབ་པར་འགྲོ་བ་ལ་དེ་དག་ལས་ཀྱང་དངས་མ་ལ་སོགས་པ་ཁྱབ་པར་འགྲོ་སྟེ། དེས་ལུས་འཕེལ་ཞིང་རྒྱས་པར་འགྱུར་རོ། །གལ་ཏེ་རྒྱུན་སྲང་དེ་དག་ཟུག་རྔུས་རྡོལ་བར་གྱུར་ན་དེའི་རྟགས་ནི་ངེས་པར་འཆི་བའམ། ཡང་ན་དྲན་པ་ཉམས་པ་དང་།
[71b]
[71b.1]ལུས་འདར་བ་དང་། ལྟོ་སྦོ་བ་དང་། སྐྱུག་པ་དང་། ལུས་ཚ་བ་སྐྱེས་པ་དང་། གླལ་བ་དང་། གཟེར་བ་དང་། བཤང་གཅི་འགགས་པ་དང་། མཚན་མ་དེ་དག་སྣང་བར་འགྱུར་རོ། །ཅི་སྟེ་རྟགས་དེ་དག་དང་ལྡན་ན་དེའི་འཚོ་བ་ནི་ཐེ་ཚོམ་དང་བཅས་པ་ཡིན་པས་སྨན་པས་གསོ་
[71b.2]བའི་ལས་བརྩམ་པར་བྱ་སྟེ། དེ་ཡང་མ་བྱས་ན་ནི་ངེས་པར་འཆི་བ་ཡིན་པས་དེ་ལ་ནི་འབད་པ་དང་བཅས་པར་མཚོན་གྱི་ལས་བྱ་སྟེ་རྨ་གསར་པ་གསོ་བའི་ཆོ་ག་བཞིན་དུ་བྱའོ། །དེ་ལ་ཁ་ཟས་འཇུ་བར་བྱེད་པ་ནི་མཁྲིས་པ་འཇུ་བར་བྱེད་པ་ཡིན་ཏེ། དེས་ཇི་ལྟར་འཇུ་བ་ནི་མདོའི་
[71b.3]གནས་སུ་བལྟའོ། །དྲང་སྲོང་རྒྱུན་ཤེས་ཀྱི་བུ་ན་རེ་ནད་གཞི་གསུམ་དང་ལུས་ཟུངས་བདུན་དང་དྲི་མ་གཉིས་དང་འདི་རྣམས་ཀྱི་དྲོད་ཀྱིས་ཁ་ཟས་འཇུ་བར་བྱེད་དོ་ཞེས་ཟེར་རོ། །ཁ་ཟས་དེ་ཡང་རླུང་དང་མཁྲིས་པ་གཉིས་ཀྱིས་ཕོ་བའི་ནང་དུ་འཇུ་བར་བྱེད་དོ། །དྲང་སྲོང་ཐང་ལ་
[71b.4]འབར་ན་རེ་ཕོ་བ་ནི་མཁྲིས་པ་འཛིན་པ་ཞེས་བྱ་བ་དེ་ཡང་དེ་ཉིད་ཡིན་ནོ་ཞེས་ཟེར་རོ། །ཕོ་བ་དེ་མ་ཞུ་བའི་གནས་ལ་བརྟེན་ཏེ། དེ་ནས་ཚེ་དང་སྟོབས་དང་། གཟི་མདངས་དང་། འབྱུང་བ་ཆེན་པོ་ལྔའི་མེ་དང་། ཁམས་བདུན་པོ་འཕེལ་ཞིང་རྒྱས་པར་བྱེད་དོ། །གལ་ཏེ་ཟས་
[71b.5]འཇུ་བའི་ལམ་ཕོ་བའི་ནང་གི་མེའི་སྟོབས་ཆུང་ན་ནི། དཔེར་ན་སྒོ་གཏན་བཅུག་ན་རྒྱུ་འདྲུལ་བྱར་མེད་པ་དང་འདྲ་བར་རྒྱུ་བ་བཀག་སྟེ་མི་འཇུ་བ་ཡིན་ལ་ཅི་སྟེ་མཁྲིས་པའི་མེའི་སྟོབས་ཆེ་ན་ནི་མ་ཞུ་བའི་ཟས་འདྲེན་ཅིང་སྨིན་ལ་འཇུ་བར་བྱེད་དོ། །ཡང་ན་ཟས་ཟོས་ན་ཕོ་བའི་གནས་སུ་
[71b.6]འགྲོ་སྟེ། དེའི་མེ་དྲོད་ཀྱིས་འཇུ་མ་ནུས་ན་འོག་ཏུ་ཐལ་བྱུང་དུ་མ་ཞུ་བར་འཁྲུ་བ་ཡང་ཡོད་དོ། །མཁྲིས་པ་འཇུ་བྱེད་དང་མཉམ་དུ་གནས་པའི་རླུང་སྟོབས་ཆུང་བ་ལ་ཕོ་བའི་ཉམ་ཆུང་ཞིང་ན་བར་འགྱུར་རོ། །དེ་དག་སྟོབས་མཉམ་པ་ནི་ལུས་འཕེལ་ཞིང་རྒྱས་པར་འགྱུར་རོ། །དེ་ལ་
[71b.7]གནས་སྐབས་དང་པོ་ཁ་ཟས་ཟོས་པའི་དུས་སུ་སྲོག་ཅེས་བྱ་བའི་རླུང་གིས་ནང་དུ་མིད་ཅིང་འོག་ཏུ་འཕུལ་བར་བྱེད་དོ། །དེ་ནས་ཕོ་བའི་ནང་དུ་ཕྱིན་པ་དང་། སྐོམ་དང་འདྲེས་པས་རྐྱང་རྐྱང་པོ་བྱས་ཏེ་འདུག་པ་དང་། དེའི་འོག་ཏུ་མཁྲིས་པ་འཇུ་བྱེད་དེ་མེ་དང་མཉམ་དུ་གནས་པའི་རླུང་གིས་
[72a]
[72a.1]སྟོབས་ཅན་དུ་བྱས་ནས་འོག་ཏུ་འདྲེན་ཏེ་འཇུ་ཞིང་ཚོས་པར་བྱ་བ་ནི་ཇི་ལྟར་ཕྱི་རོལ་གྱི་མེས་སྣོད་ལ་འབྲས་འཚོད་པ་བཞིན་ནོ། །གནས་སྐབས་གཉིས་པ་ལ་རོ་རྣམ་དྲུག་གང་ཟོས་ཀྱང་རུང་ཁོང་པའི་མེས་འཇུ་བར་བྱེད་པ་ན། རོ་དང་པོ་དབུ་བ་ཅན་བད་ཀན་དུ་འགྱུར་
[72a.2]རོ། །དེ་ལྟར་རིམ་གྱིས་འཇུ་བ་ན། སྐྱུར་མོར་འགྱུར་ཏེ་མཁྲིས་པར་འགྱུར་རོ། །དེ་དག་ཀྱང་གང་ནས་འབྱུང་ཞིང་གང་དུ་འཇུ་ཞེ་ན་མ་ཞུ་བའི་གནས་ནས་བྱུང་ཞིང་ཞུ་བའི་གནས་སུ་ཕྱིན་པ་ན་ཁོང་པའི་མེས་སྨིན་ཅིང་ཚོས་པར་བྱེད་དོ། །འཇུ་བའི་གནས་སྐབས་ན་རླུང་གི་བདག་ཉིད་དུ་
[72a.3]ཕྱིན་པ་ན་གོང་བུར་འགྱུར་ཞིང་རོ་ཚ་བར་འགྱུར་རོ། །དེ་ནས་འབྱུང་བ་ཆེན་པོ་ལྔའི་ཟས་ཀྱི་དངས་མའི་ཡོན་ཏན་སོ་སོ་དང་མཐུན་པས་ནམ་མཁའ་ལ་སོགས་པ་འབྱུང་བ་ཆེན་པོ་ལྔ་ལུས་ལ་ཡོད་པར་རང་རང་གི་ཁམས་སུ་འཇུག་ཅིང་རྒྱས་ལ་འཕེལ་བར་བྱེད་དོ། །དེ་ལྟར་ཁ་ཟས་
[72a.4]འཇུ་བའི་འོག་ཏུ། དངས་མ་དང་ཚིགས་མ་གཉིས་སུ་འགྱུར་ཏེ། དེ་ཡང་ཚིགས་མ་ལས་གང་དང་བ་དང་སླ་བ་ནི་གཅིན་དུ་འགྱུར་ལ། གང་སྐ་ཞིང་ཚིགས་མ་ལས་ཕྱི་སར་འགྱུར་རོ། །དངས་མ་ལས་ནི་རང་གི་མེས་འཇུ་བར་བྱས་ནས་ལུས་ཟུངས་རྣམ་པ་བདུན་དུ་འགྱུར་རོ། །
[72a.5]དངས་མ་རང་གི་དྲོད་ཀྱིས་སྨིན་པར་བྱས་པ་ལས་ཁྲག་ཏུ་འགྱུར་བ་ནས་ཤ་དང་ཚིལ་དང་། རུས་པ་དང་། རྐང་དང་། ཁུ་ཆུའི་བར་དུ་རིམ་གྱིས་འགྱུར་རོ། །དེ་ལ་དངས་མ་ལ་སོགས་པ་ལུས་ཟུངས་བདུན་པོ་རེ་རེ་ལ་ཡང་དངས་མ་དང་སྙིགས་མ་གཉིས་སུ་དབྱེ་སྟེ། དངས་མའི་
[72a.6]དངས་མ་ལས་ནི་ཁྲག་ཏུ་འགྱུར་རོ། །དངས་མའི་སྙིགས་མ་ལས་ནི་བད་ཀན་དུ་འགྱུར་རོ། །ཁྲག་གི་དངས་མ་ལས་ནི་ཤར་འགྱུར་རོ། །སྙིགས་མ་ལས་ནི་མཁྲིས་པར་འགྱུར་རོ། །ཤའི་དངས་མ་ལས་ནི་ཚིལ་དུ་འགྱུར་རོ། །སྙིགས་མ་ལས་ནི་རྔུ་མ་དང་། རྣ་སྤབས་དང་། བ་སྤུའི་
[72a.7]དྲི་མ་རྣམས་སུ་འགྱུར་རོ། །ཚིལ་གྱི་དངས་མ་ལས་ནི་རུས་པར་འགྱུར་རོ། །སྙིགས་མ་ལས་ནི་དབུ་བར་འགྱུར་རོ། །རུས་པའི་དངས་མ་ལས་ནི་རྐང་དུ་འགྱུར་རོ། །སྙིགས་མ་ལས་ནི་སྐྲ་དང་སེན་མོར་འགྱུར་རོ། །རྐང་གི་དངས་མ་ལས་ནི་ཁུ་ཆུར་འགྱུར་རོ། །སྙིགས་མ་
[72b]
[72b.1]ལས་ནི་པགས་པ་སྣུམ་པར་འདུག་པ་ཡིན་ནོ། །ཁུ་ཆུའི་དངས་མ་ལས་ནི་བུར་འགྱུར་རོ། །སྙིགས་མ་ལས་ནི་ལུས་ཀྱི་གཟི་མདངས་སུ་འགྱུར་རོ། །དེ་ལྟར་ལུས་ཟུངས་བདུན་ཡང་དངས་མ་དང་སྙིགས་མ་གཉིས་སུ་བལྟ་སྟེ། དེ་ལྟར་གཅིག་ལ་གཅིག་རྒྱུན་མི་འཆད་པར་བཅུད་ཀྱིས་
[72b.2]བསྐྱེད་པ་ཡིན་ནོ། །དེ་ཡང་སློབ་དཔོན་ཁ་ཅིག་ན་རེ་ཉིན་ཞག་གཅིག་གིས་ཟས་འཇུ་བའི་རིམ་པ་དངས་མ་ནས་ཁུ་ཆུའི་བར་དུ་སྐྱེ་བར་འགྱུར་རོ་ཞེས་ཟེར་རོ། །ཡང་ཁ་ཅིག་ན་རེ་ཉིན་ཞག་དྲུག་གིས་ཁུ་ཆུའི་བར་དུ་འགྱུར་རོ་ཞེས་སྨྲའོ། །ཡང་སྨན་པ་གཞན་དག་ན་རེ་ཟླ་བ་གཅིག་
[72b.3]གིས་ཁུ་ཆུའི་བར་དུ་རིམ་པས་གཟོད་འགྱུར་ཞེས་ཟེར་རོ། །དེ་ཡང་ཟས་ཟོས་པས་དངས་མ་བསྐྱེད་དེ་ཁམས་གོང་མ་ཟས་ལྟ་བུས་འོག་མ་རིམ་པས་བརྟས་པར་བྱེད་དོ། །འཁོར་ལོ་བཞིན་དུ་རྒྱུན་མི་འཆད་པར་ཟས་ཟོས་པའི་རྒྱུས་འབྱུང་བ་ཡིན་ནོ། །དེ་ལ་རོ་ཙ་བར་བྱེད་པའི་ཟས་
[72b.4]ཞོ་དང་འོ་མ་དང་བཅུད་ལ་སོགས་པས་འཕྲལ་ཁུ་ཆུ་འཕེལ་བར་སྣང་སྟེ། ཇི་ལྟར་དུག་ཟོས་པ་ལས་གཉེན་པོའི་སྨན་གྱིས་འཕྲལ་བཟློག་པར་སྣང་བ་ལྟ་བུའོ། །དེ་བས་ན་ཕལ་ཆེར་ནི་རོ་ཙ་བའི་ཁ་ཟས་དང་སྨན་གྱིས་རང་གི་འབྲས་བུ་འཕྲལ་སྟོན་པར་མཐོང་ངོ་། །ཟས་ཀྱི་དངས་མའི་
[72b.5]རྒྱུན་ཡིན་པ་དེའི་ཁྱབ་བྱེད་ཅེས་བྱ་བའི་རླུང་དེས་ལུས་ཐམས་ཅད་དུ་སྐད་ཅིག་མ་གཅིག་ལ་དུས་གཅིག་ཏུ་ཁྱབ་ཅིང་སོན་པར་བྱེད་པའི་ལས་ཅན་ཡིན་ནོ། །གལ་ཏེ་དངས་མ་ལ་སོགས་པ་འཇུག་པའི་རྒྱུན་མ་རུངས་པར་གྱུར་པ་ལས་བཅུད་དང་དེ་འཕུལ་བར་བྱེད་པའི་རླུང་དང་བཅས་
[72b.6]པའི་ལས་ཡང་གནོད་པར་འགྱུར་ཏེ། དཔེར་ན་ནམ་མཁའ་ལ་ཆུར་བབ་པ་ན་རླུང་གིས་འབབ་ཏུ་མི་སྟེར་བ་དང་འདྲའོ། །དེ་བས་ན་འཇུག་པའི་རྒྱུན་བཅུད་དང་བཅས་པ་འགག་ཅིང་མ་རུངས་པར་གྱུར་པ་ལས་ནད་གཞི་གསུམ་ཡང་འཁྲུགས་ཤིང་མི་བདེ་བ་སྐྱེད་དོ། །དེ་ལས་
[72b.7]ཁམས་བདུན་གྱི་མེའི་དྲོད་དང་། འབྱུང་བ་ལྔའི་མེ་དྲོད་དང་། ནང་གྲོལ་གྱི་མེ་དྲོད་གསུམ་ལས་ཁ་ཟས་འཇུ་བར་བྱེད་པ་ནི་ནང་གྲོལ་མེ་དྲོད་མཆོག་ཏུ་བཤད་དེ། དེ་སྟོབས་དང་ལྡན་ན་ནི་འབྱུང་བ་དང་ཁམས་བདུན་གྱི་མེ་དྲོད་སྐྱེད་པ་ཡིན་ལ་དེ་ནང་གྲོལ་གྱི་མེ་དྲོད་དམས་ན་ནི་འབྱུང་བ་
[73a]
[73a.1]ཆེན་པོ་ལྔ་དང་ཁམས་བདུན་གྱི་མེ་དྲོད་ཀྱང་འབྲི་ཞིང་འཕེལ་བར་མི་ནུས་སོ། །དེ་བས་ན་ནང་གྲོལ་གྱི་དྲོད་ཡོད་ན་ཚེ་དང་སྟོབས་ལ་སོགས་པ་ཡོད་པས་དེའི་ཕྱིར་ལུས་ཀྱི་མེ་དྲོད་སྨིན་པར་བྱེད་པ་གང་ཡིན་པ་དེ་ལ་ལེགས་པར་སྦྱར་བའི་ཁ་ཟས་ཀྱི་བུད་ཤིང་རབ་ཏུ་ཕན་
[73a.2]པས་བསྲུང་ཤིང་བསྐྱང་བ་ལ་འབད་པར་བྱའོ། །དེ་ལ་མེ་དང་མཉམ་དུ་གནས་པའི་རླུང་དེར་རང་རང་གི་གནས་ན་འདུག་པ་ནི་མེའི་དྲོད་ཀྱང་སྙོམས་པ་ཡིན་ནོ། །གལ་ཏེ་ལམ་གཞན་དུ་སོང་ན་ནི་མེའི་དྲོད་མི་བཟད་པ་ཡིན་ནོ། །མེ་དང་མཉམ་དུ་གནས་པའི་རླུང་དེས་མཁྲིས་པ་ཆེར་སྦར་ན་ནི་མེའི་
[73a.3]དྲོད་རྣོ་ཆེས་པར་འགྱུར་རོ། །རླུང་དེས་བད་ཀན་ལ་ཕོག་ན་ནི་མེའི་དྲོད་ཉམ་ཆུང་བར་འགྱུར་རོ། །དེ་ལྟར་མེའི་དྲོད་མཉམ་པ་དང་། མི་བཟད་པ་དང་། རྣོ་ཆེས་པ་དང་། ཉམ་ཆུང་བ་རྣམ་པ་བཞིར་འགྱུར་ཏེ། དེ་ཡང་ཟན་རན་པར་ཟོས་པ་ལེགས་པར་འཇུ་བ་ནི་མེའི་དྲོད་མཉམ་པ་ཞེས་བྱའོ། །མེའི་དྲོད་མི་བཟད་པ་ཞེས་བྱ་
[73a.4]བ་ནི་མང་དུ་ཟོས་ཀྱང་མྱུར་དུ་འཇུ་བ་དང་། ཉུང་ངུ་ཟོས་ཀྱང་ཡུན་རིང་པོ་ནས་གཟོད་འཇུའོ། །ཟས་ལྕི་བ་ལ་སོགས་པ་ཟོས་ཀྱང་མྱུར་དུ་འཇུ་བ་ནི་རྣོ་ཆེས་པ་ཞེས་བྱའོ། །མེའི་དྲོད་ཉམ་ཆུང་བ་ཞེས་བྱ་བ་ནི་ཟས་ཡང་བ་ཟོས་ན་ཡང་ཡུན་རིང་པོ་ནས་འཇུ་ལ་ཁྱད་པར་དུ་ཁ་སྐམ་པ་དང་། ནང་དུ་ཀྲུག་
[73a.5]ཟེར་བ་དང་། རྒྱུ་མ་འཁྲུགས་པ་དང་། ལྟོ་སྦོ་བ་དང་། ལུས་ལྕི་བའོ། །ལུས་ཀྱི་མེ་དྲོད་ཚབས་ཆེར་ཉམས་ན་ནི་སྨན་དཔྱད་བྱས་ཀྱང་མི་འཚོའོ། །གལ་ཏེ་མེའི་དྲོད་ལ་སྐྱོན་མེད་ན་ནི་ཡུན་རིང་དུ་འཚོ་བ་ཡིན་ནོ། །ནད་ཀྱི་རྩ་བ་ནི་མེའི་དྲོད་ཉམས་པ་ལས་འབྱུང་སྟེ། མེའི་དྲོད་ཉམས་ན་ལུས་ཀྱི་རྒྱུན་
[73a.6]ཐམས་ཅད་འགགས་བར་འགྱུར་རོ། །སྐྱེས་བུའི་ལུས་ཀྱི་སྟོབས་ནི་རྣམ་པ་གསུམ་སྟེ། ལྷན་ཅིག་སྐྱེས་པ་དང་། དུས་ཀྱིས་སྐྱེས་པ་དང་། སྦྱོར་བ་ལས་བྱུང་བའོ། །དེ་ལ་སྙིང་སྟོབས་ཀྱི་རང་བཞིན་ལུས་ལས་བྱུང་བ་ནི་ལྷན་ཅིག་སྐྱེས་པའི་སྟོབས་ཞེས་བྱའོ། །ན་ཚོད་ཀྱི་བྱེ་བྲག་བྱིས་པ་དང་།
[73a.7]ལང་ཚོ་ལ་སོགས་པའི་སྟོབས་དང་དུས་ཀྱི་བྲེ་བྲག་དགུན་ལ་སོགས་པ་ལས་བྱུང་བའི་སྟོབས་གཉིས་ཀ་ལ་དུས་ཀྱི་སྟོབས་ཞེས་བྱའོ། །སྒོ་གསུམ་གྱི་སྤྱོད་པ་དང་། ཟས་སྣ་ཚོགས་དང་། བཅུད་ཀྱིས་ལེན་པ་དང་། རོ་ཙ་བའི་ཆོ་ག་བསྟན་པ་ལས་བྱུང་བ་ནི་སྦྱོར་བའི་སྟོབས་ཞེས་བྱའོ། །ཡུལ་
[73b]
[73b.1]གང་དགོན་དུང་ཆུ་ཉུང་ཤིང་ཆུང་བའི་ཡུལ་ནི་ནད་ཉུང་བ་ཡིན་ནོ། །ཡུལ་གང་ཤིང་དང་ཆུ་མང་བའི་གནས་དེ་ནི་ནད་མང་དུ་སྐྱེད་དོ། །དེ་གཉིས་མཉམ་པ་ནི་རན་པ་ཡིན་པར་ཤེས་པར་བྱའོ། །དེ་ལ་སེམས་ཅན་གྱི་ལུས་ལ་རྐང་སྙིམ་པ་གང་དང་། ཚིལ་སྙིམ་པ་དོ་དང་། ཞག་སྙིམ་པ་
[73b.2]གསུམ་དང་། གཅིན་སྙིམ་པ་བཞི་དང་། མཁྲིས་པ་སྙིམ་པ་ལྔ་དང་། བད་ཀན་སྙིམ་པ་དྲུག་དང་། ཕྱི་ས་སྙིམ་པ་བདུན་དང་། ཁྲག་སྙིམ་པ་བརྒྱད་དང་། དངས་མ་སྙིམ་པ་དགུ་དང་། ཆུ་སེར་སྙིམ་པ་བཅུ་དང་། དངས་མ་ཁྱོར་བ་གང་དང་། ལྷ་བ་ཁྱོར་བ་གང་དང་། ཁུ་ཆུ་ཁྱོར་བ་གང་
[73b.3]ཡོད་དོ་ཞེས་སློབ་དཔོན་དག་འཆད་དོ། །བུད་མེད་ལ་ནི་ཁྱད་པར་དུ་འོ་མ་སྙིམ་པ་དོ་དང་ཁྲག་སྙིམ་པ་བཞིས་མང་བ་ཡོད་དོ། །སྙིམ་པའི་ཚད་ནི་སྲང་གཉིས་ལ་ཁྱོར་གང་། སྲང་བཞི་ལ་སྙིམ་པ་གང་ངོ་། །གོང་དུ་སྨོས་པའི་ཚད་བསྟན་པ་དེ་དག་གིས་ནད་མེད་པ་ཐ་མལ་པར་འདུག་པ་ལ་བཤད་ཀྱིས་
[73b.4]ཁམས་མ་སྙོམས་པ་ལ་ནི་མ་ཡིན་ནོ། །དེ་ལ་ཕ་མ་གཉིས་ཀྱི་ཁུ་བ་དང་། ཁྲག་དང་། བུད་མེད་སྦྲུམ་པའི་གནས་སྐབས་དང་། བཟའ་བ་དང་། སྤྱོད་ལམ་དང་། མངལ་གྱི་གནས་དེ་དག་སྐྱོན་དང་བཅས་པས་བུའི་ལུས་ལ་ནད་ཀྱི་རང་བཞིན་བདུན་དུ་འགྱུར་ཏེ། རླུང་དང་། མཁྲིས་
[73b.5]པ་དང་། བད་ཀན་དང་། རླུང་དང་མཁྲིས་པ་དང་ལྡན་པ་དང་། རླུང་དང་བད་ཀན་དང་ལྡན་པ་དང་། མཁྲིས་པ་དང་བད་ཀན་དང་ལྡན་པ་དང་། དེ་གསུམ་འདུས་པ་དང་བདུན་ནོ། །གོང་མའི་ཁུ་བ་ལ་སོགས་པའི་གནས་སྐབས་སུ་ཅུང་ཞིག་ཆེ་ཆུང་དུ་གྱུར་ཞིང་མི་མཐུན་པ་བསྟེན་པས་རང་བཞིན་བདུན་པོ་
[73b.6]དེ་ཡང་ཤས་ཆེ་ཆུང་དུ་གྱུར་པ་ཡིན་ནོ། །དེ་ལ་ཐོག་མར་རླུང་གི་མཚན་ཉིད་བསྟན་ཏེ། རླུང་ཞེས་བྱ་བ་འདི་ནི་ནད་ཀྱི་གཞི་ཀུན་གྱི་ནང་ན་མཐུ་ཆེ་བ་ཡིན་ཏེ། ལུས་ཐམས་ཅད་དུ་ཁྱབ་པ་དང་། མྱུར་དུ་བྱེད་པ་དང་། སྟོབས་ཆེ་བ་དང་། ནད་གཞི་གཞན་རྣམས་འཁྲུག་པར་བྱེད་པ་དང་། སླ་རྩལ་
[73b.7]སོགས་པ་འབྱིན་པར་བྱེད་པ་དང་། རང་དབང་དུ་གྱུར་པ་དང་། ནད་མང་པོའི་གཞི་བྱེད་པ་ཡིན་ཏེ། ནད་ཐམས་ཅད་ཀྱི་ནང་ན་རླུང་འདི་སྟོབས་ཆེ་ཞིང་ཁྱད་པར་དུ་གྱུར་པ་ཡིན་ནོ། །དེས་ན་ཕ་མའི་ཁུ་ཁྲག་རླུང་ཤས་ཆེ་བ་ལས་བུ་ཡང་ཇི་སྲིད་འཚོའི་བར་དུ་རླུང་གི་མཚན་ཉིད་དང་ལྡན་པ་ཡིན་ཏེ། དེའི་
[74a]
[74a.1]ལུས་སྐྲ་རྡུལ་གྱིས་གཡོགས་པ་ལྟར་སྣང་བ་དང་། ལུས་སེར་ག་བྱེ་བ་དང་། དྲོ་བ་འདོད་ཅིང་གྲང་བ་ལ་ཞེ་སྡང་བ་དང་། གཞན་ཡང་མོས་པ་མི་བརྟན་པ་དང་། དྲན་པ་མི་བརྟན་པ་དང་། བློ་མི་བརྟན་པ་དང་། སྤྱོད་པ་མི་བརྟན་པ་དང་། མཛའ་བ་མི་བརྟན་པ་དང་།
[74a.2]ལྟ་བ་མི་བརྟན་པ་དང་། འགྲོ་བ་མི་བརྟན་པ་དང་། སྨྲ་བ་མང་བ་དང་། བད་ཀན་ཆུང་བ་དང་། ནོར་ཉུང་བ་དང་། ཚེ་ཐུང་བ་དང་། གཉིད་ཆུང་བ་དང་། སྨྲ་བའི་དུས་སུ་བརྗེད་ངས་པ་དང་། ཚིག་ལྐུགས་པ་དང་། ཆད་པར་ལྟ་བ་འམ། མང་དུ་ཟ་བ་དང་། འགྱིང་ཞིང་འགྲོ་བ་དང་། གླུ་ལ་
[74a.3]དགའ་བ་དང་། བཞད་གད་ལ་དགའ་བ་དང་། རི་དགས་གསོད་པ་ལ་དགའ་བ་དང་། འཐབ་མོ་ལ་དགའ་བ་དང་། དེ་བཞིན་དུ་མངར་བ་དང་། སྐྱུར་བ་དང་། ལན་ཚྭ་དང་། དྲོ་བ་འདོད་པ་དང་། ལུས་སྐེམ་ཤིང་རིད་པ་དང་། འགྲོ་བའི་ཚེ་ཚིགས་ལས་སྒྲ་འབྱུང་བ་དང་། མི་བརྟན་པ་དང་།
[74a.4]དབང་པོ་ཡུལ་ལས་རྒྱལ་མི་ནུས་པ་དང་། དམ་པའི་སྤྱོད་པ་དང་མི་ལྡན་པ་དང་། སྐྱེས་བུ་དེ་ལ་བུད་མེད་མི་འཆགས་པ་དང་། བུ་མང་པོ་མི་སྐྱེ་བ་དང་། རླུང་གི་རང་བཞིན་ཅན་གྱི་མིའི་མིག་རྩུབ་པ་དང་། རྡུལ་གྱིས་གང་བ་ལྟར་སྣང་བ་དང་། ཟུམ་པ་དང་། མི་མཛེས་པ་དང་། མི་ཤི་བའི་མིག་
[74a.5]ལྟ་བུ་དང་། མིག་བྱེ་བཞིན་དུ་གཉིད་ལོག་པ་དང་། ཤིང་གི་སྟེང་དང་། རིའི་རྩེ་མོ་ལ་འཛེག་པ་དང་། ནམ་མཁའ་ལ་འཕུར་བ་རྨི་བ་དང་། ལོངས་སྤྱོད་ཆུང་བ་དང་། སེར་སྣ་ཆེ་བ་དང་། ཁེངས་པ་དང་། རྐུ་བ་དང་། བྱིན་སྙིང་ཟླུམ་པ་དང་། གཞན་ཡང་འདི་དག་གི་སྤྱོད་པ་གཟུགས་དང་།
[74a.6]སྒྲའི་རང་བཞིན་མཐུན་ན་ཡང་། རླུང་གི་བདག་ཉིད་ཅན་གྱི་མི་ཡིན་ཏེ། གང་ཞེ་ན། ཁྱི་དང་། ཝ་དང་། རྔ་མོ་དང་། བྱ་རྒོད་དང་། བྱི་བ་དང་། ཁྭ་དང་། དེ་རྣམས་དང་ལྡན་པའི་མི་ནི་རླུང་གི་རྟགས་སུ་ཤེས་པར་བྱའོ། །དེ་ལ་མཁྲིས་པའི་རང་བཞིན་ཅན་གྱི་མིའི་མཚན་ཉིད་དྲང་སྲོང་ཐང་ལ་འབར་
[74a.7]གྱིས་བཤད་པ་མཁྲིས་པ་ཉིད་མེ་ཡིན་པའམ། ཡང་ན་མེ་ལས་མཁྲིས་པ་འབྱུང་བའམ། ཡང་ན་ཁྲག་གི་སྙིགས་མ་དག་ཡིན་པས་ན་མཁྲིས་པའོ། །དེ་ལ་མཁྲིས་པའི་རང་བཞིན་ནི་ཤིན་ཏུ་བཀྲེས་པ་དང་། སྐོམ་པ་དང་། མདོག་སེར་སྐྱར་འདུག་པ་དང་། དྲོད་ཆེ་བ་དང་། ལག་པ་དང་།
[74b]
[74b.1]རྐང་པ་དང་། གདོང་དམར་བ་དང་། དཔའ་བ་དང་། ང་རྒྱལ་ཆེ་བ་དང་། མིག་སེར་བ་དང་། སྐྲ་དང་བ་སྤུ་ཉུང་བ་དང་། སྐྲ་སེར་སྐྱར་འདུག་པ་དང་། ཕྲེང་བ་ལ་དགའ་བ་དང་། བྱུག་པ་ལ་དགའ་བ་དང་། རྒྱན་ལ་དགའ་བ་དང་། སྤྱོད་ལམ་བཟང་བ་དང་། གཙང་སྦྲ་ཆེ་བ་དང་།
[74b.2]གཡོག་འཁོར་ལ་སྙིང་བརྩེ་བ་དང་། ཕྱུག་པ་དང་། བབ་ཆོལ་བྱེད་པ་དང་། བློ་སྟོབས་དང་ལྡན་པ་དང་། སྐྱབས་སུ་འོངས་ན་དགྲ་ཡང་སྐྱོབ་པ་དང་། ཡིད་གཞུངས་པ་དང་། ཚིགས་མཚམས་ཀྱི་ཤ་འཇམ་པ་དང་། བུད་མེད་ལ་མངོན་པར་དགའ་བ་དང་། ཁུ་ཆུ་ཉུང་ཞིང་འདོད་
[74b.3]པ་ཆུང་བ་དང་། གཉེར་མ་མྱུར་དུ་སྐྱེ་བ་དང་། སྐྲ་དཀར་མྱུར་དུ་སྐྱེ་བ་དང་། མཐོང་བ་ཉམས་མི་གསལ་བ་དང་། མངར་བ་དང་། བསྐ་བ་དང་། ཁ་བ་དང་། གྲང་བའི་ཟས་ལ་དགའ་བ་དང་། ཚད་པ་ལ་ཞེ་སྡང་བ་དང་། རྔུལ་ཆེ་བ་དང་། དྲི་མནམ་པ་དང་། བཤང་གཅི་
[74b.4]མང་བ་དང་། ཁྲོ་བ་དང་། བཟའ་བ་དང་། བཏུང་བ་ལ་ཕྲག་དོག་པ་དང་། གཞན་ཡང་རྨི་ལམ་གྱི་ནང་དུ་དོང་ཀའི་མེ་ཏོག་དང་། ཤིང་པ་ལ་ཤའི་མེ་ཏོག་དང་། ཕྱོགས་མེས་ཚིག་པ་མཐོང་བ་དང་། སྐར་མདའ་ལྟུང་བ་དང་། གློག་འགྱུ་བ་དང་། ཉི་མ་དང་མེ་མཐོང་བ་རྨི་བ་དང་།
[74b.5]མཁྲིས་པའི་རང་བཞིན་ཅན་གྱི་མི་ནི་མིག་ཕྲ་བ་དང་། སེར་བ་དང་། གཡོ་ཞིང་འགུལ་བ་དང་། རྫི་མ་སྲབ་ཅིང་ཉུང་བ་དང་། གྲང་བ་ལ་དགའ་བ་དང་། ཆང་འཐུང་བ་དང་། ཁྲོས་པའི་དུས་སུ་མིག་དམར་པོར་གྱུར་པ་དང་། ཉི་མའི་དཀྱིལ་འཁོར་སྔོ་བ་དང་དམར་བར་མཐོང་བ་
[74b.6]ཡིན་ནོ། །ཚེ་ནི་རན་པར་འཚོ་བ་ཡིན་ལ། སྟོབས་ཀྱང་རན་པར་ཡོད་དེ། ཤིན་ཏུ་མཁས་པ་དང་། སྡུག་བསྔལ་གྱིས་འཇིགས་པ་ཡིན་ནོ། །གཞན་ཡང་སྟག་དང་། དྲེད་དང་། སྤྲེའུ་དང་། བྱི་ལ་དང་། གནོད་སྦྱིན་དང་། འདི་རྣམས་ཀྱི་གཟུགས་དང་། སྐད་དང་། སྤྱོད་
[74b.7]པའི་མཚན་མ་དང་ལྡན་ན་མཁྲིས་པ་ཅན་གྱི་རྟགས་ཡིན་ནོ། །དེ་ལ་བད་ཀན་ནི་ཆུའི་རང་བཞིན་ཅན་གྱི་རྟགས་ཡིན་ཏེ། རུས་པའི་ཚིགས་མི་མངོན་པ་དང་། སྣུམ་པ་དང་། ཚིགས་འབྲེལ་བ་དང་། བཀྲེས་པ་དང་། སྐོམ་པ་དང་། ཉོན་མོངས་པ་དང་། སྡུག་བསྔལ་བ་དང་།
[75a]
[75a.1]ཚད་པ་དང་། འདི་རྣམས་བཟོད་པ་དང་། གཞན་ཡང་བློ་དང་ལྡན་པ་དང་། སྙིང་སྟོབས་ཆེ་བ་དང་། དམ་བཅས་པ་བརྟན་པ་དང་། གཞན་དུ་ཁྲེ་དང་། དཱུར་བ་དང་། འདམ་བུའི་མྱུ་གུ་དང་། མཚོན་དང་། གི་ཝང་དང་། པདྨ་དང་། གསེར་དང་།
[75a.2]དེ་དག་གི་མདོག་གང་ཡང་རུང་བར་སྣང་བ་ནི་བད་ཀན་གྱི་རང་བཞིན་ནོ། །ལག་ངར་གཉིས་ལ་འཕྱང་བ་དང་། བྲང་རྒྱས་ཤིང་ཡངས་པ་དང་། དཔྲལ་བའི་དབྱེས་ཆེ་བ་དང་། སྐྲ་མཐུག་ཅིང་མདོག་སྔོ་བ་དང་། ལུས་རྩུབ་པ་དང་། ལུས་ཤ་སྙོམས་པ་དང་། ཡན་ལག་
[75a.3]ཐམས་ཅད་ལེགས་པར་འབྱེས་པ་དང་། ལུས་མཛེས་པ་དང་། མདངས་དང་ལྡན་པ་དང་། འདོད་ཆགས་སྤྱོད་པའི་ནུས་པ་དང་ལྡན་པ་དང་། དེ་བཞིན་དུ་བཅུད་དང་། ཁུ་ཆུ་དང་། བུ་ཚ་མང་བ་དང་། གཡོག་འཁོར་མང་བ་དང་། ཆོས་ལ་དགའ་བ་དང་། ཚིག་འཇམ་པོར་
[75a.4]སྨྲ་བ་དང་། དགྲ་ལྟ་བུ་གནོད་པར་བྱེད་པ་ལ་སེམས་ལ་དམ་དུ་འཛིན་ཅིང་འཕྲལ་མི་སྨྲ་བ་དང་། གླང་པོ་ཆེའི་མཆོག་ར་རོ་བ་ལྟ་བུའི་འགྲོས་སུ་འགྲོ་བ་དང་། འབྲུག་གི་སྒྲ་དང་། རྒྱ་མཚོ་ཆེན་པོ་དང་། རྫ་རྔ་དང་། སེང་གེའི་སྐད་ལྟ་བུ་ཡོད་པ་དང་། དྲན་པ་དང་། བྱ་བ་ལ་
[75a.5]མངོན་པར་བརྩོན་པ་དང་། དུལ་བ་དང་། བྱིས་པའི་གནས་སུ་ཡང་ཤས་ཆུང་ངུ་ངུ་བ་དང་། ལྟོ་འདུན་ཆུང་བ་དང་། ཟས་ཁ་བ་དང་། བསྐ་བ་དང་། ཚ་བ་དང་། དྲོ་བ་དང་། རྩུབ་པ་དང་། ཉུང་ངུ་ཟོས་ཀྱང་སྟོབས་དང་ལྡན་པ་དང་། གཞན་ཡང་མིག་ཡངས་ཤིང་
[75a.6]སྣུམ་ལ་དཀྱུས་རིང་བ་དང་། གསལ་བ་དང་། ཤིན་ཏུ་དཀར་བ་དང་། རྫི་མ་གནག་ཅིང་མཐུག་པ་དང་། སྐད་གསང་ཆུང་བ་དང་། སྤྲོ་རིང་བ་དང་། བཟའ་བཏུང་ཉུང་ངུ་ཟ་ཞིང་འཐུང་བ་དང་། འདོད་པ་ཆུང་བ་དང་། ཚེ་རིང་བ་དང་། ནོར་མང་བ་དང་། ཐག་རིང་པོ་ལ་བློ་འཇུག་པ་
[75a.7]དང་། སྦྱིན་གཏོང་ཆེ་བ་དང་། དད་པ་ཆེ་བ་དང་། བློ་ཟབ་པ་དང་། མཐོང་བ་ཆེ་བ་དང་། བཟོད་པ་དང་ལྡན་པ་དང་། ངང་ཚུལ་བཟང་བ་དང་། གཉིད་ཆེ་བ་དང་། ལས་ཀྱི་མཐའ་རིང་བ་དང་། བྱས་པ་གཟོ་བ་དང་། བསམ་པ་དྲང་བ་དང་། མཁས་པ་དང་། གཟུགས་བཟང་བ་
[75b]
[75b.1]དང་། ངོ་ཚ་ཤེས་པ་དང་། བླ་མ་ལ་གུས་པ་དང་། སྙིང་ཉེ་བ་དང་། མཛའ་བ་བརྟན་པ་དང་། རྟག་ཏུ་གློ་བ་དང་། རྨི་ལམ་གྱི་ནང་ན་མེ་ཏོག་པདྨ་དང་། ནམ་མཁའ་ལ་བྱ་མང་པོ་ཕྲེང་བ་ལྟར་བརྒྱུས་པ་འཕུར་བ་དང་། མཚོ་དང་སྤྲིན་མཐོང་བ་དང་། ཚངས་པ་དང་། དྲག་པོ་དང་།
[75b.2]དབང་པོ་དང་། ཆུ་ལྷ་དང་། ནམ་མཁའ་ལྡིང་དང་། ངང་པ་དང་། གླང་པོ་ཆེའི་མཆོག་དང་། སེང་གེ་དང་། རྟ་དང་། ཁྱུ་མཆོག་དང་། དེ་རྣམས་དང་འདྲ་བར་མཐོང་ན་བད་ཀན་གྱི་རང་བཞིན་ཅན་དུ་ཤེས་པར་བྱའོ། །རླུང་དང་མཁྲིས་པར་ལྡན་པ་དང་། རླུང་དང་བད་ཀན་དུ་
[75b.3]ལྡན་པ་དང་། མཁྲིས་པ་དང་བད་ཀན་དུ་ལྡན་པ་དང་། འདུས་པ་དང་བཞི་པོ་དེ་དག་གི་རང་བཞིན་ཡང་གོང་མ་སོ་སོའི་རྟགས་བསྟན་པ་ལས་འདིར་ཡང་རྗེས་སུ་དཔགས་ཏེ་ཤེས་པར་བྱའོ། །དེ་ལ་སྙིང་སྟོབས་ཀྱི་རང་བཞིན་ནི་བད་ཀན་གྱི་ཡོན་ཏན་དང་འདྲ་སྟེ། གཙང་སྦྲ་ཆེ་བ་དང་། ཡོད་
[75b.4]པར་ལྟ་བ་ལ་སོགས་པའོ། །རྡུལ་གྱི་རང་བཞིན་ནི་མཁྲིས་པའི་ཡོན་ཏན་དང་འདྲ་སྟེ་མང་དུ་སྨྲ་བ་ལ་སོགས་པའོ། །མུན་པའི་རང་བཞིན་ནི་རླུང་གི་ཡོན་ཏན་དང་འདྲ་སྟེ་འཇིགས་པ་ལ་སོགས་པའོ། །ལྡན་པ་དང་འདུས་པའི་རང་བཞིན་གྱི་ཡོན་ཏན་ཡང་གོང་མ་དང་གོ་རིམས་བཞིན་དུ་སྦྱར་
[75b.5]རོ། །དེ་ལ་ན་ཚོད་ཀྱི་བྱེ་བྲག་གསུམ་དུ་བལྟ་སྟེ། བྱིས་པ་དང་། བར་མ་དང་། རྒན་པའོ། །དེ་ལ་ལོ་བཅུ་དྲུག་གི་བར་དུ་ནི་བྱིས་པ་ཞེས་བྱའོ། །དེ་ལས་ལོ་བདུན་ཅུའི་བར་དུ་ནི་བར་མ་ཞེས་བྱ་སྟེ། ལུས་དང་། དབང་པོ་དང་། གཟི་བརྗིད་ལ་སོགས་པ་འཕེལ་ཞིང་རྒྱས་པའི་
[75b.6]དུས་སོ། །དེ་ཕན་ཆད་ནི་རྒན་པོ་ཞེས་བྱ་སྟེ། ལུས་ཟུངས་ལ་སོགས་པ་ཟད་ཟིན་པའི་དུས་སོ། །སྐྱེས་བུ་གང་གི་ལུས་ཁྲུ་ཕྱེད་དང་བཞི་པའི་ཚད་དུ་ཡོད་པ་ནི་ཚེ་རིང་བ་ལ་སོགས་པའི་གཞི་ཡིན་ནོ། །གཞན་ཡང་ལུས་ལ་སྨད་པར་བྱ་བའི་དངོས་པོ་བརྒྱད་ཡོད་དེ། གང་ཞེ་ན།
[75b.7]ལུས་ལ་བ་སྤུ་མང་བ་དང་། ཡང་ན་མེད་པ་དང་། བ་སྤུ་དཀར་བ་དང་། ཡང་ན་གནག་པ་དང་། སྦོམ་པ་དང་། རིང་ཆེས་པ་དང་། གནས་མ་ཡིན་པར་སྤུ་སྐྱེས་པ་དང་། རྩུབ་པ་དང་། དེ་རྣམས་དང་ལྡན་ན་ཚེ་ཐུང་བ་དང་མི་བདེ་བ་སྐྱེད་དེ། སྐྱེས་བུ་གང་གི་སྐྲ་སྣུམ་པ་དང་། འཇམ་
[76a]
[76a.1]པ་དང་། ཕྲ་ཞིང་རེ་རེ་ནས་སྐྱེས་པ་དང་། བརྟན་པ་དང་། དེ་དག་ནི་སྐྲའི་ཡོན་ཏན་དམ་པ་ཡིན་ནོ། །དཔྲལ་བའི་ཡོན་ཏན་ནི་སྐྲ་མཚམས་ཀྱི་ཕྱོགས་མཐོ་ཞིང་མུར་འགྲམ་གཉིས་དམའ་བ་དང་ཟླ་བ་ཕྱེད་པ་ལྟ་བུ་ནི་རབ་ཏུ་བཟང་ངོ་། །སྐྱེས་བུའི་རྣ་བའི་ཡོན་ཏན་ནི་ཞེང་
[76a.2]ཆུང་ལ་དཀྱུས་རིང་བ་དང་། མཐོན་དམན་ལེགས་པར་འབྱེས་ཤིང་ཤས་རྒྱས་པ་དང་། རྣ་བའི་རྒྱབ་ཕྱོགས་མཐོ་བའོ། །མིག་གི་ཡོན་ཏན་ནི་དཀར་ནག་འབྱེས་ཤིང་གསལ་བ་དང་། རྫི་མ་བར་མ་ཆད་ཅིང་སྟུག་པའོ། །སྣའི་ཡོན་ཏན་ནི་སྣ་གཟང་མཐོ་བ་དང་། དབུགས་ཆེར་
[76a.3]འབྱུང་བ་དང་། མཐོ་དམན་མེད་ཅིང་རྒྱས་པ་དང་འདྲ་བའོ། །མཆུའི་ཡོན་ཏན་ནི་མི་འཕྱང་བ་དང་དམར་བའོ། །འགྲམ་པའི་ཡོན་ཏན་ནི་འགྲམ་པ་ཡངས་ཤིང་མཛེས་པ་དང་། ཁ་ཡངས་པ་དང་། སོ་ཐགས་བཟང་བ་དང་། མདོག་སྣུམ་ལ་འཚེར་བ་དང་། འཇམ་པ་དང་།
[76a.4]དཀར་བ་དང་མཉམ་པའོ། །ལྕེའི་ཡོན་ཏན་ནི་ལྕེ་དམར་བ་དང་། སྲབ་པ་དང་། རིང་བའོ། །ཀོ་སྐོའི་ཡོན་ཏན་ནི་ཤ་ཆེ་ཞིང་རྒྱས་པའོ། །མགྲིན་པའི་ཡོན་ཏན་ནི་རིང་ཞིང་ཟླུམ་ལ་དུང་ལྟ་བུའོ། །དཔུང་མགོ་ཟླུམ་ལ་མཐོ་ཞིང་རྒྱས་པའོ། །ལྟེ་བ་གཡས་སུ་འཁྱིལ་བ་དང་། ལྟེ་བ་དབུས་
[76a.5]ཟབ་ཅིང་མཐའ་མཐོ་བའོ། །རྐང་པ་དང་ལག་པའི་སེན་མོའི་ཡོན་ཏན་ནི་སྲབ་པ་དང་། དམར་བ་དང་། མཐོ་བ་དང་། སྣུམ་པ་དང་། ཟངས་མདོག་འདྲ་བ་དང་། ཤ་དང་འབྱར་བ་དང་། སོར་མོ་རིང་ལ་མཚམས་འབྱར་ཞིང་ཕུག་པ་མི་མངོན་པ་དང་། རྒྱབ་ཀྱི་སྒལ་ཚིགས་
[76a.6]རྒྱ་ཆེ་ཞིང་མི་མངོན་པ་དང་། རྒྱུས་པ་དང་ཚིགས་ཀྱང་མི་སྣང་ངོ་། །སྐད་ཀྱི་ཡོན་ཏན་ནི་བརྟན་པ་དང་རིང་བའོ། །ལུས་ཀྱི་མདོག་སྣུམ་པ་དང་། གཟི་མདངས་དང་ལྡན་པ་དང་། རང་བཞིན་གྱིས་སྙིང་སྟོབས་ཆེ་བ་དང་། ཕོངས་པར་གྱུར་ཀྱང་བློ་མི་འགྱུར་བའོ། །དེ་ལ་བཙས་མ་
[76a.7]ཐག་པ་ནས་ནད་མེད་ཅིང་རིམ་གྱིས་ལུས་བོང་ལ་སོགས་པ་དང་། འཇིག་རྟེན་གྱི་ཐ་སྙད་དང་བསྟན་བཅོས་ལ་མཁས་ཤིང་དགེ་མཚན་འཕེལ་བ་ལྟ་ན་ནི་ཇི་ལྟར་ཞིང་གཤིན་པའི་ལོ་ཏོག་ལྟ་བུར་འཕེལ་ཞིང་རྒྱས་པར་འགྱུར་ཏེ། གོང་དུ་སྨོས་པའི་ལུས་ཀྱི་ཡོན་ཏན་དེ་དག་ཐམས་ཅད་
[76b]
[76b.1]དང་ལྡན་པའི་སྐྱེས་བུ་ནི་ལོ་བརྒྱར་འཚོ་ཞིང་ཚེ་རིང་བ་དང་། དབང་ཕྱུག་ལ་སོགས་པ་དང་ཡུན་རིང་དུ་ལྡན་པར་འགྱུར་རོ། །དེ་ལས་ལུས་ཟུངས་བདུན་དང་སྙིང་སྟོབས་དང་བརྒྱད་ནི་ལུས་ཀྱི་སྙིང་པོ་ཞེས་བྱ་སྟེ། དེ་དག་གི་སྟོབས་ཆེ་ཆུང་བསྟན་པ་ནི་ལུས་ཟུངས་དངས་མ་དང་སྙིང་
[76b.2]སྟོབས་ཀྱི་བར་དུ་རིམ་པ་བཞིན་དུ་འོག་མ་སྟོབས་ཆེ་བ་ཡིན་པར་ཤེས་པར་བྱའོ། །ལུས་ཀྱི་སྙིང་པོ་བརྒྱད་དུ་བསྟན་པ་ཐམས་ཅད་དང་ལྡན་པའི་སྐྱེས་བུ་ནི་ཀུན་གྱི་བླ་མ་ལྟར་བཀུར་བར་བྱ་བ་དང་། ཡིད་བརྟན་པའི་གནས་དང་ཐམས་ཅད་ཀྱིས་དྲི་བའི་འོས་སུ་གྱུར་པ་དང་།
[76b.3]ལུས་དང་སེམས་ཀྱི་སྡུག་བསྔལ་བཟོད་པ་དང་། བློ་དང་ལྡན་པ་དང་། བྱ་བ་ལ་བརྟན་པར་གྱུར་པ་ཡིན་ནོ། །དེ་ལ་མི་སྙིང་སྟོབས་ཀྱི་ཤས་ཆེ་བ་ནི་རྟག་ཏུ་བདེ་བ་དང་ལྡན་པ་ཡིན་ན་རྡུལ་དང་མུན་པ་གཉིས་ཀྱི་ཤས་ཆེ་བའི་མི་ནི་བདེ་སྡུག་འདྲེན་པ་དང་ལྡན་པ་ཡིན་ནོ། །གཞན་ཡང་
[76b.4]སྐྱེས་བུ་གང་ལ་ལ་ཞིག་སྦྱིན་པ་དང་། ཚུལ་ཁྲིམས་དང་། བདེན་པ་དང་། ཚངས་པར་སྤྱོད་པ་དང་། བྱས་པ་གཟོ་བ་དང་། བྱམས་པ་དང་། སྙིང་རྗེ་ཆེ་བ་དང་། བཅུད་ཀྱིས་ལེན་པ་ལ་སོགས་པ་དེ་དག་བརྟེན་པར་བྱེད་པའི་སྐྱེས་བུ་ནི་བསོད་ནམས་དང་ཚེ་འཕེལ་བར་བྱེད་པ་
[76b.5]ཡིན་ནོ། །ལུས་ཀྱི་གནས་ལས་ལེའུ་གསུམ་པ་རྫོགས་སོ།། །།ལུས་ཀྱི་གནས་ལས་གནད་ཀྱི་བྱེ་བྲག་བསྟན་པའི་ལེའུ་བཤད་པར་བྱའོ། །མིའི་ལུས་ལ་གནད་བརྒྱ་རྩ་བདུན་ཡོད་དེ། བརླ་གཉིས་དང་། ལག་དར་གཉིས་ཏེ། བཞི་པོ་དེ་དག་
[76b.6]ལས་གནད་བཅུ་གཅིག་དང་། ལྟོ་བ་ལ་གནད་གསུམ་དང་། བྲང་ལ་གནད་དགུ་དང་། རྒྱབ་ལ་གནད་བཅུ་བཞི་དང་། ནམ་ཚོང་ཡན་ཆད་ལ་གནད་སུམ་ཅུ་རྩ་བདུན་ནོ། །དེ་ལ་སྔོན་གྱི་སྨན་པ་དག་འདི་སྐད་འཆད་དོ། རྐང་པའི་མཐིལ་གུང་མོའི་དྲང་ཐད་ཀྱི་དབུས་ན་
[76b.7]མཐིལ་འཕྲོག་པ་ཞེས་བྱ་བའི་གནད་ཡོད་དེ། དེར་མཚོན་ལ་སོགས་པ་ཕོག་ན་དེ་ནི་སྡུག་བསྔལ་དང་བཅས་ཤིང་འབྱུང་བ་ལྔ་ཐ་དད་པར་འགྱུར་རོ། །རྐང་པའི་མཐེ་བོང་དང་། མཛུབ་མོ་གཉིས་ཀྱི་བར་ན་མྱུར་བ་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་ཨ་ཤྐེ་
[77a]
[77a.1]པ་ཞེས་བྱ་བའི་རླུང་ནད་ཀྱིས་འཆི་བ་སྟོན་ཏོ། །གོང་མའི་གནད་ལས་ཡར་སོར་གཉིས་བཅལ་བར་པིར་ལྟ་བུ་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་ལུས་འདར་ཞིང་འཁོར་བར་བྱེད་དོ། །ལོང་མོའི་ཚིགས་ཀྱི་འོག་ན་པིར་གྱི་མགོ་ལྟ་བུ་
[77a.2]ཞེས་བྱ་བའི་གནད་ཡོད་དེ་དེར་མཚོན་གྱིས་ཕོག་ན་སྐྲང་ཞིང་ནད་སྐྱེ་བར་འགྱུར་རོ། །རྐང་པ་དང་བྱིན་པའི་ཚིགས་བར་ན་ལོང་མོ་ཞེས་བྱ་བའི་གནད་ཡོད་དེ། དེར་མཚོན་ལ་སོགས་པ་ཕོག་ན་དྲན་པ་ཉམས་པ་དང་། བརླ་རེངས་པ་དང་། ནད་སྐྱེད་པར་བྱེད་དེ། བྱིན་པའི་དབུས་རྟིང་བ་
[77a.3]ནས་སོར་བཅུ་གཉིས་བཅལ་བར་དབང་པོའི་ཆུ་སོ་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་ཁྲག་ཟད་ནས་འཆི་བར་བྱེད་དོ། །བྱིན་པ་དང་བརླ་གཉིས་ཀྱི་བར་ན་པུས་མོ་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་གལ་ཏེ་འཚོ་བར་འགྱུར་ན་ཡང་ལུས་ཞ་བར་
[77a.4]འགྱུར་རོ། །པུས་མོའི་ལོང་བུ་ནས་ཡང་བླ་བྲག་སར་སོར་གསུམ་བཅལ་བར་མ་ནི་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་བརླ་རེངས་པ་དང་སྐྲང་བར་བྱེད་དོ། །བརླའི་དབུས་ན་ཨུ་རུ་བ་ཤི་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་ཁྲག་ཟད་ནས་
[77a.5]བརླ་སྐམ་པར་བྱེད་དོ། །བརླའི་གོང་བརླ་བྲག་གི་འོག་ཚིགས་མཚམས་ན་མིག་དམར་པོ་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་ཁྲག་ཟད་ནས་ཟླ་བ་ཕྱེད་ཀྱིས་འཆི་བར་སྟོན་ཏོ། །བརླ་བྲག་དང་རླིག་པའི་བར་ན་བི་ཊ་བམ་ཞེས་བྱ་བའི་གནད་ཡོད་དེ། དེར་མཚོན་
[77a.6]ལ་སོགས་པ་ཕོག་ན་བུད་མེད་ལ་འཇུག་པའི་ནུས་པ་མེད་པར་འགྱུར་རོ། །རྐང་ཟུག་ཅིག་ཤོས་ལ་ཡང་ཚུལ་དེ་ལྟར་ཤེས་པར་བྱའོ། །དེ་བཞིན་དུ་དབུག་ཟུག་གཉིས་ལ་ཡང་དེ་དང་འདྲ་བར་གནད་དུ་བལྟ་སྟེ། ལོང་མོ་དང་མཁྲིག་མར་མཐུན་པ་དང་། གྲུ་མོ་དང་པུས་མོར་
[77a.7]མཐུན་པ་དང་། བྱིན་པའི་དབུས་དང་ལག་དར་གྱི་དབུས་སུ་མཐུན་པ་དང་། གཞན་ཡང་བི་ཊ་བམ་ཞེས་བྱ་བ་དང་། མིག་དམར་པོ་ཞེས་བྱ་བའི་གནད་ལ་མཚོན་གྱིས་ཕོག་ན་ཞ་བར་འགྱུར་བ་དང་འདྲ་བར་མཆན་ཁུང་གི་ནང་མཚམས་ན་ཡང་མཆན་ཁུང་འཛིན་པ་ཞེས་བྱ་བའི་གནད་ཡོད་དེ།
[77b]
[77b.1]དེར་མཚོན་གྱིས་ཕོག་ན་ཡང་དཔུང་པ་ཞ་བར་འགྱུར་ཏེ། དེ་ལ་སོགས་པ་གོང་དུ་བཤད་པའི་གོ་རིམས་བཞིན་དུ་གནད་ཡོད་པའི་ས་དང་སྐྱོན་འདྲ་བར་ཡོད་པས་ཅི་རིགས་པར་ཤེས་པར་བྱའོ། །ལྟོ་བའི་གནད་གསུམ་ལ་རྒྱུ་མ་སྦོམ་པོ་གཞང་ཞེས་བྱ་བའི་གནད་ཡོད་དེ། དེ་ལ་མཚོན་
[77b.2]གྱིས་ཕོག་སྟེ་བུ་ག་ནས་ཕྱིར་ཕྱི་ས་དང་རླུང་འགྱུར་ན་དེ་མ་ཐག་འཆིའོ། །ལྒང་པ་གཞུ་ལྟར་ཡོ་བ་ཤ་ཆུང་ཞིང་ཁྲག་ཉུང་བ་ཐུར་དུ་བལྟས་པའི་སྒོ་གཅིག་ཡོད་པ་ནི་ཆུ་སོའི་གནད་ཡིན་ཏེ། དེ་ཡང་རྐེད་པའི་དབུས་ན་ཡོད་པས་དེ་ལ་མཚོན་གྱིས་ཕོག་ན་དེ་མ་ཐག་སྲོག་འདོར་བར་འགྱུར་རོ། །
[77b.3]ཇི་སྟེ་རྡེའུ་འབྱིན་པའི་ཕྱིར་ཆུ་སོར་མཚོན་གྱིས་བྱ་དགོས་ན་ཡང་ཆུ་སོའི་གཡས་གཡོན་དུ་ནི་ཁྱད་པར་བསྲུང་བར་བྱ་བ་ཡིན་ལ་གལ་ཏེ་དེར་མཚོན་གྱིས་ཕོག་ན་ནི་འཕྲལ་འཆིའོ། །ཇི་སྟེ་རྡེའུ་འབྱིན་པའི་ཚད་བསྟན་པའི་སར་ཕུག་ན་ཡང་ཤིན་ཏུ་འཚོ་དཀའ་སྟེ། ཆུ་སོ་ནས་གཅིན་རྟག་
[77b.4]ཏུ་འཛག་པར་བཤད་དོ། །ལུས་ཀྱི་ཞུ་བ་དང་མ་ཞུ་བའི་དབུས་ན་རྩ་ཐམས་ཅད་རྟེན་པའི་གནས་ལྟེ་བ་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་འཕྲལ་འཆི་བར་བྱེད་དོ། །ཕོ་བའི་ཁ་ན་རྡུལ་དང་། མུན་པ་དང་སྙིང་སྟོབས་རྟེན་པའི་གནས་སྙིང་ཞེས་བྱ་བ་ཅིག་ཡོད་དེ། དེ་ཡང་
[77b.5]བྲང་གི་འོག །ལྟོ་བའི་གོང་ནུ་མ་གཉིས་ཀྱི་དབུས་ན་གནས་སོ། །ནུ་སོར་ལས་གོང་འོག་ཏུ་སོར་གཉིས་བཅལ་བ་ན་ནུ་མའི་རྩ་རོ་ཧི་ཏ་ཞེས་བྱ་བའི་གནད་ཡོད་དོ། །དེ་དག་གང་ཡང་རུང་བར་མཚོན་གྱིས་ཕོག་ན་ཁྲག་དང་བད་ཀན་ལྟོ་བའི་ནང་དུ་ཞུགས་ནས་འཆི་བར་བྱེད་དོ། །
[77b.6]བྲང་གི་ངོས་ན་ཨ་པ་སྟམ་བྷ་ཞེས་བྱ་བ་རླུང་རྒྱུ་བའི་གནད་གཉིས་ཡོད་དོ། །དེར་མཚོན་གྱིས་ཕོག་ན་ལྟོ་བ་ཁྲག་གིས་གང་ཞིང་ལུད་པ་དང་། དབུགས་མི་བདེ་བས་འཆི་བར་བྱེད་དོ། །བྲང་གཡས་གཡོན་གྱི་གནད་གཉིས་བྲང་ཐད་རྒྱབ་ཀྱི་སྒལ་ཚིགས་ཀྱི་ནང་གི་ངོས་གཉིས་ན་ཁ་
[77b.7]ཐུར་དུ་བལྟས་པ། པ་ལ་བ་ཁྱ་ཞེས་བྱ་བའི་གནད་གཉིས་གཉིས་ཡོད་དེ། དེར་མཚོན་གྱིས་ཕོག་ན་ལྟོ་བའི་ནང་དུ་ཁྲག་གིས་གང་ཞིང་དེ་ཉིད་རྣག་ཏུ་གྱུར་ཏེ་འཆི་བར་བྱེད་དོ། །སྒལ་ཚིགས་ཀྱི་ངོས་གཉིས་ཀྱི་སྟ་ཟུར་གྱི་རྣ་བ། རྐུབ་ཚོས་གཉིས་ཀྱི་གོང་ན་ཀ་ཏི་ཀ་ཏ་རུ་ཞེས་བྱ་བའི་གནད་གཉིས་
[78a]
[78a.1]ཡོད་དེ། དེ་གཉིས་སུ་མཚོན་ཕོག་ན་སྐྱེས་བུ་དེ་ཁྲག་ཟད་ཅིང་སྐྱ་བོར་འགྱུར་ལ་མདོག་མདངས་ཉམས་ཤིང་འཆི་བར་འགྱུར་རོ། །སྒལ་ཚིགས་ཀྱི་ངོས་གཉིས་རྐེད་པའི་རྒྱབ་ཕྱོགས་ཀྱི་མཚམས་ན་ཀུ་ཀུན་ད་ར་ཞེས་བྱ་བའི་གནད་གཉིས་ཡོད་དེ། དེར་མཚོན་གྱིས་
[78a.2]ཕོག་ན་ལུས་ཀྱི་སྤྱོད་པ་ཉམས་ཤིང་རོ་སྨད་འཆལ་བ་དང་། ཚོར་བ་མེད་པར་འགྱུར་རོ། །སྟ་ཟུར་གཉིས་ཀྱི་རྣ་བའི་གོང་རྩིབས་ལོགས་གཉིས་ཀྱི་འོག་རྐེད་པའི་ཤ་ལ་སོགས་པའི་ནང་ན་ནི་ཏམ་པ་ཞེས་བྱ་བའི་གནད་ཡོད་དེ། དེ་ཡང་རུས་པ་སྙི་བ་ན་གནས་ལ་དེར་མཚོན་གྱིས་ཕོག་ན་རོ་
[78a.3]སྨད་སྐྲངས་ཤིང་ལུས་ཉམ་ཆུང་ལ་འཆི་བར་བྱེད་དོ། །རྩིབ་མའི་འོག་ལོགས་ཀྱི་ནང་དང་འབྲེལ་བའི་རྐེད་པའི་གཡས་གཡོན་གཉིས་ན་ཐད་ཀ་དྲང་པོ་དང་། གྱེན་དུ་འགྲོ་བའི་གནད་རྩིབ་ལོགས་ཀྱི་མཚམས་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་ལྟོ་བ་ཁྲག་གིས་གང་ཞིང་
[78a.4]འཆི་བར་འགྱུར་རོ། །ནུ་མ་གཉིས་ཀྱི་རྩ་བའི་བྲང་ཐད་ཀྱི་རྒྱབ་ཀྱི་སྒལ་ཚིགས་ཀྱི་ངོས་གཉིས་ན་བརྟེན་པའི་རྩ་ཆེན་པོ་ཞེས་བྱ་བའི་གནད་གཉིས་ཡོད་དེ། དེར་མཚོན་གྱིས་ཕོག་ན་ཁྲག་ཟད་ནས་འཆི་བར་བྱེད་དོ། །དཔུང་མགོ་དང་འབྲེལ་བའི་སྒལ་ཚིགས་ཀྱི་ངོས་གཉིས་ན་ཨན་ས་ཡོ་
[78a.5]ཕ་ལ་ཀ་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་དཔུང་བ་སྐམ་ཞིང་ཚོར་བ་མེད་པར་འགྱུར་རོ། །མགྲིན་པའི་ངོས་གཉིས་དང་དཔུང་མགོ་དང་ཕྲག་པར་འབྲེལ་བའི་དབུས་ན་ཕྲག་པའི་གནད་ཅེས་བྱ་བ་ཡོད་དེ། དེར་མཚོན་གྱིས་ཕོག་ན་ལག་ངར་རེངས་ཏེ་བསྐུམ་མི་ཤེས་པར་འགྱུར་
[78a.6]རོ། །མིད་པའི་གཡས་གཡོན་གཉིས་ན་འགྲམ་པ་ལ་བརྟེན་པའི་རྩ་གཉིས་གཉིས་ཡོད་དེ། དེ་ཡང་སྔོན་པོ་ཞེས་བྱ་བ་དང་མ་ནྱ་ཞེས་བྱ་བ་གཉིས་ཡོད་དེ། བཞི་པོ་དེ་དག་གནད་དུ་བལྟ་སྟེ། དེར་མཚོན་གྱིས་ཕོག་ན་སྐད་ཉམས་པར་འགྱུར་བ་དང་། རོ་མི་ཚོར་བར་འགྱུར་རོ། །མིད་པའི་
[78a.7]གཡས་གཡོན་ནས་ལྕེ་དང་སྣར་འགྲོ་བའི་རྩ་བཞི་ཡོད་དེ། དེ་ནི་མ་ཏྲི་ཀ་ཞེས་བྱ་བའི་རྩའི་གནད་ཡིན་ཏེ། དེར་མཚོན་གྱིས་ཕོག་ན་དེ་མ་ཐག་སྲོག་འཇོམས་པའོ། །མགོ་དང་མགྲིན་པའི་ཚིགས་ཀྱི་ངོས་ན་ལྟག་པ་ཞེས་བྱ་བའི་གནད་རེ་རེ་ཡོད་དེ། དེར་མཚོན་གྱིས་ཕོག་ན་རྟག་ཏུ་མགོ་འདར་བར་
[78b]
[78b.1]འགྱུར་རོ། །རྣ་མཆོག་གཉིས་ཀྱི་སྟེང་དྲང་ཐད་ན་བྱི་རུ་ར་ཞེས་བྱ་བའི་རྩ་མཐོ་དམན་དུ་འདུག་པའི་གནད་རེ་རེ་ཡོད་དེ། དེར་མཚོན་གྱིས་ཕོག་ན་ཐོས་པ་ཉམས་ཏེ་འོན་པར་འགྱུར་རོ། །སྣའི་ལམ་ན་རྣ་བའི་ངོས་གཉིས་སུ་ཞུགས་ཏེ་མགྲིན་པའི་ནང་དུ་འབྲེལ་བའི་རྩ་དེ་བཀ་ཞེས་བྱ་བའི་གནད་གཉིས་
[78b.2]ཡོད་དེ། དེར་མཚོན་གྱིས་ཕོག་ན་དྲི་མི་ཚོར་བར་བྱེད་དོ། །མིག་གཉིས་ཀྱི་གྲྭ་སྨིན་མའི་མཇུག་གི་མཐའ་ན་མིག་བསྲུང་ཞེས་བྱ་བའི་གནད་རེ་རེ་དང་། སྨིན་མའི་སྟེང་གཤོང་བུར་འདུག་པའི་ནང་ན་འཁྱིལ་པ་ཞེས་བྱ་བའི་གནད་གཉིས་ཏེ་བཞི་པོ་དེ་དག་ལ་མཚོན་ལ་སོགས་པ་ཕོག་ན་ལོང་བར་འགྱུར་རོ། །དཔྲལ་
[78b.3]བའི་མཐའ་རྣ་བ་དང་ཉེ་བ་ན་མུར་འགྲམ་ཞེས་བྱ་བའི་གནད་རེ་རེ་ཡོད་དེ། དེར་མཚོན་གྱིས་ཕོག་ན་འཕྲལ་འཆི་བར་བྱེད་དོ། །མུར་འགྲམ་གྱི་གོང་སྐྲ་མཚམས་ན་ཨུད་ཤྐེ་པ་ཞེས་བྱ་བའི་གནད་རེ་རེ་དང་། སྨིན་མའི་དབུས་ན་སྟམ་བྷ་ནི་ཞེས་བྱ་བའི་གནད་རེ་རེ་ཡོད་དེ། དེར་མཚོན་གྱིས་ཕོག་ན་ཟུག་རྔུ་མ་
[78b.4]ཕྱུང་སྟེ་རང་སྨིན་ནས་བྱུང་བ་ནི་འཚོ་བར་འགྱུར་ལ། ཟུག་རྔུ་བྱུང་ན་ནི་དེ་མ་ཐག་འཆིའོ། །ལྕེ་དང་། མིག་དང་། སྣ་དང་། རྣ་བ་དང་། དེ་བཞིའི་རྩའི་རྒྱུན་སྲང་ནི་ཁའི་ནང་རྐན་གྱི་ཕྱོགས་སུ་འདུག་ཏེ་བཞི་པོ་དེ་དང་འབྲེལ་བའི་གནད་སུམ་མདོ་ཞེས་བྱ་བ་ཡོད་དོ། །དེ་རྣམས་ལ་མཚོན་གྱིས་ཕོག་ན་
[78b.5]འཕྲལ་ཚེའི་མཐར་གཏུགས་པ་ཡིན་ནོ། །མགོའི་ཐོད་པ་ལ་ཐད་ཀ་དང་ཐུར་དུ་འགྲོ་བའི་ཚིགས་ལྔ་ཡོད་དེ། དེ་རྣམས་ཀྱང་སྐྲ་མཚམས་ཞེས་བྱ་བའི་གནད་ཡིན་པས། དེ་ལ་མཚོན་གྱིས་ཕོག་ན་མགོ་འཁོར་བ་དང་། སྨྱོ་བ་དང་། དྲན་པ་ཉམས་ཏེ་འཆི་བར་འགྱུར་རོ། །གླད་པའི་སྟེང་ཕྱོགས་
[78b.6]སུ་འཁྱིལ་ཞིང་རྩ་ཐམས་ཅད་འདུས་པའི་ནང་ན་བདག་པོ་ཞེས་བྱ་བའི་གནད་ཡོད་དེ། དེར་མཚོན་གྱིས་ཕོག་ན་དེ་མ་ཐག་སྲོག་འཇོམས་པར་བྱེད་དོ། །ལུས་ཀྱི་གནད་ཕྱིའི་མཚན་ཉིད་ནི་གང་དུ་མནན་ན་མི་བཟོད་པར་ན་ཞིང་འགུལ་བ་དང་། སྡུག་བསྔལ་དང་བཅས་པ་གང་ཡིན་པ་སྟེ་དེ་ཡང་གནད་
[78b.7]ཡིན་པར་བལྟའོ། །གཞན་ཡང་ཤ་དང་། རུས་པ་དང་། རྒྱུས་པ་དང་། རྩ་ཆེན་པོ་དང་། རྩ་དང་། ཚིགས་དང་། འདི་དག་རང་གི་མཚམས་འདུས་པ་ཐམས་ཅད་ལ་གནད་ཅེས་བྱ་སྟེ། དེ་དག་མཚོན་ལ་སོགས་པས་ཕོག་ན་ཁྱད་པར་དུ་སྲོག་འགག་པའི་རྒྱུ་ཡིན་ནོ། །དེ་ལྟར་གང་དུ་
[79a]
[79a.1]གནད་ཀྱི་བྱེ་བྲག་ཕལ་ཆེར་རྗེས་སུ་བསྟན་པ་ཡང་ཤ་ལ་སོགས་པ་ལ་བརྟེན་པའི་གནད་རྣམ་པ་དྲུག་ཏུ་བརྟག་པར་བྱ་བ་ཡིན་ནོ། །སྲོག་ཅེས་བྱ་བ་ནི་གནད་ཐམས་ཅད་ཀྱི་སྤྱིའི་གནས་སུ་མཉམ་སྟེ་གཅིག་པར་འདོད་དོ། །རྣམ་པ་དྲུག་ཏུ་བརྟག་བདེ་གང་ཞེ་ན། ཤ་ལ་
[79a.2]གནས་པའི་གནད་བཅུ་སྟེ། དབང་པོའི་ཆུ་སོ་ཞེས་བྱ་བའི་གནད་བཞི་དང་། རྐང་མཐིལ་འཕྲོག་པ་ཞེས་བྱ་བའི་གནད་བཞི་དང་། ནུ་མའི་རྩ་བ་རོ་ཧ་ཏི་ཞེས་བྱ་བ་གནད་གཉིས་ཏེ་བཅུའོ། །རུས་བ་ལ་གནད་བརྒྱད་དེ། མུར་འགྲམ་ཞེས་བྱ་བའི་གནད་གཉིས་དང་། ཀ་ཊི་ཏ་རུ་ན་ཞེས་བྱ་བའི་གནད་
[79a.3]གཉིས་དང་། ནི་ཏམ་པ་ཞེས་བྱ་བའི་གནད་གཉིས་དང་། ཨན་ས་ཡོ་ཕ་ལ་ཞེས་བྱ་བའི་གནད་གཉིས་སོ། །རྒྱུས་པའི་གནད་ཉི་ཤུ་རྩ་གསུམ་སྟེ། ཨ་ས་ན་ཞེས་བྱ་བའི་གནད་བཞི་དང་། པིར་ལྟ་བུ་ཞེས་བྱ་བའི་གནད་བཞི་དང་། པིར་མགོ་ཞེས་བྱ་བ་བཞི་དང་། མིག་ཟུར་ཞེས་བྱ་བའི་གནད་གཉིས་དང་། རྒྱ་ཚིགས་ཞེས་བྱ་བ་བཞི་དང་།
[79a.4]མྱུར་བ་ཞེས་བྱ་བའི་གནད་གཉིས་དང་། ཨུད་ཤྐེ་པ་ཞེས་བྱ་བའི་གནད་གཉིས་དང་། ཆུ་སོ་ཞེས་བྱ་བའི་གནད་གཅིག་གོ། །རྩ་ཆེན་པོའི་གནད་དགུ་སྟེ། གཞང་ཞེས་བྱ་བའི་གནད་གཅིག་དང་། ཨ་པ་སྟམ་བྷ་ཞེས་བྱ་བའི་གནད་གཉིས་དང་། བི་དུར་ཞེས་བྱ་བའི་གནད་གཉིས་དང་།
[79a.5]སུམ་མདོ་ཞེས་བྱ་བའི་གནད་བཞིའོ། །རྩ་ལ་གནད་སུམ་ཅུ་རྩ་བདུན་མཆིས་ཏེ། རྩ་ཆེན་པོ་ཞེས་བྱ་བ་གཉིས་དང་། མ་ཀྲྀ་ཏ་ཞེས་བྱ་བའི་གནད་བརྒྱད་དང་། སྔོན་པོ་ཞེས་བྱ་བ་གཉིས་དང་། མ་ནྱ་ཞེས་བྱ་བ་གཉིས་དང་། མཆན་ཁུང་འཛིན་པ་ཞེས་བྱ་བའི་གཉིས་དང་། གདེངས་
[79a.6]ཀ་ཞེས་བྱ་བ་གཉིས་དང་། པ་ད་པ་ཞེས་བྱ་བའི་གནད་གཉིས་དང་། སྙིང་ཞེས་བྱ་བའི་གནད་གཉིས་དང་། ལྟེ་བ་ཞེས་བྱ་བའི་གནད་གཅིག་དང་། རྩིབ་ལོགས་ཀྱི་མཚམས་ཞེས་བྱ་བ་གཉིས་དང་། ནུ་མ་འཛིན་པ་ཞེས་བྱ་བ་གཉིས་དང་། ཨ་ལ་པོའི་གནད་གཉིས་དང་། བསྟི་ནི་
[79a.7]ཞེས་བྱ་པའི་གནད་གཉིས་དང་། ཨུར་པ་ཤི་ཞེས་བྱ་བའི་གནད་གཉིས་དང་། ལོ་ཧི་ཏ་ཞེས་བྱ་བའི་གནད་བཞིའོ། །ཚིགས་ལ་གནད་ཉི་ཤུ་བརྟེན་ཏེ། འཁྱིལ་བ་ཞེས་བྱ་བའི་གནད་གཉིས་དང་། མཁྲིག་མ་ཞེས་བྱ་བའི་གནད་གཉིས་དང་། ཀུ་ཀུན་ད་ར་ཞེས་བྱ་བ་གཉིས་དང་། སྐྲ་མཚམས་ཞེས་བྱ་
[79b]
[79b.1]བ་ལྔ་དང་། གྲུ་མོ་ཞེས་བྱ་བ་གཉིས་དང་། ལོང་མོ་ཞེས་བྱ་བ་གཉིས་དང་། ལྟག་པ་ཞེས་བྱ་བ་གཉིས་དང་། བདག་པོ་ཞེས་བྱ་བ་གཉིས་དང་། པུས་མོ་ཞེས་བྱ་བ་གཉིས་དང་ཉི་ཤུའོ། །སྨན་པ་གཞན་དག་ན་རེ། ཤ་ལ་བརྟེན་པའི་གནད་དང་། རྒྱུས་པ་ལ་བརྟེན་པའི་
[79b.2]གནད་དང་། གཞང་ཞེས་བྱ་བའི་གནད་དང་། མཆན་ཁུང་འཛིན་པ་ཞེས་བྱ་བའི་གནད་དང་། བི་དྲི་པོ་ཞེས་བྱ་བའི་གནད་དང་། བི་དུ་ར་ཞེས་བྱ་བའི་གནད་དང་། སུམ་མདོ་ཞེས་བྱ་བའི་གནད་དང་། རྩ་ལ་བརྟེན་པའི་གནད་རྣམས་དང་། ཨ་པ་སྟམ་བྷ་ཞེས་བྱ་བའི་གནད་དང་།
[79b.3]མིག་ཕུག་ཅེས་བྱ་བའི་གནད་དང་། རྩ་ཆེན་པོ་ལ་གནས་པའི་གནད་རྣམས་འབའ་ཞིག་མ་གཏོགས་པ་གོང་དུ་སྨོས་པའི་གནད་དེ་དག་གང་ཡང་རུང་བ་ལ་མཚོན་གྱིས་ཕོག་པར་ནུས་ན། རྟག་ཏུ་རྒྱུན་མི་ཆད་པར་ཤ་བཀྲུས་པ་འདྲ་བའི་ཆུ་ཤིན་ཏུ་སླ་བ་འཛག་ཅིང་ལུས་ཤ་སྐྱ་བོ་བསེང་པོར་གྱུར་པ་དབང་པོ་
[79b.4]ཉམས་ཤིང་མྱུར་དུ་འཆི་བར་བྱེད་དོ། །རུས་པ་ལ་གནས་པའི་གནད་གང་ཡང་རུང་བ་མཚོན་གྱིས་ཕོག་ན། ཁྲག་ཤིན་ཏུ་སླ་བ་རྐང་དང་བཅས་པ་འབྱུང་བར་འགྱུར་རོ། །རྒྱུས་པའི་གནད་ལ་མཚོན་གྱིས་ཕོག་ན་ལྟག་པར་ན་བ་དང་། བརྐྱང་བསྐུམ་མི་ཤེས་པ་དང་། བཞོན་པ་ལ་ཞོན་པའི་ནུས་
[79b.5]པ་མེད་པ་དང་། གནས་ལ་མི་དགའ་བ་དང་། ལུས་གྲིམས་པ་ཆུང་བ་དང་། ཡང་ན་འཆི་བར་འགྱུར་རོ། །རྩ་ཆེན་པོའི་གནད་ལ་མཚོན་གྱིས་ཕོག་ན་ཁྲག་སྒྲ་དང་བཅས་ཤིང་དབུ་བ་ཡོད་ལ། ཁྲག་ཚ་ཞིང་དྲན་པ་ཉམས་པར་འགྱུར་རོ། །རྩའི་གནད་ལ་མཚོན་གྱིས་ཕོག་ན་ཁྲག་སྐ་ཞིང་མང་
[79b.6]བ་རྒྱུན་མི་ཆད་པར་ཟག་སྟེ། ཁྲག་ཟད་པས་སྐོམ་དད་ཆེ་བ་དང་། མགོ་འཁོར་བ་དང་། དབུགས་མི་བདེ་བ་དང་། རྨོངས་བག་ཏུ་འདུག་པ་དང་། སྐྱིགས་བུ་རྣམས་ཀྱིས་འདེབས་ཤིང་དུས་བྱེད་པར་འགྱུར་རོ། །གལ་ཏེ་རྨ་འདྲུབས་ན་ཡང་ལུས་གྲ་མས་གང་བ་སྙམ་བྱེད་ཅིང་འཐེང་བ་དང་
[79b.7]གྱོལ་པོར་འགྱུར་རོ། །ཚིགས་ཀྱི་གནད་ལ་མཚོན་གྱིས་ཕོག་ན་ལུས་ཀྱི་སྟོབས་དང་། སྤྱོད་པ་ཉམས་ཤིང་ལུས་སྐེམས་པ་དང་། ཚིགས་རྣམས་སྐྲང་བར་འགྱུར་རོ། །གཞན་ཡང་བཅུ་དགུ་པོ་འདི་དག་ནི་འཕྲལ་འཆི་བར་བྱེད་པའི་གནད་ཡིན་ཏེ། ལྟེ་བའི་གནད་དང་། མུར་འགྲམ་
[80a]
[80a.1]གྱི་གནད་དང་། བདག་པོའི་གནད་དང་། གཞང་གི་གནད་དང་། སྙིང་གི་གནད་དང་། པུས་མོའི་གནད་དང་། ཆུ་སོའི་གནད་དང་། མ་ཀྲྀ་ཏའི་གནད་རྣམས་ཡིན་ཏེ། དེ་དག་ཏུ་མཚོན་གྱིས་ཕོག་ནས་འཕྲལ་མི་འཆི་ན་ཡང་། ཞག་བདུན་ཚུན་ཆད་ཀྱིས་ངེས་
[80a.2]པར་འཆིའོ། །འཕྲལ་མི་འཆི་བར་ཟླ་བ་གཅིག་གམ་ཟླ་བ་ཕྱེད་ཀྱི་ནང་དུ་འཆི་བའི་གནད་ནི་སུམ་ཅུ་རྩ་གསུམ་སྟེ། ཨ་པ་སྟམ་བྷ་ཞེས་བྱ་བའི་གནད་དང་། རྐང་མཐིལ་སྲེག་པའི་གནད་དང་། རྩིབ་ལོགས་ཀྱི་མཚམས་ཀྱི་གནད་དང་། ཀ་ཊི་ཏ་རུ་ཞེས་བྱ་བའི་གནད་དང་། སྐྲ་མཚམས་ཀྱི་
[80a.3]གནད་དང་། ནུ་མའི་རྩའི་གནད་དང་། དབང་པོའི་ཆུ་སོའི་གནད་དང་། མྱུར་བ་ཞེས་བྱ་བའི་གནད་དང་། ཨ་པ་ལའི་གནད་དང་། རྩ་ཆེན་པོའི་གནད་དང་། ནི་ཏམ་པའི་གནད་དང་། སྟ་ན་རོ་ཧི་ཏ་ཞེས་བྱ་བའི་གནད་རྣམས་སོ། །གནད་གསུམ་པོ་ཨུད་ཤྐེ་ཞེས་བྱ་བ་གཉིས་དང་། སྟན་པ་ནི་ཞེས་བྱ་
[80a.4]བ་དང་གསུམ་ནི་མཚོན་ཕྱུང་ན་ནི་འཆི་ལ། མ་ཕྱུང་ན་ནི་མི་འཆིའོ་ཞེས་བཤད་དེ། དེ་ཡང་རླུང་གིས་ཤ་དང་། ཞག་དང་། རྐང་དང་། གླད་རྒྱས་རྣམས་སྐེམ་པར་བྱེད་དོ། །གལ་ཏེ་ཐབས་མ་ཡིན་པས་མཚོན་དེ་ཕྱུང་ན་ནི་དབུགས་མི་བདེ་བ་དང་ལུད་པས་སྲོག་འདོར་བར་བྱེད་དོ། །གནད་
[80a.5]བཞི་བཅུ་རྩ་བཞི་པོ་འདི་དག་ཏུ་མཚོན་གྱིས་ཕོག་ན་འཐེང་འགྲུམ་ལ་སོགས་པར་འགྱུར་གྱི་འཆི་བར་བྱེད་པ་ནི་མ་ཡིན་ཏེ་གློ་བུར་གྱི་གནོད་པས་བརྒྱ་ལ་འཆི་བ་ཡང་སྲིད་དོ། །བཞི་བཅུ་རྩ་བཞི་པོ་དེ་ཡང་གང་ཞེ་ན། གདེངས་ཀ་ཞེས་བྱ་བའི་གནད་དང་། མུར་འགྲམ་གྱི་ཕྱོགས་ཀྱི་གནད་དང་།
[80a.6]མུར་འགྲམ་ཕྱོགས་ཀྱི་མིག་ཟུར་གྱི་གནད་དང་། བི་དུ་རའི་གནད་དང་། སྔོན་པོ་ཞེས་བྱ་བའི་གནད་དང་། མ་ནེའི་གནད་དང་། ལྟག་པའི་གནད་དང་། ཕྲག་པའི་གནད་དང་། འཁྱིལ་པ་ཞེས་བྱ་བའི་གནད་དང་། བི་ཊ་བོ་ཞེས་བྱ་བའི་གནད་དང་། ཨུར་པ་ཤི་ཞེས་བྱ་བའི་གནད་དང་།
[80a.7]ཀུ་ཀུན་ད་རའི་གནད་དང་། པུས་མོའི་གནད་དང་། མིག་དམར་པོའི་གནད་དང་། མཆན་ཁུང་འཛིན་པའི་གནད་དང་། པིར་ལྟ་བུའི་གནད་དང་། གྲུ་མོའི་གནད་རྣམས་སོ། །གནད་བརྒྱད་པོ་འདི་དག་ནི་ན་ཞིང་སྡུག་བསྔལ་བར་བྱེད་པ་སྟེ། དེ་ཡང་གང་ཞེ་ན། པིར་མགོ་ལྟ་བུའི་གནད་
[80b]
[80b.1]དང་། ལོང་མོའི་གནད་དང་། མཁྲིག་མའི་གནད་རྣམས་སོ། །གནད་གོང་དུ་སྨོས་པ་དེ་རྣམས་ལས་པི་ཏི་པ་དང་། མཆན་ཁུང་འཛིན་པ་དང་། པིར་མགོ་ལྟ་བུ་དང་། ཨ་ས་ཕ་ལ་དེ་རྣམས་ཀྱི་ཚད་ནི་སོར་རེ་རེ་ཙམ་ཡོད་དོ། །མཁྲིག་མའི་གནད་དང་། ལོང་མོའི་གནད་དང་།
[80b.2]ནུ་མའི་རྩ་བའི་གནད་ལ་སོར་གཉིས་ཀྱི་ཚད་དུ་ཡོད་དོ། །པུས་མོ་དང་གྲུ་མོ་གཉིས་ཀྱི་གནད་ལ་སོར་གསུམ་གསུམ་གྱི་ཚད་དུ་ཡོད་དོ། །གཞང་གི་གནད་དང་། ཆུ་སོ་དང་། སྙིང་དང་། ལྟེ་བ་དང་། སྔོན་པོ་ཞེས་བྱ་བ་དང་། སྐྲ་མཚམས་ཀྱི་གནད་དང་། མ་ཀྲྀ་ཏ་དང་། པིར་ལྟ་བུ་
[80b.3]དང་། སུམ་མདོ་ཞེས་བྱ་བ་དང་། མ་ནེ་ཡ་ཞེས་བྱ་བ་དང་། དེ་རྣམས་ཀྱི་གནད་ཉི་ཤུ་རྩ་དགུ་ནི་རང་གི་ལག་པའི་མཐིལ་གྱི་ཚད་ཙམ་རེ་རེ་ཡོད་དོ། །ལྷག་མ་ལྔ་བཅུ་རྩ་དྲུག་པོ་རྣམས་ནི་སོར་ཕྱེད་ཕྱེད་ཀྱི་ཚད་ཙམ་ཡོད་དོ། །སློབ་དཔོན་གཞན་དག་ན་རེ་གནད་ལྔ་བཅུ་རྩ་དྲུག་པོ་དེ་དག་
[80b.4]གི་ཚད་ནི་ཏིལ་འབྲུ་འམ། འབྲས་ཀྱི་ཚད་ཙམ་ཡོད་དོ་ཞེས་ཟེར་རོ། །གོང་དུ་རླུང་དང་། མཁྲིས་པ་དང་། བད་ཀན་དང་། ཁྲག་རྒྱུ་བའི་རྩ་བཞིར་བཤད་པ་དེ་དག་གི་ལུས་ཐམས་ཅད་བརྟས་པར་བྱེད་པ་ཡིན་ཏེ། དེ་ཡང་གནད་རྣམས་ལ་བརྟེན་པས་གལ་ཏེ་དེར་མཚོན་གྱིས་ཕོག་སྟེ་
[80b.5]ཁྲག་ཟད་པར་གྱུར་ན་ལུས་ཟུངས་ཟད་དེ་རྩའི་སྦུབས་རླུང་གིས་གང་ཞིང་རྒྱས་ནས་མི་བཟད་པར་ན་བར་བྱེད་པ་ཡིན་ལ། རླུང་དེས་མཁྲིས་པ་བསྐྱོད་པས་ནི་ཁ་སྐམ་པ་དང་། སྐོམ་དད་ཆེ་བ་དང་། མྱོས་པ་དང་། མགོ་འཁོར་བ་དང་། ལུས་རྔུལ་བ་དང་། ཚིགས་རྣམས་བྱེ་བ་དང་ལུས་ལྷོད་པར་
[80b.6]འགྱུར་ཏེ་འཆི་བར་འགྱུར་རོ། །ཇི་སྟེ་གནད་ཀྱི་ཚིགས་མཚོན་ལ་སོགས་པས་ཚོད་པར་གྱུར་ན། དེ་མ་ཐག་ལག་པའམ་རྐང་པས་གོང་འོག་ནས་དམ་དུ་བསྡམ་ཞིང་གཟུང་བར་བྱའོ། །གལ་ཏེ་མ་བཟུང་ན་ནི་རྩ་རྣམས་གོང་འོག་ཏུ་འཁུམས་པར་འགྱུར་རོ། །དེ་ལ་སེམས་ཅན་རྣམས་ཀྱི་འཚོ་
[80b.7]བ་ནི་ཁྲག་ལ་རག་ལས་པ་ཡིན་ཏེ། ཁྲག་ལེགས་པར་གནས་ཤིང་རྒྱུ་ན་ནི་སྲོག་ཀྱང་ལེགས་པར་གནས་པ་ཡིན་ནོ། །དེ་ལྟ་བས་ན་གནད་ལ་མ་ཕོག་ན་ནི་མཚོན་དུ་མས་བསྣུན་ཀྱང་འཆི་བར་མི་འགྱུར་ཞིང་། གནད་ལ་ཕོག་ན་ནི་ངེས་པར་འཆི་བར་འགྱུར་ལ། ཚབས་ཆུང་ངུ་བསྣུན་ཀྱང་ཞ་བ་ལ་སོགས་པར་
[81a]
[81a.1]བལྟའོ། །གཞན་ཡང་གནད་དུ་བསྣུན་པའི་རྨ་ཅན་གྱི་སྐྱེས་བུའི་དྲུང་དུ་ཐལ་སྨན་རྣོན་པོ་དང་། དུག་དང་། མེ་དང་། བ་ལ་ཏ་ཀ་དང་། ཀ་པིཏྠའི་ཁུ་བ་དང་འདི་རྣམས་མི་བསྟེན་ཅིང་སྤང་བར་བྱའོ། །གནད་དུ་ཕོག་པའི་རྨ་ལ་ནི་ཉེས་པ་ཕྲ་མོས་ཀྱང་གནོད་པར་འགྱུར་བར་བག་བྱ་བར་
[81a.2]གཅེས་སོ། །གནད་དུ་མཚོན་གྱིས་བསྣུན་པར་ཡང་མ་ཟད་དེ། གནད་ཀྱི་སྟེང་དུ་ནི་གང་ཡང་རུང་བ་གཞན་བྱུང་ན་ཡང་ཉེན་དང་བཅས་པ་ཡིན་པས་འབད་པ་དང་བཅས་པར་གསོ་བར་བྱའོ། །ལུས་ཀྱི་གནས་ལས་གནད་ཀྱི་བྱེ་བྲག་བསྟན་པའི་ལེའུ་བཞི་པ་རྫོགས་སོ།། །།
[81a.3]དེ་ནས་ལུས་ཀྱིས་འགྱུར་བའི་བྱེ་བྲག་ལས་འཆི་ལྟས་བརྟག་པའི་ལེའུ་བཤད་པར་བྱའོ། །དེ་ལ་མིའི་གནད་རྣམས་ལ་ནད་ཀྱིས་ཕོག་པ་ལས་ཕྱི་རོལ་དུ་འཆི་བའི་མཚན་མ་སྣང་བ་ཡིན་ཏེ། དཔེར་ན་འབྲས་བུའི་སྔ་རྟགས་མེ་ཏོག་དང་། ཆར་གྱི་སྔ་རྟགས་སྤྲིན་དང་། མེའི་སྔ་རྟགས་དུ་བ་ཡིན་པ་བཞིན་
[81a.4]དུ་སྐྱེས་བུ་འཆི་བར་འགྱུར་བའི་སྔ་རྟགས་སམ་མཚན་མ་ཡང་སྔོན་དུ་སྣང་སྟེ། དེ་བས་ན་འོག་ཏུ་འབྱུང་བ་འདི་དག་གིས་རྟོགས་པར་བྱའོ། །དེ་ཡང་འཆི་བའི་རྟགས་འདི་དག་དང་ལྡན་ན་ནི་ངེས་པར་འཆི་བར་འགྱུར་ལ། མི་ལྡན་ན་ནི་འཆི་བར་མི་འགྱུར་རོ། །ཅི་སྟེ་སྨན་པས་གཞུང་ལས་འབྱུང་བ་
[81a.5]བཞིན་ཤེས་ན་ནི་འཆི་ལྟས་ངེས་པ་ཡིན་ལ། གལ་ཏེ་མི་མཁས་པའམ། མ་བརྟགས་པའམ། རྩིང་པོ་རྣམས་ཀྱིས་ནི་ངེས་པར་མི་གཟུང་ངོ་། །དེ་ལ་སྨན་པ་ཁ་ཅིག་ན་རེ་ནད་པ་དང་འཆི་ལྟས་གཉིས་ནི་རྟེན་དང་བརྟེན་པའི་ཚུལ་དུ་གནས་ཏེ། འཆི་ལྟས་འབྱུང་བ་ཡང་ནད་རྣམས་ཤས་ཆེར་
[81a.6]འཁྲུགས་པ་ལས་ཕྱི་རོལ་དུ་སྣང་སྟེ། གལ་ཏེ་ནད་ཞི་ན་ནི་འཆི་ལྟས་ཀྱང་མི་འབྱུང་ལ། མ་ཞི་བཞིན་དུ་འཆི་རྟགས་དང་ལྡན་ན་ནི་ངེས་པར་འཆིའོ། །འཆི་ལྟས་ཀྱི་འགྱུར་བའི་འོག་ནས་འབྱུང་བའི་མཚན་མ་འདི་དག་གིས་རྟོགས་པར་བྱའོ། །དེ་ལ་ཟུངས་ཀྱི་རྣམ་པ་དང་། མིག་ལ་
[81a.7]སོགས་པའི་དབང་པོ་དང་། སྐད་ཀྱི་ང་རོ་དང་། འབྱུང་བ་ཆེན་པོ་ལྔའི་རང་བཞིན་ལ་རྟོག་པ་དང་། ཉི་མ་དང་། མེ་ལོང་དང་། ཆུ་ལ་སོགས་པའི་ནང་དུ་གྲིབ་མའི་རྟགས་དང་། གཞན་ཡང་ལུས་ངག་ཡིད་གསུམ་གྱི་སྒོ་ནས་བྱ་བ་དང་བྱེད་པ་སྣ་ཚོགས་རང་བཞིན་གྱི་སྤྱོད་པ་ལས་
[81b]
[81b.1]ཡོངས་སུ་ཉམས་ཏེ། གནས་སྐབས་གཞན་དུ་འགྱུར་བ་ནི་འཆི་བའི་རྟགས་སུ་བསྟན་ཏོ། །སྐྱེས་བུ་གང་གི་སྐྲ་དང་བ་སྤུ་ལ་སྣུམ་གྱིས་མ་བསྐུས་བཞིན་དུ་སྣུམ་པར་འདུག་པ་དང་། མིག་ཤིན་ཏུ་འགུལ་བ་དང་། མིག་མི་འཛུམས་པར་འབྲུ་ཚུགས་སུ་ལྟ་བ་དང་། ཡང་ན་
[81b.2]མིག་ཕུགས་སུ་ཞུགས་ན་ཡང་ཕྱིར་འབྱུང་བ་དང་། མིག་ཡ་ཡོར་འདུག་པ་དང་། མིག་སྐྲངས་པ་དང་། མིག་ཆུང་ངུར་འགྱུར་བ་དང་། དེ་བཞིན་དུ་སྨིན་མ་རིང་བ་དང་། སྨིན་མ་ཞུམ་པར་འགྱུར་བ་དང་། རྟབས་མིག་ཏུ་ལྟ་བ་དང་། ཡང་ན་དམན་པར་ལྟ་བ་དང་། བྲི་བ་དང་སྲེ་
[81b.3]མོའི་མིག་བཞིན་དུ་དམར་བ་དང་། མགལ་མེའི་འཁོར་ལོ་འདྲ་ཞིང་དམར་བ་དང་། རྒྱུ་མེད་པར་མཆི་མ་འཛག་པ་དང་། རྫི་མ་འཁྲུགས་པ་དང་། དེ་བཞིན་དུ་སྣ་ཆེན་པོར་འགྱུར་བ་དང་། ཡང་ན་ཞོམ་པར་འགྱུར་བ་དང་། འབྲུམ་བུ་ཕྲ་མོས་ཁྱབ་པར་འགྱུར་བ་དང་། སྐྲང་བར་འགྱུར་
[81b.4]བ་དང་། སྣ་འགགས་པ་དང་། སྣའི་ནང་སྐམས་པ་དང་། མ་མཆུ་འཕྱངས་པ་དང་། ཡ་མཆུ་ལྡོག་པ་དང་། རང་བཞིན་གྱི་མདོག་ལས་ཉམས་ཏེ་འཛམ་བུའི་འབྲས་བུ་སྨིན་པ་བཞིན་དུ་དམར་པོར་གྱུར་པ་དང་། ཡང་ན་མདོག་སྔོན་པོར་གྱུར་པ་དང་། སྐྱེས་བུ་གང་གི་སོ་ཤ་ཁ་རའི་
[81b.5]མདོག་ལྟ་བུ་དང་། འཕྲལ་ལ་སོ་སྐྲངས་པ་དང་། སོ་འབྲུལ་བ་དང་། སོ་ནག་སྐྱར་སོང་བ་དང་། དམར་པོ་ཟངས་མདོག་ལྟ་བུ་དང་། མེ་ཏོག་གི་ཐིག་ལེ་ལྟར་འདུག་པ་དང་། འདམ་གྱིས་བསྒོས་པ་ལྟ་བུ་དང་། གང་དག་གི་ལྕེ་ཡ་ཡོར་གྱུར་པ་དང་། ལྕེ་རྟག་ཏུ་ཕྱི་རོལ་དུ་འབྱུང་ཞིང་
[81b.6]ནང་དུ་མི་སྡུད་པ་དང་། སྐྲངས་པ་དང་། སྐམས་པ་དང་། ལྕི་བ་དང་། མདོག་སྣུམ་ནག་ཏུ་སོང་བ་དང་། དྲི་མ་མང་པོས་གཡོགས་པ་དང་། རོ་མི་ཚོར་བ་དང་། ལྕེ་རྩུབ་པ་དང་། མཇིང་པས་མགོ་མི་ཐེག་པ་དང་། བདག་གི་ལུས་ཀྱང་ཁུར་ལྕི་བ་ལྟར་མི་ཐེག་པ་སྙམ་བྱེད།
[81b.7]ཟས་ཁམ་གཅིག་ཀྱང་བདེ་བར་བལྡད་མི་ནུས་པར་གྱུར་ན་དེ་ནི་འཆི་བའི་རྟགས་ཡིན་ནོ། །སྐྱེས་བུ་གང་ལ་རྒྱུ་མེད་པར་ཡན་ལག་རྣམས་ཤིན་ཏུ་ལྕི་བ་དང་། ཡང་ན་ཤིན་ཏུ་ཡང་བ་དང་། དུག་དང་ཁྲག་གི་གཞི་མེད་པར་མིག་ལ་སོགས་པའི་སྒོ་ནས་ཁྲག་འབྱུང་བ་དང་། ཕོ་མཚན་
[82a]
[82a.1]དང་རླིག་པ་གཉིས་རེས་ཀྱི་གཅིག་ནང་དུ་ནུབ་ལ་གཅིག་ཕྱིར་འབྱུང་བ་འདི་ལྟ་བུ་རེས་ཀྱིས་བྱེད་ན་དུག་མ་གཏོགས་པ་ངེས་པར་འཆིའོ། །དེ་ཡན་ཆད་ཀྱི་མཚན་མ་གང་ཡང་རུང་བ་བྱུང་ན་འཆི་བར་འགྱུར་རོ་ཞེས་ཐམས་ཅད་ལ་སྦྱར་རོ། །སྐྱེས་བུ་གང་གི་རྒྱུ་མེད་པར་
[82a.2]དཔྲལ་པ་འམ། ཆུ་སོ་འམ། མགོ་བོ་འདི་གསུམ་ལ་རྩ་ཟླ་བ་ཆོས་པ་ལྟ་བུའི་གཟུགས་ཀྱོག་པོར་གསལ་དུ་སྣང་ན་མི་དེ་ནི་ངེས་པར་ཟླ་བ་དྲུག་ལས་མི་འཚོའོ། །དཔེར་ན་པདྨའི་འདབ་མ་ལ་ཆུ་མི་འཆགས་པ་བཞིན་དུ་སྐྱེས་བུ་གང་གིས་ལུས་ཆུས་བཀྲུས་སམ། རྐྱལ་པའི་ལུས་ལ་ཆུ་མི་
[82a.3]འཆགས་ན་དེ་ཡང་ཟླ་བ་དྲུག་ལས་མི་འཚོབ་ཡིན་ནོ། །རང་གི་ལུས་ལ་སྣུམ་གྱིས་མ་བསྐུས་བཞིན་དུ་སྣུམ་པར་མཐོང་བའམ། སྤྱི་བོ་ནས་དུ་བ་འཐུལ་བར་མཐོང་ན་ནི་ངེས་པར་ཟླ་བ་གཅིག་གི་ནང་དུ་སྲོག་འདོར་བར་འགྱུར་རོ། །སྐྲ་དང་སྨིན་མ་གང་ཡང་རུང་བ་ལས་སྐྲ་མཚམས་རང་བྱེ་
[82a.4]བའམ། སྐྲ་གཙུག་ཏུ་འཁྱིལ་བ་ལྟར་ཀུན་ཏུ་སྣང་ན། དེ་ཡང་ནད་མེད་པ་ཡིན་ན་ནི་ཞག་དྲུག་གིས་འཆི་ལ་ནད་པ་ཡིན་ན་ཞག་གསུམ་གྱིས་འཆིའོ། །སྐྱེས་བུ་གང་གི་ལྕེ་མདོག་གནག་པ་དང་། ཁ་ནས་དྲི་རུལ་བར་འབྱུང་བ་དང་། མིག་གཡོན་པ་ཕུགས་སུ་བྲོས་པ་
[82a.5]དང་། སྤྱི་བོའི་སྟེང་དུ་བྱ་བབས་པར་གྱུར་ན་དེ་ནི་ཡོངས་སུ་སྤང་བར་བྱའོ། །གང་གི་ལུས་ཁྲུས་བྱས་ལ་དེ་ནས་བྱུག་པས་བྱུགས་པ་འམ། ཡང་ན་ཁྲུས་འབའ་ཞིག་བྱས་ནས་ལུས་གཞན་ཐམས་ཅད་ནི་གཤེར་བར་འདུག་ལ་སྙིང་ག་འབའ་ཞིག་མྱུར་དུ་སྐམས་ན་དེ་ནི་ཟླ་བ་ཕྱེད་
[82a.6]ལས་མི་འཚོའོ། །གློ་བུར་དུ་ཅིག་ཅར་ལུས་ཀྱི་རང་བཞིན་གྱི་མདོག་དཀར་ལ་ཅུང་ཟད་སེར་བ་ལས་གཞན་དུ་གྱུར་ཏེ་སྨུག་ནག་ཏུ་སོང་བ་དང་། དེ་ལས་ནག་པོར་གྱུར་པ་དང་། དེ་ལས་ཤིན་ཏུ་ནག་པོར་གྱུར་པ་དང་། སྔོན་པོ་ལས་དམར་པོར་གྱུར་པ་དང་། དམར་པོ་ལས་ལྗང་གུར་
[82a.7]གྱུར་པ་དང་། ལྗང་གུ་ལས་དཀར་པོར་གྱུར་པ་དང་། དེ་བཞིན་དུ་ལུས་སྐེམས་པ་ལས་མྱུར་དུ་ཤ་ཆེན་པོར་འགྱུར་བ་དང་། ཤ་ཆེ་བ་ལས་མྱུར་དུ་སྐེམས་པར་འགྱུར་བ་དང་། གློ་བུར་དུ་སྣུམ་པ་ལས་རྩུབ་པར་འགྱུར་བ་དང་། དེ་བཞིན་དུ་རྩུབ་པ་ལས་སྣུམ་པར་འགྱུར་བ་དང་། ཅིག་
[82b]
[82b.1]ཆར་གྲང་བ་ལས་དྲོ་བར་འགྱུར་ན་ངེས་པར་འཆི་བར་འགྱུར་རོ། །སྐྱེས་བུ་གང་གི་སོར་མོའི་ཚིགས་དྲང་བ་ལས་ཚིགས་ཀྱི་ཙེག་སྒྲ་མི་གྲག་པ་ནི་མི་འཚོའོ། །སྔར་ཉུང་བ་ལས་ལུད་པ་དང་། སྦྲིད་པ་དང་། གཅིན་ལ་སོགས་པ་ཤས་ཆེར་འབྱུང་བ་དང་། སྐད་གསང་ཡང་ན་ཆེ་ཡང་ན་
[82b.2]ཆུང་ན་འཆི་བའི་རྟགས་སོ། །དབུགས་ཤིན་ཏུ་རིང་བར་འཐོན་པ་དང་། ཡང་ན་ཐུང་བར་གྱུར་པ་དང་། ལུས་ཀྱི་དྲི་ཤིན་ཏུ་ཞིམ་པར་འབྱུང་བ་དང་། ཡང་ན་དྲི་ཤིན་ཏུ་ང་བར་འབྱུང་བ་དང་། འདི་དག་དང་ལྡན་ན་ཡང་མི་འཚོའོ། །གཞན་ཡང་ལོ་གཅིག་ཚུན་ཆད་དུ་འཆི་བའི་རྟགས་
[82b.3]ནི། སྐྱེས་བུ་གང་གི་ལུས་ལ་ཁྲུས་བྱས་ཀྱང་རུང་། མིའི་དྲི་ལས་འདས་པ་ཞིམ་པ་འམ། མི་ཞིམ་པའི་དྲི་འབྱུང་བ་འམ། ཡང་ན་གོས་དྲི་མ་ཅན་གྱོན་པའམ། རྨ་ལ་སོགས་པའི་ནང་ནས་གོང་མ་ལྟ་བུའི་དྲི་མ་འབྱུང་ན་ཡང་ལོ་གཅིག་ལས་མི་ཐུབ་བོ། །རང་གི་ལུས་ལས་རོའི་བྱེ་
[82b.4]བྲག་གང་ཡང་རུང་བ་མེད་བཞིན་དུ་ཤིག་དང་སྦྲང་མ་ལ་སོགས་པ་འཁོར་ཞིང་འདུ་བ་དང་། དེ་བཞིན་དུ་ཡོད་པ་ལས་འབྱེར་ཞིང་འདུར་མི་འདོད་ན་དེ་ཡང་ལོ་གཅིག་གི་ནང་དུ་ཚེ་ཟད་པར་འགྱུར་རོ། །དགུན་ལྟ་བུ་གྲང་བའི་དུས་སུ་ནི་ལུས་ཤིན་ཏུ་ཚ་བར་བྱེད་དེ། ཚ་བའི་མཚན་ཉིད་རྔུལ་
[82b.5]འབྱུང་བ་མི་སྣང་བ་དང་། རྒྱུ་མེད་པར་ཤིན་ཏུ་ཚ་བའི་དུས་སུ་ནི་ལུས་གྲང་བར་སྟོན་ཏེ། དེ་ཡང་ལུས་ཡོངས་སུ་སྨིན་པ་ཞེས་བྱ་སྟེ་ལོ་གཅིག་ཚུན་ཆད་དུ་འཆི་བར་སྟོན་ཏོ། །གང་གི་ལུས་ལ་གྲང་འབྲུམ་འབྱུང་ཞིང་ཡན་ལག་ཚ་བའམ། ཡང་ན་ལུས་ཤིན་ཏུ་གྲང་བ་ལ་དྲོ་བ་མི་འདོད་ཅིང་
[82b.6]ཞེ་སྡང་སྐྱེ་བ་གང་ཡིན་པ་དེ་ནི་གཤིན་རྗེའི་ཁྱིམ་དུ་ཞུགས་པ་ཡིན་ནོ། །བྲང་ཤིན་ཏུ་ཆེ་སྟེ་ལྟོ་བ་རབ་ཏུ་གྲང་ལ་ཕྱི་ས་སླ་བར་འབྱུང་ཞིང་སྐོམ་དད་ཆེ་བ་གང་ཡིན་པ་དེ་ནི་རོར་གྱུར་པ་ཡིན་ནོ། །མཆིལ་མ་དང་། གཅིན་དང་། ཁུ་བ་དང་། ཕྱི་ས་དང་། འདི་རྣམས་ཆུའི་ནང་དུ་བཅུག་སྟེ། ཐལ་
[82b.7]བྱུང་ཞབས་སུ་སོང་ཞིང་དེ་ཡང་མཆིལ་མ་མདོག་སྣ་ཚོགས་སུ་འབྱུང་ན་ཟླ་བ་གཅིག་གི་ནང་དུ་སྲོག་འདོར་བར་འགྱུར་རོ། །སྐྱེས་བུ་གང་གིས་ས་ནི་ནམ་མཁར་མཐོང་ལ་ནམ་མཁའ་ནི་སར་མཐོང་བ་དང་། གཟུགས་ཅན་ནི་གཟུགས་མེད་པར་མཐོང་ལ་གཟུགས་མེད་པ་ནི་གཟུགས་ཅན་དུ་མཐོང་
[83a]
[83a.1]བ་དང་། མེ་ལ་སོགས་པའི་འོད་ནི་འོད་མེད་པར་མཐོང་བ་དང་། མདོག་དཀར་པོ་ནི་ནག་པོར་མཐོང་ལ། ནག་པོ་ནི་དཀར་པོར་མཐོང་བ་དང་། མེད་པ་ནི་ཡོད་པར་མཐོང་ལ་ཡོད་པ་ནི་མེད་པར་མཐོང་བ་དང་། མིག་ནད་མེད་བཞིན་དུ་ཟླ་བའི་གཟུགས་མང་པོ་མཐོང་ཞིང་དེ་ཉིད་ཀྱང་མཚན་
[83a.2]དང་བྲལ་བར་མཐོང་བ་དང་། གང་གི་རྩ་ལྗང་གུར་འདུག་ཅིང་བ་སྤུའི་ཁུང་བུའི་རྩ་བ་ཡང་ལྗང་གུར་འདུག་པ་དང་། གང་སྐྱུར་བ་ལ་དགའ་བ་ནི་མཁྲིས་པའི་ནད་ཀྱིས་འཆི་བའི་དུས་བྱེད་དོ། །མགོ་བོའམ་གདོང་ལ་བ་ལང་གི་ལྕི་བ་སྟུག་པོས་ཁེབས་པ་ལྟར་སྣང་ན་ཟླ་བ་གཅིག་གིས་འཆི་
[83a.3]བར་བྱེད་དོ། །གཉིད་མ་ལོག་བཞིན་དུ་སྲིན་པོ་དང་། དྲི་ཟ་དང་། ཡི་དགས་དང་། དེ་བཞིན་དུ་གྲུབ་པ་དང་། མ་གྲུབ་པ་དང་། ཤ་ཟ་ལ་སོགས་པ་མི་སྡུག་ཅིང་འཇིགས་སུ་རུང་བའི་གཟུགས་སྣ་ཚོགས་མཐོང་ན་སྲོག་དང་བྲལ་བར་འགྱུར་རོ། །སྐར་མ་སྨེ་བདུན་མཐོང་ལ་
[83a.4]སྲོག་སྐར་ལྷ་མོ་སྒྲིབ་བྱེད་མ་མཐོང་བ་དང་། ནམ་མཁའ་མཐོང་ལ་དགུ་ཚིགས་མ་མཐོང་བ་དང་། ནམ་མཁའ་ལ་སྐར་མ་གུང་ཚུགས་མ་མཐོང་ན་ལོ་གཅིག་ཚུན་ཆད་ཀྱིས་ངེས་པར་འཆིའོ། །འབྲུག་གི་སྒྲ་དང་། ཆུའི་སྒྲ་དང་། པི་ཝང་གི་སྒྲ་དང་། གླིང་བུ་དང་། རྔ་བོ་ཆེའི་སྒྲ་
[83a.5]དང་། འདི་རྣམས་ཀྱི་སྒྲ་ཡང་དག་པ་ནི་མ་ཐོས་པ་དང་། དེ་བཞིན་དུ་མེད་པ་ཐོས་ན་འཆི་བར་འགྱུར་རོ། རྣ་བའི་བུ་ག་མཛུབ་མོས་བཀབ་པ་དང་ཆུའི་སྒྲ་བཞིན་དུ་འུར་འུར་ཟེར་བ་ཡོད་དེ། དེ་རང་གིས་མ་ཐོས་ན་འཆིའོ། །དེ་བཞིན་དུ་དྲི་དང་། རོ་དང་། རེག་ལ་སོགས་པ་ཕྱིན་ཅི་
[83a.6]ལོག་ཏུ་མཐོང་བ་སྟེ། དྲི་ཞིམ་པ་ནི་ང་བར་ཚོར་ལ་དྲི་ང་བ་ནི་ཞིམ་པར་ཚོར་བ་དང་། རོ་ཡང་མངར་བ་ནི་ཚ་བར་ཤེས་ཚ་བ་ནི་མངར་བ་ཡིན་ནོ་ཞེས་ཟེར་བ་དང་། རེག་པ་འཇམ་པོ་ནི་རྩུབ་པ་ཞེས་ཟེར། རྩུབ་པ་ནི་འཇམ་པ་དང་། དེ་བཞིན་དུ་སྲ་བ་དང་། སྙི་བ་དང་། གྲང་བ་
[83a.7]དང་། དྲོ་བ་དང་། སྣུམ་པ་ལ་སོགས་པ་ཕྱིན་ཅི་ལོག་ཏུ་སྨྲ་བ་དང་། ཤེས་པ་ནི་སྲོག་གི་དབང་པོ་འདས་ཟིན་པ་ཡིན་ནོ། །ཡང་ན་གྲོང་གི་དྲི་ལ་སོགས་པ་བཟང་ངན་གང་ཡང་རུང་བ་མི་ཚོར་ན་དེ་ཡང་ངེས་པར་འཆིའོ། །མེ་མར་ཤི་བའི་དྲི་སྣས་མི་ཚོར་ན་ཡང་འཆིའོ། །སྨན་དཔྱད་
[83b]
[83b.1]གཞུང་དང་མཐུན་པར་བྱས་ན་ཡང་དེས་ཕྱིར་ཞིང་ཐུ་བར་བྱེད་ལ་སྨན་དཔྱད་ལོག་པར་བྱས་ན་རུང་བ་ལྟར་བྱེད་པ་ཡང་འཆི་བའི་རྒྱུའོ། །གང་གི་ལུས་རྡུལ་གྱིས་གཡོགས་པ་དང་། ལུས་ལ་མཚོན་ལ་སོགས་པས་བསྣུན་ན་ཡང་མི་ཚོར་ན་ཡང་འཆི་བའི་རྟགས་སུ་སྟོན་པ་ཡིན་ནོ། །དཀའ་
[83b.2]ཐུབ་དྲག་པོ་དང་། ཆོ་ག་དང་རྣལ་འབྱོར་གྲུབ་པའི་རྒྱུ་སྔོན་ཆད་མ་བསྟེན་པར་དབང་པོའི་ཡུལ་ལས་འདས་པའི་ཆོས་ཁྱད་པར་ཅན་ཤེས་པ་འམ། མཐོང་བ་འམ། སྨྲ་བ་ཡང་འཆི་བའི་རྟགས་སོ། །གཉུག་མའི་སྐད་ཆུང་བ་ལས་ཆེ་བར་གྱུར་པ་དང་། བར་བར་དུ་སྨྲ་འདོད་པ་ལ་དྲན་
[83b.3]པ་མི་གསལ་ཏེ་སྨྲ་མི་ནུས་པ་དང་། སྐད་འཛེར་བ་དང་། སྐད་ཉམ་ཆུང་བ་དང་། གཟི་མདངས་དང་སྟོབས་བྲི་བ་དང་། ཟས་དང་སྤྱོད་ལམ་ཚུལ་བཞིན་དུ་བསྟེན་ཀྱང་ནད་འཕེལ་བར་བྱེད་ན་ནི་དེ་ཡང་འཆི་བ་དང་ཉེ་བ་ཡིན་ནོ། །རང་བཞིན་གྱིས་སྐད་དང་བྲལ་བ་དང་། ང་ནི་འཆིའོ་
[83b.4]ཞེས་སྐད་ངན་འདོན་པ་དང་། ཁྱོད་ཤིའོ་བྱ་བའི་སྒྲ་ཐོས་པ་དེ་ནི་འཆི་བར་འགྱུར་བས་རིང་དུ་སྤང་བར་བྱའོ། །ལུས་ཀྱི་དབྱིབས་ཀྱི་རྣམ་པ་དང་། ཆུ་ཞེང་ལ་སོགས་པའི་ཚད་དང་། དཀར་ནག་ལ་སོགས་པའི་མདོག་དང་། གཟི་མདངས་ལ་སོགས་པའི་གྲིབ་མའམ། གཟུགས་བརྙན་རང་བཞིན་
[83b.5]ལས་འགྱུར་ཏེ་གཞན་དུ་མཐོང་ན་ཐ་ན་རྨི་ལམ་གྱི་ནང་དུ་སྣང་བ་ཡང་འཆི་བ་ཡིན་ཏེ། དེ་ཡང་ཉི་མ་དང་། ཆུ་དང་། མེ་ལོང་གི་ནང་དུ་ལུས་དབྱིབས་དང་ཆུ་ཞེང་གི་ཚད་སྣང་བ་ནི་གྲིབ་མ་ཞེས་བྱ་སྟེ། དེ་ཡང་གྲིབ་མ་ཆད་པར་སྣང་བ་དང་། དུམ་བུར་སྣང་བ་དང་། མགོ་མེད་པར་སྣང་
[83b.6]བ་དང་། ཆེན་པོར་སྣང་བ་དང་། མི་སྡུག་པར་སྣང་བ་དང་། མགོ་གཉིས་པར་སྣང་བ་དང་། ཡ་ཡོར་སྣང་བ་དང་། དེ་ལ་སོགས་པ་བདག་གི་ལུས་དུད་འགྲོའི་གཟུགས་གང་ཡང་རུང་བར་ཉི་མ་ལ་སོགས་པའི་ནང་དུ་སྣང་ན། སྐྱེས་བུ་དེ་ནི་ཚེ་རྫོགས་པ་ཡིན་པར་རིག་པར་
[83b.7]བྱའོ། །དེ་ལྟར་མི་སྣང་ན་ནི་འཆི་བའི་མཚན་མ་མ་ཡིན་ནོ། །ནད་པའི་མིག་གཞན་གྱི་མིག་ལ་བལྟར་བཅུག་སྟེ། རང་གི་གཟུགས་བརྙན་དེའི་ནང་དུ་མ་མཐོང་ན་ཚེ་ཟད་པར་ཁོང་དུ་ཆུད་པར་བྱའོ། །མདོག་དང་གཟི་བརྗིད་ནི་ལུས་ཉིད་ལ་བལྟར་སྣང་བ་སྟེ། དེ་ཡང་ལུས་ལ་ནམ་
[84a]
[84a.1]མཁའ་ལ་སོགས་པ་འབྱུང་བ་ཆེན་པོ་ལྔའི་རང་བཞིན་མཚན་ཉིད་ལ་སོགས་པར་བརྟག་པ་ནི་དེ་ལས་ནམ་མཁའི་མཚན་ཉིད་ནི་དྲི་མ་མེད་པ་དང་མདོག་སྔོ་བ་སྣུམ་ཞིང་མདངས་དང་ལྡན་པའོ། །རླུང་གི་མཚན་ཉིད་ནི་རྡུལ་གྱིས་གཡོགས་པ་དང་། མདོག་དམར་
[84a.2]སྐྱར་འདུག་པ་དང་། སྨུག་ནག་དང་། ཐལ་སྐྱར་འདུག་པ་དང་། མདངས་ཉམས་པའོ། །མེའི་མཚན་ཉིད་ནི་མདོག་ཤིན་ཏུ་དམར་བ་དང་། གཟི་བྱིན་དང་ལྡན་པ་དང་། མཐོང་ན་དགའ་བའོ། །ཆུའི་མཚན་ཉིད་ནི་བཻ་ཌཱུཪྻའི་མདོག་ལྟར་སྔོ་བ་དང་། དྲི་མ་མེད་པ་དང་།
[84a.3]མདོག་ཤིན་ཏུ་སྣུམ་པའོ། །སའི་མཚན་ཉིད་ནི་བརྟན་པ་དང་། སྣུམ་པ་དང་། ལུས་ཤ་རྒྱས་པ་དང་། དག་པ་དང་། སྨུག་ནག་ཏུ་འདུག་པ་དང་དཀར་བའོ། །ལྔ་པོ་དེ་དག་ལས་རླུང་གི་མཚན་ཉིད་དང་ལྡན་ན་ནི་ནད་དང་ཉོན་མོངས་པ་དང་། མི་བདེ་བ་དང་། འཆི་བ་ཡང་སྟོན་ཏོ། །
[84a.4]ལྷག་མ་དང་ལྡན་ན་ནི་བདེ་བ་སྐྱེད་པར་བྱེད་དོ། །གོང་དུ་སྨོས་པའི་མེའི་མཚན་ཉིད་ནི་གཞན་པས་ཁྱད་པར་རྣམ་པ་བདུན་དང་ལྡན་ཏེ། དམར་བ་དང་། སེར་བ་དང་། དཀར་བ་དང་། སྨུག་ནག་དང་། སྔོ་བ་དང་། སྐྱ་བསེང་དང་། ནག་པོའོ། །འབྱུང་བ་ལྔ་དང་། མེའི་མཚན་ཉིད་
[84a.5]བདུན་པོ་རེ་རེ་ལ་ཡང་སྣུམ་པ་དང་། དྲི་མ་མེད་པ་དང་བཅས་ན་ནི་ཁྱད་པར་དུ་བདེ་བ་སྐྱེད་དོ། །རྩུབ་པ་དང་དྲི་མ་ཅན་དང་བཅས་ན་ནི་སྡུག་བསྔལ་སྐྱེད་པར་བྱེད་དོ། །མདོག་དང་མདངས་གཉིས་ལ་ཁྱད་པར་དུ་བལྟ་བ་ནི་མདོག་ནི་སྣུམ་པ་དང་ནག་པ་སོགས་མ་ཡིན་ལ་མདངས་ནི་ལུས་ཀྱི་གཟི་བྱིན་
[84a.6]ཡིན་ཏེ་ལུས་ཀྱི་མདོག་གསལ་བར་བྱེད་པའོ། དེ་ལ་གྲིབ་མ་དང་གཟི་མདངས་གཉིས་དང་མི་ལྡན་པའི་སེམས་ཅན་ནི་གང་ཡང་མེད་དེ་ཁྱད་པར་དུ་མི་རྣམས་ཀྱི་དགེ་བ་དང་མི་དགེ་བའི་མཚན་མ་ཡང་གྲིབ་མ་དང་གཟི་མདངས་ཀྱིས་སྟོན་པ་ཡིན་པར་ཤེས་པར་བྱའོ། །གཞན་ཡང་རྐང་
[84a.7]པ་གཉིས་ཉེད་པ་དང་། རྐང་པ་ས་ལ་འཕྲེ་བ་དང་། རྐང་པ་གཡོ་བ་ནི་འཆི་བདག་གི་དབང་དུ་སོང་བའོ། །ཁ་ཟས་མང་དུ་ཟོས་ཀྱང་ཉམས་སྟོབས་བྲི་བ་དང་། མ་ཟོས་ཀྱང་ཉམས་སྟོབས་སྐྱེ་བ་འམ། ཁ་ཟས་མང་དུ་ཟོས་ཀྱང་བཤང་གཅི་ཉུང་བ་དང་། མ་ཟོས་ཀྱང་མང་བ་
[84b]
[84b.1]དང་། ཁ་ཟས་ཉུང་ངུ་ཟོས་ཀྱང་བད་ཀན་གྱིས་ཉམ་ཐག་པ་དང་། དབུགས་རིང་དུ་འཐོན་ཅིང་འགེངས་ལ་འདུད་པ་ལྟར་བྱེད་པ་དང་། དང་པོ་དབུགས་རིང་པོ་འཐོན་པ་ལས་མཇུག་ཏུ་དབུགས་ཐུང་དུ་རྩེག་ཐབས་སུ་བྱུང་སྟེ་གདུང་བ་ལྟར་ཤུགས་འབྱིན་པ་དང་། དབུགས་ཐུང་ངུ་
[84b.2]འབྱིན་ཅིང་གནད་དུ་བསྣུན་པ་ལྟར་ཤིན་ཏུ་འདར་བ་དང་། རྩེའུ་ཆུང་འཁུམས་ཏེ་མགོ་ཤིན་ཏུ་བསྒུལ་དཀའ་བ་དང་། དཔྲལ་བ་ལ་རྔུལ་མང་པོ་མཆི་མའི་རྒྱུན་བཞིན་དུ་འབྱུང་བ་དང་། ལྷུ་ཚིགས་བྱེ་སྟེ་རྐང་ལག་འཆལ་བ་དང་། ཉམས་སྟོབས་ཆེ་ཡང་རུང་། ཆུང་ཡང་
[84b.3]རུང་ལྡང་བའི་ཚེ་དྲན་པ་ཉམས་ཤིང་འགྱེལ་པ་དང་། གན་རྐྱལ་དུ་ཉལ་ཞིང་རྐང་པ་ཡང་དང་ཡང་བརྐྱང་བསྐུམ་བྱེད་པ་དང་། རྩིག་པ་དང་མལ་ཆ་ལ་སོགས་པ་ལ་ལག་པ་འབྲུད་པ་དང་། དགོད་པའི་རྒྱུ་མེད་པར་དགོད་པ་དང་། རྒྱུ་མེད་པར་མྱ་ངན་བྱེད་པ་དང་། མཆུ་
[84b.4]དང་སོ་ལ་ལྕེས་ཡང་དང་ཡང་དུ་བལྡགས་པ་དང་། ལྕེས་ཡ་མཆུ་བལྡག་ཅིང་མྱོང་བར་བྱེད་ལ་རྐན་ཡང་དང་ཡང་གཏོགས་པ་དང་། ལུས་མདོག་ནག་པོ་དང་། སེར་པོ་དང་། དམར་སྐྱ་ལ་སོགས་པར་ཡང་དང་ཡང་འགྱུར་བ་དང་། སྨན་པ་དང་། ཟས་དང་། སྨན་དང་།
[84b.5]བཏུང་བ་དང་། བླ་མ་དང་། བཤེས་གཉེན་རྣམས་ལ་ཞེ་སྡང་སྐྱེས་པ་ནི་འཆི་བདག་གི་དབང་དུ་གྱུར་པ་ཡིན་ནོ། །སྐྱེས་བུ་གང་མེའི་དྲོད་ཆུང་བ་དང་། སེམས་མལ་གཅིག་ན་མི་གནས་པ་དང་། མདོག་འགྱུར་བ་དང་། རྟག་ཏུ་མྱ་ངན་གྱིས་སེམས་གདུང་བ་
[84b.6]ནི་མི་འཚོའོ། །ནད་པའི་སྔོན་དུ་བསྔོས་པའི་ཟས་དང་། གཏོར་མ་བྱ་རོག་གིས་མི་འདོད་པ་དང་། བཅུད་ཀྱིས་ལེན་ལ་སོགས་པའི་གཞི་མེད་པར་བློ་བུར་དུ་མཁས་པར་འགྱུར་བ་དང་། ལུས་ཤ་རྒྱས་པ་དང་། གཟི་བྱིན་དང་མདངས་དང་ལྡན་ཞིང་མཛེས་པ་དང་། དཔལ་
[84b.7]ཐོབ་པར་བྱེད་པ་དང་། གལ་ཏེ་སྔར་ཐོབ་པ་ལས་ཉམས་པ་དེ་ནི་གཤིན་རྗེའི་ཁྱིམ་དུ་འཇུག་པ་ཡིན་ནོ། །སྐྱེས་བུ་གང་ལ་སྐྱོན་གྱི་རྣམ་པ་རླུང་དང་། མཁྲིས་པ་དང་། བད་ཀན་གསུམ་དང་། ཡོན་ཏན་གྱི་རྣམ་པ་རྡུལ་དང་། མུན་པ་དང་། སྙིང་སྟོབས་གསུམ་
[85a]
[85a.1]གྱི་རང་བཞིན་ཡོད་པ་ལས་གཞན་དུ་གྱུར་ན། དེ་ནི་ན་ཡང་རུང་མི་ན་ཡང་རུང་སྟེ་དེ་ནི་ངེས་པར་ཟླ་བ་དྲུག་གིས་འཆི་བར་བསྟན་ཏོ། །གང་ལ་གུས་པ་དང་། ཚུལ་ཁྲིམས་དང་། དྲན་པ་དང་། གཏོང་བ་དང་། བློ་དང་། སྟོབས་འདི་རྣམས་སྔར་
[85a.2]ཡོད་པ་ལས་རྒྱུ་མེད་པར་ལྡོག་པར་བྱེད་ན་ཟླ་བ་དྲུག་གིས་འཆི་བར་འགྱུར་རོ། །སྐྱེས་བུ་གང་ཆང་གིས་མྱོས་པ་ལྟར་འགྲོ་བ་དང་། ཚིག་འདར་ཞིང་རྨོངས་པ་དེ་ཡང་ཚེ་ཟད་པ་ཡིན་ནོ། །གང་གི་སྐྲ་ལ་ལག་པས་ཉུག་པས་ཚོར་བ་མེད་པར་རང་འབྱིན་ཞག་དྲུག་གིས་འཆི་བར་སྟོན་
[85a.3]ཏོ། །ལྐོག་མའི་ནད་མེད་བཞིན་དུ་ཟས་གྲེ་བ་ནས་མར་འགྲོར་མི་འདོད་པ་དང་། ནད་པ་ལ་ནད་གཡོག་སྔར་བརྩེ་བ་ཡིན་པ་ལ་ཕྱིས་བརྩེ་བ་ཆུང་བའམ། འདོར་བ་ལྟར་སྣང་ན་ཡང་ཚེ་གཏུགས་པ་ཡིན་ནོ། །སྐྱེས་བུ་གང་ཉིན་མཚན་དུ་གཉིད་ལོག་པར་བྱེད་དམ། ཡང་ན་ཡེ་མེད་
[85a.4]པར་བྱེད་ན་ཡང་དེ་ལྟར་བལྟའོ། །རྒྱུ་མེད་པར་མཆི་མ་མང་པོ་འོང་བ་དང་། རྒྱུ་མེད་པར་རྐང་པ་རྔུལ་པ་དང་མིག་དམར་པོར་གྱུར་ན་གཤིན་རྗེའི་གནས་སུ་འགྲོ་བར་འགྱུར་རོ། །དངོས་པོ་གང་ལ་སྔོན་དགའ་བ་ལ་ཕྱིས་སྐྱོ་བ་འམ། ཞེ་སྡང་ན་ཡང་ཚུལ་གོང་མ་ལྟར་སྦྱར་རོ། །སྐྱེས་
[85a.5]བུ་གང་ལ་རིམས་ལ་སོགས་པའི་མཚན་ཉིད་ངེས་པར་ཚབས་ཆེ་བ་ལྟར་སྣང་ལ་སྨན་དཔྱད་མ་བྱས་པར་ཞི་བ་ལྟར་བྱེད་ན་འཕྲལ་འཆི་བའི་རྟགས་སོ། །རིམས་ཀྱི་མཚན་ཉིད་ཚབས་ཆེར་བྱིང་བ་དང་། རྒྱུན་རིང་དུ་ན་བ་དང་། ཚབས་ཆེར་བླ་བ་དང་། འཁོར་བ་དང་། དབུགས་
[85a.6]མི་བདེ་བ་དང་། སྐྲངས་པ་དང་། མེའི་དྲོད་ཉམས་པ་དང་། སྟོབས་དང་ལྡན་པ་དང་། ཚིག་མི་གསལ་བ་དང་། མིག་དམར་བ་དང་། སྙིང་དུ་ཟུག་པ་དང་། མཚན་ཉིད་འདི་ལྟ་བུ་དང་ལྡན་པའི་རིམས་ཀྱང་འཆི་བའི་མཚན་མ་ཡིན་ནོ། །རིམས་ནད་ལས་སྔ་དྲོ་ལུད་
[85a.7]པ་འགོགས་སུ་མི་བཏུབ་པ་སྐམ་པོ་འབྱུང་ལ། ཕྱི་དྲོ་ལུད་པ་མཆིལ་མ་ཅན་འབྱུང་བ་དང་སྟོབས་དང་ཤ་ཟད་ན་དེ་ཡང་འཆི་བའི་རྟགས་སོ། །ཁྲག་དང་མཁྲིས་པ་ཤས་ཆེར་འཁྲུགས་པའི་ཁྲག་མདོག་གནག་པ་དང་། ཚོན་གྱི་མདོག་འདྲ་བ་དང་། དམར་པོ་དང་། སེར་པོ་
[85b]
[85b.1]དང་། ལྗང་གུའི་མདོག་ཏུ་སྣང་བ་དང་། བ་སྤུའི་ཁུང་བུ་ནས་ཁྲག་འཛག་པ་དང་། དང་ག་ནས་ཁར་ཁྲག་མང་པོ་འབྱུང་ཞིང་བརྒྱལ་བ་དང་། ཁྲག་དེ་ཡང་ཤུགས་ཡང་དང་ཡང་དུ་འབྱུང་ལ་དྲི་མི་ཞིམ་ཞིང་གོས་ལ་འཇེན་པ་དང་། ཤུན་ཏུ་རྒྱས་པ་སྐྱ་རྦབ་དང་། རིམས་ཀྱིས་
[85b.2]བཏབ་པ་དང་། མཚན་མ་འདི་དག་དང་ལྡན་ན་སྲོག་གི་དབང་པོ་འདས་པ་ཡིན་ནོ། །ལུད་པ་དང་དབུགས་མི་བདེ་བའི་ནད་ལ་རིམས་དང་། སྐྱུག་བྲོ་བ་དང་། སྐོམ་དད་ཆེ་བ་དང་། འཁྲུ་བ་དང་། སྐྲང་བའི་བརླ་བརྣན་ཡོད་ན་ཡང་མི་འཚོའོ། །གཅོང་ཆེན་པོའི་ནད་ལ་
[85b.3]རྩིབ་ལོགས་གཡས་གཡོན་དུ་ཟུག་ཅིང་ན་བ་དང་། ལྟོ་སྦོ་བ་དང་། ཁྲག་སྐྱུག་པ་དང་། ལུས་ཚ་བ་དང་བཅས་པའི་ནད་པ་དེ་ནི་སྲོག་གི་རྒྱུན་འགག་པར་སྟོན་ཏོ། །སྐྱུག་པའི་ནད་ལ་རྟག་ཏུ་སྐྱུག་པ་དང་། བཤང་གཅིའི་དྲི་བཞིན་དུ་སློན་པའི་དྲི་མི་ཞིམ་པ་དང་། རྨ་
[85b.4]བྱའི་མདོངས་བཞིན་དུ་ཚོན་སྣ་ཚོགས་སུ་སྐྱུག་པ་དང་། དེ་ཡང་ཁྲག་དང་། བཤད་པ་དང་། རྣག་དང་། ནད་དང་བཅས་པ་དང་། ལུད་པ་ལུ་བ་དང་། དབུགས་མི་བདེ་བ་དང་ལྡན་ན་དེ་ནི་ངེས་པར་ཕ་རོལ་དུ་འཕོ་བའོ། །སྐོམ་དད་ཆེ་བའི་ནད་ལ་སོགས་པའི་ནད་གཞན་
[85b.5]གྱི་རྐྱེན་གྱིས་ལུས་སྐམས་པ་དང་། ལྕེ་ཕྱིར་འབྱིན་པ་དང་། དྲན་པ་མི་གསལ་བ་དེ་ནི་ཚེ་འདི་སྤངས་པ་ཡིན་ནོ། །ཆང་ནད་ལ་ནི་ཤིན་ཏུ་གྲང་བས་ཉམ་ཐག་པ་དང་། ལུས་ཀྱི་ཤ་བྲི་བ་དང་། ཏིལ་མར་གྱིས་བསྐུས་པ་འདྲ་ན་འཆི་བའི་རྟགས་སོ། །གཞང་འབྲུམ་གྱི་
[85b.6]ནད་ལ་ལག་པ་དང་། རྐང་པ་དང་། ལྟེ་བ་དང་། བཤང་བའི་ལམ་དང་། འབྲས་བུ་རྣམས་སྐྲངས་པ་དང་། སྙིང་དང་། རྩིབ་ལོགས་དང་། ཡན་ལག་རྣམས་ན་བ་དང་། སློབ་པ་དང་གཞང་འབྲུམ་སྨིན་ཅིང་རིམས་དང་བཅས་པ་ནི་འཆི་བའི་མཚན་མའོ། །
[85b.7]ཚད་པས་འཁྲུ་བ་ལ་འཁྲུ་བའི་མདོག་མཚེར་བའི་དུམ་བུ་དང་འདྲ་བ་དང་། ཤ་བསྐུས་པའི་ཆུ་འདྲ་བ་དང་། ནག་སྨུག་ཏུ་འབྱུང་བ་དང་། ཏིལ་མར་ལྟ་བུ་དང་། མར་ལྟ་བུ་དང་། འོ་མ་ལྟ་བུ་དང་། རྐང་ལྟ་བུ་དང་། ཚིལ་ལྟ་བུ་དང་། བུ་རམ་ཆུ་ལྟ་བུ་དང་། གླད་
[86a]
[86a.1]པ་ལྟ་བུ་དང་། སྣག་ཚ་ལྟ་བུ་དང་། དྲི་མནམ་པ་དང་། ཤ་བཙོས་པ་ལྟ་བུ་དང་། སྦྲང་རྩི་ལྟ་བུ་དང་། ཤིན་ཏུ་དམར་བ་དང་། གནག་པ་དང་། སྣུམ་པ་དང་། རྣག་འདྲ་བ་དང་། ཤིན་དུ་དང་བ་དང་། སྐ་བ་དང་། མདོག་སྣ་ཚོགས་སུ་འབྱུང་བ་དང་། མ་ཚོར་བར་རང་འབྱུང་
[86a.2]བ་དང་། བཤང་བ་མང་བ་དང་། ཡང་ན་མེད་པ་དང་། ཁ་ཆུ་ལྟ་བུ་དང་། འབྱར་བག་སྦྲང་མ་འཛིན་པ་དང་། གྲ་མ་ལྟ་བུའི་རི་མོ་ཅན་དང་། ཟླ་བ་ལྟ་བུའི་ཐིག་ལེ་ཡོད་པ་དང་། གཞང་ཕྱིར་ཕྱུང་སྟེ་བཀས་པ་འདྲ་བ་དང་། རུས་པ་དང་
[86a.3]ཚིགས་ཐམས་ཅད་ན་བ་དང་། བཤང་སྒོ་འཛུམས་མི་ནུས་པར་གདངས་པ་དང་། སྟོབས་ཟད་པ་དང་། གཞང་ཕྱིར་འབྱུང་ཞིང་ནང་དུ་ཞུགས་པ་དང་། སྐོམ་དད་ཆེ་བ་དང་། དབུགས་མི་བདེ་བ་དང་། སློན་པ་དང་། ལུས་ཚ་བ་དང་། ལྟོ་སྦོས་པ་དང་། སྒྲ་དང་བཅས་པར་
[86a.4]འབྱུང་བ་དང་། མཚན་མ་འདི་དག་དང་ལྡན་ན་ངེས་པར་སྲོག་འཇོམས་པ་ཡིན་ནོ། །རྡེའུས་འགགས་པ་ལ་ནི་རླིག་པ་སྐྲངས་པ་དང་། གཅིན་འགག་ཅིང་ནད་ཀྱིས་ཉམ་ཐག་པ་ནི་འཆིའོ། །གཅིན་སྙི་བ་ལ་ནི་སྐོམ་དད་ཆེ་བ་དང་། ལུས་ཚ་བ་དང་། ཤ་སྐྲངས་པ་དང་། འཁྲུ་
[86a.5]བ་དང་། གནད་རྣམས་སུ་ཚད་འབྲུམ་བྱུང་སྟེ་སྙིང་དང་རྒྱབ་ན་བ་དང་། ནུ་མ་དང་། ཕྲག་པ་དང་། བཤང་བའི་ལམ་དང་། མགོ་བོ་དང་། ཚིགས་རྣམས་དང་། ལག་པ་དང་། རྐང་པ་དང་། གནས་དེ་དག་གང་ཡང་རུང་བར་ཚད་འབྲུམ་འབྱུང་བ་དང་། སེམས་ཞུམ་པ་
[86a.6]དང་། འདི་རྣམས་དང་བཅས་ན་སྲོག་རིང་པོ་མི་ཐུབ་བོ། །མེ་དབལ་ཀྱི་ནད་ལ་ལུས་ཐམས་ཅད་ལ་མཆེད་ཅིང་མྱགས་པ་དང་། རྣག་འཛག་ཅིང་ལུས་ཚ་བ་དང་། སྐོམ་དད་ཆེ་བ་དང་། རིམས་ཀྱིས་འདེབས་པ་དང་། ཚིགས་ཐམས་ཅད་རེངས་པ་དང་། སྐྱིགས་བུ་
[86a.7]དང་། དབུགས་མི་བདེ་བ་དང་། གླད་པ་འཁོར་བ་དང་། ལུས་ངལ་བ་དེ་དག་དང་ལྡན་ན་འཆི་བར་སྟོན་ཏོ། །སྐྲན་གྱི་ནད་ལ་སྐྲན་ཉིད་ཚབས་ཆེར་ཟླུམ་ལ་ཆེ་བ་དང་། རྡོ་བ་བཞིན་དུ་སྲ་བ་དང་། རུས་སྦལ་གྱི་རྒྱབ་བཞིན་དུ་ཕྱི་རློ་བ་དང་། སྐྲན་གྱི་སྟེང་དུ་རྩ་སྣང་བ་དང་།
[86b]
[86b.1]རིམས་ཀྱིས་འདེབས་པ་དང་། སྐྱུག་པ་དང་། སྐྱིགས་བུ་དང་། ལྟོ་སྦོ་བ་དང་། དེ་ཡང་ཟུག་གཟེར་དང་བཅས་པ་དང་། ལུད་པ་ལུ་བ་དང་། ཆམ་པས་བཏབ་པ་དང་། སྙིང་ན་བ་དང་། དབུགས་མི་བདེ་བ་དང་། འཁྲུ་བ་དང་། སྐྲང་བ་དང་། འདི་དག་དང་ལྡན་
[86b.2]ན་སྤང་བར་བྱའོ། །དམུ་རྫིང་གི་ནད་དུ་བཤང་གཅི་ནང་དུ་སྩོགས་ཤིང་ཕྱིར་མི་འབྱུང་བ་དང་། དབུགས་མི་བདེ་བ་དང་། སྐྲང་བ་དང་། སྐྱིགས་བུ་དང་། རིམས་ཀྱིས་འདེབས་པ་དང་། མགོ་འཁོར་བ་དང་། བརྒྱལ་བ་དང་། སློན་པ་དང་། འཁྲུ་བ་དང་། ཉམ་ཆུང་
[86b.3]བ་དང་། མིག་མཆུ་སྐྲངས་པ་དང་། ཕོ་མཚན་སྐྲང་ཞིང་ཡོན་པོར་འདུག་པ་དང་། ལྟོ་བའི་པགས་པ་ལས་ཆུ་འཛག་པ་དང་། བཀྲུ་སྨན་གྱིས་བཀྲུས་ན་ཡང་ལྟོ་བ་ཕྱིར་ཞིང་སྐྱེ་བ་དང་། མངོན་རྟགས་འདི་དག་ཡོད་ན་ངེས་པར་འཆི་བའི་རྟགས་སོ། །སྐྱ་རྦབ་ཀྱི་ནད་
[86b.4]ལ་ནི་སྐྲང་བ་དང་། མིག་དང་སེན་མོ་སེར་པོར་སྣང་བ་དང་། སྙོམ་པ་དང་། ལུས་ཚ་བ་དང་། ཡི་ག་འཆུས་པ་དང་། སློན་པ་དང་། བརྒྱལ་བ་དང་། ལྟོ་རྒྱས་པ་དང་། འཁྲུ་བ་དང་། འདི་རྣམས་ཀྱི་མཚན་མ་དང་བཅས་པའི་སྐྱ་རྦབ་ནི་འཆི་བའི་རྟགས་སོ། །སྐྲང་
[86b.5]བའི་ནད་ལ་ནི་ནད་ཀྱི་བླ་བརྣན་སྣ་ཚོགས་དང་ལྡན་ཞིང་རྐང་པ་གཉིས་ལས་ཡར་སྐྲངས་ཏེ་གདོང་དུ་ཕྱིན་པར་སྐྲང་བ་ནི་སྐྱེས་པ་འཆི་བའི་རྟགས་ཡིན་ལ། གདོང་ནས་མར་རྐང་པར་ཕྱིན་པར་སྐྲང་པ་ནི་བུད་མེད་འཆི་བའི་རྟགས་སོ། །དཀུ་དང་ཕོ་མཚན་ལ་སྐྲང་འབྱུང་བ་
[86b.6]དང་། སྐྲངས་པའི་སྟེང་དུ་རྩ་ཕྲ་མོས་ཁེབས་ཏེ་ཆུ་འཛག་པ་དང་། སྐྱུག་པ་དང་། རིམས་དང་། དབུགས་མི་བདེ་བ་དང་། འཁྲུ་བ་དང་། གཞན་ཡང་ཐོག་མར་རིམས་ཀྱིས་བཏབ་པ་དང་། ཡང་ན་འཁྲུ་བས་བཏབ་སྟེ་ཉམ་ཆུང་བའི་སྟེང་དུ་སྐྲངས་ནད་འབྱུང་
[86b.7]བ་འམ། ཡང་ན་སྐྲངས་ནད་ཀྱིས་ཉམ་ཆུང་བ་ལས་རིམས་སམ་འཁྲུ་བས་བཏབ་པ་དང་། ཁྱད་པར་དུ་ཉམ་ཆུང་བ་ལ་སྐྲངས་ནད་འབྱུང་ན་ལུས་འཇོམས་པར་བྱེད་དོ། །སྐྱེས་བུ་གང་གི་ལུས་རྐང་པ་ནས་སྐྲང་བ་ཟུག་སྟེ། བྱིན་སྙིང་དང་བརླ་འོག་ཏུ་སྐྲངས་ཏེ་རང་བཞིན་ལས་
[87a]
[87a.1]ཉམས་ནས་ལག་པ་དང་ཤ་ལྷོད་པར་འདུག་ན་ངེས་པར་སྤང་བར་བྱའོ། །གདོང་དང་། ལག་པ་དང་རྐང་པ་ལྷག་པར་སྐམས་ཤིང་སྐྲངས་ན་དེའི་འབྱུང་བ་ཆེན་པོ་ལྔ་ནི་ཐ་དད་པར་རིག་པར་བྱ་སྟེ། ཟླ་བ་གཅིག་གིས་སྲོག་འདོར་བར་བསྟན་ཏོ། །མེ་
[87a.2]དབལ་གྱི་ནད་ཀྱིས་བཏབ་པ་ནི་ཁ་དོག་སྣ་ཚོགས་སུ་སྣང་བ་དང་། རིམས་ཀྱིས་འདེབས་པ་དང་། བརྒྱལ་བ་དང་། ཡན་ལག་རྣམས་གྲུགས་པ་དང་། མགོ་འཁོར་བ་དང་། ཁ་སྐམས་པ་དང་། སྙིང་ན་བ་དང་། ལུས་སྟོབས་ཆུང་བ་དང་། འཁྲུ་བ་ནི་འཆི་བར་
[87a.3]བསྟན་ཏོ། །མཛེ་ནད་ལ་ནི་ཡན་ལག་ཆད་པ་དང་། མིག་དམར་བ་དང་། སྐད་ཞོམ་པ་དང་། མེ་དྲོད་ཉམས་པ་དང་། སྲིན་བུ་རྣམས་བསྟེན་པ་དང་། སྐོམ་དད་ཆེ་བ་དང་། འཁྲུ་བ་དང་། འདི་དག་དང་ལྡན་ན་འཆི་བའི་མཚན་མའོ། །རླུང་ནད་ལ་ནི་པགས་པ་ཆོར་བ་
[87a.4]མེད་པ་དང་། ཚིགས་རྣམས་བྱེ་བ་དང་། ལུས་འདར་བ་དང་། སྐྲང་བ་དང་། ཟུག་གཟེར་བྱེད་པ་དང་། འདི་དག་དང་ལྡན་ན་ངེས་པར་འཆིའོ། །དྲེག་ནད་ལ་ནི་རྨོངས་བག་ཏུ་འདུག་པ་དང་། བརྒྱལ་བ་དང་། འཛག་པ་དང་། གཉིད་ཆེ་བ་དང་། རིམས་ཀྱིས་འདེབས་
[87a.5]པ་དང་། མགོ་རེངས་པ་དང་། ཡི་ག་འཆུས་པ་དང་། དབུགས་མི་བདེ་བ་དང་། རྐང་ལག་འཁུམས་པ་དང་། འབྲུམ་བུ་འབྱུང་བ་དང་། ཤ་སྐེམ་པ་དང་། འདི་དག་ནི་འཆི་བའི་མཚན་མའོ། །གཞན་ཡང་འཆི་བའི་མཚན་མ་ནི། མགོ་ན་བ་དང་། ཡི་ག་འཆུས་པ་དང་།
[87a.6]དབུགས་མི་བདེ་བ་དང་། རྨོངས་པ་དང་། རྟག་ཏུ་འཁྲུ་བ་དང་། སྐོམ་དད་ཆེ་བ་དང་། མགོ་འཁོར་བ་དང་། ནད་སྣ་ཚོགས་པས་ལུས་ཀྱི་སྐད་དང་། ཁམས་ཀྱི་སྟོབས་དང་མེའི་དྲོད་ཉམས་ཏེ་ཟད་པར་བྱེད་ན་འཆི་བ་ཡིན་ནོ་ཞེས་བཤད་པ་ཡིན་ནོ། །རླུང་གི་ནད་དང་། བརྗེད་
[87a.7]བྱེད་དང་། མཛེ་དང་། ཁྲག་གི་དམུ་རྫིང་དང་། ཟད་བྱེད་ཀྱི་ནད་དང་། སྐྲན་དང་། གཅིན་སྙི་བ་དང་། ནད་འདི་རྣམས་གང་ཡང་རུང་བས་ལུས་ཤིན་ཏུ་ཉམ་ཆུང་བའམ། རིད་པ་ལ་བཏབ་ན་ནི་ནད་ཚབས་ཆུང་ཡང་རིང་དུ་སྤང་བར་བྱའོ། །ནད་གང་གི་སྟོབས་དང་ཤ་ཟད་ལ་
[87b]
[87b.1]ནད་ཀྱང་འཕེལ་ཏེ་ཡི་ག་འཆུས་པ་ནི་ཟླ་བ་ཕྱེད་དང་གཉིས་ནས་འཆི་བར་བསྟན་ཏོ། །རླུང་ལས་གྱུར་པའི་རྡོའམ་གཏུན་བུ་ལྟ་བུ་ཞེས་བྱ་བའི་ནད་ཡོད་དེ། དེ་ཡང་སྙིང་ལ་གནས་ནས་ཕལ་ཆེར་འཕེལ་ཞིང་རྒྱས་པ་དང་། སྐོམ་དད་ཤིན་ཏུ་ཆེ་བར་གྱུར་ན་འཕྲལ་འཆི་བའི་རྒྱུའོ། །
[87b.2]རླུང་ནད་ཀྱིས་བྱིན་པ་ཤིན་ཏུ་ལྷོད་པར་གྱུར་པ་དང་། ལུས་ཀྱི་ཤ་ཟད་ཅིང་། རྩེའུ་ཆུང་ངམ་སྣ་ཡོན་པོར་འཆུས་པར་སྣང་ན་འཕྲལ་འཆི་བར་སྟོན་ཏོ། །ཡང་ན་ལྟེ་བའམ་རྐུབ་ཀྱི་ནང་ངམ། བརླ་བྲག་གི་ནང་དུ་རླུང་ཞུགས་ཏེ། ཚབས་ཆེར་ཟུག་གཟེར་བྱེད་ན་དེ་མ་ཐག་ཏུ་ཚེ་འཕྲོག་
[87b.3]གོ། །ཡང་ན་ལུས་ཤིན་ཏུ་ཉམ་ཆུང་བ་ལ་རླུང་ཤིན་ཏུ་སྟོབས་དང་ལྡན་པ་སྙིང་ངམ་བཤང་བའི་ལམ་ལ་གནས་ཏེ། སྟོད་སྨད་ཀྱི་རྒྱུ་བ་བཀག་ན་དེ་ཉིད་དུ་འཆི་བའི་མཚན་མའོ། །ཡང་ན་ལྟེ་བ་དང་ཆུ་སོ་དང་མགོ་རྣམས་སུ་རླུང་གིས་དྲི་མ་རྣམས་བཀག་སྟེ་ཟུག་གཟེར་དྲག་པོ་
[87b.4]མྱོང་ན་འཕྲལ་འཆི་བའི་མཚན་མའོ། །ཡང་ན་བརླ་བྲག་གཉིས་སུ་རླུང་ཞུགས་ཏེ་སྐོམ་དད་སྐྱེད་ཅིང་བཤང་བ་སླ་བར་འབྱུང་ན་སྲོག་གི་རྒྱུན་འཕྲལ་འགག་གོ། །ཡང་ན་རླུང་བཤང་བའི་ལམ་དང་རྒྱུ་སྨད་ལ་བརྟེན་ནས། ཐུར་དུ་རྒྱུ་བ་བཀག་ཅིང་གྱེན་དུ་དབུགས་མི་བདེ་བ་བྱེད་ན་སྲོག་
[87b.5]འཕྲལ་འཕྲོག་གོ། །ཡང་ན་རླུང་བྲང་ལ་བརྟེན་ནས་དེ་ཡང་རླུང་ཤིན་ཏུ་དྲག་ཅིང་བརྟན་པས་ཁོང་པའི་ནང་དང་རྩིབ་མའི་རྩེ་མོ་བྱེ་བ་ཙམ་དུ་བྱས་ཏེ་མིག་བགྲད་ན་དེ་མ་ཐག་ཏུ་འཆིའོ། །གློ་བུར་རིམས་དྲག་པོས་ཐེབས་ཤིང་ཚ་བས་གདུངས་ལ་སྐོམ་དད་ཆེ་བ་དང་། བརྒྱལ་བ་དང་།
[87b.6]ཉམས་སྟོབས་ཟད་པ་དང་། ཚིགས་རྣམས་བྱེ་བ་ནི་འཕྲལ་སྲོག་འཇོམས་སོ། །ནང་པར་བ་ལང་བཟས་ལ་བཏང་བའི་དུས་སུ་གདོང་ལ་རྔུལ་ཚབས་ཆེར་འབྱུང་ཞིང་ཁའི་ནང་ན་བད་ཀན་ནམ་དྲི་མས་བསྒོས་པ་དང་། རིམས་ཚ་བས་གདུངས་ན་དེའི་འཚོ་བ་ནི་ཤིན་ཏུ་རྙེད་དཀའོ། །
[87b.7]འབྲུམ་པ་ཕྲ་མོ་བྱུ་རུའི་མདོག་འདྲ་བ་ལུས་ལ་བྱུང་སྟེ། དེ་མ་ཐག་ནང་དུ་ནུབ་ན་ཡུན་མི་རིང་བར་འཚོ་བ་འགག་གོ། །ཡང་ན་འབྲུམ་བུའི་མདོག་སྲན་ཆུང་ཤུན་པ་བཤུས་པའམ། ཡང་ན་བྱུ་རུའི་མདོག་ལྟར་དམར་བ་ཁ་ནང་དུ་བལྟས་ནས་ཚད་པ་འབྲུམ་ཐབས་སུ་བྱུང་ན་ཁྱད་པར་དུ་
[88a]
[88a.1]ལུས་འཇོམས་པར་བྱེད་དོ། །མིག་སེར་བཞིན་དུ་གདོང་ཐམས་ཅད་སེར་པོར་གྱུར་ཅིང་མུར་འགྲམ་གྱི་ཤ་ཟད་དེ་དངས་པ་དང་། ལུས་དྲོད་ཆེ་བ་གང་ཡིན་པ་དེ་ནི་སྤང་བར་བྱའོ། །སྔར་ལུས་ལ་རྨ་ཡོད་པ་ལས་རྨ་གློ་བུར་སྣང་བ་ལྟར་སྣང་ཞིང་དེ་ཡང་མེ་དབལ་
[88a.2]བཞིན་དུ་མྱུར་དུ་མཆེད་པར་བྱེད་ན་འདི་ཡང་སྤང་བར་བྱའོ། །གཞན་ཡང་རླུང་ལས་གྱུར་པའི་རྨ་ལ་ཟུག་གཟེར་མེད་པ་དང་། མཁྲིས་པ་ལས་བྱུང་བའི་རྨ་ལ་ཚ་བ་ཆུང་བ་དང་། བད་ཀན་ལས་གྱུར་པའི་རྨ་ལ་རྣག་མེད་པ་དང་། གནད་དུ་བྱུང་བའི་རྨ་ལ་རྣག་མེད་པ་དང་། རྨའི་ནང་དུ་
[88a.3]ཕྱེ་མས་མ་བཏབ་བཞིན་དུ་ཕྱེ་མས་གང་བ་ལྟར་སྣང་བ་དང་། དེ་བཞིན་དུ་རྨ་ལ་རྒྱུ་མེད་པར་མདུང་ཐུང་དང་། རྒྱལ་མཚན་དང་། མདའ་བོ་ཆེ་ལ་སོགས་པའི་གཟུགས་སུ་སྣང་ན། འདི་དག་ཀྱང་ཐག་རིང་དུ་སྤང་པར་བྱའོ། །མཚན་བར་རྡོལ་གྱི་ནད་ལས་བཤང་གཅི་གཉིས་ཀ་
[88a.4]རྨ་ལས་འབྱུང་བ་དང་། རྨ་ལས་འབུ་སྐྱེས་པ་དང་། པུས་མོ་དང་རྐང་པ་གཉིས་གཅིག་ལ་གཅིག་ཉེད་པར་བྱེད་པ་དང་། ཡང་དང་ཡང་ཁ་མྱང་བར་བྱེད་ན་དེ་ནི་འཚོ་བ་སྤངས་པ་ཡིན་ནོ། །ནད་པ་སེན་མོ་སོས་གཅོད་པ་དང་། སེན་མོས་སྐྲ་འབལ་བ་དང་། སེན་མོས་རྩ་
[88a.5]གཅོད་པ་ལྟ་ན་དེ་ཡང་འཆི་བའི་རྟགས་སོ། །ཤིང་བུས་ས་ལ་རི་མོ་འདྲི་བ་དང་། བོར་བའི་འབེན་ལ་བོད་པས་བརྡེགས་ན་དེ་ཡང་འཆི་བ་ཡིན་ནོ། །ནད་པ་བ་སྤུ་ལངས་པ་དང་། གཅིན་སྐ་བར་འབྱུང་བ་དང་། ལུད་པ་སྲ་བ་དང་། རིམས་ཀྱིས་འདེབས་པ་ཡང་སྲོག་ངེས་པར་
[88a.6]འབྲལ་ལོ། །ནད་པ་ཡང་དང་ཡང་དུ་དགོད་པ་དང་། སྐད་ཆེན་པོ་འདོན་པ་དང་། སྟན་ལ་རྐང་པ་བརྡེག་པ་དང་། སྣ་ལ་སོགས་པའི་བུ་ག་འབྲུད་པར་བྱེད་ན་འཆི་བའི་མཚན་མའོ། །ནད་པ་ལ་གློ་བུར་དུ་གདོང་ལ་ངོ་ཤིག་ཐིག་ལེ་ལྟ་བུ་བྱུང་བ་དང་། སོ་དང་སེན་མོ་ལ་གློ་
[88a.7]བུར་དུ་ཐིག་ལེ་དཀར་པོ་བྱུང་བ་དང་། ལྟོ་བའི་སྟེང་དུ་རྩའི་དྲ་བ་སྣ་ཚོགས་བཀྲ་བ་དང་། ནད་པ་དབུགས་གྱེན་དུ་མི་འབྱུང་ཞིང་དྲེད་ཡལ་བ་དང་། བརླ་བྲག་ཏུ་གཟེར་བ་དང་། བདེ་བ་ཐོབ་པ་དང་བྲལ་ན་བློ་དང་ལྡན་པས་དེའི་ཕྱིར་སྤང་སྟེ་དོར་བར་བྱའོ། །ནད་ལ་སོགས་པའི་འགྱུར་བ་ནི་ཤས་
[88b]
[88b.1]ཆེར་འཕེལ་ལ། རང་གི་རང་བཞིན་ནི་ཡོངས་སུ་ཉམས་ཏེ། དེ་ཡང་འཕྲལ་ལ་འགྱུར་ན་དེ་མ་ཐག་འཆི་བར་འགྱུར་རོ། །འཕྲལ་སྨན་པས་ནད་པའི་དོན་དུ་སྨན་གྱི་སྦྱོར་བ་འབད་ནས་བསྒྲུབས་ན་ཡང་བར་ཆད་ལ་སོགས་པས་དོན་དུ་མ་གྱུར་ན་ཡང་འཆི་བའི་རྟགས་སོ། །སྨན་པ་
[88b.2]མཁས་པ་ལས་མང་པོ་གོམས་ཤིང་གྲུབ་པས་ལུང་ལས་འབྱུང་བའི་ཆོ་ག་ཇི་སྙེད་པ་རྣམས་སྤྱད་ཀྱང་མ་གྲུབ་སྟེ། ནད་མ་ཞི་ན་དེ་ལ་གསོ་བའི་ཐབས་མེད་དོ། །ཡང་ན་སྨན་པས་ཟས་དང་སྨན་ལ་སོགས་པ་ཚུལ་བཞིན་དུ་སྦྱར་ན་ཡང་ཕྱིན་ཅི་ལོག་ཏུ་རོ་དང་ནུས་པ་ལ་སོགས་པ་
[88b.3]གཞན་དུ་གྱུར་ན་ཡང་དེ་ནད་མེད་པ་ཡིན་ན་ཡང་མི་འཚོའོ། །ནད་པའི་གནས་སུ་ཤིང་སྐམ་པོ་མེ་སྦར་ཏེ་དེར་རླུང་ཡང་མ་བྱུང་། ཆུས་ཀྱང་མ་བླུགས་བཞིན་དུ་མེ་འབར་བ་ཡང་དང་ཡང་ཤི་བ་དང་། སྣོད་ཀྱི་རྣམ་པ་གང་ཡང་རུང་བ་ལག་པ་ལ་སོགས་པའི་ནང་ནས་མ་བཏང་
[88b.4]བཞིན་ལྷུང་ཞིང་ཆག་པ་ནི་ངེས་པར་འཆི་བར་བསྟན་ཏོ། །སྐྱེས་བུ་གང་གི་ལུས་ཤིན་ཏུ་ཉམ་ཆུང་ཞིང་ནད་ཀྱིས་གཟིར་བ་ཡིན་པ་ལས་གློ་བུར་དུ་སོས་པ་ལྟར་བྱེད་པ་དང་། ཡང་ན་ནད་ཟུག་གཟེར་དང་བཅས་པས་ཉམ་ཐག་ན་འཆི་རྟགས་སུ་རིག་པར་བྱའོ། །ཉེ་དུ་རྣམས་ཀྱིས་ནད་
[88b.5]པའི་སོས་ཤིའི་བྱེ་བྲག་དྲིས་ཀྱང་སྨན་པས་སྨྲ་བར་མི་བྱ་སྟེ། འཆི་རྟགས་དང་ལྡན་བཞིན་དུ་གསོ་བའི་དཔྱད་ཀྱང་མི་བྱའོ། །གཤིན་རྗེའི་ཕོ་ཉ་དང་ཤ་ཟ་ལ་སོགས་པ་ནད་པའི་དྲུང་དུ་བསྟེན་ནས་ནད་པའི་སྲོག་འཕྲོག་པར་བྱ་བའི་ཕྱིར་སྨན་གྱི་མཐུ་སྟོབས་དང་ནུས་པ་ཟད་ཅིང་ཆུད་གསོན་པར་
[88b.6]བྱེད་དེ་དེ་བས་ན་དེ་ནི་སྤང་བར་བྱའོ། །དེ་ལ་ཚེའི་རིག་བྱེད་འདི་དག་ཐམས་ཅད་བདག་གིས་རང་བཟོར་བྱས་པ་མ་ཡིན་གྱི། སྔོན་གྱི་རིག་བྱེད་ལ་མཁས་པའི་སྨན་པ་རྣམས་ཀྱིས་གསུངས་པའི་ལུང་བསྟན་ཏེ་བཤད་ཅིང་བསྟན་པ་ཡིན་ནོ། །དེ་བས་ན་འཆི་རྟགས་ཀྱི་མཚན་ཉིད་ལ་བརྩོན་པ་
[88b.7]དང་བཅས་པས་མཁས་པར་བྱ་བ་དང་རྟོགས་པར་བྱའོ། །ཡང་ན་ན་བ་དང་མི་ན་བའི་མཚན་ཉིད་ལ་མཁས་ཤིང་བྱེ་བྲག་ཕྱེད་ན་སྨན་པ་ཞེས་བྱ་བའི་གྲངས་སུ་འགྲོའོ། །དེ་ལ་སྨན་པ་ཞེས་བྱ་བ་ནི་ནད་མི་འབྱུང་བ་ལ་མཁས་པ་དང་། ནད་གསོ་བ་ལ་མཁས་པ་ནི་ཟུག་རྔུ་འབྱིན་པ་ཞེས་བྱའོ། །
[89a]
[89a.1]མདོར་ན་ན་བ་དང་མི་ན་བའི་བྱེ་བྲག་ལ་མཁས་པ་དང་། ནད་པ་ལ་འཆི་ལྟས་མེད་ཅིང་ཚེ་ཡོད་པར་ཤེས་ལ་དེ་གསོ་བ་འམ། སྲུང་བ་ལ་མཁས་པ་ནི་ཚེའི་རིག་བྱེད་ཀྱི་འབྲས་བུ་ཡིན་ནོ། །དེ་ལ་འཆི་བ་ཞེས་བྱ་བ་ནི་སྲོག་དང་བྲལ་བ་ཡིན་ལ་འཆི་བ་དེ་ནི་སྔོན་གྱི་དྲང་
[89a.2]སྲོང་མཁས་པ་དང་ལྡན་པ་རྣམས་ཀྱིས་རྣམ་པ་བཞིར་ཤེས་ཏེ། དེ་ཡང་ཚེ་ཟད་ནས་ཤི་བ་དང་། བསོད་ནམས་ཟད་ནས་ཤི་བ་དང་། དེ་གཉིས་ཀ་ཟད་ནས་ཤི་བ་དང་། དུས་མ་ཡིན་པར་འཆི་བ་དང་བཞིའི་ཚུལ་དུ་ཤེས་ནས་བསྟན་པ་ཡིན་ནོ། །ལུས་ཀྱི་གནས་ལས་ལུས་མདོག་དང་ཚུལ་སྤྱོད་
[89a.3]ལས་འཆི་ལྟས་འབྱུང་བའི་ལེའུ་སྟེ་ལྔ་པའོ།། །།དེ་ནས་བང་ཆེན་ལ་སོགས་པའི་མཚན་མ་དགེ་བ་ལས་འཆི་ལྟས་བརྟག་པའི་ལེའུ་དྲུག་པ་བཤད་པར་བྱའོ། །སྨན་པའི་གན་དུ་ནད་པའི་ཕོ་ཉ་སྦྲོན་དུ་འོངས་པ་ན་ཡ་མཚན་ཅན་རབ་ཏུ་བྱུང་བ་དང་། བྲམ་ཟེ་ལ་སོགས་
[89a.4]པ་རིགས་བཞི་པོ་ནད་པ་རང་གི་རིགས་དང་མཐུན་པའི་འཕྲིན་པ་འོངས་ན་ནི་ལས་གྲུབ་པའི་མཚན་མའོ། །གལ་ཏེ་ཡ་མཚན་ཅན་ལ་སོགས་པ་གོང་མའི་རིགས་ལས་འཆོལ་བ་འམ། གཞན་པའི་ཕོ་ཉ་བྱུང་ན་ནི་གསོ་བའི་ལས་མི་འགྲུབ་པའི་རྟགས་སོ། །ཅི་སྟེ་རང་གི་རིགས་དང་
[89a.5]མཐུན་པའི་འཕྲིན་པ་འོངས་ན་ཡང་འོག་ནས་འབྱུང་བའི་མཚན་མ་འདི་དག་ལྟར་སྣང་ན་གསོ་བའི་འབྲས་བུ་མེད་པར་ཁོང་དུ་ཆུད་པར་བྱའོ། །དེ་ལ་སྨན་པ་འབོད་དུ་འོངས་པའི་ཚེ་ཕོ་ཉ་དེ་ཡང་ཤིན་ཏུ་དམན་པའི་ཚིག་ཏུ་སྨྲ་བ་དང་། ཕོ་ཉ་འཇིགས་པ་དང་བཅས་པ་དང་། ཤིན་ཏུ་
[89a.6]རིངས་ཐབས་སུ་སྨྲ་བ་དང་། སྔངས་བག་ཅན་དང་བཅས་པ་དང་། ཚིག་རྩུབ་བག་ཏུ་སྨྲ་བ་དང་། བཀྲ་མི་ཤིས་པར་སྨྲ་བ་དང་། ཕོ་ཉ་ལག་ན་མཚོན་ཆ་ཐོགས་པ་དང་། དབྱུག་པ་ཐོགས་པ་དང་། གཡོན་ཅན་དང་། མགོ་བྲེགས་པ་དང་། སྐྲའི་ལ་བ་ཅན་དང་།
[89a.7]དགེ་མཚན་མེད་པའི་མིང་དང་ལྡན་པ་དང་། ལས་ངན་པ་ཅན་དང་། གོས་དྲི་མ་ཅན་དང་། བུད་མེད་འཕྲིན་པར་འོངས་པ་དང་། མི་མང་པོ་ཕོ་ཉར་འོངས་པ་དང་། འཕྲིན་པ་ནད་ཀྱིས་བཏབ་པ་དང་། ལུས་མི་སྡུག་པ་དང་། མེ་ཏོག་གི་ཕྲེང་བ་དམར་པོས་ལུས་བརྒྱན་པ་
[89b]
[89b.1]འམ། ལི་ཁྲི་ལ་སོགས་པའི་བྱུག་པས་སྐུད་པ་དང་། འབྲུ་མར་གྱིས་ལུས་སྐུད་པ་དང་། འདམ་གྱིས་སྐུད་པ་དང་། གོས་རྙིང་པ་གྱོན་པ་དང་། མདོག་ཉམས་པའི་གོས་གྱོན་པ་དང་། ཆུས་འདྲུལ་བའི་གོས་གྱོན་པ་དང་། གོས་གཅིག་པ་དང་། ཕོ་ཉ་དེ་བོང་བུ་དང་། རྔ་མོ་
[89b.2]དང་། མ་ཧེ་ཞོན་ཏེ་འོངས་པ་དང་། ཕོ་ཉ་དེ་རྡོ་མཁན་དང་། ཤིང་མཁན་དང་། གོང་མའི་སྐྱོན་གང་ཡང་རུང་བ་དང་ལྡན་པའི་འཕྲིན་པ་རྒྱང་རིང་པོ་ནས་སྨན་པ་ལ་འབོད་ན་སྨན་པ་ནད་པའི་གན་དུ་འགྲོ་བར་མི་བྱའོ། །སྨན་པ་བདག་ཉིད་དགེ་མཚན་མ་ཡིན་པའི་བསམ་པ་བྱེད་
[89b.3]པའམ། དགེ་མཚན་མ་ཡིན་པའི་ཚིག་སྨྲ་བའི་དུས་སུ་འཕྲིན་པ་འོངས་པ་དང་། སྨན་པ་གཅེར་བུར་འདུག་པ་དང་། རྩྭ་གཅོད་ཅིང་འདུག་པ་དང་། རྡོ་འབུགས་ཤིང་འདུག་པ་དང་། ཕ་མའི་ཆེད་དུ་སྦྱིན་སྲེག་དང་། མཆོད་སྦྱིན་བྱེད་པ་དང་། ས་ལ་ཉལ་ཞིང་འདུག་
[89b.4]པ་དང་། སྐྲ་བཤིག་པ་དང་། མར་སྐུད་ཅིང་འདུག་པ་དང་། སྨན་པ་མྱ་ངན་དང་སྨྲེ་སྔགས་འདོན་ཅིང་ངུ་བའི་དུས་དང་། སྨན་པ་སྨྱུང་བ་བྱེད་ཅིང་འདུག་པ་དང་། མདོར་ན་སྨན་པའི་སྤྱོད་ལམ་གོང་མ་གང་ཡང་རུང་བ་དང་ལྡན་པའི་སྐབས་སུ་འཕྲིན་པ་འོངས་ན་ནད་པ་དེ་ངེས་པར་འཆི་
[89b.5]བ་ཡིན་པར་ཁོང་དུ་ཆུད་པར་བྱའོ། །ནད་པའི་ནད་གཞི་དང་། དུས་དང་། ཕོ་ཉ་དང་། སྨན་པ་དང་། ཕྱོགས་སུ་ལྡན་པར་ཚོགས་པ་ལས་ལྟས་སུ་བྱ་བ་ནི། ནད་པ་བད་ཀན་གྱི་གཞི་ཡང་ཡོད་ལ། སྨན་པ་དང་འཕྲིན་པ་གཉིས་ཀྱང་ཆུ་འགྲམ་དུ་སྔ་དྲོ་ཕྲད་པ་དང་། ནད་པ་མཁྲིས་
[89b.6]པའི་གཞི་ཡང་ཡོད་ལ་མེའམ་ཚ་བའི་ཕྱོགས་སུ་སྨན་པ་དང་ཕོ་ཉ་ཉི་མ་བྱེད་ལ་ཕྲད་པ་དང་། ནད་པ་རླུང་ནད་གྱི་གཞི་ཡང་ཡོད་ལ། ངམ་གྲོག་དང་གཡང་ས་ལྟ་བུར་སྨན་པ་དང་ཕོ་ཉ་ཕྱི་དྲོ་ཕྲད་པར་གྱུར་ན་དེ་ནི་གསོ་བའི་ཡུལ་ལས་འདས་པ་ཡིན་ནོ། །གཞན་ཡང་སྨན་པའི་དྲུང་དུ་ཕོ་
[89b.7]ཉ་འོངས་པའི་ཚེ་འདི་དག་ལྟར་སྣང་ན་ཡང་འཆི་བའི་མཚན་མར་བྱ་སྟེ། དེ་ཡང་ལྟེ་བ་ལག་པས་ནོམ་པ་དང་། དེ་བཞིན་དུ་སྣ་དང་། ཁ་དང་། སྐྲ་དང་། བ་སྤུ་དང་། སེན་མོ་དང་། སོ་དང་། ཕོ་མཚན་དང་། རྒྱབ་དང་། ནུ་མ་དང་། མགྲིན་པ་དང་། ལྟོ་བ་དང་། མཐེའུ་ཆུང་
[90a]
[90a.1]དང་། འདི་དག་ལ་ནོམ་པ་དང་། ཉུག་པ་དང་། རེག་པར་སྣང་བ་དང་། གཞན་ལག་པ་ནས་རས་བལ་ཐོགས་པ་དང་། དེ་བཞིན་དུ་ཕུབ་མ་དང་། ཞ་ཉེ་ནག་པོ་དང་། རུས་པ་དང་། རྩྭ་དང་། གཏུན་བརྡུང་དང་། རྡོ་དང་། ཕྱགས་མ་དང་། ཞིབ་མ་དང་། གོས་
[90a.2]ཀྱི་དུམ་བུ་དང་། ཐལ་བ་དང་། སོལ་བ་དང་། རས་ཀྱི་ཁ་ཚར་དང་། གཟིགས་མ་དང་། ཐག་པ་དང་། གཏུན་དང་། སྲང་དང་། ཞགས་པ་དང་། འདི་དག་ལག་ཏུ་ཐོགས་ཏེ་འོངས་པ་དང་། གཞན་ཡང་སྣོད་ཆག་པ་དང་། ཉམས་པ་ལ་སོགས་པ་ལག་ཏུ་ཐོགས་པའང་
[90a.3]རུང་སྟེ། མཚན་མ་དེ་དག་སྨན་པའི་མིག་སྔར་སྣང་ན་ནད་པ་ངེས་པར་འཆི་བའི་རྟགས་སོ། །གཞན་ཡང་ཉིན་ཞག་གི་བྱེ་བྲག་ལ་སོགས་པ་ལས་ཕོ་ཉའི་མཚན་མ་བསྟན་པ་ནི་འཕྲིན་པ་སྨན་པའི་གན་དུ་མཚན་ཕྱེད་ན་འོངས་པ་དང་། དེ་བཞིན་དུ་ཉི་མ་ཕྱེད་དང་། ཐོ་རངས་དང་།
[90a.4]དགོངས་དང་། གནམ་སྟོང་དང་། གཞན་ཡང་ཚེས་དྲུག་དང་། ཚེས་བཞི་དང་། ཚེས་དགུ་དང་། སྒྲ་གཅན་དང་། མཇུག་རིངས་ཤར་བའི་དུས་དང་། ཉི་ཟླ་གཟས་ཟིན་པའི་དུས་དང་། སྐར་མ་བྲ་ཉེ་དང་། སྨིན་དྲུག་དང་། སྐག་དང་། ཆུ་སྟོད་དང་། གྲེ་དང་།
[90a.5]ཁྲུམས་སྟོད་དང་། སྣྲུབས་དང་། སྐར་མ་དེ་རྣམས་དབང་བའི་ཉིན་ཞག་ལ་ཕོ་ཉ་འོངས་ཏེ་ནད་པའི་དོན་དུ་ཤོག་ཤིག་ཅེས་བྱ་བ་ལ་སོགས་པའི་ཚིག་གིས་འགུགས་པར་བྱེད་ན་ཡང་མི་དགེ་བའི་རྟགས་ཏེ། སྨན་པས་བགྲོད་པར་བྱ་བའི་གནས་མ་ཡིན་ནོ། །སྨན་པ་ནད་པའི་གན་
[90a.6]དུ་ཆས་པའི་ཚེ་ལམ་ཀར་འདི་དག་མཐོང་བ་འམ་ཐོས་པ་ནི་མི་འགྲུབ་པའི་མཚན་མ་སྟེ། དབང་པོ་མ་ཚང་བའི་མི་དང་། མི་རོའམ་མི་རོའི་རྒྱན་གྱིས་བརྒྱན་པ་མཐོང་བ་དང་། ཐག་པ་ལ་སོགས་པ་ཆད་པ་དང་། གོས་ལ་སོགས་པ་ཚིག་པ་དང་། སྣོད་ཆག་པ་ལ་སོགས་
[90a.7]པའི་སྒྲ་ཐོས་པ་དང་། མི་རོ་དྲི་མི་ཞིམ་པའམ། རེག་པ་ཡང་ཤས་ཆེར་རྩུབ་པ་དང་། གཞན་ཡང་དེ་དག་འདྲ་བའི་མི་དགེ་བའི་མཚན་མ་མཐོང་ངམ་ཐོས་ན་མི་དགེ་བའི་རྟགས་སོ། །གཞན་ཡང་ལམ་དུ་ཧ་ཧ་ཞེས་བྱ་བའི་སྒྲ་དང་། གཅིག་ལ་གཅིག་བརྡེག་པ་དང་། འཐབ་པའི་
[90b]
[90b.1]སྒྲ་དང་། ལྷུང་བའི་སྒྲ་དང་། སྦྲིད་པའི་སྒྲ་དང་། འདི་ལྟ་བུ་མཐོང་བ་དང་། གོས་དང་། གདུགས་དང་། མཚོན་ཆ་ཆག་པ་དང་། སྡུག་བསྔལ་དག་མཐོང་བ་དང་། གཞན་ཡང་མཆོད་པའི་རྟེན་དང་། རྒྱལ་མཚན་དང་། སྣོད་གང་ཡང་ཆུའི་ནང་དུ་ནུབ་པ་མཐོང་བ་དང་། བསད་པ་
[90b.2]དང་། དབུག་པ་དང་། བསྲེག་པ་ལ་སོགས་པའི་སྒྲ་དྲག་པོ་ཐོས་པ་དང་། སྨན་པ་ལམ་དུ་འགྲོ་བའི་ཚེ་ཐལ་བའམ། རྡུལ་གྱིས་གཡོགས་པའམ། བྱི་ལ་དང་། སྲོག་ཆགས་གོ་ད་དང་། སྲམ་དང་སྤྲེའུ་རྣམས་ཀྱིས་ལམ་བཅད་པ་དང་། གང་ན་ཉི་མ་རྒྱུ་བའི་ཕྱོགས་སུ་ནད་པ་
[90b.3]གནས་པ་དེར་འགྲོ་བ་དང་། ཤ་ཟ་བའི་གཅན་གཟན་གུང་ལ་སོགས་པ་དང་། བྱ་རྒོད་ལ་སོགས་པའི་སྒྲ་མི་བཟད་པ་ཐོས་པ་དང་། འདི་ལྟ་བུ་མཐོང་བ་དང་། ཐོས་པ་ཡང་ངེས་པར་འཆི་བའི་རྟགས་སུ་རིག་པར་བྱའོ། །གཞན་འདི་དག་མཐོང་ན་ཡང་མཚན་མ་ངན་པ་སྟེ། འབྲུ་ནག་
[90b.4]པོ་དང་། བུ་རམ་དང་། དར་བ་དང་། ལན་ཚྭ་དང་། བཏུང་བ་དང་། པགས་པ་དང་། ཡུངས་ཀར་དང་། ཞག་དང་། འབྲུ་མར་དང་། རྩྭ་དང་། འདམ་དང་། བུད་ཤིང་དང་། མ་ནིང་དང་། རིགས་ངན་པ་དང་། རྒྱ་དང་། རྙི་དང་། སློན་པ་དང་། བཤང་བ་དང་། རྣག་དང་། དེ་ལ་སོགས་པའི་
[90b.5]མཚན་མ་ངན་པ་མཐོང་བ་དང་། སྙིང་པོ་མེད་པ་དང་། འཁྲིག་པ་སྤྱོད་པ་དང་། །གཞན་ཡང་གང་འཕྲིན་པ་རས་བལ་ཐོགས་པ་ལ་སོགས་པའི་མཚན་མ་གང་ཡང་རུང་བ་འདིར་མཐོང་ན་ཡང་མཚན་མ་ངན་པར་བལྟའོ། །སྨན་པ་དགྲ་དང་ཕྲད་པ་དང་། མལ་དང་། སྟན་དང་། ཁྱོགས་ཁ་
[90b.6]སྦུབ་ཏུ་མཐོང་བ་དང་། དེ་བཞིན་དུ་སྣོད་ལ་སོགས་པ་ཁ་སྦུབ་ཏུ་མཐོང་ན་ཐམས་ཅད་འབྲས་བུ་མེད་པ་ཡིན་ནོ། །སྨན་པ་ལམ་དུ་འགྲོ་བའི་ཚེ་ཕོའི་མིང་དང་ལྡན་པ་བྱ་ངང་པ་དང་། སྲེག་པ་དང་། ལྕོ་ག་ལ་སོགས་པ་གཡོན་ལོགས་ན་གནས་པ་དང་། མོའི་མིང་དང་ལྡན་པ་རི་དགས་དང་ལྕོ་ག་མོ་
[90b.7]ལ་སོགས་པ་གཡས་ལོགས་ན་གནས་པ་དང་། བྱ་དང་རི་དགས་ལ་སོགས་པ་གཡོན་ནས་གཡས་སུ་འགྲོ་ན་དགེ་བའི་མཚན་མའོ། །ཁྱི་དང་ཝ་གཉིས་ནི་གཡས་ནས་གཡོན་དུ་འགྲོ་ན་ཤིས་པའི་མཚན་མའོ། །རི་དགས་གཉིས་ལ་སོགས་པ་ཟུང་དུ་མི་ཐེམ་པའི་གསུམ་དང་།
[91a]
[91a.1]ལྔ་ལ་སོགས་པ་མཐོང་ན་བཀྲ་ཤིས་པའི་རྟགས་སོ། །བྱ་ཙ་ཤ་དང་། བྱ་རྒོད་དང་། བ་ར་དྭ་ཙ་དང་། རྨ་བྱ་དང་། ནེའུ་ལེ་དང་། ར་དང་འདི་རྣམས་གཡས་གཡོན་གང་ན་གནས་ན་རྟག་ཏུ་ཤིས་པ་ཡིན་ནོ། །འུག་པ་དང་། བྱི་ལ་དང་། སྦྲུལ་དང་།
[91a.2]འདི་རྣམས་གཡས་གཡོན་གང་ན་གནས་ན་ཡང་མི་དགེ་བ་ཡིན་ནོ། །ཁུ་བྱུག་དང་། གོ་ད་དང་། སྦྲུལ་དང་། རི་བོང་དང་། ཛི་བ་ཀ་རྣམས་ཀྱི་མིང་ཐོས་པ་ནི་དགེ་བ་ཡིན་ལ་མཐོང་བ་ནི་མ་རུངས་པར་བཤད་དོ། །དེ་བཞིན་དུ་དྲེད་དང་། སྤྲེའུའི་མིང་ཐོས་པ་ནི་ཤིས་ལ་མཐོང་བ་
[91a.3]ནི་མི་དགེ་བ་ཡིན་ནོ། །སྨན་པའི་འཕྲལ་བ་ལ་དབང་པོའི་གཞུ་བབས་པ་ནི་མི་དགེ་བ་ཡིན་ལ། མཐོང་བ་ནི་བཀྲ་ཤིས་པའི་མཚན་མ་ཡིན་ནོ། །སྣོད་གང་མེས་གང་བར་མཐོང་ན་ནི་བཟང་བ་ཡིན་ལ། དེ་ཉིད་ཆག་ཅིང་ནང་སྟོང་པར་མཐོང་བ་ནི་ངན་པར་བཤད་དོ། །དེ་ལྟར་གོང་གི་
[91a.4]མཚན་མ་ངན་པ་དེ་དག་མཐོང་ན་ནི་དོར་ཞིང་སྤང་བར་བྱའོ། །སྨན་པ་ལམ་དུ་འགྲོ་བའི་ཚེའམ། ནད་པའི་ཁྱིམ་དུ་འཇུག་ཁར་ཞོ་མ་ཉམས་པ་ལ་སོགས་པ་འོག་ནས་འབྱུང་བ་འདི་དག་མཐོང་ན་བཀྲ་ཤིས་པར་གཟུང་སྟེ། སྙིང་རྗེའི་བསམ་པ་ཉེ་བར་བཞག་ནས་འབད་པ་བྱས་པས་གསོ་བར་
[91a.5]བྱའོ། །དེ་ཡང་ཞོ་མ་ཉམས་པ་ལ་སོགས་པ་མཐོང་བ་དང་། ཐོས་པ་དང་། རེག་པ་ནི་མི་འཆི་བའི་མཚན་མ་སྟེ། གཞན་འབྲས་དང་། ཁྲེ་དང་། སྦྲང་རྩི་དང་། མར་དང་། སེན་རྩི་དང་། དངུལ་རྡོ་དང་། བུམ་པ་དང་། དྲིལ་བུ་དང་། མར་མེ་དང་། པདྨ་དང་། རྩྭ་དཱུར་བ་
[91a.6]དང་། ཤ་རློན་པ་དང་། ཉ་དང་། འབྲས་ཡོས་དང་། འབྲས་བུ་དང་། གཡོས་སྣ་ཚོགས་སྦྱར་བ་དང་། རིན་པོ་ཆེ་དང་། གླང་པོ་ཆེ་དང་། བུམ་པ་གང་བ་དང་། བུད་མེད་གཞོན་ནུ་དང་། རྒྱལ་པོས་གོ་འཕང་བསྟོད་ཅིང་ཐབས་དམ་པ་རྩལ་བའི་མི་དང་འཕྲད་པ་དང་། ལྷ་རྣམས་
[91a.7]མཐོང་བ་དང་། རྒྱལ་པོ་མཐོང་བ་དང་། མེ་ཏོག་སུ་མ་ན་དཀར་པོ་དང་། གོས་ཤིན་ཏུ་དཀར་བ་དང་། རྔ་ཡབ་དཀར་པོ་དང་། རྟ་དང་། དུང་དང་། སྐྱེས་བུ་དམ་པ་དང་། བྲམ་ཟེ་དང་། ཅོད་པན་ཅན་དང་། རྟ་བབས་དང་། གཡུང་དྲུང་དང་། ས་ཕྱོགས་མཐོན་པོ་དང་།
[91b]
[91b.1]མེ་འབར་བ་དང་། བཟའ་བཏུང་ཡིད་དུ་འོང་བ་དང་། ཤིང་རྟ་གང་བ་དང་། བ་དྲུས་མ་བེའུ་དང་བཅས་པ་གསུམ་དང་། རྒོད་མ་རྟེའུ་དང་བཅས་པ་གསུམ་དང་། བུད་མེད་བུ་དང་བཅས་པ་མཐོང་བ་དང་། ཤང་ཤང་ཏེའུ་དང་། རི་དྭགས་དང་། བཞད་དང་། ཁུ་བྱུག་དང་། ངང་པ་དང་།
[91b.2]རྨ་བྱ་དང་། ཕྱུགས་གཅིག་བཏགས་པ་མཐོང་བ་དང་། གདུ་བུ་དང་། མེ་ལོང་དང་། ཡུངས་ཀར་དང་། གིའུ་ཝང་དང་། འདི་རྣམས་མཐོང་བ་དང་། བདུག་པའི་དྲི་དང་། བྱུག་པས་བྱུགས་པ་དང་། དཀར་བ་དང་དམར་བའི་ཁུ་བཅུད་དང་། ཁྱུ་མཆོག་དང་མཐུན་པའི་སྐད་སྙན་པ་
[91b.3]སྒྲོགས་པ་དང་། རི་དགས་དང་། བྱ་དང་། མི་རྣམས་ཀྱི་སྐད་སྙན་པ་དང་། དེ་བཞིན་དུ་གདུགས་དང་། རྒྱལ་མཚན་དང་། བ་དན་བསྒྲེངས་པ་མཐོང་བ་དང་། རྒྱལ་བ་དང་། བཀྲ་ཤིས་པར་གྱུར་ཅིག་པའི་སྐད་སྙན་པ་ཐོས་པ་དང་། རྫ་རྔ་དང་། རྔ་བོ་ཆེ་དང་། དུང་དང་།
[91b.4]བསོད་ནམས་དང་ལྡན་པའི་ལོངས་སྤྱོད་ཀྱི་སྒྲ་རྣམས་སྙན་པ་ཐོས་པ་དང་། རིག་བྱེད་འདོན་པའི་སྒྲ་དང་། བདེ་བའམ་མཐུན་པའི་རླུང་གིས་གཡོན་ལོགས་ནས་གཡས་སུ་བསྐོར་བ་དང་། མདོར་ན་སྨན་པ་ལམ་དུ་འགྲོ་བ་དང་། ནད་པའི་ཁྱིམ་དུ་ཕྱིན་པའི་ཚེ་གོང་དུ་བསྟན་
[91b.5]པ་དེ་དག་གི་སྒྲ་ཐོས་པ་དང་། མཐོང་བ་དང་། རིག་པར་བྱེད་པ་ན་ལས་རྩོམ་པ་ངེས་པར་འགྲུབ་པར་འགྱུར་བར་སྟོན་ཏོ། །དེ་ལྟར་འཕྲིན་པ་དང་དགེ་བ་དང་མི་དགེ་བའི་མཚན་ཉིད་བཤད་ནས། ད་ནི་རྨི་ལམ་གྱི་མཚན་མའི་འཆི་ལྟས་བཤད་པར་བྱ་སྟེ། སྐྱེས་བུ་གང་གི་རྨི་ལམ་གྱི་ནང་དུ་ཤི་
[91b.6]བའི་མི་དང་ཆང་ལྷན་ཅིག་འཐུངས་ནས་ཁྱིས་དྲུད་པར་རྨིས་ན་དེ་ནི་འཆི་བདག་རིམས་ཀྱི་གཟུགས་ཅན་གྱིས་མྱུར་དུ་ཁྱེར་བར་བྱེད་པ་ཡིན་ནོ། །མེ་ཏོག་གི་ཕྲེང་བ་དམར་པོས་ལུས་བརྒྱན་པ་དང་། ལུས་དམར་པོར་མཐོང་བ་དང་། གོས་དམར་པོ་གྱོན་པ་དང་། བུད་མེད་རྒོད་བག་ཅན་
[91b.7]གྱིས་ཁྱེར་བར་རྨིས་ན། དེ་ནི་འཆི་བདག་ཁྲག་མཁྲིས་ཀྱི་གཟུགས་ཅན་གྱིས་ཁྱེར་བ་ཡིན་ནོ། །མ་ཧེ་དང་། རྟ་དང་། ཕག་དང་། རྔ་མོ་དང་། བོང་བུ་རྣམས་ལ་བདག་ཉིད་ཞོན་ཏེ། ལྷོ་ཕྱོགས་སུ་འགྲོ་བར་རྨི་ན་གཅོང་ཆེན་པོའི་གཟུགས་ཅན་གྱི་འཆི་བདག་གིས་ཟིན་པ་ཡིན་ནོ། །
[92a]
[92a.1]ཤིང་ཆར་མ་ཅན་གྱི་ལྕུག་མ་དང་། འོད་མ་གང་ཡང་རུང་བ་མགོ་བོའམ་སྙིང་ག་ནས་བྱུང་བ་རྨིས་ན། དེ་ནི་འཆི་བདག་སྐྲན་གྱི་གཟུགས་ཅན་གྱིས་ཁྱེར་བ་ཡིན་ནོ། །སྐྱེས་བུ་གང་མེ་མི་འབར་བའི་མངག་མ་ལ་སྦྱིན་སྲེག་བྱེད་པ་རྨི་བ་དང་། མར་གྱིས་ལུས་བསྐུས་
[92a.2]ཤིང་གཅེར་བུར་འདུག་པ་དང་། སྙིང་གར་པདྨ་བྱུང་བ་རྨིས་ན་དེ་ནི་འཆི་བདག་མཛེའི་གཟུགས་ཅན་གྱིས་བཟུང་བ་ཡིན་ནོ། །ཏིལ་མར་གྱི་ཚོགས་རིགས་ངན་དང་ལྷན་ཅིག་འཐུང་བར་རྨིས་ན། དེ་ནི་འཆི་བདག་གཅིན་ནད་ཀྱི་གཟུགས་ཅན་གྱིས་བླངས་པ་ཡིན་ནོ། །སྲིན་པོ་ཀུན་དང་།
[92a.3]ལྷན་ཅིག་བྲོ་གར་བྱེད་ཅིང་ཆུ་ལ་འབྱིང་བ་རྨིས་ན། དེ་ནི་འཆི་བདག་སྨྱོ་བྱེད་ཀྱི་གཟུགས་ཅན་གྱིས་ཟིན་པ་ཡིན་ནོ། །མི་ཤི་བ་དང་ལྷན་ཅིག་ཆང་འཐུང་ཞིང་ར་རོ་ལ་གར་བྱེད་པར་རྨིས་ན། དེ་ནི་འཆི་བདག་བརྗེད་བྱེད་ཀྱི་གཟུགས་ཅན་གྱིས་འཆོས་པ་ཡིན་ནོ། །བོང་བུ་དང་།
[92a.4]རྔ་མོ་དང་། བྱི་བ་དང་། སྤྲེའུ་དང་། སེར་གེ་དང་། ཕག་དང་། ཝ་དང་། རོ་ལ་ཞོན་པར་རྨིས་ན། དེ་ནི་འཆི་བདག་གི་ཁར་སོན་པ་ཡིན་ནོ། །སྣུམ་ཁུར་དང་། ཤ་ཀུ་ལི་རྨི་ལམ་གྱི་ནང་དུ་ཟོས་པར་རྨིས་ལ་སད་མ་ཐག་ཏུ་དེ་བཞིན་སློན་པར་བྱེད་ན། དེ་ནི་འཚོ་བའི་སྲོག་
[92a.5]སྤངས་པ་ཡིན་ནོ། །ཟླ་བ་དང་ཉི་མ་གཟས་ཟིན་པ་རྨིས་ན། དེ་ནི་མིག་ནད་སྐྱེད་པར་བྱེད་པའི་མཚན་མའོ། །ཟླ་བ་དང་ཉི་མ་ལྷུང་བར་རྨིས་ན། མིག་གི་མཐོང་བ་ཉམས་པའི་རྟགས་སོ། །སྤྱི་བོ་ནས་འོད་མའི་ལྕུག་མ་སྐྱེས་པར་རྨིས་པ་དང་། སྤྱི་བོ་ལ་བྱ་རོག་གི་ཚང་འཆའ་བ་དང་།
[92a.6]མགོ་བོ་ཆད་པར་རྨིས་ན་འཚོ་བ་སྤང་བར་ཁོང་དུ་ཆུད་པར་བྱའོ། །བྱ་རྒོད་དང་། འུག་པ་དང་། བྱ་རོག་ལ་སོགས་པས་ཡོངས་སུ་བསྐོར་བ་དང་། དེ་བཞིན་དུ་ཡི་དགས་དང་། ཤ་ཟ་མོ་དང་། ཏྲ་པ་ཏི་དང་། ཨན་ཏྲའི་ཡུལ་གྱི་མི་ལྟར་ཤ་གནག་པ་དང་། རིགས་ངན་ཤ་མདོག་ངན་
[92a.7]པའི་མི་རྣམས་ཀྱིས་བསྐོར་བར་རྨིས་ན་འཆི་བའི་མཚན་མའོ། །སྤའི་ཚལ་དང་། འོད་མའི་ཚལ་དང་། ཚེར་མའི་ཚལ་དང་། རྩྭའི་ནགས་སྟུག་པོའི་ནང་དུ་འགྲོ་ཞིང་ཉམ་ཐག་པ་རྨིས་ན་འཆི་བའི་རྟགས་སུ་བསྟན་ཏོ། །གཡང་སར་ལྷུང་བ་དང་། དུར་ཁྲོད་དང་། རྡུལ་དང་།
[92b]
[92b.1]ཐལ་བའི་ནང་དུ་ཉལ་བ་རྨིས་ན་འཆི་བའི་རྟགས་སུ་རིག་པར་བྱའོ། །ཆུ་དང་འདམ་གྱི་ནང་དུ་ལུས་བྱིང་ཞིང་སྙིང་ག་ནས་ཆུའི་རྒྱུན་འབྱུང་བར་རྨིས་ན་གཤིན་རྗེའི་ཁྱིམ་ན་གནས་པ་ཡིན་ནོ། །གླུ་དང་། གར་དང་། རོལ་མོ་བྱེད་ཅིང་མེ་ཏོག་གི་ཕྲེང་བ་དམར་པོ་དང་། གོས་དམར་པོ་འཆང་ཞིང་གྱོན་
[92b.2]པར་རྨིས་ན་མི་འདོད་པ་ཡིན་ནོ། །བདག་གི་ལུས་རྒས་པར་རྨི་བ་དང་། ལུས་འཕེལ་བར་རྨི་བ་དང་། བསྐུ་བྱུག་བྱེད་པ་རྨི་བ་དང་བག་མ་བཏང་བར་རྨི་བ་དང་། སྤུ་འདྲེག་པར་རྨིས་ན་འདི་ཡང་མི་འདོད་པ་ཡིན་ནོ། །བཙོས་པའི་ཟས་དང་། སྣུམ་དང་། ཆང་ལ་བརྐམ་པ་དང་། སྐྱུགས་པ་དང་། འཁྲུ་བ་རྨིས་
[92b.3]ན་མི་འདོད་པའི་རྟགས་སོ། །གསེར་ལ་སོགས་པའི་ལྕགས་དྲུག་རྙེད་པར་རྨིས་པ་དང་། རྩོད་པ་དང་། འཆིང་བ་དང་། བདག་ཕམ་པར་རྨིས་ན་དེ་ཡང་འཆི་བའི་མངོན་རྟགས་སོ། །རྐང་པའི་པགས་པ་གཡང་དུ་ལྷུང་བ་དང་། མཆིལ་ལྷྭམ་གཉིས་སྟོར་བ་རྨིས་པ་དང་། སྐྱེས་བུ་
[92b.4]གང་ཡང་ཕ་མེས་ཤི་བ་ལ་སོགས་པ་རྣམས་ཀྱིས་ངག་རྩུབ་པོས་བདག་ཉིད་སྤྱོས་ཏེ་ལུས་སྤུ་ཟིང་ཞེས་བྱེད་ཅིང་འཇིགས་པར་རྨིས་པ་དང་། གཞན་ཡང་བྲག་རལ་བ་དང་། སྐར་མདའ་དང་། གཟའ་དང་། རྒྱུ་སྐར་དང་། སོ་དང་། ལྷམ་དང་། མིག་དང་འདི་རྣམས་ལྷུང་བ་དང་།
[92b.5]ཞིག་པར་རྨིས་ན་དེ་ཡང་མི་འདོད་པ་ཡིན་ནོ། །ནགས་ཚལ་སྟུག་པོའི་ནང་དུ་འགྲོ་བ་དང་། མེ་ཏོག་དམར་པོས་བརྒྱན་པ་དང་། སྡིག་ཅན་གྱི་ཁྱིམ་དུ་འཇུག་པ་དང་། མི་རོ་བསྲེགས་པའི་ཤིང་གི་ནང་དུ་བདག་ཉིད་ཞུགས་པར་རྨི་བ་དང་། འཇིགས་སུ་རུང་བའི་གནས་སུ་འགྲོ་བ་དང་། མའི་
[92b.6]མངལ་དུ་སླར་འཇུག་པར་རྨིས་ན་སྲོག་དང་བྲལ་བའི་རྟགས་སོ། །ཁང་བཟངས་དང་། བྲག་མཐོན་པོ་དང་། རི་ཆེན་པོ་ནས་ལྷུང་བར་རྨིས་ན་འཆི་བའི་མངོན་རྟགས་སོ། །དེ་བཞིན་དུ་ཉས་མིད་པར་རྨིས་ན་དེ་ལྟར་བལྟའོ། །སྐྱེས་བུ་གང་ཆོས་གོས་གོན་པ་དང་། ཆ་ལུགས་ངན་པ་འཆང་
[92b.7]བ་དང་། གཅར་བུ་རྣམས་དང་། ལག་ན་དབྱུག་པ་ཐོགས་པ་དང་། མིག་དམར་པོ་དང་། ལུས་ནག་པོའི་སྐྱེས་བུ་མཐོང་བ་རྨིས་ན་བསྔགས་པ་མ་ཡིན་ཏེ་ཉེས་པ་དང་བཅས་པ་ཡིན་ནོ། །བུད་མེད་ནག་མོ་སྡིག་པ་ཅན་གྱི་གདོང་དང་ལྡན་པ། སྐྲ་དང་། སེན་མོ་དང་། ནུ་མ་རིང་བ་དང་།
[93a]
[93a.1]གོས་དང་། ཕྲེང་བ་རྙིངས་ཤིང་དྲི་མ་དང་བཅས་པ་གྱོན་ཞིང་འོངས་པ་རྨིས་ན་ངེས་པར་འཆི་བའི་མངོན་རྟགས་སོ། །གོང་དུ་རྨི་ལམ་སྣ་ཚོགས་ཀྱི་མཚན་མར་བསྟན་པ་དེ་དག་འདིར་རྨི་ལམ་དུ་ཇི་ལྟར་འབྱུང་ཞིང་མཐོང་བ་ཡིན་ཞེ་ན། གཉིད་ལོག་པའི་གནས་
[93a.2]སྐབས་སུ་དྲི་མ་གསུམ་ཤས་ཆེར་འཁྲུགས་པས་དབང་པོའི་རྒྱུན་ཀུན་ཏུ་ཁྱབ་སྟེ་གནས་པ་ལས་ཡིད་ནི་མི་འགག་པའི་བདག་ཉིད་ཡིན་པས་དབང་པོའི་རྒྱུན་ཐམས་ཅད་ཀྱི་རྗེས་སུ་གཅོད་པའི་བྱེ་བྲག་ལས་རྨི་ལྟས་སུ་སྣང་སྟེ། དེ་ཡང་མིག་གི་དབང་པོའི་སྐྱོན་དང་བཅས་པའི་
[93a.3]རྒྱུན་ལ་ཡིད་གཅོད་པའི་དུས་ན་ནི་གཟུགས་སྣ་ཚོགས་མཐོང་བ་ལ་སོགས་པའི་རྨི་ལམ་འབྱུང་བ་ཡིན་ལ། དེ་བཞིན་དུ་དབང་པོའི་རྒྱུན་ཐམས་ཅད་ལ་ཡང་དེ་ལྟར་སྦྱར་བར་བྱ་སྟེ། འོན་ཀྱང་སྐྱོན་དང་བཅས་པའི་དབང་པོའི་རྒྱུན་ལས་ཡིད་ཀྱི་བཅས་པ་ལས་རྨི་ལམ་མི་
[93a.4]བཟད་པ་སྣ་ཚོགས་འབྱུང་བ་ཡིན་པས་ན་འཆི་བར་འགྱུར་ལ། མི་ན་བ་ནི་ནད་ཀྱིས་འདེབས་ཤིང་འཚོ་བ་ཐེ་ཚོམ་དང་བཅས་པར་འགྱུར་རོ། །དེ་ལ་རྨི་ལམ་རྨི་བར་བྱེད་པའི་རྒྱུ་ནི་རྣམ་པ་བདུན་ཏེ། སྔར་མིག་གིས་གཟུགས་ཀྱི་བྱེ་བྲག་མཐོང་བ་དང་། མྱོང་བ་དང་།
[93a.5]རྣ་བས་ཐོས་པ་དང་། ཡིད་ལ་གང་འདོད་པའི་དངོས་པོ་དང་། བརྟག་པ་དང་། བསྒོམ་པ་དང་། ནད་ཀྱི་གཞི་ལས་བྱུང་བ་སྟེ་བདུན་པོ་དེ་དག་གོ། །དེ་དག་ལས་མཐོང་བ་དང་། མྱོང་བ་དང་། ཐོས་པ་དང་། འདོད་པ་དང་། བརྟག་པ་ལས་རྨི་ལམ་འབྱུང་བ་འདི་དོན་མེད་པ་ཡིན་
[93a.6]ནོ། །དེ་ལ་ནད་གཞི་གསུམ་གྱི་རང་བཞིན་གྱི་རྨི་ལམ་ནམ་མཁའ་ལ་འཕུར་བ་དང་། མེ་མཐོང་བ་དང་། ཆུ་མཐོང་བ་དང་། དེ་དག་ཀྱང་དོན་མེད་པ་ཡིན་ནོ། །གཞན་ཡང་སྔར་རྨི་ལམ་གསལ་བ་ལས་ཕྱིས་བརྗེད་ཅིང་མི་དྲན་པ་དང་། རྨི་ལམ་མང་པོ་ཡུན་རིང་དུ་རྨི་བ་དང་། ཡུན་ཐུང་
[93a.7]བར་རྨི་བ་དང་། འདི་དག་ཀྱང་དོན་མེད་པའི་རྨི་ལམ་མོ། །གཞན་དུ་ནམ་གྱི་ཆ་སྟོད་ལ་རྨི་ལམ་རྨིས་པ་ནི་འབྲས་བུ་ཡུན་རིང་པར་སྟོན་པ་འམ། ཆུང་བའི་རྟགས་སོ། །ནང་པར་བ་ལང་བཟས་ལ་གཏོང་བའི་དུས་སུ་རྨི་ལམ་རྨི་བ་ནི་འཕྲལ་འབྲས་བུ་ཆེན་པོ་སྟོན་པའི་རྟགས་སོ། །
[93b]
[93b.1]རྨི་ལམ་བཟང་པོ་རྨིས་ན་རྨི་ལམ་གཞན་གྱིས་བར་མི་ཆོད་པར་བྱ་བའི་ཕྱིར། གཉིད་ལོག་པར་མི་བྱ་སྟེ་འབེལ་བའི་གཏམ་བྱའོ། །གལ་ཏེ་སྡིག་པའི་རྨི་ལམ་རྨི་ན་ནི་ཞི་བའི་སྦྱིན་སྲེག་དང་། སྦྱིན་པ་དང་། བཟླས་བརྗོད་དང་། བསྒོམ་པ་དང་། བཀྲ་ཤིས་མང་པོ་ཡང་
[93b.2]བྱའོ། །ཅི་སྟེ་མི་དགེ་བ་རྨི་ལམ་གྱི་ནང་དུ་མཐོང་ན། དེ་ཞི་བར་བྱ་བའི་ཕྱིར་ཡང་གཉིད་ལོག་པར་བྱ་སྟེ། རྨི་ལམ་བཟང་པོ་ཕྱིས་བྱུང་ན་སྔ་མ་དོན་མེད་པ་ཡིན་ནོ། །གཞན་ཡང་འོག་ནས་འབྱུང་བ་འདི་དག་རྨི་ན་ཚེ་རིང་བ་ལ་སོགས་པའི་ཡོན་ཏན་འབྱུང་སྟེ། དེ་ཡང་ལྷ་དང་།
[93b.3]བྲམ་ཟེ་དང་། ཁྱུ་མཆོག་དང་། གྲོགས་པོ་གསོན་པོ་དང་། རྒྱལ་པོ་དང་། སྐྱེས་བུ་དམ་པ་དང་། སྙན་པར་གྲགས་པའི་མི་དང་། མེ་འབར་བ་དང་། གྲུབ་པ་དང་། མཚོ་ཤིན་ཏུ་དངས་པ་དང་། ཁྱེའུ་དང་། བུ་མོ་ལུས་མདོག་དཀར་ལ་ཅུང་ཟད་དམར་བ་དང་། གོས་
[93b.4]དཀར་ལ་ཤིན་ཏུ་འཚེར་བ་དང་། མིའི་ཤ་ཟ་བ་དང་། ལུས་ལ་མེ་འབར་བ་དང་། ལུས་ཐམས་ཅད་ཁྲག་གིས་བྱུགས་པར་རྨིས་པ་དང་། མདོར་ན་རྨི་ལྟས་ཀྱི་མཚན་མ་བཟང་པོ་དེ་དག་མཐོང་ན། ཚེ་རིང་བ་དང་། ནད་ཉུང་བར་འགྱུར་རོ། །གཞན་དུ་ན་གདུགས་དང་།
[93b.5]མེ་ལོང་དང་། དུག་དང་། ཤ་རློན་པ་དང་། སྣ་མའི་མེ་ཏོག་དཀར་པོ་དང་། གོས་དང་། མི་གཙང་བས་ལུས་བྱུགས་པའི་མི་དང་། ཤིང་ཏོག་ཨ་མྲ་ལ་སོགས་པའི་འབྲས་བུ་རྙེད་པར་རྨིས་ན་མཆོག་ཏུ་བཟང་བ་ཡིན་ནོ། །རི་མཐོན་པོ་དང་། ཁང་བཟངས་ཀྱི་སྟེང་དང་། ཤིང་
[93b.6]འབྲས་བུ་ཅན་དང་འདི་རྣམས་ལ་འཛེག་པ་དང་། སེང་གེ་དང་། མི་དང་། གླང་པོ་ཆེ་དང་། རྟའམ་བ་ལང་གིས་དྲངས་པའི་ཤིང་རྟ་དང་། འདི་དག་ལ་ཞོན་པར་རྨིས་ན་དེ་ནི་བདེ་བ་སྦྱིན་པར་བྱེད་དོ། །ཆུ་བོ་ཆེན་པོ་དང་། མཚོ་བྲན་དང་། རྒྱ་མཚོ་ཆེན་པོ་གང་ཡང་རུང་བ་
[93b.7]ཤར་ཕྱོགས་ནས་བྱང་ཕྱོགས་སུ་རྒལ་བར་རྨིས་ན་འདི་ཡང་བདེ་བ་སྐྱེད་པར་བྱེད་དོ། །རིགས་ང་ན་དང་འགྲོགས་པ་དང་། བདག་ཉིད་ཤི་བར་རྨིས་ན་ཡང་ཚེ་རིང་བ་ལ་སོགས་པའི་མཚན་མ་དགེ་བ་ཡིན་ནོ། །ལམ་ཉམ་ང་བ་ནས་འབྱུང་བ་དང་། ལྷ་རྣམས་དང་། ཕ་མ་ལ་མཆོད་
[94a]
[94a.1]པར་རྨིས་པ་དང་། བདག་ཉིད་ངུ་བ་དང་། རྡེག་འཆོས་པ་ལས་ལྡང་བ་དང་། དགྲ་ཕམ་པར་བྱས་པ་དང་། སྐྱེས་བུ་གང་གིས་དེ་ལྟར་རྨིས་ན། ཚེ་རིང་བ་དང་། ནད་མེད་པ་དང་། ནོར་མང་པོ་རྙེད་པ་ལ་སོགས་པ་ཐོབ་པའི་རྟགས་སོ། །གཞན་ཡང་
[94a.2]ནད་པའི་ཡོན་ཏན་ཁྱིམ་དུ་བཀྲ་ཤིས་ཤིང་དམ་པ་རྣམས་ཀྱི་སྤྱོད་ཚུལ་དང་ལྡན་པ་དང་། ཆུང་མ་དང་། བུ་དང་། བུ་མོ་དང་། ཉེ་དུ་དང་། གཡོག་འཁོར་དང་ལྡན་ཞིང་། དེ་ཡང་སྙིང་ཉེ་ཞིང་མཐུན་པར་འཇུག་པ་དང་། སྨན་ལ་ཡིད་ཆེས་པ་དང་། སྨན་མང་པོ་
[94a.3]འཆང་བ་དང་། སྙིང་སྟོབས་ཆེ་བ་དང་། ཕོ་ཉ་དང་ལྡན་པ་དང་། གཙང་སྦྲ་ཆེ་བ་དང་། སྨན་པ་དང་། བྲམ་ཟེ་ལ་གུས་པ་དང་། ནད་པ་དང་ནད་གཡོག་གཉིས་ཀྱང་སྨན་དཔྱད་ཀྱི་གསོ་བ་ལ་སེམས་སྐྱོ་བ་མེད་པ་དང་། མདོར་ན་གོང་དུ་སྨོས་པའི་བཀྲ་ཤིས་པ་ལ་སོགས་པའི་
[94a.4]ཡོན་ཏན་འདི་དག་དང་ལྡན་པའི་ནད་པ་ནི་བདེ་བ་ཐོབ་པར་འགྱུར་བའི་མཚན་མ་ཡིན་ནོ། །དེ་ལ་ལུས་ཀྱི་གནས་ཞེས་བྱ་བ་འདི་སྐྱེ་བ་དང་འཆི་བའི་མཚན་ཉིད་བསྟན་པ་ཡིན་པས་ལུས་ཀྱི་གནས་ཞེས་བྱའོ། །ལུས་ཀྱི་གནས་ལས་འཕྲིན་པའི་མཚན་མ་ལས་འཆི་ལྟས་སུ་བསྟན་
[94a.5]པའི་ལེའུ་ཐ་མ་རྫོགས་སོ།། །།ཡན་ལག་བརྒྱད་པའི་སྙིང་པོ་ལས་ལུས་ཀྱི་གནས་ཞེས་བྱ་བའི་ལེའུ་དྲུག་པ་རྫོགས་ཏེ་ཡན་ལག་བརྒྱད་པའི་སྙིང་པོའི་གནས་གཉིས་པའོ།། །།དེ་ནས་ནད་ཐམས་ཅད་ཀྱི་གཞི་བཤད་པར་བྱ་སྟེ། ཅི་ན་ཡང་རུང་སྟེ་ནད་
[94a.6]དོ་ཅོག་ཐམས་ཅད་ཀྱི་གཞི་ལས་ནད་དུ་འགྱུར་བར་བསྟན་པ་དྲང་སྲོང་ཆེན་པོ་རྒྱུན་ཤེས་ཀྱི་བུ་ལ་སོགས་པ་ན་རེ་ནད་ཅེས་བྱ་བའི་མིང་དུ་བརྩི་བའི་རྣམ་གྲངས་ནི་ལུས་འཇོམས་པར་བྱེད་པ་ཡིན། སྡིག་པ་ཡིན། རིམས་ཡིན། གནོད་པར་བྱེད་པ་ཡིན། །འགྱུར་བར་བྱེད་པ་ཡིན།
[94a.7]སྡུག་བསྔལ་མ་ཞུ་བའི་ནད་དམིགས་ཡིན། ལུས་ཟད་པར་བྱེད་པ་ཡིན། འཚོ་དཀའ་བར་བྱེད་པ་ཡིན། མཁུན་པར་བྱེད་པ་ཡིན། ལུས་ཀུན་མི་བདེ་བར་བྱེད་པ་ཡིན་ཞེས་བྱའོ། །ནད་དོ་ཅོག་གི་བྱེ་བྲག་ནི་རྣམ་པ་ལྔར་ཤེས་པར་བྱ་སྟེ། དེ་དག་གང་ཞེ་ན་ནད་ཀྱི་གཞི་དང་། ནད་ཚུལ་
[94b]
[94b.1]སྔར་བྱུང་བ་དང་། ནད་ཀྱི་ཚུལ་ཕྱེད་པ་དང་། ཟས་སྨན་འཕྲོད་པ་གོམས་པར་བྱེད་པ་དང་། ནད་དཀྱེལ་དུ་གྱུར་པ་དང་། རྣམ་པ་ལྔར་ཤེས་པར་བྱའོ། །དེ་ལ་ནད་ཀྱི་གཞི་ཞེས་བྱ་བ་ནི་ནད་དུ་གྱུར་པའི་རྒྱུ་དང་། ནད་དུ་གྱུར་པའི་སྐྱེ་མཆེད་དང་། ནད་དུ་གྱུར་པའི་རྐྱེན་དང་། ནད་སློང་བར་བྱེད་
[94b.2]པ་དང་། ནད་དུ་གྱུར་པའི་རྒྱུ་མཚན་དང་། རྣམ་གྲངས་ཀྱི་མིང་འདི་རྣམས་ལ་ནད་ཀྱི་གཞི་ཞེས་བྱའོ། །དེ་ལ་ནད་ཚུལ་སྔར་བྱུང་བ་ཞེས་བྱ་བ་ནི་ནད་དམིགས་ཤིག་འབྱུང་བར་ནི་གྱུར་ན། ནད་ཅི་ཡིན་པའི་བྱེ་བྲག་མ་ཕྱེད་པས་ནད་ཀྱི་ཚུལ་ཅི་ཡིན་པ་གསལ་བར་ཡང་མི་སྣང་། ནད་དཀྱེལ་
[94b.3]ཡང་མི་ཆེ་བ་དེ་ལྟ་བུ་ལ་ནད་ཚུལ་སྔར་བྱུང་བ་ཞེས་བྱའོ། །དེ་ལ་ནད་ཀྱི་ཚུལ་ཕྱེད་པ་ཞེས་བྱ་བ་ནི་ནད་ཀྱིས་ཐེབས་པའི་ནད་དང་། ནད་དམིགས་ཀྱི་དངོས་པོ་ཅི་ཡིན་པ་གསལ་བར་ཤེས་པ་ནི་ནད་ཀྱི་ཚུལ་ཕྱེད་པ་ཞེས་བྱ་སྟེ། ནད་ཀྱི་དབྱིབས་ཚུལ་ཅི་འདྲ་བ་དང་། ནད་དམིགས་ཀྱི་
[94b.4]ནད་ཀྱི་བྱེ་བྲག་གསལ་བར་མངོན་པ་དང་། ནད་ཀྱི་རྟགས་དང་། ནད་ཀྱི་མཚན་ཉིད་དང་། ནད་ཀྱི་མཚན་མ་ཅི་ཡིན་པ་བྱེ་བྲག་ཕྱེད་པར་ཤེས་པའོ། །ཟས་སྨན་འཕྲོད་པ་གོམས་པར་བྱེད་པ་ཞེས་བྱ་བ་ནི་ནད་ཀྱི་རྒྱུ་དང་མི་མཐུན། ནད་ཀྱི་ངོ་བོ་དང་མི་མཐུན་པར་སྨན་དང་། ཟས་དང་།
[94b.5]གནས་པ་དང་། སྤྱོད་པ་ལ་སོགས་པ་བསྒྱུར་ཏེ་བྱས་པས་བདེ་བར་ཤེས་པར་འགྱུར་བ་དེ་ནི་ཉམས་སུ་ཕན་ཞིང་བརྟས་པར་བྱེད་པ་ཞེས་བྱ་སྟེ། དེ་ནི་ནད་དང་འཕྲོད་པའི་ཟས་སྨན་གོམས་པ་ཞེས་བྱའོ། །དེ་ལྟ་བུ་ལས་བཟློག་པ་ནི་ཉམས་སུ་མི་ཕན་ལ་བརྟ་བར་མི་འགྱུར་ཏེ་དེ་ནི་ཟས་སྨན་ནད་
[94b.6]དང་མི་འཕྲོད་པ་ཞེས་བྱའོ། །དེ་ལ་ནད་དཀྱེལ་དུ་གྱུར་པ་ཞེས་བྱ་བ་ནི་རླུང་ནད་དམ། མཁྲིས་པ་འམ། བད་ཀན་ལྟ་བུའི་ནད་ཀྱིས་ཐེབས་པ་དེ་ཆེར་སྐྱེས་པས་ནད་སྔོན་དུ་ན་བར་གྱུར་ཏེ་བདག་ནི་ནད་འདི་ལྟ་བུ་ཞིག་གིས་ཐེབས་ཏེ་ན་ཞིང་འདུག་སྙམ་དུ་ཤེས་པ་ཡིན་ནོ། །ནད་དོ་ཅོག་
[94b.7]ཐམས་ཅད་ཀྱི་ཚུལ་ཤེས་པར་བྱ་བའི་ཐབས་རྣམ་པ་ལྔ་ཡོད་དེ། ནད་རེ་རེ་ལ་ཡང་སྣ་གྲངས་སུ་ཡོད་པ་དང་། ནད་དམིགས་གང་ཡིན་བརྟག་པ་དང་། གཙོ་བོར་གྱུར་པའི་ནད་དང་། ནད་སྟོབས་ཀྱི་མཐུ་ཆེ་བ་དང་། དུས་ལས་ནད་དམིགས་ཤེས་པར་བྱ་བ་དང་ལྔའོ། །དེ་
[95a]
[95a.1]ལ་ནད་རེ་རེའི་སྣ་གྲངས་ཞེས་བྱ་བ་ནི་དཔེར་ན་རིམས་ལྟ་བུ་ལ་ཡང་རིམས་ནད་རྣམ་པ་བརྒྱད་དུ་བཤད་པ་ཡིན་ནོ། །དེ་ལ་ཡང་ནད་དམིགས་གང་ཡིན་བརྟག་པ་ནི་རླུང་ནད་དང་། མཁྲིས་པའི་ནད་དང་བད་ཀན་གྱི་ནད་རྣམས་ཅིག་ཅར་དུས་གཅིག་ཏུ་ན་
[95a.2]ན་ནད་དེ་རླུང་གི་ཤས་སུ་གཏོགས་པ་ཡིན་ནམ། མཁྲིས་པའམ་བད་ཀན་གྱི་ཤས་གར་གཏོགས། ནད་འདི་གང་ཡིན་ཞེས་རྣམ་པར་རྟོག་པར་བྱེད་པའོ། །དེ་ལ་གཙོ་བོར་གྱུར་པའི་ནད་ཅེས་བྱ་བ་ནི་རླུང་དང་མཁྲིས་པ་དང་བད་ཀན་གྱི་སར་རང་རང་གི་ནད་བྱུང་བ་ནི་ནད་རང་དབང་ཅན་ཞེས་
[95a.3]བྱ་སྟེ། དེ་ནི་ནད་གཙོ་བོར་གྱུར་པ་ཞེས་བྱའོ། །བད་ཀན་གྱི་སར་རླུང་ནད་ལྟ་བུ་བྱུང་བ་ནི་རང་དབང་མེད་པ་གཙོ་བོར་མ་གྱུར་པ་ཡིན་ཏེ་གསོ་དཀའ་བ་ཞེས་བྱའོ། །དེ་ལ་ནད་དམིགས་ཀྱི་མཐུ་ཆེ་བ་ཞེས་བྱ་བ་ནི་ཅི་ལས་ནད་དུ་གྱུར་པའི་ནད་ཀྱི་གཞི་ཡང་རྗེས་ཆོད་དེ་ཤེས་པ་དེ་ལས་
[95a.4]ནད་དུ་གྱུར་པའི་ནད་ཀྱང་དངོས་སུ་མངོན་པར་གྱུར་པ་དེ་ནི་ནད་དམིགས་མཐུ་ཆེ་བར་གྱུར་པ་ཞེས་བྱ་སྟེ། ནད་ཚབས་ཆེ་བར་བལྟའོ། །ཅི་ལས་ནད་དུ་གྱུར་པའི་ནད་གཞི་ཡང་ཚང་བར་མི་མངོན་ལ། ནད་ཀྱི་གཞི་གང་ལས་ན་བར་གྱུར་པའི་ནད་དམིགས་ཀྱང་ཚང་བར་
[95a.5]མི་མངོན་ན། དེ་ནི་ནད་དམིགས་མི་ཆེ་བ་ཞེས་བྱའོ། །དེ་ལ་དུས་ལས་ནད་དམིགས་གང་ཡིན་ཤེས་པར་བྱ་ཞེས་བྱ་བ་ནི། རླུང་དང་། མཁྲིས་པ་དང་། བད་ཀན་གྱི་བྱེ་བྲག་གི་ཚུལ་བཞིན་དུ་མཚན་མོའི་བྱེ་བྲག་དང་། ཉིན་མོའི་བྱེ་བྲག་དང་།
[95a.6]དུས་ཚིགས་ཀྱི་བྱེ་བྲག་གམ། ཟན་ཟོས་པའི་འོག་གམ། ཁ་ཟས་ཞུ་བར་གྱུར་པའི་རྗེས་ལྟ་བུ་ལ་ན་ན་འདི་རྣམས་ཀྱི་བྱེ་བྲག་གང་གི་ཚེ་ནད་ཀྱིས་བཏབ་པ་དེ་ལས། ནད་ཅི་ཡིན་པ་ཤེས་པར་གྱིས་ཤིག །དེ་ལྟ་བས་ན་ནད་གཞི་གང་ལས་ནད་དུ་གྱུར་པའི་དམིགས་མདོ་ཙམ་ཞིག་བསྟན་
[95a.7]པ་ནི་དེ་ཡིན་ནོ། །ཞིབ་ཏུ་ནི་འོག་ནས་བཤད་པར་བྱའོ། །ནད་དོ་ཅོག་ཐམས་ཅད་ཀྱི་ནད་གཞི་ནི་རླུང་དང་། མཁྲིས་པ་དང་། བད་ཀན་རྣམས་འཁྲུགས་པ་ལས་ནད་ལྡང་བར་འགྱུར་རོ། །དེ་ཡང་ཇི་ལྟ་བུ་ཞེ་ན་གནོད་པར་འགྱུར་བའི་ཚོགས་བསྟེན་པས་ནད་གཞི་འཁྲུགས་ན་ནད་ལྡང་ངོ་། །
[95b]
[95b.1]གནོད་པར་གྱུར་པ་བསྟེན་པས་ནད་ལྡང་བར་འགྱུར་བ་དེ་ཡང་རྣམ་པ་གསུམ་ཞིག་སྔར་བཤད་པ་ཡང་ཡིན་ཏེ། དེ་ལས་རླུང་ནད་དུ་གྱུར་པའི་ནད་གཞི་ནི། རོ་ཁ་བ་དང་། ན་ལེ་ཤམ་དང་། རོ་བསྐ་བའི་བག་ཟ་བ་དང་། ཁ་ཟས་ཆུང་ངུར་ཟ་བ་དང་། ཁ་ཟས་རྩུབ་པར་ཟ་བ་དང་། རྟག་
[95b.2]ཏུ་ཁ་ཟས་ཚོད་བཟུང་སྟེ། དབུ་ཟུངས་ཟ་བ་དང་། བཤང་གཅི་འོང་ན་བཀག་པ་དང་། ཡང་ན་བཤང་གཅི་མི་འོང་བཞིན་དུ་ནན་གྱིས་བཙིར་བ་དང་། མཚན་མོ་ཐོག་ཐག་མི་ཉལ་བ་དང་། སྐད་ཆེན་པོ་དྲག་པར་སྨྲ་བ་དང་། བཀྲུ་སྨན་དང་། སྐྱུག་སྨན་ཧ་ཅང་མང་དུ་
[95b.3]གཏོང་བ་དང་། འཇིགས་པ་དང་། མྱ་ངན་དང་། སེམས་ལས་དང་། དྲག་ཤུལ་རྩལ་བག་དང་། ལས་ཁུར་ཆེར་བྱེད་པ་དང་། བུད་མེད་ལ་ཧ་ཅང་དྲགས་པ་དང་། འདི་རྣམས་ལྟ་བུའི་གཞིས་དབྱར་ཟླ་ཐ་ཆུངས་ཉ་བྲི་ཕན་ཆད་སྟོན་ཟླ་འབྲིང་པོའི་ཉ་ཚུན་ཆད་དུ་ནད་ཀྱི་ཐེབས་པ་
[95b.4]དང་། ཕྱི་འཕྲེད་དམ་ཐོ་རངས་ན་བ་དང་། ཁ་ཟས་ཟོས་པ་ཞུ་བའི་རྗེས་ལ་ན་བ་དེ་དག་ནི་རླུང་ནད་ཡིན་ནོ། །མཁྲིས་པ་རྒྱས་པར་གྱུར་པའི་ནད་གཞི་ནི། ན་ལེ་ཤམ་དང་། སྒོག་པ་དང་། དབྱི་མོ་དང་། ཀྲུ་ཏྲུག་ཏྲེས་ལྟ་བུ་ཟོས་པ་དང་། སྐྱུ་རུ་ར་དང་། བལ་པོ་སེ་འུ་ལྟ་བུ་མ་གཏོགས་
[95b.5]པར་སྐྱུར་བག་གོ་ཅོག་ཟོས་པ་དང་། རོ་རྣོ་བག་ལ་སྐེ་ཚེ་ལྟ་བུ་ཚ་བ་དང་། ཁ་ཟས་མ་བསྒྲངས་པ་ཚ་ཆེས་པ་ཟོས་སམ་འཐུངས་པ་དང་། ཉི་ཚན་ནམ་མེའི་འོད་ཚ་ཆེས་པ་ལ་འདེ་བ་དང་། ཁྲོས་ཤིང་རྔམ་པ་དང་། ལུས་དང་ཁོང་ཚ་བར་འགྱུར་བའི་བག་འདི་རྣམས་ཀྱིས་ནི་སྟོན་ཟླ་
[95b.6]འབྲིང་པོ་ཉ་བྲི་ཕན་ཆད་སྟོན་ཟླ་ཐ་ཆུངས་དང་དགུན་ཟླ་ར་བ་ཉ་ཚུན་ཆད་ནད་ཀྱིས་བཏབ་པའམ། ཉི་མའི་གུང་ངམ། ནམ་ཕྱེད་ན་འམ། དབྱར་ཟླ་ར་བ་དང་། དབྱར་ཟླ་འབྲིང་པོ་ཚ་བའི་དུས་སུ་ནད་ཀྱིས་བཏབ་ན་དེ་ནི་མཁྲིས་པའི་ནད་ཅེས་བྱའོ། །དེ་ལ་བད་ཀན་གྱི་ནད་དུ་གྱུར་པའི་ནད་
[95b.7]གཞི་ནི་བུ་རམ་གྱི་བག་དང་། འོ་མ་ལྟ་བུ་མངར་བག་དང་། ལན་ཚྭ་དང་། སྣུམ་བག་དང་། ཁ་ཟས་འཇུ་དཀའ་སྟེ་ལྕི་བ་དང་། བད་ཀན་དུ་གྱུར་པའི་བག་དང་། བསིལ་བའི་བག་དང་། རྟག་པར་མལ་གཅིག་ན་འདུག་པའི་བག་དང་། འཕྲེས་ཤིང་སྙེས་ཏེ་འདུག་པ་དང་། ཟས་མ་ཞུ་བ་དང་། ཉིན་པར་
[96a]
[96a.1]གཉིད་ལོག་པ་དང་། ཤ་སྐྱེ་ཞིང་སྦོམ་པར་འགྱུར་བ་འདི་རྣམས་ཀྱིས་བད་ཀན་གྱི་ནད་རྒྱས་པ་དྲངས་ཤིང་སློན་ཀྱང་མ་ཕྱིན་ཏམ། ཟན་ཟོས་མ་ཐག་པའི་རྗེས་ལ་ནའམ། དཔྱིད་ཟླ་འབྲིང་པོ་དང་། དཔྱིད་ཟླ་ཐ་ཆུངས་ཀྱི་ངོ་ལ་ནའམ། སྔ་དྲོ་ན་
[96a.2]འམ། ནམ་སྟོད་ལ་ནད་ཀྱིས་བཏབ་ན་དེ་ནི་བད་ཀན་གྱི་ནད་ཅེས་བྱའོ། །དེ་ལ་གཉིས་ལས་གྱུར་པའི་ནད་ནི་རླུང་དང་མཁྲིས་པ་གཉིས་ལས་གྱུར་པའི་ནད་དང་། རླུང་དང་བད་ཀན་གཉིས་ལས་གྱུར་པའི་ནད་དང་། མཁྲིས་པ་དང་རླུང་གཉིས་ལས་གྱུར་པའི་ནད་དང་། བད་ཀན་དང་
[96a.3]རླུང་གཉིས་ལས་གྱུར་པའི་ནད་དང་། བད་ཀན་དང་མཁྲིས་པ་གཉིས་ལས་གྱུར་པའི་ནད་དང་། འདི་རྣམས་ལྟ་བུ་ནི་གཉིས་ལས་གྱུར་པའི་ནད་ཅེས་བྱའོ། །དེ་ལ་འདུས་པ་ལས་གྱུར་པའི་ནད་ཅེས་བྱ་བ་ནི་རླུང་དང་། མཁྲིས་པ་དང་། བད་ཀན་གྱི་ནད་དམིགས་གསུམ་ཚོགས་པ་ལས་
[96a.4]ནད་དུ་གྱུར་པ་དེ་ནི་འདུས་པ་ལས་གྱུར་པའི་ནད་ཅེས་བྱའོ། །འདུས་པ་ལས་གྱུར་པའི་ནད་དེ་ཡང་ནད་གཞི་ཇི་ལྟ་བུ་ལས་ནད་དུ་འགྱུར་ཞེ་ན། རླུང་ནད་དུ་གྱུར་པའི་ཁ་ཟས་དང་། མཁྲིས་པའི་ནད་དུ་གྱུར་པའི་ཁ་ཟས་དང་། བད་ཀན་གྱི་ནད་དུ་གྱུར་པའི་ཁ་ཟས་འདི་གསུམ་འདྲེས་པར་ཟོས་ལ་མ་
[96a.5]ཞུ་བར་གྱུར་པ་དང་། ཁ་ཟས་སྔར་ཟོས་པའི་རྗེས་ལ་ཁ་ཟས་ཕྱི་མ་ཡང་ཟོས་ཏེ་ཁ་ཟས་སྙོམས་པར་གྱུར་པ་འདི་ལྟ་བུ་དང་། ཁ་ཟས་ནང་མི་འཕྲོད་པ་ལྟ་བུ་དང་། ལྷག་པར་ཆེར་ཟོས་པ་དང་། ཆང་མི་ཞིམ་པ་ངན་པ་འཐུངས་པ་དང་། ཆུ་གནོད་པར་གྱུར་པ་ངན་པ་འཐུངས་པ་དང་། ཚོད་མ་སྐམ་
[96a.6]པོའི་བག་ཟ་བ་དང་། ལ་ཕུག་ལྟ་བུའི་རྩ་བའི་བག་རྗེན་པར་ཟ་བ་དང་། ཏིལ་གྱི་ཚིགས་མ་ཟ་བ་དང་། ས་ཞག་ཟ་བ་དང་། སོ་བའི་ཆང་དང་། ཤ་རུལ་བ་དང་། ཤ་སྐམ་པ་དང་། ཤ་རིད་པ་ངན་པ་འདི་ལྟ་བུའི་བག་ལ་སོགས་ཏེ། ནད་དམིགས་རྣམ་གསུམ་དུ་གྱུར་པའི་བག་ཟོས་པ་དང་།
[96a.7]སྔོན་ཆད་ཁ་ཟས་རྟག་ཏུ་གོམས་པ་ཟ་བ་ལས་བསྒྱུར་ཏེ། སྔོན་མ་ལོངས་པའི་ཁ་ཟས་གསར་པ་ཟོས་པ་དང་། དུས་ཚིགས་ཚུལ་བཞིན་དུ་མི་གནས་པར་གྱུར་ཏེ་དུས་ཚིགས་ལོག་པ་ངན་པར་གྱུར་པ་དང་། ཤར་ཕྱོགས་ནས་རླུང་ལངས་པའི་ཁར་བབ་པའམ། ཡང་ན་སྔ་དྲོའི་སེར་བུའམ།
[96b]
[96b.1]ཡང་ན་གར་འགྲོ་བའི་མདུན་ནས་རླུང་གནོད་པས་ཕོག་པ་དང་། ལུས་ལ་ཡི་དགས་གདོན་འདྲེ་ཕབ་པ་དང་། དུག་འཐུངས་པ་དང་། དབྱིག་དུག་འཐུངས་པ་དང་། ཁོང་དུ་བེའུ་སྣབས་ཀྱི་ནད་ཡོད་པ་དང་། རི་དྲུང་དུ་ཉེ་བར་གནས་པ་དང་། བཙས་པའི་བླ་སྐར་ལ་གཟའ་ཞུགས་པས་གནོད་
[96b.2]པར་གྱུར་པ་དང་། སྨན་བཅུད་ལེན་ལྟ་བུ་ལོག་པ་བཏོང་བའམ། སྐྱུག་སྨན་དང་། བཀྲུ་སྨན་དང་། དུགས་དང་ལུམས་ལྟ་བུ་ལོག་པར་བྱས་པ་འདི་ལྟ་བུའམ། ཚེ་སྔ་མ་དང་ལྟར་གྱི་ཚེ་ལྟ་བུ་ལ་སྡིག་པ་སྣ་ཚོགས་བྱས་པའམ། བུད་མེད་རྣམས་བུ་བཙས་པའི་ཚེ་ལོག་པར་བྱུང་བ་དང་། དེའི་
[96b.3]ཚེ་དཔྱད་ལོག་པར་བྱས་པ་དང་། རྣམ་པ་འདི་ལྟ་བུའི་ནད་དུ་གྱུར་ནས་རླུང་དང་། མཁྲིས་པ་དང་། བད་ཀན་སོ་སོའི་ནད་ཀྱི་གནས་སུ་སོ་སོའི་རྩའི་སྦུབས་ནས་ནད་རྒྱུ་སྟེ། ནད་དཀྱེལ་ཞུགས་ན་འདུས་པའི་ནད་ཀྱིས་ལུས་མྱུར་དུ་འབེབས་པར་འགྱུར་རོ། །ནད་གཞི་བཤད་པའི་ལེའུ་སྟེ་དང་པོའོ།། །།
[96b.4]རིམས་ནད་ཀྱི་ནད་གཞི་བསྟན་པའི་ལེའུ་སྟེ་གཉིས་པ་བཤད་བར་བྱའོ། །རིམས་ནི་ཐམས་ཅད་ཀྱི་བདག་པོ་ཞེས་བྱའོ། །རིམས་དེ་ནི་སྡིག་པ་ཡིན། འཆི་བདག་ཡིན། གཟི་དང་མདངས་མ་རུངས་པར་བྱེད་པ་ཡིན། འཆི་བར་བྱེད་པ་ཡིན། རིམས་ནད་ཀྱི་ནད་གཞི་རྣམ་པ་གཅིག་ནི། གནའ་
[96b.5]ག་ལ་ལྷ་མ་ཡིན་ཞེས་བྱ་བས་ལྷ་ཐམས་ཅད་བོས་ཏེ་མཆོད་སྦྱིན་བྱས་ནས། ལྷ་ཆེན་པོ་དྲག་ཤུལ་ཅན་མ་བོས་ཏེ། མཆོད་སྦྱིན་ཡང་མ་བྱིན་པས་ལྷ་དྲག་ཤུལ་ཅན་དེ་ཁྲོས་ནས་ལྷ་མ་ཡིན་གྱི་མཆོད་སྦྱིན་ཡང་མ་རུངས་པར་བྱས། ཁྲོས་ཤིང་རྔམ་པའི་ཚེ་དཔྲལ་བར་ཡང་མིག་གཅིག་བྱུང་
[96b.6]བའི་ནང་ནས་རིམས་ནད་བྱུང་སྟེ། མི་ཡུལ་དུ་རིམས་ནད་བཏང་སྟེ་རིམས་འདི་ལས་ཀྱང་བྱུང་ཞེས་ཟེར་རོ། །རིམས་ནི་ཐོག་མར་བཙའ་བའི་ཚེ་ཡང་ལུས་དང་ལྷན་ཅིག་ཏུ་བྱུང་བ་ཡིན། ལུས་ཐ་མ་འཆི་བའི་ཚེ་ཡང་རིམས་དང་ལྷན་ཅིག་འགྲོ་བ་ཡིན་ནོ། །རིམས་ཀྱི་རང་བཞིན་ནི་
[96b.7]ལུས་ཀུན་ཏུ་ཚ་བ་རྨོངས་པ་ཡིན་ནོ། །རིམས་ནད་དུ་གྱུར་པའི་ནད་གཞི་ནི་ཁ་ཟས་མི་འཕྲོད་ཅིང་གནོད་པ་ལོག་པར་བསྟེན་པ་ལས་འབྱུང་ངོ་། །རིམས་དྲག་པོ་སྣ་ཚོགས་ཡོད་པ་དེ་དག་གི་མིའོ་ཅོག་དང་། རྟ་དང་། གླང་པོ་ཆེ་དང་། བ་ལང་ལ་སོགས་པ་སྐྱེ་གནས་ཐ་དད་པ་རྣམས་
[97a]
[97a.1]ལ་རིམས་ནད་གྱིས་བཏབ་ནས་མི་དང་ཕྱུགས་ལ་རིམས་ནད་དེའི་མིང་སོ་སོར་བཏགས་པར་གྱུར་ཏོ། །ཡང་རིམས་ལ་རྣམ་པ་བརྒྱད་ཡོད་དེ། དེ་གང་ཞེ་ན་རླུང་དང་། མཁྲིས་པ་དང་། བད་ཀན་གྱི་ནད་དམིགས་སོ་སོའི་རིམས་སྣ་གསུམ་དང་། འདྲེས་
[97a.2]པའི་རིམས་ནད་གསུམ་དང་། གསུམ་འདུས་པའི་རིམས་ནད་དང་། གློ་བུར་གྱི་རིམས་ནད་དང་བརྒྱད་དོ། །དེ་ལ་རིམས་ནད་བརྒྱད་པོ་གང་ཞེ་ན། སོ་སོའི་ནད་དམིགས་ཀྱི་རིམས་ནད་རྣམ་པ་གསུམ་པོ་རླུང་ལས་གྱུར་པའི་རིམས་ནད་དང་། མཁྲིས་པ་ལས་གྱུར་པའི་རིམས་ནད་དང་། བད་ཀན་
[97a.3]ལས་གྱུར་བའི་རིམས་ནད་དང་རྣམ་གསུམ་མོ། །ཡང་ན་ནད་གཞི་སྣ་གཉིས་འདྲེས་པའི་རིམས་ནད་རྣམ་གསུམ་ཡོད་པ་རླུང་དང་མཁྲིས་པར་འདྲེས་པའི་རིམས་ནད་དང་། རླུང་དང་བད་ཀན་དུ་འདྲེས་པའི་རིམས་ནད་དང་། མཁྲིས་པ་དང་རླུང་ནད་དུ་འདྲེས་པའི་རིམས་ནད་དང་། མཁྲིས་པ་དང་བད་ཀན་དུ་འདྲེས་
[97a.4]པའི་རིམས་ནད་དང་། བད་ཀན་དང་རླུང་ནད་དུ་འདྲེས་པའི་རམས་ནད་དང་། བད་ཀན་དང་མཁྲིས་པར་འདྲེས་པའི་རིམས་ནད་དང་། འདི་རྣམ་གསུམ་མོ། །འདུས་པ་ལས་གྱུར་པའི་རིམས་ནད་ནི་རླུང་དང་། མཁྲིས་པ་དང་བད་ཀན་གསུམ་མཉམ་དུ་འདུས་པ་ལས་རིམས་ནད་དུ་འགྱུར་
[97a.5]བ་ནི་འདུས་པའི་རིམས་ནད་ཅེས་བྱའོ། །གློ་བུར་གྱི་རིམས་ནི་དྲག་ཤུལ་གྱི་བག་ལས་སྣད་པ་དང་། གདོན་ནད་ཀྱིས་བཏབ་པ་ལྟ་བུ་དང་། དམོད་པ་བོར་བ་དང་། ངན་དུ་བྱེད་པའི་བྱད་བྱས་པ་ལས་རིམས་སུ་འགྱུར་རོ། །དེ་ལྟར་རིམས་ནད་ནི་རྣམ་པ་དེ་བརྒྱད་དོ། །རིམས་ནད་གང་
[97a.6]ཡང་རུང་སྟེ། དང་པོ་རིམས་ནད་དུ་གྱུར་པའི་སྔ་ཚུལ་ནི། རླུང་ནད་སློང་བའམ། མཁྲིས་པའི་ནད་སློང་བའམ། བད་ཀན་གྱི་ནད་སློང་བ་དེ་ལུ་བུའི་སོ་སོའི་ནད་གཞིས་སོ་སོའི་ནད་བསླངས་ནས། ཁ་ཟས་མ་ཞུ་བའི་ས་ཕོ་བའི་ནད་དུ་རིམས་ནད་ཞུ་བ་དང་ལྷན་ཅིག་གནས་ནས་ནང་
[97a.7]གི་རྩ་ཀུན་འགགས་ཏེ་ཁ་ཟས་འཇུ་བའི་གནས་ཕོ་བའི་ནང་ན་དྲོད་ཡོད་པ་ཀུན་ཕྱི་རོལ་དུ་ཕྱུང་ནས། རིམས་ནད་ཆ་བ་ཕྱི་རོལ་དུ་བྱུང་བ་དང་གཉིས་ཀྱིས་ལུས་ཀྱི་ཕྱི་ནང་ཐམས་ཅད་ལ་ཁྱབ་པར་ཞུགས་ནས་ལུས་ཐོག་ཐག་ཏུ་གདུངས་ཏེ། ལུས་རབ་ཏུ་ཚ་ནར་གྱུར་པ་དེ་ནི་རིམས་ནད་ཡིན་ཏེ་
[97b]
[97b.1]རྩ་སྒོ་ཀུན་འགགས་ཤིང་ལུས་ལ་རྔུལ་བ་ཡང་ཕལ་ཆེར་མི་འབྱུང་ངོ་། །འདི་ལྟ་བུ་ནི་ཐོག་མ་རིམས་ནད་ཀྱིས་བཏབ་པའི་རྟགས་སྔ་ཚུལ་ཞེས་བྱ་བ་ཡིན་ནོ། །དེའི་རྗེས་ལ་རིམས་ནད་དེ་ཚབས་ཆེར་སྐྱེས། ནད་ཀྱི་རང་བཞིན་གསལ་བར་བྱེད་པ་ཞེས་བྱ་སྟེ། དེ་ཡང་ཇི་ལྟ་
[97b.2]ཞེ་ན། ཁོང་ངལ། ཉམས་མི་དགའ། ལུས་ལྕི། ཁར་རོ་བྲོ་བ་མི་ཚོར། ཁ་ཟས་ཡི་གར་མི་འོང་། གླལ་འབྱུང་། མིག་རྩ་དམར། ཡང་ན་མིག་རྩ་སེར་རམ་མིག་དཀར་བག་ཆེ་བ་དང་། རྐང་ལག་གི་ལྷུ་ཚིགས་ཀུན་བརྡུངས་པ་ཙམ་དུ་ན། ཁ་ཟས་འཇུ་བའི་ཤས་བྲི། ཉམས་སྟོབས་
[97b.3]ཆུང་། གཉིད་ཆེ། བ་སྤུ་ཀུན་ལངས། བྱ་རྨྱང་བྱེད་འདོད། བྱིན་པའི་ཉ་ན། ལུས་སྙོམ། ཕན་པའི་དཔྱད་བསྟན་པ་ལས་མི་བཟོད་དེ་ཁྲོ། ཁ་ཟས་སྐྱུར་བག་དང་རོ་ཚ་བ་དང་དྲོན་པོའི་བག་ལ་སྲེད། ཁ་ཟས་མངར་ལ་མི་དགའ། བྱིས་པ་གཞོན་ནུའི་བག་ལ་ཁྲོ། །སྐོམ་དད་རབ་ཏུ་ཆེ།
[97b.4]སྒྲའི་བག་དང་མེ་དང་གྲང་ལྷགས་དང་རླུང་དང་གྲིབ་མ་དང་ཉི་ཚན་དང་འདི་རྣམས་ལྟ་བུ་ལ་བསྟེན་པར་ཡང་རེས་འགའ་ནི་འདོད། རེས་འགའ་ནི་མི་འདོད་དེ་མ་ངེས་སོ། །འདི་རྣམས་ལྟར་གྱུར་པ་ནི་རིམས་ནད་ཀྱི་རང་བཞིན་གསལ་བར་བྱེ་བྲག་ཕྱེད་པ་ཞེས་བྱའོ། །དེ་ལ་རླུང་ལས་
[97b.5]གྱུར་པའི་རིམས་ནད་ཀྱི་ནད་ཐབས་ནི་དང་པོ་རིམས་ཀྱིས་ཐེབས་པའི་ཚེ་ཡང་ནད་ཚབས་མི་ཆེ། ཚ་བའི་ཚབས་ཀྱང་མི་ཆེའོ། །རིམས་འབྱང་དུ་ཉེ་བའི་ཚེ་ན་ནད་ཚབས་ཀྱང་མི་ཆེ། ཚ་བའི་ཚབས་ཀྱང་མི་ཆེའོ། །ལུས་དང་ཡན་ལག་མི་སྙོམས་ཏེ་མལ་གཅིག་ཏུ་ཟུག་ཅིང་ན་བ་མ་
[97b.6]ཡིན་གྱི་འཕོ་ཞིང་ན། རྐང་པ་གཉིས་ཚོར་བ་མེད་ཅིང་བེམ་བག་ཏུ་འགྱུར་ལ་རེངས། བྱིན་སྙིང་ན། ལུས་ཀྱི་ཁོང་ངལ་ཞིང་རུས་པའི་ཚིགས་རྣམས་ཁ་བྱེ་བ་སྙམ་བྱེད། བརླ་གཉིས་ན། རྐེད་པ་ན། རྒྱབ་བརྡུང་བ་སྙམ་དུ་ན། ལྟོ་བ་ན། རུས་པ་ཀུན་དང་རྩིབ་ལོགས་གཡས་གཡོན་
[97b.7]ལྷག་པར་ན། སྙིང་བཙིར་བ་སྙམ་བྱེད་ལ་ཟུག་ཅིང་ན། བྲང་དང་ནུ་འཇིང་དུ་བཙུགས་པ་སྙམ་དུ་གཟེར་ཞིང་ན། ཕྲག་སོར་གཉིས་བརྡུངས་པ་བཞིན་དུ་ན། དཔུང་པ་ནས་ལག་ངར་དུ་བཅོམ་པ་བཞིན་དུ་ན། སྒྲོག་རུས་ཀྱི་ཉེ་འཁོར་བཙིར་བ་སྙམ་བྱེད། འགྲམ་པ་ན་སྟེ་ཁ་ཟས་བལྡད་མི་
[98a]
[98a.1]ནུས། ཁ་གླལ་འབྱིན། རྣ་བ་གཉིས་འབོད་ཅིང་སྒྲ་འབྱུང་། མུར་འགྲམ་གཉིས་ཟུག་ཅིང་ན། གླད་པའི་སྤྱི་བོ་ན། ཁའི་ནང་རོ་ཅི་བྲོ་བ་མི་ཚོར་བའམ། ཡང་ན་ཁའི་རོ་བསྐ་བ་བྲོ། །བཤང་གཅིའི་དྲི་མ་ཡང་མི་འབྱུང་སྟེ་སྲི། ཤ་མདངས་ཀྱི་པགས་པ་
[98a.2]དང་། བཞིན་དང་། ཁའི་ནང་དང་། མིག་དང་། སེན་མོ་དང་། བཤང་གཅི་ལ་སོགས་པ་ཀུན་ཡང་རྩུབ་ལ་ཅུང་ཟད་རྩ་དམར། ཁ་ནས་མཆིལ་མ་མང་། ཁ་ཟས་ཡི་གར་མི་འོང་བཞིན་ཟ། ཟས་འཇུར་མི་རུང་། ལུས་ལ་རྔུལ་མི་འབྱུང་། མཚན་མོ་གཉིད་མི་
[98a.3]འོང་། མཆུ་དང་གྲེ་བ་སྐམ། སྐོམ་དད་ཆེ། ལུད་པ་སྐམ། ལུད་པ་ལུ་ཞིང་སྐམ་པོར་སྐྱུགས་ཏེ་མི་འབྱུང་། སེམས་བྱིང་ཞིང་དམན་པར་གྱུར། ལུས་ཀྱི་བ་སྤུ་ལངས་ཏེ་ཤ་དང་པགས་པ་བརྩེ། ལུས་དང་རྐང་ལག་འདར། སྦྲིད་པ་འགགས་ཏེ་འབྱུང་དུ་མི་རུང་། མགོ་
[98a.4]འཁོར། ཁ་ནས་ཚིག་ཅལ་ཅོལ་སྨྲ། ཉི་ཚན་ནམ་དྲོ་བའི་བག་ལ་འདུག་པར་འདོད། རྐང་ལག་བྱ་རྨྱང་བྱེད། ནད་ཀྱི་ཚུལ་འདི་རྣམས་ལྟ་བུ་ནི་རླུང་ནད་ཀྱི་རིམས་ཞེས་བྱའོ། །དེ་ལ་མཁྲིས་པ་ལས་གྱུར་པའི་རིམས་ཀྱི་ནད་ཐབས་ནི་ལུས་ཀྱི་མགོ་དང་ཡན་ལག་ཀུན་དུ་ན་བ་དང་ཚ་
[98a.5]བས་ཅིག་ཅར་ཁྱབ་ལ་ཚིག་ཅལ་ཅོལ་དུ་སྨྲ་ཞིང་གླལ། ཁའི་ནང་རོ་ཚ་བར་བྲོ། །སྣ་དང་ཁའི་ནང་དུ་ཐོར་བུ་འབྱུང་། བསིལ་བའི་བག་འདོད། མགོ་འཁོར། བརྒྱལ། མྱོས། སྙིང་མི་དགའ། ཐུར་དུ་འཁྲུ། མཁྲིས་པར་སློན། མཆིལ་མ་བོར་བའི་ནང་ནས་ཁྲག་འབྱུང་། རོ་
[98a.6]སྐྱུར། ལུས་ལ་ཐོར་བུ་དམར་པོ་ཆང་ཆུང་འབྱུང་། ཤ་མདངས་ཀྱི་མདོག་དང་། བཞིན་མདོག་དང་། མིག་དང་། སེན་མོ་དང་། བཤང་གཅི་རྣམས་སེར་ཞིང་རྩ་སྔོ་རྔུལ་འབྱུང་བའི་དབུགས་འབྱུང་བ་མནམ་མམ། སྐོམ་དད་ཆེ་བའི་ནད་འདི་ལྟ་བུའི་ནད་ཐབས་ནི་མཁྲིས་པའི་རིམས་
[98a.7]ནད་ཡིན་ནོ། །བད་ཀན་ལས་རིམས་སུ་གྱུར་པའི་ནད་ཐབས་ནི་ལྷག་པར་ཁ་ཟས་ཡི་གར་མི་འོང་ལ་རྨོངས་བག་ཏུ་འགྱུར། རྩ་རྣམས་འགགས་ལ་རྩ་དྲག་ཏུ་མི་འཕར། ཁ་ནས་བད་ཀན་མང་། ཁའི་ནང་རོ་མངར་བ་བྲོ། །དང་ཀ་མེར་མེར་པོར་བྱེད། དབུགས་མི་བདེ། ཆམ་པས་
[98b]
[98b.1]བཏབ། སྙིང་ན། སློན་ཅིང་སྐྱུགས་པ་འབྱུང་། ལུད་པ་མི་མང་བར་ལུ་ཞིང་འབོགས། ལུས་ལ་ཐོར་བུ་གྲང་མོ་རྩ་དམར་བ་ཅུང་ཟད་འབྱུང་། མྱོས་ཤིང་རྨོངས་བག་ཏུ་འདུག །ལུས་འདར་བའི་ནད་ཐབས་འདི་ལྟ་བུ་ནི་བད་ཀན་གྱི་རིམས་ཞེས་བྱའོ། །རླུང་ནད་ཀྱི་
[98b.2]རིམས་དང་། མཁྲིས་པའི་རིམས་དང་། བད་ཀན་གྱི་རིམས་རྣམ་གསུམ་གང་ལྟར་ན་ཡང་རུང་། ནད་ཐབས་བརྟག་སླ་བའི་ཐབས་ནི་ཕྱི་འཕྲེད་དང་ཐོ་རངས་རིམས་ཀྱིས་བཏབ་པའམ། རིམས་ན་བ་ཞིག་ན་རླུང་ལས་གྱུར་པའི་རིམས་ཡིན་ནོ། །ཉི་མ་ཕྱེད་དང་། ནམ་གྱི་
[98b.3]གུང་ལ་རིམས་ཀྱིས་བཏབ་པའམ། རིམས་ནད་ལས་ན་མཁྲིས་པ་ལས་གྱུར་པའི་རིམས་ནད་ཡིན་ནོ། །སྔ་དྲོ་དང་སྲོད་ལ་རིམས་ཀྱིས་བཏབ་བམ་རིམས་ནད་ལས་ན་བད་ཀན་ལས་གྱུར་པའི་རིམས་ནད་ཡིན་ཏེ་རིམས་ནད་གང་ཡིན་པ་ཐབས་དེ་ལྟར་རྟོགས་ཤིག །ཡང་རིམས་
[98b.4]ཀྱིས་བཏབ་པ་ལ་སྨན་དང་ཁ་ཟས་ཀྱིས་ནད་དམིགས་གང་ཡིན་པ་བརྟག་པ་ནི་རླུང་ནད་དམ་བད་ཀན་གྱི་ནད་སྐྱེ་བར་འགྱུར་བའི་ཁ་ཟས་དང་སྨན་བྱིན་ན་ནད་སློང་ངམ་ལྡང་བར་གྱུར་ཏེ་ཟས་དང་སྨན་གྱི་གཞི་དེས་གནོད་པར་གྱུར་ན། དེ་ནི་རླུང་ལས་གྱུར་པའི་རིམས་སམ། མཁྲིས་
[98b.5]པའམ་བད་ཀན་ལས་གྱུར་པའི་རིམས་ཡིན་པར་ཤེས་ཏེ། སྨན་དང་ཟས་ཐབས་བསྒྱུར་ཏེ་བཏང་ན་ཕན་པར་འགྱུར་རོ། །དེ་ལ་འདྲེས་པའི་རིམས་ནད་ཅེས་བྱ་བ་ནི་རླུང་ལས་གྱུར་པའི་རིམས་ནད་ཀྱི་ཐབས་དང་། མཁྲིས་པ་ལས་གྱུར་པའི་ནད་ཀྱི་ཐབས་ལ་སོགས་པ་
[98b.6]རིམས་སོ་སོའི་ཚུལ་དམིགས་ཀྱིས་ཕྱེ་བ་ནད་དམིགས་སྣ་གཉིས་ཀྱི་རིམས་ཀྱིས་བཏབ་པར་སྣང་ན། དེ་ནི་འདྲེས་པའི་རིམས་ཞེས་བྱ་བ་སྟེ། འདྲེས་པའི་རིམས་དེ་ནི་ནད་ཐབས་ཀྱི་ཚུལ་དམིགས་ཅི་འདྲ་བ་གཞན་ཡང་བཤད་པར་བྱའོ། །དེ་ལ་རླུང་དང་མཁྲིས་པར་
[98b.7]འདྲེས་པའི་རིམས་ནད་ཀྱི་ཐབས་ནི་གླད་པ་ན། བརྒྱལ། སློན་བྲོ། །ལུས་ཚ། རྨོངས་བག་ཏུ་འགྱུར། གྲེ་བ་དང་ཁ་སྐམ། སྙིང་མི་དགའ། རུས་པའི་ཚིགས་རྣམས་ཁ་བྱེ་བ་སྙམ་བྱེད། གཉིད་མེད། སྐོམ་དད་ཆེ། མགོ་འཁོར། ལུས་ཀྱི་བ་སྤུ་ལངས་ཏེ་རེག་ན་ཤ་བརྩེ། ཁ་གླལ། ཚིག་
[99a]
[99a.1]སྨྲ་བ་མང་ངོ་། །ཐབས་འདི་ལྟར་ན་ན་རླུང་དང་མཁྲིས་པ་གཉིས་འདྲེས་པའི་རིམས་ནད་ཅེས་བྱའོ། །དེ་ལ་བད་ཀན་དང་རླུང་འདྲེས་པ་ལས་རིམས་ནད་དུ་གྱུར་པའི་ཐབས་ཀྱི་རྟགས་ནི་ལུས་ཕྱི་ནང་ཚ་བ་མེད། ཁ་ཟས་ཡི་གར་མི་འོང་། གླད་པ་ན།
[99a.2]རུས་པའི་ཚིགས་རྣམས་ན། ཆམ་པས་བཏབ། དབུགས་མི་བདེ་སྟེ་རྔམ་པའི་ཤུགས་དྲག །ལུད་པ་ལུ། བཤང་གཅི་སྲི། ལུས་ཕྱི་ནང་ཁོང་བསིལ་ཏེ་གྲང་། མོང་མོང་པོར་བྱེད། མིག་རབ་རིབ་ཟ། རྨུགས་པར་གྱུར་ཏེ་ནད་ཐབས་འདི་ལྟ་བུ་ནི་བད་ཀན་དང་རླུང་ནད་འདྲེས་
[99a.3]པའི་རིམས་ནད་ཀྱི་རྟགས་ཡིན་ནོ། །དེ་ལ་བད་ཀན་དང་། མཁྲིས་པར་འདྲེས་པའི་རིམས་ནད་ཀྱི་རྟགས་ནི། ལུས་ཕྱི་ནང་ཁོང་གྲང་སྟེ་རེངས་བག་ཏུ་འདུག །རེས་འགའ་ནི་ལུས་ཚ་སྟེ་རྔུལ་འབྱུང་བས་ཚ་གྲང་གཅིག་ཏུ་ཆད་པ་མེད་དོ། །སྐོམ་དད་ཆེ། ལུད་པ་ལུ། བད་ཀན་དང་
[99a.4]མཁྲིས་པའི་བག་ཏུ་འཁྲུ། རྨོངས་བག་དང་། རྨུགས་པ་དང་། ཁའི་ནང་བྱུགས་སམ་བསྐུས་པ་ལྟར་བལྡག་བལྡག་པོ་དང་། རོ་ཁ་བ་བྲོ་བ་འདི་ལྟ་བུ་ནི་བད་ཀན་དང་མཁྲིས་པ་འདྲེས་པའི་རིམས་ནད་ཀྱི་རྟགས་ཡིན་ནོ། །དེ་ལ་འདུས་པའི་རིམས་ནད་ཅེས་བྱ་བ་ནི་རླུང་དང་། མཁྲིས་
[99a.5]པ་དང་བད་ཀན་གྱི་ནད་ཐམས་ཅད་འདུས་པའི་རིམས་ནད་ཀྱིས་བཏབ་པའི་ཚེ་ལུས་སྐད་ཅིག་སྐད་ཅིག་ཏུ་ཚ། དེ་བཞིན་དུ་བར་འགའ་བར་འགའ་ཁོང་གྲང་སྟེ་བསིལ། ཉིན་པར་གཉིད་རབ་ཏུ་ཆེ། མཚན་མོ་གཉིད་མེད། ཡང་ན་ཉིན་མཚན་གཉིས་ཀ་གཉིད་ཆེ། ཡང་ན་ཉིན་
[99a.6]མཚན་གཉིས་ཀར་གཉིད་མི་འོང་། ལུས་ཆེར་རྔུལ་ཏམ་ཡང་ན་ལུས་རྔུལ་མི་འབྱུང་། གླུ་ལེན། གར་བྱེད། གད་མོ་དགོད་པ་ལ་སོགས་པ་དང་། ལུས་ཀྱིས་བསྒྱུར་ཅིང་བྱ་བ་རྣམས་བྱེད། མིག་ནས་མཆི་མ་ཟག །མིག་མི་གསལ་ཏེ་རྩ་དམར་རམ་སེར། མིག་ཐ་མལ་པ་མི་
[99a.7]འདྲ་སྟེ་ཞུམ་ཞིང་གཡོ། །མིག་གི་རྫི་མ་ལོང་པོར་འདུག །བྱིན་སྙིང་ན། རྩིབ་ལོགས་སུ་ན། གླད་པའི་སྤྱི་བོ་དང་རུས་པའི་ཚིགས་ན། མགོ་འཁོར། རྣ་བ་གཉིས་ན་སྟེ་འབོད་མགུལ་པའི་ནང་གྲ་མས་གང་བ་སྙམ་བྱེད། ལྕེ་རྩུབ་ལ་ཚིག་པ་བཞིན་དུ་གནག །ལུས་ལྕི་ལ་
[99b]
[99b.1]ལག་ངར་དང་དཔུང་པའི་ཚིགས་ཁ་བྱེ་ཞིང་འཆོས་པ་སྙམ་བྱེད་ཅིང་ལྕི། རུས་པའི་ཚིགས་རྣམས་ཁ་བྱེ་ཞིང་ལྕི། ཁའི་མཆིལ་མའམ། ལུད་པའི་ནང་ནས་ཁྲག་དང་། མཁྲིས་པ་དང་བད་ཀན་འབྱུང་། མགོ་བོ་ཅོག་ཅོག་པོར་མི་བཏུབ་སྟེ་གཡས་གཡོན་དུ་འདྲིལ་ཞིང་འཕྱོ། སྐོམ་དད་
[99b.2]རབ་ཏུ་ཆེ། ལུས་ཐོར་བུའམ། འབྲུམ་ཕྲན་ནག་པོའམ། དམར་པོ་ཕྲེའུ་ཙིག་ཙིག་པོ་མཐའ་མ་འཁོར་བ་གང་ལ་དབུས་ཉི་ཚེར་མ་བྱུང་སྟེ་སྟོང་པར་འདུག་པ་དེ་ལྟ་བུ་ལུས་ཀྱི་སྐབས་སུ་འབྱུང་བར་སྣང་བ་དང་། ལུས་ལ་སྐབས་སྐབས་སུ་ཐོར་བུ་ཙིག་ཙིག་པོ་ཕྲེའུ་འདབ་ཆགས་སུ་བྱུང་བ་
[99b.3]ཀོར་ཀོར་པོར་སྣང་། སྙིང་ན། བཤང་གཅི་སྲི་སྟེ་འགགས་པའམ། ཡང་ན་ཐུར་དུ་འཁྲུ་ཞིང་འོང་བ་སྙམ་བྱེད་ལ། བཤང་བའི་ཚེ་ཆེན་པོ་མི་འབྱུང་། ཁའི་ནང་སྣུམ་གྱིས་བསྐུས་པ་བཞིན་དུ་སྣུམ་བག་ཏུ་བྲོ། །ཉམས་སྟོབས་ཆུང་སྟེ་བྲི། སྐད་ཀྱི་གདངས་ཆུང་སྟེ་གཅོམ་ཆུང་།
[99b.4]ཁ་ནས་བླ་ཞིང་རྡོལ། འདུས་པའི་ནད་འདི་ལྟ་བུས་བཏབ་ན་ནད་གཞི་རླུང་དང་བད་ཀན་མཁྲིས་པ་རྣམས་ཡུན་རིང་དུ་སྨིན་དུ་མི་བཏུབ་སྟེ་ནད་ཀྱི་རྩེ་མ་ཞིལ། མིའི་ཉམས་ནི་རྨུགས། མགུལ་པ་དང་གྲེ་བའི་ནད་རྟགས་སྒྲ་ངར་ངར་པོ་དང་། སྒྲ་སོག་སོག་ཟེར་བ་འདི་ལྟ་བུ་ནི་
[99b.5]འདུས་པའི་རིམས་ནད་ཀྱིས་ཐེབས་པའི་རྟགས་ཡིན་ནོ། །འདུས་པའི་རིམས་ནད་འདི་ལྟ་བུ་ལས་ཚབས་རབ་ཏུ་ཆེ་བར་གྱུར་ན་རིམས་དེའི་མིང་ནི་འདུས་པའི་རིམས་མངོན་དུ་རྨུགས་བྱེད་ཅེས་བྱ་སྟེ། ནད་དེས་ནི་མདངས་ཕྲོགས་ནས་མིའི་གཟི་བྱིན་ཀུན་མེད་པར་བྱས། བཤང་
[99b.6]གཅི་འགགས་ལ་རྟུག་སྐམ་དུ་གྱུར་ཏེ་མི་འབྱུང་། ཁོང་པའི་ནང་གི་དྲོད་ཉམས་ཏེ་ཆུང་བ་འདི་ནི་འདུས་པའི་རིམས་ཀྱི་ནད་རྨུགས་བྱེད་ཀྱི་རྟགས་ཡ་ང་བ་ཐམས་ཅད་ཚོགས་པ་ཡིན་ཏེ་གསོར་མི་རུང་ངོ་། །དེ་ལྟ་བུ་གཞན་ནི་གསོ་དཀའ་བ་ཞེས་བྱ་སྟེ། འདུས་པའི་རིམས་མངོན་དུ་
[99b.7]རྨུགས་བྱེད་ནད་སྣ་མ་ཚང་བ་དེ་ནི་གསོས་ན་ཡང་དབང་པོ་ཉམས་པའམ་རྐང་ལག་ཉམས་པ་ཙམ་དུ་འགྱུར་རོ། །རྣམ་པ་གཞན་དུ་ཡང་འདུས་པའི་རིམས་ནད་ཡིན་ན། དེ་ཡང་མཁལ་མའི་ནད་ལོགས་ཤིག་ན་འདུག་སྟེ། ཇི་ལྟ་ཞེ་ན་ཕྱི་རོལ་གྱི་པགས་པ་དང་ཤ་མཐང་ཚའམ།
[100a]
[100a.1]ཡང་ན་ཁོང་པ་ནང་ཚ་སྟེ། དེ་ཡང་ན་ཚ་བ་སྔར་བྱུང་། ཡང་ན་ཚ་བ་ཕྱིས་བྱུང་བ་ཡོད་དེ། དེ་ལ་ཚ་བ་སྔར་བྱུང་བའི་རིགས་ནི་གསོ་དཀའ་བ་ཡིན་ནོ། །ཚུལ་དེ་དང་འདྲ་བར་རླུང་དང་བད་ཀན་གཉིས་ཀྱང་ཡང་ན་ཕྱི་རོལ་དུ་ཕྱུང་སྟེ་ཤ་དང་པགས་པ་
[100a.2]གྲང་ངམ། ཡང་ན་ཁོང་པའི་ནང་དུ་བྱུང་སྟེ་ཁོང་གྲང་བ་དེ་ལྟ་བུ་གྲང་བའི་རིམས་སྔར་བྱུང་ངམ། ཡང་ན་གྲང་བའི་རིམས་མཇུག་ཏུ་ཕྱིས་བྱུང་བ་ཡང་ཡོད་དོ། །གྲང་བའི་རིམས་དང་། རླུང་དང་། བད་ཀན་གྱི་རིམས་དེ་སྔར་བྱུང་བའི་རྗེས་ལ་ཕྱིས་མཁྲིས་པའི་རིམས་ཚ་བས་
[100a.3]བསྣན་ན་བད་ཀན་གཤེར་བ་འབྱུང་བ་དེ་ནི་བསྐམས། རླུང་གྲང་བའི་བག་ཞི་བར་བྱས་པས་ཁའི་ནང་རོ་སྐྱུར་བར་བྲོ། བརྒྱལ། མྱོས། སྐོམ་དད་ཆེ་བར་འགྱུར་རོ། །ཡང་ན་མཁྲིས་པའི་ནད་ཚ་བས་ཐོག་མར་བཏབ་སྟེ་དེའི་རྗེས་ནི་རྨུགས་ཤིང་བད་ཀན་ཁ་ནས་མང་དུ་འབྱུང་ངོ་། །
[100a.4]སློན་ནོ། །ཁོང་སྙོམ། ནད་ཐབས་འདི་ལྟ་བུ་ནི་འདུས་པའི་རིམས་ཡིན་ཏེ། དཀྱེལ་ཆེར་སྐྱེས་པ་མངོན་དུ་རྨུགས་བྱེད་ཅེས་བྱ་བ་གསོ་དཀའ་བའི་ནད་ཐབས་ཡིན་ནོ། །དེ་ལ་གློ་བུར་གྱི་རིམས་ནད་རྣམ་པ་བཞི་སྟེ། དྲག་ཤུལ་ལས་གྱུར་པའི་རིམས་ནད་དང་། མངོན་པར་ཟིན་
[100a.5]པའི་རིམས་ནད་དང་། དམོད་པའི་རིམས་ནད་དང་། བྱད་ཀྱི་རིམས་ནད་དོ། །དེ་ལ་དྲག་ཤུལ་གྱི་རིམས་ནད་ཀྱང་རྣམ་པ་བཞི་ལས་འབྱུང་སྟེ། མཚོན་གྱིས་སྨས་པ་དང་། གཅད་པ་དང་། མེས་ཚིག་པ་ལས་རིམས་སུ་གྱུར་པ་དང་། སྟོབས་རྩལ་གྱི་བག་ལས་སྣད་དེ་
[100a.6]རིམས་སུ་གྱུར་པའོ། །འདི་རྣམས་ལྟ་བུ་ལས་རིམས་སུ་གྱུར་པ་ནི་ཕལ་ཆེར་རླུང་གི་ཁྲག་ནད་དུ་གྱུར་པ་བྱས་ནས་ཁྲག་ལ་གནོད་པར་གྱུར་པ་དང་ན་ལ་སྐྲང་། མདོག་མི་སྡུག་ལ་ན་སྟེ་རིམས་སུ་འགྱུར་རོ། །མངོན་པར་ཟིན་པའི་རིམས་ནད་ཅེས་བྱ་བ་ནི་གདོན་གྱི་བག་མིའི་ལུས་ལ་བབ་
[100a.7]པའམ། གདོན་གྱིས་ཟིན་པ་དང་སྨན་གྱི་དྲི་བསུང་དྲག་པོ་སྣར་ཕོག་པ་ལས་རིམས་སུ་གྱུར་པ་དང་། མདའ་དུག་ལྟ་བུའི་རླངས་པའམ། དྲིས་ཕོག་པ་ལས་རིམས་སུ་གྱུར་པ་དང་། ཁྲོས་པ་ལས་རིམས་སུ་གྱུར་པ་དང་། འཇིགས་པ་དང་། མྱ་ངན་དང་། འདོད་པ་ལས་རིམས་
[100b]
[100b.1]སུ་གྱུར་པའོ། །དེ་ལ་གདོན་བབས་སམ། གདོན་གྱིས་ཟིན་ན་ངུའམ་དགོད་པའི་རིམས་ནད་དུ་འགྱུར་རོ། །སྨན་གྱི་བསུང་དྲག་པོའམ་ངན་པས་ཕོག་ན་སྦྲིད་པ་འབྱུང་། གླད་པ་ན། སྐྲང་། བརྒྱལ་བའི་རིམས་ནད་དུ་འགྱུར་རོ། །མདའ་དུག་ལྟ་བུ་ལས་རིམས་ནད་དུ་གྱུར་པ་ནི་
[100b.2]བརྒྱལ། ཚད་པས་འདེབས་ཏེ་འཁྲུ། ལུས་དང་བཞིན་མདོག་གནག །ལུས་ཚ། སྙིང་ན་བའི་རིམས་སུ་འགྱུར་རོ། །ཁྲོས་པ་ལས་ནི་གླད་པ་ན་ཞིང་ལུས་འདར་བའི་རིམས་སུ་འགྱུར་རོ། །འཇིགས་པའམ་མྱ་ངན་གྱིས་བཏབ་པ་ནི་ཚིག་མང་དུ་སྨྲ་ཞིང་ན་བའི་རིམས་སུ་འགྱུར་རོ། །
[100b.3]འདོད་པ་ལས་ནི་མགོ་འཁོར། ཟས་ཡི་གང་མི་འོང་། ལུས་ཚ། ངོ་ཚ་མེད། གཉིད་མེད། བློ་དང་བརྟན་པའི་བག་ཏུ་ཉམས་པ་དེ་ལྟ་བུའི་རིམས་སུ་འགྱུར་རོ། །དེ་ལ་གདོན་གྱིས་བཏབ་པ་སྨན་དང་དུག་གི་ངད་པས་ཕོག་པ་འདི་གསུམ་ནི་འདུས་པའི་རིམས་ནད་ཀྱི་ནད་ཐབས་
[100b.4]དང་གཅིག་གོ། །ཁྲོས་པའི་རིམས་ནི་མཁྲིས་པ་ལས་རིམས་སུ་གྱུར་པའི་ནད་ཐབས་དང་གཅིག་གོ། །འཇིགས་པ་དང་། མྱ་ངན་དང་། འདོད་པ་ལས་གྱུར་པའི་རིམས་དང་། འདི་རྣམས་ནི་རླུང་གི་རིམས་དང་། བད་ཀན་གྱི་རིམས་དང་། མཁྲིས་པའི་རིམས་
[100b.5]སུ་འགྱུར་རོ། །དམོད་པ་བོར་བ་དང་། བྱད་བྱས་པ་ལས་རིམས་ནད་དུ་གྱུར་པ་ནི་འདུས་པའི་ནད་དྲག་པོ་མི་བཟད་པར་འགྱུར་རོ། །དེ་ལ་ངན་སྔགས་ཀྱི་བྱད་བྱས་པས་ནི་ཐོག་མར་སེམས་ལ་བབ། དེའི་འོག་ཏུ་ལུས་ལ་བབ་སྟེ་ཚ། དེ་ནས་ཐོར་བུས་གང་བར་འགྱུར། སྐོམ་དད་
[100b.6]ཆེ། མགོ་འཁོར། ལུས་ཚ། བརྒྱལ། རིམས་དེ་ཉིན་རེ་ཞིང་ཕྱི་ཕྱིར་ཚབས་ཆེ་བར་འགྱུར་རོ། །རིམས་ནད་རྣམ་པ་བརྒྱད་པོ་དེ་ནི་དེ་རྣམས་ཡིན་ནོ། །རིམས་ནད་དེ་དག་ཀྱང་རྣམ་པ་གཉིས་ཏེ། ལུས་ཀྱི་རིམས་ནད་དང་། སེམས་ཀྱི་རིམས་ནད་དོ། །གྲང་བའི་རིམས་དང་།
[100b.7]ཚ་བའི་རིམས་སོ། །ལུས་ཀྱི་ཕྱི་རོལ་གྱི་ཚ་བའི་རིམས་དང་། ལུས་ཀྱི་ཁང་པ་ནང་དུ་ཚ་བའི་རིམས་སོ། །དུས་ཀྱི་རང་བཞིན་གྱི་རིམས་དང་། དུས་ལས་གྱུར་པའི་རིམས་སོ། །གསོར་རུང་བའི་རིམས་དང་། གསོར་མི་རུང་བའི་རིམས་སོ། །རིམས་ནད་མ་སྨིན་པའི་རིམས་དང་།
[101a]
[101a.1]རིམས་ནད་སྨིན་པའི་རིམས་སོ། །དེ་ལ་དུས་ཀྱི་རིམས་ཞེས་བྱ་བ་ནི་སྔར་ཚ་བའི་རིམས་ཀྱིས་ལུས་ལ་བཏབ་པའོ། །ཕྱིས་རྙིང་ལ་ཚ་བར་གྱུར་པ་ནི་ཡིད་ཀྱི་རིམས་སོ། །རླུང་དང་བད་ཀན་གྱི་ནད་གཉིས་ཅིག་ཅར་བྱུང་བ་ནི་གྲང་བའི་རིམས་སོ། །མཁྲིས་པའི་
[101a.2]རིམས་ནད་དང་འབྲེལ་བ་ནི་ཚ་བའི་རིམས་སོ། །ནད་སྣ་གཉིས་འདྲེས་པ་ནི་རིམས་ཞེས་བྱའོ། །ཁོང་པའི་ནང་དུ་ཚ་བའི་རིམས་ན་བ་ནི་རིམས་ནད་དཀྱེལ་ཆེ་སྟེ། །ཁོང་པའི་ནང་དུ་ན་ཞིང་བཤང་གཅིའི་དྲི་མ་སྲི་ཞིང་འགག་གོ། །ལུས་ཀྱི་ཕྱི་རོལ་ཚ་བའི་རིམས་ནི་ལུས་ཀྱི་ཤ་དང་
[101a.3]པགས་པ་ཚ་ཞིང་ན་བར་ཟད་དེ་འདི་ནི་གསོ་སླའོ། །དེ་ལ་དུས་ཀྱི་རང་བཞིན་གྱི་རིམས་ནི་དུས་དུས་སུ་ལྡང་བའི་རིམས་ཡིན་ཏེ། དབྱར་དང་། སྟོན་དང་། དཔྱིད་གསུམ་རླུང་ནད་ལ་སོགས་པ་རིམ་པ་བཞིན་དུ་འབྱུང་བའི་རིམས་ཡིན་ནོ། །གྱུར་པའི་རིམས་ནི་དེ་ལྟ་བུ་དུས་སོ་སོའི་ཚེ།
[101a.4]དུས་ཚིགས་དང་མཐུན་པའི་རིམས་མ་ཡིན་པ་དེ་ནི་གྱུར་པའི་རིམས་ནད་ཅེས་བྱ་སྟེ་གསོ་དཀའ་བའོ། །རང་བཞིན་གྱི་རིམས་ནད་ཅེས་བྱ་བ་དེ་ཡང་ཕལ་ཆེར་རླུང་ནད་ཀྱིས་སློང་སྟེ་དུས་བཞིར་རིམ་བཞིན་འགྱུར་རོ། །དབྱར་གྱི་ཚེ་ནི་རླུང་ནད་ཀྱི་ནད་བསླངས་ནས་མཁྲིས་པ་དང་བད་ཀན་
[101a.5]དུ་ལྡན་པ་དང་རིམས་ནད་དུ་འགྱུར་རོ། །སྟོན་ནི་མཁྲིས་པའི་ནད་སློང་སྟེ་དེའི་གྲོགས་བད་ཀན་གྱིས་བྱས་པས་རིམས་ནད་དུ་འགྱུར་ཏེ་དེ་ལྟ་བུ་ལ་ཁ་ཟས་སྨྱུང་བར་བྱས་ཀྱང་། སྟོན་ཉམས་མཐུ་སྐྱེ་བའི་དུས་ཡིན་པས་གནོད་པར་མི་འགྱུར་རོ། །དཔྱིད་ཀ་ནི་བད་ཀན་ལས་ནད་དུ་
[101a.6]འགྱུར་བའི་དུས་ཡིན་ཏེ། བད་ཀན་གྱི་རིམས་ནད་ལངས་པའི་ཟླ་ལ་རླུང་དང་མཁྲིས་པའི་ནད་ཀྱང་དེའི་རྗེས་ལ་འབྱུང་ངོ་། །མི་ཉམས་འཚག་ཆེ་བ་ཞིག་ལ་རིམས་ནད་ཚ་བས་ཆུང་ངུ་ཞིག་གིས་སྔར་བཏབ་ལ་ཕྱི་ནས་ནད་དེ་མ་ཡིན་པ་གནོད་པའི་ནད་བླ་བརྣན་གཞན་ལྟ་བུས་
[101a.7]བཏབ་པ་ཡང་མེད་ན་རིམས་ནད་དེ་ལྟ་བུ་ནི་གསོ་སླ་བ་ཞེས་བྱའོ། །ཡང་ནད་པའོ་ཅོག་གི་ནད་གསོ་བ་ལ། འཚོའམ་མི་འཚོ་དཀའ་སླ་ཅི་འདྲ་བ་བརྟག་པ་ནི་ནད་པའི་ཁ་གདོང་ལ་སོགས་པ་ཇི་ལྟར་གྱུར་པའི་ཚུལ་དང་ལྟ་བ་དང་མཚན་མ་ཤེས་པར་བྱ་བའི་དམིགས་བཤད་པ་དང་སྦྱོར་ལ།
[101b]
[101b.1]གསོ་དཀའ་སླ་ཤེས་པར་གྱིས་ཤིག །དེ་ལ་རིམས་ནད་མ་སྨིན་པ་ཞེས་བྱ་བ་ནི། རིམས་ཀྱིས་དང་པོ་གསར་དུ་བཏབ་པ་རྩེ་མ་ཞིལ་བ་ལྟ་བུ་ལ་བྱ་སྟེ། དེ་ནི་རིམས་ཚབས་ཆེ་ལ་ན། ཁོང་རྨྱ་བ་མ་ཡིན། གཅིན་མང་། ཐུར་དུ་བཤང་བ་འགགས་ཏེ་སྲི། ཁ་ཟས་མི་འཇུ།
[101b.2]སྐོམ་དད་ཆུང་། ཁ་ཟས་ཡི་གར་མི་འོང་སྟེ་ནད་ཐབས་འདི་ལྟ་བུ་ནི་རིམས་ནད་གསར་པ་ཞེས་བྱ་སྟེ་རིམས་ནད་མ་སྨིན་པ་ཡིན་ནོ། །དེ་ལ་རིམས་ནད་སྨིན་པར་གྱུར་པ་ཞེས་བྱ་བ་ནི་རིམས་ནད་རྩེ་ཞིལ་བར་གྱུར་པ་ལ་བྱ་སྟེ། དེ་ནི་རིམས་ནད་ཚབས་ཆེ་བླ་ཞིང་སྨྲ། དབུགས་
[101b.3]ཀྱི་རྔམ་པ་དྲག །མགོ་འཁོར། བཤང་གཅི་དྲི་མ་མི་འགག་པར་ཐུར་དུ་འབྱུང་། སློན་པར་བྱེད་པའི་ནད་ཐབས་འདི་ལྟ་བུ་ནི་རིམས་ནད་སྨིན་པར་གྱུར་པའི་རྟགས་ཡིན་ནོ། །ཡང་རིམས་ནད་རྣམ་པ་ལྔར་བཤད་པ་ལ་རླུང་དང་མཁྲིས་པ་བད་ཀན་སོ་སོའི་དུས་ཚིགས་ཀྱི་དམིགས་
[101b.4]དང་ནད་པའི་ཉམས་འཚག་ཆེ་ཆུང་ལས་ཀྱང་འགྱུར་ཏེ། རིམས་ནད་རྣམ་པ་ལྔ་ཅར་ཡང་ཕལ་ཆེར་ནི་འདུས་པའི་རིམས་ནད་དུ་འགྱུར་རོ། །ལྔ་གང་ཞེ་ན། རྒྱུན་གྱི་རིམས་ནད་དང་། རྟག་པའི་རིམས་ནད་དང་། རིམས་ཉིན་གཅིག་པ་དང་། རིམས་ཉིན་ཞག་གསུམ་པ་
[101b.5]དང་། རིམས་ཉིན་ཞག་བཞི་པའོ། །དེ་ལ་རྒྱུན་གྱི་རིམས་ནི་ལུས་ཀྱི་སྲོག་ཟུངས་བདུན་དང་། བཤད་གཅི་དང་། རྩ་ཀུན་ལ་རླུང་དང་། མཁྲིས་པ་དང་། བད་ཀན་གྱི་རིམས་ནད་ཀྱིས་ཁྱབ་པར་བྱས་ནས་ལུས་ཀུན་ཚ་བར་གྱུར་ཏེ། སྲོག་ཟུངས་བདུན་དང་། བཤད་གཅི་
[101b.6]ལ་སོགས་པའི་ནང་དུ་རིམས་དེ་མཚུངས་པར་ཞུགས་ནས་ཚབས་ཆེར་སྐྱེས་ཏེ་རིམས་ཀྱི་མཐུ་ཆེན་ལུས་ལྕི། རྐང་ལག་རེངས་བག་ཏུ་འདུག་སྟེ། དེའི་ཚེ་རྒྱུན་གྱི་རིམས་དེ་ནི་དམིགས་ཀྱིས་ལུས་ཀྱི་ནང་ན་བཅུད་དངས་མ་ཞེས་བྱ་བ་ལ་བརྟེན་ཅིང་འདུག་སྟེ། རིམས་ནད་དེ་ལ་སོགས་
[101b.7]པའི་དཔྱད་ཀྱང་དཀའ་ལ། བཟོད་པར་ཡང་རབ་ཏུ་དཀའོ། །རིམས་ནད་དེ་ལྟ་བུས་ཁོང་པའི་ནང་གི་བཤང་གཅི་དྲི་མ་ལ་བབ་སྟེ། ཚ་བའི་དྲོད་ཀྱིས་སྨིན་ཅིང་ཚོས་པར་བྱས་ནས་ནི་མྱུར་དུ་འཚོ་སླའོ། །གལ་ཏེ་ནད་ལུས་ཀྱི་སྲོག་ཟུངས་བདུན་པ་ལ་བབ་སྟེ་རིམས་ནད་ཚབས་ཆེ་བ་དེས་མྱུར་དུ་
[102a]
[102a.1]སྨིན་ཅིང་ཚ་བས་གདུང་བར་བྱེད་ན་ནི་གསོ་དཀའ་སྟེ་མི་རུང་ངོ་། །འདུས་པའི་རིམས་ནད་རྒྱུན་ཅེས་བྱ་བ་དེ་རླུང་ལས་གྱུར་པའི་རིམས་ནད་ཡིན་ན་ནི་ཞག་བདུན་དུ་གནས་ཏེ། དེ་ཡང་གལ་ཏེ་རླུང་ངམ། མཁྲིས་པའམ། བད་ཀན་ཉིད་ལས་བབ་སྟེ་ནད་ཉིད་ལ་
[102a.2]གདུང་ཞིང་སྨིན་པར་བྱེད་པ་ནི་རིམས་འབྱང་དུ་རུང་བ་ཞེས་བྱ་སྟེ་ཞག་བདུན་གྱིས་འཚོའོ། །སྲོག་ཟུངས་བདུན་པོ་ཉིད་ཁྲག་ལ་སོགས་པ་དང་ལུས་ཀྱི་དྲི་མ་བཤང་གཅི་ལ་བབ་སྟེ། རིམས་ཚ་བ་དེས་གདུང་ཞིང་ཚོས་པར་བྱེད་ན་ནི་རིམས་འབྱང་དུ་མི་རུང་བ་ཞེས་བྱ་སྟེ་ཞག་བདུན་གྱིས་འཆི་
[102a.3]བར་འགྱུར་རོ། །ཚུལ་དེ་དང་འདྲ་བར་མཁྲིས་པའི་ནད་ནི་ཞག་བཅུས་བྱེ་བྲག་དབྱེའོ། །བད་ཀན་གྱི་ནད་གཞི་བཅུ་གཉིས་ཀྱི་བྱེ་བྲག་དབྱེའོ། །དེ་ལྟར་འདུས་པའི་རིམས་ནད་རྒྱུན་ཞེས་བྱ་བའི་རིམས་དེ་འཚོ་བ་དང་འཆི་བར་འགྱུར་བའི་བྱེ་བྲག་ནི་དེ་ལྟར་བལྟའོ། །ཞེས་གནའི་
[102a.4]དྲང་སྲོང་མེ་བཞིན་འཇུག་དེ་སྐད་འཆད་དོ། །ཡང་དྲང་སྲོང་ལྗང་སྔོའི་བུ་ན་རེ་རླུང་ལས་གྱུར་པའི་རིམས་ཞག་བདུན་གྱིས་སོས་འཆིའི་བྱེ་བྲག་དབྱེ་ཞེས་བྱ་བ་ནི་ཞག་བཅུ་བཞིས་བྱེ་བྲག་དབྱེའོ། །མཁྲིས་པའི་རིམས་ནད་ཞག་དགུས་བྱེ་བྲག་དབྱེ་ཞེས་བྱ་བ་ནི་ཞག་བཅོ་བརྒྱད་
[102a.5]ཀྱིས་འཚོ་འཆིའི་བྱེ་བྲག་དབྱེའོ། །བད་ཀན་གྱི་རིམས་ནད་ཞག་བཅུ་གཅིག་གིས་བྱེ་བྲག་དབྱེ་ཞེས་བྱ་བ་ནི་ཞག་ཉི་ཤུ་རྩ་གཉིས་ཀྱིས་བྱེ་བྲག་དབྱེའོ། །དེ་ལྟར་རླུང་དང་། མཁྲིས་པ་དང་། བད་ཀན་གསུམ་གྱི་རིམས་ནད་འདུས་པའི་རྒྱུན་ཞེས་བྱ་བས་བཏབ་པ་འཚོ་འཆིའི་བྱེ་བྲག་
[102a.6]གི་ཚིགས་ནི་དེ་ལྟར་བལྟ་ཞེས་འཆད་དོ། །རིམས་ནད་གྲངས་སོ་སོར་བསྟན་མོད་ཀྱི་འོན་ཀྱང་ནད་པ་ནད་རྩེ་ཞིལ་ན་ཉམ་ཆུང་སྟེ་རིད་པ། ཁ་ཟས་མི་འཕྲོད་པ་གཅིག་ཟོས་སམ་བསྟེན་པ་དང་། བྱ་བ་ལ་སོགས་པ་གནོད་པ་ཞིག་བྱས་ན་ནད་དམིགས་ཆུང་ངུས་ཀྱང་སྲོག་ཟུངས་
[102a.7]བདུན་པོ་ཤ་ཁྲག་ལ་གནོད་པར་བྱས་ཏེ་ནད་ཀྱི་དཀྱེལ་དང་དཔུང་སྐྱེས་ནས་རིམས་ནད་དེ་ཡུན་རིང་དུ་ན་ཞིང་ནད་ལ་གཉེན་པོ་མེད་པར་འགྱུར་ཏེ། རེས་འགའ་ནི་ཚབས་ཆེ། རེས་འགའ་ནི་ཚབས་ཆུང་སྟེ། རིམས་ནད་དེ་རླུང་དང་། མཁྲིས་པ་དང་། བད་ཀན་རང་རང་གི་དུས་
[102b]
[102b.1]ཀྱི་ཆེ་ནད་ཀྱི་སྟོབས་སྐྱེས། ནད་ལ་བར་ཆད་བྱེད་དོ། །དེ་ལྟར་རིམས་རྒྱུན་རིང་དུ་གྱུར་པ་ལ་ཡང་སྨན་དཔྱད་ཀྱི་མཐུ་སྐྱེད་ན་ནི་རིམས་ནད་ཕྱིན་ཏོ། །སྨན་དཔྱད་ཀྱི་མཐུ་ཆུང་ན་ནི་རིམས་ནད་མི་ཕྱིན་ཏོ། །རླུང་དང་། མཁྲིས་པ་དང་། བད་ཀན་གྱི་ནད་དམིགས་ཟད།
[102b.2]རིམས་ནི་ཆུང་ལ་ཕྲ་བར་གྱུར་པའི་ཚེ་ན་རིམས་ནད་དེ་ཕོ་བའི་ནང་གི་བཅུད་དངས་མའི་ནང་ན་འདུག་གོ། །དེ་ལྟར་རིམས་དེ་བཅུད་དངས་མའི་ནང་ན་འདུག་པར་གྱུར་ན་ལུས་རིད་ཅིང་སྐེམ། བཞིན་དང་ཁ་དོག་ངན། རྨོངས་བག་ཏུ་འདུག །ཁོང་སྙོམ། ཁ་ཟས་ཡི་གར་མི་
[102b.3]འོང་བ་ལ་སོགས་པར་འགྱུར་རོ། །དེ་ལྟར་བཅུད་དངས་མ་དང་རིམས་སུ་འདྲེས་ཏེ་ཕོ་བ་ན་འདུག་པའི་རྩ་ཐམས་ཅད་ཀྱི་སྒོ་ཡང་དེ་ན་ཁ་བྱེ་ཞིང་འདུས་པས་རྩ་སྒོ་ཀུན་གྱི་ནང་ན་བཅུད་དངས་མ་རིམས་དང་འདྲེས་པ་དེར་སོང་ན་ལུས་ཐམས་ཅད་ལ་རྒྱུན་གྱི་རིམས་ནད་དེས་མྱུར་དུ་ཁྱབ་སྟེ་
[102b.4]ན་བར་བྱེད་དོ། །དེ་ལ་རྟག་པའི་རིམས་ཞེས་བྱ་བ་ནི་འདུས་པའི་རིམས་རྒྱུན་ཞེས་བྱ་བ་ལས་ཚུལ་མི་འདྲ་བར་ལོག་པར་ལྟ་སྟེ་ནད་ཐམས་ཅད་ཀྱང་མི་འདྲའོ། །ཇི་ལྟ་ཞེ་ན་རྒྱུན་གྱི་རིམས་དེ་ནི་ཉིན་ཞག་དུ་མ་ཞིག་ཏུ་ཉིན་མཚན་རྒྱུན་དུ་ནའོ། །རྟག་པའི་རིམས་འདི་ནི་
[102b.5]ཉིན་པར་ལན་གཉིས་ནད་ལྡང་། མཚན་མོ་ལན་གཉིས་ནད་ལྡང་ཞིང་ན་བས་དེའི་ཕྱིར་མི་འདྲའོ། །ནད་ལྡང་བའི་དུས་ཀྱང་མ་ངེས་ཏེ་རེས་འགའ་སྔ་དྲོ། རེས་འགའ་ཕྱི་དྲོ། རེས་འགའ་ཉི་མ་གུང་ལ་ན། མཚན་མོ་ཡང་ནམ་སྟོད་ནམ་སྨད་ལ་ན་བའི་དུས་ངེས་
[102b.6]པ་མེད་དོ། །ཐོག་མ་ནད་ཀྱིས་འདེབས་པའི་དུས་ཀྱང་ངེས་པ་མེད་དོ། །རྟག་པའི་རིམས་འདི་ཉིད་ནི་ཁྲག་ལ་ཕལ་ཆེར་བརྟེན་ཅིང་འདུག་པ་དེ་ནི་རྟག་པའི་རིམས་ཞེས་བྱའོ། །ཁ་ཅིག་ན་རེ་རྟག་པའི་རིམས་དེ་ནི་ཉིན་ལན་གཉིས་ན་ཞིང་མཚན་ལན་གཉིས་ན་ཞེས་ཀྱང་འཆད་དོ། །
[102b.7]དེ་ལ་རིམས་ཉིན་གཅིག་པ་ནི་ཉིན་གཅིག་ཀྱང་ལན་རེ་རེ་ན་བ་ཡིན་ཏེ། རིམས་དེ་ཡང་ཤའི་རྩ་བའི་ནང་ན་བརྟེན་ཅིང་འདུག་པ་ཡིན་ནོ། །ཉིན་གཅིག་པའི་རིམས་འདི་ནི་རིམས་ཀྱི་ནང་ན་ནད་ཚབས་མི་ཆེ་བ་ཡིན་ཏེ་གསོ་སླའོ། །དེ་ལ་ཉིན་གསུམ་པའི་རིམས་ཞེས་བྱ་བ་ནི་ཉིན་གཅིག་
[103a]
[103a.1]དང་པོ་རིམས་ཀྱིས་བཏབ་ལ་དེའི་ཕྱི་དེ་ཉིན་ནི་མི་ནའོ། །དེའི་ཡང་ཕྱི་དེ་ཉིན་ན་བར་བྱེད་པ་དེ་ལྟ་བུའོ། །རིམས་འདི་ནི་ཚིལ་གྱི་རྩ་བའི་ནང་ན་ཞེན་ཅིང་འདུག་པ་ཡིན་ཏེ། མཁྲིས་པ་དང་རླུང་གཉིས་གླད་པའི་སྤྱི་བོར་ཞུགས་ཤིང་ཞེན་ན་གླད་པའི་སྤྱི་བོ་
[103a.2]ནའོ། །རྐང་པ་མན་ཆད་དཀུ་དོར་ན་ན་བད་ཀན་དང་མཁྲིས་པ་ལས་གྱུར་པའི་ནད་ཡིན་ནོ། །རྒྱབ་ན་ན་རླུང་དང་བད་ཀན་ལས་གྱུར་པའི་ནད་ཡིན་ནོ། །བཞི་པའི་རིམས་ཞེས་བྱ་བ་ནི། དང་པོ་ཉིན་གཅིག་རིམས་ན་ལ་དེའི་འོག་ཉི་མ་གཉིས་ནི་མི་ནའོ། །དེ་ནས་ཉི་
[103a.3]མ་བཞི་ནང་པར་ཡང་ན་བ་འདི་ནི་བཞི་པའི་རིམས་ཞེས་བྱ་སྟེ། རིམས་ནད་འདི་ལྟ་བུ་ནི་མྱུར་དུ་མི་འབྱང་སྟེ་ཡུན་རིང་དུ་ནའོ། །རིམས་ནད་འདི་ནི་ཚིལ་ལམ། རྐང་ངམ། རུས་པའི་ནང་ན་འདུག་པ་ཡིན་ནོ། །ན་བའི་ཐབས་ཀྱང་རྣམ་པ་གཉིས་ཏེ་བད་ཀན་བྱིན་
[103a.4]པ་གཉིས་ཀྱི་ནང་ན་ཞུགས་ཏེ་ན་བ་དང་རླུང་གླད་པའི་ནང་དུ་ཞུགས་ཏེ་ན་བ་དང་རྣམ་པ་གཉིས་ཡིན་ནོ། །ཡང་བཞི་པའི་རིམས་དེ་ཡང་མི་འདྲ་བ་གཞན་ཡང་ཡོད་དེ། རུས་པ་དང་ཚིགས་གཉིས་ཀྱི་ནང་དུ་ཞུགས་ཏེ་འདུག་ན་ཉི་མ་བཞི་ལ་དང་པོ་ཉི་མ་གཉིས་རིམས་ན། དེའི་འོག་ཏུ་ཉི་མ་གཅིག་
[103a.5]མི་ན། དེའི་ཕྱི་དེ་ཉིན་ཡང་ན་བར་བྱེད་ན་དེ་ལྟ་བུ་ནི་བཞི་པའི་རིམས་ཞེས་བྱའོ། །རིམས་ནད་དེ་ལྟ་བུ་ལ་ཁ་ཟས་མི་འཕྲོད་པ་ཟོས་པ་དང་། །གནོད་པར་འགྱུར་བ་ལུས་ཀྱིས་བསྐྱོད་པའི་ལས་བྱས་ན། རླུང་དང་། མཁྲིས་པ་དང་། བད་ཀན་གྱི་ནད་གཞིའི་
[103a.6]མཐུ་ཕྱིར་སྐྱེས་ཏེ་ན་བར་འགྱུར་རོ། །ཁ་ཟས་ཕན་པ་ཟོས་པ་དང་ལུས་ཀྱིས་བསྐྱོད་པའི་གནོད་པ་མ་བྱས་ན་ནད་དམིགས་ཀྱི་ཉམས་དམའ་སྟེ་འབྱང་བར་འགྱུར་རོ། །ཡིད་ཀྱི་རིམས་ནད་ཅན་ཞེས་བྱ་བ་ནི་སྔོན་གྱི་སྡིག་པ་མི་དགེ་བའི་ལས་ལས་འབྱུང་སྟེ། ཁ་ཟས་མི་
[103a.7]འཕྲོད་པ་དང་གནོད་པར་འགྱུར་བ་མ་བྱས་པར་རིམས་ནད་ཀྱིས་བཏབ་ནས་ཕྱི་ཕྱིར་ནད་ཚབས་ཆེ་སྟེ། ན་བའི་ཚེ་རིམས་ནད་གཞན་དང་འདྲ་བར་ན་བ་ཡིན་ནོ། །རིམས་ནད་དོ་ཅོག་གིས་བཏབ་སྟེ་ན་བ་ལས་ཐ་མར་འབྱུང་དུ་ཉེ་བའི་རྟགས་ནི་ལུས་ཀྱི་སྲོག་ཟུངས་བདུན་
[103b]
[103b.1]པོ་བཅུད་དངས་མ་དང་། ཤ་ལ་སོགས་པ་ལ་རླུང་ངམ། མཁྲིས་པའམ། བད་ཀན་གྱིས་རིམས་ནད་དེ་དཀྲུགས་ཤིང་བསླངས་ནས་ནད་སློང་བར་བྱེད། ནད་པ་དབུགས་དང་རྔམ་པ་དྲག་ཏུ་འབྱུང་། ལུས་རྔུལ། མཁུན། སློང་བར་བྱེད། ལུས་འདར།
[103b.2]རྐང་ལག་བྱ་རྨྱང་བྱེད། ཚིག་མང་དུ་སྨྲ། ཚ་བའམ་གྲང་བས་ལུས་དང་བཞིན་གྱི་མདོག་དང་གཟི་ཀུན་ཉམས་པར་བྱས། ཤེས་ཤིང་ཁོང་དུ་ཆུད་པའི་བག་མེད་དེ་རྨོངས་བག་ཏུ་འདུག །རིམས་ནད་ཚབས་ཆེར་ན་བས་ཉམ་ཐག་སྟེ་མཁྲིས་པའི་ཚུལ་གྱིས་
[103b.3]ལྟ་བ་འདི་ལྟ་བུའི་ཚེ་ན་ནི་རིམས་དེ་ཞུ་ཞིང་བྱང་བ་ཡིན་ཏེ། དེའི་ཚེ་འཕྱེན་སྒྲ་དང་བཅས་པ་ཡང་འབྱུང་ཞིང་། ཐུར་དུ་ཚད་པ་སླ་བར་ཤུགས་དྲག་ཏུ་འཁྲུས་ནས་དེ་ནས་ལུས་ཡང་ཤིང་སྙོམ། རྨྱ་བ་དང་། རྨོངས་བག་དང་། ལུས་ཚ་བའི་བག་དང་། ཁའི་
[103b.4]ནང་ཐོར་བུའི་བག་ཀྱང་མེད། མིག་ལ་སོགས་པ་དབང་པོ་རྣམས་བརྟས་ཏེ་ན་བ་མེད། ལུས་ལ་རྔུལ་ཡང་འབྱུང་། སྦྲིད་པ་ཡང་འབྱུང་། ན་བ་མེད་ཅིང་རང་བཞིན་གྱིས་ཉམས་ཐ་མལ་པར་གྱུར་ཏེ། ཁ་ཟས་ཡི་གར་འོང་། མགོ་བོ་གཡའ་སྟེ་ཤིག་ཕྲུག་
[103b.5]འདོད་པ་འདི་ལྟ་བུ་ནི་རིམས་ནད་བྱང་བའི་མཚན་མ་ཡིན་ནོ། །རིམས་ཀྱི་ནད་གཞི་བཤད་པའི་ལེའུ་སྟེ་གཉིས་པ་རྫོགས་སོ།། །།ཁྲག་དང་མཁྲིས་པ་རྒྱས་པའི་ནད་ལས་ཁ་སྣ་དང་མིག་ནས་ཁྲག་འབྱུང་བ་དང་། ཐུར་དུ་ཁྲག་འབྱུང་བ་
[103b.6]དང་། ལུད་པ་ལུ་བའི་ནད་གཞིའི་ལེའུ་གསུམ་པ་བཤད་པར་བྱའོ། །རབ་ཏུ་དྲོད་ཆེ་བ་དང་། རབ་ཏུ་རོ་བྲོ་བ་རྣོ་བ་དང་། རབ་ཏུ་ཚ་བ་དང་། སྐྱུར་བ་དང་། ལན་ཚྭ་ལ་སོགས་ཏེ་ཚ་བར་འགྱུར་བའི་བག་ཟོས་པ་དང་། འབྲུ་བག་ལ་ཀོ་ཏྲ་པ་དང་། ཨུད་ཏ་
[103b.7]ལ་ཀ་དང་། འདི་ལྟ་བུའི་ཚ་བའི་བག་དང་། ན་ལེ་ཤམ་དང་། དབྱི་མོ་དང་། །ཀྲུ་ཏྲུག་ཏྲེས་ལ་སོགས་པ་སྨན་ཚ་བའི་བག་མཁྲིས་པར་གྱུར་པ་ཧ་ཅང་བསྟེན་དྲགས་ན་མཁྲིས་པའི་ནད་དུ་འགྱུར་ཞིང་མཁྲིས་པ་རྒྱས་པ་སྟེ། ལུད་པ་དང་ཁྲག་རྒྱས་པའི་ནད་
[104a]
[104a.1]དུ་འགྱུར་རོ། །མཁྲིས་པ་དང་ཁྲག་གཉིས་ཕན་ཚུན་ནད་འདྲེས་པར་གྱུར་པ་དང་། ལུས་ཐམས་ཅད་ལ་ཁྲག་དང་མཁྲིས་པས་ཁྱབ་ནས་ནད་དུ་འགྱུར་རོ། །དེ་བས་ན་མཁྲིས་པའི་ནད་ཅེས་བྱ་བ་དེ་ནི་ཁྲག་ནད་དུ་གྱུར་པ་དང་། ཁྲག་དང་
[104a.2]མཁྲིས་པར་འདྲེས་པ་དང་། ཁྲག་གིས་མཁྲིས་པ་ལ་གནོད་པར་བྱས་པ་འདི་རྣམས་ལྟ་བུས་མཁྲིས་པ་དེ་ཁྲག་གི་དྲི་དང་། ཁྲག་གི་མདོག་དང་མཐུན་པར་འཇུག་ཅིང་གནས་པས་ན་དེའི་ཕྱིར་ཁྲག་གིས་མཁྲིས་པའི་ནད་དམིགས་མཚོན་ཏེ་བསྟན་པ་ཡིན་ནོ། །དེ་
[104a.3]ནས་ཁྲག་གི་གནས་མཆེར་པ་དང་མཆིན་པ་ལ་མཁྲིས་པའི་ནད་དེ་ལྡང་བར་འགྱུར་རོ། །མཁྲིས་པའི་ནད་ལངས་པས་གླད་པ་ལྕི་ཞིང་ན། ཁ་ཟས་ཡི་གར་མི་འོང་། ཚ་བ་སྐྱེས་པས་གྲང་ཞིང་བསིལ་བར་བྱེད། སློན་ཞིང་སྐྱུགས་ན་སྐྱུགས་པ་དུད་ཁ་ལ་རོ་
[104a.4]སྐྱུར་བ་འབྱུང་། སྐྱུགས་པའི་མདོག་བཙོག་བཙོག་ལྟར་སྣང་། ལུད་པ་ལུ། དབུགས་མི་བདེ། གླད་པ་འཁོར། ཁོང་སྙོམ། ཁ་ནས་སྐྱུགས་པ་དང་། ཁྲག་དང་། མཆིལ་མ་འོང་ཞིང་དྲི་མི་ཞིམ་སྟེ། གཡའ་སྙམ་དུ་མནམ། ཁ་དྲི་མི་ཞིམ།
[104a.5]ཉ་རྗེན་བཞིན་དུ་མནམ། སྐད་འཛེར་ཏེ་འགགས། མིག་དང་། ཤ་དང་། པགས་པའི་མདོག་དང་། སེན་མོ་དང་། བཤང་གཅི་ལ་སོགས་པའི་མདོག་རྣམས་དམར་ལ་ལྗང་སྔོན་དུ་འདུག་པ་མདོག་སེར་པོར་སྣང་བ་དེ་ལྟ་བུར་འགྱུར་རོ། །རྨི་ལམ་ན་ཡང་
[104a.6]གཟུགས་ཀྱི་ཁ་དོག་དེ་ལྟར་འབྱུང་ཞིང་སྣང་ངོ་། །དེ་ལྟར་གྱུར་ན་མཁྲིས་པ་དང་ཁྲག་རྒྱས་པ་ཡིན་ནོ། །མཁྲིས་པ་དང་ཁྲག་གི་ནད་སྟོད་དུ་རྒྱས་པ་ནི། སྣ་དང་། མིག་དང་། རྣ་བ་དང་། ཁ་ནས་ཁྲག་འབྱུང་བར་འགྱུར་རོ། །གལ་ཏེ་ཁྲག་དང་མཁྲིས་པའི་ནད་
[104a.7]རོ་སྨད་དུ་རྒྱས་ན་ཕོ་མཚན་དང་། མོ་མཚན་དང་རྐུབ་ནས་ཁྲག་འབྱུང་བར་འགྱུར་རོ། །ཁྲག་དང་མཁྲིས་པའི་ནད་རབ་ཏུ་རྒྱས་ཏེ་ཚབས་ཆེ་ན་བ་སྤུའི་བུ་ག་ཐམས་ཅད་ནས་ཀྱང་ཁྲག་འབྱུང་ངོ་། །དེ་ལྟར་སྟོད་དུ་ཁ་སྣ་ནས་ཁྲག་འོང་ན་ནི་གསོ་སླ་སྟེ། སྟོད་བད་ཀན་གྱི་
[104b]
[104b.1]རང་བཞིན་ཡིན་པས་ན་དེའི་ཕྱིར་དེ་ལྟ་བུ་ལ་བཀྲུ་སྨན་གྱིས་བཀྲུས་ན་ཕན་པར་འགྱུར་རོ། །ཡང་ན་མཁྲིས་པའི་ནད་ལ་ཕན་པའི་སྨན་དཔྱད་ཀྱང་མང་དུ་ཡོད་མོད་ཀྱི། མཁྲིས་པའི་ནད་ནི་བཀྲུ་སྨན་གྱིས་བཀྲུས་པ་ལས་དཔྱད་བཟང་བ་མེད་དོ། །དེ་ལྟར་མཁྲིས་པའི་ནད་
[104b.2]བཀྲུ་སྨན་གྱིས་བཀྲུས་ཏེ་ཕྱིན་ན་མཁྲིས་པའི་ཟླ་ལ་བད་ཀན་གྱི་ནད་ཅི་ཡོད་པ་ཡང་བྱང་བར་འགྱུར་རོ། །བད་ཀན་གྱི་ནད་དེ་ཕྱིན་ཏེ་བྱང་ནས་སྨན་དང་། ཁ་ཟས་རོ་བསྐ་བ་དང་མངར་བའི་བག་ཟོས་ན་གནོད་པ་མེད་དེ། མཁྲིས་ནད་དང་ཁྲག་ནད་ལྟ་བུ་སེལ་ཏེ་ཕན་ནོ། །
[104b.3]སྨན་དང་། ཁ་ཟས་རོ་ཁ་བ་དང་བསྐ་བའི་བག་ལྟ་སྨོས་ཀྱང་ཅི་དགོས་ཏེ། དེས་ནི་མཁྲིས་པ་དང་ཁྲག་ནད་ཀྱང་སེལ་ལ། བད་ཀན་གྱི་ནད་ཀྱང་སེལ་བས་ཕན་ནོ། །ཐུར་དུ་ཁྲག་དང་མཁྲིས་པ་བྱུང་བ་དེ་ནི་རླུང་ལས་གྱུར་པའི་ས་བོན་ཡིན་ཏེ། དེ་ནི་མྱུར་དུ་བྱར་མི་རུང་
[104b.4]སྟེ། དེ་ལ་སྐྱུག་སྨན་བཏང་ན་གསོ་སླ་སྟེ། མྱུར་དུ་འབྱང་བར་འགྱུར་རོ། །དེ་བས་ན་མཁྲིས་པ་རྒྱས་པའི་ནད་ལ་སྐྱུག་སྨན་བཏང་བ་ནི་སྨན་ཕྲན་ཚེགས་སུ་འགྱུར་ཏེ། ཕན་པའི་དཔྱད་མ་ཡིན། མཁྲིས་པའི་ཟླ་ལ་རླུང་ནད་ཡོད་པ་ཡང་སྐྱུག་སྨན་
[104b.5]གྱིས་མི་ཕན་ནོ། །དེ་བས་ན་མཁྲིས་པ་རྒྱས་པའི་ནད་ལ་སྐྱུག་སྨན་པས་ནི་ཟས་རོ་བསྐ་བ་དང་། མངར་བ་ཕན་པར་འགྱུར་རོ། །ཁྲག་དང་མཁྲིས་པ་རྒྱས་ཏེ་བད་ཀན་དང་རླུང་གཉིས་ཀ་འདྲེས་ཏེ་སྟོད་སྨད་གཉིས་ཀར་ཁྲག་འབྱུང་བར་འགྱུར་ན་ནི་གསོ་དཀའ་སྟེ།
[104b.6]སྐྱུག་སྨན་བཀྲུ་སྨན་གཉིས་ཀྱང་བད་ཀན་དང་རླུང་ནད་དེ་ལ་མཁྲིས་པའི་ནད་ཀྱང་སྐྱུག་སྨན་དང་བཀྲུ་སྨན་གྱིས་ཕྱིན་པ་མེད་ལ། དེ་བཞིན་དུ་ནད་འདི་འཚོ་བར་འགྱུར་བ་ཡང་མེད་དོ། །དེ་ལྟར་མཁྲིས་པ་དང་། ཁྲག་ནད་རྒྱས་པ་དང་། རླུང་དང་བད་ཀན་
[104b.7]གྱི་ནད་ཀུན་འདྲེས་པར་གྱུར་པ་དེ་ལྟ་བུར་ནད་ཐམས་ཅད་ཞི་བར་བྱ་བའི་དཔྱད་བྱས་ན་ཕན་ནོ། །དེའི་འོག་ནས་ཞིབ་ཏུ་སྨན་སྦྱར་བའི་སྐབས་སུ་འཆད་དོ། །མཁྲིས་པ་དང་ཁྲག་གི་ནད་དེ་ལྟ་བུར་གྱུར་པ་ནད་དེའི་ནང་དུ་རླུང་ངམ། མཁྲིས་པའམ། བད་ཀན་
[105a]
[105a.1]གྱི་ནད་དམིགས་གང་ཆེ་བརྟག་དགོས་ཏེ། དེ་ནི་གཏར་ག་ཐོབ་ལ་ཁྲག་ཅི་འདྲ་བ་རྟོག་ཤིག །མཁྲིས་པ་དང་ཁྲག་རྒྱས་པའི་ནད་དེ་ལས་གཞན་ཡང་ཕྲན་ཚེགས་ཅི་དང་ཅིར་གྱུར་པ་ཡང་རྗེས་དཔྱད། འཚོ་འཆི་ཅིར་འགྱུར་བ་ནད་པའི་
[105a.2]བཞིན་མདོག་ལ་སོགས་པ་ལས་ལྟས་སུ་བལྟ་བ་ཡང་སྦྱོར་བའི་དཔྱད་གྱིས་ཤིག །ལུད་པ་ལུ་བ་གློ་ནད་རྣམ་པ་ལྔའི་ནད་དམིགས་བཤད་པར་བྱའོ། །གློ་ན་སྟེ་ལུད་པ་ལུ་བས་ནི་ལུས་ལ་གནོད་པ་མྱུར་དུ་བྱེད་པས་ན། དེའི་ཕྱིར་ལུད་པ་ལུ་བའི་
[105a.3]དམིགས་འདིར་བསྟན་པར་བྱའོ། །ལུད་པ་ལུ་བ་དེ་ཡང་རྣམ་པ་ལྔ་སྟེ། རླུང་དང་། མཁྲིས་པ་དང་། བད་ཀན་དང་། གློ་རྡོལ་བ་དང་། ལུས་ཀྱི་སྲོག་ཟུངས་བདུན་ཟད་པར་འགྱུར་བའི་གློ་གཅོང་སྐེམ་བྱེད་དང་ལྔའོ། །གློ་ནད་འདི་ལྔ་ལས་
[105a.4]རླུང་ནད་ཀྱི་ལུད་པ་བཀར་ཞིང་ན་བབས་ནི་མཁྲིས་པའི་གློ་ནད་ཀྱི་ནད་དཀྱེལ་ཆེའོ། །མཁྲིས་པའི་གློ་ནད་པས་ནི་བད་ཀན་ལས་གྱུར་པའི་ནད་ཆེའོ། །བད་ཀན་ལས་གྱུར་པའི་ནད་པས་ནི་གློ་འགྲམས་ཏེ་རྡོལ་པའི་ནད་ཆེའོ། །དེ་བས་གློ་གཅོད་སྐེམ་བྱེད་ཀྱི་ནད་
[105a.5]ཆེའོ། །གློ་ནད་འདི་རྣམས་གང་ན་ཡང་རུང་། ནད་ཐབས་ཀྱི་སྤྱི་ནི་ལུད་པ་ལུ། གྲེ་བའི་ནང་གཡའ། ཟས་ཡི་གར་མི་འོང་། གྲེ་བའི་ནང་གྲ་མས་གང་བ་བཞིན་དུ་རྩུབ་ལ་ཚ། རླུང་རོ་སྨད་མན་ཆད་དུ་རྒྱུ་ཞིང་འགྲོ་བ་ཞིག་ཡོད་པ་དེ་ཡང་ནད་ཀྱིས་
[105a.6]འགྲོར་མ་སྟེར། དེ་འགགས་པས་རླུང་དེ་འཁྱིལ་ནས་ཕྱིར་ལོག་སྟེ། རོ་སྟོད་དུ་སོང་ནས་བྲང་དང་མགུལ་པའི་ནང་ཀུན་ཏུ་ཞེན་ཏེ། དེ་ནས་གླད་པའི་ནང་དང་སྟོད་ཀྱི་རྩ་ཀུན་གྱི་ནང་དུ་རླུང་དེས་གང་བ་དང་། དེའི་ཕྱི་རོལ་རླུང་དེས་ལུས་དང་ཡན་ལག་རྣམས་གྱེན་
[105a.7]དུ་བཏེག་ཅིང་སྦར་བ་བཞིན་དུ་གཡེངས་པར་བྱེད་པས་ལུད་པ་ལུ། མིག་ནི་རྡོལ་ཞིང་བྱུང་ལ་ཐུག་པ་ཙམ་དུ་ན། རྒྱབ་དང་བྲང་རྩིབ་ལོགས་སུ་ཟུག་ཅིང་ན་བར་བྱས་ནས་རླུང་གྱེན་དུ་ཁར་རྒྱུ་ཞིང་འབྱུང་ངོ་། །རླུང་དེ་ལུད་པ་ལུ་ཞིང་འབྱུང་བའི་སྒྲ་ནི་ཁར་བའི་
[105b]
[105b.1]སྣོད་ཆག་པའི་སྒྲ་སྐད་ཟེར་རོ། །དེ་ལྟར་རླུང་ནད་ལས་གློ་ལུ་བ་དེ་ཡང་ནད་གཞིའི་བྱེ་བྲག་ཐ་དད་པས། རླུང་ནད་ཁོང་པ་ནང་དུ་འགགས་ཤིང་ཞེན་པའི་ནད་ཀྱང་ཐ་དད་པར་གྱུར་ཏེ། དེའི་ཕྱིར་ནད་ཐབས་ཀྱང་མི་འདྲ། ལུད་པ་ལུ་བའི་སྐད་ཀྱང་མི་འདྲ་
[105b.2]བར་འབྱུང་ངོ་། །དེ་ལ་རླུང་ནད་ལས་གྱུར་པའི་ལུད་པས་བཀར་བའི་ནད་ཐབས་ནི། རླུང་ནད་སློང་ཞིང་ལྡང་བར་འགྱུར་བའི་ཁ་ཟས་ཟོས་པས་བྲང་དང་། ཐོང་ཀ་དང་། གྲེ་བའི་ནང་ཁ་བསྐམས། སྙིང་ན། རྩིབ་ལོགས་དང་། བྲང་དང་།
[105b.3]གླད་པར་ཟུག་ཅིང་ན། རྨོངས་བག་ཏུ་འགྱུར་རོ། །རླུང་གིས་ལུས་ཐམས་ཅད་ཀྱི་ནང་དཀྲུགས་པ་སྙམ་བྱེད། སྐད་འགགས། ལུད་པ་སྐམ། ལུད་པ་ཤུགས་དྲག་ཏུ་ལུ། ལུ་བའི་ཚེ་ཟུག་ཅིང་ཆེར་ན། ལུ་བའི་སྒྲ་དྲག་ཏུ་འབྱུང་། ལུས་ཀུན་
[105b.4]རྩུབ་ལ་རེག་ན་བརྩེ། བད་ཀན་གྱི་བག་ཁོང་ན་བསྐམས་ཏེ་ཟད་པས། ལུད་པ་དྲག་པ་ཡུན་རིང་ཞིག་ཏུ་ལུ་ལུ་ན། ཡང་བད་ཀན་ཅུང་ཟད་ཙམ་ཞིག་འབྱུང་བ་དེ་ལྟ་བུ་ནི་རླུང་ལས་གྱུར་པའི་ལུད་པ་ལུ་བའི་ནད་ཐབས་ཡིན་ནོ། །དེ་ལ་མཁྲིས་པའི་ནད་ལས་
[105b.5]གྱུར་པའི་ལུད་པ་ལུ་བའི་ནད་ཐབས་ནི། ལུད་པ་ལུ་ན། མཆིལ་མའི་རོ་ཁ། ཁའི་ནང་གི་རོ་བྲོ་བ་ཡང་ཁ། མིག་སེར། རིམས་ཀྱིས་ཐེབས། མགོ་འཁོར། མཁྲིས་པ་དང་ཁྲག་ཏུ་སློན་པར་བྱེད། བད་ཀན་དང་མཆིལ་མ་དུད་པ་འདྲ་བ་ནག་
[105b.6]པོར་འབྱུང་ངོ་། །སྐད་འགགས། སྐོམ་དད་ཆེ། ཁོང་མྱོས་པར་འགྱུར། ལུད་པ་རྟག་པར་དྲག་ཏུ་ལུ་བའི་ཚེ་མིག་ལམ་དུ་སྐར་མདའ་འཕྲོ་བར་བྱེད་པ་ལྟ་བུར་སྣང་། ནད་ཐབས་འདི་ལྟ་བུ་ནི་མཁྲིས་པས་བཀར་བའི་ལུད་པ་ཞེས་བྱ་བའོ། །དེ་ལ་
[105b.7]བད་ཀན་གྱིས་བཀར་བའི་ལུད་པའི་ནད་ཐབས་བྲང་དུ་ཟུག་པའི་ནད་ཚབས་ནི་མི་ཆེ། གླད་པའི་སྤྱི་བོ་དང་སྙིང་ག་ནི་ལྕི་ལ་མེར་མེར་པོར་གང་བ་སྙམ་བྱེད། གྲེ་བའི་ནང་བད་ཀན་གྱིས་སྐྱང་ནུལ་དུ་བྱུགས་པ་ཙམ་དུ་ཞེན་ལ་འབྱུང་དུ་མི་རུང་། ཆམ་པས་འདེབས།
[106a]
[106a.1]སྐྱུགས། ཁ་ཟས་ཡི་གར་མི་འོང་། བ་སྤུ་དང་ཤའི་པགས་པར་རེག་ན་བརྩེ། ལུད་པ་ལུ་ན་བད་ཀན་དཀར་པོ་དཀར་ལ་སྣུམ་བག་ཏུ་འབྱུང་ངོ་། །ནད་ཐབས་འདི་ལྟ་བུ་ནི་བད་ཀན་གྱིས་བཀར་བའི་ལུད་པ་ལུ་བའི་ནད་ཐབས་ཞེས་
[106a.2]བྱའོ། །དེ་ལ་གློ་འགྲམས་ཏེ་རྡོལ་བའི་ནད་ཐབས་ནི་སྟོབས་ལ་སོགས་པ་དྲག་ཤུལ་གྱི་བག་ལྟ་བུར་བྱས་པ་དང་། སྟོབས་ཀྱི་ཚན་གྱིས་མི་ནུས་བཞིན་དུ་ཡང་སྟོབས་སམ། ཁུར་ལྟ་བུ་ཚན་ཆེན་པོ་ཕྱུང་བས་རླུང་གིས་གློ་བ་རྡོལ་ཏེ་དྲལ་ནས། དེའི་
[106a.3]རྗེས་སུ་མཁྲིས་པ་ཡང་ཞུགས་ཏེ་ནད་དཀྱེལ་དུ་གྱུར་པ་ལས་ལུད་པ་ལུ་ནས་ལུད་པ་དེ་ཁར་བད་ཀན་དང་ཁྲག་འབྱུང་བ་ཁ་དོག་སེར་པོ་ནག་པོ་རྣག་གི་ལྗན་ལྗིན་རིལ་རིལ་པོ་དང་འདྲེས་པའི་བད་ཀན་ཅིག་འབྱུང་ངོ་། །གྲེ་བའི་ནང་བད་ཀན་རྣག་ཁྲག་འོང་བའི་ཚེ་
[106a.4]ན་ལ་བྲང་དང་། ནུ་འཇིང་དང་། ཐོད་ག་ཕྱོགས་སུ་གཟེར་བ་བཞིན་དུ་ཟུག །རུས་པའི་ཚིགས་ཁ་བྱེ་བ་སྙམ་བྱེད་ལ་རིམས་ནད་ཀྱིས་འདེབས། དབུགས་མི་བདེ། སྐོམ་དད་ཆེ། སྐད་འགགས། ལུས་འདར། རྩིབ་ལོགས་སུ་ཟུག་ཅིང་ན་སྟེ།
[106a.5]མཁུན་ཞིང་ཕུག་རོན་སྐད་འབྱིན་ཏོ། །དེ་ལྟར་གློ་འགྲམས་ཏེ་རྡོལ་ན་བགས་ཀྱིས་ཉམས་སྟོབས་འབྲི། ཁ་ཟས་ཁད་ཀྱིས་ཡི་གར་མི་འོང་། ཕོ་བའི་དྲོད་དང་ཉམས་འཚག་དང་། བཞིན་མདོག་དང་འདི་རྣམས་ཀྱང་ཁད་ཀྱིས་འབྲི་བར་འགྱུར་རོ། །ནད་
[106a.6]ཐབས་འདི་ལྟར་ན་ན་གློ་འགྲམས་ཏེ་རྡོལ་བ་ཡིན་ནོ། །དེ་ལ་ལུས་ཀྱི་སྲོག་ཟུངས་བདུན་ཟད་པར་འགྱུར་བའི་གློ་གཅོད་ན་བའི་ནད་ཐབས་ནི་གཅིན་ཁྲག་ཏུ་འོང་། རྒྱབ་དང་རྐེད་པ་ན། མཆོག་ཏུ་རླུང་ནད་ཀྱིས་ནང་སློང་བར་བྱེད་དེ་དེ་བས་ན་ཟད་པར་བྱེད་པའི་
[106a.7]ནད་འདི་ནི་ལུས་ཀྱི་ནད་ལ་རྒྱལ་པོ་ལྟར་བྱེད་པས་ན་ནད་ཀྱི་རྒྱལ་པོ་ཟད་བྱེད་ཅེས་བྱའོ། །དེའི་ནད་ཐབས་ཀྱང་ལུད་པ་ལུ་ཞིང་བད་ཀན་དུ་འབྱུང་ངོ་། །བད་ཀན་དུ་ལུ་བ་ལས་ཀྱང་རུལ་ཏེ་རྣག་བཞིན་དུ་འབྱུང་ལ་མདོག་སེར་མནམ། རྩ་སྔོ་ཞིང་དམར། རྩིབ་
[106b]
[106b.1]ལོགས་གཡས་གཡོན་ན་མར་གཞོགས་ཤིང་བཅད་པ་སྙོམ་བྱེད། སྙིང་ཐུར་དུ་འཕྱོངས་ཤིང་ལྟུང་བ་སྙམ་བྱེད་དེ་ན། གློ་བུར་དུ་རེས་འགའ་ནི་ཚ་བར་འདོད། རེས་འགའ་ནི་བསིལ་ཞིང་གྲང་བར་འདོད། ཁ་ཟས་མང་དུ་ཟ་ཕོད་ལ་ཉམས་འཚག་ནི་ཟད་
[106b.2]དེ་རྐེ། ཁ་གདོང་ནི་མདོག་སྣུམ་ལ་གསལ། སོ་དཀར། མིག་བཟང་པོར་སྣང་བ་འདི་ལྟ་བུའི་ཚུལ་དུ་གྱུར་ན་དེའི་རྗེས་ལ་ལུས་ཀྱི་སྲོག་ཟུངས་ཟད་པར་འགྱུར་བའི་ནད་ཀྱི་ཚུལ་ཐམས་ཅད་འབྱུང་བར་འགྱུར་རོ། །དེ་བས་ན་ལུས་སྲོག་ཟད་པར་འགྱུར་བའི་
[106b.3]ལུད་པས་བཀར་བར་འགྱུར། ལུད་པས་བཀར་ཞིང་ལུ་ལུ་བས་ལུས་ཟད་དེ་མ་རུངས་པར་འགྱུར་རོ། །ནད་པ་དེ་ཉམས་འཚག་ཡོད་ན་ནི་གློ་གཅོད་ཟད་བྱེད་ཀྱི་ནད་དང་། གློ་འགྲམས་པའི་ནད་གཉིས་ཀ་ཡང་དེ་ལས་མིང་ལ་བར་གསོ་བ་ཙམ་དུ་རུང་ངོ་། །
[106b.4]གློ་འགྲམས་པ་དང་། ལུས་ཟད་པ་བསྐམས་པའི་གློ་གཅོང་གཉིས་ཀ་གསར་དུ་བྱུང་ན་སྨན་དཔྱད་ཀྱིས་གསོར་རུང་ངོ་། །རླུང་ངམ་མཁྲིས་པའམ་བད་ཀན་གསུམ་གྱི་ནད་དར་བར་འགྱུར་བའི་གློ་གཅོང་ཟད་བྱེད་ཀྱི་ནད་ཀྱིས་བཏབ་པ་ཡང་གསོར་རུང་ངོ་། །
[106b.5]རླུང་དང་། མཁྲིས་པ་དང་། བད་ཀན་གསུམ་ལྟ་བུ་ལས་གང་ཡང་རུང་སྟེ། ནད་སྣ་གཉིས་འདྲེས་པའི་ནད་དུ་གྱུར་ཏམ་མི་རྒན་པོ་ལྟ་བུ་ལ་གློ་གཅོད་ཟད་བྱེད་ཀྱི་ནད་ཀྱིས་བཏབ་ན་དེ་དག་ཀྱང་ནད་དེ་ལས་མི་འགྱུར། མི་ཐུ། སླ་བ་ཙམ་དུ་གསོར་རུང་ངོ་། །
[106b.6]དེ་ལྟ་བས་ན་ལུས་སྲོག་ཟད་པར་བྱེད་པའི་གློ་གཅོང་གི་ནད་གསོ་བ་ཡལ་བར་བོར་ན་དང་པོ་ལུད་པ་ལུའོ། །དེ་ནས་དབུགས་མི་བདེའོ། །དབུགས་མི་བདེ་བ་ལས་ལུས་སྲོག་བདུན་པོ་ཟད་པར་འགྱུར་རོ། །དེ་ནས་སློན་པར་བྱེད། དེ་ནས་སྐད་འགགས་པ་ལ་
[106b.7]སོགས་པའི་ནད་རྣམས་འབྱུང་ངོ་། །དེ་བས་ན་ནད་ཐབས་འདི་ལྟར་གྱུར་ན་གསོ་བའི་དཔྱད་མྱུར་དུ་གྱིས་ཤིག །ཁྲག་མཁྲིས་དང་ལུད་པ་ལུ་བའི་གློ་ནད་རྣམ་ལྔའི་ནད་གཞི་བཤད་པའི་ལེའུ་སྟེ་གསུམ་པ་རྫོགས་སོ།། །།
[107a]
[107a.1]དབུགས་མི་བདེ་བའི་ནད་དང་། སྐྱིགས་བུས་བཏབ་པའི་ནད་གཞི་བཤད་པའི་ལེའུ་བཞི་པ་བཤད་པར་བྱའོ། །དེ་ལ་དབུགས་མི་བདེ་བའི་ནད་ནི་ལུད་པས་བཀར་བའི་ནད་དཀྱེལ་ཆེར་སྐྱེས་སམ། ཡང་ན་དབུགས་མི་བདེ་བར་འགྱུར་བའི་ཁ་ཟས་མི་འཕྲོད་པ་
[107a.2]ཅིག་སྔར་ཟོས་ལ། ནད་བསླང་སྟེ་དབུགས་མི་བདེ་བར་གྱུར་ཏམ། ཡང་ན་ཁ་ཟས་མ་ཞུ་བས་ཚད་པར་འཁྲུས་སམ། ཁ་ཟས་མ་ཞུ་བས་སློན་ཏམ་དུག་འཐུངས་སམ། སྐྱ་རྦབ་ཀྱི་ནད་ཀྱིས་བཏབ་བམ་རིམས་ཀྱིས་བཏབ་བམ། འདི་ལྟ་བུ་གང་ཡང་རུང་བའི་ནད་གཞི་དབུགས་མི་བདེ་
[107a.3]བར་འགྱུར་རོ། །དབུགས་མི་བདེ་བའི་ནད་དེ་ཡང་རྣམ་པ་ལྔ་སྟེ། དབུགས་ཅུང་ཟད་མི་བདེ་བ་དང་། དབུགས་མི་བདེ་བ་མུན་པ་བཞིན་སྙིང་རྨུགས་ཀྱིས་བྱེད་པ་དང་། དབུགས་འཆད་པ་དང་། དབུགས་དྲག་པོ་མི་བདེ་བ་ཆེར་འབྱུང་བ་དང་། དབུགས་ཕྱིར་རྒྱུ་བ་དྲག་ལ་ནང་དུ་རྔུབ་
[107a.4]པའི་ཚེ་དབུགས་འཆད་དེ། ནང་དུ་མི་རྔུབ་པ་དང་རྣམ་པ་དེ་ལྔའོ། །ཡང་དབུགས་མི་བདེ་བའི་ནད་ཐམས་ཅད་ནི་དབུགས་ཕྱི་ནང་དུ་རྒྱུ་བ་ལ་བད་ཀན་གྱིས་ཆོད་དེ་འགགས་པ་དང་ཟས་སྐོམ་མིད་པའི་གྲེ་བ་དང་མགུལ་པའི་སྦུ་གུ་དང་། སྲོག་ཅེས་བྱ་བའི་རླུང་ཕྱི་ནང་དུ་རྒྱུ་བ་ཞིག་ཡོད་པ་དང་
[107a.5]འདི་དག་ལ་བད་ཀན་གྱིས་འགགས་ཏེ་ཆོད་པས་དབུགས་རྒྱུ་བའི་རླུང་འགྲོར་མི་སྟེར་ཞིང་གློ་གཡས་གཡོན་དུ་འཁྱིལ་ཏེ་འདུག་ལ་རྩ་སྒོ་ཡང་བད་ཀན་གྱི་ནད་ཀྱིས་འགགས་ན་མ་ཞུ་བའི་གནས་ཕོ་བ་ནས་དབུགས་ཕྱི་ནང་དུ་རྒྱུ་བ་དེ་བྱུང་ནས་བྲང་གི་ཐད་ཀར་འདུག་ཅིང་འཁྱིལ་ནས་དབུགས་མི་བདེ་བར་
[107a.6]འགྱུར་ཏེ་ནའོ། །དེ་ལྟར་ན་ན་བའི་ཚུལ་ནི་དང་པོར་སྙིང་དང་རྩིབ་ལོགས་ན་སྲོག་གི་དབུགས་ཕྱི་ནང་དུ་རྒྱུ་བ་ལས་གནོད་དེ་ན། དབུགས་ཀྱིས་གང་སྟེ་བུས་པའི་ཐབས་སུ་ན། མུར་འགྲམ་གཡས་གཡོན་དུ་ཟུག་སྟེ་ན་བ་འདི་ནི་དབུགས་མི་བདེ་བ་སྤྱིའི་ནད་ཐབས་ཡིན་ནོ། །དེ་ལ་དབུགས་ཅུང་
[107a.7]ཟད་མི་བདེ་བ་ཞེས་བྱ་བའི་ནད་ཐབས་ནི་སྟོབས་རྩལ་དྲག་ཤུལ་གྱི་བག་བྱས་སམ། ཁ་ཟས་ཧ་ཅང་འགྲངས་ཆེས་པར་ཟོས་པ་འདི་ལྟ་བུས་འཕྲལ་དུ་དབུགས་མི་བདེ་སྟེ། རྔམ་པ་དྲག་ཏུ་འབྱུང་བར་བྱེད་དོ། །དབུགས་མི་བདེ་བ་འདི་ནི་ཕྲན་ཚེགས་ཡིན་ཏེ་འདི་རང་ཞི་བར་འགྱུར་བ་ཡིན་ནོ། །
[107b]
[107b.1]དེ་ལ་དབུགས་མི་བདེ་བ་མུན་པ་བཞིན་རྨུགས་ཞེས་བྱ་བའི་ཐབས་ནི་རྣམ་པ་གཉིས་ཏེ། བད་ཀན་ལས་དབུགས་མི་བདེ་བར་གྱུར་པ་དང་། མཁྲིས་པ་ཚ་བའི་ནད་ལས་དབུགས་མི་བདེ་བར་གྱུར་པ་དང་གཉིས་སོ། །དེ་ལ་བད་ཀན་སྐྱེས་ན་དབུགས་ཕྱི་ནང་དུ་རྒྱུ་བའི་རླུང་དེ་འགགས་ཏེ་འཁྱིལ་ནས་
[107b.2]ཕྱིར་འབྱུང་དུ་མི་སྟེར་བར་སྦུ་གུ་དང་རྩའི་ནང་ན་མར་དབུགས་ལོག་པར་ཐུར་དུ་རྒྱུ་བར་བྱེད། གླད་པ་ན། མགུལ་པའི་ནང་གི་སྦུ་གུ་ན། བྲང་དང་རྩིབ་ལོགས་སུ་ཟུག་ཅིང་ནའོ། །ལུད་པ་ལུ་ན་གྲེ་བའི་ནང་སྒྲ་ངར་ངར་ཟེར། སྙིང་མི་དྲན་རྨོངས་བག་ཏུ་གྱུར། ཁ་ཟས་ཡི་གར་མི་
[107b.3]འོང་ངོ་། །ཆམ་པས་འདེབས། སྐོམ་དད་ཆེ་སྟེ་དབུགས་མི་བདེ་བའི་ཚེ་ན་རབ་ཏུ་མི་བདེ་སྟེ། དམིགས་ཀྱིས་ནི་སྲོག་ཅེས་བྱ་བའི་རླུང་ཞིག་ཡོད་དེ། གློ་སྙིང་གི་ནང་ནས་གྱེན་དུ་གླད་པའི་སྤྱི་བོའི་བར་དུ་རྒྱུ་ལ་དེའི་ལས་ནི་སེམས་དང་ཞིང་གསལ་བར་བྱེད། མིག་དང་རྣ་བ་ལ་སོགས་
[107b.4]པ་དབང་པོ་རྣམས་དང་ཞིང་གསལ་བར་བྱེད། སེམས་བརྟན་པར་བྱེད་མཆིལ་མ་འདོར་བར་བྱེད། སྦྲིད་པ་འབྱུང་བར་བྱེད། སྒྲེགས་པ་འབྱུང་བར་བྱེད། དབུགས་ཕྱི་ནང་དུ་རྒྱུ་བར་བྱེད། ཁ་ཟས་ཟས་སྐོམ་མིད་པར་བྱེད་པ་དེ་ལྟ་བུའི་རླུང་ཞིག་ཡོད་དེ། བད་ཀན་གྱིས་འགགས་ཏེ་
[107b.5]རླུང་རྒྱུར་མི་སྟེར་བ་དང་། དབུགས་འགགས་ཏེ་མི་བདེ་བས་དབུགས་ཐུམ་ཐུམ་བྱེད་པས་མུན་པ་བཞིན་དུ་འགྱུར་རོ། །དེ་ལ་ཁོང་ནས་བད་ཀན་ངན་པ་ཅུང་ཟད་ཙམ་ཕྱུང་ན་སྐད་ཅིག་ཙམ་བདེའོ། །ཉལ་བའི་ཚེ་ན་དབུགས་རབ་ཏུ་མི་བདེའོ། །ཙོག་ཙོག་པོར་འདུག་ན་ནི་དབུགས་མི་ཟད་བདེ་
[107b.6]བར་བྱེད། དབུགས་མི་བདེ་བའི་ཚེ་མིག་ཧར་ཧར་པོར་འགྱུར། འཕྲལ་བ་ན་རྔུལ་འབྱུང་སྟེ་རབ་ཏུ་མི་བདེ། ཁ་སྐམ། དབུགས་མི་བདེ་བས་རྔམ་པ་བསྟུད་མར་འབྱུང་། བད་ཀན་ལས་གྱུར་པའི་དབུགས་མི་བདེ་བ་ཡིན་པས་དྲོན་པོའི་བག་འདོད། ཁོང་འདར། ཆར་པ་འབབ་
[107b.7]པའམ། ནམ་ལངས་ཏེ་ཡུལ་གྲང་ངམ། སྔ་དྲོའི་སེར་བུས་ཕོག་པ་དང་། བད་ཀན་སྐྱེས་ནས་དབུགས་མི་བདེ་བའི་ནད་ལས་འགྱུར་ཏེ། དེ་ལྟ་བུ་ལ་སྨན་དཔྱད་ཀྱི་ཆོ་ག་བྱས་ན་ནད་དེ་ལས་དཀྱེལ་མིན་པ་ཙམ་གསོར་རུང་ངོ་། །དབུགས་མི་བདེ་བའི་ནད་དེ་ལྟ་བུས་གསར་དུ་བཏབ་པའམ།
[108a]
[108a.1]ནད་པ་ཉམས་འཚག་ཡོད་ན་ནི་གསོ་སླའོ། །དེ་ལ་ཚ་བ་མཁྲིས་པའི་བག་གིས་དབུགས་མི་བདེ་བར་འགྱུར་ལ། རིམས་ཚ་བས་བཏབ་བམ་མྱོས་ཏེ་དབུགས་མི་བདེ་ན་ནི་སྨན་བསིལ་བག་གིས་ནད་གསོའོ། །དེ་ལ་དབུགས་འཆད་ཅིང་དབུགས་མི་བདེ་བའི་ནད་
[108a.2]ཐབས་ནི་དབུགས་མི་བདེ་བའི་རྔམ་པ་ཤུགས་དྲག་པོ་འབྱུང་བའི་རྗེས་ལ་དབུགས་ཆད་པ་དེ་ལྟ་བུ་བསྟུད་པར་ན་སྟེ། དེའི་ཚེ་སྲོག་གི་གནས་ཡོད་པ་ཀུན་ཀྱང་འཆད་པ་ཙམ་དུ་ན། རྔུལ་འབྱུང་། བརྒྱལ། ཁོང་ལྕོག །ལྒང་པ་ཚ། གཅིན་འགག །མིག་ཧར་ཧར་པོར་འོག་མིག་ཏུ་
[108a.3]ཐུར་དུ་ལྟ་ལ་མིག་ཡ་གཅིག་དམར་པོར་གྱུར། ཡང་དང་ཡང་མི་དྲན་ཏེ་མོང་མོང་བོར་གྱུར། ཁ་སྐམ། སྨྲ་བའི་ཤུགས་ཉམས་ཏེ་གསང་དམའ། གཟི་མདངས་ཉམས་བཞིན་བླག་བླག་པོར་གྱུར། སྙིང་མི་དྲན་ཏེ་མྱོ་མྱོ་པོ་དེ་ལྟར་བྱེད་དོ། །དེ་ལ་དབུགས་མི་བདེ་བའི་ང་རོ་
[108a.4]ཆེར་འབྱུང་བའི་ནད་ཐབས་ནི་དབུགས་མི་བདེ་བའི་ང་རོ་ཉམས་པའི་སྒྲ་ཆེར་འབྱུང་ལ་རྔམ་པ་དྲག །དབུགས་མི་བདེ་བའི་ང་རོ་གཉིས་ཀྱི་སྔུར་པ་སྒྲ་བཞིན་འབྱུང་། དབུགས་མི་བདེ་བའི་དབུགས་དྲག་ཏུ་འབྱུང་བའི་ཚེ་དབྱར་གྱི་གླང་རྒྱགས་ཏེ་འགྱིང་བའི་ང་རོ་སྐད་དྲག་ཏུ་ཟེར། སྔར་
[108a.5]ལོབས་ཤིང་ཤེས་པ་རྣམས་ཀྱང་བརྗེད་དེ་མི་དྲན། མིག་གིས་མི་མཐོང་ལ་འཁྲུལ། བཞིན་འགྱུར། རོ་སྟོད་དང་དཔུང་མགོ་ཞུམ་པོར་འགྱུར། བཤད་གཅི་འགགས་ཏེ་མི་འབྱུང་། སྐད་ཀྱི་གདངས་ཉམས་ཏེ་གཅོམ་ཆུང་། གྲེ་བ་སྐམས། ཡང་དང་ཡང་སྙིང་མི་དྲན་ཏེ་
[108a.6]མྱོས། རྣ་བ་དང་མུར་འགྲམ་དང་ཀླད་པ་ཟུག་སྟེ་ནའོ། །དབུགས་གྱེན་དུ་ཕྱིར་འབྱུང་བ་ཡུན་རིང་དུ་འབྱུང་ལ་ནང་དུ་མི་རྔུབ། འདིའི་ནད་ཐབས་ནི་མགུལ་པ་དང་སྦུ་གུ་དང་རྩ་སྒོ་རྣམས་བད་ཀན་གྱིས་ཆོད་དེ་འགགས་པ་དེ་ལྟར་ནང་དུ་རྔུབ་མི་ནུས་ཏེ་དབུགས་བདེ་ལ་དབུགས་མནམ་པོར་
[108a.7]འབྱུང་། མིག་གྱེན་དུ་བལྟ་ལ་མིག་འཁྲུལ་ཅིང་ཕྱོགས་ཀུན་དུ་ཡང་བལྟ། གནད་དང་སྲོག་ཆད་ལ་ཐུག་པ་ཙམ་དུ་ཉམ་ཐག་ནས་སྨྲེ་སྔགས་འདོན་ཅིང་ཚིག་མི་འབྱིན། ནད་ཐབས་འདི་ལྟ་བུར་གྱུར་པ་སྣ་གྲངས་ཚང་ན་ནི་གསོར་ཡང་མི་རུང་ངོ་། །སྣ་གྲངས་འདི་ལྟར་མ་ཚང་ན་ནི་གསོར་
[108b]
[108b.1]རུང་ངོ་། །དབུགས་མི་བདེ་བའི་ནད་ཐབས་ལྔ་ནི་དེ་ལྟ་བུ་ཡིན་ནོ། །དེ་ལ་སྐྱིགས་བུས་བཏབ་པའི་ནད་ཀྱང་སྤྱི་ནི་དབུགས་མི་བདེ་བའི་ནད་ཀྱི་གཞི་དང་ནད་ཀྱི་ཐབས་ཀྱི་ཚུལ་དང་ཡང་འདྲ། ནད་ཀྱི་མིང་གི་རྣམ་གྲངས་ཀྱང་མཉམ། རང་བཞིན་ཡང་འདྲ། སྐྱིགས་བུ་དང་དབུགས་མི་
[108b.2]བདེ་བའི་ནད་ཀྱང་འདྲའོ། །ལྔ་གང་ཞེ་ན། ཁ་ཟས་ལ་སྐྱིགས་བུ་ཐ་མལ་པ་དང་། དྲག་ཤུལ་ལས་གྱུར་པའི་སྐྱིགས་བུ་ཕྲ་མོ་དང་། སྐྱིགས་བུ་ཟུང་དུ་འབྱུང་བ་དང་། སྐྱིགས་བུ་ཆེར་འབྱུང་བ་དང་། ཁོང་པའི་གཏིང་གི་ཟབས་ནས་སྐྱིགས་བུ་འབྱུང་བ་དང་ལྔའོ། །དེ་ལ་ཁ་ཟས་ལས་གྱུར་
[108b.3]པའི་སྐྱིགས་བུ་ནི་ཁ་ཟས་རིངས་ཐབས་སུ་ཟོས་པ་དང་། ཟས་རྩུབ་པའམ། ཁ་ཟས་ཚན་མོའམ། ཁ་ཟས་སྲ་བའམ། ཟས་སྐོམ་སྔ་ན་མ་གོམས་པ་དེ་ལྟ་བུ་དྲག་ཏུ་ཟོས་པས་བཙིར་བར་གྱུར་པའི་རླུང་གིས་ཕུལ་བ་ལས་སྐྱིགས་བུས་བཏབ་སྟེ་ན་བ་མ་ཡིན་པ་སྒྲ་མི་གྲག་པར་འབྱུང་
[108b.4]སྦྲིད་པས་འདེབས་སོ། །དེ་ལྟ་བུ་ལ་སྔན་ཆད་གོམས་པའི་ཟས་སྐོམ་ཐ་མལ་པ་ཟོས་པས་ཞི་བར་འགྱུར་རོ། །དེ་ལྟ་བུ་ནི་ཟས་ལས་གྱུར་པ་ཞེས་བྱའོ། །དེ་ལ་དྲག་ཤུལ་ལས་གྱུར་པའི་སྐྱིགས་བུ་ཕྲན་ཚེགས་གང་ཞེ་ན། དེ་ནི་དྲག་ཤུལ་ལས་སྟོབས་རྩལ་གྱི་བག་བྱས་པས་རླུང་
[108b.5]བསྐྱོད་དེ་དེས་སྐྱིགས་བུ་མི་དྲག་པ་མགུལ་བའི་ནང་ནས་བྱུང་སྟེ། ན་བའི་ཤུགས་ཀྱང་མི་དྲག་སྟེ་འཇམ་མོ། །དེ་ཡང་དག་ཤུལ་གྱི་བག་བྱས་ན་ནི་སྐྱིགས་བུའི་ནད་ལའོ། །ཁ་ཟས་ཟོས་པ་རྣམས་ཀྱིས་འཇམ་པར་འགྱུར་རོ། །དེ་ལ་སྐྱིགས་བུ་ཟུང་དུ་འབྱུང་བའི་ནད་ཐབས་ནི་
[108b.6]བསྟུད་མར་ལན་གཉིས་ཙམ་འབྱུང་ལ། དེའི་འོག་ཏུ་ཁ་ལངས་ཙམ་ལས་མི་འབྱུང་ཞིང་དེ་ནས་ཡང་བསྟུད་མར་འབྱུང་བ་དེ་ལྟ་བུ་ཡིན་ནོ། །དེ་ནི་ཁ་ཟས་སྐྱིགས་བུས་འདེབས་པར་འགྱུར་ཏེ། དེ་ཡང་ཁ་ཟས་འཇུར་ཉེ་བའི་ཚེ་ན་སྐྱིགས་བུས་དྲག་ཏུ་འདེབས། ཁ་ཟས་ཞུ་ཕན་
[108b.7]ཆད་ནི་རང་འབྱུང་ངོ་། །སྐྱིགས་བུས་བསྟུད་མར་འདེབས་པའི་ཚེ་ན་ལུས་འདར། ཀླད་པ་དང་མགུལ་པ་ན། ཁོང་ལྕོག །སྐོམ་དད་ཆེ། ཚིག་སྨྲ་བ་མང་། སློན་ཚད་པས་འདེབས། མིག་ཧར་བག་ཏུ་ལྟ། གླལ་འབྱུང་ངོ་། །སྐྱིགས་བུ་ཟུང་དུ་འབྱུང་བ་ནི་འདི་ནད་
[109a]
[109a.1]ཐབས་ཀྱང་དྲག་ལ་ཁ་ཟས་ཞུ་བའི་ཚེ་སྐྱིགས་བུའི་ནད་ཀྱང་ལྡང་ཞིང་མི་བདེ་བར་བྱེད་པ་ཡིན་ནོ། །དེ་ལ་སྐྱིགས་བུ་ཆེར་འབྱུང་བའི་ནད་ཐབས་ནི་སྨིན་མ་དང་མུར་འགྲམ་གཉིས་མཉམ། མིག་ནས་མཆི་མའང་། མིག་ཧར་བག་ཏུ་ལྟ། ལུས་རེངས་
[109a.2]བག་ཏུ་བྱེད། ཚིག་འཁྲུལ། དྲན་པ་དང་ཤེས་པ་འཁྲུལ་བག་ཏུ་བྱེད། མིད་པའི་སྦུ་གུ་འགགས། སྲོག་གི་གནད་གསིག་ཅིང་སྐྱོད་པར་བྱེད། རྒྱབ་ཏུ་རྒྱུ། ལུས་ཀྱི་ཁོག་སྐམ་བག་ཏུ་འགྱུར་བའི་སྐྱིགས་བུ་དྲག་ཏུ་འབྱུང་སྟེ། སྐྱིགས་བུ་དེ་ཁོང་པའི་ནང་དམའ་བ་ནས་འབྱུང་།
[109a.3]སྒྲ་ཆེར་འབྱུང་། སྐྱིགས་བུ་འབྱུང་བའི་ཚེ་ན་བའི་ཚབས་ཆེ་སྟེ་སྐྱིགས་བུའི་སྟོབས་ཀྱི་ཤུགས་དྲག་པར་འབྱུང་བ་ཡིན་ནོ། །དེ་ལ་ཁོང་པའི་གཏིང་གི་ཟབས་ནས་སྐྱིགས་བུ་འབྱུང་བའི་ནད་ཐབས་ནི་ཁ་ཟས་ཞུ་བའི་གནས་ལོང་ཀའམ། ལྟེ་བའི་ཐད་ཀ་ཙམ་ནས་སྐྱིགས་བུ་གོང་མ་དང་འདྲ་བར་
[109a.4]འབྱུང་སྟེ་ནད་ཐབས་ཀྱང་གོང་མ་དང་འདྲ་བར་བསྟུད་མ་ཡང་དང་ཡང་འབྱུང་ཞིང་ཁ་གླལ། རྐང་ལག་བྱ་རྨྱང་བྱེད། སྐྱིགས་བུ་འབྱུང་བའི་སྒྲ་བྲག་ཅ་ཅན་ཟབ་མོར་འོང་བ་ནི་ནད་ཐབས་དེ་ལྟ་བུ་ཡིན་ནོ། །དེ་ལ་སྐྱིགས་བུ་ཐོག་མར་རྣམ་པ་གཉིས་པོ་ནི་གསོ་སླའོ། །ཐ་མའི་སྐྱིགས་བུའི་ནད་ཐབས་སུ་གྱུར་པ་ནི་གསོར་
[109a.5]མི་རུང་ངོ་། །སྐྱིགས་བུའི་ནད་ཐམས་ཅད་ཀྱི་སྣ་གྲངས་ཀྱང་ཚང་ལ་ནད་ཚབས་ཀྱང་ཆེ། ནད་གཞན་ཀུན་ཀྱང་ཚོགས་ལ་ཕོ་བ་གྲང་སྟེ་ཟས་ཀྱང་མ་ཞུ། མི་ན་རྒས་སམ། བུད་མེད་ལ་དྲགས་པར་གྱུར་པ་ལྟ་བུ་ཞིག་གམ། ནད་ཀྱིས་ལུས་ཟད་དེ་གོང་མ་དང་ཁ་ཟས་བཅད་དམ་
[109a.6]མ་ཆུད་དམ། གློ་འགྲམས་ཏེ་རྡོལ་ཏམ། སྨན་ཚབས་ཆེན་པོར་གྱུར་པ་འདི་རྣམས་གང་ཡང་རུང་བ་ལ་སྐྱིགས་བུ་ཡོང་བ་དེ་ལྟ་བུས་བཏབ་ན་གསོར་མི་རུང་ངོ་། །ཡང་ན་ནད་དོ་ཅོག་གིས་ཀྱང་མ་རུངས་པར་ནི་བྱེད་མོད་ཀྱི། སྐྱིགས་བུ་ལྟར་མྱུར་དུ་མ་རུངས་པར་བྱེད་པ་ཉིད་མ་ཡིན་
[109a.7]ནོ། །སྐྱིགས་བུ་དང་དབུགས་མི་བདེ་བའི་ནད་གཉིས་ནི་ནམ་འཆིར་ཉེ་བའི་ཚེ་ན་འོང་བར་འགྱུར་རོ། །དབུགས་མི་བདེ་བའི་ནད་ཐབས་དང་། སྐྱིགས་བུའི་ནད་ཐབས་བཤད་པ་སྟེ་ལེའུ་བཞི་པ་རྫོགས་སོ།། །།གློ་གཅོང་ཆེན་པོ་ལུས་ཀྱི་སྲོག་ཟུངས་ཟད་པར་བྱེད་
[109b]
[109b.1]པའི་ནད་གཞིའི་ལེའུ་ལྔ་པ་བཤད་པར་བྱའོ། །ཟད་བྱེད་ཀྱི་ནད་གློ་གཅོང་ཞེས་བྱ་བ་འདི་ཕྱི་བཞིན་ནང་དུ་འོང་ཞིང་འབྲང་ངོ་། །ནད་མང་པོ་ཀུན་གྱི་ཐོག་མར་འགྲོ་བས་ན་དེའི་ཕྱིར་འདིའི་མིང་ནི་ནད་གནོད་པའི་རྒྱལ་པོ་ཞེས་ཀྱང་བྱ། ལུས་ཟད་པར་བྱེད་པ་ཞེས་ཀྱང་བྱ། ལུས་
[109b.2]སྐེམས་པར་བྱེད་པ་ཞེས་ཀྱང་བྱ། ནད་ཀྱི་རྒྱལ་པོ་ཞེས་ཀྱང་བྱ་སྟེ། ནད་འདི་གནའ་དང་པོ་ནི་རྒྱུ་སྐར་རྣམས་དང་བྲམ་ཟེ་རྣམས་ལ་གློ་གཅོང་གིས་འདེབས་པའི་རྒྱལ་པོར་གྱུར་པས་ན་དེའི་ཕྱིར་ནད་འདི་ལ་མིང་གནོད་པའི་རྒྱལ་པོ་ཞེས་ཀྱང་བྱའོ། །སྨན་ཡང་ཟད། ལུས་ཀྱང་ཟད་
[109b.3]པར་བྱེད་པས་ན་གློ་གཅོང་ཟད་བྱེད་ཅེས་ཀྱང་བྱ། མིའི་བཅུད་དང་ཤ་ཁྲག་ལ་སོགས་པ་སྐེམས་པར་བྱེད་པས་ན་གློ་གཅོང་སྐེམས་བྱེད་ཅེས་ཀྱང་བྱའོ། །ནད་དེ་དག་གི་ནང་ནས་རྒྱལ་པོ་ལྟར་གྱུར་པས་ན་རྒྱལ་པོ་ཞེས་ཀྱང་བྱའོ། །དེ་ལ་གློ་གཅོང་སྐེམས་བྱེད་ཀྱི་ནད་ཀྱང་རྣམ་པ་འདི་
[109b.4]བཞི་གང་ཡང་རུང་བ་ལས་ནད་དུ་གྱུར་ཏེ། བཞི་གང་ཞེ་ན། སྟོབས་ཀྱི་ཚན་གྱིས་མི་ནུས་བཞིན་དུ་ཉམས་མཐུ་གཏུགས་ཏེ། ཆད་ཆད་དུ་དྲག་ཤུལ་བྱས་པ་ལྟ་བུའམ་བཤང་གཅི་འོང་བར་གྱུར་ན་བརྣགས་ཏེ་བཀག་པའམ་བུད་མེད་ལ་དྲགས་ཏེ་ཁུ་བ་ཟད་པ་དང་། མདངས་ཟད་པ་
[109b.5]དང་། ཁོང་ན་སྣུམ་ཡོད་པ་ཟད་པ་དང་། སྤྱིར་ཁམས་བདུན་པོ་ཟད་པ་དང་། ཟས་སྐོམ་སྔོན་མ་ཟོས་པ་ཟ་བའི་ཆོ་ག་བཞིན་དུ་མ་ཟོས་པ་རྣམ་པ་འདི་ལྟ་བུ་གང་ཡང་རུང་བ་ལས་ནད་དུ་འགྱུར་རོ། །དེ་ལྟར་ནད་དུ་གྱུར་པའི་རྒྱུ་བཞི་ལྟ་བུའི་རླུང་ནད་དང་མཁྲིས་པའི་ནད་དང་བད་
[109b.6]ཀན་གྱི་ནད་བསླངས་ནས་ལུས་ཐམས་ཅད་དང་། རུས་པའི་ཚིགས་ཐམས་ཅད་ཀྱི་ནང་དུ་ནད་ཞུགས་ནས་དེ་ནས་རྩ་ཐམས་ཅད་དུ་གྱེས་ཏེ་འཕྲོས་ནས། རྩ་ཆེན་པོ་བཅུའི་ནང་དུ་ནད་ཞུགས་ནས་ཡང་ན་ནི་རྩ་དེ་རྣམས་ཀྱི་སྒོ་འགགས་པར་འགྱུར། ཡང་ན་ནི་རྩ་དེ་རྣམས་ཀྱི་སྒོ་
[109b.7]འབྱེ་བར་འགྱུར། དེ་བཞིན་དུ་རོ་སྟོད་དང་། རོ་སྨད་དང་རྩིབ་ལོགས་གཡས་གཡོན་དང་། ཁོང་པ་ནང་སོ་སོ་ཀུན་དུ་ནད་ཀྱིས་གང་བར་འགྱུར་རོ། །དེའི་ནད་ཐབས་ནི་ཆམ་པས་འདེབས་སྦྲིད་པ་རབ་ཏུ་དྲག་པོ་མང་དུ་འབྱུང་། ཁ་ནས་མཆིལ་མ་དང་བད་ཀན་མང་དུ་འབྱུང་
[110a]
[110a.1]ཞིང་འདོར། ཁའི་ནང་མངར། ཕོ་བའི་དྲོད་ཉམས། རྫ་མ་དང་། གཞོང་པ་དང་། སྣོད་སྤྱད་ལ་སོགས་པ་ཀུན་དང་། ཟས་སྐོམ་ལ་སོགས་པ་གཙང་བར་འདུག་ཀྱང་བཙོག་ཅིང་། ཁ་ཟས་ཀྱི་ནང་དུ་སྦྲང་བུ་དང་། རྩ་དང་སྐྲ་ལ་སོགས་པ་སོང་བར་
[110a.2]མཐོང་། སྙིང་ན། སློན་བྲོ། ཟས་ཡི་གར་མི་འོང་། ཁ་ཟས་རྟག་ཏུ་ཟོས་ཀྱང་ཉམས་འཚག་ཟད། ལག་པ་རྟག་ཏུ་ལྟ་ཞིང་ལག་ངར་གྱི་མཁྲིག་མར་སྦོམ་ཕྲ་འཇལ་འདོད། རྐང་པ་དང་གདོང་སྐྲང་། མིག་དཀར་ཁྲལ་ཁྲལ་བྱེད། ལུས་མཐོང་ན་འཇིགས་སུ་རུང་། སྙིང་ལ་
[110a.3]བུད་མེད་འདོད། ཆང་དང་ཤ་ཡི་གར་འོང་བ་སྙམ་བྱེད། ཟོས་ན་སྐྱུག་བྲོ། ཀླད་པའི་སྤྱི་བོ་རྟག་ཏུ་འགེབས་པར་བྱེད། སེན་མོ་དང་སྐྲ་རབ་ཏུ་རིང་། རྨི་ལམ་ན་ཕྱེ་མ་ལེབ་དང་། རྩངས་པ་དང་། སྡིག་སྦྲུལ་དང་། སྤྲེའུ་དང་། གཅན་གཟན་དང་། བྱ་རྣམས་ཀྱིས་བདག་
[110a.4]ལ་འཚེ་བར་མཐོང་། སྐྲ་དང་རུས་པ་དང་། ཕུབ་མ་དང་ཐལ་བའི་ཕུང་པོ་ལ་བདག་འཛེག་ཅིང་འགྲོ་བར་རྨི། གྲོང་དང་ཡུལ་སྟོང་དང་ཆུ་བོ་སྐམས་པ་མཐོང་། སྐར་མ་ལྟུང་བ་དང་། རི་བསྒྱེལ་ཞིང་ལྷུང་བར་རྨི་ལམ་དུ་མཐོང་ལ་ཤིང་སྐྱེས་པ་ཀུན་འབར་བར་མཐོང་། གལ་ཏེ་ནད་རོ་སྟོད་
[110a.5]ཡན་ཆད་དུ་རྒྱས་ན་ནི་ཆམ་པས་ཐེབས། དབུགས་མི་བདེ། ལུད་པས་བཀར། ཕྲག་པ་ན། ཀླད་པའི་སྤྱི་བོར་ན། སྐད་འགག །ཟས་ཡི་གར་མི་འོང་བ་དེ་ལྟ་བུར་འགྱུར་རོ། །གལ་ཏེ་རོ་སྨད་མན་ཆད་དུ་ནད་དཀྱེལ་ཆེ་ན་ནི་ཡང་ན་ཚད་པར་འཁྲུ། ཡང་ན་རྟུག་སྐམ་དུ་གྱུར་
[110a.6]ཏེ་འཁྲེན་པས་འདོགས་སོ། །གལ་ཏེ་ནང་གྲོལ་གྱི་ནང་དུ་ནད་དཀྱེལ་ཆེར་གྱུར་ན་ནི་སློན་པར་བྱེད་དོ། །རྩིབ་ལོགས་སུ་ནད་བབས་ན་ནི་གློ་གཡས་གཡོན་དུ་ཐད་ཀར་ཟུག་ཅིང་ནའོ། །རུས་པའི་ཚིགས་ཀྱི་ནང་དུ་ནད་བབས་ན་ནི་རིམས་ནད་དུ་འགྱུར་རོ། །དེ་ལྟར་ནད་གནོད་བྱེད་ཀྱི་གློ་
[110a.7]གཅོང་གི་ནད་ཐབས་རྣམ་པ་བཅུ་གཅིག་ཡོད་པ་དེ་ནི་དེ་ལྟ་བུ་ཡིན་ནོ། །གློ་གཅོང་གི་ནད་ཐབས་འདི་ལྟ་བུས་བཏབ་པ་ལ་ནད་བླ་བརྣན་གཞན་གྱིས་བཏབ་པ་ནི་སྐད་འཇེར་ཏེ་འགག །གྲེ་བ་སུབས། བྲང་གི་ནུ་འཇིང་གཡས་གཡོན་དུ་ཟུག་ཅིང་ན། ཁ་གླལ། ལུས་དང་རོ་སྟོད་
[110b]
[110b.1]བརྡུང་བ་སྙམ་བྱེད་དེ་ན། ཁ་ནས་མཆིལ་མ་དང་། བད་ཀན་གྱི་བག་འདོར་བ་མང་། ཕོ་བའི་དྲོད་ཉམས། ཁ་ནས་རྣག་མནམ་པ་དེ་ལྟ་བུའི་ནད་དུ་འགྱུར་བ་འདི་ནི་བླ་བརྣན་གྱི་ནད་ཐབས་ཡིན་ནོ། །དེ་ལ་གློ་གཅོང་ཟད་བྱེད་ཀྱི་ནད་ཅི་ལས་གྱུར་པའི་བྱེ་བྲག་སོ་སོའི་དམིགས་ཀྱང་
[110b.2]བཤད་པར་བྱ་སྟེ། ནད་དེ་ལྟ་བུ་ལ་རླུང་ལས་གྱུར་པའི་ཤས་ཆེན་གླད་པ་ན། རྩིབ་ལོགས་སུ་ཟུག་ཅིང་ན། མགུལ་པ་སུབས་ཤིང་སྐད་འགགས་པ་དེ་ལྟ་བུར་འགྱུར་རོ། །དེ་ལ་མཁྲིས་པ་རྒྱས་ཏེ་ཚ་བའི་ནད་ཀྱི་ཤས་ཆེ་ན་ནི་ལག་མཐིལ་དང་རྐང་མཐིལ་ཚ། ཚད་པས་རབ་
[110b.3]ཏུ་འཁྲུ། ཁྲག་ཏུ་སློན། ཁ་མནམ། རིམས་ཀྱིས་འདེབས་སོ། །ནད་དེ་ལ་བད་ཀན་གྱི་ཤས་ཆེ་ན་ནི་ཟས་ཡི་གར་མི་འོང་། སློན། ལུད་པས་བཀར། མགོ་དང་ལུས་དང་རྐང་ལག་ལྕི། མཆིལ་མ་དང་བད་ཀན་མང་དུ་འོང་། ཆམ་པས་འདེབས། དབུགས་
[110b.4]མི་བདེ། སྐད་འགག །ཕོ་བའི་དྲོད་ཉམས་པ་དེ་ལྟ་བུའི་ནད་དུ་འགྱུར་རོ། །ནད་དེ་ལྟ་བུས་བཏབ་སྟེ། གསོ་དཀའ་བ་དང་། སླ་བའི་བྱེ་བྲག་ཏུ་ལྟ་བ་ནི་རླུང་དང་མཁྲིས་པ་དང་བད་ཀན་གྱི་ནད་ཀུན་རྒྱས་ལ་ཕོ་བའི་དྲོད་ནི་ཉམས་ཏེ་ཆུང་། བད་ཀན་ཆེར་སྐྱེས་པས་ཕོ་བའི་ནད་
[110b.5]འགགས་ཤིང་ཆོད་དེ་རྩ་ཐམས་ཅད་ཀྱི་སྒོ་ཡང་འགགས་ནས་ལུས་ཀྱི་སྲོག་ཟུངས་བདུན་དང་། བཤང་གཅི་དང་རྔུལ་དང་རླུང་དང་མཁྲིས་པ་དང་། བད་ཀན་ཡན་ཆད་ལུས་ལ་ཡོད་པ་རྣམ་པ་བཅུ་གསུམ་གྱིས་དྲོད་ཆུང་ངུར་འགྱུར་རོ། །ཕོ་བའི་མེ་དྲོད་དེས་ལོག་པར་ཚ་ཞིང་འཚིག་པར་
[110b.6]བྱེད་པས་ཁ་ཟས་ཟོས་པའི་བཅུད་དེ་ཞུ་བར་མ་བྱས་པས་ཁྲག་དང་ཤ་ལ་སོགས་པར་མི་འགྱུར་ལ། ཁ་ཟས་ཟོས་པའི་བཅུད་དེ་བད་ཀན་དུ་གྱུར་ནས་སླར་ཁར་འབྱུང་བར་བྱེད། ཁ་ཟས་ལྟོ་ན་ཡོད་པ་ཡང་ཞུ་ཞིང་བཅུད་དུ་འགྱུར་བ་ནི་མི་བྱེད་ཀྱི་དྲི་མ་བཤང་གཅི་ཐུར་དུ་འགྲོ་སྟེ། དེ་ལྟ་
[110b.7]བས་ཁྲག་དང་ཤ་ལ་སོགས་པ་ལུས་ཀྱི་སྲོག་ཟུངས་ཉམས་འཚག་ཏུ་བརྟ་བར་མི་འགྱུར་བས། ཁ་ཟས་མ་ཞུ་བ་བཅུད་དུ་མི་འགྱུར། བཅུད་དུ་མ་གྱུར་ན་ཁྲག་ཏུ་མི་འགྱུར། ཤ་ལ་སོགས་པའི་སྲོག་ཟུངས་སུ་ག་ལ་འགྱུར་ཏེ། ལྟོ་བའི་ནང་ན་བཤང་གཅི་འབའ་ཞིག་གི་ཚོགས་
[111a]
[111a.1]ཀྱིས་ལུས་རྒྱས་ཏེ། དེའི་ཕྱིར་ལུས་ཤ་ཀུན་ནི་མེད་པར་གྱུར་པས་ན་ཟད་བྱེད་ཀྱི་ནད་གློ་གཅོང་ཞེས་བྱ་སྟེ། ནད་ཐབས་འདི་ལྟར་སྣ་མ་ཚང་སྟེ། དཀྱེལ་ཆུང་ཡང་ནད་པའི་ཉམས་འཚག་ཆུང་སྟེ། སྨན་བཏང་མི་བཟོད་པ་དང་ན་ནས་ཡུན་རིང་བ་དེ་ལྟ་བུ་ནི་སྨན་
[111a.2]བཏང་མི་བཟོད་དེ་གསོར་མི་རུང་ངོ་། །ནད་ཐབས་འདི་ལྟར་ན་ནས་རིང་པོ་མ་ལོན་པ་ཉམས་འཚག་གིས་ཐུབ་སྟེ། སྨན་བཏང་བཟོད་ན་གསོར་རུང་ངོ་། །སྐད་སུབས་ཤིང་འགགས་པའི་ནད་ཐབས་སྣ་དྲུག་བཤད་པ་སྐད་སུབས་ཤིང་འགགས་པ་ཡང་། རླུང་ནད་དམ་མཁྲིས་པའམ།
[111a.3]བད་ཀན་གྱི་ནད་སྣ་ཐ་དད་པ་ལས་ཀྱང་གྱུར། ནད་འདི་གསུམ་ཅར་འདུས་པ་ལས་ཀྱང་སྐད་འགགས་པར་གྱུར། ཡང་ལ་ལས་ནི་ཟད་བྱེད་ཀྱི་ནད་གློ་གཅོང་ལས་ཀྱང་སྐད་འགག །ཚིལ་ལས་གྱུར་པའི་ནད་ཀྱིས་ཀྱང་སྐད་འགགས་ཏེ་དེ་ལྟར་སྐད་འགགས་པ་ནི་དེ་རྣམས་ལས་འབྱུང་
[111a.4]ངོ་། །དེ་ལ་རླུང་ནད་ལས་གྱུར་པའི་སྐད་འགགས་པའི་ནད་ཐབས་ནི། སྐད་ཀྱི་གསང་དམའ་ཞིང་སུབས་བག་ཏུ་ཟེར། ལུས་རྨྱ་ལ་ཁོང་རྩུབ། སྐད་འགྱུར། གྲེ་བའི་ནང་གྲ་མས་གང་བ་ཙམ་དུ་རྩུབ་སྟེ། མགུལ་པའི་ནང་བད་ཀན་གྱིས་ཀྱང་ནུལ་དུ་འབྱུང་བ་སྙམ་བྱེད་ན་
[111a.5]གྲེ་བའི་ནང་ངར་ངར་ཟེར་ཏེ་སྐད་མི་ཕྱིན་ཅིང་འགག་གོ། །རླུང་ནད་དང་མཁྲིས་པ་དང་བད་ཀན་གྱི་ནད་འདི་གསུམ་ཆར་ལས་གྱུར་ཏེ། སྐད་འགགས་ན་ནི་ནད་ཐབས་གོང་མ་དང་སྣ་གསུམ་ཆར་ཚང་བར་ན་ལ་སྐད་སུབས་སོ། །ཟད་བྱེད་ཀྱི་ནད་གློ་གཅོང་ལས་གྱུར་ཏེ། སྐད་
[111a.6]འགགས་ན་ནི་གྲེ་བའི་ནང་ན་རྩུབ་པོས་དྲུད་པ་སྙམ་བྱེད་ལ། གྲེ་བ་ནས་ཤེ་རུལ་ལམ། བད་ཀན་དུད་ཁ་ལྟ་བུར་འབྱུང་ཞིང་རབ་ཏུ་ནའོ། །ཚིལ་ནད་ལས་གྱུར་པའི་སྐད་འགགས་པའི་ནད་ཐབས་ནི་བད་ཀན་ལས་གྱུར་པའི་ནད་ཐབས་དང་འདྲའོ། །དེ་ལ་སྐད་འགགས་པའི་
[111a.7]ནད་འདི་རྣམས་ཀྱི་ནང་ན་གོང་མའི་ནད་ལྔ་པོ་གང་ཡང་རུང་སྟེ། ཚིག་གསལ་བར་མི་ཕྱིན་ལ་ལེགས་པར་གསོར་མི་རུང་ཞིང་། སྐད་ཆེར་སུབས་པ་དེ་དག་གསོ་དཀའོ། །ཐ་མའི་ཚིལ་ནད་ལས་གྱུར་ཏེ་སྐད་སུབས་པ་འདི་ཡང་གསོ་དཀའ་སྟེ་ཐོང་ཤིག །ཡི་ག་འཆུས་པའི་ནད་
[111b]
[111b.1]ཐབས་སྣ་ལྔ་བཤད་པ། རླུང་ནད་དམ་མཁྲིས་པའི་ནད་དམ། བད་ཀན་གྱི་ནད། ནད་དམིགས་ཐ་དད་པ་གང་ཡང་རུང་སྟེ། ལྕེའམ་ཕོ་བ་ལ་གནས་ན་ཡི་ག་འཆུས་པར་འགྱུར་རོ། །དེ་ཡང་ཇི་ལྟ་ཞེ་ན། རླུང་ལས་གྱུར་ན་ཁའི་ནང་རོ་ཁའོ། །བད་ཀན་ལས་གྱུར་ན་ཁའི་ནང་རོ་
[111b.2]མངར་བར་བྲོ་སྟེ་ཡི་ག་འཆུའོ། །རླུང་དང་མཁྲིས་པ་དང་བད་ཀན་གསུམ་ཆར་ལས་གྱུར་ན་ཁའི་ནང་རོ་བྲོ་བ་མེད་དོ། །མྱ་ངན་གྱིས་བཏབ་སྟེ། སྙིང་མི་དགའ་ཞིང་ཡི་ག་འཆུས་ན་རླུང་ནད་ལས་གྱུར་པ་ཡིན་ནོ། །ཁྲོ་སྟེ་རྔམ་པ་ལས་ཡི་ག་འཆུས་ན། མཁྲིས་པའི་ནད་དུ་གྱུར་
[111b.3]པ་ཡིན་ནོ། །དེ་ལྟ་བས་ན་ཡི་ག་འཆུས་པའི་ནད་དམིགས་རྣམ་པ་ལྔ་ནི་དེ་ལྟ་བུ་ཡིན་ནོ། །སློན་པའི་ནད་ཐབས་སྣ་ལྔ་བཤད་པ། སྐྱུག་བྲོ་ཞིང་སློན་པར་གྱུར་པའི་ནད་ཐབས་ནི་རླུང་ངམ་མཁྲིས་པའམ་བད་ཀན་གྱི་ནད་ཐ་དད་པ་ལས་སློན་པར་འགྱུར་བ་དང་། རླུང་དང་བད་ཀན་མཁྲིས་
[111b.4]པའི་ནད་གསུམ་ཆར་འདུས་པ་ལས་སློན་པར་འགྱུར་བ་དང་། ཡིད་དུ་མི་འོང་ཞིང་སྐྱུག་བྲོ་བར་གྱུར་པའི་དངོས་པོ་མཐོང་བ་ལས་སློན་པར་འགྱུར་བ་དང་དེ་ལྔའོ། །ནད་ཐབས་འདི་ལྟ་བུ་གང་ཡང་རུང་བས་བཏབ་པ་དང་། སྟོད་དུ་རྒྱུ་བའི་རླུང་བྲང་དང་། ནམ་ཚོང་ན་འདུག་པ་དེས་གྱེན་དུ་
[111b.5]སློང་ཞིང་ཕུལ་ཏེ་ཐམས་ཅད་སློན་པར་བྱེད་དོ། །སློན་པའི་ཐབས་ནི་ཁར་མཆིལ་མ་བསྟུད་པ་འབྱུང་ལ། དང་ག་མཆུ་ཁའི་ནང་ལན་ཚྭའི་རོ་བྲོ་ལ་ཡི་ག་རབ་ཏུ་འཆུ་ཞིང་སློན་པར་བྱེད་དེ། འདི་ནི་སློན་ཏོ་ཅོག་སྤྱིའི་ནད་ཐབས་ཡིན་ནོ། །དེ་ལ་རླུང་ནད་ལས་གྱུར་པའི་སློན་པའི་ནད་ཐབས་ནི་ལྟེ་བ་དང་
[111b.6]རྒྱབ་ཏུ་ཟུག་སྟེ་ན། རྩིབ་ལོགས་སུ་འང་ཟུག་སྟེ། ཆུང་ཟད་སྐྱུག་ཅིང་བར་ཆད་ལ། སྐྱུགས་པའི་རོ་བསྐ་ཞིང་དབུ་བ་ཅན་དུ་འབྱུང་སྟེ། སྒྲེགས་པ་དང་བཅས་པར་འོང་། སྐྱུགས་པ་མདོག་གནག་པ་དང་། ཁོང་ནས་སློན་པའི་ཚེ་ཁོང་ནས་སློང་ཞིང་། ཕུལ་བའི་ཤུགས་དྲག་ལ།
[111b.7]སྐྱུགས་པ་མང་པོ་མི་འབྱུང་བ་ནི་ལུད་པ་ལུ། ཁ་སྐམ། སྙིང་དང་གླད་པ་ན། སྐད་ལ་གནོད་དེ་འགག །ཁོང་སྙོམ་པ་དེ་ལྟ་བུར་གྱུར་ན་རླུང་ནད་ཀྱིས་སློན་པའི་ཐབས་ཡིན་ནོ། །དེ་ལ་མཁྲིས་པ་ལས་གྱུར་པའི་སློན་པའི་ནད་ཐབས་ནི་སྐྱུགས་པ་ཐལ་ཁུ་བཞིན་རྩ་དམར་ལ་དུད་པ་ལྟ་
[112a]
[112a.1]བུ་ལྗང་གུ་སྔོ་རྩེ་སེར། སྐྱུགས་པའི་ནང་ན་ཁྲག་ཀྱང་ཡོད་ལ། རོ་སྐྱུར་ལ་སྐྱུགས་པ་ཚ་སྟེ། དྲོད་ཆེ། སྐོམ་དད་ཆེ། བརྒྱལ། ལུས་ཕྱི་ནང་དུ་ཚ་བའི་ནད་ཐབས་དེ་ལྟ་བུར་སློན་ཏོ། །དེ་ལ་བད་ཀན་ལས་གྱུར་པའི་སློན་པའི་ནད་ཐབས་ནི་སློན་པའི་སྐྱུགས་པའི་མདོག་
[112a.2]སྣུམ་ཞིང་ཁར་བསིལ། བད་ཀན་དུ་སློན་པ་དེ་ནལ་ནལ་བྱེད་དེ་རིང་དུ་དྲང་དུ་རུང་ལ། སྐྱུགས་པའི་ནང་ན་ཆུ་བུར་ལྟ་བུའི་རིལ་རིལ་པོ་ཡོད། སློན་པའི་རོ་མངར་བ་ལན་ཚྭ་བྲོ། སློན་པའི་ཐབས་ཆེས་ཏེ་བ་སྤུ་ལངས་ཏེ། ཤ་དང་སྤུ་བརྩེ་སྟེ་རེག་མི་བཟོད། ཁ་གདོང་སྐྲང་།
[112a.3]ཁའི་ནང་རོ་མངར་བར་བྲོ། བློང་བློང་པོར་འདུག །སྙིང་ག་ནས་མཆིལ་མ་མང་དུ་འོང་བའི་ནད་ཐབས་འདི་ལྟ་བུ་ཡིན་ནོ། །རླུང་དང་མཁྲིས་པ་བད་ཀན་གསུམ་ཆར་ལས་གྱུར་པའི་ནད་ཐབས་ནི་ནད་སྣ་གསུམ་གྱི་ནད་ཐབས་ཐམས་ཅད་ཚང་བར་ན་ཞིང་སློན་ཏོ། །དེ་ལ་ཡིད་དུ་མི་
[112a.4]འོང་ཞིང་སྐྱུག་བྲོ་བའི་དངོས་པོ་མཐོང་ན་སློན་པ་ནི་རུལ་བ་དང་མི་གཙང་བ་དང་། བཙོག་པ་དང་། སྐྱུག་བྲོ་བར་འགྱུར་བ་དེ་ལྟ་བུ་མཐོང་ངམ་ཐོས་པས་སྐྱུག་བྲོ་སྟེ་སློན་པར་བྱེད་དོ། །སློན་པ་འདི་ལྟ་བུའི་ནད་ཐབས་གང་ཡང་རུང་སྟེ། འཆི་བར་འགྱུར་བའི་ལྟས་སམ། མཚན་མ་
[112a.5]ངན་པ་བྱུང་ན་གསོར་མི་རུང་སྟེ། དཔྱད་མ་བྱེད་ཅིག །སྙིང་ན་བ་དང་། ལྟོ་ན་སྲིན་བུ་ཡོད་པའི་ནད་ཐབས་དང་། སྐོམ་དད་ཆེ་བའི་ནད་ཐབས་དང་། ཕོ་བ་ན་བེའུ་སྣབས་ཡོད་པས་མཆིན་པ་ན་བ་ལ་སོགས་པའི་ནད་ཐབས་བཤད་པའོ། །སྙིང་ན་བའི་ནད་ཐབས་ནི་སྙིང་ན་བ་ཡིན་
[112a.6]ནོ། །ཁོང་ན་སྲིན་བུ་ཡོད་ན་ལྷག་པར་ན་སྟེ། སྙིང་ན་བ་དང་། སྲིན་བུའི་ཐབས་ཀྱི་ཚུལ་ནད་ཐབས་རྣམ་པ་ལྔ་ཡོད་དོ། །དེ་ལ་རླུང་ནད་ལས་གྱུར་པའི་སྙིང་ན་བའི་ནད་ཐབས་ནི་རབ་ཏུ་ན་ལ་ཟུག་ཅིང་ན་བ་དེ་ཡང་སོ་སོར་འཕྲོ་བར་བྱེད། བརྡུངས་སམ་བཅོམ་པ་སྙམ་བྱེད།
[112a.7]སྙིང་རེངས་པ་སྙམ་བྱེད། གཤེར་བག་མེད་སྟོང་པར་གྱུར་པ་སྙམ་བྱེད། གློ་བུར་དུ་སེམས་ཞུམ་པར་བྱེད། སྙིང་མི་དགའ། འཇིགས། སྒྲ་གྲག་ན་མི་བཟོད། འཕར་ཞིང་འདར། གཟུས་པ་སྙམ་བྱེད། རྨོངས་བག་ཏུ་གྱུར་ཏེ་དབུགས་འཆད། གཉིད་ཆུང་། ནད་
[112b]
[112b.1]ཐབས་འདི་ལྟ་བུར་གྱུར་ན་རླུང་ནད་ལས་གྱུར་པའི་སྙིང་ན་བ་ཡིན་ནོ། །མཁྲིས་པའི་ནད་ལས་གྱུར་ཏེ་སྙིང་ན་བའི་ནད་ཐབས་ནི་སྐོམ་དད་ཆེ། མགོ་འཁོར། བརྒྱལ། ཁོང་ཚ། ལུས་རྔུལ། ཐང་ག་དང་གྲེ་བ་ནས་ཡར་སྐྱུག །ལུས་སྙོམ་ཞིང་སྒྱིད་སྐྱུར། སྐྱུགས་པ་མཁྲིས་པ་དང་
[112b.2]རོ་སྐྱུར་བར་བྲོ་ལ་དུད་ཁར་འོང་། ཤ་མདོག་སེར། རིམས་ཀྱིས་ཀྱང་འདེབས་སོ། །བད་ཀན་ལས་གྱུར་པའི་སྙིང་ན་བའི་ནད་ཐབས་ནི་སྙིང་རེངས་པ་སྙམ་བྱེད། སྙིང་ན་རྡོ་བ་ཡོད་པ་སྙམ་བྱེད། ཁུར་ཐང་གར་བླངས་པ་སྙམ་བྱེད་དེ། ལུད་པ་ལུ། ཕོ་བའི་དྲོད་ཉམས། ཁ་ནས་
[112b.3]བད་ཀན་དང་མཆིལ་མ་མང་དུ་འབྱུང་། གཉིད་ཆེ། ཁོང་སྙོམ། ཟས་ཡི་གར་མི་འོང་། རིམས་ཀྱིས་འདེབས་པའི་ནད་ཐབས་ནི་འདི་ལྟ་བུ་ཡིན་ནོ། །རླུང་དང་མཁྲིས་པའི་ནད་དང་བད་ཀན་གྱི་ནད་གསུམ་ཆར་འདུས་པ་ལས་སྙིང་ན་བའི་ནད་ཐབས་ནི་ནད་སྣ་གསུམ་གྱི་ནད་ཐབས་ཀུན་
[112b.4]ཚང་བར་ན་བར་འགྱུར་རོ། །སྲིན་བུ་ཡོད་པའི་ནད་ཐབས་ནི་མིག་སྤྱིར་ཅུང་ཟད་གནག །མུན་པར་ཞུགས་པ་སྙམ་དུ་མི་དྲན། སྙིང་ན། ལུས་སྐམ། ལུས་གཡའ། ཁ་ནས་ཆུ་འཛག །མཆིན་ངོགས་ཐོག་ཐག་ཏུ་སོག་ལེས་དྲུད་པ་སྙམ་དུ་ཚ་བར་བྱེད་ན་སྲིན་བུ་ཡོད་པ་ཡིན་ཏེ།
[112b.5]སྲིན་བུའི་ནད་ཐབས་དྲག་པ་འདི་ལྟ་བུ་ནི་མྱུར་དུ་གནོད་པར་འགྱུར་བ་ཡིན་ནོ། །དཔྱད་མྱུར་དུ་གྱིས་ཤིག །དེ་ལ་སྐོམ་དད་ལྷག་པར་ཆེ་བར་གྱུར་པའི་ནད་ཐབས་ནི། རླུང་དང་མཁྲིས་པ་བད་ཀན་སོ་སོ་ལ་སྐོམ་དད་ཆེ་བར་གྱུར་པ་དང་། གསུམ་འདུས་པ་ལས་གྱུར་པ་དང་། རིམས་ནད་
[112b.6]གྱིས་བཏབ་པ་ལས་སྐོམ་དད་ཆེ་བར་གྱུར་པ་དང་། ནད་ཐབས་དྲུག་ཡོད་དོ། །སྐོམ་དད་སྐྱེས་སོ་ཅོག་ནི་རླུང་དང་མཁྲིས་པ་གཉིས་རྒྱས་པའི་གཞིས་སྲོག་ཟུངས་བདུན་འཕྲོད་སྙོམས་ཤིང་འདུག་པ་ལས་དཀྲུགས་ཏེ་ནད་བསླངས་ནས། དང་པོ་བསྐམས་པར་བྱས་ནས་ལུས་ཐམས་ཅད་
[112b.7]འདར། མགོ་འཁོར། ལུས་ཚ། སྐོམ་དད་ཆེ། ཁོང་ཚ། རྨོངས་པར་བྱེད། ལྕེའི་དྲུང་དང་། མགུལ་པ་དང་། གློ་དང་། བད་ཀན་དང་སྐོམ་འཐུངས་པ་རྩར་འགྲོ་བ་རྣམས་བསྐམས་པ་འདི་ལྟ་བུའི་ནད་གཞི་ལས་སྐོམ་དད་ཆེ་བའི་ནད་དུ་འགྱུར་རོ། །དེ་ལྟར་ནད་སྣ་དྲུག་ལས་སྐོམ་
[113a]
[113a.1]དད་ཆེར་སྐྱེས་པའི་ནད་ཐབས་ཀྱི་སྤྱི་ནི། ཁ་བསྐམས་ཏེ་སྐོམ་འཐུངས་ཀྱང་མི་ངོམས་ལ་ཁ་ཟས་མཐོང་ན་ཁྲོ། སྐད་འགག །གྲེ་བ་དང་མཆུ་དང་ལྕེ་རྣམས་རྩུབ་པོར་གྱུར་ལ་ལྕེ་འབྱིན་པར་བྱེད་ཁོང་སྙོམ། ཚིག་མང་དུ་སྨྲ། སེམས་མྱོས་པ་ཡིན་ཏེ། སྐེམ་
[113a.2]གྱིས་གདུངས་པའི་ནད་དམ། སྐོམ་འགགས་པའི་ནད་དུ་གྱུར་པ་སྔར་བཤད་པའི་དམིགས་དེ་དང་འདྲ་བར་ནད་དུ་འགྱུར་རོ། །དེ་ལ་རླུང་ནད་ལས་གྱུར་པའི་སྐོམ་དད་ཆེ་བའི་ནད་ཐབས་ནི་ཁོང་རྨྱ། ཉམས་དམན། མུར་འགྲམ་དུ་ཟུག །ཀླད་པ་འཁོར། སྣས་དྲི་ཅི་བྲོ་བ་མི་ཚོར། ལྕེས་ཀྱང་རོ་ཅི་
[113a.3]བྲོ་མི་ཚོར། རྣ་བས་ཀྱང་སྒྲ་མི་ཐོས། གཉིད་མེད། ཉམས་འཚག །ཟས་ཆུ་གྲང་མོ་འཐུངས་ན་ནད་ལ་ཕན་པར་འགྱུར་རོ། །མཁྲིས་པ་ལས་སྐོམ་དད་དུ་གྱུར་ན་བརྒྱལ། ཁའི་ནང་རུལ་རོ་ཁ་བ་བྲོ། མིག་ལམ་དུ་དམར་བ་མཐོང་། རྟག་པར་ཁ་སྐམ། ཁོང་ཚ། དབུགས་མནམ་
[113a.4]མོ། །བད་ཀན་ལས་གྱུར་པའི་སྐོམ་དད་སྐྱེས་པའི་ཐབས་ནི་དང་པོ་བད་ཀན་གྱིས་ནང་དུ་འགགས་ཤིང་ཆོད་པས་རླུང་འགགས་ཏེ་འཁྲུགས་པས་སྐོམ་འཐུངས་པ་རྩར་འགྲོ་བའི་རྩ་སྒོ་དེ་རླུང་དེས་འགགས་ནས་བད་ཀན་འཇིམ་རྫབ་འདྲ་བ་དེ་ཡང་རླུང་གིས་བསྐམས་པ་དང་། མགུལ་
[113a.5]པའི་ནང་གྲ་མས་གང་བ་བཞིན་དུ་ཚ་ལ་རྩུབ། གཉིད་ཆེ། ཁའི་ནང་རོ་མངར་བ་བྲོ། ལྟོ་ལྦོ། མགོ་བོ་ཡོ་ཡོ་པོ་ལ་ཉམས་མཐོང་བག་ཏུ་འགྱུར། སློན་ཁ་ཟས་ཡི་གར་མི་འོང་། ལུས་སྙོམ། ཟས་མི་འཇུའོ། །རླུང་དང་མཁྲིས་པ་དང་བད་ཀན་གསུམ་ཀའི་ནད་ལས་
[113a.6]གྱུར་ཏེ། སྐོམ་དད་སྐྱེས་པའི་ན་བའི་ནད་ཐབས་ནི་རླུང་དང་མཁྲིས་པ་དང་བད་ཀན་གྱི་ནད་དམིགས་སོ་སོར་བཤད་པའི་ནད་ཐབས་ཐམས་ཅད་ཀུན་ཚང་བར་ན་བ་ཡིན་ནོ། །ཕོ་བ་ན་བེའུ་སྣབས་ཡོད་པ་ལས་སྐོམ་དད་སྐྱེས་པ་དང་། མགུལ་པར་ཁ་ཟས་ཐོགས་ཏེ་མིད་དུ་མི་རུང་བ་
[113a.7]ཡང་སྐོམ་པའི་ལན་ཡིན་ཏེ། འདི་ཡང་རླུང་དང་མཁྲིས་པའི་ནད་ལས་གྱུར་པ་ཡིན་ནོ། །ཕོ་བའི་མེ་དྲོད་ཧ་ཅང་ཆེ་བ་ལ། སྐོམ་ཧ་ཅང་དྲགས་སམ་མངས་ན་ཡང་སྐོམ་དད་ཀྱི་ནད་དུ་གྱུར་ཏེ། ཟས་སྣུམ་བག་ཟོས་པ་དང་། ཟས་ལྕི་བ་དང་། སྐྱུར་བག་དང་། ལན་ཚྭ་ཆེ་བ་བག་ཟོས་པ་
[113b]
[113b.1]འདི་ལྟ་བུས་ཀྱང་བད་ཀན་སྐྱེས་པའི་སྐོམ་དད་ཀྱི་ནད་དུ་འགྱུར་རོ། །བཅུད་དང་ཟས་ཟད་པ་ལས་སྐོམ་དད་དུ་གྱུར་ན་ནི་གློ་གཅོང་ཟད་བྱེད་ཀྱི་ནད་ཐབས་བཤད་པ་དང་འདྲའོ། །རིམས་ནད་ལས་སྐོམ་དད་སྐྱེས་པའི་ནད་དུ་འགྱུར་བ་ནི་ལུས་ཀྱི་ཁོང་བསྐམས་པར་གྱུར་པ་ལྟ་བུ་དང་།
[113b.2]ཟ་གུར་གྱུར་པ་ལྟ་བུ་དང་། རིམས་ལ་སོགས་པ་ནད་ཡུན་རིང་པོར་བཏབ་པའི་ནད་དེ་ལྟ་བུ་གང་ཡང་རུང་། ན་བ་ལས་སྐོམ་དད་སྐྱེས་པའི་ནད་དུ་གྱུར་པ་དེ་ནི་རིམས་ནད་ཀྱི་རང་བཞིན་གྱི་ནད་ཐབས་དང་འདྲ་བར་བཤད་དོ། །ནད་གཞི་བཤད་པའི་ལེའུ་ལྔ་པ་རྫོགས་
[113b.3]སོ།། །།ཆང་གི་ཉེས་དམིགས་དང་། ནད་ཐབས་ལ་སོགས་པ་བཤད་པའི་ལེའུ་དྲུག་པ་བསྟན་པར་བྱའོ། །ཆང་གི་རང་བཞིན་དང་རོའི་བྱེ་བྲག་ནི་སྤྱིར་རྣམ་པ་བཅུ་སྟེ་གང་ཞེ་ན། རྣ་བ་དྲོད་ཆེ་བ་རྩུབ་པ་དྲག་པ་སྐྱུར་བ་བུད་མེད་དང་ཕྲད་པར་འདོད་པ་ལུས་ལ་མྱུར་དུ་
[113b.4]ཁྱབ་པར་བྱེད། ལུས་ཡང་འབར་ཏེ་མདངས་ཅན་དུ་འགྱུར། འཕྲལ་དུ་གསལ་བར་བྱེད་དོ། །མིའི་ཁོང་ན་མདངས་ཞེས་བྱ་བ་ཡོད་པ་དེ་ནི་བྱེ་བྲག་བཅུའི་ཚུལ་དུ་གནས་ཏེ། ཆང་གི་ཚུལ་འདི་བཅུ་ལས་བཟློག་པར་བལྟའོ། །དུག་ཀྱང་རྣོ་བ་ལ་སོགས་པ་རྣམ་པ་འདི་བཅུའི་ཚུལ་དུ་
[113b.5]གནས་མོད་ཀྱི་དེ་ནི་ཧ་ཅང་དྲགས་ཆེས་པས་སེམས་མ་རུངས་པར་བྱེད། འཆི་བར་བྱེད་དོ། །ཆང་གི་མཐུའི་ཡོན་ཏན་ནི། རྣོ་བ་དང་། དྲོད་ཆེ་བ་ལ་སོགས་པ་ཡིན་ནོ། །མིའི་ཁོང་ན་མདངས་ཡོད་པའི་ཡོན་ཏན་ནི་རྔུལ་བ་ལ་སོགས་པའི་ཡོན་ཏན་རྣམ་པ་བཅུར་བལྟའོ། །
[113b.6]དེ་ལ་ཆང་གི་ཡོན་ཏན་དེའི་རྣམ་པ་བཅུས་ནི་མིའི་ཁོང་ན་མདངས་ཡོད་པའི་ཡོན་ཏན་རྣམ་པ་བཅུ་གནས་པར་བྱས་ནས་སེམས་བསྒྱུར་ཏེ། ཁྲིད་པ་དེ་ནི་ར་རོ་བ་ཞེས་བྱའོ། །དེ་ལ་དང་པོ་ཆང་འཐུངས་པས། ཐོག་མ་བཟི་བ་ནི་སྙིང་དགའ་སྟེ། གཏམ་དང་བཞད་གད་བྱེད་པར་འགྱུར་
[113b.7]བ་ཡིན་ནོ། །དེ་བས་མང་དུ་འཐུངས་ཏེ་ར་རོ་བ་ནི་རིགས་པ་དང་། མི་རིགས་པ་ཅལ་ཅོལ་འདྲེན་པར་བྱེད་པ་དང་། བག་མེད་པར་གནས་ལ་རྣམ་པར་རྟོག་པ་ངན་པས་བཅོས་ནས་སེམས་རྨོངས་པ་སྟེ། བདེ་བ་ཡིན་ནོ་སྙམ་དུ་བསམས་ནས་འཁྲུལ་བར་བྱེད་དོ། །དེ་ལྟར་ཆང་གིས་
[114a]
[114a.1]འབྲིང་ཙམ་དུ་ར་རོ་བ་དང་། གཏུ་ལུམ་ཉིད་དུ་ཁོམ་པར་མ་གྱུར་པའི་བར་གྱི་ཚེ་ནི་རྡུལ་དང་མུན་པའི་རང་བཞིན་ཞེས་བྱའོ། །དེ་ལ་རྡུལ་གྱི་རང་བཞིན་ནི་ཚིག་ཅལ་ཅོལ་མང་དུ་སྨྲ་བ་ཡིན་ནོ། །ཁྲོ། ང་རྒྱལ་ཆེ། སེར་སྣ་བྱེད་པ་དེ་ལྟ་བུར་འགྱུར་རོ། །དེ་
[114a.2]ལ་མུན་པའི་རང་བཞིན་དུ་གྱུར་པ་ཞེས་བྱ་བ་ནི་འཇིགས་པའི་སེམས་མེད། གཉིད་བྲོ། སྙོམ། སྙིང་ལ་བརྩམས་པ་མེད་པར་སེམས་པ་སྟེ། དེ་ལྟ་བུ་ནི་གླང་པོ་ཆེ་སྨྱོན་པའམ་སྦྲུལ་པོ་ཆེ་བཏགས་པ་ལས་ཤོར་བ་དང་འདྲ་སྟེ། ཅི་ལ་ཡང་མི་བྱེད་པ་ཡིན་ནོ། །དེ་ལྟ་བུའི་ཚེ་
[114a.3]ནི་ངང་ཚུལ་ངན་པའི་རང་བཞིན་ཁ་ན་མ་ཐོ་བ་རྣམས་ཀྱི་གནས་སུ་གྱུར་པས། ཆང་གཅིག་པུ་ལས་རང་འགྲོའི་ལམ་དུ་མང་པོ་སྟོན་པར་བྱེད་དོ། །གསུམ་པོའི་ཚེ་རབས་སུ་ར་རོ་བ་ནི་ཤི་བ་བཞིན་ཚོར་བ་མེད་པར་ཉལ་ཏེ་འདུག་གོ། །དེ་ནི་ཤི་བ་བས་ཀྱང་སྡིག་པའི་རང་བཞིན་དུ་
[114a.4]འགྱུར་བ་ཡིན་ཏེ། དེའི་ཚེ་ནི་རབ་ཏུ་སྡིག་པ་ལ་གནས་པ་ཞེས་བྱའོ། །དེ་བས་ན་ཆང་ལ་ཞུགས་ཤིང་མྱོས་པ་ནི་ཆོས་དང་ཆོས་མ་ཡིན་པ་དང་། བདེ་བ་དང་སྡུག་བསྔལ་བ་དང་། དོན་དང་དོན་མེད་པ་དང་། ཕན་པ་དང་གནོད་པའི་དམིགས་མི་ཤེས་པར་བྱེད་པ་ཡིན་ན་དེ་ལ་ལྟ་
[114a.5]མཛངས་པ་སུ་ཞིག་བསྟེན་པར་བྱེད། ཆང་གིས་ནི་མྱོས་པར་བྱེད། འཇིགས་པ་དང་མྱ་ངན་དུ་འགྱུར། ཁྲོས་པ་དང་སྲོག་གི་བདུད་དུ་འགྱུར་བ་དེ་ལྟ་བུ་ཡིན། སྨྱོ་བྱེད་ཀྱི་ནད་དང་། བརྗེད་བྱེད་ཀྱི་ནད་དང་། མྱོས་པ་དང་བརྒྱལ་བར་གྱུར་པ་དང་ནད་ཀྱིས་འདེབས་པར་འགྱུར་རོ། །
[114a.6]དེ་ལྟ་བས་ན་ཆང་གཅིག་པུས་དྲན་པ་ཉམས་པར་བྱས་པ་དེ་ལྟ་བུ་ལས་ཉེས་པ་ཐམས་ཅད་འོང་བར་འགྱུར་ན་ཆང་གི་ཉེས་དམིགས་རྣམ་པ་ལྔ་པོ་ལྟ་བཤད་ཀྱང་མི་དགོས་ཏེ། དེ་ལྟ་བས་ན་ཆང་ལྟ་སྨོས་ཀྱང་མི་དགོས་ཀྱི། ཁ་ཟས་མི་རིགས་པ་ཞིག་ཟོས་ན་ཡང་ནད་དུ་འགྱུར་བའམ་འཆི་བར་
[114a.7]འགྱུར་བ་ཡིན་ནོ། །ཡང་ཆང་གི་ཉེས་དམིགས་ནི་མིས་བསྒྲུབ་པའི་མདོ་ནོར་དང་། ལོངས་སྤྱོད་དང་ཐར་པའི་ལམ་དོན་དུ་གཉེར་བར་བྱ་བ་དང་། འདི་གསུམ་དང་བྲོ་དང་བསྟན་པར་བྱ་བ་དང་། ཁྲེལ་དང་ངོ་ཚ་ཤེས་པར་བྱ་བ་ལ་སོགས་པ་འདི་ལྟ་བུ་ཡང་མེད་པར་བྱེད་དོ། །དེ་ལ་ཆང་ལ་སྲ་
[114b]
[114b.1]སྟེ། ཆང་འཐུངས་ཀྱང་ཧ་ཅང་ར་རོ་བར་མི་འགྱུར་བ་ནི་ཉམས་འཚག་ཡོད་དེ་ཚོར་བ་དང་། སྔར་ཁ་ཟས་ཟོས་པ་དང་། ཁ་ཟས་ཆེར་ཟ་ཕོད་པ་དང་། རྟག་ཏུ་ཁ་ཟས་སྣུམ་བག་ཟ་བ་དང་། སྙིང་སྟོབས་ཆེ་བའི་མི་དང་། ན་ཚོད་དར་ལ་བབ་སྟེ་གཞོན་པ་དང་། རྟག་ཏུ་ཆང་མི་འཆད་
[114b.2]པར་འཐུང་བ་ལྟ་བུ་དང་། ཕ་མའི་རྒྱུད་ཀྱིས་རྟག་ཏུ་ཆང་འཐུང་འཐུང་བར་གྱུར་པ་དང་། ལུས་ཚིལ་དང་བད་ཀན་གྱི་ཤས་ཆེ་ལ། རླུང་དང་མཁྲིས་པའི་ཤས་ནི་ཆུང་། ཕོ་བའི་མེ་དྲོད་ནི་ཆེ་ཞིང་བརྟན་པར་ཡང་ཡོད་པ་དེ་ལྟ་བུ་ནི་ཆང་ལ་སྲ་སྟེ་འཐུངས་ན་ཡང་ར་རོ་བར་མི་འགྱུར་རོ། །དེ་ལ་
[114b.3]ཆང་ལ་སྙི་སྟེ་ར་རོ་ཞིང་མྱོས་པར་འགྱུར་བའི་མི་ནི་ཆང་ལ་སྲ་བའི་དམིགས་སྣ་རེ་རེ་ནས་བཤད་པ་དེ་ལས་བཟློག་ན། ཆང་ལ་སྙི་ཞིང་ར་རོ་བར་འགྱུར། ཆང་ལ་བརྐམ་ཞིང་དྲག་ཏུ་འཐུངས་པ་དང་། སྤྲོ་ཐུང་ཞིང་ཁྲོ་བ་ལྟ་བུ་ནི་ཆང་ལ་སྙི་ཞིང་མྱུར་དུ་ར་རོ་བར་འགྱུར་རོ། །དེ་ལ་ཆང་
[114b.4]གི་ནང་ན་མྱུར་དུ་ར་རོ་བར་འགྱུར་བ་ནི་ཆང་སར་པ་སྐྱུར་ཞིང་སྐྱུར་བ་ལྟ་བུ་མང་དུ་འཐུངས་ན་མྱུར་དུ་ར་རོ་བར་བྱེད། དེ་ལ་ཆང་ནད་ཀྱི་ཐབས་ཀྱང་རྣམ་པ་བཞི་སྟེ། རླུང་ནད་དང་མཁྲིས་པའི་ནད་དང་བད་ཀན་གྱི་ནད་དང་། འདུས་པའི་ནད་རྣམ་པ་བཞི་ལས་འབྱུང་ངོ་། །ཡང་ན་ཆང་ལས་
[114b.5]ནད་དུ་གྱུར་ན་ཡང་རླུང་དང་མཁྲིས་པ་དང་བད་ཀན་གྱི་ནད་ཀུན་ཚོགས་པར་འབྱུང་མོད་ཀྱི། མིང་ནི་རླུང་ནད་ལས་གྱུར་པ་ཞེ་འམ་མཁྲིས་པའི་ནད་ལས་གྱུར་པ་ཞེས་སོ་སོར་འདོགས་སོ། །དེ་ལ་ཆང་ནད་དོ་ཅོག་སྤྱིའི་ནད་ཐབས་ནི་རབ་ཏུ་རྨོངས་པར་འགྱུར། སྙིང་མི་དགའ། ཚད་
[114b.6]པས་འཁྲུ། རྟག་ཏུ་སྐོམ། གྲང་བའི་རིམས་སམ་ཚ་བའི་རིམས་ཀྱིས་འདེབས། ཀླད་པ་ན། རྩིབ་ལོགས་ཀྱི་རུས་པ་ཟུག་ཅིང་ན། ལུས་དང་རྐང་ལག་འདར། ལུས་ཀྱི་སྲོག་གི་གནད་ཀུན་བཅད་དམ་བརྡུངས་པ་སྙམ་བྱེད། རྐེད་པ་ན། བརླ་ན། མིག་རབ་རིབ་ཁྱེར།
[114b.7]ལུད་པས་བཀར། དབུགས་མི་བདེ། མཚན་མོ་གཉིད་མེད། ལུས་རྔུལ་བཤང་བ་ཐུར་དུ་འབྱུང་བ་འདྲ་བར་འོང་། ལུས་སྐྲང་། སེམས་རྨོངས་བག་ཏུ་བྱེད་དེ། འདི་མན་ཆད་ནད་དོ་ཅོག་སྤྱིའི་ནད་ཐབས་ཡིན་ནོ། །དེ་ལ་ཆང་ལས་རླུང་ནད་དུ་གྱུར་པའི་ནད་ཐབས་ནི། ནད་
[115a]
[115a.1]ཐབས་གཞན་ནི་གོང་མ་དང་འདྲ་ལ་དེ་ལས་ལྷག་པར་གཉིད་མི་འོང་ངོ་། །དབུགས་མི་བདེ། གླད་པའི་སྤྱི་བོ་ལོགས་སུ་ན། རྨི་ལམ་ན་ཕན་ཚུན་དུ་འགྲོ། གནམ་ལ་འཕུར། གཤིན་དོགས་ལྟ་བུ་དང་ལྷན་ཅིག་གཏམ་ཟེར་བ་དེ་ལྟ་བུ་ཡིན་ནོ། །
[115a.2]ཆང་ལས་མཁྲིས་པའི་ནད་དུ་གྱུར་པའི་ནད་ཐབས་ནི་ཚ་བའི་རིམས་ཀྱིས་འདེབས། ལུས་རྡུལ། རྨོངས་བག་ཏུ་འདུག །ཚད་པས་འཁྲུ། སྐོམ་དད་ཆེ། མགོ་བོ་འཁོར། མིག་རྩ་དམར་ཞིང་རྩ་སེར། མཁུར་ཚོས་དམར་པོར་འགྱུར་རོ། །ཆང་ལས་བད་ཀན་གྱི་ནད་
[115a.3]དུ་གྱུར་བའི་ནད་ཐབས་ནི་སློན། སྙིང་ན་ཞིང་མི་དགའ། གཉིད་ཆེ། ལུས་དང་རྐང་ལག་འདར། ཁོང་ལྕིའོ། །ཆང་ལས་འདུས་པའི་ནད་དུ་གྱུར་པའི་ནད་ཐབས་ནི་ནད་སྣ་གསུམ་གྱི་ནད་ཀུན་ཚོགས་པར་ན་བར་འགྱུར་རོ། །ཆང་རྟག་ཏུ་འཐུང་འཐུང་སྟེ་གོམས་པར་གྱུར་པ་ལྟ་བུ་
[115a.4]ལས་ཆང་ཅིག་ཅར་བཅད་དེ་ཕྱིན་ཆད་མི་འཐུང་བ་དེ་ཡང་ནད་རྣམ་གཉིས་སུ་འགྱུར་ཏེ། འཇོམས་བྱེད་ཅེས་བྱ་བའི་ནད་དང་། ལུས་བསྐམ་པའི་ནད་དང་རྣམ་པ་གཉིས་སུ་འགྱུར་རོ། །ཅི་སྟེ་ཞེ་ན། ཆང་བཅད་པས་རླུང་ནད་དྲག་ཏུ་གཡོ་བ་དང་ཉམས་འཚག་ལྷག་པར་དྲག་ཏུ་འབྲི་བར་
[115a.5]གྱུར་པ་ལས་མཆིལ་མ་དང་། བད་ཀན་ཕྱིར་འདོར་བས་མགུལ་སྐམ། གཉིད་རབ་ཏུ་ཆེ་སྟེ། སྒྲ་རྣམས་གྲག་པ་མི་བཟོད་པ་དང་བློང་བག་ཏུ་གྱུར་པ་དེ་ནི་འཇོམས་བྱེད་ཀྱི་ནད་ཅེས་བྱའོ། །དེ་ལ་བསྐམ་པར་འགྱུར་བའི་ནད་ཐབས་ནི་དཔུང་པ་དང་ཀླད་པ་ན། སྙིང་དང་
[115a.6]མགུལ་པ་ན། མོང་མོང་པོར་འགྱུར། ལུད་པས་བཀར། སྐོམ་དད་ཆེ། སྐྱུགས་པ་མི་འབྱུང་བཞིན་དུ་སྐམ། སྐྱིགས་བུས་ཕུལ་ཞིང་སྐྱུག །རིམས་ཀྱིས་འདེབས་པ་དེ་ལྟ་བུའི་ནད་དུ་འགྱུར་རོ། །སུ་ཡང་རུང་། བག་ཆང་བཅད་དེ་ཐུབ་པ་དེ་ནི་ཉེས་དམིགས་ཀུན་ཐུབ་
[115a.7]པའི་རང་བཞིན་ཅན་ཡིན། བློ་དང་སེམས་སྔོན་གྱི་སར་ཆུད་དེ། དྲན་ཞིང་གསལ་བ་ཡིན་ནོ། །ལུས་དང་སེམས་ཀྱི་སྤྱོད་པ་འཁྲུལ་པ་ནམ་ཡང་མི་འབྱུང་བ་ཡིན་ནོ། །ཡང་ཆང་འཐུངས་ཏེ་ར་རོ་བ་རྡུལ་གྱི་སྐྱོན་ལས་ནད་དུ་གྱུར་པ་དང་མུན་པའི་སྐྱོན་ལས་ནད་དུ་གྱུར་པ་དང་།
[115b]
[115b.1]ཁ་ཟས་མི་འཕྲོད་ཅིང་གནོད་པར་ཟོས་པས་བཅུད་དངས་མ་རྒྱུ་བའི་རྩ་དང་ཁྲག་རྒྱུ་བའི་རྩ་རྣམས་དང་། སེམས་འཇུག་པའི་རྩ་རྣམས་འགགས་པ་ལས་ནད་རྣམ་པ་གསུམ་དུ་འགྱུར་ཏེ། གང་ཞེ་ན་མྱོས་པ་དང་། བརྒྱལ་བ་དང་། ཀུན་ཏུ་སོང་བ་དང་། ནད་འདི་རྣམ་པ་གསུམ་ལྟ་བུར་གྱུར་ཏེ་ནད་དཀྱེལ་ཡང་གོ་
[115b.2]རིམས་བཞིན་ཆེའོ། །དེ་ཡང་མྱོས་པར་འགྱུར་བའི་ནད་གཞི་ནི་རླུང་དང་མཁྲིས་པ་དང་། བད་ཀན་གྱི་ནད་ལས་མྱོས་པར་འགྱུར་བ་དང་། རླུང་དང་མཁྲིས་པ་དང་བད་ཀན་གསུམ་འདུས་པས་མྱོས་པར་འགྱུར་བ་དང་། ཁྲག་ནད་ལས་མྱོས་པར་འགྱུར་བ་དང་། ཆང་ལས་མྱོས་
[115b.3]པར་འགྱུར་བ་དང་། དུག་གིས་ཀྱང་མྱོས་པར་འགྱུར་བ་དེ་ལྟ་བུའི་ནད་དུ་འགྱུར་རོ། །དེ་ལ་རླུང་ནད་ཀྱིས་མྱོས་པར་འགྱུར་བའི་ནད་ཐབས་ཀྱི་ཚུལ་ནི་མང་དུ་སྨྲ་བ་ལ་ཆགས། མང་དུ་སྨྲ། ཚིག་བརྐམ་པར་སྨྲ། ལུས་ཀྱི་བྱེད་པ་རྣམས་འཁྲུལ་ཞིང་གཡོ་བའི་བག་ཡོད། ལུས་
[115b.4]རྩུབ་ལ་མདོག་གནག །རྩ་དམར། འདི་ལྟ་བུ་ནི་རླུང་ནད་ཀྱིས་མྱོས་པ་ཞེས་བྱ་བ་ཡིན་ནོ། །དེ་ལ་མཁྲིས་པའི་ནད་ཀྱིས་མྱོས་པའི་ཐབས་ནི་ཁྲོ་བཞིན་མདོག་དམར་ལ་སེར་བར་སྣང་། ཚིག་ཅུང་ཟད་ཙམ་གྱི་ཕྱིར་ཡང་འཐབ་པར་དགའ་བ་དེ་ལྟ་བུ་ཡིན་ནོ། །བད་ཀན་གྱིས་མྱོས་པའི་
[115b.5]ནད་ཐབས་ནི་བཞིན་མདོག་རྩ་དཀར་ཅི་ཡང་མི་སྨྲ་མི་བྱེད་པར་འདུག་ཅིང་ལེ་ལོ་ཆེ་བར་གྱུར་པ་དེ་ལྟ་བུ་ཡིན་ནོ། །རླུང་དང་མཁྲིས་པ་དང་བད་ཀན་གསུམ་ཆར་འདུས་པ་ལས་མྱོས་པའི་ནད་ཀྱི་ཐབས་ནི་རླུང་ལ་སོགས་པ་རྣམ་པ་གསུམ་ཀའི་མྱོས་པ་དང་འདྲའོ། །ཁྲག་ནད་ཀྱིས་མྱོས་པའི་
[115b.6]ཐབས་ནི་ལུས་ཀྱི་ཡན་ལག་རེངས་ཏེ་བརྐྱང་བསྐུམ་མི་ནུས། མིག་ཀྱང་ཕྱེ་བཙུམས་མི་ནུས་ཏེ་ཧར་བག་ཏུ་འདུག་ལ་མཁྲིས་པའི་ནད་ཀྱིས་མྱོས་པའི་ཚུལ་དང་ཡང་འདྲ་བར་བལྟའོ། །ཆང་གིས་ར་རོ་སྟེ་མྱོས་པའི་ནད་ཐབས་ནི་སྐད་ཀྱི་གདངས་དང་། ཚིག་དང་ལུས་འགྱུར་ཚིག་གི་
[115b.7]སྨྲ་བ་དང་ལུས་ཀྱི་བྱེད་པ་རྣམས་འཁྲུལ་བར་བྱེད་དོ། །དུག་གིས་མྱོས་པའི་ནད་ཐབས་ནི་ལུས་འདར། གཉིད་རབ་ཏུ་ཆེ། གོང་མའི་ནད་ཐབས་ཀུན་ལས་ལྷག་པར་ནད་ཆེ་བ་དེ་ལྟ་བུ་ཡིན་ནོ། །དེ་ལ་རླུང་ལ་སོགས་པ་རྣམ་པ་བདུན་གྱིས་མྱོས་པའི་ནད་ཀྱིས་འདེབས་པར་ཤེས་པར་བྱའོ། །
[116a]
[116a.1]དེ་ལ་རླུང་ལ་སོགས་པ་རྣམ་པ་དེ་བདུན་གྱིས་སྙིང་སྟོར་ཟབ་བརྒྱལ་བར་འགྱུར་བའི་ནད་ཐབས་ཀྱི་དམིགས་ནི་རླུང་དང་མཁྲིས་པ་ལ་སོགས་པ་ལྟ་བུ་སོ་སོའི་ནད་ཐབས་ཀྱི་རྟགས་གང་ཆ་བ་ལས། སོ་སོའི་ནད་དམིགས་ཡིན་པར་ཤེས་པར་བྱའོ། །དེ་བཞིན་དུ་
[116a.2]ཁྲག་རྒྱས་པ་དང་། ཆང་ནད་དང་དུག་གིས་ཕོག་སྟེ་བརྒྱལ་བ་ཡང་དེ་བཞིན་ཤེས་པར་བྱའོ། །དེ་ལ་རླུང་ནད་ཀྱིས་བརྒྱལ་བར་གྱུར་པའི་ནད་ཐབས་ནི་ནམ་མཁའ་ལ་མིག་ལམ་དུ་སྔོན་དམར་རམ་ནག་པོ་མཐོང་ལ། དེ་ནས་མུན་ཐིབས་ཞེས་བྱེད་དེ་བརྒྱལ། དེ་ནས་མྱུར་དུ་སངས་པར་འགྱུར་
[116a.3]བའི་འོག་ཏུ་སྙིང་འདར། ཀླད་པ་འཁོར། ལུས་ཤ་སྐེམ། བཞིན་མདོག་གནག་ལ་རྩ་དམར་ཏེ་སྤྱིར་སྨུག་པ་འདི་ལྟ་བུར་གྱུར་ན་རླུང་གི་རང་བཞིན་ལས་གྱུར་པའི་བརྒྱལ་བའི་ནད་ཐབས་ཞེས་བྱའོ། །དེ་ལ་མཁྲིས་པའི་ནད་ལས་བརྒྱལ་བར་གྱུར་པའི་ནད་ཐབས་ནི་གྱེན་དུ་ནམ་མཁའ་
[116a.4]ལ་མིག་ལམ་དུ་དམར་པོའམ། སེར་པོར་མཐོང་ནས་མུན་ཐིབས་ཞེས་བྱེད་དེ་བརྒྱལ་ལོ། །དེ་ནས་སངས་ནས་ཀྱང་། ལུས་རྔུལ། ཁོང་ཚ། སྐམ། ཕྱི་རོལ་གྱི་ཤ་ཐང་ཚ་བས་གདུངས། ཚད་པའི་མདོག་སེར་པོའམ་སྔོན་པོར་འཁྲུ། མིག་ལམ་དུ་དམར་པོ་དང་སེར་པོ་ལོང་
[116a.5]ལོང་པོར་སྣང་བའི་ནད་ཐབས་འདི་ནི་མཁྲིས་པ་ལས་བརྒྱལ་བ་ཞེས་བྱའོ། །དེ་ལ་བད་ཀན་གྱི་ནད་ཀྱིས་བརྒྱལ་བར་འགྱུར་བའི་ནད་ཐབས་ནི། མིག་ལམ་ན་སྤྲིན་འདྲ་བར་དཀར་པོའི་བག་མཐོང་ནས། མུན་ཐིབས་ཞེས་བྱེད་དེ་བརྒྱལ་ནས་ཡུན་རིང་དུ་ལོན་པ་དང་། གདོད་སངས་
[116a.6]ཏེ་སངས་ནས་ཀྱང་། སྙིང་ན། ཁ་ནས་མཆིལ་མ་དང་། ཁ་ཆུ་མང་དུ་འབྱུང་། ཁ་མིག་ཐོམ་བག་ཏུ་འགྱུར་ལ་ལུས་དང་རྐང་ལག་པགས་རློན་གྱིས་དཀྲིས་པ་བཞིན་དུ་ལྕི་བ་ལྟ་བུ་ནི་བད་ཀན་གྱིས་བརྒྱལ་བའི་ནད་ཐབས་ཡིན་ནོ། །རླུང་དང་མཁྲིས་པ་དང་བད་ཀན་གསུམ་ཆར་
[116a.7]གྱིས་བརྒྱལ་བའི་ནད་ཐབས་ནི་བརྗེད་བྱེད་ཀྱི་གདོན་ནད་ཀྱིས་བཏབ་པའི་ནད་ཐབས་དང་འདྲ་བའི་ལུས་མྱུར་དུ་ས་ལ་འགྱེལ་ཏེ། བརྒྱལ་ཞིང་མི་དྲན་ཏེ་དེའི་ཚེ་སྔར་མི་སྡུག་ཅིང་འཇིགས་པའི་ཚུལ་དུ་བྱེད་པའམ། ངན་སྐྱུགས་ལ་སོགས་པ་འབྱུང་བ་ནི་མེད་དེ། ནད་ཐབས་གཞན་ནི་
[116b]
[116b.1]རླུང་དང་མཁྲིས་པ་དང་བད་ཀན་གསུམ་ཆར་གྱིས་བརྒྱལ་བའི་ཐབས་དང་འདྲའོ། །དེ་ལྟར་སྙིང་སྟོར་བརྒྱལ་ནད་རླུང་དང་མཁྲིས་པ་དང་བད་ཀན་ལ་སོགས་པས་མྱོས་པ་དང་བརྒྱལ་བར་འགྱུར་ཏེ། ནད་ཚབས་ཆེ་ཡང་སྨན་དཔྱད་བྱ་མི་དགོས་པར་ནད་རང་དུབ་ཅིང་ཞི་བར་འགྱུར་རོ། །
[116b.2]ནད་ཀྱིས་བཏབ་པ་ནི་སྨན་དཔྱད་མ་བྱས་པར་རང་དུབ་ཅིང་འཚོར་མི་རུང་ངོ་། །དེ་ལ་ནད་ནི་ལུས་དང་ངག་དང་ཡིད་ཀྱིས་ལས་བྱེད་པ་དང་འདི་བཞིན་ལ། རླུང་དང་མཁྲིས་པ་དང་བད་ཀན་གྱི་ནད་དཀྱེལ་ཆེར་ཞེན་ཏེ་ནད་ཀྱི་མཐུ་ཆེར་གྱུར་པ་དང་། རླུང་དང་མཁྲིས་པ་དང་བད་ཀན་གྱི་ནད་
[116b.3]རྣམས་འདུས་ནས་སྲོག་ལ་བབ་སྟེ་དེར་གནས་ཤིང་བརྟེན་པར་གྱུར་པ་དང་། ནད་དེས་མི་དེ་ཤི་བ་དང་འདྲ་བར་བྱས་ཏེ་ཤི་བ་བཞིན་དུ་འདུག་པ་དེ་ནི་འདུས་ནད་ཀུན་ཏུ་ཞུགས་པ་ཞེས་བྱ་སྟེ། ནད་འདི་ནི་འདུས་པའི་རིམས་ནད་ཀྱིས་བཏབ་པའི་རྗེས་ལ་འབྱུང་བ་ཞེས་བྱ་སྟེ། ནད་
[116b.4]འདི་ལ་མྱུར་དུ་རིངས་པར་དཔྱད་མ་བྱས་ན། དཔེར་ན་མཚོ་གཏིང་ཟབ་མོའི་ནང་ན་ཆུ་སྲིན་འདུག་པ་དེ་ལྟ་བུའི་དྲུང་། གད་ཀའི་གཡང་ས་ན་ལྷུང་ལ་ཐུག་པ་དང་འདྲ་བར་འདུས་ནད་ཀུན་ཏུ་ཞུགས་པས་བཏབ་པ་ཡང་དེ་དང་འདྲ་བ་སྟེ། དེ་ལྟ་བུའི་ནད་པ་ལ་དཔྱད་མྱུར་དུ་གྱིས་ཏེ་གསོས་ཤིག །
[116b.5]ཆང་ནད་དང་རླུང་ནད་དང་མཁྲིས་པ་དང་། བད་ཀན་གྱི་ནད་ཀྱིས་མྱོས་པ་དང་། སྙིང་སྟོར་བརྒྱལ་ནད་དང་། འདུས་ནད་ཀྱིས་ཤི་བ་དང་འདྲ་བར་ན་བའི་ཐབས་བཤད་པ་སྟེ་ལེའུ་དྲུག་པ་རྫོགས་སོ།། །།གཞང་འབྲུམ་གྱི་ནད་གཞི་བཤད་པའི་ལེའུ་སྟེ་བདུན་པ་བཤད་
[116b.6]པར་བྱའོ། །གཞང་འབྲུམ་གྱི་ནད་དུ་གྱུར་རོ་ཅོག་གི་གཞི་ནི་ཟས་གནོད་པས་རླུང་དང་མཁྲིས་པ་དང་། བད་ཀན་གྱི་ནད་ལས་ལངས་ཏེ་ཤ་དང་པགས་པ་དང་། ཚིལ་ལ་ཞུགས་པ་དང་གནོད་པ་བྱས་ནས། གཞང་འབྲུམ་གྱི་ནད་སྣ་ཚོགས་སུ་འགྱུར་རོ། །གཞང་འབྲུམ་
[116b.7]གྱི་ནད་ནི་ཁ་ཟས་མི་འཕྲོད་པ་ལས་ལྡང་བར་འགྱུར་རོ། །དེ་ལ་གཞང་འབྲུམ་གྱི་ནད་དེ་ཡང་མདོ་རྣམ་པ་གཉིས་ཏེ། དང་པོ་བཙས་པ་ནས་ནད་དང་ལྷན་ཅིག་འབྱུང་བ་དང་། ཕྱིས་གཞང་འབྲུམ་གྱི་ནད་འབྱུང་བ་ཡིན་ནོ། །དེ་ལ་ཡང་རྣམ་པ་གཉིས་ཏེ། གཞང་འབྲུམ་དཀར་པོ་དང་།
[117a]
[117a.1]གཞང་འབྲུམ་ཁྲག་ཏུ་ཟག་པའོ། །གཞང་ནི་རྒྱུ་མ་སྦོམ་པོ་ལ་བརྟེན་ཅིང་འདུག་གོ། །དེ་ལ་གཞང་འབྲུམ་གྱི་ནད་འབྱུང་བ་ནི་གཞན་ཁར་སོར་ཕྱེད་དང་ལྔ་མན་ཆད་ཀྱི་ནང་ན་གཉེར་མ་རིམ་པ་གསུམ་ཡོད་པ་གཉེར་མ་རེ་རེ་ལ་སོར་ཕྱེད་དང་གཉིས་གཉིས་ཏེ།
[117a.2]དེ་ལྟར་གཉེར་མའི་རིམ་པ་གསུམ་པོ་དེ་ལ་སོར་ཕྱེད་དང་ལྔ་ཡོད་པར་འགྱུར་རོ། །དེ་ལ་ཕུགས་ཀྱི་གཉེར་མའི་མིང་ནི་ཕྱིར་ཕུལ་བ་ཞེས་བྱ། བར་གྱི་གཉེར་མའི་མིང་ནི་ཕྱིར་སེལ་བ་ཞེས་བྱ། གཞང་ཁའི་གཉེར་མ་ནི་འཛུམས་པ་ཞེས་བྱ་བ་གཞང་ཁའི་ཕྱི་རོལ་སོར་གཅིག་ཚུན་ཆད་
[117a.3]ཀྱི་ནང་དུ་འབྲུམ་བུ་འབྱུང་བ་ལ་ཡང་གཞང་འབྲུམ་ཡིན་ནོ། །གཞང་ཁོར་ཡུག་སོར་གཅིག་པོ་མ་གཏོགས་པ། ནས་ཀྱི་སྲིད་ཕྱེད་དང་གཉིས་ཀྱི་ཁྱོན་ཁོར་ཁོར་ཡུག་མ་གཏོགས་པ་ཕན་ཆད་ནི་སྤུ་སྐྱེ་སྟེ། སྤུ་བྱུང་བྱུང་བ་དེ་ཕན་ཆད་དུ་བྱུང་བ་ནི་མཚན་བར་རྡོལ་གྱི་ནད་ཅེས་
[117a.4]བྱའོ། །དེ་ལ་དང་པོ་བཙས་པ་ནས་གཞང་འབྲུམ་གྱི་ནད་དང་ལྷན་ཅིག་འབྱུང་ཞེས་བྱ་བ་ནི། ཐོག་མར་ཕ་དང་མ་ཁ་ཟས་མི་འཕྲོད་པ་ཟོས་པ་ལས་ས་བོན་ནད་ཅན་དུ་གྱུར་པ་དེ་ལྟ་བུས་བུ་བྱུང་ན་གཞང་འབྲུམ་གྱི་ནད་དུ་འགྱུར་བ་ཡང་ཡོད། ལ་ལ་ནི་སྔོན་གྱི་སྡིག་པའི་ལས་
[117a.5]ལས་ནད་དུ་འགྱུར་བ་ཡང་ཡོད། ནད་དམིགས་འདི་ལྟ་བུ་རྣམ་གཉིས་ལས་ནད་བསླངས་ཏེ་ནད་གཞི་འདི་གཉིས་འདུས་པའི་གཞང་འབྲུམ་དུ་གྱུར་པ་དང་། ནད་དམིགས་གཞན་ལས་གཞང་འབྲུམ་གྱི་ནད་དུ་གྱུར་ཀྱང་རུང་སྟེ་མདོར་ན་ཕ་མའི་རིགས་ལས་གྱུར་པའི་ནད་ཐམས་ཅད་
[117a.6]དང་། དང་པོ་བཙས་པ་ནས་གཞང་འབྲུམ་གྱི་ནད་ཅན་དུ་གྱུར་པ་འདི་ནི་ལྷག་པར་གསོ་དཀའོ། །ཡང་གཞང་འབྲུམ་རྩུབ་པོར་འདུག་པ་དང་། གཞང་འབྲུམ་ཕུགས་སུ་བྱུང་སྟེ། བལྟ་དཀའ་བ་འདི་ཡང་གསོ་དཀའོ། །ཡང་གཞང་འབྲུམ་མདོག་དཀར་པོར་བྱུང་བ་
[117a.7]དང་། གཞང་འབྲུམ་བྱུང་བ་ལས་ནད་ཐམས་ཅད་དུ་གྱུར་ཏེ། ནད་གཞན་ཡང་གཞང་འབྲུམ་གྱི་ནད་རྣམ་པ་དྲུག་ཡོད་དེ། གང་ཞེ་ན། རླུང་དང་། མཁྲིས་པ་དང་། བད་ཀན་གསུམ་གྱི་གཞང་འབྲུམ་སོ་སོར་འབྱུང་བ་དང་། རླུང་དང་བད་ཀན་གྱི་ནད་སྣ་གཉིས་ལས་
[117b]
[117b.1]གཞང་འབྲུམ་དུ་གྱུར་པ་ནི་ཀུན་འདུས་པ་ལས་གྱུར་པ་ཡང་སྨོས་སོ། །དྲི་མ་བསྩགས་པ་ལས་གཞང་འབྲུམ་དུ་འགྱུར་བ་དང་། ཁྲག་ནད་ལས་གཞང་འབྲུམ་དུ་འགྱུར་བ་དེ་དང་དྲུག་གོ། །དེ་ལ་རླུང་དང་བད་ཀན་ལས་གཞང་འབྲུམ་དུ་གྱུར་པ་ནི་གཞང་འབྲུམ་དཀར་པོའི་ཁྲག་
[117b.2]དང་། མཁྲིས་པ་གཉིས་ལས་གཞང་འབྲུམ་དུ་འགྱུར་བ་ནི་གཞང་འབྲུམ་རློན་པ་ཞེས་བྱ་སྟེ། ཁྲག་ཚད་དུ་འགྱུར་རོ། །གཞང་འབྲུམ་གྱི་ནད་གཞི་སྔར་བཤད་པ་འདི་ལྟ་བུས་ནད་བསླངས་ནས་ཁོང་པ་ནང་གི་ཕོ་བའི་དྲོད་བྲི་སྟེ་ཉམས་པ་དང་དེ་ནས་གཞང་འབྲུམ་གྱི་ནད་དཀྱེལ་དུ་སོགས་
[117b.3]ཤིང་འདུག་པ་ལ་དེའི་སྟེང་དུ་བུད་མེད་ལ་ཧ་ཅང་དྲགས་པ་ལྟ་བུ་དང་། བཞོན་པ་མི་བདེ་བས་ཁོང་འཁྲུགས་པ་དང་། སྟན་མཐོ་དམན་ཅན་མི་བདེ་བ་དང་། སྟན་སྲབ་ལ་རྐུབ་རྟེན་ཙོག་པུར་བཅས་པ་དང་། ལྒང་པའི་གཅེའུ་ནས་སྨན་མས་གཏོང་བ་དང་། བཤང་བའི་འོག་ཏུ་རྡོ་བའམ་
[117b.4]ཕག་དུམ་མམ། བོང་པའམ་ལག་པའི་ཐལ་མོ་འམ་ར་ད་འམ་འདི་ལྟ་བུས་ཕྱིས་དྲགས་ཏེ་གཞང་ཁ་སྣད་པ་དང་། ཆུ་རབ་ཏུ་གྲང་བས་རྐུབ་བཀྲུས་ཏེ། གྲང་བ་ཁོང་དུ་ཞེན་པ་དང་། རྟུག་སྐམ་ཁ་སྲ་བ་ཧ་ཅང་བཙིར་དྲགས་ཏེ་གཞང་སྣད་པ་དང་། ཐུར་དུ་དབུགས་བྱུང་བ་དང་། གཅིན་
[117b.5]སྙོམ་པ་དང་། བཤང་བ་འོང་བ་ལ་བརྣག་ཅིང་མ་བཙལ་བ་དང་། འདི་རྣམས་མི་འོང་བཞིན་ནན་གྱིས་བཙིར་བ་དང་། རིམས་ཀྱིས་བཏབ་པ་དང་། སྐྲང་ནད་ཚད་པས་རབ་ཏུ་འཁྲུས་པ་དང་། ཕོ་བར་བེའུ་སྣབས་ཆགས་པ་དང་། འོར་ནད་དང་སྐྱ་རྦབ་ཀྱི་ནད་དང་། རིད་དེ་སྐེམ་པར་
[117b.6]གྱུར་པ་དང་ལུས་ལ་གནོད་པར་འགྱུར་བའི་དཔྱད་དམ། ལུས་ཀྱི་ལས་སུ་འགྱུར་བའི་གནོད་པར་འགྱུར་བའི་བག་བྱས་པ་དང་འདི་རྣམས་ལྟ་བུ་ལས་གཞང་འབྲུམ་གྱི་ནད་དུ་འགྱུར་རོ། །ཡང་བུད་མེད་ལ་གཞང་འབྲུམ་འབྱུང་བར་འགྱུར་བའི་དམིགས་ནི་བྱིས་པ་ཟླ་གྲངས་མ་ཚང་བར་རུམ་ནས་
[117b.7]འཕྱིལ་ཏེ་བྱུང་བ་ལྟ་བུ་དང་། ཟླ་གྲངས་ཚང་སྟེ་བུ་ཆེ་བར་གྱུར་པའི་བུ་ནད་ཀྱིས་གཟིར་བའམ། འབྱུང་བའི་དུས་ལས་ཡོལ་བར་གྱུར་པས་གཟིར་ཏེ་ནད་དུ་གྱུར་པ་ལྟ་བུ་འམ། གཞང་གི་ནང་ན་ཐུར་དུ་སེལ་བ་ཞེས་བྱ་བའི་རླུང་ཞིག་ཡོད་པ་དེས་རླུང་ངམ། མཁྲིས་པའམ། བད་ཀན་
[118a]
[118a.1]གྱི་ནད་བསླངས་ནས་གཞང་གི་ནང་ན་གཉེར་མ་གསུམ་ཡོད་པའི་ཕྲག་ཏུ་ཞེན་ཏམ། ཡང་ན་རླུང་དེས་ཐུར་དུ་བཤང་བའི་དྲི་མ་གཉེར་མའི་ཕྲག་ཏུ་སོང་བར་བྱས་པ་དེ་ལས་གཞང་འབྲུམ་དུ་གྱུར་ཏེ་ཁྲག་ཚད་དུ་འོང་ངོ་། །དེ་ལ་གཞང་འབྲུམ་གྱི་ནད་འོང་བར་གྱུར་ན།
[118a.2]སྔར་ན་བའི་ནད་ཐབས་ནི། ཕོ་བའི་དྲོད་ཉམས་ཏེ་བྲི། དྲི་མ་ཐུར་དུ་བྱུང་བ་སྲི་སྟེ་སྐམ་བག་ཏུ་འོང་། བརླ་ན། བྱིན་པའི་ཉྭ་ན། མགོ་འཁོར། ལག་ངར་ན། མིག་སྐྲང་། ཡང་ན་ནི་ཐུར་དུ་ཚད་པས་འཁྲུ། ཡང་ན་ནི་སྲི་སྟེ་འོང་དུ་མི་རུང་ངོ་། །ལྟེ་བའི་འོག་ན་རླུང་ཆེ་སྟེ། ཁོང་
[118a.3]ན་ཁྲུ་ལུ་ལུ་ཟེར། རླུང་དེ་དག་ཀྱང་ཕལ་ཆེར་ལྟེ་བའི་འོག་མན་ཆད་དུ་རྒྱུ་ཞིང་ཟུག་སྟེ་ན་ལ། རྒྱུ་མ་དང་གཞང་གི་ནང་ན་བཅད་པ་སྙམ་བྱེད། རླུང་ཐུར་དུ་འབྱུང་། གསལ་པོར་འབྱུང་བ་ཡང་སྒྲ་ཅན་དུ་འབྱུང་། རྒྱུ་མའི་ནང་ན་སྒྲ་ཁྲུ་ལུ་ལུ་ཟེར་ལ་ལྟོ་སྦོ། ཁོང་རྨྱ་ཞིང་སྒྲེགས་
[118a.4]པ་སྒྲ་ཅན་དུ་ཆེར་འོང་། གཅིན་ནི་རབ་ཏུ་མང་། བཤང་བའི་དྲི་མ་ནི་བབས་ཆུང་ངུ་འོང་། ཁ་ཟས་ཡི་གར་མི་འོང་། སྐྱུགས་པ་དུད་ཀ་ལ་རོ་སྐྱུར་པར་འོང་། ཀླད་པ་དང་བྲང་རྒྱབ་ཏུ་ཟུག་ཅིང་ན། ཁོང་སྙོམ། བཞིན་མདོག་མི་སྡུག་པར་འགྱུར། ཉམས་གློ་བག་ཏུ་འགྱུར།
[118a.5]དབང་པོ་རྣམས་ཉམས་ཤིང་མི་གསལ། ཁྲོ་བར་འགྱུར། ཕན་པའི་དཔྱད་བསྟན་ཅིང་བསྒོ་ན་བཀའ་བློ་མི་བདེ་སྟེ། ནད་ཐབས་འདི་ལྟ་བུར་གྱུར་པ་ལ་སྨན་པ་ཐེ་ཚོམ་ཟོས་ཏེ་མཆི་ན། ཚད་རྙིང་ལྡང་དུབ་ཏུ་འཁྲུ་བའི་ནད་དམ། འོར་ནད་དམ། སྐྱ་རྦབ་ཀྱི་ནད་དམ། སྐྲན་ནམ།
[118a.6]དམུ་རྫིང་ལྟ་བུའི་ནད་དམིགས་ལྟ་བུ་གང་ཡིན་མི་ཤེས་ན། ནད་ཐབས་རྣམ་པ་དེ་སྙེད་དུ་ན་བ་དེ་ཉིན་གཅིག་ནད་ལྡང་ཞིང་ཚབས་ཆེ་བར་གྱུར་ན་གཞང་འབྲུམ་གྱི་ནད་འབྱུང་བར་འགྱུར་རོ། །ནད་ཐབས་འདི་ལྟ་བུས་བཏབ་པའི་རྗེས་ལ་གཞང་འབྲུམ་གྱི་ནད་འབྱུང་བར་འགྱུར་ཏེ། གཞང་
[118a.7]གི་ནང་ན་ཐུར་དུ་སེལ་བ་ཞེས་བྱ་བའི་རླུང་ཞིག་ཡོད་པ་དེ་ཕྱིར་ལོག་སྟེ་གྱེན་དུ་འཁྱིལ་ནས་དྲི་མ་བཤང་བ་འགགས་ཏེ་འབྱུང་དུ་མི་རུང་བར་འགྱུར་རོ། །བཤང་བ་འགགས་པས་ཁོང་པའི་ནང་ན་རླུང་གཞན་ཡོད་པས་དབང་པོ་རྣམས་དང་ལུས་ཀྱི་ནང་ཐམས་ཅད་དཀྲུགས་ཏེ་ནད་བསླངས།
[118b]
[118b.1]དེ་བཞིན་དུ་བཤང་གཅི་དང་མཁྲིས་པ་དང་བད་ཀན་ཁོང་ན་ཡོད་པ་དང་། ལུས་ཀྱི་སྲོག་ཟུངས་བདུན་དང་། འདི་རྣམས་ཀྱང་དཀྲུགས་ཏེ་བསླངས་ན་ཕོ་བའི་མེ་དྲོད་ཀྱང་ཉམས་ཏེ་ཆུང་དུ་གྱུར་ནས། གཞང་འབྲུམ་གྱི་ནད་འབྱུང་བར་འགྱུར་བ་ཡིན་ཏེ། དེ་དེ་ལྟར་གཞང་འབྲུམ་གྱི་ནད་
[118b.2]འབྱུང་སྟེ། ལུས་རབ་ཏུ་སྐེམ། ཅི་བྱེད་ཀྱང་མི་ནུས་ཏེ་བསྐྱོད་པའམ་བྱ་བའི་བསམ་པ་མེད། ཉམ་ཆུང་། ཁོང་རྨྱ། བཞིན་མདངས་མེད་པར་འགྱུར། ལུས་ཞིག་ཅིང་ཁོང་ལྷོད་བཞིན་གྱི་མདོག་ཉམས་སོ། །ཤིང་གི་སྡོང་པོ་ལ་སྲིན་བུ་ཞུགས་ཏེ་མ་རུངས་པ་བཞིན་དུ་ནད་ཀྱི་སྣ་གྲངས་
[118b.3]གོང་དུ་བཤད་པ་དེ་སྙེད་ཀྱིས་ལུས་ཀྱི་སྲོག་གི་ནད་ལ་གནད་དུ་བབས་པས་ལུས་ལ་གནོད་པར་གྱུར་ཏེ། ནད་གཞན་ཡང་དེའི་སྟེང་དུ་བྱུང་བ་ནི། ལུད་པས་བཀར། སྐོམ་དད་ཆེ། ཁ་ཟས་རོ་བྲོ་བར་མི་ཚོར། དབུགས་མི་བདེ། ཆམ་པས་འདེབས། སྒྱིད་སྐྱུར། ལུས་དང་རྐང་ལག་
[118b.4]ཆག་གྲུགས་སུ་གྱུར་པ་བཞིན་ན། སློན། སྦྲིད་པ་འབྱུང་། ལུས་སྐྲང་། རིམས་ཀྱིས་འདེབས། ཁུ་ཆུ་དང་ཁྲག་ཟད། རྣ་བ་འོན། མིག་རབ་རིབ་ཁྱེར། ཁུ་བ་བསྡུས་ཏེ་རྡེའུར་ཆགས་པ་དང་། དྲི་མ་སྙིགས་པ་ལས་རྡེའུར་ཆགས་ཏེ་ཆུ་སྲི། ལུས་ཞིག་སྟེ་ཁོང་རྨྱ་ལ་སྐད་འགགས་
[118b.5]ཡང་དང་ཡང་སེམས་ཁོང་དུ་ཆུད་ཅིང་མཆིལ་མ་འདོར། ཡི་ག་འཆུས། རུས་པའི་ཚིགས་རྣམས་དང་སྙིང་དང་། ལྟེ་བ་དང་། གཞང་གི་ནང་དང་ཆུ་སོ་གཡས་གཡོན་དུ་ཟུག་ཅིང་ན། ཚད་པ་ཐུར་དུ་སླ་མོ་འབྱར་བག་སྲན་ཁུ་ལྟ་བུར་འཁྲུ་སྟེ། དེ་ཡང་རེས་འགའ་ནི་སྲི། རེས་
[118b.6]འགའ་ནི་མི་སྲི་བར་འོང་། རེས་འགའ་ནི་རྟུག་སྐམ། རེས་འགའ་སླ་མོར་འཁྲུ། རེས་འགའ་ནི་མ་ཞུ་བ་རྩམ་པར་འཁྲུ། རེས་འགའ་ནི་ཞུ་བར་འཁྲུ། ཚད་པའི་སྤུ་མདོག་ཀྱང་སྐྱ་བོ་སེར་པོ་སྔོན་པོ་དང་། ཁྲག་བག་སྤྱི་ཞིང་འཁྱིལ་བའི་བག་ཏུ་འཁྲུའོ། །འདི་ལྟ་བུ་ནི་གཞང་
[118b.7]འབྲུམ་མོ་ཅོག་གི་སྤྱིའི་ནད་ཐབས་ཡིན་ནོ། །རླུང་ནད་ཀྱི་དཀྱེལ་ཆེ་བ་ལས་གཞང་འབྲུམ་དུ་གྱུར་ན། གཞང་འབྲུམ་སྐམ་ལ་བག་ཆུང་། ཟུག་ཅིང་ན་སྟེ། ཚ་རབ་རབ་བྱེད། གཞང་འབྲུམ་དེ་རྙི་རྙི་པོ་རྩ་གནག་ཅིང་དམར་བག་ཡོད་དེ་སྤྱིར་སྨུག །ལ་ལ་ནི་སྲ་ལ་རྩུབ། ཆེ་ཆུང་ཡོད།
[119a]
[119a.1]རྩེ་མོ་ཕྲ་ལ་ཐོར་ཏོ་རྡོལ། གཞང་འབྲུམ་ཆེ་ཆུང་ཡོད་ལ། ནང་མི་མཐུན། མེ་ཏོག་ཀ་དམྤ་དང་། ཀུ་བའི་མེ་ཏོག་འདྲ། ཀེ་རི་ཀ་འདྲ། ལ་ལ་ནི་རྒྱ་ཤུག་གི་འབྲས་བུ་འདྲ། ལ་ལ་ནི་ཚ་གོ་འདྲ། ལ་ལ་ནི་ཤིང་ཏོག་འབི་འབི་འདྲ། ལ་ལ་ནི་རས་
[119a.2]བལ་ཀ་ར་བ་སའི་འབྲས་བུ་འདྲ། ལ་ལ་ནི་མེ་ཏོག་ཀ་དམྤའི་འབྲས་བུ་འདྲ། གཞང་འབྲུམ་ལ་ལ་ནི་ཡུངས་ཀར་འདྲ་བ་འདུག་སྟེ། གཞང་འབྲུམ་ཚུལ་དེ་ལྟ་བུ་བྱུང་ན་ཀླད་པ་དང་། རྩིབ་ལོགས་དང་། ཕྲག་པ་དང་། རྐེད་པ་དང་། བརླ་དང་། ཆུ་སོ་གཡས་གཡོན་དང་འདི་
[119a.3]རྣམས་སུ་ལྷག་པར་ཟུག་ཅིང་ན། སྒྲེགས་པ་དང་སྦྲིད་པ་མང་། ཐུར་དུ་བཤང་བའི་དྲི་མ་སྲི། སྙིང་ན། ཁ་ཟས་ཡི་ག་འཆུ། ལུད་པས་བཀར། དབུགས་མི་བདེ། ཕོ་བའི་དྲོད་མི་སྙོམས། རྣ་བ་སྒྲ་འབྱུང་སྟེ་འབོད། མགོ་འཁོར། དེ་རྣམས་ཀྱིས་བཏབ་སྟེ་ན་བ་དང་།
[119a.4]རྟུག་སྐམ་དུ་འབྱུང་བའི་ཚེ་མཁྲེགས་ཤིང་ན་ན་འབྱུང་བའི་ཚེ་སྒྲ་ཅན་དུ་འབྱུང་ཞིང་ན། སྤྱི་བག་དང་སྐམ་བག་ཏུ་འདྲེས་པ་ཐུར་དུ་འབྱུང་། པགས་པའི་མདོག་དང་སེན་མོ་དང་མིག་དང་ཁ་གདོང་དང་བཤང་གཅི་འདི་རྣམས་ཀྱི་མདོག་ནག་པོར་སྣང་། རླུང་ནད་ཀྱིས་གཞང་འབྲུམ་བྱུང་ན་
[119a.5]ཁོང་དུ་སྐྲན་འབྱུང་། མཆེར་པ་ན། དམུ་རྫིང་ལྟ་བུ་དང་། གློ་གཡས་གཡོན་ལྟ་བུར་དབབ་པ་ལྟ་བུ་འབྱུང་བར་འགྱུར་ཏེ། འདི་ནི་རླུང་ནད་ལས་གྱུར་པའི་གཞང་འབྲུམ་གྱི་ནད་ཐབས་ཤེས་པར་བྱའོ། །མཁྲིས་པ་རྒྱས་པ་ལས་གཞང་འབྲུམ་དུ་གྱུར་པའི་ནད་ཐབས་ནི་གཞང་འབྲུམ་
[119a.6]གྱི་མདོག་སྨུག་ནག་རྩ་སེར་ལ་ཐོར་ཏོ་སྔོ། ཐུར་དུ་ཁྲག་སླ་མོར་འབྱུང་སྟེ་རུལ་ཅིང་མནམ་ལ་གཞང་འབྲུམ་ཉིད་ནི་འཇམ་ལ་ཁོང་ལྷོད། གཞང་འབྲུམ་གྱི་དབྱིབས་ནེ་ཚོའི་མཆུ་དང་། སྲིན་བུ་པད་པའི་མཆུ་འདྲ་ལ། གཞང་འབྲུམ་དེ་ཚ་ཞིང་རུལ་བག་ཏུ་འདུག །ལུས་ལ་རིམས་ནད་
[119a.7]འབྱུང་། ལུས་རྔུལ། སྐོམ། བརྒྱལ། ལུས་ཚ། ཡི་ག་འཆུས། མྱོ་མྱོ་པོར་འགྱུར། དྲི་མ་བཤང་བ་ཐུར་དུ་འབྱུང་བ་ནི་སྲི། བག་ལ་དྲོན་པོ་ཚ་བར་འོང་ངོ་། །སྤུ་མདོག་སྔོ་ཞིང་སེར་ལ་ཁྲག་དང་བེའུ་སྣབས་སུ་འདྲེས་པ་དང་། ནས་རུལ་པའི་ནང་འདྲ་བར་འོང་། པགས་པ་
[119b]
[119b.1]དང་སེན་མོ་དང་བཞིན་མདོག་ཀྱང་ལྗང་སྔོན་རྩ་སེར་བག་ཏུ་སྣང་སྟེ། འདི་ལྟ་བུ་ནི་མཁྲིས་པ་ལས་གཞང་འབྲུམ་དུ་གྱུར་པའི་ནད་ཐབས་ཡིན་ནོ། །དེ་ལ་བད་ཀན་རྒྱས་པ་ལས་གཞང་འབྲུམ་དུ་གྱུར་པའི་ནད་ཐབས་ནི་གཞང་འབྲུམ་དེ་དྲུང་སྦོམ་པོ་སྡུག །ན་བ་ཆུང་། མྱུག་མྱུག་པོར་འབྱུང་བར་སྣང་ལ།
[119b.2]གཞང་འབྲུམ་གྱི་ཤ་ཆེ་ལ་འཇམ། རེང་རེང་པོར་ཟླུམ་ལ་ལྕི། གཞང་འབྲུམ་བརྟེན་པོར་འདུག །གཞང་འབྲུམ་དེ་འབྱིལ་ཞིང་འབྱར་བག་ཡོད་སྲ་ལ་འཇམ། འབྲུམ་བུ་དེ་རྟག་ཏུ་གཡའ། རེག་ན་དགའ། གཞང་འབྲུམ་གྱི་དབྱིབས་ནི་ཤིང་ཏོག་ཀ་རི་ར་དང་། པ་ན་སའི་འབྲས་བུའི་
[119b.3]རུས་པ་དང་། བའི་ནུ་མའི་དབྱིབས་འདྲ། ཆུ་སོ་གཡས་གཡོན་དུ་ཟུག་ཅིང་སྤོའོ། །ལྟེ་བ་དང་ཆུ་སོ་དང་གཞང་གི་ནང་ན་དྲི་མ་བཤང་བ་ཡོད་པ་འདི་དག་བཅད་པ་སྙམ་བྱེད་ཅིང་ན། ལུད་པས་བཀར། དབུགས་མི་བདེ། སྙིང་ན། ཁ་ནས་བད་ཀན་དང་མཆིལ་མ་མང་དུ་
[119b.4]འདོར། ཡི་ག་འཆུས། ཆམ་པས་འདེབས། མོང་མོང་པོར་བྱེད། ཀླད་པ་ཚབས་ཆེར་ན། ཏོམ་བག་ཏུ་འདུག །གྲང་བའི་རིམས་ཀྱིས་འདེབས་པར་འགྱུར། ཁུ་བ་དང་ཁྲག་ཟག །ཕོ་བའི་དྲོད་ཉམས། སློན། རྟག་ཏུ་ཁ་ཟས་མ་ཞུ་བ་དང་བེའུ་སྣབས་སུ་འཁྲུ། བད་
[119b.5]ཀན་ལྟ་བུ་དང་ཚད་པས་འདེབས་ཏེ་འཁྲུ། ཡང་གཞང་འབྲུམ་དེ་ནི་མི་རྡོལ་མི་ཟག་གོ། །ལུས་ཀྱི་པགས་པ་དང་སེན་མོ་ལ་སོགས་པའི་མདོག་ནི་དཀར་ལ་འཇམ་མོ། །བད་ཀན་ལས་གཞང་འབྲུམ་དུ་གྱུར་པའི་ནད་ཐབས་ནི་དེ་ལྟ་བུ་ཡིན་ནོ། །དེ་ལ་ནད་སྣ་གཉིས་འདྲེས་པའི་
[119b.6]གཞང་འབྲུམ་གྱི་ནད་དམ། རླུང་དང་བད་ཀན་འདྲེས་པའི་གཞང་འབྲུམ་གྱི་ནད་དམ། མཁྲིས་པ་དང་བད་ཀན་དུ་འདྲེས་པའི་ནད་གང་ཡང་རུང་། ནད་སྣ་གཉིས་འདྲེས་པའི་ནད་ཐབས་དེ་ནི་གཞང་འབྲུམ་གྱི་ནད་ཐབས་འདྲེས་པ་ཞེས་བྱའོ། །དེ་ལ་འདུས་པའི་གཞང་འབྲུམ་གྱི་
[119b.7]ནད་ཐབས་ནི་རླུང་དང་མཁྲིས་པ་དང་བད་ཀན་གསུམ་གྱི་གཞང་འབྲུམ་གྱི་ནད་དཀྱེལ་དུ་སྩོགས་སྩོགས་པ་ལས། གཞང་འབྲུམ་གྱི་ནད་འབྱུང་སྟེ་ནད་སྣ་གསུམ་གྱི་ནད་ཐབས་སྣ་ཚང་བར་ན་བ་དེ་ནི་འདུས་པའི་གཞང་འབྲུམ་གྱི་ནད་ཐབས་ཞེས་བྱའོ། །དེ་ལ་ཁྲག་ནད་རྒྱས་པ་
[120a]
[120a.1]ལས་གཞང་འབྲུམ་དུ་གྱུར་པའི་ནད་ཐབས་ནི་གཞང་གི་ནང་དུ་འབྲུམ་བུ་བྱུང་བ་འདི་དབྱིབས་ནི་ཤིང་འབའ་ཏའི་ལོ་མ་ཁ་འབུས་པ་འདྲ། མདོག་ནི་འོལ་མ་སེའི་འབྲས་བུ་དང་། བྱུ་རུའི་མདོག་འདྲའོ། །གཞང་འབྲུམ་དེ་ནད་ཁྲག་གིས་བརྒྱལ་ལ། དྲོ་ཞིང་ཚ་བར་
[120a.2]འདུག་པ་དེ་མཁྲིས་པ་ལས་གྱུར་པའི་གཞང་འབྲུམ་དེ་དྲི་མ་ཐུར་དུ་འབྱུང་བའི་ཤུགས་ཀྱིས་བཙིར་བ་དང་། འཕྲལ་དུ་ཁྲག་ངན་པ་ཚེན་པོར་འབྱུང་ཞིང་འཁྲུ་བར་འགྱུར་རོ། །ནད་དང་ཁྲག་ཟད་པས་མདོག་དང་ཉམས་འཚག་ཀྱང་ཉམས་ཏེ། མདོག་ཉམས་པའི་དཔེ་ནི་སྦལ་པ་སེར་པོ་
[120a.3]འདྲ་ལ་མདངས་ཉམས། དབང་པོ་རྣམས་མི་གསལ་བར་གྱུར་པ་འདི་ནི་ཁྲག་ནད་ལས་གྱུར་པའི་གཞང་འབྲུམ་ཞེས་བྱའོ། །གཞང་འབྲུམ་གྱི་ནད་ལས་གཞང་གི་ནང་ནས་གྱེན་དུ་སློང་ཞིང་འཁྱིལ་བ་ཞེས་བྱ་བ་ནི་ནད་སློང་བའི་ཁ་ཟས་མོན་སྲན་སྡེའུ་མུངྒ་བ་དང་། ཀོ་དྲ་བ་དང་།
[120a.4]འཛུར་ན་དང་། ཀ་རི་ཀ་དང་། མོན་སྲན་ཙ་ན་ལ་སོགས་པ་ཁ་ཟས་རྩུབ་མོ་དྲི་མ་ཐུར་དུ་བཤང་བ་མི་འབྱུང་ཞིང་སྲི་བར་བྱེད་པ་དེ་ལྟ་བུས། རླུང་ཉིད་ཀྱིས་རང་གི་གནས་སུ་ནད་བསླངས་ཏེ་དཀྱེལ་དུ་གྱུར་ནས་དྲི་མ་བཤང་གཅི་ཐུར་དུ་རྒྱུ་བའི་སྦུ་གུ་རྣམས་རླུང་གིས་འགགས་ནས། བཤང་
[120a.5]གཅི་དང་དབུགས་ཐུར་དུ་འབྱུང་བ་རྣམས་རླུང་གིས་བསྐམས་ཏེ། འགགས་ནས་འབྱུང་དུ་མི་རུང་བ་དང་། རབ་ཏུ་ན་བར་འགྱུར་ཏེ། ཁོང་བའི་ནང་ན་རྒྱབ་དང་སྙིང་དང་རྩིབ་ལོགས་དང་འདི་རྣམས་སུ་ནད་འགྲོ་ཞིང་ཟུག་ལ་ལྟོ་སྦོ། རྒྱུ་མའི་ནང་བསྐོར་ཞིང་གཅུས་པ་སྙམ་བྱེད། སྙིང་
[120a.6]ན། སྙིང་དང་ཆུ་སོའི་ཐད་ཀ་ལྒང་པ་གཉིས་གཞོགས་ཤིང་བཅད་པ་སྙམ་བྱེད་ལ་རབ་ཏུ་ན། ཐོར་བུ་འབྱུང་། སྐྲང་པར་འགྱུར། རླུང་དེ་རོ་སྟོད་ཡན་ཆད་ཀྱི་ནང་དུ་སོང་ན། དེའི་གཞིས་སློན་པ་དང་། ཡི་ག་འཆུས་པ་དང་རིམས་ནད་དུ་འགྱུར། སྙིང་ན། ཚད་རྙིང་ལ་སོགས་
[120a.7]པའི་འཁྲུ་བའི་ནད་དང་ཆུ་སྲི་བ་དང་ཚད་པ་མཁྲེགས་ཤིང་འཁྲུ་བ་དང་། རྣ་བས་མི་ཐོས་པ་དང་། མིག་རབ་རིབ་ཁྱེར་བ་དང་། དབུགས་མི་བདེ་བ་དང་། ཀླད་པ་ན་བ་དང་། ལུད་པས་བཀར་བ་དང་། ཆམ་པས་འདེབས་པ་དང་། སེམས་འགྱུར་བ་དང་། སྐོམ་དད་ཆེ་བ་དང་། ཁྲག་
[120b]
[120b.1]དང་མཁྲིས་པའི་ནད་དང་། སྐྲན་ནད་དང་། དམུ་རྫིང་ལ་སོགས་པའི་རླུང་ནད་ཡང་བ་མི་བཟད་པ་རྣམ་པ་དེ་སྙེད་འབྱུང་བར་འགྱུར་ཏེ་འདི་ནི་གཞང་འབྲུམ་མིང་ངན་གྱེན་དུ་འཁྱིལ་བ་ཞེས་བྱ་སྟེ། ནད་འདི་ནི་རབ་ཏུ་གནོད་པ་ཡིན་ཏེ། ཁོང་པའི་ནང་དུ་རླུང་ནད་ཀྱི་དཀྱེལ་ཆེར་ཞུགས་
[120b.2]ལ། གཞང་འབྲུམ་གྱིས་མ་བཏབ་པར་ཡང་། བཤང་གཅིའི་ནད་གྱེན་དུ་འཁྱིལ་བ་འདི་ལྟ་བུར་འགྱུར་རོ། །གཞང་འབྲུམ་གྱི་ནད་དེ་སྙེད་ཀྱི་ནང་ན་གསོ་དཀའ་བ་ནི་དང་པོ་བཙས་པ་ནས་ལྷན་ཅིག་ཏུ་བྱུང་བའི་གཞང་འབྲུམ་གྱི་ནད་དང་། འདུས་པའི་གཞང་འབྲུམ་གྱི་ནད་
[120b.3]དང་གཉེར་མ་ཕུགས་ན་ཡོད་པའི་གཞང་འབྲུམ་གྱི་ནད་འདི་རྣམས་ནི་གསོ་དཀའོ། །གཞང་འབྲུམ་གྱི་ནད་དེ་ལྟ་བུས་བཏབ་ཀྱང་ཕོ་བའི་མེ་དྲོད་ཆེ་སྟེ། ཁ་ཟས་འཇུ་བ་དང་ཉམས་འཚག་དང་ལྡན་པ་ལ་སོགས་པ་དང་། རླུང་ངམ་མཁྲིས་པ་ལྟ་བུ་གང་ཡང་རུང་བ་སྣ་གཉིས་
[120b.4]ལས་གཞང་འབྲུམ་དུ་གྱུར་པ་དང་། གཞང་གི་གཉེར་མ་གཉིས་མན་ཆད་ཀྱི་ནང་ན་གཞང་འབྲུམ་ཡོད་པ་དང་། འདི་ལྟ་བུ་ནི་ནད་རྩེ་ཞིལ་ཙམ་དུ་གསོར་རུང་ངོ་། །གཞང་འབྲུམ་གྱི་ནད་བྱུང་ནས་ལོ་གཅིག་ལྷག་ལོན་པ་ནི་རབ་ཏུ་གསོ་དཀའོ། །གཞང་གི་ནང་ན་གཉེར་མ་ཐ་མར་གཞང་
[120b.5]འབྲུམ་འབྱུང་བ་དང་། རླུང་ངམ་མཁྲིས་པ་ལྟ་བུ་གང་ཡང་རུང་བའི་ནད་སྣ་གཅིག་ལས་གཞང་འབྲུམ་དུ་གྱུར་པ་དང་། གཞང་དུ་གསར་དུ་བྱུང་མ་ཐག་པ་དང་། ཕོ་མཚན་ལས་བྱུང་བ་དང་། ལྟེ་བར་བྱུང་བ་དང་། རྣ་བའམ་སྣའི་ནང་དུ་ཐོར་བུ་རྟ་བླ་བ་ལྟ་བུ་འབྱུང་བ་འཁྱིལ་ཞིང་
[120b.6]འཇམ་པ་ཞིག་འབྱུང་སྟེ། དེ་ནི་སྙིང་ལ་གནས་པའི་རླུང་ཁྱབ་བྱེད་ཅེས་བྱ་བ་ཞིག་ཡོད་པ་དེས་བད་ཀན་གྱི་ནད་བྱས་ཏེ་པགས་པའི་ཕྱི་རོལ་དུ་མཛེར་བ་འདྲ་བའི་ཐོར་བུ་འབྱུང་བར་བྱེད་དོ། །པགས་པ་སྲ་ལ་རྩུབ་པ་བྱུང་བ་ནི་མཛེར་པ་ཞེས་བྱ་སྟེ། རླུང་ནད་ཀྱིས་པགས་པ་ལ་ཟུག་ཅིང་རྩུབ།
[120b.7]མཁྲིས་པ་ལས་གྱུར་ན་གནག་ལ་རྩ་དམར་རོ། །བད་ཀན་ལས་གྱུར་ན་འཇམ་ལ་མཛེར་པ་དེ་མདོག་མི་སྡུག་པ་ཡང་མ་ཡིན་ནོ། །དེ་ལྟར་གཞང་འབྲུམ་གྱི་ནད་ལ་དཔྱད་མྱུར་དུ་མ་བྱས་ན་ཐུར་དུ་བཤང་བའི་དྲི་མ་རྣམས་གཞང་ཁར་མྱུར་དུ་འགགས་ནས་བཤང་བས་མྱུར་དུ་
[121a]
[121a.1]གང་སྟེ། གསོ་དཀའ་བར་འགྱུར་གྱི་མྱུར་དུ་གསོས་ཤིག །གཞང་འབྲུམ་གྱི་ནད་ཐབས་སྣ་ཚོགས་བཤད་པ་སྟེ་ལེའུ་བདུན་པ་རྫོགས་སོ།། །།ཚད་པས་འཁྲུ་བ་དང་ཕོ་བའི་གྲང་བ་ལས་ཚད་རྙིང་དུ་འཁྲུ་བའི་ནད་གཞི་བསྟན་པའི་ལེའུ་བརྒྱད་
[121a.2]པ་བཤད་པར་བྱའོ། །ཚད་པས་འཁྲུ་བའི་ནད་གཞི་ནི་དྲུག་སྟེ། རླུང་དང་མཁྲིས་པ་དང་། བད་ཀན་གསུམ་གྱི་ནད་འདུས་པ་ལས་ཀྱང་ཚད་པར་འགྱུར་རོ། །འཇིགས་པ་དང་མྱ་ངན་ལས་ཀྱང་ཚད་པར་འགྱུར་ཏེ། ནད་གཞི་འདི་དག་གིས་ཚད་པས་རབ་ཏུ་འཁྲུའོ། །ཚད་པ་
[121a.3]ལ་གནོད་པ་ནི་ཆུ་རབ་ཏུ་འཐུངས་པ་དང་། ཤ་རིད་ཤ་བསྐམས་པ་དང་། ཁ་ཟས་མ་ལོབས་པ་གནོད་པ་ཟོས་པ་དང་། ཏིལ་ཁུར་དང་། ནས་ལ་སོགས་པ་འབྲུ་མ་སྨིན་པ་ཟོས་པ་དང་། ཆང་འཐུང་བ་དང་། ཁ་ཟས་རྩུབ་པོ་དང་། ཁ་ཟས་ཚོད་མ་ཟིན་ཏེ་དྲགས་པ་དང་། གཞང་
[121a.4]འབྲུམ་གྱི་ནད་དང་། ཟས་སྣུམ་བག་དྲགས་པ་དང་། ཁོང་ན་སྲིན་བུ་ཡོད་པ་དང་། བཤང་བ་འོང་བར་གྱུར་ན་གནག་པ་དང་། དེ་འདྲ་བ་གནོད་པར་འགྱུར་བ་བསྟེན་པས་རླུང་ནད་ལངས་ཏེ་རླུང་ནད་དེས་བད་ཀན་གྱི་ནད་ལངས་ཏེ་ཁོང་པའི་ཁ་ཟས་ནང་གྲོལ་དང་། བཤང་བ་ཀུན་
[121a.5]ཀྱང་དེས་ཁྱབ་ནས་མེའི་དྲོད་ཉམས་ཏེ་ཚད་པས་ཐུར་དུ་འཁྲུའོ། །ཚད་པས་རབ་ཏུ་འཁྲུ་བ་ནི་བཤང་བ་སླ་བར་བྱུང་བ་ནི་ཚད་པའོ། །ཚད་པར་གྱུར་པའི་ནད་ཐབས་ནི་སྙིང་དང་ཁོང་པའི་ནང་དང་། གཞང་གི་ནང་དུ་ཟུག་ཅིང་ན། ལུས་ཞིག །དྲི་མ་བཤང་བ་ཐུར་དུ་མི་འབྱུང་སྟེ་
[121a.6]སྲི། ལྟོ་སྦོ། ཁ་ཟས་མི་འཇུའོ། །དེ་ལ་རླུང་ནད་ལས་གྱུར་པའི་ཚད་པ་ནི་བཤང་བ་ཆུ་སླ་མོ་དང་འདྲེས་པ་ཉུང་ཤས་སུ་འབྱུང་བའི་ཚེ། སྒྲ་དང་བཅས་པར་འབྱུང་ལ། འཁྲུ་བའི་ཚེ་རྒྱུ་ཞབས་སུ་ཟུག་ཅིང་ན། ཚད་པ་བབས་ཆེར་མི་འོང་། ཉུང་ཤས་སུ་སྲི་ཞིང་འོང་། ཚད་
[121a.7]པའི་སྤུ་མདོག་ནི་རྩུབ་པོ་དབུ་བ་ཅན་དང་། བར་ཡང་དང་ཡང་དུ་འཁྲུ་བ་དང་། ཡང་ན་རིལ་རིལ་པོ་དང་འདྲེས་པས་ཡང་དང་ཡང་དུ་འཁྲུ་སྟེ། བུ་རམ་ཚིག་པ་འདྲ་བར་སྣང་བ་དང་། སྤྱི་བོ་འབྱར་བག་ཏུ་འདྲེས་ཤིང་ཚད་པ་འབྱུང་། ཚད་པ་འབྱུང་བའི་ཚེ་གཞོགས་ཤིང་བཅད་པ་
[121b]
[121b.1]སྙམ་བྱེད། ཁ་སྐམ། གཞང་གི་ནང་ཉམས་ཏེ་ཕྱིར་འབྱུང་བར་བྱེད། བ་སྤུ་ལངས། ཚད་པ་མཁྲེགས་ཤིང་འཁྲུ་བ་འདི་ནི་རླུང་ལས་གྱུར་པའི་ཚད་པ་ཡིན་ནོ། །དེ་ལ་མཁྲིས་པ་ལས་གྱུར་པའི་ཚད་པའི་ནད་ཐབས་དང་། སྤུ་མདོག་ནི་སེར་ལ་གནག །སེར་ལ་ལྗང་སྔོན་དུ་ཡང་
[121b.2]སྣང་། ཁྲག་དང་འདྲེས་པ་དྲི་རབ་ཏུ་མནམ། སྐོམ། བརྒྱལ། ལུས་རྔུལ། ཁོང་ཚ། རྒྱུ་མར་ཟུག་ཅིང་གཞང་གི་ནང་ཚ། གཞང་གི་ནང་ན་ཐོར་བུ་འབྱུང་བ་དེ་ནི་མཁྲིས་པའི་ནད་ལས་གྱུར་པའི་ཚད་པ་ཡིན་ནོ། །དེ་ལ་བད་ཀན་གྱི་ནད་ལས་ཚད་པར་གྱུར་པའི་ཚད་པའི་
[121b.3]སྤུ་མདོག་དང་ནད་ཐབས་ནི་ཚད་པ་གར་བ་འབྱར་འབྱར་པོ་འབྱིལ་བག་དང་། ནལ་ནལ་པོར་འོང་། སྤུ་མདོག་སྐྱ་ལ་འཇམ། བེའུ་སྣབས་དང་བད་ཀན་དུ་འཁྲུ་ཡང་དང་ཡང་འོང་། ཚད་པ་ཉིད་ལྕི། མནམ། ཚད་པ་ཕལ་ཆེར་མི་འོང་། ཟུག་པའི་ནད་ཚབས་མི་ཆེ། གཉིད་ཆེ།
[121b.4]ཁོང་སྙོམ། ཁ་ཟས་མཐོང་ན་ཡི་ག་འཆུ། ཚད་པ་དང་བཤང་བར་འདྲེས་པ་ཉུང་ཤས་ཉུང་ཤས་སུ་འབྱུང་ཞིང་ཅུང་ཟད་ཙམ་མཁྲེགས། བ་སྤུ་རྣམས་གྱེན་དུ་ལངས་ཤིང་སློན། ཆུ་སོ་དང་། ལྟོ་བ་དང་། གཞང་དང་འདི་རྣམས་ལྕི། ཚད་པས་འཁྲུ་ཞིང་བཤང་ཡང་མ་འཁྲུས་པ་སྙམ་
[121b.5]བྱེད་པ་འདི་ལྟ་བུ་ནི་བད་ཀན་ལས་གྱུར་པའི་ཚད་པ་ཞེས་བྱའོ། །འདུས་པ་ལས་གྱུར་པའི་ཚད་པའི་ནད་ཐབས་ནི་རླུང་དང་མཁྲིས་པ་དང་བད་ཀན་གསུམ་གྱི་ཚད་པའི་སྤུ་མདོག་དང་ནད་ཐབས་ཚང་བར་ན་བ་ཡིན་ནོ། །འཇིགས་སྐྲག་པ་ལས་ཚད་པར་འགྱུར་བ་ནི་འཇིགས་པས་སེམས་
[121b.6]འཁྲུགས་པ་དང་། མཁྲིས་པ་གཡོས་ཏེ། ཁོང་ན་བཤང་བ་ཡོད་པ་སླ་བོར་བྱས་ནས་རླུང་གིས་ཕྱི་རོལ་ཏུ་འཁྲུ་བར་བྱེད་དོ། །དེ་ནི་ཁོང་ན་བཤང་བ་ཡོད་པས་མྱུར་དུ་ཚ་ཞིང་སླ་བ་ནུར་ནུར་པོར་བྱས་པས་ཚད་པར་འགྱུར་བ་མ་ཡིན་ཏེ། དེ་ནི་རླུང་དང་མཁྲིས་པའི་ཚད་པའི་ཚུལ་དང་འདྲའོ། །
[121b.7]མྱ་ངན་ལས་གྱུར་པའི་ཚད་པའི་ཚུལ་དེ་དང་འདྲའོ། །མདོར་ན་ཚད་པ་ནི་རྣམ་པ་གཉིས་ཏེ། ཟས་མ་ཞུ་བ་ཅན་དུ་འཁྲུ་བ་དང་། མ་ཞུ་བ་མེད་པར་འཁྲུ་བའམ། ཁྲག་མེད་པར་འཁྲུ་བའོ། །དེ་ལ་ཟས་མ་ཞུ་བ་ཅན་དུ་འཁྲུ་བ་ནི་ཚད་པ་དེ་ཆུའི་ནང་དུ་བོར་ན་འབྱིང་། རབ་ཏུ་མནམ་
[122a]
[122a.1]མོ། །ཚད་པ་འདི་ལྟ་བུར་འཁྲུ་བར་འགྱུར་ན་སྔར་ལྟོ་སྦོ། རྟུག་སྐམ་དུ་འགྱུར། ཟུག་ཅིང་ན། ཁ་ནས་བད་ཀན་དང་མཆིལ་མ་མང་དུ་འདོར་ཏེ། འདི་ལྟར་བྱེད་ན་ཟས་མ་ཞུ་བའི་ཚད་པས་འཁྲུ་བ་ཡིན་ནོ། །ཁ་ཟས་མ་ཞུ་བ་མེད་པའི་ཚད་པས་འཁྲུ་བ་ནི་
[122a.2]ནད་ཐབས་དང་ཚད་པའི་ཚུལ་འདི་རྣམས་དང་མི་འདྲ་སྟེ་བཟློག་པར་ཤེས་པར་བྱའོ། །ཡང་བད་ཀན་ལས་ཚད་པར་གྱུར་ན་ནི་ཁ་ཟས་ཞུ་བར་གྱུར་ཀྱང་ཚད་པ་ཆུའི་ནང་དུ་འབྱིང་བར་འགྱུར་རོ། །ཚད་པ་གསར་པ་གསོ་བའི་དཔྱད་མྱུར་དུ་མ་བྱས་ན་ཕོ་བ་གྲང་སྟེ་ཟས་མ་ཞུ་བ་ཁོང་དུ་
[122a.3]སོགས་ཤིང་འཁྲུ་བའི་ཚད་རྙིང་གི་ནད་དུ་འགྱུར་རོ། །དེ་ལ་ཚད་པས་རབ་ཏུ་འཁྲུ་ཞེས་བྱ་བ་ནི་ཁོང་པའི་དྲོད་ཉམས་པར་འགྱུར་བའི་ཁ་ཟས་བསིལ་བའི་ཤ་དག་ཟོས་པས། ཟས་མ་ཞུ་ཞིང་བེའུ་སྣབས་ཅན་དུ་འཁྲུ་བ་དེ་ནི་ནད་རྙིང་ཞེས་བྱའོ། །བེའུ་སྣབས་མེད་ཀྱང་རུང་། ཞུ་
[122a.4]ནས་འཁྲུ་བར་བྱེད་པ་དེ་ནི་ཚད་པ་ཞེས་བྱ་སྟེ། དེ་ལྟ་བུ་ནི་རང་བཞིན་གྱིས་མྱུར་དུ་མ་རུངས་པར་བྱེད་པའོ། །དེ་ཡང་ཁ་ཟས་མ་ཞུ་སྟེ་ཟས་རྗེན་པ་དང་། བེའུ་སྣབས་སུ་འདྲེས་པ་ཁོང་ན་སྩོགས་སྩོགས་ཤིང་། འཁྲུའམ་ཡང་ན་ཞུན་ཡང་རླུང་གིས་འགགས་ཏེ་འོང་དུ་མི་རུང་།
[122a.5]རེས་འགའ་ནི་ཚད་པ་སླ་མོར་ཡང་དང་ཡང་འཁྲུ་སྟེ་ཚད་རྙིང་འདི་ལྟ་བུའི་ནད་ནི་ཕོ་བ་གྲང་སྟེ་ཟས་མ་ཞུ་བ་ཁོང་ན་སྩོགས་སྩོགས་ཤིང་། སྐམས་སྐམས་སུ་འཁྲུ་བ་འདི་ནི་ཚད་རྙིང་ཡུན་རིང་དུ་ན་བར་བྱེད་པ་ཡིན་ཏེ། དེ་ཡང་རྣམ་པ་བཞི་ལས་ཚད་རྙིང་གི་ནད་དུ་འགྱུར་རོ། །བཞི་
[122a.6]གང་ཞེ་ན། རླུང་དང་མཁྲིས་པ་དང་བད་ཀན་སྣ་རེ་རེ་ལས་ཚད་རྙིང་དུ་འགྱུར་བ་དང་། ནད་འདུས་པ་ལས་ཚད་རྙིང་དུ་འགྱུར་བ་དང་བཞིའོ། །དེ་ལ་ཕོ་བ་གྲང་བའི་ཚད་རྙིང་གི་ནད་དུ་གྱུར་ན་དེའི་ནད་ཐབས་སྔར་འབྱུང་བ་ནི་ཕོ་བའི་ནད་ཀྱི་དྲོད་ཉམས་ཟས་ཡུན་རིང་དུ་མི་འཇུ། ཁ་ཟས་ཟོས་
[122a.7]པས་གྲེ་བ་སྒྱུར་བར་འགྱུར། ཁ་ནས་བད་ཀན་དང་མཆིལ་མ་མང་དུ་འདོར། ཁར་རོ་ཅི་བྲོ་བ་མི་ཚོར། ཁ་ཟས་ཡི་གར་མི་འོང་། སྐོམ་ཞིང་ཁོང་སྙོམ། ཀླད་པ་འཁོར། ལྟོ་སྦོ། སློན་བྲོ། རྣ་བའི་ནང་སྒྲ་ཙི་རི་རི་ཟེར། རྒྱུ་མའི་ནང་ན་སྒྲ་ཁྲུ་ལུ་ལུ་ཟེར། སྒྲེགས་པ་མནམ་པོར་འབྱུང་།
[122b]
[122b.1]དབུགས་མི་བདེ། རིམས་ཀྱིས་འདེབས། བརྒྱལ། ཀླད་པ་ན། བཤང་བ་ཐུར་དུ་འབྱུང་དུ་མི་རུང་སྟེ་སྲི། རྐང་ལག་སྐྲང་པའི་ཐབས་འདི་ལྟ་བུ་སྔར་བྱུང་ན་ཕོ་བ་གྲང་ཞིང་འཁྲུ་བའི་ཚད་རྙིང་སྤྱིའི་ནད་ཐབས་ཡིན་ནོ། །དེ་ལ་རླུང་ནད་ལས་གྱུར་པའི་ཚད་རྙིང་དུ་འཁྲུ་བའི་ནད་ཐབས་ནི་རྐན་སྐམས།
[122b.2]མིག་རབ་རིབ་ཟ། རྣ་བ་གཉིས་ནས་སྒྲ་འབྱུང་། རྩིབ་ལོགས་དང་བརླ་དང་ཆུ་སོ་གཡས་གཡོན་དང་། མགུལ་པ་འདི་རྣམས་ན། ཡང་དང་ཡང་ཁོང་སྦོ་ཞིང་གསུད། ཁ་ཟས་ཀྱི་རོ་བྲོ་བ་ཀུན་ལ་ཆགས། ཁ་ཟས་ཞུར་ཉེ་ན་ཁོང་སྦོ། ཞུ་ན་བཀྲེས་ཤིང་སྐོམ། ཁ་ཟས་ཟོས་ན་
[122b.3]བདེ་བར་འགྱུར། རླུང་ནད་དེ་ལས་རྙིང་ནད་དང་། སྐྲན་དང་གཞང་འབྲུམ་དང་། མཆེར་པ་ན་བ་དང་། སྐྱ་རྦབ་ཀྱི་ནད་འདི་རྣམས་འབྱུང་བའི་ཚུལ་དུ་འགྱུར། ཚད་པས་འཁྲུ་བའི་ཚེ་འགགས། སྐོམ་པོ་ཡང་སླ་བ་ཞིག་འབྱུང་སྟེ། དེ་ཡང་མྱུར་དུ་འོང་དུ་མི་རུང་ཞིང་སྲི་སྟེ་འབྱུང་དཀའ།
[122b.4]ཚད་པར་འབྱུང་བའི་ཚེ་ན་སྒྲ་ཅན་མ་ཞུ་བའི་བེའུ་སྣབས་སུ་འབྱུང་། གཞང་ན། དབུགས་མི་བདེ་ཞིང་ལུད་པས་བཀར། ནད་ཐབས་འདི་རྣམས་ལྟ་བུར་ན་ཞིང་འཁྲུ་བའི་ཚད་རྙིང་ནི་རླུང་ནད་ལ་ཕོ་བ་གྲང་བའི་ཚད་རྙིང་འཁྲུ་བ་ཞེས་བྱ་སྟེ། འདི་རླུང་ནད་ལས་གྱུར་པའི་ཚད་རྙིང་གི་
[122b.5]ནད་ཐབས་ཡིན་ནོ། །དེ་ལ་མཁྲིས་པ་ལས་གྱུར་པའི་ཚད་རྙིང་གི་མདོག་དང་ནད་ཐབས་ནི་ལུས་ཀྱི་ཤ་མདོག་སྔོ་ལ་སེར་པོར་འདུག །ཚད་པ་སླ་མོ་སེར་པོར་འཁྲུ། སྒྲེགས་པ་མནམ་ཞིང་སྐྱུར་བར་འབྱུང་། སྙིང་དང་གྲེ་བ་ན་ཞིང་ཚ། ཡི་ག་འཆུ། སྐོམ་པས་གདུངས་པ་
[122b.6]འདི་ལྟ་བུ་ནི་མཁྲིས་པ་ལས་གྱུར་པའི་ཚད་རྙིང་གི་རླུང་ནད་ལ་ཕོ་བ་གྲང་བའི་ཚད་རྙིང་གི་ནད་ཐབས་ཞེས་བྱའོ། །དེ་ལ་བད་ཀན་ལས་གྱུར་པའི་ཚད་རྙིང་གི་ནད་ཐབས་ནི་བད་ཀན་ཆེ་བས་ཁ་ཟས་འཇུ་དཀའ། སློན། ཁ་ཟས་ཡི་གར་མི་འོང་། ཁའི་ནང་ན་ཡང་བད་ཀན་གྱིས་
[122b.7]གང་སྟེ་ཁ་ནས་བད་ཀན་དང་མཆིལ་མ་མང་དུ་འོང་ཞིང་འདོར། ལུད་པས་བཀར། ཆམ་པས་འདེབས། དོང་ག་ན། ལྕི་བ་མེར་མེར་པོར་བྱེད། ལྟོ་བ་ཡང་སྲ་ལ་ལྕི། སྒྲེགས་པ་མནམ་པོར་འབྱུང་། ཁོང་པའི་ཕོ་བ་དྲོད་ཉམས། བུད་མེད་ལ་དགའ་བར་བྱེད། ཚད་པ་
[123a]
[123a.1]བེའུ་སྣབས་ལྟ་བུ་དང་། བད་ཀན་དང་འདྲེས་པར་འཁྲུ་ལ། བཤང་བ་ཐུར་དུ་འབྱུང་བ་ལྕི། རིད་ཅིང་སྐེམས་པ་མ་ཡིན་ཡང་། ཉམས་སྟོབས་ཆུང་སྟེ་ཞན། འདི་ལྟ་བུའི་ནད་ཐབས་ནི་བད་ཀན་ལས་གྱུར་པའི་ཚད་རྙིང་ཞེས་བྱའོ། །དེ་ལ་འདུས་པ་ལས་གྱུར་
[123a.2]པའི་ཚད་རྙིང་གི་ནད་ཐབས་ནི་རླུང་དང་མཁྲིས་པ་དང་བད་ཀན་གསུམ་ཆར་གྱི་ཚད་རྙིང་གི་ནད་ཐབས་ཀུན་དང་མཐུན་པ་ཡིན་ནོ། །ཕོ་བའི་ནང་གི་མེའི་དྲོད་མ་སྙོམས་པ་རྣམ་པ་གསུམ་ལ་སོགས་པ་རྟག་ཏུ་བཤད་པ་ལྟར་གྱུར་ན་ཕོ་བ་གྲང་བ་ལས་མ་ཞུ་བའི་ཚད་རྙིང་གི་ནད་དུ་འགྱུར་རོ། །
[123a.3]ཕོ་བའི་ནང་གི་མེ་དྲོད་སྙོམས་པར་གྱུར་ན། བདེ་ཞིང་ནད་མེད་པར་འགྱུར་བའི་གཞི་ཡང་དེ་ཡིན་ཏེ། ཚད་རྙིང་གི་ནད་དུ་མི་འགྱུར་རོ། །ནད་ཀྱི་ནང་ན་དཀྱེལ་ཆེ་བ་གསོ་དཀའ་བ་ནི་རྣམ་པ་བརྒྱད་ཡོད་དེ། གང་ཞེ་ན། རླུང་ནད་དང་། ཆུ་སོ་ན་རྡེའུ་ཡོད་པ་དང་། མཛེ་ནད་དང་།
[123a.4]ཟ་གུ་དང་། དམུ་རྫིང་དང་། མཚན་བར་རྡོལ་བའི་ནད་དང་། གཞང་འབྲུམ་དང་། ཕོ་བ་གྲང་ནས་ཚད་རྙིང་དུ་གྱུར་པའི་ནད་ཐབས་དང་རྣམ་པ་འདི་བརྒྱད་ཡིན་ནོ། །ཚད་པ་དང་ཕོ་བ་གྲང་བའི་ཚད་རྙིང་དུ་འཁྲུ་བའི་ནད་ཐབས་བཤད་པའི་ལེའུ་བརྒྱད་པ་རྫོགས་སོ།། །།
[123a.5]གཅིན་འགགས་པ་དང་གཅིན་སྙི་བ་ཟ་གུའི་ནད་དམིགས་བསྟན་པའི་ལེའུ་དགུ་པ་བཤད་པར་བྱའོ། །དེ་ལ་ལྒང་པ་དང་ལྒང་པའི་མགོ་དང་། ཕོ་མཚན་དང་རྐེད་པ་དང་། ཕོ་མཚན་གྱི་འབྲས་བུ་གཉིས་དང་། གཞང་དང་འདི་རྣམས་ནི་གཞང་གི་རུས་པའི་ནང་དུ་བསྟན་ཅིང་གཅིག་
[123a.6]ཏུ་འབྲེལ་པར་བཤད་དོ། །ལྒང་པ་དེ་ཁ་སྦུབ་ཏུ་ཐུར་དུ་བལྟས་ཀྱང་། ལྒང་པ་དེའི་རྩའི་སྦུ་གུའི་ཁ་གཡས་གཡོན་ནས། གཅིན་གྱི་རྒྱུན་ཕྲེའུ་རྒྱུན་མི་འཆད་པར་ཟག་པས་ལྒང་པའི་ནད་དུ་འགག་པར་བྱེད་དོ། །གཅིན་རྩ་སྒོ་ནས་རྒྱུ་སྟེ་ལྒང་པར་ཞུགས་ཤིང་སྩོགས་པ་དེ་ལས་གཅིན་
[123a.7]ནད་ཆུས་བཀག་པའི་ནད་དང་ཟ་གུའི་ནད་སྤྱིར་སྣ་ཉི་ཤུར་འགྱུར་རོ། །གཅིན་སྣོད་ལྒང་པ་དེ་ཡང་སྲོག་གི་གནད་ལ་བརྟེན་པས་ནད་ཆེ་སྟེ། དེ་ལ་རླུང་ནད་ལས་གྱུར་ཏེ་ཆུས་འགགས་ན་ལྒང་པ་དང་ཆུ་སོ་གཡས་གཡོན་དང་། ཕོ་མཚན་འདི་རྣམས་རབ་ཏུ་ན་སྟེ་གཅིན་འགགས་ནས། གཅིན་ཅུང་
[123b]
[123b.1]ཟད་ཅིག་ཡང་དང་ཡང་སྲི་ཞིང་འབྱུང་ངོ་། །མཁྲིས་པའི་ནད་ལས་གྱུར་ཏེ་གཅིན་འགགས་ན་གཅིན་གྱི་མདོག་སེར་རམ་དམར་ལ་ཚ་ཞིང་ནའོ། །བད་ཀན་ལས་གྱུར་ཏེ་གཅིན་འགགས་པ་ནི་ལྒང་པ་དང་ཕོ་མཚན་ལྕི་བར་འགྱུར་ལ་སྐྲངས། གཅིན་གར་ལ་སྦྱིན་བག་ནལ་ནལ་པོ་
[123b.2]ཞིག་དལ་གྱིས་འབྱུང་སྟེ་ཐོགས་ཤིང་སྲི་བའི་ཚུལ་དུ་འོང་ངོ་། །འདུས་པའི་ནད་ལས་ཀྱང་གྱུར་ཏེ་གཅིན་འགགས་ན་ནད་ཐབས་གོང་མ་སྣ་གསུམ་ལྟར་སྣང་ན་ཡང་ཆུ་སྲི་བར་བྱེད་དོ། །དེ་ལ་ཆུ་སོར་རྡེའུ་ཆགས་པའི་ཚུལ་དང་ནད་ཐབས་ནི་ནམ་ལྒང་བའི་ཁ་རླུང་གིས་ཆོད་པ་དང་། ཆུ་སོ་
[123b.3]ན་གཅིན་ནམ་མཁྲིས་པ་འམ། བད་ཀན་ནམ་ཁུ་ཆུ་གང་ཡོད་པ་དེ་སྐམས་པར་བྱས་ནས་དེ་ལས་རྡེའུ་ཆགས་ཏེ། བགས་ཀྱིས་རྡེའུ་ནད་དཀྱེལ་དུ་སྐྱེས་པ་ནི་དཔེར་ན་གླང་གི་གི་ཝང་ཆགས་ཏེ་ཆེར་སྐྱེས་པ་དང་འདྲའོ། །ཆུ་སོར་རྡེའུ་ཆགས་པར་གྱུར་ན་ནད་ཀྱིས་འདེབས་པའི་ནད་ཐབས་ཀྱི་
[123b.4]ཚུལ་ནི་ལྒང་པ་སྦོ། ལྒང་པའི་དྲུང་དང་ཉེན་ཀོར་ཀུན་ན། ལྒང་པ་དང་གཅིན་དབྲེ་ལ་མནམ། གཅིན་འགགས། རིམས་ཀྱིས་འདེབས། ཁ་ཟས་ཡི་ག་འཆུ། ལྟེ་བ་དང་། ཕོ་མཚན་གྱི་འབྲས་བུའི་སྲུབས་ཐོག་ཐག་དང་། ལྒང་པ་ཆུ་སོའི་ཀླད་འདི་རྣམས་སུ་ཟུག་ཅིང་ན།
[123b.5]གཅིན་སྲི་ཞིང་འབྱུང་བའི་ཚེ་གཅིན་གྱི་སྦུ་གུ་སུབས་ཤིང་འགགས་པས་གཅིན་འབྱུང་བའི་ཚེ། གཅིན་གྱི་རྒྱུན་ཞིག་སྟེ་ཐིགས་པ་བྲུལ་བྲུལ་པོར་འབྱུང་། གཅིན་དེ་ལྟ་བུ་ཕྱིན་ན་གདོད་བདེའོ། །གཅིན་འབྱུང་བའི་མདོག་ནི་བ་ལང་གི་ཚིལ་འདྲ་བར་སྣང་ངོ་། །དེ་ལྟ་བུ་ལ་རེས་འགའ་
[123b.6]ལུས་འགུལ་ཞིང་བསྐྱོད་པ་ལྟ་བུ་བྱས་པས་ལྒང་པ་དང་ཆུ་སོའི་ནང་འགགས་ཏེ་སྣད་ན་རབ་ཏུ་ན་ཞིང་མི་བདེའོ། །ནད་འདི་ལྟ་བུ་ནི་ཆུ་སོར་རྡེའུ་ཆགས་པའི་སྤྱིའི་ནད་ཐབས་ལྔར་འབྱུང་བ་ཡིན་ནོ། །དེ་ལ་རླུང་ནད་ལས་རྡེའུར་ཆགས་པའི་ནད་ཐབས་ནི། ནད་ཚབས་རབ་ཏུ་ཆེ་ལ་སོ་
[123b.7]འཐམས་པར་བསྡམས། ལུས་འདར། ཕོ་མཚན་ནས་ཟིན་ཏེ། ལག་པས་ཉེད། ལྟེ་བར་ཟུག་ཅིང་ན། རབ་ཏུ་མཁུན་ཅིང་འགགས་ཏེ་འོད་དུ་མི་རུང་བའི་ཚེ། འཕྱེན་དང་བཤང་བར་བཅས་ཏེ་འབྱུང་། གཅིན་ནི་ཐིགས་པར་ཉུང་ཤས་ཉུང་ཤས་ཡང་དང་ཡང་འོང་། ཆུ་སོའི་
[124a]
[124a.1]ནང་ན་རྡེའུ་ཡོད་པ་ནི་གནག་ཅིང་རྩུབ་སྟེ། ཉམས་ལ་ཆུ་སོའི་ནང་ན་ཚེར་མ་བསགས་པ་གང་བ་སྙམ་བྱེད། མཁྲིས་པ་ལས་རྡེའུར་ཆགས་པའི་ནད་ཐབས་ནི་མཁྲིས་པ་ཚ་བ་དྲོད་ཀྱིས་ལྒང་པ་དེ་བཙོས་པ་བཞིན་དུ་ཚ། རྡེའུའི་དབྱིབས་ནི་ག་བོའི་འབྲས་བུའི་རུས་
[124a.2]པ་འདྲ། མདོག་ནི་དམར་ཞིང་སེར་ལ་རྩ་གནག་གོ། །ལྒང་པའི་ནང་དུ་ཟུག་ཅིང་ནའོ། །བད་ཀན་གྱི་ནད་ལ་རྡེའུར་ཆགས་ན་རྡེའུ་བསིལ་ཞིང་ལྕི་ལ་བོངས་ཆེ་འཇམ། རྡེའུའི་མདོག་ནི་སྦྲང་རྩི་ལྟ་བུའམ་དཀར་པོར་འདུག་གོ། །རྡེའུའི་ནད་འདི་རྣམས་ལྟ་བུ་ནི་བྱིས་པ་ཆུང་ངུ་
[124a.3]ལྟ་བུ་ལ་ཕལ་ཆེར་འབྱུང་བར་འགྱུར་ཏེ། ལུས་དང་ཤ་ཆུང་བས་རྡེའུ་ཡང་མི་ཆེའོ། །རྡེའུ་ནད་འདི་ལྟ་བུ་ལ་དྲལ་ཞིང་རྡེའུ་འབྱིན་པའི་ཚེ་བདེ་བར་འཚོ་བར་འགྱུར་རོ། །མི་ཆེན་པོ་ལྟ་བུ་ལ་ཆུ་སོར་རྡེའུ་ཆགས་པའི་ནད་ནི་ཁུ་བ་ལས་གྱུར་ཏེ། དེ་ཡང་ཁུ་བ་གནས་འཕགས་ལ་ཕྱིར་མ་
[124a.4]བྱུང་མ་བཏང་སྟེ། ཕོ་མཚན་གྱི་འབྲས་བུའི་བར་དུ་རླུང་གིས་བསྐམས་ཏེ། ཁུ་བ་བསྡུས་པར་གྱུར་པ་དེ་ནི་ཁུ་བ་ལས་རྡེའུར་ཆགས་པ་ཞེས་བྱའོ། །དེའི་ནད་ཐབས་ནི་ལྒང་པ་དང་ཆུ་སོར་ཟུག་ཅིང་ན། གཅིན་འགགས། ཕོ་མཚན་གྱི་འབྲས་བུ་སྐྲང་ངོ་། །ཁུ་བ་ལས་རྡེའུ་ཆགས་
[124a.5]མ་ཐག་ཏུ་ཁུ་བ་ཞུ་སྟེ། སླ་མོར་འགྱུར། ན་ཞིང་ཟུག་པའི་ཚེ་རྡེའུ་ཆགས་པ་དེར་ལག་གིས་མནམ་ཤིང་མཉེས་ན་རྡོབ་བཞིན་དུ་རབ་ཏུ་སྲ་ཞིང་མཁྲང་ངོ་། །ཁུ་བ་ལས་དེ་ལྟར་རྡེའུ་ཆགས་པ་དེ་ཡང་རླུང་གིས་ཕྱེ་མར་དཀྲུགས་ནས་ཞིབ་མོ་དེ་གཅིན་དང་ལྷན་ཅིག་ཐུར་དུ་ཐ་མལ་པར་འབྱུང་བ་ཡང་
[124a.6]ཡོད་དེ། དེ་ནི་ཚུལ་བཞིན་འབྱུང་བ་ཞེས་བྱའོ། །དེ་ལ་རྡེའུ་ཕྱེ་མར་མི་འཁྲུགས་པ་ནི་གཅིན་འགག་པར་བྱེད་དེ། དེ་ཡང་ལྒང་པའི་ཁ་འགགས་ནས་ན་ཞིང་གཅིན་འགགས་ཏེ་འོང་དུ་མི་རུང་བར་བྱེད་དོ། །དེ་ལྟར་ཆུ་སོ་ན་རྡེའུ་ཆགས་པ་དེས་ནལ་གཡའ་བར་བྱེད་དོ། །གལ་ཏེ་རླུང་
[124a.7]ནད་ཀྱིས་ལྒང་པ་དེ་རང་གི་གནས་ནས་རབ་ཏུ་སྦགས་ཏེ་བསྐྱོད་ནས་ལྒང་པ་དེ་རྒྱས་ཤིང་གནག་སྟེ་ཆེ་ཞིང་སྦོམ་དུ་གྱུར་ནས། ལྒང་པ་རྒྱས་ཏེ་ལོག་པར་འདུག་པར་གྱུར་ན་ན་ཚ་གཡོ་ཞིང་འཕར། གཅུས་པ་སྙམ་བྱེད། གཅིན་ཡང་འགགས་ཏེ་ཐིགས་པ་ཐིགས་ཙམ་དུ་འོང་སྟེ། དེ་ལྟ་བུ་
[124b]
[124b.1]ལ་ལྒང་པ་བཙིར་ཏེ་གཅིན་ཕྱུང་ཤིག །དེ་བས་ན་གོང་མ་ལྟར་ལྒང་པའི་ཁ་རླུང་གིས་ཆོད་དེ་འགགས་པ་དང་། ལྒང་པ་ལོག་པ་འདི་རྣམ་གཉིས་ནི་རླུང་ལས་གྱུར་པའི་ལྒང་པའི་ནད་ཅེས་བྱ་སྟེ། གསོ་དཀའ་བ་དང་། གསོ་རབ་ཏུ་དཀའ་བ་ཞེས་བྱའོ། །ཡང་གཞང་དང་ལྒང་པ་གཉིས་
[124b.2]ཀྱི་བར་ན་རླུང་རབ་ཏུ་མཐུ་ཆེ་བ་ཞིག་ཡོད་པ་དེ་རྡོ་བའི་གཏུན་བུ་དང་འདྲ་བར་སྲ་ཞིང་སྟུག་པ་ཅིག་ཡོད་པ་དེས་ལྒང་པ་མདུད་པ་བོར་ཏེ། མི་གཡོ་བ་མཐོན་པོར་འཇོག་པར་བྱེད་དེ་དེ་ལྟར་གྱུར་ན་ཆུ་སོའི་ཐད་ཀར་སྦོས་ཤིང་བཤང་གཅི་གཉི་ག་རླུང་གིས་ཐོགས་ཏེ་འགགས་པར་བྱེད་དོ། །
[124b.3]ནད་འདི་ནི་རྡོ་བའི་གཏུན་བུ་ལྟ་བུའི་རླུང་ནད་ཀྱིས་གཅིན་འགགས་པ་ཞེས་བྱའོ། །ཡང་ཆུ་འགགས་པའི་ནད་དང་། རླུང་ནད་ཀྱིས་འཁྱིལ་བར་བྱེད་པ་ཞེས་བྱ་བ་ཞིག་ཡོད་པ་དེས་ནི་ལྒང་པ་རབ་ཏུ་ན་བར་བྱེད་ཅིང་གཅིན་གྱི་ནང་དུ་རླུང་དེ་ཞུགས་ནས་གཅིན་འཁྱིལ་ཞིང་འཁོར། རེམ་རེམ་
[124b.4]པོར་གྱུར། གཅུ་བ་སྙམ་བྱེད། ལྕི། གཅིན་སྲི་སྟེ་ཉུང་ཤས་ཙམ་འབྱུང་། ཡང་ན་གཅིན་དང་བཤང་བ་གཉིས་ལྷན་ཅིག་ཏུ་འབྱུང་བར་བྱེད་དེ། ནད་འདི་ནི་རླུང་ནད་ཀྱིས་འཁྱིལ་བར་བྱེད་པའི་ཆུས་འགགས་པ་ཞེས་བྱའོ། །ཡང་ཆུས་འགགས་པའི་ནད་རྣམ་གཅིག་ནི་རླུང་
[124b.5]ནད་ལྟ་བུའི་ནད་གཞི་མེད་པར་གཅིན་རང་འགགས་ཏེ་ཡུན་རིང་དུ་མ་བྱུང་ངམ། ཡང་ན་ཆུ་ཅུང་ཟད་འགགས་པ་ལས་མཇུག་ཏུ་གཅིན་འབྱུང་བར་གྱུར་ན། དེ་ནི་ནད་མི་ཆེ་བ་ཞེས་བྱ་བ་ཡིན་ནོ། །ཡང་ལྟོ་བར་གཅིན་འགགས་པ་ཞེས་བྱ་བའི་ནད་ཡོད་དེ། དེ་ནི་གཅིན་སྙོམས་པ་
[124b.6]ལས་རྣགས་ཏེ་འགགས་པ་ལས། ལྟེ་བའི་འོག་ལྟོ་བའི་ནང་ལྒང་པར་གཅིན་གྱིས་གང་བ་དང་། དེའི་ཚེ་རླུང་གིས་ཐོགས་ནས་བསྡུས་ཏེ་སྐམས་པ་དང་། དེའི་ཚེ་རབ་ཏུ་ན། ཆུ་སོར་སྦོ། ཁ་ཟས་མི་འཇུ། བཤང་གཅི་གཉིས་ཀ་འགགས་སོ། །ཆུས་འགགས་པའི་
[124b.7]ནད་འདི་ནི་ལྟོ་བར་གཅིན་རྣགས་པའི་ནད་ཅེས་བྱའོ། །ཡང་ཆུས་འགགས་པའི་ནད་རྣམ་གཅིག་ནི་གཅིན་འབྱུང་བའི་སྦུ་གུ་འཆུས་ཤིང་ལོག་གམ། ཡང་ན་གཅིན་སྣོད་ལྒང་པའམ། ཡང་ན་གཅིན་འབྱུང་བའི་སྦུ་གུའི་ནང་ངམ། ཡང་ན་ཕོ་མཚན་གྱི་ནང་རླུང་གིས་འགགས་ན་
[125a]
[125a.1]གཅིན་ཉུང་ཤས་སམ་སྲི་ཞིང་འབྱུང་བའི་རྗེས་ལ་ན་ཡང་རུང་མི་ན་ཡང་རུང་། གཅིན་འགག་ཅིང་སྐབས་སྐབས་སུ་འབྱུང་ལ་ལྷག་མ་ཡང་ལུས་ཏེ་ཆུས་འགགས་པའི་ནད་འདི་ནི་ཕོ་མཚན་ལྕི་བར་བྱེད་པ་ཞེས་བྱའོ། །ཡང་ཆུས་འགགས་པའི་ནད། གཅིན་གྱི་
[125a.2]མདུད་པ་ཞེས་བྱ་བ་ཞིག་ཡོད་པ་དེའི་ནད་ཐབས་ནི་ལྒང་པའི་ཁའི་ནང་ཟླུམ་པོ་ཆུང་ངུ་སྲ་བ་ཞིག་ཏུ་འཕྲལ་དུ་གྱུར་པ་དང་། ཆུ་སོར་རྡེའུ་ཆགས་པའི་ནད་དང་འདྲ་སྟེ། ནད་ཚབས་ཆེ་ལ་གཅིན་གྱི་ཕུར་མདུད་པ་བཅས་ཏེ་ནད་འདི་ནི་གཅིན་གྱི་མདུད་པ་ཞེས་བྱའོ། །ཡང་གཅིན་སྙོམས་པ་ལས་གཅིན་
[125a.3]མ་གཅིས་པར། བུད་མེད་ལ་ཉལ་པོ་བྱས་ནས་དེའི་རྗེས་ལ་གཅིན་གཅིས་པ་ནི་ཡང་ན་ནི་གཅིན་སྔར་འབྱུང་། ཡང་ན་ནི་ཁུ་བ་སྔར་འབྱུང་སྟེ་དེ་ནི་གཅིན་དང་ཁུ་བ་འདྲེས་པ་ཞེས་བྱ་བ་ཡིན་ནོ། །ཡང་ན་བཤང་བ་སྲི་ཞིང་འགགས། བད་ཀན་གྱིས་ཆུ་སྲི་ཞིང་འགགས་པར་འགྱུར། ནད་
[125a.4]ཐབས་ནི་ལུས་ཀྱི་ཁོང་རྩུབ་ལ་ཉམ་ཆུང་བས་རླུང་ནད་སྐྱེས་ཏེ། བཤང་བ་ཐུར་དུ་མི་འབྱུང་ཞིང་ནམ་སྲི་ལ་འགགས་པའི་ཚེ་ན། གཅིན་འབྱུང་བའི་སྦུ་གུའི་ནང་དུ་བཤང་བ་དེ་སོང་སྟེ་འདྲེས་པས་གཅིན་འབྱུང་བའི་དྲི་མ་མནམ་པོར་བཤང་བའི་དྲི་དང་འདྲ་བར་བྱུང་བ་དེ་ནི་བཤང་བ་འགགས་པའི་
[125a.5]གཅིན་ནད་ཅེས་བྱའོ། །ཡང་གཅིན་ནད་རྣམ་པ་གཅིག་ནི་ལུས་ཀྱིས་ལས་དྲག་ཤུལ་ལ་སོགས་པ་ལྟ་བུ་བྱས་པ་དང་། ཁ་ཟས་རོ་ཚ་བ་དང་། དྲོད་ཆེ་བ་ལྟ་བུའི་བག་ཟོས་པ་དང་། ལམ་བགྲོད་དེ་ཆད་ཅིང་ཉི་ཚན་ལ་སོགས་པས་གདུངས་པ་དང་། མཁྲིས་པའི་ནད་ཆེར་སྐྱེས་ལ་དེའི་སྟེང་
[125a.6]དུ་རླུང་ནད་ཀྱིས་ལྒང་པ་དང་། ལྒང་པའི་ཆུ་སོ་གཡས་གཡོན་གྱི་ནང་ན་ཞུགས་ན་ན་ཞིང་ཚ་བར་འགྱུར། གཅིན་གཅིས་ན་མདོག་ཡང་ན་སེར། ཡང་ན་ཁྲག་འདྲེས། ཡང་ན་ཁྲག་དངོས་སུ་འབྱུང་སྟེ། འདི་འདྲ་བའི་གཅིན་ཚན་པོ་ཉུང་ཤས་སུ་སྲི་ཞིང་འབྱུང་ངོ་། །དེ་ནི་ཚ་བ་
[125a.7]དང་རླུང་ལས་གྱུར་པའི་གཅིན་སྲི་བའི་ནད་ཅེས་བྱའོ། །ཡང་ལུས་ཀྱི་ཁོང་རྩུབ་ལ་ཁོང་དུབ། རྨྱ་བར་གྱུར་པ་དེས་ལྒང་པའི་དྲུང་ན་མཁྲིས་པའི་ནད་ཚ་བ་དང་། རླུང་ཡོད་པ་གཉིས་གཉིས་གཅིན་བསྐམས་ན། ཟད་པ་དང་ན་ཞིང་ཚ་བ་ལ་སོགས་པ་དང་སྲི་བར་འགྱུར་ཏེ།
[125b]
[125b.1]ནད་འདི་ཡང་ལྷག་མ་དང་གཅིག་གོ། །ཡང་ན་ཆུ་སྲི་བའི་ནད་སྣ་གཅིག་ནི་མཁྲིས་པ་དང་བད་ཀན་གཉིས་ཀྱི་ནད་ལྒང་པའི་ས་ན་ཡོད་པའི་སྟེང་དུ། གལ་ཏེ་རླུང་ནད་ཀྱིས་ཀྱང་བསྣན་ན་གཅིན་འགག་པར་འགྱུར་རོ། །གཅིན་ཅུང་ཟད་འབྱུང་བའི་ཁ་དོག་ཀྱང་སེར། དམར། དཀར་
[125b.2]བར་གར་བོ་འབྱུང་ལ་ཚ་བར་འོང་། ཡང་ན་གི་ཝང་གི་ཁ་དོག་འདྲ། ཡང་ན་དུང་ཕྱེ་མར་ཞིབ་ཏུ་བཏགས་བཏགས་པ་འདྲ་བ་སྐོམ་པོ་འབྱུང་། ཡང་ན་ནག་པོ་དང་དཀར་པོ་དང་དམར་པོ་གསུམ་འདྲེས་པའི་ཁ་དོག་འདི་ལྟ་བུའི་གཅིན་འབྱུང་སྟེ། འདི་ནི་གཅིན་ཉམས་པའི་ནད་ཅེས་བྱའོ། །
[125b.3]ཆུས་འགགས་པའི་ནད་དམིགས་ཞིབ་ཏུ་བསྟན་པའི་ལེའུ་སྟེ་དགུ་པ་རྫོགས་སོ།། །།གཅིན་འགགས་པ་དང་གཅིན་སྙི་བ་ཟ་གུའི་ནད་དམིགས་བསྟན་པའི་ལེའུ་བཅུ་པ་བཤད་པར་བྱའོ། །དེ་ལ་གཅིན་སྲི་ལ་ཟ་གུར་འགྱུར་བའི་ནད་ནི་རྣམ་པ་གཉིས་ཡོད་དེ། དེ་ལ་
[125b.4]བད་ཀན་ལས་ནད་ཟ་གུར་གྱུར་པའི་ནད་ནི་བཅུ་ཡོད་དོ། །མཁྲིས་པ་ལས་ཟ་གུར་གྱུར་པའི་ནད་ནི་དྲུག་ཡོད་དོ། །གཅིན་སྙི་ཞིང་ཟ་གུར་གྱུར་པའི་ནད་དེ་ནི་ཁ་ཟས་བད་ཀན་དང་། ཚིལ་དང་གཅིན་དུ་འགྱུར་བ་དེ་ལྟ་བུ་ལས་ཟ་གུའི་ནད་དུ་འགྱུར་རོ། །དེ་ཡང་ཇི་ལྟ་ཞེ་ན་ཁ་ཟས་རོ་
[125b.5]མངར་བ་དང་། སྐྱུར་བ་དང་། ལན་ཚྭ་དང་། ཟས་སྣུམ་བག་དང་། འཇུ་དཀའ་ཞིང་ལྕི་བ་དང་། ཟས་འབྱིལ་བག་དང་། བསིལ་བའི་བག་དང་། འབྲུ་སར་པའི་ཆང་དང་། ཡུལ་སེར་ཆེ་བ་ནས་བྱུང་བའི་བྱ་ན་ལྟ་བུ་དང་། བུ་རམ་དང་། བུ་རམ་ཤིང་དང་། དར་བ་དང་། ཁ་ཟས་འདི་ལྟ་
[125b.6]བུའི་བག་ཟ་ཞིང་འཐུངས་པ་དང་། གནས་གཅིག་ནས་སྟན་གཅིག་གི་ཐོག་ཏུ་རྟག་པར་འདུག་པ་དང་། སྔོན་དང་མི་འདྲ་བར་མལ་མི་བདེ་བར་ལུས་མི་བདེ་བར་ཉལ་བ་དང་། འདི་རྣམས་ལྟ་བུས་ལྒང་པར་ནད་ཆགས་ཏེ་ཟ་གུར་འགྱུར་རོ། །དེ་ཡང་ཇི་ལྟ་ཞེ་ན་ཁ་ཟས་གནོད་
[125b.7]པ་དེ་ལྟ་བུ་ལ་སོགས་པ་བད་ཀན་ལ་གནོད་བར་བྱེད་དོ། །བད་ཀན་ལ་གནོད་པ་བྱས་པས་གཅིན་སྒོ་ལྒང་པའི་འཁོར་དང་ལུས་ཀྱི་ནང་གི་རུལ་བ་དང་། རྔུལ་བ་དང་། ཚིལ་དང་། བཅུད་དངས་མ་དང་། བྱ་ན་ཤ་ཟོས་པ་དང་། འདི་རྣམས་ལ་ཡང་གནོད་པ་བྱས་པ། མཁྲིས་
[126a]
[126a.1]པ་དང་ཁྲག་ལ་ཡང་གནོད་པར་བྱེད་དེ། དེ་ལྟ་བུས་བད་ཀན་དང་ལུས་ཀྱི་རུལ་བ་དང་། རྔུལ་བ་ལ་སོགས་པ་གཅིན་གྱི་གཞིར་གྱུར་པ་འདི་རྣམས་གཅིན་ཟ་གུར་འོང་བས་ཟད་པ་དང་། ལུས་ཀྱི་སྲོག་ཟུངས་བདུན་པོ་ཡང་། རླུང་གིས་ལྒང་པའི་ནང་དུ་འཁུས་
[126a.2]ཤིང་དྲངས་ཏེ་ཟད་པར་བྱེད་དོ། །ཁ་ཟས་དེ་ལྟ་བུ་ལས་གཅིན་སྙི་བ་ཟ་གུའི་ནད་དུ་གྱུར་ན་གསོར་མི་སོས་པའི་ནད་དང་། གསོར་རུང་བའི་ནད་དང་མི་ཐུལ་བ་ཙམ་དུ་འགྱུར་བར་བྱ་བ་དང་། རྣམ་པ་འདི་གསུམ་ཡོད་དོ། །དེ་ལ་གསོར་རུང་བར་བྱ་བའི་དཔྱད་དང་རྣམ་པ་གསུམ་
[126a.3]ཡོད་དེ། ལེགས་པར་མཐུན་པར་བྱ་བ་དང་མི་མཐུན་པར་བྱ་བའི་དཔྱད་དང་། ནད་དམིགས་ཆེན་པོ་ལ་དཔྱད་དུ་བྱ་བ་དང་གསོ་བའི་ཐབས་འདི་ལྟར་བྱའོ། །དེ་ལ་གཅིན་སྙི་བ་ཟ་གུ་སྤྱིའི་ནད་ཐབས་ནི་གཅིན་རབ་ཏུ་མང་ལ་དུལ་དུལ་པོར་འོང་ངོ་། །དེ་ལ་རླུང་དང་མཁྲིས་པ་དང་
[126a.4]བད་ཀན་དང་གསུམ་གྱིས་སྲོག་ཟུངས་བདུན་ལ་གནོད་པར་བྱེད་པའི་བྱེ་བྲག་དང་། རླུང་དང་མཁྲིས་པ་དང་། བད་ཀན་དང་། སྲོག་ཟུངས་བདུན་དུ་འདྲེས་པས་གཅིན་གྱི་ཁ་དོག་ལ་སོགས་པ་བརྟག་པར་བྱ་བའི་དམིགས་ནི་གཅིན་སྙི་བ་ཟ་གུའི་བྱེ་བྲག་ལས་ཤེས་པར་བྱའོ། །
[126a.5]དེ་ལ་གཅིན་མང་། གཅིན་མདོག་གསལ་ལ་དཀར། བསིལ། དྲི་མི་ཞིམ་པ་མེད་ལ་ཆུ་ལྟ་བུར་འདུག་ན། དེ་ནི་མིང་ཆུའི་ཟ་གུ་ཞེས་བྱའོ། །ཡང་ཟ་གུའི་ནད་ཐབས་རྣམ་གཅིག་ནི། ཅུང་ཟད་རྙོག་རྙོག་པའི་བག་ཡོད་ལ། འབྱིལ་བག་ཏུ་འདུག །བུ་རམ་ཤིང་གི་ཁུ་བ་
[126a.6]དང་འདྲ་བར་རོ་རབ་ཏུ་མངར་ཏེ་ནད་འདིའི་མིང་ནི་བུ་རམ་ཤིང་གི་ཁུ་བ་ལྟ་བུའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་སྐ་བར་འབྱུང་ལ། ཞག་ལོན་ན་ཡང་གར་པོར་འདུག་པ་འདི་ནི་གཅིན་གར་པོའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་
[126a.7]འབྱུང་བ་ཆང་དང་འདྲ་ལ། སྟེང་རིམ་དང་། ཞབས་ནི་གར་པོར་འདུག་སྟེ་འདི་ནི་ཆང་གི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་བ་སྤུ་འང་ལངས་ཤིང་འགྲེང་བར་འགྱུར་ལ་གཅིན་འབྱུང་བ་ཡང་འབྲས་བཏགས་པའི་ཕྱེ་བཞིན་གར་ལ་མདོག་སྐྱ་བོར་འབྱུང་བ་འདི་ནི་
[126b]
[126b.1]འབྲས་ཕྱེ་ལྟར་འབྱུང་བའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་འབྱུང་བ་ཁུ་ཆུ་དང་འདྲའམ། ཡང་ན་ཁུ་ཆུ་དང་འདྲེས་པར་འབྱུང་སྟེ། འདི་ནི་ཁུ་ཆུའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་གྱི་ནང་ན་རྡུལ་ལྟར་ཙིག་ཙིག་པོར་བྱེ་མ་ལྟ་
[126b.2]བུར་འབྱུང་སྟེ་འདི་ནི་བྱེ་མའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་བབས་ཆེར་ཡང་དང་ཡང་དུ་འབྱུང་ལ། གཅིན་རབ་ཏུ་བསིལ་ཏེ་འདི་ནི་གྲང་ཞིང་བསིལ་བའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་པ་གཅིག་ནི་གཅིན་དལ་གྱིས་གཅིན་འབྱུང་བ་དང་ཉུང་ཤས་
[126b.3]ཉུང་ཤས་སུ་གཅིན་འབྱུང་སྟེ། འདིའི་མིང་ནི་བགས་ཀྱིས་འབྱུང་བའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་འབྱུང་བའམ་གཅིན་ཟ་གུར་འབྱུང་བ་དེ་ཁ་ཆུ་བཞིན་ནལ་ནལ་པོ་འབྱིལ་དག་ཏུ་འབྱུང་བ་འདིའི་མིང་ནི་ཁ་ཆུ་ལྟར་འབྱུང་བའི་ཟ་གུ་ཞེས་བྱའོ། །ཡང་ཟ་
[126b.4]གུའི་ནད་རྣམ་གཅིག་ནི་གཅིན་གྱི་མདོག་ནས་ཚིག་འཁུས་པའི་ཚ་ཡ་བཀྵར་འདྲ་བའི་མདོག་དང་། རོ་དང་དྲི་ཡང་འདྲ་ལ་རེག་པ་ཡང་དེ་དང་འདྲ་སྟེ། འདི་ནི་ནས་ཚིག་གི་ཚ་ཡ་བཀྵ་ར་དང་འདྲ་བའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་འབྱུང་བའི་མདོག་སྔོན་པོར་འོང་སྟེ་
[126b.5]འདི་ནི་གཅིན་སྔོན་པོའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་སྣག་ཚ་བཞིན་ནག་པོར་འོང་སྟེ། འདི་ནི་ཟ་གུ་ནག་པོ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་གྱི་མདོག་སྐྱེར་བའམ། ཡུང་བའི་ཁ་དོག་བཞིན་མདོག་སེར་ལ་རབ་ཏུ་ཚ་སྟེ། ནད་དུ་བསྲེགས་
[126b.6]པ་བཞིན་དུ་འོང་སྟེ། འདི་ནི་ཟ་གུ་སེར་པོར་འོང་བ་ཞེས་བྱའོ། །ཡང་ཟ་གུའི་ནད་རྣམ་པ་གཅིག་ནི་གཅིན་གྱི་མདོག་བཙོད་ཁུ་བཞིན་དམར་པོ་མནམ་པོར་འོང་བ་འདིའི་མིང་ནི་བཙོད་ཁུ་ལྟ་བུའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་གྱི་མདོག་ཁྲག་འདྲ་བ་ཚ་བ་
[126b.7]མནམ་པོ་ལན་ཚྭ་བྲོ་བར་འབྱུང་ན་འདིའི་མིང་ནི་ཁྲག་གི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་དང་ཞག་ཏུ་འདྲེས་པའམ། ཞག་དངོས་པོ་ཡང་དང་ཡང་འབྱུང་བ་འདིའི་མིང་ནི་གཅིན་ཞག་ཏུ་འབྱུང་བའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་དང་རྐང་
[127a]
[127a.1]དུ་འདྲེས་པ་ཡང་དང་ཡང་འབྱུང་ངམ་རྐང་དངོས་སུ་ཡང་དང་ཡང་འབྱུང་བ་འདིའི་མིང་ནི་རྐང་དུ་འབྱུང་བའི་ཟ་གུ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གླང་པོ་ཆེ་སྨྱོན་པ་སྨྱོས་པ་དང་འདྲ་བར་གཅིན་གྱི་རྒྱུན་མི་དྲག་པར་དལ་བུས་རྒྱུན་མི་འཆད་པར་
[127a.2]འབྱུང་ལ། གཅིན་ནི་ཆུ་སེར་དུ་འོང་སྟེ། ཆུ་སེར་གྱི་ནང་ན་སྲུ་སྲུས་པོའམ། ཙིག་ཙིག་པོ་འབྱུང་སྟེ། འདི་ནི་གླང་པོ་ཆེ་མྱོས་པ་ལྟར་གཅིན་སྲི་བ་ཞེས་བྱའོ། །ཡང་ཟ་གུའི་ནད་རྣམ་གཅིག་ནི་གཅིན་སྦྲང་རྩི་དང་འདྲ་བར་འབྱུང་བ་འདིའི་མིང་ནི་ཟ་གུ་སྦྲང་རྩི་ལྟར་འབྱུང་བ་ཞེས་བྱ་སྟེ།
[127a.3]དེ་ལ་ཡང་རྣམ་པ་གཉིས་ཤིག་ཡོད་ཅེས་ཟེར་ཏེ། གཅིག་ནི་སྲོག་ཟུངས་བདུན་ལྟ་བུ་ཟད་པ་ལས་ཟ་གུར་འགྱུར་རོ། །ཡང་རྣམ་པ་གཅིག་ནི་རླུང་དང་མཁྲིས་པ་འམ། བད་ཀན་ལྟ་བུའི་ནད་ཀྱིས་ལྒང་པ་ནས་གཅིན་འབྱུང་བའི་སྦུ་གུ་ཁ་འགགས་སམ། ཡང་ན་རླུང་
[127a.4]གིས་འགགས་པར་གྱུར་ན་དེ་ལྟ་བུ་ལས་གཅིན་སྦྲང་རྩི་ལྟར་འབྱུང་བའི་ཟ་གུར་འགྱུར་རོ། །དེ་ལ་མཁྲིས་པའམ་རླུང་ནད་དང་། བད་ཀན་གྱི་ནད་ཀྱིས་ལྒང་པ་སྐད་ཅིག་ཏུ་སྟོང་པར་འགྱུར། སྐད་ཅིག་ཅིང་གཅིན་གྱིས་གང་བར་འགྱུར་ཏེ། ནད་ཐབས་འདི་ལྟ་བུ་ནི་གསོ་དཀའ་
[127a.5]བ་ཡིན་ཏེ། དཔྱད་མི་བྱེད་པར་ཡུན་རིང་པོར་ཡལ་བར་བོར་ན་ནད་འདི་ལྟ་བུ་ཀུན་ནི་ཟ་གུའི་ནང་གཅིན་སྦྲང་རྩི་ལྟ་བུར་འབྱུང་བར་འགྱུར་རོ། །གཅིན་ཟ་གུ་སྦྲང་རྩི་ལྟར་འབྱུང་ཞེས་བྱ་བ་ནི་སྦྲང་རྩི་ལྟར་འབྱུང་བ་ཕལ་ཆེར་རོ་མངར་པོར་འབྱུང་བའོ། །དེ་བས་ན་གཅིན་གྱི་རོ་མངར་
[127a.6]པོར་འབྱུང་བ་ཀུན་ནི་ལུས་ཀྱི་རོ་ཡང་མངར་པོར་འགྱུར་བ་ཡིན་ནོ། །གཅིན་ཟ་གུ་མངར་པོ་སྦྲང་རྩི་ལྟར་འགྱུར་ན་དེའི་ནད་བླ་ཐབས་ཀྱང་ཁ་ཟས་མི་འཇུ། ཟས་ཡི་གར་མི་འོང་། སློན། གཉིད་ཆེ། ལུད་པས་བཀར། ཆམ་པས་འདེབས་ཏེ་ནད་འདི་ལྟ་བུ་ནི་བད་ཀན་ལས་གྱུར་པའི་
[127a.7]ཟ་གུའི་ནད་ཐབས་ཞེས་བྱའོ། །མཁྲིས་པ་ལས་གྱུར་པའི་ནད་ཐབས་ནི་ཕོ་མཚན་གྱི་འབྲས་བུར་ཟུག་ཅིང་ན་ལ། གཞིགས་ཤིང་བཅད་པ་སྙམ་བྱེད། རིམས་ཀྱིས་འདེབས། ཚ་ལ་སྐོམ་དད་ཆེ། སྐྱུར། བརྒྱལ། ཚད་པར་འཁྲུ་བ་འདི་ལྟ་བུ་ནི་མཁྲིས་པ་ལས་
[127b]
[127b.1]གྱུར་པའི་ཟ་གུའི་ནད་ཐབས་ཡིན་ནོ། །རླུང་ལས་གྱུར་པའི་ཟ་གུའི་ནད་ཐབས་ནི་བཤང་བ་སྲི་སྟེ་འོང་དུ་མི་རུང་། ལུས་འདར། སྙིང་ན། ཁ་ཟས་མིང་གི་འདོད་པ་སྙམ་བྱེད་ལ་ཟུག་ཅིང་ན། གཉིད་མེད། ཁ་སྐམ། ལུད་པས་བཀར། དབུགས་མི་བདེ་བ་འདི་ལྟར་འགྱུར་
[127b.2]རོ། །དེ་ལྟར་གཅིན་སྙི་སྟེ་ཟ་གུའི་ནད་ཀྱིས་བཏབ་པ་ལས། སྨན་དཔྱད་ཀྱིས་མི་གསོ་བར་ཡལ་བར་བོར་ན་འབྲས་དང་། ཕོལ་མིག་དང་། མེ་དབལ་དང་། འབྲུམ་བུ་དང་། ཤུར་བུ་ལ་སོགས་པ་ནད་ཀྱི་ཉེན་རྣམ་པ་བཅུར་འགྱུར་རོ། །འབྲས་དང་འབྲུམ་བུ་ལ་སོགས་པ་ནད་ཀྱིས་
[127b.3]རྐང་ལག་གི་རུས་ཚིགས་དང་སྲོག་གི་གནད་དང་ཤ་གནད་གར་ཆེའོ་ཅོག་གི་དམིགས་དམིགས་སུ་འབྱུང་བར་འགྱུར་རོ། །དེ་ལ་འབྲས་ནད་དེབ་ཚེ་ཆེན་པོ་ཙམ་ཁམ་ཕོར་ཤ་རའི་དབྱིབས་ལྟ་བུའི་ནད་འབྲས་འབྱུང་བའི་དབྱིབས་ནི། མཐའ་ནི་མཐོལ་དབུས་ནི་དམའ། མདོག་ནི་རྩ་
[127b.4]གནག །ནང་རུལ་ན་སྟེ། དབྱིབས་ནི་འབྲས་ནད་ཁམ་པོར་ཤར་བ་འདྲ་བས་ན་དེའི་ཕྱིར་འབྲས་ནད་ཁམ་པོར་ཤར་བ་ལྟ་བུ་ཞེས་བྱའོ། །དེ་ལས་འབྲས་ནད་རུས་སྦལ་ལྟ་བུའི་དབྱིབས་ཞེས་བྱ་བ་ནི། ནང་དུ་ཟུག་ཅིང་ན་ལ་ཉེན་ཀོར་ཆེར་མཆེད་ཅིང་། རུས་སྦལ་གྱི་རྒྱབ་འདྲ་བར་སྒུར་
[127b.5]སྒུར་པོ་འཇམ་པོ་སྐྲངས་པ་འདི་ནི་རུས་སྦལ་ལྟ་བུའི་འབྲས་ནད་ཅེས་བྱའོ། །ཡང་འབྲས་བྱེར་བ་རྒྱ་མོ་ལྟ་བུ་ཞེས་བྱ་བ་ནི། རྩ་རྣམས་ནི་སྲ་ཞིང་རེངས་པར་འགྱུར། འབྲུམ་བུ་རྒྱ་མོ་ལྟ་བུ་འབྱུང་བ་ནི་འཇམ་ལ་ན་ཞིང་ཟུག །འབྲུམ་བུ་ཕྲ་མོ་མང་པོ་ཤ་སྟག་འབྱུང་སྟེ། རྡོལ་ཅིང་
[127b.6]ཟག་ལ་ལུས་ཀུན་ལ་ཁྱབ་པར་བྱེད་དེ། འདི་ནི་རྒྱ་མོ་ལྟ་བུའི་འབྲས་མཆེད་པ་ཞེས་བྱའོ། །བི་ན་ཏ་ཞེས་བྱ་བ་ནི། ལྟོའམ་རྒྱབ་ཏུ་འབྲས་འདྲ་བ་ཆེ་ལ་མདོག་སྔོ་བ་ཞིག་བྱུང་ནས། ཁོང་དུ་ཟུག་ཅིང་ན། རུལ་ཞིང་རྣགས་པར་བྱེད་དེ་འབྲས་འདྲ་བར་འབྱུང་བ་དེ་འབུར་པོ་མཐོན་པོར་
[127b.7]མི་འབྱུང་སྟེ། འདི་ནི་ཉེ་འཁོར་ཆེར་ཁེབས་པ་སྟེ། འབྲས་ནད་ལུས་སྒུར་པོར་བྱེད་པའི་ནད་བྱིན་ཏ་ཞེས་བྱའོ། །མེ་དབལ་ཕྲ་མོ་ནི་འབྲུམ་བུ་ཐོག་མ་བྱུང་བ་ན། ཤ་མཐོང་གི་པགས་པ་ཚིག་པར་བྱེད་ལ། ལུས་ཀུན་ལ་མི་བཟད་ཅིང་རབ་ཏུ་ཚ་བའི་མེ་དབལ་གྱིས་ཁྱབ་ཅིང་
[128a]
[128a.1]མཆེད། མེ་དབལ་གྱི་འབྲུམ་བུ་བྱུང་བའི་མདོག་ནི་དམར་ལ་གནག །ལུས་ཚ་ཞིང་མྱོས། རིམས་ཀྱིས་འདེབས་ཏེ། ནད་ཐབས་འདི་ལྟ་བུ་ནི་མེ་དབལ་ཕྲ་མོ་ཞེས་བྱའོ། །འབྲུམ་བུའི་དབྱིབས་དང་། ཚད་སྲན་ཆུང་ལྟ་བུ་ཞེས་བྱ་བ་ནི། འབྲུམ་བུ་ཆེ་ཆུང་
[128a.2]གི་ཚད་དང་དབྱིབས་སྲན་ཆུང་དང་འདྲ་བས་ན་དེ་ནི་འབྲུམ་བུ་སྲན་ཆུང་ལྟ་བུ་ཞེས་བྱའོ། །དེ་ལ་འབྲུམ་ཕྲན་ཤུར་བུའི་དབྱིབས་དང་ཚད་འབྲུམ་ཕྲན་ཡུངས་ཀར་ལྟ་བུ་ཞེས་བྱ་བ་ནི་འབྲུམ་ཕྲན་ཤུར་བུར་བྱུང་བའི་དབྱིབས་དང་ཚད་ཡུངས་ཀར་ཙམ་དུ་འབྱུང་སྟེ། ནད་ཚབས་ཀྱང་ཆེ་ལ་མྱུར་
[128a.3]དུ་སྨིན་པར་འགྱུར། འབྲུམ་ཕྲན་ཡུངས་ཀར་ལྟ་བུ་བྱུང་ན་དེའི་འཁོར་ཡང་འབྲུམ་ཕྲན་ཡུངས་ཀར་ལྟ་བུས་གང་ཞིང་འཁོར་བར་འབྱུང་སྟེ། འདི་ནི་འབྲུམ་ཕྲན་ཤུར་བུ་ཡུངས་ཀར་ལྟ་བུ་ཞེས་བྱའོ། །དེ་ལ་འབྲུམ་ཕྲན་བུ་དང་བཅས་པའི་འབྱུང་བ་ནི་འབྲུམ་བུ་ཆེན་པོ་མང་དུ་འབྱུང་
[128a.4]བའི་ཉེན་ཀོར་ན་འབྲུམ་བུ་རབ་ཏུ་ཕྲ་མོས་གང་བར་འབྱུང་བ་དེ་ནི་འབྲུམ་ཕྲན་བུ་དང་བཅས་པ་ཞེས་བྱའོ། །དེ་ལ་ལྡུམ་བུ་བི་ད་རིའི་རྩ་བ་དང་འདྲ་བ་ཞེས་བྱ་བ་ནི། ཐོར་བུ་བྱུང་བའི་དབྱིབས་ནི་མཐོ་ཞིང་རིང་བ་མྱུག་མྱུག་པོ་ལྡུམ་བུ་བི་ད་རི་དང་ལ་ཕུག་གི་དབྱིབས་དང་འདྲ་ལ་སྲ་སྟེ་འདི་
[128a.5]ནི་ལྡུམ་བུ་བི་ད་ར་ཞེས་བྱའོ། །དེ་ལ་ཁོང་འབྲས་བྱུང་བ་ནི་ནད་དཀྱེལ་ཆེ་སྟེ། ཕྱི་ནས་ལོགས་ཤིག་ཏུ་ཞིབ་ཏུ་བསྟན་ཏོ། །དེ་ལྟར་ནད་རྣམ་པ་དེ་བཅུའི་ནང་ན་དང་པོ་གསུམ་དང་འབྲུམ་བུ་དང་བཅས་པ་ཞེས་བྱ་བ་དང་། ལྡུམ་བུ་བི་ད་རིའི་རྩ་བ་འདྲ་བའི་འབྲུམ་བུ་དང་། འདི་རྣམ་པ་ལྔ་
[128a.6]ནི་ཚིལ་ཆེས་པ་ལས་གྱུར་ཏེ་ནད་དཀྱེལ་ཆེ་བས་བཟོད་པར་ཡང་དཀའ་ལ་དཔྱད་ཀྱང་དཀའོ། །མཁྲིས་པའི་ནད་ཆེ་བ་ལས་ནད་དེ་ལྟ་བུ་བྱུང་བ་ནི་ནད་ཚབས་ཀྱང་མི་ཆེ་སྟེ། བརྣགས་སུ་རུང་ལ་གསོ་སླའོ། །ཚིལ་ཆུང་བ་ལས་ཀྱང་ནད་འདི་ལྟ་བུ་འབྱུང་བ་ཡང་ཡོད་དེ། །ཡང་འབྲས་
[128a.7]དང་ཕོལ་མིག་དང་འབྲུམ་བུ་དེ་ལྟ་བུ་ནི་གཅིན་སྙི་སྟེ་ཟ་གུར་གྱུར་པ་དེའི་སྟེང་དུ་རླུང་དང་མཁྲིས་པ་དང་བད་ཀན་གྱི་ནད་གང་ཆེ་བར་གྱུར་པ་ལས་དེ་བཞིན་དུ་འབྲས་དང་འབྲུམ་བུ་དང་མེ་དབལ་ལ་སོགས་པ་སྣ་ཚོགས་པ་འབྱུང་བར་འགྱུར་རོ། །ལ་ལ་ནི་གཅིན་སྙི་བ་ཟ་གུའི་ནད་མེད་ཀྱང་ཚིལ་
[128b]
[128b.1]ཆེ་བ་ལས་རླུང་ངམ་མཁྲིས་པ་ལ་སོགས་པའི་ནད་ཞུགས་པར་གྱུར། འབྲས་དང་འབྲུམ་བུ་ལ་སོགས་པའི་ནད་དེ་ལྟ་བུར་འགྱུར་བ་ཡང་ཡོད་ན་འབྲས་དང་འབྲུམ་བུ་ལ་སོགས་པའི་ནད་གང་ཡིན་པ་དངོས་སུ་མ་བྱུང་གི་བར་དུ། ནད་ཐབས་ཉི་ཚེ་གང་ཡིན་པ་ཐོག་ཏུ་མི་ཕེབས་སོ། །
[128b.2]གཅིན་སྙི་ལ་ཟ་གུའི་ནད་ཐབས་སུ་གྱུར་པ་མེད་པར་གཅིན་གྱི་མདོག་སེར་པོ་འམ་དམར་པོ་བྱུང་བ་དེ་ནི་ཟ་གུའི་ནད་ཅེས་མི་བྱ་སྟེ། ཁྲག་དང་མཁྲིས་པའི་ནད་ལས་གྱུར་པར་ཤེས་པར་བྱའོ། །གཅིན་སྙི་བ་ཟ་གུར་གྱུར་པའི་ནད་ཐབས་ནི། ལུས་རྔུལ། ལུས་དང་རྐང་ལག་དྲི་མི་ཞིམ་པ་དང་ཁོང་
[128b.3]ལྷོད་པར་འགྱུར། སྟན་གྱི་ཐོག་ན་འདུག་པ་དང་། མལ་ན་ཉལ་ན་བདེ་བ་སྙམ་བྱེད་ཅིང་འདུག་ཅིང་ཉལ་ཆགས། སྙིང་དང་མིག་དང་ལྕེ་དང་རྣ་བ་དང་འདི་རྣམས་ཀུན་ལ་བད་ཀན་གྱིས་སྟུག་པོ་ལྗིན་བག་ཏུ་བྱུགས་ཤིང་ཡོགས་པ་སྙོམ་བྱེད། སྐྲ་དང་སེན་མོ་ལྷག་པར་རིང་པོར་འགྱུར།
[128b.4]ལུས་ཀྱི་ཉམས་བསིལ་བ་ལ་དགའ། གྲེ་བ་དང་རྐན་ནི་སྐམ། ཁའི་ནང་གི་རོ་མངར་བར་བྲོ། རྐང་མཐིལ་དང་ལག་མཐིལ་ཚ། གཅིན་གར་གཅིས་པར་གྲོག་མ་ཀུན་འདུ་བར་འགྱུར་ཏེ། ནད་ཀྱི་ཚུལ་འདི་འདྲ་བ་ནི་ཟ་གུ་ཐམས་ཅད་ཀྱི་ནད་ཐབས་ཡིན་ནོ། །ཟ་གུའི་ནད་དམིགས་གང་
[128b.5]ཡིན་པ་སོ་སོར་དབྱེ་བ་ནི་རྣམ་པ་གཉིས་ཡོད་དེ། གཅིན་ཟ་གུར་བྱུང་བ་སྦྲང་རྩིའི་མདོག་འདྲ་ལ། འཁྱིལ་ཞིང་གཅིན་གྱི་རོ་ཡང་མངར། ལུས་ཀྱི་ཤ་ཡང་གང་ཞིང་རྒྱས་ན་དེ་ནི་བད་ཀན་ལས་གྱུར་པའི་ཟ་གུ་ཞེས་བྱའོ། །ཡང་ཟ་གུར་གྱུར་ལ་ལུས་ཀྱང་རྐེ་སྟེ་ཟད་ན་དེ་ནི་ཁ་བདུན་ཟད་པ་
[128b.6]ཞེས་བྱ་སྟེ་རླུང་ལས་གྱུར་པའི་ཟ་གུ་ཞེས་བྱའོ། །ཡང་ཟ་གུར་གྱུར་པའི་ནད་ཐབས་སྔར་ནི་བད་ཀན་དང་མཁྲིས་པ་ལས་གྱུར་པའི་ཚུལ་ཡིན་ལ། ཕྱིས་བགས་ཀྱིས་རླུང་ནད་ཀྱི་ཟ་གུར་གྱུར་པའི་ནད་འདི་ནི་གསོ་སླ་བ་ཡིན་ནོ། །མཁྲིས་པའི་ནད་ལས་ཟ་གུར་གྱུར་པ་ནི་དཀྱེལ་མི་སྐྱེ་མི་ལ་
[128b.7]བར་གསོར་རུང་ངོ་། །ཚིལ་ལ་རླུང་ངམ་མཁྲིས་པའམ། བད་ཀན་གྱི་ནད་མ་ཞུ་བ་ལྟ་བུའི་ཟ་གུ་ནི་གསོར་རུང་ངོ་། །གཅིན་སྙི་བ་ཟ་གུའི་ནད་ཀྱི་བྱེ་བྲག་བཤད་པ་དང་། ཟ་གུའི་ནད་ཀྱི་ཉེན་གཞན་དུ་འགྱུར་བ་བཤད་པའི་ལེའུ་བཅུ་པ་རྫོགས་སོ།། །།འབྲས་ནད་དང་།
[129a]
[129a.1]རྒྱུ་རླུགས་དང་། སྐྲན་ནད་དང་། ནད་སྣ་འདི་གསུམ་གྱི་ནད་གཞི་བཤད་པའི་ལེའུ་བཅུ་གཅིག་པ་བཤད་པར་བྱའོ། །དེ་ལ་ཁོང་འབྲས་སུ་གྱུར་པའི་ནད་ཀྱི་གཞི་ནི། ཁ་ཟས་ཁོང་དུ་ཞག་ལོན་པ་དང་། ཁ་ཟས་ཧ་ཅང་ཚ་ཆེས་པ་དང་། ཁ་ཟས་རྩུབ་པ་
[129a.2]དང་། ཁ་ཟས་སྐམ་བག་དང་། ཁ་ཟས་ཚ་བར་འགྱུར་བ་འདི་རྣམས་ལྟ་བུ་ཟོས་པ་དང་། རྐང་ལག་བསྐམས་ཏེ་མི་བདེ་བཞིན་དུ་ཉལ་བ་དང་། ཁྲག་ནད་རྒྱས་པར་འགྱུར་བའི་བག་བྱས་པས་ལུས་ཀྱི་པགས་པ་དང་། ཤ་དང་ཚིལ་དང་རུས་པ་དང་ཁྲག་དང་ཆུ་བ་ཕྲེའུ་དང་ཆུ་བ་
[129a.3]ཆེན་པོ་རྣམས་དང་འདི་ཀུན་ཀྱང་ཁྲག་ནད་དུ་གྱུར་པའི་ནད་ནང་དུ་ཞེན་པ་དང་། དེ་ལས་ཕྱི་ནང་གཉིས་ཀར་སྐྲངས་ཏེ། ཁོང་འབྲས་ཀྱི་རྩ་བ་ཁོང་དུ་རིང་དུ་ཟུག་ལ་ནད་ཚབས་ཆེ་སྟེ། ཁོང་འབྲས་ཀྱི་དབྱིབས་ནི་ཟླུམ་པོའམ་འཇིང་བ་རིང་པོར་འབྱུང་ངོ་། །དེ་ཡང་ནད་གཞི་ཐ་དད་པའི་བྱེ་
[129a.4]བྲག་གི་ནད་སྣ་དྲུག་ཡོད་དོ། །གང་ཞེ་ན་རླུང་དང་། མཁྲིས་པ་དང་། བད་ཀན་དང་གསུམ་ལས་ཁོང་འབྲས་ནད་སྣ་རེ་རེ་འབྱུང་བ་དང་། འདུས་པ་ལས་ཁོང་འབྲས་སུ་གྱུར་པ་དང་། ཁྲག་ནད་རྒྱས་པ་ལས་ནད་དུ་འགྱུར་བ་དང་རྨས་ཏེ་རྨ་བྱུང་བ་ལས་ཁོང་འབྲས་སུ་གྱུར་པ་དང་རྣམ་
[129a.5]པ་དྲུག་གོ། །དེ་དག་ལའང་རྣམ་པ་གཉིས་ཡོད་དེ། ཕྱི་རོལ་དུ་འབྱུང་བ་དང་། ནད་དུ་འབྱུང་བ་དང་། རྣམ་པ་གཉིས་སོ། །དེ་ལ་ཕྱི་རོལ་དུ་འབྱུང་བ་ནི་ལུས་ཀྱི་ཡན་ལག་དེ་དག་ཏུ་མི་བཟད་པའི་ནད་རྡོག་རྡོག་པར་བརྒྱུས་པ་འདྲ་བ་མཐོན་པོར་འབྱུང་ངོ་། །དེ་ལ་ནད་ནང་དུ་འབྱུང་
[129a.6]བ་ནི་ནང་གི་ཟབས་སུ་སྐྲན་དང་འདྲ་བ་མཁྲང་བ་མི་བཟད་པར་འབྱུང་ངོ་། །དེ་འབྱུང་བའི་དབྱིབས་ནི་གྲོག་མའི་ས་ཕུང་སྤུངས་པ་མཐོན་པོར་འདུག་པ་དེ་ལྟ་བུ་ལྟེ་བ་དང་། ཆུ་སོ་དང་། མཆིན་པ་དང་། མཆེར་པ་དང་། གློ་བ་དང་། སྙིང་དང་། ལྟོ་བ་དང་། ཆུ་སོ་གཡས་
[129a.7]གཡོན་དང་། མཁལ་མ་གཡས་གཡོན་དང་། གཞང་ཁ་དང་འདི་རྣམས་ཀྱི་སར་འབྱུང་སྟེ། དེ་ནི་མེ་དང་མཚོན་གྱིས་ཕོག་པ་བཞིན་མྱུར་དུ་འཆི་བར་བྱེད་དོ། །དེ་ལ་རླུང་ནད་ལས་གྱུར་པའི་ནད་ཐབས་ནི་མདོག་སྨུག་པོར་འདུག་ལ་མྱུར་དུ་འབྱུང་དུ་མི་རུང་སྟེ་རིང་དུ་ཐོགས།
[129b]
[129b.1]མགོ་སྨིན་ཅིང་རྣགས་པ་ཡང་མི་སྙོམས་ལ་ན་ཞིང་ཚ། མགོ་འཁོར། ཉམ་ཆུང་། ཕལ་ཕལ་བྱེད་ཅིང་སྒྲ་ཡང་ཡོད་དེ་འདི་ནི་རླུང་ནད་ལས་གྱུར་པ་ཞེས་བྱའོ། །དེ་ལ་མཁྲིས་པ་ལས་གྱུར་པའི་ནད་ཐབས་ནི་སྐོམ་དད་ཆེ། རྨོངས་བག་ཏུ་འགྱུར། ཁོང་ཚ། རིམས་ཀྱིས་
[129b.2]འདེབས། ནད་འབྱུང་བའི་མདོག་ནི་ཟངས་ཀྱི་མདོག་བཞིན་དམར་ལ་རྩ་ནག་ནད་དམིགས་མྱུར་དུ་འབྱུང་ཞིང་མྱུར་དུ་རྣགས་པར་འགྱུར་ཏེ། འདི་ལྟ་བུ་ནི་མཁྲིས་པ་ལས་གྱུར་པ་ཡིན་ནོ། །དེ་ལ་བད་ཀན་ལས་གྱུར་པའི་ནད་ནི་ཁོང་བསིལ་ཞིང་གྱེན་དུ་སློན། ཁ་གླལ། ལུས་ལྕི། ཟས་
[129b.3]ཡི་གར་མི་འོང་། ནད་དམིགས་གར་བྱུང་བ་དེར་སྲ་ལ་མདོག་སྐྱ། གཡའ། མིག་མྱུར་དུ་འབྱུང་དུ་མི་རུང་། ནད་དམིགས་ཀྱི་ཉེ་འཁོར་ཚ་བ་འདི་ནི་བད་ཀན་ལས་གྱུར་པ་ཡིན་ནོ། །དེ་ལ་འདུས་པའི་ནད་ལས་གྱུར་པའི་ནད་ཐབས་ནི་ནད་དམིགས་ཀྱི་ཚུལ་ལས། ནད་ཕྱི་རོལ་དུ་འབྱུང་ངམ་
[129b.4]ནང་དུ་འབྱུང་བ་ཤེས་པར་བྱ་སྟེ་ནད་བྱུང་བའི་འབྲུམ་བུ་ནག་པོས་ཁེབས་པར་བྱུང་ལ། འབྲུམ་བུ་ནག་པོ་དེ་རབ་ཏུ་ཚལ་ན། རིམས་ཀྱིས་ཀྱང་འདེབས་སོ། །དེ་ལ་ཁྲག་ནད་ལས་གྱུར་པའི་ནད་ནི་མཁྲིས་པ་ལས་གྱུར་པའི་ནད་ཐབས་དང་འདྲ་སྟེ་ཁྲག་ལས་ནད་དུ་གྱུར་ན་ཕྱི་རོལ་གྱི་ཤ་དང་
[129b.5]པགས་པ་ལས་འབྱུང་བར་འགྱུར་རོ། །བུད་མེད་རྣམས་ལ་ནི་ནང་དུ་འབྱུང་བར་འགྱུར་རོ། །མཚོན་ལ་སོགས་པས་རྨས་ཏེ་རྨ་བྱུང་བ་ལས་མི་འཕྲོད་པས་རྨ་རེད་དེ། རྨ་ཁ་ཚ་བ་རླུང་གིས་ཕུལ་ནས་ཁྲག་དང་མཁྲིས་པ་མཆེད་དེ་ཁྲག་དང་མཁྲིས་པ་དེ་ལས་ནད་བླ་ཐབས་རྣེའུ་ལྷགས་
[129b.6]ཤིང་དེ་དག་ཏུ་ན་བར་འགྱུར་རོ། །ནད་གནས་ཐ་དད་པ་སོ་སོར་བྱུང་ན་ནད་ཀྱི་བྱེ་བྲག་ནི་ལྟེ་བར་བྱུང་ན་སྐྱིགས་བུས་འདེབས་སོ། །ཆུ་སོར་བྱུང་ན་ཆུ་འགགས་པ་དང་། གཅིན་རྣག་ཏུ་འབྱུང་བར་འགྱུར་རོ། །མཆིན་པ་ལ་བྱུང་ན་དབུགས་མི་བདེའོ། །མཆེར་པ་ལ་བྱུང་ན་རྔམ་པ་
[129b.7]དྲག་ཏུ་འཕུལ་ཞིང་དབུགས་མི་བདེའོ། །གློ་བ་ལ་བྱུང་ན་ལྐོག་མ་དང་མགུལ་པ་ན་ཞིང་སྐོམ་དད་ཆེའོ། །སྙིང་ལ་བྱུང་ན་ལུས་ཀྱི་ཡན་ལག་ཐམས་ཅད་རབ་ཏུ་གཟིར་བར་བྱེད་དོ། །མཆིན་ངོགས་ཀྱི་ནང་དུ་འབྱུང་ན་ལུད་པས་ལུ། སྙིང་གར་གཡོགས་པ་སྙམ་བྱེད། མྱོས།
[130a]
[130a.1]སྙིང་མུག་མུག་ཅིང་མུན་སྲོས་པ་བཞིན་དུ་འགྱུར་རོ། །རྩིབ་ལོགས་ཀྱི་ནང་དུ་བྱུང་ན་ཕྲག་པ་དང་ལྟོ་བ་སྐྲང་ངོ་། །ཆུ་སོ་གཡས་གཡོན་མདོམས་ཕྲག་ཏུ་བྱུང་ན། བརླ་ཐོག་ཐག་ཏུ་ན་བར་འགྱུར་རོ། །མཁལ་མ་ལ་བྱུང་ན་རྐེད་པ་དང་རྒྱབ་དང་རྩིབ་
[130a.2]ལོགས་སུ་ན་བར་འགྱུར་རོ། །གཞང་ལ་བྱུང་ན་བཤང་བ་དང་དབུགས་ཐུར་དུ་འབྱུང་བ་འགག་པར་འགྱུར་རོ། །མ་ཞུ་བའི་གནས་ཕོ་བ་དང་། ཞུ་བའི་གནས་ལོང་ཀ་དང་ཕྱེད་མ་ཞུར་གནས་པ་ནང་གྲོལ་འདི་དག་གི་ཐོག་ཏུ་བྱུང་ན་དེ་དག་གི་འོར་ནད་དང་འདྲའོ། །དེ་ལ་ཁོང་དུ་
[130a.3]ལྟེ་བ་ཡན་ཆོད་དུ་བྱུང་ན་ནི་རྣག་ཁར་འོང་བར་འགྱུར་རོ། །རོ་སྨད་ལྟེ་བའི་འོག་མན་ཆད་ཁོང་དུ་བྱུང་ན། རྐུབ་ཏུ་རྣག་ཟག་པར་འགྱུར་རོ། །ལྟེ་བའི་ནང་དུ་བྱུང་ན་སྟོད་སྨད་གཉིས་ཀ་ནས་རྣག་ཟག་པར་འགྱུར་རོ། །དེ་ལྟར་རྣམ་དྲུག་ལྟ་བུའི་ཕྱིའམ་ནང་དུ་འབྱུང་ན། རླུང་དང་
[130a.4]མཁྲིས་པ་དང་བག་ཀན་དང་ཁྲག་རྒྱས་པ་དང་། རྨ་རེད་པའི་རྨེན་བུ་ལ་སོགས་པ་སོ་སོའི་ནད་དམིགས་བཞིན་དུ་གསོ་བའི་དཔྱད་བྱའོ། །འདུས་པའི་ནད་ལས་འབྱུང་བར་འགྱུར་བ་ནི་གསོ་དཀའ་ཏེ་མ་གཏོགས་སོ། །དེ་ལ་སྙིང་དང་ལྟེ་བ་དང་ལྒང་པ་ཆུ་སོ་འདི་དག་ཏུ་ཕྱི་རོལ་
[130a.5]དུ་འབྱུང་ཡང་རུང་། ནང་དུ་འབྱུང་ཡང་རུང་སྟེ། སྨིན་ཏེ་རྣག་ཟག་པར་གྱུར་ཀྱང་མི་འཚོའོ། །ཁོང་དུ་འབྱུང་སྟེ། སྨིན་ནས་རྣག་ཁ་ནས་ཟག་ཅིང་འོང་ཡང་ནད་པ་ཉམ་ཆུང་ལ་ནད་བླ་ཐབས་ན་བ་གཞན་ཡང་ཡོད་ན། དེ་ལྟ་བུའང་མི་འཚོའོ། །དེ་དང་འདྲ་བར་
[130a.6]བུད་མེད་ཀྱི་ནུ་མ་ལ་བྱུང་ན་ཡང་རྩ་སྒོ་ཁ་བྱེ་བ་ཡིན་པས་གསོ་དཀའ་སྟེ་མི་འཚོའོ། །བུད་མེད་ལ་བུ་བཙས་པ་དང་། སྦྲུམ་མ་དང་། ནུ་ཞོ་ཡོད་པ་དང་། ནུ་ཞོ་མེད་པ་ལྟ་བུ་ལ་བྱུང་བ་ནི་ཕྱི་རོལ་དུ་བྱུང་བ་ཞེས་བྱ་སྟེ། འོར་ནད་དང་འདྲ་བར་སྟུག་པོར་སྐྲངས་པ་སྲ་སྟེ། འདི་
[130a.7]ཡང་དེ་བཞིན་དུ་གསོ་དཀའོ། །བུ་མོ་ཆུང་ངུའི་ནུ་མའི་རྩ་བའི་སྦུ་གུ་རྣམས་ནི་ཕྲ་བས་ན་དེ་ལྟ་བུ་ལ་ནི་མི་འབྱུང་ངོ་། །རྒྱུ་རླུགས་ཀྱི་ནད་གཞི་བཤད་པ། རྒྱུ་རླུགས་ཀྱི་ནད་ནི་རྒྱུ་མའི་ནང་གི་རླུང་ཡན་མན་རྒྱུ་བ་འགགས་ཏེ། ཐོགས་པ་དང་ནད་དུ་གྱུར་ནས་ན་ཞིང་སྐྲངས་ཏེ་རྒྱུ་མ་
[130b]
[130b.1]ཐུར་དུ་རྣུ་ཞིང་ཆུ་སོ་ནས་ཕོ་མཚན་གྱི་འབྲས་བུའི་ནང་དུ་སོན་པ་དང་། ཕོ་མཚན་དང་ཕོ་མཚན་གྱི་པགས་པའི་རྩ་ཡང་རྒྱུ་མ་རླུགས་པས་བཙིར་ནས། ཕོ་མཚན་གྱི་པགས་པ་ཡང་ཆེར་སྐྱེ་བར་བྱེད་དོ། །རླིག་རླུགས་ཀྱི་ནད་དེ་ཡང་རྣམ་པ་བདུན་ཏེ། རླུང་དང་མཁྲིས་པ་དང་བད་
[130b.2]ཀན་གྱི་ནད་སྐྱེད་པ་དང་། ཁྲག་ནད་སྐྱེ་སྟེ་ལུད་པ་དང་ཚིལ་ནད་དུ་གྱུར་པ་དང་། ལྒང་པ་སྐྱེས་པ་དང་རྒྱུ་མ་སྐྱེས་པའི་ནད་དང་རྣམ་པ་འདི་བདུན་ནོ། །དེ་ལ་ལྒང་པ་སྐྱེས་པ་དང་རྒྱུ་མ་སྐྱེས་པ་འདི་གཉིས་ཀྱང་རླུང་ནད་ཀྱིས་སྐྱེ་བར་འགྱུར་ཏེ། རླིག་རླུགས་ཀྱི་ནད་ཀྱི་རྒྱུ་ནི་ཐ་དད་དོ། །དེ་ལ་
[130b.3]རླུང་ནད་ལས་གྱུར་པའི་རླིག་རླུགས་ཀྱི་ནད་ཐབས་ནི། རྐྱལ་པ་རླུང་གིས་གང་བ་འདྲ་ལ། རླུང་ལས་གྱུར་པས་ནན་པར་གྱུར་པའི་གཞི་མེད་པ་བཞིན་དུ་ནའོ། །མཁྲིས་པ་ལས་གྱུར་པའི་རླིག་རླུགས་ནི་རླིག་པའི་མདོག་ཤིང་ཨུ་དུམྦཱ་རའི་འབྲས་བུ་འདྲ་བར་དམར་པོར་སྣང་ལ་དྲོ་ཆེ་ཞིང་ཚལ་
[130b.4]འདྲུལ་བ་དེ་ལྟ་བུ་ཡིན་ནོ། །བད་ཀན་ལས་རླིག་རླུགས་སུ་གྱུར་པ་ནི་གྲང་ལ་ལྕི། འཇམ་ལ་གཡའ། སྲ་ལ་ནད་ཚབས་མི་ཆེ་བ་དེ་ལྟ་བུ་ཡིན་ནོ། །ཁྲག་ནད་རྒྱས་པ་ལས་རྒྱུ་རླུགས་སུ་གྱུར་པ་ནི་འབྲུམ་བུ་ནག་པོས་གང་བ་ཡོད་དེ། ཚུལ་གཞན་ནི་མཁྲིས་པ་ལས་རྒྱུ་རླུགས་ཀྱི་ནད་དུ་གྱུར་
[130b.5]པ་དང་འདྲའོ། །ཚིལ་ནད་ལས་རྒྱུ་མ་སྐྱེས་ཏེ་རྒྱུ་རླུགས་ཀྱི་ནད་དུ་གྱུར་པའི་ནད་ཐབས་ནི་སྤྱི་བད་ཀན་དང་འདྲ་སྟེ། འཇམ་ལ་རླིག་པའི་དབྱིབས་ནི་ཤིང་ཏ་ལའི་འབྲས་བུ་ལྟར་འདུག་གོ། །གཅིན་སྙོམས་ན་བརྣགས་པ་ཤ་སྟག་བྱེད་པ་དེས་གཅིན་སྩོགས་ཤིང་ལྒང་པ་ཆེར་སྐྱེས་པ་
[130b.6]ལས་རླིག་རླུགས་སུ་གྱུར་ན་རྐྱལ་པ་ཆུས་གང་བ་བཞིན་རྙོག་རྙོག་ཟེར་ལ་ན། རླིག་པའི་པགས་པ་འཇམ། ཆུ་འགག་པར་བྱེད། ཕོ་མཚན་གྱི་འོག་པགས་པའི་བར་དུ་གློ་གློ་བོར་འབྱུང་ངོ་། །རྒྱུ་མ་ནར་ཏེ་རླིག་རླུགས་སུ་གྱུར་པའི་ནད་ཐབས་ནི་རླུང་ནད་སླང་བར་གྱུར་པའི་ཁ་ཟས་དང་།
[130b.7]ཟས་བསིལ་བའི་བག་དང་། ཆུའི་ནང་དུ་རྐྱལ་བ་དང་། བཤང་གཅི་སྙོམས་ན་ནན་གྱིས་བརྣགས་པ་དང་། མི་བྲོ་བཞིན་བཙིར་པ་དང་། ཁུར་དང་ལམ་གྱིས་དུབ་པ་དང་ལུས་དང་ལུས་ཀྱི་ཡན་ལག་ལོག་པར་གཅུ་ཞིང་། སྐྱོད། གསིག་སྟེ། རྒྱུ་མའི་ནང་འཁྲུགས་པར་འགྱུར།
[131a]
[131a.1]དེ་ལྟ་བུའི་བག་བྱས་པས། དེའི་ཚེ་རྒྱུ་མ་ཕྲེའུ་ཁ་ཅིག་རང་གི་གནས་ནས་རླུང་གིས་ཐུར་དུ་ལོག་པར་ཕུལ་ཏེ། ཆུ་སོ་དང་མདོམས་ཀྱི་ཕྲག་ཏུ་ཕྱིན་པར་བྱས་ནས་མདུད་པ་ལྟར་གློ་བོ་ཞིག་ཏུ་དེའི་ཚེ་སྐྲང་ངོ་། །འདི་ལྟར་གྱུར་ཀྱང་ཡལ་བར་བོར་ཏེ་སྨན་དཔྱད་མི་བྱེད་
[131a.2]ན་རླིག་རླུགས་ཆེར་སྐྱེས་ཏེ། ཁོང་སྦོ་ན་རེམ་རེམ་པོར་བྱེད་ལ་ནང་དུ་རླུང་གིས་རབ་ཏུ་གཟིར་བ་དང་། རྒྱུ་མ་སྒྲ་ཅན་ཁྲུ་ལུ་ལུ་ཟེར་ཞིང་རླིག་པའི་ནང་དུ་གང་བར་བྱེད། རྒྱུ་མ་ཁོང་པའི་ནང་དུ་སླར་ཕུལ་ཏེ་བཏང་ནས་ཡང་སླར་བཞིན་སྔ་མ་ཁོ་བ་བཞིན་གང་བར་འགྱུར་རོ། །དེ་ལྟ་བས་
[131a.3]ན་རྒྱུ་མ་ནར་ཞིང་སྐྱེས་པའི་རླིག་རླུགས་འདི་ནི་གསོ་དཀའ་སྟེ། རླུང་ནད་ལས་རླིག་རླུགས་སུ་གྱུར་པ་དང་འདྲ་ལ་རྩ་ཕྲ་མོ་དྲ་བ་སྐར་ཁུང་རིས་ལྟར་འདུག་པ་རྩ་ཀུན་རྩུབ་ལ་སྨུག་གོ། །སྐྲན་ནད་རྣམ་པ་བརྒྱད་ཀྱི་ནད་གཞི་དང་ནད་ཐབས་བཤད་པ་སྐྲན་རྣམ་པ་བརྒྱད་ཡོད་དོ། །རླུང་དང་
[131a.4]མཁྲིས་པ་དང་བད་ཀན་རེ་རེའི་སྐྲན་དང་རླུང་དང་མཁྲིས་པ་དང་བད་ཀན་གསུམ་ལས་གཉིས་གཉིས་སུ་འདྲེས་པ་ལས། སྐྲན་རྣམ་གསུམ་དུ་གྱུར་པ་དང་། འདུས་པའི་ནད་ལས་སྐྲན་དུ་གྱུར་པ་དང་། བུད་མེད་ཟླ་མཚན་མངལ་དུ་རླུང་ནད་དམ་མཁྲིས་པའམ་བད་ཀན་གྱི་ནད་ཀྱིས་
[131a.5]འགགས་ཏེ་སྐྲན་དུ་གྱུར་པ་དང་། སྐྲན་རྣམ་པ་དེ་བརྒྱད་དོ། །སྐྲན་ནད་དུ་གྱུར་པའི་ནད་གཞི་ནི། རིམས་ཀྱིས་བཏབ་པ་དང་། སློན་པ་དང་། ཚད་པ་ལ་སོགས་པས་འཁྲུ་བ་དང་། སྐྱུག་སྨན་དང་། བཀྲུ་སྨན་ལ་སོགས་པ་བཏང་བས། ལུས་ཀྱི་ཤ་ཟད་དེ་སྐམ་པོར་གྱུར་
[131a.6]པས། ལུས་རླུང་ཅན་དུ་གྱུར་པའི་སྟེང་དུ་བཀྲེས་པ་ལས་ཆུ་གྲང་འཐུངས་པ་དང་། ཟས་བཅད་དེ་སྨྱུང་བ་བྱས་པ་དང་། ཧ་ཅང་དྲགས་ཆེས་པ་ལས། ཆུའི་ནང་དུ་རྐྱལ་བ་ལ་སོགས་ཏེ་ལུས་ལ་གནོད་ཅིང་རླུང་ནད་སློང་བར་འགྱུར་བ་དེ་ལྟ་བུའི་བག་བསྟེན་པ་དང་ཡང་ན་སློན་མི་བྲོ་ཞིང་།
[131a.7]ནན་གྱིས་བཀུག་པ་དང་། ཡང་ན་སློན་བྲོ་ན་བརྣགས་ཏེ། མ་སློན་པ་དང་། བཤང་གཅི་དང་དབུགས་ཐུར་དུ་འབྱུང་བ་སྙོམས་ཤིང་འོང་ན་ཡང་བརྣགས་པ་དང་། འདི་དག་མི་འོང་བཞིན་དུ་ནན་གྱིས་བཙིར་བ་དང་། སྐྱུག་སྨན་དང་། བཀྲུ་སྨན་ཞིག་བཏང་ན་སྔར་སྨན་མར་གྱི་
[131b]
[131b.1]དཔྱད་དང་། དུགས་ཀྱི་ཆོ་ག་མ་བྱས་པར་སྐྱུག་སྨན་དང་བཀྲུ་སྨན་བཏང་བ་དང་། ཡང་ན་ཆོ་ག་བཞིན་དུ་སྐྱུག་སྨན་དང་བཀྲུ་སྨན་བཏང་བའི་རྗེས་ལ་ཁ་ཟས་དྲོད་པོ་ཆེ་ཚ་བའི་ནད་མྱུར་དུ་ལྡང་བ་རྣམས་ཟོས་པའམ། ཡང་ན་བད་ཀན་སྐྱེ་བར་འགྱུར་བའི་ཁ་ཟས་འབྱིལ་བག་དེ་ལྟ་བུ་ཟོས་པ་ལས་ནད་
[131b.2]དཀྱེལ་དུ་འགྱུར་ཏེ། དེ་ལྟར་རླུང་ནད་ཆེར་སྐྱེས་པས་རླུང་དང་མཁྲིས་པ་དང་། བད་ཀན་གྱི་ནད་སོ་སོ་ན་འདོམས་པར་གྱུར་ཏམ། ཡང་ན་ནད་སྣ་གཉིས་སུ་གྱུར་ཏམ། ཡང་ན་རླུང་དང་མཁྲིས་པ་དང་བད་ཀན་གྱི་ནད་དུ་གྱུར་ཏམ། ཡང་ན་ཁྲག་ནད་དང་འདྲེས་པ་དེ་ལྟ་བུས་ལུས་ཀྱི་རྩ་ཆེན་པོ་བཅུའི་
[131b.3]ནང་དུ་ནད་ཞུགས་པ་དང་། ལུས་ཀྱི་སྟོད་སྨད་ཁ་ཟས་དང་བཤང་གཅི་རྒྱུ་ཞིང་འབྱུང་བའི་ལམ་སྲང་ཡང་ནད་ཀྱིས་ཆོད་དེ་འགགས་ནས་ན་ཞིང་མི་བདེ་བའི་ས་བོན་གྱིས་ལུས་ཀྱི་ཤ་བྲི་སྟེ་སྐམ་པར་གྱུར་པས་བད་ཀན་དང་མཁྲིས་པ་དང་། བཤང་གཅིའི་དྲི་མས་རྩ་སྒོ་དང་། བཤང་གཅི་རྒྱུ་བའི་
[131b.4]སྲང་འགགས་སམ། ཁོང་པ་ནང་གྲོལ་གྱི་ནང་དུ་རླུང་ཞེན་ཏེ། ལུས་ཀྱི་ནང་རྩུབ་ཅིང་སྲ་བར་གྱུར་པས་རླུང་དང་མཁྲིས་པ་དང་བད་ཀན་གསུམ་གྱི་རང་གི་གནས་སུ་སྐྲན་ཞུགས་ན་དེའི་མིང་ནི་སྐྲན་ནད་རང་དབང་ཅན་ཞེས་བྱའོ། །རླུང་དང་མཁྲིས་པ་དང་བད་ཀན་གྱི་སྐྲན་དེ་མཁྲིས་པའི་སར་རླུང་གི་སྐྲན་
[131b.5]ཞུགས་སམ་བད་ཀན་གྱི་སར་མཁྲིས་པའི་སྐྲན་ཞུགས་སམ་རླུང་གི་སར་བད་ཀན་གྱི་སྐྲན་ཞུགས་སམ་རླུང་གི་སར་མཁྲིས་པའི་སྐྲན་ཞུགས་པ་དེ་ལྟ་བུ་ནི་གཞན་གྱི་སར་སྐྲན་ཞུགས་པ་ཞེས་བྱའོ། །དེ་ལྟར་ནད་དཀྱེལ་འདུས་པ་ལས་ནད་དེ་གོང་གོང་པོར་གྱུར་པས་ནད་དེ་གཟུགས་ཡོད་པ་མ་ཡིན་
[131b.6]ཡང་གཟུགས་སུ་གྱུར་ནས། སྐྲན་རིལ་རིལ་པོ་ལག་གིས་མྱང་དུ་ཡོད་པ་རྡོག་རྡོག་པོ་མདུད་པ་ལྟར་འདུག་པ་འདིའི་མིང་ནི་སྐྲན་ནད་ཅེས་བྱའོ། །དེ་ལ་རླུང་ནད་ལས་གྱུར་པའི་སྐྲན་གྱི་ནད་ཐབས་ནི། ལྒང་པའི་ཆུ་སོ་དང་ལྟེ་བ་དང་སྙིང་ག་དང་རྩིབ་ལོགས་གཡས་གཡོན། འདི་རྣམས་
[131b.7]གང་ཡང་རུང་བར་སྐྲན་གནས་ཤིང་འདུག་སྟེ། རླུང་སྐྲན་དེ་དག་ཏུ་བྱུང་བས་མཇིང་བ་དང་ཀླད་པ་ན། རིམས་ནད་ཀྱིས་འདེབས། མཆེར་པ་ན། རྒྱུ་མའི་ནང་སྒྲ་ཁྲུ་ལུ་ལུ་ཟེར། ན་ཞིང་ཟུག །ཐུར་དུ་བཤང་བ་སྲི་ཞིང་འགགས། དབུགས་མི་བདེ་སྟེ། དབུགས་ཕྱིར་ཡང་དང་ཡང་
[132a]
[132a.1]འབྱུང་བ་མི་ཕྱིན། ལུས་སྲ་བར་རེངས་བག་ཏུ་འགྱུར་ལ། ཁ་སྐམ། ལུས་རིད་ཅིང་སྐམ། ཕོ་བའི་མེ་དྲོད་མི་སྙོམས། ལུས་ཀྱི་པགས་པ་ཤ་མདོག་གནག་ལ་རྩུབ་པ་དེ་ལྟ་བུ་ནི་རླུང་སྐྲན་གྱི་ནད་ཐབས་ཡིན་ཏེ་རླུང་སྐྲན་དེ་ཁོང་པ་ནང་ན་དབྱིབས་ཚུལ་ཇི་ལྟ་བུ་ཞིག་
[132a.2]ཏུ་འདུག་པ་དང་། རླུང་སྐྲན་དེ་གང་ན་འདུག་པ་རྟག་ཏུ་མི་མངོན་ལ། རླུང་སྐྲན་དེ་རེས་འགའ་ནི་སྐྱེ། རེས་འགའ་ནི་འབྲི་ཞིང་ན་སྟེ། ཉམས་ལ་རླུང་སྐྲན་དེ་སྲོག་ཆགས་གྲོག་མ་ཞིག་གིས་གང་བ་སྙམ་དུ་པྲྭ་པྲྭ་བྱེད་པ་ཟུག་ཅིང་ན་བ་འདི་ལྟ་བུ་ནི་རླུང་སྐྲན་གྱི་ནད་ཐབས་ཡིན་ནོ། །དེ་ལ་མཁྲིས་
[132a.3]པ་ལས་སྐྲན་ནད་དུ་གྱུར་པའི་ནད་ཐབས་ནི། ལུས་ཚ་ལ་སྒྲེགས་པ་སྐྱུར་པོར་འོང་ངོ་། །བརྒྱལ། ཐུར་དུ་འཁྲུ། ལུས་རྔུལ། སྐོམ། རིམས་ནད་ཀྱིས་འདེབས་བཞིན་མདོག་དང་ལུས་ཀྱི་མདོག་དང་། སེན་མོ་རྣམས་སེར་པོར་སྣང་། མཁྲིས་པའི་སྐྲན་དེ་ལག་པས་རེག་ན་མི་
[132a.4]བཟོད། སྐྲན་དེ་རབ་རབ་བྱེད་ཅིང་མེ་བཞིན་འབར། སྐྲན་ཡོད་པའི་འཁོར་མེས་བསྲེགས་པ་བཞིན་ཆེའོ། །ནད་ཐབས་འདི་ལྟ་བུ་ནི་མཁྲིས་པའི་སྐྲན་ནད་ཅེས་བྱའོ། །དེ་ལ་བད་ཀན་ལས་སྐྲན་དུ་གྱུར་པའི་ནད་ཐབས་ནི་གློ་བག་ཏུ་གྱུར་ལ་ཁ་ཟས་ཡི་གར་མི་འོང་། ཕོ་བའི་དྲོད་
[132a.5]ཆུང་། གྲང་བའི་རིམས་ནད་དང་ཆམ་པས་འདེབས། ཁོང་སྙོམ། དང་ག་མེར་མེར་པོར་བྱེད། ལུད་པས་བཀར། བཞིན་མདོག་དང་། སེན་མོ་དང་། ཤ་མཐང་གི་མདོག་དཀར་པོར་འདུག །བད་ཀན་ལས་སྐྲན་དུ་གྱུར་པ་ཉིད་ནི། ཁོང་པའི་ནང་གི་ཕུགས་ན་སྐྲན་སྲ་ཞིང་
[132a.6]ལྕི་ལ། འཕོ་ཞིང་འགུལ་བ་དང་། སྐྱེད་དབྲི་མེད་དེ་མལ་གཅིག་ན་བརྟན་པར་འདུག་ལ། སྐྲན་བེམ་བེམ་པོར་འདུག །བད་ཀན་གྱི་སྐྲན་རང་གི་གནས་སུ་འདུག་པ་དེ་ན་བ་ནི་བད་ཀན་གྱི་ནད་ཀྱི་དུས་དུས་སུ་ལྡང་ཞིང་ནའོ། །དེ་ལ་རླུང་དང་མཁྲིས་པ་དང་བད་ཀན་གསུམ་གང་
[132a.7]ཡང་རུང་བ་ལས། རླུང་དང་མཁྲིས་པ་ལྟ་བུ་ནད་སྣ་གཉིས་ལས་སྐྲན་དུ་གྱུར་པ་ནི་སྐྲན་ན་བའི་ནད་ཐབས་ཀྱང་ནད་སྣ་གཉིས་འདྲེས་པའི་ནད་ཐབས་སུ་འགྱུར་རོ། །རླུང་དང་མཁྲིས་པ་དང་བད་ཀན་སྣ་གསུམ་ལས་སྐྲན་དུ་གྱུར་པའི་ནད་ཐབས་ནི། རབ་ཏུ་ན་ལ་ཚ། སྐྲན་དེ་སྟུག་
[132b]
[132b.1]ཅིང་སྲ་ལ་འབུར་འབུར་པོ་མཐོར་འགྱུར། སྐྲན་དེ་མྱུར་དུ་སྨིན་པར་འགྱུར་རོ། །ནད་འདུས་པ་ཚང་བའི་ནད་འདི་ནི་གསོར་མི་རུང་ངོ་། །དེ་ལ་ཁྲག་སྐྲན་ནི་བུད་མེད་འབའ་ཞིག་ལ་འབྱུང་སྟེ། ཟླ་མཚན་ཟག་གམ་གསར་དུ་བུ་བཅས་སམ། འོན་ཏེ་མངལ་གྱི་ནད་དང་གཅིག་
[132b.2]ཡོད་པ་ལས་ཁ་ཟས་རླུང་ནད་དུ་འགྱུར་བའི་བག་ཟོས་པ་དང་། རླུང་ནད་སློང་བར་འགྱུར་བའི་བག་བསྟེན་པས་རླུང་ནད་ལངས་ནས་ཟླ་མཚན་ཟླ་རེ་ཞིང་དུས་སུ་འོང་བ་ནང་དུ་འགགས་ཏེ། ལྟོ་བ་ཆེར་སྐྱེས་ཏེ། རུམ་ན་བུ་ཆགས་པ་འདྲ་བར་སྣང་། སྙིང་ན། ཁ་ཟས་ཀྱི་རོ་ཁ་ཅིག་
[132b.3]ཡིད་ལ་འདོད་པ་སྙམ་བྱེད། ནུ་ཞོ་ཡང་ཆང་ཆུང་སྣང་། ཁོང་རྨྱ་སྟེ། དེ་ལྟ་བུ་ལས་བགས་ཀྱིས་རླུང་ནད་དང་ཕྲད་པ་དང་སྐྲན་དེ་མཁྲིས་པའི་གནས་སུ་ཞེན་ནས་ཁྲག་སྐྲན་ཏེ། རླུང་དང་མཁྲིས་པ་ལས་འབྱུང་བ་ན་ལ་ཁོང་པའི་ནང་སྲ་བ་མེར་མེར་པོའི་བག་དང་ཁོང་ཚབ་དང་། ཚད་པས་
[132b.4]འཁྲུ། སྐོམ། རིམས་ནད་ཀྱིས་འདེབས། འདི་ལྟ་བུའི་ནད་བླ་ཐབས་སུ་ཡང་འགྱུར་རོ། །ཡང་ན་མངལ་གྱི་ནང་ན་ཁྲག་ཡོད་པ་བས་ནད་ཚབས་རབ་ཏུ་ཆེའོ། །མངལ་གྱི་ནང་ནས་ཀྱང་ཟག་ལ་དྲི་མི་ཞིམ་པ་དང་། ཟུག་པའི་ནད་ཐབས་དང་། ན་ལ་གཡོ་ཞིང་འཕར་བ་ཡང་།
[132b.5]དེ་ནི་མངལ་དུ་བུ་ཆགས་པ་ཞེས་མི་བྱའི་སྐྲན་མངལ་དུ་ཆགས་པ་ཡིན་ཏེ། སྐྲན་དེ་ལ་པྲྭ་པྲྭ་བྱེད། སྐྲན་དེ་ཉིད་གོང་བུར་གྱུར་ཏེ་འདུག་ཀྱང་གལ་ཏེ་ཚིགས་རིང་ཞིག་ལོན་ཞིང་འགུལ་ཏེ་པར་པར་བྱེད་ན་ཡང་དེ་ལྟ་བུ་ཡང་རུམ་ན་བུ་ཡོད་ཅེས་མི་བྱའི་མངལ་དུ་སྐྲན་དེ་ཉིད་ཆེར་སྐྱེས་ཞེས་བྱའོ། །
[132b.6]ཡང་ན་སྐྲན་ནོ་ཅོག་རླུང་དང་མཁྲིས་པ་དང་བད་ཀན་སོ་སོའི་ནད་ཀྱི་གནས་ལ་བརྟེན་ཏེ་སྐྲན་དུ་གྱུར་པ་དང་། འདུས་པའི་སྐྲན་དུ་གྱུར་པ་དེ་དག་ནི་གལ་ཏེ་ཡུན་རིང་པོ་ཞིག་ན་སྐྲན་སྨིན་ཏེ་རྡོལ་བར་འགྱུར་རོ། །ཡང་ན་ནི་སྨིན་ཅིང་རྡོལ་དུ་མི་རུང་ངོ་། །ཁོང་འབྲས་ཀྱི་ནད་བྱུང་བ་ནི་སྐྲན་དང་མི་
[132b.7]འདྲ་སྟེ། དེ་ནད་ཁྲག་ངན་པ་ལ་བརྟེན་པས། མྱུར་དུ་སྨིན་ཅིང་རྡོལ་བར་འགྱུར་རོ། །དེ་བས་ན་དེ་ནི་མྱུར་དུ་ཚ་བར་བྱེད་པས་ན་དེའི་ཕྱིར་ཞེས་བྱའོ། །དེ་ལ་སྐྲན་གྱི་ཕྱི་ནང་གི་བར་ན་ཡོད་པའི་ནད་ཐབས་ནི་ཆུ་སོ་དང་། ལྟོ་བ་དང་། སྙིང་དང་། མཆེར་པ་དང་། ཁོང་པའི་དྲོད་ཆུང་ཞིང་མདོག་
[133a]
[133a.1]ཉམས། ཉམས་འཚག་བྲི། བཤང་གཅི་སྲི་ཞིང་འགགས། ཕྱི་རོལ་དུ་སྐྲན་འབྱུང་བ་ནི་ནད་ཐབས་འདི་དང་མི་འདྲའོ། །ནང་གྲོལ་གྱི་མཐའ་མ་ན་སྐྲན་ཡོད་པ་ནི། ནད་ཚབས་མི་ཆེའོ། །སྐྲན་འདུག་པ་དེའི་འཁོར་ན་ཤ་མདོག་ཀྱང་འགྱུར་ལ་ཕྱི་རོལ་དུ་གློ་གློ་བོར་
[133a.2]ཆེར་སྣང་ངོ་། །དེ་ལ་རླུང་ནད་ལས་ཧེན་ཀྱིར་འགྱུར་བ་ཡང་ཡོད་དེ། དེ་ནི་རླུང་གྱེན་དུ་རྒྱུ་བ་དང་། ཐུར་དུ་རྒྱུ་བ་རྣམས་འགྱིལ་ཏེ་འགགས་པས་ལྟོ་བ་རབ་ཏུ་ཆེར་གྱུར་ལ་ཧེན་གྱིས་བྱུང་སྟེ། ཤིན་ཏུ་ན་བ་དེ་ནི་རླུང་ནད་ཀྱིས་ཧེན་ཀྱིར་གྱུར་པ་ཞེས་བྱའོ། །དེ་ཡང་རྡོ་བའི་གཏུན་བུ་འཇོང་པོ་
[133a.3]ལྟར་ལྟོ་བ་ནས་ཡར་གྱེན་དུ་སྲ་ཞིང་མཁྲང་བ་སྟུག་པོ་མདུད་པ་ཅན་རྡོ་བའི་གཏུན་བུ་འཇོང་འཇོང་པོ་ལྟར་ཕྱིར་འབུར་ཞིང་གློ་བར་འབྱུང་བ་དེ་ནི་ཧེན་གྱི་གྱེན་དུ་བྱུང་བ་ཞེས་བྱའོ། །ཧེན་གྱི་ལྟོ་བ་ནས་དྲང་པོར་འདུག་པ་ནི། ཧེན་གྱི་ཐད་ཀར་འདུག་པ་ཞེས་བྱའོ། །ལོང་ཀ་ནས་རྒྱུ་
[133a.4]ཞབས་གཞང་དང་། དཀུ་དོའི་བར་དུ་ཐུར་དུ་ཟུག་ཅིང་གསང་ལ་བར་དུ་ན་བ་དེ་ནི་ཐུར་དུ་ཟུག་པའི་རླུང་ནད་ཅེས་བྱའོ། །ནད་ཐབས་དེ་ལས་བཟློག་སྟེ་ཚུལ་དེ་འདྲ་བ་ལས་ཐད་ཀར་ཟུག་སྟེ་ནའམ་གྱེན་དུ་ཟུག་སྟེ་ན་བ་དེ་ནི་གྱེན་དུ་ཟུག་པའི་རླུང་ནད་ཅེས་བྱའོ། །སྦྲགས་པ་རབ་ཏུ་
[133a.5]མང་བ་དང་། བཤང་བ་འོང་དུ་མི་རུང་སྟེ། འགགས་པ་དང་ཁ་ཟས་འགྲངས་ཤིང་ཚིམ་པར་ཟ་བའི་ནུས་པ་དང་། རྒྱུ་མའི་ནང་ན་སྒྲ་ཁྲུ་ལུ་ལུ་ཟེར་ཞིང་དྲོད་ཆུང་སྟེ། ཟས་མི་འཇུ་བ་དང་། ཧེན་གྱིས་འབུར་འབུར་པོར་བྱུང་ན། དེ་ལྟ་བུའི་སྐྲན་ཉེ་བར་འོངས་པའི་ནད་ཐབས་
[133a.6]ཡིན་ཞེས་ཟེར་རོ། །འབྲས་ནད་དང་། རྒྱུ་རླུགས་དང་། སྐྲན་དང་། འདི་སྣ་གསུམ་གྱི་ནད་གཞི་བཤད་པ་སྟེ་ལེའུ་བཅུ་གཅིག་པ་རྫོགས་སོ།། །།དམུ་རྫིང་གི་ནད་གཞི་བཤད་པའི་ལེའུ་བཅུ་གཉིས་པ་བཤད་པར་བྱའོ། །ཡང་ན་ནད་དོ་ཅོག་ཐམས་ཅད་ཀྱང་
[133a.7]ཕོ་བའི་མ་དྲོད་ཆུང་བ་ལས་ནད་དུ་འགྱུར་རོ། །ཕོ་བའི་མེ་དྲོད་ཆུང་ན་དམུ་རྫིང་གི་ནད་དུ་འགྱུར་རོ། །དེ་ལ་དམུ་རྫིང་གི་ནད་དུ་གྱུར་པའི་ནད་གཞི་ནི་ཟས་མ་ཞུ་བ་དང་། ཁ་ཟས་མི་འཕྲོད་པའི་བག་དང་། ཁ་ཟས་རྩུབ་མོ་ཁེངས་བུ་ཞག་ལོན་པ་དང་། ཟས་ཀྱི་རོ་དང་མདོག་
[133b]
[133b.1]འགྱུར་བ་དང་། བུད་མེད་ཀྱི་སྐྲ་དང་། སེན་མོ་དང་། ཤིང་ཚེར་ལྟ་བུས་རྒྱུ་མ་བརྟོལ་བ་དང་། དྲི་མ་ལྟར་སོང་བ་དང་། རླུང་དང་མཁྲིས་པ་ལ་སོགས་པ་དང་། བཤང་གཅི་ལྟ་བུའི་དྲི་མ་འདི་རྣམས་ཁོང་དུ་བསགས་པས་ལུས་ཀྱི་སྲོག་ཟུངས་བདུན་སྟོད་སྨད་དུ་རྒྱུ་བ་དང་།
[133b.2]བད་ཀན་རྒྱུ་བའི་རྩ་རྣམས་འགགས་ཏེ། ལུས་ཁོང་ན་ཡོད་པའི་རླུང་སྲོག་ཅེས་བྱ་བ་དང་། ཕོ་བའི་དྲོད་ཀྱིས་མེ་དང་ཐུར་དུ་སེལ་བ་ཞེས་བྱ་བའི་རླུང་འདི་རྣམས་ལ་གནོད་པར་བྱས། པགས་པ་དང་ཤ་མཐངས་ཀྱི་བར་དུ་ཡང་ནད་ཞུགས་ནས་གསུས་པ་ཆེར་སྐྱེས་པ་དེ་ནི་དམུ་རྫིང་
[133b.3]གི་ནད་ཅེས་བྱའོ། །དེ་ལ་ཡང་རྣམ་པ་བརྒྱད་དེ། རླུང་གི་དམུ་རྫིང་དང་། མཁྲིས་པའི་དམུ་རྫིང་དང་། བད་ཀན་གྱི་དམུ་རྫིང་དང་། འདུས་པའི་དམུ་རྫིང་དང་། མཛེར་པ་ལས་དམུ་རྫིང་དུ་གྱུར་པ་དང་། སྤུ་དང་སྐྲ་དང་རྟ་རྔའི་བག་ལྟ་བུ་དང་། ཁ་ཟས་འདྲེས་པ་ཟོས་
[133b.4]པ་དང་། རྒྱུ་མའི་ནང་དུ་འཁྲིས་ཏེ་བཤང་བ་འགགས་ནས། བཤང་བ་དེ་མང་དུ་འཁྱིལ་པ་ལས་དམུ་རྫིང་དུ་གྱུར་པ་དང་། ཁ་ཟས་ཀྱི་ནང་དུ་རུས་པ་དང་། གྲ་མ་དང་། ཉའི་གྲ་མ་དང་། རྩ་དང་། ཤིང་བུ་དང་། གསེག་མ་རྣོན་པོའི་བག་ལྟོར་སོང་བ་དེས་རྒྱུ་མ་རྡོལ་ཏེ་བུ་བྱུང་
[133b.5]ངམ་ཧ་ཅང་འགྲངས་ཆེས་པ་ཞིག་ལས་གླལ་བའི་དབུགས་ནང་དུ་རྔུབས་དྲགས་པས་རྒྱུ་མ་གས་ཏེ་ལྟོ་བའི་ནང་དུ་ཟག་ཅིང་འཁྱིལ་བས་དམུ་རྫིང་ཆགས་པ་དང་། ཟས་མ་ཞུ་སྟེ་ཕོ་བར་བེའུ་སྣབས་ཆགས་པའི་སྟེང་དུ་སྣུམ་བག་དང་། འཚལ་ནན་དུ་ཆུའི་བག་འཐུངས་པ་དང་། འཚལ་
[133b.6]ནན་དུ་ཆུ་ཧ་ཅང་མང་དུ་འཐུངས་པ་དང་། ཕོ་བའི་དྲོད་ཆུང་བས་མ་ཞུ་བའམ། ཡང་ན་ཧ་ཅང་སྐེམ་པོར་གྱུར་པ་དེ་ལྟ་བུ་ལས་དྲོད་ཆུང་ཞིང་གྲང་ནད་རླུང་སྐྱེས་པས་ཁ་ཟས་ཟོས་པའི་བཅུད་དངས་མ་རྩ་སོ་སོར་འགྲོ་བའི་རྩ་སྒོ་ཡང་འགགས་ལ་བད་ཀན་གྱིས་ཀྱང་ཆོད་ལ་བད་ཀན་དང་།
[133b.7]དམུ་ཆུར་འདྲེས་ནས་ཆེར་སྐྱེས་པ་དེ་ནི་དམུ་རྫིང་ཞེས་བྱའོ། །དེ་ལྟར་དམུ་རྫིང་རྣམ་པ་དེ་བརྒྱད་གང་ལྟར་གྱུར་ཀྱང་རུང་སྟེ་དམུ་རྫིང་དུ་གྱུར་པའི་ནད་ཐབས་ནི། རྐན་དང་མཆུ་སྐམ། རྐང་ལག་དང་ལྟོ་བ་སྐྲངས། སེམས་དྲན་པ་དང་ཉམས་འཚག་དང་ཁ་ཟས་འདི་རྣམས་ལྔ་ལས་བྲི་སྟེ་
[134a]
[134a.1]ཉམས། ལུས་ཤ་རིད་དེ་སྐེམ། གསུས་པ་ཆེར་སྐྱེ་སྟེ་ལུས་གཟུགས་སྤྱིར་བལྟས་ན་དམུ་རྫིང་གིས་བཏབ་པའི་མི་དེ་ཡི་དགས་འདྲའོ། །དེ་ལྟར་དམུ་རྫིང་གི་ནད་དུ་གྱུར་པ་དེ་བཀྲེས་ཏེ་ཁ་ཁ་བྱེད་པ་ཡང་ཉམས་ཏེ་མེད། ཁ་ཟས་ཟོས་ན་ཡང་ཡུན་རིང་དུ་མི་འཇུ་
[134a.2]ལ་འཇུ་བའི་ཚེ་ན་ཡང་དང་ག་ཚ་ཞིང་སྐྱུར་བཞིན་དུ་འཇུ་ལ་ཁ་ཟས་ཞུའམ། མ་ཞུ་བའི་དྲོད་ཀྱང་མ་ཟིན་ལ་འགྲངས་པར་མི་ནུས། ཉམས་འཚག་ཀྱང་ཉིན་གཅིག་པས་ཉིན་གཅིག་ཅིང་བྲི་ལ་ཅུང་ཟད་ཅིག་ལས་བྱས་པས་བསྐྱོད་ན་ཡང་དབུགས་མི་བདེ་སྟེ་རྔམ་པ་དྲག་ཏུ་འབྱུང་།
[134a.3]བཤང་བ་ཁོང་དུ་བསོགས་ཤིང་སྲི་ལ་རྐང་པ་ཅུང་ཟད་སྐྲང་། ཆུ་སོའི་མཚམས་སུ་ན་ཞིང་གང་སྟེ་རྒྱས། ཁ་ཟས་ཡང་བ་ཅུང་ཟད་ཟོས་ཀྱང་སྦོས་པ་བཞིན་དུ་འགྱུར་ཏེ། གསུས་པའི་གཉེར་མ་ནི་རངས། རྩ་ནི་རྒྱས། དམུ་རྫིང་དུ་གྱུར་པའི་ནད་ཐབས་འདྲ་སྟེ། མྱོས་ཤིང་
[134a.4]སློན་བག་ཏུ་འགྱུར་ལ་ཁོང་པའི་དྲོད་ནི་དྲོ། བཤང་བའི་དྲི་མ་སྲི་ཞིང་འགགས་ན་དྲོད་ཆུང་བར་འགྱུར་རོ། །ལུས་ནི་ཚ་ཞིང་སྐྲངས་ལ་གསུས་པ་ཆེར་སྐྱེས་ཏེ། མཇུག་ཏུ་ལྟོ་བའི་ནང་དུ་འབྱུང་བར་འགྱུར་རོ། །དེ་ལ་དམུ་རྫིང་གི་ནད་རླུང་ལས་གྱུར་པའི་ཤས་ཆེ་ན་ཤ་མདོག་སྨུག་
[134a.5]སྐྲང་པ་མེད། གསུས་པ་ཁུར་ཐོགས་པ་བཞིན་ལྕི་བ་ཡིན། རྩ་མང་པོའི་དྲ་བ་སྐར་ཁུང་རིས་བཞིན་དུ་གསུས་པ་བཀྲ། ལྟོ་བའི་ནང་ན་རྟག་པར་སྒྲ་འུ་རུ་རུ་ཟེར། ལྟེ་བ་དང་རྒྱུ་མར་ཟུག་ཅིང་རབ་ཏུ་ན། རླུང་ནད་ལས་གྱུར་ན་སྙིང་དང་རྐེད་པ་དང་ལྟ་བ་དང་གཞང་དང་ཆུ་སོ་གཡས་
[134a.6]གཡོན་དུ་ཟུག་ཅིང་ན། དབུགས་ཐུར་དུ་སྒྲ་ཅན་དུ་འབྱུང་། གཅིན་སྲི་སྟེ་ཅུང་ཟད་ཙམ་དུ་འབྱུང་། ཕོ་བའི་དྲོད་ཧ་ཅང་ཆེ་བ་ཡང་མ་ཡིན། ཁར་རོ་མི་བྲོ་བ་ཡང་མ་ཡིན་ཏེ། ཟས་ཡི་གར་འོང་ཞིང་འདོད་དེ་འདི་ལྟ་བུ་ནི་རླུང་ནད་ཀྱི་ཤས་ཆེ་བ་ལས་དམུ་རྫིང་དུ་གྱུར་པ་ཞེས་བྱའོ། །དེ་ལ་རླུང་
[134a.7]ནད་ཀྱི་དམུ་རྫིང་ནི་ལག་པ་དང་། གཞང་དང་ཕོ་མཚན་གྱི་འབྲས་བུ་དང་ལྟོ་བ་འདི་རྣམས་སྐྲང་། ལྟོ་བའི་སྟོད་དང་ལྟོ་བའི་སྨད་དང་། རྩིབ་ལོགས་དང་རྐེད་པ་དང་རྒྱབ་དང་། འདི་རྣམས་སུ་ན། རུས་པའི་ཚིགས་བྱ་བ་སྙམ་བྱེད། ལུད་པ་སྐམ་ལུད་ཀྱིས་བཀར། ལུས་ཀྱི་ཡན་ལག་
[134b]
[134b.1]ན། རོ་སྨད་ལྕི། བཤང་བ་སྲི་ཞིང་འགགས། ལུས་ཀྱི་པགས་པའི་ཤ་མདོག་དང་། སྐྲ་དང་སེན་མོ་ལ་སོགས་པ་གནག་ལ་རྩ་དམར། གསུས་པ་གློ་བུར་དུ་རེས་འགའ་ནི་སྐྱེ། རེས་འགའ་ནི་འབྲི། གསུས་པ་ཟུག་ཅིང་ན། རྩ་ཕྲ་མོ་ཟུག་ཅིང་རྒྱས། གསུས་པ་རྐྱལ་པ་བུས་པ་
[134b.2]བཞིན་དུ་རྒྱས་ཏེ། གསུས་པ་རྒྱས་ན་རྐྱལ་པ་བུས་པ་བརྡབས་པ་སྐད་ཟེར་ལ་ལྟོ་བའི་ནང་ཕན་ཚུན་ཡན་མན་ཀུན་དུ་རླུང་རྒྱུ་ལན་ཞིང་ཟུག །དེ་ལ་མཁྲིས་པ་ལས་དམུ་རྫིང་དུ་གྱུར་པའི་ནད་ཐབས་ནི། རིམས་ནད་ཀྱིས་འདེབས། བརྒྱལ། ཁོང་ཚ། སྐོམ་དད་ཆེ། ཁའི་ནང་ཚ། མགོ་
[134b.3]འཁོར། ཚད་པས་རབ་ཏུ་འཁྲུ། པགས་པའི་ཤ་མདོག་དང་སེན་མོ་ལ་སོགས་པ་སེར་པོར་སྣང་། གསུས་པའི་མདོག་ཀྱང་སེར། ལྟོ་བའི་རྩ་རྣམས་ཀྱི་མདོག་ཀྱང་སེར་ལ་ཟངས་ཀྱི་ཁ་དོག་བཞིན་དམར། ལུས་རྔུལ་ལ་ཚ་ཞིང་བསྲེགས་པ་སྙམ་བྱེད་ལ་ལུས་ཀྱི་ངད་པར་
[134b.4]འགྱུར། རེག་ན་འཇམ། མྱུར་དུ་སྨིན་ཅིང་རྣགས་ཏེ་ཟག་པར་འགྱུར་རོ། །བད་ཀན་ལས་དམུ་རྫིང་དུ་གྱུར་པའི་ནད་ཐབས་ནི། རྐང་ལག་གི་ལྷུ་ཚིགས་ན། རྐང་ལག་ཚོར་བའི་བག་མེད་དེ་བེམ་བེམ་པོར་འདུག །གསུས་པ་སྐྲངས་ལ་ལྕི། གཉིད་ཆེ། རྟག་ཏུ་སློན། ཟས་
[134b.5]ཡི་གར་མི་འོང་། དབུགས་མི་བདེ། ལུད་པ་ལུ། པགས་པ་དང་སེན་མོ་ལ་སོགས་པའི་མདོག་སྐྱ་བོར་འགྱུར་རོ། །དམུ་རྫིང་སྐྱེས་པའི་ལྟོ་བ་སྲ་ཞིང་མཁྲང་ལ་འཇམ། གསུས་པའི་སྟེང་དུ་རྩ་དཀར་པོ་ཆེན་པོས་གང་། གསུས་པ་བགས་ཀྱིས་ཆེར་སྐྱེས་ཏེ་སྲ་ཞིང་མཁྲང་།
[134b.6]ལག་པས་མྱངས་ན་གྲང་། གསུས་པ་ལྕི། རླུང་དང་མཁྲིས་པ་དང་བད་ཀན་གསུམ་ཅར་འདུས་པ་ལས་དམུ་རྫིང་དུ་གྱུར་པའི་ནད་ཐབས་ནི། རླུང་དང་མཁྲིས་པ་དང་བད་ཀན་སོ་སོའི་དམུ་རྫིང་གི་ནད་ཐབས་བཤད་པ་སྟེ། དེ་ལྟ་བུའི་ནད་སྣ་ཚང་བའི་དམུ་རྫིང་དེ་ནི་འདུས་པའི་དམུ་
[134b.7]རྫིང་ཞེས་ཀྱང་བྱ་སྟེ། འདུས་པའི་དམུ་རྫིང་གི་ནད་དུ་གྱུར་པ་ནི་བུད་མེད་ཀྱི་ཁ་ཟས་ཀྱི་ནང་དུ་སྐྲ་དང་། སེན་མོ་དང་དྲི་མ་དང་གནོད་པར་འགྱུར་བའི་དབྱིག་དུག་དང་། དུག་ལ་སོགས་པས་ཁོང་པ་ནང་དུ་ཁྲག་དང་ནད་རྣམས་བསྩགས་པས། གསུས་པ་ཡང་དམུ་རྫིང་ལྟར་སྐྱེལ།
[135a]
[135a.1]ཁ་སྐམ། མགོ་འཁོར། བརྒྱལ་བའི་ནད་ཐབས་འདི་ལྟ་བུ་ནི་འདུས་པའི་དམུ་རྫིང་གི་ནད་ཐབས་ཡིན་ཏེ། གྲང་ལྷགས་དང་། རླུང་དང་ནམ་རྨུས་ན་ནད་ན་བར་འགྱུར། མྱུར་དུ་སྨིན་ཅིང་རྣགས་ཏེ་མི་བཟད་པར་ན་བར་འགྱུར་རོ། །དེ་ལས་མཆེར་པ་ལས་དམུ་
[135a.2]རྫིང་དུ་གྱུར་པ་ནི་ཁ་ཟས་ཧ་ཅང་ཆེར་ཟོས་པས་ནང་དུ་འཁྲུགས་ཏེ་མི་བདེ་བ་དང་། ཕན་ཚུན་དུ་སོང་ཞིང་དྲག་ཤུལ་ཆེར་བསྐྱོད་པ་བྱས་པས་བུད་མེད་ལ་ཧ་ཅང་དྲགས་པ་དང་། ལས་ཆེས་པས་དུབ་པ་དང་། ལམ་རིངས་ཀྱིས་དུབ་པ་དང་། བཀྲུ་སྨན་དང་སྐྱུག་སྨན་ལྟ་བུ་དྲགས་པས་ལུས་རྐེ་
[135a.3]སྟེ་མཆེར་པ་གློ་གཡོན་ན་འདུག་པ་ཐུར་དུ་ལྷུང་ནས་མཆེར་པ་སྐྲངས་སམ། ཁྲག་གིས་རྒྱས་སམ་ཡང་ན་ཟས་ཀྱི་བཅུད་ཁུ་བ་མ་ཞུ་བས་ཆེར་སྐྲངས་པས་རྡོ་བའི་གཏུན་བུ་བཞིན་སྲ་བར་འགྱུར་ཏེ། རུས་སྦལ་གྱི་རྒྱབ་བཞིན་དུ་སྔར་མཁྲང་བར་གྱུར་པ་ལས་བགས་ཀྱིས་ཆེར་སྐྱེས་ནས་ལྟོ་བར་
[135a.4]དམུ་རྫིང་ལྟར་ཆགས་པ་དང་། ན་བའི་ཐབས་ནི་དབུགས་མི་བདེ། ལུད་པ་ལུ། སྐོམ་དད་ཆེ། ཁ་ཟས་ཁར་རོ་ཅི་བྲོ་མི་ཚོར། ལྟོ་བ་ཆེར་རྒྱས་ལན། རིམས་ཀྱིས་འདེབས། ཁ་གདོང་གི་ཤ་མདོག་སྐྱ་བོ་རྦབ་རྦབ་པོར་འདུག །བརྒྱལ། སློན། ཁོང་ཚ་ཞིང་མྱོས་པ་དེ་ལྟ་བུར་འགྱུར་
[135a.5]རོ། །རྩ་རྣམས་ནི་དམར་ཞིང་སྨུག་པའམ། སྔོ་ཞིང་སེར་ལ་མི་སྡུག་པ་དེ་ལྟ་བུར་འགྱུར་རོ། །བཤང་བ་ཐུར་དུ་འོང་དུ་མི་རུང་སྟེ། འགག་ཅིང་ན། གསུས་པ་ཆེར་སྐྱེས་པ་དང་། མོང་མོང་པོར་གྱུར་པ་དང་། སྐོམ་དང་སྐྱེས་པ་དང་། ཁོང་ཚ་ཞིང་རིམས་ཀྱིས་འདེབས་པ་དང་། ལུས་ལྕི་ཞིང་
[135a.6]ཟས་ཡི་གར་མི་འོང་བ་དང་། གསུས་པ་རྒྱས་ཏེ་སྲ་བར་འགྱུར་བ་དང་། འདི་ལྟ་བུའི་བྱེ་བྲག་ལས་མཆེར་པའི་དམུ་རྫིང་དེ་རླུང་དང་མཁྲིས་པའམ་བད་ཀན་གྱིས་གང་ཆེ་བ་ལས་མཆེར་པའི་དམུ་རྫིང་དང་འདྲ་བར་གློ་གཡས་ན་མཆིན་པ་འདུག་པ་དེ་ཡང་ཁ་ཟས་ཧ་ཅང་ཆེར་ཟོས་པས་ནད་དུ་འཁྲུགས་ཏེ་མི་བདེ་
[135a.7]བ་དང་། ཕན་ཚུན་དུ་སོང་ཞིང་དྲག་ཤུལ་ཆེར་བསྐྱོད་པ་བྱས་པ་དང་། བུད་མེད་ལ་ཧ་ཅང་དྲགས་པ་དང་། ལས་ཆེན་པོས་དུབ་པ་དང་། ལམ་རིངས་ཀྱིས་དུབ་པ་དང་། བཀྲུ་སྨན་དང་། སྐྱུག་སྨན་ལྟ་བུ་དྲགས་པས་ལུས་ཤ་རྐེ་སྟེ་མཆིན་པ་གཡས་ན་འདུག་པ་དེ་ཐུར་དུ་ལྷུང་ནས་མཆེད་པ་བཞིན་སྐྲངས་
[135b]
[135b.1]ཏེ་དམུ་རྫིང་དུ་འགྱུར་རོ། །དེ་ལ་བྱ་སྒྲོ་དང་སྐྲ་དང་རྟ་རྔ་ལ་སོགས་པ་ཁ་ཟས་དང་འདྲེས་ཏེ་ཟོས་པ་དེས། རྒྱུ་མའི་ནང་འཁྲིས་ཏེ་འཁུམས་པས་བཤང་བ་ཀུན་ནང་དུ་འཁྱིལ་ཞིང་འགགས་པ་དང་གཞང་འབྲུམ་གྱི་ནད་ཀྱིས་བཏབ་བམ། བཤང་བ་འགགས་ཏེ་འབྱུང་དུ་མི་རུང་བའམ་ཁ་ཟས་ཀྱིས་རྒྱུ་མའི་
[135b.2]ནང་གི་ངོས་ལ་ཆགས་པས་མཁྲིས་པ་དང་། བད་ཀན་དང་བཤང་གཅི་རྣམས་འགགས་ཏེ། འཁྱིལ་བས་རླུང་ཐུར་དུ་སེལ་བ་ཞེས་བྱ་བ་ཞིག །ལྟོ་ན་གནས་པ་དེ་འགགས་ཤིང་འཁྱིལ་བས་ནད་དུ་གྱུར་ཏེ། རླུང་དེས་ལུས་ཀྱི་ཁོང་ཚ། རིམས་ནད་ཀྱིས་འདེབས། སྐོམ། སྦྲིད་པ་འབྱུང་། ལུད་
[135b.3]པ་ལུ། དབུགས་མི་བདེ། བརླ་ན། ཀླད་པ་ན། སྙིང་ན། ལྟེ་བ་ན། གཞང་དང་འདི་རྣམས་ན་བས་བཤང་བ་འགག་ཅིང་འཁྱིལ། ཟས་ཡི་གར་མི་འོང་། སློན། ལྟོ་བའི་ནང་དུ་རླུང་སྒྲ་འུ་རུ་རུ་ཟེར། རྩ་ཀུན་རྒྱས་ཏེ་སྔོ་ལ་སྨུག །ལྟེ་བའི་གོང་དུ་བ་མཇུག་འདྲ་བ་ཤུར་ཤུར་པོ་སྣང་བའི་ཧེན་
[135b.4]གྱི་འབྱུང་བ་འདི་ནི། སྐྲ་དང་རྟ་རྔ་ལ་སོགས་པ་རྒྱུ་མའི་ནང་དུ་མཁྲིས་པའི་དམུ་རྫིང་ཞེས་བྱའོ། །དེ་ལ་རྒྱུ་མ་རལ་བ་ལས་དམུ་རྫིང་དུ་གྱུར་པ་ནི་རྣམ་པ་གཉིས་ཏེ། ཁ་ཟས་དང་རུས་པ་རྣོན་པོས་སམ། གསེག་མ་རྣོན་པོའི་བག་དང་འདྲེས་པས་རྒྱུ་མ་རྡོལ་བའམ། ཧ་ཅང་མ་འོས་པར་དྲགས་ཆེས་
[135b.5]པས་རྒྱུ་མ་གས་པར་གྱུར་པ་དེ་ལྟ་བུ་ལས། ཁོང་པའི་ནང་དུ་ཡང་ཁ་ཟས་ཀྱི་སྙགས་སྙིགས་དང་། བེའུ་སྣབས་སུ་བཅས་ཏེ་ལུག་པར་གྱུར་པ་དང་། ཐུར་དུ་ཡང་བཤང་བ་ཉུང་ཤས་ཉུང་ཤས་མནམ་པོ་ཤེའུ་རུལ་ལྟ་བུ་སྤྱི་བག་ཏུ་འབྱུང་བ་མདོག་དམར་སེར་ཅན་དུ་འབྱུང་སྟེ། དེ་ལྟ་བུས་ལྟོ་བའི་
[135b.6]ནང་ཡང་གང་། ཐུར་དུ་ཡང་འདི་བཞིན་དུ་འབྱུང་སྟེ། ལྟེ་བ་མན་ཆད་ལྟེ་བ་ཆུས་གང་བ་བཞིན་ཆེར་སྐྱེ་ལ་ལུས་ཀུན་ཁྱབ། དབུགས་མི་བདེ། སྐོམ་དད་ཆེ། མགོ་འཁོར་བ་འདི་ལྟ་བུའི་ནད་ཐབས་ནི་རྒྱུ་མ་རྡོལ་བའི་དམུ་རྫིང་ཞེས་བྱའོ། །ཡང་ཁ་ཅིག་ན་རེ་ནད་དེ་ལྟ་བུ་ལ་རྒྱུ་མ་ཟག་པའི་དམུ་རྫིང་ཞེས་
[135b.7]ཀྱང་ཟེར་རོ། །དེ་ལ་དམུ་ཆུའི་དམུ་རྫིང་ཞེས་བྱ་བ་ནི། སྣུམ་བག་ལ་སོགས་པ་རྟག་ཏུ་འཐུང་བ་ལ་ཞུགས་པ་དང་། འཕྲལ་དུ་ཆུ་མང་དུ་འཐུངས་པ་དང་། ཧ་ཅང་ཆུ་མ་འོས་པར་དྲག་ཏུ་འཐུངས་པ་དང་། འདི་ལྟ་བུས་ཁོང་པའི་དྲོད་བྲི་སྟེ་ཕོ་བའི་དྲོད་ཆུང་བ་དང་ཡང་ན་ཧ་ཅང་སྐེམ་པར་གྱུར་པའམ་
[136a]
[136a.1]འདི་ལྟ་བུའི་ཁོང་གྲང་ཞིང་རླུང་བག་ཆེར་སྐྱེས་པས་བད་ཀན་དང་ཆུ་འདྲེས་པ་འཁྱིལ་ཏེ་རྫིང་བ་ལས་ཇེ་ཆེ་ཇེ་ཆེར་སྐྱེས་པ་དེ་ཉིད་དམུ་རྫིང་ཞེས་བྱའོ། །དེ་ལྟར་དམུ་རྫིང་དུ་གྱུར་པ་དང་། སྐོམ་དད་ཆེ། རྐུབ་ཏུ་ཆུ་ཟག་ཅིང་ན། ལུད་པས་བཀར། དབུགས་མི་བདེ། ཟས་ཡི་
[136a.2]གར་མི་འོང་། རྩ་རྣམས་མདོག་སྣ་ཚོགས་སུ་བཀྲ་ལ་རྒྱས་ཤིང་གང་། གསུས་པ་ལ་མྱངས་ཤིང་བལྟས་ན་རྐྱལ་པ་ཆུས་གང་བ་བཞིན་འདུག་ལ། བསྐྱོད་ན་ཁོང་ན་སྐྱོག་སྐྱོག་ཟེར། ལུས་འདར། དེ་ལྟར་གསུས་པ་དམུ་རྫིང་དུ་གྱུར་ན་ཆེ་ལ་འཇམ། སྲ། ལྟེ་བའི་ཐད་ཀར་ཟླུམ། ནད་འདི་ལྟ་
[136a.3]བུ་ལ་དཔྱད་མི་བྱེད་ཅིང་མི་གསོ་བར་ཡལ་བར་བོར་ན་ནད་དཀྱེལ་སྐྱེས་ཏེ། ཁོང་དུ་རུལ་ཏེ་རྣགས་ནས་རྣག་སླ་མོར་ཟག་ལ་རུས་པའི་ཚིགས་དང་རྩ་ཀུན་གྱི་ནང་དུ་ཡང་འགྲོ། ཁར་ཡང་འབྱུང་། ལུས་ཀྱི་རྔུལ་དུ་ཡང་འབྱུང་ངོ་། །ཡང་དམུ་རྫིང་དེ་གལ་ཏེ་ཐུར་དུ་འབྱུང་དུ་མི་རུང་ཞིང་འགགས་ན་རྒྱུ་མའི་
[136a.4]ནང་དུ་འཁྱིལ་ཏེ། ལྟོ་བ་གཡས་གཡོན་དུ་ཐད་ཀར་གང་ཞིང་འདུག་གོ། །དེ་ལྟར་གྱུར་ན་གསུས་པ་ལྕི་ལ་སྲ་ཞིང་ཟླུམ། བརྡབས་ན་སྒྲ་འབྱུང་། གསུས་པ་མདོག་འཇམ། གསུས་པའི་རྩ་མི་སྣང་སྟེ་ལྟེ་བའི་ཐད་ཀར་བསྒུལ་ན་མེར་མེར་བྱེད་དེ་འདི་ལྟ་བུའི་ནད་ནི་ཆུའི་དམུ་རྫིང་ཞེས་བྱའོ། །
[136a.5]དེ་ལྟར་དམུ་རྫིང་གི་ནད་རྣམ་པ་དེ་སྙེད་ལ་གསོ་དཀའ་སླའི་བྱེ་བྲག་ནི། རླུང་ལས་དམུ་རྫིང་དུ་གྱུར་པ་དང་། མཁྲིས་པ་ལས་དམུ་རྫིང་དུ་གྱུར་པ་དང་། དེ་བཞིན་དུ་བད་ཀན་ལས་དམུ་རྫིང་དུ་གྱུར་པ་དང་། འདུས་པ་ལས་གྱུར་པ་དང་། མཆེར་པ་ལས་གྱུར་པ་དང་། ཆུ་ལས་དམུ་རྫིང་དུ་གྱུར་པ་
[136a.6]འདི་རྣམས་ནི་གོང་མ་བས་འོག་མ་རིམ་བཞིན་དུ་གསོ་དཀའོ། །དེ་ལྟར་དམུ་རྫིང་ངོ་ཅོག་གི་ནད་ནི། ཟླ་བ་ཕྱེད་ལོན་ཕན་ཆད་དམུ་རྫིང་གི་ནད་གང་ཡིན་པ་རྟོགས་པར་འགྱུར་རོ། །འདུས་པའི་དམུ་རྫིང་དང་ལྟོ་བར་ཆུ་འཁྱིལ་བའི་དམུ་རྫིང་དང་། དམུ་རྫིང་ལྟ་བུར་གྱུར་པ་ལས་ནད་བླ་བརྣན་ལྟ་བུས་
[136a.7]བཏབ་པ་དང་། དམུ་རྫིང་གི་ནད་གང་ཡང་རུང་མི་འཚོ་བར་འགྱུར་བའི་འཆི་ལྟས་བྱུང་བ་དང་། དང་པོ་སྐྱེས་པ་ནས་དམུ་རྫིང་དུ་གྱུར་པ་འདི་རྣམས་ལྟ་བུ་ནི་གསོ་དཀའོ། །དེ་ལ་གསོ་སླ་བ་ནི་དམུ་རྫིང་གསར་དུ་བྱུང་བ་དང་། ཆུའི་དམུ་རྫིང་ལྟ་བུར་གྱུར་པ་དང་། ནད་པའི་ཉམས་འཚག་གིས་ཐུབ་པ་
[136b]
[136b.1]དང་། གསོས་དང་སྨན་དཔྱད་དུ་ཡང་རུང་བ་འདི་རྣམས་ལྟ་བུ་ནི་གསོ་སླའོ། །དམུ་རྫིང་རྣམ་པ་བརྒྱད་བཤད་པ་སྟེ་ལེའུ་བཅུ་གཉིས་པ་རྫོགས་སོ།། །།སྐྱ་རྦབ་དང་། འོར་ནད་དང་། མེ་དབལ་གྱི་ནད་གཞི་བསྟན་པ་སྟེ་ལེའུ་བཅུ་གསུམ་པ་བཤད་པར་བྱའོ། །དེ་ལ་སྐྱ་རྦབ་
[136b.2]ཀྱི་ནད་ནི་སྔར་ཇི་སྐད་དུ་བཤད་པ། ཁ་ཟས་ཚ་བ་དང་། སྐྱུར་བ་དང་། ལན་ཚྭ་ལ་སོགས་པ་དེ་ལྟ་བུས་མཁྲིས་པའི་ནད་ལྷག་པར་སློང་བར་བྱེད་པས་མཁྲིས་པའི་ནད་ཆེར་ལངས་པ་དང་། མཁྲིས་པ་སྙིང་ལ་གནས་པ་དེ་རླུང་གི་སྟོབས་ཀྱིས་རྩ་ཆེན་པོ་བཅུའི་ནང་དུ་བཀྲམ་སྟེ་གྱེས་ནས་ལུས་
[136b.3]ཐམས་ཅད་དུ་ཁྱབ་སྟེ། བད་ཀན་དང་། པགས་པ་དང་། ཁྲག་དང་། ཤ་རྣམས་ཀྱི་ནང་དུ་ཞུགས་ཏེ་གནོད་པའི་ནད་དུ་གྱུར་ན། མཁྲིས་པ་དང་ཤ་དང་པགས་པའི་ནང་ན་བརྟེན་ཅིང་འདུག་པ་དེས་པགས་པའི་མདོག་ཀྱང་འགྱུར་ཏེ་སྐྱ་བ། སེར་བ། ལྗང་སྔོན་གྱི་བག་ཡོད་པ་དེ་ནི་སྐྱ་
[136b.4]རྦབ་ཀྱི་ནད་ཅེས་བྱ་སྟེ། ཁ་དོག་དེ་གསུམ་གྱི་ནང་ནས་སྐྱ་བའི་ཤས་ཆེ་བས་དེའི་ཕྱིར་སྐྱ་རྦབ་ཀྱི་ནད་ཅེས་བྱའོ། །དེའི་ཕྱིར་ནད་དེས་ལུས་ལྕི་བ་དང་། སྲོག་ཟུངས་ཀྱི་ཁམས་རྣམས་ལྷོད་པ་དང་། མདངས་དང་ཡོན་ཏན་ཡང་ཟད་པས། ཁྲག་དང་ཚིལ་རྣམས་ཀྱང་བྲི་སྟེ། ཆུང་དུ་གྱུར། ལུས་
[136b.5]ཀྱི་སྙིང་པོ་ཡང་མེད། དབང་པོ་རྣམས་ཀྱང་ལྷོད། ལུས་ཀྱི་ཡན་ལག་ཀྱང་བརྡུང་བ་སྙམ་བྱེད། ནད་པ་དེ་ཉམས་ལ་སྙིང་གནས་ཟག་པ་སྙམ་བྱེད། མིག་དང་མིག་ཕུགས་སྐྲངས། ཉམས་ལ་བྱིང་བ་སྙམ་བྱེད་ཅིང་ན། མཆིལ་མ་མང་། གཅོམ་ཆུང་སྟེ་མང་དུ་སྨྲ་མི་ཕོད། ཁ་ཟས་ལ་
[136b.6]ཚིག་པ་ཟ་ཞིང་མི་འདོད། གྲང་བའི་བག་མི་བཟོད། བ་སྤུ་རྣམས་ཀྱི་ཕོ་བའི་དྲོད་ཉམས། དཔྱི་མན་ཆད་རོ་སྨད་ཐུར་དུ་བྱིང་བ་སྙམ་བྱེད་དེ་ལྕི། རིམས་ཀྱིས་འདེབས། དབུགས་མི་བདེ། རྣ་བ་འབོད་ཅིང་སྒྲ་ཙི་རི་རི་ཟེར། ཁོང་ངལ། མགོ་འཁོར་ཏེ། སྐྱ་རྦབ་ཀྱི་ནད་ཐབས་སྤྱི་ནི་དེ་ལྟ་བུ་ཡིན་
[136b.7]ནོ། །སྐྱ་རྦབ་ཀྱི་ནད་དེ་ཡང་རྣམ་པ་ལྔ་སྟེ། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་དང་། ས་ཞག་ལྟ་བུ་ཟོས་པ་ལས་སྐྱ་རྦབ་ཏུ་གྱུར་པ་རྣམ་པ་དེ་ལྔའོ། །སྐྱ་རྦབ་ཀྱི་ཐོག་མའི་ནད་ཐབས་ནི་སྙིང་འཕར། པགས་
[137a]
[137a.1]པའི་ཤ་མདངས་རྩུབ། ཡི་ག་འཆུས། གཅིན་གྱི་མདོག་སེར། རྔུལ་མེད་ཁོང་པའི་ཕོ་བའི་དྲོད་ཆུང་། ཉམས་བྱིང་སྟེ་ལྕི། ཁོང་ངལ་ལོ། །རླུང་ནད་ལས་གྱུར་པའི་སྐྱ་རྦབ་ཀྱི་ནད་ཐབས་ནི། ལུས་ཀུན་ན་ཞིང་ཟུག་ལ་འདར། མདོག་གནག་ཅིང་རྩུབ། རྩ་རྣམས་
[137a.2]དང་སེན་མོ་དང་མིག་དང་བཤང་གཅི་རྣམས་ཀྱི་མདོག་སྨུག །ལུས་ནི་སྐྲང་། ལྟོ་བ་ན་ཞིང་སྦོ། ཁར་རོ་བྲོ་བ་མི་ཚོར། རྟུག་སྐམ་དུ་འབྱུང་། རྩིབ་ལོགས་དང་། ཀླད་པའི་སྤྱི་བོར་ཟུག་ཅིང་ན་བ་དེ་ལྟ་བུ་ཡིན་ནོ། །མཁྲིས་པ་ལས་སྐྱ་རྦབ་ཏུ་གྱུར་པའི་ནད་ཐབས་ནི་རྩ་དང་སེན་མོ་དང་མིག་ལ་
[137a.3]སོགས་པའི་མདོག་ལྗང་སྔོན་ལས་རྩ་སེར་པོར་སྣང་། རིམས་ཀྱིས་འདེབས། དབུགས་མི་བདེ་སྟེ་མུན་པ་བཞིན་རྨུགས་ཞེས་བྱེད་པ་དང་། སྐོམ་དད་སྐྱེ། ལུས་རྔུལ། བརྒྱལ། ཉམས་ལ་བསིལ་བའི་བག་འདོད། ལུས་མནམ་སྟེ་དྲི་མི་ཞིམ། ཁའི་ནང་ཚ། ཐུར་དུ་འཁྲུ། སྒྲེགས་པ་སྐྱུར་
[137a.4]ལ་ཚ་བར་འབྱུང་བ་འདི་ལྟ་བུ་ཡིན་ནོ། །བད་ཀན་ལས་གྱུར་པའི་སྐྱ་རྦབ་ཀྱི་ནད་ཐབས་ནི་རྩ་དང་སེན་མོ་ལ་སོགས་པའི་མདོག་དཀར་པོར་སྣང་། ཉམས་གློ་བག་ཏུ་འདུག །ཁའི་ནང་ལན་ཚྭའི་རོ་བྲོ། བ་སྤུ་རྣམས་ལངས་ཏེ་བརྩེ། སྐད་འགག །ལུད་པས་བཀར། སློན་པར་བྱེད་དོ། །འདུས་པ་
[137a.5]ལས་གྱུར་པའི་སྐྱ་རྦབ་ཀྱི་ནད་ཐབས་ནི་རླུང་དང་མཁྲིས་པ་དང་བད་ཀན་གསུམ་གྱི་སྐྱ་རྦབ་ཀྱི་ནད་ཐབས་ཀྱི་སྣ་གྲངས་འདྲེས་པར་ན་ལ་ཚབས་ཆེ་སྟེ་བརྣགས་པར་དཀའ་བ་དེ་ལྟ་བུ་ཡིན་ནོ། །ས་ཞག་སྦྱིན་པོ་ཟོས་པ་ལས་སྐྱ་རྦབ་ཀྱི་ནད་ཐབས་སུ་གྱུར་པ་ནི། ས་ཞག་རོ་བསྐ་བ་ཟོས་ན་རླུང་ནད་ཀྱི་སྐྱ་རྦབ་ཏུ་འགྱུར་
[137a.6]རོ། །ཚ་བྲོ་བའི་ས་ཞག་ཟོས་ན་མཁྲིས་པའི་ནད་ཀྱི་སྐྱ་རྦབ་ཏུ་འགྱུར་རོ། །ས་ཞག་རོ་མངར་བ་ཟོས་ན་བད་ཀན་གྱི་ནད་ཀྱི་སྐྱ་རྦབ་ཏུ་འགྱུར་རོ། །དེ་ལྟར་ས་དེ་ལྟ་བུའི་བག་ཟོས་པས་ལུས་ཀྱི་སྲོག་ཟུངས་རྣམས་ལ་ཡང་གནོད་པའི་ནད་དུ་འགྱུར་བར་བྱེད་དོ། །ཁམ་པའི་ས་ཞག་རྩུབ་མོ་ཟོས་ན་ལུས་
[137a.7]ཀྱང་རྩུབ་པར་འགྱུར་ལ། ནང་གི་རྒྱུ་མ་ཡང་བཙོས་པ་སྙམ་བྱེད་ཅིང་གང་ལ། ཁོང་པ་ནང་དུ་འགགས་ཏེ་ནད་ཐབས་ནི་གོང་མ་དང་འདྲའོ། །དེ་ལྟར་ཁམ་པའི་ས་ཞག་ཟོས་པས་རྐང་པ་དང་། ལྟེ་བ་དང་། ཁ་དང་ཕོ་མཚན་རྣམས་སྐྲང་། བཤང་བ་ཐུར་དུ་སྲིན་བུ་ཅན་དུ་འབྱུང་ཞིང་བཀྲ་བག་དང་
[137b]
[137b.1]འདྲེས་པར་འོང་། ཁར་བད་ཀན་དང་ཁྲག་ཏུ་འདྲེས་པར་འོང་ངོ་། །སྐྱ་རྦབ་ཀྱི་ནད་ཀྱིས་བཏབ་པའི་ནད་པ་དེ་ལ། མཁྲིས་པ་སྐྱེ་བར་འགྱུར་བའི་ཁ་ཟས་བསྟེན་ན་མཁྲིས་པའི་ནད་ཆེར་སྐྱེས་པས། ཁོང་པའི་ནང་གྲོལ་དང་། ལུས་ཀྱི་ཡན་ལག་གི་ཤ་ཁྲག་རྣམས་མཁྲིས་པ་ལས་བསྲེགས་
[137b.2]ནས། མིག་སེར་གྱི་ནད་དུ་འགྱུར་ཏེ་མིག་དང་། གཅིན་དང་། པགས་པ་དང་། སེན་མོ་དང་། ཁ་གདོང་དང་། བཤང་བ་རྣམས་ཀྱི་མདོག་སེར་པོར་སྣང་། ལུས་ཚལ་ཟས་མི་འཇུ། སྐོམ་དད་ཆེ། ལུས་ཀྱི་མདོག་ནི་སྦལ་པ་བཞིན་སེར་པོར་སྣང་། དབང་པོ་རྣམས་ཉམས་པ་འདི་ལྟ་བུ་ཡིན་
[137b.3]ནོ། །མཁྲིས་པའི་ནད་རྒྱས་ན། སྐྱ་རྦབ་ཀྱི་ནད་ཀྱིས་བཏབ་པར་མིག་སེར་གྱི་ནད་ཀྱིས་འདེབས་སོ། །འོར་ནད་ཀྱིས་བཏབ་པ་ཞིག་ལ་དཔྱད་མི་བྱེད་པར་ཡལ་བར་བོར་ན་ལུས་ཕྱོགས་སུ་ཆེར་སྐྲང་སྟེ། ནད་གསོ་དཀའ་བ་མིག་སེར་འོར་ཐབས་ཞེས་བྱ་བ་དེ་ལྟ་བུར་འགྱུར་རོ། །མིག་སེར་འོར་
[137b.4]ཐབས་ཀྱི་ནད་དེ་ལ་དཔྱད་འཕྱིས་ན། ནད་ཧ་ལི་མ་ཀ་ཞེས་བྱ་བར་འགྱུར་ཏེ། དེའི་ནད་ཐབས་ནི་གདོང་པ་དང་། ཤ་མདོག་ལྗང་ནག་སེར་བར་སྣང་སྟེ། རླུང་དང་མཁྲིས་པ་གཉིས་ཀྱི་ནད་ཀྱིས་མགོ་འཁོར། སྐོམ་དད་ཆེ། བུད་མེད་ལ་འདོད་པའི་བག་མེད། རིམས་ནད་ཀྱིས་ཅུང་ཟད་འདེབས། ཁོང་
[137b.5]སྙོམ། ཉམ་ཆུང་། ཕོ་བའི་དྲོད་བྲི། ཁྲག་ངན་པ་ནད་ཁྲག་ཏུ་འགྱུར། ཟས་མ་ཞུ་བའི་ཚུལ་དུ་སྦོ་ལ། མི་སློན་མི་འཁྲུ་བ་དེའི་ཚེ་ན། ནད་དེ་ནི་ཧ་ལི་མ་ཀ་ཞེས་བྱ་སྟེ། མིག་སེར་གྱི་ནད་འདི་རྣམས་ཀྱང་། སྐྱ་རྦབ་ཀྱི་ནད་ལས་དཔྱད་འཕྱིས་པའི་བླ་བརྣན་དང་མིག་སེར་གྱི་ནད་རྣམས་ལྟ་བུར་འགྱུར་
[137b.6]རོ། །མིག་སེར་གྱི་ནད་དེ་ལྟ་བུ་ལས་དཔྱད་འཕྱིས་ཏེ། བྱིང་ན་མིག་སེར་གྱི་ནད་དེ་ལྟ་བུ་དག་གི་བླ་བརྣན་གྱི་ནང་ན་གཙོར་ནི་འོར་ནད་དུ་འགྱུར་བའི་ནད་མང་བས་དེའི་ཕྱིར་འདིའི་རྗེས་ལ་འོར་ནད་ཀྱི་དམིགས་བསྟན་ཅིང་བཤད་དེ། འོར་ནད་དེ་ཡང་ཇི་ལྟ་བུ་ལས་འབྱུང་ཞེ་ན། མཁྲིས་པ་དང་། ཁྲག་དང་།
[137b.7]བད་ཀན་གྱིས་རླུང་གི་ནད་བསླང་སྟེ། འདུས་པའི་ནད་དཀྱེལ་དུ་བསགས་པ་དེ་ཡང་། རླུང་ནད་ཀྱིས་རྩ་རྣམས་ཀྱི་ནང་འཕྲོས་ཏེ། གྲམ་པ་ལས་རྩ་འགགས་ནས་ཤ་དང་པགས་པའི་ནང་དུ་ཞུགས་ཏེ། སྐྲངས་ལ་མཁྲང་བར་འགྱུར་བ་དེ་ནི་འོར་ནད་ཐམས་ཅད་ཀྱི་ཚུལ་ཡིན་ནོ། །འོར་ནད་དེ་ཡང་ནད་
[138a]
[138a.1]གཞིའི་བྱེ་བྲག་དང་། ནད་ཐབས་ཀྱི་བྱེ་བྲག་ལས། འོར་ནད་རྣམ་པ་དགུར་ཡང་བཤད་དེ། དེ་ནི་རླུང་དང་། མཁྲིས་པ་དང་། བད་ཀན་ལས་གྱུར་པའི་འོར་ནད་སྣ་གསུམ་དང་། རླུང་དང་མཁྲིས་པ་དང་བད་ཀན་ནང་གི་གཉིས་གཉིས་སུ་འདྲེས་པའི་འོར་ནད་སྣ་གསུམ་
[138a.2]དང་། འདུས་པའི་འོར་ནད་དང་དུག་གིས་ཕོག་པའི་འོར་ནད་རྣམ་པ་དགུའོ། །ཡང་ན་རྟག་ཏུ་འོར་ནད་དུ་སྐྲང་བ་དང་། གློ་བུར་དུ་འོར་ཐབས་སུ་སྐྲང་བ་དང་གཉིས་སོ། །ཡང་ལུས་ཐམས་ཅད་འོར་ཐབས་སུ་སྐྲང་བའི་ནད་དང་། ཡན་ལག་རྐང་ལག་སྐྲང་པའི་འོར་ནད་རྣམ་པ་གཉིས་སོ། །ཡང་
[138a.3]འོར་ནད་རྣམས་གསུམ་ཡོད་དེ། ཕྱོགས་སུ་རྒྱས་པར་ཁྱབ་པའི་འོར་ནད་དང་། མི་ན་བར་གློ་བོར་སྐྲང་བའི་འོར་ནད་དང་། མདུད་པ་བཞིན་འབར་འབུར་དུ་སྐྲང་བའི་འོར་ནད་ཀྱི་བྱེ་བྲག་རྣམ་པ་གསུམ་མོ། །དེ་ལྟར་སྣ་ཚོགས་རྣམ་པ་འདི་ནི་འོར་ནད་དོ་ཅོག་གི་སྤྱིའི་ནད་དུ་འགྱུར་བའི་གཞི་ལས་འབྱུང་ངོ་། །
[138a.4]དེ་ལ་འོར་ནད་སོ་སོའི་ནད་གཞིའི་རྒྱུ་ཐ་དད་པས། འོར་ནད་སོ་སོའི་འགྱུར་བ་ནི་འོར་ནད་དུ་འགྱུར་བའི་ནད་ཀྱིས་བཏབ་པ་དང་། ལས་དང་། ཟས་སྨྱུང་བ་ལ་སོགས་པ་བྱས་པ་དང་། རིད་ཅིང་ཉམ་ཆུང་ལ། ཟས་སླ་བག་ཟོས་པ་དང་། ཟས་ཀྱི་ཚོད་ཧ་ཅང་དྲགས་པ་དང་། ཡང་ཟས་སྤྱི་བག་དང་།
[138a.5]སྐྱུར་བག་དང་། སྣུམ་བག་དང་། བསིལ་བག་དང་། ལན་ཚྭ་ཆེས་པ་དང་། ཐལ་སྨན་རྣོན་པོ་ཀྵ་ར་ལྟ་བུ་བཏང་བ་དང་། ཟས་ཚ་བའི་བག་དང་། ཧ་ཅང་དྲོ་ཆེས་པ་དང་། མྱ་ངན་གྱིས་བཏབ་པ་དང་། ཆུ་མང་དུ་འཐུངས་པ་དང་། ཉིན་པར་ཉལ་ཞིང་མཚན་མོ་མི་ཉལ་བ་དང་། ཁམ་པ་སྦྱིན་
[138a.6]པོ་ཟོས་པ་དང་། གྲོང་ཁྲོད་ན་གནས་པ་བྱ་ཕག་ལ་སོགས་པའི་ཤ་ཟ་བ་དང་། ཤ་སྐམ་ཟ་བ་དང་། ཟས་མ་ཞུ་བ་དང་། ཁོང་ངལ་བ་དང་། བུད་མེད་ལ་དྲགས་པ་དང་། རྐང་པས་ལམ་རིང་པོར་སོང་སོང་བ་དང་། རྟ་མི་བདེ་བ་ལས་ལུས་གསིགས་པ་དང་། དབུགས་མི་བདེ་བ་དང་། ལུད་པས་
[138a.7]བཀར་བ་དང་། ཚད་པས་བཏབ་པ་དང་། གཞང་འབྲུམ་གྱི་ནད་དང་། ལྟོ་བའི་ནད་དང་། མངལ་ནས་ཁྲག་ཟག་པ་དང་། རིམས་ནད་ཀྱིས་བཏབ་པ་དང་། སྦོས་ཏེ་ཟུག་པ་དང་། སྦོས་ཏེ་འཁྱིལ་ནས་མི་སློན་པའི་འཁྲུ་བ་དང་། སློན་པ་དྲགས་པ་དང་། བུད་མེད་སྦྲུམ་མ་དང་། མེ་དབལ་གྱི་ནད་ཀྱིས་
[138b]
[138b.1]བཏབ་པ་དང་། སྐྱ་རྦབ་ཀྱི་ནད་དང་། འདི་ལྟ་བུའི་བག་གཞན་ཡང་ལུས་ལ་གནོད་པར་འགྱུར་བ་ལོག་པར་བསྟེན་པ་བྱས་པས་འོར་ནད་ཀྱི་དཀྱེལ་འབྲས་བུ་འདུས་ཤིང་བབས་ན། རོ་སྟོད་ཡན་ཆད་འོར་ནད་སྐྲང་ངོ་། །རོ་སྨད་དུ་ཆུ་སོར་ནད་བབས་ཏེ་དཀྱེལ་དུ་ཞུགས་ན། རོ་སྨད་མན་ཆད་སྐྲང་ངོ་། །
[138b.2]རྐེད་པར་བབས་ན་ལུས་ཀྱི་བར་རྐེད་པའི་འཁོར་སྐྲང་ངོ་། །འོར་ནད་ལུས་ཀུན་དུ་ཞུགས་ན་ལུས་ཐམས་ཅད་སྐྲང་ངོ་། །ལུས་ཀྱི་ཡན་ལག་རྐང་པའམ་ལག་པ་ལ་བབས་ན་ཡན་ལག་ཏུ་སྐྲང་ངོ་། །དེ་ལྟར་འོར་ནད་ཀྱིས་འདེབས་ན་ནད་ཐབས་སྔར་རྩ་རྣམས་ཚ། ལུས་དང་རྐང་ལག་ལྕི་བ་དེ་རྣམས་
[138b.3]ལྟར་ལྟར་བྱེད་དོ། །དེ་ལས་གྱུར་པའི་འོར་ཐབས་ནི་སྐྲང་བ་མལ་གཅིག་ཏུ་མི་སྐྲང་བར་ཕན་ཚུན་དུ་འཕོ་ལ་ལུས་དང་བ་སྤུ་རྩུབ། ཤ་མདོག་རྩ་གནག་ལ་དམར། ལུས་ཀྱི་པགས་པ་འཁུམས། རྐང་ལག་འདར། བ་སྤུ་བརྩེ་ཞིང་ཤ་མཐངས་ལ་རེག་ན་ན་ཞིང་མི་བདེ། ཟུག་ལ་རུས་པ་ཀུན་ཁ་བྱེ་
[138b.4]བའམ་ཆག་པ་ཙམ་དུ་ན། ཤ་མདངས་བེམ་བེམ་པོར་འགྱུར་ཏེ་རེག་པ་མི་ཚོར། ནད་མྱུར་དུ་ལྡང་ཞིང་མྱུར་དུ་ཞི། སྐྲངས་པའི་སྟེང་དུ་མནན་ཅིང་བཙིར་ན་ཁུང་བུ་ངོར་ཞེས་འབྱུང་། ཏིལ་གྱི་འབྲུ་མར་རམ། འབྲི་མར་ལྟ་བུ་དྲོན་པོར་བྱས་ཏེ། བསྐུ་ཞིང་མཉེས་ན་ཞི་བར་འགྱུར་རོ། །མཚན་
[138b.5]མོ་ནི་སྐྲང་བ་བྲི། ཉིན་པར་ནི་ཆེར་སྐྲང་། པགས་པའི་ཤ་མདངས་ཡུངས་མར་གྱིས་བསྐུས་པ་བཞིན་ཚ་བར་བྱེད། ཤ་མདངས་ཀྱི་མདོག་ནི་རྩ་སེར་དམར་གྱི་མདོག་ལ་ནག་པོར་སྣང་ངོ་། །མཁྲིས་པ་ལས་འོར་ནད་དུ་གྱུར་པའི་ནད་ཐབས་ནི་པགས་པ་དང་བ་སྤུ་ཟངས་མདོག་ཏུ་སྣང་། སྐྲང་བ་
[138b.6]མྱུར་དུ་ལུས་ལ་མཆེད་ཅིང་མྱུར་དུ་ཞེ་ན། སྔར་ལུས་ཀྱི་རྐེད་པར་འོར་ནད་འབྱུང་། སྐོམ་དད་ཆེ། ལུས་ཚ། རིམས་ནད་ཀྱིས་འདེབས། ལུས་རྔུལ། ལུས་རྔུལ་བག་ཏུ་མནམ། མྱོས་བག་ལ་མིག་འཁོར། གྲང་ཞིང་བསིལ་བའི་བག་འདོད། ཚད་པས་ཐུར་དུ་འཁྲུ་ཞིང་མནམ། ཤ་མཐངས་
[138b.7]ལ་རེག་ན་མི་བཟོད་ལ་མདོག་འཇམ་མོ། །བད་ཀན་ལས་འོར་ནད་དུ་གྱུར་པའི་ནད་ཐབས་ནི་ལུས་གཡའ། ཤ་མཐངས་དང་། བ་སྤུ་རྣམས་མདོག་དཀར། ཤ་མཐངས་ཁོང་མཁྲང་ཞིང་གྲང་ལ་ལྕི། མདོག་སྣུམ། འཇམ། ན་བ་ལ་ལྡང་དུབ་མེད་པར་རྟག །གློང་བག་ཏུ་འདུག་ལ་གཉིད་ཆེ།
[139a]
[139a.1]སློན། ཕོ་བའི་མེ་དྲོད་ཉམས། སྐྲངས་པའི་སྟེང་དུ་མནན་ན་ཁུང་བུ་ལྕོངས་ཞེས་བྱེད། བད་ཀན་གྱི་འོར་ནད་འདི་འབྱུང་བ་ཡང་དཀོན། བྱུང་ན་ཡང་གསོ་དཀའ། མཚན་མོ་ནི་ཚབས་ཆེར་སྐྲང་། བད་ཀན་གྱི་འོར་ནད་ལ་གཏར་ག་བཏབ་ན་ཡང་ཁྲག་མྱུར་དུ་མི་ཕྱིན། དྲོ་ཞིང་
[139a.2]ཚ་བའི་བག་རག་ན་དགའོ། །རླུང་དང་མཁྲིས་པ་དང་། བད་ཀན་ལྟ་བུ་གཉིས་གཉིས་སུ་འདྲེས་པའི་ནད་ཐབས་ནི་བད་ཀན་དང་། མཁྲིས་པའི་འོར་ནད་སྣ་གཉིས་ཀྱི་ནད་ཐབས་སུ་ན་བ་ཡིན་ནོ། །འདུས་པའི་འོར་ནད་ཀྱི་ནད་ཐབས་ནི་རླུང་དང་མཁྲིས་པ་དང་། བད་ཀན་གྱི་འོར་ནད་སྣ་གསུམ་
[139a.3]གྱི་ནད་སྣ་ཚང་བའི་ནད་ཐབས་སུ་ན་བ་ཡིན་ན། དེ་ལ་སྣད་པའི་འོར་ནད་ཀྱི་ནད་ཐབས་ནི་མཚོན་ལ་སོགས་པས་ཚད་དམ་དྲལ་ཏམ། རྨས་སམ། ལྷགས་པའམ་ཁ་བས་རུལ་ཏམ་མེས་ཚིག་གམ། མཚོར་ཞུགས་ཏེ་ལུས་སྐྲངས་སམ། བསེ་རྩིའི་འབྲས་བུ་གོ་བེའམ། སྨན་ཀ་པི་ཀ་ཙུའམ།
[139a.4]གྲ་མ་ལ་སོགས་པས་རེག་ཅིང་ཕོག་ན་སྐྲངས་པ་མཆེད་པར་འགྱུར་ཏེ། མདོག་དམར་པོར་སྣང་ལ་རབ་ཏུ་ཚ་སྟེ། འདི་ལྟ་བུ་སྣང་བའི་རྟགས་ཚང་བ་མཁྲིས་པའི་བག་ཏུ་གཏོགས་སོ། །དུག་གིས་ཕོག་པའི་འོར་ཞེས་བྱ་བ་ནི་སྲོག་ཆགས་གདུག་པའི་བག་ལུས་ལ་སོང་བའི་གཅིན་གྱིས་ཕོག་པ་དང་།
[139a.5]སོ་དང་མཆེ་བ་དང་། སེན་མོས་ཟུག་ཅིང་སྐྲངས་པ་དང་། སྲོག་ཆགས་གདུག་པའི་བག་མ་ཡིན་པས་རྟུག་གཅིན་དང་། ཁུ་བ་ལྟ་བུའི་དྲི་མ་ཕོག་པ་དང་། དུག་གི་ཤིང་གི་རླུང་ཁར་བབས་པ་དང་། དབྱིག་དུག་གམ་དུག་སྦྱར་མའི་ཕྱེ་མ་རེག་པ་འདི་ལྟ་བུ་ལས་འོར་ནད་དུ་འགྱུར་རོ། །དེ་ལ་འོར་ནད་
[139a.6]གསོ་བ་ནི། སྐྲང་བ་ཕན་ཚུན་དུ་འཕོ་བ་མི་མཁྲང་སྟེ་སྙི། ལུས་མྱུར་དུ་ཚ་ཞིང་རྩེ་འཇིལ། འོར་གསར་དུ་བྱུང་མ་ཐག་ལ་དེའི་སྟེང་དུ་ནད་བླ་བརྣན་གྱི་བག་མེད་པ་དེ་ལྟ་བུ་ནི་གསོ་སླའོ། །འོར་ནད་གསོ་དཀའ་བ་ནི་སྔར་ལོགས་ཤིག་ཏུ་བཤད་པ་ཡིན་ནོ། །དེ་ལ་མེ་དབལ་གྱི་ནད་ཐབས་ནི་རྣམ་པ་
[139a.7]གཉིས་ཏེ། མཚོན་དང་རྡོ་དབྱུག་གིས་སྣད་པ་ལས་མེ་དབལ་གྱི་ནད་དུ་འགྱུར་བ་དང་། རླུང་ངམ་མཁྲིས་པའམ་བད་ཀན་གྱིས་ནད་བསླང་སྟེ། མེ་དབལ་དུ་འགྱུར་བ་ནི་འོར་ནད་ཀྱི་ནད་གཞི་ལས་འོར་ནད་དུ་གྱུར་པ་དང་འདྲའོ། །མེ་དབལ་དེ་ཡང་རྣམ་པ་གསུམ་སྟེ། ཕྱི་རོལ་ན་གནས་པ་དང་།
[139b]
[139b.1]ནང་ན་གནས་པ་དང་། གཉི་ག་ན་གནས་པ་དང་གསུམ་མོ། །འདི་གསུམ་ལ་གསོ་དཀའ་སླ་ཡང་རིམ་བཞིན་ཏེ། ཕྱིའི་མེ་དབལ་ནི་གསོ་སླ། ནང་གི་མེ་དབལ་ནི་གསོ་དཀའ། ཕྱི་ནང་གཉིས་ཀའི་མེ་དབལ་ནི་དེ་བས་ཀྱང་གསོ་དཀའོ། །ཡང་ན་མེ་དབལ་གྱི་ནད་ཀྱང་རླུང་དང་མཁྲིས་པ་དང་།
[139b.2]བད་ཀན་གྱིས་ནད་སློང་བར་འགྱུར་བའི་ནད་ལངས་ཏེ། མེ་དབལ་གྱི་ནད་དུ་འགྱུར་མོད་ཀྱི། ལྷག་པར་ནི་ཚ་བའི་བག་གིས་ནད་བསླང་སྟེ། ལུས་ཀུན་ལ་མེ་དབལ་གྱིས་ཁྱབ་པར་བྱེད་དེ། ནང་གི་མེ་དབལ་ནང་ན་གནས། ཕྱིའི་མེ་དབལ་ཕྱི་ན་གནས། ཕྱི་ནང་གཉིས་ཀའི་མེ་དབལ་ཡང་ཕྱི་ནང་གི་
[139b.3]བར་ན་གནས་ཏེ། ནད་དེས་ལུས་ཀྱི་ནད་རྣམས་ལ་ཚ་བས་གདུངས་ལ་མྱོས་བག་ཏུ་བྱེད། རྩ་རྣམས་ཀྱི་སྒོ་འགག །སྐོམ་དད་ལྷག་པར་ཆེ། བཤང་གཅི་རེས་འགའ་ནི་མང་དུ་འོང་། །རེས་འགའ་ནི་འགག་པར་བྱེད་ཅིང་སྲི། ཕོ་བའི་དྲོད་དང་ཉམས་འཚག་མྱུར་དུ་ཉམས་ཏེ། བྲི་བ་ཡིན་ཏེ་ནད་
[139b.4]ཐབས་འདི་ལྟ་བུ་ནི་ནང་གི་མེ་དབལ་ཞེས་བྱའོ། །ཕྱིའི་མེ་དབལ་ནི་ནད་ཐབས་འདི་རྣམས་ལྟ་བུ་ལས་ཚུལ་བཟློག་སྟེ་ཤེས་པར་བྱའོ། །ཕྱི་ནང་གཉིས་ཀའི་མེ་དབལ་ནི་ནད་ཐབས་དེ་རྣམ་གཉིས་ལྟར་ནའོ། །མེ་དབལ་གྱི་ནད་ཐབས་སྤྱི་ནི་དེ་ལྟ་བུར་བལྟའོ། །རླུང་ནད་ལས་མེ་དབལ་དུ་གྱུར་པའི་ནད་
[139b.5]ཐབས་ནི། རླུང་ནད་ལས་རིམས་སུ་གྱུར་པའི་ནད་ཐབས་དང་འདྲ་སྟེ། ཚ་བའི་ནད་ལུས་ཀུན་ཏུ་མཆེད་ལ་སྐྲང་། ཟུག་ཅིང་ཕྲྭ་ཕྲྭ་བྱེད། ལུས་དང་ཡན་ལག་རྣམས་བརྡུང་བརྡུང་བ་སྙམ་བྱེད། བ་སྤུ་རྣམས་ལངས་ཤིང་བརྩེ་བ་འདི་ལྟ་བུར་བྱེད་དོ། །མཁྲིས་པ་ལས་མེ་དབལ་དུ་གྱུར་པའི་ནད་
[139b.6]ཐབས་ནི་ལུས་ཀུན་ཏུ་མེ་དབལ་གྱི་ནད་མྱུར་དུ་མཆེད་ཅིང་འགྲོ། སྤྱི་ནི་མཁྲིས་པ་ལས་རིམས་ཚ་བར་གྱུར་པ་དང་ཐབས་གཅིག་སྟེ། ལུས་དང་བཞིན་མདོག་རབ་ཏུ་དམར་རོ། །བད་ཀན་ལས་མེ་དབལ་དུ་གྱུར་པའི་ནད་ཐབས་ནི་མེ་དབལ་གྱི་འབྲུམ་བུའི་འཁོར་གཡའ་ལ་པགས་པ་འཇམ་སྟེ། ནད་ཐབས་
[139b.7]སྤྱི་ནི་བད་ཀན་གྱི་རིམས་དང་འདྲའོ། །དེ་ལྟར་མེ་དབལ་དང་འབྲས་ལ་སོགས་པ་བྱུང་ན་སྨན་དང་དཔྱད་མི་བྱེད་པར་ཡལ་བར་བཞག་ན་རླུང་དང་མཁྲིས་པ་དང་བད་ཀན་སོ་སོའི་ནད་ཀྱི་ཚུལ་ལས་བསགས་པ་སྨིན་ཏེ་རྡོལ་བ་དང་རྨའི་ཚུལ་ལ་སོ་སོའི་ནད་གང་ཡིན་པ་གསལ་བར་ཤེས་པར་འགྱུར་རོ། །དེ་ལ་
[140a]
[140a.1]རླུང་དང་མཁྲིས་པ་སྣ་གཉིས་འདྲེས་པ་ལས་མེ་དབལ་དུ་གྱུར་པའི་ནད་ཐབས་ནི། རིམས་ནད་ཀྱིས་འདེབས། སློན། བརྒྱལ། ཚད་པས་རབ་ཏུ་འཁྲུ། སྐོམ་དད་ཆེ། མགོ་འཁོར། ལྷུ་ཚིགས་ཀྱི་རུས་པ་ཆག་
[140a.2]པ་སྙམ་བྱེད། ཕོ་བའི་མེ་དྲོད་ཉམས། དབུགས་མི་བདེ། སྙིང་མུག་མུག་བྱེད་ཅིང་མུན་ཐིབས་ཐིབས་བྱེད་པ་བཞིན་དུ་མི་དྲན། ཁ་ཟས་ཡི་གར་མི་འོང་། ལུས་དང་ཡན་ལག་ལ་མེ་དབལ་མཆེད་དོ་ཅོག་མེ་དབལ་གྱི་ནད་རྒྱ་སོལ་གྱི་མེ་མདག་འབར་བ་བཞིན་དུ་ཚ།
[140a.3]ཤ་མདོག་གནག་ལ་སྔོ། ཡང་ན་ཁྲག་ནག་རྒྱས་པའི་དཀྱིལ་དུ་ཡང་སྩོགས་ཤིང་མེ་དབལ་གྱི་འབྲུམ་བུ་དེ་མེས་ཚིག་པ་འདྲ་བ་ཞིག་ཡོད་དེ། དེས་ལུས་ཐོག་ཐག་ཏུ་མྱུར་དུ་མཆེད་དེ་ཁྱབ་པ་དང་གནད་ཀུན་གྱི་ནང་དུ་ཡང་འཇུག་ཅིང་འགྲོ་ལ་ཆུ་སེར་ལྟ་བུའི་བག་ཟག་གོ། །གལ་ཏེ་མེ་དབལ་རླུང་ནད་ཀྱི་ཤས་
[140a.4]ཆེ་ན། ལུས་དང་ཡན་ལག་རབ་ཏུ་ན་ལ། མི་དྲན་ཏེ་མྱོས། གཉིད་ཆེ། དབུགས་མི་བདེ། དབུགས་ཀྱི་རྔམ་པ་དྲག་ཏུ་འབྱུང་། སྐྱིགས་བུས་འདེབས་པའི་ནད་ཐབས་འདི་ལྟ་བུར་གྱུར་ན། ནད་པ་དེ་སྔས་གར་བོར་ཡང་དགའ་བ་དང་བདེ་བ་མེད་དོ། །སྐབས་སྐབས་སུ་རྐང་ལག་བརྐྱང་
[140a.5]ཞིང་བྱ་རྨྱང་བྱས་ན་ཡང་། ལུས་དང་སེམས་མི་བདེ་ཞིང་ཁོང་ངལ་བར་འགྱུར། སེམས་རྨོངས་བག་གིས་གསལ་ཏེ་གོ་དཀའ། གཉིད་ཆེ་བ་དེ་ལྟ་བུ་ནི་མེ་དང་འདྲ་བར་མེ་དབལ་ཞེས་བྱའོ། །དེ་ལ་མཛེར་བ་འདྲ་བར་འབྱུང་བ་ལས་མེ་དབལ་དུ་འགྱུར་བའི་ནད་ཐབས་ནི། བད་ཀན་ཆེར་སྐྱེས་པས་
[140a.6]རླུང་འཁྱིལ་ཞིང་འགག་སྟེ། རླུང་འགགས་ཤིང་འཁྱིལ་བ་དེས། བད་ཀན་རྡོལ་ཏེ་རླུང་དེ་ཁྲག་གི་ནང་དུ་ཞུགས་ཏེ། ཁྲག་ནད་བསླངས་ནས་པགས་པ་དང་། རྩ་ཕྲན་དང་། ཆུ་བ་དང་། ཤ་ཀུན་གྱི་ནང་དུ་ཁྲག་ནད་ཞུགས་ནས་ཐོར་བུ་ཕྲ་མོ་རིང་པོ་དང་། ཐོར་བུ་སྦོམ་པོ་སྲ་བ་མཛེར་བ་དང་
[140a.7]འདྲ་བར་འབྱུང་སྟེ། མང་པོ་ཕྲེང་བ་བཞིན་དུ་ཆགས་ཏེ་མདོག་དམར་པོར་འདུག་པ་སྡེ་ལྟ་བུར་བྱུང་རབ་ཏུ་ན། རིམས་ཀྱིས་འདེབས། དབུགས་མི་བདེ། ལུད་པས་བཀར། ཚད་པས་རབ་ཏུ་འཁྲུ། ཁ་སྐམ། སྐྱིགས་བུས་འདེབས། སློན། མགོ་འཁོར། རྨོངས་བག་ཏུ་
[140b]
[140b.1]འགྱུར། པགས་པའི་ཤ་མདོག་མི་སྡུག །བརྒྱལ། ལུས་དང་ཡན་ལག་ཀུན་བརྡུང་བརྡུང་བ་སྙམ་བྱེད། ཕོ་བའི་མེ་དྲོད་ཉམས་པར་གྱུར་པའི་ནད་ཐབས་འདི་ལྟ་བུ་ནི་མཛེར་པ་ལྟ་བུའི་མེ་དབལ་གྱི་ནད་བད་ཀན་དང་རླུང་གཉིས་ཀྱིས་སློང་སྟེ་བད་ཀན་དང་མཁྲིས་པ་ལས་ནི་རིམས་སུ་འགྱུར་རོ། །
[140b.2]བད་ཀན་གྱིས་ནི་ལུས་དང་ཡན་ལག་རེངས་པའི་བག་ལ་གཉིད་ཆེ། གློ་བག་ཏུ་འདུག །ཀླད་པ་ན། ལུས་ཀྱི་ཡན་ལག་ན་ཞིང་བརྐྱང་བསྐུམ་བྱེད་འདོད། ཚིག་མང་དུ་སྨྲ། ཟས་ཡི་གར་མི་འོང་། མགོ་འཁོར། བརྒྱལ། ཕོ་བའི་མེ་དྲོད་ཉམས། རྐང་ལག་གི་རུས་པ་རྣམས་ཆག་པ་
[140b.3]སྙམ་བྱེད། སྐོམ་དད་ཆེ། དབང་པོ་རྣམས་མི་གསལ་ལ་ལྕི། ཚད་པ་བེའུ་སྣབས་སུ་འཁྲུ། དང་ག་རྫིང་ཞིང་གང་བ་སྙམ་བྱེད། དེ་ནས་རྩ་ཆེན་པོ་ཀུན་གྱི་ནང་དུ་ཞུགས་ཤིང་འགྲོ་ལ། ཕལ་ཆེར་ནི་ཕོ་བའི་ནང་དུ་ནད་ཞུགས་ནས། ལུས་ཀྱི་ཕྱོགས་ཡན་གར་ན་བ་ནི་མ་ཡིན་གྱི། ལུས་
[140b.4]ཀུན་དུ་ན་སྟེ། དེས་ན་ཐོར་བུ་སེར་པོ་དང་། དམར་པོ་དང་། དཀར་པོས་གང་བས་ན། ནོར་བུ་སྐར་ཕྲན་ལྟར་སྣང་སྟེ། ལུས་མདོག་གནག་ལ་འཇམ། དྲི་མ་ཅན་དུ་འགྱུར། འོར་ཐབས་སུ་སྐྲང་། ལུས་ལྕི། ཐོར་བུ་རྣགས་པའི་ཟབས་ཆེ། རབ་ཏུ་དྲེད་ཆེ་སྟེ་ཚ་ལ་རུལ་ཞིང་རྣགས།
[140b.5]ཤ་ཀུན་ཀྱང་རུལ་ཞིང་རྣགས་ཞིག་ནས། རྩ་རྒྱུས་ཉི་ཚེ་གསལ་བར་སྣང་སྟེ། ལུས་མི་རོ་ལྟར་གྱུར་པ་འདི་ནི་འདམ་འདྲ་བའི་མེ་དབལ་གྱི་ནད་ཅེས་བྱའོ། །རླུང་དང་མཁྲིས་པ་དང་བད་ཀན་གསུམ་འདུས་པའི་མེ་དབལ་གྱི་ནད་ནི། མེ་དབལ་གྱི་ནད་ཐབས་ཐམས་ཅད་ཚང་བར་ན་སྟེ། འདུས་
[140b.6]པའི་མེ་དབལ་གྱི་ནད་དེས། ལུས་ཀྱི་སྲོག་ཟུངས་བདུན་ལ་མྱུར་དུ་ཁྱབ་པར་བྱེད་དོ། །མཚོན་གྱིས་རྨས་པ་ལས་ཁྲག་ནད་ལངས་ཏེ། ཆུ་སེར་དང་ཚ་བ་སྐྱེས་ན་མེ་དབལ་གྱི་ནད་ཐབས་སུ་འགྱུར་ཏེ། དེ་ལ་རླུང་ནད་ཀྱིས་ཀྱང་མཆེད་ནས། མོན་སྲན་དཀར་རུ་འདྲ་བར་འབྱུང་སྟེ། སྐྲངས་ལ་
[140b.7]རིམས་ནད་ལྟ་བུར་འགྱུར་རོ། །ཚ་ལ་དམར་སྨུག་ཏུ་འགྱུར་རོ། །མེ་དབལ་གྱི་ནད་དེ་ལ་གསོ་དཀའ་སླའི་བྱེ་བྲག་ཏུ་རླུང་དང་མཁྲིས་པ་དང་བད་ཀན་སྣ་རེའི་མེ་དབལ་ནི་གསོ་སླའོ། །རླུང་དང་མཁྲིས་པ་ལྟ་བུ་སྣ་གཉིས་ལས་མེ་དབལ་དུ་གྱུར་ལ་ནད་བླ་བརྣན་གྱིས་བཏབ་ན་ཡང་གསོ་སླའོ། །མེ་
[141a]
[141a.1]དབལ་གྱི་ནད་དེ་ལ་གསོ་དཀའ་བ་ནི། རླུང་དང་མཁྲིས་པ་ལྟ་བུ་སྣ་གཉིས་ལས་མེ་དབལ་དུ་གྱུར་པ་མཚོན་གྱིས་རྨས་ཏེ་རྨ་རེད་པའི་མེ་དབལ་དང་། ནད་ཐམས་ཅད་འདུས་པའི་མེ་དབལ་གྱིས་ལུས་ཀྱི་གནས་ཀུན་དུ་ཁྱབ་པ་དང་། རྩ་དང་། ཆུ་བ་དང་། ཤ་དང་འདི་རྣམས་
[141a.2]ཀུན་རུལ་ཏེ། རོ་བཞིན་མནམ་པོར་གྱུར་པ་འདི་ལྟ་བུའི་མེ་དབལ་ནི་གསོ་དཀའོ། །སྐྱ་རྦབ་དང་། འོར་ནད་དང་། མེ་དབལ་གྱི་ནད་གཞི་བཤད་པ་སྟེ་ལེའུ་བཅུ་གསུམ་པ་རྫོགས་སོ།། །།མཛེ་ནད་དང་། ལྟོར་སྲིན་བུ་འཇུག་པའི་ནད་གཞི་བཤད་པ་སྟེ། ལེའུ་བཅུ་བཞི་
[141a.3]པ་བཤད་པར་བྱའོ། །དེ་ལ་མཛེ་ནད་ཀྱིས་འདེབས་པའི་ནད་གཞི་ནི། ཁ་ཟས་མི་འཕྲོད་པ་གནོད་པ་ལྟ་བུ་ལ་སོགས་པ་ཟོས་པ་དང་ལུས་ཀྱི་བྱ་བ་བསྐྱོད་པ་དང་། འདུག་པ་དང་། ཉལ་བ་ལ་སོགས་པ་གནོད་པ་མི་འཕྲོད་པར་འགྱུར་བའི་བག་བྱས་པ་དང་། དགེ་བའི་མི་དམ་པ་དག་ལ་སྨོད་པ་
[141a.4]དང་། སྲོག་གཅོད་པ་དང་། གཞན་གྱི་ནོར་འཕྲོག་པ་ལ་སོགས་སྡིག་པའི་ལས་ལ་བརྟེན་པ་དང་། འདི་ལྟ་བུ་སྔོན་གྱི་ཚེ་བྱས་སམ། ད་ལྟ་འཕྲལ་དུ་བྱས་པའི་སྡིག་གིས། ཁོང་ནས་ནད་བསླང་། ནད་རྩ་ཀུན་གྱི་ནང་དུ་གྲམ་སྟེ་ཞུགས་ནས། ཤ་དང་པགས་པ་དང་། ཁྲག་དང་ཆུ་སེར་གྱི་
[141a.5]ནད་ལངས་ཏེ་ནང་གི་ཤ་རྣམས་ཀྱང་ཁོང་སླ་བར་གྱུར་ནས། མཛེ་ནད་ལུས་ཀྱི་ཕྱིར་འབྱུང་ངོ་། །མཛེ་ནད་འབྱུང་བའི་ཐབས་ནི་མཛེ་ནད་ངན་པས་པགས་པའི་མདོག་མི་སྡུག་པར་བྱེད་དོ། །མཛེ་ནད་ཀྱིས་ཐེབས་པ་ལས་སྨན་དཔྱད་མི་བྱེད་པར་ཡལ་བར་བོར་ན། ལུས་ཐམས་ཅད་མ་རུངས་
[141a.6]པར་གྱུར་ནས། ལུས་ཀྱི་ནང་གི་སྲོག་ཟུངས་བདུན་ཡང་མཛེ་ནད་ཀྱིས་རྒྱས་ཏེ། ནང་ཐམས་ཅད་རུལ་བར་འགྱུར་བ་དང་། ལུས་ཀྱི་ཕྱི་ཡང་རུལ་ཏེ་རྣགས་ཤིང་རུལ་ནས་དེའི་ནང་དུ་འབུ་ཕྲ་མོ་ཞུགས་ནས་ལུས་ཀྱི་སྤུ་དང་། པགས་པ་དང་། ཆུ་བ་ཕྲ་མོ་དང་། རྩ་ཆེན་པོ་དང་རུས་པ་ལ་སོགས་
[141a.7]པ་ཀུན་གྱི་ནང་དུ་ཞུགས་ཏེ། ལུས་ལ་ཟ་བར་བྱེད་པ་འདི་ནི་མཛེ་ནད་ཅེས་བྱའོ། །ཤ་བཀྲ་གཟི་གུའི་ནད་ནི་གོང་མ་ལྟ་བུའི་ནད་དེ་མ་ཡིན་ཏེ། ཕྱི་རོལ་གྱི་ནད་ཅེས་བྱའོ། །ཡང་ན་མཛེ་ནད་གསོ་དཀའ་བ་རྣམ་པ་བདུན་ཡོད་དེ། རླུང་དང་མཁྲིས་པ་དང་བད་ཀན་སྣ་རེའི་མཛེ་ནད་རྣམ་གསུམ་
[141b]
[141b.1]དང་། རླུང་དང་མཁྲིས་པ་ལ་སོགས་པ་གཉིས་གཉིས་ནད་འདྲེས་པའི་མཛེ་ནད་རྣམ་གསུམ་དང་། འདུས་པའི་མཛེ་ནད་དང་བདུན་ནོ། །མཛེ་ནད་གང་གིས་བཏབ་ཀྱང་རུང་། རླུང་དང་མཁྲིས་པ་དང་བད་ཀན་གསུམ་ལས་འགྱུར་ཏེ། དེ་གསུམ་ལ་རླུང་ངམ་མཁྲིས་པ་ལྟ་བུ་ལ་སོགས་པ་
[141b.2]ཤས་གང་ཆེ་བ་ལས་མཛེ་ནད་ཀྱི་མིང་དུ་འདོགས་སོ། །དེ་ལ་རླུང་ནད་ལས་མཛེར་གྱུར་པའི་མིང་ནི་ཐོད་པ་ལྟ་བུ་ཞེས་བྱའོ། །མཁྲིས་པ་ལས་གྱུར་པའི་མཛེ་ནད་ནི། ཤིང་ཨུ་དུམྦཱ་རའི་འབྲས་བུ་སྨིན་པ་འདྲའོ། །བད་ཀན་ལས་གྱུར་པའི་མཛེ་ནད་དང་། རྐང་ཤུ་གཉིས་ནི་ཟླུམ་པོ་གོར་གོར་
[141b.3]པོར་འབྱུང་ངོ་། །མཛེ་རི་ཤ་ཞེས་བྱ་བ་ནི་རླུང་དང་མཁྲིས་པ་གཉིས་ལས་འབྱུང་ངོ་། །མཛེ་ནད་པགས་པ་གཅིག་པ་དང་། མཛེ་ནད་དུ་གཏོགས་པ་འབྲུམ་བུ་ཕྲ་མོ་དང་། ཤ་བཀྲ་དང་། འབྲས་བྱེར་བ་དང་། འདི་རྣམས་ནི་རླུང་དང་བད་ཀན་གཉིས་ལས་འབྱུང་ངོ་། །ཤུ་བ་དང་། ཤ་
[141b.4]ཏ་རུ་ཤིང་དང་། པུཎྜ་རཱི་ཀ་དང་། འབྲུམ་བུ་ཙག་ཙག་པོར་འབྱུང་བ་དང་། གཡན་པ་དང་། ཙར་མ་ད་ལ་དང་། འདི་རྣམས་ནི་བད་ཀན་དང་མཁྲིས་པ་གཉིས་ལས་འབྱུང་ངོ་། །རླུང་དང་མཁྲིས་པ་དང་བད་ཀན་གསུམ་འདུས་པ་ལས་མཛེར་གྱུར་པ་ནི་ཀ་ཀ་ན་ཞེས་བྱའོ། །དེ་ལ་མཛེ་
[141b.5]ནད་ཐོད་པ་ལྟ་བུ་དང་། ཤིང་ཐོག་ཨུ་དུམྦཱ་ར་སྨིན་པ་ལྟ་བུ་དང་། ཟླུམ་པོ་གོར་གོར་པོར་འབྱུང་བ་དང་། གསུམ་མཛེ་ཀ་ཀ་ན་དང་། པུཎྜ་རཱི་ཀ་འདྲ་བ་དང་། ཨ་རི་ཤྱའི་ལྕེ་དང་། ཤ་དང་། འདི་བདུན་ནི་མཛེ་ནད་ཆེན་པོ་ཞེས་བྱ་སྟེ་གསོ་དཀའ་བ་ཡིན་ནོ། །མཛེ་ནད་འདི་ལྟ་བུ་འབྱུང་ན།
[141b.6]སྔར་ན་བའི་ནད་ཐབས་ནི་ཤ་མཐངས་རབ་ཏུ་འཇམ། ཡང་ན་རེག་ན་རབ་ཏུ་རྩུབ། ཡང་ན་ནི་ལུས་རབ་ཏུ་རྔུལ། ཡང་ན་ནི་རྔུལ་མེད། པགས་པའི་ཤ་མདོག་མི་སྡུག །ལུས་ཚ། ཕྱོགས་སུ་གཡའ། ཡང་ལུས་ཀྱི་ཤ་མཐངས་བེམ་བེམ་པོར་གྱུར་ཏེ་ཚོར་བའི་བག་མེད། ཁོང་དུ་ཟུག་ཅིང་
[141b.7]ན། ཁོང་དུ་ཐོར་བུ་ལས་རྨར་གྱུར་པ་ཀུན་ལྷག་པར་རབ་ཏུ་ན། མཛེ་ནད་མྱུར་དུ་འབྱུང་ལ་ནད་མི་འབྱང་སྟེ། ཡུན་རིང་དུ་ན། མཛེ་ནད་བྱུང་སྟེ་ཆེར་སྐྱེས་པའི་ཉེན་ཀོར་གྱི་པགས་པ་རྩུབ། ནད་ལྡང་བའི་གཞི་ཆུང་། ཅུང་ཟད་ཙམ་གྱིས་ཀྱང་ནད་ཆེ་བར་འགྱུར་བ་སྤུ་ལངས་ཤིང་འགྲེང་ལ་རེག་ན་བརྩེ།
[142a]
[142a.1]མདོག་གནག་ལ་འདི་ལྟ་བུར་གྱུར་ན་མཛེ་ནད་གང་ཡང་རུང་བ་དང་པོ་འོང་བའི་ནད་ཐབས་ནི་ནའོ། །དེ་ལ་མི་ཐོད་ལྟ་བུར་འབྱུང་བའི་ནད་ཐབས་ནི་ཤ་མདོག་སྨུག །པགས་པའི་མདོག་རྩུབ། བེམ་བེམ་པོར་གྱུར་ཏེ་ཚོར་བའི་བག་མེད། ལུས་རྩུབ། ལུས་ཐོག་ཐག་ཀུན་
[142a.2]ཏུ་མཛེ་ནད་ཀྱིས་ཁྱབ་པར་གང་། ལུས་ཀུན་གྱི་བ་སྤུ་ལངས་ཤིང་བརྩེ། ཟུག་ཅིང་ན་བའི་ཚབས་ཆེ། ལུས་ཕྱོགས་སུ་གཡའ་བ་ནི་ཆུང་ལ། མཛེ་ནད་ཀྱིས་མྱུར་དུ་མཆེད་ཅིང་ཁྱབ་པར་འགྱུར་བའི་ནད་ཐབས་ནི་ཐོད་པ་ལྟ་བུ་ཞེས་བྱའོ། །མཛེ་ནད་ཤིང་ཏོག་ཨུ་དུམྦཱ་ར་ལྟ་བུའི་ནད་
[142a.3]ཐབས་ནི། བ་སྤུ་པགས་པའི་མདོག་ནི་ཟངས་བཞིན་དམར། རྩ་རྣམས་ནི་སྐྱ་བོར་གྱུར། ལུས་ཀྱི་ཤ་ཁྲག་རུལ། ལུས་ཚལ་ན་བའི་ཚབས་ཆེ། མཛེ་ནད་མྱུར་དུ་འབྱུང་ལ་ལུས་འཇིག་ཅིང་འདྲུལ། འབུ་སྲིན་གྱིས་གང་བའི་ནད་ཐབས་འདི་ལྟ་བུ་ནི། མཛེ་ནད་ཤིང་ཨུ་དུམྦཱ་རའི་འབྲས་
[142a.4]བུ་སྨིན་པ་ལྟ་བུ་ཞེས་བྱའོ། །མཛེ་ནད་ཟླུམ་པོ་གོར་གོར་པོར་འབྱུང་བའི་ནད་ཐབས་ནི། ཕན་ཚུན་དུ་མི་འཕོ་བར་མལ་གཅིག་ན་འདུག །ཉམས་ཤིག་ཤིག་པོ་གློང་བག་ཏུ་འདུག་ལ། ལུས་ལྕི། ལུས་ཀྱི་ཤ་མཐངས་འཇམ། ཤ་མདོག་དཀར་ལ་རྩ་དམར། མཛེ་ནད་ལུས་
[142a.5]ཀུན་དུ་མྱུར་དུ་མཆེད་ཅིང་འགྲོ་བ་མ་ཡིན། མཛེ་ནད་ཐོར་བུ་འདྲ་བར་འབྱུང་བ་དེ་དང་ཕན་ཚུན་འདབ་འབྲེལ་ཞིང་འབྱར་ལ། མཛེའི་ཤུ་བ་གློ་ཞིང་འབུར། ལུས་ཕྱོགས་སུ་གཡའ། རྣག་དང་ཆུ་སེར་ཟག །ནང་འབུས་གང་། ཤུ་བའི་མཐའ་མ་ཀུན་འཇམ་ལ་སེར་པོར་སྣང་བ་ཟླུམ་པོ་གོར་
[142a.6]གོར་པོ་ཤ་སྟག་ཏུ་འདུག་པའི་ནད་ཐབས་འདི་ལྟ་བུ་ནི་བད་ཀན་གྱི་མཛེ་ནད་ཟླུམ་པོ་གོར་གོར་པོར་འབྱུང་བའི་ནད་ཐབས་ཞེས་བྱའོ། །གཡའ་ལ་ཐོར་བུ་རྩ་གནག་པ་ཞིག་བྱུང་། དེ་ལས་ཆུ་སེར་ཟག་པ་ནི་གླང་ཤུ་བའི་རྩར་རྩི་ཞེས་བྱའོ། །མཛེ་ནད་རི་ཤྱའི་ལྕེ་འདྲ་བའི་ནད་ཐབས་ནི་ལུས་རྩུབ་
[142a.7]ལ་ཤུ་བ་འདྲ་བར་འབྱུང་བའི་མཐའ་དམའ། ནང་གནག །དབུས་གློ་ལ་མཐོ། ཟུག་ཅིང་ན། ལུས་ཚ། རྣགས་ཏེ་ལུས་ཚ། ལུས་ཀུན་ན་ཞིང་རྩུབ་པས་གང་ལ། འབུ་ཡང་མང་དུ་ཞུགས་པ་འདི་ནི་རི་ཤྱ་ལ་ལི་འདྲ་བའི་མཛེ་ནད་ཅེས་བྱའོ། །མཛེ་ནད་པགས་པ་གཅིག་པུ་
[142b]
[142b.1]ཞེས་བྱ་བ་ནི་པགས་པ་གླང་པོ་ཆེའི་ཀོ་བ་འདྲ་བར་རེག་ཅིང་མྱངས་ན་སྲ་ལ་སྟུག་པ་འདི་ནི་མཛེ་ནད་བཞི་ཆར་འོང་བ་ཡིན་ཏེ། ལུས་ལས་རྔུལ་མི་འབྱུང་། མདོག་ནི་ཉ་ལྤགས་འདྲའོ། །འབྲུམ་བུ་ཕྲ་མོ་ཙིག་ཙིག་པོ་འབྱུང་བའི་ནད་ཐབས་ནི་ལུས་ཀྱི་ཤ་མཐངས་རྩུབ་ལ་ལུས་ལ་ཐུག་ཐུག་པོར་བྱུང་
[142b.2]བ་མྱངས་ན་སྲ། གཡའ་ཞིང་རྩུབ་ལ་པགས་པའི་མདོག་ནག་གོ། །ཤ་བཀྲ་ནི་ནང་རྩུབ་ལ་ཕྱི་རོལ་འཇམ། ཕུག་ན་གློག་པ་འབྱུང་། རེག་ན་འཇམ་ལ་པགས་པའི་མདོག་དཀར། ལ་ལ་ནི་ཟངས་ལྟར་དམར་བ་ཡང་ཡོད། ཁ་དོག་ནི་ཤིང་ཀི་ནའི་མེ་ཏོག་འདྲ། ཤ་བཀྲའི་ནད་
[142b.3]འདི་ནི་རོ་སྟོད་དུ་ཕལ་ཆེར་འབྱུང་ངོ་། །འབྲས་བྱུང་སྟེ་དེ་ནས་གཡའ་ཞིང་དམར་པོར་གྱུར་པ་དེ་ནི་མི་འབྱེར་བའི་འབྲས་ཞེས་བྱའོ། །ཞིག་སྟེ་རབ་ཏུ་ན་ལ་ཆེན་པོ་མི་གཡའ་བར། ཐོར་བུ་འདྲ་བའི་ཕོལ་མིག་དམར་པོས་གང་བ་འདི་ནི་རྐང་ལག་ཞིག་པ་ཞེས་བྱའོ། །ཤུ་བའི་ནད་
[142b.4]ཐབས་ནི་རིང་ལ་མཆེད་པ། པགས་པའི་མདོག་ནི་རྩ་དཱུར་བའི་འདབ་མ་ལྟར་ལྗང་སྔོན་ནམ། ཟར་མའི་མེ་ཏོག་ལྟར་རྩ་སྔོ་ལ། ཤུ་བ་གོར་གོར་པོ་འབུར་ལ་ལིང་ལིང་པོར་འབྱུང་། ཅུང་ཟད་གཡའ་བ་ནི་ཤུ་བ་ཞེས་བྱའོ། །རྨ་ཁ་བརྒྱ་པའི་མཛེ་ནད་ནི་ལྷུ་ཚིགས་ལ་འབྱུང་སྟེ། སྔར་ལུས་
[142b.5]ཚ་ཞིང་ན། མཛེ་ནད་འབྱུང་བའི་དྲུང་གི་འཁོར་སྦོམ་ལ་ནང་དུ་ནི་གནག །རྨ་ཁ་མང་དུ་འབྱུང་། རྣགས་ཤིང་རུལ་ཏེ། འབུ་འཇུག་པའི་ནད་འདི་ནི་རྨ་ཁ་བརྒྱ་པའི་མཛེ་ནད་ཅེས་བྱའོ། །མཛེ་ནད་པདྨ་པུཎྜ་རཱི་ཀ་འདྲ་བ་འབྱུང་བའི་ནད་ཐབས་ནི་ལུས་གཡའ་ལ་ཚ་ཞིང་ན། འབུར་འབུར་
[142b.6]པོར་སྐྲང་བའི་མཐའ་དམར། དབུས་དཀར། ཁྲག་གིས་རྒྱས་ཏེ། མེ་ཏོག་པདྨའི་འདབ་མ་ལྟར་རྒྱས་ལ་སྟུག་པོ་དེ་རྡོལ་ཏེ་ཁྲག་དང་ཆུ་སེར་འཛག་པ་འདི་ནི་པུཎྜ་རཱི་ཀ་ལྟ་བུའི་མཛེ་ནད་ཅེས་བྱའོ། །མཛེ་ནད་འབྲུམ་བུ་ལྟ་བུའི་ནད་ཐབས་ནི་ལུས་ཀྱི་ཤ་མཐངས་འབྲུམ་བུ་དཀར་པོ་དང་། སྨུག་
[142b.7]པོས་གང་བ་འདི་ནི་མཛེ་ནད་འབྲུམ་བུ་ལྟ་བུ་ཞེས་བྱའོ། །མཛེ་ནད་གཡན་པའི་ཕོལ་མིག་ལྟ་བུ་ཕྲ་མོ་གནག་ལ་རྩ་སྨུག་པོ་ཕྲ་མོ་མང་པོ་ཤ་སྟག་བྱུང་བ་རབ་ཏུ་གཡའ་ཞིང་ན་ལ་རྣག་ཞུགས་པ་ལྟ་བུ་ནི་རྐུབ་ཚོས་དང་། དཀུ་དོ་དང་། ལག་སོར་གྱི་བར་དང་། གྲུ་མོར་འབྱུང་བ་འདི་ནི་
[143a]
[143a.1]མཛེ་ནད་གཡན་པ་ཞེས་བྱའོ། །མཛེ་ནད་ཁྲག་གིས་པགས་པ་མྱགས་པ་ཞེས་བྱ་བ་ནི། ལུས་གཡའ་བར་རབ་ཏུ་དྲོ་ཞིང་ཚ། ཐོར་བུ་རེག་མི་བཟོད་པ་དེ་ལྟ་བུ་བྱུང་བ་ལས་ཁྲག་གིས་རྒྱས་ན་པགས་པ་ཕྱོགས་སུ་མྱགས་པ་འདི་ནི་པགས་པ་མྱགས་པའི་མཛེ་ནད་ཅེས་
[143a.2]བྱའོ། །འབྲས་བུ་ཀ་ཀ་ནན་ཏི་ལྟ་བུའི་མཛེ་ནད་སྔར་ནི་མདོག་དམར་ལ་གནག །དེའི་རྗེས་ལ་རབ་ཏུ་ཚ་ཞིང་ན་ནས་མཛེ་ནད་ཐམས་ཅད་ནི་ཚུལ་དང་རྟགས་དང་ལྡན་པ་དེ་ཤ་མདོག་ཀྱང་སྣ་གཅིག་ཏུ་མ་ཟད་དེ། རྣམ་པ་སྣ་ཚོགས་སུ་བཀྲ་བར་སྣང་བ་འདི་ནི་མཛེ་ནད་ཀ་ཀ་ནན་ཏིའི་འབྲས་བུ་
[143a.3]ཞེས་བྱའོ། །ཡང་མཛེ་ནད་ཐམས་ཅད་ཀྱི་ནད་དམིགས་གང་ཡིན་པའི་བྱེ་བྲག་ནི་གོང་དུ་རླུང་དང་མཁྲིས་པ་ལ་སོགས་པ་ནད་གཞི་ཐ་དད་པ་ལས་མཛེ་ནད་དུ་གྱུར་པའི་དམིགས་བསྟན་པ་དང་། མཛེ་ནད་ཀྱི་དབྱིབས་དང་། མདོག་ཇི་འདྲ་བ་དང་། ཇི་ལྟར་ན་བའི་དམིགས་དང་། རླུང་དང་
[143a.4]མཁྲིས་པ་ལ་སོགས་པ་ཤས་གང་ཆེ་བ་དེ་ལྟ་བུ་ལས་མཛེའི་ནད་དམིགས་ཤེས་པར་གྱིས་ཤིག །དེ་ལ་མཛེ་ནད་གསོར་མི་རུང་བའི་ནད་ནི་རླུང་དང་མཁྲིས་པ་དང་བད་ཀན་འདུས་པའི་ནད་གཞི་ཆེན་པོར་གྱུར་ལ། མི་འཚོ་བའི་མཚན་མ་དང་། ལྟས་ངན་པ་ཡང་བྱུང་བ་དང་། མཛེ་རུས་པའི་
[143a.5]ནང་དུ་ཞེན་པ་དང་། རྐང་པ་ལ་ཞེན་པ་དང་། ཁུ་བ་ལ་ཞེན་པ་དང་། འདི་རྣམས་ལྟ་བུ་ནི་གསོ་དཀའ་སྟེ་མི་འཚོའོ། །དེ་ལ་ཚིལ་གྱི་ནང་དུ་ཞུགས་པའི་མཛེ་ནད་ནི། ནད་དེ་ལས་མི་ལ་མི་སྐྱེ་བ་ཙམ་དུ་གསོར་རུང་ངོ་། །མཁྲིས་པའི་ནད་ལས་མཛེར་གྱུར་པ་དང་། རླུང་དང་མཁྲིས་པ་
[143a.6]ལྟ་བུ་གང་ཡང་རུང་བ་སྣ་གཉིས་འདྲེས་པ་ལས་མཛེར་གྱུར་པ་དང་། ཁྲག་དང་ཤ་ལ་མཛེ་ཞུགས་པ་འདི་ལྟ་བུ་ནི་གསོ་དཀའ་བ་ཞེས་བྱའོ། །བད་ཀན་དང་རླུང་ནད་ཤས་ཆེ་བའི་མཛེ་ནད་དང་། པགས་པ་ཉི་ཚེ་ལ་མཛེ་ནད་བྱུང་བ་དང་། རླུང་ངམ། མཁྲིས་པའམ་བད་ཀན་གང་ཡང་
[143a.7]རུང་བ་སྣ་གཅིག་ལས་མཛེ་ནད་དུ་གྱུར་པ་འདི་རྣམས་ལྟ་བུའི་མཛེ་ནད་ནི་གསོ་དཀའ་བ་མ་ཡིན་ནོ། །དེ་ལ་མཛེ་ནད་པགས་པ་ཉི་ཚེ་ལ་བྱུང་བ་ནི། ཟུག་ཐབས་སུ་ན། པགས་པའི་མདོག་མི་སྡུག །པགས་པའི་མདོག་རྩུབ་པ་ཡིན་ནོ། །མཛེ་ནད་ཁྲག་ལ་བབས་པར་གྱུར་ན་ལུས་རྔུལ་ཆེ།
[143b]
[143b.1]གཉིད་ཆེ་སྐྲང་བ་ཡིན་ནོ། །མཛེ་ནད་ཤ་ལ་བྱུང་ན་རྐང་པ་དང་། ལག་པ་དང་། རྐང་ལག་གི་ཚིགས་སུ་འབྲུམ་བུ་ཙིག་ཙིག་པོ་འབྱུང་ཞིང་རྣགས་ཏེ་རྐང་ལག་གི་ཚིགས་སུ་ནད་ཚབས་ལྷག་པར་ཆེའོ། །མཛེ་ནད་ཚིལ་ལ་བབས་པར་གྱུར་ན་ལག་པ་ཞ །འགྲོ་མི་ནུས། རྐང་པའམ། ལག་
[143b.2]པ་རྣགས་ཏེ་ཞིག་པར་འགྱུར་རོ། །མཛེ་ནད་རུས་པ་རྐང་པ་ལ་བབས་པར་གྱུར་ན་སྣའི་རུས་པ་ཞོམ། མིག་དམར། སྐད་འགགས། མཛེ་ནད་རྡོལ་བའི་རྨ་ཁར་འབུ་འཇུག་གོ། །མཛེ་ནད་ཁུ་བ་ལ་བབས་པར་གྱུར་ན། ཆུང་མ་དང་བུ་ལ་ཡང་འབྱུང་བར་འགྱུར་རོ། །དེ་ལྟ་བས་ན་མདོར་ན་ལུས་
[143b.3]ཀྱི་སྲོག་ཟུངས་བདུན་པོ་ཁྲག་དང་ཤ་དང་། ཚིལ་ལ་སོགས་པར་མཛེ་ནད་གང་ལ་བྱུང་ཡང་རུང་། མཛེ་ནད་ཀྱི་ནད་ཐབས་རིམ་པ་བདུན་དུ་ཤེས་པར་གྱིས་ཤིག །ཤ་བཀྲ་གཟི་གུར་འདུག་པ་ནི་མཛེ་ནད་གཅིག་པུ་ལས་འོངས་ཏེ། དེའི་ནང་ན་ཡང་ཤ་བཀྲ་གཟི་གུ་ཚབས་ཆེན་པོ་མི་སྡུག་པར་
[143b.4]གྱུར་པ་ནི་བསལ་བའི་དཔྱད་དཀའ་སྟེ། ཤ་བཀྲ་སྐམ་པོ་རྣག་ཁྲག་མི་ཟག་པ་ནི་ཁྲག་དང་ཤ་དང་། ཚིལ་ལས་འབྱུང་བར་འགྱུར་རོ། །རླུང་ནད་ལས་ཤ་བཀྲར་གྱུར་པ་ནི། ཤ་མདོག་རྩུབ་ལ་དམར་བའོ། །མཁྲིས་པ་ལས་ཤ་བཀྲར་གྱུར་པ་ནི་ཟངས་མདོག་དང་། པདྨའི་
[143b.5]མདོག་ལྟར་རྩ་དམར། ལུས་ཚ། སྤུ་ཀུན་འབྱིའོ། །བད་ཀན་ལས་ཤ་བཀྲར་གྱུར་པ་ནི་མདོག་དཀར་ལ་སྟུག །ལུས་ལྕི་ཞིང་གཡའ་བ་ཡིན་ནོ། །ནད་ཁྲག་དང་། ཤ་དང་། ཚིལ་དང་། འདི་གསུམ་ལས་ཤ་བཀྲ་གཟི་གུར་གྱུར་པའི་ཤ་མདོག་སོ་སོར་བསྟན་པ་དེ་ལ་
[143b.6]ཤ་བཀྲའི་ནད་རྣམ་གཉིས་གཅིག་ཏུ་གྱུར་པ་ནི་གསོ་དཀའོ། །རླུང་གི་ཤ་བཀྲ་བས་མཁྲིས་པའི་ཤ་བཀྲ་གསོ་དཀའོ། །མཁྲིས་པའི་ཤ་བཀྲ་བས་བད་ཀན་གྱི་ཤ་བཀྲ་གསོ་དཀའོ། །ཤ་བཀྲ་དཀར་པོ་མ་ཡིན་པ་དང་། བ་སྤུ་མ་བྱི་སྟེ། ཕལ་ཆེ་བ་དང་། ཤ་བཀྲ་ནད་འདབ་མ་
[143b.7]འདྲེས་ཏེ། སོ་སོ་ན་འདུག་པ་དང་། གསར་དུ་བྱུང་མ་ཐག་པ་དང་། མེའམ་སྨན་གྱིས་བསྲེགས་པ་འདི་ལྟ་བུ་ནི་གསོ་སླའོ། །འདི་ལྟ་བུ་མ་ཡིན་པ་གཞན་ནི་གསོ་དཀའོ། །མདོམས་དང་། ལག་པ་དང་། མཆུར་བྱུང་ན་གསེར་ཡང་རུང་སྟེ། སྨན་དཔྱད་ཀྱིས་བསྩལ་དཀའོ། །
[144a]
[144a.1]མཛེ་ནད་འདི་ལྟ་བུས་བཏབ་པའི་མི་ལ་ལུས་རེག་གམ། ཟན་གཅིག་ཟ་འམ། མལ་གཅིག་གམ་སྟན་གཅིག་ལ་འདུག་པ་ལ་སོགས་པ་འདི་ལྟ་བུ་ཀུན་གྱི་ནད་འགོ་བར་འགྱུར་ཏེ། ལྷག་པར་མིག་ནད་དང་། མཛེ་དང་ཤ་བཀྲ་ལ་སོགས་པའི་ནད་ནི་འགོ་
[144a.2]ཞེས་བྱའོ། །མཛེ་ནད་རྣམ་པ་བཅྭ་བརྒྱད་བཤད་པ་རྫོགས་སོ།། །།ལུས་ཀྱི་སྲིན་བུ་སྣ་ཚོགས་བཤད་པ། མིའི་ལུས་ལ་སྲིན་བུ་རྣམ་པ་གཉིས་ཏེ། ཕྱི་དང་ནང་གི་སྲིན་བུའོ། །དེ་ལ་ཕྱི་རོལ་གྱི་སྲིན་བུ་ནི་དྲི་མ་དང་བད་ཀན་དང་ཁྲག་ལ་སོགས་པ་ལས་
[144a.3]འབྱུང་ཞིང་གནས་ཏེ། དེ་ལ་ཡང་མདོར་རྣམ་བཞིའོ། །མིང་གི་བྱེ་བྲག་ཏུ་དབྱེ་ན་རྣམ་པ་ཉི་ཤུ་ཡོད་དེ། དེ་ལ་ཁྲག་ལས་བྱུང་བ་ནི། ཕྱི་རོལ་གྱི་སྲིན་བུ་སྟེ། དབྱིབས་དང་། མདོག་ཀྱང་ཏིལ་འབྲུ་ཙམ་སྐྲ་དང་ལུས་ལ་གནས་པའི་སྲོ་ཤིག་རྣམ་གཉིས་ཡིན་ནོ། །སྲོ་ཤིག་གིས་
[144a.4]ཀྱང་ལུས་ལ་ཐོར་བུ་དང་འབྲུམ་བུ་དང་གཡན་པར་བྱེད་དོ། །ནང་གི་སྲིན་བུ་ནི་བད་ཀན་ལས་གྱུར་ཏེ། དེ་ཡང་མཛེ་ནད་འབྱུང་བའི་རྒྱུར་འགྱུར་རོ། །ནང་གི་སྲིན་བུ་དག་ནི་གཞན་པས་ལྷག་པར་མཛེ་ནད་ཀྱི་གཞིར་འགྱུར་རོ། །སྲིན་བུ་དེ་དག་གི་ཟས་ནི་བུ་རམ་དང་། འོ་མ་ལ་སོགས་
[144a.5]པ་མངར་བག་དང་། ཞོ་དང་ཚ་ལ་སོགས་པ་སྐྱུར་བག་དང་། འབྲས་ཆན་ལ་སོགས་པ་གསར་བག་དང་། ཉ་ལ་སོགས་པ་བད་ཀན་དུ་འགྱུར་བའི་ཟས་ལ་དགའོ། །མི་གཙང་བའི་བཤང་གཅིའི་ནང་ན་གནས་པའི་སྲིན་བུའི་ཟས་འབྲུ་བག་དང་། ཚོད་མ་ལོ་མ་བཏབ་པ་ལ་སོགས་
[144a.6]པའི་བག་ལ་དགའོ། །བད་ཀན་ཕོ་བའི་ནང་ནས་བྱུང་བའི་སྲིན་བུ་ནི་ཆེར་སྐྱེས་པ་དང་། ཁོང་པའི་ནང་ཕོ་བའི་ནང་དང་། ལོང་ཀའི་ནང་ཀུན་ཏུ་འགྲོའོ། །སྲིན་བུ་ལ་ལྕག་འདྲ་བ་ཕྲ་མོ་རིང་པོར་འདུག་གོ། །ལ་ལ་ནི་སྲིན་གྲོལ་མ་འདྲ་བ་འདུག་གོ། །སྲིན་བུ་ཁ་ཅིག་ནི་
[144a.7]མྱུ་གུ་ཁ་འབུས་པ་འདྲ་བ་གྲོལ་མ་དཀའ་རུ་ཡོད་དོ། །སྲིན་བུ་ཁ་ཅིག་ནི་སྐུད་པ་ཕྲ་མོ་རིང་པོ་འདྲ་བར་ཡོད་དོ། །སྲིན་བུ་ཁ་ཅིག་ནི་ཐུང་ལ་རབ་ཏུ་ཕྲ་བ་ཡོད་དེ། དེ་དག་ལ་ལ་ནི་དཀར། ལ་ལ་ནི་རྩ་དམར་བ་ཡོད་དོ། །སྲིན་བུ་དེ་རྣམས་ཀྱི་མིང་སྤྱིར་ནི་རྣམ་པ་བདུན་ཡོད་དེ། རྒྱུ་
[144b]
[144b.1]མ་ཟ་བ་ཞེས་བྱ་བ་དང་། ལྟོ་བའི་ནང་ན་འཁྲུལ་བ་ཞེས་བྱ་བ་དང་། སྙིང་ལ་ཟ་བ་ཞེས་བྱ་བ་དང་། ཡ་མཚན་ཆེན་པོ་ཞེས་བྱ་བ་དང་། མི་མངོན་པར་རྐུ་བ་དང་། རྩྭ་དཱུར་བའི་མེ་ཏོག་ཅེས་བྱ་བ་དང་། དྲི་ཞིམ་པོ་ཞེས་བྱ་བ་དང་། སྲིན་བུ་འདི་རྣམས་ནི་སྙིང་ལ་ཟ་ཞིང་ཁ་ནས་ཆུ་ཟག་
[144b.2]པར་བྱེད། ཟས་མི་འཇུ་བར་བྱེད། ཁ་ཟས་ཡི་གར་མི་འོང་བར་བྱེད། བརྒྱལ་ཞིང་མི་དྲན་པར་བྱེད། སློན་པར་བྱེད། རིམས་ནད་ཀྱིས་འདེབས། གསུས་པ་ཆེར་སྐྱེ། ལུས་སྐེམ་ཞིང་རིད། སྦྲིད་པ་རྟག་པར་འོང་། ཆམ་པས་འདེབས། དེ་ལ་ཁྲག་རྒྱུ་བའི་རྩའི་ནང་ནས་ཁྲག་
[144b.3]ལས་བྱུང་བའི་སྲིན་བུ་ཕྲ་མོ་ཁྲག་གི་ནང་ན་གནས་ཏེ། ལུས་ཟུངས་ཟླུམ། རྐང་ལག་མེད། མདོག་ཟངས་ཁ་ལྟར་དམར་ལ་རབ་ཏུ་ཕྲ་བ་ཁ་ཅིག་ནི་བལྟར་ཡང་མི་མངོན་ཏེ་སྲིན་བུ་དེ་དག་གི་མིང་ནི་སྐྲའི་རྩ་བ་ཟ་བ་དང་། ལུས་སྤུ་བྱི་བར་བྱེད་པ་དང་། སྤུ་གླིང་ཆགས་པ་དང་། ཨུ་དུམྦཱ་
[144b.4]རའི་འབྲས་བུ་འདྲ་བ་དང་། ཞགས་པ་དང་བཅས་པ་ཞེས་བྱ་བ་དང་། སྲིན་བུ་མཐོང་ཀ་ཞེས་བྱ་བ་དང་། སྲིན་བུ་འདི་དྲུག་གིས་ནི་ལུས་ཀྱི་པགས་པ་ལ་མཛེ་ནད་ཀྱི་ནད་ཐབས་བཞིན་དུ་མཛེ་ལྟར་འབྱུང་བར་བྱེད་དོ། །ཟས་ཞུ་བའི་གནས་ལོང་ཀའི་ནང་ན་མི་གཙང་བ་ལས་བྱུང་བའི་སྲིན་བུ་ཡོད་
[144b.5]དེ། དེ་ཆེར་སྐྱེས་ན་ཐུར་དུ་བཤང་བ་དང་ལྷན་ཅིག་འབྱུང་བར་འགྱུར་རོ། །གལ་ཏེ་སྲིན་བུ་དེ་ཆེན་པོར་སྐྱེས་ན་ཕོ་བའི་ནང་དུ་འཇུག་པར་འགྱུར་ཏེ། ཕོ་བའི་ནང་དུ་འོངས་ན་དེའི་ཚེ་སྒྲེགས་པ་འབྱུང་བ་དང་། དབུགས་འབྱུང་བ་དྲི་མི་ཞིམ་སྟེ་ཕྱི་ས་བཞིན་དུ་མནམ་པར་འགྱུར་རོ། །ཡང་
[144b.6]གཞང་གི་ནང་མི་གཙང་བའི་ཁྲོད་ན་གནས་པའི་སྲིན་བུ་ལྔ་ཡོད་དེ་སྲིན་བུ་ཁམ་གྱིས་ཟ་བ་ཞེས་བྱ་བ་དང་། དལ་གྱིས་འགྲོ་བ་ཞེས་བྱ་བ་དང་། མྱོང་བར་བྱེད་ཅེས་བྱ་བ་དང་། བརྐམ་པ་ཞེས་བྱ་བ་དང་། ལུས་ལ་གནོད་པ་ཞེས་བྱ་བ་དང་། འདི་ལྔ་ཡོད་དེ། དེ་དག་གི་ལུས་
[144b.7]དབྱིབས་དང་ཁ་དོག་ནི་ཆེན་པོ་དང་། ཟླུམ་པོ་དང་། ཕྲ་མོ་དང་། སྦོམ་པོ་དང་། སྨུག་པོ་དང་། སེར་པོ་དང་། དཀར་པོ་དང་། དམར་པོར་འདུག་གོ། །སྲིན་བུ་དེ་དག་ནི་ཐུར་དུ་འཁྲུ་བར་བྱེད་དེ། རྟུག་སྐམ་གྱིས་འདེབས་ཤིང་སྲི་བར་བྱེད། ལུས་སྐེམ་པོར་འགྱུར། ལུས་ཁོང་
[145a]
[145a.1]རྩུབ། སྐྱ་བོ་རྦབ་རྦབ་པོར་འགྱུར། བ་སྤུ་ལངས་ཤིང་འགྲེང་སྟེ། ཕོ་བའི་དྲོད་ཉམས། གཞང་གི་ནང་གཡའ། གཞང་ཕྱིར་འབྱུང་བར་བྱེད་དོ། །མཛེ་ནད་དང་། སྲིན་བུ་འབྱུང་བའི་ནད་གཞི་བཤད་པ་སྟེ། ལེའུ་བཅུ་བཞི་པ་རྫོགས་
[145a.2]སོ།། །།རླུང་ནད་དུ་གྱུར་པའི་ནད་གཞི་བསྟན་པ་སྟེ། ལེའུ་བཅོ་ལྔ་པ་བཤད་པར་བྱའོ། །རླུང་ནི་མི་འོ་ཅོག་གི་སྲོག་དང་། རྩི་ཤིང་ཐམས་ཅད་ལ་ཕན་པར་འགྱུར་བ་དང་། གནོད་པར་འགྱུར་བའི་རྒྱུ་ཡིན་ཏེ། དེ་བས་ན་ནད་དུ་གྱུར་པའི་རླུང་དང་། ནད་དུ་
[145a.3]གྱུར་པ་མ་ཡིན་པའི་རླུང་དང་། ལུས་ཀྱི་ཁྱད་པར་དུ་འགྱུར་བ་ཞེས་བྱའོ། །དེ་ལྟ་བས་ན་རླུང་འདི་ནི་ལུས་ཐམས་ཅད་པ་ཞེས་བྱའོ། །ཐམས་ཅད་ཀྱི་རང་བཞིན་པ་ཞེས་བྱའོ། །ཐམས་ཅད་ཀྱི་མཚན་ཉིད་ཅེས་བྱའོ། །ཇི་ལ་ཡང་དབང་བྱེད་པས་ན་སྐྱེ་དགུའི་བདག་ཅེས་
[145a.4]བྱའོ། །ཇི་ཡང་འབྱིན་པར་བྱེད་པ་འཛིན་པར་བྱེད། ཐམས་ཅད་དུ་འགྲོ་བ། ཁྱད་པར་དུ་འཇུག་པ། ཐམས་ཅད་དུ་འགྲོ་བ་ལ་ཁྱད་པར་འཇུག་པ། ཀུན་ནས་སྡུད་པ་འཆི་བདག་ཏུ་གྱུར་པ། གཤིན་རྗེར་གྱུར་པ་ལྟ་བུ་ཞེས་བྱའོ། །དེ་བས་ན་ནད་སློང་བའི་རླུང་
[145a.5]ནད་ངན་པར་མི་འགྱུར་བར་ནན་ཏན་གྱིས་ཤིག །དེ་ཡང་ནད་དམིགས་ཤེས་པར་བྱ་བའི་ལེའུ་ལས་རླུང་གི་བྱེ་བྲག་མདོ་དང་། ཞིབ་ཏུ་བསྟེན་པ་ནི། ན་བ་མེད་ཅིང་ཐ་མལ་པར་གནས་པའི་ཚེ། རླུང་གི་རང་བཞིན་ལས་གང་དང་གང་བྱེད་པ་དང་། རླུང་དེར་གྱུར་ན་ནད་ཅི་དང་ཅི་
[145a.6]སློང་བ་བཤད་པ་དང་། ཡང་ལྟག་པའི་ནད་དམིགས་ཀྱི་བྱེ་བྲག་བཤད་པའི་ནང་ནས་རླུང་གི་མིང་སོ་སོར་བཏགས་པ་དང་། རླུང་གང་དང་གང་ན་གནས་པ་དང་། ལུས་ལ་རླུང་ཐ་དད་པ་རྣམ་ལྔ་ཡོད་པ་གང་ནས་གང་དུ་རྒྱུ་བ་དང་། རླུང་རྣམ་པ་ལྔ་ལས། ཅི་དང་ཅི་བཤད་པ་
[145a.7]རྣམས་ཀྱང་ཤེས་པར་གྱིས་ཤིག །སྐབས་འདིར་ནི་རླུང་ནད་དུ་གྱུར་པ་ན་ནད་སློང་བར་བྱེད་པའི་ནད་སློང་བའི་གཞི་དང་མཚན་ཉིད་དུ་དབྱེ་བ་ནི་འདིར་བསྟན་པར་བྱའོ། །དེ་ལ་རླུང་ནད་ནི་རླུང་ནད་དུ་གྱུར་པའི་བག་བྱས་པའི་ལུས་ཀྱི་སྲོག་ཟུངས་ཟད་པར་བྱེད་པའི་རླུང་ནད་ལངས་
[145b]
[145b.1]ནས། ནང་གྲོལ་གྱི་སྦུ་གུ་དང་། རྩ་ཆེན་པོའི་ནང་དུ་རླུང་ནད་ཕན་གནོད་གཞན་ཞིག་གིས་ཁོང་པའི་ནང་གང་བར་འགྱུར་བ་དེ་ལྟ་བུས་ནད་དེའི་ཐོག་ཏུ་བསྣན་ཏེ། ཡོག་ཅིང་ཁེབས་ནས་རླུང་ནད་དུ་འགྱུར་རོ། །དེ་ལ་རླུང་ནད་ཞུ་བའི་གནས་ཕོ་བ་མན་ཆད་དུ་ཞུགས་ཏེ་ན་ན་ལྟོ་སྦོ་ཞིང་ན།
[145b.2]རྒྱུ་མའི་ནང་ཁྲུ་ལུ་ལུ་ཟེར། ཐུར་དུ་བཤང་བ་འོང་དུ་མི་བཏུབ། ཆུ་སོར་རྡེའུ་ཆགས་ཏེ་རྡེའུ་སྐྱེ། གཞང་འབྲུམ་སྐྱེད། རྒྱབ་ན་ཞིང་རྐང་པ་ན། རོ་སྨད་མན་ཆད་དུ་དམིགས་སུ་རབ་ཏུ་ཟུག་ཅིང་ནའོ། །ཟས་མ་ཞུ་བའི་གནས་ཕོ་བ་ཡན་ཆད་དུ་ཞུགས་ཏེ་ན་ན་སྐོམ་དད་ཆེ། སློན་བྲོ།
[145b.3]དབུགས་མི་བདེ། ལུད་པ་ལུ། སྦོ་ཞིང་འཁྲུ། མགུལ་པ་དང་། གྲེ་བ་མི་བདེ། སྒྲེགས་པ་མང་ཞིང་ཟས་མ་ཞུ་བའི་སྒྲེགས་པ་འབྱུང་ངོ་། །དེ་ལྟར་ལྟོ་བ་ཡན་ཆད་དུ་རླུང་ནད་ལངས་ཏེ་ན་ན། རྣ་བ་ལ་སོགས་པ་དབང་པོ་རྣམས་མི་བདེ་ལ་མི་གསལ་ཞིང་རྟུལ་ལོ། །པགས་
[145b.4]པ་ལ་རླུང་ཞུགས་ན་པགས་པ་འགགས་ཤིང་རྩུབ་པའོ། །ཁྲག་ལ་རླུང་ནད་ཞུགས་ན་རབ་ཏུ་ན། གཉིད་ཆེ། ཤ་མདོག་དམར་ལ་ཁ་དོག་མི་སྡུག་པར་འགྱུར། ཐོར་བུ་འབྱུང་། ཁ་ཟས་ཟོས་པ་རྣམས་ལྟོ་ན་རེམ་རེམ་པོར་འདུག །ཡི་ག་འཆུ། སྐེམ་པོར་འགྱུར།
[145b.5]མགོ་འཁོར། ཚིལ་དང་ཤ་ལ་རླུང་ཞུགས་ན་རྨེན་བུ་ལྟ་བུར་འབྱུང་། རབ་ཏུ་ཟུག་ཅིང་ན། རྩུབ་ཅིང་ངལ་སྐྱེན། ལུས་ལྕི། ལུས་ཀྱི་ལྷུ་ཚིགས་ཡན་ལག་རེངས། ཁུ་ཚུར་དང་དབྱིག་པས་ཕོག་པ་སྙམ་བྱེད་དོ། །རུས་པ་ལ་རླུང་ནད་ཞུགས་ན་བརླ་དང་བྱིན་པ་རྗེ་ངར་རབ་ཏུ་
[145b.6]རྐང་ཟུག་ཕྱོགས་སུ་ན། རུས་པའི་ཚིགས་སུ་ན། ཉམས་སྟོབས་རབ་ཏུ་ཟད་པར་བྱེད་དོ། །རྐང་ལ་རླུང་ནད་ཞུགས་ན། རུས་པའི་ནང་སྟོང་པར་འགྱུར། གཉིད་མེད་རྒྱུན་དུ་ནའོ། །ཁུ་བ་ལ་རླུང་ནད་ཞུགས་ན་ཡང་ན་ཁུ་བ་མྱུར་དུ་འབྱུང་བར་འགྱུར་རོ། །ཡང་ན་ཁུ་བ་འབྱུང་དུ་
[145b.7]མི་རུང་བའམ། ཁུ་བའི་མདོག་གཞན་དུ་འགྱུར་བར་བྱེད་དོ། །དེ་དང་འདྲ་བར་བུད་མེད་ཀྱི་མངལ་དུ་ཁུ་བ་གནས་པ་ཡང་དེ་དང་འདྲ་བར་འགྱུར་རོ། །རྩ་ལ་རླུང་ནད་ཞུགས་ན་རྩ་སྦོ་བ་དང་། ནང་སྟོང་པར་འགྱུར་རོ། །ཆུ་བ་ལ་རླུང་ཞུགས་ན་དཔྱི་ནས་བརླར་ཟུག་ཅིང་ན་བ་དང་། གླང་
[146a]
[146a.1]ཆངས་པ་དང་། ད་རྒན་གྱི་ནད་དུ་འགྱུར་རོ། །རུས་པའི་ཚིགས་སུ་རླུང་ནད་ཞུགས་ན། མྱངས་པ་ན་རྐྱལ་པ་རླུང་གིས་གང་བ་བཞིན་དུ་སྐྲང་། བརྐྱང་བསྐུམ་བྱས་ན་ནའོ། །ལུས་ཐམས་ཅད་ལ་རླུང་ནད་ཞུགས་ན་ཟུག་ཅིང་ན་ལ་ཆག་པ་སྙམ་བྱེད། རེངས་
[146a.2]ཤིང་རྐང་ལག་ཕྱིར་གཡབ་པར་འདོད། ཚོར་བའི་བག་མེད། བེམ་བག་ཏུ་འགྱུར། ཚིགས་འཁུམས་པ་དང་། འདའ་བར་འགྱུར་རོ། །ནམ་ཚོང་ཆེན་པོའི་ནང་ཀུན་དུ་རླུང་ནད་ཡང་དང་ཡང་ཞུགས་ཏེ་འགྲོ་བ་ན་ལུས་འགུལ་ཞིང་འདར་ལ་ནད་འཇུག་པར་བྱེད་དེ། དེ་ལ་མིང་ནི་
[146a.3]ལུས་ལ་ནད་འཇུག་པ་ཞེས་བྱའོ། །རོ་སྨད་མན་ཆད་དུ་རླུང་ནད་འགགས་པ་དང་། གྱེན་དུ་སོང་ན་སྙིང་ལ་གནས་ཏེ། སྦུ་གུར་ཞུགས་ནས་སྙིང་དང་། ཀླད་པ་དང་། མུར་འགྲམ་དུ་ཟུག་ཅིང་ན། དེ་བཞིན་དུ་ལུས་ཐམས་ཅད་གཞུ་ལྟར་གུག་སྟེ། སྒུར་པོར་འགྱུར། དབུགས་དང་
[146a.4]རྔམ་པ་མི་བདེ་བར་འཐོན། ཧར་མིག་ཏུ་ལྟ་ཞིང་འབྱེད་འཛུམས་མི་ཤེས། ཕུག་རོན་བཞིན་དུ་འཁུན། དྲན་པ་ཉམས་པར་འགྱུར་ཏེ། དེའི་མིང་ནི་གཞན་དབང་ཅན་ཞེས་བྱའོ། །སློབ་དཔོན་གཞན་དག་ན་རེ། ནད་དེའི་མིང་ཨ་བ་ད་ན་ཀ་ཞེས་བྱའོ་ཞེའོ། །གལ་ཏེ་རླུང་ནད་གཞན་
[146a.5]དབང་ཅན་དེ་སྙིང་གི་གནས་དང་། རེ་ཞིག་བྲལ་བ་ལྟ་ན་ནི། སྐད་ཅིག་ནད་མེད་ཅིང་བདེ་ལ། རླུང་དེ་སླར་སྙིང་ལ་ཞུགས་ན། ཡང་ནད་སྔ་མ་ལྡང་བར་འགྱུར་རོ། །བུད་མེད་བུ་བྱུང་བའི་འོག་ཏུ་ཁྲག་ཤས་ཆེར་འབྱུང་བའི་རྗེས་ལ་རླུང་ནད་གཞན་དབང་གི་ནད་བྱུང་བའམ། ཡང་ན་སྣད་
[146a.6]པའི་དབང་གིས་རླུང་ནད་བྱུང་ན་ནི་གསོ་དཀའ་བ་ཡིན་ནོ། །མགྲིན་པའི་གཡས་གཡོན་གྱི་འཕར་རྩ་གཉིས་ཀྱི་ནང་དུ་རླུང་ཞུགས་ན་ནི་ནམ་ཚོང་ཡན་ཆད་གུག་ཅིང་རྩ་རེངས་ཏེ་གཡོ་བར་གྱུར་པ་དང་། དེ་བཞིན་དུ་རྩ་ཆེན་པོ་གཞན་རྣམས་སུ་ཞུགས་ཏེ་ལུས་ཐམས་ཅད་ཁྱབ་པ་དེའི་ཚེ་ནི་ལུས་
[146a.7]ཐམས་ཅད་ཀྱང་གཞུ་ལྟར་འཁུམས་པར་འགྱུར་རོ། །རླུང་ནད་དེའི་ཤུགས་དྲག་ཏུ་སྐྱེ་ན་ནི། ཡན་ལག་ཆག་པ་སྙམ་བྱེད་ཅིང་ན། ཧར་མིག་ཏུ་ལྟ་ཞིང་འབྱེད་འཛུམས་མི་ཤེས། གླལ་བདེ་བར་མི་ཕྱིན། སོ་འཁྲིག །སྟོད་དུ་སྐྱུག །རྩིབ་ལོགས་གཉིས་སུ་ཟུག་ཅིང་ན། སྐད་
[146b]
[146b.1]གསལ་པོར་མི་ཕྱིན། འགྲམ་པ་དང་། རྒྱབ་ཀྱི་སྒལ་ཚིགས་དང་མགོ་བོ་རྣམས་རེངས་ཤིང་བསྒུལ་དཀའ་བ་ཡིན་ཏེ། རླུང་དེའི་མིང་ནི་ད་རྒན་ལུས་ནང་དུ་གུག་པ་ཞེས་བྱའོ། །དེ་ལ་ད་རྒན་ཕྱིར་དགྱེ་བའི་རླུང་གི་མཚན་མ་ཡང་དེ་འདྲ་སྟེ། ཁྱད་པར་དུ་ལུས་ཕྱིར་གྱེད་ཅིང་རླུང་
[146b.2]གིས་མགོ་རྒྱབ་ཏུ་འདྲེན་ལ། བྲང་མདུན་དུ་འབུར། གཉའ་བ་སོས་འབྲད་པ་སྙམ་སེམས། བཞིན་མདོག་འགྱུར། ཚབས་ཆེར་རྔུལ་འབྱུང་། ཡན་ལག་ཐམས་ཅད་ལྷོད་པར་གྱུར་པ་དེ་ནི། དེ་རྒན་གྱི་ནད་ལུས་ཕྱིར་དགྱེ་བ་ཞེས་བྱའོ། །སློབ་དཔོན་ཁ་ཅིག་ན་རེ་རླུང་
[146b.3]དེའི་མིང་ནི་གཞུ་ལྟར་རེངས་པ་ཞེས་བྱའོ་ཞེའོ། །ཡང་སློབ་དཔོན་ཁ་ཅིག་ན་རེ་དེའི་མིང་ནི་རླུང་ནད་ཤུགས་དྲག་པོ་ཞེས་བྱའོ་ཞེས་ཟེར་རོ། །གནད་ཀྱི་སྟེང་དུ་རྨ་འབྱུང་སྟེ་དེར་རླུང་ལ་སོགས་པའི་ནད་གཞི་གཞན་དག་རླུང་གིས་ཕུལ་ཏེ། རྐང་པ་ཡན་ཆད་མགོ་བོ་མན་ཆད་ལུས་
[146b.4]ཀུན་ནད་ཀྱིས་ཁྱབ་པར་བྱས་ཏེ་དེ་ཡང་སྦོམ་པ་དང་། ལུས་སྐྱ་བོ་རྦབ་རྦབ་པོར་གྱུར་པ་ནི་རྨའི་ད་རྒན་ཞེས་བྱ་སྟེ་སྤང་བར་བྱའོ། །གོང་དུ་བཤད་པའི་རླུང་ནད་ལྔ་པོ་དེ་དག་ཐམས་ཅད་ཀྱང་རླུང་གི་ཤུགས་དང་བྲལ་ན་ནི་ནད་མེད་ཅིང་བདེ་བར་འགྱུར་རོ། །ལྕེ་ལ་སོ་ཤིང་ལ་སོགས་པས་
[146b.5]བཞར་དྲགས་པ་དང་། བཅའ་བ་སྐོམ་པོ་སྲ་བ་བཅས་པ་དང་། ཁུ་ཚུར་དང་རྡོ་བ་ལ་སོགས་པས་སྣད་པའི་དབང་གིས་འགྲམ་པའི་རྩ་བའི་རླུང་འཁྲུགས་ཏེ། འགྲམ་པ་གཡས་གཡོན་གཉིས་ཀྱི་རྩ་བ་ནས་བསྐྱོད་ཅིང་ཉམས་པར་བྱས་ཏེ། ཁ་རྟག་ཏུ་གདངས་པ་འམ་ཡང་
[146b.6]ན་འཛུམས་པར་བྱེད་དེ། བཟའ་བ་དང་། སྨྲ་བ་ཐམས་ཅད་ཀྱང་ཤིན་ཏུ་དཀའ་བ་དེ་ནི་འགྲམ་པ་རང་གི་གནས་ནས་ཉམས་པ་ཞེས་བྱ་བའི་རླུང་ནད་ཅེས་བྱའོ། །ལྕེའི་རྩེ་མོ་ན་སྨྲ་བར་བྱེད་པའི་རྩ་ཡོད་དེ། དེའི་ནང་དུ་རླུང་ཞུགས་ནས། ལྕེ་ལྡིབས་ཤིང་ལྐུགས་པར་འགྱུར་
[146b.7]ཏེ་བཟའ་བ་དང་བཏུང་བའི་རོ་ཡང་མི་ཚོར། སྨྲ་ཡང་མི་ནུས་པ་དེ་ནི་ལྕེ་ལྡིབས་པ་ཞེས་བྱ་བའི་རླུང་ནད་ཅེས་བྱའོ། །རླུང་ནད་ཀླད་པའི་གཞོགས་ཕྱེད་ན་བ་ཞེས་བྱ་བ་ནི། མགོས་ཁུར་ཆེན་པོ་ཁྱེར་བ་དང་། དགོད་དྲགས་པ་དང་། ཚིག་དྲག་ཏུ་སྨྲ་བ་དང་། དེ་བཞིན་དུ་སྡངས་
[147a]
[147a.1]པ་དང་། གདོང་ཡོན་པོར་གཅུས་ནས་སྦྲིད་པ་གཏོང་བ་དང་། གཞུ་སྲ་སྟེ་མ་འདྲེན་པ་དང་། མལ་སྟན་མཐོན་དམན་མི་སྙོམས་པ་ལ་ཉལ་བ་དང་། བཅའ་བ་སྐམ་པོ་སྲན་ཏེ་མ་འཆའ་བ་དང་། དེ་བཞིན་དུ་རླུང་ནད་སྐྱེས་པའི་བག་བསྟེན་པས་རླུང་
[147a.2]འཕེལ་ཏེ། རོ་སྟོད་དུ་ཞུགས་ནས་ཁ་གདོང་གི་གཞོགས་ཕྱེད་ཡོན་པོར་བྱས་ཏེ། དེ་སྨྲ་བ་དང་། དགོད་པ་དང་། ལྟ་བ་རྣམས་ཀྱང་ཡོ་བར་བྱེད་དོ། །དེས་ན་ནད་པའི་མགོ་བོ་ཡང་འགུལ་ཞིང་དམ་པར་བྱེད་དོ། །དེ་བཞིན་དུ་སྐད་མི་ཕྱིན་པ་དང་། ཧར་མིག་ཏུ་ལྟ་ཞིང་འབྱེད་
[147a.3]འཛུམས་མི་ཤེས་པ་དང་། སོ་འགུལ་བ་དང་། སྐད་འཛེར་བ་དང་། སྒྲ་མི་ཐོས་པ་དང་། སྦྲིད་པ་མི་ཐོན་པ་དང་། དྲི་མི་ཚོར་བ་དང་། དྲན་པ་ཉམས་པ་དང་། རྨོངས་པ་དང་། གཉིད་ཀྱི་ནང་དུ་སྡངས་པ་དང་། མཆིལ་མ་གཡོན་ཕྱོགས་སུ་འདོར་བ་དང་། ལྟ་བ་ཡང་མིག་
[147a.4]ཡ་གཅིག་ལྟ་ཞིང་འཛུམས་པ་དང་། ནམ་ཚོང་ཡན་ཆད་མི་བཟད་པར་ན་བ་ཡིན་ནོ། །སློབ་དཔོན་ཁ་ཅིག་ན་རེ་ལུས་ཀྱི་རོ་སྨད་ཀྱི་གཞོགས་ཕྱེད་ཀྱང་དེ་ལྟར་ན་བ་ཡོད་ཅེས་ཟེར་རོ། །ཡང་གཞན་དག་ན་རེ་ད་རྒན་ཕྱོགས་གཅིག་ཏུ་གྱུར་པ་ཡང་དེའི་མཚན་ཉིད་དང་ལྡན་པ་ཡིན་ནོ་ཞེའོ། །
[147a.5]རླུང་ནད་ཁྲག་ལ་བརྟེན་ཏེ། སྐེ་རྩའི་ནང་དུ་ཞུགས་ནས་དེས་རྩ་རྣམས་རྩུབ་པ་དང་། ནད་དང་བཅས་པ་དང་། མདོག་གནག་པར་བྱེད་དེ། དེ་ནི་རྩ་འཛིན་པའི་རླུང་ནད་ཅེས་བྱ་སྟེ་གསོར་མི་རུང་ངོ་། །རླུང་གིས་ལུས་ཀྱི་གཞོགས་ཕྱེད་བཟུང་སྟེ་དེས་རྩ་དང་རྒྱུས་པ་བསྐམ་པར་བྱས་ནས།
[147a.6]གཞོགས་ཕྱེད་གང་ཡང་རུང་བ་ལ་གནོད་པར་བྱེད་དོ། །ཚིགས་ཀྱི་བོགས་རེ་ཡང་བྱེ་ཞིང་ལྷོད། གཞོགས་ཕྱེད་ཀྱི་ལས་ལ་སྦྱོར་མི་ནུས། ཚོར་བ་མེད་ཅིང་བེམ་བེམ་པོར་གྱུར་པ་ཡིན་ཏེ། དེ་ནི་སྨན་པ་ཁ་ཅིག་ན་རེ། ཡན་ལག་ཕྱོགས་གཅིག་གི་ནད་ཅེས་བྱའོ་ཞེས་ཟེར་རོ། །ཡང་
[147a.7]སྨན་པ་གཞན་དག་ན་རེ་གཞོགས་ཕྱེད་སྐམ་པ་ཞེས་ཟེར་རོ། །ལུས་ཐམས་ཅད་ལ་བརྟེན་པའི་རླུང་ནད་ཀྱང་ལུས་ལ་ཚོར་བ་མེད་པ་ལ་སོགས་པ་མཚན་མ་གོང་མ་དང་འདྲ་སྟེ། དེ་ནི་ཡན་ལག་ཐམས་ཅད་ཀྱི་ནད་ཅེས་བྱའོ་ཞེས་པས་དེ་རླུང་ནད་ཉི་ཚེ་གཞོགས་ཕྱེད་སྐམ་པ་ནི་གསོ་དཀའ་
[147b]
[147b.1]བ་ཡིན་ནོ། །ནད་གཞི་གཞན་དང་འདྲེས་པས། གཞོགས་ཕྱེད་སྐམ་པ་ནི་ཤིན་ཏུ་དཀའ་བས་གསོར་མི་རུང་ངོ་། །གློ་གཅོང་ཟད་བྱེད་ཀྱིས་གཞོགས་ཕྱེད་སྐམ་པ་ནི་སྤང་བར་བྱའོ། །རླུང་ནད་མ་ཞུ་བ་དང་། བད་ཀན་དང་འདྲེས་ནས་རྩའི་རྒྱུན་སྲང་ཆོད་དེ། དེས་ལུས་ཐམས་ཅད་ཤིང་
[147b.2]བཞིན་དུ་རེངས་པར་བྱས་ནས། བརྐྱང་བསྐུམ་མི་ནུས་པ་ནི་ཤིང་ལྟར་རེངས་པའི་རླུང་ནད་ཅེས་བྱའོ། །རླུང་ནད་ཕྲག་པའི་རྩ་ལ་ཞུགས་པ་ནི་ཕྲག་པའི་རྩ་འཁུམས་ཏེ་ལག་ངར་མི་ཐེག་ཅིང་། འགུལ་བསྐྱོད་མི་ནུས་ཏེ། དེའི་མིང་ནི་དཔུང་པ་འཇས་པའི་རླུང་ནད་ཅེས་བྱའོ། །རླུང་
[147b.3]གིས་ལག་པའི་མཐིལ་ཕྱོགས་སོར་མོ་དང་འབྲེལ་པའི་ཆུ་བ་རྣམ་པར་འཁུམས་ཏེ། ན་བས་ཉམ་ཐག་ཅིང་ལག་པ་གཡོ་བ་ལ་སོགས་མི་ཤེས་པ་སྟེ། དེའི་མིང་ནི་རླུང་ནད་བི་ཤ་ཙེ་ཞེས་བྱའོ། །གང་གི་ཚེ་རླུང་རྐེད་པའི་གནས་སུ་བརྟེན་ཏེ་བརླའི་ཆུ་བའི་ནང་དུ་ཞུགས་ནས་འཐེང་བར་
[147b.4]འགྱུར་བ་དེ་ནི་རླུང་ནད་འཐེང་པོ་ཞེས་བྱའོ། །དེ་ལྟར་རླུང་དེ་བརླའི་ཆུ་བ་གཉིས་ཀ་ལ་ཞུགས་པ་ནི་འཕྱེ་བར་འགྱུར་ཏེ། དེའི་མིང་ནི་རླུང་ནད་འཕྱེ་བོ་ཞེས་བྱའོ། །ཡང་རླུང་ནད་འགྲོ་བར་རྩོམ་པ་ན་མི་བརྟེན་ཞིང་འདར་བ་དང་། འཐེང་བ་ལྟར་འགྲོ་བ་དེ་ནི་ཚིགས་ཀྱི་འབྱོར་མཚམས་
[147b.5]དབྱེ་བ་ཡིན་ཏེ། དེ་ནི་སྲན་མ་ལྟར་འཐེང་བ་ཞེས་བྱ་བའི་རླུང་ནད་ཅེས་བྱའོ། །ཅུང་ཟད་མ་ཞུ་བ་དང་ཅུང་ཟད་ཞུ་བའི་སྟེང་དུ་ཟས་ཟོས་པ་དང་། དྲོ་གྲང་འདྲེས་པར་ཟོས་པ་དང་། སྐམ་པ་དང་རློན་པ་འདྲེས་མར་བསྟེན་པ་དང་། དེ་བཞིན་དུ་ཁ་ཟས་ལྕི་བ་དང་། སྣུམ་ཆེས་པ་
[147b.6]བསྟེན་པ་དང་། འདུག་གནས་མི་བདེ་བ་ལ་འདུག་པ་དང་། མི་ནུས་བཞིན་དུ་ལས་རྩོམ་པ་དང་། ཉིན་པར་ཉལ་བ་དང་། མཚན་མོ་གཉིད་མི་ལོག་པ་དང་། རྒྱུ་དེ་དག་གིས་བད་ཀན་དང་ཚིལ་གཉིས། རླུང་དང་། མཁྲིས་པ་གང་ཡང་རུང་བ་དང་། བཅས་པར་འཁྲུགས་
[147b.7]ནས་མ་ཞུ་བ་ཚབས་ཆེར་སོགས་ཏེ། དེས་ལུས་ཉམ་ཐག་ཅིང་བད་ཀན་ཚོར་བ་མེད་པའི་བརླའི་རུས་པའི་ནང་དུ་ཞུགས་ནས་བརླ་རེངས་ཤིང་འདེགས་མི་ནུས་ལ་གྲང་བ་དང་། ཚོར་བ་མེད་པ་དང་། གཞན་གྱི་བརླ་སྙམ་སེམས་པ་དང་། ལྕི་བ་དང་། མི་བཟད་པར་ན་བ་དང་། འགྲོ་
[148a]
[148a.1]མི་ནུས་པ་དང་། ཡན་ལག་བརྡུངས་པ་སྙམ་སེམས་པ་དང་། བདོ་བག་ཏུ་འདུག་པ་དང་། སྙོམ་བག་ཏུ་སྐྱུགས་བྲོ་བ་དང་། ཡི་ག་འཆུས་པ་དང་། རིམས་ཀྱིས་འདེབས་པ་དང་། རྐང་པ་སྒྱིད་ཞན་ཅིང་ཞིག་པ་སྙམ་སེམས་པ་དང་། རྐང་པ་འདེགས་
[148a.2]པ་དཀའ་བ་དང་། ཚོར་བ་མེད་ཅིང་བེམ་བེམ་པོར་འདུག་པ་དང་། མཚན་མ་དེ་དག་དང་ལྡན་པའི་རླུང་ནད་ནི་བརླ་རེངས་པ་ཞེས་བྱའོ་ཞེས་བཤད་དོ། །སྨན་པའི་སློབ་དཔོན་གཞན་དག་ན་རེ་ཕྱུག་པོའི་རླུང་ནད་ཅེས་བྱའོ་ཞེས་ཟེར་རོ། །པུས་མོའི་དབུས་སུ་རླུང་དང་ཁྲག་འདྲེས་ཏེ་ཞུགས་
[148a.3]ནས་པུས་མོའི་སྟེང་དུ་སྐྲངས་ཏེ་ཟུག་གཟེར་ཆེ་བ་ཅེ་སྤྱང་གི་མགོ་ལྟར་སྦོམ་པར་གྱུར་པ་ནི་རླུང་ནད་ཅེ་སྤྱང་གི་མགོ་ལྟ་བུ་ཞེས་བྱའོ། །རྐང་པ་བབ་ཅོལ་དུ་བོར་བའམ། ཡང་ན་ཆད་ཅིང་ངལ་བ་ལས་རླུང་སྐྱེས་ཏེ་རབ་ཏུ་ཟུག་ཅིང་ན་ལ་ལོང་མོ་ལ་བརྟེན་པ་ནི་རླུང་ནད་ཚེར་མ་ལྟ་བུ་ཞེས་བྱའོ། །རྐང་
[148a.4]པའི་རྟིང་པ་དང་སོར་མོར་འབྲེལ་པའི་ཆུ་བ་ལ་རླུང་གིས་གནོད་ཅིང་ཉམ་ཐག་པར་བྱས་ཏེ་བརླ་ནས་ཡར་འཇུག་ཅིང་འགྲོ་བ་དེ་ནི་རླུང་ནད་གྲི་ཏྲ་སི་ཞེས་བྱའོ། །ཞེས་བཤད་དོ། །གོང་དུ་སྨོས་པའི་རླུང་ནད་བི་ཤ་ཙེ་ཞེས་བྱ་བ་ལག་དར་གྱི་ནད་དང་། གྲི་ཏྲ་སི་ཞེས་བྱ་བའི་བརླའི་ནད་དེ་གཉིས་
[148a.5]ཀ་ཡང་ཟུག་གཟེར་ཤིན་ཏུ་དྲག་པ་ཡིན་ཏེ་དེ་གཉིས་ཀྱི་མིང་ནི་རླུང་ནད་ཁ་ལི་ཏི་ཞེས་བྱའོ། །རྐང་པ་གཉིས་བརྩེ་སྟེ་ཚོར་བ་བེམ་བེམ་པོར་གྱུར་པ་ནི། བད་ཀན་དང་རླུང་འཁྲུགས་པ་ཡིན་ཏེ། དེ་ནི་རྐང་པ་བརྩེ་བའི་རླུང་ནད་ཅེས་བྱའོ། །གང་གི་ཁྲག་དང་མཁྲིས་པ་དང་རླུང་འཁྲུགས་པས་
[148a.6]རྐང་པ་ཚ་འུར་འུར་པོར་འདུག་པ་དང་། འཆག་པ་དང་འགྲོ་བའི་དུས་སུ་ཆེར་ཚ་བ་དེ་ནི་རླུང་ནད་རྐང་པ་ཚ་བ་ཞེས་བྱའོ། །རླུང་གི་ནད་གཞི་བཤད་པའི་ལེའུ་སྟེ་བཅོ་ལྔ་པ་རྫོགས་སོ།། །།དེ་ནས་དྲེག་ནད་ཀྱི་ནད་གཞི་བཤད་པའི་ལེའུ་བརྗོད་པར་བྱ་སྟེ། དེ་ལ་
[148a.7]ཁྲག་འཁྲུགས་པར་བྱེད་ཅིང་ཚ་བ་སྐྱེད་པའི་ཟས་དང་། སྲོག་ཆགས་ཆུ་ན་སྤྱོད་པའི་ཤ་དང་། རྒྱ་སྲན་དང་། མོན་སྲན་སྡེའུ་དང་། འབྲས་ནིས་པ་དང་། སྐྱུར་དང་། ཆང་དང་། དར་བ་སྐྱུར་པོ་དང་། ཞོ་སྐྱུར་པོ་ལ་སོགས་པ་བསྟེན་པ་དང་། གང་ཡང་མི་མཐུན་པའི་
[148b]
[148b.1]རྫས་ཡུལ་སེར་ཆེ་བ་ནས་བྱུང་བའི་ཤ་དང་། མོན་སྲན་གྲེའུ་དང་། སྦྲང་རྩི་ལྷན་ཅིག་ཟོས་པ་དང་། འོ་མ་དང་འབྲུའི་མྱུ་གུ་ལྷན་ཅིག་ཟོས་པ་དང་། སྦྱོར་བ་དེ་དག་ལོག་པར་བསྟེན་པ་དང་། འདི་བཞིན་ཉིན་པར་གཉིད་ལོག་པ་དང་། མཚན་མོ་གཉིད་མི་ལོག་བ་དང་། ཉལ་པོ་དྲགས་
[148b.2]པ་དང་། སྐྱིད་དེ་བ་འགྲོ་བ་ལ་སོགས་དྲག་ཤུལ་མ་མྱོང་བ་དང་། ལུས་སྣད་པ་དང་ལུས་མ་དག་པ་དག །སྐྱོན་དེ་རྣམས་ཀྱིས་མི་དག་གི་ཁྲག་འཁྲུགས་པ་དང་། གཞན་ཡང་རླུང་སྐྱེ་བའི་ཟས་བསྟེན་པས་རླུང་ལམ་གཞན་དུ་སོང་སྟེ་ཁྲག་དང་རླུང་གཉིས་གཅིག་ལ་གཅིག་གནོད་པར་
[148b.3]བྱེད་ཅིང་མི་བདེ་བ་སྐྱེད་པ་ཡིན་ཏེ། དེའི་མིང་ནི་ཕྱུག་པོའི་ནད་ཅེས་ཀྱང་བྱ། འཐེང་བའི་ནད་ཅེས་ཀྱང་བྱ། བ་ས་ལ་ཞེས་ཀྱང་བྱ། རླུང་དང་ཁྲག་འདྲེས་པའི་དྲེག་ནད་ཅེས་ཀྱང་བྱ་སྟེ། དེ་དག་ནི་མིང་གི་རྣམ་གྲངས་སོ། །ནད་དེ་ཡང་ཐོག་མར་རྐང་པ་གཉིས་སུ་རྒྱུག་སྟེ། ཁྱད་པར་དུ་
[148b.4]རྟ་ལ་སོགས་པ་ལ་ཞོན་པའི་རྐང་པ་འཕྱང་བ་ལ་སོགས་པའི་བདག་ཉིད་ཅན་ཡིན་ནོ། །དེ་ལ་དྲེག་ནད་ཐོག་མར་འབྱུང་བའི་ཚུལ་ནི་ཤིན་ཏུ་རྩུབ་པ་དང་། ཡང་ན་ཤིན་ཏུ་འཇམ་པ་དང་། རབ་ཏུ་རྔུལ་བའམ། ཡང་ན་ལུས་ཀྱི་མདོག་འགྱུར་བ་ལ་སོགས་པ་མཛེའི་ནད་ཐོག་
[148b.5]མ་འབྱུང་བའི་ཚུལ་དང་འདྲ་བར་འབྱུང་ངོ་། །དེ་བཞིན་དུ་ལུས་ཤིན་ཏུ་མ་རུངས་པ་དང་། ཡན་ལག་ལྷོད་པ་དང་། པུས་མོ་དང་བྱིན་པ་དང་བརླ་དང་། རྐེད་པ་དང་། ཕྲག་གོང་དང་། ལག་པ་དང་། རྐང་པ་ལ་སོགས་པའི་ཚིགས་རྣམས་སུ་གཡའ་བ་དང་།
[148b.6]འགུལ་བ་དང་། ན་བ་དང་། ཆག་པ་སྙམ་བྱེད་པ་དང་། ལུས་ལྕི་བ་དང་། ཚོར་བ་ཆུང་བ་དང་། ནད་ཡང་དང་ཡང་ལྡང་དུབ་བྱེད་པ་རྣམས་ཡིན་ནོ། །དྲེག་དེ་རྣམས་རྐང་པ་གཉིས་ལ་གནས་པའམ། ཡང་ན་ལག་པ་གཉིས་ལ་གནས་པ་ཡང་ཡོད་དེ། དེ་གཉིས་
[148b.7]གང་ཡང་རུང་བ་ལས་ལུས་ཐམས་ཅད་དུ་ཁྱབ་པར་འགྲོ་སྟེ། ཅི་ལྟར་བྱི་བ་ཁྲོས་པའི་མཆེ་བའི་དུག་གིས་ལུས་ཐམས་ཅད་དུ་ཁྱབ་པར་འགྲོ་བ་བཞིན་ནོ། །དེ་ཡང་དང་པོ་ཤ་དང་པགས་པའི་ཕྱི་རིམ་ཐམས་ཅད་དུ་ཁྱབ་པར་འགྲོ་སྟེ། དེའི་མིང་ནི་རྟོགས་པར་སླ་ཞེས་བྱའོ། །དེ་ནས་
[149a]
[149a.1]རིམ་གྱིས་ཐ་མར་ལུས་ཟུངས་ཐམས་ཅད་དུ་ཡང་ཁྱབ་པར་འགྲོ་སྟེ། དེ་ནི་རྟོགས་པར་དཀའ་བའི་དྲེག་ནད་ཅེས་བྱའོ། །དེ་ལ་རྟོགས་སླ་བའི་དྲེག་ནད་ནི་གོང་གི་གཡའ་བ་ལ་སོགས་པའི་མཚན་མ་དང་ལྡན་པ་དང་། གཞན་ཡང་པགས་པ་བྱེར་བ་དང་། མདོག་
[149a.2]སྨུག་ནག་ཏུ་འཇུག་པ་དང་། དམར་བ་དང་། བྱ་རྨྱང་དང་བཅས་པ་དང་། རབ་ཏུ་ཚ་བ་འུར་འུར་པོར་འདུག་པ་དང་དྲོ་བ་རྣམས་ཡིན་ནོ། །དེ་ལ་རྟོགས་པར་དཀའ་བའི་དྲེག་ནད་ནི་གོང་མ་པས་ཤས་ཆེར་ན་ཞིང་ཟུག་པ་དང་། སྐྲང་བ་དང་། མཁྲང་བ་དང་། ཚོས་པ་སྙམ་བྱེད་པ་
[149a.3]དང་། རླུང་ཚིགས་དང་། རུས་པ་དང་རྐང་གི་ནང་དུ་ཞུགས་ཏེ། བཅད་པ་སྙམ་སེམས་ཤིང་ནང་དུ་རྒྱུ་ཞིང་ནད་ཀྱི་ཤུགས་དྲག་པའི་ཚེ་ལུས་སྒུར་བ་དང་། ཞ་བ་དང་འཐེང་བར་བྱེད། ལུས་ཐབས་སུ་རྒྱུ་བ་ཡིན་ནོ། །དེ་ལ་རླུང་ཤས་ཆེ་བའི་དྲེག་ནད་ནི་ཟུག་གཟེར་བ་དང་། པར་
[149a.4]པར་བྱེད་པ་དང་། ན་བ་དང་། ལུས་སྐྲང་ཞིང་རྩུབ་པ་དང་། མདོག་གནག་པ་དང་། སྔོ་བསངས་སུ་འདུག་པ་དང་། ཡང་དང་ཡང་ན་ཞིང་ཞི་བར་བྱེད་པ་དང་། རྩ་ཆེན་པོ་དང་ཚིགས་དང་སོར་མོ་རྣམས་འཁུམས་པ་དང་། ལུས་བཅིངས་པ་སྙམ་བྱེད་ཅིང་ཤིན་ཏུ་ན་བ་དང་།
[149a.5]གྲང་བ་ལ་ཞེ་སྡང་བ་དང་། ལུས་ལ་གྲང་བས་རེག་ན་བདེ་བ་དང་། རེངས་པ་དང་། ལུས་ལ་ཚོར་བ་མེད་ཅིང་བེམ་བེམ་པོར་འདུག་པ་རྣམས་ཡིན་ནོ། །ཁྲག་གི་ཤས་ཆེ་བའི་དྲེག་ནད་ནི་རབ་ཏུ་སྐྲང་བ་དང་། ཟུག་ཅིང་ན་བ་དང་། ཟངས་མའི་མདོག་འདྲ་བ་དང་། ལུས་བེམ་བེམ་
[149a.6]པོར་ཡུངས་ཀར་གྱི་འདག་གུས་བསྐུས་པ་བཞིན་ཆ་ཙེག་ཙེག་སེམས་པ་དང་། སྣུམ་པ་དང་། རྩུབ་པས་ཞི་བར་མི་འགྱུར་བ་དང་། གཡའ་བ་དང་རུལ་བ་དང་ལྡན་པ་ཡིན་ནོ། །མཁྲིས་པ་ཤས་ཆེ་བའི་དྲེག་ནད་ལ་ནི་ཚ་བ་འུར་འུར་པོར་འདུག་པ་དང་། རྨོངས་བག་ཏུ་འདུག་པ་
[149a.7]པ་དང་། རྔུལ་ཆེ་བ་དང་། བརྒྱལ་བ་དང་། མྱོས་པ་དང་། སྐོམ་དད་ཆེ་བ་དང་། རེག་མི་བཟོད་པ་དང་། ན་བ་དང་། མདོག་དམར་བ་དང་། སྐྲང་བ་དང་། ཚོས་པ་དང་། རབ་ཏུ་དྲོ་བ་རྣམས་ཡིན་ནོ། །བད་ཀན་ཤས་ཆེ་བའི་དྲེག་ནད་ནི་ལུས་འགུལ་མི་ཤེས་པ་དང་། ལུས་
[149b]
[149b.1]ལྕི་བ་དང་། ཚོར་བ་མེད་ཅིང་བེམ་བེམ་པོར་འདུག་པ་དང་། མདོག་སྣུམ་པ་དང་། ལུས་གྲང་བ་དང་། གཡའ་བ་དང་ཅུང་ཟད་ན་བ་རྣམས་ཡིན་ནོ། །དྲེག་ནད་ཉེས་པ་འདྲེས་པའི་ལས་གཉིས་ལྡན་པའམ། གསུམ་འདུས་པའི་མཚན་མ་ཡང་ཅི་རིགས་པར་ཤེས་པར་བྱའོ། །དེ་ལས་ནད་གཅིག་ཤས་ཆེ་བའམ་གསར་དུ་བྱུང་
[149b.2]བ་ནི་གསོར་རུང་ངོ་། །ནད་གཞི་གཉིས་དང་ལྡན་པ་ནི་མི་ལ་ཙམ་དུ་གསོར་ནུས་སོ། །ནད་གཞི་གསུམ་གྱི་དྲེག་ནད་ཆུ་སེར་འཛག་པ་དང་། རེངས་པ་དང་ཐོར་བུ་འཕྱང་བ་དེ་ནི་སྤང་བར་བྱའོ། །རྐང་ལག་གི་ཚིགས་རྣམས་སུ་ཁྲག་རྒྱུ་བའི་རྩ་རླུང་གིས་བཀག་ན་རླུང་དང་ཁྲག་ཕན་ཚུན་ཕྲད་ནས་ཟུག་གཟེར་ཤིན་ཏུ་ཆེ་བ་ཡིན་
[149b.3]ཏེ། དེ་ནི་མྱུར་དུ་སྲོག་འདོར་བའི་བདག་ཉིད་ཅན་ཡིན་ནོ། །དེ་ལ་རླུང་གི་བདག་ཉིད་རྣམ་པ་ལྔ་ལས། སྲོག་ཅེས་བྱ་བའི་རླུང་ནི་ཁ་ཟས་རྩུབ་པ་དང་། རྩོལ་བ་དྲགས་པ་དང་། སྨྱུང་བར་འདུག་པ་དང་། ཁ་ཟས་དྲགས་པ་དང་། འགྲངས་ཆེས་པ་དང་། སྣང་བ་དང་། ལམ་གྱིས་དུག་པ་དང་ཤུགས་དྲག་ཏུ་སྨྲ་བ་དང་། འབྱུང་བའི་
[149b.4]ཤུགས་འགགས་པ་དང་། རྒྱུ་དེ་དག་གིས་རླུང་འཁྲུགས་ཏེ། མིག་ལ་སོགས་པ་དབང་པོ་རྣམས་ལ་གནོད་པར་བྱས་ཏེ། སྣ་ཆུ་འཛག་པ་དང་། ཉམ་ཐག་པར་ན་བ་དང་། སྐོམ་དད་ཆེ་བ་དང་། ལུད་པ་དང་། དབུགས་མི་བདེ་བ་ལ་སོགས་པ་རྣམས་བསྐྱེད་དོ། །དེ་ལ་སྟོད་དུ་རྒྱུ་བའི་རླུང་ཞེས་བྱ་བ་ནི་སྦྲིད་པ་དང་། །སྒྲེགས་པ་དང་། སྐྱུག་པ་
[149b.5]དང་། གཉིད་དང་དེ་རྣམས་དགག་པ་དང་། ཁུར་ལྕི་བ་ཁུར་བ་དང་། ངུ་དྲགས་པ་དང་། དགོད་དྲགས་པ་ལ་སོགས་པའི་རྒྱུས་རླུང་འཁྲུགས་ཏེ། མགུལ་པ་འགགས་པ་དང་། སེམས་ཉམས་པ་དང་། སྐྱུག་པ་དང་ཁ་ཟས་ཡི་གར་མི་འོང་བ་དང་། ཆམ་པས་བཏབ་པ་དང་། དེ་བཞིན་དུ་མགུལ་པའི་སྦ་བ་ལ་སོགས་པ་ནམ་
[149b.6]ཚོང་ཡན་ཆད་ཀྱི་ནད་དེ་དང་དེ་ལ་སོགས་པ་སྐྱེད་པར་བྱེད་དོ། །ཁྱབ་བྱེད་ཅེས་བྱ་བའི་རླུང་ནད་ནི་འགྲོ་དྲགས་པས་རང་གི་གནས་ཉམས་པ་དང་། རྩེད་མོ་ཤིན་ཏུ་དྲགས་པ་མི་བཟད་པ་བྱེད་པ་དང་། ཁ་ཟས་མི་མཐུན་པ་དང་། རྩུབ་པ་བསྟེན་པ་དང་། འཇིགས་པ་དང་། དགའ་ཆེས་པ་དང་། ཡི་བསད་པ་ལ་སོགས་པའི་རྒྱུས་ཁྱབ་བྱེད་ཀྱི་རླུང་
[149b.7]འཁྲུགས་ཏེ། རྒ་བ་དང་ཉམས་སྟོབས་འཇིག་པར་བྱེད་ཅིང་། ལུས་སྐྲང་བ་དང་། སེམས་གཡེངས་པ་དང་། རིམས་ཀྱིས་འདེབས་པ་དང་། ཡན་ལག་ཐམས་ཅད་ན་ཞིང་ཟུག་པ་དང་། སྤུ་ཟིང་ཞེས་བྱེད་པ་དང་། ལུས་ཚོར་བ་མེད་ཅིང་བེམ་བེམ་པོར་གྱུར་པ་དང་། མཛེ་ནད་དང་ཤུ་བ་མཆེད་པ་དང་། གཞན་ཡང་ལུས་ཐམས་
[150a]
[150a.1]ཅད་དུ་འགྲོ་བའི་ནད་སྐྱེད་པར་བྱེད་དོ། །དེ་ལ་མེ་དང་མཉམ་དུ་གནས་པ་ཞེས་བྱ་བའི་རླུང་ནི་ཟས་མ་སྙོམས་པ་དང་། སྔ་མ་མ་ཞུ་བར་ཟ་བ་དང་། ཟས་རྙིང་པ་ཟ་བ་དང་། དུས་མ་ཡིན་པར་གཉིད་ལོག་པ་དང་། མཚན་མོ་གཉིད་མ་ལོག་པ་དང་། རྒྱུ་དེ་དག་གིས་འཁྲུག་
[150a.2]པར་བྱེད་དེ། གཟེར་བ་དང་། སྐྲན་དང་། ཕོ་བའི་ནད་དང་། ཞུ་བ་དང་། མ་ཞུ་བའི་གནས་སུ་ནད་རྣམས་སྐྱེད་པར་བྱེད་དོ། །ཐུར་དུ་སེལ་བའི་རླུང་ཞེས་བྱ་བ་ནི་ཁ་ཟས་རྩུབ་པ་དང་། འཇུ་དཀའ་བ་ཟོས་པ་དང་། རྟ་ལ་སོགས་པ་བཞོན་པའི་སྟེང་ནས་ལྷུང་བ་དང་། བཞོན་པ་ལ་
[150a.3]རྟག་ཏུ་བརྟེན་པ་དང་། གནས་གཅིག་ཏུ་ཡུན་རིངས་བ་དང་། འགྲོ་བ་ལ་རྟག་པ་དང་། རྒྱུ་དེ་དག་གིས་ནད་འཁྲུགས་ཏེ། མ་ཞུ་བའི་གནས་ལ་བརྟེན་ནས་གཅིན་ནད་དང་། ཁུ་ཆུའི་ནད་དང་། གཞང་འབྲུམ་དང་། གཞང་ཕྱིར་བྱུང་བ་ལ་སོགས་པའི་ནད་གསོ་དཀའ་བ་མང་དུ་སྐྱེད་
[150a.4]དོ། །སྲོག་ཅེས་བྱ་བ་ལ་སོགས་པའི་རླུང་ལྔ་པོ་དེ་དག་གང་ཡང་རུང་བ་མ་ཞུ་བ་དང་། ལྷན་ཅིག་ལྡན་ན་ནི་ལུས་སྙོམ་པ་དང་། འགུལ་མི་ཤེས་པ་དང་། ཁོང་ལྕི་བ་དང་། སྣུམ་པ་དང་། ཁ་ཟས་ཡི་གར་མི་འོང་བ་དང་། སྒྱིད་ཞན་པ་དང་། གྲང་བ་དང་། སྐྲང་བ་དང་།
[150a.5]མེའི་དྲོད་ཉམས་པ་དང་། ཚ་བ་དང་རྩུབ་པ་ལ་མངོན་པ་ཆགས་པ་དང་། དེ་ཉིད་ཟོས་ན་བདེ་བ་དང་། རྟགས་འདི་དག་དང་ལྡན་པ་ཡིན་པར་ཤེས་པར་བྱའོ། །མ་ཞུ་བ་དང་མི་ལྡན་ན་ནི་རྟགས་དེ་དག་དང་ལྡན་པ་མ་ཡིན་པར་ཤེས་པར་བྱའོ། །རླུང་དེ་མཁྲིས་པ་ལ་སོགས་པ་ནད་གཞན་
[150a.6]དང་ལྡན་པ་ཡིན་ན་ཡང་དེའི་དབྱེ་བ་དམིགས་ཀྱིས་བཤད་པར་བྱ་སྟེ། དེ་ལ་རླུང་ནད་མཁྲིས་པ་དང་ལྡན་པའི་རྟགས་ནི་ལུས་ཚ་བ་འུར་འུར་པོར་འདུག་པ་དང་། སྐོམ་དད་ཆེ་བ་དང་། ཟུག་གཟེར་ཆེ་བ་དང་། མགོ་འཁོར་བ་དང་། མུན་འཐིབས་ཞེས་བྱེད་པ་དང་། ཁ་ཟས་ཚ་བ་དང་།
[150a.7]དྲོ་བ་དང་། སྐྱུར་བ་དང་། ལན་ཚྭ་རྣམས་ཟོས་ན་ལུས་ཚ་བ་སྐྱེད་པ་དང་། བསིལ་བ་འདོད་པ་རྣམས་ཡིན་ནོ། །རླུང་དང་བད་ཀན་དང་ལྡན་པའི་རྟགས་ནི་ལུས་བསིལ་བ་དང་། ཁོང་གྲང་བ་དང་། ཟུག་གཟེར་ཆེ་བ་དང་། ཁ་ཟས་ཚ་བ་དང་། དྲོ་བ་ཟོས་ན་ལྷག་པར་བདེ་བ་
[150b]
[150b.1]དང་། སྨྱུང་བ་དང་། རྩོལ་བ་དང་། ཁ་ཟས་རྩུབ་པ་དང་། དྲོ་བ་དང་འདི་རྣམས་འདོད་པ་ཡིན་ནོ། །རླུང་ཁྲག་དང་བཅས་པའི་རྟགས་ནི། ཤ་དང་པགས་པའི་ནང་དུ་ཚ་ཤས་ཆེ་ཞིང་ཟུག་པ་དང་། མདོག་དམར་པོར་སྐྲང་བ་དང་། ལུས་ལ་ཐིག་ལེ་
[150b.2]དམར་པོ་འབྱུང་པ་ཡིན་ནོ། །རླུང་ཤ་དང་ལྷན་ཅིག་འཁྲུགས་པ་ཡིན་ན་ནི་སྐྲང་ཞིང་མཁྲང་བ་དང་། མདོག་འགྱུར་བ་དང་། དེ་བཞིན་དུ་འབྲུམ་བུ་ཕྲ་མོ་འབྱུང་ཞིང་མཁྲང་ལ་མདོག་འགྱུར་བ་དང་། ལུས་བརྩེ་བ་དང་། ལུས་ལ་གྲོག་མ་རྒྱུ་བ་སྙམ་
[150b.3]བྱེད་པ་ཡིན་ནོ། །རླུང་དེ་ཚིལ་དང་ལྡན་པར་འཁྲུགས་པ་ཡིན་ན་ནི། ལུས་སྐྲང་ཞིང་མི་བརྟན་པ་དང་། སྣུམ་པ་དང་། རེག་ན་འཇམ་པ་དང་། གྲང་བ་དང་། ཟས་ཡི་གར་མི་འོང་བ་དེ་ནི་གསོ་དཀའ་བའི་ཕྱུག་པོའི་ནད་ཅེས་བྱའོ། །དེ་ལ་རླུང་
[150b.4]རུས་པ་དང་ལྡན་པར་འཁྲུགས་ན་ནི། རེག་ན་ཤིན་ཏུ་ཚ་བ་དང་། བཙིར་ན་མངོན་པར་དགའ་བ་དང་། ཁབ་ཀྱིས་གཙགས་པ་སྙམ་བྱེད་པ་དང་། ཡན་ལག་རྣམས་ན་ཞིང་ཟུག་པ་ཡིན་ནོ། །རླུང་ནད་རྐང་དང་ལྷན་ཅིག་འཁྲུགས་པ་ནི་ལུས་སྒུ་བ་དང་།
[150b.5]ཡང་ནས་ཡང་དུ་གླལ་འབྱུང་བ་དང་། ལུས་གཅུས་པ་སྙམ་བྱེད་པ་དང་། ལུས་རབ་ཏུ་ན་བ་དང་། ལག་པ་གཉིས་ཀྱིས་བཙིར་ཞིང་མཉེས་ན་བདེ་བར་འགྱུར་བ་ཡིན་ནོ། །རླུང་ཁུ་བ་དང་ལྷན་ཅིག་འཁྲུགས་པ་ཡིན་ན་ནི། ཁུ་བ་ཤུགས་དྲག་ཏུ་
[150b.6]འབྱུང་བ་དང་། ཡང་ན་ས་བོན་གྱི་བྱ་བ་བྱེད་མི་ནུས་པ་ཡིན་ནོ། །རླུང་ཟས་དང་ལྷན་ཅིག་འདྲེས་ཏེ་འཁྲུགས་ན་ནི། ཟས་དེ་ཁོང་པར་ཇི་སྲིད་གནས་ཀྱི་བར་དུ་ནི་ན་ལ། དེ་ཞུ་བ་ཙམ་གྱི་ཚོད་ན་ནི་བདེ་བ་ཡིན་ནོ། །རླུང་དེ་གཅིན་དང་ལྷན་ཅིག་འཁྲུགས་
[150b.7]པར་གྱུར་པ་ཡིན་ན་ནི། གཅིན་སྲི་ཞིང་འགགས་ལ་ཆུ་སོར་རླུང་གིས་གང་བ་ཡིན་ནོ། །ཕྱི་ས་སྟེ་བཤང་བ་དང་ལྡན་ཏེ་འཁྲུགས་པ་ཡིན་ན་ནི། ཕྱི་ས་ཐུར་དུ་འབྱུང་བ་འགགས་ལ་རང་གི་གནས་སུ་ཐོགས་ཏེ་འབྱུང་དུ་མི་རུང་བ་དང་། སྣུམ་
[151a]
[151a.1]བག་ཟོས་ན་མྱུར་དུ་འབྱུང་ལ་ཁོང་སྦོ་བར་ཡང་འགྱུར་ལ། ཟས་དེ་ཁོང་དུ་ཕུལ་ཏེ་འབྱུང་བ་ཡང་ཤིན་ཏུ་དཀའ་བས་ཐོགས་ཏེ་འབྱུང་བ་ཡིན་ནོ། །རླུང་དེ་ལུས་ཟུངས་ཐམས་ཅད་དང་ལྷན་ཅིག་འཁྲུགས་པ་ཡིན་ན་ནི་བརླ་དང་ཆུ་སོའི་བར་དང་། རྒྱབ་ཀྱི་སྒལ་
[151a.2]ཚིགས་ན་བ་དང་། རླུང་ལུགས་སུ་མི་འབྱུང་སྟེ། ལོག་པར་སོང་བ་དང་། སྙིང་མི་བདེ་ཞིང་རབ་ཏུ་ན་བ་རྣམས་ཡིན་ནོ། །སྲོག་ཅེས་བྱ་བའི་རླུང་དེ་མཁྲིས་པ་དང་ལྷན་ཅིག་འཁྲུགས་པ་ཡིན་ན་ནི་མགོ་འཁོར་བ་དང་། བརྒྱལ་བ་དང་། ཟུག་པ་དང་། ཆ་འུར་འུར་པོར་འདུག་པ་དང་།
[151a.3]ཟས་ཕྱེད་ཙམ་ཞུ་སྟེ་སྐྱུར་པོར་འགྱུར་ཙམ་ན་སློན་པ་ཡིན་ནོ། །སྟོད་དུ་རྒྱུ་བའི་རླུང་མཁྲིས་པ་དང་འདྲེས་ཏེ་འཁྲུགས་ན་ནི་མགོ་འཁོར་བ་ལ་སོགས་པ་གོང་མའི་མཚན་ཉིད་དང་ལྡན་པའི་སྟེང་དུ་ཁོང་ཚ་བ་འུར་འུར་པོར་འདུག་ཅིང་ཉམས་སྟོབས་ཟད་པ་ཡིན་ནོ། །ཁྱབ་བྱེད་ཀྱི་རླུང་མཁྲིས་པ་དང་
[151a.4]འདྲེས་ཏེ་འཁྲུགས་པ་ཡིན་ན་ནི་ལུས་ཐམས་ཅད་ཚ་བ་དང་། ངལ་བ་དང་ལུས་ཀྱི་སྤྱོད་པ་མི་ནུས་ཤིང་ལྡོག་པ་དང་། ལུས་ཚ་ཞིང་ནད་དང་བཅས་པ་ཡིན་ནོ། །མེ་དང་མཉམ་དུ་གནས་པའི་རླུང་དང་མཁྲིས་པ་དང་ལྷན་ཅིག་འཁྲུགས་པ་ཡིན་ན་ནི། ཁོང་པའི་མེ་དྲོད་ཉམས་པར་བྱེད་ཅིང་
[151a.5]ལྷག་པར་ཆེ་བ་དང་། སྙིང་མི་དགའ་བ་དང་། སྐོམ་དད་ཆེ་ཞིང་ཚ་བ་དང་བཅས་པ་ཡིན་ནོ། །ཐུར་དུ་སེལ་བའི་རླུང་མཁྲིས་པ་དང་ལྷན་ཅིག་འཁྲུགས་ན་ནི་ཕྱི་སའི་མདོག་སེར་པོར་འབྱུང་ཞིང་། ཟླ་མཚན་ཤས་ཆེར་འཛག་པ་དང་། བུད་མེད་ཀྱི་མོ་མཚན་དང་ཕོ་མཚན་དང་། རྐུབ་རྣམས་
[151a.6]སུ་ཚ་བ་ཆེ་བ་དེ་རྣམས་ཡིན་ནོ། །སྲོག་ཅེས་བྱ་བའི་རླུང་བད་ཀན་དང་ལྷན་ཅིག་འཁྲུགས་ན་ནི་ལུས་ལ་གནོད་པའི་སྙོམ་པ་དང་། ཁ་ཟས་ཡི་གར་མི་འོང་བ་དང་། སྐྱུག་བྲོ་བ་དང་མཆིལ་མ་མང་བ་དང་། སྦྲིད་པ་དང་སྒྲེགས་པ་དང་། དབུགས་འབྱུང་རྔུབ་འགགས་པ་ཡིན་ནོ། །
[151a.7]སྟོད་དུ་རྒྱུ་བའི་རླུང་བད་ཀན་དང་ལྷན་ཅིག་འཁྲུགས་པ་ཡིན་ན་ནི་ལུས་ལྕི་བ་དང་། ཁ་ཟས་ཡི་གར་མི་འོང་བ་དང་། ཚིག་དང་སྒྲ་འཚུབས་ཤིང་འགགས་པ་དང་། ཉམས་སྟོབས་རྣམས་འཇོམས་པར་བྱེད་པ་ཡིན་ནོ། །ཁྱབ་བྱེད་ཀྱི་རླུང་བད་ཀན་དང་ལྷན་ཅིག་འཁྲུགས་པ་ཡིན་
[151b]
[151b.1]ན་ནི་རུས་པའི་ཚིགས་རྣམས་བརྐྱང་བསྐུམ་མི་ཤེས་པ་དང་། ཡན་ལག་ཐམས་ཅད་ལྕི་བ་དང་། འགྲོ་བ་མི་བརྟན་ཞིང་འཁྱོར་འགྲོ་བ་ཡིན་ནོ། །མེ་དང་མཉམ་དུ་གནས་པའི་རླུང་བད་ཀན་དང་ལྷན་ཅིག་འཁྲུགས་པ་ཡིན་ན་ནི་ལུས་ཀུན་གྲང་ཞིང་རྔུལ་མེད་ལ་མེ་དྲོད་ཆུང་བ་ཡིན་ནོ། །ཐུར་
[151b.2]དུ་སེལ་བའི་རླུང་བད་ཀན་དང་འདྲེས་པ་ཡིན་ན་ནི་བཤང་གཅི་མི་འབྱུང་ཞིང་འགགས་པ་ཡིན་ནོ། །དེ་ལྟར་རླུང་ནད་ཀྱི་དབྱེ་བ་གཞན་དང་འབྲེལ་བ་ཉི་ཤུ་རྩ་གཉིས་སུ་ཤེས་པར་བྱའོ། །དེ་ལ་སྲོག་ཅེས་བྱ་བའི་རླུང་ལ་སོགས་པ་ལྔ་པོ་གང་ཡང་རུང་བ་རླུང་ནད་ལྷག་མ་བཞི་ལ་ལྡན་པ་ཞེས་བྱ་སྟེ།
[151b.3]དེ་བཞིན་དུ་རེ་རེ་ལ་ཡང་རྣམ་པ་བཞི་བཞི་སྟེ་ཉི་ཤུར་འགྱུར་རོ། །དེ་ལ་སྲོག་ཅེས་བྱ་བའི་རླུང་བད་ཀན་དང་འགྱུར་བའི་རླུང་དང་ལྷན་ཅིག་འཁྲུགས་ན། དེའི་རྟགས་ནི་དབུགས་འབྱུང་རྔུབ་དཀའ་བ་དང་། ཆམ་པས་འདེབས་པ་དང་། མགོ་བསྒྱུར་དཀའ་བ་དང་། གློ་སྙིང་ན་བ་དང་། ཁའི་
[151b.4]ནང་སྐམ་པ་རྣམས་ཡིན་ནོ། །སྟོད་དུ་རྒྱུ་བའི་རླུང་སྲོག་ཅེས་བྱ་བའི་རླུང་དང་ལྷན་ཅིག་འཁྲུགས་ན་ནི་མདོག་དང་ཉམས་སྟོབས་ཟད་པར་བྱེད་དོ། །འདི་ལ་ཇི་ལྟར་སྦྱར་བ་བཞིན་དུ་རླུང་ནད་ལྷག་མ་རྣམས་ལ་ཡང་དེ་ལྟར་སྦྱར་བར་བྱའོ། །རླུང་རྣམ་པ་ལྔ་པོ་དེ་དག་གི་གནས་ནི་ནད་གཞི་གསུམ་
[151b.5]གང་དང་གང་ན་གནས་པ་དང་། ནད་དམིགས་ཅིར་འགྱུར་བའི་ལེའུ་ལ་བལྟ་བར་བྱའོ། །རླུང་ནད་དེ་དག་གི་ལས་དང་། ཤས་ཆེ་ཆུང་ཡང་དེ་ལ་ལྟོས་ཤིག །སྲོག་ཅེས་བྱ་བ་ལ་སོགས་པའི་རླུང་རྣམ་པ་ལྔ་དང་གང་ཡང་རུང་བ་ནང་འདྲེས་པའི་སྟེང་དུ་ནད་གཞན་གྱིས་འདྲེས་པའམ།
[151b.6]རླུང་ནད་ཉི་ཚེ་དང་ལྡན་པ་གང་ཡིན་པ་སྨན་པ་རྣམས་ཀྱིས་ལེགས་པར་རྟོགས་ཤིག །མཁྲིས་པ་དང་བད་ཀན་གཉིས་ལ་རླུང་རྣམ་པ་ལྔ་པོ་དང་། རེ་རེར་སྦྱར་བའི་རྣམ་པ་བཅུ་དང་། བད་ཀན་དང་མཁྲིས་པ་བཤང་གཅི་གཉིས་དང་ལྡན་པ་དང་བཅུ་གཉིས་པོ་དེ་དག་ཀྱང་བརྟག་གོ། །དེ་
[151b.7]ལས་བཟློག་པ་བཅུ་གཉིས་ཏེ་ཇི་རིགས་སུ་རྟོགས་པར་བྱའོ། །བད་ཀན་དང་མཁྲིས་པ་གཉིས་ཀྱི་རླུང་ནད་ལྔ་པོ་རེ་རེ་ལ་ཡང་འདྲེས་པར་རྟོགས་ཤིག །དེ་ལྟར་རླུང་རྣམ་པ་ལྔ་དང་མཁྲིས་པ་དང་བད་ཀན་ནད་ཕན་ཚུན་འདྲེས་པར་བྱས་ནས་ནི་དུ་མར་འགྱུར་ཏེ་དེ་དག་རེ་རེ་ལ་ཡང་དབྱེ་ན་
[152a]
[152a.1]རྩིས་ཀྱིས་མི་ལང་སྟེ་གྲངས་མེད་པར་འགྱུར་རོ། །དེ་བས་ན་འདྲེས་པའི་ནད་དེ་ནི་ཤིན་ཏུ་རྟོགས་པར་དཀའ་བ་ཡིན་པས་སྨན་པ་མཁས་པ་གཞན་གྱི་ནད་རིག་པ་དག་གིས་རང་རང་གི་ནད་གཞིའི་སྐྱེ་བ་དང་འབྲི་བའི་ཚུལ་བཟའ་བ་དང་། བཏུང་བ་དང་སྤྱོད་ལམ་ལ་སོགས་
[152a.2]པ་གང་གིས་སློང་བ་ཡང་དང་ཡང་དུ་བརྟག་ཅིང་ཤེས་པར་བྱའོ། །རླུང་ལྔ་པོ་དེ་དག་ལས་ཀྱང་ཁྱད་པར་དུ་སྲོག་ཅེས་བྱ་བའི་རླུང་དེ་ནི་སྐྱེ་དགུ་རྣམས་ཀྱི་འཚོ་བ་ཡིན་ལ་སྟོད་དུ་རྒྱུ་བའི་རླུང་ནི་ཉམས་སྟོབས་ཡིན་པར་བརྗོད་དོ། །རླུང་གཉིས་པོ་དེ་དག་ཉམས་ཤིང་གནོད་པར་གྱུར་ན་ནི་ཚེ་དང་སྟོབས་
[152a.3]ཀྱང་ཟད་པར་འགྱུར་རོ། །རླུང་རྣམ་པ་ལྔ་པོ་དེ་དག་གཅིག་ལ་གཅིག་འདྲེས་ཏེ་ལྡན་པའམ་ཡང་ན་མཁྲིས་པ་ལ་སོགས་པ་ནད་གཞན་དུ་མ་དང་འདྲེས་ཤིང་ལྡན་པ་ཡང་རུང་སྟེ། ནད་ཀྱི་མཚན་ཉིད་ཤེས་པ་ཡིན་ན་ནི་ལོ་གཅིག་མ་ལོན་ཀྱང་རུང་སྟེ། དེ་ཡང་ཤིན་ཏུ་གསོ་དཀའོ། །ནད་ཀྱི་མཚན་ཉིད་
[152a.4]མ་ཤེས་ཏེ་ལོ་གཅིག་འདས་པ་ཕན་ཆད་ནི་གསོ་དཀའ་བ་མེད་དོ། །དེ་ལྟར་འདྲེས་པའི་ནད་དེ་དག་གསོ་བ་མ་བྱས་ཏེ་ཡལ་བར་བོར་ན་ཁོང་འབྲས་དང་། ནད་གཞི་མཆེར་པའི་ནད་དང་། སྙིང་ནད་དང་། སྐྲན་དང་། མེ་དྲོད་ཉམས་པ་ལ་སོགས་པ་བླ་བརྣན་འབྱུང་བར་འགྱུར་རོ། །དྲེག་ནད་
[152a.5]ཀྱི་ནད་གཞི་བཤད་པའི་ལེའུ་སྟེ་བཅུ་དྲུག་པ་རྫོགས་སོ།། །།སྨན་པའི་བདག་པོ་སེང་གེ་སྦས་པའི་བུ་སྨན་པ་ཆེན་པོ་ཕ་ཁོལ་ཞེས་བྱ་བས། ཡན་ལག་བརྒྱད་པའི་སྙིང་པོ་མཛད་པ་ལས་ནད་གཞིའི་གནས་ཞེས་བྱ་བ་བཅུ་དྲུག་པ་རྫོགས་ཏེ། ཡན་ལག་བརྒྱད་པའི་སྙིང་པོའི་
[152a.6]གནས་གསུམ་པའོ།། །།སྨན་དཔྱད་ཡན་ལག་བརྒྱད་པའི་སྙིང་པོ་ལས་གསོ་བའི་དཔྱད་ཉི་ཤུ་རྩ་གཉིས་ཞེས་བྱ་བ། རིམས་ནད་གསོ་བའི་ལེའུ་དང་པོ་བཤད་པར་བྱ་སྟེ། དེ་ཡང་དྲང་སྲོང་ཆེན་པོ་རྒྱུན་ཤེས་ཀྱི་བུ་ལ་སོགས་པས་བཤད་པ་ན་རེ་རིམས་ནི་ཁ་ཟས་མ་ཞུ་བའི་གནས་སུ་
[152a.7]ཞུགས་ནས་རླུང་ལ་སོགས་པ་དང་ལྷན་ཅིག་གནས་ཏེ། མེ་དྲོད་ཉམས་པར་བྱས་ནས་ནང་གི་རྩའི་ལམ་བཀག་སྟེ། རིམས་ནད་སྐྱེད་པ་ཡིན་ནོ། །དེ་ལ་ཐོག་མར་རིམས་མ་སྨིན་པ་ལ་ནི་སྨྱུང་བ་བྱས་ལ། ཉམས་སྟོབས་བསྲུང་བ་ལ་འབད་དོ། །ཉམས་སྟོབས་དང་ལྡན་ན་ནི་ནད་མེད་པ་
[152b]
[152b.1]ཡིན་པས་ཐོག་མར་གསོ་བའི་ཆོ་ག་འདི་དག་བྱའོ། །དང་པོ་སྨྱུང་བ་བྱས་པས་ནི་ཉེས་པ་རྣམས་ཟད་པར་བྱེད་དེ། མེ་དྲོད་སྐྱེད་ཅིང་ལུས་ཡང་ལ་ནད་མེད་པ་དང་། བཀྲེས་པ་དང་། སྐོམ་པ་དང་། ཟས་ཡི་གར་འོང་ཞིང་ཁ་ཟས་འཇུ་ལ་ཉམས་སྟོབས་དང་གཟི་མདངས་རྣམས་སྐྱེ་བར་འགྱུར་
[152b.2]རོ། །དེ་ལ་བད་ཀན་ཚབས་ཆེ་སྟེ། རང་གི་གནས་ལས་ལུད་ནས་བད་ཀན་ཕྱི་རོལ་ཏུ་འབྱུང་ཞིང་དེ་ཡང་གཉིད་ནད་དང་། ཆམ་པ་དང་ཡི་ག་འཆུས་པ་དང་། ལུད་པ་དང་། གསུད་པ་དང་། ལྷན་ཅིག་འབྱུང་ཞིང་ཟས་ཟོས་མ་ཐག་ལྡང་བའི་རིམས་ནད་མ་ཞུ་བ་དང་བཅས་པ་དེ་ལ་ནི་སྐྱུག་སྨན་
[152b.3]གཏང་བར་འོས་ཏེ་སློན་བྱའོ། །རིམས་ནད་གཞན་ལ་སྐྱུག་སྨན་བཏང་ན་ནི་དབུགས་མི་བདེ་བ་དང་། འཁྲུ་བ་དང་། རྨོངས་པ་དང་། སྙིང་ནད་དང་། རིམས་མི་ཟད་པ་རྣམས་ཀྱིས་འདེབས་སོ། །པོ་སོན་ཆ་དང་། དུག་མོ་ཡུངས་དང་། ཤིང་མངར་གང་ཡང་རུང་བ།
[152b.4]པི་པི་ལིང་དང་ལྷན་ཅིག་གམ། ཡང་ན་ཆུ་དྲོན་པོ་དང་སྦྲང་རྩི་ལན་ཚྭ་དང་བཅས་པ་བླུད་ལ་སྐྱུག་ཏུ་གཞུག་གོ། །ཡང་ན་པ་ཏོ་ལ་དང་། ནིམ་པ་དང་། ག་གོན་དང་། སྦ་དང་། འདི་རྣམས་ཀྱི་ལོ་མ་གང་ཡང་རུང་བ་བསྐོལ་བའི་ཁུ་བ་དང་། འབྲས་ཡོས་ཀྱི་སྐྱོ་མ་དང་། བུ་རམ་ཤིང་གི་ཁུ་
[152b.5]བ་དང་། ཆང་དང་དེ་དག་གང་ཡང་རུང་བའི་ནང་དུ་པོ་སོན་ཆའི་ཕྱེ་མས་བཏབ་པ་བླུད་དོ། །ཡང་ན་ཉམས་སྟོབས་དང་། དུས་ཀྱི་བྱེ་བྲག་ཤེས་པའི་སྨན་པས་ཆོ་ག་གྲུབ་པའི་ནང་དུ་བཤད་པའི་སྐྱུག་སྨན་གཏང་བར་བྱའོ། །གོང་མའི་སྐྱུག་སྨན་བྱས་ཀྱང་རུང་། མ་བྱས་ཀྱང་རུང་། རིམས་
[152b.6]ནད་ཅན་གྱི་སྐྱེས་བུ་ལ་ནི་ཉེས་པ་རྣམས་རང་གི་གནས་ལས་ཉམས་ཤིང་དྲོད་སྐྱེད་པས་ནད་སྨིན་པ་དང་ཞི་བར་བྱ་བའི་ཕྱིར་ཁྱད་པར་དུ་སྨྱུང་བ་བྱས་ན་ཕན་ནོ། །དཔེར་ན་ཕྱི་རོལ་གྱི་མེ་མདག་ལ་ཐལ་བས་གཡོགས་ན། ཁ་ཟས་ལ་སོགས་པ་འཚོར་མི་ནུས་པ་དང་འདྲ་བར། ཁོང་པའི་རླུང་ལ་སོགས་
[152b.7]པའི་ཉེས་པས་གཡོགས་ན་ཁ་ཟས་འཇུ་མི་ནུས་ཏེ། དེ་བས་ན་སློན་བྱས་པའི་འོག་ཏུ་སྨིན་པར་གྱུར་པའི་ཕྱིར་སྨྱུང་བ་ལ་སོགས་པ་བྱའོ། །བད་ཀན་དང་རླུང་ལས་གྱུར་པའི་རིམས་སྐོམ་དད་ཆེ་བ་ལ་ནི། ཆུ་དྲོན་པོ་ཉུང་ངུ་ཉུང་ངུ་བྱིན་ན་བད་ཀན་སྐམ་པོ་སླ་བར་བྱའོ། །སྐོམ་དད་མྱུར་དུ་
[153a]
[153a.1]འཇིལ་བར་བྱེད་ན་མེ་དྲོད་དང་རྩའི་རྒྱུན་སྲང་ཡང་འཇམ་ཞིང་དག་པ་དང་། མཁྲིས་པ་དང་། རླུང་དང་། རྔུལ་དང་། ཕྱི་ས་དང་། གཅིན་དང་། འདི་རྣམས་ཀྱང་ལེགས་པར་འབྱུང་བར་བྱེད་ལ་གཉིད་དང་། རྨོངས་བག་དང་། ཡི་ག་འཆུས་པ་རྣམས་འཕྲོག་
[153a.2]ཅིང་སྲོག་འཛིན་པར་བྱེད་དོ། །གལ་ཏེ་ཆུ་གྲང་འཐུངས་ན་ཕན་ཡོན་གོང་མ་ལོག་པར་འགྱུར་ཏེ། ནད་ཀྱི་ཚོགས་སྐྱེད་པར་བྱེད་དོ། །ཆུ་དྲོན་པོ་འཐུངས་ན་ཕན་ཡོན་གོང་མ་ལྟར་ཡོད་ན་ཡང་གཅིག་ཏུ་མཁྲིས་པ་ཅན་ལ་ནི་མ་ཡིན་ཏེ། དེ་ཡང་མཁྲིས་པ་ཤས་ཆེ་བ་དང་། མིག་ལ་སོགས་
[153a.3]པ་དབང་པོའི་ནད་དང་། ལུས་ཚ་བ་དང་། རྨོངས་བག་ཏུ་འདུག་པ་དང་། འཁྲུ་བ་དང་། དུག་དང་ཆང་ལས་གྱུར་པའི་རིམས་དང་། སོས་ཀ་ཚ་བའི་དུས་དང་། ལུས་ཟད་ཅིང་སྐེམ་པ་དང་། མཁྲིས་པ་དང་ཁྲག་ལ་ནི་ཆུ་དྲོན་པོ་མི་སྦྱར་རོ། །གླ་སྒང་དང་། ཙནྡན་དང་། བཅའ་སྒ་
[153a.4]དང་། པར་པ་ཏ་དང་། པུ་ཤེལ་ཙི་དང་། བ་ལེ་ཀ་དང་། འདི་རྣམས་གང་ཡང་རུང་བ་བསྐོལ་བའི་ཁུ་བ་མཁྲིས་པ་ལས་གྱུར་པའི་རིམས་ནད་ཀྱི་སྐོམ་དད་ཅན་ལ་སྦྱར་ན་ཁ་ཟས་འཇུ་བར་བྱེད་ཅིང་སྐོམ་དད་འཇོམས་སོ། །མཁྲིས་པ་མེད་ན་དྲོད་མེད། དྲོད་མེད་ན་རིམས་མེད་དེ། དེ་
[153a.5]བས་ན་མཁྲིས་པ་དང་མི་མཐུན་པའི་བཟའ་བ་དང་། སྤྱོད་ལམ་ཐམས་ཅད་ཤས་ཆེར་སྤང་བར་བྱའོ། །མདོར་ན་རིམས་ནད་ཐམས་ཅད་ལ་སྨྱུང་བ་མ་གཏོགས་པར་ལུས་ཀྱི་ཁྲུས་དང་། བསྐུ་བ་དང་བྱུག་པ་ལ་སོགས་པའི་བྱ་བ་ཐམས་ཅད་སྤང་ངོ་། །རིམས་མ་སྨིན་པ་མི་ཟད་པར་ན་བ་ལ་
[153a.6]ནི། སྨན་གྱི་ཁུ་བ་དང་འདག་གུ་ལ་སོགས་པ་མི་བླུད་དེ། ཅི་ལྟར་མ་ཞུ་བ་ལ་ཟུག་གཟེར་འཇོམས་པའི་སྨན་མི་བླུད་པ་དང་འདྲའོ། །གལ་ཏེ་བླུད་པར་གྱུར་ན་ནི་ཕྱིར་ཞིང་ནད་སྐྱེད་པར་བྱེད་དེ། སྦྲུལ་ལ་འོ་མ་བླུད་པ་བཞིན་ནོ། །བད་ཀན་དང་རླུང་ལས་གྱུར་པའི་རིམས་སྙོམ་པ་དང་།
[153a.7]སྣ་ཆུ་འཛག་པ་དང་། དབུགས་མི་བདེ་བ་དང་། རྗེ་ངར་དང་རུས་ཚིགས་སུ་ཟུག་ཅིང་ན་བ་ལ་ནི་དུགས་བྱ་བར་རབ་ཏུ་བསྔགས་ཏེ། རྔུལ་དང་། བཤང་གཅི་དང་། འཕྱེན་བདེ་བར་འབྱུང་སྟེ། མེའི་དྲོད་ཀྱང་སྐྱེད་པར་བྱེད་དོ། །སྣུམ་ཆོས་ཀྱི་ཆོ་གར་བཤད་པའི་ནང་དུ་ཆུ་དྲོན་ལས་
[153b]
[153b.1]བྱས་པའི་དུགས་ཐམས་ཅད་འདིར་སྤྱད་པར་བྱའོ། །རིམས་གསར་པ་ལ་ནི་ཐོག་མར་སྨྱུང་བ་དང་། དུགས་འབའ་ཞིག་བྱའོ། །དེ་ནས་ཞག་དྲུག་གི་བར་དུ་སྨིན་པར་བྱ་བའི་ཆོ་ག་ལ་སོགས་པ་ཐམས་ཅད་སྤང་ངོ་། །ཞག་བདུན་པ་ནས་ནི་མ་སྨིན་པ་སྨིན་པར་བྱ་བའི་ཕྱིར། ནས་
[153b.2]ཐུག་དང་ཏིག་ཏའི་ཁུ་བ་བླུད་དེ། གནས་སྐབས་ཇི་ལྟ་བ་བཞིན་དུ་གསོའོ། །རླུང་ཉི་ཚེའི་རིམས་དང་། ལུས་ཟད་པའམ། གློ་བུར་ལས་གྱུར་པའི་རིམས་དང་། རིམས་རྙིང་པ་རྣམས་ལ་སྨྱུང་བ་མི་བྱ་སྟེ། དེ་ལ་ནི་ཉམས་སྟོབས་སྐྱེད་པའི་ཆོ་ག་ཐམས་ཅད་སྦྱར་རོ། །དེ་ལ་ཐོག་མར་
[153b.3]རིམས་སྨིན་པ་དང་། མ་སྨིན་པའི་རང་བཞིན་ཤེས་པར་བྱ་སྟེ། དེ་ཡང་ཉམས་བརྟ་བ་དང་སྤང་བར་བྱ་བའི་ལེའུ་ལ་བལྟས་ནས་སྨྱུང་བ་བྱས་ལ་ལེགས་པར་འགྱུར་ན་ལུས་རྗུད་པར་སྣང་སྟེ་དེ་ལ་ཐུག་པ་རྐྱང་རྐྱང་པོ་ལ་སོགས་པ་ནད་གཞི་སོ་སོ་དང་མཐུན་པའི་སྨན་སྦྱར་ལ་རིམ་གྱིས་གཏང་ངོ་། །
[153b.4]དེ་ནས་ཐུག་པའི་ཁུ་བ་བླུད་པ་ནི་སྨན་པ་མཁས་པས་ཇི་སྲིད་དུ་རིམས་རྩེ་ཞིལ་ནས་སམ། ཞག་དྲུག་ལོན་པའི་འོག་ཏུ་བླུད་པར་བྱའོ། །ཐུག་པའི་རིམ་པ་དེ་ལྟར་བྱས་ན། ཕོ་བའི་མེ་དྲོད་སྐྱེད་པར་བྱེད་དོ། །ཇི་ལྟར་བུད་ཤིང་ལ་མེ་བཞིན་ནོ། །ཐུག་པའི་ཁུ་བ་དྲོ་བའི་ཕྱིར་རྔུལ་
[153b.5]འབྱིན་པར་བྱེད་དོ། །སྨན་དང་སྦྱར་བ་སྤང་བའི་ཕྱིར་དང་མེ་དྲོད་སྐྱེད་པའི་ཕྱིར། ཁུ་བ་ཡིན་པའི་ཕྱིར་སྐོམ་པ་ཞི་བར་བྱེད་དོ། །ཁ་ཟས་ཡིན་པའི་ཕྱིར་ཉམས་སྟོབས་སྐྱེད་པར་བྱེད་དོ། །རྩར་མྱུར་དུ་འགྲོ་བའི་ཕྱིར་ཡང་བ་ཉིད་དོ། །རིམས་ལ་ཕན་པར་བྱེད་པའི་ཕྱིར་རིམས་འཇོམས་སོ། །
[153b.6]དེ་བས་ན་ཐོག་མར་ཐུག་པས་རིམས་གསོ་བར་བྱའོ་ཞེས་ཟེར་རོ། །དེ་ལ་ཐུག་པ་ནི་ཐོག་མ་འབྲས་ཡོས་ཀྱི་ཐུག་པ་དང་། དེའི་འོག་ཏུ་འབྲས་བརྔོས་པ་བཏགས་པའི་ཐུག་པའི་ནང་དུ་སྤོད་བཅའ་སྒ་དང་། འུ་སུ་དང་། པི་པི་ལིང་དང་། རྒྱམ་ཚས་བཏབ་པ་བླུད་དོ། །གལ་ཏེ་སྐྱུར་ལ་
[153b.7]གོམས་པ་ཡིན་ན། སེའུ་འབྲུ་བཏབ་སྟེ་ལྷན་ཅིག་བླུད་དོ། །མཁྲིས་པ་ཤས་ཆེ་སྟེ། ཕྱི་ས་སླ་བར་འབྱུང་བ་ལ་ནི་ཐུག་པ་བཅའ་སྒས་བཏབ་སྟེ་བསྒྲངས་པའི་ནང་དུ་སྦྲང་རྩི་བཏབ་པ་བླུད་དོ། །ཆུ་སོ་དང་། རྩིབ་ལོགས་དང་། མགོ་བོ་རྣམས་སུ་ཟུག་ཅིང་ན་བ་ལ་ནི་ཀཎྜ་ཀ་རི་དང་།
[154a]
[154a.1]གཟེ་མ་ལས་གཞི་བླངས་པའི་ཐུག་པ་བླུད་དོ། །ཀྲྀཥྞ་པརྞི་དང་། བ་ལ་དང་། བིལ་བ་དང་། དོང་གྲ་དང་། ཨུཏྤ་ལ་དང་། འུ་སུ་དང་། འདི་རྣམས་ལས་གཞི་བླངས་པའི་ཐུག་པ་སྐྱུར་གྱིས་བཏབ་པ་བླུད་ན་རིམས་དང་འཁྲུ་བ་ལ་ཕན་ཏེ། མེའི་དྲོད་སྐྱེད་ཅིང་
[154a.2]སྨིན་པར་བྱེད་དོ། །དབུགས་མི་བདེ་བ་དང་། སྐྱིགས་བུ་དང་། གཟེར་བ་དང་། ལུད་པ་ལ་ནི་རྩ་བ་ལྔ་པ་ཆུང་ངུ་ལས་གཞི་བླངས་པའི་ཐུག་པ་བླུད་དོ། །རིམས་ནད་བད་ཀན་ཤས་ཆེ་བས་ཉམ་ཐག་པ་ལ་ནི་རྩ་བ་ཆེན་པོ་ལྔ་པ་དང་། ནས་ལས་གཞི་བླངས་པའི་ཐུག་པ་བླུད་དོ། །
[154a.3]རིམས་རྟུག་པ་འགག་པ་ལ་ནི་པི་པི་ལིང་དང་སྐྱུ་རུ་ར་ལས་གཞི་བླངས་པའི་ནས་ཐུག་གི་ནང་དུ་མར་བསྐོལ་བ་བཅུག་སྟེ་འཐུངས་ན་དྲི་མ་འགགས་པ་ཚུལ་བཞིན་འབྱུང་ངོ་། །ཁོང་པར་འཁྱིལ་ཞིང་ཟུག་གཟེར་དང་བཅས་པ་ལ་ནི་དབྱི་མོང་དང་། པི་པི་ལིང་གི་རྩ་བ་དང་། རྒུན་འབྲུམ་
[154a.4]དང་། སྐྱུ་རུ་ར་དང་། དོང་གྲ་ལས་གཞི་བླངས་པའི་ཐུག་པ་བླུད་དོ། །ཁོང་པ་འཁྲོག་པ་ལ་ནི་རྒྱ་ཤུག་དང་། ད་ཏྲིག་དང་། ས་ལ་པརྞི་དང་། ཀྲྀཥྞ་པརྞི་དང་། བིལ་བ་དང་། བ་ལ་དང་། དེ་རྣམས་ལས་གཞི་བླངས་པའི་ཐུག་པ་བླུད་དོ། །རྔུལ་དང་གཉིད་མེད་ཅིང་
[154a.5]སྐོམ་པས་གདུངས་པ་ལ་ནི་ཁ་ར་དཀར་པོ་དང་། སྐྱུ་རུ་ར་དང་། དོང་གྲ་ལས་གཞི་བླངས་པའི་ཐུག་པ་བླུད་དོ། །སྐོམ་དད་ཆེ་བ་དང་། སྐྱུག་བྲོ་བ་ལས་ཁྱབ་པའི་རིམས་ནད་ལ་ནི་ཁ་ར་དཀར་པོ་དང་། རྒྱ་ཤུག་དང་། རྒུན་འབྲུམ་དང་། ཐལ་ཏྲེས་དང་། གླ་སྒང་དང་། ཙནྡན་
[154a.6]དཀར་པོ་དང་། འདི་རྣམས་ལས་གཞི་བླངས་པའི་ཐུག་པ་སྦྲང་རྩིས་བཏབ་པ་བླུད་དོ། །གོང་གི་ཐུག་པ་ལ་སྨོས་པའི་སྨན་རྣམས་དང་། ཤ་ཁུ་དང་། སྲན་མུངྒ་ལ་སོགས་པའི་ཁུ་བཅུད་ལ་སོགས་པ་ལ་ཡང་ཅི་རིགས་པར་སྦྱར་རོ། །དེ་ལ་ཐུག་པ་བླུད་དུ་མི་རུང་བ་ནི་ཆང་ལས་
[154a.7]རིམས་སུ་གྱུར་པ་དང་། ཆང་རྟག་ཏུ་འཐུངས་པ་དང་། སོ་ག་ཚ་བའི་དུས་དང་། མཁྲིས་པའི་གནས་སུ་བད་ཀན་ཞུགས་ཏེ། ལྷག་པར་ཤས་ཆེར་ན་བ་དང་། སྐོམ་དད་ཆེ་བ་དང་། སྐྱུག་བྲོ་བ་དང་། ལུས་ཚ་བ་དང་། སྟོད་དུ་ཁྲག་ལུད་པ་རྣམས་ལ་ནི་ཐུག་པ་མི་བླུད་དེ།
[154b]
[154b.1]དེ་ལ་ནི་རིམས་འཇོམས་པའི་ཤིང་ཏོག་རྒུན་འབྲུམ་ལ་སོགས་པའི་ཁུ་བ་དང་འབྲས་ཡོས་བཏགས་པའི་ཕྱེའི་སྐྱོ་མ་སྦྲང་རྩི་དང་ཁ་ར་དང་ལྡན་པར་བླུད་དོ། །སྨན་དེ་དག་ཞུ་བའི་ཚོད་ཙམ་ན། ནས་ཐུག་དང་། འབྲས་བརྔོས་པའི་ཆན་དང་། ཁྱིམ་བྱ་ལ་སོགས་པ་མཆུས་གཟས་ཚོལ་
[154b.2]བའི་ཤ་ཁུ་དང་། སྲན་མུངྒའི་འུ་ཤ་དང་བཅས་པ་སྦྱིན་ནོ། །དེ་ལྟར་ཐུག་པ་ལ་སོགས་པའི་རིམ་པ་གོང་དུ་བསྟན་པ་དེ་དག་ཀྱང་ཉམས་སྟོབས་བྲི་བ་དང་བསྲུང་བ་དང་། ནད་གཞི་རྣམས་མི་འོང་བར་བྱ་བའི་ཕྱིར་ཞག་དྲུག་གི་བར་དུ་སྤྱད་དོ། །དེའི་འོག་ཏུ་རིམས་སྨིན་པ་དང་། སྨྱུང་
[154b.3]བ་ལ་སོགས་པ་རབ་ཏུ་བསྔགས་ཏེ། ཉེས་པའི་ལྷག་མ་ལུས་པ་ལ་ནི་སྨིན་པ་དང་། ཞི་བར་བྱ་བའི་ཕྱིར་སྨན་བསྐོལ་བའི་ཁུ་བ་དྲོན་པོ་དེ་ཉིད་གྲང་མོར་བྱས་པ་དང་། སྨན་རང་གི་ཁུ་བ་དང་། ཐུག་པ་རྐྱང་རྐྱང་བོ་ལ་སོགས་པའི་སྐྱོ་མ་ལ་སོགས་པའི་ནད་གཞི་ཇི་ལྟ་བ་བཞིན་དུ་བླུད་དོ། །མཁྲིས་
[154b.4]པ་ལས་གྱུར་པའི་རིམས་ནད་ལ་ནི་ཁྱད་པར་དུ་ཁ་བའི་སྨན་སྦྱར་ཏེ། བད་ཀན་ལས་གྱུར་པའི་རིམས་ལ་ཡང་སྨན་ཁ་བ་དང་ཚ་བ་རྣམས་སྦྱར་རོ། །མཁྲིས་པ་དང་བད་ཀན་ལས་གྱུར་པའི་རིམས་ལ་ནི། རོ་བསྐ་བ་ཕན་མོད་ཀྱི་རིམས་སར་པ་ལ་ནི་མི་བསྔགས་སོ། །ཇི་ལྟ་ཞེ་ན། རོ་བསྐ་
[154b.5]བས་ནི་རྟུག་པ་འགགས་པ་དང་། རིམས་མི་ཟད་པ་དང་། བྲང་ཚ་ཞིང་ཁ་ནས་ཆུ་སྐྱུར་འབྱུང་བ་དང་། ལྟོ་སྦོ་བ་ལ་སོགས་པ་སྐྱེད་པར་བྱེད་དོ། །འདིར་སྨན་པ་ཁ་ཅིག་ན་རེ་ཞག་དྲུག་ཕན་ཆད་རིམས་འཇོམས་པའི་སྨན། གླ་སྒང་དང་། ལྡུམ་བུ་སྐྲ་བཟངས་ལ་སོགས་པ་གཟོད་གཏང་ངོ་
[154b.6]ཞེས་ཟེར་རོ། །གཞན་དག་ན་རེ་ཞག་བཅུ་ཕན་ཆད་སྨན་དཔྱད་གཟོད་བྱའོ་ཞེས་ཟེར་རོ། །ཡང་སྨན་པ་ཁ་ཅིག་ན་རེ་ཟས་ཡང་བ་ཐུག་པ་ལ་སོགས་པ་ཞག་དྲུག་གི་བར་དུ་བྱིན་ལ། དེ་ཕན་ཆད་སྨན་དཔྱད་གཟོད་བྱའོ་ཞེས་ཟེར་རོ། །ཡང་གཞན་དག་ན་རེ་གོང་མ་དེ་དག་ནི་ངེས་
[154b.7]པ་མ་ཡིན་ཏེ་ནད་ཀྱི་གནས་སྐབས་ལས་ལྟོས་ཏེ། སྨན་དཔྱད་བྱའོ་ཞེས་ཟེར་རོ། །རིམས་མ་སྨིན་པ་ནི་ཞག་བཅུ་ལོན་ན་ཡང་སྨན་དཔྱད་མི་བྱ་སྟེ། ཟླ་བ་ཕྱེད་དང་གཉིས་ཀྱི་བར་དུ་ཡང་དགག་གོ། །གང་གི་ཕྱིར་ནད་གཞི་ཤུགས་དྲག་པས་རིམས་མ་སྨིན་ཏེ། ཤས་
[155a]
[155a.1]ཆེར་ན་བ་ལ་སྨན་བཏང་ན་ཕྱིར་ཞིང་ཐུ་བར་བྱེད་དོ། །གཞན་ཡང་རིམས་གསར་པ་ན་ཞིང་སྙོམ་ལ་རྨོངས་བག་ཏུ་འདུག་པ་ལ་སྨན་བྱིན་ན་ཡང་རིམས་མཆེད་པར་བྱེད་དོ། །དུས་གང་དག་གི་ཚེ་སྨན་བྱིན་ཞེ་ན། དྲག་པོའི་ཟུག་གཟེར་ལྷོད་པ་དང་། ལུས་ཡང་བ་
[155a.2]དང་། དྲི་མ་རྣམས་བསྐྱོད་པར་གྱུར་ན་དེའི་ཚེ་ཞག་དྲུག་ལ་སོགས་པ་མ་ལོན་ཏེ། ཡུན་རིང་བ་ཡིན་ན་ཡང་སྨན་བླུད་པ་ལ་སོགས་པ་བྱའོ། །དེ་ལྟར་ནད་གཞི་སོ་སོའི་བྱེ་བྲག་ཤེས་པར་བྱས་ནས་སྨིན་པར་བྱ་བའི་སྨན་སྐྲ་ལོ་དང་། བཅའ་སྒ་དང་། བྱི་ཚེར་བ་དང་། དེ་གསུམ་གང་
[155a.3]ཡང་རུང་བ་གླ་སྒང་དང་ལྡན་པར་བསྐོལ་བའི་ཁུ་བའམ། ཡང་ན་བ་ལ་དང་། པུ་ཤེལ་ཙི་དང་། བ་ལ་ཀ་འདི་གསུམ་བསྐོལ་བའི་ཁུ་བ་གྲང་མོའམ། ཡང་ན་ཏིག་ཏ་དང་། སླེ་ཏྲེས་དང་། གླ་སྒང་དང་། དོང་གྲ་དང་། འདི་རྣམས་བསྐོལ་བའི་ཁུ་བ་གྲང་མོ་བླུད་དོ། །འདིར་
[155a.4]སྨན་བསྐོལ་བའི་ཚད་ནི་སྨན་སྲང་གཅིག་ཆུ་སྲང་བཅུ་དྲུག་དང་བསྐོལ་ཏེ། བཞི་ཆ་སྲང་བཞི་ལུས་པར་བྱའོ། །བསྒྲངས་པ་ཞེས་སྨོས་པ་ནི་ཆུ་བསྐོལ་བ་སྲང་དྲུག་གི་ནང་དུ་སྨན་སྲང་གཅིག་བཅུག་པའོ། །འདི་དག་ཇི་ལྟར་རིགས་པ་བཞིན་སྦྱར་བས་བླུད་ན། ནད་རྣམས་སྨིན་པར་བྱེད་པ་
[155a.5]ཡིན་ཏེ། རིམས་དང་། ཡི་ག་འཆུས་པ་དང་། སྐོམ་དད་ཆེ་བ་དང་། ཁ་ཟས་ཀྱི་རོ་མི་ཚོར་བ་དང་། མ་ཞུ་བ་རྣམས་འཇོམས་སོ། །དུག་མོ་ཡུངས་དང་། པ་ཏོ་ལའི་ལོ་མ་དང་། པུ་ཙེ་ཤེལ་དང་། འདི་རྣམས་བསྐོལ་བའི་ཁུ་བ་བླུད་ན་རྒྱུན་གྱི་རིམས་ལ་ཕན་ནོ། །
[155a.6]པ་ཏོ་ལ་དང་། ཐལ་ཏྲེས་དང་། གླ་སྒང་དང་། པ་ཐ་དང་། པུ་ཙེ་ཤེལ་དང་། འདི་རྣམས་བསྐོལ་བ་བླུད་ན་རྟག་པའི་རིམས་ལ་ཕན་ནོ། །པ་ཏོ་ལ་དང་། ནིམ་པ་དང་། འབྲས་བུ་གསུམ་དང་། རྒུན་འབྲུམ་དང་། དུག་མོ་ཡུངས་ཀྱི་ཤུན་ཕྲགས་དང་འདི་རྣམས་
[155a.7]བསྐོལ་བའི་ཁུ་བ་བླུད་ན། ཉིན་གཅིག་པའི་རིམས་ལ་ཕན་ནོ། །ཏིག་ཏ་དང་། སླེ་ཏྲེས་དང་། ཙནྡན་དཀར་པོ་དང་། བཅའ་སྒ་དང་འདི་རྣམས་བསྐོལ་བའི་ཁུ་བ་བླུད་ན་ཉིན་གསུམ་པའི་རིམས་ལ་ཕན་ནོ། །སྐྱུ་རུ་ར་དང་། གླ་སྒང་དང་། སླེ་ཏྲེས་རྣམས་བསྐོལ་
[155b]
[155b.1]བའི་ཁུ་བའི་ནང་དུ་སྦྲང་རྩི་བཏབ་སྟེ་བླུད་ན་ཉིན་བཞི་པའི་རིམས་ཞི་བར་བྱེད་དོ། །དེ་ལ་རླུང་ལས་གྱུར་པའི་རིམས་ལ་ནི། བྱི་ཚེར་བ་དང་། སླེ་ཏྲེས་དང་། བཅའ་སྒ་དང་། དོང་གྲ་རྣམས་བསྐོལ་བའི་ཁུ་བའམ། ཡང་ན་པི་པི་ལིང་གི་རྩ་བ་དང་། སླེ་ཏྲེས་དང་། བཅའ་
[155b.2]སྒ་རྣམས་ལྷན་ཅིག་བསྐོལ་བའམ། ཡང་ན་རྩ་བ་ཆུང་ངུ་ལྔ་བསྐོལ་བའི་ཁུ་བ་བླུད་ན་ཕན་ནོ། །མཁྲིས་པ་ལས་གྱུར་པའི་རིམས་ལ་ནི་དུག་མོ་ཡུངས་དང་། གླ་སྒང་དང་། པུ་ཙེ་ཤེལ་བསྐོལ་བའི་ཁུ་བ་གྲང་མོའི་ནང་དུ་སྦྲང་རྩི་བཏབ་པ་བླུད་པའམ། ཡང་ན་གླ་སྒང་དང་།
[155b.3]སྐྲ་ལོ་དང་། བྱི་ཚེར་བ་དང་། ཏིག་ཏ་རྣམས་བསྐོལ་བའི་ཁུ་བ་བླུད་ན་ཕན་ནོ། །བད་ཀན་ལས་གྱུར་པའི་རིམས་ལ་ནི་དུག་མོ་ཡུངས་ཀྱི་སྡེ་ཚན་བསྐོལ་བའམ། ཡང་ན་བ་ཤ་ཀ་དང་། གླ་སྒང་དང་། བཅའ་སྒ་དང་། བྱི་ཚེར་བ་རྣམས་བསྐོལ་བའི་ཁུ་བ་བཏང་ན་ཕན་
[155b.4]ནོ། །རླུང་དང་བད་ཀན་དུ་འདྲེས་པའི་རིམས་ལ་ནི་མེ་དྲོད་སྐྱེད་པ་དང་། སྨིན་པར་བྱེད་པའི་སྨན་ཨ་རུ་ར་དང་། པི་པི་ལིང་གི་རྩ་བ་དང་། དོང་གྲ་དང་། པུ་ཙེ་ཤེལ་རྣམས་བསྐོལ་བ་བླུད་དོ། །རླུང་དང་མཁྲིས་པ་འདྲེས་པའི་རིམས་ལ་ནི་རྒུན་འབྲུམ་དང་། ཤིང་
[155b.5]མངར་དང་། ཤིང་ཏོག་མ་རུ་ཀ་དང་། སེང་ཕྲོམ་དང་། ཏང་པལ་དང་། ཐལ་ཏྲེས་དང་། གླ་སྒང་དང་། སྐྱུ་རུ་ར་དང་། བལ་ཀ་དང་། པདྨའི་གེ་སར་དང་། ཤུག་པ་དང་། པདྨའི་རྩ་བ་དང་། ཙནྡན་དང་། པུ་ཤེལ་ཙེ་དང་། ཨུཏྤལ་སྔོན་པོ་
[155b.6]དང་། པ་རུ་ཤ་ཀ་དང་། འདི་རྣམས་ཕྱེ་མར་བཏགས་པ་ཆུ་དང་བསྐོལ་བ་སྐན་ཏེར་གྱུར་པའམ། ཡང་ན་བསྐོལ་བའི་ཁུ་བ་བསྒྲངས་ནས་མེ་ཏོག་ཀུ་སུ་མའི་དྲིས་བསྒོས་ལ་སྦྲང་རྩི་དང་། ཁ་ར་དཀར་པོ་དང་། འབྲས་ཡོས་བཏགས་པའི་ཕྱེ་མས་བཏབ་པ་འཐུངས་ན་
[155b.7]མྱུར་དུ་ཞི་བར་བྱེད་དོ། །དེ་བཞིན་དུ་རིམས་དང་། ཆང་ནད་དང་། སྐྱུག་བྲོ་བ་དང་། བརྒྱལ་བ་དང་། ལུས་ཚ་བ་དང་། མགོ་འཁོར་བ་དང་། ཁྲག་སྟོད་དུ་ལུད་པ་དང་། མིག་སེར་རྣམས་འཇོམས་སོ། །པུ་ཙེ་ཤེལ་བཏགས་པའི་ཕྱེ་མ་ཆུ་དང་དོག་ལེ་སར་པ་
[156a]
[156a.1]གཙང་མའི་ནང་དུ་བསྐོལ་ལ། རས་དང་བཙགས་ཏེ། ཚིགས་མ་བོར་ལ། ཁུ་བ་དངས་མའི་ནང་དུ་མར་གྱིས་བཏབ་པའི་ཁུ་བ་དེ་འཐུངས་ན་རིམས་དང་ལུས་ཚ་བ་རྣམས་འཇོམས་སོ། །བད་ཀན་དང་རླུང་འདྲེས་པའི་རིམས་ལ་ནི་ཤུ་དག་དང་།
[156a.2]པུ་ཙེ་ཤེལ་དང་། པ་ཐ་དང་། དོང་ག་དང་། དུག་མོ་ཡུངས་ཀྱི་ཤུན་པ་རྣམས་བསྐོལ་ལ་བླུད་དོ། །ཡང་ན་སླེ་ཏྲེས་བསྐོལ་བའི་ཁུ་བའི་ནང་དུ་པི་པི་ལིང་གི་ཕྱེ་མ་བཏབ་པ་འཐུངས་ན་ཡང་ཕན་ནོ། །ཡང་ཀཎྜ་ཀ་རི་དང་། བཅའ་སྒ་དང་། སླེ་ཏྲེས་བསྐོལ་
[156a.3]བའི་ཁུ་བའི་ནང་དུ་པི་པི་ལིང་གི་ཕྱེ་མས་བཏབ་པ་འཐུངས་ན་རླུང་དང་བད་ཀན་ལས་གྱུར་པའི་རིམས་དང་། ལུད་པ་དང་། དབུགས་མི་བདེ་བ་དང་། སྣ་ཆུ་འཛག་པ་དང་། ཟུག་གཟེར་རྣམས་འཇོམས་སོ། །ཨ་རུ་ར་དང་། འུ་སུ་དང་། གླ་སྒང་དང་། བཅའ་
[156a.4]སྒ་དང་། བུ་ཏི་ཀ་དང་། པར་པ་ཏ་ཞེས་བྱ་བ་སྲོ་ལོ་དང་། ཀད་ཕ་ལ་དང་། ཤུ་དག་དང་། ག་བྲའི་རྩ་བ་དང་། ཐང་ཤིང་དང་། འདི་རྣམས་བསྐོལ་བའི་ནང་དུ་ཤིང་ཀུན་དང་། སྦྲང་རྩི་དང་ལྡན་པར་བྱས་ཏེ་འཐུངས་ན། རླུང་དང་བད་ཀན་གྱི་རིམས་དང་། ལྟོ་
[156a.5]བ་དང་། སྙིང་དང་། རྩིབ་ལོགས་སུ་ཟུག་ཅིང་ན་བ་དང་། ལྐོག་མ་དང་། སྐྲན་ནད་དང་། ལུད་པ་དང་། དབུགས་མི་བདེ་བ་རྣམས་སེལ་ཏོ། །བད་ཀན་དང་མཁྲིས་པ་ལས་གྱུར་པའི་རིམས་ལ་ནི་དོང་གའི་སྡེ་ཚན་བསྐོལ་བའི་ཁུ་བའི་ནང་དུ་སྦྲང་རྩི་བཏབ་པ་བླུད་ན་
[156a.6]ཕན་ནོ། །ཡང་ན་པུ་ཙེ་ཤེལ་དང་། བ་ཤ་ཀ་དང་། པུ་ཤེལ་ཙེ་དང་། འབྲས་བུ་གསུམ་དང་། སླེ་ཏྲེས་དང་། པ་ཏོ་ལ་དང་། བོང་ང་དཀར་པོ་དང་། ནིམ་པ་དང་། མུར་བ་དང་། བྱི་ཚེར་བ་རྣམས་བསྐོལ་བའི་ནང་དུ་སྦྲང་རྩིས་བཏབ་པ་འཐུངས་ན་ཡང་
[156a.7]བད་ཀན་དང་མཁྲིས་པའི་རིམས་ལ་ཕན་ནོ། །འདུས་པ་ལས་གྱུར་པའི་རིམས་ལ་ནི། ཀཎྜ་ཀ་རི་དང་། ཐང་ཤིང་དང་། སྐྱེར་བ་དང་། གླ་སྒང་དེ་རྣམས་བསྐོལ་བའི་ནང་དུ་པ་ཏོ་ལ་དང་། ནིམ་པ་དང་། འབྲས་བུ་གསུམ་དང་། པུ་ཙེ་ཤེལ་རྣམས་
[156b]
[156b.1]བཏགས་པའི་ཕྱེ་མས་བཏབ་པ་བླུད་དོ། །འདུས་པའི་རིམས་དང་རླུང་དང་བད་ཀན་ཤས་ཆེ་བ་དང་། ལུད་པ་དང་། དབུགས་མི་བདེ་བ་དང་། རྩིབ་ལོགས་ན་བ་རྣམས་ལ་ནི་དོང་གྲ་དང་། མ་ནུ་དང་། སླེ་ཏྲེས་དང་། ཀཎྜ་ཀ་རི་རྣམས་བསྐོལ་བའི་ཁུ་བ་བླུད་དོ། །
[156b.2]མ་དུ་ཀའི་མེ་ཏོག་དང་། རྒུན་འབྲུམ་དང་། ཀྱི་ལྕེ་བ་དང་། པ་རུ་ཤ་ཀ་དང་། པུ་ཤེལ་ཙེ་དང་། པུ་ཙེ་ཤེལ་དང་། འབྲས་བུ་གསུམ་དང་། ཏང་པལ་དང་། འདི་རྣམས་ཆོ་ག་བཞིན་དུ་བསྐོལ་ཏེ་བསྒྲངས་པ་དུས་སུ་འཐུངས་ན་འདུས་པ་དང་ལྡན་པའི་རིམས་
[156b.3]ཐམས་ཅད་སེལ་ཏོ། །ཛཱ་ཏི་ཞེས་བྱ་བ་སུ་མ་ནའི་མེ་ཏོག་དང་། སྐྱུ་རུ་ར་དང་། གླ་སྒང་དང་། བི་ཙར་བ་གོང་མ་བཞིན་བསྐོལ་བ་དུས་སུ་འཐུངས་ན་རིམས་ནད་ཐམས་ཅད་སེལ་ཏོ། །རིམས་ནད་རྟུག་པ་འགགས་པ་ལ་ནི། པུ་ཙེ་ཤེལ་དང་། རྒུན་འབྲུམ་
[156b.4]དང་། ཀྱི་ལྕེ་བ་དང་། འབྲས་བུ་གསུམ་བསྐོལ་བའི་ནང་དུ་བུ་རམ་བཏབ་པ་བཏུང་ན་ཕན་ནོ། །སྨན་དེ་དག་ཞུ་བའི་ཚོད་ཙམ་ན། ཟས་སུ་ཐུག་པ་ལ་སོགས་པའི་རིམ་པ་སྨན་དང་ལྡན་པར་སྦྱིན་ནོ། །རིམས་ནད་བད་ཀན་ཅན་ལ་ནི་ཐུག་པ་ལ་སོགས་པ་མི་བླུད་དོ། །
[156b.5]ཇི་ལྟར་རྔུལ་གྱི་སྟེང་དུ་ཆར་བབ་ན་འདམ་དུ་འགྱུར་བ་དང་འདྲ་བར་བད་ཀན་འཕེལ་བར་འགྱུར་བའི་ཕྱིར་རོ། །དེ་བས་ན་བད་ཀན་ལས་གྱུར་པའི་རིམས་ལ་ཐོག་མར་སྨྱུང་བ་ལེགས་པའི་མཚན་མ་དང་། དང་པོ་ཐུག་པ་ལ་སོགས་པ་མི་བླུད་པར་རྒྱ་སྲན་དང་། མོན་སྲན་
[156b.6]ཙ་ན་ཀ་དང་། མོན་སྲན་ལས་བྱས་པའི་ཁུ་བཅུད་ཡང་བ་ཉུང་བ་དང་། སྣུམ་མེད་པ་སྨན་ཁ་བ་དང་བཅས་པ་ཡི་གར་འོང་བ་ལན་ཚྭ་དང་ལྡན་པ་སྦྱིན་ནོ། །ཁ་ཟས་ནི་འབྲས་དམར་པོ་ལ་སོགས་པ་རྙིང་པ་དང་། འབྲས་དྲུག་ཅུ་པ་ལ་སོགས་པ་ཕན་ནོ། །བད་ཀན་
[156b.7]ཤས་ཆེ་བའི་རིམས་ལ་ནི་བད་ཀན་འཇོམས་པའི་མཐུ་དང་ལྡན་པའི་སྨན་བསྐོལ་བའི་ནང་ན་གོང་དུ་སྨོས་པའི་འབྲས་དམར་པོའམ། ནས་ཕུབ་མ་མེད་པར་བྱས་པ་ལན་གཉིས་གསུམ་བཀྲུས་ལ་ནད་དང་མཐུན་པར་འབྲས་ཆན་དང་། ནས་ཆན་དུ་བྱས་ཏེ་ཟའོ། །
[157a]
[157a.1]སྲན་མུངྒ་དང་། སྲན་ཆུང་དང་། རྒྱ་སྲན་ལ་སོགས་པ་ཡང་ཞིང་ཉུང་བའི་ཁུ་བཅུད་ནད་པ་གང་ལ་གོམས་པ་འཐུངས་ན་རིམས་འཇོམས་སོ། །ཚོད་མར་ནི་ཀ་ར་ཝེལ་ལ་དང་། རྒྱལ་མོ་ག་གོན་དང་། ལ་ཕུག་གཞོན་ནུ་དང་། པར་
[157a.2]པ་ཏ་དང་། བར་ད་ཀ་དང་། ནིམ་པ་དང་། ཀུ་སུ་མ་དང་། པ་ཏོ་ལའི་འབྲས་བུ་དང་། ལོ་མ་དང་འདི་རྣམས་གང་རྙེད་པ་ལ་ཚོད་མར་བྱའོ། །ཤ་ཁུ་ནི་ཤ་ཡང་བ་རྣམས་དང་། སྲོག་ཆགས་ཐང་ལ་གནས་པ་སྲེག་པ་ལ་སོགས་པའི་ཤ་ཁུ་ཀཎྜ་ཀ་རི་དང་།
[157a.3]པ་རུ་ཤ་ཀ་དང་། ཨག་ནི་མན་ཐ་དང་། རྒུན་འབྲུམ་དང་། སྐྱུ་རུ་ར་དང་། སེའུ་འབྲུ་དང་། པི་པི་ལིང་དང་། བཅའ་སྒ་དང་། འུ་སུ་དང་། ཟི་ར་དང་། རྒྱམ་ཚ་རྣམས་དང་། ཁ་ར་དཀར་པོ་དང་། སྦྲང་རྩི་དང་། འདི་རྣམས་རླུང་དང་། སྣུམ་
[157a.4]མེད་ན་ཡང་རུང་སྟེ། ལེགས་པར་སྦྱར་བ་གཏང་ངོ་། །ཚོད་མའི་ནང་དུ་སྦྱར་བ་ནི་དར་བ་ཧ་ཅང་མི་སྐྱུར་བ་ཡི་གར་འོང་བའི་དངས་མ་མེ་མི་ཆེ་བ་དང་བསྐོལ་ཏེ། ཟས་ཀྱི་འོག་ཏུ་གཏང་ངོ་། །ཡང་ན་སྨན་བསྐོལ་བའི་ཆུ་བསྒྲངས་པའམ། གལ་ཏེ་ཆང་ལ་གོམས་པ་
[157a.5]ཡིན་ན་ནི། ཆང་སྐོམ་དུ་བླུད་དོ། །རིམས་བྱང་བའམ། མ་བྱང་ཡང་རུང་སྟེ། ཉི་མ་ནུབ་པའི་དུས་སུ་བད་ཀན་ཟད་ཅིང་མེའི་དྲོད་ཆེ་བའི་དུས་ཡིན་པས་དེའི་ཚེ་ན་ཟས་ཡང་ཟའོ། །ཡང་ན་ནད་དང་རྗེས་སུ་མཐུན་པར་ཟས་བཟའ་སྟེ། དེ་ཡང་བད་ཀན་ལ་
[157a.6]སྔ་དྲོ། མཁྲིས་པ་ལ་ཉི་མ་ཕྱེད། རླུང་ལ་ཕྱི་དྲོ་སྦྱིན་ནོ། །ནད་པ་དེ་མེ་དྲོད་ཆུང་བ་ལ་སྔ་དྲོ་ཟས་སྦྱིན་ན་དེས་ནི་ནད་ཕྱིར་ཐུ་བར་འགྱུར་རོ། །སྨན་བསྐོལ་བའི་ཁུ་བ་དང་། ཕན་པའི་ཟས་ཀྱིས་ལུས་ཡང་བར་འགྱུར་ཏེ། བད་ཀན་དང་མེ་དྲོད་ཆུང་སྟེ། མཁྲིས་པ་དང་
[157a.7]རླུང་ཤས་ཆེ་ན་ཞག་བཅུ་པ་ཡན་ཆད་མར་སྦྱིན་ནོ། །རིམས་སྨིན་པ་ལ་མར་བཏང་ན་ནི་བདུད་རྩི་དང་འདྲའོ། །མ་སྨིན་པ་ཡིན་ན་ནི་ཞག་བཅུ་པ་ལས་འདས་པ་ཡིན་ན་ཡང་ལུད་པ་དང་། ཡི་ག་འཆུས་པ་ལ་སོགས་པ་ཉེས་པ་སྣ་ཚོགས་སྐྱེད་དོ། །བད་ཀན་ཤས་
[157b]
[157b.1]ཆེ་བའི་རིམས་ལ་ནི། དང་པོ་སྨྱུང་བ་དང་སྨན་ཁ་བའི་ཁུ་བ་ལ་སོགས་པས་བད་ཀན་ཟད་པར་བྱའོ། །ལུས་ཟུངས་དང་ཉམས་སྟོབས་འཕེལ་བའི་ཕྱིར་རིམས་རྙིང་པ་བསྲུང་བར་བྱའོ། །གང་གི་ཕྱིར་མཁྲིས་པ་མེའི་རང་བཞིན་སྨིན་པར་བྱེད་པ་ནི་རྩུབ་པ་དང་གཤེར་བག་
[157b.2]སྤངས་པ་ཡིན་ཏེ། དེས་མཁྲིས་པ་སྐྱེས་པ་དེ་ལས་ནི་སློན་ན་དུགས་བསྐོལ་བའི་ཆུ་དང་། རོ་བསྐ་བ་དང་། ཡང་བའི་ཟས་ཀྱིས་ལུས་ཤས་ཆེར་རྩུབ་སྟེ། རླུང་སྟོབས་ཆེ་བ་འཁྲུག་པར་བྱས་པ་དེ་ལ་ནི་མར་མཆོག་ཏུ་ཕན་ཏེ། ཁོང་པའི་ནང་དུ་མེ་འབར་བ་ལ་ཆུས་
[157b.3]བསད་པ་དང་འདྲའོ། །མར་ནི་རླུང་དང་མཁྲིས་པ་སེལ་བའི་མཆོག་ཡིན་ཏེ། རང་རང་དང་མཐུན་པའི་སྨན་དང་སྦྱར་ན་ནི་ནད་ཀུན་ལ་ཡང་ཕན་ནོ། །མར་དེ་བསིལ་བའི་སྨན་དང་སྦྱར་ན་ནི་རིམས་ཚ་བ་འཇོམས་ལ། དྲོ་བའི་སྨན་དད་སྦྱར་ན་ནི་གྲང་བའི་
[157b.4]རིམས་སེལ་ཏོ། །རྩུབ་པའི་སྨན་དང་སྦྱར་ན་ནི་བད་ཀན་ཞི་བར་བྱེད་དོ། །དེ་ལྟ་བས་ན་གོང་དུ་སྨོས་པའི་སྐྲ་ལོ་དང་། གླ་སྒང་བསྐོལ་བའི་ཁུ་བ་ལ་སོགས་པ་ནད་གཞི་སོ་སོ་དང་མཐུན་པའི་སྨན་མར་དང་ཅི་རིགས་སུ་སྦྱར་ཏེ་གཏང་ངོ་། །འབྲས་བུ་གསུམ་དང་།
[157b.5]ནིམ་པའི་ཤུན་ཕྲགས་དང་། ཤིང་མངར་དང་། བྲི་ཧ་ཏི་རྣམ་གཉིས་ཕྱིར་སྲང་གཅིག་དང་། སྲན་ཆུང་སྲང་གཅིག་དང་། དེ་རྣམས་བསྐོལ་བའི་ནང་དུ་མར་སྲང་ཕྱེད་བཅུག་སྟེ་འཐུངས་ན་རིམས་དང་ལུད་པ་ལ་ཕན་ནོ་ཞེས་སྨན་པ་རྒན་པོ་རྣམས་འཆད་དོ། །པི་པི་ལིང་
[157b.6]དང་། དུག་མོ་ཡུངས་དང་། ད་བ་ནི་ཞེས་བྱ་བ་ཀཎྜ་ཀ་རི་དང་། པུ་ཙེ་ཤེལ་དང་། ཐལ་ཏྲེས་དང་། སྐྱུ་རུ་ར་དང་། ཏ་མ་ལ་ཀ་དང་། བིལ་བ་དང་། གླ་སྒང་དང་། ཙནྡན་དང་། པ་ལ་ནི་ཞེས་བྱ་བ་ཀྱི་ལྕེ་བ་དང་། པུ་ཤེལ་ཙི་དང་། རྒུན་འབྲུམ་དང་།
[157b.7]བོང་ང་དཀར་པོ་དང་། ས་ལ་པརྞི་དང་། འདི་རྣམས་མར་དང་མར་གྱི་བཞི་འགྱུར་གྱི་ཆུ་དང་ལྷན་ཅིག་བསྐོལ་བ་ལས་རན་པར་འཐུངས་ན་རིམས་དང་མེའི་དྲོད་མ་སྙོམས་པ་དང་། ཧ་ལི་མ་ཀ་ཞེས་བྱ་བའི་ནད། ཡི་ག་འཆུས་པ་དང་། ཚ་བ་ཤས་ཆེ་བ་དང་། སྲིན་
[158a]
[158a.1]ཤ་ཡ་དང་། སློན་པ་དང་། རྩིབ་ལོགས་དང་། མགོ་ན་བ་དང་། ཟད་བྱེད་ཀྱི་ནད་མྱུར་དུ་འཇོམས་སོ། །རླུང་ལས་གྱུར་པའི་རིམས་ལ་ནི་རླུང་ནད་གསོ་བའི་སྐབས་སུ་བཤད་པའི་སེང་ཕྲོམ་གྱི་སྨན་མར་ལས་དུར་བྱིད་མ་གཏོགས་པ་ལྷག་
[158a.2]མ་སྦྱར་བར་བྱའོ། །མཁྲིས་པ་ལས་གྱུར་པའི་རིམས་ལ་ནི་ཏིག་ཏའི་སྨན་མར་མཛེ་ནད་ཀྱི་སྐབས་སུ་བཤད་པ་དང་། བ་ཤ་ཀའི་སྨན་མར་ཁྲག་མཁྲིས་ཀྱི་སྐབས་སུ་བཤད་པ་དང་། ཀྱི་ལྕེ་བིའི་སྨན་མར་ཁོང་འབྲས་ཀྱི་ནང་དུ་སྨོས་པ་དང་སྦྱར་ན་ཕན་ནོ། །བད་ཀན་
[158a.3]ལས་གྱུར་པའི་རིམས་རྙིང་པ་ལ་ནི་བྱི་དང་ག་དང་། ཁ་རུ་ཚ་དང་། དབྱི་མོ་དང་། པ་ཐ་དང་། ཚ་བ་གསུམ་དང་། ཙི་ཏྲ་ཀ་དང་། རྒྱམ་ཚ་དང་། ནས་ཚིག་འཁུས་པའི་ཐལ་བ་དང་། འདི་རྣམས་སྲང་རེ་རེ་དང་། མར་སྲང་སུམ་ཅུ་རྩ་གཉིས་དང་། དེ་དང་
[158a.4]མཉམ་པའི་འོ་མ་དང་། ཆུ་སྲང་དགུ་བཅུ་རྩ་དྲུག་དང་བསྐོལ་ཏེ་དེ་ལས་རན་པར་འཐུངས་ན་བད་ཀན་ལས་གྱུར་པའི་རིམས་རྙིང་པ་འཇོམས་སོ། །སླེ་ཏྲེས་ཆམ་ཆོམ་བརྡུངས་ལ་བསྐོལ་ཏེ། བཞི་ཆ་ལུས་པ་དང་དེ་ཉིད་ཀྱི་ཕྱེ་མ་བཏབ་སྟེ། སྨན་གྱི་བཞི་འགྱུར་གྱི་
[158a.5]མར་དང་ཡང་བསྐོལ་ཏེ་བཟའ་བའམ། དེ་བཞིན་དུ་འབྲས་བུ་གསུམ་དང་། བ་ཤ་ཀ་དང་། རྒུན་འབྲུམ་དང་། བ་ལ་རྣམས་རེ་རེ་ནས་གོང་མ་སླེ་ཏྲེས་ཀྱི་སྦྱོར་བ་ལྟར་འཐུངས་ན་རིམས་གཅོད་པར་འགྱུར་རོ། །གོང་གི་མར་དེ་ཞུ་བའི་ཚད་ཙམ་ན། ཤ་འཇམ་
[158a.6]པའི་ཁུ་བ་དང་ལྷན་ཅིག་ཟན་ཟོས་ན་སྟོབས་སྐྱེད་དོ། །དེས་ཉེས་པ་འཇོམས་པའི་མཆོག་ཡིན་ནོ། །སྲན་མུངྒ་དང་། ཀ་ར་བིར་ལ་སོགས་པའི་ཁུ་བཅུད་ནི་བད་ཀན་དང་མཁྲིས་པ་འཇོམས་སོ། །ཤས་ཆེར་བྱིན་ན་ནི་རླུང་ལས་གྱུར་པའི་རིམས་རྙིང་པ་ལ་
[158a.7]མི་ཕན་ཏེ། ཟུག་གཟེར་དང་ལྟོ་བ་ན་སྲ་བར་བྱེད་ཅིང་རིམས་འཕེལ་བར་བྱེད་དོ། །གལ་ཏེ་གོང་དུ་སྨོས་པའི་སྦྱོར་བ་དེ་དག་གིས་ཀྱང་རིམས་མ་ཞི་ན་གོང་དུ་སྨོས་པའི་སློན་དང་འོག་ནས་སྨོས་པའི་བཀྲུ་སྨན་གྱིས་ལུས་དག་པར་བྱ་སྟེ། སྦྲུམ་མ་དང་། མེ་དྲོད་ཆུང་
[158b]
[158b.1]བ་དང་། ལུས་རྩུབ་པ་རྣམས་ལ་ནི་མི་བྱའོ། །ཕོ་བའི་ནང་དུ་བད་ཀན་ཞུགས་པའི་ནད་གཞི་སྟོབས་ཆེ་བ་ལ་ནི་སྨན་པས་ནད་པའི་ཉམས་སྟོབས་བསྲུང་བར་བྱའོ། །རིམས་སྨིན་ཏེ་རང་རང་གི་གནས་ནས་བསྐྱོད་པ་དང་། རིམས་མི་ཟད་པ་མ་གཏོགས་པ་གཞན་ལ་བཀྲུ་
[158b.2]སྨན་གཏང་སྟེ། འབྲས་བུ་གསུམ་དང་། ཤ་མ་དུར་བྱིད་དང་། པི་པི་ལིང་དང་། ནཱ་ག་གེ་སར་དང་། ཁ་ར་དཀར་པོ་དང་། འདི་རྣམས་བཏགས་པ་སྦྲང་རྩི་དང་རི་ལུར་བྱས་པ་བཏང་བའམ། ཡང་ན་དྲི་སྣ་གསུམ་ལ་སོགས་པ་ཚ་བ་གསུམ་གྱི་བཀྲུ་སྨན་
[158b.3]ཆོ་ག་གྲུབ་པའི་གནས་སུ་བསྟན་པ་བཏང་བའམ། ཡང་ན་རྒུན་འབྲུམ་སྐྱུ་རུ་རའི་ཁུ་བ་དང་སྦྱར་བའམ། ཡང་ན་རྒུན་འབྲུམ་དང་། ཨ་རུ་ར་སྦྱར་བའམ། ཡང་ན་སྐྱུ་རུ་ར་རང་གི་ཁུ་བའི་ནང་དུ་མར་བརྔོས་པ་བླུད་ན་ཡང་རིམས་འཇོམས་སོ། །ཡང་ན་སྐྱུ་རུ་
[158b.4]རའི་ཕྱེ་མ་མར་དང་སྦྲང་རྩི་དང་སྦྱར་བ་བལྡག་པའམ་དོང་ཀ་འོ་མའམ་རྒུན་འབྲུའི་ཁུ་བ་བཏུང་བའམ། ཡང་ན་འབྲས་བུ་གསུམ་མམ། ཀྱི་ལྕེ་བ་འོ་མ་དང་སྦྱར་བ་རིམས་ནད་ཅན་ལ་བླུད་དོ། །དེ་ལྟར་ཁྲུས་དང་སློན་བྱས་པའི་འོག་ཏུ་ཐུག་པ་རྐྱང་རྐྱང་པོ་ལ་སོགས་པ་
[158b.5]རིམ་པས་བླུད་དོ། །རིམས་རང་གི་གནས་ནས་བསྐྱེད་དེ་གོང་འོག་གཉིས་སུ་འཁྲུ་སྟེ་འབྱུང་བར་འགྱུར་ན། སྨིན་པ་ཡིན་ན་ཡང་མི་གཅད་པར་གཞག་གོ། །གལ་ཏེ་བཅད་ན་ནི་ཁོང་པའི་ནང་དུ་གནས་རྙེད་དེ་ངེས་པར་གནོད་པར་བྱེད་དོ། །རིམས་སྨིན་ཏེ་ཚབས་
[158b.6]ཆེར་འཁྲུ་བ་ལ་ནི་གཅད་བར་བྱའོ། །མ་ཞུ་བར་རང་འཁྲུ་སྟེ། ཚབས་ཆེ་བར་འབྱུང་བ་ལ་ནི། མདོའི་གནས་ནད་གཞི་གསུམ་གྱི་མཚན་ཉིད་བསྟན་པ་ནས་འབྱུང་བ་བཞིན་དུ་བྱའོ། །མ་སྨིན་པའི་རིམས་དང་འཁྲུ་བ་ཡིན་ན་ནི་མི་གཅད་དེ། གལ་ཏེ་སྨན་གྱིས་
[158b.7]གཅད་པར་གྱུར་ན་ནད་སྐྱེད་དོ། །གལ་ཏེ་སྨན་པ་རྨོངས་པ་མི་མཁས་པས་རིམས་ནད་མ་སྨིན་པ་ལ་བཀྲུ་སྨན་གཏོང་བ་ནི་རང་ཉིད་ཕུང་བར་བྱེད་པ་ཡིན་ཏེ། ཇི་ལྟར་སྦྲུལ་ནག་པོ་གཉིད་ལོག་པ་ལ་ལག་པའི་རྩེ་མོས་ཉུག་པ་དང་འདྲའོ། །རིམས་ནད་ལུས་ཟད་པ་ལ་ནི་
[159a]
[159a.1]སློན་ཁྲུས་མི་ཕན་ཏེ། གལ་ཏེ་བཀྲུ་སྨན་དང་འབྱོར་པ་ཡིན་ན་ནི་འོ་མའི་བཏུང་བ་ཅི་འདོད་པ་དང་། ནི་རུ་ཧ་བཏང་སྟེ་འཁྲུ་བ་ཞི་བར་བྱའོ། །ནད་པ་འོ་མ་ལ་གོམས་ཤིང་བད་ཀན་ཟད་པ་དང་། ལུས་ཚ་བ་དང་། སྐོམ་དད་ཆེ་བ་དང་། རླུང་
[159a.2]དང་མཁྲིས་པས་ཉམ་ཐག་པ་ལ་ནི་འོ་མ་རབ་ཏུ་ཕན་ཏེ། འཁྲུ་བ་ལ་ཡང་ཕན་ནོ། །སྨྱུང་བས་ཉམ་ཐག་པ་ལ་ནི་འོ་མ་མཆོག་ཏུ་བཟང་སྟེ། ནགས་མེས་ཆག་པ་ལ་ནི་ཆར་བབས་ནས་ས་བོན་ཆེར་འཕེལ་བ་དང་འདྲ་བར་རིམས་མྱུར་དུ་ཞི་བར་བྱེད་དོ། །འོ་མ་དེ་ཡང་སོ་སོའི་
[159a.3]སྨན་དང་ལེགས་པར་སྦྱར་ཏེ། དྲོ་བ་དང་གྲང་བ་དང་། བཞོས་མ་ཐག་པ་ལ་སོགས་པ་དུས་ཀྱི་བྱེ་བྲག་ཤེས་པར་བྱ་སྟེ། ཅི་རིགས་པར་བླུད་ན་རིམས་ལ་ཕན་ནོ། །ལོག་པར་བྱས་ན་ནི་མ་ཡིན་ནོ། །འོ་མ་དེ་བཅའ་སྒ་དང་། འབྲ་གོ་དང་། རྒུན་འབྲུམ་དང་།
[159a.4]ཤ་ཁ་ར་དང་མར་དང་ལྷན་ཅིག་བསྐོལ་ཏེ་བསྒྲངས་པའི་ནང་དུ་སྦྲང་རྩི་དང་ལྡན་པར་འཐུངས་ན་སྐོམ་དད་ཆེ་བ་དང་ལུས་ཚ་བ་དང་རིམས་འཇོམས་སོ། །སྦྱོར་བ་གོང་མའི་སྟེང་དུ་རྒུན་འབྲུམ་དང་། བ་ལ་དང་། ཤིང་མངར་དང་། ཐལ་ཏྲེས་དང་། པི་པི་ལིང་དང་།
[159a.5]ཙནྡན་རྣམས་བསྐོལ་ཏེ་བསྒྲངས་པའི་ནང་དུ་སྦྲང་རྩི་བཏབ་པ་བླུད་ན་ཡང་ཕན་ཡོན་གོང་མ་དང་འདྲའོ། །ཡང་ན་འོ་མ་ཏི་ཚེ་འོ་མའི་བཞི་འགྱུར་གྱི་ཆུ་དང་བསྐོལ་བ་བླུད་པའམ། ཡང་ན་པི་པི་ལིང་དང་། འོ་མ་བསྐོལ་བ་བླུད་དོ། །ཡང་ན་འོ་མ་རྩ་བ་ལྔ་དང་བསྐོལ་
[159a.6]བ་འཐུངས་ན་ལུད་པ་དང་། དབུགས་མི་བདེ་བ་དང་། མགོ་ན་བ་དང་། རྩིབ་ལོགས་ན་བ་དང་ཟུག་པ་དང་རིམས་རྙིང་པ་རྣམས་སེལ་བར་བྱེད་དོ། །ཡང་ན་ཨེ་རཎྜའི་རྩ་བ་དང་། བ་ལ་དང་། བིལ་བ་གང་ཡང་རུང་བ་བསྐོལ་བའི་ཁུ་བ་འོ་མ་བཞོས་མ་ཐག་པའི་དྲོན་
[159a.7]པོ་དང་ལྷན་ཅིག་འཐུངས་ན་རིམས་ནད་ལས་གྲོལ་བར་བྱེད་དོ། །ཁྱད་པར་དུ་རླུང་གིས་ཕྱི་ས་འགགས་པ་དང་། བེའུ་སྣབས་ཁྲག་དང་བཅས་པར་འབྱུང་བ་དང་། སྐོམ་པ་དང་། ཟུག་གཟེར་དང་། སྲ་བ་ཧི་ཀ་ལ་ནི་ནད་ལས་གྲོལ་བར་བྱེད་དོ། །ཡང་ན་
[159b]
[159b.1]བཅའ་སྒ་དང་། བ་ལ་དང་། ཀཎྜ་ཀ་རི་དང་། གཟེ་མ་དང་། བུ་རམ་དང་། འོ་མ་སྦྱར་བ་འཐུངས་ན་སྐྲང་བ་དང་། ཕྱི་ས་དང་། གཅིན་དང་། འཕྱེན་འགགས་པ་དང་། རིམས་ལས་རྒྱལ་བར་བྱེད་དོ། །བ་སྤྲུ་བ་མེ་ཏོག་དཀར་པོ་ཅན་དང་།
[159b.2]བིལ་བ་དང་། བཪྴ་བྷུ་ཞེས་བྱ་བ་བ་སྦྲུ་བ་མེ་ཏོག་དམར་པོ་ཅན་རྣམས་འོ་མ་དང་བསྐོལ་བ་འཐུངས་ན་རིམས་དང་གྲང་བ་སེལ་ལོ། །ཤིང་ཤ་པའི་སྙིང་པོ་དང་། འོ་མ་སྦྱར་བ་འཐུངས་ན་ཡང་རིམས་མྱུར་དུ་འཇོམས་སོ། །རིམས་ཞུ་བའི་གནས་སུ་ཞུགས་ནས། ནི་
[159b.3]རུ་ཧ་བཏང་བར་གྱུར་ན་མྱུར་དུ་མེའི་སྟོབས་སྐྱེད་པ་དང་། རིམས་དང་བྲལ་བ་དང་། དགའ་བར་བྱེད་པ་དང་། ཟས་ཡི་གར་འོང་བར་བྱེད་དོ། །མཁྲིས་པ་ལས་གྱུར་པའི་རིམས་སམ། མཁྲིས་པ་དང་། བད་ཀན་ལས་གྱུར་པའི་རིམས་ཁུ་བའི་གནས་སུ་
[159b.4]ཞུགས་པ་ལ་ནི་བཀྲུ་སྨན་གཏོང་ངོ་། །ནད་གཞི་གསུམ་ཆར་སྨིན་པའི་གནས་སུ་སོང་བ་ལ་ནི་འཇམ་རྩིས་ཞི་བར་བྱའོ། །བད་ཀན་དང་མཁྲིས་པ་ཟད་པའི་ནད་ལ་མཇུག་ཏོ་དང་། རྒྱབ་དང་། རྐེད་པ་ན་བ་དང་། མེ་དྲོད་ཆེ་བ་དང་། རྟུག་པ་འགགས་པ་ལ་ནི་
[159b.5]འཇམ་རྩི་མས་གཏོང་བར་བྱའོ། །པ་ཏོ་ལ་དང་། ནིམ་པའི་ལོ་མ་དང་། པུ་ཙེ་ཤེལ་དང་། དོང་ག་དང་། ཏི་ར་དང་། བ་ལ་དང་། གཟེ་མ་དང་། པོ་སོན་ཆ་དང་། པུ་ཤེལ་ཙེ་དང་། བ་ལ་ཀ་དང་། འདི་རྣམས་ཆུ་དང་། སྨན་སྤྱི་དང་མཉམ་
[159b.6]པའི་འོ་མ་དང་ལྷན་ཅིག་བསྐོལ་ལ། འོ་མ་ལུས་པའི་ནང་དུ་གླ་སྒང་དང་། པོ་སོན་ཆ་དང་། པི་པི་ལིང་དང་། ཤིང་མངར་དང་། དུག་མོ་ཡུངས་ཀྱི་ཤུན་ཕྲགས་རྣམས་ཀྱི་ཕྱེ་མ་བཏབ་སྟེ། མར་དང་སྦྲང་རྩི་བསྲེས་པས་སྡུད་པའི་འཇམ་རྩི་མས་གཏོང་ན་
[159b.7]རིམས་འཇོམས་པར་བྱེད་དོ། །ཡང་ན་དོང་ག་དང་། པུ་ཤེལ་ཙེ་དང་། ཤིང་མངར་དང་། པོ་སོན་ཆ་དང་། འདབ་མ་རྣམ་བཞི་དང་། འདི་རྣམས་བསྐོལ་བའི་ཁུ་བའི་ནང་དུ་པྲི་ཡང་ཀུ་དང་། པོ་སོན་ཆ་དང་། གླ་སྒང་དང་། ཉེའུ་ཤིང་དང་། ཤིང་
[160a]
[160a.1]མངར་དང་། འདི་རྣམས་ཀྱི་ཕྱེ་མ་བཏབ་ལ། མར་དང་བསྐོལ་ཏེ་སྨན་གཏོང་ཀ་ར་བུ་རམ་དང་སྦྲང་རྩི་བཏབ་སྟེ་མས་གཏོང་ན་རིམས་སེལ་ཏོ། །ཡང་ན་ཛི་བནྟི་དང་། ཤིང་མངར་དང་། མེ་ད་དང་། པི་པི་ལིང་དང་། པོ་སོན་ཆ་དང་། ཤུ་དག་
[160a.2]དང་། རིད་ཏི་དང་། ར་སྣ་དང་། བ་ལ་དང་། བིལ་བ་དང་། ཤུ་ཏི་དང་། ཉེའུ་ཤིང་རྣམས་བཏགས་ལ་སྨན་སྤྱིའི་བཞི་འགྱུར་གྱི་མར་དང་། ཏིལ་མར་བསྲེས་པ་དང་། མར་གྱི་བཞི་འགྱུར་གྱི་འོ་མ་དང་། ཆུ་ཉིས་འགྱུར་དང་བསྐོལ་བ་ནད་གཞི་ཇི་ལྟ་བ་བཞིན་དུ་འཇམ་
[160a.3]རྩི་མས་གཏོང་ན་རིམས་འཇོམས་སོ། །གཞན་ཡང་ཆོ་ག་གྲུབ་པའི་སྐབས་སུ་བཤད་པའི་འཇམ་རྩི་ཡང་འདིར་རིམས་ནད་ལ་སྦྱར་རོ། །རིམས་རྙིང་པ་ལ་སྣ་སྨན་བཏང་ན་ཡི་ག་འབྱེ་བ་དང་། མགོ་ནད་དང་། ལུས་ལྕི་བ་དང་། བད་ཀན་འཕྲོག་ལ་དབང་པོ་གསལ་
[160a.4]བར་བྱེད་དོ། །སྣུམ་དང་བཅས་པའི་སྣ་སྨན་བཏང་ན་ནི་མགོ་སྟོང་པ་སྙམ་བྱེད་པ་དང་། ལུས་ཚ་བ་དང་། མཁྲིས་པ་རྣམས་འཇོམས་སོ། །གཞན་ཡང་ཆམ་པ་དང་། མགོ་དང་། མགུལ་པའི་ནད་དང་། ལྕེས་རོ་མི་ཚོར་བ་རྣམས་ལ་ནི་དུད་པ་བརྔུབ་པ་དང་།
[160a.5]སྨན་ཁུས་མཁུར་བ་བཀང་སྟེ་མི་བསྐྱོད་པར་བཞག་པ་དང་། གཡས་གཡོན་སྤོ་བའི་སྨན་ཁུ་བཅང་བ་རྣམས་མདོའི་གནས་སུ་ཇི་ལྟར་བསྟན་པ་རྣམས་ནད་གཞི་དང་སྦྱར་ཏེ་བཏང་ངོ་། །རིམས་རྙིང་པ་ཟས་ཡི་གར་མི་འོང་བ་ལ་ནི་ཁ་ལུང་གི་གེ་སར་མར་དང་། རྒྱམ་ཚར་
[160a.6]བཅས་པའི་ལྡེ་གུའམ། ཡང་ན་རྒུན་འབྲུམ་དང་། ཁ་ར་དཀར་པོ་དང་། སྐྱུ་རུ་རའི་ཁུ་བ་བཅངས་ན་ཕན་ནོ། །པགས་པ་ལ་བརྟེན་པའི་རིམས་རྙིང་པ་ལ་ནི་ཇི་ལྟར་རིགས་པ་བཞིན་དུ་དྲོ་བ་དང་གྲང་བའི་སྨན་བསྐོལ་བས་བསྐུ་བ་དང་། བྱུག་པ་དང་། བླུགས་
[160a.7]པ་ལ་སོགས་པ་བྱའོ། །དེ་བཞིན་དུ་མིག་སྨན་དང་དུད་པ་བརྔུབ་པ་ལ་སོགས་པ་བྱ་སྟེ། གློ་བུར་དུ་བྱུང་བའི་རིམས་ལ་ཡང་ཚུལ་དེ་ལྟར་བྱའོ། །རིམས་རྙིང་པ་ལ་ལུས་ཚ་བ་ལ་ནི་མར་ལན་སྟོང་གི་བར་དུ་ཆུ་གྲང་མོར་བཅུག་པ་ལ་ཡང་བཞུ་ཡང་བཅུག་བྱས་པའི་མར་
[160b]
[160b.1]བསྐུས་ན་ཚ་བའི་རིམས་ཞི་བར་བྱེད་དོ། །ཡང་ན་མདོའི་གནས་སུ་བསྟན་པའི་མངར་བའི་སྡེ་ཚན་གེ་སར་ལ་སོགས་པའམ། ཡང་ན་སྐྱུར་བའི་སྡེ་ཚན་སྐྱུ་རུ་ར་ལ་སོགས་པའམ། བསྐ་བའི་སྡེ་ཚན་ཨ་རུ་ར་ལ་སོགས་པའམ། རྩྭ་དཱུར་བའི་སྡེ་ཚན་ནམ། མཁྲིས་
[160b.2]པ་འཇོམས་པའི་སྡེ་ཚན་ནྱ་གྲོ་དྷ་ལ་སོགས་པ་འམ། ཤུག་པའི་སྡེ་ཚན་ནམ། སྨན་གྱི་སྡེ་ཚན་དེ་དག་གང་ཡང་རུང་བ་འོ་མ་དང་། ཏིལ་མར་དང་། བསྐོལ་བ་ཡང་རུང་མ་བསྐོལ་བ་ཡང་རུང་སྟེ། འདག་གུ་དང་སྨན་མར་གྱི་བསྐུ་བ་ལ་སོགས་པ་ཆོ་ག་ཇི་ལྟ་
[160b.3]བ་བཞིན་དུ་བྱས་ན་དེ་མ་ཐག་པའི་རིམས་འཇོམས་སོ། །ཡང་ན་གོང་གི་སྨན་གྱི་སྦྱོར་བ་དེ་ཉིད་ཅུང་ཟད་རྩིང་ཙམ་དུ་བཏགས་པའི་ལྡེ་གུས་ལུས་བསྐུ་བར་བྱའོ། །གལ་ཏེ་ཞི་བར་དྲགས་ན་ནི་ཚ་བ་ཕྱིར་མི་འབྱུང་སྟེ། སླར་ཁོང་དུ་ཞུགས་ནས་ཚ་བ་སྐྱེ་བའི་ཕྱིར་རོ། །
[160b.4]གོང་མའི་སྨན་དེ་ཉིད་བསྐོལ་བའི་ནང་དུ་ལུས་གཞུག་པའམ་བླུགས་པ་ཡང་བྱའོ། །དེ་བཞིན་དུ་རྩབ་མོ་དང་། ཆང་སྐྱུར་དང་། འོ་མ་དང་། མར་དང་། ཆུ་ལ་སོགས་པའི་ནང་དུ་བླུགས་པ་དང་། ལུས་སྤྱིང་བར་བྱའོ། །ཀ་པིད་ཏ་དང་། ཁ་ལུང་དང་།
[160b.5]ཨ་མྲ་དང་། བི་ད་རི་དང་། སེང་ཕྲོམ་དང་། སེའུ་འབྲུ་དང་། རྒྱ་ཤུག་གི་མྱུ་གུ་དང་། འདི་རྣམས་ཨ་རིཥྚའི་ནང་དུ་བྱས་ལ་དེའི་སྦུ་བས་ལུས་བསྐུས་ན་ལུས་ཚ་བ་དང་། ན་བ་དང་། རྨོངས་བག་ཏུ་འདུག་པ་དང་། སྐོམ་དད་ཆེ་བ་རྣམས་ཞི་བར་
[160b.6]བྱེད་དོ། །དེ་བཞིན་དུ་མཁྲིས་པས་ལུས་འགྱུར་བ་བསྟན་པའི་ལེའུ་ལས་འབྱུང་བའི་གསོ་བ་འདིར་བྱས་ན། ཚ་བའི་རིམས་མྱུར་དུ་སེལ་ཏོ། །དྲོ་བའི་ནུས་པ་དང་རེག་པ་དང་ལྡན་པའི་སྨན་རྒྱ་སྤོས་དང་། ཨ་ཀ་རུ་དང་། རུ་རྟ་དང་། སྟོན་དང་། རྡོ་དྲེག་
[160b.7]དང་། ཀོ་ཉོན་ཙེ་དང་། ཐང་ཤིང་དང་། ཆུ་སྲིན་སེན་མོ་དང་། ར་སྣ་དང་། གུ་གུལ་དང་། ཤུ་དག་དང་། རྩ་རོང་དང་། སུག་སྨེལ་རྣམ་གཉིས་དང་། ཙནྡན་དང་། སིབ་དང་། ཤི་ཀྲུ་དང་། བྱེའུ་རུག་པ་དང་། སྤང་སྤོས་དང་། བྱ་མ་
[161a]
[161a.1]ཀ་དང་། ཡུངས་ཀར་དང་། སླེ་ཏྲེས་དང་། ཨེ་རཎྜ་རྣམ་གཉིས་དང་། བ་རུ་ར་དང་། རོ་ཧི་ཤ་དང་། །ཏ་མ་ལའི་ལོ་མ་དང་། བྷུ་ཏི་ཀ་དང་། ས་ལི་ཀ་དང་། འུ་སུ་དང་། ཏི་མུ་ས་དང་། ཤུ་ཏི་དང་། རྒྱ་སྲན་དང་། མོན་སྲན་མ་
[161a.2]ཤ་དང་། ཀྲུ་ཏྲུག་ཏྲེས་དང་། པུ་ཏི་ཀ་རཉྫ་དང་། ན་གུ་ལ་རྣམ་གཉིས་དང་། གཞན་ཡང་བསིལ་བའི་ནུས་པ་དང་ལྡན་པའི་སྨན་རྣམས་ཞིབ་ཏུ་བཏགས་ལ་ཆང་དང་རྩབས་སྐྱུར་པོ་དང་ཏིལ་མར་དང་ལྷན་ཅིག་བསྐོལ་ཏེ། དྲོ་འཇམ་ཙམ་བྱས་པས་བསྐུ་
[161a.3]བའམ། ཡང་ན་ཞིབ་ཏུ་བཏགས་པའི་ལྡེ་གུས་བྱུག་པ་བྱས་ན། རིམས་གྲང་བ་ཞི་བར་བྱེད་དོ། །ཡང་ན་རྒྱ་སྤོས་ལ་སོགས་པ་གོང་གི་སྦྱོར་བ་དེ་ཉིད་ཀྱིས་བླུགས་པ་དང་། ལུས་སྦྱིང་བ་ལ་སོགས་པ་བྱའོ། །དེ་བཞིན་དུ་ཆང་སྐྱུར་དང་། བ་གཅིན་
[161a.4]དང་། ཞོ་ག་ཆུ་ལ་སོགས་པ་སྨན་མེད་པའི་ཉི་ཚེའི་བླུགས་པ་ལ་སོགས་པ་བྱའོ། །ཡང་ན་དོང་ཀ་ལ་སོགས་པའི་སྡེ་ཚན་གྱི་བཏུང་བ་དང་། བསྐུ་བ་དང་བྱུག་པ་ལ་ཡང་སྦྱར་རོ། །ཨ་ཀ་རུའི་དུད་པ་དང་། པ་ལ་ཀའི་དུད་པ་འོག་ནས་སྨོས་པ་གང་
[161a.5]ཡིན་པ་ཡང་རིམས་གྲང་མོ་འདི་ལ་སྦྱར་རོ། །མེའི་དྲོད་བསྐྱེད་པར་བྱ་བའི་ཕྱིར་དུགས་ཀྱི་ཆོ་ག་བསྟེན་པར་བྱའོ། །དེ་བཞིན་དུ་རླུང་མེད་པའི་ཁང་པར་འདུག་པ་དང་། རྩོལ་བ་དང་གོས་ལྕི་བ་བགོ་བ་ལ་སོགས་པ་ཡང་བྱའོ། །རྔུལ་དབྱུང་བར་བྱ་བའི་
[161a.6]ཕྱིར་མཁྲིས་པ་སྐྱེད་པའི་སྨན་བཟའ་བར་བྱ་སྟེ། རྒྱ་སྲན་ཀུ་ལངྠ་དང་། མ་ཤ་དང་། ནིམ་པ་ཝ་ས་ཞེས་བྱ་བའི་ཟས་དང་། ཤ་རྣམས་སྦྱར་རོ། །གནས་ནི་ཁང་པའི་དབུས་དང་། ས་ཁང་གི་ནང་དུ་རྩྭ་ཀུ་ཤ་དང་། ལྷྭམ་དང་། ར་ལ་ཀ་ཞེས་བྱ་
[161a.7]བའི་སྟན་བྱ་སྟེ། ཁང་པ་དེའི་ནང་དུ་མདག་མ་དུད་པ་མེད་ཅིང་དམར་རུག་གེ་བ་ཞུགས་ལིང་གི་ནང་དུ་བཅུག་སྟེ་བསྲོ་བར་བྱའོ། །གྲང་བའི་དབང་གིས་ཤིན་ཏུ་འདར་བར་གྱུར་པ་ལ་ནི་ཆང་ངམ། དར་བའམ། རྒྱ་སྲན་དང་། ཁྲེ་རྒོད་ལ་སོགས་པ་
[161b]
[161b.1]འབྲུའི་ཁུ་བའི་ནང་དུ་ཚ་བ་གསུམ་བཏབ་པའམ། གཞན་ཡང་མཁྲིས་པ་སྐྱེད་པའི་སྨན་རྣམས་བསྟེན་པར་བྱའོ། །དེ་བཞིན་དུ་བུད་མེད་ཤིན་ཏུ་ནུ་མ་མཛེས་ཤིང་ཤ་རྒྱས་པ་ལུས་ལ་བྱུག་པ་དང་། རྒྱན་ཐམས་ཅད་ཀྱིས་བརྒྱན་པ་ལང་ཚོ་ལ་བབ་པ་དང་།
[161b.2]ཆང་གིས་ཤིན་ཏུ་དྲེགས་པ་ཡིད་དུ་འོང་ཞིང་ཤིན་ཏུ་འགྱིང་བག་དང་ལྡན་པའི་བུད་མེད་དང་མཐང་སྦྱར་བའི་དུགས་བྱ་སྟེ། ནམ་གྲང་བར་གྱུར་པའི་དུས་ན་བུད་མེད་དེ་སྤང་བར་བྱའོ། །འདུས་པ་ལས་གྱུར་པའི་རིམས་ལ་ནི་ཉེས་པ་གཅིག་ཤས་ཆུང་ཞིང་
[161b.3]གཉིས་ཤས་ཆེ་ན་ནི་གཉིས་ཟད་པར་བྱ་ཞིང་གཅིག་གསོ་བར་བྱའོ། །གཉིས་ཤས་ཆེ་ཞིང་གཅིག་ཤས་ཆུང་ན་ནི་གཉིས་བྲི་ཞིང་གཅིག་བསྐྱེད་པར་བྱའོ། །ཉེས་པ་གསུམ་ཆ་མཉམ་ན་ནི་དང་པོ་བད་ཀན་གསོ་ཞིང་དེ་ནས་རླུང་དང་མཁྲིས་པ་རིམ་བཞིན་
[161b.4]དུ་གསོའོ། །འདུས་པ་ལས་གྱུར་པའི་རིམས་ནད་ཀྱིས་ལུས་ཟད་ཅིང་རྣ་རྩ་གཉིས་སུ་ཤིན་ཏུ་མི་བཟད་པར་ན་བ་སྐྲངས་པར་གྱུར་པ་ནི་འཚོ་བར་དཀའ་སྟེ། ཕལ་ཆེར་འཆི་བར་འགྱུར་བས་དེ་ལ་ནི་མྱུར་དུ་ཁྲག་གཏར་བ་དང་། མར་བླུད་པ་དང་། བད་
[161b.5]ཀན་དང་མཁྲིས་པ་འཇོམས་པའི་སྨན་གྱིས་བྱུག་པ་དང་། སྣ་ནས་བཏང་བའི་སྨན་དང་། མཁུར་བར་བཅང་བ་རྣམས་བྱས་ན་ཕན་ནོ། །ལུས་ཟུངས་རྣམས་ལ་བརྟེན་པའི་རིམས་གྲང་བ་དང་། དྲོ་བ་དང་། སྣུམ་པ་དང་། རྩུབ་པ་ལ་སོགས་
[161b.6]པའི་ཆོ་ག་བྱས་ཀྱང་མ་ཞི་ན་དེ་ལ་ནི་ལག་པ་གཉིས་ལས་རིམ་གྱིས་ཁྲག་དབྱུང་བར་བྱའོ། །རིམས་མི་བཟད་པ་ལ་ཆོ་ག་གོང་མ་དེས་ཀྱང་ཞིར་མི་འདོད་ན་ནད་གཞི་ཇི་ལྟ་བ་བཞིན་དུ། རླུང་ལ་སོགས་པའི་ནད་གང་ཤས་ཆེ་བ་བརྟགས་ཏེ། སོ་སོའི་བྱ་བ་
[161b.7]བཞིན་དུ་སྤང་བར་བྱ་ཞིང་འོག་ནས་སྨོས་པ་བཞིན་དུ་གསོ་བར་བྱ་སྟེ། དེ་ཡང་པ་ཏོ་ལ་དང་། པུ་ཙེ་ཤེལ་དང་། གླ་སྐང་དང་། ཨ་རུ་ར་དང་། ཤིང་མངར་དང་། འདི་རྣམས་ལན་བཞི་ལྔ་བསྐོལ་བའི་རྗེས་སུ་བླུད་ན་རིམས་མི་བཟད་པ་རྣམས་སེལ་
[162a]
[162a.1]བར་བྱེད་དོ། །འབྲས་བུ་གསུམ་དང་། ཨ་རུ་ར་དང་། སླེ་ཏྲེས་དང་། པི་པི་ལིང་དང་། འདི་རྣམས་གང་ཡང་རུང་བའི་ཁུ་བ་བསྐོལ་བ་དྲོན་མོའམ་གྲང་མོ་ཡང་རུང་སྟེ། དེ་བཞིན་དུ་མར་དང་། འདག་གུ་དང་། ཕྱེ་མ་དང་།
[162a.2]རི་ལུ་ལ་སོགས་པ་རེ་རེའི་སྦྱོར་བ་བཅུད་ཀྱིས་ལེན་གྱི་ཆོ་ག་བཞིན་དུ་བྱ་བའམ་ཡང་ན་གོ་བྱེའུ་གཉིས་དང་སྦྱར་བ་བྱིན་ན་ནི་རིམས་མི་བཟད་པ་ཞི་བར་བྱེད་དོ། །ཉི་མ་གང་ལ་ཉིན་བཞི་པའི་རིམས་ལ་སོགས་པས་བཏབ་པའི་དུས་སུ་ནད་གཞི་རྣམས་བརྟག་སྟེ། ལུས་
[162a.3]འཕེལ་བར་བྱ་བའི་ཆོ་ག་ཚུལ་བཞིན་དུ་བྱའོ། །སྒོག་སྐྱའི་ཏིལ་མར་དང་བཅས་པ་ཐོ་རངས་སམ་ཁ་ཟས་ཀྱི་གོང་དུ་བཏུང་བའམ་དེ་བཞིན་དུ་མར་རྙིང་པ་དང་། ཞོ་དང་། འོ་མ་དང་། དར་བ་དང་། སྲང་དྲུག་པ་ཞེས་བྱ་བའི་མར་གཅོང་ཆེན་པོའི་སྐབས་སུ་
[162a.4]བཤད་པ་དང་། དགེ་བའི་སྨན་མར་སྨྱོ་བྱེད་ཀྱི་སྐབས་སུ་འབྱུང་བ་དང་། བའི་རྣམ་ལྔའི་སྨན་མར་བརྗེད་བྱེད་ཀྱི་སྐབས་སུ་འབྱུང་བ་དང་། ཏིག་ཏའི་སྨན་མར་མཛེ་ནད་ཀྱི་སྐབས་སུ་བཤད་པ་དང་། བ་ཤ་ཀའི་སྨན་མར་ཁྲག་མཁྲིས་ཀྱི་ནང་ནས་འབྱུང་
[162a.5]བའམ། འདི་རྣམས་གང་ཡང་རུང་བ་ནང་པར་རམ་ཟས་ཀྱི་གོང་དུ་རིམས་མི་བཟད་པ་ལ་སྦྱར་བར་བྱའོ། །འབྲས་བུ་གསུམ་དང་། རྒྱ་ཤུག་དང་། ཨག་ནི་མནྠ་དང་། འདི་རྣམས་བསྐོལ་བའི་ནང་དུ་མར་དང་མར་གྱི་ཉིས་འགྱུར་གྱི་ཞོ་དང་། མར་གྱི་བཞི་
[162a.6]ཆའི་སེང་ཕྲོམ་གྱི་ཤུན་ཕྲགས་གི་ཕྱེ་མ་བཏབ་སྟེ། ཡང་བསྐོལ་བའི་མར་ལས་རན་པར་འཐུངས་ན་རིམས་མི་བཟད་པ་འཇོམས་པའི་མཆོག་ཡིན་ནོ། །འབྲས་བུའི་ཆང་དང་། འབྲུའི་ཆང་ལེགས་པར་སྨིན་པ་དང་། རྨ་བྱ་དང་། སྲེག་པ་དང་། ཁྱིམ་
[162a.7]བྱའི་ཤ་གཙང་བ་དྲོ་བའི་ནུས་པ་དང་ལྡན་པ་ཟས་དང་ལྷན་ཅིག་ཅི་འདོད་པ་ཚིམ་ཚད་དུ་ཟོས་ལ། ཞག་དེ་ཉིད་ལ་གཉིད་ལོག་པའམ། ཡང་ན་སློན་དུ་གཞུག་གོ། །ཡང་ན་སྨན་མར་ཐུན་ཚད་ཆེན་པོ་འཐུངས་ལ་དེའི་འོག་ཏུ་སྐྱུག་སྨན་བྱའོ། །ཐོག་མར་སྣུམ་ཆོས་དང་
[162b]
[162b.1]དུགས་བྱས་ལ། དེ་ནས་ནི་ལི་ནི་དང་། ཨ་ཛ་གནྡྷ་དང་། དུར་བྱིད་དང་། པུ་ཙེ་ཤེལ་དང་། འདི་རྣམས་བཏགས་པའི་ཕྱེ་མ་ཆུ་དང་བསྐྱོས་ཏེ། རིམས་ཀྱིས་བཏབ་པའི་ཞག་བཏུང་ངོ་། །ལྡོང་རོས་དང་། རྒྱམ་ཚ་དང་། པི་པི་ལིང་དང་། ཏིལ་མར་དང་
[162b.2]ལྷན་ཅིག་སྦྱར་བའི་མིག་སྨན་ཡང་གཞུག་གོ། །ཤིང་ཀུན་དང་། སྟག་གི་ཚིལ་ཆ་མཉམ་པ་རྒྱམ་ཚ་དང་སྦྱར་བའི་སྣ་སྨན་གཏང་ངོ་། །ཡང་ན་མར་རྙིང་པ་གཅིག་པུའམ། ཡང་ན་སེང་གེའི་ཚིལ་རྒྱམ་ཚ་དང་སྦྱར་ཏེ་སྣ་སྨན་གཏང་ངོ་། །ཡང་ན་བ་ལ་ཀ་ཤ་དང་།
[162b.3]ནིམ་པའི་ལོ་མ་དང་། ཤུ་དག་དང་། རུ་རྟ་དང་། ཨ་རུ་ར་དང་། ཡུངས་ཀར་དང་། ནས་དང་། མར་དང་སྦྱར་བས་བདུག་པར་བྱས་ན་རིམས་མ་རུངས་པ་སེལ་ཏོ། །ཡང་ན་བྱི་ལའི་རྟུག་པའི་བདུག་པ་ཡང་དེ་བཞིན་དུ་ཕན་ནོ། །བྱ་མ་ཀ་དང་། ཤུ་དག་
[162b.4]དང་། སྲ་རྩི་པོག་དང་། ནིམ་པ་དང་། ཨ་ཀ་དང་། ཨ་ཀ་རུ་དང་། ཐང་ཤིང་དང་། འདི་རྣམས་སྦྱར་བའི་དུད་པ་ནི་གཞན་གྱིས་མི་ཐུབ་པའི་བདུག་པ་ཞེས་བྱ་སྟེ། རིམས་ཐམས་ཅད་ལ་སྦྱར་རོ། །གཞན་ཡང་འཇིགས་པ་ལས་རིམས་སུ་གྱུར་པ་
[162b.5]དང་། སེམས་བསྒྱུར་བ་ལས་རིམས་སུ་གྱུར་པ་དང་། འབྱུང་པོ་དང་། སྨྱོ་བྱེད་དང་། བརྗེད་བྱེད་ཀྱི་ནད་དུ་བཤད་པའི་བདུག་པ་དང་། སྣ་སྨན་དང་མིག་སྨན་དུ་བཤད་པ་རྣམས་སྐབས་འདིར་རིམས་ཐམས་ཅད་ལ་སྦྱར་རོ། །གཞན་ཡང་ལྷ་བསྟན་པ་དང་ནོར་
[162b.6]བུ་བཅང་བ་དང་། སྔགས་དང་། གཏོར་མ་གཏོང་བ་དང་། ལྷ་མཆོད་པ་དང་། སྦྱིན་སྲེག་དང་། ཉེ་བར་གསོ་སྦྱོང་བྱ་བ་དང་། བདེ་ལེགས་དང་ཕྱག་འཚལ་བ་ལ་སོགས་པ་བྱས་ན། རིམས་ནད་ཐམས་ཅད་སེལ་ཏོ། །གློ་བུར་དུ་བྱུང་བའི་རིམས་མི་བཟད་པ་ནི་
[162b.7]ཕལ་ཆེར་གདན་ལས་གྱུར་པ་སྟེ། དེ་ལ་ནི་ལྷ་ལ་བསྙེན་ཅིང་མཆོད་ན་དེ་ཉིད་དེའི་སྨན་ཡིན་ནོ། །རིམས་མི་བཟད་པ་ལ་གྲང་བ་དང་། དྲོ་བ་ལ་སོགས་པ་རང་རང་གི་གསོ་བ་རྣམ་པ་ཐམས་ཅད་བྱས་ཀྱང་མ་ཞི་ན། ཁྲག་གཏར་བར་བྱའོ། །རླུང་དང་། མེ་དབལ་དང་།
[163a]
[163a.1]འབྲུམ་བུ་ལས་གྱུར་པའི་རིམས་ནད་ལ་ནི་སྨན་མར་དང་། བྱུག་པ་གྲང་མོ་དང་། བླུགས་པ་དང་། ཤ་ཁུ་དང་། བཟའ་བ་དང་། ཁྲག་ཏུ་དབྱུང་བ་ལ་སོགས་པ་རང་རང་གི་གསོ་བ་བཞིན་དུ་བྱའོ། །ཞག་གསུམ་པའི་རིམས་ལ་ནི་ནམ་ཚོང་གི་
[163a.2]རྩ་ལས་གཏར་རོ། །ཞག་བཞི་པ་ལ་ནི་རྒྱབ་ཀྱི་ནམ་ཚོང་གི་དྲང་ཐད་ཀྱི་རྩ་ལས་གཏར་རོ། །དངས་མ་ལ་རིམས་མ་རུངས་པ་ཞུགས་པ་ལ་ནི་སྨྱུང་བ་དང་སྐྱུག་སྨན་གཏོང་ངོ་། །རིམས་དེ་ཁྲག་གི་ནང་དུ་ཞུགས་ན་ནི་ཁྲག་ལ་ཕན་པའི་སྨན་བསྐོལ་བའི་ཆུ་ལུས་ལ་གཏོར་
[163a.3]བ་དང་། བསྐུ་བ་དང་། གཏར་ག་རྣམས་བྱའོ། །རིམས་དེ་ཤ་ལ་གནས་ན་ནི་བཀྲུ་སྨན་རྣོན་པོ་གཏོང་ངོ་། །ཚིལ་ལ་གནས་ན་ནི་ཚིལ་དབྲི་བའི་སྨན་བྱའོ། །རིམས་དེ་རུས་པ་དང་རྐང་ལ་གནས་ན་ནི་དུགས་དང་། མཉེ་བ་དང་། བསྐུ་བྱུག་དང་། རླུང་
[163a.4]ནད་ཞི་བའི་སྨན་རྣམས་བྱ་སྟེ། ཁྱད་པར་དུ་འཇམ་རྩི་མས་གཏོང་ན་ཕན་ནོ། །འབྱུང་པོའི་གདོན་ལས་གྱུར་པའི་རིམས་ལ་ནི་སྔགས་དང་གཏོར་མ་ལ་སོགས་པའི་ཆོ་ག་བྱས་ན་ཕན་ནོ། །སྨན་བདུགས་པའི་དྲིས་ཕོག་པ་ལས་རིམས་སུ་གྱུར་པ་ལ་ནི་མཁྲིས་
[163a.5]པ་ཞི་བར་བྱེད་པའི་སྨན་རྣམས་སྦྱིན་ན་ཕན་ནོ། །དུག་གིས་ཕོག་པ་ལས་རིམས་སུ་གྱུར་པ་ལ་ནི་དུག་གསོ་བའི་དཔྱད་བྱའོ། །ཁྲོས་པ་ལས་གྱུར་པའི་རིམས་ལ་ནི་གང་ལ་དགའ་བའི་ནོར་སྦྱིན་པ་དང་། སྙིང་དགའ་བའི་གཏམ་བྱའོ། །དེས་མ་ཞི་ན་
[163a.6]ཕན་པའི་ཟས་དང་སྨན་བསྟེན་པར་བྱའོ། །དེས་ཀྱང་མ་ཞི་ན་མི་ཕན་པའི་ཟས་དང་སྨན་གྱིས་གསོའོ། །དེ་དག་གིས་མ་ཕན་ན་བཀྲུ་སྨན་གཏོང་ན་ཕན་ནོ། །ཁྲོ་བ་ལས་རིམས་བྱུང་བ་ལ་ནི་འདོད་པ་བསྟེན་པས་ཞི་བར་འགྱུར་རོ། །འདོད་པ་ལ་ཆགས་པ་
[163a.7]ལས་རིམས་སུ་གྱུར་པ་ལ་ཁྲོ་བ་བསྐྱེད་པས་ཞི་བར་འགྱུར་རོ། །མྱ་ངན་དང་འཇིགས་པ་ལས་རིམས་སུ་གྱུར་པ་ལ་ནི་ཁྲོ་བ་དང་སྙིང་དུ་སྡུག་པ་དང་གཉིས་ཀ་བསྟེན་པས་ཞི་བར་འགྱུར་རོ། །དམོད་པ་དང་དྲག་ཤུལ་གྱི་ལས་ལས་རིམས་སུ་གྱུར་པ་ལ་ནི་སྲིད་སྲུང་གི་
[163b]
[163b.1]རིག་བྱེད་ཀྱི་ཆོ་གའམ། ལྷ་ལ་སོགས་པ་ལ་མཆོད་པ་བྱས་ན་ཞི་བར་འགྱུར་རོ། །གློ་བུར་དུ་བྱུང་བའི་རིམས་དེ་རྣམས་ཐོག་མར་ནི་གཅིག་པུ་བྱུང་བ་ཡིན་ན་ཕྱིས་ནི་ནད་གཞི་འདྲེས་ནས་བྱུང་བ་ཡིན་ཏེ། དེ་བས་ན་གློ་བུར་དུ་བྱུང་བའི་རིམས་ལ་ནི་སྨན་དང་དཔྱད་
[163b.2]ནད་གཞི་དང་ཇི་ལྟར་མཐུན་པར་གསོའོ། །རིམས་དེ་རླུང་ལ་སོགས་པའི་ནད་གཞི་མི་ལྡན་གྱི་བར་དུ་ནི། གཏིང་ཟུག་པར་མི་འགྱུར་རོ། །རིམས་ལྡང་བའི་དུས་སུ་སེམས་པ་ལས་རིམས་སུ་གྱུར་པ་ལ་ནི་ཡུལ་ཡིད་དུ་འོང་བ་སྣ་ཚོགས་མངོན་དུ་བྱས་ན་དྲན་པ་
[163b.3]ཞི་བར་འགྱུར་རོ། །སེམས་ཅན་ཐམས་ཅད་ལ་ཡིད་དགའ་བར་བྱ་སྟེ། སྙིང་རྗེས་སེམས་བརླན་པར་གྱུར་ན་རིམས་འཇོམས་སོ། །སྐྱེས་བུ་རིམས་དང་བྲལ་ཞིང་ཉམས་སྟོབས་མ་སྐྱེས་པ་ལ་ནི་ལུས་ཀྱི་རྩོལ་བ་དང་། འཁྲིག་པ་དང་། དེ་བཞིན་དུ་ཁ་
[163b.4]ཟས་ལྕི་བ་དང་། མ་གོམས་པ་དང་ཚ་བ་བསྐྱེད་པ་དང་། གཞན་རིམས་སྐྱེད་པའི་རྒྱུ་ཐམས་ཅད་སྤང་བར་བྱའོ། །རིམས་ལས་བྱང་བ་ཡིན་ན་ཡང་ཁ་ཟས་ཐམས་ཅད་འཆོལ་བར་མང་དུ་མི་བཟའ་སྟེ། །ཉམ་ཆུང་བས་ཁ་ཟས་འཆོལ་བར་ཟོས་ན་ནད་བྱང་བ་ཡིན་ན་
[163b.5]ཡང་ཕྱིར་ནད་ལྡོག་པར་བྱེད་དོ། །དེ་བས་ན་བག་མ་བྱས་པའི་ཟས་དང་སྤྱོད་ལམ་བསྟེན་པ་ལས་ནི་སྲོག་འཕྲལ་ལ་འཕྲོག་པར་བྱེད་པ་ཡིན་པས་ཁྱད་པར་དུ་ནད་ཀྱི་གནས་སྐབས་ལ་བརྟགས་ཏེ། སྨྱུང་བ་དང་། དུགས་དང་། ནས་ཀྱི་ཐུག་པ་དང་། ཏིག་ཏའི་ཁུ་བ་
[163b.6]དང་། སྨིན་པར་བྱེད་པའི་སྨན་དང་། འོ་མ་དང་མར་ལ་སོགས་པ་གསོ་བ་ཐམས་ཅད་སྦྱར་བར་བྱའོ། །ལྷ་ཁྱབ་འཇུག་གིས་གཏོང་བའི་རིམས་ཤིན་ཏུ་དྲག་པོ་ལ་ནི་སྨན་དང་། ནོར་བུ་དང་། སྔགས་རྣམས་མགོ་ལ་གདགས་སོ། །གཞན་ཡང་ཕ་མ་
[163b.7]ལ་སོགས་པ་དམ་པ་རྣམས་དང་། བླ་མ་དང་། བྲམ་ཟེ་དང་། ལྷ་རྣམས་ལ་མཆོད་པ་དང་། ཡིད་དགའ་བར་བྱེད་པའི་འདོད་པའི་ཡུལ་རྣམས་བསྟེན་པར་བྱས་པས་ཀྱང་རིམས་རྣམས་ཞི་བར་འགྱུར་རོ། །གསོ་བའི་གནས་ལས་རིམས་ནད་གསོ་བའི་ལེའུ་སྟེ་དང་པོ་རྫོགས་སོ།། །།
[164a]
[164a.1]དེ་ནས་ཁྲག་མཁྲིས་གསོ་བའི་ལེའུ་གཉིས་པ་བཤད་པར་བྱ་སྟེ། སྐྱེས་བུ་སྟོབས་དང་ལྡན་ཞིང་ཁྲག་སྟོད་དུ་ཤུགས་མི་དྲག་པར་འབྱུང་བ་དེ་ཡང་གསར་དུ་དགུན་ནམ་གྲང་བའི་དུས་སུ་བླ་བརྣན་མེད་པར་འབྱུང་ན། མདོའི་གནས་ནད་མེད་པར་འགྱུར་བའི་ཚུལ་
[164a.2]བསྟན་པའི་ལེའུ་ལས་ཁྲག་མཁྲིས་ཤས་ཆེ་བར་འགྱུར་བའི་གསོ་བ་འདིར་སྦྱར་རོ། །ཁྲག་མཁྲིས་ཐུར་དུ་བྱུང་བ་དང་། ནད་གཞི་གཉིས་འདྲེས་པ་ལས་འབྱུང་བ་དང་། ལྡང་དུབ་བྱེད་པ་དང་། སྟོད་དུ་བྱུང་བའི་ཁྲག་ཁ་དང་། སྣ་དང་། མིག་དང་། རྣ་བའི་བུ་གར་འཕོ་ཞིང་འབྱུང་བ་དང་།
[164a.3]སྨད་དུ་བྱུང་བའི་ཁྲག་ཕོ་མཚན་དང་། རྐུབ་ནས་འབྱུང་བ་དང་། ཡང་ན་ཁྲག་སྟོད་སྨད་དུ་ཕྱིན་ཅི་ལོག་ཏུ་འབྱུང་བ་རྣམས་ལ་ནི་རིམ་པས་ཁད་ཀྱིས་བརྡལ་ལ་གསོའོ། །སྟོད་སྨད་གཉིས་ཀ་ལས་ཁྲག་ཆེར་འབྱུང་ཞིང་མེའི་དྲོད་ཆུང་བ་དང་། ནད་གཞི་གསུམ་ལས་གྱུར་པ་དང་།
[164a.4]སྟོད་སྨད་གང་ཡང་རུང་བ་ལས་ཚབས་ཆེར་འབྱུང་བ་རྣམས་ནི་སྤང་བར་བྱའོ། །དེ་ལ་ནད་གཞི་དང་། ཉི་མ་རིང་ཐུང་ནུར་བའི་དུས་དང་། ཁྲག་མཁྲིས་དེ་ནད་གཞི་གང་དང་འབྲེལ་ནས་སྟོབས་ཆེ་ཆུང་དུ་སོང་བ་དང་། ཡུལ་དང་དུས་ལ་སོགས་པ་བརྟགས་ནས་ཁྲག་གོང་འོག་
[164a.5]གང་ནས་བྱུང་བ་ལ་སོགས་པ་བྱེ་བྲག་ཤེས་པར་བྱས་ནས། དེའི་འོག་ཏུ་སྨྱུང་བའམ། ལུས་འཕེལ་ཞིང་རྒྱས་པར་བྱ་བའམ། ལུས་སྦྱང་བའམ། སྨན་གྱིས་ཞི་བར་བྱ་བ་རྣམས་གང་རིགས་པར་བྱའོ། །ཁ་ཟས་དྲོ་བ་དང་རྣོ་བ་ལ་སོགས་པས་མཁྲིས་པའི་ནད་སྐྱེས་པ་དེ་ཡང་།
[164a.6]ནད་གཞི་མང་པོ་དང་འདྲེས་ཏེ་ཉམས་སྟོབས་དང་ལྡན་ལ་ཁྲག་སྟོད་དུ་བྱུང་བ་ལ་ནི་བཀྲུ་སྨན་བཏང་ལ། སྨད་དུ་བྱུང་བ་ལ་ནི་སྐྱུག་སྨན་གཏང་ངོ་། །ལུས་འཕེལ་ཞིང་ཉམས་སྟོབས་དང་ལྡན་ན་ནི་སྨྱུང་བ་བྱའོ། །གལ་ཏེ་ལུས་སྨྱུང་བ་བྱས་པ་དང་། རིད་པ་ཡིན་ན་ནི་ཉམས་སྟོབས་
[164a.7]སྐྱེད་པའི་ཆོ་ག་བྱའོ། །ཁྲག་སྟོད་དུ་བྱུང་བ་ལ་ནི་ཁ་བ་དང་། བསྐ་བའི་སྨན་གྱི་ཁུ་བས་ཞི་བར་བྱའོ། །སྨྱུང་བ་བྱས་པ་ལ་ནི་བཅའ་སྒ་མ་གཏོགས་པའི་ཡན་ལག་དྲུག་པའི་སྨན་བསྐོལ་བའི་ཁུ་བ་བླུད་དོ། །ཁྲག་ཐུར་དུ་བྱུང་བ་ལ་ནི་མངར་བའི་ཁུ་བཅུད་ཀྱིས་ཞི་བར་བྱའོ། །
[164b]
[164b.1]ཁྲག་སྟོད་དུ་བྱུང་བ་ལ་ནི་ཐོག་མར་སྐྱོ་མ་བླུད་དོ། །སྨད་དུ་བྱུང་བ་ལ་ནི་སྨན་ཐུག་བླུད་དོ། །ཁྲག་མཁྲིས་ཅན་ཉམས་སྟོབས་ཡོད་ཅིང་ཤ་མ་ཟད་པ་ལ་ཟས་ཟ་ནུས་པ་དེ་ནི་སྐྱོན་གྱིས་ཁྲག་བྱུང་དུ་ཟིན་ཀྱང་དང་བོར་ཁྲག་བཅད་དུ་མི་རུང་ངོ་། །བཅད་སྔས་ན་ནད་མང་དུ་སྐྱེད་དོ། །གཞན་
[164b.2]དུ་ན་ཉམས་ཟད་ཅིང་ཟས་ཟ་མི་ནུས་ཏེ། ཉེས་པ་དག་ཅིང་ཁྲག་མང་དུ་འབྱུང་བ་ལ་ནི་ཁྲག་མ་བཅད་ན་མེས་ཚིག་པ་བཞིན་དུ་མྱུར་དུ་འཆི་བར་བྱེད་དོ། །དུར་བྱིད་དང་། ཤ་མ་དུར་བྱིད་གཉིས་བསྐོལ་བའི་ཁུ་བའི་ནང་དུ་ཡང་དེ་ཉིད་བཏགས་པའི་ཕྱེ་མ་དང་། ཤ་ཁ་རའི་ཕྱེ་མ་
[164b.3]དང་སྦྱར་ནས་ལག་པའི་མཐིལ་དུ་བཞག་སྟེ་བལྡག་གོ། །དུར་བྱིད་དང་། ཤ་མ་དུར་བྱིད་དང་། འབྲས་བུ་གསུམ་དང་། པི་པི་ལིང་དང་། ཤ་ཁ་ར་དང་སྦྱར་བའི་རི་ལུ་བྱས་ཏེ། དེ་ལས་རན་པར་ཟོས་ན། འདུས་པ་ལས་གྱུར་པའི་ཁྲག་སྟོད་དུ་ལུད་པ་དང་། སྐྲང་
[164b.4]བ་དང་། རིམས་རྣམས་འཇོམས་སོ། །ཡང་ན་དུར་བྱིད་དང་། ཤ་ཁ་ར་ཆ་སྙོམས་ཏེ། ཁ་རའི་བཞི་ཆའི་པི་པི་ལིང་དང་། དེ་རྣམས་སྦྲང་རྩི་དང་། རི་ལུ་བྱས་ཏེ་ཟོས་ན་ཕན་ཡོན་གོང་མ་དང་འདྲའོ། །ཡང་ན་ཁྲག་ཐུར་དུ་འབྱུང་བ་ལ་ནི་སྐྱུག་སྨན་བཏང་སྟེ། ཆུ་དང་སྐྱོ་
[164b.5]མ་སྦྱར་བའི་ནང་དུ། པོ་སོན་ཆ་དང་། སྦྲང་རྩི་དང་། ཁ་ར་བཏབ་པའམ། ཡང་ན་པོ་སོན་ཆ་དང་། ཁ་ར་དང་། སྦྲང་རྩི་དང་། ཆུ་དང་སྦྱར་བ་བཏང་བའམ། ཡང་ན་ཤིང་མངར་བསྐོལ་བའི་ཁུ་བའི་ནང་དུ་པོ་སོན་ཆ་བཏབ་པའམ། ཡང་ན་བུ་རམ་ཆུ་པོ་སོན་ཆ་དང་
[164b.6]སྦྱར་བའམ། སྦྱོར་བ་དེ་དག་ལས་གང་ཡང་རུང་བ་བྱས་ན་སྐྱུགས་པར་འགྱུར་ཏེ། ཐུར་དུ་འབྱུང་བའི་ཁྲག་མཁྲིས་ལ་བསྔགས་སོ། །དེ་ལྟར་སློན་ཁྲུས་ཀྱིས་ལུས་དག་པར་བྱས་ནས། ཉམས་སྟོབས་བསྲུང་བར་བྱ་བའི་ཕྱིར། རང་རང་གི་གསོ་བ་སྐྱོ་མ་དང་། ཐུག་
[164b.7]པ་ལ་སོགས་པ་རིམ་བཞིན་སྦྱར་རོ། །དེ་ལ་སྐྱོ་མ་ནི་རིམས་ནད་གསོ་བའི་ནང་ནས་འབྱུང་བའི་རྒུན་འབྲུམ་མམ། ཤིང་ཏོག་མ་དུ་ཀ་ལ་སོགས་པའི་སྐྱོ་མའམ། ཡང་ན་མཁྲིས་པ་འཇོམས་པའི་འབྲས་བུའི་རིགས་རྒུན་འབྲུམ་དང་། སྐྱུ་རུ་ར་ལ་སོགས་པའི་སྐྱོ་མ་བླུད་དོ། །
[165a]
[165a.1]ཡང་ན་འབྲ་གོ་དང་། རྒུན་འབྲུམ་དང་། མ་དུ་ཀ་དང་། པ་རུ་ཤ་ཀ་དང་། འདི་རྣམས་ཁ་ར་དང་སྦྱར་བ་ནི་སྙིང་པོ་ལྔའི་སྐྱོ་མ་ཞེས་བྱ་སྟེ་བླུད་པའམ། ཡང་ན་སྙིང་པོ་ལྔའི་སྨན་ཁུའི་ནང་དུ་མར་དང་། སྦྲང་རྩི་དང་། འབྲས་ཡོས་ཀྱི་ཕྱེ་མ་དང་འདི་
[165a.2]རྣམས་ཆུ་དང་སྦྱར་བའི་སྐྱོ་མ་བླུད་དོ། །གལ་ཏེ་སྐྱུ་རུ་ར་ལ་དགའ་ཞིང་མེ་དྲོད་ཆུང་བ་ཡིན་ན་ནི་སྐྱུ་རུ་ར་དང་སེའུ་འབྲུ་ལྟ་བུ་གདབ་པོ། །དེ་ལ་ཐུག་པ་ནི་པདྨ་གེ་སར་དང་། ཨུཏྤ་ལའི་གེ་སར་དང་། ཀྲྀཥྞ་པརྞི་དང་། པྲི་ཡང་ཀུ་རྣམས་བསྐོལ་བའི་ཐུག་པའམ། ཡང་ན་པུ་
[165a.3]ཤེལ་ཙེའམ། སེང་ཕྲོམ་དཀར་པོ་དང་ཙནྡན་དང་། འདི་རྣམས་བསྐོལ་བའི་ཐུག་པའི་ནང་དུ་བཅའ་སྒ་བཏབ་པའམ། ཡང་ན་བ་ལ་ཀ་དང་། ད་ཏ་ཀའི་མེ་ཏོག་དང་། བིལ་བའི་རྐང་དང་། བྱི་ཚེར་བ་དང་། འདི་རྣམས་སྦྱར་བའི་ཐུག་པའམ། ཡང་ན་ཏིག་ཏ་དང་།
[165a.4]པུ་ཤེལ་ཙེ་དང་། གླ་སྒང་དང་། འདི་རྣམས་སྦྱར་བའི་ཐུག་པའམ། ཡང་ན་སྲན་ཆུང་དང་། ཀྲྀཥྞ་པརྞི་སྦྱར་བའམ། ཡང་ན་ས་ལ་པརྞི་འམ། མོན་སྲན་སྡེའུ་དང་སྦྱར་བའི་ཐུག་པའམ། ཡང་ན་བ་ལ་དང་། ཧ་རེ་ཎུ་ཀ་དང་། མར་དང་སྦྱར་བའམ། གོང་གི་ཐུག་པའི་
[165a.5]སྦྱོར་བ་དེ་རྣམས་བསིལ་བའི་ནུས་པ་དང་ལྡན་པ་སྲོག་ཆགས་ཐང་ལ་གནས་པའི་ཤ་ཁུ་ལས་གཞི་བླངས་པའི་ཐུག་པ་གྲང་མོའི་ནང་དུ་སྦྲང་རྩི་དང་ཁ་ར་བཏབ་སྟེ། སྦྱོར་བ་རེ་རེ་ནས་དེ་ལྟར་སྦྱར་རོ། །དེ་བཞིན་དུ་བསིལ་བའི་ནུས་པ་དང་ལྡན་པའི་ཤ་ཁུའི་ནང་དུ་མངར་ལ་
[165a.6]དད་པ་ཡིན་ན་མར་དང་བརྔོས་ལ་ཤ་ཁ་ར་དང་ལྡན་པར་སྦྱིན་ནོ། །སྐྱུར་ལ་དད་པ་ཡིན་ན་ནི་སྐྱུར་ལ་བཏང་བ་བླུད་དོ། །ཁ་ཟས་ཀྱི་ཚུལ་བརྟག་ཅིང་ཤེས་པའི་ལེའུ་ལས་ཡང་ཞིང་བསིལ་བའི་ཁ་ཟས་གྲང་བ་དང་། གང་བུ་ལས་སྐྱེས་པའི་འབྲུ་དང་། ཚོད་མ་ཡང་བ་དང་
[165a.7]བསིལ་བའི་ནུས་པ་ཅན་ཁྲག་མཁྲིས་ལ་རབ་ཏུ་བསྔགས་སོ། །བཏུང་བ་ནི་གོང་དུ་སྨོས་པའི་ཡན་ལག་དྲུག་པའི་སྨན་ལས་དོང་གྲ་སྤངས་པའི་བཏུང་བའམ། ཡང་ན་རྩ་བ་ཆུང་ངུ་ལྔ་བསྐོལ་བའམ། ཡང་ན་ཆུ་བསྐོལ་བ་བསྒྲངས་པའམ། ཡང་ན་སྦྲང་རྩིའི་ཆུའམ། ཡང་ན་
[165b]
[165b.1]མཁྲིས་པ་འཇོམས་པའི་འབྲས་བུ་རྒུན་འབྲུམ་དང་། འབྲ་གོ་ལ་སོགས་པ་བསྐོལ་བའི་ཆུ་བླུད་དོ། །རྟུག་པ་འགགས་པ་ལ་ནི་རྒྱ་སྣེའུ་དང་། རི་བོང་གི་ཤ་དང་སྦྱར་བ་ཕན་ནོ། །རླུང་ཤས་ཆེ་བའི་རྟུག་པ་འགགས་པ་ལ་ནི་སྲེག་པའི་ཤ་དང་ཨུ་དུམྦཱ་ར་བསྐོལ་བ་བླུད་པའམ། ཡང་
[165b.2]ན་ཤིང་པླག་ཤ་བསྐོལ་བའི་ནང་དུ་རྨ་བྱའི་ཤ་དང་སྦྱར་བའམ། ཡང་ན་ནྱ་གྲོ་དྷ་དང་ཁྱིམ་བྱའི་ཤ་དང་བསྐོལ་བ་བླུད་དོ། །མདོར་ན་ཁྲག་དང་མཁྲིས་པ་སྐྱེ་བའི་རྒྱུ་དྲོ་བ་དང་རྣོ་བ་ཐམས་ཅད་སྤང་བར་བྱའོ། །བ་ཤ་ཀ་བསྐོལ་བའི་ཁུ་བའི་ནང་དུ་པྲི་ཡང་ཀུ་དང་། ས་ནག་པོ་
[165b.3]དང་། སྐྱེར་ཁཎྜ་དང་། སེང་ཕྲོམ་དང་། སྦྲང་རྩི་སྦྱར་བ་འཐུངས་ན་ཁྲག་མཁྲིས་འཇོམས་སོ། །ཡང་ན་བ་ཤ་ཀ་ཉི་ཚེ་བསྐོལ་བའི་ཁུ་བའམ། ཡང་ན་བ་ཤ་ཀ་བསྐོལ་བའི་ཁུ་བའི་ནང་དུ་སྦྲང་རྩི་དང་། ཁ་ར་བཏབ་པ་འཐུངས་ན་དེ་མ་ཐག་ཏུ་ཁྲག་མཁྲིས་འཇོམས་སོ། །
[165b.4]ཁྲག་མཁྲིས་ལ་ནི་བ་ཤ་ཀ་འདི་ལས་ལྷག་པ་མེད་དོ། །པ་ཏོ་ལ་དང་། སུ་མ་ན་དང་། ཙནྡན་རྣམ་གཉིས་དང་། ནིམ་པ་དང་། ཤུག་པ་དང་། དེ་རྣམས་ལྷན་ཅིག་སྦྱར་བའམ། ཡང་ན་སེང་ཕྲོམ་དང་། བ་ཤ་ཀ་དང་། མོན་སྣེའུ་དམེ་རུ་དང་། ས་ནག་པོ་དང་། མ་དུ་
[165b.5]ཡན་ཏི་ཀ་ཞེས་བྱ་བ་སེན་རྩི་རྣམས་སྦྱར་བའམ། ཡང་ན་ཉེའུ་ཤིང་ཐལ་ཏྲེས་དང་། རམ་ཉེ་བ་རྣམ་གཉིས་དང་ཤིང་མངར་དང་འདི་རྣམས་སྦྱར་བའམ། སྦྱོར་བ་དེ་གསུམ་གང་ཡང་རུང་བ་བསྐོལ་བའི་ཁུ་བའི་ནང་དུ་ཁ་ར་དང་། སྦྲང་རྩི་དང་ལྡན་པ་འཐུངས་ན། ཁྲག་
[165b.6]མཁྲིས་འཇོམས་སོ། །ཡང་ན་རྒྱ་སྐྱེགས་ཤིང་གི་ཤུན་པ་བསྐོལ་བའི་ནང་དུ་ཀ་ར་བཏབ་པ་འཐུངས་ན་ཡང་ཕན་ནོ། །ཡང་ན་བ་གླང་གི་ལྕི་བ་དང་། རྟ་རྟུག་བཙིར་བའི་ཁུ་བའི་ནང་དུ་སྦྲང་རྩི་དང་མར་བཏབ་པ་བཏུང་ངོ་། །ཁྲག་སྐ་བར་བྱུང་བ་ལ་ནི་བྱ་ཕུག་རོན་གྱི་རྟུག་
[165b.7]པ་སྦྲང་རྩི་དང་སྦྱར་ཏེ་བལྡག་གོ། །ཁྲག་ཤས་ཆེར་འབྱུང་བ་ལ་ནི་སྐམ་ས་ན་གནས་པའི་བྱ་དང་། རི་དགས་ཀྱི་ཁྲག་སྦྲང་རྩི་དང་སྦྱར་བ་བཏུང་ངོ་། །ཡང་ན་རའི་མཚན་མ་མཁྲིས་པ་དང་བཅས་པ་བཙོས་པའམ། མ་བཙོས་པ་ཡང་རུང་ཟོས་ན་ཕན་ནོ། །ཡང་ན་
[166a]
[166a.1]སྨན་པ་ལ་ནི་བསྐོལ་བའི་ཁུ་བ་སྲང་དྲུག་ཙམ་གྱི་ནང་དུ་ཙནྡན་དང་། པུ་ཤེལ་ཙེ་དང་། གླ་སྒང་དང་། འབྲས་ཡོས་དང་། མུངྒ་དང་། པི་པི་ལིང་དང་། ནས་དང་། འདི་རྣམས་བཏགས་པའི་ཕྱེ་མ་བཅུག་ལ་སྤངས་ཏེ། ནང་པར་བཙགས་ལ་ཚིགས་མ་
[166a.2]བོར་ཏེ། དངས་མ་བླུད་ན་ཁྲག་མཁྲིས་འཇོམས་སོ། །ཙནྡན་དང་། པདྨ་དང་། པུ་ཤེལ་ཙེ་དང་། དེ་གསུམ་གྱི་ཁུ་བའི་ནང་དུ་བོང་བ་བསྲེགས་པ་དམར་པོར་གྱུར་པ་བཅུག་སྟེ། སྤངས་པའི་དངས་མ་བསྒྲངས་པའི་ནང་དུ་སྦྲང་རྩི་དང་། ཁ་ར་བཏབ་པ་བླུད་ན་ཁྲག་མཁྲིས་ཤས་ཆེ་བ་
[166a.3]ལས་རྒྱལ་ལོ། །བུ་རམ་ཤིང་གི་ཚིགས་མ་བརྡུངས་པ་ཆུ་དང་མཉེས་པའི་ཁུ་བ་རྫ་སྣོད་གསར་པའི་ནང་དུ་བཅུག་ལ། ཁང་པའི་ཕྱི་རོལ་དུ་བཞག་སྟེ་བསྲུངས་ལ་ཐོ་རངས་རས་ལ་བཙགས་ཏེ་ཚིགས་མ་བོར། དངས་མ་སྦྲང་རྩི་དང་བཅས་པ་མེ་ཏོག་པདྨ་ཁ་ཕྱེ་བའི་དྲིས་
[166a.4]བསྒོས་པ་འཐུངས་ན་ཕན་ཡོན་གོང་མ་དང་འདྲའོ། །མཁྲིས་པའི་རིམས་འཇོམས་པའི་སྨན་དུག་མོ་ཉུང་ལ་སོགས་པའི་སྨན་ཐམས་ཅད་ཀྱང་ཁྲག་མཁྲིས་ལ་སྦྱར་བར་བྱའོ། །གོང་མའི་སྨན་ཁུ་བའི་སྦྱོར་བ་དེ་དག་གིས་མེ་དྲོད་སྐྱེས་ཏེ། བད་ཀན་ཟད་པ་དང་། ཁྲག་
[166a.5]མཁྲིས་ད་རུང་མ་ཞི་ཞིང་། རླུང་དང་འདྲེས་ནས་འཁྲུགས་པ་ལ་ནི་རའི་འོ་མའམ། བའི་རྣམ་ལྔ་ཆུ་ལྔ་འགྱུར་དང་བསྐོལ་ལ་ཆུ་དུ་བ་དང་བླུད་ན་ཕན་ནོ། །ཡང་ན་རྩ་བ་ལྔ་པ་ཆུང་ངུ་དང་། བའི་རྣམ་ལྔ་དང་རའི་འོ་མ་བསྐོལ་བ་སྦྲང་རྩི་དང་། ཁ་ར་བཏབ་པ་བཏུང་ངོ་། །ཡང་ན་
[166a.6]རྒུན་འབྲུམ་དང་། བཅའ་སྒ་དང་། བ་ལ་དང་། གཟེ་མ་དང་། ཛི་བ་ཀ་དང་། ཟངས་རྩི་བ་དང་། དེ་རྣམས་རེ་རེ་ཡང་ཆུ་དང་བསྐོལ་བའི་ནང་དུ་འོ་མ་དང་། མར་བཏབ་པ་སྦྱར་ཏེ་གཏང་ངོ་། །ཡང་ན་འོ་མ་དང་ཁ་ར་དང་བསྐོལ་ཏེ་མར་དང་སྦྱར་ལ་གཏང་ངོ་། །གཟེ་མ་དང་ཉེའུ་ཤིང་འོ་མ་དང་
[166a.7]བསྐོལ་བའམ། ཡང་ན་འདབ་མ་རྣམ་བཞི་འོ་མ་དང་བསྐོལ་བ་འཐུངས་ན་ཁྲག་ནད་མྱུར་དུ་ཞི་བར་འགྱུར་ཞིང་། ཁྱད་པར་དུ་གཅིན་འོང་བའི་བུ་ག་ནས་ཁྲག་འབྱུང་བ་ལ་ཕན་ནོ། །ཁྲག་རྐུབ་ནས་འབྱུང་བ་ལ་ནི་ཆུ་ཤིང་གི་ཁུ་བ་དང་འོ་མ་སྦྱར་བ་བླུད་ན་ཕན་ནོ། །ཡང་ན་ནྱ་གྲོ་དྷའི་མྱུ་གུ་འོ་མ་དང་
[166b]
[166b.1]བསྐོལ་བའམ། ཡང་ན་བཅའ་སྒ་དང་། ཨུ་དི་ཙ་དང་། ཨུཏྤལ་དང་འོ་མ་བསྐོལ་བ་བླུད་ན་ཕན་ནོ། །ཡང་ན་ཁྲག་ཏུ་འཁྲུ་བའི་གསོ་བ་དང་། གཞང་འབྲུམ་ཁྲག་ཚད་ཅན་གྱི་གསོ་བ་ཇི་སྙེད་པའང་འདིར་སྦྱར་རོ། །སྨན་ཁུ་བ་འཐུངས་པའི་འོག་ཏུ་བཟའ་བ་ཡང་གོང་
[166b.2]མའི་འོག་མ་བསྐོལ་བ་དང་སྦྱར་རོ། །ཡང་ན་གོང་གི་སྦྱོར་བ་དེ་དག་མར་དང་སྦྱར་བ་གཏང་ངོ་། །བ་ཤ་ཀའི་ལོ་མ་དང་། སྡོང་བུ་དང་། རྩ་བ་དང་བཅས་པ་སྲང་སུམ་ཅུ་རྩ་གཉིས་དང་། དེའི་བརྒྱད་འགྱུར་གྱི་ཆུ་སྲང་ཉིས་བརྒྱ་ལྔ་བཅུ་རྩ་དྲུག་དང་བསྐོལ་ཏེ། བརྒྱད་ཆ་ལུས་པ་
[166b.3]དང་། ཚིགས་མ་བོར་བའི་ནང་དུ་མར་སྲང་བརྒྱད་དང་། བ་ཤ་ཀའི་མེ་ཏོག་སྲང་གཉིས་ཕྱེ་མར་བྱས་ཏེ་བཏབ་པ་ཡང་བསྐོལ་ཏེ་བསྒྲངས་པའི་ནང་དུ་སྦྲང་རྩི་དང་ལྡན་པར་འཐུངས་ན། ཁྲག་མཁྲིས་དང་། མཁྲིས་པའི་སྐྲན་དང་། རིམས་དང་། དབུགས་མི་བདེ་བ་དང་།
[166b.4]ལུད་པ་དང་། སྙིང་ནད་དང་། མིག་སེར་དང་། རབ་རིབ་དང་། མགོ་འཁོར་བ་དང་། མེ་དབལ་དང་། སྐད་འགགས་པ་རྣམས་འཇོམས་སོ། །རྒྱ་སྐྱེགས་ཤིང་གི་ལོ་མ་བཙིར་བའི་ཁུ་བ་དང་། དེའི་བཞི་ཆའི་མར་དང་བསྐོལ་བའི་ནང་དུ་མར་གྱི་བཞི་ཆ་བ་ལ་ཤ་
[166b.5]རྒྱ་སྐྱེགས་ཤིང་གི་ལོ་མ་དང་། སྦྲང་རྩི་བཏབ་སྟེ་འཐུངས་ན་ཁྲག་མཁྲིས་འཇོམས་སོ། །དེ་བཞིན་དུ་ཀྱི་ལྕེ་བའི་ལོ་མ་ཡང་སྦྱོར་བ་དེ་ལྟར་བྱས་ན་ཕན་ཡོན་དེ་དང་འདྲའོ། །མགུལ་པ་ནས་ཁྲག་ལྦུ་བ་ཅན་དང་བད་ཀན་དང་བཅས་པ་སྐ་བར་འབྱུང་བ་ལ་ནི་ཨུཏྤ་ལའི་
[166b.6]སྡོང་བུ་བསྲེགས་པའི་ཐལ་བ་དང་། མར་དང་སྦྲང་རྩི་རྣམས་འདག་གུར་བྱས་ཏེ་སྦྱིན་ནོ། །ཡང་ན་ཨུཏྤ་ལ་དང་། པདྨ་དང་། པྲི་ཡང་ཀུ་དང་། ཤིང་མ་དུ་ཀ་དང་། དེ་རྣམས་རེ་རེ་ཐལ་སྦྱོར་གོང་མ་དང་བྱས་ན་ཡང་ཕན་ནོ། །རྐུབ་ནས་མར་ཁྲག་ཤས་ཆེར་འབྱུང་བ་
[166b.7]ལ་ནི་རུ་ཧ་དང་། ཁྲག་མཁྲིས་འཇོམས་པའི་སྨན་གྱིས་འཇམ་རྩི་བྱའོ། །སྣ་ནས་ཁྲག་སྐྱོན་མེད་པར་འབྱུང་བ་ལ་ནི། སྣ་ནས་གཞུག་པ་དང་བླུགས་པའི་སྨན་བྱ་སྟེ། དེ་ཡང་གོང་གི་སྦྱར་སྨན་བསྐོལ་བའི་ཁུ་བའི་ནང་དུ་འོ་མ་དང་། བུ་རམ་ཤིང་གི་ཁུ་བ་ལ་སོགས་
[167a]
[167a.1]པ་དང་བསྲེས་ཏེ་བླུགས་པར་བྱའོ། །ཡང་ན་འོ་མ་ལ་སོགས་པ་དེ་དག་ཁ་ར་དང་སྦྱར་བའམ། ཡང་ན་ཆུ་ཉི་ཚེ་བླུགས་ན་ཕན་ནོ། །ཡང་ན་སེའུའི་མེ་ཏོག་དང་། ཨ་མྲ་དང་། ཤར་དུ་ལ་དང་།
[167a.2]དེ་གསུམ་གང་ཡང་རུང་བའི་སྣ་སྨན་བཏང་ངོ་། །ཡང་ན་སྨན་བསིལ་བའི་སྨན་རྩྭ་དཱུར་བ་དང་། བྱི་ཚེར་བ་ལ་སོགས་པས་ལུས་བྱུག་པ་དང་། བསྐུ་མཉེ་དང་། རྒྱུན་བླུགས་པ་དང་། སྨན་ཁུ་གྲང་མོའི་ནང་དུ་ལུས་འཇུག་པ་ལ་སོགས་པ་ཡང་བྱའོ། །
[167a.3]མཁྲིས་པའི་རིམས་ཀྱི་ནད་དུ་བཤད་པའི་ལུས་ཀྱི་ནང་དང་། ཕྱི་རོལ་ནས་སྨན་དུ་བྱ་བ་ཐམས་ཅད་དང་། གློ་འགྲམས་པ་དང་། ཟད་བྱེད་ཀྱིས་གསོ་བ་ཐམས་ཅད་ཀྱང་ཁྲག་མཁྲིས་འདི་ལ་ཕན་པ་ཡིན་པར་སྦྱར་རོ། །གསོ་བའི་གནས་ལས་ཁྲག་
[167a.4]མཁྲིས་གསོ་བའི་ལེའུ་སྟེ་གཉིས་པ་རྫོགས་སོ།། །།དེ་ནས་ལུད་པ་དང་གློ་ནད་གསོ་བའི་ལེའུ་བཤད་པར་བྱ་སྟེ། དེ་ལ་རླུང་འབའ་ཞིག་ལས་གྱུར་པའི་ལུད་པའི་ནད་ལ་ནི། ཐོག་མར་རླུང་ལ་ཕན་པའི་སྨན་སྣ་ཚོགས་དང་སྦྱར་བའི་སྣུམ་གྱི་ཆོ་ག་སྤྱད་
[167a.5]པར་བྱ་སྟེ། དེ་ཡང་སྣུམ་དང་སྦྱར་བའི་ཐུག་པ་དང་། ཁུ་བཅུད་གཏང་བ་དང་། བལྡག་པ་དང་། བསྐུ་བ་དང་། དུགས་དང་། དུད་པས་བདུག་པ་དང་། དེ་བཞིན་དུ་བཟའ་བ་དང་། བཏུང་བ་ཐམས་ཅད་སྣུམ་དང་བཅས་པར་བྱའོ། །གཞན་ཡང་རྟུག་པ་འགགས་
[167a.6]པ་ལ་ནི་འཇམ་རྩི་མས་གཏོང་བས་བསལ་བར་བྱའོ། །རླུང་ལས་གྱུར་བའི་ལུད་པ་དེ་མཁྲིས་པ་དང་བཅས་པར་གྱུར་ན། ཐོག་མ་ཟས་ཟོས་ལ་དེའི་འོག་ཏུ་མར་དང་འོ་མ་ཉལ་ཀར་བཏུང་ངོ་། །རླུང་ལས་གྱུར་པའི་ལུད་པ་བད་ཀན་དང་བཅས་པ་ཡིན་ན་ནི། སྣུམ་དང་བཅས་
[167a.7]པའི་བཀྲུ་སྨན་གཏང་བར་བྱའོ། །དེ་ལ་རླུང་ལ་ཕན་པའི་སྨན་ནི་སླེ་ཏྲེས་དང་། ཀཎྜ་ཀ་རི་གཉིས་སྲང་སུམ་ཅུ་བསྐོལ་བའི་ཁུ་བའི་ནང་དུ་མར་སྲང་སུམ་ཅུ་རྩ་གཉིས་དང་བསྐོལ་ཏེ། ཆུ་ནི་དུ། མར་ནི་ལུས་པ་དང་དེ་ནས་བླུད་ན་རླུང་ལས་གྱུར་པའི་ལུད་པ་སེལ་ཞིང་མེའི་དྲོད་སྐྱེད་
[167b]
[167b.1]པར་བྱེད་དོ། །ཡ་བཀྵ་ར་དང་། ར་སྣ་དང་། ཤུ་དག་དང་། ཤིང་ཀུན་དང་། པ་ཐ་དང་། ཤིང་མངར་དང་། འུ་སུ་དང་། ཚ་བ་རྣམ་ལྔ་དང་། དེ་རྣམས་ཞོ་རེ་རེ་དང་། མར་ཁུ་བྲེ་གང་དང་། རྩ་བ་བཅུ་པ་བསྐོལ་བའི་ཁུ་བ་མར་གྱི་བཞི་འགྱུར་དང་ལྷན་
[167b.2]ཅིག་བསྐོལ་ལ། མར་ལུས་པ་དང་། དེ་ལས་ཅི་རན་ཙམ་འཐུངས་པའི་རྗེས་ལ་འབྲས་ཐུག་བླུད་ན། ལུད་པ་ལུ་བ་དང་། དབུགས་མི་བདེ་བ་དང་། སྙིང་ན་བ་དང་། རྩིབ་ལོགས་ན་བ་དང་། ཕོ་བའི་ནད་དང་། སྐྲན་ལ་སོགས་པ་སེལ་བར་བྱེད་དོ། །ཡང་
[167b.3]ན་ར་སྣ་དང་། རྩ་བ་བཅུ་པ་དང་། ཉེའུ་ཤིང་དང་། འདི་རྣམས་སྲང་བཅུ་གཉིས་བཅུ་གཉིས་དང་། རྒྱ་སྲན་དང་། རྒྱ་ཤུག་དང་། ནས་འདི་རྣམས་སྲང་བརྒྱད་བརྒྱད་དང་། ར་ཤ་སྲང་བཅུ་དང་། ཆུ་སྲང་ལྔ་བརྒྱ་དང་། འདི་རྣམས་ལྷན་ཅིག་
[167b.4]བསྐོལ་ཏེ་བཞི་ཆ་ལུས་པ་དང་། དེ་དང་མཉམ་པའི་མར་དང་། མར་གྱི་ཚད་ཀྱི་འོ་མ་དང་། ཛི་བན་ཏིའི་སྡེ་ཚན་ལྷན་ཅིག་བསྐོལ་ཏེ། མར་ལུས་པ་དང་། དེ་ལས་བཏུང་བ་དང་། སྣར་བླུགས་པ་དང་། འཇམ་རྩི་མས་གཏོང་བ་ལ་སོགས་པ་བྱས་ན། རླུང་ལས་
[167b.5]གྱུར་པ་ལ་སོགས་པའི་ལུད་པ་རྣམ་ལྔ་དང་། མགོ་འདར་བ་དང་། མོ་མཚན་དང་། བརླ་བྲག་གི་ནད་དང་། ལུས་དང་ཡན་ལག་གང་ཡང་རུང་བ་ལ་རླུང་ནད་བྱུང་སྟེ་ན་བ་དང་། མཆིན་པ་ན་བ་དང་། རོ་སྟོད་མན་ཆད་ཀྱི་རླུང་ནད་སེལ་ཏོ། །ཡང་ན་བྱི་རིའི་སྡེ་ཚན་ཆུ་དང་
[167b.6]ཚུལ་བཞིན་དུ་བསྐོལ་བ་བཞི་ཆ་ལུས་པ་དང་། ཁུ་བའི་བཞི་ཆའི་མར་དང་ལྷན་ཅིག་བསྐོལ་ལ། མར་ལུས་པ་དང་། བི་ད་རའི་ཕྱེ་མ་ཉུང་ཟད་བཏབ་སྟེ། དེ་ལས་རན་པར་ཟོས་ན་ལུད་པའི་ནད་སེལ་ཏོ། །ཡང་ན་ཤིང་ཨ་ཤྭ་ཀའི་ས་བོན་དང་། ཤིང་མངར་དང་། བི་
[167b.7]ད་ཀ་དང་། སྐྱེར་ཁཎྜ་དང་། ཤུག་པ་དང་། ལན་ཚྭ་བྱིལ་དང་། ཁ་རུ་ཚ་དང་བཅས་པ་འདི་རྣམས་མར་དང་ཚུལ་བཞིན་དུ་སྦྱར་བའམ། ཡང་ན་སྨན་དེ་རྣམས་ཀྱི་ཕྱེ་མ་མར་དང་སྦྱར་བའི་ལྡེ་གུ་སྦྱིན་ཞིང་དེའི་འོག་ཏུ་འོ་མ་བླུད་པས་ནད་ཞི་བར་བྱེད་དོ། །ཡང་ན་བྱི་དང་ག་དང་། དོང་
[168a]
[168a.1]གྲ་དང་། ར་སྣ་དང་། པི་པི་ལིང་དང་། ཤིང་ཀུན་དང་། ལྕེ་མྱང་ཚ་དང་། བར་གྱི་ཞེས་བྱ་བ་ག་བྲའི་རྩ་བ་དང་། ཡ་བཀྵ་ར་དང་། འདི་རྣམས་ཀྱི་ཕྱེ་མ་ཆུ་དོན་དང་སྦྱར་བའམ། ཡང་ན་མར་ཅི་རན་ཙམ་དང་སྦྱར་བ་འཐུངས་ན། རླུང་དང་བད་
[168a.2]ཀན་ལས་གྱུར་པའི་ལུད་པ་དང་། དབུགས་མི་བདེ་བ་དང་། སྐྱིགས་བུ་དང་། མེའི་དྲོད་ཆུང་བ་རྣམས་ཞི་བར་བྱེད་དོ། །ཡང་ན་རླུང་ལས་གྱུར་པའི་ལུད་པ་ལ་ནི་བྱི་ཚེར་བ་དང་། སྲིང་ག་བི་ར་ཞེས་བྱ་བ་བཅའ་སྒ་དང་། ཟུར་པ་དཀར་པོ་དང་། རྒུན་འབྲུམ་དང་། ཁ་ར་
[168a.3]དཀར་པོ་དང་། སྲིང་ག་ཏ་ཀ་དང་། འདི་རྣམས་ཏིལ་མར་དང་སྦྱར་བའི་ལྡེ་གུ་བྱིན་ན། རླུང་ལས་གྱུར་པའི་ལུད་པ་སེལ་ཏོ། །ཡང་ན་དུས་པར་ཤ་ཞེས་བྱ་བ་བྱི་ཚེར་བ་དང་། པི་པི་ལིང་དང་། མུ་ཏ་ཞེས་བྱ་བ་གླ་སྒང་དང་། ག་བྲའི་རྩ་བ་དང་། ཀར་ཀ་ཏ་སྲིང་གི་ནི་དང་།
[168a.4]ཥ་ཊི་ཞེས་བྱ་བ་ཟུར་པ་དཀར་པོ་དང་། འདི་རྣམས་ཀྱི་ཕྱེ་མ་བུ་རམ་རྙིང་པ་དང་། ཏིལ་མར་དང་སྦྱར་བའི་ལྡེ་གུ་བྱིན་ན། རླུང་ལས་གྱུར་པའི་ལུད་པ་སེལ་ཏོ། །པི་པི་ལིང་དང་། བཅའ་སྒ་དང་། ཀར་ཀ་ཏ་སྲིང་ག་དང་། འདི་རྣམས་ཀྱི་ཕྱེ་མ་བུ་རམ་རྙིང་པ་དང་ཏིལ་མར་
[168a.5]དང་སྦྱར་བའི་ལྡེ་གུ་བྱིན་ན། རླུང་ལས་གྱུར་པའི་ལུད་པ་སེལ་ཏོ། །པི་པི་ལིང་དང་། སེན་ད་པ་གཉིས་ཀྱི་ཕྱེ་མ་ཆུ་དྲོན་མོ་དང་སྦྱར་བ་རླུང་ལས་གྱུར་པའི་ལུད་པ་ཅན་ལ་སྦྱིན་ནོ། །ཡང་ན་བཅའ་སྒ་དང་། ཁ་ར་དཀར་པོའི་ཕྱེ་མ་ཞོ་ག་ཆུའི་ནང་དུ་བཏབ་སྟེ་བླུད་པའམ། ཡང་
[168a.6]ན་པི་པི་ལིང་དང་། ལྕེ་མྱང་ཚ་གཉིས་ཀྱི་ཕྱེ་མ་ཆུ་དང་བསྐོལ་བའི་ཁུ་བའི་ནང་དུ་མར་ཁོལ་ཐག་ཆད་པ་ཅུང་ཟད་བླུགས་ཏེ། ཆང་ངམ་ཞོ་ག་ཆུ་གང་ཡང་རུང་བ་དང་བསྲེས་པ་བླུད་ན། རླུང་ལས་གྱུར་པའི་ལུད་པ་སེལ་ཏོ། །ལུད་པ་དང་བཅས་པའི་ཆམ་པ་ལ་ནི་ཐོག་མར་འོ་མ་
[168a.7]དང་། ཤ་ཁུ་དང་བཅས་པའི་བཟའ་བ་སྦྱིན་ལ། དེའི་འོག་ཏུ་སྣུམ་དང་བཅས་པའི་དུད་པའི་ཆོ་ག་གོང་དུ་བསྟན་པ་རྣམས་བྱའོ། །གཞན་ཡང་སྐྱིགས་བུ་དང་དབུགས་མི་བདེ་བའི་ནད་ལ་དུད་པ་བཏང་བའི་ཆོ་ག་འོག་ནས་བསྟན་པ་རྣམས་ལ་ཡང་ལུད་པའི་ཆམ་པ་བཞིན་དུ། ཐོག་
[168b]
[168b.1]མར་འོ་མ་དང་ཤ་ཁུའི་བཅུད་བྱིན་ལ། དེའི་འོག་ཏུ་དུད་པ་གཏང་བར་བྱའོ། །ཁ་ཟས་ནི་དྲོ་བ་དང་། ཐང་དང་ཆུ་ལ་གནས་པའི་སྲོག་ཆགས་ཀྱི་ཤ་ཁུ་དང་། མོན་སྲན་གྲེའུ་དང་། ཨད་མ་ཀུབ་ཏ་ཞེས་བྱ་བ་ཁ་སྲལ་ཕྲེའུའི་ཁུ་བ་གང་ཡང་རུང་བ་འབྲས་སཱ་ལུ་དང་། ནས་
[168b.2]དང་གྲོ་དང་། ཞག་དྲུག་ཅུ་པའི་འབྲས་གང་ཡང་རུང་བ་དང་སྦྱོར་བའི་ཟས་བྱིན་ན། རླུང་ལས་གྱུར་པའི་ལུད་པ་སེལ་ཏོ། །ཡང་ན་ལ་ལ་ཕུད་དང་། པི་པི་ལིང་དང་། བིལ་བའི་རྐང་དང་། དོང་གྲ་དང་། རྩི་ཏྲ་ཀ་དང་། ར་སྣ་དང་། ཨ་ཛ་ཛི་ཞེས་བྱ་བ་ཟ་རི་དང་། ཀྲྀཥྞ་
[168b.3]པརྞི་དང་། པ་ལ་ཤ་དང་། ཟུར་པ་དང་། མ་ནུ་དང་། འདི་རྣམས་བསྐོལ་བའི་ཁུ་བ་ལས་གཞི་བླངས་པའི་ཐུག་པའི་ནང་དུ་སྣུམ་དང་སྐྱུར་དང་ལན་ཚྭས་བཏབ་པ་བླུད་ན། རྐེད་པ་ན་བ་དང་། སྙིང་ན་བ་དང་། རྩིབ་ལོགས་ན་བ་དང་། ལྟོ་ན་བ་དང་། དབུགས་མི་བདེ་བ་
[168b.4]དང་། སྐྱིགས་བུ་རྣམས་སེལ་ཏོ། །ལྷག་པར་ཡང་རླུང་ལས་གྱུར་པའི་ལུད་པ་རྣམས་སྦྱོང་ངོ་། །རྩ་བ་བཅུ་བསྐོལ་བའི་ཁུ་བ་ལས་གཞི་བླངས་པའི་ཐུག་པའི་ནང་དུ་ཚ་བ་ལྔའི་ཕྱེ་མ་དང་བུ་རམ་བཏབ་སྟེ་བླུད་ན། རླུང་ལས་གྱུར་པའི་ལུད་པ་སེལ་ཏོ། །ཡང་ན་ཏིལ་དང་།
[168b.5]འབྲས་སཱ་ལུ་དང་། སྐྱུར་དང་། སྣུམ་དང་བཅས་པའི་ཐུག་པའམ། ཡང་ན་འབྲས་ཀྱི་འོ་ཐུག་རྒྱམ་ཚས་བཏབ་པ་བླུད་ན། རླུང་གི་ལུད་པ་ལ་ཕན་ནོ། །གོང་དུ་སྨོས་པའི་རྐེད་པ་ལ་སོགས་པའི་ནད་རྣམས་ཞི་བར་བྱེད་དོ། །ཉ་དང་། ཁྱིམ་བྱ་དང་། ཕག་དང་། འདི་
[168b.6]གསུམ་གང་ཡང་རུང་བའི་ཤ་ཁུ་ལས་གཞི་བླངས་པའི་ཐུག་པ་མར་དང་རྒྱམ་ཚ་དང་ལྡན་པར་བླུད་ན་ཕན་ཡོན་གོང་དང་འདྲའོ། །གཞན་ཡང་བ་སྤྲུ་ཀ་དང་། བ་ཡུ་སི་ཞེས་བྱ་བ་མོན་སྣེའུ་དམེ་རུ་དང་། ཀ་ས་གྷ་ནན་ཏི་དང་། ཀཎྜ་ཀ་རིའི་ལོ་མ་དང་། འབྲས་བུ་དང་། ལ་ཕུག་གཞོན་
[168b.7]ནུ་དང་། སྐམ་པོ་དང་། འདི་རྣམས་ལ་གཡོས་སུ་བྱས་པའི་ཚོད་མ་རླུང་ལས་གྱུར་པའི་ལུད་པ་ཅན་ལ་སྦྱར་རོ། །ཟས་ནི་སྣུམ་ཆེན་པོ་བཞི་དང་། འོ་མ་དང་། བུ་རམ་ཤིང་གི་ཁུ་བ་དང་། བུ་རམ་ལས་སྦྱར་བའི་བཏུང་བ་གོ་དྷི་ཀ་ཞེས་བྱ་བ་དང་། དེ་རྣམས་དང་ལྷན་ཅིག་སྦྱར་བ་
[169a]
[169a.1]བཟའོ། །སྐོམ་དུ་ནི་ཞོ་ག་ཆུ་དང་། རྩབ་མོ་དང་། སེའུ་འབྲུའི་བཏུང་བ་ཆུ་དང་སྦྱར་བ་ལ་སོགས་པ་དང་། ཆང་དང་། སྐོམ་འདི་རྣམས་རླུང་ལས་གྱུར་པའི་ལུད་པ་ཅན་ལ་བླུད་དོ། །མཁྲིས་པ་དང་བད་ཀན་ལས་
[169a.2]གྱུར་པའི་ལུད་པ་ལ་ནི་སྣུམ་དང་བཅས་པའི་སྐྱུག་སྨན་བཏང་ན་ཕན་ཏེ། དེ་བཞིན་དུ་པོ་སོན་ཆ་དང་། ཏང་པ་ལ་དང་། ཤིང་མངར་དང་། འདི་གསུམ་ཆུ་དང་བསྐོལ་བའི་ཁུ་བ་བླུད་དོ། །སློན་པར་བྱས་ན་ཕན་ནོ། །ཡང་ན་པོ་སོན་ཆ་དང་། ཤིང་མངར་
[169a.3]གྱི་ཕྱེ་མ་བུ་རམ་ཤིང་གི་ཁུ་བའམ། བི་ད་རའི་ཁུ་བ་གང་ཡང་རུང་བའི་ནང་དུ་བཏབ་སྟེ་བླུད་ན་སྐྱུགས་པར་འགྱུར་ཏེ། མཁྲིས་པ་དང་བད་ཀན་ལས་གྱུར་པའི་ལུད་པ་སེལ་ཏོ། །མཁྲིས་པ་ལས་གྱུར་པའི་ལུད་པ་བད་ཀན་གྱི་ཤས་ཆུང་ན་ནི། ཤིང་ཉེ་རོང་གཅིག་པུ་རྒུན་འབྲུམ་
[169a.4]ལ་སོགས་པའི་མངར་བག་དང་སྦྱར་བའི་བཀྲུ་སྨན་བཏང་ངོ་། །ཅི་སྟེ་བད་ཀན་གྱི་ཤས་ཆེ་ན་ཤིང་ཉེ་རོང་སྨན་ཁ་བའི་བག་དང་སྦྱར་ལ་བཏང་ངོ་། །དེ་ལྟར་སློན་ཁྲུས་ཀྱིས་ནད་དག་པར་བྱས་ནས། དེ་ཡང་མཁྲིས་པ་ཤས་ཆེ་ཞིང་བད་ཀན་ཆུང་བའི་ལུད་པའི་ནད་ལ་ནི། མངར་
[169a.5]བག་དང་། སྣུམ་བག་དང་སྦྱར་བའི་ཐུག་པ་གྲང་མོ་བླུད་དོ། །བད་ཀན་ཤས་ཆེ་ཞིང་མཁྲིས་པས་ཤས་ཆུང་བའི་ལུད་པ་ལ་ནི། སྨན་ཁ་བ་དང་། རྩུབ་པ་དང་སྦྱར་བའི་ཐུག་པ་གྲང་མོ་བླུད་དོ། །མཁྲིས་པ་ཉི་ཚེ་ལས་གྱུར་པའི་ལུད་པ་ལ་ནི། སི་ད་ཞེས་
[169a.6]བྱ་བའི་ཁ་ར་དཀར་པོ་དང་། ཨུཏྤ་ལ་དང་། འདི་རྣམས་སྦྲང་རྩི་དང་ལྡེ་གུར་བྱས་ནས་བྱིན་ན་ཞི་བར་འགྱུར་རོ། །བད་མཁྲིས་དང་བཅས་པའི་ལུད་པ་ལ་ནི། གོང་མའི་སྨན་གྱི་སྟེང་དུ་གླ་སྒང་དང་། ན་ལེ་ཤམ་གྱིས་བཏབ་སྟེ་སྦྱིན་ནོ། །མཁྲིས་པ་
[169a.7]དང་རླུང་ལས་གྱུར་པའི་ལུད་པ་ལ་ནི། གླ་སྒང་དང་། ན་ལེ་ཤམ་མ་གཏོགས་པ་གོང་མའི་སྦྱོར་བ་སྨན་གྱི་སྟེང་དུ་མར་གྱིས་བཏབ་པའི་ལྡེ་གུ་བལྡག་ཏུ་བཅུག་ན་ཕན་ནོ། །མཁྲིས་པ་ལས་གྱུར་པའི་ལུད་པ་ལ་ནི་རྒུན་འབྲུམ་ལྔ་བཅུ་པ་དང་། ཀ་ནི་ལི་ཞེས་བྱ་བའི་པི་པི་ལིང་
[169b]
[169b.1]སུམ་ཅུ་དང་། ཤ་ཁ་ར་སྲང་གཅིག་དང་། འདི་གསུམ་སྦྲང་རྩི་དང་ལྡེ་གུར་བྱས་ཏེ་སྦྱིན་ནོ། །ཡང་ན་བེའུ་རྩྭ་མ་ཟོས་པའི་ཚན་བུའི་ཁུ་བ་བཙིར་བ་དང་། སྦྲང་རྩིར་སྦྱར་བ་ཟོས་ན་མཁྲིས་པ་ལས་གྱུར་པའི་ལུད་པ་སེལ་ཏོ། །ཡང་ན་སྟར་ག་ཞེས་བྱ་བའི་ཤིང་ཚ་དང་།
[169b.2]བྱོ་ཤ་ཞེས་བྱ་བའི་ཚ་བ་གསུམ་དང་། རྒུན་འབྲུམ་དང་། པི་པི་ལིང་གི་རྩ་བ་དང་། མ་ནུ་དང་། འབྲས་ཡོས་དང་། གླ་སྒང་དང་། ཟུར་པ་དཀར་པོ་དང་། ར་སྣ་དང་། སྐྱུ་རུ་ར་དང་། ཤ་ཁ་ར་འདི་རྣམས་ཀྱི་ཕྱེ་མ་མར་དང་སྦྲང་རྩི་དང་སྦྱར་བའི་ལྡེ་གུ་ཟོས་ན་སྙིང་ནད་དང་། ལུད་
[169b.3]པའི་ནད་སེལ་ཏོ། །ཡང་ན་སྲོག་ཆགས་ཐང་ལ་གནས་པའི་མངར་བའི་ཤ་དང་། ཁྲེ་དང་ཁྲེ་རྒོད་ཀྱི་བཟའ་བ་དང་། མོན་སྲན་སྡེའུ་ལ་སོགས་པའི་ཁུ་བ་དང་། ཚོད་མ་ཁ་བར་སྦྱར་བ་ཟོས་ན་མཁྲིས་པ་ལས་གྱུར་པའི་ལུད་པ་སེལ་ཏོ། །བད་ཀན་ཤས་ཆེ་བ་ལ་ནི་སྨན་ཁ་བ་དང་།
[169b.4]སྦྲང་རྩི་དང་སྦྱར་བའི་ལྡེ་གུ་སྦྱིན་ནོ། །བད་ཀན་གྱི་ཤས་ཆུང་བ་ལ་ནི་འབྲས་དྲུག་ཅུ་པའི་ཆན་འོ་མ་ལ་སོགས་པའི་ཁུ་བ་དང་ལྷན་ཅིག་སྦྱིན་ནོ། །བཏུང་བ་ནི་ཤ་ཁ་ར་དང་སྦྱར་བའམ། ཡང་ན་རྒུན་ཆུའམ། བུ་རམ་ཤིང་གི་ཁུ་བའམ། འོ་མ་བསྐོལ་ལ་བསྒྲངས་པ་བླུད་
[169b.5]པར་བྱའོ། །ཀ་ཀོ་ལ་ཞེས་བྱ་བ་རམ་ཉེའུ་པ་རྣམ་གཉིས་དང་། མེ་ད་རྣམ་གཉིས་དང་། བྲི་ཧ་ཏི་རྣམ་གཉིས་དང་བྲི་ཤ་ཞེས་བྱ་བ་རྣམ་གཉིས་དང་། བ་ཤ་ཀ་དང་། དོང་གྲ་དང་འདི་རྣམས་ཞིབ་ཏུ་བཏགས་ཏེ། ཤ་ཁུའམ། འོ་མའམ། ཐུག་པ་གང་ཡང་རུང་བ་འུ་ཤར་
[169b.6]སྦྱར་ཏེ་བླུད་ན། མཁྲིས་པ་ལས་གྱུར་པའི་ལུད་པ་སེལ་ཏོ། །རྒུན་འབྲུ་དང་། པི་པི་ལིང་དང་། རྩྭའི་རྩ་བ་ལྔ་ཆུ་དང་བསྐོལ་བའི་ཁུ་བ་དང་། འོ་མ་དང་ཡང་བསྐོལ་བའི་ཆུ་ནི་དུ། འོ་མ་ལུས་པ་དང་། བསྒྲངས་པའི་སྟེང་དུ་སྦྲང་རྩི་དང་ཤ་ཁ་ར་བཏབ་པ་འཐུངས་ན། མཁྲིས་
[169b.7]པ་ལས་གྱུར་པའི་ལུད་པ་ཞི་བར་བྱེད་དོ། །ཡང་ན་གོང་མའི་སྨན་ཁུ་ལས་གཞི་བླངས་པའི་ཐུག་པ་བསྒྲངས་པའི་ནང་དུ་སྦྲང་རྩི་བཏབ་པ་བླུད་པའམ། ཡང་ན་ཟུར་པའམ། ཧྲི་བེ་ཌ་ཞེས་བྱ་བ་ཨུ་དི་ཙ་དང་། བྲི་ཧ་ཏི་དང་། ཤ་ཁ་ར་དང་། བི་ཤ་བེ་ཤ་རྩ་ཞེས་བྱ་བ་བཅའ་
[170a]
[170a.1]སྒ་དང་། འདི་རྣམས་ཆུ་དངས་སུ་བྱས་ཏེ། རས་ལས་བཙགས་ལ་ཚིགས་མ་བོར་བའི་ཁུ་བའི་ནང་དུ་མར་གྱིས་བསྲེས་ཏེ་འཐུངས་ན། མཁྲིས་པ་ལས་གྱུར་པའི་ལུད་པའི་ནད་ཞི་བར་བྱེད་དོ། །ཤ་ཁ་ར་དང་། ཛི་བ་ཀ་དང་། མུངྒ་པརྞི།
[170a.2]མ་ཤ་པརྞི་དང་། དུར་བ་ལ་ཞེས་བྱ་བ་བྱི་ཚེར་བ་དང་། འདི་རྣམས་ཆམ་ཆོམ་བརྡུངས་ཏེ། མར་གྱི་བརྒྱད་འགྱུར་གྱི་འོ་མ་དང་ཆུ་དང་ལྷན་ཅིག་བསྐོལ་ཏེ། མར་ཉི་ཚེ་ལུས་པ་དང་། དེ་ལས་བཏུང་བ་དང་། བཟའ་བ་དང་བསྐུ་བ་ལ་སོགས་པ་བྱས་ན་མཁྲིས་པ་ལས་
[170a.3]གྱུར་པའི་ལུད་པ་ལས་རྒྱལ་ལོ། །ཡང་ན་སྨན་གོང་མ་དེ་རྣམས་ཀྱི་ཕྱེ་མ་སྦྲང་རྩི་དང་སྦྱར་བའི་ལྡེ་གུའམ། ཡང་ན་བསྐོལ་བའི་ཁུ་བ་བསྒྲངས་པ་འཐུངས་ན་ཕན་ནོ། །བད་ཀན་ལས་གྱུར་པའི་ལུད་པའི་ནད་ལ་ནི་ཐོག་མར་ལྷ་ཤིང་ཞེས་བྱ་བ་ཐང་ཤིང་དང་མར་བསྐོལ་
[170a.4]ལ་མར་ལུས་པའི་ནང་དུ། ཚ་བ་གསུམ་དང་། ནས་ཚིགས་འཁུས་པའི་ཐལ་བའི་ཕྱེ་མ་བཏབ་པའི་མར་གྱི་སྣུམ་གྱི་ཆོ་ག་བྱ་སྟེ། དེའི་འོག་ཏུ་སྐྱུག་སྨན་དང་། བཀྲུ་སྨན་དང་། སྣ་སྨན་ལ་སོགས་པ་གོང་མའི་མར་ལས་གཞི་བླངས་ཏེ། ཉམས་དང་སྦྱར་བ་
[170a.5]ཅི་རིགས་པར་གཏང་ངོ་། །ནད་པ་ཉམས་སྟོབས་ཆུང་བ་ལ་ནི་སློན་ཁྲུས་དང་། སྣ་སྨན་དྲག་པོ་མི་གཏོང་ངོ་། །དེ་ལྟར་སློན་ཁྲུས་བྱས་པའི་རྗེས་ལ། ནས་དང་། མོན་སྲན་སྡེའུ་དང་། རྒྱ་སྲན་ལ་སོགས་པ་རྩུབ་པ་དང་། ན་ལེ་ཤམ་ལ་སོགས་པ་ཚ་བའི་སྨན་
[170a.6]སྦར་བའི་ཐུག་པ་དྲོན་མོ་བླུད་དོ། །ཀ་ས་མར་ད་ཀ་དང་། བརྟ་ཀ་ཞེས་བྱ་བ་དང་། བྱ་གྲྀ་ཞེས་བྱ་བ་ཀཎྜ་ཀ་རི་དང་། དེ་རྣམས་ཀྱི་ཚོད་མ་ཡ་བཀྵ་ར་དང་། པི་པི་ལིང་དང་ལྡན་པར་བྱས་ལ་སྦྱིན་ནོ། །སྲོག་ཆགས་ཐང་ལ་གནས་པ་དང་། ཁུང་ན་གནས་པའི་ཤ་ཁུ་ཏིལ་
[170a.7]དང་། ཡུངས་ཀར་དང་། བིལ་བ་དང་། དེ་རྣམས་གང་ཡང་རུང་བ་མར་དང་སྦར་བའི་ཁུ་བ་སྦྱིན་ནོ། །སྐོམ་དུ་ནི་རྩ་བ་བཅུ་པ་བསྐོལ་བའི་ཆུའམ། ཆུ་བསྐོལ་བའམ། ཡང་རྟག་ཏུ་ཆང་འཐུང་བ་ཡིན་ན་ཡང་ཆང་ངམ། ཡང་ན་སྦྲང་རྩི་དང་ཆུ་སྦྱར་བ་བླུད་དོ། །ཡང་
[170b]
[170b.1]ན་མ་ནུའི་རྩ་བ་དང་། དོང་གའི་རྩ་བ་དང་། པ་ཏོ་ལའི་རྩ་བ་དང་། དེ་རྣམས་ཆམ་ཆོམ་བརྡུངས་ལ་ཆུ་དང་ནུབ་གཅིག་སྤངས་ཏེ། དེའི་ཁུ་བ་སྦྲང་རྩི་དང་སྦྱར་བ་འཚལ་ནན་དུ་བླུད་ན་བད་ཀན་ལས་གྱུར་བའི་ལུད་པ་སེལ་ཏོ། །ཡང་ན་པི་པི་ལིང་དང་། པི་པི་ལིང་གི་རྩ་བ་དང་།
[170b.2]སྲིད་ཁ་བེ་རེ་ཞེས་བྱ་བ་བཅའ་སྒ་དང་། བ་རུ་ར་དང་དེ་རྣམས་སྦྲང་རྩི་དང་ལྡེ་གུར་བྱས་པ་བྱིན་ན་བད་ཀན་གྱི་ལུད་པ་འཕྲོག་གོ། །ཡང་ན་རྨ་བྱ་དང་། ཁྱིམ་བྱའི་སྒྲོ་ཞིག་ཁ་གབ་ཅན་གྱི་ནང་དུ་བཅུག་སྟེ་བསྲེགས་ལ། སྣག་ཚ་བཞིན་དུ་ནག་པོ་སོང་བ་དང་། ནས་ཚིག་
[170b.3]འཁུས་པའི་ཐལ་བ་དང་བསྲེས་ལ་སྦྲང་རྩི་དང་སྦྱར་བའི་ལྡེ་གུ་བྱིན་ན། བད་ཀན་ལས་གྱུར་བའི་ལུད་པ་ཞི་བར་བྱེད་དོ། །ཡང་ན་བི་ཤ་ལ་ཞེས་བྱ་བ་ཤིང་ཉེ་རོང་དང་། ཨིནྡྲ་བ་རུ་ནི་དང་། པི་པི་ལིང་དང་། གླ་སྒང་དང་། དྲི་བི་རྩ་ཞེས་བྱ་བ་ཤིང་ཉེ་རོང་དང་།
[170b.4]འདི་རྣམས་ཀྱི་ཕྱེ་མ་སྦྲང་རྩི་དང་སྦྱར་བ་བླུད་པའམ། ཡང་ན་ན་ལེ་ཤམ་དང་། སྦྲང་རྩི་སྦྱར་བའི་ལྡེ་གུའམ། ཡང་ན་རྫོང་ག་ཀ་ཞེས་བྱ་བ་ཨ་ཀ་རུ་དང་། སྦྲང་རྩི་སྦྱར་བའམ། ཡན་ན་ཀཎྜ་ཀ་རི་དང་། སྦྲང་རྩི་དང་སྦྱར་བའམ། ཡང་ན་པར་པ་ཏ་དང་། སྦྲང་རྩི་སྦྱར་བའམ། ཡང་ན་བྲི་ཀ་ར་ཛ་དང་།
[170b.5]སྦྲང་རྩི་སྦྱར་བའམ། ཡང་ན་ཀ་ས་ག་ན་དང་། སྦྲང་རྩིར་སྦྱར་བའམ། ཡང་ན་རྟ་ནག་པོའི་རྟུག་པ་བཙིར་བའི་ཁུ་བ་དང་སྦྲང་རྩི་སྦྱར་བའམ། སྦྱོར་བ་འདི་རྣམས་གང་ཡང་རུང་བ་ཟོས་ན། བད་ཀན་ལས་གྱུར་པའི་
[170b.6]ལུད་པ་ཞི་བར་བྱེད་དོ། །ཐང་ཤིང་དང་། ཟུར་པ་དང་། ཀར་ཀ་ཏ་ཤྲིང་གི་དང་། བྱི་ཚེར་བ་དང་། འདི་རྣམས་ཏིལ་མར་དང་སྦྲང་རྩི་དང་སྦྱར་བ་ཟོས་ན། བད་ཀན་དང་རླུང་ལས་གྱུར་པའི་ལུད་པ་ཞི་བར་བྱེད་དོ། །ཡང་ན་པི་པི་ལིང་དང་། དོང་གྲ་དང་། གླ་སྒང་
[170b.7]དང་། ཨ་རུ་ར་དང་། སྐྱུ་རུ་ར་དང་། ཁ་ར་དཀར་པོ་དང་། འདི་རྣམས་སྦྲང་རྩི་དང་། ཏིལ་མར་དང་སྦྱར་བ་དང་། ཡང་འབྲས་ཡོས་དང་། ཁ་ར་དཀར་པོ་དང་། སྐྱུ་རུ་རའི་ཤིང་གི་མྱུ་གུ་དང་། འདི་རྣམས་ཏིལ་མར་དང་སྦྲང་རྩི་དང་སྦྱར་བའི་སྦྱོར་བ་གསུམ་པོ་དེ་
[171a]
[171a.1]དག་གང་ཡང་རུང་བ་ཟོས་ན། བད་ཀན་ལས་གྱུར་པའི་ལུད་པ་སེལ་ཏོ། །ཡང་ན་སེའུ་འབྲུ་སྲང་གཉིས་དང་། བུ་རམ་སྲང་བརྒྱད་དང་། ཚ་བ་གསུམ་སྲང་རེ་རེ་དང་། འདི་རྣམས་ཀྱི་ཕྱེ་མ་ཟོས་ན་ཡང་ཡི་ག་འབྱེ་ཞིང་མེའི་དྲོད་སྐྱེད་པ་དང་།
[171a.2]སྐད་སྙན་པར་འགྱུར་བ་དང་། ཆམ་པ་དང་། དབུགས་མི་བདེ་བ་དང་། ལུད་པ་ལས་རྒྱལ་བར་འགྱུར་རོ། །ཡང་ན་བུ་རམ་སྲང་གཉིས་དང་། ནས་ཚིག་འཁུས་པའི་ཐལ་བ་ཞོ་གཅིག་དང་། པི་པི་ལིང་དང་ན་ལེ་ཤམ་ཞོ་གཉིས་གཉིས་དང་། སེའུ་འབྲུ་
[171a.3]སྲང་ཕྱེད་དང་འདི་རྣམས་ཀྱི་ཕྱེ་མ་ཟོས་ན། ལུད་པ་དང་། དབུགས་མི་བདེ་བ་སེལ་ཏོ། །ཡང་ན་རིམས་ནད་གསོ་བའི་སྐབས་སུ། ཨ་རུ་ར་ལ་སོགས་པའི་སྦྱར་སྨན་བསྟན་པའི་ནང་དུ་ཀར་ཀ་ཏ་ཤྲིང་གི་བསྣན་ལ་བསྐོལ་བའི་ཁུ་བ་བླུད་ན་ལུད་པ་ལ་རབ་ཏུ་ཕན་ནོ། །
[171a.4]ཡང་ན་དྷི་སྱ་ཞེས་བྱ་བ་ལ་ལ་ཕུད་དང་། དུར་བྱིད་དང་། བི་ཤ་ལ་དང་། གླ་སྒང་དང་། པུཥྐར་མཱུ་ལ་དང་། པི་པི་ལིང་དང་། འདི་རྣམས་བ་གཅིན་ནམ་ཆུ་གང་ཡང་རུང་བ་དང་བསྐོལ་བའི་ཁུ་བ་འཐུངས་ན་བད་ཀན་ལས་གྱུར་པའི་ལུད་པ་ཞི་བར་འགྱུར་རོ། །
[171a.5]ཡང་ན་པི་པི་ལིང་ཞོ་གཉིས་དང་། ཁ་ར་དཀར་པོ་ཞོ་གཉིས་ཀྱི་ཕྱེ་མ་དང་། ཏིལ་མར་ཞོ་བཞི་དང་བསྐོལ་ནས་རི་ལུར་བྱས་ལ། རྒྱ་སྲན་བསྐོལ་བའི་ཁུ་བའི་ནང་དུ་མཉེས་ཏེ་འཐུངས་ན་བད་ཀན་ལས་གྱུར་པའི་ལུད་པ་འཇོམས་སོ། །ཡང་ན་རྩ་བ་བཅུ་པ་བསྐོལ་བའི་
[171a.6]ཁུ་བ་སྲང་བརྒྱ་ཉི་ཤུ་རྩ་བརྒྱད་ཀྱི་ནང་དུ་མར་སྲང་སུམ་ཅུ་རྩ་གཉིས་དང་། པུཥྐར་མཱུ་ལ་དང་། ཟུར་པ་དང་། བིལ་བ་དང་། བྱིའུ་རུག་པ་དང་། ཚ་བ་གསུམ་དང་། ཤིང་ཀུན་དང་། འདི་རྣམས་ཞོ་གཉིས་གཉིས་དང་ལྷན་ཅིག་བསྐོལ་ཏེ། མར་འབའ་ཞིག་
[171a.7]ལུས་པ་དང་། ཐོག་མར་ཐུག་པ་བླུད་ལ་དེ་ལས་རན་པར་འཐུངས་ན། རླུང་དང་བད་ཀན་གྱི་ནད་ཐམས་ཅད་འཇོམས་སོ། །ཡང་ན་ནིར་གུན་ཐིག་ལེ་ཞེས་བྱ་བ་ཤེས་པ་ལའི་ལོ་མ་བསྐོལ་བའི་ཁུ་བའི་བཞི་འགྱུར་གྱི་མར་དང་བསྐོལ་ཏེ་མར་ལུས་པ་འཐུངས་ན་ལུད་པ་འཇོམས་
[171b]
[171b.1]སོ། །ཡང་ན་བྱི་ཏང་ག་བསྐོལ་བའི་ཁུ་བའི་ནང་དུ་མར་དང་ཚ་བ་གསུམ་བསྐོལ་བའི་ཁུ་བ་འཐུངས་ན། ལུད་པ་ཞི་བར་བྱེད་དོ། །ཡང་ན་བ་སྤྲུ་བ་མེ་ཏོག་དམར་པོ་ཅན་དང་བྱེའུ་རུག་པ་དང་། ཀ་ས་མ་ར་དང་། ཨ་རུ་ར་དང་། པ་ཏོ་ལ་དང་། བྲི་ཧ་ཏི་དང་། ཕ་
[171b.2]ན་ཛི་ཀ་དང་། འདི་རྣམས་བསྐོལ་བའི་ཁུ་བའི་ནང་དུ་མར་དང་། འོ་མ་དང་། ཚ་བ་གསུམ་དང་ཡང་ལེགས་པར་བསྐོལ་ནས་མར་ལུས་པ་དང་། དེ་ལས་རན་པར་འཐུངས་ན། ལུད་པ་ལུ་བ་དང་། རིམས་མི་བཟད་པ་དང་། ཟད་བྱེད་ཀྱི་ནད་དང་། གཞང་
[171b.3]འབྲུམ་ལ་སོགས་པ་ལས་ཐར་བར་བྱེད་དོ། །ཡང་ན་ཀཎྜ་ཀ་རིའི་རྩ་བ་དང་། འོ་མ་དང་བཅས་པ་ཆུ་དང་ཚུལ་བཞིན་དུ་བསྐོལ་བའི་ཁུ་བ་སྲང་བརྒྱ་ཉི་ཤུ་རྩ་བརྒྱད་ཀྱི་ནང་དུ། མར་སྲང་སུམ་ཅུ་རྩ་གཉིས་དང་། སྨན་པ་ལ་དང་། ཚ་བ་གསུམ་དང་། བྱི་དོང་ག་
[171b.4]དང་། ཟུར་པ་དང་། བལ་པོ་སེའུ་དང་། སེའུ་རྩ་ལ་ཞེས་བྱ་བ་ཁ་རུ་ཚ་དང་། ཡ་བཀྵ་ར་ཞེས་བྱ་བ་ནས་ཚིག་འཁུས་པའི་ཐལ་བ་དང་། མ་ནུའི་རྩ་བ་དང་། བྲི་ཀྵི་བ་ཞེས་བྱ་བ་བ་སྤྲུ་བ་དང་། བྲི་ཧ་ཏི་དང་། ཨ་རུ་ར་དང་། ལ་ལ་ཕུད་དང་། ཀྲུ་ཏྲུག་
[171b.5]ཏྲེས་དང་། རྒུན་འབྲུམ་དང་། དབྱི་མོ་དང་། པུརྞ་རྣ་བ་མེ་ཏོག་དམར་པོ་ཅན་དང་། བྱི་ཚེར་བ་དང་། ཨ་མ་ལ་པོ་ཏ་ས་ཞེས་བྱ་བ་ལྟ་བུ་དང་། ཀར་ཀ་ཏ་ཤྲིང་གི་ནི་དང་། ཏ་མ་ལ་ཀི་དང་། བྷར་གི་ཞེས་བྱ་བ་ག་བྲའི་རྩ་བ་དང་། ར་སྣ་དང་། གཟེ་མ་དང་། འདི་
[171b.6]རྣམས་ཆམ་ཆོམ་བརྡུངས་པ་དང་། འདི་རྣམས་ལྷན་ཅིག་བསྐོལ་ཏེ། མར་ལུས་པའི་མིང་ནི་ཀཎྜ་ཀ་རིའི་སྨན་མར་ཞེས་བྱ་བ་སྟེ། དེ་ལས་རན་པར་འཐུངས་ན། ལུད་པའི་ནད་རྣམ་པ་ལྔ་དང་། དབུགས་མི་བདེ་བའི་ནད་རྣམ་པ་ལྔ་དང་། སྐྱིགས་བུའི་ནད་རྣམ་པ་ལྔ་པོ་
[171b.7]རྣམས་ལ་རབ་ཏུ་བསྔགས་ཏེ། བད་ཀན་འཇོམས་པར་བྱེད་པ་ཡང་ཡིན་ནོ། །ཡང་ན་ཀཎྜ་ཀ་རི་སྲང་བརྒྱད་བཏགས་པའི་ཕྱེ་མ་ཆུ་སྲང་ཉིས་སྟོང་བཞི་བཅུ་རྩ་བརྒྱད་བསྐོལ་ཏེ། སྲང་བརྒྱ་ཉི་ཤུ་རྩ་བརྒྱད་ལུས་པའི་ནང་དུ་མར་སྲང་བཅུ་དྲུག་དང་། ཁ་ར་དཀར་པོ་སྲང་བཞི་
[172a]
[172a.1]བཅུ་དང་། ཚ་བ་གསུམ་དང་། ར་སྣ་དང་། སླེ་ཏྲེས་དང་། ཀྲུ་ཏྲུག་ཏྲེས་དང་། ཀར་ཀ་ཏ་ཤྲིང་གི་དང་། ག་བྲའི་རྩ་བ་དང་། གླ་སྒང་དང་། པི་པི་ལིང་མཱུ་ལ་དང་། ད་ན་ཡ་ཞེས་བྱ་བ་བྱི་ཚེར་བ་དང་། འདི་རྣམས་སྲང་ཕྱེད་ཕྱེད་ཞིབ་ཏུ་བཏགས་
[172a.2]པ་བླུགས་ལ་ལྷན་ཅིག་བསྐོལ་ཏེ། ཁུ་བ་དུ་ཞིང་མར་ལུས་ཏེ། དྲིལ་དུ་བཏུབ་པ་དང་། ཕྱིར་ཕྱུང་སྟེ། སྣོད་ཀྱི་ནང་དུ་བསྒྲངས་པ་དང་། པི་པི་ལིང་སྲང་བརྒྱད་དང་། སྨྱིག་རྐང་སྲང་བརྒྱད་དང་། སྦྲང་རྩི་རྙིང་པ་སྲང་བཅུ་དྲུག་དང་། འདི་རྣམས་མཉེས་ཏེ་ལྡེ་གུར་བྱས་
[172a.3]ནས་རན་པར་ཟོས་ན། སྐྲན་དང་། སྙིང་ནད་དང་། སྐྲངས་པ་དང་། གཞང་འབྲུམ་དང་། དབུགས་མི་བདེ་བ་དང་། ལུད་པ་ཐམས་ཅད་ལས་ངེས་པར་རྒྱལ་བར་འགྱུར་རོ། །བད་ཀན་ལས་གྱུར་པའི་ལུད་པ་རྟག་ཏུ་འབྱུང་བ་ལ་ནི། དུད་པ་ཁ་ནས་བརྔུབ་པའི་ཆོ་ག་
[172a.4]བྱ་བ་དང་ཡང་ན་བཀྲུ་སྨན་བཏང་ན་ཞི་བར་འགྱུར་རོ། །ཡང་ན་ལྡོང་རོས་དང་། བ་བླ་དང་། ཤིང་མངར་དང་། གནྡྷ་མན་སི་ཞེས་བྱ་བ་སྤང་སྤོས་དང་། གླ་སྒང་དང་། ཤིང་ཨིང་གུ་དའི་ཤུན་ཕྲགས་དང་། འདི་རྣམས་དང་དུད་པ་བརྔུབ་པའི་ཆོ་ག་མདོའི་གནས་སུ་
[172a.5]བསྟན་པ་བཞིན་དུ་ཇི་སྲིད་ལུད་པ་སོས་ཀྱི་བར་དུ་བྱའོ། །དེའི་འོག་ཏུ་བུ་རམ་དང་། འོ་མ་དྲོ་འཇམ་ཙམ་དུ་སྦྱར་བ་སྐོམ་དུ་བླུད་ན་ལུད་པ་རྩ་བ་ནས་འཇོམས་སོ། །རླུང་དང་བད་ཀན་ལས་གྱུར་བའི་ལུད་པ་ནི་སྨན་ཁོང་པའི་དུད་པ་བརྔུབ་པ་བྱས་ན། རྒྱུན་གྱི་ལུད་པ་དང་
[172a.6]འཕྲལ་གྱི་ལུད་པ་འཇོམས་སོ། །བད་ཀན་གྱི་ལུད་པ་བར་བར་དུ་མུན་པ་བཞིན་དུ་སྣང་ན་ནི་མཁྲིས་པ་དང་འབྲེལ་པ་ཡིན་ནོ། །དེ་ལ་ནི་མཁྲིས་པ་དང་། བད་ཀན་གསོ་བའི་ཆོ་ག་ཇི་ལྟ་བ་བཞིན་དུ་བྱའོ། །བད་ཀན་དང་རླུང་འདྲེས་པའི་ལུད་པའི་ནད་ལ་ནི་དང་པོ་བད་
[172a.7]ཀན་འབའ་ཞིག་གསོ་བའི་དཔྱད་གོང་དུ་བསྟན་པ་བཞིན་དུ་བྱའོ། །རླུང་དང་མཁྲིས་པ་དང་བད་ཀན་འདི་གསུམ་འདུས་པའི་ལུད་པ་ལ་ནི་ཐོག་མར་མཁྲིས་པ་གསོ་བར་བྱའོ། །རླུང་དང་བད་ཀན་གྱི་ལུད་པ་སྐམ་པོ་འབྱུང་སྟེ། རླུང་ཤས་ཆེ་བ་ལ་ནི་སྣུམ་གྱི་ཆོ་ག་བྱའོ། །
[172b]
[172b.1]དེ་ཉིད་ཕྱི་ས་སླ་བར་འབྱུང་སྟེ། བད་ཀན་གྱི་ཤས་ཆེ་བ་ལ་ནི་རྩུབ་པའི་ཆོ་ག་བྱའོ། །མཁྲིས་པའི་ཤས་ཆེ་ན་ནི་ཁ་བའི་བག་བསྟེན་པར་བྱའོ། །གློ་འགྲམས་ཏེ་ཁྲག་དང་བཅས་པའི་ལུད་པ་འབྱུང་བ་ལ་ནི་དེ་མ་ཐག་རྒྱ་སྐྱེགས་དང་སྦྲང་རྩི་དང་འོ་མ་དང་འདི་གསུམ་སྦྱར་
[172b.2]བ་བླུད་དོ། །དེ་ཞུ་བའི་ཚོད་ཙམ་ན་འབྲས་ཆན་འོ་མ་དང་ཤ་ཁ་ར་དང་བཅས་པ་སྦྱིན་ནོ། །ལུད་པ་ལུ་བའི་ཚེ་རྩིབ་ལོགས་གཉིས་དང་། ཆུ་སོར་ཟུག་གཟེར་བྱེད་ཅིང་མཁྲིས་པའི་མེ་དྲོད་ཆུང་བ་ལ་ནི་རྒྱ་སྐྱེགས་ཆང་དང་སྦྱར་བ་བླུད་དོ། །ལུད་པ་ལུ་ཞིང་ཕྱིས་སླ་བར་འབྱུང་
[172b.3]བ་ལ་ནི་མེའི་དྲོད་ཉམས་ཆུང་ན་དེ་ལ་ནི་རྒྱ་སྐྱེགས་དང་། གླ་སྒང་དང་། བོང་ང་དཀར་པོ་དང་། པ་ཅ་དང་། དུག་མོ་ཡུངས་ཀྱི་ཤིང་ཤུན་དང་འདི་རྣམས་བཏགས་པའི་ཕྱེ་མ་ཆུ་དང་སྦྱར་བ་བླུད་དོ། །ལུད་པ་ལུ་ཞིང་མེ་དྲོད་ཚབས་ཆེར་སྐྱེས་པ་ལ་ནི་རྒྱ་སྐྱེགས་དང་། མར་
[172b.4]དང་། སྤྲ་ཚིལ་དང་། སྨན་འཚོ་བྱེད་ཀྱི་སྡེ་ཚན་དང་། སྨྱིག་རྐང་དང་འདི་རྣམས་ཆ་སྙོམས་ཏེ་འོ་མ་དང་བསྐོལ་བ་བླུད་ན་ཕན་ནོ། །གློ་འགྲམས་ཏེ་ཁྲག་མ་ཆོད་པ་ལ་ནི། ཨིཤྟྲྭ་རི་ཀ་དང་། པདྨའི་རྩ་བའི་ཚིགས་དང་། པདྨ་གེ་སར་དང་། ཙནྡན་དཀར་པོ་དང་། འདི་
[172b.5]རྣམས་ཆམ་ཆོམ་བརྡུངས་ཏེ། འོ་མ་དང་བསྐོལ་བ་བསྒྲངས་པའི་ནང་དུ་སྦྲང་རྩི་བཏབ་པ་འཐུངས་ན་ཁྲག་ཆོད་པར་བྱེད་དོ། །ཡང་ན་ནས་རྗེན་བཏགས་པའི་འོ་མ་དང་བསྐོལ་བའི་ཐུག་པ་མར་དང་སྦྱར་བའམ། ཡང་ན་ཁ་ར་དཀར་པོའི་ཕྱེ་མ་དང་། འོ་མ་སྦྲང་རྩི་དང་སྦྱར་
[172b.6]བའི་ཐུག་པ་བླུད་ན། གློ་འགྲམས་པའི་ནད་དང་རིམས་སེལ་ཏོ། །ཟད་བྱེད་ཀྱི་ལུད་པ་ལ་ནི་མངར་བའི་སྨན་རྒུན་འབྲུམ་དང་། ཤིང་མངར་ལ་སོགས་པ་སྦྱར་བའི་མར་བྱིན་ན་ཕན་ནོ། །ཡང་ན་བུ་རམ་ཆུ་བསྐོལ་བ་དང་བསྒྲངས་པའི་ནང་དུ་ན་ལེ་ཤམ་དང་སྦྲང་རྩི་བཏབ་པ་བླུད་
[172b.7]པའམ། ཡང་ན་སྐྱུ་རུ་རའི་ཕྱེ་མ་དང་འོ་མ་དང་བསྐོལ་བ་མར་དང་ལྡན་པ་བླུད་པའམ། ཡང་ན་བཅུད་ཀྱིས་ལེན་གྱི་སྐབས་སུ་པི་པི་ལིང་གི་ཆོ་ག་བསྟན་པ་བཞིན་དུ་སྦྱར་བར་བྱའོ། །ལུད་པ་ལུ་བ་དང་། ཚིགས་དང་རུས་པར་ཟུག་ཅིང་ན་བ་ལ་ནི་སྦྲང་རྩི་དང་། ཤིང་མངར་དང་།
[173a]
[173a.1]ཤིང་ཏོག་མ་དུ་ཀ་དང་། རྒུན་འབྲུམ་དང་། ཏུ་ཀཤྐི་ར་ཞེས་བྱ་བའི་སྨྱིག་རྐང་དང་། བ་ལ་དང་། པི་པི་ལིང་དང་འདི་རྣམས་མར་དང་སྦྱར་བ་བྱིན་ན་ཕན་ནོ། །ཡང་ན་ཏྲི་ཛ་ཏྲ་ཞེས་བྱ་བ་དྲི་སྣ་གསུམ་ཞོ་རེ་རེ་དང་། པི་པི་ལིང་སྲང་ཕྱེད་དང་། ཁ་
[173a.2]ར་དཀར་པོ་དང་། ཤིང་ཏོག་མ་དུ་ཀ་དང་། ཁར་ཛུ་ར་ཞེས་བྱ་བ་འབྲ་གོ་དང་འདི་རྣམས་ཞོ་རེ་རེ་ཞིབ་ཏུ་བཏགས་ལ་སྦྲང་རྩི་དང་རི་ལུ་བྱས་པ་ནི་སུག་སྨེལ་གྱི་རི་ལུ་ཞེས་བྱ་སྟེ། དེ་ལས་རན་པར་ཟོས་ན་རོ་ཙ་བར་བྱེད་དེ། ཁྲག་དང་མཁྲིས་པ་དང་། ལུད་པ་དང་། དབུགས་
[173a.3]མི་བདེ་བ་དང་། ཡི་ག་འཆུས་པ་དང་། སྐྱུགས་པ་དང་། བརྒྱལ་བ་དང་། སྐྱིགས་བུ་དང་། རྨོངས་པ་དང་མགོ་འཁོར་བ་དང་། གློ་གཅོང་ཟད་བྱེད་ཀྱི་ནད་དང་། གློ་འགྲམས་པའི་ནད་དང་། སྐད་ཉམས་པ་དང་། མཆིན་པ་ན་བ་དང་། སྐེམ་བྱེད་ཀྱི་ནད་དང་།
[173a.4]དྲེག་དང་། ལུད་པ་ཁྲག་ཏུ་འབྱུང་བ་དང་། སྙིང་དང་། རྩིབ་ལོགས་ན་བ་དང་། སྐོམ་དད་ཆེ་བ་དང་། རིམས་སྣ་ཚོགས་ལ་ཡང་ཕན་ནོ། །ལུད་པ་ཁྲག་ཏུ་འབྱུང་བ་ལ་ནི་བ་སྤྲུ་བ་མེ་ཏོག་དམར་པོ་ཅན་དང་། ཤ་ཁ་ར་དང་། འབྲས་ཐུག་པོ་ཆེ་དང་། སཱ་ལུ་
[173a.5]དམར་པོའི་ཕྱེ་མ་རྒུན་ཆུ་དང་། འོ་མ་དང་ཆུ་བཞིན་དུ་བསྐོལ་བའི་ནང་དུ་མར་བཏབ་པ་བླུད་དོ། །ཡང་ན་ཤིང་མངར་དང་། ཤིང་ཏོག་མ་དུ་ཀ་དང་། འབྲས་ཐུག་པོ་ཆེ་དང་། འོ་མར་སྦྱར་བའི་ཐུག་པ་བླུད་ན་ཕན་ནོ། །གློ་འགྲམས་ཏེ་ཁ་དང་སྣ་ལ་སོགས་པ་ལས་
[173a.6]ཁྲག་མང་པོ་ལུད་པ་ལ་ནི་ཁྲག་དང་། མཁྲིས་པའི་གསོ་བ་ཐམས་ཅད་བྱའོ། །གློ་འགྲམས་པའི་ལུད་པ་རླུང་གིས་ལམ་གཞན་དུ་སོང་སྟེ། ལུད་པ་མ་ཐོན་ཞིང་འགགས་པ་ལ་ནི། རའི་ཚིལ་རན་པར་བཞུས་ལ་ཆང་གི་ནང་དུ་རྒྱམ་ཚ་དང་ལྡན་པར་བྱས་ཏེ་བླུད་ན་ཕན་
[173a.7]ནོ། །གློ་འགྲམས་པ་དང་། ཉམས་སྟོབས་ཆུང་བ་དང་གློ་གཅོང་ཟད་བྱེད་དང་། གཉིད་མི་འོང་བ་དང་། མེ་དྲོད་རྣོ་ཆེས་པ་ལ་ནི་འོ་མ་བསྐོལ་ཏེ། སྤྲིས་མ་སྐ་བར་གྱུར་པའི་ནང་དུ་ཤ་ཁ་ར་དང་སྦྲང་རྩི་དང་། མར་དང་སྦྱར་བའི་བཟའ་བ་སྦྱིན་ནོ། །ཡང་ན་ཁ་ར་
[173b]
[173b.1]དང་། ནས་དང་། གྲོ་དང་། ཛི་བ་ཀ་དང་། ཟངས་རྩི་བ་དང་། འདི་རྣམས་ཀྱི་ཕྱེ་མ་སྦྲང་རྩི་དང་སྦྱར་བའི་ལྡེ་གུའམ་འོ་མ་སྦྱར་བའི་ཐུག་པ་སྦྱིན་ནོ། །ཁྲག་དང་ཤ་ཟད་པའི་ནད་ལ་ནི་སྲོག་ཆགས་ཤ་ཟའི་ཤ་བསྐོལ་བའི་ཁུ་བའི་ནང་མར་ཁུ་དང་། སྦྲང་རྩི་དང་པི་པི་
[173b.2]ལིང་སྦྱར་བ་ཟོས་ན་ཤ་ཁྲག་སྐྱེ་བར་བྱེད་དོ། །གློ་འགྲམས་པ་དང་། གློ་གཅོང་ཟད་བྱེད་དང་། ས་བོན་དང་། དབང་པོ་རྣམས་ཉམས་པ་ལ་ནི། ནྱ་གྲོ་དྷ་དང་། ཨུ་དུམྦཱ་ར་དང་། ཤིང་ཨ་ཤྭདྠ་དང་། པླག་ཤ་དང་། ཤིང་སཱ་ལ་དང་། གནྡྷ་པྲི་ཡང་ཀུ་དང་།
[173b.3]ཤིང་ཏ་ལའི་རྩེ་མོ་དང་། ཤིང་འཛམ་བུའི་ཤུན་པ་དང་། ཤིང་པི་ཡ་ལི་དང་། ཤུག་པ་དང་། ཤིང་ཨ་ཤྭ་ཀརྣ་དང་། འདི་རྣམས་འོ་མ་དང་ལྷན་ཅིག་བསྐོལ་བའི་ཁུ་བ་དང་། མར་དང་འབྲས་ཆན་དང་བཅས་པ་ཟོས་ན་ཕན་ནོ། །རླུང་དང་མཁྲིས་པ་ལས་
[173b.4]གྱུར་པའི་གློ་འགྲམས་པའི་ནད་བཙུགས་པ་ལྟར་ན་བ་ལ་ནི་ལུས་ལ་མར་གྱིས་བསྐུ་བྱུག་བྱའོ། །རླུང་ལས་གྱུར་པའི་གློ་འགྲམས་ཤིང་བཙུགས་པ་སྙམ་བྱེད་པའི་ནད་ལ་ནི། རླུང་འཇོམས་པའི་སྨན་སྣ་ཚོགས་དང་། ཏིལ་མར་དུ་སྦྱར་བས་བསྐུ་བྱུག་བྱའོ། །
[173b.5]སྙིང་དང་རྩིབ་ལོགས་སུ་ཟུག་པའི་ནད་ལ་ནི་སྨན་འཚོ་བྱེད་སྣ་བཅུ་བསྐོལ་བའི་ཁུ་བ་མར་དང་ཡང་བསྐོལ་ལ། མར་འབའ་ཞིག་ལུས་པ་བླུད་དོ། །ཡང་ན་སྙིང་དང་རྩིབ་ལོགས་སུ་ཟུག་པ་ན་རླུང་དང་མཁྲིས་པ་དང་ཁྲག་གང་ལས་གྱུར་པ་ལེགས་པར་བརྟགས་ཏེ། སོ་
[173b.6]སོ་དང་མཐུན་པའི་སྨན་གཏང་བར་བྱའོ། །ཤིང་མངར་དང་། ན་ག་བ་ལ་དང་། འདི་གཉིས་བསྐོལ་བའི་ཁུ་བའི་བཞི་ཆ་ལུས་པའི་ནང་དུ་སྨན་ཁུའི་ཕྱེད་ཀྱི་མར་དང་དེ་དང་མཉམ་པའི་འོ་མ་བཏབ་པ་དང་། པ་ཡ་སྱ་དང་། པི་པི་ལིང་སྨྱིག་རྐང་དང་། འདི་
[173b.7]རྣམས་ཆམ་ཆོམ་བརྡུངས་ཏེ། ལྷན་ཅིག་བསྐོལ་ལ་མར་འབའ་ཞིག་ལུས་པ་དང་། དེ་ལས་རན་པར་འཐུངས་ན་གློ་འགྲམས་པའི་ནད་ཞི་བར་བྱེད་དོ། །སྨན་ཛི་བན་ཏིའི་སྡེ་ཚན་བཅའ་སྒ་དང་། ཉེའུ་ཤིང་དང་། བི་ར་ཞེས་བྱ་བ་རམ་ཉེ་བ་དང་། བ་སྤྲུ་བ་རྣམ་
[174a]
[174a.1]གཉིས་དང་། ག་བྲའི་རྩ་བ་དང་། རི་དི་དང་། ཁ་སྲལ་ཕྲེའུ་དང་། ཟུར་པ་དང་། ཏ་མ་ལ་ཀ་དང་། ཤིང་ག་ཏྲ་ཀ་དང་། པ་ཡ་སྱ་དང་། རྩ་བ་ཆུང་ངུ་ལྔ་དང་། རྒུན་འབྲུམ་དང་། ཨ་ཤོ་ཞེས་བྱ་བ་སྟར་ག་ལ་སོགས་པའི་འབྲས་བུ་
[174a.2]མངར་ཞིང་སྣུམ་པ་དང་། ཉམས་སྟོབས་སྐྱེད་པའི་སྨན་དེ་རྣམས་ཞོ་གཉིས་ཞིབ་ཏུ་བཏགས་པའི་ཕྱེ་མ་མར་སྲང་སུམ་ཅུ་རྩ་གཉིས་དང་། འོ་མ་དང་། སྐྱུ་རུ་ར་བཙིར་བའི་ཁུ་བ་དང་། བི་ད་རི་བཙིར་བའི་ཁུ་བ་དང་། ར་ཤ་འདི་བཞི་སྲང་སུམ་ཅུ་རྩ་གཉིས་གཉིས་དང་
[174a.3]ཆུ་སྲང་བརྒྱ་དྲུག་ཅུ་དང་། འདི་རྣམས་ཚུལ་བཞིན་དུ་བསྐོལ་ཏེ། མར་འབའ་ཞིག་ལུས་པ་བསྒྲངས་པའི་ནང་དུ་སྦྲང་རྩི་སྲང་བཅུ་དྲུག་དང་། ཤ་ཁ་ར་སྲང་བཅུ་དྲུག་གི་ཕྱེ་མ་དང་། ན་ལེ་ཤམ་དང་། སུག་སྨེལ་དང་། ཤིང་ཚ་དང་། གནྡྷ་པ་ཏྲ་དང་། ནཱ་ག་གེ་
[174a.4]སར་དང་། འདི་ལྔ་སྲང་ཕྱེད་ཕྱེད་ཀྱི་ཕྱེ་མ་དང་། འདི་རྣམས་དང་ལྡེ་གུར་བྱས་ཏེ། དེ་ལས་འཇུ་སྟོབས་ཆེ་ཆུང་དང་སྦྱར་ཏེ་བསྟེན་ན་ཇི་ལྟར་ལྷ་རྣམས་དང་། ཀླུའི་མཆོག་རྣམས་ལ་བདུད་རྩི་བསྟེན་ན་མི་འཆི་བ་བཞིན་དུ་སྨན་མར་འདི་ཡང་སྔོན་གྱི་དྲང་སྲོང་ཆེན་པོ་རྣམས་ཀྱིས་
[174a.5]མི་རྣམས་ལ་བདུད་རྩི་དང་འདྲ་བར་བཤད་དེ། དེ་ལས་ཅི་རན་པར་འཐུངས་ན། ས་བོན་ཉམས་པ་དང་། གློ་གཅོང་དང་། གློ་འགྲམས་པ་དང་། ནད་མ་རུངས་པ་རྣམས་ཀྱིས་ལུས་ཉམ་ཆུང་བ་དང་། ཉལ་པོ་མི་ནུས་པ་དང་། མདོག་དང་སྐད་ཉམས་པ་
[174a.6]འཕེལ་བ་དང་། ལུད་པ་དང་། སྐྱིགས་བུ་དང་། རིམས་དང་། དབུགས་མི་བདེ་བ་དང་། ལུས་ཚ་བ་དང་། སྐོམ་དད་ཆེ་བ་དང་། ཁྲག་དང་མཁྲིས་པ་སེལ་བར་བྱེད་དོ། །གཞན་ཡང་བུ་བཟང་པོ་སྟེར་བ་དང་། སྐྱུགས་པ་དང་། བརྒྱལ་བ་དང་། སྙིང་ན་བ་དང་།
[174a.7]མངལ་ན་བ་དང་། གཅིན་ནད་ལ་སོགས་པའི་ནད་ཐམས་ཅད་སེལ་བར་བྱེད་དོ། །གཟེ་མ་དང་། པུ་ཤེལ་ཙེ་དང་། བཙོད་དང་། བ་ལ་དང་། ཀ་མ་ལི་ཞེས་བྱ་བ་ཏང་པལ་དང་། བྷུ་ཏི་ཀ་དང་། རྩྭ་དཱུར་བའི་རྩ་བ་དང་། ཀྲྀཥྞ་པརྞི་དང་། པ་ལ་ཤའི་རྩ་བ་
[174b]
[174b.1]དང་། ཐལ་ཏྲེས་དང་། ས་ལ་པརྞི་དང་། སྨན་དེ་རྣམས་སྲང་རེ་རེ་དང་། ཆུ་སྲང་བརྒྱ་བདུན་ཅུ་རྩ་དྲུག་དང་བསྐོལ་ཏེ། ཁུ་བ་སྲང་བཞི་བཅུ་རྩ་བཞི་ལུས་པའི་ནང་དུ་མར་སྲང་སུམ་ཅུ་རྩ་གཉིས་དང་བའི་འོ་མ་སྲང་བརྒྱ་བདུན་ཅུ་རྩ་དྲུག་གི་ནང་དུ། ཨད་མ་
[174b.2]ཀུབ་ཏ་དང་། ཛི་བན་ཏི་དང་། མེད་རྣམ་གཉིས་དང་། ཟངས་རྩི་བ་དང་། ཛི་བ་ཀ་དང་། རིད་དྷི་ཀ་དང་། རྒུན་འབྲུམ་རྣམ་གཉིས་དང་། ཤ་ཁ་ར་དང་། སྲ་མ་ན་དང་། པདྨའི་རྩ་བ་དང་། འདི་རྣམས་ཞོ་དྲུག་ཆམ་ཆོམ་བརྡུངས་ཏེ་ལྷན་ཅིག་བསྐོལ་ཏེ། མར་
[174b.3]སྲང་སུམ་ཅུ་རྩ་གཉིས་ལུས་པ་དང་དེ་ལས་རན་པར་འཐུངས་ན། རླུང་དང་མཁྲིས་པ་དང་། སྙིང་འཛག་ཅིང་ན་བ་ལ་ཕན་ནོ། །གཞན་ཡང་གཅིན་སྲི་བ་དང་། གཅིན་ནད་དང་། གཞང་འབྲུམ་དང་། ལུད་པ་དང་། ལུས་སྐེམ་པ་དང་། ཟད་བྱེད་རྣམས་ལ་
[174b.4]ཕན་ཞིང་གཞུ་འདྲེན་པས་དུབ་པ་དང་། བུད་མེད་ཀྱིས་དུབ་པ་དང་། ཁུར་ཆེན་པོས་དུབ་པ་དང་། ཆང་གིས་དུབ་པ་དང་། ལམ་གྱིས་དུབ་པ་རྣམས་ལ་ཕན་ཏེ་སྟོབས་དང་ཤ་སྐྱེད་པར་བྱེད་དོ། །ཤིང་མངར་སྲང་བརྒྱད་དང་། རྒུན་འབྲུ་སྲང་བཅུ་དྲུག་དང་། ཆུ་
[174b.5]སྲང་སུམ་བརྒྱ་བརྒྱད་ཅུ་རྩ་དྲུག་དང་བསྐོལ་ཏེ། སྲང་དགུ་བཅུ་རྩ་བདུན་ལུས་པའི་ཁུ་བའི་ནང་དུ་མར་སྲང་སུམ་ཅུ་རྩ་གཉིས་དང་ཡང་ཚུལ་བཞིན་དུ་བསྐོལ་ཏེ། མར་ཉི་ཚེ་ལུས་པའི་ནང་དུ། པི་པི་ལིང་སྲང་བརྒྱད་དང་། ནས་ཀྱི་ཕྱེ་སྲང་ཉི་ཤུ་རྩ་གཉིས་དང་། ཤ་
[174b.6]ཁ་ར་དང་། སྦྲང་རྩི་སྲང་བརྒྱད་བརྒྱད་ཞིབ་ཏུ་བཏགས་པའི་ཕྱེ་མས་བཏབ་སྟེ་འདག་གུར་བྱས་ནས་དེ་ལས་རན་པར་ཟོས་ན། གློ་གཅོང་ཟད་བྱེད་དང་། གློ་འགྲམས་པ་དང་། ཁྲག་སྐྲན་དང་། དེ་རྣམས་ལ་ཕན་ནོ། །ཡང་ན་ད་དྲི་ཞེས་བྱ་བ་སྐྱུ་རུ་རའི་འབྲས་བུ་དང་། བི་ད་རི་དང་། བུ་རམ་ཤིང་
[174b.7]དང་། སྨན་འཚོ་བྱེད་སྣ་བཅུ་དང་། འདི་རྣམས་སྲང་སུམ་ཅུ་རྩ་གཉིས་གཉིས་དང་བསྐོལ་བའི་ཁུ་བའི་ནང་དུ་མར་དང་། བའི་འོ་མ་བྲེ་རེ་རེ་དང་འདི་རྣམས་ལྷན་ཅིག་བསྐོལ་ཏེ། མར་འབའ་ཞིག་ལུས་པ་དང་། ཕྱིར་ཕྱུང་སྟེ་བཙགས་ལ་བསྒྲངས་པའི་ནང་དུ་ཁ་ར་
[175a]
[175a.1]དཀར་པོ་དང་། སྦྲང་རྩི་བྲེ་རེ་རེ་བཏབ་སྟེ་དེ་ལས་རན་པར་འཐུངས་ན། གཅོང་ཆེན་པོའི་ནད་དང་། མཁྲིས་པ་དང་། ཁྲག་དང་། ལུད་པ་དང་། སྐེམ་བྱེད་དང་། ཟད་བྱེད་རྣམས་ལ་ཕན་ཏེ། །གཞན་ཡང་ཚེ་རིང་བ་དང་། ན་ཚོད་བརྟན་པ་
[175a.2]དང་། ཤ་དང་། ཁུ་ཆུ་དང་། སྟོབས་འཕེལ་བར་བྱེད་དོ། །གཞན་ཡང་སྨན་གྱི་ལྡེ་གུ་དེ་ནི་རླུང་དང་མཁྲིས་པའི་ཤས་ཆེ་བ་ཡིན་ན་ཡང་སྨན་མར་ཉུང་ངུས་ཞི་བར་བྱེད་ཅིང་ཟིལ་གྱིས་གནོན་པར་འགྱུར་རོ། །གོང་དུ་བཤད་པའི་སྨན་མར་གསུམ་པོ་སུག་སྨེལ་གྱི་སྨན་མར་དང་།
[175a.3]བདུད་རྩིའི་སྨན་མར་དང་། སྐྱུ་རུ་རའི་སྨན་མར་འདི་གསུམ་གྱི་ཕན་ཡོན་གྱི་དམིགས་ནི་ལུས་ཉམ་ཆུང་བ་དང་། རིད་པ་དང་། ཟད་བྱེད་རྣམས་ལ་ཕན་ནོ། །གཞན་ཡང་ཟད་བྱེད་དང་། ཉམ་ཆུང་བ་དང་། རིད་པ་རྣམས་ལ་ནི་ཅུ་གང་དང་། པི་པི་ལིང་དང་། འབྲས་
[175a.4]ཡོས་རྣམས་བཏགས་པའི་ཕྱེ་མ་མར་དང་སྦྲང་རྩི་དང་སྦྱར་བའི་ལྡེ་གུ་བྱིན་ན་ཕན་ནོ། །དེའི་འོག་ཏུ་མར་དང་བུ་རམ་སྦྱར་བའི་བཏུང་བ་བླུད་ན། རོ་ཙ་བར་བྱེད་ཅིང་བུད་མེད་ལ་ཕོད་པ་དང་། ཉམས་སྟོབས་དང་ལྡན་ཞིང་ལུས་མྱུར་དུ་རྒྱས་པར་བྱེད་དོ། །ཡང་ན་ཀུ་
[175a.5]སྨན་དའི་ཕྱི་ཤུན་དང་། སྙིང་པོ་བོར་བའི་ལྷག་མ་སྲང་བརྒྱ་རླངས་པའི་ནང་དུ་བཙོས་ཏེ། ཚོས་པ་དང་ཕྱིར་ཕྱུང་ལ། མར་སྲང་སུམ་ཅུ་རྩ་གཉིས་ཀྱི་ནང་དུ་ཡང་བསྐོལ་ལ་དཀྲུག་ཅིང་སྦྲང་རྩི་དང་འདྲ་བར་གྱུར་པ་དང་། དེའི་ནང་དུ་ཧྭགས་སྲང་བརྒྱད་དང་། པི་པི་ལིང་
[175a.6]དང་། བཅའ་སྒ་དང་། ཐ་ཝེ་དང་། འདི་གསུམ་སྲང་གསུམ་གསུམ་དང་། དྲི་སྣ་གསུམ་དང་། དྷ་རྣ་ཡང་ཞེས་བྱ་བ་འུ་སུ་དང་། ན་ལེ་ཤམ་འདི་རྣམས་སྲང་ཕྱེད་ཕྱེད་ཀྱི་ཕྱེ་མས་བཏབ་ལ་ཕྱིར་ཕྱུང་སྟེ། སྣོད་སྣུམ་ཅན་གྱི་ནང་དུ་བཅུག་ལ་བསྒྲངས་ཏེ། སྦྲང་
[175a.7]རྩི་སྲང་བཅུ་དྲུག་དང་བསྲེས་ལ་དཀྲུགས་ཏེ། ལྡེ་གུ་སྣོད་ཀྱི་ནང་དུ་བཞག་པ་ནི་ལྷའི་སྨན་པ་ཐ་སྐར་གྱི་བུ་གཉིས་ཀྱིས་བཤད་པ། ཀུ་སྨན་ད་ཞེས་བྱ་བའི་བཅུད་ཀྱིས་ལེན་ཡིན་ཏེ། དེ་ལས་རན་པར་ཟོས་ན། ལུད་པ་དང་། སྐྱིགས་བུ་དང་། རིམས་དང་། དབུགས་
[175b]
[175b.1]མི་བདེ་བ་དང་། ཁྲག་དང་། མཁྲིས་པ་དང་། གློ་གཅོང་ཟད་བྱེད་དང་། གློ་འགྲམས་པ་སེལ་ཏོ། །བློ་དང་། དྲན་པ་དང་། སྟོབས་སྐྱེད་པར་བྱེད་དོ། །མཧཱ་བ་ལ་ཞོ་གཅིག་འོ་མ་དང་། ཤ་སྦྱར་བ་དང་པོའི་ཞག་ལ་ཞོ་གཅིག་བཟའོ། །དེ་ནས་ཞག་བརྒྱད་ཀྱི་བར་དུ་ཞོ་རེ་རེས་བསྐྱེད་དེ། སྲང་
[175b.2]གཅིག་ཏུ་གྱུར་པ་དང་། དེ་ལ་ཞག་བརྒྱད་ཀྱི་བར་དུ་ཞོ་རེ་རེས་མར་ཕྲི་ལ། དེ་ནས་ཞག་དྲུག་གི་བར་དུ་ཞོ་རེ་རེས་ཡར་བསྐྱེད་དོ། །དེ་ལྟར་ཞག་ཉི་ཤུ་རྩ་གཉིས་ཀྱི་བར་དུ་ཆོ་ག་དེ་ལྟར་བྱས་ཏེ། ཁ་ཟས་གཞན་མི་བཟའ་བར་སྦྱོར་བ་དེ་དག་བྱས་ན། ལུས་ཀྱི་ཉམས་སྟོབས་དང་ཚེ་དང་མདོག་གསལ་
[175b.3]བར་བྱེད་པའི་མཆོག་ཡིན་ནོ། །ཡང་ན་མུངྒ་པརྞིའི་ལོ་མའམ། ཤིང་མངར་རམ། བཅའ་སྒ་འདི་གསུམ་གང་ཡང་རུང་བའི་ཆོ་ག་གོང་མ་ལྟར་བྱས་ན་ཕན་ཡོན་ཡང་གོང་མ་དང་འདྲ་བར་ཤེས་པར་བྱའོ། །མཧཱ་བ་ལ་སྲང་བརྒྱད་ཆུ་སྲང་བརྒྱ་ལྔ་བཅུ་རྩ་གཉིས་ཀྱི་ནང་དུ་བསྐོལ་
[175b.4]ཏེ། ཁུ་བ་བཞི་ཆ་ལུས་པ་དང་། དེའི་ནང་དུ་ཁུ་བ་དང་མཉམ་པའི་མར་དང་། དེ་དང་མཉམ་པའི་འོ་མ་དང་། བ་ལ་དང་། ཨ་ཏི་བ་ལ་དང་། ཤིང་མངར་དང་། བ་སྦྲུ་བ་དང་། པྲ་པུཎྜ་རཱི་ཀ་དང་། ཏང་པ་ལ་དང་། པི་ལ་ཡ་དང་། ཁ་སྲལ་ཕྲེའུ་དང་།
[175b.5]ཨ་ཤྭ་གནྡྷ་དང་། ཁ་ར་དཀར་པོ་དང་། ཟངས་རྩི་བ་དང་། མེ་ད་རྣམ་གཉིས་དང་། གཟེམ་དང་། རམ་ཉེ་བ་རྣམ་གཉིས་དང་། པ་ཡ་སྱ་དང་། ཟི་ར་རྣམ་གཉིས་དང་། པདྨའི་རྩ་བ་དང་། པདྨའི་རྩ་ལག་དང་། འབྲ་གོ་དང་། ཤྲིང་ག་ཏ་ཀ་དང་། ཀ་ཤེ་
[175b.6]རུ་ཀ་དང་། འདི་རྣམས་སྲང་ཕྱེད་ཕྱེད་ཆམ་ཆོམ་བརྡུངས་ཏེ་བསྲེས་ལ་ལྷན་ཅིག་བསྐོལ་ཏེ། མར་འབའ་ཞིག་ལུས་པ་ནི་མ་ཧཱ་བ་ལའི་མར་ཞེས་བྱ་སྟེ། དེ་ལས་རན་པར་འཐུངས་ན། ཁྲག་དང་། མཁྲིས་པ་དང་། གློ་གཅོང་ཟད་བྱེད་དང་། གློ་འགྲམས་པ་ལས་རྒྱལ་
[175b.7]བར་བྱེད་དོ། །དེ་བཞིན་དུ་སྐོམ་དད་ཆེ་བ་དང་། མགོ་འཁོར་བ་དང་། ལུས་ཚ་བ་དང་། ལུས་ཤ་རྒྱས་ཤིང་ཉམས་སྟོབས་འཕེལ་བའི་མཆོག་ཡིན་ནོ། །གཞན་ཡང་ཚེ་རིང་བར་འགྱུར་བ་དང་། མདངས་བཟང་བར་འགྱུར་བ་དང་། མདོག་སྡུག་པར་འགྱུར་བ་དང་།
[176a]
[176a.1]གཉེར་མ་དང་སྐྲ་དཀར་འཇོམས་པར་བྱེད་པ་ཡིན་ལ། ཟླ་བ་དྲུག་གི་བར་དུ་བསྟེན་ན། རྒན་པོ་ཡང་གཞོན་ནུར་འགྱུར་རོ། །གོང་དུ་སྨོས་པའི་སྨན་མར་དེ་དག་ནི་ཉམས་སྟོབས་ཆེ་ཞིང་མེ་དྲོད་ཆེ་བ་ལ་གཏང་བ་ཡིན་གྱི། ཉམས་སྟོབས་ཆུང་བ་དང་། མེ་དྲོད་
[176a.2]ཆུང་བ་ལ་ཡང་མ་ཡིན་ཏེ། དེ་ལྟར་དྲོད་ཆུང་བ་ལས་ནི་ཕྱི་ས་སླ་བ་འབྱུང་བ་ཡིན་ཏེ། དེ་ལ་ནི་གཅོང་ཆེན་པོ་གསོ་བའི་ཆོ་ག་རྣམས་བྱའོ། །རྩ་བ་བཅུ་པ་དང་། སྲན་མ་ཨད་མ་ཀུན་ཏ་དང་། ཤང་ཀ་པུཥྤ་དང་། ཟུར་པ་དང་། བ་ལ་དང་། ཧསྟི་པི་པི་ལིང་དང་། ཨ་
[176a.3]པ་མར་ག་དང་། པི་པི་ལིང་གི་རྩ་བ་དང་། ཀྲུ་ཏྲུག་ཏྲེས་དང་། ག་བྲའི་རྩ་བ་དང་། མ་ནུའི་རྩ་བ་དང་། འདི་རྣམས་སྲང་གཉིས་གཉིས་ཆམ་ཆོམ་བརྡུངས་པ་དང་། ནས་སྲང་དྲུག་ཅུ་རྩ་བཞི་དང་། ཨ་རུ་ར་བཟང་པོ་རྡོག་མ་བརྒྱ་དང་། ཆུ་སྲང་སུམ་བརྒྱ་ཉི་ཤུ་
[176a.4]དང་། འདི་རྣམས་ལྷན་ཅིག་བསྐོལ་ལ། ནས་ཚོས་པ་དང་། ཕྱིར་ཕྱུང་ལ་བཙགས་ཏེ། ཨ་རུ་ར་མ་གཏོགས་པ་ཚིགས་མ་བོར་ཏེ། ཨ་རུ་ར་བཙོས་པ་དེ་ཉིད་སྨན་ཁུ་དང་། བུ་རམ་སྲང་བརྒྱ་དང་། མར་སྲང་བརྒྱད་དང་། ཏིལ་མར་སྲང་བརྒྱད་དང་། པི་པི་ལིང་སྲང་བཞི་དང་། འདི་རྣམས་བསྐོལ་
[176a.5]ཏེ་བསྒྲངས་པའི་ནང་དུ་སྦྲང་རྩི་སྲང་བརྒྱད་བཏབ་པ་ནི། དྲང་སྲོང་རི་བྱིའི་ལྡེ་གུ་ཞེས་བྱ་སྟེ། དེ་ལས་རྟག་ཏུ་ཨ་རུ་ར་རྡོག་མ་གཉིས་གཉིས་དང་བཅས་པའི་ལྡེ་གུ་ཟོས་ན་བཅུད་ཀྱིས་ལེན་དུ་འགྱུར་ཏེ། གཉེར་མ་རངས་པ་དང་། སྐྲ་དཀར་མེད་ཅིང་མདོག་དང་། ཆེ་དང་།
[176a.6]སྟོབས་ཀྱང་འཕེལ་བར་བྱེད་དོ། །གཞན་ཡང་ལུད་པ་རྣམ་པ་ལྔ་དང་། ཟད་བྱེད་ཀྱི་ནད་དང་། དབུགས་མི་བདེ་བ་དང་། སྐྱིགས་བུ་དང་། རིམས་མི་བཟད་པ་དང་། སྐྲན་དང་། གཅིན་ནད་དང་། ཕོ་བའི་ནད་དང་། གཞང་འབྲུམ་དང་། སྙིང་ནད་དང་། ཡི་ག་
[176a.7]འཆུས་པ་དང་། ཆམ་པ་རྣམས་ལ་ཕན་ཏེ། དཔལ་བསྐྱེད་ཅིང་བཅུད་ཀྱིས་ལེན་གྱི་མཆོག་ཏུ་དྲང་སྲོང་ཆེན་པོ་རི་བྱིས་བཤད་པ་ཡིན་ནོ། །རྩ་བ་བཅུ་པ་དང་། བ་ལ་དང་། མུར་བ་དང་། སེར་པོ་རྣམ་གཉིས་དང་། པི་པི་ལིང་དང་། ཧསྟི་པི་པི་ལིང་དང་། པ་ཐ་
[176b]
[176b.1]དང་། ཨ་ཤྭ་གནྡྷ་དང་། ཨ་པ་མརྒ་དང་། ཁ་སྲལ་ཕྲེའུ་དང་། བོང་ང་དཀར་པོ་དང་། སླེ་ཏྲེས་དང་། བ་ལ་དང་། བིལ་བ་དང་། ཏྲི་བི་ཏ་ཞེས་བྱ་བ་ཤིང་ཉེ་རོང་དང་། དན་ཏི་དང་། ཙི་ཏྲ་ཀའི་རྩ་བ་དང་། ལོ་མར་བཅས་པ་དང་། པ་ཡས་སྱ་ཞེས་བྱ་བ་ཀྵི་རི་
[176b.2]ནི་དང་། དུག་མོ་ཉུང་དང་། སྤང་སྤོས་དང་། བི་ཟ་ཀ་ཞེས་བྱ་བ་ཨ་ས་ནའི་ཤིང་གི་སྙིང་པོ་དང་། འོ་མར་བཅས་པ་དང་། བོ་ཏ་སྠ་བི་ར་ཞེས་བྱ་བའི་ཤིང་དང་། གོ་བྱེ་དང་། བྱི་དང་ག་དང་། ཉེའུ་ཤིང་དང་། བུ་ཏ་ཀ་རཉྫ་
[176b.3]དང་། ཤ་མྱ་ཀ་ཞེས་བྱ་བ་དོང་ག་དང་། ཙནྡྲ་མེ་ཁ་དང་། ས་ཧ་ར་ཙ་ཞེས་བྱ་བ་བ་སྤྲུ་དང་། ཤི་ཀྲུ་དང་། ནིམ་པའི་ཤུན་ཕྲགས་དང་། བུ་རམ་ཤིང་གི་ཁུ་བ་དང་། འདི་རྣམས་སྲང་རེ་རེ་དང་། ཨ་རུ་ར་སྟོང་ཆིག་བརྒྱ་དང་། ནས་སྲང་བརྒྱ་ཉི་ཤུ་རྩ་བརྒྱད་
[176b.4]དང་། སྨན་དེ་རྣམས་ཀྱི་བརྒྱད་འགྱུར་ཆུ་དང་བསྐོལ་བ་གོང་མ་ལྟར་ནས་ཚོས་པ་དང་ཕྱུང་སྟེ། ཁུ་བ་བཙིར་ལ་ཨ་རུ་ར་མ་གཏོགས་པའི་སྙིགས་མ་བོར་ཏེ། ཡང་ཨ་རུ་ར་ཚོས་པ་དེ་དང་། བུ་རམ་རྙིང་པ་སྲང་བརྒྱ་དང་། ཏིལ་མར་དང་། མར་དང་། སྐྱུ་རུ་རའི་ཁུ་བ་དང་། འདི་
[176b.5]རྣམས་སྲང་སུམ་ཅུ་རྩ་གཉིས་གཉིས་རྣམས་མེ་མི་ཆེ་བ་ལ་ཡང་བསྐོལ་ཏེ། དྲིལ་དུ་བཏུབ་པ་ཙམ་ན་ཕྱུང་སྟེ། བསྒྲངས་ནས་དེའི་ནང་དུ་སྦྲང་རྩི་སྲང་དྲུག་ཅུ་རྩ་བཞི་དང་། པི་པི་ལིང་སྐམ་པོ་སྲང་བཞི་དང་། དྲི་སྣ་གསུམ་སྲང་རེ་རེ་ཞིབ་ཏུ་བཏགས་པའི་ཕྱེ་མ་བཏབ་སྟེ། དེ་
[176b.6]རྣམས་ལེགས་པར་བསྲེས་ནས་དཀྲུགས་ཏེ། སྣོད་རྫ་མ་རྙིང་པའི་ནང་དུ་བཅུག་ནས་ཟླ་བ་གཅིག་གི་བར་དུ་ནས་ཀྱི་ཕུང་པོའི་ནང་དུ་བཞག་སྟེ། དེ་ནས་གོང་མ་བཞིན་དུ་ཨ་རུ་ར་གཉིས་གཉིས་ལྡེ་གུ་དང་བཅས་པར་ཟོས་ན། དྲང་སྲོང་ཆེན་པོ་གནས་འཇོག་གིས་བཤད་པའི་
[176b.7]བཅུད་ཀྱིས་ལེན་གྱི་ལྡེ་གུ་ཞེས་བྱ་སྟེ། གོང་དུ་སྨོས་པའི་ལྡེ་གུ་ཐམས་ཅད་པས་ཁྱད་པར་དུ་ཕན་ཡོན་ལྷག་པ་ཡིན་ནོ། །ནད་མེད་པ་རྣམས་ལ་ཡང་ཆོ་ག་བསྲུང་མི་དགོས་པར་དུས་ཐམས་ཅད་དུ་བསྔགས་སོ། །ལྕེ་མྱང་ཚ་དང་། བཅའ་སྒ་སྲང་རེ་རེ་དང་ཁ་རུ་ཚ་སྲང་
[177a]
[177a.1]གཉིས་དང་། ད་ཏྲིག་དང་། སེའུ་འབྲུ་དང་། ཨརྫ་ཀ་ཞེས་བྱ་བ་ཞིམ་ཐིག་ལེ་དང་། དེ་རྣམས་སྲང་བརྒྱད་བརྒྱད་དང་། ན་ལེ་ཤམ་དང་། གོ་སྙོད་ཞོ་རེ་རེ་དང་། འུ་སུ་ཞོ་གཉིས་དང་། འདི་རྣམས་ཞིབ་ཏུ་བཏགས་
[177a.2]ཏེ་བཟའ་བ་དང་། བཏུང་བའི་ནང་དུ་བཏབ་སྟེ་ཟོས་ན། ཡི་ག་འཆུས་པ་དང་། མེ་དྲོད་ཉམས་པ་དང་། རྩིབ་ལོགས་ན་བ་དང་། དབུགས་མི་བདེ་བ་དང་། ལུད་པ་རྣམས་ལ་ཕན་ནོ། །འུ་སུ་ཞོ་གཉིས་དང་། གོ་སྙོད་དང་། ལ་ལ་ཕུད་དང་།
[177a.3]བལ་པོ་སེའུ་དང་། ད་ཏྲིག་དང་། འདི་རྣམས་སྲང་ཕྱེད་ཕྱེད་དང་། ཁ་རུ་ཚ་སྲང་གཉིས་དང་། བཅའ་སྒ་ཞོ་གཉིས་དང་། ཀ་པིད་ཏ་དང་། ཨ་རུ་ར་སྲང་ཕྱེད་དང་གསུམ་གསུམ་དང་། ཤ་ཁ་ར་སྲང་བཅུ་དྲུག་དང་བསྲེས་པའི་ཀ་པི་ད་ཏ་རོ་དྲུག་པའི་ཕྱེ་མ་ཞེས་
[177a.4]བྱ་སྟེ། བཟའ་བ་དང་བཏུང་བ་དང་ལྷན་ཅིག་ཟོས་ན་ཕན་ཡོན་གོང་མ་དང་འདྲའོ། །གློ་གཅོང་ཟད་བྱེད་ལ་ནི། གཅོང་ཆེན་པོ་གསོ་བའི་ཆོ་ག་ཇི་ལྟར་བཤད་པ་བཞིན་དུ་བྱའོ། །གོང་དུ་བསྟན་པའི་སྨན་གྱི་སྦྱོར་བ་དེ་དག་གིས་གློ་གཅོང་ཟད་བྱེད་ཀྱི་ནད་ཞི་སྟེ། ཉམས་
[177a.5]སྟོབས་དང་ལྡན་ཞིང་བད་ཀན་སྐྱེད་པར་གྱུར་ན། དེའི་རྟགས་མགོ་བོ་དང་བྲང་ན་བར་གྱུར་པ་དེ་ལ་ནི་དུད་པ་བརྔུབ་པའི་ཆོ་ག་རྣམས་བྱ་སྟེ། དེ་ཡང་མེ་ད་རྣམ་གཉིས་དང་། བ་ལ་རྣམ་གཉིས་དང་། ཤིང་མངར་དང་། བཙོ་མའི་ཤུན་ཕྲགས་དང་། འདི་
[177a.6]རྣམས་ཆུ་ཐགས་སུ་བྱ་སྟེ། རེང་བུར་བྱས་ནས་བསྐམས་ཏེ་མེ་ལ་བསྲེགས་པའི་དུད་པ་བརྔུབ་བོ། །དེའི་འོག་ཏུ་ཛི་བན་ཏིའི་སྡེ་ཚན་གྱི་སྨན་མར་འུ་ཤ་དང་ལྷན་ཅིག་བཏུང་ངོ་། །ཡང་ན་ལྡོང་རོས་དང་། ཤིང་པླག་ཤ་དང་། ཨ་ཛ་གནྡྷ་དང་། ཅུ་གང་
[177a.7]དང་། དོང་གྲ་དང་། འདི་རྣམས་ཡང་བཙོ་མའི་ཤུན་ཕྲགས་དང་ཆུ་ཐགས་སུ་བྱ་སྟེ། རེང་བུའི་དུད་པ་བརྔུབ་པར་བྱས་ནས་དེའི་འོག་ཏུ་ཤ་ཁ་རའི་ཆུའམ། བུ་རམ་ཤིང་གི་ཁུ་བའམ། བུ་རམ་གྱི་ཆུ་གང་ཡང་རུང་བ་བླུད་དོ། །ཡང་ན་ལྡོང་རོས་དང་། ནྱ་གྲོ་དྷའི་མྱུ་གུ་རློན་
[177b]
[177b.1]པ་ཆ་སྙོམས་ཏེ་བཏགས་ལ་མར་དང་སྦྱར་ནས་རེང་བུ་བྱས་ཏེ་དུད་པ་བརྔུབ་བོ། །དེའི་འོག་ཏུ་སྲེག་པའི་ཤ་ཁུ་དང་བཟའ་བ་དང་བཏུང་བ་སྦྱར་ལ་སྦྱིན་ནོ། །ཟད་བྱེད་ཀྱི་ལུད་པ་ལ་ནི་ཐོག་མ་ཉམས་སྟོབས་དང་མེ་དྲོད་བསྐྱེད་པར་བྱའོ། །ནད་གཞི་མང་པོ་ལས་སྐྱེད་པར་བྱེད་པ་དང་། ནད་གཞི་
[177b.2]མང་པོ་ལས་གྱུར་པའི་ལུད་པ་ནི། དང་པོ་སྣུམ་ཆོས་བྱ་ཞིང་འཇམ་པའི་བཀྲུ་སྨན་བཏང་སྟེ། དེ་ལ་དོང་ག་དང་། དུར་བྱིད་དང་། འདི་གཉིས་རྒུན་ཆུ་དང་། མར་དང་སྦྱར་བའམ། ཡང་ན་སེང་ཕྲོམ་བསྐོལ་བའི་ཁུ་བ་མར་དང་སྦྱར་བའམ། བི་ད་རིའི་རང་གི་ཁུ་བ་རང་གི་མར་
[177b.3]དང་སྦྱར་བའམ། འདི་གསུམ་གང་ཡང་རུང་བ་ལུས་ཟད་བྱེད་དང་ཉམ་ཆུང་བ་དག་པར་བྱ་བའི་ཕྱིར་བཀྲུ་སྨན་དེ་དག་བཤད་དོ། །མཁྲིས་པ་དང་། བད་ཀན་དང་། ལུས་ཟུངས་བདུན་ཟད་པ་དང་། ཟད་བྱེད་ཀྱི་ནད་དང་། ལུད་པ་ཟད་བྱེད་དེ་ལ་ནི་ཀར་ཀ་ཏ་སྲིང་གི་དང་།
[177b.4]བ་ལ་རྣམ་གཉིས་ཆམ་ཆོམ་བརྡུངས་ཏེ། མར་བཞི་འགྱུར་གྱི་འོ་མ་དང་བསྐོལ་ཏེ་བླུད་དོ། །གཅིན་སྲི་ཞིང་མདོག་སྣ་ཚོགས་སུ་སྣང་བ་ལ་ནི་བི་ད་རི་དང་ཀ་དམ་པ་གཉིས་འོ་མ་དང་མར་དུ་སྦྱར་བའམ། ཡང་ན་ཤིང་ཏ་ལའི་འབྲས་བུ་མར་དང་འོ་མ་དང་སྦྱར་བ་བླུད་དོ། །
[177b.5]ཕོ་མཚན་དང་། རྐུབ་དང་། ཆུ་སོ་དང་། བརླ་བྲག་སྐྲང་ཞིང་ནད་དང་བཅས་པ་ལ་ནི་མར་གྱི་སྙིང་ཁུའམ་ཡང་ན་མར་དང་། ཏིལ་མར་བསྲེས་པ་གང་ཡང་རུང་བའི་འཇམ་རྩི་མས་གཏོང་ངོ་། །དེའི་འོག་ཏུ་སྲོག་ཆགས་སྐམ་ས་ལ་གནས་པའི་ཤ་དང་། བྱིའུ་ཅོ་གའི་ཤ་དང་།
[177b.6]སྲོག་ཆགས་ཁུང་ན་གནས་པའི་ཤ་དང་། ཤ་སར་པ་ཟ་བའི་སྲོག་ཆགས་ཀྱི་ཤ་དང་། ཤ་ཟའི་སྲོག་ཆགས་ཐམས་ཅད་ཀྱི་ཤ་དང་། འདི་རྣམས་ཡས་ཀྱི་གོ་རིམས་བཞིན་བཟའོ། །ཐང་ལ་གནས་པའི་སྲོག་ཆགས་དེ་དག་ཐམས་ཅད་ཀྱི་ཤ་ནི་ཤིན་ཏུ་དྲོ་ཞིང་རྩའི་རྒྱུན་དག་པ་ནས་འཇུག་སྟེ།
[177b.7]འདིས་ལུས་རྒྱས་ཤིང་འཕེལ་བར་འགྱུར་རོ། །ཞེས་དྲང་སྲོང་ཆེན་པོ་སྒྲ་གྲག་གི་བུས་བཤད་དོ། །དབྱི་མོ་དང་འབྲས་བུ་གསུམ་དང་། ག་བྲའི་རྩ་བ་དང་། རྩ་བ་བཅུ་པ་དང་། ཙི་ཏྲ་ཀ་དང་། ཀུ་ལདྠ་ཞེས་བྱ་བ་རྒྱ་སྲན་དང་། པི་པི་ལིང་གི་རྩ་བ་དང་། པ་ཐ་
[178a]
[178a.1]དང་། རྒྱ་ཤུག་སྐྱུར་པོ་དང་། ནས་དང་། དེ་རྣམས་ཆམ་ཆོམ་བརྡུངས་ཏེ་ཆུ་དང་བསྐོལ་བའི་ནང་དུ། དོང་གྲ་དང་། བྱི་ཚེར་བ་དང་། པི་པི་ལིང་དང་། ཟུར་པ་དང་། མ་ནུ་དང་། ཀར་ཀ་ཏ་སྲིང་གི་དང་། འདི་རྣམས་ཞིབ་ཏུ་བཏགས་
[178a.2]པའི་ཕྱེ་མ་དང་། མར་སྲང་གིས་ཆ་སྙོམས་ཏེ་ཚུལ་བཞིན་དུ་བསྐོལ་ལ་མར་འབའ་ཞིག་ལུས་བའི་ནང་དུ། ཡ་བཀྵ་ར་དང་། སརྫི་ཀའི་ཐལ་བ་དང་ལན་ཚྭ་རྣམ་ལྔ་དང་། འདི་རྣམས་བཏབ་སྟེ་དེ་ལས་ཅི་རན་པར་འཐུངས་ན། ཟད་བྱེད་དང་ལུད་པས་ཉམ་ཐག་པ་
[178a.3]སེལ་ཏོ། །ཀ་ས་མར་ད་དང་། ཨ་རུ་ར་དང་། གླ་སྒང་དང་། པ་ཐ་དང་། ཀད་པ་ལ་དང་། དོང་གྲ་དང་། པི་པི་ལིང་དང་། པུ་ཙེ་ཤེལ་དང་། ཏང་པ་ལ་དང་འདི་རྣམས་ཞོ་གཉིས་གཉིས་ཚུལ་བཞིན་དུ་བསྐོལ་བའི་ཁུ་བའི་ནང་དུ་མར་སྲང་སུམ་ཅུ་རྩ་གཉིས་དང་།
[178a.4]འོ་མ་དང་། རྒུན་འབྲུམ་སྲང་དྲུག་ཅུ་རྩ་བཞི་བཞི་དང་བསྐོལ་ཏེ་མར་འབའ་ཞིག་ལུས་པ་ལས་རན་པར་འཐུངས་ན། སྐྲངས་པ་དང་། རིམས་དང་། མཆིན་པ་དང་། ལུད་པ་ཐམས་ཅད་འཕྲོག་ཅིང་ཞི་བར་བྱེད་དོ། །བྲི་ཤ་ཞེས་བྱ་བ་བ་ཤ་ཀ་དང་། ཀཎྜ་ཀ་རི་
[178a.5]དང་། སླེ་ཏྲེས་དང་དེ་གསུམ་གྱི་རྩ་བ་དང་། འབྲས་བུ་དང་མྱུ་གུ་དང་། ལོ་མ་རྣམས་ཆམ་ཆོམ་བརྡུངས་པའི་ཁུ་བ་དང་མར་དུ་བསྐོལ་ཏེ། མར་འབའ་ཞིག་ལུས་པ་འཐུངས་ན། ལུད་པ་དང་ཡི་ག་འཆུས་པ་རྣམས་སེལ་ཏོ། །ཡང་ན་སེའུ་འབྲུའི་ཁུ་བ་
[178a.6]མར་ཅི་ཙམ་པའི་ཉིས་འགྱུར་དུ་བསྐོལ་ཏེ་མར་ལུས་པ་ལས། དེའི་ནང་དུ་ཚ་བ་གསུམ་གྱི་ཕྱེ་མ་བཏབ་སྟེ་བླུད་ན་ཕན་ཡོན་གོང་མ་དང་འདྲའོ། །ཡང་ན་ཡ་བཀྵ་ར་དང་མར་སྦྱར་བ་ཟས་ཟོས་པའི་འོག་ཏུ་བླུད་དོ། །ཡང་ན་པི་པི་ལིང་དང་། བུ་རམ་དང་། མར་གྱི་
[178a.7]བཞི་འགྱུར་གྱི་རའི་འོ་མ་དང་འཐུངས་ན། ཕན་ཡོན་གོང་མ་དང་མཐུན་ནོ། །སྨན་མར་དེ་དག་གིས་བླུད་ན་ཕན་ཡོན་ནི་མེ་དྲོད་བསྐྱེད་ཅིང་ཟད་བྱེད་ཀྱི་ནད་དང་། ལུད་པའི་ནད་ཐམས་ཅད་དང་། བྲང་དང་། རྒྱུན་སྲང་དང་གྲེ་བར་ནད་གཞིས་ལུད་པ་འགགས་
[178b]
[178b.1]པ་རྣམས་སྦྱོང་བར་བྱེད་དོ། །ནས་སྲང་སུམ་ཅུ་རྩ་གཉིས་དང་། ཨ་རུ་ར་རྣམ་པར་རྒྱལ་བ་རྡོག་མ་ཉི་ཤུ་དང་། ཆུ་དང་ཚུལ་བཞིན་དུ་བསྐོལ་ཏེ་ནས་ཚོས་པ་དང་། ཨ་རུ་ར་ཕྱིར་ཕྱུང་སྟེ་མཉེས་ལ་གོང་གི་ནས་ཁུའི་ནང་དུ་ཨ་རུ་ར་དེ་ཉིད་དང་། བུ་རམ་རྙིང་པ་སྲང་དྲུག་
[178b.2]དང་། ལྡོང་རོས་ཞོ་གཉིས་སྐྱེར་ཁཎྜ་ཞོ་གཉིས་དང་འདི་རྣམས་དང་ལྷན་ཅིག་ཏུ་སྦྱར་ཏེ་ལྡེ་གུ་ཟོས་ན་ལུད་པ་དང་དབུགས་མི་བདེ་བ་སེལ་ཏོ། །སྲོག་ཆགས་སྭ་བིདྷ་ཞེས་བྱ་བ་ལ་མོད་འདྲ་བའི་སྤུ་ཡོད་དེ། དེ་བསྲེགས་པའི་ཐལ་བ་མར་དང་སྦྲང་རྩི་དང་ཤ་ཁ་རར་སྦྱར་
[178b.3]བའམ། རྨ་བྱའི་རྐང་པ་བསྲེགས་པའི་ཐལ་བ་མར་དང་སྦྲང་རྩི་དང་སྦྱར་བའི་འདག་གུ་ཟོས་ན་ལུད་པ་དང་དབུགས་མི་བདེ་བ་སེལ་ཏོ། །ཡང་ན་ཨེ་རཎྜའི་ལོ་མ་བསྲེགས་པའི་ཐལ་བ་དང་ཚ་བ་གསུམ་དང་ཏིལ་མར་དང་བུ་རམ་བཅས་པར་སྦྱར་བའི་འདག་གུའམ།
[178b.4]ཡང་ན་ཨེ་རཎྜ་དང་། བྱིའུ་རུག་པའི་ལོ་མ་བསྲེགས་པའི་ཐལ་བ་དང་། ཚ་བ་གསུམ་དང་། ཏིལ་མར་དང་། བུ་རམ་དང་སྦྱར་བའི་ལྡེ་གུ་ཟོས་ན། ཟད་བྱེད་ཀྱི་ལུད་པ་འཇོམས་སོ། །ཡང་ན་ཚ་བ་གསུམ་གྱི་ཕྱེ་མ་དང་། བུ་རམ་རྙིང་པ་དང་། མར་དང་སྦྱར་བའི་ལྡེ་
[178b.5]གུ་ཟོས་ན་ཕན་ཡོན་གོང་མ་དང་འདྲའོ། །ཡང་ན་ཤུག་པ་དང་། འབྲས་བུ་གསུམ་དང་། ཚ་བ་གསུམ་དང་། བྱི་དང་ག་དང་། ཐང་ཤིང་གི་འབྲས་བུ་གསུམ་དང་། བ་ལ་དང་། ར་སྣ་དང་། འདི་རྣམས་ཀྱི་ཕྱེ་མ་དང་། ཕྱེ་མ་སྤྱི་དང་མཉམ་པའི་ཤ་ཁ་ར་དང་སྦྱར་
[178b.6]བའམ། ཡང་ན་ཕྱེ་མ་དེ་མར་དང་སྦྲང་རྩི་དང་སྦྱར་བའི་ལྡེ་གུ་ཟོས་ན། ལུད་པ་སེལ་བའི་མཆོག་ཡིན་ནོ། །དེ་བཞིན་དུ་ན་ལེ་ཤམ་ཕྱེ་མ་མར་དང་སྦྲང་རྩི་དང་སྦྱར་བའི་ལྡེ་གུ་ཟོས་ན་ཕན་ཡོན་གོང་མ་དང་འདྲའོ། །ཡང་ན་ཨ་རུ་ར་དང་། བཅའ་སྒ་དང་། གནྡྷ་ཞེས་བྱ་བ་
[178b.7]གླ་སྒང་དང་། འདི་རྣམས་ཀྱི་ཕྱེ་མ་བུ་རམ་དང་རི་ལུར་བྱས་ཏེ་མུར་ན། ལུད་པའི་ནད་ཐམས་ཅད་དང་དབུགས་མི་བདེ་བའི་ནད་ཐམས་ཅད་ལ་ཕན་ནོ། །ཡང་ན་བ་རུ་ར་གཅིག་པུ་མུར་ན་ཡང་ཕན་ཡོན་གོང་དང་འདྲའོ། །སེང་ཕྲོམ་དང་ཤ་ཁ་ར་བཏགས་པའི་ཕྱེ་མ་མར་
[179a]
[179a.1]དང་བསྐོལ་བ་དང་བསྲེས་ཏེ་ཐུག་པའི་ནང་དུ་བཏབ་ནས་བཏུང་བའམ། ཡང་ན་ནས་སམ་གྲོ་རྗེན་བཏགས་གྲང་ཟན་ཐབས་སུ་སྦྱར་བའི་ནང་དུ་སྨན་གོང་མ་མར་དང་བཅས་པ་ཟོས་ན། སྐྱུགས་པ་དང་། སྐོམ་དད་ཆེ་བ་དང་། ལུད་པ་དང་འཁྲུ་
[179a.2]བ་རྣམས་སེལ་ཏོ། །ཡང་ན་ཀཎྜ་ཀ་རི་བསྐོལ་བའི་ཁུ་བའི་ནང་དུ་མོན་སྲན་སྡེའུ་དང་། སྐྱུ་རུ་ར་དང་། སེའུ་འབྲུ་ལ་སོགས་པའི་སྐྱུར་དང་། ལེགས་པར་སྦྱར་བའི་ཡུ་ཤ་བྱིན་ན་ལུད་པ་ཐམས་ཅད་ཀྱི་སྨན་དུ་བསྔགས་སོ། །ཡང་ན་རླུང་ལ་ཕན་པའི་སྨན་སྣ་ཚོགས་
[179a.3]དང་འོ་མ་དང་སྦྱར་བའམ། ཡང་ན་སྲོག་ཆགས་བི་ཀ་ར་ལ་སོགས་པ་དང་། པར་གུ་དོ་ཞེས་བྱ་བ་ཤང་ཤང་ཏེའུ་ལ་སོགས་པ་དང་། བ་ལ་ཞེས་བྱ་བ་ཁུང་ན་གནས་པའི་སྲོག་ཆགས་སྦྲུལ་ལ་སོགས་པ་འདི་རྣམས་ཀྱི་ཤ་ཁུའམ། ཡུ་ཤ་བླུད་ན་ཟད་བྱེད་ཀྱི་ལུད་
[179a.4]པ་འཇོམས་སོ། །གློ་གཅོང་ཟད་བྱེད་ཀྱི་ལུད་པ་ལ་ནི་དུད་པ་གཏང་བའི་ཆོ་གའི་སྐབས་སུ་འབྱུང་བའི་བཟའ་བའམ། བཏུང་བར་སྦྱར་བའམ། ཡང་ན་འོག་ནས་གཅོང་ཆེན་པོ་གསོ་བའི་སྐབས་སུ་བསྟན་པའི་བཟའ་བ་དང་བཏུང་བ་ཐམས་ཅད་འདིར་སྦྱར་རོ། །
[179a.5]མདོར་ན་ཉམས་སྟོབས་དང་། མེའི་དྲོད་སྐྱེད་པ་དང་། རྒྱུན་སྲང་སྦྱོར་བར་བྱེད་པའི་སྨན་ཐམས་ཅད་ནི་ཟད་བྱེད་ཀྱི་ལུད་པ་གསོ་བ། སྟོབས་ཆེ་བ་མཆོག་ཏུ་བསྔགས་སོ། །འདུས་པ་ལས་གྱུར་པའི་ཟད་བྱེད་ཀྱི་ལུད་པ་ནི་ཤིན་ཏུ་མི་བཟད་པ་ཡིན་ཏེ། དེ་ལ་ནི་ཐོག་
[179a.6]མར་ཉེས་པ་གང་གི་ཤས་ཆེ་བ་བརྟགས་ནས་སོ་སོ་དང་མཐུན་པའི་སྨན་བསྟན་པར་བྱའོ། །ལུད་པ་གསོ་བའི་ལེའུ་གསུམ་པ་རྫོགས་སོ།། །།དེ་ནས་སྐྱིགས་བུ་དང་དབུགས་མི་བདེ་བ་གསོ་བའི་ལེའུ་བཤད་པར་བྱ་སྟེ། དེ་ལ་སྐྱིགས་བུ་དང་
[179a.7]དབུགས་མི་བདེ་བའི་ནད་གཞི་གཅིག་ཏུ་བསྟན་པས་གསོ་བའི་དཔྱད་ཀྱང་འདྲ་སྟེ་གཅིག་ཏུ་བསྟན་པ་ཡིན་ནོ། །ཐོག་མར་སྐྱིགས་བུ་དང་དབུགས་མི་བདེ་བ་འབྱུང་བའི་རྒྱུ་ནི་རྩའི་རྒྱུན་སྲང་རྣམས་སུ་བད་ཀན་རྒྱུ་བ་རླུང་གིས་བསྒོངས་ཤིང་འགགས་པ་ལས་སྐྱིགས་བུ་འབྱུང་སྟེ། དེ་
[179b]
[179b.1]ལ་ནི་ཐོག་མ་སྣུམ་པའི་སྨན་དང་། ལན་ཚྭ་དང་ཏིལ་མར་དུ་བཅས་པའི་སྣུམ་དུགས་ལེགས་པར་བྱས་ནས་བད་ཀན་འགགས་པ་དེ་ཞུ་ཞིང་སློན་བྱ་སྟེ། ཕྱིར་ཁོང་པའི་ནང་དུ་ལོག་ནས་ཁ་ལ་སོགས་པ་ལ་ཕྱིར་ཕྱུང་སྟེ། དེ་འབྱུང་བ་དང་རླུང་ལེགས་པར་རྒྱུ་ཞིང་དབུགས་
[179b.2]ཀྱང་ཚུལ་བཞིན་དུ་འབྱུང་ངོ་། །དེ་ལྟར་དུགས་བྱས་པའི་འོག་ཏུ་སྣུམ་དང་སྲོག་ཆགས་ཐང་ལ་གནས་པའི་ཤ་དང་བཅས་པའི་བཟའ་བ་སྦྱིན་ནོ། །ཡང་ན་སྣུམ་མ་འབྱོར་ན་ཞོའི་སྤྲིས་མ་དང་བཅས་པ་སྦྱིན་ནོ། །དེའི་འོག་ཏུ་སྐྱིགས་བུ་དང་། དབུགས་མི་བདེ་བའི་ནད་
[179b.3]པ་ལ་སྐྱུག་སྨན་འཇམ་པོ་བཏང་སྟེ། ཁྱད་པར་དུ་ལུད་པ་དང་། སྙིང་ནད་དང་བྲང་ལ་ཕན་པའི་སྨན་བཏང་ན་བཟང་ངོ་། །དེ་ཡང་པི་པི་ལིང་དང་། ལྕེ་མྱང་ཚ་དང་། སྦྲང་རྩི་དང་སྦྱར་བ་ཟོས་ན་སྐྱུགས་པར་འགྱུར་ཏེ། རླུང་ལ་ཕན་པའི་སྨན་རྣམས་ཀྱང་དེ་ལྟར་སྦྱར་རོ། །
[179b.4]དེ་ལྟར་བད་ཀན་རླུང་གིས་འཁྲུགས་པ་དེ་སྨན་གྱིས་ཕྱིར་ཕྱུང་ན་ནད་མེད་ཅིང་བདེ་བ་ཐོབ་བོ། །དེ་བས་ན་སྐྱུག་སྨན་གྱིས་སློན་ཏེ། བད་ཀན་ཕྱུང་ན་རྒྱུན་སྲང་དག་སྟེ་དབུགས་ལེགས་པར་འབྱུང་བར་འགྱུར་རོ། །དབུགས་མི་བདེ་ཞིང་རྟུག་པ་འགགས་ཏེ། མི་དྲན་པ་ལྟར་
[179b.5]བྱེད་ན་དེ་ནི་མུན་འཐིབས་ཞེས་བྱ་བའི་སྐྱིགས་བུ་དང་དབུགས་མི་བདེ་བའི་ནད་ཡིན་ཏེ། དེ་ལ་ནི་མ་དུ་ལུང་ག་དང་། སྟར་བུ་དང་། ཤིང་ཀུན་དང་། བི་ལུ་དང་། བི་ད་ཁ་རུ་ཚ་དང་བཅས་པའི་ཟས་བྱིན་ན། དབུགས་ཚུལ་བཞིན་དུ་འབྱུང་ངོ་། །ཡང་ན་མ་དུ་ལུང་ག་ལ་
[179b.6]སོགས་པའི་ཤིང་ཏོག་སྐྱུར་བ་རྣམས་དང་། རྒྱམ་ཚ་དང་སྦྱར་བའི་བཀྲུ་སྨན་དྲོ་འཇམ་ཙམ་བཏང་སྟེ། དེ་ལྟར་བད་ཀན་བསྒོངས་པ་ལས་རླུང་འཁྲུགས་ཏེ། སྐྱིགས་བུ་དང་དབུགས་མི་བདེ་བ་འབྱུང་བ་གང་ཡིན་པ་སློན་ཁྲུས་གཉིས་ཀྱིས་རྒྱུན་སྲང་དག་པར་བྱ་སྟེ། ཇི་
[179b.7]ལྟ་ཞེ་ན། དཔེར་ན་ཆུའི་རྒྱུན་བབ་པ་ལ་ཆུ་ལོན་གྱིས་བཀག་ན་ཆུ་ལམ་གཞན་ནས་འགྲོ་བ་དང་འདྲ་བར། རླུང་རྒྱུ་བ་བད་ཀན་གྱིས་བཀག་པ་ཡང་དེ་དང་འདྲ་བས་སློན་ཁྲུས་གཉིས་ཀྱི་གོང་འོག་ཏུ་དག་པར་བྱ་བ་གཅེས་སོ། །ཆོ་ག་དེ་ལྟར་བྱས་ཀྱང་མ་ཞི་སྟེ། ནང་དུ་
[180a]
[180a.1]ཅུང་ཞིག་ལུས་པ་ལྟར་ན་དུད་པ་བརྔུབ་པའི་ཆོ་གས་ཞི་བར་བྱ་སྟེ། དེ་ཡང་ཡུང་བ་དང་། ཨེ་རཎྜའི་ལོ་མ་དང་། རྩ་བ་དང་། རྒྱ་སྐྱེགས་དང་། ལྡོང་རོས་དང་། ཐང་ཤིང་དང་། བ་བླ་བ་དང་། སྤང་སྤོས་དང་། འདི་རྣམས་ཞིབ་ཏུ་
[180a.2]བཏགས་པ་མར་དང་སྦྱར་བའི་རེང་བུ་བསྲེགས་པའི་དུད་པ་བརྔུབ་པའམ། ཡང་ན་ནས་ཞིབ་ཏུ་བཏགས་པ་མར་དང་སྦྱར་བའི་རེང་བུ་བསྲེགས་པའི་དུད་པ་བརྔུབ་པའམ། ཡང་ན་སྤྲ་ཚིལ་དང་། སྲ་རྩི་པོག་དང་། མར་དང་སྦྱར་བའི་རེང་བུའི་དུད་པ་བརྔུབ་པའམ། ཡང་
[180a.3]ན་ཨ་ཀ་རུ་དང་། མར་དང་སྦྱར་བའི་དུད་པ་བརྔུབ་པའམ། ཙནྡན་བསྲེགས་པའི་དུད་པ་བརྔུབ་པའམ། ཡང་ན་གླང་གི་རྭ་དང་། བ་ལ་དང་། ར་སྣ་དང་། འདི་གསུམ་གྱི་དུད་པ་བརྔུབ་པའམ། ཡང་ན་སྲོག་ཆགས་རི་ཤི་དང་། གོ་དྷ་དང་། ཀུ་རང་ག་རི་དགས་དང་།
[180a.4]འདི་རྣམས་གང་ཡང་རུང་བའི་པགས་པ་དང་། རྨིག་པ་དང་། རྭའི་དུད་པ་དང་། ཡང་ན་གུ་གུལ་ལམ། ལྡོང་རོས་སམ། ཤིང་ཐ་ལའི་ཐང་ཆུ་དེ་རྣམས་གང་ཡང་རུང་བའི་དུད་པ་བརྔུབ་པའམ། ཡང་ན་སྲ་རྩི་པོག་དང་། ཨ་ཀ་རུ་དང་། ཤུག་པ་དང་། དེ་
[180a.5]རྣམས་མར་དང་སྦྱར་བའི་དུད་པ་བརྔུབ་བོ། །དེ་ལ་གོང་དུ་དུགས་ཞེས་སྨོས་པ་ཡང་དུགས་བྱར་མི་ནུས་པའི་གནས་སུ་ནི་དུགས་སྤང་བ་ཡིན་ལ། བྱར་རུང་བའི་གནས་སུ་ནི་ངེས་པར་དུགས་བྱ་སྟེ། དེ་གང་ཞེ་ན། ཁ་ར་དཀར་པོ་དང་། འོ་མ་དྲོ་འཇམ་ཙམ་དང་སྨན་སྣུམ་
[180a.6]བག་ཅན་བཏགས་པའི་ཕྱེ་མ་དང་བསྲེས་པས་བླུགས་པའི་དུགས་བྱའོ། །གཞན་ཡང་བླུགས་པའི་དུགས་དང་། གླན་པའི་དུགས་ཀྱི་སྐབས་སུ་བསྟན་པའི་སྨན་རྣམས་ཀྱང་འདིར་སྦྱར་རོ། །གློ་གཅོང་ཟད་བྱེད་དང་། མགྲིན་པ་ཟད་བྱེད་ལ་ཡང་ཆོ་ག་འདི་ལྟར་སྦྱར་རོ། །
[180a.7]སྐྱིགས་བུ་དང་དབུགས་མི་བདེ་བ་མ་ཞུ་བ་དང་བཅས་པ་ལ་ནི་མ་ཞུ་བའི་ཆོ་ག་སྨྱུང་བ་ལ་སོགས་པ་བྱའོ། །ཇི་སྟེ་དུགས་དང་སྐྱུག་སྨན་དང་བཀྲུ་སྨན་ལ་སོགས་པ་དྲགས་ཏེ། རླུང་ཆེར་འཁྲུགས་པ་མཐོང་ན་དེ་ལ་ནི་རླུང་འཇོམས་པའི་སྨན་སྣ་ཚོགས་དང་། སྣུམ་དང་བཅུད་ཀྱིས་
[180b]
[180b.1]ལེན་ལ་སོགས་པ་དྲོ་འཇམ་ཙམ་དུ་སྦྱར་ལ། དེ་ལས་བཟའ་བ་དང་བཏུང་བ་དང་། བསྐུ་བ་ལ་སོགས་པ་བྱས་ན་ཞི་བར་བྱེད་དོ། །ཇི་སྟེ་བད་ཀན་ཟད་དམ་དུགས་བྱར་མི་རུང་བའི་གནས་སུ་དུགས་བྱས་སམ། ཉམ་ཆུང་བ་ལ་སློན་ཁྲུས་བྱས་ན། རླུང་རྣམས་འཁྲུགས་
[180b.2]ཤིང་གནད་རྣམས་སྐམ་པ་དང་། མྱུར་དུ་སྲོག་འཕྲོག་པར་བྱེད་དོ། །དེ་ལ་ནི་རླུང་འཇོམས་པའི་སྨན་གྱི་ཁུ་བ་དང་། སྣུམ་དང་ལྡེ་གུ་ལ་སོགས་པ་སྦྱར་ན། སྐྱིགས་བུ་དང་དབུགས་མི་བདེ་བ་ཞི་བར་འགྱུར་རོ། །ཁམས་ཟད་ཅིང་ལུས་སྐེམ་པ་དང་། ཚད་པས་འཁྲུ་
[180b.3]བ་དང་། མཁྲིས་པ་དང་། ཚ་བ་འདི་རྣམས་དང་ལྷན་ཅིག་ཏུ་སྐྱིགས་བུ་དང་དབུགས་མི་བདེ་བ་དང་འདྲེས་པར་གྱུར་པ་ལ་ནི་སྨན་མངར་བའི་བག་དང་། སྣུམ་པ་དང་། བསིལ་བ་ལ་སོགས་པས་གསོ་བར་བྱའོ། །སྲོག་ཆགས་ཐང་ལ་གནས་པའི་ཤ་དང་རྒྱ་སྲན་དང་།
[180b.4]རྩ་བ་བཅུ་པ་འདི་རྣམས་ལྷན་ཅིག་བསྐོལ་བའི་ཁུ་བ་བླུད་ན། སྐྱིགས་བུ་དང་དབུགས་མི་བདེ་བ་སེལ་ཏོ། །ཡང་ན་ན་ལེ་ཤམ་དཀར་པོ་དང་། བར་ད་ཀ་དང་། ཀ་སག་ན་དང་། བ་ཤ་ཀ་དང་། ལ་ཕུག་སྐམ་པོ་དང་། འདི་རྣམས་བསྐོལ་བའི་ཁུ་བ་བྱིན་ན་
[180b.5]ཡང་སེལ་ཏོ། །ཡང་ན་ནིམ་པའི་ལོ་མ་དང་། ཀུ་ལ་ཀ་དང་། བྲི་ཧི་ཏ་དང་། ཁ་ལུང་དང་འདི་རྣམས་ཡུ་ཤར་སྦྱར་བ་བླུད་པའམ། ཡང་ན་ཀཎྜ་ཀ་རི་དང་། བྱི་ཚེར་བ་དང་། བིལ་བའི་རྐང་དང་། ཀར་ཀ་ཏ་སྲིང་གི་དང་། གཟེ་མ་དང་། སླེ་ཏྲེས་དང་། ཙི་
[180b.6]ཏྲ་ཀ་དང་། རྒྱ་སྲན་དང་འདི་རྣམས་ཆུ་དང་ལྷན་ཅིག་བསྐོལ་བའམ། བཏུང་བའམ། ཡང་ན་ར་སྣ་དང་། རྩ་བ་ཆུང་ངུ་ལྔ་དང་། མོན་སྲན་སྡེའུ་དང་། ཙི་ཏྲ་ཀ་དང་། འདི་རྣམས་བསྐོལ་བའི་ཁུ་བ་ཡུ་ཤ་བླུད་པའམ། སྦྱོར་བ་དེ་རྣམས་ལས་གང་ཡང་རུང་བ་བླུད་
[180b.7]ན་སྐྱིགས་བུ་དང་དབུགས་མི་བདེ་བ་སེལ་ཏོ། །ཀྲུ་ཏྲུག་ཏྲེས་དང་། གོ་སྙོད་དང་། ཀར་ཀ་ཏ་སྲིང་གི་དང་། ཁ་རུ་ཚ་དང་། དེ་རྣམས་ལས་གཞི་བླངས་པའི་ཐུག་པ་སྦྱིན་ནོ། །ཡང་ན་རྩ་བ་བཅུ་པ་དང་སྦྱར་བའི་ཐུག་པ་བླུད་ན། ལུད་པ་དང་སྐྱིགས་བུ་དང་དབུགས་མི་
[181a]
[181a.1]བདེ་བ་རྣམས་ལ་ཕན་ནོ། །རྩ་བ་བཅུ་པ་དང་། ར་སྣ་དང་། ཟུར་པ་དང་། ག་བྲའི་རྩ་བ་དང་། བིལ་བ་རྣམ་གཉིས་ཀྱི་རྐང་དང་། པུཥྐར་མཱུ་ལ་དང་། ཀར་ཀ་ཏ་སྲིང་གི་དང་། པི་པི་ལིང་དང་། ལྕ་བའི་རྩ་བ་དང་། སླེ་ཏྲེས་དང་། བཅའ་སྒ་དང་། དེ་རྣམས་བསྐོལ་བའི་ཁུ་བ་བླུད་ལ། དེ་ཞུ་བའི་ཚོད་ཙམ་ན་དེ་
[181a.2]རྣམས་ལས་གཞི་བླངས་པའི་ཐུག་པ་སྦྱིན་ནོ། །འབྲས་དྲུག་ཅུ་པ་དང་། གྲོ་དང་ནས་དང་མོན་སྲན་སྡེའུ་དང་། རྒྱ་སྲན་ཀུ་ལངྠ་དང་། དེ་རྣམས་གཡོས་སུ་བྱས་པའི་བཟའ་བ་དང་བཏུང་བ་བྱིན་ན་ལུད་པ་དང་། རོ་སྟོད་རྫིངས་པ་དང་། རྩིབ་ལོགས་སུ་ཟུག་པ་དང་། སྐྱིགས་བུ་དང་། དབུགས་མི་བདེ་
[181a.3]བ་རྣམས་ཞི་བར་བྱེད་དོ། །ཡང་ན་ཨརྐའི་མྱུ་གུ་སྐམ་པོ་བཏགས་ཏེ་འོ་མ་དང་སྦྲུས་ལ་དེ་ནས་སྐམས་ནས་ཡང་འོ་མས་སྦྲུ་ཞིང་བསྐམས་པ་ལན་མང་དུ་བྱས་ལ། ཐ་མར་སྦྲང་རྩི་དང་སྦྱར་བ་བཟའ་བའམ། ཡང་ན་རྩ་བ་བཅུ་པ་བསྐོལ་ཏེ་ཁུ་བ་ནས་ཕྱེ་དང་སྦྱར་བའི་ལྡེ་གུ་བཏུང་
[181a.4]ངོ་། །ཡང་ན་ཡ་བཀྵ་ར་དང་། རྩི་བོ་ཆེ་དང་། ཁ་རུ་ཚ་དང་། སེའུ་འབྲུ་དང་། འདི་རྣམས་མར་དང་སྦྱར་ལ་བཟའ་བ་གཏང་བའམ། ཡང་ན་མ་ནུ་དང་། ཟུར་པ་དང་། ཚ་བ་གསུམ་དང་། ཁ་ལུང་དང་། སྟར་བུ་དང་བཅས་པའི་བཟའ་བ་སྦྱིན་པར་བྱའོ། །
[181a.5]གཞན་ཡང་སྐོམ་དུ་རྩ་བ་བཅུ་པ་བསྐོལ་བའམ། ཡང་ན་ཐང་ཤིང་བསྐོལ་བའི་ཁུ་བའམ། ཡང་ན་ཆང་གི་ཉིང་ཁུ་གང་ཡང་རུང་བ་བླུད་ན། སྐྱིགས་བུ་དང་། དབུགས་མི་བདེ་བ་སེལ་ཏོ། །ཡང་ན་པི་པི་ལིང་དང་། པི་པི་ལིང་གི་རྩ་བ་དང་། ཨ་རུ་ར་དང་།
[181a.6]བྱི་དང་ག་དང་། ཀྲུ་ཏྲུག་ཏྲེས་རྣམས་ཞིབ་ཏུ་བཏགས་པའི་ལྡེ་གུ་ཕྲུ་བ་སྣུམ་ཅན་གྱི་ནང་དུ་བསྐུས་ལ། བཅུད་རད་པར་གྱུར་པ་དང་། དར་བ་ཆུས་མ་རེག་པའི་ནང་དུ་བསྐུས་ལ། ཟླ་གཅིག་གི་བར་དུ་བཞག་པ་ལས་རན་པར་འཐུངས་ན། མེ་དྲོད་སྐྱེད་པ་དང་། ལུད་པ་
[181a.7]དང་། དབུགས་མི་བདེ་བ་ལས་ངེས་པར་རྒྱལ་ལོ། །ཡང་ན་པ་ཐ་དང་། མུར་པ་དང་། ཐང་ཤིང་གི་འབྲས་བུ་དང་། ས་ར་ཀོ་ཉོན་ཙེ་དང་། འདི་རྣམས་ཞིབ་ཏུ་བཏགས་ནས་ཆང་གི་ཉིང་ཁུའི་ནང་དུ་བཏབ་སྟེ། ལན་ཚྭ་དང་བཅས་པ་ནུབ་གཅིག་བཞག་ལ། ཞག་
[181b]
[181b.1]རེར་ཁྱོར་རེ་བླུད་ན་དབུགས་མི་བདེ་བ་དང་སྐྱིགས་བུ་སེལ་ཏོ། །ཡང་ན་ག་བྲའི་རྩ་བ་དང་། བཅའ་སྒ་དང་། འདི་གཉིས་བཏགས་པའི་ཕྱེ་མ་ཆུ་དྲོ་འཇམ་ཙམ་བཏུང་བའམ། ཡང་ན་ཡ་བཀྵ་ར་དང་། ན་ལེ་ཤམ་གྱི་ཕྱེ་མ་ཆུ་དྲོན་དང་གཏང་ངོ་། །ཡང་ན་བཱི་ཤུ་བ་
[181b.2]བསྐོལ་བའི་ཁུ་བའི་ནང་དུ་བཱི་ཤུ་བ་དེ་དང་མཉམ་པ་བཏགས་པའི་ཕྱེ་མ་དང་སྐྱོ་མར་བྱས་ཏེ་བླུད་དོ། །ཡང་ན་སཔྟ་པརྞིའི་ཁུ་བའི་ནང་དུ་པི་པི་ལིང་དང་སྦྲང་རྩི་དང་ལྡན་པར་བྱས་ཏེ་བཏུང་བའམ། ཡང་ན་ཤྲི་ཤའི་མེ་ཏོག་སྦྲང་རྩི་དང་ལྡན་པར་བྱས་ཏེ་བླུད་ན། མཁྲིས་པ་དང་
[181b.3]བད་ཀན་ལས་གྱུར་པའི་སྐྱིགས་བུ་དང་དབུགས་མི་བདེ་བ་སེལ་ཏོ། །ཅུ་གང་དང་པི་པི་ལིང་དང་འབྲས་ཀྱི་བྱེ་བྲག་མ་དུ་ཞེས་བྱ་བ་དང་། དོང་གྲ་དང་འདི་རྣམས་བཏགས་པའི་ཕྱེ་མ་མར་དང་སྦྱར་པ་གླན་པའི་དུགས་ཟན་ཐབས་སུ་བྱས་ཏེ་ཟོས་ན། དེས་སྐྱིགས་བུ་དང་
[181b.4]དབུགས་མི་བདེ་བ་དང་། མཁྲིས་པ་དང་ལྡན་པ་རྣམས་ལ་ཕན་ནོ། །སྐྱིགས་བུ་དང་དབུགས་མི་བདེ་བ་རླུང་དང་ལྡན་པ་ལ་ནི་ཤྭ་བི་ཙེ་ཞེས་བྱ་བའི་ཤ་དང་། རི་བོང་གི་ཤ་དང་། པི་པི་ལིང་དང་། མར་དང་། རི་དགས་ཤལ་ལྱ་ཀ་ཞེས་བྱ་བའི་ཁྲག་དང་། འདི་རྣམས་
[181b.5]གོང་མ་ལྟར་བྱས་ལ་ཟོས་ན་ཕན་ནོ། །ཡང་ན་ལྕམ་པའི་ཁུ་བ་དང་། ཚ་བ་གསུམ་དང་། མར་དང་སྦྱར་བའི་འབྲས་ཆན་ཟོས་ལ། སྐོམ་དུ་འོ་མ་འཐུངས་ན། རླུང་དང་མཁྲིས་པ་དང་བཅས་པའི་སྐྱིགས་བུ་དང་དབུགས་མི་བདེ་བ་སེལ་བར་བྱེད་དོ། །ཡང་ན་
[181b.6]རའི་འོ་མ་བཞི་འགྱུར་གྱི་ཆུ་དང་བསྐོལ་ལ། འོ་མ་ལུས་པ་དང་། བུ་རམ་དང་། དོང་གྲའི་ཕྱེ་མ་བཏབ་པ་བཏུང་ངོ་། །པི་པི་ལིང་མཱུ་ལ་དང་། ཤིང་མངར་དང་། བུ་རམ་དང་། འདི་རྣམས་ཀྱི་ཕྱེ་མ་གླང་དང་། རྟ་རྟུག་གཉིས་བཙིར་བའི་ཁུ་བ་དང་། མར་དང་སྦྲང་རྩི་དང་ལྷན་ཅིག་ཟོས་
[181b.7]ན་སྐྱིགས་བུ་དང་དབུགས་མི་བདེ་བ་སེལ་ཏོ། །ཡང་ན་རྟ་དང་། གླང་པོ་ཆེ་དང་། གླང་དང་། ཕག་དང་། རྔ་མོ་དང་། བོང་བུ་དང་། ལུག་དང་། ར་དང་། འདི་རྣམས་གང་ཡང་རུང་བའི་རྟུག་པ་བཙིར་བའི་ཁུ་བ་སྦྲང་རྩི་དང་སྦྱར་བའི་ལྡེ་གུ་བྱ་སྟེ། དེ་ལས་རན་པར་ཟོས་ན་བད་ཀན་
[182a]
[182a.1]ཤས་ཆེ་བའི་སྐྱིགས་བུ་དང་དབུགས་མི་བདེ་བ་སེལ་ཏོ། །ཡང་ན་སྲོག་ཆགས་རྐང་བཞི་པའི་པགས་པ་དང་། རུས་པ་དང་། སྤུ་དང་། རྨིག་པ་དང་། རྭ་དང་། དེ་ལས་བྱུང་བ་དང་། སྦྲང་རྩི་དང་སྦྱར་བའི་ལྡེ་གུ་བཟའ་བའམ། ཡང་ན་ཨ་
[182a.2]ཤྭ་གནྡྷ་བཏགས་པའི་ཕྱེ་མ་སྦྲང་རྩི་དང་སྦྱར་བའི་ལྡེ་གུ་ཟོས་ན། བད་ཀན་ཤས་ཆེ་བའི་དབུགས་མི་བདེ་བ་སེལ་ཏོ། །ཡང་ན་ཟུར་པ་དང་། པུཥྐར་མཱུ་ལ་དང་སྐྱུ་རུ་ར་དང་བཏགས་པའི་ཕྱེ་མ་སྦྲང་རྩི་དང་སྦྱར་བའམ། ཡང་ན་མ་ནུ་དང་། པི་པི་ལིང་དང་། སྦྲང་རྩིར་
[182a.3]སྦྱར་བའི་ལྡེ་གུ་ཟོས་ན་ཕན་ཡོན་གོང་མ་དང་འདྲའོ། །ཡང་ན་བཙག་ཡུག་སྣམ་དང་། དངུལ་རྡོ་དང་། པི་པི་ལིང་དང་། འདི་རྣམས་སྦྲང་རྩི་དང་སྦྱར་བའམ། ཡང་ན་ཀ་པིད་ཐའི་ཁུ་བ་སྦྲང་རྩི་དང་སྦྱར་བའམ། ཡང་ན་ཀ་པིད་ཐ་བསྐོལ་བའི་ཁུ་བའི་ནང་དུ་སྐྱུ་
[182a.4]རུ་ར་དང་། པི་པི་ལིང་དང་། རྒྱམ་ཚའི་ཕྱེ་མ་བཏབ་པའི་ལྡེ་གུ་བྱས་པའམ། ཡང་ན་ཨ་རུ་ར་བཏགས་པའི་ཕྱེ་མ་དང་མར་དང་སྦྲང་རྩི་དང་སྦྱར་བའི་ལྡེ་གུའམ། ཡང་ན་ན་ལེ་ཤམ་དང་། བྱི་དང་ག་དང་། པི་པི་ལིང་བཏགས་པའི་ཕྱེ་མ་མར་དང་སྦྲང་རྩི་སྦྱར་
[182a.5]བའི་ལྡེ་གུའམ། ཡང་ན་རྒྱ་ཤུག་དང་། འབྲས་ཡོས་དང་། རྒུན་འབྲུམ་དང་། པི་པི་ལིང་དང་། དོང་གྲ་དང་། འདི་རྣམས་བཏགས་པའི་ཕྱེ་མ་མར་དང་སྦྲང་རྩི་སྦྱར་བའི་ལྡེ་གུའམ། ཡང་ན་ཡུང་བ་དང་། པི་པི་ལིང་དང་། ར་སྣ་དང་། ན་ལེ་ཤམ་བཏགས་
[182a.6]པའི་ཕྱེ་མ་དང་། བུ་རམ་དང་ཏིལ་མར་དང་སྦྱར་བའི་ལྡེ་གུའམ། སྨན་གྱི་སྦྱོར་བ་དེ་དག་ལས་ནད་གཞི་ལེགས་པར་བརྟགས་ཏེ། སོ་སོ་དང་མཐུན་པའི་ཁུ་བ་དང་། ཆུ་དྲོན་དང་། ཆང་དང་། དར་བ་དང་། ཞོ་ག་ཆུ་དང་། རྩབ་མོ་ལ་སོགས་པ་གང་དང་མཐུན་པའི་ནང་
[182a.7]དུ་མཉེས་ཏེ་བཏང་ན། བད་ཀན་ཤས་ཆེ་བའི་སྐྱིགས་བུ་དང་དབུགས་མི་བདེ་བ་སེལ་ཏོ། །ཛི་བན་ཏི་དང་། གླ་སྒང་དང་། བྱེའུ་རུག་པ་དང་། དྭ་ཚ་དང་། སུག་སྨེལ་རྣམ་གཉིས་དང་། ཙནྟྲ་དང་། ཏ་མ་ལ་ཀི་དང་། ཨ་ཀ་རུ་དང་། ག་བྲའི་རྩ་བ་དང་། དོང་
[182b]
[182b.1]གྲ་དང་། བ་ལ་ཀ་དང་། ཀར་ཀ་ཏ་སྲིང་གི་དང་། ཟུར་པ་དང་། པི་པི་ལིང་དང་། ནཱ་ག་གེ་སར་དང་། ཙ་རོང་དང་། དེ་རྣམས་ཞིབ་ཏུ་བཏགས་པའི་ཕྱེ་མའི་ཉིས་འགྱུར་གྱི་ཤ་ཁ་ར་དང་། བཟའ་བ་དང་བཏུང་བའི་ནང་དུ་བཏབ་སྟེ་ཅི་འདོད་པ་ཟོས་ན་རྩིབ་ལོགས་ན་བ་དང་།
[182b.2]རིམས་ན་བ་དང་། ལུད་པ་དང་། སྐྱིགས་བུ་དང་དབུགས་མི་བདེ་བ་སེལ་བའི་མཆོག་ཡིན་ནོ། །དོང་གྲ་དང་བུ་རམ་ཆ་སྙོམས་པ་བཟའ་བའམ། ཡང་ན་སྣ་སྨན་དུ་བཏང་བའམ། ཡང་ན་སྒོག་སྐྱ་དང་། ཀུན་དོང་དང་། གྲིན་ཛ་ན་ཞེས་བྱ་བ་སྒོག་པའི་རིགས་དང་། དེ་
[182b.3]དག་གི་རྩ་བ་ཆུ་དང་བསྐོལ་ཏེ་སྣར་བླུགས་བའམ། ཡང་ན་ཙནྡན་བདར་བ་སྣར་བླུགས་པའམ། ཡང་ན་སྦྲང་མའི་རྟུག་པ་བུད་མེད་ཀྱི་ནུ་ཞོ་དང་སྦྱར་བའམ། ཡང་ན་ལེ་བརྒན་རྩི་དང་། སྦྲང་མའི་རྟུག་པ་སྦྱར་བ་སྣར་བླུགས་སོ། །ཡང་ན་མར་གྱི་སྙིང་ཁུ་དང་
[182b.4]རྒྱམ་ཚས་བཏབ་པའམ། འོ་མ་དང་། མར་བསྐོལ་ནས་མར་ལུས་པ་དང་དེས་སྣར་བླུགས་པར་བྱའོ། །སྨན་མངར་བ་རྣམས་ཆམ་ཆོམ་བརྡུངས་ཏེ་བསྐོལ་བའི་ཁུ་བ་བཏུང་བའམ། ཡང་ན་སྣར་བླུགས་སོ། །སྦྲང་རྩི་དང་ཁ་ར་དཀར་པོ་སྦྱར་ན། དང་པོ་ཐིགས་པ་
[182b.5]གྲང་མོ་བླུགས་ལ། དེ་ནས་དྲོན་མོ་བླུགས་ཏེ། དེ་བཞིན་དུ་རེས་ཀྱིས་སྣར་བླུགས་པར་བྱའོ། །རྩ་བ་བཅུ་པ་ཚུལ་བཞིན་དུ་བསྐོལ་བའི་ཁུ་བ་འོ་མ་དང་བསྐོལ་ཏེ་མར་ལུས་པ་དང་། དེས་གོང་མ་བཞིན་དུ་དྲོ་བ་དང་གྲང་བ་རེས་མོས་ཀྱིས་སྣར་བླུགས་སོ། །པི་པི་ལིང་དང་།
[182b.6]ཁ་རུ་ཚ་དང་། ཡ་བཀྵ་ར་དང་། གུ་རུ་ཚེ་དང་། ཤིང་ཀུན་དང་། ཙོ་ར་ཀ་དང་། བྱིའུ་རུག་པ་དང་། འདི་རྣམས་མར་དང་། ཞོ་ག་ཆུ་དང་། རྩ་བ་བཅུ་བསྐོལ་བའི་ཁུ་བ་དང་བསྲེས་ཏེ་ཡང་བསྐོལ་ནས། མར་ལུས་པ་དང་། དེ་ལས་རན་པར་འཐུངས་ན། སྐྱིགས་
[182b.7]བུ་དང་དབུགས་མི་བདེ་བ་སེལ་ཏོ། །ཡང་ན་འཚོ་བྱེད་སྣ་བཅུ་ཆམ་ཆོམ་བརྡུངས་ཏེ། མར་དང་ཚུལ་བཞིན་དུ་བསྐོལ་ལ། མར་འབའ་ཞིག་ལུས་པའི་ནང་དུ་སྦྲང་རྩིས་བསྲེས་པའི་ལྡེ་གུ་འཐུངས་ན་ཕན་ནོ། །ཏེ་ཛོ་བ་ཏི་དང་། ཨ་རུ་ར་དང་། རུ་རྟ་དང་། པི་པི་ལིང་
[183a]
[183a.1]དང་། པུ་ཙེ་ཤེལ་དང་། བྷུ་ཏི་ཀ་དང་། མ་ནུའི་རྩ་བ་དང་། པ་ལ་ཤ་དང་། ཙི་ཏྲ་ཀ་དང་། ཟུར་པ་དང་། ལན་ཚྭ་རྣམ་གཉིས་དང་། ཏ་མ་ལི་ཀ་དང་། ཛི་བན་ཏི་དང་། བིལ་བའི་སྙིང་པོ་དང་། ཤུ་དག་དང་། བལ་བུའི་ལོ་མ་དང་། འདི་
[183a.2]རྣམས་ཞོ་གཉིས་གཉིས་དང་། ཤིང་ཀུན་ཞོ་ཕྱེད་དང་། འདི་རྣམས་མར་སྲང་སུམ་ཅུ་རྩ་གཉིས་དང་བསྐོལ་ཏེ་མར་འབའ་ཞིག་ལུས་པར་འཐུངས་ན། རྐང་ལག་ཏུ་རླུང་ཞེན་པ་དང་། གཞང་འབྲུམ་དང་། ཕོ་བའི་ནད་དང་། སྐྱིགས་བུ་དང་། སྙིང་དང་། རྩིབ་
[183a.3]ལོགས་སུ་ཟུག་པ་རྣམས་མྱུར་དུ་ཞི་བར་བྱེད་དོ། །ཡང་ན་ཡ་བཀྵ་ར་དང་། ལན་ཚྭ་དང་། ལན་ཚྭའི་ཉིས་འགྱུར་གྱི་མར་དང་བསྲེས་པ་འཐུངས་ན་ཕན་ནོ། །དྲང་སྲོང་ཆེན་པོ་ཐང་ལ་འབར་གྱིས་གཅིན་ནད་ཀྱི་སྐབས་སུ་བཤད་པའི་སྨན་མར་དང་། བ་ཤ་ཀའི་མར་ཁྲག་མཁྲིས་གསོ་
[183a.4]བའི་ལེའུའི་ནང་ནས་འབྱུང་བ་དང་། དྲ་དྷི་ཀ་ཞེས་བྱ་བ་དང་། ཧ་པུ་ཤ་ཞེས་བྱ་བ་སྤ་མའི་འབྲས་བུའི་སྨན་མར་སྐྲན་གསོ་བའི་ལེའུ་ལས་བཤད་པ་དང་། སྨན་མར་དེ་རྣམས་ཀྱང་ལུད་པ་དང་སྐྱིགས་བུའི་ནད་ལ་སྦྱར་རོ། །དབུགས་མི་བདེ་བའི་ནད་རྔམ་པ་དྲག་ཏུ་
[183a.5]འབྱུང་བ་ལ་ནི། གློ་བུར་དུ་ཡང་དང་ཡང་དུ་ཆུ་གྲང་གིས་གཏོར་ཞིང་སྡངས་སུ་གཞུག་པའམ། ལུས་དྲག་ཏུ་གཡེངས་ཤིང་སྤྲུག་པ་དང་། འཇིགས་སུ་གཞུག་པ་དང་། ཡང་ན་དགར་གཞུག་པ་དང་། གཞན་གྱི་ཡོན་ཏན་བརྗོད་དེ། ཕྲག་དོག་བསྐྱེད་པ་དང་། དབུགས་
[183a.6]བསྡམ་དུ་གཞུག་པ་དང་། སྤྲེའུའི་སོས་འདེབས་སུ་བཅུག་ན་ཕན་ནོ། །གཞན་ཡང་རླུང་དང་བད་ཀན་ལ་ཕན་པའི་སྨན་དང་། བཟའ་བ་དང་། བཏུང་བ་དང་། དྲོ་བ་ཐམས་ཅད་བསྟེན་པར་བྱའོ། །སྐྱིགས་བུ་དང་། དབུགས་མི་བདེ་བའི་ནད་ཐམས་ཅད་ལ་ནི། ལུས་
[183a.7]ཉམས་སྟོབས་དང་ལྡན་པ་ཡིན་ན་ནི་གསོ་སླའོ། །ཉམས་སྟོབས་མེད་ཅིང་རིད་པ་ནི་གསོ་དཀའོ། །དེ་བས་ན་ཉམས་སྟོབས་བསྐྱེད་ཅིང་ནད་ཞི་བར་བྱ་བ་ཡང་དང་ཡང་དུ་དཔྱད་ཅིང་འབད་པར་བྱའོ། །གཞན་ཡང་ལུད་པ་དང་དབུགས་མི་བདེ་བ་དང་། གློ་གཅོང་ཟད་བྱེད་དང་།
[183b]
[183b.1]སྐྱུག་པ་དང་། སྐྱིགས་བུ་དང་། འདི་རྣམས་གང་ཡང་རུང་བ་གཅིག་གསོས་ན་ཐམས་ཅད་ལ་ཕན་པ་ཡིན་ནོ། །སྐྱིགས་བུ་དང་དབུགས་མི་བདེ་བ་གསོ་བའི་ལེའུ་བཞི་པ་རྫོགས་སོ།། །།དེ་ནས་རྒྱལ་པོའི་ནད་ཅེས་བྱ་བ་གཅོང་ཆེན་པོ་གསོ་བའི་ལེའུ་
[183b.2]བཤད་པར་བྱའོ། །གཅོང་ཆེན་པོའི་ནད་པ་ཉམས་སྟོབས་དང་ལྡན་ཞིང་ནད་གཞི་མང་པོ་ཡོད་པ་ལ་ནི། ཐོག་མར་སྣུམ་ཆོས་དང་དུགས་བྱས་ལ། དེའི་འོག་ཏུ་སློན་ཁྲུས་ཀྱིས་ལུས་སྦྱང་བར་བྱ་སྟེ། སྣུམ་ལ་སོགས་པས་ལུས་ཉམ་ཆུང་བར་མི་འགྱུར་བར་བསྲུང་བར་
[183b.3]བྱའོ། །དེ་ལ་སྐྱུག་སྨན་ནི་འོ་མ་དང་། མངར་བའི་ཤ་ཁུ་དང་། སྐྱུག་སྨན་ལས་གཞི་བླངས་པའི་ནས་ཐུག་མར་དང་ལྡན་པ་ནི། དེ་གསུམ་གང་ཡང་རུང་པའི་ནང་དུ། པོ་སོན་ཆའི་ཕྱེ་མ་བཏབ་སྟེ་བླུད་ནས་སློན་དུ་གཞུག་གོ། །དེ་ལ་
[183b.4]བཀྲུ་སྨན་ནི་ཤ་མ་དུར་བྱིད་དང་། དོང་ག་སྦྲང་རྩི་དང་། ཤ་ཁ་ར་དང་སྦྱར་བའམ། ཡང་ན་འོ་མ་དང་། མར་དང་། ཕྱེ་དང་ལྡན་པའི་སྐྱོ་མར་སྦྱར་བའམ། ཡང་ན་རྒུན་འབྲུམ་དང་། བི་ད་རི་དང་། ཏང་པལ་རྣམས་ལས་གང་ཡང་རུང་
[183b.5]པ་ཤ་ཁུ་དང་ལྡན་པར་སྦྱར་བ་གོང་མའི་སྨན་དང་བཅས་པ་འཐུངས་ན་འཁྲུ་བར་འགྱུར་རོ། །དེ་ལྟར་སློན་ཁྲུས་ཀྱིས་ཁོང་དག་པར་བྱས་པའི་འོག་ཏུ་ཉམས་འཕེལ་ཞིང་རྒྱས་པ་དང་དྲོད་སྐྱེད་པ་དག་སྦྱར་རོ། །གཞན་ཡང་བཟའ་བ་དང་བཏུང་བ་ཡི་གར་འོང་བ་དང་། རླུང་
[183b.6]ལ་ཕན་པ་རྣམས་དང་ཡང་བ་རྣམས་སྦྱར་ཏེ། འབྲས་དྲུག་ཅུ་པ་དང་། གྲོ་དང་། ནས་དང་། མུངྒ་རྣམས་ལས་གང་ཡང་རུང་བ་སྦངས་པའམ། ཆན་དུ་བྱས་ཏེ་བཟའ་བ་དང་ཚོད་མར་སྦྱར་ཏེ་སྦྱིན་ནོ། །གཞན་ཡང་རའི་འོ་མ་དང་། མར་དང་། སྲོག་ཆགས་ཤ་ཟ་བའི་
[183b.7]ཤ་དང་། བྱ་རོག་དང་། འུག་པ་དང་། གླང་པོ་ཆེ་དང་། བ་དང་། རྟ་དང་། ནེའུ་ལེ་དང་། སྦྲུལ་དང་། བྱ་རྒོད་དང་། ཁྲ་དང་། བོང་བུ་དང་། རྔ་མོ་དང་། དེ་རྣམས་ཀྱི་ཤ་གང་ཡང་རུང་བ་ནད་པ་ལ་གསོང་སྟེ་སྦྱིན་ནོ། །ཅི་སྟེ་ནད་པས་ཚོར་ན་ནི་སྐྱུགས་པ་དང་།
[184a]
[184a.1]ཉམས་སྟོབས་དང་། གཟི་མདངས་འབྲི་བར་འགྱུར་བའི་སྐྱོན་ཡོད་དོ། །མཁྲིས་པ་དང་། བད་ཀན་ལས་གྱུར་པའི་གཅོང་ཆེན་པོའི་ནད་ལ་ནི། རི་དགས་དང་། བྱ་ལ་སོགས་པའི་ཤ་གཡོས་སུ་བྱས་པ་བྱིན་ན་ཕན་ནོ། །རླུང་ལས་གྱུར་
[184a.2]པ་ལ་ནི་ཕག་རྒོད་ལ་སོགས་པ་རི་དགས་ཆེན་པོ་རྣམས་ཀྱི་ཤ་རྣམས་ལས་གཡོས་སུ་བྱས་པ་ཕན་ནོ། །ཡུངས་ཀར་གྱི་མར་ལ་གང་ཡང་རུང་བ་ནད་གཞི་སྟོབས་ཇི་ལྟ་བ་བཞིན་དུ་སྦྱར་བའི་ནང་དུ། སྣུམ་དང་། ལན་ཚྭ་དང་། སྒེའུ་གཤེར་དང་། བཅའ་སྒ་ལ་སོགས་
[184a.3]པ་ལེགས་པར་སྦྱར་ཏེ་རོ་དང་ལྡན་པ་ཞིམ་པོར་བྱས་ཏེ་ཉུང་ཤས་སྦྱར་བ་སྦྱིན་པར་བྱའོ། །ཐུག་པ་དང་ཁུ་བཅུད་ལ་སོགས་པའི་ཚོད་མ་སྣ་ཚོགས་མར་རམ། དེ་བཞིན་དུ་ལ་ཕུག་སྐམ་པོ་དང་། རྒྱ་སྲན་གྱི་ཁུ་བཅུད་ལན་ཚྭ་དང་སྒེའུ་གཤེར་དང་ལེགས་པར་སྦྱར་བ་བླུད་ན་
[184a.4]ཕན་ནོ། །ར་ཤའི་ཁུ་བ་དང་། པི་པི་ལིང་དང་། ནས་དང་རྒྱ་སྲན་དང་། དོང་གྲ་དང་། སེའུ་འབྲུ་དང་། སྐྱུ་རུ་ར་དང་ལྡན་པར་སྣུམ་ཆེར་བཏབ་པ་བླུད་ན། ཆམ་པ་དང་། ལུད་པ་དང་། དབུགས་མི་བདེ་བ་དང་། གླད་པ་ན་བ་དང་། སྐད་འགགས་པ་དང་། ཡི་
[184a.5]ག་འཆུས་པ་དང་། འདི་རྣམས་ལ་ཕན་ནོ། །མཁྲིས་པ་ལ་སོགས་པའི་གཅོང་ཆེན་པོ་ལ་ནི་ཆང་ཤིན་ཏུ་རྙིང་པ་རྩའི་རྒྱུན་སྦྱོང་ནུས་པར་བླུད་དོ། །ཁྱད་པར་དུ་རྒུན་ཆང་དང་། ཨ་རིཥྚའི་ཆང་དང་། ཆང་དངས་མ་དང་། ཆང་རྣམས་བཏུང་བར་བླུད་དོ། །ཡང་
[184a.6]ན་རྩ་བ་ཆུང་ངུ་ལྔ་བསྐོལ་བའམ། བཅའ་སྒ་བསྐོལ་བའམ། ཡང་ན་ལོ་མ་རྣམ་བཞི་བསྐོལ་བའམ། ཡང་ན་འུ་སུ་དང་བཅའ་སྒ་བསྐོལ་བ་བླུད་དོ། །ཡང་ན་རྩ་བ་ལྔ་ཆུང་ངུ་ཤིན་ཏུ་འབད་པ་དང་བཅས་པས་གཙང་སྦྲ་ཆེར་བྱ་སྟེ། བཟའ་བ་དང་སྦྱར་ལ་བཏང་
[184a.7]ན་གཅོང་ཆེན་པོ་དང་རྗེས་སུ་མཐུན་པ་ཡིན་ནོ། །རྩ་བ་བཅུ་འོ་མའམ་ཡང་ན་ཤ་ཁུའི་ནང་དུ་བཙོས་ལ། བ་ལའི་ཕྱེ་མས་བཏབ་པ་མར་དང་སྦྱར་བ་བཟའ་བའམ། ཡང་ན་སྲོག་ཆགས་ཤ་ཟ་བའི་ཤ་ཁུའི་ནང་དུ་བ་ལའི་ཕྱེ་མ་བཏབ་པ་བཏུང་བའམ། ཡང་ན་
[184b]
[184b.1]མར་དང་མར་གྱི་བཅུ་འགྱུར་གྱི་འོ་མ་དང་ལྷན་ཅིག་བསྐོལ་བའི་ནང་དུ་བ་ལའི་ཕྱེ་མས་བཏབ་སྟེ། སྦྲང་རྩི་དང་ལྡན་པར་བླུད་དོ། །ཇི་བན་ཏི་དང་། ཤིང་མངར་དང་། རྒུན་འབྲུམ་དང་། དུག་མོ་ཡུངས་ཀྱི་འབྲས་བུ་དང་། མ་ནུ་དང་། ཟུར་པ་དང་། པི་པི་
[184b.2]ལིང་དང་། ཀཎྜ་ཀ་རི་དང་། གཟེ་མ་དང་། བ་བླ་དང་། ཨུཏྤལ་དང་། སྐྱུ་རུ་ར་དང་། ཀྱི་ལྕེ་བ་དང་། བྱི་ཚེར་བ་དང་། འདི་རྣམས་ཕྱེ་མར་བྱས་ཏེ། སྨན་གྱི་བཞི་འགྱུར་གྱི་མར་དང་། མར་བཞི་འགྱུར་གྱི་ཆུ་དང་བསྐོལ་ཏེ། །དེ་ལས་རན་པར་འཐུངས་ན།
[184b.3]ནད་ཀྱི་རྒྱལ་པོ་རྩ་ནས་འཇོམས་སོ། །འབྲ་གོ་དང་། རྒུན་འབྲུ་དང་། མ་དུ་ཀའི་མེ་ཏོག་དང་། པ་རུ་ཤ་དང་། པི་པི་ལིང་དང་། འདི་རྣམས་མར་དང་ཚུལ་བཞིན་བསྐོལ་བ་ལས་རན་པར་འཐུངས་ན། སྐད་འགགས་པ་དང་། ལུད་པ་དང་། རིམས་
[184b.4]རྣམས་འཇོམས་སོ། །རྩ་བ་བཅུ་པ་བསྐོལ་བའི་ཁུ་བ་འོ་མ་དང་ཡང་བསྐོལ་བའི་མར་སར་པི་པི་ལིང་དང་། སྦྲང་རྩི་དང་སྦྱར་བ་ཟོས་ན་སྐད་འགགས་པ་དང་། གླད་པ་ན་བ་དང་། རྩིབ་ལོགས་སུ་ཟུག་པ་དང་། གློ་དང་། ལུད་པ་དང་། དབུགས་མི་
[184b.5]བདེ་བ་དང་། རིམས་རྣམས་ལ་ཕན་ནོ། །རྩ་བ་ཆེ་ཆུང་ལྔ་གང་ཡང་རུང་བ་དང་། དེའི་བཞི་འགྱུར་གྱི་འོ་མ་དང་། འོ་མའི་བཞི་ཆའི་མར་དང་ཚུལ་བཞིན་དུ་བསྐོལ་བའི་མར་དང་། ཡང་ན་རྩ་བ་ལྔ་དང་། དེའི་བཞི་འགྱུར་གྱི་འོ་མ་དང་ཡང་བསྐོལ་བའི་མར་
[184b.6]ལས་རན་པར་འཐུངས་ན་ཆམ་པ་ལ་སོགས་པའི་གཅོང་ཆེན་པོའི་ནད་ཀྱི་སྟོབས་བདུན་འཇོམས་པར་བྱེད་དོ། །ཚ་བ་རྣམ་ལྔ་དང་། ནས་ཚིག་འཁུས་པའི་ཐལ་བ་དང་། འདི་རྣམས་སྲང་རེ་རེ་དང་། མར་བྲེ་གང་དང་མར་དང་མཉམ་པའི་འོ་མ་དང་། འོ་མའི་སུམ་
[184b.7]འགྱུར་གྱི་ཆུ་དང་བསྐོལ་ཏེ། དེ་ལས་རན་པར་འཐུངས་ན། རྩ་རྒྱུན་རྣམས་སྦྱོང་ཞིང་། སྐྲན་དང་། རིམས་དང་། དམུ་རྫིང་དང་། མཚེར་པ་དང་། ཕོ་བའི་ནད་དང་། སྐྱ་རྦབ་དང་། ཆམ་པ་དང་། དབུགས་མི་བདེ་བ་དང་། ལུད་པ་དང་། མེ་དྲོད་ཉམས་པ་དང་། སྐྲང་
[185a]
[185a.1]བ་དང་། རླུང་སྟོད་དུ་ཞུགས་པ་རྣམས་ལས་རྒྱལ་ལོ། །ཡང་ན་ར་སྣ་དང་། བ་ལ་དང་། གཟེ་མ་དང་། ས་ལ་པརྞི་དང་། བ་སྤྲུ་བ་རྩ་བ་དཀར་པོ་ཅན་དང་། དེ་རྣམས་བསྐོལ་བའི་ནང་དུ། ཛི་བན་ཏི་དང་། པི་པི་ལིང་དང་། འོ་མ་མར་
[185a.2]དང་ཚུལ་བཞིན་བསྐོལ་བ་འཐུངས་ན། གློ་གཅོང་སྐེམ་བྱེད་ལས་རྒྱལ་ལོ། །ཡང་ན་ཨ་ཤྭ་གནྡྷ་དང་། འོ་མ་བསྐོལ་བ་དཀྲུགས་ཏེ། མར་བྱུང་བ་དེ་འོ་མ་དང་། ཁ་ར་དཀར་པོ་སྦྱར་བ་འཐུངས་ན། གློ་གཅོང་ཟད་བྱེད་རྣམས་སེལ་བར་བྱེད་དོ། །སྲོག་
[185a.3]ཆགས་ཤ་རན་པ་ཁུང་ན་གནས་པ་དང་། གཞན་ཡང་ཤ་རན་པ་རྣམས་ཀྱི་ཤ་སྲང་བརྒྱ་དང་། ཆུ་སྲང་སྟོང་ཉི་ཤུ་རྩ་བརྒྱད་བསྐོལ་ཏེ། བཞི་ཆ་སྲང་བརྒྱ་ཉི་ཤུ་རྩ་བརྒྱད་ལུས་པའི་ནང་དུ། འཚོ་བྱེད་སྡེ་བཅུ་སྲང་རེ་རེ་ཕྱེ་མར་བྱས་ནས། མར་སྲང་སུམ་ཅུ་རྩ་གཉིས་
[185a.4]བཅུག་སྟེ་ཚུལ་བཞིན་བསྐོལ་ལ་མར་དང་ཤ་ལུས་པ་དང་། དེ་ལས་རན་པར་ཟོས་ན་རླུང་དང་མཁྲིས་པ་ལས་གྱུར་པའི་གཅོང་ཆེན་པོ་དང་། རླུང་ནད་མ་ལུས་པ་དང་། དབུགས་མི་བདེ་བ་དང་། སྙིང་དང་། རྩིབ་ལོགས་སུ་ཟུག་པ་དང་། ལུས་སྐེམ་པར་བྱེད་
[185a.5]པ་དང་། སྐད་འགགས་པ་དང་། འདི་རྣམས་ལས་རྒྱལ་བར་བྱེད་དོ། །སུག་སྨེལ་དང་། ཏི་མུ་ས་དང་། འབྲས་བུ་གསུམ་དང་། རྒྱམ་ཚ་དང་། ཚ་བ་གསུམ་དང་། ཙི་ཏྲ་ཀ་དང་། ས་ར་ན་དང་། ནིམ་པ་དང་། སེང་ལྡེང་དང་། ས་ལ་བི་ཛ་དང་། བསེ་
[185a.6]ཤིང་གི་འབྲས་བུ་དང་། བྱི་དང་ག་དང་། འདི་རྣམས་སྲང་བརྒྱད་བརྒྱད་དང་། ཆུ་སྲང་ཉིས་བརྒྱ་ལྔ་བཅུ་རྩ་དྲུག་དང་བསྐོལ་ཏེ། སྲང་བཅུ་དྲུག་ལུས་པ་དང་། དེའི་ནང་དུ་ཡང་མར་སྲང་སུམ་ཅུ་རྩ་གཉིས་དང་ཡང་བསྐོལ་ཏེ། མར་འབའ་ཞིག་ལུས་པའི་ནང་
[185a.7]དུ་ཅུ་གང་སྲང་དྲུག་དང་། ཁ་ར་སྲང་སུམ་ཅུ་དང་། སྦྲང་རྩི་སྲང་དྲུག་ཅུ་རྩ་བཞི་དང་། དྲི་སྣ་གསུམ་སྲང་རེ་རེ་དང་། འདི་རྣམས་ཁ་གཟར་གྱིས་དཀྲུགས་ཏེ། བཅུད་ཀྱིས་ལེན་བཞིན་དུ་ཆོ་ག་མེད་པར་སྔ་དྲོ་དེ་ལས་རན་པར་ཟོས་ལ་བཏུང་བར་འོ་མ་བླུད་ན། བློ་
[185b]
[185b.1]དང་། མིག་གསལ་བ་དང་། ཚེ་རིང་བ་དང་། མེ་དྲོད་སྐྱེད་པ་དང་། དེ་བཞིན་དུ་གཅིན་ནད་དང་། སྐྲན་དང་། གློ་འགྲམས་པའི་ནད་དང་། སྐྱ་རྦབ་དང་། མཚན་པར་རྡོལ་བ་རྣམས་འཇོམས་སོ། །གང་གློ་འགྲམས་པའི་ནད་ལ་མར་དང་བུ་རམ་བཤད་པ་
[185b.2]འདིར་ཡང་གློ་གཅོང་ཟད་བྱེད་ལ་ཡང་སྦྱར་རོ། །ཤིང་ཚ་དང་། སུག་སྨེལ་དང་། པི་པི་ལིང་དང་། ཅུ་གང་དང་། ལི་ཁ་ར་དང་། དེ་རྣམས་ཡས་ཀྱི་རིམ་བཞིན་དུ་ཉིས་འགྱུར་ཉིས་འགྱུར་གྱིས་བསྐྱེད་པའི་ཕྱེ་མ་བཟའ་བའམ། ཡང་ན་མར་དང་སྦྲང་རྩི་དང་སྦྱར་
[185b.3]བའི་ལྡེ་གུ་བལྡགས་ན། དབུགས་མི་བདེ་བ་དང་། སྐད་འགགས་པ་དང་། ལུད་པ་དང་། གློ་གཅོང་ཟད་བྱེད་དང་། རྩིབ་ལོགས་ན་བ་དང་། བད་ཀན་རྣམས་འཇོམས་པར་བྱེད་དོ། །ཁྱད་པར་དུ་གློ་གཅོང་ལ་ཕན་ནོ། །སྐད་འགགས་པར་འགྱུར་བས་
[185b.4]སྣ་སྨན་དང་། དུད་པས་བདུག་པ་ལ་སོགས་པའི་ཆོ་ག་བྱའོ། །དེ་ལ་རླུང་ལས་གྱུར་པའི་སྐད་འགགས་པ་ལ་ནི་ཀ་ས་མར་ད་ཀ་དང་། ཀཎྜ་ཀ་རི་དང་། བྲིང་ག་ར་ཛ་དང་། འདི་རྣམས་ཀྱི་རང་གི་ཁུ་བ་མར་བསྐོལ་བ་ལས་རན་པར་འཐུངས་ན། ལུད་པ་དང་སྐད་
[185b.5]འགགས་པ་ལས་རྒྱལ་བར་བྱེད་དོ། །ཡང་ན་ཨན་ཏ་ར་ཀ་ལས་ཞེས་བྱ་བའི་མར་འཐུངས་ན་ཡང་ཕན་ཡོན་དེ་དང་འདྲའོ། །ཡང་ན་རྒྱ་ཤུག་གི་ལོ་མ་བཏགས་པའི་ཕྱེ་མ་མར་དང་བརྡོས་པའི་ནང་དུ་ལྕེ་མྱང་ཚ་བཏབ་པ་ཟན་གོང་དུ་འཐུངས་ན་ཕན་ནོ། །
[185b.6]ཡང་ན་མ་དུ་ཀ་དང་། རྒུན་འབྲུམ་དང་། པི་པི་ལིང་དང་། བྱི་དང་ག་དང་། ཧ་ན་ས་བ་དའི་རྩ་བ་དང་། འདི་རྣམས་བཏགས་པའི་ཏིལ་མར་བསྐོལ་བ་སྣར་བླུགས་སོ། །འབྲས་ཆན་མར་དང་བུ་རམ་དུ་བཅས་པའམ་ཡང་ན་འོ་ཐུག་མར་དང་བུ་རམ་དུ་སྦྱར་བ་
[185b.7]བཟའ་སྟེ། དེའི་འོག་ཏུ་ཆུ་དྲོ་འཇམ་ཙམ་བཏུང་སྟེ། སྣུམ་ཆོས་དང་། དུགས་བྱས་ན་རླུང་གིས་སྐད་འགགས་པ་སེལ་ཏོ། །མཁྲིས་པ་ལས་གྱུར་པའི་སྐད་འགགས་པ་ལ་ནི། ཤིང་འོ་མ་ཅན་གྱི་མྱུ་གུ་ཆམ་ཆོམ་བརྡུངས་པའམ། ཡང་ན་བཏགས་པའི་
[186a]
[186a.1]ཕྱེ་མ་མར་དང་ཚུལ་བཞིན་བསྐོལ་ཏེ་བསྒྲངས་པའི་ནང་དུ་སྦྲང་རྩི་བཏབ་སྟེ་བྱིན་ལ་སྐོམ་དུ་འོ་མ་བསྐོལ་བ་གྲངས་པ་བླུད་དོ། །ཡང་ན་ཤིང་མངར་དང་སྦྱར་བའི་འོ་ཐུག་བཏུང་བའམ། ཡང་ན་བ་ལ་དང་ས་ལ་པརྞི་ལ་སོགས་པ་སྦྱར་བའམ།
[186a.2]ཡང་ན་བིད་རི་འམ་ཤིང་མངར་དུ་སྦྱར་བ་བསྐོལ་བའི་མར་དང་ལན་ཚྭ་དང་བཅས་པ་སྣར་བླུགས་པ་བྱས་ན་སྐད་གསལ་བར་བྱེད་པའི་མཆོག་ཡིན་ནོ། །ཡང་ན་པྲ་པུཎྜ་རཱི་ཀ་དང་། ཤིང་མངར་དང་། པི་པི་ལིང་དང་། བྲི་ཧ་ཏི་དང་། བ་ལ་རྣམས་འོ་མ་དང་མར་དུ་སྦྱར་བ་
[186a.3]བསྐོལ་བ་སྣར་བླུགས་ན་ཡང་མཁྲིས་པའི་སྐད་འགགས་པ་སེལ་བའི་མཆོག་ཡིན་ནོ། །ཡང་ན་མངར་བའི་སྨན་ཛི་བན་ཏིའི་སྡེ་ཚན་བཏགས་པའི་ཕྱེ་མ་མར་དང་སྦྲང་རྩི་དང་སྦྱར་བའི་ལྡེ་གུ་ཟོས་ན་ཡང་ཕན་ནོ། །བད་ཀན་ལས་གྱུར་པའི་སྐད་འགགས་པ་ལ་ནི་
[186a.4]སྨན་ཚ་བ་ན་ལེ་ཤམ་ལ་སོགས་པའི་བཟའ་བ་དང་བ་གཅིན་བཏུང་བ་དང་རྩུབ་པ་རྣམས་སྦྱར་རོ། །ཀད་པ་ལ་དང་སྐྱུ་རུ་ར་དང་། ཚ་བ་གསུམ་དང་དེ་རྣམས་ཀྱི་ཕྱེ་མ་ཏིལ་མར་དང་། སྦྲང་རྩི་དང་ལྡེ་གུར་བྱས་པའམ། ཡང་ན་ཚ་བ་གསུམ་དང་། ཡ་བཀྵ་ར་
[186a.5]དང་། ཀྲུ་ཏྲུག་ཏྲེས་དང་། དབྱི་མོ་དང་། ག་བྲའི་རྩ་བ་དང་། ཨ་རུ་ར་དང་དེ་རྣམས་སྦྲང་རྩིའི་ལྡེ་གུར་བྱས་པ་འམ། ཡང་ན་ནས་ཀྱི་ཐུག་པ་པི་པི་ལིང་དང་། སྐྱུ་རུ་ར་དང་སྦྱར་བའམ། ཡང་ན་ནས་ཐུག་གཅིག་པུ་མར་དང་ཏིལ་མར་དང་སྦྱར་བ་འཐུངས་ན།
[186a.6]བད་ཀན་གྱི་སྐད་འགགས་པ་ཞི་བར་བྱེད་དོ། །ཡང་ན་པི་པི་ལིང་དང་། བཅའ་སྒ་སྔར་ཟོས་ལ། དེའི་འོག་ཏུ་སྨན་རྣོ་བ་དང་སྦྱར་བའི་སྐྱུག་སྨན་བཏང་ངོ་། །སྐད་དྲགས་པ་ལས་སྐད་འགགས་པ་ལ་ནི་སྨན་མངར་བའི་སྡེ་ཚན་འོ་མ་དང་བསྐོལ་བའི་ནང་དུ་ཁ་ར་དང་སྦྲང་
[186a.7]རྩི་བཏབ་པ་བླུད་ན་ཕན་ནོ། །ཡི་ག་འཆུས་པ་ལ་ནི་ཕན་པ་དང་། མི་ཕན་པ་སྣ་ཚོགས་བསྲེས་ལ་སྦྱིན་ནོ། །དེ་བཞིན་དུ་ཕྱི་ནང་གཉིས་ཀ་ནས་ཁྲུས་བྱས་ཏེ། སེམས་དགའ་བར་བྱ་བ་དང་། ཡི་གར་འོང་བའི་སྨན་སྦྱིན་ནོ། །དེ་ནས་དུས་གཉིས་སུ་སོ་ཤིང་བཅའ་
[186b]
[186b.1]ཞིང་བསྐ་བའི་སྨན་ཏིན་དུ་ཀ་ལ་སོགས་པས་ཁ་བཀྲུ་ཞིང་མུར་བར་བྱའོ། །ཡང་ན་ཁར་སྨན་གྱི་དུད་པའི་སྦྱོར་བ་བདུག་གོ། །ཡང་ན་བལ་བུའི་ཕྱེ་མའི་སྦྱོར་བའི་རི་ལུར་བྱས་པའམ། ཡང་ན་ཟླ་བའི་འོད་ཅེས་བྱ་བའི་ཟས་ཁ་ར་དཀར་པོ་དང་ག་པུར་དང་ལྡན་པར་
[186b.2]བྱས་ཏེ་ཟོས་ན། ཡི་ག་འབྱེད་པའི་མཆོག་ཡིན་ནོ། །དེ་ལ་རླུང་ལས་གྱུར་པའི་ཡི་ག་འཆུས་པ་ལ་ནི། ཧ་རེ་ཎུ་ཀ་དང་། པི་པི་ལིང་དང་། བྱི་དང་ག་དང་། ར་སྣ་དང་། རྒྱམ་ཚ་དང་། དོང་གྲ་དང་། སུག་སྨེལ་དང་། ག་
[186b.3]བྲའི་རྩ་བ་དང་། ནས་ཚིག་འཁུས་པའི་ཐལ་བ་དང་། ཤིང་ཀུན་དང་འདི་རྣམས་ཀྱི་ཕྱེ་མ་ཆང་གི་དངས་མའམ། ཡང་ན་སྨན་མར་དང་སྦྱར་ཏེ་བཏང་ངོ་། །ཡང་ན་ཤུ་དག་གི་ཆུས་སྨན་དུ་སྦྱར་རོ། །མཁྲིས་པ་ལས་གྱུར་པའི་ཡི་ག་འཆུས་པ་ལ་ནི་བུ་
[186b.4]རམ་དང་ཆུ་སྦྱར་བས་ཁྲུས་བྱའོ། །ཡང་ན་ཁ་ར་དང་། མར་དང་ལན་ཚྭའི་མཆོག་དང་སྦྲང་རྩིར་སྦྱར་བའི་ལྡེ་གུ་སྦྱིན་ནོ། །བད་ཀན་ལས་གྱུར་པའི་ཡི་ག་འཆུས་པ་ལ་ནི་ནིམ་པ་བསྐོལ་བའི་ཆུས་སློན་བྱའོ། །བཏུང་བར་ནི་ཏི་མུ་ས་དང་། དོང་ག་བསྐོལ་བའི་
[186b.5]ཆུའམ། ཡང་ན་སྨན་རྣོ་བ་དང་སྦྱར་བའི་ཨ་རིཥྚའི་ཆང་ངམ། རྒུན་ཆང་ངམ། སྦྲང་ཆང་རྣམས་ལས་གང་ཡང་རུང་བ་བླུད་དོ། །ཡང་ན་གོང་དུ་བཤད་པའི་ཧ་རེ་ཎུ་ཀ་དང་། པི་པི་ལིང་ལ་སོགས་པའི་ཕྱེ་མ་ཆུ་དྲོན་པོ་དང་སྦྱར་བ་བླུད་དོ། །སུག་སྨེལ་དང་།
[186b.6]ཤིང་ཚ་དང་། ནཱ་ག་པུཥྤ་དང་། ན་ལེ་ཤམ་དང་། པི་པི་ལིང་དང་། བཅའ་སྒ་དང་། འདི་རྣམས་ཡས་ཀྱི་རིམ་བཞིན་དུ་ཆ་རེས་བསྐྱེད་པ་ཕྱེ་མར་བྱས་ལ་སྤྱི་དང་མཉམ་པའི་ཁ་ར་དང་བཅས་པ་ཟོས་ན། ཆམ་པ་དང་། ཡི་ག་འཆུས་པ་དང་། སྙིང་ན་བ་དང་། ལུད་
[186b.7]པ་དང་། དབུགས་མི་བདེ་བ་དང་། མགུལ་པའི་ནད་རྣམས་འཇོམས་སོ། །ལ་ལ་ཕུད་དང་། ད་ཏྲིག་དང་། སྟར་བུ་དང་། བཅའ་སྒ་དང་། སེའུ་འབྲུ་དང་། རྒྱ་ཤུག་དང་། དེ་རྣམས་ཞོ་གཉིས་གཉིས་དང་། ཁ་ར་སྲང་བཞི་དང་། འུ་སུ་དང་། ཁ་རུ་ཚ་དང་།
[187a]
[187a.1]གོ་སྙོད་དང་། ཤིང་ཚ་དང་། འདི་རྣམས་ཞོ་རེ་རེ་དང་། པི་པི་ལིང་འབྲུ་བརྒྱད་དང་། ན་ལེ་ཤམ་ཉིས་བརྒྱ་དང་། དེ་རྣམས་ཀྱི་ཕྱེ་མས་ནི་ཡི་གེ་འབྱེ། མེ་དྲོད་སྐྱེད། ཕྱི་ས་འགགས་པ་དང་། ལུད་པ་དང་། སྙིང་ག་དང་། རྩིབ་ལོགས་སུ་
[187a.2]ཟུག་པ་དང་། མཆེར་པ་དང་། གཞང་འབྲུམ་དང་། ཕོ་བའི་ནད་སེལ་ཏོ། །བལ་བུའི་ལོ་མ་དང་། ན་ལེ་ཤམ་དང་། དོང་གྲ་དང་། པི་པི་ལིང་དང་། དེ་རྣམས་གོ་རིམས་བཞིན་དུ་དང་པོའི་ཆ་རེས་བསྐྱེད་པ་དང་། ཤིང་ཚ་དང་། སུག་སྨེལ་དང་། བལ་བུའི་
[187a.3]ཕྱེ་མ་དང་། པི་པི་ལིང་གི་བརྒྱད་འགྱུར་གྱི་ཁ་ར་དཀར་པོ་དང་། དེ་རྣམས་ཀྱི་ཕྱེ་མ་ནི་ཡི་ག་འཆུས་པ་དང་། མེ་དྲོད་སྐྱེས་པ་དང་། ལུད་པ་དང་། དབུགས་མི་བདེ་བ་དང་། ཟས་ཡི་གར་མི་འོང་བ་དང་། སྐྱུག་པ་དང་། མཆེར་པ་ན་བ་དང་། སྙིང་ནད་དང་། རྩིབ་
[187a.4]ལོགས་སུ་ཟུག་པ་དང་། སྐྱ་རྦབ་དང་། རིམས་དང་། འཁྲུ་བ་དང་། རླུང་འཁྱིལ་པ་བདེ་བར་འབྱུང་སྟེ། ནད་དེ་རྣམས་ལས་རྒྱལ་བར་བྱེད་དོ། །ནཱ་ག་པུཥྤ་སྲང་ཕྱེད་དང་། ཤིང་ཚ་དང་། སུག་སྨེལ་ཞོ་གཉིས་གཉིས་དང་། གནྡྷ་བྷ་དྲ་སྲང་ཕྱེད་དང་། དེ་རྣམས་ཀྱི་ཕྱེ་མ་
[187a.5]བུ་རམ་རྙིང་པ་སྲང་ཉི་ཤུ་རྩ་ལྔ་དང་ལྷན་ཅིག་བསྐོལ་བ་ཞོ་གཉིས་ཙམ་གྱི་རི་ལུ་བྱས་ཏེ་ཟོས་ན་ཕན་ཡོན་གོང་མ་དང་འདྲའོ། །ཤིང་ཨརྐ་དང་། སླེ་ཏྲེས་བསྲེས་པའི་ཐལ་བ་ཆུ་དང་བསྲེས་པའི་ནང་དུ་ནུབ་གཅིག་སྦངས་ཏེ་ཆམ་པ་ཅན་ལ་ཟན་དུ་བྱས་ཏེ་སྦྱིན་ནོ། །ནད་པ་
[187a.6]ཉམས་སྟོབས་དང་ལྡན་པ་ཡིན་ན་སློན་བྱའོ། །སློན་བྱས་པའི་འོག་ཏུ་སྲོག་ཆགས་ཐང་ལ་གནས་པའི་ཤ་སྨན་ཚ་བ་དང་ཁ་བ་སྦྱར་བ་ཐུར་མ་ལ་བསྲེགས་ཏེ། སྐམ་པ་དང་ཡང་བའི་ཟས་དང་བཏུང་བ་ནི་སྲན་མ་ཙ་ན་ཀ་ལ་སོགས་པ་ཡང་སྦྱར་རོ། །བད་ཀན་ལས་གྱུར་
[187a.7]པའི་ཆམ་པ་ནི་རླུང་གིས་བད་ཀན་བསྐྱོད་པ་ཡིན་ཏེ། དེ་བས་ན་དེ་ལ་ནི་སྨན་པ་མཁས་པས་སྣུམ་པ་དང་དྲོ་བ་ཉིད་ཀྱིས་ཞི་བར་བྱ་སྟེ། ཆམ་པའི་ནད་གསོ་བ་དང་། སྐྱུག་བྲོ་བའི་ནད་ཀྱི་གསོ་བ་དང་མཐུན་པས་གང་གི་སྦྱོར་བ་བྱས་ཀྱང་ཕན་ནོ། །ཁྱད་པར་དུ་ཆམ་པ་ལ་ནི་
[187b]
[187b.1]ལྷག་པར་སྣུམ་ཆོས་དང་། བསྐུ་མཉེ་དང་དུགས་བསྟེན་པར་བྱའོ། །དུགས་ནི་ཟན་གྱིས་གླན་པའི་དུགས་བྱ་སྟེ། ཤ་ཁུ་དང་སྣུམ་དང་། ལན་ཚྭ་དང་། སྨན་རྣོན་པོ་སྐྱུར་དང་སྦྱར་བའི་ཟན་གྱི་དུགས་ཀྱིས་མགོ་དང་མགུལ་པ་དང་། རྩིབ་ལོགས་སུ་ན་བ་རྣམས་ལ་ནི།
[187b.2]ནད་གཞི་ཇི་ལྟ་བ་བཞིན་དུ་གསོ་བའི་ཆོ་ག་དེ་ལྟར་བྱའོ། །ཆུ་དང་ཐང་གཉི་ག་ལ་གནས་པའི་ཤ་རྣམས་ལན་ཚྭ་སྣུམ་བཞི་དང་ལེགས་པར་དུགས་བྱའོ། །བད་ཀན་དང་མཁྲིས་པར་ལྡན་པའི་ནད་ལ་ནི། ཤུ་ཏི་དང་། ཤིང་མངར་དང་། རུ་རྟ་དང་། རྒྱ་སྤོས་དང་། ཙནྡན་
[187b.3]དང་སྦྱར་བའི་བྱུག་པ་མར་དང་བཅས་པའི་བསྐུ་བྱུག་དང་ལྡན་པ་ནི་ནད་པ་ལ་འདོད་པ་ཡིན་ནོ། །དེ་བཞིན་དུ་བ་ལ་དང་། ར་སྣ་དང་། ཏིལ་དང་། མར་དང་། ཤིང་མངར་དང་། ཨུཏྤ་ལ་སྦྱར་བའི་ཕྱེ་མ་གོང་མ་ལྟར་སྦྱར་བ་ཡང་ཕན་ནོ། །བ་སྤྲུ་བ་དང་། ཤི་ཀྲུ་དང་། བ་
[187b.4]ལ་དང་། རམ་ཉེ་བ་དང་། བི་ད་ར་དང་། དེ་རྣམས་ཡང་གོང་མ་བཞིན་དུ་བྱུག་པ་བྱས་ན་ཡང་དེ་དང་འདྲའོ། །དེ་བཞིན་དུ་གླད་པ་དང་། རྩིབ་ལོགས་དང་། མགུལ་པ་ན་བ་ལ་ནི་སྣར་བླུགས་པ་དང་། དུ་བ་བརྔུབ་པ་དང་། ཟན་ཟོས་པའི་འོག་ཏུ་སྣུམ་སྦྱིན་པ་
[187b.5]དང་། བསྐུ་བར་འོས་པའི་འབྲུ་མར་གྱིས་བསྐུ་བ་དང་། མས་གཏོང་བ་རྣམས་ཕན་པའི་ཆོ་ག་བྱའོ། །དེ་བཞིན་དུ་མགོ་དང་རྩིབ་ལོགས་སུ་མགུལ་པ་ན་བ་ལ་ནི་ནད་གཞི་ཇི་ལྟ་བ་བཞིན་དུ་ཁྲག་དབྱུང་སྟེ། རླུང་ལ་ནི་རྔབས་རུས་བྱའོ། །མཁྲིས་པ་ལ་ནི་སྲིན་བུ་
[187b.6]པད་པས་བྱའོ། །བད་ཀན་ལ་ནི་ཀུ་བས་ཁྲག་དབྱུང་ངོ་། །གཏར་བའི་རྨ་ལ་ཤུག་པ་དང་། པུ་ཤེལ་ཙི་དང་། ཙནྡན་བཏགས་པའི་ཕྱེ་མ་མར་དང་སྦྱར་བའམ། ཡང་ན་དཱུར་བ་དང་། ཤིང་མངར་དང་། བཙོད་དང་། ནཱ་ག་གེ་སར་མར་དང་སྦྱར་བས་བསྐུ་བའམ།
[187b.7]ཡང་ནྱ་གྲོ་དྷའི་སྡེ་ཚན་མར་དང་སྦྱར་བའམ། ཡང་ན་མར་ལན་བརྒྱ་ཆུ་དང་བཀྲུས་པའམ། ཡང་ན་འོ་མས་བཀྲུ་བའམ། ཡང་ན་ཤིང་མངར་གྱི་ཆུས་བཀྲུ་བ་རབ་ཏུ་བསྔགས་སོ། །གཅོང་ཆེན་པོའི་ནད་དེས་མེ་དྲོད་ཉམས་ཏེ་ཤས་ཆེར་བེའུ་སྣབས་དང་བཅས་ཏེ་
[188a]
[188a.1]འཁྲུ་བར་གྱུར་ན་ནི། ཕོ་བའི་ནད་ཀྱི་འཁྲུ་བ་གསོ་བ་ཇི་ལྟ་བ་བཞིན་དུ་བྱས་ན་ཕན་ནོ། །ལུས་ཟུངས་ཟད་དེ་གཅོང་ཆེན་པོའི་ནད་ཀྱིས་ཤ་སྐེམ་པར་གྱུར་ཅིང་ཕྱི་སའི་སྟོབས་ཉི་ཚེ་ཡོད་པ་ལ་ནི། དེ་ཉིད་ཀྱི་སྟོབས་མི་འགྱུར་བར་བསྲུང་བར་བྱའོ། །
[188a.2]ཤ་ཉི་ཚེ་རན་པར་ཟོས་ལ་དེའི་འོག་ཏུ་བཏུང་བ་ནི་རྒུན་ཆང་བླུད་དོ། །གཅོང་ཆེན་པོའི་ནད་ལ་ནི། བཤང་བ་ཕྱིར་མི་འབྱུང་བར་བསྡམས་ཀྱང་ནང་དུ་གནོད་པར་མི་འགྱུར་རོ། །གཅོང་ཆེན་པོ་ལ་ནི་ཤའི་བཟའ་བ་དང་། རྒུན་ཆང་དང་། ཆང་གི་སྙིང་པོ་དང་། ཨ་རིཥྚའི་
[188a.3]ཆང་དང་། སྦྲང་ཆང་དང་། འདི་རྣམས་གང་རྙེད་པ་བླུད་ན་ཕན་ནོ། །རྩའི་རྒྱུན་འགགས་པ་སྦྱང་བ་དང་། ཉམས་སྟོབས་དང་། གཟི་མདངས་བསྐྱེད་པར་བྱ་བའི་ཕྱིར་ལུས་སྣུམ་གྱིས་བསྐུས་ལ། ཤིང་སྒྲོམ་གྱི་ནང་དུ་སྣུམ་ཉི་ཚེའམ། འོ་མ་འམ་ཆང་གང་
[188a.4]ཡང་རུང་བ་ཆུ་དྲོན་པོས་བཀང་ལ་དེའི་འོག་ཏུ་ལུས་སྦྱང་ངོ་། །དེ་ནས་ཕྱིར་བྱུང་སྟེ་བདེ་བར་འདུག་པ་ལ་མར་དང་ཏིལ་མར་བསྲེས་པས་ལུས་བསྐུ་བྱུག་བྱས་ལ་ལག་པས་དལ་གྱིས་མཉེས་ཏེ། བག་ཕྱེའི་ལྡེ་གུས་དྲིལ་བར་བྱའོ། །དེ་ནས་ཡང་ཛི་བན་ཏི་དང་། དཱུར་
[188a.5]བ་དང་། བཙོད་དང་། བ་སྤུ་བ་དང་། ཤང་ཤ་གན་དྷ་དང་། ཨ་པ་མ་རྒ་དང་། ཨག་ནི་མན་ཐ་དང་། ཤིང་མངར་དང་། བ་ལ་དང་། བི་ད་རི་དང་། ཡུངས་ཀར་དང་། གླ་སྒང་དང་། འབྲས་དང་། ཟར་མ་དང་། མོན་སྲན་གྲེའུ་དང་། ཏིལ་དང་། ཕབས་དང་།
[188a.6]འདི་རྣམས་ཅིག་ཅར་བཏགས་ཏེ། སྨན་སྤྱིའི་སུམ་འགྱུར་གྱི་ནས་ཕྱེ་དང་ཞོ་དང་སྦྲང་རྩི་དང་དེ་ལྷན་ཅིག་སྦྱར་བའི་ལྡེ་གུས་ལུས་དྲིལ་ཏེ། བསྐུས་ན་ཉམས་བརྟ་ཞིང་ཤ་སྐྱེ་ལ་མདོག་བཟང་བར་འགྱུར་རོ། །ཡུངས་ཀར་བཏགས་པའི་ཕྱེ་མ་དང་། ཛི་བན་ཏིའི་
[188a.7]སྡེ་ཚན་དང་། སྤོས་དྲི་ཞིམ་པོའི་ཁྲུས་རྩི་བཅུག་ལ་དུས་དང་མཐུན་པའི་ཆུས་ཁྲུས་བྱས་ལ། དེའི་འོག་ཏུ་མེ་ཏོག་དྲི་ཞིམ་པོའི་ཕྲེང་བ་ལ་སོགས་པ་དང་རྒྱན་སྣ་ཚོགས་ཀྱིས་བརྒྱན་ཏེ། བརྟེན་པ་ལ་སོགས་པ་བྱས་ན་བཀྲ་མི་ཤིས་པ་ལ་སོགས་པ་འཇོམས་
[188b]
[188b.1]སོ། །གཞན་ཡང་གཅོང་ཆེན་པོ་ལ་ནི། གཉེན་བཤེས་ཡིད་དུ་འོང་བ་བལྟ་བ་དང་། གླུ་དང་སིལ་སྙན་རྣམས་སྙན་པ་དང་། མར་དང་འོ་མ་དང་བཅས་པའི་འཇམ་རྩི་མས་གཏོང་བ་དང་ཤ་དང་ཆང་སྣ་ཚོགས་བསྟེན་པ་དང་། ལྷ་ལ་མཆོད་པ་དང་། གཏོར་
[188b.2]མ་བཏང་བ་དང་། བཀྲ་ཤིས་དང་། སྦྱིན་སྲེག་ལ་སོགས་པ་བྱས་པ་དང་། དེ་བཞིན་དུ་སྲིད་སྲུང་གི་རིག་བྱེད་ལས་འབྱུང་བའི་མཆོད་པ་ཡང་འདིར་སྦྱར་རོ། །གསོ་བའི་གནས་ལས་གཅོང་ཆེན་པོ་གསོ་བའི་ལེའུ་སྟེ་ལྔ་པ་རྫོགས་སོ།། །།དེ་ནས་
[188b.3]རྟག་ཏུ་སློན་པའི་ནད་དང་སྙིང་ནད་གསོ་བ་དང་སྐོམ་པའི་ནད་གསོ་བའི་ལེའུ་བཤད་པར་བྱའོ། །སློན་པའི་ནད་ནི་མ་ཞུ་བའི་གནས་ནས་ཕལ་ཆེར་འབྱུང་སྟེ། རླུང་ལས་གྱུར་པ་མ་གཏོགས་པར་དང་པོ་སྨྱུང་བ་བྱས་ན་ཕན་ནོ། །དེ་ལ་ནད་ཕལ་ཆེར་གཡོས་ཏེ་རྟག་
[188b.4]ཏུ་སློན་ཞིང་ཉམས་སྟོབས་དང་ལྡན་པ་ལ་ནི་སྐྱུག་སྨན་གཏང་བར་བྱའོ། །དེའི་འོག་ཏུ་རིམ་གྱིས་སྙིང་ལ་ཕན་པའི་བཀྲུ་སྨན་རྒུན་ཆང་ལ་སོགས་པའམ། རྒུན་འབྲུམ་ལ་སོགས་པ་འབྲས་བུའི་ཁུ་བ་གང་ཡང་རུང་བ་འོ་མ་དང་ལྷན་ཅིག་གཏང་བར་བྱ་སྟེ། ཉེས་པ་
[188b.5]གྱེན་དུ་འབྱུང་བ་རྣམས་ཐུར་དུ་བཀྲུ་བར་བྱའོ། །ཉམས་སྟོབས་ཆུང་བ་ལ་ནི་རྩུབ་པའི་སྨན་འབྲས་ཡོས་ཀྱི་ཐུག་པ་ལ་སོགས་པས་ཞི་བར་བྱེད་དོ། །དེ་ནས་ཟས་ཤིན་ཏུ་སྐ་བ་ཞིམ་ཞིང་ཡི་གར་འོང་བ་རན་པར་བཟའ་བ་དང་། སྨྱུང་བ་བྱ་བ་ནི་རབ་ཏུ་བསྔགས་སོ། །མོན་
[188b.6]སྲན་སྡེའུ་ལ་སོགས་པ་བརྔོས་པའི་ཡུ་ཤ་དང་། ཏིལ་བརྔོས་ཏེ་ཆམ་ཆོམ་བརྡུངས་ལ་ཆུ་དང་ལྷན་ཅིག་སྦངས་ཏེ་སྐྱུར་པོར་གྱུར་པ་ཨམ་བི་ལ་ཀ་ཞེས་བྱ་བ། ལ་ཕུག་སྐམ་པོ་དང་། ཤིང་ཏོག་ལྕི་ལི་ལ་སོགས་པའི་སྐམ་པོ་ཆམ་ཆོམ་བརྡུངས་ཏེ། ཆུ་ནང་དུ་སྦངས་པ་
[188b.7]སྐྱུར་པོར་སོང་བ་ནི་བ་ལ་ཞེས་བྱ་སྟེ། འདི་རྣམས་ཟས་དང་ལྷན་ཅིག་བཟའོ། །ཚོད་མ་ནི་མདོའི་གནས་སུ་བསྟན་པ་རྣམས་དང་། བལྡག་པ་དང་། ནར་མའི་ཟས་དང་། བཏུང་བ་དྲི་སྣ་གསུམ་ཆུ་དང་བསྐོལ་བའི་ནང་དུ་སྦྲང་རྩི་བཏབ་པ་དང་། ཡང་ན་དྲི་གསུམ་
[189a]
[189a.1]ཆུའི་ནང་དུ་བསྐོལ་བའི་སེའུས་བཏབ་པའི་བཏུང་བ་དང་། བག་ཆོས་ལས་བྱས་པའི་ཁུ་བ་སྣ་ཚོགས་ལེགས་པར་སྨིན་པ་ལ་དུ་ལ་སོགས་པ་དང་། གཞན་ཡང་མདོའི་གནས་སུ་བསྟན་པའི་འབྲས་བུ་རྣམས་དང་། དྲི་ཞིམ་པོ་དང་སྦྱར་བའི་ཆུས་
[189a.2]ལུས་བཀྲུ་བ་དང་། རྒྱ་མཚོའི་དབུ་བ་ལ་སོགས་པས་ལུས་ཕྱི་བརྡར་བྱ་བ་དང་། ཟས་ཟོས་པའི་འོག་ཏུ་འཕྲལ་ལ་གདོང་དུ་ཆུ་གྲང་མོས་གཏོར་ཞིང་དྲི་ཞིམ་པོ་དང་ལྡན་པ་སྟེ། དེ་ཡང་མེ་ཏོག་དང་འབྲས་བུ་དང་བཟའ་བ་དང་བཏུང་བ་ལས་བྱུང་བ་དྲི་ཞིམ་པོས་ཀྱང་བདུག་
[189a.3]པར་བྱའོ། །དེ་ལྟར་བསྟན་པའི་རིམ་པ་ནི། སྐྱུག་སྨན་གྱི་ཆོ་ག་སྤྱིར་བསྟན་པ་ཡིན་ནོ། །དེ་ལ་རླུང་ལས་གྱུར་པའི་རྟག་ཏུ་སྐྱུགས་པའི་ནད་ལ་ནི་མར་ཁུ་དྲོ་འཇམ་ཙམ་རྒྱམ་ཚ་དང་ལྡན་པར་འཐུངས་ན་ཕན་ཏེ། ཁྱད་པར་དུ་ལུད་པ་དང་སྙིང་འཛག་པ་ཞི་བར་འགྱུར་རོ། །ཡང་ན་ཚ་བ་
[189a.4]གསུམ་དང་སྦྱར་པའི་མར་དང་། ལན་ཚྭ་རྣམ་གསུམ་དང་ལྡན་པར་བཟའ་བ་དང་། བལ་པོ་སེའུ་དང་སྦྱར་བའི་མར་ཁུ་བླུད་ན། རླུང་ལས་གྱུར་པའི་སྐྱུགས་པའི་ནད་སེལ་ཏོ། །ཡང་ན་ཞོ་དང་མར་བསྲེས་པའི་ནང་དུ་འུ་སུ་དང་བཅའ་སྒ་བཏབ་པས་བླུད་ན་ཕན་ཡོན་གོང་མ་དང་འདྲའོ། །གོང་དུ་
[189a.5]སྨོས་པའི་ཆོ་ག་སྤྱིར་སྨོས་པ་ནི་ཐམས་ཅད་ལ་སྦྱར་བར་བྱའོ། །ཡང་ན་ཆུ་དང་འོ་མ་ཆ་མཉམ་པ་འཐུངས་ན། སྐྱུགས་པའི་ནད་རླུང་ལས་གྱུར་པ་སེལ་ཏོ། །བྱེ་བི་སྐྱི་རི་ཞེས་བྱ་བ་ཁྱིམ་བྱ་ལ་སོགས་པའི་ཤ་ཁུ་བལ་པོ་སེའུ་ལ་སོགས་པ་སྐྱུར་བ་དང་ལྡན་པའི་ནང་དུ་རྒྱམ་ཚ་
[189a.6]དང་མར་ཤས་ཆེར་བཏབ་སྟེ་བླུད་ན་ཕན་ནོ། །རླུང་ལས་གྱུར་པའི་སྐྱུགས་པའི་ནད་སེལ་ཏོ། །བཟའ་བ་ནི་སྣུམ་དང་ལྡན་ཞིང་བཅའ་སྒ་དང་། ཞོ་དང་བལ་པོ་སེའུ་དང་རྒྱམ་ཚ་དང་བཅས་པར་སྦྱར་བའི་དྲོན་པོ་བཟའ་བར་བྱའོ། །རླུང་ལས་གྱུར་པའི་སྐྱུགས་པའི་ནད་འདི་ལ་
[189a.7]ནི། སེང་ཕྲོམ་ལ་སོགས་པའི་བཀྲུ་སྨན་སྣུམ་དང་ལན་ཚྭ་དང་བཅས་པའི་དྲོ་འཇམ་ཙམ་བཏང་ན་ཞི་བར་བྱེད་དོ། །དེ་ལ་སྐྱུགས་པའི་ནད་མཁྲིས་པ་ལས་གྱུར་པ་ལ་ནི་རྒུན་འབྲུམ་དང་བུ་རམ་ཤིང་ལ་སོགས་པ་རང་རང་གི་ཁུ་བའི་ནང་དུ། ཏྲི་བ་ཙི་དང་སྦྱར་བའི་བཀྲུ་
[189b]
[189b.1]སྨན་གཏང་བར་བྱའོ། །ཡང་ན་སེང་ཕྲོམ་མར་དང་སྦྱར་བའི་བཀྲུ་སྨན་གཏང་ངོ་། །མཁྲིས་པ་ལས་གྱུར་པའི་སྐྱུགས་པའི་ནད་སྙིང་སྟོབས་སུ་འགྱུར་ཏེ། བད་ཀན་གྱི་གནས་སུ་གྱུར་པ་ལ་ནི་སློན་སྨན་མངར་བ་དང་ཁ་བ་རྣམས་ཀྱིས་གྱེན་དུ་དྲང་ངོ་། །དེ་ལྟར་སློན་སྨན་གྱིས་
[189b.2]ལུས་དག་པར་བྱས་ནས། སྐྱོ་མ་དང་ཐུག་པ་ཆུའི་ནང་དུ་སྦྲང་རྩི་དང་ཤ་ཁ་ར་བཏབ་པ་བླུད་དོ། །བཟའ་བ་དང་འབྲས་དྲུག་ཅུ་པའི་ཆན་སྲན་མུངྒ་སྲོག་ཆགས་ཐང་ལས་སྐྱེས་པའི་ཤ་ཁུ་དང་ལེགས་པར་སྦྱར་བའི་ཚོད་མ་དང་ལྷན་ཅིག་བསྐོལ། བཏུང་བ་ནི་སོ་ཕག་
[189b.3]བསྲེགས་ནས་མདོག་དམར་པོར་སོང་བ་དང་། ཆུ་གྲང་གི་ནང་དུ་བཅུག་ལ་སོ་ཕག་ཕྱིར་ཕྱུང་སྟེ་བསྒྲངས་པའི་ཆུ་བླུད་དོ། །ཡང་ན་སྲན་མུངྒ་དང་། པུ་ཤེལ་ཙི་དང་། པི་པི་ལིང་དང་། འུ་སུ་འདི་རྣམས་ཆུ་དང་ལྷན་ཅིག་ཁང་པའི་ཕྱི་རོལ་དུ་ནུབ་གཅིག་ཆུ་དང་སྦངས་ལ་བཞག་སྟེ། དེ་
[189b.4]ནས་བླུད་ན་མཁྲིས་པ་ལས་གྱུར་པའི་སྐྱུགས་པའི་ནད་སེལ་ཏོ། །ཡང་ན་རྒུན་འབྲུམ་དང་། བུ་རམ་ཤིང་དང་། སླེ་ཏྲེས་དང་། དེ་རྣམས་གང་ཡང་རུང་བའི་ཁུ་བ་བླུད་ན། སྐྱུགས་པའི་ནད་མཁྲིས་པ་ལས་གྱུར་པ་སེལ་ཏོ། །ཡང་ན་ཤིང་འཛམ་བུ་དང་། ཨ་མྲའི་ལོ་མ་
[189b.5]དང་། ཨུ་ཤིར་དང་། ནྱ་གྲོ་དྷའི་ས་བོན་འབུས་པ་དང་། མྱུ་གུ་དང་འདི་རྣམས་ཆམ་ཆོམ་བརྡུངས་ཏེ། ཆུ་དང་ལྷན་ཅིག་བསྐོལ་ལ་བསྒྲངས་པ་དང་སྦྲང་རྩིས་བཏབ་སྟེ་འཐུངས་ན། སྐྱུགས་པའི་ནད་དང་། རིམས་དང་། འཁྲུ་བ་དང་། བརྒྱལ་བ་དང་། སྐོམ་
[189b.6]དད་ཆེ་བ་དང་། འདི་རྣམས་འབྱང་དཀའ་བའི་ཡང་ནད་སེལ་བར་བྱེད་དོ། །ཡང་ན་སྐྱུ་རུ་རའི་ཁུ་བ་ཙནྡན་དང་ལྷན་ཅིག་བསྐོལ་ཏེ་བཏུང་བའམ། སྲན་མུངྒ་བཏགས་པ་ཆུ་དང་སྦྱར་བ་བཏུང་ངོ་། །རྒྱ་ཤུག་གི་ཚི་གུ་དང་། ཁ་ར་དཀར་པོ་དང་། འབྲས་ཡོས་དང་།
[189b.7]སྦྲང་མའི་རྟུག་པ་དང་། པི་པི་ལིང་དང་། དངུལ་རྡོ་དང་། འདི་རྣམས་ཀྱི་ཕྱེ་མ་སྦྲང་རྩི་དང་སྦྱར་བའི་ལྡེ་གུའམ། ཨ་རུ་ར་དང་། རྒུན་འབྲུམ་དང་། རྒྱ་ཤུག་དང་། སྦྲང་རྩི་དང་སྦྱར་བའི་ལྡེ་གུ་བྱིན་ན། མཁྲིས་པ་ལས་གྱུར་པའི་སྐྱུགས་པའི་ནད་ལ་ཕན་ནོ། །དེ་ལ་བད་
[190a]
[190a.1]ཀན་ལས་གྱུར་པའི་སྐྱུགས་པའི་ནད་ལ་ནི། ནིམ་པ་དང་། པི་པི་ལིང་དང་། པོ་སོན་ཆ་དང་། འདི་རྣམས་ཀྱི་སློན་སྨན་ཆུ་དྲོན་པོ་དང་སྦྱར་བ་གཏང་ངོ་། །ཉམས་སྟོབས་ཆུང་ན་ནི་སྨྱུང་བ་ཉི་ཚེ་བྱའོ། །ཡང་ན་དོང་ག་ལ་སོགས་པའི་སྡེ་ཚན་བསྐོལ་
[190a.2]བ་བསྒྲངས་པའི་ནང་དུ་སྦྲང་རྩི་བཅུག་སྟེ། བད་ཀན་ལས་གྱུར་པའི་སློན་ནད་ཅན་ལ་བླུད་དོ། །ཡང་ན་ཕྱེའི་སྐྱོ་མའམ། སྐྱུགས་པའི་ནད་འཇོམས་པའི་སྨན་འབྲས་ཡོས་དང་། རྒྱ་ཤུག་སྐྱུར་པོ་དང་། བལ་པོ་སེའུ་ལ་སོགས་པ་བཏགས་ཏེ་བསྐོལ་བའི་ཁུ་བའི་ནང་
[190a.3]དུ་ནས་བརྔོས་ཏེ་ཕྱེར་བྱས་ལ་སྐྱོ་མ་བླུད་དོ། །བཟའ་བ་ནི་ཡི་གར་འོང་བ་རྒུན་འབྲུ་ལ་སོགས་པ་དང་སྦྱར་བ་སྨན་ཞིམ་ཐིག་ལེ་དང་བུ་སྲིན་དང་བཅས་པར་སྦྱིན་ནོ། །ལྡོང་རོས་དང་། པི་པི་ལིང་དང་། ན་ལེ་ཤམ་བཏགས་པའི་ཕྱེ་མ་སྐྱུར་རྩི་ཆེན་པོའམ། ཀ་པིད་ཏའི་ཁུ་བ་གང་ཡང་རུང་
[190a.4]བའི་ནང་དུ་བཏབ་སྟེ་སྦྲང་རྩི་དང་སྦྱར་བའི་ལྡེ་གུ་བྱིན་ན་བད་ཀན་ལས་གྱུར་པའི་སྐྱུགས་པའི་ནད་སེལ་ཏོ། །ཡང་ན་ཀ་པིད་ཏ་དང་། ཚ་བ་གསུམ་སྦྱར་བའམ། བྱི་ཚེར་བ་སྦྲང་རྩི་དང་སྦྱར་བ་ཟོས་ན། བད་ཀན་ལས་གྱུར་པའི་སྐྱུགས་པའི་ནད་སེལ་ཏོ། །གློ་བུར་དུ་ཡུལ་རྨེ་
[190a.5]བའམ་མི་གཙང་བ་མཐོང་སྟེ། ཡང་ནས་ཡང་དུ་སྐྱུགས་པ་ལ་ནི་ཡིད་དང་རྗེས་སུ་མཐུན་པར་ཡིད་དུ་འོང་བ་དང་སྤྱོད་པ་དང་དགའ་བ་བསྐྱེད་པ་ལ་སོགས་པ་བྱའོ། །སྲིན་བུ་ལས་གྱུར་པའི་སློན་པའི་ནད་ནི་སྲིན་བུ་གསོ་བ་དང་། སྙིང་ནད་གསོ་བའི་སྐབས་སུ་ཇི་ལྟར་བཤད་པ་བཞིན་དུ་སྨན་
[190a.6]གྱིས་གསོ་བར་བྱའོ། །སྐྱུགས་པའི་ནད་ལྷག་མ་སྐོམ་པ་དང་། མ་ཞུ་བ་དང་། སྙིང་ནད་ལ་སོགས་པ་ལས་གྱུར་པ་ལ་ནི་རང་རང་དང་མཐུན་པའི་སྨན་རླུང་ནད་གསོ་བའི་སྐབས་སུ་བཤད་པས་ཞི་བར་བྱའོ། །གཞན་ཡང་ཡང་ནས་ཡང་དུ་སྐྱུགས་ཏེ། ལུས་ཟུངས་རྣམས་ཟད་ཅིང་རླུང་འཁྲུགས་
[190a.7]པར་གྱུར་པ་ལ་ནི་ཐོག་མར་སྐྱུག་སྨན་གྱི་ཆོ་ག་བཞིན་དུ་ལུས་ཟུངས་རྣམས་འཕེལ་ཞིང་རྒྱས་པ་དང་མི་སྐྱུགས་པར་བྱ་སྟེ། དེ་ཡང་མར་དང་། བུ་རམ་དང་། ཤ་ཁུ་དང་། དགེ་བའི་སྨན་མར་དང་། ཚ་བ་གསུམ་གྱི་སྨན་མར་དང་། འཚོ་བྱེད་སྡེ་བཅུའི་སྨན་མར་དང་། འོ་མ་དང་། ལྡེ་གུ་གང་ཡང་རུང་བ་རྣམས་བསྟེན་ན་ཤིན་ཏུ་མི་བཟད་པའི་སྐྱུགས་པ་
[190b]
[190b.1]རྣམས་སེལ་ཏོ། །སྙིང་ནད་གསོ་བ་དེ་ལ་རླུང་ལས་གྱུར་པའི་སྙིང་ནད་ལ་ནི་ཞོ་ག་ཆུ་དང་། རྩབས་སྐྱུར་པོ་དང་། དར་བ་འདི་རྣམས་གང་ཡང་རུང་བ་དང་ཏིལ་མར་དང་སྦྱར་བའི་ནང་དུ་ལན་ཚྭ་ནག་པོ་བཏབ་སྟེ་དྲོ་འཇམ་ཙམ་བླུད་ན་སྙིང་ནད་དང་། སྐྲན་དང་། ལྟོ་བའི་ནད་ལས་རྒྱལ་བར་བྱེད་དོ། །
[190b.2]ཡང་ན་ཏིལ་མར་དང་། ལན་ཚྭ་དང་། གཅིན་དང་། སྐྱུར་པོ་དང་། འདི་རྣམས་ཆུ་དང་ལྷན་ཅིག་བསྐོལ་ཏེ། ཏིལ་མར་ཉི་ཚེ་ལུས་པ་འཐུངས་ན་ཕན་ཡོན་གོང་མ་དང་འདྲའོ། །ཡང་ན་བིལ་བའི་ཤིང་དང་། ར་སྣ་དང་། ནས་དང་། རྒྱ་ཤུག་དང་། ཐང་ཤིང་གི་འབྲས་བུ་
[190b.3]དང་། བ་སྤྲུ་བ་དང་། རྒྱ་སྲན་དང་། རྩ་བ་ལྔ་དང་། འདི་རྣམས་ཆམ་ཆོམ་བརྡུངས་ཏེ་ཆུ་དང་ཏིལ་མར་དང་ཚུལ་བཞིན་དུ་བསྐོལ་ལ། ཆུ་དུ། ཏིལ་མར་འབའ་ཞིག་ལུས་པ་དང་། དེ་ལས་བཏུང་བ་དང་། འཇམ་རྩི་མས་གཏོང་བ་དང་། སྣར་བླུགས་པ་བྱས་ན་
[190b.4]སྙིང་ནད་སེལ་ཏོ། །ཡང་ན་བཅའ་སྒ་དང་། བྱེའུ་རུག་པ་དང་། རྒྱམ་ཚ་དང་། ཀྲུ་ཏྲུག་ཏྲེས་དང་། ཤིང་ཀུན་དང་། མ་ནུ་དང་། ཨ་རུ་ར་དང་། འདི་རྣམས་ཆམ་ཆོམ་བརྡུངས་ཏེ་ཆུ་དང་བསྐོལ་བའི་ཁུ་བ་དང་། མར་དང་མར་གྱི་བཞི་འགྱུར་གྱི་ཆུ་དང་བསྐོལ་ལ།
[190b.5]མར་འབའ་ཞིག་ལུས་པ་དང་། དེ་ལས་རན་པར་འཐུངས་ན། རྩིབ་ལོག་ན་ཞིང་གཟེར་བ་དང་། སྐྲན་དང་འདི་རྣམས་འཇོམས་སོ། །ཡང་ན་ཁ་རུ་ཚ་སྲང་གཉིས་དང་། ཨ་རུ་ར་སྲང་ལྔ་དང་། འདི་རྣམས་ཆམ་ཆོམ་བརྡུངས་ཏེ། གོང་མ་བཞིན་མར་དང་
[190b.6]སྦྱར་བ་འཐུངས་ན། སྙིང་ནད་དང་། རྩིབ་ལོགས་ན་བ་དང་། སྐྲན་དང་དབུགས་མི་བདེ་བ་སེལ་ཏོ། །ཡང་ན་སེའུ་འབྲུ་དང་། ཁ་རུ་ཚ་དང་། ཤིང་ཀུན་དང་། སྟར་བུ་དང་འདི་རྣམས་ཀྱི་ཕྱེ་མ་ཆུ་དྲོན་པོ་དང་ལྷན་ཅིག་འཐུངས་ན། རླུང་དང་། སྙིང་ནད་དང་། དབུགས་
[190b.7]མི་བདེ་བ་རབ་ཏུ་ཞི་བར་བྱེད་དེ་རབ་ཏུ་བཟང་ངོ་། །ཡང་ན་པུཥྐར་མཱུ་ལ་ཟུར་པ་དང་། བཅའ་སྒ་དང་། སྐྱུར་རྩི་ཆེན་པོའི་རྩ་བ་དང་། ཨ་རུ་ར་དང་། འདི་རྣམས་ཕྱེ་མར་བྱས་ཏེ། ཡ་བཀྵ་ར་དང་། སྐྱུར་དང་། ལན་ཚྭ་དང་ལྡན་པར་བྱ་བའམ། ཆུ་དྲོན་གང་འབྱོར་པ་དང་སྦྱར་བ་འཐུངས་
[191a]
[191a.1]ན། སྙིང་གཅད་པ་སྙམ་བྱེད་ཅིང་ཟུག་པ་རྣམས་ལ་ཕན་ནོ། །ཡང་ན་ལ་ལ་ཕུད་དང་། རྒྱམ་ཚ་དང་། ཡ་བཀྵ་ར་དང་། ཤུ་དག་དང་། གོ་སྙོད་དང་། བཅའ་སྒ་དང་། ཐང་ཤིང་དང་། སྐྱུར་རྩི་ཆེན་པོ་དང་། པ་ལ་ཤ་དང་། ཟུར་པ་དང་། མ་
[191a.2]ནུ་འདི་རྣམས་བསྐོལ་བའི་ཁུ་བ་འཇམ་ཙམ་འཐུངས་ན་ཕན་ཡོན་གོང་དང་འདྲའོ། །ཡང་ན་ཚ་བ་ལྔ་དང་། ཟུར་པ་དང་། ཨ་རུ་ར་དང་། བུ་རམ་དང་། བི་ཛུ་ར་དང་། མ་ནུ་འདི་རྣམས་ཀྱི་ཕྱེ་མ་ཆང་དང་སྦྱར་བ་ཏིལ་མར་དང་། མར་བསྐོལ་བའི་ནང་དུ་བླུགས་ལ་ལན་ཚྭ་དང་ལྡན་པར་
[191a.3]འཐུངས་ན། སྙིང་ནད་དང་། རྩིབ་ལོགས་ན་བ་དང་། མོ་མཚན་རྣམས་སུ་ཟུག་པ་དང་། སྐྲན་དང་། དམུ་རྫིང་རྣམས་ལ་ཕན་ནོ། །ཡང་ན་རླུང་ལས་གྱུར་པའི་སྙིང་ནད་ལ་ནི། སྣུམ་ཆོས་དང་དུགས་བྱ་བའི་སྨན་སྦྱིན་ནོ། །རྩ་བ་ལྔ་པ་ཆུང་ངུ་ཆམ་ཆོམ་བརྡུངས་ལ་ཆུ་
[191a.4]དང་བསྐོལ་བའམ། ཡང་ན་བཅའ་སྒ་བསྐོལ་བའི་བཏུང་བ་དྲོ་འཇམ་ཙམ་བླུད་དོ། །ཡང་ན་ཆང་ངམ་རྩབས་སྐྱུར་པོ་དང་འདི་དག་རྣམས་སྐོམ་དུ་བླུད་དོ། །རླུང་གིས་སྙིང་གཟེར་ཞིང་མགུལ་པ་དང་དབུགས་བསྡམས་པ་སྙམ་བྱེད་པ་དང་། མ་ཞུ་བ་ཡོད་པ་རྣམས་ལ་
[191a.5]ཡང་གསོ་བ་གོང་མ་ལྟར་བྱའོ། །སྙིང་འཛག་པ་དང་། གཅིན་ནད་དང་རླུང་ལས་གྱུར་པའི་སྙིང་ནད་ལ་ནི། སྣུམ་མང་པོ་དང་། སྲེག་པ་དང་། ཁྲུང་ཁྲུང་དང་། རྨ་བྱ་དང་། ཅོ་ག་དང་། ཁྱིམ་བྱ་དང་། དེ་རྣམས་ཀྱི་ཤ་ཁུ་བྱིན་ན་ཕན་ནོ། །ཡང་ན་བ་ལའི་སྨན་མར་
[191a.6]རླུང་ནད་གསོ་བའི་སྐབས་སུ་བཤད་པ་བཏུང་བའམ། སུ་ཀུ་མ་རའི་སྨན་མར་ཁོང་འབྲས་གསོ་བ་ལས་འབྱུང་བའམ། ཡང་ན་ཤིང་མངར་ལན་བརྒྱ་བཙོས་པའི་སྨན་དྲེག་ནད་གསོ་བའི་ནང་དུ་བཤད་པ་ཡང་སྙིང་ནད་ཅན་ལ་སྦྱར་བར་བྱའོ། །ཡང་ན་སྣུམ་ཆེན་པོའི་མཆོག་
[191a.7]ཅེས་བྱ་བའི་སྨན་མར་སྦྱར་བར་བྱ་སྟེ། ར་སྣ་དང་། ཛི་བ་ཀ་དང་། ཛི་བན་ཏི་དང་། བ་ལ་དང་། ཀཎྜ་ཀ་རི་དང་། བ་སྦྲུ་བ་དང་། ག་བྲའི་རྩ་བ་དང་། སྠི་ར་ཞེས་བྱ་བ་ས་ལ་པརྞི་དང་། ཤུ་དག་དང་། ཚ་བ་གསུམ་དང་། འདི་རྣམས་ཆམ་ཆོམ་བརྡུངས་པ་དང་།
[191b]
[191b.1]སྣུམ་ཆེན་པོ་བཞི་ཆ་མཉམ་པ་དང་། དེའི་བཞི་ཆའི་ཞོ་དང་། རྩབ་མོ་དང་། ཞོ་ག་ཆུ་སྐྱུར་པོ་དང་། དར་བ་སྐྱུར་པོ་དང་། ཆང་དང་སྐྱུར་པོ་གང་རྙེད་པ་སྣུམ་ཆེན་པོ་གཅིག་གི་བཞི་འགྱུར་དང་། སྐྱུར་ལྔ་སྤྱི་དང་མཉམ་པའི་ཆུ་དང་ལྷན་ཅིག་བསྐོལ་ཏེ། མར་ཉི་ཚེ་ལུས་པ་དང་།
[191b.2]དེ་ལས་རྟག་ཏུ་བསྟེན་ན། ཚིམ་པར་བྱེད་པ་དང་། ལུས་འཕེལ་ཞིང་རྒྱས་པར་བྱེད་པ་དང་། སྟོབས་སྐྱེད་ཅིང་རླུང་ལས་གྱུར་པའི་སྙིང་ནད་འཇོམས་སོ། །རླུང་ལས་གྱུར་པའི་སྙིང་ནད་མེ་དྲོད་ཆེ་བ་དང་། སྙིང་འཛག་པ་དང་། འཕར་བ་ལ་ནི་འོ་མ་དང་། ཞོ་དང་། བུ་རམ་
[191b.3]དང་། མར་དང་། ཆུ་ན་གནས་པ་དང་། ཁྱིམ་ན་གནས་པའི་ཕྱུགས་ཀྱི་ཤ་རྣམས་ཟོས་ཤིང་འཐུངས་ན་ཕན་ནོ། །རླུང་ལས་གྱུར་པའི་སྙིང་ནད་མ་གཏོགས་པ་ལྷག་མའི་སྙིང་ནད་བཞི་ལ་ནི་གོང་མའི་སྣུམ་གྱི་ཆོ་ག་སྤང་བར་བྱ་སྟེ། རླུང་ལས་གྱུར་པ་ཡིན་
[191b.4]ན་ཡང་། གལ་ཏེ་སྙིང་བསྡམས་པ་སྙམ་བྱེད་པའི་ནད་དང་། ཟས་ཡི་གར་མི་འོང་བ་ལྟ་ན་ཡང་སྣུམ་གྱི་ཆོ་ག་སྤང་ངོ་། །དེ་རླུང་ལས་གྱུར་པའི་སྙིང་ནད་བད་ཀན་དང་འདྲེས་པ་ཡིན་ན་ནི་རྩུབ་པ་དང་དྲོ་བའི་གསོ་བ་བསྟན་པ་ཡིན་ནོ། །དེ་ལ་མཁྲིས་པ་ལས་གྱུར་པའི་
[191b.5]སྙིང་ནང་ལ་ནི་རྒུན་འབྲུམ་དང་། བུ་རམ་ཤིང་གི་ཁུ་བ་དང་། ཁ་ར་དཀར་པོ་དང་། སྦྲང་རྩི་དང་། པ་རུ་ཤ་རྣམས་ལས་གཞི་བླངས་པའི་བཀྲུ་སྨན་གཏང་བར་བྱ་སྟེ། ལུས་དག་པ་དང་འདོད་པའི་ཐུག་པ་ལ་སོགས་པ་རིམ་གྱིས་མཁྲིས་པ་འཇོམས་པ་སྦྱིན་ནོ། །གློ་
[191b.6]འགྲམས་པ་དང་། མཁྲིས་པའི་རིམས་ཀྱི་གསོ་བ་བཤད་པ་བཞིན་དུ་ལུས་ཀྱི་ཕྱི་རོལ་ནས་བསྐུ་བྱུག་དང་། ནང་ནས་བཀྲུ་སྨན་གྱི་སྦྱོར་བ་འདིར་བྱ་བར་བཤད་དེ། པུ་ཙེ་ཤེལ་དང་། ཤིང་མངར་བཏགས་ཏེ་ཆུ་དང་སྦྱར་བ་ཁ་ར་བཏབ་སྟེ་འཐུངས་ན། མཁྲིས་པ་ལས་
[191b.7]གྱུར་པའི་སྙིང་ནད་སེལ་ཏོ། །ཡང་ན་ར་སྣ་དང་། ཤ་ཁ་ར་དང་། རྒུན་འབྲུམ་དང་། ཛི་བ་ཀ་དང་། ཟངས་རྩི་བ་དང་། ཨུཏྤ་ལ་དང་། བ་ལ་དང་། འབྲ་གོ་དང་། རམ་ཉེ་བ་རྣམ་གཉིས་དང་། མེ་ད་རྣམ་གཉིས་དང་། འདི་རྣམས་མ་ཧེའི་མར་དང་། འོ་མ་ཆུ་དང་
[192a]
[192a.1]ཚུལ་བཞིན་དུ་སྦྱར་བའི་མར་འཐུངས་ན། མཁྲིས་པ་ལས་གྱུར་པའི་སྙིང་ནད་སེལ་ཏོ། །ཡང་ན་པྲ་པུཎྜ་རཱི་ཀ་དང་། ཤིང་མངར་དང་། པདྨའི་རྩ་བའི་མདུད་པ་དང་། ཀྲྀཥྞ་དང་། བཅའ་སྒ་དང་། ཉ་ལྕིབས་དང་། འདི་རྣམས་འོ་མ་དང་
[192a.2]ལྷན་ཅིག་བསྐོལ་ནས་མར་ལུས་པ་དང་བཙགས་ཏེ་བསྒྲངས་པའི་ནང་དུ། སྦྲང་རྩི་བཏབ་སྟེ་འཐུངས་ན་རབ་ཏུ་བསྔགས་སོ། །ཡང་ན་དར་བའི་སྨན་གྱི་སྡེ་ཚན་མར་དང་གོང་མ་བཞིན་བསྐོལ་ཏེ་འཐུངས་ན། མཁྲིས་པ་ལས་གྱུར་པའི་སྙིང་ནད་སེལ་ཏོ། །ཡང་ན་ཏིལ་མར་
[192a.3]དང་ཚུལ་བཞིན་བསྐོལ་ཏེ། བསྒྲངས་པའི་ནང་དུ་སྦྲང་རྩི་བཏབ་སྟེ་འཇམ་རྩི་མས་གཏོང་བར་བྱའོ། །དེ་ལ་བད་ཀན་ལས་གྱུར་པའི་སྙིང་ནད་ལ་ནི་ཐོག་མར་དུགས་བྱ་སྟེ། དེའི་འོག་ཏུ་ནིམ་པ་དང་། ཤུ་དག་བསྐོལ་བའི་སྐྱུག་སྨན་བཏང་ངོ་། །ཁ་ཟས་ནི་ནས་ལས་
[192a.4]གཡོས་སུ་བྱས་ཏེ་སྦྱིན་ནོ། །ཚོད་མ་ནི་རྒྱ་སྲན་གྱི་ཁུ་བ་དང་། སྲོག་ཆགས་ཐང་ལ་གནས་པའི་ཁུ་བ་རུང་ངོ་། སྐོམ་དུ་ནི་ཆང་རྣོན་པོ་བླུད་དོ། །ཤུ་དག་དང་། ཤིང་ཀུན་དང་། ལན་ཚྭ་རྣམ་གཉིས་དང་། དོང་གྲ་དང་། སུག་སྨེལ་དང་། ལ་ལ་ཕུད་དང་། པི་པི་ལིང་
[192a.5]དང་། ནས་ཚིག་འཁུས་པའི་ཐལ་བ་དང་། འདི་རྣམས་ཀྱི་ཕྱེ་མ་ཆུ་དྲོ་འཇམ་ཙམ་མམ། ཡང་ན་རྒྱ་ཤུག་སྐྱུར་པོ་ལ་སོགས་པ་འབྲས་བུའི་ཆུའམ། འུ་སུའི་རང་སྐྱུར་རམ། རྒྱ་སྲན་གྱི་ཡུ་ཤའམ། བ་གཅིན་ནམ། ཨ་ས་ཝའི་བཏུང་བའམ། འདི་རྣམས་གང་
[192a.6]ཡང་རུང་བ་ལས་སྐྱོ་མར་བྱས་ཏེ་བླུད་དོ། །སུ་སྐར་ར་མ་ལ་དང་། ཨ་རུ་ར་དང་། པ་ལ་ཤ་དང་། བཅའ་སྒ་དང་། ཟུར་པ་དང་། ར་སྣ་དང་། ཤུ་དག་དང་། པི་པི་ལིང་དང་འདི་རྣམས་ཚུལ་བཞིན་བསྐོལ་བའི་ཁུ་བ་བླུད་ན་ཕན་ནོ། །ཨ་རུ་ར་དང་།
[192a.7]བཅའ་སྒ་དང་། བོང་ང་དཀར་པོ་དང་། པཊྚ་དྲུག་དང་། ཀད་པ་ལ་དང་། འདི་རྣམས་ཆུ་དང་བསྐོལ་ཏེ་བཏང་ན་ཕན་ཡོན་གོང་མ་དང་འདྲའོ། །རོ་ཧི་ཏ་དང་། སེང་ལྡེང་དང་། ཨ་ཤྭདྠ་ཀ་དང་། ཨུ་དུམྦཱ་ར་དང་། ཨརྫུ་ན་དང་། ནྱ་གྲོ་དྷ་དང་། འདི་རྣམས་བསྐོལ་
[192b]
[192b.1]བའི་ཁུ་བའི་ནང་དུ། ཚ་བ་གསུམ་དང་དྲི་བི་ཙ་བཏགས་པའི་ཕྱེ་མ་བཏབ་སྟེ་ལྡེ་གུར་བྱས་ནས་བཟའ་བའམ། ཡང་ན་ཚ་བ་གསུམ་དང་དུར་བྱིད་ཀྱི་ཕྱེ་མ་ཆུ་དང་སྦྱར་ཏེ་གཏང་བའམ། ཡང་ན་ཆུ་དྲོན་དང་ལྡེ་གུར་བྱས་པ་ཟོས་ན་བད་ཀན་ལས་གྱུར་པའི་སྙིང་ནད་སེལ་ཏོ། །བད་
[192b.2]ཀན་ལས་གྱུར་པའི་སྐྲན་གསོ་བའི་སྐབས་ལས་འབྱུང་བའི་ཐལ་སྨན་གྱི་སྦྱོར་བ་དང་། སྨན་མར་འདིར་ཡང་སྦྱར་ཏེ་བླུད་དོ། །བྲག་ཞུན་གྱི་ཆོ་ག་དང་ཚངས་པས་བཤད་པའི་བཅུད་ཀྱིས་ལེན་གྱི་ཆོ་ག་ཡང་འདིར་སྦྱར་རོ། །དེ་བཞིན་དུ་སྐྱུ་རུ་རའི་ལྡེ་གུའམ། དྲང་སྲོང་
[192b.3]རི་བྱིས་བཤད་པའི་ལྡེ་གུས་ཡང་སྐབས་འདིར་སྦྱར་རོ། །སྐྱེས་བུ་གང་ཟས་ཟོས་མ་ཐག་སྙིང་གི་ཕྱོགས་སུ་ཟུག་གཟེར་སྐྱེ་ཞིང་ཁ་ཟས་འཇུ་བ་བཞིན་དུ་ཟུག་གཟེར་ཆུང་བ་ལྟར་བྱེད་ན་རུ་རྟ་དང་། བྱི་དང་ག་དང་། ལན་ཚྭ་རྣམ་གཉིས་དང་། སེང་ཕྲོམ་དང་། ཐང་
[192b.4]ཤིང་དང་། བོང་ང་དཀར་པོ་དང་། འདི་རྣམས་ཀྱི་ཕྱེ་མ་ཆུ་དྲོན་དང་སྦྱར་བ་བླུད་ན་ཞི་བར་བྱེད་དོ། །དེ་ཡང་སྔོན་གྱི་སློབ་དཔོན་དག་ན་རེ། གོང་གི་སྨན་ཞོ་གཉིས་ཆུ་སྲང་གསུམ་དང་བསྐོལ་ཏེ་བླུད་དོ་ཞེས་ཟེར་རོ། །ཁ་ཟས་ཞུ་བའི་འོག་ཏུ་རྟག་ཏུ་ཟུག་གཟེར་སྐྱེ་བ་
[192b.5]ལ་ནི། སྣུམ་བའི་སྨན་བཀྲུ་སྨན་ནམ། འབྲས་བུའི་བཀྲུ་སྨན་ནམ། རྩ་བའི་བཀྲུ་སྨན་རྣོན་པོ་བཏང་ངོ་། །དེ་ལ་སྣུམ་པའི་བཀྲུ་སྨན་ནི་སེང་ཕྲོམ་དང་། ནི་ལི་ནི་དང་། ཨེ་རཎྜའི་མར་རྣམས་སོ། །འབྲས་བུའི་བཀྲུ་སྨན་ནི་སཔྟ་ལ་དང་། ཤ་ཁི་ནི་དང་། དན་ཏིའི་
[192b.6]འབྲས་བུ་དང་། བྲ་བན་ཏི་དང་། གིར་ནི་ཀར་ནི་དཀར་དང་། རྒུན་འབྲུམ་དང་། འབྲ་གོ་དང་། བྱི་དང་ག་དང་། མུ་ར་དང་། དོང་ག་དང་། འབྲས་བུ་གསུམ་དང་། ཀམ་པི་ལ་རྣམས་སོ། །རྩ་བའི་བཀྲུ་སྨན་ནི་དན་ཏི་དང་། ཁྲོན་བུ་དང་འདི་དག་གོ། །
[192b.7]མ་ཞུ་བའི་གནས་ན་རླུང་ཕལ་ཆེར་འཁྲུགས་ཏེ། ཟས་རྒྱུ་བའི་ལམ་བཀག་ནས་ན་བ་ལ་ནི་དེ་དང་རྗེས་སུ་མཐུན་པར་སློན་ཁྲུས་ཀྱིས་ལུས་དག་པར་བྱ་བ་དང་། སྨྱུང་བར་འདུག་པ་དང་། མ་ཞུ་བ་སྨིན་པའི་སྨན་རྣམས་ཀྱིས་ཞི་བར་བྱའོ། །སྲིན་བུ་ལས་གྱུར་
[193a]
[193a.1]བའི་སྙིང་ནད་ལ་ནི་སྲིན་བུ་འཇོམས་པའི་སྨན་ཐམས་ཅད་ཀྱིས་གསོ་བར་བྱའོ། །སྐོམ་པའི་ནད་གསོ་བའི་སྐོམ་དད་ཆེ་བའི་ནད་ཐམས་ཅད་ལ་ནི་ཕལ་ཆེར་རླུང་དང་མཁྲིས་པ་འཇོམས་པའི་སྨན་ཐམས་ཅད་བསྔགས་སོ། །དེ་བཞིན་དུ་སྐོམ་པ་
[193a.2]ཐམས་ཅད་ལ་ཕྱི་ནང་གཉི་ག་ནས་བསིལ་བའི་ཆོ་གས་ལུས་དག་པ་དང་ཞི་བར་བྱའོ། །ཡང་ན་ཆར་པའི་ཆུ་གྲང་མོའམ། །ཆུ་མིག་ལས་བྱུང་བའི་ཆུ་དང་སྦྲང་རྩི་དང་སྦྱར་བ་འཐུངས་ན་ཕན་ནོ། །ཡང་ན་བོང་བའམ། བྱེ་མའམ། གྱོ་དུམ་གང་ཡང་རུང་བ་
[193a.3]བསྲེགས་པ་ཆུ་ནང་དུ་བཅུག་ལ་དངས་པར་གྱུར་པ་དང་བླུད་དོ། །ཡང་ན་རྩ་བ་ལྔ་བསྐོལ་བ་བསྒྲངས་པའི་ནང་དུ་ཤ་ཁ་ར་བཏབ་པའམ། ཡང་ན་རྩྭ་དཱུར་བ་ལ་སོགས་པའི་རྩྭའི་རྩ་བ་ལྔ་པ་ཆུང་ངུ་དང་བསྐོལ་བའི་ནང་དུ། ཤ་ཁ་ར་བཏབ་པ་འཐུངས་ན་རབ་
[193a.4]ཏུ་བསྔགས་སོ། །ཡང་ན་འབྲས་ཡོས་ལ་སོགས་པའི་ཕྱེ་ཆུ་དང་སྐྱོ་མར་བྱས་ཏེ་བླུད་དོ། །ནས་ཁྲལ་ཁྲོལ་ཙམ་དྲུས་ཏེ་ཆན་དུ་བྱས་པའི་ནང་དུ་སྦྲང་རྩི་དང་། ཤ་ཁ་ར་བཏབ་པ་ཟོས་ན་སྐོམ་དད་ཆེ་བ་ལ་ཕན་ནོ། །དེ་བཞིན་དུ་ནས་དང་འབྲས་དང་། ཁྲེ་རྒོད་
[193a.5]རྙིང་པ་གང་ཡང་རུང་བ་འོ་མ་དང་ཐུག་པར་བྱས་པའི་ནང་དུ་ཁ་ར་དང་སྦྲང་རྩི་བཏབ་པ་འཐུངས་ན་རབ་ཏུ་བསྔགས་སོ། །སྐོམ་དད་ཆེ་བའི་ནད་ཡོད་པས་ནི་ཐོག་མར་ཆུ་གྲང་གིས་ལུས་བཀྲུས་ལ། དེའི་འོག་ཏུ་བསིལ་བའི་སྨན་ཐམས་ཅད་བསྐོལ་བའི་ཁུ་བ་དང་།
[193a.6]འོ་མ་ལས་གཞི་བླངས་པའི་བཟའ་བ་གྲང་མོའི་ནང་དུ་སྦྲང་རྩི་དང་། ཤ་ཁ་ར་བཏབ་པ་སྦྱིན་ནོ། །ཡང་ན་སྲོག་ཆགས་ཐང་ལས་སྐྱེས་པའི་ཤ་ཁུའི་ནང་དུ་མར་བསྐོལ་བ་བཅུག་ལ་ལན་ཚྭ་དང་སྐྱུར་མེད་པར་བྱ་སྟེ། བཟའ་བ་དང་ལྷན་ཅིག་སྦྱིན་ནོ། །ཡང་ན་སྲན་
[193a.7]མུངྒ་ལ་སོགས་པ་བསིལ་བའི་ནུས་པ་དང་ལྡན་པ་དང་། འཚོ་བྱེད་སྡེ་བཅུ་ལས་གཞི་བླངས་པའི་གཡོས་སུ་བྱས་པ་ལ་ཡང་རབ་ཏུ་བསྔགས་སོ། །གཞན་ཡང་འོ་མ་བསྲུབས་པའི་མར་སར་རམ། སྨན་བསིལ་བག་བསྐོལ་བའི་ཁུ་བའམ། ཡང་ན་བུ་
[193b]
[193b.1]རམ་ཤིང་གི་ཁུ་བ་གང་ཡང་རུང་བ་སྣར་བླུགས་པ་ཡང་རབ་ཏུ་བཟང་ངོ་། །མདོའི་གནས་སུ་བསྟན་པའི་མཁུར་བར་བཅང་བའི་སྨན་འོ་མ་དང་། བུ་རམ་ཆང་དང་། ཁ་རའི་ཁུ་བ་ལ་སོགས་པ་ཡང་ཁ་སྐམ་པ་དང་སྐོམ་དད་ཆེ་བ་ལ་ཕན་ཏེ་མཁུར་བར་བཅང་ངོ་། །གཞན་
[193b.2]ཡང་ཚ་བའི་རིམས་ལ་ཇི་ལྟར་བྱུགས་པ་དང་བསྐུ་བ་སྨོས་པ་འདིར་ཡང་སྦྱར་རོ། །མྱ་ངན་དང་མི་དགའ་བ་སྤངས་ཏེ་སེམས་བདེ་བར་འགྱུར་བའི་བག་བསྟེན་ཏོ། །མཚོ་ཆེན་པོ་དང་མཚོ་ཆུང་ངུ་ལ་སོགས་པ་ཉམས་སུ་དགའ་བ་བསྟེན་པའམ། དྲན་དུ་གཞུག་གོ། །དེ་
[193b.3]དག་ནི་སྐོམ་དད་ཀྱི་ཆོ་ག་སྤྱིར་བསྟན་པ་ཡིན་ནོ། །དེ་ལ་རླུང་ལས་གྱུར་པའི་སྐོམ་དད་ལ་ནི་ཞོ་བུ་རམ་དང་སྦྱར་བ་བསྔགས་སོ། །ཡང་ན་ལུས་ཉམས་སྟོབས་བསྐྱེད་ཅིང་བསིལ་བའི་ནུས་པ་དང་ལྡན་པའི་སྨན་ཤ་ཁུ་དང་ལྷན་ཅིག་སྦྱར་བའམ། ཡང་ན་བི་ད་རིའི་སྡེ་ཚན་
[193b.4]བསྐོལ་བ་བསྒྲངས་པ་འཐུངས་ན་ཕན་ནོ། །མཁྲིས་པ་ལས་གྱུར་པ་ལ་ནི་ཨུ་དུམྦཱ་ར་བསྐོལ་བའི་ཁུ་བའི་ནང་དུ་ཁ་ར་དཀར་པོ་བཏབ་པ་འཐུངས་ན་ཕན་ནོ། །ཡང་ན་ཨུ་དུམྦཱ་ར་བསྐོལ་བའི་ཁུ་བ་བསྒྲངས་པའི་ནང་དུ་ཤ་ཁ་ར་བཏབ་པ་བཏུང་བའམ། ཡང་ན་ཐལ་
[193b.5]ཏྲེས་ཀྱི་སྡེ་ཚན་བསྐོལ་བའི་ཁུ་བའི་ནང་དུ་ཁ་རས་བཏབ་པ་བཏུང་བའམ། དེ་བཞིན་དུ་པ་རུ་ཤ་ཀ་དང་སླེ་ཏྲེས་ལ་སོགས་པའི་སྡེ་ཚན་བསྐོལ་བའི་ཁུ་བའི་ནང་དུ་ཤ་ཁ་ར་དང་སྦྲང་རྩི་བཏབ་པ་ཡང་དེ་དང་འདྲ་བར་བལྟའོ། །ཡང་ན་མངར་བའི་སྨན་རྒུན་འབྲུམ་ལ་
[193b.6]སོགས་པ་བསྐོལ་བའི་ཁུ་བའི་ནང་དུ་ཤིང་འོ་མ་ཅན་ནྱ་གྲོ་དྷ་ལ་སོགས་པ་བསྐོལ་བའི་ཁུ་བའི་ནང་དུ་ཤ་ཁ་ར་དང་སྦྲང་རྩི་བཏབ་པ་སྦྱིན་ནོ། །ཡང་ན་སྐྱུར་རྩི་ཆེན་པོ་དང་། རྒུན་འབྲུའི་ལྕུག་མ་དང་། ནྱ་གྲོ་དྷ་དང་། ལྕང་མ་དང་། འདི་རྣམས་ཀྱི་ལོ་མ་དང་། ཀུ་ཤ་
[193b.7]དང་ཤ་ཀ་ལ་སོགས་པ་རྩ་བའི་རྩ་བ་ལྔ་དང་། ཤིང་མངར་དང་འདི་རྣམས་བསྐོལ་བའི་ཁུ་བའམ། ཡང་ན་རིམས་ནད་གསོ་བའི་སྐབས་སུ་བཤད་པའི་སྙིང་པོ་ལྔའི་སྨན་རྒུན་འབྲུམ་ལ་སོགས་པ་བསྐོལ་བའམ། སྦྱོར་བ་དེ་དག་གང་ཡང་རུང་བ་བླུད་ན། མཁྲིས་པ་
[194a]
[194a.1]ལས་གྱུར་པའི་སྐོམ་དད་སེལ་ཏོ། །བད་ཀན་ལས་གྱུར་པའི་སྐོམ་པའི་ནད་ལ་ནི་ཐོག་མར་ནིམ་པ་བསྐོལ་བའི་ཁུ་བ་བླུད་དེ་སྐྱུག་ཏུ་གཞུག་གོ། །ཡང་ན་བིལ་བ་དང་། འུ་སུ་དང་། རྩ་བ་ལྔ་པ་ཆུང་ངུ་དང་། དར་བ་དང་། ཙི་ཏྲ་ཀ་དང་། འདི་
[194a.2]རྣམས་ཆུ་དང་བསྐོལ་བའི་ཁུ་བ་བླུད་དོ། །ཡང་ན་ཡུངས་ཆུ་དང་བསྐོལ་བའི་ཁུ་བའི་ནང་དུ་སྦྲང་རྩི་དང་། ཤ་ཁ་ར་བཏབ་པ་བཏུང་བའམ། ཡང་ན་མུངྒ་དང་། པ་ཏོ་ལ་དང་། ནིམ་པ་རྣམ་གཉིས་ཀྱི་ལོ་མ་བསྐོལ་བའི་ཁུ་བའི་ནང་དུ་ཚ་བ་གསུམ་གྱི་ཕྱེ་མས་བཏབ་
[194a.3]པ་བཏུང་ངོ་། །གཞན་ཡང་ནས་ལས་བྱས་པའི་ཟན་དང་། སྨན་གྱི་ཁུ་བ་མཁུར་བར་བཅང་བ་དང་། སྨན་སྣ་ནས་གཏང་བ་དང་ལྡེ་གུ་ལ་སོགས་པའི་སྨན་ཚ་བའི་བག་དང་བཅས་པ་སྦྱིན་ནོ། །མ་ཞུ་བ་དང་བཅས་པའི་སྐོམ་དད་ཆེ་བའི་ནད་ལ་ནི་གོང་དུ་
[194a.4]སྨོས་པའི་སྦྱོར་བ་རྣམས་བྱ་སྟེ། ཁྱད་པར་དུ་སྐྱུག་སྨན་གྱིས་ཞི་བར་བྱའོ། །དེ་བཞིན་དུ་སྦྱོར་བ་གཞན་ཡང་ཚ་བ་གསུམ་དང་གོ་བྱེ་དང་། ཤུ་དག་དང་། འདི་རྣམས་ཀྱི་ཕྱེ་མ་བལ་པོ་སེའུའི་ཁུ་བའམ། ཆུ་དྲོན་ནམ་ཞོ་ག་ཆུ་གང་ཡང་རུང་བ་དང་སྦྱར་ཏེ་
[194a.5]བཏང་ན། སྐོམ་དད་མ་ཞུ་བ་དང་བཅས་པ་ཞི་བར་བྱེད་དོ། །གལ་ཏེ་ནད་པ་ཟས་སྟོབས་ཆུང་ན་ཟས་ཤིན་ཏུ་སླ་བ་དང་། སྐྱོ་མ་གང་ཡང་རུང་བ་དུས་ཚོད་དང་སྦྱར་ཏེ་གཏང་ངོ་། །ངལ་བས་སྐོམ་དད་སྐྱེས་པ་ལ་ནི་ཤ་ཁུའམ་ཤ་ཁ་ར་དང་སྦྱར་བའི་སྐྱོ་མ་བླུད་
[194a.6]དོ། །ཚ་བས་སྐོམ་དད་སྐྱེ་བ་ལ་ནི་ནས་ཀྱི་ཕྱེའམ། རྒྱ་ཤུག་གི་ཕྱེ་མའི་སྐྱོ་མ་ཁ་ར་དང་སྦྱར་བ་བླུད་དོ། །ཡང་ན་ཏིལ་གྱི་ཚིགས་མ་བཏགས་ཏེ་རང་སྐྱུར་དང་སྦྱར་བས་ལུས་ཐམས་ཅད་བསྐུས་ན་ཚ་བ་འཇིལ་ལོ། །ལུས་ཁྲུས་བྱས་པས་སྐོམ་དད་སྐྱེད་པ་ལ་ནི་ཆང་
[194a.7]ངམ་ཆུས་བསྲེས་པའམ། ཡང་ན་བུ་རམ་ཆུ་བླུད་དོ། །ཆང་འཐུངས་པས་སྐོམ་དད་སྐྱེད་པ་ལ་ནི་ཆུ་དང་ཆང་ཕྱེད་མར་བསྲེས་པ་བླུད་དེ། དེ་ནས་ལུས་ཁྲུས་བྱས་ལ་ཟས་སྐྱུར་དང་ལན་ཚྭ་དང་ལྡན་པར་སྦྱིན་ནོ། །སྣུམ་པ་དང་ལྡན་པའི་ཟས་རྣོ་ཆེས་པ་ཟོས་པས་མེ་དྲོད་སྐྱེས་
[194b]
[194b.1]ཏེ་སྐོམ་དད་བྱུང་བ་ལ་ནི་ཆུ་རང་བཞིན་གྱིས་གྲང་བ་སྦྱིན་ནོ། །སྣུམ་མ་ཞུ་བ་ལས་སྐོམ་དད་སྐྱེས་པ་ལ་ནི་ཆུ་དྲོན་པོ་སྦྱིན་ནོ། །སྣུམ་བག་ཞུ་ནས་སྐོམ་དད་སྐྱེས་པ་ལ་ནི་ཐུག་པ་གར་པོ་བླུད་དོ། །སྣུམ་དང་ལྡན་པའི་ཟས་ཟོས་པ་ལས་སྐོམ་དད་སྐྱེས་པ་ལ་ནི་སྣོད་ནང་དུ་ཁ་བ་བཅུག་
[194b.2]ལ། དེའི་སྟེང་དུ་བུ་རམ་དང་ཆུ་བླུགས་བཞིན་དུ་བཏུང་ངོ་། །ཟས་ལྕི་བ་ཟོས་པ་ལས་སྐོམ་དད་སྐྱེས་པ་ལ་ནི། ཆུ་དྲོན་པོ་བླུད་དེ་སྐྱུག་ཏུ་གཞུག་གོ། །གློ་གཅོང་ཟད་བྱེད་ཀྱི་སྐོམ་དད་སྐྱེས་པ་ལ་ནི། གློ་གཅོང་ལ་ཕན་པའི་བཟའ་བ་དང་། བཏུང་བ་དང་ཉམས་
[194b.3]སྟོབས་སྐྱེད་པའི་སྨན་ཐམས་ཅད་འདིར་སྦྱར་རོ། །ལུས་རིད་པ་དང་ཉམས་སྟོབས་ཆུང་བ་དང་། ཟས་རྩུབ་པ་ཟོས་པ་ལས་སྐོམ་དང་སྐྱེས་པ་ལ་ནི་འོ་མའམ་ར་ཤའི་ཁུ་བ་སྦྱིན་ནོ། །སྟོད་དུ་བྱུང་བའི་རླུང་གི་ཉེས་པས་སྐོམ་དད་སྐྱེས་པ་ལ་ནི། ལུད་པ་ཟད་བྱེད་ལ་ཕན་
[194b.4]པའི་སྨན་འོ་མ་དང་སྦྱར་བ་བླུད་དོ། །ནང་གང་ཡང་རུང་བའི་རྐྱེན་གྱིས་སྐོམ་དད་སྐྱེས་པ་ལ་ནི། འུ་སུ་བསྐོལ་བའི་ཁུ་བའི་ནང་དུ་ཁ་ར་དཀར་པོ་དང་སྦྲང་རྩི་བཏབ་ལ་བླུད་དོ། །གཞན་ཡང་སྐོམ་དད་ནད་གང་ལས་གྱུར་པ་བརྟགས་ཏེ། དེ་དང་མཐུན་པར་བཏུང་བ་
[194b.5]བྱིན་པ་ཤིན་ཏུ་བསྔགས་སོ། །གལ་ཏེ་མ་ཞུ་བ་ལས་སྐོམ་དད་སྐྱེས་ཏེ་ཆུ་འགགས་པ་ལས་ལུས་ཤ་ཟད་པར་སྣང་ན། དེ་ནི་ཤི་བའམ་ཡང་ན་ཡུན་རིང་དུ་ན་བར་འགྱུར་ཏེ། དེ་ལ་ནི་མྱུར་དུ་ཅི་འདོད་པའི་བཟའ་བ་དང་བཏུང་བ་དང་སྨན་བྱིན་ན་དེ་མ་ཐག་སྐོམ་དད་ཞི་བར་
[194b.6]གྱུར་ན་ནད་གཞན་ཡང་གསོ་བར་ནུས་སོ། །གསོ་བའི་གནས་ལས་ལེའུ་དྲུག་པ་རྫོགས་སོ།། །།དེ་ནས་ཆང་ནད་གསོ་བའི་ལེའུ་བཤད་པར་བྱའོ། །ཐོག་མར་སྨན་པས་རླུང་ལ་སོགས་པའི་ནད་གཞི་གང་ཤས་ཆེ་བ་ལེགས་པར་བརྟགས་ཏེ་དང་
[194b.7]པོ་ཤས་གང་ཆེ་བ་གསོ་བར་བྱའོ། །ནད་གཞི་ཤས་མཉམ་པའི་ཆང་ནད་ལ་ནི། དང་པོ་བད་ཀན་གསོ་བར་བྱ་སྟེ། རིམ་གྱིས་མཁྲིས་པ་དང་རླུང་ཡང་གསོའོ། །དེ་ལྟར་རིམ་གྱིས་གསོ་བ་ནི་དང་པོ་བད་ཀན་གྱི་གནས་སུ་འཁྲུགས་ཤིང་། དེ་ནས་མཁྲིས་པ་དང་རླུང་
[195a]
[195a.1]ཡང་འཁྲུགས་བས་གསོ་བ་ཡང་དེ་ལྟར་བྱའོ། །དེ་ལ་ཆང་ཉུང་ངུ་འཐུངས་པ་དང་། ཡང་ན་མང་དུ་འཐུངས་པ་དང་ལོག་པར་འཐུངས་པ་ལས་ཆང་ནད་སྐྱེ་བར་འགྱུར་ཏེ། དེ་ལ་ནི་སྔར་ཆང་གང་འཐུངས་པ་དེ་ཉིད་བླུད་པས་ཞི་བར་འགྱུར་རོ། །ཆང་
[195a.2]དང་དུག་གཉིས་ནི་རྣོ་བ་ལ་སོགས་པའི་ནུས་པ་མཉམ་པར་བཤད་མོད་ཀྱི། ཆང་བས་དུག་གི་མཐུ་ནི་ཤིན་ཏུ་ཆེའོ། །ཆང་མང་དུ་འཐུངས་པ་ལ་ནི་གང་གི་རང་བཞིན་ཤིན་ཏུ་རྣོ་བ་དང་། དྲོ་བར་ཡང་འགྱུར་རོ། །དེའི་འོག་ཏུ་སྐྱུར་ཞིང་ཚ་བ་བསྐྱེད་དེ་ཟས་ཀྱི་
[195a.3]བཅུད་མི་འཇུ་བའམ། ཡང་ན་ལོག་པར་འཇུ་སྟེ་རུལ་ཞིང་མྱགས་པར་བྱེད་ལ། དེ་ནས་ཞུ་ཕན་ཆད་ནི་མེའི་དྲོད་ཤིན་ཏུ་ཆེ་སྟེ། བསྲེགས་པས་ཞུ་བའི་རྗེས་རོ་ཁ་བ་དང་། ལན་ཚྭ་དང་། སྐྱུར་བ་ལ་སོགས་པར་འགྱུར་ཏེ། དེ་ལས་བརྒྱལ་བ་དང་།
[195a.4]སྐོམ་དད་ཆེ་བ་དང་། རྨོངས་པ་དང་། རིམས་དང་། ནང་དུ་ཚ་བ་དང་། མགོ་འཁོར་བར་འགྱུར་རོ། །ཆང་འཐུངས་པ་ལས་བད་ཀན་འཁྲུགས་ཏེ། རླུང་རྒྱུ་བའི་ལམ་བཀག་པ་ལས་ནི་ཤིན་ཏུ་མི་བཟད་པའི་ནད་སྐྱེད་དེ། མགོ་དང་རུས་པ་དང་ཚིགས་
[195a.5]རྣམས་སུ་ན་བར་འགྱུར་ཏེ། དེ་ལ་ནི་ཆང་འཐུང་བ་ཉིད་ཀྱིས་ཞི་བར་འགྱུར་རོ། །ཆང་ནད་དེ་ཞུ་བའི་མཚན་མ་ནི་བཟའ་བ་དང་བཏུང་བ་ཡི་གར་འོང་ཞིང་ལུས་ཡང་བར་འགྱུར་རོ། །དེ་ལྟར་ཆང་ནད་ཞི་བར་ཤེས་ནས་དེའི་འོག་ཏུ་སྐྱུག་སྨན་བཏང་ཟིན་པའི་ཆོ་ག་
[195a.6]ལུས་བཀྲུ་བ་དང་སྣའི་དུད་པ་བཏང་བ་ལ་སོགས་པ་རྣམས་སྐབས་འདིར་སྦྱར་བར་བྱའོ། །གོང་དུ་ཟས་ཀྱི་བཅུད་ཚིག་པར་གྱུར་པ་ལ་ནི་སྐྱུར་དང་ལྷན་ཅིག་ཟས་ཟོས་པར་གྱུར་ན་མྱུར་དུ་རོ་མངར་བར་འགྱུར་ཏེ། ཉེས་པ་འཇུ་བར་བྱེད་པའི་ནུས་པ་དང་ལྡན་པའི་མཆོག་
[195a.7]ཡིན་ནོ། །ཆང་གི་ཡོན་ཏན་རྣོ་བ་དང་དྲོ་བ་ལ་སོགས་པའི་ནད་གཞིའི་གནས་སུ་བསྟན་པ་དང་། དྲོད་སྐྱེད་པ་ལ་སོགས་པ་ནི་མདོའི་གནས་སུ་བསྟན་པ་ཡིན་ཏེ། འོན་ཀྱང་གོམས་པའི་དབང་ཡིན་པས་ཆང་ནི་ལུས་ཟུངས་སྙོམས་པར་བྱེད་པའི་མཆོག་ཡིན་ནོ། །
[195b]
[195b.1]ཆང་འཐུངས་ཏེ་འཇུ་བའི་འོག་ཏུ་ནད་འཕྲལ་མི་ལྡང་ཡང་ཕྱིས་ལམ་གཞན་ལ་བརྟེན་ནས་ལྡང་སྟེ། དེ་ལ་ནི་ཞག་བདུན་ནམ་བརྒྱད་ཀྱི་བར་དུ་སྨན་གྱིས་གསོའོ། །གལ་ཏེ་དེ་དག་ཏུ་མ་གསོས་ན་ནི་ནད་ཆེར་འཕེལ་ཏེ་ཚབས་ཆེར་སྐྱེས་པ་ཡིན་པས་དེ་ལ་ནི་ཇི་ལྟར་ཆང་ནད་
[195b.2]ལ་སྦྱར་བའི་སྨན་གྱི་སྦྱོར་བ་རྣམས་བྱའོ། །དེ་ལ་རླུང་ལས་གྱུར་པའི་ཆང་ནད་ལ་ནི་སྐྱུར་རྩི་ཆེན་པོ་དང་། ད་ཏྲིག་དང་། རྒྱ་ཤུག་གི་འབྲས་བུ་དང་། སེའུ་འབྲུ་དང་། ཐ་ཝེ་དང་། ལ་ལ་ཕུད་དང་སྤ་མའི་འབྲས་བུ་དང་། ཚ་བ་གསུམ་དང་། སྒེའུ་གཤེར་
[195b.3]དང་ལན་ཚྭ་རྣམ་གསུམ་དང་། འདི་རྣམས་ཀྱི་ཕྱེ་མ་ཟན་ཆང་དང་སྦྱར་བ་བཏུང་ཞིང་ཐུར་མ་ལ་བསྲེགས་པའི་ཤ་དང་། སྣུམ་དང་བཅས་པའི་ཟན་ཧ་མྲི་ཏ་ཀའི་ཚོད་མ་དང་བཅས་པ་སྦྱིན་ནོ། །ཡང་ན་ཤ་གཙང་མའི་ཁུ་བ་སྐྱུར་བ་དང་ལན་ཚྭ་དང་སྣུམ་དང་བཅས་པ་
[195b.4]བྱིན་ན་ཕན་ནོ། །ཡང་ན་ཤ་བའི་སྐྱུར་པོ་རྒུན་འབྲུམ་དང་། མདོག་དམར་པོར་བཙོས་པ་དང་། ཨ་མྲ་དང་། ཨ་མྲ་ཏ་ཀའི་འབྲས་བུ་གཤགས་པའི་ནང་གི་ནར་ནར་པོ་དང་སྦྱར་བ་བཟའོ། །གྲོ་དང་སྲན་མ་ཤ་ལས་བྱས་པའི་གཡོས་ཡི་གར་གང་འོང་བ་སྦྱིན་ནོ། །
[195b.5]སྒེའུ་གཤེར་གཤགས་པ་དང་། ཤ་ཁུ་སྐྱུར་པོ་དང་སྦྱར་བའི་ཟས་སྦྱིན་ནོ། །བཏུང་བ་ནི་ཆང་ལེགས་པར་སྨིན་པ་ལན་ཚྭ་དང་དྲི་ཞིམ་པ་དང་སྦྱར་བ་བླུད་དོ། །ཡང་ན་རྩ་བ་ཆུང་ངུ་ལྔ་བསྐོལ་བའི་ཁུ་བ་འམ། སེའུ་འབྲུའི་ཁུ་བ་བླུད་ན། རླུང་ལས་གྱུར་པའི་
[195b.6]ཆང་ནད་སེལ་ཏོ། །ཡང་ན་བཅའ་སྒ་དང་། འུ་སུ་བསྐོལ་བའི་ཁུ་བའམ། དེ་བཞིན་དུ་ཞོ་ག་ཆུའམ། ཚྭའམ། ཆུ་འམ། རང་སྒྱུར་རམ་གང་ཡང་རུང་བ་བླུད་དོ། །གཞན་ཡང་ཏིལ་མར་ལ་སོགས་པས་ལུས་བསྐུ་བྱུག་བྱ་བ་དང་། དྲིལ་བ་དང་། བསྐྲུ་བ་
[195b.7]དང་། གོས་དྲོན་པོ་བགོ་བ་དང་། ཨ་ག་རུའི་བདུག་པས་བདུགས་པ་དང་། ཨ་ག་རུ་དང་། གུར་ཀུམ་གྱིས་བྱུགས་པ་དང་། བུད་མེད་ལང་ཚོ་ལ་བབ་པ་ནུ་མ་དང་བརླ་དང་། སྟ་ཟུར་རྣམས་མཛེས་ཤིང་ལུས་ཀྱི་ཡན་ལག་དྲོད་སྐྱེད་པ་དང་ལྡན་པ་དགའ་བ་བསྐྱེད་
[196a]
[196a.1]ནུས་པ་སྡུག་པ་དང་ལྷན་ཅིག་འཁྱུད་པ་དང་མཐང་སྦྱར་ཞིང་། བསྐུ་མཉེ་ལ་སོགས་པ་བདེ་བའི་བྱ་བ་སྐྱེས་བུའི་ཡིད་བཞིན་དུ་བྱེད་པ་དང་བསྟེན་པར་བྱའོ། །མཁྲིས་པ་ལས་གྱུར་པའི་ཆང་ནད་ལ་ནི་ཆུ་མང་པོ་སྦྲང་རྩིའམ་ཤ་ཁ་རས་བཏབ་པ་བླུད་དོ། །
[196a.2]ཡང་ན་ཟན་ཆང་བཟང་པོའི་ནང་དུ་སེའུ་འབྲུ་དང་། འབྲ་གོ་དང་། འབའ་ཆ་དང་། རྒུན་འབྲུམ་དང་། པ་རུ་ཤ་ཀ་འདི་རྣམས་ཀྱི་ཁུ་བ་དང་བསྲེས་ལ་བསྒྲངས་པའི་ནང་དུ་ཕྱེ་དང་ཤ་ཁ་རས་བཏབ་པ་བླུད་དོ། །ཡང་ན་སྨན་མངར་བའི་སྡེ་ཚན་རྒུན་འབྲུ་ལ་སོགས་པ་
[196a.3]བསྐོལ་བའི་ཁུ་བ་བསྒྲངས་པའི་ནང་དུ། ཆང་དང་སྦྲང་རྩིས་བཏབ་པ་བླུད་ན་མཁྲིས་པ་ལས་གྱུར་པའི་ཆང་ནད་སེལ་ཏོ། །ཟས་སུ་འབྲས་དྲུག་ཅུ་པ་དང་རི་བོང་དང་གོང་མ་སྲེག་གི་ཤ་དང་། ཧ་རེ་ཎུ་ཀ་དང་། སྲན་མུངྒ་དང་། སྐྱུ་རུ་ར་དང་། པ་ཏོ་ལ་དང་། སེའུ་
[196a.4]འབྲུ་དང་། འདི་དག་ལས་གཡོས་སུ་བྱས་པ་སྦྱིན་ནོ། །བད་ཀན་དང་མཁྲིས་པ་འདྲེས་པའི་ཆང་ནད་སྐོམ་དད་ཆེ་ཞིང་ལུས་ཚ་བར་གྱུར་པ་ལ་ནི་ཆུ་གྲང་མོ་དང་ཆང་མང་དུ་སྦྱར་བའམ། ཡང་ན་ཆུ་གྲང་དང་བུ་རམ་ཆུ་སྦྱར་བ་བླུད་ལ་སྐྱུག་ཏུ་གཞུག་གོ། །དེའི་འོག་ཏུ་སྐྱོ་མ་
[196a.5]ལ་སོགས་པའི་རིམ་པ་རྒུན་འབྲུའི་ཁུ་བ་དང་སྦྱར་བ་བླུད་ན་རབ་ཏུ་ཕན་ནོ། །གལ་ཏེ་མེའི་དྲོད་ཆེ་སྟེ་ཁ་ཟས་མྱུར་དུ་འཇུ་ན་ཉེས་པའི་ལྷག་མ་ཅུང་ཟད་ཡོད་པའི་རྟགས་སོ། །ལུད་པ་ཁྲག་དང་ལྷན་ཅིག་འབྱུང་ལ་རྩིབ་ལོགས་གཉིས་དང་ནུ་མ་རྣམས་སུ་ཟུག་ཅིང་ལུས་ཚ་
[196a.6]བ་སྐྱེས་ཏེ་སྐོམ་དད་ཆེ་བ་དང་། སྙིང་དང་བྲང་རྣམས་སུ་ན་བ་ལ་ནི། སླེ་ཏྲེས་དང་། ག་དུར་དང་། པ་ཏོ་ལ་བསྐོལ་བའི་ཁུ་བ་གང་ཡང་རུང་བ་བཅའ་སྒ་དང་ལྷན་ཅིག་སྦྱར་བ་བཏུང་ངོ་། །དེའི་འོག་ཏུ་བཟའ་བ་ནི་སྲེག་པའི་ཤ་དང་ལྷན་ཅིག་བཟའོ། །སྐྱེས་བུ་གང་ཆང་ནད་
[196a.7]ཀྱིས་སྐོམ་དད་རབ་ཏུ་ཆེ་བ་ནི་རླུང་དང་མཁྲིས་པ་ལས་གྱུར་པ་ཡིན་ཏེ། དེ་ལ་ནི་ནད་གཞི་དང་མཐུན་པར་རྒུན་ཆུ་གྲང་མོ་བླུད་དོ། །བཏུང་བ་དེ་ཞུ་བའི་ཚོད་ཙམ་ན་ར་ཤའི་ཁུ་བ་སྨན་མངར་བ་དང་སྐྱུར་བ་དང་སྦྱར་བའི་བཟའ་བ་སྦྱིན་ནོ། །གལ་ཏེ་སྐོམ་ན་ཆང་ཉུང་ངུ་དང་། ཆུ་
[196b]
[196b.1]མང་དུ་བསྲེས་པ་བཏུང་སྟེ་དེ་ཡང་ར་རོ་བ་བསྲུང་ངོ་། །ཡང་ན་གླ་སྒང་དང་། སེའུ་འབྲུ་དང་། འབྲས་ཡོས་དང་། འདི་དག་བསྐོལ་བའི་ཁུ་བའམ། ཡང་ན་འདབ་མ་རྣམ་བཞི་བསྐོལ་བའི་ཁུ་བའམ། ཡང་ན་སྨན་པ་ཏོ་ལ་དང་། ཨུཏྤ་ལའི་རྩ་བ་བསྐོལ་བ་བཏུང་
[196b.2]བའམ། ཡང་ན་རང་བཞིན་གྱིས་བསིལ་བའི་ཆུའམ་སྦྱོར་བ་དེ་དག་གང་ཡང་རུང་བ་བཏུང་ངོ་། །གཞན་ཡང་ཆང་མང་དུ་འཐུངས་པས་བད་ཀན་ཟད་པར་བྱས་ལ་མཁྲིས་པ་སྐྱེས་ཏེ། གྲེ་བ་དང་རྐན་དང་མཆུ་སྐམས་ལ་ལྕེ་ཕྱིར་འབྱིན་ཅིང་སྐམ་ལ་མགོ་འཁོར་ཏེ། ས་ལ་འགྱེལ་བ་
[196b.3]ལ་ནི་ནུབ་མོའི་ཆུ་རླུང་གིས་བསིལ་བར་བྱས་པ་ཡོག་དྲོད་ཀྱིས་བྱིན་ནོ། །ཡང་ན་སྐྱུར་རྣམ་པ་ལྔ་ཞེས་བྱ་བ་རྒྱ་ཤུག་དང་། སེའུ་འབྲུ་དང་། ད་ཏྲིག་དང་། ཙ་ཏྲ་ཞེས་བྱ་བའི་ལོ་མ་དང་། ཙུག་ཏྲི་ཀ་ཞེས་བྱ་བའི་རྩ་བ་འདི་གཉིས་ཀྱི་ཁུ་བའི་ནང་དུ་གོང་མ་གསུམ་གྱི་ཕྱེ་མས་
[196b.4]བཏབ་སྟེ་ལྡེ་གུར་བྱས་ལ་ངོ་གདོང་བསྐུས་ན་དེ་མ་ཐག་སྐོམ་དད་ཟློག་གོ། །ཆང་མང་དུ་འཐུངས་པ་ལས་ཁོང་པའི་ནང་དུ་དྲོད་ཆེར་སྐྱེས་ཏེ། ཁྲག་དང་མཁྲིས་པ་ཆེར་འཁྲུགས་ནས་ཕྱི་རོལ་པགས་པར་ཚ་བ་མི་བཟད་པ་སྐྱེས་པ་ལ་ནི་བསིལ་བའི་ཆོ་ག་སྣ་ཚོགས་བྱའོ། །
[196b.5]དེ་ལྟར་བསིལ་བའི་ཆོ་ག་སྣ་ཚོགས་བྱས་ཀྱང་ཚ་བ་ཞི་བར་མ་ནུས་ན། རྩ་བའི་ཆོ་ག་བསྟན་པའི་ནང་རོ་ཧི་ཏ་ཞེས་བྱ་བའི་རྩ་ལས་གཏར་ཏེ་ཁྲག་དབྱུང་ངོ་། །བད་ཀན་ལས་གྱུར་པའི་ཆང་ནད་ལ་ནི་སྨྱུང་བ་དང་སྐྱུག་སྨན་གཉིས་ཀྱིས་ཞི་བར་བྱའོ། །གཞན་ཡང་བཅའ་སྒ་
[196b.6]དང་། ས་ལ་པརྞི་དང་། བ་ལ་ཀ་དང་། ཀཎྜ་ཀ་རི་དང་། འདི་རྣམས་གང་ཡང་རུང་བ་བསྐོལ་བའི་ཁུ་བ་གྲང་མོ་བླུད་དོ། །སློན་བྱས་པའི་འོག་ཏུ་ལྟོགས་པར་གྱུར་ན་དུས་སུ་སྦྲང་རྩི་མང་དུ་བླུད་པའམ། ཡང་ན་ཤ་ཁ་ར་དང་སྦྲང་རྩི་སྦྱར་བ་སྦྱིན་ནོ། །ཡང་ན་ཨ་
[196b.7]རིཥྚ་ལས་བྱས་པའི་ཨ་ས་བའི་ཆང་རྙིང་པ་བཏུང་བའམ། ཡང་ན་བུ་རམ་ཆང་བླུད་དོ། །ཡང་ན་སྐྱོ་མ་སྣུམ་མེད་པ་བླུད་དེ་སྦྲང་རྩི་མན་ཆད་གོང་མ་དེ་དག་ཀུན་གྱི་ནང་དུ་ལ་ལ་ཕུད་དང་། དོང་གྲ་བཏབ་པ་བླུད་དོ། །ནས་དང་གྲོའི་ཟན་དྲོན་པོ་ཉུང་ཤས་དང་། རྒྱ་སྲན་གྱི་
[197a]
[197a.1]ཡུ་ཤ་སྐྱུར་དང་། ཚ་བ་དང་ཁ་བའི་སྤོད་བཏབ་པ་མར་ཉུང་ཤས་དང་སྦྱར་བ་ཡིད་ཙམ་སྦྱིན་ནོ། །ཡང་ན་ར་ཤའི་ཁུ་བའམ་སྲོག་ཆགས་ཐང་ལ་གནས་པའི་ཤའི་ཁུ་བའི་ནང་དུ་ལ་ཕུག་སྐམ་པོ་དང་། སྟར་བུ་དང་། ད་ཏྲིག་དང་། པ་ཏོ་ལ་དང་།
[197a.2]ཚ་བ་གསུམ་དང་། སེའུ་འབྲུ་དང་། འདི་རྣམས་ལེགས་པར་སྦྱར་བ་གོང་གི་ཟས་དང་ལྷན་ཅིག་བཟའོ། །ཡང་ན་ཤ་གཏུབས་ལ་དེའི་ནང་དུ་བཅའ་སྒ་དང་། ན་ལེ་ཤམ་དང་། ཧ་རི་ཏ་དང་། སྒེའུ་གཤེར་གཤགས་པ་དང་། འདི་རྣམས་བཙོས་ལ་ཚོས་པའི་ནང་དུ་རྒྱམ་
[197a.3]ཚ་ལ་སོགས་པས་ཡན་ལག་བརྒྱད་པའི་ཕྱེ་མ་དང་། སྐྱུར་རྩི་ཆེན་པོའི་ཁུ་བ་བཅུག་ལ་ཡང་ཅུང་ཟད་བསྐོལ་ཏེ། དེའི་ནང་དུ་ཀ་རིར་དང་། ཀ་མར་དྷ་ལ་སོགས་པ་ཡི་ག་དབྱེ་བའི་སྨན་བཏབ་སྟེ། ཤའི་རོ་མེད་པར་གྱུར་པ་དང་མར་དང་བརྔོས་ལ་བག་ཟན་ལེབ་པོའི་
[197a.4]ནང་དུ་བཅུག་སྟེ། བེ་རེག་ཐབས་སུ་བཙོས་ལ་དེ་ལས་མེའི་དྲོད་ཆེ་ཆུང་དང་སྦྱར་ནས་ཅི་རན་དུ་བཟའོ། །བཏུང་བ་ནི་སྦྲང་ཆང་སྐྱོན་མེད་པར་གྱུར་པ་འཐུངས་ན་བད་ཀན་ལས་གྱུར་པའི་ཆང་ནད་སེལ་ཏོ། །ཁ་ན་ཁ་ར་དཀར་པོ་དང་ཁ་རུ་ཚ་དང་། གོ་སྙོད་དང་།
[197a.5]ད་ཏྲིག་དང་། སྟར་བུ་དང་། འདི་རྣམས་ཆ་མཉམ་པ་དང་། ཤིང་ཚ་དང་། སུག་སྨེལ་དང་། ན་ལེ་ཤམ་འདི་དག་གསུམ་ཁ་ར་དཀར་པོ་ཕྱེད་ཕྱེད་དང་། ལྷན་ཅིག་སྦྱར་བ་ནི་ཡན་ལག་བརྒྱད་པའི་ཕྱེ་མ་ཞེས་བྱ་སྟེ། དེ་ལས་རན་པར་ཟོས་ན་རྒྱུན་སྲང་དག་པ་དང་།
[197a.6]མེའི་དྲོད་སྐྱེས་པ་དང་། བད་ཀན་ལས་གྱུར་པའི་ཆང་ནད་སེལ་ཏོ། །རྩུབ་པ་དང་དྲོ་བས་ལུས་བསྐུ་ཞིང་དྲིལ་ལ་ཁྲུས་བྱ་ཞིང་ཟས་སྨྱུང་བ་བྱས་ན། བད་ཀན་ལས་གྱུར་པའི་ཆང་ནད་མྱུར་དུ་སེལ་ཏོ། །ཡང་ན་བུད་མེད་འདོད་པ་དང་ལྡན་པ་རྣམས་དང་ལྷན་ཅིག་འདུག་
[197a.7]ལ། ནུབ་མོ་གཉིད་མ་ལོག་པར་ཉལ་པོ་ཅུང་ཟད་ཙམ་སྤྱད་པར་བྱས་ན། བད་ཀན་ཤས་ཆེ་བའི་ཆང་ནད་མྱུར་དུ་སེལ་ཏོ། །དེ་ཡན་ཆད་ནད་གཞི་སོ་སོའི་གསོ་བ་བསྟན་ནས། ད་ནི་འདུས་པ་གསོ་བ་བཤད་པར་བྱ་སྟེ། དེ་ལ་ནད་གཞི་འདུས་པའི་དབྱེ་བ་
[197b]
[197b.1]རྣམ་པ་བཅུ་ཡོད་དེ། ལྷག་མ་ཡང་ཅི་རིགས་པར་བརྟག་གོ། །དེ་ལ་ཤིང་ཚ་དང་། ནཱ་ག་པུཥྤ་དང་། པི་པི་ལིང་དང་། ན་ལེ་ཤམ་དང་། གོ་སྙོད་དང་། འུ་སུ་དང་། པ་རུ་ཤ་ཀ་དང་། མ་དུ་ཤ་ཀ་དང་། སུག་སྨེལ་དང་། ཐང་ཤིང་དང་། ཁ་
[197b.2]ར་དཀར་པོ་དང་། འདི་རྣམས་བཏགས་པའི་ཕྱེ་མ་ཀ་པིད་ཏའི་ཁུ་བའི་ནང་དུ་བཏགས་ཏེ། ག་པུར་གྱི་དྲིས་བསྒོས་པ་འཐུངས་ན། ཆང་ནད་འདུས་པ་ལས་གྱུར་པ་ཐམས་ཅད་ཞི་ཞིང་ཡི་ག་འབྱེ་ལ། མེའི་དྲོད་སྐྱེད་པར་བྱེད་དོ། །ཆང་ནད་ཀྱིས་ཡང་ན་ནི་
[197b.3]སྙིང་འཁྲུག་པར་བྱེད་ལ། ཡང་ན་ལུས་འཇོམས་པར་བྱེད་དོ། །དེ་བས་ན་ཆང་ནད་ལ་སེམས་དགའ་བར་གྱུར་པའི་ཆོ་ག་བྱའོ། །ཆང་ནད་ལ་ལུས་དག་པར་བྱ་བའི་ཆོ་ག་སློན་ཁྲུས་ལ་སོགས་པ་གསོ་བའི་དཔྱད་སྣ་ཚོགས་བྱས་ཀྱང་ཞི་བར་མ་གྱུར་
[197b.4]ཏེ། བད་ཀན་ཟད་ཅིང་ལུས་ཉམ་ཆུང་ལ་རིད་ཅིང་རླུང་དང་མཁྲིས་པ་ཤས་ཆེར་སྐྱེས་པ་ནི་ཆང་ནད་ཀྱིས་ལུས་འཇོམས་པར་བྱེད་པ་ཞེས་བྱ་སྟེ། ལུས་ཟུངས་ཉམས་བར་བྱས་པ་ཡིན་པས་དེ་ལ་ནི་འོ་མ་བླུད་ན་ལུས་མྱུར་དུ་འཕེལ་བར་བྱེད། ཇི་ལྟར་དཔྱིད་
[197b.5]ཀྱི་དུས་སུ་ཤིང་ལ་ཆར་བབ་ན་འཕེལ་བ་བཞིན་དུ་འོ་མ་འཐུངས་པས་ཀྱང་ལུས་འཕེལ་ཞིང་རྒྱས་པར་བྱེད་དོ། །དེ་ལ་འོ་མས་ལུས་ཟུངས་འཕེལ་བ་ཡིན་ན་ཡང་ཆང་དང་མི་འཕྲོད་པས་འོ་མ་ནི་ཉུང་ངུ་བཏུང་ངོ་། །ནད་ཚབས་ཆེ་བ་ལ་འོ་མ་ནི་མང་དུ་བླུད་ལ་ཆང་ནི་རིམ་
[197b.6]གྱིས་ཉུང་དུ་སྦྱིན་ནོ། །ལུས་འཇོམས་བྱེད་དང་། ལུས་སྐེམ་བྱེད་ཀྱི་ཆང་ནད་ཀྱིས་གཟིར་བར་གྱུར་པ་ལ་ནི་མར་དང་འོ་མའི་འཇམ་རྩི་མས་གཏོར་ན་ཞི་བར་འགྱུར་རོ། །དེ་ནས་ཁྲུས་དང་བསྐུ་བྱུག་དང་། ལུས་དྲིལ་བ་བྱས་ནས་དེའི་འོག་ཏུ་རླུང་ལ་ཕན་པའི་བཟའ་བ་དང་བཏུང་
[197b.7]བ་སྦྱིན་ནོ། །ཆང་རན་པར་འཐུངས་ན་ནི་ཆང་ལས་གྱུར་པའི་ནད་མི་འབྱུང་སྟེ། དེ་ནས་ཚོད་ཅི་ཙམ་བཏུང་བའི་སྦྱོར་བ་བཤད་པར་བྱ་སྟེ། ལེགས་པར་འཐུངས་ན་ནི་བདེ་བ་འབའ་ཞིག་སྐྱེད་པ་ཡིན་ཏེ། དེ་ཡང་ཇི་ལྟ་ཞེ་ན། ལྷའི་སྨན་པ་ཐ་སྐར་གྱི་བུ་གཉིས་ཀྱིས་ཆང་
[198a]
[198a.1]འཐུངས་པས་ནི་གཟི་མདངས་བསྐྱེད་པ་དང་། དབྱངས་ཅན་གྱི་བུས་འཐུངས་པས་ནི་སྟོབས་བསྐྱེད་པ་དང་། བརྒྱ་བྱིན་གྱིས་འཐུངས་པས་ནི་ནུས་པ་བསྐྱེད་པ་དང་། ཁྱབ་འཇུག་གིས་འཐུངས་པས་ནི་འོད་དཔག་ཏུ་མེད་པ་བསྐྱེད་པ་དང་། མེ་
[198a.2]ཏོག་མདངས་ཀྱིས་འཐུངས་པས་ནི་གཞན་ལ་བལྟས་པ་ཙམ་གྱིས་རྨོངས་པ་མེད་པའི་མཐུ་ཐོབ་པ་དང་། སྟོབས་ལྡན་གྱིས་འཐུངས་པས་ནི་སྐྱེས་བུའི་དོན་གྲུབ་པ་དང་། མདོའི་ནོར་བུ་ཞེས་བྱ་བའི་མཆོད་སྦྱིན་གྱི་དུས་སུ་བྲམ་ཟེ་རྣམས་ཆང་རང་ཉིད་ཀྱང་འཐུངས་ལ་སྲེག་
[198a.3]བླུགས་ཀྱང་ཆང་དང་བྱེད་དོ། །སྔོན་གྱི་དུས་སུ་ཆང་གི་རྒྱ་མཚོ་ཆེན་པོའི་ནང་དུ་ལྷ་དང་ལྷ་མ་ཡིན་ཐམས་ཅད་འདུས་ནས་སྨན་ཐམས་ཅད་ཀྱིས་བཅུག་སྟེ་བཀང་ནས་ཡོངས་སུ་བསྲུབས་པ་ལས་དེའི་ནང་ནས་ཐོག་མར་ཁྱབ་འཇུག་གི་ཆུང་མ་ལག་རྨི་དང་། ཟླ་བ་དང་བདུད་
[198a.4]རྩི་རྣམས་བྱུང་བར་གྱུར་ཏོ། །རྒུན་ཆང་དང་། སྦྲང་ཆང་དང་། སྦྱར་བའི་ཆང་དང་། བུ་རམ་ཤིང་གི་ཆང་དང་། བུ་རམ་གྱི་ཆང་དང་། ཨ་ས་ཝའི་ཆང་ལ་སོགས་པ་ཀུན་ཀྱང་ར་རོ་བའི་ནུས་མཐུ་ཀུན་ལ་ཡོད་དེ་རང་བཞིན་མི་འདོར་རོ། །སྨད་འཚོང་མ་ལ་འགྱིང་འགྲོས་
[198a.5]ཅན་ཞེས་བྱ་སྟེ། ཆང་འཐུངས་ན་མིང་དང་མཐུན་པར་སྒེག་པར་སྟོན་ཏོ། །བུད་མེད་རིགས་མ་ཡང་ཆང་འཐུངས་ན། ངོ་ཚ་མེད་པར་བྱེད་ཅིང་སེམས་གཞན་དུ་འགྱུར་བ་སྟོན་ཏོ། །ཆང་འཐུངས་ན་ནི་ཐུབ་པ་རྣམས་ཀྱང་འདོད་པ་རྣམས་ཀྱིས་སེམས་ཕྲོགས་སོ། །
[198a.6]ཆང་འཐུངས་པའི་རྒྱུས་ནི་བུད་མེད་རྣམས་ཀྱང་ཁྲོ་གཉེར་དང་སྨིན་མ་གཡོ་བར་བྱེད་ལ། མཛུབ་མོས་གཞན་ལ་སྡིགས་པར་བྱེད་ཅིང་། ཁ་ཅིག་ལ་ནི་གནོད་པ་སྦྱིན་པ་ལྟར་སྟོན་ཀྱང་གཉི་ག་ལ་སྙིང་དགའ་བར་ནི་མཚུངས་སོ། །ཆང་འཐུངས་ན་ལྷའི་བུ་མོ་རྣམས་ཀྱང་
[198a.7]འདོད་པ་ལ་དགའ་བར་འགྱུར་རོ། །ཆང་འཐུངས་ན་ནི་སྐྱེས་བུ་གཡུལ་དུ་འཇུག་པ་རྣམས་ཀྱང་རྩ་བཞིན་སྲོག་འདོར་བར་བྱེད་ཅིང་རྩོད་པ་འཕེལ་བ་དང་། །ཆང་མང་དུ་བསྟེན་པས་ནི་ཕྱིས་ཀྱང་དེ་ལ་སྲེད་ཅིང་ཆོག་མི་ཤེས་པར་འགྱུར་རོ། །མྱ་ངན་དང་། སྐྱོ་བ་དང་། མི་དགའ་བ་
[198b]
[198b.1]དང་། འཇིགས་པ་རྣམས་ཀྱི་ཟིལ་གྱིས་གནོན་པར་མི་འགྱུར་རོ། །དགའ་འདུན་དང་། དགའ་སྟོན་ཆེན་པོ་དང་། སྐྱེད་མོས་ཚལ་དུ་འགྲོ་བ་ལ་སོགས་པ་ཡང་ཆང་མེད་པར་མཛེས་པར་མི་འགྱུར་རོ། །ཁ་ཅིག་ནི་ཆང་འཐུངས་པའི་དབང་གིས་སྡུག་ཅིང་ཡིད་དུ་
[198b.2]འོང་བ་མང་པོ་དང་བྲལ་བ་དྲན་ནས་ངུ་བ་ཡང་ཡོད། མི་མཛའ་བ་དང་ནི་མཛའ་བར་འགྱུར་ལ། མཛའ་བ་དང་ནི་བྲལ་བར་འགྱུར་བ་ཡང་ཡོད་དོ། །ཆང་འཐུངས་བའི་སྐྱེས་བུའི་བློ་ལ་ནི་ལྷའི་དབང་པོ་བརྒྱ་བྱིན་ལ་ཡང་བརྙས་པ་སྐྱེ་བ་དང་། ཆང་འཐུངས་པའི་རྒྱུས་ནི་
[198b.3]གཞན་ལ་གཏན་དུ་མེད་པ་རང་རིག་པ་བདེ་བའི་རོ་མྱོང་བར་བྱེད་པ་དེ་ཡང་ཡིན་ནོ། །གཞན་ཡང་མཛའ་བར་འགྱུར་ལ། འབྲེལ་པ་ཡང་ལྷག་པར་འབྱེ་བར་འགྱུར་རོ། །ཆང་བྱིན་ན་ནི་ལྷ་དང་ལྷ་མ་ཡིན་དང་། གནོད་སྦྱིན་དང་། དྲི་ཟ་དང་། སྲིན་པོ་དང་མི་རྣམས་ཀྱང་
[198b.4]དགའ་བ་དང་། མགུ་བ་དང་། ངག་གི་ལམ་འཕེལ་བར་འགྱུར་རོ། །ཆང་ཚུལ་བཞིན་མ་ཡིན་པར་འཐུངས་ན་ནི་ནད་སྐྱེད་པར་འགྱུར་ཏེ། དེ་ཡང་ཚིལ་རྒྱས་པ་དང་། རླུང་དང་བད་ཀན་སྐྱེད་པར་འགྱུར་རོ། །ཆང་ཚུལ་བཞིན་དུ་འཐུངས་ན་ནི་ཉེས་པ་ཆེན་པོ་
[198b.5]ལས་ཀྱང་གྲོལ་བར་འགྱུར་རོ། །ལུས་ཀྱི་ནད་གཞན་ཡོད་པ་ལ་ནི་ཆང་སྤང་བར་བྱའོ། །ཆང་ནད་མ་ཡིན་པ་ནད་གཞན་ལ་ནི་ཆང་སྐྱོན་མེད་པའི་ནང་དུ་སྨན་ཚོགས་དང་སྦྱར་བ་ཐང་ལ་གནས་པ་དང་གྲོང་ལ་གནས་པའི་སྲོག་ཆགས་ཀྱི་ཤ་ལེགས་པར་བཏགས་པ་ཆང་དང་
[198b.6]ལྷན་ཅིག་བཏུང་ངོ་། །ཆང་འབའ་ཞིག་ནི་གནོད་དེ་མི་འཇུའོ། །སྒོག་སྐྱ་དང་ཤ་དང་ཆང་དུ་སྦྱར་བས་ནི་རླུང་ནད་མི་བཟད་པ་འཇོམས་ཀྱི། སྒོག་སྐྱ་ཉི་ཚེས་ནི་དེ་ལྟ་མ་ཡིན་ནོ། །ཆང་ནི་ཟུག་རྔུ་ཁོང་དུ་ལུས་པ་དབྱུང་བ་དང་། ཐལ་སྨན་རྣོན་པོའི་ལས་དང་། མེ་བཙའ་ལ་
[198b.7]སོགས་པའི་ལས་བྱེད་ཀར་བླུད་དོ། །ནད་པ་དམ་དུ་བཟུང་ལ་མཚོན་དབྱུང་བ་ལ་སོགས་པའི་ལས་བྱས་ན་སྨན་པའི་བྱ་བ་ལས་ཤིན་ཏུ་སླ་བར་འགྱུར་རོ། །ཆང་ནི་མེའི་དྲོད་སྐྱེད་པ་དང་། ཡི་ག་འབྱེ་བ་དང་། མྱ་ངན་དང་། ངལ་བ་སེལ་བ་དང་། ནད་མེད་ཅིང་
[199a]
[199a.1]སྟོབས་འཕེལ་བའི་མཆོག་ཡིན་ནོ། །དེ་བས་ན་བདག་ཉིད་ཆེན་པོ་རྣམས་ཀྱིས་རང་གི་སྲོག་བསྲུང་བའི་ཕྱིར་ཆང་རན་པར་བཏུང་བར་བྱའོ། །བསྟེན་པ་དང་ཉེ་བར་བསྟན་པ་རྣམས་ཀྱིས་ལོངས་སྤྱོད་དང་ལྷན་ཅིག་སྤྱོད་པའི་ཆོས་ཀྱང་ཆང་འདི་ལས་
[199a.2]ལྷག་པ་མེད་དོ། །ཐོག་མར་ཆང་འཐུངས་པ་ནི་དང་པོར་ཁྲུས་བྱས་ལ་ལྷ་དང་བྲམ་ཟེ་དང་བླ་མ་ལ་ཕྱག་འཚལ་ཏེ། །རང་གི་ལས་ཀྱི་བྱ་བ་བྱས་ནས་འཁོར་ཐམས་ཅད་དང་ལྷན་ཅིག་ཆང་འཐུངས་ཏེ། ས་གཞི་ཆུའམ། ཆུ་དྲི་དང་ལྡན་པས་ཆག་ཆག་བཏབ་ལ་ཟས་
[199a.3]བཟའ་བའི་བཀད་སར་སོང་སྟེ། སྟན་རྒྱ་ཆེ་ཞིང་བདེ་བར་བཏིང་ནས་མི་སྲུན་པའི་སྐྱེ་བོ་རྣམས་བསལ་ཏེ། མཛའ་བཤེས་དང་། གཡོག་འཁོར་ཡིད་དུ་འོང་ཞིང་རང་གི་སྙན་པ་སྒྲོགས་པ་རྣམས་དང་། ལྷན་ཅིག་ཏུ་འདུག་པར་བྱའོ། །ཡང་ན་བུད་མེད་གཞོན་ནུ་
[199a.4]འཇོ་སྒེག་དང་ལྡན་པ་དག་རོལ་མོ་སྙན་པའི་སྒྲ་དང་ལྷན་ཅིག་གར་དང་གླུ་ལེན་ཅིང་ཤིན་ཏུ་མཛེས་པ་དང་། བུད་མེད་དེ་དག་གི་ལུས་ལ་དྲིལ་བུ་གཡེར་ཀའི་སྒྲ་དང་བཅས་པ་དང་། རྨ་བྱ་ལ་སོགས་པའི་གར་དང་། སྐད་སྙན་པར་སྒྲོགས་པ་དང་། གཞན་ཡང་ཟ་འུག་
[199a.5]ལ་སོགས་ཁ་དོག་དུ་མ་དང་ལྡན་པའི་གོས་བགོ་ཞིང་གསེར་ལས་བྱས་པའི་རྒྱན་ནོར་བུ་སྣ་ཚོགས་ཀྱིས་སྤྲས་པས། ལུས་སྤུད་པའི་བུད་མེད་ཐུབ་པའི་སྐྱེས་བུ་རྣམས་ཀྱི་སེམས་ཀྱང་གཡོ་བར་བྱེད་པ་དང་། རི་དགས་ཀྱི་མིག་ལྟར་འགུལ་ཤིང་རྩེ་བའི་མིག་གིས་ལྟ་
[199a.6]ཞིང་སྙིང་དུ་སྡུག་ལ། དེ་ཡང་ཕྱུག་པོའི་རིགས་སུ་སྐྱེས་ཤིང་ནུ་མ་རྒྱས་པ་དང་། རོ་སྨད་ལྕི་བའི་འགྲོས་སུ་འགྲོ་བ་དང་། གདོང་ཟླ་བ་ལྟ་བུའི་བུད་མེད་རྒན་པོ་ཡང་དྲེགས་པ་སྐྱེད་པ་དང་། གཞན་པའི་སེམས་ཀྱང་ཀུན་ཏུ་ཆགས་པ་སྐྱེད་ནུས་པ་དང་། བུད་
[199a.7]མེད་དར་ལ་བབ་ཅིང་ལུས་སྲབ་པ་ཆང་གིས་དྲེགས་པ། རང་བཞིན་གྱིས་འཇོ་སྒེག་ཅན་དག་ཕན་ཚུན་ཆང་ལ་སོགས་པ་འབྲིམ་ཞིང་དེ་ཡང་རླུང་ཡབ་དང་པདྨའི་ལོ་མ་ལ་སོགས་པས་བསིལ་བར་བྱས་པའི་ཆང་མཐོང་ན་ཡང་དེ་ལ་ཆགས་པ་སྐྱེས་ན། འཐུང་བ་ལྟ་ཅི་སྨོས་ཏེ་
[199b]
[199b.1]ཆང་གི་དབང་དུ་སེམས་འགྲོའོ། །ཆང་དེ་ཡང་ཙུ་ཏའི་མེ་ཏོག་དང་། གླ་རྩི་དང་། སྣ་མའི་མེ་ཏོག་དམར་པོས་བསྒོས་ལ་ཤེལ་ཕོར་གྱི་སྣོད་ཀྱི་ནང་དུ་བླུགས་ཏེ་མཛེས་པ་ནི་འདོད་པའི་ལྷའི་ལུས་བཞིན་དུ་སྣང་ངོ་། །ཆང་འཐུངས་པའི་དུས་སུ་དང་པོར་བལ་བུའམ། སུག་
[199b.2]སྨེལ་ལ་སོགས་པའི་ཕྱེ་མའམ། གོང་དུ་སྨོས་པའི་ན་ཚོད་གནས་པར་བྱེད་པའི་ལྡེ་གུ་ཟོས་ནས། དེའི་འོག་ཏུ་ཆང་འདོད་པའི་སྐྱེས་བུས་ས་ཕྱོགས་ཞལ་ཞལ་བྱས་པའི་སྟེང་དུ་ཆང་གི་ནང་དུ་ཆུ་ཅུང་ཟད་དང་བསྲེས་ལ་བཏུང་སྟེ། དྲན་པ་དང་བློ་དང་ལྡན་པའི་སྐྱེས་བུས་མི་ཆེ་
[199b.3]མི་ཆུང་བར་རན་པར་རྟག་ཏུ་སྤྱད་དེ། དེའི་འོག་ཏུ་ཟས་ཀྱི་བྱ་བ་ལེགས་པར་སྦྱར་བ་དང་ཉེ་བར་སྤྱད་པར་བྱ་སྟེ། ཐོག་མར་བུད་མེད་ལ་བླུད་དེ། བུད་མེད་དེས་ཀྱང་ཆང་གི་ནང་དུ་དྲི་ཞིམ་པོས་བྱུགས་པའི་གདོང་དང་། ཨུཏྤ་ལ་ཁ་ཕྱེ་བ་ལྟ་བུའི་མིག་གིས་བལྟས་པས་བུང་
[199b.4]བ་མང་པོས་ཆང་འཐུང་བ་ལྟ་བུའི་གཟུགས་བརྙན་ཤིན་ཏུ་མཛེས་པར་སྣང་བའི་ཆང་དེ་སྣོད་གསུམ་གྱི་ནང་དུ་བླུགས་ཏེ། འཁོར་རྣམས་ཀྱིས་བསྟོད་བཞིན་དུ་འཐུངས་ན། དེའི་འོག་ཏུ་ཟས་ཟ་བའི་བཀད་སར་སོང་སྟེ། སྨན་པ་མཁས་པས་མདུན་དུ་བཞག་ལ་ཟས་བཟའ་བར་
[199b.5]བྱ་སྟེ། འདིར་ཡང་ཤ་དང་། སྣུམ་ཁུར་དང་། མར་དང་། སྒེའུ་གཤེར་དང་། ཧ་རི་ཏ་ལ་སོགས་པ་དང་། ཁ་རུ་ཚ་དང་ལྡན་པར་ཟས་བཟའོ། །གསང་ནན་དུ་སྐྱོགས་གཉིས་སམ་གསུམ་ཉུང་བ་བཏུང་བར་བྱ་སྟེ། དེ་ཡང་བུད་མེད་ལ་ཕོད་པར་བྱ་བའི་ཕྱིར་རོ།
[199b.6]དབེན་པར་ཆུང་མ་དང་ལྷན་ཅིག་སོང་སྟེ། ཆུང་མ་པང་པར་བཞག་ལ་རྐང་ལག་གིས་དམ་དུ་འཁྱུད་པ་དང་། བུད་མེད་ཀྱི་ལུས་ལས་རྔུལ་འབྱུང་ཞིང་བ་སྤུ་ལྡང་ལ་ནུ་མ་འགུལ་བར་སྣང་སྟེ། དེ་མ་ཐག་ཆང་བླངས་ལ་བུད་མེད་ལ་བླུད་དོ། །གལ་ཏེ་དེ་ལྟར་མ་བླུད་ན་ནི་
[199b.7]ཁྱིམ་ཐབ་ཀྱི་བདེ་བ་ཅི་ཞིག་མྱོང་སྟེ། ཕལ་ཆེར་སྡུག་བསྔལ་དང་བཅས་པས་དམྱལ་བ་དང་འདྲའོ། །དེ་ལྟར་ཆང་དེ་ཡན་ཆད་མཆོག་གི་གཟུགས་དང་ལྡན་པས་བུད་མེད་དེས་འཐུངས་པ་དང་། དེའི་ལྷག་མ་དེ་ཡང་ཤིན་ཏུ་དྲི་ཞིམ་པ་དང་ལྡན་པ་པདྨ་རཱ་ག་བཞུས་པ་ལྟ་
[200a]
[200a.1]བུའི་མདོག་དང་ལྡན་པ་ཡིན་ནོ། །དེའི་འོག་ཏུ་འདོད་པ་ཟིན་ཏེ་དུབ་པ་དང་ཆང་ཉུང་ཟད་བཏུང་བར་བྱའོ། །གལ་ཏེ་ཆང་མངས་ན་ནི་གཟི་མདངས་ཉམས་པས་ཆང་མང་དུ་འཐུང་བ་སྤང་ངོ་། །དེ་ནས་བདེ་བར་ཉལ་བར་བྱའོ། །ཆང་བཏུང་བའི་ཚུལ་
[200a.2]དེ་ལྟར་བྱས་ན། ཆོས་དང་དོན་འདོད་པས་ཉམས་པར་མི་འགྱུར་ཏེ་སྙིང་པོ་མེད་པའི་འཁོར་བ་ན་བདེ་བའི་མཆོག་ཏུ་འགྲོ་བར་འགྱུར་རོ། །དེ་ལྟར་བྱས་པའི་རིམ་པ་དེ་ཡང་ལྷ་རྣམས་དང་ལོངས་སྤྱོད་དང་ལྡན་པའི་སྐྱེས་བུས་བྱ་བ་ཡིན་གྱི་གཞན་དུ་ན་ནི་ཕོངས་པས་ཉམ་
[200a.3]ཐག་པར་འགྱུར་ཏེ། དེའི་འོག་ཏུ་སེམས་གདུངས་ནས་ནོར་བུ་འབུད་ཅིང་རྙེད་པར་འགྱུར་རོ། །སྐྱེས་བུ་འཇུངས་པ་དག་ནི་གཞན་ལོངས་སྤྱོད་བྱེད་པ་དག་ལ་སྨོད་ཅིང་བདག་ཉིད་ལ་འབྱོར་པ་ཡོད་ན་ཡང་མི་སྤྱོད་པ་དག་ནི་གཞན་གྱི་ནོར་བསྲུང་བའི་མཛོད་དང་མཚུངས་
[200a.4]སོ། །འོན་ཀྱང་རིམ་པ་དེ་ལྟར་ཆང་འཐུངས་ན་ཚེ་ལ་ཕན་ཞིང་དབང་པོ་རྣམས་སུ་ཡུལ་བསྐམས་ཏེ། རང་དགར་འགྲོ་བ་ལས་རྒྱལ་བ་ཡིན་ནོ། །ཆོ་ག་དེ་དག་ནི་ནོར་དང་ལྡན་པ་རྣམས་ཀྱིས་བྱའོ། །དེ་ལྟ་བས་ན་ཆང་ཇི་ལྟར་རིགས་པ་དང་ཕན་པ་རན་པར་སྦྱར་ཏེ།
[200a.5]དེ་ཡང་བདག་ཉིད་ཆེན་པོ་རྣམས་ཀྱིས་མཐོང་བ་ཉམས་པར་མི་འགྱུར་ཞིང་སེམས་མི་འཁྲུལ་བའི་ཚོད་ཀྱིས་བཏུང་བར་བྱའོ། །དེ་ནས་ནི་སྤང་བར་བྱའོ། །གཞན་ཡང་རླུང་གི་རང་བཞིན་ཅན་གྱི་མི་ལ་ཆང་བླུད་པ་ནི་དང་པོར་བསྐུ་བྱུག་དང་ལུས་དྲིལ་བ་དང་ཁྲུས་བྱས་ལ་བཟའ་
[200a.6]བ་ནི་སྣུམ་དང་དྲོ་བ་བཟུང་ངོ་། །བཏུང་བ་ནི་ཆང་བཏུང་བ་དང་། བྱུག་པ་རྣམས་ཀྱིས་བསྒོས་ལ་བླུད་དོ། །མཁྲིས་པའི་རང་བཞིན་གྱི་མི་ལ་ནི་བསིལ་བའི་སྦྱོར་བ་སྣ་ཚོགས་དང་། མངར་བ་དང་། སྣུམ་པ་དང་བཅས་པའི་ཟས་དང་ཆང་གི་བཏུང་བ་བྱིན་ན་ཡང་ལུས་ཉམས་
[200a.7]པར་མི་འགྱུར་རོ། །བད་ཀན་གྱི་རང་བཞིན་ཅན་གྱི་མི་ལ་ནི་ནས་དང་གྲོ་ལ་སོགས་པ་དྲོ་བའི་ཟས་དང་། སྲོག་ཆགས་ཐང་ལ་གནས་པའི་ཤ་ན་ལེ་ཤམ་ལ་སོགས་པ་དང་སྦྱོར་བའི་ཟས་དང་ཆང་བཏུང་བར་བྱའོ། །དེ་ལ་ཕལ་ཆེར་རླུང་ནད་ལ་ཕན་པའི་ཆང་ནི་བཏགས་པ་ལས་
[200b]
[200b.1]བྱས་བའི་ཆང་དང་བུ་རམ་ཆང་ཕན་ནོ། །མཁྲིས་པའི་ནད་ལ་ནི་རྒུན་ཆང་ཆུ་ཅུང་ཟད་དང་བསྲེས་པ་བླུད་དོ། །བད་ཀན་གྱི་ནད་ལ་ནི་རྒུན་ཆང་ངམ་ཨ་རིཥྚའི་བཏུང་བའམ་སྦྲང་ཆང་བཏུང་ངོ་། །བད་ཀན་ཤས་ཆེ་བའི་ནང་ལ་ནི་སྔར་ཆང་བླུད་ལ་དེའི་འོག་ཏུ་ཟས་བཟའོ། །མཁྲིས་
[200b.2]པ་ཤས་ཆེ་བ་ལ་ནི་ཆང་འཐུངས་ལ་དེ་མ་ཐག་ཟས་བཟའོ། །རླུང་ཤས་ཆེ་བ་ལ་ནི་ཟས་ཕྱེད་ཟོས་ནས་ཆང་བཏུང་ངོ་། །ནད་གཞི་མཉམ་པ་ལ་ནི་ཅི་དགར་བཏུང་ངོ་། །དེ་ལ་གཞན་ཡང་མྱོས་པའམ་བརྒྱལ་བའི་ནད་ལ་ནི་རླུང་དང་མཁྲིས་པ་འཇོམས་པའི་སྨན་གཏང་བར་བྱ་སྟེ།
[200b.3]དེ་ལ་བརྒྱལ་བ་ལ་ནི་ནད་གཞི་གང་ལས་གྱུར་པ་བརྟག་སྟེ། ཁྱད་པར་དུ་མཁྲིས་པ་བརྟག་པར་བྱའོ། །བརྒྱལ་བ་དང་མྱོས་པ་ཐམས་ཅད་ལ་ནི་བསིལ་བའི་བྱུག་པས་བསྐུ་ཞིང་ནོར་བུ་ཆུ་ནང་དུ་བཅུག་པའི་ཆུས་གཏོར་ཏེ་རླུང་ཡབ་ཀྱིས་གཡབ་པོ། རྒུན་འབྲུམ་དང་། བུ་རམ་ཤིང་
[200b.4]དང་། འབྲ་གོ་དང་། ཏང་པལ་དང་། འདི་རྣམས་ཀྱི་ཁུ་བ་འོ་མ་དང་བསྐོལ་བ་ཁ་རས་བཏབ་པ་བླུད་དོ། །ཡང་ན་མངར་བའི་སྡེ་ཚན་འོ་མ་དང་ལྷན་ཅིག་བསྐོལ་བ་བཏུང་བའམ། ཡང་ན་ཤ་ཁུའམ་མུངྒའི་ཡུ་ཤ་གང་ཡང་རུང་བའི་སེའུ་འབྲུ་དང་སྦྱར་བ་བླུད་དོ། །བཟའ་བ་ནི་འབྲས་དྲུག་ཅུ་པ་དང་། འབྲས་དམར་པོ་དང་།
[200b.5]ནས་ལས་གཡོས་སུ་བྱའོ། །གཞན་ཡང་སྨན་འཚོ་བྱེད་ཀྱི་སྨན་མར་དང་། དགེ་བའི་སྨན་མར་དང་། ཏིག་ཏ་ཆེན་པོའི་སྨན་མར་དང་། སྲང་བའི་སྨན་མར་དང་། འདི་དག་གང་ཡང་རུང་བ་འམ། ཡང་ན་ཙིཏྲ་ཀ་འོ་མ་དང་སྦྱར་བའམ། ཡང་ན་པི་པི་ལིང་དང་བྲག་
[200b.6]ཞུན་ཡང་བཅུད་ཀྱིས་ལེན་གྱི་ཆོ་ག་བཞིན་དུ་སྦྱར་བའམ། ཡང་ན་འབྲས་བུ་གསུམ་མར་དང་སྦྲང་རྩི་དང་ཤ་ཁ་རས་བཏབ་པའམ། དེ་དག་ལས་གང་ཡང་རུང་བ་བླུད་ན། མྱོས་པ་དང་བརྒྱལ་བ་ཐམས་ཅད་ཞི་བར་བྱེད་དོ། །མྱོས་པ་དང་བརྒྱལ་བ་ཤུགས་དྲག་ཏུ་ཞེན་པ་ལ་
[200b.7]ནི་ཁ་སྣའི་དབུགས་འགགས་པའམ། ཡང་ན་མིའི་འོ་མ་བཏུང་བའམ། ཡང་ན་སྣ་ནས་བླུགས་པ་ཕན་ནོ། །ཡང་ན་པདྨའི་རྩ་ལག་དང་། པི་པི་ལིང་དང་། སྦྲང་རྩི་སྦྱར་བའམ་ཡང་ན་ཨ་རུ་ར་དང་སྦྲང་རྩི་སྦྱར་བའམ། ཡང་ན་བྱི་ཚེར་བ་དང་སྦྲང་རྩི་སྦྱར་བའམ།
[201a]
[201a.1]ཡང་ན་ག་དུར་དང་སྦྲང་རྩིའམ། སྦྱོར་བ་འདི་དག་གང་ཡང་རུང་བའི་ལྡེ་གུར་བྱས་པ་ཟོས་ན་ཕན་ནོ། །ཡང་ན་ན་ལེ་ཤམ་དང་། རྒྱ་ཤུག་གི་རུས་པ་དང་། རྐང་དང་། པུ་ཤེལ་ཙི་དང་། ནཱ་ག་གེ་སར་དང་། འདི་རྣམས་བཏགས་པ་ཆུ་གྲང་
[201a.2]དང་སྦྱར་བ་འཐུངས་ན། མྱོས་པ་དང་བརྒྱལ་བའི་ནད་སེལ་ཏོ། །ཡང་ན་སྐྱུ་རུ་ར་བསྐོལ་བའི་ཁུ་བ་དང་། མར་དང་ལྷན་ཅིག་བསྐོལ་བའམ། ཡང་ན་ཨ་རུ་རའི་ཁུ་བ་དང་། མར་བསྐོལ་བའི་མར་འབའ་ཞིག་ལུས་པ་འཐུངས་ན་ཕན་ནོ། །ནད་གཞིའི་སྟོབས་
[201a.3]ཇི་ལྟ་བ་བཞིན་དུ་གོང་མའི་ཆོ་ག་རྣམས་མྱོས་པ་དང་། བརྒྱལ་བ་རྣམས་ལ་ཅི་རིགས་པར་བྱའོ། །དེ་བཞིན་དུ་སློན་ཁྲུས་ལ་སོགས་པ་ལས་རྣམ་ལྔ་དང་། གཏར་གས་ཁྲག་དབྱུང་བ་ཡང་རབ་ཏུ་ཕན་ནོ། །གཞན་ཡང་སེམས་བརྟན་པར་བྱ་ཞིང་ཤེས་པ་ཡུལ་ལ་
[201a.4]མ་ཆགས་པར་བྱའོ། །མྱོས་པ་དང་བརྒྱལ་བ་ཚབས་ཆེ་བ་ལ་ནི། སྙིང་སྟོར་གྱི་སྨན་དུ་བཤད་པ་ཤིན་ཏུ་རྣོ་བ་ལ་སོགས་པ། དུག་གིས་མྱོས་པའི་སྦྱར་སྨན་དག་གིས་གསོ་བར་བྱའོ། །དེ་ལ་སྙིང་སྟོར་གྱི་ནད་ལ་ནི་མྱུར་དུ་ཤིན་ཏུ་རྣོ་བའི་སྣ་སྨན་བཏང་བ་དང་། མིག་སྨན་
[201a.5]རྣོན་པོ་བླུགས་པ་དང་། དུད་པ་རྣོན་པོ་བརྔུབ་པ་དང་། སྨན་རྣོན་པོའི་ཕྱེ་མ་ཆུ་དང་སྦྱར་བ་མཁུར་བར་བཅང་བ་དང་། སེན་མོའི་ནང་དུ་ཁབ་བཙུགས་ཏེ་ཚར་གཞུག་པ་དང་། འདི་དག་བྱས་ན་སྙིང་སྟོར་གྱི་ནད་ཞི་བར་བྱེད་དོ། །ཡང་ན་སྐྲ་འབལ་བ་དང་། ལུས་མེས་
[201a.6]བསྲེགས་པ་དང་། སོས་བཅད་པ་དང་། སྲོག་ཆགས་སྡིག་པའི་སོས་འདེབས་སུ་གཞུག་པ་དང་། སྒེའུ་གཤེར་ལ་སོགས་པ་ཚ་བའི་ཁུ་བ་དང་། སྐྱུར་བའི་བག་དར་བ་ལ་སོགས་པ་ཁར་བཅད་དུ་གཞུག་པ་དང་། ཁ་སྲལ་ཕྲེའུ་ལུས་ལ་བརྡར་བར་བྱ་སྟེ། དེ་
[201a.7]ལྟར་རྣ་བའི་སྨན་དེ་དག་གིས་སད་དེ་འདུ་ཤེས་རྙེད་ནས། སྒོག་སྐྱའི་རང་གི་ཁུ་བ་བླུད་དོ། །ཁ་ཟས་ནི་ཚ་བ་གསུམ་དང་། ལན་ཚྭ་དང་། སྐྱུར་རྩི་ཆེན་པོའི་གེ་སར་དང་བཅས་པར་ཟས་བྱིན་ནས། དེ་ནས་རྒྱུན་སྲང་དག་པར་བྱ་བའི་ཕྱིར་དུ། ཟས་ཡང་བ་དང་། རྣོ་བ་
[201b]
[201b.1]དང་། ཚ་བ་དང་དྲོ་བའི་བག་སྦྱིན་ནོ། །སད་མ་ཐག་ཏུ་ངོ་མཚར་གྱི་གཏམ་དང་། འདས་པའི་ཆོས་རྣམས་དྲན་དུ་གཞུག་པ་དང་། གཉེན་བཤེས་སྡུག་པའི་གཏམ་ཐོས་པར་བྱ་བ་དང་། བལྟར་གཞུག་པ་དང་། རོལ་མོའི་སྒྲ་དང་། གླུ་སྐད་དྲག་ཏུ་བླང་བ་དང་།
[201b.2]རྩོལ་བ་མང་དུ་བྱེད་དུ་གཞུག་པ་དང་། སློན་ཁྲུས་བྱ་བ་དང་། དུ་བ་བརྔུབ་པ་དང་། ཁྲག་དབྱུང་བར་བྱ་སྟེ། དྲན་པ་སླར་རྙེད་པར་གྱུར་ན་ཡང་སྙིང་མི་སྟོར་བར་བྱ་བའི་ཕྱིར་དེ་བསྲུང་བར་བྱ་སྟེ། ཆོ་ག་གོང་མ་རྣམས་རྟག་ཏུ་བྱའོ། །གསོ་བའི་གནས་ལས་ཆང་ནད་གསོ་
[201b.3]བའི་ལེའུ་བདུན་པ་རྫོགས་སྷོ།། །།དེ་ནས་གཞང་འབྲུམ་གསོ་བའི་ལེའུ་བཤད་པར་བྱ་སྟེ། དེ་ལ་གཞང་འབྲུམ་གསོ་བའི་དུས་སུ་དཔྱིད་ཟླ་ར་བ་དང་། སྟོན་ཟླ་ཐ་ཆུངས་དང་། དབྱར་ཟླ་ཐ་ཆུངས་དང་། དུས་མཉམ་པ་དེ་དག་ནི་སྤྲིན་མེད་པའི་དུས་ཞེས་བྱ་
[201b.4]སྟེ། དེ་དག་གི་ཚེ་རབ་ཏུ་སློན་ཁྲུས་ཀྱིས་ལུས་དག་པར་བྱས་ལ་རྗེས་སུ་མཐུན་པའི་ཟས་ཡང་བ་དང་། ཉུང་བ་བྱིན་ནས་ཉམ་ཧ་ཅང་ཡང་མི་ཆུང་བའི་སྐབས་སུ་གསོ་བར་བྱའོ། །དེ་ལ་དང་པོ་བཤང་གཅི་བྱས་ལ་ཁྲུས་ལ་སོགས་པ་གཙང་སྦྲ་ཡང་བྱ་སྟེ་བྲམ་ཟེ་ལ་སོགས་
[201b.5]པས་བདེ་ལེགས་བརྗོད་ནས་སྤང་ལེབ་ཀྱི་ཁྲིའམ། མིའི་པང་པར་ནད་པ་གན་རྐྱལ་དུ་བཞག་ལ་ཉི་མའི་ཕྱོགས་སུ་རྐུབ་བསྟན་ཏེ། རྐེད་པའི་ཕྱོགས་མཐོང་བར་བྱས་ལ། སྒྱིད་ཁུང་གཉིས་ལས་རས་ཀྱིས་དྲངས་ལ་རྐེད་པ་ནས་དམ་དུ་བཅིངས་ལ་དྲང་པོར་བཞག་སྟེ། རྐུབ་
[201b.6]ཀྱི་ནང་མར་གྱིས་བསྐུས་ནས། དེ་ནས་ཆ་སྤྱད་མར་གྱིས་ཡང་བསྐུས་ཏེ་ནང་དུ་དལ་གྱིས་བཏང་ངོ་། །དེ་ལྟར་ནང་དུ་ཆ་སྤྱད་ཀྱིས་ཕྱིན་པ་དང་། ནད་པས་ཕྱིར་བཙིར་ལ་མི་གཙང་བ་ཡོད་ན་བཏོན་ཏེ། དེ་ནས་མཚོན་རས་འཇམ་པོས་དཀྲིས་ལ་གཞང་འབྲུམ་མནན་ཏེ། སྨན་
[201b.7]པས་མདོའི་གནས་སུ་བསྟན་པའི་ཆོ་ག་བཞིན་དུ། གཞང་འབྲུམ་འཛག་པ་ལ་ནི་ཐལ་སྨན་གྱིས་བསྲེག་པར་བྱའོ། །སྐམ་པོ་ལ་ནི་ཐལ་སྨན་ནམ་ལྕགས་བསྲེགས་པས་བསྲེག་གོ། །གཞང་འབྲུམ་ཚབས་ཆེ་བ་ལ་ནི་བཅད་ནས་བསྲེག་གོ། །དེ་ལྟར་ཟིན་པ་དང་ཆ་སྤྱད་
[202a]
[202a.1]བཀྲོལ་ལ། དེ་ནས་ནད་པ་དེའི་རྐུ་བ་དང་རོ་སྨད་མར་གྱིས་བསྐུའོ། །གལ་ཏེ་གཞང་འབྲུམ་མང་དུ་ཡོད་ན་ཡང་ཞག་བདུན་བདུན་ནས་རེ་རེའི་ཆོ་ག་གོང་ལྟར་བྱའོ། །དུས་གཅིག་ཏུ་ནི་མི་བྱའོ། །དེ་ནས་རླུང་མེད་པའི་ཁང་བར་བཞག་སྟེ། ཆོ་ག་རིམ་པ་
[202a.2]བཞིན་བྱའོ། །གཞང་འབྲུམ་དུ་མ་ཡོད་པ་ལ་ནི་དང་པོ་གཡས་ཕྱོགས་ན་ཡོད་པར་བྱའོ། །དེ་ནས་གཡོན། དེ་ནས་རྒྱབ། དེ་ནས་མདུན་གྱི་བྱ་སྟེ། དེ་ལྟར་ཆོ་ག་བསྲེགས་པ་ལེགས་པར་གྱུར་ན་རླུང་ལུགས་སུ་འབྱུང་བ་དང་། ཟས་ཡི་གར་འོང་བ་དང་། མེའི་
[202a.3]དྲོད་སྐྱེད་པ་དང་། ནད་ལེགས་པར་ཞི་བ་དང་། མདོག་དང་སྟོབས་སྐྱེ་བར་འགྱུར་རོ། །དེ་ལྟར་མཚོན་དང་ཐལ་བའི་ལས་བྱས་པའི་འོག་ཏུ་ཆུ་སོར་ཟུག་གཟེར་སྐྱེ་བར་གྱུར་ན། བ་སྤྲུ་བ་དང་། རུ་རྟ་དང་། ཤུ་ཏི་དང་། ཨ་ག་རུ་དང་། ཐང་ཤིང་དང་། འདི་རྣམས་
[202a.4]ཞིབ་ཏུ་བཏགས་པའི་ཕྱེ་མ་ཆུ་དང་ལྡེ་གུར་བྱས་པས་ལྟེ་བའི་འོག་ཏུ་བསྐུ་བར་བྱའོ། །ཅི་སྟེ་བཤང་གཅི་འགགས་པར་གྱུར་ན། སྨན་ར་སྣ་དང་། ཨ་ལམ་བུ་པ་དང་། ཨེ་རཎྜ་དང་། གཟེ་མ་དང་། བ་སྤྲུ་བ་དང་། གནྡྷ་སུ་ར་དང་། འདི་རྣམས་ལྷན་ཅིག་བསྐོལ་
[202a.5]ལ་དྲོ་འཇམ་ཙམ་དུ་བྱ་སྟེ། ཐོག་མར་རྒྱབ་དང་། རྐེད་པ་དང་། རྐུབ་དང་བརླ་བྲག་ཏུ་མར་གྱིས་བསྐུ་བྱུག་བྱས་ལ། དེའི་འོག་ཏུ་སྨན་ཁུས་བླུགས་པ་དང་། རོ་སྨད་སྨན་ཁུའི་ནང་དུ་གཞུག་པར་བྱའོ། །ཡང་ན་རླུང་འཇོམས་པའི་སྨན་དང་བཅས་པའི་འོ་མའམ།
[202a.6]ཡང་ན་ཏིལ་མར་གྱིས་གོང་མ་བཞིན་དུ་བླུགས་པ་དང་། རོ་སྨད་གཞུག་གོ། །ཡང་ན་རྟུག་པ་འགགས་པ་ལ་ནི་རླུང་ལ་ཕན་ཞིང་དྲོད་སྐྱེད་པ་དང་། དུར་བྱིད་དང་། རྒྱ་སྣེའུ་དང་། ཨུ་པོ་ད་ཀ་དང་། ཙུ་ཙུ་ཀ་པརྞི་དང་། འདི་རྣམས་ཀྱི་ཚོད་མ་ཞོ་དང་ཞོ་ག་ཆུ་
[202a.7]ལས་གཞི་བླངས་པ་དང་། གོང་མའི་སྣུམ་དང་བཅས་པའི་ཟས་བཟའོ། །དེ་ལ་གཞང་འབྲུམ་ལ་མཁྲིས་པ་ལས་གྱུར་བའི་ཚ་བ་ནི་མེད་དོ། །གལ་ཏེ་ཡོད་ན་ཡང་རླུང་དང་ཅུང་ཟད་འདྲེས་པར་ཡོད་དོ། །རླུང་དང་བད་ཀན་ལས་གྱུར་པའི་གཞང་འབྲུམ་གྱི་ནད་ཀྱི་མཚན་
[202b]
[202b.1]མ་ནི་གཞང་ཕྱིར་འབྱུང་ཞིང་ཕྱི་ས་དང་། འཕྱེན་འགགས་པ་དང་། གཡའ་བ་དང་། ན་བ་དང་། སྐྲང་བར་འགྱུར་ཏེ། དེ་ལ་ནི་བི་ལ་བའི་རྩ་བ་དང་། ཙི་ཏྲ་ཀ་དང་། ཡ་བཀྵ་ར་དང་། རུ་རྟ་དང་། ཏིལ་མར་དང་། འདི་རྣམས་ཚུལ་བཞིན་དུ་བསྐོལ་བའི་ཁུ་
[202b.2]བས་གཞང་འབྲུམ་ལ་བཀྲུ་ཞིང་བླུགས་སོ། །ཡང་ན་སྦྲུལ་དང་། བྱི་ལ་དང་། རྔ་མོ་དང་། ཕག་རྒོད་དང་། འདི་རྣམས་ཀྱི་ཞག་གིས་བསྐུ་ཞིང་བླུགས་སོ། །དེའི་འོག་ཏུ་ཟན་གྱིས་གླན་པའི་དུགས་དང་། ཆུ་ལུམས་ཀྱི་དུགས་བྱ་བའམ། ཡང་ན་དུགས་ཀྱི་ཆོ་གའི་
[202b.3]སྐབས་སུ་བསྟན་པ་རྣམས་འདིར་སྦྱར་རོ། །ཡང་ན་ཏིལ་མར་དང་། མར་དང་། ཆུ་དང་། ཕྱེར་སྦྱར་བའི་ཟན་དྲོན་གྱིས་དུགས་བྱའོ། །ཐོག་མར་སྣུམ་གྱིས་བསྐུས་ལ་དེ་ནས་དུགས་བྱའོ། །ཡང་ན་ར་སྣ་དང་། སྤ་མའི་འབྲས་བུའམ། ཤི་ཀྲུའི་ལོ་མའམ་
[202b.4]དེ་དག་ལས་གང་ཡང་རུང་བ་བཏགས་པའི་ཏིལ་མར་དང་ཟན་དུ་བྱས་པས་དུགས་བྱའོ། །ཨརྐའི་རྩ་བ་དང་། ཤ་མའི་ལོ་མ་དང་། མིའི་སྐྲ་དང་། སྦྲུལ་གྱི་པགས་པ་དང་འདི་རྣམས་མར་དང་བསྲེས་པའི་དུད་པས་བདུགས་ན་གཞང་འབྲུམ་ལ་ཕན་ནོ། །དེ་
[202b.5]བཞིན་དུ་ཨ་ཤྭ་གནྡྷ་དང་། བྲི་ཧ་སྟི་དང་། བྱིའུ་རུག་པ་དང་། པི་པི་ལིང་དང་། འདི་རྣམས་མར་དང་སྦྱར་བའི་དུད་པས་བདུག་གོ། །ཡང་ན་ཀུ་བ་ཁ་བོའི་ས་བོན་དང་མྱུ་གུ་འཇམ་པོ་བཏགས་པ་འབྲས་ཀྱི་རང་སྐྱུར་དང་སྦྱར་བའི་ལྡེ་གུ་རེང་བུར་བྱ་སྟེ་གྲིབ་སྐམ་དུ་
[202b.6]བྱས་ནས་རྐུབ་ནས་ཡར་བཅུག་ན་གཞང་འབྲུམ་འབྱིན་ཏོ། །ཡང་ན་ཀུ་བ་ཁ་བོའི་མྱུ་གུ་དང་། རྩ་བ་དང་། ནས་ཚིག་འཁུས་པའི་ཐལ་བ་དང་། འོལ་མ་སེ་དང་། སུ་ར་སྣ་དང་། ཀུཤྨནྡའི་ས་བོན་དང་། འདི་རྣམས་ཞིབ་ཏུ་བཏགས་པ་གོང་མ་བཞིན་དུ་ལྡེ་གུར་བྱས་ལ་
[202b.7]བཅུག་ལ་གཏང་ངོ་། །ཡང་ན་སུ་དྷཱ་ཀྵི་ར་དང་། ཡུངས་མར་སྦྱར་བས་བྱུགས་པའམ། ཡང་ན་ཁྱིམ་བྱའི་རྟུག་པ་དང་། པི་པི་ལིང་དང་། འོལ་མ་སེའི་འབྲས་བུ་འདི་རྣམས་བཏགས་ལ་བ་གཅིན་དང་སྦྱར་བའི་ལྡེ་གུས་བསྐུས་ན་ཡང་ཕན་ནོ། །དེ་བཞིན་དུ་ཟུར་པ་དང་། པྲི་
[203a]
[203a.1]ཡང་ཀུ་དང་། ཏ་མ་ལའི་རུས་པ་དང་། ཀར་ཀ་ཏ་སྲིང་གི་དང་། ཨ་རུ་ར་དང་། རུ་རྟ་དང་། བསེ་ཤིང་གི་འབྲས་བུ་དང་། སྤངས་མ་དང་། ཤི་ཀྲུ་དང་། ལ་ཕུག་གི་ས་བོན་དང་། ལོ་མ་དང་། ཀ་ར་བཱི་ར་དང་། ནིམ་པའི་ལོ་མ་དང་། ཤིང་
[203a.2]པི་ལུའི་རྩ་བ་དང་། བིལ་བའི་རྩ་བ་དང་། ཤིང་ཀུན་དང་། སུ་དྷཱ་ཀྵི་ར་དང་། འདི་རྣམས་ལྷན་ཅིག་བཏགས་ཏེ་ལྡེ་གུར་བྱས་པས་བསྐུས་པའམ། ཡང་ན་རུ་རྟ་དང་། ཤི་རི་ཤའི་ས་བོན་དང་། པི་པི་ལིང་དང་། ལྕེ་མྱང་ཚ་དང་། བུ་རམ་དང་། ཨརྐའི་ལོ་མ་དང་
[203a.3]འབྲས་བུ་གསུམ། འདི་རྣམས་ཀྱི་ལྡེ་གུས་བསྐུས་ན་གཞང་འབྲུམ་རྩ་ནས་འབྱིན་ཏོ། །ཡང་ན་ཨརྐའི་ལོ་མ་དང་། སུ་དྷཱ་ཀྵི་རའི་ཤིང་དང་། ཀུ་བ་ཁ་བོའི་ལོ་མ་དང་། ཀ་རཉྫ་ཕ་ལ་དང་། འདི་རྣམས་བཏགས་པ་རའི་གཅིན་དང་སྦྱར་བས་བསྐུས་ན་གཞང་
[203a.4]འབྲུམ་སེལ་བའི་མཆོག་གོ། །ཡང་ན་ཨ་ནུ་བ་ས་ནའི་སྨན་པི་པི་ལིང་ལ་སོགས་པའི་ལྡེ་གུ་བྱས་པ་བསྐུས་ན་ཡང་རབ་ཏུ་བསྔགས་སོ། །བྱུག་པའི་སྨན་དེ་དག་གིས་ཞི་བར་མ་ནུས་ན། བྱུག་པའི་སྨན་དེ་རྣམས་ཏིལ་མར་དང་ཚུལ་བཞིན་བསྐོལ་བས་བསྐུས་ན་རབ་
[203a.5]ཏུ་ཕན་ནོ། །བདུག་པ་དང་བྱུག་པ་དང་བསྐུ་བའི་སྨན་གཏོང་བའི་དུས་སུ་ནད་ཁྲག་མ་རུངས་པ་ལ་སོགས་པར་གྱུར་ན་གཞང་འབྲུམ་དེ་ལས་ཁྲག་བྱུང་ན་བདེ་བ་སྐྱེད་པར་འགྱུར་རོ། །དེ་ལྟར་ཁྲག་གཟགས་ཀྱང་མ་བྱུང་ཞིང་སྐྲངས་པ་དང་། སྲ་བའི་གཞང་འབྲུམ་རྣམས་ལ་
[203a.6]ནི་སྲིན་བུ་པད་པ་དང་། མཚོན་ཁབ་རྩེ་གཤིབས་པས་ཡང་དང་ཡང་དུ་ཁྲག་དབྱུང་ངོ་། །གྲང་དྲོ་དང་སྣུམ་རྩུབ་ལ་སོགས་པ་དེ་ལྟར་བྱས་ཀྱང་གཞང་འབྲུམ་ཞི་བར་མ་ནུས་ན། ནད་ཁྲག་ཡོད་པ་ཡིན་པས་དེ་ལ་སྨན་པས་གོང་མ་ལྟར་ཁྲག་དབྱུང་ངོ་། །ཡང་ན་ཁ་ཟས་གཞན་
[203a.7]མི་བཟའ་བར་འོ་མ་བསྲུབས་པའི་དར་བའི་ནང་ཙི་ཏྲ་ཀའི་ཕྱེ་མས་བཏབ་པ་ཉི་ཚེ་འཐུངས་ན་གཞང་འབྲུམ་སེལ་ཏོ། །སྨན་ཀོ་བི་དྷ་རའི་རྩ་བ་བཏགས་པའི་ཕྱེ་མ་དར་བ་དང་སྦྱར་བ་འཐུངས་ལ་དེ་ཞུ་ཙམ་ན་ཟས་ཕན་པ་རྣམས་ཟོས་ན་གཞང་འབྲུམ་ལ་ཕན་ནོ། །གང་གི་གཞང་འབྲུམ་
[203b]
[203b.1]སྐྲང་ཞིང་ཟུག་པར་ན་ལ་མེའི་དྲོད་ཆུང་བ་ལ་ནི་སྐྲན་གྱི་ཆོ་གར་བཤད་པའི་ཤིང་ཀུན་ལ་སོགས་བའི་ཕྱེ་མ་ཟོས་ལ་དེའི་འོག་ཏུ་དར་བ་བཏུང་བའམ། ཡང་ན་བུ་རམ་དང་ཨ་རུ་ར་སྦྱར་བ་བཟའོ། །ཡང་ན་ཨ་རུ་ར་དང་། བྱི་དང་ག་དང་། ཙི་ཏྲ་ཀ་དང་། དུག་མོ་ཡུངས་ཀྱི་ཤིང་
[203b.2]ཤུན་དང་། འདི་རྣམས་ཀྱི་ཕྱེ་མ་དར་བ་དང་ལྷན་ཅིག་བཏུང་ངོ་། །ཡང་ན་དུག་མོ་ཡུངས་དང་། པི་པི་ལིང་དང་། ཙི་ཏྲ་ཀ་དང་། སུ་ར་ན་དང་། འདི་རྣམས་གོང་མའི་ཆས་འོག་མ་ཆ་ཕྱེད་ཕྱེད་ཀྱིས་བསྐྱེད་ལ་བཏགས་པའི་ཕྱེ་མ་དར་བ་དང་ལྷན་ཅིག་བླུད་དོ། །ཡང་ན་
[203b.3]ལན་ཚྭ་རྣམ་གསུམ་དང་། ཚ་བ་གསུམ་དང་། ཤིང་ཀུན་དང་། སྟར་བུ་དང་འདི་རྣམས་ཀྱི་ཕྱེ་མ་ཆུ་དྲོན་དང་སྦྱར་ནས་བཏང་ངོ་། །ཡང་ན་བི་ལ་དང་། ཀ་པིད་ཏ་དང་། ནས་དང་འདི་རྣམས་ཀྱི་ཕྱེ་མ་དང་དར་བ་སྦྱར་བའམ། ཡང་ན་བཅའ་སྒ་དང་། ཏིང་ཀུམ་ཚ་དང་།
[203b.4]ནས་ཕྱེ་དང་དར་བ་སྦྱར་བའམ། ཡང་ན་བ་ལ་ད་ཀ་དང་། ནས་ཕྱེ་དང་དར་བ་སྦྱར་བ་འདི་དག་གི་སྐྱོ་མ་གང་ཡང་རུང་བ་བླུད་ན་ཕན་ནོ། །ཡང་ན་སྤ་མའི་འབྲས་བུ་དང་། ཤིང་ཀུན་དང་། ཙི་ཏྲ་ཀ་དང་། འདི་རྣམས་དར་བ་དང་ལྡན་པར་བཏུང་ངོ་། །ཡང་ན་ཟླ་བ་གཅིག་
[203b.5]གི་བར་དུ་ཤིང་པི་ལུའི་འབྲས་བུ་བཟའ་སྟེ། དེའི་འོག་ཏུ་དར་བ་བཏུང་ངོ་། །ཡང་ན་ཉིན་མཚན་དུ་ཟས་དང་མ་འདྲེས་པར་དར་བ་ཅི་འདོད་པར་བཏུང་ངོ་། །ལུས་ཀྱི་སྟོབས་དང་མེའི་དྲོད་ཆུང་བ་ལ་ནི་དར་བ་ཉི་ཚེ་སྤྱད་དོ། །སྨན་པས་དུས་དང་ཉམས་སྟོབས་ཀྱི་བྱེ་
[203b.6]བྲག་ཤེས་པར་བྱས་ནས་ཞག་བདུན་ནམ་བཅུའམ། ཟླ་བ་དྲུག་གམ་ཟླ་བ་ཕྱེད་ཀྱི་བར་དུ་དར་བ་འབའ་ཞིག་བླུད་དོ། །ཡང་ན་ཕྱེ་དང་དར་བ་ལྡེ་གུར་བྱས་པ་བླུད་དོ། །ཡང་ན་དར་བ་འཐུངས་ཏེ་ཞུ་བའི་ཚོད་ཙམ་ན་དར་བ་ལས་གཞི་བླངས་པའི་ཐུག་པ་རྒྱམ་ཚ་དང་བཅས་
[203b.7]པར་སྦྱིན་པར་བྱའོ། །དེ་ནས་དར་བ་ལས་གཞི་བླངས་པའི་འབྲས་ཆན་བཟའ་སྟེ་འཚལ་ནན་དུ་འོ་མ་བླུད་དོ། །ཡང་ན་མུངྒའི་ཡུ་ཤ་དང་། ཤ་ཁུ་དར་བ་དང་སྦྱར་བ་དང་། འབྲས་ཆན་ཚོད་ཟིན་པར་བཟའོ། །དེ་ལ་སྨན་པས་ནད་གཞི་དང་མེའི་སྟོབས་བརྟགས་ལ་
[204a]
[204a.1]དར་བའི་བྱེ་བྲག་གསུམ་གཏང་བར་བྱ་སྟེ། དེ་ཡང་མར་མེད་པའི་དར་བ་རྩུབ་པ་དང་། སྣུམ་ཕྱེད་ཙམ་ཕྱུང་བ་དང་། མར་མ་ཕྱུང་བ་དང་དར་བ་རྣམ་པ་གསུམ་པོ་དེ་དག་ཅི་རིག་པར་སྦྱར་རོ། །དེ་ལ་གཞང་འབྲུམ་གྱི་ནད་ལ་དར་བ་ལེགས་པར་
[204a.2]སྦྱར་ན། འཕྲལ་དུ་ཞི་བར་བྱེད་ཅིང་ཕྱིས་མི་སྐྱེ་བའི་མཆོག་ཡིན་ཏེ། དར་བ་དེ་ནི་སའི་སྟེང་གི་རྩ་བ་ལ་ཕོག་ན་ཡང་རྩ་བ་ནས་སྲེག་པར་བྱེད་ན་གཞང་འབྲུམ་ལྟ་ཅི་སྨོས། དེ་ལྟར་དར་བས་རྒྱུན་སྲང་རྣམས་དག་པར་བྱས་ནས་ཟས་ཀྱི་བཅུད་ཀྱིས་ལུས་ཟུངས་རྣམས་འཕེལ་
[204a.3]བར་བྱེད་དོ། །ཡིད་དགའ་བ་དང་སྟོབས་དང་ལྡན་བ་དང་མདོག་བཟང་པོར་འགྱུར་རོ། །མདོར་ན་དར་བ་བཅུག་ལ་ནུབ་གཅིག་བཞག་པ་འཐུངས་ན་གཞང་འབྲུམ་གྱི་ནད་འཇིག་པར་བྱེད་དོ། །ཡང་ན་འུ་སུ་དང་། ཟི་ར་དང་། གོ་སྙོད་དང་། སྤ་མའི་འབྲས་བུ་དང་། པི་
[204a.4]པི་ལིང་རྣམ་གཉིས་དང་། ཤུ་ཏིའི་འབྲས་བུ་དང་། པི་པི་ལིང་གི་རྩ་བ་དང་། ཟུར་པ་དང་། ལ་ལ་ཕུད་དང་། ཙི་ཏྲ་ཀ་དང་། ཡ་བ་ན་ཀ་དང་། འདི་རྣམས་ཞིབ་ཏུ་བཏགས་ལ། རྩ་བ་སྣུམ་ཅན་གྱི་ནང་དུ་དར་བ་དང་སྦངས་ལ་ལེགས་པར་སྨིན་པ་ཤས་ཆེར་
[204a.5]སྐྱུར་ཞིང་ཚ་བར་གྱུར་པ་ནི་དར་བའི་ཨ་རིཥྚ་ཞེས་བྱ་སྟེ། དེ་ལས་ཅི་འདོད་པར་འཐུངས་ན་མེ་དྲོད་སྐྱེད་པ་དང་། ཟས་ཡི་གར་འོང་བ་དང་། མདོག་བཟང་བ་དང་། བད་ཀན་དང་རླུང་ཚུལ་བཞིན་འབྱུང་བ་དང་། གཞང་ཁ་སྐྲང་ཞིང་གཡའ་བ་དང་། ན་བ་རྣམས་འཇོམས་
[204a.6]ཤིང་སྟོབས་འཕེལ་བར་བྱེད་དོ། །ཡང་ན་ཀྲུ་ཏྲུག་ཏྲེས་ཀྱི་རྩ་བའི་ཤུན་པ་བཏགས་པ་ལྡེ་གུར་བྱས་པའི་རྫ་མའི་ནང་ངོས་བསྐུས་ལ་དེའི་ནང་དུ་དར་བའམ་ཞོ་བླུགས་ལ་བཞག་སྟེ། ལེགས་པར་སྨིན་པ་དང་འཐུངས་ན་གཞང་འབྲུམ་སེལ་ཏོ། །ཡང་ན་ག་བྲའི་རྩ་བ་དང་།
[204a.7]ཐལ་ཏྲེས་དང་། ཨ་རུ་ར་དང་། ཚ་བ་ལྔ་དང་། འདི་རྣམས་ཀྱང་གོང་མ་ལྟར་བྱས་ན་ཕན་ཡོན་གོང་མ་དང་འདྲའོ། །ཡང་ན་ཧ་ཏི་པི་པི་ལིང་དང་པ་ཐཱ་དང་། ཤུ་ཏིའི་ས་བོན་དང་། ཚ་བ་ལྔ་དང་། གཡེར་མ་དང་། ཟི་ར་དང་། འུ་སུ་དང་། བིལ་བའི་རྐང་དང་།
[204b]
[204b.1]འདི་རྣམས་བཏགས་པའི་ཕྱེ་མ་ཐུག་པ་ཡུ་ཤའམ། ཁུ་བ་ལ་སོགས་པའི་ནང་དུ་བཏབ་པའམ། ཡང་ན་སེའུ་འབྲུ་ལ་སོགས་པ་འབྲས་བུའི་སྐྱུར་གྱི་ཁུ་བའི་ནང་དུ་ཏིལ་མར་དང་མར་གཉིས་བསྐོལ་བ་དང་། གོང་མའི་ཕྱེ་མ་དང་ལྷན་ཅིག་ཏུ་སྦྱར་བའམ། ཡང་
[204b.2]ན་སྨན་དེ་ཉིད་ཆུ་དང་མར་ཚུལ་བཞིན་བསྐོལ་བ་འཐུངས་ན་མེ་དྲོད་སྐྱེད་པར་བྱེད་དོ། །རིམ་པ་གོང་དུ་སྨོས་པ་འདི་ནི་ཕྱི་ས་སླ་བར་བྱ་བའི་ཕྱིར་བཤད་པ་ཡིན་ནོ། །ད་ནི་རྟུག་པ་འགགས་པའི་ཆོ་ག་བཤད་པར་བྱ་སྟེ། དེ་ལ་རྟུག་པ་སྲ་བར་གྱུར་པ་ལ་ནི་ཟས་
[204b.3]སྣུམ་ཤས་ཆེ་བ་དང་། ལན་ཚྭ་དང་ལྡན་པར་སྦྱིན་ཞིང་དེའི་འོག་ཏུ་ཆང་བླུད་དོ། །ཡང་ན་དར་བ་འམ་བུ་རམ་ཆང་ངམ། སྐྱུར་པོའམ། ཆང་དང་འདི་དག་གང་ཡང་རུང་བའི་ནང་དུ་ལན་ཚྭས་བཏབ་པ་འཐུངས་ན། རྟུག་པ་འགགས་པ་སེལ་ཏོ། །ཡང་ན་ཀ་
[204b.4]རཉྫའི་ལོ་མ་བསྐོལ་བའི་ནང་དུ་མར་དང་ཏིལ་མར་ཡང་བསྐོལ་བ་བཅུག་ལ་ཕྱེས་བཏབ་སྟེ་ལྡེ་གུར་བྱས་པ་ཟོས་ལ་དེ་ཞུ་བའི་ཆོད་ཙམ་ན་ཟས་ཟོས་ན་རླུང་གིས་རྟུག་པ་འགགས་པ་སེལ་ཏོ། །ཡང་ན་བུ་རམ་དང་། དོང་གྲ་དང་། ཡང་ན་པ་ཏྲ་དང་། བུ་རམ་དང་། ཡ་
[204b.5]བཀྵ་ར་དང་བཅས་པ་མར་དང་ཟོས་ན་ཡང་ཕན་ནོ། །ཡང་ན་བ་རུ་ར་བ་གཅིན་གྱི་ནང་དུ་ནུབ་གཅིག་སྦངས་ལ་བུ་རམ་དང་ལྷན་ཅིག་ཟོས་ན་རླུང་ལས་གྱུར་པའི་རྟུག་པ་འགགས་པ་ཡང་འབྱུང་ངོ་། །ཡང་ན་ཨ་རུ་ར་རྡོག་མ་ཉིས་བརྒྱ་བ་གཅིན་བྲེ་བོ་ཆེ་གཉིས་དང་
[204b.6]བསྐོལ་བ་ཨ་རུ་ར་འབའ་ཞིག་ལུས་པ་དང་སྦྲང་རྩི་དང་བཅས་པར་ཞག་རེ་རེ་གཉིས་གཉིས་ཟོས་ན། བད་ཀན་ལས་གྱུར་པའི་རྟུག་པ་འགགས་པ་དང་། གཞང་འབྲུམ་གྱི་ནད་དང་། མཛེ་ནད་དང་། སྐྲངས་པ་དང་། གཅིན་ནད་དང་། སྐྲན་དང་། དམུ་རྫིང་
[204b.7]དང་། སྲིན་བུའི་ནད་དང་། འབྲས་ཀྱི་ཕྲེང་བ་དང་། ལྦ་བའི་ཤ་སྟོར་བ་དང་། རྐང་བམ་དང་། ལུས་སྦོ་བ་དང་། སྐྱ་རྦབ་དང་། དྲེག་ནད་དང་འདི་རྣམས་ལ་ཕན་ནོ། །ཡང་ན་བར་ད་ཀ་བུ་རམ་དང་བཅས་པ་ཟོས་ལ་དེའི་འོག་ཏུ་ཨ་ཛ་ཤྲིང་གིའི་རྩ་བ་བཏགས་
[205a]
[205a.1]པ་རའི་གཅིན་དང་སྦྱར་བ་འཐུངས་ན་གཞང་འབྲུམ་ཞི་བར་བྱེད་དོ། །ཡང་ན་འབྲས་བུ་གསུམ་བསྐོལ་བའི་ཁུ་བའི་ནང་དུ་དུར་བྱིད་བཏགས་པའི་ཕྱེ་མ་བཏབ་པའམ། ཡང་ན་དར་བའི་ནང་དུ་ཨ་རུ་རའི་ཕྱེ་མ་བཏབ་པ་བཏང་ངོ་། །ཡང་ན་ཨ་
[205a.2]རུ་ར་དང་། པི་པི་ལིང་བཏགས་པའི་ཕྱེ་མ་མར་བསྐོལ་བའི་ནང་དུ་བླུགས་ཏེ་བུ་རམ་དང་བཅས་པ་ཟོས་ན་རྟུག་པ་འགགས་པ་སེལ་ཏོ། །ཡང་ན་ཨ་རུ་ར་དང་དུར་བྱིད་དང་། དན་ཏི་གསུམ་ཟོས་ན་ཡང་ཕྱི་ས་འགགས་པ་ཚུལ་བཞིན་འབྱུང་ལ་དེ་བྱུང་ཡང་གཞང་འབྲུམ་གྱི་
[205a.3]སྟོབས་ཀྱང་ཟད་པར་བྱེད་དོ། །ཡང་ན་སེའུ་འབྲུ་རང་རང་གི་ཁུ་བ་དང་། ཟི་ར་དང་ལ་ལ་ཕུད་དང་། བུ་རམ་དང་། དོང་གྲ་དང་། པ་ཏྲ་དང་། འདི་རྣམས་ལྷན་ཅིག་སྦྱར་བ་དར་བ་དང་འཐུངས་ན་རླུང་ལས་གྱུར་པའི་རྟུག་པ་འགགས་པ་སེལ་ཏོ། །ཡང་ན་
[205a.4]བུ་རམ་ཤིང་གི་ཆང་དང་། བུ་རམ་ཆང་གི་ནང་དུ་ཙི་ཏྲ་ཀ་དང་། བཅའ་སྒའི་ཕྱེ་མ་བཏབ་པའམ། ཡང་ན་ཟན་ཆང་གི་ནང་དུ་སྤ་མའི་འབྲས་བུ་དང་། པ་ཐ་དང་། ཁ་རུ་ཚའི་ཕྱེ་མ་བཏབ་སྟེ་འཐུངས་ན་ཕན་ནོ། །ཡང་ན་པི་པི་ལིང་གི་འབྲུ་བཅུ་དང་། ཏིལ་
[205a.5]ནག་པོ་སྲང་ཕྱེད་བཏགས་པ་འོ་མའི་ནང་དུ་བཏབ་སྟེ་འཐུངས་ལ་དེ་བཞིན་དུ་ཞག་བཅུའི་བར་དུ་པི་པི་ལིང་བཅུ་བཅུས་བསྐྱེད་དེ་འཐུངས་ན་ཉམས་སྟོབས་དང་མེའི་དྲོད་སྐྱེའོ། །ཡང་ན་བྱི་ཚེར་བ་དང་། བིལ་བ་དང་། ལ་ལ་ཕུད་དང་། དོང་གྲ་དང་། དེ་རྣམས་ལས་ཅི་རྙེད་ཀྱང་
[205a.6]རུང་སྟེ། པ་ཏྲ་དང་ལྷན་ཅིག་ཏུ་ཆུ་དང་སྦྱར་ཏེ་འཐུངས་ན་གཞང་འབྲུམ་སེལ་ཏོ། །ཡང་ན་ཆུ་སྲང་ཉིས་སྟོང་བཞི་བཅུ་རྩ་བརྒྱད་ཀྱི་ནང་དུ་ཨ་རུ་རའི་ཕྱི་ཤུན་སྐམ་པོ་སྲང་བརྒྱད་དང་སྐྱུ་རུ་ར་སྐམ་པོ་སྲང་བཅུ་དྲུག་དང་། ཀ་པིད་ཏ་སྲང་བཅུ་དང་། བི་ཤ་ལ་སྲང་ལྔ་དང་། སེང་ཕྲོམ་
[205a.7]དང་། ན་ལེ་ཤམ་དང་། པི་པི་ལིང་དང་། བྱི་དང་ག་དང་། ཤིང་ཚ་དང་། དེ་རྣམས་སྲང་གཉིས་གཉིས་དང་། འདི་རྣམས་ཆམ་ཆོམ་བརྡུངས་ཏེ་བསྐོལ་ལ་བཞི་ཆ་སྲང་ལྔ་བརྒྱ་རྩ་བཅུ་གཉིས་ལུས་པ་དང་། བཙགས་པའི་ཁུ་བའི་ནང་དུ་འབྲུ་མར་སྲང་ཉིས་བརྒྱ་དང་། ད་ཏ་
[205b]
[205b.1]ཀི་སྐམ་པོ་སྲང་བཅུ་དྲུག་སྣོད་སྣུམ་ཅན་གྱི་ནང་དུ་བཅུག་སྟེ་ཟླ་བ་ཕྱེད་བཞག་ལ་ལེགས་པར་སྨིན་པ་ནི་ཨ་རུ་རའི་ཆང་ཞེས་བྱ་སྟེ། དེ་ལས་རན་པར་བསྟེན་ན་མེའི་དྲོད་སྐྱེད་པ་དང་། གཞང་འབྲུམ་དང་། ཕོ་བའི་ནད་དང་། སྐྱ་རྦབ་དང་། མཛེ་དང་། དམུ་རྫིང་དང་།
[205b.2]དབྱིག་དུག་དང་། རིམས་དང་། སྐྲངས་པ་དང་། མཆིན་པ་ན་བ་དང་། སྙིང་ནད་དང་། སྐྲན་དང་། གཅོང་ཆེན་པོ་དང་། སྐྱུགས་པའི་ནད་དང་། སྲིན་བུའི་ནད་རྣམས་སེལ་ཏོ། །ཡང་ན་ཆུ་སྲང་ལྔ་བརྒྱ་བཅུ་གཉིས་ཀྱི་ནང་དུ་དན་ཏི་དང་། རྩ་བ་བཅུ་པ་དང་། འབྲས་
[205b.3]བུ་གསུམ་དང་། ཙི་ཏྲ་ཀ་དང་། འདི་རྣམས་རེ་རེ་ཞིང་སྲང་བཅོ་ལྔ་ཆམ་ཆོམ་བརྡུངས་ལ་བསྐོལ་ཏེ། བཞི་ཆ་སྲང་བརྒྱ་ཉི་ཤུ་རྩ་བརྒྱད་ལུས་པ་དང་། བཙགས་ལ་ཚིགས་མ་ཕྱུང་བའི་ཁུ་བའི་ནང་དུ་བུ་རམ་སྲང་བརྒྱ་དང་། ད་ཏ་ཀི་སྲང་བཅུ་དྲུག་བཅུག་སྟེ། ཡང་
[205b.4]ན་སྣོད་སྣུམ་ཅན་གྱི་ནང་དུ་ཟླ་བ་གཅིག་བཞག་སྟེ་ལེགས་པར་སྨིན་པ་ནི་དན་ཏིའི་ཆང་ཞེས་བྱ་སྟེ། དེ་ལས་རན་པར་འཐུངས་ན་ཕན་ཡོན་གོང་མ་དང་འདྲ་སྟེ། ཁྱད་པར་དུ་ཕྱི་ས་བདེ་བར་འབྱུང་ངོ་། །ཆུ་སྲང་ལྔ་བརྒྱ་བཅུ་གཉིས་ཀྱི་ནང་དུ་བྱི་ཚེར་བ་སྐམ་པོ་སྲང་
[205b.5]བཅུ་དྲུག་དང་དན་ཏི་དང་པ་ཏྲ་དང་། ཙི་ཏྲ་ཀ་དང་། ཨ་རུ་ར་རྣམ་པར་རྒྱལ་བ་དང་། བ་ཤ་ཀ་དང་། སྐྱུ་རུ་ར་དང་། དོང་གྲ་དང་། འདི་རྣམས་སྲང་གཉིས་གཉིས་དང་ལྷན་ཅིག་བསྐོལ་ལ་བཞི་ཆ་ལུས་པ་དང་། དེའི་ནང་དུ་ཁ་ར་དཀར་པོ་སྲང་བརྒྱ་དང་། ད་ཏ་ཀི་
[205b.6]སྲང་བཅུ་དྲུག་བཅུག་ལ། རྫ་མའི་སྣོད་དུ་པྲི་ཡང་ཀུ་དང་། པི་པི་ལིང་དང་། དབྱི་མོ་དང་། འདི་དག་ཕྱེ་མར་བྱས་ལ་མར་དང་སྦྲང་རྩི་དང་ལྡེ་གུ་བྱས་ལ་བསྐོལ་བའི་ནང་དུ་བླུགས་པར་བྱ་སྟེ། ཟླ་བ་གཅིག་བཞག་ལ་ལེགས་པར་སྨིན་པ་ནི་བྱི་ཚེར་བའི་ཆང་ཞེས་བྱ་སྟེ། དེ་ལས་
[205b.7]རན་པར་འཐུངས་ན། ཕན་ཡོན་གོང་མ་དང་འདྲའོ། །ཟན་གྱི་གོང་དུ་སྐྱུར་རྩི་ཆེན་པོ་ལ་སོགས་པ་སྐྱུར་བའི་འབྲས་བུའི་ཁུ་བ་དང་། མར་གོང་མ་བཞིན་དུ་སྦྱར་བ་འཐུངས་ན་ཕྱིས་འགགས་པ་བདེ་བར་འབྱུང་ངོ་། །ཡང་ན་དབྱི་མོ་དང་། ཀྲུ་ཏྲུག་ཏྲེས་མར་དང་ཚུལ་བཞིན་
[206a]
[206a.1]དུ་སྦྱར་བའམ། ཡང་ན་ནས་ཚིག་འཁུས་པའི་ཐལ་བ་བུ་རམ་དང་སྦྱར་བ་འམ། པི་པི་ལིང་གི་རྩ་བ་མར་དང་སྦྱར་བའི་ནང་དུ་བུ་རམ་དང་། ཡ་བཀྵ་ར་དང་། དོང་གྲའི་ཕྱེ་མ་བཏབ་པའམ། པི་པི་ལིང་དང་། པི་པི་ལིང་གི་རྩ་བ་དང་། འུ་སུ་དང་།
[206a.2]སེའུ་འབྲུ་དང་། འདི་རྣམས་མར་དང་མར་གྱི་བཞི་འགྱུར་གྱི་ཞོ་དང་ཆུ་དང་ཚུལ་བཞིན་དུ་བསྐོལ་ཏེ། མར་འབའ་ཞིག་ལུས་པ་ཟོས་ན་རླུང་དང་བཤང་གཅི་འགགས་པ་རྣམས་སེལ་ཏོ། །ཤིང་པ་ལ་ཤའི་ཐལ་བ་ཆུ་དང་བསྲེས་ལ་བཙགས་པ་དང་། དེའི་སུམ་ཆའི་མར་
[206a.3]དང་བསྐོལ་ལ་མར་ལུས་པ་དང་དེའི་ནང་དུ་ཨིནྡྲ་ཡ་བའི་སྡེ་ཚན་བཏགས་པའི་ཕྱེ་མས་བཏབ་པ་འཐུངས་ན། གཞང་འབྲུམ་དང་མེའི་དྲོད་སྐྱེད་པའི་ཆོ་ག་ཡིན་ནོ། །ཚ་བ་རྣམ་ལྔ་དང་། ཨ་རུ་ར་དང་། ཡ་བཀྵ་ར་དང་། ལྕེ་མྱང་ཚ་དང་། པ་ཐ་དང་། འུ་སུ་དང་། ན་ལེ་
[206a.4]ཤམ་དང་། བིལ་བ་དང་། མར་དང་། དེའི་བཞི་འགྱུར་གྱི་ཞོ་དང་། ཆུ་དང་ཚུལ་བཞིན་བསྐོལ་བ་འཐུངས་ན་གཞང་འབྲུམ་དང་བརླ་བྲག་ཏུ་ན་བ་དང་གཞང་ཕྱིར་བྱུང་བ་དང་། གཅིན་སྲི་ཞིང་འཛག་པ་རྣམས་ལས་མྱུར་དུ་རྒྱལ་བར་བྱེད་དོ། །པ་ཐ་དང་། ཨ་
[206a.5]ཛ་མོ་དང་། འུ་སུ་དང་། བྱི་ཚེར་བ་དང་། ཚྭ་བ་རྣམ་ལྔ་དང་། བིལ་བ་དང་། འདི་རྣམས་མར་དང་ཞོ་དང་། རྩང་གི་རིའི་ཁུ་བ་གཉིས་མར་གྱི་བཞི་འགྱུར་དང་ཆུ་དང་ཚུལ་བཞིན་དུ་བསྐོལ་ཏེ། མར་ལུས་པ་ལས་རན་པར་འཐུངས་ན། ལྟོ་སྦོས་པ་དང་། གཅིན་
[206a.6]སྲི་བ་དང་། འཕྱེན་པྲེག་པྲེག་པོར་འབྱུང་བ་དང་། གཞང་འབྱུང་བའི་ནད་དང་། གཞང་འབྲུམ་དང་། ཕོ་བའི་ནད་དང་། བད་ཀན་དང་རླུང་ནད་འཇོམས་པར་བྱེད་དོ། །རྨ་བྱ་དང་། སྲེག་པ་དང་། ལ་བན་ཞེས་བྱ་བའི་ཤ་ཁུ་སྐྱུར་དང་ལེགས་པར་སྦྱར་བའམ།
[206a.7]ཡང་ན་ཁྱིམ་བྱའམ་ལྕོ་གའི་ཤ་ཁུ་སྐྱུར་དང་བཅས་པ་བྱིན་ན་རླུང་དང་ཕྱི་ས་འགགས་པ་ལ་ཕན་ནོ། །རྒྱ་སྣེའུ་དང་། ཙི་ཏྲ་ཀ་དང་། དུར་བྱིད་དང་། དན་ཏི་དང་། པ་ཏྲ་དང་། ཨ་མ་ལི་ཀ་ལ་སོགས་པའི་ལོ་མ་དང་། གཞན་ཡང་བད་ཀན་དང་རླུང་འཇོམས་པའི་ཚོད་
[206b]
[206b.1]མ་ཡང་བ་དང་ཕྱི་ས་སླ་བར་འགྱུར་བའི་བག་གང་ཡང་རུང་བ་ཚོད་མར་བྱས་པའི་ནང་དུ་ཤིང་ཀུན་དང་། ཏིལ་དང་། མར་དང་། ཞོའི་སྤྲིས་མ་དང་། འུ་སུ་དང་། ཚ་བ་ལྔ་བཏགས་པའི་ཕྱེ་མ་དང་། འུ་སུའི་གེ་སར་དང་། སྒེའུ་གཤེར་གཤགས་
[206b.2]པ་དང་། འདི་རྣམས་སྤོད་ཐབས་སུ་བཅུག་པ་ལེགས་པར་སྦྱར་ཏེ། ནད་པ་གང་ལ་དགའ་བའི་སྤོས་བསྲེགས་པས་ཚོད་མ་བདུགས་ལ། དེ་ནས་ཟི་ར་དང་། ན་ལེ་ཤམ་དང་། བི་ཊ་ཁ་རུ་ཚ་འདི་དག་བཏགས་པས་ཤས་ཆེར་
[206b.3]བཏབ་སྟེ་ཟོས་ན་རླུང་ཤས་ཆེ་བ་དང་། གཞང་འབྲུམ་དང་། ལུས་རྩུབ་པ་དང་། མེ་དྲོད་ཆུང་བ་དང་། རྟུག་སྐམ་རྣམས་ལ་ཕན་ཏེ་སྦྱར་བར་བྱའོ། །ཟས་ནི་འབྲས་དམར་པོ་ལས་གཡོས་སུ་བྱས་ལ། ཚོད་མ་ནིམ་པ་དང་། སྲོག་ཆགས་གོ་བོ་དང་། ར་དང་།
[206b.4]རྔ་མོ་དང་། ཁྱད་པར་དུ་སྲོག་ཆགས་ཤ་ཟ་བའི་ཤ་ཁུའི་ནང་དུ་ཤིང་ཀུན་ལ་སོགས་པའི་སྤོད་དང་སྦྱར་བ་ཐབས་གོང་མ་བཞིན་དུ་བྱས་ཏེ་ཟོས་ན་ཕན་ཡོན་གོང་མ་དང་འདྲའོ། །བཏུང་བ་ནི་ཆང་དང་ཤ་ཁ་ར་མི་བཏུང་བ་དང་། བུ་རམ་གྱི་ཆང་དང་། དར་བ་དང་། རྩབ་
[206b.5]མོ་དང་། ཨ་རིཥྚའི་ཆང་དང་། ཞོ་ག་ཆུ་དང་འདི་རྣམས་བཏུང་ངོ་། །ཡང་ན་ཆུ་ཉི་ཚེར་འུ་སུ་དང་། བཅའ་སྒ་ཆུ་དང་བསྐོལ་བ་བཏུང་བའམ། ཡང་ན་ཀཎྜ་ཀ་རི་ཆུ་དང་བསྐོལ་བ་ཉུང་ཤས་བཏུང་ངོ་། །བཏུང་བ་དེ་རྣམས་ཀྱང་ཟས་ཀྱི་བར་རམ་ཟས་ཀྱི་འོག་ཏུ་འཐུངས་
[206b.6]ན་རླུང་གི་རྟུག་སྐམ་འབྱིན་ནོ། །རླུང་དང་མཁྲིས་པ་དང་བད་ཀན་ལས་གྱུར་པའི་རྟུག་སྐམ་བདེ་བར་འབྱུང་ཞིང་གཞང་འབྲུམ་གྱི་ནད་ཀྱང་ཞི་བར་འགྱུར་ཏེ། མེའི་དྲོད་ཀྱང་སྐྱེད་པར་འགྱུར་རོ། །རྟུག་སྐམ་གྱི་ཟིལ་གྱིས་མནན་ཏེ་ཁོང་ཤིན་ཏུ་རྩུབ་པ་དང་། རླུང་ལོག་པར་
[206b.7]སོང་བ་དང་། གཟེར་ཞིང་ན་བས་ཉམ་ཐག་པ་ལ་ནི་འཇམ་རྩི་མས་གཏོང་བ་རབ་ཏུ་ཕན་ཏེ། དེ་ཡང་པི་པི་ལིང་དང་། པོ་སོན་ཆ་དང་། བིལ་བ་དང་། ཤུ་ཏི་དང་། ཤིང་མངར་དང་། ཤུ་དག་དང་། རུ་རྟ་དང་། ཟུར་པ་དང་། མ་ནུ་དང་། ཀྲུ་ཏྲུག་ཏྲེས་དང་།
[207a]
[207a.1]ཐང་ཤིང་དང་། འདི་རྣམས་བཏགས་ཏེ། ཏིལ་མར་དང་། ཏིལ་མར་གྱི་བཞི་འགྱུར་གྱི་འོ་མ་དང་ཆུ་དང་ལྡན་པར་བསྐོལ་ཏེ། མར་འབའ་ཞིག་ལུས་པ་དང་། འཇམ་རྩི་བཏང་ན་གཞང་འབྲུམ་དང་རླུང་འཁྱིལ་པ་ལ་ཕན་པའི་ཆོ་ག་ཡིན་ཏེ།
[207a.2]གཞན་ཡང་གཞང་ཕྱིར་བྱུང་བ་དང་ཟུག་གཟེར་དང་གཅིན་སྲི་བ་དང་། ཕྱི་ས་སྲི་ཞིང་སྒྲ་དང་བཅས་པར་འབྱུང་བ་དང་། རྐེད་པ་དང་། རྒྱབ་བསྒུལ་དཀའ་བ་དང་། མདོམས་ཕྱོགས་སུ་སྦོས་པ་དང་། བེའུ་སྣབས་སུ་འཁྲུ་བ་དང་། གཞང་སྐྲངས་པ་དང་། རླུང་
[207a.3]དང་། རྟུག་པ་འགགས་པ་དང་། ཡང་དང་ཡང་ཕྱི་ས་འབྱུང་འདོད་ཅིང་ཆེར་མི་འོང་བ་རྣམས་ལ་ཕན་ནོ། །ཡང་ན་བཀྲུ་སྨན་དྲག་པོ་མས་གཏོང་བར་བྱ་སྟེ། དེ་ཡང་རྩ་བ་ལྔ་པ་ཆུང་ངུ་དང་། འོ་མ་དང་། བ་གཅིན་དང་། ཏིལ་མར་དང་། ལན་ཚྭ་དང་།
[207a.4]པི་པི་ལིང་ལ་སོགས་པའི་འབྲས་བུ་དང་། འདི་རྣམས་ཚུལ་བཞིན་དུ་སྦྱར་བ་གཏང་ངོ་། །དེ་ཡན་ཆད་གཞང་འབྲུམ་སྐམ་པོའི་གསོ་བ་བཤད་ནས། །ད་ནི་གཞང་འབྲུམ་ཁྲག་འཛག་པའི་གསོ་བ་བཤད་པར་བྱ་སྟེ། དང་པོ་གཞང་འབྲུམ་ཁྲག་འཛག་
[207a.5]པ་དེ་རླུང་ངམ་བད་ཀན་གང་ལས་གྱུར་པ་བརྟགས་ཏེ། དེའི་འོག་ཏུ་སྣུམ་པ་དང་བསིལ་བ་སྦྱར་བ་འམ། རྩུབ་པ་དང་བསིལ་བ་སྦྱར་ཏེ་དྲོ་བག་ནི་མཁྲིས་པ་བསྐྱེད་དེ་བསྲུང་ངོ་། །དེ་ལ་རླུང་དང་ལྡན་པའི་གཞང་འབྲུམ་ཁྲག་འཛག་པའི་མཚན་མ་ནི་ཕྱི་སའི་མདོག་
[207a.6]སྨུག་ནག་ཏུ་འབྱུང་བ་དང་། སྲ་བ་དང་། རྩུབ་པ་དང་། འཕྱེན་མང་པོ་འབྱུང་བ་དང་། རྐེད་པ་དང་བརླ་དང་གཞང་རྣམས་སུ་ཟུག་ཅིང་ན་བ་ཡིན་ཏེ། དེ་ཡང་རྩུབ་པའི་ཟས་ཟོས་པ་ལས་བྱུང་བ་ཡིན་ནོ། །གལ་ཏེ་བད་ཀན་དང་བཅས་པ་ཡིན་ན་ནི་ཕྱིས་སླ་བ་དང་།
[207a.7]དཀར་བ་དང་། སེར་བ་དང་། ལྕི་བ་དང་། སྣུམ་པ་དང་། དཔྱི་ན་བ་དང་། གཞང་ཚོར་བ་མེད་པ་སྙམ་བྱེད་པ་ཡིན་ཏེ། དེ་ནས་ཟས་སྣུམ་པ་དང་། ཟས་ལྕི་བ་ཟོས་པས་འབྱུང་ངོ་། །དེ་བཞིན་དུ་ཁྲག་དང་མཁྲིས་པ་ལས་གྱུར་པ་ཡང་རང་གི་མཚན་ཉིད་བརྟགས་
[207b]
[207b.1]ཏེ་ཁྲག་དབྱུང་བའི་ཆོ་ག་བཞིན་ཤེས་པར་བྱའོ། །ཁྲག་དང་རླུང་ལ་སོགས་བ་མ་རུངས་པར་བྱས་ན་ནི་ཉམས་སྟོབས་ཇི་ལྟ་བ་བཞིན་དུ་ཁྲུས་དང་སྨྱུང་བ་ལ་སོགས་པ་བྱའོ། །ཇི་སྲིད་དུ་ནད་ཁྲག་མ་ཟད་ཀྱི་བར་དུ་ཕྱིར་བྱུང་བ་མི་གཅད་པར་བཏང་ངོ་། །དེ་ནས་ནད་
[207b.2]རྣམས་སྨིན་པར་བྱ་བ་དང་། མེ་དྲོད་སྐྱེད་པ་དང་། ཁྲག་གཅད་པར་བྱ་བའི་ཕྱིར་སྨན་ཁ་བའི་སྦྱོར་བ་བཤད་པར་བྱ་སྟེ། སྐྱེས་བུ་གང་ནད་གཞིའི་ཉེས་པས་ལུས་ཀྱི་ཤ་ཟད་པ་དང་། རླུང་ལས་གྱུར་པའི་ཁྲག་འཛག་པའི་ནད་ལ་ནི་སྨན་ཁ་བ་རྣམས་སྣུམ་དང་བཅས་
[207b.3]པས་སྦྱར་ཏེ་བཏུང་བ་དང་བསྐུ་བ་དང་འཇམ་རྩི་མས་གཏང་བར་བྱའོ། །གང་མཁྲིས་པ་ལས་གྱུར་པའི་ཁྲག་ནི་ཚ་བའི་དུས་སུ་ཆེར་འཛག་པར་འགྱུར་ཏེ། དེ་ནི་ངེས་པར་བཅད་ཅིང་མི་འབྱུང་བའི་ཆོ་ག་བྱའོ། །རླུང་དང་བད་ཀན་ལས་གྱུར་པ་ལ་ནི་བཅད་པའི་ཆོ་ག་
[207b.4]མི་བྱའོ། །བད་ཀན་ལས་གྱུར་པའི་ཁྲག་འཛག་པ་ལ་ནི་བཅའ་སྒ་དང་། དུག་མོ་ཡུངས་ཀྱི་ཤུན་ཕྲགས་བསྐོལ་བའི་ཁུ་བ་བླུད་དོ། །ཡང་ན་རྩ་མཁྲིས་དང་། བཅའ་སྒ་དང་། བྱི་ཚོར་བ་དང་། ཙནྡན་དམར་པོ་དང་འདི་རྣམས་བསྐོལ་བའི་ཁུ་བ་བླུད་དོ། །
[207b.5]ཡང་ན་སྐྱེར་པའི་ཤུན་པ་དང་། པུ་ཤེལ་ཙི་དང་། ནིམ་པ་དང་། སེའུ་འབྲུའི་ཤུན་པ་དང་། འདི་རྣམས་བསྐོལ་བའི་ཁུ་བ་བླུད་དོ། །ཡང་ན་དུག་མོ་ཡུངས་ཀྱི་ཤུན་ཕྲགས་དང་། འབྲས་བུ་དང་། སྐྱེར་ཁཎྜ་དང་། བོང་ང་དཀར་པོ་དང་། སྦྲང་རྩི་དང་། འདི་
[207b.6]རྣམས་སྦྱར་ལ་བཏུང་ངོ་། །ཡང་ན་ཨ་པ་མརྒ་བཏགས་པའི་ཕྱེ་མ་སྦྲང་རྩི་དང་འབྲས་བཀྲུས་པའི་ཆུ་དང་ལྷན་ཅིག་བཏུང་ངོ་། །ཡང་ན་དུག་མོ་ཡུངས་ཀྱི་ཤུན་པ་རློན་པ་སྲང་བརྒྱ་ཆར་པའི་ཆུ་དང་ཚུལ་བཞིན་དུ་བསྐོལ་ཏེ། སྙིགས་མ་བོར་ལ་ཁུ་བ་དངས་མའི་ནང་དུ་བཙོད་
[207b.7]དང་པྲི་ཡངྐུ་དང་། མོན་ཆ་ར་དང་། འདི་གསུམ་སྲང་རེ་རེ་དང་། དུག་མོ་ཡུངས་སྲང་གསུམ་འདི་རྣམས་ཞིབ་ཏུ་བཏགས་པའི་ཕྱེ་མ་བཅུག་ལ་ཡང་བསྐོལ་ཏེ། ལྡེ་གུ་དྲིལ་དུ་བཏུབ་ཙམ་ན་ཕྱིར་བྱུང་བའི་ལྡེ་གུ་ལས་ཅི་རན་དུ་བཟའོ། །དེའི་འོག་ཏུ་མེ་སྟོབས་ཆེ་ཆུང་དང་
[208a]
[208a.1]སྦྱར་ཏེ་ཐུག་པ་དང་། ཐུག་པ་རྐྱང་རྐྱང་པོ་དང་། བའི་འོ་མའི་བཏུང་བ་དང་། རའི་འོ་མ་དང་བཅས་པའི་བཟའ་བ་དང་བཏུང་བ་སྦྱར་བར་བྱས་ན་ལྡེ་གུའི་ཕན་ཡོན་ནི་ཁྲག་ཚད་དུ་འཁྲུ་བ་དང་། གཞང་འབྲུམ་དང་། ཁྲག་མཁྲིས་སྟོབས་ཆེ་
[208a.2]སྟེ་གོང་འོག་གཉིས་ཀར་ཁྲག་འཛག་པ་རྣམས་ཀྱང་མྱུར་དུ་ཞི་བར་བྱེད་དོ། །ཡང་ན་དུག་མོ་ཡུངས་ཀྱི་ཤུན་ཕྲགས་སྲང་བརྒྱ། ཆུ་སྲང་ལྔ་བརྒྱ་རྩ་བཅུ་གཉིས་དང་བསྐོལ་ལ་བརྒྱད་ཆ་ལུས་པ་དང་། ཚིགས་མ་བོར་བའི་ནང་དུ་སྐྱེར་ཁཎྜ་སྐམ་པོ་དང་། ཚ་བ་གསུམ་དང་།
[208a.3]སེང་ཕྲོམ་རྣམ་པ་གཉིས་དང་། མོན་ཆ་ར་དང་། སེའུ་གཞོན་ནུའི་ཤུན་པ་དང་བིལ་བ་གཞོན་ནུ་དང་། གླ་སྒང་དང་། བཙོད་དང་། ད་ཏ་ཀའི་འབྲས་བུ་དང་། འདི་རྣམས་སྲང་རེ་རེ་དང་དུག་མོ་ཡུངས་ཀྱི་ཤུན་ཕྲགས་སྲང་བཅུ་བཏགས་པའི་ཕྱེ་མ་དང་། མར་སྲང་ཉི་ཤུ་དང་།
[208a.4]བུ་རམ་སྲང་སུམ་ཅུ་དང་དེ་རྣམས་ལྷན་ཅིག་བསྐོལ་ཏེ་ལྡེ་གུར་གྱུར་པ་དང་། སྣོད་སྣུམ་ཅན་གྱི་ནང་དུ་བཅུག་ནས་ནས་ཀྱི་ཕུང་པོའི་ནང་དུ་ཟླ་བ་ཕྱེད་བཞག་པའི་ལྡེ་གུ་ལས་རན་པར་ཟོས་ན་གཞང་འབྲུམ་ཐམས་ཅད་དང་། ཕོ་བའི་ནད་དང་། ལུད་པ་དང་དབུགས་མི་བདེ་བ་
[208a.5]སེལ་ཏོ། །ཡང་ན་སེང་ཕྲོམ་དང་། ཏིལ་དང་། མོན་ཆ་ར་དང་། བཙོད་དང་། ཙནྡན་དང་། ཨུཏྤལ་དང་། འདི་རྣམས་ཀྱི་ཕྱེ་མ་རའི་འོ་མ་དང་བཏུང་ཞིང་ཟས་ཀྱང་འབྲས་ཆན་དང་། རའི་འོ་མ་མར་དང་བཅས་པ་བཟའོ། །ཡང་ན་ཤིང་མངར་དང་། ཤུག་
[208a.6]པ་དང་། བྱི་ཚེར་བ་དང་། ཤིང་པ་ཡ་སའི་ལོ་མ་དང་། དུར་བ་དང་། འདི་རྣམས་བཏབས་པའི་ཕྱེ་མ་ཁ་ར་དཀར་པོ་དང་སྦྲང་རྩི་དང་ལྷན་ཅིག་ཆུ་གྲང་མོ་དང་སྦྱར་བའམ། ཡང་ན་རའི་འོ་མ་དང་ལྷན་ཅིག་བཏུང་ངོ་། །ཡང་ན་སེང་ཕྲོམ་དང་། པུ་ཙེ་ཤེལ་དང་། དུག་མོ་ཡུངས་དང་།
[208a.7]བཙོད་དང་། ཤིང་ཤལ་མ་ལའི་ཤུན་ཕྲགས་དང་། ཙནྡན་དང་། ཤིང་མངར་དང་། པུ་ཤེལ་ཙི་དང་། འདི་རྣམས་བཏགས་པའི་ཕྱེ་མ་འབྲས་བཀྲུས་པའི་ཆུ་དང་སྦྱར་བ་གཞང་འབྲུམ་ཁྲག་ཚད་ཅན་ལ་བླུད་དོ། །ལ་ལ་ཕུད་དང་། དུག་མོ་ཡུངས་དང་། པ་ཊ་དང་། བཅའ་སྒ་དང་། སྐྱེར་ཁཎྜ་རྣམས་
[208b]
[208b.1]ཀྱི་ཕྱེ་མ་ཟོས་ན་གཞང་འབྲུམ་ཁྲག་ཚད་ཅན་ལ་ཕན་ནོ། །ཡང་ན་ཁྲག་དང་ཟུག་གཟེར་ཤས་ཆེར་འབྱུང་བ་ལ་ནི་པ་ཡ་སྱ་དང་། ཀཎྜ་ཀ་རི་གཉིས་མར་དང་བསྐོལ་ཏེ་བླུད་དོ། །ཡང་ན་ད་ཏ་ཀི་དང་། སེང་ཕྲོམ་དང་། དུག་མོ་ཡུངས་ཀྱི་ཤུན་ཕྲགས་དང་། འབྲས་བུ་དང་ཨུཏྤ་ལ་
[208b.2]དང་། པདྨ་གེ་སར་དང་། འདི་རྣམས་མར་དང་ཆུ་དང་ཚུལ་བཞིན་དུ་བསྐོལ་བའམ་ཡང་ན་ཡ་བཀྵ་ར་དང་། མར་དང་མར་གྱི་བཞི་འགྱུར་གྱི་སེའུ་འབྲུའི་ཁུ་བ་དང་ཚུལ་བཞིན་བསྐོལ་བ་འཐུངས་ན། གཞང་འབྲུམ་ཁྲག་ཚད་དུ་འཁྲུ་བ་ཟུག་གཟེར་དང་བཅས་པ་སེལ་ཏོ། །
[208b.3]ཡང་ན་ཤ་ཁ་ར་དང་། པདྨ་གེ་སར་དང་། མར་སར་དང་ལྷན་ཅིག་སྦྱར་བའམ། ཏིལ་དང་མར་སར་ལྷན་ཅིག་སྦྱར་བས་བསྐུ་བྱུག་བྱས་ན་གཞང་འབྲུམ་ཁྲག་ཚད་དུ་འབྱུང་ཞིང་ཟུག་པ་སེལ་ཏོ། །ཡང་ན་རའི་མར་སར་དང་། མར་དང་། འོ་མ་དང་། སྲོག་ཆགས་ཐང་
[208b.4]ལས་སྐྱེས་པའི་ཤ་ཁུ་དང་རྒྱ་སྣེའུ་སྦྱར་བའི་ཚོད་མའི་ནང་དུ་དར་བའམ། དར་བ་སྐྱུར་པོ་གང་ཡང་རུང་བས་བཏབ་པའི་ཚོད་མ་དང་། འབྲས་དམར་པོའི་ཆན་ཞོའི་སྤྲིས་མ་དང་ལྷན་ཅིག་བཟའོ། །སྐོམ་དུ་ནི་འབྲས་དྲུག་ཅུ་པའི་ཆང་སར་པ་འཐུངས་ན་ཕན་ཡོན་གོང་མ་
[208b.5]དང་འདྲའོ། །དེ་བཞིན་དུ་ཆང་སར་པའི་ཉིང་ཁུ་འཐུངས་ན་གཞང་འབྲུམ་ཁྲག་ཚད་དུ་འབྱུང་བ་ལ་ཕན་པའི་མཆོག་ཡིན་ནོ། །ཐུག་པ་དང་། སྲན་མུངྒ་ལ་སོགས་པའི་ཡུ་ཤ་དང་། ཤ་ཁུ་ལ་སོགས་པ་དང་། ཀུན་དོང་དུ་སྦྱར་བའམ། ཡང་ན་ཉི་ཚེ་ཡང་རུང་སྟེ་ཟོས་
[208b.6]ན་རླུང་ཁྲག་ཤས་ཆེར་གཡོས་པ་ལས་རྒྱལ་བར་འགྱུར་རོ། །གཞང་འབྲུམ་ཁྲག་ཆེར་འཛག་སྟེ། རླུང་ཚབས་ཆེར་འཁྲུགས་ན་དེ་ལ་ནི་འབད་པ་དང་བཅས་པས་བསྲུང་བའི་ཆོ་ག་བྱའོ། །གཞང་འབྲུམ་ཁྲག་ཚད་ཅན་དང་ཁྲག་དང་མཁྲིས་པ་སྟོབས་ཆེ་ཞིང་བད་ཀན་
[208b.7]དང་རླུང་ཤས་ཆུང་བར་མཐོང་ན་དེ་ལ་ནི་རྣམ་པ་ཐམས་ཅད་དུ་བསིལ་བའི་ཆོ་ག་དེ་དག་གིས་ཞི་བར་མ་ནུས་ན་སྣུམ་ཞིང་དྲོ་བའི་ཆོ་ག་བྱ་སྟེ། ཤ་ཁུ་དྲོ་བའི་ཟས་དང་། མར་གྱི་འཇམ་རྩི་མས་གཏོང་བ་ལ་སོགས་པ་བྱའོ། །ཏིལ་མར་དང་། མར་དང་། འོ་མ་འདི་རྣམས་
[209a]
[209a.1]གང་རྙེད་པ་དྲོ་འཇམ་ཙམ་གཞང་འབྲུམ་ལ་བླུགས་སོ། །ཡང་ན་བྱི་ཚེར་བ་དང་། ཀུ་ཤ་དང་། ཀུ་ཤའི་རྩ་བ་དང་། ཤལ་མ་ལིའི་མེ་ཏོག་དང་། རྩ་བ་དང་། ནྱ་གྲོ་དྷ་དང་། ཨུ་དུམྦཱ་ར་དང་། ཨ་ཤྭདྠཱ་གསུམ་གྱི་མྱུ་གུ་དང་། འདི་རྣམས་སྲང་
[209a.2]གཉིས་གཉིས་དང་། ཆུ་བྲེ་གསུམ་དང་། འོ་མ་བྲེ་གང་དང་ཚུལ་བཞིན་དུ་བསྐོལ་ལ་འོ་མ་ལུས་པ་དང་། ཚིགས་མ་བོར་ལ་ཁུ་བའི་ནང་དུ་མོན་ཆ་ར་དང་། བཙོད་དང་། ཙནྡན་དང་། ཨུཏྤ་ལ་དང་། པྲི་ཡང་ཀུ་དང་། དུག་མོ་ཡུངས་ཀྱི་ས་བོན་དང་། པདྨ་གེ་
[209a.3]སར་དང་། འདི་རྣམས་བཏགས་པའི་ཕྱེ་མ་དང་། མར་དང་། སྦྲང་རྩི་དང་། ཤ་ཁ་རས་བཏབ་སྟེ་འདྲེས་པར་གྱུར་པ་ནི་བི་ཙེའི་འཇམ་རྩི་ཞེས་བྱ་སྟེ། དེ་ལས་མས་གཏོང་བ་བྱས་ན་ཕྱི་ས་འབྱུང་འདོད་བཞིན་དུ་མི་འོང་བ་དང་། གཞང་འབྱུང་བ་དང་། ཁྲག་འཛག་
[209a.4]པ་དང་། རིམས་རྣམས་ལ་ཕན་ནོ། །ཡང་ན་ཤིང་མངར་དང་། པྲ་པུཎྜ་རཱི་ཀ་དང་། གོང་མའི་སྨན་མོན་ཆ་ར་ལ་སོགས་པ་དང་། སྨན་སྤྱིའི་ཉིས་འགྱུར་གྱི་འོ་མ་དང་། མར་ལ་སོགས་པའི་སྣུམ་དང་ཚུལ་བཞིན་དུ་བསྐོལ་ཏེ། ཨ་ནུ་བ་ས་ན་བཏང་ངོ་། །ཡང་ན་
[209a.5]ཤིང་མངར་དང་། ཨུཏྤ་ལ་དང་། སེང་ཕྲོམ་དང་། བ་ལ་ཀ་དང་། བཙོད་དང་། བིལ་བ་དང་། དབྱི་མོ་དང་། བོང་ང་དཀར་པོ་དང་། གླ་སྒང་དང་། པ་ཊ་དང་། ཡ་བཀྵ་ར་དང་། སྐྱེར་པ་དང་། ཤིང་ཚ་དང་། དོད་གྲ་དང་། སྤང་སྤོས་དང་། ཙི་ཏྲ་ཀ་དང་།
[209a.6]ཐང་ཤིང་དང་། ཙ་ཀོ་རའི་རང་གི་ཁུ་བ་དང་འདི་རྣམས་མར་དང་ཚུལ་བཞིན་དུ་བསྐོལ་བ་ལས་རན་པར་འཐུངས་ན་ནད་གཞི་གསུམ་འཇོམས་ཏེ། ཁྱད་པར་དུ་གཞང་འབྲུམ་དང་། ཚད་པས་འཁྲུ་བ་དང་། ཕོ་བའི་ནད་དང་། སྐྱ་རྦབ་དང་། རིམས་དང་། ཡི་ག་
[209a.7]འཆུས་པ་དང་། གཅིན་སྲི་བ་དང་། གཞང་བྱུང་བ་དང་། ཆུ་སོ་ན་བ་དང་། ལྟོ་སྦོས་པ་དང་། ཕྱི་ས་ཡང་དང་ཡང་དུ་འབྱུང་བ་དང་། བེའུ་སྣབས་སུ་འཁྲུ་བ་དང་། གཞང་འབྲུམ་ཟུག་ཅིང་ན་བ་དང་། འདི་རྣམས་ལ་སྨན་འདི་ནི་མཆོག་ཏུ་བསྔགས་སོ། །གཞང་
[209b]
[209b.1]འབྲུམ་འཁྲུགས་པར་གྱུར་པ་ལ་ནི། སྨན་མངར་བ་དང་། སྐྱུར་བ་དང་། གྲང་བ་དང་། དྲོ་བ་ལ་སོགས་པ་ལ་མེའི་སྟོབས་ཆེ་ཆུང་དང་སྦྱར་ཏེ་རྟག་ཏུ་བཏང་ན་ཞི་བར་འགྱུར་རོ། །རྟུག་སྐམ་གྱི་ནད་ལ་ནི་གྲང་བའི་རིམས་གསོ་བའི་བསྐུ་བྱུག་བཞིན་དུ་འདིར་ཡང་ཏིལ་མར་གྱི་བསྐུ་
[209b.2]བྱུག་དང་སྣུམ་ཆོས་ལེགས་པར་བྱས་ལ་དེ་ནས་དུགས་བྱའོ། །དེ་ནས་དུར་བྱིད་དང་། དན་ཏི་དང་། པི་པི་ལིང་དང་། ནི་ལི་ནིའི་འབྲས་བུ་དང་། པོ་སོན་ཆའི་འབྲས་བུ་དང་། སྨན་གཅིག་གི་ཉིས་འགྱུར་གྱི་ལན་ཚྭ་རྣམ་གཉིས་དང་། འདི་རྣམས་ཀྱི་ཕྱེ་མ་བུད་མེད་ཀྱི་
[209b.3]འོ་མ་དང་བ་གཅིན་དང་སྦྱར་བའི་རེང་བུ་ལག་པའི་མཐེ་བོང་ཙམ་བྱ་སྟེ། བཤང་བའི་ལམ་དུ་རེང་བུ་མར་གྱིས་བསྐུས་ལ་མས་ཡར་བཅུག་ན་རྟུག་སྐམ་ཚུལ་བཞིན་དུ་འབྱུང་ངོ་། །ཡང་ན་པི་པི་ལིང་དང་། པོ་སོན་ཆ་དང་། ཁྱིམ་གྱི་དུད་པ་དང་། ཡུངས་ཀར་དང་། འདི་
[209b.4]རྣམས་གོང་མ་བཞིན་བ་གཅིན་དང་བུ་རམ་དང་སྦྱར་ཏེ་མས་གཏོང་ན་རྟུག་སྐམ་ལེགས་པར་འབྱུང་ངོ་། །ཡང་ན་གོང་མའི་སྨན་གྱི་སྦྱོར་བ་གཉིས་པའི་སྨན་གྱི་ཕྱེ་མ་སྨྱུག་མ་ལ་སོགས་པའི་སྦུབས་སུ་བཅུག་པ་རྐུབ་ནས་བཅུག་སྟེ་བུད་པར་བྱའོ། །དེས་ཀྱང་མ་ཕན་ན་སྨན་རྣོ་བ་དང་སྣུམ་གྱི་
[209b.5]འཇམ་རྩི་མས་གཏོང་བར་བྱའོ། །འཇམ་རྩིའི་སྦུ་གུ་དེ་ཡང་དྲང་པོར་བྱ་སྟེ། ལེགས་པར་བཏང་ན་རྟུག་སྐམ་དང་རླུང་བདེ་བར་འབྱུང་ངོ་། །གལ་ཏེ་ཁོང་རྩུབ་པས་རླུང་དང་རྟུག་སྐམ་དེ་འབྱུང་དུ་མ་འདོད་ན། རླུང་འཇོམས་པའི་བཀྲུ་སྨན་སྣུམ་དང་བཅས་པ་དང་། ཨ་ནུ་བ་ས་
[209b.6]ན་གཏང་ངོ་། །ཡང་ན་ལན་ཚྭ་རྣམ་གསུམ་དང་། ཚ་བ་གསུམ་དང་། འབྲས་བུ་གསུམ་དང་། དན་ཏི་དང་། བ་ལ་ད་ཀ་དང་། ཙི་ཏྲ་ཀ་དང་འདི་རྣམས་བཏགས་པའི་ཕྱེ་མ་མར་དང་བ་གཅིན་དང་སྦྲུས་ལ་རྫ་མ་ཁ་སྦྱར་གྱི་ནང་དུ་བཅུག་སྟེ་དུད་པ་མ་ཤོར་བར་མཚམས་
[209b.7]འཇིམ་པས་གླན་ཏེ་མེའི་ནང་དུ་བསྲེགས་ལ་དུ་བ་ནང་དུ་ཞུ་སྟེ་ཐལ་བར་སོང་བ་ནི་དགེ་བའི་ཐལ་བ་ཞེས་བྱ་སྟེ། མར་དང་ལྷན་ཅིག་བཏུང་བའམ། ཡང་ན་འབྲས་ཆན་ནམ། སྣུམ་དང་ལྡན་པའི་ཟས་དང་ལྷན་ཅིག་ཟོས་ན་རྟུག་པ་འགགས་པ་དང་། གཞང་འབྲུམ་དང་། སྐྲན་
[210a]
[210a.1]དང་། སྐྱ་རྦབ་དང་། དམུ་རྫིང་དང་། སྲིན་ནད་དང་། གཅིན་འགགས་པ་དང་། རྡེའུ་ཆགས་པ་དང་། སྐྲང་བ་དང་། སྙིང་ནད་དང་། ཕོ་བའི་ནད་དང་། མཆིན་པ་ན་བ་དང་། ལྟོ་སྦོ་བ་དང་། དབུགས་མི་བདེ་བ་དང་། ལུད་པ་ལུ་བ་རྣམས་
[210a.2]འཇོམས་སོ། །གཞན་ཡང་གཞང་འབྲུམ་གྱི་རྟུག་པ་སྐ་བའི་ཆོ་ག་བཤད་པ་ཐམས་ཅད་འདིར་སྦྱར་བར་བྱའོ། །གཞན་ཡང་པུ་ཏི་ཀ་རཉྫའི་ཤུན་པ་སྲང་ཉིས་བརྒྱ། ཆུ་སྲང་ལྔ་བརྒྱ་རྩ་བཅུ་གཉིས་ཀྱི་ནང་དུ་བསྐོལ་ཏེ་བཞི་ཆ་ལུས་པ་དང་། ཚིགས་མ་བོར་ལ་དངས་
[210a.3]མའི་ནང་དུ་བུ་རམ་སྲང་བརྒྱད་ཅུ་དང་། ཚ་བ་གསུམ་སྲང་བརྒྱད་ཞིབ་ཏུ་བཏགས་པའི་ཕྱེ་མ་བཅུག་སྟེ་བསྲེགས་ལ་ཟླ་བ་གཅིག་བཞག་སྟེ་རང་གི་དྲོད་ཀྱིས་ལེགས་པར་སྨིན་པ་དང་ཅུང་ཞིག་སྐྱུར་བར་འགྱུར་ཏེ། དེ་ལས་རན་པར་འཐུངས་ན་རླུང་ལེགས་པར་འབྱུང་ཞིང་
[210a.4]གཞང་འབྲུམ་དང་། མཆེར་པའི་ནད་དང་། སྐྲན་དང་། དམུ་རྫིང་རྣམས་ལས་རྒྱལ་བར་འགྱུར་རོ། །ཡང་ན་པུ་ཏི་ཀ་རཉྫ་ཞེས་བྱ་བ་སྲིན་སྨན་རྨེ་རུ་སྲང་བརྒྱད་དང་། རྩ་བ་གཉིས་པོ་ཙི་ཏྲ་ཀ་དང་། ཀཎྜ་ཀ་རི་གཉིས་ཀྱང་སྲང་བརྒྱད་བརྒྱད་དང་། ཆུ་
[210a.5]སྲང་སྟོང་ལྔ་བརྒྱ་སུམ་ཅུ་རྩ་དྲུག་བསྐོལ་ཏེ། བཞི་ཆ་སུམ་བརྒྱ་བརྒྱད་ཅུ་རྩ་བཞི་ལུས་པ་དང་། ཚིགས་མ་བོར་ཏེ་བསྒྲངས་པའི་ནང་དུ་དྲི་སྣ་གསུམ་དང་། ཚ་བ་གསུམ་དང་། པི་པི་ལིང་གི་རྩ་བ་དང་། སེའུ་འབྲུ་དང་། སྲུ་སྲུའི་རྩ་བ་དང་། གུ་གུལ་དང་། མ་ནུ་
[210a.6]དང་། འུ་སུ་དང་། དབྱི་མོ་དང་། སྤ་མའི་འབྲས་བུ་དང་། སྒེའུ་གཤེར་དང་། སྟར་བུ་དང་འདི་རྣམས་སྲང་རེ་རེ་ཞིབ་ཏུ་བཏགས་པའི་ཕྱེ་མ་སྦྲང་རྩི་དང་། རྒུན་འབྲུམ་དང་། སྐྱུར་རྩི་ཆེན་པོ་དང་། སྒེའུ་གཤེར་དང་འདི་རྣམས་རློན་པ་བརྗིད་པའི་ཁུ་བ་སྲང་
[210a.7]ཉི་ཤུ་ཉི་ཤུ་དང་། བུ་རམ་ཤིང་གི་ཁུ་བ་ཅི་མང་དུ་བླུགས་ཏེ། འདི་རྣམས་ལྷན་ཅིག་སྣོད་སྣུམ་ཅན་གྱི་ནང་དུ་བཅུག་པ་ཟླ་བ་གཅིག་བཞག་སྟེ་སྨིན་ནས་སྐྱུར་པོར་གྱུར་པ་དང་། དེ་ལས་རན་པར་འཐུངས་ན་ཤིང་སོག་ལེས་བཅད་པ་བཞིན་དུ་གཞང་འབྲུམ་འཇོམས་ཏེ།
[210b]
[210b.1]ཁྱད་པར་དུ་མེའི་དྲོད་སྐྱེད་པར་བྱེད་པའི་མཆོག་ཡིན་ནོ། །དེ་བཞིན་དུ་སྐྱ་རྦབ་དང་། དབྱིག་དུག་དང་། དམུ་རྫིང་དང་། སྐྲན་དང་། མཆེར་པ་ན་བ་དང་། ལྟོ་སྦོ་བ་དང་། རྡེའུ་ཆགས་པ་དང་། གཅིན་སྲི་བ་རྣམས་སེལ་ཏོ། །ཡང་ན་ཤིང་པི་ལུའི་
[210b.2]འབྲས་བུ་ཁུ་བ་སྲང་ལྔ་བརྒྱ་བཅུ་གཉིས་ལེགས་པར་རས་དང་བཙིར་ལ། སྣོད་སྣུམ་ཅན་གྱི་ནང་དུ་བཅུག་སྟེ་དེའི་ནང་དུ་ད་ཏ་ཀི་དང་། རྒུན་འབྲུམ་སྲང་གཉིས་གཉིས་དང་། འབྲ་གོ་དང་། སྐྱུ་རུ་རའི་འབྲས་བུ་དང་འདི་གཉིས་སྲང་གཉིས་གཉིས་དང་། པ་ཐ་
[210b.3]དང་། བོང་ང་དཀར་པོ་དང་། བྱི་ཚེར་བ་དང་། སྟར་བུ་དང་། ཚ་བ་གསུམ་དང་། ཤིང་ཚ་དང་། སུག་སྨེལ་དང་། འུ་སུ་དང་། འབུ་སུ་ཧང་དང་། བུ་ཚང་རྡོ་དང་། ལི་ཤི་དང་། བྱི་དང་ག་དང་། པི་པི་ལིང་གི་རྩ་བ་དང་། ཀྲུ་ཏྲུག་ཏྲེས་དང་། འདི་
[210b.4]རྣམས་སྲང་རེ་རེ་བཏགས་པའི་ཕྱེ་མ་དང་། བུ་རམ་སྲང་བརྒྱ་བཅུག་སྟེ། རླུང་མེད་པའི་གནས་སུ་ཟླ་བ་ཕྱེད་བཞག་ནས་དེ་ལས་རན་པར་འཐུངས་ན་གཞང་འབྲུམ་དང་སྐྲན་རྣམས་ཞི་བར་བྱེད་དེ་མེའི་སྟོབས་སྐྱེད་ཅིང་མྱུར་དུ་འཇུ་བར་འགྱུར་རོ། །ཡང་ན་རྩ་བ་བཅུ་
[210b.5]པ་དང་། དུར་བྱིད་དང་། པ་ཐ་དང་། ཨརྐ་རྣམ་གཉིས་དང་། བོང་ང་དཀར་པོ་དང་། ཀད་ཕ་ལ་དང་། འདི་རྣམས་སྲང་བཅུ་བཅུ་བཏགས་ལ་སྦྱོར་བ་གོང་མ་བཞིན་དུ་རྫ་མ་ཁ་སྦྱར་གྱི་ནང་དུ་བསྲེགས་ཏེ་ཐལ་བར་གྱུར་པ་དང་། ཆུ་སྲང་ལྔ་བརྒྱ་བཅུ་གཉིས་
[210b.6]ཀྱི་ནང་དུ་བཅུག་ལ་རས་ཀྱིས་བཙགས་ནས་ཚིགས་མ་བོར་ལ་དངས་མ་དེ་རྫ་བུམ་གྱི་ནང་དུ་བསྐོལ་ནས་བཞི་ཆ་སྲང་བརྒྱ་ཉི་ཤུ་རྩ་བརྒྱད་ལུས་པ་དང་། དེའི་ནང་དུ་བུ་རམ་སྲང་བརྒྱ་དང་། ཚ་བ་གསུམ་དང་། དབྱི་མོ་དང་། ཨ་རུ་ར་སྲང་ལྔ་ལྔ་དང་། ཙི་ཏྲ་ཀ་
[210b.7]སྲང་གཉིས་དང་། ཡ་བཀྵ་ར་སྲང་གཉིས་དང་། དེ་རྣམས་ཞིབ་ཏུ་བཏགས་པའི་ཕྱེ་མ་བཅུག་ལ་ཡང་བསྐོལ་ཏེ། ལྡེ་གུ་དྲིལ་དུ་བཏུབ་ཙམ་ན་ཕྱིར་ཕྱུང་བས་ན་བུ་རམ་གྱི་ལྡེ་གུ་ཞེས་བྱ་སྟེ། དེ་ལས་རན་པར་ཟོས་ན་སྐྲན་དང་། མཆེར་པའི་ནད་དང་།
[211a]
[211a.1]གཞང་འབྲུམ་དང་། མཛེ་དང་། གཅིན་ནད་དང་མེའི་དྲོད་ཉམས་པ་འཇོམས་པར་བྱེད་དོ། །ཡང་ན་ཀྲུ་ཏྲུག་ཏྲེས་ཀྱི་རྩ་བ་ལྔ་བཅུ་ཆུ་སྲང་ལྔ་བཅུ་བརྒྱ་བཅུ་གཉིས་ཀྱི་ནང་དུ་བསྐོལ་ཏེ་བརྒྱད་ཆ་སྲང་དྲུག་ཅུ་རྩ་བཞི་ལུས་པ་དང་། དེའི་ནང་དུ་བུ་རམ་རྙིང་པ་
[211a.2]སྲང་བརྒྱད་བཅུག་སྟེ་ཡང་བསྐོལ་ལ་ཅུང་ཞིག་སྐ་བར་གྱུར་པ་དང་། དེའི་ནང་ཚ་བ་གསུམ་དང་། ཤུ་ཏི་དང་། ཨ་རུ་ར་དང་། རུ་རྟ་དང་། དུར་བྱིད་དང་། བྱི་དང་ག་དང་། ཤིང་ཚ་དང་། ཙི་ཏྲ་ཀ་དང་། སུག་སྨེལ་དང་། འདི་རྣམས་བཏགས་པའི་ཕྱེ་མ་བཅུག་ལ་
[211a.3]དཀྲུགས་ནས་ལྡེ་གུར་གྱུར་པ་ལས་རན་པར་ཟོས་ན་གཞང་འབྲུམ་དང་། མཛེ་དང་། མཆེར་པ་ན་བ་དང་། སྐྲན་དང་། དམུ་རྫིང་རྣམས་ལས་རྒྱལ་བར་བྱེད་དོ། །རྟག་ཏུ་གོམས་པར་བྱས་ན་མེའི་དྲོད་སྐྱེད་པར་བྱེད་དོ། །ཡང་ན་ཚ་བ་གསུམ་དང་། འབྲས་བུ་
[211a.4]གསུམ་དང་། བྱི་དང་ག་དང་། ཏིལ་དང་། གོ་བྱེ་དང་། ཙི་ཏྲ་ཀ་འདི་རྣམས་བུ་རམ་དང་རི་ལུར་བྱས་ཏེ་བཏང་ན་གཞང་འབྲུམ་སེལ་ཞིང་མེ་དྲོད་སྐྱེད་པར་བྱེད་དོ། །སྨན་སུ་ར་ནའི་རྩ་བ་རྫ་མ་ཁ་སྦྱར་གྱི་ནང་དུ་བཅུག་སྟེ། མཚམས་སུ་འཇིམ་པས་བསྐུས་ནས་
[211a.5]ཆོ་ག་བཞིན་བསྲེགས་ཏེ་ཐལ་བར་གྱུར་པ་དང་། ལན་ཚྭ་དང་། ཏིལ་མར་དང་སྦྱར་ཏེ་ཟོས་ན་གཞང་འབྲུམ་ཟློག་པར་བྱེད་དོ། །ན་ལེ་ཤམ་དང་། པི་པི་ལིང་དང་། དོང་གྲ་དང་། ཀྲུ་ཏྲུག་ཏྲེས་དང་། དེ་རྣམས་ཡས་ཀྱི་རིམ་པ་བཞིན་དུ་ཆ་རེས་བསྐྱེད་དོ། །ཀྲུ་ཏྲུག་
[211a.6]ཏྲེས་ཀྱི་བཞི་འགྱུར་གྱི་ཤལ་མ་ལི་དང་། སྨན་དེ་རྣམས་སྤྱིའི་ཉིས་འགྱུར་གྱི་བུ་རམ་དང་། རི་ལུར་བྱས་ཏེ་དེ་ལས་རན་པར་ཟོས་ན་གཞང་འབྲུམ་གཅོད་པར་བྱེད་དོ། །ཡང་ན་ན་ལེ་ཤམ་དང་། དེའི་ཉིས་འགྱུར་གྱི་བཅའ་སྒ་དང་། དེའི་བཞི་འགྱུར་གྱི་ཀྲུ་ཏྲུག་ཏྲེས་
[211a.7]དང་། དེའི་ཉིས་འགྱུར་གྱི་སུ་ར་ན་རྣམས་བཏགས་པའི་ཉིས་འགྱུར་གྱི་བུ་རམ་དང་། རི་ལུར་བྱས་ཏེ་ཟོས་ན་གཞང་འབྲུམ་སེལ་ཏོ། །ཨ་རུ་ར་དང་། དོང་གྲ་དང་། པི་པི་ལིང་དང་། ཀ་རཉྫ་དང་། བྱི་དང་ག་དང་། ཀྲུ་ཏྲུག་ཏྲེས་དང་། འདི་རྣམས་བཏགས་པ་དང་
[211b]
[211b.1]མཉམ་པའི་ཁ་ར་དཀར་པོ་དང་བསྲེས་པའི་ཕྱེ་མ་དེ་ལས་རན་པར་ཟོས་ན་ཟས་ལྕི་བ་དང་། མང་དུ་ཟོས་ཀྱང་མྱུར་དུ་འཇུ་བར་བྱེད་དེ་རྟ་གདོང་བཞིན་ནོ། །དུག་མོ་ཡུངས་དང་། ལང་ག་ལི་དང་། པི་པི་ལིང་དང་། ཀྲུ་ཏྲུག་ཏྲེས་དང་། ཨ་པ་མརྒའི་ས་བོན་དང་། ནིམ་པ་དང་།
[211b.2]རྒྱམ་ཚ་དང་། དེ་རྣམས་ཀྱི་ཕྱེ་མའི་ཉིས་འགྱུར་གྱི་བུ་རམ་དང་རི་ལུར་བྱས་ཏེ་ཟོས་ན་གཞང་འབྲུམ་སེལ་ཏོ། །གཞང་འབྲུམ་གཞོམ་པར་འདོད་པས་ཀྲུ་ཏྲུག་ཏྲེས་དང་དུག་མོ་ཡུངས་དང་། ཙི་རི་བིལ་བ་དང་། ནིམ་པ་དང་། རྒྱམ་ཚ་དང་། འདི་རྣམས་བཏགས་པའི་
[211b.3]ཕྱེ་མ་དར་བའི་ནང་དུ་བསྐྱོས་ཏེ་ཞག་བདུན་གྱི་བར་དུ་བཏུང་བར་བྱའོ། །མདོར་ན་གཞང་འབྲུམ་སྐམ་པོ་ལ་ནི་བ་ལ་ད་ཀ་དང་། གཞང་འབྲུམ་གཤེར་བ་ལ་ནི་དུག་མོ་ཡུངས་ཀྱི་ཤུན་ཕྲགས་ཕན་པའི་མཆོག་ཏུ་བཤད་དོ། །གཞང་འབྲུམ་ཐམས་ཅད་ལ་དར་བ་
[211b.4]བསྟེན་ན་སྟོབས་སྐྱེད་ཅིང་ཉེས་པ་འཇོམས་སོ། །རླུང་དང་བད་ཀན་ལ་སོགས་པས་རྟུག་པ་འགག་པའི་གཞང་འབྲུམ་ལ་ནི་མེའི་དྲོད་སྐྱེད་པ་དང་། མཐུན་པའི་བཟའ་བཏུང་དང་སྨན་རྣམས་བསྟེན་པར་བྱ་སྟེ། ཆོ་ག་དེ་ལྟར་མ་བྱས་ན་ནི་ཕྱིན་ཅི་ལོག་ཏུ་འགྱུར་རོ། །
[211b.5]གཞང་འབྲུམ་དང་། འཁྲུ་བ་དང་། ཕོ་བའི་ནད་གཞི་དང་། འདི་རྣམས་ཕལ་ཆེར་གཅིག་ལ་གཅིག་རྗེས་སུ་འབྲེལ་པ་ཡིན་ཏེ། དེ་དག་ཀྱང་མེའི་དྲོད་ཉམ་ཆུང་བ་ལས་གྱུར་པ་ཡིན་པས་ཁྱད་པར་དུ་མེའི་དྲོད་བསྲུང་བ་ལ་འབད་པར་བྱའོ། །གསོ་བའི་
[211b.6]གནས་ལས་གཞང་འབྲུམ་གསོ་བའི་ལེའུ་བརྒྱད་པ་རྫོགས་སོ།། །།དེ་ནས་འཁྲུ་བ་གསོ་བའི་ལེའུ་བཤད་པར་བྱ་སྟེ། མེའི་དྲོད་ཉམས་པས་མ་ཞུ་བའི་གནས་ཕོ་བ་ལ་བརྟེན་ནས་ཤས་ཆེར་འཁྲུ་བར་འགྱུར་ཏེ། དེ་ལ་ནི་ཐོག་མར་སྨིན་པར་བྱ་བའི་
[211b.7]ཕྱིར་རླུང་ལས་གྱུར་པ་ཡིན་ན་ཡང་སྨྱུང་བ་བྱས་ན་ཕན་ནོ། །དེ་ལྟར་འཁྲུ་བ་ནི་ཁོང་དུ་ཟུག་གཟེར་ཆེ་ཞིང་ལྟོ་ལྕི་ལ་ཆམ་པས་ཉམ་ཐག་པ་ལ་ནི་སྐྱུག་སྨན་བྱའོ། །ནད་གཞི་ཁོང་དུ་སྩོགས་པར་ཁ་ཟས་ཚུལ་བཞིན་མི་འཇུ་སྟེ། ནད་གཞི་དང་འདྲེས་ནས་ཤས་
[212a]
[212a.1]ཆེར་འཁྲུ་ལ་རང་ཉིད་འཁྲུ་བ་ནི་ཞུ་བས་འཁྲུ་བ་ཞེས་བྱ་སྟེ། དང་པོར་སྨན་དཔྱད་མི་བྱ་བར་བཏང་སྙོམས་སུ་བཞག་གོ། །མ་ཞུ་བས་འཁྲུ་བ་ལ་ཡང་ཚུལ་དེ་ལྟར་དང་པོ་གཅོད་པའི་སྨན་དཔྱད་མི་བྱའོ། །གཞན་ཡང་ལྟོ་སྦོ་བ་དང་། ལུས་ལྕི་བ་དང་། ཟུག་
[212a.2]གཟེར་ཆེ་བ་དང་། དྲན་པ་མི་གསལ་ཞིང་འཁྲུ་བ་ཆེར་མི་འབྱུང་བ་ལ་ནི་ཨ་རུ་ར་བྱིན་ཏེ་བདེ་བར་འཁྲུར་གཞུག་གོ། །ནད་ཚབས་མི་ཆེ་བའི་འཁྲུ་བ་ལ་ནི་ཉུང་བ་བསྐམ་པར་བྱ་བའི་ཕྱིར་བྷུ་ཏི་ཀ་དང་། པི་པི་ལིང་དང་། བཅའ་སྒ་དང་། ཤུ་དག་དང་། འུ་སུ་དང་།
[212a.3]ཨ་རུ་ར་དང་། འདི་རྣམས་ཤས་ཆེར་བསྐོལ་ཏེ་བླུད་དོ། །ཡང་ན་བིལ་བ་དང་། འུ་སུ་དང་། གླ་སྒང་དང་། དོང་གྲ་དང་། བ་ལ་ཀ་དང་། འདི་རྣམས་བསྐོལ་བའི་ཁུ་བ་བླུད་པའམ། ཡང་ན་བིལ་བ་དང་། འུ་སུ་དང་། གླ་སྒང་དང་། བཅའ་སྒ་དང་།
[212a.4]བ་ལ་ཀ་དང་། འདི་རྣམས་བསྐོལ་བའི་ཆུའམ། ཡང་ན་ལན་ཚྭ་བི་ད་དང་། པ་ཐ་དང་། ཤུ་དག་དང་། ཨ་རུ་ར་དང་། བྱི་དང་ག་དང་། དོང་གྲ་དང་། འདི་རྣམས་བསྐོལ་བའམ། ཡང་ན་བཅའ་སྒ་དང་། ག་པུར་དང་། ཤུ་དག་དང་། བོང་ང་དཀར་
[212a.5]པོ་དང་། བིལ་བ་དང་། དུག་མོ་ཡུངས་དང་། ཤིང་ཀུན་དང་། འདི་རྣམས་བསྐོལ་བའི་ཁུ་བ་བླུད་དོ། །ནད་གཞི་ཅུང་ཟད་ཚབས་ཆུང་ངུར་འཁྲུ་བ་ལ་ནི་ཤུ་དག་དང་། བོང་ང་དཀར་པོ་བསྐོལ་བའམ། ཡང་ན་ལྡུམ་བུ་སྐྲ་བཟངས་བསྐོལ་བའམ། ཡང་
[212a.6]ན་བ་ལ་ཀ་ཏ་དང་། དོང་གྲ་བསྐོལ་བའི་ཆུ་བླུད་དོ། །ལུས་ཉམ་ཆུང་ཞིང་བཀྲེས་པ་ལ་ཟས་ཀྱི་ཚོད་ལ་བབ་པ་ལྟ་ན་ཐུག་པ་ལ་སོགས་པ་ཡང་བའི་ཟས་སྦྱིན་ནོ། །དེ་ལྟར་གོང་དུ་སྨོས་པའི་རིམ་པ་དག་བྱས་ན་ཟས་ཡི་གར་འོང་ཞིང་མེའི་དྲོད་སྐྱེད་ལ་ཉམས་སྟོབས་
[212a.7]འཕེལ་བར་འགྱུར་རོ། །དེ་ལྟར་འཁྲུ་བའི་ནད་པ་དེ་གང་ལ་གོམས་པའི་བཏུང་བ་ལ་སོགས་པ་དེས་གསོ་བར་བྱ་སྟེ། དེ་ཡང་དར་བའམ། རང་སྐྱུར་རམ། ཐུག་པའམ། སྐྱོ་མའམ། ཆང་ངམ། རྒུན་ཆང་ངམ། གང་ཡང་རུང་བས་བྱའོ། །དེ་ནས་ཐུག་
[212b]
[212b.1]པ་ལ་སོགས་པའི་བཟའ་བ་སྦྱར་ཏེ། དེ་ཡང་མེ་དྲོད་བསྐྱེད་པ་དང་། སྨན་པ་དང་། འཁྲུ་བ་གཅོད་པའི་སྨན་པ་ལ་ན་དང་། ཟུར་པ་དཀར་པོ་དང་། འུ་སུ་དང་། ཤིང་ཀུན་དང་། ད་ཏྲིག་དང་། བལ་པོ་སེའུ་དང་། པ་ལ་ཤ་དང་། སྤ་མའི་འབྲས་བུ་དང་། ཟི་
[212b.2]ར་དང་། ལ་ལ་ཕུད་དང་། བི་དྷ་ལྕེ་མྱང་ཚ་དང་། རྩ་བ་ཆུང་ངུ་ལྔ་དང་། པ་ཐ་དང་། འདི་རྣམས་བཟའ་བ་དང་བཏུང་བ་དང་ཅི་རིགས་པར་སྦྱར་ཏེ་བཟའོ། །བད་ཀན་དང་མཁྲིས་པ་ཤས་ཆེ་བའི་འཁྲུ་བ་ལ་ནི་ས་ལ་པརྞི་དང་། བ་ལ་དང་། བིལ་བ་དང་། ཀྲྀཥྞ་
[212b.3]པརྞི་དང་། འདི་རྣམས་ལས་གཞི་བླངས་པའི་ཐུག་པའི་ནང་དུ་སེའུ་འབྲུ་སྐྱུར་པོ་བཏབ་སྟེ་བླུད་ན་ཕན་ནོ། །འཁྲུ་བ་འགགས་པ་ལ་ནི་ཨ་རུ་ར་དང་། པི་པི་ལིང་དང་། པི་པི་ལིང་གི་རྩ་བ་དང་། བིལ་བ་དང་། དེ་དག་ལས་གཞི་བླངས་པའི་ཐུག་པ་བླུད་ན་རླུང་བདེ་བར་
[212b.4]འབྱུང་ངོ་། །ནད་གཞི་མང་པོ་འཁྲུགས་ཏེ་འཁྲུ་བ་འགགས་པ་དང་། མེའི་དྲོད་ཆེ་བ་ལ་ནི་པི་པི་ལིང་དང་། བྱི་དང་ག་དང་། འབྲས་བུ་གསུམ་དང་། འདི་རྣམས་བསྐོལ་བའི་བཀྲུ་སྨན་གཏང་ངོ་། །དེ་ལྟར་ཁྲུས་བྱས་པའི་འོག་ཏུ་རླུང་འཇོམས་པ་དང་།
[212b.5]མེའི་དྲོད་སྐྱེད་པའི་སྨན་ཚ་བ་ལྔ་ལ་སོགས་པ་དང་སྦྱར་བའི་ཐུག་པ་བླུད་དོ། །མ་ཞུ་བའི་འཁྲུ་བ་སྨིན་ནས་མེའི་དྲོད་སྐྱེད་དེ། ཞུ་བར་འཁྲུ་ལ་དེ་ཡང་དང་ཡང་དུ་ཉུང་ངུ་ཉུང་ངུར་འབྱུང་ཞིང་མཁྲེགས་པ་དང་། དབུ་བ་དང་། བེའུ་སྣབས་དང་། དྲི་མ་དང་ནད་དང་བཅས་
[212b.6]པར་འབྱུང་བའམ། ཡང་ན་ཕྱི་ས་བཙིར་ཡང་མི་འབྱུང་བ་ལ་ནི་ཞོ་དང་། འོ་མ་དང་། མར་དང་། བཅའ་སྒ་དང་བུ་རམ་དང་སྦྱར་བ་བཏུང་ངོ་། །ཡང་ན་རྒྱ་ཤུག་གི་འབྲས་བུ་སྦངས་པ་བུ་རམ་དང་ཏིལ་མར་དུ་བཅས་པ་བཟའོ། །འཁྲུ་བ་འབྱུང་དཀའ་སྟེ་འགགས་
[212b.7]པ་ལ་ནི་རྒྱ་སྣེའུའི་ཚོད་མ་ལ་སོགས་པ་དང་། དེ་བཞིན་དུ་ཤ་ཁུ་མར་མང་པོ་དང་སྦྱར་བའི་ནང་དུ་ཞོ་དང་སེའུ་ལ་སོགས་པ་སྦྱར་བའམ་ཡང་ན་མ་ཤ་དང་། མོན་སྲན་སྡེའུ་དང་། ཏིལ་མར་དང་ལེགས་པར་སྦྱར་བ་གང་ཡང་རུང་བ་དང་། འབྲས་ཆན་དུ་བྱས་པ་བཟའོ། །
[213a]
[213a.1]ཡང་ན་ཟུར་པ་དང་། ཨ་མུ་ལ་དང་། ཀ་པོ་ཏི་དང་། པ་ཐ་དང་། སྭ་སྟི་ཀའི་ཚོད་མའམ། ཡང་ན་ཤུ་ཤ་དང་། ལ་ལ་ཕུད་དང་། ཀ་ར་ཏ་དང་། ཀྵི་རི་ནི་དང་། ཙིར་བི་དའི་ཚོད་མའམ་ཡང་ན་ཨུ་པོ་ད་ཀ་དང་། ཛི་བན་ཏི་དང་། བ་ཀུ་ཛི་དང་།
[213a.2]རྒྱ་སྣེའུའི་ཚོད་མའམ། ཡང་ན་ལྕམ་པ་དང་། ཨེ་རཎྜ་དང་། ལོ་ན་ཀི་དང་། འདི་རྣམས་ཀྱི་ཚོད་མ་གང་ཡང་རུང་བ་ཞོ་དང་ལེགས་པར་སྦྱར་བ་དང་། འབྲས་ཆན་བཟའ་བ་དང་། ཡང་ན་རུས་སྦལ་དང་། བྱེའུ་བར་ཏ་ཀ་དང་། སྤར་བ་དང་། རྨ་བྱ་དང་། སྲེག་པ་དང་།
[213a.3]ཁྱིམ་བྱ་གང་ཡང་རུང་བའི་ཤ་ཁུ་དང་བཅས་པའི་བཟའ་བ་སྦྱིན་ནོ། །བིལ་བ་དང་། གླ་སྒང་དང་། བ་རུ་ར་དང་། ད་ཏ་ཀའི་མེ་ཏོག་དང་། དོང་གྲ་དང་འདི་རྣམས་དར་བ་དང་སྦྱར་བའི་ཐུག་པ་འཐུངས་ན་ཞུ་བའི་འཁྲུ་བ་སེལ་ཏོ། །ཀ་པིད་ཏ་དང་། ཀ་ཙུ་ར་དང་།
[213a.4]ག་བྲའི་རྩ་བ་དང་། ཡུ་ཏི་ཀ་དང་། ནྱ་གྲོ་དྷའི་མྱུ་གུ་དང་། སེའུ་འབྲུ་དང་། ཤ་ནའི་རས་བལ་དང་། ཤ་མ་ལི་དང་། དེ་རྣམས་ཀྱི་ལོ་མ་བཏགས་པ། ཞོ་དང་སྦྱར་བ་འཐུངས་ན་ཡང་ཞུ་བའི་འཁྲུ་བ་སེལ་ཏོ། །བིལ་བ་གཞོན་ནུ་མ་སྨིན་པ་དང་། ཏིལ་
[213a.5]ཞིབ་ཏུ་བཏགས་པའི་ཕྱེ་མ་དང་། ཞོའི་སྤྲིས་མ་དང་། སྐྱུར་དང་སྣུམ་དང་བཅས་པར་ཏིལ་གྱི་ཚིགས་མ་ཟོས་ན་འཁྲུ་བ་མཁྲེགས་པ་དང་བཅས་པ་ཞི་བར་འགྱུར་རོ། །ཡང་ན་ན་ལེ་ཤམ་དང་། འུ་སུ་དང་། ཟི་ར་དང་། ད་ཏྲིག་དང་། ཟུར་པ་དཀར་པོ་དང་། ལན་
[213a.6]ཚྭ་བི་ད་དང་། སེའུ་འབྲུ་དང་། ད་ཏ་ཀི་དང་། པ་ཐ་དང་། འབྲས་བུ་གསུམ་དང་། ཚ་བ་ལྔ་དང་། ནས་ཚིག་འཁུས་པའི་ཐལ་བ་དང་། ཀ་པིད་ཏ་དང་། ཨ་མྲ་དང་། ཤིང་འཛམ་བུའི་འབྲས་བུ་དང་། འདི་གསུམ་གྱི་རྐང་དང་། ལ་ལ་ཕུད་དང་། ན་ལེ་ཤམ་གྱི་དྲུག་འགྱུར་
[213a.7]གྱི་བིལ་བ་དང་། འདི་རྣམས་ཞིབ་ཏུ་བཏགས་པའི་ཕྱེ་མ་ཞོ་དང་སྲན་མུངྒའི་ཁུ་བ་དང་། བུ་རམ་དང་ཏིལ་དང་མར་བསྲེས་པའི་སྣུམ་དང་། དེ་རྣམས་ཚུལ་བཞིན་དུ་སྦྱར་བ་ནི་གཞན་གྱིས་མི་ཐུབ་པའི་ཟས་ཞེས་བྱ་སྟེ་དེ་ལས་རན་པར་ཟོས་ན་མེའི་དྲོད་སྐྱེད་པ་དང་། ཟས་
[213b]
[213b.1]འཇུ་བ་དང་། འཁྲུ་བ་ཐུར་དུ་འབྱུང་བ་སྲ་བར་བྱེད་པ་དང་། ཟས་ཡི་གར་མི་འོང་བ་དང་མཁྲེགས་པ་རྣམས་འཇོམས་པར་བྱེད་དོ། །ཡང་ན་རྒྱ་ཤུག་གི་འབྲས་བུ་དང་། བིལ་བ་གཞོན་ནུ་བཏགས་པ་དང་། འབྲས་དང་། ནས་དང་། མུངྒ་དང་། མོན་སྲན་སྡེའུ་དང་། ཏིལ་དང་
[213b.2]འདི་རྣམས་ལྷན་ཅིག་པ་དེའི་ནང་དུ་ཏིལ་མར་དང་མར་བརྔོས་ཏེ་བཅུག་ལ་ཞོ་དང་སེའུ་འབྲུའི་ཁུ་བ་དང་བསྲེས་པ་ཚུལ་བཞིན་བསྐོལ་བ་ནི་ཁུ་བཅུད་ཅེས་བྱ་སྟེ། དེ་ལས་རན་པར་འབྲས་ཆན་དང་བཅས་པར་ཟོས་ན་རྟུག་པ་ཟད་ཅིང་གདོང་སྐམས་པ་ལ་ཕན་ནོ། །ཡང་ན་ཞོའི་
[213b.3]སྤྲིས་མ་དང་། མར་དང་ཏིལ་མར་བསྲེས་པ་བསྐོལ་བའི་ནང་དུ་དོང་གྲའི་ཕྱེ་མ་བུ་རམ་དང་སྦྱར་བ་བཟའོ། །ཡང་ན་ཆང་གི་ནང་དུ་ཏིལ་མར་དང་། མར་བསྐོལ་བ་བླུགས་ཏེ་ཚོད་མར་བྱའོ། །ཡང་ན་ཀིའུའི་ཁུ་བ་སེའུ་འབྲུ་ལ་སོགས་པ་སྐྱུར་བ་དང་སྦྱར་ཏེ། མར་དང་
[213b.4]བསྐོལ་ལ་བཅུག་པ་ཚོད་མར་སྦྱར་རོ། །ཡང་ན་ཕྱེའི་ཟན་བྲུལ་གྱི་སྟེང་དུ་མར་དང་ཏིལ་མར་བླུགས་ལ་ཚ་བ་གསུམ་གྱི་ཕྱེ་མས་བཏབ་པ་བཟའོ། །ཡང་ན་སྲན་མ་ཤ་ལེགས་པར་སྦྱར་བའི་སྟེང་དུ་མར་གྱི་ཉིང་ཁུ་བླུགས་ལ་ཟོས་ན་ཕན་ཡོན་གོང་མ་དང་འདྲའོ། །ར་དང་
[213b.5]ལུག་གི་ཤ་ཁུ་སེའུའི་སྐྱུར་གྱི་ཉིང་ཁུ་དང་འུ་སུ་དང་དོང་གྲའི་ཕྱེ་མ་དང་ལྷན་ཅིག་སྦྱར་བ་བསྐོལ་ཏེ་བཙགས་པའི་ཁུ་བ་འབྲས་དམར་པོའི་ཆན་དང་ལྷན་ཅིག་བཟའ་ཞིང་དེའི་འོག་ཏུ་བཏུང་བ་ལེགས་པར་སྦྱར་ན་རྟུག་པ་འགགས་པ་མྱུར་དུ་ཞི་བར་བྱེད་དོ། །ཞེས་བཤད་དོ། །
[213b.6]བིལ་བ་གཞོན་ནུ་དང་། བུ་རམ་དང་། ཏིལ་མར་དང་། པི་པི་ལིང་དང་། བཅའ་སྒ་དང་། འདི་རྣམས་ཀྱི་ལྡེ་གུ་ཟོས་ན་རླུང་གིས་འགགས་པ་དང་། ཟུག་གཟེར་ཆེ་ཞིང་མཁྲེགས་པ་དང་བཅས་པ་ཞི་བར་བྱེད་དོ། །སེང་ཕྲོམ་དཀར་པོའི་ཤུན་པ་དང་། ད་ཏ་ཀིའི་མེ་ཏོག་
[213b.7]དང་། རྒྱ་ཤུག་གི་ལོ་མ་དང་། འདི་རྣམས་བཏགས་པའི་ཕྱེ་མ་ཞོའི་སྤྲིས་མ་སྦྲང་རྩི་དང་ཀ་པིད་ཏའི་རང་གི་ཁུ་བ་དང་ལྷན་ཅིག་སྦྱར་བ་འཐུངས་ན་ཕན་ནོ། །རླུང་གིས་རྟུག་པ་འགགས་ཤིང་ཟུག་གཟེར་ཆེ་སྟེ་མཁྲེགས་ལ་ཁྲག་དང་བེའུ་སྣབས་དང་བཅས་པར་འབྱུང་བ་དང་།
[214a]
[214a.1]སྐོམ་པས་གདུངས་པ་ལ་ནི་འོ་མ་ཚིམ་ཚད་དུ་སྦྱིན་ནོ། །ཡང་ན་ཏིལ་དང་མར་བསྲེས་པའི་སྟེང་དུ་འོ་མ་བཞོས་ཏེ་ལྷན་ཅིག་བླུད་དོ། །ཡང་ན་ཨེ་རཎྜའི་རྩ་བའམ་བ་ལའི་རྩ་བ་དང་བིལ་བའི་རྩ་བ་གང་ཡང་རུང་བ་དང་བསྐོལ་བའི་ཁུ་བ་བླུད་དོ། །ཡང་ན་གླ་སྒང་ཉི་ཤུ་
[214a.2]དང་། དེའི་སུམ་འགྱུར་གྱི་ཆུ་དང་། འོ་མ་སྲང་བཞི་དང་ལྷན་ཅིག་བསྐོལ་ལ་བཞི་ཆ་ལུས་པ་ལས་རན་པར་འཐུངས་ན་མ་ཞུ་བའི་ནད་དང་བཅས་པ་ལ་ཕན་ནོ། །ཡང་ན་པི་པི་ལིང་དང་ན་ལེ་ཤམ་ཞིབ་ཏུ་བཏགས་ཏེ་འོ་མ་དང་ལྷན་ཅིག་འཐུངས་ན་ཡུན་རིང་པོ་ནས་ཞེན་པའི་
[214a.3]མཁྲེགས་པ་ཡང་འཇོམས་སོ། །སྨྱུང་བ་ལ་སོགས་བས་ལུས་ཉམ་ཆུང་ཞིང་ཁོང་རྩུབ་ལ་ཟུག་གཟེར་གྱིས་ཉམ་ཐག་པར་གྱུར་ན་མེའི་དྲོད་བརྟགས་ཏེ་ཐལ་སྨན་རྣོན་པོ་མར་དང་བཅས་པ་སྦྱིན་ནོ། །ཡང་ན་རྩ་བ་བཅུ་པ་ཚུལ་བཞིན་དུ་བསྐོལ་ཏེ་བཞི་ཆ་ལུས་པ་དང་ཚིགས་
[214a.4]མ་བོར་ཏེ་སྨན་གྱི་ཁུ་བའི་བཞི་ཆའི་མར་དང་ཞོ་དང་། ཆང་གི་ཉིང་ཁུ་དང་། ལྕེ་མྱང་ཚྭ་དང་། ཚ་བ་ལྔ་བཏགས་ཏེ་ལྷན་ཅིག་བསྐོལ་ལ་མར་ཉི་ཚེ་ལུས་པ་དང་། དེ་ལས་རན་པར་ཟོས་ན་གཟེར་བས་ཉམ་ཐག་པ་སེལ་ཏོ། །ཡང་ན་བཅའ་སྒ་སྲང་དྲུག་དང་། པི་པི་ལིང་
[214a.5]མཱུ་ལ་དང་། ཀྲུ་ཏྲུག་ཏྲེས་དང་། རྒྱམ་ཚྭ་འདི་གསུམ་སྲང་གཉིས་དང་། ཏིལ་མར་སྲང་སུམ་ཅུ་རྩ་གཉིས་དང་། ཞོ་ག་ཆུ་དང་། ཚུལ་བཞིན་བསྐོལ་ལ་མར་ཉི་ཚེ་ལུས་པ་ལས་རན་པར་འཐུངས་ན་འཁྲུ་བའི་ཟུག་གཟེར་དང་བཅས་པ་སེལ་ཏོ། །ཡང་ན་ཤ་དང་འོ་མ་མར་
[214a.6]རམ་ཏིལ་མར་གང་ཡང་རུང་བ་དང་ཚུལ་བཞིན་བསྐོལ་ལ་མར་ལུས་པ་དང་། དེ་ལས་བཏུང་བ་དང་འཇམ་རྩི་མས་གཏོང་བ་དང་བསྐུ་བྱུག་ལ་སོགས་པ་བྱས་ན་རྟུག་པ་འགགས་པ་དང་འཁྲུ་བའི་ཟུག་གཟེར་ལས་རྒྱལ་བར་བྱེད་དོ། །རླུང་འཁྲུགས་པ་དང་། ཟུག་གཟེར་
[214a.7]ལ་ནི་ཏིལ་མར་མཆོག་ཡིན་ཏེ་དེ་ལས་ལྷག་པ་མེད་དོ། །གཞན་ཡང་རླུང་ནི་བད་ཀན་ལ་སོགས་པའི་ནད་གཞི་འཇོམས་པར་བྱེད་ཅིང་གཡོ་བ་དང་ལུས་ལ་ཁྱབ་པ་དང་རང་གི་གནས་ན་འདུག་པ་ཡིན་པས་དེ་ལ་ཡང་ཏིལ་མར་འདི་རབ་ཏུ་བསྔགས་ཏེ། མེའི་དྲོད་ཆུང་བ་ལ་སྦྱར་
[214b]
[214b.1]ན་ཡང་བདེ་བར་བྱེད་པའི་མཆོག་ཡིན་ནོ། །མེའི་སྟོབས་ཆེ་བ་དང་། རླུང་རང་གི་གནས་སུ་མཁྲེགས་པ་ལྟ་སྨོས་ཀྱང་ཅི་དགོས་ཏེ་ཏིལ་མར་ཚུལ་བཞིན་སྦྱར་ན་འདུག་པའི་གནས་མེད་དོ། །བཤང་བ་ཟད་པ་དང་ནད་གཞི་རྣམས་རང་གི་གནས་ལས་ཉམས་ཏེ་འཁྲུགས་
[214b.2]ནས་རླུང་འབའ་ཞིག་སྟོབས་ཆེ་ཞིང་མཁྲེགས་པ་དང་བཅས་པ་ཟུག་གཟེར་ཡོད་པའི་ཚད་ནད་ཅན་ནི་འཚོ་དཀའ་བ་ཡིན་ཏེ། དེ་ཡང་གལ་ཏེ་ཕྱི་ནང་གཉིས་ཀ་ནས་ཏིལ་མར་བཏུང་བ་དང་བསྐུ་བ་ལ་སོགས་པ་བྱས་ན་འཚོ་བར་འགྱུར་རོ། །གཞང་ན་ཞིང་ཕྱིར་འབྱུང་བ་ལ་ནི་
[214b.3]འོ་མ་དང་རྒྱ་ཤུག་སྐྱུར་པོ་དང་། ཙང་གོ་རེ་གཉིས་ཀྱི་རང་གི་ཁུ་བ་དང་། མར་དང་། ཞོ་དང་། དོང་གྲ་བཏགས་པའི་ཕྱེ་མ་དང་། འདི་རྣམས་བསྐོལ་བའི་མར་རམ། ཡང་ན་འོ་མ་དང་རྒྱ་ཤུག་ལ་སོགས་པ་གོང་མ་དེ་དག་བསྐོལ་བའི་ཁུ་བའི་ནང་དུ་ཞོ་དང་དོང་གྲ་
[214b.4]བཏགས་པ་བཅུག་པའི་ལྡེ་གུ་གང་ཡང་རུང་བས་བསྐུས་ན་ཕན་ནོ། །ཡང་ན་འུ་སུ་དང་། ན་ལེ་ཤམ་དང་། བྱི་དང་ག་དང་། ལྕེ་མྱང་ཚ་དང་། ཟི་ར་དང་། ཚ་བ་རྣམ་ལྔ་དང་། སེའུ་འབྲུ་དང་། དེ་རྣམས་ཀྱི་ཕྱེ་མ་རྒྱ་ཤུག་སྐྱུར་པོ་དང་། ཙང་གོ་རེའི་ཁུ་བ་དང་།
[214b.5]ཞོ་དང་། འོ་མ་དང་། མར་འདི་རྣམས་ཚུལ་བཞིན་བསྐོལ་ལ། མར་ཉི་ཚེ་ལུས་པས་བསྐུས་ན་གཞང་ཕྱིར་འབྱུང་ཞིང་ཟུག་པ་ཞི་བར་བྱེད་དོ། །ཡང་ན་རྩ་བ་བཅུ་པོ་དང་མར་དུ་སྦྱར་བའི་འཇམ་རྩི་མས་གཏོང་བར་བྱའོ། །ཡང་ན་ཟུར་པ་དཀར་པོ་དང་། ཤུ་ཏི་
[214b.6]དང་། རུ་རྟ་དང་། མར་དུ་སྦྱར་བའམ་ཡང་ན་ཤུ་དག་དང་། ཀྲུ་ཏྲུག་ཏྲེས་དང་། མར་དུ་སྦྱར་བའམ་སྦྱོར་བ་དེ་དག་མར་དང་ཚུལ་བཞིན་བསྐོལ་ཏེ་འཇམ་རྩི་མས་གཏོང་བར་བྱའོ། །བཤད་བ་མཁྲེགས་པ་དང་། གཞང་ཕྱིར་བྱུང་བ་དང་། གཅིན་འགགས་པ་དང་།
[214b.7]རྐེད་པ་རེངས་པ་ལ་ནི་ཏིལ་མར་རམ་མར་ཡང་རུང་། སྨན་མངར་བ་དང་སྐྱུར་བ་ཚུལ་བཞིན་བསྐོལ་བའི་ཨ་ནུ་བ་ས་ན་བྱའོ། །གལ་ཏེ་གཞང་ཕྱིར་བྱུང་སྟེ་ནང་དུ་ཞུགས་སུ་མ་འདོད་དེ་སྲ་བ་ལྟ་ན་མར་གྱིས་བསྐུ་ཞིང་དུགས་བྱས་པས་འཇམ་པོར་གྱུར་ནས་ཕུལ་ལ་ནང་དུ་གཞུག་
[215a]
[215a.1]པར་བྱའོ། །གལ་ཏེ་ལན་ཅིག་གཞང་ནང་དུ་བཅུག་ནས་ཕྱིར་ཡང་འབྱུང་ན་ནི་རྐུབ་ཚོས་གཉིས་པགས་པས་གླན་ལ་དབུས་སུ་ཕུག་པ་ལ་སོགས་པ་ཆོ་ག་ཇི་ལྟར་བྱ་བ་ནི་མདོ་ནས་གསུངས་པ་ལྟ་བུའོ། །ཡང་ན་རྩ་བ་ཆེན་པོ་ལྔ་དང་བྱི་བའི་ནང་
[215a.2]གྲོལ་ཕྱུང་བའི་ཤ་དང་། འོ་མ་དང་ལྷན་ཅིག་བསྐོལ་བའམ། ཡང་ན་རླུང་འཇོམས་པའི་སྨན་དང་། ཏིལ་མར་ཚུལ་བཞིན་བསྐོལ་བས་གང་ཕྱི་ས་འབྱུང་བ་ལ་བསྐུ་བ་དང་བཏུང་བ་ལ་སོགས་པ་བྱས་ན་ཕན་ནོ། །མཁྲིས་པ་ལས་གྱུར་པའི་འཁྲུ་བ་མ་ཞུ་བ་དང་
[215a.3]བཅས་པ་ལ་ནི་རྣོ་བ་དང་དྲོ་བའི་བག་སྤངས་ཏེ་གོང་མ་བཞིན་དུ་ཐོག་མར་སྨྱུང་བ་ལ་སོགས་པ་བྱའོ། །མཁྲིས་པ་ལས་གྱུར་པའི་འཁྲུ་བ་སྐོམ་དད་ཆེ་བ་ལ་ནི་ཡན་ལག་དྲུག་ཅེས་བྱ་བའི་སྨན་གླ་སྒང་དང་། པར་པ་ཏ་དང་། པུ་ཤེལ་ཙི་དང་། ཙནྡན་དང་། ཨུ་དི་ཙ་
[215a.4]དང་། དོང་གྲ་དང་། ཏིག་ཏ་དང་། ཐལ་ཏྲེས་དང་། འདི་རྣམས་བསྐོལ་བའི་ཁུ་བ་བླུད་དོ། །དེ་ལྟར་སྨྱུང་བ་ལ་སོགས་པ་བྱས་ཏེ་བཀྲེས་ན་ཟས་འདོད་པ་ལ་མེའི་དྲོད་སྐྱེད་པར་འདོད་པའི་ཕྱིར་ཐུག་པ་ལ་སོགས་པ་བྱིན་ཏེ། དེ་ཡང་རྩ་བ་ཆུང་ངུ་ལྔ་དང་། ཉེའུ་
[215a.5]ཤིང་དང་། བ་ལ་རྣམ་གཉིས་དང་། མོན་སྲན་སྡེའུ་དང་། མོན་སྲན་གྲེའུ་གཉིས་ཀྱི་ལོ་མ་དང་། འདི་རྣམས་ཀྱི་ཐུག་པ་དང་། ཁུ་བཅུད་དང་། ཟས་ཀྱི་ནང་དུ་བཏབ་པ་ལས་གཞི་བླངས་ལ་སྦྱིན་ནོ། །འཁྲུ་བ་འགགས་པ་ལ་ནི་དུག་མོ་ཡུངས་ཀྱི་ཤུན་ཕྲགས་དང་།
[215a.6]འབྲས་བུ་དང་། བོང་ང་དཀར་པོ་དང་བཏགས་པའི་ཕྱེ་མ་སྦྲང་རྩི་དང་འབྲས་བཀྲུས་པའི་ཁུ་བ་དང་ལྷན་ཅིག་སྦྱར་བ་བླུད་དོ། །པ་ཐ་དང་། དུག་མོ་ཡུངས་ཀྱི་ཤུན་ཕྲགས་དང་། ས་བོན་དང་། སྐྱེར་བ་དང་། པི་པི་ལིང་གི་རྩ་བ་དང་། བཅའ་སྒ་དང་། འདི་རྣམས་ལྷན་ཅིག་
[215a.7]སྐོལ་བའམ། ཡང་ན་བོང་ང་དཀར་པོ་དང་། བིལ་བ་དང་། དུག་མོ་ཡུངས་དང་། ཨུ་དི་ཙ་དང་། གླ་སྒང་རྣམས་ལྷན་ཅིག་བསྐོལ་བའམ། ཡང་ན་བོང་ང་དཀར་པོ་དང་། རྩྭ་དཱུར་བ་དང་། སྐྱེར་བ་དང་། དུག་མོ་ཡུངས་དང་། སྐྱེར་ཁཎྜ་དང་། དེ་རྣམས་ལྷན་ཅིག་བསྐོལ་བའི་ཁུ་
[215b]
[215b.1]བའམ། ཡང་ན་བོང་ང་དཀར་པོ་དང་། བཅའ་སྒ་དང་། གླ་སྒང་དང་། དུག་མོ་ཡུངས་དང་། ཀད་ཕ་ལ་དང་། འདི་རྣམས་བསྐོལ་བའི་ཁུ་བ་སྦྲང་རྩི་དང་ལྷན་ཅིག་སྦྱར་བ་བླུད་དོ། །ཤ་ཁུ་དང་བཅས་པའི་ཟས་ཟ་བ་ལ་ནི་དུག་མོ་ཡུངས་ཀྱི་ས་བོན་སྲང་གཅིག་བསྐོལ་
[215b.2]བའི་ཁུ་བ་བླུད་ན་མཁྲིས་པ་ལས་གྱུར་པའི་འཁྲུ་བ་སེལ་ཏོ། །དེ་བཞིན་དུ་སྐྱེས་བུ་གང་ཤ་ཁུ་དང་བཅས་པའི་ཟས་ཟ་བ་ལ་ནི་གླ་སྒང་བསྐོལ་བའི་ཁུ་བ་སྦྲང་རྩི་དང་སྦྱར་བའམ། ཡང་ན་ཤལ་མ་ལིའི་ལོ་མ་བསྐོལ་བ་གྲངས་པའི་ནང་དུ་སྦྲང་རྩི་བཏབ་པ་བླུད་ན་མཁྲིས་པ་
[215b.3]ལས་གྱུར་པའི་འཁྲུ་བ་སེལ་ཏོ། །ཏིག་ཏ་དང་། གླ་སྒང་དང་། དུག་མོ་ཡུངས་དང་། སྐྱེར་ཁཎྜ་དང་། དེ་རྣམས་བཏགས་པའི་ཕྱེ་མའམ། ཡང་ན་སྐྱེར་པ་དང་། བ་ལ་ཀ་དང་། བིལ་བ་དང་། བྱི་ཚེར་བ་དང་། འདི་རྣམས་ཀྱི་ཕྱེ་མའམ། ཡང་ན་ཏིལ་དང་།
[215b.4]མོན་ཆ་ར་དང་། སེང་ཕྲོམ་དཀར་པོ་དང་། བཙོད་དང་། པདྨ་དང་། ཨུཏྤ་ལ་དང་། འདི་རྣམས་བཏགས་པའི་ཕྱེ་མའམ་ཡང་ན་དོང་གྲ་དང་། ད་ཏ་ཀའི་མེ་ཏོག་དང་། བལ་པོ་སེའུའི་ཤུན་པ་དང་། འབྲས་བུ་དང་། འདི་རྣམས་ཕྱེ་མའམ། ཕྱེ་
[215b.5]མའི་སྦྱོར་བ་དེ་དག་སྦྲང་རྩི་དང་འབྲས་བཀྲུས་པའི་ཁུ་བ་དང་སྦྱར་བ་ལས་གང་ཡང་རུང་བ་འཐུངས་ན་མཁྲིས་པ་ལས་གྱུར་པའི་འཁྲུ་བ་སེལ་ཏོ། །ཡང་ན་སྐྱེར་པ་དང་དུག་མོ་ཡུངས་དང་། སེང་ཕྲོམ་དང་། སུག་སྨེལ་དང་འདི་རྣམས་བསྐོལ་བའི་ཁུ་བ་འཐུངས་ན་ཞུ་བའི་
[215b.6]འཁྲུ་བ་སེལ་ཏོ། །ཡང་ན་སེང་ཕྲོམ་གྱི་སྡེ་ཚན་དང་། ཨམ་པཥྚའི་སྡེ་ཚན་དང་། པྲི་ཡང་ཀུའི་སྡེ་ཚན་དང་། འདི་རྣམས་གང་ཡང་རུང་བ་བསྐོལ་བའི་ཁུ་བ་བླུད་ན་ཞུ་བའི་འཁྲུ་བ་སེལ་ཏོ། །ཡང་ན་པུ་ཙེ་ཤེལ་དང་། པ་ལ་ཀ་དང་། ཤིང་མངར་དང་། པྲི་ཡང་ཀུ་
[215b.7]དང་། སེའུ་འབྲུའི་མྱུ་གུ་དང་། འདི་རྣམས་ཞོ་དང་། འུ་སུ་དང་། ལྷན་ཅིག་བླུགས་པ་དང་། ཐུག་པ་དང་། ལྡེ་གུ་དང་། ཁ་ལ་ཀ་དང་། འདི་རྣམས་སྦྱར་བ་བླུད་དོ། །དེ་བཞིན་དུ་ཀ་པིད་ཏ་དང་། བིལ་བ་དང་། ཨ་མྲ་དང་། འཛམ་བུ་དང་། འདི་རྣམས་ཀྱི་རྐང་
[216a]
[216a.1]ཡང་གོང་མའི་ཐུག་པ་ལ་སོགས་པ་དང་སྦྱར་རོ། །མཁྲིས་པ་ལས་གྱུར་པའི་སྨིན་པའི་འཁྲུ་བ་ལ་ནི་རའི་འོ་མ་མཆོག་ཏུ་བསྔགས་ཏེ། གལ་ཏེ་ནད་གཞི་སྟོབས་ཆེ་བས་འོ་མས་མ་ཞི་ན་བཀྲུ་སྨན་བཏང་ངོ་། །འཁྲུ་བ་དང་ཁྲག་ཏུ་འཁྲུ་བ་རེས་ཀྱིས་
[216a.2]འབྱུང་བ་ལ་ནི་པ་ལ་ཤ་བསྐོལ་བའི་ཁུ་བ་ཉི་ཚེའམ། ཡང་ན་འོ་མ་དང་ལྷན་ཅིག་འཐུངས་ལ་དེའི་འོག་ཏུ་མེ་དྲོད་ཆེ་ཆུང་དང་སྦྱར་ཏེ་འོ་མ་དྲོན་མོ་བླུད་ན་སླ་ཚ་བདེ་བར་འབྱུང་སྟེ་ཁོང་པའི་འཁྲུ་བའི་ནད་སེལ་ཏོ། །ཡང་ན་ཀྱི་ལྕེ་བ་ལ་ཤའི་སྦྱོར་བ་ལྟར་བྱས་ན་ཡང་ཕན་ཡོན་གོང་མ་དང་
[216a.3]འདྲའོ། །གོང་དུ་ཐུག་པ་དང་བཀྲུ་སྨན་ལ་སོགས་པ་སྦྱོར་བ་བྱས་ཀྱང་ཟུག་གཟེར་ད་དུང་མ་ཞི་བ་ལྟར་ན་མེའི་དྲོད་བརྟགས་ཏེ་ཨ་ནུ་བ་ས་ན་གཏང་བར་བྱ་སྟེ་ཤ་ཏ་པུཥྤ་དང་། ཉེའུ་ཤིང་དང་། བིལ་བ་དང་། ཤིང་མངར་དང་དེ་རྣམས་འོ་མ་དང་མར་དང་མར་གྱི་བཞི་འགྱུར་གྱི་
[216a.4]ཏིལ་མར་དང་ཚུལ་བཞིན་བསྐོལ་བའི་ཨ་ནུ་བ་ས་ན་མས་གཏང་ངོ་། །དེ་ལྟར་བྱས་ཀྱང་མཁྲིས་པའི་འཁྲུ་བ་མ་ཞི་ན་ནི་པིད་ཙའི་འཇམ་རྩི་མས་གཏོང་ན་ཕན་པའི་མཆོག་ཡིན་ནོ། །ཤལ་མ་ལིའི་ལོ་མ་རློན་པ་སྦོམ་པ་ཀུ་ཤ་རློན་པས་བཅིངས་ཏེ། ས་ནག་པོའི་འཇིམ་པས་གཡོགས་
[216a.5]ཏེ་བ་ལྕི་སྐམ་པོའི་མེའི་ནང་དུ་བསྲེགས་ཏེ། འཇིམ་པ་བསྐམས་པ་དང་། འཇིམ་པ་བཀོག་ལ་ནང་གི་སྨན་གྱི་གོང་པོ་ལས་སྲང་གཅིག་ཙམ་འོ་མ་སྲང་སུམ་ཅུ་རྩ་གཉིས་ཀྱི་ནང་དུ་མཉེས་ཏེ་ཚིགས་མ་བོར་ལ་དངས་མའི་ནང་དུ་རྒྱ་སྤོས་དང་ཤིང་མངར་བཏགས་པའི་ཕྱེ་མ་དང་སྦྲང་རྩི་དང་། མར་
[216a.6]དང་ཏིལ་མར་འདི་རྣམས་སྣོད་ཡངས་པའི་ནང་དུ་བཅུག་སྟེ་རྐུབ་ནུབ་པར་བཞག་ལ་འདུག་གོ། །དེ་ནས་ལུས་ཁྲུས་བྱས་ལ་འོ་མ་འམ་སྲོག་ཆགས་ཐང་ལས་སྐྱེས་པའི་ཤ་ཁུ་དང་ཟས་ལྷན་ཅིག་ཟོས་ན་མཁྲིས་པ་ལས་གྱུར་པའི་འཁྲུ་བ་དང་། རིམས་དང་། སྐྲངས་པ་དང་། སྐྲན་ནད་དང་།
[216a.7]རླུང་ནད་དང་། ཕོ་བའི་ནད་རྣམས་སྦྱོར་བ་འདིས་མྱུར་དུ་ཞི་བར་བྱེད་དོ། །བཀྲུ་སྨན་དང་། བཀྲུ་སྨན་དྲག་པོ་དང་། འཇམ་རྩི་མས་གཏོང་བའི་སྦྱོར་བ་དྲགས་པ་ལས་བྱུང་བ་ཡང་འདིས་མྱུར་དུ་ཞི་བར་བྱེད་དོ། །ཡང་ན་དུག་མོ་ཡུངས་དང་། ཤུག་པ་བསྐོལ་བ་ཁཎྜ་འདྲ་བར་གྱུར་པ་དང་།
[216b]
[216b.1]དུག་མོ་ཡུངས་ཀྱི་སྡེ་ཚན་དང་། ཨ་པ་སྟའི་སྡེ་ཚན་སྦྲང་རྩི་དང་ལྷན་ཅིག་སྦྱར་བ་ཟོས་ན་འཁྲུ་བའི་ནད་ཐམས་ཅད་སེལ་ཏོ། །མ་ཞུ་བ་དང་ན་བ་མེད་ཅིང་མེ་དྲོད་ཆེ་སྟེ་ཡུན་རིང་པོ་ནས་འཁྲུ་བའི་ཁྲག་དང་བཅས་པ་མདོག་སྣ་ཚོགས་སུ་འབྱུང་བ་ལ་ནི། ད་རི་ག་བྲི་ཏིའི་ཤུན་པ་བཏགས་
[216b.2]པ་ཆུ་དང་གོང་བུར་བྱས་ལ་ཀད་པ་ལའི་ལོ་མའི་ནང་དུ་ཐུམ་པོར་བྱས་ཏེ་འཇིམ་པས་གཡོགས་ལ་མེའི་ནང་དུ་བསྲེགས་ཏེ་ཕྱིར་ཕྱུང་ལ་ཁུ་བ་བཙིར་བའི་ཁུ་བའི་ནང་དུ་ཤ་ཁ་རའམ་སྦྲང་རྩི་བཏབ་པ་གྲང་མོ་བླུད་ན་ཕན་ནོ། །དེ་བཞིན་དུ་ཤིང་འོ་མ་ཅན་གྱི་ཤུན་པ་རློན་པ་དེ་ཉིད་ཀྱི་ལོ་མས་དཀྲིས་ལ་ཆོ་ག་
[216b.3]གོང་མ་བཞིན་དུ་བྱས་ཏེ་བླུད་དོ། །ཡང་ན་འཁྲི་ཤིང་གི་ཤུན་པ་ཆུ་དྲོན་དང་སྦྱར་ལ་མར་དང་སྦྲང་རྩི་དང་བཅས་པ་ཟོས་ན། འཁྲུ་བ་ཚབས་ཆེ་བ་ཡང་ཞི་བར་བྱེད་དོ། །མཁྲིས་པའི་འཁྲུ་བ་ལ་དེ་དང་མི་མཐུན་པའི་ཁ་ཟས་དང་སྨན་བསྟན་པ་ལས་མཁྲིས་པ་འཁྲུགས་ཏེ་ཁྲག་ཏུ་
[216b.4]འཁྲུ་ཞིང་དེ་ཡང་སྐོམ་དད་ཆེ་ལ་རིམས་ཀྱིས་འདེབས་པ་དང་། གཞང་ཁ་ཚོས་པར་བྱས་པ་ལ་ནི་བཙོད་དང་། པདྨ་དང་། ཨུཏྤ་ལ་དང་། འདི་རྣམས་རའི་འོ་མ་དང་ལྷན་ཅིག་བསྐོལ་བའམ། ཡང་ན་མོན་ཛ་ར་འོ་མ་དང་ལྷན་ཅིག་བསྐོལ་བ་བླུད་དོ། །ཐལ་
[216b.5]ཏྲེས་དང་། ཤིང་མངར་དང་། སེང་ཕྲོམ་རྣམས་འོ་མ་དང་ལྷན་ཅིག་བསྐོལ་བའམ། ཡང་ན་ཤིང་ནྱ་གྲོ་དྷ་ལ་སོགས་པ་འོ་མ་ཅན་གྱི་ཤིང་གི་ལོ་མ་དང་ལྷན་ཅིག་བསྐོལ་བའམ། ཡང་ན་སྦྱོར་བ་གཉིས་ཀྱི་ནང་དུ་སྦྲང་རྩི་དང་ཤ་ཁ་ར་དང་བཅས་པ་བཟའ་
[216b.6]བ་དང་བཏུང་བའམ། གཞང་དུ་བླུགས་པ་ལ་སོགས་པ་བྱས་ན་ཕན་ནོ། །བཏུང་བ་དང་ཁུ་བཅུད་ལ་སོགས་པ་ཡང་སྐྱུར་མེད་པ་མར་དང་བཅས་པ་གྲང་བག་བྱིན་ན་ཕན་ནོ། །ཡང་ན་ཏང་པལ་གྱི་འབྲས་བུའི་ཁུ་བ་སྐྱུར་ཅུང་ཟད་ལི་ཁ་ར་དང་བཅས་པ་བྱིན་ནོ། །ཡང་ན་བ་
[216b.7]ལ་ཀ་དང་། ཨུཏྤ་ལ་དང་། དོང་ག་དང་། ཀྲྀཥྞ་པརྞིའི་ཁུ་བ་དང་། རའི་འོ་མ་དང་། ཆུ་དང་ཚུལ་བཞིན་བསྐོལ་བའི་ཐུག་པ་བླུད་ན་ཁྲག་གི་འཁྲུ་བ་སེལ་ཏོ། །ཟས་ཀྱི་གོང་བུ་མར་སར་དང་། སྦྲང་རྩི་དང་ལི་ཁ་ར་དང་སྦྱར་བའི་ལྡེ་གུ་གཞག་གོ། །ཁྲག་གི་འཁྲུ་
[217a]
[217a.1]བ་ཚབས་ཆེ་བ་ལ་ནི་རའམ་རི་དགས་ཀྱི་ཁྲག་དང་། མར་བསྐོལ་བ་བསྲེས་པ་བླུད་ན་ཕན་ནོ། །བཟའ་བ་དང་བཏུང་བ་ཡང་རའི་འོ་མའི་མར་དང་འོ་མར་བཅས་པའམ། ཡང་ན་འོ་མ་ཉི་ཚེ་ཡང་རུང་སྟེ་ཞག་གསུམ་བསྟན་ཏོ། །ཡང་ན་གོང་མ་སྲེག་གི་
[217a.2]ཤ་ཁུ་དང་། འོ་མ་དང་ལྷན་ཅིག་བཏུང་བའམ་ལྡེ་གུ་བྱས་ཏེ་ཟོས་ན་ནད་མེད་པའི་བདེ་བ་སྐྱེད་དོ། །ཡང་ན་ཉེའུ་ཤིང་བཏགས་པའི་ཕྱེ་མ་དང་ལྷན་ཅིག་ཐོག་མར་འཐུངས་ལ། དེའི་འོག་ཏུ་འོ་མ་དང་ཟས་ལྷན་ཅིག་བཟའ་བའམ། ཡང་ན་ཉེའུ་ཤིང་དང་མར་ཚུལ་བཞིན་
[217a.3]བསྐོལ་བ་འཐུངས་ན་ཁྲག་ལས་གྱུར་པའི་འཁྲུ་བ་མྱུར་དུ་འཇོམས་པར་བྱེད་དོ། །ཡང་ན་རྒྱ་སྐྱེགས་དང་། དོང་ག་དང་། པི་པི་ལིང་དང་། སྐྱེར་པ་དང་། པུ་ཙེ་ཤེལ་དང་། དུག་མོ་ཡུངས་དང་། མར་དང་འདི་རྣམས་ཚུལ་བཞིན་དུ་མར་གྱི་ཐུག་པ་དང་། ཐུག་པ་
[217a.4]རྐྱང་རྐྱང་པོ་ལ་སོགས་པ་སྦྱར་ན། ནད་གཞི་གསུམ་ལས་གྱུར་པའི་འཁྲུ་བ་མི་བཟད་པ་ཡང་ཞི་བར་འགྱུར་རོ། །ས་ནག་པོ་ལས་སྐྱེས་པའི་དུང་ཆུང་དང་། ཤིང་མངར་བཏགས་པའི་ཕྱེ་མ་དང་སྦྲང་རྩི་དང་རའི་ཁྲག་དང་། འབྲས་བཀྲུས་པའི་ཆུ་དང་སྦྱར་བ་འཐུངས་
[217a.5]ན་ཁྲག་ལས་གྱུར་པའི་འཁྲུ་བ་སེལ་ཏོ། །ཡང་ན་གན་དྷ་པྲི་ཡང་ཀུ་བཏགས་པའི་ཕྱེ་མ་འབྲས་བཀྲུས་པའི་ཆུའི་ནང་དུ་སྦྲང་རྩི་དང་སྦྱར་བ་འཐུངས་ན་ཕན་ནོ། །ཏིལ་ནག་པོ་བཏགས་པའི་ཕྱེ་མ་དང་དེའི་ལྔ་ཆ་གཅིག་གི་ལི་ཁ་ར་དང་རའི་འོ་མ་དང་སྦྱར་བ་འཐུངས་ན་
[217a.6]ཁྲག་འཁྲུ་བ་དེ་མ་ཐག་ཏུ་སེལ་ཏོ། །ཙནྡན་དང་། ལི་ཁ་ར་དང་། སྦྲང་རྩི་དང་། འབྲས་བཀྲུས་པའི་ཆུ་དང་ལྷན་ཅིག་སྦྱར་ཏེ་བཏང་ན་སྐོམ་དད་ཆེ་བ་དང་། གཅིན་ནད་དང་། ལུས་ཚ་བ་ཆེ་བ་དང་། ཁྲག་ཏུ་འཁྲུ་བ་རྣམས་ལས་གྲོལ་ལོ། །གཞང་ཁ་ཚ་བས་ཚོས་པ་
[217a.7]ལ་ནི་སྨན་གྲང་བའི་ནུས་པ་དང་ལྡན་པས་བསྐུ་བ་བྱས་ན་ཕན་ནོ། །ཉུང་ངུ་ཉུང་ངུར་ལན་མང་པོར་ཁྲག་ཏུ་འཁྲུ་ཞིང་ཟུག་གཟེར་དང་བཅས་པ་དང་རླུང་གིས་འགགས་ཏེ་ཆེད་འགའ་འབྱུང་ཆེད་འགའ་མི་འབྱུང་བས་ཉམ་ཐག་པ་ལ་ནི་གོང་དུ་སྨོས་པའི་བིད་ཙ་བ་ཏི་ཞེས་བྱ་བའི་
[217b]
[217b.1]འཇམ་རྩི་མས་གཏོང་བའི་སྦྱོར་བ་བྱ་སྟེ། ཤིང་ཤ་པ་དང་། ཀར་བྷུ་དྷ་རུ་ལ་སོགས་པའི་ལོ་མ་ཆམ་ཆོམ་བརྡུངས་ཏེ་མར་དང་འོ་མ་ཆུ་དང་ཚུལ་བཞིན་བསྐོལ་ཏེ་མར་ཉི་ཚེ་ལུས་པ་ལས་འཇམ་རྩི་མས་བཏང་ན་འཁྲུ་བ་བེའུ་སྣབས་སུ་འབྱུང་བ་དང་། གཞང་ཉམས་ཏེ་ཕྱིར་
[217b.2]འབྱུང་བ་དང་། མཁྲེགས་པ་དང་། ལུས་སྐེམ་ཞིང་རིད་པ་དང་། སྟོབས་སྐྱེད་པར་བྱེད་དོ། །དེ་ནས་པྲ་པུཎྜ་རི་ཀ་མར་དང་ཚུལ་བཞིན་བསྐོལ་བའི་འཇམ་རྩི་མས་གཏང་བར་བྱའོ། །ཡང་ན་བཤང་བ་དང་ཁྲག་ཏུ་འདྲེས་ཏེ་འབྱུང་བའམ་ཡང་ན་ཁྲག་འབའ་ཞིག་
[217b.3]བཤད་བའི་སྔོན་དུ་འབྱུང་བའམ། ཕྱི་ནས་འབྱུང་ཡང་རུང་སྟེ་དེ་ལ་ནི་འོག་ནས་འབྱུང་བའི་ཉེའུ་ཤིང་གི་སྨན་མར་ལྡེ་གུའི་ཆེད་དུ་སྦྱར་རོ། །ཡང་ན་ཕྱུང་མ་ཐག་པ་དང་། སྦྲང་རྩི་དང་ལི་ཁ་ར་གཉིས་མར་གྱི་བཞི་ཆ་དང་སྦྱར་བའི་ལྡེ་གུ་ཕན་པའི་ཟས་དང་ལྷན་ཅིག་ཟོས་ན་ཁྲག་
[217b.4]ལས་གྱུར་པའི་འཁྲུ་བ་སེལ་ཏོ། །གོང་གི་ཁྲག་གོང་འོག་གཉིས་ཀར་ཤས་ཆེར་འབྱུང་བ་ལ་ནི་ནྱ་གྲོ་དྷ་དང་། ཨུ་དུམ་བཱ་ར་དང་། ཨ་ཤྭདྠ་དང་། འདི་རྣམས་ཀྱི་མྱུ་གུ་ཆམ་ཆོམ་བརྡུངས་ཏེ་ཆུ་དྲོན་གྱི་ནང་དུ་ཞག་གཅིག་སྦངས་ལ་དེའི་ཁུ་བ་དང་མར་དང་ལྷན་ཅིག་བསྐོལ་
[217b.5]ལ་མར་ཉི་ཚེ་ལུས་པའི་ནང་དུ་མར་གྱི་བཞི་ཆའི་སྦྲང་རྩི་དང་ཁ་ར་དང་བཅས་པ་ལྡེ་གུར་བྱས་ཏེ་ཟོས་ན་ཕན་ནོ། །བད་ཀན་ལས་གྱུར་པའི་འཁྲུ་བ་ལ་ནི་རླུང་ལས་གྱུར་པའི་འཁྲུ་བའི་ཆོ་ག་བྱ་སྟེ་ལྷག་པར་སྨྱུང་བ་ལ་སོགས་པའི་སྦྱོར་བ་བྱའོ། །དེ་ལ་བད་ཀན་ལས་གྱུར་པའི་འཁྲུ་
[217b.6]བ་འགགས་པ་ལ་ནི་སྨིན་པ་དང་མེའི་དྲོད་བསྐྱེད་པའི་སྦྱོར་བ་བྱ་སྟེ། དེ་ཡང་བིལ་བ་གཞོན་ནུ་དང་། གླ་སྒང་དང་། ཨ་རུ་ར་དང་། བཅའ་སྒ་དང་འདི་རྣམས་བསྐོལ་བའི་ཁུ་བ་དང་། ཡང་ན་ཤུ་དག་དང་། བྱི་དང་ག་དང་། བྷུ་ཏི་ཀ་དང་། དོང་ག་དང་། ཐང་ཤིང་དང་།
[217b.7]འདི་རྣམས་ལྷན་ཅིག་བསྐོལ་བའམ། ཡང་ན་པི་པི་ལིང་རྣམ་གཉིས་དང་། པི་པི་ལིང་གི་རྩ་བ་དང་། ཀྲུ་ཏྲུག་ཏྲེས་དང་། འདི་རྣམས་བསྐོལ་བའི་ཁུ་བའམ། ཡང་ན་པ་ཏ་དང་། ཙི་ཏྲ་ཀ་དང་། དུག་མོ་ཡུངས་དང་། པི་པི་ལིང་གི་རྩ་བ་དང་། པུ་ཙེ་ཤེལ་དང་། ཤུ་
[218a]
[218a.1]དག་དང་། ཨ་རུ་ར་དང་། འདི་རྣམས་བསྐོལ་བའི་ཁུ་བའམ། ཡང་ན་བཏགས་པའི་ཕྱེ་མ་ཆུ་དྲོན་དང་སྦྱར་བ་འཐུངས་ན་བད་ཀན་ལས་གྱུར་པའི་འཁྲུ་བ་སེལ་ཏོ། །ཡང་ན་ཁ་རུ་ཚ་དང་། ཚ་བ་གསུམ་དང་། ཤུ་དག་དང་། ཤིང་ཀུན་དང་། བོང་ང་
[218a.2]དཀར་པོ་དང་། འདི་རྣམས་ཕྱེ་མར་བྱས་ཏེ་ཆུ་དྲོན་དང་ལྷན་ཅིག་འཐུངས་ན་བད་ཀན་ལས་གྱུར་པའི་འཁྲུ་བས་ཉམ་ཐག་པ་སེལ་ཏོ། །ཀ་པིད་ཏའི་རྐང་དང་། ཚ་བ་གསུམ་གྱི་ཕྱེ་མ་སྦྲང་རྩི་དང་ལི་ཁར་དང་སྦྱར་བའི་ལྡེ་གུའམ། ཡང་ན་ཀད་པ་ལའི་ཕྱེ་མ་སྦྲང་རྩི་དང་སྦྱར་བའི་
[218a.3]ལྡེ་གུ་བལྡགས་ན་བད་ཀན་ལས་གྱུར་པའི་ཁོང་པའི་འཁྲུ་བ་ལས་གྲོལ་ལོ། །ཡང་ན་པི་པི་ལིང་དང་སྦྲང་རྩིར་སྦྱར་བའི་ལྡེ་གུ་ཟོས་ན་ཕན་ཡོན་གོང་མ་དང་འདྲའོ། །ཡང་ན་ཙི་ཏྲ་ཀའི་ཕྱེ་མ་དར་བ་དང་སྦྱར་བ་བཏུང་བའམ། ཡང་ན་བིལ་བ་གཞོན་ནུ་གཅིག་པུ་ཟོས་ན་ཡང་ཁོང་
[218a.4]པའི་འཁྲུ་བ་སེལ་ཏོ། །ཡང་ན་པ་ཏ་དང་། མོན་ཛ་ར་དང་། གླ་སྒང་དང་། ད་ཏ་ཀི་དང་། བིལ་བ་དང་། དོང་ག་དང་། འདི་རྣམས་ཀྱི་ཕྱེ་མ་དར་བ་དང་བུ་རམ་དུ་སྦྱར་བ་འཐུངས་ན་བད་ཀན་ལས་གྱུར་པའི་འཁྲུ་བ་ཤིན་ཏུ་ཚབས་ཆེ་བ་ཡང་སེལ་ཏོ། །ལ་ལ་ཕུད་དང་།
[218a.5]པི་པི་ལིང་གི་རྩ་བ་དང་། དྲི་རྣམ་བཞི་དང་། དོང་ག་དང་། ན་ལེ་ཤམ་དང་། ཀྲུ་ཏྲུག་ཏྲེས་དང་། བ་ལ་ཀ་དང་། ཟི་ར་དང་། འུ་སུ་དང་། ཁ་རུ་ཚ་དང་། འདི་རྣམས་ཆ་མཉམ་པ་དང་། ད་ཏྲིག་དང་། ད་ཏ་ཀི་དང་། པི་པི་ལིང་དང་། བིལ་བ་དང་། བལ་པོ་
[218a.6]སེའུ་དང་། ཏི་མུ་ས་དང་། འདི་རྣམས་ལ་ལ་ཕུད་ཀྱི་སུམ་འགྱུར་དང་། ཁ་ར་དཀར་པོ་ལ་ལ་ཕུད་ཀྱི་དྲུག་འགྱུར་དང་། ཀ་པིད་ཏ་ལ་ལ་ཕུད་ཀྱི་བརྒྱད་འགྱུར་དང་འདི་རྣམས་ཀྱི་ཕྱེ་མ་བྱས་པ་ནི་ཀ་པིད་ཏའི་ཆ་བརྒྱད་པའི་ཕྱེ་མ་ཞེས་བྱ་སྟེ། དེ་ལས་རན་པར་འགམས་ན་བད་
[218a.7]ཀན་ལས་གྱུར་པའི་འཁྲུ་བ་དང་། ཕོ་བའི་ནད་དང་། སྐེམ་བྱེད་ཀྱི་ནད་དང་། ལྐོག་མའི་ནད་དང་། ལུད་པའི་ནད་དང་། དབུགས་མི་བདེ་བ་དང་། ཁོང་པའི་དྲོད་ཉམས་པ་དང་། གཞང་འབྲུམ་དང་། སྣ་ཆུ་འཛག་པ་དང་། ཡི་ག་འཆུས་པ་རྣམས་སེལ་ཏོ། །
[218b]
[218b.1]མིག་སྐྲང་བ་དང་། རིམས་རྣམ་བཞི་དང་འདི་རྣམས་སེལ་ཏོ། །ལ་ལ་ཕུད་དང་། འུ་སུ་དང་། ཟི་ར་དང་། འདི་རྣམས་ཞོ་བཞི་བཞི་དང་། པི་པི་ལིང་གི་རྩ་བ་དང་། ཚ་བ་གསུམ་དང་། འདི་རྣམས་སྲང་རེ་རེ་དང་། སེའུ་འབྲུ་དང་། ཁ་ར་དཀར་པོ་སྲང་བརྒྱད་བརྒྱད་
[218b.2]འདི་རྣམས་ཕྱེ་མར་བྱས་པ་ནི་སེའུ་འབྲུ་ཆ་བརྒྱད་པའི་ཕྱེ་མ་ཞེས་བྱ་སྟེ། དེ་ལས་རན་པར་ཟོས་ན་སྦྱོར་བ་གོང་མའི་ཡོན་ཏན་དང་འདྲའོ། །བད་ཀན་ལས་གྱུར་པའི་འཁྲུ་བའི་ཁ་ཟས་ནི་རླུང་ལས་གྱུར་པའི་འཁྲུ་བའི་ཁ་ཟས་དང་ཐུག་པའི་བྱེ་བྲག་ལ་སོགས་པ་སྦྱར་ཏེ་ཁྱད་པར་དུ་ཙང་གི་རི་དང་། རྒྱ་
[218b.3]ཤུག་སྐྱུར་པོ་རང་གི་ཁུ་བ་དང་། དར་བ་རྣམས་བསྐོལ་བའི་ནང་དུ་བྱི་དང་ག་དང་། ན་ལེ་ཤམ་དང་། ཀ་པིད་ཏ་དང་། དོང་གའི་ཕྱེ་མ་བཏབ་པའི་ཐུག་པ་ནི་ཁ་ལའི་ཐུག་པ་ཞེས་བྱ་སྟེ། དེ་ལས་རན་པར་འཐུངས་ན་བད་ཀན་ལས་གྱུར་པའི་འཁྲུ་བ་ལས་རྒྱལ་ལོ། །བད་
[218b.4]ཀན་ལས་གྱུར་པའི་མ་ཞུ་བའི་འཁྲུ་བ་ཟད་དེ། ཁུ་བར་འཁྲུ་བ་ལ་ནི་རྒྱ་སྐྱེགས་དང་། དོང་ག་དང་། པི་པི་ལིང་ལ་སོགས་པ་སྲང་དྲུག་གོང་དུ་སྨོས་པ་དང་ལྷན་ཅིག་ཏུ་ནས་ཐུག་དང་སྦྱར་བའམ། ཡང་ན་མར་རྙིང་པ་ནས་ཐུག་གམ། ཐུག་པ་རྐྱང་རྐྱང་པོ་དང་འཐུངས་
[218b.5]ན་ཕན་ནོ། །རླུང་དང་བད་ཀན་ལས་གྱུར་པའི་འཁྲུ་བ་འགགས་པ་དང་། བད་ཀན་ལས་གྱུར་པའི་ཤས་ཆེར་འཁྲུ་བ་དང་། ཟུག་གཟེར་དང་བཅས་ཤིང་མཁྲེགས་པ་ལ་ནི་པིད་ཚའི་འཇམ་རྩི་རབ་ཏུ་བསྔགས་ཏེ། དེ་ཡང་ཤུ་དག་དང་། བིལ་བ་དང་། པི་པི་ལིང་དང་།
[218b.6]རུ་རྟ་དང་། ཤུ་ཏི་དང་། རྒྱམ་ཚ་དང་། འདི་རྣམས་བིལ་བའི་མར་དང་ཚུལ་བཞིན་སྦྱར་བའམ། ཡང་ན་ཏིལ་མར་དང་བཅས་ཏེ་གཏང་ངོ་། །རླུང་དང་བད་ཀན་གྱི་འཁྲུ་བ་ཤས་ཆེར་ཉམ་ཐག་པ་ལ་ནི་ཨ་ནུ་བ་ས་ན་དྲོ་འཇམ་ཙམ་གཏང་ངོ་། །བད་ཀན་ཟད་དེ་ཡུན་རིང་པོར་
[218b.7]འཁྲུ་ཞིང་ལུས་ཉམ་ཆུང་བ་དང་། རླུང་གཞང་གི་ནང་དུ་སྟོབས་ཆེར་སྐྱེས་པ་ལ་ནི་དེ་མ་ཐག་རླུང་ཞི་བར་བྱ་བའི་ཆོ་ག་དང་། གང་ཤས་ཆེ་བའི་གསོ་བ་ལ་འབད་པར་བྱའོ། །དེ་ཡང་ཐོག་མར་རླུང་གསོ་བར་བྱ་སྟེ། དེ་ནས་མཁྲིས་པ་དང་། དེ་ནས་བད་ཀན་གསོའོ། །
[219a]
[219a.1]ཡང་ན་ཐོག་མར་གང་ཤས་ཆེ་བ་རིམ་བཞིན་དུ་གསོའོ། །དེ་ལ་རླུང་འཁྲུགས་པར་བྱེད་པའི་རྒྱུ་ནི་འཇིགས་པ་དང་། མྱ་ངན་གྱིས་ཀྱང་འཁྲུགས་པར་བྱེད་དེ། དེ་ལ་སྤྲོ་བསྲིང་བ་དང་། དབྱུང་བ་དང་། སེམས་དགའ་བ་ལ་སོགས་པའི་
[219a.2]ཐབས་ཀྱིས་བཟློག་པར་བྱའོ། །འཁྲུ་བ་སོས་པའི་མཚན་མ་ནི་འཁྲུ་བ་ཆད་པ་དང་གཅིན་དང་འཕྱེན་བདེ་བར་འབྱུང་བ་དང་། མེའི་དྲོད་ཆེ་བ་དང་། ལྟོ་ཡང་བར་གྱུར་ན་ཁོང་ན་ནད་མེད་ཅིང་བདེ་བའི་མཚན་མ་ཡིན་ནོ། །གསོ་བའི་གནས་ལས་འཁྲུ་བ་གསོ་བའི་
[219a.3]ལེའུ་སྟེ་དགུ་པ་རྫོགས་སོ།། །།དེ་ནས་ཕོ་བའི་ནད་གསོ་བའི་ལེའུ་བཤད་པར་བྱ་སྟེ། ཕོ་བའི་གནས་སུ་རླུང་ལ་སོགས་པའི་ཉེས་པ་སུན་པར་བྱ་སྟེ། མ་ཞུ་བར་གྱུར་ན་སྨྲ་བ་ལ་སོགས་པའི་ཚོད་རན་པར་བཟའ་བའི་ཆོ་ག་བཞིན་དུ་བྱའོ། །གོང་དུ་
[219a.4]འཁྲུ་བ་སྨིན་པར་བྱ་བའི་ཆོ་ག་ཇི་ལྟར་བསྟན་པ་བཞིན་དུ་འདིར་ཡང་དེ་ལྟར་བྱ་སྟེ། ཁ་ཟས་ནི་བཀྲེས་པའམ། ཚ་བ་རྣམ་ལྔ་དང་། ལན་ཚྭ་དང་བཅས་པ་ཡང་ཞིང་དྲོད་སྐྱེད་པའི་ཐུག་པ་ལ་སོགས་པ་སྦྱིན་ནོ། །གཞན་ཡང་དྲོད་བསྐྱེད་པའི་ཕྱིར། བལ་བུ་ལ་
[219a.5]སོགས་པའི་ཕྱེ་མ་ཡང་སྦྱར་རོ། །མ་ཞུ་བ་ལ་བོང་ང་དཀར་པོ་དང་། དོང་གྲ་དང་། སེའུ་འབྲུ་ལ་སོགས་པའི་སྐྱུར་དང་སྦྱར་བའི་ཐུག་པ་བླུད་དོ། །ཕོ་བའི་ནད་མ་ཞུ་བ་འཁྲུ་བའི་བཏུང་བ་ནི་ཆུ་དང་། དར་བ་དང་། ཆང་ལ་སོགས་པ་གང་ལ་དད་པ་སྦྱིན་ནོ། །ཕོ་
[219a.6]བའི་ནད་ཀྱིས་འཁྲུ་བའི་ནད་པ་ལ་ནི་དར་བས་དྲོད་སྐྱེད་ཅིང་འཁྲུ་བ་གཅོད། ལུས་ཡང་ཞུ་ན་བསོད་ལ་མངར་བའི་ཕྱིར་མཁྲིས་པ་མི་སྐྱེད་པ་སྐ་ཞིང་དྲོ་ལ་ཅུང་ཞིག་སྒྱུར་ཏེ་རྩུབ་པའི་ཕྱིར་བད་ཀན་ལ་ཕན་ནོ། །མངར་བ་དང་། སྐྱུར་བ་དང་། བསྐ་བའི་ཕྱིར་རླུང་ལ་ཕན་ཏེ།
[219a.7]དར་བ་བསྲུབས་མ་ཐག་པའི་སར་པ་ནི་ཚ་བ་མི་སྐྱེ། སྐྱུར་རྣམ་བཞི་ཞེས་བྱ་བ། སེའུ་འབྲུ་དང་། ཀ་པིད་ཏ་དང་། ད་ཏྲིག་དང་། ཨ་མ་ལ་བྲི་ཤ་དང་རྣམ་བཞི་སྐམ་པོ་ཕུལ་རེ་རེ་དང་། ཚ་བ་གསུམ་སྲང་རེ་རེ་དང་། ལན་ཚྭ་རྣམ་ལྔ་སྤྱིར་སྲང་བཞི་དང་། ལི་ཁ་ར་
[219b]
[219b.1]སྲང་བརྒྱད་དང་། དེ་རྣམས་ཕྱེ་མར་བྱས་ནས་ལོ་མའི་ཚོད་མ་དང་། སྲན་ཚོད་དང་། བཟའ་བ་བསོད་པའི་ནང་དུ་བཏབ་སྟེ་འཐུངས་སམ་ཟོས་ན་ལུད་པ་དང་། མ་ཞུ་བ་དང་། ཡི་ག་འཆུས་པ་དང་། དབུགས་མི་བདེ་བ་དང་། སྙིང་ན་བ་དང་། སྐྱ་རྦབ་
[219b.2]རྣམས་འཇོམས་སོ། །མ་ཞུ་བ་སྨིན་པར་བྱ་བའི་ཕྱིར། དོང་ག་དང་། བོང་ང་དཀར་པོ་དང་། གླ་སྒང་དང་། འདི་རྣམས་བསྐོལ་བའི་ཁུ་བའམ། ཡང་ན་ཕྱེ་མ་ཆུ་དྲོན་པོ་དང་སྦྱར་བའམ་ཡང་ན་དོང་ག་དང་། ཨ་རུ་རའི་ཕྱེ་མ་ཆུ་དྲོན་དང་སྦྱར་བ་བླུད་དོ། །ཡང་ན་
[219b.3]ཤུ་དག་གི་སྡེ་ཚན་དང་རྒྱམ་ཚ་དང་བཅས་པ་ཆུ་དྲོན་དང་སྦྱར་བའམ། ཡང་ན་ཆང་དང་སྦྱར་བ་བཏུང་ངོ་། །ཕྱི་ས་མ་ཞུ་བར་འབྱུང་བ་ལ་ནི་ལན་ཚྭ་དང་། བིལ་བ་དང་། ཙི་ཏྲ་ཀ་དང་། དོང་ག་དང་། འདི་རྣམས་བཏགས་པའི་ཕྱེ་མ་སེའུ་འབྲུའི་ཁུ་བར་སྦྱར་བ་
[219b.4]བཏུང་ངོ་། །བད་ཀན་དང་རླུང་ལས་གྱུར་པའི་བེའུ་སྣབས་སུ་འཁྲུ་ཞིང་ཁོང་པ་ན་བ་ལ་ནི་དུག་མོ་ཡུངས་དང་། ཤིང་ཀུན་དང་། བོང་ང་དཀར་པོ་དང་། ཤུ་དག་དང་། ཁ་རུ་ཚ་དང་། ཨ་རུ་ར་རྣམས་དྲོན་མོ་ལས་སྦྱར་བ་གཏད་དོ། །སྐྱུགས་ཤིང་ཚིགས་
[219b.5]སུ་ཟུག་ཅིང་ན་བ་ལ་ནི་ཨ་རུ་ར་དང་། ཁ་རུ་ཚ་དང་། ཟི་ར་དང་། ན་ལེ་ཤམ་དང་། འདི་རྣམས་ཀྱི་ཕྱེ་མ་ཆུ་དྲོན་དང་སྦྱར་བ་བླུད་དོ། །པི་པི་ལིང་དང་། དོང་ག་དང་། པ་ཐ་དང་། ཐལ་ཏྲེས་རྣམ་གཉིས་དང་། བྲི་ཧ་ཏི་རྣམ་གཉིས་དང་། ཙི་ཏྲ་ཀ་དང་། དུག་
[219b.6]མོ་ཡུངས་ཀྱི་ས་བོན་དང་། ཐལ་བ་རྣམ་གཉིས་དང་། ལན་ཚྭ་རྣམ་ལྔ་དང་། འདི་རྣམས་ཀྱི་ཕྱེ་མ་ཆང་གི་སྙིང་བུའམ། ཞོའམ། ཆུ་དྲོན་མོའམ། སྐྱུར་གང་ཡང་རུང་བ་ལས་བཏང་ན་མེའི་དྲོད་སྐྱེད་ཅིང་ཁོང་པའི་སྤོ་བ་སེལ་བའི་མཆོག་ཡིན་ནོ། །ཡང་ན་ལན་ཚྭ་རྣམ་
[219b.7]ལྔ་དང་། ཐལ་བ་རྣམ་གཉིས་དང་། ན་ལེ་ཤམ་དང་། ཚ་བ་རྣམ་ལྔ་དང་། ཨ་ཛ་མོད་དང་། ཤིང་ཀུན་དང་། དེ་རྣམས་ཀྱི་ཕྱེ་མ་སྐྱུར་རྩི་ཆེན་པོའམ། སེའུ་འབྲུའམ། རྒྱ་ཤུག་གང་ཡང་རུང་བའི་ཁུ་བ་ལས་རི་ལུར་བྱས་ཏེ་ཟོས་ན་འཁྲུ་བ་སྨིན་པ་དང་དྲོད་སྐྱེད་པའི་
[220a]
[220a.1]མཆོག་ཡིན་ནོ། །བལ་བུའི་ལོ་མ་དང་། དབྱི་མོ་དང་། ན་ལེ་ཤམ་སྲང་རེ་རེ་དང་། པི་པི་ལིང་མཱུ་ལ་སྲང་གཉིས་དང་། བཅའ་སྒ་སྲང་གསུམ་དང་། དྲི་སྣ་བཞི་དང་། པུ་ཤེལ་ཙི་ཞོ་གཉིས་གཉིས་དང་། དེ་རྣམས་ཞིབ་ཏུ་བཏགས་
[220a.2]པའི་ཕྱེ་མའི་སུམ་འགྱུར་གྱི་བུ་རམ་དང་རི་ལུར་བྱས་པ་ལ་ནི་བལ་བུའི་རི་ལུ་ཞེས་བྱ་སྟེ། རན་པར་ཟོས་པའི་རྗེས་ལ་ཆང་དང་ཤ་ལ་སོགས་པའི་ཁུ་བཅུད་དང་། ཤ་ཁུ་དང་ཨ་རིཥྚའི་ཆང་དང་། ཞོ་ག་ཆུ་དང་། ཐུག་པ་དང་། ལོ་མ་དང་འདི་རྣམས་གང་ཡང་
[220a.3]རུང་བ་གསང་གནས་སུ་བྱིན་ཏེ། དེ་ལྟར་རྟག་ཏུ་བསྟན་ན་རླུང་དང་བད་ཀན་ལས་གྱུར་པའི་སྐྱུག་པ་དང་། ཕོ་བ་ན་བ་དང་། རྩིབ་ལོགས་དང་། སྙིང་ན་བ་དང་། རིམས་དང་། སྐྲང་པ་དང་། སྐྱ་རྦབ་དང་། སྐྲན་དང་། ཆང་ནད་དང་། གཞང་འབྲུམ་དང་།
[220a.4]ཆམ་པ་དང་། སྣ་ཆུ་འཛག་པ་དང་། དབུགས་མི་བདེ་བ་དང་། ལུད་པ་ལུ་བ་རྣམས་ལས་ཟློག་པར་བྱེད་དོ། །ཅི་སྟེ་འཁྲུ་བ་འགགས་ཏེ་ན་བ་ལ་ནི་གང་གི་སྦྱོར་བ་ལས་བཅའ་སྒ་ཕྱུང་ལ་ཨ་རུ་ར་སྲང་གསུམ་གྱིས་སྦྲུས་ཏེ་བསྲེས་པ་ཟོས་ན་ཕན་ནོ། །གལ་ཏེ་
[220a.5]མཁྲིས་པ་ལས་གྱུར་པའི་སྐྱུག་པའི་ནད་དང་། ཕོ་བའི་ནད་ལ་སོགས་པ་ལ་ནི་གོང་གི་སྦྱོར་བ་ལས་བུ་རམ་ཕྱུང་ལ་ཕྱེ་མའི་བཞི་འགྱུར་གྱི་ཁ་ར་དཀར་པོ་བསྲེས་ཏེ་རི་ལུར་བྱས་ཏེ་བཟའོ། །རི་ལུ་དེ་ཡང་བུ་རམ་མམ། ཁ་ར་གང་དང་སྦྱོར་ཡང་ཆུ་དང་བསྐོལ་ཏེ་ཆུ་
[220a.6]དུ་བ་དང་ཕྱེ་མ་བཅུག་ལ་རི་ལུར་བྱས་པ་ནི་ཡང་བའི་མཆོག་ཡིན་ནོ། །དེ་ནས་སྨན་གྱི་སྦྱོར་བ་དེ་དག་གིས་མ་ཞུ་བའི་འཁྲུ་བ་སྨིན་ཏེ། རླུང་ལས་གྱུར་བའི་ཕོ་བའི་ནད་དང་། འཁྲུ་བ་སྐྱེས་ན་དྲོད་སྐྱེ་བའི་སྨན་དང་སྦྱར་བའི་མར་ཉུང་ངུ་ཉུང་ངུ་བཟའོ། །མེ་དྲོད་ཅུང་ཞིག་
[220a.7]སྐྱེས་ཏེ་རླུང་དང་། བཤང་གཅི་འགགས་ན་ཞག་གཉིས་གསུམ་སྣུམ་ཆོས་བྱས་ཏེ། དེ་ནས་ནི་རུ་ཧ་གཏང་བར་བྱའོ། །དེ་ནས་ཉེས་པ་རྣམས་བྱུང་བ་དང་། ཨེ་རཎྜའི་མར་རམ་སེང་ཕྲོམ་གྱི་མར་གང་ཡང་རུང་བ་ཐལ་སྨན་དང་ལྷན་ཅིག་སྦྱར་ལ་བཀྲུ་སྨན་གཏང་ངོ་། །
[220b]
[220b.1]དེ་ལྟར་བྱས་པས་ལུས་དག་སྟེ། ཁོང་རྩུབ་ལ་ཕྱི་ས་འགགས་པར་གྱུར་ན་རླུང་སེལ་ཅིང་དྲོད་སྐྱེད་པའི་སྐྱུར་བའི་སྨན་དང་བཙོས་པའི་ཏིལ་མར་གྱི་ཨ་ནུ་བས་མས་གཏང་བར་བྱའོ། །དེ་ལྟར་བྱས་ཀྱང་ནད་མ་ཞི་ན་བཀྲུ་སྨན་དྲག་པོ་དང་། བཀྲུ་སྨན་དང་། འཇམ་རྩི་མས་
[220b.2]གཏོང་བའི་སྦྱོར་བ་ཡང་དང་ཡང་དུ་བྱའོ། །དེ་ནས་ཁ་ཟས་ཡང་བ་མར་དང་བཅས་པའི་མེའི་དྲོད་དང་སྦྱར་ཏེ་ཡང་དང་ཡང་དུ་གོམས་པར་བྱའོ། །རྩ་བ་ལྔ་དང་། ཨ་རུ་ར་དང་། ཚ་བ་གསུམ་དང་། པི་པི་ལིང་གི་རྩ་བ་དང་། ལྕེ་མྱང་ཚ་དང་། ར་སྣ་དང་། ཀྵི་ར་རྣམ་
[220b.3]གཉིས་དང་། ཟི་ར་དང་། བྱི་དང་ག་དང་། ཟུར་པ་དང་། དེ་རྣམས་མར་དང་ཚྭ་ལྷན་ཅིག་བསྐོལ་ཏེ་ཚྭ་དུ་བ་དང་ཕྱིར་ཕྱུང་ལ། སྐྱུར་རྩི་ཆེན་པོའི་རང་གི་ཁུ་བའི་ནང་དུ་ཡང་བསྐོལ་ཏེ་དེ་བཞིན་དུ་སྒེའུ་གཤེར་དང་། ལ་ཕུག་སྐམ་པོ་དང་། རྒྱ་ཤུག་སྐྱུར་པོ་དང་། ཙུག་
[220b.4]ཏྲི་ཀ་དང་། བལ་པོ་སེའུ་དང་། འདི་རྣམས་ཀྱི་རང་གི་ཁུ་བ་དང་དར་བ་དང་། ཞོ་ག་ཆུ་དང་། ཆང་གི་སྙིང་ཁུ་དང་། ནས་ཀྱི་རྩབ་མོ་དང་འབྲས་ཀྱི་ཀཉྫི་དང་། འདི་རྣམས་རེ་རེའི་ཁུ་བའི་ནང་དུ་གོང་གི་སྨན་དང་མར་རིམ་པས་བསྐོལ་ཏེ་ཁུ་བ་དུ་བ་དང་ཡང་ཕྱིར་
[220b.5]ཕྱུང་སྟེ་ཡང་བསྐོལ་ལ་རིམ་པ་དེ་ལྟར་བྱས་པའི་མར་ནི་དྲོད་སྐྱེད་པའི་མཆོག་ཡིན་ཏེ། ཟུག་གཟེར་དང་། སྐྲན་དང་། དམུ་རྫིང་དང་། དབུགས་མི་བདེ་བ་དང་། ལུད་པ་དང་། རླུང་དང་བད་ཀན་རྣམས་འཇོམས་སོ། །ཡང་ན་སྐྱུར་རྩི་ཆེན་པོའི་ཁུ་བ་དང་། གོང་
[220b.6]མའི་སྨན་ལྷན་ཅིག་བཟའོ། །ཏིལ་མར་གོང་མའི་རྩ་བ་ལྔ་ལ་སོགས་པའི་སྨན་དང་སྦྱར་བའི་ཏིལ་མར་གྱིས་བསྐུ་བྱུག་བྱས་ན་སེལ་ཏོ། །སྨན་དེ་དག་གི་ཕྱེ་མ་ཆུ་དྲོ་འཇམ་ཙམ་དང་སྦྱར་བ་འཐུངས་ན་རླུང་དང་བད་ཀན་འདྲེས་པའམ། བད་ཀན་ནམ་རླུང་
[220b.7]ཉི་ཚེ་མ་ཞུ་བའི་འཁྲུ་བ་སེལ་ཏོ། །མཁྲིས་པའི་མེ་དྲོད་ཉམས་པའི་ཕོ་བ་འཁྲུ་བ་ལ་ནི་བཀྲུ་སྨན་ནམ་སློན་ཁྲུས་ཀྱིས་ཞི་བར་བྱ་སྟེ། ཁ་ཟས་ནི་ཁ་བ་དང་། ཡང་བ་དང་། འཁྲུ་བ་གཅོད་པ་དང་། མེ་དྲོད་སྐྱེད་ཅིང་ཚ་བ་ཆུང་བའི་ཟས་དང་། ཁབ་དང་།
[221a]
[221a.1]སྣུམ་པའི་ཕྱེ་མ་འོག་ནས་འབྱུང་བ་རྣམས་ཀྱང་མེའི་དྲོད་སྐྱེད་དོ། །པ་ཏོ་ལ་དང་། ནིམ་པ་དང་། ཀྱི་ལྕེ་བ་དང་། པུ་ཙེ་ཤེལ་དང་། ཏིག་ཏ་དང་། པར་པ་ཏ་དང་། དུག་མོ་ཡུངས་ཀྱི་ཤུན་ཕྲགས་དང་འབྲས་བུ་དང་། མུར་བ་དང་། ཤི་ཀྲུ་མངར་པོའི་འབྲས་བུ་དང་།
[221a.2]ཤུ་དག་དང་སྐྱེར་པའི་ཤུན་ཕྲགས་དང་། ཤུག་པ་དང་། པུ་ཤེལ་ཙེ་དང་། ལ་ལ་ཕུད་དང་། གླ་སྒང་དང་། ཙནྡན་དཀར་པོ་དང་། རྒྱ་ཚ་དང་། བོང་ང་དང་། ཚ་བ་གསུམ་དང་། ཤིང་ཚ་དང་། སུག་སྨེལ་དང་། གནྡྷ་བྷ་དྲ་དང་། ཐང་ཤིང་དང་འདི་རྣམས་ཀྱི་ཕྱེ་མ་སྦྲང་རྩི་དང་ལྡེ་གུར་བྱས་ཏེ་བཟའ་བའམ། ཡང་ན་
[221a.3]ཆང་ངམ་ཆུ་དང་བསྐོལ་ཏེ་འཐུངས་ན་སྙིང་ནད་དང་། སྐྱ་རྦབ་ཀྱི་ནད་དང་། ཕོ་བའི་ནད་དང་། སྐྲན་དང་། ཟུག་གཟེར་དང་། མ་ཞུ་བ་དང་། རིམས་དང་། མིག་སེར་གྱི་ནད་དང་། འདུས་པའི་ནད་དང་། ཁའི་ནད་དང་། འདི་རྣམས་འཇོམས་སོ། །ཏིག་ཏ་དང་། པུ་ཙེ་ཤེལ་དང་། གླ་སྒང་དང་།
[221a.4]ཚ་བ་གསུམ་དང་། དུག་མོ་ཡུངས་རྣམས་ཆ་མཉམ་ལ་ཙི་ཏྲ་ཀ་སྨན་སྣ་གཅིག་གི་ཆ་གཉིས་དུག་མོ་ཡུངས་ཀྱི་ཤུན་ལྤགས་སྨན་སྣ་གཅིག་གི་བཅུ་དྲུག་འགྱུར་འདི་རྣམས་ཞིབ་ཏུ་བཏགས་ཏེ་བུ་རམ་དང་སྦྱར་ནས་ཆུ་གྲང་མོ་དང་སྦྱར་ཏེ་འཐུངས་ན་ཕོ་བའི་ནད་དང་། སྐྲན་དང་། མིག་
[221a.5]སེར་དང་། རིམས་དང་། སྐྱ་རྦབ་དང་། གཅིན་ནད་དང་། ཡི་ག་འཆུས་པ་དང་། འཁྲུ་བ་རྣམས་སེལ་ཏོ། །ཡང་ན་བཅའ་སྒ་དང་། བོང་ང་དཀར་པོ་དང་། ལིག་དུར་དང་། པ་ཐ་དང་། བིལ་བ་དང་། ད་ཏ་ཀའི་མེ་ཏོག་དང་། སྐྱེར་ཁཎྜ་དང་། དུག་མོ་ཡུངས་ཀྱི་ཤུན་
[221a.6]པ་དང་། འབྲས་བུ་དང་། ཏིག་ཏ་དང་། འདི་རྣམས་སྦྲང་རྩི་དང་སྦྱར་ལ་འབྲས་བཀྲུས་པའི་ཁུ་བ་དང་འཐུངས་ན། མཁྲིས་པས་ཕོ་བ་ཉམས་པ་དང་། ཁྲག་ཏུ་འཁྲུ་བ་དང་གཞང་འབྲུམ་དང་། མཁྲེགས་པ་དང་། གཞང་ཁ་ན་བ་ལ་སོགས་པ་ལ་ཕན་ནོ། །ཙནྡན་
[221a.7]དང་། ཤུ་དག་དང་། པུ་ཤེལ་ཙི་དང་། པ་ཐ་དང་། མུར་བ་དང་། ཀུ་ཏྲ་ན་ཏ་དང་། ཤུ་དག་དང་། ཤ་རི་བ་དང་། ལོ་མ་བདུན་པ་དང་། བ་ཤ་ཀ་དང་། པ་ཏོ་ལ་དང་། ཨུ་དུམྦཱ་ར་དང་། ཨ་ཤྭདྠ་དང་། ནྱ་གྲོ་དྷ་དང་། པླག་ཤ་དང་། ག་པི་ཏ་ན་དང་། པུ་ཙེ་ཤེལ་དང་། ལི་ག་
[221b]
[221b.1]དུར་དང་། ནིམ་པ་དང་། དེ་རྣམས་སྲང་གཉིས་གཉིས་ཆུ་སྲང་ལྔ་བརྒྱ་རྩ་བཅུ་གཉིས་ཀྱི་ནང་དུ་བསྐོལ་ཏེ། བཞི་ཆ་ལུས་པའི་ནང་དུ་མར་དང་། ཏིག་ཏ་དང་། དུག་མོ་ཡུངས་དང་། ར་མཉེ་བ་དང་། པི་པི་ལིང་དང་། ཨུཏྤ་ལ་དང་། དེ་རྣམས་ཀྱི་ཕྱེ་མ་དང་ལྷན་ཅིག་བསྐོལ་
[221b.2]ལ་མར་འབའ་ཞིག་ལུས་པ་ལས་རན་པར་འཐུངས་ན་མཁྲིས་པས་ཕོ་བ་ཉམས་པ་ལ་ཕན་ནོ། །ཡང་ན་མཛེ་ནད་གསོ་བའི་སྐབས་སུ་བཤད་པའི་ཏིག་ཏའི་སྨན་མར་གཏང་ངོ་། །བད་ཀན་གྱིས་ཕོ་བའི་མེ་དྲོད་ཉམས་པ་ལ་ནི་སྨན་རྣོན་པོ་པི་པི་ལིང་དང་། ཡུངས་ཀར་ལ་སོགས་པ་དང་སྦྱར་བའི་སྐྱུག་
[221b.3]སྨན་གཏང་ངོ་། །དེ་ནས་རོ་ཚ་བ་དང་། སྐྱུར་བ་དང་། ལན་ཚྭ་དང་ཐལ་སྨན་རྣོན་པོ་ལ་སོགས་པས་རིམ་གྱིས་མེ་དྲོད་སྐྱེད་པར་བྱེད་དོ། །མ་ཧུ་ལུང་ཀའི་མྱུ་གུ་དང་། ཨ་རུ་ར་དང་། པ་ཏ་དང་འུ་སུ་དང་ཚ་བ་རྣམ་ལྔ་དང་། པ་ལ་ཤ་དང་། འདི་རྣམས་ཞོ་གཉིས་གཉིས་ཆུ་སྲང་སུམ་ཅུ་རྩ་
[221b.4]གཉིས་ཀྱི་ནང་དུ་བསྐོལ་ཏེ་བཞི་ཆ་ལུས་པ་དང་། དེ་ལས་བཏུས་པ་དང་། ཐུག་པ་ལ་སོགས་པ་དང་སྦྱར་ཏེ་བླུད་དོ། །མ་དུ་ལུང་ཀའི་མེ་ཏོག་སྲང་ཉིས་བརྒྱ་ལྔ་བཅུ་རྩ་དྲུག་དང་། བྱི་དང་ག་སྲང་བརྒྱ་ཉི་ཤུ་རྩ་བརྒྱད་དང་། ཙི་ཏྲ་ཀ་སྲང་དྲུག་བརྒྱ་རྩ་བཞི་དང་། བསེ་ཤིང་གི་འབྲས་བུ་
[221b.5]སྲང་སུམ་ཅུ་རྩ་གཉིས་དང་། བཙོད་སྲང་བརྒྱད་དང་། འདི་རྣམས་ཆུ་སྲང་སྟོང་ལྔ་བརྒྱ་རྩ་དྲུག་དང་བསྐོལ་ལ། སུམ་ཆ་སྲང་ལྔ་བརྒྱ་རྩ་བཅུ་གཉིས་ལུས་པ་དང་གྲངས་པའི་ནང་དུ་སྦྲང་རྩི་སྲང་སུམ་ཅུ་རྩ་གཉིས་བཏབ་སྟེ། སུག་སྨེལ་དང་པདྨའི་རྩ་བ་དང་། ཨ་ཀ་རུ་དང་། ཙནྡན་དང་འདི་
[221b.6]རྣམས་ཀྱི་ལྡེ་གུས་བུམ་པ་སྣུམ་ཅན་གྱི་ནང་དུ་གོང་གི་སྨན་བཅུག་ལ་ཟླ་བ་གཅིག་བཞག་སྟེ་སྨན་པའི་ཆང་འཐུངས་ན་ཕོ་བའི་མེ་དྲོད་སྐྱེད་པ་དང་། ལུས་ཀྱི་ཉམས་སྟོབས་འཕེལ་བ་དང་། ཁྲག་མཁྲིས་སེལ་བ་སྟེ། ཁྱད་པར་དུ་སྐེམ་ནད་དང་། མཛེ་དང་། ཤ་བཀྲ་དང་། གཅིན་སྙི་བ་རྣམས་
[221b.7]འཇོམས་སོ། །ཡང་ན་མ་དུ་ལུང་ཀའི་ཁུ་བ་ཕྱེད་དུ་བར་བསྐོལ་བའི་ནང་དུ་སྦྲང་རྩི་དེའི་བཞི་ཆ་གཅིག་བཏབ་ལ་སྦྱོར་བ་གོང་མ་བཞིན་དུ་བྱས་པའི་ཆང་ཟན་ཕན་པ་དང་ལྷན་ཅིག་བསྟེན་ན་ཕོ་བའི་ནད་ཐམས་ཅད་ཞི་སྟེ་ཕན་ཡོན་གོང་མ་དང་འདྲའོ། །དེ་བཞིན་དུ་རྒུན་འབྲུ་བུ་རམ་ཤིང་དང་། འབྲ་གོ་རྣམས་ཀྱི་
[222a]
[222a.1]ཁུ་བ་ཕྱེད་དུ་བར་བསྐོལ་ཏེ་སྦྲང་རྩི་བཞི་ཆ་གཅིག་བཏབ་སྟེ་སྦྱོར་བ་གོང་མ་ལྟར་བྱས་པ་ཡང་ཕན་ཡོན་དེ་དང་འདྲའོ། །ཤིང་ཀུན་དང་། པུ་ཙེ་ཤེལ་དང་། ཤུ་དག་དང་། བོང་ང་དང་། དུག་མོ་ཡུངས་དང་། གཟེ་མ་དང་། ཚ་བ་ལྔ་དང་། པ་ཐ་དང་འདི་རྣམས་ཞོ་གཉིས་གཉིས་དང་། ལན་ཚྭ་རྣམ་ལྔ་
[222a.2]སྲང་རེ་རེ་དང་། འདི་རྣམས་ཆམ་ཆོམ་བརྡུངས་པ་དང་། མར་དང་ཏིལ་མར་གཉིས་སྲང་བཅུ་དྲུག་བཅུ་དྲུག་དང་། ཞོ་སྲང་དྲུག་ཅུ་རྩ་བཞི་དང་། འདི་རྣམས་མེ་མི་ཆེ་བ་དང་བསྐོལ་ཏེ་ཁུ་བ་དུ་སྟེ་ནུར་ནུར་པོར་གྱུར་པ་དང་། མར་དང་དངས་སྙིགས་ཕྱེ་ལ་སྙིགས་མ་ཞི་ག་ཁ་ཁབ་ཅན་གྱི་ནང་དུ་བསྲེགས་ཏེ་ཐལ་བར་གྱུར་པ་དང་།
[222a.3]སྔ་མའི་མར་དང་ལྷན་ཅིག་ལག་པའི་ནང་དུ་ལྡེ་གུར་བྱས་ཏེ་ཞོ་གཉིས་ཙམ་འཐུངས་ལ་དེ་ཞུ་བའི་ཚོད་ཙམ་ན་སྦྲང་རྩི་ལ་སོགས་པ་མངར་བའི་ཟས་ཟོས་ན་རླུང་དང་བད་ཀན་ལས་གྱུར་པའི་ནད་ཐམས་ཅད་ལས་གྲོལ་ཏེ་ཁྱད་པར་དུ་དུག་དང་དབྱིག་དུག་འཇོམས་སོ། །ཏིག་ཏ་དང་། པུ་ཙེ་ཤེལ་དང་།
[222a.4]པ་ཏོ་ལ་དང་ནིམ་པ་དང་། པར་པ་ཏ་དང་། འདི་རྣམས་གོང་མ་ལྟར་བསྲེགས་པའི་ཐལ་བ་དང་། མ་ཧེའི་གཅིན་དང་བསྲེས་ཏེ་འཐུངས་ན་མེ་དྲོད་སྐྱེད་པར་བྱེད་དོ། །ཡང་ན་སེར་པོ་རྣམ་གཉིས་དང་། ཤུ་དག་དང་། རུ་རྟ་དང་། ཙི་ཏྲ་ཀ་དང་། པུ་ཙེ་ཤེལ་དང་། ག་དུར་དང་། འདི་རྣམས་ཀྱི་ཕྱེ་མར་གཅིན་
[222a.5]དང་སྦྱར་བ་འཐུངས་ན་མེའི་དྲོད་སྐྱེད་དོ། །སུ་དྷཱ་ཀྵི་རའི་ཤིང་སྲང་བཞི་དང་ལན་ཚྭ་རྣམ་གསུམ་སྲང་རེ་རེ་དང་བར་ཏ་ཀ་བསྐོལ་བ་བསྐམས་པ་སྲང་བཞི་དང་། ཨརྐ་སྲང་བརྒྱད་དང་། ཙི་ཏྲ་ཀ་སྲང་གཉིས་དང་། འདི་རྣམས་ཡང་གོང་མ་ལྟར་བསྲེགས་པའི་ཐལ་བ་བྱེའུ་བར་ཏ་ཀའི་ཁུ་བ་དང་རི་
[222a.6]ལུར་བྱས་ཏེ། ཁ་ཟས་ཀྱི་གོང་དུ་ཡང་དང་ཡང་དུ་ཟོས་ན་ཟས་མྱུར་དུ་འཇུ་ཞིང་ཁྱད་པར་དུ་ལུད་པ་དང་། དབུགས་མི་བདེ་བ་དང་། གཞང་འབྲུམ་དང་། གསུད་པ་དང་། ཆམ་པ་དང་། སྙིང་ནད་རྣམས་ཞི་བར་བྱེད་ཅིང་འཇོམས་སོ། །ཡང་ན་ཁ་ལུད་དང་། ཟུར་པ་དང་། ར་སྣ་དང་། ཚ་བ་གསུམ་དང་།
[222a.7]ཨ་རུ་ར་དང་། སྭ་རྫི་ཀའི་ཐལ་བ་དང་། ནས་ཚིག་འཁུས་པའི་ཐལ་བ་དང་། ལན་ཚྭ་རྣམ་ལྔ་དང་། འདི་རྣམས་བཏགས་པའི་ཕྱེ་མ་ཆུ་དྲོ་འཇམ་ཙམ་དང་འཐུངས་ན་སྟོབས་དང་མདོག་དང་མེ་དྲོད་འཕེལ་བར་བྱེད་དོ། །བད་ཀན་གྱི་ཕོ་བའི་ནད་དེ་རླུང་དང་བཅས་པ་ཡིན་ན་ནི་གོང་
[222b]
[222b.1]གི་སྨན་དེ་དག་མར་དང་བསྐོལ་ཏེ་སྦྱིན་ནོ། །ཡང་ན་ཐང་ལ་འབར་གྱིས་བཤད་པའི་སྨན་མར་གཅིན་ནད་ཀྱི་སྐབས་སུ་བསྟན་པ་དང་། སྲང་དྲུག་པ་ཞེས་བྱ་བའི་སྨན་མར་གཅོང་ཆེན་པོའི་སྐབས་སུ་བཤད་པ་དང་། གོ་བྱེའི་སྨན་མར་སྐྲན་ནད་ཀྱི་སྐབས་སུ་བསྟན་པ་དེ་དག་ལས་གང་ཡང་རུང་བ་ཉེས་
[222b.2]པའི་སྟོབས་ཆེ་ཆུང་དང་སྦྱར་ཏེ་གཏང་ངོ་། །ལན་ཚྭ་ནག་པོ་དང་། ཁ་རུ་ཚ་དང་། བུལ་ཏོག་དང་། སྭརྫི་ཀའི་ཐལ་བ་དང་། ནས་ཚིག་འཁུས་པའི་ཐལ་བ་དང་། སབ་ཏ་ལ་དང་། ཀཎྜ་ཀ་རི་དང་། ཙི་ཏྲ་ཀ་དང་། འདི་རྣམས་གཅིག་ཏུ་སྔ་མ་བཞིན་དུ་བསྲེས་ཏེ་ཐལ་བ་ཆུ་དང་བསྲེས་པ་ལ་རས་
[222b.3]ཀྱིས་ལན་བདུན་བཙགས་ཏེ་ཁུ་བ་སྲང་དྲུག་ཅུ་རྩ་བཞིའི་ནང་དུ་མར་སྲང་བརྒྱ་ཉི་ཤུ་རྩ་བརྒྱད་བཅུག་སྟེ་བསྐོལ་ཏེ་མར་ལུས་པ་དང་། རན་པར་འཐུངས་ན་མེའི་དྲོད་སྐྱེད་དོ། །འདུས་པའི་ཕོ་བའི་ནད་ལ་ནད་སྟོབས་ཇི་ལྟ་བ་བཞིན་དུ་ལས་རྣམ་ལྔའི་དཔྱད་བྱའོ། །བད་ཀན་ཅན་མཆིལ་མ་མང་ཞིང་མེ་དྲོད་
[222b.4]ཆུང་བ་ལ་ནི་རྩུབ་པ་དང་། ཁ་བ་དང་། མེའི་དྲོད་སྐྱེད་པའི་སྨན་སྦྱར་རོ། །ལུས་རྗུད་པ་ལ་ནི་སྣུམ་པ་དང་། རྩུབ་པ་དང་བཅས་པར་རེས་ཀྱིས་བསྟན་ཏོ། །རླུང་གི་ཤས་ཆེ་ཞིང་མེ་དྲོད་ཆུང་སྟེ་ལུས་ཤ་ཟད་ཅིང་སྐེམ་པ་ལ་ནི་ཚ་བ་དང་དྲོད་སྐྱེད་པའི་སྨན་ཚ་བ་རྣམ་ལྔ་ལ་སོགས་པ་དང་སྦྱར་བའི་སྨན་སྦྱིན་ནོ། །
[222b.5]མེ་གྲོད་ཆུང་ཞིང་མཁྲིས་པ་ཤས་ཆེ་བ་ལ་ནི་དྲོད་སྐྱེད་པའི་བག་ཁ་བ་དང་། ཚ་བ་དང་། མངར་བའི་སྨན་དང་ལྷན་ཅིག་སྦྱར་བ་བླུད་དོ། །རླུང་ཤས་ཆེ་ཞིང་མེ་དྲོད་ཆུང་བ་ལ་ནི་སྣུམ་དང་སྐྱུར་དང་ལན་ཚྭ་དང་ལྡན་པ་རབ་ཏུ་བསྔགས་སོ། །ཉམ་ཆུང་བ་ལ་ནི་མེ་དྲོད་སྐྱེད་ཅིང་སྣུམ་བསྟན་པ་ནི་མཆོག་ཡིན་ནོ། །སྣུམ་
[222b.6]ཤས་ཆེ་བ་ལ་ནི་མར་དང་ཟས་ལྕི་བ་རྣམས་ཀྱང་སྤང་ངོ་། །སྐྱེས་བུ་གང་མེ་དྲོད་ཆུང་ཞིང་བད་ཀན་ཟད་དེ་ཕྱི་ས་འགག་ཅིང་། རེས་འགའ་སླ་བར་འབྱུང་བ་ལ་ནི་ལན་ཚྭ་དང་སྦྱར་བའི་མར་ཉུང་ངུ་ཟོས་ན་མེ་དྲོད་དང་མཉམ་དུ་གནས་པའི་རླུང་དེ་གནས་སུ་འདྲེན་པར་བྱེད་དོ། །རང་གི་ལས་དྲོད་སྐྱེད་
[222b.7]པར་འགྱུར་རོ། །བད་ཀན་ཟད་ཅིང་མེ་དྲོད་ཆུང་ལ་མ་ཞུ་བ་བེའུ་སྣབས་སུ་འཁྲུ་བ་ལ་ནི། མར་ལ་མེའི་དྲོད་སྐྱེད་པའི་སྨན་དང་སྦྱར་བ་བླུད་ན་མེ་དང་མཉམ་དུ་གནས་པའི་རླུང་གི་གནས་དག་པས་ཕྱིར་རང་གི་གནས་སུ་འོང་ལ། དེ་ལྟར་མེ་དང་མཉམ་དུ་གནས་པའི་རླུང་དང་མེ་དྲོད་ལྷན་ཅིག་གནས་ན་
[223a]
[223a.1]སྐྱེས་བུའི་སྟོབས་མྱུར་དུ་སྐྱེད་པར་བྱེད་དོ། །ཕྱི་ས་འབྱུང་དཀའ་ལ་སྲ་བར་འོང་བ་ལ་ནི། མར་ལན་ཚྭ་དང་བཅས་པ་ཟས་ཀྱི་ནང་དུ་བཏུང་ངོ་། །ཁོང་རྩུབ་ཅིང་མེ་དྲོད་ཆུང་བ་ལ་ནི་མར་རམ་ཏིལ་མར་དྲོད་སྐྱེད་པའི་སྨན་དང་སྦྱར་བ་བླུད་དོ། །སྣུམ་མང་དུ་འཐུངས་ཏེ་དྲོད་ཉམས་
[223a.2]པ་ལ་ནི་སློན་ཁྲུས་ཀྱིས་ལུས་དག་པར་བྱས་ནས་ཁ་ཟས་ཀྱི་ཆོ་ག་ཚུལ་བཞིན་དུ་བྱའོ། །ནད་བྱང་སྟེ་མེ་དྲོད་ཆུང་བ་ལ་ནི་མར་ཉི་ཚེ་བའི་སྨན་དང་སྦྱར་བས་དྲོད་སྐྱེད་དོ། །ལམ་དང་སྨྱུང་བ་བྱས་པས་ལུས་ཉམ་ཆུང་ཞིང་། མེའི་དྲོད་ཉམས་པ་ལ་ནི་ནས་ཐུག་མར་གྱིས་བཏབ་པ་བླུད་དོ། །ཡང་ན་འབྲས་ཀྱི་ཁུ་བས་སྟོབས་སྐྱེད་
[223a.3]ཅིང་གང་མེ་དྲོད་སྐྱེད་པ་ཉམས་སྟོབས་འཕེལ་བར་བྱེད་པའི་སྨན་གང་ཡང་རུང་བས་བྱའོ། །ཡུན་རིང་དུ་འདོད་པ་སྤྱད་པས་ཤ་ཟད་ཅིང་ལུས་ཉམ་ཆུང་སྟེ་རིང་པ་ཕོ་བའི་དྲོད་ཉམས་པའི་མི་ལ་ནི་སྲོག་ཆགས་ཤ་རྗེན་ཟ་བའི་ཤ་སྐྱུར་དང་སྦྱར་བའམ། རོ་ཚ་བ་ཡང་བ་དྲོན་པོ་འཐུངས་ན་དྲི་མ་དག་པར་འགྱུར་ཏེ། མྱུར་དུ་མེ་
[223a.4]དྲོད་སྐྱེད་དོ། །དེ་ཡང་ཤས་ལུས་སྐྱེད་པའི་ཕྱིར་ཉིང་ཤ་ཅན་གྱི་ཤ་ཁྱད་པར་དུ་ཉམས་སྟོབས་སྐྱེད་པར་བྱེད་དོ། །སྣུམ་དང་། ཨ་ས་བའི་ཆང་དང་། ཨ་རི་ཏིའི་ཆང་དང་། སྨན་བསྐོལ་དང་། ཟས་འཕྲོད་པ་རྣམས་ཡང་དག་པར་སྦྱར་ན་ལུས་ཀྱི་སྟོབས་དང་མེ་དྲོད་འཕེལ་བར་བྱེད་དོ། །ཇི་ལྟར་ཕྱི་རོལ་གྱི་མེ་
[223a.5]གནས་པ་ལ་ཤིང་གི་སྙིང་པོ་སེང་ལྡེང་ལ་སོགས་པ་བཅུག་ན་མེ་རྟག་པ་དང་འདྲ་བར་ལུས་ཀྱི་མེ་ལ་ཡང་སྣུམ་དང་བཅས་པའི་ཟས་ཟོས་ན་མེ་དྲོད་སྐྱེད་ཅིང་བརྟན་པར་འགྱུར་རོ། །ཟས་མ་ཟོས་པ་དང་། ཟས་ཧ་ཅང་འགྲངས་པ་ལས་མེའི་དྲོད་སྐྱེད་པར་མི་བྱེད་དེ། ཇི་ལྟར་ཤིང་མེད་པ་དང་། ཤིང་མངས་པས་
[223a.6]མེ་ཆེར་མི་འབར་བ་བཞིན་ནོ། །གང་གི་ཚེ་བད་ཀན་བྲི་སྟེ་མཁྲིས་པ་རང་གི་གནས་སུ་རླུང་དང་ལྷན་ཅིག་གནས་པས་དྲོད་སྐྱེད་པ་དེའི་ཚེ་མེ་དང་རླུང་འདྲེས་པ་ཡིན་ཏེ། དེས་ན་དང་པོ་ཁ་ཟས་མྱུར་དུ་འཇུ་བར་བྱས་ནས། དེའི་འོག་ཏུ་ཁམས་དང་མདངས་ཐམས་ཅད་བསྲེགས་བཙོས་ནས་འཆི་བར་འགྱུར་རོ། །སྐྱེས་
[223a.7]བུ་དེའི་ནད་ཁོང་ན་ཡོད་ཀྱི་བར་དུ་ཐ་མལ་པ་ཡིན་ན་ཡང་དེ་མ་ཐག་པར་འཇུ་སྟེ། དེ་ནས་ཁམས་རྣམས་ལ་ཡང་འཇུག་པར་འགྱུར་རོ། །མེ་དྲོད་ཤིན་ཏུ་ཆེ་བ་ལས་སྐོམ་དད་དང་། དབུགས་མི་བདེ་བ་དང་། ཚ་བ་དང་། བརྒྱལ་བར་བྱེད་པའི་ནད་འབྱུང་བར་འགྱུར་རོ། །མེའི་དྲོད་ཆེ་བ་དེ་ལྟ་བུ་ལ་ནི། ཁ་
[223b]
[223b.1]ཟས་ལྕི་བ་དང་། སྣུམ་པ་དང་། བསྐ་བ་དང་། སྨིན་སྐྱེན་པའི་ཟས་དང་། གྲང་བ་དང་། བརྟན་པ་ལ་སོགས་པའི་བཟའ་བ་དང་བཏུང་བས་ཞི་བར་བྱ་བ་ནི་ཆུས་མེ་བསད་པ་བཞིན་ནོ། །ཁ་ཟས་མ་ཞུར་ཟིན་ཀྱང་ཁ་ཟས་ཡང་དང་ཡང་དུ་བཟའ་བར་བྱ་སྟེ། ཁ་ཟས་མ་ཟོས་ན་ནང་གི་མེའི་བུད་ཤིང་མེད་པས་ཁམས་
[223b.2]ལ་གནོད་དེ་འཆི་བར་འགྱུར་རོ། །མེའི་སྟོབས་ཆེས་པའི་སྐྱེས་བུ་ལ་ནི་ཏིལ་དང་མོན་སྲན་སྡེའུ་ལ་སོགས་པ་ལས་བྱས་པའི་ས་རའི་ཐུག་པ་དང་། འོ་ཐུག་དང་ཚིལ་དང་ཞག་ལ་སོགས་པའི་སྣུམ་དང་། ནས་ཐུག་བུ་རམ་དང་སྦྱར་བའི་ཐུག་པ་དང་། སྲོག་ཆགས་ཆུ་ལ་གནས་པ་རུས་སྦལ་ལ་སོགས་པ་
[223b.3]དང་། ཆུ་འགྲམ་ན་གནས་པའི་ངང་པ་ལ་སོགས་པ་འདི་རྣམས་ཀྱི་ཤ་མར་ལ་བརྔོས་པ་དང་། ཁྱད་པར་དུ་ཉའི་ཤ་འཇམ་པོ་ཆུ་མི་གཡོ་བ་ལ་གནས་པ་དང་། ལུག་ཤ་ལེགས་པར་བརྔོས་པ་ཟོས་ན་མེའི་དྲོད་སྐྱེད་དོ། །དེས་ཀྱང་མ་ཞི་ན་འོ་མ་སྤྲ་ཚིལ་དང་སྦྱར་བའམ། ཡང་ན་མར་དང་སྤྲ་ཚིལ་དུ་སྦྱར་བ་སྐོམ་དུ་
[223b.4]བླུད་དོ། །བག་ཕྱེ་དང་མར་དང་འོ་མ་སྦྱར་བའི་སྐོམ་མང་དུ་བླུད་དོ། །ཡང་ན་བག་ཕྱེ་སྲོག་ཆགས་ཐང་ལ་གནས་པའི་ཤ་ཁུ་དང་ཏིལ་མར་སྦངས་པའི་སྣུམ་གང་ཡང་རུང་བ་དང་སྦྱར་བ་བླུད་དོ། །ཡང་ན་ཤ་མ་དུར་བྱིད་འོ་མ་དང་སྦྱར་བའི་བཀྲུ་སྨན་གཏང་ངོ་། །ལན་མང་དུ་མཁྲིས་པ་སེལ་བའི་སྨན་བཏང་ལ། དེའི་འོག་ཏུ་འོ་མ་
[223b.5]དང་བཅས་པའི་ཟས་བཟའོ། །ཁ་ཟས་ལྕི་བ་དང་། མི་གཙང་བ་དང་། བད་ཀན་སློང་བར་བྱེད་པའི་ཟས་དང་ཟས་ཟོས་པའི་འོག་ཏུ་ཉིན་པར་ཉལ་བར་བྱེད་པས་ཀྱང་ཕོ་བའི་དྲོད་འཇོམས་པར་བྱེད་དོ། །ཕོ་བའི་དྲོད་ཤས་ཆེ་ན་ཁ་ཟས་སྲེག་པར་བྱེད་ལ། དེ་ནས་ནད་གཞི་དང་། ཁམས་དང་། སྲོག་རྣམས་
[223b.6]རིམ་བཞིན་དུ་བསྲེགས་ནས་འཆི་བར་འགྱུར་རོ། །དེ་ལྟར་ཟས་ལྕི་བ་ལ་སོགས་པ་དེ་དག་ནི་རང་བཞིན་གྱིས་མི་མཐུན་པ་ཡིན་ནོ། །ཡང་སྦྱོར་བའི་དབང་གིས་ཤེས་པར་བྱ་སྟེ། ཅི་འདོད་པ་བཞིན་དུ་མི་རུང་སྟེ། དེ་བས་ན་མི་རྣམས་ཀྱི་སྟོབས་མེ་ལས་འབྱུང་ལ། སྟོབས་ལས་ནི་སྲོག་གྲུབ་པ་དེ་བས་ན་མེའི་དྲོད་སྐྱེད་
[223b.7]ཅིང་མེ་དྲོད་རན་པར་བྱ་བ་ལ་འབད་ཅིང་བསྲུང་བར་བྱའོ། །དེ་ལྟ་བས་ན་མེ་དྲོད་ཉམས་ན་ནི་མིའི་སྲོག་ཀྱང་ཉམས་པར་འགྱུར་བ་ཡིན་ཏེ། མེ་དྲོད་ཆེ་ཆུང་དུ་སོང་ན་ནི་ནད་སྣ་ཚོགས་ཀྱང་འབྱུང་ལ། མེ་དྲོད་མ་ཉམས་ན་ནི་ནད་མེད་ཅིང་ཚེ་རིང་བར་འགྱུར་རོ། །གསོ་བའི་གནས་ལས་ཕོ་བའི་ནད་གསོ་བའི་ལེའུ་བཅུ་པ་རྫོགས་སོ།། །།
[224a]
[224a.1]དེ་ནས་གཅིན་འགགས་པའི་ནད་གསོ་བའི་ལེའུ་བཤད་པར་བྱའོ། །དེ་ལ་རླུང་ལས་གྱུར་པའི་གཅིན་འགགས་པའི་ནད་ལ་ནི། རླུང་འཇོམས་པའི་སྨན་ཏིལ་མར་དང་སྦྱར་བས་ལྟེ་བའི་འོག་མན་ཆད་དུ་བསྐུ་བྱུག་བྱ་སྟེ། སྣུམ་དང་ལྡན་པའི་དུགས་དང་། བླུགས་
[224a.2]པའི་དུགས་དང་བྱུག་པ་རྣམས་བྱའོ། །རྩ་བ་བཅུ་པ་དང་། བ་ལ་དང་། ཨེ་རཎྜ་དང་། ནས་དང་། ཉེའུ་ཤིང་དང་། བ་སྤྲུ་བ་དང་། རྒྱ་སྲན་དང་། རྒྱ་ཤུག་དང་། ལྕགས་དང་། བ་སྤྲུ་བ་མེ་ཏོག་དམར་པོ་ཅན་དང་། སྲུ་སྲུའི་རྩ་བ་དང་། འདི་རྣམས་བཏགས་པའི་ཕྱེ་མ་མར་
[224a.3]དང་། ཕག་ཚིལ་དང་། ལན་ཚྭ་རྣམ་ལྔ་དང་ཆུ་དང་ཚུལ་བཞིན་བསྐོལ་ཏེ། བཏུང་བ་དང་། བྱུག་པ་དང་། དུགས་ལ་སོགས་པ་བྱས་ན་ཟུག་གཟེར་འཇོམས་པའི་མཆོག་ཡིན་ནོ། །ཡང་ན་གོང་གི་སྨན་དེ་རྣམས་འབྲུ་མར་འབྱུང་བའི་འབྲས་བུའི་རིགས་རྣམས་དང་། སྐྱུར་དང་
[224a.4]སྣུམ་མང་པོ་དང་ལྡན་པར་བཏུང་བ་དང་། ཟས་དང་བྱུག་པ་ལ་སོགས་པ་བྱས་ན་ཕན་ཡོན་གོང་མ་དང་འདྲའོ། །བཏུང་བ་ནི་ཁ་རུ་ཚ་མང་པོ་དང་སྦྱར་བའི་ཆང་འཐུངས་ན་གཅིན་འགགས་པ་སེལ་ཏོ། །མཁྲིས་པ་ལས་གྱུར་པའི་གཅིན་འགགས་པའི་ནད་ལ་ནི་བསིལ་བས་ལུས་ལ་
[224a.5]བླུགས་པ་དང་། བྱུག་པ་དང་ལུམས་བྱའོ། །ཉེའུ་ཤིང་དང་གཟེ་མ་དང་། བ་ཏ་རི་དང་། རྒུན་འབྲུ་དང་། རྩའི་རྩ་བ་དང་། འདི་རྣམས་ཚུལ་བཞིན་བསྐོལ་བའི་ནང་དུ་སྦྲང་རྩི་དང་། ཤ་ཁ་ར་བཏབ་པ་བླུད་དོ། །བ་ཤ་ཀ་དང་། ག་གོན་དང་། ཨེར་བ་རུ་དང་། ལེ་བརྒན་རྩི་
[224a.6]འདི་གསུམ་གྱི་ས་བོན་དང་། གུར་ཀུམ་དང་། འདི་རྣམས་ཀྱི་ཕྱེ་མ་རྒུན་ཆུ་དང་སྦྱར་བ་འཐུངས་ན་གཅིན་འགགས་པའི་ནད་ཐམས་ཅད་སེལ་ཏོ། །ཡང་ན་རྒྱལ་མོ་ག་གོན་གྱི་ས་བོན་དང་ཤིང་མངར་དང་། སྐྱེར་པའི་ཕྱེ་མ་དང་འབྲས་བཀྲུས་པའི་ཆུ་དང་འཐུངས་ན་ཡང་ཕན་ནོ། །ཡང་
[224a.7]ན་རྒུན་འབྲུམ་ཆམ་ཆོམ་བརྡུངས་ནས་ཆུ་དང་སྦྱར་བ་འཐུངས་ན་ཕན་ནོ། །བད་ཀན་ལས་གྱུར་པའི་གཅིན་འགགས་པའི་ནད་ལ་ནི་ཐོག་མར་དུགས་བྱས་ལ་དེའི་འོག་ཏུ་རྣོ་བ་དང་། དྲོ་བ་དང་། ཚ་བའི་སྐྱུག་སྨན་བཏང་ངོ་། །བཟའ་བ་ནི་ནས་ལས་བྱས་པའི་ཟན་དང་། ཁུར་བ་ལ་
[224b]
[224b.1]སོགས་པ་རྣོ་བ་དང་། ཚ་བ་དང་། ནས་ཚིགས་འཁུས་པའི་ཐལ་བ་དང་། དར་བ་དང་བཅས་པ་སྦྱིན་ནོ། །བཏུང་བ་ནི་སུག་སྨེལ་ལམ། སྐྱུ་རུ་རའི་འབྲས་བུ་གང་ཡང་རུང་བ་དང་ཆང་དུ་སྦྱར་བ་བླུད་དོ། །ཡང་ན་བྱ་བཞད་ཀྱི་རུས་པ་དང་། གཟེ་མ་དང་། སུག་སྨེལ་དང་། ཚ་བ་
[224b.2]གསུམ་དང་། འདི་རྣམས་སྦྲང་རྩི་དང་བ་གཅིན་དང་སྦྱར་བ་བཏུང་ངོ་། །ཡང་ན་ཀཎྜ་ཀ་རི་བསྐོལ་བའི་ཁུ་བ་སྦྲང་རྩི་དང་སྦྱར་བ་བླུད་དོ། །ཡང་ན་ཤིང་ཏི་པ་ར་གའི་ས་བོན་ཞིབ་ཏུ་བཏགས་པའི་ཕྱེ་མ་དང་དར་བ་བསྐྱོས་ཏེ་བླུད་དོ། །ཡང་ན་དྷ་བ་དང་། སབ་ཏ་པརྞི་དང་། དུག་
[224b.3]མོ་ཡུངས་དང་། སླེ་ཏྲེས་དང་། དོང་ག་དང་། ཀེའུ་ཀ་དང་། སུག་སྨེལ་དང་། ཤེ་ཏ་ཀ་རཉྫ་དང་། འདི་རྣམས་བསྐོལ་བའི་ཁུ་བའི་ནང་དུ་སྦྲང་རྩི་དང་སྦྱར་བ་འམ་ཡང་ན་དེ་རྣམས་སྦྱར་བའི་ཐུག་པ་བླུད་དོ། །ཡང་ན་བྱུ་རུ་བཏགས་པའི་ཕྱེ་མ་འབྲས་བཀྲུས་པའི་ཆུ་དང་ལྷན་ཅིག་བཏུང་
[224b.4]ངོ་། །ཡང་ན་ཤིང་པ་ཏ་ལའི་ཐལ་བའི་ཆུ་དང་སྦྱར་བ་ལན་བདུན་བཙགས་པའི་ཁུ་བ་ཏིལ་མར་དང་སྦྱར་བ་བླུད་དོ། །ཡང་ན་ཤིང་པ་ཏ་ལ་དང་། ཡ་བཀྵ་ར་དང་། པ་རི་པ་ཏྲ་དང་། ཏིལ་དང་། དེ་རྣམས་ཀྱི་ཐལ་བ་ཆུ་དང་བསྐྱོས་པ་དང་། ཆང་དངས་མ་དང་ལྷན་ཅིག་སྦྱར་བའི་ནང་དུ་ཤིང་ཚ་
[224b.5]དང་སུག་སྨེལ་དང་། སྤངས་མ་དང་། འདི་རྣམས་གསུམ་གྱི་ཕྱེ་མས་བཏབ་ལ་བླུད་དོ། །གོང་གི་བཏུང་བ་དང་། ལྡེ་གུའི་སྨན་ཐམས་ཅད་ཀྱི་ནང་དུ་བུ་རམ་བསྐོལ་ཏེ། ཁཎྜ་ཙམ་སྲ་བར་གྱུར་པ་བཏབ་ལ་མཉེས་ཏེ་སྦྱིན་ནོ། །འདུས་པ་ལས་གྱུར་པའི་གཅིན་འགགས་
[224b.6]པའི་ནད་ལ་ནི་ནད་གཞི་སོ་སོའི་གསོ་བ་དང་མཐུན་པར་སྦྱར་རོ། །རྡེའུ་ཡུན་མི་རིང་དུ་ཆགས་པ་ལ་ཡང་དེ་ལྟར་ནད་གཞི་སོ་སོ་དང་མཐུན་པའི་སྨན་དཔྱད་དེ་རླུང་ནད་འཇོམས་པའི་འཇམ་རྩི་མས་གཏོང་བ་ལ་སོགས་པ་ཡང་དེ་ལྟར་སྦྱར་རོ། །རྡེའུ་ཆགས་པའི་ནད་ནི་ཤིན་ཏུ་མི་བཟད་པ་ཡིན་
[224b.7]ཏེ་འཆི་བདག་གི་གཟུགས་དང་འདྲའོ། །དེ་ཡང་རྡེའུ་ནར་མ་སོན་པ་ལ་ནི་སྨན་གྱིས་གསོའོ། །ནར་སོན་པ་ལ་ནི་མཚོན་གྱི་ལས་བྱ་སྟེ། དེ་ལ་དང་པོ་རྡེའུ་ཇི་ལྟར་ཆགས་པའི་མཚན་ཉིད་ཤེས་པར་བྱས་ནས་སྣུམ་ཆོས་ལ་སོགས་པའི་རིམ་པ་བྱ་བར་འདོད་དེ། སྲུ་སྲུའི་རྩ་བ་དང་། བ་
[225a]
[225a.1]སུ་ཀ་དང་། བ་སི་རི་དང་། ཨ་སྨན་ཏ་དང་། ཉེའུ་ཤིང་དང་། ལྕམ་པ་དང་། ཨ་ཏི་བ་ལ་དང་། གོ་བྱེ་དང་། པུ་ཙེ་ཤེལ་དང་། ཀ་ཙ་ཀ་དང་། བྲཀྵི་ད་ནི་དང་། ཤིང་ཤ་ཀའི་འབྲས་བུ་དང་། བྱ་གྲི་དང་། གུ་ཐ་དང་། གཟེམ་དང་། ནས་དང་། རྒྱ་སྲན་
[225a.2]དང་། རྒྱ་ཤུག་དང་། པ་ར་ན་དང་། ཀན་ཏ་ཀའི་འབྲས་བུ་དང་། འདི་རྣམས་མར་དང་ཚུལ་བཞིན་བསྐོལ་བའི་ནང་དུ་ཨུ་ཤ་ཀའི་སྡེ་ཚན་གྱི་ཕྱེ་མ་བཏབ་པ་འཐུངས་ན། རླུང་ལས་གྱུར་པའི་རྡེའུ་མྱུར་དུ་འཇིག་པར་བྱེད་དོ། །ཡང་ན་ཨེ་རཎྜ་དང་། བྲི་ཧ་ཏི་དང་། ཀཎྜ་ཀ་རི་དང་།
[225a.3]གཟེམ་དང་། བུ་རམ་ཤིང་འདི་རྣམས་ཀྱི་རྩ་བའི་ཕྱེ་མ་ཞོ་མངར་པོ་ལ་བཏབ་སྟེ་བླུད་ན་རླུང་ལས་གྱུར་པའི་རྡེའུ་འཇིག་པར་བྱེད་དོ། །མཁྲིས་པ་ལས་གྱུར་པའི་རྡེའུ་ཆགས་པ་ལ་ནི་ཀུ་ཤ་དང་། ཀ་ཤ་དང་། འདམ་བུ་དང་། གུ་ཐ་དང་། ཨིང་ཀ་ཐ་དང་། ཉེའུ་ཤིང་དང་། སྲུ་སྲུའི་རྩ་བ་དང་།
[225a.4]དར་བ་དང་། བི་ད་རི་དང་། བ་རི་ཧི་དང་། འབྲས་ཀྱི་རྩ་བ་དང་། གཟེ་མ་དང་། བ་ལུ་ཀ་དང་། བ་ཏ་ཀ་དང་། ལྕགས་ཕྱེ་དང་། ཀུ་རུ་ཏ་ཀ་དང་། བ་སྤྲུ་བ་དང་། ཤི་རི་ཤ་དང་དེ་རྣམས་བསྐོལ་བའི་ཁུ་བ་མར་དང་ལྷན་ཅིག་བསྐོལ་བའི་ནང་དུ་ག་གོན་ལ་སོགས་པའི་ས་བོན་དང་།
[225a.5]ཨུཏྤ་ལའི་ས་བོན་དང་། ཤིང་མངར་དང་། བྲག་ཞུན་དང་འདི་རྣམས་ཀྱི་ཕྱེ་མས་བཏབ་སྟེ་འཐུངས་ན་ཕན་ནོ། །བད་ཀན་ལས་གྱུར་པའི་རྡེའུ་ཆགས་པ་ལ་ནི་སྨན་བ་རུ་ནའི་སྡེ་ཚན་དང་། རླུང་འཇོམས་པའི་སྨན་ཐང་ཤིང་ལ་སོགས་པའི་སྡེ་ཚན་དང་། བྱི་དང་ག་དང་། ཧ་རེ་ཎུ་ཀ་དང་། གུ་གུལ་དང་།
[225a.6]ན་ལེ་ཤམ་དང་། རུ་རྟ་དང་། ཀྲུ་ཏྲུག་ཏྲེས་དང་། བྱེའུ་རུག་པ་དང་། དེ་རྣམས་བསྐོལ་བའི་ཁུ་བ་མར་དང་ཡང་བསྐོལ་བའི་ནང་དུ་ཨུ་ཤ་ཀའི་སྡེ་ཚན་བཏགས་པའི་ཕྱེ་མ་བཏབ་པའི་མར་བླུད་ན་བད་ཀན་ལས་གྱུར་པའི་རྡེའུ་མྱུར་དུ་འཇིག་པར་བྱེད་དོ། །བཟའ་བ་དང་། བཏུང་བ་ནི་འོ་མ་
[225a.7]དང་། ཐུག་པ་དང་ཐལ་སྨན་དང་སྦྱར་བའི་ནད་གཞི་སོ་སོ་དང་མཐུན་པའི་སྨན་རྣམས་ཀྱང་བཟའ་བཏུང་གི་ནང་དུ་སྦྱར་རོ། །རྡེའུ་ཕྱེ་མར་ཆགས་པ་ལ་པི་ཙུ་ཀ་དང་། ཨ་ཀོ་ལ་དང་། ཨུཏྤ་ལའི་འབྲས་བུ་རྣམས་ཆུ་དྲོན་པོ་དང་སྦྱར་བའི་ནང་དུ་བུ་རམ་བཏབ་པ་འཐུངས་ན་རྡེའུ་ཕྱེ་མར་
[225b]
[225b.1]ཆགས་པ་འབྱིན་པར་བྱེད་པའི་མཆོག་ཡིན་ནོ། །ཁྲུང་ཁྲུང་དང་། རྔ་མོ་དང་། བོང་བུ་དང་། འདི་རྣམས་ཀྱི་རུས་པ་དང་། གཟེ་མ་དང་། ཏ་ལ་པ་ཏྲི་ཀ་དང་། ཨ་ཛ་མོ་དང་། ཀ་དམ་བའི་རྩ་བ་དང་། བཅའ་སྒ་འདི་རྣམས་ཆུ་དྲོན་པོའམ། ཆང་དང་སྦྱར་ཏེ་འཐུངས་ན་རྡེའུ་ཕྱེ་
[225b.2]མར་ཆགས་པ་འཇིག་པར་བྱེད་དོ། །གྲིང་ཏྱ་ཀུན་ད་ཀའི་ས་བོན་གྱི་ཕྱེ་མ་སྦྲང་རྩི་དང་ལྡན་པར་ལུག་གི་འོ་མའི་ནང་དུ་བཅུག་སྟེ། ཞག་བདུན་གྱི་བར་དུ་འཐུངས་ན་རྡེའུ་འཇོམས་པར་བྱེད་དོ། །ཤི་ཀྲུའི་རྩ་བ་བསྐོལ་བ་དྲོ་འཇམ་ཙམ་འཐུངས་ན་རྡེའུ་གནས་ནས་སྐྱོད་པར་བྱེད་དོ། །ཏིལ་
[225b.3]དང་། ཨ་པ་མརྒ་དང་། ཆུ་ཤིང་དང་། པ་ལ་ཤ་དང་། འདི་རྣམས་ཀྱི་ཐལ་བ་ལུག་གི་གཅིན་དང་ལྷན་ཅིག་འཐུངས་ན་ཕྱེ་མར་ཆགས་པའི་རྡེའུ་ཆགས་པ་གཉིས་འཇོམས་པར་བྱེད་དོ། །ཡང་ན་ལྕམ་པའི་རྩ་བ་བཙིར་བ་ཆང་ལ་སོགས་པའི་ནང་དུ་བསྲེས་པ་འཐུངས་ན་ཕན་ཡོན་གོང་
[225b.4]མ་དང་འདྲའོ། །ཡང་ན་རྡེའུ་ཆགས་པའི་ཟུག་གཟེར་གྱིས་ཉམ་ཐག་པ་ལ་ནི་ལྕམ་པའི་རྩ་བ་དེ་ཉིད་འོ་མ་དང་སྦྱར་བ་བླུད་དོ། །ཡང་ན་ཨ་རུ་རའི་རུས་པ་འོ་མ་དང་ཚུལ་བཞིན་བསྐོལ་བའམ་བ་སྤྲུ་བའི་འོ་མ་དང་བསྐོལ་བའམ། ཡང་ན་བར་ཧྲི་ཤི་ཀའི་རྩ་བ་འབྲས་བཀྲུས་པའི་ཆུ་དང་
[225b.5]ཐོག་མར་འཐུངས་ཏེ་དེའི་འོག་ཏུ་འོ་མ་དང་བཅས་པའི་ཁ་ཟས་བཟའོ། །ལྷག་མ་ནི་གཅིན་འགགས་པའི་སྨན་གྱི་ཅི་ལྟ་བ་བཞིན་དུ་འདིར་ཡང་སྦྱར་བར་བྱའོ། །ཡང་ན་གཟེ་མ་དང་། དེའི་ཉིས་འགྱུར་གྱི་བྲི་ཧ་ཏི་ལ་སོགས་པའི་སྡེ་ཚན་དང་ཚུལ་བཞིན་དུ་མར་དང་འོ་མ་བསྐོལ་བ་
[225b.6]འཐུངས་ན་གཅིན་ནད་ཐམས་ཅད་སེལ་ཏོ། །ཐང་ཤིང་དང་། གླ་སྒང་དང་། མུར་བ་དང་། ཤིང་མངར་དང་། ཨ་རུ་ར་དང་། འོ་མའམ། ཆུ་དང་སྦྱར་ཏེ་འཐུངས་ན་གཅིན་འགགས་པའི་ནད་ཐམས་ཅད་ལ་ཕན་ནོ། །ཡང་ན་བྱི་ཚེར་བ་བསྐོལ་བའི་ཁུ་བའམ། ཀ་ཀུ་
[225b.7]པ་བསྐོལ་བའི་ཁུ་བའམ། ཡང་ན་འབྲས་བུ་གསུམ་བཏགས་པའི་ཕྱེ་མ་རྒྱམ་ཚ་དང་། ཆུ་དྲོན་དང་སྦྱར་བ་བཏུང་བར་བྱའོ། །ཡང་ན་བྱ་གྲི་དང་གཟེ་མ་བསྐོལ་བའི་ཐུག་པ་ཕ་ནི་ཏ་ཞེས་བྱ་སྟེ་བླུད་དོ། །ཡང་ན་གོ་བྱེའི་སྡེ་ཚེན་བསྐོལ་བ་འམ། ཁྱིམ་བྱའི་ཤ་ཁུ་དང་སྦྱར་བའི་
[226a]
[226a.1]ཐུག་པ་བླུད་དོ། །ཡང་ན་བྲག་ཞུན་སྨན་བི་ར་ཏ་ཀའི་སྡེ་ཚན་ཡང་དང་ཡང་དུ་བསྐོལ་བ་སྦྱིན་ནོ། །ཡང་ན་ཆང་ལེགས་པར་སྨིན་པར་འཐུངས་ཏེ། རྟ་རྒྱུག་པའམ། ཤིང་རྟས་མྱུར་དུ་ཤུགས་ཀྱིས་འགྲོ་ཞིང་ལུས་བསྐྱོད་པས་རྡེའུ་གནས་ནས་འཕོ་བར་འགྱུར་རོ། །
[226a.2]རྡེའུ་གོང་པོར་ཆགས་པ་དང་རྡེའུ་ཕྱེ་མར་ཆགས་པ་ལ་ནི་རྣམ་པ་ཐམས་ཅད་དུ་བི་ར་ཏ་ཀ་ལ་སོགས་པའི་སྡེ་ཚན་བཟའ་བ་དང་བཏུང་བ་དང་ཐམས་ཅད་ལ་སྦྱར་བར་བྱའོ། །བཀྲུ་སྨན་གྱི་དོན་དུ་སེང་ཕྲོམ་གྱི་མར་རླུང་ནད་ཀྱི་སྐབས་སུ་བཤད་པ་དང་། ཁྱད་པར་དུ་འཇམ་རྩི་མས་གཏོང་
[226a.3]བའི་ལས་བྱའོ། །ཁུ་བ་ལས་གྱུར་པའི་རྡེའུ་ཆགས་པ་ལ་ནི་ཉམས་སྟོབས་དང་ལྡན་པ་ཞིག་ན། ཕོ་མཚན་གྱི་ལམ་ནས་འཇམ་རྩི་བཏང་སྟེ་གནས་དག་པར་བྱའོ། །གཞན་ཡང་སྐྱེས་བུ་དེས་ཐོག་མར་ཁུ་བ་འཕེལ་བའི་ཆོ་ག་ཁྱིམ་བྱའི་ཤ་དང་། མོན་སྲན་གྲེའུ་དང་། བྱིའུ་མཆིལ་པ་
[226a.4]དང་། དེ་རྣམས་ཀྱི་ཤ་དང་ཁུ་བ་ངོམས་པར་འཐུངས་ལ་བུད་མེད་འདོད་པའི་ཤས་ཆེ་བ་བསྟེན་ཅིང་ཉལ་པོ་བྱས་ན་ཕན་ནོ། །དེ་ལ་རྡེའུ་མཚོན་གྱིས་དྲལ་ཏེ་དབྱུང་བའམ་ཡང་རྡེའུར་སྨིན་ནས་ངེས་པར་རེད་པ་ནི་དྲལ་བར་འོས་པ་ཡིན་ལ། མ་སྨིན་པ་ལ་ནི་གོང་གི་སྨན་གྱིས་གསོ་བར་བྱའོ། །
[226a.5]དེ་ལ་རྡེའུ་འབྱིན་པ་དང་དཔྱད་ཆེན་པོ་འདི་ནི་ཤིན་ཏུ་ཉེན་ཆེ་སྟེ། སོས་ཤི་བསྡོ་བར་དམ་བཅའ་དགོས་པ་ཡིན་པས་སྨན་པས་ས་བདག་གི་རྒྱལ་པོ་ལ་སྨན་དཔྱད་ཀྱི་ཡན་ལག་བགྱི་བར་ཐག་བཅད་དེ་དེའི་འོག་ཏུ་སྨན་པས་མཚོན་ལེགས་པར་བྱས་ནས་ཤིན་ཏུ་བརྟགས་ཏེ་ལས་བརྩམ་པར་བྱའོ། །
[226a.6]དེ་ཡང་གསོ་བའི་དཔྱད་མ་བྱས་ན་ནི་ངེས་པར་འཆི་བར་འགྱུར་ལ། བྱས་ན་ནི་ཐེ་ཚོམ་དང་བཅས་ཤིང་འཚོ་བ་ཡང་སྲིད་པས་ཤིན་ཏུ་བག་དང་བཅས་པར་དཔྱད་བྱ་བའི་རིགས་སོ། །དཔྱད་རྩོམ་པའི་སྨན་པ་བདག་ཉིད་ཀྱང་སྨན་དཔྱད་ཀྱི་ལུང་ལེགས་པར་ཁོང་དུ་ཆུད་ཅིང་གསོ་བའི་ལས་
[226a.7]མང་པོ་གྲུབ་པས་བྱ་དགོས་པ་ཡིན་ནོ། །དེ་ལ་རྡེའུ་འབྱིན་པར་འདོད་པས་ཐོག་མ་ནས་ནད་པ་ལ་སྣུམ་གྱི་ཆོ་གས་ལུས་དག་པར་བྱས་ལ། དེ་ནས་རྡེའུ་གསལ་པོར་མངོན་པར་བྱ་བའི་ཕྱིར་ལུས་ཅུང་ཞིག་སྦྱར་ཏེ་རིད་པར་བྱ་སྟེ། དེའི་འོག་ཏུ་ལུས་མར་གྱིས་བསྐུས་ལ་ཅུང་ཞིག་
[226b]
[226b.1]རྔུལ་བའི་ཆོ་ག་བྱའོ། །དེ་ནས་བདེ་ལེགས་སུ་འགྱུར་ཞིང་རང་གི་ལུས་བསྲུང་བའི་ཕྱིར་བཀྲ་ཤིས་དག་བྱ་བར་རིགས་སོ། །དེ་ནས་སྙིང་སྟོབས་བསྐྱེད་པའི་ཕྱིར་ཐོག་མར་རྡེའུ་འབྱིན་ཁར་ཆང་བཟང་པོ་མང་དུ་བླུད་ལ། རྟའམ་ཤིང་རྟ་ལ་བསྐྱོན་ཏེ་དྲག་ཏུ་རྒྱུགས་ན་གནས་སྔ་མ་
[226b.2]ལས་རྡེའུ་འོག་ཏུ་རང་འབབ་པར་འགྱུར་རོ། །ཐབས་དེས་རྡེའུ་འོག་ཏུ་མ་འཕོས་ན་བཙིར་བ་ལ་སོགས་འོག་ནས་འབྱུང་བའི་ཆོ་ག་རྣམས་བྱའོ། །དེ་ནས་ནད་པ་ལ་ཟན་ཅུང་ཟད་བྱིན་ལ་ནད་པ་སྤང་ལེབ་ཀྱི་ཁྲི་པུས་མོ་ཙམ་མཐོ་བའི་སྟེང་དུ་སྟན་ནང་ཚངས་ཅན་ལ་སོགས་པ་འཇམ་རྩི་བཏིང་བ་ལ་
[226b.3]མི་ཅིག་རྒྱབ་ནས་རྟེན་ཐབས་སུ་འདུག་ལ། །དེའི་པང་པར་ནད་པ་བཞག་སྟེ་ལྟེ་བ་ཡན་ཆད་ཀྱི་རོ་སྟོད་ཅུང་ཟད་བསྟོད་ལ་པུས་མོ་གཉིས་བཀུག་སྟེ་སྒྱིད་ཁུང་གཉིས་ནས་རས་ཀྱིས་བྲངས་ལ་ལག་ངར་གཉིས་དང་བཅས་པ་མི་འགུལ་བར་དམ་དུ་རྐེད་པར་བཅིང་ངོ་། །དེ་ནས་ཉེ་འཁོར་ན་
[226b.4]འདུག་པ་རྣམས་ཀྱིས་སྤྲོ་བ་བསྐྱེད་དོ། །དེ་ནས་ལྟེ་བ་མན་ཆད་བསྐུ་བྱུག་བྱས་ཏེ། ལྷོ་བ་གཡོན་ལོགས་ནས། མར་ལ་ཁུ་ཚུར་གྱིས་མཐར་ཆགས་སུ་ཕུལ་ཐབས་ཀྱིས་བཙིར་ལ། ཇི་སྲིད་དུ་རྡེའུ་འོག་ཏུ་ཕྱིན་པར་གྱུར་ན་ལག་པ་གཡོན་པའི་མཛུབ་མོ་དང་གུང་མོ་གཉིས་སེན་མོ་བྲེགས་
[226b.5]ལ་ཏིལ་མར་གྱིས་བསྐུས་ནས་བཤང་བའི་ལམ་ནས་བཅུག་སྟེ། ནམ་རྡེའུ་ལ་རེག་པ་དང་། ཕྱི་རོལ་གྱི་བཤང་བའི་སྒོ་དང་། འབྲས་བུའི་མཚམས་ཀྱི་སྲུབས་བྲེང་བྲེང་པོར་སྟོབས་ཀྱིས་ཕུལ་ཏེ་དེ་ཡང་ཇི་སྲིད་གཞུང་མཐོན་པོར་གྱུར་གྱི་བར་དུ་སོར་མོ་གཉིས་ཀྱིས་བཙིར་
[226b.6]ཞིང་ཕྱི་རོལ་ནས་ཀྱང་ཁུ་ཚུར་གྱིས་དགུག་སྟེ་ཚན་གྱིས་ཕུལ་བར་བྱའོ། །དེ་ནས་མཐོ་བར་གྱུར་པ་དང་། དབུས་བྲེང་བྲེང་པོའི་སྲུབས་ཀྱི་དཀྱིལ་དུ་མེ་ཚོན་མི་གདབ་པར་གཡས་གཡོན་གང་མཐོ་བའི་སྟེང་ཕྱོགས་ཀྱི་སྲུབས་ཀྱི་མཆན་དུ་ཟབས་སུ་ནས་གང་ཙམ་ལ་རྨ་ཁའི་ཆེ་
[226b.7]ཆུང་ནི་རྡོའི་ཤོང་ཚད་ཀྱི་རྨ་དྲལ་ལ་རྡེའུ་ཆེ་ཆུང་ཅི་ཡོད་པ་མ་ལུས་པར་དབྱུང་ངོ་། །ཅི་སྟེ་ལག་པས་རྡེའུ་མཐོན་ན་ལྕགས་ཀྱུ་མི་རྣོ་བས་ཕྱིར་དྲངས་ཏེ་མ་ལུས་པར་དབྱུང་ངོ་། །བུད་མེད་ཀྱི་རྡེའུ་ཆགས་པ་ལ་ནི་ཆུ་སོའི་གཡས་གཡོན་གྱི་ངོས་གང་ཡང་རུང་བ་ལ་ཡོད་དོ། །དེ་ཡང་
[227a]
[227a.1]མངལ་ལ་བརྟེན་ཏེ་འདུག་པས་མཛུབ་མོ་དང་གུང་མོ་གཉིས་གོང་མ་བཞིན་དུ་བཅུག་སྟེ་གང་ཕྱོགས་ན་ཡོད་པ་མྱང་ནས་གཡས་གཡོན་གང་ན་ཡོད་ན་ཡང་དེའི་ཕྱོགས་ཀྱི་ངོས་ལ་དྲལ་ལོ། །ཆོ་ག་གཞན་ནི་སྐྱེས་པ་དང་འདྲའོ། །གཞན་དུ་ལོག་པར་དྲལ་
[227a.2]ན་ནི་རྨ་ཁ་ལས་རྟག་ཏུ་གཅིན་འཛག་པའི་སྐྱོན་དུ་འགྱུར་རོ། །སྐྱེས་པ་ལ་ཡང་བཙིར་དྲགས་ན་ལྒང་པ་ཞར་ནས་རྟག་ཏུ་གཅིན་འཛག་པའི་སྐྱོན་ཡོད་དེ་དེ་བས་ན་སྐྱེས་པའི་ཆུ་སོར་རྡེའུ་ཕྱིན་ཁར་དལ་གྱིས་ཕུལ་ལ་མཉེའོ། །ལན་ཅིག་དྲལ་ནས་རྡེའུ་ཕྱིར་བྱུང་ན་ནི་ལེགས་པའི་
[227a.3]མཚན་མ་ཡིན་ནོ། །ལན་ཅིག་དྲལ་བས་རྡེའུ་མ་ཐོན་ན་ཉེས་པ་ཡིན་ཏེ་ཡང་མི་བསྣན་ནོ། །དེ་ལྟར་དྲལ་མ་ཐག་ཏུ་མཚོན་ཕྱིར་ཕྱུང་ལ། རྡེའུ་ཡང་ཏིང་ཐོགས་ལ་ཕྱུང་མ་ཐག་ཏུ་སྣོད་ཆུ་དྲོན་གྱིས་བཀང་བའི་ནང་དུ་རོ་སྨད་བཅུག་ལ་དུགས་བྱས་ན་ཁྲག་ངན་ཕྱིར་བྱུང་ཞིང་ནད་
[227a.4]ཉུང་བར་ཡང་འགྱུར་རོ། །རྨ་ཁ་ཆུ་མི་ཤོར་བར་བསྲུང་ངོ་། །དེ་ནས་རྨ་ཁའི་ནང་ན་ཁྲག་ངན་ཡོད་ན་བཙིར་ལ་དབྱུང་ངོ་། །དེ་ལྟར་བྱས་ན་ཡང་ནང་དུ་རྡེའུའི་དུམ་བུ་ཁྲག་ངན་ལུས་སུ་དོགས་ན་ཤིང་འོ་མ་ཅན་ཆམ་ཆོམ་བརྡུངས་ལ་ཆུ་དང་བསྐོལ་བའི་ཁུ་བ་ལྒང་པའི་ནང་དུ་
[227a.5]བཅུག་ལ་ཕོ་མཚན་གྱི་བུ་གའམ་རྨ་གང་ཡང་རུང་བ་ནས་འཇམ་རྩིའི་ཐབས་སུ་བཏང་ན་རྡེའུའི་དུམ་བུ་དང་ཁྲག་ངན་ཐམས་ཅད་འབྱིན་ཏེ། གཅིན་གྱི་གནས་དག་པར་གྱུར་པ་ལ་གཅིན་ཡང་ལེགས་པར་འབྱུང་ངོ་། །གོང་དུ་འོ་མ་ཅན་གྱི་ཤིང་ཞེས་སྨོས་པ་ནི་སྨན་པ་རྣམས་འདི་ལྔ་ལ་འདོགས། ནྱ་གྲོ་
[227a.6]དྷ་དང་། ཨུ་དུམ་ཝཱ་ར་དང་། ཨ་ཤྭདྠ་དང་། ཀ་པིད་ཏ་དང་། པླག་ཤ་སྟེ་ལྔ་པོ་འདི་དག་ཡིན་པར་འདོད་དོ། །དེ་ནས་མར་དང་སྦྲང་རྩི་ཆ་སྙོམས་ལ་རྨ་ཁར་བསྐུའོ། །གཅིན་གྱི་གནས་དག་པར་བྱ་བའི་ཕྱིར་བུ་རམ་ཡོག་ཚད་དུ་བཟའོ། །ཁ་ཟས་ནི་ཞག་གསུམ་གྱི་བར་དུ་སྔ་དྲོ་ཕྱི་དྲོ་དུས་
[227a.7]གཉིས་སུ་ཁྲུས་དང་བཀྲུ་སྨན་དང་། གཟེ་མ་དང་། འདི་རྣམས་བསྐོལ་བའི་ཁུ་བ་ལ་གཞི་བླངས་པའི་འབྲས་ཐུག་དྲོ་འཇམ་ཙམ་མར་དང་ལྡན་པ་སྦྱིན་ནོ། །དེ་ནས་ཉི་མ་བཅུ་པའི་བར་དུ་འབྲས་ཆན་ཉུང་ཤས་མར་དང་འོ་མ་དང་ལྡན་པར་བྱས་པ་སྦྱིན་ནོ། །དེ་ཕན་ཆད་ནི་ཤིང་ཐོག་
[227b]
[227b.1]སྐྱུར་པོ་སེའུ་འབྲུ་ལ་སོགས་པ་དང་སྐམ་ན་གནས་པའི་རི་དགས་ཀྱི་ཤ་ཁུ་དང་འབྲས་ཆན་ཆུང་ངུ་ཟའོ། །དེ་ནས་ཁ་ཟས་ཀྱི་རིམ་པ་བསྐྱེད་དོ། །ཤིང་འོ་མ་ཅན་བསྐོལ་བའི་ཁུ་བས་ཇི་སྲིད་སོས་ཀྱི་བར་དུ་རྨ་བཀྲུ་བར་བྱའོ། །ཡང་རྨའི་ཐན་ཀོར་དུ་པྲ་པུཎྜ་རཱི་ཀ་དང་། བཙོད་དང་།
[227b.2]ཤིང་མངར་དང་། སེང་ཕྲོམ་དཀར་པོ་དང་། འདི་རྣམས་བཏགས་པའི་ཕྱེ་མ་ཆུ་དང་ལྡེ་གུར་བྱས་པས་བཀྲུའོ། །ཡང་ན་སྨན་གོང་མའི་ནང་དུ་ཡུང་བ་དང་སྐྱེར་པ་བསྣན་ཏེ་ཕྱེ་མར་བྱས་པ་ལ་ཏིལ་མར་དང་སྦྱར་བས་རྨ་ལ་བསྐུའོ། །གཞན་ཡང་གོང་མིའི་སྦྱོར་བའི་སྨན་
[227b.3]གྱི་ནང་དུ་སྦྲང་རྩི་དང་སྦྱར་བ་ཞག་བཅུའི་བར་དུ་རྨ་ལ་དུགས་བྱའོ། །ཡང་ན་སྨན་དེ་ཉིད་ཀྱིས་ཞག་བདུན་གྱི་བར་དུ་གཅིན་གྱི་རྒྱུན་སྲང་ཀུན་ཏུ་ཡང་དུགས་བྱའོ། །དེ་ལྟར་བྱས་ཀྱང་གཅིན་རྨ་ལས་འབྱུང་ཞིང་ཕོ་མཚན་ནས་མི་འབྱུང་ན། མདོའི་གནས་སུ་ཇི་ལྟར་བཤད་པ་བཞིན་
[227b.4]དུ་རྨ་མེས་བསྲེགས་ན་རྨ་འདྲུབ་པའི་རིགས་སོ། །ཡང་ན་མངར་བའི་སྨན་སྣ་ཚོགས་སྦྲང་རྩི་དང་སྦྱར་བའི་ཁུ་བ་ལྒང་པའི་ནང་དུ་བླུགས་ཏེ་སྦུ་གུ་ཕྲ་མོ་དང་ཕོ་མཚན་གྱི་བུ་ག་ནས་ཡར་འཇམ་རྩིའི་ཐབས་སུ་བཏང་ན་གཅིན་བདེ་བར་འབྱུང་ཞིང་མཁྲིས་པ་ཡང་སེལ་ཏོ། །རྨ་འདྲུ་བ་
[227b.5]ནས་ལོ་གཅིག་གི་བར་དུ་སྲུང་བ་ནི་རི་དང་ཤིང་ལ་མི་འཛེག །རྟ་དང་གླང་པོ་ཆེ་དང་ཤིང་རྟ་ལ་མི་ཞོན་ཉལ་པོ་སྤང་ཆུ་ལ་མི་རྐྱལ་མཚོན་གདབ་ཏུ་མི་རུང་བའི་གནས་བརྒྱད་ཡོད་དེ། རླིག་པ་དང་། གཅིན་དང་། ཁུ་བ་འབབ་པའི་གནས་དང་། ལྒང་པ་དང་ཕོ་མཚན་དང་བཤང་བའི་སྒོའི་
[227b.6]མཚམས་ཀྱི་སྲུབས་དང་ཕོ་མཚན་གྱི་རྩེ་མོ་དང་། མོ་མཚན་གྱི་ཁ་དང་། འདི་དག་ནི་གནད་ཀྱི་གནས་བརྒྱད་ཡིན་པས་མཚོན་མི་གདབ་བོ། །གཅིན་འགགས་པའི་ནད་གསོ་བའི་ལེའུ་བཅུ་གཅིག་པ་རྫོགས་སོ།། །།དེ་ནས་གཅིན་སྙི་བ་ཟ་གུའི་ནད་གསོ་བའི་ལེའུ་
[227b.7]བཤད་པར་བྱའོ། །དེ་ལ་གཅིན་ནད་ཡོད་པའི་ནད་པ་སྟོབས་དང་ལྡན་ན་ཐོག་མར་ཡུངས་ཀར་དང་། ནིམ་པ་དང་། ཉེའུ་ཤིང་དང་། བ་རུ་ར་དང་། ཀ་རཉྫ་དང་། འདི་རྣམས་གང་ཡང་རུང་བའི་མར་གྱི་ནང་དུ་གཟེ་མ་བཏབ་པ་བསྐོལ་ཏེ་མར་འབའ་ཞིག་ལུས་པས་སྣུམ་
[228a]
[228a.1]ཆོས་བྱས་ལ་དེའི་འོག་ཏུ་སྐྱུག་སྨན་དང་བཀྲུ་སྨན་གཏང་ངོ་། །དེའི་འོག་ཏུ་བྱེའུ་རུག་པའི་སྡེ་ཚན་བསྐོལ་བའི་ཁུ་བའི་ནང་དུ་གླ་སྒང་དང་། ཐང་ཤིང་དང་། དོང་གྲ་གསུམ་བཏགས་པའི་ནི་རུ་ཧ་མས་གཏང་བར་བྱའོ། །ཡང་ན་མཁྲིས་པ་ལ་ཕན་པའི་སྨན་
[228a.2]བསྐོལ་བའི་ཁུ་བའི་ནང་དུ་ནྱ་གྲོ་དྷའི་སྡེ་ཚན་གྱི་ཕྱེ་མ་བཏབ་པའི་ནི་རུ་ཧ་གཏང་ངོ་། །དེ་ལྟར་དག་པར་བྱས་ནས་སྲོག་ཆགས་ཐང་ལ་གནས་པའི་ཤ་ཁུ་དང་ཐུག་པར་བྱས་པ་བླུད་དོ། །གལ་ཏེ་ཐུག་པ་མ་བླུད་ན་ནི་གཅིན་འགགས་པ་དང་། སྐྲན་དང་ཁམས་ཟད་པ་དང་། ཆུ་སོ་གཟེར་བའི་
[228a.3]ནད་འབྱུང་སྟེ། དེ་ལ་ནི་གོང་གི་ཐུག་པ་ལ་སོགས་པའི་སྦྱོར་བས་གཅིན་འགགས་པ་དང་། ཁམས་ཟད་པ་ཞི་བར་བྱ་བ་དང་། བསྲུང་བར་བྱ་བའི་སྦྱོར་བ་བྱ་སྟེ། གཅིན་ནད་ཐམས་ཅད་ལ་ཆོ་ག་དེ་ལྟར་བྱའོ། །སྐྱུ་རུ་ར་བསྐོལ་བའི་ཁུ་བའི་ནང་དུ་ཡུང་བའི་ཕྱེ་མ་དང་སྦྲང་རྩི་བཏབ་པ་
[228a.4]སྦྱིན་ནོ། །ཡང་ན་སྐྱེར་པ་དང་། ཐང་ཤིང་དང་འབྲས་བུ་གསུམ་དང་། གླ་སྒང་འདི་རྣམས་ཆུ་དང་བསྐོལ་བའི་ཁུ་བ་གྲང་མོའི་ནང་དུ་སྦྲང་རྩི་བཏབ་པ་བླུད་ན་གཅིན་ནད་སེལ་ཏོ། །ཡང་ན་ཙི་ཏྲ་ཀ་དང་། འབྲས་བུ་གསུམ་དང་། སྐྱེར་པ་དང་། དུག་མོ་ཡུངས་ཀྱི་ཤུན་པ་དང་།
[228a.5]འདི་རྣམས་བསྐོལ་བའི་ཁུ་བའི་ནང་དུ་སྦྲང་རྩི་བཏབ་པ་བླུད་ན་ཕན་ནོ། །ཡང་ན་སླེ་ཏྲེས་ཀྱི་ཁུ་བ་སྦྲང་རྩི་དང་སྦྱར་བ་འམ། ཡང་ན་སྐྱུ་རུ་རའི་ཁུ་བ་སྦྲང་རྩི་དང་སྦྱར་བ་བླུད་ན་ཕན་ནོ། །ཡང་ན་སེང་ཕྲོམ་དང་། ཨ་རུ་ར་དང་། གླ་སྒང་དང་། ཀད་པ་ལ་དང་། འདི་རྣམས་ཀྱི་ཁུ་བ་
[228a.6]འམ། ཡང་ན་པ་ཐ་དང་། བྱི་དང་ག་དང་། ཨ་རྫུན་དང་། བྱི་ཚེར་བ་དང་། འདི་རྣམས་ཀྱི་ཁུ་བ་འམ། ཡང་ན་སེང་ལྡེང་དང་། སྐྱེར་པ་དང་། བྱི་དང་ག་དང་འདི་རྣམས་བསྐོལ་བའི་ཁུ་བ་འམ། སྨན་གྱི་སྦྱོར་བ་འདི་གསུམ་གང་ཡང་རུང་བའི་ནང་དུ་སྦྲང་རྩི་བཏབ་པ་བླུད་ན་
[228a.7]བད་ཀན་ལས་གྱུར་པའི་གཅིན་ནད་སེལ་ཏོ། །མཁྲིས་པ་ལས་གྱུར་པའི་གཅིན་ནད་ལ་ནི་པུ་ཤེལ་ཙི་དང་། སེང་ཕྲོམ་དང་། ཨ་རྫུ་ན་དང་། ཙནྡན་དང་། འདི་རྣམས་བསྐོལ་བའམ། ཡང་ན་པ་ཏོ་ལ་དང་། ནིམ་པ་དང་། སྐྱུ་རུ་ར་དང་། སླེ་ཏྲེས་དང་འདི་རྣམས་
[228b]
[228b.1]ལྷན་ཅིག་བསྐོལ་བ་དང་། ཡང་ན་སེང་ཕྲོམ་དང་། བ་ལ་ཀ་དང་། སྐྱེར་པ་དང་། ད་ཏ་ཀའི་མེ་ཏོག་དང་འདི་དག་བསྐོལ་བའི་ཁུ་བ་འམ་སྦྱོར་བ་དེ་གསུམ་གྱི་ནང་དུ་སྦྲང་རྩི་བཏབ་པ་གང་ཡང་རུང་བ་བླུད་ན་ཕན་ནོ། །མཁྲིས་པ་དང་བད་ཀན་གྱི་གཅིན་ནད་ལ་རང་གི་སྨན་གང་ཡིན་
[228b.2]པ་བསྐོལ་བའི་ཁུ་བ་འམ། ཡང་ན་གཅིན་གྱི་ནང་དུ་ནས་དང་གྲོ་སྦངས་པ་ལས་ཟས་ལ་སོགས་པ་གཡོས་སུ་བྱས་པ་བཟའོ། །རླུང་ལས་གྱུར་པའི་ནད་ལ་ནི་སྣུམ་དང་སྦྱར་བ་བཟའོ། །གཅིན་སྙི་བའི་ནད་ལ་ནི་རྟ་དང་བ་ལང་གང་ཡང་རུང་བ་ལ་ནས་བྱིན་ཏེ། དེའི་ལྕི་བ་ལས་
[228b.3]བྱུང་བའི་ནས་ལས་གཡོས་སུ་བྱས་པའི་སྣུམ་ཁུར་དང་ཕྱེ་དང་ཟན་ལ་སོགས་པ་བྱས་ཏེ་བྱིན་ན་ཕན་ནོ། །ཡང་ན་འོད་མ་ལས་སྐྱེས་པའི་འབྲུ་ལས་གོང་མ་ལྟར་གཡོས་སུ་བྱས་ཏེ་ཟོས་ན་ཕན་ནོ། །ཡང་ན་ཅི་ཙེ་དང་། བྲའོ་དང་། སྲན་མུད་ག་ལ་སོགས་པའི་གང་བུ་ལས་
[228b.4]སྐྱེས་པའི་འབྲུ་དང་འབྲས་རྙིང་པ་དང་། འདི་རྣམས་ལས་གཡོས་སུ་བྱས་པ་བྱིན་ན་ཕན་ནོ། །ཡང་ན་ཏིལ་དང་། ཡུངས་ཀར་གྱི་(ཆིགས་‚ཚིགས་)མ་སྐྱུར་དང་སྦྱར་བའི་ཐུག་པ་ཁ་ལ་ཞེས་བྱ་བར་གྲགས་པ་ཡིན་ཏེ་འཐུངས་ན་ཕན་ནོ། །བཏུང་བ་ནི་ཀ་པིད་ཏ་དང་ཤིང་ཏིན་དུ་དང་། འཛམ་བུ་
[228b.5]དང་འདི་རྣམས་ཀྱི་འབྲས་བུའི་ཁུ་བ་སྐྱུར་པོ་རྒུན་ཆུས་དམར་པོར་བསྒྱུར་བ་བཏུང་ངོ་། །ཚོད་མ་ནི་ཁུ་བའི་བག་པ་ཏོ་ལ་དང་། སཔྟ་ལ་སོགས་པ་ལ་བྱའོ། །བཟའ་བ་ནི་ལ་དུ་དང་ཕྱེ་དང་སྦྲང་རྩི་དང་། འབྲས་བུ་གསུམ་དང་བཅས་པའི་སྐོམ་བག་བཟའོ། །སྲོག་
[228b.6]ཆགས་ཐང་ལས་སྐྱེས་པའི་ཐུར་མ་བསྲེགས་ཏེ་ཆུ་སེར་བསྐམས་པའི་ཤ་བཟའོ། །འོག་ནས་སྨོས་པའི་ལྕགས་ལས་བྱས་པའི་སྦྱོར་བ་ཡང་འདིར་སྦྱར་རོ། །དེའི་འོག་ཏུ་རྒུན་ཆང་དང་ཨ་རིཥྚ་དང་། ཨ་ས་བའི་ཆང་དང་། འདི་རྣམས་ཡོངས་སུ་སྨིན་པའི་ཆང་རྙིང་པ་དང་དྲོ་
[228b.7]བའི་བཏུང་བ་སྦྱིན་ནོ། །དེ་བཞིན་དུ་ཨ་ས་ནའི་སྡེ་ཚན་བསྐོལ་བའི་ཆུའམ་རྩྭ་དཱུར་བ་དང་བསྐོལ་བའི་ཆུའམ་སྦྲང་རྩིའི་ཆུ་བཏུང་བར་སྦྱིན་ནོ། །འབྲས་བུ་གསུམ་བསྐོལ་བའི་ཆུའི་ནང་དུ་ནས་ནུབ་གཅིག་སྤངས་ལ་ཉིན་གཅིག་བསྐོལ་ཏེ། ལེགས་པར་བཏགས་པའི་ཕྱེ་མ་སྦྲང་རྩི་
[229a]
[229a.1]དང་བཅས་པར་བུ་རམ་དང་སྦྱར་བ་བླུད་དོ། །ཤིང་སཱ་ལ་དང་། ལོ་མ་བདུན་པ་དང་། ཀམ་པི་ལྱ་དང་། བྲིག་ཤྐ་དང་། བ་རུ་ར་དང་། ཀ་པིད་ཏ་དང་། རོ་ཧི་དང་། འདི་རྣམས་ཀྱི་མེ་ཏོག་ཕྱེ་མར་བྱས་ཏེ་སྦྲང་རྩི་དང་ལྷན་ཅིག་བཟའ་བ་འམ། ཡང་
[229a.2]ན་སྐྱུ་རུ་རའི་ཁུ་བར་སྨན་གོང་མའི་ཕྱེ་མས་བཏབ་པ་འཐུངས་ན་བད་ཀན་དང་མཁྲིས་པ་ལས་གྱུར་པའི་གཅིན་ནད་སེལ་ཏོ། །གཟེ་མ་དང་། སྐྱེར་པ་དང་། སེང་ཕྲོམ་དང་། ཀད་པ་ལ་དང་། ཤུ་དག་དང་། ཨརྫུ་ན་དང་། ཤུག་པ་དང་། ཨསྨན་ཏ་ཀ་དང་། ནིམ་པ་
[229a.3]དང་། ཙནྡན་དང་། ཨ་ཀ་རུ་དང་། ཏི་མུ་ས་དང་། པ་ཏོ་ལ་དང་། ག་པུར་དང་། བཙོད་དང་། བོང་ང་དཀར་པོ་དང་། གོ་བྱེ་དང་འདི་རྣམས་ཏིལ་མར་དང་ཚུལ་བཞིན་དུ་བསྐོལ་བ་འཐུངས་ན་རླུང་དང་བད་ཀན་ལས་གྱུར་པའི་གཅིན་ནད་ལ་ཕན་ནོ། །མཁྲིས་པ་
[229a.4]ལས་གྱུར་པའི་གཅིན་ནད་ལ་ནི་གོང་མའི་སྨན་མར་དང་བསྐོལ་བ་བླུད་དོ། །འདུས་པའི་གཅིན་ནད་ལ་ནི་མར་དང་ཏིལ་མར་དང་བསྲེས་པ་བསྐོལ་བ་བླུད་དོ། །ཡང་ན་རྩ་བ་བཅུ་པ་དང་། ཟུར་པ་དཀར་པོ་དང་། དན་ཏི་དང་། ཐང་ཤིང་དང་། བ་སྦྲུ་བ་རྣམ་གཉིས་དང་།
[229a.5]སྣུ་ཧི་དང་། ཨར་ཀའི་རྩ་བ་དང་། ཨ་རུ་ར་དང་། བྷུ་ཀ་དམ་པ་དང་། བསེ་ཤིང་གི་འབྲས་བུ་དང་། ཀ་རཉྫའི་རྩ་བ་དང་། བ་ར་ནའི་རྩ་བ་དང་། པི་པི་ལིང་གི་རྩ་བ་དང་། མ་ནུའི་རྩ་བ་དང་། འདི་རྣམས་སྲང་བཅུ་བཅུ་དང་། ནས་དང་། རྒྱ་ཤུག་དང་། རྒྱ་སྲན་འདི་རྣམས་སྲང་བཅུ་
[229a.6]དྲུག་བཅུ་དྲུག་དང་། ཆུ་བྲེ་ཉི་ཤུ་རྩ་བཞི་དང་ཚུལ་བཞིན་དུ་བསྐོལ་ནས་བཞི་ཆ་ལུས་པའི་ནང་དུ་པི་པི་ལིང་རྣམ་གཉིས་དང་། དབྱི་མོ་དང་། ནི་ཙུ་ལ་དང་། རོ་ཧི་ཏ་ཀ་དང་། དུར་བྱིད་དང་། བྱི་དང་ག་དང་། ཀམ་པི་ལྱ་དང་། ག་བྲའི་རྩ་བ་དང་། དེ་རྣམས་བཏགས་
[229a.7]པའི་ཕྱེ་མ་དང་། མར་བྲེ་གང་དང་ཡང་ཚུལ་བཞིན་དུ་བསྐོལ་ཏེ་མར་ལུས་པ་ནི་ཐང་ལ་འབར་གྱིས་བཤད་པའི་མར་ཞེས་བྱ་སྟེ། དེ་ལས་རན་པར་འཐུངས་ན་གཅིན་ནད་ཐམས་ཅད་དང་འབྲུམ་བུ་ཕྲ་མོས་ཉམ་ཐག་པ་ལས་རྒྱལ་བར་བྱེད་དོ། །ཁྱད་པར་དུ་སྐྱ་རྦབ་དང་། ཁོང་
[229b]
[229b.1]འབྲས་དང་། སྐྲན་དང་། གཞང་འབྲུམ་དང་། སྐྲང་པ་དང་། སྐེམ་པ་དང་། དབྱིག་དུག་དང་། དམུ་རྫིང་དང་། ལུད་པ་དང་། དབུགས་མི་བདེ་བ་དང་། སྐྱུགས་པ་དང་། ཚིལ་རྒྱས་པ་དང་། མཆེར་པ་ན་བ་དང་། དྲེག་དང་མཛེ་དང་། སྨྱོ་བྱེད་དང་། བརྗེད་བྱེད་
[229b.2]ལས་རྒྱལ་བར་འགྱུར་རོ། །ཡང་ན་སེང་ཕྲོམ་དང་། མུར་བ་དང་། ཟུར་པ་དཀར་པོ་དང་། བྱི་དང་ག་དང་། ག་བྲའི་རྩ་བ་དང་། རྒྱ་སྤོས་དང་། ཆུ་སྲིན་སེན་མོ་དང་། སླ་བ་དང་། དུག་མོ་ཡུངས་དང་། རུ་རྟ་དང་། ཀྲ་མུ་ཀྲ་དང་། པྲི་ཡང་ཀུ་དང་། བོང་ང་དཀར་པོ་
[229b.3]དང་། ཙི་ཏྲ་ཀ་དང་། བི་ཤ་རྣམ་གཉིས་དང་། དྲི་རྣམ་བཞི་དང་། ཏིག་ཏ་དང་། པུ་ཤེལ་ཙེ་དང་། ལ་ལ་ཕུད་དང་། མ་ནུ་དང་། པ་ཐ་དང་། པི་པི་ལིང་གི་རྩ་བ་དང་། དབྱི་མོ་དང་། འབྲས་བུ་གསུམ་དང་། སྨན་འདི་རྣམས་ཞོ་གཉིས་གཉིས་སུ་སྲང་ལྔ་བརྒྱ་རྩ་བཅུ་
[229b.4]གཉིས་དང་བསྐོལ་ཏེ་བཞི་ཆ་ལུས་པ་དང་། ཚིགས་མ་བོར་ཏེ་བསྒྲངས་པའི་ནང་དུ་སྦྲང་རྩི་བྲེ་དོ་བཅུག་ལ་ཟླ་བ་ཕྱེད་ཀྱི་བར་དུ་སྣོད་སྣུམ་ཅན་གྱི་ནང་དུ་བཞག་པ་ནི་སེང་ཕྲོམ་གྱི་ཨ་ས་བའི་ཆང་ཞེས་བྱ་སྟེ། དེ་ལས་རན་པར་འཐུངས་ན་གཅིན་ནད་དང་། གཞང་འབྲུམ་དང་། མཛེ་དང་ཡི་
[229b.5]ག་འཆུས་པ་དང་། སྲིན་བུའི་ནད་དང་། སྐྱ་རྦབ་དང་། ཕོ་བའི་ནད་དང་། ཚིལ་རྒྱས་པའི་ནད་ལས་ཐར་བར་བྱེད་དོ། །ཡང་ན་སེང་ཕྲོམ་ལ་སོགས་པ་གོང་མའི་སྨན་སྲང་ཉི་ཤུ་ཆུ་སྲང་བཞི་སྟོང་དགུ་བཅུ་རྩ་དྲུག་གི་ནང་དུ་བསྐོལ་ཏེ། བཞི་ཆ་སྲང་སྟོང་ཉི་ཤུ་རྩ་བཞི་ལུས་པའི་ནང་དུ་བུ་
[229b.6]རམ་སྲང་ཉིས་བརྒྱ་དང་། སྦྲང་རྩི་སྲང་དྲུག་ཅུ་རྩ་བཞི་དང་། དུག་མོ་ཡུངས་ཀྱི་སྡེ་ཚན་བཏགས་པའི་ཕྱེ་མ་བཅུག་སྟེ་རྫ་མ་སྣུམ་ཅན་སྲ་བའི་ནང་དུ་པི་པི་ལིང་གི་ཕྱེ་མ་དང་སྦྲང་རྩིས་ནང་ངོས་བསྐུས་ལ། རྫ་མའི་ཕྱི་རོལ་ནས་ཀྱང་རྒྱ་སྐྱེགས་བཞུས་པས་བསྐུས་པའི་ནང་དུ་བཅུག་
[229b.7]ལ་སེང་ལྡེང་གི་མེ་མདག་གི་ནང་དུ་ལྕགས་སྲབ་ཅིང་རྣོ་བ་ལོ་མ་ལྟ་བུ་ལེབ་ལེབ་པོ་བྱས་ཏེ་བསྲེགས་ལ། སྨན་ཁུའི་ནང་དུ་བཅུག་སྟེ། དེ་བཞིན་དུ་ཡང་བསྲེག་ཅིང་ཡང་བཅུག་ལ་ལན་མང་དུ་བྱས་ཏེ། ནས་ཀྱི་ཕུང་པོའི་ནང་དུ་ཟླ་བ་གསུམ་མམ་བཞིར་བཞག་པ་ནི་ལྕགས་ལས་
[230a]
[230a.1]བྱས་པའི་ཆང་ཞེས་བྱ་སྟེ། དེ་ལས་རན་པར་འཐུངས་ན་ཕན་ཡོན་གང་མ་བས་ཀྱང་ཁྱད་པར་དུ་འཕགས་སོ། །གཅིན་ནད་ལ་ནི་སྨན་རྩུབ་པ་དང་སྦྱར་བའི་ལྡེ་གུ་སླ་བས་ལུས་ཤུགས་དྲག་ཏུ་དྲིལ་ཅིང་ལུས་ཀྱི་རྩལ་དང་། ནུབ་མོ་མི་ཉལ་བ་དང་། གང་ཡང་
[230a.2]བད་ཀན་དང་ཚིལ་འཇོམས་པའི་བག་ཕྱི་དང་ནང་གཉིས་ནས་ཟས་དང་། སྤྱོད་ལམ་བསྟེན་ན་ཕན་ནོ། །བྲག་ཞུན་སྲང་བརྒྱ་ཨ་ས་ནའི་སྡེ་ཚན་བསྐོལ་བའི་ཁུ་བའི་ནང་དུ་སྦངས་ཏེ་ཕྱིར་ཕྱུང་ལ། ཡང་སྐམས་ཏེ་ཡང་སྦངས་ཤིང་བྲན་པ་ལན་མང་དུ་བྱས་ལ། བཅུད་ཀྱིས་ལེན་གྱི་ཆོ་ག་
[230a.3]ལྟར་བཏུང་ཞིང་ཨ་ས་ནའི་ཁུ་བ་ལས་གཞི་བླངས་པའི་འབྲས་ཆན་དང་། སྲོག་ཆགས་ཐང་ལ་གནས་པའི་ཤ་ཁུ་དང་བཅས་པ་ཟོས་ན། གཅིན་ནད་ཀྱིས་ཉམ་ཐག་པ་ཐམས་ཅད་དང་། གཞན་གྱིས་གཙེས་པ་ལ་ཡང་ཕན་ཏེ། འབྲས་ཀྱི་ཕྲེང་བ་དང་། ལྦ་བ་དང་། ཐོར་བུ་
[230a.4]དང་། ཚོ་ཆེས་པ་དང་། མཛེ་ནད་དང་། མཚན་བར་རྡོལ་བ་དང་། སྲིན་བུའི་ནད་དང་། རྐང་བམ་དང་། སྐྲངས་པ་རྣམས་ལ་ཕན་པའི་བཅུད་ཀྱིས་ལེན་གྱི་མཆོག་ཡིན་ནོ། །གཅིན་ནད་ཀྱི་སྐྱེས་བུ་ནི་དྲང་སྲོང་བཙུན་པ་ལྟར་འབྲས་བུ་དང་རྩ་བ་དང་། སྡོང་བུ་རྣམས་ཟས་སུ་
[230a.5]བཟའ་ཞིང་ལྷམ་དང་། གདུགས་སྤངས་ལ་དཔག་ཚད་བརྒྱ་ཚུན་ཆད་དུ་འགྲོ་བ་འམ། ཡང་ན་ཁྲོན་པ་ལ་སོགས་པ་ཆུའི་གནས་རྐོ་བའི་ལས་བྱའོ། །ཡང་ན་བ་ལིང་གི་གཅིན་དང་། ལྕི་བ་བཟའ་ཞིང་བཏུང་ལ་བ་ལང་གཟས་སུ་འགྲོ་བ་དང་ལྷན་ཅིག་འགྲོ་བར་བྱའོ། །ནད་
[230a.6]པ་རྗུད་ཅིང་རིད་པ་ཡིན་ན་ནི་ཚིལ་དང་གཅིན་མི་སྐྱེད་ལ་ལུས་འཕེལ་ཞིང་རྒྱས་པའི་སྨན་དང་ཁ་ཟས་སྦྱར་བར་བྱའོ། །ཁམ་ཕོར་ཤར་བ་ལྟ་བུའི་ནད་ལ་སོགས་པའི་འབྲུམ་བུ་ཕྲ་མོའི་ནད་བཅུ་འབྱུང་བའི་ནད་མ་སྨིན་པ་ལ་ནི་སྐྲངས་པའི་གསོ་བ་བྱ་ལ་སྨིན་པ་ལ་ནི་གསོ་བའི་
[230a.7]ཆོ་ག་བྱའོ། །ཐོག་མར་ནད་གཞི་བརྟགས་ཏེ་ནྱ་གྲོ་དྷ་ལ་སོགས་པ་ཤིང་འོ་མ་ཅན་གྱི་ཤུན་པ་བསྐོལ་བའི་ཁུ་བ་དང་། རའི་འོ་མ་ནི་རབ་ཏུ་བསྔགས་སོ། །དང་པོ་སློན་ཁྲུས་ཀྱིས་ལུས་དག་པར་བྱས་ཏེ་དེ་ཡང་གཅིན་ནད་ལ་ནི་རྣོ་བ་དང་རྩུབ་པའི་བཀྲུ་སྨན་གཏོང་ངོ་། །ཡང་
[230b]
[230b.1]ན་སུག་སྨེལ་གྱི་སྡེ་ཚན་ཏིལ་མར་དང་སྦྱར་བས་རྨ་འདྲུབ་པར་བྱ་ཞིང་དོང་གྲ་ལ་སོགས་པའི་སྡེ་ཚན་བསྐོལ་བས་ལུས་དྲིལ་བར་བྱའོ། །སྨན་ཨ་ས་ནའི་སྡེ་ཚན་བསྐོལ་བའི་ཆུས་བཀྲུ་ཞིང་བླུགས་པར་བྱའོ། །དུག་མོ་ཡུངས་ཀྱི་སྡེ་ཚན་བསྐོལ་བ་ནི་བཟའ་བ་དང་བཏུང་བར་སྦྱར་རོ། །
[230b.2]པ་ཐ་དང་། ཀྲུ་ཏྲུག་ཏྲེས་དང་། ཤ་རང་གཤྠ་དང་། ཐལ་ཏྲེས་དང་། ཀཎྜ་ཀ་རི་དང་། སབྟ་པརྞི་དུག་མོ་ཡུངས་ཀྱི་རྩ་བ་དང་། ཀད་པ་ལ་དང་། དོང་གྲ་དང་འདི་རྣམས་བཏགས་པའི་ཕྱེ་མ་སྦྲང་རྩི་དང་ལྡེ་གུར་བྱས་ཏེ་བལྡག་པ་དང་། ཡང་ན་སྐྱ་རྦབ་ཀྱི་གསོ་བའི་ནང་ནས་ལྕགས་
[230b.3]ཕྱེ་ཆ་དགུ་པ་ཞེས་བྱ་བའི་ཕྱེ་མ་དག་འདིར་སྦྱར་རོ། །སྦྲང་རྩི་ལྟ་བུ་ཞེས་བྱ་བའི་གཅིན་ནད་ན་བར་གྱུར་ན་སྐྱེས་བུ་རྣམས་ཀྱིས་ཡོངས་སུ་སྤང་བར་བྱ་སྟེ་འོན་ཀྱང་བྲག་ཞུན་བརྒྱའི་སྦྱོར་བ་དང་། པུ་ན་རྣའི་སྦྱོར་བ་ནི་བྱ་བར་བཤད་དོ། །གསོ་བའི་གནས་ལས་གཅིན་སྙི་བ་ཟ་གུའི་ནད་གསོ་
[230b.4]བའི་ལེའུ་སྟེ་བཅུ་གཉིས་པ་རྫོགས་སོ།། །།དེ་ནས་ཁོང་འབྲས་གསོ་བའི་ལེའུ་བཅུ་གསུམ་པ་བཤད་པར་བྱ་སྟེ། དེ་ལ་འབྲས་སོ་ཅོག་མ་སྨིན་པའི་ཚེ་ན་ནི་སྐྲངས་པ་གསོ་བའི་ཆོ་ག་ལྟར་སོ་སོའི་རྟགས་དང་མཐུན་པར་གཏར་ག་བྱ་སྟེ་ཁྲག་དབྱུང་ངོ་། །སྨིན་ཟིན་པ་ལ་ནི་དྲལ་
[230b.5]ལ་རྨ་གསོ་བའི་ཆོ་ག་ལྟར་བྱའོ། །དེ་ནས་རླུང་ལས་གྱུར་པའི་རྨ་ལ་ནི་རྩ་བ་ལྔ་དང་ལན་ཚྭ་ཤས་ཆེ་བ་དང་བསྐོལ་བའི་ཆུས་རྨ་བཀྲུ་བར་བྱའོ། །གཞན་ཡང་མེ་པ་ད་རུའི་སྡེ་ཚན་དང་། ཤིང་མངར་དང་ལན་ཚྭ་དང་ཏིལ་དང་ལྷན་ཅིག་སྦྱར་བས་རྨ་བཀྲུའོ། །ཡང་ན་བཀྲུ་སྨན་གང་
[230b.6]ཡང་རུང་བའི་ནང་དུ་དྲི་བི་ཙ་བཏབ་སྟེ་སྣུམ་ཆེན་པོ་བཞི་གང་ཡང་རུང་བ་བསྲེས་ཏེ་བླུད་ལ་ཁྲུས་བྱས་ཏེ་ལུས་དག་པར་བྱའོ། །དེ་ནས་རྨ་འདྲུབ་པར་བྱ་བའི་ཕྱིར་བ་ད་རིའི་སྡེ་ཚན་དང་དུར་བྱིད་བསྲེས་པས་རྨ་བསྐུ་བར་བྱའོ། །མཁྲིས་པའི་རྨ་ལ་ནི་ནྱ་གྲོ་དྷ་ལ་སོགས་པའི་འོ་མ་ཅན་གྱི་ཤིང་
[230b.7]ལས་བྱུང་བའི་འོ་མས་བཀྲུ་བར་བྱའོ། །དེ་ནས་ཤིང་མངར་དང་། ཏིལ་དང་། ཨ་རུ་ར་འདི་གསུམ་གྱིས་བསྐུའོ། །རྨ་འདྲུབ་པར་བྱ་བའི་ཕྱིར་བཙོད་དང་། པུ་ཤེལ་ཙེ་དང་། ཤུག་པ་དང་། པ་ཡ་སྱ་དང་། སེར་པོ་རྣམ་གཉིས་དང་། འབྲས་བུ་གསུམ་དང་། ཤིང་མངར་
[231a]
[231a.1]འདི་རྣམས་འོ་མ་དང་ལྷན་ཅིག་བསྐོལ་ཏེ་འོ་མ་ནི་དུ་མར་ནི་ལུས་པ་བསྐུའོ། །ཡང་ནྱ་གྲོ་དྷའི་སྡེ་ཚན་གྱི་ཤིང་དང་། ལོ་མ་དང་། འབྲས་བུ་དང་། ཤུན་པ་དང་། མར་བསྐོལ་བས་བསྐུས་ན་འདྲུབ་པར་འགྱུར་རོ། །བད་ཀན་ལས་གྱུར་པ་ལ་ནི་དོང་གྲའི་སྡེ་
[231a.2]ཚན་བསྐོལ་བས་རྨ་བཀྲུའོ། །དེ་ནས་ཕྱེ་དང་སེར་པོ་རྣམ་གཉིས་དང་། ཤིང་ཉེ་རོང་དང་། ཏིལ་མར་དང་འདི་རྣམས་ཀྱིས་བསྐུའོ། །ཡང་ན་རྒྱ་སྲན་དང་། དན་ད་དང་། ཤ་མ་དུར་བྱིད་དང་། ཀྲུ་ཏྲུག་ཏྲེས་དང་། སེང་ཕྲོམ་དཀར་པོ་དང་། རྒྱམ་ཚ་དང་། ཏིལ་དང་བ་གཅིན་
[231a.3]དང་སྦྱར་བས་བསྐུས་ན་རྨ་འདྲུབ་པར་འགྱུར་རོ། །དེ་བཞིན་དུ་གློ་བུར་དུ་སྣད་པའམ། ཁྲག་ལས་གྱུར་པའི་འབྲས་ལ་ནི་མཁྲིས་པ་ལས་གྱུར་པ་ལ་ཇི་ལྟར་གསོ་བ་བཞིན་དུ་བྱའོ། །ཁོང་འབྲས་ནང་དུ་མ་སྨིན་པ་ལ་ནི་མར་གྱི་སྡེ་ཚན་བསྐོལ་བའི་ནང་དུ་ཨུ་ཤ་ཀའི་སྡེ་ཚན་གྱི་ཕྱེ་མས་བཏབ་སྟེ་བད་ཀན་
[231a.4]གྱི་དུས་ལས་ཡོལ་བ་དང་བླུད་པར་བྱའོ། །ཡང་ན་བཀྲུ་སྨན་གང་ཡང་རུང་བ་མར་དང་སྦྱར་བའི་ནང་དུ་གོང་གི་སྨན་སྡེ་ཚན་གཉིས་ཀྱི་ཕྱེ་མས་བཏབ་པ་བླུད་དོ། །ཡང་ན་ནད་མ་སྨིན་པ་ལ་ནི་བཀྲུ་སྨན་དྲག་པོ་དང་། འཇམ་རྩི་མས་གཏང་བར་བྱ་སྟེ་དེ་ཡང་གོང་གི་སྡེ་ཚན་གཉིས་ལས་ནད་གཞི་
[231a.5]གོང་དང་མཐུན་པ་སྦྱར་ལ་མས་གཏང་བར་བྱའོ། །དང་པོར་ནད་ཇི་ལྟ་བ་བཞིན་དུ་སྦྲང་རྩི་དང་ན་ལེ་ཤམ་དཀར་པོས་བཏབ་པའི་བཟའ་བ་དང་བཏུང་བ་དང་བསྐུ་བ་བྱས་སམ་བླུད་ན་ཁོང་འབྲས་མ་སྨིན་པ་འཇོམས་པར་བྱེད་དོ། །གཞན་ཡང་ཀྱི་ལྕེ་བ་དང་། ཤིང་མངར་དང་། འབྲས་བུ་
[231a.6]གསུམ་དང་། ནིམ་པ་དང་། པུ་ཤེལ་ཙི་འདི་རྣམས་ཆ་སྙོམས་པ་དང་དྲི་བི་ཏ་དང་། པ་ཏ་ལའི་རྩ་བ་འདི་གཉིས་ཀྱི་ལྕི་བའི་བཞི་འགྱུར་དང་། སྲན་ཆུང་དེའི་བརྒྱད་འགྱུར་རྣམས་ཆུ་དང་མར་དང་ཚུལ་བཞིན་བསྐོལ་ནས་བླུད་ན་ཁོང་འབྲས་དང་། སྐྲན་དང་། མེ་དབལ་དང་། ལུས་ཚ་བ་
[231a.7]དང་། དྲན་པ་ཉམས་པ་དང་། ས་བོན་མངས་པ་དང་། སྐོམ་དད་ཆེ་བ་དང་། བརྒྱལ་བ་དང་། སློན་པ་དང་། སྙིང་ན་བ་དང་། ཁྲག་མཁྲིས་དང་། མཛེ་དང་། མིག་སེར་གྱི་ནད་དང་། འདི་རྣམས་ལ་ཕན་ནོ། །ཡང་ན་ཀྱི་ལྕེ་བ་སྲང་བཞི་ཆུ་སྲང་སུམ་ཅུ་རྩ་གཉིས་དང་བསྐོལ་
[231b]
[231b.1]ཏེ་བཞི་ཆ་ལུས་པ་དང་། སྐྱུར་བའི་ཁུ་བ་སྲང་བཞི་དང་། འོ་མ་སྲང་བཞི་དང་། མར་སྲང་བཞི་དང་། ཏིག་ཏ་དང་། ཏྲ་ཡན་ཏི་དང་། བྱི་ཚེར་བ་དང་། གླ་སྒང་དང་། ཏ་མ་ལ་གི་དང་། རམ་ཉེ་བ་དང་། ཛི་བན་ཏི་དང་། ཙནནྡ་དང་ཨུཏྤ་ལ་དང་། འདི་རྣམས་ཞོ་གཉིས་ཆམ་ཆོམ་བརྡུངས་
[231b.2]ལ་གཅིག་ཏུ་བསྐོལ་ལ་མར་འབའ་ཞིག་ལུས་པ་བླུད་པའམ། ཡང་ན་རྒུན་འབྲུའམ། མ་དུ་གའི་མེ་ཏོག་དང་། འབྲ་གོ་དང་། བི་ད་རི་དང་། ཉེའུ་ཤིང་དང་། པ་རུ་ཤ་དང་། འབྲས་བུ་གསུམ་དང་། འདི་རྣམས་བསྐོལ་བའི་ཁུ་བའི་ནང་དུ་མར་དང་འོ་མ་དང་། བུ་རམ་ཤིང་
[231b.3]གི་ཁུ་བ་དང་། སྐྱུར་པོ་དང་འདི་རྣམས་ཆ་མཉམ་སྟེ་ཨ་རུ་རའི་ཕྱེ་མས་བཏབ་ནས་བསྐོལ་ལ་མར་ལུས་པ་དང་གྲང་བའི་ནང་དུ་ཤ་ཁ་ར་དང་། སྦྲང་རྩི་དང་མར་གྱི་བཞི་ཆ་དང་བསྲེས་ནས་བླུད་ན་ཕན་ཡོན་གོང་མ་དང་འདྲ་བར་ཤེས་པར་བྱའོ། །དེ་ལ་ནད་ཚབས་ཆེ་ཆུང་དང་སྦྱར་བས་གར་
[231b.4]སྐྲངས་པའི་སྟེང་དུ་རྡབས་རྭ་དང་། ཀུ་བ་དང་། སྲིན་བུ་པད་པ་དང་གསུམ་གྱིས་ཁྲག་དབྱུང་བའམ། ཡང་ན་གཏར་ག་འདི་བཞི་གང་ཡང་རུང་བས་ཁྲག་དབྱུང་ངོ་། །དེ་ལ་འབྲས་ཆེ་ཆུང་འདྲ་བར་སྨིན་པའི་མཚན་མ་ནི་ཕྱི་རོལ་དུ་འབུར་བར་སྣང་སྟེ། དེ་ཡང་ཕྱོགས་གཅིག་ཏུ་འདུས་
[231b.5]པ་དང་འདུག་སྟེ། སྟེང་དུ་ལག་པས་རེག་ན་རབ་ཏུ་ན་ཞིང་མནན་ན་གཤོང་བར་འདུག་ལ་ལུས་ཚ་བར་བྱེད་དེ། དེ་ལ་ནི་གོང་གི་བཀྲུ་སྨན་གྱིས་བྱུག་གོ། །དེ་ལ་འབྲས་སྨིན་པའི་མཚན་མ་མཐོང་ནས་མཚོན་གྱིས་དྲལ་ཏེ། རྨ་གསོ་བའི་ཆོ་ག་བསྟན་པར་བྱའོ། །ཁོང་འབྲས་ནང་དུ་སྨིན་
[231b.6]པའི་མཚན་མ་ཡང་དེ་ལྟར་བལྟའོ། །ཁོང་འབྲས་སྨིན་ནས་གོང་འོག་ཏུ་མཆེད་པར་བྱེད་དེ། དེ་ཡང་སྨིན་ནས་མྱུར་བར་དཔྱད་མ་བྱས་པ་དང་། ཁ་ཟས་མི་མཐུན་པ་ཟོས་པའི་ཉེས་པས་རྨ་སྐྲངས་པ་མཆེད་ཅིང་འདྲུལ་བར་འགྱུར་རོ། །དེ་ཡང་ཞག་བཅུ་གཉིས་ཀྱི་བར་དུ་གོང་འོག་ཏུ་
[231b.7]མི་མཆེད་པར་བྱ་བའི་ཆོ་གས་བསྲུང་བར་བྱ་སྟེ། དེ་ཡང་བ་ར་ན་ལ་སོགས་པའི་སྡེ་ཚན་བསྐོལ་བའི་ཁུ་བ་དྲོ་འཇམ་ཙམ་མམ་ཡང་ན་ཤི་ཀྲུ་དང་སྦྲང་རྩི་སྦྱར་བ་འམ། ཡང་ན་འབྲས་ཀྱི་ཐུག་པ་ལ་ཤི་ཀྲུ་དང་། སྦྲང་རྩི་སྦྱར་བའམ། ཡང་ན་ནས་དང་། རྒྱ་ཤུག་དང་། རྒྱ་སྲན་
[232a]
[232a.1]གྱི་ཁུ་བ་བཏུང་བ་འམ། བཟའ་བ་འམ། བཏུང་བ་ནི་རབ་ཏུ་བསྔགས་སོ། །ཞག་བཅུ་ནས་ནི། ཀྱི་ལྕེ་བ་ལ་སོགས་པའི་མར་གོང་དུ་སྨོས་པའམ། ཡང་ན་སེང་ཕྲོམ་དཀར་པོ་དང་སྦྱར་བའི་མར་གོང་དུ་རླུང་གི་སྐབས་སུ་བསྟན་པ་བླུད་ལ་སྨན་གྱི་སྟོབས་
[232a.2]ཀྱིས་ནད་འཇིལ་བར་བྱའོ། །དེ་ནས་ཏིག་ཏའི་མར་མཛེ་ནད་ཀྱི་སྐབས་སུ་བསྟན་པའི་ནང་དུ་སྦྲང་རྩི་དང་སྦྱར་བ་ཅུང་ཟད་སྦྱིན་ནོ། །སྐྲན་གྱི་བཅོས་ཐབས་ཇི་སྙེད་འབྱུང་བ་ཐམས་ཅད་ཁོང་འབྲས་ལ་ཡང་ཐབས་དེས་གསོ་བར་བྱའོ། །གཞན་ཡང་ཁོང་འབྲས་ཀྱི་ནད་ཐམས་ཅད་ལ་གུ་གུལ་
[232a.3]དང་། བྲག་ཞུན་གཉིས་གང་ཡང་རུང་བས་ཟས་དང་སྨན་ཐམས་ཅད་ལ་སྦྱར་བར་བྱའོ། །ཁོང་འབྲས་ནི་སྨིན་དུ་མི་གཞུག་སྟེ། མི་སྨིན་པའི་ཆོ་ག་ལ་འབད་པར་བྱའོ། །ཅི་སྟེ་སྨིན་ན་ནི་ཤིན་དུ་ཉེན་ཆེ་སྟེ་གསོ་བར་དཀའོ། །ཁོང་འབྲས་ཞེས་བྱ་བ་ནི་མྱུར་དུ་སྨིན་པར་བྱེད་
[232a.4]པའི་རང་བཞིན་ཡིན་ནོ། །འབྲས་ཁོང་དུ་ན་ཞིང་ཚ་བ་ལ་ནི་ལེགས་པར་བརྟགས་ཏེ་གཅིན་སྙི་བའི་ནད་གསོ་བ་བཞིན་དུ་འདི་ཡང་ཐབས་དེ་ལྟར་གསོ་བར་བྱའོ། །བུད་མེད་ཀྱི་ནུ་མར་འབྲས་བྱུང་བ་ལ་ནི་སྨིན་པར་བྱ་བའི་ཆོ་ག་མི་བྱ་སྟེ། རྨའི་སྐབས་ལས་འབྱུང་བའི་དཔྱད་བཞིན་བྱའོ། །
[232a.5]མྱུར་དུ་སྨིན་ན་ནི་ཤས་ཆེ་བ་དང་འཇམ་པའི་ཕྱིར་ཚབས་ཆེར་འདྲུལ་བའི་སྐྱོན་ནོ། །རང་སྨིན་པ་དང་ནུ་སོར་གྱི་མཐའ་སྐོར་གནག་མཚམས་ཀྱི་ནང་རོལ་ཏུ་མཚོན་མི་གདབ་པར་བསྲུང་སྟེ། གཞན་ཡང་གང་ཡང་རུང་བར་མཚོན་གྱིས་དྲལ་བའི་ལས་བྱའོ། །འབྲས་དེ་ན་ཡང་རུང་མིན་
[232a.6]ཡང་རུང་། སྨིན་ཡང་རུང་མ་སྨིན་ཡང་རུང་སྟེ། རྟག་ཏུ་ནུ་མ་ལས་བཞོ་བར་བྱའོ། །དེ་ནས་ཤིང་ཉེ་རོང་གི་ཕྱེ་མས་རླུང་ཤས་ཆེ་བའི་ནད་ཡིན་ན་ནི་སྣུམ་ཤས་ཆེར་བཏབ་སྟེ་བྱིན་ལ་ཁྲུས་བྱས་ཏེ་ལུས་དག་པར་བྱའོ། །དེ་ལ་སྣུམ་ནི་འདི་དག་སྟེ། ཨ་མྲའི་འབྲས་བུའི་སྨན་མར་རམ་
[232a.7]ཨེ་རཎྜའི་སྨན་མར་རམ་སུ་གུ་མ་དའི་སྨན་མར་རམ། མི་ཏྲ་ཀའི་སྨན་མར་རམ་འདི་རྣམས་ཀྱི་མར་གང་རྙེད་པ་དང་སྦྱར་རོ། །དེ་ནས་རླུང་ལས་གྱུར་པ་ལ་ཕན་པའི་སྨན་ཚོགས་ཞིབ་ཏུ་བཏགས་ཏེ། ཆུ་དང་མར་ཚུལ་བཞིན་བསྐོལ་ཏེ་ཆུ་དུ་མར་ལུས་པ་དང་། བཀྲུ་སྨན་དྲག་པོ་མས་གཏང་བའི་
[232b]
[232b.1]ཐབས་དུ་མས་གཏང་བར་བྱའོ། །དེ་ནས་ཤ་ཁུ་དང་བཅས་པའི་ཟས་སྦྱིན་ནོ། །དེའི་འོག་ཏུ་ཤིང་མངར་གྱི་ཕྱེ་ཏིལ་མར་དང་བསྐོལ་བས་ལུས་བསྐུ་བར་བྱའོ། །རླུང་ལས་གྱུར་བའི་འབྲས་སྨིན་པ་ལ་ནི་རླུང་ལ་ཕན་པའི་སྨན་དང་དུགས་དང་བསྐུ་བྱུག་ལ་སོགས་པ་བྱ་སྟེ། སྨིན་ནས་དྲལ་ལ་རྨ་གསོ་
[232b.2]བའི་ཆོ་ག་ལྟར་བྱའོ། །མཁྲིས་པ་དང་། ཁྲག་ལས་གྱུར་པ་མ་སྨིན་པ་ལ་ནི་གོང་དུ་བགྲང་བའི་ཆོ་ག་བསྟན་པ་བཞིན་བྱའོ། །སྨིན་ནས་འདྲལ་ལ་རྨ་གསོ་བའི་ཆོ་ག་ལྟར་བྱའོ། །རྟག་ཏུ་བར་མ་ཆད་པར་ཁྲག་ཀྱང་དབྲིའོ། །བད་ཀན་ལས་གྱུར་པ་ལ་ནི་སྐྱེར་པའི་ཕྱེ་མ་བ་གཅིན་དང་
[232b.3]སྦྱིན་ནོ། །སྦྱིན་པར་བྱ་བའི་ཆོ་ག་མ་གཏོགས་པ་ཕྱེ་མ་བད་ཀན་ལས་གྱུར་པའི་འབྲས་གསོ་བའི་ཆོ་ག་རྣམས་འདིར་བྱའོ། །བད་ཀན་ལས་གྱུར་པའི་འབྲས་རང་སྨིན་པའི་ཚེ་ན་ནི་དྲལ་ཏེ། སུ་མ་ནའི་མེ་ཏོག་དང་གོ་བྱེ་དང་། ཨང་གོ་ལ་ན་སཔྟ་པརྞ་དང་། པ་ཏོ་ལ་དང་། ནིམ་
[232b.4]པ་དང་། ཡུང་བ་དང་། བྱི་དང་ག་དང་། དུག་མོ་ཡུངས་དང་། འདི་རྣམས་ཏིལ་མར་དང་སྦྱར་ལ་རྨ་དག་པར་བྱ་བའི་ཕྱིར་བླུད་པ་ནི་རབ་ཏུ་བསྔགས་སོ། །ཚིལ་ལས་གྱུར་པའི་ནུ་མའི་ནད་ལ་ནི་བྱིའུ་རུག་པའི་སྡེ་ཚན་བཏགས་ཏེ་བ་གཅིན་དང་སྦྱར་བ་འམ། ཡང་ན་ཀླད་པ་བཀྲུ་
[232b.5]བའི་སྨན་བཏགས་པས་དུགས་བྱས་ལ་སྨིན་པ་དང་། ནུ་སོར་གྱི་མཐའ་ནག་པོར་མཚོན་གྱིས་མི་གདབ་སྟེ་ཕྱི་རོལ་ནས་གཙགས་བུས་ལེགས་པར་དྲལ་ནས་རྣག་ཕྱུང་ལ་སྦྲང་རྩི་དང་རྒྱམ་ཚ་དང་ནག་ཚུར་སྦྱར་བས་རྨ་བཀྲུས་ཏེ་དར་སྐུད་ཀྱིས་བཙེམ་མོ། །ཚིལ་ལས་གྱུར་པའི་ནུ་
[232b.6]མའི་རྨ་དག་པར་བྱ་བའི་ཕྱིར་ལྡོང་རོས་དང་། བ་བླ་དང་། སུ་མ་ན་དང་། པི་པི་ལིང་མཱུ་ལ་དང་། གོ་བྱེ་དང་། འདི་རྣམས་ཏིལ་མར་དང་དྲོ་འཇམ་ཙམ་སྦྱར་བས་རྨ་བཀྲུའོ། །ཇི་སྲིད་རྨ་མ་འདྲུབ་ཀྱི་བར་དུ་སྣུམ་དང་བཅས་པའི་དུགས་བྱའོ། །ཆུ་སོའི་གནས་སུ་འབྲས་
[232b.7]བྱུང་བ་ལ་ནི་རས་སྣུམ་ཅན་གྱིས་དུགས་བྱས་ལ་རས་ཀྱིས་རྐེད་པར་བཅིང་ངོ་། །དེའི་འོག་ཏུ་བཤང་བའི་སྒོ་དང་། འབྲས་བུའི་བར་སྲུབས་བྲེང་བྲེང་པོའི་འོག་ཏུ་འབྲུའི་ཁ་འདྲ་བའི་མཚོན་གྱིས་དྲལ་ཏེ། རྣག་འཛག་ཏུ་འཇུག་ལ་དམུ་རྫིང་གསོ་བའི་ཐབས་བཞིན་དུ་དབུག་པ་
[233a]
[233a.1]དང་། སྦུ་གུའི་རྨ་བཀག་པ་རྣམས། བཅིང་བ་དང་། སྨན་གྱིས་དག་པར་བྱས་ནས་རྨ་འདྲུབ་པའི་ཆོ་ག་བྱའོ། །ཁོང་འབྲས་ལོང་ཀའམ་རྒྱུ་མ་ལ་འབྱུང་སྟེ། རླིག་པའི་འོག་ཏུ་ཕྱིན་པ་དང་། རླུང་ལས་གྱུར་པའི་འབྲས་གསོ་བའི་ཆོ་ག་བཞིན་དུ་བྱའོ། །
[233a.2]གཞན་ཡང་བ་སྤྲུ་བ་སྲང་བརྒྱད་དང་། རྩ་བ་བཅུ་པ་དང་། ཨ་ཤྭ་གན་དྷ་དང་། ཨེ་རཎྜ་དང་། ཉེའུ་ཤིང་དང་། རྩྭ་དཱུར་བ་རྣམ་གཉིས་དང་། འདམ་བུ་དང་། རྩྭ་ཀུ་ཤ་དང་། བུ་རམ་ཤིང་གི་རྩ་བ་དང་། མ་ཏ་ཀ་ལ་དང་། འདི་རྣམས་ཀྱི་རྩ་བ་རེ་རེ་ལ་ཡང་སྲང་བཅུ་བཅུ་ཆམ་
[233a.3]ཆོམ་བརྡུངས་ཏེ་ཆུ་སྲོང་ཉིས་སྟོང་བཞི་བཅུ་རྩ་བརྒྱད་དང་། བསྐོལ་ལ་སྲང་ཉིས་བརྒྱ་ལྔ་བཅུ་རྩ་དྲུག་ལུས་པ་དང་ཕྱིར་ཕྱུང་ལ་བཙགས་ཏེ་གྲང་བའི་ནང་དུ་བུ་རམ་སྲང་སུམ་ཅུ་རྩ་གཉིས་དང་འོ་མ་བྲེ་དོ་དང་། ཨེ་རཎྜའི་མར་བྲེ་དོའི་ནང་དུ་པི་པི་ལིང་གི་རྩ་བ་དང་། ལྕེ་མྱང་ཚ་དང་། ཤིང་
[233a.4]མངར་དང་། ལ་ལ་ཕུད་དང་། རྒུན་འབྲུམ་དང་། དོང་གྲ་དང་། འདི་རྣམས་ལྷན་ཅིག་ཏུ་བསྐོལ་ལ། འོ་མ་དུ། མར་ལུས་པ་ནི་སུ་ཀུ་མ་རུ་ཞེས་བྱ་བའི་བཅུད་ཀྱིས་ལེན་པ་ཡིན་ཏེ། སྨན་མར་འདི་ནི་ཚ་བ་དང་། རླུང་དང་། ལམ་དུ་འགྲོ་བ་དང་། བཞོན་པ་ལ་སོགས་པ་ལ་འགྲོ་
[233a.5]བའི་ཚེ་ཡང་བསྲུང་མི་དགོས་པར་བཟའོ། །དེ་ཡང་གཞོན་ནུ་རྣམས་དང་། ཕྱུག་པོ་རྣམས་དང་བུད་མེད་རྣམས་དང་། སྐྱིད་དེ་བ་རྣམས་དང་། བུད་མེད་མང་པོའི་ཁྱིམ་ཐབ་རྣམས་ལ་སྦྱར་བར་བྱའོ། །དཔལ་སྐྱེད་པ་དང་། རྩོད་པ་ཟློག་པར་བྱེད་དེ། རྟག་ཏུ་བསྟེན་ན་སྡུག་ཅིང་
[233a.6]མཛེས་པ་དང་ལུས་ཤ་སྐྱེད་པ་དང་། དེ་བཞིན་དུ་རླིག་རླུགས་དང་། ཁོང་འབྲས་དང་། སྐྲན་དང་། གཞང་འབྲུམ་དང་། མོ་མཚན་དང་། ཕོ་མཚན་གྱི་ནང་དང་། རླུང་ནད་ཀྱིས་ཉམ་ཐག་པ་དང་། སྐྲང་པ་དང་། དམུ་རྫིང་དང་། དྲེག་དང་། མཆིན་པ་ན་བ་དང་།
[233a.7]རྟུག་སྐམ་འདི་རྣམས་ཞི་བར་བྱེད་པའི་མཆོག་ཡིན་ནོ། །གཞང་ལ་ཁོང་འབྲས་འབྱུང་བ་ལ་ནི་སྣུམ་ཆོས་དང་། ཁྲུས་དང་། འཇམ་རྩི་མས་གཏོང་བ་ལ་སོགས་པས་ཐོག་མར་ཞི་བར་བྱས་ལ་དེས་ཞི་བར་མ་ནུས་ན་དང་པོ་ཡང་འཇམ་རྩི་བྱས་ཏེ། རྒྱུ་ཞབས་ཀྱི་སྤུ་མཚམས་
[233b]
[233b.1]གཡས་གཡོན་དུ་མཚོན་ཟླ་བ་བཀས་པ་ལྟ་བུ་བསྲེགས་པས་དབུག་ལ། རླུང་གིས་འགགས་པ་དེ་དལ་གྱིས་དབྱུང་ངོ་། །དེ་ལ་དབུག་པའི་ཚད་ནི་སྨན་པ་ཁ་ཅིག་ན་རེ་མཐེ་བོང་གི་ཚིགས་དང་པོ་ནུབ་པ་ཙམ་ཟབས་སུ་གཏང་ངོ་ཞེས་ཟེར་རོ། །ཡང་ཁ་ཅིག་ན་རེ་ཟབས་སུ་སྲིན་ལག་གི་
[233b.2]ཚིགས་དང་པོ་ནུབ་པ་ཙམ་གཏང་ངོ་ཞེས་ཟེར་རོ། །དྲལ་བ་ནི་དང་པོ་པགས་པ་ཕུག་ལ་མཐེ་བོང་གིས་རྨ་ཁའི་པགས་པ་བཏེག་སྟེ། དེ་ནས་དེའི་འོག་ཏུ་མཚོན་གྱི་རྩེ་མོ་དྲང་པོར་ཟབས་སུ་མི་གཏང་བར་རྩེ་མོ་ལྟེ་བ་ཕྱོགས་སུ་ཚད་བཞིན་དུ་གཏང་ངོ་། །ཡང་ན་སྨན་པ་ཁ་ཅིག་ན་
[233b.3]རེ་མཆིན་པའི་ཁོང་འབྲས་ལ་ནི་བད་ཀན་དང་རླུང་གི་ཁོང་འབྲས་གསོ་བའི་ཐབས་ལྟར་བྱའོ། །སྨན་པ་ཁ་ཅིག་ན་རེ། མཐེ་ཆུང་དང་། སྲིན་ལག་གི་ཚིགས་དང་པོའི་ཚད་ཙམ་གཏང་ངོ་། །ཞེས་ཟེར་རོ། །ཁོང་འབྲས་གསོ་བའི་ལེའུ་བཅུ་གསུམ་པ་རྫོགས་སོ།། །།
[233b.4]དེ་ནས་སྐྲན་ནད་གསོ་བའི་ལེའུ་བཅུ་བཞི་པ་བཤད་པར་བྱ་སྟེ། དེ་ལ་རླུང་ལས་གྱུར་པའི་སྐྲན་ནད་ནི་ཕྱི་ས་དང་རླུང་འགག་ཅིང་མི་བཟད་པར་ན་བ་ཡིན་ཏེ། དེ་ཡང་རྩུབ་པ་དང་གྲང་བའི་རྒྱུ་ལས་བྱུང་བ་ཡིན་པས་དེ་ལ་ནི་རླུང་ནད་ཀྱི་སྐབས་སུ་བཤད་པའི་འབྲུ་མར་སྦྱར་བས་བཟའ་བ་དང་།
[233b.5]བཏུང་བ་དང་། འཇམ་རྩི་གཏང་བ་དང་། བསྐུ་བྱུག་དང་། སྣུམ་ཆོས་བྱའོ། །ཁྱད་པར་དུ་ལྟོ་སྦོ་ཞིང་ན་བ་དང་། རེངས་པ་དང་། རྟུག་པ་འགགས་པ་འདི་རྣམས་ལ་ནི་དུགས་བྱ་སྟེ། རྒྱུན་སྲང་མཉེན་པར་བྱས་ན། རླུང་ནད་ཚབས་ཆེ་བ་ལ་ཕན་ཏེ། རྒྱལ་བར་བྱེད་དོ། །
[233b.6]སྣུམ་ཆོས་ཀྱིས་ནི་ཁྱད་པར་དུ་ཕྱི་ས་འགགས་པ་དང་། སྐྲན་ནད་སེལ་ཏོ། །སྐྲན་ནད་ལྟེ་བའི་ཁོང་དུ་བྱུང་བ་ལ་ནི། ཁྱད་པར་དུ་སྣུམ་གྱི་བཏུང་བ་སྦྱར་རོ། །ཞུ་བའི་སྐབས་སུ་སྐྲང་འབྱུང་བ་ལ་ནི་འཇམ་རྩི་མས་གཏོང་བ་ཕན་ནོ། །སྐྲན་ལྟོ་བའི་ནང་དུ་བྱུང་བ་ལ་ནི་སྣུམ་གྱི་འཇམ་རྩི་གཉི་ག་
[233b.7]བྱའོ། །རླུང་ལས་གྱུར་པའི་སྐྲན་མེ་དྲོད་ཆེ་ཞིང་རླུང་གིས་ཕྱི་ས་འགགས་པ་ལ་ནི་ཉམས་སྟོབས་འཕེལ་བའི་བཟའ་བ་དང་། བཏུང་བ་དང་། སྣུམ་པ་དང་། དྲོ་བའི་བག་སྦྱར་རོ། །སྣུམ་གྱི་བཏུང་བ་དང་བཀྲུ་སྨན་དྲག་པོ་དང་། འཇམ་རྩི་མས་གཏོང་བ་རྣམས་ལ་ཡང་དང་ཡང་དུ་
[234a]
[234a.1]སྦྱར་ན། རླུང་ལས་གྱུར་པའི་སྐྲན་ལ་ཕན་ནོ། །བད་ཀན་དང་མཁྲིས་པ་ནི་སྨན་པས་མི་འབྱུང་བར་བསྲུང་ངོ་། །འཇམ་རྩི་ནི་རླུང་སྐྲན་འཇོམས་པའི་མཆོག་ཏུ་རིག་པར་བྱ་སྟེ། དེ་ཡང་དང་པོ་རླུང་གི་རང་གི་གནས་སུ་ཞི་བར་བྱས་ན་དེ་མ་ཐག་སྐྲན་སེལ་ཏོ། །
[234a.2]དེ་བས་ན་བཀྲུ་སྨན་དྲག་པོ་དང་འཇམ་རྩི་མས་གཏང་བ་ཡང་དང་ཡང་དུ་བྱས་ན། རླུང་དང་། མཁྲིས་པ་དང་། བད་ཀན་གྱི་བདག་ཉིད་ཀྱི་སྐྲན་ཡང་ཞི་བར་འགྱུར་རོ། །ཤིང་ཀུན་དང་། ཁ་རུ་ཚ་དང་། ཚ་བ་གསུམ་དང་། རྩབ་རུ་ཚ་དང་། བལ་པོ་སེའུ་དང་། མ་ནུ་དང་།
[234a.3]གོ་སྙོད་དང་། འུ་སུ་དང་། ཟི་ར་དང་། ལ་ལ་ཕུད་དང་། སྟར་བུ་དང་། ཡ་བཀྵ་ར་དང་། ཀྲུ་ཏྲུག་ཏྲེས་དང་། ཟུར་པ་དང་། ཨ་ཛ་གནྡྷ་དང་། སུག་སྨེལ་དང་། བྱེའུ་རུག་པ་དང་། འདི་རྣམས་ཆམ་ཆོམ་བརྡུངས་ཏེ། ཞོ་དང་། མར་དང་། ལྷན་ཅིག་ཚུལ་བཞིན་བསྐོལ་
[234a.4]བ་ལས་རན་པར་འཐུངས་ན་རླུང་ལས་གྱུར་པའི་སྐྲན་ནད་སེལ་ཏོ། །ཁྱད་པར་དུ་ཟུག་གཟེར་དང་ལྟོ་སྦོ་བ་འཕྲོག་གོ། །སྤ་མའི་འབྲས་བུ་དང་། ཚ་བ་གསུམ་དང་། ཟི་ར་དང་། ཚ་བ་ལྔ་དང་། ཨ་ཛ་མོ་རྡ་དང་། གོ་སྙོད་དང་། ལྕེ་མྱང་ཚ་དང་། འདི་རྣམས་ཆམ་ཆོམ་བརྡུངས་
[234a.5]ཏེ། མར་དང་ལྷན་ཅིག་ཞོ་དང་བསྐོལ། ཞོ་དུ་བ་དང་ཕྱིར་ཕྱུང་ལ་འོ་མའི་ནང་དུ་ཡང་བསྐོལ་ལ། དེ་བཞིན་དུ་བལ་པོ་སེའུ་དང་། ལ་ཕུག་སྐམ་པོ་དང་། རྒྱ་ཤུག་སྐྱུར་པོ་དང་། དེ་གསུམ་གྱི་ཁུ་བའི་ནང་དུ་བསྐོལ་བའི་མར་ལས་རན་པར་འཐུངས་ན་རླུང་ལས་གྱུར་པའི་སྐྲན་
[234a.6]དང་། དམུ་རྫིང་དང་། ལྟོ་སྦོ་བ་དང་། རྩིབ་ལོགས་ན་བ་དང་། སྙིང་ན་བ་དང་། ལྟོ་བ་ན་བ་དང་། མོ་མཚན་གྱི་ནད་དང་། གཞང་འབྲུམ་དང་། ཕོ་བའི་ནད་དང་། ལུད་པ་དང་། དབུགས་མི་བདེ་བ་དང་། ཡི་ག་འཆུས་པ་དང་། རིམས་རྣམས་སེལ་བར་བྱེད་དོ། །
[234a.7]ཡང་ན་རྩ་བ་བཅུ་པ་དང་། པ་ལང་ཀ་དང་། སུ་ཤ་བི་དང་། བ་སྤྲུ་བ་རྣམ་གཉིས་དང་། མ་ནུ་དང་། ཨེ་རཎྜ་དང་། ར་སྣ་དང་། ཨ་ཤྭ་གནྡྷ་དང་། ག་བྲའི་རྩ་བ་དང་། ཟུར་པ་དཀར་པོ་དང་། སླེ་ཏྲེས་དང་། སུ་ཏི་ཀ་རཉྫ་དང་། འདི་རྣམས་སྲང་གཉིས་གཉིས་
[234b]
[234b.1]དང་། ནས་དང་། རྒྱ་ཤུག་དང་། རྒྱ་སྲན་དང་། མོན་སྲན་གྲེའུ་དང་། འདི་རྣམས་སྲང་བཅུ་དྲུག་བཅུ་དྲུག་དང་། དེ་རྣམས་ཆམ་ཆོམ་བརྡུངས་ཏེ། ཆུ་སྲང་ལྔ་བརྒྱ་རྩ་བཅུ་གཉིས་དང་བསྐོལ་ཏེ། བཞི་ཆ་ལུས་པའི་ནང་དུ་ཞོ་སྲང་བརྒྱ་ཉི་ཤུ་རྩ་བརྒྱད་དང་། བལ་པོ་
[234b.2]སེའུ་དང་། ཨ་མྲ་ཏ་ཀ་དང་། མ་དུ་ལུང་ག་དང་། འདི་རྣམས་རང་གི་ཁུ་བ་སྲང་སུམ་ཅུ་རྩ་གཉིས་གཉིས་དང་། མར་སྲང་སུམ་ཅུ་རྩ་གཉིས་དང་། ནས་སོ་བའི་རྩབ་མོ་དང་། འབྲས་ཀྱི་ཆང་སྐྱུར་དང་། ཚྭ་དང་འདི་རྣམས་སྲང་སུམ་ཅུ་རྩ་གཉིས་གཉིས་དང་། ག་
[234b.3]བྲའི་རྩ་བ་དང་། གཡེར་མ་དང་། ཤུ་དག་དང་། པི་པི་ལིང་གི་རྩ་བ་དང་། ར་སྣ་དང་། ཙི་ཏྲ་ཀ་དང་། འུ་སུ་དང་། ཏི་མུས་དང་། ལ་ལ་ཕུད་དང་། སྟར་བུ་དང་། ཟི་ར་ནག་པོ་དང་། གོ་སྙོད་དང་ཤིང་ཀུན་དང་། སྤ་མའི་འབྲས་བུ་དང་། ག་བི་དང་། ཟངས་
[234b.4]རྩི་བ་དང་། ཨ་ཤྭ་ཀ་དང་། དུར་བྱིད་དང་། དན་ད་དང་། མུར་བ་དང་། ཧསྟི་པི་པི་ལིང་དང་། བྱི་དང་ག་དང་། བལ་པོ་སེའུ་དང་། གཟེ་མ་དང་། རྒྱལ་མོ་ག་གོན་གྱི་ས་བོན་དང་། སྤང་སྤོས་དང་། སྲུ་སྲུའི་རྩ་བ་དང་། ཤུ་ཏི་དང་། ཐལ་བ་རྣམ་གཉིས་དང་། བྱེའུ་
[234b.5]རུ་ག་པ་དང་། ཐལ་ཏྲེས་དང་། ནི་ལི་ནིའི་འབྲས་བུ་དང་། ལན་ཚྭ་རྣམ་གསུམ་དང་དེ་རྣམས་ཞིབ་ཏུ་བཏགས་པའི་ཕྱེ་མ་བཏབ་སྟེ་བསྐོལ་བས་མར་འབའ་ཞིག་ལུས་པ་ནི། ཞོ་ལ་སོགས་པའི་སྨན་མར་ཞེས་བྱ་སྟེ། དེ་ལས་རན་པར་འཐུངས་ན་གོང་དུ་སྨོས་པའི་ནད་ཤིན་དུ་
[234b.6]གསོ་དཀའ་བ་ཡང་མྱུར་དུ་སེལ་བར་བྱེད་དོ། །དེ་བཞིན་དུ་བརྗེད་བྱེད་དང་སྨྱོ་བྱེད་དང་། གཅིན་འགགས་པ་དང་། རླུང་ནད་རྣམས་མྱུར་དུ་སེལ་བར་བྱེད་དོ། །ཡང་ན་ཚ་བ་གསུམ་དང་། འབྲས་བུ་གསུམ་དང་། འུ་སུ་དང་། དབྱི་མོ་དང་། བྱི་དང་ག་དང་། ཙི་ཏྲ་ཀ་དང་
[234b.7]འདི་རྣམས་མར་དང་འོ་མ་དང་བཅས་པ་བསྐོལ་བ་འཐུངས་ན་རླུང་ལས་གྱུར་པའི་སྐྲན་སེལ་ཏོ། །ཤུན་པ་བཤུས་པའི་སྒོག་སྐྱ་སྲང་བརྒྱ་དང་། རྩ་བ་ལྔ་ཆེན་པོ་སྲང་རེ་རེ་དང་། ཆུ་སྲང་གོང་དང་བསྐོལ་ལ་བཞི་ཆ་ལུས་པའི་ཕྱེད་དང་མཉམ་པའི་སེའུ་འབྲུའི་རང་གི་ཁུ་བ་དང་། ཆང་
[235a]
[235a.1]དང་འབྲས་ཀྱི་རང་སྐྱུར་དང་། ཞོ་དང་དེ་རྣམས་རེ་རེ་ཡང་གོང་མའི་ཁུ་བའི་ཕྱེད་ཕྱེད་དང་མཉམ་པ་དང་། ཚ་བ་གསུམ་དང་། འབྲས་བུ་གསུམ་དང་། ཤིང་ཀུན་དང་། ལ་ལ་ཕུད་དང་། དབྱི་མོ་དང་། ཏི་མུས་དང་། སྟར་བུ་དང་། རྒྱམ་ཚ་དང་།
[235a.2]ཐང་ཤིང་དང་། འདི་རྣམས་སྲང་རེ་རེ་ཞིབ་ཏུ་བཏགས་པའི་ཕྱེ་མ་མར་སྲང་སུམ་ཅུ་རྩ་གཉིས་དང་ཡང་བསྐོལ་ཏེ། མར་ལུས་པ་དང་རན་པར་འཐུངས་ན་རླུང་ནད་ཐམས་ཅད་ལས་གྱུར་པའི་སྐྲན་སེལ་བའི་མཆོག་ཡིན་ནོ། །ཡང་ན་གཅོང་ཆེན་པོ་གསོ་བའི་སྐབས་ལས་བྱུང་བའི་སྲང་
[235a.3]དྲུག་པ་ཞེས་བྱ་བའི་སྨན་མར་བླུད་དོ། དེ་ཡང་འོ་མའི་སྐྱིན་པར་ཆང་ངམ་ཆང་གི་དངས་མ་འམ། སེའུ་འབྲུའི་ཁུ་བའམ་ཞོའི་སྤྲིས་མ་གང་ཡང་རུང་བ་དང་སྦྱར་བའི་སྨན་མར་འཐུངས་ན་རླུང་ལས་གྱུར་པའི་སྐྲན་སེལ་ཏོ། །གལ་ཏེ་རླུང་གི་སྐྲན་ལ་བད་ཀན་སྩོགས་ཏེ། མེ་དྲོད་
[235a.4]ཉམས་ཤིང་ཡི་ག་འཆུས་པ་དང་། སྙིང་འཛག་པ་དང་། ལུས་ལྕི་བ་དང་སྙོམ་པར་འགྱུར་ཏེ། དེ་ལ་སྐྱུག་སྨན་གཏང་ངོ་། ཟུག་གཟེར་དང་། ལྟོ་སྦོ་བ་དང་། རྟུག་པ་འགགས་པ་དང་། ཁོང་པ་སྣུམ་པར་ཤེས་ན་སྨན་བསྐོལ་བའི་ཆུ་དང་ཕྱེ་མ་དང་། རི་ལུ་དང་།
[235a.5]སྨན་མར་སྦྱར་བར་བྱ་སྟེ། དེ་ཡང་རྒྱ་ཤུག་དང་། སེའུ་འབྲུ་དང་། ཆུ་དྲོན་དང་། དར་བ་དང་། ཆང་དང་། རྩབས་སྐྱུར་པོ་དང་ལྷན་ཅིག་སྦྱར་བ་གཏང་ངོ་། །ཡང་ན་ནད་པར་སྨན་གྱི་ཕྱེ་མ་ཟོས་ལ་དེའི་འོག་ཏུ་མར་དང་བཅས་པའི་ཐུག་པ་རྐྱང་རྐྱང་པོ་བཏུང་བའམ། ཟས་
[235a.6]བཟའོ། །ཡང་ན་འོག་ནས་སྨོས་པའི་སྨན་གྱི་ཕྱེ་མ། མ་དུ་ལུང་གའི་ཁུ་བའི་ནང་དུ་ལན་མང་པོར་བྲན་པའི་ཕྱེ་མ་དང་། བད་ཀན་དང་རླུང་འཇོམས་པའི་རི་ལུ་ལ་སོགས་པ་བྱའོ། །ཡང་ན་ཤིང་ཀུན་དང་། ཤུ་དག་དང་། ཨ་རུ་ར་དང་། ཨ་ཛ་གནྡྷ་དང་། སེའུ་
[235a.7]འབྲུ་དང་། ཏི་མུ་ས་དང་། འུ་སུ་དང་། པ་ཐ་དང་། པུཥྐར་མཱུ་ལ་དང་། ཟུར་པ་དཀར་པོ་དང་། སྤ་མའི་འབྲས་བུ་དང་། ཙི་ཏྲ་ཀ་དང་། ཐལ་བ་རྣམ་གཉིས་དང་། ལན་ཚྭ་རྣམ་གཉིས་དང་། ཚ་བ་གསུམ་དང་། ཟི་ར་དང་། དབྱི་མོ་དང་། ད་ཏྲ་གི་དང་། སྟར་བུ་དང་། འདི་རྣམས་
[235b]
[235b.1]ལྷན་ཅིག་ཏུ་སྦྱར་བའི་ཕྱེ་མ་ལས་རན་པར་ཟོས་ན། སྙིང་ག་དང་། རྩིབ་ལོགས་དང་། ཆུ་སོ་དང་། མཇུག་ཏོ་དང་། མངལ་དང་འཇང་དང་། འདི་རྣམས་སུ་ཟུག་ཅིང་ན་བ་དང་། རླུང་དང་བད་ཀན་དང་། མ་ཞུ་བ་ལས་བྱུང་བའི་ནད་དང་། གསོ་དཀའ་བའི་སྐྲན་དང་། རླུང་
[235b.2]དང་གཅིན་དང་། ཕྱི་ས་འགགས་པ་དང་། སྐེ་འགགས་པ་དང་། སྟོད་འཛིངས་པ་དང་། སྐྱ་རྦབ་དང་། ཡི་ག་འཆུས་པ་དང་། མཆེར་པ་ན་བ་དང་། གཞང་འབྲུམ་དང་། སྐྱིགས་བུ་དང་། རླིག་རླུགས་དང་། ལྟོ་སྦོ་བ་དང་། དབུགས་མི་བདེ་བ་དང་། ལུད་པ་དང་མེའི་
[235b.3]དྲོད་ཉམས་པ་རྣམས་འཇོམས་པར་བྱེད་དོ། །རྒྱམ་ཚ་དང་། ལ་ལ་ཕུད་དང་། ཏི་མུས་དང་། པི་པི་ལིང་དང་། དོང་གྲ་དང་། འདི་རྣམས་ཡས་ཀྱི་རིམ་བཞིན་དུ་ཆ་རེ་རེ་བསྐྱེད་པ་དང་། དེ་རྣམས་སྤྱི་དང་མཉམ་པའི་ཨ་རུ་ར་དང་ལྷན་ཅིག་སྦྱར་བ་ནི། མངོན་སུམ་དུ་མེ་དང་
[235b.4]མཉམ་པ་ཡིན་ནོ། །ཡང་ཚ་བ་གསུམ་དང་། ཏི་མུ་ས་དང་། རྒྱམ་ཚ་དང་། ཟི་ར་རྣམ་གཉིས་དང་། ཤིང་ཀུན་དང་འདི་རྣམས་ཆ་སྙོམས་པ་ནི། ཤིང་ཀུན་བརྒྱད་པའི་ཕྱེ་མ་ཞེས་བྱ་སྟེ། དེ་ལས་ཁམ་དང་པོར་མར་དང་བསྲེས་པ་ཟོས་ན་ཁོང་དྲོད་བསྐྱེད་ཅིང་རླུང་ལས་
[235b.5]གྱུར་པའི་སྐྲན་སེལ་ཏོ། །ཡང་ཤུ་དག་དང་། ལྕེ་མྱང་ཚ་དང་། ལི་དོང་གྲ་དང་། ལ་ལ་ཕུད་དང་། ཨ་རུ་ར་དང་། མ་ནུ་དང་། རུ་རྟ་དང་། དུར་བྱིད་དང་། དན་དའི་རྩ་བ་དང་། འདི་རྣམས་དང་པོའི་ཆ་རེ་རེས་ཀུན་ལ་བསྐྱེད་པ་ནི་སྟག་ལྟ་བུའི་ཕྱེ་མ་ཞེས་བྱ་སྟེ། དེ་ལས་ཆུ་
[235b.6]དྲོན་དང་སྦྱར་ཏེ་འཐུངས་ན་དཔེར་ན་སྟག་གིས་རི་དགས་ཀྱི་ཚོགས་བཅོམ་པ་བཞིན་དུ། ཁོང་པའི་ནད་ཐམས་ཅད་དང་། སྐྲན་དང་། དམུ་རྫིང་ལ་སོགས་པའི་ནད་འཇོམས་པར་བྱེད་དོ། །རྒྱམ་ཚ་དང་། པི་པི་ལིང་དང་ཨ་རུ་ར་དང་། ཏི་མུ་ས་དང་། འདི་རྣམས་ཀྱི་ཕྱེ་མ་
[235b.7]ཆུ་དྲོ་འཇམ་ཙམ་དང་སྦྱར་ཏེ་བཏང་ན། བད་ཀན་དང་རླུང་ལས་གྱུར་པའི་ནད་འཇིག་པར་བྱེད་དོ། །ལྕགས་མདས་ལུས་འབིགས་པ་བཞིན་ནོ། །ཡང་ན་ཁམས་སླང་གི་སྟེང་དུ་པི་ཀ་རཉྫའི་ལོ་མ་བཏིང་བ་དེའི་སྟེང་དུ་ཨིན་དྲ་བ་རུ་ནི་དང་། དབྱི་མོ་དང་། ཀྲུ་ཏྲུག་ཏྲེས་དང་། བཅའ་
[236a]
[236a.1]སྒ་དང་། པི་པི་ལིང་དང་། ན་ལེ་ཤམ་གྱི་ཕྱེ་མ་རིམ་བཞིན་དུ་བདལ་བའི་སྟེང་དུ་ལན་ཚྭ་བཏབ་ནས་དེ་ལྟ་བུ་རིམ་པ་བཞིན་དུ་བརྩེགས་ནས་ཕྲུ་བ་སར་པས་དུད་པ་མ་ཤི་བར་བཀག་ལ་འོག་ནས་མེ་བཏང་སྟེ་བསྲེགས་ལ་ཚིག་པར་གྱུར་པ་དེ་བཏགས་ནས་ཞོ་ག་ཆུ་དང་སྦྱར་
[236a.2]ཏེ་འཐུངས་ན། སྐྲན་དང་། དམུ་རྫིང་དང་། སྐྱ་རྦབ་ཀྱི་ནད་དང་། གཞང་འབྲུམ་རྣམས་ལ་ཕན་ནོ། །ཤིང་ཀུན་དང་། དེའི་སུམ་འགྱུར་གྱི་རྒྱམ་ཚའི་ཕྱེ་མ་དང་། དེའི་སུམ་འགྱུར་གྱི་ཨེ་རཎྜའི་མར་དང་། དེའི་སུམ་འགྱུར་གྱི་སྒོག་སྐྱའི་ཁུ་བ་དང་། དེ་རྣམས་ལྷན་ཅིག་སྦྱར་
[236a.3]ལ་འཐུངས་ན་སྐྲན་དང་། དམུ་རྫིང་དང་། རྒྱུ་རླུགས་ཀྱི་ཟུག་གཟེར་འཇོམས་པར་བྱེད་དོ། །ཡང་ན་ཁ་ལུང་གི་ཁུ་བ་དང་། ཤིང་ཀུན་དང་། ལྕེ་མྱང་ཚ་དང་རྒྱམ་ཚ་དང་འདི་རྣམས་ཆང་གི་ཉིང་ཁུའི་ནང་དུ་བཏབ་སྟེ་འཐུངས་ན་རླུང་ལས་གྱུར་པའི་སྐྲན་སེལ་ཏོ། །བཅའ་སྒ་ཞོ་
[236a.4]གཉིས་དང་། བུ་རམ་ཞོ་བཞི་དང་། ཏིལ་ནག་པོ་ཕུབ་མ་མེད་པ་སྲང་གཅིག་དང་། འདི་རྣམས་ལྷན་ཅིག་ཕྱེ་མར་བྱས་ཏེ་ཟོས་ལ་དེའི་འོག་ཏུ་འོ་མ་དྲོན་པོ་འཐུངས་ན། རླུང་ལས་གྱུར་པའི་སྙིང་ནད་དང་། སྐྲན་དང་། གཞང་འབྲུམ་དང་། མོ་མཚན་དུ་ཟུག་པ་དང་། རྟུག་
[236a.5]པ་འགགས་པ་རྣམས་ལས་རྒྱལ་བར་བྱེད་དོ། །རླུང་ལས་གྱུར་པའི་སྐྲན་ལ་ནི། ཨེ་རཎྜའི་མར་ཆང་གི་དངས་མ་ལས་གཏང་ངོ་། །རླུང་དང་བད་ཀན་རྗེས་སུ་འབྲེལ་པ་ཡིན་ན་ཡང་སྦྱོར་བ་དེ་ལྟར་བྱའོ། །རླུང་དང་མཁྲིས་པ་འབྲེལ་པ་ཡིན་ན་འོ་མ་དང་ལྷན་ཅིག་གཏང་ངོ་། །
[236a.6]གལ་ཏེ་རླུང་ལས་གྱུར་པའི་སྐྲན་མཁྲིས་པ་ཆེར་སྐྱེས་ན་ནི་ཚ་བ་ཆེ་བ་ཡིན་ཏེ། དེ་ལ་ནི་སྣུམ་དང་བཅས་པའི་བཀྲུ་སྨན་བྱའོ། །བཀྲུ་སྨན་བྱས་ཀྱང་ཚ་བ་དེ་བཞིན་དུ་ཡོད་ན་ཁྲག་དབྲི་སྟེ་གཏར་ག་བྱའོ། །སྒོག་སྐྱ་ཤུན་པ་སྐམ་པོ་སྲང་བཞི་དང་། དེའི་བརྒྱད་འགྱུར་གྱི་ཆུ་དང་། འོ་མ་
[236a.7]དང་ལྷན་ཅིག་བསྐོལ་ཏེ། འོ་མ་ལུས་པ་དང་། དེ་ལས་རན་པར་འཐུངས་ན། རླུང་ལས་གྱུར་པའི་སྐྲན་དང་། རྟུག་པ་འགགས་པ་དང་། ཞེན་པའི་རླུང་དང་། རིམས་མི་བཟད་པ་དང་། སྙིང་ནད་དང་། ཁོང་འབྲས་དང་། སྐེམ་བྱེད་དང་། འདི་རྣམས་མྱུར་དུ་
[236b]
[236b.1]ཟློག་ཕར་བྱེད་དོ། །ཏིལ་མར་དང་། ཆང་གི་དངས་མ་དང་། བ་གཅིན་དང་། རང་སྐྱུར་དང་། ནས་ཚིག་འཁུས་པའི་ཐལ་བ་དང་། འདི་རྣམས་ལྷན་ཅིག་ཏུ་སྦྱར་བ་འཐུངས་ན། སྐྲན་དང་། དམུ་རྫིང་དང་། ལྟོ་སྦོས་པ་རྣམས་ལ་ཕན་ནོ། །ཡང་ན་ཀྲུ་ཏྲུག་ཏྲེས་
[236b.2]དང་། པི་པི་ལིང་དང་མཱུ་ལ་དང་། ཨེ་རཎྜ་དང་། བཅའ་སྒ་དང་། ཤིང་ཀུན་དང་། རྩབ་རུ་ཚ་དང་རྒྱམ་ཚ་དང་འདི་རྣམས་ཚུལ་བཞིན་བསྐོལ་བ་འཐུངས་ན་ཟུག་གཟེར་དང་ལྟོ་སྦོ་བ་དང་རྟུག་པ་འགགས་པ་རྣམས་ལ་ཕན་པའི་མཆོག་ཡིན་ནོ། །མ་ནུ་དང་། ཨེ་རཎྜའི་རྩ་བ་
[236b.3]བ་དང་། ནས་དང་། བྱི་ཚེར་བ་དང་། བ་ཤ་ཀ་དང་། འདི་རྣམས་ཚུལ་བཞིན་དུ་བསྐོལ་བ་འཐུངས་ན་ལྟོ་སྦོ་བ་དང་། ལུས་ཚ་བའི་ནད་འཇོམས་སོ། །ཡང་ན་མ་ནུ་དང་། ཨེ་རཎྜ་དང་། རྩྭ་དཱུར་བ་དང་། འདི་རྣམས་ཀྱི་རྩ་བ་དང་། ཐང་ཤིང་དང་། བཅའ་སྒ་དང་། དེ་
[236b.4]རྣམས་བསྐོལ་བའི་ཁུ་བ་འཐུངས་ན། ཁོང་པ་ན་བ་དང་། རྒྱབ་ཀྱི་སྒལ་ཚིགས་སུ་ཟུག་པ་ལ་ཕན་ནོ། །རླུང་ལས་གྱུར་པའི་སྐྲན་ལ་ནི། བྲག་ཞུན་དང་། པ་ཡ་སྱ་དང་། རྩ་བ་ལྔ་པ་ཆེ་ཆུང་གང་ཡང་རུང་བ་ཆུ་དང་བསྐོལ་བ་བླུད་དོ། །རླུང་སྐྲན་དང་། རྟུག་པ་འགགས་
[236b.5]པ་ལ་ནི། ནས་ཆན་སྣུམ་དང་ལྡན་པ་བྱིན་ཏེ། པི་པི་ལིང་དང་། ལ་ཕུག་སྐམ་པོའི་ཁུ་བཅུད་དང་སྦྱར་བའི་ཟས་སྦྱིན་ནོ། །ཡང་ན་ནས་ཀྱི་ཟན་འོ་མ་དྲོན་པོ་དང་ལྷན་ཅིག་སྦྱིན་ནོ། །ཡང་ན་ནི་མོན་སྲན་གྲེའུ་དང་། མོན་སྲན་སྡེའུ་ལ་སོགས་པའི་ཟན་དྲོན་སྣུམ་དང་། ལན་ཚྭ་
[236b.6]མང་པོ་དང་ལྡན་བའི་ཟས་ཟའོ། །རླུང་ལས་གྱུར་པའི་སྐྲན་དྲི་མ་དང་བཅས་པ་ལ་ནི། ནི་ལི་ནི་དང་། དུར་བྱིད་དང་། དན་ཏི་དང་། ཨ་རུ་ར་དང་། ཀ་ལི་ལྱ་ཀ་དང་། རྩལ་རུ་ཚ་དང་། ནས་ཚིག་འཁུས་པའི་ཐལ་བ་དང་། དོང་གྲ་དང་། འདི་རྣམས་མར་དང་ལྷན་
[236b.7]ཅིག་བཀྲུ་སྨན་གཏང་ངོ་། །ཡང་ན་ནི་ལི་ནི་དང་། འབྲས་བུ་གསུམ་དང་། ར་སྣ་དང་། བ་ལ་དང་། པུ་ཙེ་ཤེལ་དང་། པི་དང་ག་དང་ཀཎྜ་ཀ་རི་དང་། འདི་རྣམས་སྲང་རེ་རེ་དང་ཆུ་སྲང་བརྒྱ་ཉི་ཤུ་རྩ་བརྒྱད་དང་ལྷན་ཅིག་བསྐོལ་ཏེ། ཁུ་བ་བརྒྱད་ཆ་ལུས་བའི་ནང་དུ། མར་
[237a]
[237a.1]བྲེ་གང་དང་། ཞོ་བྲེ་གང་དང་། སུ་དྷཱ་ཀྵི་ར་སྲང་གཅིག་དང་ལྷན་ཅིག་བསྐོལ་ཏེ། མར་ལུས་པ་ནི་ནི་ལི་ནིའི་མར་ཞེས་བྱ་སྟེ། དེ་ལས་སྲང་རེ་རེ་དང་ཐུག་པ་རྐྱང་པོ་དང་ལྷན་ཅིག་བསྲེས་པ་ལས་སྲང་རེ་རེ་ཟོས་ཏེ་ལེགས་པར་འཁྲུས་པ་དང་། ཤ་ཁུའི་བཟའ་བ་
[237a.2]བྱིན་ན། སྐྲན་དང་། མཛེ་དང་། དམུ་རྫིང་དང་། སྨེ་བ་དང་། སྐྲང་བ་དང་། སྐྱ་རྦབ་དང་། རིམས་དང་། ཤ་བཀྲ་དང་། མཆེར་པ་ན་བ་དང་། སྨྱོ་བྱེད་རྣམས་འཇོམས་པར་བྱེད་དོ། །མདོར་ན་རླུང་ལས་གྱུར་པའི་སྐྲན་ནད་གསོ་བ་ལ་ནི། ཁྱིམ་བྱ་དང་། རྨ་བྱ་དང་། སྲེག་པ་དང་།
[237a.3]ཁྲུང་ཁྲུང་དང་། བྱེའུ་བྲ་དྷེ་ཀ་དང་། འདི་རྣམས་ཤ་ཁུའི་ཆེད་དུ་སྦྱར་རོ། །ཟས་སུ་ནི་འབྲས་ཞག་དྲུག་ཅུ་པ་ལ་སོགས་པ་སྦྱར་རོ། །བཏུང་བར་ནི་ཆང་སྦྱར་རོ། །སྣུམ་བག་ནི་མར་སྦྱར་རོ། །རླུང་ལས་གྱུར་པའི་སྐྲན་ནད་ཅན་ལ་ནི། ཟས་ཉུང་ཟད་རན་པ་དྲོ་བ་དང་སྣུམ་པ་དང་སླ་
[237a.4]བ་བཟའོ། །བཏུང་བ་ནི་ཆང་གི་ཉིང་ཁུ་དང་། འུ་སུ་བསྐོལ་བའི་ཆུ་དྲོན་པོ་འཐུངས་ན་ཕན་ནོ། །མཁྲིས་པ་ལས་གྱུར་པའི་སྐྲན་ནད་ལ་ནི་ཐོག་མར་སྣུམ་པ་དང་། དྲོ་བའི་རྒྱུ་ལས་འབྱུང་སྟེ། དེ་ལས་རྒུན་འབྲུ་དང་། ཨ་རུ་ར་དང་། བསྐོལ་བའི་ནང་དུ་བུ་རམ་བཅུག་པའམ།
[237a.5]ཡང་ན་ཀ་པི་ལྱ་སྦྲང་རྩི་དང་སྦྱར་བ་བླུད་ལ་ཁྲུས་བྱའོ། །ཡང་ན་ཁྲག་མཁྲིས་གསོ་བའི་བཀྲུ་སྨན་ནམ། ཆོ་ག་གྲུབ་པའི་ནང་གི་བཀྲུ་སྨན་གང་ཡང་རུང་བ་གཏང་ངོ་། །རྩུབ་པ་དང་དྲོ་བ་ལས་བྱུང་བའི་མཁྲིས་པའི་སྐྲན་ལ་ནི་ཁ་བའི་སྨན་སྦྱར་བ་དང་། ཡང་ཁྲག་མཁྲིས་གསོ་བ་ལས་བྱུང་
[237a.6]བའི་བ་ཤ་ཀའི་སྨན་མར་སྦྱར་བའམ། ཡང་ན་རྩྭའི་རྩ་བ་ལྔ་དང་། སྦྱར་བའི་མར་རམ། ཡང་ན་འཚོ་བྱེད་སྡེ་བཅུ་དང་བསྐོལ་བའི་མར་གང་ཡང་རུང་བ་བླུད་ན་མཁྲིས་པ་ལས་གྱུར་པའི་སྐྲན་ཞི་བར་བྱེད་པའི་མཆོག་ཡིན་ནོ། །ཡང་ན་འཚོ་བྱེད་སྡེ་བཅུ་དེ་ཉིད་འོ་མ་དང་བསྐོལ་བ་འམ།
[237a.7]ཡང་ན་ནྱ་གྲོ་དྷའི་སྡེ་ཚན་བསྐོལ་བ་འཐུངས་ན་ཡང་མཁྲིས་པའི་སྐྲན་སེལ་ཏོ། །རྩུབ་པ་དང་དྲོ་བ་ལས་གྱུར་པའི་སྐྲན་ནམ། སྐྲན་ཐམས་ཅད་ལ་ནི་སྨན་པས་བཀྲུ་སྨན་མར་རམ་འོ་མ་དང་ལྷན་ཅིག་སྦྱར་བའི་བཀྲུ་སྨན་སྦྱར་རོ། །སྐྱུ་རུ་ར་དང་། བུ་རམ་ཤིང་གི་ཁུ་བ་སྲང་དྲུག་ཅུ་རྩ་བཞི་
[237b]
[237b.1]དང་མར་སྲང་སུམ་ཅུ་རྩ་གཉིས་དང་། ཨ་རུ་ར་སྲང་བརྒྱད་དང་འདི་རྣམས་ལྷན་ཅིག་བསྐོལ་ཏེ། མར་ལུས་པ་ལས་རན་པར་འཐུངས་ན། མཁྲིས་པ་ལས་གྱུར་བའི་སྐྲན་སེལ་ཏོ། །ཡང་ན་མཁྲིས་པ་ཁོང་འབྲས་གསོ་བའི་ནང་ནས་འབྱུང་བའི་སེང་ཕྲོམ་གྱི་མར་འཐུངས་ན་ཡང་ཕན་ནོ། །ཡང་
[237b.2]ན་རྒུན་འབྲུ་དང་པ་ཡས་སྱ་དང་། ཤིང་མངར་དང་། ཤུག་པ་དང་། ཙནྡན་དཀར་པོ་དང་། སྦྲང་རྩི་དང་འདི་རྣམས་འབྲས་བཀྲུས་པའི་ཆུ་དང་ལྷན་ཅིག་འཐུངས་ན་མཁྲིས་པ་ལས་གྱུར་པའི་སྐྲན་ནད་སེལ་ཏོ། །ཀྱི་ལྕེ་བ་སྲང་གཉིས་ཆུ་སྲང་དྲུག་ཅུ་རྩ་བཞི་དང་བསྐོལ་ཏེ་བརྒྱད་ཆ་ལུས་པ་དང་།
[237b.3]ཚིགས་མ་བོར་ལ་འོ་མ་དྲོན་པོ་དང་ལྷན་ཅིག་བཏུང་བར་བྱའོ། །དེའི་འོག་ཏུ་མེའི་དྲོད་ཇི་ལྟ་བ་བཞིན་དུ་འོ་མ་དྲོན་པོ་དང་བླུད་ན་མཁྲིས་པའི་ནད་དང་། མཁྲིས་པ་ལས་གྱུར་པའི་སྐྲན་སེལ་བར་བྱེད་དོ། །མཁྲིས་པ་ལས་གྱུར་པའི་སྐྲན་ནད་ཀྱིས་ལུས་ཚ་བ་ལ་ནི་མར་གྲང་མོས་བསྐུ་ཞིང་།
[237b.4]བསིལ་བའི་སྨན་ཙནྡན་དང་། ཨུ་ཤི་རའི་ཕྱེ་མ་དང་སྦྱར་བས་བྱུག་པར་བྱའོ། །ཆུ་ལས་སྐྱེས་པའི་པདྨ་ལ་སོགས་པའི་ལོ་མས་ལུས་ལ་རེག་ཅིང་བཀབ་པ་དང་། སྣོད་ཆུས་བཀང་བའི་ནང་དུ་སྤྱིང་པར་བྱའོ། །དང་པོ་ལུས་ཚ་ཞིང་ཟུག་གཟེར་ཆེ་ལ་མེ་དྲོད་ཆུང་བ་ལ་གཏར་ག་
[237b.5]བྱས་ཏེ། ཁྱད་པར་དུ་མཁྲིས་པ་ལས་གྱུར་པའི་སྐྲན་ལ་བྱའོ། །དེ་ལྟར་ཁྲག་མང་དུ་ཕྱུང་བས་ནད་ཀྱི་རྩ་བ་ཆད་དེ། སྐྲན་ཡང་ཟད་ཅིང་ཁྲག་རོ་སྐྱུར་བར་བྱུང་སྟེ་ཁྲག་དང་ནད་ཀྱང་མེད་ཅིང་ཉམ་ཆུང་བ་ལ། སྲོག་ཆགས་ཐང་ལས་སྐྱེས་པའི་ཤ་ཁུས་ཉམས་བརྟ་བར་བྱའོ། །དེ་ལྟར་
[237b.6]ཉམས་བརྟས་ནས་ཀྱང་ཉེས་པའི་ལྷག་མ་ཅུང་ཞིག་ཡོད་པ་ལྟར་ན། ཡང་དང་ཡང་མར་བསྟེན་ཅིང་གོམས་པར་བྱའོ། །ཁྲག་དང་མཁྲིས་པ་ལས་གྱུར་པའི་སྐྲན་ཤས་ཆེར་གཡོས་ཏེ། བྱ་བ་གང་གིས་ཀྱང་མ་ཐུབ་སྟེ། སྐྲན་ཁོང་དུ་སྨིན་ཅིང་ན་བ་ལ་ནི། མཁྲིས་པ་
[237b.7]ལས་གྱུར་པའི་ཁོང་འབྲས་གསོ་བའི་ཆོ་ག་ཐམས་ཅད་ཀྱང་བྱའོ། །མདོར་ན་ཁ་ཟས་ནི་འབྲས་སཱ་ལུ་ལ་སོགས་པ་བྱའོ། །འོ་མ་ནི་བ་དང་རའི་འོ་མ་སྦྱར་རོ། །ཚོད་མ་ནི་པ་ཏོ་ལ་ལ་སོགས་པ་བྱའོ། །ཤ་ནི་སྲོག་ཆགས་ཐང་ལས་སྐྱེས་པའི་ཤ་རྣམས་བྱའོ། །སྣུམ་དུ་ནི་མར་
[238a]
[238a.1]བྱའོ། །ཚོད་མ་དང་། བཟའ་བའི་ནང་དུ་སྦྱར་བ་ནི་སྐྱུ་རུ་ར་དང་། པ་རུ་ཤ་ཀ་དང་། རྒུན་འབྲུ་དང་། འབྲ་གོ་དང་། སེའུ་འབྲུ་དང་། ཁ་ར་དཀར་པོ་རྣམས་དང་སྦྱར་རོ། །བཏུང་བ་ནི་སྣུམ་བ་ལ་དང་། བྲི་ཧ་སྟི་ལ་སོགས་པ་རྩ་བ་ཆུང་ངུ་ལྔ་བསྐོལ་བའི་ཆུ་དང་
[238a.2]སྦྱར་རོ། །བད་ཀན་ལས་གྱུར་བའི་སྐྲན་ལ་ནི་ཐོག་མར་སློན་བྱ་སྟེ། གལ་ཏེ་སློན་མི་ཐིག་སྟེ་ཉམ་ཆུང་བ་ལ་ནི་སྨྱུང་བ་བྱའོ། །སློན་དང་སྨྱུང་བ་བྱས་བའི་འོག་ཏུ་མེ་དྲོད་སྐྱེད་པར་བྱེད་པའི་ཕྱིར་སྨན་ཁ་བ་དང་། དྲོ་བ་དང་། ཚ་བ་དང་། སྦྱར་བའི་ཐུག་པ་ལ་སོགས་པའི་ཟས་དང་། ཤིང་ཀུན་ལ་
[238a.3]སོགས་པའི་ཕྱེ་མ་ནས་ཚིག་འཁུས་པའི་ཐལ་བ་དང་། ཤིང་ཀུན་དང་། སྟར་བུ་དང་། འདི་གསུམ་སྨན་གཅིག་གི་ཉིས་འགྱུར་དུ་བྱས་པ་གཏང་ངོ་། བད་ཀན་ལས་གྱུར་བའི་སྐྲན་ནད་ཕྱིར་འབུར་བའམ། ཡང་ན་མི་མངོན་པར་འདུག་ཅིང་། ཚོར་བ་མེད་ལ་སྲ་ཞིང་བརྟན་པ་དང་།
[238a.4]ལྟོ་སྦོ་བ་ལ་སོགས་པའི་ནད་དང་བཅས་པ་ལ་ནི། དུགས་བྱ་སྟེ་སྙི་བའི་ཆོ་ག་བྱའོ། །བད་ཀན་ལས་གྱུར་བའི་སྐྲན་ཅན་ལ་ནི་ཡ་བཀྵ་ར་དང་། སྨན་ཚ་བ་སྦྱར་བའི་བཏུང་བ་སྦྱིན་ནོ། །ཡང་ན་རྩ་བ་བཅུ་པ་བསྐོལ་བའི་ཁུ་བ་ཚ་བ་གསུམ་དང་། ནས་ཚིག་འཁུས་པའི་ཐལ་བ་དང་། རྒྱམ་
[238a.5]ཚ་དང་། ཤིང་ཀུན་དང་། རྩལ་རུ་ཚ་དང་། སེའུ་འབྲུ་དང་། དེ་རྣམས་མར་དང་ཚུལ་བཞིན་སྦྱར་བ་འཐུངས་ན། བད་ཀན་ལས་གྱུར་བའི་སྐྲན་ལས་མྱུར་དུ་རྒྱལ་བར་བྱེད་དོ། །གོ་བྱེ་སྲང་གཉིས་དང་། རྩ་བ་ཆུང་ངུ་ལྔ་སྲང་རེ་རེ་དང་། ཆུ་སྲང་བརྒྱ་ཉི་ཤུ་རྩ་བརྒྱད་དང་བསྐོལ་ཏེ་བཞི་ཆ་
[238a.6]ལུས་པ་དང་། དེ་དང་མཉམ་པའི་མར་དང་། མར་དང་མཉམ་པའི་འོ་མ་དང་། བྱི་དང་ག་དང་། ཤིང་ཀུན་དང་། རྒྱམ་ཚ་དང་། ནས་ཚིག་འཁུས་པའི་ཐལ་བ་དང་། ཟུར་པ་དང་། རྩལ་རུ་ཚ་དང་། ཧ་ཏི་པི་པི་ལིང་དང་། ར་སྣ་དང་། ཤིང་མངར་དང་། ཤུ་དག་དང་། པི་པི་ལིང་
[238a.7]དང་། དོང་གྲ་འདི་རྣམས་ཞོ་གཉིས་དང་ལྷན་ཅིག་ཡང་བཀོལ་བའི་སྨན་མར་འདི་ནི་གོ་བྱེའི་མར་ཞེས་བྱ་སྟེ། དེ་ལས་རན་པར་ཟོས་ན། བད་ཀན་ལས་གྱུར་བའི་སྐྲན་འཇོམས་པའི་མཆོག་ཡིན་ཏེ། དེ་བཞིན་དུ་མཆེར་བ་དང་། སྐྱ་རྦབ་ཀྱི་ནད་དང་། ཕོ་བའི་ནད་དང་། ལུད་ཕ་
[238b]
[238b.1]དང་། དབུགས་མི་བདེ་བ་སེལ་ཏོ། །མར་དེ་ཟོས་པའི་འོག་ཏུ་བད་ཀན་གྱི་སྐྲན་ཅན་གྱི་ལུས་ཐམས་ཅད་ལ་ནི་དུགས་བྱའོ། །སྐྲན་ཐམས་ཅད་ལ་ནི་སྣུམ་ཆོས་བྱས་ལ་དེའི་འོག་ཏུ་དུགས་བྱས་ནས། གསོ་བ་གང་བྱས་ཀྱང་ངེས་པར་འགྲུབ་སྟེ་དུགས་མ་བྱས་ན་གསོ་དཀའ་འོ། །
[238b.2]ཐོག་མར་བད་ཀན་གྱི་སྐྲན་ལ་སྣུམ་ཆོས་དང་དུགས་བྱས་ཏེ་སྙི་བར་གྱུར་པ་དང་། མདོའི་གནས་ནས་བྱུང་བའི་བུམ་པའི་ཆ་སྤྱད་ཀྱིས་སྐྲན་ནང་ནས་དྲང་བའི་དཔྱད་བྱ་སྟེ། སྐྲན་གང་དུ་ཡོད་པའི་སར་རས་ཀྱིས་དཀྲིས་ལ། སྐྲན་གྱི་ཚོད་ཤེས་པའི་སྨན་པས་མཚོན་རྣོན་པོས་
[238b.3]རས་ཀྱི་སྟེང་ནས་རྨ་དྲལ་ལ་ཟིན་པ་དང་། ལྷམ་མཁན་གྱི་ཤིང་གི་ཆ་སྤྱད་དམ། ལྕགས་ལས་བྱས་པའམ། རའི་རྨིག་པའམ། མེ་ལོང་གང་ཡང་རུང་བས་བཙིར་ལ་ནང་གི་དྲི་མ་ཕྱིར་ཕྱུང་བ་དང་དག་པར་ཕྱི་བར་བྱའོ། །སྐྲན་དེ་སྙིང་ངམ་རྒྱུ་མའི་ཕྱོགས་གང་ན་ཡོད་
[238b.4]པའི་སར་དྲལ་བའི་དུས་སུ་མཚོན་གྱིས་མ་ཕོག་པར་བསྲུང་བར་བྱའོ། །ཏིལ་དང་། ཡུངས་ཀར་དང་། ཟར་མའི་ས་བོན་འདི་རྣམས་བཏགས་པའི་ཕྱེ་མས་རྨ་བྱུག་པར་བྱའོ། །དེ་ནས་བད་ཀན་ལས་གྱུར་པའི་སྐྲན་གྱི་རྨ་དེ་ལྕགས་ཀྱི་སྣོད་དྲོ་བ་ཙམ་དང་བསྲེས་ཏེ་དུགས་
[238b.5]བྱའོ། །བྱ་བའི་རིམ་པ་དེ་དག་གིས་བད་ཀན་ལས་གྱུར་པའི་སྐྲན་ནད་སྙི་བར་གྱུར་པ་ལ་ནི་སྣུམ་བག་དང་ལྡན་པའི་ཁྲུས་དང་། རྩ་བ་བཅུ་པ་དང་སྦྱར་བའི་འཇམ་རྩི་སྦྱར་རོ། །པི་པི་ལིང་དང་། སྐྱུ་རུ་ར་དང་། རྒུན་འབྲུ་དང་། ཤ་མ་དུར་བྱིད་ལ་སོགས་པའི་སྡེ་ཚན་དང་།
[238b.6]འདི་རྣམས་སྲང་རེ་རེ་དང་། ཨེ་རཎྜའི་མར་དང་། རྩི་མར་བྲེ་རེ་རེ་དང་། འབྲུ་མར་གྱི་དྲུག་འགྱུར་གྱི་འོ་མ་དང་ལྷན་ཅིག་བསྐོལ་ལ་མར་ལུས་པ་འདི་ནི། འདྲེས་པའི་སྨན་མར་ཞེས་བྱ་སྟེ། དེས་བཀྲུ་སྨན་དུ་བླུད་ན་སྐྲན་སེལ་བའི་མཆོག་གོ། །དེ་བཞིན་དུ་ཤ་རྒྱས་པ་དང་།
[238b.7]ཁོང་འབྲས་དང་། ཟུག་གཟེར་དང་། རླུང་ནད་རྣམས་ལ་བདུད་རྩི་དང་འདྲའོ། །ཡང་ན་ནི་ལི་ནིའི་སྨན་མར་གོང་དུ་བསྟན་པ་དེ་ལས་སྲང་གཉིས་གཉིས་ཙམ་བཏུང་བའམ། དེ་བཞིན་དུ་ཁོང་འབྲས་ཀྱི་སྐབས་སུ་བཤད་པའི་སུ་ཀུ་མར་ཞེས་བྱ་བའི་སྨན་མར་དང་།
[239a]
[239a.1]དམུ་རྫིང་གི་སྐབས་སུ་བཤད་པའི་སྨན་མར་གང་ཡང་རུང་བ་བཏུང་བར་བྱའོ། །ཡང་ན་དན་ཏི་དང་ཙི་ཏྲ་ཀ་དང་། ཨ་རུ་ར་དང་། འདི་རྣམས་སྲང་ཉི་ཤུ་རྩ་ལྔ་དང་ཆུ་སྲང་ལྔ་བརྒྱ་རྩ་བཅུ་གཉིས་དང་བསྐོལ་ཏེ། བརྒྱད་ཆ་སྲང་དྲུག་ཅུ་རྩ་བཞི་ལུས་པ་དང་། ཨ་རུ་
[239a.2]ར་མ་གཏོགས་པའི་ཚིགས་མ་བོར་ཏེ། ཁུ་བ་ཨ་རུ་ར་དང་བཅས་པའི་ནང་དུ་བུ་རམ་སྲང་ཉི་ཤུ་རྩ་ལྔ་དང་། ཏིལ་དང་དུར་བྱིད་ཀྱི་ཕྱེ་མ་སྲང་བཞི་བཞི་དང་། པི་པི་ལིང་དང་། བཅའ་སྒའི་ཕྱེ་མ་ཞོ་གཉིས་གཉིས་དང་། འདི་རྣམས་ལྷན་ཅིག་ཏུ་མེ་མི་ཆེ་བ་དང་བསྐོལ་ཏེ། བཅུར་
[239a.3]འདོད་པ་ཙམ་གྱི་ལྡེ་གུར་གྱུར་པ་དང་ཕྱིར་ཕྱུང་ལ་བསྒྲངས་པའི་ནང་དུ་སྦྲང་རྩི་སྲང་བཞི་དང་། དྲི་སྣ་བཞིའི་ཕྱེ་མ་སྲང་རེ་རེ་བཏགས་པ་ལས། ཨ་རུ་རའི་འབྲུ་རེ་རེ་དང་བཅས་པའི་ལྡེ་གུ་སྲང་རེ་ཟོས་ན་ཁོང་སྣུམ་ཞིང་། ནད་མེད་ལ་བདེ་བར་བྲེ་རེ་རེ་ཙམ་འཁྲུ་སྟེ། དེ་ཡང་སྐྲན་དང་། སྙིང་
[239a.4]ནད་དང་། གཞང་འབྲུམ་དང་། སྐྲངས་པ་དང་། ལྟོ་སྦོས་པ་དང་། བཅོས་པའི་དུག་དང་། མཛེ་དང་། དམུ་རྫིང་དང་། ཨུད་ཀླེ་ཤའི་ནད་དང་། ཡི་ག་འཆུས་པ་དང་། མཆེར་པ་ན་བ་དང་། ཕོ་བ་ན་བ་དང་། རིམས་མི་བཟད་པ་དང་། སྐྱ་རྦབ་དང་། མིག་སེར་རྣམས་འཇོམས་པར་བྱེད་
[239a.5]དེ། འདི་ནི་དན་ཏི་དང་། ཙི་ཏྲ་ཀ་དང་། ཨ་རུ་རའི་ལྡེ་གུ་ཞེས་བྱའོ། །ཡང་ན་པུ་དཤྐ་རིའི་ཆུ་འོ་མའི་ནང་དུ་དུར་བྱིད་ཀྱི་ཕྱེ་མ་བཅུག་ལ་བྲན་ཏེ། མར་དང་སྦྲང་རྩི་ཞོ་གཉིས་དང་། ལྡེ་གུར་བྱས་པ་བྱིན་ལ་བཀྲུ་སྨན་འཇམ་པོ་བྱའོ། །རུ་རྟ་དང་། དུར་བྱིད་དང་། དན་ད་དང་། ཨ་རུ་ར་
[239a.6]དང་། ཡ་བཀྵ་ར་དང་། གུ་གུལ་དང་། འདི་རྣམས་ཀྱི་ཕྱེ་མ་བ་གཅིན་དང་ལྷན་ཅིག་གམ་ཡང་ན་གུ་གུལ་ཉི་ཚེ་བ་གཅིན་དང་བཏུང་ངོ་། །ཡང་ན་ཆོ་ག་གྲུབ་པའི་ནང་ནས་བཤད་པའི་བཀྲུ་སྨན་དྲག་པོ་དང་། བད་ཀན་ལས་གྱུར་པའི་སྐྲན་ལ་སྦྱར་རོ། །བད་ཀན་ལས་གྱུར་པའི་སྐྲན་
[239a.7]རྩ་བ་ཟུག་པ་དང་། རྒྱ་ཆེ་བ་དང་། སྲ་བ་དང་། ཚོར་བ་མེད་པ་དང་། སྦོ་བ་དང་། ཕྱིར་སྦོ་བ་འདི་རྣམས་ཀྱི་ཐལ་སྨན་གྱི་ཨ་རི་རྟ་དང་། མེ་ལས་བྱའོ། །བད་ཀན་ལས་གྱུར་པའི་སྐྲན་ནད་ལ་ནི་གཞང་འབྲུམ་དང་། རྡེའུ་དང་། ཕོ་བ་གསོ་བའི་ནང་དུ་བཤད་པའི་ཐལ་སྨན་རྣམས་
[239b]
[239b.1]སྦྱར་ཏེ། ཞག་གཅིག་གམ་གཉིས་གསུམ་གྱི་བར་དུ་ངལ་གསོ་ཞིང་སྦྱར་རོ། །སྨན་པས་ལུས་ཀྱི་སྟོབས་དང་ནད་ཟད་པར་བྱ་བའི་རིམ་པ་ལ་འབད་དོ། །ཡང་ན་ཐང་ཤིང་དང་། ཤམ་དུར་བྱིད་དང་། དན་ད་དང་། པུ་ཙེ་ཤེལ་དང་། ཚ་བ་རྣམ་ལྔ་དང་། སྭ་ཙི་ཀའི་ཐལ་བ་དང་།
[239b.2]ནས་ཚིག་འཁུས་བའི་ཐལ་བ་དང་། འབྲས་བུ་གསུམ་དང་། པ་ཐ་དང་། ཟི་ར་ནག་པོ་དང་། རུ་རྟ་དང་། སརྞ་སུ་གན་དྷ་དང་། འདི་རྣམས་སྲང་ཕྱེད་ཕྱེད་དང་། ལན་ཚྭ་རྣམ་ལྔ་སྲང་རེ་རེ་དང་། ཞིབ་ཏུ་བཏགས་པའི་ཕྱེ་མ་ཏིལ་མར་དང་ཞག་དང་། ཞོ་དང་མར་དང་དེ་དག་
[239b.3]ལེགས་པར་སྦྲུས་ལ་རྫ་མ་ཁ་སྦྱར་གྱི་ནང་དུ་བསྲེགས་ལ་དུད་པ་མ་ཤོར་བར་བྱ་སྟེ། རྫ་མ་དམར་པོར་གྱུར་པ་དང་། ཕྱུང་ལ་དེའི་ཐལ་བ་འོ་མ་དང་མར་དང་། དར་བ་དང་ཆང་ལ་སོགས་པ་གང་ཡང་རུང་བ་དང་སྦྱར་ཏེ། རན་པར་འཐུངས་ན་སྐྲན་དང་། རླུང་ལས་གྱུར་
[239b.4]པའི་རྟུག་པ་འགགས་པ་དང་། རླིག་རླུགས་དང་། གཞང་འབྲུམ་དང་། དམུ་རྫིང་དང་། ཕོ་བའི་ནད་དང་། སྲིན་བུ་དང་། བརྗེད་བྱེད་ཀྱི་གདོན་དང་། སྨྱོ་བྱེད་དང་མངལ་ནད་དང་། ཁུ་ཆུ་ལས་གྱུར་པའི་རྡེའུའི་ནད་དང་། དེ་བཞིན་དུ་བྱི་བ་དང་། སྦྲུལ་ལ་སོགས་པའི་
[239b.5]དུག་དང་། དེ་རྣམས་ཐལ་སྨན་འདིས་ཞི་བར་བྱེད་དོ། །བད་ཀན་ནི་མངར་བ་དང་། སྣུམ་པའི་བདག་ཉིད་ཡིན་པས་དེ་ལ་ནི་ཤ་ཁུ་དང་། མར་དང་འོ་མར་བཅས་པའི་ཐལ་སྨན་རྣོན་པོ་བཏང་ན། བད་ཀན་ལས་གྱུར་པའི་སྐྲན་ཁོང་པར་དུམ་བུ་དུམ་བུར་བཅད་ནས་འབྱུང་བར་
[239b.6]བྱེད་དོ། །ཆང་དང་སྣུམ་ཡུན་རིང་དུ་བསྟེན་པས་མེའི་དྲོད་ཆུང་ཞིང་ཡི་ག་འཆུས་པ་ལ་ནི་ཨ་ས་བ་དང་། ཨ་རི་སྟའི་ཆང་ལེགས་པར་སྨིན་པར་སྦྱར་ཏེ་རྒྱུན་སྲང་གི་ལམ་དག་པར་བྱའོ། །འབྲས་དམར་པོ་ལ་སོགས་པའི་འབྲས་དང་། འབྲས་དྲུག་ཅུ་རྙིང་པ་དང་།
[239b.7]རྒྱ་སྲན་དང་། སྲོག་ཆགས་ཐང་ལས་སྐྱེས་པའི་ཤ་དང་། པུ་ཏི་ཀ་རཉྫ་དང་། ཙི་ཏྲ་ཀ་དང་། ཨ་ག་ནི་མན་ཐ་དང་། ལ་ལ་ཕུད་དང་། པརྞ་དང་། འདི་རྣམས་ཀྱི་མྱུ་གུ་དང་། ཤི་ཀྲུ་དང་། བིལ་བ་གཞོན་ནུ་དང་། ལ་ཕུག་སྐམ་པོ་གཞོན་ནུ་དང་། ཁ་ལུང་དང་།
[240a]
[240a.1]ཤིང་ཀུན་དང་། སྟར་བུ་དང་། ནས་ཚིག་འཁུས་པའི་ཐལ་བ་དང་། སེའུ་འབྲུ་དང་། ཚ་བ་གསུམ་དང་། དར་བ་དང་། མར་དང་། ཏིལ་མར་དང་། འདི་རྣམས་དང་ཅི་ལྟར་འཚམ་པ་བཞིན་དུ་ཁ་ཟས་སྦྱར་རོ། །བཏུང་བར་ནི་ཆང་གི་དངས་མ་དང་།
[240a.2]འབྲས་ཀྱི་རང་སྐྱུར་དང་། ཞོག་ཆུ་དང་དར་བ་རྣམས་ལས་གང་ཡང་རུང་བའི་ནང་དུ་ལ་ལ་ཕུད་དང་ལན་ཚྭའི་ཕྱེ་མས་བཏབ་པའམ། ཡང་ན་རྩ་བ་ལྔ་པ་བསྐོལ་བའི་ཁུ་བ་འམ། ཡང་ན་རྒུན་ཆང་རྙིང་པ་བླུད་དོ། །ཡང་ན་པི་པི་ལིང་དང་། པི་པི་ལིང་གི་རྩ་བ་དང་། ཀྲུ་ཏྲུག་ཏྲེས་དང་།
[240a.3]གོ་སྙོད་དང་། ལྕེ་མྱང་ཚ་དང་། འདི་རྣམས་ཀྱི་ཕྱེ་མ་ཆང་ངམ་ཆང་གི་སྙིགས་མ་དང་བསྲེས་ཏེ་འཐུངས་ན་བད་ཀན་ལས་གྱུར་པའི་སྐྲན་མྱུར་དུ་སེལ་ཏོ། །གལ་ཏེ་སློན་དང་། སྨྱུང་བ་དང་། དུགས་དང་སྨན་མར་དང་། བཀྲུ་སྨན་དང་། འཇམ་རྩི་དང་། ཐལ་སྨན་དང་།
[240a.4]ཨ་ས་བ་དང་། ཨ་བཱི་སྟའི་ཆང་དང་། རི་ལུ་དང་ཕན་པའི་ཟས་རྣམས་བསྟེན་ཀྱང་མ་ཞི་སྟེ། བད་ཀན་གྱི་སྐྲན་གཏིང་ཟུག་པར་གྱུར་ན་དེ་ལ་ནི་ཁྲག་དབྱུང་ཞིང་ལྕགས་ལ་སོགས་པས་བསྲེག་པར་བྱའོ། །དེ་ནས་སྨན་པས་སྐྲན་གྱི་སྟེང་རས་ཀྱིས་དཀྲིས་ལ། རས་ཀྱི་
[240a.5]སྟེང་ནས་མི་དྲག་པས་མནན་ཏེ། སྐྲན་གྱི་ཐན་འཁོར་ཀུན་ཏུ་ལྡེ་གུ་འམ། ལྕགས་བསྲེགས་པའམ། གཙུབ་ཤིང་བསྲུབས་པའི་མདག་མ་འམ། ཏིན་ཏུ་ཀའི་མདག་མ་གང་ཡང་རུང་བས་བསྲེག་གོ། །ལྟེ་བ་དང་། ཆུ་སོ་དང་། རྒྱུ་མ་དང་། སྙིང་དང་། ལྟེ་བའི་འོག་
[240a.6]གི་སྤུ་འདི་རྣམས་སུ་མེས་སྲེག་པ་སྤང་ངོ་། །དེ་ནས་བསིལ་བ་དང་། བསྐ་བ་དང་། མངར་བའི་སྨན་གྱིས་མེའི་སྟོབས་ཞི་བར་བྱ་སྟེ། དེའི་འོག་ཏུ་རྨ་གསོ་བའི་ཆོ་ག་བྱའོ། །མ་ཞུ་བ་ལས་གྱུར་པའི་སྐྲན་ལ་ནི་ཐུག་པ་ལ་སོགས་པ་མེའི་དྲོད་སྐྱེད་པའི་ཆོ་ག་བྱ་སྟེ། ཁྱད་པར་དུ་
[240a.7]སྨྱུང་བ་བྱས་ན་ཕན་ནོ། །འདྲེས་པ་ལས་གྱུར་པའི་སྐྲན་ལ་ནི་དུས་ཤེས་པའི་སྨན་པས་རང་རང་གི་གསོ་བ་བཞིན་དུ་གསོའོ། །བུད་མེད་ཀྱི་ཁྲག་སྐྲན་ལ་ནི་བུ་བཙས་པའི་འོག་ཏུ་སྣུམ་ཆོས་དང་དུགས་བྱས་ལ་སྣུམ་ཆོས་དང་བཅས་པའི་བཀྲུ་སྨན་བྱའོ། །བཏུང་བར་ནི་
[240b]
[240b.1]ཏིལ་བསྐོལ་བའི་ཁུ་བའི་ནང་དུ་བུ་རམ་དང་མར་དང་ཚ་བ་གསུམ་དང་། ག་བྲའི་རྩ་བའི་ཕྱེ་མ་དང་ལྡན་པར་བྱས་པ་བྱིན་ཏེ། བུད་མེད་ཟླ་མཚན་ཉམས་པ་ལ་སྦྱར་རོ། །ག་བྲའི་རྩ་བ་དང་པི་པི་ལིང་དང་། ཀ་རཉྫའི་ཤུན་ལྤགས་དང་། པི་པི་ལིང་གི་རྩ་བ་དང་། ཐང་ཤིང་འདི་རྣམས་ཀྱི་ཕྱེ་མ་ཏིལ་བསྐོལ་
[240b.2]བའི་ཁུ་བའི་ནང་དུ་བཏབ་སྟེ་འཐུངས་ན། བུད་མེད་ཀྱི་ཁྲག་སྐྲན་སེལ་ཏོ། །ཡང་ན་ཤིང་པ་ལ་ཤ་བསྲེགས་པའི་ཐལ་བ་དང་ཆུ་དང་བསྲེས་པ་བཙགས་པའི་ཁུ་བ་སྲང་ཉིས་བརྒྱ་ལྔ་བཅུ་རྩ་དྲུག་དང་། ཏིལ་མར་དང་མར་སྲང་ཉི་ཤུ་རྩ་བརྒྱད་བརྒྱད་དང་བསྐོལ་ཏེ་མར་ལུས་
[240b.3]པ་དང་། དེ་ལས་རན་པར་འཐུངས་ན་སྐྲན་སྙི་ཞིང་ལྷོད་པར་འགྱུར་རོ། །དེས་ཀྱང་ལྷོད་པ་འམ་སྙི་བར་མ་གྱུར་ན། ཏིལ་ཆུ་ཐགས་སུ་བྱས་པ་འམ། ཡང་ན་ཤྲི་ཁཎྜ་གང་ཡང་རུང་བ་དང་ཐལ་སྨན་སྦྱར་ཏེ་མོ་མཚན་ནས་བཀྲུ་སྨན་གཏང་ངོ་། །ཡང་ན་ནས་ཚིག་འཁུས་
[240b.4]པའི་ཐལ་བ་དང་། ཤྲི་ཁཎྜ་གཉིས་ཉ་ཕྲུག་གི་ཤ་བརྡུངས་པའི་ནང་དུ་བརྔོས་ཏེ། མོ་མཚན་ནས་བཀྲུ་སྨན་གཏང་ངོ་། །ཡང་ན་ཕག་རྒོད་དང་། ཉའི་མཁྲིས་པ་རས་མ་ལ་ལེགས་པར་བསྒོས་ཏེ་བསྒྲིལ་ལ་མོ་མཚན་ནས་ཡར་གཞུག་གོ། །མངལ་དག་པར་བྱ་བའི་ཕྱིར་བུ་རམ་དང་
[240b.5]ཐལ་སྨན་དང་། ཕབས་སུ་སྦྱར་བ་གཏང་ངོ་། །ཁྲག་མཁྲིས་ལ་ཕན་པའི་ཨུཏྤ་ལའི་སྡོང་བུ་བསྲེགས་པའི་ཐལ་སྨན་སྦྲང་རྩི་དང་མར་དུ་སྦྱར་བའི་ལྡེ་གུ་སྦྱིན་ནོ། །བུད་མེད་ཁྲག་སྐྲན་ཅན་ལ་ནི་སྒོག་སྐྱ་དང་ཆང་ལེགས་པར་སྨིན་པ་དང་ཉ་ཤ་རྣམས་སྦྱར་རོ། །ཡང་ན་རྩ་བ་བཅུ་
[240b.6]པ་དང་འོ་མ་དང་ཐལ་སྨན་བ་གཅིན་དང་སྦྱར་བའི་འཇམ་རྩི་མས་གཏོང་ངོ་། །ཆོ་གའི་རིམ་པ་དེ་ལྟར་བྱས་ཀྱང་ཁྲག་སྐྲན་དེ་མ་བྱུང་ན་དྲལ་བའི་ཆོ་ག་བྱས་ན་ཕན་ནོ། །དེ་ནས་བུད་མེད་དེའི་ལུས་ལ་མར་དང་ཏིལ་མར་བསྲེས་པས་བསྐུ་བྱུག་བྱས་ལ་ཁྲག་ཤས་ཆེར་འབྱུང་ན་གཅད་
[240b.7]པར་བྱ་སྟེ། ཁ་ཟས་ནི་ཤ་ཁུ་དང་བཅས་པའི་འབྲས་ཆན་དང་དེ་བཞིན་དུ་བཏུང་བར་ཡང་ཆང་སར་པ་སྦྱིན་ནོ། །དེ་ལྟར་བྱས་ཀྱང་ཁྲག་མང་དུ་བྱུང་ན་ཁྲག་མཁྲིས་ཀྱི་གསོ་བ་ཇི་ལྟ་བ་བཞིན་དུ་བྱའོ། །རླུང་གི་ནད་བྱུང་བ་ན་ནི་རླུང་ནད་གསོ་བ་ཐམས་ཅད་བྱའོ། །ལྟོ་སྦོ་བ་ལ་
[241a]
[241a.1]སོགས་པ་དང་། རླུང་གིས་ཕྱི་ས་འགགས་པ་དང་། རླུང་ནད་མ་ཞུ་བ་ལས་བྱུང་བའི་ནད་གང་ཡང་རུང་བ་བྱུང་ན། སོ་སོའི་གསོ་བ་ཐམས་ཅད་བྱའོ། །སྐྲན་གསོ་བའི་ལེའུ་བཅུ་བཞི་པ་རྫོགས་སོ།། །།དེ་ནས་དམུ་རྫིང་གསོ་བའི་ལེའུ་
[241a.2]བཤད་པར་བྱ་སྟེ། དམུ་རྫིང་ནི་ཉེས་པ་ཤས་ཆེར་བསྩགས་ཏེ། རྒྱུ་སྲང་རྣམས་འགགས་པ་ལས་འབྱུང་བ་ཡིན་ཏེ། དེ་བས་ན་དེ་ལ་ནི་ཡང་དང་ཡང་དུ་བཀྲུ་སྨན་གཏང་བར་བྱའོ། །དམུ་རྫིང་ཅན་གྱི་ནད་པ་ལ་བཏུང་བར་ནི་ཉིན་མཚན་དུ་ཨེ་རཎྜའི་མར་བ་གཅིན་ནམ་འོ་མ་དང་ལྷན་ཅིག་
[241a.3]བཏུང་བ་འམ་ཡང་ན་བ་གཅིན་ནམ་མ་ཧེའི་གཅིན་ཉི་ཚེ་ཟླ་བ་གཅིག་གམ་གཉིས་ཀྱི་བར་དུ་སྦྱིན་ནོ། །ལུས་ཉམས་འཕེལ་ཞིང་རྒྱས་པར་བྱ་བའི་ཕྱིར། བ་དང་རྔ་མོའི་འོ་མ་ཉི་ཚེ་ཟླ་བ་གཅིག་གམ་གཉིས་ཀྱི་བར་དུ་བླུད་དོ། །ཁྱད་པར་དུ་ལུས་ཚ་བ་དང་། ལྟོ་སྦོ་བས་ཉམ་ཐག་པ་
[241a.4]དང་། སྐོམ་དད་ཆེ་བ་དང་། བརྒྱལ་བ་ཟིལ་གྱིས་ནོན་པ་ལ་ཡང་རྔ་མོའི་འོ་མ་སྦྱར་རོ། །རྩུབ་ཅིང་རླུང་ཤས་ཆེར་གཡོ་བ་ལས་གྱུར་པའི་དམུ་རྫིང་གི་ནད་དག་པར་འདོད་ན་ནི། སྨན་མར་དམུ་རྫིང་འཇོམས་པ་གང་ཡང་རུང་བས་སྣུམ་ཆོས་སྦྱར་བར་བྱའོ། །སྨན་མར་སྲང་
[241a.5]དྲུག་པ་ཞེས་བྱ་བ་རྩ་བ་བཅུ་པ་བསྐོལ་བའི་ཆུ་དང་ཞོ་ག་ཆུ་སྲང་བརྒྱ་ཉི་ཤུ་རྩ་བརྒྱད་བརྒྱད་དང་བསྐོལ་བ་བླུད་དོ། །ཡང་ན་དོང་གྲ་སྲང་གསུམ་དང་མར་དང་ཏིལ་མར་སྲང་བཅུ་དྲུག་དང་། དེ་བཞིན་དུ་ཞོ་ག་ཆུ་སྲང་བརྒྱ་ཉི་ཤུ་རྩ་བརྒྱད་དང་བསྐོལ་ཏེ་མར་ལུས་པ་དང་དེ་ལས་རན་
[241a.6]པར་འཐུངས་ན་དམུ་རྫིང་གི་ནད་ཐམས་ཅད་འཇོམས་ཏེ། ཁྱད་པར་དུ་ཡང་བད་ཀན་དང་རླུང་ལས་གྱུར་པའི་དམུ་རྫིང་འཇོམས་པའི་མཆོག་ཡིན་ནོ། །མར་སྲང་སུམ་ཅུ་རྩ་གཉིས་དང་། མར་དེའི་བཞི་འགྱུར་གྱི་ཆུ་དང་ཆུའི་ཉིས་འགྱུར་གྱི་བ་གཅིན་དང་། ཙི་ཏྲ་ཀ་སྲང་
[241a.7]གཅིག་གི་ཕྱེ་མ་བསྐོལ་ཏེ་མར་ལུས་པ་དང་། ཐལ་སྨན་དང་ལྷན་ཅིག་དམུ་རྫིང་ཅན་གྱི་ནད་པ་ལ་བླུད་པར་བྱའོ། །ཡང་ན་ནི་ནས་དང་། རྒྱ་ཤུག་དང་། རྒྱ་སྲན་དང་། རྩ་བ་བཅུ་པ་ཚུལ་བཞིན་བསྐོལ་བའི་ཁུ་བའི་ནང་དུ་ཆང་དང་། རང་སྐྱུར་དང་། མར་དང་བསྲེས་
[241b]
[241b.1]ཏེ་ཡང་བསྐོལ་ཏེ་མར་ལུས་པ་བླུད་དོ། །མར་དེ་རྣམས་ཀྱི་སྦྱོར་བ་དེ་དག་གིས་ཁོང་སྣུམ་ཞིང་ལུས་ཀྱི་ཉམས་སྟོབས་སྐྱེད་ལ། རླུང་ཞི་ཞིང་ནད་རང་གི་གནས་ལས་བསྐྱོད་པ་དང་། ཆོ་ག་གྲུབ་པ་ལས་འབྱུང་བའི་བཀྲུ་སྨན་བྱའོ། །པ་ཏོ་ལའི་རྩ་བ་དང་། འབྲས་བུ་གསུམ་དང་།
[241b.2]སྐྱེར་པ་དང་བྱི་དང་ག་དང་། འདི་རྣམས་ཞོ་གཉིས་གཉིས་དང་། ཀ་པི་ལྱ་ཞོ་བཞི་བཞི་དང་། ནི་ལི་ནི་ཞོ་དྲུག་དང་། ཏྲི་བི་ཙ་ཞོ་བརྒྱད་དང་། འདི་རྣམས་བཏགས་པའི་ཕྱེ་མ་གཅིན་དང་སྦྱར་བའི་བཀྲུ་སྨན་བླུད་དོ། །དེས་ལེགས་པར་འཁྲུས་པ་དང་། ཐུག་པ་དང་། སྲོག་ཆགས་
[241b.3]ཐང་ལ་གནས་པའི་ཤ་ཁུ་སྦྱིན་ནོ། །དེ་ནས་ཞག་དྲུག་གི་བར་དུ་འོ་མ་ཚ་བ་གསུམ་དང་ཚུལ་བཞིན་བསྐོལ་བ་བླུད་དོ། །ཕྱེ་མའི་སྦྱོར་བ་དེ་དག་ཡང་དང་ཡང་དུ་བྱས་ན་དམུ་རྫིང་ཐམས་ཅད་འཇོམས་སོ། །ཡང་ན་བི་ཤ་ལ་དང་། ཤང་གི་ནི་དང་། དན་ཏི་དང་། སེང་ཕྲོམ་གྱི་ཤུན་
[241b.4]ལྤགས་དང་། ཤུ་དག་དང་འདི་རྣམས་བཏགས་པའི་ཕྱེ་མ་ཀར་ཀ་ན་དུ་དང་། རྒུན་འབྲུམ་དང་། རྒྱ་ཤུག་དང་། འདི་རྣམས་ཀྱི་ཁུ་བ་བ་གཅིན་དང་སྦྲང་ཆང་གང་ཡང་རུང་བ་དང་ལྷན་ཅིག་བཀྲུ་སྨན་གྱི་དོན་དུ་གཏང་ངོ་། །ལ་ལ་ཕུད་དང་། སྤ་མའི་འབྲས་བུ་དང་། འུ་སུ་དང་།
[241b.5]ཤ་ཏ་པུཥྤ་དང་། ཟི་ར་ནག་པོ་དང་། ཀ་ར་བཱི་ར་དང་། པི་པི་ལིང་གི་རྩ་བ་དང་། ཨ་ཛ་གནྡྷ་དང་། ཟུར་པ་དང་། ཤུ་དག་དང་། ཟི་ར་དང་ཚ་བ་གསུམ་དང་། ཁྲོན་བུ་དང་། འབྲས་བུ་གསུམ་དང་། ཐལ་བ་རྣམ་གཉིས་དང་། མ་ནུ་དང་། རུ་རྟ་དང་། ལན་ཚྭ་རྣམ་ལྔ་དང་། ཕྱི་
[241b.6]དང་ག་དང་། འདི་རྣམས་ཆ་སྙོམས་པ་དང་། དན་ཏི་ཆ་གསུམ་དང་། དྲི་བིད་ཏ་དང་། བི་ཤ་ལ་ཆ་གཉིས་དང་། ས་ཏ་ལ་ཆ་བཞི་དང་། འདི་རྣམས་བཏགས་པའི་ཕྱེ་མ་ནི་སྲེད་མེད་ཀྱི་བུའི་ཕྱེ་མ་ཞེས་བྱ་སྟེ། འདི་བསྟེན་ན་ཁྱབ་འཇུག་གིས་ལྷ་མ་ཡིན་བཅོམ་པ་བཞིན་དུ་ནད་ཀྱི་ཚོགས་
[241b.7]དུ་མས་བཏབ་པའི་ནད་མི་འཕེལ་ཞིང་སེལ་བར་བྱེད་དོ། །དམུ་ཆུ་ལ་ནི་དར་བ་ལས་གཏང་ངོ་། །རླུང་གིས་ལྟོ་སྦོ་བ་ལ་ནི་ཆང་ལས་གཏང་ངོ་། །རླུང་ནད་ལ་ནི་ཆང་བཀྲུས་པ་ལས་གཏང་ངོ་། །ཕྱིས་འགགས་པ་ལ་ནི་ཞོ་ག་ཆུ་ལས་གཏང་ངོ་། །གཞང་འབྲུམ་ལ་ནི་སེའུ་འབྲུའི་
[242a]
[242a.1]ཁུ་བ་ལས་གཏང་ངོ་། །མཁྲེགས་པ་ལ་ནི་ད་ཏྲིག་གི་ཁུ་བ་ལས་གཏང་ངོ་། །མ་ཞུ་བ་ལ་ནི་ཆུ་དྲོན་པོ་ལས་བཏང་སྟེ། འདིས་མཚན་བར་རྡོལ་བ་དང་། སྐྱ་རྦབ་ཀྱི་ནད་དང་། ལུད་པ་དང་། དབུགས་མི་བདེ་བ་དང་། སྐེ་འགགས་པ་དང་། སྙིང་ནད་
[242a.2]དང་། ཕོ་བའི་ནད་དང་། མཛེ་དང་། ཕོ་བ་དྲོད་ཆུང་བ་དང་། རིམས་དང་། མཆེ་བའི་དུག་དང་། རྩ་བའི་དུག་དང་། དུག་སྦྱར་མ་རྣམས་ལ་ཕན་ནོ། །རང་གི་ཉམས་སྟོབས་དང་སྦྱར་ཏེ། སྔར་སྣུམ་བག་གིས་བརྟས་ལ་དེ་ནས་བཀྲུ་སྨན་གཏང་བར་བྱའོ། །སྤ་མའི་
[242a.3]འབྲས་བུ་དང་། ཁྲོན་བུ་དང་། འབྲས་བུ་གསུམ་དང་། པུ་ཙེ་ཤེལ་དང་། ནི་ལི་ནི་དང་། ཀྱི་ལྕེ་བ་དང་། ཏ་ལ་དུར་བྱིད་དང་། ཤུ་དག་དང་། རྒྱམ་ཚ་དང་། ཁ་རུ་ཚ་དང་། པི་པི་ལིང་རྣམས་ཕྱེ་མར་བྱས་ཏེ། སེའུ་འབྲུའི་ཁུ་བ་འམ། འབྲས་བུ་གསུམ་གྱི་ཁུ་བ་འམ། ཤ་
[242a.4]ཁུ་འམ་བ་གཅིན་ནམ། ཆུ་དྲོ་འཇམ་ཙམ་ལས་གཏང་བ་འདི་ནི་སྐྲན་ཐམས་ཅད་དང་། མཆེར་པ་ན་བ་དང་། དམུ་རྫིང་ཐམས་ཅད་དང་། ཤ་བཀྲ་དང་། མཛེ་དང་། ལྷོག་པ་དང་། ཕོ་བའི་དྲོད་མ་སྙོམས་པ་དང་། ལུད་པ་དང་། གཞང་འབྲུམ་དང་། སྐྱ་རྦབ་ཀྱི་ནད་དང་།
[242a.5]མིག་སེར་དང་། ལྗང་ཁུ་ཁ་དང་། རླུང་དང་མཁྲིས་པ་དང་། བད་ཀན་རྣམས་ལ་ཕན་ཏེ། བཀྲུ་སྨན་འདི་རྣམས་ཀྱིས་མྱུར་དུ་སོས་པར་བྱེད་དེ། འདི་ནི་སྤ་མ་ལ་སོགས་པའི་ཕྱེ་མ་ཞེས་བྱའོ། །ནི་ལི་ནི་དང་། ལྕང་མ་དང་། ཚ་བ་གསུམ་དང་། ནས་ཚིག་འཁུས་པའི་ཐལ་བ་དང་།
[242a.6]ལན་ཚྭ་རྣམ་ལྔ་དང་། ཀྲུ་ཏྲུག་ཏྲེས་དང་། འདི་རྣམས་ཀྱི་ཕྱེ་མ་མར་དང་སྦྱར་ཏེ་འཐུངས་ན། དམུ་རྫིང་དང་སྐྲན་སེལ་ཏོ། །དེ་ལྟར་ཡང་དང་ཡང་དུ་བཀྲུ་སྨན་བཏང་བའི་བར་དུ་ཉམས་སྟོབས་བསྐྱེད་པར་བྱ་བའི་ཕྱིར། གོང་མ་ལྟར་རྔ་མོ་འམ། བ་འམ། རའི་འོ་མ་གཏང་ངོ་། །དམུ་
[242a.7]རྫིང་གི་ནད་ཚབས་ཆེ་བ་ལ་ནི་སྣུམ་དང་བཅས་པའི་བཀྲུ་སྨན་མྱུར་དུ་བཏང་སྟེ། ཉམ་ཆུང་བ་ལ་ནི་མི་བསྡད་དོ། །མར་སྲང་བརྒྱ་ཉི་ཤུ་རྩ་བརྒྱད་ཀྱི་ནང་དུ་ཨ་རུ་ར་སྲང་སུམ་ཅུ་རྩ་གཉིས་བཏགས་པ་དང་ལྷན་ཅིག་མེ་ལ་བཞུས་པ་དང་། ཁ་གཟར་གྱིས་དཀྲུག་ཅིང་ནས་ཀྱི་སྦུན་
[242b]
[242b.1]པའི་ནང་དུ་ཟླ་བ་གཅིག་བཞག་ལ། དེ་ནས་ཕྱུང་ལ་ཡང་བཞུས་ཏེ་ཡང་ཨ་རུ་ར་བསྐོལ་བའི་ཆུ་དང་། ཞོ་སྐྱུར་བོ་དང་ལྡན་པར་བསྐོལ་ཏེ། དེ་ལས་རན་པར་འཐུངས་ན་དམུ་རྫིང་དང་། སྦྱར་བའི་དུག་དང་། གཏུན་ལྟ་བུའི་ནད་དང་། ལྟོ་སྦོ་བ་དང་། སྐྲན་དང་། ཁོང་འབྲས་དང་།
[242b.2]དེ་བཞིན་དུ་མཛེ་དང་སྨྱོ་བྱེད་དང་། བརྗེད་བྱེད་རྣམས་འཇོམས་པར་བྱེད་དོ། །ཡང་ན་བའི་འོ་མ་དང་། ཤྲི་ཁཎྜ་དང་བཅས་པར་བསྐོལ་ཏེ་བསྒྲངས་ལ། ཁ་གཟར་གྱིས་དཀྲུགས་ཏེ། དེ་ལས་བྱུང་བའི་མར་དང་ཤྲི་ཁཎྜ་ཡང་བསྐོལ་བའི་ཁུ་བ་དང་བཅས་པར་འཐུངས་ན་ཕན་ཡོན་གོང་
[242b.3]མ་དང་འདྲའོ། །ཡང་ན་འོ་མ་སྲང་ལྔ་བརྒྱ་རྩ་བཅུ་གཉིས་དང་། ཤྲཱི་ཁཎྜའི་འོ་མ་སྲང་བཅུ་དྲུག་དང་ལྷན་ཅིག་མནན་ཏེ། ཞོར་སྨིན་པ་དང་བསྲུབས་པའི་མར་དང་། ཏྲི་བི་ཙ་བཅུག་པ་ལ་ཡང་བསྐོལ་ཏེ་འཐུངས་ན་ཕན་ཡོན་གོང་མ་དང་འདྲའོ། །དེ་བཞིན་དུ་མར་བྲེ་གང་དང་། མར་
[242b.4]གྱི་བརྒྱད་འགྱུར་གྱི་འོ་མ་དང་། སུ་དྷ་ཀྵི་ར་སྲང་གཅིག་དང་། དུར་བྱིད་སྲང་དྲུག་དང་། གོང་གི་ཕྱེ་མ་དང་འདི་རྣམས་དང་ལྷན་ཅིག་བསྐོལ་ཏེ། མར་ཉི་ཚེ་ལུས་པ་བླུད་དོ། །དེའི་འོག་ཏུ་ཐུག་པ་དང་། ཁུ་བཅུད་མངར་པོ་དང་འོ་མ་བཏུང་ངོ་། །མར་ཁོད་པར་ཞུ་སྟེ་འཁྲུས་པ་དང་།
[242b.5]བཅའ་སྒ་བསྐོལ་བའི་ཁུ་བ་དྲོན་པོ་བླུད་དོ། །དེ་ནས་ཐུག་པ་དང་། རྒྱ་སྲན་གྱི་ཡུ་ཤ་ཡང་རིམ་པས་བླུད་དོ། །དེ་ལྟར་ཁོང་པ་རྩུབ་པར་གྱུར་པ་དང་། ཞག་གསུམ་གྱི་བར་དུ་གོང་མའི་མར་དང་ལྷན་ཅིག་ཟས་སྦྱིན་ནོ། །གོང་མའི་རིམ་པ་དེ་ལྟར་ཡང་དང་ཡང་དུ་སྨན་མར་བཏུང་
[242b.6]ངོ་། །སྨན་མར་གྱི་སྦྱོར་བ་དེ་དག་སྨན་པ་མཁས་པས་ཚུལ་བཞིན་བྱས་ན། སྐྲན་རྣམས་དང་། སྦྱར་བའི་དུག་རྣམས་དང་། དམུ་རྫིང་རྣམས་ཞི་བར་བྱེད་དོ། །ཡང་ན་སྨན་པི་ལུ་བཏགས་པའི་ཕྱེ་མ་དང་། མར་བསྐོལ་བ་འཐུངས་ན། ལྟོ་སྦོ་ཞིང་ཟུག་པ་རྣམས་ལ་ཕན་ནོ། །
[242b.7]ཡང་ན་སེང་ཕྲོམ་གྱི་སྨན་མར་རམ། ནི་ལི་ནིའི་སྨན་མར་རམ། འདྲེས་པ་ཞེས་བྱ་བའི་སྨན་མར་གང་ཡང་རུང་བ་བླུད་དོ། །བཀྲུ་སྨན་དེ་དག་གིས་ནད་གཞི་དང་བྲལ་བ་དང་། ཐུག་པ་ལ་སོགས་པའི་འབྲས་ཆན་ལ་སོགས་པ་ཡང་བ་རན་པར་ཁ་ཟས་ཀྱི་ཚོད་ཟིན་པར་བྱའོ། །ཉེས་
[243a]
[243a.1]བའི་ལྷག་མ་ཅུང་ཞིག་ལུས་པ་ལྟ་ན། ཨ་རུ་ར་རྡོག་མ་སྟོང་པ་གཅིན་དང་ལྷན་ཅིག་བཟའ་སྟེ། བཏུང་བ་ནི་འོ་མ་སྦྱར་རོ། །ཡང་ན་པི་པི་ལིང་རྡོག་མ་སྟོང་ཤྲི་ཁཎྜའི་འོ་མའམ། ཆུ་དང་སྤངས་ཏེ་ཟོས་ལ་དེའི་འོག་ཏུ་འོ་མ་བཏུང་ངོ་། །ཡང་ན་པི་པི་ལིང་བསྐྱེད་
[243a.2]པའི་ཆོ་ག་བཅུད་ཀྱིས་ལེན་གྱི་སྐབས་སུ་བཤད་པ་ཟོས་ན་དེའི་འོག་ཏུ་འོ་མ་བཏུང་བའམ། ཡང་ན་བཅུད་ཀྱིས་ལེན་གྱི་སྐབས་སུ་བཤད་པའི་བྲག་ཞུན་ཟོས་ལ། དེའི་འོག་ཏུ་འོ་མ་བཏུང་བའམ། ཡང་ན་གུ་གུལ་བཅུད་ཀྱིས་ལེན་དུ་སྨོས་པ་ལྟར་ཟོས་ལ། འོ་མ་བཏུང་བའམ། ཡང་
[243a.3]ན་འོ་མ་དང་སྒེའུ་གཤེར་གྱི་ཁུ་བ་ཆ་སྙོམས་པ་འཐུངས་ན་ཕན་ནོ། །ཡང་ན་དམུ་རྫིང་གི་ནད་ལྷག་མ་ལུས་པ་ལ་ནི་ཙི་ཏྲ་ཀ་དང་། ཐང་ཤིང་བཏགས་པའི་ཕྱེ་མ་དང་འོ་མ་སྦྱར་བ་བཏུང་བའམ། དེ་བཞིན་དུ་བཟས་གཞན་མི་ཟ་བར་ཧ་ཏི་པི་པི་ལིང་དང་། བཅའ་སྒ་འོ་མ་དང་སྦྱར་བ་ཟླ་
[243a.4]བ་གཅིག་བཏུང་ངོ་། །ཡང་ན་བྱི་དང་ག་དང་། ཀྲུ་ཏྲུག་ཏྲེས་དང་། དན་ཏི་དང་། དབྱི་མོ་དང་། ཚ་བ་གསུམ་འདི་རྣམས་བཏགས་ཏེ་འོ་མ་དང་ལྷན་ཅིག་སྦྱར་བ་ཞོ་གཉིས་ཙམ་འཐུངས་ན་དམུ་རྫིང་ཚབས་ཆེ་བ་ལས་རྒྱལ་བར་བྱེད་དོ། །ཁ་ཟས་ནི་འོ་མའམ། སུ་དྷཱ་
[243a.5]ཀྵི་ར་འོ་མ་དང་མར་དང་བཅས་པ་ཟླ་བ་གཅིག་ཏུ་བཟའོ། །ཡང་ན་ཤྲི་ཁཎྜའི་འོ་མའི་ནང་དུ་པི་པི་ལིང་དང་། ཨ་རུ་ར་སྦངས་ལ་བཏགས་ཏེ་ཁུར་བའི་ནང་དུ་བཏབ་ལ་སྦྱིན་ནོ། །གལ་ཏེ་དམུ་རྫིང་ཅན་རླུང་ནད་ཀྱིས་རྩིབ་ལོགས་སུ་ཟུག་པ་དང་། རེངས་པ་དང་། རོ་སྟོད་
[243a.6]འཛིངས་པར་གྱུར་ན་དེ་ལ་ནི་བིལ་བའི་ཐལ་བ་དང་། ཏིལ་མར་སྦྱར་བ་བླུད་དོ། །ཡང་ན་ཏིན་དུ་ཀ་དང་། བ་ལ་དང་། བ་ལ་ཤ་དང་། ཏིལ་གྱི་སྡོང་བུ་དང་། ཆུ་ཤིང་དང་། ཨ་བ་མརྒ་དང་། ཨག་ནི་མན་ཐ་དང་། འདི་རྣམས་ཀྱི་ཐལ་བ་ཆུ་དང་སྦྱར་ལ་རས་ཀྱིས་བཙགས་ཏེ།
[243a.7]ཏིལ་མར་དང་ལྷན་ཅིག་བསྐོལ་ལ་བླུད་དོ། །རླུང་ལས་གྱུར་པའི་དམུ་རྫིང་བད་ཀན་དང་ལྷན་ཅིག་ལྡན་པའམ། མཁྲིས་པ་དང་ལྡན་པ་དང་། དེ་གཉི་ག་དང་ལྡན་ཞིང་རླུང་སྟོབས་ཆེ་བར་གྱུར་པ་དེ་ལ་ནི་ཨེ་རཎྜའི་མར་ནད་གཞི་སོ་སོ་དང་སྦྱར་བ་བཏང་ན་ཕན་ནོ། །ཡང་ན་ཐང་
[243b]
[243b.1]ཤིང་དང་། རྒྱ་སྐྱེགས་ཤིང་དང་། ཧ་ཏི་པི་པི་ལིང་དང་། ཤི་ཀྲུ་དང་། ཨ་ཤྭ་ཀརྞ་དང་འདི་རྣམས་བཏགས་པའི་ཕྱེ་མ་བ་གཅིན་དང་སྦྱར་བའི་ལྡེ་གུས་དམུ་རྫིང་གི་ཕྱི་རོལ་ནས་བསྐུའོ། །ཡང་ན་བྲིཤྩི་ཀ་ལི་དང་། ཤུ་དག་དང་། བཅའ་སྒ་དང་། རྩ་བ་ལྔ་པ་དང་། བ་སྤུ་བ་དང་།
[243b.2]འུ་སུ་དང་། རུ་རྟ་དང་། འདི་རྣམས་བསྐོལ་བའི་ཁུ་བའམ། ཡང་ན་བ་གཅིན་གང་ཡང་རུང་བས་ཕྱི་རོལ་ནས་དཀྲུགས་སོ། །དེ་ལྟར་ཁྲུས་ལ་སོགས་པ་བྱས་ནས་ནད་ཕྱུང་སྟེ། ལྟོ་བ་ཞུམ་པར་གྱུར་པ་དང་། ཡང་ལྟོ་བ་རླུང་གིས་མི་སྦོ་བའི་ཕྱིར་ས་ལ་དང་། བ་ལའི་སྡེ་ཚན་དུགས་
[243b.3]ཀྱི་སྐབས་སུ་བཤད་པ་བཞིན་དུ་དུགས་བྱས་ཏེ། རས་ཀྱིས་ལྟོ་བ་བཅིང་བར་བྱའོ། །དེ་ལྟར་ལེགས་པར་ཁྲུས་བྱས་ནས་ལྟོ་བ་ཡང་སྦོ་བ་ལྟ་ན་སྣུམ་དང་སྐྱུར་དང་ལན་ཚྭ་དང་བཅས་པའི་བཀྲུ་སྨན་དྲག་པོ་བྱའོ། །རླུང་བད་ཀན་དང་བཅས་པས་ལྟོ་སྦོ་བར་བྱེད་པ་ལ་ནི་སྨན་རྣོ་བ་དང་། ཐལ་
[243b.4]སྨན་དང་གཅིན་དང་བཅས་པས་འཇམ་རྩི་མས་གཏོང་བར་བྱའོ། །དེ་ལྟར་གོང་དུ་བསྟན་པའི་བྱ་བ་དེ་དག་ནི་དམུ་རྫིང་སྤྱིའི་ཆོ་གར་གྲགས་པ་ཡིན་ནོ། །རླུང་ལས་གྱུར་པའི་དམུ་རྫིང་ཅན་ཉམས་སྟོབས་དང་ལྡན་པ་ལ་ནི། སྨན་བྱིད་རིའི་སྡེ་ཚན་མར་དང་བསྐོལ་བ་བླུད་ལ་ཁོང་སྣུམ་པར་
[243b.5]གྱུར་པ་དང་། ཡན་ལག་ཐམས་ཅད་ལ་དུགས་བྱ་སྟེ། སེང་ཕྲོམ་གྱི་མར་རམ། འདྲེས་པའི་སྨན་མར་གྱིས་བསྐུ་སྨན་བྱའོ། །དེ་ལྟར་ཁྲུས་བྱས་པའི་འོག་ཏུ་ཉམས་སྟོབས་བསྐྱེད་པར་བྱ་བའི་ཕྱིར་ཐུག་པ་དང་འོ་མ་སྦྱིན་ནོ། །ཉམས་རྙེད་ནས་རིམ་གྱིས་འོ་མ་སྤང་བར་བྱ་སྟེ། ཡང་
[243b.6]ཁོང་པ་ལྟམ་མམ། སྔོ་བར་བྱེད་ན་ནི་གོང་དུ་སྨོས་པའི་བཀྲུ་སྨན་ཡང་བྱའོ། །དེ་ནས་མེ་དྲོད་ཆུང་ཞིང་རྟུག་པ་འགགས་པར་གྱུར་པ་ལ་ནི། ཤ་ཁུ་སྐྱུར་དང་ལན་ཚྭ་ཅུང་ཟད་དང་ལྡན་པས་ཡང་སྣུམ་ཆོས་བྱ་སྟེ། དེ་ནས་དུགས་བྱས་ལ་རྩ་བ་བཅུ་པ་དང་སྦྱར་བའི་འཇམ་རྩི་མས་
[243b.7]གཏོང་ངོ་། །དེ་ནས་སྨན་རྣོ་བ་དང་ལྷན་ཅིག་འཇམ་རྩི་མས་གཏོང་ངོ་། །རླུང་ལས་གྱུར་པའི་དམུ་རྫིང་ཁོང་རྩུབ་ཅིང་ཕྱི་ས་དང་འཕྱེན་འགགས་པ་དང་མེའི་དྲོད་ཆེ་བ་དང་། ཁོང་པ་འཁྲུག་ཅིང་གྱོ་ལ་རུས་པ་དང་ཚིགས་དང་རྩིབ་ལོགས་དང་རྒྱབ་དང་། མཇུག་ཏོ་རྣམས་སུ་ཟུག་ཅིང་ན་བ་ལ་ནི་ཏིལ་
[244a]
[244a.1]དང་། ཨེ་རཎྜའི་མར་དང་། རླུང་ནད་འཇོམས་པའི་སྨན་དང་། སྐྱུར་དང་ལྡན་པར་ལྷན་ཅིག་བསྐོལ་ཏེ། མར་ལུས་པ་དེས་ཧ་ནུ་བ་ས་མས་གཏོང་ངོ་། །ཉམས་སྟོབས་ཆུང་ཞིང་ཁྲུས་མི་ཐེག་པ་ལ་ནི་དམུ་རྫིང་ཞི་བར་བྱ་བའི་སྨན་འཇམ་རྩི་དང་འོ་མ་དང་
[244a.2]མར་དང་། ཤ་ཁུ་ལ་སོགས་པ་སྦྱར་རོ། །མཁྲིས་པ་ལས་གྱུར་པའི་དམུ་རྫིང་ཅན་གྱི་ནད་པ་ཉམས་སྟོབས་དང་ལྡན་པ་ལ་ནི་སྨན་མངར་བ་དང་སྦྱར་བས་སྣུམ་ཆོས་བྱ་སྟེ། ཤ་མ་དུར་བྱིད་དང་། འབྲས་བུ་གསུམ་དང་མར་ལྷན་ཅིག་བསྐོལ་ཏེ་ཁྲུས་བྱའོ། །དེ་ནས་ནྱ་གྲོ་དྷའི་
[244a.3]སྡེ་ཚན་ལས་བསྐོལ་བའི་ནང་དུ་ཁ་ར་དང་སྦྲང་རྩི་དང་མར་མང་དུ་བླུགས་ཏེ། བཀྲུ་སྨན་དྲག་པོ་བྱས་ན་ཕན་ནོ། །དེ་བཞིན་དུ་ནྱ་གྲོ་དྷའི་སྡེ་ཚན་བསྐོལ་བའི་འཇམ་རྩི་མས་གཏོང་ངོ་། །དམུ་རྫིང་ཅན་གྱི་ནད་པ་ཉམ་ཆུང་བ་ལ་ནི། དང་པོ་ཨ་ནུ་བ་ས་ན་གཏང་ངོ་། །དེ་ནས་འོ་མའི་
[244a.4]འཇམ་རྩིས་དག་པར་བྱའོ། །མེ་སྟོབས་སྐྱེས་པ་ལ་ནི་སྣུམ་ཆོས་བྱ་སྟེ། ཡང་དང་ཡང་དུ་བཀྲུ་སྨན་བྱའོ། །འོ་མ་འམ་དུར་བྱིད་སྦྱར་བ་འམ། ཨེ་རཎྜའི་མར་དང་སྦྱར་བའམ། ཡང་ས་ལ་འམ། ཀྱི་ལྕེ་བ་འོ་མ་དང་སྦྱར་བ་འམ། ཡང་ན་དོང་ག་འོ་མ་དང་སྦྱར་བས་
[244a.5]བཀྲུ་སྨན་བྱའོ། །མཁྲིས་པ་ལས་གྱུར་པའི་དམུ་རྫིང་བད་ཀན་དང་བཅས་པ་ལ་ནི་བ་གཅིན་དང་སྦྱར་བའི་འོ་མས་བཀྲུ་སྨན་བྱའོ། །མཁྲིས་པ་ལས་གྱུར་པའི་དམུ་རྫིང་རླུང་དང་བཅས་པ་ལ་ནི་ཏིག་ཏའི་སྨན་མར་འོ་མ་དང་བཅས་པས་ཡང་དང་ཡང་དུ་བཀྲུ་སྨན་བྱའོ། །འབྲས་
[244a.6]གང་ཡང་རུང་བའི་འོ་མ་དང་ལྷན་ཅིག་སྦྱིན་པའམ། ཡང་ན་བྱི་ད་རིའི་སྡེ་ཚན་འོ་མ་དང་བསྐོལ་བ་སྦྱིན་ནོ། །འོ་ཐུག་སྦྱར་བས་དམུ་རྫིང་གི་ཕྱི་རོལ་ནས་བསྐུའོ། །འཇམ་རྩི་དང་བཀྲུ་སྨན་དང་འོ་མ་བཏང་བ་དེ་དག་ཡང་དང་ཡང་དུ་རིམ་པ་དེ་ལྟ་བུ་འབད་པ་དང་བཅས་པས་མ་
[244a.7]ཡེངས་པར་བྱས་ན་ངེས་པར་མཁྲིས་པ་ལས་གྱུར་པའི་དམུ་རྫིང་ལས་རྒྱལ་བར་བྱེད་དོ། །བད་ཀན་ལས་གྱུར་པའི་དམུ་རྫིང་ལ་ནི་དུག་མོ་ཡུངས་ཀྱི་སྡེ་ཚན་ལ་མར་དང་བསྐོལ་བས་བཏུང་བ་ལ་སོགས་པས་སྣུམ་ཆོས་བྱས་ལ། དེའི་འོག་ཏུ་དུགས་བྱས་ནས་ཉམས་སྟོབས་དང་
[244b]
[244b.1]ལྡན་པ་ཞིག་ན་ཤྲི་ཁཎྜ་མར་དང་སྦྱར་བས་ཁྲུས་བྱའོ། །དེའི་འོག་ཏུ་མེའི་དྲོད་བསྐྱེད་པར་བྱ་བའི་ཕྱིར། བད་ཀན་འཇོམས་པའི་སྨན་ཚ་བ་དང་ཐལ་སྨན་དང་ལྡན་པའི་བཟའ་བ་ཐུག་པ་ལ་སོགས་པ་རིམ་གྱིས་སྦྱིན་ནོ། །ཡང་ན་མུ་ཀ་ཀའི་སྡེ་ཚན་དང་། ཚ་བ་གསུམ་དང་བ་
[244b.2]གཅིན་དང་སྦྱར་བའི་ཏིལ་མར་དང་འདི་རྣམས་ལྷན་ཅིག་བསྐོལ་ལ། བཀྲུ་སྨན་དྲག་པོ་མས་གཏོང་ངོ་། །དེའི་འོག་ཏུ་མུ་ཀ་ཀའི་སྡེ་ཚན་ཏིལ་མར་དང་བསྐོལ་བའི་འཇམ་རྩིས་བཏང་བ་ཡང་དེ་དང་འདྲའོ། །ཁ་ཟས་ནི་ཚ་བ་གསུམ་དང་། འོ་མར་བཅས་པའམ་ཡང་ན་རྒྱ་སྲན་
[244b.3]གྱི་ཁུ་བཅུད་དང་ལྡན་པར་སྦྱིན་ནོ། །བད་ཀན་ལས་གྱུར་པའི་དམུ་རྫིང་འབུར་བ་དང་བརྟན་པ་དང་། རློངས་བག་ཏུ་འདུག་པ་དང་ཡི་ག་འཆུས་པ་དང་། སྙིང་ན་བ་དང་། མེ་དྲོད་ཆུང་བ་དང་། ཆང་ནད་ཆེ་བ་ལ་ནི་ཨ་རིཥྚའི་ཆང་དང་། ནས་ཚིག་འཁུས་པའི་ཐལ་བ་ཆུ་དང་སྦྱར་
[244b.4]བ་རས་ཀྱིས་བཙགས་ལ་བཏུང་བར་སྦྱིན་ནོ། །ཤིང་ཀུན་དང་། པི་པི་ལིང་དང་། འབྲས་བུ་གསུམ་དང་། ཐང་ཤིང་དང་། སེར་པོ་རྣམ་གཉིས་དང་། བསེ་ཤིང་གི་འབྲས་བུ་དང་། ན་ལེ་ཤམ་དཀར་པོ་དང་། པུ་ཙེ་ཤེལ་དང་། སེང་ཕྲོམ་དང་། ཤུ་དག་དང་། བཅའ་
[244b.5]སྒ་དང་། བོང་ང་དཀར་པོ་དང་། གླ་སྒང་དང་། རུ་རྟ་དང་། ས་ར་ལ་ཞེས་བྱ་བ་ཀོ་ཉོན་ཙེ་དང་། ལན་ཚྭ་རྣམ་ལྔ་དང་འདི་རྣམས་ཞིབ་ཏུ་བཏགས་ལ་ཞོ་དང་སྣུམ་རྣམ་བཞིས་སྦྲུས་ལ་རྫ་མ་ཁ་སྦྱར་གྱི་ནང་དུ་དུ་བ་མ་ཤོར་བར་བསྲེགས་པའི་ཐལ་བ་ཕྱུང་ལ་དེ་ལ་ཞོ་གཉིས་གཉིས་ཆང་གི་
[244b.6]དངས་མ་དང་། ཞོ་ག་ཆུ་དང་། ཆུ་དྲོན་དང་། ཨ་རིཥྚ་དང་། ཨ་ས་བའི་ཆང་དང་། ནས་ཆང་དང་། འདི་རྣམས་གང་ཡང་རུང་བ་དང་ལྷན་ཅིག་སྦྱར་བ་འཐུངས་ན་དམུ་རྫིང་དང་སྐྲན་དང་གཏུན་ལྟ་བུའི་ནད་དང་། ཏུ་ནི་དང་། སྐྲང་བ་དང་། གསུས་པ་དང་མཆེར་པ་ན་བ་དང་།
[244b.7]སྙིང་ན་བ་དང་། གཞང་འབྲུམ་དང་། རྟུག་པ་འགགས་པ་རྣམས་ཞི་བར་བྱེད་དོ། །བད་ཀན་ལས་གྱུར་པའི་དམུ་རྫིང་ཉམ་ཆུང་བ་ལ་ནི་ཧ་རི་སྟའི་ཆང་དང་། བ་གཅིན་གྱི་བཏུང་བ་དང་། སྨན་གྱི་ཕྱེ་མ་དང་། ལྕགས་ལས་བྱས་པའི་བཏུང་བ་དང་། ཏིལ་མར་ཐལ་སྨན་
[245a]
[245a.1]དང་བཅས་པའི་བཏུང་བ་དང་། དེ་དག་གང་ཡང་རུང་བ་དང་སྦྱར་ན་རྒྱལ་བར་བྱེད་དོ། །ཡུངས་ཀར་དང་། ཕབས་དང་། ལ་ཕུག་གི་ས་བོན་དང་། དེ་དག་བཏགས་པའི་ཕྱེ་མ་བ་གཅིན་དང་ལྡེ་གུར་བྱས་པས་དམུ་རྫིང་བསྐུས་ལ། ཕྱི་རོལ་
[245a.2]ནས་དུགས་བྱ་སྟེ། དེ་ལྟར་ཡང་དང་ཡང་དུ་བྱ་བའི་རིམ་པ་སྦྱར་རོ། །འདུས་པ་ལས་གྱུར་པའི་དམུ་རྫིང་ལུས་སྟོབས་དང་མེ་དྲོད་ཆུང་ཞིང་ནད་གཞི་རྣམས་ཚབས་ཆེ་སྟེ། གཅིག་ལ་གཅིག་གནོད་པར་གྱུར་པ་ནི་གསོར་མི་རུང་སྟེ་སྤང་ངོ་། །དེ་ནི་གལ་ཏེ་མ་བྱས་ན་ནི་ངེས་པར་
[245a.3]འཆི་ལ། བྱས་ན་ནི་འཚོ་ཡང་སྲིད་པས་གསོ་བ་འདི་དག་བྱ་སྟེ། དན་ཏི་དང་ཏྲ་བན་ཏིའི་འབྲས་བུའི་མར་གྱི་བཏུང་བ་བྱིན་ན་རབ་ཏུ་བསྔགས་སོ། །འདུས་པའི་དམུ་རྫིང་ལ་ནད་གཞི་གསུམ་གྱི་གསོ་བ་ཚུལ་བཞིན་དུ་བྱས་ཀྱང་མ་ཐུབ་ན། ཉེ་དུ་རྣམས་ལ་དྲིས་ནས་ཀ་ཀ་ད་ནི་དང་། འོལ་
[245a.4]མ་སེ་དང་། ཀ་ར་བཱི་ར་དང་། འདི་གསུམ་གྱི་རྩ་བ་བཏགས་པའི་ཕྱེ་མ་ཆང་དང་ལྷན་ཅིག་བཏུང་ངོ་། །ཡང་ན་བཟའ་བ་དང་བཏུང་བའི་ནང་དུ་བསྟན་པའི་དུག་དག་པ་སྦྱིན་ནོ། །ཡང་ན་སྦྲུལ་ཁྲོས་པའི་ཁར་ཤིང་ཏོག་བཅུག་ལ་གདུག་པས་ཟོས་ཟིན་པའི་ཤིང་ཏོག་བྱིན་ན་ནད་གཞི་
[245a.5]རྣམས་གཅིག་ཏུ་བསྡུས་ནས་དུག་གི་མཐུས་དཀྲུགས་ཏེ་ཕྱི་རོལ་དུ་འབྱིན་ཅིང་འཇིག་པར་བྱེད་དོ། །སྦྱོར་བའི་རིམ་པ་དེ་དག་བྱས་ནས་གལ་ཏེ་དུག་དེ་ནད་ཀྱི་སྟེང་དུ་བབ་ན་ནི་ནད་དེ་འཇིག་པར་བྱེད་ལ། ལུས་ཐ་མལ་པ་ལ་བབ་ན་ནི་འཆི་བར་འགྱུར་རོ། །ཅི་སྟེ་དུག་གི་ནད་ཞི་བ་
[245a.6]ལྟར་ན་ཆུ་གྲང་མོས་ལུས་ཁྲུས་བྱས་ལ་དེའི་འོག་ཏུ་འོ་མ་སྦྱིན་ནོ། །ཡང་ན་དུག་དང་། དུར་བྱིད་དང་། མན་དུ་ཀ་པར་ནི་དང་། རྒྱ་སྣེའུ་དང་། ནས་དང་། ཀ་ལ་ཤ་ཀ་དང་། དེ་རྣམས་ལས་གང་ཡང་རུང་བའི་རང་གི་ཁུ་བ་སྐྱུར་དང་། ལན་ཚྭ་དང་། སྣུམ་མེད་པར་སློན་
[245a.7]པའམ་སྐམ་པོ་གང་ཡང་རུང་སྟེ། ཁ་ཟས་གཞན་མི་བཟའ་བར་ཟླ་བ་གཅིག་ཏུ་བཟའོ། །གལ་ཏེ་སྐོམ་ན་ཡང་དེ་རྣམས་རང་གི་ཁུ་བ་བླུད་དོ། །དེ་བཞིན་དུ་གོང་མའི་ཆོ་ག་དེ་དག་གིས་ཟླ་བ་གཅིག་ནས་ནད་མེད་པར་འགྱུར་ཏེ། ལུས་ཉམ་ཆུང་ན་སྲོག་བསྲུང་བར་བྱ་བའི་ཕྱིར་རྔ་མོའི་
[245b]
[245b.1]འོ་མ་བླུད་དོ། །མཆེར་པའི་ནད་དམུ་རྫིང་ལ་ནི་ནད་གཞི་ཇི་ལྟ་བར་སྣུན་ཆོས་དང་དུགས་བྱ་སྟེ། ཞོ་དང་འབྲས་ཆན་དུ་བཅས་པ་ཟོས་ལ་ལག་པ་གཡོན་པ་ལ་གཏར་གས་ཁྲག་དབྱུང་ངོ་། །ནད་པ་དེས་ཉམས་སྟོབས་རྙེད་པ་དང་། ཡང་སྣུམ་ཆོས་བྱས་ཏེ། ཉེས་པའི་ལྷག་མ་
[245b.2]སློན་ཁྲུས་ཀྱིས་ལུས་དག་པར་བྱས་ལ། རྒྱ་མཚོའི་ཉ་ཕྱིས་ཀྱི་ཕྱེ་མ་དང་། ཐལ་སྨན་དང་འོ་མར་སྦྱར་བ་བླུད་དོ། །དེ་བཞིན་དུ་པུ་ཏི་ཀ་རཉྫ་ལ་རྩབས་སྐྱུར་པོ་དང་སྦྱར་ཏེ། བསྐྱོས་པས་རས་ཀྱིས་བཙགས་པའི་ནང་དུ་ལྕེ་མྱང་ཚ་དང་པི་པི་ལིང་ཤས་ཆེར་བཏགས་པའི་ཕྱེ་མས་
[245b.3]བཏབ་པ་བླུད་དོ། །ཡང་ན་ཤི་ཀྲུ་བསྐོལ་བའི་ནང་དུ། རྒྱམ་ཚ་དང་། ཙི་ཏྲ་ཀ་དང་། པི་པི་ལིང་གི་ཕྱེ་མ་བཏབ་པ་བླུད་དོ། །ཡང་ན་ཤིང་ཀུན་ལ་སོགས་པའི་ཕྱི་མ་སྐྲན་ནད་གསོ་བའི་ལེའུར་བཤད་པ་དང་། ཐལ་སྨན་སྣ་ཚོགས་དང་། སྨན་མར་སྲང་དྲུག་པ་ཆེ་ཆུང་དང་
[245b.4]སྦྱོར་བ་དེ་དག་གང་ཡང་རུང་བ་མེ་དྲོད་ཇི་ལྟ་བ་བཞིན་དུ་སྦྱིན་པར་བྱའོ། །ཡང་ན་པི་པི་ལིང་དང་། དོང་གྲ་དང་། དན་ཏི་ཆ་མཉམ་པ་དང་། ཨ་རུ་ར་སྣ་གཅིག་གི་ཉིས་འགྱུར་དང་། ལྕེ་མྱང་ཚ་སྣ་གཅིག་གི་ཕྱེད་དང་། འདི་རྣམས་ཕྱེ་མར་བྱས་ཏེ་ཆུ་དྲོན་ལ་གཏང་ངོ་། །
[245b.5]བྱི་དང་ག་དང་། ཀྲུ་ཏྲུག་ཏྲེས་དང་། ཕྱེ་དང་། རྒྱམ་ཚ་དང་། ཤུ་དག་དང་། དེ་རྣམས་ཀྱི་ཕྱེ་མ་མར་དང་སྦྲུས་ཏེ་རྫེའུ་ཁ་སྦྱར་གྱི་ནང་དུ་བསྲེགས་ལ། དེའི་ཐལ་བ་འོ་མ་དང་ལྷན་ཅིག་འཐུངས་ན། སྐྲན་དང་མཆེར་བའི་ནད་འཇོམས་པར་བྱེད་དོ། །ཡང་ན་རྒྱ་ཤུག་གི་འོ་མ་
[245b.6]བཏགས་པའི་ཏིལ་མར་དང་བསྲེས་པ་ལྡེ་གུར་བྱས་པ་མཆེར་པའི་དམུ་རྫིང་གི་སྟེང་དུ་བསྐུས་ལ་ལེགས་པར་མཉེས་ལ། གཏུན་ཤིང་གིས་བརྡུང་བ་དང་བཙིར་ཏེ། དེ་ནས་འོ་མ་འཐུངས་ན་མཆེར་པའི་དམུ་རྫིང་འཇོམས་སོ། །ཡང་ན་ཤིང་རོ་ཧི་ནིའི་ལྕུག་མ་རྩ་བ་ནས་བཅད་དེ་
[245b.7]བསྐམས་ལ། ཨ་རུ་ར་དང་ལྷན་ཅིག་བཏགས་པའི་ཕྱེ་མ་ཆུ་དང་ཞག་བདུན་གྱི་བར་དུ་སྦངས་ལ་འཐུངས་ན། མིག་སེར་དང་། མཆེར་བ་དང་། སྐྲན་དང་། གཞང་འབྲུམ་དང་། སྲིན་བུ་དང་། སྐྲང་བ་དང་། དམུ་རྫིང་དང་། དེ་རྣམས་ལ་ཕན་ནོ། །རོ་ཧི་ཏའི་
[246a]
[246a.1]ཤུན་ཕྲགས་སྲང་ཉི་ཤུ་རྩ་ལྔ་དང་། རྒྱ་ཤུག་སྐམ་པོ་སྲང་སུམ་ཅུ་རྩ་གཉིས་ཆམ་ཆོམ་བརྡུངས་ཏེ་བསྐོལ་བ་བཞི་ཆ་ལུས་པ་དང་། ཚིགས་མ་བོར་བའི་ནང་དུ་ཚ་བ་རྣམ་ལྔ་སྲང་རེ་རེ་དང་དེ་སྤྱི་དང་མཉམ་པའི་རོ་ཧི་ཏའི་ཤུན་ཕྲགས་རྣམས་བཏགས་པའི་
[246a.2]ཕྱེ་མ་དང་། མར་སྲང་སུམ་ཅུ་རྩ་གཉིས་འོ་མ་སྲང་དྲུག་ཅུ་རྩ་བཞི་དང་ཡང་བསྐོལ་ཏེ། མར་ལུས་པ་ལས་རན་པར་འཐུངས་ན་མཆེར་པའི་དམུ་རྫིང་ཚབས་ཆེ་བ་ཡང་མྱུར་དུ་སེལ་བར་བྱེད་དོ། །ཡང་ན་ཆུ་ཤིང་དང་། ཏིལ་གྱི་སྡོང་བུ་དང་། གཟེ་མ་རྣམས་བསྲེགས་
[246a.3]པའི་ཐལ་བ་ཏིལ་མར་དང་བསྐོལ་བ་ལས་རན་པར་འཐུངས་ན་བད་ཀན་དང་རླུང་ལས་གྱུར་པའི་མཆེར་པའི་དམུ་རྫིང་ལས་རྒྱལ་ལོ། །སྦྱོར་བ་དེ་དག་གིས་མ་ཞི་སྟེ་རླུང་དང་བད་ཀན་ལས་གྱུར་པའི་མཆེར་པའི་དམུ་རྫིང་རྣག་ཏུ་རེད་པ་ནི་སྐྲན་གསོ་བའི་ཆོ་ག་བཞིན་དུ་མེའི་ལས་
[246a.4]བྱའོ། །མཁྲིས་པ་ལས་གྱུར་པའི་དམུ་རྫིང་ལ་ནི། འཚོ་བྱེད་སྣ་བཅུ་མར་དང་བསྐོལ་བ་རབ་ཏུ་བསྔགས་ཏེ། དེ་བཞིན་དུ་འོ་མའི་འཇམ་རྩི་དང་། ཁྲག་དབྱུང་བ་དང་། སློན་ཁྲུས་ཀྱིས་ལུས་དག་པར་བྱ་བ་དང་། འོ་མའི་བཏུང་བ་སྦྱར་བ་རབ་ཏུ་བསྔགས་སོ། །མཆིན་པའི་དམུ་
[246a.5]རྫིང་གི་གསོ་བ་ནི། མཆེར་པའི་དམུ་རྫིང་གི་གསོ་བ་ཐམས་ཅད་བྱ་སྟེ། ཁྱད་པར་དུ་ལག་པ་གཡས་པ་ལ་གཏར་ག་བྱའོ། །གཞང་འགགས་པའི་དམུ་རྫིང་ལ་ནི་ཐོག་མར་དུགས་བྱས་ལ་བ་གཅིན་སྨན་རྣོན་པོ་དང་། ཏིལ་མར་དང་ལན་ཚྭ་སྦྱར་བས་བཀྲུ་སྨན་དྲག་པོ་
[246a.6]དང་། འཇམ་རྩི་མས་གཏོང་བ་དང་། ཕྱི་ས་སླ་བར་གྱུར་པའི་ཟས་དང་བཀྲུ་སྨན་རྣོན་པོ་རྣམས་གཏང་བར་བྱའོ། །གཞན་ཡང་རླུང་གིས་རྟུག་པ་འགགས་པ་དང་། རླུང་ལ་ཕན་པའི་གསོ་བ་ཐམས་ཅད་ཀྱང་འདིར་སྤྱད་དོ། །རྒྱུ་མ་རྡོལ་བའི་དམུ་རྫིང་ལ་དུགས་མ་
[246a.7]གཏོགས་པའི་བད་ཀན་གྱི་དམུ་རྫིང་གི་གསོ་བ་ཐམས་ཅད་བྱའོ། །སྨན་པས་ཆུ་སེར་ལ་སོགས་པ་བཞིན་དུ་ཡང་དང་ཡང་དུ་གཟགས་པར་བྱའོ། །ལྟོ་བ་ཆུས་གང་བའི་དམུ་རྫིང་ལ་ནི་བ་གཅིན་དང་། སྨན་རྣོ་བ་དང་། ཐལ་སྨན་དང་སྦྱར་བའི་བཟའ་བ་དང་བཏུང་བ་སྦྱར་
[246b]
[246b.1]རོ། །མེའི་དྲོད་སྐྱེད་པ་དང་། བད་ཀན་འཇོམས་པའི་བཟའ་བ་ཉེ་བར་བསྟེན་པར་བྱའོ། །རའི་རིལ་མ་བསྲེགས་པའི་ཐལ་བ་བ་གཅིན་དང་སྦྱར་ཏེ་རས་ལ་བཙགས་ལ་བསྐོལ་ཏེ། སྐ་བར་གྱུར་པ་དང་། དེའི་ནང་དུ་པི་པི་ལིང་དང་པི་པི་ལིང་གི་རྩ་བ་དང་བཅའ་སྒ་དང་།
[246b.2]ལན་ཚྭ་རྣམ་ལྔ་དང་། དུར་བྱིད་དང་། དན་ད་དང་། འབྲས་བུ་གསུམ་དང་། ཁྲོན་བུ་དང་། ཀར་ཀ་ཏ་སྲིང་གི་དང་། སྭ་རྩི་ཀའི་ཐལ་བ་དང་། ཤུ་དག་དང་། ས་ཏ་ལ་དང་། འདི་རྣམས་བཏགས་པའི་ཕྱེ་མ་ཞོ་གཉིས་གཉིས་བཅུག་ལ། རྒྱ་ཤུག་གི་འབྲས་བུ་ཙམ་
[246b.3]གྱི་རི་ལུ་བྱས་ཏེ། རང་སྐྱུར་གྱི་ནང་དུ་མཉེས་ལ་རན་པར་འཐུངས་ན་མ་ཞུ་བ་དང་སྐྲང་བ་དང་དམུ་རྫིང་ཤས་ཆེ་བ་རྣམས་སེལ་ཏོ། །དེ་ལ་དམུ་རྫིང་མཚོན་གྱིས་དྲལ་བ་ནི། དམུ་རྫིང་རྣམ་པ་བརྒྱད་ལས། གསུམ་ནི་དྲལ་བའི་ཆོ་ག་བྱ་སྟེ། དེ་ཡང་གང་ཞེ་ན། གཞང་འགགས་
[246b.4]པའི་དམུ་རྫིང་དང་། རྒྱུ་མ་རྡོལ་བའི་དམུ་རྫིང་དང་། ལྟོ་བ་འཆུས་པའི་དམུ་རྫིང་དང་གསུམ་མོ། །ཐོག་མར་ནི་དམུ་རྫིང་བརྒྱད་པོ་ཀུན་ཀྱང་སྨན་གྱིས་གསོ་བར་བྱའོ། །དེས་མ་ཐུབ་ན་སྨན་པས་མཚོན་གྱིས་ཁོང་ཕྱེ་བའི་དཔྱད་བྱ་སྟེ། ཐོག་མར་ནད་པའི་དཔྱད་རྩོམ་
[246b.5]པ་ཡང་གྱ་ཚོམས་སུ་བྱར་མི་རུང་སྟེ། ནད་པའི་ཉེ་དུ་རྣམས་ཀྱིས་རྒྱལ་པོ་ལ་ཐུགས་ཚོད་དུ་གསོལ་ནས་སྨན་པས་བདག་ཉིད་ཀྱི་སྤྱད་ཀྱི་མཚོན་ལེགས་པར་བྱ་སྟེ་བརྟགས་ལ་སྦྱོར་བ་བརྩམ་པར་བྱ་སྟེ། དེ་ལ་དམུ་རྫིང་བརྟོལ་བར་འདོད་པས་དང་པོར་གཞང་འགགས་པའི་དམུ་
[246b.6]རྫིང་དང་། རྒྱུ་མ་རྡོལ་བའི་དམུ་རྫིང་གཉིས་ལ་ཐོག་མར་སྣུམ་གྱི་ཆོ་ག་དང་དུགས་བྱ་སྟེ། ནད་པའི་ལྟེ་བའི་འོག་ཏུ་སོར་བཞི་བཅལ་ལ། དེ་ནས་གཡོན་ངོས་དཀུའི་ཕྱོགས་སུ་སོར་བཞི་བཅལ་བར་རྨ་ཁ་སོར་བཞི་ཙམ་དྲལ་ལོ། །རྒྱུ་མ་ལ་མ་ཕོག་པར་བག་བྱའོ། །དྲལ་ཟིན་པ་
[246b.7]དང་། རྨའི་ནང་ནས་རྒྱུ་མའི་ནང་དུ་སྤུའི་གོང་བུ་འམ་རྡོ་འམ། དྲིང་བའི་རིལ་བུ་འབྱར་བས་རྒྱུ་མ་འགགས་པ་འམ། ཤིང་ཚལ་ལམ། རུས་པ་འམ། ཟུག་རྔུ་གང་ཡང་རུང་བས་རྒྱུ་མ་རྡོལ་བ་གང་ཡིན་པ་དེ་ལེགས་པར་བརྟགས་ཏེ། དེ་ཡང་ལག་པ་སྣུམ་གྱིས་བསྐུས་པས་མྱང་ཞིང་
[247a]
[247a.1]ལྟའོ། །གལ་ཏེ་སྤུའི་གོང་བུའམ། དྲི་མའི་རིལ་བུས་འགགས་པ་ཡིན་ན། དེ་ལ་ནི་རྒྱུ་མའི་ཕྱི་རོལ་ནས་ཅུང་ཟད་མཉེས་ལ་སྔ་མའི་གནས་ནས་འགོག་པའམ་བསྐྱོད་པ་འམ། བཙིར་བ་ཙམ་གྱིས་དབྱུང་བར་འགྱུར་རོ། །ཟུག་རྔུས་རྡོལ་བ་ལ་
[247a.2]ནི། ཟུག་རྔུ་ཕྲ་འམ་དྲང་དུ་འདོད་པ་ལྟ་བུ་ལ་ནི། སྤྲེའུའི་སོ་ལྟ་བུའི་སྐམ་པས་ཕྱིར་དྲངས་ལ་དབྱུང་ངོ་། །ཟུག་རྔུ་ལྕི་སྟེ་དབྱུང་དུ་མི་འདོད་པ་འམ་སྦོམ་པ་ལ་ནི། རྒྱུ་མ་དང་མཚམས་སུ་བཅད་དོ། །གལ་ཏེ་ཆུ་སེར་དང་། དྲི་མ་ངན་པ་རྒྱུ་བ་ཡོད་ན་ཡང་བུ་ག་བཙིར་ལ་དེ་ཉིད་ནས་ཕྱིར་
[247a.3]དབྱུང་ངོ་། །དེ་ནས་མར་དང་སྦྲང་རྩི་བསྲེས་པས་རྒྱུ་མ་བསྐུའོ། །ཆོ་ག་དེ་ཉིད་བྱས་ཟིན་པ་དང་། རྒྱུ་སྨད་ཀྱི་ནང་གྲོལ་རོ་སྟོད་ཕྱོགས་སུ་དབུགས་རིང་པོས་ཕྱོགས་གཅིག་ཏུ་དྲངས་པ་ལྟར་བྱས་པས་རྒྱུ་མ་སྔ་མའི་གནས་སུ་བདེ་བར་རང་འདུག་པའི་རིགས་སོ། །དེ་ནས་ཕྱིའི་ལྟོ་བའི་
[247a.4]རྨ་དར་སྐུད་ཀྱིས་བཙེམས་ལ། ས་ནག་པོ་དང་། ཤིང་མངར་ཆུ་དང་སྦྱར་བའི་ལྡེ་གུས་རྨ་དང་ལྟོ་བ་བསྐུས་ལ། རས་ཀྱིས་རྨ་དང་རྐེད་པ་དཀྲིས་ཏེ་གཞག་གོ། །དེ་ནས་རླུང་མེད་པའི་གནས་སུ་འོ་མ་འབའ་ཞིག་གིས་གསོས་ལ། མལ་སྣུམ་ཅན་བཅས་ལ་བསྙལ་
[247a.5]ལོ། །ལྟོ་བ་ཆུས་གང་བའི་དམུ་རྫིང་ལ་ནི་རླུང་དང་མཐུན་པའི་སྨན་དང་ཏིལ་མར་དུ་སྦྱར་བས་ལུས་བསྐུ་བར་བྱའོ། །དེ་ནས་ལྟོ་བ་རས་ཀྱིས་དཀྲིས་ཏེ་ཆུ་དྲོན་པོས་སྟེང་དུ་བླུགས་ལ་དུགས་བྱའོ། །དེ་ལ་མཚོན་གདབ་ས་ནི་གོང་མ་དང་མཐུན། རྨ་ཁ་ནི་སོར་གཅིག་གི་ཐད་དུ་དབུག་
[247a.6]གོ། །མཚོན་ནི་འབྲས་ཀྱི་རྩེ་མོ་འདྲ་བས་དྲལ་ལོ། །དེ་ལྟར་དྲལ་མ་ཐག་ཏུ་ཤིང་སྦུ་གུ་ཅན་འཇམ་པོའི་ཐམ་བུས་ཐབས་སུ་བཅུག་ལ། སྦུབས་ཀྱི་ནང་ནས་ནད་ཅུང་ཟད་ཕྱུང་ལ་གཟག་གོ། །དེ་ནས་རས་སམ་པགས་པས་དམ་དུ་བཅིངས་ལ་རླུང་མི་ཤོར་བར་བྱའོ། །དེ་ནས་ཞག་
[247a.7]གསུམ་གྱི་བར་དུ་མི་བསྒུལ་བར་གསུམ་པ་ནས་ཞག་བཅུ་དྲུག་གི་བར་དུ་ཉིན་རེ་ཁད་ཀྱིས་དབྱུང་ངོ་། །ཞག་བཅུ་དྲུག་ལོན་ནས་སྦུ་གུ་ཕྱུང་སྟེ། ཏིལ་མར་དང་ལན་ཚྭ་བཏབ་པས་རྨ་ཁ་བསྐུས་ལ་རས་ཀྱིས་ལྟོ་བ་བཅིང་ལ། དེ་ནས་ཞག་གསུམ་པ་ནས་ཞག་བཅུ་དྲུག་གི་བར་
[247b]
[247b.1]དུ་རས་བཀྲོལ་ཞིང་རྨ་བཙིར་ལ་གོང་མའི་སྨན་གྱིས་ཀྱང་དེ་བཞིན་དུ་བསྐུ། ཅི་སྟེ་བརྟོལ་མ་ཐག་ཏུ་འཕྲལ་ནད་དུས་གཅིག་ཏུ་ཕྱུང་བར་གྱུར་ན་སྐྱོན་འདི་དག་ཡོད་དེ། སྐོམ་དད་ཆེ་བ་དང་། ཚ་བ་སྐྱེ་བ་དང་། ཡན་ལག་ཟུག་ཅིང་ན་བ་དང་། འཁྲུ་བ་དང་། དབུགས་མི་བདེ་བ་དང་།
[247b.2]ལུད་པ་ལུ་བ་དང་། ལག་པ་དང་རྐང་པ་ཚ་བ་དང་། འདི་རྣམས་འབྱུང་བས་ཁད་ཀྱིས་ཞག་རེ་དབྱུང་བར་བྱའོ། །ནད་འབྱིན་པའི་ཚེ་དལ་བུས་བཙིར་རོ། །དེ་ནས་རླུང་མེད་པའི་གནས་སུ་བཞག་ནས་ཞག་དང་པོ་སྨྱུང་བར་བྱའོ། །དེ་ནས་ཞག་གཉིས་པ་ལ་ཚྭ་དང་སྣུམ་
[247b.3]མེད་པའི་འབྲས་ཐུག་སྦྱིན་ནོ། །དེ་ནས་ཟླ་བ་དྲུག་གི་བར་དུ་ཁ་ཟས་གཞན་མི་བཟའ་བར་འོ་མ་འབའ་ཞིག་སྦྱིན་ནོ། །དེ་ནས་ཟླ་བ་གསུམ་གྱི་བར་དུ་འོ་མ་ལས་གཞི་བླངས་པའི་འབྲས་ཐུག་སྦྱིན་ནོ། །དེ་ནས་ཟླ་བ་གསུམ་གྱི་བར་དུ་ཅི་ཙེ་དང་། ཁྲེའི་ཐུག་པ་ལ་འོ་མ་དང་ལན་
[247b.4]ཚྭ་ཅུང་ཟད་བཏབ་སྟེ། སེའུ་འབྲུ་བསྐོལ་བའི་ཁུ་བ་བསྲེས་པ་བཏུང་ངོ་། །དེ་ལྟར་བྱས་པའི་རིམ་པས་ལོ་གཅིག་གི་བར་དུ་བསྲུངས་ན་ནི། ལྟོ་བ་ཆུས་གང་བའི་དམུ་རྫིང་འཇོམས་པར་བྱེད་དོ། །སྲོག་འཚོལ་བའི་སློབ་དཔོན་སྨན་པས་ཇི་ལྟར་བསྟན་པའི་ལུང་མཉན་པར་བྱས་
[247b.5]ནས་ཆོ་ག་བསྲུང་བ་ལ་འབད་པར་བྱ་སྟེ། ཟས་ཐུབ་པར་བྱ་ཞིང་ལྟོ་འདུན་ལ་སོགས་པ་མི་བྱའོ། །གཞང་འགགས་པའི་དམུ་རྫིང་དང་། རྒྱུ་མ་རྡོལ་བའི་དམུ་རྫིང་གཉིས་ཀྱི་ཆོ་ག་དང་། བསྲུང་བ་ཡང་འདི་དང་འདྲ་བར་ལོ་གཅིག་གི་བར་དུ་བྱའོ། །དེ་ལྟར་ལོ་གཅིག་གི་
[247b.6]བར་དུ་བསྲུང་བ་བྱས་ནས་ཕྱིས་ནད་མི་སྐྱེ་ཞིང་བརྟན་པར་བྱ་བའི་ཕྱིར་སྨན་གྱི་སྦྱོར་བ་འོག་ནས་འབྱུང་བ་འདི་དག་བྱའོ། །དེ་ལ་དམུ་རྫིང་བརྒྱད་པོ་ཀུན་ཀྱང་ཕལ་ཆེར་ནད་གཞི་འདུས་པ་ལ་སོགས་པ་ལས་འབྱུང་བ་སྟེ། དེ་བས་ན་རླུང་ལ་སོགས་པ་གསོ་བར་བྱ་བ་ནི་རྣམ་པ་ཐམས་ཅད་
[247b.7]དུ་བསྔགས་ཏེ། དེ་ཡང་རླུང་ལ་སོགས་པ་ཁོང་པའི་ནང་དུ་ཞུགས་ཏེ་དྲོད་ཉམས་པར་བྱེད་ན། དེ་ནས་ནི་ཁ་ཟས་དྲོ་བ་དང་ཡང་བར་བྱས་པའི་ནད་དུ་རྩ་བ་ལྔ་པ་དང་། ལན་ཚྭ་དང་། སྐྱུར་དང་། སྣུམ་ཅུང་ཟད་དང་བཅས་པའི་ཐུག་པ་སྦྱིན་ནོ། །ཡང་ན་ནས་རྙིང་པ་དང་། འབྲས་
[248a]
[248a.1]ཞག་དྲུག་ཅུ་པ་གཅིན་གྱིས་བྲན་ཏེ་བསྐམས་ལ་འོ་མས་གཞི་བླངས་ཏེ་ཐུག་པ་བྱ་སྟེ་ཅི་འདོད་པ་སྦྱིན་ནོ། །སྐོམ་དུ་ནི་བུ་རམ་ཤིང་བསྐོལ་བའི་ཁུ་བ་བླུད་ན་ནད་གཞི་གསུམ་ལས་གྱུར་པའི་དམུ་རྫིང་ལས་བཟློག་སྟེ། རང་རང་གི་གནས་སུ་ཞི་བར་བྱེད་དོ། །
[248a.2]དམུ་རྫིང་ཅན་ཀུན་གྱིས་བསྲུང་བར་བྱ་བ་ནི། ཤིན་ཏུ་དྲོ་བ་དང་། སྐྱུར་བ་དང་། རྩུབ་པ་དང་། ལན་ཚྭ་དང་། ཕྱི་ས་འགགས་པའི་ཟས་དང་། གྲང་བ་དང་། ལྕི་བ་དང་། བུ་རམ་དང་། ཏིལ་ལས་བྱས་པའི་ཟས་དང་། ཆུ་འཐུང་བ་དང་། སྔོ་རྔད་དང་། རླན་ལ་
[248a.3]འདུག་པ་དང་འདི་རྣམས་ཤས་ཆེར་མི་སྤྱད་མི་བསྟེན་གཞན་ཡང་སྤང་བར་བྱ་བ་འདི་དག་བྱ་སྟེ། ལུས་ཀྱི་རྩོམ་པ་དང་། ལམ་དུ་འགྲོ་བ་དང་། བཞོན་པའི་འགྲོ་བ་དང་། འོང་བ་སྤང་བར་བྱའོ། །སྐོམ་དུ་ནི་དར་བ་ཧ་ཅང་སླ་བ་ཡང་མ་ཡིན་སྐ་བ་ཡང་མ་ཡིན་མངར་བ་
[248a.4]ཡང་མ་ཡིན་པའི་བཏུང་བ་བསྔགས་ཏེ། དེ་ཡང་ནད་ཀྱི་གཞི་དང་སྦྱར་ཏེ་བཏུང་ངོ་། །དེ་ཡང་རླུང་ལས་གྱུར་པའི་དམུ་རྫིང་ལ་ནི། ན་ལེ་ཤམ་དང་། ཁ་རས་བཏབ་པ་སྦྱིན་ནོ། །བད་ཀན་ལས་གྱུར་པ་ལ་ནི་ལ་ལ་ཕུད་དང་རྒྱམ་ཚ་དང་ཟི་ར་དང་སྦྲང་རྩི་དང་། ཚ་བ་གསུམ་
[248a.5]འདི་རྣམས་ཀྱིས་བཏབ་པ་སྦྱིན་ནོ། །འདུས་པ་ལས་གྱུར་པ་ལ་ནི་བ་ཚ་ཅན་གྱི་ཚ་དང་། ཚ་བ་གསུམ་གྱིས་བཏབ་པའི་དར་བ་སྦྱིན་ནོ། །གཞང་འགགས་པའི་དམུ་རྫིང་ལ་ནི། སྤ་མའི་འབྲས་བུ་དང་། ལ་ལ་ཕུད་དང་། ལན་ཚྭ་དང་། ཟི་ར་རྣམས་བཏབ་པ་སྦྱིན་ནོ། །
[248a.6]རྒྱུ་མ་རྡོལ་བའི་དམུ་རྫིང་ལ་ནི་པི་པི་ལིང་དང་སྦྲང་རྩིས་བཏབ་པ་སྦྱིན་ནོ། །ལྟོ་བ་ཆུས་གང་བའི་དམུ་རྫིང་ལ་ནི། ཚ་བ་གསུམ་གྱིས་བཏབ་པའི་དར་བ་སྦྱིན་ནོ། །མཆིན་པའི་དམུ་རྫིང་ལ་ནི། སྦྲང་རྩི་དང་། ཤུ་དག་དང་། སྒ་དང་། ཉེའུ་ཤིང་དང་། རུ་རྟ་དང་།
[248a.7]རྒྱམ་ཚ་དང་། ཏིལ་མར་དང་འདི་རྣམས་བཏབ་པ་བླུད་དོ། །ཁྱད་པར་དུ་དར་བའི་སྐོམ་གྱི་ཕན་ཡོན་ནི། ལུས་ལྕི་བ་དང་། མེའི་དྲོད་ཉམས་པ་དང་། ཡི་ག་འཆུས་པ་དང་། ཚིལ་རྒྱས་པའི་ནད་དང་། འཁྲུ་བ་དྲག་པོས་ལུས་ཤིན་ཏུ་ཉམ་ཆུང་བར་གྱུར་པ་ལ་ནི་འོ་མ་
[248b]
[248b.1]བདུད་རྩི་དང་འདྲ་བར་ཤེས་པར་བྱའོ། །གསོ་བའི་གནས་ལས་དམུ་རྫིང་གསོ་བའི་ལེའུ་བཅོ་ལྔ་བ་རྫོགས་སོ།། །།དེ་ནས་སྐྱ་རྦབ་ཀྱི་ནད་གསོ་བའི་ལེའུ་བཤད་པར་བྱ་སྟེ། སྐྱེས་བུ་གང་སྐྱ་རྦབ་ན་བ་ལ་ནི། ཐོག་མར་དགེ་བའི་སྨན་མར་དང་། བའི་རྣམ་
[248b.2]ལྔའི་སྨན་མར་དང་། ཏིག་ཏ་ཆེན་པོའི་སྨན་མར་མཛེ་ནད་ཀྱི་སྐབས་སུ་བཤད་པ་དང་། དོང་གའི་སྡེ་ཚན་བསྐོལ་བའི་སྨན་མར་འདི་རྣམས་གང་ཡང་རུང་བ་བླུད་དོ། །སེའུ་འབྲུ་རང་གི་ཁུ་བ་སྲང་བརྒྱད་དང་། འུ་སུ་སྲང་གཉིས་དང་། ཙི་ཏྲ་ཀ་སྲང་གཅིག་དང་། བཅའ་
[248b.3]སྒ་སྲང་གཉིས་དང་། པི་པི་ལིང་སྲང་ཕྱེད་དང་། འདི་རྣམས་བཏགས་པའི་ཕྱེ་མ་མར་སྲང་ཉི་ཤུ་དང་། ཆུ་སྲང་བརྒྱ་ཉི་ཤུ་རྩ་བརྒྱད་དང་ཚུལ་བཞིན་དུ་བསྐོལ་ཏེ་མར་ལུས་པ་དང་རན་པར་འཐུངས་ན་སྙིང་ནད་དང་སྐྱ་རྦབ་དང་། སྐྲན་དང་། གཞང་འབྲུམ་དང་། མཆེར་པ་དང་།
[248b.4]རླུང་དང་བད་ཀན་གྱིས་ཉམ་ཐག་པ་སེལ་ཏོ། །དེའི་མེ་དྲོད་སྐྱེད་པ་དང་། དབུགས་མི་བདེ་བ་དང་། ལུད་པ་འཇོམས་ཤིང་རླུང་ལམ་ལོག་པར་ཞུགས་པ་ལུགས་བཞིན་འབྱུང་ལ། བུད་མེད་བུ་འབྱུང་དཀའ་བ་ལ་ཡང་རབ་ཏུ་བསྔགས་སོ། །དེ་ནས་སྐྱ་རྦབ་ན་བའི་ནད་པ་དེ་སྣུམ་
[248b.5]ཆོས་ལེགས་པར་བྱ་སྟེ། སྨན་རྣོ་བས་སློན་བྱའོ། །དེ་ནས་ཡང་སྣུམ་ཆོས་བྱ་སྟེ། འོ་མ་བ་གཅིན་དང་སྦྱར་བ་འམ། རེ་རེ་ཡང་རུང་བས་ལན་མང་དུ་བཀྲུ་སྨན་བྱའོ། །དན་ཏིའི་འབྲས་བུའི་ཁུ་བ་དྲོ་འཇམ་ཙམ་གྱི་ནང་དུ་ཏང་པལ་གྱི་འབྲས་བུ་དང་། རྒུན་འབྲུའི་འབྲས་
[248b.6]བུ་སྲང་བཞི་བཞི་བཅུག་སྟེ་ནུབ་གཅིག་སྦངས་ལ། ནང་པར་མཉེས་ནས་བཙགས་པ་འཐུངས་ན། སྐྱ་རྦབ་ཀྱི་ནད་ལས་རྒྱལ་བར་བྱེད་དོ། །ཡང་ན་བ་གཅིན་གྱི་ནང་དུ་ཨ་རུ་རའི་ཕྱེ་མས་བཏབ་སྟེ་བཏུང་བ་འམ། ཡང་ན་འབྲས་བུ་གསུམ་བ་གཅིན་དང་བསྐོལ་བའི་ནང་དུ་
[248b.7]ཨ་རུ་རའི་ཕྱེ་མ་བཏབ་པ་འམ། ཡང་ན་ཁྲོན་བུ་དང་། ཤ་མ་དུར་བྱིད་དང་། ཐང་ཤིང་དང་། བཅའ་སྒ་དང་། འདི་རྣམས་བ་གཅིན་དང་བཏགས་ཏེ་བཏུང་བའམ། ཡང་ན་སྨན་དེ་དག་ཉིད་བ་གཅིན་དང་བསྐོལ་བ་བཏུང་ངོ་། །ཡང་ན་སྨན་དེ་དག་ཉིད་འོ་མ་དང་ཚུལ་བཞིན་དུ་
[249a]
[249a.1]བསྐོལ་ལ་འཐུངས་ན་ཉེས་པ་རྣམས་འཇོམས་སོ། །ཡང་ན་ལྕགས་ཕྱེ་བ་གཅིན་དང་འོ་མ་གང་ཡང་རུང་བའི་ནང་དུ་བཞག་ལ་སྦྱིན་ནོ། །དེ་ཞུ་བའི་ཚོད་ཙམ་ན་འོ་མ་འམ་མངར་བའི་ཁུ་བ་གང་ཡང་རུང་བ་ལྷན་ཅིག་བཟའོ། །དེ་ལྟར་སློན་ཁྲུས་ཀྱིས་
[249a.2]སྟོད་སྨད་དུ་ལུས་དག་པར་བྱས་ནས། ཨ་རུ་ར་དང་། སྦྲང་རྩི་དང་། མར་སྦྱར་བའི་ལྡེ་གུ་སྦྱིན་ནོ། །བྱི་ཤ་ལ་དང་། པུ་ཙེ་ཤེལ་དང་། གླ་སྒང་དང་། རུ་རྟ་དང་། ཐང་ཤིང་དང་། དུག་མོ་ཡུངས་དང་། འདི་རྣམས་ཞོ་གཉིས་གཉིས་དང་། མུར་བ་སྲང་ཕྱེད་དང་། བོང་ང་
[249a.3]ཞོ་གཅིག་དང་འདི་རྣམས་བཏགས་པའི་ཕྱེ་མ་ཆུ་དྲོ་འཇམ་ཙམ་དང་འཐུངས་ན། དེ་ནས་སྦྲང་རྩི་བལྡགས་ན་སྐྱ་རྦབ་དང་། རིམས་དང་། ལུས་ཚ་བ་དང་། ལུད་པ་དང་། དབུགས་མི་བདེ་བ་དང་། ཡི་ག་འཆུས་པ་དང་། སྐྲན་དང་། ལྟོ་སྦོས་པ་དང་། མ་ཞུ་བ་རླུང་དང་
[249a.4]བཅས་པ་དང་། ཁྲག་མཁྲིས་རྣམས་ལས་རྒྱལ་བར་བྱེད་དོ། །ཡང་ན་བ་ཤ་ཀ་དང་། ཀྲུ་ཏྲུག་ཏྲེས་དང་། འབྲས་བུ་གསུམ་དང་། པུ་ཙེ་ཤེལ་དང་། ཏིག་ཏ་དང་། ནིམ་པ་དང་། འདི་རྣམས་ཆམ་ཆོམ་བརྡུངས་ཏེ་བསྐོལ་བའི་ཁུ་བ་བསྒྲངས་པའི་ནང་དུ་སྦྲང་རྩི་བཏབ་པ་
[249a.5]འཐུངས་ན་སྐྱ་རྦབ་དང་། མིག་སེར་དང་ཁྲག་མཁྲིས་འཇོམས་པར་བྱེད་དོ། །ཡང་ན་ཚ་བ་གསུམ་དང་། ཙི་ཏྲ་ཀ་དང་། བྱི་དང་ག་དང་། འབྲས་བུ་གསུམ་དང་། ག་དུར་དང་། འདི་རྣམས་བཏགས་པའི་ཕྱེ་མ་སྤྱི་དང་མཉམ་པའི་ལྕགས་ནག་པོའི་ཕྱེ་མ་མར་དང་སྦྲང་
[249a.6]རྩི་དང་སྦྱར་ཏེ། དར་བ་འམ་ཆུ་དྲོན་པོ་དང་འོ་མ་དང་བཅས་པར་འཐུངས་ན། མིག་སེར་དང་། སྐྱ་རྦབ་དང་། སྙིང་ནད་དང་། མཛེ་དང་། གཞང་འབྲུམ་དང་། གཅིན་ནད་ཐམས་ཅད་སེལ་བར་བྱེད་དོ། །དོང་གྲ་དང་། ལྕགས་ཕྱེ་དང་། ཏིལ་དང་། བུ་རམ་འདི་རྣམས་
[249a.7]ཆ་མཉམ་པ་དང་། སྨན་སྣ་གཅིག་གི་ཉིས་འགྱུར་གྱི་པི་པི་ལིང་དང་། དེ་རྣམས་རི་ལུར་བྱས་པ་ཟོས་ན་སྐྱ་རྦབ་ལ་ཕན་ནོ། །ཡང་ན་ཏ་བྱ་དང་། སྐྱེར་པའི་ཤུན་པ་དང་། དབྱི་མོ་དང་། པི་པི་ལིང་གི་རྩ་བ་དང་། ཐང་ཤིང་དང་། ཚ་བ་གསུམ་ལ་སོགས་པ་སྦྱོར་བ་གོང་མའི་
[249b]
[249b.1]སྨན་དང་། དེ་རྣམས་སྤྱིའི་ཉིས་འགྱུར་གྱི་ལྕགས་ཕྱེ་དང་ཕྱེ་མར་བྱས་ལ་སྨན་རེ་རེའི་བརྒྱད་འགྱུར་གྱི་བ་གཅིན་དང་། སྨན་སྣ་སོ་སོར་བསྐོལ་ལ་རི་ལུར་བྱར་འདོད་པ་ཙམ་གྱི་སྐན་ཏེར་གྱུར་པ་དང་གཅིག་ཏུ་བསྲེས་ཏེ་རི་ལུར་བྱས་པ་ནི་ལྕགས་ཕྱེའི་རི་ལུ་ཞེས་བྱ་སྟེ། དེ་ལས་
[249b.2]ཅི་རན་དར་བ་དང་སྦྱར་ཏེ་འཐུངས་ན་སྐྱ་རྦབ་ཀྱི་ནད་རྣམས་ལ་སྲོག་སྦྱིན་པར་བྱེད་དོ། །གཞན་ཡང་མཛེ་དང་། མ་ཞུ་བ་དང་། སྐྲང་བ་དང་། བརླ་རེངས་པ་དང་། ཡི་ག་འཆུས་པ་དང་། གཞང་འབྲུམ་དང་། མིག་སེར་དང་། གཅིན་ནད་དང་མཚེར་པའི་ནད་རྣམས་
[249b.3]ཀྱང་ཞི་བར་བྱེད་དོ། །ཡང་ན་ཏ་བྱ་དང་། བྲག་ཞུན་དང་། དངུལ་དང་། ལྕགས་ཀྱི་དྲི་མ་དང་། དེ་རྣམས་སྲང་ལྔ་དང་། ཙི་ཏྲ་ཀ་དང་། འབྲས་བུ་གསུམ་དང་། ཚ་བ་གསུམ་དང་། བྱི་དང་ག་དང་། དེ་རྣམས་སྲང་རེ་རེ་དང་། ཤ་ཁ་ར་སྲང་བརྒྱད་དང་། འདི་
[249b.4]རྣམས་ཀྱི་ཕྱེ་མ་སྦྲང་རྩི་དང་སྦྱར་བ་ཟོས་ན། སྐྱ་རྦབ་དང་། དུག་དང་། ལུད་པ་དང་། གཅོང་ཆེན་པོ་དང་། རིམས་མི་བཟད་པ་དང་། མཛེ་དང་། མ་ཞུ་བ་དང་། གཅིན་ནད་དང་། སྐྲང་བ་དང་། དབུགས་མི་བདེ་བ་དང་། ཡི་ག་འཆུས་པ་རྣམས་ལ་ཕན་ཏེ། ཁྱད་
[249b.5]པར་དུ་བརྗེད་བྱེད་ཀྱི་ནད་དང་། མིག་སེར་དང་། གཞང་འབྲུམ་རྣམས་འཇོམས་པར་བྱེད་དོ། །ཡང་ན་དུག་མོ་ཡུངས་དང་། འབྲས་བུ་གསུམ་དང་། ནིམ་པ་དང་། པ་ཏོ་ལ་དང་། ག་དུར་དང་། དོང་གྲ་དང་འདི་རྣམས་བསྐོལ་བའི་ཁུ་བའི་ནང་དུ་བྲག་ཞུན་སྲང་བརྒྱད་
[249b.6]བཅུག་སྟེ། ཞག་བཅུའམ། ཉི་ཤུ་འམ། སུམ་ཅུའི་བར་དུ་ཡང་སྦང་ཞིང་ཡང་སྐམ་པ་ལན་མང་དུ་བྱས་པ་དང་། བྲག་ཞུན་དང་མཉམ་པའི་ཤ་ཁ་ར་དང་། སྨིག་རྐང་པ་དང་། པི་པི་ལིང་དང་། སྐྱུ་རུ་ར་དང་། ཀར་ཀ་ཏ་སྲིང་གི་སྲང་རེ་རེ་དང་། ཀཎྜ་ཀ་རིའི་རྩ་བ་དང་འབྲས་
[249b.7]བུ་གཉིས་སྲང་གཅིག་དང་། དྲི་སྣ་གསུམ་ཞོ་གཉིས་གཉིས་དང་། སྦྲང་རྩི་སྲང་གསུམ་དང་ལྷན་ཅིག་རི་ལུ་ཞོ་གཉིས་པའི་ཚད་དུ་བྱས་ལ། ཟས་གཞན་མ་འདྲེས་པར་ཟོས་པའི་འོག་ཏུ་སེའུ་འབྲུའི་ཁུ་བ་དང་འོ་མ་དང་། ཐང་ལ་གནས་པའི་བྱའི་ཤ་ཁུ་དང་། ཆུ་དྲོན་པོ་
[250a]
[250a.1]དང་། ཨ་ས་བའི་ཆང་དང་། ནས་ཆང་དང་། དེ་རྣམས་གང་ཡང་རུང་བ་འཐུངས་ན། སྐྱ་རྦབ་དང་། མཛེ་དང་། རིམས་དང་། མཆེར་པ་དང་། མགོ་འཁོར་བ་དང་། གཞང་འབྲུམ་དང་། མཚན་བར་རྡོལ་བ་དང་། རྨ་རྣགས་པ་དང་།
[250a.2]སྙིང་ནད་དང་། ཁུ་ཆུ་དང་། གཅིན་དང་། ཚ་བའི་ནད་ཞི་བར་བྱེད་དེ། དེ་བཞིན་དུ་སྐེམ་བྱེད་དང་། སྦྱར་བའི་དུག་དང་། དམུ་རྫིང་དང་། ལུད་པ་དང་། རྩ་བའི་ནད་དང་། ཁྲག་དང་། མཁྲིས་པ་དང་། སྐྲང་བ་དང་། སྐྲན་དང་། མགུལ་པའི་ནད་དང་། དེ་བཞིན་དུ་རྒྱུ་
[250a.3]རླུགས་དང་། མགོ་འཁོར་བ་ཡང་རི་ལུ་འདིས་འཇོམས་པར་བྱེད་དེ། ནད་ཐམས་ཅད་འཕྲོག་ཅིང་ཞི་བར་བྱེད་དོ། །རྒུན་འབྲུམ་དང་། པི་པི་ལིང་སྲང་བཅུ་དྲུག་བཅུ་དྲུག་དང་། ཤ་ཁ་ར་སྲང་ལྔ་བཅུ་དང་། དེ་བཞིན་དུ་ཤིང་མངར་དང་། བཅའ་སྒ་དང་། སྨིག་རྐང་དང་། འདི་
[250a.4]རྣམས་སྲང་གཉིས་གཉིས་ཕྱེ་མར་བྱས་ཏེ། སྐྱུ་རུ་རའི་འབྲས་བུའི་ཁུ་བ་སྲང་ལྔ་བརྒྱ་བཅུ་གཉིས་ཀྱི་ནང་དུ་བཅུག་སྟེ། མེ་ཆུང་ངུ་ལ་བསྐོལ་ཏེ་ལྡེ་གུར་གྱུར་པ་དང་ཕྱུང་ལ་བསྒྲངས་པའི་ནང་དུ། སྦྲང་རྩི་སྲང་སུམ་ཅུ་རྩ་གཉིས་དང་སྦྱར་བའི་ལྡེ་གུ་ལག་པའི་མཐིལ་དུ་བཞག་སྟེ། དེ་
[250a.5]ལས་ཞོ་གཉིས་གཉིས་ཟོས་ན། ཧ་ལི་མ་ཀ་ཞེས་བྱ་བའི་ནད་དང་། སྐྱ་རྦབ་དང་། མིག་སེར་རྣམས་སེལ་ཏོ། །ཡང་རྩ་བ་ལྔ་ཆུང་ངུའི་ཁུ་བ་དང་། རྒུན་འབྲུམ་དང་། སྐྱུ་རུ་ར་རང་གི་ཁུ་བ་དང་། བཟའ་བ་དང་། བཏུང་བ་དང་། ལྷན་ཅིག་སྦྱར་བ་བཏང་ན། སྐྱ་རྦབ་ཀྱི་
[250a.6]ནད་དང་། མིག་སེར་གྱིས་ཉམ་ཐག་པ་སེལ་ཏོ། །དེ་ལྟར་གོང་དུ་བསྟན་པ་དེ་དག་ནི་སྐྱ་རྦབ་ཀྱི་གསོ་བ་སྤྱིར་བསྟན་པ་ཡིན་ཏེ། དེ་བཞིན་དུ་སྨན་པ་མཁས་པས་ནད་སོ་སོའི་དམིགས་ཤེས་པར་བྱ་སྟེ། ཇི་ལྟར་མཐུན་མཐུན་དུ་སྦྱར་རོ། །རླུང་ལས་གྱུར་པའི་སྐྱ་རྦབ་ལ་ནི་
[250a.7]གོང་དུ་སྨོས་པ་བཞིན་དུ་སྣུམ་ཤས་ཆེར་སྦྱར་རོ། །མཁྲིས་པ་ལས་གྱུར་པ་ལ་ནི་ཁ་བ་དང་། བསིལ་བའི་བག་སྦྱར་རོ། །བད་ཀན་ལས་གྱུར་པ་ལ་ནི་རྩུབ་པ་དང་། ཚ་བ་དང་དྲོ་བའི་བག་སྦྱར་རོ། །འདུས་པ་ལས་གྱུར་པ་ལ་ནི་དེ་རྣམས་བསྲེས་པ་སྦྱར་རོ། །
[250b]
[250b.1]ཚ་བ་གསུམ་དང་། བིལ་བ་དང་། སེར་པོ་རྣམ་གཉིས་དང་། འབྲས་བུ་གསུམ་དང་། བ་སྤྲུ་བ་རྣམ་གཉིས་དང་། གླ་སྒང་དང་། ལྕགས་ཕྱེ་དང་། བྱི་དང་ག་དང་། ཐང་ཤིང་དང་། བྲིཤྩི་ཀ་ལི་དང་། ག་བྲའི་རྩ་བ་དང་། འདི་རྣམས་
[250b.2]ཆམ་ཆོམ་བརྡུངས་ཏེ། འོ་མ་དང་མར་ཚུལ་བཞིན་དུ་བསྐོལ་བ་འཐུངས་ནས་ཞག་ཟོས་པ་ལས་གྱུར་པའི་དམུ་རྫིང་གི་ནད་ཐམས་ཅད་མྱུར་དུ་ཞི་བར་བྱེད་དོ། །དེ་བཞིན་དུ་ནཱ་ག་གེ་སར་དང་། ཤིང་མངར་དང་། པི་པི་ལིང་དང་། རྩྭ་ཀུ་ཤ་དང་། འདི་རྣམས་
[250b.3]ཆམ་ཆོམ་བརྡུངས་ཏེ། འོ་མ་དང་། མར་དང་། ཚུལ་བཞིན་དུ་བསྐོལ་བ་འཐུངས་ན་ཕན་ཡོན་གོང་མ་དང་འདྲའོ། །ས་ཞག་ཟོས་པའི་སྐྱ་རྦབ་ཀྱི་ནད་པ་ས་ཞག་ལ་སྲེད་པ་ཡིན་ན་ནི། དེ་སུན་དབྱུང་བར་བྱ་བའི་ཕྱིར་བྱི་དང་ག་དང་། ནིམ་པའི་
[250b.4]ཁུ་བ་དང་། པ་ཏ་དང་། མུར་བ་འདི་རྣམས་ཀྱི་ཁུ་བ་གང་ཡང་རུང་བ་ས་ཞག་ལས་བརྐོས་པ་ཟོས་ན་ཕན་ནོ། །ས་ཞག་གི་བྱེ་བྲག་འདོད་པ་ཟོས་ནས་ནད་ཐ་དད་པ་འབྱུང་བར་གྱུར་ན་སྨན་པས་སོ་སོ་དང་མཐུན་པའི་སྨན་སྦྱར་རོ། །མིག་སེར་གྱི་ནད་ཀྱིས་བཏབ་
[250b.5]པ་ལ་ནི་མཁྲིས་པ་ལ་ཕན་པའི་སྨན་ནམ། སྐྱ་རྦབ་ལ་ཕན་པའི་སྨན་གང་ཡང་རུང་བ་སྦྱིན་ནོ། །ཨ་རུ་ར་རྡོག་མ་བརྒྱ་བསྐོལ་བའི་ཁུ་བའི་ནང་དུ། ཨ་རུ་ར་ལྔ་བཅུ་བཏགས་པའི་ཕྱེ་མ་དང་། མར་སྲང་སུམ་ཅུ་རྩ་གཉིས་དང་
[250b.6]ཚུལ་བཞིན་དུ་བསྐོལ་ཏེ། མར་ལུས་པ་ལས་རན་པར་འཐུངས་ན། སྐྲན་དང་མིག་སེར་དང་། སྐྱ་རྦབ་ཐམས་ཅད་སེལ་ཏོ། །དོང་ག་དང་། ཚ་བ་གསུམ་གྱི་ཕྱེ་མ་བུ་རམ་ཤིང་ངམ། བི་ད་རི་འམ། སྐྱུ་རུ་རའི་ཁུ་བ་གང་ཡང་རུང་
[250b.7]བའི་ནང་དུ་བཏབ་སྟེ། སྲང་གཅིག་ཙམ་འཐུངས་ན། མིག་སེར་གྱི་ནད་འཇོམས་སོ། །ཡང་ན་དན་ད་བཏགས་པའི་ཕྱེ་མ་དེའི་ཉིས་འགྱུར་གྱི་བུ་རམ་དང་བཅས་པ་ཆུ་གྲང་དང་བཏུང་བའམ། གང་ཡང་རུང་བ་དང་སྦྱར་བ་སྦྱིན་ནོ། །ཡང་ན་འབྲས་བུ་གསུམ་དང་།
[251a]
[251a.1]སླེ་ཏྲེས་དང་ནིམ་པ་འདི་རྣམས་ཀྱི་ཁུ་བ་གང་ཡང་རུང་བའི་ནང་དུ་སྦྲང་རྩི་བཏབ་སྟེ། ནང་རེ་ནང་རེ་སྦྱར་ཏེ་འཐུངས་ན། མིག་སེར་གྱིས་ཉམ་ཐག་པ་ལ་ཕན་ནོ། །སྐྱེར་པ་དང་། བཙག་ཡུག་སྣམ་དང་། སྐྱུ་རུ་ར་རྣམས་སྦྱར་བའི་མིག་སྨན་དུ་
[251a.2]སྦྱར་བ་ཡང་མིག་སེར་རྣམས་འཇོམས་སོ། །མིག་སེར་གྱིས་བཏབ་པའི་ནད་པ་ཕྱི་ས་ཏིལ་བཏགས་པའི་ཕྱེ་མ་འདྲ་བ་དཀར་པོ་འབྱུང་ཞིང་བད་ཀན་གྱིས་ལམ་འགགས་པ་ལ་ནི་བད་ཀན་དང་མཁྲིས་པ་འཇོམས་པའི་སྨན་གྱིས་གསོའོ། །ཁ་ཟས་རྩུབ་པ་དང་། གྲང་བ་དང་། ལྕི་
[251a.3]བ་དང་། མངར་བ་དང་། རྩོལ་བ་བྱས་པའི་རྒྱུ་རླུང་གིས་བད་ཀན་འཁྲུགས་པར་བྱས་ཏེ། མཁྲིས་པའི་ཕྱི་རོལ་ནས་བཏོན་པའི་དབང་གིས་སྐྱེས་བུ་དེའི་གཅིན་དང་མིག་དང་པགས་པ་རྣམས་སེར་པོར་གྱུར་ཅིང་། ཕྱི་ས་དཀར་པོར་འབྱུང་ལ་ནད་འཁྲུགས་ཏེ། ཕྱི་ས་འགགས་པ་དང་།
[251a.4]སྙིང་ལྕི་བ་ལ་སོགས་པར་གྱུར་ཏེ། དེའི་དབང་གིས་ལུས་རྗུད་པ་དང་། མེ་དྲོད་ཆུང་བ་དང་། རྩིབ་ལོགས་སུ་ཟུག་པ་དང་། སྐྱིགས་བུ་དང་། ལུད་པ་དང་། ཡི་ག་འཆུས་པ་དང་། རིམས་ཀྱིས་འདེབས་ཏེ། མཁྲིས་པས་ཡན་ལག་ཐམས་ཅད་དུ་ཁྱབ་པ་ཡིན་ལ།
[251a.5]དེ་ལ་ནི་རིམ་གྱིས་བརྡལ་ལ་གསོའོ། །དེ་ལྟར་མིག་སེར་གྱིས་ཁྱབ་པའི་ནད་པ་ལ་ནི། རྨ་བྱ་དང་། ཁྱིམ་བྱ་དང་། སྲེག་པའི་ཤ་ཁུ་དང་། ཡང་ན་ལ་ཕུག་སྐམ་པོ་དང་། རྒྱ་སྲན་གྱི་ཁུ་བཅུད་གང་ཡང་རུང་བའི་ནང་དུ་རྩུབ་པ་དང་། ཚ་བ་དང་། སྐྱུར་བ་དང་སྦྱར་བའི་
[251a.6]ཟས་སྦྱིན་ནོ། །གཞན་ཡང་ཤིན་ཏུ་ཚ་བ་དང་། སྐྱུར་བ་དང་། རྣོ་བ་དང་། ལན་ཚྭ་དང་། ཤིན་ཏུ་དྲོ་བ་རྣམས་བསྔགས་སོ། །ཁ་ལུང་གི་ཁུ་བ་ཚ་བ་གསུམ་དང་སྦྱར་བའི་ལྡེ་གུ་བལྡག་པར་བྱའོ། །དེ་ལྟར་གོང་མའི་གསོ་བ་དེ་དག་བྱས་ན། མཁྲིས་པ་རང་གི་གནས་སུ་
[251a.7]འཇུ་སྟེ། དེས་ན་ཕྱི་ས་ཡང་མདོག་ཐ་མལ་པར་འགྱུར་ཞིང་། རླུང་སྒྲ་དང་བཅས་པ་ཡང་ཞི་བར་འགྱུར་རོ། །དེ་ལྟར་མདོག་འགྱུར་ཏེ། སྔ་མ་ལས་ལོག་པ་ལྟར་སྣང་ན་ཡང་དེ་བརྟ་བར་བྱ་བའི་ཆོ་ག་བཤད་པར་བྱ་སྟེ། དེ་ལ་མིག་སེར་གྱི་ནད་གསོ་བ་འཕྱིས་ནས་དེ་
[251b]
[251b.1]ཁོང་དུ་ཞུགས་ཏེ་དཀྱེལ་དུ་གྱུར་པ་ལ་ནི་བྲག་ཞུན་དང་། མཀྵི་ཀ་ད་རུ་དང་། གསེར་གྱི་དྲི་མ་གང་ཡང་རུང་བ་བ་གཅིན་དང་སྦྱར་བ་ཟླ་བ་གཅིག་གི་བར་དུ་བསྟེན་པར་བྱའོ། །ཧ་ལི་ས་ཀ་ཞེས་བྱ་བའི་ནད་ལ་ནི། སླེ་ཏྲེས་ཀྱི་རང་གི་ཁུ་བ་དང་། འོ་མ་དང་། མ་ཧེའི་མར་འོ་མའི་ཕྱེད་དང་།
[251b.2]འདི་རྣམས་བསྐོལ་བའི་མར་གྱི་བཏུང་བ་ལ་སོགས་པས་ལུས་ཀྱི་སྣུམ་ཆོས་བྱ་སྟེ། དེ་ནས་སྐྱུ་རུ་རའི་ཁུ་བ་དང་དུར་བྱིད་དང་སྦྱར་བས་བཀྲུ་སྨན་བྱའོ། །ཁ་ཟས་ནི་མངར་བ་དང་། རླུང་དང་མཁྲིས་པ་འཇོམས་པ་གཏང་ངོ་། །དེ་བཞིན་དུ་གོང་དུ་སྨོས་པའི་རྒུན་འབྲུའི་ལྡེ་གུ་
[251b.3]དང་། མངར་བའི་སྨན་དང་སྦྱར་བའི་ཟས་བཟའ་ཞིང་འོག་ནས་སྨོས་པའི་འོ་མའི་འཇམ་རྩི་མས་གཏོང་བ་རྣམས་ཡུན་ཅི་རིང་དུ་བྱའོ། །བཏུང་བར་ནི་རྒུན་ཆང་དང་། ཨ་རི་ཏའི་ཆང་མེ་དྲོད་དང་སྦྱར་ཏེ་ཅི་རིགས་སུ་སྦྱིན་ནོ། །ཡང་ན་ཨ་རུ་རའི་ལྡེ་གུ་ལུད་པ་གསོ་བའི་སྐབས་ལས་
[251b.4]བྱུང་བའམ། ཡང་ན་པི་པི་ལིང་དང་། ཤིང་མངར་དང་། བ་ལ་དང་། དེ་རྣམས་གང་ཡང་རུང་བ་འོ་མ་དང་སྦྱར་ཏེ་ནད་གཞི་དང་མེ་དྲོད་དང་དཔགས་ལ་གཏང་ངོ་། །དེ་བཞིན་དུ་སྨན་པ་མཁས་པས་སྐྲང་ནད་གསོ་བའི་དཔྱད་ཇི་སྙེད་པས་སྐྱ་རྦབ་ཀྱི་ནད་ཐམས་ཅད་ལ་སྦྱར་རོ། །
[251b.5]གསོ་བའི་གནས་ལས་སྐྱ་རྦབ་ཀྱི་ནད་གསོ་བའི་ལེའུ་སྟེ་བཅུ་དྲུག་པ་རྫོགས་སོ།། །།དེ་ནས་འོར་ནད་གསོ་བའི་ལེའུ་བཤད་པར་བྱ་སྟེ། དེ་ལ་ནད་གཞི་ཐམས་ཅད་འདུས་པ་འམ་ལྡན་པའམ། ནད་གཞི་རེ་རེ་ལས་གྱུར་པའི་སྐྲངས་ནད་གང་ཡང་རུང་བ་མ་
[251b.6]ཞུ་བ་དང་བཅས་པ་དེ་ལ་ནི་ཐོག་མར་ལུས་ཤ་སྲི་ཞིང་སྨྱུང་བ་བྱའོ། །དེའི་འོག་ཏུ་ཁ་ཟས་ཀྱང་ཡང་བ་བཟའ་ཞིང་སྐོམ་དུ་ནི། དོང་གྲ་དང་། བོང་ང་དཀར་པོ་དང་། ཐང་ཤིང་དང་། བྱི་དང་ག་དང་། དུག་མོ་ཡུངས་དང་། ན་ལེ་ཤམ་བསྐོལ་བའི་ཆུ་དྲོན་པོ་བླུད་དོ། །ཡང་
[251b.7]ན་ཨ་རུ་ར་དང་། བཅའ་སྒ་དང་། ཐང་ཤིང་དང་། བ་སྤྲུ་བ་དང་། དེ་རྣམས་བསྐོལ་བའི་ཁུ་བ་བླུད་པའམ། ཡང་ན་སྐྱ་རྦབ་ཀྱི་ནང་དུ་བཤད་པའི་ལྕགས་ཕྱེ་ཆ་དགུ་པ་བསྐོལ་བ་བླུད་དོ། །འོར་ནད་ཤས་ཆེ་བ་ལ་ནི་དེ་དག་པར་བྱ་བའི་ཕྱིར་ཨ་རུ་རའི་ཕྱེ་མ་བ་གཅིན་དང་སྦྱར་
[252a]
[252a.1]བ་བླུད་དོ། །ཡང་ན་འབྲས་བུ་གསུམ་བསྐོལ་བའི་ནང་དུ་པུ་ཙེ་ཤེལ་དང་། དུར་བྱིད་དང་། ཚ་བ་གསུམ་གང་ཡང་རུང་བའི་ཕྱེ་མ་བཏབ་པ་བླུད་པའམ། ཡང་ན་འབྲས་བུ་གསུམ་གང་ཡང་རུང་བའི་ནང་དུ་གུ་གུལ་ལམ་བྲག་ཞུན་བཏབ་པ་བླུད་
[252a.2]པ་འམ། འོར་ནད་སྐྲངས་པ་དེ་མེ་དྲོད་ཆུང་ཞིང་མ་ཞུ་བས་ཁྱབ་སྟེ། རྟུག་པ་འགགས་པའམ། ཡང་ན་ཕྱི་ས་སླ་བར་འབྱུང་བ་ལ་ནི་ཁ་རུ་ཚ་དང་། ཚ་བ་གསུམ་སྦྲང་རྩི་དང་། དར་བ་དང་སྦྱར་བ་བཟའ་བ་འམ། ཡང་ན་ཨ་རུ་ར་དང་བུ་རམ་བཟའ་བ་འམ། ཡང་ན་
[252a.3]བུ་རམ་དང་བཅའ་སྒ་སྦྱར་བ་ཟོས་པའི་འོག་ཏུ་དར་བ་བཏུང་བར་བྱའོ། །ཡང་ན་སྒེའུ་གཤེར་དང་། བུ་རམ་ཆ་མཉམ་པ་སྦྱར་ཏེ། དང་པོའི་ཞག་སྲང་ཕྱེད་ཟོས་ལ། དེ་ནས་ཞག་བཅུའི་བར་དུ་སྲང་ཕྱེད་ཕྱེད་ཀྱིས་སྐྱེད་དེ། ཞག་བཅུ་གཅིག་པ་ནས་སྲང་ཕྱེད་ཕྱེད་ཀྱི་ཞག་
[252a.4]བཅུའི་བར་དུ་མི་བྲི་སྟེ། སྲང་ཕྱེད་དུ་ཕྱིན་པ་དང་། ཡང་ཞག་བཅུའི་བར་དུ་སྲང་ཕྱེད་ཕྱེད་ཞག་རེ་སྐྱེད་དེ། དེ་ལྟར་ཟླ་བ་གཅིག་གི་བར་དུ་ཟོས་ལ། སྨན་དེ་ཞུ་བའི་ཚོད་ཙམ་ན། བཏུང་བ་ནི། མ་ཤ་ཀའི་ཁུ་བ་དང་། འོ་མ་དང་། ཤ་ཁུ་གསུམ་བད་ཀན་དང་། མཁྲིས་
[252a.5]པ་དང་། རླུང་གང་ཡིན་པ་བརྟགས་ཏེ། ནད་གཞི་དང་རེ་རེ་ནས་སྦྱར་ཏེ་འཐུངས་ན་སྐྲན་དང་། དམུ་རྫིང་དང་། གཞང་འབྲུམ་དང་། འོར་ནད་དང་། གཅིན་ནད་དང་། དབུགས་མི་བདེ་བ་དང་། ཆམ་པ་དང་། ལུས་སྙོམ་པ་དང་། འཇུ་སྟོབས་ཆུང་བ་དང་། མིག་
[252a.6]སེར་དང་། སྐེམ་བྱེད་དང་། བརྗེད་བྱེད་དང་། སྨྱོ་བྱེད་དང་། ལུད་པ་དང་། བད་ཀན་རྣམས་སྒེའུ་གཤེར་དང་། བུ་རམ་གྱི་སྦྱོར་བ་འདི་བྱས་ན་མྱུར་དུ་རྒྱལ་བར་བྱེད་དོ། །སྒེའུ་གཤེར་གྱི་ཁུ་བ་དང་། དོང་གྲའི་ཕྱེ་མ་དང་། འོ་མ་དང་མར་ལྷན་ཅིག་བསྐོལ་ཏེ། རན་པར་འཐུངས་
[252a.7]ན་འོར་ནད་དང་། ཆམ་པ་ན་བ་དང་། དམུ་རྫིང་དང་། མེ་དྲོད་ཉམས་པས་ཉམ་ཐག་པ་རྣམས་ཞི་བར་བྱེད་དོ། །མ་ཞུ་བ་མེད་བཞིན་དུ་ཕྱི་ས་འགགས་ཤིང་འོར་ནད་ཀྱིས་ཉམ་ཐག་པ་ལ་ནི། ཚ་བ་གསུམ་དང་། དུར་བྱིད་དང་། དན་ཏི་དང་། ཀྲུ་ཏྲུག་ཏྲེས་དང་། དེ་རྣམས་འོ་མ་དང་
[252b]
[252b.1]བསྐོལ་ཏེ་བླུད་དོ། །བའམ་མ་ཧེ་གང་ཡང་རུང་བའི་གཅིན་དང་། འོ་མ་བཏུང་ཞིང་བཟའ་བ་ཡང་འོ་མ་དང་བཅས་པར་བྱའོ། །ཞག་བདུན་ནམ་ཡང་ན་ཟླ་བ་གཅིག་གི་བར་དུ་རྔ་མོའི་འོ་མ་ཉི་ཚེས་ཉམས་བརྟ་བར་བྱའོ། །ཏི་མུ་ས་དང་། ནས་ཚིག་འཁུས་པའི་ཐལ་བ་
[252b.2]དང་། ལ་ལ་ཕུད་དང་། ཚ་བ་རྣམ་ལྔ་དང་། ན་ལེ་ཤམ་དང་། སེའུ་འབྲུ་དང་། པ་ཐ་དང་། འུ་སུ་དང་། སྟར་བུ་དང་། བ་ལ་དང་། བིལ་བ་དང་། དེ་རྣམས་ཞོ་གཉིས་གཉིས་དང་། ཆུ་སྲང་ལྔ་བརྒྱ་རྩ་བཅུ་གཉིས་དང་མར་སྲང་སུམ་ཅུ་རྩ་གཉིས་དང་བསྐོལ་ཏེ་
[252b.3]མར་ལུས་པ་དང་། དེ་ལས་རན་པར་འཐུངས་ན་འོར་ནད་དང་། གཞང་འབྲུམ་དང་། སྐྲན་དང་། གཅིན་ནད་རྣམས་འཇོམས་སོ། །ཙི་ཏྲ་ཀའི་ཕྱེ་མ་འོ་མའི་ནང་དུ་བཏབ་སྟེ་ཞོར་རེད་པ་དང་། དེ་ལས་བྱུང་བའི་མར་སར་དར་བ་དང་བཅས་པའི་ནང་དུ་ཡང་ཙི་ཏྲ་ཀའི་
[252b.4]ཕྱེ་མས་བཏབ་སྟེ་བསྐོལ་ལ། མར་ལུས་པ་ལས་རན་པར་འཐུངས་ན། ཕན་ཡོན་གོང་མ་དང་འདྲའོ། །ནད་ཀྱི་སྟོབས་དང་། དུས་ཤེས་པའི་སྨན་པས་ཐང་ལ་འབར་གྱིས་སྨན་མར་གཅིན་ནད་ཀྱི་སྐབས་ལས་འབྱུང་བ་དང་། ཏིག་ཏ་ཆེན་པོའི་སྨན་མར་མཛེ་ནད་གསོ་བ་
[252b.5]ལས་བཤད་པ་དང་། དགེ་བའི་སྨན་མར་སྨྱོ་བྱེད་ཀྱི་ནང་ནས་འབྱུང་བ་དང་། ཨ་རུ་རའི་སྨན་མར་དམུ་རྫིང་ལས་བཤད་པ་རྣམས་ཅི་རིགས་པར་སྦྱར་རོ། །རྩ་བ་བཅུ་པ་སྲང་སུམ་ཅུ་རྩ་གཉིས་དང་། མར་སྲང་སུམ་ཅུ་རྩ་གཉིས་དང་། མར་གྱི་བཅུ་དྲུག་འགྱུར་གྱི་ཆུ་དང་། ཨ་
[252b.6]རུ་ར་དང་བུ་རམ་སྲང་བརྒྱད་དང་། འདི་རྣམས་བསྐོལ་བའི་ནང་དུ་དྲི་སྣ་གསུམ་དང་། ཚ་བ་གསུམ་དང་། ནས་ཚིག་འཁུས་པའི་ཐལ་བ་ཅུང་ཟད་ཙམ་དང་། འདི་རྣམས་ཀྱི་ཕྱེ་མ་བཏབ་སྟེ་ལྡེ་གུར་གྱུར་པ་དང་། བསྒྲངས་པའི་ནང་དུ་སྦྲང་རྩི་སྲང་བཅུ་དྲུག་བཏབ་སྟེ། དེ་
[252b.7]ལས་རན་པར་བལྡགས་ན། འོར་ནད་ཚབས་ཆེ་བ་དང་། རིམས་དང་སྐྲན་དང་། གཅིན་ནད་དང་། ལུས་སྐེམ་ཞིང་རིད་པ་དང་། མ་ཞུ་བ་དང་། ཁྲག་མཁྲིས་དང་། རླུང་དང་། སྒྲེགས་པ་སྐྱུར་པོར་འབྱུང་བ་དང་། མདོག་འགྱུར་བ་དང་། གཅིན་དང་། རླུང་
[253a]
[253a.1]དང་། ཁུ་ཆུའི་ནད་དང་། དབུགས་མི་བདེ་བ་དང་། ཡི་ག་འཆུས་པ་དང་། མཆེར་པ་ན་བ་དང་། སྦྱར་བའི་དུག་དང་། དམུ་རྫིང་རྣམས་སེལ་ཏོ། །ནས་དང་འབྲས་རྙིང་པའི་ཁ་ཟས་རྩ་བ་བཅུ་པའི་ཁུ་བ་ལས་གཞི་བླངས་ལ། ལན་
[253a.2]ཚྭ་དང་སྣུམ་ཉུང་ཤས་བཏབ་སྟེ་བྱིན་ན་འོར་ནད་ལ་ཕན་ནོ། །རྒྱ་སྲན་ཀུ་ལད་ཐ་དང་། མོན་སྲན་སྡེའུའི་ཁུ་བཅུད་ཐལ་སྨན་དང་། ཚ་བ་གསུམ་དང་ལྡན་པ་དང་། དེ་བཞིན་དུ་སྲོག་ཆགས་ཐང་ལ་གནས་པ་རུས་སྦལ་དང་། གོད་དང་། ཤ་ཡ་ཀ་དང་། འདི་རྣམས་
[253a.3]ཀྱི་ཤ་ཁུ་པི་པི་ལིང་དང་སྦྱར་བ་ཟོས་ན་ཡང་འོར་ནད་འཇོམས་སོ། །བཏུང་བ་ནི་དར་བ་མི་སྐྱུར་བ་འམ་ཡང་ན་རྒུན་ཆང་དང་། ཨ་རིཥྚའི་ཆང་དང་། ཨ་ས་བའི་ཆང་གང་ཡང་རུང་བ་ཚ་བ་གསུམ་དང་ལྡན་པ་སྦྱིན་ནོ། །ཡང་ན་ཟི་ར་དང་ཟུར་པ་དང་། ཛི་བན་ཏི་དང་། ཀ་
[253a.4]ར་བཱི་ར་དང་། མ་ནུ་དང་། ཙི་ཏྲ་ཀ་དང་། བིལ་པའི་རྐང་དང་། ཡ་བཀྵ་ར་དང་། ད་ཏྲི་ག་དང་། འདི་རྣམས་རེ་རེ་ཡང་རྒྱ་ཤུག་གི་འབྲས་བུའི་ཚད་དང་ལྡན་པའི་ཐུག་པ་མར་དང་ཏིལ་མར་སྦྱར་ཏེ་འཐུངས་ན། འོར་ནད་དང་། སྐྲང་པ་ལ་ཕན་པའི་མཆོག་ཡིན་ཏེ།
[253a.5]དེ་བཞིན་དུ་འཁྲུ་བ་དང་། སྙིང་ནད་དང་། སྐྲན་དང་། གཞང་འབྲུམ་དང་། མེ་དྲོད་ཆུང་བ་དང་། གཅིན་ནད་རྣམས་ལ་ཕན་ནོ། །དེ་བཞིན་དུ་ཚ་བ་རྣམ་ལྔ་རྒྱ་ཤུག་གི་ཚད་ཙམ་དང་། མར་དང་ཏིལ་མར་དུ་བརྔོས་པའི་ཐུག་པ་འཐུངས་ན་ཡང་ཕན་ཡོན་དེ་དང་འདྲའོ། །
[253a.6]ཡང་ན་རྡོ་དྲེག་དང་། རུ་རྟ་དང་། སྟོ་ནེ་ཡ་དང་། ཧ་རེ་ཎུ་ཀ་དང་། ཨ་རུ་ར་དང་། ཤུག་པ་དང་། ཤྲི་བེཤྟ་ཀ་དང་། ཆུ་སྲིན་སེན་མོ་དང་། འབུ་སུ་ཧང་དང་། ཐང་ཤིང་དང་། བྲི་ཡང་ཀུ་དང་། སྤང་སྤོས་དང་། པི་པི་ལིང་དང་། དབྱི་མོ་དང་། ཀུ་ཏན་ན་ཏ་དང་། བྱ་མ་
[253a.7]ཀ་དང་། བ་ལ་ཀ་དང་། དྲི་སྣ་བཞི་དང་། བལ་བུའི་ལོ་མ་དང་། གླ་སྒང་དང་། གནྡྷ་པ་ལ་ཤ་དང་། འདི་རྣམས་བཏགས་པའི་ཕྱེ་མ་ཏིལ་མར་དང་སྦྱར་བས་བསྐུ་བ་དང་ཕྱེ་མ་ཆུ་དང་སྦྱར་བའི་ཁྲུས་དང་། ལྡེ་གུའི་བྱུག་པ་རྣམས་བྱའོ། །ཡང་ན་ནིམ་པ་དང་། བ་སྤྲུ་བ་མེ་ཏོག་
[253b]
[253b.1]དམར་པོ་ཅན་དང་། ནག་ཏ་མ་ལ་དང་། ཨརྐ་བསྐོལ་བའི་ཆུས་ཁྲུས་བྱའོ། །ཡན་ལག་ཕྱོགས་གཅིག་སྐྲངས་པ་ལ་ནི་བ་སྤྲུ་བ་དང་། ཀ་ར་བཱི་ར་དང་། ཀིང་ཤུ་ཀ་དང་། བྱི་ཤ་ལ་དང་། འབྲས་བུ་གསུམ་དང་། སེང་ཕྲོམ་དང་། ན་ལི་ཀ་ཞེས་བྱ་བ་ཀ་པོ་ད་ཙ་ར་ན་དང་།
[253b.2]ཐང་ཤིང་དང་། སྤང་སྤོས་དང་། ཀོ་ཤ་ཏ་ཀི་དང་། བོང་ང་དཀར་པོ་དང་། ཏ་ལའི་ལོ་མ་དང་། ཛ་ཡན་ཏི་ཞེས་བྱ་བ་ཏང་ག་རི་དང་། འོལ་མ་སེ་དཀར་པོ་དང་། ཀ་ཀ་ད་ནི་དང་། སཱ་ལའི་ཤིང་དང་། དབྱི་མོ་དང་། བྲི་ཤ་ཀར་ནི་དང་། བྲི་ཏི་དང་། རིད་དྷི་དང་། ཧསྟི་ཀར་
[253b.3]ཎ་ཞེས་བྱ་བ་ཨེ་རཎྜ་དང་། འདི་རྣམས་བཏགས་པའི་ཕྱེ་མ་ཆུ་དྲོ་འཇམ་ཙམ་དང་ལྡེ་གུར་བྱས་ཏེ་བསྐུས་ན་ཕན་ནོ། །རླུང་ལས་གྱུར་པའི་འོར་ནད་སྐྲངས་པ་ལ་ནི་ཟླ་བ་ཕྱེད་ཀྱི་བར་དུ་དུར་བྱིད་དང་མར་སྦྱར་བ་འམ་ཡང་ན་ཨེ་རཎྜའི་མར་འབའ་ཞིག་བཏུང་ངོ་། །རླུང་གིས་
[253b.4]རྟུག་པ་འགགས་པ་ལ་ཡང་སྦྱོར་བ་དེ་ཉིད་བྱའོ། །ཨེ་རཎྜའི་མར་འོ་མ་འམ་ཤ་ཁུ་དང་ལྡན་བར་ཟས་ཀྱི་གོང་དུ་བཟའོ། །རླུང་གི་སྐྲངས་ནད་ལ་ནི་རླུང་འཇོམས་པའི་སྨན་གྱིས་བསྐུ་བྱུག་བྱའོ། །ཡན་ལག་ཕྱོགས་གཅིག་སྐྲངས་པ་ལ། ཁ་ལུད་དང་། ཨག་ནི་མན་ཐ་
[253b.5]དང་། སྤང་སྤོས་དང་། བཅའ་སྒ་དང་། ཐང་ཤིང་དང་། དེ་རྣམས་ཀྱི་ལྡེ་གུས་བསྐུའོ། །མཁྲིས་པ་ལས་གྱུར་པའི་འོར་ནད་ལ་ནི་ཏིག་ཏའི་སྨན་མར་རམ། ནྱ་གྲོ་དྷའི་སྡེ་ཚན་མར་དང་བསྐོལ་བས་བསྐུའོ། །སྐོམ་དད་ཆེ་བ་དང་། རྨོངས་བག་ཏུ་འདུག་པ་དང་། ལུས་ཚ་
[253b.6]བ་ལ་ནི་འོ་མ་དང་མར་དང་བྱུག་པ་དང་བསྐུ་བ་གྲང་མོ་བྱས་པས་རབ་ཏུ་ཕན་ནོ། །ཡང་ན་པ་ཏོ་ལའི་རྩ་བ་དང་། ཀྱི་ལྕེ་བ་དང་། ཤིང་མངར་དང་། པུ་ཙེ་ཤེལ་དང་། ཨ་རུ་ར་དང་། ཐང་ཤིང་དང་། སྐྱེར་བ་དང་། ཙནྡན་དང་། དན་ད་དང་། བི་ཤ་ལ་དང་། ལྕང་མ་དང་།
[253b.7]པི་པི་ལིང་དང་། འདི་རྣམས་མར་དང་ལྷན་ཅིག་བསྐོལ་ཏེ་འཐུངས་ན་ཁོང་པ་ཚ་བ་དང་། སྐོམ་དད་ཆེ་བ་དང་། མགོ་འཁོར་བ་དང་། འདུས་པའི་ནད་དང་། མེ་དབལ་དང་། སྐྲང་བ་དང་། ལུས་ཚ་བ་དང་། རིམས་མི་བཟད་པ་རྣམས་སེལ་ཏོ། །བད་ཀན་ལས་གྱུར་པའི་འོར་ནད་ལ་ནི་དོང་གའི་སྡེ་
[254a]
[254a.1]ཚན་ཏིལ་མར་དང་བསྐོལ་བ་བླུད་དོ། །རྩ་རྒྱུན་འགགས་པ་དང་མེ་དྲོད་ཆུང་བ་དང་ཡི་ག་འཆུས་པ་དང་། རྨོངས་བག་ཏུ་འདུག་པ་ལ་ནི་ཐལ་སྨན་ཨ་ས་བའི་ཆང་དང་། ཨ་རིཥྚའི་ཆང་དང་། བ་གཅིན་དང་། དར་བ་དང་ལྷན་
[254a.2]ཅིག་བསྐྱོས་ཏེ་གཏང་ངོ་། །པི་པི་ལིང་དང་། ཏིལ་མར་ལ་སོགས་པའི་ཚིགས་མ་རྙིང་པ་དང་། ཤི་ཀྲུའི་ཤུན་པ་དང་། ཟར་མ་དང་འདི་རྣམས་བཏགས་པའི་ཕྱེ་མ་བ་གཅིན་དྲོ་འཇམ་ཙམ་དང་སྦྱར་ཏེ་བྱུག་པ་དང་། ལུས་དྲིལ་བ་ལ་སོགས་པ་བྱའོ། །རུ་རྟ་དང་། ཨག་ནི་
[254a.3]མནྠ་དང་། ཙིཏྲ་ཀ་དང་། རྒྱ་སྲན་དང་། དོང་གྲ་རྣམས་པ་གཅིན་དང་ཆུ་དང་ཚུལ་བཞིན་བསྐོལ་བའི་ཆུས་ལུས་ཁྲུས་བྱའོ། །ཙ་རོང་དང་། ཨ་ཀ་རུའི་ལྡེ་གུས་ལུས་བྱུག་གོ། །ཀ་ལ་ཞེས་བྱ་བ་ནཱ་ག་བ་ལ་དང་། ཨ་ཛ་ཤྲིང་གི་དང་། ཀོ་ཉོན་ཙེ་དང་། ཨ་ཛ་གནྡྷ་དང་། ཨ་ཤྭ་
[254a.4]གནྡྷ་དང་། ཨམ་པཥྚ་དང་། འདི་རྣམས་སྦྱར་བའི་ལྡེ་གུ་ནི་ཡན་ལག་ཕྱོགས་གཅིག་སྐྲངས་པ་ལ་རབ་ཏུ་བསྔགས་སོ། །ཡང་ན་རླུང་ལ་སོགས་པའི་ནད་གཞི་ཤེས་པར་བྱས་ལ། ཉེས་པ་ཇི་ལྟ་བ་བཞིན་དུ་གཏར་ག་བྱས་ཏེ་ཁྲག་དབྱུང་ངོ་། །ནད་གཞི་རྣམས་འདྲེས་ན་གང་
[254a.5]ཤས་ཆེ་བ་བརྟགས་ཏེ་ཐོག་མར་དེ་གསོ་བར་བྱའོ། །ཐ་ཝེ་དང་། པ་ཐ་དང་། གླ་སྒང་དང་། ཚ་བ་སྣ་ལྔ་དང་། ཀཎྜ་ཀ་རི་དང་། སྐྱེར་པ་དང་། དེ་རྣམས་ཆུ་དྲོན་དང་སྦྱར་ཏེ་གཏང་བ་འམ། ཡང་ན་ཏིག་ཏ་དང་། བཅའ་སྒ་དང་དེ་གཉིས་ཆུ་དྲོན་ལ་སྦྱར་ཏེ་འཐུངས་ན། ནད་གཞི་
[254a.6]གསུམ་ལས་གྱུར་པའི་འོར་ནད་ཡུན་རིང་དུ་ལོན་ཏེ་ཚབས་ཆེ་བ་ཡང་ཞི་བར་བྱེད་དོ། །བདུད་རྩི་རྣམ་པ་གཉིས་ཤེས་བྱའོ། །སླེ་ཏྲེས་དང་། ཨ་རུ་ར་དང་། བ་སྤྲུ་བ་དང་། ཐང་ཤིང་དག་གུ་གུལ་དང་། དེ་རྣམས་བ་གཅིན་དང་སྦྱར་ཏེ་འཐུངས་ན། སྐྲང་པ་དང་། དམུ་རྫིང་
[254a.7]དང་། མཛེ་དང་། སྐྱ་རྦབ་དང་། སྲིན་བུའི་ནད་དང་། བད་ཀན་དང་གཅིན་ནད་དང་རླུང་སྟོད་དུ་ཞུགས་པ་རྣམས་འཇོམས་སོ། །གོང་དུ་སྨོས་པ་དེ་དག་ནི་ནད་གཞི་ལས་འོར་ནད་ལས་སྐྲངས་པའི་གསོ་བ་བཤད་པ་ཡིན་ནོ། །དེ་ལ་སྣད་པ་ལས་གྱུར་པ་ལ་ནི་ཁྲག་དབྱུང་
[254b]
[254b.1]བས་ནད་སྦྱང་བར་བྱ་སྟེ། དེ་ནས་སྨན་བསིལ་བའི་ནུས་པ་དང་ལྡན་པ་དང་། མར་བསྲེས་པ་བསྐུ་བ་དང་། བྱུག་པ་རྣམས་བྱའོ། །དུག་གིས་ཕོག་པའི་འོར་ནད་ལ་ནི་དུག་གི་གསོ་བ་རྣམས་འདིར་སྦྱར་རོ། །སྲོག་ཆགས་ཆུ་དང་ཐང་གཉི་ག་ལ་གནས་པ་དང་། རྗུད་པའི་
[254b.2]ཤ་དང་། པ་ཏོ་ལ་ལ་སོགས་པ་ཚོད་མའི་ལོ་མ་སྐམ་པོ་དང་། ཏིལ་དང་། བུ་རམ་ལས་བྱས་པའི་ཁ་ཟས་དང་། འབྲས་ལ་སོགས་པ་བཏགས་པའི་ཟས་དང་། ཞོ་དང་ལན་ཚྭར་བཅས་པ་དང་། ཟས་ཀྱི་མི་བག་ཅན་དང་། ཆང་སྐྱུར་དང་། ཡོས་དང་། ཤ་སྐམ་དང་།
[254b.3]ཕན་གནོད་བསྲེས་པའི་ཟས་དང་། ཟས་ལྕི་བ་དང་། ཟས་མི་བསོད་པ་དང་། ལུས་ཟ་བར་བྱེད་པའི་ཟས་དང་ཉིན་པར་ཉལ་བ་དང་། ཉལ་པོ་རྣམས་སྤང་བར་བྱའོ། །གཞན་ཡང་སྐྲང་བར་འགྱུར་བའི་བཟའ་བཏུང་ཐམས་ཅད་སྤང་ཞིང་དོར་རོ། །གསོ་བའི་གནས་
[254b.4]ལས་འོར་ནད་གསོ་བའི་ལེའུ་སྟེ་བཅུ་བདུན་པ་རྫོགས་སོ།། །།དེ་ནས་མེ་དབལ་གསོ་བའི་ལེའུ་བཤད་པར་བྱ་སྟེ། དེ་ལ་ཐོག་མར་མེ་དབལ་བྱུང་བ་ལ་ནི་སྨྱུང་བ་དང་། རྩུབ་ཆོས་དང་། ཁྲག་དབྱུང་བ་དང་། སྐྱུག་སྨན་དང་། ཁྲུས་སྨན་རྣམས་
[254b.5]བྱའོ། །ཁ་ཅིག་ཏུ་ནི་སྣུམ་ཆོས་བྱ་ཞེས་ཟེར་རོ། སྐྱུག་སྨན་ནི་པོ་སོན་ཆ་དང་། དུག་མོ་ཡུངས་དང་ཤིང་མངར་སྦྱར་བ་འམ། ཡང་ན་ཏིལ་དང་། ནིམ་པའི་ལོ་མ་དང་། པོ་སོན་ཆ་སྦྱར་བ་རྣམས་ཀྱི་སྐྱུག་སྨན་བཏང་ན་མེ་དབལ་ལ་ཕན་ནོ། །མེ་དབལ་ནང་དུ་ཞུགས་པ་ལ་
[254b.6]ནི་ཁྱད་པར་དུ་ཀྱི་ལྕེ་བ་དང་། རྒུན་འབྲུམ་དང་། འབྲས་བུ་གསུམ་དང་། དེ་རྣམས་ཀྱི་ཁུ་བ་གང་ཡང་རུང་བའི་ནང་དུ་དུར་བྱིད་བཏབ་པ་འམ། ཡང་ན་འོ་མ་དང་། མར་དང་། དུར་བྱིད་ཀྱི་ཕྱེ་མ་དང་སྦྱར་བའི་བཀྲུ་སྨན་བྱའོ། །ནད་གཞི་ཆུང་སྟེ་སློན་ཁྲུས་མི་དགོས་པ་ལ་
[254b.7]ནི། ཙནྡན་དང་ཨུཏྤ་ལ་སྦྱར་བ་འམ། ཡང་ན་གླ་སྒང་དང་། ནིམ་པ་དང་། པ་ཏོ་ལ་དང་། པུ་ཙེ་ཤེལ་གྱི་སྡེ་ཚན་དང་ལྷན་ཅིག་སྦྱར་བས་ཞི་བར་བྱའོ། །ཡང་ན་ཐལ་ཏྲེས་དང་། སྐྱུ་རུ་ར་དང་། པུ་ཤེལ་ཙེ་དང་། གླ་སྒང་རྣམས་ལྷན་ཅིག་བསྐོལ་བའི་ཆུས་ཞི་བར་བྱའོ། །
[255a]
[255a.1]མེ་དབལ་གྱི་ནད་སྐོམ་དད་ཆེ་བ་ལ་ནི། བྱི་ཚེར་བ་དང་། བར་པ་ཏ་དང་། སླེ་ཏྲེས་དང་། བཅའ་སྒ་དང་། དེ་རྣམས་བསྐོལ་བའི་ཁུ་བའམ་ཡང་ན་གྲངས་པ་བླུད་དོ། །ཡང་ན་སྐྱེར་པ་དང་པ་ཏོ་ལ་དང་། པུ་ཙེ་ཤེལ་དང་། སྲན་ཆུང་དང་།
[255a.2]འབྲས་བུ་གསུམ་དང་། ནིམ་པ་དང་། ཤིང་མངར་དང་། ཀྱི་ལྕེ་བ་བསྐོལ་ཏེ་མར་དང་ལྷན་ཅིག་འཐུངས་ན་མེ་དབལ་གྱི་ནད་སྐོམ་དད་ཆེ་བ་ལ་ཕན་ནོ། །མེ་དབལ་གྱི་ནད་ཡན་ལག་རྣམས་སུ་ནད་ཁྲག་ཡོད་པ་ལ་ནི་ཐོག་མར་ནད་གཞི་ཇི་ལྟ་བ་བཞིན་དུ་ལྕེ་ལ་སྲིན་བུ་
[255a.3]པད་པ་དང་ཀུ་བ་རྣམས་ཀྱིས་ཁྲག་དབྱུང་ངོ་། །གལ་ཏེ་གཏར་ག་མ་བྱས་ན་ནི་ཁྲག་རྣག་ཏུ་འགྱུར་ཏེ། པགས་པ་དང་ཤ་དང་རུས་པ་རྣམས་སུ་ཞུགས་པར་འགྱུར་རོ། །སྦྱོར་བ་དེ་དག་གིས་མ་ཞུ་བ་མེད་ཅིང་བད་ཀན་ཟད་དོ། །མཁྲིས་པ་དང་རླུང་ཤས་ཆེ་བར་གྱུར་པ་ལ་ནི་
[255a.4]ཏིག་ཏའམ། ཏིག་ཏ་ཆེན་པོའི་སྨན་མར་མཁྲིས་པའི་མཛེ་ནད་ཀྱི་སྐབས་སུ་བཤད་པའམ། ཀྱི་ལྕེའི་སྨན་མར་རྣམས་གཏང་ངོ་། །དེ་ལྟར་གཏར་ག་དང་སློན་ཁྲུས་ཀྱིས་ཁོང་པའི་མེ་དབལ་དག་སྟེ། རླུང་ལ་སོགས་པའི་ནད་གཞིའི་དབང་གིས་པགས་པ་དང་ཤ་ལ་བརྟེན་པ་
[255a.5]ལ་ནི་ཕྱི་རོལ་ནས་བྱུག་པ་བྱས་ནས། མེ་དབལ་དེ་མ་ཐག་ཞི་བར་བྱེད་དོ། །དེ་ཡང་རླུང་ལས་གྱུར་པའི་མེ་དབལ་ནི་ཤུ་ཏི་དང་། གླ་སྒང་དང་། བ་ར་ཧི་དང་། འོད་མ་དང་། ཨར་ཏ་ཀ་ལ་དང་། འུ་སུ་དང་། ཐང་ཤིང་དང་། པི་པི་ལིང་དང་། ཤི་ཀྲུ་དང་། རུ་རྟ་དང་། འདི་
[255a.6]རྣམས་ཀྱི་བྱུག་པ་བྱས་ན་ཕན་ནོ། །མཁྲིས་པ་ལས་གྱུར་པ་ལ་ནི་ནྱ་གྲོ་དྷ་ལ་སོགས་པའི་སྡེ་ཚན་ནམ། དེ་བཞིན་དུ་པདྨ་དང་། ཨུཏྤ་ལ་དང་། ཉ་ལྕིབས་དང་། ཆུའི་ནང་གི་འདམ་བག་དང་། པདྨའི་རྩ་བ་དང་། སྲིང་ག་ཏ་ཀ་དང་། ཤ་ཁ་ར་དང་། ཙནྡན་དང་།
[255a.7]བ་ལ་ཀ་དང་། མུ་ཏིག་དང་། ནོར་བུ་དང་། བཙག་ཡུག་སྣམ་དང་། པ་ཡ་སྱ་དང་། པྲ་པུཎྜ་རཱི་ཀ་དང་། ཤིང་མངར་དང་། ཤུག་པ་དང་། མར་དང་། འོ་མ་དང་། དེ་རྣམས་སྦྱར་བའི་བྱུག་པ་བྱ་བའམ། ནྱ་གྲོ་དྷའི་རྩ་བ་གཞོན་ནུ་དང་། ཆུ་ཤིང་གི་སྙིང་པོ་རྣམས་
[255b]
[255b.1]ལན་བརྒྱར་བཀྲུས་པའི་མར་དང་ལྡེ་གུར་བྱས་པའམ། ཡང་ན་པདྨའི་ཚོགས་མར་དང་སྦྱར་བ་གོང་མ་ལྟར་བྱས་པས་བྱུག་པ་བྱའོ། །ཡང་ན་པདྨ་སྐྱེས་པའི་འདམ་བག་གྲང་མོའམ། ཡང་ན་མུ་ཏིག་དང་། དུང་དང་། བྱི་རུ་དང་། ཉ་ཕྱིས་དང་། བཙག་ཡུག་སྣམ་དང་། འདི་
[255b.2]རྣམས་གང་ཡང་རུང་བ་བཏགས་པས་བྱུག་གོ །བད་ཀན་ལས་གྱུར་པའི་མེ་དབལ་ལ་ནི་འབྲས་བུ་གསུམ་དང་། ཤུག་པ་དང་། པུ་ཤེལ་ཙེ་དང་། བཙོད་དང་། ཀ་ར་བཱི་ར་དང་། འདམ་བུའི་རྩ་བ་དང་། ཨ་ནན་དའི་རྩ་བ་དང་། འདི་རྣམས་ཀྱི་ལྡེ་གུས་བསྐུས་ན་ཕན་ནོ། །
[255b.3]ཡང་ན་ད་བ་དང་། ལོ་མ་བདུན་པ་དང་། སེང་ལྡེང་དང་། ཐང་ཤིང་དང་། ཀུ་སྨན་ད་ཀ་དང་། གླ་སྒང་དང་། དོང་ག་འདི་རྣམས་ཀྱི་ལྡེ་གུ་འམ། ཡང་ན་བར་ནའི་སྡེ་ཚན་གྱི་ལྡེ་གུས་བསྐུའོ། །ཡང་ན་དོང་གའི་ལོ་མ་དང་། སླེ་སྨན་ཏ་ཀའི་ཤུན་པ་དང་། ཨིནྡྲ་བ་རུ་ནའི་
[255b.4]ལོ་མ་དང་། ཀ་ཀ་ཧྭ་དང་། ཤི་རི་ཤའི་མེ་ཏོག་དང་། འདི་རྣམས་ཀྱི་ལྡེ་གུས་བྱུག་གོ། །གོང་དུ་སྨོས་པའི་བྱུག་པ་སྦྱོར་བ་སྨན་ཤ་ཏ་པུཥྤ་ལ་སོགས་པ་དེ་དག་ཉིད་ཀྱིས་སོ་སོའི་ནད་གཞི་བཞིན་དུ་བྱུགས་པ་དང་། བསྐུ་བྱུག་དང་། སྨན་མར་དང་། ཕྱེ་མ་རྣམས་ཀྱང་དེ་ལས་བྱའོ། །
[255b.5]གང་ཡང་རླུང་ཤས་ཆེ་བ་ལ་ནི་སྨན་མར་ཤས་ཆེར་གཏང་ངོ་། །བད་ཀན་གྱི་གནས་སུ་མེ་དབལ་མ་ཞུ་བ་དང་བཅས་པ་ལ་ནི་དྲོ་བ་དང་། རྩུབ་པ་ཆེར་སྦྱར་རོ། །མཁྲིས་པའི་གནས་སུ་ཞུགས་པ་ལ་ནི་བསིལ་བ་དང་མར་དང་ལྡན་པར་སྦྱར་རོ། །ཤིན་ཏུ་བསིལ་བག་དང་ལྡན་པའི་
[255b.6]ཤིང་མངར་དང་སྦྱར་བས་བྱུགས་ཏེ། རས་སྲབ་མོས་ཕྱི་རོལ་ནས་དཀྲིས་ལ་དེ་ལྟར་ཡང་དང་ཡང་དུ་བརྗེ་ཞིང་ལན་མང་དུ་བྱའོ། །གལ་ཏེ་བར་བར་དུ་ཐག་ཁྱེར་ན་ནི་ནུས་པ་ཆུང་བར་འགྱུར་རོ། །ལྡན་པའི་ནད་ལ་ནི་གང་གི་སྦྱོར་བ་གཉིས་གཉིས་བསྲེས་ཏེ་བཏང་ན་ཕན་པའི་
[255b.7]མཆོག་ཡིན་ནོ། །དེ་དང་འདྲ་བའི་མེ་དབལ་ལ་ནི་མར་ལན་བརྒྱར་བཀྲུས་པའི་མར་ཉི་ཚེས་བསྐུ་བར་བྱའོ། །ཡང་ན་མར་གྱི་སྙིང་ཁུའམ། ཤིང་མངར་བསྐོལ་བའི་ཁུ་བའམ། ཁ་ར་དཀར་པོ་བསྐོལ་པའི་ཆུའམ། པདྨ་འམ། ཨུཏྤ་ལའི་ཆུའམ། འོ་མ་འམ།
[256a]
[256a.1]བུ་རམ་ཤིང་བཀོལ་བའི་ཁུ་བའམ། དེ་རྣམས་གང་ཡང་རུང་བ་གྲང་མོའི་རྒྱུན་བླུགས་སོ། །ཏིག་ཏ་ཆེན་པོའི་སྨན་མར་ནི་མེ་དང་འདྲ་བའི་མེ་དབལ་ལ་བཏུང་བ་དང་། བྱུག་པ་དང་བླུགས་པ་རྣམས་བྱས་ན་ཕན་པའི་མཆོག་ཡིན་ནོ། །མཛེར་
[256a.2]པ་ལྟ་བུའི་མེ་དབལ་ལ་ནི་ཁྲག་མཁྲིས་གསོ་བའི་བྱ་བ་ཇི་སྐད་བཤད་པ་བཞིན་དུ་གསོ་བ་ལྟར་བྱའོ། །དེ་བཞིན་དུ་བད་ཀན་དང་རླུང་འཇོམས་པའི་སྨན་དང་ཟན་དུགས་དང་། བྱུག་པ་ལ་སོགས་པ་བྱས་ན་ཕན་ནོ། །ཡང་ན་མཛེར་པ་ལྟ་བུའི་མེ་དབལ་ཟུག་གཟེར་དང་
[256a.3]བཅས་པ་ལ་ནི་རྩ་བ་བཅུ་པ་དང་། ཏིལ་མར་བསྐོལ་བ་དྲོན་པོ་འམ། བ་གཅིན་དྲོན་པོ་འམ། ཆུ་དྲོན་མོ་གང་ཡང་རུང་བས་བླུགས་པར་བྱའོ། །ཡང་ན་ཤི་ཀྲུའམ། ནག་ཏ་མ་ལ་དང་། ལ་ཕུག་སྐམ་པོ་དང་། བ་རུ་ར་དང་དེ་རྣམས་གང་ཡང་རུང་བའི་ཕྱེ་མ་ཆུ་དྲོན་པོ་དང་
[256a.4]ལྡེ་གུར་བྱས་ཏེ། མཛེར་པ་ལྟ་བུའི་མེ་དབལ་ལ་བསྐུའོ། །དན་ཏི་དང་། ཙི་ཏྲ་ཀ་དང་། ཤིང་ཚ་དང་། ཤྲཱི་ཁཎྜ་དང་། ཨརྒའི་ལོ་མ་དང་། བུ་རམ་དང་། གོ་བྱེའི་རུས་པ་དང་། ནག་ཚུར་དང་། འདི་རྣམས་ལྡེ་གུར་བྱས་པས་བསྐུས་ན་ཕྱི་རོལ་གྱི་རྡོ་ཡང་འབིགས་པར་
[256a.5]འགྱུར་ན་བད་ཀན་ལས་གྱུར་པའི་མེ་དབལ་མཛེར་པ་ལྟ་བུའི་ཕྱི་རོལ་པགས་པ་ལ་བརྟེན་པ་ལྟ་སྨོས་ཀྱང་ཅི་དགོས། མཛེར་པ་ལྟ་བུའི་མེ་དབལ་ཡུན་རིང་དུ་གནས་པ་ལ་ནི་ལ་ཕུག་དང་རྒྱ་སྲན་ཀུ་ལཏྠ་དང་། སེའུ་འབྲུ་དང་བཅས་པའི་ཁུ་བཅུད་སྦྱིན་ནོ། །རྟག་ཏུ་གྲོ་དང་ནས་
[256a.6]ཀྱི་ཟས་བཟའོ། །རྒུན་ཆང་དང་། བུ་རམ་ཆང་དང་། ཤ་ཁ་རའི་བཏུང་བ་དང་། དེ་བཞིན་དུ་ཆང་གི་སྙིང་པོ་སྦྲང་རྩི་དང་སྦྱར་བའི་ནང་དུ་ཁ་ལུང་གི་ཁུ་བ་བཅུག་པའམ། ཡང་ན་འབྲས་བུ་གསུམ་གྱི་སྦྱོར་བ་སྦྲང་རྩི་དང་སྦྱར་བའམ། ཡང་ན་པི་པི་ལིང་གི་སྦྱོར་བ་སྦྲང་རྩི་དང་
[256a.7]སྦྱར་བའམ། ཡང་ན་ཐང་ཤིང་གི་སྦྱོར་བ་དང་། སླེ་ཏྲེས་ཀྱི་སྦྱོར་བ་དང་། ཡང་ན་བྲག་ཞུན་གྱི་སྦྱོར་བ་དང་། ཡང་ན་གླ་སྒང་གི་སྦྱོར་བ་དང་། གོ་བྱེའི་སྦྱོར་བ་དང་། ཡང་ན་སྦྲང་རྩིའི་སྦྱོར་བ་འདི་རྣམས་ཀྱི་བཏུང་བ་གང་ཡང་རུང་བ་སྦྱར་རོ། །ནམ་ཚོང་ཡན་ཆད་དུ་ཞུགས་པ་ལ་ནི་
[256b]
[256b.1]མགོའི་བཀྲུ་སྨན་དང་། དུད་པ་བརྔུབ་པ་ལ་སོགས་པ་བྱའོ། །གཞན་ཡང་སྐྲན་ནད་ཀྱི་གསོ་བ་ཐམས་ཅད་ཀྱང་འདིར་སྦྱར་རོ། །གཞན་ཡང་ལྕགས་དང་། གསེར་དང་། ལན་ཚྭ་དང་། རྡོ་དང་དེ་རྣམས་གང་ཡང་རུང་བས་བསྲེག་གོ། །གོང་དུ་བསྟན་པའི་སྦྱོར་བ་སྣ་ཚོགས་དེ་དག་
[256b.2]གིས་མ་ཞི་སྟེ། མཛེར་པ་ལྟ་བུའི་མེ་དབལ་རྡོ་བཞིན་དུ་སྲ་སྟེ་ཉེ་བར་མ་ཞི་ན། ཐལ་སྨན་དང་། རིམ་གྱིས་མེ་དང་། གསེར་གྱིས་བསྲེགས་ན་ཕན་ནོ། །མཛེར་པ་ལྟ་བུའི་མེ་དབལ་རྒྱུ་དེ་དག་གིས་སྨིན་པར་བྱས་པ་དང་། མཚོན་གྱིས་དྲལ་ཏེ་དབྱུང་བར་བྱའོ། །མེ་དབལ་གྱི་
[256b.3]ཁྲག་རང་གི་གནས་ལས་ཉམས་ཏེ་འཁྲུགས་པ་ལ་ནི་ཁྲག་དབྱུང་ངོ་། །དེ་ལྟར་ཡང་དང་ཡང་དུ་གཏར་ག་བྱས་པའི་འོག་ཏུ་རླུང་དང་བད་ཀན་འཇོམས་པའི་སྨན་གཏང་ངོ་། །བསྲེགས་པ་དང་། སྨིན་པའི་དབང་གིས་རུལ་ཞིང་མྱགས་པ་ལ་ནི་ཕྱི་ནང་གཉི་ག་ནས་རྨ་གསོ་བའི་
[256b.4]ཆོ་ག་ཇི་ལྟ་བ་བཞིན་བྱའོ། །སྐྱེར་པ་དང་། བྱི་དང་ག་དང་། ཀམ་བི་ལྱ་དང་དེ་རྣམས་ཏིལ་མར་དང་སྦྱར་བས་བསྐུས་ན་རྨ་ལ་ཕན་ནོ། །བད་ཀན་དང་མཁྲིས་པ་ཤས་ཆེ་བའི་མེ་དབལ་ལ་ནི། དཱུར་བའི་རང་གི་ཁུ་བ་དང་མར་སྦྱར་བ་ཕན་ནོ། །མེ་དབལ་ལ་ནི་སློན་ཁྲུས་ཀྱིས་
[256b.5]ལུས་ཐམས་ཅད་ཀྱང་བྱ་བར་འོས་པ་ཡིན་ལ། ཁྲག་དབྱུང་བ་ཉི་ཚེ་ཡང་དེ་དང་འདྲ་བར་ལས་བྱེད་དེ། དེ་ཡང་མེ་དབལ་གྱི་ནད་དེ་ཁྲག་མཁྲིས་དང་ལྡན་ན་ནི་ཁྲག་དབྱུང་ལ་མི་ལྡན་ན་ནི་མི་དབྱུང་སྟེ། མེ་དབལ་དེ་ཉིད་ཁྲག་ལ་བརྟེན་པ་ཡིན་པས་ལན་མང་དུ་ཁྲག་དབྱུང་བར་
[256b.6]འོས་པ་ཡིན་ནོ། །ནད་གཞི་མང་པོ་འདུས་པའི་མེ་དབལ་ལ་ནི་མར་ཉི་ཚེ་མི་སྦྱིན་ཏེ། གལ་ཏེ་གཏོང་ན་ཡང་བཀྲུ་སྨན་དང་སྦྱར་ལ་གཏང་ངོ་། །ཅི་སྟེ་མར་ཉི་ཚེ་བྱིན་ན་ནི་ཁྲག་དེ་ཉིད་གཞི་ཚོས་པར་བྱེད་དེ་སྐྱོན་དུ་འགྱུར་རོ། །གསོ་བའི་གནས་ལས་མེ་དབལ་གསོ་བའི་ལེའུ་
[256b.7]བཅོ་བརྒྱད་པ་རྫོགས་སོ།། །།དེ་ནས་མཛེ་ནད་གསོ་བའི་ལེའུ་བཤད་པར་བྱ་སྟེ། དེ་ལ་མཛེ་ནད་ཐམས་ཅད་ལ་ནི་ཐོག་མར་སྣུམ་གྱི་བཏུང་བ་ཉེ་བར་སྤྱད་པར་བྱའོ། །དེ་ལ་རླུང་ལས་གྱུར་པའི་མཛེ་ནད་ལ་ནི་རྩ་བ་བཅུ་པ་དང་། སླེ་ཏྲེས་དང་། ཨེ་
[257a]
[257a.1]རཎྜ་དང་། ཤ་རང་ག་སྟ་དང་། དེ་རྣམས་ཀྱི་ཕྱེ་མ་མར་རམ་ཏིལ་མར་གང་ཡང་རུང་བ་དང་བསྐོལ་བ་འཐུངས་ན་ཕན་ནོ། །པ་ཏོ་ལ་དང་། ནིམ་པ་དང་། པུ་ཙེ་ཤེལ་དང་། སྐྱེར་པ་དང་། པ་ཏ་དང་། བྱི་ཚེར་བ་དང་། སྐྲ་ལོ་དང་། ཀྱི་ལྕེ་བ་
[257a.2]དང་། དེ་རྣམས་སྲང་རེ་རེ་ཆུ་སྲང་ཉིས་བརྒྱ་རྩ་བཅུ་དྲུག་དང་བསྐོལ་ཏེ། བརྒྱད་ཆ་ལུས་པའི་ནང་དུ་ཀྱི་ལྕེ་བ་དང་། གླ་སྒང་དང་། ཏིག་ཏ་དང་། དུག་མོ་ཡུངས་དང་། པི་པི་ལིང་དང་། ཙནྡན་དང་། དེ་རྣམས་ཞོ་གཉིས་གཉིས་དང་། མར་སྲང་བཅུ་གཉིས་དང་། ཡང་
[257a.3]བསྐོལ་ལ་མར་ལུས་པ་ནི་ཏིག་ཏའི་སྨན་མར་ཞེས་བྱ་སྟེ། དེ་ལས་རན་པར་འཐུངས་ན་མཁྲིས་པ་དང་། མཛེ་དང་། མེ་དབལ་དང་། འབྲུམ་བུ་ཕྲ་མོ་དང་། ལུས་ཚ་བ་དང་། སྐོམ་དད་ཆེ་བ་དང་། མགོ་འཁོར་བ་དང་། གཡའ་བ་དང་། སྐྱ་རྦབ་ཀྱི་ནད་དང་། འབྲས་དང་།
[257a.4]རྨ་འགྲམས་པ་དང་། འབྲུམ་བུ་དང་། ཁོང་འབྲས་དང་། སྐྲན་དང་། སྐེམ་བྱེད་ཀྱི་ནད་དང་། སྨྱོ་བྱེད་དང་། མྱོས་པ་དང་། སྙིང་ནད་དང་། རབ་རིབ་དང་། ངོ་ཤིག་དང་། ཕོ་བའི་ནད་དང་། ཤ་བཀྲ་དང་། མིག་སེར་དང་། མཚན་པར་རྡོལ་བ་དང་། བརྗེད་བྱེད་
[257a.5]དང་། བུད་མེད་ཀྱི་ཟླ་མཚན་གྱི་ནད་དང་། སྦྱར་བའི་དུག་དང་། གཞང་འབྲུམ་དང་། ཁྲག་མཁྲིས་རྣམས་ལ་ཕན་ནོ། །གཞན་ཡང་མཁྲིས་པ་ལས་གྱུར་པའི་ནད་ཤིན་ཏུ་གསོ་དཀའ་བ་ཡང་འབྱང་བར་བྱེད་དོ། །ལོ་མ་བདུན་པ་དང་། པར་པ་ཏ་དང་། དོང་ག་དང་། པུ་
[257a.6]ཙེ་ཤེལ་དང་། ཤུ་དག་དང་། འབྲས་བུ་གསུམ་པ་དང་། ཤུག་པ་དང་། པ་ཐ་དང་། སེར་པོ་རྣམ་གཉིས་དང་། ཐལ་ཏྲེས་རྣམ་གཉིས་དང་། པི་པི་ལིང་དང་། ནིམ་པ་དང་། ཙནྡན་དང་། ཤིང་མངར་དང་། བི་ཤ་ལ་དང་། དུག་མོ་ཡུངས་དང་། སླེ་ཏྲེས་དང་། ཏིག་ཏ་
[257a.7]དང་། པུ་ཤེལ་ཙེ་དང་། བ་ཤ་ཀ་དང་། མུར་བ་དང་། ཉེའུ་ཤིང་དང་། པ་ཏོ་ལ་དང་། བོང་ང་དཀར་པོ་དང་། གླ་སྒང་དང་། ཀྱི་ལྕེ་བ་དང་། བྱི་ཚེར་བ་དང་། དེ་རྣམས་ཀྱི་ཕྱེ་མ་དང་། མར་དང་མར་གྱི་བརྒྱད་འགྱུར་གྱི་ཆུ་དང་། སྐྱུ་རུ་རའི་ཁུ་བ་མར་གྱི་ཉེས་འགྱུར་དང་།
[257b]
[257b.1]འདི་རྣམས་ཚུལ་བཞིན་བསྐོལ་བའི་མར་ནི་ཏིག་ཏ་ཆེན་པོའི་སྨན་མར་ཞེས་བྱ་སྟེ། ཕན་ཡོན་གོང་མ་བས་ཀྱང་ཤས་ཆེ་བ་བཟང་བར་འདོད་དོ། །མཛེ་ནད་བད་ཀན་ལས་གྱུར་པ་ལ་ནི་ནིམ་པ་དང་། ལོ་མ་བདུན་པ་དང་། ཙི་ཏྲ་ཀ་དང་། རུ་རྟ་དང་། ཚ་བ་གསུམ་དང་།
[257b.2]བི་ལ་ཡ་དང་། དོང་ག་དང་། འདི་རྣམས་མར་དང་ཚུལ་བཞིན་བསྐོལ་བ་བླུད་དོ། །མཛེ་ནད་ཐམས་ཅད་ལ་ནི་བ་ལ་ཀ་ཏའི་མར་རམ། ཡུངས་ཀར་གྱི་མར་མཆོག་ཏུ་བསྔགས་ཏེ་བླུད་པར་བྱའོ། །ཡང་ན་བྱི་དང་ཀ་དང་། ཨ་རུ་ར་དང་། གོ་བྱེ་རྣམས་ཚུལ་བཞིན་བསྐོལ་བའི་
[257b.3]མར་བླུད་དོ། །ཡང་ན་དོང་གའི་རྩ་བ་མར་དང་ལན་བརྒྱ་བསྐོལ་བའི་མར་བླུད་ཅིང་སེང་ལྡེང་གི་ཆུ་བསྟེན་ཏེ་འཐུངས་ན། མཛེ་ནད་ལས་མྱུར་དུ་རྒྱལ་ལོ། །གོང་དུ་བསྟན་པའི་མར་གྱི་སྦྱོར་བ་དེ་དག་གིས་བསྐུ་བྱུག་ལ་སོགས་པ་ཡང་དེས་བྱའོ། །དེ་ལྟར་སྣུམ་ཆོས་བྱས་པའི་འོག་ཏུ་
[257b.4]མེ་དབལ་གྱི་ནད་ལ་སྨོས་པའི་སློན་ཁྲུས་ཀྱི་སྨན་འདིར་ཡང་སྦྱར་ཏེ་སློན་ཁྲུས་བྱའོ། །དེ་ནས་སྨན་པས་ནད་པའི་ཉམས་སྟོབས་བརྟགས་ཏེ། དཔྲལ་བ་དང་ལག་པ་དང་རྐང་པ་རྣམས་ལས་ཁྲག་དབྱུང་བར་བྱ་སྟེ། དེ་ཡང་ཇི་ལྟར་གཏར་ག་བྱ་ཞེ་ན། མཛེ་ནད་ཤས་ཆུང་
[257b.5]བ་ལ་ནི་ཞལ་ཞལ་གྱིས་ཁྲག་དབྱུང་བ་དང་། གཞན་ཡང་ཀུ་བ་ལ་སོགས་པས་ཇི་ལྟར་ཁྲག་དབྱུང་བ་ནི་ནད་གཞི་དང་སྦྱར་ནས་གཏར་གའི་ལེའུ་ལས་བལྟས་ཏེ་བྱའོ། །ཁྲག་ཕྱུང་བ་དང་། སློན་ཁྲུས་བྱས་པས་ཁོང་པ་སྟོང་པ་ལ་ནི་རླུང་འཇོམས་པའི་སྨན་དང་སྦྱར་བའི་སྣུམ་རིམ་
[257b.6]གྱིས་བསྟེན་ན། ལུས་འཇིག་པར་བྱེད་པའི་རླུང་ཞི་བར་བྱེད་དེ། མི་འཇིག་ཅིང་སྲུང་བར་བྱེད་དོ། །བླ་ཤ་དང་། སླེ་ཏྲེས་དང་། ནིམ་པ་དང་། འབྲས་བུ་གསུམ་དང་། པ་ཏོ་ལ་དང་། ཀཎྜ་ཀ་རི་དང་། ཀ་རཉྫ་དང་། འདི་རྣམས་ཆུ་དང་ཚུལ་བཞིན་བསྐོལ་བའི་
[257b.7]ནང་དུ་སྨན་དེ་ཉིད་ཀྱི་ཕྱེ་མ་དང་། མར་དང་ཡང་བསྐོལ་ཏེ་མར་ལུས་པ་ནི་རྡོ་རྗེ་ཅན་ཞེས་བྱ་བའི་སྨན་མར་ཡིན་ཏེ་དེ་ལས་རན་པར་འཐུངས་ན། མེ་དབལ་དང་། རིམས་དང་། མིག་སེར་དང་། ཁྲག་ལུད་པ་དང་། མཛེ་ནད་རྣམས་འཇོམས་སོ། །ཡང་ན་འབྲས་བུ་
[258a]
[258a.1]གསུམ་དང་ཚ་བ་གསུམ་དང་། ཀཎྜ་ཀ་རི་རྣམ་གཉིས་དང་། པུ་ཙེ་ཤེལ་དང་། དུར་བྱིད་དང་། དན་ད་དང་། དོང་ག་དང་། བོང་ང་དཀར་པོ་དང་། ཙི་ཏྲ་ཀ་དང་། པ་ཐ་དང་། དེ་རྣམས་ཞོ་གཉིས་གཉིས་ཞིབ་ཏུ་བཏགས་པ་དང་། སུ་དྷ་
[258a.2]ཀྵི་རིའི་འོ་མ་སར་པ་སྲང་སུམ་ཅུ་རྩ་གཉིས་དང་བསྐོལ་ཏེ། མར་ལུས་པ་ལས་རན་པར་བཏུང་བ་དང་། སྣུམ་ཆོས་དང་བཀྲུ་སྨན་དུ་སྦྱར་ན། མཛེ་མ་རུངས་པ་དང་། ཤ་གཟི་གུ་དང་། མཆེར་པ་ན་བ་དང་། རྒྱུ་རླུགས་དང་། རྡེའུ་འགགས་པ་དང་། སྐྲན་དང་། དེ་རྣམས་
[258a.3]གསོ་དཀའ་བ་ཡང་རྡོ་རྗེ་ཆེན་པོ་ཞེས་བྱ་བའི་སྦྱོར་བ་འདིས་ཞི་བར་བྱེད་དོ། །ཡང་ན་དན་ཏི་སྲང་བརྒྱ་ཉི་ཤུ་རྩ་བརྒྱད་ཆུ་སྲང་ལྔ་བརྒྱ་རྩ་བཅུ་གཉིས་དང་བསྐོལ་ཏེ། བཞི་ཆ་ལུས་པའི་ནང་དུ་མར་སྲང་སུམ་ཅུ་རྩ་གཉིས་དང་། དམར་ག་ཞེས་བྱ་བ་ཀོ་ཤ་ཏ་ཀིའི་ཕྱེ་མ་སྲང་གཅིག་
[258a.4]བཏབ་སྟེ་རན་པར་འཐུངས་ན་གོང་འོག་གཉིས་ཀར་དག་པར་འགྱུར་རོ། །ཡང་ན་ཨ་བརྟ་ཀ་ཞེས་བྱ་བ་སཱ་ཏྱ་བ་སྲང་བརྒྱ་ཆུ་སྲང་ལྔ་བརྒྱ་རྩ་བཅུ་གཉིས་ཀྱི་ནང་དུ་བསྐོལ་ཏེ། བརྒྱ་དྲུག་ཅུ་རྩ་བཞི་ལུས་པའི་ནང་དུ་ཨ་བརྟ་ཀའི་ཕྱེ་མ་དང་། མར་སྲང་སུམ་ཅུ་རྩ་གཉིས་དང་ཡང་
[258a.5]བསྐོལ་ལ་མར་ལུས་པ་ལས་རན་པར་འཐུངས་ན། དེ་ཡང་ཞག་རེ་མི་བཟའ་བར་ཞག་རེས་བར་བཅད་ཅིང་ཟོས་ལ་སྨན་དེ་ཞུ་བའི་ཚོད་ཙམ་ན། ཁྲེ་རྒོད་ཀྱི་ཟས་དང་། རྩབས་ཀྱི་རང་སྐྱུར་དང་ལྷན་ཅིག་ཟོས་ན། མཛེ་དང་། ཤ་བཀྲ་དང་། ཨ་བའི་རྣམས་ལ་ཕན་
[258a.6]ཏེ། གཞན་ཡང་འབྲས་ཀྱི་ཕྲེང་བ་ལས་རྒྱལ་བར་འདོད་པ་དང་། བུ་མང་པོ་སྐྱེད་པར་འདོད་པ་དང་། དྲན་པ་འཛིན་པར་འདོད་པ་རྣམས་ཀྱིས་ཀྱང་བསྟེན་པར་བྱའོ། །ནི་ལི་ཏ་ཀའི་ཚིལ་སྦྲང་རྩི་དང་ཛཱ་ཏིའི་ཁུ་བ་དང་ལྡན་པ་འམ། ཡང་ན་མར་དང་ནི་ལི་ཏ་ཀ་ཆ་སྙོམས་པ་
[258a.7]འམ། ཡང་ན་སེང་ལྡེང་དང་། ཨ་ས་ན་བསྐོལ་བའི་ཆུ་ཛཱ་ཏིའི་ཁུ་བ་དང་ལྡན་པར་འཐུངས་ན་མཛེ་ནད་འཇོམས་སོ། །བཟའ་བ་ནི་འབྲས་དམར་པོ་ལ་སོགས་པ་དང་། ནས་དང་། གྲོ་དང་། ཅི་ཙེ་དང་། ཁྲེ་དང་། སྲན་མུངྒ་དང་། སྲན་ཆུང་དང་། ཏུ་བ་རི་དང་ཚོད་མ་ཁ་བ་
[258b]
[258b.1]རྣམས་དང་། སྐམ་སར་གནས་པའི་ཤ་ཁུ་འབྲས་བུ་གསུམ་དང་། པ་ཏོ་ལ་དང་། སེང་ལྡེང་དང་། ནིམ་པ་དང་། གོ་བྱེ་རྣམས་སྦྱར་བ་སྦྱིན་ནོ། །བཏུང་བར་ནི་ཆང་སྨན་མཐུན་པ་དང་སྦྱར་བའམ། དར་བའི་ནང་དུ་སོ་མར་ཛ་བཏབ་པ་བླུད་དོ། །བཟའ་བ་དང་བཏུང་བ་དེ་དག་ཀྱང་
[258b.2]མི་སྐྱུར་བ་དང་། མི་ཚ་བ་དང་། མི་རྣོ་བ་བྱིན་ན་མཛེ་ནད་ལ་ཕན་ནོ། །གཞན་དུ་ན། ཞོ་དང་འོ་མ་དང་། བུ་རམ་དང་ཆུ་དང་ཐུན་མོང་དུ་གནས་པའི་ཤ་དང་། ཏིལ་དང་མོན་སྲན་གྲེའུ་རྣམས་ནི་མཛེ་ན་བ་རྣམས་ཀྱིས་ཐག་རིང་དུ་སྤང་བར་བྱའོ། །པ་ཏོ་ལའི་རྩ་བ་དང་། འབྲས་བུ་གསུམ་
[258b.3]དང་། བི་ཤ་ལ་དང་། ལྔ་པོ་དེ་དག་རེ་རེ་ཡང་མ་ཤ་བཅུ་དྲུག་བཅུ་དྲུག་དང་། ཀྱི་ལྕེ་བ་དང་། པུ་ཙེ་ཤེལ་ཞོ་ཕྱེད་ཕྱེད་དང་། དོང་གྲ་བཞི་ཆ་དང་། དེ་རྣམས་སྤྱིར་སྲང་གཅིག་ཡོད་པ་དེ་བཏགས་ལ་ཆུ་དང་ཚུལ་བཞིན་བསྐོལ་བ་འཐུངས་ན། རླུང་ལ་སོགས་པའི་ནད་གཞི་སྦྱོང་བར་
[258b.4]བྱེད་དོ། །སྨན་དེ་ཞུ་བའི་ཚོད་ཙམ་ན་སྐམས་ལ་གནས་པའི་རི་དགས་དང་བྱ་རྣམས་ཀྱི་ཤ་ཁུ་འབྲས་རྙིང་པའི་ཆན་དང་སྦྱར་ཏེ་ཟོས་ན་མཛེ་ནད་ཐམས་ཅད་དང་། སྐྲངས་པ་དང་། ཕོ་བའི་ནད་དང་། གཅིན་སྲི་བ་དང་། ཧ་ལི་མ་ཀ་ཞེས་བྱ་བའི་ནད་རྣམས་ལ་ཕན་ཏེ། ཞག་
[258b.5]དྲུག་ཏུ་སྦྱོར་བ་དེ་ལྟར་བྱས་ན་སྙིང་དང་ཆུ་སོར་ཟུག་པ་དང་། རིམས་མི་བཟད་པ་རྣམས་ཀྱང་ཞི་བར་བྱེད་དོ། །བྱི་དང་གའི་ནང་གི་སྙིང་པོ་དང་། སྐྱུ་རུ་ར་དང་། ཨ་རུ་ར་དང་། དེ་དག་སྲང་རེ་རེ་དང་། ད་ན་ཏྲི་སྲང་གསུམ་དང་། བུ་རམ་སྲང་བཅུ་གཉིས་དང་། འདི་རྣམས་རི་
[258b.6]ལུར་བྱས་ཏེ་བྱིན་ན་མཛེ་དང་། ཤ་བཀྲ་དང་། དབུགས་མི་བདེ་བ་དང་། ལུད་པ་དང་། གཞང་འབྲུམ་དང་། གཅིན་ནད་དང་། མཆེར་བ་ན་བ་དང་། ཐོར་བུའི་ནད་དང་། ཚིགས་ཀྱི་སྟེང་ན་གནས་པའི་འབྲུམ་བུའི་ནད་དང་། སྐྲན་རྣམས་འཇོམས་ཏེ་སྦྱོར་བ་འདི་ནི་གནོད་
[258b.7]སྦྱིན་ནོར་བུ་བཟང་པོ་ཞེས་བྱ་བ་དེས། ཉན་ཐོས་ཀྱི་དགེ་སློང་གཅིག་ནད་ཀྱིས་སྲོག་འདོར་དུ་ཉེ་བ་དང་། དེའི་དོན་དུ་སྦྱོར་བ་འདི་བཤད་པས། རིལ་བུ་འདིའི་མིང་ཡང་ནོར་བུ་བཟང་པོ་ཞེས་གྲགས་པ་ཡིན་ནོ། །ཏིག་ཏ་དང་། ནིམ་པ་དང་། འབྲས་བུ་གསུམ་དང་། ཤུག་
[259a]
[259a.1]པ་དང་། བོང་ང་དཀར་པོ་དང་། པི་པི་ལིང་དང་། མུར་བ་དང་། པ་ཏོ་ལ་དང་། སེར་པོ་རྣམ་གཉིས་དང་། པུ་ཙེ་ཤེལ་དང་། ཨིན་དྲ་བ་རུ་ནི་དང་། དུག་མོ་ཡུངས་དང་། ཤུ་དག་དང་། འདི་རྣམས་ཆ་སྙོམས་པ་དང་། དན་ཏི་དང་། དེའི་ཉིས་
[259a.2]འགྱུར་གྱི་དུར་བྱིད་དང་། དེའི་ཉིས་འགྱུར་གྱི་བྲམྷི་དང་། འདི་རྣམས་ཀྱི་ཕྱེ་མ་མར་དང་སྦྲང་རྩི་དང་ལྡེ་གུར་བྱས་པ་རན་པར་ཟོས་ན་མཛེ་དང་གཅིན་ནད་དང་། རྨོངས་བག་ཏུ་འདུག་པ་རྣམས་ལ་ཕན་པའི་མཆོག་ཡིན་ནོ། །ཡང་ན་འབྲས་བུ་གསུམ་དང་། པི་པི་ལིང་དང་། བྱི་
[259a.3]དང་ག་དང་། འདི་རྣམས་སྦྲང་རྩི་དང་། ཏིལ་མར་དང་། མར་དང་ལྡེ་གུར་བྱས་པ་འམ། ཡང་ན་ཀ་ཀོ་ཨུ་དུམ་བཱ་ར་དང་། བྱི་དང་ག་དང་། ནིམ་པ་དང་། གླ་སྒང་དང་། ཚ་བ་གསུམ་དང་། དེ་རྣམས་ཀྱི་ཕྱེ་མ་བྲིཀྵ་བསྐོལ་བའི་ཁུ་བའི་ནང་དུ་བཏབ་སྟེ་འཐུངས་ན་པགས་
[259a.4]པའི་ནད་ཐམས་ཅད་འཇོམས་སོ། །དུག་མོ་ཡུངས་དང་། ཙི་ཏྲ་ཀ་དང་། ནིམ་པ་དང་། ཐང་ཤིང་དང་། སེང་ལྡེང་དང་། ཨ་ས་ན་དང་། ལོ་མ་བདུན་པ་དང་། འདི་རྣམས་བསྐོལ་བའི་ནང་དུ་མར་དང་། ཨ་རུ་རའི་ཕྱེ་མ་དང་། སྦྲང་རྩི་དང་ལྡན་པར་ཟོས་ན་མཛེ་ནད་འཇོམས་སོ། །སེང་ལྡེང་དང་།
[259a.5]ནིམ་པ་དང་། སླེ་ཏྲེས་དང་། པ་ཏོ་ལའི་རྩ་བ་དང་། བྱི་ཚེར་བ་དང་། འདི་རྣམས་བསྐོལ་བ་ནི་སེང་ལྡེང་ལ་སོགས་པ་སྨན་གྱི་སྦྱོར་བ་དྲུག་ཅེས་བྱ་སྟེ། ཇི་ལྟར་ལྷ་མ་ཡིན་ཁྱབ་འཇུག་གིས་བཅོམ་པ་བཞིན་དུ། མཛེ་ནད་ཐམས་ཅད་འཇོམས་སོ། །སྐྱེར་པ་དང་། ནིམ་
[259a.6]པ་དང་། སེང་ལྡེང་དང་། འདི་རྣམས་ཀྱི་ཤུན་ཕྲག་བསྐོལ་བ་འཐུངས་ན་མཛེ་ནད་སེལ་ཏོ། །ཡང་ན་སྐྱེར་པ་དང་འབྲས་བུ་གསུམ་དང་། ནིམ་པ་དང་། པ་ཏོ་ལའི་རྩ་བ་དང་། པུ་ཙེ་ཤེལ་དང་། ཤུ་དག་དང་། བཙོད་དང་འདི་རྣམས་བསྐོལ་བ་འཐུངས་ན། བད་
[259a.7]ཀན་དང་མཁྲིས་པ་ལས་གྱུར་པའི་མཛེ་ནད་གཅོད་དོ། །དམ་པའི་ཆོས་ཡང་དག་པར་བསྟེན་པས་འཁོར་བའི་འཆིང་བ་གཅོད་པ་བཞིན་ནོ། །གོང་གི་སྨན་དེ་དག་བའི་མར་དང་བསྐོལ་བའི་མར་ནི་རླུང་ལས་གྱུར་པའི་མཛེ་ནད་སེལ་བའི་མཆོག་ཡིན་ཏེ་མྱུར་དུ་རྒྱལ་བར་བྱེད་དོ། །
[259b]
[259b.1]དེ་བཞིན་དུ་སེང་ལྡེང་དང་། ནིམ་པ་དང་། སྐྱེར་པ་དང་། སླེ་ཏྲེས་དང་། ཐང་ཤིང་དང་། འདི་རྣམས་རེ་རེ་ནས་བའི་མར་དང་སྦྱོར་བ་གོང་མ་ལྟར་བྱས་ན་ཕན་ནོ། །པ་ཐ་དང་། སྐྱེར་པ་དང་། ཙི་ཏྲ་ཀ་དང་། དན་ཏི་དང་། དུག་མོ་ཡུངས་དང་། པུ་ཙེ་ཤེལ་དང་། འདི་རྣམས་ཀྱི་ཕྱེ་མ་
[259b.2]བ་གཅིན་དང་། ཆུ་དྲོན་པོ་གང་ཡང་རུང་བ་ལས་ཟླ་བ་གཅིག་གི་བར་དུ་འཐུངས་ན། མཛེའི་ནད་དང་། གཞང་འབྲུམ་དང་། གཅིན་གྱི་ནད་དང་། སྐྲངས་པ་དང་། སྐྱ་རྦབ་དང་། མ་ཞུ་བ་དང་། སྲིན་བུའི་ནད་ལ་ཕན་ནོ། །རྒྱ་སྐྱེགས་དང་། དན་ད་དང་། མུར་བ་དང་།
[259b.3]འབྲས་བུ་གསུམ་དང་། ཙི་ཏྲ་ཀ་དང་། པ་ཐ་དང་། བྱི་དང་ག་དང་། ཨ་བ་མ་རྒ་དང་། ཚ་བ་གསུམ་དང་། སྐྱེར་པ་དང་། ལོ་མ་བདུན་པ་དང་། བ་ཤ་ཀ་དང་། བཙོད་དང་། ནིམ་པ་དང་། ཐང་ཤིང་དང་། རྩ་བ་ལྔ་པ་ཆེ་ཆུང་དང་། འདི་རྣམས་ཀྱི་ཕྱེ་མ་བ་གཅིན་དང་སྦྱར་བ་ཟླ་བ་
[259b.4]གཅིག་གི་བར་དུ་བཏུང་ཞིང་ཕན་པའི་ཟས་དང་ལྷན་ཅིག་བསྟེན་ན། མཛེ་ནད་ཐམས་ཅད་འཇོམས་སོ། །སྐྱེར་པ་དང་། པི་པི་ལིང་དང་། དོང་གྲ་དང་། བྱི་དང་ག་དང་། ཏོ་བ་རི་དང་། ཙི་ཏྲ་ཀ་དང་། ཏ་བྱ་དང་། འདི་རྣམས་ཡས་ཀྱི་རིམ་བཞིན་དུ་ཆ་རེས་བསྐྱེད་པའི་ཕྱེ་མ་བ་གཅིན་
[259b.5]དང་བཅས་པ་འཐུངས་ན། མཛེ་ནད་ཤིན་ཏུ་མི་བཟད་པ་རྣམས་ཀྱང་འཇོམས་སོ། །ཚ་བ་གསུམ་དང་། འབྲས་བུ་གསུམ་དང་། ཏིལ་དང་། གོ་བྱེ་དང་། དེ་རྣམས་ཀྱི་ཕྱེ་མ་མར་དང་སྦྲང་རྩི་དང་ཁ་ར་དཀར་པོ་དང་སྦྱར་བའི་རི་ལུ་ནི། ཚ་བ་གསུམ་ལ་སོགས་པའི་ཆ་བདུན་
[259b.6]པའི་རི་ལུ་ཞེས་བྱ་སྟེ། དེ་ལས་རན་པར་ཟོས་ན། མཛེ་ནད་ལས་རྒྱལ་ཞིང་བཅུད་ཀྱིས་ལེན་དུ་འགྱུར་ལ། བུད་མེད་ལ་ཉལ་ཕོད་པར་འགྱུར་རོ། །སོ་མ་ར་ཛ་དང་། ཙི་ཏྲ་ཀ་དང་། སྐྱེར་པ་དང་། བྱི་དང་ག་དང་། ཏུ་པ་རའི་རུས་པ་དང་། གོ་བྱེ་དང་། འབྲས་བུ་
[259b.7]གསུམ་དང་། དེ་རྣམས་ཀྱི་ཕྱེ་མ་བུ་རམ་དང་རི་ལུར་བྱས་ཏེ། རྟག་ཏུ་གོམས་པར་བྱས་ན་མཛེ་ནད་ཐམས་ཅད་སེལ་ཏོ། །བྱི་དང་ག་དང་། གོ་བྱེ་དང་། སོ་མ་ར་ཛ་དང་། ཙི་ཏྲ་ཀ་དང་། བ་ར་ཧི་དང་། ཨ་རུ་ར་དང་། ལང་ག་ལི་དང་། པི་པི་ལིང་དང་། ཏིལ་ནག་པོ་དང་། འདི་རྣམས་ཀྱི་
[260a]
[260a.1]ཕྱེ་མ་བུ་རམ་དང་རི་ལུར་བྱས་ཏེ་ཟོས་ན་མཛེ་ནད་འཇོམས་སོ། །སོ་མ་ར་ཛ་དང་། བྱི་དང་ཀའི་སྙིང་པོ་དང་། པི་པི་ལིང་དང་། པི་པི་ལིང་གི་རྩ་བ་དང་། ལྕགས་ཀྱི་ཕྱེ་མ་དང་། སྐྱུ་རུ་ར་དང་། དེ་རྣམས་ཀྱི་ཕྱེ་མ་ཏིལ་མར་དང་ལྡེ་གུར་བྱས་ཏེ་ཟོས་ན། མཛེ་ནད་
[260a.2]གསོ་དཀའ་བ་ཡང་འཇོམས་སོ། །ཡང་ཨ་རུ་ར་དང་། གོ་བྱེ་དང་ཏིལ་མར་དང་དེ་རྣམས་ཀྱི་ཕྱེ་མ་བུ་རམ་དང་རི་ལུར་བྱས་ཏེ་ཟོས་ན་མཛེ་ནད་ལས་རྒྱལ་བར་བྱེད་དོ། །འདིར་བུ་རམ་དང་། སྨན་གྱི་ཚད་མ་སྨོས་པ་རྣམས་ནི་སྨན་སྤྱིའི་ཉེས་འགྱུར་གྱི་བུ་རམ་དང་སྦྱོར་ཅིག །ཡང་
[260a.3]ན་གོ་བྱེ་དང་། བྱི་དང་ག་དང་། སོ་མ་ར་ཛ་རྣམས་ཀྱི་ཕྱེ་མ་བུ་རམ་དང་། རི་ལུར་བྱས་ཏེ་ཟོས་ན་ཕན་ཡོན་ཡང་དེ་དང་འདྲའོ། །ཡང་ན་བྱི་དང་ག་དང་། སེང་ལྡེང་དང་། བྲག་ཞུན་གྱི་ཕྱེ་མ་ལས་རན་པར་ཟོས་ན་འབྲུམ་བུ་ཕྲ་མོ་དང་། ཤ་གཟི་གུ་དང་། ཤུ་བ་རྣམས་འཇོམས་སོ། །
[260a.4]བྱི་དང་ག་དང་། ཙི་ཏྲ་ཀ་དང་། སྐྱུ་རུ་ར་དང་། ལྕགས་ཀྱི་ཕྱེ་མ་དང་། པི་པི་ལིང་དང་། ཁ་ར་རྣམས་བཏགས་པའི་ཕྱེ་མ་ཏིལ་མར་དང་བཏགས་པའི་ལྡེ་གུ་བལྡགས་ན། མཛེ་ནད་གསོ་དཀའ་བ་ལས་རྒྱལ་བར་བྱེད་དོ། །གླ་སྒང་དང་། ཚ་བ་གསུམ་དང་། འབྲས་བུ་
[260a.5]གསུམ་དང་། བཙོད་དང་། ཐང་ཤིང་དང་། རྩ་བ་ལྔ་པ་རྣམ་གཉིས་དང་། ལོ་མ་བདུན་པ་དང་། ནིམ་པ་དང་། ཤིང་ཚ་དང་། བི་ཤལ་དང་། ཙི་ཏྲ་ཀ་དང་། མུར་བ་རྣམས་བཏགས་པའི་ཕྱེ་མ་དང་། སྨན་སྣ་གཅིག་གི་དགུ་འགྱུར་གྱི་ནས་ཕྱེ་དང་། སྦྲང་རྩི་ཆ་གཅིག་དང་།
[260a.6]མཛེ་འཇོམས་པའི་སྨན་རྣམས་བསྐོལ་བའི་ཁུ་བ་དང་བསྐྱོས་ཏེ་རྟག་ཏུ་འཐུངས་ན་མཛེ་ནད་ཟློག་པར་བྱེད་དོ། །དེ་བཞིན་དུ་འོར་ནད་དང་། སྐྱ་རྦབ་ཀྱི་ནད་དང་། ཤ་བཀྲ་དང་། ཕོ་བའི་ནད་དང་། གཞང་འབྲུམ་དང་། རླིག་རླུགས་དང་། མཚན་བར་རྡོལ་བ་དང་། འབྲུམ་བུ་
[260a.7]ཕྲ་མོ་དང་། འབྲུམ་བུ་དང་། འབྲུམ་ཆེན་གྱི་ནད་འཇོམས་སོ། །ཏུ་པར་ཞེས་བྱ་བ་ཨ་ཏ་ཀའི་རུས་པ་དང་། གོ་བྱེ་དང་། སོ་མ་ར་ཛ་དང་། ཙི་ཏྲ་ཀའི་རྩ་བ་དང་། འདི་རྣམས་རེ་རེ་ཡང་བཅུད་ཀྱིས་ལེན་གྱི་སྦྱོར་བ་བཞིན་དུ་སྦྱར་ཏེ་བསྟེན་པར་བྱའོ། །གོང་མའི་སྨན་གྱི་སྦྱོར་བ་
[260b]
[260b.1]གོང་དུ་བསྟན་པ་དེ་དག་གིས་ཁོང་པའི་ནང་གི་མཛེ་ནད་དག་སྟེ། པགས་པའི་ཕྱི་རོལ་དུ་བྱུང་བ་ལ་ནི་སྨན་གྱིས་བྱུགས་པ་ཕན་ཏེ། ལུས་དྲི་མ་དང་བཅས་པ་ལ་སྨན་རྣོན་པོའི་བྱུག་པ་བསྐུས་པས་མཛེ་ནད་ཚབས་ཆེར་ཐུ་བར་སྣང་སྟེ། མཛེ་ནད་འཁོར་ལིང་ཅན་དང་གཏིང་ཟུག་པ་དང་།
[260b.2]སྲ་བ་རྣམས་ལ་ནི་འབྲུའི་ཐུམ་བུ་ལ་སོགས་པས་དུགས་བྱས་ཏེ། སྙི་ཞིང་མཐོན་པོར་གྱུར་པ་དང་། མཚོན་གྱིས་ཞལ་ཞལ་བྱ་ཞིང་ཕྱི་སྟེ། དེའི་འོག་ཏུ་སྨན་གྱིས་བྱུག་པར་བྱའོ། །མཛེ་ནད་གང་ལུས་ཀྱི་དབང་པོ་རྣམས་ཉམས་ཤིང་པགས་པ་མཚོན་གྱིས་ཞལ་ཞལ་བྱར་མི་རུང་
[260b.3]བ་དེ་ལ་ནི་དང་པོ་ཁྲག་ཕྱུང་སྟེ། དེའི་འོག་ཏུ་ཐལ་སྨན་རྣོན་པོས་བསྲེག་པར་བྱའོ། །མཛེ་ནད་སྲ་བ་དང་། རྩུབ་པ་དང་། བེམ་བེམ་པོར་མི་ཚོར་བར་འདུག་པ་དང་། ཡུན་རིང་དུ་ལོན་པ་དང་། བརྟན་པ་རྣམས་ལ་ནི་མཛེ་ནད་འཇོམས་པའི་སྨན་གྱི་བྱུག་པ་དང་བཏུང་བར་བླུད་
[260b.4]དོ། །དེའི་འོག་ཏུ་དུག་འཇོམས་པའི་སྨན་དང་དུག་སྔགས་ཀྱིས་བཏབ་པ་བསྲེས་ཏེ་སྦྱིན་ནོ། །མཛེ་ནད་གང་ལུས་རེངས་ཤིང་གྱོང་པ་དང་། ཚོར་བག་མེད་པ་དང་། རྔུལ་མི་འབྱུང་བ་དང་། ཤིན་ཏུ་གཡའ་བ་རྣམས་ལ་ནི་བ་ལང་གི་ལྕི་བ་སྐམ་པོ་དང་། རྒྱ་མཚོའི་དབུ་བ་
[260b.5]འམ། མཚོན་གང་ཡང་རུང་བས་བཞར་ཏེ། དེའི་འོག་ཏུ་སྨན་གྱིས་བྱུག་པར་བྱའོ། །གླ་སྒང་དང་། འབྲས་བུ་གསུམ་དང་། པོ་སོན་ཆ་དང་། ཀ་རཉྫ་དང་། དོང་ག་དང་། དུག་མོ་ཡུངས་དང་། ལོ་མ་བདུན་པ་དང་། རུ་རྟ་དང་། པྲི་ཡང་ཀུ་དང་། སྐྱེར་པ་དང་།
[260b.6]ཡུངས་ཀར་དང་། འདི་རྣམས་ཚུལ་བཞིན་བསྐོལ་བ་ནི་ཡུངས་ཀར་གྱི་སྦྱོར་བ་ཞེས་བྱ་སྟེ། ལུས་བཀྲུ་བ་དང་། བྱུག་པ་དང་། དེས་བཞར་བ་དང་། སློན་ཁྲུས་ཀྱང་བྱས་ན། པགས་པའི་ནད་དང་། མཛེ་དང་། སྐྲང་པ་དང་། སྐྱ་རྦབ་ཀྱི་ནད་རྣམས་ཀྱང་འཇོམས་སོ། །
[260b.7]ཀ་ར་བཱི་ར་དང་། ནིམ་པ་དང་། དུག་མོ་ཡུངས་དང་། དོང་ག་དང་། ཙི་ཏྲ་ཀ་དང་། འདི་རྣམས་ཀྱི་རྩ་བ་བ་གཅིན་དང་ལྷན་ཅིག་བསྐོལ་ཏེ། དྲིལ་དུ་བཏུབ་པ་ཙམ་ཕྱུང་སྟེ། དེའི་ལྡེ་གུས་བསྐུས་ན་མཛེ་ནད་འཇོམས་སོ། །ཀ་ར་བཱི་ར་དཀར་པོའི་རྩ་བ་དང་། དུག་མོ་
[261a]
[261a.1]ཡུངས་དང་། ཀ་ར་ཉྫའི་འབྲས་བུ་དང་། སྐྱེར་པའི་ཤུན་པ་དང་། སུ་མ་ནའི་ལོ་མ་དང་། འདི་རྣམས་ཀྱི་ཕྱེ་མ་ལྡེ་གུར་བྱས་པས་བསྐུས་ན་ཡང་མཛེ་ནད་འཇོམས་པར་ཀུན་གྱིས་མངོན་སུམ་དུ་མཐོང་ཞིང་གྲགས་པ་ཡིན་ནོ། །ཤྲི་ཤའི་ཤུན་པ་དང་།
[261a.2]རས་བལ་གྱི་མེ་ཏོག་དང་། དོང་གའི་ལོ་མ་དང་། མོན་སྲན་སྡེའུ་དམེ་རུའི་རྩ་བ་དང་། ལོ་མར་བཅས་པ་དང་། འདི་བཞི་བཏགས་པའི་ཕྱེ་མའི་ལྡེ་གུས་བསྐུས་ན་ཡང་ཕན་ནོ། །ནིམ་པ་དང་། སེར་པོ་རྣམ་གཉིས་དང་། བྱེའུ་རུག་པ་དང་། པ་ཏོ་ལ་དང་། རུ་རྟ་དང་།
[261a.3]ཨ་ཤྭ་གནྡྷ་དང་། ཐང་ཤིང་དང་། ཤི་ཀྲུ་དང་། ཡུངས་ཀར་དང་། གཡེར་མ་དང་། འུ་སུ་དང་། བླ་བ་ཞེས་བྱ་བ་ཀུ་ཊན་ན་ཊ་དང་། ཙནྡན་དང་འདི་རྣམས་ཆ་སྙོམས་པའི་ཕྱེ་མ་དར་བ་དང་བཏགས་ཏེ། ཐོག་མར་ཏིལ་མར་གྱིས་ལུས་བྱུགས་ལ། དེ་ནས་ལྡེ་གུ་དྲིལ་བ་
[261a.4]བྱས་ན་མཛེ་ནད་གཡའ་བ་དང་། འབྲུམ་བུ་དང་། འབྲུམ་བུ་ཕྲ་མོ་དང་། མཛེ་དང་སྐྲངས་པ་རྣམས་ཞི་བར་འགྱུར་རོ། །ཡང་ན་གླ་སྒང་དང་། སྐྱེར་ཁཎྜ་སྐམ་པོ་དང་། སྐྱེར་པ་དང་། ནག་ཚུར་དང་། ཀམ་པི་ལྱ་དང་། རུ་རྟ་དང་། སེང་ཕྲོམ་དང་། མུ་ཟི་དང་། སྲ་རྩི་
[261a.5]པོག་དང་། བྱི་དང་ག་དང་། ལྡོང་རོས་དང་། བ་བླ་དང་། ཀ་ར་བཱི་རའི་ཤུན་པ་དང་། འདི་རྣམས་ཕྱེ་མར་བྱས་ལ་སྔར་ཏིལ་མར་གྱིས་ལུས་བསྐུས་པའི་སྟེང་དུ་བཏབ་ན། ཤུ་བ་དང་། གཡན་པ་དང་། འབྲུམ་བུ་ཕྲ་མོ་དང་། ཁྱི་རྔོ་དང་རྐང་ཤུ་ལ་སོགས་པའི་འདུས་པའི་
[261a.6]ནད་སེལ་བར་བྱེད་དོ། །ཤྲི་ཁཎྜའི་ཤིང་གི་སྡོང་བུའི་ནང་དུ་ཡུངས་ཀར་བཏགས་པ་བཅུག་སྟེ། རྫ་སླང་གི་ནང་དུ་མེ་མི་ཆེ་བ་ལ་བཙོས་ལ། དེ་ལས་ལྡེ་གུར་བྱས་པས་བསྐུས་ན་རྐང་ཤུ་སེལ་བར་བྱེད་དོ། །ཇི་ལྟར་འདོད་ཆགས་ཀྱིས་ཟིལ་གྱིས་ནོན་པ་དག་ངོ་ཚ་སྤངས་
[261a.7]པ་བཞིན་ནོ། །ལྡོང་རོས་དང་། བ་བླ་དང་། ན་ལེ་ཤམ་དང་། དེ་རྣམས་ཏིལ་མར་དང་། ཤིང་ཨ་རྐའི་འོ་མ་དང་སྦྱར་བ་བསྐུས་ན། མཛེ་འཕྲོག་པར་བྱེད་དོ། །དེ་བཞིན་དུ་ཀ་རཉྫ་དང་། ཙཀྲ་མར་ད་དང་། རུ་རྟ་དང་། དེ་རྣམས་བ་གཅིན་དང་བཏགས་པ་འཐུངས་ན་ཡང་
[261b]
[261b.1]ཕན་ནོ། །ཡང་ན་གུ་གུལ་དང་། ན་ལེ་ཤམ་དང་། བྱི་དང་ག་དང་། ཡུངས་ཀར་དང་། ནག་ཚུར་དང་། སྲ་རྩི་པོག་དང་། གླ་སྒང་དང་། ཀོ་ཉོན་ཙིའི་ཐང་ཆུ་དང་། བ་བླ་དང་། མུ་ཟི་དང་། ལྡོང་རོས་དང་། རུ་རྟ་དང་། ཀམ་པི་ལྱ་དང་། སེར་པོ་གཉིས་དང་། དེ་
[261b.2]རྣམས་ཀྱི་ཕྱེ་མ་ཙཀྲ་མར་དའི་མར་དང་བསྲེས་པའི་ལྡེ་གུར་བྱས་ལ། ཐོག་མར་མཚོན་གྱིས་བཞར་ལ། དེའི་སྟེང་དུ་བསྐུས་པ་ཉི་མ་ལ་བཞག་སྟེ་འདུག་ན་མཛེ་ནད་གཏན་དུ་ཞི་བར་བྱེད་དོ། །ཡང་ན་ན་ལེ་ཤམ་དང་། ཤིང་ཏ་ལའི་ལོ་མ་དང་། རུ་རྟ་དང་། ལྡོང་རོས་དང་། ནག་
[261b.3]ཚུར་དང་། འདི་རྣམས་ཏིལ་མར་དང་སྦྱར་བ་ཟངས་མའི་སྣོད་ལ་ཞག་བདུན་བཞག་སྟེ་དེས་ཞག་བདུན་གྱི་བར་དུ་ཉི་མ་ཚ་བ་ལ་བསྐུ་ཞིང་བསྟེན་ན་ཤ་བཀྲ་འཇོམས་སོ། །ཤ་བཀྲ་གསར་བ་ལ་ནི་ལུས་ཀྱི་ཕྱི་ཁྲུས་མི་བྱ་བར་སློན་ཁྲུས་བྱས་ལ་དེའི་སྦྱོར་བ་གོང་མ་ཟླ་བ་གཅིག་བསྟེན་ན་
[261b.4]ཕན་ནོ། །ཨ་པ་མརྒ་བསྲེགས་པའི་ཐལ་བ་ཆུ་ནང་དུ་བསྐྱོས་ཏེ། ལན་བདུན་བཙགས་ལ་པྲི་ཡང་ཀུའི་མར་དང་སྦྱར་ལ་བསྐོལ་བས་ལུས་བསྐུ་བྱུག་བྱས་ན་ཤ་བཀྲ་སེལ་ཏོ། །ཀ་ཀ་ཛང་གའི་རྩ་བ་དང་། རས་བལ་གྱི་འདབ་མ་དང་། ལ་ཕུག་གི་ས་བོན་དང་། དེ་རྣམས་དར་བ་དང་བཏགས་ཏེ་
[261b.5]སྦྱར་བ། གཟའ་མིག་དམར་ལ་བབ་པའི་དུས་སུ་བསྐུས་ན། ཤ་བཀྲ་སེལ་བར་གྲགས་པ་ཡིན་ནོ། །ཛི་བན་ཏི་དང་། བཙོད་དང་། སྐྱེར་པ་དང་། ཀམ་པི་ལྱ་དང་། སྤངས་མ་དང་། དེ་རྣམས་ཆམ་ཆོམ་བརྡུངས་ཏེ་མར་དང་ཏིལ་མར་དང་། མར་གྱི་བཞི་འགྱུར་གྱི་འོ་མ་
[261b.6]དང་བསྐོལ་བའི་ནང་དུ་སྲ་རྩི་པོག་དང་། སྤྲ་ཚིལ་གྱིས་བཏགས་པ་བསྐུས་ན་འབྲས་བྱེར་བ་འཇིག་པར་འགྱུར་ཏེ། དེ་བཞིན་དུ་པགས་པ་གཅིག་པའི་མཛེ་དང་། འབྲུམ་བུ་ཕྲ་མོའི་མཛེ་ནད་དང་། འབྲས་མི་འབྱོར་བ་རྣམས་ཀྱང་ཞི་བར་བྱེད་དོ། །ལོ་མ་བདུན་པའི་རྩ་བ་དང་།
[261b.7]ཤྲི་ཤའི་ཤུན་ཕྲག་དང་། ཨ་ཤྭ་མར་དང་། ཨ་རྐ་དང་། སུ་མ་ན་དང་། ཙི་ཏྲ་ཀ་དང་། ཐལ་ཏྲེས་དང་། ནིམ་པ་དང་། འདི་རྣམས་ཀྱི་ཤུན་ཕྲགས་དང་། ཀ་རཉྫའི་འབྲུ་དང་། ཡུངས་ཀར་དང་། ཙཀྲ་མར་ད་དང་། འབྲས་བུ་གསུམ་དང་། བྱི་དང་ག་དང་། ཚ་བ་
[262a]
[262a.1]གསུམ་དང་། སེར་པོ་རྣམ་གཉིས་དང་། འདི་རྣམས་ཕྱེ་མར་བྱས་ལ་ཏིལ་མར་དང་། དེའི་བཞི་འགྱུར་གྱི་བ་གཅིན་དང་བསྐོལ་ཏེ། མར་འབའ་ཞིག་ལུས་པ་ནི་རྡོ་རྗེ་ཅན་ཞེས་བྱ་བ་རྡོ་རྗེ་དང་མཉམ་པའི་ལྡེ་གུ་ཡིན་ཏེ། དེ་ལས་བསྐུ་བྱུག་བྱས་ན།
[262a.2]པགས་པའི་ནད་ཐམས་ཅད་དང་། རྨ་འགྲམས་པ་དང་། རླུང་དང་བད་ཀན་ལས་གྱུར་པའི་མཛེ་ནད་སེལ་ཏོ། །ཨེ་རཎྜ་དང་། སྐྱེར་ཁཎྜ་དང་། ག་པུར་དང་། ཤིང་ནིམ་པ་དང་། ཀ་ཏཾ་པ་དང་། ག་བའི་རྩ་བ་དང་། ཀམ་པི་ལྱ་དང་། བྱི་དང་ག་དང་། ཨིན་དྲ་བ་རུ་ཎི་དང་། ནིར་
[262a.3]གུན་ཐི་དང་། གོ་བྱེ་དང་། ཐང་ཤིང་དང་། ཁྲོན་བུ་དང་། ཤིང་ཀོ་ཉོན་ཙེའི་ཐང་ཆུ་དང་། གུ་གུལ་དང་། ལྡོང་རོས་དང་། ལན་ཚྭ་དང་། ཤིང་ཏ་ལ་དང་། བཅའ་སྒ་དང་། འདི་རྣམས་བཏགས་པའི་ཕྱེ་མ་དང་། ཏིལ་མར་བསྐོལ་བའི་ནང་དུ་སུ་དྷཱ་ཀྵི་ར་ཞེས་བྱ་བ་ཤི་རི་
[262a.4]ཁཎྜའི་ལོ་མ་དང་། ཨ་རྐའི་ལོ་མ་ཆ་མཉམ་པ་དང་ལྷན་ཅིག་ལྡེ་གུར་བྱས་པ་ནི། རྡོ་རྗེ་ཆེན་པོའི་ལྡེ་གུ་ཞེས་བྱ་སྟེ། དེས་བསྐུས་ན་ཕན་ཡོན་རྡོ་རྗེ་ཅན་དང་འདྲ་སྟེ། ལྷག་པར་ཡང་འདིས་ནི་ཤ་བཀྲ་དང་། འབྲས་ཀྱི་ཕྲེང་བ་དང་། གཞང་འབྲུམ་རྣམས་འཇོམས་སོ། །
[262a.5]རུ་རྟ་དང་། ཨ་ཤོ་མར་ཞེས་བྱ་བ་ཏེ་ཛོ་བ་ཏི་དང་། སུ་དྷཱ་ཀྵི་ར་དང་། རྒྱམ་ཚ་དང་། འདི་རྣམས་བཏགས་པའི་ཕྱེ་མ་བ་གཅིན་དང་། ཏིལ་མར་དང་སྦྱར་བའི་ནང་དུ་ཅུང་ཞིག་བཏབ་སྟེ་འཐུངས་ན་མཛེ་ནད་ལས་རྒྱལ་བའི་མཆོག་ཡིན་ནོ། །ཡུངས་ཀར་གྱི་མར་སྤྲ་ཚིལ་དང་།
[262a.6]ཤི་ཀྲུ་དང་། གུ་གུལ་དང་། སྤངས་མ་དང་། སྐྱེར་ཁཎྜ་དང་། འདི་རྣམས་བསྐོལ་བའི་མར་གྱིས་བསྐུས་ན་མཆན་ཁུང་གི་ནད་དང་། རྐང་ཤུ་རྣམས་མྱུར་དུ་ཟློག་པར་བྱེད་དོ། །རྒྱ་སྐྱེགས་དང་། ཚ་བ་གསུམ་དང་། ཙཀྲ་མར་ད་དང་། ཀོ་ཉོན་ཙེའི་ཐང་ཆུ་དང་། རུ་རྟ་དང་།
[262a.7]ཡུངས་ཀར་དང་། ལ་ཕུག་གི་ས་བོན་དང་། སེར་པོ་རྣམ་གཉིས་དང་། འདི་རྣམས་ཀྱི་ཕྱེ་མ་དར་བ་དང་སྦྱར་བའི་ལྡེ་གུས་བསྐུས་ན། ཤུ་བ་ཐམས་ཅད་ལ་ཕན་ནོ། །ཞེས་དྲང་སྲོང་རྣམས་ཀྱིས་གསུངས་སོ། །ཙི་ཏྲ་ཀ་དང་། ཤི་ཀྲུ་དང་སྦྱར་བ་འམ། ཡང་ན་སླེ་ཏྲེས་དང་། ཨ་
[262b]
[262b.1]བ་མརྒ་དང་། ཐང་ཤིང་ཞོ་ག་ཆུ་དང་སྦྱར་བའམ། ཡང་ན་སེང་ལྡེང་དང་། ཤིང་དྭ་བ་འམ། ཡང་ན་དན་ཏི་དང་། དྲ་བན་ཏིའམ། ཡང་ན་རྒྱ་སྐྱེགས་དང་། སྐྱེར་ཁཎྜའམ། ཡང་ན་སུག་སྨེལ་དང་། པུ་རྣ་བའམ། སྦྱོར་བ་དྲུག་པོ་དེ་རྣམས་ལས་གང་ཡང་རུང་བའི་ཕྱེ་མ་
[262b.2]ཞོ་ག་ཆུ་དང་སྦྱར་བ་བསྐུས་ན། རླུང་དང་བད་ཀན་ལས་གྱུར་པའི་མཛེ་ནད་སེལ་ཏོ། །ཛ་ལ་ཞེས་བྱ་བ་བཱ་ལུ་ཀ་དང་། བྷ་བྱ་ཞེས་བྱ་བ་རུ་རྟ་དང་། ནཱ་ག་གེ་སར་དང་། གནྡྷ་བྷ་དྲ་དང་། ཙནྡན་དང་། ཨུ་ཤི་ར་དང་། དེ་རྣམས་གོང་མའི་ཆ་རེས་བསྐྱེད་པའི་ཕྱེ་མ་ལྡེ་གུར་བྱས་ཏེ་བསྐུས་ན།
[262b.3]བད་ཀན་དང་མཁྲིས་པ་ལས་གྱུར་པའི་མཛེ་ནད་སེལ་ཏོ། །མཛེ་ནད་ལུས་ཚ་བ་དང་བཅས་པ་ལ་ནི། གོང་དུ་སྨོས་པའི་ཏིག་ཏའི་སྨན་མར་དང་། མར་ལན་བརྒྱར་བཀྲུས་པ་དང་། ཏིལ་མར་དང་ཙནྡན་དང་། ཤིང་མངར་དང་། པྲ་པུཎྜ་རཱི་ཀ་དང་། ཨུཏྤ་ལ་དང་། ཚུལ་བཞིན་
[262b.4]བསྐོལ་བའམ། འདི་རྣམས་གང་ཡང་རུང་བས་བསྐུས་ན་ཕན་ནོ། །གང་གི་ལུས་འདྲུལ་ཞིང་ཡན་ལག་ཆད་པ་དང་། ལུས་ཚ་བ་དང་། འབྲུམ་བུ་བྱུང་བ་དང་། པགས་པ་མྱགས་པ་དང་བཅས་པ་ལ་ནི་བསིལ་བའི་བྱུག་པ་དང་། བླུགས་པ་དང་། གཏར་ག་དང་། བཀྲུ་སྨན་
[262b.5]དང་། ཏིག་ཏའི་སྨན་མར་རྣམས་བྱིན་ན་ཕན་ནོ། །སེང་ལྡེང་དང་། བ་ཤ་ཀ་དང་། ནིམ་པ་དང་། དུག་མོ་ཡུངས་དང་། འབྲས་བུ་གསུམ་དང་། བྱི་དང་ག་དང་། སླེ་ཏྲེས་དང་། འདི་རྣམས་བ་གཅིན་དང་སྦྱར་བས་ནང་དང་ཕྱི་རོལ་ནས་བཏུང་བ་དང་། བླུགས་པ་ལ་སོགས་
[262b.6]པ་བྱས་ན། སྲིན་བུ་ལས་གྱུར་པའི་མཛེ་ནད་འཇོམས་སོ། །དེ་ལ་རླུང་ཤས་ཆེ་བའི་མཛེ་ནད་ལ་ནི་ཐོག་མར་སྨན་མར་བྱའོ། །བད་ཀན་ལས་གྱུར་པའི་མཛེ་ནད་ལ་ནི་ཐོག་མར་སྐྱུག་སྨན་གཏང་ངོ་། །མཁྲིས་པ་ལས་གྱུར་པ་ལ་ནི། དང་པོ་གཏར་གས་ཁྲག་དབྱུང་བ་དང་
[262b.7]བཀྲུ་སྨན་རྣམས་བྱའོ། །དེ་ལ་མཛེ་ནད་ཐམས་ཅད་ལ་ཁྲག་གི་ཉེས་པ་མེད་ཅིང་། སློན་ཁྲུས་ཀྱིས་ཁོང་དག་ན་ནི། གོང་དུ་སྨོས་པའི་བསྐུ་བྱུག་ལ་སོགས་པའི་སྨན་བྱས་ན། དེ་མ་ཐག་ཕན་པར་འགྱུར་གྱི་ཁྲག་གི་ཉེས་པ་དང་བཅས་ཤིང་ཁོང་མ་དག་ན་ནི་དེ་ལྟར་མ་ཡིན་ནོ། །དེ་ལྟར་
[263a]
[263a.1]ཁྲག་གི་ཉེས་པ་ཡང་མེད། ཁོང་པ་ཡང་དག་པར་བྱས་གོང་དུ་སྨོས་པའི་སྣུམ་ལ་སོགས་པའི་སྨན་དུས་དང་མཐུན་པར་སྦྱར་ན། མཛེ་ནད་ཐམས་ཅད་ངེས་པར་བཟློག་སྟེ་གསོ་སླའོ། །དེ་ལ་ནད་གཞི་མང་པོ་འདུས་པའི་མཛེ་ཚབས་ཆེ་བ་ལ་ནི་སློན་ཁྲུས་ལ་
[263a.2]སོགས་པས་ཁོང་པ་ཡང་དང་ཡང་དུ་སྦྱང་བར་བྱའོ། །དེ་ལྟར་སྦྱང་བ་བྱས་པས་ནད་པ་ཉམས་སྟོབས་ཆུང་ཞིང་རླུང་གིས་ཉམ་ཐག་པར་གྱུར་ན། སྲོག་མྱུར་དུ་འཇིག་པར་འགྱུར་བས་དེ་བས་ན་སྨན་པས་སྲོག་བསྲུང་བ་ལ་འབད་དོ། །དེ་ལྟར་གསོ་བ་ཐམས་ཅད་ཀྱིས་མཛེ་ནད་
[263a.3]སོས་པར་གྱུར་ན། ཕྱིས་མི་འབྱུང་བར་བྱ་བའི་ཕྱིར་ལུས་ཀྱི་རོ་སྟོད་དག་པའི་ཆེད་དུ་ཟླ་བ་ཕྱེད་ཕྱེད་ཅིང་སློན་སྨན་བྱའོ། །ལུས་ཀྱི་རྨ་དག་པར་བྱ་བའི་ཕྱིར་ཟླ་བ་རེ་རེ་ཞིང་བཀྲུ་སྨན་བྱའོ། །མགོ་བོ་དག་པར་བྱ་བའི་ཕྱིར་ཞག་གསུམ་ཞིང་མགོ་བོའི་བཀྲུ་སྨན་བྱའོ། །དེ་བཞིན་དུ་ཟླ་བ་
[263a.4]དྲུག་ཅིང་གཏར་ག་བྱ་སྟེ་ཁྲག་དབྱུང་བར་བྱའོ། །གལ་ཏེ་མཛེ་ནད་ལས་སློན་ཁྲུས་མ་ལེགས་ཤིང་ཁོང་དག་པར་མ་གྱུར་ན་ཕྱིར་ནད་གཞི་ཆེར་འཁྲུགས་ཏེ། ནད་སླར་སྐྱེ་ཞིང་གསོར་མི་རུང་བར་འགྱུར་བས་དེ་བས་ན་མཛེའི་ནད་གཞི་མ་ལུས་པར་རྩད་བཅད་ཅིང་དྲུངས་དབྱུང་བར་བྱའོ། །
[263a.5]གསོ་བའི་གནས་ལས་མཛེ་ནད་གསོ་བའི་ལེའུ་བཅུ་དགུ་པ་རྫོགས་སོ།། །།དེ་ནས་ཤ་བཀྲ་དང་སྲིན་བུའི་ནད་གསོ་བའི་ལེའུ་བཤད་པར་བྱ་སྟེ། དེ་ལ་ཤ་བཀྲའི་ནད་ནི། མཛེ་ནད་པས་ཀྱང་ཤིན་ཏུ་སྨད་པ་ཡིན་ནོ། །དེ་བས་ན་མྱུར་དུ་གསོ་བའི་ཆོ་ག་ལ་འབད་དེ་མ་
[263a.6]བྱས་ན་གསོར་མི་རུང་བར་འགྱུར་ཏེ་མེ་ཉུང་ངུ་ལས་འབར་བས་ཁྱིམ་ཚིག་པ་དང་འདྲའོ། །དེ་བས་ཁྱད་པར་དུ་ལུས་ཀྱི་ཤ་བཀྲ་ལ་ཐོག་མར་སློན་ཁྲུས་ཀྱིས་ལུས་དག་པར་བྱའོ། །ཤ་བཀྲ་ལ་ནི་ཤྲི་ཁཎྜ་དང་། སོ་མར་ཛ་བསྐོལ་བའི་ཁུ་བ་འམ། ཡང་ན་རང་གི་ཁུ་བ་བུ་རམ་དང་བཅས་
[263a.7]པ་བླུད་ནས། དེའི་འོག་ཏུ་ཉམས་སྟོབས་ཇི་ལྟ་བ་བཞིན་དུ་བསྐུ་བྱུག་བྱས་ལ། ཉི་མ་ལ་ཇི་སྲིད་བཟོད་ཀྱི་བར་དུ་གཞག་པར་བྱའོ། །སྦྱོར་བ་དེ་དག་ཞག་གསུམ་གྱི་བར་དུ་བསྟེན་ལ། སྐོམ་དད་སྐྱེས་པར་གྱུར་ན་ཐུག་པ་བླུད་དོ། །དེ་ལྟར་ཉི་མ་ལ་ཞག་གསུམ་བཞག་པས་ཆུ་སྐྱེས་
[263b]
[263b.1]པ་ལ་ནི་ཚེར་མས་བརྟོལ་ལ་གཟག་པར་བྱའོ། །དེ་ནས་སོ་མ་ར་ཛ་དང་། ཨ་ས་ན་དང་། པྲི་ཡང་ཀུ་དང་། ཤུ་ཏི་དང་། འདི་རྣམས་ཆོ་ག་བཞིན་དུ་ནང་རེ་ནང་རེ་བཞིན་ཟླ་བ་ཕྱེད་ཀྱི་བར་དུ་གཏང་ངོ་། །ཡང་ན་རྒྱ་སྐྱེགས་ཤིང་གི་ཁུ་བ་དང་། ཧྭགས་དང་སྦྱར་བའི་ཆུ་གོང་མ་ལྟར་ཉམས་
[263b.2]སྟོབས་དང་སྦྱར་ཏེ་གཏོང་ངོ་། །ཤིང་ཕལ་གུ་དང་། སྐྱུ་རུ་རའི་ཤིང་དང་། དུག་མོ་ཡུངས་ཀྱི་ཤིང་གི་ཤུན་པ་བཏགས་པ་སོ་མ་ར་ཛའི་ཁུ་བའི་ནང་དུ་བཏབ་པ་འཐུངས་པ་དང་། ལུས་དྲོ་བར་འགྱུར་ཏེ་ཆུ་བུར་བྱུང་ན་ཚ་བ་མེད་པའི་ཟས་དར་བ་དང་ལྷན་ཅིག་བཟའོ། །ཡང་ན་
[263b.3]བ་གཅིན་གྱི་ནང་དུ་ཙི་ཏྲ་ཀ་དང་། ཚ་བ་གསུམ་གྱི་ཕྱེ་མ་དང་། སྦྲང་རྩི་དང་སྦྱར་བ་སྣོད་སྣུམ་ཅན་གྱི་ནང་དུ་བཅུག་པ་ཟླ་བ་ཕྱེད་ཀྱི་བར་དུ་བཞག་ལ་དེ་ལས་རན་པར་བཏུང་ངོ་། །གཞན་ཡང་བཏུང་བ་ལ་སོགས་པའི་བྱ་བ་ཐམས་ཅད་མཛེ་ནད་ཀྱི་ཆོ་ག་ལྟར་བྱའོ། །ཡང་ན་བྲིང་
[263b.4]གར་ཛ་ཏིལ་མར་དང་བརྔོས་ཏེ། ལྕགས་སྣོད་ཀྱི་ནང་དུ་བཅུག་པ་བཟའ་ཞིང་ཨ་ས་ནའི་ས་བོན་འོ་མ་དང་བསྐོལ་བ་འཐུངས་ན་ཤ་བཀྲ་འཇོམས་སོ། །ཡང་ན་པུ་ཏི་ཀ་རཉྫ་དང་། དོང་ག་དང་། ཨརྐ་དང་། ཤྲི་ཁཎྜའི་ཤིང་དང་། ཛཱ་ཏི་དང་། དེ་རྣམས་ཀྱི་ཤུན་པ་བཏགས་
[263b.5]པ་བ་གཅིན་དང་སྦྱར་བའི་ལྡེ་གུས་བསྐུས་ན། ཤ་བཀྲ་དང་། གཞང་འབྲུམ་དང་། ཤུ་བ་དང་། གཡན་པ་དང་། འབྲུམ་བུ་དང་། རྨ་འགྲམས་པ་རྣམས་འཇོམས་སོ། །ཡང་ན་ཙི་ཏྲ་ཀ་དང་། གླང་པོ་ཆེའི་པགས་པ་བསྲེགས་པའི་ཐལ་བ་ཏིལ་མར་དང་སྦྱར་བས་བསྐུས་
[263b.6]ན་ཡང་ཤ་བཀྲ་སེལ་བའི་མཆོག་ཡིན་ནོ། །ཡང་ན་སྦུར་བ་ནག་པོའི་ཤ་དང་དོང་གའི་ལོ་མ་དང་ལྡེ་གུར་བྱས་ཏེ་བསྐུས་ན། དེ་གཅིག་པུས་ཀྱང་ཤ་བཀྲ་འཇིག་པར་བྱེད་དོ། །ཆུ་བུར་ཕྱིར་དབྱུང་བའི་ཕྱིར་བ་གཅིན་དང་ནུབ་གཅིག་སྦངས་ཏེ། གྲིབ་མ་ལ་སྐམས་པ་དེ་བཞིན་
[263b.7]དུ་ལན་གསུམ་བྱས་ལ། དེའི་འོག་ཏུ་ཞིབ་ཏུ་བཏགས་ཏེ་ཤྲི་ཁཎྜའི་འོ་མ་དང་སྦྱར་བས་བསྐུས་ན་ཤ་བཀྲ་འཇོམས་སོ། །སྦྲུལ་ནག་པོའི་ཤ་རྫེའུ་ཁ་སྦྱར་གྱི་ནང་དུ་དུད་པ་མ་ཤོར་བར་བསྲེགས་ཏེ། སྣག་ཚ་འདྲ་བར་སོང་བའི་ཐལ་བ་བ་རུ་རའི་མར་དང་སྦྱར་བས་བསྐུས་ན་ཡང་
[264a]
[264a.1]ཤ་བཀྲ་འཇོམས་སོ། །དེ་བཞིན་དུ་རྨ་བྱའི་མཁྲིས་པ་ཉི་ཚེ་འམ། ཡང་ན་བ་ལ་ཀ་བསྲེགས་པའི་ཐལ་བ་རྨ་བྱའི་མཁྲིས་པ་དང་བསྲེས་པས་བསྐུས་ན་ཤ་བཀྲ་སེལ་ཏོ། །སོ་མ་ར་ཛ་སྲང་བཞི་དང་། བ་ལ་སྲང་གཅིག་བཏགས་བ་བ་གཅིན་དང་སྦྱར་
[264a.2]བས་བསྐུས་ན་ཡང་ཤ་བཀྲའི་མདོག་བསྒྱུར་ཅིང་པགས་པའི་མདོག་ཐ་མལ་པར་སྐྱེད་པའི་མཆོག་ཡིན་ནོ། །གླང་པོ་ཆེའི་རྟུག་པ་ལེགས་པར་བསྲེགས་ཏེ་ཐལ་བར་གྱུར་པ་དང་། གླང་པོ་ཆེའི་གཅིན་དང་བསྐྱོས་ཏེ་བཙགས་པ་སྲང་བརྒྱ་རྩ་བཅུ་གཉིས་དང་། དེའི་བཅུ་ཆ་གཅིག་
[264a.3]གི་སོ་མ་ར་ཛའི་ཕྱེ་མ་བཏབ་སྟེ་བསྐོལ་ལ་སྐ་བར་གྱུར་པ་དང་། ཤ་བཀྲའི་པགས་པའི་ཕྱི་རོལ་བཞར་བའི་སྟེང་དུ་བསྐུས་ན་ཤ་བཀྲ་འཇོམས་སོ། །མདོར་ན་མཛེ་དང་པགས་པའི་མདོག་ནག་པོ་སྣག་ཚ་འདྲ་བ་དང་། ཐིག་ལེ་ལྟ་བུར་ཆགས་པ་དང་རྨའི་ཤ་རྙིང་པ་ཕྱིར་འབུར་བ་དང་།
[264a.4]དེ་རྣམས་ལ་ཐོག་མར་བཞར་ལ་དེའི་འོག་ཏུ་བསྐུ་བྱུག་བྱས་ན། ཤ་བཀྲ་ལ་སོགས་པ་འཇོམས་སོ། །གོ་བྱེ་དང་། ཙི་ཏྲ་ཀ་དང་། ཤིང་སུ་དྷཱ་ཀྵི་ར་དང་། ཨརྐའི་རྩ་བ་དང་། འོལ་མ་སེ་དང་། ཚ་བ་གསུམ་དང་། དུང་དང་། སྤངས་མ་དང་། རུ་རྟ་དང་། ལན་ཚྭ་རྣམ་ལྔ་དང་། ཐལ་བ་རྣམ་
[264a.5]གཉིས་དང་། ལང་ག་ལི་དང་། འདི་རྣམས་བཏགས་པའི་ཕྱེ་མ་སུ་དྷཱ་ཀྵི་ར་དང་། ཨ་རྒའི་འོ་མ་དང་བསྐོལ་ཏེ། སྐ་བར་གྱུར་པ་དང་། ལྕགས་སྣོད་ཀྱི་ནང་དུ་བཅུག་སྟེ། དེ་ལས་ཐུར་མས་བསྐུས་ན་མཛེ་དང་། ཤ་བཀྲ་དང་། སྨེ་བ་དང་། པགས་པའི་མདོག་སྣག་ཚ་འདྲ་
[264a.6]བར་གྱུར་པ་དང་། གཞང་འབྲུམ་དང་། པགས་པའི་ཤ་མཛེར་དང་དེ་རྣམས་འཇོམས་པར་བྱེད་དོ། །མདོར་ན་ཤ་བཀྲ་ཡོད་པའི་ནད་པ་ལ་ནི་སློན་ཁྲུས་ཀྱིས་ལུས་དག་པར་བྱ་བ་དང་། གཏར་གས་ཁྲག་དབྱུང་བ་དང་། ཁ་བ་དང་། བསྐ་བའི་ཟས་ཀྱིས་ལུས་རྩུབ་པར་
[264a.7]བྱ་བ་དང་། ཕྱེའི་ཟས་རྣམས་བསྟེན་ཏོ། །གལ་ཏེ་དེ་དག་སྡིག་པ་ཟད་པ་ལྟ་ན་སོས་པ་སྲིད་ཀྱི་དེ་ལྟ་མ་ཡིན་ན་ནི་གསོ་དཀའོ། །དེ་ནས་སྲིན་བུ་གསོ་བ་བཤད་དེ། །དེ་ལ་ཁོང་པའི་སྲིན་བུ་བད་ཀན་ལས་གྱུར་པ་ལ་ནི་ཐོག་མར་སྣུམ་ཆོས་དང་དུགས་བྱས་ལ། བུ་རམ་དང་འོ་
[264b]
[264b.1]མ་དང་སྦྱར་བ་བཏུང་བའམ། ཡང་ན་ཉ་ཤ་ལ་སོགས་པ་བཟའ་སྟེ། ནུབ་མོ་བདེ་བར་བསྙལ་ལ་སྲིན་བུ་ཀུན་རང་གི་གནས་ལས་བྱུང་ནས། ཟས་མངར་བག་ཅན་ལ་འདུ་བར་འགྱུར་རོ། །དེའི་འོག་ཏུ་བྱེའུ་རུག་པའི་སྡེ་ཚན་བ་གཅིན་དང་ཆུ་དང་བསྐོལ་ལ་དེའི་ནང་དུ་པི་པི་ལིང་དང་། པོ་སོན་ཆ་དང་།
[264b.2]བྱི་དང་ག་དང་། སྭརྩི་ཀའི་ཐལ་བ་དང་། འདི་རྣམས་ཕྱེ་མར་བྱས་ལ་ཏིལ་མར་དང་སྦྱར་ནས་བཀྲུ་སྨན་དྲག་པོ་མས་གཏོང་བར་བྱའོ། །དེ་ལྟར་ནི་རུ་ཧ་མས་གཏོང་བའི་རྗེས་ལ་བཀྲུ་སྨན་གཏང་བར་བྱ་སྟེ། ཏྲི་བི་ཏ་དང་། པོ་སོན་ཆ་དང་། པི་པི་ལིང་དང་། འདི་གསུམ་གྱི་ཕྱེ་མ་
[264b.3]བྱེའུ་རུག་པའི་སྡེ་ཚན་བསྐོལ་བའི་ནང་དུ་བཏབ་ལ་བླུད་དོ། །ཁོང་པའི་ནང་དག་པར་བྱའོ། །དེ་ལྟར་སློན་ཁྲུས་བྱས་པའི་རྗེས་ལ་ཚ་བ་ལྔས་བཏབ་པའི་འབྲས་ཐུག་སྦྱིན་པར་བྱའོ། །དེ་ནས་སྨན་ཚ་བ་དང་ཁ་བ་བསྐོལ་བའི་ཆུས་ལུས་ལ་བླུགས་པར་བྱའོ། །སློན་ཁྲུས་ཀྱིས་ལུས་
[264b.4]དག་པར་བྱས་ནས། བྱི་དང་ཀའི་མར་གྱི་འཇམ་རྩི་མས་གཏོང་བར་བྱའོ། །མགོ་བོའི་སྲིན་བུ་ལ་ནི་མགོ་ཁྲུས་ཀྱི་སྨན་དུ་བཤད་པ་གཏང་བར་བྱའོ། །བཟའ་བ་ནི་ཤིན་ཏུ་ཚ་བ་དང་། ཁ་བ་དང་སྣུམ་ཅུང་ཟད་དང་བཅས་པ་སྦྱིན་ནོ། །དེ་ནས་དར་བ་ལས་གཞི་བླངས་པའི་
[264b.5]ཐུག་པའི་སྟེང་དུ། བྱི་དང་ག་དང་། པི་པི་ལིང་དང་། ན་ལེ་ཤམ་དང་། པི་པི་ལིང་གི་རྩ་བ་དང་། ན་ལེ་ཤམ་དཀར་པོ་དང་། སྭ་རྩི་ཀའི་ཐལ་བ་རྣམས་ཀྱི་ཕྱེ་མས་བཏབ་པ་བླུད་པར་བྱའོ། །ཡང་ན་ཤྲི་ཤ་ཀ་དང་། གི་རི་ཀརྞི་དང་། པ་རི་བྲ་ཏ་ཀ་དང་། ཀ་བྷུ་ཀ་དང་། པ་ལ་ཤའི་ས་
[264b.6]བོན་དང་། མན་དུ་ར་དང་། པུ་ཏི་ཀ་དང་། འདི་རྣམས་གང་ཡང་རུང་བ་བསྐོལ་བའི་ཁུ་བའི་ནང་དུ་སྦྲང་རྩི་དང་སྦྱར་བ་བླུད་དོ། །ཡང་ན་བྱེའུ་རུག་པའི་སྡེ་ཚན་ལས་སྨན་གང་ཡང་རུང་བ་སྦྲང་རྩི་དང་སྦྱར་བའི་ལྡེ་གུ་བལྡག་པར་བྱའོ། །ཡང་ན་བྱེའུ་རུག་པའི་སྡེ་ཚན་དང་། ཏྲི་
[264b.7]བི་ཙའི་ཕྱེ་མ་དང་བྱི་དང་ག་དང་ཆུ་དང་བསྐོལ་བའི་ནང་དུ་བཏབ་པ་བླུད་དོ། །སྲིན་བུ་ཅན་ལ་གོང་གི་སྡེ་ཚན་གྱི་སྨན་དང་། ཏྲི་བི་ཙའི་ཕྱེ་མ་སྦྲང་རྩི་དང་སྦྱར་བ་བལྡགས་པའམ། ཡང་ན་འབྲས་བུ་གསུམ་གྱི་ཁུ་བའི་ནང་དུ་བྱེའུ་རུག་པའི་སྡེ་ཚན་དང་། ཏྲི་བི་ཏ་བཏགས་པའི་ཕྱེ་མས་
[265a]
[265a.1]བཏབ་བ་བླུད་དོ། །མགོ་བོའི་སྲིན་བུ་ལ་ནི་རྟ་རྟུག་བཙིར་བའི་ཁུ་བ་དང་། བྱིའུ་རུག་པའི་སྡེ་ཚན་ལས་སྨན་གང་ཡང་རུང་བ་དང་། ཏྲི་བི་ཏའི་ཕྱེ་མས་བཏབ་པའི་ལྡེ་གུས་བསྐུ་བར་བྱའོ། །གཞན་ཡང་སྲིན་བུའི་ནད་ཀུན་ལ་དྲ་བན་ཏིའི་གེ་སར་ལེགས་པར་
[265a.2]བཏགས་ལ་བག་ཕྱེ་དང་བསྲེས་ལ་བཙོས་པའི་སྣུམ་ཁུར་བཟའ་བར་བྱའོ། །དེ་ནས་འབྲས་ཀྱི་སྐྱུར་པོ་འམ་ཚ་བླུད་དོ། །ཡང་ན་ཚ་བ་ལྔ་དང་། ལན་ཚྭ་བཏབ་པའི་དར་བ་ཡང་སླ་ཙམ་སྦྱིན་ནོ། །ཡང་ན་སྨན་ཨ་པ་མརྒ་དང་། ནི་རྒུན་ཐིའི་ལོ་མ་བཏགས་ལ་བག་ཕྱེ་དང་
[265a.3]བསྲེས་ལ་བཙོས་པའི་སྣུམ་ཁུར་བཟའ་བར་བྱའོ། །བཏུང་བ་ནི་གོང་མ་དང་འདྲ། ཡང་ན་བྱི་དང་གའི་ཕྱེ་མ་དང་། བག་ཕྱེ་བསྲེས་པའི་སྣུམ་ཁུར་བཟའོ། །ཡང་ན་བྱི་དང་ག་ཤུན་པ་བོར་བའི་ནང་གི་འབྲུ་བཏགས་ལ། བ་ལ་ཏ་གའི་མར་དང་ཆ་སྙོམས་ཏེ་བསྲེས་ལ་ཕྱེད་ནི་ཁ་ནས་
[265a.4]བཏུང་། ཕྱེད་འཇམ་རྩི་ཐབས་སུ་མས་བཏང་ལ་ཉི་མ་ཚ་བ་ལ་འདེར་གཞུག་གོ། ཡང་ན་ས་ར་ལ་དང་། ཐང་ཤིང་གི་མར་ཆ་སྙོམས་ལ་བསྲེས་ཏེ། གོང་མའི་ཆོ་ག་བཞིན་བྱའོ། །བཤང་བའམ་མི་གཙང་བའི་ནང་དུ་སྐྱེས་པའི་སྲིན་བུ་ལ་ནི་ཁྲུས་དང་འཇམ་རྩི་བཏང་བ་ལས་འདའ་
[265a.5]བ་མེད་དོ། །ངེས་པར་གཏང་བར་བྱའོ། །བད་ཀན་ལས་གྱུར་པའི་སྲིན་བུ་ལ་ནི་མགོ་བཀྲུ་བའི་སྨན་དང་། སློན་དང་། ཁོང་དུ་ཞི་བའི་སྨན་གཏང་ངོ་། །ཁྲག་ལས་གྱུར་པའི་སྲིན་བུ་ལ་ནི་མཛེ་ནད་གསོ་བའི་ཆོ་ག་ལྟར་བྱའོ། །ཁྲག་ལས་གྱུར་པའི་སྲིན་བུ་དང་། སྐྲ་རྩ་ཟ་བར་བྱེད་
[265a.6]པའི་སྲིན་བུ་ནི། ཨིན་དྲ་ལུབ་ཏ་ཞེས་བྱ་བ་མགོ་གསོ་བའི་ཆོ་ག་འོག་ནས་འབྱུང་བ་བཞིན་གསོའོ། །རྣག་ལས་སྐྱེས་པའི་སྲིན་བུ་ལ་ནི་རྨ་འགྲམས་པའི་དཔྱད་འོག་ནས་འབྱུང་བ་བཞིན་བྱའོ། །སྲིན་བུ་ཡོད་པ་རྣམས་ཀྱིས་ཁ་ཟས་འདི་དག་སྤང་བར་བྱ་སྟེ། འོ་མ་དང་། ཤ་དང་།
[265a.7]མར་དང་། བུ་རམ་དང་། ཞོ་དང་། སྔོ་རྔད་ཀྱི་ཚོད་མ་དང་འདི་རྣམས་མི་བཟའ་སྟེ། མདོར་ན་མངར་བ་དང་། སྐྱུར་བ་རྣམས་སྤང་བར་བྱའོ། །གསོ་བའི་གནས་ལས་ཤ་བཀྲ་དང་སྲིན་བུའི་ནད་གསོ་བའི་ལེའུ་ཉི་ཤུ་པ་རྫོགས་སོ།། །།དེ་ནས་རླུང་ནད་གསོ་
[265b]
[265b.1]བའི་ལེའུ་བཤད་པར་བྱའོ། །དེ་ལ་རླུང་ནད་འབའ་ཞིག་བད་ཀན་དང་། མཁྲིས་པ་མ་འདྲེས་པ་ལ་ནི་ཚིལ་དང་། མར་དང་། རྐང་དང་ཏིལ་མར་ཏེ་བཞི་པོ་དེ་དག་ལས་བཏུང་བ་ལ་སོགས་པའི་སྣུམ་ཆོས་སྦྱར་རོ། །དེ་ནས་རླུང་ནད་ཅན་གྱི་ནད་པ་དེ་ཁོང་སྣུམ་གྱིས་ཞེན་པར་གྱུར་ནས་
[265b.2]བར་དེར་ངལ་བསོས་ལ་དེའི་འོག་ཏུ་སྣུམ་ཆེན་པོ་བཞི་འོ་མ་དང་ལྷན་ཅིག་ཏུ་སྦྱར་ཏེ་སྣུམ་ཆོས་སུ་བྱ་བ་དང་། དེ་བཞིན་དུ་གྲོང་དང་། ཐང་དང་། ཆུ་ལ་གནས་པའི་སྲོག་ཆགས་ཀྱི་ཤ་ཁུ་གང་ཡང་རུང་བ་སྣུམ་ཆེན་པོ་བཞི་དང་སྦྱར་བ་བཏང་བ་དང་། གཞན་ཡང་འབྲས་ཀྱི་འོ་ཐུག་དང་། ཀྲི་ས་ར་
[265b.3]སྐྱུར་དང་། ལན་ཚྭ་དང་ལྡན་པར་བཏུང་ཞིང་དེའི་འོག་ཏུ་སྣུམ་དང་ལྡན་པའི་འཇམ་རྩི་མས་གཏོང་ངོ་། །སྣ་སྨན་དང་སྐྱོ་མ་དང་། ཁ་ཟས་རྣམས་ཀྱང་སྣུམ་དང་སྦྱར་བ་སྦྱིན་ནོ། །དེ་ལྟར་ཁོང་སྣུམ་གྱིས་ཞེན་པར་གྱུར་ན། སྣུམ་ཆེན་པོ་བཞི་བཏང་ཞིང་གདིང་བའི་དུགས་ལ་སོགས་
[265b.4]པ་ཡན་ལག་བརྒྱད་པ་བསྡུས་པ་ལས་འབྱུང་བ་རྣམས་འདིར་སྦྱར་རོ། །རླུང་ནད་ཀྱིས་ལུས་ཡང་ཡང་པོར་གྱུར་པ་དང་། རེངས་པ་དང་། ནད་དང་བཅས་ཤིང་ཟུག་པ་ལ་ཡང་སྣུམ་དང་བཅས་པའི་དུགས་བྱས་ན་ཇི་ལྟར་འདོད་པ་བཞིན་དུ་ལུས་ཀྱི་བྱ་བ་ནུས་པར་འགྱུར་ཏེ།
[265b.5]ཇི་ལྟར་ཤིང་སྐམ་པོ་ཡང་དུགས་དང་སྣུམ་ལ་སོགས་པའི་ཆོ་ག་བྱས་ན། ཅི་དགར་མདའ་ལ་སོགས་པ་བྱར་ཡོད་ན། ལུས་ཅན་རྣམས་ལ་སྨོས་ཀྱང་ཅི་དགོས། དེ་ལྟར་དུགས་བྱས་པའི་ཡོན་ཏན་ནི་བ་སྤུ་ལངས་པ་དང་། ན་བ་དང་། ཟུག་གཟེར་ཆེ་བ་དང་། རྩོལ་བ་
[265b.6]མང་བ་དང་། ལུས་སྐེམ་པ་དང་། རེངས་པ་ལ་སོགས་པ་མྱུར་དུ་ཞི་བར་འགྱུར་ཞིང་ལུས་ཀྱི་ཤ་མཉེན་པར་འགྱུར། རླུང་ན་བའི་ནད་པ་ལ་སྣུམ་ཆོས་སྦྱར་བའི་ཡོན་ཏན་ནི། དངས་མ་ལ་སོགས་པའི་ལུས་ཟུངས་རྣམས་མྱུར་དུ་འཕེལ་ཞིང་ལུས་ཀྱི་ཉམས་སྟོབས་དང་།
[265b.7]མེའི་དྲོད་འཕེལ་ཞིང་འཚོ་བ་ཡང་ཡུན་རིང་དུ་གནས་པར་བྱེད་དོ། །དེ་ལྟར་རླུང་ནད་ཅན་གྱི་སྐྱེས་བུ་ལ་ལན་ཅིག་མ་ཡིན་པར་ཕོག་མང་དུ་སྣུམ་ཆོས་དང་དུགས་ཡང་དང་ཡང་བྱས་ན། ཁོང་སྣུམ་ཞིང་འཇམ་པར་འགྱུར་ཏེ། རླུང་ནད་གནས་པར་མི་འགྱུར་རོ། །གལ་ཏེ་
[266a]
[266a.1]སྣུམ་ལ་སོགས་པ་གོང་མའི་སྦྱོར་བ་དེ་དག་གིས་མ་ཞི་ན་ནི་ངེས་པར་ནད་གཞན་དང་འདྲེས་པ་ཡིན་ཏེ། དེ་ནས་བཀྲུ་སྨན་འཇམ་པོ་སྣུམ་དང་བཅས་པ་བཏང་སྟེ། དེ་ཡང་སེང་ཕྲོམ་དང་། ས་ཏ་ལ་གང་ཡང་རུང་བ་མར་དང་བསྐོལ་བ་བླུད་པ་འམ། ཡང་ན་
[266a.2]ཨེ་རཎྜའི་མར་འོ་མ་དང་བསྐོལ་བ་བླུད་ན། ནད་འཕྲོག་ཅིང་ཞི་བར་འགྱུར་རོ། །སྣུམ་པ་དང་། སྐྱུར་བ་དང་། གྲོ་བ་དང་། ལན་ཚྭ་ལ་སོགས་པས་དྲི་མ་སོགས་ཤིང་རྩ་རྒྱུན་འགགས་ཏེ་རླུང་ཚུལ་བཞིན་མི་འབྱུང་བ་ལ་ནི་བཀྲུ་སྨན་བཏང་ན། རླུང་ལུགས་བཞིན་དུ་འབྱུང་ངོ་། །སྐྱེས་
[266a.3]བུ་རླུང་ནད་ཅན་ཉམས་སྟོབས་ཆུང་ཞིང་བཀྲུ་སྨན་བཏང་བར་མ་འོས་པ་ལ་ནི་དྲོད་སྐྱེད་པ་དང་། སྨིན་པའི་ཟས་དང་བཅས་པའི་ནི་རུ་ཧ་མས་གཏོང་བའམ། ཡང་ན་དྲོད་སྐྱེད་པ་དང་། སྨིན་པའི་སྨན་དང་། ཟས་ལྷན་ཅིག་གཏང་ངོ་། །དེ་ལྟར་སློན་ཁྲུས་བྱས་པའི་འོག་ཏུ་མེ་དྲོད་
[266a.4]ཚབས་ཆེར་སྐྱེས་པར་གྱུར་པ་ལ་ཡང་སྣུམ་ཆོས་དང་དུགས་བྱའོ། །སྐྱུག་སྨན་བྱས་པའི་འོག་ཏུ་ཐུག་པ་ལ་སོགས་པའི་རིམ་པ་མ་བྱས་པར་ཁ་ཟས་རན་བར་ཟོས་པས་ཕོ་བའི་ནང་དུ་རླུང་ཞུགས་པ་ལ་ནི་མཛེ་ནད་ཀྱི་སྐབས་སུ་བཤད་པའི་སྨན་དྲུག་པའི་ཕྱེ་མ་འམ། ཡང་
[266a.5]ན་ཤུ་དག་གི་སྡེ་ཚན་གྱི་ཕྱེ་མ་གང་ཡང་རུང་བ་ཆུ་དྲོ་འཇམ་ཙམ་དང་སྦྱར་བ་བླུད་དོ། །བྱུག་པ་ལ་སོགས་པའི་རིམ་པ་བྱས་པས་མེ་དྲོད་ཤས་ཆེར་སྐྱེས་པ་ལ་ནི་རླུང་ནད་ཉི་ཚེའི་ཆོ་ག་བཞིན་བྱའོ། །ལྟེ་བའི་ཕྱོགས་སུ་རླུང་ཞུགས་པ་ལ་ནི་བིལ་བ་གཞོན་ནུ་དང་། ཉ་ཤ་གཡོས་སུ་
[266a.6]བྱས་པ་བྱིན་ནོ། །ལྟེ་བའི་འོག་ཏུ་ཞུ་བའི་གནས་སུ་རླུང་ཞུགས་པ་ལ་ནི། འཇམ་རྩིའི་ལས་བྱས་ན་རབ་ཏུ་བསྔགས་སོ། །ཡང་ན་དང་པོ་མར་རམ་ཏིལ་མར་འཐུངས་ལ། དེའི་འོག་ཏུ་ཟས་ཟོས་ན་ཕན་ནོ། །ཁོང་པའི་ནང་དུ་རླུང་ཞུགས་པ་ལ་ནི་ཐལ་སྨན་དང་ཕྱེ་མ་ལ་
[266a.7]སོགས་པ་དྲོད་སྐྱེད་ཅིང་སྨིན་པར་བྱེད་པའི་སྨན་བསྟེན་ན་ཕན་ནོ། །སྙིང་གི་ནང་དུ་རླུང་ཞུགས་པ་ལ་ནི་ས་ལ་པརྞི་འོ་མ་དང་སྦྱར་བ་བླུད་དོ། །མགོ་བོའི་ནང་དུ་རླུང་ཞུགས་པ་ལ་ནི་སྣ་ནས་སྨན་མར་གཏང་ངོ་། །དེ་བཞིན་དུ་སྣུམ་དང་བཅས་པའི་སྣ་སྨན་དང་། དུད་པ་བརྔུབ་པ་ལ་
[266b]
[266b.1]སོགས་པ་བྱའོ། །རྣ་བ་ལ་སོགས་པ་གཞན་རྣམས་ལ་རླུང་ཞུགས་ན་ཡང་སོ་སོ་དང་མཐུན་པའི་སྨན་སྦྱར་ན་ཕན་ནོ། །རླུང་ནད་པགས་པ་ལ་བརྟེན་པ་ལ་ནི་དུགས་དང་བསྐུ་བྱུག་དང་རླུང་མེད་པའི་གནས་སུ་འདུག་པ་དང་། ཟས་ཡི་གར་འོང་བ་བསྟེན་ན་ཕན་ནོ། །རླུང་ནད་
[266b.2]ཁྲག་ལ་གནས་པ་ལ་ནི་བསིལ་བའི་བྱུག་པས་བྱུགས་པ་དང་། བཀྲུ་སྨན་དང་ཁྲག་དབྱུང་བ་རྣམས་བྱས་ན་ཕན་ནོ། །རླུང་ཤ་དང་ཚིལ་ལ་བརྟེན་པ་ལ་ནི་བཀྲུ་སྨན་བྱས་ན་ཕན་ཏེ། དེ་བཞིན་དུ་ནི་རུ་ཧ་དང་ཞི་བའི་སྨན་རྣམས་བྱས་ན་ཕན་ནོ། །རླུང་རུས་པ་དང་རྐང་ལ་གནས་པ་ལ་
[266b.3]ནི་ཕྱི་ནང་གཉིས་ཀ་ལ་སྣུམ་ཆོས་བྱས་ན་རྒྱལ་བར་བྱེད་དོ། །རླུང་ཁུ་ཆུ་ལ་གནས་པ་ལ་ནི་སེམས་དགའ་བར་བྱ་བ་དང་། ཉམས་སྟོབས་སྐྱེད་ཅིང་ཁུ་ཆུ་འཕེལ་བར་བྱ་བའི་ཟས་བསྟེན་ན་ཕན་ནོ། །རླུང་གིས་ཁུ་ཆུ་འགགས་ཏེ་འབྱུང་དུ་མི་སྟེར་བ་ལྟ་ན་ནི་བཀྲུ་སྨན་བྱིན་ན་ཕན་ནོ། །དེའི་
[266b.4]འོག་ཏུ་བཟའ་བ་ལ་སོགས་པའི་རིམ་པ་གོང་དུ་སྨོས་པ་ལྟར་བྱས་ན་ཕན་ནོ། །རླུང་ཁུ་ཆུ་ལ་གནས་པར་གྱུར་ན། བུ་ཚ་ཡང་ཤ་སྐེམ་པར་འགྱུར་རོ། །དེ་ཤ་སྐེམ་པའི་བུ་ལ་ནི་ཁ་ར་དཀར་པོ་དང་། ཏང་པལ་དང་། ཤིང་མངར་རྣམས་འོ་མ་དང་སྦྱར་བ་བླུད་ན་ཤ་སྐྱེ་བར་འགྱུར་
[266b.5]རོ། །རླུང་རྒྱུས་པ་དང་ཚིགས་དང་རྩ་རྣམས་སུ་ཞུགས་པ་ལ་ནི་སྣུམ་པ་དང་ཚ་བའི་སྨན་བསྟེན་པ་དང་། ཆུ་ལུམས་ཀྱི་དུགས་བྱའོ། །རླུང་གིས་ཡན་ལག་འཁུམས་པ་ལ་ནི་མོན་སྲན་གྲེའུ་དང་། རྒྱམ་ཚ་ཏིལ་མར་དང་སྦྱར་བས་བསྐུས་ན་ཕན་ནོ། །ཁྲག་ཕྱུང་བས་
[266b.6]ལུས་སྐྱེས་ཏེ་ལུས་བེམ་བེམ་པོར་གྱུར་ཅིང་ཚོར་བ་མེད་པ་ལ་ནི། ཁྱིམ་གྱི་དུད་པ་དང་། ལན་ཚྭ་དང་། ཏིལ་མར་དང་སྦྱར་བས་བསྐུས་ན་ཕན་ནོ། །ཚོར་བ་དང་བཅས་པ་ཡིན་ན་ནི་ཆུ་ལུམས་ཀྱིས་དུགས་བྱའོ། །ཨ་བ་ཏ་ན་རང་དབང་ཅན་ཞེས་བྱ་བའི་རླུང་ནད་
[266b.7]ཡོད་དེ། དེའི་མཚན་ཉིད་ནི་མིག་འགུལ་མི་ཤེས་བསྐྱོད་མི་ནུས་ཤིང་འདོད་པའི་རྩོལ་བ་མི་ཤེས་ལ་ཁུ་ཆུ་མི་འབྱུང་བ་རྣམས་ཡིན་ཏེ། དེ་ལ་ནི་མྱུར་དུ་གསོ་བར་བྱ་སྟེ། ཐོག་མར་དུགས་དང་སྣུམ་ཆོས་བྱས་ལ། དེའི་འོག་ཏུ་མགོ་ཁྲུས་ཀྱི་སྣ་སྨན་རྣོན་པོ་གཏང་ངོ་། །
[267a]
[267a.1]དེ་ནས་བི་ད་རིའི་སྡེ་ཚན་བསྐོལ་བ་དང་། ཞོ་དང་འོ་མ་དང་ཤ་ཁུ་དང་མར་ཆ་སྙོམས་ཏེ་བསྐོལ་ལ་མར་ལུས་ཏེ་འདུག་པ་བླུད་དོ། །དེ་ནས་ཐུག་པ་རྐྱང་རྐྱང་པོ་ལ་སོགས་པ་རིམ་གྱིས་བྱིན་ན། རླུང་གིས་ཁྱབ་པར་འགྱུར་ཏེ། དེ་མ་ཐག་ཕན་ནོ། །རྒྱ་སྲན་དང་
[267a.2]ནས་དང་། རྒྱ་ཤུག་དང་། རླུང་འཇོམས་པའི་སྨན་ཐང་ཤིང་གི་སྡེ་ཚན་ལ་སོགས་པ་དང་སྐོམ་གཤེར་གཉི་ག་ན་གནས་པའི་ཤ་དང་ལྷན་ཅིག་བསྐོལ་ཏེ་བཞི་ཆ་ལུས་པའི་ནང་དུ་རང་སྐྱུར་དང་། འོ་མ་དང་མངར་བའི་སྡེ་ཚན་གྱི་ཕྱེ་མ་དང་། སྣུམ་ཆེན་པོ་བཞི་བཅུག་སྟེ་བསྐོལ་ལ་
[267a.3]སྣུམ་ལུས་པ་དང་། དེ་ལས་བླུགས་པ་དང་། བསྐུ་བྱུག་དང་ལུས་གཞུག་པ་དང་བཟའ་བ་དང་བཏུང་བ་དང་། སྣར་བླུགས་པ་དང་འཇམ་རྩི་ལ་སོགས་པ་བྱས་ན། རླུང་ནད་འཇོམས་པར་བྱེད་དོ། །དེ་དག་ལ་སོགས་པ་སྣུམ་ཆོས་དང་དུགས་ཀྱི་ཆོ་གའི་ནང་ནས་འབྱུང་བའི་
[267a.4]རླུང་ལ་ཕན་པ་རྣམས་འདིར་སྦྱར་རོ། །དེ་ལ་ཨ་པ་ཏ་ན་ཀ་ཞེས་བྱ་བ་རླུང་ནད་ཀྱིས་ཉམ་ཐག་པའི་སྐྱེས་བུ་ལ་ནི་མགོ་ཁྲུས་ཀྱི་སྣ་སྨན་ལན་མང་དུ་ཡང་དང་ཡང་དུ་བྱ་སྟེ། དེ་ཡང་བད་ཀན་སེལ་ཅིང་རྣོ་བའི་སྨན་གྱིས་སྦུ་གུ་ནས་འབུད་པ་འམ་ཡང་ན་སྨན་གྱི་ཕུར་མ་སྣ་སྒོ་ནས་བཙིར་
[267a.5]ཞིང་བླུགས་ན། རླུང་ལེགས་པར་སྦུབས་སུ་རྒྱུ་ཞིང་དེ་བཞིན་དུ་འདུ་ཤེས་རྙེད་པར་འགྱུར་རོ། །ཁ་རུ་ཚ་དང་། ཨ་རུ་ར་དང་། ཚ་བ་གསུམ་མར་དང་བསྐོལ་ཏེ་བྱིན་ན་རླུང་ཤས་ཆེ་བ་ལ་ཕན་ནོ། །ཡང་སེང་ཕྲོམ་དང་། འབྲས་བུ་གསུམ་སྲང་བརྒྱད་དང་། རྩ་བ་ཆེན་པོ་ལྔ་སྲང་སུམ་ཅུ་རྩ་
[267a.6]གཉིས་དང་། ཨེ་རཎྜ་དང་། བྲི་ཧ་ཏི་དང་། དུར་བྱིད་སྲང་རེ་རེ་དང་། ཆུ་སྲང་ལྔ་བརྒྱ་རྩ་བཅུ་གཉིས་དང་བསྐོལ་ཏེ། བཞི་ཆ་ལུས་པའི་ནང་དུ་ཞོ་སྲང་བརྒྱ་ཉི་ཤུ་རྩ་བརྒྱད་དང་། ནས་ཚིག་འཁུས་པའི་ཐལ་བ་དང་། བིལ་བ་སྲང་གསུམ་དང་མར་སྲང་སུམ་ཅུ་རྩ་གཉིས་དང་ཡང་བསྐོལ་ཏེ། མར་འབའ་ཞིག་ལུས་
[267a.7]པ་ལས་རན་པར་བསྟེན་ན། རླུང་ནད་མ་རུངས་པ་དང་། ཡན་ལག་ཐམས་ཅད་ལ་གནས་པ་དང་། མོ་མཚན་གྱི་ནད་དང་། རྒྱུ་རླུགས་ཀྱི་ནད་དང་སྐྲན་དང་། དམུ་རྫིང་རྣམས་སེལ་བར་བྱེད་དོ། །གོང་དུ་སེང་ཕྲོམ་གྱི་ཆོ་ག་ཇི་ལྟ་བ་བཞིན་དུ་རམ་མྱ་ཀ་དང་། ཨ་ཤོ་ཀ་ཡང་བཀྲུ་སྨན་
[267b]
[267b.1]གྱི་དོན་དུ་འདིར་སྦྱར་རོ། །གསོ་བ་དེ་དག་ནི་རླུང་ནད་ཨ་བ་ཏ་ན་ཀ་གཞན་དབང་ཅན་ཉི་ཚེ་ལ་སྦྱོར་བ་ཡིན་ནོ། །ཨ་པ་ཏ་ན་ཀ་ཞེས་བྱ་བའི་རླུང་ནད་བད་ཀན་དང་མ་ཞུ་བ་དང་མཁྲིས་པ་དང་འདྲེས་པ་ཡིན་ན་ཡང་གསོ་བ་དེ་ལྟར་བྱ་སྟེ། དེ་ཡང་རླུང་དེ་བད་ཀན་དང་བཅས་ཤིང་སྙིང་དང་རྩིབ་ལོགས་ན་
[267b.2]བར་གྱུར་པ་ལ་ནི་གཡེར་མ་དང་། ཨ་རུ་ར་དང་། ཤིང་ཀུན་དང་། མ་ནུ་དང་། ལན་ཚྭ་རྣམ་གསུམ་བཏགས་པའི་ཕྱེ་མ་ནས་བསྐོལ་བའི་ཁུ་བ་དང་སྦྱར་བ་བཏུང་བ་འམ། ཡང་ན་ཤིང་ཀུན་དང་། བཅའ་སྒ་དང་། ཁ་རུ་ཚ་དང་། སེའུ་འབྲུ་དང་། སྟར་བུ་དང་། འདི་རྣམས་
[267b.3]ཀྱི་ཕྱེ་མ་ནས་དང་བསྐོལ་བའི་ཁུ་བ་དང་སྦྱར་བ་འཐུངས་ན་ཕན་ནོ། །བད་ཀན་དང་རླུང་འཇོམས་བའི་གསོ་བ་སྙིང་ནད་ཀྱི་སྐབས་སུ་བཤད་པ་འདིར་སྦྱར་ན་རབ་ཏུ་བསྔགས་སོ། །ད་རྒན་ཞེས་བྱ་བའི་རླུང་ནད་ལུས་ནང་དུ་གུག་པ་དང་། ཕྱིར་དགྱེ་བ་རྣམ་པ་གཉིས་ཡོད་དེ། དེ་ལ་ནི་ཀླད་པ་
[267b.4]གཞོགས་ཕྱེད་ན་བའི་གསོ་བ་ཇི་ལྟ་བ་བཞིན་དུ་བྱ་སྟེ། དེ་བཞིན་དུ་ཤིང་སྒྲོམ་བུ་རམ་གྱིས་བཀང་སྟེ་ལུས་བཅིང་བར་བྱའོ། །ད་རྒན་གྱི་རླུང་ནད་ནང་དུ་ཞུགས་པ་ནི་གསོ་དཀའོ། །གཞུ་ལྟར་རེངས་པའི་ད་རྒན་ཞེས་བྱ་བའི་རླུང་ནད་ཡོད་དོ་དེའི་མཚན་ཉིད་ནི་སོ་སོའི་མདོག་འགྱུར་ཞིང་
[267b.5]གདོང་དང་ཡན་ལག་རྣམས་ཞིག་པ་དང་། དྲན་པ་ཉམས་པ་དང་། རྔུལ་རྟག་ཏུ་འབྱུང་བ་ཡིན་ཏེ། དེ་ནི་ཞག་བཅུ་ལས་མི་འཚོ་སྟེ། གཞན་དུ་ན་ཤུགས་ཞན་ཅིང་འཚོ་བ་ལྟ་ན་ཡང་ལུས་གཞུ་ལྟར་སྒུར་བ་དང་། གླེན་པ་དང་། འཐེང་བ་དང་། ལག་པ་ཞ་བ་དང་། གཞོགས་ཕྱེད་
[267b.6]ན་བ་དང་། འཕྱེ་བོ་དང་། དབང་པོ་མ་ཚང་བ་ལ་སོགས་པ་རྣམས་སུ་འགྱུར་རོ། །འགྲམ་པ་རང་གི་གནས་ནས་ཉམས་པ་ཞེས་བྱ་བའི་རླུང་ནད་ཡོད་དེ། དེ་ལ་ནི་སྣུམ་ཆོས་དང་དུགས་བྱ་སྟེ། དེའི་འོག་ཏུ་སྣུམ་སྨན་པ་མཁས་པས་གཞུག་པར་བྱའོ། །ཀོ་སྐོ་ཕྱིར་འབྱུང་
[267b.7]བ་འམ་ནང་དུ་ཞུགས་པར་གྱུར་ན་ཡང་དེ་ཚུལ་བཞིན་དུ་ཆུད་པར་གཞུག་གོ། རླུང་ནད་ཀྱིས་ལྕེ་ལྡིབས་ཏེ་སྨྲ་མི་ནུས་པ་ལ་ནི་རླུང་ནད་ཀྱི་གསོ་བ་བྱས་པ་བཞིན་དུ་བྱའོ། །རླུང་ནད་ཀླད་པ་གཞོགས་ཕྱེད་ན་བ་ལ་ནི་མགོ་ཏིལ་མར་གྱིས་བསྐུ་ཞིང་རྣ་བ་དང་མིག་བརྟ་བར་བྱའོ། །
[268a]
[268a.1]ཀླད་པ་གཞོགས་ཕྱེད་སྐྲངས་པ་ཡིན་ན་ནི་སྐྱུག་སྨན་གཏང་ངོ་། །ཚ་བ་ཆེ་ཞིང་དམར་ལ་ཉམས་སྟོབས་ཡོད་ན་ནི་གཏར་གས་ཁྲག་དབྱུང་ངོ་། །རླུང་གཞོགས་ཕྱེད་ན་བ་ཞེས་བྱ་བའི་ནད་ཡོད་དེ། དེ་ལ་ནི་ཐོག་མར་སྣུམ་ཆོས་བྱ་སྟེ་སྣུམ་དང་ལྡན་པའི་བཀྲུ་སྨན་བྱའོ། །
[268a.2]དཔུང་པ་འཇས་པ་ཞེས་བྱ་བའི་རླུང་ནད་ལ་ནི་སྣ་སྨན་བཏང་ཞིང་མ་ཞུ་བ་མེད་པ་ཡིན་ན་ཟས་ཀྱི་ཁོང་དུ་སྣུམ་བག་སྦྱིན་ནོ། །བརླ་རེངས་པར་བྱེད་པ་ཞེས་བྱ་བའི་རླུང་ནད་ལ་ནི། སྣུམ་ཆོས་དང་། སློན་ཁྲུས་དང་ལུས་དག་པར་བྱ་བའི་ཆོ་ག་མི་ཕན་ཏེ། ཕལ་ཆེར་བད་ཀན་དང་ཚིལ་
[268a.3]དང་མ་ཞུ་བ་ལས་གྱུར་པ་ཡིན་ཏེ། དེ་ལ་ནི་རྩུབ་པ་དང་ལྡན་པའི་ཆོ་གས་བད་ཀན་ཟད་པར་བྱ་སྟེ། དེ་ཡང་བཟའ་བ་ནི་ནས་དང་། ཁྲེ་དང་། ཁྲེ་རྒོད་རྣམས་བསྔགས་སོ། །ཚོད་མ་ནི་ལན་ཚྭ་དང་འབྲུ་མར་ཉུང་ཟད་དང་བཅས་པ་འམ། ཡང་ན་སྲོག་ཆགས་ཐང་ལས་སྐྱེས་བའི་
[268a.4]ཤ་ཁུ་མར་དང་མི་ལྡན་པའི་ཚོད་མའང་མིའི་ཟས་དང་ལྷན་ཅིག་ཟོས་ན་རབ་ཏུ་བསྔགས་སོ། །རླུང་ནད་བརླ་རེངས་པ་ཞེས་བྱ་བ་ཕྱུག་པོའི་ནད་ལ་ནི་དུག་མོ་ཡུངས་ཀྱི་སྡེ་ཚན་ནམ། ཤུ་དག་གི་སྡེ་ཚན་གང་ཡང་རུང་བ་བསྐོལ་བ་ལན་ཚྭ་དང་བཅས་པ་དྲོ་འཇམ་ཙམ་ཉི་ཚེ་བླུད་པའམ། ཡང་ན་མཛེ་
[268a.5]ནད་ཀྱི་སྐབས་སུ་བཤད་པའི་སྨན་དྲུག་པའི་ཕྱེ་མས་བཏབ་པ་བླུད་དོ། །ཡང་ན་འབྲས་བུ་གསུམ་དང་དབྱི་མོ་དང་། པུ་ཙེ་ཤེལ་དང་། པི་པི་ལིང་དང་། འདི་རྣམས་ཀྱི་ཕྱེ་མ་སྦྲང་རྩི་དང་སྦྱར་བའི་ལྡེ་གུའམ། ཡང་ན་དབྱི་མོ་དང་། ཨ་རུ་ར་དང་། ཙི་ཏྲ་ཀ་དང་། ཐང་ཤིང་
[268a.6]བཏགས་པའི་ཕྱེ་མ་སྦྲང་རྩི་དང་སྦྱར་བ་བལྡག་པར་བྱའོ། །ཨ་རུ་ར་དང་། གུ་གུལ་དང་། བྲག་ཞུན་གང་ཡང་རུང་བ་བ་གཅིན་དང་སྦྱར་བ་བཏུང་བར་བསྟེན་ཏོ། །ཚ་བ་གསུམ་དང་། ཙི་ཏྲ་ཀ་དང་། གླ་སྒང་དང་། འབྲས་བུ་གསུམ་དང་། པི་པི་ལིང་དང་། བྱི་དང་ག་
[268a.7]དང་། དགུ་པོ་དེ་སྤྱི་དང་མཉམ་པའི་གུ་གུལ་རྣམས་ལྷན་ཅིག་བཏགས་པའི་ཕྱེ་མ་ཟོས་ན། བརླ་རེངས་པའི་ནད་ཚིལ་དང་བད་ཀན་མ་ཞུ་བ་ལས་གྱུར་པ་དང་། རླུང་ཐམས་ཅད་ལས་རྒྱལ་བར་བྱེད་དོ། །གོང་དུ་སྨོས་པའི་སྦྱོར་བ་དེ་དག་གིས་བད་ཀན་དང་ཚིལ་དུ་བཅས་
[268b]
[268b.1]པའི་རླུང་ནད་ཐམས་ཅད་ཞི་བར་བྱེད་པ་ཡིན་ནོ། །བརླ་རེངས་པའི་ནད་ལ་ནི། ཐལ་སྨན་བ་གཅིན་དང་སྦྱར་བས་དུགས་དང་བླུགས་པ་དང་དྲིལ་བ་རྣམས་བྱའོ། །བད་ཀན་པགས་པའི་ཕྱིར་བྱུང་བ་ལ་ནི་ཡུངས་ཀར་དང་ཀ་རཉྫའི་འབྲས་བུ་བ་གཅིན་དང་སྦྱར་བས་བསྐུས་ན་ཕན་
[268b.2]ནོ། །ཨརྐ་དང་། ཨག་ནི་མནྠ་དང་། ནིམ་པ་དང་། དེ་རྣམས་ཀྱི་རྩ་བ་དང་། ཐང་ཤིང་དང་། ཡུངས་ཀར་དང་། བོང་བ་བསྲེགས་པ་དང་། གྲོག་མོའི་ས་ཕུང་དང་། འདི་རྣམས་ཀྱི་ཕྱེ་མ་སྦྲང་རྩི་དང་སྦྱར་བའི་ལྡེ་གུས་བསྐུས་ན་ཕན་ནོ། །བརླ་རེངས་པའི་ནད་ཀྱིས་བཏབ་
[268b.3]པའི་ནད་པ་དེས་བད་ཀན་ཟད་པར་བྱ་བའི་ཕྱིར་ལུས་ཀྱི་རྩོལ་བ་དང་ངལ་བའི་ལས་བསྟེན་ཏོ། །དེ་བཞིན་དུ་ཐང་ལ་མཆོང་བ་དང་། ཅི་ནུས་ཀྱིས་བུད་མེད་ལ་ཉལ་པོ་བསྟེན་པར་བྱའོ། །དེ་བཞིན་དུ་མཚོ་མི་གཡོ་བ་ལ་བདེ་བར་འཇུག་པ་དང་། ཆུ་བོ་རྒྱུན་ལས་བཟློག་སྟེ་བརྒལ་དུ་གཞུག་
[268b.4]གོ། །དེ་ལྟར་སྦྱོར་བ་དེ་དག་གིས་བད་ཀན་དང་ཚིལ་ཟད་པར་བྱས་པའི་འོག་ཏུ། རླུང་ལ་ཕན་པའི་སྨན་སྣུམ་ལ་སོགས་པ་སྦྱར་བར་བྱའོ། །རླུང་ནད་ལྷག་མ་གྲི་ཏ་ལ་སོགས་པ་རྐང་པ་ཡན་ཆད་ལ་གནས་པ་ལ་ཡང་ཉམས་སྟོབས་དང་། དུས་ཀྱི་བྱེ་བྲག་དང་། གང་ན་ཡོད་པ་
[268b.5]བརྟགས་ཏེ། གོང་དུ་སྨོས་པའི་གསོ་བ་བཞིན་དུ་བྱའོ། །ས་ཧ་ར་ཙ་དང་། ཐང་ཤིང་དང་། དོང་གྲ་དང་། དེ་རྣམས་ཀྱི་ཕྱེ་མར་བྱས་པ་ཏིལ་མར་དང་སྦྱར་བ་འཐུངས་ན། རླུང་གིས་ལུས་གཟིར་ཏེ་འགྲོ་མི་ནུས་པ་ཡང་དེ་མ་ཐག་ཐོགས་པ་མེད་པར་འགྲོ་ནུས་པར་འགྱུར་རོ། །ར་སྣ་དང་།
[268b.6]དོང་གྲ་དང་། ཙི་ཏྲ་ཀ་དང་། པི་པི་ལིང་དང་། ཟུར་བ་དང་། མ་ནུ་དང་། འདི་རྣམས་བཏགས་པའི་ཕྱེ་མ་མར་དང་སྦྱར་བ་འཐུངས་ན་རླུང་ནད་འཇོམས་པའི་མཆོག་ཡིན་ནོ། །ནིམ་པ་དང་། སླེ་ཏྲེས་དང་། བ་ཤ་ཀ་དང་། པ་ཏོ་ལ་དང་། ཀཎྜ་ཀ་རི་འདི་རྣམས་སྲང་བཅུ་བཅུ་ཆུ་སྲང་ལྔ་
[268b.7]བརྒྱ་རྩ་བཅུ་གཉིས་དང་བསྐོལ་ཏེ། ཁུ་བ་བརྒྱད་ཆ་ལུས་པའི་ནང་དུ་མར་སྲང་སུམ་ཅུ་རྩ་གཉིས་དང་། པ་ཐ་དང་། བྱི་དང་ག་དང་། ཐང་ཤིང་དང་། ཧ་སྟི་པི་པི་ལིང་དང་། དོང་གྲ་དང་། སྐྱེར་པ་དང་། ཤུ་ཏི་དང་། དབྱི་མོ་དང་། རུ་རྟ་དང་། ཏེ་ཛོ་བ་ཏི་དང་། ན་ལེ་ཤམ་དང་།
[269a]
[269a.1]དུག་མོ་ཡུངས་དང་། ཏི་མུ་ས་དང་། ཀྲུ་ཏྲུག་ཏྲེས་དང་། པུ་ཙེ་ཤེལ་དང་། གོ་བྱེ་དང་། ཤུ་དག་དང་། པི་པི་ལིང་གི་རྩ་བ་དང་། བཙོད་དང་། བོང་ང་དཀར་པོ་དང་། བོང་ང་སེར་པོ་དང་། ལ་ལ་ཕུད་དང་། སྨན་འདི་རྣམས་ཞོ་གཉིས་གཉིས་དང་། ཡུངས་
[269a.2]མའི་ས་བོན་ཕུབ་མ་དང་ཕྲལ་བ་སྲང་ལྔ་དང་། འདི་རྣམས་བཏགས་པའི་ཕྱེ་མ་བཏབ་སྟེ་ཡང་བསྐོལ་ལ་མར་འབའ་ཞིག་ལུས་པ་ལས་རན་པར་འཐུངས་ན། རླུང་ནད་ཆེན་པོ་རུས་ཚིགས་དང་རྐང་རྣམས་སུ་ཞུགས་པ་ཡང་ཟློག་པར་བྱེད་དོ། །དེ་བཞིན་དུ་མཛེ་ནད་རུས་པ་དང་།
[269a.3]རྐང་རྣམས་སུ་ཞུགས་པ་ལ་ཡང་ཕན་ནོ། །གཞན་ཡང་རྨའི་སྦུབས་འགྲམས་པ་དང་། ལྦ་བ་དང་། མཚན་པར་རྡོལ་བ་དང་། འབྲས་ཀྱི་ཕྲེང་བ་དང་། ནམ་ཚོང་ཡན་ཆད་ཀྱི་ནད་ཐམས་ཅད་དང་། སྐྲན་དང་། གཞང་འབྲུམ་དང་། གཅིན་ནད་དང་། གཅོང་ཆེན་པོ་དང་།
[269a.4]དབུགས་མི་བདེ་བ་དང་། ཡི་ག་འཆུས་པ་དང་། སྣ་ཆུ་འཛག་པ་དང་། ལུད་པ་དང་། སྐྲངས་པ་དང་། སྙིང་ནད་དང་། སྐྱ་རྦབ་དང་། མྱོས་པ་དང་། ཁོང་འབྲས་དང་། རླུང་ནད་དང་ཁྲག་ནད་རྣམས་སེལ་ཏེ། རླུང་མགོར་ཞུགས་པ་ལ་ནི་བིལ་བ་གཞོན་ནུ་དང་། འོ་མ་
[269a.5]བསྐོལ་བའི་ཁུ་བ་མར་གྱི་སྙིང་ཁུ་དང་ཡང་བསྐོལ་བའི་མར་ལས་སྲང་ཕྱེད་ཙམ་སྣར་བླུགས་ན་ཕན་ནོ། །ཡང་ན་བིལ་བ་གཞོན་ནུ་དང་། འོ་མ་བསྐོལ་བའི་ནང་དུ་ཆུ་སྲིན་ན་ཀྲ་དང་། ཉ་དང་རུས་སྦལ་དང་། འུག་པ་དང་། དེ་རྣམས་གང་ཡང་རུང་བའི་ཞག་དང་ཡང་བསྐོལ་
[269a.6]ལ། ཞག་ལུས་པ་ལས་སྲང་ཕྱེད་དམ་སྲང་གཅིག་སྣར་བླུགས་ན་ཁྱད་པར་དུ་རླུང་ཉི་ཚེ་སེལ་བར་བྱེད་དོ། །ཏིལ་གྱི་ཚིགས་མ་རྙིང་པ་དང་རྩ་བ་ཆེན་པོ་ལྔ་སོ་སོར་བསྐོལ་ལ། དེ་ནས་གཅིག་ཏུ་བསྲེས་པའི་ནང་དུ་འབྲུ་མར་དང་། དེའི་བརྒྱད་འགྱུར་གྱི་འོ་མ་དང་ཡང་བསྐོལ་
[269a.7]ཏེ། མར་འབའ་ཞིག་ལུས་པ་ལས་རན་པར་འཐུངས་ན། ཁྱད་པར་དུ་རླུང་ནད་དང་བད་ཀན་དང་བཅས་པ་འཇོམས་སོ། །སྨན་པྲ་ས་ར་སྲང་བརྒྱ་བསྐོལ་བའི་ཁུ་བའི་ནང་དུ་མར་སྲང་སུམ་ཅུ་རྩ་གཉིས་དང་། འོ་མ་དེ་དང་མཉམ་པ་དང་། མེ་ད་རྣམ་གཉིས་དང་། ཤ་ཏ་
[269b]
[269b.1]པུཥྤ་དང་། བཙོད་དང་། རུ་རྟ་དང་། ར་སྣ་དང་། ཙནྡན་དམར་པོ་དང་། ཛི་བ་ཀ་དང་། ཟངས་རྩི་བ་དང་། རམ་ཉེ་བ་རྣམ་གཉིས་དང་། ཐང་ཤིང་དང་། སྨན་འདི་རྣམས་བཏགས་པའི་ཕྱེ་མ་བཏབ་སྟེ་ཡང་བསྐོལ་ཏེ། མར་ལུས་པ་ལས་རན་པར་འཐུངས་ན་རླུང་ནད་ཐམས་ཅད་འཇིག་པར་བྱེད་དོ། །
[269b.2]ས་ཧ་ཙ་རའི་རྩ་བ་དང་ཡལ་ག་དང་བཅས་པ་སྲང་བརྒྱ་དང་། དེ་དང་མཉམ་པའི་རྩ་བ་བཅུ་པ་དང་། ཉེའུ་ཤིང་སྲང་ལྔ་བཅུ་ཐམ་པ་དང་། ཆུ་སྲང་ཉིས་སྟོང་བཞི་བཅུ་རྩ་བརྒྱད་བསྐོལ་ཏེ། བཞི་ཆ་སྲང་ལྔ་བརྒྱ་རྩ་བཅུ་གཉིས་ལུས་པའི་ནང་དུ་དབྱི་མོ་དང་། ཆུ་སྲིན་སེན་མོ་དང་། རུ་རྟ་དང་།
[269b.3]ཙནྡན་དང་། སུག་སྨེལ་དང་། གུར་ཀུམ་དང་། པྲི་ཡང་ཀུ་དང་། ན་ལི་ཀ་དང་། བ་ལི་ཀ་དང་། རྡོ་དྲེག་དང་། བཙོད་དང་། སྤང་སྤོས་དང་། ཨ་ཀ་རུ་དང་། ཐང་ཤིང་དང་། ཙ་རོང་དང་། ཤུ་ཏི་དང་། དུ་རུ་སྐ་དང་། རྒྱ་སྤོས་དང་། འདི་རྣམས་སྲང་རེ་རེ་བཏགས་པའི་ཕྱེ་མ་དང་།
[269b.4]གོང་གི་སྨན་ཁུ་དང་མཉམ་པའི་རའི་འོ་མ་དང་། ཏིལ་མར་དེ་དང་མཉམ་པ་རྣམས་ལྷན་ཅིག་བསྐོལ་ཏེ། མར་འབའ་ཞིག་ལུས་པ་ལས་རན་པར་འཐུངས་ན་རླུང་ནད་གསོ་དཀའ་བ་ཡང་འཇིག་པར་བྱེད་དེ་གཞན་ཡང་རླུང་གིས་འདར་བ་དང་། ཤ་འགུལ་བ་དང་ལུས་རེངས་པ་དང་། སྐེམ་བྱེད་ལ་
[269b.5]སོགས་པ་དང་བཅས་པའི་རླུང་ནད་དང་། སྐྲན་དང་། སྨྱོ་བྱེད་དང་། ཆམ་པས་བཏབ་པ་དང་། མོ་མཚན་གྱི་ནད་རྣམས་འཇོམས་པར་བྱེད་དོ། །ས་ཧ་ཙ་ར་སྲང་བརྒྱ་བསྐོལ་བའི་ཁུ་བའི་ནང་དུ་ཏིལ་མར་སྲང་བརྒྱ་ཉི་ཤུ་རྩ་བརྒྱད་དང་། འོ་མ་ཏིལ་མར་གྱི་བཞི་འགྱུར་དང་། ས་ཧ་ཙ་རའི་རྩ་བ་སྲང་
[269b.6]བཅུའི་ཕྱེ་མའམ། ཡང་ན་ས་ཧ་ཙ་ར་མེད་ན་རྒྱ་སྤོས་དང་། ཤུ་དག་དང་། ས་ལ་པརྞི་དང་། རུ་རྟ་དང་། ཐང་ཤིང་དང་། སུག་སྨེལ་དང་། རྡོ་དྲེག་དང་། སྤང་སྤོས་དང་། ཤུ་ཏི་དང་། ཙནྡན་དམར་པོ་དང་འདི་རྣམས་སྲང་རེ་རེའི་ཕྱེ་མ་བཏབ་སྟེ་བསྐོལ་བའི་ནང་དུ་ཤ་ཁ་ར་སྲང་བཅོ་
[269b.7]བརྒྱད་བཅུག་པ་ནི་དྲང་སྲོང་གཟིངས་ཅན་གྱི་སྨན་མར་ཞེས་བྱ་སྟེ། དེ་ལས་རན་པར་འཐུངས་ན་རླུང་ནད་གསོ་དཀའ་བ་དང་། རླུང་ནད་ཁོང་དུ་འཁྱིལ་པ་དང་། སྨྱོ་བྱེད་དང་། སྐྲན་དང་། རླིག་རླུགས་ལས་རྒྱལ་བར་བྱེད་དོ། །བ་ལ་སྲང་བརྒྱ་དང་། སླེ་ཏྲེས་སྲང་ཉི་ཤུ་རྩ་ལྔ་དང་།
[270a]
[270a.1]ར་སྣ་སྲང་ཕྱེད་དང་བཅུ་གསུམ་ཆུ་སྲང་ཁྲི་ཉིས་སྟོང་བརྒྱད་བརྒྱ་དང་བསྐོལ་ཏེ། བརྒྱད་ཆ་གཅིག་སྲང་བརྒྱ་ཉི་ཤུ་རྩ་བརྒྱད་ལུས་པའི་ནང་དུ་ཞོ་དང་། ཞོ་ག་ཆུ་དང་། བུ་རམ་ཤིང་གི་ཁུ་བ་དང་། ཚྭ་དང་། ཏིལ་མར་དང་དེ་རྣམས་རེ་རེ་ཡང་སྲང་བརྒྱ་ཉི་ཤུ་རྩ་བརྒྱད་
[270a.2]བརྒྱད་དང་། རའི་འོ་མ་སྲང་དྲུག་ཅུ་རྩ་བཞི་དང་། ཟུར་པ་དཀར་པོ་དང་། ཀོ་ཉོན་ཙེ་དང་། སྐྱེར་པ་དང་། སུག་སྨེལ་དང་། བཙོད་དང་། ཨ་ག་རུ་དང་། ཙནྡན་དང་། ཤུག་པ་དང་། ཨ་ཏི་བ་ལ་དང་། གླ་སྒང་དང་། མུངྒའི་ལོ་མ་དང་། ཧེ་རུ་ཎུ་ཀ་དང་། ཤིང་མངར་དང་།
[270a.3]བྱེའུ་རུག་པ་དང་། བྱ་ཁྲན་ཁ་ཞེས་བྱ་བ་རྒྱ་མཚོ་ནས་བྱུང་བའི་ཆུ་སྲིན་སེན་མོ་དང་། ཟངས་རྩི་བ་དང་། ཛི་བ་ཀ་དང་། རྒྱ་སྐྱེགས་ཤིང་དང་། བོ་ལ་དང་། གླ་རྩི་དང་། ན་ལི་ཀ་ཞེས་བྱ་བ་ཀ་པོ་ཏ་ཙ་ར་ན་དང་། ཛཱ་ཏི་བྷ་དྲ་དང་། འབུ་སུ་ཧང་དང་། གུར་ཀུམ་དང་། རྡོ་དྲེག་དང་། ཛཱ་ཏི་ཕ་
[270a.4]ལ་དང་། ཀད་པ་ལ་དང་། བ་ལ་དང་། ཤིང་ཚ་དང་། པོག་དཀར་པོ་དང་། ག་ཕུར་དང་། ཏུ་རུསྐ་དང་། ཤི་ནི་བ་ས་ཀ་དང་། ལི་ཤི་དང་། ཆུ་སྲིན་སེན་མོ་དང་། ཀ་ཀོ་ལ་དང་། རུ་རྟ་དང་། སྤང་སྤོས་དང་། པྲི་ཡང་ཀུ་དང་། སྟོ་ནི་ཡ་དང་། རྒྱ་སྤོས་དང་། བྱ་མ་ཀ་དང་། ཤུ་དག་དང་། མ་དེ་
[270a.5]ན་ག་དང་། པླ་བ་ཞེས་བྱ་བ་ཀུ་ཏན་ན་ཊ་དང་། ནཱ་ག་གེ་སར་དང་། འདི་རྣམས་སྲང་རེ་རེ་བཏགས་ལ་བཏབ་སྟེ་ཡང་བསྐོལ་ལ་ཕྱིར་ཕྱུང་སྟེ་ཚིགས་མ་བོར་བའི་ནང་དུ་གནྡྷ་བྷ་དྲ་བཏགས་པའི་ཕྱེ་མ་བཏབ་སྟེ་ཆོ་ག་བཞིན་སྦྱར་ཏེ་བྱིན་ན། ལུད་པ་དང་། དབུགས་མི་བདེ་བ་དང་།
[270a.6]རིམས་དང་། བརྒྱལ་བ་དང་། སྐྱུགས་པ་དང་། སྐྲན་དང་། ཟད་བྱེད་དང་། གློ་འགྲམས་པ་དང་། མཆེར་པ་ན་བ་དང་། སྐེམ་བྱེད་དང་། བརྗེད་བྱེད་དང་། བཀྲ་མི་ཤིས་པ་རྣམས་འཇིག་པར་བྱེད་དེ། འདི་ནི་བ་ལའི་ཏིལ་མར་བཟང་པོ་ཞེས་བྱ་བ་ཡིན་ཏེ། རླུང་ནད་འཇོམས་
[270a.7]པར་བྱེད་དོ། །གོང་དུ་བསྟན་པའི་སྨན་མར་དེ་དག་གི་བཏུང་བ་དང་། སྣ་སྨན་དང་། བསྐུ་བྱུག་རྣམས་དུས་སུ་ལེགས་པར་སྣུམ་ཆོས་བྱས་ན། རླུང་ནད་མ་རུངས་པ་རྣམས་མྱུར་དུ་ཞི་བར་བྱེད་ཅིང་བུད་མེད་བུ་མེད་པ་ཡང་བུ་སྐྱེད་པར་བྱེད་དོ། །གང་གི་ཚེ་བད་ཀན་དང་། མཁྲིས་
[270b]
[270b.1]པ་སྨིན་པའི་གནས་ན་འདུག་པ་ལས་གོང་གི་སྣུམ་ཆོས་དང་། དུགས་ལ་སོགས་པ་བྱས་པས་ཅུང་ཞིག་སྙི་བའམ་སླ་བར་གྱུར་པ་ལྟ་ན་ཡང་འཇམ་རྩིས་ཞི་བར་བྱའོ། །གསོ་བའི་གནས་ལས་རླུང་ནད་གསོ་བའི་ལེའུ་སྟེ་ཉི་ཤུ་རྩ་གཅིག་པ་རྫོགས་སོ།། །།དེ་ནས་དྲེག་
[270b.2]ནད་གསོ་བའི་ལེའུ་བཤད་པར་བྱ་སྟེ། དེ་ལ་དྲེག་ནད་ཅན་གྱི་ནད་པས་ཐོག་མར་སྣུམ་ཆོས་བྱས་ལ་རླུང་བསྲུང་ཞིང་ཁྲག་ཉུང་ངུ་ཉུང་ངུ་དབྱུང་ངོ་། །གཞན་དུ་ན་ནད་གཞིའི་སྟོབས་དང་། ཉམས་སྟོབས་ཆེ་ཆུང་བརྟགས་ཏེ་ལན་མང་དུ་དབྱུང་ངོ་། །དེ་ལ་དྲེག་ནད་ན་ཞིང་གཟེར་ལ་ཚ་ཞིང་མདོག་
[270b.3]དམར་བ་ལ་ནི། སྲིན་བུ་པད་པས་ཁྲག་དབྱུང་ངོ་། །དྲེག་ནད་ཅན་གྱི་ལུས་བེམ་བེམ་པོར་སོང་ཞིང་ལུས་གཡའ་བ་དང་། ན་ཞིང་ཚ་བ་ཆེ་བ་ལ་ནི། རྭ་དང་ཀུ་བས་ཁྲག་དབྱུང་བར་བྱའོ། །ཕྱོགས་ཀུན་ཏུ་གནས་འཕོ་ཞིང་ན་བ་ལ་ནི་རྩ་ནས་ཁྲག་གཏར་བ་དང་། ཞལ་ཞལ་ཐབས་སུ་
[270b.4]ཁྲག་དབྱུང་བར་བྱའོ། །ལུས་ན་ཞིང་རླུང་ཤས་ཆེ་སྟེ་ལུས་རྩུབ་པ་ལ་ནི་ཁྲག་དབྱུང་དུ་མི་རུང་ངོ་། །གལ་ཏེ་དེ་ལྟ་བུ་ལ་གཏར་ག་བྱས་ན། ཁྲག་ཟད་དེ་རླུང་འཁྲུགས་ནས་ཟབ་ཏུ་སྐྲང་པ་དང་། ལུས་རེངས་པ་དང་། འདར་བུ་དང་། ཆུ་བ་དང་རྩ་རྣམས་ལ་ནད་འབྱུང་ཞིང་ལུས་དྲི་མ་དང་
[270b.5]བཅས་ལ་ནད་གཞན་རྣམས་ཀྱང་འབྱུང་བར་འགྱུར་རོ། །དེ་ལ་ཐོག་མར་སྣུམ་ཆོས་བྱ་སྟེ་དེའི་འོག་ཏུ་སྣུམ་དང་ལྡན་པའི་ཁྲུས་བྱའོ། །རླུང་ཤས་ཆེ་བའི་དྲེག་ནད་ལ་ནི་མར་རྙིང་པ་གཏང་ངོ་། །སྲ་བ་ཞེས་བྱ་བ་ཤིང་ཤར་ཀ་དང་། ཀྵི་ར་ཀ་ཀོ་ལ་དང་། པ་ཡ་སྱ་དང་། ཛི་བ་ཀ་དང་། ཟངས་
[270b.6]རྩི་བ་དང་། འདི་རྣམས་ཆ་སྙོམས་ཏེ་བཏགས་པའི་ཕྱེ་མ་མར་དང་འོ་མ་དང་ལྷན་ཅིག་བསྐོལ་ཏེ། དེ་ལས་རན་པར་འཐུངས་ན་དྲེག་ནད་ཐམས་ཅད་འཇོམས་སོ། །རྒུན་འབྲུམ་དང་མ་དུ་ཀ་བསྐོལ་པའི་ཁུ་བའི་ནང་དུ་མར་དང་། ཁ་ར་དཀར་པོ་བཏབ་སྟེ་བསྐོལ་བའི་མར་བཏུང་བ་
[270b.7]འམ། དེ་བཞིན་དུ་འོ་མ་དང་སླེ་ཏྲེས་ཀྱི་ཁུ་བའི་ནང་དུ་མར་དང་། ཤ་ཁ་རས་བཏབ་སྟེ་བསྐོལ་བའི་མར་ཡང་བཏུང་ངོ་། །ཡང་ན་ཏིལ་མར་དང་། ལི་ཁ་ར་བསྲེས་པ་བླུད་དོ། །བ་ལ་དང་ཉེའུ་ཤིང་དང་ར་སྣ་དང་། པི་ལུ་དང་རྩ་བ་བཅུ་པ་དང་། དུར་བྱིད་དང་། ཨེ་རཎྜ་དང་དེ་རྣམས་
[271a]
[271a.1]འོ་མ་དང་ཚུལ་བཞིན་བསྐོལ་བ་བླུད་ན། རླུང་གིས་ཉམ་ཐག་པ་འཇོམས་སོ། །ཡང་ན་འོ་མ་བཞོས་མ་ཐག་པ་དྲོན་པོ་བ་གཅིན་དང་བསྲེས་པ་བླུད་ན་ནད་གཞིའི་ལུགས་བཞིན་འབྱུང་བར་འགྱུར་རོ། །མཁྲིས་པ་ཤས་ཆེ་བའི་དྲེག་ནད་ལ་ནི་ཉེའུ་ཤིང་
[271a.2]དང་། པུ་ཙེ་ཤེལ་དང་། པ་ཏོ་ལའི་རྩ་བ་དང་། འབྲས་བུ་གསུམ་དང་། སླེ་ཏྲེས་དང་འདི་རྣམས་སམ་ཡང་ན་སྨན་ཁ་བ་དང་མངར་བ་རྣམས་དང་འདི་རྣམས་གང་ཡང་རུང་བ་མར་རམ་འོ་མ་གང་འབྱོར་པ་དང་བསྐོལ་བ་འཐུངས་ན་ཕན་ནོ། །དྲེག་ནད་གཞི་ཤས་ཆེ་བ་ལ་ནི་འོ་མ་
[271a.3]དང་ཨེ་རཎྜ་སྦྱར་བའི་བཀྲུ་སྨན་བཏང་ངོ་། །དེ་ཞུ་བའི་ཚོད་ཙམ་ན་འབྲས་དང་འོ་མ་ལྷན་ཅིག་བཟའོ། །ཡང་ན་ཨ་རུ་ར་བསྐོལ་ཏེ་མར་དང་བརྔོས་པ་བཏུང་ངོ་། །ཡང་ན་ཏྲི་བྱིད་ཀྱི་ཕྱེ་མ་རྒུན་ཆུའམ་འོ་མ་གང་ཡང་རུང་བ་དང་སྦྱར་བ་བླུད་དོ། །ཡང་ན་དྲེག་ནད་ཅན་གྱི་ནད་པ་
[271a.4]ལ་ནི་འོ་མའི་འཇམ་རྩི་མར་དང་བཅས་པ་བཏང་སྟེ་དྲི་མ་སྦྱང་བར་བྱའོ། །གང་གི་ཕྱིར་དྲེག་ནད་ལ་ནི་འཇམ་རྩི་མས་གཏོང་བ་ལས་ལྷག་པ་མེད་དེ་ཁྱད་པར་དུ་གཞང་དང་རྩིབ་ལོགས་དང་། རུས་ཚིགས་དང་དམུ་རྫིང་གིས་ཉམ་ཐག་པ་རྣམས་ལ་ཕན་ནོ། །བད་ཀན་ཤས་ཆེ་བའི་དྲེག་
[271a.5]ནད་ལ་ནི་གླ་སྒང་དང་། རྒུན་འབྲུམ་དང་། སྐྱེར་པ་དང་། འདི་རྣམས་བསྐོལ་བའི་ཁུ་བ་སྦྲང་རྩི་དང་སྦྱར་བའམ། ཡང་ན་འབྲས་བུ་གསུམ་བསྐོལ་བའི་ཁུ་བའམ། ཡང་ན་སླེ་ཏྲེས་བསྐོལ་བའི་ཁུ་བ་སྦྲང་རྩི་དང་སྦྱར་བ་བླུད་ན་ཕན་ནོ། །བད་ཀན་གྱི་དྲེག་ནད་ཅན་ལ་ནི་ཐོག་མར་
[271a.6]ཇི་ལྟར་འོས་པར་སྣུམ་ཆོས་བྱས་ལ་སྐྱུག་སྨན་བཏང་སྟེ། དེའི་འོག་ཏུ་འཇམ་ཆོས་དང་རྩུབ་ཆོས་གང་རིགས་བྱའོ། །འབྲས་བུ་གསུམ་དང་ཚ་བ་གསུམ་དང་པ་ཏོ་ལ་དང་། ཤིང་ཚ་དང་། ཅུང་ཧང་དང་ཙི་ཏྲ་ཀ་དང་ཤུ་དག་དང་། བྱི་དང་ག་དང་། པི་པི་ལིང་
[271a.7]གི་རྩ་བ་དང་། སྤང་སྤོས་དང་། བ་ཤ་ཀའི་ཤུན་ཕྲག་དང་། རི་དྷི་དང་། ལང་ག་ལི་དང་། དབྱི་མོ་དང་། འདི་རྣམས་ཆ་སྙོམས་པའི་ཕྱེ་མ་དང་ལྡེ་གུར་བྱས་ཏེ་ལྕགས་སྣོད་ཀྱི་ནང་དུ་བཅུག་ལ་ནུབ་གཅིག་བཞག་སྟེ། ཕྱི་དེ་ཉི་མ་ཕྱེད་ཙམ་ན་དེ་ལས་རན་པར་
[271b]
[271b.1]ཟོས་ན་དྲེག་ནད་ནད་གཞི་གསུམ་ལས་གྱུར་པ་དང་། ཟུག་གཟེར་ཤིན་ཏུ་ཚབས་ཆེ་བ་ལ་ཕན་ནོ། །ཀོ་ཀི་ལ་ཀྵི་ཞེས་བྱ་བ་བསྐོལ་བའི་ཁུ་བ་བཏུང་ཞིང་དེ་ཉིད་ཀྱི་ཚོད་མ་དང་ལྷན་ཅིག་ཟས་ཟོས་ན་དྲེག་ནད་འཇིལ་བར་བྱེད་དེ། ཇི་ལྟར་སྙིང་རྗེ་ལ་གོམས་པས་
[271b.2]ཁྲོ་བ་སེལ་བ་བཞིན་ནོ། །རྩ་བ་ཆེན་པོ་ལྔ་དང་། སྐྱུ་རུ་རའི་ཁུ་བ་ལེ་ལི་ཏ་ཀའི་ཞག་དང་། ལྷན་ཅིག་འཐུང་ཞིང་ཚངས་པར་སྤྱོད་ན། ལུས་ལ་དྲེག་ནད་གཏིང་ཟུག་པ་ལས་རྒྱལ་བར་བྱེད་དོ། །གོང་དུ་བསྟན་པ་དེ་དག་ནི་ནང་གི་གསོ་བ་བསྟན་པ་ཡིན་ལ། ད་ནི་
[271b.3]ཕྱི་རོལ་གྱི་དྲེག་གི་གསོ་བ་བཤད་པར་བྱ་སྟེ། དེ་ཡང་སྐྱུར་རྩབས་བརྒྱ་ཉི་ཤུ་རྩ་བརྒྱད་དང་། ཏིལ་མར་དང་། དེའི་བཞི་ཆའི་སྲ་རྩི་པོག་དང་ཆུ་མང་དུ་བསྐོལ་ཏེ་དེ་ལས་རན་པར་འཐུངས་ན་རིམས་དང་ཚ་བས་ཉམ་ཐག་པ་རྣམས་འཇིག་པར་བྱེད་པའི་མཆོག་ཡིན་ནོ། །
[271b.4]ཡང་ན་ཏིལ་མར་བཙོད་དང་སྤྲ་ཚིལ་དང་བཅས་པ་གོང་བུར་བྱས་པའམ། སྲ་རྩི་པོག་དང་ཐལ་ཏྲེས་དང་ཏིལ་མར་དང་གོང་བུར་བྱས་པས་ལུས་ལ་བསྐུས་ན་དྲེག་ནད་འཇོམས་སོ། །རྩ་བ་བཅུ་པ་དང་འོ་མ་ལྷན་ཅིག་བསྐོལ་བ་འམ། ཡང་ན་མར་དང་ཆུ་དྲོན་པོ་ལྷན་ཅིག་
[271b.5]སྦྱར་ཏེ་བླུགས་པ་བྱས་ན་རླུང་ཤས་ཆེ་བའི་དྲེག་ནད་དེ་མ་ཐག་འཇོམས་པར་བྱེད་དོ། །ལུས་རེངས་པ་དང་བརྐྱང་བསྐུམ་བྱེད་འདོད་པ་དང་ན་བས་ཉམ་ཐག་པ་ལ་ནི་སྣུམ་བཞི་པོ་སྨན་མངར་བ་དང་སྦྱར་ཏེ་བླུགས་པ་བྱས་ན་ཕན་ནོ། །ལུས་ཚ་ན་ནི་གྲང་མོའི་རྒྱུན་བླུགས་སོ། །
[271b.6]བའི་འོ་མ་དང་ལུག་གི་འོ་མ་དང་རའི་འོ་མ་ཏིལ་དང་བསྲེས་པའམ། ཡང་ན་འཚོ་བྱེད་སྡེ་བཅུ་བསྐོལ་བའམ། རྩ་བ་ཆུང་ངུ་ལྔ་བསྐོལ་བའི་བླུགས་པ་ཡང་རབ་ཏུ་ཕན་ནོ། །བླུགས་པའི་ཆེད་དུ་རྒུན་ཆུ་དང་། བུ་རམ་ཤིང་གི་ཁུ་བ་དང་། ཆང་དང་། ཞོ་ག་ཆུ་དང་རྩབ་མོ་
[271b.7]སྐྱུར་པོ་དང་། འབྲས་བཀྲུས་པའི་ཆུ་དང་། སྦྲང་རྩིའི་ཆུ་དང་། ཤ་ཁ་རའི་ཆུ་འདི་གང་ཡང་རུང་བ་བླུགས་ན། དྲེག་ནད་ཚ་བ་ཆེ་བ་ལ་ནི་བསྔགས་སོ། །བུད་མེད་སྙིང་དུ་སྡུག་ཅིང་སྙན་པར་སྨྲ་བ་ལག་པ་དང་ནུ་མ་ཙནྡན་གྱི་ལྡེ་གུ་བསྐུས་བས་མཐང་སྦྱར་ན་ལུས་ཚ་ཞིང་ན་
[272a]
[272a.1]བ་དང་དུབ་པ་སེལ་ཏེ་བསིལ་ཞིང་བདེ་བར་འགྱུར་རོ། །དྲེག་མདོག་དམར་ཞིང་ནད་དང་བཅས་ལ་ཚ་བ་དང་ལྡན་པ་ལ་ནི། ཁྲག་ཕྱུང་ལ་ལྡེ་གུས་བསྐུས་ཏེ་དེ་ཡང་པྲ་པུཎྜ་རཱི་ཀ་དང་། བཙོད་དང་། ཤིང་མངར་དང་། སྐྱེར་པ་དང་། ཙནྡན་དང་ཁ་ར་དཀར་
[272a.2]པོ་དང་། ཨེ་ར་ཀའི་ཕྱེ་མ་དང་། སྲན་ཆུང་དང་། པུ་ཤེལ་ཙེ་དང་། ཤུག་པ་དང་འདི་རྣམས་ཀྱི་ལྡེ་གུས་བསྐུས་ན་ཚ་ཞིང་ན་བ་དང་། ཤུ་བ་མཆེད་པ་དང་སྐྲངས་པ་རྣམས་ཟློག་པར་བྱེད་དོ། །ཀྲི་ས་ར་ཏི་ལ་དང་། མུངྒ་ལ་སོགས་པ་ལས་བྱས་པ་རླུང་འཇོམས་པའི་སྨན་དང་
[272a.3]ལྷན་ཅིག་བསྐོལ་བའི་སྣུམ་གྱིས་གླན་ན་ཟུག་གཟེར་འཇོམས་སོ། །དེ་བཞིན་དུ་མུངྒ་དང་། འོ་མ་རླུང་ལ་ཕན་པའི་སྨན་དང་སྣུམ་དུ་སྦྱར་བས་བསྐུ་བའམ། ཡང་ན་ཏིལ་དང་ཡུངས་ཀར་སྣུམ་དང་བཅས་པའི་ཟན་གྱིས་གླན་ན་ཡང་ཟུག་གཟེར་འཇོམས་སོ། །སྲོག་ཆགས་
[272a.4]ཆུ་ལས་སྐྱེས་པ་དང་། མཐུ་རྩལ་གྱིས་བཟས་ཚོལ་བའི་ཤ་དང་། ཆུ་འགྲམ་ན་གནས་པའི་ཤ་ཞིབ་མོར་གཏུབས་པ་ལན་ཚྭ་དང་ལེགས་པར་སྦྱར་བ་འཚོ་བྱེད་སྡེ་བཅུའི་སྨན་དང་སྣུམ་དང་བཅས་པས་གླན་པ་བྱས་ན་རེངས་པ་དང་། ཟུག་ཅིང་ན་བ་དང་། སྐྲངས་པ་དང་
[272a.5]བྱ་རྨྱང་དང་ཡན་ལག་འཁུམས་པ་རྣམས་མྱུར་དུ་འཇོམས་སོ། །འཚོ་བྱེད་སྡེ་བཅུའི་སྨན་འོ་མ་དང་ཞག་དང་བཙོས་ཏེ་བསྐུས་ན་ཕན་ཡོན་དེ་དང་འདྲའོ། །ཡང་ན་ས་ཧ་ཙ་རའི་རྩ་བ་དང་། ཛི་བན་ཏི་དང་མར་དང་རའི་འོ་མ་དང་། ལྡེ་གུས་གླན་པའམ། དེ་བཞིན་དུ་ཏིལ་
[272a.6]འོ་མས་བྲན་ཏེ་བསྐམས་ལ་བརྔོས་ནས་བཏགས་པའི་འོ་མ་དང་སྦྱར་བའི་ལྡེ་གུས་བསྐུ་བའམ། ཡང་ན་ཟར་མ་བཏགས་ཏེ་འོ་མ་དང་སྦྱར་བའམ། ཡང་ན་ཉེའུ་ཤིང་གི་ཕྱེ་མ་འོ་མ་དང་སྦྱར་བ་དེ་དག་གང་ཡང་རུང་བས་གླན་ན། རླུང་ཤས་ཆེ་ཞིང་ཟུག་གཟེར་དང་
[272a.7]བཅས་པ་འཇོམས་སོ། །ཡང་ན་བ་གཅིན་དང་ཐལ་སྨན་དང་ཆང་དང་མར་རྣམས་བསྐོལ་བས་བྱུག་པ་བྱས་ན། ཟུག་གཟེར་དང་བཅས་པ་སེལ་ཏོ། །མར་དང་། རྒུན་ཚ་དང་ལྷན་ཅིག་བསྐོལ་བས་བླུགས་པ་དང་བསྐུ་བྱུག་བྱས་ན་བད་ཀན་ཤས་ཆེ་བའི་དྲེག་ནད་ལ་
[272b]
[272b.1]ཕན་ནོ། །ཁྱིམ་གྱི་དུད་པ་དང་། ཤུ་དག་དང་། རུ་རྟ་དང་ཉེའུ་ཤིང་དང་། སེར་པོ་རྣམ་གཉིས་དང་དེ་རྣམས་ཀྱི་བསྐུ་བ་སྦྱར་ན་རླུང་དང་བད་ཀན་ཤས་ཆེ་བ་སེལ་ཏོ། །ཤི་ཀྲུ་དམར་པོའི་ས་བོན་བཏགས་པའི་ཕྱེ་མ་འབྲས་ཀྱི་རང་སྐྱུར་དང་ལྡན་པའི་ལྡེ་གུས་ཡང་དང་ཡང་བསྐུ་
[272b.2]ཞིང་ཚྭ་ལ་སོགས་པས་བླུགས་པ་བྱས་ན་རླུང་དང་བད་ཀན་ཤས་ཆེ་བའི་དྲེག་ནད་ལ་ཕན་ནོ། །རྟོགས་པར་སླ་བའི་དྲེག་ནད་ལ་ནི་བྱུག་པ་དང་བསྐུ་བ་དང་བླུགས་པ་དང་ཆུ་ནང་དུ་འདུག་པ་རྣམས་སྦྱར་བར་བྱ་ལ། རྟོགས་པར་དཀའ་བའི་དྲེག་ནད་ལ་ནི་བཀྲུ་སྨན་དང་། བཀྲུ་
[272b.3]སྨན་དྲག་པོ་དང་སྣུམ་གྱི་བཏུང་བ་རྣམས་སྦྱར་རོ། །རླུང་དང་བད་ཀན་ཤས་ཆེ་བའི་དྲེག་ནད་ལ་ནི་བྱུག་པ་དྲོན་པོ་བཏང་ངོ་། །གལ་ཏེ་གྲང་མོ་བྱས་ན་ནི་ལུས་ཚ་བ་དང་། སྐྲང་པ་དང་། ན་བ་དང་། གཡའ་བ་དང་། རེངས་པར་འགྱུར་རོ། །ཁྲག་དང་མཁྲིས་
[272b.4]པ་ཤས་ཆེ་བའི་དྲེག་ནད་ལ་ནི་བྱུག་པ་ལ་སོགས་པས་བསིལ་བར་བྱ་སྟེ། གལ་ཏེ་དྲོ་བ་བྱས་ན་ནི་སྐེམ་བྱེད་དང་། མདོག་དམར་བ་དང་རྔུལ་འབྱུང་བ་དང་ལུས་གས་པར་འགྱུར་རོ། །ཤིང་མངར་སྲང་བརྒྱ་ཚུལ་བཞིན་བསྐོལ་ཏེ་བཞི་ཆ་ལུས་པ་དང་། དེའི་ནང་དུ་ཏིལ་མར་
[272b.5]སྲང་བརྒྱ་ཉི་ཤུ་རྩ་བརྒྱད་དང་། ཏིལ་མར་དང་མཉམ་པའི་འོ་མ་དང་བསྲེས་པའི་ནང་དུ་སྟི་ར་དང་། བཅའ་བའི་འབྲས་བུ་དང་། མུར་བ་དང་། པ་ཡ་སྱ་དང་། ཉེའུ་ཤིང་དང་། ཨ་ཀ་རུ་དང་། ཙནྡན་དང་། ཧན་ས་པ་ཏི་དང་། སྤང་སྤོས་དང་། མེ་ད་རྣམ་གཉིས་དང་།
[272b.6]སླེ་ཏྲེས་དང་། ར་མཉེ་བ་རྣམ་གཉིས་དང་། འཚོ་བྱེད་དང་། ཛི་བ་ཀ་དང་། ཟངས་རྩི་བ་དང་། ཤིང་ཚ་དང་། གནྡྷ་བྷ་དྲ་དང་། ཆུ་སྲིན་སེན་མོ་དང་། བ་ལ་ཀ་དང་། པྲ་པུཎྜ་རཱི་ཀ་དང་། བཙོད་དང་། ཐལ་ཏྲེས་དང་། ཨིན་དྲ་བ་རུ་ནི་དང་། ཀུ་ཏན་ན་ཏ་དང་། འདི་
[272b.7]རྣམས་སྲང་རེ་རེ་བཏགས་པའི་ཕྱེ་མ་བཏབ་སྟེ་བསྐོལ་ལ་མར་འབའ་ཞིག་ལུས་པ་ལས་སྦྱོར་བ་རྣམ་པ་བཞི་པོ་བཏུང་བ་དང་སྣར་བླུགས་པ་དང་། བསྐུ་བྱུག་དང་། འཇམ་རྩི་མས་གཏོང་བ་རྣམས་བྱས་ན། མཁྲིས་པ་དང་ཚ་བ་དང་རིམས་ཀྱིས་ཉམ་ཐག་པ་ལ་ཕན་ནོ། །ཡང་
[273a]
[273a.1]ན་སྨན་བསྐོལ་བའི་ཁུ་བའི་ནང་དུ་བ་ལའི་ཕྱེ་མ་དང་ཏིལ་མར་དང་དེ་དང་མཉམ་པའི་འོ་མ་དང་ཡང་བསྐོལ་ལ། དེ་བཞིན་དུ་ཏིལ་མར་དེ་འོ་མ་དང་ལན་བརྒྱ་སྟོང་གི་བར་དུ་བསྐོལ་ཏེ། དེ་ལས་རན་པར་འཐུངས་ན་དྲེག་དང་རླུང་ཞི་བར་བྱེད་དེ། ཁྱད་པར་དུ་
[273a.2]བཅུད་ཀྱིས་ལེན་གྱི་མཆོག་ཏུ་འགྱུར་ཞིང་དབང་པོ་རྣམས་གསལ་བར་བྱེད་དེ། ཚེ་དང་ལུས་འཕེལ་ཞིང་རྒྱས་པ་དང་། སྐད་སྙན་པ་དང་། ཁུ་ཆུ་དང་། ཁྲག་གི་ནད་རྣམས་འཇོམས་པར་བྱེད་དོ། །རླུང་འཁྲུགས་ཤིང་ཚིལ་དང་བད་ཀན་ལྷག་པར་སྐྱེས་པས་རྩའི་ནང་དུ་
[273a.3]རྒྱུར་མི་སྟེར་ཏེ་འགགས་ན་ཐོག་མར་སྣུམ་བསྟེན་ཅིང་ཉམས་བརྟ་བའི་ཆོ་ག་མི་བསྔགས་སོ། །དེ་ལ་ནི་དང་པོ་བརླ་རེངས་པའི་ཆོ་གར་བཤད་པ་རྣམས་བྱ་སྟེ། དེའི་འོག་ཏུ་སྨན་སྣུམ་དང་ལྡན་པར་སྦྱར་རོ། །ཇི་ལྟར་ཁྲག་གི་སྐྱོན་མེད་པར་འགྱུར་བའི་བྱ་བའི་ཆོ་ག་
[273a.4]ཐམས་ཅད་བྱའོ། །དེ་ལ་སྲོག་ཅེས་བྱ་བའི་རླུང་ལ་སོགས་པ་རྣམ་ལྔ་འཁྲུགས་པར་སྣང་ན། མ་ནོར་བར་རླུང་ནད་གསོ་བའི་སྐབས་སུ་བཤད་པའི་གསོ་བའི་རིམ་པ་དང་། རླུང་ལྔ་པོ་རེ་རེ་གང་འཁྲུགས་པ་བརྟགས་ཏེ་དེ་ཉིད་ཀྱི་སྟོབས་ཆེ་ཆུང་ལས་གསོ་བར་བྱའོ། །
[273a.5]རླུང་ནད་མ་ཞི་བ་དང་བཅས་པ་ལ་ནི་ཐོག་མར་དུགས་དང་། སྨྱུང་བ་དང་། སྨིན་པར་བྱ་བ་དང་། རྩུབ་པའི་སྨན་དུ་བྱུག་པ་དང་། བླུགས་པ་ལ་སོགས་པ་མ་ཞུ་བ་མེད་པར་བྱས་ལ་དེའི་འོག་ཏུ་རླུང་ཉི་ཚེའི་གསོ་བ་བྱའོ། །སྐེམ་བྱེད་དང་། བྱ་རྨྱང་དང་རྐང་ལག་
[273a.6]འཁུམས་པ་དང་། རེངས་པ་དང་། ཚོར་བ་མེད་པ་དང་། འདར་བུ་དང་། འགྲམ་པའི་ཚིགས་བྱོར་བ་དང་། ཁ་ཡོ་བ་དང་། འཐེང་བ་དང་། ཞ་བ་དང་། དྲེག་ནད་དང་། ཚིགས་འཁྲུལ་བ་དང་། གཞོགས་ཕྱེད་ན་བ་དང་། གཞན་ཡང་ཚིལ་དང་། རྐང་དང་། རུས་
[273a.7]པའི་ནང་དུ་ཞུགས་པའི་ནད་འདི་རྣམས་ཚབས་ཆེར་ན་བ་ཡིན་པས་ཡུན་མི་རིང་ན་ནི་འབད་པ་དང་བཅས་པས་གསོར་རུང་སྟེ། དེ་བས་ན་ནད་གསར་ཞིང་ནད་པ་ཉམས་སྟོབས་དང་ལྡན་བ་ཞིག་ན་མྱུར་དུ་གསོ་བར་བྱའོ། །རླུང་ནད་མཁྲིས་པ་དང་བཅས་པ་ཡིན་ན་ནི་རེས་ཀྱིས་
[273b]
[273b.1]དྲོ་བ་དང་གྲང་བའི་གསོ་བ་ལན་མང་དུ་བྱའོ། །ཡང་ན་འཚོ་བྱེད་སྡེ་བཅུ་དང་མར་བསྐོལ་བ་བླུད་དོ། །རླུང་ནད་མཁྲིས་པ་དང་ལྡན་པ་ལ་ནི་སྲོག་ཆགས་ཐང་ལས་སྐྱེས་པའི་ཤ་དང་། ནས་དང་། འབྲས་སཱ་ལུའི་ཟན་བྱིན་ཏེ། འོ་མ་དང་ལྡན་པའི་བཀྲུ་སྨན་འཇམ་པོ་ཡང་བཏང་ངོ་། །
[273b.2]རྩ་བ་ཆེན་པོ་ལྔ་དང་བ་ལ་བསྐོལ་བ་འོ་མ་དང་ལྡན་པའི་འཇམ་རྩི་མས་གཏོང་ངོ་། །ཏིལ་མར་སྨན་མངར་བ་དང་སྦྱར་བའི་འཇམ་རྩི་དུས་སུ་བཏང་ན་ཕན་ནོ། །ཡང་ན་ཤིང་མངར་དང་ཏིལ་མར་རམ། ཡང་ན་མར་རམ་འོ་མའམ་ཡང་ན་རྩ་བ་ལྔ་པ་བསྐོལ་བའི་ཁུ་བའམ། ཡང་
[273b.3]ན་ཆུ་གྲང་མོ་དང་དེ་རྣམས་གང་ཡང་རུང་བས་བླུགས་པ་བྱས་ན་མཁྲིས་པ་དང་ལྡན་པའི་རླུང་ནད་ལ་ཕན་ནོ། །བད་ཀན་དང་ལྡན་པའི་རླུང་ནད་ལ་ནི་ནས་ཀྱི་ཟན་དང་། སྐམ་ན་གནས་པའི་རི་དགས་དང་། བྱའི་ཤ་དང་། དུགས་དང་། བཀྲུ་སྨན་དྲག་པོ་རྣོན་པོ་དང་། སློན་ཁྲུས་
[273b.4]ཀྱང་ཕན་ཏེ། མར་རྙིང་པ་དང་། ཏིལ་དང་། ཡུངས་ཀར་གྱི་འབྲུ་མར་རྣམས་སྦྱར་ན་ཕན་ནོ། །རླུང་བད་ཀན་དང་མཁྲིས་པར་ལྡན་པ་ལ་ནི་དང་པོ་མཁྲིས་པ་གསོ་ཞིང་དེ་ནས་བད་ཀན་རིམ་གྱིས་གསོའོ། །རླུང་དང་ཁྲག་འདྲེས་པ་ལ་ནི་དྲེག་ནད་ཀྱི་གསོ་བ་ཇི་སྐད་བཤད་པ་
[273b.5]རྣམས་བྱའོ། །རླུང་ཤས་རྒྱས་པ་དང་བཅས་པ་ལ་ནི་དུགས་དང་བསྐུ་བྱུག་དང་། ཤ་ཁུ་དང་། འོ་མ་དང་སྣུམ་རྣམས་སྦྱོར་བ་བཞིན་བྱས་ན་ཕན་ནོ། །རླུང་ནད་བརླ་རེངས་པ་དང་བཅས་པ་ལ་ནི་གཅིན་ནད་དང་། ཚིལ་རྒྱས་པ་དང་། རླུང་ནད་བརླ་གསོ་བ་རྣམས་འདིར་སྦྱར་རོ། །
[273b.6]རླུང་ནད་རུས་པ་དང་། རྐང་ལ་གནས་པ་ལ་ནི་སྣུམ་ཆེན་པོ་རྣམས་སྦྱར་རོ། །རླུང་ཁུ་ཆུ་ལ་གནས་པ་ལ་ནི་གོང་དུ་བཤད་པའི་ཆོ་ག་བྱས་ན་ཕན་ནོ། །རླུང་ཕོ་བའི་ནང་དུ་བྱུང་བ་ལ་ནི་ཟས་འཇུ་བར་བྱེད་པ་དང་། མེ་དྲོད་སྐྱེད་པའི་སྨན་དང་སྐྱུག་སྨན་དང་། ཁ་ཟས་
[273b.7]ཡང་བ་ཚོད་ཟིན་པར་བྱས་ན་ཕན་ནོ། །རླུང་གཅིན་གྱི་གནས་སུ་བྱུང་བ་ལ་ནི་གཅིན་འཕེལ་བའི་སྨན་དང་དུགས་དང་། ཕོ་མཚན་ནས་སྨན་མས་གཏོང་ན་ཕན་ནོ། །རླུང་བཤང་བ་ལ་གནས་པ་ལ་ནི་ཨེ་རཎྜའི་མར་ཕན་ཏེ། དེ་བཞིན་དུ་སྣུམ་དང་ལྡན་པའི་བཀྲུ་
[274a]
[274a.1]སྨན་དང་འཇམ་རྩི་ཕན་ནོ། །ལུས་ཟུངས་ཀུན་ཏུ་རླུང་གིས་ཁྱབ་པ་ལ་ནི་བད་ཀན་དང་རླུང་མི་འཁྲུག་ཅིང་། རླུང་དང་རྗེས་སུ་མཐུན་པའི་སྨན་མྱུར་དུ་བྱས་ན་ཕན་ནོ། །ཡང་ན་དེ་ལ་ནི་གང་ཐུར་དུ་འཁྲུ་བར་མི་འགྱུར་བ་དང་། སྣུམ་པ་དང་།
[274a.2]རྩ་རྒྱུན་དག་པའི་སྨན་དང་དེ་དག་གང་ཡང་རུང་བ་བཟའ་བཏུང་ཀུན་ལ་སྦྱར་རོ། །ཕལ་ཆེར་ལྒང་པ་ནས་སྨན་མས་གཏོང་སྟེ། དེ་ཡང་མངར་བ་དང་། སྣུམ་པའི་འཇམ་རྩི་མས་གཏོང་ངོ་། །དེ་ནས་ལུས་ཀྱི་ཉམས་སྟོབས་བརྟགས་ཏེ། སྟོབས་དང་ལྡན་པ་ཡིན་ན་ནི་བཀྲུ་
[274a.3]སྨན་འཇམ་པོ་གཏང་ངོ་། །དེ་བཞིན་དུ་བཅུད་ཀྱིས་ལེན་གྱི་སྦྱོར་བ་ཇི་སྙེད་པ་བྱས་ན་ཡང་རབ་ཏུ་བསྔགས་ཏེ་ཁྱད་པར་དུ་བྲག་ཞུན་དང་། འོ་མའི་སྦྱོར་བ་དང་། དེ་བཞིན་དུ་གུ་གུལ་ཉི་ཚེ་དང་བྷར་ག་པས་བཤད་པའི་ཚངས་པའི་བཅུད་ཀྱིས་ལེན་ཞེས་བྱ་བའི་ནང་དུ་ཁ་ར་
[274a.4]དཀར་པོ་སྲང་སྟོང་ཆིག་བརྒྱ་དང་སྦྱར་བའི་ལྡེ་གུ་ཡང་རབ་ཏུ་ཕན་ནོ། །གཞང་ཁའི་ནང་དུ་ཐུར་དུ་སེལ་བ་ཞེས་བྱ་བའི་རླུང་ཡོད་དེ། དེ་ནད་གཞི་གང་ཡང་རུང་བ་དང་འབྲེལ་ཅིང་ན་བ་ལ་ནི་མེ་དྲོད་སྐྱེད་པ་དང་། ཕྱི་ས་སྐ་བར་འགྱུར་བ་དང་། རླུང་བདེ་བར་འབྱུང་བར་བྱ་ཞིང་
[274a.5]གཅིན་སྦྱང་བའི་ཕྱིར་ཡང་སྦྱོར་བ་དེ་དག་བྱའོ། །དེ་དག་ནི་རླུང་དང་ལྡན་པའི་ནད་ཀྱི་གསོ་བ་མདོར་བསྟན་པ་ཡིན་ཏེ། སྲོག་ཅེས་བྱ་བའི་རླུང་ལ་སོགས་པ་རླུང་ནད་རྣམ་པ་ལྔ་པོ་ཡང་སྨན་པས་གང་དང་ལྡན་པ་བརྟགས་ཏེ་སོ་སོའི་གསོ་བ་བཞིན་དུ་བྱའོ། །དེ་ལ་སྟོད་དུ་
[274a.6]རྒྱུ་བའི་རླུང་ནི་སྨན་པས་སྟོད་དུ་དྲང་ཞིང་གསོའོ། །ཐུར་དུ་སེལ་བའི་རླུང་ནི་སྨད་དུ་དྲང་ཞིང་གསོའོ། །མེ་དང་མཉམ་དུ་གནས་པའི་རླུང་ནི་མཉམ་པ་ཉིད་དུ་གསོ་ཞིང་གཞུག་གོ། །ཁྱབ་བྱེད་ཀྱི་རླུང་ནད་ནི་གསུམ་ཀའི་སྦྱོར་བ་བྱའོ། །བཞི་པོ་དེ་དག་པས་ཀྱང་སྲོག་ཅེས་བྱ་
[274a.7]བའི་རླུང་ཁྱད་པར་དུ་བསྲུང་བར་བྱ་སྟེ། རླུང་དེ་དག་གནས་ན་ལུས་གནས་པའི་ཕྱིར་རོ། །དེ་ལྟར་ནད་གཞི་དེ་དག་རང་གི་གནས་སྤངས་ཏེ་ལམ་གཞན་དུ་ཞུགས་པར་གྱུར་ན། དེ་ལས་སློན་ཏེ་སོ་སོའི་གནས་སུ་བཞག་སྟེ་གསོའོ། །རླུང་ནད་ཁྲག་མཁྲིས་དང་ལྡན་པ་མ་
[274b]
[274b.1]གཏོགས་པ་ལྷག་མའི་ནད་གཞི་གང་དང་ལྡན་ཡང་བཅུད་ཀྱིས་ལེན་གྱི་ཆོ་ག་བཞིན་དུ་སྒོག་པ་བསྟེན་ན་ཕན་ནོ། །སྟོད་དུ་རྒྱུ་བའི་རླུང་ལ་སོགས་པ་མཁྲིས་པར་ལྡན་པ་ཡིན་ན་ནི་ཐོག་མར་མཁྲིས་པ་གསོས་ལ་དེའི་འོག་ཏུ་རླུང་གསོ་བར་བྱའོ། །དེ་བཞིན་དུ་ཁྲག་དང་ལྡན་
[274b.2]པ་ཡིན་ན་ཡང་ཐོག་མར་ཁྲག་དང་དྲེག་ནད་ཀྱི་གསོ་བ་བྱ་ཞིང་། དེའི་འོག་ཏུ་རླུང་གསོའོ། །ཁྲག་མཁྲིས་དང་རླུང་འདྲེས་པའི་ནད་ལ་ཡང་བཅུད་ཀྱིས་ལེན་གྱི་ཆོ་ག་སྣ་ཚོགས་བརྟགས་ཏེ་འདིར་སྦྱར་རོ། །ནད་གཞི་ཇི་ལྟ་བ་བཞིན་དུ་གསོ་བ་ཡང་མ་ནོར་བར་བསྟེན་
[274b.3]པ་ཡིན་ཏེ། ཚེའི་རིག་བྱེད་ཀྱི་འབྲས་བུ་ནི་གསོ་བའི་གནས་ཡིན་ཏེ། ནད་རྣམས་ཀྱིས་ཉམ་ཐག་པ་འཕྲལ་དུ་འཇིག་པར་བྱེད་པ་ཡིན་ནོ། །དེ་ལྟ་བས་ན་འདི་ནི་གསོ་བ་ཞེས་ཀྱང་བྱ། ཕན་པ་ཞེས་ཀྱང་བྱ། སྦྱོར་བ་ཞེས་ཀྱང་བྱ། སྨན་པ་ཞེས་ཀྱང་བྱ། སྨན་
[274b.4]ཞེས་ཀྱང་བྱ། ཞི་བར་བྱེད་པ་ཞེས་ཀྱང་བྱ། བསྔགས་པ་ཞེས་ཀྱང་བྱ་སྟེ། དེ་དག་ནི་མིང་གི་རྣམ་གྲངས་ཡིན་ནོ། །གསོ་བའི་གནས་ལས་དྲེག་ནད་གསོ་བའི་ལེའུ་ཉི་ཤུ་རྩ་གཉིས་པ་སྟེ་ཐ་མ་རྫོགས་སོ།། །།སྨན་པའི་བདག་པོ་སེང་གེ་སྦས་པ་ཞེས་
[274b.5]བྱ་བའི་བུ། སྨན་པ་ཆེན་པོ་ཕ་གོལ་ཞེས་བྱ་བས། ཡན་ལག་བརྒྱད་པའི་སྙིང་པོ་མཛད་པ་ལས། གསོ་བའི་གནས་ཞེས་བྱ་བ་ལེའུ་ཉི་ཤུ་རྩ་གཉིས་པ་རྫོགས་སྷོ།། །།ཡན་ལག་བརྒྱད་པའི་སྙིང་པོ་གནས་བཞི་པའོ།། །།སྨན་དཔྱད་ཡན་ལག་བརྒྱད་
[274b.6]པའི་སྙིང་པོ་ལས། ཆོ་ག་གྲུབ་པ་རྣམ་པ་དྲུག །ཅེས་བྱ་བ་ཆོ་ག་གྲུབ་པའི་གནས་ལྔ་པ་བརྗོད་པར་བྱ་སྟེ། དེ་ལ་གསོ་བའི་གནས་དེ་ཡང་ཆོ་ག་གྲུབ་པ་ལ་ལྟོས་དགོས་པ་ཡིན་པས། གསོ་བའི་འོག་ཏུ་ཆོ་གའི་གནས་བཤད་པར་རིགས་སོ། །དེ་ལ་ཐོག་མར་
[274b.7]སྐྱུག་སྨན་གཏང་བའི་ཆོ་ག་བཤད་པར་བྱ་སྟེ། དེ་ཡང་དྲང་སྲོང་ཆེན་པོ་རྒྱུན་ཤེས་ཀྱི་བུ་ལ་སོགས་པས་བཤད་པ་ན་རེ། དེ་ལ་པོ་སོན་ཆ་དང་། དུར་བྱིད་གཉིས་ནི་སློན་དང་ཁྲུས་ཀྱིས་ནད་ཐམས་ཅད་ལ་ཕན་པའི་མཆོག་ཡིན་ཏེ། ནད་ཀྱི་བྱེ་བྲག་རེ་རེ་ལ། བཟང་བ་ཛི་མུ་
[275a]
[275a.1]ཏ་ལ་སོགས་པ་གཞན་ནི་ཡོད་ན་ཐམས་ཅད་ལ་ཁྱབ་པར་བསྔགས་པ་ནི། དེ་གཉིས་ལས་ལྷག་པ་མེད་དོ། །དེ་ལ་སྐྱུག་སྨན་གཏང་བའི་དུས་ནི། དཔྱིད་དང་སོས་ཀའི་མཚམས་ཀྱི་ཟླ་བ་དང་། ཚེས་གྲངས་དང་། ཉི་མ་ཤིས་པ་ལ་གཏང་ངོ་། །དེ་
[275a.2]ལ་སྐྱུག་སྨན་པོ་སོན་ཆ་བཏང་བ་ནི་སོན་ཆའི་འབྲས་བུ་དེ། ཧ་ཅང་མདོག་སེར་པོ་ཡང་མ་ཡིན་ཞིང་སྐྱ་བོར་སོང་བ་ནི་སྨིན་པའི་ཚད་ཡིན་ཏེ། དེ་བླངས་ལ་ཕྱིས་ནས་རྩ་ཀུ་ཤ་ལས་སྣོད་དུ་བྱས་པའི་ནང་དུ་བཅུག་སྟེ་ཐེ་གུས་བཅིངས་ནས་བ་ལང་གི་ལྕི་བས་ཕྱི་རོལ་ནས་བྱུག་སྟེ། དེ་
[275a.3]ནས་འབྲུའི་ཕུང་པོའི་ནང་དུ་ཞག་བརྒྱད་ཀྱི་བར་དུ་བཞག་སྟེ། དེ་ཡང་ཀུ་ཤས་དཀྲིས་པའི་ཡོན་ཏན་ནི། འཇམ་ཞིང་མངར་ལ་དྲི་ཞིམ་པར་འགྱུར་རོ། །དེ་ལྟར་ཞག་བརྒྱད་ལོན་པ་དང་ཕྱུང་ལ་ཉི་མ་ལ་བསྐམས་པ་དང་། པི་པི་ལིང་ཡང་དེ་ལྟར་བྱས་ཏེ་བསྐམས་ལ། ཏིལ་གྱི་ཚིགས་
[275a.4]མ་བཏགས་པའི་ཕྱེ་མ་ཞོ་དང་མར་དང་། སྦྲང་རྩི་དང་སྦྱར་བས་བསྐུས་ཏེ་དེ་བསྐམས་པ་དང་། བུམ་པའི་ནང་དུ་བཅུག་སྟེ་ཇི་ཙམ་ན་དགོས་པའི་དུས་སུ་སྦྱར་རོ། །དེ་ནས་པོ་སོན་ཆ་དང་པི་པི་ལིང་གི་སྦྱོར་བ་དེ་མཐེ་བོང་ནང་དུ་བཅུག་པའི་ཆང་པ་གང་ཙམ་ཕྱེ་མར་བྱས་ལ་ཤིང་མངར་
[275a.5]དང་། ཀོ་བི་ད་ར་དང་། ཀར་བུ་ད་རི་ཞེས་བྱ་བ་སླེ་སྨན་ཏ་ཀ་དང་། བིམ་པ་དང་། ནིམ་པ་དང་། ལྕང་མ་དང་། ཤ་ན་པུས་ཤི་ཤུ་ཞེས་བྱ་བ་དང་། ས་ད་པུཥྤ་ཞེས་བྱ་བ་ཨརྒ་དང་། ཨ་པ་མརྒ་དང་། འདི་རྣམས་གང་ཡང་རུང་བ་ཞིག་ཆམ་ཆོམ་བརྡུངས་ཏེ། ནུབ་གཅིག་
[275a.6]སྦངས་ལ་བསྐོལ་བའི་ཁུ་བ་སྙིམ་པ་གང་གི་ནང་དུ་བཏབ་སྟེ་བསྐོལ་ལ་སྔ་དྲོ་བླུད་དོ། །མདོའི་གནས་སུ་བསྟན་པའི་ཆོ་ག་བཞིན་དུ་ལེགས་པར་སྐྱུག་ཏུ་གཞུག་གོ། །ཁྱད་པར་དུ་བད་ཀན་གྱི་རིམས་དང་ཆམ་པས་བཏབ་པ་དང་། སྐྲན་དང་ཁོང་འབྲས་རྣམས་ལ་སྐྱུག་སྨན་
[275a.7]བྱ་སྟེ། མཁྲིས་པ་བྱུང་ན་བཅད་དོ། །པི་པི་ལིང་དང་། པོ་སོན་ཆ་བསྐོལ་བའི་ཁུ་བ་འམ། ཡང་ན་ཀོ་པི་ད་རའི་ཁུ་བ་གང་ཡང་རུང་བའི་ནང་དུ་པི་པི་ལིང་དང་། པོ་སོན་ཆའི་ཕྱེ་མའི་སྦྱོར་བ་དང་། ཕྱེ་མ་དེའི་སུམ་ཆའི་འབྲས་བུ་གསུམ་གྱི་ཕྱེ་མ་བཏབ་སྟེ་བླུད་ན་རིམས་དང་། ཡི་ག་
[275b]
[275b.1]འཆུས་པ་དང་། ལྦ་བ་དང་། ཐོར་བུ་དང་། འབྲུམ་ཆེན་དང་། དམུ་རྫིང་རྣམས་ལ་ཕན་ནོ། །གལ་ཏེ་མཁྲིས་པ་བད་ཀན་གྱི་གནས་སུ་ཞུགས་པ་ལ་ནི། ཛི་མུ་ཏ་དང་། ཀོ་ཤ་ཏ་ཀི་རྣམ་གཉིས་དང་། དུག་མོ་ཡུངས་དང་། འདི་རྣམས་གང་ཡང་རུང་བ་ཞིག་བསྐོལ་
[275b.2]བའི་ཁུ་བའི་ནང་དུ་གོང་གི་པོ་སོན་ཆ་དང་། པི་པི་ལིང་གི་སྦྱོར་བའི་ཕྱེ་མ་བཏབ་སྟེ་བླུད་དོ། །སྙིང་ཚ་བ་དང་ཁྲག་མཁྲིས་རྒྱས་པ་ལ་ནི། པི་པི་ལིང་བརྒྱ་འོ་མ་དང་བསྐོལ་བའི་ནང་དུ་པོ་སོན་ཆའི་སྦྱོར་བ་བཏབ་སྟེ་བླུད་དོ། །ཡང་ན་པོ་སོན་ཆའི་སྦྱོར་བ་གོང་མའི་ཕྱེ་མ་འོ་མ་དང་བསྐོལ་
[275b.3]ཏེ་ཞོར་གྱུར་པ་དང་། དེའི་ཞོ་འམ་ཞོའི་སྤྲིས་མ་འཐུངས་ན་བད་ཀན་ལས་གྱུར་པའི་སྐྱུགས་པ་དང་། ཆམ་པས་བཏབ་པ་དང་། མུན་ཐིབས་ཞེས་བྱེད་པ་ལ་ཕན་ནོ། །ལུས་སྐེམ་ཞིང་མེ་དྲོད་ཀྱིས་ཉམ་ཐག་པ་ལ་ནི་པོ་སོན་ཆ་དང་། དེ་བ་ཏ་ལི། ཀོ་ཤ་ད་ཀི་དང་། དུག་མོ་
[275b.4]ཡུངས་དང་། ཀུ་བ་ཁ་བོ་དང་། འདི་རྣམས་འོ་མ་དང་ཚུལ་བཞིན་བསྐོལ་བའི་ནང་དུ་གོང་དུ་སྨོས་པའི་སྨན་གྱི་ཕྱེ་མ་དང་། པོ་སོན་ཆ་དང་། པི་པི་ལིང་གི་སྦྱོར་བའི་ཕྱེ་མ་བཏབ་སྟེ། འོ་མ་དང་ཡང་བསྐོལ་ལ། དེ་ལས་བྱུང་བའི་མར་བླུད་དོ། །ཡང་ན་པི་པི་ལིང་དང་། པོ་སོན་
[275b.5]ཆའི་འབྲས་བུའི་ཁུ་བ་གོ་བྱེའི་ཆོ་ག་བཞིན་དུ་བྱ་སྟེ། ལྡེ་གུ་སྐྱ་བ་ལ་དྲིལ་དུ་བཏུབ་པ་ཙམ་གྱི་ཚོད་བྱིན་ལ་བདེ་བར་སྐྱུག་ཏུ་གཞུག་གོ། ཡང་ན་ལྡེ་གུ་དེ་ཉིད་བཟའ་བ་དང་བཏུང་བའི་ནང་དུ་བཏབ་སྟེ་བཟའ་བའམ། ཡང་ན་གོང་གི་པི་པི་ལིང་དང་། པོ་སོན་ཆའི་སྦྱོར་བ་བསྐོལ་
[275b.6]བ་དང་ལྷན་ཅིག་གཏང་ངོ་། །ཡང་ན་པོ་སོན་ཆ་དང་། པི་པི་ལིང་དང་། ནིམ་པ་དང་། ཨརྐ་དང་། དེ་དག་གང་ཡང་རུང་བ་བསྐོལ་བའི་ནང་དུ་དུག་མོ་ཡུངས་ཀྱི་སྡེ་ཚན་བཏགས་པའི་ཕྱེ་མ་བཏབ་སྟེ་བླུད་ན། ཉམས་བརྟས་པ་ལས་གྱུར་པའི་ནད་གཏིང་ཟུག་པ་ཡང་ཞི་བར་
[275b.7]བྱེད་དོ། །བྱིས་པ་གཞོན་ནུ་བད་ཀན་དང་མཁྲིས་པ་ཡོད་ཅིང་སྐྱུག་སྨན་བཏང་མི་བཟོད་པ་ལ་ནི་ཐོག་མར་འགྲངས་པར་བྱས་ནས། དེའི་འོག་ཏུ་པོ་སོན་ཆའི་མེ་ཏོག་གམ་འབྲས་བུ་གང་ཡང་རུང་བ་ལེགས་པར་བཏགས་ལ་མེ་ཏོག་གི་ཕྲེང་བ་ལ་ཕྱེ་མས་བསྒོས་ཏེ་སྣ་སྒོར་
[276a]
[276a.1]མནམ་ན་བདེ་བར་སྐྱུག་པར་འགྱུར་རོ། །ཡང་ན་ཐུག་པ་འམ། ཤ་ཁུ་འམ། ཀྲི་ས་ར་ལ་སོགས་པའི་ནང་དུ་པོ་སོན་ཆའི་ཕྱེ་མས་བཏབ་སྟེ་བླུད་ན་ཡང་སྐྱུག་པར་འགྱུར་རོ། །ཡང་ན་ཛི་མུ་ཏ་ལ་སོགས་པའི་གོང་དུ་སྨོས་པའི་སྨན་དྲུག་པོ་ཡང་པོ་
[276a.2]སོན་ཆའི་སྦྱོར་བ་བཞིན་དུ་བྱས་ལ་ཁྱད་པར་དུ་ཛི་མུ་ཏའི་སྦྱོར་བས་ནི་རིམས་དང་། དབུགས་མི་བདེ་བ་དང་ལུད་པ་དང་། སྐྱིགས་བུ་ལ་སོགས་པའི་ནད་ལ་ཡང་སྦྱར་རོ། །ཡང་ན་ཛི་མུ་ཏའི་མེ་ཏོག་གམ་མེད་ན་འབྲས་བུའམ། ཡང་ན་འབྲས་བུ་སྤུ་དང་བཅས་པའམ།
[276a.3]དེ་དག་གང་རྙེད་ཀྱང་རུང་སྟེ། འོ་མ་བསྐོལ་བ་དང་སྦྱར་ལ་སྐྱུག་སྨན་གྱི་དོན་དུ་བཏང་བ་འམ། ཡང་ན་ཛི་མུ་ཏའི་འབྲས་བུ་མ་སྨིན་པ་དང་ཞོའི་སྤྲིས་མ་ལ་སྦྱར་བ་བྱིན་ན་སྐྱུག་པར་འགྱུར་རོ། །ཡང་ན་ཛི་མུ་ཏའི་འབྲས་བུ་སེར་སྐྱར་སོང་བའི་ཕྱེ་མ་འོ་མར་བསྐོལ་ལ་ཞོ་སྐྱུར་པོར་
[276a.4]གྱུར་པ་ལ་བཏབ་ན་སྐྱུག་པར་འགྱུར་རོ། །ཨ་ས་བའི་ཆང་གི་དངས་མའི་ནང་དུ་ཛི་མུ་ཏའི་རྩ་བ་མཉེས་ཏེ་བླུད་དོ། །ཛི་མུ་ཏའི་སྦྱོར་བ་དེ་དག་གིས་བད་ཀན་དང་། ཡི་ག་འཆུས་པ་དང་། ལུད་པ་ལུ་བ་དང་། སྐྱ་རྦབ་དང་། གཅོད་ཆེན་པོ་རྣམས་ལ་སྦྱོར་བ་འདི་
[276a.5]བཏང་ན་ཕན་ནོ། །ཀུ་བ་དང་ཀོ་ཤ་ཏ་ཀི་རྣམ་གཉིས་དང་སྦྱོར་བ་གོང་མ་བཞིན་འོ་མ་དང་མེ་ཏོག་དང་འབྲས་བུའི་ཆོ་ག་ཇི་ལྟ་བ་བཞིན་བྱའོ། །ཡང་ན་དེ་གསུམ་ལེགས་པར་སྨིན་པ་བླངས་ཏེ་སྐམ་པོ་བཏགས་པའི་ཕྱེ་མ་བཙགས་པ་སྲང་ཕྱེད་འོ་མའི་ནང་དུ་བསྐྱོས་པ་བླུད་
[276a.6]ན་རླུང་དང་མཁྲིས་པ་ལ་ཕན་ནོ། །པ་ཏོ་ལའི་རྩ་བ་བསྐོལ་བའི་ཁུ་བ་འམ། ཡང་ན་དོང་གའི་སྡེ་ཚན་ལས་པ་ཐ་ཡན་ཆད་སྨན་དགུ་ལས་གང་ཡང་རུང་བའི་ཁུ་བའི་ནང་དུ་ཛི་མུ་ཏའི་འབྲས་བུ་གཉིས་སམ་གསུམ་ཆམ་ཆོམ་བརྡུངས་ཏེ་འཐུངས་ན་
[276a.7]མཁྲིས་པ་དང་བད་ཀན་གྱི་རིམས་ནད་ཅན་ལ་ཕན་ནོ། །ཡང་ན་ཛི་མུ་ཏ་བཏགས་པའི་ཕྱེ་མ་མཁྲིས་པའི་རིམས་ལ་ནི་ཆུ་གྲང་མོ་དང་སྦྱར་ཏེ་གཏང་ངོ་། །བད་ཀན་དང་རླུང་འདྲེས་པའི་རིམས་ལ་ནི་ཆུ་དྲོ་འཇམ་ཙམ་དང་སྦྱར་བ་བྱིན་ནོ། །ལུད་
[276b]
[276b.1]པ་དང་དབུགས་མི་བདེ་བ་དང་། དུག་དང་། སྐྱུགས་པ་དང་། རིམས་དང་། བད་ཀན་ཤས་ཆེ་བ་དང་། མུན་ཐིབས་ཞེས་བྱེད་པའི་ནད་དང་། དེ་རྣམས་དང་ལྡན་པའི་སྐྱེས་བུ་ལ་ནི་ཀུ་བ་ཁ་བོའི་སྐྱུག་སྨན་རབ་ཏུ་བསྔགས་སོ། །ཀུ་བ་ཁ་
[276b.2]བོའི་འབྲས་བུ་དང་། མེ་ཏོག་དང་། མེ་ཏོག་མེད་པའི་དུས་སུ་ནི་མྱུ་གུ་དང་། ལོ་མ་གསར་པ་འོ་མ་དང་བསྐོལ་བ་མཁྲིས་པ་དང་། བད་ཀན་དུ་ལྡན་པའི་རིམས་མཁྲིས་པ་ཤས་ཆེ་བ་ལ་གཏང་ངོ་། །ཀུ་བ་ཁ་བོ་ལེགས་པར་སྨིན་པའི་ནང་གི་འབྲས་བུ་
[276b.3]ཕྱུང་སྟེ། འོ་མའི་ནང་དུ་བཅུག་སྟེ་ཞོར་གྱུར་པ་དང་། བད་ཀན་ལས་གྱུར་པའི་ལུད་པ་དང་། དབུགས་མི་བདེ་བ་དང་། སྐྱུག་སྨན་གྱི་དོན་དུ་བླུད་དོ། །ཡང་ན་སྐྱ་རྦབ་དང་། མཛེ་དང་། དུག་གིས་ཉམ་ཐག་པ་ལ་ནི་ཀུ་བ་ཁ་བོའི་ས་བོན་ཞོག་ཆུ་དང་སྦྱར་བ་
[276b.4]སྦྱིན་ནོ། །ཡང་ན་ཀུ་བ་ཁ་བོའི་ས་བོན་དར་བ་བསྐོལ་བའི་ནང་དུ་བཏབ་སྟེ། རྒྱམ་ཚ་དང་། སྦྲང་རྩི་དང་བཅས་པ་བླུད་ན་ཕན་ཡོན་གོང་མ་དང་འདྲའོ། །ཡང་ན་ཀུ་བ་ཁ་བོའི་ས་བོན་རའི་འོ་མའི་ནང་དུ་བྲན་ཏེ་རའི་འོ་མ་དེ་ཉིད་དང་བཅས་པ་འཐུངས་
[276b.5]ན་དུག་དང་། སྐྲན་དང་། དམུ་རྫིང་དང་། ཐོར་བུ་དང་། འབྲས་དང་། རྐང་བམ་རྣམས་ལ་ཕན་ནོ། །ནས་ཕྱེའམ་ཡང་ན་ཀུ་བ་ཁ་བོའི་ས་བོན་གང་ཡང་རུང་བའི་ཀུ་བའི་རང་ཁུས་བསྒོས་ཏེ་སྐྱོ་མར་བྱས་པ་བླུད་ན་བད་ཀན་ལས་གྱུར་པའི་
[276b.6]རིམས་དང་། ལུད་པ་དང་། ལྐོག་མའི་ནད་དང་། མ་ཞུ་བ་རྣམས་ལ་ཕན་ནོ། །སྐྲན་དང་རིམས་རྙིང་པ་ལ་ནི་ཀུ་བ་ཁ་བོའི་ཕྱེ་མ་ཤ་ཁུ་དང་ལྷན་ཅིག་བླུད་ན་ལེགས་པར་སྐྱུག་ཅིང་ཉམ་ཆུང་བར་ཡང་མི་འགྱུར་རོ། །ཀུ་བ་ཁ་
[276b.7]བའི་འབྲས་བུ་དང་། མེ་ཏོག་རང་གི་ཁུ་བ་བསྐམས་ཏེ་བཏགས་པའི་ཕྱེ་མ་མེ་ཏོག་གི་ཕྲེང་བ་ལ་བསྒོས་ཏེ་མན་མན་བདེ་བར་སྐྱུག་པར་བྱེད་དོ། །སྐྱིད་དེ་བའི་སྐྱུག་སྨན་དུ་སྦྱར་རོ། །ལུད་པ་དང་། སྐྲན་དང་། །དམུ་རྫིང་
[277a]
[277a.1]དང་། ལྐོག་མའི་ནད་དང་། དེ་བཞིན་དུ་རླུང་བད་ཀན་གྱི་གནས་སུ་ཞུགས་པ་དང་། ཁ་དང་མགྲིན་པར་བད་ཀན་གནས་པ་དང་། བད་ཀན་སོགས་ཤིང་བརྟན་པའི་ནད་རྣམས་ལ་སྨན་དྷ་མར་ཀའི་སྐྱུག་སྨན་
[277a.2]འདོད་པ་ཡིན་ཏེ། ཟངས་རྩི་བ་དང་། ཁ་སྲལ་ཕྲེའུ་དང་། ཉེའུ་ཤིང་དང་། ར་མཉེ་བ་རྣམ་གཉིས་དང་། ཤྲ་བ་ནི་དང་། མེ་ད་རྣམ་གཉིས་དང་། མ་དུ་ལི་ཀ་དང་། འདི་རྣམས་གང་ཡང་རུང་བའི་ཕྱེ་མ་དང་། ར་ཛཱ་ཀོ་ཤ་ཏ་ཀི་ཞེས་བྱ་བ་དྷ་མར་
[277a.3]ཀའི་ཕྱེ་མ་དང་བཅས་པ་སྦྲང་རྩི་དང་ཤ་ཁ་ར་དང་སྦྱར་བའི་ལྡེ་གུ་ཟོས་ན་ལུད་པ་དང་སྙིང་ཚ་བ་ལ་རབ་ཏུ་བསྔགས་སོ། །མཁྲིས་པ་ཚ་བ་དང་བད་ཀན་དང་ལྡན་པ་ལ་ཡང་གོང་གི་སྦྱོར་བ་གང་ཡང་རུང་བ་ཆུ་དྲོ་འཇམ་ཙམ་དང་སྦྱར་བ་གཏང་ངོ་། །
[277a.4]འུ་སུ་དང་གཡེར་མ་བསྐོལ་བའི་ཁུ་བའི་ནང་དུ་དྷ་མར་ཀའི་ཕྱེ་མ་བཏབ་སྟེ་བླུད་ན་དུག་ནད་འཇོམས་སོ། །བིམ་པ་དང་། བ་སྤྲུ་བ་དང་། ཀ་ས་མར་དྷ་ཀ་གང་ཡང་རུང་བ་བསྐོལ་བའི་ཁུ་བའི་ནང་དུ་དྷ་མར་ཀའི་འབྲས་བུ་གཅིག་གམ་
[277a.5]གཉིས་མཉེས་ལ་ཚིགས་མ་བོར་ཏེ་དངས་མ་བླུད་ན་སྙིང་ནད་ལ་ཕན་ནོ། །དྷ་མར་ཀའི་འབྲས་བུ་འོ་མ་དང་ལྷན་ཅིག་བསྐོལ་ཏེ། དེ་ལས་བྱུང་བའི་མར་བཏུང་བ་འམ། ཡང་ན་པོ་སོན་ཆ་དང་། དུག་མོ་ཡུངས་དང་། ཛི་མུ་ཏའི་
[277a.6]འབྲས་བུ་དང་། ཀྲི་ཏ་བེ་ཏ་ན་དང་། འདི་རྣམས་རེ་རེ་ནས་སྦྱོར་བ་དེ་ལྟར་བྱས་ན་སྐྱུག་སྨན་དུ་བཟང་ངོ་། །མཛེ་དང་། སྐྱ་རྦབ་ཀྱི་ནད་དང་། མཆེར་པའི་ནད་དང་། སྐྲང་པ་དང་། སྐྲན་དང་། སྦྱར་བའི་དུག་དང་། འདི་རྣམས་
[277a.7]ལ་ནི་ཚ་བ་དང་། རྣོ་བ་དང་། དྲོ་བའི་སྐྱུག་སྨན་བསྔགས་སོ། །པོ་སོན་ཆ་དང་། ཀུ་བ་ཁ་བོ་དང་། དྷ་མར་ཀ་དང་། དུག་མོ་ཡུངས་དང་། ཛི་མུ་ཏ་དང་། ཀྲི་ཏ་བེ་དྷ་ཀ་དེ་རྣམས་གང་ཡང་རུང་བ་གཅིག་དང་། ཀོ་ཤ་ཏ་ཀི་
[277b]
[277b.1]ཆ་སྙོམས་ཏེ་བསྐོལ་བའི་ཁུ་བ་དང་། ཡུལ་སེར་ཆེ་བ་ནས་བྱུང་བའི་ཤ་ཁུ་དང་ལྷན་ཅིག་བསྐོལ་ཏེ། ལན་ཚྭ་དང་བཅས་པ་བླུད་དོ། །ཡང་ན་པོ་སོན་ཆ་ལ་སོགས་པའི་འབྲས་བུ་གང་ཡང་རུང་བ་ཅིག་དང་། པི་པི་ལིང་ཆ་
[277b.2]མཉམ་པ་ཀོ་ཤ་ཏ་ཀའི་ཁུ་བ་དང་སྦྱར་བའམ་ཡང་ན་ཀོ་ཤ་ཏ་ཀི་བསྐོལ་བའི་ཁུ་བ་དང་སྦྱར་བ་བླུད་དོ། །དུག་མོ་ཡུངས་ཀྱི་སྦྱོར་བའི་སྐྱུག་སྨན་ནི་བྱིས་པ་ཤིན་ཏུ་གཞོན་ནུ་ལ་གཏང་བ་ཡིན་ཏེ། དེ་བཞིན་དུ་བད་ཀན་དང་ཁྲག་མཁྲིས་དང་
[277b.3]བཅས་པ་དང་། རིམས་དང་། ཤུ་བ་མཆེད་པ་དང་། སྙིང་ནད་དང་། དྲེག་ནད་དང་། མཛེ་དང་། འདི་རྣམས་ལ་རབ་ཏུ་བསྔགས་སོ། །ཡུངས་ཀར་དང་། མ་དུ་ཀ་དང་། རྒྱམ་ཚ་དང་། དེ་རྣམས་གང་ཡང་རུང་བ་བསྐོལ་
[277b.4]བའི་ཁུ་བའམ། ཡང་ན་དུག་མོ་ཡུངས་ཀྱི་ས་བོན་ཀྲི་ས་ར་དང་ལྡན་པ་སྐྱུག་སྨན་གྱི་དོན་དུ་བླུད་དོ། །དུག་མོ་ཡུངས་ཀྱི་ས་བོན་ཨརྐའི་འོ་མའི་ནང་དུ་ཞག་བདུན་གྱི་བར་དུ་བསྒོས་ཤིང་བྲན་ཏེ། བསྐམས་ལ་བཏགས་པའི་ཕྱེ་མ་པོ་སོན་ཆ་
[277b.5]དང་། ཛི་མུ་ཏ་དང་། ཀུ་བ་ཁ་བོ་དང་། ཛི་བན་ཏི་དང་། ཛི་བ་ཀ་དང་། དེ་རྣམས་གང་ཡང་རུང་བ་ཅིག་བསྐོལ་བའི་ཁུ་བའི་ནང་དུ་བཏབ་སྟེ་བླུད་དོ། །སློན་སྨན་གྱི་སྦྱོར་བ་པོ་སོན་ཆ་ལ་སོགས་པ་འདི་དག་ནི་གཙོར་སྨོས་པ་ཙམ་དུ་ཟད་ཀྱི། སྐྱེས་
[277b.6]བུ་བློ་དང་ལྡན་པ་རྣམས་ཀྱིས་གཞུང་གཞན་ལས་འབྱུང་བ་རྣམས་ཀྱང་ཅི་རིགས་སུ་སྦྱོར་ཅིག །ཆོ་ག་གྲུབ་པའི་གནས་ལས་ལེའུ་དང་པོ་རྫོགས་སོ།། །།དེ་ནས་བཀྲུ་སྨན་གཏང་བའི་ཆོ་གའི་ལེའུ་བཤད་པར་
[277b.7]བྱ་སྟེ། དེ་ལ་དུར་བྱིད་དང་པོ་ཟོས་ཤིང་མ་ཞུ་བའི་ཚེ་ན་ནི་རོ་བསྐ་ལ་མངར་ཞིང་རྩུབ་པ་ཡིན་ཏེ། ཞུ་ནས་ནི་རོ་ཚ་བ་ཡིན་ལ་བད་ཀན་དང་མཁྲིས་པ་འཇོམས་ཤིང་རྩུབ་པས་ནི་རླུང་འཁྲུག་པར་བྱེད་དོ། །དུར་བྱིད་དེ་སྨན་དང་སྦྱར་ན་ནི་རླུང་དང་
[278a]
[278a.1]མཁྲིས་པ་དང་བད་ཀན་གསུམ་འཇོམས་ཏེ། ཁྱད་པར་དུ་ཆོ་ག་བཞི་ལྡན་པར་བྱས་ན་ནད་གཞི་ཐམས་ཅད་ལས་རྒྱལ་བར་བྱེད་དོ། །དུར་བྱིད་དེ་ཡང་རྣམ་པ་གཉིས་ཏེ། རྩ་བ་སྨུག་ནག་ཏུ་འདུག་པ་དང་། དུར་བྱིད་དཀར་པོ་དང་
[278a.2]གཉིས་སུ་བཤད་དོ། །དེ་གཉིས་ལས་དུར་བྱིད་དཀར་པོ་ནི་མཆོག་ཏུ་བསྔགས་ཏེ། ཆོ་ག་བསྲུང་མི་དགོས་ཤིང་བཀྲུ་སྨན་འཇམ་པོ་ཡིན་ཏེ། སྐྱིད་དེ་བ་སྡུག་མ་མྱོང་བ་རྒན་པོ་དང་རྒྱུ་སྙི་བ་རྣམས་ལ་གཏང་བ་ཡིན་ནོ། །དུར་བྱིད་སྨུག་ནག་ནི་བརྒྱལ་ཞིང་རྨོངས་
[278a.3]བག་ཏུ་བྱེད་ལ། མགྲིན་པ་གྲ་མས་གང་ཞིང་བྲུད་པ་ལྟར་བྱེད་ལ། རྣོ་ཞིང་མྱུར་དུ་འཁྲུ་བའི་བདག་ཉིད་ཡིན་པས་ལྟོ་ཤིན་ཏུ་སྲ་བ་དང་། ནད་གཞི་མང་པོས་ཉམ་ཐག་སྟེ་ལུས་ཤིན་ཏུ་ཟད་པ་ལ་བསྔགས་སོ། །དུར་བྱིད་དེ་བཏུང་བའི་དུས་སུ་ཡང་རྩ་བ་གཡས་གཡོན་དུ་མ་
[278a.4]འཕྲོས་ཤིང་ཟབས་སུ་དྲང་པོར་འདུག་པ་དེ་ཕྱུང་ལ་དབུས་ཀྱི་སྙིང་པོ་བོར་ཏེ་ཤུན་པ་བསྐམས་ལ་སྦས་ནས་སྣོད་དུ་གཞུག་གོ། །དེ་ནས་བཀྲུ་སྨན་དུ་སྦྱར་བ་ནི་རླུང་ནད་ཅན་ལ་ནི་དུར་བྱིད་ཕྱེ་མར་བྱ་སྟེ། རྒྱམ་ཚ་དང་། བཅའ་སྒ་ཉུང་ཟད་དང་། སྐྱུར་དང་སྦྱར་ཏེ་བླུད་དོ། །
[278a.5]མཁྲིས་པ་ལས་གྱུར་པའི་ནད་ལ་ནི་དུར་བྱིད་མར་དང་། སྦྲང་རྩི་དང་ཁ་ར་དང་བཅས་པ་འོ་མ་དང་རྒུན་ཆུ་དང་བུ་རམ་ཤིང་གི་ཁུ་བ་དང་ཏང་པལ་དང་སྨན་མངར་བའི་སྡེ་ཚན་དང་། འབྲས་བུ་གསུམ་དང་། དེ་རྣམས་ཀྱི་ཁུ་བ་གང་ཡང་རུང་བ་དང་སྦྱར་བ་བླུད་དོ། །
[278a.6]བད་ཀན་ལས་གྱུར་པའི་ནད་ལ་ནི་སཱ་ལུའི་ཁུ་བ་དང་། བ་གཅིན་དང་། རྩབས་སྐྱུར་པོ་དང་། ཚ་བ་རྣམ་ལྔའི་ཁུ་བ་དང་བད་ཀན་འཇོམས་པའི་སྨན་ཉུང་ཤས་དུར་བྱིད་ཀྱི་ཕྱེ་མ་དང་སྦྱར་བ་བླུད་དོ། །དུར་བྱིད་བསྐོལ་བའི་ཁུ་བ་གྲང་མོའི་ནང་དུ་ཁ་ར་
[278a.7]དང་། སྦྲང་རྩི་དང་། དྲི་སྣ་གསུམ་དང་སྦྱར་བ་བླུད་པ་འམ། ཡང་ན་དུར་བྱིད་ཀྱི་ཕྱེ་མ་ཁ་ར་དང་སྦྲང་རྩི་དང་སྦྱར་བའི་ལྡེ་གུ་བལྡགས་ན་བཀྲུ་སྨན་ཡིད་དུ་འོང་བ་ཡིན་ནོ། །ཨ་ཛཱ་གན་དྷ་དང་། སྨྱིག་རྐང་དང་། བི་ད་རི་དང་། ཤ་ཁ་ར་དང་། འདི་རྣམས་དང་དུར་
[278b]
[278b.1]བྱིད་ཀྱི་ཕྱེ་མ་སྦྲང་རྩི་དང་མར་སྦྱར་བའི་ལྡེ་གུ་བལྡགས་ན་འདུས་པ་དང་། རིམས་དང་། ལུས་རེངས་པ་དང་། ལུས་ཚ་བ་དང་། སྐོམ་དད་ཀྱིས་གཟིར་བ་ལེགས་པར་འཁྲུ་བར་བྱེད་དོ། །ཡང་ན་བུ་རམ་ཤིང་གི་སྡོང་བུ་བཀས་ཏེ། དུམ་བུ་གཉིས་སུ་བྱས་པའི་ནང་ངོས་དུར་བྱིད་ཀྱི་ཕྱེ་མ་ལྡེ་གུར་བྱས་
[278b.2]ཏེ། བསྐུས་ཏེ་སླར་སྦྱར་བས་སྣོད་ཁ་སྦྱར་གྱི་ནང་དུ་ཆོ་ག་བཞིན་དུ་ཚོས་པར་བྱས་ནས་ཟོས་པ་ན་འདུས་པ་ལས་གྱུར་པའི་ནད་ལེགས་པར་འཁྲུ་བར་འགྱུར་རོ། །ཤིང་ཚ་དང་སུག་སྨེལ་མཉམ་པ་དང་། དེ་གཉིས་དང་མཉམ་པའི་ནི་ལི་ནི་དང་། སྨན་གསུམ་པོ་དེ་དག་དང་མཉམ་པའི་དུར་བྱིད་དང་། སྨན་
[278b.3]དེ་བཞི་དང་མཉམ་པའི་ཤ་ཁ་ར་དང་། འདི་རྣམས་ཀྱི་ཕྱེ་མ་རྒུན་འབྲུའི་ཁུ་བའི་ནང་དུ་སྦྲང་རྩི་དང་ཕྱེས་བཏབ་པའི་སྐྱོ་མ་འཐུངས་ན་རླུང་དང་། མཁྲིས་པ་དང་། བད་ཀན་ལས་གྱུར་པའི་ནད་དང་། མེའི་དྲོད་ཆུང་བ་དང་། སྐྱེས་བུ་སྐྱིད་དེ་བ་དང་། ཤིན་ཏུ་གཞོན་པ་རྣམས་ལ་ཆོ་ག་བསྲུང་མི་དགོས་པར་འཁྲུ་
[278b.4]བར་བྱེད་དོ། །བྱི་དང་ག་ཕུབ་མ་མེད་པ་དང་། འབྲས་བུ་གསུམ་དང་། ནས་ཚིག་འཁུས་པའི་ཐལ་བ་དང་། པི་པི་ལིང་དང་། སྨན་སྣ་གཅིག་གི་སུམ་འགྱུར་གྱི་དྲི་བི་ཙ་དང་། དེ་རྣམས་ཀྱི་ཕྱེ་མ་སྦྲང་རྩི་འམ། མར་རམ་བུ་རམ་དེ་རྣམས་གང་ཡང་རུང་བའི་ལྡེ་གུ་བལྡགས་ན་ཡི་ག་འཆུས་པ་
[278b.5]དང་། སྐྲན་དང་མཆེར་པ་དང་། དམུ་རྫིང་དང་། ལུད་པ་དང་། ནད་ཧ་ལི་མི་ཀ་དང་། གཞན་ཡང་བད་ཀན་དང་། རླུང་ལས་གྱུར་པའི་ནད་མྱུར་དུ་སྦྱོང་བར་བྱེད་དོ། །བྱི་དང་ག་དང་། པི་པི་ལིང་མུངྒ་ལ་དང་། འབྲས་བུ་གསུམ་དང་། འུ་སུ་དང་། ཙི་ཏྲ་ཀ་དང་། ན་ལེ་ཤམ་དང་། དུག་མོ་ཉུང་དང་།
[278b.6]ཟི་ར་དང་། པི་པི་ལིང་དང་། ཧསྟི་པི་པི་ལིང་དང་། ཏི་མུ་ས་དང་། ལན་ཚྭ་རྣམ་ལྔ་དང་། འདི་རྣམས་ཞོ་གཉིས་གཉིས་ཕྱེ་མར་བྱས་པ་དང་། ཏྲི་བི་ཙ་སྲང་བརྒྱད་ཀྱི་ཕྱེ་མ་དང་། ཏིལ་མར་སྲང་བརྒྱད་དང་། སྐྱུ་རུ་རའི་འབྲས་བུའི་ཁུ་བ་སྲང་སུམ་ཅུ་རྩ་གཉིས་དང་། བུ་རམ་སྲང་སུམ་བརྒྱ་ལྔ་བཅུ་དང་།
[278b.7]དེ་རྣམས་ལྷན་ཅིག་མེ་མི་ཆེ་བ་དང་བསྐོལ་བ་ནི་དགེ་བའི་བུ་རམ་ཞེས་བྱ་བའི་སྦྱོར་བ་ཡིན་ཏེ། དུས་ཐམས་ཅད་དུ་སྦྱོར་བ་འདི་བྱར་ཡང་རུང་སྟེ། ཆོ་ག་བསྲུང་མི་དགོས་པར་འདི་ལས་རན་པར་འཐུངས་ན་མཛེ་དང་། གཞང་འབྲུམ་དང་། མིག་སེར་དང་། གཅིན་ནད་དང་། སྐྲན་དང་། དམུ་རྫིང་དང་། མཚན་
[279a]
[279a.1]བར་རྡོལ་བ་དང་། ཕོ་བའི་ནད་དང་། སྐྱ་རྦབ་ཀྱི་ནད་རྣམས་འཇོམས་ཤིང་བུད་མེད་བུ་མེད་པ་ལ་བུ་ཡང་སྐྱེ་བར་བྱེད་དོ། །ཚ་བ་གསུམ་དང་། དྲི་སྣ་གསུམ་དང་། གླ་སྒང་དང་། བྱི་དང་ག་དང་། སྐྱུ་རུ་ར་དང་། དེ་སྤྱི་དང་མཉམ་པའི་དུར་བྱིད་དང་། དེ་དང་མཉམ་པའི་ཁ་ར་དཀར་པོ་
[279a.2]བཏགས་པའི་ཕྱེ་མ་སྦྲང་རྩི་དང་རི་ལུར་བྱས་པ་ཟོས་ན་གཅིན་སྲི་བ་དང་། རིམས་དང་། སྐྱུག་པའི་ནད་དང་། ལུད་པ་དང་། སྐེམ་བྱེད་དང་། མགོ་འཁོར་བ་དང་། ཟད་བྱེད་ཀྱི་ནད་དང་། ལུས་ཚ་བ་དང་། སྐྱ་རྦབ་ཀྱི་ནད་དང་། མེ་དྲོད་ཆུང་བ་དང་། དུག་ཐམས་ཅད་ལ་རབ་ཏུ་བསྔགས་སོ། །
[279a.3]དུར་བྱིད་དང་། དུག་མོ་ཡུངས་དང་། པི་པི་ལིང་དང་། བཅའ་སྒ་འདི་རྣམས་ཀྱི་ཕྱེ་མ་སྦྲང་རྩི་དང་རྒུན་འབྲུའི་ཁུ་བ་དང་སྦྱར་ཏེ། དབྱར་གྱི་དུས་སུ་བཀྲུ་སྨན་བཏང་བར་བཟང་ངོ་། །དུར་བྱིད་དང་། བྱི་ཚེར་བ་དང་། གླ་སྒང་དང་། ཁ་ར་དང་། བ་ལ་ཀ་དང་། ཙན་དན་དང་། ཤིང་མངར་དང་། སཱ་ཧ་
[279a.4]ལ་དང་། འདི་རྣམས་ཀྱི་ཕྱེ་མ་རྒུན་ཆུ་དང་སྦྱར་བ་སྟོན་གྱི་དུས་སུ་བཀྲུ་སྨན་བཟང་ངོ་། །ཏྲི་བི་ཏ་དང་། ཙི་ཏྲ་ཀ་དང་། པ་ཐ་དང་། ཟི་ར་དང་། ས་ར་ལ་དང་། ཤུ་དག་དང་། རྩ་སྨན་ཁྲོན་བུ་དང་། འདི་རྣམས་ཀྱི་ཕྱེ་མ་ཆུ་དྲོན་དང་སྦྱར་བ་དགུན་གྱི་དུས་སུ་བཀྲུ་སྨན་བཟང་ངོ་། །དུར་བྱིད་དང་ཁ་ར་ཆ་མཉམ་
[279a.5]པ་ནི་སོ་གའི་བཀྲུ་སྨན་བཟང་ངོ་། །དུར་བྱིད་དང་། ཀྱི་ལྕེ་དང་། སྤ་མའི་འབྲས་བུ་དང་། པུ་ཙེ་ཤེལ་དང་། ཁྲོན་བུ་དང་འདི་རྣམས་ཀྱི་ཕྱེ་མ་ཞག་གསུམ་གྱི་བར་དུ་གཅིན་གྱི་ནང་དུ་སྦངས་ཤིང་སྣུམ་ཆོས་བྱས་པའི་མོད་ལ་བཏང་ན་དྲི་མ་ཐམས་ཅད་འབྱིན་པར་བྱེད་དོ། །ཤ་མ་དུར་བྱིད་དང་། བྱི་ཚེར་བ་དང་།
[279a.6]ཧ་ཏི་པི་པི་ལིང་དང་། དུག་མོ་ཡུངས་དང་། ནི་ལི་ནི་དང་། པུ་ཙེ་ཤེལ་དང་། གླ་སྒང་དང་། འབྲས་བུ་གསུམ་དང་འདི་རྣམས་ཀྱི་ཕྱེ་མ་ཤ་ཁུ་དང་མར་དང་། ཆུ་དྲོན་གང་ཡང་རུང་བ་ལས་དུས་ཐམས་ཅད་དུ་བཏང་ན་ཁོང་རྩུབ་པ་ལ་རབ་ཏུ་བསྔགས་སོ། །བཀྲུ་སྨན་དོང་ག་ནི་བཀྲུ་སྨན་འཇམ་ཞིང་རོ་མངར་བ་ལ་
[279a.7]བསིལ་བའི་ནུས་པ་དང་ལྡན་པ་ཡིན་པས་རིམས་དང་། སྙིང་ནད་དང་དྲེག་ནད་དང་། ཕྱི་ས་འགགས་པ་ལ་སོགས་པའི་ནད་ལ་རབ་ཏུ་ཕན་ནོ། །དོང་ག་ནི་འཇམ་ཞིང་ཉེན་མེད་པའི་བཀྲུ་སྨན་གྱི་མཆོག་ཡིན་ཏེ། བྱིས་པ་དང་རྒན་པོ་དང་ལུས་སྐེམ་ཞིང་ཟད་པ་དང་། ཤིན་ཏུ་གཞོན་པ་ལ་ཡང་སྦྱར་རོ། །
[279b]
[279b.1]དེ་ཡང་དོང་གའི་འབྲས་བུ་ལེགས་པར་སྨིན་པའི་དུས་སུ་བླངས་ན་དོང་ག་དེ་ཡང་སྐྱོན་མེད་ཅིང་སྲིན་བུས་མ་ཟོས་པ་ཁུར་གཅིག་ཙམ་བླངས་ཏེ་ཕྱེ་མའི་ནང་དུ་གཞུག་གོ། །ནུབ་བདུན་ལོན་པ་དང་ཕྱུང་ལ་ཉི་མ་ལ་བསྐམ་པར་བྱའོ། །དེ་ནས་ཤུན་པ་དང་འབྲས་བུ་བསལ་ཏེ་སྙིང་པོ་སྣོད་གཙང་མའི་ནང་
[279b.2]དུ་གཞག་གོ། །བྱིས་པ་ལོ་བཞི་ནས་བཅུ་གཉིས་ཀྱི་བར་དུ་ལོན་པ་དང་། མི་སྐྱིད་དེ་བ་ལུས་ཚ་བས་གདུངས་ཤིང་རྟུག་སྐམ་གྱིས་བཏབ་པ་ལ་ནི་དོང་གའི་སྙིང་པོ་རྒུན་ཆུ་དང་སྦྱར་ལ་བཏང་ངོ་། །དོང་གའི་སྙིང་པོ་བསྐོལ་བ་གྲང་མོ་ཆང་གི་དངས་མ་འམ། ཞོ་ག་ཆུ་འམ། སྐྱུ་རུ་རའི་འབྲས་བུ་འམ། སྐྱུར་པོ་གང་
[279b.3]ཡང་རུང་བ་དང་ལྷན་ཅིག་སྦྱར་བའི་ནང་དུ་ཏྲི་བིད་ཀྱི་ཕྱེ་མས་བཏབ་པ་བླུད་དོ། །དན་ད་བསྐོལ་བའི་ཁུ་བའི་ནང་དུ་དོང་གའི་སྙིང་པོ་དང་བུ་རམ་བཅུག་སྟེ་ཟླ་བ་ཕྱེད་དམ་གཅིག་གི་བར་དུ་བཞག་པའི་ཆང་བཏུང་བར་བྱའོ། །སེང་ཕྲོམ་གྱི་རྩ་བའི་ནང་ཤུན་བོར་ཏེ་ཕྱི་ཤུན་བླངས་ཏེ་བསྐམས་ལ་ཕྱེ་མར་
[279b.4]བྱ་སྟེ། དེའི་ཕྱེ་མའི་སུམ་ཆ་གཉིས་ནི་སེང་ཕྲོམ་བསྐོལ་བའི་ནང་དུ་སྦངས་ཏེ། ཁ་ཅིག་ནི་རྩ་བ་བཅུ་པ་བསྐོལ་བའི་ཁུ་བའི་ནང་དུ་སྦངས་པ་ཡང་བསྐམས་ཏེ། ཡང་ཕྱེ་མར་བྱས་པའི་ཞོ་ག་ཆུ་དང་། བ་གཅིན་དང་། ཆང་གི་སྙིང་པོ་དང་། རྒྱ་ཤུག་དང་། སྐྱུ་རུ་རའི་ཁུ་བ་རྣམས་ལས་གང་
[279b.5]ཡང་རུང་བ་དང་སྦྱར་ཏེ་ལག་མཐིལ་དུ་བཞག་ལ་བཏུང་ངོ་། །ཡང་ན་ནས་བསྐོལ་བའི་ཁུ་བའི་ནང་དུ་དེ་ཉིད་ཀྱི་ཕྱེ་མ་དང་། ཤ་ཁ་ར་དང་། མར་དང་སྦྱར་བའི་ལྡེ་གུ་དེ་ཡང་བཀྲུ་སྨན་གྱི་དམ་པ་ཡིན་ནོ། །དེ་ལ་སུ་དྷཱ་ཀྵི་ར་ནི་ནད་གཞི་ཤས་ཆེར་སྩོགས་ཤིང་གསོ་དཀའ་བ་ཡང་མྱུར་དུ་འཇིག་པར་བྱེད་ལ།
[279b.6]ཤིན་ཏུ་དྲག་ཅིང་རྩུབ་པ་ཡིན་པས་ལྟོ་སྙི་བ་དང་། བྱིས་པ་དང་། རྒན་པོ་དང་། ནད་རྙིང་ཅན་ཉམ་ཆུང་བ་ལ་བཏང་དུ་མི་རུང་ངོ་། །སུ་དྷ་ཀྵི་ར་སྟེ་སྐྲན་དང་། དམུ་རྫིང་དང་། སྦྱར་བའི་དུག་དང་། པགས་པའི་ནད་དང་། གཅིན་སྦྲང་རྩི་ལྟ་བུ་བྱུང་བའི་ནད་དང་། སྐྱ་རྦབ་དང་། དུག་འཇོམས་པ་
[279b.7]དང་། སྐྲང་བ་དང་། ནད་གཞིས་སེམས་མི་དྲན་པ་ལ་ཡང་སུ་དྷཱ་ཀྵི་ར་ཞེས་བྱ་བ་སྣུ་ཧི་སྦྱར་ན་ཕན་ནོ། །སུ་དྷཱ་ཀྵི་ར་ཤིང་དེ་ཡང་ཚེར་མ་རྣོ་བ་མང་པོས་ཁྱབ་པ་རབ་ཏུ་བཟང་ངོ་། །ཤིང་དེ་ཡང་ལོ་གཉིས་སམ་གསུམ་ལོན་པ་དཔྱིད་ཀྱི་དུས་སུ་མཚོན་གྱིས་དྲལ་ཏེ་ལོ་མ་དབྱུང་བར་བྱའོ། །བིལ་བ་
[280a]
[280a.1]ལ་སོགས་པ་རྩ་བ་ཆེན་པོ་ལྔ་དང་། བྲི་ཧ་ཏི་རྣམ་གཉིས་དང་། དེ་དག་གང་ཡང་རུང་བ་རེ་རེ་བསྐོལ་བའི་ཁུ་བ་དང་མཉམ་པའི་སུ་དྷཱ་ཀྵི་ར་དང་བསྲེས་ཏེ། མེའི་མདག་མ་ལ་མ་རེག་པ་ཙམ་དུ་བསྐམས་ལ་རི་ལུར་བྱས་ལ་ཞོ་ག་ཆུ་དང་། བ་གཅིན་དང་། ཆང་གང་ཡང་རུང་བ་དང་
[280a.2]སྦྱར་ཏེ་བླུད་དོ། །དུར་བྱིད་དང་། དོང་ག་དང་། ཤང་ཀི་ནི་དང་། དན་ཏི་དང་། དྲ་བན་ཏི་དང་། ས་ཏ་ལ་དང་། འབྲས་བུ་གསུམ་དང་། ཁྲོན་བུ་དང་། དེ་རྣམས་གང་ཡང་རུང་བ་གཅིག་གི་ཕྱེ་མ་སུ་དྷཱ་ཀྵི་རའི་འོ་མའི་ནང་དུ་སྦངས་ཤིང་བསྐམ་པར་བྱ་སྟེ། དེའི་འོག་ཏུ་ཤ་ཁུའམ་མར་གང་ཡང་རུང་བ་སྦྱར་
[280a.3]ཏེ་བླུད་དོ། །དེ་བཞིན་དུ་ཚ་བ་གསུམ་དང་། འབྲས་བུ་གསུམ་དང་། ཏྲི་བི་ཙ་དང་། དན་ཏི་དང་། ཀྲུ་ཏྲུག་ཏྲེས་དང་། དེ་རྣམས་ཀྱང་རེ་རེ་ནས་སུ་དྷ་ཀྵི་རའི་འོ་མ་དང་། གོང་མ་བཞིན་དུ་བྱས་པ་བུ་རམ་དང་། ཆུ་སྦྱར་ཏེ་བཏང་ངོ་། །སྨན་ཤང་ཁི་ནིའི་འབྲས་བུ་ཡ་བ་ཏིག་ཏ་ཞེས་བྱ་བ་ཧ་ཅང་མི་སྐམ་
[280a.4]པ་བླངས་ཏེ་ཕུབ་མ་མེད་པར་བྱས་པ་དང་། ས་ཏ་ལའི་རྩ་བ་ཡང་དེ་ལྟར་བྱས་ལ་དེ་གཉི་ག་ཡང་རྣོ་བར་འཁྲུ་བར་བྱེད་པ་ཡིན་ཏེ། བད་ཀན་གྱི་ནད་དང་། དམུ་རྫིང་དང་། སྦྱར་དུག་དང་། སྐྲང་པ་ལ་སོགས་པ་ལ་སྦྱར་བར་བྱའོ། །སྙིང་ནད་དང་། བད་ཀན་དང་རླུང་ལས་གྱུར་བའི་ནད་དང་།
[280a.5]དེ་བཞིན་དུ་ཁྲག་ལ་ཡང་ཤ་ཁི་ན་དང་། ས་ཏ་ལ་གཉིས་ཆང་དང་ལན་ཚྭ་དང་བཅས་པ་ཞོ་གཉིས་ཙམ་གྱི་རི་ལུར་བྱས་ཏེ་སྦྱར་བར་བྱའོ། །དན་ཏིའི་རྩ་བ་གླང་པོ་ཆེའི་ཤ་ལྟར་བརྟན་ཞིང་སྦོམ་པ་དང་། དྲ་བན་ཏིའི་རྩ་བ་དམར་ལ་ཅུང་ཟད་གནག་པར་འདུག་པ་དང་། གཉིས་ནི་རྣོ་བ་དང་།
[280a.6]དྲོད་ཆེ་བ་མྱུར་དུ་འཁྲུ་བར་བྱེད་ལ། མཁྲིས་པ་དང་བད་ཀན་ནི་འཇུ་བར་བྱེད་དོ། །དན་ཏིའི་རྩ་བ་གླང་པོ་ཆེའི་སོ་ལྟར་བརྟན་ཞིང་སྦོམ་པ་དང་། དྲ་བན་ཏིའི་རྩ་བ་དམར་ལ་ཅུང་ཟད་གནག་པར་འདུག་པ་དང་གཉིས་ནི་རྣོ་བ་དང་། དྲོད་ཆེ་ལ་མྱུར་དུ་འཁྲུ་བར་བྱེད་པ་ཡིན་པས། རླུང་ལྕི་བ་ནི་འཁྲུ་
[280a.7]བར་བྱེད་ལ་མཁྲིས་པ་དང་། བད་ཀན་ནི་འཇུ་བར་བྱེད་དོ། །དན་ཏི་དང་། དྲ་བན་ཏིའི་རྩ་བ་དེ་གཉིས་སྦྲང་རྩི་དང་པི་པི་ལིང་གི་ལྡེ་གུས་ཕྱི་རོལ་ནས་བྱུགས་ལ་རྩ་དཱུར་བས་དཀྲིས་ཏེ། དེའི་ཕྱི་རོལ་ནས་འཇིམ་པས་བསྐུས་ནས་མེ་ཆུང་ངུའམ་ཉི་མ་ལ་སྐམ་མོ། །དེ་ལྟར་བྱ་བ་ནི་ལུས་ཟུངས་ཟད་
[280b]
[280b.1]པའི་ནུས་པ་གཞིལ་བར་བྱ་བའི་ཕྱིར་བྱ་བ་ཡིན་ནོ། །དེ་ལྟར་བསྐམས་པ་དང་། ཞོ་ག་ཆུ་དང་། ཆང་དང་དར་བ་དང་། ཨ་ས་བའི་ཆང་དང་། པི་ལུའི་ཁུ་བ་གང་ཡང་རུང་བ་དང་ལྷན་ཅིག་སྦྱར་ཏེ་བཏང་ན་སྐྲན་དང་། གཅིན་ནད་དང་། དམུ་རྫིང་དང་། སྦྱར་བའི་དུག་གིས་ལུས་ཉམ་ཐོག་པ་
[280b.2]ལ་ཕན་ནོ། །ཡང་ན་དེ་གཉིས་ཀྱི་ཕྱེ་མ་དང་། རི་དགས་དང་། རའི་ཤ་ཁུ་དང་སྦྱར་ཏེ་བཏང་ན་སྐྱ་རྦབ་དང་། ལྟོ་བའི་སྲིན་བུ་དང་། མཚན་བར་རྡོལ་བ་ལ་ཕན་ནོ། །རྩ་བ་བཅུ་པ་དང་། དན་ཏི་དང་། དྲ་བན་ཏི་གཉིས་ཀྱི་ཕྱེ་མ་ཆོ་ག་བཞིན་ཡང་བསྐོལ་ལ་མར་ལྷག་མ་ལུས་པ་ལས་
[280b.3]འཐུངས་ན་མེ་དབལ་དང་། མེ་དབལ་ཕྲ་མོ་དང་། ཁོང་འབྲས་དང་། མཆན་ཁུང་ཚ་བ་དང་། འདི་རྣམས་ལས་རྒྱལ་བར་བྱེད་དོ། །ཆོ་ག་དེ་བཞིན་དུ་ཏིལ་མར་བསྐོལ་བ་དང་སྦྱར་ན་ཡང་། གཅིན་ནད་དང་། སྐྲན་དང་། གཞང་འབྲུམ་དང་། རྟུག་པ་འགགས་པ་དང་། བད་ཀན་དང་།
[280b.4]རླུང་ལས་རྒྱལ་བར་བྱེད་དོ། །དེ་བཞིན་དུ་སྣུམ་ཆེན་པོ་བཞི་ཆོ་ག་དེ་ལྟར་བྱས་ནས་འཐུངས་ན། རྟུག་པ་དང་རླུང་འགགས་པ་དང་། དེ་བཞིན་དུ་རླུང་གིས་གནོད་པར་གྱུར་པ་ལ་ཡང་ཕན་ནོ། །དུར་བྱིད་ལ་སོགས་པ་སྨན་གོང་དུ་བསྟན་པ་དགུ་པོ་དེ་དག་ནི་བཀྲུ་སྨན་གྱི་ནང་ནས་མཆོག་ཏུ་བཤད་དོ། །
[280b.5]ཨ་རུ་ར་ཡང་དུར་བྱིད་ཀྱི་ཆོ་ག་ཇི་ལྟ་བ་བཞིན་དུ་ཉེ་བར་བརྟག་ཅིང་དཔྱད་པར་བྱའོ། །བུ་རམ་སྲང་བརྒྱད་དང་། ཨ་རུ་ར་རྡོག་མ་ཉི་ཤུ་དང་། དན་ཏི་དང་། ཙི་ཏྲ་ཀ་སྲང་རེ་རེ་དང་། པི་པི་ལིང་དང་། དུར་བྱིད་ཞོ་གཉིས་དང་། འདི་རྣམས་ལྷན་ཅིག་སྦྱར་ཏེ། རི་ལུ་བཅུར་བྱས་ལ་ཞག་
[280b.6]བཅུ་བཅུ་ཞིང་རི་ལུ་རེ་རེ་ཟོས་ཏེ། དེའི་རྗེས་ལ་ཆུ་དྲོན་པོ་འཐུང་ཞིང་རི་ལུ་བཅུ་པོ་ཟད་ཀྱི་བར་ལ་ཐབས་དེ་ལྟར་བྱས་ན། ཆོ་ག་བསྲུང་མི་དགོས་པར་ནད་ཐམས་ཅད་ཟློག་པར་བྱེད་དོ། །ཁྱད་པར་དུ་ཕོ་བའི་ནད་དང་། སྐྱ་རྦབ་དང་། མཛེ་ནད་ཐིག་ལེ་དམར་པོ་ཅན་དང་། གཞང་འབྲུམ་དང་
[280b.7]གཡའ་བ་དང་འདི་རྣམས་ལ་ཕན་ནོ། །སྨན་གྱི་དངོས་པོ་ནུས་པ་ཆུང་བ་ཡིན་ན་སྨན་རྣོན་པོ་དང་སྦྱར་ན་ལས་ཆེན་པོ་བྱེད་དོ། །སྨན་ཐུན་ཆེ་བ་ཡིན་ན་ཡང་སྨན་རྣོ་བ་དང་མ་སྦྱར་ན་ནི་ལས་ཉུང་ངུ་བྱེད་པ་ཡིན་ནོ། །དུས་ཀྱི་བྱེ་བྲག་ལས་བརྟགས་ཏེ་རྣོ་བ་དང་འཇམ་པའི་སྨན་ལེགས་པར་སྦྱར་ཏེ་གཏང་
[281a]
[281a.1]ངོ་། །དེ་ལྟར་ལེགས་པར་སྦྱར་བས་ནི་སྨན་རྣོ་བ་ཡང་འཇམ་པོར་འགྱུར་ལ། འཇམ་པོ་ཡང་རྣོ་བར་འགྱུར་རོ། །དེ་ལྟར་གོང་དུ་བཤད་པའི་བཀྲུ་སྨན་དེ་དག་ཀྱང་ཡིད་དང་རྗེས་སུ་མཐུན་པའི་སྨན་ཤིང་ཚ་དང་། ནཱ་ག་གེ་སར་དང་། ཨ་མྲ་ཏ་ཀ་དང་། སེའུ་འབྲུ་དང་། སུག་
[281a.2]སྨེལ་དང་། ཁ་ར་དཀར་པོ་དང་། སྦྲང་རྩི་དང་། ཁ་ལུང་དང་ཆང་ལ་སོགས་པ་དྲི་ཞིམ་པོས་བསྒོས་ཤིང་བཏབ་ལ་ལྡན་པར་བྱས་ལ་བླུད་པར་བྱའོ། །ཆོ་ག་གྲུབ་པའི་གནས་ལས་བཀྲུ་སྨན་བཏང་བའི་ལེའུ་གཉིས་པ་རྫོགས་སོ།། །།དེ་ནས་སྐྱུག་སྨན་
[281a.3]དང་བཀྲུ་སྨན་དང་དེ་གྲུབ་པར་བྱ་བའི་ཆོ་གའི་ལེའུ་བཤད་པར་བྱ་སྟེ། གལ་ཏེ་སྐྱུག་སྨན་དེ་ལྟོ་སྙི་བ་དང་། ཤིན་དུ་ལྟོགས་པ་དང་། བད་ཀན་ཆུང་བ་ལ་གཏང་ངམ། ཡང་ན་སྨན་ཤིན་ཏུ་རྣོ་བ་འམ། གྲང་ཆེས་པའམ། ཐུན་ཆུང་བ་འམ། ཟས་མ་ཞུ་བ་འམ། ཉམ་ཆུང་ཆེས་པ་ལ་བླུད་ན།
[281a.4]སློན་གྱེན་དུ་མི་འབྱུང་བར་ཐུར་དུ་འགྲོ་བར་འགྱུར་ཏེ། ཉེས་པ་ཕྱིར་སོགས་པར་འགྱུར་བས། དེ་བས་ན་དེ་ལ་ནི་ཡང་སྣུམ་ལ་སོགས་པ་གོང་མའི་རིམ་པ་བྱས་ནས་སྨན་ཡང་གཏོང་ངོ་། །བཀྲུ་སྨན་ཡང་ཟས་མ་ཞུ་བ་དང་། བད་ཀན་དང་ལྡན་པ་ལ་གཏང་ངམ། ཡང་ན་བཀྲུ་སྨན་དེ་ཉིད་ཤིན་ཏུ་རྣོ་བ་
[281a.5]དང་། དྲོ་ཆེས་པ་དང་། ལན་ཚྭ་མང་ཞིང་སྨན་ཐུན་ཆེས་པ་དང་། ཡི་གར་མི་འོང་བཞིན་དུ་བྱིན་ན་སླར་སྟོད་དུ་འབྱུང་བར་འགྱུར་ཏེ། དེ་ལ་ནི་གོང་དུ་བཤད་པའི་ཆོ་ག་བཞིན་དུ་བཀྲུ་སྨན་ཡང་བྱའོ། །བཀྲུ་སྨན་དེ་བཏང་ཡང་ལེགས་པར་མ་གྱུར་ཏེ། ཕོ་བ་ལ་བརྟེན་ཞིང་འཁྲུར་མི་བཏུབ་པ་ལ་ནི་
[281a.6]གོམས་ཤིང་ཡི་གར་འོང་བ་སྤངས་ལ། གང་གནོད་པ་མི་སྐྱེད་པའི་བཀྲུ་སྨན་གྱིས་བསྣན་ནོ། །སྐྱེས་བུ་གང་གི་ལུས་སྣུམ་ཆོས་དང་དུགས་ཀྱིས་ཞེན་པར་བྱས་པ་ལ་སྨན་རྙིང་པ་རྩུབ་པའི་བཀྲུ་སྨན་བཏང་བས་ནད་རང་གི་གནས་ནས་བསྐྱོད་ཅིང་འཁྲུ་མ་ནུས་པས་མགོ་འཁོར་བ་དང་། སྐྲང་བ་
[281a.7]དང་། སྐྱིགས་བུ་དང་། མུན་པར་མཐོང་བ་དང་། སྐོམ་དད་ཆེ་བ་དང་། བྱིན་པའི་ཉན་བ་དང་། ལུས་གཡའ་བ་དང་། མགོ་བོ་ཚ་བ་ཆེ་ཞིང་མདོག་འགྱུར་བ་ལ་སོགས་པའི་ནད་དེ་རྣམས་སྐྱེད་པར་བྱེད་དོ། །ནད་པ་དེ་སྣུམ་དང་དུགས་ཀྱིས་ལེགས་པར་བྱས་ཀྱང་མེ་དྲོད་ཆེ་བ་ལ་སྨན་རྙིང་པ་ཐུན་ཆུང་
[281b]
[281b.1]དུ་གཏང་བའམ། ཡང་ན་གྲང་བ་དང་། མ་ཞུ་བས་ཁོང་འཁྱིལ་ལ་གཏམས་ཤིང་དྲི་མ་འབྱུང་མི་ནུས་ཏེ། སྦྱོར་བ་ལ་སོགས་པས་གོང་གི་ནད་དེ་དག་འབྱུང་བར་འགྱུར་ཏེ། དེ་ལ་ནི་ཏིལ་མར་དང་། ལན་ཚྭས་ལུས་བསྐུ་བྱུག་བྱས་ལ་གདིང་བའི་དུགས་དང་ཤ་ཁ་ར་ཞེས་བྱ་བའི་དུགས་བྱ་སྟེ། དེའི་
[281b.2]འོག་ཏུ་ནི་རུ་ཧ་གཏོང་ཞིང་ཟས་སུ་སྲོག་ཆགས་ཐང་ལས་སྐྱེས་པའི་ཤ་ཁུ་སྦྱིན་ནོ། །དེའི་འོག་ཏུ་པོ་སོན་ཆ་དང་། པི་པི་ལིང་དང་། ཐང་ཤིང་དང་། ཏིལ་མར་སྦྱར་བའི་འཇམ་རྩི་གཏང་ངོ་། །དེ་ནས་རླུང་འཇོམས་པའི་སྨན་གྱིས་སྣུམ་ཆོས་བྱས་ལ། བཀྲུ་སྨན་རྣོན་པོ་གཏང་ངོ་། །ནད་གཞི་
[281b.3]སྟོབས་ཆེ་ཞིང་ཁོང་རྩུབ་ལ་མེ་དྲོད་ཆེ་བ་ལ་སྨན་ཐུན་ཉུང་ངུ་བཏང་བས་ནད་གློངས་ལ་ཁོང་དུ་འཁྱིལ་ཞིང་ནད་གཞིས་ལམ་བཀག་ནས་ལྟེ་བའི་ཕྱོགས་སུ་ཤས་ཆེར་སྦོ་ཞིང་། རྒྱབ་དང་། རྩིབ་ལོགས་དང་། མགོ་བོ་རྣམས་སུ་ཟུག་པ་དང་། དབུགས་མི་བདེ་བ་དང་། ཕྱི་ས་དང་། གཅིན་
[281b.4]དང་། རླུང་རྣམས་མི་བཟད་པར་འགག་པར་བྱེད་དེ། དེ་ལ་ནི་བསྐུ་བྱུག་དང་། དུགས་དང་། རེངས་བུ་མས་གཏོང་བ་དང་། བཀྲུ་སྨན་དྲག་པོ་དང་འཇམ་རྩི་མས་གཏོང་བ་རྣམས་བྱའོ། །ཡང་ན་གཞང་འབྲུམ་གྱི་སྐབས་སུ་བཤད་པའི་རྟུག་སྐམ་གསོ་བའི་ཆོ་ག་བྱས་ན་རབ་ཏུ་
[281b.5]བསྔགས་སོ། །རྩ་བ་ལྔ་པ་དང་། ནས་ཚིག་འཁུས་པའི་ཐལ་བ་དང་། ཤུ་དག་དང་། པུ་ཏི་ཀ་རཉྫ་དང་། ལྕེ་མྱང་ཚྭ་དང་། འདི་རྣམས་ནས་ཀྱི་ཐུག་པ་དང་ལེགས་པར་སྦྱར་བ་འཐུངས་ན་ཟུག་གཟེར་དང་། རྟུག་པ་འགགས་པ་དང་། ལྟོ་སྦོ་བ་རྣམས་འཇོམས་སོ། །པི་པི་ལིང་དང་།
[281b.6]སེའུ་འབྲུ་དང་། ཐལ་སྨན་དང་། ཤིང་ཀུན་དང་། བཅའ་སྒ་དང་། སྟར་བུ་དང་། ལྕེ་མྱང་ཚྭ་དང་འདི་རྣམས་ཆང་ངམ་མར་རམ་ཆུ་དྲོན་པོ་གང་ཡང་རུང་བ་དང་སྦྱར་བ་བཏང་ན། ཚད་པ་དང་བད་ཀན་དུ་འཁྲུ་བ་དང་། རྟག་ཏུ་འཛག་པ་དང་། ཟུག་ཅིང་ན་བ་དང་། མཁྲེགས་པ་རྣམས་ལ་ཕན་
[281b.7]ནོ། །སྨན་འཐུངས་ནས་དྲི་མ་ཅི་བདེར་མ་བཏང་སྟེ་འགགས་ན། ནད་གཞི་གསུམ་འཁྲུགས་ཏེ་སྙིང་གི་ཕྱོགས་སུ་ནད་ལོག་ནས་རོ་སྟོད་ཤིན་ཏུ་མི་བཟད་པར་འཛིངས་པར་འགྱུར་ཏེ། དེ་བཞིན་དུ་རྩིབ་ལོགས་སུ་ཟུག་པ་དང་། སྐྱིགས་བུ་དང་། ལུད་པ་དང་། ཉམ་ཆུང་བ་དང་། ཁ་ཆུ་འཛགས་
[282a]
[282a.1]པ་དང་། མིག་མི་བརྟན་པར་འགུལ་བ་དང་། ལྕེ་འཆའ་བ་དང་། དྲན་པ་ཉམས་པ་དང་། སོ་ཀྲིག་ཀྲིག་བདར་བར་འགྱུར་ཏེ། དེ་ལ་ནི་སྨན་པ་རྨོངས་པ་མེད་པར་བྱས་ཏེ། ནད་མཁྲིས་པ་ཡིན་པ་ལྟ་ན་ནི་སྨན་མངར་བ་དང་སྦྱར་བའི་སྐྱུག་སྨན་གཏང་ངོ་། །བད་ཀན་
[282a.2]ལྟར་སྣང་ན་ནི་སྨན་ཚ་བ་དང་ལྷན་ཅིག་སྐྱུག་སྨན་གཏང་ངོ་། །དེ་ནས་ཉེས་པའི་ལྷག་མ་ལུས་པ་ལྟ་ན་ནི། དྲོད་སྐྱེད་པའི་སྨན་བཏང་ལ་ནད་སྨིན་པར་བྱའོ། །དེའི་འོག་ཏུ་ནད་པ་དེའི་མེ་དྲོད་དང་ཉམས་སྟོབས་བསྐྱེད་པའི་ཕྱིར་སྨན་དང་བཏུང་བ་རྣམས་བྱའོ། །སྨན་གྱི་སྦྱོར་བ་དྲགས་ཏེ་ཤས་ཆེར་
[282a.3]སྐྱུགས་པ་ལ་ནི་རླུང་གིས་སྙིང་གཟིར་ཞིང་ན་བར་འགྱུར་རོ། །དེ་ལ་ནི་སྣུམ་པ་དང་། སྐྱུར་བ་དང་། ལན་ཚྭ་སྦྱིན་ནོ། །མཁྲིས་པ་དང་བད་ཀན་གྱིས་སྙིང་ན་བ་ལ་ནི་རང་རང་གི་སྨན་སྦྱར་བ་གཏང་ངོ་། །དེ་ལ་སྨན་འཐུངས་ནས་བད་ཀན་གྱིས་རླུང་བཀག་སྟེ་འབྱུང་དུ་མི་སྟེར་བ་འམ། ཡང་ནད་
[282a.4]ཚབས་ཆེར་འབྱུང་སྟེ་རླུང་འཁྲུགས་ནས་ཡན་ལག་འཁུམས་པ་དང་། རེངས་པ་དང་། འདར་བ་དང་། ཟུག་གཟེར་བྱེད་པ་དང་། ལུས་ཞིག་པ་དང་། ལུས་བརྡུང་བ་སྙམ་བྱེད་པ་དང་། ཟུག་པར་འགྱུར་ཏེ། དེ་ལ་ནི་རླུང་འཇོམས་པའི་སྨན་ཐམས་ཅད་དང་སྣུམ་ཆོས་དང་། དུགས་དང་
[282a.5]འཇམ་རྩི་མས་གཏོང་བ་དང་། བསྐུ་བྱུག་དང་། ཆུ་ལུམས་ལ་སོགས་པ་བྱས་ན་རབ་ཏུ་བསྔགས་སོ། །ལྟོ་སྙི་ཞིང་ཤིན་ཏུ་བཀྲེས་པ་ལས་བཀྲུ་སྨན་ཐུན་ཆེ་ཞིང་རྣོ་བ་བྱིན་ན། མྱུར་དུ་བད་ཀན་དང་མཁྲིས་པ་ཡང་འདྲེན་ཞིང་ལུས་ཟུངས་རྣམས་འབྱིན་ཞིང་ཟད་པར་བྱེད་དོ། །དེ་ལྟར་བཀྲུ་སྨན་
[282a.6]ཀྱི་སྦྱོར་བ་དྲགས་པ་དེ་ལ་ནི་སྨན་གྱི་ལྷག་མ་ཁོང་ན་འདུག་པ་དེ་སྐྱུག་སྨན་གྱིས་ཡང་དྲང་བར་བྱའོ། །སྐྱུག་སྨན་གྱི་སྦྱོར་བ་དྲགས་པས་མང་དུ་སྐྱུགས་པ་ལ་ནི་བཀྲུ་སྨན་འཇམ་པོ་གཏང་ངོ་། །གཞན་ཡང་སྦྱོར་བ་དྲགས་པ་དེ་ལ་ནི། ལུས་ལ་བླུགས་པ་གྲང་མོ་དང་། ཆུ་གྲང་གི་ནང་དུ་ལུས་གཞུག་
[282a.7]པ་དང་། བཟའ་བ་དང་བཏུང་བ་ལ་སོགས་པ་ཡང་ཤིན་ཏུ་གྲང་མོ་སྦྱར་ན་ཆད་པར་འགྱུར་རོ། །ཙན་དན་དཀར་པོ་དང་། སྟང་ཟིལ་དང་། པུ་ཙེ་ཤེལ་དང་། དེ་རྣམས་ཀྱི་ཕྱེ་མ་དང་། རའི་ཁྲག་དང་། ཤ་ཁ་རའི་ཆུའི་ནང་དུ་འབྲས་ཡོས་ཀྱི་ཕྱེ་མ་བཏབ་པའི་སྐྱོ་མ་འཐུངས་ན། འཁྲུ་བའི་
[282b]
[282b.1]སྦྱོར་བ་དྲགས་པ་གཅོད་ཅིང་ཕན་པའི་མཆོག་ཡིན་ནོ། །སློན་སྨན་གྱི་སྦྱོར་བ་དྲགས་པ་ལ་ནི་ཆུ་གྲང་མོས་བླུགས་པ་དང་། རྒུན་འབྲུ་ལ་སོགས་པའི་ཁུ་བ་མར་དང་སྦྲང་རྩི་དང་ཁ་ར་དང་ལྡན་པའི་སྐྱོ་མ་བླུད་དོ། །སྒྲེགས་པ་དང་བཅས་པའི་སློན་ཚབས་ཆེར་འབྱུང་བ་ལ་ནི་མུར་བ་དང་།
[282b.2]འུ་སུ་དང་། གླ་སྒང་དང་། མ་དུ་ཀ་དང་། སྟང་ཟིལ་རྣམས་ཀྱི་ཕྱེ་མ་སྦྲང་རྩི་དང་ལྡེ་གུར་སྦྱར་བ་སྦྱིན་ནོ། །སྐྱུགས་བཞིན་དུ་ལྕེ་ནང་དུ་འཁུམས་པ་ལ་ནི་སྣུམ་པ་དང་། སྐྱུར་བ་དང་། ལན་ཚྭ་དང་ལྡན་པ་ཡིད་དུ་འོང་བའི་སྨན་མཁུར་བར་བཅང་བ་དང་། དེ་བཞིན་དུ་ཡིད་དུ་འོང་བའི་མུངྒ་ལ་
[282b.3]སོགས་པའི་ཁུ་བཅུད་དང་ཤ་ཁུ་ཕན་ནོ། །ལྕེ་ནང་དུ་འཁུམས་པའི་ནད་པའི་དྲུང་དུ་སྐྱེས་བུ་གཞན་ཞིག་ཤིང་ཏོག་སྐྱུར་བ་ཟར་བཅུག་ན་ཕན་ནོ། །ལྕེ་ཕྱིར་ཕྱུང་སྟེ་སྡུད་མི་ནུས་པ་ལ་ནི་ཏིལ་དང་རྒུན་འབྲུམ་བཏགས་པའི་ལྡེ་གུས་བསྐུས་ཏེ་སླར་གཞུག་པར་བྱའོ། །སྐད་འགགས་ཤིང་རླུང་ནད་སྐྱེས་
[282b.4]པ་ལ་ནི་དུས་ཤེས་པའི་སྨན་པས་ནས་ཐུག་མར་དང་ཤ་ཁུ་ལས་གཞི་བླངས་པའི་ཐུག་པ་སླ་མོ་བྱིན་ཏེ། དེ་བཞིན་དུ་སྣུམ་ཆོས་དང་དུགས་སྦྱོར་བར་བྱའོ། །དེ་ལ་སྨན་གྱི་སྦྱོར་བ་ཐུན་ཆེས་ཏེ་དྲགས་པས་ཁྲག་འབྱུང་སྟེ། དེའི་མིང་ནི་སྲོག་སྟོང་པ་ཞེས་བྱ་བར་བཤད་དེ། འདི་ནི་སྲོག་དང་བཅས་
[282b.5]པར་འབྱུང་བ་ཡིན་ནོ། །དེ་ལྟར་འབྱུང་བའི་ཁྲག་དང་ཟས་སུ་བསྲེས་ཏེ་ཁྱི་འམ་བྱ་རོག་ལ་བྱིན་ལ་དེས་ཟོས་པར་གྱུར་ན་ནད་པ་འཚོ་བ་ཡིན་ལ། མ་ཟོས་ན་ནི་མཁྲིས་པ་སྲོག་ཅེས་བྱ་བ་འབྱུང་བ་ཡིན་པས་འཆི་བར་སྟོན་ཏོ། །ཡང་ན་རས་དཀར་པོ་ལ་ཁྲག་གིས་བསྒོས་ཏེ་བསྐམས་ལ་དེའི་འོག་ཏུ་
[282b.6]ཆུ་དྲོན་གྱིས་བཀྲུས་ན། མདོག་གྱུར་པ་ཙམ་ལས་མ་དག་པར་གྱུར་ན་སྲོག་ཅེས་བྱ་བ་མཁྲིས་པ་བྱུང་བ་ཡིན་པས་འཆི་བ་ཡིན་ལ། དག་ཅིང་རྗེས་མེད་པ་ཡིན་ན་ནི་ཁྲག་ཡིན་ཏེ་འཚོ་བར་བསྟན་ནོ། །སྦྱོར་བ་དྲགས་པ་ལས་སྐོམ་དད་ཆེ་བ་དང་། བརྒྱལ་བ་དང་། མ་ཞུ་བས་ཉམ་ཐག་པར་འགྱུར་ཏེ།
[282b.7]དེ་ལ་ནི་མི་འཆི་བར་བྱ་བའི་གསོ་བ་མྱུར་དུ་ཁྲག་དང་མཁྲིས་པའི་འཁྲུ་བ་གཅོད་པའི་སྨན་གྱིས་སྲོག་བསྲུང་བར་བྱའོ། །རི་དགས་དང་། བ་ལང་དང་། མ་ཧེ་དང་། ར་དང་འདི་རྣམས་གསོན་པའི་ཁྲག་ཕྱུང་མ་ཐག་བླུད་ན་སྲོག་སླར་རྙེད་དེ་བརྟན་པར་འཛིན་པར་འགྱུར་རོ། །དེ་བས་ན་ཁྲག་དེ་སྲོག་ཅེས་
[283a]
[283a.1]བྱ་བའི་མཁྲིས་པའི་གནས་སུ་སོང་སྟེ་བརྟས་པར་བྱེད་དོ། །རི་དགས་ལ་སོགས་པའི་ཁྲག་དེ་ཉིད་དཀྲུགས་ཏེ་ཁྲག་གིས་འཇམ་རྩི་མས་གཏོང་བར་ཡང་བྱའོ། །ཡང་ན་པི་པི་ལིང་དང་། ཏང་པལ་དང་། ཤིང་མངར་དང་། དཱུར་བ་དང་། པུ་ཙེ་ཤེལ་དང་། འདི་
[283a.2]རྣམས་འོ་མ་དང་ལྷན་ཅིག་བསྐོལ་བའི་ནང་དུ་མར་གྱི་ཉིང་ཁུ་དང་སྟང་ཟིལ་དང་བཅས་པ་གྲང་མོའི་འཇམ་རྩི་མས་གཏོང་བར་བྱའོ། །ཡང་ན་འཁྲུ་བ་གསོ་བའི་སྐབས་སུ་བཤད་པའི་པིད་ཙའི་འཇམ་རྩི་ཤིན་ཏུ་གྲང་བའམ། །ཡང་ན་མར་གྱི་ཉིང་ཁུའི་འཇམ་རྩི་མས་གཏོང་བར་བྱའོ། །གཞང་
[283a.3]ཕྱིར་བྱུང་བའི་ནད་ལ་ནི་དང་པོར་སྨན་བསྐོལ་བའི་ཁུ་བས་འཁྲུ་བ་བཅད་ལ་དེ་ནས་སླར་གཞུག་གོ། །དྲན་པ་ཉམས་པ་ལ་ནི་སྙན་ཚིག་གི་རིག་བྱེད་དང་། གླིང་བུ་དང་། གླུ་དབྱངས་ལ་སོགས་པ་སྙན་པའི་སྒྲ་ཐོས་པར་བྱས་ན་དྲན་པ་རྙེད་པར་འགྱུར་རོ། །སྐྱུག་སྨན་དང་བཀྲུ་སྨན་དེ་གྲུབ་
[283a.4]པར་བྱ་བའི་ཆོ་གའི་ལེའུ་གསུམ་པ་རྫོགས་སོ།། །།དེ་ནས་སྨན་མས་གཏོང་བའི་ཆོ་གའི་ལེའུ་བཤད་པར་བྱ་སྟེ། བ་ལ་དང་། སླེ་ཏྲེས་དང་། འབྲས་བུ་གསུམ་དང་། ར་སྣ་དང་། རྩ་བ་བཅུ་པ་དང་། འདི་རྣམས་སྲང་རེ་རེ་དང་། པོ་སོན་ཆའི་རྡོག་མ་བརྒྱད་དང་། རའི་ཤ་སྲང་ལྔ་
[283a.5]བཅུ་དང་། སྨན་དེ་རྣམས་ཀྱི་བཅུ་དྲུག་འགྱུར་གྱི་ཆུ་སྲང་ཉིས་བརྒྱ་ལྔ་བཅུ་རྩ་དྲུག་དང་བསྐོལ་ཏེ་བཙགས་ལ། ཚིགས་མ་བོར་ཏེ་བཞི་ཆ་སྲང་དྲུག་ཅུ་རྩ་བཞི་ལུས་པའི་ནང་དུ། ལ་ལ་ཕུད་དང་། པོ་སོན་ཆ་དང་། བིལ་བ་དང་། རུ་རྟ་དང་། ཤ་ཏ་པུཥྤ་དང་། ཤུ་དག་དང་། གླ་སྒང་
[283a.6]དང་། པི་པི་ལིང་དང་། འདི་རྣམས་ཀྱི་ཕྱེ་མ་དང་། བུ་རམ་དང་། སྦྲང་རྩི་དང་། མར་དང་། ཏིལ་དང་། ལན་ཚྭ་དང་ལྡན་པར་བྱ་སྟེ། དྲོ་འཇམ་ཙམ་ལས་ཆོ་ག་བཞིན་དུ་འཇམ་རྩི་མས་བཏང་ན་མཆོག་ཡིན་ཏེ། ནད་ཐམས་ཅད་འཇོམས་པར་བྱེད་དེ། ནད་མེད་པ་ལ་བཏང་ན་ཡང་ཚེ་རིང་
[283a.7]བ་དང་ལུས་བརྟ་བར་བྱེད་དོ། །ཕྱེ་མ་དང་བསྐོལ་བའི་ཚད་ནི་སྨན་བསྐོལ་བའི་ཁུ་བའི་བརྒྱད་ཆའི་ཕྱེ་མ་དང་། བུ་རམ་སྲང་གཅིག་དང་། མར་དང་། སྦྲང་རྩི་བཞི་ཆ་དང་། ལན་ཚྭ་ཅི་རན་ཙམ་བཏབ་སྟེ་བསྐོལ་ལ་གཏང་ངོ་། །འཇམ་རྩི་སྦྱར་བའི་ཚད་གཞན་དུ་མ་སྨོས་པ་རྣམས་
[283b]
[283b.1]ཀྱང་ཐབས་འདི་བཞིན་དུ་སྦྱར་བར་བྱའོ། །རྩ་བ་བཅུ་པ་དང་། ར་ཤ་ལྷན་ཅིག་ཆོ་ག་བཞིན་དུ་བསྐོལ་བའི་ནང་དུ་ཏིལ་མར་དང་། མར་དང་། ཞག་དང་། སྣུམ་པོ་གསུམ་བཏབ་སྟེ། མས་བཏང་ན་ནི་རུ་ཧའི་མཆོག་ཏུ་དྲང་སྲོང་རྣམས་ཀྱིས་བཤད་དེ། རླུང་ནད་ཐམས་ཅད་འཕྲོག་གོ །
[283b.2]བ་ལ་དང་། པ་ཏོ་ལ་དང་། རྩ་བ་ཆུང་ངུ་དང་། ཀྱི་ལྕེ་བ་དང་། ཨེ་རཎྜ་དང་། ནས་དང་། སྨན་དེ་རྣམས་ཚུལ་བཞིན་དུ་བསྐོལ་བའི་ཁུ་བ་སྲང་སུམ་ཅུ་རྩ་གཉིས་ཀྱི་ནང་དུ་རའི་ཤ་ཁུ་སྲང་སུམ་ཅུ་རྩ་གཉིས་བཅུག་ལ་ཡང་བསྐོལ་ཏེ་ཁུ་བ་སྲང་སུམ་ཅུ་རྩ་གཉིས་ལུས་པའི་ནང་དུ་པྲི་ཡང་ཀུ་དང་། པི་པི་ལིང་
[283b.3]དང་། གླ་སྒང་གསུམ་གྱི་ཕྱེ་མས་སྨན་ཁུའི་བརྒྱད་ཆ་དང་། ཏིལ་མར་དང་། མར་དང་། སྦྲང་རྩི་དང་། རྒྱམ་ཚྭ་རྣམས་ལྷན་ཅིག་བསྐོལ་ཏེ་འཇམ་རྩི་མས་བཏང་ན་དེ་མ་ཐག་མེ་དྲོད་དང་ཉམས་སྟོབས་དང་། ཤ་སྐྱེ་བར་བྱེད་ཅིང་མིག་གསལ་བར་འགྱུར་རོ། །ཨེ་རཎྜའི་རྩ་བ་སྲང་གསུམ་དང་། བ་ལ་ཤ་སྲང་གསུམ་དང་།
[283b.4]རྩ་བ་ལྔ་ཆུང་ངུ་དང་། ར་སྣ་དང་། བ་ལ་དང་། སླེ་ཏྲེས་དང་། ཨ་ཤྭ་གན་དྷ་དང་། བ་སྤྲུ་བ་དང་། དོང་གྲ་དང་། ཐང་ཤིང་དང་། དེ་རྣམས་སྲང་རེ་རེ་དང་། པོ་སོན་ཆ་རྡོག་མ་བརྒྱད་དང་། དེ་རྣམས་ཆུ་སྲང་ཉིས་བརྒྱ་ལྔ་བཅུ་རྩ་དྲུག་དང་བསྐོལ་ཏེ་བརྒྱད་ཆ་ལུས་པའི་ནང་དུ་ཤུ་དག་དང་། ཤུ་ཏི་དང་།
[283b.5]སྤ་མའི་འབྲས་བུ་དང་། པྲི་ཡང་ཀུ་དང་། ཤིང་མངར་དང་། པི་པི་ལིང་དང་། དུག་མོ་ཡུངས་ཀྱི་ས་བོན་དང་། གླ་སྒང་དང་། སྐྱེར་ཁཎྜ་དང་། འདི་རྣམས་ཞོ་གཉིས་གཉིས་ཞིབ་ཏུ་བཏགས་པ་དང་། ལན་ཚྭ་ཅི་རན་ཙམ་དང་། སྦྲང་རྩི་དང་། ཏིལ་མར་དང་། བ་གཅིན་དང་། འདི་རྣམས་
[283b.6]དང་སྦྱར་བའི་འཇམ་རྩི་མས་བཏང་ན་སྟོད་དུ་སྐྱུགས་པ་དང་། མེ་དྲོད་སྐྱེད་པ་དང་། བྱིན་པ་དང་། བརླ་དང་། རྐང་པ་དང་། མཇུག་དོ་དང་། རྒྱབ་དང་། ལྟོ་བ་དང་། སྙིང་དང་། ཕོ་མཚན་རྣམས་སུ་ཟུག་པ་དང་། ལུས་ལྕི་བ་དང་། རླུང་དང་བཤང་གཅི་འགགས་པ་དང་། སྐྲན་དང་། རྡེའུ་
[283b.7]ཆགས་པ་དང་། རླིག་རླུགས་དང་། ཕོ་བའི་ནད་དང་། གཞང་འབྲུམ་དང་། དེ་དང་དེ་ལ་སོགས་པ་བད་ཀན་དང་། རླུང་ལས་གྱུར་པའི་ནད་ཐམས་ཅད་ལས་རྒྱལ་བར་བྱེད་དོ། །ཤིང་མངར་དང་། སེང་ཕྲོམ་དང་། ཨ་རུ་ར་དང་། ཙན་དན་དང་། པདྨ་དང་། ཨུཏྤ་ལ་དང་། འདི་རྣམས་
[284a]
[284a.1]འོ་མའི་མཆོག་བའི་འོ་མ་དང་ཚུལ་བཞིན་བསྐོལ་ཏེ་བསྒྲངས་པའི་ནང་དུ་འཚོ་བྱེད་སྡེ་བཅུའི་ཕྱེ་མ་དང་། ཁ་ར་དང་། སྦྲང་རྩི་དང་། མར་དང་སྦྱར་བའི་འཇམ་རྩི་མས་གཏོང་ན་མཁྲིས་པ་ལས་གྱུར་པའི་ནད་ལ་ཕན་ནོ། །ར་སྣ་དང་། བ་ཤ་ཀ་དང་། བཙོད་དང་། བྱི་ཚེར་བ་དང་། བ་
[284a.2]ལ་དང་། །རྩྭའི་རྩ་བ་ལྔ་ཞེས་བྱ་བ་དུར་བྱིད་དང་། ཀུ་ཤ་དང་། བུ་རམ་ཤིང་དང་། འདམ་བུ་དང་། འབྲས་སཱ་ལུ་དང་། འདི་རྣམས་ཀྱི་རྩ་བ་དང་། རྩ་བ་ལྔ་ཆུང་ངུ་དང་། ཐལ་ཏྲེས་དང་། ཙན་དན་དང་། ཤུག་པ་རྣམ་གཉིས་དང་། ཤིང་མངར་དང་། སེང་ཕྲོམ་རྣམ་གཉིས་དང་། འདི་
[284a.3]རྣམས་སྲང་ཕྱེད་ཕྱེད་ཆུ་དང་ཚུལ་བཞིན་བསྐོལ་བའི་ཁུ་བ་དང་། འོ་མ་སྲང་དྲུག་ཅུ་རྩ་བཞི་དང་ཡང་བསྐོལ་ཏེ་འོ་མ་ཉི་ཚེ་ལུས་པ་དང་། དེའི་ནང་དུ་ཛི་བན་ཏི་དང་། མེ་ད་རྣམ་གཉིས་དང་། ཉེའུ་ཤིང་དང་། བི་ད་རི་དང་། ར་མཉེ་བ་རྣམ་གཉིས་དང་། རྒུན་འབྲུ་དང་། ཁ་ར་དཀར་པོ་དང་། ཛི་བ་ཀ་
[284a.4]དང་། པདྨ་གེ་སར་དང་། པྲ་པུཎྜ་རཱི་ཀ་དང་། ཨུཏྤ་ལ་དང་། པུཎྜ་རཱི་ཀ་དང་། སེང་ཕྲོམ་དང་། ཁ་སྲལ་ཕྲེའུ་དང་། ཤིང་མངར་དང་། ནཱ་ག་གེ་སར་དང་། མུན་ཛ་ཏ་ཀ་དང་། ཙནྡན་རྣམ་གཉིས་དང་། འདི་རྣམས་ཀྱི་ཕྱེ་མ་བཏགས་པ་དང་། མར་དང་སྦྲང་རྩི་དང་རྒྱམ་ཚྭ་དང་
[284a.5]ལྡན་པར་བྱ་སྟེ། བསྒྲངས་པའི་ནི་རུ་ཧ་མས་གཏང་ངོ་། །ནི་རུ་ཧ་བཏང་ནས་སླར་བྱུང་བ་ལྟ་ན་སྲོག་ཆགས་ཐང་ལ་གནས་པའི་ཤ་ཁུའམ། ཡང་ན་འོ་མ་དང་ལྷན་ཅིག་འབྲས་ཆན་བྱིན་ལ། དེའི་འོག་ཏུ་ལུས་ཁྲུས་བྱས་ན་ལུས་ཚ་བ་དང་། འཁྲུ་བའི་ནད་དང་། ཁྲག་དང་མཁྲིས་པ་
[284a.6]རྒྱས་པ་དང་། སྙིང་ནད་དང་། སྐྱ་རྦབ་ཀྱི་ནད་དང་། རིམས་མི་བཟད་པ་རྣམས་དང་། སྐྲན་དང་། གཅིན་འགགས་པ་དང་། མིག་སེར་ལ་སོགས་པ་མཁྲིས་པ་ལས་གྱུར་པའི་ནད་དོ་ཅོག་སེལ་ཏོ། །ཀོ་ཤ་ཏ་ཀི་དང་། དོང་ག་དང་། ཐང་ཤིང་དང་། མུར་བ་དང་། གཟེ་མ་
[284a.7]དང་། དུག་མོ་ཡུངས་དང་། ཨརྐ་དང་། པ་ཐ་དང་། རྒྱ་སྲན་དང་། བྲི་ཧ་ཏི་དང་། འདི་རྣམས་སྲང་ལྔ་དེ་དྲུག་འགྱུར་གྱི་ཆུ་སྲང་བརྒྱད་ཅུ་དང་བསྐོལ་ལ། བཞི་ཆ་སྲང་ཉི་ཤུ་ལུས་པ་དང་། དེའི་ནང་དུ་ཡུངས་ཀར་དང་། སུག་སྨེལ་དང་། པོ་སོན་ཆ་དང་། རུ་རྟ་དང་། འདི་རྣམས་ཀྱི་ཕྱེ་མ་
[284b]
[284b.1]ཞོ་གཉིས་གཉིས་དང་། སྦྲང་རྩི་དང་། པོ་སོན་ཆའི་མར་དང་། ཐལ་སྨན་དང་། ཡུངས་ཀར་གྱི་མར་དེ་རྣམས་སྲང་གཉིས་གཉིས་དང་ལྡན་པའི་ནི་རུ་ཧ་མས་གཏོང་ན་མེ་དྲོད་ཆུང་བ་དང་། ཟས་ཡི་གར་མི་འོང་བ་དང་། བད་ཀན་ལས་གྱུར་པའི་ནད་ཐམས་ཅད་འཇོམས་སོ། །དེ་ནས་ཤིན་ཏུ་
[284b.2]གཞོན་པ་འམ་སྐྱིད་དེ་བའི་མི་ལ་ནི་སྣུམ་ཞིང་འཇམ་པའི་སྨན་སྲང་གཉིས་གཉིས་ཙམ་གྱི་ཚད་ཙམ་གཏང་བར་བྱ་སྟེ། དེ་ཡང་འོ་མ་སྲང་བཞི་དང་། སྦྲང་རྩི་དང་། ཏིལ་མར་དང་། མར་སྲང་གཉིས་གཉིས་དང་། འདི་རྣམས་ཁ་གཟར་དང་། དཀྲུགས་ཏེ་འཇམ་རྩི་མས་གཏོང་ན་རླུང་ནད་འཇོམས་སོ།
[284b.3]སྟོབས་འཕེལ་ཞིང་མདོག་གསལ་བར་བྱེད་དོ། །ཏིལ་མར་དང་། ཆང་གི་དངས་མ་དང་། སྦྲང་རྩི་དང་། མར་དང་། དེ་དག་ཁྱོར་རེ་རེ་དང་། བིལ་བ་ལ་སོགས་པ་རྩ་བ་ཆེན་པོ་བསྐོལ་བའི་ཁུ་བ་སྲང་བཞི་དང་། འདི་རྣམས་མས་གཏོང་ན་རླུང་ནད་རྣམས་ལས་རྒྱལ་བར་བྱེད་དོ། །པ་ཏོ་ལ་དང་། ནིམ་པ་
[284b.4]དང་། བུ་ཏི་ཀ་དང་། ར་སྣ་དང་། ལོ་མ་བདུན་པ་དང་། འདི་རྣམས་སྲང་རེ་རེ་བསྐོལ་བའི་ཁུ་བ་སྲང་གཉིས་གཉིས་དང་། མར་སྲང་གཉིས་ཀྱི་ནང་དུ་ཡུངས་ཀར་གྱི་ཕྱེ་མ་བཏགས་པའི་ཁུ་བ་ལྔ་ཞེས་བྱ་བ་ཡིན་ཏེ། མས་གཏོང་ན་མིག་ནད་དང་། སྲིན་ནད་དང་། མཛེ་ནད་དང་། གཅིན་ནད་རྣམས་
[284b.5]འཇོམས་སོ། །ཏིལ་མར་དང་། བ་གཅིན་དང་། ཞོ་ག་ཆུ་དང་། རྩབས་སྐྱུར་པོ་དེ་རྣམས་སྲང་གཉིས་གཉིས་ཡུངས་ཀར་བཏགས་པའི་ཕྱེ་མ་དང་། སྦྲང་རྩི་དང་སྦྱར་བའི་འཇམ་རྩི་བྱས་ན་བུད་མེད་ལ་ཕོད་པར་འགྱུར་རོ། །དེ་ནས་དེའི་འོག་ཏུ་སྦྱོར་བ་མས་གཏོང་ན་རྟུག་པ་འགགས་པ་དང་།
[284b.6]ལྟོ་སྦོ་བ་འཇིག་པར་བྱེད་དོ། །པ་ཡ་སྱ་དང་། བུ་རམ་ཤིང་དང་། ས་ལ་པརྞི་དང་། ར་སྣ་དང་འདི་རྣམས་གང་ཡང་རུང་བ་བསྐོལ་བའི་ནང་དུ་པི་པི་ལིང་བཏགས་པའི་ཕྱེ་མ་དང་། སྦྲང་རྩི་དང་མར་དང་བསྲེས་པའི་འཇམ་རྩི་བྱས་ན་བུད་མེད་ལ་ཕོད་པར་འགྱུར་རོ། །དེ་ནས་དེའི་འོག་ཏུ་ཀུན་ལ་འབྲས་བུ་
[284b.7]མངོན་དུ་གྲུབ་ཅིང་གནོད་པ་མེད་ལ་སྟོབས་དང་ལུས་འཕེལ་ཤིང་རྒྱས་པ་དང་། བདེ་བར་བྱེད་པའི་འཇམ་རྩི་དུས་ཐམས་ཅད་དུ་སྦྱར་བར་བྱ་བ་བཤད་པར་བྱ་སྟེ། དེ་ཡང་སྦྲང་རྩི་དང་། ཏིལ་མར་ཆ་མཉམ་པ་དང་། རྒྱམ་ཚྭ་ཞོ་གཉིས་དང་། ཤུ་ཏི་ཞོ་བཞི་དང་། འདི་རྣམས་བཏགས་པའི་ཕྱེ་མ་ཨེ་
[285a]
[285a.1]རཎྜའི་རྩ་བ་བསྐོལ་བའི་ཁུ་བའི་ནང་དུ་སྦྱར་བ་ནི། སྦྲང་རྩི་དང་ཏིལ་མར་ཆ་མཉམ་པ་ཞེས་བྱ་བ་ཡིན་ཏེ། དེ་ལ་ནི་རུ་ཧ་མས་གཏོང་ན་བཅུད་ཀྱིས་ལེན་དུ་འགྱུར་ཏེ། གཅིན་ནད་དང་། གཞང་འབྲུམ་དང་། སྲིན་བུའི་ནད་དང་། སྐྲན་དང་། རྒྱུ་ཆེར་སྐྱེས་པའི་ནད་རྣམས་སེལ་ཏོ། །
[285a.2]སྦྱོར་བ་གོང་མའི་ནང་དུ་ཤིང་མངར་གྱི་ཕྱེ་མས་བསྲེས་ན་མིག་ལ་ཕན་ཏེ་ཁྲག་དང་མཁྲིས་པ་ལ་ཡང་ཕན་ནོ། །གླ་སྒང་བཏགས་པའི་ཕྱེ་མ་སྦྲང་རྩི་དང་ཏིལ་མར་དང་། ཤ་ཁུ་དང་མར་དང་སྦྱར་བ་ནི་ཡ་བ་ན་ཞེས་བྱ་སྟེ། དེས་འཇམ་རྩི་བྱས་ན་གཞང་འབྲུམ་དང་། བརླ་དང་། རླིག་པ་དང་། ཕོ་མཚན་
[285a.3]རྣམས་སུ་ཟུག་པ་ལས་རྒྱལ་བར་བྱེད་དོ། །ཡང་ན་སྦྲང་རྩི་དང་། མར་དང་། ཞག་དང་། ཏིལ་མར་སྲང་གཉིས་གཉིས་ཀྱི་ནང་དུ་རྒྱམ་ཚྭ་ཞོ་གཅིག་དང་། སྤ་མའི་འབྲས་བུ་སྲང་ཕྱེད་ཀྱི་ཕྱེ་མ་དང་སྦྱར་བ་ནི་དེ་ཡང་ཡ་བ་ས་ཞེས་བྱ་སྟེ། འཇམ་རྩི་མས་གཏོང་ན་ཕན་ཡོན་གོང་མ་དང་འདྲའོ། །ཡང་
[285a.4]ན་ཨེ་རཎྜའི་རྩ་བ་བསྐོལ་བའི་ཁུ་བའི་ནང་དུ་ཤུ་དག་དང་། པི་པི་ལིང་དང་། པོ་སོན་ཆ་གསུམ་པའི་ཕྱེ་མ་དང་། སྦྲང་རྩི་དང་། ཏིལ་མར་དང་། རྒྱམ་ཚྭ་ཅི་རན་ཙམ་བཏབ་པ་ནི་ཡུག་ཏི་ར་ཋ་ཞེས་བྱ་སྟེ། དེའི་འཇམ་རྩི་མས་གཏོང་བར་བྱའོ། །ཡང་ན་ཨེ་རཎྜའི་རྩ་བ་བསྐོལ་བའི་ནང་དུ་ཤུ་
[285a.5]དག་དང་། ཤུ་ཏི་དང་། ཤིང་ཀུན་དང་། རྒྱམ་ཚྭ་དང་། ཐང་ཤིང་དང་། ར་སྣ་དང་། དེ་རྣམས་བཏགས་པའི་ཕྱེ་མ་སྦྲང་རྩི་དང་སྦྱར་བ་ནི་ཉེས་པ་འཕྲོག་པ་ཞེས་བྱ་བའི་འཇམ་རྩི་ཡིན་ཏེ། འཇམ་རྩི་མས་གཏོང་ན་དགེ་བར་འགྱུར་རོ། །ཡང་ན་རྩ་བ་ལྔ་བསྐོལ་བའི་ཁུ་བའི་ནང་དུ་པི་པི་
[285a.6]ལིང་དང་། རྒྱམ་ཚྭ་དང་། ཤིང་མངར་དང་། དེ་རྣམས་བཏགས་པའི་ཕྱེ་མ་དང་། སྦྲང་རྩི་དང་ཏིལ་མར་བཏབ་པ་ནི་གྲུབ་པའི་འཇམ་རྩི་ཞེས་བྱ་བ་ཡིན་པར་ཤེས་པར་བྱའོ། །ཡང་ན་རྩ་བ་བཅུ་པ་དང་། འབྲས་བུ་གསུམ་དང་། པོ་སོན་ཆ་དང་། བིལ་བ་དང་། དེ་རྣམས་བ་
[285a.7]གཅིན་དང་ཚུལ་བཞིན་བསྐོལ་བའི་ནང་དུ་པ་ཐ་དང་། དུག་མོ་ཡུངས་དང་། གླ་སྒང་དང་། པོ་སོན་ཆ་དང་། ལན་ཚྭ་དང་དེ་རྣམས་ཀྱི་ཕྱེ་མ་སྦྲང་རྩི་དང་། ཏིལ་མར་དང་། མར་དང་ཐལ་སྨན་བཏབ་པ་ནི་ཡུག་ཏི་ར་ཐ་ཞེས་བྱ་སྟེ་དེ་ལས་རན་པར་མས་གཏོང་ན། བད་ཀན་གྱི་ནད་དང་། སྐྱ་རྦབ་དང་།
[285b]
[285b.1]གསུད་པ་དང་། ཁུ་ཆུ་དང་། རླུང་འགགས་པ་དང་། ཁོང་འཁྲུགས་པ་རྣམས་ལ་རབ་ཏུ་བསྔགས་སོ། །གླ་སྒང་དང་། པ་ཐ་དང་། སླེ་ཏྲེས་དང་། ཨེ་རཎྜ་དང་། བ་ལ་དང་། ར་སྣ་དང་། བ་སྤྲུ་བ་དང་། བཙོད་དང་། དོང་ག་དང་། པུ་ཙེ་ཤེལ་དང་། ཀྱི་ལྕེ་བ་དང་། བ་རུ་ར་དང་། རྩ་བ་ལྔ་པ་
[285b.2]ཆུང་ངུ་དང་། དེ་རྣམས་སྲང་རེ་རེ་དང་། དེ་རྣམས་ཆུ་སྲང་བརྒྱ་ཉི་ཤུ་རྩ་བརྒྱད་དང་ཚུལ་བཞིན་བསྐོལ་ཏེ་བཞི་ཆ་ལུས་པ་དང་བཙགས་ཏེ་ཚིགས་མ་བོར་བའི་དངས་མ་འོ་མ་སྲང་དྲུག་ཅུ་རྩ་བཞི་དང་ཡང་བསྐོལ་ཏེ། འོ་མ་ལུས་པ་དང་། འོ་མའི་བཞི་ཆའི་སྲོག་ཆགས་ཐང་ལ་གནས་པའི་ཤ་ཁུ་
[285b.3]དང་མར་དང་། སྦྲང་རྩི་དང་། རྒྱམ་ཚྭ་དང་། ཤིང་མངར་དང་། ཤུ་ཏི་དང་། པི་པི་ལིང་དང་། དུག་མོ་ཡུངས་དང་། སྐྱེར་ཁཎྜ་དང་། འདི་རྣམས་བཏགས་པའི་ཕྱེ་མ་བཏབ་སྟེ་བསྲེས་པའི་འཇམ་རྩི་དྲོ་འཇམ་ཙམ་མས་གཏོང་ན། ལུས་ཀྱི་ཤ་དང་མེ་དྲོད་དང་། སྟོབས་དང་། ཁུ་ཆུ་རྣམས་
[285b.4]འཕེལ་ཞིང་དྲེག་ནད་དང་། རྨོངས་བག་ཏུ་འདུག་པ་དང་། གཅིན་ནད་དང་། གཞང་འབྲུམ་དང་། སྐྲན་དང་། བཤང་ཅི་འགགས་པ་དང་། རིམས་མི་བཟད་པ་དང་། ཤུ་བ་མཆེད་པ་དང་། རྒྱུ་རླུགས་དང་། བད་ཀན་ཚད་པར་འཁྲུ་བ་རྣམས་འཇོམས་ཏེ། དེ་བཞིན་དུ་བརླ་ཕྲག་དང་། བརླ་
[285b.5]དང་། རྐེད་པ་དང་། དཀུ་དང་། གཉའ་རེངས་དང་། རྣ་བ་དང་། མགོ་བོ་རྣམས་སུ་ན་ཞིང་ཟུག་པ་དང་། ཟླ་མཚན་གྱི་ནད་དང་། སྨྱོ་བྱེད་དང་། སྐྲང་པ་དང་། ལུད་པ་དང་། རྡེའུ་ཆགས་པ་དང་། རླུང་འཁྱིལ་བ་རྣམས་སེལ་ཏོ། །གཞན་ཡང་མིག་ལ་ཕན་ཞིང་བུ་སྐྱེ་བར་བྱེད་དེ། ཡ་བ་
[285b.6]ན་ཞེས་བྱ་བའི་འཇམ་རྩིའི་མཆོག་ཡིན་ཏེ། བཅུད་ཀྱིས་ལེན་དུ་འགྱུར་རོ། །རི་དགས་གདོང་ཆུང་བ་རི་བོང་དང་། ཕག་ལ་སོགས་པའི་ཤ་རྩ་བ་བཅུ་པ་དང་ལྷན་ཅིག་བསྐོལ་བའི་ཁུ་བའི་ནང་དུ་སྤ་མའི་འབྲས་བུ་དང་། ཤུ་ཏི་དང་། གླ་སྒང་བཏགས་པའི་ཕྱེ་མ་དང་། སྣུམ་ཆེན་པོ་བཞི་དང་
[285b.7]ལྡན་པའི་ནི་རུ་ཧ་མས་གཏོང་ན། རླུང་འཕྲོག་པའི་མཆོག་ཡིན་ཏེ། ཤིན་ཏུ་བུད་མེད་ལ་ཉལ་ཕོད་པར་འགྱུར་རོ། །རྨ་བྱའི་གཤོག་པ་དང་། མཁྲིས་པ་དང་། རྒྱུ་མ་དང་། རྐང་པ་དང་། མཆུ་དང་། རྟུག་པ་རྣམས་བོར་བའི་ཤ་འབའ་ཞིག་དང་། རྩ་བ་ཆུང་ངུ་ལྔ་སྲང་རེ་རེ་དང་། སྨན་གྱི་
[286a]
[286a.1]བརྒྱད་འགྱུར་གྱི་ཆུ་དང་འོ་མ་ལྷན་ཅིག་བསྐོལ་ཏེ་འོ་མ་ལུས་པའི་ནང་དུ། བི་ད་རི་དང་། པི་པི་ལིང་དང་། ཤིང་མངར་དང་། ཤུ་ཏི་དང་། པོ་སོན་ཆ་བཏགས་པའི་ཕྱེ་མ་དང་། མར་དང་། སྦྲང་རྩི་དང་། ལན་ཚྭ་ཅུང་ཟད་བཏབ་སྟེ། དེ་ལས་འཇམ་རྩི་མས་གཏོང་ན་ལུས་ཀྱི་སྟོབས་
[286a.2]དང་ཁུ་ཆུ་འཕེལ་བར་བྱེད་པའི་མཆོག་ཡིན་ཏེ། རྨ་བྱའི་ཆོ་ག་ཇི་ལྟ་བ་བཞིན་དུ་སྲེག་པ་ལ་སོགས་པ་ཁྲོན་རྐོ་བས་ཁ་ཟས་ཚོལ་བ་ཐམས་ཅད་དང་། བྱེའུ་ལ་སོགས་པ་མཆུས་ཟས་ཐུ་བ་ཐམས་ཅད་དང་། སེང་གེ་ལ་སོགས་པ་མཐུ་རྩལ་གྱིས་ཟས་ཚོལ་བ་ཐམས་ཅད་ཀྱི་ཤ་རེ་རེ་ལ་ཡང་ཆོ་ག་དེ་
[286a.3]ལྟར་བྱ་སྟེ། དེ་བཞིན་དུ་ཆུ་ལ་གནས་པ་ངང་པ་དང་། རོ་ཧི་ཏ་ལ་སོགས་པའི་ཤ་རྣམས་རྨ་བྱའི་ཆོ་ག་ལྟར་བྱ་སྟེ། ཉ་ཤ་ལ་ནི་འོ་མ་སྤང་ངོ་། །སྲོག་ཆགས་གོ་ད་དང་། སྲེ་མོ་དང་། བྱི་ལ་དང་། ཤ་ལྱ་ཀ་དང་། བྱི་བ་དང་། དེ་རྣམས་ཀྱི་ཤ་སྲང་བཅུ་བཅུ་དང་། རྩ་བ་ལྔ་པ་དེ་དང་མཉམ་པ་
[286a.4]དང་། སྨན་གྱི་བརྒྱད་འགྱུར་གྱི་འོ་མ་དང་ཚུལ་བཞིན་བསྐོལ་ལ་འོ་མ་ལུས་པའི་ནང་དུ། པོ་སོན་ཆ་དང་། པི་པི་ལིང་དང་། ལན་ཚྭ་རྣམ་གཉིས་ཀྱི་ཕྱེ་མ་དང་། ཁ་ར་དང་། ཏིལ་མར་དང་། སྦྲང་རྩི་དང་། མར་དང་ལྡན་པའི་འཇམ་རྩི་སྦྱར་ཏེ་བཏང་ན་བཅུད་ཀྱིས་ལེན་དུ་འགྱུར་ཏེ།
[286a.5]ལུས་ཀྱི་རྩོལ་བས་གློ་འགྲམས་པ་དང་། དབང་པོ་རྣམས་མི་གསལ་བ་དང་། སྟོབས་དང་གཟི་མདངས་ཉམས་པ་དང་། ཁུ་ཆུ་དང་བཤང་གཅི་འགགས་པ་དང་དྲེག་ནད་ལ་ཕན་ཞིང་དེ་བཞིན་དུ་རྟ་དང་གླང་པོ་ཆེ་དང་། ཤིང་རྟ་ལ་སོགས་པ་ལས་ལྷུང་ཞིང་རྐང་ལག་ཆག་ཅིང་གྲུགས་
[286a.6]པ་རྣམས་ལ་འཇམ་རྩི་བཏང་ན་སླར་འཚོ་བར་འགྱུར་ཏེ། རོ་ཙ་བར་བྱེད་པའི་ཡུལ་ཡིན་ནོ། །བཟའ་བ་ནི་ཁ་སྲལ་དང་། བྱི་ཚེར་བ་ལས་གཞི་བླངས་པའི་འོ་ཐུག་སྦྱིན་ནོ། །ཨེ་རཎྜ་ལ་སོགས་པའི་འཇམ་རྩི་མས་གཏོང་བའི་སྦྱོར་བ་དེ་དག་ནི་ཆོ་ག་བསྲུང་མི་དགོས་པར་གྲུབ་པའི་སྨན་དུ་བཤད་པ་ཡིན་
[286a.7]ནོ། །ད་ནི་རླུང་ནད་འཇོམས་ཤིང་བསྲུང་བ་དང་བཅས་པའི་འཇམ་རྩི་མས་གཏོང་བ་བརྗོད་པར་བྱ་སྟེ། དེ་ཡང་རྩ་བ་བཅུ་པ་དང་། བ་ལ་དང་། ར་སྣ་དང་། ཨ་ཤྭ་གན་དྷ་དང་། བ་སྤྲུ་བ་དང་། སླེ་ཏྲེས་དང་། ཨེ་རཎྜ་དང་། ཏིག་ཏ་དང་། ག་བྲའི་རྩ་བ་དང་། བ་ཤ་ཀ་དང་། བྷུ་ཏི་ཀ་དང་། ཉེའུ་ཤིང་དང་།
[286b]
[286b.1]ས་ཧ་ཙ་ར་དང་། ཀ་ཀ་ན་སེ་དང་། དེ་རྣམས་སྲང་རེ་རེ་དང་། ནས་དང་། མོན་སྲན་གྲེའུ་དང་། ཟར་མ་དང་། རྒྱ་ཤུག་དང་རྒྱ་སྲན་དང་། འདི་རྣམས་སྲང་གཉིས་གཉིས་ཆུ་སྲང་ཉིས་སྟོང་བཞི་བཅུ་རྩ་བརྒྱད་དང་ཚུལ་བཞིན་བསྐོལ་ཏེ། བཞི་ཆ་ཁུ་བ་སྲང་ལྔ་བརྒྱ་རྩ་བཅུ་གཉིས་ལུས་པའི་ནང་དུ་ཨ་རུ་ར་
[286b.2]དང་། འཚོ་བྱེད་སྡེ་བཅུ་རེ་རེའི་ཕྱེ་མ་དང་། ཏིལ་མར་སྲང་བརྒྱ་ཉི་ཤུ་རྩ་བརྒྱད་དང་ལྷན་ཅིག་བསྐོལ་ཏེ། འཇམ་རྩི་མས་གཏོང་ན་རླུང་ནད་ཐམས་ཅད་སེལ་བར་བྱེད་དོ། །ཡང་ན་ཐང་ལ་གནས་པའི་སྲོག་ཆགས་ཀྱི་ཞག་འཚོ་བྱེད་སྡེ་བཅུ་དང་། གོང་མ་བཞིན་བྱས་པའི་འཇམ་རྩི་བཏང་ན་རླུང་ནད་ཐམས་
[286b.3]ཅད་སེལ་ཏོ། །ཡང་ན་ཤུ་ཏི་དང་། ནས་དང་། བིལ་བ་དང་། རང་སྐྱུར་དང་། ཏིལ་མར་དེ་རྣམས་ཚུལ་བཞིན་བསྐོལ་བའི་ཏིལ་མར་ནི་རླུང་ནད་ཅན་ལ་སྦྱར་རོ། །ཡང་ན་རྒྱམ་ཚ་མེའི་ནང་དུ་བསྲེགས་ཏེ་དམར་པོར་གྱུར་པ་དང་། མར་གྱི་ནང་དུ་སྨྱུགས་ཏེ། དེ་བཞིན་དུ་ཡང་དང་ཡང་བྱས་པའི་
[286b.4]མར་གྱི་འཇམ་རྩི་མས་གཏོང་ན་རླུང་ནད་ལས་རྒྱལ་བར་བྱེད་དོ། །ཛི་བན་ཏི་དང་། པོ་སོན་ཆ་དང་། མེ་ད་རྣམ་གཉིས་དང་། སྲ་བ་ནི་དང་། ཤིང་མངར་དང་། བ་ལ་དང་། ཤུ་ཏི་དང་། ཟངས་རྩི་བ་དང་། པི་པི་ལིང་དང་། ཀ་ཀ་ན་སི་དང་། ཉེའུ་ཤིང་དང་། ཁ་སྲལ་བ་དང་། ར་མཉེ་བ་འོ་མ་ཅན་
[286b.5]དང་། ཀ་ར་ཀ་ཏ་ཤྲིང་གི་དང་། ཟུར་པ་དང་། ཤུ་དག་དང་། འདི་རྣམས་བཏགས་པའི་ཕྱེ་མ་དང་མར་དང་། ཏིལ་མར་དང་། དེའི་བཞི་འགྱུར་གྱི་འོ་མ་དང་སྦྱར་ཏེ་འཇམ་རྩི་མས་གཏོང་ན། ཉམས་བརྟ་བ་དང་། རླུང་དང་མཁྲིས་པ་འཇོམས་ཤིང་ཉམས་སྟོབས་དང་མེ་དྲོད་དང་ཁུ་ཆུ་འཕེལ་བར་
[286b.6]བྱེད་དེ། ཁྲག་དང་ཁུ་བའི་ནད་འཕྲོག་ཅིང་བུ་སྐྱེད་པར་བྱེད་དོ། །ཡང་ན་རྒྱམ་ཚ་དང་། པོ་སོན་ཆ་དང་། རུ་རྟ་དང་། ཤུ་ཏི་དང་། ལྕང་མ་དང་། ཤུ་དག་དང་། བ་ལ་ཀ་དང་། ཤིང་མངར་དང་། ག་བྲའི་རྩ་བ་དང་། ཐང་ཤིང་དང་། ཀད་པ་ལ་དང་། དོང་གྲ་དང་། མ་ནུ་དང་། མེད་
[286b.7]དང་། དབྱི་མོ་དང་། ཙི་ཏྲ་ཀ་དང་། ཟུར་པ་དང་། བྱི་དང་ག་དང་། བོང་ང་དཀར་པོ་དང་། ཏྲི་བི་ཙ་དང་། ཧ་རེ་ཎུ་ཀ་དང་། ནི་ལི་ནི་དང་། ཐི་ར་དང་། བིལ་བ་དང་། ཏི་མུ་ས་དང་། པི་པི་ལིང་དང་། དན་ཏི་དང་། ར་སྣ་དང་། འདི་རྣམས་ཆ་མཉམ་སྟེ་ཨེ་རཎྜའི་མར་རམ། ཏིལ་མར་དང་།
[287a]
[287a.1]བསྐོལ་བ་ལས་འཇམ་རྩི་བྱས་ན། བད་ཀན་ལས་གྱུར་བའི་ནད་ཐམས་ཅད་འཇོམས་ཏེ། དེ་བཞིན་དུ་རླིག་རླུགས་དང་། ཕྱི་ས་འཁྱིལ་བ་དང་། སྐྲན་དང་། གཞང་འབྲུམ་དང་། མཆེར་པ་ན་བ་དང་། གཅིན་ནད་དང་། བརླ་རེངས་པའི་ནད་དང་། ལྟོ་སྦོ་བ་དང་། རྡེའུ་
[287a.2]ཆགས་པ་རྣམས་མྱུར་དུ་སེལ་བར་བྱེད་དོ། །ཡང་ན་བིལ་བ་ལ་སོགས་པའི་རྩ་བ་ལྔ་ཏིལ་མར་དང་བསྐོལ་བའི་འཇམ་རྩི་མས་གཏོང་ན། རླུང་ནད་དང་བད་ཀན་གྱི་ནད་འཇོམས་སོ། །ཡང་ན་བད་ཀན་ལ་ཕན་པའི་སྨན་ཚ་བ་ལྔ་ལ་སོགས་པ་དང་ཏིལ་མར་ལྷན་ཅིག་བསྐོལ་ཏེ་འཇམ་རྩི་བྱས་ན་
[287a.3]ཡང་ཕན་ནོ། །ཡང་ན་ཏིལ་མར་དང་དེའི་བརྒྱད་འགྱུར་གྱི་རང་སྐྱུར་དང་ལྷན་ཅིག་བསྐོལ་བའི་ནང་དུ། པོ་སོན་ཆའི་ཕྱེ་མས་བཏབ་པའི་འཇམ་རྩི་བད་ཀན་ཅན་ལ་གཏོང་ངོ་། །རྨོངས་བག་ཏུ་གྱུར་པ་ལ་ནི་མས་གཏོང་བ་རྣོ་བ་འཇམ་པོ་འདོད་དེ། དེ་རྣོ་བ་བཏབ་པའི་རྗེས་ལ་ནི། འཇམ་པའི་སྨན་
[287a.4]བཏང་སྟེ། དེ་ཡང་འཇམ་པ་ནི། སྣུམ་པ་དང་མངར་བ་དང་། བསིལ་བ་རྣམས་སོ། །འཇམ་པའི་རྗེས་ལ་ནི་རྣོན་པོ་བཏང་སྟེ། དེ་ལ་རྣོ་བའི་སྨན་ནི་བ་གཅིན་དང་། བི་ལུ་དང་། ཀྲུ་ཏྲུག་ཏྲེས་དང་། ལན་ཚྭ་དང་། ཐལ་སྨན་དང་། ཡུངས་ཀར་རྣམས་སོ། །དེ་ཡང་དུས་དང་གནས་སྐབས་
[287a.5]ཤེས་པར་བྱས་ནས་འོ་མ་དང་མར་ལ་སོགས་པ་ནི་འཇམ་པ་ལ་སྦྱར་རོ། །ཐོག་མར་སྨན་པ་བློ་དང་ལྡན་པས་ནད་པའི་ཉམས་སྟོབས་དང་དུས་ཀྱི་བྱེ་བྲག་དང་། ནད་གཞི་དང་། རང་བཞིན་གྱི་བྱེ་བྲག་ཤེས་པར་བྱས་ནས་ནད་གཞི་སོ་སོ་དང་མཐུན་པའི་སྨན་གྱི་སྡེ་ཚན་གང་ཡིན་པ་དང་སྦྱར་བའི་
[287a.6]འཇམ་རྩི་མས་གཏོང་བར་བྱའོ། །ནད་པ་ཚ་བས་ཉམ་ཐག་པ་ལ་ནི་བསིལ་བའི་འཇམ་རྩི་གཏང་ཞིང་ཉམས་བརྟ་བའི་ཁ་ཟས་ལ་སོགས་པ་ཡང་བསིལ་བག་སྦྱར་རོ། །གྲང་བས་ཉམ་ཐག་པ་ལ་ནི་སྨན་དང་ལྡན་པའི་འཇམ་རྩི་ཁ་ཟས་ལ་སོགས་པ་དྲོད་བག་སྦྱར་རོ། །སྐྱེས་བུ་གང་གི་མཛེ་ནད་
[287a.7]དང་། ཚིལ་རྒྱས་པའི་ནད་དང་། གཅིན་ནད་རྣམས་ལ་ནི་བཀྲུ་སྨན་སྦྱར་བར་རིགས་ཀྱི་ཉམས་བརྟ་བའི་འཇམ་རྩི་མི་བྱའོ། །ལུས་ཟད་པ་དང་། གློ་འགྲམས་པ་དང་། ཉམ་ཆུང་བ་དང་། བརྒྱལ་བ་དང་། ལུས་རྗུད་པ་དང་། ལུས་སྐེམ་པ་དང་། སློན་ཁྲུས་ཀྱིས་ལུས་དག་ཟིན་པ་རྣམས་
[287b]
[287b.1]ལ་ནི། སྐྱུག་སྨན་དང་། བཀྲུ་སྨན་མི་བྱའོ། །དེ་བཞིན་དུ་གང་གི་སྲོག་ཟུངས་ཕྱི་ས་བརྟན་པར་འཛིན་པ་ལ་ཡང་བཀྲུ་སྨན་མི་བཏང་ངོ་། །ཆོ་ག་གྲུབ་པའི་གནས་ལས་སྨན་མས་གཏོང་བའི་ཆོ་གའི་ལེའུ་སྟེ་བཞི་པ་རྫོགས་སོ།། །།དེ་ནས་སྨན་མས་གཏོང་བའི་ཆོ་གས་ནད་ཕྱིན་ཏེ་སོས་
[287b.2]པར་བྱ་བའི་ཆོ་གའི་ལེའུ་བཤད་པར་བྱ་སྟེ། དེ་ལ་ནད་པ་སྣུམ་དང་དུགས་མ་བྱས་པ་དང་ལྟོ་ཤིན་ཏུ་ལྕི་བ་ལམས་གཏོང་བའི་སྨན་གྲང་མོ་དང་། སྣུམ་དང་། ལན་ཚྭ་ཉུང་བ་དང་། སྨན་ཐུན་ཚད་ཆུང་བ་དང་། ཡང་ན་བསྐ་བ་མས་གཏོང་ན་སྨན་གྱི་སྟོབས་ཆུང་བས་ནད་གཞི་འཁྲུགས་ནས་མི་
[287b.3]འབྱུང་སྟེ་སྦྱོར་བ་ལོག་པ་དེས་ནི་རླུང་དང་ཕྱི་ས་དང་གཅིན་འགགས་ཤིང་ཆུ་སོ་དང་ལྟེ་བ་རྣམས་སུ་ན་བ་དང་། ལུས་ཚ་ཞིང་དང་ཀ་མེར་མེར་པོར་བྱེད་པ་དང་། གཞང་སྐྲང་བ་དང་། གཡའ་བ་དང་། འབྲས་བྱུང་བ་དང་། མདོག་འགྱུར་བ་དང་། གནས་ལ་མི་དགའ་བ་དང་། མེ་དྲོད་ཆུང་བར་
[287b.4]འགྱུར་ཏེ། དེ་ལ་ནི་འཁྲུ་བ་གསོ་བའི་ལེའུ་ལས་འབྱུང་བའི་སྨན་བུ་ཏི་ཀ་དང་། པི་པི་ལིང་དང་། བཅའ་སྒ་དང་། ཤུ་དག་དང་། འུ་སུ་དང་། ཨ་རུ་ར་བསྐོལ་བ་འམ། ཡང་ན་བིལ་བ་དང་། འུ་སུ་དང་། གླ་སྒང་དང་། བཅའ་སྒ་དང་། བལ་དང་། དེ་རྣམས་བསྐོལ་བ་འམ། སྦྱོར་
[287b.5]བ་དེ་གཉིས་གང་ཡང་རུང་བ་དྲོན་པོ་འཐུངས་ན་རབ་ཏུ་བསྔགས་སོ། །ཡང་ན་རྟུག་པ་འགགས་ཏེ་ཟུག་གཟེར་ཆེ་བ་ལ་ནི་པོ་སོན་ཆའི་རེང་བུ་བཏང་ཞིང་དུགས་བྱ་བ་དང་། དུས་ཚོད་ཤེས་པར་བྱས་ལ་བཀྲུ་སྨན་ཡང་བཏང་སྟེ། བིལ་བའི་རྩ་བ་དང་། དུར་བྱིད་དང་། ཐང་ཤིང་དང་། ནས་
[287b.6]དང་། རྒྱ་ཤུག་དང་། རྒྱ་སྲན་དང་། འདི་རྣམས་བཏགས་བའི་ཆང་དང་། བ་གཅིན་དང་ལྷན་ཅིག་མས་གཏོང་ན་ཕྱི་ས་འགགས་པ་སེལ་པར་འགྱུར་རོ། །དེ་ལ་ནད་གཞི་སྟོབས་ཆེ་བ་འམ། ཁོང་དུ་རྩུབ་པ་འམ། ལྟོ་སྲ་བ་ལ་སྨན་ཐུན་ཆུང་བ་དང་། ནུས་པ་ཆུང་བའི་སྨན་མས་
[287b.7]གཏོང་ན། ནད་གཞི་རྣམས་སློང་སྟེ། རླུང་རྒྱུ་བའི་རྒྱུ་སྲང་འགགས་ནས། རླུང་ལམ་ལོག་པར་སོང་སྟེ། ལྟོ་སྦོས་ཤིང་གནད་རྣམས་ཀྱང་ཤིན་ཏུ་གཟིར་ཞིང་ན་བར་འགྱུར་རོ། །དེ་བཞིན་དུ་ལུས་ཚ་བ་དང་། གཞང་དང་། ལྟོ་བ་དང་། རླིག་པ་དང་། ཆུ་སོ་རྣམས་སུ་ཟུག་ཅིང་ན་
[288a]
[288a.1]བ་དང་། རླུང་དེ་སྙིང་ལ་བརྟེན་ཅིང་ལུས་ཐམས་ཅད་དུ་འཕོ་སྟེ་ན་བར་འགྱུར་རོ། །དེ་ནི་བསྐུ་བྱུག་དང་དུགས་བྱ་སྟེ། པོ་སོན་ཆའི་རེང་བུ་སྦྱར་བར་བྱའོ། །ཡང་ན་བིལ་བ་ལ་སོགས་པ་གོང་དུ་སྨོས་པའི་སྨན་བསྐོལ་བའི་ནང་དུ་པི་ལུའི་འབྲས་བུ་དང་། དུག་མོ་ཡུངས་ཀྱི་ཕྱེ་མ་དང་། བ་གཅིན་དུ་
[288a.2]སྦྱར་བ་ནི་རུ་ཧ་མས་གཏོང་ན་ཕན་ནོ། །ཡང་ན་ཀོ་ཉོན་ཙེ་དང་། ཐང་ཤིང་དང་། ཏིལ་མར་དང་སྦྱར་བའི་འཇམ་རྩི་མས་གཏོང་བར་བྱའོ། །མས་གཏོང་བ་དེ་བར་དུ་བཅད་ཅིང་བཏང་བའམ། ཡང་ན་བཙིར་དྲགས་པའམ། ཐུན་ཆེས་པ་འམ། ལན་ཚྭ་དང་སྣུམ་མེད་པ་འམ། གྲང་བ་འམ། སྨན་ཉུང་
[288a.3]བ་འམ་འཇམ་པོ་བཏང་བར་གྱུར་ན་ནི་རླུང་གིས་གྱེན་དུ་ཕུལ་ཏེ་ཁ་འམ། སྣ་ནས་འབྱུང་བར་འགྱུར་ལ། དེའི་དབང་གིས་བརྒྱལ་བ་དང་། བྲང་ཚ་ཞིང་ཁ་ནས་ཆུ་འབྱུང་བ་དང་། སྐོམ་དད་ཆེ་བ་དང་། ལུས་ཚ་བ་ལ་སོགས་པ་སྐྱེ་བར་འགྱུར་རོ། །དེ་ལྟར་བརྒྱལ་བ་ལ་སོགས་པར་གྱུར་ན། དེ་མ་ཐག་ཏུ་ཆུ་
[288a.4]གྲང་མོས་གདོང་ལ་གཏོར་རོ། །བརྒྱལ་བ་དེས་དུབ་པར་གྱུར་པ་ལ་ནི། རླུང་ཡབ་ཀྱིས་གཡབ་ཅིང་དབུགས་བསྡམས་ཏེ་བརྔུབ་ཏུ་གཞུག་གོ། །དེ་ནས་ནད་པ་དེ་ཁ་བུབ་ཏུ་བཞག་སྟེ། རྒྱབ་དང་རྩིབ་ལོགས་དང་ལྟོ་བ་རྣམས་སུ་ལག་པ་ལ་སོགས་པ་དྲོན་པོས་མཉེ་ཞིང་དུགས་བྱའོ། །དེ་ནས་རྒྱལ་
[288a.5]བུའི་སྐྱེས་བུས་ཚིག་སྤྱོ་བ་དང་བཅས་པས་སྐྲ་ལས་དྲངས་ཤིང་དྲུད་པ་དང་། མཚོན་དང་མེ་མཆེད་པ་དང་། སྦྲུལ་དང་། མཆེ་བ་ཅན་ལ་སོགས་པས་འཇིགས་པར་བྱས་ན། མས་གཏོང་བ་དེ་ཚུལ་བཞིན་དུ་འབྱུང་བར་འགྱུར་རོ། །དེས་ཀྱང་མ་ཐུབ་ན་ཇི་ལྟར་ཡང་མི་འཆི་བའི་ཐབས་བྱ་སྟེ། ལག་
[288a.6]པ་གཉིས་སམ་རས་ཀྱིས་མགུལ་པ་དམ་དུ་བཅིངས་ན་སྲོག་ཅེས་བྱ་བ་དང་། གྱེན་དུ་རྒྱུ་བའི་རླུང་གི་ལམ་འགགས་ཏེ། ཐུར་དུ་སེལ་བའི་རླུང་ཞེས་བྱ་བ་དེས་རང་གི་གནས་སུ་འོག་ཏུ་མྱུར་དུ་འདྲེན་པར་བྱེད་དོ། །ཡང་ན་རུ་རྟ་དང་སེང་ཕྲོམ་གཉིས་ཀྱི་ཕྱེ་མ་རང་སྐྱུར་དང་བསྐོལ་ཏེ་བླུད་ན་དྲོ་བ་དང་།
[288a.7]རྣོ་བ་དང་། འཁྲུ་བའི་རང་བཞིན་ཡིན་པས། མས་གཏོང་བའི་སྨན་དེ་ལུགས་བཞིན་འབྱུང་ངོ་། །ཡང་ན་དུར་བྱིད་དང་། ཨ་རུ་རའི་ཕྱེ་མ་བ་གཅིན་དང་བསྐྱོས་པ་འཐུངས་ན་ཐུར་དུ་འབྱུང་བར་འགྱུར་རོ། །ཞུ་བའི་གནས་སུ་མས་གཏོང་བའི་སྨན་འདུག་པ་ལ་ནི་ཐོག་མར་དུགས་བྱས་ལ། དེའི་འོག་ཏུ་
[288b]
[288b.1]རྩ་བ་བཅུ་པ་དང་། ནས་དང་རྒྱ་ཤུག་དང་རྒྱ་སྲན་རྣམས་བ་གཅིན་དང་ལྷན་ཅིག་བསྐོལ་ཏེ་ནི་རུ་ཧ་མས་གཏོང་ངོ་། །ཡང་ན་སླེ་ཏྲེས་དང་། སྨྱུག་མའི་ལོ་མ་དང་། བུ་ཏ་ཀ་རཉྫའི་ཤུན་པ་དང་། ལོ་མ་དང་། ཟུར་བ་དང་། ཐང་ཤིང་དང་། བྷུ་དྷི་ཀ་དང་། འདི་རྣམས་བ་གཅིན་དང་བསྐོལ་ལ། ཏིལ་
[288b.2]མར་དང་བུ་རམ་དང་། རྒྱམ་ཚ་དང་བཅས་པའི་ནང་དུ་བཀྲུ་སྨན་གྱི་ཕྱེ་མས་བཏབ་པ་མས་གཏང་ངོ་། །མས་གཏོང་བའི་སྨན་དེ་བྲང་གི་ནང་དུ་བྱུང་བ་ལ་ནི་བིལ་བ་ལ་སོགས་པ་རྩ་བ་ལྔ་བསྐོལ་བ་མས་གཏོང་ངོ་། །མགོ་བོར་བྱུང་བ་ནི་སྣར་བླུགས་པའི་སྨན་དང་དུད་པ་བཏང་བ་དང་། ཡུངས་མར་གྱི་ལྡེ་
[288b.3]གུས་མགོ་བོ་བསྐུའོ། །མས་གཏོང་བའི་སྦྱོར་བ་དྲོད་ཆེས་པ་དང་། རྣོ་ཆེས་པ་དང་། སྐྱུར་དྲགས་པ་དང་། བསྐ་ཆེས་པའི་སྨན་ནད་པ་དུགས་མ་བྱས་པ་དང་། ནད་གཞི་ཆུང་བ་དང་། རྒྱུ་སྙི་བ་ལ་གཏོང་བ་འམ། ཡང་དང་ཡང་བཏང་ན་ནི་སྦྱོར་བ་དྲགས་པ་ཡིན་ཏེ། ཁོང་པའི་ནང་དུ་ནད་སྐྱེད་
[288b.4]པར་བྱེད་དོ། །མས་གཏོང་བའི་སྦྱོར་བ་དྲགས་ཏེ་མང་དུ་འཁྲུ་ན་བཀྲུ་སྨན་དྲགས་པའི་གསོ་བ་ཇི་ལྟ་བ་བཞིན་དུ་བྱའོ། །ཡང་ན་མས་གཏོང་བའི་སྨན་དང་། ཐལ་སྨན་དང་། སྐྱུར་བ་དང་། དྲོ་བ་དང་། རྣོ་བ་དང་ལན་ཚྭ་རྣམས་མཁྲིས་པའི་རང་བཞིན་ཅན་ལ་སྦྱར་ལ། གཞང་གི་ནང་དུ་
[288b.5]ཚ་བ་སྐྱེས་ཏེ་བྲུས་པ་སྙམ་བྱེད་ཅིང་གནོད་པ་དང་བཅས་པར་འཁྲུ་བར་བྱེད་དེ། འཁྲུ་བ་དེ་ཡང་ཁྲག་བཙོས་པ་ལྟ་བུ་འབྱུང་ལ་མཁྲིས་པ་ཡང་ཤུགས་དྲག་པོས་ཤས་ཆེར་འབྱུང་སྟེ། ཡང་ནས་ཡང་དུ་དྲན་པ་སྟོར་བར་འགྱུར་རོ། །དེ་ལ་ནི་ཁྲག་དང་མཁྲིས་པའི་འཁྲུ་བའི་གསོ་བ་རབ་
[288b.6]ཏུ་བསྔགས་སོ། །དེ་བཞིན་དུ་གཞང་ཚ་བ་ལ་སོགས་པའི་ནད་དེ་ལ་ནི། དུར་བྱིད་ཀྱི་ཕྱེ་མ་རྒུན་ཆུའི་ནང་དུ་བསྐྱོས་པ་བླུད་དོ། །ཇི་ལྟར་མཁྲིས་པའི་འཁྲུ་བ་གསོ་བ་བཞིན་དུ། རླུང་དང་མཁྲིས་པ་གསོ་བའི་ཆོ་ག་བྱས་ན་ཡང་གནོད་པ་སེལ་བར་བྱེད་དོ། །དེ་ལྟར་སྐྱེས་བུ་དེའི་ཁོང་དག་པ་ལྟ་ན།
[288b.7]ཐུག་པ་གྲང་མོ་ཁར་དང་བཅས་པ་བླུད་དོ། །དེ་ལྟར་འཁྲུ་བའི་འོག་ཏུ་བཤད་བ་ཟད་པར་འགྱུར་བ་དང་། བཟའ་བར་ནི་མོན་སྲན་གྲེའུའི་ཁུ་བཅུད་དང་། མོན་སྲན་རྡེའུ་ལ་སོགས་པའི་ཆན་དང་ལྷན་ཅིག་སྦྱིན་ནོ། །བཏུང་བར་ནི་ཞོ་དང་ཆང་བླུད་དོ། །དེ་རྩུབ་པོར་གྱུར་བའི་སྦྱོར་བས་ནད་ཕྱིན་ཏེ་སོས་
[289a]
[289a.1]པར་བྱ་བ་བསྟན་ཏོ། །ད་ནི་སྣུམ་ཆོས་ཀྱི་འཇམ་རྩི་མས་བཏང་བས་ནད་ཕྱིན་ཏེ་སོས་པར་བྱ་བ་བཤད་པར་བྱ་སྟེ། དེ་ཡང་རླུང་ལས་གྱུར་པའི་ནད་ལ་འཇམ་རྩི་གྲང་བ་འམ། ཉུང་བ་བཏང་བ་དང་། མཁྲིས་པ་ལས་གྱུར་པ་ལ་ནི་ཤིན་ཏུ་རྣོ་ཆེས་པ་བཏང་བ་དང་། བད་ཀན་ལས་གྱུར་
[289a.2]པ་ལ་འཇམ་པ་དང་། དེ་བཞིན་དུ་གྲང་ཆེས་པ་ལ་འཇམ་རྩི་འཇུ་དཀའ་བ་དང་། དྲི་མ་མང་དུ་སྩོགས་པ་ལ་སྨན་ནུས་སྟོབས་ཆུང་བ་བཏང་ན། སྣུམ་རླུང་ལ་སོགས་པའི་ནད་གཞི་དང་འདྲེས་ནས་ནང་དུ་འཁྱིལ་ཏེ་སླར་འབྱུང་བར་མི་འགྱུར་ཏེ། དེ་ལྟར་རླུང་དང་འདྲེས་ཏེ་ཕྱིར་མི་འབྱུང་བ་དེས་ནི། རེངས་པ་
[289a.3]དང་། མཁྲིས་པ་ལས་གྱུར་པ་ལ་ནི། བརླ་སྟོབས་ཞེན་པ་དང་། སྐྱིགས་བུ་དང་། རིམས་དང་། གཟིར་བ་དང་། ཡན་ལག་བརྡུང་བརྡུང་བ་སྙམ་བྱེད་པ་དང་། རྩིབ་ལོགས་ན་བ་དང་། འདར་བུ་རྣམས་འབྱུང་བར་ཤེས་པར་བྱའོ། །དེ་ལྟ་བུ་ལ་ནི་སྣུམ་པ་དང་། ལན་ཚྭ་དང་། དྲོ་བ་དང་། རྣོ་
[289a.4]བའི་སྨན་ཀོ་ཉོན་ཙེའི་མར་དང་། ར་སྣ་དང་། རང་སྐྱུར་དང་། ཆང་དང་། རྒྱ་ཤུག་དང་། རྒྱ་སྲན་དང་། ནས་རྣམས་བསྐོལ་བ་འམ་ཡང་ན་ནི་རུ་ཧ་མས་གཏོང་ན་སེལ་བར་བྱེད་དོ། །དེ་ནས་ཟས་ཟོས་ལ་གོང་གི་ནི་རུ་ཧའི་སྨན་གྱི་སྦྱོར་བ་གཉིས་པོ་གང་ཡང་རུང་བ་ཏིལ་མར་དང་སྦྱར་བའི་འཇམ་རྩི་ཉི་
[289a.5]མ་ཕྱེད་ཕྱེད་ཙམ་ན་གཏོང་ངོ་། །འཇམ་རྩི་མས་གཏོང་བ་དེ་ནང་དུ་མཁྲིས་པ་དང་འདྲེས་ནས་ཕྱིར་མི་འབྱུང་བའི་མཚན་མ་ནི་སྐོམ་དད་ཆེ་བ་དང་། ཚ་བ་ཆེ་བ་དང་། མདོག་དམར་བ་དང་། རྨོངས་བག་ཏུ་འདུག་པ་དང་། མདོག་འགྱུར་བ་དང་། མུན་པར་མཐོང་བ་དང་། རིམས་ཀྱིས་འདེབས་པ་རྣམས་
[289a.6]ཡིན་པར་ཤེས་པར་བྱ་སྟེ། དེ་ལ་ནི་ཁ་བ་དང་མངར་བའི་སྨན་རྣམས་སྦྱར་བའི་ནི་རུ་ཧ་མས་གཏོང་བར་བྱའོ། །འཇམ་རྩི་མས་གཏོང་བ་དེ་བད་ཀན་གྱི་ནང་དུ་འཁྱིལ་ཏེ་ཕྱིར་མ་བྱུང་བའི་མཚན་མ་ནི་སྙོམ་པ་དང་། རིམས་གྲང་མོས་ཐེབས་པ་དང་། སྒྱིད་ཞན་པ་དང་། ཆམ་པས་བཏབ་པ་དང་།
[289a.7]ཡི་ག་འཆུས་པ་དང་། ལུས་ལྕི་བ་དང་། བརྒྱལ་བ་དང་། རབ་ཏུ་ན་བ་ཡིན་པར་ཤེས་པར་བྱ་སྟེ། དེ་ལ་ནི་བསྐ་བ་དང་། ཁ་བ་དང་། ཚ་བའི་སྨན་དང་། བ་གཅིན་ལས་གཞི་བླངས་ལ། པོ་སོན་ཆ་དང་། སྐྱུར་དང་། ཏིལ་མར་དང་བཅས་པའི་ནི་རུ་ཧ་མས་བཏང་བས་ཞི་བར་བྱའོ། །
[289b]
[289b.1]འགྲངས་ཆེས་པ་ལ་འཇམ་རྩི་མས་བཏང་ནས་ཕྱིར་མ་བྱུང་བའི་མཚན་མ་ནི། སྐྱུག་བྲོ་བ་དང་། བརྒྱལ་བ་དང་། ཡི་ག་འཆུས་པ་དང་། སྙོམ་པ་དང་། གཟེར་བ་དང་། རྨྱ་བ་དང་། ཡན་ལག་བརྡུང་བརྡུང་བ་སྙམ་བྱེད་པ་དང་། གཞན་ཡང་མ་ཞུ་བའི་མཚན་མ་རྣམས་འབྱུང་ཞིང་ལུས་ཚ་
[289b.2]བར་བྱེད་དེ། དེ་ལ་ནི་སྨན་རྣོ་བ་བསྐོལ་བའི་ནང་དུ་ལན་ཚྭའི་ཕྱེ་མ་བཏབ་པ་བླུད་དེ་ཞུ་བར་གྱུར་པ་དང་། བཀྲུ་སྨན་འཇམ་པོ་བཏང་ལ་དར་བ་ལས་གཞི་བླངས་པའི་བཟའ་བ་དང་བཏུང་བ་ཕན་ནོ། །འཇམ་རྩི་མས་གཏོང་བ་དེ་ཕྱི་ས་དང་གཉིས་འདྲེས་ནས་ནང་དུ་སོགས་ཤིང་ཕྱིར་འབྱུང་དུ་མི་འདོད་པའི་
[289b.3]མཚན་མ་ནི་ཕྱི་ས་དང་གཅིན་དང་། རླུང་འགགས་པས་ཉམ་ཐག་པ་དང་། ལུས་ལྕི་བ་དང་། ལྟོ་སྦོ་བ་དང་། རོ་སྟོད་འཛིངས་པ་རྣམས་ཡིན་པར་ཤེས་པར་བྱ་སྟེ། དེ་ལ་ནི་སྣུམ་པ་དང་དུགས་དང་། རེང་བུ་མས་གཏོང་བ་དང་། དུར་བྱིད་དང་། བིལ་བ་ལ་སོགས་པ་གོང་དུ་སྨོས་པའི་
[289b.4]སྦྱོར་བས་ནི་རུ་ཧ་དང་། ཨ་ནུ་བ་ས་ན་མས་གཏང་ངོ་། །ཡང་ན་རྟུག་པ་འགགས་པའི་ཆོ་གར་བཤད་པ་བཞིན་བྱ་སྟེ་ཞི་བར་བྱའོ། །ཁ་ཟས་མ་ཟོས་ཏེ་ལྟོགས་པ་དང་། གཞང་ཚོ་སྟེ་ལྟོགས་པ་དང་། ཐུག་པའམ་ཡང་ན་ཉུང་ངུ་འཐུང་བ་ལ་འཇམ་རྩི་ཤུགས་དྲག་པོས་མས་གཏང་བར་བྱས་ན་རོ་
[289b.5]སྟོད་དུ་འབྱུང་ཞིང་དེ་ནས་མགྲིན་པར་འབྱུང་སྟེ། མགོ་བོའི་བུ་ག་སྣ་ཚོགས་སུ་འབྱུང་བར་འགྱུར་རོ། །དེ་ལྟར་བྱུང་བ་ནི་ནས་དང་། དུར་བྱིད་དང་། རྒྱ་ཤུག་དང་། རྒྱ་སྲན་དང་། འདི་རྣམས་བ་གཅིན་དང་། ཏིལ་མར་དང་། ཚུལ་བཞིན་དུ་བསྒྲུབས་པ་ལ་ནི་རུ་ཧ་དང་། འཇམ་རྩི་མས་གཏང་
[289b.6]བར་བྱའོ། །འཇམ་རྩི་མས་གཏོང་བ་དེ་མགུལ་བར་བྱུང་བ་ལ་ནི་མགུལ་བ་བསྡམས་པ་དང་། བཅིང་བ་དང་། བཀྲུ་སྨན་གཏང་བ་དང་། སྐྱུག་པ་འཇོམས་ཤིང་སྨན་གྱིས་བཟློག་པར་བྱའོ། །འཇམ་རྩི་དེ་མ་ཚོས་པར་བཏང་ན་ནི་གཞང་གི་ནང་དུ་ཡོག་པ་ལྟར་འདུག་ཅིང་། རྒྱུ་སྲང་རྣམས་སུ་
[289b.7]ཚུལ་བཞིན་མི་འགྲོ་སྟེ། དེ་ཡང་ཟུག་གཟེར་ཆེ་ལ་རྨོངས་བག་ཏུ་འདུག་ཅིང་གཡའ་བ་དང་། སྐྲང་བར་བྱེད་དོ། །དེ་ལ་ནི་སྨན་རྣོ་བ་མས་གཏོང་བ་འམ། དེ་བཞིན་དུ་ཨརྐའི་ལོ་མ་བསྐོལ་བའི་ཏིལ་མར་དང་བསྒྲུབས་པས་མས་གཏོང་ངོ་། །འཇམ་རྩི་ནང་དུ་གཏོང་ཁར་རླུང་ལེགས་པར་མ་བྱུང་སྟེ། སྦུ་བུའི་
[290a]
[290a.1]ཁ་ནས་སྔོན་དུ་རླུང་སོང་ངམ། ཡང་ན་རྒྱུ་སྲང་རྣམས་འགགས་ཏེ་འགྲོར་མ་འདོད་པའམ། ཡང་ན་སྨན་ལྷག་མ་མ་ལུས་པར་བཏང་སྟེ། དེའི་རྗེས་ལ་སྦུབས་སུ་ཞུགས་ནས་རླུང་འཁྲུགས་པར་འགྱུར་ཏེ། ན་ཞིང་ཟུག་པར་གྱུར་པ་དེ་ལ་ནི་བསྐུ་བྱུག་དང་། གཞང་གི་ཕྱོགས་སུ་དུགས་
[290a.2]བྱ་བ་དང་། རླུང་འཇོམས་པའི་སྨན་རྣམས་སྦྱར་རོ། །འཇམ་རྩི་ནང་དུ་བརྟད་ཐབས་སུ་བཅུག་སྟེ། ཕྱུང་བའི་དུས་སུ་ཡང་རིང་ཐབས་སུ་ཕྱུང་ངམ། སྦུ་བུ་ཡོན་པར་གཏོང་ངམ། གཏོང་ཞིང་ནད་པས་ལུས་འགུལ་བསྐྱོད་བྱས་ན། རྐེད་པ་དང་། གཞང་དང་། རྗེ་ངར་དང་། བརླ་དང་ཆུ་སོ་རྣམས་
[290a.3]སུ་རེངས་ཤིང་ནད་ཀྱིས་ཉམ་ཐག་པར་འགྱུར་ཏེ། དེ་ནི་རླུང་འཇོམས་པའི་བཟའ་བ་དང་། དུགས་དང་། བསྐུ་བྱུག་དང་། མས་གཏོང་བ་རྣམས་ཀྱང་རླུང་ལ་ཕན་པའི་སྨན་དང་སྦྱར་བ་བཏང་ན་ཕན་ནོ། །འཇམ་རྩི་གཏོང་བཞིན་དུ་བཅིང་བ་ལྷོད་དམ་གྲོལ་ཏེ་མར་ཕྱིར་བོར་ཏེ། རླུང་ནང་དུ་ཞུགས་ནས་
[290a.4]བྲང་དང་མགོ་བོར་ཟུག་གཟེར་སྐྱེ་ཞིང་རླུང་གི་སྟོབས་ཆེ་ན་ནི་གོང་མའི་གནོད་པ་རྣམས་ཀྱང་སྐྱེད་པར་འགྱུར་ཏེ། དེ་བས་ན་དེ་ལ་ནི་བིལ་བ་ལ་སོགས་པ་རྩ་བ་ལྔའམ། ཡང་ན་པོ་སོན་ཆ་ལ་སོགས་པའམ། ཤམ་དུར་བྱིད་ལ་སོགས་པ་སྦྱར་ཏེ་དེ་གསུམ་གང་ཡང་རུང་བ་བ་གཅིན་དང་སྦྱར་བ་མས་གཏང་
[290a.5]ངོ་། །འཇམ་རྩི་མས་གཏོང་བ་དེ་བཙིར་དྲགས་ན་ནི་ཁོང་པ་དང་། མགུལ་པར་འགྲོ་བར་འགྱུར་ཏེ། དེ་ལ་ནི་སྨན་མས་གཏོང་བ་དང་། བཀྲུ་སྨན་གཏོང་བ་དང་། མགུལ་པ་བསྡམས་པའི་ལས་རྣམས་བྱའོ། །དེ་ལྟར་སློན་ཁྲུས་ལ་སོགས་པས་ལུས་དག་པར་བྱས་ནས། དེའི་འོག་ཏུ་སྨན་པས་
[290a.6]ལུས་ཀྱི་ཉམས་སྟོབས་དང་མེའི་དྲོད་ཆུང་བ་ལ་བཟའ་བ་དང་བཏུང་བ་མི་མཐུན་པ་རྣམས་བསྒྲིམས་ནས་བསྲུང་བར་བྱ་སྟེ། ཇི་ལྟར་སྒོང་གཞོན་ནུའམ་འབྲུ་མར་གྱིས་གང་བའི་སྣོད་བཞིན་བསྲུང་བར་བྱའོ། །དེ་ལྟར་སློན་ཁྲུས་ཀྱིས་ལུས་དག་པའི་ནད་པ་དེ་ལ་ནི་ཐོག་མར་ཁ་ཟས་མངར་བ་དང་ཡི་གར་
[290a.7]འོང་བ་སྦྱིན་ནོ། །དེའི་འོག་ཏུ་སྐྱུར་བ་དང་ལན་ཚྭར་བཅས་པ་སྦྱིན་ནོ། །དེའི་འོག་ཏུ་མངར་བ་དང་ཁ་བ་སྦྱིན་ནོ། །དེའི་འོག་ཏུ་བསྐ་བ་དང་ཚ་བ་སྦྱིན་ནོ། །དེ་ལྟར་རོ་རྣམས་གཅིག་ལ་གཅིག་མི་མཐུན་པ་སྦྱིན་ནོ། །ཇི་ལྟར་སྣུན་པ་དང་རྩུབ་པ་བཞིན་ནོ། །རིམ་པ་དེ་ལྟར་བྱས་པའི་སྦྱོར་བས་ལུས་ཉམས་ཐ་
[290b]
[290b.1]མལ་པར་སྦྱར་བར་བྱའོ། །ལུས་ཀྱི་ཉམས་ཐ་མལ་པ་ཞེས་བྱ་བ་ནི་ལུས་ཐམས་ཅད་ནུས་ཤིང་ཉམས་སྟོབས་བརྟན་པ་ཡིན་ཏེ། རང་བཞིན་གྱི་ལུས་ཞེས་བྱའོ། །ཆོ་ག་གྲུབ་པའི་གནས་ལས་སྨན་མས་གཏོང་བའི་ཆོ་གས་ནད་ཕྱིན་ཏེ་སོས་པར་བྱ་བའི་ལེའུ་སྟེ་ལྔ་པ་རྫོགས་སོ།། །།
[290b.2]དེ་ནས་སྨན་གྱི་ཆོ་གའི་ལེའུ་བཤད་པར་བྱ་སྟེ། དེ་ལ་ཐོག་མར་སྨན་པས་ཡུལ་ཇི་ལྟ་བུ་ལས་བཏུ་བར་བྱ་ཞེ་ན། དྲོ་གྲང་མཉམ་པའི་ཡུལ་དང་ཐང་མཉམ་པ་དང་། ས་མདོག་སྣུམ་པ་དང་། གནག་པ་དང་གསེར་གྱི་མདོག་ལྟར་འདུག་པ་དང་། དེ་དག་ཀྱང་ས་ཕྱོགས་གང་གཙང་ཞིང་སྙི་བ་
[290b.3]དང་། ཆུ་གཡས་ཕྱོགས་སུ་འབབ་ཅིང་རྩྭ་ཀུ་ཤ་དང་། བྷུ་ཏི་ཀ་ལ་སོགས་པ་ཡོད་པའི་ས་དང་། གཤོལ་ལ་སོགས་པས་རྨོས་པའི་ས་ལས་སྐྱེས་པ་བླངས་ལ། ཤིང་ཆེན་པོའི་གྲིབ་མ་ལ་སོགས་པས་གནོད་པ་བྱས་པ་དང་། དེ་བཞིན་དུ་དུར་ཁྲོད་དང་། མཆོད་རྟེན་དང་། ལྷ་ཁང་དང་། མཆོད་རྟེན་རྙིང་པའི་
[290b.4]དྲུང་དུ་སྐྱེས་པ་དང་། གྲོག་མའི་གནས་སུ་སྐྱེས་པའི་སྨན་རྣམས་སྤང་སྟེ། དེ་བཞིན་དུ་སྲིན་བུ་ལ་སོགས་པས་ཟོས་པ་དང་། ཉི་མས་ཚིག་པ་དང་། ནགས་ཚིག་པའི་ནང་དུ་སྐྱེས་པ་དང་། འབྱུང་པོ་གནས་པའི་ཤིང་དྲུང་དུ་སྐྱེས་པ་དང་། ཤིང་ཆེན་པོའི་ལོ་མ་དང་། ཡལ་ག་ལ་སོགས་པ་ལས་འབབ་
[290b.5]པའི་ཆུ་ཕོག་པ་དང་། ཤིང་གི་ལོ་མ་ལས་ཉི་མ་འབབ་པའི་དུག་ཀྱིས་ཕོག་པའི་སྨན་དང་། འདི་རྣམས་ལྟ་བུ་སྤང་སྟེ། རྩ་བ་ཆེན་པོ་བྱང་ཕྱོགས་སུ་བསྟན་ཏེ་ཟུག་པའི་སྨན་རྣམས་དུས་ཇི་ལྟ་བ་བཞིན་དུ་བརྔས་པ་དང་། མདོག་དང་དྲི་ལ་སོགས་པ་དང་ལྡན་པ་རྣམས་བླངས་ན་རབ་ཏུ་བསྔགས་
[290b.6]སོ། །དེ་ནས་སྨན་པ་བདག་ཉིད་ལུས་ཁྲུས་དང་གཙང་སྦྲ་དང་སྨྱུང་བ་བྱས་ལ་བཀྲ་ཤིས་པའི་ཆོ་ག་འདོན་ཅིང་ཤིན་ཏུ་གུས་པ་དང་བཅས་པས་གནས་དགེ་ཞིང་ཤིས་པ་ལས་སྐྱེས་པའི་སྨན་རྣམས་བཅུད་དང་། ཡོན་ཏན་དང་དུས་ཀྱི་བྱེ་བྲག་ཤེས་པར་བྱ་སྟེ་ལོ་གཅིག་ཚུན་ཆད་ཀྱི་སྨན་སར་པ་བཏུ་ཞིང་སྤྱད་
[290b.7]པར་བཟང་ངོ་། །བུ་རམ་དང་། མར་དང་། སྦྲང་རྩི་དང་། འབྲུ་ཐམས་ཅད་དང་། པི་པི་ལིང་དང་། བྱི་དང་ག་དང་། མིང་དུ་སྨོས་པ་དེ་དག་ནི་བརླིང་པ་བཟང་ངོ་། །དེ་ལ་བ་ལང་ལ་སོགས་པའི་འོ་མ་ཐམས་ཅད་སྤྱད་པའི་ཚུལ་ནི་བ་གཞོན་ཞིང་ཉམས་སྟོབས་དང་ལྡན་པ་ཁྲག་ལ་སོགས་པའི་ལུས་
[291a]
[291a.1]ཟུངས་མ་ཉམས་པ་དང་། སྤུ་དང་། རྭ་དང་རྨིག་པ་ལ་སོགས་པས་བརྒྱན་པ། ནད་མེད་ཅིང་བེའུ་བཙས་ནས་ཡུན་རིང་དུ་ལོན་པའི་འོ་མ་དང་། གཅིན་དང་ལྕི་བ་ལ་སོགས་པ་བླང་ངོ་། །ལན་ཚྭ་མ་གཏོགས་པ་སྨན་ཐམས་ཅད་ཁུ་བ་དང་ཕྱེ་མ་དང་། བསྐོལ་བ་དང་། སྦངས་པ་གྲང་
[291a.2]མོ་དང་། ཕན་ཊ་དང་། དེ་དག་འདི་ལྟར་བཏགས་པར་བྱ་སྟེ། སྦྱོར་བ་ལྔ་པོ་དེ་དག་ཀྱང་གོང་མ་བཞིན་དུ་ནུས་པ་ཆེ་བ་ཡིན་ནོ། །དེ་ལ་རང་གི་ཁུ་བ་ཞེས་བྱ་བ་ནི་སྨན་དེ་མ་ཐག་བཏུས་ལ་བརྡུངས་ཏེ་ཚགས་ཀྱིས་བཙགས་པའི་རང་གི་ཁུ་བའོ། །ཕྱེ་མ་ཞེས་བྱ་བ་ནི་སྨན་བཏགས་པའི་ཕྱེ་མ་གཞན་ལ་གདབ་
[291a.3]པའི་ཆེད་དུ་བྱས་པའོ། །ཡང་ན་སྨན་སྐམ་པོ་བཏགས་པའི་ཕྱེ་མ་ལ་ཡང་བྱའོ། །བསྐོལ་བ་ཞེས་བྱ་བ་ནི་སྨན་ཐམས་ཅད་པ་འམ། ཆམ་ཆོམ་བརྡུངས་པ་ཆོ་ག་བཞིན་དུ་ཆུ་དང་ལྷན་ཅིག་བསྐོལ་བ་ལ་བྱའོ། །སྦངས་པའི་གྲང་མོ་ཞེས་བྱ་བ་ནི་སྨན་རྣམས་ཆུ་གྲང་གི་ནང་དུ་བཅུག་ལ་བསིལ་བའི་སར་
[291a.4]ནུབ་གཅིག་བཞག་སྟེ་ཐོ་རངས་བཏུང་བའོ། །ཕན་ཊ་ཞེས་བྱ་བ་ནི་ཆུ་བསྐོལ་བ་དྲོན་པོའི་ནང་དུ་སྨན་བཅུག་ལ་བརྡུངས་ཏེ་མཉེས་ལ་བསྲོས་ཏེ་བཙགས་ཏེ་བཏུང་བའོ། །རང་གི་ཁུ་བ་ལ་སོགས་པ་དེ་དག་ཀྱང་ནད་ཀྱི་སྟོབས་ཆེ་ཆུང་ལ་བརྟགས་ཏེ་ཆོ་ག་བཞིན་དུ་རན་པར་གཏང་ངོ་། །དེ་ཡང་དྲང་
[291a.5]སྲོང་ཆེན་པོ་རྒྱུན་ཤེས་ཀྱི་བུས་བཤད་པ་ན་རེ་སྨན་གྱི་ཚད་རན་པ་ཞེས་བྱ་བ་ནི་ངེས་པ་མེད་དེ། ནད་ཀྱི་བྱེ་བྲག་དང་ལྟོ་སྲ་སྙི་དང་། ཉམས་སྟོབས་ཆེ་ཆུང་དང་། དུས་དང་ཡུལ་གྱི་བྱེ་བྲག་ཤེས་པར་བྱས་ནས་སྨན་ཡང་དེ་བཞིན་དུ་བརྟག་པར་བྱའོ། །འོན་ཀྱང་རང་གི་ཁུ་བ་བཏུང་བའི་འབྲིང་ཚད་ནི་
[291a.6]སྲང་བཞིའི་ཚད་ཙམ་ནི་རན་པ་ཡིན་ནོ་ཞེས་བཤད་དོ། །ཕྱེ་མ་བསྐོལ་བའི་ཚད་ནི་སྨན་གཅིག་ཆུ་སྲང་བཅུ་དྲུག་དང་བསྐོལ་ཏེ། བཞི་ཆ་གཅིག་ལུས་པ་བཏུང་བའོ། །སྨན་བསྐོལ་ཏེ་བསྒྲངས་པའི་སྨན་བསྐོལ་བའི་ཁུ་བ་སྲང་དྲུག་གི་ནང་དུ་སྨན་གཅིག་བཅུག་ནས་ནུབ་གཅིག་སྦངས་པ་བླུད་དོ། །
[291a.7]ཕན་ཊ་ནི་ཆུ་སྲང་བཞིའི་ནང་དུ་སྨན་སྲང་གཅིག་བཅུག་ལ་ནུབ་གཅིག་སྦངས་པའོ། །མར་བསྐོལ་བའི་ཚད་མ་སྨོས་པ་རྣམས་ནི་སྨན་གྱི་ཕྱེ་མའི་བཞི་འགྱུར་གྱི་འོ་མ་དང་། དེའི་བཞི་འགྱུར་གྱི་ཆུ་དང་བསྐོལ་ལོ། །ཆུ་ཉི་ཚེ་དང་བསྐོལ་བ་ཡིན་ན་ནི་མར་ཅི་ཙམ་པའི་བཞི་ཆའི་ཕྱེ་མ་དང་།
[291b]
[291b.1]དེའི་བཅུ་དྲུག་འགྱུར་གྱི་ཆུ་དང་བསྐོལ་བའོ། །སྨན་བསྐོལ་བའི་ཁུ་བ་དང་སྦྱོར་བ་ཡིན་ན་ནི་མར་གྱི་བརྒྱད་ཆའི་ཕྱེ་མ་དང་ལྷན་ཅིག་བསྐོལ་བའོ་ཞེས་ཟེར་རོ། །བསྐོལ་ཏེ་ཚོས་པའི་ཚད་ནི་སྨན་གྱི་ཚིགས་མ་ལག་པར་མི་འབྱར་ཏེ་དྲིལ་ཏུ་བཏུབ་པའམ། ཡང་ན་མེར་བཅུག་སྟེ་སྒྲ་མེད་པ་དང་།
[291b.2]གང་གི་ཚེ་མདོག་དང་དྲི་དང་རོ་རྣམས་མ་འགྱུར་ཏེ་ལྡན་པའི་ཚེ་ན་ནི་ཚོས་པའི་ཚད་ཡིན་ཏེ་དེ་མ་ཐག་ཕྱུང་ངོ་། །མར་ཚོས་བའི་ཚད་ནི་ལྦུ་བ་ཞི་བའོ། །ཏིལ་མར་ཚོས་པའི་ཚད་ནི་ལྦུ་བ་བྱུང་བའོ། །ལྡེ་གུའི་ཚད་ནི་གང་དུ་བཏུབ་ཅིང་ཆུ་ནང་དུ་བཅུག་ན་ནང་དུ་འབྱིང་བའོ། །ཚོས་པའི་ཚད་ཀྱང་རྣམ་པ་གསུམ་
[291b.3]སྟེ། ཚོས་པ་དང་པོ་ཚིགས་མ་དང་དངས་མ་འདྲེས་པའོ། །ཚོས་པ་རན་པའི་ཚད་ནི་དངས་སྙིགས་ཕྱེད་པའོ། །རབ་ཏུ་ཚོས་པ་ནི་སྙིགས་མ་ཅུང་ཟད་ཅིག་མདོག་ནག་པོར་གྱུར་ལ། དེ་ཡང་དྲིལ་དུ་བཏུབ་པའི་ཚད་དོ། །རབ་ཏུ་ཚོས་པ་དེ་ནི་སྣུམ་ཤས་ཆུང་ཞིང་ནུས་པ་ཞན་པ་ཡིན་ནོ། །ཚོས་པ་
[291b.4]དང་པོ་ནི་དྲོད་ཉམས་པར་བྱེད་དོ། །ཚོས་པ་རན་པ་ནི་སྣར་བླུགས་པ་ལ་སྦྱར་རོ། །རབ་ཏུ་ཚོས་པ་ནི་ལུས་བསྐུ་བ་ལ་སྦྱར་རོ། །ཚོས་པ་རན་པ་ནི་བཏུང་བ་དང་མས་གཏོང་བ་གཉིས་ལ་སྦྱར་རོ། །མ་ཤ་དྲུག་ལ་ཤ་ན་གཅིག །ཤ་ན་བཞི་ལ་ཞོ་གཉིས། དེ་བཞི་ལ་སྲང་གཅིག །དེའི་བཞི་འགྱུར་ནི་ཀུ་
[291b.5]དྷ་བ་ཞེས་བྱ་སྟེ་སྲང་བཞིའོ། །དེའི་བཞི་འགྱུར་ལ་བྲེའུ་ཆུང་གང་ངོ་། །བྲེའུ་ཆུང་བཞི་ལ་ཨ་དྷ་ཀ་སྟེ་བྲེ་འབྲིང་ངོ་། །བྲེ་འབྲིང་བཞི་ལ་བྲེ་བོ་ཆེ་གཅིག་གོ། །བྲེ་བོ་ཆེ་བཞི་ལ་བ་ཧ་ཞེས་བྱ་བའི་ཚད་དོ། །ཀུ་དྷ་བ་ལ་སོགས་པའི་ཚད་བསྟན་པ་དེ་དག་ནི་ཕྱེ་མ་དང་སྨན་བསྐོལ་བའི་ནང་དུ་གདབ་པ་སྐམ་
[291b.6]པོའི་ཚད་བསྟན་པ་ཡིན་གྱི། གལ་ཏེ་སྨན་རློན་པ་འམ། སྨན་ཁུ་ལྟ་བུ་ནི་ཉིས་འགྱུར་དུ་སྐྱེད་དེ་སྦྱར་རོ། །གོང་དུ་སྨན་གྱི་སྲང་ཚད་ངེས་པར་མ་སྨོས་པ་རྣམས་ནི་ཆ་སྙོམས་ཏེ་སྦྱར་རོ། །ཤ་ན་གཉིས་ལ་ཞོ་གཅིག་ཡིན་ཏེ་དེའི་མིང་གི་རྣམ་གྲངས་ནི་བཱ་ཏ་ཀ་དང་། ཀོ་ལ་དང་། བ་ཌ་ར་དང་། ཏྲ་ཀྵུ་
[291b.7]མ་སྟེ་དེ་དག་ནི་མིང་གི་རྣམ་གྲངས་སོ། །ཞོ་གཉིས་ལ་ཀར་ཤ་གཅིག་ཡིན་ཏེ། དེའི་མིང་ནི་ཨཀྵ་དང་། པི་ཙུ་དང་། པ་ནི་ཏ་ལ་དང་། སུ་བརྞ་དང་། ཀ་བ་ལ་གྲ་ཧ་དང་། ཀར་ཤ་དང་། བི་དྷ་པ་ད་དང་། ཏི་ན་ཏུ་ཀ་དང་། པ་ཎི་དང་། མ་ཎི་ཀ་དང་། དེ་དག་ནི་ཀརྴའི་མིང་གི་རྣམ་གྲངས་སོ། །ཀར་ཤ་
[292a]
[292a.1]གཉིས་ལ་ཤུ་ཏི་ཞེས་བྱ་བ་ཡིན་ཏེ། དེའི་མིང་ནི་ཨཏྠ་མྱི་ཀ་དང་པི་ཙུ་ཞེས་བྱ་སྟེ་མིང་གི་རྣམ་གྲངས་སོ། །ཀར་ཤ་བཞི་ལ་སྲང་གཅིག་སྟེ་དེའི་མིང་ལ་པ་ལ་དང་། པྲ་པུན་ཙ་དང་། བིལ་བ་དང་། མུཥྚི་དང་། ཨ་སྲ་དང་། ཙ་ཏུར་ཏི་ཀ་དང་། དེ་དག་ནི་སྲང་གཅིག་གི་མིང་གི་རྣམ་གྲངས་སོ། །སྲང་
[292a.2]གཉིས་ལ་ཁྱོར་གང་། ཁྱོར་དོ་ལ་སྙིམ་གང་། སྙིམ་པ་དོ་ལ་ཕུལ་གང་། ཨ་ད་ཀ་ཞེས་བྱ་བ་བྲེ་འབྲིང་གི་མིང་གི་རྣམ་གྲངས་ལ། ཨཱ་དྷ་ཀ་མ་དང་། བྷ་ཛཱ་དང་། ཀ་ན་སྟེ་དེ་དག་ནི་བྲེ་འབྲིང་གི་མིང་གི་རྣམ་གྲངས་སོ། །དྲོ་ན་སྟེ་བྲེ་བོའི་མིང་གི་ཀུམ་པ་དང་། གྷ་དྷ་དང་། མ་ན་སྟེ་དེ་དག་ནི་མིང་གི་རྣམ་གྲངས་
[292a.3]སོ། །སྲང་བརྒྱ་ལ་ཏུ་ལ་ཞེས་བྱ་སྟེ། དེའི་ཉིས་འགྱུར་ལ་ཁུར་གཅིག་ཅེས་བརྗོད་དོ། །རི་གངས་ཅན་དང་། རི་འབིགས་བྱེད་རི་བྲན་སྣ་ཚོགས་ཀྱིས་བསྐོར་བ་ནི་སྨན་སྣ་ཚོགས་པའི་གཞི་ཡིན་ཏེ། དེ་ཡང་རི་གངས་ཅན་ནི་བྱང་ཕྱོགས་ན་གནས་ཏེ་དེ་ལ་ནི་བསིལ་བའི་ནུས་པ་དང་ལྡན་པའི་སྨན་སྣ་ཚོགས་
[292a.4]སྐྱེའོ། །རི་འབིགས་བྱེད་ནི་ལྷོ་ཕྱོགས་ན་གནས་ཏེ། དེ་ལ་ནི་དྲོ་བའི་ནུས་པ་དང་ལྡན་པ་སྣ་ཚོགས་སྐྱེའོ། །ཆོ་ག་གྲུབ་པའི་གནས་ལས་སྨན་གྱི་ཆོ་ག་བསྟན་པའི་ལེའུ་སྟེ་དྲུག་པ་རྫོགས་སོ།། །།སྨན་པའི་བདག་པོ་སེང་གེ་སྦས་པ་ཞེས་བྱ་བའི་བུ་སྨན་པ་ཆེན་པོ་ཕ་ཁོལ་ཞེས་བྱ་བས་
[292a.5]ཡན་ལག་བརྒྱད་པའི་སྙིང་པོ་མཛད་པ་ལས། ཡན་ལག་བརྒྱད་པའི་སྙིང་པོའི་གནས་ལྔ་པའོ།། །།སྨན་དཔྱད་ཡན་ལག་བརྒྱད་པའི་སྙིང་པོ་ལས་མཆོག་བཞི་བཅུ་པའི་ཆོ་གའི་ལེའུ་བརྗོད་པར་བྱ་སྟེ། དེ་ཡང་ཐོག་མར་བྱིས་པ་གསོ་བའི་ཆོ་གའི་ལེའུ་བཤད་པར་བྱའོ། །
[292a.6]དང་པོར་བྱིས་པ་བཙས་མ་ཐག་ཏུ་མར་དང་རྒྱམ་ཚ་དང་ལྡན་པའི་ཆུས་ལུས་བཀྲུ་བར་བྱའོ། །དེ་ནས་མངལ་ནས་བྱུང་བའི་སྡུག་བསྔལ་གྱིས་ཉོན་མོངས་པ་ལ། བ་ལ་དང་འབྲུ་མར་གྱིས་བཀྲུའོ། །དེའི་འོག་ཏུ་བྱིས་པའི་རྣ་བའི་དྲུང་དུ་རྡོ་གཉིས་བརྡུངས་པའི་སྒྲ་བསྒྲག་གོ། །དེ་ནས་བྱིས་པའི་
[292a.7]གཡོན་ཕྱོགས་ནས་སྔགས་འདི་བརྗོད་དོ། །ཨཱང་གད་ཨཱང་གད་སམ་བྷ་བ་སི། ཧྲྀ་ད་ཡཱ་ད་ཨ་བྱིད་ཛ་ཡ་སོ། ཨཱད་མ་བེ་སུ་ཏྲ་ན་མཱ་སི། ས་ཛ་བ་ཤར་ད་ན་ཤ་ཏམ། ཤ་ཏཱ་པུ་ཤ་ཏ་བར་ཤོ་ས། དྷིར་གྷམ་ཡུར་བ་ས་ནུ་ཧི། ན་ཀྵ་ཏྲ་ཎི་ཏྲི་ཤོ་རཱ་ཏི། ར་ཧཤྴ་ད་ཏྭཱ་བི་རཀྵ་ཏུ། དེ་ནས་བྱིས་པ་དེ་ནད་མེད་
[292b]
[292b.1]ཅིང་བདེ་བར་འགྱུར་བ་དང་། ལྟེ་བའི་རྩ་བ་སོར་གཅིག་ལ་ཐེ་གུས་བཅིངས་ཏེ། དེ་ནས་སོར་བཞི་ལུས་པ་དང་བཅད་ལ། ཐེ་གུ་གོང་དུ་སྐོ་བ་ལ་བསྟོད་དེ་བཞག་ལ་སྐམ་མོ། །དེའི་འོག་ཏུ་ལྟེ་བ་ལ་རུ་རྟ་ཏིལ་མར་དང་ལྡན་པས་བསྐུའོ། །དེའི་འོག་ཏུ་ཤིང་འོ་མ་ཅན་རྣམས་སམ། ཡང་ན་སྨན་
[292b.2]དྲི་ཞིམ་པོ་རྣམས་ཆུ་དང་བསྐོལ་བ། དྲོ་འཇམ་ཙམ་གྱི་ནང་དུ་གསེར་དང་དངུལ་བསྲེགས་ཏེ་ནང་དུ་སྨྱུགས་ལ་དེས་ལྟེ་བ་བཀྲུའོ། །དེ་ལ་ལག་པ་གཡས་པའི་མཛུབ་མོས་བྱིས་པའི་མཚོག་མའི་སྟེང་དུ་རས་བལ་སྣུམ་ཅན་གྱིས་ལན་གཉིས་ལན་གསུམ་ཅུང་ཞིག་མནན་ཏེ་བཞག་སྟེ། མགོ་བོར་དས་དཀྲིས་
[292b.3]ཏེ་གཞག་གོ། །དེ་ནས་བློ་དང་ཚེ་དང་ཉམས་སྟོབས་སྐྱེད་པའི་ཕྱིར། བི་ཤ་ལ་དང་། བྲཧྨི་དང་། ཤུ་དག་དང་། ཤང་ཀ་པུཥྤ་དང་། དེ་རྣམས་བཏགས་པའི་ཕྱེ་མ་མར་དང་སྦྲང་རྩི་དང་ལྡེ་གུར་བྱས་ཏེ། ཐུན་ཚད་ཧ་རེ་ཎུ་ཀའི་ཚད་ཙམ་བྱའོ། །ཡང་ན་གསེར་དང་། ཤུ་དག་དང་། མུ་མེན་དང་། ཨ་
[292b.4]རུ་ར་དང་། འདི་རྣམས་ཞིབ་ཏུ་བཏགས་པའི་ཕྱེ་མ་མར་དང་སྦྲང་རྩི་དང་སྦྱར་བ་འམ། ཡང་ན་གསེར་དང་སྐྱུ་རུ་རའི་ཕྱེ་མ་སྦྲང་རྩི་དང་སྦྱར་བ་གཏང་ངོ་། །མངལ་གྱི་མི་གཙང་བའི་དྲི་མ་དག་པར་བྱ་བའི་ཕྱིར་ཤུ་དག་དང་རྒྱམ་ཚ་མར་དང་སྦྱར་བས་སློན་བྱའོ། །བྱིས་པ་བཙས་པའི་ལས་དང་ཆོ་ག་ལྷག་
[292b.5]མ་རྣམས་ནི་སྐྱེ་དགུའི་བདག་གིས་བཤད་པ་བཞིན་དུ་བྱས་ན་སྙིང་ལ་གནས་པའི་རྩ་རྣམས་འཕེལ་ཞིང་རྒྱས་པར་འགྱུར་རོ། །དེ་ནས་ཞག་གསུམ་པ་འམ་བཞི་པ་ནས་བུད་མེད་ཀྱི་འོ་མ་འབྱུང་བར་འགྱུར་རོ། །འོ་མ་མི་འབྱུང་བའི་ཞག་དང་པོ་ལ་ནི་མར་དང་སྦྲང་རྩི་དང་སྨན་ཨ་ནན་ཏ་བསྲེས་ཏེ་སྦྱར་བ་ལ་
[292b.6]སྔགས་ཀྱིས་བཏབ་སྟེ་བྱིས་པ་ལ་དུས་གསུམ་དུ་སྦྱིན་ནོ། །ཞག་གཉིས་པ་ལ་ནི་སྨན་ལག་ཤྨ་ན་དང་མར་སྦྱར་བ་སྦྱིན་ནོ། །ཞག་གསུམ་པ་ལ་ནི་ཞུན་མར་ཉི་ཚེ་བླུད་དོ། །ནམ་གྱི་མཚན་སྟོད་ལ་ནི་ཞུན་མར་རམ་མའི་ནུ་ཞོ་ལག་མཐིལ་གང་ཙམ་སྦྱིན་ནོ། །འོ་མ་འམ་མར་སར་ནི་དུས་གཉིས་
[292b.7]སུ་བླུད་དོ། །ནུ་ཞོ་ནི་མ་ཉིད་ཀྱིས་བླུད་ན་ཉམས་སྟོབས་འཕེལ་བར་འགྱུར་རོ། །འོ་མ་མང་བ་དང་བུ་ལ་མཉེས་གཤིན་ཅིང་བརྩེ་བའི་ནུ་མ་བསྣུན་པའི་མ་མ་གཉིས་བྱ་སྟེ། དེ་ཡང་ཡན་ལག་ལྷག་ཆད་མེད་ཅིང་སྨད་པ་མ་ཡིན་པ་དང་། ཚངས་པར་སྤྱོད་པ་དང་རིགས་མཉམ་པ་དང་།
[293a]
[293a.1]ནད་མེད་ཅིང་རང་བཞིན་དུ་གནས་པ་དང་། དར་ལ་བབ་པ་དང་། བདག་ཉིད་ཀྱི་བུ་ཚ་སྔར་སྐྱེས་པ་ཤི་མ་མྱོང་བ་དང་། ལྟོ་འདུན་ཆུང་བ་རྣམས་ལས་བྱ་སྟེ། མ་མ་དེ་གཉིས་ཀྱང་བཟའ་བ་དང་བཏུང་བ་ཕན་པ་བསྟེན་པར་བྱའོ། །དེ་ལ་ནུ་ཞོ་ཉམས་པའི་རྒྱུ་ནི་བཀྲེས་པ་དང་ཁྲོ་
[293a.2]བ་དང་སྨྱུང་བར་འདུག་པ་དང་། ལུས་ཀྱི་རྩོལ་བ་དྲགས་པ་རྣམས་ཡིན་ནོ། །ནུ་ཞོ་སྐྱེད་པའི་ཕྱིར་བུ་རམ་ཆང་མ་གཏོགས་པའི་ཆང་དང་སྲོག་ཆགས་གཤེར་ས་ན་འདུག་པའི་ཤ་ཁུ་དང་གང་ཡང་འོ་མ་འཕེལ་བར་བྱེད་པའི་སྨན་བསྟེན་པར་བྱའོ། །མྱ་ངན་ལ་སོགས་པ་ནི་འོ་མ་བྲི་བར་བྱེད་པའི་རྒྱུ་
[293a.3]ཡིན་ནོ། །ཁ་ཟས་མི་མཐུན་པ་རྣམས་བསྟེན་པ་དང་། བཀྲེས་པར་འདུག་པ་དང་། སེམས་གཞན་དུ་གྱུར་པ་དང་། སྦྲུམ་པའི་དུས་སུ་ལུས་ཟུངས་རྣམས་ཉམས་པར་གྱུར་ཏེ། དེས་ནུ་ཞོ་མ་རུངས་པར་བྱས་ཏེ་བྱིས་པའི་ནད་སྐྱེད་པར་བྱེད་དོ། །བུད་མེད་ནུ་ཞོ་སྐམས་ཤིང་མེད་པར་གྱུར་ན་ནི་
[293a.4]རའམ་བའི་འོ་མ་ཡང་ཡོན་ཏན་དེ་དང་འདྲ་བས་བླུད་པར་བྱའོ། །ཡང་ན་བྲི་ཧ་ཏི་ལ་སོགས་པ་རྩ་བ་ཆུང་ངུ་ལྔ་གོང་མའི་འོ་མ་དང་བསྒྲུབས་པ་འམ། ཡང་ན་ཐི་ར་རྣམ་གཉིས་ལི་ཁ་ར་དང་ལྡན་པ་བླུད་པར་བྱའོ། །ཁྱད་པར་དུ་ཞག་དྲུག་གི་བར་དུ་བསྲུང་བ་དང་གཏོར་མ་ཡང་བྱ་སྟེ། དེ་བཞིན་དུ་
[293a.5]དེའི་ཉེ་དུ་རྣམས་ཀྱིས་ཀྱང་གཉིད་མི་ལོག་པར་དགའ་བ་དང་མཆོག་ཏུ་དགའ་བ་བསྐྱེད་པར་བྱའོ། །དེ་ནས་ཞག་བཅུ་ཚང་བ་དང་། རང་རང་གི་རིགས་དང་མཐུན་པའི་ཆོ་ག་བྱས་ཏེ། བཙས་པའི་མལ་ལས་བླང་བར་བྱའོ། །དེ་ནས་ལྷ་ལ་མཆོད་པ་ལ་སོགས་པ་བྱས་ནས་བྱིས་པའི་མིང་
[293a.6]གདགས་སོ། །ལུས་མདོག་མཛེས་པར་བྱ་བའི་ཕྱིར་ལྡོང་རོས་དང་། བ་བླ་དང་། གི་ཝང་དང་། ཨ་ཀ་རུ་དང་། ཙནྡན་རྣམས་ཀྱི་བྱུག་པས་ལུས་བསྐུའོ། །མིང་བཏགས་པ་ཡང་རྒྱུ་སྐར་དང་། རང་ལྷ་དང་། ཉེ་དུ་རྣམས་གང་ཡང་རུང་བ་ལས་ཆ་དྲས་ཏེའམ། ཡང་ན་ཡི་གེ་མཉམ་
[293a.7]པ་ལས་མིང་གདགས་སོ། །དེ་ནས་གཟུགས་ཀྱི་བྱེ་བྲག་བཤད་པ་ལ་བརྟེན་ནས་ཚེ་བརྟག་པར་བྱའོ། །བྱིས་པ་གསོ་ཤེས་པའི་སྨན་པས་ཤར་རམ། བྱང་དུ་མགོ་བསྟན་པར་བྱའོ། །གོས་བཀྲུས་པ་གཙང་ལ་གཉེར་མ་མེད་ཅིང་འཇམ་པས་བསྐོན་ཏེ་རྩྭའི་མལ་སྟན་ལ་བཞག་སྟེ། གོས་
[293b]
[293b.1]དང་སྟན་རྣམས་ལ་གདོན་འཇོམས་པའི་སྨན་གྱི་བདུག་པས་བདུགས་ཏེ། དེ་ཡང་བྱ་རོག་གི་དུག་དང་། དུར་བྱིད་སྦྱར་བས་བདུགས་ན་རབ་ཏུ་བསྔགས་སོ། །ཤང་ཤང་ཏེའུ་དང་། བསེ་རྭ་གཅིག་ལ་སོགས་པའི་རྭ་ན་ཡོད་པའི་ནོར་བུས་བྱིས་པ་བསྲུང་བའི་ཆེད་དུ་རྟག་ཏུ་གདགས་སོ། །སྨན་བྲཧྨི་
[293b.2]དང་། ཨིན་ཏྲི་ཞེས་བྱ་བ་ཤ་ལ་དང་། ཛི་བ་ཀ་ལ་སོགས་པའི་སྨན་དེ་རྣམས་གང་ལ་དགའ་བའི་སྨན་གྱིས་ལག་པ་གཉིས་དང་མགུལ་པ་དང་། སྤྱི་བོ་རྣམས་སུ་གདགས་སོ། །ཁྱད་པར་དུ་ཤུ་དག་དུས་སུ་རྟག་ཏུ་དྲུང་དུ་བརྟེན་ན་ཚེ་རིང་བ་དང་། ཡིད་གཞུངས་པ་དང་། དྲན་པ་དང་། བདེ་
[293b.3]ལེགས་སུ་བྱེད་ཅིང་གདོན་རྣམས་ལས་སྲུང་བར་བྱེད་དོ། །དེ་ནས་བྱིས་པ་ནད་མེད་ཅིང་ཟླ་བ་དྲུག་གམ་བདུན་ནམ་བརྒྱད་ལོན་པ་དང་དགུན་གྱི་དུས་སུ་ཉིན་ཞག་དགེ་བ་ལ་མ་མའི་སར་བཞག་ནས་དབུགས་དབྱུང་ཞིང་སྤྲོ་བ་སྐྱེད་ཅིང་། རྣ་བ་གཉིས་དབུག་པར་བྱ་སྟེ། སྨན་པས་ཁྱེའུའི་རྣ་བ་གཡས་
[293b.4]པ་ཐོག་མར་ཕུག་ལ། བུ་མོའི་ནི་གཡོན་པ་དང་པོར་དབུག་གོ། །དེ་ཡང་སྨན་པའི་ལག་པ་གཡས་པས་ཁབ་བླངས་ཏེ། ལག་པ་གཡོན་པས་རྣ་ཤལ་བཟུང་ལ་དེའི་དབུས་སུ་མཁུར་ཚོས་དང་ཅུང་ཞིག་ཉེ་བར་ཉི་མའི་ངོས་སུ་བསྟན་ན། ཤ་མ་བཞིན་དུ་ཤིན་དུ་སྲབ་པར་སྣང་བ་དེ་ན་ལྷའི་བུག་
[293b.5]པ་ཞེས་བྱ་བ་ཡོད་དེ། དེར་ལེ་བརྒན་རྩིའི་ཐིག་ལེའི་མཚན་མ་བཏབ་སྟེ། ལག་པ་གཅིག་གིས་དལ་གྱིས་ལན་ཅིག་དབུག་སྟེ་གོང་འོག་དང་ངོས་གཉིས་སུ་མི་ཡོ་བར་བྱའོ། །གལ་ཏེ་ཡོ་བ་ལྟ་ན་ནི་དེ་དག་ཏུ་ཀ་ལི་ཀ་ཞེས་བྱ་བ་དང་། མར་དྷ་ནི་ཞེས་བྱ་བ་དང་། རག་ཀ་ཏ་ཞེས་བྱ་
[293b.6]བའི་རྩ་རྣམས་ཡོད་དོ། །དེ་དག་ཏུ་ཕོག་ན་མདོག་དམར་བ་དང་། ན་བ་དང་། ཚ་བ་དང་། སྐྲང་བ་དང་། ཚ་བ་འུར་འུར་པོར་འདུག་པ་དང་། དྲག་ཏུ་ན་བ་དང་། གཉའ་བ་རེངས་པ་དང་། པ་ཏ་ན་ཀ་ཞེས་བྱ་བའི་རླུང་ནད་དུ་འགྱུར་རོ། །གལ་ཏེ་ནད་དེ་དག་ཏུ་གྱུར་ན་ནི་དེ་དག་གི་བྱེ་བྲག་ཤེས་པར་
[293b.7]བྱས་ནས་མྱུར་དུ་གསོ་བར་བྱའོ། །གནས་མ་ནོར་བར་ཕུག་ན་ནི་ཁྲག་མི་འབྱུང་ལ་ནད་མེད་ཅིང་དམར་བ་ལ་སོགས་པའི་སྐྱོན་ཡང་མེད་དོ། །དབུག་པའི་ཁབ་དེ་ཡང་སྐུད་པས་བཏགས་ལ་མར་གྱིས་བསྐུས་ཏེ་ཕུག་ལ་སྐུད་པ་དྲང་བར་བྱ་སྟེ། དེ་ནས་ཡང་ཏིལ་མར་ཚོས་པའི་རྒྱུན་གྱིས་བུ་གར་བླུགས་
[294a]
[294a.1]སོ། །དེ་ལྟར་རྣ་ཤལ་ཕུག་ཟིན་པའི་འོག་ཏུ་ཕན་པའི་ཟས་སྦྱིན་ནོ། །དེ་ནས་རས་བལ་གྱི་འདའ་བས་རྣ་བ་གཡོན་གྱི་བུ་གར་གླན་ལ་ཞག་གསུམ་གྱི་བར་དུ་གཞག་གོ། །རྨ་འཚོ་བ་དང་རིམ་གྱིས་དལ་བུས་བུ་ག་བསྐྱེད་པར་བྱའོ། །དེ་ནས་བྱིས་པ་དེའི་སོ་སྐྱེད་པ་དང་། རིམ་གྱིས་
[294a.2]ནུ་ཞོ་དེ་ལས་བཟློག་པར་བྱའོ། །འོ་མ་ནི་གོང་དུ་སྨོས་པ་བཞིན་སྦྱར་རོ། །ཁ་ཟས་ཀྱང་ཡང་ཞིང་ཉམས་བརྟ་བ་རྣམས་སྦྱིན་ནོ། །བྱིས་པ་ནུ་ཞོ་མི་འཐུང་བ་ལ་ནི་ཤིང་པི་ཡ་ལའི་རྐང་དང་། མ་དུ་ཀའི་མེ་ཏོག་དང་། སྦྲང་རྩི་དང་། འབྲས་ཡོས་དང་། ཁ་ར་དཀར་བོ་དང་། འདི་རྣམས་ལ་ནན་ཏུར་
[294a.3]བྱས་ཏེ་བྱིས་པ་ལ་བྱིན་ན་ཚིམ་ཞིང་ཉམས་སྟོབས་སྐྱེད་དོ། །བིལ་བ་གཞོན་ནུ་དང་། ཤ་ཁ་ར་དང་། སུག་སྨེལ་དང་། འབྲས་ཡོས་ཀྱི་ཕྱེ་མ་དང་། དེ་རྣམས་ཀྱི་སྐྱོ་མ་བླུད་ན་མེ་དྲོད་སྐྱེད་དོ། །ད་ཏའི་མེ་ཏོག་དང་། ཤ་ཁ་ར་དང་། འབྲས་ཡོས་ཀྱི་ཕྱེ་མ་དང་། སྐྱོ་མ་བླུད་ན་གླད་ཚ་སྐ་
[294a.4]སླ་རན་པར་འབྱུང་ངོ་། །གལ་ཏེ་བྱིས་པ་དེ་ནད་བྱུང་ན་གནོད་པར་མི་འགྱུར་བའི་སྨན་འཇམ་པོ་སྦྱིན་ནོ། །ནད་གཞན་གྱི་བླ་བརྣན་གྱིས་འདྲེས་པ་ལས་ཡང་བཀྲུ་སྨན་གྱིས་ཞི་བར་བྱའོ། །ཇི་ལྟར་བྱིས་པའི་བློ་གཞན་དུ་གྱུར་པ་ན་ཡང་། སྡངས་པར་འགྱུར་བའི་བག་མི་བྱ་སྟེ། གལ་ཏེ་སྡངས་པར་
[294a.5]གྱུར་ན་ནི་གདོན་གྱིས་ཟིན་པའི་རྒྱུར་འགྱུར་རོ། །བྱིས་པ་དེ་གོས་ཀྱི་རླུང་ཡབ་ཀྱིས་གཡབ་པ་དང་། གཞན་གྱིས་བགོམ་ཞིང་རེག་པ་ལས་ཀྱང་བསྲུང་བར་བྱའོ། །བྲ་ཧྨི་དང་། ཡུངས་ཀར་དང་། ཤུ་དག་དང་། ཐལ་ཏྲེས་དང་། རུ་རྟ་དང་། རྒྱམ་ཚ་དང་། པི་པི་ལིང་དང་། འདི་རྣམས་དང་
[294a.6]ཚུལ་བཞིན་བསྐོལ་བའི་སྨན་མར་བླུད་ན། སྐད་གསལ་བ་དང་། ཡིད་གཞུངས་པ་དང་། དྲན་པ་མྱུར་བར་བྱེད་དོ། །དེ་བཞིན་དུ་ཚེ་རིང་བ་དང་། སྡིག་པ་ཞི་བར་བྱེད་པ་དང་། གདོན་འཇོམས་པ་དང་། འབྱུང་པོ་དང་། སྨྱོ་བྱེད་རྣམས་ལས་ཟློག་བར་བྱེད་དོ། །ཤུ་དག་དང་། སོ་མ་ར་ཛ་
[294a.7]དང་། མན་དུ་ཀ་པ་ར་ནི་དང་། ཤང་ཀ་པུཥྤ་དང་། ཉེའུ་ཤིང་དང་། བྲཧྨི་སོ་མ་ཞེས་བྱ་བ་ནི་ནཱ་དང་། སླེ་ཏྲེས་དང་། བྲཧྨི་དང་། འདི་རྣམས་སྲང་རེ་རེ་ཆམ་ཆོམ་བརྡུངས་ཏེ། མར་སྲང་སུམ་ཅུ་རྩ་གཉིས་དང་། འོ་མ་མར་གྱི་བཞི་འགྱུར་དང་། ཚུལ་བཞིན་བསྐོལ་ཏེ་མར་ལུས་པ་ནི་ཡན་
[294b]
[294b.1]ལག་བརྒྱད་པའི་མར་ཞེས་བྱ་སྟེ། དེ་ལས་རན་པར་བླུད་ན་སྐལ་བ་ལྡན་པ་དང་། ཚེ་རིང་བ་དང་། ཚིག་གསལ་བ་དང་། ཡིད་གཞུངས་པ་དང་། དྲན་པ་གསལ་བར་བྱེད་པའི་མཆོག་ཡིན་ནོ། །རའི་འོ་མ་དང་། ཨ་རུ་ར་དང་། ཚ་བ་གསུམ་དང་། བ་ཏ་དང་། ཤུ་དག་དང་། ཤི་ཀྲུ་དང་།
[294b.2]རྒྱམ་ཚ་དང་། དེ་རྣམས་མར་དང་ལྷན་ཅིག་བསྐོལ་ཏེ། མར་ལུས་པ་ནི་དབྱངས་ཅན་ཞེས་བྱ་བའི་མར་ཡིན་ཏེ། དེ་ལས་རན་པར་འཐུངས་ན་སྐད་གསལ་བ་དང་། ཡིད་གཞུངས་པ་དང་། དྲན་པ་མྱུར་བ་དང་། མེ་དྲོད་སྐྱེད་པར་བྱེད་དོ། །ཤུ་དག་དང་། སླེ་ཏྲེས་དང་། ཉེའུ་ཤིང་དང་། ཨ་རུ་ར་
[294b.3]དང་། ཤིང་གི་ནི་དང་། བྱི་དང་ག་དང་། བཅའ་སྒ་དང་། ཨ་པ་མརྒ་དང་། འདི་རྣམས་མར་དང་ལྷན་ཅིག་བསྐོལ་ཏེ་འཐུངས་ན་ཡང་ཕན་ཡོན་གོང་མ་དང་འདྲའོ། །གསེར་དང་། གི་རི་ཀརྞི་ཀ་དང་། ཤུ་དག་དང་། རུ་རྟ་རྣམས་ལྷན་ཅིག་སྦྱར་བ་འམ། ཀྵ་རི་ཀི་དང་། གསེར་ལྷན་ཅིག་
[294b.4]སྦྱར་བ་འམ། གསེར་དང་མད་ཚ་ཨཀྵ་ཞེས་བྱ་བ་གན་ད་དུར་བ་དང་། ཤང་ཀ་པུཥྤ་དང་། དེ་རྣམས་ལྷན་ཅིག་སྦྱར་བའམ། ཡང་ན་གི་རི་ཀརྞི་ཀ་དཀར་པོ་དང་། གསེར་དང་། ཤུ་དག་དང་། དེ་རྣམས་ལྷན་ཅིག་སྦྱར་བ་འམ། སྦྱོར་བ་བཞི་པོ་དེ་དག་གང་ཡང་རུང་བ་སྦྲང་རྩི་དང་། མར་
[294b.5]དང་སྦྱར་བའི་ལྡེ་གུས་བྱིས་པ་དེ་ལོ་གཅིག་གི་བར་དུ་བལྡག་ཏུ་བཅུག་ན་ལུས་ཀྱི་ཉམས་སྟོབས་དང་། མདོག་དང་། བློ་གསལ་བར་བྱེད་པའི་མཆོག་ཡིན་ནོ། །ཤུ་དག་དང་། ཤིང་མངར་དང་། རྒྱམ་ཚ་དང་། ཨ་རུ་ར་དང་། དོང་གྲ་དང་། ཏི་མུ་ས་དང་། རུ་རྟ་དང་། པི་པི་
[294b.6]ལིང་དང་། ཟི་ཟ་དང་། དེ་རྣམས་ཀྱི་ལྡེ་གུ་བྱིན་ན་ཡང་ཚིག་གསལ་བར་བྱེད་བའི་མཆོག་ཡིན་ནོ། །བྱིས་པ་གསོ་བའི་ཆོ་གའི་ལེའུ་དང་པོ་རྫོགས་སོ།། །།དེ་ནས་བྱིས་པའི་ནད་གསོ་བའི་ལེའུ་བཤད་པར་བྱ་སྟེ། དེ་ལ་བྱིས་པ་གསོ་བ་ནི་རྣམ་པ་གསུམ་དུ་
[294b.7]བཤད་དེ། འོ་མ་དང་། ཟས་དང་། དེ་གཉིས་ཀའོ། །དེ་གཉིས་ལ་སྐྱོན་མེད་ན་ནི་ཐ་མལ་པར་གནས་ཤིང་ནད་མེད་པ་ཡིན་ལ་དེ་གཉིས་སྐྱོན་དང་བཅས་ན་ནི་ནད་འབྱུང་བ་ཡིན་ནོ། །འོ་ན་སྐྱོན་མེད་པ་ནི་ཆུའི་ནང་དུ་བཅུག་ན་ཆུ་དང་ལྷན་ཅིག་ཏུ་འགྱུར་བ་ནི་སྐྱོན་མེད་ཅིང་དག་པ་ཡིན་ནོ། །
[295a]
[295a.1]དེ་ལ་མའི་ནུ་ཞོ་རླུང་གིས་མ་རུངས་ན་ནི་འོ་མ་ཆུའི་ནང་དུ་བླུགས་ན་སྟེང་དུ་འབྱུང་ཞིང་རོ་བསྐ་བ་དང་། ལྦུ་བ་དང་བཅས་པ་དང་། རྩུབ་པ་དང་བྱིས་པའི་བཤང་གཅི་སྲ་ཞིང་འགག་པར་བྱེད་དོ། །མཁྲིས་པས་མ་རུངས་པའི་རྟགས་ནི་འོ་མ་བསྲེགས་ན་དྲོ་ཞིང་རོ་སྐྱུར་བའམ། ཚ་
[295a.2]བ་དང་ཆུར་བླུགས་ན་སེར་པོ་ཤར་ཤར་པོ་སྣང་བ་དང་བྱིས་པས་འཐུངས་ན་ལུས་ཚ་བསྐྱེད་དོ། །བད་ཀན་གྱིས་མ་རུངས་པའི་རྟགས་ནི། འོ་མའི་རོ་ལན་ཚྭ་བྲོ་ཞིང་བསྐ་བ་དང་། ཆུར་བླུགས་ན་འོག་ན་འབྱིང་བ་དང་། སྤྱིན་བག་ནལ་ནལ་པོར་འདུག་པ་ཡིན་ནོ། །ནད་གཉིས་འདྲེས་པ་ནི་ལྡན་པ་
[295a.3]ཞེས་བྱའོ། །གསུམ་འདྲེས་པ་ནི་འདུས་པ་ཞེས་བྱའོ། །འོ་མའི་རང་གི་ཉེས་པ་ཇི་ལྟ་བ་བཞིན་བའི་འོ་མ་བླུད་ན་བྱིས་པ་ལ་ཡང་ནད་དེ་དག་སྐྱེད་པར་བྱེད་དོ། །དེ་ལ་བྱིས་པ་ཆུང་ངུ་ན་བའི་མཚན་མ་ནི་ཡང་དང་ཡང་དུ་དྲག་ཏུ་ངུ་བ་དང་། ཡང་ན་བྱིས་པ་རང་ཉིད་ཀྱི་ལག་པས་ལུས་ལ་ལྷག་པར་ཉུག་པ་འམ།
[295a.4]ཡང་ན་གང་དུ་རེག་པར་མི་བཟོད་པ་དེར་ན་བ་ཡིན་ནོ། །གལ་ཏེ་མགོ་བོ་ན་ན་ནི་མིག་འཛུམས་པར་བྱེད་པ་ཡིན་ནོ། །སྙིང་མི་བདེ་ན་ནི་ལྕེ་དང་མཆུ་སོས་གནོན་ཞིང་དབུགས་མི་བདེ་ལ་ཁུ་ཚུར་འཆང་བར་བྱེད་པ་ཡིན་ནོ། །ཁོང་པ་མི་བདེ་ན་བཤང་གཅི་འགག།།སྟོད་དུ་སྐྱུག །ནུ་ཞོ་མི་འདོད། རྒྱུ་མ་ཁྲུ་ལུ་ལུ་
[295a.5]ཟེར། ལྟོ་སྦོ། རོ་སྟོད་སྒུ། གསུས་པ་མཐོ་བར་འདུག་པ་རྣམས་ཡིན་ནོ། །ཆུ་སོ་དང་ཕོ་མཚན་དུ་མི་བདེ་ན་ནི་བཤང་གཅི་འགག། སྡངས་ཤིང་ཕྱོགས་ཀུན་ཏུ་ལྟ་བ་ཡིན་ནོ། །དེ་ལྟར་མི་བདེ་ན་ནུ་ཞོ་བསྣུན་པའི་མ་མ་ལ་ནད་གཞི་ཇི་ལྟ་བ་བཞིན་དུ་གོས་པ་བྱ་སྟེ། རླུང་གི་བདག་ཉིད་ཀྱིས་ནུ་ཞོ་མ་
[295a.6]རུངས་པར་གྱུར་པ་ལ་ནི་རྩ་བ་བཅུ་པ་བསྐོལ་བའི་ཁུ་བ་ཞག་གསུམ་བླུད་དོ། །ཡང་ཙི་ཏྲ་ཀ་དང་། ཤུ་དག་དང་། པ་ཐ་དང་། པུ་ཙེ་ཤེལ་དང་། རུ་རྟ་དང་། ལ་ལ་ཕུད་དང་། ཐང་ཤིང་དང་། ཀོ་ཉོན་ཙེ་དང་། བྲིཤྩི་ཀ་ལ་དང་། པི་པི་ལིང་དང་། བཅའ་སྒ་དང་། དེ་རྣམས་བསྐོལ་བའི་ཁུ་བ་བླུད་
[295a.7]དོ། །དེ་ནས་རླུང་འཇོམས་པའི་སྨན་མར་བླུད་དེ། །བཏུང་བར་ནི་ཆང་གི་དངས་མ་བླུད་དོ། །དེའི་འོག་ཏུ་སྣུམ་དང་ལྡན་པའི་བཀྲུ་སྨན་གཏང་ངོ་། །དེ་ནས་སྨན་མས་གཏོང་བའི་ལས་བྱ་སྟེ། དུགས་ལ་སོགས་པ་རླུང་འཇོམས་པའི་སྨན་ཡང་གཏང་ངོ་། །ར་སྣ་དང་། ཏི་མུ་ས་དང་། ཀོ་ཉོན་ཙེ་དང་།
[295b]
[295b.1]ཐང་ཤིང་དང་དེ་རྣམས་ཕྱེ་མར་བྱས་ཏེ་མར་དང་སྦྱར་བའི་ལྡེ་གུ་བྱས་ཏེ་སྦྱིན་པའམ། ཡང་ན་སྨན་དེ་རྣམས་ཚུལ་བཞིན་བསྐོལ་ཏེ་ཁ་ར་དཀར་པོ་དང་སྦྱར་བ་བླུད་དོ། །མཁྲིས་པས་ནུ་ཞོ་མ་རུངས་པར་གྱུར་པ་ལ་ནི། སླེ་ཏྲེས་དང་། ཉེའུ་ཤིང་དང་། པ་ཏོ་ལ་དང་། ནིམ་པ་དང་། ཙནྡན་དང་། ཐལ་ཏྲེས་
[295b.2]དང་། དེ་རྣམས་བསྐོལ་བའི་ཁུ་བ་མ་མ་དང་བྱིས་པ་གཉི་ག་ལ་བླུད་དོ། །ཡང་ན་འབྲས་བུ་གསུམ་དང་། འབྲས་གང་དང་། ཏིག་ཏ་དང་། པུ་ཙེ་ཤེལ་དང་། ཐལ་ཏྲེས་ལ་སོགས་པའི་སྡེ་ཚན་དང་། པ་ཏོ་ལ་ལ་སོགས་པའི་སྡེ་ཚན་དང་། ཤུག་པའི་སྡེ་ཚན་དང་། སྡེ་ཚན་གྱི་སྦྱོར་བ་དེ་
[295b.3]དག་གང་ཡང་རུང་བ་མར་དང་ལྷན་ཅིག་བསྐོལ་བའི་སྨན་མར་བླུད་ནས་དེའི་འོག་ཏུ་མཁྲིས་པ་ལ་ཕན་པའི་བཀྲུ་སྨན་གཏང་ངོ་། །སྨན་བསིལ་བས་བསྐུ་བ་དང་བྱུག་པ་ལ་སོགས་པ་ཡང་སྦྱར་རོ། །བད་ཀན་གྱིས་ནུ་ཞོ་མ་རུངས་པར་གྱུར་པ་ཡང་ཤིང་མངར་དང་ལྕེ་མྱང་ཚ་དང་ལྡན་པའི་མར་གྱིས་བྱིས་པ་
[295b.4]ལ་བླུད་དོ། །དེའི་འོག་ཏུ་རྒྱམ་ཚ་དང་ཤིང་མངར་དང་། པི་པི་ལིང་རྣམས་སྦྲང་རྩི་དང་སྦྱར་བའི་ལྡེ་གུས་སློན་བྱའོ། །ཡང་ན་པོ་སོན་ཆའི་མེ་ཏོག་གི་ལྡེ་གུས་མའི་ནུ་མ་དང་། བྱིས་པའི་སོ་དང་། མཆུ་ལ་བསྐུས་ན་བྱིས་པ་བདེ་བར་སྐྱུག་པར་འགྱུར་རོ། །མ་ལ་ནི་སྐྱུག་སྨན་དྲག་པོས་སློན་དུ་གཞུག་
[295b.5]གོ། །ལྡན་པའི་ནད་ལ་ནི་གླ་སྒང་ལ་སོགས་པ་བསྐོལ་བ་བླུད་དོ། །དེ་བཞིན་དུ་རྒྱ་སྤོས་དང་། སྲི་ཐཱི་ཀ་དང་། སྒྲོན་ཤིང་དང་། དུག་མོ་ཡུངས་དང་། དེ་རྣམས་བསྐོལ་བ་ཡང་བླུད་དོ། །ཡང་ན་བོང་ང་དཀར་པོ་དང་། གླ་སྒང་དང་། ཤུ་དག་དང་། ཚ་བ་ལྔ་དང་དེ་རྣམས་བསྐོལ་བ་བླུད་དོ། །
[295b.6]ནུ་མའི་ཞོ་ལ་ནད་གཞི་གསུམ་གྱི་མཚན་མ་ནི་མ་ཞུ་བ་བེའུ་སྣབས་འབྱུང་ཞིང་དྲི་ང་ལ་ཆུ་དང་འདྲ་བར་སླན་ཏེར་འབྱུང་བ་དང་། ཕྱི་ས་སྲི་བ་དང་། མར་ཡང་དང་ཡང་རྒྱུན་མི་འཆད་པར་འབྱུང་བ་དང་། ལྦུ་བ་དང་བཅས་ཤིང་ནད་མདོག་སྣ་ཚོགས་སུ་འབྱུང་སྟེ། གཅིན་མདོག་ཀྱང་སེར་
[295b.7]བ་དང་། བསྐ་བར་འབྱུང་བ་དང་། རིམས་ཀྱིས་འདེབས་པ་དང་། ཁ་ཟས་ཡི་གར་མི་འོང་བ་དང་། སྐོམ་དད་ཆེ་བ་དང་། སྐྱུག་བྲོ་བ་དང་། སྒྲེགས་པ་སྐྱུར་པོར་འབྱུང་བ་དང་། བྱ་རྨྱང་བྱེད་པ་དང་། ཡན་ལག་ཆག་པ་སྙམ་བྱེད་པ་དང་། ཡན་ལག་བསྐྱོད་ཅིང་འདེགས་པ་
[296a]
[296a.1]དང་། འཁུན་པ་དང་། ལུས་འདར་བ་དང་། མགོ་འཁོར་བ་དང་། སྣ་དང་། མིག་དང་། གདོང་ཚོས་པ་ལ་སོགས་པའི་ནད་སྐྱེ་བར་འགྱུར་ཏེ། གཞན་ཡང་དེ་དང་འདྲ་བའི་ནད་མང་དུ་འབྱུང་སྟེ། དེའི་མིང་ནི་ནད་ཤིན་དུ་མི་བཟད་པ་ཀྵི་ར་ས་ཀ་ཞེས་བྱ་བ་ཡིན་ནོ། །དེ་ལྟ་བུའི་
[296a.2]ནད་པ་ལ་ནི་མ་བུ་གཉིས་ཀ་ལ་སྐྱུག་སྨན་བྱ་སྟེ། ཐུག་པ་རྐྱང་རྐྱང་པོ་ལ་སོགས་པའི་རིམ་པ་ཡང་སྦྱར་ཏེ། ཤུ་དག་ལ་སོགས་པའི་སྡེ་ཚན་ཡང་སྦྱར་རོ། །ཡང་ན་སེར་པོ་རྣམ་གཉིས་ལ་སོགས་པ་འམ་ཡང་ན་བོང་ང་དཀར་པོ་དང་། པ་ཐ་དང་། པི་པི་ལིང་དང་། པུ་ཙེ་ཤེལ་དང་། གླ་སྒང་དང་དེ་
[296a.3]རྣམས་བསྐོལ་བའམ། ཡང་ན་པ་ཐ་དང་། བཅའ་སྒ་དང་། སླེ་ཏྲེས་དང་། པུ་ཙེ་ཤེལ་དང་། ཏེ་ཛོ་པ་ཏི་དང་། ཐང་ཤིང་དང་། ཐལ་ཏྲེས་དང་། གླ་སྒང་དང་། མུར་བ་དང་། དུག་མོ་ཡུངས་དང་། དེ་རྣམས་བསྐོལ་བའི་ཁུ་བ་བླུད་ན་ཡང་ནུ་ཞོའི་སྐྱོན་སེལ་བའི་མཆོག་ཡིན་ནོ། །དུས་ལ་མཁས་
[296a.4]པའི་སྨན་པས་ནད་གཞི་ཇི་ལྟ་བུའི་རྗེས་སུ་འབྲེལ་པའི་ནད་ཀྱི་གསོ་བ་ལ་ཡང་ཅི་རིགས་པར་བྱའོ། །བྱིས་པ་དེ་ཐོག་མ་སོ་སྐྱེས་པའི་དུས་སུ་ནད་ཐམས་ཅད་སློང་བར་བྱེད་དོ། །ཁྱད་པར་དུ་རིམས་དང་། ཁོང་འཁྲུ་བ་དང་། ལུད་པ་ལུ་བ་དང་། སྐྱུག་པ་དང་། མགོ་ན་བ་དང་། མིག་རྣག་འཛག་པ་
[296a.5]དང་། མིག་མཆུའི་ཤ་སྐྱེས་པ་དང་། མེ་དབལ་ལ་སོགས་པ་སྐྱེ་བར་འགྱུར་ཏེ། ཇི་ལྟར་བྱི་ལ་སྒལ་ཚིགས་བྱེ་བའི་དུས་དང་། རྨ་བྱ་ཅོད་པན་སྐྱེས་པའི་དུས་དང་། བྱིས་པ་སོ་སྐྱེས་པའི་དུས་དེ་ནི་ནད་མ་རུངས་པ་ཐམས་ཅད་སློང་བར་བྱེད་དོ། །སྐྱོན་གྱི་རང་བཞིན་ལས་ནད་ཇི་ལྟར་འབྱུང་བ་དང་། ནད་ཇི་ལྟར་ཤས་
[296a.6]ཆེ་ཞིང་སྟོབས་ཆེ་བ་དང་། དུས་དང་ཡུལ་ལ་སོགས་པ་རྣམས་བརྟགས་ནས་སྨན་པས་སྨན་སྦྱར་བར་བྱའོ། །ནད་གཞི་འཁྲུགས་ཏེ་རིམས་ལ་སོགས་པ་རྣམས་སུ་གྱུར་པ་ནི། སྨན་ཡང་དེ་དག་ཉིད་ཀྱིས་གསོ་བར་བྱ་སྟེ། སྨན་གྱི་ཐུན་ཚད་ཆུང་ཚད་དུ་གཏང་ངོ་། །ལུས་ཆུང་བ་དང་། སྡུག་མ་མྱོང་
[296a.7]བ་དང་། ཟས་ཐམས་ཅད་ལ་བརྟེན་ཏེ་རྟག་ཏུ་འོ་མ་དང་མར་ལས་གོམས་པར་བྱས་པའི་བྱིས་པའི་ལུས་ནི་སྣུམ་པ་ཡིན་ཏེ། དེ་བས་ན་འཕྲལ་སྨན་འཇམ་པོའི་སློན་སྨན་བཏང་སྟེ། དེ་ཡང་ནུ་ཞོ་ངོམས་པར་འཐུང་དུ་བཅུག་ན་སྐྱུག་པར་འགྱུར་རོ། །འོ་མ་དང་ཁ་ཟས་གཉིས་ཀྱིས་འཚོ་བའི་བྱིས་
[296b]
[296b.1]པ་ལ་ནི་སྐྱུག་སྨན་ཐུག་པ་སླ་བ་དང་བསྲེས་པ་བླུད་པ་སྐྱུག་ཏུ་གཞུག་གོ། །ཟས་ཉི་ཚེས་འཚོ་བའི་བྱིས་པ་ལ་ནི་སྐྱུག་སྨན་མར་དང་སྦྱར་བ་གཏང་ངོ་། །གལ་ཏེ་མས་གཏོང་བའི་སྨན་ཟོས་པ་ཡིན་ན་ནི་མས་གཏོང་བའི་བཀྲུ་སྨན་བྱའོ། །སྣ་སྨན་རྔུབ་པའི་སྨན་དང་། སྣའི་བཀྲུ་སྨན་ཡང་བྱའོ། །བཀྲུ་
[296b.2]སྨན་ལ་སོགས་པ་གོང་དུ་བཤད་པ་དེ་དག་མ་མ་ལ་ཡང་སྦྱར་རོ། །མུར་བ་དང་། ཚ་བ་གསུམ་དང་། འབྲས་བུ་གསུམ་དང་། རྒྱ་ཤུག་གི་འབྲས་བུ་དང་། འཛམ་བུའི་ཤུན་པ་དང་། ཐང་ཤིང་དང་། ཡུངས་ཀར་དང་། པ་ཐ་དང་། དེ་རྣམས་ཀྱི་ཕྱེ་མ་སྦྲང་རྩི་དང་ལྡེ་གུར་བྱས་ཏེ་བལྡག་ཏུ་
[296b.3]བཅུག་ན་ནུ་ཞོའི་སྐྱོན་སེལ་བའི་མཆོག་ཡིན་ནོ། །པི་པི་ལིང་དང་། དན་ད་ཀའི་མེ་ཏོག་དང་། སྐྱུ་རུ་རའི་འབྲས་བུ་དང་། དེ་རྣམས་ཀྱི་ཕྱེ་མ་དང་། སྦྲང་རྩི་དང་སྦྱར་བས་སོ་རྩི་བསྐུས་པའམ། ཡང་ན་བྱ་ལཱ་བི་དང་། སྲེག་པའི་ཤ་སྐམ་ཞིབ་ཏུ་བཏགས་པ་སྦྲང་རྩི་དང་སྦྱར་བས་སོ་རྩི་བསྐུས་ན་
[296b.4]བྱིས་པའི་སོ་རྩ་མྱུར་དུ་བདེ་བར་སྐྱེའོ། །ཤུ་དག་དང་། བྲི་ཧ་ཏི་རྣམ་གཉིས་དང་། པ་ཐ་དང་། ཚ་བ་གསུམ་དང་། བོང་ང་དཀར་པོ་དང་། གླ་སྒང་དང་། སྨན་མངར་བའི་སྡེ་ཚན་དང་། དེ་རྣམས་མར་དང་ལྷན་ཅིག་བསྐོལ་ཏེ་མར་ལུས་པས་སོ་རྩ་བསྐུས་ན་སོ་བདེ་བར་སྐྱེད་དོ། །སྐྱེར་པ་
[296b.5]དང་། སྲེ་ཡ་ནི་དང་། བྲི་ཧ་ཏི་དང་། ཀྲྀཥྞ་པརྞི་དང་། ཤུ་ཏི་དང་། དེ་རྣམས་སྦྲང་རྩི་དང་མར་དང་ལྷན་ཅིག་ལྡེ་གུར་བྱས་ཏེ་བལྡག་ཏུ་བཅུག་ན། ཕོ་བའི་མེ་དྲོད་སྐྱེད་པའི་མཆོག་ཡིན་ཏེ། རླུང་ནད་ལུགས་བཞིན་འབྱུང་ཞིང་ཚད་པར་འཁྲུ་བ་དང་། རིམས་དང་། དབུགས་མི་བདེ་བ་དང་།
[296b.6]མིག་སེར་དང་། སྐྱ་རྦབ་དང་། ལུད་པ་ལས་རྒྱལ་བར་བྱེད་དོ། །ཁྱད་པར་དུ་བྱིས་པའི་ནད་ཐམས་ཅད་ལ་བསྔགས་ཏེ། ཉམས་སྟོབས་དང་མདོག་གསལ་བར་བྱེད་དོ། །བཙོད་དང་། ད་ཏ་ཀི་དང་། སེང་ཕྲོམ་དང་། ཀུ་ཊན་ན་ཊ་དང་། མུངྒ་པརྞི་དང་། བ་ཤ་པརྞི་དང་།
[296b.7]མུངྒའི་འབྲས་བུ་དང་། བིལ་བ་གཞོན་ནུ་དང་། རས་བལ་གྱི་ས་བོན་དང་། འདི་རྣམས་ཆུ་དང་ལྷན་ཅིག་བསྐོལ་བའི་ཁུ་བའི་ནང་དུ་མར་དང་ཐལ་སྨན་གྱི་ཁུ་བ་དང་། ཞོ་ག་ཆུ་དང་ལྡན་པར་ལྷན་ཅིག་བསྐོལ་ཏེ་མར་ལུས་པ་ལས་རན་པར་བླུད་ན། སོ་ལས་གྱུར་པའི་ནད་མྱུར་
[297a]
[297a.1]དུ་འཇིག་པར་བྱེད་དོ། །དེ་བཞིན་དུ་ནད་རྣམ་པ་སྣ་ཚོགས་པ་ཡང་སེལ་བར་བྱེད་དོ། །ཞེས་དྲང་སྲོང་འདྲོབ་སྐྱོང་གིས་བཤད་དོ། །སོ་ལས་གྱུར་པའི་བྱིས་པའི་ནད་ལ་ནི་ཧ་ཅང་གསོ་བ་མི་བྱ་སྟེ། སོ་སྐྱེས་པའི་ནད་ནི་རང་ཉིད་ཞི་བར་འགྱུར་རོ། །བྱིས་པ་དེ་ཉིན་པར་ལྷག་པར་
[297a.2]གཉིད་ལོག་པ་དང་། ཆུ་གྲང་འཐུངས་པ་དང་། བད་ཀན་སྐྱེས་པའི་ནུ་ཞོ་བསྟེན་པའི་རྒྱུས་བཅུད་དངས་མ་རྒྱུ་བའི་སྦུ་གུ་རྣམས་བད་ཀན་གྱིས་འགགས་ཏེ། དེ་ལས་ཁ་ཟས་ཡི་གར་མི་འོང་བ་དང་། ཆམ་པས་འདེབས་ཤིང་སྣ་ཆུ་འཛག་པ་དང་། རིམས་ཀྱིས་འདེབས་པ་དང་། ལུད་པ་
[297a.3]རྣམས་སྐྱེ་བར་འགྱུར་ཏེ། དེས་ན་བྱིས་པའི་ལུས་སྐམ་པར་འགྱུར་ཞིང་ཟད་པ་དང་། ལུས་སྣུམ་ཞིང་མིག་དང་གདོང་དཀར་པོར་འགྱུར་ཏེ། དེ་ལ་རྒྱམ་ཚ་དང་། ཚ་བ་གསུམ་དང་། ཤ་རང་ག་ཤ་དང་། པ་ཐ་དང་། གི་རི་གདམ་པ་ཀ་དང་། དེ་རྣམས་ཀྱི་ཕྱེ་མ་མར་དང་སྦྲང་རྩི་དང་སྦྱར་བས་ཁ་
[297a.4]ཟས་ཡི་གར་མི་འོང་བ་དང་། ལུས་སྐེམ་པ་ལ་སྦྱར་རོ། །ཤིང་ཨ་ཤྭ་ཀ་དང་། པུ་ཙེ་ཤེལ་དང་། ཚ་བ་རྣམ་ལྔ་དང་དེ་རྣམས་ཀྱི་ཕྱེ་མའམ། ཡང་ན་རྒྱ་ཤུག་དང་། ད་ཏ་ཀི་དང་། སྐྱུ་རུ་ར་དང་། དེ་རྣམས་ཀྱི་ཕྱེ་མ་དང་། ཕྱེ་མ་དེ་གཉིས་གང་ཡང་རུང་བ་མར་དང་སྦྱར་བ་བྱིན་ན་ཕན་ནོ། །
[297a.5]སྟི་ར་དང་། ཤུ་དག་དང་། བྲི་ཧ་ཏི་རྣམ་གཉིས་དང་། བུ་ཚང་རྡོ་དང་། པི་པི་ལིང་དང་། རྒྱ་སྤོས་དང་། ལྕང་མ་དང་། ཨུཏྤ་ལ་དང་། བ་སྤྲུ་བ་དང་། ག་བྲའི་རྩ་བ་དང་། གླ་སྒང་དང་། དེ་རྣམས་ཞོ་གཉིས་དང་། མར་སྲང་བཅུ་དྲུག་དང་། ལྷན་ཅིག་བསྐོལ་ཏེ་བསྒྲུབས་པ་ལས་རན་
[297a.6]པར་བླུད་ན་རྒྱུ་སྲང་དག་པར་བྱེད་པའི་མཆོག་ཡིན་ནོ། །ཡང་ན་བྲི་ཧ་ཏི་དང་། ཨ་ཤྭ་གན་དྷ་དང་། བྱེའུ་རུག་པ་དང་། པི་པི་ལིང་དང་། དེ་རྣམས་ཀྱི་ཕྱེ་མའི་སྦྱོར་བའི་སྨན་བསྐོལ་བའི་ནང་དུ་བཏབ་སྟེ། མར་དང་ཡང་བསྐོལ་ལ་མར་ལུས་པ་ལས་རན་པར་བླུད་ན་ཡང་ཕན་ཡོན་གོང་མ་དང་འདྲའོ། །
[297a.7]ཤིང་མངར་དང་། པི་པི་ལིང་དང་། སེང་ཕྲོམ་དང་། དུག་མོ་ཡུངས་དང་། ཨུཏྤ་ལ་དང་། ཙནྡན་དང་། བལ་བུ་དང་། ཐལ་ཏྲེས་རྣམ་གཉིས་དང་དེ་རྣམས་མར་དང་ཚུལ་བཞིན་བསྐོལ་ཏེ་མར་ལུས་བ་ལས་རན་པར་འཐུངས་ན་ལུས་སྐེམ་པ་ལས་རྒྱལ་བར་བྱེད་དོ། །བུ་རམ་ཤིང་དང་
[297b]
[297b.1]ཆུ་ནས་སྐྱེས་པའི་ཤིང་མངར་དང་། ག་བྲའི་རྩ་བ་དང་། པི་པི་ལིང་དང་། ཐང་ཤིང་དང་། ཨ་ཤྭ་གན་དྷ་དང་། རམ་ཉེ་བ་རྣམ་གཉིས་དང་། ར་སྣ་དང་། ཟངས་རྩི་བ་དང་། ཛི་བ་ཀ་དང་། འདམ་པ་གཉིས་དང་། བྱི་དང་ག་དང་། དེ་རྣམས་ཆམ་ཆོམ་བརྡུངས་ཏེ་མར་དང་རི་བོང་གི་མགོ་བོ་བསྐོལ་
[297b.2]བའི་ཁུ་བ་དང་། ཚུལ་བཞིན་བསྐོལ་ཏེ་མར་ལུས་པ་ལས་རན་པར་འཐུངས་ན། ལུས་སྐེམ་པ་ལས་འཕེལ་ཞིང་བརྟས་པར་བྱེད་པའི་མཆོག་ཡིན་ནོ། །ཤུ་དག་དང་། སྐྱུ་རུ་ར་དང་། རྒྱ་སྤོས་དང་། ཨ་རུ་ར་དང་། ཙ་རོང་དང་དེ་རྣམས་ར་ཐུག་གི་གཅིན་དང་ཆང་དང་། འབྲུ་མར་དང་དེ་རྣམས་
[297b.3]ལྷན་ཅིག་བསྐོལ་བའི་མར་གྱིས་བསྐུས་ན་ཕན་ནོ། །རྒྱ་སྐྱེགས་ཀྱི་ཁུ་བ་བྲེ་གང་དང་། དེ་དང་མཉམ་པའི་ཏིལ་མར་དང་། དེའི་བཞི་འགྱུར་གྱི་ཞོ་ག་ཆུ་དང་། ཨ་ཤྭ་གན་དྷ་དང་། སྐྱེར་པ་དང་། ཐང་ཤིང་དང་། རུ་རྟ་དང་། གླ་སྒང་དང་། ཙནྡན་དཀར་པོ་དང་། མུར་བ་དང་། པུ་ཙེ་ཤེལ་
[297b.4]དང་། ཤུ་ཏི་དང་། ར་སྣ་དང་། ཤིང་མངར་དང་། དེ་རྣམས་ཆ་མཉམ་སྟེ་ཆམ་ཆོམ་བརྡུངས་པ་དང་ལྷན་ཅིག་བསྐོལ་ཏེ་ཏིལ་མར་ལུས་པ་ནི་རྒྱ་སྐྱེགས་ལ་སོགས་པའི་ཏིལ་མར་ཞེས་བྱ་སྟེ། དེས་བསྐུ་བྱུག་བྱས་ན་ཉམས་སྟོབས་དང་། རིམས་དང་། གློ་གཅོང་ཟད་བྱེད་དང་། སྨྱོ་བྱེད་དང་།
[297b.5]དབུགས་མི་བདེ་བ་དང་། བརྗེད་བྱེད་དང་། རླུང་སེལ་བར་བྱེད་དེ། གནོད་སྦྱིན་དང་། སྲིན་པོ་དང་། འབྱུང་པོ་རྣམས་འཇོམས་ཏེ་བུད་མེད་སྦྲུམ་མ་ལ་ཡང་བསྔགས་སོ། །བོང་ང་དཀར་པོ་དང་། ཀར་ཏ་སྲིང་གི་དང་། པི་པི་ལིང་དང་། དེ་རྣམས་ཀྱི་ཕྱེ་མ་སྦྲང་རྩི་དང་ལྡེ་གུར་
[297b.6]བྱས་ཏེ་བལྡག་གོ། །བོང་ང་དཀར་པོ་སྦྲང་རྩི་དང་སྦྱར་བ་གཅིག་པུས་ཀྱང་ལུད་པ་དང་། རིམས་དང་། སྐྱུག་བྲོ་བ་དང་། བླ་བརྣན་གྱི་ནད་རྣམས་ལ་ཕན་ནོ། །བྱིས་པ་གང་དུ་ཞོ་འཐུངས་པ་ལ་ཡང་དང་ཡང་སློན་པ་ལ་ནི་བྲི་ཧ་ཏི་རྣམ་གཉིས་ཀྱི་འབྲས་བུའི་ཁུ་བའམ། ཚ་བ་རྣམ་ལྔའི་ཕྱེ་མ་དང་། མར་
[297b.7]དང་སྦྲང་རྩི་དེ་རྣམས་ལྡེ་གུར་བྱས་ཏེ་སྦྱིན་ནོ། །པི་པི་ལིང་དང་། ལན་ཚྭ་རྣམ་ལྔ་དང་། བྱི་དང་ག་དང་། མན་དར་ཞེས་བྱ་བ་ན་རི་བྷ་ཏྲ་ཀ་དང་དེ་རྣམས་མར་དང་སྦྲང་རྩི་དང་སྦྱར་བའི་ལྡེ་གུའམ། ཡང་ན་ཚ་བ་གསུམ་དང་། སྲོག་ཆགས་ཤ་ལ་ལྱ་ཀ་དང་། གོ་ད་དང་། ཤྭ་བྱིད་དང་། རྨ་བྱ་དང་དེ་རྣམས་
[298a]
[298a.1]གང་རྙེད་པ་བསྲེགས་ཏེ་སྣག་ཚར་བྱས་པ་ལས་མར་དང་སྦྲང་རྩི་དང་སྦྱར་བ་འམ། ཡང་ན་སེང་ལྡེང་དང་ཀ་གུ་བ་དང་། བལ་བུ་དང་། རུ་རྟ་དང་། ཙནྡན་དཀར་པོ་དང་། དེ་རྣམས་ཀྱི་ཕྱེ་མ་འོ་མ་དང་མར་དང་ལྷན་ཅིག་བསྐོལ་ཏེ། མར་ལུས་པ་འཐུངས་ན་བྱིས་པའི་ནད་སྐྱུག་པ་སེལ་བར་
[298a.2]བྱེད་དོ། །གལ་ཏེ་བྱིས་པ་དེ་མའི་ཁོང་ནས་སོ་སྐྱེས་པ་བྱུང་ངམ་ཡ་སོ་དང་པོ་སྐྱེས་པ་བྱུང་ན་མི་དགེ་བ་ཡིན་ཏེ། དེ་ལ་ནི་བྲམ་ཟེ་ལས་ཞི་བའི་ཆོ་ག་བྱའོ། །བྱིས་པའི་བད་ཀན་འཁྲུགས་ཏེ་རྐན་ལས་ཤ་མཛེར་འབྱུང་ཞིང་སྐྲང་ཞིང་འོག་ཏུ་འབབ་པར་གྱུར་ན། ནུ་ཞོ་མི་འདོད་ཅིང་། གཅིན་སྲི་བ་དང་།
[298a.3]ལྟོ་སྦོ་བ་དང་། ཁོང་འཁྲུགས་པ་དང་། སྐོམ་དད་ཆེ་བ་དང་། ཁ་དང་། ལྐོག་མ་དང་། མིག་ན་བ་དང་། གཉའ་བ་འདེགས་མི་ནུས་པ་དང་། སྐྱུག་པ་ཡིན་ཏེ་དེ་ལ་ནི་ནས་ཚིག་འཁུས་པའི་ཐལ་བ་དང་། སྦྲང་རྩི་དང་སྦྱར་ཏེ་སྐྲངས་པར་བསྐུ་ཞིང་འབབ་པ་བཏེག་པར་བྱའོ། །རྐན་བསྐམས་པ་ལ་ནི་
[298a.4]པི་པི་ལིང་དང་། བཅའ་སྒ་དང་། བའི་གཅིན་ཁུ་དང་། རྒྱམ་ཚ་དང་དེ་རྣམས་ལྷན་ཅིག་སྦྱར་བ་འམ། ཡང་ན་བཅའ་སྒ་དང་། སྐྱེར་པ་དང་། བྲིང་ག་ར་ཛ་དང་། ནྱ་གྲོ་དྷའི་ལོ་མ་དང་དེ་རྣམས་ཀྱི་ཕྱེ་མ་དོག་ལེའི་ནང་དུ་བ་ལང་གི་ལྕི་བའི་ཁུ་བ་དང་བསྲེས་པ་བླུགས་ལ་བསྲེས་ཏེ། དེས་ནྱ་གྲོ་
[298a.5]དྷའི་ལོ་མ་དང་བསྒོས་ཏེ་སྤྱི་བོའི་སྟེང་དུ་བཀབ་ལ་བཅིངས་ཏེ་གཞག་གོ། །དོག་ལེའི་ནང་དུ་བ་ལང་གི་ལྕི་ཁུ་དང་སྨན་མར་སྦྱར་བས་དར་ལ་བསྒོས་ཏེ་རྐན་དང་ཁ་ལ་བསྐུ་ཞིང་གླན་པར་བྱའོ། །ཨ་རུ་ར་དང་། ཤུ་དག་དང་། རུ་རྟ་དང་། དེ་རྣམས་ཀྱི་ཕྱེ་མ་སྦྲང་རྩི་དང་བཅས་པ། ནུ་ཞོ་
[298a.6]དང་བཅས་པ་ལྷན་ཅིག་བྱིས་པ་ལ་བླུད་ན་རྐན་འབབ་སྟེ་སྐྲངས་ཤིང་ཤ་མཛེར་འབྱུང་བ་ལས་གྲོལ་བར་བྱེད་དོ། །བྱིས་པའི་ལུས་དྲི་མས་ཡོགས་པ་འམ། ལུས་རབ་ཏུ་རྔུལ་བའི་དབང་གིས་གཞང་གི་ནང་དུ་ཁྲག་དང་བད་ཀན་ལས་གྱུར་པའི་རྨ་ཟངས་མའི་མདོག་ལྟ་བུ་ཤིན་དུ་གཡའ་བ་དང་བཅས་པ་
[298a.7]འབྱུང་སྟེ། དེའི་རྒྱུས་བླ་བརྣན་གཞན་གྱི་ནད་མང་དུ་འབྱུང་བར་འགྱུར་ཏེ། དེ་ལ་ཁ་ཅིག་ན་རེ་མ་ཏྲི་ཛ་ཞེས་བྱ་བའི་བྱིས་པའི་གདོན་ཡིན་ནོ། །ཞེས་སྨྲའོ། །གཞན་དག་ནི་སྲུལ་པོའི་གདོན་ཡིན་ནོ་ཞེས་ཀྱང་ཟེར་རོ། །བྱིས་པའི་རྒྱབ་དང་། བྲང་དང་། གཞང་དང་རྐེད་པར་གོང་
[298b]
[298b.1]མའི་ནད་དེ་འབྱུང་བ་ཡོད་དེ། དེ་ནི་མིང་མེད་ཅིང་སྨད་པ་ཡིན་ནོ་ཞེས་ཁ་ཅིག་སྨྲ་སྟེ་དེ་ལྟ་བུའི་ནད་ལ་ནི་སྐྱུ་རུ་ར་དང་། འོ་མ་དང་སྦྱར་བས་བཀྲུས་ལ་དག་པར་བྱའོ། །དེ་བཞིན་དུ་མཁྲིས་པ་དང་བད་ཀན་འཇོམས་པའི་སྨན་གྱིས་ཡང་དག་པར་བྱའོ། །ཡང་ན་ཙནྡན་དང་ཁ་ར་དཀར་པོ་དང་བཅས་
[298b.2]པའི་ཆུ་གྲང་མོས་ཁོང་པ་ནས་བཏུང་བར་བླུད་དོ། །སྐྱེར་ཁཎྜ་དང་སྦྲང་རྩི་སྦྱར་བས་རྨ་ལ་བྱུག་གོ། །བི་ད་རི་དང་འབྲས་བུ་གསུམ་དང་། རྒྱ་ཤུག་དང་། ཤིང་པླག་ཤ་བསྐོལ་བའི་ཁུ་བས་བླུགས་པར་བྱའོ། །ནག་ཚུར་དང་། གིའུ་ཝང་དང་། སྤངས་མ་དང་། ལྡོང་རོས་དང་། བ་བླ་
[298b.3]དང་། སྐྱེར་ཁཎྜ་དང་། དེ་རྣམས་བཏགས་པའི་ཕྱེ་མས་རྨ་ལ་གདབ་པ་འམ། ཡང་སྨན་ཉིད་སྐྱུར་དང་བཏགས་པའི་ལྡེ་གུས་བསྐུ་བར་བྱའོ། །ཡང་ན་ཤིང་མངར་དང་། དུང་དང་། སྟད་ཟིལ་ཞིབ་ཏུ་བཏགས་པའམ། ཡང་ན་ཐལ་ཏྲེས་དང་། དུང་གི་སྙིང་པོ་དང་དེ་གཉིས་ཀྱི་ཕྱེ་མའམ།
[298b.4]ཡང་ན་ཨ་ས་ནའི་ཤུན་ཕྲགས་ཞིབ་ཏུ་བཏགས་པའི་ཕྱེ་མའམ། སྦྱོར་བ་དེ་དག་གང་ཡང་རུང་བ་རྨ་ལ་གདབ་བོ། །གང་དུ་དམར་ཞིང་སྐྲང་བའི་ཤས་ཆེ་བ་དེར་ནི་སྲིན་བུ་པད་པས་ཁྲག་འཇིབ་ཏུ་གཞུག་གོ། །གཞང་གི་ནང་དུ་བྱུང་བའི་སྨད་པའི་ནད་ཀུ་ཊ་ཀ་ཞེས་བྱ་བ་དེ་ལ་ནི་མཁྲིས་པའི་རྨ་གསོ་བའི་སྨན་
[298b.5]ཐམས་ཅད་རབ་ཏུ་བསྔགས་སོ། །པ་ཐ་དང་། བྱི་དང་ག་དང་། སེར་པོ་རྣམ་གཉིས་དང་། གླ་སྒང་དང་། ག་བྲའི་རྩ་བ་དང་། བ་སྤྲུ་བའི་རྩ་བ་དང་། བིལ་བ་དང་། ཚ་བ་གསུམ་དང་། བྲི་ལྕི་ཀ་ལི་དང་། དེ་རྣམས་མར་དང་ལྷན་ཅིག་བསྐོལ་ཏེ་ལྡེ་གུར་བྱས་ལ་ཟོས་ན་བྱིས་པའི་ནད་མ་
[298b.6]ཏྲི་ཛ་ཞེས་བྱ་བ་དང་། ས་ཟོས་ཏེ་ནད་དུ་གྱུར་པ་ལས་གྲོལ་བར་བྱེད་དོ། །ནད་ལ་ཕན་པའི་སྨན་གང་ཡང་རུང་ནུ་མ་ལ་བྱུགས་ཏེ་བྱིས་པས་འཐུང་དུ་བཅུག་ན་ནད་ལས་རྒྱལ་བར་བྱེད་དོ། །དེ་ནས་ཅུང་ཟད་ན་བཀྲུ་བར་བྱའོ། །བྱིས་པའི་ནད་གསོ་བའི་ལེའུ་སྟེ་གཉིས་པ་རྫོགས་སོ།། །།
[298b.7]དེ་ནས་བྱིས་པ་གདོན་གྱིས་ཟིན་པ་གསོ་བའི་ལེའུ་བཤད་པར་བྱ་སྟེ། སྔོན་ལྷ་ཆེན་པོ་མ་ཧཱ་དེ་བས་རང་གི་བུ་གཞོན་ནུ་གདོང་དྲུག་བསྲུང་བར་བྱ་བའི་ཆེད་དུ་སྐྱེས་པའི་གཟུགས་ཅན་ལྔ་དང་། བུད་མེད་ཀྱི་གཟུགས་ཅན་བདུན་ཏེ་དེ་ལྟར་གདོན་གྱི་ལུས་བཅུ་གཉིས་སྤྲུལ་པར་གྱུར་ཏོ། །དེ་ལ་སྐྱེས་བའི་
[299a]
[299a.1]གདོན་རྣམ་པ་ལྔ་ནི། སྐེམ་བྱེད་ཀྱི་གདོན་དང་། བྱི་ཤ་ཀ་ཞེས་བྱ་བ་དང་། ལུག་མགོ་ཅན་གྱི་གདོན་དང་། ཁྱིའི་གདོན་དང་། ཡི་དྭགས་ཀྱི་གདོན་ནི་ལྔ་པོ་དེ་དག་གོ། །བུད་མེད་ཀྱི་གཟུགས་ཅན་གྱི་གདོན་ནི་བྱའི་གདོན་དང་། སྲུལ་པོའི་གདོན་དང་། སྲུལ་པོ་བསིལ་བྱེད་ཀྱི་གདོན་
[299a.2]དང་། སྲུལ་པོ་མཐོང་བྱེད་ཅེས་བྱ་བའི་གདོན་དང་། གདོང་འཁུར་བ་ལྟ་བུའི་གདོན་དང་། ནམ་གྲུའི་གདོན་དང་། ནམ་གྲུ་སྐེམ་པའི་གདོན་དང་། བདུན་པོ་དེ་དག་གོ། །གདོན་དེ་རྣམས་ཀྱིས་ཐོག་མར་ཟིན་པའི་སྤྱིའི་རྟགས་ནི་རྟག་ཏུ་ངུ་བ་དང་། རིམས་ཀྱིས་འདེབས་པ་དང་། སྔང་བ་དང་། གླལ་བ་དང་། སྨིན་
[299a.3]མ་འདེགས་པ་དང་། དམན་པར་འདུག་བ་དང་། ཁ་ནས་ལྦུ་བ་འཛག་པ་དང་། གྱེན་དུ་ལྟ་བ་དང་། མཆུ་ལ་སོས་འདེབས་པ་དང་། མཚན་མོ་གཉིད་མི་ལོག་ཅིང་ངུ་བ་དང་། འཁུན་པ་དང་། ནུ་ཞོ་མི་འདོད་པ་དང་། སྐད་འགྱུར་བ་དང་། རང་གི་མ་མའི་ལུས་ལ་གློ་བུར་སེན་མོས་འབྲད་
[299a.4]པ་རྣམས་ཏེ་དེ་དག་ནི་གདོན་སྤྱིའི་མཚན་མ་ཡིན་ནོ། །དེ་ལ་སྐེམ་བྱེད་ཀྱི་གདོན་གྱིས་ཟིན་བའི་རྟགས་ནི་མིག་ཡ་གཅིག་མཆི་མ་འཛག་ཅིང་ཡང་དང་ཡང་མགོ་སྤྲུགས་པ་དང་། ལུས་ཀྱི་གཞོགས་ཕྱེད་ཉམས་པ་དང་། ལུས་ཀྱི་ཁོང་རེངས་པ་དང་། རྔུལ་བ་དང་། གཉའ་བ་མཐོན་པོར་
[299a.5]འདེགས་པ་དང་། སོ་འཁྲིགས་པ་དང་། ནུ་ཞོ་མི་འདོད་པ་དང་། སྔང་བཞིན་དུ་ངུ་བ་དང་། སྐད་འགགས་པ་དང་། ཁ་ཡོ་བར་འགྱུར་བ་དང་། ཁ་ཆུ་འཛག་པ་དང་། ཤས་ཆེར་བར་སྣང་ལ་ཁ་ལྟ་བ་དང་། ཁྲག་དང་ཞག་གི་དྲི་བྲོ་བ་དང་། རྟག་ཏུ་སྐྱོ་ཞིང་ཡིད་མི་བདེ་བ་དང་།
[299a.6]བྱིས་པ་དེ་ཡང་དང་ཡང་ཁུ་ཚུར་འཆང་བ་དང་། མིག་དང་ཟ་འགྲམ་དང་། སྨིན་མ་ཡ་གཅིག་འགུལ་བ་དང་མིག་གཉིས་ཀ་དམར་བ་རྣམས་ཡིན་ཏེ། དེས་ཟིན་ན་ནི་ངེས་པར་ལུས་ཉམས་པའམ་འཆི་བར་འགྱུར་རོ། །དེ་ལ་བྱི་ཤ་ཀའི་གདོན་གྱིས་ཟིན་པའི་རྟགས་ནི་འདུ་ཤེས་ཉམས་པ་དང་།
[299a.7]སྐྲ་ཡང་དང་ཡང་འབལ་བ་དང་། མགོ་འདུད་ཅིང་གཉའ་བ་གུག་པ་དང་། གླལ་ཞིང་རྐྱོང་བར་བྱེད་པ་དང་། བཤང་གཅི་འབྱུང་བ་དང་། དབུ་བས་སློན་པ་དང་། ནམ་མཁའ་ལ་ལྟ་བ་དང་། ལག་པ་དང་། སྨིན་མ་དང་རྐང་པ་རྣམས་ཀྱིས་གར་བྱེད་པ་དང་། རང་གི་ལྕེ་དང་ནུ་མ་ལ་སོས་འདེབས་
[299b]
[299b.1]པ་དང་། རིམས་དྲག་པོས་འདེབས་པ་དང་། མཚན་མོ་གཉིད་མི་འོང་བ་དང་། རྣག་དང་ཁྲག་གི་དྲི་བྲོ་བ་རྣམས་ཡིན་ནོ། །དེ་ལ་ལུག་མགོ་ཅན་གྱི་གདོན་གྱིས་ཟིན་པའི་རྟགས་ནི། སྦོ་བ་དང་། ལག་པ་དང་རྐང་པ་གཉིས་འགུལ་བ་དང་། ལྦུ་བ་སྐྱུག་པ་དང་། སྐོམ་དད་ཆེ་བ་དང་། ཁུ་ཚུར་འཆའ་བ་དང་།
[299b.2]སྐད་གསང་དམའ་བ་དང་། མདོག་འགྱུར་བ་དང་། འཁུན་པ་དང་། ཚད་པ་བད་ཀན་དུ་འཁྲུ་བ་དང་། སྐྱུག་པ་དང་། ལུད་པ་ལུ་བ་དང་། སྐྱིགས་བུ་འབྱུང་བ་དང་། ནུབ་མོ་གཉིད་མི་ལོག་པ་དང་། མཆུ་ལ་སོས་གནོན་པ་དང་། ལུས་འཁུམས་པ་དང་། ཁོང་རེངས་པ་དང་། ར་ཐུག་གི་དྲི་བྲོ་བ་དང་།
[299b.3]བར་སྣང་ལ་ལྟ་ཞིང་དགོད་པ་དང་། རྐང་ལག་རྐྱོང་བ་དང་། རིམས་ཀྱིས་འདེབས་པ་དང་། བརྒྱལ་བ་དང་། མིག་ཡ་གཅིག་སྐྲང་བ་ལ་སོགས་པའི་ནད་རྣམས་དང་ལྡན་པ་ཡིན་ནོ། །ཁྱིའི་གདོན་གྱིས་ཟིན་པའི་རྟགས་ནི་ལུས་འདར་བ་དང་། བ་སྤུ་ལངས་པ་དང་། ལུས་རྔུལ་བ་དང་། མིག་འཛུམས་
[299b.4]པ་དང་། ལྕེ་ཕྱིར་འབྱིན་ཅིང་སོས་གནོན་པ་དང་། སྐད་འཛེར་བ་དང་། སྐྱུག་པ་དང་། བཤང་བའི་དྲི་བྲོ་བ་དང་། ཁྱི་བཞིན་དུ་ཟུག་པ་རྣམས་ཡིན་ནོ། །དེ་ལ་ཡི་དགས་ཀྱི་གདོན་གྱིས་ཟིན་པའི་རྟགས་ནི་བ་སྤུ་ལྡང་བ་དང་། ཡང་དང་ཡང་ལྡང་བ་དང་། བབ་བབ་དུ་ངུ་ཞིང་ལུས་ཚ་བ་དང་། ལུད་པ་ལུ་བ་
[299b.5]དང་། ཚད་པར་འཁྲུ་བ་དང་། སྐྱུག་པ་དང་། གླལ་བ་དང་། སྐོམ་དད་ཆེ་བ་དང་། བརྐྱང་བསྐུམ་བྱེད་པ་དང་། ལུས་བསྐམས་པ་དང་། ཁོང་རེངས་པ་དང་། མདོག་འགྱུར་བ་དང་། ཁུ་ཚུར་འཆའ་བ་དང་། མཆི་མ་འཛག་པ་དང་། མཚན་མ་དེ་དག་དང་ལྡན་ན་བྱིས་པ་གདོན་གྱིས་ཟིན་པ་ཡིན་
[299b.6]ནོ། །དེ་ལ་བྱའི་གདོན་གྱིས་ཟིན་པའི་རྟགས་ནི། རྐང་ལག་གནས་ནས་ཉམས་པ་དང་། ཚད་པར་འཁྲུ་བ་དང་། ལྕེ་དང་རྐན་དང་ལྐོག་མར་རྨ་བྱུང་བ་དང་། ཚིགས་སུ་འབྲུམ་བུ་བྱུང་ཞིང་ཚ་བ་དང་། ན་བ་དང་། སྨིན་པ་དང་། དེ་ཡང་ཚིགས་རྣམས་སུ་ཡང་དང་ཡང་འཕོ་བ་དང་། ཉིན་མཚན་དུ་
[299b.7]འབྲུམ་བུ་དེས་ཆུ་སེར་འཛག་པ་ཡིན་ཏེ། ཁྱད་པར་དུ་ཁ་དང་རྐུབ་ཏུ་ཡང་སྨིན་པ་དང་། འཇིགས་པ་དང་། བྱའི་དྲི་བྲོ་བ་དང་། རིམས་ཀྱིས་འདེབས་པ་རྣམས་ཡིན་ནོ། །སྲུལ་པོའི་གདོན་གྱིས་ཟིན་པའི་རྟགས་ནི། སྐྱུག་པ་དང་། ལུས་འདར་བ་དང་། སྐོམ་པ་དང་། མཚན་མོ་གཉིད་མི་འོང་བ་
[300a]
[300a.1]དང་། སྐྱིགས་བུ་དང་། ལྟོ་སྦོ་བ་དང་། ཁོང་འཁྲུ་ཞིང་ཕྱི་ས་སླ་བ་དང་། སྐོམ་དད་ཆེ་བ་དང་། གཅིན་འགགས་པ་དང་། ཡན་ལག་གནས་ནས་ཉམས་པ་དང་། སྤུ་ཟིང་ཞེས་བྱེད་པ་དང་། བྱ་རོག་ལྟར་ལུས་རྔུལ་བྲོ་བ་རྣམས་ཡིན་ནོ། །སྲུལ་བ་བསིལ་བྱེད་ཀྱི་གདོན་གྱིས་
[300a.2]ཟིན་པའི་རྟགས་ནི། ལུས་འདར་བ་དང་། ངུ་བ་དང་། འཕྲེད་མིག་ཏུ་ལྟ་བ་དང་། སྐོམ་དད་ཆེ་བ་དང་། རྒྱུ་མ་འཁྲུ་བ་དང་། ཞག་དང་རྣག་གི་དྲི་བྲོ་བ་དང་། རྩིབ་ལོགས་ཡ་གཅིག་གྲང་ཞིང་ཡ་གཅིག་དྲོ་བ་རྣམས་ཡིན་ནོ། །དེ་ལ་སྲུལ་པོ་མཐོང་བྱེད་ཀྱི་གདོན་གྱིས་ཟིན་པའི་རྟགས་ནི་སྐྱུག་པ་དང་།
[300a.3]ལུས་ཚ་བ་དང་། ལུད་པ་ལུ་བ་དང་། གཉིད་ཆུང་བ་དང་། ཁོང་འཁྲུ་བ་དང་། ཕྱི་སའི་མདོག་འགྱུར་བ་དང་། དྲི་ང་བ་དང་། ཤས་ཆེར་ལུས་སྐེམ་པ་དང་། མཐོང་བ་ཞན་པ་དང་། མིག་ན་བ་དང་། གཡའ་བ་དང་། མིག་མཆུའི་ཤ་སྐྱེས་པའི་མིག་ནད་འབྱུང་ཞིང་སྐྲང་བ་དང་། སྐྱིགས་བུ་དང་།
[300a.4]ཡིད་མི་བདེ་བ་དང་། ནུ་ཞོ་མི་འདོད་པ་དང་། ལུས་མདོག་འགྱུར་བ་དང་། སྐད་དྲག་ཏུ་འདོན་པ་དང་། འདར་བ་དང་། ཉའམ་སྐྱུར་བའི་དྲི་བྲོ་བ་རྣམས་ཡིན་ནོ། །ཁུར་བ་ལྟ་བུའི་གདོང་ཅན་གྱི་གདོན་གྱིས་ཟིན་པའི་རྟགས་ནི་ལག་པ་དང་རྐང་པ་དང་གདོང་རྣམས་མི་མཛེས་ཤིང་མི་སྡུག་པར་འགྱུར་
[300a.5]བ་དང་། དྲག་ཏུ་འདོན་པ་དང་། ལྟོ་བའི་སྟེང་གི་རྩ་རྣམས་ནག་པོར་འགྱུར་ཞིང་མདོག་ནག་པོས་ཁྱབ་པར་འདུག་པ་དང་། ལུས་ཚ་བ་དང་། ཟས་ཡི་གར་མི་འོང་བ་དང་། རྐང་ལག་མི་བདེ་བ་དང་། བ་གཅིན་གྱི་དྲི་བྲོ་བ་རྣམས་ཡིན་ནོ། །ནམ་གྲུའི་གདོན་གྱིས་ཟིན་པའི་རྟགས་ནི། མདོག་
[300a.6]སྔོ་བསངས་སུ་འདུག་པ་དང་། རྣ་བ་དང་མིག་ཉེད་པ་དང་། ལུད་པ་ལུ་ཞིང་དབུགས་མི་བདེ་བ་དང་། མིག་ཕན་ཚུན་འགུལ་བ་དང་། ཁ་ཡོ་ཞིང་དམར་བ་དང་། ར་ཐུག་གི་དྲི་བྲོ་བ་དང་། ལུས་ཚ་བ་དང་། སྐེམ་པ་དང་། ཕྱི་ས་སེར་པོར་འབྱུང་ཞིང་སླ་བ་རྣམས་ཡིན་ནོ། །དེ་ལ་ནམ་གྲུ་སྐེམ་བྱེད་ཀྱི་
[300a.7]གདོན་གྱིས་ཟིན་པའི་རྟགས་ནི། རིམས་ཀྱིས་ལུས་ཟད་པ་དང་། སྐྲ་འབལ་བ་དང་། ཟས་མི་འདོད་པ་དང་། སྐད་གསང་དམའ་བ་དང་། མདོག་འགྱུར་བ་དང་། ཕྱི་སའི་མདོག་སྣ་ཚོགས་སུ་འདུག་པ་དང་། ལྟོ་བ་ལ་ཐོར་བུ་འབྱུང་ཞིང་སྲ་བ་དང་། ངུ་བ་དང་། བྱ་རྒོད་ཀྱི་དྲི་བྲོ་བ་དང་། ཡུན་
[300b]
[300b.1]རིང་དུ་ན་བ་དང་། ལྟོའི་ཐོར་བུ་དེ་ཡང་ཟླུམ་པོར་འདུག་པ་དང་། བཤང་གཅི་སྣ་ཚོགས་སྣང་བ་དང་། ལྕེའི་དབུས་དམར་ཞིང་དཀར་མདོག་སྔོ་བསངས་སུ་འདུག་པ་དེ་ནི་སྤང་བར་བྱ་སྟེ། ཁ་ཟས་མང་དུ་ཟོས་ཀྱང་ཉམས་སྟོབས་ཡོངས་སུ་ཟད་ཅིང་སྐོམ་དད་ཀྱིས་ཟིན་ཏེ། མིག་ཀོང་དུ་བྲོས་པ་ནི་ནམ་གྲུ་སྐེམ་
[300b.2]བྱེད་ཀྱིས་ཁྱེར་བ་ཡིན་པར་ཤེས་པར་བྱ་སྟེ། དེ་དག་ནི་བུད་མེད་ཀྱི་གཟུགས་ཅན་གྱི་གདོན་བདུན་ཡིན་ནོ། །གདོན་དེ་དག་ནི་མི་ལ་ཅིའི་ཕྱིར་འཚེ་ཞིང་འཇུག་ཅེ་ན། མཆོད་པ་འདོད་པའི་ཕྱིར་འཇུག་པ་ཡིན་ནོ། །དེ་ལ་འཚེ་བའི་བདག་ཉིད་ཅེས་བྱ་བའི་གདོན་གྱིས་ཟིན་པའི་མཚན་མ་ནི་བྱིས་པའི་སྣ་ཆུ་
[300b.3]འཛག་པ་དང་། ལྕེ་འགགས་པ་དང་། སྦྲིད་པ་རྟག་ཏུ་འབྱུང་བ་དང་། ལུས་མི་བདེ་བ་དང་། མཆི་མ་འཛག་པ་དང་། མདོག་སྡུག་པ་དང་། སྐད་གསང་དམའ་བ་དང་། དྲི་ང་འབྱུང་བ་དང་། ལུས་ཟུངས་ཟད་པ་དང་། རང་གི་བཤང་གཅི་མི་སྦེད་པར་ཉེད་པ་དང་། ལག་པ་གཉིས་བསྐོར་
[300b.4]ཞིང་བདག་གམ་གཞན་ལ་རྡེག་པ་དང་། དེ་བཞིན་དུ་མཚོན་དང་ཤིང་ལ་སོགས་པས་ཀྱང་དེ་ལྟར་རྡེག་པ་དང་། མེ་འབར་བའི་ནང་དུ་འཇུག་པ་དང་། ཆུའི་ནང་དུ་མཆོང་བ་དང་། ཁྲོན་པའི་ནང་དུ་བབ་ཆོལ་དུ་འཇུག་པ་དང་། གཞན་ཡང་དེ་དང་འདྲ་བའི་རྣམ་པ་བྱེད་པ་དང་། སྐོམ་དད་ཆེ་བ་དང་།
[300b.5]ལུས་ཚ་བ་དང་། རྨོངས་བག་ཏུ་འདུག་པ་དང་། ཁ་ནས་རུལ་དྲི་བྲོ་བ་དང་། རྟག་ཏུ་སྐྱུག་པ་དང་། བུ་གའི་སྒོ་ཀུན་ནས་ཁྲག་འཛག་པ་དང་། འཆི་ལྟས་འབྱུང་བ་དེ་དག་དང་ལྡན་པ་དེ་ནི་ཡོངས་སུ་སྤང་བར་བྱའོ། །འདོད་པ་ལ་དགའ་བ་ཞེས་བྱ་བའི་གདོན་གྱིས་ཟིན་པའི་རྟགས་ནི། བུད་
[300b.6]མེད་དང་དབེན་པར་འདོད་པ་དང་ལྡན་པའི་ཚིག་སྨྲ་བ་དང་། དྲི་ཞིམ་པོ་དང་། ཕྲེང་བ་དང་། རྒྱན་ལ་དགའ་བ་དང་། སྙིང་དགའ་བ་དང་། སེམས་ཞི་བར་གནས་པ་ཡིན་ཏེ། དེས་ཟིན་ན་ནི་གསོ་དཀའ་བ་ཡིན་ནོ། །གཏོར་མ་འདོད་པ་ཞེས་བྱ་བའི་གདོན་གྱིས་ཟིན་པའི་མཚན་མ་ནི། སྒྱིད་ཞན་
[300b.7]པ་དང་། ཁ་མྱང་ཞིང་ལྡག་པར་བྱེད་པ་དང་། མཆུ་དང་། ལྐོག་མ་དང་། རྐན་སྐམ་པ་དང་། ལྟོགས་པའི་ཚུལ་དུ་ལྟ་བ་དང་། ངུ་བ་དང་། དམན་པའི་སེམས་ཀྱིས་རྒྱུག་པ་དང་། ཁ་ཟས་སློང་ཞིང་བྱིན་ན་འགྲངས་ཤིང་ངོམས་པར་མི་འགྱུར་ཏེ། དེ་ནི་གསོ་སླ་བ་ཡིན་པ་ཞེས་བྱའོ། །
[301a]
[301a.1]དེ་ལ་འཚེ་བའི་བདག་ཉིད་ཅན་གྱི་གདོན་ལ་ནི་དུད་པས་བདུག་པ་དང་། གྲུབ་པའི་སྔགས་ཡང་དང་ཡང་བཟླས་པས་ཞི་བར་བྱའོ། །འདོད་པ་ལ་དགའ་བ་དང་། གཏོར་མ་འདོད་པ་ལ་ནི་ཇི་ལྟར་འདོད་པ་བཞིན་དུ་གཏོར་མ་སྦྱིན་ནོ། །དེ་ལ་གསོར་རུང་བའི་གདོན་ལ་ནི་ཁང་ཐོག་དབེན་
[301a.2]པར་ཆག་ཆག་དང་། སྐྱོང་ནུལ་བྱས་པའི་སྟེང་དུ་བྱིས་པ་བཞག་ལ་ཞག་གསུམ་གྱི་བར་དུ་མེ་མ་ཤི་བར་བཞག་སྟེ་ཐལ་བས་བྱིས་པའི་མཐའ་ནས་བསྐོར་བས་མེ་ཏོག་དང་ལོ་མ་དང་འབྲས་བུ་དང་། ཁ་ཟས་དང་ཡུངས་ཀར་གྱིས་ཆལ་པར་བཀྲམ་ལ་གདོན་འཇོམས་པའི་ཡུངས་ཀར་དང་སྐེ་ཚེའི་འབྲུ་མར་གྱི་མེ་
[301a.3]མར་སྦར་ན་སྡིག་པ་སེལ་བར་བྱེད་དོ། །ལས་བྱེད་པའི་གཡོག་ཀྱང་འཁྲིག་པ་དང་། ཤ་དང་ཆང་ལས་ལྡོག་པར་བྱའོ། །དེ་ནས་བྱིས་པ་མར་རྙིང་པས་བསྐུ་བྱུག་བྱས་ལ། ཆུ་དྲོ་འཇམ་ཙམ་གྱིས་ཁྲུས་བྱས་ཏེ། དེའི་འོག་ཏུ་བ་བླ་དང་། ནིམ་པ་དང་། ཨག་ནི་མེན་ཐ་དང་། དོང་ག་དང་། པ་རི་བྷ་ཏྲ་
[301a.4]ཞེས་བྱ་བ་མནྡ་ར་དང་། ཀ་ཊ་ཀ་དང་། འཛམ་བུ་དང་། ཏ་མ་ལ་དང་། བུ་དི་ཀ་དང་། ལྕམ་པ་དང་། ཨ་པ་མརྒ་དང་། པི་པི་ལིང་དང་། ཤི་ཀྲུ་མངར་པོ་དང་། ཀ་ཀ་ཛང་ག་དང་། གེ་རི་ཀར་ནི་ཀ་དཀར་པོ་དང་། ཀ་པིད་ཐ་དང་། འོ་མ་ཅན་གྱི་ཤིང་ལྔ་དང་། ཀ་རཉྫ་དང་། ཀ་དམ་
[301a.5]པ་དང་། དེ་རྣམས་སྦྱར་བའི་དུད་པས་བདུག་གོ། །ཡང་ན་གུང་དང་། སྟག་དང་། སྦྲུལ་དང་། སེང་གེ་དང་། དྲེད་དང་དེ་རྣམས་ཀྱི་པགས་པ་མར་དང་བསྲེས་པའི་དུད་པས་བདུག་པ་འམ། ཡང་ན་པུ་ཏི་ཀ་རཉྫའི་རྩ་བ་ལ་སོགས་པའི་ཡན་ལག་བཅུ་པ་དང་། ཡུངས་ཀར་དང་།
[301a.6]ཤུ་དག་དང་། གོ་བྱེ་དང་། ཏི་མུ་ས་དང་། རུ་རྟ་དང་། དེ་རྣམས་མར་དང་སྦྱར་བའི་དུད་པས་བདུགས་ན་ཡང་གདོན་ཐམས་ཅད་ལས་རྣམ་པར་གྲོལ་བར་བྱེད་དོ། །ཡང་ན་ཡུངས་ཀར་དང་། ནིམ་པའི་ལོ་མ་དང་། ཨ་ཤ་ཁུ་རའི་རྩ་བ་དང་། ཤུ་དག་དང་། སྟག་པའི་ལོ་
[301a.7]མ་དང་། དེ་རྣམས་མར་དང་སྦྱར་བའི་དུད་པས་བདུགས་ན་ཡང་གདོན་ཐམས་ཅད་སེལ་ལོ། །ཡང་ན་གླང་གི་རྭ་དང་སྤུ་དང་། རུས་པ་དང་། པགས་པ་དང་། བྱི་ལའི་རྟུག་པ་དང་། ནིམ་པའི་ལོ་མ་དང་། ནིམ་པའི་ཐང་ཆུ་དང་། པུ་ཙེ་ཤེལ་དང་། སྤྲ་ཚིལ་དང་། བྲི་ཧ་ཏི་རྣམ་གཉིས་
[301b]
[301b.1]དང་། རས་བལ་གྱི་ས་བོན་གྱི་རུས་པ་དང་། ནས་སོ་བ་དང་། རའི་སྤུ་དང་། ཐང་ཤིང་དང་། ཡུངས་ཀར་དང་། རྨ་བྱའི་སྒྲོ་དང་། ཤྲི་བི་ས་ཞེས་བྱ་བ་ཀོ་ཉོན་ཙེའི་ཐང་ཆུ་དང་། ཕུབ་མ་དང་། མིའི་སྐྲ་དང་། ཤིང་ཀུན་དང་དེ་རྣམས་ཀྱི་ཕྱེ་མ་རས་མའི་སྣོད་ཀྱི་ནད་དུ་ར་གཅིན་དང་སྦངས་ཏེ། དུད་
[301b.2]པས་བདུགས་ན་གདོན་ཐམས་ཅད་དང་རིམས་མི་བཟད་པ་རྣམས་ལ་ཕན་ནོ། །ཡང་ན་དཱུར་བ་དང་། ཨ་མྲའི་ཚི་གུ་དང་། རྒྱ་སྤོས་དང་། ན་ལེ་ཤམ་དང་། སྦྲང་རྩི་དང་། དོང་གྲ་དང་། ཀྲྀཥྞ་པརྞི་དང་། གླ་སྒང་དང་དེ་རྣམས་བཏགས་པའི་ཕྱེ་མ་མར་དང་རྩ་བ་བཅུ་པ་བསྐོལ་བའི་ཁུ་བ་འོ་མ་
[301b.3]དང་ཚུལ་བཞིན་བསྐོལ་ཏེ་མར་ལུས་པ་ལས་རན་པར་བླུད་ན་གདོན་ལས་རྒྱལ་བར་བྱེད་པའི་མཆོག་ཡིན་ནོ། །ར་སྣ་དང་། ཨ་ཤུ་མ་ཏིའི་ལོ་མ་དང་། རྩ་བ་ལྔ་པ་དང་། བ་ལ་དང་། གླ་སྒང་དང་། དེ་རྣམས་བསྐོལ་བའི་ཁུ་བའི་ནང་དུ། ཐལ་ཏྲེས་དང་། ཚ་བ་གསུམ་དང་། ཙི་ཏྲ་ཀ་དང་།
[301b.4]པ་ཐ་དང་། བྱི་དང་ག་དང་། ཤིང་མངར་དང་། པ་ཡ་སྱ་དང་། ཤིང་ཀུན་དང་། ཐང་ཤིང་དང་། པི་པི་ལིང་མཱུ་ལ་དང་། དུག་མོ་ཡུངས་དང་། དེ་རྣམས་བཏགས་པའི་ཕྱེ་མ་དང་། མར་ལྷན་ཅིག་བསྐོལ་ཏེ། མར་ལུས་པ་ལས་རན་པར་བླུད་ན་བྱིས་པ་ལ་རྟག་ཏུ་ཕན་པ་ཡིན་ཏེ། ནད་
[301b.5]ཐམས་ཅད་དང་གདོན་འཕྲོག་ཅིང་མེ་དྲོད་སྐྱེད་པ་དང་སྟོབས་དང་མདོག་སྟེར་བར་བྱེད་དོ། །ཐལ་ཏྲེས་དང་། མུ་ར་དང་། བྲ་ཧྨི་དང་། ཤང་ཁི་ནི་དང་། རུ་རྟ་དང་། ཤུ་དག་དང་། ཡུངས་ཀར་དང་། ཨ་ཤྭ་གན་དྷ་དང་། བྱིའུ་རུག་པ་དང་། དེ་རྣམས་མར་དང་ལྷན་ཅིག་བསྐོལ་བའི་མར་
[301b.6]ལུས་པ་དེ་ལས་བཏུང་བ་དང་བྱུག་པ་བྱས་ན་གདོན་ཐམས་ཅད་འཇིག་པར་བྱེད་དོ། །གང་ཡང་འབྱུང་པོའི་རིག་སྔགས་ཀྱིས་སྨན་མར་ལ་བཟླས་པར་བྱའོ། །ས་གཙང་མར་དཀྱིལ་འཁོར་ཁྲུ་གང་བར་བྱས་ཏེ་བ་ལང་གི་ལྕི་བས་བྱུགས་ནས་འབྲས་གྲུས་པ་དཀར་པོ་ཆག་གྲུམ་མེད་པའི་སྣོད་ཀྱི་
[301b.7]ནང་དུ་བཀང་ལ་ཡོན་དང་བཅས་པ་དེར་གཞག་གོ། །དུ་བ་མེད་པའི་མེ་སྣོད་དང་བཅས་པ་དང་། ཆུ་སྣོད་དང་བཅས་པ་དང་། གུ་གུལ་དང་། མར་དང་། མེ་ཏོག་དཀར་པོ་དང་། གཏོར་མ་དང་། སྤོས་དང་། དཱུར་བ་དཀར་པོ་དང་། ཡུངས་ཀར་དང་། བསྲེག་བླུགས་ཀྱི་རྫས་དེ་དག་ཀྱང་
[302a]
[302a.1]བཞག་ལ། དེ་ནས་སྨན་པ་གོས་གཙང་མ་ཁ་དོག་གསུམ་དང་ལྡན་པ་འམ། ཡང་ན་གོས་དཀར་པོ་གྱོན་ཏེ་ཁ་ཤར་དུ་བལྟས་ནས་དཀྱིལ་འཁོར་གྱི་སར་འཇུག་པར་བྱ་སྟེ། གྲོ་བའི་དུམ་བུ་བླངས་ནས་གྲོ་བ་ལ་གཞན་གྱིས་མི་ཐུབ་པ་ཞེས་བྱ་བའི་རིག་སྔགས་གི་ཝང་གིས་བྲིས་
[302a.2]པས་དཀྲིས་ལ་ཆོ་ག་བཞིན་དུ་བསྒྲུབ་ན་འབྱུང་པོ་དང་གདོན་ཐམས་ཅད་ལས་རྒྱལ་བར་བྱེད་དོ། །ལག་ཤྨན་དང་། ས་ཧ་དེ་བ་དང་། ནཱ་ག་དན་ཏི་དང་། ཀ་དམ་བ་ར་དང་། ཁ་སྲལ་དང་། ཀར་ཀ་ཏི་ཤྲིང་ག་དང་། ཀུ་བ་ཁ་བོ་དང་། བྷི་ཧ་ཧ་ཏི་དང་། ཁར་ན་ས་དང་། བེ་ཤ་ལ་དང་། མ་ཧ་
[302a.3]ཀི་ཤ་དང་། ཉེའུ་ཤིང་བ་དང་། དེ་རྣམས་བཏགས་ཏེ་རིག་སྔགས་ཀྱིས་བཏབ་ནས་གྲོ་བའི་ནང་དུ་བཅུག་སྟེ། བྱིས་པ་བྱང་ཕྱོགས་སུ་ཁ་ལྟར་བཅུག་ལ་མགུལ་དུ་གདགས་སོ། །དེ་དག་མ་འབྱོར་ན་ཟར་མའི་སྐུད་པ་སྲ་བ་ལ་མདུད་པ་བོར་ཏེ་སྔགས་བཟླས་པར་བྱའོ། །བྱིས་པ་བསྲུང་བའི་ཕྱིར་
[302a.4]དང་པོར་རང་བྱུང་ཆེན་པོ་ལ་ཕྱག་བྱ་སྟེ། སྔོན་གྱི་དྲང་སྲོང་ཆེན་པོ་རྣམས་ཀྱིས་ཞི་བར་བྱས་པ་ཡིན་པས་གདུ་བུའི་སྲུང་བའི་སྐུད་པ་གདགས་པར་བྱའོ། །ཨིན་དྲ་པྲ་ཏི་ས་རམ་དུ་བྷྱ། ཡེ་ཙ་ཏ་ས་ནུ་ཙ་རི་ཎ། བཛྲ་རཱ་ཤ་ནི་དྷ་ར་བྷཱུ་ཏ་མེ་གྷ་བིན་དཱ་ནུ་སྭ་རི་ཎ་ཨཻ་ར་པ་ཎ། སྐན་དྷ་ག་ཏམ། ཡེ་ན་ཡ་ཏི་པཱུ་ར་ཎ་
[302a.5]ད་རམ། ཡ་མ་བྷི་བ་ས་ཏོ་རཱ་ཛ་ཡེ་ཛ་ཏ་སྱཱ་ནུ་ཙ་རི་ཎི། མེ་ཙ་སུཾ་ཀ་རི་སྲིང་ཧོཥྞ། ག་ཛ་བ་ཛི་སཱ་མཱ་ནཱ་ནཱ། ཀཱ་ལཀྵ་ཀཱ་ལ་ཡ་སཻ་པཱ་ཤཻ་སྟ་མ་དཀྵ། བྷྲྀ་ཀུ་ཊི་མུ་ཁ་ཤག་ཏི་མུངྒ་ར། ཧསྟེ་ཙ་ཁ་ད་ག་པྲ་སཱ་དྷཱ་ར་ཤུ་ཡེ། པཱ་ཤ་རཏྣ་ཀ་རོ་རཱ་ཛ། ཏོ་བྲིད་སཱ་ག་རཱ་ལ་ཡ། ཤ་རད་པྲག་ཎ་ཀ་ར། ཡོ་ཙ་ཏ་སྱན་
[302a.6]ནུ་ཙཱ་རེ་ཎ། མ་ཧོ་ར་ནྱི་མན་ཏམ་བེ་གེ་ན། ཀྵོ་བ་ཡན་ཏི། སེ་རམ་པ་ཧི་དཱ་ནཱ་དྷཱི་པོ་བྷེ་ཤ་བྷ་ན་སརྦྦ་ཡཀྵ་དི་བོ། བཱུ་བི་ནཱ་ནཱ། ཀ་རཤྩ་ཡེ། བྷཱུ་ཏ་སྐྱེ་བ་ནུ་ཙཱ་རཱ་སཱ་དཱ། ཨཱི་དིཏྟྱ་བྷ་སཱ་བྷོ་རུ། དྲ་མ་ཏུ་ཏྲཤྩ་ཤི་ནཱ་བཱ་པཻ་ཏེ། སརྦ་ན་མ་སཱ་ཏ་མ། ཨི་མམ་པྲ་ཏི་ས་ཀྲི་ཡམ། དཱིར་གཱ་མཱ་ཡཱ། ར་རོ་གན་
[302a.7]ཙཱ། ད་བཱ་དཱ་སན་ཏུ། སན་ཏི་དེ་བྷ་ག་བཱན་བྲ་ཧྨ་སྭ་སྟི་ན་རཏྟ། པ་ར་བྷ་ཨུ་སྭ་སྟི་བེ་དཾཤྩ་ཡག་ནྱ་ཤཱ་ཨིག་ནི་ཤ་མ་ཨུ་ཙ། སྭསྟི་ཏི་ཤྲི་ཌི་ཏེ་བྷི་ར་ཧི་ལ། ཤྨི་མེ་དྷ་ཀྟ་མ་ཏྱ་ཏི། སྭསྟི་དུཥྚཤྩ། བ་སུ་ཧྲཱི་བྷུད་དྷི་རེ་བ་ཙ། སྭ་སྟི་རུ་ཏྲི་བ་ཤ་བ་ཀཱ་ཤུ། སྐན་དྷ་ཤ་ཀ་ཏི་དྷ་ར་བྷཱུ་
[302b]
[302b.1]ཏི། སྭསྟི་དཱ་ཏ་ཙ། སུ་བརྞ་ཤྩ་མ་ཧཱ་ལ། སྭསྟི་དེ་བཱཤྩ་རཀྵཤྩ། མ་ཙཱ་དེ་བ་པཱ་མ་ག་མ། དུར་བྱ་ཧྲིད་ནི། དུཿསྭ་བ་ན་མ་ན་ཙི་ན་ཏི་ཏ་ན་ཙི། དུཥྚ་དྷིན་མ་བྷ་ཡཾ་ཀྲི་ཏོ། བཱ་ཙ་པྲ་ཏི་ཧི། ཏེ་མ་ཡ། རཀྵ་པྲ་ཏི་ས་རཱ། ཏྱུ་བྷྱམ། བྷ་དེ་ཡ་མ་བ་པཱ་གཱ་ཏེ་ནི། ནིར་བྲིད་ཏ་མ་ནི་རུ་དེ་གོ། ཛཱི་
[302b.2]བ་བཪྵེ་ཤ་ཏམ་སུ་ཁི། སྣུམ་ཁུར་དང་། ནས་ཀྱི་ཁུར་བ་དང་། ཚོད་མ་དང་། སྭསྟི་ཀ་དང་། ཨུ་ལོ་པི་ལ་སོགས་པ་དང་། མི་སྲི་ཀ་དང་། ཀུར་མ་དང་། བུ་ད་བུ་ད་དང་། ཡུང་བ་དང་། ཀྲི་ས་ར་དང་། ཡ་བ་ཀ་དང་། སྦྲང་རྩི་དང་། ཏིལ་བཏགས་པའི་ཕྱེ་མ་དང་། ལན་ཚྭ་
[302b.3]དང་། ཞོ་དང་། ཟན་དྲོན་དང་། ནིས་པ་པ་དང་། འབྱུང་པོའི་ཟས་ཅན་དང་། འོ་མ་དང་། ཤ་ཁྲག་རྗེན་པ་དང་། བཙོས་པ་དང་། ཉ་དང་། ཕྱེ་དང་། ཆང་དང་། ཨ་ས་བའི་ཆང་དང་། དྲི་དང་། ཕྲེང་བ་དང་། འབྲས་བུ་དང་། གསེར་དང་། གུ་གུལ་དང་། པོག་དཀར་པོའི་
[302b.4]བདུག་པ་དང་། བྱེའུ་རུག་པ་དང་། ཞིམ་ཐིག་ལེ་དང་། ནིརྒུན་ཐི་དང་། མེ་ཏོག་ལོ་མ་དང་བཅས་པ་དང་། དེ་རྣམས་སྤགས་དང་བཅས་པའི་གཏོར་མ་བྱས་ལ། བྱིས་པའི་ཁྱིམ་དེ་ཉིད་ཀྱི་ཕྱོགས་བཞི་ནས་སྦྱིན་པར་བྱ་སྟེ། དེ་བཞིན་དུ་བཞི་མདོ་དང་། སུམ་མདོ་དང་། ལྷའི་
[302b.5]གནས་དང་། བ་ལང་གི་ལྷས་དང་། ཤིང་གཅིག་གི་དྲུང་དང་། ཆུ་མིག་དང་དེ་རྣམས་ལས་ནམ་སྲོས་པའི་དུས་སུ་མར་མེ་དང་བཅས་པར་གཏང་ངོ་། །དེ་ནས་དཀྱིལ་འཁོར་ཟླུམ་པོ་འམ། གྲུ་བཞིར་བྱས་ཏེ་བ་ལང་གི་ལྕི་བ་ས་ལ་མ་ལྷུང་བས་བྱུགས་ལ་རྩྭ་དར་བ་དང་། མེ་ཏོག་
[302b.6]ཡིད་དུ་འོང་བས་བརྒྱན་ཏེ། དེའི་སྟེང་དུ་འབྱུང་པོའི་བདག་པོ་འཁོར་དང་བཅས་པ་བཀོད་ལ། འབྱུང་པོའི་ཕྱོགས་སུ་ཁ་ཤར་དུ་བདག་བལྟས་ལ། རིག་སྔགས་འདི་བརྗོད་དེ་གཏོར་མ་སྦྱིན་ནོ། །དེ་ལ་སྔགས་ནི། ཨོཾ་ན་མཿཨ་བི་བ་ར་ཀས། ན་མཿཀུ་རུང་བྷ་ཡ། ན་མ་སབ་ཏ་ནམ་མ་ཏྲི་
[302b.7]ནམ་ན་མཿ སྐན་ཧ་ཡ། ཧི་ལི་ཏི། མི་དྷི་ལི་ཏི། ཧི་ལིད་ཏཱ། པ་ལི་ནི་སྭཱ་ཧཱ། དེ་ནི་བཞུགས་སུ་གསོལ་བ་དང་། བུད་མེད་ཀྱི་གཟུགས་ཅན་གྱི་གདོན་སྤྱན་དྲངས་པ་ཡང་ཡིན་ནོ། །སྔགས་དེས་ཁྱོར་བ་གང་གི་ཆུ་ལ་ལན་བདུན་བཟླས་བརྗོད་བྱ་སྟེ། བདག་གི་ལུས་ལ་གཏོར་ན་བདག་ཉིད་
[303a]
[303a.1]བསྲུང་བ་བྱས་པར་འགྱུར་རོ། །གདོན་དེ་རྣམས་འདུས་པ་དང་གཏོར་མ་ལ་སོ་སོའི་བདེན་པའི་དམོད་པ་དང་ལྡན་པའི་སྔགས་འདི་བརྗོད་པར་བྱ་སྟེ། པྲ་ཛ་བ་ཏོ་ཙ་ཡ་སྱ་ཏྱམ། ཨ་མི་རི་ཤཱ་རི། དྷརྨ་རཱ་ཛཱ་ཡ་སྱ་ཏྱམ། ཡ་ཙ་སྱ་ཏྱམ། ཏ་པ་སི་ཤུ། དྷཱ་ནཱ་དྷཱི་པ་ཏི་ཡ་ཚ་ཏྱམ། ཛཱ་ལཱ་དྷཱི་པེ།
[303a.2]ཡ་སྱ་ཏྱམ། ཨག་ནི་ཧོ་ཏྲེ་ཤུ། སྱ་ཏྱམ་ཡཾ་ཤྲཱི་ཏི་ཡེ་ཤུད་ཙ། པ་ཧི་བྲ་ཧ། སུ་ཡཾ་སྱ་ཏྱམ། ཨི་ཤཱི་རི་ཙ་མ་ཧཱདྨ་ནི། ཨ་ཏེ་ཏུ་སྱ་ཏྱམ་སྱད་ཏྱ་བས་མ་ཡེགྷུ་ཧེ་ཀ་སེཏྱ་ཏི་ན། དར་ཤ་ཡ་དྲ་མ་སྭ་རུ་པཱ་ཎི། སྱཏྱམ་རཀྵ་ཏེ་སརྦ་ཤི། ཨ་མན་ཏྲི་ཏྲ་མ་ཡ་སྱོ་མྱ། སྱ་མྱ་རུ་པ་པྲ་ཏཱིཙྪ་ད། བ་ལཱི་ཚ་སུ་པ་
[303a.3]ཧྲི་ཏྲམ་སརྦ་སརྦ་ཀོ་མ་ཀ་གྲ་ཧེ། དར་ཤ་ཡ་དྭ་མསྭ་རུ་པཱ་ཎི། བ་ལན་ཙ་པྲི་ཏི་གྲ་ཡ་སྟམ། དེ་ནས་དེའི་འོག་ཏུ་མཉམ་པར་བཞག་སྟེ། རིགས་ཀྱི་གསང་སྔགས་འདི་བརྗོད་དོ། །ཨོཾ་ལ་ནི་ལཱ། ཁཱ་ལཱ་ཁཱ་ལཱ། ན་གུ་ལ་གྲ་ཧ་ཀཱ་རི་ཀ་སེ་ནཱ་ནུ་སེ་ན། མཱ་ཏཱ་ཙ་མ་ཧཱ་སེ་ན་ཡ་ཤ་སྭ་ནི། ཀྲི་ཏ་མཱ་ལཱ་
[303a.4]ཀྵ་ཏ་ཤར། ཨེ་ཏཱ་སྟུ་གྲ་ཧ་མ་ཏ་ར། ཀུ་མཱ་ར་བ་ཙ་ནཱ་ཤྲི་གྲམ་པྲ་མུན་ཙན་དུ་ཤི། ཤུ་མ་ཏི་མཱ་མ། ཀ་ལ་ཀ་ལ་པོ་ཛ་ལ་ཤ་ཀ་ཏི། ཀིང་ཀི་ནི་ཛྭ་ལ་བྷུ་ཤི་ཏ། ཀུ་མཱ་ར་བཱ་ཙ་ནཱ། ཧུ་ཏིམ། སཾ་བྲ་ཏ་མུ་ཙ་ཏམ་ཤི་ཤུ། པ་ཏ་ཀ་ཀུར་ཀུ་ཊ་ཚ་ཊམ། གན་དྷ་བ་ར་ཧྲི་ད་ར་ཤི་ཁཱི་ཤ་ར་སྟམ་
[303a.5]བཤྩ་ཏེ། མུ་ཏྲ་མུད་ཙ་ཏ་མཱ་ཏུ་ར་ཤི་ཤུ་གན་ད་དྷུ་པ་མཱ་ལྱཾཙྪ། ཀུ་མཱ་ར་ཏེ་པྲ་ཡཙྪ་ཏྲི། ནསྠ་ཏ་བྱམ་ཏད་གྲ་ཡ། སྭཾ་གཱ་ཏི་མ་གྷ་ཙ་མ་ཙི་རམ། ད་ཏྲ་སརྦ་ཀུ་མཱ་ར་ན་མ་སཾ་ག་ཏ་གན་མཱ་ད་ནེ། རཀ་ཏེརྦ་ཙ་པ་ཏ་རཀྟ་ཤུ་ག་ནི་བ་ས་ནི། ཀུ་མཱ་ར་སྱ་ཁ་ཡམ་ཏ་ཏྲི། ཡཱ་ཏ་བ་ལམ་བི་མུན་ཙ་ཏ་ཤན་མུ་
[303a.6]ཁ་དྷ་ཤ་ཀྵོ། བེ་ཏྲ་སི་ཀ་ལེ་དོ་བར། བི་ར་ཀུ་མཱ་རི་དི་བ་ཏི། སྟེ་བ་པུསྟོ་བི་ཤི་དྱ་ཏྱམ་བྲ་ཧ་མ་ནོ་བྲ་ཧྨ་ནོ་བྲ་ཧྨ་ན་ནན་ཏྲུ། སརྦ་བེ་དི་བ་ད་མཱ་པར། ཡཀྵ་རཱཀྵ་ས་ནཱ་གཱ་ནཱཾ་གན་དྷ་ར་བཱ་ཨ་སུ་ར་ཡོ་ར་པི། པི་ཤཱ་ཙ་བྷཱུ་ཏ་སཾ་ག་ནཱ་མ། བྱ་ད་མི། ཙཱ་མཱ་རི་ཤཱ་རཱ། ཨག་ནྱ་པ་ཡ་ཏི་སྐན་དྷོ། ག་མྱ་ཏྲཱ་
[303a.7]མཱ་ག་ན་ད་མ་ད་ནཱམ། གྲོ་ཧོ་ཡ་ཀོ་པ་ཡོད་ད་ཉྱམ། ཀུ་མཱ་ར་སྭ་ཡ་ཤསྦི་ནི། རྟན་ཙུ་ཏ་ས་བྲེཀྵ་བྲི་མ་བྷ་ཡ་པ་རི་ཤ་དྷོ་བྷ་བེད། །དེ་ལྟར་གཏོར་མ་བཏང་བའི་འོག་ཏུ་མེ་ལ་སྦྱིན་སྲེག་གིས་མཆོད་པར་བྱ་སྟེ། དེ་ཡང་བཅའ་བ་དང་། བཟའ་བ་དང་། མེ་ཏོག་ལ་སོགས་པ་སེར་སྐྱ་དང་། དམར་པོ་ལ་སོགས་
[303b]
[303b.1]པ་རྣམ་པ་སྣ་ཚོགས་དང་། དྲི་རྣམ་པ་སྣ་ཚོགས་དང་། གུ་གུལ་གྱི་བདུག་པ་དང་། སེང་ལྡེང་ལ་སོགས་པའི་ཡམ་ཤིང་བྱའོ། །ཡང་ན་ཙན་དན་གྱི་ཤིང་གིས་བྱ་སྟེ། དེ་ཡང་གྲངས་བརྒྱ་རྩ་བརྒྱད་སྦྱིན་སྲེག་བྱའོ། །གདོན་ཐམས་ཅད་ལས་གྲོལ་བར་བྱེད་པའི་མེ་དབྱུག་པ་ལྟ་བུ་ཞེས་བྱ་བའི་རིག་
[303b.2]སྔགས་བརྗོད་པར་བྱ་སྟེ། ཨོཾ་བྲ་ཧྨ་བྱ་ཏ་ན་ལམ་དེ་བམ། ཧ་སྱག་བྱ་པ་ཏི་ཙམ་ཀམ། དེ་བ་ན་ས་པྲ་མུ་ཁ་མ་སྭ་ཏི་སྭཱ་ཧཱ། ཨ་བ་ཧཱ་ར་ཧཱུ་ཛམ། ས་ཧི་བད་ཏྱམ་ཧ་ན་ཏན་སི། པཱ་དཱ་ཀ་ས་བཀྵ་ན། ཏྭམ་ཡ་ག་ཉཤྩ། ཡུ་པཤྩ། ཏྭམ་ཧི་དྷ་ར་མ་བ་ཏང་། ག་ཏི་ཧི་རན་ནྱ་རཱ་ཏཱ་དེ་བ་སྟཱམ། ཏྭམ་
[303b.3]ཧི་བེ་དང་བི་དང་ག་ཏི། དུར་ཁྲི་ཏཱ་ནཱམ། བི་ནཱ་ཡ་ཤ་ཡཱ་ཏྭམ། ཧི་ཨུད་པ་ད་ཏི་སུ་རེ། ད་ཧ་ས་གྲ་ཧ་དེ་བ་ཏྭམ། ཨི་དམ་དུཥྚ་ས་བྲི་གྲ་ཧ། ཨག་ན་ཡེ་སྭཱ་ཧཱ། ཏྭམ་ཏི་ཤཱན་ཏི་ཀ་རོ་བ་ན་ནི། སྟམ་མ་རུ་ཏ་རོ་དན། ཧ་རི་པྲ་དཱ་ན་གྷ་དི་རི་ཤི། དཱི་མཱམ་ནི་གྲི་ཧྱ་གུ་ཧྱམ་ཀམ། ཨུད་མ་ད་ཡ་ཏི། ཏེ་
[303b.4]ཛ་སྭ་ཙཱ། ན་མཿ ཤ་མ་ཙཱི་ཏིང་ཀུ་རུ། དུཥྚི་གྷཱ་བྷ་རསྣ་སྟམ། སྭམ་སྭརྦོ་པ་དྲ་བེ་ཤུ་ཙ། ཡཱ་ཀྲི་ཏྲི་ན་ཧོ་མྱེ་ན་ཤི་གྷྲ་མ་ཤཱན་ཏི་པྲཛྙཱ་ཡ་དེ་ཨ་ཧི་བྷན་ཏི་དེ་བ་ནཱ་མ། ཏྭམ་ཧི་བག་ཏྲམ་པུ་ར་ཏ་ནཱ་མ། ཏེ་ན་ས་ཡ་ཏེ་ན་དེ་བཱ་ཤང་། ཨི་མ་སཱ་དྷ་ཡ། མེ་གྲ་ཧམ། ན་མསྟུ་ཏེ་བྱ་བཱ་ཧ་དན་དི། ད་ཧ་ད་ཧ།
[303b.5]དར་ཤ་ཡ་དར་ཤ་ཡ་ཏེ་ཛ་ཏེ་ཛ་མོ་ཊ་ཡ་མོ་ཊ་ཡ། ཨ་པསྨ་ར་མུད་གྷ་ཊ་ཡ། ཀུ་མཱ་ར་བི་ཤཱ་ཙ། རི་བ་ཏི་རོ་ད་ན་ཏྲཱ་ས་ན། ཀམ་པ་ན། ཨུད་ཀམ་པ་ན། པཱི་ཛྲ་བད་དེ་བ་ཡཀྵ་གན་དྷར་བ། བྷུ་ཏཱ་ནཱམ། ནཱ་ག་རཀྵ་ས། སན་དར་ཛ་ན། བྷཎྜ་ན། བི་དྷུ་གྲ་ས་ར་ཡ། བྷ་ན་བྷ་ནཱ། ཨག་ནི་དྷནྟྲ།
[303b.6]ཨག་ནི་བཱིཏྱ་ན་མ་ཏེ། ཛྲ་ས་སྭ་ན། ཨུན་མཱན་ད་ཡ་སྭཱ་ཧཱ། བྷུར་བྷུ་ཝཱ་ཡ་སྭཱ་ཧཱ། དི་བ་ཏ་ཏེ་ཛ་ས་སྭཱ་ཧཱ། ཧ་བྱ་བཱ་ཧ་ན་ཡ་སྭཱ་ཧཱ། ཡ་མ་ཡེ་སྭཱ་ཧཱ། སྦྱིན་སྲེག་འདིས་ནི་བྱིས་པའི་གདོན་མཐའ་དག་འཇིག་པར་བྱེད་དོ། །དེ་བཞིན་དུ་གཏོར་མ་དང་། སྦྱིན་སྲེག་དང་། བདུག་པ་དང་། ཁྲུས་
[303b.7]ཀྱི་ཚུལ་སྔགས་ཀྱི་རྒྱུད་རིག་སྦྱར་བར་བྱའོ། །བུ་ཏི་ཀ་རཉྫའི་ཤུན་པ་དང་། འོ་མ་ཅན་གྱི་ཤིང་གི་ཤུན་པ་དང་། ལོ་མ་དང་། ཀུ་བ་དང་། བི་ལ་ཤ་དང་། སྱོ་ན་ཀ་དང་། བིལ་བ་དང་། ཀ་པིད་ཐ་དང་། དེ་རྣམས་ཆ་མཉམ་སྟེ་ནུབ་མོ་བསྐོལ་ལ་བྱིས་པ་རྣམས་ལ་ནུབ་མོ་ཁྲུས་བྱས་ན་
[304a]
[304a.1]ཤིས་པ་ཡིན་ནོ། །གཞན་དུ་ན་གདོན་གྱིས་ཟིན་པ་ལས་བླ་བརྣན་གྱི་ནད་ལྡན་པ་ལྟ་བུའི་ནད་གསོ་བ་བྱུང་ན་ནི། བྱིས་པའི་ནད་གསོ་བ་ལས་བཤད་པའི་སྨན་གྱི་སྦྱོར་བ་རྣམས་བྱའོ། །བྱིས་པ་གདོན་གྱིས་ཟིན་པ་གསོ་བའི་ལེའུ་གསུམ་པ་རྫོགས་སོ།། །།
[304a.2]དེ་ནས་གདོན་གྱི་དམིགས་ཤེས་པར་བྱ་བའི་ལེའུ་བཤད་པར་བྱ་སྟེ། ཐོག་མར་སྨན་པས་ནད་པའི་ཤེས་པ་དང་། སྨྲ་བ་དང་། སྤྱོད་པ་དང་སྟོབས་ཅི་འདྲ་བ་ལས་གདོན་གྱི་རྟགས་ཤེས་པར་བྱ་སྟེ་བརྗོད་པར་བྱའོ། །དེ་ཡང་སྐྱེས་བུ་གང་གིས་སྤྱོད་ཚུལ་དང་། རང་བཞིན་དང་། འགྲོ་བ་
[304a.3]དང་། བྱེད་པ་རྣམས་ལྷ་དང་། ལྷ་མ་ཡིན་དང་། དྲི་ཟ་ལ་སོགས་པ་གང་གི་རྟགས་དང་། མཐུན་པར་བྱེད་པ་དེའི་མཚན་ཉིད་ཤེས་པར་བྱ་སྟེ་བརྟག་གོ། །དེ་ལ་ལྷ་དང་ལྷ་མ་ཡིན་ལ་སོགས་པ་གདོན་གྱི་རིགས་རྣམ་པ་བཅྭ་བརྒྱད་ཡོད་དོ། །དེ་དག་ཀྱང་རྒྱུ་མེད་པར་ནི་གདོན་འཇུག་མི་ནུས་
[304a.4]ཏེ། རྒྱུ་དེ་ཡང་གང་ཞེ་ན། འཕྲལ་གྱི་རྐྱེན་དང་། སྔོན་གྱི་ལས་ལས་གྱུར་པ་ཡིན་ཏེ། དེ་ཡང་ཤེས་རབ་ཉམས་པས་ཆགས་པ་དང་། ཞེ་སྡང་དང་། གཏི་མུག་ལ་སོགས་པ་ཤས་ཆེར་སྐྱེས་པ་དང་། ཆོས་ལུགས་ཉམས་པར་བྱས་པ་དང་། བརྟུལ་ཞུགས་ཉམས་པ་དང་། སྤྱོད་
[304a.5]ལམ་ལོག་པར་བྱེད་པ་དང་། བླ་མ་ལ་སོགས་པ་མཆོད་པར་འོས་པ་ལ་མི་མཆོད་པ་དང་། བདག་ཉིད་ཀྱི་གཞུང་ལུགས་ཉམས་པར་བྱས་པ་དང་། བདག་ཉིད་གསོད་པར་བྱེད་པ་དང་། རྒྱུ་དེ་དག་བྱས་པས་གདོན་གྱིས་གླགས་རྙེད་དེ་སྐྱེས་བུའི་ལུས་ལ་འཇུག་ཅིང་གནོད་པར་བྱེད་དོ། །
[304a.6]གཞན་ཡང་གདོན་གྱིས་གླགས་རྙེད་པར་བྱེད་པའི་རྒྱུ་ནི་སྡིག་པའི་ལས་རྩོམ་པ་དང་། སྔོན་མི་དགེ་བའི་ལས་བྱས་པ་དང་། བདག་ཉིད་གཅིག་པུར་གྲོགས་མེད་པར་ཁང་སྟོང་དང་། དུར་ཁྲོད་དང་། བཞི་མདོ་དང་། མཆོད་རྟེན་ལ་སོགས་པའི་དྲུང་དུ་མཚན་མོ་བརྟེན་ཅིང་གནས་
[304a.7]པ་དང་། མཚན་མོ་གཅེར་བུར་རྒྱུ་བ་དང་། དེ་བཞིན་དུ་བླ་མ་མཆོད་པར་འོས་པ་སྨོད་པ་དང་། དུས་དང་ཆོ་ག་མ་ཡིན་པར་འཁྲིག་པ་སྤྱོད་པ་དང་། མི་གཙང་བས་ལྷ་མི་མཉེས་པར་བྱེད་པ་དང་། གཞན་གྱི་བུད་མེད་བུ་བཙས་མ་ཐག་པ་ལ་འདྲེས་པར་སྤྱོད་པ་དང་། སྦྱིན་སྲེག་དང་། སྔགས་
[304b]
[304b.1]དང་། གཏོར་མ་དང་། མཆོད་པ་ལ་སོགས་པ་ལ་ཡོ་བྱད་མི་འབྱོར་བ་དང་། མདོར་ན་མདོའི་གནས་སུ་ཉིན་པར་གྱི་སྤྱོད་ལམ་བསྟན་པ་ལོག་པར་བྱེད་པ་ལས་གདོན་འཇུག་ཅིང་གནོད་པར་བྱེད་པ་ཡིན་ནོ། །དེ་ལ་ལྷའི་གདོན་ནི་ཟླ་བ་ཡར་ངོའི་ཚེས་གཅིག་དང་། ཚེས་བཅུ་གསུམ་ལ་མི་ལ་འཇུག་པར་འགྱུར་
[304b.2]རོ། །ལྷ་མ་ཡིན་གྱི་གདོན་ནི་ཡར་ངོའི་ཚེས་བཅུ་གསུམ་དང་མར་ངོའི་བཅུ་གཉིས་ལ་འཇུག་པར་འགྱུར་རོ། །དྲི་ཟའི་གདོན་ནི་ཚེས་བཅུ་བཞི་དང་བཅུ་གཉིས་ལ་འཇུག་གོ། །ཀླུའི་གདོན་ནི་ཚེས་ལྔ་ལ་འཇུག་པར་འགྱུར་རོ། །གནོད་སྦྱིན་གྱི་གདོན་ནི་ཟླ་བ་ཡར་ངོའི་ཚེས་བདུན་དང་བཅུ་གཅིག་ལ་འཇུག་
[304b.3]པར་འགྱུར་རོ། །ཚངས་པའི་སྲིན་པོའི་གདོན་ནི་ཡར་ངོའི་ཚེས་ལྔ་དང་། ཚེས་བརྒྱད་དང་། བཅོ་ལྔ་ལ་འཇུག་པར་འགྱུར་རོ། །སྲིན་པོ་དང་ཤ་ཟའི་གདོན་ནི་ཟླ་བ་མར་ངོའི་ཚེས་གཅིག་དང་དགུ་དང་བཅུ་གཉིས་ལ་འཇུག་པར་འགྱུར་རོ། །ཡི་དགས་ཀྱི་གདོན་ནི་གནམ་སྟོང་དང་ཚེས་བཅུ་ལ་འཇུག་པ་
[304b.4]ཡིན་ནོ། །བླ་མ་རྒན་པ་ལ་སོགས་པས་སྨོན་པ་བྱས་པ་ལས་བྱུང་བའི་གདོན་ནི་ཕལ་ཆེར་ཚེས་བརྒྱད་དང་དགུ་ལ་འཇུག་གོ། །གདོན་དེ་དག་ཀྱང་ཕལ་ཆེར་ནམ་སྲོས་པའི་དུས་སུ་འཇུག་པ་ཡིན་ནོ། །དེ་ལ་སྐྱེས་བུའི་ལྷའི་གདོན་གྱིས་ཟིན་པའི་རྟགས་ནི་བཞིན་མདངས་པད་མ་ཁ་བྱེ་བ་ལྟ་བུར་འདུག་པ་
[304b.5]དང་། ཞི་བའི་མིག་ཏུ་ལྟ་བ་དང་། མི་ཁྲོ་བ་དང་། སྨྲ་བ་ཉུང་བ་དང་། རྔུལ་དང་བཤང་གཅི་འབྱུང་བ་དང་། ཟས་མི་འདོད་པ་དང་། ལྷ་དང་བྲམ་ཟེ་ལ་མཆོག་ཏུ་འཛིན་པ་དང་། གཙང་སྦྲ་ཆེ་བ་དང་། སཾསྐྲྀ་ཏའི་སྐད་དུ་སྨྲ་བ་དང་། ཡུན་རིང་པོ་ནས་མིག་འབྱེད་པ་དང་། ལུས་དྲི་ཞིམ་པ་དང་།
[304b.6]གཞན་ལ་མཆོག་སྟེར་ཞིང་བཀྲ་ཤིས་པ་ལ་སོགས་པའི་ཚིག་སྦྱིན་པ་དང་། ཕྲེང་བ་དང་། གོས་དཀར་པོ་དང་། འབབ་ཆུ་དང་། རི་བོ་དང་། ཁང་པ་མཐོན་པོ་ལ་དགའ་བ་དང་། གཉིད་མེད་པ་དང་། གཞན་ལ་གནོད་པ་མི་བྱེད་པ་དང་། མཚན་མ་དེ་དག་དང་ལྡན་ན་ལྷས་དབང་དུ་བྱས་པ་ཡིན་ནོ། །དེ་ལ་
[304b.7]ལྷ་མ་ཡིན་གྱི་གདོན་གྱིས་ཐེབས་པའི་རྟགས་ནི། མིག་ཡོན་པོར་ལྟ་བ་དང་། རང་བཞིན་མ་རུངས་པ་དང་། ལྷ་དང་། བླ་མ་དང་། བྲམ་ཟེ་རྣམས་ལ་ཞེ་སྡང་བ་དང་། འཇིགས་པ་མེད་པ་དང་། རིམས་ཀྱིས་སྙེམས་པ་དང་། དཔའ་ཞིང་བརྟན་པ་དང་། ཁྲོ་བ་ཅན་དང་། རྩོལ་བ་ཞེན་པ་དང་། དྲག་
[305a]
[305a.1]པོ་དང་། སྐེམ་བྱེད་དང་། ཁྱབ་འཇུག་དང་། དབང་པོ་ཡང་བདག་ཡིན་ནོ། །ཞེས་སྨྲ་བ་དང་། ཤ་དང་ཆང་ལ་དད་ཅིང་དགའ་བ་ནི་ལྷ་མ་ཡིན་གྱི་གདོན་ཡིན་ནོ། །དྲི་ཟའི་གདོན་གྱིས་ཐེབས་པའི་རྟགས་ནི། རང་གི་སྤྱོད་པ་ལ་དགའ་ཞིང་ལུས་དྲི་ཞིམ་པ་དང་།
[305a.2]རྟག་ཏུ་སྙིང་དགའ་ཞིང་གླུ་གར་ལ་དགའ་བ་དང་། དེ་བཞིན་དུ་ཁྲུས་དང་། སྐྱེད་མོས་ཚལ་དང་། གོས་དང་ཕྲེང་བ་ལ་དགའ་ཞིང་བྱུག་པ་དམར་པོ་ལ་མོས་པ་དང་། སྒེག་པ་དང་། འགྱིང་བ་འདོད་པ་ནི་དྲི་ཟའི་གདོན་གྱིས་ཟིན་པའི་རྟགས་སོ། །ཀླུའི་གདོན་གྱིས་ཟིན་པའི་རྟགས་ནི། མིག་དམར་
[305a.3]བ་དང་། ཁྲོ་བའི་ངང་ཚུལ་དང་། མིག་ཧར་ཧར་པོར་བགྲད་པ་དང་། ཡོན་པོར་འགྲོ་བ་དང་། མི་བརྟན་ཞིང་འགུལ་བ་དང་། རྒྱུན་དུ་དབུགས་རྒོད་པ་དང་། ལྕེ་ཡང་ནས་ཡང་དུ་འབྱིན་པ་དང་། ཁའི་གྲ་ལ་ལྕེས་བྱུག་པ་དང་། འོ་མ་དང་། བུ་རམ་དང་། ཁྲུས་ལ་དགའ་བ་དང་།
[305a.4]ཁ་བུབ་ཏུ་ཉལ་བ་དང་། གདུགས་མཐོང་ན་འཇིགས་པ་སྟེ་དེ་ནི་ཀླུའི་གདོན་གྱིས་ཟིན་པའི་དབང་དུ་བྱས་པའོ། །གནོད་སྦྱིན་གྱི་གདོན་གྱིས་ཟིན་པའི་རྟགས་ནི། མིག་བགྲད་ཅིང་དམར་ལ་འབུར་བ་དང་། ལུས་དྲི་ཞིམ་པ་དང་། གཟི་མདངས་ཤིན་ཏུ་བཟང་བ་དང་། གར་དང་། གཏམ་དང་།
[305a.5]གླུ་དང་། ཁྲུས་དང་། ཕྲེང་བ་དང་། བྱུག་པ་ལ་དགའ་བ་དང་། ཉ་དང་ཤ་ལ་སྲེད་པ་དང་། སྤྲོ་བ་དང་། དགའ་བ་ཆེ་བ་དང་། སྟོབས་ཆེ་བ་དང་། ནད་མེད་པ་དང་། ལག་པའི་རྩེ་མོ་འགུལ་ཞིང་ཁྱེད་ཅག་རྣམས་ལ་ནོར་ལ་སོགས་པ་ཅི་ཞིག་སྦྱིན་ཞེས་སྨྲ་བ་དང་། གསང་བའི་ཚིག་མི་
[305a.6]ཐུབ་པ་དང་། སྨན་པ་དང་། བྲམ་ཟེ་ལ་སྤྱོད་པ་དང་། ཁྲོ་བག་ཆུང་བ་དང་། འགྲོས་མྱུར་བ་དང་། འདི་དག་ནི་གནོད་སྦྱིན་གྱི་གདོན་གྱིས་ཟིན་པའི་རྟགས་སོ། །ཚངས་པ་སྲིན་པོའི་གདོན་གྱིས་ཟིན་པའི་རྟགས་ནི། དགོད་ཅིང་གར་ལ་དགའ་བ་དང་། ལས་དྲག་པོ་བྱེད་པ་དང་། རྒྱུ་
[305a.7]མེད་པར་རྡེག་པ་དང་། དམོད་པ་དང་བཅས་པའི་ཚིག་ངན་པ་སྨྲ་བ་དང་། འགྲོས་མྱུར་བ་དང་། ལྷ་དང་། བྲམ་ཟེ་དང་། སྨན་པ་ལ་སྡང་བ་དང་། ཤིང་ངམ་མཚོན་ལ་སོགས་པས་བདག་ཉིད་ལ་བསྣུན་པ་དང་། ཀྭ་ཡེ་ཀྭ་ཡེ་ཞེས་བོད་པར་སྨྲ་བ་དང་། བསྟན་བཅོས་དང་རིག་བྱེད་
[305b]
[305b.1]སྔོན་ཐོས་པ་འདོན་པ་དང་། དེ་དག་ནི་ཚངས་པའི་སྲིན་པོའི་གདོན་གྱིས་ཟིན་པའི་མཚན་མའོ། །སིན་པོའི་གདོན་གྱིས་ཟིན་པའི་རྟགས་ནི་ཁྲོ་མིག་ཏུ་ལྟ་བ་དང་། ཁྲོ་གཉེར་དང་ལྡན་པ་དང་། རྟབ་བག་ཏུ་བྱེད་པ་དང་། གཞན་ལ་རྡེག་པ་དང་། རྒྱུག་ཅིང་འགྲོ་བ་དང་། སྐད་ཀྱི་བོར་འདོན་པ་དང་།
[305b.2]གདོང་འཇིགས་སུ་རུང་བ་སྟོན་པ་དང་། ཁ་ཟས་མ་ཟོས་ཀྱང་སྟོབས་དང་ལྡན་པ་དང་། གཉིད་མེད་པ་དང་། མཚན་མོ་རྒྱུ་བ་དང་། ངོ་ཚ་མི་ཤེས་པ་དང་། གཙང་སྦྲ་མེད་པ་དང་། དཔའ་བ་དང་། མ་རུངས་པའི་ལས་བྱེད་པ་དང་། ཚིག་རྩུབ་པོ་སྨྲ་བ་དང་། ཁྲོ་བ་དང་། ཁྲག་དང་། ཕྲེང་བ་དམར་
[305b.3]པོ་དང་། བུད་མེད་དང་། ཤ་དང་ཆང་ལ་དགའ་བ་དང་། ཁྲག་གམ་ཤ་མཐོང་ན་རྐན་གཏོག་ཅིང་མཆུ་བལྡག་པ་དང་། ཁ་ཟས་ཟ་བའི་དུས་སུ་དགོད་པ་དང་། འདི་དག་ནི་སྲིན་པོའི་གདོན་གྱི་མཚན་མའོ། །ཤ་ཟའི་གདོན་གྱིས་ཟིན་པའི་རྟགས་ནི། སེམས་ཐ་མལ་པར་མི་འདུག་པ་དང་། ས་གཅིག་ལ་
[305b.4]མི་གནས་པ་དང་། ཀུན་ཏུ་རྒྱུག་པ་དང་། ཟས་ཀྱི་ལྷག་མ་དང་། གླུ་དང་། གར་དང་། ཤ་དང་ཆང་རྣམས་ལ་དགའ་བ་དང་། དམོད་མོ་དང་བཅས་པའི་ཚིག་ངན་པ་སྨྲ་བ་དང་། བཞིན་མདོག་ཞན་པ་དང་། རྒྱུ་མེད་པར་ངུད་མོ་འདེབས་ཤིང་སེན་མོས་ལུས་འབྲུད་པ་དང་། ལུས་རྩུབ་པ་དང་། སྐད་
[305b.5]ཉམས་པ་དང་། བདག་སྡུག་གོ་ཞེས་སྨྲེ་སྔགས་འདོན་པ་དང་། འབྲེལ་པ་དང་མི་འབྲེལ་བའི་ཚིག་ཏུ་སྨྲ་བ་དང་། དྲན་པ་ཉམས་པ་དང་། གནས་ལ་དགའ་བ་དང་། མི་བརྟན་པ་དང་། གཅེར་བུར་བྱུང་བ་དང་། དྲི་མ་ཅན་དང་། སྲང་ཁ་ན་འདུག་པའི་གོས་ཅི་སྙེད་པ་གོན་པ་དང་། རྩྭ་ཕྲེང་
[305b.6]བར་བྱས་ནས་ལུས་ལ་བརྒྱན་པ་དང་། ཤིང་ལ་རྟ་ཟེར་ཏེ་བཞོན་པ་དང་། མི་གཙང་བ་ལུད་ཕུང་གི་སྟེང་དུ་འདུག་པ་དང་། ཟས་མང་དུ་ཟ་སྟེ་འདི་ནི་ཤ་ཟའི་གདོན་གྱིས་ཟིན་པའི་མཚན་མའོ། །ཡི་དགས་ཀྱི་གདོན་གྱིས་ཟིན་པའི་རྟགས་ནི། གཟུགས་དང་བྱ་བ་དང་དྲི་ཡི་དགས་
[305b.7]དང་འདྲ་ཞིང་འཇིགས་སྐྱེན་པ་དང་། ཟས་མི་འདོད་པ་དང་། རྟག་ཏུ་རྩྭ་གཅོད་པ་སྟེ། འདི་དག་ནི་ཡི་དགས་ཀྱི་གདོན་གྱིས་ཟིན་པའི་མཚན་མའོ། །གྲུལ་བུམ་གྱི་གདོན་གྱིས་ཟིན་པའི་རྟགས་ནི། ཚིག་མང་པོ་སྨྲ་ཞིང་གླལ་བ་དང་། གདོང་ནག་པ་དང་། མི་སྡོད་པར་འགྲོ་བ་དང་།
[306a]
[306a.1]རང་གི་རླིག་པ་ཆེར་སྐྲངས་ཤིང་འཕྱང་བ་ནི་གྲུལ་བུམ་གྱི་གདོན་གྱི་མཚན་མའོ། །བྱད་སྟེམས་ཀྱི་གདོན་གྱིས་ཟིན་པའི་རྟགས་ནི། ཤིང་དང་བོང་བ་ཐོགས་ཤིང་འགྲོ་བ་དང་། སྲང་ཁའི་ཕྱག་དར་གྱི་དུམ་བུ་གྱོན་པ་དང་། གཅེར་བུར་རྒྱུག་པ་དང་། ལྷག་མིག་ཏུ་ལྟ་བ་དང་།
[306a.2]རྩྭའི་རྒྱན་བྱེད་པ་དང་། དུར་ཁྲོད་དང་། གནས་སྟོང་པ་དང་། སྲང་དང་། ཤིང་གཅིག་གི་དྲུང་དུ་བརྟེན་པ་དང་། ཏིལ་གྱི་ཟས་དང་། ཤ་དང་ཆང་ལ་ཆགས་པ་སྟེ་འདི་ནི་བྱད་སྟེམས་ཀྱི་གདོན་གྱིས་ཟིན་པ་ཡིན་ནོ། །གཡེངས་བྱེད་ཀྱི་གདོན་གྱིས་ཟིན་པའི་རྟགས་ནི། ཚིག་རྩུབ་པ་སྨྲ་བ་དང་།
[306a.3]ཟས་མི་འདོད་ཅིང་ཆུ་ཉེ་ཚེ་སློང་བ་དང་། སྔངས་ཤིང་མིག་དམར་བས་ལྟ་བ་དང་། ཚིག་དྲག་པ་སྟེ། འདི་ནི་ཨཽ་ཀི་ར་ཎ་ཞེས་བྱ་བའི་གདོན་གྱིས་ཟིན་པའི་མཚན་མའོ། །རོ་ལངས་ཀྱི་གདོན་གྱིས་ཟིན་པའི་རྟགས་ནི། དྲི་དང་ཕྲེང་བ་ལ་དགའ་བ་དང་། ཚིག་བདེན་པར་སྨྲ་བ་དང་། ཚིག་ཡོངས་སུ་འདར་བ་དང་།
[306a.4]གཉིད་ཆེ་བ་ནི་རོ་ལངས་ཀྱི་གདོན་གྱིས་ཟིན་པ་ཡིན་ནོ། །སྔོན་གཉེན་ཤི་བ་འདྲེར་གྱུར་པའི་གདོན་གྱིས་ཟིན་པའི་རྟགས་ནི། མཐོང་བ་མི་གསལ་བ་དང་། བཞིན་ཞན་པ་དང་། རྐན་བསྐམས་པ་དང་། མིག་དང་རྫི་མ་འགུལ་བ་དང་། གཉིད་ཆེ་བ་དང་། མེའི་དྲོད་ཆུང་བ་དང་། གཡོན་ཕྱོགས་སུ་གོས་གྱོན་པ་དང་།
[306a.5]ཏིལ་དང་། ཤ་དང་། བུ་རམ་ལ་དགའ་བ་དང་། ཚིག་འཁྲུལ་བ་དང་། འདི་ནི་སྔོན་གྱི་གཉེན་ཤི་བའི་གདོན་གྱིས་ཟིན་པའི་མཚན་མའོ། །བླ་མ་དང་རྒན་པ་དང་གྲུབ་པ་རྣམས་ཀྱི་དམོད་པ་ལས་བྱུང་བའི་གདོན་གྱིས་ཟིན་པའི་རྟགས་ནི། སྤྱོད་ལམ་དང་ཟས་ལ་སོགས་པ་གདོན་སོ་སོའི་
[306a.6]རྟགས་དང་། ཇི་ལྟར་མཐུན་པ་ཡིན་པ་དེ་ལྟར་ངོས་གཟུང་བར་བྱའོ། །མདོར་ན་བྱིས་པའི་ཚོགས་ཀྱི་རྗེས་སུ་འབྲང་བའི་གདོན་དང་གཅེར་བུར་འདུག་ཅིང་སྐྲ་གྱེན་དུ་བརྫེས་པ་དང་། སེམས་སྡུག་བསྔལ་གྱིས་གདུངས་པ་དང་། ཡུན་རིང་པོར་གདོན་གྱིས་ཟིན་པ་ནི་སྤང་བར་བྱའོ། །གདོན་
[306a.7]གྱི་དམིགས་བསྟན་པའི་ལེའུ་སྟེ་བཞི་པ་རྫོགས་སོ།། །།དེ་ནས་གདོན་ནད་དེ་དག་གསོ་བའི་ལེའུ་བརྗོད་པར་བྱ་སྟེ། གང་གིས་ལུས་ལ་འཁྲིག་པ་དང་གཏོར་མ་ལ་སོགས་པ་འདོད་པའི་གདོན་རྣམས་ཀྱིས་མི་གཙེ་བར་འདོད་པ་རྣམས་ཀྱིས་བཟླས་བརྗོད་དང་། སྦྱིན་སྲེག་དང་།
[306b]
[306b.1]གཏོར་མ་དང་། བརྟུལ་ཞུགས་དང་། དཀའ་ཐུབ་དང་། ཚུལ་ཁྲིམས་དང་། བསམ་གཏན་དང་། སྦྱིན་པ་དང་། ཤེས་རབ་དང་། སྙིང་རྗེ་ལ་སོགས་པ་རྣམས་བསྟེན་ན་རྒྱལ་བར་བྱེད་དོ། །གདོན་གྱིས་མི་བརྫིའོ། །ཤིང་ཀུན་དང་། ཚ་བ་གསུམ་དང་། བ་བླ་དང་། གླ་རྩི་དང་། སྒོག་པ་དང་།
[306b.2]ཨརྐའི་རྩ་བ་དང་། སྤང་སྤོས་དང་། ཨ་ཛ་ལོ་མི་དང་། གོ་ལི་མི་དང་། འབམ་པོ་དང་། ཤུ་དག་དང་། གན་དྷ་པྲི་ཡང་ཀུ་དང་། ཀུ་ཀཱུ་ཏི་དང་། སརྦ་གན་དྷ་ཞེས་བྱ་བ་གན་དྷ་ཀུ་ལི་དང་། ཀ་ན་ཞེས་བྱ་བ་ཀ་ཀ་ད་དང་། ལ་བ་ཀ་དང་། ར་མཉེ་འོ་མ་ཅན་དང་། བཛྲ་ཀྲོ་དྷ་དང་། སླེ་ཏྲེས་དང་། ཀར་ཀ་ཏ་ཤྲིང་
[306b.3]གི་དང་། མོ་ཧ་ན་བལ་ལི་དང་། ལིག་བུ་མིག་དང་། ཡུངས་ཀར་དང་། གཞན་ཡང་གདོན་འཇོམས་པའི་སྨན་ཇི་སྙེད་པ་དང་། བོང་བུ་དང་། རྟ་དང་། ཁྱི་དང་། ལུག་དང་། རྔ་མོ་དང་། རཀྵི་དང་། གོ་དྷ་དང་། སྲེ་མོ་དང་། རེག་འབྱམ་དང་། གུང་དང་། བྱི་ལ་དང་། བ་ལང་དང་།
[306b.4]སེང་གེ་དང་། སྟག་དང་། རྒྱ་མཚོ་ན་གནས་པའི་སྲོག་ཆགས་ཀྱི་པགས་པ་དང་། མཁྲིས་པ་དང་། སོ་དང་། སེན་མོ་དང་། དེ་རྣམས་མར་རྙིང་པ་འམ། སར་པའམ། ཏིལ་མར་རམ། གང་ཡང་རུང་བ་དང་ལྷན་ཅིག་བསྒྲུབས་ཏེ། དེས་བཏུང་བ་དང་། སྣར་བླུགས་པ་དང་། བསྐུ་
[306b.5]མཉེ་དང་། ཕྱེ་མའི་དུད་པས་བདུག་པ་དང་། རི་ལུར་བྱས་ཏེ། དེ་ལ་མིག་སྨན་དང་། སྣར་ཕྱེ་མས་བུད་པ་དང་། བསྐུ་བ་དང་། བསྐོལ་བའི་ཁུ་བས་བླུགས་པ་ལ་སོགས་པ་ཅི་རིགས་པར་བྱས་ནས་གདོན་སྨྱོ་བྱེད་དང་། བརྗེད་བྱེད་དང་བཅས་པ་ཞི་བར་བྱའོ། །ཧ་ཏི་པི་པི་ལིང་དང་།
[306b.6]པི་པི་ལིང་གི་རྩ་བ་དང་། ཚ་བ་གསུམ་དང་། སྐྱུ་རུ་ར་དང་། ཡུངས་ཀར་དང་། སྲོག་ཆགས་གོ་དྷ་དང་། སྲེ་མོ་དང་། བྱི་ལ་དང་། ཛ་ཤ་དང་། དེ་རྣམས་ཀྱི་མཁྲིས་པ་ལྷན་ཅིག་བཏགས་པའི་ཕྱེ་མ་སྣ་ནས་གཏོང་བ་དང་། བསྐུ་བྱུག་དང་། བླུགས་པ་ལ་སོགས་པ་བྱས་ན་གདོན་
[306b.7]འཇོམས་སོ། །ཡུངས་ཀར་དང་། ཤུ་དག་དང་། ཤིང་ཀུན་དང་། པྲི་ཡང་ཀུ་དང་། སེར་པོ་རྣམ་གཉིས་དང་། བཙོད་དང་ཀ་ནི་དཀར་པོ་དང་། འབྲས་བུ་གསུམ་དང་། ཤི་ཏ་ཀ་ཊ་བི་དང་། ནིམ་པའི་ལོ་མ་དང་། ཀ་རཉྫ་ཀ་དང་། ཤྲི་ཡའི་ས་བོན་དང་། ཐང་ཤིང་དང་། ཚ་བ་
[307a]
[307a.1]གསུམ་དང་། དེ་རྣམས་བཏགས་པའི་ཕྱེ་མ་དང་། མར་ཅི་ཙམ་པའི་བཞི་འགྱུར་གྱི་བ་གཅིན་དང་། བསྐོལ་བའི་སྨན་མར་ནི་དོན་གྲུབ་ཀྱི་སྨན་མར་ཞེས་བྱ་སྟེ། དེ་ལས་རན་པར་བཏུང་བ་དང་སྣར་བླུགས་པ་བྱས་ན། གདོན་ཐམས་ཅད་འཇོམས་པར་བྱས་ཤིང་ཁྱད་པར་དུ་ལྷ་མ་
[307a.2]ཡིན་གྱི་གདོན་སེལ་ཏེ། གཤེད་བྱེད་དང་། བཀྲ་མི་ཤིས་པ་དང་། དུག་དང་། སྨྱོ་བྱེད་དང་། རིམས་དང་། བརྗེད་བྱེད་དང་། སྡིག་པ་རྣམས་འཇོམས་སོ། །སྨན་དེ་ཉིད་ཀྱི་ཕྱེ་མར་གཅིན་དང་སྦྱར་ཏེ་བཏུང་བའམ། སྣར་བླུགས་པ་དང་། བྱུག་པ་དང་། ཁྲུས་དང་། དྲིལ་བ་རྣམས་
[307a.3]བྱས་ན་གོང་དུ་བསྟན་པའི་ཡོན་ཏན་ཐམས་ཅད་དང་ཁྱད་པར་དུ་རྒྱལ་པོའི་སྒོར་ཡང་དགོས་པའི་དོན་ཐམས་ཅད་འགྲུབ་པར་འགྱུར་རོ། །ཡུངས་ཀར་དང་། ཚ་བ་གསུམ་དང་། ཤུ་དག་དང་། ཨ་ཤྭ་གན་དྷ་དང་། སེར་པོ་རྣམ་གཉིས་དང་། ཤིང་ཀུན་དང་། ཀུན་དོང་གི་རྩ་བ་དང་། ཀ་
[307a.4]རཉྫའི་ས་བོན་དང་། ཤིར་ཤའི་མེ་ཏོག་དང་། ཀ་པིད་ཏའི་འབྲས་བུ་དང་། ཤུན་ཕྲགས་དང་། རྒྱམ་ཚ་དང་། ཏ་ག་རུ་དང་། རུ་རྟ་དང་། སོན་ཀའི་རྩ་བ་དང་། གེ་རི་ཀར་ནི་དཀར་པོ་དང་། དེ་རྣམས་བཏགས་ལ་ར་གཅིན་དང་། ལེགས་པར་བསྒོས་ཏེ་བ་ལང་གི་མཁྲིས་པ་དང་
[307a.5]བསྲེས་ཏེ་རི་ལུར་བྱས་ལ་སྦྱིན་ན། རྨ་རེད་པ་དང་། སྨྱོ་བྱེད་དང་། མུན་ཐིབས་ཞེས་བྱེད་པ་དང་། མཚན་མོ་མི་མཐོང་བ་དང་། དྲན་པ་སྟོར་བ་དང་། ཆུས་ཁྱེར་ཏེ་བརྒྱལ་བ་དང་། དུག་མདའ་ལ་སོགས་པས་ཕོག་པ་དང་། སྦྲུལ་གྱི་མཆེ་བས་ཟིན་ཏེ་བརྒྱལ་བ་དང་། དེ་རྣམས་ལ་
[307a.6]མིག་ཏུ་བསྐུ་བ་དང་། སྣར་བླུགས་པ་དང་། བསྐུ་བ་བྱས་ན་ཞི་བར་བྱེད་དོ། །རས་བལ་གྱི་ས་བོན་དང་། རྨ་བྱའི་སྒྲོ་དང་། བྲི་ཧ་ཏི་དང་། མ་ཧཱ་དེ་བ་ལ་ཕུལ་བའི་མེ་ཏོག་རྙིང་པ་དང་། པོ་སོན་ཆ་དང་། ཤིང་ཚ་དང་། སྤང་སྤོས་དང་། བྱི་ལའི་རྟུག་པ་དང་། འབྲས་ཀྱི་ཕུབ་མ་
[307a.7]དང་། ཤུ་དག་དང་། མིའི་སྐྲ་དང་། སྦྲུལ་གྱི་པགས་པ་བརྗེས་པ་དང་། གླང་པོ་ཆེའི་སོ་དང་། གླང་གི་རྭ་དང་། ཤིང་ཀུན་དང་། ན་ལེ་ཤམ་དང་། འདི་རྣམས་ཆ་མཉམ་སྟེ་བཏགས་པ་བསྲེགས་པའི་དུད་པས་བདུགས་ན་སྐེམ་བྱེད་ཀྱི་གདོན་དང་། སྨྱོ་བ་དང་། ཤ་ཟ་དང་། ལྷའི་
[307b]
[307b.1]གདོན་གྱིས་ཐེབས་པ་རྣམས་སེལ་བའི་མཆོག་ཡིན་ནོ། །ཡང་ན་བཅའ་སྒ་དང་། པི་པི་ལིང་དང་། ན་ལེ་ཤམ་དང་། གནྡྷ་བྷ་དྲ་དང་། གུར་གུམ་དང་། པི་པི་ལིང་གི་རྩ་བ་དང་། ཀཎྜ་ཀ་རི་དང་། ཡུང་བ་དང་། སྐྱེར་པའི་རྩ་བ་དང་། རུ་རྟ་དང་། ཡུངས་ཀར་དང་། ཡུངས་ནག་དང་།
[307b.2]བ་ལ་ཀ་དང་། དུག་མོ་ཡུངས་དང་། ཙནྡན་དཀར་པོ་དང་། སྒོག་སྐྱ་དང་། ཨ་རུ་ར་དང་། བ་རུ་ར་དང་། པུ་ཤེལ་ཙི་དང་། པུ་ཙེ་ཤེལ་དང་། ཤུ་དག་དང་། སྤངས་མ་དང་། ཤིང་མངར་དང་། བ་བླ་དང་། ཙནྡན་དམར་པོ་དང་། སུག་སྨེལ་དང་། ལྡོང་རོས་དང་།
[307b.3]ཤུག་པ་དང་། པོག་དཀར་པོ་དང་། རྒྱ་སྤོས་དང་། མེ་ཏོག་མ་དུ་ཀའི་ཤིང་དང་། པྲི་ཡང་ཀུ་དང་། བོང་ང་དཀར་པོ་དང་། སྐྱེར་ཁཎྜ་དང་། དབྱི་མོ་རྣམས་ཆ་མཉམ་སྟེ། ཞིབ་ཏུ་བཏགས་ལ་དེ་རྣམས་སྤྱིར་བསྡོམས་པའི་བཞི་འགྱུར་གྱི་མར་རྙིང་པ་དང་། གཅིན་གྱི་སྡེ་ཚན་མདོའི་གནས་
[307b.4]སུ་བསྟན་པ་ལས་གཅིན་མར་དང་ཆ་སྙོམས་ཏེ་རེ་རེ་ནས་བསྐོལ་ལ་གཅིན་དང་མར་ལུས་པ་བཙགས་པ་ནི་གདོན་ཁུས་འདེབས་པའི་མར་ཡིན་ནོ། །ཞེས་སྔོན་གྱི་མཁས་པ་དག་འདོད་དེ། དེ་ལས་རན་པར་འཐུངས་ན་གདོན་སེལ་བའི་མཆོག་ཡིན་ནོ། །ཡང་ན་སྤོས་དང་། ཤིང་
[307b.5]མངར་དང་། ཀ་རཉྫ་དང་། རྒྱ་སྐྱེགས་དང་། པ་ཏོ་ལའི་རྩ་བ་དང་། བཙོད་དང་། ཤུ་དག་དང་། པ་ཏོ་ལ་དང་། ཤིང་ཀུན་དང་། ཡུངས་ཀར་དང་། ཀཎྜ་ཀ་རི་དང་། སེར་པོ་རྣམ་པ་གཉིས་དང་། གན་དྷ་པྲི་ཡང་ཀུ་དང་། པུ་ཙེ་ཤེལ་དང་། རྒྱ་ཤུག་གི་འབྲས་བུ་དང་། ཚ་བ་གསུམ་
[307b.6]དང་། འབྲས་བུ་གསུམ་དང་། གཙོ་འབྲས་དང་། ཐང་ཤིང་དང་། བྱི་དང་ག་དང་། ཨཉྫ་གན་དྷ་དང་། སླེ་ཏྲེས་དང་། ཨད་ཀོ་ལ་དང་། ཀོ་ཤ་ཏ་ཀི་དང་། ཤི་ཀྲུ་དང་། ནིམ་པ་དང་། གླ་སྒང་དང་། དུག་མོ་ཡུངས་དང་། རུ་རྟ་དང་། ཤི་རི་ཤའི་མེ་ཏོག་དང་། ས་བོན་དང་།
[307b.7]གི་རི་ཀརྞི་དང་། དན་ཏི་དང་། ཀྲུ་ཏྲུག་ཏྲེས་དང་། བིལ་བ་རྣམས་ཆ་སྙོམས་ཏེ་ཞིབ་ཏུ་བཏགས་ལ་དེ་རྣམས་སྤྱིར་བསྡོམས་པའི་བཞི་འགྱུར་གྱི་མར་རྙིང་པ་དང་། གཅིན་ནམ་བརྒྱད་དང་། དེ་རེ་རེ་ནས་གོང་མ་བཞིན་དུ་བསྐོལ་ལ། གཅིན་དང་མར་ཉི་ཚེ་ལུས་པ་བཙགས་པའི་མིང་ནི་གདོན་ཁུས་
[308a]
[308a.1]འདེབས་པའི་མར་ཆེན་པོ་ཞེས་བྱ་སྟེ། ཆོ་ག་བཞིན་དུ་ལེགས་པར་སྦས་ལ། དེ་ལས་བཏུང་བ་དང་། མིག་ལ་བསྐུ་བ་དང་། སྣར་བླུགས་པ་དང་། ལུས་བསྐུ་བ་བྱས་ན་གདོན་ཡིན་ནོ་ཅོག་ཐམས་ཅད་དང་། སྨྱོ་བྱེད་དང་། མཛེ་དང་། རིམས་རྣམས་སེལ་བར་བྱེད་དོ། །
[308a.2]དུས་གང་དང་གང་གི་ཉིན་ཞག་ལ་གདོན་གྱིས་ཟིན་པའི་ཉིན་ཞག་དེ་དང་དེའི་དུས་སུ། ལྷག་པར་གཏོར་མ་དང་། སྦྱིན་སྲེག་ལ་སོགས་པ་སྨན་པས་ཇི་ལྟ་ཇི་ལྟར་རིགས་པ་བཞིན་སྦྱར་རོ། །གཞན་ཡང་ཁྲུས་དང་། གོས་དང་། ཤ་དང་། ཚིལ་དང་། ཆང་དང་། འོ་མ་དང་། བུ་རམ་
[308a.3]ལ་སོགས་པ་གདོན་གང་ལ་དད་ཅིང་སྲེད་པ་དེའི་ཚེ་དེ་ལ་སྦྱིན་ནོ། །གདོན་ཐམས་ཅད་ལ་ནི་རིན་པོ་ཆེ་རྡོ་རྗེ་དང་། བཻ་ཌཱུརྱ་དང་། མརྒད་ལ་སོགས་པ་དང་། སུ་མ་ན་ལ་སོགས་པའི་མེ་ཏོག་དྲི་ཞིམ་པའི་ཕྲེང་བའམ། ཡང་ན་སྨན་གྱི་རིགས་དྲི་ཞིམ་པ་དང་། ཕྲེང་བ་དང་། མོན་སྲན་སྡེའུ་དང་།
[308a.4]མོ་སྲན་ན་གུལ་ལ་སོགས་པའི་འབྲུ་དང་། སྦྲང་རྩི་དང་། ཞུན་མར་དང་། ཁུར་བ་དང་། ལ་དུ་ལ་སོགས་པ་སྦྱིན་ཏེ་སྦྱོར་བ་དེ་དག་ནི་གདོན་གྱི་ཆོ་ག་སྤྱིར་བསྟན་པ་ཡིན་ནོ། །དེ་ལ་ལྷའི་གདོན་དང་། དྲང་སྲོང་དང་། རྒན་པོ་དང་། གྲུབ་པ་དང་། བླ་མ་དང་། གདོན་ལྔ་པོ་དེ་དག་
[308a.5]ལ་ནི་ལྷ་ཁང་ནས་གཏོར་མ་སྦྱིན་ནོ། །དེ་ལས་ཀྱང་ལྷའི་གདོན་ལ་ནི་བྱང་ཕྱོགས་སུ་བལྟས་ཏེ་སྦྱིན་ནོ། །ལྷ་མ་ཡིན་གྱི་གདོན་ལ་ནི་དུས་ཇི་ལྟ་བ་བཞིན་དུ་ནུབ་ཕྱོགས་སུ་ཁ་བལྟས་ཏེ་བཞི་མདོ་ནས་གཏོར་མ་སྦྱིན་ནོ། །དྲི་ཟའི་གདོན་ལ་ནི་བ་ལང་གི་ལམ་ནས་གོས་དང་རྒྱན་དང་ཆས་པའི་
[308a.6]གཏོར་མ་སྦྱིན་ནོ། །སྔོན་གཉེན་ཤི་བ་འདྲེར་གྱུར་པའི་གདོན་དང་། ཀླུའི་གདོན་ལ་ནི་འབབ་ཆུའི་ངོས་ནས་གཏོར་མ་བཏང་སྟེ། དེ་ལས་ཀྱང་ཀླུའི་གདོན་ལ་ནི་ཁྱད་པར་དུ་ཤར་ལྷོའི་མཚམས་སུ་ཁ་བལྟས་ཏེ་གཏོར་མ་གཏང་ངོ་། །གནོད་སྦྱིན་གྱི་གདོན་ལ་ནི་གནོད་སྦྱིན་གྱི་གནས་སམ།
[308a.7]ཡང་ན་ཆུ་བོ་གཉིས་འདོམ་པའི་མདོ་ལས་གཏང་ངོ་། །སྲིན་པོའི་གདོན་དང་། ཚངས་པ་སྲིན་བུའི་གདོན་ལ་ནི་ལམ་གྱི་བཞི་མདོ་དང་། ནགས་ཚང་ཚིང་འཇིགས་སུ་རུང་བ་ལས་ལྷོ་ཕྱོགས་སུ་ཁ་བལྟས་ཏེ་གཏོར་མ་སྦྱིན་ནོ། །ཚངས་པ་སྲིན་པོའི་གདོན་ལ་ནི་ཤར་ཕྱོགས་སུ་ཁ་བལྟས་ཏེ་སྦྱིན་ནོ། །
[308b]
[308b.1]ཤ་ཟའི་གདོན་ལ་ནི་གནས་སྟོང་པ་ནས་ནུབ་ཕྱོགས་སུ་ཁ་བལྟས་ཏེ་གཏོར་མ་སྦྱིན་ནོ། །དེ་ལ་ལྷའི་གདོན་ལ་ནི་གཏོར་མ་ཤིན་ཏུ་གཙང་ཞིང་དགེ་བར་བཤམས་ལ། དེ་ཡང་མེ་ཏོག་དཀར་པོ་ལས་བྱས་པའི་ཕྲེང་བ་དང་། ཨ་ཀ་རུ་ལ་སོགས་པ་དྲི་ཞིམ་པོ་དང་། འབྲས་ཀྱི་འོ་ཐུག་དང་། འབྲས་
[308b.2]ཆན་དང་། ཞོ་དང་། གདུགས་དཀར་པོ་དང་བཅས་པ་འདོད་པ་ཡིན་ནོ། །ཤིང་ཀུན་དང་། ཡུངས་ཀར་དང་། ཤུ་དག་དང་། ཚ་བ་གསུམ་དང་། འདི་རྣམས་སྲང་ཕྱེད་ཕྱེད་བཏགས་པའི་ཕྱེ་མ་མར་སྲང་སུམ་ཅུ་རྩ་གཉིས་དང་། མར་བཞི་འགྱུར་གྱི་བ་གཅིན་དང་ལྷན་ཅིག་བསྐོལ་ཏེ་མར་འབའ་
[308b.3]ཞིག་ལུས་པ་ལས་བཏུང་བ་དང་། སྣར་བླུགས་པ་དང་། བསྐུ་བ་བྱས་ན་ལྷའི་གདོན་ལས་གྲོལ་བར་འགྱུར་རོ། །དེ་བཞིན་དུ་ཤུ་དག་དང་། ཤིང་ཀུན་དང་། སྒོག་སྐྱ་དང་། དེ་རྣམས་ཀྱི་ཕྱེ་མ་ར་གཅིན་དང་བཏགས་ཏེ། སྣར་བླུགས་པ་དང་། མིག་ཏུ་བསྐུས་ན་ཡང་ལྷའི་གདོན་ལས་ཐར་
[308b.4]རོ། །ལྷ་མ་ཡིན་གྱི་གདོན་ལ་ནི་ཤིང་ཏོག་ཇི་སྙེད་པ་དང་། པུ་ཤེལ་ཙི་དང་། པད་མ་དང་། ཨུཏྤལ་དང་སྦྱར་བའི་གཏོར་མ་སྦྱིན་ནོ། །ཀླུའི་གདོན་ལ་ནི་སུ་མ་ན་ལ་སོགས་པའི་མེ་ཏོག་དང་། འབྲས་ཡོས་དང་། བུ་རམ་དང་སྦྱར་བའི་སྣུམ་ཁུར་དང་། བུ་རམ་དང་སྦྱར་བའི་འབྲས་ཆན་དང་།
[308b.5]ཟས་མཆོག་ཅེས་བྱ་བའི་འོ་ཐུག་དང་། སྦྲང་རྩི་དང་། འོ་མ་དང་། ས་ནག་པོ་དང་། ནཱ་ག་གེ་སར་དང་། ཤུ་དག་དང་། པདྨ་དང་། གུ་གུལ་དང་། པུ་ཤེལ་ཙི་དང་། ཨུཏྤ་ལ་དམར་པོའི་འདབ་མ་དང་ལྡན་པའི་གཏོར་མ་སྦྱིན་ནོ། །སེང་ཕྲོམ་དཀར་པོའི་ལོ་མ་དང་། རྒྱ་སྤོས་དང་།
[308b.6]ནཱ་ག་གེ་སར་དང་། ཡུངས་ཀར་དང་འདི་རྣམས་ཆུ་གྲང་མོ་དང་བཏགས་ཏེ། སྣར་བླུགས་པ་དང་། མིག་ལ་བསྐུས་ན་ཀླུའི་གདོན་ལས་ཐར་རོ། །གནོད་སྦྱིན་གྱི་གདོན་ལ་ནི་འོ་མ་དང་། ཞོ་དང་། མར་དང་། འབྲས་ཆན་བསྲེས་པའི་ཟས་དང་། གུ་གུལ་དང་། སྒྲོན་ཤིང་དང་། པདྨ་
[308b.7]དང་། པུ་ཤེལ་ཙི་དང་། གོས་དང་། གསེར་རྒྱན་དུ་བྱས་པ་འམ། མ་བྱས་པའང་རུང་བའི་གཏོར་མ་སྦྱིན་ནོ། །མར་དང་། འོ་མ་དང་། བ་གཅིན་དང་། ཆ་སྙོམས་ཏེ་བསྐོལ་བ་ལས་བཏུང་བ་དང་། སྣར་བླུགས་པ་དང་། བསྐུ་བྱུག་བྱས་ན་གནོད་སྦྱིན་གྱི་གདོན་ལ་ཕན་
[309a]
[309a.1]ནོ། །ཨ་རུ་ར་དང་། སེར་པོ་རྣམ་གཉིས་དང་། སྒོག་སྐྱ་དང་། ན་ལེ་ཤམ་དང་། ཤུ་དག་དང་། ནིམ་པའི་ལོ་མ་དང་། འདི་རྣམས་བཏགས་པར་གཅིན་དང་སྦྱར་ཏེ། སྣར་བླུགས་པ་དང་། མིག་ལ་བསྐུས་ན་ཡང་གནོད་སྦྱིན་གྱི་གདོན་ལས་གྲོལ་ལོ། །ཚངས་པའི་
[309a.2]སྲིན་པོའི་གདོན་ལ་ནི་ནས་ཕྱེ་བྲེ་དོ་ལས་བྱས་པའི་སྣོད་བཀང་བ་དང་། བུམ་པ་གང་བའི་ཆུ་དང་། ཏིལ་བཏགས་པའི་ཕྱེ་དང་། གདུགས་དང་། གོས་དང་། གུར་གུམ་ལ་སོགས་པའི་བྱུག་པ་དང་ལྡན་པའི་གཏོར་མ་སྦྱིན་ནོ། །སེང་ལྡེང་སྲང་ཉི་ཤུ་བསྐོལ་བའི་ཁུ་བའི་ནང་དུ་ཚ་བ་གསུམ་དང་།
[309a.3]འབྲས་བུ་གསུམ་དང་། ཤིང་ཀུན་དང་། ཤུ་དག་དང་། ཤུ་ཏི་དང་། ཡུངས་ཀར་དང་། ནིམ་པའི་ལོ་མ་དང་། སྒོག་སྐྱ་དང་། དེ་རྣམས་ཀྱི་ཕྱེ་མ་མར་སྲང་ཉི་ཤུ་རྩ་བརྒྱད་དང་། བ་གཅིན་མར་གྱི་སུམ་འགྱུར་དང་ལྷན་ཅིག་བསྐོལ་བ་དེ་ལས་ཡང་བཏུང་བ་དང་། སྣར་བླུགས་པ་དང་། བསྐུ་
[309a.4]བྱུག་བྱས་ན་ཕན་ནོ། །སྲིན་པོའི་གདོན་ལ་ནི་ཏིལ་བཏགས་པའི་ཕྱེ་མ་དང་། མེ་ཏོག་དཀར་པོ་དང་། འབྲས་དང་། མོ་སྲན་གྲེའུ་ལ་སོགས་པ་བསྲེས་པའི་ཆན་དང་། ཤ་བཙོས་པ་དང་། ཤ་རྗེན་པ་དང་། ནིས་པ་པ་དང་། ཁྲག་དང་བཅས་པའི་གཏོར་མ་སྦྱིན་ནོ། །ཀ་རཉྫ་དང་། ཤྲི་
[309a.5]ཤ་དང་། པ་ཏྲ་ལ་ནག་པོ་གཉིས་ཀྱི་རྩ་བ་དང་། ཤུན་ཕྲགས་དང་། མེ་ཏོག་དང་། འབྲས་བུ་དང་། བིལ་བའི་རྩ་བ་དང་། ཚ་བ་གསུམ་དང་། ཤིང་ཀུན་དང་། དུག་མོ་ཡུངས་དང་། སྒོག་སྐྱ་དང་། སྐྱུ་རུ་རའི་འབྲས་བུ་དང་། འདི་རྣམས་ཀྱི་ཕྱེ་མ་བ་གཅིན་དང་། ཧ་ཅང་མི་སླ་
[309a.6]མི་སྐ་ཙམ་དུ་སྦྱར་ཏེ། སྣར་བླུགས་པ་དང་། མིག་ཏུ་བསྐུས་ན་སྲིན་པོའི་གདོན་ལ་ཕན་ནོ། །ཡང་ན་སྨན་དེ་དག་ཉིད་མར་དང་བ་གཅིན་མར་གྱི་བཞི་འགྱུར་དང་ལྷན་ཅིག་སྦྲུས་ཏེ་བསྐོལ་ལ་ལྷག་མ་ལུས་པ་དང་། བཏུང་བ་དང་སྣར་བླུགས་པ་དང་བསྐུ་བྱུག་བྱས་ན་སྲིན་པོའི་གདོན་ཟློག་པར་བྱེད་དོ། །
[309a.7]ཤ་ཟའི་གདོན་ལ་ནི་བུ་རམ་ཆང་དང་། ཏིལ་གྱི་ཚིགས་མ་དང་། ཏིལ་གྱི་ཕྱེ་མ་དང་། ཞོ་དང་། ལ་ཕུག་དང་། ལན་ཚྭ་དང་། མར་དང་། འབྱུང་པོའི་ཟས་འབྲས་དང་། སྲན་མ་ཤ་ལ་སོགས་པ་བསྲེས་པའི་ཆན་དང་། ཕྱེ་ལས་བྱས་པའི་ཟན་དང་བཅས་པའི་གཏོར་མ་སྦྱིན་ནོ། །སེར་
[309b]
[309b.1]པོ་རྣམ་གཉིས་དང་། བཙོད་དང་། ཤུ་ཏི་དང་། ལན་ཚྭ་དང་། དོང་གྲ་དང་། ཤིང་ཀུན་དང་། པྲི་ཡང་ཀུ་དང་། ཚ་བ་གསུམ་དང་། སྒོག་སྐྱ་དང་། འབྲས་བུ་གསུམ་དང་། ཤུ་དག་དང་། པ་ཊ་ལི་དང་། གི་རི་གརྞི་ཀ་དཀར་པོ་དང་། ཤྲི་ཤའི་མེ་ཏོག་དཀར་པོ་དང་། འདི་རྣམས་བ་
[309b.2]གཅིན་དང་། དེའི་བཞི་ཆའི་མར་དང་ལྷན་ཅིག་བསྐོལ་ཏེ། དེ་ལས་བཏུང་བ་དང་། བསྐུ་བྱུག་བྱས་ན་ཤ་ཟའི་གདོན་སེལ་ཏོ། །ཡང་ན་སྨན་དེ་ཉིད་རའི་གཅིན་དང་བཏགས་ཏེ་མིག་ཏུ་བསྐུ་བ་དང་། སྣར་བླུགས་པ་ཡང་ཕན་ནོ། །ལྷའི་གདོན་དང་། དྲང་སྲོང་གི་གདོན་དང་། སྔོན་གྱི་གཉེན་ཤི་བ་
[309b.3]འདྲེར་གྱུར་པའི་གདོན་དང་། དྲི་ཟའི་གདོན་དང་། དེ་དག་ལ་ནི་སྣ་སྨན་རྣོ་བ་གཏང་བར་བྱ་སྟེ། འཇམ་པའི་བག་སྨན་མར་ལ་སོགས་པ་སྤྱད་པར་བྱའོ། །ཤ་ཟའི་གདོན་མ་གཏོགས་པའི་གདོན་ཐམས་ཅད་ལ་མི་མཐུན་ཞིང་མི་འཕྲོད་པའི་ཟས་མི་སྦྱིན་ཏེ། གལ་ཏེ་མི་མཐུན་པར་
[309b.4]བྱིན་པར་གྱུར་ན། གདོན་དེ་དག་ནི་མཐུ་སྟོབས་ཆེ་བ་ཡིན་པས་ཁྲོས་ཏེ་སྨན་པ་དང་ནད་པ་གཉིས་ཀ་གསོད་པར་བྱེད་དོ། །འཕགས་པ་སྤྱན་རས་གཟིགས་དབང་ཕྱུག་འཇིག་རྟེན་མགོན་པོ་ཕྱག་བཅུ་གཉིས་པའི་གཟུངས་སྔགས་བཟླས་ན། ནད་ཐམས་ཅད་གསོ་བར་བྱེད་ཅིང་
[309b.5]གདོན་ཐམས་ཅད་ལས་ཀྱང་རྒྱལ་བར་བྱེད་དོ། །དེ་བཞིན་དུ་སྨྱོ་བྱེད་དང་། བརྗེད་བྱེད་ལ་སོགས་པ་མདོར་ན་སེམས་འཁྲུགས་པའི་གདོན་ཐམས་ཅད་ཟློག་པར་བྱེད་པའི་མཆོག་ཡིན་ནོ། །གཞན་ཡང་ནད་པ་དེས་ལུས་གཙང་སྦྲ་བྱས་ཏེ། རིག་སྔགས་ཀྱི་རྒྱལ་མོ་རྨ་བྱ་
[309b.6]ཆེན་མོ་དུས་རྟག་ཏུ་མདུན་དུ་བཀླགས་ཏེ་ཉན་དུ་བཅུག་ན་ཡང་ཕན་ནོ། །གཞན་ཡང་གདོན་གྱི་མགོན་པོ་དཔལ་ལྡན་དབང་ཕྱུག་ཆེན་པོ་དང་། དེའི་འཁོར་རྣམས་མཆོད་པ་བྱེད་པ་དང་། དེ་བཞིན་དུ་གྲུབ་པའི་རིག་སྔགས་བཟླས་བརྗོད་བྱས་ན་ཡང་གདོན་ཐམས་ཅད་སེལ་བར་བྱེད་
[309b.7]དོ། །གཞན་ཡང་འོག་ནས་སྨྱོ་བྱེད་ཀྱི་ཆོ་ག་ཐམས་ཅད་འདིར་བྱས་ན་ཕན་ནོ། །འདིར་བརྗོད་པ་ཐམས་ཅད་ཀྱང་སྨྱོ་བྱེད་ལ་ཕན་ཏེ། གཅིག་ལ་གཅིག་ཕན་ཚུན་ཕན་པ་ཡིན་པས་ཅི་རིགས་པར་སྦྱར་ན་ཞི་བར་འགྱུར་རོ། །གདོན་ནད་གསོ་བའི་ལེའུ་སྟེ་ལྔ་པ་རྫོགས་སོ།། །།
[310a]
[310a.1]དེ་ནས་སྨྱོ་བྱེད་ཀྱི་ནད་གསོ་བའི་ལེའུ་བཤད་པར་བྱ་སྟེ། དེ་ལ་སྨྱོ་བྱེད་ཀྱི་ནད་ནི་ནད་གཞི་གསུམ་རེ་རེ་ལས་གྱུར་པ་དང་། སེམས་གདུངས་པ་ལས་གྱུར་པ་དང་། དུག་ལས་གྱུར་པ་སྟེ་དྲུག་ཡོད་དོ། །དེ་ལ་སྨྱོ་བྱེད་ཅེས་བྱ་བ་ནི་ལུས་དང་སེམས་ཀྱི་རྒྱུ་སྲང་ནད་གཞིས་ལོག་པར་བསྒྱུར་
[310a.2]ཏེ། གནོད་པར་གྱུར་པ་ལ་སྨྱོ་བྱེད་ཅེས་བྱའོ། །དེ་ལ་སྨྱོ་བྱེད་ནི་བཟའ་བ་དང་། བཏུང་བ་གནོད་པ་བསྟེན་པ་དང་། བཟའ་བ་དང་བཏུང་བ་གཡོས་རྙིངས་པར་གྱུར་པའི་ཟས་དང་། མི་འདོད་བཞིན་དུ་ཟོས་པ་དང་། ཟས་སྒོམ་མི་གཙང་བ་ཟོས་པ་དང་། ཁ་ཟས་མི་སྙོམས་པ་ཟོས་པ་དང་། ཁ་
[310a.3]ཟས་ཀྱི་སྦྱོར་བ་ལོག་པར་བྱས་པ་དང་། སེམས་གདུངས་པ་དང་། སྙིང་སྟོབས་ཆུང་བ་དང་། ནད་ཀྱི་ཤུགས་ཀྱིས་དྲན་པ་ཉམས་པ་དང་། གློ་གཅོང་ཟད་བྱེད་ཀྱི་ནད་ལ་མི་བཟད་པ་བསྟེན་པ་དང་། མཆོད་པར་འོས་པའི་ལྷ་དང་བླ་མ་ལ་སོགས་པ་ལ་མཆོད་པ་མི་བྱེད་པ་དང་། སྙིང་ན་བ་དང་།
[310a.4]སྙིང་མི་དྲན་པ་དང་། དུག་དང་། དབྱིག་དུག་དང་། ཉེས་པའི་དུག་ལ་བསྟེན་པས་སྨྱོ་བྱེད་ཀྱི་ནད་འབྱུང་བ་ཡིན་ནོ། །རྒྱུ་གོང་མ་དེ་དག་གིས་སྐྱེས་བུ་སྙིང་སྟོབས་ཞན་པའི་སྙིང་གི་ནང་དུ་ནད་གཞི་རྣམས་ཀྱིས་གནོད་པར་བྱས་པས་བློ་དྲི་མ་དང་བཅས་པར་འགྱུར་ཏེ། ཡིད་རྒྱུ་བའི་སྦུ་བུ་རྣམས་
[310a.5]བཀག་ནས་དེའི་འོག་ཏུ་སྨྱོ་བྱེད་དུ་འགྱུར་ཏེ། དེས་བློ་དང་རྣམ་པར་ཤེས་པ་དྲན་པ་རྣམས་འཁྲུགས་ཤིང་ལུས་ཀྱི་བདེ་བ་དང་སྡུག་བསྔལ་བ་ཡང་མི་ཚོར་ཏེ་ཉམས་ལ་ཤིང་རྟ་ཁ་ལོ་སྒྱུར་བ་དང་བྲལ་བ་བཞིན་དུ། རྩོམ་པ་ཐམས་ཅད་ཀྱང་མ་བསམས་བཞིན་དུ་གཏང་མེད་པར་
[310a.6]འགྱུར་རོ། །དེ་ལ་རླུང་ལས་གྱུར་པའི་སྨྱོ་བྱེད་ཀྱི་མཚན་མ་ལ་ནི་ལུས་ཤ་ཟད་དེ་རིད་པར་གྱུར་པ་དང་། གཞི་མེད་པར་ངུ་བ་དང་། དམོད་པ་དམོད་པ་དང་། དགོད་པ་དང་། འཛུམ་པ་དང་། གར་བྱེད་པ་དང་། གླུ་ལེན་པ་དང་། རོལ་མོ་བྱེད་པ་དང་། ལུས་འགུལ་སྐྱོད་བྱེད་པ་དང་། ཡན་
[310a.7]ལག་གི་ཚོགས་ཉེད་ཅིང་ཚེག་སྒྲ་འདོན་པ་དང་། གཞི་ཡོད་བཞིན་དུ་ཅིའང་མི་བྱེད་པ་དང་། གླིང་བུ་དང་། པི་ཝང་དང་། རྗེས་སུ་མཐུན་པའི་སྒྲ་ཡང་དང་ཡང་དུ་འདོན་པ་དང་། ཁ་ནས་ལྦུ་བ་རྒྱུན་དུ་འཛག་པ་དང་། ཁ་ནས་ཚིག་ཅལ་ཅོལ་མང་དུ་སྨྲ་བ་དང་། ལུས་ལ་རྒྱན་མེད་བཞིན་དུ་རྒྱན་
[310b]
[310b.1]ཡོད་དོ་ཞེས་ཟེར་བ་དང་། བཞོན་པ་མ་ཡིན་པ་ལ་ཞོན་པ་ཡིན་ནོ་ཞེས་ཟེར་ཞིང་ཞོན་པར་རྩོལ་བ་དང་། ཟས་མེད་པ་ལ་ཟས་འདོད་པ་སྐད་ཟེར་བ་ལ་ཟས་རྙེད་ཅིང་མཐོང་ན་མི་འདོད་པ་དང་། མིག་ཤིན་ཏུ་ཟླུམ་ཤིང་རྩ་དམར་བ་དང་། ཁ་ཟས་ཞུ་བའི་འོག་ཏུ་ནད་ཆེ་བར་ལྡང་བ་ཡིན་ནོ། །མཁྲིས་
[310b.2]པས་སྨྱོས་པའི་མཚན་མ་ནི་གཞན་ལ་སྡིགས་མཛུབ་བསྒྲེང་བ་དང་། ཁྲོ་ཞིང་རྔམ་པ་དང་། ཁུ་ཚུར་དང་བོང་བས་གཞན་ལ་བརྡེག་ཅིང་སྐྲོད་པ་དང་། ཀྲང་བ་དང་། གྲིབ་མ་དང་། ཆུ་འདོད་པ་དང་། གཅེར་བུར་འདུག་པ་དང་། ལུས་ཀྱི་མདོག་སེར་བ་དང་། མེ་མི་སྣང་བར་མེ་འབར་
[310b.3]རོ་ཞེས་སྨྲ་བ་དང་། ཉིན་པར་སྐར་མ་མཐོང་བ་དང་། མར་མེ་མེད་པར་མར་མེ་མཐོང་བ་རྣམས་ཡིན་ནོ། །བད་ཀན་ལས་སྨྱོ་བྱེད་དུ་གྱུར་པའི་རྟགས་ནི་ཁ་ཟས་ཡི་གར་མི་འོང་བ་དང་། སློན་དང་ཁ་ཟས་ཉུང་ངུ་ཟ་ཞིང་སྨྲ་བ་ཉུང་བ་དང་། བུད་མེད་ཤས་ཆེར་འདོད་པ་དང་། གཅིག་པུ་དབེན་པ་ལ་
[310b.4]དགའ་བ་དང་། ཁ་ཆུ་དང་སྣབས་འཛག་པ་དང་། འཇིགས་སྐྱེན་པ་དང་། གཙང་བ་ལ་མི་དགའ་བ་དང་། གཉིད་ཆེ་བ་དང་། གདོང་སྐྲང་པ་དང་། ནད་དེ་ཡང་ནུབ་མོ་ཆེར་ལྡང་ཞིང་ཟས་ཟོས་མ་ཐག་ཤས་ཆེར་ལྡང་བ་རྣམས་ཡིན་ནོ། །མཚན་མ་ཐམས་ཅད་དང་ལྡན་ན་ནི་འདུས་པ་
[310b.5]ལས་གྱུར་པའི་སྨྱོ་བྱེད་ཀྱི་རྟགས་སུ་བལྟ་སྟེ། དེ་ནི་མི་བཟད་པ་ཡིན་པས་སྨན་པས་ཡོངས་སུ་སྤང་བར་བྱའོ། །སེམས་གདུངས་པ་ལས་སྨྱོ་བྱེད་དུ་གྱུར་པའི་མཚན་མ་ནི། ནོར་དང་སྙིང་དུ་སྡུག་པ་ལ་སོགས་པ་བྲལ་བར་དཀའ་བ་དང་བྲལ་ཏེ། དེའི་སྡུག་བསྔལ་གྱིས་ཟིལ་གྱིས་
[310b.6]མནན་ནས་ལུས་ཀྱི་དབལ་སྐྱ་ཞིང་བཞིན་ཤིན་དུ་ཞན་པས་ངུ་ཞིང་ཀྱི་ཧུད་ཅེས་སྨྲེ་སྔགས་འདོན་ཞིང་ཡང་དང་ཡང་དུ་དྲན་པ་སྟོར་བར་གྱུར་པ་དང་། གློ་བུར་དུ་བརྒྱལ་བར་གྱུར་ཏེ། ནོར་དང་སྙིང་དུ་སྡུག་པ་ལ་སོགས་པའི་ཡོན་ཏན་བརྗོད་ཅིང་མྱ་ངན་གྱིས་སེམས་ཉོན་མོངས་པ་དེ་ལ་རྩེ་གཅིག་ཏུ་མི་
[310b.7]སེམས་པ་དང་། མཚན་ཐོག་ཐག་ཏུ་མི་ཉལ་བར་སེམས་སྣ་ཚོགས་སུ་སེམས་པ་ཡིན་ནོ། །དུག་འཐུང་བ་ལས་སྨྱོ་བྱེད་དུ་གྱུར་པའི་རྟགས་ནི་གདོང་སྔོ་སྐྱར་འདུག་པ་དང་། གཟི་མདངས་ཉམས་པ་དང་། མིག་ལ་སོགས་པ་དབང་པོའི་སྟོབས་ཉམས་པ་དང་། དུག་གི་མཐུས་འཇུ་བའི་དུས་ན་
[311a]
[311a.1]ཡང་དྲན་པ་ཉམས་ཤིང་མིག་དམར་བར་གྱུར་པ་ལ་ནི་གསོ་བའི་ཆོ་ག་མེད་དེ་སྤང་བར་བྱའོ། །དེ་ལ་རླུང་ལས་གྱུར་པའི་སྨྱོ་བྱེད་དུ་གྱུར་པའི་ནད་ལ་ནི་ཐོག་མར་སྨན་མར་སྦྱར་ཏེ་བཏུང་བར་བྱའོ། །རླུང་དང་གཞན་འདྲེས་པ་ཡིན་ན་ནི། བཀྲུ་སྨན་དང་སློན་སྨན་འཇམ་པོ་སྣུམ་དང་བཅས་པར་
[311a.2]གཏོང་ངོ་། །བད་ཀན་དང་མཁྲིས་པ་ལས་གྱུར་པའི་སྨྱོ་བྱེད་ལ་ནི་དང་པོ་སྣུམ་དང་དུགས་བྱ་སྟེ། དེའི་འོག་ཏུ་སློན་དང་ཁྲུས་བྱས་ཏེ། དེ་ནས་དུགས་བྱས་ནས་མས་གཏོང་བ་དང་མགོ་ཁྲུས་ཀྱང་བྱའོ། །དེ་ལྟར་སློན་ཁྲུས་ལ་སོགས་པས་ལུས་དག་པར་བྱས་ནས་དྲན་པ་རྙེད་པར་འགྱུར་རོ། །དེ་ལྟར་བྱས་པའི་
[311a.3]འོག་ཏུ་མིག་སྨན་དང་། སྣ་སྨན་རྣོན་པོ་ཡང་སྦྱར་ལ་གཏང་ངོ་། །དེ་བཞིན་དུ་སེམས་དགའ་བ་སྐྱེ་བ་དང་། དབུགས་དབྱུང་བ་དང་། སྔངས་སུ་གཞུག་པ་དང་། འཇིགས་པར་བྱ་བ་དང་། རྡེག་པ་དང་། བརྡེག་པར་བྱ་བ་དང་། དེ་བཞིན་དུ་བསྐུ་བྱུག་དང་། དྲིལ་བ་དང་། དུ་བ་རྔུབ་པ་དང་།
[311a.4]སྨན་མར་བཏུང་བ་ལ་སོགས་པ་སློན་ཁྲུས་ཀྱིས་ལུས་དག་པའི་འོག་ཏུ་སེམས་ཐ་མལ་པ་ལ་དེ་དག་སྦྱར་བར་བྱའོ། །ཤིང་ཀུན་དང་། ཁ་རུ་ཚ་དང་། ཚ་བ་གསུམ་དང་དེ་རྣམས་སྲང་གཉིས་གཉིས་བཏགས་པའི་ཕྱེ་མ་མར་སྲང་བརྒྱ་ཉི་ཤུ་རྩ་བརྒྱད་དང་། དེའི་བཞི་འགྱུར་གྱི་བ་གཅིན་དང་ལྷན་ཅིག་
[311a.5]བསྐོལ་ཏེ། མར་ལུས་པ་དེ་ལས་རན་པར་བསྟེན་ན། སྨྱོ་བྱེད་དང་། འབྱུང་པོ་དང་། བརྗེད་བྱེད་རྣམས་སེལ་བའི་མཆོག་ཡིན་ནོ། །བྲམྷི་རང་གི་ཁུ་བ་སྲང་དྲུག་ཅུ་རྩ་བཞི་དང་། མར་སྲང་སུམ་ཅུ་རྩ་གཉིས་དང་། ཚ་བ་གསུམ་དང་། ཤ་མ་དུར་བྱིད་དང་། བིམ་བི་ཏ་དང་། ཤང་ཁ་
[311a.6]པུཥྤ་དང་། དོང་ག་དང་། སབ་ཏ་ལ་དང་། བྱི་དང་ག་དང་། འདི་རྣམས་ཞོ་གཉིས་གཉིས་བཏགས་པའི་ཕྱེ་མ་དང་ཚུལ་བཞིན་བསྐོལ་ཏེ་མར་ལུས་པ་ནི་བྲམྷིའི་མར་ཞེས་བྱ་སྟེ། དེ་ལ་ཞག་རེ་སྲང་རེས་བསྐྱེད་དེ་སྲང་བཞིར་ཕྱིན་གྱི་བར་དུ་ཟོས་ན་སྨྱོ་བྱེད་དེ་འཕྲོག་པར་བྱེད་དོ། །བུད་མེད་བུ་མེད་
[311a.7]པ་ལ་བུ་སྟེར་བར་བྱེད་ཅིང་སྐད་སྙན་པ་དང་། ཚིག་གསལ་བ་དང་དྲན་པ་དང་ཡིད་གཞུངས་པར་བྱེད་ཅིང་དཔལ་སྐྱེད་པར་བྱེད་དོ། །འབྲས་བུ་གསུམ་དང་། བི་ཤ་ལ་དང་། ཧ་རེ་ཎུ་ཀ་དང་། ཐང་ཤིང་དང་། ཨེ་ལ་བ་ལུ་ཀ་དང་། ཐལ་ཏྲེས་རྣམ་གཉིས་དང་། སེར་པོ་རྣམ་གཉིས་དང་། སྠི་ར་རྣམ་གཉིས་
[311b]
[311b.1]དང་། པྲི་ཡང་ཀུ་དང་། རྒྱ་སྤོས་དང་། བྲི་ཧ་ཏི་དང་། རུ་རྟ་དང་། བཙོད་དང་། དོང་ག་དང་། ནཱ་ག་གེ་སར་དང་། སེའུ་འབྲུ་དང་། བྱི་དང་ག་དང་། བལ་བུའི་ལོ་མ་དང་། སྣ་མའི་མེ་ཏོག་ཁ་མ་ཕྱེ་བ་དང་། ཨུཏྤ་ལ་དང་། དན་ཏི་དང་། ཤུག་པ་དང་། ཙནྡན་དཀར་པོ་དང་། འདི་རྣམས་ཞོ་གཉིས་གཉིས་དང་
[311b.2]བཏགས་ཏེ། མར་སྲང་སུམ་ཅུ་རྩ་གཉིས་དང་ཚུལ་བཞིན་བསྐོལ་བ་ནི་དགེ་བའི་སྨན་མར་ཞེས་བྱ་སྟེ། དེ་ལས་རན་པར་འཐུངས་ན་གདོན་གྱིས་ཟིན་པ་དང་། སྨྱོ་བྱེད་དང་། ལུད་པ་ལུ་བ་དང་། བརྗེད་བྱེད་དང་། སྡིག་པ་རྣམས་འཇོམས་པར་བྱེད་དེ། དེ་བཞིན་དུ་སྐྱ་རྦབ་དང་། གཡན་པ་དང་།
[311b.3]དུག་དང་། སྐེམ་བྱེད་དང་། རྨོངས་བག་དང་། གཅིན་ནད་དང་། རིམས་ནད་དང་། དབྱིག་དུག་དང་། ཁུ་ཆུ་ཟད་པའི་ནད་དང་། དྲན་པ་སྟོར་བ་དང་། ལྐུགས་པ་དང་། མེ་དྲོད་ཆུང་བ་རྣམས་ལ་ཕན་ཏེ། གཞན་ཡང་སྟོབས་སྐྱེད་པ་དང་། ཡིད་གཞུངས་པ་དང་། དྲན་པ་མྱུར་བ་
[311b.4]དང་། བཀྲ་ཤིས་པ་དང་། ཚེ་རིང་བ་དང་། ལུས་མཛེས་མདངས་དང་ལྡན་པ་དང་། སྐལ་བ་དང་ལྡན་པ་དང་། ལུས་བརྟས་པར་བྱེད་པ་དང་། བུ་སྐྱེད་པར་བྱེད་པའི་མཆོག་ཡིན་ནོ། །ཡང་ན་གོང་མའི་སྨན་ལས་ཨེ་ལ་བ་ལུ་ཀ་ཡན་ཆད་བདུན་མ་གཏོགས་པ་ཐལ་ཏྲེས་རྣམ་གཉིས་ལ་སོགས་
[311b.5]པ་སྨན་སྣ་ཉི་ཤུ་རྩ་གཅིག་རེ་རེ་ཡང་སྲང་ཕྱེད་དང་གཉིས་གཉིས་ཆམ་ཆོམ་བརྡུངས་ལ་སྲང་བརྒྱད་ལ་ཕུལ་གོང་དུ་བརྩིས་པའི་ཆུ་ཕུལ་དྲུག་ཅུ་རྩ་བཞི་དང་བསྐོལ་ཏེ། བཞི་ཆ་ལུས་པའི་ནང་དུ་མར་སྲང་སུམ་ཅུ་རྩ་གཉིས་དང་། བ་བེའུ་མང་དུ་སྐྱེས་པའི་འོ་མ་མར་གྱི་བཞི་འགྱུར་དང་། མེ་ད་རྣམ་གཉིས་
[311b.6]དང་། ར་མཉེ་བ་དང་། བུང་ཚང་རྡོ་དང་། ཁ་སྲལ་ཕྲེའུ་དང་། བུ་རམ་ཤིང་དང་། མུངྒ་པརྞི་དང་། འདི་རྣམས་ཀྱི་ཕྱེ་མས་བཏབ་སྟེ་ཡང་བསྐོལ་ལ་མར་ལུས་པ་ནི་དགེ་བ་ཆེན་པོའི་སྨན་མར་ཞེས་བྱ་སྟེ། གོང་མའི་ཕན་ཡོན་པས་ལྷག་སྟེ་ལུས་ཉམས་བརྟ་བར་བྱེད་ཅིང་ནད་གཞི་སེལ་བའི་མཆོག་ཡིན་
[311b.7]ནོ། །སྤང་སྤོས་རྣམ་གཉིས་དང་། ཆུ་རྩ་དང་། ཁ་སྲལ་ཕྲེའུ་དང་། ཤུ་དག་དང་། ཀྱི་ལྕེ་བ་དང་། ར་མཉེ་བ་དང་། ཙ་རོང་དང་། པུ་ཙེ་ཤེལ་དང་། སླེ་ཏྲེས་དང་། བར་ར་ཧེ་དང་། ཚད་ཏྲ་དང་། ཨ་ཏ་ཚིད་ཏྲ་དང་། བ་ལང་ག་ཤ་དང་། མ་ཧཱ་བུ་རུ་ཤན་དན་ཏ་དང་། སྐྱུ་རུ་ར་དང་།
[312a]
[312a.1]ན་ཀུ་ལ་རྣམ་གཉིས་དང་། ཀ་ཏམ་བྷ་ར་དང་། བཱི་ཤྩི་ཀ་ལི་དང་། ས་ལ་པརྞི་དང་། འདི་རྣམས་ཆ་སྙོམས་ཏེ་མར་དང་ཚུལ་བཞིན་བསྐོལ་བ་ནི་ཤ་ཟ་ཆེན་པོའི་མར་ཞེས་བྱ་སྟེ། དེ་ལས་རན་པར་འཐུངས་ན། ཉིན་བཞི་པའི་རིམས་དང་། སྨྱོ་བྱེད་ཀྱི་གདོན་དང་།
[312a.2]བརྗེད་བྱེད་ཀྱི་གདོན་འཇོམས་ཏེ་བློ་གསལ་བ་དང་། དྲན་པ་དང་། ཡིད་གཞུངས་པ་དང་། བྱིས་པ་རྣམས་ཀྱི་ལུས་བརྟ་ཞིང་འཕེལ་བར་བྱེད་པ་ནི་བདུད་རྩི་དང་འདྲའོ། །བྲ་ཧྨི་དང་། ཨིནྡྲ་བཱ་རུ་ནི་དང་། བྱི་དང་ག་དང་། ཚ་བ་གསུམ་དང་། ཤིང་ཀུན་དང་། སྤང་སྤོས་དང་།
[312a.3]མུར་བ་དང་། ར་སྣ་དང་། བོང་ང་དཀར་པོ་དང་། སྒོག་སྐྱ་དང་། བི་ཤ་ལ་དང་། བྱེའུ་རུག་པ་དང་། ཤུ་དག་དང་། ཁྲེ་དང་། ནཱ་ག་དན་ཏྲ་དང་། བྱི་ཚེར་བ་དང་། ཨ་རུ་ར་དང་། བིག་པན་འདི་རྣམས་གླང་པོ་ཆེའི་གཅིན་དང་བཏགས་ཏེ། ཆང་བུར་བྱས་ནས་གྲིབ་
[312a.4]མ་ལ་བསྐམས་ཏེ། དེ་ནས་སྣར་བླུགས་པ་དང་། མིག་ཏུ་བསྐུ་བ་དང་། ལུས་ལ་བྱུག་པ་དང་། དུད་པས་བདུགས་པ་བྱས་ན་སྨྱོ་བྱེད་སེལ་བར་བྱེད་དོ། །སྣར་རྔུབ་པའི་སྨན་སྣ་ཚོགས་ཡུངས་ཀར་གྱི་མར་དང་སྦྱར་བ་སྣར་བླུགས་པར་བྱའོ། །ཡུངས་ཀར་གྱི་མར་
[312a.5]གྱིས་ལུས་བསྐུ་བྱུག་བྱས་ལ། ཡུངས་ཀར་དེ་ཉིད་ཀྱི་ཕྱེ་མ་སྣར་བླུག་གོ། །ཡང་ན་མདོའི་གནས་སུ་བསྟན་པའི་དུད་པའི་སྨན་རྣོན་པོ་ཤིང་ཀུན་དང་སྦྱར་བའི་དུད་པས་བདུགས་ན་ཕན་ནོ། །ཝ་དང་། ཤ་ལྱ་ཀ་དང་། འུག་པ་དང་། ཛ་དུ་ཀ་དང་། བྱི་བ་དང་། ར་
[312a.6]ཐུག་དང་། འདི་རྣམས་ཀྱི་གཅིན་དང་། རྟུག་པ་དང་། སྤུ་དང་། པགས་པ་དང་། མཁྲིས་པ་དང་། སེན་མོ་དང་། འདི་རྣམས་ཀྱི་དུད་པས་སྣ་དང་ལུས་ལ་བྱུག་པ་དང་། མིག་ལ་བསྐུ་བ་དང་། ལུས་བཀྲུ་བ་དང་བླུགས་པ་ལ་སོགས་པ་སྨྱོ་བྱེད་ཅན་ལ་སྤྱད་དོ། །རླུང་དང་བད་ཀན་
[312a.7]གྱི་ཤས་ཆེ་བའི་སྨྱོ་བྱེད་ལ་ནི་ཁྱི་དང་། བ་ལང་དང་ཉ་རྣམས་ཀྱི་ཤ་རུལ་པའི་དུད་པས་རྟག་ཏུ་བདུག་གོ། །མཁྲིས་པ་ལས་གྱུར་པའི་སྨྱོ་བྱེད་ལ་ནི། ཏིག་ཏའི་མར་དང་། སྨན་འཚོ་བྱེད་ཀྱི་མར་དང་། སྣུམ་སྣ་གཉིས་དང་། དེ་བཞིན་དུ་བཟའ་བཏུང་ཡང་བསིལ་བ་དང་།
[312b]
[312b.1]མངར་བ་དང་། ཡང་བ་རྣམས་བསྔགས་སོ། །གཞན་ཡང་གཏར་ག་གདབ་པའི་ཆོ་ག་བཞིན་དུ་བྱས་ཏེ། བྲང་དང་། མིག་འགྲམ་དང་། དཔྲལ་བའི་དབྱེས་ལས་ཁྲག་གཏར་བ་དང་། ཡང་ན་ཤ་གཙང་མ་ཚིམ་ཚད་དུ་བཟའ་བ་དང་། རླུང་མེད་པའི་ཕྱོགས་སུ་མལ་བཅས་ཏེ་གཞག་
[312b.2]པ་དང་ཡང་སེམས་རྨོངས་པའི་ནད་ལས་གྲོལ་བར་བྱེད་དོ། །ཡང་སྨྱོ་བྱེད་ཀྱི་ནད་ཀྱིས་ཟིན་པའི་ནད་པ་དེ་ཆུའི་ནང་དུ་བསྐྱུར་བ་དང་། ཁྲོན་པའི་ནང་དུ་བཅུག་པ་དང་ཡང་ན་ལྟོགས་ལྟོགས་སུ་ལུས་དབྲི་བར་བྱའོ། །ཡང་ན་གྲོགས་པོ་སྙིང་དུ་སྡུག་པས་ཆོས་དང་དོན་དང་ལྡན་པའི་གཏམ་གྱིས་
[312b.3]དབུགས་དབྱུང་ཞིང་དྲུང་དུ་བསྡད་དེ་སེམས་དགའ་བར་བྱའོ། །ཡང་ན་ཉེ་བ་སྡུག་པ་ཤི་བའམ། རྨད་དུ་བྱུང་བའི་གཏམ་རྣམས་བརྗོད་པར་བྱའོ། །ཡང་ན་རྐང་ལག་བཅིངས་ལ་ཡུངས་ཀར་གྱིས་བྱུགས་ཏེ་གན་རྐྱལ་དུ་ཉི་མ་དྲོན་པོ་ལ་གཞག་པར་བྱའོ། །ཡང་ན་ཁ་སྲལ་ཕྲེའུ་བཏགས་
[312b.4]པའི་ལྡེ་གུས་བསྐུས་པ་འམ། ཡང་ན་ལྕགས་བསྲེགས་པའམ། ཆུ་བསྐོལ་བའམ། ཏིལ་ལམ་མར་གང་ཡང་རུང་བས་ལུས་བསྲེག་གོ། །ཡང་ན་ལྕག་གིས་གཞུ་བའམ། ཡང་ན་ཐག་པས་བཏགས་ཏེ་གཡང་སར་བསྐྱུར་བ་འམ། ཡང་ན་མཚོན་དང་རྡོ་དང་མི་མེད་
[312b.5]པའི་ཁང་པ་སྟོང་པ་གཅིག་པུར་གཞག་པར་བྱའོ། །ཡང་ན་སྦྲུལ་ཆེན་པོ་སྔོན་མེད་པ་བསྟན་ལ་འཇིགས་སུ་གཞུག་གོ། །དེ་བཞིན་དུ་གླང་དང་། སེང་གེ་དང་། གླང་པོ་ཆེ་ལ་སོགས་པ་གང་ཡང་རུང་བས་འཇིགས་སུ་གཞུག་གོ། །ཡང་ན་རྒྱལ་པོའི་སྐྱེས་བུས་ལེགས་པར་
[312b.6]བཅིངས་ནས་རྒྱབ་ཏུ་ཕྱུང་ལ་གསད་སར་ཁྱེར་བ་ཡིན་ནོ། །ཞེས་སྨྲས་ན་སྡིགས་མཛུབ་ལ་སོགས་པས་བསྡིགས་ཏེ་འཇིགས་སུ་གཞུག་གོ། །གང་གི་ཕྱིར་སྦྱོར་བ་དེ་དག་བྱས་ན། ལུས་ཀྱི་སྡུག་བསྔལ་དང་སྲོག་གི་འཇིགས་པས་དྲན་པ་རྙེད་པར་འགྱུར་རོ། །ཞེས་སྔོན་གྱི་སློབ་
[312b.7]དཔོན་དག་བཞེད་དོ། །འོན་ཀྱང་སྦྱོར་བ་དེ་དག་ཐམས་ཅད་བྱས་ན་སྨྱོ་བྱེད་ཀྱི་ནད་ཐམས་ཅད་ལས་རྒྱལ་བར་བྱེད་དོ། །གསོ་བ་གྲུབ་པ་དེ་དག་ཀྱང་ཡུལ་དང་དུས་ལ་སོགས་པ་ལ་བརྟག་ལེགས་པར་སྦྱར་བར་བྱའོ། །གང་ཞིག་གཉེན་སྡུག་པ་དང་ནོར་བཟང་པོ་དང་བྲལ་ཏེ་དྲན་པ་སྟོར་
[313a]
[313a.1]བར་གྱུར་པ་ལ་ནི་ནོར་དང་གཉེན་སྡུག་པ་ལ་སོགས་པ་དེ་ཉིད་ཡོད་དོ་ཞེས་བརྗོད་ཅིང་དབུགས་དབྱུང་ངོ་། །འདོད་པ་དང་། མྱ་ངན་དང་། འཇིགས་པ་དང་། ཁྲོ་བ་དང་། དགའ་བ་དང་། ཕྲག་དོག་དང་། ཆགས་པ་ལས་གྱུར་པའི་སྨྱོ་བྱེད་ལ་ནི་དེ་གཉིས་
[313a.2]གཅིག་ལ་གཅིག་ཕན་ཚུན་གཉེན་པོར་བྱས་ཏེ་ཞི་བར་བྱའོ། །སྨྱོ་བྱེད་ཀྱི་ནད་དེ་ཡང་གདོན་དང་འབྲེལ་པ་ཡིན་ཏེ། གདོན་དང་སྨྱོ་བྱེད་གང་གི་ཤས་ཆེ་བའི་མཚན་མ་དང་། རང་བཞིན་བརྟགས་ཏེ། དེའི་འོག་ཏུ་གདོན་ནད་དང་སྨྱོ་བྱེད་ཀྱི་སྨན་ཅི་རིགས་པར་སྦྱར་རོ། །གལ་ཏེ་གདོན་དང་འབྲེལ་པ་
[313a.3]ཡིན་ན་ནི་གཏོར་མ་སྦྱིན་པར་བྱ་སྟེ། ཏིལ་གྱི་ཕྱེ་མ་དང་། ནས་ཀྱི་ཕྱེ་མའི་ཟན་དང་། ཆང་བུ་དང་། ཟས་སྣུམ་ཞིང་མངར་བ་དང་། འབྲས་ཆན་ཁྲག་གིས་བསྒོས་པ་དང་། ཤ་རྗེན་པ་དང་། བཙོས་པ་དང་། འབྲུའི་ཆང་དང་། སྦྱར་བའི་ཆང་དང་། ཨ་སའི་ཆང་དང་། མེ་ཏོག་ཨ་ཏི་མུག་ཏ་
[313a.4]དང་། སྲི་ཤིང་གི་མེ་ཏོག་དང་། ས་ཧ་ཙ་རའི་མེ་ཏོག་དང་བཅས་པའི་གཏོར་མ་བ་ལང་གི་སྟེགས་དང་ཆུ་ཀླུང་དང་ཟམ་ངོགས་ལས་གཏང་བར་བྱའོ། །སྐྱེས་བུ་གང་ཤ་དང་ཆང་སྤངས་པ་དང་། སྡོམ་པ་ལ་གནས་པ་དང་། ལུས་ངག་ཡིད་གསུམ་གཙང་ཞིང་དག་པ་དང་།
[313a.5]སྙིང་སྟོབས་དང་ལྡན་པའི་བློ་ཅན་ལ་ནི་ལྷན་ཅིག་སྐྱེས་པ་དང་། གློ་བུར་ལས་བྱུང་བའི་སྨྱོ་བྱེད་རྣམས་ཀྱིས་ནམ་ཡང་ཚུགས་པར་མི་འགྱུར་རོ། །དབང་པོ་རྣམས་ཀྱི་ཡུལ་ཇི་ལྟ་བ་བཞིན་དུ་གསལ་བར་བྱེད་ཅིང་། དེ་བཞིན་དུ་ལུས་དང་སེམས་ཀྱང་དངས་ལ་ལུས་ཟུངས་རྣམས་རང་
[313a.6]བཞིན་དུ་གནས་པར་གྱུར་ན་སྨྱོ་བྱེད་དང་བྲལ་བའི་མཚན་མ་ཡིན་ནོ། །སྨྱོ་བྱེད་ཀྱི་ནད་གསོ་བའི་ལེའུ་སྟེ་དྲུག་པ་རྫོགས་སོ།། །།དེ་ནས་བརྗེད་བྱེད་ཀྱི་ནད་གསོ་བའི་ལེའུ་བཤད་པར་བྱ་སྟེ། དེ་ལ་བརྗེད་བྱེད་ཅེས་བྱ་བ་ནི་དྲན་པ་ཉམས་པའི་བདག་ཉིད་ཡིན་ཏེ།
[313a.7]དེས་བློ་དང་སེམས་ཡོངས་སུ་འཁྲུགས་པ་ཡིན་ལ། དེ་ཡང་སེམས་ལས་དྲགས་པ་དང་། མྱ་ངན་དང་འཇིགས་པ་ལ་སོགས་པ་འབྱུང་བ་ཡིན་ནོ། །ནད་གཞི་རྣམས་ནི་སྨྱོ་བྱེད་དང་འདྲ་སྟེ། ཉེས་པ་འཁྲུགས་ནས་ལུས་དང་སེམས་ལ་ཞུགས་ཏེ། སྙིང་ལ་གཡོགས་པས་
[313b]
[313b.1]སེམས་ཀྱི་བདག་ཉིད་ཉམས་པར་བྱས་ཏེ། འདུ་ཤེས་རྒྱུ་བའི་རྒྱུན་རྣམས་བཀག་པས་མུན་པར་ཞུགས་པ་སྙམ་བྱེད་ཅིང་བློ་རྨོངས་པར་འགྱུར་ཏེ། ལས་ཀྱི་བྱ་བ་ཅི་བྱེད་ཀྱང་སྨད་ཅིང་འཇིགས་སུ་རུང་བའི་ལས་བྱེད་ཅིང་སོ་འཁྲིགས་པ་དང་། ཁ་ནས་ལྦུ་བ་འབྱུང་བ་དང་ལག་པ་དང་རྐང་
[313b.2]པ་འགུལ་ཞིང་བསྐྱོད་པ་དང་། གཟུགས་མེད་པ་མཐོང་ཞིང་ཡོད་པ་མི་མཐོང་བ་དང་། འདར་ཞིང་ས་ལ་འགྱེལ་བ་དང་། མིག་དང་སྨིན་མ་ཡོ་བར་གྱུར་པ་དང་། ནད་སྟོབས་དང་བྲལ་ནས་བཟོད་ཟད་པ་ཡིན་ནོ། །དེ་ཡང་བརྗེད་བྱེད་དེ་ཡུན་རིང་དུ་ལོན་པ་ནི་འགྱུར་བ་དེ་དག་
[313b.3]ཚབས་ཆེ་བ་ཡིན་ནོ། །དེ་ལྟར་གྱུར་པའི་བརྗེད་བྱེད་དེ་ཡང་རླུང་དང་། མཁྲིས་པ་དང་། བད་ཀན་དང་། འདུས་པ་དང་བཞིའོ། །དེ་ལ་བརྗེད་བྱེད་ཀྱིས་ཐོག་མར་ཟིན་པའི་ཚུལ་ནི་སྙིང་འདར་ཞིང་སྟོང་པ་སྙམ་བྱེད་པ་དང་། མགོ་འཁོར་བ་དང་མུན་ཐིབས་ཞེས་བྱེད་ཅིང་མུན་པར་མཐོང་
[313b.4]བ་དང་། མིག་ཟམ་ཟིམ་དུ་འདུག་པ་དང་། རྫི་མ་འཁྲུགས་པ་དང་། མིག་གྱུར་པ་དང་། སྒྲ་མི་གྲག་བཞིན་དུ་ཐོས་པ་དང་། རྔུལ་འབྱུང་བ་དང་། ཁ་ཆུ་དང་སྣབས་འཛག་པ་དང་། ཁ་ཟས་མི་འཇུ་ཞིང་ཡི་གར་མི་འོང་བ་དང་། ཁོང་པ་འཁྲུགས་ཤིང་ཁྲུ་ལུ་ལུ་ཟེར་བ་དང་། ཉམས་
[313b.5]འཚག་ཟད་པ་དང་། གཉིད་མེད་པ་དང་། ཡན་ལག་བརྡུང་བརྡུང་བ་སྙམ་བྱེད་པ་དང་། སྐོམ་དད་ཆེ་བ་དང་། དེ་རྨི་ལམ་ན་ཡང་གླུ་ལེན་པ་དང་། གར་བྱེད་པ་དང་། ཏིལ་མར་དང་། ཆང་འཐུང་བ་དང་། ཏིལ་མར་དང་ཆང་གི་གཅིན་འབྱུང་བར་རྨི་བ་རྣམས་ཡིན་ནོ། །དེ་ལ་རླུང་ལས་
[313b.6]གྱུར་པའི་བརྗེད་བྱེད་ཀྱི་མཚན་མ་ནི་བརླ་གཉིས་འགུལ་བ་དང་། ཡང་དང་ཡང་ས་ལ་འགྱེལ་བ་དང་། ཡང་དང་ཡང་དྲན་པ་སྟོར་ཞིང་རྙེད་པ་དང་། ཚིག་མི་གསལ་བ་སྨྲ་བ་དང་། མིག་ཟླུམ་ལ་ཕྱིར་འབུར་བ་དང་། རྔམ་པ་དྲག་ཏུ་འདོན་ཅིང་དབུགས་མི་བདེ་བ་དང་། ཁ་ནས་ལྦུ་བ་
[313b.7]འབྱུང་བ་དང་། མགོ་འགུལ་ཞིང་འདོམ་པ་དང་། སོ་འཁྲིགས་པ་དང་། གྲེ་བ་རླུང་གིས་གང་བ་དང་། ཡན་ལག་ཕན་ཚུན་བརྡེག་པ་དང་། ཁུ་ཚུར་བསྡམས་ནས་མཐེའུ་ཆུང་ནས་བཟུང་སྟེ། སོར་མོ་རྣམས་རིམ་གྱིས་རྐྱོང་བ་དང་། ལུས་རྩུབ་པ་དང་། མིག་དང་། པགས་
[314a]
[314a.1]པ་དང་། སེན་མོ་རྣམས་རྩ་གནག་ཅིང་དངོས་པོ་རྣམས་ནག་པོར་མཐོང་བ་དང་། རང་བཞིན་གྱིས་མིག་བསྟན་པ་དང་། ལུས་རྩུབ་པ་རུད་རུད་པོར་འདུག་ཅིང་གཡོ་བ་དང་། མདོག་མི་སྡུག་པ་དང་། བཞིན་འགྱུར་བ་རྣམས་ཡིན་ནོ། །མཁྲིས་པ་ལས་གྱུར་པའི་བརྗེད་
[314a.2]བྱེད་ཀྱི་རྟགས་ནི། དྲན་པ་ཡང་དང་ཡང་ཉམས་ཤིང་ཡང་དང་ཡང་འདུས་ཤིང་རྙེད་པ་དང་། མིག་དང་གདོང་དང་། པགས་པའི་མདོག་སེར་ཞིང་ལྦུ་བ་སེར་པོར་འབྱུང་བ་དང་། ས་ལ་རྐང་ལག་གིས་བརྡེག་པ་དང་། མིག་ལམ་དུ་འཇིགས་སུ་རུང་བ་དང་། འཚེར་བ་དང་། ཁྲོ་བོའི་གཟུགས་
[314a.3]མཐོང་ཞིང་སྐོམ་དད་དང་བཅས་པ་ཡིན་ནོ། །བད་ཀན་ལས་བརྗེད་བྱེད་དུ་གྱུར་པའི་མཚན་མ་ནི་ཡུན་རིང་པོ་ནས་དྲན་པ་སྟོར་ཞིང་དྲན་པ་རྙེད་པ་ཡང་བུལ་བ་དང་། ཁ་ཟས་ཉུང་ངུ་ཟ་ཞིང་བྱེད་སྤྱོད་ཉུང་བ་དང་། ཁ་ཆུ་ཡང་དང་ཡང་དུ་འབྱུང་བ་དང་། མིག་དང་། སེན་མོ་དང་། ཁའི་ནང་
[314a.4]དཀར་བ་དང་། གཟུགས་རྣམས་དཀར་པོར་མཐོང་བ་ཡིན་ནོ། །འདུས་པ་ལས་གྱུར་པའི་བརྗེད་བྱེད་ཀྱི་མཚན་མ་ཐམས་ཅད་དང་ལྡན་པ་ནི་སྤང་བར་བྱའོ། །དེ་ལ་གློ་དང་སྙིང་དང་དྲན་པའི་སྦུ་བུ་རྣམས་སུ་དྲི་མ་འགགས་པའི་བརྗེད་བྱེད་ལ་ནི་ཐོག་མར་དེ་དག་པར་བྱ་བའི་ཕྱིར་སྨན་
[314a.5]རྣོན་པོ་དང་བཅས་པའི་སློན་ལ་སོགས་པའི་ལུམས་བྱའོ། །རླུང་ལས་གྱུར་པའི་བརྗེད་བྱེད་ལ་ནི་ཕལ་ཆེར་སྨན་མས་གཏོང་བ་རྣམས་བྱའོ། །མཁྲིས་པ་ལས་གྱུར་པ་ལ་ནི་ཕལ་ཆེར་བཀྲུ་སྨན་སྦྱར་རོ། །དེ་ལྟར་གོང་དུ་སློན་ཁྲུས་ཀྱིས་ལུས་དག་པར་བྱས་ནས་སྤྲོ་བ་
[314a.6]བསྐྱེད་དོ། །དེའི་འོག་ཏུ་བརྗེད་བྱེད་ཀྱི་སྨན་བཤད་པར་བྱ་སྟེ། བའི་ལྕི་བའི་ཁུ་བ་དང་། འོ་མ་དང་། ཞོ་དང་། གཅིན་དང་། མར་དང་། དེ་རྣམས་ཆ་སྙོམས་ཏེ་བསྐོལ་བ་བའི་རྣམ་ལྔའི་མར་ཞེས་བྱ་སྟེ། དེ་ལས་རན་པར་འཐུངས་ན། བརྗེད་བྱེད་དང་། རིམས་དང་།
[314a.7]སྨྱོ་བྱེད་དང་། མིག་སེར་རྣམས་སེལ་ལོ། །རྩ་བ་རྣམ་པ་ལྔ་པ་གཉིས་དང་། འབྲས་བུ་གསུམ་དང་། སེར་པོ་རྣམ་གཉིས་དང་། དུགས་མོ་ཡུངས་ཀྱི་ཤུན་ཕྲགས་དང་། ལོ་མ་བདུན་པ་དང་། ཨ་པ་མརྒ་དང་། ནི་ལི་ནི་དང་། པུ་ཙེ་ཤེལ་དང་། དོང་ག་དང་། མ་ནུ་དང་།
[314b]
[314b.1]ཤིང་ཕལ་གུའི་རྩ་བ་དང་། བྱི་ཚེར་བ་དང་། སྨན་དེ་རྣམས་ཆུ་སྲང་གཉིས་གཉིས་ཆུ་སྲང་བརྒྱད་ལ་ཆུ་ཕུལ་གང་དུ་བརྩིས་པའི་ཆུ་ཕུལ་དྲུག་ཅུ་རྩ་བཞི་དང་བསྐོལ་ཏེ། བཞི་ཆ་ལུས་པའི་ནང་དུ་ག་བྲའི་རྩ་བ་དང་། པ་ཐ་དང་། ཨ་ཏ་ཀ་ཞེས་བྱ་བ་རུ་བ་རི་དང་། དན་ཏི་དང་། དུར་བྱིད་དང་།
[314b.2]ཚ་བ་གསུམ་དང་། རོ་ཧ་ཤ་དང་། བྷུ་ཏི་ཀ་དང་། མུར་པ་དང་། ཅི་སྐྲིགས་དང་། ཧ་ཏི་པི་པི་ལིང་དང་། ཐལ་ཏྲེས་རྣམ་གཉིས་དང་། མ་ནུ་ཡན་ཏི་ཞེས་བྱ་བ་སེན་རྩི་དང་། ཙི་ཏྲ་ཀ་དང་། ལྕང་མ་དང་། འདི་རྣམས་ཞོ་གཉིས་དང་། མར་སྲང་སུམ་ཅུ་རྩ་གཉིས་དང་།
[314b.3]བའི་རྣམ་ལྔ་རེ་རེ་ཡང་དེ་དང་ལྷན་ཅིག་བསྐོལ་ཏེ་མར་ལུས་པ་ནི་བའི་རྣམ་ལྔ་ཆེན་པོའི་མར་ཞེས་བྱ་སྟེ། དེ་ལས་རན་པར་འཐུངས་ན། བརྗེད་བྱེད་དང་། རིམས་དང་། དམུ་རྫིང་དང་། མཚན་པར་རྡོལ་བ་འཕྲོག་པའི་མཆོག་ཡིན་ཏེ། སྐྲན་ནད་དང་། གཞང་
[314b.4]འབྲུམ་དང་། མིག་སེར་དང་། སྐྱ་རྦབ་དང་། སྐྲན་དང་། ལུད་པ་དང་། གདོན་རྣམས་འཇོམས་པར་བྱེད་དོ། །ཤུ་དག་དང་། རུ་རྟ་དང་། ད་ཤང་ཁ་པུཥྤ་དང་། མར་རྙིང་པ་དང་། མར་གྱི་བཞི་འགྱུར་གྱི་སྨན་བྲམྷི་རང་གི་ཁུ་བ་དང་། དེ་རྣམས་ལྷན་
[314b.5]ཅིག་བསྐོལ་ཏེ། དེ་ལས་རན་པར་འཐུངས་ན། ཡིད་གཞུངས་ཤིང་སྨྱོ་བྱེད་དང་། བཀྲ་མི་ཤིས་པ་རྣམས་དང་། བརྗེད་བྱེད་དང་བསྡིགས་པ་རྣམས་ལས་རྒྱལ་བར་བྱེད་དོ། །ཡང་ན་འཚོ་བྱེད་སྡེ་བཅུ་སྲང་རེ་རེ་བཏགས་པའི་ཕྱེ་མ། ཏིལ་མར་དང་། མར་སྲང་སུམ་ཅུ་
[314b.6]སུམ་ཅུ་དང་། འོ་མ་ཕུལ་དྲུག་ཅུ་རྩ་བཞི་དང་འདི་རྣམས་ཆུ་དང་ཚུལ་བཞིན་བསྐོལ་ཏེ་མར་ལུས་པ་ལས་རན་པར་འཐུངས་ན་བརྗེད་བྱེད་ལས་གྲོལ་བར་བྱེད་དོ། །ཡང་ན་འོ་མ་དང་། བུ་རམ་ཤིང་གི་ཁུ་བ་སྲང་ཉི་ཤུ་རྩ་བརྒྱད་དང་། མར་སྲང་སུམ་ཅུ་རྩ་གཉིས་དང་། དེའི་
[314b.7]བརྒྱད་འགྱུར་གྱི་ཏང་པལ་གྱི་ཁུ་བ་དང་། འཚོ་བྱེད་སྡེ་བཅུ་ཞོ་གཉིས་གཉིས་ཀྱི་ཕྱེ་མ་ཚུལ་བཞིན་བསྐོལ་ཏེ་མར་ལུས་པ་ལས་རན་པར་འཐུངས་ན་རླུང་དང་མཁྲིས་པ་ལས་གྱུར་པའི་བརྗེད་བྱེད་མྱུར་དུ་འཇིག་པར་བྱེད་དོ། །ཡང་ན་རྩྭ་ཀ་ཤ་དང་། ཀུ་ཤ་དང་། བི་ད་རི་
[315a]
[315a.1]དང་། བུ་རམ་ཤིང་དང་དེ་རྣམས་འོ་མ་དང་ལྷན་ཅིག་བསྐོལ་ཏེ། འོ་མ་ལུས་པ་ལས་རན་པར་འཐུངས་ན་ཡང་ཕན་ཡོན་དེ་དང་འདྲ་སྟེ། ཤིང་མངར་གྱི་ཕྱེ་མ་དང་། མར་དང་། མར་གྱི་བཅོ་བརྒྱད་འགྱུར་གྱི་སྨན་དའི་ཁུ་བ་དང་ཚུལ་བཞིན་དུ་བསྐོལ་ཏེ་མར་ལུས་པ་ལས་
[315a.2]རན་པར་འཐུངས་ན་བརྗེད་བྱེད་འཕྲོག་པར་བྱེད་དོ། །ཡང་ན་བ་སེར་སྐྱའི་སྣ་ནས་བླུགས་ན་བརྗེད་བྱེད་ལས་རྒྱལ་བའི་མཆོག་ཡིན་ནོ། །ཁྱི་དང་། ཝ་དང་། བྱི་ལ་དང་། སེང་གེ་ལ་སོགས་པ་གང་ཡང་རུང་བའི་མཁྲིས་པ་གོང་མ་ལྟར་བཏང་ན་ཡང་བསྔགས་སོ། །སྲོག་ཆགས་གོ་
[315a.3]དྷ་དང་། སྲེ་མོ་དང་། གླང་པོ་ཆེ་དང་། ཁྱུ་མཆོག་དང་། དྲེད་དང་། བ་ལང་དང་། དེ་རྣམས་ཀྱི་མཁྲིས་པ་གང་ཡང་རུང་བ་དང་ཏིལ་མར་བསྐོལ་ཏེ། ཏིལ་མར་ལུས་པ་ལས་བསྐུ་བ་དང་། སྣ་ནས་བླུགས་པ་བྱས་ན་ཡང་བསྔགས་སོ། །འབྲས་བུ་གསུམ་དང་། ཚ་བ་གསུམ་
[315a.4]དང་། ཀོ་ཉོན་ཙེ་དང་། ནས་ཚིག་འཁུས་པའི་ཐལ་བ་དང་། ཕ་ནིད་ཙ་དང་། སུ་ཤཱ་ཧཱ་དང་། ཨ་པ་མརྒ་དང་། ཀ་རཉྫའི་ས་བོན་དང་། འདི་རྣམས་ཏིལ་མར་ར་གཅིན་དང་བསྐོལ་ལ་མར་ལུས་པ་ལས་སྣར་བླུགས་པའམ། ཡང་ན་སྨན་དེ་རྣམས་ཀྱི་ཕྱེ་མ་སྦུ་གུ་ནས་སྨན་པས་
[315a.5]སྣར་བུད་པར་བྱའོ། །ཡང་ན་སྲེ་མོ་དང་། འུག་པ་དང་། སྤྲེའུ་དང་། བྱ་རྒོད་དང་། སྦྲུལ་དང་། བྱ་རོག་དང་། སྲོག་ཆགས་ཀ་ཊི་ཀ་དང་དེ་རྣམས་གང་རྙེད་པའི་མཆུ་དང་། སྒྲོ་དང་། རྟུག་པ་རྣམས་ཀྱི་དུད་པས་བརྗེད་བྱེད་ཅན་ལ་བདུག་གོ། །ཡང་ན་ཏིལ་མར་རམ། སྒོག་
[315a.6]སྐྱ་འམ། འོ་མའམ་ཉེའུ་ཤིང་གང་ཡང་རུང་བ་བསྟེན་ན་ཕན་ནོ། །ཡང་ན་སྨན་བྲམྷི་དང་། རུ་རྟ་དང་། ཤུ་དག་གང་ཡང་རུང་བའི་ཁུ་བ་སྦྲང་རྩི་དང་ལྡན་པ་བསྟེན་ན་ཕན་ནོ། །ནད་གཞི་གསུམ་མཉམ་དུ་འཁྲུགས་ཏེ། གནད་ཆེན་པོ་སྙིང་དང་སེམས་ལ་བརྟེན་ནས་ལུས་དང་སེམས་ལ་
[315a.7]གནོད་པར་བྱས་ཏེ། བརྗེད་བྱེད་ཀྱི་ནད་འབྱུང་ན་ནི་སྨན་གཞན་གྱིས་གསོ་བར་དཀའ་སྟེ། དེ་ལ་ནི་བཅུད་ཀྱི་ཆོ་གས་གསོ་བར་བྱའོ། །དེ་བས་ན་བརྗེད་བྱེད་ཀྱི་ནད་ཀྱིས་ཉམ་ཐག་པའི་ནད་པ་དེ་ལ་ནི། མེ་དང་། ཆུ་དང་། གཡང་ས་ལ་སོགས་པ་མི་བཟད་པ་རྣམས་ལས་དུས་ཐམས་ཅད་
[315b]
[315b.1]དུ་བསྲུང་ཞིང་བསྐྱང་བར་བྱའོ། །དེ་ལྟར་སེམས་གྱུར་པའི་ནད་པ་དེ་བརྗེད་བྱེད་ཀྱིས་སེམས་གྱུར་པའི་ནད་ལས་གྲོལ་མ་ཐག་ནི་ཁྱོད་འདི་ལྟར་འབྱུང་པོས་ཟིན་པར་འགྱུར་རོ་ཞེས་བྱ་བ་ལ་སོགས་པའི་ཚིག་བརྗོད་པར་མི་བྱ་སྟེ། ལུས་དང་སེམས་ཉོན་མོངས་པའི་སྐྱེས་བུ་དེ་ལ་ནི་ཡུལ་ཡིད་
[315b.2]དུ་འོང་བ་ལ་སོགས་པས་སེམས་བརྟ་ཞིང་གསོ་བར་བྱའོ། །བརྗེད་བྱེད་ཀྱི་ནད་གསོ་བའི་ལེའུ་སྟེ་བདུན་པ་རྫོགས་སོ།། །།དེ་ནས་རྫི་མ་དང་མིག་མཆུའི་ནད་ངོ་ཤེས་པར་བྱ་བའི་ལེའུ་བཤད་པར་བྱ་སྟེ། དེ་ལ་མིག་ནད་དོ་ཅོག་སློང་བར་བྱེད་པའི་ཁ་ཟས་ལ་སོགས་
[315b.3]པ་ཟོས་པ་དང་། ཁྱད་པར་དུ་མིག་ལ་གནོད་པའི་ཟས་ཟོས་པ་དང་། གཞན་ཡང་མིག་ནི་ཕལ་ཆེར་མཁྲིས་པ་འཁྲུགས་ན་མིག་ཀྱང་དེའི་རྗེས་སུ་ན་བར་བྱེད་པས་ན་ནད་གཞི་གང་ལས་གྱུར་ཀྱང་རུང་སྟེ། ཉེས་པའི་དྲི་མ་རྩའི་(སྡུབས་,སྦུབས་)ནས་གྱེན་དུ་འབྱུང་སྟེ། མིག་མཆུ་དང་།
[315b.4]མིག་གི་གྲྭ་མཚམས་དང་། མིག་གི་འབྲས་བུ་དཀར་པོ་དང་། ནག་པོ་དང་། མཐོང་བའི་མིག་དང་། དེ་དག་གང་ཡང་རུང་བའམ། ཡང་ན་ཐམས་ཅད་ལ་ཡང་རུང་སྟེ་བརྟེན་ནས་ནད་གཞི་ཇི་ལྟ་བ་བཞིན་དུ་ནད་སྐྱེད་དོ། །དེ་ལ་རླུང་ལས་གྱུར་པའི་མིག་ནད་ཀྱི་མཚན་མ་ནི་མིག་
[315b.5]ཆུའི་རྩ་ལ་རླུང་ཞུགས་པར་གྱུར་ཏེ། དེ་ཡང་གཉིད་ལོག་པ་ལས་སད་ན་དབྱེར་མི་འདོད་ཅིང་ནད་དང་བཅས་པ་དང་། མིག་བྱེ་མས་གང་བ་སྙམ་བྱེད་པ་དང་། འབྱེད་པའི་དུས་སུ་ཡང་དཀའ་བས་འབྱེད་ཅིང་མཆི་མ་ཟག་པ་དང་། མིག་མཉེས་ན་ཅུང་ཞིག་ཕན་པ་སྙམ་བྱེད་པ་
[315b.6]དེ་ནི་མིག་ནད་འབྱེད་དཀའ་བ་ཡིན་ནོ། །ཞེས་སྔོན་གྱི་དྲང་སྲོང་དག་འཆད་དོ། །དེ་ལ་མིག་ནད་འཛུམས་པ་ཞེས་བྱ་བའི་མཚན་མ་ནི། རླུང་གིས་མཆུ་བསྐྱོད་དེ་ཡང་དང་ཡང་དུ་མིག་འབྱེད་ཅིང་འཛུམས་པ་སྟེ། དེ་ཡང་ནད་མེད་པའོ། །དེ་ལ་རླུང་གིས་མིག་ནད་ཉམས་པ་ཞེས་བྱ་བ་ནི་རླུང་
[315b.7]གིས་མིག་གི་འགུལ་རྩ་ཉམས་པར་བྱས་པས་འབྱེད་འཛུམས་ཀྱི་རྩོལ་བ་མི་ཤེས་ཏེ། དེ་ཡང་མིག་མཆུ་འོག་མ་རྟག་ཏུ་ལྷོད་པར་བྱེད་པའོ། །དེ་ལ་མཁྲིས་པ་ལས་གྱུར་པའི་མིག་མཆུའི་ནད་ཀྱི་མཚན་མ་ནི། མིག་མཆུའི་ནད་དམ་ཕྱི་རོལ་གང་ཡང་རུང་བ་ཀུ་མུ་ཏའི་ས་བོན་གྱི་མདོག་
[316a]
[316a.1]ལྟ་བུའི་འབྲུམ་བུ་ཕྲ་མོ་འབྱུང་ཞིང་དེ་ཡང་བརྟོལ་ན་ཡང་གང་བ་ནི་ཀུ་མུ་ཏའི་ས་བོན་ལྟ་བུའི་མིག་མཆུའི་ནད་ཅེས་བྱའོ། །དེ་ལ་མཁྲིས་པས་སློང་བ་ཞེས་བྱ་བའི་མིག་མཆུའི་ནད་ནི་མིག་མཆུ་རབ་ཏུ་ཚ་ཞིང་ཤིན་ཏུ་ན་ལ་མདོག་དམར་ཞིང་རེག་པར་མི་བཟོད་པ་ཡིན་ནོ། །གཞན་ཡང་
[316a.2]མིག་མཆུའི་ནད་ནི་ནད་གཞི་རྫི་མའི་ནང་དུ་ཞུགས་ནས་གཡའ་ཞིང་ཚ་སྟེ། དེའི་འོག་ཏུ་རྫི་མ་བྱི་བར་བྱེད་དེ། དེའི་མིང་ནི་རྫི་མ་འབྱི་བ་ཞེས་བྱ་བའི་མིག་མཆུའི་ནད་ཡིན་ནོ། །བད་ཀན་ལས་གྱུར་པའི་མིག་མཆུའི་ནད་ནི་འབྲུམ་བུ་ཕྲ་མོ་དཀར་པོ་ཡུངས་ཀར་ཙམ་ལ་མ་ཐུག་པར་འབྱུང་བ་དང་།
[316a.3]སྐྲང་པ་དང་། མིག་རུས་ཁྱབ་པ་དང་། ན་བ་དང་། གཡའ་བ་དང་། མཆི་མ་སྤྱི་བག་ཅན་དང་ལྡན་པ་དེ་ནི་མིག་མཆུའི་ནད་ཤ་སྐྱེས་པ་ཞེས་བྱ་བར་བཤད་དོ། །བད་ཀན་གྱིས་སློང་བ་ཞེས་བྱ་བའི་མིག་མཆུའི་ནད་ནི་འབྱེད་འཛུམས་མི་ཤེས་པ་དང་། མིག་རྔུས་ཁྱབ་པར་འདུག་པ་ཡིན་
[316a.4]ནོ། །གཞན་ཡང་བད་ཀན་ལས་གྱུར་པའི་མིག་མཆུའི་ནད་ནི་ཐོར་བུ་རྒྱ་ཤུག་ཙམ་མམ། དེ་བས་ཡིད་ཙམ་ཆུང་བར་འབྱུང་སྟེ། དེ་ཡང་དཀར་ལ་ན་ཞིང་སྨན་པ་དང་། གཡའ་བ་དང་། སྲ་བ་རྣམས་ཡིན་ཏེ། མིག་མཆུའི་ནད་དེ་ལ་ནི་ལག་གྷ་ན་ཞེས་བྱ་བ་ཡིན་ནོ། །ཁྲག་ལས་གྱུར་
[316a.5]པའི་མིག་མཆུའི་ནད་ཀྱི་མཚན་མ་ནི་འབྲུམ་བུ་ཁྲག་འདྲ་བ་སྟུག་པོ་མང་དུ་འབྱུང་སྟེ། དེའི་མིང་ནི་མིག་མཆུ་ཁྱབ་པར་བྱེད་པ་ཞེས་བྱའོ། །གཞན་ཡང་དམར་པོ་ཤར་ཤར་པོ་ཁྲག་གི་མདོག་ཏུ་སྣང་ཞིང་དེ་ཡང་རེག་པར་མི་བཟོད་པ་ཡིན་ཏེ། དེ་ནི་ཁྲག་གིས་སློད་བའི་མིག་
[316a.6]མཆུའི་ནད་ཅེས་བྱའོ། །མིག་མཆུའི་ནད་ཤ་ཆེ་བའི་འབྲུམ་བུ་སྲ་བ་དང་། སྣུམ་པ་དང་། ཚ་བ་དང་། ན་བ་དང་། མདོག་དམར་ཞིང་ཁྲག་གི་མདོག་ཏུ་གྱུར་ཞིང་ཁྲག་འཛག་ལ་བཅད་པ་བཞིན་དུ་འཕེལ་བ་ནི་ཁྲག་ལས་བྱུང་བ་ཡིན་ནོ། །དེའི་མིང་ནི་ཁྲག་གི་མིག་
[316a.7]མཆུའི་ནད་ཅེས་བྱའོ། །ཡང་ན་ཁྲག་ལས་གྱུར་པའི་མིག་མཆུའི་ནད་ནི་མིག་མཆུའི་དཀྱིལ་ལམ། མིག་མཆུའི་མཐའ་མ་ལ་མོན་སྲན་སྡེའུ་ཙམ་གྱི་ཚད་ཙམ་ཟངས་མའི་མདོག་འདྲ་བར་འབྱུང་ཞིང་གཡའ་བ་དང་། ཟུག་གཟེར་དང་བཅས་པ་ལ་བརྟན་པར་གནས་པ་དེ་ནི་སྟང་
[316b]
[316b.1]ཟིལ་ལྟ་བུའི་མིག་མཆུའི་ནད་ཅེས་བྱའོ། །དེ་ལ་འདུས་པ་ལས་གྱུར་པའི་མིག་མཆུའི་ནད་ནི་མིག་མཆུའི་ཕྱི་རོལ་སྐྲང་བ་ལྟར་འདུག་ལ་ནང་དུ་སྦུ་བུ་ཕྲ་མོས་ཁྱབ་པར་འདུག་སྟེ། ནང་ཆུས་ཁེངས་ཤིང་དེ་ཡང་འཛག་པ་དང་། པད་མའི་རྩ་བ་དང་འདྲ་བ་ནི་པད་མའི་རྩ་བ་ལྟ་བུའི་
[316b.2]མིག་མཆུའི་ནད་ཅེས་བྱའོ། །ཁྲག་གིས་ནད་གཞི་རྣམས་བསླངས་ཏེ་མིག་མཆུའི་ནད་དུ་གྱུར་པ་ནི་ནད་གཞི་རྣམས་ལྷན་ཅིག་འཁྲུགས་ཏེ། རྒྱུ་མེད་པར་རྣག་དང་ཆུ་སེར་རེས་འགའ་མི་འཛག་པ་དང་། རེས་འགའ་འཛག་པ་ནི་མིག་མཆུའི་ནད་ཁྲག་གིས་སློང་བ་ཞེས་བྱའོ། །
[316b.3]ནད་གཞི་གསུམ་ཁྲག་དང་བཅས་པའི་མིག་མཆུའི་ནད་ནི་སྔོ་བསངས་སུ་འདུག་པ་དང་། ཟུག་གཟེར་བྱེད་པ་དང་། རྣག་དང་བཅས་ཤིང་སྐྲང་པ་དང་ལྡན་པ་ནི་སྔོ་བསངས་ལྟ་བུའི་མིག་མཆུའི་ནད་ཅེས་བྱའོ། །ཁྲག་དང་ནད་གཞི་རྣམས་འདྲེས་པ་ལས་གྱུར་པའི་མིག་མཆུའི་ནད་ནི་མིག་
[316b.4]མཆུ་གཉིས་འབྱར་བ་དང་། གཡའ་བ་དང་། མདོག་དམར་ཞིང་སྐྲང་པ་དང་བཅས་པ་ནི། མིག་མཆུའི་ནད་འབྱར་བག་ཅེས་བྱའོ། །མིག་མཆུའི་ནད་འབྲུམ་བུ་ཕྲ་མོ་བྱེ་མ་འདྲ་བས་ནང་དུ་ཁེངས་ཤིང་སྲ་བ་དང་རྩུབ་པ་དེ་ནི་མིག་མཆུའི་ནད་བྱེ་མ་ལྟ་བུ་ཞེས་བྱའོ། །གང་ཞིག་མཆུ་
[316b.5]གནག་ཅིང་འདམ་ལྟར་འདུག་པ་དེ་ནི་མིག་མཆུའི་ནད་འདམ་ལྟ་བུ་ཞེས་བྱའོ། །སྐྱེས་བུ་གང་གི་མིག་མཆུའི་ཤ་ཆེར་སྐྱེས་ཞིང་མཐུག་ལ་མཐོན་དམན་མེད་ཅིང་རང་གི་མདོག་གཞན་དང་མ་འདྲེས་པར་འདུག་པ་དེ་ནི་མིག་མཆུའི་ནད་ཤས་ཆེ་བ་ཞེས་བྱའོ། །ཡང་ན་མིག་མཆུའི་
[316b.6]ནད་ནི་བྱིས་པ་སོ་སྐྱེས་པའི་མཚན་མའི་རྟགས་སུ་འབྱུང་སྟེ། རྒྱུ་དེས་མིག་མཆུ་སྐྲང་ཞིང་མིག་དམར་བ་དང་། བལྟར་མི་བཟོད་པ་དང་། མིག་མཆུ་ཟུག་གཟེར་དང་བཅས་ཤིང་འབྱར་བར་འདུག་པ་དང་། རྣ་བ་དང་སྣ་དང་མིག་རྣམས་ལག་པས་ཉེད་པ་ཡིན་ཏེ། དེ་ནི་མིག་
[316b.7]མཆུའི་ནད་ཀུ་ཀུན་ཀ་ཞེས་བྱ་བ་ཡིན་ནོ། །མིག་མཆུའི་ནད་རྫི་མ་འཁྲུགས་ཏེ་མིག་མཆུའི་སྤུ་ཞུམ་པར་གྱུར་ནས། མིག་མཆུ་ལ་ནང་དུ་ལྟ་ཞིང་མིག་མཆུ་འདེབས་མི་ནུས་པ་དང་། རྫི་མ་བཏོགས་ན་རེས་འགའ་ནད་ཞི་ལ་ཡང་སྤུ་སར་པ་སྐྱེས་པ་དང་། ཚེར་མའི་རྩེ་མོ་བཞིན་
[317a]
[317a.1]དུ་རྣོ་བ་དེས་མིག་ལ་ཟུག་པ་སྐྲང་བར་འགྱུར་ཏེ། དེ་ནི་མིག་མཆུའི་ནད་རྫི་མ་འཁྲུགས་པ་ཞེས་བྱའོ། །ཡང་མིག་མཆུའི་ནད་སྣ་གོང་ཕྱོགས་ཀྱི་མིག་གི་གྲྭ་མཚམས་ཀྱི་མིག་མཆུའི་ཕྱི་རོལ་དུ་ཐོར་བུ་འབྱུང་ཞིང་སྲ་ལ་མཐོན་པོར་འདུག་པ་དང་། སྨིན་པའི་དུས་སུ་ཁྲག་
[317a.2]དང་རྣག་འཛག་ཅིང་ཡང་དང་ཡང་དུ་རྣག་ཁྲག་གིས་ཁེངས་པ་དེ་ནི་མིག་མཆུའི་ནད་མེ་དབལ་ཆུང་ངུ་ཞེས་བྱའོ། །ནད་གཞི་གསུམ་དང་ཁྲག་ལས་གྱུར་པའི་ནད་ནི་མིག་མཆུའི་དབུས་སུ་ཤའི་མཛེར་པ་ལྟ་བུ་འབྱུང་ཞིང་མཁྲང་བ་དང་། སྲ་བ་དང་། ནད་མེད་ཅིང་རིང་པོར་འཕྱང་བ་
[317a.3]དེ་ནི་མིག་མཆུའི་ནད་ཐོར་བུ་ལྟ་བུ་ཞེས་བྱའོ། །ཉི་ཤུ་རྩ་བཞི་པོ་དེ་དག་ནི་མིག་མཆུ་ལ་བརྟེན་པའི་ནད་དུ་བཤད་དོ། །དེ་རྣམས་ལས་དང་པོ་ནི་འབྱེད་དཀའ་ཞེས་བྱ་བའི་མིག་མཆུའི་ནད་ནི་སྨན་གྱིས་གསོ་བར་བྱ་བ་ཡིན་ནོ། །དེའི་འོག་མ་གཉིས་དང་མིག་ཏུ་འབྲུམ་བུ་བྱུང་བ་ནི་སྤང་བར་
[317a.4]བྱའོ། །དེ་ལྟར་རྫི་མ་འཁྲུགས་པ་ཞེས་བྱ་བའི་ནད་ནི་ལན་འགའ་གསོར་རུང་ཞིང་རེས་འགའ་ཐུ་བར་བྱེད་པ་ནི། ཡུན་རིང་དུ་ན་བར་བྱེད་པ་ཡིན་ནོ། །ལྷག་མ་རྣམས་ནི་མཚོན་གྱི་ལས་ཀྱིས་གསོ་བར་བྱ་སྟེ། དེ་ཡང་རྫི་མ་འབྱི་བ་ཞེས་བྱ་བའི་མིག་མཆུའི་ནད་ནི་མཚོན་གྱིས་གཙགས་
[317a.5]བར་བྱའོ། །མིག་མཆུའི་ནད་ཐོར་བུ་ནི་གཅད་པར་བྱའོ། །དེ་ལ་ལག་གྷ་ན་དང་། ཀུ་མུ་ཏའི་ས་བོན་ལྟ་བུ་དང་། པད་མའི་རྩ་བ་ལྟ་བུ་དང་། ཨུད་ཙང་ག་ཞེས་བྱ་བ་ལྟ་བུ་དང་། དངུལ་རྡོ་ལྟ་བུ་ཞེས་བྱ་བ་དང་། མེ་དབལ་ཕྲ་མོ་ལྟ་བུ་རྣམས་ནི་མཚོན་གྱིས་དྲལ་བར་བྱའོ། །མིག་
[317a.6]མཆུའི་ཤས་སྐྱེས་པ་དང་། སྔོ་བསངས་དང་། བྱེ་མ་ལྟ་བུ་དང་། ཁྲག་གིས་ནད་གཞི་སློང་བར་བྱེད་པ་ཞེས་བྱ་བ་དང་། འདམ་བུ་ལྟ་བུ་ཞེས་བྱ་བ་དང་། ཤ་ཆེ་བ་ཞེས་བྱ་བ་དང་། ཀུ་ཀུ་ན་ཞེས་བྱ་བ་དང་། དེ་རྣམས་ནི་མཚོན་གྱིས་བཞར་བར་བྱའོ། །མིག་མཆུའི་ནད་དམིགས་
[317a.7]བརྟག་པའི་ལེའུ་སྟེ་བརྒྱད་པ་རྫོགས་སོ།། །།དེ་ནས་མིག་མཆུའི་ནད་བསལ་བའི་ལེའུ་བཤད་པར་བྱའོ། །དེ་ལ་མིག་མཆུའི་ནད་འབྱེད་དཀའ་བ་ཞེས་བྱ་བ་ལ་ནི་མར་རྙིང་པ་དང་། རྒུན་འབྲུ་དང་། ཆུ་ཚུལ་བཞིན་བསྐོལ་ཏེ་ཁ་ར་བཏབ་པ་བཏུང་བར་བྱ་སྟེ།
[317b]
[317b.1]དེ་བཞིན་དུ་སྣར་བླུགས་པ་དང་། དུད་པ་དང་། མིག་སྨན་སྣུམ་དང་སྦྱར་བ་གཏང་ངོ་། །ཀུ་མུ་ཏའི་ས་བོན་ལྟ་བུའི་མིག་མཆུའི་ནད་ལ་ནི་མཚོན་གྱིས་གཙགས་ལ། དེའི་སྟེང་དུ་རྒྱམ་ཚའི་ཕྱེ་མས་གདབ་པར་བྱའོ། །ཤིང་མངར་དང་། སྐྱུ་རུ་ར་དང་། པ་ཏོ་ལ་རྣམས་བསྐོལ་
[317b.2]བའི་ཆུས་ཀྱང་བླུགས་སོ། །དེ་ལ་མཚོན་གྱི་ལས་བྱ་དགོས་པའི་མིག་མཆུའི་ནད་ལ་ནི་ཐོག་མར་སློན་ཁྲུས་ཀྱིས་ལུས་དག་པར་བྱས་ལ། དེའི་འོག་ཏུ་ནད་པ་རླུང་མེད་པའི་གནས་སུ་གན་རྐྱལ་དུ་བཞག་ལ་ནད་གཡོག་གིས་མི་འགུལ་བར་བཟུང་ལ་རས་འཇམ་པོ་ཆུ་དྲོན་དུ་བཅུག་པས་
[317b.3]མིག་མཆུའི་ཕྱི་རོལ་དུ་དུགས་བྱས་ལ། དེའི་འོག་ཏུ་ལག་པ་གཡོན་པའི་མཐེ་བོང་དང་མཛུབ་མོ་གཉིས་གོང་མའི་རས་ཀྱིས་དཀྲིས་ལ་དེས་མིག་མཆུ་གཉིས་ཕྱེ་ཞིང་ཕྱིར་བཟློག་པར་བྱའོ། །དེ་ལྟར་བྱས་ན་མི་འཇིལ་ཞིང་བརྟན་པར་བྱས་པའི་ཕྱིར་རོ། །དེ་ནས་མཚོན་རྩེ་མོ་
[317b.4]དཀྱིལ་འཁོར་ལྟ་བུ་འམ། ཤ་ཁ་ཏྲ་འམ། ཤེ་ཕ་ལིའི་ལོ་མ་ལྟ་བུའམ། རྒྱ་མཚོའི་ལྦུ་བ་གང་ཡང་རུང་བའི་མཚོན་གྱིས་ཡིད་འཕྲེད་དུ་རྒྱ་གྲམ་དུ་གདབ་པོ། །དེ་ནས་ཁྲག་བྱུང་བ་དང་། རས་བལ་གྱིས་ཕྱིའོ། །གལ་ཏེ་ཁྲག་མ་བྱུང་ན་ནི། ཡང་མཚོན་གྱིས་ལེགས་
[317b.5]པར་དྲལ་ཏེ་ཕྱིས་ལ། དེའི་འོག་ཏུ་ནད་གཞི་རང་རང་དང་མཐུན་པའི་སྨན་སྦྲང་རྩི་དང་སྦྱར་བ་རྨར་གདབ་པོ། །དེའི་འོག་ཏུ་ཆུ་དྲོན་གྱིས་བཀྲུའོ། །དེ་ནས་མར་དང་སྦྲང་རྩི་དང་ནས་ཕྱེ་བསྲེས་ལ་ཟན་ཐབས་སུ་བྱས་པས་མིག་ལ་གླན་ལ། དེའི་སྟེང་དུ་རས་མར་གྱིས་བྱུགས་པས་
[317b.6]དཀྲིས་ཏེ་རྣ་བའི་གོང་འོག་ཏུ་བརྟོད་ལ་བཞག་གོ། །རས་དེ་ཡང་ཞག་རེར་བཀྲོལ་ཞིང་རང་རང་དང་མཐུན་པའི་སྨན་ཡང་བླུགས་སོ། །ཞག་བཞི་ལོན་ནས་སྣར་བླུགས་པ་ལ་སོགས་པ་ཡང་བྱའོ། །ཞག་ལྔ་པ་ལ་ནི་རས་བཀྲོལ་ལ་བཏང་སྟེ་གླན་མི་དགོས་སོ། །དེ་ལྟར་
[317b.7]མཚོན་གྱིས་ལེགས་པར་བཞར་ལེགས་པའི་མཚན་མ་ནི། མིག་མཆུ་ནི་མཐོན་དམན་མེད་ཅིང་མཉམ་པ་དང་། དམར་སྐྱར་འདུག་ཅིང་སེན་མོའི་མདོག་ཏུ་སྣང་བ་དང་། སྐྲང་པ་དང་། གཡའ་བ་དང་། རེག་ཅིང་བསྒུལ་ན་ཡང་ན་བ་མེད་པར་རིག་པར་བྱའོ། །དེ་ལས་
[318a]
[318a.1]བཟློག་པ་ནི་མ་ལེགས་པའི་མཚན་མ་ཡིན་ཏེ། དེ་ལ་ནི་ཡང་མཚོན་གྱིས་བཞར་ཏེ་བཟླ་བར་བྱའོ། །གལ་ཏེ་མཚོན་གྱིས་བཞར་དྲགས་ན་ནི་མིག་མཆུ་ན་ཞིང་ཟུག་པ་དང་། རྫི་མ་འབྱི་བ་དང་། འཛག་པ་མང་བར་འགྱུར་ཏེ། དེ་ལ་ནི་སྣུམ་ཆོས་དང་།
[318a.2]དུགས་ལ་སོགས་པ་རླུང་ལ་ཕན་པའི་སྦྱོར་བ་བྱས་ན་ཕན་ནོ་ཞེས་སྨན་པ་རྣམས་འདོད་དོ། །དེའི་འོག་ཏུ་སེང་ཕྲོམ་དཀར་པོ་མར་སར་གྱིས་བསྐུས་ཏེ། ཨེ་རཎྜའི་རྩ་བའི་ཕྱེ་མའི་ལྡེ་གུས་བྱུགས་པ་རྫེའུ་ཁ་སྦྱར་གྱི་ནང་དུ་བསྲེགས་ཏེ་ཚོས་པ་དང་། ཆུས་བཀྲུས་ཏེ་སྐམས་ལ་
[318a.3]བཏགས་པའི་ཕྱེ་མ་བུད་མེད་དང་རའི་འོ་མ་གང་ཡང་རུང་བ་དང་སྦྲུས་ལ་རས་ཀྱི་ནང་དུ་ཐུམ་བུར་བྱས་ཏེ་མིག་ལ་དུགས་བྱའོ། །ཡང་ན་སེང་ཕྲོམ་དཀར་པོ་ལ་འབྲས་ཐུག་པོ་ཆེའི་ཕྱེ་མའི་ལྡེ་གུས་ཆོ་ག་གོང་མ་ལྟར་བྱས་པ་ལས་དེའི་ཕྱེ་མ་ཞོ་ག་ཆུ་དང་མཉེས་ཏེ། དུགས་བྱས་ན་མཚོན་གྱིས་
[318a.4]བཞར་དྲགས་པ་ལ་ཕན་ནོ། །ཡང་ན་ཞོ་ག་ཆུ་ཉི་ཚེས་བླུགས་པ་བྱ་ཞིང་སྲོག་ཆགས་སྐམ་ན་གནས་པའི་ཤ་དང་ལྷན་ཅིག་བཟའ་བར་བྱའོ། །མིག་མཆུ་ལ་འབྲུམ་བུ་ཕྲ་མོ་སྲ་ཞིང་མཐོན་པོ་བྱུང་བ་ལ་ནི་འབྲས་ཀྱི་སོ་འདྲ་བའི་མཚོན་གྱིས་དྲལ་ཏེ་དེ་བཙིར་ལ་སྨན་གྱིས་བཏབ་པ་དང་། བསྐུ་
[318a.5]བ་ལ་སོགས་པ་ནི་སྔ་མ་བཞིན་དུ་སྦྱར་རོ། །གོང་དུ་སྨོས་པའི་བཞར་བ་ལ་སོགས་པའི་དཔྱད་ཐམས་ཅད་ཀྱང་དྲལ་བ་འདིར་སྦྱར་བར་བྱའོ། །མཁྲིས་པ་དང་ཁྲག་ལས་གྱུར་པའི་མིག་མཆུའི་ནད་ལ་ནི། སྨན་མངར་བའི་སྡེ་ཚན་དང་མར་སྦྱར་བས་དང་པོ་བཏུང་བ་ལ་སོགས་
[318a.6]པ་སྣུམ་ཆོས་དང་སྦྱར་ཏེ། དེའི་འོག་ཏུ་ཁྲག་གཏར་རོ། །དེ་ནས་ཤིང་ཉེ་རོང་གི་བཀྲུ་སྨན་གཏང་ངོ་། །མིག་མཆུའི་ནད་མཚོན་གྱིས་བཞར་ཏེ་ཁྲག་བྱུང་བ་དང་། ཤིང་མངར་བསྐོལ་བའི་ཆུས་བཀྲུས་ཏེ། ཙནྡན་དཀར་པོ་འོ་མ་དང་སྦྱར་བས་བླུགས་པ་བྱས་ན་ཕན་ནོ། །རྫི་མ་
[318a.7]འབྱི་བའི་མིག་མཆུའི་ནད་ལ་ནི་སྤུ་ཐོག་མ་གང་ནས་འབྱི་བའི་སྤུའི་ཁུང་བུ་ཁབ་ཀྱིས་གཙགས་ཏེ་ཁྲག་དབྱུང་བའམ། ཡང་ན་སྲིན་བུ་པད་པས་ཁྲག་དབྱུང་བ་ཕན་ནོ། །ཡང་ན་རྫི་མའི་ནད་ལ་འོ་མ་དང་། བུ་རམ་ཤིང་གི་ཁུ་བ་དང་སྦྱར་བའི་མར་གྱིས་སློན་བྱ་བ་དང་། མངར་
[318b]
[318b.1]བ་དང་། བསིལ་བའི་སྨན་དང་བསྐོལ་བའི་མར་གྱི་སྣ་སྨན་བཏང་ན་ཕན་ནོ། །ཡང་ན་ནག་ཚུར་དཀར་པོའི་ཕྱེ་མ་ཟངས་མའི་སྣོད་ཀྱི་ནང་དུ་བཅུག་ལ་བྱིའུ་རུག་པའི་སྨན་གྱི་ཁུ་བས་ཞག་བཅུའི་བར་དུ་བྲན་ཅིང་དེའི་འོག་ཏུ་བསྐམས་ལ་དེའི་འོག་ཏུ་མིག་ཏུ་བསྐུས་ན། རྫི་མ་
[318b.2]འབྱེ་བའི་ནད་ལ་ཕན་པའི་མཆོག་ཡིན་ནོ། །མིག་མཆུའི་ནད་ཤ་སྐྱེས་པ་ལ་འབྲུམ་བུ་ཕྲ་མོ་འབྱུང་བའི་ནད་ལ་ནི་ཐོག་མར་མཚོན་གྱིས་བཞར་ལ་བཅའ་སྒ་དང་། རྒྱམ་ཚ་གཉིས་ཀྱི་ཕྱེ་མ་བཏབ་སྟེ། དེའི་འོག་ཏུ་ཆུ་དྲོན་གྱིས་བཀྲུའོ། །སེང་ལྡེང་དང་། ཨཊྚ་ཀ་ཞེས་བྱ་བ་ཏུ་བ་རི་དང་།
[318b.3]ན་ལེ་ཤམ་དཀར་པོ་ཆུ་དང་ལྷན་ཅིག་བསྐོལ་བའི་ཆུའམ། ཡང་ན་སེར་པོ་རྣམ་གཉིས་དང་། འབྲས་བུ་གསུམ་དང་། ཤིང་མངར་རྣམས་བསྐོལ་བའི་ཁུ་བ་སྦྲང་རྩི་དང་སྦྱར་བས་བླུགས་པར་བྱའོ། །བད་ཀན་ལས་གྱུར་པའི་མིག་མཆུའི་ནད་ལ་ནི་ནག་ཚུར་དང་། རྒྱམ་ཚ་དང་། ལྡོང་རོས་
[318b.4]དང་། པི་པི་ལིང་དང་། སྐྱེར་ཁཎྜ་དང་འདི་རྣམས་ཞིབ་ཏུ་བཏགས་པའི་ཕྱེ་མ་སྦྲང་རྩི་དང་སྦྱར་བས་བླུགས་པར་བྱའོ། །གཞན་ཡང་བད་ཀན་ལ་ཕན་པའི་སྨན་སྐྱུག་སྨན་དང་། མིག་སྨན་དང་། སྣ་ནས་གཏོང་བ་ཐམས་ཅད་ཀྱང་འདིར་བྱའོ། །མིག་མཆུའི་ནད་གྷ་ན་ཞེས་བྱ་བ་ལ་ནི། བད་
[318b.5]ཀན་ལས་གྱུར་པའི་མིག་མཆུའི་ནད་ལ་ཕན་པའི་སྨན་ཐམས་ཅད་འདི་ལ་ཡང་ཕན་ཏེ། གལ་ཏེ་དེས་མ་ཞི་ན་མེའི་ལས་ཐམས་ཅད་བྱའོ། །ཀུ་ཀུ་ན་ཀ་ཞེས་བྱ་བ་བྱིས་པའི་མིག་མཆུའི་ནད་ལ་ནི་སེང་ལྡེང་དང་། འབྲས་བུ་གསུམ་དང་། ནིམ་པའི་ལོ་མ་རྣམས་ལྷན་ཅིག་ཡུངས་
[318b.6]ཀར་གྱི་མར་དང་སྦྱར་བས་བཏུང་བ་ལ་སོགས་པ་སྣུམ་ཆོས་བྱས་ཏེ། པི་པི་ལིང་དང་། ཤིང་མངར་དང་། རྒྱམ་ཚ་དང་། ཞུན་མར་རྣམས་སྦྱར་བས་ནུ་མ་བསྣུན་པའི་མ་ལ་སློན་བྱའོ། །དེའི་འོག་ཏུ་ཨ་རུ་ར་དང་། པི་པི་ལིང་དང་། རྒུན་འབྲུ་བསྐོལ་བའི་བཀྲུ་སྨན་བྱས་ན་ཡང་
[318b.7]ཕན་ནོ། །དེ་ནས་མ་མ་དེ་ལ་གླ་སྒང་དང་། སེར་པོ་རྣམ་གཉིས་དང་། པི་པི་ལིང་རྣམས་བཏགས་པའི་འདག་གུས་ནུ་མ་ལ་བྱུག་གོ། །ཡུངས་ཀར་མར་དང་བསྲེས་པའི་དུད་པས་ནུ་མ་ལ་བདུག་གོ། །དེ་ལྟར་ན་སློན་ཁྲུས་ལ་སོགས་པས་ནུ་མ་བསྣུན་པའི་མ་མའི་ལུས་དག་པ་དང་། པ་
[319a]
[319a.1]ཏོ་ལ་དང་། གླ་སྒང་དང་། རྒུན་འབྲུ་དང་། སླེ་ཏྲེས་དང་། འབྲས་བུ་གསུམ་དང་། འདི་རྣམས་བསྐོལ་བའི་བཏུང་བ་བླུད་དོ། །དེའི་འོག་ཏུ་བྱིས་པའི་མིག་མཆུ་མཚོན་གྱིས་བཞར་བའམ། ཡང་ན་སྲིན་བུ་པད་པས་འཇིབ་ཏུ་གཞུག་སྟེ། དེ་ནས་སྐྱུ་རུ་ར་དང་
[319a.2]ཨ་སྨན་ཏ་ག་དང་། ཤིང་འཛམ་བུ་དང་། དེ་རྣམས་ཀྱི་འོ་མ་བསྐོལ་བའི་ཁུ་བས་བླུགས་པར་བྱའོ། །ཡང་ན་བྱིས་པ་ལ་ནི་ཕལ་ཆེར་སྣུམ་དང་འོ་མས་བསྐྱེད་པ་ཡིན་པས་བད་ཀན་གྱི་ནད་འབྱུང་སྟེ། དེ་བས་ན་བྱིས་པའི་ནད་ཐམས་ཅད་ལ་ཐོག་མར་སློན་སྨན་བཏང་ན་མཆོག་ཏུ་
[319a.3]བསྔགས་སོ། །དེ་ཡང་འོ་མ་ཉི་ཚེ་འཐུངས་པའི་བྱིས་པ་ལ་ནི། རྒྱམ་ཚ་དང་། པི་པི་ལིང་དང་། ཨ་པ་མརྒའི་འབྲས་བུ་དང་། མར་དང་འོ་མ་དང་། སྦྲང་རྩི་དང་ལྡན་པའི་སློན་སྨན་གཏང་ངོ་། །འོ་མ་དང་ཟས་འདྲེས་མར་བསྟེན་པའི་བྱིས་པ་ལ་ནི་ཤུ་དག་གི་ཕྱེ་མ་སྦྲང་རྩི་དང་བཅས་པའི་
[319a.4]སློན་སྨན་གཏང་ངོ་། །ཟས་ཉི་ཚེ་བསྟེན་པའི་བྱིས་པ་ལ་ནི་པོ་སོན་ཆ་ཤིང་མངར་དང་སྦྱར་བ་གཏང་ངོ་། །སྐྱུག་སྨན་དེ་དག་བྱིས་པའི་ནད་ཐམས་ཅད་ལ་ཕན་པའི་སྟེང་དུ་ཁྱད་པར་དུ་ཀུ་ཀུ་ན་ཀ་ཞེས་བྱ་བའི་བྱིས་པའི་ནད་ལ་ཕན་ནོ། །ཡང་ན་སྨན་སབ་ཏ་དང་མར་ལྷན་ཅིག་བསྐོལ་
[319a.5]བའི་མར་བླུད་ན་གོང་འོག་གཉིས་ཀ་སྦྱོར་རུང་བར་བྱེད་དོ། །སེར་པོ་རྣམ་གཉིས་དང་། སེང་ཕྲོམ་དང་། ཤིང་མངར་དང་། པུ་ཙེ་ཤེལ་དང་། ནིམ་པའི་ལོ་མ་དང་། འདི་རྣམས་སྦྲང་རྩི་དང་འོ་མ་དང་ལྡན་པའི་ཟངས་མའི་ཕྱེ་མ་འམ། ལྕགས་ཀྱི་ཕྱེ་མ་གང་ཡང་རུང་
[319a.6]བ་དང་བསེས་པའི་རི་ལུ་བྱས་ཏེ་བཏང་ན་བྱིས་པའི་མིག་མཆུའི་ནད་ལ་ཕན་ནོ། །ཡང་ན་སུག་སྨེལ་དང་། སྒོག་སྐྱ་དང་། ཀ་ཏ་ཀ་དང་། དུང་དང་། ནལ་ཤམ་དང་། ཕ་ནི་ཛ་ཀ་དང་། འདི་རྣམས་ཆང་ལ་བདར་ལ་ཀད་ཕ་ལ་དང་བཅས་པའི་བདར་བུ་བྱས་ཏེ་བཏང་ན།
[319a.7]ཀུ་ཀུ་ན་ཀ་ཞེས་བྱ་བའི་བྱིས་པའི་ནད་དང་། ཤ་སྐྱེས་པ་ཞེས་བྱ་བའི་མིག་མཆུའི་ནད་ལ་ཕན་ནོ། །རྫི་མ་འཁྲུགས་པ་ཞེས་བྱ་བའི་ནད་ལ་ནི་ཐོག་མར་སློན་ཁྲུས་ཀྱིས་ལུས་དག་པར་བྱས་ཏེ། དེའི་འོག་ཏུ་མིག་གི་རྫི་མ་ཡར་བཏེག་ལ་རྫི་མ་ཆ་གསུམ་དུ་བགོས་པའི་ཆ་གཉིས་སྨིན་
[319b]
[319b.1]མ་དང་སྦྱར། ཆ་གཅིག་ཙམ་བཞག་དེ་ནས་ནས་གང་ཙམ་ནས་ཀྱི་དབྱིབས་འདྲ་བར་འཕྲེད་དུ་མཚོན་གྱིས་དྲལ་ལ་ཁྲག་གཟགས་སོ། །ཁྲག་གི་ཤུགས་ཟད་པ་དང་། འཕྲལ་བ་ལ་རས་ཀྱིས་དམ་དུ་དཀྲིས་ལ་རྫི་མ་ཚོམ་བུར་བྱས་ཏེ་དེའི་བར་མཚམས་མོན་སྲན་སྡེའུ་ཙམ་བཞག་ལ།
[319b.2]གླད་པའི་རྫི་མའི་ཚོམ་བུ་འཕྲལ་བའི་རས་ལ་རྫི་མ་བརྟོད་དེ། བ་ལང་ངམ་རྟའི་སྤུ་འམ། ཟར་མའི་སྐུད་པས་བཙེམས་ཏེ། ཁབ་སྐུད་གཞུ་འདྲ་བས་དྲུབ་པོ། དེ་ཡང་ཧ་ཅང་དམ་ལྷོད་དུ་མ་སོང་བར་རན་པར་བྱའོ། །དེ་ནས་རས་འཇམ་པོ་མར་དང་སྦྲང་རྩི་བྱུགས་པས་བཅིང་
[319b.3]བ་མེད་པར་སྟེང་ནས་གཡོགས་སོ། །གལ་ཏེ་ཟུག་གཟེར་ཡོད་ན་ནི་ནྱ་གྲོ་དྷའི་སྡེ་ཚན་བསྐོལ་བའི་ཁུ་བ་འོ་མ་དང་བཅས་པས་བླུགས་སོ། །དེ་ནས་བརྟན་པར་གྱུར་ཏེ་ཞག་ལྔ་ལོན་པ་དང་སྐུད་པ་བཀྲོལ་ཏེ་བཙག་ཡུག་སྣམ་གྱི་ཕྱེ་མས་གདབ་པོ། །དེའི་འོག་ཏུ་སྣ་སྨན་དང་
[319b.4]མིག་སྨན་རྣོན་པོ་སྦྱར་རོ། །ཆོ་ག་དེ་དག་གིས་ཀྱང་རྫི་མ་འཁྲུགས་པའི་ནད་ཞིར་མ་འདོད་ན། རྫི་མ་གང་རིང་བ་སྐམ་པས་བཟུང་སྟེ། ཕྱུང་སྟེ་དེའི་བུ་གའི་རྗེས་ལ་ཐལ་སྨན་རྣོན་པོའམ། ཁབ་རྩེ་འདྲ་བའི་མཚོན་རྣོན་པོ་མེའི་མདོག་འདྲ་བར་བྱས་པས་བསྲེག་གོ། །
[319b.5]མིག་མཆུའི་ནད་མེ་དབལ་ལྟ་བུ་ལ་ཡང་དང་པོ་མཚོན་གྱིས་དྲལ་ལ། ཐལ་སྨན་རྣོན་པོ་འམ་མེས་བསྲེག་གོ། །ཐོར་བུ་བྱུང་བ་ལ་ནི་ཐོར་བུ་བཅད་ལ། དེའི་འོག་ཏུ་ཐལ་སྨན་ནམ་མེས་བསྲེག་གོ། །མིག་མཆུའི་ནད་གསོ་བའི་ལེའུ་སྟེ་དགུ་པ་རྫོགས་སོ།། །།
[319b.6]དེ་ནས་མིག་གི་གྲྭ་མཚམས་དང་། མིག་གི་འབྲས་བུ་དཀར་པོ་དང་ནག་པོའི་ནད་དམིགས་ཤེས་པར་བྱ་བའི་ལེའུ་བཤད་པར་བྱ་སྟེ། དེ་ལ་རླུང་ལས་གྱུར་པའི་མིག་གི་གྲྭ་མཚམས་ཀྱི་ནད་ཀྱི་མཚན་མ་ནི་རླུང་གིས་མཆི་མ་འབྱུང་བའི་རྒྱུན་བཀག་པས་མིག་མཆུའི་གྲྭ་
[319b.7]མཚམས་དང་། མིག་གི་འབྲས་བུ་དཀར་པོའི་མཚམས་སྣ་གོང་ཕྱོགས་ནས་ཆུ་དང་འདྲ་བའི་མཆི་མ་འབྱུང་ལ། དེ་ཡང་མིག་ནད་མེད་ཅིང་རྩ་དམར་ལ་སྐྲང་བ་ཡིན་ཏེ། དེ་ནི་མིག་ནད་ཀྱི་ཆུ་འཛག་པ་ཞེས་བྱའོ། །བད་ཀན་ལས་གྱུར་པའི་མིག་ནད་ཀྱི་མཚན་མ་ནི་མཆིལ་
[320a]
[320a.1]མ་དང་འདྲ་བ་སྤྱི་བག་ཏུ་འདུག་པ་དང་། མདོག་དཀར་བ་དང་། འཛག་པ་དཀའ་བ་དང་། མང་དུ་འཛག་པ་ཡིན་ཏེ། དེ་ནི་བད་ཀན་འཛག་པ་ཞེས་བྱ་བའི་ནད་ཡིན་ནོ། །ཡང་ན་བད་ཀན་ལས་གྱུར་པའི་རྟགས་ནི། མིག་གི་གྲྭ་མཚམས་སུ་མཐོན་པོ་ཙོག་ཙོག་
[320a.2]པོར་སྐྲང་པ་དང་། ཆུ་ལན་ཚྭ་ཅན་གྱི་ཆུ་བུར་འདྲ་བར་སྟེང་དུ་འབྱུང་ཞིང་ཆུ་བུར་དེ་ཡང་རྩ་བ་ཆེན་པོ་དང་། སྣུམ་པ་དང་། འགུལ་བ་དང་། མདོག་དཀར་བ་དང་། འཇམ་པ་དང་། འབྱིལ་བག་ཏུ་འདུག་པ་དང་། ཡུན་རིང་དུ་མི་ཤེས་པ་དང་། གཡའ་བ་དང་། ཟུག་གཟེར་
[320a.3]བ་མེད་པ་དེ་ནི་ཨུ་པ་ན་ཧ་ཞེས་བྱ་བའི་མིག་གི་གྲྭ་མཚམས་ཀྱི་ནད་ཡིན་ནོ། །ཁྲག་ལས་གྱུར་པའི་མཚན་མ་ནི་མཆི་མ་མང་དུ་འཛག་ཅིང་ཚ་བ་དང་། ཟངས་མའི་མདོག་འདྲ་བ་དམར་པོར་འབྱུང་བ་ཡིན་ཏེ། དེ་ནི་མིག་གི་ནད་དམར་པོར་འཛག་པ་ཞེས་བྱའོ། །མིག་མཆུའི་གྲྭ་
[320a.4]མཚམས་དང་། མིག་གི་འབྲས་བུ་དཀར་པོའི་མཚམས་ལ་བརྟེན་པའི་འབྲུམ་བུ་ཕྲ་མོ་ནི་སྲན་སྡེའུ་ཙམ་འབྱུང་སྟེ། དེ་ཡང་མདོག་ཟངས་མ་བཞིན་དུ་དམར་ལ་ཚ་ཞིང་ཟུག་གཟེར་དང་ལྡན་པ་དང་། བརྟོལ་ན་ཁྲག་འཛག་པ་ཡིན་ཏེ། དེ་ནི་པར་པ་ནི་ཞེས་བྱ་བའི་མིག་ནད་ཡིན་
[320a.5]ནོ། །ནད་གཞི་གསུམ་དང་ཁྲག་ལས་གྱུར་པའི་མིག་ནད་ཀྱི་རྟགས་ནི། མིག་གི་སྣ་ཕྱོགས་ནས་པགས་པ་དང་། ཤ་སྨིན་པའི་དབང་གིས་མཆི་མ་རྣག་དང་བཅས་པ་ཡང་འཛག་སྟེ། དེའི་མིང་ནི་རྣག་འཛག་པའི་མིག་ནད་ཅེས་བྱའོ། །གཞན་ཡང་མིག་སྣ་ཕྱོགས་ཀྱི་
[320a.6]གྲྭ་སྐྲང་པ་དང་། ན་བ་དང་། རྨ་ཕྲ་མོ་འབྱུང་བ་དང་། ཡང་དང་ཡང་ཆུ་སེར་དང་། རྣག་འཛག་པ་དང་། ནད་དང་བཅས་པ་དེ་ནི་རྣག་གར་པོ་འཛག་པའི་མིག་ནད་ཅེས་བྱའོ། །སྣ་ཕྱོགས་ཀྱི་མིག་འགྲམ་གྱི་ནང་དུ་སྐྲང་པ་དང་། ཟུག་གཟེར་ཆེ་བ་དང་། ཚ་བ་འབྱུང་བའི་ནད་ནི་མེ་
[320a.7]དབལ་ཕྲ་མོའི་ནད་ཅེས་བྱའོ། །མིག་ཟུར་གང་ཡང་རུང་བར་མིག་མཛེར་འབྱུང་སྟེ། དེ་ཡང་གཡའ་བ་དང་། རྫི་མ་འབྱི་བ་དང་། རྣག་འཛག་པ་དང་། སྲིན་ཡོད་པ་དང་། ནད་དང་བཅས་པ་དེ་ནི་མིག་མཛེར་གྱི་ནད་སྲིན་བུ་ཅན་ཞེས་བྱའོ། །དེ་ལ་མིག་གི་གྲྭ་མཚམས་ཀྱི་
[320b]
[320b.1]ནད་དགུ་ལས། ཨུ་པ་ན་ཧ་དང་། མིག་མཛེར་གྱི་ནད་སྲིན་བུའི་ནད་དང་། མཆི་མ་རྣག་གར་པོར་འཛག་པ་དང་། པརྦ་ནི་དང་། བཞི་པོ་དེ་དག་ནི་མཚོན་གྱི་ལས་ཀྱིས་གསོ་བར་བྱའོ། །ལྷག་མ་ལྔ་ལས་བཞི་ནི་སྨན་གྱིས་གསོ་བར་བྱའོ། །མེ་དབལ་ཕྲ་མོའི་མིག་ནད་ནི་
[320b.2]སྤང་བར་བྱའོ། །ད་ནི་མིག་གི་འབྲས་བུ་དཀར་པོའི་ནད་དམིགས་བརྟག་པ་བཤད་དེ། དེ་ལ་མཁྲིས་པ་ལས་གྱུར་པའི་མིག་ནད་ནི་མིག་གི་འབྲས་བུ་དཀར་པོའི་སྟེང་དུ་ནག་པོའམ། སྔོ་བསངས་སམ་སེར་པོ་ལྟ་བུར་ཐིག་ལེ་བྱུང་བ་འམ། ཡང་ན་མེ་ལོང་གཡའ་དང་
[320b.3]བཅས་པ་ལྟར་སྣང་ལ་ཚ་བ་དང་། ནད་མེད་ཅིང་ཅུང་ཟད་འཁྲུ་བ་དང་། སྐོམ་དད་ཆེ་བ་དང་བཅས་པ་ཡིན་ཏེ། དེའི་མིང་ནི་ཉ་ཕྱིས་ལྟ་བུའི་མིག་ནད་ཅེས་བྱའོ། །དེ་ལ་བད་ཀན་ལས་གྱུར་པའི་ནད་མིག་གི་འབྲས་བུ་དཀར་པོའི་སྟེང་དུ་ཤ་མདོག་དཀར་པོ་ཅུང་ཞིག་སྐྱེས་
[320b.4]ཏེ། དེ་ཡང་རིམ་གྱིས་ཡུན་རིང་པོ་ནས་འཕེལ་བ་དེ་ནི་མིག་མཛེར་དཀར་བའི་ནད་ཅེས་བྱའོ། །ཡང་ན་མིག་གི་འབྲས་བུ་དཀར་པོ་ལ་ཆུའི་ཐིགས་པ་འདྲ་བའི་ནད་འབྱུང་སྟེ། དེ་ལ་སྐྲང་པ་དང་། ཟུག་གཟེར་ཆུང་བ་དང་། མདོག་དཀར་བ་དང་། མཐུག་པ་དང་།
[320b.5]འཇམ་པ་དང་། ལྕི་བ་དང་། སྣུམ་པ་གང་ཡིན་པ་དེ་ནི་བད་ཀན་གྱིས་བསྒོངས་པའི་མིག་ནད་ཅེས་བྱའོ། །ཡང་མིག་གི་འབྲས་བུ་དཀར་པོའི་སྟེང་དུ་ཕྱེ་མ་ལྟ་བུའི་ཐིག་ལེ་འབྱུང་ཞིང་དེ་ཡང་མཐོན་པོར་འདུག་པ་ཡིན་ཏེ། དེ་ནི་འབྲས་ཕྱེའི་ཐིག་ལེ་ལྟ་བུ་ཞེས་བྱ་བའི་
[320b.6]མིག་ནད་ཅེས་བྱའོ། །ཁྲག་ལས་གྱུར་པའི་མིག་གི་འབྲས་བུ་དཀར་པོའི་ནད་མདོག་དམར་པོ་ཤར་ཤར་པོར་འགྱུར་ཞིང་ཚ་འུར་འུར་པོར་འདུག་ལ་ན་བ་དང་བཅས་པ་དང་། མཆི་མ་དང་སྐྲང་པ་མེད་པ་ཡིན་ཏེ། དེའི་མིང་ནི་མིག་རྩ་འགྱུར་བ་ཞེས་བྱའོ། །དེ་ཉིད་གསོ་བ་
[320b.7]མ་བྱས་པར་བཞག་ན་ནི་ཁྲག་ཆེར་སྐྱེས་ཏེ་ཁྲག་དང་བཅས་པ་ནི་མིག་གི་རྩ་བ་བརྩེ་བ་ཞེས་བྱ་བའི་ནད་ཡིན་ཏེ། ལྟ་བ་ལ་སོགས་པའི་རྩོལ་བ་མི་ནུས་པར་འགྱུར་རོ། །མིག་གི་འབྲས་བུ་དཀར་པོའི་སྟེང་དུ་ཁྲག་གིས་གང་བའི་རྩའི་དྲ་བས་གཡོགས་ཏེ། དེ་ཡང་སྟུག་པ་དང་མཐོན་
[321a]
[321a.1]པོར་འདུག་པ་དེ་ནི་རྩའི་དྲ་བ་ལྟ་བུའི་མིག་ནད་ཅེས་བྱའོ། །ཡང་མིག་གི་འབྲས་བུ་དཀར་པོའི་སྟེང་དུ་ཤ་མ་ཐུག་པོར་འབྱུང་ཞིང་དེ་མཐོ་དམན་མེད་པ་འཇམ་པ་པད་མ་འདྲ་བ་ཡིན་ཏེ། དེའི་མིང་ནི་ཁྲག་ལས་གྱུར་པའི་མིག་མཛེར་གྱི་ནད་ཅེས་བྱའོ། །ཡང་ན་མིག་གི་འབྲས་
[321a.2]བུ་དཀར་པོའི་སྟེང་དུ་ཐིག་ལེ་དམར་པོ་རི་བོང་གི་ཁྲག་ལྟ་བུ་དམར་པོར་སྣང་ཞིང་ནད་མེད་པ་འཇམ་པོར་འདུག་པ་དེ་ནི་ལིང་ཏོག་དམར་པོ་ཞེས་བྱའོ། །མིག་གི་འབྲས་བུ་དཀར་པོའི་སྟེང་དུ་ནད་གཞི་གསུམ་ལས་གྱུར་པའི་མཛེར་མདོག་དམར་པོ་དང་། སྔོ་བསངས་སུ་འདུག་པ་དང་།
[321a.3]འཇམ་པ་དང་། མྱུར་དུ་མཆེད་པ་དང་། ཤས་ཀུན་དུ་ཁྱབ་པ་ལ་དེ་ནི་ཁྱབ་བྱེད་ཀྱི་མིག་ནད་ཅེས་བྱའོ། །ཡང་མིག་འབྲས་དཀར་པོ་ལ་ནད་གཞི་འདུས་པ་དང་། ཁྲག་ལས་གྱུར་པའི་ནད་རྒྱུས་པ་ལྟ་བུ་ནར་ནར་པོར་གྱུར་པ་ནི་རྒྱུས་པ་ལྟ་བུའི་མིག་མཛེར་གྱི་ནད་ཅེས་བྱའོ། །ཡང་
[321a.4]ན་མིག་འབྲས་དཀར་པོའི་སྟེང་དུ་ཤའི་རིལ་རིལ་པོར་ཁྲག་སྐམ་གྱི་མདོག་ལྟར་སྔོ་བསངས་སུ་འདུག་ཅིང་མཐུག་ལ་རྒྱ་ཆེ་བར་སྣང་བ་དེ་ནི་ཤའི་མིག་མཛེར་ཅེས་བྱའོ། །ཡང་མིག་གི་འབྲས་བུ་དཀར་པོའི་སྟེང་དུ་འབྲས་བུ་ཕྲ་མོ་ཡུངས་ཀར་གྱི་འབྲུ་ཙམ་མདོག་གནག་པ་དང་། ཚ་བ་
[321a.5]དང་། རེག་ན་རྩུབ་པ་དང་། རྩ་མང་པོས་གཡོགས་པར་སྣང་བ་དེ་ནི་འབྲུམ་ཕྲན་རྩས་གཡོགས་པའི་མིག་ནད་ཅེས་བྱའོ། །དེ་དག་ལས་མིག་ནད་ཉ་ཕྱིས་ལྟ་བུ་དང་། མིག་རྩ་བརྩེ་བའི་ནད་དང་། མིག་རྩ་འགྱུར་བའི་ནད་དང་། འབྲས་ཕྱེའི་ཐིག་ལེ་ལྟ་བུ་དང་། བད་
[321a.6]ཀན་གྱིས་བསྒོངས་པའི་མིག་ནད་དང་། ལིང་ཐོག་དམར་པོ་དང་དྲུག་པོ་དེ་དག་ནི་སྨན་གྱིས་གསོ་བར་བྱའོ། །ལྷག་མ་བདུན་ནི་མཚོན་གྱི་ལས་ཀྱིས་གསོ་བར་བྱའོ། །བདུན་པོ་དེ་དག་སར་པའི་དུས་ན་ནི་སྨན་གྱིས་གསོའོ། །མིག་མཛེར་གྱི་ནད་རྣམ་པ་ལྔར་བཤད་པ་དེ་དག་མིག་གི་འབྲས་
[321a.7]བུ་ནག་པོའི་སྟེང་དུ་འབྱུང་སྟེ། རྒྱུས་པ་དང་རྩས་གཡོགས་པར་སྣང་ན་དེ་ནི་མཚོན་གྱིས་གཅད་པར་བྱའོ། །མཐོང་མིག་གི་སྟེང་དུ་པགས་པ་ལ་ཤ་འབྱར་བ་ལྟ་བུ་མཐོན་པོར་ཕྱིན་པར་སྣང་ན་དེ་ནི་སྤང་བར་བྱའོ། །མིག་གི་འབྲས་བུ་ནག་པོའམ། མཐོང་གི་སྟེང་དུ་མཁྲིས་པ་ལས་
[321b]
[321b.1]གྱུར་པའི་ལིང་ཏོག་འབྱུང་སྟེ། མིག་གི་པགས་པ་རྡོལ་ནས་ཟུག་གཟེར་དང་བཅས་ཤིང་མཆི་མ་འབྱུང་བ་དང་། ན་བ་དང་། དམར་བ་ཡིན་ཏེ། དེའང་འཛམ་བུའི་འབྲས་བུ་སྨིན་པ་དང་འདྲ་བར་སྣང་ཞིང་ཅུང་དམར་བར་འདུག་པ་དེ་ནི་ཟད་བྱེད་ཀྱི་ལིང་ཏོག་ཅེས་བྱ་སྟེ། གསོ་དཀའ་བ་ཡིན་
[321b.2]ནོ། །ལིང་ཏོག་གི་ནད་དེ་ཆེར་སྐྱེས་ནས་ནི་ཆེར་ཟབས་སུ་པགས་པའི་རིམ་པ་གཉིས་ཕུག་ནས་འདུག་པ་ཡིན་ཏེ། དེའི་མཚན་མ་ནི་ན་བ་དང་། གཟེར་བ་དང་། མཆི་མ་ལ་སོགས་པ་ཤས་ཆེར་འབྱུང་བ་དང་། ཁབ་ཀྱིས་ཕུག་པ་ལྟར་སྣང་བ་ཡིན་ཏེ། དེ་ནི་མི་ལ་བ་ཙམ་དུ་གསོར་
[321b.3]རུང་ངོ་། །ལིང་ཏོག་དེ་ཡང་སྔ་མ་བས་ཤས་ཆེར་སྐྱེས་ཏེ། པགས་པའི་རིམ་པ་གསུམ་ཕུག་ནས་རྨས་ཀུན་དུ་ཁྱབ་པར་སྣང་བ་ནི། གསོ་བར་མི་ནུས་སོ། །ཡང་མིག་གི་འབྲས་བུ་ནག་པོ་བད་ཀན་ལས་གྱུར་པའི་ལིང་ཏོག་ཧ་ཅང་མི་དཀར་བར་དུང་གི་མདོག་ལྟར་སྣང་བ་དེ་ནི། ལིང་ཏོག་
[321b.4]མ་འདྲེས་པ་ཞེས་བྱ་སྟེ། གསོ་བར་སླ་བ་ཡིན་ནོ། །ཡང་མིག་གི་འབྲས་བུ་ནག་པོ་ལ་ཁྲག་ལས་གྱུར་པའི་ལིང་ཏོག་འབྲུམ་བུ་ཕྲ་མོ་ཟངས་མའི་མདོག་ལྟ་བུ་འབྱུང་བ་དང་། མཆི་མའི་མདོག་ཀྱང་ཟངས་མའི་མདོག་ལྟར་དམར་ཞིང་འབྱར་བག་ཏུ་འབྱུང་བ་དང་། རབ་ཏུ་ན་བ་དང་།
[321b.5]རའི་རིལ་མ་དང་འདྲ་བའི་འབྲུམ་བུ་ཕྱིར་འབུར་བར་བྱུང་ལ་ཅུང་ཟད་ནག་པ་དེ་ནི་རིལ་མ་ལྟ་བུ་ཞེས་བྱ་བའི་ལིང་ཏོག་ཡིན་ཏེ་སྤང་བར་བྱའོ། །ཡང་ན་ནད་གཞི་གསུམ་དང་ཁྲག་ལས་གྱུར་པའི་ལིང་ཏོག་འབྱུང་སྟེ། དེ་ཡང་ཚ་བ་དང་། ན་བ་དང་། ཟངས་མའི་མདོག་འདྲ་བའི་རྩས་གཡོགས་
[321b.6]པར་འདུག་པ་དང་། རྒྱུ་མེད་པར་མཆི་མ་གྲང་བ་དང་དྲོ་བ་རེས་ཀྱིས་འཛག་པ་དང་། ཡང་ན་སྐ་བ་དང་སླ་བ་རེས་ཀྱིས་འཛག་པ་ཡིན་ཏེ། དེའི་མིང་ནི་ལིང་ཏོག་རྩས་གཡོགས་པ་ཞེས་བྱ་བ་ཡིན་ཏེ་སྤང་བར་བྱའོ། །ཡང་ན་ནད་གཞི་གསུམ་དང་། ཁྲག་ལས་གྱུར་པའི་ལིང་ཏོག་
[321b.7]མཐོང་བའི་མིག་སྟེང་དུ་འབྱུང་སྟེ། འབྲས་བུ་ནག་པོ་ཐམས་ཅད་དཀར་པོར་བསྒྱུར་ཏེ། མདོག་དཀར་པོ་སྤྲིན་ལྟ་བུས་ཡོགས་པའམ་ཡང་ན་འབྲས་ནིས་པ་བའི་ལོ་མ་ལྟ་བུས་ཡོགས་ལ་ཤིན་ཏུ་མི་བཟད་པར་ན་ཞིང་རྩ་དམར་བ་དང་། ཚ་ཞིང་སྐྲང་པས་ཉེན་པ་ཡིན་ཏེ། དེའི་མིང་ནི་ལིང་
[322a]
[322a.1]ཏོག་ཚོས་པ་ཞེས་བྱ་སྟེ། ཡོངས་སུ་སྤང་བར་བྱའོ། །གང་གི་མིག་གིས་མཐོང་བ་ཉམས་ཤིང་མིག་གི་མཐའ་སྔོ་བསངས་སུ་འདུག་པ་དང་། ཡང་ན་དམར་བའམ། ཡང་ན་ཕྱིར་འབུར་བར་འདུག་པའམ། ཡང་ན་ཟབས་སུ་ཞུགས་པའམ། ཡང་ན་
[322a.2]མཆི་མ་འཛག་ཅིང་རྨ་འཁྱིམས་པ་འམ། ཡང་ན་རྙིངས་པ་འམ། ཡང་ན་མཐོན་དམན་དུ་འདུག་སྟེ་མི་མཉམ་པ་དང་། ཡང་ན་དབུས་སུ་ཆད་པ་ལྟར་སྣང་བའམ། མཚན་མ་དེ་དག་གང་ཡང་རུང་བ་དང་ལྡན་པའི་ལིང་ཏོག་ནི་ཡོངས་སུ་སྤང་བར་བྱའོ། །དེ་ལྟར་མིག་གི་
[322a.3]འབྲས་བུ་ནག་པོའི་ནང་དུ་ནད་གསོར་རུང་བ་དང་མི་རུང་བ་རྣམ་པ་ལྔར་བཤད་པ་ཡིན་ནོ། །མིག་མཆུའི་ནད་དང་། མིག་གི་འབྲས་བུ་དཀར་པོ་དང་། མིག་གི་འབྲས་བུ་ནག་པོའི་ནད་དམིགས་ཤེས་པར་བྱ་བའི་ལེའུ་སྟེ་བཅུ་པ་རྫོགས་སོ།། །།
[322a.4]དེ་ནས་མིག་ཟུར་གཉིས་དང་། མིག་གི་འབྲས་བུ་དཀར་པོ་དང་ནག་པོ་རྣམས་ཀྱི་གསོ་བའི་ལེའུ་བཤད་པར་བྱའོ། །དེ་ལ་མུན་པ་ན་ཧ་ཞེས་བྱ་བའི་ནད་ལ་ནི་ཐོག་མར་སྨན་པས་དུགས་བྱས་ལ། དེའི་འོག་ཏུ་གཙགས་བུ་འབྲས་ཀྱི་རྩེ་མོ་འདྲ་བས་ཕུག་ལ། དེ་ནས་རྩེ་མོ་
[322a.5]དཀྱིལ་འཁོར་འདྲ་བའི་མཚོན་གྱིས་བཞར་བར་བྱའོ། །དེའི་འོག་ཏུ་པི་པི་ལིང་དང་། རྒྱམ་ཚྭ་གཉིས་ཀྱི་ཕྱེ་མ་སྦྲང་རྩི་དང་སྦྱར་བས་བསྐུས་ལ། མིག་མཆུའི་ཆོ་ག་བཞིན་དུ་རས་ཀྱིས་བཅིང་བ་ལ་སོགས་པ་བྱའོ། །དེ་ནས་པ་ཏོ་ལའི་ལོ་མ་དང་། སྐྱུ་རུ་རའི་ལོ་མ་བསྐོལ་
[322a.6]བས་བླུགས་སོ། །པར་པ་ནི་ཞེས་བྱ་བའི་ནད་ཀྱི་ཐུར་བུ་ནི་ལྕགས་ཀྱུ་གུག་པོས་ཆ་དང་པོ་ནས་བཟུང་སྟེ། འཕེལ་གཙགས་ཀྱིས་ཕྱེད་དུ་བཅད་དོ། །གཞན་ལྟར་བྱས་ན་ནི་མཆི་མ་རྒྱུ་བའི་སྦུ་གུ་ལ་གནོད་པར་འགྱུར་རོ། །དེ་ནས་སྦྲང་རྩི་དང་རྒྱམ་ཚྭ་སྦྱར་བས་གདབ་བོ། །
[322a.7]གསོ་བ་ལྷག་མ་ནི་མིག་མཛེར་གྱི་ཆོ་ག་བཞིན་དུ་བྱའོ། །མཆི་མ་རྣག་གར་པོར་འཛག་པའི་ནད་ལ་ནི་ཐོག་མར་རྩ་གཏར་ཏེ་ཁྲག་ཕྱུང་ལ། དེའི་འོག་ཏུ་སྨན་གྱི་བྱུག་པས་བྱུག་གོ། །དེའི་གསོ་བ་ནི་མིག་སྨིན་པའི་ཆོ་ག་མ་ནོར་བར་འདིར་བྱའོ། །དེ་བཞིན་དུ་རྒྱམ་ཚ་དང་།
[322b]
[322b.1]སྒེའུ་གཤེར་དང་། ནག་ཚུར་དང་། ལྕགས་དང་ཟངས་མ་ལེགས་པར་བཏགས་པའི་ཕྱེ་མས་བཏབ་པའམ་ཡང་ན་སྨན་དེ་རྣམས་སྦྲང་རྩི་དང་མིག་སྨན་དུ་སྦྱར་བས་གཏང་ངོ་། །མིག་མཛེར་གྱི་ནད་སྲིན་བུ་ཅན་ལ་ཐོག་མར་བ་ལང་གི་ལྕི་བ་ལ་སོགས་པས་དུགས་བྱས་ལ། མཚོན་
[322b.2]འབྲས་ཀྱི་རྩེ་མོ་འདྲ་བས་དབུག་ལ་མཚོན་རྩེ་དཀྱིལ་འཁོར་འདྲ་བས་ཕྱི་བར་བྱའོ། །འབྲས་བུ་གསུམ་དང་། ནག་ཚུར་དང་། རྒྱམ་ཚ་རྣམས་སྦྲང་རྩི་དང་སྦྱར་བས་གདབ་བོ། །ཉ་ཕྱིས་ལྟ་བུའི་མིག་ནད་ལ་ནི་བད་ཀན་འཛག་པ་ཞེས་བྱ་བའི་གསོ་བ་ཐམས་ཅད་འདིར་བྱའོ། །
[322b.3]བད་ཀན་བསྒོངས་པ་ཞེས་བྱ་བའི་མིག་ནད་དང་། འབྲས་ཀྱི་ཐིག་ལེ་ལྟ་བུ་ཞེས་བྱ་བའི་མིག་ནད་གཉིས་ནི་གཏར་ག་མ་གཏོགས་པ་ལྷག་མ་བད་ཀན་འཛག་པའི་ཆོ་ག་བཞིན་དུ་བྱའོ། །དེ་བཞིན་དུ་གཉིས་པོ་དེ་ལ་ནི་ཚ་བ་གསུམ་དང་། ཀད་ཕ་ལ་དང་འདི་རྣམས་བཏགས་
[322b.4]པའི་ཕྱེ་མ་ཁ་ལུང་གི་ཁུ་བས་བསྒོས་ཏེ། མིག་སྨན་དུ་གཏང་ངོ་། །སྲི་ཤིང་གི་མེ་ཏོག་ཁ་མ་བྱེ་བ་དང་། རྒྱམ་ཚ་དང་། ཐང་ཤིང་དང་། བཅའ་སྒ་དང་། འདི་རྣམས་བཏགས་པའི་ཕྱེ་མ་ཆང་གི་དངས་མ་དང་མིག་སྨན་དུ་སྦྱར་ན་སྐྲང་པ་དང་། གཡའ་བ་སེལ་བར་བྱེད་དོ། །
[322b.5]མིག་ནད་རྩ་འགྱུར་བ་དང་། བརྩེ་བ་དང་རྩ་འདྲ་བས་གཡོགས་པ་དང་། ལིང་ཏོག་དམར་པོ་དང་། དྲ་བའི་དྲ་བ་ལྟ་བུ་སྟེ་བཞི་པོ་དེ་དག་ནི་ཁྲག་འཛག་པའི་ཆོ་ག་བཞིན་དུ་བྱའོ། །ཁྱད་པར་དུ་རྩ་འགྱུར་བའི་མིག་ནད་ལ་ནི་མར་དང་སྦྲང་རྩི་སྦྱར་བས་བསྐུའོ། །རྩ་བརྩེ་བ་ཞེས་
[322b.6]བྱ་བའི་མིག་ནད་ལ་ནི་སྐྱེར་ཁཎྜ་ཞིབ་ཏུ་བདར་ལ་སྦྲང་རྩི་དང་སྦྱར་བས་མིག་ལ་བསྐུའོ། །ལིང་ཏོག་དམར་པོ་ལ་ནི་སྦྲང་རྩི་དང་། ཁ་ར་དང་ཞོ་ག་ཆུ་དང་སྦྱར་བ་བླུགས་ན་ཕན་ནོ། །དེ་བཞིན་དུ་ལིང་ཏོག་དམར་པོ་ལ་ནི། ཤེལ་དང་། དུང་དང་། ཤིང་མངར་དང་། གུར་ཀུམ་དང་། འདི་
[322b.7]རྣམས་སྦྲང་རྩི་དང་སྦྱར་བའི་མིག་སྨན་གཏང་ངོ་། །ཡང་ན་ལིང་ཏོག་དམར་པོ་ལ་ནི། དུང་དང་། སྦྲང་རྩི་སྦྱར་བའམ། ཡང་ན་ཁ་ར་དང་རྒྱ་མཚོའི་ལྦུ་བ་སྦྱར་བ་བླུགས་ན་ཕན་ནོ། །གོང་དུ་མིག་མཛེར་གྱི་ནད་རྣམ་པ་ལྔ་བཤད་པ་ལས། དུད་ཀ་ལྟ་བུ་དང་། དམར་བ་དང་། ཞོ་འདྲ་བའི་
[323a]
[323a.1]ནད་གང་ཡིན་པ་དེ་དག་ནི་ལིང་ཏོག་གསོ་བའི་ཆོ་ག་བཞིན་དུ་བྱའོ། །མིག་མཛེར་ལྔ་པོ་གང་བྱུང་ཡང་རུང་སྟེ། ཐོག་མར་ནད་པ་གན་རྐྱལ་དུ་བཞག་ལ་དུགས་བྱ་སྟེ། ཁ་ལུང་དང་། རྒྱམ་ཚྭ་སྦྱར་བས་མིག་བསྐུས་ལ་ལག་པས་མཉེ་བར་བྱའོ། །དེ་ལྟར་མིག་
[323a.2]མཛེར་ཤས་ཆེར་བྱུང་སྟེ། རང་གི་གནས་ནས་བསྐྱོད་པ་དང་། ནད་གཡོག་གིས་འདིར་ཁྱད་པར་དུ་མགོ་བོ་མི་འགུལ་བར་དམ་དུ་བཟུང་ལ་མིག་མཛེར་གང་ཕྱོགས་ན་ཆེར་ཡོད་པ་བརྟགས་ཏེ། མཐོང་བའི་མིག་བསྲུང་ཞིང་གང་དུ་ཆེར་སྐྱེས་པ་དེ་དང་དེར་མཚོན་ལྕགས་ཀྱུ་རབ་ཏུ་གུག་པ་འམ།
[323a.3]མཚོན་མུ་ཙ་ཏྱ་ཞེས་བྱ་བ་དང་། མཚོན་སེའུ་ཙི་ཙི་ཏྲ་ཞེས་བྱ་བ་གང་ཡང་རུང་བ་ལེགས་པར་བཟུང་ནས་རྨ་ཆེར་མི་གདོད་ཅིང་མཚོན་རྩེ་དཀྱིལ་འཁོར་ལྟ་བུས་བཅད་དེ། དེ་ཡང་སྣ་གོང་གཡས་ཀྱི་མིག་ཕུགས་ཀྱི་འགྲམ་ནས་ཆ་བཞིར་བགོས་ཏེ། ཆ་གཅིག་ལུས་པ་ཙམ་ནས་བཅད་
[323a.4]དེ་སྣ་གོང་ཕྱོགས་ཀྱི་མིག་ཟུར་ནས་མཆི་མ་བྱུང་བའི་སྦུ་བུ་ཡོད་དེ། དེ་བསྲུང་བར་བྱའོ། །གལ་ཏེ་དེར་མཚོན་གྱིས་ཕོག་ན་ནི་རྟག་ཏུ་མཆི་མ་འཛག་པའི་སྐྱོན་དུ་འགྱུར་རོ། །གལ་ཏེ་མིག་གི་འགྲམ་ཕྱོགས་སུ་མིག་མཛེར་ཡོད་ན་ནི་ནད་པ་སྣ་གོང་ཕྱོགས་སུ་བལྟར་བཅུག་ནས་ཡང་ཆ་
[323a.5]བཞིར་བགོས་ཏེ། ཆ་གཅིག་ལུས་པ་ཙམ་ནས་གཅད་པར་བྱ་སྟེ། དེར་ཡང་མཆི་མ་འཛག་པ་བསྲུང་བར་བྱའོ། །དེ་ལྟར་ན་མཚོན་གྱིས་ལེགས་པར་བཅད་པའི་འོག་ཏུ་ཚ་བ་གསུམ་དང་། རྒྱམ་ཚྭ་དང་། སྦྲང་རྩི་དང་སྦྱར་བས་བསྐུའོ། །དེའི་འོག་ཏུ་ཞུན་མར་དྲོན་
[323a.6]པོས་བླུགས་སོ། །དེ་ནས་ཞུན་མར་སྦྲང་རྩི་དང་སྦྱར་བས་བསྐུའོ། །དེའི་འོག་ཏུ་རས་ཀྱིས་གོང་མ་ལྟར་ཆིངས་ཤིག །དེ་ནས་ཞག་གསུམ་པ་ལ་རས་བཀྲོལ་ནས་ཀ་རཉྫ་འོ་མ་དང་བསྒྲུབས་པ་བསྐོལ་ཏེ་བླུགས་པར་བྱའོ། །ཡང་ན་སེར་པོ་རྣམ་གཉིས་དང་། པ་ཏོ་ལ་དང་།
[323a.7]ཤིང་མངར་དང་། རྒྱ་སྐྱེགས་ཤིང་དང་འདི་རྣམས་བསྐོལ་བའི་ཁུ་བའི་ནང་དུ་ཀ་རཉྫའི་མེ་ཏོག་ཁ་མ་བྱེ་བ་དང་། སྦྲང་རྩི་བཏབ་པས་བླུགས་པར་བྱའོ། །དེ་ནས་ཞག་ལྔ་འམ་བདུན་ནམ་མིག་གི་ནད་རུང་བ་འདྲ་ན་རས་དགྲོལ་བར་བྱའོ། །དེ་མཚོན་གྱིས་ལེགས་པར་
[323b]
[323b.1]བཅད་ན་ནི་ནད་མེད་ཅིང་བདེ་བར་འགྱུར་རོ། །བཅད་མ་ལེགས་ན་ནི་ནད་འབྱུང་བར་འགྱུར་རོ། །དེ་ལ་ནི་སྨན་གྱིས་བླུགས་པ་དང་། བསྐུ་བ་དང་། བཞར་བ་དང་མིག་བརྟ་བའི་ཆོ་ག་རྣམས་ལེགས་པར་གྱིས་ཤིག། ཁ་ར་དཀར་པོ་དང་། ལྡོང་རོས་དང་། ཨེ་ལ་བ་ལུ་ཀ་དང་།
[323b.2]ཚ་མཆོག་རྒྱམ་ཚྭ་དང་། བཅའ་སྒ་དང་། དེ་རྣམས་ཞོ་རེ་རེ་དང་། སྐྱེར་ཁཎྜ་སྲང་ཕྱེད་དང་། འདི་རྣམས་སྦྲང་རྩི་དང་སྦྱར་བ་མིག་ཏུ་བསྐུས་ན། བད་ཀན་ལས་གྱུར་པའི་རབ་རིབ་དང་། མིག་ཆུ་སེར་གྱིས་གང་བ་དང་། ལིང་ཏོག་དང་། མིག་མཛེར་བཅས་པའི་ལྷག་མ་
[323b.3]ལུས་པ་ལ་ཕན་ནོ། །འབྲས་བུ་གསུམ་གྱི་ཤུན་པ་རེ་རེ་ནས་ཆུ་ཐགས་སུ་བྱས་ཏེ། ལྡེ་གུ་འདྲ་བར་གྱུར་པ་དང་། རྫེའུ་ཁ་སྦྱར་གྱིས་བསྲེགས་པ་རང་གི་ཁུ་བ་དང་སྦྲུས་ཏེ་སྐམ། དེ་ནས་བཏགས་ཏེ་དེ་ལྟར་ཡང་དང་ཡང་བྱས་ན་སྣག་ཚ་འདྲ་བར་གྱུར་པ་དང་། རྒྱམ་ཚྭ་ཉིས་འགྱུར་
[323b.4]དང་སོ་སོར་བསྲེས་ལ་ཡང་བཏགས་ཏེ། ཕྱེ་མ་གསུམ་པོ་དེ་དག་ནི་བཞར་ཞིང་ཕྱི་བའི་འོག་ཏུ་བསྐུ་བའི་སྨན་གྱི་མཆོག་དྲང་སྲོང་ཆེན་པོ་མུ་ཁྱུད་ཀྱིས་བཤད་དོ། །རྩའི་དྲ་བས་གཡོགས་པ་ལྟ་བུ་ཞེས་བྱ་བའི་ནད་རྩ་རྣམས་ཤིན་ཏུ་སྲ་བར་འདུག་པ་ཡང་སྨན་གོང་མས་བསྐུའོ། །
[323b.5]དེས་ཞིར་མ་འདོད་ན་ནི་མིག་མཛེར་དང་འབྲུམ་བུའི་ཆོ་ག་བཞིན་དུ་གསོ་བར་བྱའོ། །ལིང་ཏོག་ཐམས་ཅད་ལ་ནི་ཐོག་མར་ནད་གཞི་གང་ཡིན་པ་བརྟགས་ཏེ། སྣུམ་པའམ་རྩུབ་པ་གང་དང་སྦྱོར་བ་དང་། འབྲས་བུ་གསུམ་དང་སྦྱར་བ་ཡིན་ནོ། །དེ་བཞིན་དུ་ཏིག་ཏ་ཆེན་པོའི་
[323b.6]སྨན་མར་ཡང་བླུད་དེ་གཏར་ག་བྱའོ། །བཀྲུ་སྨན་དང་བླུགས་པ་ལ་སོགས་པ་ཡང་འདོད་པ་ཡིན་ནོ། །ལིང་ཏོག་ཟད་བྱེད་ལ་ནི་དེ་བཞིན་དུ་ཏིག་ཏ་ཆེན་པོའི་སྨན་མར་ཡང་བླུད་དེ་གཏར་ག་བྱའོ། །བཀྲུ་སྨན་དང་བླུགས་པ་ལ་སོགས་པ་ཡང་འདོད་པ་ཡིན་ན་དུར་བྱིད་དང་
[323b.7]ལན་གསུམ་བསྐོལ་བའི་ཁུ་བ་མར་དང་ཡང་བསྐོལ་ཏེ། མར་ལུས་པ་ལས་རན་པར་བླུད་དོ། །དེའི་འོག་ཏུ་སྲིན་བུ་པད་པའམ། གཏར་གས་ཁྲག་དབྱུང་ངོ་། །ཨུཏྤ་ལ་དང་། ར་མཉེ་བ་རྣམ་པ་གཉིས་དང་། རྒུན་འབྲུ་དང་། ཤིང་མངར་དང་། བི་ད་རི་དང་། འདི་
[324a]
[324a.1]རྣམས་ཆུ་དང་བསྐོལ་བའི་ཁུ་བ་འམ། ཡང་ན་རའི་འོ་མ་དང་བསྐོལ་ཏེ། འོ་མ་ལུས་པ་གང་ཡང་རུང་བའི་ནང་དུ་ཁ་ར་དཀར་པོ་བཏབ་སྟེ་མིག་ཏུ་བླུགས་ན་ལིང་ཏོག་ཟད་བྱེད་སེལ་ཏོ། །གལ་ཏེ་མིག་དམར་ཞིང་མཆི་མ་འཛག་སྟེ་ནད་དང་བཅས་པ་ལ་ནི་དྲང་སྲོང་མུ་ཁྱུད་
[324a.2]ཀྱི་མིག་སྨན་གྱིས་ཞི་བར་བྱའོ། །སྲིང་ཤིང་གི་མེ་ཏོག་དང་། རྒྱ་སྐྱེགས་དང་། བཙག་ཡུག་སྣམ་དང་། ཙནྡན་དཀར་པོ་རྣམས་རི་ལུར་བྱས་ཏེ་བསྐུས་ན་ཁྲག་དང་། མཁྲིས་པ་དག་པར་བྱེད་ཅིང་ཟད་བྱེད་ཀྱི་ལིང་ཏོག་འཇོམས་པར་འགྱུར་རོ། །ཡང་གླང་པོ་ཆེ་དང་། ཕག་དང་།
[324a.3]རྔ་མོ་དང་། བ་ལང་དང་། རྟ་དང་། ར་དང་། བོང་བུ་དང་། འདི་རྣམས་ཀྱི་སོ་དང་། དུང་དང་། མུ་ཏིག་དང་། རྒྱ་མཚོའི་ལྦུ་བ་དང་། དེ་རྣམས་ཆ་སྙོམས་ཏེ་སྨན་སྣ་གཅིག་གི་བཞི་ཆའི་ན་ལེ་ཤམ་རྣམས་ལྷན་ཅིག་རི་ལུར་བྱས་ཏེ་བསྐུས་ན། ལིང་ཏོག་ཟད་བྱེད་ཀྱིས་ཁྱབ་པར་གྱུར་པ་ལས་
[324a.4]ཟློག་པར་བྱེད་དོ། །ཡང་ན་ཏ་མ་ལའི་ལོ་མ་དང་། བ་ལང་གི་སོ་དང་། དུང་དང་། རྒྱ་མཚོའི་ལྦུ་བ་དང་། བོང་བུའི་རུས་པ་དང་། ཟངས་མ་དེ་རྣམས་བ་གཅིན་དང་རི་ལུར་བྱས་ཏེ། མིག་ལ་བསྐུས་ན་ལིང་ཏོག་ཐམས་ཅད་སེལ་ཏོ། །ཡང་ན་མརྒད་ལ་སོགས་པ་རིན་པོ་ཆེ་དང་།
[324a.5]གླང་པོ་ཆེ་ལ་སོགས་པའི་སོ་དང་། ཕྱུགས་ཀྱི་སོ་རྣམས་དང་། གསེར་ལ་སོགས་པའི་འབྱུང་ཁུངས་ཀྱི་ནོར་བུ་དང་། ཚ་བ་གསུམ་དང་། སུག་སྨེལ་དང་། ཀ་རཉྫའི་ས་བོན་དང་། སྒོག་སྐྱ་དང་། གང་ཡང་རྨ་འཚོ་བའི་སྨན་གྱི་རིགས་དང་འདི་རྣམས་རི་ལུར་བྱས་ཏེ་མིག་ལ་བསྐུས་
[324a.6]ན་ལིང་ཏོག་རྨ་དང་བཅས་པ་དང་། རྨ་ཟབ་པ་དང་། མིག་སྤྲིན་གྱི་སྟེང་གི་ལིང་ཏོག་ཐམས་ཅད་འཇོམས་པར་བྱེད་དོ། །ལིང་ཏོག་པགས་པ་ཕུག་ནས་ཟབས་སུ་སོང་ཞིང་ནད་དང་བཅས་པ་ལ་སྣུམ་གྱི་བཏུང་བ་དང་། སྣར་བླུགས་པ་དང་། ཟས་བཅུད་ཅན་ཟོས་ཀྱང་བརྟ་སྟེ་འཚོ་
[324a.7]བར་འགྱུར་རོ། །ནད་མེད་པ་ལ་སྨན་གྱི་ཕུར་མ་བསྲེག་ཅིང་བཙོས་པའི་ཁུ་བའི་ཐིགས་པ་མིག་ཏུ་བླུགས་ཤིང་ཚིམ་པར་བྱས་ན་ཕན་ནོ། །ལིང་ཏོག་ཉི་ཚེ་ལ་ནི་སྐྱེར་པ་དང་། ཤིང་མངར་དང་། ཐལ་ཏྲེས་དང་། སེང་ཕྲོམ་ཤ་ར་བ་དང་། དེ་རྣམས་བསྐོལ་བའི་ཁུ་བའམ་ཡང་ན་སེང་
[324b]
[324b.1]ཕྲོམ་བཏགས་པའི་ཕྱེ་མ་ཆུ་དྲོན་གྱི་ནང་དུ་སྨྱུགས་ཤིང་དེའི་ཐིགས་པ་གང་ཡང་རུང་བ་བླུགས་ན་ཕན་ནོ། །ཡང་ན་བྲི་ཧ་ཏིའི་རྩ་བ་དང་། ཤིང་མངར་དང་། ཟངས་མའི་ཕྱེ་མ་དང་། རྒྱམ་ཚྭ་དང་། དོང་གྲ་དང་། སྐྱུ་རུ་རའི་འབྲས་བུ་བསྐོལ་བ་དེ་རྣམས་ཆུ་ཐགས་སུ་བྱས་བའི་ལྡེ་གུས་
[324b.2]ཟངས་མའི་སྣོད་ལ་བསྐུས་ཏེ། ནས་དང་། སྐྱུ་རུ་རའི་ལོ་མ་དང་། མར་གསུམ་བསྲེས་པའི་དུད་པས་ལན་མང་དུ་བདུགས་པའི་ཟངས་མའི་སྣོད་ཀྱི་སྨན་དང་བཅས་པའི་ནང་དུ་ཆུ་དང་སྦྲང་རྩི་བཅུག་ལ་མཉེས་ཏེ་རི་ལུར་བྱས་པ་དེ་ནི་མཐོན་ཁ་ཆེན་པོ་ལྟ་བུ་ཞེས་བྱ་སྟེ། ལིང་ཏོག་ཉི་ཚེ་
[324b.3]སེལ་བར་བྱེད་པའི་མཆོག་ཡིན་ནོ། །ཡང་ལིང་ཏོག་མ་འདྲེས་པར་བརྟན་ཞིང་མཐུག་པར་སྣང་བ་དེ་ལ་ནི་ལན་མང་དུ་ཁྲག་གཏར་ཞིང་མགོ་དང་ལུས་ཀྱི་ཁྲུས་དང་། སྨན་གྱི་ཕུར་མ་བཙོས་པའི་ཁུ་བའི་ཐིགས་པ་བླུགས་པ་ལན་མང་དུ་བྱའོ། །གཞན་ཡང་ན་ལེ་ཤམ་དང་། པི་པི་ལིང་དང་།
[324b.4]ཤྲི་ཤའི་འབྲས་བུ་དང་། རྒྱམ་ཚྭ་དང་དེ་རྣམས་ཀྱི་ཕྱེ་མ་འམ་ཡང་ན་འབྲས་བུ་གསུམ་བསྐོལ་བའི་ནང་དུ་རྒྱམ་ཚ་བཅུག་པས་བསྒོས་ན་གནས་ནས་སྐྱོད་པར་བྱེད་དོ། །ཡང་ན་དུང་དང་། རྒྱ་ཤུག་ཚི་གུ་དང་། ཀ་ཏ་ཀ་དང་། རྒུན་འབྲུ་དང་། ཤིང་མངར་དང་། སྦྲང་རྩི་
[324b.5]དང་། དེ་རྣམས་སྦྱར་བ་བསྐུ་བའམ། ཡང་ན་སོ་དང་། རྒྱ་མཚོའི་ལྦུ་བ་དང་། ཤྲི་ཤའི་མེ་ཏོག་དེ་དག་ཆང་དང་སྦྱར་ཏེ་བསྐུས་ན་ཡང་ལིང་ཏོག་ཉི་ཚེ་གནས་ནས་སྐྱོད་པར་བྱེད་དོ། །ཡང་ན་སྐྱུ་རུ་ར་དང་། ཕ་ནིད་ཛ་ཀའི་ཁུ་བའི་ནང་དུ་བ་ལང་གི་ལྕི་བ་ཐལ་བར་བྱས་པ་ནུབ་གཅིག་
[324b.6]སྦངས་ཏེ་སྐམས་ལ་བཏགས་པའི་ཕྱེ་མས་བསྐུས་ན་ཡང་ལིང་ཏོག་ཉི་ཚེ་གནས་ནས་སྐྱོད་པར་བྱེད་དོ། །ཡང་ན་མོན་སྲན་སྡེའུ་ཕུབ་མ་དང་བྲལ་བ་དང་། དུང་དང་ལྷན་ཅིག་བཏགས་ཏེ་སྦྲང་རྩི་དང་སྦྱར་བས་བསྐུས་ན་ཡང་ཕན་ནོ། །ཡང་ན་མ་དུ་ཀའི་སྙིང་པོ་སྦྲང་རྩི་དང་
[324b.7]སྦྱར་བ་འམ། ཡང་ན་བ་རུ་རའི་ཚི་གུ་སྦྲང་རྩི་དང་སྦྱར་བས་བསྐུས་ན་ལིང་ཏོག་ཉི་ཚེ་གནས་ནས་སྐྱོད་པར་བྱེད་དོ། །ཡང་ན་བ་ལང་དང་། བོང་བུ་དང་། རྟ་དང་། རྔ་མོ་དང་། དེ་རྣམས་ཀྱི་སོ་དང་། དུང་དང་། རྒྱ་མཚོའི་ལྦུ་བ་དང་། དེ་རྣམས་ཨརྫུ་ན་བསྐོལ་བའི་ཁུ་བ་དང་། རི་ལུར་
[325a]
[325a.1]བྱས་པས་མིག་ལ་བསྐུས་ན་ལིང་ཏོག་གནས་ནས་སྐྱོད་དེ་འཇིག་པར་བྱེད་དོ། །ལིང་ཏོག་མཐོན་པོར་འདུག་པའམ། མཐུག་པ་འམ། ཟུག་རྔུ་འདྲ་བ་འམ། དེ་གསུམ་གང་ལྟར་འདུག་ཀྱང་རྟ་རྔ་ལ་སོགས་པས་བཞར་བར་བྱའོ། །ལིང་ཏོག་རྩས་གཡོགས་
[325a.2]པ་ཞེས་བྱ་བ་དེ་ནི་གལ་ཏེ་མཐོང་བ་མ་ཉམས་ན་མིག་རྨ་གསོ་བའི་ཆོ་ག་ལྟར་གྱིས་ཤིག །ཡང་ན་པྲ་པུཎྜ་རཱི་ཀ་དང་། ཤིང་མངར་དང་། བུང་ཚང་རྡོ་དང་། བྲི་ཧ་ཏི་དང་། ཨ་ཀ་རུ་དང་། ལིག་བུ་མིག་དང་དེ་རྣམས་རའི་འོ་མ་དང་བཏགས་པའི་ལྡེ་གུ་སྦྱར་ལ་ཐོག་མ་ནས་མར་གྱི་
[325a.3]དུད་པས་བདུག །དེའི་འོག་ཏུ་སྐྱུ་རུ་རའི་དུད་པས་ཡང་བདུགས་ལ། དེ་ནས་རི་ལུར་བྱས་ཏེ། མིག་ཏུ་བསྐུས་ན་ཕན་པར་བྱེད་པའི་མཆོག་ཡིན་ནོ། །སྦྱོར་བ་དེ་དག་གིས་ཀྱང་མ་ཞི་ན་མིག་མཆུའི་སྐབས་སུ་བཤད་བའི་མཚོན་གྱི་ལས་དང་། རའི་རིལ་མ་ལྟ་བུའི་ལིང་ཏོག་གི་ཆོ་ག་
[325a.4]བྱའོ། །རའི་རིལ་མ་ལྟ་བུའི་ལིང་ཏོག་དང་། དེ་བཞིན་དུ་གསོར་མི་རུང་བའི་ལིང་ཏོག་གཞན་དག་གལ་ཏེ་ཟུག་གཟེར་དང་བཅས་པ་ཡིན་ན་ནི་དེ་ཞི་བར་བྱ་བའི་ཕྱིར་སྣུམ་གྱི་བཏུང་བ་དང་། ཁྲག་དབྱུང་བ་ལ་སོགས་པས་ཞི་བར་བྱའོ། །དེ་བཞིན་དུ་ལིང་ཏོག་ཕྱིར་འབུར་
[325a.5]ཞིང་མཐོན་པོར་སྣང་བ་ཡང་དབྲི་བར་བྱ་ཞིང་འཇོམས་པའི་སྨན་བྱའོ། །རྒྱ་སྟར་དང་། གོ་བྱེ་དང་། ཤིང་ཏ་ལ་དང་། ཀ་རི་ར་དང་། སྨྱིག་མ་དང་དེ་རྣམས་ཀྱི་རུས་པ་བསྲེགས་པའི་ཐལ་བ་བཙགས་པའི་ཐལ་ཁུའི་ནང་དུ་རྔ་མོའི་རུས་པ་བཏགས་པའི་ཕྱེ་མ་བཏབ་སྟེ་བསྐོལ་ལ།
[325a.6]དེ་བཞིན་དུ་ཡང་དང་ཡང་དུ་བྱས་ལ་མིག་ཏུ་བསྐུས་ན། ལིང་ཏོག་གསོར་མི་རུང་ཞིང་མདོག་གྱུར་པ་ཡང་འཇོམས་སོ། །སྦྱོར་བ་དེ་དག་ནི་ལིང་ཏོག་གསོར་མི་རུང་བ་ཡང་འཇོམས་པར་བྱེད་ན་གསོར་རུང་བ་ལྟ་སྨོས་ཀྱང་ཅི་དགོས་ཏེ་ཡོན་ཏན་དཔག་ཏུ་མེད་དོ། །རའི་རིལ་མ་ལྟ་བུ་
[325a.7]ཞེས་བྱ་བའི་ལིང་ཏོག་གསོར་མི་རུང་བ་དེ་ནི་ངོས་གཉིས་ནས་གཙགས་བུ་ཁབ་རྩེ་འདྲ་བས་དྲལ་ཏེ་མཐེ་བོང་གཉིས་ཀྱིས་བཙིར་ལ་ཆུ་སེར་གཟག་གོ། །དེའི་རྨའི་ནང་དུ་བ་ལང་གི་ཤའི་ཕྱེ་མ་དང་ཚིལ་རློན་པས་རྨའི་ནང་དུ་བཅུག་སྟེ། དེའི་འོག་ཏུ་རས་ཀྱིས་དཀྲིས་ཏེ་བཅིང་
[325b]
[325b.1]བ་དང་། དགྲོལ་བར་ཡང་དང་ཡང་བྱའོ། །དེ་ནས་ཞག་བདུན་ལོན་ཏེ་རྨ་རུབ་ཅིང་མིག་གི་འབྲས་བུ་ནག་པོ་མི་མཉམ་པ་མེད་ཅིང་བརྟན་པར་གྱུར་པ་དང་། སྣུམ་དང་བཅས་པའི་མིག་སྨན་བཏང་ཞིང་མར་དང་འོ་མར་སྦྱར་བའི་སྣ་སྨན་ཡང་བླུགས་སོ། །དེ་ལྟར་ཆོ་ག་བྱས་ཀྱང་ཆུས་
[325b.2]ཡང་ཁེངས་པ་ལྟ་ན་དབུག་པ་དང་། དྲལ་བ་ལ་སོགས་པའི་ཆོ་ག་ཅི་རིགས་པར་བྱ་སྟེ། ཅི་ནས་ཀྱང་གཅད་དྲགས་ཏེ། མཐོང་བའི་མིག་ནད་དུ་མ་ཞུགས་པའི་ཐབས་བྱའོ། །དེ་ལྟར་ལིང་ཏོག་ཐམས་ཅད་སོ་སོའི་ནད་དང་རྗེས་སུ་མཐུན་པའི་སྨན་དང་སྦྱར་བའི་མར་གྱིས་སྣར་བླུགས་
[325b.3]པ་ལ་སོགས་པ་རྟག་ཏུ་བསྟེན་པར་བྱ་སྟེ། དེ་བཞིན་དུ་མཐོང་བའི་མིག་ཉམས་པར་མི་འགྱུར་ཞིང་ནད་ཀྱི་སྟོབས་མི་རྙེད་པར་བྱ་བའི་ཆེད་དུ། དུས་རྟག་ཏུ་མིག་སྨན་རྣོན་པོ་བསྟེན་པར་བྱའོ། །མིག་གི་འབྲས་བུ་དཀར་ནག་དང་། མིག་གི་གྲ་མཚམས་ཀྱི་ནད་གསོ་བའི་ལེའུ་
[325b.4]སྟེ་བཅུ་གཅིག་པ་རྫོགས་སོ།། །།དེ་ནས་མིག་རབ་རིབ་ཏུ་གྱུར་ཏེ་མི་མཐོང་བའི་ནད་དམིགས་བརྟགས་པའི་ལེའུ་བཤད་པར་བྱའོ། །དེ་ལ་ནད་གཞི་གང་ཡང་རུང་བ་རྩའི་ནང་དུ་ཞུགས་ཏེ། རབ་རིབ་ཀྱི་རིམ་པ་དེ་ལྟར་དང་པོས་ཁེབས་པའི་རྟགས་ནི་རྒྱུ་མེད་
[325b.5]པར་དངོས་པོ་རྣམས་གསལ་བར་མི་མཐོང་བ་དང་། ཡང་ན་དངོས་པོ་མེད་པ་གསལ་བར་མཐོང་བ་ཡིན་ནོ། །མཐོང་བའི་མིག་ལ་རབ་རིབ་རིམ་པ་གཉིས་ཀྱིས་ཁེབས་པའི་རྟགས་ནི་རྒྱུ་མེད་པར་དངོས་པོ་རྣམས་གསལ་བར་མི་མཐོང་བ་དང་། དངོས་པོ་མི་སྣང་བ་ཐམས་ཅད་
[325b.6]མཐོང་ལ། དྲུང་ན་འདུག་པའི་དངོས་པོ་གསལ་བ་ནི་རབ་ཏུ་བསྒྲིམས་ཏེ་བརྟགས་ན་གཟོད་མཐོང་བ་དང་། ཐག་རིང་བ་དང་། ཕྲ་བའི་དངོས་པོ་མི་མཐོང་བ་དང་། རིང་བ་ནི་ཉེ་བར་མཐོང་ལ་ཉེ་བ་ནི་རིང་བར་མཐོང་བ་ཡིན་ནོ། །དེ་བཞིན་དུ་ནང་གི་གནང་ཟླུམ་པོ་ལ་སོགས་པ་ཇི་ལྟ་བ་བཞིན་
[325b.7]དུ་ཕྱིའི་གཟུགས་ཀྱང་དེ་བཞིན་དུ་མཐོང་བ་དང་། ཉེས་པ་དེ་མཐོང་བའི་མིག་གི་འབྲས་བུ་བརྟེན་པ་ཡིན་ན་ནི། དངོས་པོ་གཅིག་གཉིས་སུ་མཐོང་བ་དང་། མང་པོ་གཅིག་ཏུ་མཐོང་བ་དང་། ཉེས་པ་དེ་ལྟ་བུ་མིག་གི་ནང་དུ་ཞུགས་ན་ནི་དངོས་པོ་ཆེ་བ་ནི་ཆུང་བར་མཐོང་ལ། ཆུང་བ་ནི་
[326a]
[326a.1]ཆེ་བར་མཐོང་བ་ཡིན་ནོ། །མཐོང་བའི་མིག་གི་འོག་ཕྱོགས་སུ་ཉེས་པ་བརྟེན་པ་ཡིན་ན་ནི་དྲུང་ན་འདུག་པ་མི་མཐོང་བ་ཡིན་ནོ། །ཉེས་པ་སྟེང་ཕྱོགས་སུ་བརྟེན་པ་ཡིན་ན་ནི་ཐག་རིང་བའི་དངོས་པོ་མཐོང་བ་ཡིན་ནོ། །མཐོང་བའི་མིག་གི་གཡས་གཡོན་གཉིས་ཀ་ལ་ཉེས་པ་བརྟེན་
[326a.2]པ་ཡིན་ན་ནི་གཡས་གཡོན་གྱི་དངོས་པོ་རྣམས་མི་མཐོང་བ་ཡིན་ནོ། །མཐོང་མིག་ལ་སྤྲིས་གཡོགས་པའི་རིམ་པ་གསུམ་དུ་གཡོགས་པ་ལ་ནི། སྟེང་འོག་གཉིས་སུ་མི་མཐོང་ཞིང་མཐོང་བ་ཡང་རས་སྲབ་མོས་མིག་བཀབ་པ་ཙམ་དུ་མཐོང་བ་ཡིན་ནོ། །ཇི་ལྟར་སྐྱི་མདོག་འགྱུར་
[326a.3]བ་བཞིན་དུ་མཐོང་བ་དེ་ཡང་དེ་ལྟར་འགེབས་པར་བྱེད་དོ། །གནས་སྐབས་རིམ་པ་དེ་དག་ཏུ་གསོ་བ་མ་བྱས་ན་ནི། གནས་སྐབས་བཞི་པ་ལ་ཉེས་པས་མཐོང་བའི་མིག་ཁྱབ་པར་འགེབས་ཏེ། གཏན་དུ་མི་མཐོང་བ་ཡིན་ཏེ། དེ་དག་ནི་རབ་རིབ་ཀྱི་མཚན་མ་སྤྱིར་བསྟན་པ་ཡིན་
[326a.4]ནོ། །དེ་ལ་རླུང་ལས་གྱུར་པའི་རབ་རིབ་ཀྱི་མཚན་མ་ནི་དངོས་པོ་རྣམས་འགྱུར་བར་མཐོང་བ་དང་། དངོས་པོ་བརྟན་པ་འགུལ་བར་མཐོང་བ་དང་། མི་གསལ་བར་མཐོང་བ་དང་། འོད་རྩ་དམར་བར་མཐོང་བ་དང་། རེས་འགའ་གསལ་བར་མཐོང་བ་དང་། དེ་བཞིན་དུ་དྲ་
[326a.5]བ་རིས་སུ་མཐོང་བ་དང་། སྐྲ་ཤད་འཛིངས་པ་མཐོང་བ་དང་། མེད་བཞིན་དུ་སྦྲང་བུ་དང་། འོད་ཟེར་མཐོང་བ་རྣམས་ཡིན་ནོ། །དེ་ལྟར་རླུང་ལས་གྱུར་པའི་རབ་རིབ་ཀྱི་ནད་གསོ་བར་མ་བྱས་ཏེ། སྤྲིས་གཡོགས་པ་རིམ་པ་གསུམ་པར་གྱུར་ན་ནི་མིག་གི་འབྲས་བུ་རྩ་དམར་
[326a.6]པོར་འགྱུར་ཞིང་བཞིན་གྱི་གདོང་ལ་སྣ་མེད་པར་མཐོང་བ་དང་། ཟླ་བ་དང་མེ་ལ་སོགས་པ་གཅིག་ལ་དུ་མར་མཐོང་བ་དང་། ཡོན་པོ་དྲང་པོར་མཐོང་ཞིང་དྲང་པོ་ཡོ་བར་མཐོང་བ་ཡིན་ནོ། །ནད་དེ་ཆེར་སྐྱེས་ཏེ་གནས་སྐབས་བཞི་པར་གྱུར་ན་རྡུལ་ལམ་དུ་བས་ཁེབས་པ་ལྟར་སྣང་
[326a.7]བའམ། ཤིན་ཏུ་གསལ་བར་སྣང་བ་འམ། ཡང་ན་མཐོང་བའི་མིག་རྒྱ་ཆེ་བ་དང་། ཡང་ན་མིག་འཛུམས་པའི་སྣང་བ་ནི། མཐོང་བ་ཉམས་ཤིང་ལོང་བ་ཞེས་བྱའོ། །ཡང་རླུང་གིས་མཐོང་བའི་མིག་གི་རྩ་འཁུམས་པར་བྱས་ནས་མཐོང་བའི་མིག་ཟབས་སུ་ཞུགས་ཏེ།
[326b]
[326b.1]ཉེས་པ་དེས་མཐོང་བ་ཉམས་པ་ཡོད་དེ་དེ་ནི་ཟབས་སུ་ཞུགས་པའི་མིག་ནད་དུ་དྲང་སྲོང་རྣམས་ཀྱིས་བཤད་དོ། །མཁྲིས་པ་ལས་གྱུར་པའི་རབ་རིབ་ཀྱི་མཚན་མ་ནི་གློག་དང་། སྲིན་བུ་མེ་ཁྱེར་དང་། མེ་སྒྲོན་གྱི་འོད་ལྟར་མཐོང་བ་དང་། རྨ་བྱ་དང་། སྲེག་པའི་སྒྲོ་ལྟར་ཚོན་སྣ་ཚོགས་སུ་
[326b.2]མཐོང་བ་དང་། དངོས་པོ་རྣམས་ཕལ་ཆེར་སྔོན་པོར་མཐོང་བ་ཡིན་ནོ། །མཁྲིས་པའི་རབ་རིབ་གསོ་བ་མ་བྱས་པ། སྤྲིས་གཡོགས་ཏེ་རིམ་པར་གྱུར་པ་ནི། མཐོང་བའི་མིག་གི་འབྲས་བུ་ཁར་བ་ཕྱིས་པ་ལྟར་སྔོན་པོར་སྣང་ཞིང་གཟུགས་ཀྱང་དེ་ལྟར་མཐོང་བ་དང་། ཉི་མ་
[326b.3]དང་། ཟླ་བ་འཁྱིམས་པ་དང་། མེ་དང་། སྨིག་རྒྱུ་དང་། འཇའ་ཚོན་རྣམས་མཐོང་བ་ཡིན་ནོ། །སྤྲིས་གཡོགས་པ་བཞི་པར་གྱུར་ན་ནི་མཐོང་བའི་མིག་བུང་བ་ལྟར་སྔོ་བ་དང་། དངོས་པོ་རྣམས་མི་མཐོང་བ་དང་། འབྲས་བུ་སྣུམ་པར་འདུག་པ་དེ་ནི་མཐོང་བ་ཉམས་པ་
[326b.4]ཡིན་ཏེ། དེ་ཡང་མིག་གི་འབྲས་བུ་ཆུང་ངུར་འགྱུར་ཞིང་དངོས་པོ་རྣམས་ཆུང་ངུར་མཐོང་བ་ཡིན་ཏེ། དེ་ནི་ཆུང་ངུ་མཐོང་བ་ཞེས་བྱའོ། །ཡང་མིག་སེར་པོར་འགྱུར་ཞིང་དངོས་པོ་རྣམས་ཀྱང་སེར་པོར་མཐོང་བ་དེ་ནི་མཁྲིས་པ་མ་རུང་བའི་ནད་ཅེས་བྱའོ། །བད་ཀན་ལས་གྱུར་
[326b.5]པའི་རབ་རིབ་ཀྱི་མཚན་མ་ནི་ཕལ་ཆེར་ཕྱི་རོལ་གྱི་དངོས་པོ་རྣམས་སྣུམ་པ་དང་། དཀར་པོར་མཐོང་བ་དང་། དེ་བཞིན་དུ་དུང་དང་། ཟླ་བ་དང་། མེ་ཏོག་ཀུན་ད་དང་། ཀུ་མུ་ཏའི་མདོག་ལྟར་མཐོང་བ་ཡིན་ནོ། །དེ་བཞིན་དུ་གསོ་བ་མ་བྱས་ཏེ། སྤྲིས་གཡོགས་པ་གསུམ་པར་
[326b.6]གྱུར་ན་ནི་ཟླ་བ་དང་ཉི་མའི་འོད་མེད་ཅིང་མེ་མར་ལ་སོགས་པས་བསྐོར་བ་ལྟ་བུར་མཐོང་ཞིང་མིག་འབྲས་དཀར་པོར་གྱུར་པ་ཡིན་ནོ། །དེ་ཉིད་གསོ་བ་མ་བྱས་པར་རིམ་པ་བཞི་པའི་སྤྲིས་གཡོགས་པར་གྱུར་ན་ནི་མཐོང་མིག་གི་སྟེང་དུ་བད་ཀན་མངོན་དུ་སྣང་ཞིང་། དེ་ཡང་འཇམ་ལྟ་མཉམ་
[326b.7]པ་ཉམས་པར་བྱས་པ་ཡིན་ཏེ། དེ་ཡང་པད་མའི་འདབ་མ་ཁ་བྱེ་བའི་སྟེང་དུ་ཆུའི་ཐིགས་པ་འདུག་པ་ལྟར་སྣང་བ་དང་། གལ་ཏེ་དྲོས་ན་ནི་ཆུང་བར་འགྱུར་ལ་གྲིབ་མས་ཕོག་པ་འམ། གྲང་བས་ཉེན་ན་ནི་ཡོངས་སུ་ཁྱབ་པར་བྱེད། མདོག་ཀྱང་དུང་དང་། ཟླ་བ་དང་། མེ་ཏོག་ཀུན་
[327a]
[327a.1]ད་དང་། ཤེལ་ལྟར་དཀར་བ་ཡིན་ཏེ། དེ་ནི་མཐོང་བ་ཉམས་ཏེ་ལོང་བའི་རྟགས་སོ། །དེ་ལ་ཁྲག་ལས་གྱུར་པའི་རབ་རིབ་ཀྱི་མཚན་མ་ནི་མིག་གི་འབྲས་བུ་དམར་ཞིང་དངོས་པོ་རྣམས་མུན་པར་མཐོང་བ་ཡིན་ནོ། །དེ་ཉིད་གསོ་བ་མ་བྱས་ན་ནི་སྤྲིས་གཡོགས་པའི་
[327a.2]ནད་རིམ་པ་གསུམ་པར་འགྱུར་ཏེ། མཐོང་མིག་དམར་བའམ་གནག་པར་འགྱུར་ཞིང་གཟུགས་ཀྱང་དེ་ལྟར་མཐོང་བ་ཡིན་ནོ། །དེ་ཉིད་ལ་ཡང་མ་གསོས་ན་སྤྲིས་གཡོགས་པ་རིམ་པ་བཞིར་གྱུར་ན་ཡང་མཐོང་མིག་དམར་བ་འམ་ནག་པོར་འགྱུར་ཏེ་འོད་མེད་ཅིང་ལོང་བའི་རྟགས་སོ། །ལྡན་
[327a.3]པའི་ནད་དང་འདུས་པའི་རབ་རིབ་ཐམས་ཅད་ཀྱི་མཚན་མ་ཡང་འདྲེས་པའི་རྟགས་དང་ལྡན་པ་ཡིན་ཏེ། གློ་བུར་དུ་དངོས་པོ་རེས་འགའ་གསལ་བར་མཐོང་། རེས་འགའ་མི་གསལ་བར་མཐོང་བ་ཡིན་ནོ། །ལྷག་མ་སྤྲིས་གཡོགས་པའི་རིམ་པ་གསུམ་པར་གྱུར་པ་ནི། མཐོང་བ་
[327a.4]ཉམས་ཤིང་ལོང་བའི་མཚན་མ་ནི་ལྟ་བའི་མིག་ཚོན་སྣ་ཚོགས་སུ་སྣང་ཞིང་གཟུགས་ཀྱང་སྣ་ཚོགས་སུ་མཐོང་བ་ཡིན་ནོ། །གང་གིས་མཐོང་བའི་མིག་ལ་ནད་གཞི་རྣམས་འདུས་ཏེ་སྲེ་མོའི་མིག་འདྲ་བར་འགྱུར་ཞིང་ཉིན་པར་ཁ་དོག་སྣ་ཚོགས་སུ་མཐོང་ལ་མཚན་མོ་མི་མཐོང་བ་ཡིན་ཏེ། ནེའུ་
[327a.5]ལེ་ལྟ་བུའི་མིག་ལོང་བ་ཞེས་བྱའོ། །ཡང་ན་ནད་གཞི་ཐམས་ཅད་ལས་གྱུར་བའི་མིག་ནད་ཉི་མ་ནུབ་ཕྱོགས་ཀྱི་རི་ལས་ནུབ་སྟེ་འོད་མི་སྣང་བ་ནི་མཐོང་བའི་མིག་ནད་བཞིས་ཁེབས་ཏེ་མི་མཐོང་ལ། ནང་པར་ཉི་མ་ཤར་ཏེ་འོད་ཀྱིས་ཕོག་ན་སྤྲིས་གཡོགས་པ་འཇུ་ཞིང་རྗེས་པར་འགྱུར་ཏེ།
[327a.6]དེ་ནི་ཉིན་པར་གསལ་བར་མཐོང་ཞིང་མཚན་མོ་མི་མཐོང་བའི་ནད་ཅེས་བྱའོ། །ཡང་ལུས་ཚ་བས་གདུངས་པ་ལས་དེ་མ་ཐག་ཆུ་གྲང་གི་ནང་དུ་ཞུགས་པར་གྱུར་ན། དེའི་དབང་གིས་ནད་གཞི་གསུམ་འཁྲུགས་པར་བྱས་ཏེ། གྱེན་དུ་མིག་གཉིས་ལ་ཚ་བ་ཞུགས་ཏེ། དེས་
[327a.7]མིག་མཆུ་ཅུང་ཟད་ཙམ་ཚ་བ་དང་། མིག་གི་དཀར་པོ་ཅུང་ཟད་དྲི་མ་དང་བཅས་པར་སྣང་བ་དང་། ཉིན་མོ་གསལ་པོར་མི་མཐོང་ལ་ནུབ་མོ་ལོང་བར་འགྱུར་ཏེ། དེ་ནི་ཚ་བས་མིག་མ་རུངས་པར་ཤེས་པར་བྱའོ། །ཡང་ཁ་ཟས་སྐྱུར་བ་ཤས་ཆེར་ཟོས་པས་ནད་གཞི་
[327b]
[327b.1]གསུམ་ཁྲག་དང་བཅས་པས་མིག་ནད་ཁྱབ་པས། རྣག་དང་གཡའ་བ་དང་། དྲི་མ་དང་བཅས་པ་དེ་དག་ནི་སྐྱུར་གྱིས་གནོད་པའི་མིག་ནད་དུ་མཁས་པ་དག་འདོད་དོ། །གཞན་ཡང་མྱ་ངན་དང་། རིམས་དང་། འགོ་བའི་ནད་ལ་སོགས་པས་རླུང་ལ་སོགས་པའི་ནད་གཞི་འཁྲུགས་ཏེ།
[327b.2]མིག་གི་དཀྱིལ་འཁོར་ཐམས་ཅད་དུད་ཀར་འདུག་ཅིང་དངོས་པོ་རྣམས་ཀྱང་དུད་ཀར་མཐོང་བ་ཡིན་ནོ། །དེ་ནི་མིག་ནད་དུད་ཀ་ལྟ་བུ་ཞེས་བྱའོ། །ཡང་གང་ཞིག་སྙིང་སྟོབས་ཆུང་བ་དག་གློ་བུར་དུ་ཉི་མའི་འོད་ལ་སོགས་པའི་གཟུགས་རྨད་དུ་བྱུང་བ་མཐོང་ན། དེའི་རྒྱུས་མིག་ལ་བརྟེན་པའི་
[327b.3]རླུང་གིས་ནད་གཞི་འཁྲུགས་ཏེ། མིག་གི་མདངས་བསྐམས་པར་བྱས་པས་ལྟ་བའི་མིག་གི་མཐོང་བ་ཉམ་ཆུང་བར་འགྱུར་ཏེ། མདོག་ཀྱང་བཻ་ཌཱུརྱ་ལྟར་འདུག་ཅིང་མིག་ཧར་བག་ཏུ་འདུག་པ་དང་། ནད་མེད་པ་དེ་ནི་རང་བཞིན་གྱི་མིག་ནད་མ་ཡིན་ཏེ། དེའི་མིང་ནི་འགོ་བའི་མིག་ནད་ཅེས་
[327b.4]བྱའོ། །མཐོང་བའི་མིག་གི་ནད་དེ་དག་ལས་ཀྱང་བད་ཀན་ལས་གྱུར་པའི་མཐོང་བ་མ་གཏོགས་པ་རླུང་དང་། མཁྲིས་པ་དང་། ཁྲག་དང་། འདུས་པ་དང་ལྡན་པ་དང་། འགོ་བའི་ནད་དང་། དེ་བཞིན་དུ་མིག་ཟབས་སུ་ཞུགས་པ་དང་། མཐོང་བའི་མིག་ཞུམ་ཞིང་ཆུང་ངུར་སོང་བ་
[327b.5]དང་དེ་རྣམས་ནི་སྤང་བར་བྱའོ། །རླུང་དང་། མཁྲིས་པ་དང་། བད་ཀན་དང་ལྡན་པ་དང་། འདུས་པ་དང་། ཁྲག་ལས་གྱུར་པ་དང་། དེ་རྣམས་སྤྲིས་གཡོགས་པའི་ནད་རིམ་པ་གསུམ་དང་། སྲེ་མོའི་མིག་ལྟ་བུའི་ནད་དང་། བདུན་པོ་དེ་དག་ནི་མི་ལ་བ་
[327b.6]ཙམ་དུ་གསོ་བར་ནུས་སོ། །ལྷག་མ་བཅུ་གཉིས་པོ་རླུང་དང་། མཁྲིས་པ་དང་། བད་ཀན་དང་ལྡན་པ་དང་། འདུས་པ་ལས་གྱུར་པའི་རབ་རིབ་དྲུག་དང་། མཁྲིས་པས་མ་རུངས་པར་གྱུར་པ་དང་། བད་ཀན་གྱིས་མཐོང་བ་ཉམས་པ་དང་། ནད་གཞིས་མ་རུངས་པ་དང་།
[327b.7]ཚ་བས་གནོད་པ་དང་། སྐྱུར་གྱིས་མ་རུངས་པར་བྱས་པ་དང་། དུད་ཀ་ལྟ་བུ་ཞེས་བྱ་བ་དང་། དེ་རྣམས་ནི་མྱུར་དུ་གསོ་བར་བྱ་སྟེ། དེ་དག་ནི་མཐོང་བའི་མིག་གི་ནད་ཉི་ཤུ་རྩ་བདུན་དུ་དྲང་སྲོང་རྣམས་ཀྱིས་བཤད་པ་ཡིན་ནོ། །མིག་ནད་རབ་རིབ་ཀྱི་ནད་གཞི་བཤད་པའི་ལེའུ་སྟེ་
[328a]
[328a.1]བཅུ་གཉིས་པ་རྫོགས་སོ།། །།དེ་ནས་མིག་ནད་རབ་རིབ་གསོ་བའི་ལེའུ་བཤད་པར་བྱ་སྟེ། གལ་ཏེ་རབ་རིབ་ཀྱི་ནད་དེ་གསོ་བར་མ་བྱས་ན་ནི་སྤྲིས་གཡོགས་པའི་ནད་གནས་སྐབས་གསུམ་པར་འགྱུར་ཏེ། དེ་ཡང་གསོ་བ་མ་བྱས་ན་མཐོང་བ་
[328a.2]ཉམས་ཤིང་ལོང་བར་འགྱུར་རོ། །དེ་བས་ན་མིག་ནད་ཐམས་ཅད་ཀྱི་ནང་ནས་རབ་རིབ་ནི་ཤིན་ཏུ་མི་བཟད་པ་ཡིན་ཏེ། དེ་ལྟ་བས་ན་རབ་རིབ་བྱུང་མ་ཐག་གསོ་བའི་རིགས་སོ། །སྨན་འཚོ་བྱེད་སྲང་བརྒྱ། ཆུ་སྲང་ལྔ་བརྒྱ་རྩ་བཅུ་གཉིས་ཀྱི་ནང་དུ་བསྐོལ་ཏེ། བཞི་ཆ་ལུས་པ་དང་།
[328a.3]དེའི་ཉིས་འགྱུར་གྱི་འོ་མ་དང་། མར་སྲང་སུམ་ཅུ་རྩ་གཉིས་དང་། པུཎྜ་རཱི་ཀ་དང་། ར་མཉེ་བ་རྣམ་གཉིས་དང་། པི་པི་ལིང་དང་། སེང་ཕྲོམ་དང་། རྒྱམ་ཚ་དང་། ཤིང་མངར་དང་། རྒུན་འབྲུ་དང་། ཐང་ཤིང་དང་། ཁ་ར་དཀར་པོ་དང་། འབྲས་བུ་གསུམ་
[328a.4]འདི་རྣམས་ཞོ་གཉིས་གཉིས་བཏབ་སྟེ་ལྷན་ཅིག་བསྐོལ་ལ་མར་འབའ་ཞིག་ལུས་པ་ལས་ཉལ་ཁར་རན་པར་འཐུངས་ན་རབ་རིབ་འཇོམས་པའི་མཆོག་ཡིན་ནོ། །ཡང་ན་རྒུན་འབྲུ་དང་། ཙནྡན་དཀར་པོ་དང་། བཙོད་དང་། ར་མཉེ་བ་རྣམ་གཉིས་དང་། ཛི་བ་ཀ་རྣམ་གཉིས་དང་།
[328a.5]ཁ་ར་དཀར་པོ་དང་། ཉེའུ་ཤིང་དང་། མེ་ད་རྣམ་གཉིས་དང་། པུཎྜ་རཱི་ཀ་དང་། ཤིང་མངར་དང་། ཨུཏྤལ་དང་། འདི་རྣམས་ཀྱི་ཕྱེ་མ་དང་། མར་རྙིང་པ་དང་། འོ་མ་བྲེ་རེ་རེ་དང་། ཆུ་དང་ཚུལ་བཞིན་བསྐོལ་ཏེ་མར་ལུས་པ་ནི་རྒུན་འབྲུའི་སྨན་མར་ཞེས་བྱ་སྟེ། དེ་ལས་
[328a.6]རན་པར་འཐུངས་ན། སྤྲིས་གཡོགས་པའི་རིམ་པ་དང་། རབ་རིབ་དང་མིག་གི་རྩ་ལ་ཁྲག་ཞུགས་ཏེ་དམར་པོ་ཤར་ཤར་པོར་སྣང་བའི་ནད་དང་། འགོ་བའི་ནད་འཇོམས་སོ། །ཡང་ན་པ་ཏོ་ལ་དང་། ནིམ་པ་དང་། པུ་ཙེ་ཤེལ་དང་། སྐྱེར་པ་དང་། པུ་ཤེལ་ཙེ་དང་། འབྲས་བུ་
[328a.7]གསུམ་དང་། བ་ཤ་ཀ་དང་། བྱི་ཚེར་བ་དང་། ཀྱི་ལྕེ་བ་དང་། སྲོ་ལོ་དང་། འདི་རྣམས་སྲང་རེ་རེ་དང་། སྐྱུ་རུ་ར་སྲང་བཅུ་དྲུག་དང་། ཆུ་སྲང་ལྔ་བརྒྱ་རྩ་བཅུ་གཉིས་དང་ལྷན་ཅིག་བསྐོལ་ཏེ་བཞི་ཆ་སྲང་བརྒྱ་ཉི་ཤུ་རྩ་བརྒྱད་ལུས་པའི་ནང་དུ་གླ་སྒང་དང་། ཏིག་ཏ་དང་། ཤིང་མངར་དང་།
[328b]
[328b.1]དུག་མོ་ཡུངས་དང་། བ་ལུ་དང་། ཙནྡན་དང་། པི་པི་ལིང་དང་། འདི་རྣམས་སྲང་ཕྱེད་ཕྱེད་བཏགས་པའི་ཕྱེ་མ་དང་། མར་སྲང་སུམ་ཅུ་རྩ་གཉིས་དང་ཚུལ་བཞིན་བསྐོལ་ཏེ། མར་འབའ་ཞིག་ལུས་པ་ནི་སྐྱུ་རུ་རའི་སྨན་མར་ཞེས་བྱ་སྟེ། དེ་ལས་རན་པར་འཐུངས་ན། མིག་
[328b.2]དང་། རྣ་བ་དང་། སྣའི་ནད་ལས་རྒྱལ་བར་བྱེད་དོ། །དེ་བཞིན་དུ་ཁོང་འབྲས་དང་། རིམས་དང་། ཤུ་བ་མཆེད་པའི་ནད་མ་རུངས་པ་དང་། འབྲུམ་བུ་དང་། མཛེ་ནད་རྣམས་སེལ་ཏོ། །ཁྱད་པར་དུ་ལིང་ཏོག་དང་། རབ་རིབ་དང་། མཚན་མོ་མི་མཐོང་བ་དང་། དྲོ་བ་དང་།
[328b.3]སྒྱིད་སྐྱུར་བ་དང་། ལུས་ཚ་བ་རྣམས་འཇོམས་པར་བྱེད་དོ། །འབྲས་བུ་གསུམ་སྲང་བརྒྱད་དང་། ཆུ་སྲང་བརྒྱ་ཉི་ཤུ་རྩ་བརྒྱད་དང་བསྐོལ་ཏེ་བཞི་ཆ་ལུས་པ་དང་། དེ་དང་མཉམ་པའི་འོ་མ་དང་། མར་སྲང་བཅུ་དྲུག་དང་ཡང་འབྲས་བུ་གསུམ་གྱི་ཕྱེ་མ་སྲང་གཅིག་བཏབ་སྟེ་ཡང་
[328b.4]བསྐོལ་ལ། མར་ལུས་པ་ནི་འབྲས་བུ་གསུམ་གྱི་སྨན་མར་ཞེས་བྱ་སྟེ། ཁ་རའམ་སྦྲང་རྩི་དང་འབྲས་བུ་གསུམ་གྱི་ཁུ་བ་དང་། དེ་གསུམ་གང་ཡང་རུང་བ་དང་ལྷན་ཅིག་འཐུངས་ན་རབ་རིབ་ཐམས་ཅད་འཇོམས་སོ། །ཡང་ན་ཤིང་མངར་དང་། ར་མཉེ་བ་རྣམ་གཉིས་དང་། ཀཎྜ་ཀ་
[328b.5]རི་དང་། པི་པི་ལིང་དང་། ཨ་རུ་ར་དང་། ཨུཏྤ་ལ་དང་། ཁ་ར་དཀར་པོ་དང་། རྒུན་འབྲུ་དང་། འདི་རྣམས་སྲང་རེ་རེ་དང་། མར་དང་རའི་འོ་མ་སྲང་སུམ་ཅུ་རྩ་གཉིས་གཉིས་དང་། འབྲས་བུ་གསུམ་དང་། བ་ཤ་ཀ་དང་། བྲིང་ག་ར་ཛ་དང་། དེ་གསུམ་གྱི་རང་གི་ཁུ་བ་སྲང་
[328b.6]སུམ་ཅུ་རྩ་གཉིས་གཉིས་དང་། དེ་རྣམས་ལྷན་ཅིག་བསྐོལ་ཏེ་མར་ལུས་པ་ནི་འབྲས་བུ་གསུམ་གྱི་སྨན་མར་ཆེན་པོ་ཞེས་བྱ་སྟེ། དེ་ལས་རན་པར་འཐུངས་ན་ལིང་ཏོག་སེལ་བའི་དམ་པ་ཡིན་ནོ། །འབྲས་བུ་གསུམ་དང་། ཤིང་མངར་བཏགས་པའི་ཕྱེ་མ་སྦྲང་རྩི་དང་སྦྱར་བའམ།
[328b.7]ཡང་ན་འབྲས་བུ་སུམ་མར་དང་སྦྱར་བའི་ལྡེ་གུ་ཟླ་བ་གཅིག་གི་བར་དུ་ཕན་པའི་ཟས་དང་། ལྷན་ཅིག་ཉལ་ཁར་བསྟེན་ཅིང་སྐོམ་དུ་སྐྱུ་རུ་རའི་ཆུ་འཐུངས་ན་བྱ་འདབ་བཟངས་ཀྱི་མིག་བཞིན་དུ་རྣོ་བར་འགྱུར་རོ། །ཞེས་རྒྱལ་པོའི་དྲང་སྲོང་ཆེན་པོ་ལེགས་ལྡན་མུ་ཁྱུད་ཀྱིས་བཤད་དོ། །
[329a]
[329a.1]དྲུབ་མར་ཅང་དང་། ལྕགས་དང་། གསེར་དང་། ཤིང་མངར་དང་། ཁ་ར་དཀར་པོ་དང་། མར་རྙིང་པ་དང་། སྦྲང་རྩི་དང་། འདི་རྣམས་གང་རྙེད་པ་འབྲས་བུ་གསུམ་དང་སྦྱར་བ་ལས་ཅི་འདོད་པ་ཟོས་ན་རབ་རིབ་འཇོམས་པའི་གཙོ་བོ་ཡིན་ནོ། །
[329a.2]ཡང་ན་འབྲས་བུ་གསུམ་བསྐོལ་བའི་ནང་དུ་ཞུན་མར་གྱིས་བཏབ་པ་འཐུངས་ན་རབ་རིབ་སེལ་ཏོ། །ཡང་ན་སྣུམ་ཁུར་རམ། སྲན་ཚོད་དང་། ཕྱེ་མ་དང་། ལྷན་ཅིག་འབྲས་བུ་གསུམ་དང་ཕྱེ་མ་བསྟེན་ན་མིག་ནད་རབ་རིབ་སེལ་ཏོ། །ཡང་ན་འོ་ཐུག་གི་ནང་དུ་འབྲས་བུ་གསུམ་གྱི་
[329a.3]ཕྱེ་མ་བཏབ་སྟེ་བསྒྲངས་པ་སྦྲང་རྩི་དང་ཤ་ཁ་རས་བཏབ་པ་འཐུངས་ན་རབ་རིབ་ལ་ཕན་ནོ། །ཡང་ན་རྒུན་འབྲུ་དང་། ལི་ཁ་ར་དང་། སྦྲང་རྩི་དང་། དེ་གསུམ་གང་ཡང་རུང་བ་དང་། ཨ་རུ་ར་དང་ལྷན་ཅིག་སྦྱར་ཏེ། རབ་རིབ་ཅན་གྱི་ནད་པས་ནང་པར་རམ་
[329a.4]ཟས་ཀྱི་གོང་དུ་རྟག་ཏུ་བསྟེན་པར་བྱའོ། །ལིག་བུ་མིག་ཆ་དྲུག་ཅུ་རྩ་བཞི་དང་། ཟངས་མ་དང་། དངུལ་དང་། གསེར་ཆ་རེ་རེ་དང་། འདི་རྣམས་སྣོད་ཀྱི་ནང་དུ་བཞུ་སྟེ། གཅིག་ཏུ་གྱུར་པ་དང་། རོ་རྣམ་དྲུག་གི་སྡེ་ཚན་གཅིག་གི་སྨན་ཁུའི་ནང་དུ་གསེར་
[329a.5]ལ་སོགས་པའི་གོང་བུ་དེ་མེའི་ནང་དུ་བསྲོས་པ་བཅུག་ལ། དེ་བཞིན་དུ་ལན་བདུན་དེ་ལྟར་བྱས་ལ་རོ་ལྷག་མ་ལྔ་པོ་རེ་རེའི་ཁུ་བ་ཡང་གོང་མ་ལྟར་བྱས་ཏེ། བདུན་ཕྲག་དྲུག་པོ་བཞི་བཅུ་རྩ་གཉིས་ཀྱི་བར་དུ་གོང་བུ་དེ་སྨན་ཁུས་བསྒོས་པ་དེ་དང་། བཻ་ཌཱུརྱ་དང་། མུ་ཏིག་
[329a.6]དང་། དུང་དང་། དེ་གསུམ་ཆ་རེ་རེ་ལྷན་ཅིག་བཏགས་པའི་ཕྱེ་མ་ནི། ལིག་བུ་མིག་ལ་སོགས་པའི་མིག་སྨན་ཞེས་བྱ་སྟེ། ཕྱེ་མ་དེས་མིག་ཏུ་བཏབ་ན་རབ་རིབ་ཐམས་ཅད་སེལ་ཏོ། །རྒུན་འབྲུ་དང་། པདྨའི་རྩ་ལག་གི་རང་གི་ཁུ་བ་དང་། འོ་མ་
[329a.7]དང་། ཆང་དང་། ཞག་དང་། ཆར་པའི་ཆུ་དེ་རྣམས་རེ་རེའི་ནང་དུ་ཡང་གོང་མའི་ལིག་བུ་མིག་གི་གོང་བུ་ཡང་གོང་མ་ལྟར་བྱས་ཏེ་ལན་བདུན་བདུན་བསྒོས་ཏེ་ཕྱེ་མར་བྱས་པ་དུང་གི་སྣོད་ཀྱི་ནང་དུ་བཅུག་སྟེ་མིག་སྨན་དུ་བསྟེན་ན་མིག་གསལ་བར་བྱེད་དོ། །མིག་
[329b]
[329b.1]ཐམས་ཅད་ལ་ཕན་པའི་མཆོག་ཡིན་ནོ། །ཞེས་ལུས་འཕགས་ཀྱི་བདག་པོ་ཛ་ན་ཀ་ཞེས་བྱ་བས་བཤད་དོ། །སྦངས་མ་སྲང་གཉིས་རྒྱ་ཤུག་གི་སོལ་བའི་ནང་དུ་བསྲེགས་པ་དེ་ལས་སྲང་གཉིས་ཙམ་བླངས་ལ། རའི་འོ་མ་དང་སྦྲང་རྩི་དང་གསུམ་པོ་རེ་རེའི་ནང་དུ་ཡང་གོང་མ་
[329b.2]ལྟར་ལན་བདུན་བདུན་བྱས་པ་དེ་དང་། དྲུབ་མར་ཅང་དང་། ན་ལེ་ཤམ་དང་། ལིག་བུ་མིག་དང་། པུ་ཙེ་ཤེལ་དང་། རྒྱ་སྤོས་དང་། ལྕུམ་ཚ་དང་། སེང་ཕྲོམ་དང་། ལྡོང་རོས་དང་། ཨ་རུ་ར་དང་། པི་པི་ལིང་དང་། སུག་སྨེལ་དང་། རྒྱ་མཚོའི་ལྦུ་བ་དང་། སྟང་ཟིལ་
[329b.3]དང་། འདི་གཉིས་ཞོ་གཉིས་གཉིས། ཤིང་མངར་སྲང་གཅིག་འདི་རྣམས་སྣོད་ཀྱི་ནང་དུ་བཞུས་ཏེ། དེ་རྣམས་བཏགས་པའི་ཕྱེ་མ་ནི་སྤངས་མའི་མིག་སྨན་ཞེས་བྱ་སྟེ། མིག་ནད་སྤྲིས་གཡོགས་པ་གསུམ་དང་། མིག་མཛེར་དང་། མཚན་མོ་མི་མཐོང་བ་དང་།
[329b.4]མིག་དམར་པོ་ཤར་ཤར་པོ་དང་། དེ་རྣམས་འཇོམས་པར་བྱེད་དེ། ཁྱད་པར་དུ་ཕྱེ་མ་འདིས་ནི་རབ་རིབ་སེལ་ཏེ། ཇི་ལྟར་ཉི་མས་རབ་རིབ་ཀྱི་མུན་པ་སེལ་བ་བཞིན་ནོ། །སྤང་སྤོས་དང་། དྲི་སྣ་གསུམ་དང་། ལྕགས་དང་། གུར་གུམ་དང་། ནཱི་ལ་
[329b.5]ཨུཏྤ་ལ་དང་། ཨ་རུ་ར་དང་། སྤངས་མ་དང་། ཁ་ར་དཀར་པོ་དང་། ནོར་བུ་དོན་ཟད་དང་། དུང་དང་། རྒྱ་མཚོའི་ལྦུ་བ་དང་། ན་ལེ་ཤམ་དང་། སྟང་ཟིལ་དང་། པི་པི་ལིང་དང་། ཤིང་མངར་དང་། འདི་རྣམས་བཏགས་པའི་ཕྱེ་མ་རྒྱུ་སྐར་དང་། ཟླ་
[329b.6]བ་གཅིག་བྱུང་བའི་དུས་སུ་མིག་གཉིས་ལ་བསྐུས་ན། མིག་མཛེར་དང་། རབ་རིབ་དང་། མིག་དམར་པོ་ཤར་ཤར་པོ་འབྱུང་བ་དང་། གཡའ་བ་དང་། སྤྲིས་གཡོགས་པའི་རིམ་པ་གསུམ་ལ་སོགས་པ་ཞི་བར་འདོད་དོ། །ན་ལེ་ཤམ་དང་། འབྲས་བུ་གསུམ་དང་།
[329b.7]དེ་རྣམས་ཆ་རེ་རེ་དང་། པི་པི་ལིང་དང་། རྒྱ་མཚོའི་ལྦུ་བ་ཆ་གཉིས་དང་། སྟང་ཟིལ་ཆ་དགུ་དང་། དེ་རྣམས་ཞིབ་ཏུ་བཏགས་པའི་ཕྱེ་མ་རྒྱུ་སྐར་ནག་པ་ལ་བབ་པའི་ཚེ་མིག་སྨན་དུ་སྦྱར་ན། བད་ཀན་ལ་སོགས་པའི་རབ་རིབ་ཐམས་ཅད་ལས་རྒྱལ་བར་བྱེད་དོ། །
[330a]
[330a.1]ཡང་ན་བ་གཅིན་དང་། བ་དང་ར་ལ་སོགས་པའི་ལྕི་བ་དང་། རིལ་མའི་ཁུ་བ་དང་། རྩབ་མོ་སྐྱུར་པོ་དང་། བུད་མེད་ཀྱི་འོ་མ་དང་། དུག་གི་ལོ་མ་དང་། སྦྲང་རྩི་དང་དེ་རྣམས་རེ་རེ་ལ་ཡང་སྤངས་མ་བསྲེགས་ཏེ། འབར་བ་ལན་དུ་མར་བཅུག་སྟེ་དེའི་འོག་ཏུ་ཕྱེ་མར་
[330a.2]བྱས་ཏེ། སྐྱེས་བུ་གང་གི་མིག་སྨན་དུ་སྦྱར་བར་བྱས་ན་ནམ་མཁའ་ལྡིང་གི་མིག་བཞིན་དུ་རྣོ་བར་འགྱུར་རོ། །ཞ་ཉེ་ཡང་དང་ཡང་དུ་བསྲེགས་ཏེ། འབྲས་བུ་གསུམ་དང་། དུག་དང་། བྲིངྒ་ར་ཛ་དང་། ཤིང་མངར་དང་། དེ་རྣམས་རེ་རེ་བསྐོལ་བའི་ཁུ་བ་སྣ་རེ་དང་། མར་དང་།
[330a.3]རའི་འོ་མ་དང་འདི་རྣམས་རེ་རེ་ལ་ཡང་ལན་བདུན་བདུན་གོང་མ་ལྟར་བླུད་ལ་བསྒོས་ཏེ། དེའི་འོག་ཏུ་ཞ་ཉེ་དེ་མིག་སྨན་གྱི་ཐུར་མར་བྱས་ཏེ་སྨན་གྱིས་བསྒོས་སམ་མ་བསྒོས་པ་ཉི་ཚེས་ཀྱང་རུང་སྟེ། མིག་ཏུ་བྱུགས་ན་རབ་རིབ་དང་། མིག་མཛེར་དང་། རྣག་དང་། ཆུ་སེར་འཛག་པ་དང་།
[330a.4]མིག་འབྱར་བག་དང་། གཡའ་བ་དང་། ཚོར་བ་མེད་པ་དང་། དམར་པོ་ཤར་ཤར་པོར་སྣང་བ་འཇོམས་པར་བྱེད་དོ། །ཞ་ཉེ་བཞུས་པའི་དངས་མ་དང་། དངུལ་ཆུ་ཆ་སྙོམས་ཏེ་དེ་གཉིས་སྤྱི་དང་མཉམ་པའི་ལིག་བུ་མིག་དང་། ག་བུར་ཅུང་ཟད་བཏགས་པའི་ཕྱེ་མ་མིག་སྨན་དུ་སྦྱར་ན་རབ་
[330a.5]རིབ་ཐམས་ཅད་འཇོམས་སོ། །བྱ་རྒོད་ལེགས་པར་ཤི་བའི་མགོ་བོ་ཉི་མ་འཆར་ཀའི་མདོག་ལྟར་དམར་བ་བ་ལང་གི་ལྕི་བས་བསྲེགས་པའི་ཐལ་བ་དང་། ལིག་བུ་མིག་ཆ་སྙོམས་ཏེ་བསྲེགས་པའི་ཕྱེ་མ་འདི་ནི་བྱ་རྒོད་ཀྱི་མགོ་བོའི་ཕྱེ་མ་ཞེས་བྱ་སྟེ། འདིས་མིག་སྨན་གྱི་སྦྱོར་བ་བྱས་ན་བྱ་རྒོད་ཀྱི་
[330a.6]མིག་བཞིན་དུ་རྣོ་བར་འགྱུར་ཏེ། མིག་གི་སྟོབས་བསྐྱེད་དོ། །ཡང་ན་སྦྲུལ་ནག་པོའི་མགོ་བོ་བཅད་དེ་མགོ་བོ་དེའི་ནང་དུ་ལིག་བུ་མིག་མར་དང་བསྲེས་པ་བཅུག་ལ་ཁམ་ཕོར་ཁ་སྦྱར་གྱི་ནང་དུ་དུད་པ་མ་ཤོར་བར་བསྲེགས་ཏེ་ཚོས་པ་དང་། སྤང་སྤོས་དང་། གན་དྷ་བྷ་དྲ་དང་ལྷན་ཅིག་བཏགས་ཏེ་
[330a.7]ཕྱེ་མར་བྱས་པ་དེ་མིག་སྨན་དུ་སྦྱར་ན་མིག་གི་འབྲས་བུ་རྡོལ་བ་ཡང་སྲུང་བར་བྱེད་དོ། །ཡང་ན་བུམ་པ་གང་གི་འོ་མའི་ནང་དུ་སྦྲུལ་ནག་པོ་ཤི་བའི་རོ་དང་། སྡིག་པའི་ཁོག་པ་བཞི་བཅུག་སྟེ་ཞག་ཉི་ཤུ་རྩ་གཅིག་གི་བར་དུ་བཞག་ལ་རུལ་བར་གྱུར་པ་དང་བསྲུབས་ལ། དེ་ལས་མར་བྱུང་བ་དེ་
[330b]
[330b.1]ཁྱིམ་བྱ་ལ་བྱིན་ཏེ། ཁྱིམ་བྱའི་རྟུག་པ་དེས་མིག་སྨན་དུ་བསྐུས་ན་ལོང་བར་གྱུར་པ་ཡང་ངེས་པར་མཐོང་ནུས་པར་འགྱུར་རོ། །ཡང་ན་སྦྲུལ་ནག་པོའི་ཞག་དང་། དུང་དང་། ཀ་ཏ་ཀའི་འབྲས་བུ་དང་། ལིག་བུ་མིག་དང་། འདི་རྣམས་མིག་སྨན་དུ་སྦྱར་ན། ལོང་བར་གྱུར་པ་
[330b.2]ཡང་རིང་པོ་མི་ཐོགས་པར་མཐོང་བ་བསྐྱེད་དོ། །ཡང་ན་ན་ལེ་ཤམ་རྡོག་མ་བཅུ་དང་། དྲུབ་མར་ཅང་ཞོ་གཅིག་དང་སྤངས་མ་སྲང་གཅིག་དང་། ཤིང་མངར་ཞོ་གཉིས་དང་། དེ་རྣམས་འོ་མའི་ནང་དུ་སྦངས་ཤིང་བརླན་པར་བྱ་སྟེ། དུ་བ་མ་ཤོར་བར་བྱས་ནས་བསྲེགས་པའི་
[330b.3]ཕྱེ་མས་མིག་ལ་བསྐུས་ན་གཞན་དང་མི་འདྲ་བར་ཁྱད་པར་དུ་རབ་རིབ་འཇོམས་པའི་མཆོག་ཡིན་ཏེ་ཟླ་མེད་དོ། །ཡང་ན་བ་རུ་རའི་ཚི་གུ་དང་། ན་ལེ་ཤམ་དང་། སྐྱུ་རུ་ར་དང་། སྤངས་མ་དང་། ཤིང་མངར་དང་། དེ་རྣམས་ཆུ་ཐགས་སུ་བྱས་ཏེ། རི་ལུར་བྱས་ལ་གྲིབ་མ་ལ་
[330b.4]བསྐམས་ཏེ་མིག་ཏུ་བསྐུས་ན། རིང་པོ་མི་ཐོགས་པར་རབ་རིབ་འཇོམས་པར་བྱེད་དོ། །ཡང་ན་ན་ལེ་ཤམ་དང་། སྐྱུ་རུ་ར་དང་། རྒྱ་མཚོའི་ལྦུ་བ་དང་། སྤངས་མ་དང་། ལིག་བུ་མིག་དང་། དྲུབ་མར་ཅང་གི་རྡོ་དང་། དེ་རྣམས་གོང་མའི་གོ་རིམས་བཞིན་དུ་ཆ་རེས་བསྐྱེད་དེ།
[330b.5]མིག་སྨན་དུ་སྦྱར་བ་ནི་དྲུབ་མར་ཅང་ཆ་དྲུག་པ་ཞེས་བྱ་སྟེ། དེས་མིག་ཏུ་བསྐུས་ན་རབ་རིབ་དང་། མིག་མཛེར་དང་། རྣག་ཏུ་འཛག་པ་དང་། སྤྲིས་གཡོགས་པ་དང་། གཡའ་བ་རྣམས་འཕྲོག་གོ། །ཡང་ན་ཨནྡ་རྙིལ་ལ་སོགས་པ་རིན་པོ་ཆེ་རྣམས་དང་། དངུལ་དང་། ཤེལ་
[330b.6]དང་། གསེར་དང་། ལིག་བུ་མིག་དང་། ཟངས་མ་དང་། ལྕགས་དང་། དུང་དང་། ཙནྡན་དམར་པོ་དང་། བཙག་དམར་པོ་དང་། དེ་རྣམས་བཏགས་ཏེ་མིག་སྨན་དུ་སྦྱར་ན་མཐོང་བའི་མིག་ནད་ཐམས་ཅད་སེལ་བར་བྱེད་དོ། །ཡང་ན་ཏིལ་མར་དང་། བ་རུ་རའི་མར་དང་། བྲིང་ག་ར་
[330b.7]ཛ་དང་། ཨ་ས་ནའི་རང་གི་ཁུ་བ་དང་། དེ་རྣམས་ལྕགས་སྣོད་དུ་བསྐོལ་ཏེ་སྣར་བླུགས་པ་བྱས་ན་མཐོང་བའི་མིག་གི་ཉམས་སྟོབས་སྐྱེད་པར་བྱེད་དོ། །ཡང་ན་ནད་ཀྱི་ཚུལ་དང་སྦྱར་ཏེ་སྨན་གཅིག་གིས་ནད་ཐམས་ཅད་སོས་པ་ནི་མ་ཡིན་ཏེ། སྣུམ་གྱི་བཏུང་བ་དང་། ཁྲག་འཛག་པ་དང་།
[331a]
[331a.1]བཀྲུ་སྨན་དང་། སྣ་སྨན་དང་། མིག་སྨན་བསྐུ་བ་དང་། མགོ་བོའི་བཀྲུ་སྨན་དང་སྨན་མས་གཏོང་བ་དང་། ཉམས་བརྟ་བར་བྱ་བ་དང་། བྱུགས་པ་དང་། བླུགས་པ་ལ་སོགས་པ་ཅི་རིགས་པར་མིག་ནད་ཅན་ལ་སྦྱར་རོ། །དེ་ལྟར་བསྟན་པ་དེ་ནི་རབ་རིབ་ཀྱི་
[331a.2]གསོ་བ་སྤྱིར་བསྟན་པ་ཡིན་ནོ། །ད་ནི་ནད་གཞི་རེ་རེའི་གསོ་བ་བཤད་ཀྱིས་ཉོན་ཅིག །དེ་ལ་རླུང་ལས་གྱུར་པའི་རབ་རིབ་ལ་ནི་རྩ་བ་བཅུ་པ་བསྐོལ་བའི་ཁུ་བའི་ནང་དུ་མར་དང་། མར་གྱི་བཞི་འགྱུར་གྱི་འོ་མ་དང་། འབྲས་བུ་གསུམ་གྱི་ཕྱེ་མ་བསྐོལ་ལ་མར་ལུས་པ་ལས་བཏུང་
[331a.3]བ་ལ་སོགས་པ་སྣུམ་ཆོས་བྱས་ཏེ། དེའི་འོག་ཏུ་འབྲས་བུ་གསུམ་དང་། རྩ་བ་ལྔ་བསྐོལ་བའི་ཁུ་བའི་ནང་དུ་འོ་མ་དང་། ཨེ་རཎྜའི་མར་དང་བསྲེས་ཏེ་བཀྲུ་སྨན་དུ་སྦྱར་རོ། །ཡང་ན་ཛི་བན་ཏིའི་རྩ་བ་དང་ཡལ་ག་དང་བཅས་པ་སྲང་བརྒྱ་ཆུ་སྲང་ལྔ་བརྒྱ་རྩ་བཅུ་གཉིས་དང་བསྐོལ་ཏེ་
[331a.4]བརྒྱད་ཆ་ལུས་པའི་ནང་དུ་ཏིལ་མར་དང་། འོ་མ་སྲང་སུམ་ཅུ་རྩ་གཉིས་གཉིས་དང་། བ་ལ་རྣམ་གསུམ་དང་། ཛི་བན་ཏི་དང་། ཉེའུ་ཤིང་གཉིས་ཀྱི་རྩ་བ་སྲང་རེ་རེ་དང་། ཤིང་མངར་སྲང་བཞི་དང་། དེ་རྣམས་ལྕགས་སྣོད་ཀྱི་ནང་དུ་བསྐོལ་ཏེ་ལྕགས་སྣོད་དེ་ཉིད་ཀྱི་ནང་དུ་ཟླ་བ་གཅིག་
[331a.5]གི་བར་དུ་བཞག་ལ། དེ་ནས་སྣ་སྨན་དུ་སྦྱར་ན་རླུང་དང་མཁྲིས་པ་ལས་གྱུར་པའི་ནམ་ཚོང་ཡན་ཆད་ཀྱི་ནད་འཇོམས་ཏེ། ཁྱད་པར་དུ་ལྟ་བའི་མིག་ལ་བརྟེན་པའི་ནད་སེལ་ཅིང་། སྐྲ་སྐྱེ་ལ་གཉའ་བ་དང་། ཕྲག་པ་དང་། བཞིན་འཕེལ་ཞིང་རྒྱས་པར་བྱེད་པ་དང་། གཞོན་
[331a.6]ནུར་གྱུར་ཞིང་ལུས་ཤ་མཛེས་པར་བྱེད་དོ། །ཡང་ན་ཨེ་རཎྜ་དཀར་པོའི་རྩ་བ་དང་། བྲི་ཧ་ཏིའི་འབྲས་བུ་དང་། ཐང་ཤིང་དང་། ཤུ་དག་དང་། རྒྱ་སྤོས་དང་། གོ་ཤ་ཡ་དང་། བིལ་བའི་རྩ་བ་དང་། ཏིལ་མར་དང་། འོ་མ་དང་། དེ་རྣམས་ཚུལ་བཞིན་དུ་བསྐོལ་ཏེ་མར་
[331a.7]ལུས་པ་ལས་སྣར་བླུགས་ན་རླུང་དང་བད་ཀན་ལས་གྱུར་པའི་ནམ་ཚོང་ཡན་ཆད་ཀྱི་ནད་ཐམས་ཅད་ལས་རྒྱལ་བར་བྱེད་དོ། །ཡང་ན་སྟག་དང་། ཕག་དང་། བྱ་རྒོད་དང་། སྦྲུལ་དང་། ཁྱིམ་བྱ་དང་། དེ་རྣམས་གང་ཡང་རུང་བའི་ཚིལ་དང་། སྦྲང་རྩི་དང་སྦྱར་ཏེ་མིག་ཏུ་བསྐུས་ལ་དེའི་
[331b]
[331b.1]འོག་ཏུ་ལིག་བུ་མིག་ཤ་ཁུ་དང་འོ་མའི་ནང་དུ་གོང་མའི་ཆོ་ག་བཞིན་དུ་ལན་བདུན་སྨྱུགས་ཏེ་མིག་སྨན་སྦྱར་ན་རབ་རིབ་འཇོམས་པར་བྱེད་པའི་མཆོག་དམ་པ་ཡིན་ནོ། །དེ་ལྟར་བྱས་ཀྱང་རབ་རིབ་ཞིར་མ་འདོད་ན་མིག་བརྟ་བའི་ཆོ་ག་བྱ་སྟེ་ཤུ་ཏི་དང་། རུ་རྟ་དང་། སྤང་སྤོས་དང་།
[331b.2]ར་མཉེ་བ་རྣམ་གཉིས་དང་། ཤིང་མངར་དང་། པྲ་པུཎྜ་རཱི་ཀ་དང་། ཀོ་ཉོན་ཙེ་དང་། པི་པི་ལིང་དང་། ཐང་ཤིང་དང་། མར་དང་། དེའི་བརྒྱད་འགྱུར་གྱི་འོ་མ་དང་། དེ་རྣམས་ལྷན་ཅིག་བསྐོལ་ཏེ་བཏང་ན་མིག་བརྟ་བའི་སྨན་གྱི་མཆོག་ཡིན་ནོ། །རི་དགས་ཨེ་ན་ཡའི་ཚིལ་དང་།
[331b.3]འོ་མ་དང་། ཤིང་མངར་དང་། པུ་ཤེལ་ཙི་དང་། ཙནྡན་དཀར་པོ་རྣམས་ཆམ་ཆོམ་བརྡུངས་ཏེ་བསྐོལ་ལ་ཁ་གཟར་གྱིས་དཀྲུགས་ཏེ། ཚོས་པ་དང་སྙིགས་མ་བོར་ཏེ་ཉམས་བརྟ་བའི་སྨན་དུ་སྦྱར་ན་ཡང་ཕན་ཡོན་དེ་དང་འདྲའོ། །དེ་བཞིན་དུ་སྲོག་ཆགས་ཤ་བེ་ཏ་དང་། རེག་འཇམ་
[331b.4]དང་། གོ་ད་དང་། ཁྱིམ་བྱ་དང་། སྲེག་པ་དང་། རྨ་བྱ་དང་དེ་རྣམས་གང་ཡང་རུང་བའི་ཚིལ་དང་། ཤིང་མངར་དང་། པུ་ཤེལ་ཙེ་དང་། ཙནྡན་དང་། འོ་མ་དང་། ཆོ་ག་གོང་ལྟར་སྦྱར་ན་ཡང་ཉམས་བརྟ་བར་འགྱུར་རོ། །ཡང་ན་སྣུམ་གྱིས་མིག་བརྟ་བ་དང་། སྨན་གྱི་ཕུར་མ་
[331b.5]བསྲེགས་ཤིང་བཙོས་པའི་ཁུ་བའི་ཐིགས་པ་མིག་ཏུ་བླུགས་ན་ཡང་མིག་གསལ་བར་བྱེད་དོ། །འདིར་རླུང་ལས་གྱུར་པའི་སྣ་ཆུ་འཛག་པའི་ཆོ་ག་ཐམས་ཅད་ཀྱང་བྱ་སྟེ། མས་གཏོང་བའི་ནི་རུ་ཧ་དང་། འཇམ་རྩི་ཡང་སྦྱར་རོ། །མཁྲིས་པ་ལས་གྱུར་པའི་རབ་རིབ་ལ་ནི་འཚོ་བྱེད་
[331b.6]སྡེ་བཅུ་དང་། འབྲས་བུ་གསུམ་བཏགས་པའི་ཕྱེ་མ་དང་། མར་བསྐོལ་བ་བླུད་དེ་སྣུམ་གྱིས་ཞེན་པ་དང་། གཏར་ཀས་ཁྲག་དབྱུང་ངོ་། །ཤ་ཁ་ར་དང་། ཤིང་ཉེ་རོང་དང་། སུག་སྨེལ་གྱི་ཕྱེ་མ་སྦྲང་རྩི་དང་སྦྱར་བའི་སྨན་གྱིས་ཁྲུས་བྱའོ། །དེ་བཞིན་དུ་བསིལ་བའི་བླུགས་
[331b.7]པ་དང་། བྱུག་པ་ལ་སོགས་པ་ཡང་སྦྱར་བར་བྱའོ། །ཡང་ན་ཐལ་ཏྲེས་དང་། ཤུག་པ་དང་། པུ་ཤེལ་ཙེ་དང་། མུ་ཏིག་དང་། སེང་ཕྲོམ་དང་། ཙནྡན་དཀར་པོ་རྣམས་བཏགས་ཏེ་རི་ལུར་བྱས་ནས་མིག་ཏུ་བསྐུས་ན་ཡང་མཁྲིས་པ་ལས་གྱུར་པའི་རབ་རིབ་ལ་ཕན་ནོ། །ཡང་ན་
[332a]
[332a.1]གན་དྷ་བྷ་དྲ་དང་། ཨུཏྤ་ལ་དང་། ནཱ་ག་པུཥྤ་དང་། ག་པུར་དང་། ཤིང་མངར་དང་། བཙག་ཡུག་སྣམ་རྣམས་ཀྱི་ཕྱེ་མས་མིག་སྨན་བྱས་ན་ཕན་ནོ། །དངུལ་རྡོ་དང་། སྤངས་མ་ཆ་ལྔ་ལྔ་དང་། ཀར་ཀ་ཏ་སྲིང་གི་དང་། སྐྱུ་རུ་རའི་འབྲས་བུ་ཆ་གསུམ་གསུམ་དང་།
[332a.2]ཤེལ་དང་། ག་པུར་ཆ་རེ་རེ་དེ་རྣམས་ཀྱི་ཕྱེ་མས་བསྐུས་ན་རབ་རིབ་འཇོམས་སོ། །ཞུན་མར་དང་། མར་གྱི་བཞི་འགྱུར་གྱི་འོ་མ་དང་། འཚོ་བྱེད་སྡེ་བཅུ་དང་། ཁ་ར་དཀར་པོ་དང་། ཨུཏྤལ་སྔོན་པོ་ཞོ་གཉིས་གཉིས་བསྐོལ་བའི་མར་གྱིས་སྣར་བླུགས་པའི་སྨན་ཡང་བྱའོ། །བད་
[332a.3]ཀན་ལས་གྱུར་པའི་རབ་རིབ་ཀྱི་སྨན་ལ་ནི་སླེ་ཏྲེས་བསྐོལ་བའི་ཁུ་བའི་ནང་དུ་འབྲས་བུ་གསུམ་དང་། པི་པི་ལིང་དང་། མར་ལྷན་ཅིག་བསྐོལ་བའི་མར་གྱིས་སྣུམ་ཆོས་བྱས་ལ། དེའི་འོག་ཏུ་གཏར་གས་ཁྲག་དབྱུང་ངོ་། །དེ་ནས་དན་ཏི་དང་། དུར་བྱིད་བསྐོལ་བའི་ནང་དུ་གླ་གོར་ཞོ་ཤ་
[332a.4]དང་། ཨ་རུ་ར་དང་། བཅའ་སྒ་དང་། པི་པི་ལིང་གི་ཕྱེ་མས་བཏབ་ལ་བཀྲུ་སྨན་དུ་བླུད་དོ། །རྩ་བ་བཅུ་བསྐོལ་བའི་ནང་དུ་ཧྲི་བེ་ར་དང་། ཐང་ཤིང་དང་། སེར་པོ་རྣམ་གཉིས་དང་། པི་པི་ལིང་དང་། དེ་རྣམས་འོ་མ་དང་། ཏིལ་མར་དང་བསྐོལ་བའི་མར་གྱི་སྣ་སྨན་གཏང་ངོ་། །ཡང་
[332a.5]ན་དུང་དང་། པྲི་ཡང་ཀུ་དང་། ལྡོང་རོས་དང་། ཚ་བ་གསུམ་དང་། འབྲས་བུ་གསུམ་དང་། དེ་རྣམས་ཀྱིས་རི་ལུར་བྱས་པ་ནི་དྲི་མ་མེད་པ་ཞེས་བྱ་བའི་རི་ལུ་ཡིན་ཏེ་མིག་ལ་བསྐུས་ན། མིག་དང་ཞིང་དྲི་མ་མེད་པར་འགྱུར་རོ། །ཡང་ན་ལྕགས་ནག་པོའི་ཕྱེ་མ་དང་། ཚྭ་བ་གསུམ་དང་།
[332a.6]རྒྱམ་ཚ་དང་། འབྲས་བུ་གསུམ་དང་། དེ་རྣམས་རི་ལུར་བྱས་པ་ནི་ཁུ་བྱུག་ཅེས་བྱ་བའི་རི་ལུ་ཡིན་ཏེ། མིག་ལ་བསྐུས་ན་མིག་གསལ་བར་བྱེད་དོ། །ཡང་ན་རི་བོང་དང་། བོང་བུ་དང་། གླང་དང་། སེང་གེ་དང་། རྔ་མོ་དང་། དེ་རྣམས་ཀྱི་སོ་དང་། འཕྲལ་བའི་རུས་པ་དང་། བ་
[332a.7]ལང་དཀར་པོའི་སྤུ་དང་། ན་ལེ་ཤམ་དང་། དུང་དང་། ཙནྡན་དཀར་པོ་དང་། རྒྱ་མཚོའི་ལྦུ་བ་དང་། དེ་རྣམས་བཏགས་པའི་ཕྱེ་མ་བུད་མེད་ཀྱི་ནུ་ཞོ་དང་སྦྱར་བའི་རི་ལུར་བྱས་ཏེ་མིག་ལ་བསྐུས་ན་རབ་རིབ་དང་ལིང་ཏོག་ལས་རྒྱལ་བར་བྱེད་དོ། །ཁྲག་ལས་གྱུར་པའི་རབ་རིབ་ལ་མཁྲིས་
[332b]
[332b.1]པའི་རབ་རིབ་ཀྱི་གསོ་བ་ཇི་ལྟ་བ་བཞིན་དུ་བྱས་ཏེ། ཁྱད་པར་དུ་བཟའ་བ་དང་། སྤྱོད་ལམ་ལ་སོགས་པ་ཤིན་ཏུ་བསིལ་བས་ཁྲག་གི་ཉེས་པ་སེལ་བར་བྱེད་དོ། །རྒུན་འབྲུ་དང་། སྤང་སྤོས་དང་། སེང་ཕྲོམ་དང་། ཤིང་མངར་དང་། དུང་དང་། ཟངས་མ་དང་། ཙནྡན་དང་།
[332b.2]པདྨ་དང་། ཤུ་དག་དང་། ཨུཏྤ་ལ་དང་། དེ་རྣམས་རའི་འོ་མ་དང་བཏགས་ཏེ། རི་ལུས་མིག་སྨན་བྱས་ན་ཁྲག་ལས་གྱུར་པའི་རབ་རིབ་མྱུར་དུ་འཇིག་པར་བྱེད་དོ། །ལྡན་པ་དང་འདུས་པ་ལས་གྱུར་པའི་རབ་རིབ་ལ་ནི་ནད་གཞི་གང་གི་ཤས་ཆེ་ཆུང་དང་སྦྱར་ཏེ། གོང་གི་གསོ་བདག་
[332b.3]ལས་ཇི་ལྟར་མཐུན་པར་སྦྱར་རོ། །དེ་བཞིན་དུ་མ་ཀ་དང་། བྱི་དང་ག་དང་། སྒྲོན་ཤིང་དང་། ན་ལེ་ཤམ་དང་། འོ་མ་དང་། ཏིལ་མར་རྣམས་ལྷན་ཅིག་བསྐོལ་ཏེ། མར་ལུས་པ་ལས་སྣ་སྨན་བཏང་བའམ། ཡང་ན་སྨན་དེ་ཉིད་འོ་མ་དང་སྦྱར་བའི་བྱུག་པས་གདོང་ལ་བསྐུས་ན་
[332b.4]ཡང་ལྡན་པ་དང་འདུས་པའི་རབ་རིབ་འཇོམས་པར་བྱེད་དོ། །ཡང་ན་རྒྱ་སྤོས་དང་། ཨུཏྤལ་སྔོན་པོ་དང་། ཨ་ནན་ཏ་དང་། ཤིང་མངར་དང་། སུ་ནི་ཤ་དང་། དེ་རྣམས་བཏགས་པའི་ཕྱེ་མ་ཏིལ་མར་གྱིས་བསྐོལ་བའི་མར་གྱིས་སྣ་སྨན་དུ་བཏང་བ་དང་། མགོ་ལ་བསྐུ་བ་དང་།
[332b.5]མས་གཏོང་བ་བྱས་ན་རབ་ཏུ་བསྔགས་སོ། །ཡང་ན་པུ་ཤེལ་ཙེ་བསྐོལ་བའི་ཁུ་བའི་ནང་དུ་པི་པི་ལིང་དང་། རྒྱམ་ཚྭ་བཏགས་པའི་ཕྱེ་མས་བཏབ་སྟེ་རས་ལ་བཙགས་པའི་དངས་མའི་ནང་དུ་མར་བཅུག་སྟེ། ཡང་བསྐོལ་ལ་སྐ་བར་གྱུར་པ་དང་བསྒྲངས་པའི་ནང་དུ་སྦྲང་རྩི་དང་སྦྱར་ཏེ་
[332b.6]མིག་ཏུ་བསྐུས་ན་འདུས་པ་ལས་གྱུར་པའི་རབ་རིབ་ཐམས་ཅད་ལ་ཕན་ནོ། །ཡང་ན་འུག་པ་ལ་སོགས་པ་ནུབ་མོ་རྒྱུ་བའི་སེམས་ཅན་གྱི་རུས་པ་རྐང་གང་བ་ལིག་བུ་མིག་དང་བཅས་པ་འབབ་ཆུ་གླང་མོའི་ནང་དུ་ཞག་ཉི་ཤུའམ། ཟླ་བ་གཅིག་གི་བར་དུ་བཞག་སྟེ། དེའི་འོག་ཏུ་ཕྱུང་ལ་བསྐམས་
[332b.7]ཏེ་མེ་ཏོག་ལུག་རུ་བ་དང་། ཤིང་མངར་རྣམས་ཕྱེ་མར་བྱས་ཏེ་མིག་ཏུ་བསྐུས་ན་འདུས་པ་ལས་གྱུར་པའི་རབ་རིབ་སེལ་བའི་མཆོག་ཡིན་ནོ། །སྤྲིས་གཡོགས་པའི་མིག་ནད་རིམ་པ་གསུམ་པ་ལ་ནི་ཁྲག་གཏར་བ་མ་གཏོགས་པ་རིམ་གྱི་གསོ་བ་ཐམས་ཅད་བྱའོ། །གལ་ཏེ་གཏར་ག་བྱེད་ན་ནི་
[333a]
[333a.1]རས་ཀྱིས་མགུལ་བ་བསྡམས་པས་ནད་གཞི་རྣམས་མྱུར་དུ་འདུས་ཏེ། ལོང་བར་གྱུར་པའི་སྐྱོན་ཡོད་པས་གཏར་བའི་དམིགས་ཡོད་ན་ཡང་སྲིན་བུ་པད་པས་ཁྲག་དབྱུང་ངོ་། །བུ་རམ་དང་། རྒྱ་མཚོའི་ལྦུ་བ་དང་། པི་པི་ལིང་དང་། ལིག་བུ་མིག་དང་། ན་ལེ་
[333a.2]ཤམ་དང་། གུར་གུམ་རྣམས་ཀྱི་ཕྱེ་མ་སྦྲང་རྩི་དང་སྦྱར་བས་མིག་ལ་བསྐུས་ན་སྤྲིས་གཡོགས་པའི་ནད་ཡང་བ་སྦྱོང་ངོ་། །སྲེ་མོའི་མིག་ལྟ་བུའི་མིག་ནད་ལ་ནི་མིག་འདུས་པ་ལས་གྱུར་པའི་གསོ་བ་ཐམས་ཅད་འདིར་སྦྱར་རོ། །མར་དང་སྦྲང་རྩི་དང་བ་ལང་གི་ལྕི་ཁུ་གསུམ་གྱི་ནང་
[333a.3]དུ་སྐྱེར་ཁཎྜ་དང་། བཙག་ཡུག་སྣམ་དང་། བལ་བུ་དང་། དེ་རྣམས་ཀྱི་ཕྱེ་མ་དང་སྦྱར་བའི་མིག་སྨན་གྱིས་བསྐུས་ན་མཚན་མོ་མི་མཐོང་བ་ལ་ཕན་ནོ། །ཡང་ན་ཞོའི་ནང་དུ་ན་ལེ་ཤམ་བདར་བས་མིག་ཏུ་བསྐུས་ན་ཡང་མཚན་མོ་མི་མཐོང་བ་ལ་ཕན་པའི་མཆོག་ཡིན་ནོ། །
[333a.4]ཀ་རཉྫ་དང་། ཨུཏྤ་ལ་དང་། བཙག་ཡུག་སྣམ་དང་། པདྨའི་གེ་སར་དང་། དེ་རྣམས་བ་ལང་གི་ལྕི་ཁུའི་ནང་དུ་བཏགས་ཏེ་རི་ལུར་བྱས་པ་ནི་ནད་གཞི་ཐམས་ཅད་ལས་གྱུར་པའི་མིག་ནད་འཇོམས་སོ། །ཡང་ན་ཀོན་ཏི་ཞེས་བྱ་བ་ཧ་རེ་ཎུ་ཀ་དང་། པི་པི་ལིང་དང་། ལིག་བུ་མིག་དང་།
[333a.5]རྒྱམ་ཚ་རྣམས་བཏགས་པའི་ཕྱེ་མ་ར་གཅིན་དང་སྦྱར་བ་རི་ལུར་བྱས་ཏེ་མིག་ལ་བསྐུས་ན་ཕན་ཡོན་དེ་དང་འདྲའོ། །ཡང་ན་ཀ་ལ་ན་དང་། ཚ་བ་གསུམ་དང་། འབྲས་བུ་གསུམ་དང་། ལྡོང་རོས་དང་། བ་བླ་དང་། རྒྱ་མཚོའི་ལྦུ་བ་དང་། དེ་རྣམས་རའི་འོ་མ་དང་བཏགས་ཏེ་རི་ལུར་
[333a.6]བྱས་ཏེ་མིག་ལ་བསྐུས་ན་ཕན་ཡོན་དེ་དང་འདྲའོ། །ཡང་ན་མཆིན་པའི་ནང་དུ་པི་པི་ལིང་བཅུག་སྟེ་མ་ཚིག་པར་བསྲེགས་ལ་ཚོས་པ་དང་ཕྱིར་ཕྱུང་ལ་མཉམ་སྟེ། དེའི་འོག་ཏུ་བཏགས་ལ་སྦྲང་རྩི་དང་སྦྱར་བས་མིག་ལ་བསྐུས་ན་མཚན་མོ་མི་མཐོང་བའི་ནད་སེལ་བའི་མཆོག་ཡིན་ནོ། །
[333a.7]མཚན་མོ་མི་མཐོང་བའི་ནད་པས་བཟའ་བ་ནི་མ་ཧེའི་མཆིན་པ་དང་། མཆེར་པ་ཏིལ་མར་དང་ལྷན་ཅིག་བཟའོ། །ཡང་ན་འཚོ་བྱེད་སྡེ་བཅུའི་འོ་མ་མར་དང་ལྷན་ཅིག་སྦྲུས་ཏེ་བཟའོ། །དེ་བཞིན་དུ་ཨ་ཏི་མུག་ཏ་དང་། ཨེ་རཎྜ་དང་། ལང་ག་ལི་དང་། ཤུ་ཏི་དང་། དེ་རྣམས་ཀྱི་
[333b]
[333b.1]ལོ་མ་མར་དང་བརྔོས་ཏེ་བཟའ་བར་བྱའོ། །ཡང་ན་དྲོ་ན་པུཥྤ་ཞེས་བྱ་བའི་ལོ་མ་མར་དང་བརྔོས་ཏེ་བཟའ་བཏུང་དུ་སྦྱར་ན་ཡང་རབ་ཏུ་བསྔགས་སོ། །མིག་ནད་དམར་པོ་ཤར་ཤར་པོར་འདུག་པ་དང་། མཁྲིས་པས་སྐྱུར་བ་དང་། དྲོ་བ་དང་ཚ་བ་དང་བཅས་པའི་མིག་ནད་ལ་ནི་མར་
[333b.2]རྙིང་པའི་བཏུང་བ་ལ་སོགས་པས་སྣུམ་ཆོས་བྱ་སྟེ། བསིལ་བའི་ནུས་པ་དང་ལྡན་པའི་སྨན་གྱི་ཁྲུས་དང་བྱུག་པ་སྦྱར་རོ། །བ་ལང་གི་ལྕི་བའི་ཁུ་བ་དང་། འོ་མ་དང་། མར་དང་། བཙག་ཡུག་སྣམ་དང་། བལ་བུའི་ལོ་མ་རྣམས་བསྐོལ་ཏེ་མིག་ཏུ་བླུགས་པའམ། ཡང་ན་
[333b.3]བཙག་ཡུག་སྣམ་དང་། བལ་བུའི་ལོ་མའི་མིག་སྨན་དུ་བྱས་པ་ཡང་ཕན་ཡོན་གོང་མ་དང་འདྲའོ། །མེ་ད་རྣམ་གཉིས་དང་། བཙོད་དང་། སེང་ཕྲོམ་དང་། ཨ་ནན་ཏ་དང་། སྐྱེར་པ་དང་། ཤིང་མངར་དང་། འདི་རྣམས་མར་དང་། ཏིལ་མར་དང་། མར་གྱི་བརྒྱད་འགྱུར་གྱི་འོ་མ་
[333b.4]དང་བསྐོལ་བའི་སྨན་མར་གྱི་སྣ་སྨན་བཏང་ན་ཕན་ནོ། དེ་བཞིན་དུ་འོ་མའི་མར་གྱིས་མིག་བརྟ་བར་བྱ་བའི་ཕྱིར་བླུགས་པར་བྱའོ། །དེས་ཀྱང་མ་ཞི་ན་ཁྲག་གཏར་བར་བྱའོ། །རྣམ་པ་གཞན་ཡང་སྣད་པ་དང་། འཇིགས་ཤིང་སྔངས་པ་དང་། མྱ་ངན་དང་། ཁ་ཟས་རྩུབ་
[333b.5]པ་ཟོས་པ་དང་། སྟན་མེད་པར་ཉལ་བ་དང་། དེ་བཞིན་དུ་སྐྱུག་སྨན་དང་། བཀྲུ་སྨན་དང་། སྣར་བླུགས་པ་མ་ལེགས་པ་དང་། མིག་བརྟ་བའི་ཐལ་སྨན་གྱི་ཐིགས་པ་བླུགས་མ་ལེགས་པ་དང་། སྐྱུགས་དྲགས་པ་དང་། བཀྲེས་པ་དང་། སྐོམ་དད་ཆེས་
[333b.6]པ་བརྣགས་པ་དང་། མིག་ནད་ཡལ་བར་བོར་ཏེ་ཡུན་རིངས་པ་དང་། རྣམ་པ་དེ་དག་གིས་ཀྱང་རབ་རིབ་བཞིན་དུ་མཐོང་བའི་ནད་སྐྱེད་པར་བཤད་དེ། དེ་ལ་ནི་རླུང་ལ་སོགས་པའི་ནད་གཞི་གང་ཡིན་པ་བརྟགས་ཏེ་རང་རང་དང་མཐུན་པའི་སྨན་སྦྱར་རོ། །གཞན་ཡང་ཉི་མའི་ཟེར་དང་།
[333b.7]མིའི་འོད་དང་། གློག་ལ་སོགས་པ་འཚེར་བ་ལ་རྣམ་པར་བལྟས་པས་མིག་ཉམས་པ་ལ་ནི་བསིལ་བའི་སྨན་དང་སྦྱར་བའི་མར་རམ། གསེར་ཞུན་མར་དང་སྦྱར་བས་སྨན་དུ་སྦྱར་རོ། །དེ་ལྟ་བས་ན་སྐྱེས་བུ་རྣམས་ཀྱིས་མིག་ནི་དུས་ཐམས་ཅད་དུ་བསྲུང་བར་བྱ་སྟེ། ཇི་སྲིད་དུ་འཚོ་
[334a]
[334a.1]བ་གནས་པར་འདོད་པས་མཐུ་གཏུགས་ཏེ་གསོ་བར་བྱའོ། །ཅིའི་ཕྱིར་ཞེ་ན། གང་དག་མིག་དང་བྲལ་ན་མུན་པར་འགྱུར་ཏེ་ཉིན་མོ་དང་མཚན་མོ་ཡང་བྱེ་བྲག་མེད་ཅིང་ནོར་མང་པོ་འདོད་ན་ཡང་དོན་མེད་པ་ཡིན་ནོ། །དེ་ལ་དུས་རྟག་ཏུ་བསྟེན་པར་བྱ་བ་ནི་འབྲས་
[334a.2]བུ་གསུམ་དང་། དུས་དུས་སུ་ཁྲག་དབྱུང་བར་བྱ་བ་དང་། སློན་ཁྲུས་ཀྱིས་ལུས་སྦྱང་བ་དང་། སེམས་དགའ་བར་བྱ་བ་དང་། ཡིད་བདེ་བར་བྱ་བ་དང་། མིག་སྨན་གྱི་སྦྱོར་བ་བསྟེན་པ་དང་། ཏིལ་མར་དང་མར་ལ་སོགས་པའི་སྣ་སྨན་བསྟེན་པ་དང་། བྱ་ཤའི་བྱ་ན་བསྟེན་པ་དང་
[334a.3]རྐང་པ་གཉིས་བཀྲུ་ཞིང་བྱི་དོར་བྱས་ཏེ་བཀྲུ་བ་དང་། དྲིལ་བ་ལ་སོགས་པའི་རིམ་གྲོ་བྱ་བ་དང་། རྟག་ཏུ་ཞུན་མར་བཏུང་བ་དང་། ཁ་ཟས་གནོད་པ་རྣམས་སྤང་བ་དང་། ཤིན་ཏུ་ཕྲ་བ་དང་། གཡོ་བ་དང་། འཚེར་བའི་དངོས་པོ་ལ་མི་ལྟ་བ་དང་། དེ་དག་ནི་སྐྱེས་བུ་རྣམས་ཀྱིས་མིག་
[334a.4]བསྲུང་བར་དྲང་སྲོང་ཆེན་པོ་མུ་ཁྱུད་ཀྱིས་བཤད་དོ། །རབ་རིབ་ཀྱི་ནད་གསོ་བའི་ལེའུ་སྟེ་བཅུ་གསུམ་པ་རྫོགས་སོ།། །།དེ་ནས་མིག་གི་མཐོང་བ་ཉམས་པ་གསོ་བའི་དཔྱད་ཀྱི་ལེའུ་བཤད་པར་བྱ་སྟེ། དེ་ལ་བད་ཀན་གྱིས་མཐོང་བ་ཉམས་པ་ལེགས་པར་
[334a.5]སྨིན་པ་ལ་ནི་དབྱེ་བའི་དཔྱད་བྱའོ། །དེ་ཡང་སྨིན་པའི་མཚན་མ་ནི་ཤིན་ཏུ་དཀའ་བ་དེ། མཆིལ་མའི་ཐལ་བ་ལྟ་བུ་ཡིན་ཡང་དེ་ལ་ཐུར་མས་དབྱེའོ། །དེ་ལ་མ་སྨིན་པའི་མཚན་མ་ནི། ཞོ་ག་ཆུ་ལྟར་དང་ཞིང་སླ་བར་འདུག་པ་སྟེ། ཤིན་ཏུ་སྲབ་པའོ། །དེ་ལ་ནི་ཐུར་མས་ཕྱེ་ཡང་
[334a.6]སླར་སྟེང་དུ་འགྲོ་སྟེ་ཚོར་བ་དྲག་པོ་ཡང་མྱོང་ལ་མཐོང་བ་ཡང་སླར་འགེབས་པར་བྱེད་དོ། །དེ་ལྟ་བས་ན་དཔྱད་བྱེད་པར་འདོད་པས་ཐོག་མར་སྨིན་པར་བྱ་བའི་ཆོ་ག་བྱ་སྟེ། ཁ་ཟས་དང་སྨན་གྱིས་བད་ཀན་སྐྱེད་པར་བྱེད་དོ། །རླུང་དང་མཁྲིས་པའི་ཤས་ཀྱིས་འདྲེས་ན་ནི་གསོ་བར་དཀའ་
[334a.7]སྟེ། ཡུན་རིང་བར་འགྱུར་བས་རླུང་མཁྲིས་ནི་བསལ་བར་བྱའོ། །དེ་ལ་བད་ཀན་འབའ་ཞིག་གིས་ལོང་བའི་མཚན་མ་ནི་བད་ཀན་གྱིས་ལོང་བ་དེ་ལ་རླུང་དང་མཁྲིས་པས་ཟིལ་གྱིས་ནོན་ན་ནི་མདོག་སྔོན་པོར་འགྱུར་ཏེ། དེ་བས་ན་རླུང་དང་མཁྲིས་པ་བསལ་བའི་ཆོ་ག་མང་དུ་བྱ་སྟེ།
[334b]
[334b.1]སྔོན་པོ་ལས་དཀར་པོར་གྱུར་པ་ན་གཟོད་དབྱེའོ། །དེ་ལ་དབྱེར་མི་རུང་བ་དྲུག་ཡོད་དེ། འཁོར་བ་ལྟ་བུ་དང་། ཁ་ར་ལྟ་བུ་དང་། གྲ་མ་ལྟ་བུ་དང་། གྲ་མ་མེས་བཅད་པ་ལྟ་བུ་དང་། ཟླ་བ་ལྟ་བུ་དང་། གདུགས་ལྟ་བུ་དང་དྲུག་གོ། །དེ་ལ་འཁོར་བ་ཞེས་བྱ་བ་ནི་མིག་གི་འབྲས་བུ་འཁོར་
[334b.2]བའི་ཚུལ་དུ་རྟག་ཏུ་འགུལ་བ་སྟེ། ཆུ་འཁྱིལ་བ་ལྟ་བུའོ། །མདོག་ནི་དཀར་ལ་ཅུང་ཟད་དམར་རོ། །ཁ་ར་ལྟ་བུ་ཞེས་བྱ་བ་ནི་དཔེར་ན་ཤ་ཁ་རའི་མདོག་ལྟ་བུའམ། ཤིང་ཨརྒའི་ལོ་མ་ལ་ལན་ཚྭས་བཏབ་པ་ལྟ་བུ་སྟེ། དཀར་ལ་ཅུང་ཟད་དམར་ཞིང་དེ་ཉིད་ཀྱང་ཤིན་ཏུ་བསྐ་བར་འདུག་
[334b.3]པའོ། །གྲ་མ་ལྟ་བུ་ཞེས་བྱ་བ་ནི་མིག་གི་འབྲས་བུ་ལ་འབྲས་ཀྱི་གྲ་མ་ལྟ་བུའི་རི་མོ་སྣང་བའོ། །གྲ་མ་མེས་བཅད་པ་ལྟ་བུ་ནི་དཔེར་ན། འབྲས་ཀྱི་གྲ་མ་མེས་བཅད་ན་དུམ་བུར་སྣང་ཞིང་ཆད་འཕྲོ་གནག་པ་བཞིན་དུ་མིག་གི་འབྲས་བུ་ལ་ཡང་དེ་ལྟར་སྣང་ཞིང་དེ་ཡང་ནད་དང་བཅས་པའོ། །
[334b.4]ཟླ་བ་ལྟ་བུ་ཞེས་བྱ་བ་ནི་དབྱིབས་ཟླ་བ་གང་བ་ལྟར་འདུག་ལ་དེ་ཡང་ཁ་རའི་མདོག་ལྟ་བུའོ། །གདུགས་ལྟ་བུ་ནི་གདུགས་ལྟར་ཟླུམ་ཞིང་ཁ་དོག་སྣ་ཚོགས་སུ་འདུག་པ་སྟེ། དྲུག་པོ་སྟེ་དེ་དག་གང་ཡང་རུང་བ་སྣང་ན་ནི་ལི་ཀ་ཞེས་བྱ་སྟེ་གསོར་མི་རུང་ངོ་། །གཞན་ཡང་སྐྱོན་འདི་དག་
[334b.5]ཡོད་ན་ཡང་དབྱེར་མི་རུང་སྟེ། གོང་དུ་མིག་གི་གཏར་ག་བསྟན་པའི་སྐབས་སུ་སྐོམ་པ་ལ་སོགས་པ་བསྲུང་བ་བཞིན་དུ་འདིར་དབྱེ་བའི་དུས་སུ་ཡང་བསྲུང་བར་འབྱུང་སྟེ། དེ་ཡང་སྐོམ་དད་ཆེ་བ་དང་། ཆམ་པས་བཏབ་པ་དང་། ལུད་པ་ལུ་བ་དང་། དེ་བཞིན་དུ་དཔྱད་
[334b.6]ཀྱིས་འཇིགས་པ་དང་། རྟག་ཏུ་སྐྱུག་པ་དང་། མགོ་བོ་དང་། རྣ་བ་དང་། མིག་འདི་རྣམས་མི་བདེ་ན་དཔྱད་མི་བྱའོ། །དེ་ནས་མི་དབྱེ་བའི་དུས་ཚིགས་བསྟན་པ་ནི་དཔྱིད་ཟླ་འབྲིང་པོ་དང་། དབྱར་ཟླ་ཐ་ཆུངས་དང་། སྟོན་ཟླ་ཐ་ཆུངས་ལ་བབ་པའི་ཚེ་སྣུམ་གྱི་ཆོ་ག་དང་།
[334b.7]དུགས་ཀྱི་ཆོ་ག་བྱས་ནས་སློན་ཁྲུས་ཀྱིས་ལུས་དག་པར་བྱའོ། །དེ་ནས་ཉམས་བརྟས་ནས་དེ་དང་མཐུན་པའི་ཟས་དང་སྐོམ་སྦྱིན་ནོ། །དེའི་འོག་ཏུ་ས་ཕྱོགས་གསལ་བར་ནད་པ་བཞག་ལ་སྔ་དྲོ་དང་པོར་དབྱེ་བར་བྱ་སྟེ། སྨན་པ་ཁྲི་པུས་མོ་ཙམ་མཐོ་བའི་སྟེང་དུ་
[335a]
[335a.1]འདུག་ནས། ནད་པ་སྨན་པའི་མདུན་དྲང་པོར་ཁ་ཤར་ཕྱོགས་སུ་བསྟན་ཏེ། སྟན་འཇམ་པ་གང་ཡང་རུང་བ་ལ་བཞག་ནས་རྐང་པ་གཉིས་བརྐྱང་དུ་གཞུག །ནད་པའི་རྒྱབ་ཏུ་ནད་གཡོག་བཞག་ནས་ནད་གཡོག་གི་ལག་པ་གཉིས་ཀྱིས་ནད་པའི་མགོ་བོ་དམ་དུ་བཟུང་
[335a.2]སྟེ། མི་འགྱུར་བར་བྱས་ནས་བག་ཡངས་སུ་གཞག་གོ། །དེ་ནས་ནད་པའི་མིག་སྨན་པའི་ཁའི་དབུགས་དྲོན་པོས་དུགས་བྱས་ལ། སྨན་པའི་མཐེ་བོས་ནད་པའི་མིག་དལ་གྱིས་མཉེས་ནས་སྨན་པའི་མིག་ལ་དྲང་པོར་འབྲུ་ཚུགས་སུ་བལྟར་བཅུག་ལ། མིག་གི་ནད་ཀྱི་སྤྲི་འམ་དྲི་
[335a.3]མ་སྔ་མའི་སོ་ལས་ཅུང་ཞིག་གཡོ་བར་སྣང་ན་ནད་པ་རང་གི་མིག་སྣ་གོང་དུ་བལྟར་བཅུག་ལ། ནད་གཡོག་གིས་མགོ་བོ་དམ་དུ་བཟུང་ལ་མི་འགུལ་བར་བྱས་ནས་ཐུར་མ་གཟུགས་པའི་ཚད་ནི་ནད་པའི་མིག་རང་གི་སྣ་གོང་དུ་བལྟས་པ་ལས་ནག་པོའི་མཐའ་ནས་བཟུང་སྟེ། དཀར་པོ་
[335a.4]འབའ་ཞིག་ལ་ཆ་བཞིར་བགོས་ནས་ཆ་གསུམ་ནི་ནག་པོའི་ཕྱོགས་སུ་ལུས། ཆ་གཅིག་མུར་འགྲམ་ལོགས་སུ་ལུས་པའི་མཚམས་ན་ལྷའི་བུག་པ་ཞེས་བྱ་བ་ཡོད་དེ། དེར་མིག་གི་ཐུར་མ་མཛུབ་མོ་དང་། གུང་མོ་དང་། མཐེ་བོ་གསུམ་གྱིས་དམ་དུ་བཟུང་ལ། ལྟག་འོག་ཏུ་
[335a.5]ཡ་ཡོར་མ་གྱུར་པར་འཕྲེད་དྲང་པོར་གཟུགས་ཏེ། མིག་གི་འབྲས་བུར་ཕྱིན་པར་བཏང་། ནད་པའི་མིག་གཡོན་པ་ནི་སྨན་པའི་ལག་པ་གཡས་པས་དབུག །མིག་གཡས་པ་ནི་སྨན་པའི་ལག་པ་གཡོན་པས་དབུག་སྟེ། དེ་ལྟར་ནང་དུ་ཐུར་མས་ཕུག་པ་ལས་ལེགས་པའི་མཚན་མ་
[335a.6]ནི་བུས་ཞེས་བྱ་བའི་སྒྲ་འབྱུང་ལ། དེ་ཡང་ནད་མེད་ཅིང་ཆུའི་ཐིགས་པ་འགའ་ཡང་འབྱུང་བའི་རིགས་སོ། །དེ་ནས་ནད་པ་སྐྱེད་དོ། །ཅི་སྟེ་མིག་ལས་མཆི་མ་འོང་ངམ་དམར་པོར་གྱུར་ན་འོ་མ་ཅུང་ཞིག་བླུགས་སོ། །ཐུར་མའི་རྩེ་མོ་ཡང་ཧ་ཅང་མི་རྣོ་བས་ནང་དུ་དལ་བུས་རིམ་
[335a.7]གྱིས་ཕུལ་ཏེ། རྩེ་མོ་དབུས་སུ་ཕྱིན་ནས་སྣ་གོང་ཕྱོགས་སུ་ཕྱི་བ་ལྟར་བྱས་ལ་འོག་ཕྱོགས་སུ་གཏང་ངོ་། །ཅི་སྟེ་འོག་ཏུ་བཏང་ཡང་ཕྱིར་ལོག་པ་ལྟར་བྱེད་ན་ནད་པ་རང་གིས་སྣ་བུད་པ་ལྟར་བྱས་ན་འོག་ཏུ་འགྲོ་བའི་རིགས་སོ། །གལ་ཏེ་ཐུར་མས་ཕྱིས་ཀྱང་མི་འགུལ་ན་ཡང་སྔ་མ་བཞིན་དུ་
[335b]
[335b.1]དབུགས་དྲོན་པོས་མིག་ཏུ་དུགས་བྱས་ལ་ཐུར་མས་ཕྱིས་ན་འོག་ཏུ་འགྱུར་རོ། །དེ་ནས་གཟུགས་ཀྱི་རྣམ་པ་ཕྲ་རགས་མཐོང་ན་ཐུར་མ་རིམ་གྱིས་ཕྱིར་དབྱུང་ངོ་། །དེ་ནས་རས་བལ་དྲོན་པོ་སྣུམ་ཅན་གྱིས་དུགས་བྱས་ལ་རས་ཀྱིས་དཀྲིས་ནས་གན་རྐྱལ་དུ་བསྙལ་ལ་གཞག་གོ། །མིག་ཡ་གཅིག་ལ་
[335b.2]ཆོ་ག་ཇི་ལྟར་བསྟན་པ་བཞིན་དུ་ཡ་གཅིག་ལ་ཡང་དེ་ལྟར་ཤེས་པར་བྱའོ། །དེ་ནས་རླུང་མེད་པའི་གནས་སུ་མགོ་བོ་དང་རྐང་པ་མར་གྱིས་བསྐུས་ཏེ་གཞག་ལ། ཕན་པའི་ཟས་དང་སྤྱོད་ལམ་ཞག་བདུན་གྱི་བར་དུ་བསྟེན་པར་བྱའོ། །དུས་དེའི་བར་དུ་བསྲུང་བར་བྱ་བ་ནི་ཆམ་པ་དང་། ལུད་པ་དང་།
[335b.3]སྒྲེགས་པ་དང་། མཆིལ་མ་འདི་རྣམས་ཅི་ནས་ཀྱང་དགག། ཆམ་པ་ལ་སོགས་པ་དང་། བད་ཀན་སྐྱེ་བར་བྱེད་པའི་རྒྱུ་ནི་ཆུ་ཡིན་པས་ཆུ་བཏུང་བ་སྤང་བར་བྱའོ། །ཡང་ཆེར་སྐོམ་ན་ཆུ་བསྐོལ་བ་སྒ་བཏབ་པ་ཅུང་ཟད་བཏུང་། གཞན་ཡང་ཁ་ཕུབ་ཏུ་འདུག་པ་དང་། ཁྲུས་དང་སོ་ཤིང་བཅའ་བ་
[335b.4]ཡང་མི་བྱ། ཅི་ནས་ཀྱང་བད་ཀན་སྐྱེ་བར་བྱེད་པའི་ཁ་ཟས་དང་། བཏུང་བ་ཐམས་ཅད་སྤང་ངོ་། །ནད་པ་དེས་སྦྲིད་པ་དང་ལམ་དུ་འགྲོ་བར་མི་བྱ། ཁ་ཟས་དང་བཏུང་བ་དྲོད་བག་བསྟེན་ཅིང་གྲང་བ་དང་། བསིལ་བག་སྤང་། ནད་པ་ཉམས་སྟོབས་དང་ལྡན་པ་ཞིག་ན་སྨྱུང་བར་བྱ།
[335b.5]གལ་ཏེ་མི་བདེ་བ་འམ་རླུང་ལངས་པ་ལྟར་བྱེད་ན་བ་མར་དྲོན་པོས་བསྐུ། ཁ་ཟས་ནི་ནས་ཀྱི་ཟན་ཅུང་ཟད་སླ་བ་ཚ་བ་གསུམ་དང་། སྐྱུ་རུ་ར་བཏབ་པ་སྦྱིན། ཡང་ན་གོང་མ་བས་སླ་བ་འདག་གུ་ཙམ་གྱི་ཟན་ལྷག་མའི་སྤོད་དང་སྣུམ་དང་བཅས་པར་བྱས་ལ་སྦྱིན་ནོ། །མིག་ཕྱི་ནས་ཞག་གསུམ་
[335b.6]ལོན་པ་དང་། བཅིངས་པ་བཀྲོལ་ཏེ། རླུང་ལ་ཕན་པའི་སྨན་སྣ་ཚོགས་བསྐོལ་བའི་སྨན་གྱི་ཁུ་བ་མིག་ཏུ་བླུགས་སོ། །དེ་བཞིན་དུ་ཞག་བདུན་པའི་བར་དུ་ཡང་ཐབས་དེ་ལྟར་བྱ། གལ་ཏེ་གསུམ་པ་ནས་དྲུག་པའི་བར་དུ་སྨན་མ་འབྱོར་ན་ཡང་བདུན་པ་ལ་མི་བླུགས་སུ་མི་རུང་ངོ་། །ཇི་སྲིད་
[335b.7]དུ་མིག་གི་མཐོང་བ་བརྟན་པོར་མ་གྱུར་གྱི་བར་དུ་ཆོ་ག་བསྲུང་བ་ལ་འབད་པར་བྱ་སྟེ། དེ་ཡང་གཟུགས་ཤིན་ཏུ་ཕྲ་བ་དང་། སྲོག་ཆགས་ཕྲ་བ་དང་། ཤིན་ཏུ་འཚེར་བ་གང་ཡང་རུང་བ་ལ་མི་ལྟ། མིག་གིས་ལྟ་བ་ཡང་རིམ་གྱིས་དལ་བུས་ལྟའི། ཅིག་ཆར་བབ་ཆོལ་དུ་མི་ལྟ།
[336a]
[336a.1]གལ་ཏེ་མིག་སྐྲངས་ནས་དམར་པོར་གྱུར་ཏམ། མིག་ནད་གཞན་གང་ཡང་རུང་བ་བྱུང་ན། དེ་དང་པོར་ཐུར་མས་ཕུག་ཉེས་པ་འམ། ཁ་ཟས་མི་མཐུན་པ་ཅི་ལས་གྱུར་པ་བརྟགས་ནས་སྐྲངས་པ་ལ་སོགས་པ་སོ་སོའི་ནད་དང་མཐུན་པའི་སྨན་གྱིས་གསོའོ། །དེ་ཡང་
[336a.2]མིག་སྐྲངས་པ་ལ་སོགས་པའི་ནད་གང་ཡང་རུང་བ་བྱུང་ན་རྩྭ་དཱུར་བ་དང་། ནས་སོ་བ་དང་། བཙག་ཡུག་སྣམ་དང་། ཐལ་ཏྲེས་དང་། འདི་རྣམས་ཆ་སྙོམས་ནས་མར་དང་ལྡན་པར་བྱས་ཏེ་ཆུ་འཐགས་སུ་བྱས་ནས་བསྐུས་ན་མིག་གི་སྐྱོན་སེལ་ལོ། །ཡང་ན་ཡུངས་ཀར་དང་།
[336a.3]ཏིལ་གཉིས་ཀྱི་ཕྱེ་མ་ཁ་ལུང་གི་ཁུ་བ་དང་སྦྱར་ཏེ་བསྐུས་ན་ཡང་སེལ་ཏོ། །ཡང་ན་པ་ཡ་སྱ་དང་། ཐལ་ཏྲེས་ཀྱི་ལོ་མ་དང་། བཙོད་དང་། ཤིང་མངར་རྣམས་ཕྱེ་མར་བྱས་ལ་རའི་འོ་མ་དང་སྦྱར་བའི་འདག་གུ་དྲོ་འཇམ་ཙམ་གྱིས་བསྐུས་ན་ཡང་མིག་བདེ་བར་བྱེད་པའི་མཆོག་
[336a.4]ཡིན་ནོ། །ཡང་ན་སེང་ཕྲོམ་དང་། རྒྱམ་ཚ་དང་། རྒུན་འབྲུ་དང་། ཤིང་མངར་དང་། འདི་རྣམས་རའི་འོ་མ་དང་སྦྱར་བ་བསྐོལ་བའི་ཁུ་བས་མིག་ཏུ་བླུགས་ན་མིག་ནད་འཇོམས་པར་བྱེད་དོ། །ཡང་ན་ཤིང་མངར་དང་། ཨུཏྤ་ལ་དང་། རུ་རྟ་འདི་རྣམས་རའི་འོ་མ་དང་
[336a.5]བསྐོལ་བའི་ཁུ་བ་འམ། ཡང་ན་རྒུན་འབྲུ་དང་། རྒྱ་སྐྱེགས་གཉིས་རའི་འོ་མ་དང་བསྐོལ་བའི་ཁུ་བ་བླུགས་ན་ཡང་མིག་ནད་སེལ་ཏོ། །ཡང་ན་རླུང་ལ་ཕན་པའི་སྨན་ཇི་སྙེད་པ་ཆམ་ཆོམ་བརྡུངས་ཏེ། རའི་འོ་མ་དང་། འོ་མའི་བཞི་འགྱུར་གྱི་ཆུ་དང་བསྐོལ་ཏེ། ཆུ་དུ། འོ་
[336a.6]མ་ལུས་པ་དང་ཕྱིར་ཕྱུང་སྟེ་བཙགས་པའི་ཁུ་བའི་ནང་དུ་འོ་མ་ཇི་ཙམ་པའི་མར་དང་། ཤུག་པའི་སྡེ་ཚན་གྱི་སྨན་བཏགས་ལ་ཕྱེ་མར་བྱས་ལ། མར་དང་། འོ་མ་དང་། ལྷན་ཅིག་བསྐོལ་ནས་འོ་མ་ནི་དུ། མར་ལུས་པ་དང་དེས་བསྐུ་བ་ལ་སོགས་པ་བྱས་ན་ནི་མིག་ནད་
[336a.7]ཀུན་ལ་ཕན་ཏེ། ལྷག་པར་ཡང་ཁྲག་ལས་གྱུར་པ་སྦྱོང་ངོ་། །དེ་ལྟར་བྱས་ཀྱང་ཁྲག་ནད་མ་ཞི་ན་ནད་པ་དེ་ཡང་སྣུམ་ཆོས་བྱ་ཞིང་དུགས་བྱས་ལ་མིག་རྩ་ལ་གཏར་ག་བྱའོ། །ཇི་ལྟར་གཏར་བ་ནི་མིག་ནད་ཀྱི་གཏར་གའི་སྐབས་ལ་བལྟའོ། །དེ་ཇི་ལྟར་བྱ་བ་
[336b]
[336b.1]ལེགས་པར་གྱུར་ན་ཚ་བ་དང་འཇམ་པའི་སྨན་བཏང་སྟེ། ཨརྒའི་རྩ་བ་དང་། ན་ལེ་ཤམ་དང་། བ་བླ་དང་། སྐྱེར་ཁཎྜ་རྣམས་ཀྱི་ཕྱེ་མ་བུ་རམ་དང་རི་ལུར་བྱས་ལ་ཆར་པའི་ཆུ་དང་བདར་བས་མིག་ལ་བསྐུས་ན་ཡང་ཕན་ནོ། །ཡང་ན་ཛཱ་ཏི་དང་། ཤྲི་ཤ་དང་། ད་བ་དང་། ཀར་
[336b.2]ཀ་ཏ་ཤྲིང་གི་རྣམས་ཀྱི་མེ་ཏོག་དང་། བཻ་ཌཱུརྱ་དང་། མུ་ཏིག་གི་འབྲས་བུ་དང་འདི་རྣམས་བཏགས་ཏེ་རའི་འོ་མ་དང་འདག་གུར་བྱ་སྟེ། ཟངས་མའི་སྣོད་ལ་བསྐུས་ནས་བསྐམས་པ་དང་། ཕྱིར་བཀོག་ལ་ཡང་བཏགས་ཏེ། ཡང་རའི་འོ་མ་དང་ལྡེ་གུར་བྱས་ནས་ཡང་བསྐུ་བ་
[336b.3]དང་། སྐམ་པ་ཞག་བདུན་གྱི་བར་དུ་ཐབས་དེ་ལྟར་བྱས་ནས་ཐབས་ལ་རི་ལུར་བྱས་ནས་གྲིབ་སྐམས་སུ་བྱས་ཏེ། འོ་མ་དང་སྦྱར་བས་མིག་ལ་བསྐུས་ན་མཐོང་བ་དང་གསལ་བ་དང་སྟོབས་སྐྱེ་བར་འགྱུར་རོ། །ཡང་ན་ལིག་བུ་མིག་དང་། བྱུ་རུ་དང་། ལྡོང་རོས་དང་། རྒྱ་མཚོའི་
[336b.4]ལྦུ་བ་དང་། ན་ལེ་ཤམ་རྣམས་ཀྱི་ཕྱེ་མ་རའི་འོ་མ་དང་འདག་གུར་བྱས་ལ། ཟངས་མའི་སྣོད་ལ་གོང་མ་ལྟར་བྱས་པས་མིག་ལ་བསྐུས་ན་ཡང་ཕན་ཡོན་གོང་མ་དང་འདྲ་བར་ཤེས་པར་བྱའོ། །མིག་གི་མཐོང་བ་ཉམས་པ་གསོ་བར་བྱ་བའི་ལེའུ་སྟེ་བཅུ་བཞི་པ་རྫོགས་སོ།། །།
[336b.5]དེ་ནས་མིག་ནད་སྣ་ཚོགས་ཐམས་ཅད་ཀྱི་ནད་གཞི་བརྟག་པའི་ལེའུ་བཤད་པར་བྱ་སྟེ། དེ་ལ་རླུང་ལས་གྱུར་པའི་མིག་ནད་ཀྱི་མཚན་མ་ནི་མཆི་མ་མང་དུ་འཛག་པ་དང་། སྣ་བུས་པ་ལྟར་རྒྱས་ཤིང་གང་བ་དང་། སྐྲང་བའི་ཤས་ཆུང་བ་དང་། མུར་འགྲམ་དང་། འཕྲལ་བ་དང་།
[336b.6]སྨིན་མ་དང་། མིག་དང་། ཁ་དང་འདི་རྣམས་སུ་ཟུག་ཅིང་འཕར་བ་དང་། རྔུ་མ་སྐམ་པོ་ཅུང་ཟད་ཡོད་པ་དང་། མཆི་མ་གྲང་མོ་སླ་བ་འབྱུང་བ་དང་། ལྡང་དུབ་ཏུ་ན་བ་དང་། མིག་འབྱེད་འཛུམས་དཀའ་བ་དང་། མིག་གི་ནང་དུ་སྲིན་བུ་རྒྱུ་བ་སྙམ་བྱེད་པ་དང་། མིག་གང་ཞིང་བུས་པ་
[336b.7]སྙམ་བྱེད་པ་དང་། གྲ་མས་གང་བ་སྙམ་བྱེད་པ་དང་། སྣུམ་གྱིས་བསྐུས་པས་དྲོ་བས་ཞི་བར་གྱུར་པ་དེ་ནི་རླུང་ལས་གྱུར་པ་ཡིན་ནོ། །རླུང་ནད་དེ་ཡལ་བར་བོར་ཏེ་གསོ་བ་མ་བྱས་པ་ལ་ནི་མིག་ནད་གདུང་བ་ཞེས་བྱ་བར་འགྱུར་ཏེ། དེའི་མཚན་མ་ནི་རྣ་བ་གཉིས་ལས་སྒྲ་འབྱུང་བ་དང་། མགོ་འཁོར་
[337a]
[337a.1]བ་དང་། འཕྲལ་བ་དང་། མིག་དང་། སྨིན་མ་ལ་སོགས་པར་གཙུབ་ཤིང་གིས་གཙུབས་པ་སྙམ་སེམས་པ་ཡིན་ནོ། །དེ་ཡང་བག་མེད་པ་ལས་ཡལ་བར་བོར་ན་ནི་མིག་ཏུ་གདུང་བ་འཇོམས་བྱེད་ཅེས་བྱ་བར་འགྱུར་ཏེ། དེའི་རྟགས་ནི་ནད་ཀྱི་རྣམ་པ་སྣ་ཚོགས་
[337a.2]འབྱུང་ཞིང་མཐོང་བའི་མིག་ལ་རྨ་འབྱུང་ཞིང་ཉམས་པར་འགྱུར་བ་ཡིན་ནོ། །ཡང་ན་མིག་གི་ནང་དུ་ནད་འཁྲུགས་ཏེ། མིག་སྟེང་གི་གནད་ཀྱི་རྩ་དང་མུར་འགྲམ་མམ། དེ་ལས་གཞན་དུ་ཡང་རུང་སྟེ། རླུང་ཞུགས་ནས་མི་བཟད་པར་ན་བ་དང་། དབྱར་བག་ཏུ་འདུག་པ་དང་། སྐྲང་བ་
[337a.3]དང་། མིག་འགྱུར་བ་དང་། ཞུམ་པ་དང་། མཆི་མ་འཛག་པ་དེ་ནི་རླུང་ནད་གཞན་དུ་ཞུགས་པའི་མིག་ནད་ཅེས་བྱའོ། །དེ་ལ་མིག་ནད་རླུང་གི་རྣམ་གྲངས་ཞེས་བྱ་བ་ཡོད་དེ། དེའི་མཚན་མ་ནི་མིག་ཡོ་བར་འགྱུར་བ་དང་། མིག་སྔ་ན་བས་ཆུང་བར་འགྱུར་བ་དེ་ལྷག་མའི་མིག་ནད་ཀྱི་ཚུལ་
[337a.4]ནི་གོང་མ་དང་འདྲའོ། །མཁྲིས་པས་འཛག་པའི་མིག་ནད་ཀྱི་མཚན་མ་ནི་མིག་ཚ་བ་དང་། དུ་བ་འབྱུང་བ་སྙམ་སེམས་པ་དང་། མིག་མཆུའི་ཕྱི་རོལ་སྐྲང་ཞིང་སྔོ་བསངས་སུ་འདུག་པ་དང་། མིག་གི་ནང་གནག་པ་དང་། མཆི་མ་ཚ་བ་དང་སེར་པོ་འབྱུང་བ་དང་། མིག་གི་མདོག་
[337a.5]དམར་བ་དང་། དངོས་པོ་རྣམས་སེར་པོར་མཐོང་བ་དང་། རྨ་ལན་ཚྭས་བཏབ་པ་སྙམ་བྱེད་པ་ཡིན་ནོ། །དེ་ཉིད་ཡལ་བར་བོར་ཏེ་གསོ་བ་མ་བྱས་པ་ནི་མིག་ནད་གདུང་བ་ཞེས་བྱ་བར་འགྱུར་ཏེ། དེའི་རྟགས་ནི་མེ་མདག་འབར་བ་ལྟར་འདུག་པ་དང་། མཆི་མའི་མདོག་ལྟར་སྣང་བ་
[337a.6]ཡིན་ནོ། །དེ་ལ་བད་ཀན་ལས་གྱུར་པའི་མིག་ནད་ཀྱི་མཚན་མ་ནི་མིག་ཚོར་བ་མེད་པ་དང་། ཆེར་སྐྲང་བ་དང་། ཆེར་གཡའ་བ་དང་། གཉིད་ཆེ་བ་དང་། ཟས་ལ་མི་དགའ་བ་དང་། མིག་རྔུ་བ་དང་། མཆི་མ་སྣུམ་པ་དང་། མང་བ་དང་། དཀར་བ་དང་། སྤྱི་བག་ཏུ་སྣང་བ་ཡིན་
[337a.7]ནོ། །དེ་ཉིད་གསོ་བ་མ་བྱས་ཏེ་ཡལ་བར་བོར་བ་ལས་ནི་ཡང་མིག་ནད་གདུང་བ་ཞེས་བྱ་བར་འགྱུར་ཏེ། དེའི་རྟགས་ནི་མིག་གི་འབྲས་བུ་ནག་པོ་དམར་པོར་འགྱུར་བ་དང་། ཆམ་པས་འདེབས་པ་དང་། སྣ་བུས་པ་ལྟར་གང་ཞིང་རྒྱས་པ་དང་། མིག་བྱེ་མས་གང་བ་སྙམ་བྱེད་པ་ཡིན་ནོ། །
[337b]
[337b.1]དེ་ལ་ཁྲག་ལས་གྱུར་པའི་མིག་ནད་ཀྱི་མཚན་མ་ནི་མཆི་མ་ཁྲག་ཏུ་འཛག་པ་དང་། མིག་དམར་པོ་ཤར་ཤར་པོར་སྣང་བ་དང་། རྔུ་མ་དམར་བ་དང་། མིག་གི་འབྲས་བུ་དཀར་པོ་ཡང་དམར་བ་དང་། དངོས་པོ་དམར་པོར་མཐོང་བ་དང་། གཞན་ཡང་མཁྲིས་པའི་རྟགས་ཀྱང་འདིར་བལྟའོ། །
[337b.2]དེ་ཉིད་ཡལ་བར་བོར་བ་ཡང་མིག་ནད་གདུང་བ་ཞེས་བྱ་བར་འགྱུར་ཏེ། དེའི་རྟགས་ནི་མིག་མཐའ་ཟངས་མའི་མདོག་ལྟར་འདུག་པ་དང་། མིག་ཆུང་བ་སྙམ་སེམས་ཤིང་ན་བ་དང་། མེ་ཏོག་བན་དུ་ཀ་ལྟར་དམར་བ་དང་། ཏཱ་མྱ་ནི་ཞེས་བྱ་བ་དང་། རེག་ན་མི་བཟོད་པ་དང་། ཁྲག་གི་
[337b.3]ནང་དུ་ནིམ་པའི་འབྲས་བུ་བཅུག་པ་བཞིན་དུ་མིག་གི་འབྲས་བུ་ལ་ཡང་དེ་ལྟར་སྣང་བ་དང་། དངོས་པོ་རྣམས་མེ་འབར་བའི་མདོག་ཏུ་མཐོང་བ་ཡིན་ནོ། །དེ་ལ་འཛག་པའི་མིག་ནད་ལ་ཁྱད་པར་དུ་མིག་ནད་གདུང་བ་ཐམས་ཅད་ནི་རླུང་ལ་སོགས་པའི་ནད་གཞི་བྱེ་བྲག་གིས་ཚབས་ཆེ་བ་ཡིན་ཏེ། ཁྱད་
[337b.4]པར་དུ་མུར་འགྲམ་དང་། སོ་དང་། མཁུར་ཚོས་དང་། མགོ་བོ་རྣམས་སུ་ལྷག་པར་ན་བར་བྱེད་དོ། །རླུང་དང་མཁྲིས་པ་ལས་གྱུར་པའི་མིག་ནད་ཀྱི་མཚན་མ་ནི་མིག་གི་ནང་དུ་བྲུད་པ་སྙམ་སེམས་པ་དང་། ན་ཞིང་རྡོལ་བ་སྙམ་སེམས་པ་དང་། རྣག་གིས་གཡོགས་པ་ལྟར་འདུག་
[337b.5]པ་དང་། མིག་མཆུ་རྩུབ་ཅིང་རེག་མི་བཟོད་པ་དང་། མིག་འབྱེད་འཛུམས་དཀའ་བ་དང་། མིག་འཛག་པ་ཉུང་ཞིང་སྐམ་པ་དང་། གྲང་བར་འདོད་པ་དང་། ན་བ་དང་། སྨིན་པ་དང་བཅས་པ་ཡིན་ཏེ། དེ་ནི་མིག་ནད་སྐམ་ཞིང་སྨིན་པ་ཞེས་བྱའོ། །ནད་གཞི་གསུམ་ཁྲག་དང་
[337b.6]བཅས་པ་ལས་གྱུར་པའི་མིག་ནད་ཀྱི་མཚན་མ་ནི་སྐྲང་བ་དང་། རབ་ཏུ་ན་བ་དང་། ཚ་བ་དང་། རྟག་ཏུ་འཛག་པ་དང་། མིག་གི་འབྲས་བུ་དཀར་པོ་ལ་ཨུ་དུམ་བཱ་རའི་འབྲས་བུ་འདྲ་བར་སྣང་བ་དང་། མཆི་མ་ཡང་གྲང་བ་དང་། དྲོ་བ་དང་། རྩུབ་པ་དང་། སྤྱི་བག་དང་། སླ་བ་དང་།
[337b.7]སྐ་བ་རིས་ཀྱིས་འབྱུང་བ་དེ་ནི་མིག་ནད་སྐྲང་བ་དང་སྨིན་པ་དང་བཅས་པ་ཞེས་བྱའོ། །ཅུང་ཟད་སྐྲང་བ་ཞེས་བྱ་བའི་མིག་ནད་ཀྱི་མཚན་མ་ནི་སྐྲང་བ་གོང་མ་བས་ཚབས་ཆེ་བ་ལ་སོགས་པ་རྟགས་ལྷག་མ་དེ་ཉིད་དང་འདྲའོ། །མིག་ནད་སྨིན་པ་ཞེས་བྱ་བའི་མཚན་མ་ནི་སྐྲང་བ་དང་།
[338a]
[338a.1]ས་མ་རམ་པ་དང་། དྲི་མ་དང་བཅས་པའི་མཆི་མ་འཛག་པ་དང་། མཐོང་བའི་མིག་ལ་ཁད་ཀྱིས་གཡོགས་པ་ལྟར་སྣང་བ་དང་། མིག་འབྲས་དཀར་པོ་ལ་དམར་ཞིང་རྣག་དང་བཅས་པ་དང་། ཚ་བ་དང་། མི་མཐོང་བ་དང་། ན་ཞིང་ཟུག་གཟེར་ཚབས་ཆེ་བ་
[338a.2]ཡིན་ནོ། །ནད་གཞི་ཉེས་པ་རྣམས་འཁྲུགས་ཏེ། ཁྱད་པར་དུ་མཁྲིས་པ་དང་། ཁྲག་ཤས་ཆེས་པས་ཟས་ཟོས་པའི་དངས་མ་སྐྱུར་པོར་གྱུར་པ་རླུང་ལ་སོགས་པས་མིག་ཏུ་སོན་པར་བྱས་ཏེ། མིག་རྩ་ལ་ཆགས་པ་ནས་མིག་གི་མདོག་ཀྱང་དམར་ནག་ཏུ་འགྱུར་བ་དང་། དེ་བཞིན་
[338a.3]དུ་སྐྲང་བ་དང་། ཚ་བ་དང་། སྨིན་པ་དང་། མཆི་མ་འཛག་པ་དང་། མཐོང་བ་མི་གསལ་བ་ཡིན་ཏེ། དེ་ནི་སྐྱུར་གྱིས་བསྐྱེད་པའི་མིག་ནད་ཅེས་བྱའོ། །དེ་ལྟར་མིག་ནད་སྣ་ཚོགས་ཀྱང་རྣམ་གྲངས་བཅུ་དྲུག་ཏུ་བཤད་དེ། དེས་ན་མིག་ནད་རྩུབ་པ་འཇོམས་བྱེད་དང་། མིག་
[338a.4]ནད་སྨིན་པ་ཞེས་བྱ་བ་གཉིས་ནི་ཡོངས་སུ་སྤང་བར་བྱའོ། །དེ་ལ་མིག་ནད་གདུང་བ་ཞེས་བྱ་བ་ལ་ཆོ་ག་ལེགས་པར་མ་སྤྱད་ན་ནི་ཤིན་ཏུ་ཉེན་ཆེ་སྟེ། དེ་ཡང་རླུང་ལས་གྱུར་པའི་མིག་ནད་གདུང་བ་ཆོ་ག་ཉེས་པར་བྱས་ན་ནི་ཞག་ལྔས་མཐོང་བ་ཉམས་པར་འགྱུར་རོ། །
[338a.5]བད་ཀན་ལས་གྱུར་པའི་མིག་ནད་གདུང་བ་ལ་ཆོ་ག་ལོག་པར་སྤྱད་ན་ཞག་བདུན་གྱིས་མཐོང་བ་ཉམས་པར་འགྱུར་རོ། །ཁྲག་ལས་གྱུར་པའི་མིག་ནད་ལ་ཆོ་ག་ཉེས་པར་བྱས་ན་ཞག་གསུམ་གྱིས་མཐོང་བ་ཉམས་སོ། །མཁྲིས་པ་ལས་གྱུར་པའི་མིག་གདུང་བའི་ནད་ལ་ཆོ་ག་ལོག་པར་
[338a.6]བྱས་ན་དེ་མ་ཐག་མཐོང་བ་ཉམས་པར་འགྱུར་རོ། །མིག་ནད་སྣ་ཚོགས་ཐམས་ཅད་ཀྱི་ནད་གཞི་བཤད་པའི་ལེའུ་སྟེ་བཅོ་ལྔ་པ་རྫོགས་སོ།། །།དེ་ནས་མིག་ནད་སྣ་ཚོགས་གསོ་བའི་ལེའུ་བཤད་པར་བྱ་སྟེ། དེ་ལ་མིག་ནད་འཛག་པ་ཐམས་ཅད་ཐོག་མར་འབྱུང་བའི་ཚེ་ནི་
[338a.7]སྨན་རྣོན་པོ་དང་སྦྱར་བའི་སྨན་མཁུར་བར་བཅང་བ་དང་། སྣ་སྨན་གཏང་བ་དང་། སྨྱུང་བ་བྱས་ཏེ་རླུང་ལས་གྱུར་པ་ནི་མ་གཏོགས་སོ། །མིག་ཚ་བ་དང་མིག་བད་ཀན་གྱིས་ཡོགས་པ་ལྟར་འདུག་པ་དང་། མིག་མདོག་དམར་བ་དང་། མཆི་མ་འཛག་པ་དང་། སྐྲང་པ་ལ་སོགས་པའི་
[338b]
[338b.1]མིག་ནད་ཐམས་ཅད་ལ་ནི་གན་དྷ་བྷ་དྲ་དང་། སུག་སྨེལ་དང་། ན་ལེ་ཤམ་དང་། བཙག་ཡུག་སྣམ་དང་། དེ་རྣམས་འདག་གུར་བྱས་པས་མིག་གི་ཕྱི་རོལ་ཏུ་བསྐུས་ན་ཞི་བར་འགྱུར་རོ། །རླུང་ལས་གྱུར་པའི་མིག་ནད་ལ་ནི་སྐྱེར་ཁཎྜ་དང་། ཤིང་མངར་དང་། རྒྱ་སྤོས་དང་། ཙནྡན་
[338b.2]དང་། རྒྱམ་ཚ་རྣམས་སྦྱར་བའམ། ཡང་ན་རྒྱམ་ཚ་དང་། བཅའ་སྒ་དང་། སྐྱེར་ཁཎྜ་རྣམས་མར་གྱི་སྙིང་ཁུ་ལས་བཏགས་པའམ། ཡང་ན་སེང་ཕྲོམ་དཀར་པོ་མར་ལས་བརྔོས་ཏེ་འདག་གུར་བྱས་པ་འམ། སྦྱོར་བ་དེ་དག་གང་ཡང་རུང་བ་བསྐུས་ན་ཕན་ནོ། །མཁྲིས་པ་
[338b.3]དང་ཁྲག་ལས་གྱུར་པའི་མིག་ནད་ལ་ཡང་སྤང་སྤོས་དང་། ཤུག་པ་དང་། བུང་ཚང་རྡོ་དང་། ཤིང་མངར་དང་། དེ་རྣམས་ཀྱི་འདག་གུས་བསྐུས་ན་ཕན་ནོ། །བད་ཀན་ལས་གྱུར་པའི་མིག་ནད་འཛག་པ་ལ་ནི་ལྡོང་རོས་དང་། པྲི་ཡང་ཀུ་དང་། སྦྲང་རྩི་དང་སྦྱར་བས་མིག་གི་ཕྱི་རོལ་པགས་
[338b.4]པ་ལ་བསྐུས་ན་ཕན་ནོ། །འདུས་པ་ལས་གྱུར་པའི་མིག་ནད་འཛག་པ་ལ་ནི་མིག་སྨན་དེ་ཐམས་ཅད་སྦྱར་བ་བསྐུའོ། །ན་ལེ་ཤམ་དཀར་པོ་ཆ་གཅིག་དང་། ལྡོང་རོས་ཆ་བཞི་དང་། སེང་ཕྲོམ་དཀར་པོ་ཆ་བཅུ་དྲུག་དང་། དེ་རྣམས་ཞིབ་ཏུ་བཏགས་ཏེ་རས་ཀྱི་ནང་དུ་ཕུར་མར་བྱས་ཏེ།
[338b.5]ཟུག་གཟེར་བདོ་བའི་དུས་སུ་མིག་ལ་གླན་ནོ། །རྒྱ་སྲན་ཀུ་ལཏྠ་རས་ཀྱི་ནང་དུ་ཐུམ་བུ་བྱས་ཏེ། དགོན་པའི་བ་ལང་གི་ལྕི་བའམ། རའི་རིལ་མ་བསྐོལ་བའི་ཁུ་བའི་རླངས་པར་བཙོས་ཏེ་ཚོས་པ་དང་སེན་མོས་ཤུན་པ་བཤུས་ལ་བསྐམས་ཏེ་བཏགས་པའི་ཕྱེ་མས་ནུབ་མོ་ལན་ཅིག་
[338b.6]བསྐུས་པ་ཙམ་གྱིས་ཀྱང་ནད་གཞི་འཁྲུགས་པ་དེ་མ་ཐག་ཞི་བར་བྱེད་དོ། །ཤུ་ཏི་དང་། ཨ་རུ་ར་དང་། སྤངས་མ་དང་། ཤིང་མངར་དང་། སེང་ཕྲོམ་དང་། འདི་རྣམས་ཞིབ་ཏུ་བཏགས་ཏེ། རས་ཀྱི་ནང་དུ་ཕུར་མར་བྱས་ཏེ། ལྷོད་པར་བཅིངས་ནས། འབྲས་རྩབས་སྐྱུར་
[338b.7]པོ་ཟངས་སྣོད་ཀྱི་ནང་དུ་བཅུག་སྟེ། ཕུར་མའི་ཐུམ་པོ་དེ་ཡང་དེའི་ནང་དུ་བཅུག་པ་དེས་མིག་ཏུ་བདུགས་ན་མིག་ནད་ཀྱི་རྣམ་གྲངས་སྣ་ཚོགས་སེལ་ཏོ། །སྐྱེར་པ་སྲང་གཅིག་ཆུ་སྲང་བཅུ་དྲུག་གི་ནང་དུ་བསྐོལ་ཏེ། བརྒྱད་ཆ་ལུས་པའི་ནང་དུ་སྦྲང་རྩི་བཏབ་པ་མིག་ཏུ་བླུགས་ན་ནད་གཞི་
[339a]
[339a.1]ཐམས་ཅད་ལས་གྱུར་པའི་མིག་ནད་སེལ་ཏོ། །ཤི་ཀྲུའི་ལོ་མ་རང་གི་ཁུ་བ་སྦྲང་རྩི་དང་སྦྱར་བ་མིག་ཏུ་བླུགས་ན། རླུང་དང་མཁྲིས་པ་དང་བད་ཀན་ལ་སོགས་པ་ནད་ཀྱི་རྣམ་གྲངས་མང་པོ་ལས་ཀྱང་རྒྱལ་བར་བྱེད་དོ། །དེ་ལ་རླུང་ལས་གྱུར་པའི་མིག་ནད་འཛག་པ་ལ་ནི་ཨེ་
[339a.2]རཎྜ་གཞོན་ནུའི་ལོ་མ་དང་རྩ་བ་ཆམ་ཆོམ་བརྡུངས་ལ་རའི་འོ་མ་དང་ཚུལ་བཞིན་བསྐོལ་ཏེ་མིག་ཏུ་བླུགས་ན། ཟུག་གཟེར་དེ་མ་ཐག་འཇོམས་པར་བྱེད་དོ། །ཡང་ན་ཕྱེ་ཟན་དྲོན་པོ་མིག་ཏུ་བདུགས་ན་ཡང་ཕན་ཡོན་དེ་དང་འདྲའོ། །ཡང་ན་རླུང་ལས་གྱུར་པའི་མིག་ནད་འཛག་པ་
[339a.3]ལ་ནི་བིལ་བ་ལ་སོགས་པའི་རྩ་བ་ལྔ་དང་། ཨེ་རཎྜའི་རྩ་བ་དང་། བྲི་ཧ་ཏི་དང་། མ་དུ་ཤི་ཀྲུ་དང་དེ་རྣམས་ཆམ་ཆོམ་བརྡུངས་ཏེ་བསྐོལ་བའི་ཁུ་བ་དྲོ་འཇམ་ཙམ་བླུགས་ན་ཕན་ནོ། །ཡང་ན་བ་ལ་ཀ་ཞེས་བྱ་བ་དེ་ནི་དྷི་བེ་ར་དང་། རྒྱ་སྤོས་དང་། ཤ་རང་གཥྚ་དང་། ཨུ་དུམ་བཱ་རའི་
[339a.4]ཤུན་པ་དང་། བུ་རམ་ཤིང་དང་། དེ་རྣམས་ཆུ་དང་འོ་མ་དང་ཚུལ་བཞིན་བསྐོལ་ཏེ་འོ་མ་ཉི་ཚེ་ལུས་པ་མིག་ཏུ་བླུགས་ན་མིག་ནད་རླུང་ལས་གྱུར་པ་ཟུག་གཟེར་དང་བཅས་པ་སེལ་བའི་མཆོག་ཡིན་ནོ། །དེ་ལ་མཁྲིས་པ་ལས་གྱུར་པའི་མིག་ནད་ལ་ནི་བཙོད་དང་། སྐྱེར་བ་དང་། རྒྱ་
[339a.5]སྐྱེགས་དང་། རྒུན་འབྲུ་དང་། ཤིང་མངར་རྣམ་གཉིས་དང་། ཨུཏྤ་ལ་དང་། དེ་རྣམས་བསྐོལ་བའི་ཁུ་བའི་ནང་དུ་ཁ་ར་བཏབ་སྟེ་མིག་ཏུ་བླུགས་པ་བྱས་ན། ཁྲག་དང་མཁྲིས་པ་ལས་གྱུར་པའི་མིག་ནད་འཛག་པ་སེལ་ཏོ། །རྒུན་འབྲུ་དང་། ཤིང་མངར་དང་། འདི་གཉིས་ཞིབ་ཏུ་
[339a.6]བཏགས་ཏེ་ཕྱེ་མ་རས་འཇམ་པོའི་ནང་དུ་ཕུར་མ་བྱས་ཏེ་ལྷོད་པར་བཅིངས་ནས་ཆར་པའི་ཆུའི་ནང་དུ་སྨྱུགས་ཏེ་མིག་ཏུ་བླུགས་ན་ཁྲག་དང་མཁྲིས་པ་ལས་གྱུར་པའི་མིག་ནད་འཛག་པ་སེལ་ཏོ། །ཡང་ན་པྲ་པུཎྜ་རཱི་ཀ་དང་། ཤིང་མངར་དང་། སྐྱེར་པ་དང་། འདི་རྣམས་ཞིབ་ཏུ་
[339a.7]བཏགས་ཏེ། རས་འཇམ་པོའི་ནང་དུ་ཐུམ་པོར་བྱས་ཏེ། ནུ་ཞོ་ཁ་ར་དང་བཅས་པའམ་རའི་འོ་མའི་ནང་དུ་སྦངས་ཏེ་མིག་ཏུ་བླུགས་ན། མིག་ཚ་བ་དང་། ན་བ་དང་། མདོག་དམར་བ་དང་། མཆི་མ་འཛག་པ་རྣམས་སེལ་ཏོ། །སེང་ཕྲོམ་དཀར་པོ་དང་། ཤིང་མངར་མར་གྱི་ནང་དུ་བརྔོས་
[339b]
[339b.1]ཏེ་བཏགས་པའི་ཕྱེ་མ་རས་འཇམ་པོའི་ནང་དུ་ཐུམ་པོར་བྱས་ཏེ། བུད་མེད་ཀྱི་ནུ་ཞོའི་ནང་དུ་སྨྱུགས་ཏེ་མིག་གི་ནང་དུ་བླུགས་ན་ཁྲག་དང་མཁྲིས་པ་ལས་གྱུར་པའི་མིག་ནད་སྣད་པ་ལས་རྒྱལ་བར་བྱེད་དོ། །བད་ཀན་ལས་གྱུར་པའི་མིག་ནད་འཇོག་པ་ལ་ནི་དོང་གྲ་དང་། འབྲས་བུ་
[339b.2]གསུམ་དང་། ནིམ་པ་དང་། སེང་ཕྲོམ་དཀར་པོ་དང་། འདི་རྣམས་བསྐོལ་བའི་ཁུ་བ་དྲོ་འཇམ་ཙམ་བླུགས་ན་ཕན་ནོ། །འདུས་པ་ལས་གྱུར་པའི་མིག་ནད་འཛག་པ་ལ་ནི་སྨན་གྱི་སྦྱོར་བ་འདྲེས་པ་ཡང་བླུགས་པར་བྱའོ། །གཞན་ཡང་རླུང་ལས་གྱུར་པའི་མིག་ནད་འཛག་པ་ལ་ནི་མར་
[339b.3]རྙིང་པ་བཏུང་ངོ་། །མཁྲིས་པ་ལས་གྱུར་པའི་མིག་ནད་ལ་ནི་མར་རྙིང་པ་ཁ་ར་དང་བཅས་པ་བླུད་དོ། །བད་ཀན་ལས་གྱུར་པ་ལ་ནི་མར་རྙིང་བ་ཚ་བ་གསུམ་དང་སྦྱར་བ་དེའི་ནང་དུ་ནས་ཚིག་འཁུས་པའི་ཐལ་བའི་ཕྱེ་མ་བཏབ་པ་བླུད་དོ། །དེ་ལྟར་སྣུམ་གྱིས་ཞེན་པ་དང་། གཏར་ག་བྱས་
[339b.4]ཏེ་ཁྲག་དབྱུང་ངོ་། །དེའི་འོག་ཏུ་ཡང་སྣུམ་ཆོས་བྱས་ཏེ། དེ་ནས་ཡང་བཀྲུ་སྨན་གཏང་ངོ་། །དེ་ལ་མིག་ནད་གདུང་བ་ལ་ནི་ཡུལ་གཤེར་ས་ན་གནས་པའི་སྲོག་ཆགས་ཀྱི་ཤ་གཡོས་སུ་ལེགས་པར་སྦྱར་བའི་བྱུག་པ་དྲོན་པོས་མགོ་དང་གདོང་ལ་བསྐུས་ན་ཟུག་གཟེར་ཞི་བར་བྱེད་དོ། །
[339b.5]མིག་ནད་ཚ་བ་ལ་ནི་འོ་མ་དང་མར་སྨན་གྲང་མོ་དང་སྦྱར་བས་བྱུག་རྩི་བྱས་ཏེ་བསྐུའོ། །གསོ་བ་གཞན་ནི་རབ་རིབ་གསོ་བའི་ནད་གཞི་བརྟ་བ་བཞིན་འདིར་སྦྱར་རོ། །ཆོ་ག་དེ་དག་ནི་མིག་སྨན་ཐམས་ཅད་ལ་སྔ་མ་བཞིན་ནོ། །མིག་ནད་གདུང་བ་ལ་ཐབས་དེ་དག་གང་གིས་ཀྱང་མ་ཞི་ན།
[339b.6]སྨིན་མའི་སྟེང་དུ་མེ་བཙའ་བཏབ་ན་ཕན་ནོ། །བའི་ཞོ་སྣུམ་མེད་པ་དངུལ་ལ་མ་ཟངས་མའི་སྣོད་ཀྱི་ནང་དུ་བླུགས་ཏེ། ཇི་སྲིད་དུ་སྔོན་པོར་གྱུར་པ་དང་བསྐམས་ཏེ། དེའི་ཕྱེ་མ་ཞོ་ག་ཆུ་དང་རི་ལུར་བྱས་ཏེ་མིག་ཏུ་བསྐུས་ན་རླུང་ལས་གྱུར་པའི་མིག་ནད་འཇོམས་པར་བྱེད་དོ། སྲིང་ཤིང་གི་མེ་
[339b.7]ཏོག་ཁ་མ་བྱེ་བ་དང་། དུང་དང་། འབྲས་བུ་གསུམ་དང་། ཤིང་མངར་དང་། བ་བླ་དང་། དེ་རྣམས་བཏགས་པའི་ཕྱེ་མ་ཆར་པའི་ཆུ་དང་རི་ལུར་བྱས་ཏེ་བསྐུས་ན། ཁྲག་དང་མཁྲིས་པ་ལས་གྱུར་པའི་མིག་ནད་སེལ་ཏོ། །རྒྱམ་ཚ་དང་། འབྲས་བུ་གསུམ་དང་། ཚ་བ་གསུམ་དང་།
[340a]
[340a.1]དུང་གི་སྙིང་པོ་དང་། རྒྱ་མཚོའི་ལྦུ་བ་དང་། ཨེ་ལ་བ་ལུ་ཀ་དང་། སྲ་རྩི་པོག་དང་དེ་རྣམས་རི་ལུར་བྱས་པས་བསྐུས་ན། བད་ཀན་ལས་གྱུར་པའི་མིག་ནད་སེལ་ཏོ། །པྲ་པུཎྜ་རཱི་ཀ་དང་། ཤིང་མངར་དང་། སྐྱེར་པ་དང་། དེ་གསུམ་སྲང་བརྒྱད་བརྒྱད་ཆུ་སྲང་
[340a.2]ལྔ་བརྒྱ་རྩ་བཅུ་གཉིས་ཀྱི་ནང་དུ་བསྐོལ་ཏེ་བཞི་ཆ་ལུས་པ་དང་། ཚིགས་མ་བོར་བའི་དངས་མ་དེ་ཡང་བསྐོལ་ཏེ། སྐ་བར་གྱུར་པའི་ནང་དུ་ར་གན་གྱི་དུད་པ་སྲང་བཅུ་དང་། ན་ལེ་ཤམ་ཞོ་གཉིས་ཀྱི་ཕྱེ་མ་བཏབ་སྟེ། རི་ལུ་འམ་ཕྱེ་མས་ཀྱང་རུང་སྟེ་བསྐུས་ན་མིག་ནད་ཐམས་ཅད་ལས་
[340a.3]གྱུར་པའི་མིག་ནད་འཛག་པ་དང་། དམར་བ་དང་། བྲུད་པ་སྙམ་བྱེད་པ་རྣམས་འཇོམས་ཏེ། དེ་མ་ཐག་གསལ་བར་འགྱུར་ཏེ། སྦྱོར་བ་འདི་ནི་ཕྱུགས་བདག་གི་མིང་དུ་བཤད་པའི་ནང་ན་གསང་བ་དམ་པའི་མིག་སྨན་གྱི་མཆོག་ཡིན་ནོ། །དེ་ལ་མིག་ནད་སྐམ་ཞིང་སྨིན་པ་ལ་ནི་
[340a.4]སྨན་མར་བཏུང་བ་དང་། འཚོ་བྱེད་སྡེ་བཅུ་དང་སྦྱར་བའི་མིག་བརྟ་བའི་སྨན་བླུགས་པ་དང་། མར་དེ་ཉིད་ཀྱིས་སྣར་བླུགས་པའམ། ཡང་ན་ཏིལ་མར་སྣར་བླུགས་པ་རབ་ཏུ་ཕན་ནོ། །འདིར་བླུགས་པ་ནི་འོ་མ་དྲོ་འཇམ་ཙམ་རྒྱམ་ཚ་དང་བཅས་པ་བླུགས་ན་ཕན་ནོ། །ཡང་ན་
[340a.5]བཅའ་སྒ་བུད་མེད་ཀྱི་ནུ་ཞོ་དང་བཏགས་ཏེ་མར་དང་སྦྱར་བས་མིག་ཏུ་བསྐུས་ན་ཕན་ནོ། །ཡང་ན་གཤེར་ས་ནས་སྐྱེས་པའི་སྲོག་ཆགས་ཀྱི་ཤའི་ཞག་བཅའ་སྒ་དང་། རྒྱམ་ཚ་ཅུང་ཟད་དང་བཅས་པ་བླུགས་ན་ཕན་ནོ། །ཡང་ན་མིའི་སྐྲ་མར་གྱིས་སྦགས་ཏེ་ཁམ་ཕོར་ཁ་སྦྱར་གྱི་ནང་
[340a.6]དུ་དུད་པ་མ་ཤོར་བར་བསྲེགས་ཏེ། དེ་ལས་སྣག་ཚར་གྱུར་པ་དང་མར་གྱིས་བསྒོས་ཏེ་ལྕགས་སམ་མེ་ལོང་གི་སྟེང་དུ་བཏགས་ལ། དེའི་ཕྱེ་མས་བསྐུས་ན་མིག་སྨན་གྱི་མཆོག་ཏུ་བཤད་དོ། །དེ་ལ་མིག་ནད་ལས་སྐྲང་པ་སྨིན་པ་དང་བཅས་པ་དང་། ཅུང་ཟད་སྐྲང་པའི་མིག་
[340a.7]ནད་གཉིས་ལ་ནི་སྣུམ་ཆོས་བྱས་ཏེ། ཁྲག་གཏར་ལ་དེའི་འོག་ཏུ་ཡང་སྣུམ་ཆོས་བྱས་ཏེ། རྒུན་འབྲུ་དང་། ཨ་རུ་ར་གཉིས་བསྐོལ་བའི་ནང་དུ་དུར་བྱིད་ཀྱི་ཕྱེ་མ་དང་མར་བཏབ་སྟེ་བཀྲུ་སྨན་གཏང་ངོ་། །སེང་ཕྲོམ་དཀར་པོ་མར་གྱི་ནང་དུ་བརྔོས་ཏེ་ཕྱེ་མར་བྱས་པ་རས་ཀྱི་ནང་དུ་
[340b]
[340b.1]ཕུར་མ་བྱས་ཏེ། ཆུ་དྲོན་དང་མཉེས་ལ་མིག་ཏུ་བླུགས་ན་ནི་མིག་གི་ཟུག་གཟེར་འཇོམས་པའི་མཆོག་ཡིན་ནོ། །ཡང་ན་སྐྱེར་པ་དང་པྲ་པུཎྜ་རཱི་ཀ་དང་གཉིས་བསྐོལ་བའི་ཁུ་བ་བླུགས་ན་ཡང་ཕན་ནོ། །མིག་བྲུད་པ་སྙམ་བྱེད་པ་དང་། མིག་དམར་བ་དང་མཆི་མ་འཛག་པ་རྣམས་ལ་སཱན་དྷ་
[340b.2]བ་ཞེས་བྱ་བའི་སྦྱོར་བ་བྱ་སྟེ། དེ་རྣམས་ཀྱང་ལྕགས་ཀྱི་གཞི་ལ་ཟངས་མ་བ་གཅིན་དང་བཏགས་ཏེ་མར་གྱི་དུད་པས་བདུགས་ལ་མིག་ཏུ་བླུགས་ན་མིག་གི་ཟུག་རྔུ་འཇོམས་སོ། །ཡང་ན་ཟངས་མའི་སྣོད་ཀྱི་ནང་དུ་བའི་ཞོའི་སྤྲིས་མ་བཅུག་སྟེ། པི་པི་ལིང་དང་། རྒྱམ་ཚ་གཉིས་ཞིབ་ཏུ་
[340b.3]བཏགས་ལ་མིག་སྨན་དུ་སྦྱར་ན། དེ་ཡང་སཱན་དྷ་བ་ཞེས་བྱ་བ་སྟེ་མིག་ཏུ་བླུགས་ན་ཕན་ནོ། །ཡང་ན་ཟངས་མའི་སྣོད་ཀྱི་ནང་དུ་བུད་མེད་ཀྱི་འོ་མ་དང་དུང་བདར་ཏེ་དོང་ག་འམ་ནས་གང་ཡང་རུང་བ་མར་གྱིས་བསྒོས་པའི་དུད་པས་བདུགས་ལ་མིག་ཏུ་བསྐུས་ན། མིག་བྲུད་པ་སྙམ་བྱེད་པ་
[340b.4]ལ་སོགས་པའི་མིག་ནད་མི་བཟད་པ་ལས་གྲོལ་བར་བྱེད་དོ། །དེ་ཡང་སཱན་དྷ་བ་ཞེས་བྱ་བ་ཡིན་ནོ། །ཡང་ན་ཨུ་དུམ་བཱ་རའི་འབྲས་བུ་ལྕགས་སྣོད་ཀྱི་ནང་དུ་བུད་མེད་ཀྱི་ཞོ་དང་སྦྱར་ཏེ། ཤིང་ཤྱ་མའི་ལོ་མ་མར་གྱིས་བསྒོས་པའི་དུད་པས་བདུགས་ཏེ་མིག་ཏུ་བསྐུས་ན། མིག་ནད་ཚ་
[340b.5]བ་དང་། ཟུག་གཟེར་ཆེ་བ་དང་། མདོག་དམར་བ་རྣམས་ལ་ཕན་ནོ། །ཡང་ན་ཤི་ཀྲུའི་ལོ་མ་རང་གི་ཁུ་བ་ཟངས་མ་གཉིས་ཀྱི་བར་དུ་བཏགས་ཏེ་མེ་མར་གྱི་དུད་པས་བདུགས་ན། དེ་ཡང་སཱན་དྷ་བ་ཞེས་བྱ་བ་སྟེ་དེས་མིག་ཏུ་བསྐུས་ན་མིག་ནད་སྐྲང་པ་དང་། མཆི་མ་འཛག་པ་དང་།
[340b.6]ཟུག་གཟེར་དང་བཅས་པ་རྣམས་འཇིལ་བར་བྱེད་དོ། །ཡང་ན་ཁ་རའི་སྣོད་ཀྱི་གཞི་ལ་གྱོ་མོའི་དུམ་བུ་ཏིལ་གྱི་ཆུ་དང་བདར་ཏེ་ནིམ་པའི་ལོ་མ་མར་གྱིས་བསྒོས་པའི་དུད་པས་བདུགས་ལ་དེས་མིག་ཏུ་བསྐུས་ན། མིག་ནད་བྲུད་པ་སྙམ་བྱེད་པ་དང་། མདོག་དམར་བ་དང་། མཆི་མ་འཛག་
[340b.7]པ་དང་། ཟུར་གཟེར་ཆེ་བ་རྣམས་ལ་ཕན་ནོ། །དེ་ཡང་སཱན་དྷ་ཞེས་བྱའོ། །སྨན་གྱི་སྦྱོར་བ་སཱན་དྷ་ཞེས་བྱ་བ་དེས་མིག་ཟུག་གཟེར་དང་བྲལ་བ་ལྟ་ན། དེའི་འོག་ཏུ་བུད་མེད་ཀྱི་ནུ་ཞོ་ལན་གསུམ་གྱི་བར་དུ་བླུགས་པར་བྱའོ། །ཡང་ན་བལ་བུའི་ལོ་མ་དང་། པི་པི་ལིང་དང་། རྒྱ་སྦོས་དང་།
[341a]
[341a.1]ལྕགས་ཕྱེ་དང་། སྟང་ཟིལ་དང་། སྣ་མའི་མེ་ཏོག་དང་། ནག་ཚུར་དང་། རྒྱམ་ཚ་དང་། དེ་རྣམས་བ་གཅིན་དང་བདར་བའི་འདག་གུས་ཟངས་མའི་སྣོད་ལ་བྱུགས་ཏེ། ཞག་བདུན་དུ་བཞག་སྟེ་དེ་ནས་ཡང་གཅིན་དང་བཏགས་པའི་རི་ལུ་བྱ་སྟེ་གྲིབ་མར་བསྐམས་
[341a.2]ལ་བུད་མེད་ཀྱི་ནུ་ཞོ་དང་བདར་ནས་མིག་ཏུ་བསྐུས་ན། མིག་བྲུད་པ་སྙམ་བྱེད་པ་དང་། མཆི་མ་འཛག་པ་དང་སྐྲང་བ་དང་། གཡའ་བ་རྣམ་པར་འཇིག་གོ། །ཡང་ན་ཀཎྜ་ཀ་རིའི་ཤུན་པ་དང་། ཤིང་མངར་དང་། ཟངས་མའི་ཕྱེ་མ་དང་། དེ་དག་རའི་འོ་མ་དང་བཏགས་ཏེ་ཤྱ་མི་
[341a.3]དང་། སྐྱུ་རུ་རའི་ལོ་མ་མར་གྱིས་བསྒོས་པའི་དུད་པས་བདུག་པ་མིག་ལ་བསྐུས་ན། སྐྲང་པ་དང་། ཟུག་གཟེར་ཆེ་བ་རྣམས་སེལ་ཏེ། དེ་ལ་སྐྱུར་གྱིས་སྐྱེད་པ་ཞེས་བྱ་བའི་མིག་ནད་ལ་ནི་མཁྲིས་པའི་མིག་ནད་ཀྱི་གསོ་བ་ཐམས་ཅད་བྱའོ། །བད་ཀན་དང་མཁྲིས་པ་དང་ཁྲག་
[341a.4]དང་འདུས་པ་དང་། འདི་རྣམས་རེ་རེས་བསླང་བའི་མིག་ནད་དང་། ཀུ་ཀུན་ཞེས་བྱ་བའི་མིག་ནད་དང་། རྫི་མའི་ནང་དུ་ཞུགས་པ་ཞེས་བྱ་བའི་མིག་ནད་དང་། མིག་སྐམ་ཞིང་སྨིན་པ་ཞེས་བྱ་བ་དང་། པད་མའི་རྩ་བ་ལྟ་བུ་ཞེས་བྱ་བའི་མིག་ནད་དང་། སྐྲང་བ་ཆུང་བ་ཞེས་བྱ་
[341a.5]བའི་མིག་ནད་དང་། གཞན་ཡང་བད་ཀན་དང་ཁྲག་དང་། མཁྲིས་པ་དང་འདི་རྣམས་རེ་རེ་འཛག་པའི་མིག་ནད་དང་། དེ་གསུམ་ལས་གྱུར་པ་བཏུང་བའི་ནད་སྣ་རེ་དང་། རླུང་ནད་མ་གཏོགས་པ་མིག་ནད་བཅོ་བརྒྱད་པོ་དེ་དག་ནི་མིག་ཚག་པ་ཞེས་བྱ་བ་སྟེ། དེ་དག་ནི་ཉེ་བར་འཚོ་བ་
[341a.6]ཡིན་ཏེ་གསོ་བར་བྱའོ། །དེ་དག་རང་རང་གི་གསོ་བའི་ནད་སོ་སོའི་ལེའུར་བཤད་ཟིན་ཏོ། །གལ་ཏེ་དེ་ལས་མིག་ཚག་པ་ཞེས་བྱ་བའི་ནད་དུ་གྱུར་ན་ནི་དེའི་གསོ་བ་སྤྱིར་བརྗོད་པར་བྱ་སྟེ། དེ་ལ་ཐོག་མར་སྣུམ་ཆོས་བྱས་ཏེ་སློན་བྱའོ། །དེ་ནས་གཏར་ག་བྱ་སྟེ་ཁྲག་དབྱུང་ངོ་། །དེ་ནས་བཀྲུ་སྨན་
[341a.7]བཏང་སྟེ། མིག་མཆུ་མཚོན་གྱིས་བཞར་བ་བྱས་ན་མིག་ནད་ཐམས་ཅད་དག་པར་འགྱུར་རོ། །སྤངས་མ་སྲང་གཅིག་དང་། ན་ལེ་ཤམ་དཀར་པོ་སྲང་ཉི་ཤུ་རྩབ་མོ་སྲང་སུམ་ཅུའི་ནང་དུ་བཏགས་ཏེ། ཟངས་མའི་སྣོད་ཀྱི་ནང་དུ་བཅུག་སྟེ་བླུགས་ན། མིག་ཚག་པའི་ནད་ལོ་དུ་མ་ལོན་པ་ཡང་ཞི་བར་
[341b]
[341b.1]བྱེད་དོ། །དེ་བཞིན་དུ་མིག་ནད་གཡོགས་པ་སྙམ་བྱེད་པ་དང་། ཚ་བ་དང་། མཆི་མ་འཛག་པ་དང་། གཡའ་བ་དང་། སྐྲངས་པ་རྣམས་འཇོམས་པར་བྱེད་དོ། །ཀ་རཉྫའི་ས་བོན་དང་། བྱེའུ་རུག་པ་དང་། སྣ་མའི་མེ་ཏོག་ཁ་མ་བྱེ་བ་འདི་རྣམས་ཆམ་ཆོམ་བརྡུངས་ཏེ་བསྐོལ་བའི་
[341b.2]ཚིགས་མ་བོར་ཏེ་ཡང་བསྐོལ་ལ་སྟང་ཟིལ་དང་ལྷན་ཅིག་མིག་སྨན་དུ་བླུགས་ན། མིག་ཚག་པའི་ནད་ལ་ཕན་ཏེ། ཁྱད་པར་དུ་མིག་གཡའ་བ་དང་། རྣག་འཛག་པ་དང་གཡའ་བ་འཇོམས་པའི་མཆོག་ཡིན་ནོ། །སྐྱེར་ཁཎྜ་དང་། སྲ་རྩི་ཕོག་དང་། ར་གན་གྱི་དུད་པ་དང་། ལྡོང་རོས་
[341b.3]དང་། རྒྱ་མཚོའི་ལྦུ་བ་དང་། རྒྱམ་ཚ་དང་། བཙག་ཡུག་སྣམ་དང་། ན་ལེ་ཤམ་དང་། འདི་རྣམས་སྦྲང་རྩི་ལས་བཏགས་པ་མིག་སྨན་དུ་བསྐུས་ན། རྣག་འཛག་པ་དང་གཡའ་བ་འཇོམས་པའི་མཆོག་ཡིན་ནོ། །ཡང་ན་རྒྱ་སྤོས་ཨ་རུ་རའི་ཁུ་བའི་ནང་དུ་བཏགས་པས་མིག་
[341b.4]ཚག་པ་ལ་བསྐུས་ན་ཕན་ནོ། །ཐང་ཤིང་ར་གཅིན་གྱི་ནང་དུ་སྣུམ་དང་བཅས་པས་བསྐུས་ན་མིག་ནད་འཛག་པ་ཚག་པ་འཇོམས་སོ། །ཡང་ན་རྒྱམ་ཚ་དང་། འབྲས་བུ་གསུམ་དང་། པི་པི་ལིང་དང་། པུ་ཙེ་ཤེལ་དང་། དུག་གི་སྙིང་པོ་དང་། ཟངས་མའི་ཕྱེ་མ་
[341b.5]དང་། དེ་རྣམས་སྦྱར་བའི་མིག་སྨན་གྱིས་བསྐུས་ན་མིག་ཚག་པ་དང་ལིང་ཏོག་རྣམས་འཇོམས་སོ། །ནག་ཚུར་བྱ་བ་ལ་མའི་ཕྱེ་མ་བྱེའུ་རུག་པའི་ཁུ་བས་བསྐོལ་ཏེ། ཟངས་མའི་སྣོད་ཀྱི་ནང་དུ་ཞག་བཅུ་བཞིའི་བར་དུ་བཞག་ལ་མིག་ཏུ་བསྐུས་ན་མིག་ཆུ་སེར་གྱིས་གང་བ་
[341b.6]དང་། རྫི་མ་བྱི་བའི་ནད་ལས་རྒྱལ་བར་བྱེད་དོ། །བ་བླ་དང་། སོ་བའི་ལ་ཞེས་བྱ་བ་སྟང་ཟིལ་དང་མཉམ་པའི་ཟངས་མའི་ཕྱེ་མ་ཞིབ་ཏུ་བཏགས་པས་མིག་སྨན་དུ་སྦྱར་ན། ཐུར་མ་གཅིག་གིས་ཀྱང་རྫི་མ་སྐྱེད་ཅིང་མིག་ཚག་པའི་ནད་སེལ་ཏོ། །ཡང་ན་རྒྱ་སྐྱེགས་དང་། ནིར་
[341b.7]གུན་ཐི་དང་། བྲེང་ག་ར་ཛ་དང་། སྐྱེར་པ་དང་འདི་རྣམས་ཀྱི་ཁུ་བའི་ནང་དུ་རས་ཀྱི་དུམ་བུ་ཞག་བདུན་གྱི་བར་དུ་སྦངས་ཏེ། དེ་ནས་ཕྱུང་ལ་རས་དེ་སྡོང་བུར་བྱས་ལ་མར་མེར་བསྲེགས་ཏེ། དུད་པ་ཆགས་པའི་སྣག་ཚས་བསྐུས་ན་ཕན་ནོ། །མིག་ཆུ་སེར་གྱིས་གང་བའི་ནད་པ་ལ་
[342a]
[342a.1]དུས་རྟག་ཏུ་མིག་མཆུ་མཚོན་གྱིས་བཞར་བ་དང་། ཁྲག་དབྱུང་བ་དང་ཡང་དང་ཡང་བཀྲུ་སྨན་བསྟེན་པར་བྱའོ། །མིག་ཚག་པ་ཞེས་བྱ་བའི་མིག་ནད་ཆུ་སེར་རྣག་ཏུ་འཛག་པ་སྦྱོར་བ་དེ་དག་གིས་ཞི་བར་མ་འདོད་ན་ནི་མིག་ཐུར་ཕྲ་མོ་མེ་ལ་བསྲེགས་པས་བསྲུང་ངོ་། །དེ་
[342a.2]ལྟར་མིག་ནད་དགུ་བཅུ་རྩ་བཞི་པོ་དེ་དག་གི་རྒྱུ་དང་མཚན་ཉིད་དང་གསོ་བ་གཅིག་ལ་གཅིག་མ་འདྲེས་པར་ཐམས་ཅད་བཤད་པ་ཡིན་ནོ། །དེ་ལ་སྐྱེས་བུ་རྣམས་ཀྱི་མིག་ལ་ནད་མེད་ཅིང་ཐ་མལ་པར་འདུག་པ་ཡིན་ན་ཡང་མིག་ལ་གཅེས་པར་འཛིན་པ་རྣམས་ཀྱིས་ནི་དུས་ཐམས་ཅད་དུ་ནས་དང་། གྲོ་
[342a.3]དང་། འབྲས་དྲུག་ཅུ་པ་དང་། ཁྲེ་རྒོད་དང་། མོན་སྲན་སྡེའུ་ལ་སོགས་པ་དེ་དག་ཀྱང་རྙིང་པ་དང་གང་ཡང་བད་ཀན་དང་། མཁྲིས་པ་འཇོམས་པའི་སྨན་ཞུན་མར་མང་དུ་བཏབ་པའི་ཟས་དང་། ཚོད་མ་ཡང་དེ་བཞིན་དུ་ཆོ་ག་བཞིན་དུ་བྱའོ། །བྱ་ན་ཡང་སྲོག་ཆགས་ཐང་ལ་གནས་
[342a.4]པའི་ཤ་དང་། སེའུ་འབྲུ་དང་། ཁ་ར་དཀར་པོ་དང་། རྒྱམ་ཚ་དང་། འབྲས་བུ་གསུམ་དང་། སྦྲང་རྩི་རྣམས་བསྟེན་ནོ། །བཏུང་བར་ནི་ཆར་པའི་ཆུ་སྦྱར་རོ། །དེ་བཞིན་དུ་གདུགས་དང་། ལྷམ་དང་བཅས་ཤིང་འགྲོ་བར་བྱ་སྟེ། ཆོ་ག་ཇི་ལྟ་བ་བཞིན་དུ་ལུས་སྦྱང་བར་བྱའོ། །
[342a.5]དེ་བཞིན་དུ་ནད་མེད་པ་ཐ་མལ་པར་འདུག་པ་རྣམས་ཀྱིས་ཀྱང་འདི་དག་སྤང་བར་བྱ་སྟེ། འབྱུང་བ་རྣམས་ཀྱི་ཤུགས་མི་དགག་པ་དང་། མ་ཞུ་བའི་ཟས་ཆེར་མི་བཟའ་བ་དང་། གང་ཡང་ཟས་ཚ་བ་དང་། སྨན་ཚ་བ་དང་། ཕྱི་ས་འགག་པར་འགྱུར་བའི་ཟས་དང་། སྨན་དང་ཐམས་ཅད་
[342a.6]སྤང་བར་བྱའོ། །རྐང་པ་གཉིས་ཀྱི་དབུས་ན་རྩ་ཆེ་ཞིང་སྦོམ་པོའི་རྩ་གནས་ཏེ། དེ་ལས་མིག་ཏུ་གྱེས་པའི་རྩ་དུ་མ་ཡོད་པས་ལྷག་པར་ཡང་རྐང་པ་ལ་ཡང་བསྐུ་བ་དང་བྱུག་པ་དང་། དྲིལ་བ་ལ་སོགས་པ་བྱས་ན་མིག་ལ་ཕན་ནོ། །གལ་ཏེ་རྐང་པ་ལ་དྲི་མ་དང་། ཚ་བ་དང་། སྣད་པ་
[342a.7]ལ་སོགས་པས་གནོད་པར་གྱུར་ན་ནི་མིག་ཀྱང་མ་རུང་བར་འགྱུར་རོ། །དེ་ལྟ་བས་ན་མིག་ལ་ཕན་པར་འདོད་པ་རྣམས་ཀྱིས་རྐང་པ་བསྐུ་བ་དང་། དྲིལ་བ་དང་། བྱུག་པ་དང་། ལྷམ་གྱོན་པ་ལ་སོགས་པ་རྟག་ཏུ་བསྟེན་པར་བྱའོ། །མིག་ནད་སྣ་ཚོགས་གསོ་བའི་ལེའུ་སྟེ་བཅུ་
[342b]
[342b.1]དྲུག་པ་རྫོགས་སོ།། །།དེ་ནས་རྣ་བའི་ནད་གཞི་ཤེས་པར་བྱ་བའི་ལེའུ་བཤད་པར་བྱ་སྟེ། དེ་ལ་རླུང་ལས་གྱུར་པའི་རྣ་བའི་ནད་ཀྱི་མཚན་མ་ནི་ཆམ་པས་བཏབ་པ་སྟེ་གསོ་བ་མ་བྱས་པ་དང་། ཆུ་ལ་རྐྱལ་ནས་རྣ་བའི་ནང་དུ་ཆུ་ཞུགས་ཏེ་ལེགས་པར་མ་ཕྱིན་པ་དང་། རྣ་བ་གཡའ་
[342b.2]སྟེ་བྲུད་པ་ལས་བྲུད་ཉེས་ཏེ། རླུང་འཁྲུགས་ནས་ནད་དུ་གྱུར་པ་དང་། གཞན་ཡང་རྣ་བ་འཁྲུགས་པར་གྱུར་པའི་རྒྱུ་བཟའ་བ་དང་། སྤྱོད་ལམ་ལོག་པར་བསྟེན་པ་དང་། སྒྲ་མི་སྙན་པས་རྣ་བའི་ཐོས་པར་བྱེད་པའི་རྩ་སྦུབས་ཀྱི་ནང་དུ་རླུང་ཞུགས་ཏེ། ཤིན་ཏུ་ཟུག་ཅིང་ཤུགས་དྲག་
[342b.3]པར་ན་བ་དང་། ཀླད་པའི་ཕྱེད་ན་ཞིང་རེངས་པར་བྱེད་པ་དང་། གྲང་ཞིང་བསིལ་བ་ལ་མངོན་པར་མི་དགའ་བ་དང་། གལ་ཏེ་ནད་དེ་སྨིན་ན་ཡང་ཡུན་རིང་ནས་གཟོད་སྨིན་ལ། ཆུ་སེར་སླ་མོ་ཅུང་ཟད་འཛག་པ་དང་། གློ་བུར་དུ་རྣ་བ་སྟོང་པ་སྙམ་དུ་སེམས་པ་དང་། རྣ་བའི་ནང་རེས་ཞུམ་
[342b.4]པར་འགྱུར་ཞིང་རེས་ཡངས་པར་འགྱུར་བ་ཡིན་ན། །མཁྲིས་པ་ལས་གྱུར་པའི་རྣ་བའི་ནད་ཀྱི་མཚན་མ་ནི་ན་ཞིང་ཚ་བ་དང་བཅས་པ་དང་། གྲང་བ་འདོད་པ་དང་། སྐྲང་པ་དང་། རིམས་ཀྱིས་འདེབས་པ་དང་། མྱུར་དུ་སྨིན་ཅིང་རྣགས་པ་དང་། རབ་ཏུ་སྨིན་ནས་ཀྱང་རང་གི་མདོག་
[342b.5]ཆུ་སེར་སེར་པོར་འཛག་པ་དང་། གང་དང་གང་དུ་ཆུ་སེར་དེས་རེག་པ་དེ་དང་དེར་སྨིན་ཅིང་རྣག་པར་འགྱུར་རོ། །བད་ཀན་ལས་གྱུར་པའི་རྣ་བའི་ནད་ཀྱི་རྟགས་ནི་མྱུར་དུ་སྨིན་པ་དང་། འགྲམ་པ་དང་། མགྲིན་པ་ལྕི་བ་དང་། ཟུག་གཟེར་མི་དྲག་པ་དང་། གཡའ་བ་དང་། སྐྲང་
[342b.6]པ་དང་། དྲོ་བག་འདོད་པ་དང་། སྨིན་ནས་ནི་དཀར་བ་དང་། སྐ་བ་འཛག་པར་འགྱུར་བ་ཡིན་ནོ། །གློ་བུར་དུ་སྣད་པ་ལ་སོགས་པས་ཁྲག་འཁྲུགས་པའི་རྣ་བའི་ནད་ཀྱི་མཚན་མ་ནི་རྣ་བ་ཤིན་ཏུ་ཟུག་ཅིང་ན་སྟེ། ཁྲག་འཁྲུགས་པ་དེ་ཡང་མཁྲིས་པ་དང་ལྷན་ཅིག་འཁྲུགས་
[342b.7]ཤིང་ན་སྟེ། དེ་ཡང་མཁྲིས་པའི་མཚན་ཉིད་ཅུང་ཟད་ཙམ་དང་ལྡན་པའམ། ཡང་ན་ཤས་ཆེ་བ་དང་ལྡན་པ་ཡིན་ནོ། །འདུས་པ་ལས་གྱུར་པའི་རྣ་བའི་ནད་ཀྱི་མཚན་མ་ནི་གཟེར་བ་དང་། སྐྲང་བ་དང་། རིམས་ཀྱིས་འདེབས་པ་དང་། མི་བཟད་པར་ན་བ་དང་། གྲང་
[343a]
[343a.1]བ་དང་། དྲོ་བ་རེས་ཀྱིས་འདོད་པ་དང་། རྣ་བས་སྒྲ་མི་ཐོས་པ་དང་། ནད་སྨིན་ནས་ནི་རྣག་དང་ཆུ་སེར་དཀར་བ་དང་། གནག་པ་དང་། དམར་བ་དང་། སྐ་བ་རེས་ཀྱིས་འཛག་པ་ཡིན་ནོ། །རྣ་བའི་ནང་གི་རྩ་སྒྲ་ཐོས་པར་བྱེད་པའི་རྩ་རྒྱུན་ཡོད་དེ།
[343a.2]དེར་རླུང་ཞུགས་ནས་རྒྱུ་མེད་པར་སྒྲ་སྣ་ཚོགས་ཡང་ནས་ཡང་དུ་ཐོས་པ་དེ་ནི་རླུང་ནད་སྒྲ་ཅན་ཞེས་བྱ་བའོ། །ཞེས་དྲང་སྲོང་རྣམས་ཀྱིས་བཤད་དོ། །བད་ཀན་དང་རླུང་ལྡན་པ་ལས་གྱུར་པའི་རྣ་བའི་ནད་གསོ་བ་མ་བྱས་ཏེ་ཡལ་བར་བོར་བ་ལས་ནི་ཐོག་མར་སྐད་གསང་མཐོན་པོས་
[343a.3]སྨྲས་ན་ཐོས་པར་འགྱུར་ཏེ། དེའི་འོག་ཏུ་རིམ་གྱིས་འོན་པར་འགྱུར་རོ། །རླུང་གིས་བད་ཀན་བསྐམས་ཏེ་རྣ་བའི་རྒྱུན་སྲང་བཀག་པ་ལས་ན་བ་ཡིན་ཏེ། དེ་ནི་པྲ་ཏེ་ཧ་ན་ཞེས་བྱ་བའི་རྣ་བའི་ནད་དུ་བཤད་དོ། །བད་ཀན་རྣ་བ་ལ་བརྟེན་པར་གྱུར་ན་རྣ་བ་གཡའ་བ་དང་། སྐྲང་
[343a.4]པར་འགྱུར་བ་ནི་སྐྲང་པ་དང་གཡའ་བའི་རྣ་བའི་ནད་ཅེས་བྱའོ། །མཁྲིས་པས་བད་ཀན་ཚོས་པར་བྱས་ཏེ་ནད་དང་བཅས་པའམ། ནད་མེད་ཀྱང་རུང་སྟེ་རྣག་སྐ་བ་མང་དུ་འཛག་པ་ནི་རྣ་ནད་རྣགས་པ་ཞེས་བྱའོ། །རླུང་ལ་སོགས་པའི་ཉེས་པས་རྣ་བའི་ཤ་དང་ཁྲག་རུལ་པར་བྱས་
[343a.5]ནས། དེ་ལས་སྲིན་བུ་སྐྱེས་ཏེ་དེས་ཟོས་པ་ལས་མི་འཛག་པར་ན་བ་དེ་ནི་རྣ་བའི་ནད་སྲིན་བུ་ཅན་ཞེས་བྱའོ། །རྣ་བའི་ནད་གཡའ་ཞིང་ཕྲུགས་པ་ལས་རྨ་འབྱུང་སྟེ་འབྲས་བུར་གྱུར་པ་ནི་གོང་དུ་ཁོང་འབྲས་ཀྱི་མཚན་ཉིད་ཇི་ལྟ་བ་བཞིན་དུ་ཤེས་པར་བྱའོ། །དེ་བཞིན་དུ་རྣ་བ་སྐྲང་
[343a.6]པ་ལ་གསོ་བ་མ་བྱས་ཏེ་ཡལ་བར་བོར་ན། ནད་གཞི་ཇི་ལྟ་བ་བཞིན་དུ་ཐོར་བུ་དང་འབྲུམ་བུ་འབྱུང་སྟེ། དེ་ཡང་རབ་ཏུ་ན་བ་དང་། རྣག་གིས་གང་བ་དང་། འོན་པར་འགྱུར་རོ། །མའི་མངལ་དུ་རླུང་གིས་རྣ་བ་བསྐུམས་ཏེ་བསྡུས་པ་ནི། རྣ་ནད་ཞུམ་པ་ཞེས་བྱའོ། །ཡང་ན་མའི་
[343a.7]མངལ་གྱི་ནང་དུ་རྣ་བ་ཤའི་ཐོར་བུ་ཤིན་ཏུ་སྲ་བ་གཅིག་གམ་མང་དུ་ཡང་རུང་སྟེ། པི་པི་ལིང་གི་ཚད་ཙམ་འབྱུང་བ་དེ་ནི་རྣ་ནད་པི་པི་ལིང་ལྟ་བུ་ཞེས་བྱའོ། །འདུས་པ་ལས་གྱུར་པའི་རྣ་བའི་ནད་ནི་ནད་གཞི་རང་དང་མཐུན་པའི་མདོག་ཏུ་སྣང་ཞིང་རབ་ཏུ་ན་བ་དང་། རེངས་པ་དང་། སྐྲང་
[343b]
[343b.1]པར་འགྱུར་ཏེ་དེ་ལ་ཡལ་བར་བོར་ཏེ་གསོ་བ་མ་བྱས་པ་ལས་ནི་ནད་སྨིན་ཏེ་འཛག་པ་ཡང་ཡུངས་མར་ལྟ་བུར་འབྱུང་ཞིང་རྨ་འཚོ་དཀའ་བའམ། རྨ་འདྲུབ་ན་ཡང་ངེས་པར་རྣ་དྲུང་འཁུམས་ཤིང་ཞུམ་པར་འགྱུར་ཏེ། དེའི་མིང་ནི་རྣ་ནད་བིད་རི་ཀ་ཞེས་བྱའོ། །རྣ་བའི་རྩའི་ནང་དུ་རླུང་ནད་ཞུགས་ཏེ།
[343b.2]རྣ་བའི་དྲུང་སྐེམ་པ་ཡོད་དེ། དེའི་མིང་ནི་རྣ་དྲུང་གི་ནད་སྐེམ་བྱེད་ཅེས་བྱའོ། །རྣ་ཤལ་རླུང་གིས་བསྐམས་ཏེ་སྲབ་མོར་སོང་ཞིང་པི་ཝང་གི་རྒྱུད་བཞིན་དུ་ཐང་ཆད་པ་ནི་རྣ་ཤལ་གྱི་ནད་རྒྱུད་ཅན་ཞེས་བྱའོ། །སྐྱིད་པ་འམ་སྡུག་མ་མྱོང་བའི་རྣ་ཤལ་ཕུག་སྟེ་སྐྲངས་པ་ལས་མ་གསོས་ན་དེ་མ་ཐག་
[343b.3]ཤས་ཆེར་སྐྲང་ཞིང་འཕེལ་བར་འགྱུར་བ་དང་། ནད་དང་བཅས་པ་དང་། མེ་ཏོག་པ་རི་པོ་ཊ་ལྟར་རྩ་དམར་བ་ཡིན་ཏེ། དེ་ནི་པ་རི་བོ་ཊ་ན་ཞེས་བྱ་བའི་རྣ་ཤལ་གྱི་ནད་ཅེས་བྱའོ། །རྣ་ཆ་ཤིན་ཏུ་ལྕི་བས་རྣ་བ་གྲང་སྟེ་ཁྲག་དང་མཁྲིས་པ་སྐྱེད་དེ་མདོག་དམར་བ་དང་། སྔོ་བསངས་
[343b.4]སུ་འདུག་པ་དང་། ན་བ་དང་། ཚ་འུར་འུར་པོ་དང་། མྱུར་དུ་སྨིན་པ་དང་། སྐྲང་པ་དང་། འབྲུམ་བུ་དང་། འབྲུམ་བུ་ཕྲ་མོ་དང་། རྣག་དང་ལྡན་པ་དེ་ནི་ཨུད་པ་ད་ཞེས་བྱ་བའི་རྣ་བའི་ནད་ཡིན་ནོ། །རླུང་དང་བད་ཀན་ལས་གྱུར་པའི་རྣ་ཤལ་གྱི་ནད་ཀྱི་རྟགས་ནི་སྐྲང་ཞིང་ནད་
[343b.5]མེད་པ་དང་། སྲ་ཞིང་གྱོང་བ་དང་། ནད་གཞི་རང་གི་མདོག་ཏུ་སྣང་བ་དེ་ནི་ཨུ་མན་ཐ་ཞེས་བྱ་བའི་རྣ་ཤལ་གྱི་ནད་ཅེས་བྱའོ། །རྣ་ཤལ་ཕུག་ཉེས་ཏེ་བརྒྱངས་པ་ལས་འདུས་པའི་ནད་འབྱུང་སྟེ་དེ་ཡང་གཡའ་བ་དང་། ཚ་བ་དང་། སྐྲང་བ་དང་། མྱུར་དུ་སྨིན་པ་དེ་ནི་སྡུག་བསྔལ་
[343b.6]སྐྱེད་པ་ཞེས་བྱ་བའི་རྣ་ཤལ་གྱི་ནད་ཅེས་བྱའོ། །དེ་ལྟར་རྣ་ཤལ་གྱི་ནད་དེ་གསོ་བ་མ་བྱས་ཏེ། ཡལ་བར་བོར་ན་ནི་བད་ཀན་དང་ཁྲག་ལས་གྱུར་བའི་འབྲུམ་བུ་ཕྲ་མོ་འབྱུང་ཞིང་དེ་ཡང་རྣགས་པ་དང་། གཡའ་བ་དང་། ནད་དང་བཅས་ཏེ་སྲོག་ཆགས་ཕྲ་མོ་སྐྱེ་ཞིང་རྣག་ལྡག་
[343b.7]ཅིང་བཟའ་བ་ཡིན་ཏེ། དེ་ནི་རྣ་ཤལ་གྱི་ནང་སྲོག་ཆགས་ཕྲ་མོས་ཟོས་པའི་རྣ་ནད་ཅེས་བྱའོ། །དེ་ལྟར་རྣ་བའི་ནད་ཀྱི་བྱེ་བྲག་ཉི་ཤུ་རྩ་ལྔ་བཤད་པ་ལས་འདུས་པ་ལས་གྱུར་པའི་རྣ་བའི་ནད་པི་པི་ལིང་ལྟ་བུ་ཞེས་བྱ་བ་དང་། བི་ད་རི་ཞེས་བྱ་བ་དང་། འཁུམས་ཤིང་ཞུམ་པ་ཞེས་
[344a]
[344a.1]བྱ་བ་དང་། བཞི་པོ་འདི་དག་ནི་གསོར་མི་རུང་ངོ་། །པི་ཝང་གི་རྒྱུད་ལྟ་བུ་ཞེས་བྱ་བའི་རྣ་ནད་ནི་མི་ལ་བ་ཙམ་དུ་གསོར་རུང་ངོ་། །ལྷག་མ་རྣམས་ནི་ཅི་རིགས་པར་སྨན་གྱིས་གསོ་བར་བྱའོ། །རྣ་ནད་ཀྱི་དམིགས་བརྟགས་པའི་ལེའུ་སྟེ་བཅུ་བདུན་པ་རྫོགས་སོ།། །།
[344a.2]དེ་ནས་རྣ་བའི་ནད་གསོ་བར་བྱ་བའི་ལེའུ་བཤད་པར་བྱ་སྟེ། དེ་ལ་རླུང་ལས་གྱུར་པའི་རྣ་བའི་ནད་ལ་ནི་ཐོག་མར་ཤ་ཁུ་བླུད་ལ་དེའི་ནུབ་མོ་རླུང་འཇོམས་པའི་སྨན་དང་སྦྱར་བའི་མར་བླུད་དོ། །དེ་ནས་དུགས་བྱས་ལ་དེའི་འོག་ཏུ་ཨ་ཤྭདྠ་དང་། བིལ་བ་དང་། ཨརྐ་དང་། ཨེ་རཎྜ་
[344a.3]དང་། དེ་རྣམས་ཀྱི་འོ་མ་གང་ཡང་རུང་བའམ། ཡང་ན་ལ་ཕུག་དང་། གུ་གུལ་གང་ཡང་རུང་བ་འབྲུ་དང་། རྒྱམ་ཚྭ་དང་བསྒོས་ཏེ། ཁམ་ཕོར་ཁ་སྦྱར་གྱི་ནང་དུ་ཆོ་ག་བཞིན་དུ་བཙོས་ལ། ཚོས་པ་དང་ཕྱུང་ལ་བཙིར་བའི་ཁུ་བ་དྲོ་འཇམ་གྱིས་རྣ་བ་དགང་ངོ་། །ཡང་ན་དར་
[344a.4]བ་ལ་སོགས་པ་རླུང་འཇོམས་པའི་སྨན་གྱི་སྡེ་ཚན་དར་བ་སྐྱུར་པོ་དང་། ཞོ་ག་ཆུ་དང་། རྩབ་མོ་ལ་སོགས་པའི་སྐྱུར་དང་། བ་དང་། མ་ཧེ་ལ་སོགས་པའི་གཅིན་དང་། སྣུམ་ཆེན་པོ་བཞི་དང་། དེ་རྣམས་དང་ལྷན་ཅིག་བསྐོལ་ཏེ། མར་ལུས་པ་ལས་རྣ་བར་བླུགས་ན་རྣ་བའི་
[344a.5]ཟུག་གཟེར་ཤིན་ཏུ་མི་བཟད་པ་ཡང་སེལ་ཏོ། །ཡང་ན་རྩ་བ་ཆེན་པོ་ལྔ་གང་ཡང་རུང་བའི་ཤིང་གི་ཐོར་ཏོ་སྲོ་མའི་རས་ཀྱིས་དཀྲིས་ལ་ཏིལ་མར་གྱིས་བསྐུས་ཏེ། མེའི་ནང་དུ་བསྲེགས་པའི་སྣུམ་གྱི་ཐིགས་པ་བླུགས་ན་དེ་མ་ཐག་རྣ་བའི་ཟུག་གཟེར་འཇོམས་སོ། །ཡང་ན་ཐང་ཤིང་
[344a.6]དང་། རུ་རྟ་རྣམས་ལས་གང་ཡང་རུང་བའི་ཆོ་ག་གོང་མ་བཞིན་དུ་བྱས་ན་ཡང་ཕན་ཡོན་དེ་དང་འདྲའོ། །རླུང་ནད་དང་རླུང་གི་ཆོམ་པ་གསོ་བ་ཐམས་ཅད་ཀྱང་འདིར་བྱས་ན་ཕན་ནོ། །དེ་ལ་རླུང་གི་རྣ་ནད་ཅན་གྱིས་ཆུ་ལ་སོགས་པས་མགོ་བསྐྲུ་བ་དང་། ཆུ་གྲང་མོའི་བཏུང་བ་ཉིན་པར་
[344a.7]ཡང་སྤང་བར་བྱའོ། །མཁྲིས་པ་ལས་གྱུར་པའི་རྣ་བའི་ནད་ལ་ནི་ཁ་ར་དཀར་པོ་དང་བཅས་པའི་མར་གྱིས་སྣུམ་ཆོས་བྱས་ལ། མཁྲིས་པ་ལ་ཕན་པའི་བཀྲུ་སྨན་གཏང་ངོ་། །རྒུན་འབྲུ་དང་། ཤིང་མངར་འོ་མ་དང་ལྷན་ཅིག་བསྐོལ་ཏེ་རྣ་བར་བླུགས་ན་རབ་ཏུ་བསྔགས་སོ། །
[344b]
[344b.1]ཤིང་མངར་དང་། དཱུར་བ་དཀར་པོ་དང་། ཙནྡན་དཀར་པོ་དང་། པུ་ཤེལ་ཙི་དང་། བུང་ཆང་རྡོ་དང་། སེང་ཕྲོམ་དང་། ཛི་བ་ཀ་དང་། པདྨའི་རྩ་ལག་དང་། པདྨ་དང་། བཙོད་དང་། ཐལ་ཏྲེས་དང་། འདི་རྣམས་ཤིང་མངར་བསྐོལ་བའི་ཁུ་བ་སྲང་སུམ་ཅུ་རྩ་གཉིས་
[344b.2]དང་། དེའི་ཉིས་འགྱུར་གྱི་འོ་མ་དང་། ཏིལ་མར་སྲང་བརྒྱད་དང་དེ་རྣམས་ཚུལ་བཞིན་དུ་བསྐོལ་ཏེ། མར་ལུས་པ་ལས་རྣར་བླུགས་པ་དང་། རྣ་བར་དགང་བ་དང་། བསྐུ་བྱུག་ཏུ་སྦྱར་ན་རྣ་བའི་ཟུག་གཟེར་དང་ཚ་བ་སེལ་བར་བྱེད་དོ། །ཡང་ན་སྦྲང་རྩི་ཉི་ཚེའི་ཆོ་ག་དེ་
[344b.3]ལྟར་བྱས་ན་ཡང་ཕན་ཡོན་དེ་དང་འདྲའོ། །ཡང་ན་གོང་གི་སྦྱོར་བའི་སྨན་ཤིང་མངར་ལ་སོགས་པ་མར་དང་ལྡེ་གུར་བྱས་ཏེ། རྣ་བའི་ཕྱི་ནང་དུ་བྱུགས་ན་ཡང་ཕན་ནོ། །བད་ཀན་ལས་གྱུར་པའི་ནད་ལ་ནི་པི་པི་ལིང་མར་དང་ལྷན་ཅིག་བསྐོལ་བ་བླུགས་ལ་ཐོག་མར་སློན་སྨན་
[344b.4]བྱའོ། །གང་ཡང་བད་ཀན་ལ་ཕན་པའི་དུད་པས་བཏང་བ་དང་། སྣ་སྨན་བཏང་བ་དང་། མཁུར་བར་བཅང་བ་དང་། དུགས་བྱ་བ་ལ་སོགས་པ་ཡང་སྦྱར་རོ། །སྒོག་སྐྱ་དང་། སྒེའུ་གཤེར་དང་། ན་ལེ་ཤམ་དཀར་པོ་དང་། མུ་རང་ག་དང་། ལ་ཕུག་དང་།
[344b.5]ཆུ་ཤིང་དང་དེ་རྣམས་གང་ཡང་རུང་བའི་ཁུ་བ་དྲོ་འཇམ་ཙམ་དང་སྦྱར་བ་རྣ་བར་བླུགས་པ་ཐག་གི་ཟད་ནས་ཕྱིར་ཕོ་བ་ན་རྣ་བའི་ནད་སེལ་ཏོ། །ཡང་ན་ཨརྐའི་མྱུ་གུ་སྐྱུར་བ་གང་ཡང་རུང་བ་དང་བཏགས་ཏེ། འབྲུ་མར་དང་། རྒྱམ་ཚ་དང་ལྡན་པའི་ནང་དུ་ཤྲི་ཁཎྜའི་སྡོང་བུའི་དབུས་
[344b.6]སུ་ཕུག་སྟེ། ཨརྐའི་ལོ་མས་གཡོགས་ལ་ཁམ་ཕོར་ཁ་སྦྱར་གྱི་ནང་དུ་བཅུག་སྟེ་མེ་ལ་བཙོས་ཏེ་ཁུ་བ་བཙིར་བས་རྣ་བར་བླུགས་ན། རྣ་བའི་ཟུག་གཟེར་འཇོམས་པའི་མཆོག་ཡིན་ནོ། །ཡང་ན་མ་དུ་ལུང་ག་དང་ཀ་པིད་ཐ་གང་ཡང་རུང་བའི་ཁུ་བས་རྣ་བ་བཀང་ན་ཡང་ཕན་ནོ། །ཡང་
[344b.7]ན་ཚྭས་རྣ་བ་བཀང་ལ་རྒྱ་མཚོའི་ལྦུ་བའི་ཕྱེ་མས་གདབ་པ་བྱས་ན་ཡང་ཕན་ནོ། །ཡང་ན་ར་དང་ལུག་གི་གཅིན་དང་འོད་མའི་ཤུན་ལྤགས་ཏིལ་མར་དང་ལྷན་ཅིག་བསྐོལ་ལ་བླུགས་པ་འམ། ཡང་ན་ཡུངས་མར་ཤིང་ཀུན་དང་། གཡེར་མ་དང་། དོང་གྲ་རྣམས་ལྷན་ཅིག་བསྐོལ་
[345a]
[345a.1]ལ་བླུགས་པ་དང་། སྦྱོར་བ་དེ་དག་གང་ཡང་རུང་བ་བྱས་ན་ཡང་ཕན་ནོ། །དེ་ལ་ཁྲག་ལས་གྱུར་པའི་རྣ་བའི་ནད་ལ་ནི་མཁྲིས་པ་གསོ་བ་ཐམས་ཅད་བྱ་སྟེ། ཁྱད་པར་དུ་གཏར་ག་བྱས་ན་ཕན་ནོ། །རྣ་བའི་ཟུག་གཟེར་ནད་སྨིན་ཏེ་རྣག་འཛག་པ་ལ་ནི་དུད་པས་
[345a.2]བདུག་པ་དང་། སྨན་མཁུར་བར་བཅང་བ་དང་། སྣ་སྨན་རྣམས་སྦྱར་རོ། །དེ་བཞིན་དུ་གང་ཡང་རྨ་འཁྱིམས་པ་དང་། རེད་པའི་ཆོ་ག་ཐམས་ཅད་ཀྱང་འདིར་སྦྱར་རོ། །སྨན་གྱི་ལྡེ་གུས་རྣ་བར་བྱུགས་ལ་རས་བལ་གྱི་ཡེ་འུས་ཉིན་རེ་ལན་གཉིས་སུ་ཕྱི་ཞིང་དག་པ་དང་། གུ་གུལ་གྱི་
[345a.3]དུད་པས་བདུགས་ལ་སྦྲང་རྩིས་རྣ་བ་དགང་བར་བྱའོ། །ཡང་ན་བྱེའུ་རུག་པའི་སྡེ་ཚན་བསྐོལ་བའི་ཁུ་བ་རས་བལ་གྱི་ཡེའུ་ལས་བསྒོས་ལ་རྣ་བའི་ནང་དུ་ཆུབ་པར་བསྐུལ་ཞིང་བྱེའུ་རུག་པའི་སྡེ་ཚན་གྱི་ཕྱེ་མས་གདབ་པོ། །གང་གིས་རྣ་བ་ལ་ཟུག་གཟེར་དང་། རྣག་དང་། ལྕི་བ་
[345a.4]ཡོད་པ་དེ་ལ་སྡེ་ཚན་གྱི་ཆོ་ག་དེ་དག་གིས་ཞི་བར་བྱེད་དོ་ཞེས་དྲང་སྲོང་རྣམས་ཀྱིས་བཤད་དོ། །པྲི་ཡང་ཀུ་དང་། ཤིང་མངར་དང་། ཨམ་པསྠ་དང་། ད་ཏ་ཀི་དང་། ཨུཏྤ་ལ་དང་། འདབ་མ་རྣམ་བཞི་དང་། བཙོད་དང་། སེང་ཕྲོམ་དང་། རྒྱ་སྐྱེགས་དང་། དེ་རྣམས་
[345a.5]ཀ་པིད་ཏའི་རང་གི་ཁུ་བ་དང་། ཏིལ་མར་ལྷན་ཅིག་བསྐོལ་ཏེ་རྣ་བར་བླུགས་ན་རྣག་ཁྲག་ཟག་པ་ཞི་བར་བྱེད་དོ། །རྣ་བའི་ནད་སྒྲ་ཅན་དང་། འོན་པར་གྱུར་པ་གཉིས་ལ་ནི་ཆུ་ལས་གྱུར་པའི་རྣ་ནད་ཀྱི་གསོ་བ་ཐམས་ཅད་འདི་ལ་སྦྱར་རོ། །རྣ་བའི་ནད་སྒྲ་ཅན་དང་འོན་པ་གཉིས་བད་
[345a.6]ཀན་དང་བཅས་པ་ཡིན་ན་ནི་དང་པོ་སློན་ལ་སོགས་པས་བད་ཀན་སྦྱངས་ལ་དེའི་འོག་ཏུ་ཨེ་རཎྜ་དང་། ཤི་ཀྲུ་དང་། ལ་ཕུག་གཞོན་ནུ་དང་། དེ་རྣམས་ཀྱི་ལོ་མ་བསྐོལ་བའི་ཁུ་བ་དང་། དེའི་བཞི་འགྱུར་གྱི་ཏིལ་མར་དང་། དེའི་བརྒྱད་འགྱུར་གྱི་འོ་མ་དང་། ཤིང་མངར་དང་།
[345a.7]ར་མཉེ་བའི་ཕྱེ་མ་དང་དེ་རྣམས་ལྷན་ཅིག་བསྐོལ་ཏེ་མར་ལུས་པ་ལས་རྣར་བླུགས་པ་དང་། བསྐུ་བྱུག་དང་། རྣ་བ་བཀང་བ་ལ་སོགས་པ་བྱས་ན་རྣ་བ་སྒྲ་དང་བཅས་པ་དང་། འོན་པ་དང་། ཟུག་གཟེར་རྣམས་ངེས་པར་འཇོམས་སོ། །ཡང་ན་བོང་ང་དཀར་པོ་དང་། ཤིང་
[345b]
[345b.1]ཀུན་དང་། ཤུ་ཏི་དང་། སྐྱེར་པའི་ཤུན་པ་དང་། སྭ་རྫི་ཀའི་ཐལ་བ་དང་། ཚ་བ་གསུམ་དང་། ཏིལ་མར་དང་། ཏིལ་མར་གྱི་བཞི་འགྱུར་གྱི་ཚྭ་དང་དེ་རྣམས་ལྷན་ཅིག་བསྐོལ་ཏེ་མར་འབའ་ཞིག་ལུས་པ་ལས་རྣ་བར་བླུགས་ན་རྣ་བ་ཟུག་པ་དང་། ཆུ་སེར་འཛག་པ་དང་། རྣ་བ་འོན་
[345b.2]པ་དང་། སྒྲ་དང་བཅས་པ་སེལ་ཏོ། །རྣ་བ་སྒྲ་ཟ་ཟི་ཟེར་བ་ལ་ནི་ཡུངས་མར་གྱིས་རྣ་བ་བཀང་ན་ཕན་ནོ། །ལ་ཕུག་སྐམ་པོ་དང་། བཅའ་སྒ་བསྲེགས་པའི་ཐལ་བ་དང་། ཤིང་ཀུན་དང་། བཅའ་སྒ་དང་། ཤུ་ཏི་དང་། ཤུ་དག་དང་། རུ་རྟ་དང་། སྐྱེར་པ་དང་། ཤི་
[345b.3]ཀྲུ་དང་། སྐྱེར་ཁཎྜ་དང་། ཁ་རུ་ཚ་དང་། ཡ་བཀྵ་ར་དང་། སརྫི་ཀའི་ཐལ་བ་དང་། ལན་ཚྭ་ཁྲོལ་བུ་དང་། རྒྱམ་ཚ་དང་། གྲོ་བའི་དུད་པ་དང་། རྩལ་རུ་ཚ་དང་། གླ་སྒང་དང་། དེ་རྣམས་ཏིལ་མར་དང་། དེའི་བཞི་འགྱུར་གྱི་དགུན་ཚྭ་དང་། ཁ་ལུང་གི་ཁུ་བ་ཚ་
[345b.4]དང་མཉམ་པ་དང་དེ་དང་མཉམ་པའི་ཆུ་ཤིང་གི་ཁུ་བ་དང་ལྷན་ཅིག་བསྐོལ་ཏེ་མར་ལུས་པ་ལས་རྣ་བར་བླུགས་པ་བྱས་ན་རྣ་བ་གཡའ་བ་དང་། སྒྲ་དང་བཅས་པ་དང་། རྣ་བ་འོན་པ་དང་། རྣ་བ་འཛག་པ་དང་། ཟུག་གཟེར་ཆེ་བ་དང་། སྲིན་བུ་ཡོད་པ་དེ་རྣམས་གསོ་
[345b.5]དཀའ་བ་ཡང་ཐལ་སྨན་གྱི་ཏིལ་མར་ཞེས་བྱ་བ་འདིས་མྱུར་དུ་འཇོམས་པར་བྱའོ། །མཆོག་ཏུ་ཁ་དང་སོའི་ནད་ལ་བསྔགས་ཏེ། རྣ་བ་ཕུག་སྟེ་ཚོར་བ་མེད་པ་ལ་ནི་རྣ་བའི་ཉེ་འཁོར་ལས་གཏར་ག་བྱའོ། །རྣ་བ་སྐྲང་ཞིང་རྣག་དང་བཅས་ཏེ་གསལ་པོར་མི་ཐོས་པ་ལ་ནི་སྐྱུག་སྨན་
[345b.6]བྱས་ན་ཕན་ནོ། །བྱིས་པ་དང་རྒན་པོ་འོན་ཏེ་ལོ་གྲངས་དུ་མ་ལོན་པ་ལ་ནི་སྤང་བར་བྱའོ། །རྣ་བ་ཐོག་མ་སྨིན་ཅིང་འཇམ་པར་བྱ་བའི་ཕྱིར་སྣུམ་དང་དུགས་རེས་ཀྱིས་བྱ་སྟེ། དེའི་འོག་ཏུ་རས་ཀྱིས་རྣ་བའི་ནད་དག་པར་བྱའོ། །དེ་ནས་འབྲུ་མར་གྱིས་རྣ་བ་གང་བར་བྱས་ན་ཕན་ནོ། །
[345b.7]སྦྱོར་བ་དེ་དག་ནི་རྣ་སྤབས་ཀྱིས་གང་བ་དང་། བད་ཀན་ཅན་ལ་སྦྱར་བ་ཡིན་ནོ། །རྣ་བ་སྐྲང་བ་ནི་རྣར་བླུགས་པའི་སྨན་དང་། མཁུར་བར་བཅང་བ་དང་། དུ་བ་བརྔུབ་པ་དང་། གང་ཡང་བད་ཀན་འཇོམས་པའི་སྨན་ཚ་བ་དང་། དྲོ་བའི་བྱུག་པ་ལ་སོགས་པ་ཐམས་
[346a]
[346a.1]ཅད་བྱས་ན་ཕན་ནོ། །རྣ་བ་རྣག་འཛག་པ་དང་། སྲིན་བུ་ཅན་གཉིས་ལ་ནི་རྣ་བ་རྣག་འཛག་པའི་སྦྱོར་བ་ཐམས་ཅད་སྦྱར་རོ། །རྣ་ནད་སྲིན་བུ་ཅན་གཉིས་ལ་ནི་ཁྱད་པར་དུ་ཡུངས་མར་ཚ་བས་བླུགས་ན་ཕན་ནོ། །རྣ་བའི་ནང་ནས་
[346a.2]འབྲས་བྱུང་བ་ལ་ནི་དང་པོ་སློན་བྱས་ལ། དེའི་འོག་ཏུ་གསོ་བ་ནི་ཁོང་འབྲས་ཀྱི་གསོ་བ་ཇི་ལྟ་བ་བཞིན་དུ་མཁྲིས་པའི་རྣ་ནད་ཀྱི་གསོ་བ་ཡང་དེ་དང་སྦྱར་རོ། །རྣ་བའི་ནད་ཐོར་བུ་དང་འབྲུམ་བུ་བྱུང་བ་ལ་ནི་སྣའི་འབྲུམ་བུའི་གསོ་བ་ཐམས་ཅད་བྱའོ། །རྣ་ནད་བི་ད་རི་ཀ་ཞེས་བྱ་བ་དེ་
[346a.3]སྨིན་ཀྱང་རུང་མ་སྨིན་ཀྱང་རུང་སྟེ་ནད་གཞི་ཇི་ལྟ་བ་བཞིན་དུ་བརྟགས་ཏེ་རྣ་བའི་འབྲས་ནད་ཀྱི་གསོ་བ་ཡང་ཐམས་ཅད་བྱའོ། །རྣ་ཤལ་སྐམ་པའི་ནད་ལ་ནི་རླུང་གི་ནད་ཀྱི་གསོ་བ་ཇི་ལྟ་བ་བཞིན་དུ་རྣར་བླུགས་པ་དང་། བྱུག་པ་ལ་སོགས་པ་ཅི་རིགས་སུ་སྦྱར་རོ། །དེ་ལྟར་བྱས་
[346a.4]ལ་ལེགས་པར་ཞེན་པ་དང་། རྣ་ཤལ་ཏིལ་མར་གྱིས་བསྐུས་ལ། པི་ཡ་ལའི་ས་བོན་དང་། ཤིང་མངར་དང་། ཨ་ཤྭ་གན་དྷ་དང་། ནས་དང་དེ་རྣམས་ཀྱི་རྣ་དྲུང་དང་། རྣ་ཤལ་ལ་བསྐུ་ཞིང་དྲིལ་ལོ། །དེའི་འོག་ཏུ་ཤ་རྒྱས་ཤིང་འཕེལ་བར་བྱ་བའི་ཕྱིར་
[346a.5]བསྐུ་བྱུག་རྟག་ཏུ་བྱའོ། །ཉེའུ་ཤིང་དང་། ཨ་ཤྭ་གན་དྷ་དང་། པ་ཡ་སྱ་དང་། ཨེ་རཎྜ་དང་། ཛི་བ་ཀ་དང་དེ་རྣམས་འབྲུ་མར་དང་འོ་མ་དང་ལྷན་ཅིག་བསྐོལ་ཏེ་མར་ལུས་པ་ལས་རན་པར་འཐུངས་ན། རྣ་བའི་རྣ་ཤལ་འཕེལ་ཞིང་རྒྱས་པར་འགྱུར་བའི་མཆོག་ཡིན་
[346a.6]ནོ། །ཡང་ན་འཚོ་བྱེད་ཀྱི་འབྲུ་མར་དང་། འོ་མ་དང་། ཡུལ་སེར་ཆེ་བ་ལ་གནས་པའི་སྲོག་ཆགས་ཀྱི་ཤ་བསྐོལ་བས་བསྐུས་ན་རྣ་དྲུད་རྣ་ཤལ་ཤ་སྐྱེ་བར་འགྱུར་བའི་མཆོག་ཡིན་ནོ། །རྣ་ཆ་ལྕི་བས་བུ་ག་འོལ་དུ་ཆ་བ་ལ་ནི་མཚོན་གྱིས་བཅད་དེ་རྨ་སྦྱར་ལ་ཡང་ཤ་སྐྱེ་
[346a.7]བའི་གསོ་བ་བྱའོ། །པི་ཝང་གི་རྒྱུད་ལྟ་བུའི་རྣ་ནད་ལ་ཡང་། མི་ལ་བ་ཙམ་དུ་གསོར་རུང་བའི་ཆོ་ག་བྱའོ། །མེ་ཏོག་པ་རི་པོ་ཊ་ཞེས་བྱ་བའི་རྣ་ནད་ཀྱི་གསོ་བ་ཡང་དེ་ལྟར་བྱའོ། །ཨུཏྤ་ད་ཞེས་བྱ་བའི་རྣ་བའི་ནད་ལ་ནི་སྲིན་བུ་པད་པས་ཁྲག་འཇིབ་ཏུ་གཞུག་ཅིང་བསིལ་བའི་ནུས་པ་
[346b]
[346b.1]དང་ལྡན་པའི་སྨན་གྱིས་བྱུག་པར་བྱའོ། །ཤིང་འཛམ་བུ་དང་། ཨ་མྲའི་ལོ་མ་དང་། བ་བླ་དང་། ཤིང་མངར་དང་། སེང་ཕྲོམ་དང་། ཏིལ་དང་། བཙོད་དང་། ཨུཏྤ་ལ་དང་། ཀ་ཏམ་པ་དང་། ཐལ་ཏྲེས་དང་། དེ་རྣམས་ཏིལ་མར་དང་། ཏིལ་མར་གྱི་བཞི་འགྱུར་གྱི་
[346b.2]རྩབས་སྐྱུར་པོ་དང་ལྷན་ཅིག་བསྐོལ་ཏེ་མར་ལུས་པ་ལས་བསྐུ་བྱུག་བྱ་བའམ། ཡང་ན་མེ་དབལ་གསོ་བའི་སྐབས་ནས་འབྱུང་བས་བསྐུ་བྱུག་བྱའོ། །ཨུན་མན་ཐ་ཞེས་བྱ་བའི་རྣ་བའི་ནད་ལ་ནི་སྲོག་ཆགས་གོ་དྷ་དང་། ཀར་ཀ་ཊ་དང་། དེ་གཉིས་ཀྱི་ཞག་དང་། ཏ་ལའི་ལོ་མ་དང་། ཨ་
[346b.3]ཤྭ་གན་དྷ་དང་། ཨརྐ་དང་། སོ་མ་ར་ཙའི་ས་བོན་དང་། རྒྱམ་ཚྭ་དང་། བྱེའུ་རུག་པ་དང་། ལང་ག་ལི་དང་། ཏིལ་མར་རྣམས་ལྷན་ཅིག་བསྐོལ་བ་ལས་མར་ལུས་པས་བསྐུ་བྱུག་དང་སྣ་སྨན་རྣོན་པོ་ཡང་གཏང་ངོ་། །རྣ་ཤལ་ཕུག་ཉེས་པའི་རྣ་བའི་ནད་ལ་ནི་ཨ་སྨན་ཏ་དང་།
[346b.4]འཛམ་བུ་དང་། ཨ་མྲ་གསུམ་གྱི་ལོ་མ་བསྐོལ་བའི་ཁུ་བ་བླུགས་པར་བྱ་སྟེ་དེའི་འོག་ཏུ་ཏིལ་མར་གྱིས་བསྐུས་ལ། ཤིང་མངར་དང་། བཙོད་དང་། པྲ་པུཎྜ་རཱི་ཀ་དང་། ཡུང་བ་དང་། འདི་རྣམས་ཞིབ་ཏུ་བཏགས་པའི་ཕྱེ་མས་གདབ་པོ། ཡང་ན་རྒྱ་སྐྱེགས་དང་། ཏིལ་
[346b.5]མར་སྦྱར་བས་བསྐུ་བྱུག་བྱས་ན་ཕན་ནོ། །སྲོག་ཆགས་སྲིན་བུས་ཟོས་པའི་རྣ་ནད་ལ་ནི་བ་ལང་གི་ལྕི་བའི་དུགས་མང་དུ་བྱས་ལ། བྱི་དང་གའི་སྙིང་པོ་བཏགས་པའི་ཕྱེ་མ་བེའུ་མང་དུ་བཙས་པའི་གཅིན་དང་སྦྱར་ཏེ་བསྐུ་བྱུག་མང་དུ་བྱའོ། །ཡང་ན་དུག་མོ་ཡུངས་དང་། ཤིང་ཨིང་
[346b.6]ཀུ་ཏ་དང་། ཀ་རཉྫའི་ས་བོན་དང་། དོང་གའི་ཤུན་པ་དང་། དེ་རྣམས་ཀྱི་ཕྱེ་མ་བ་གཅིན་དང་ལྡེ་གུར་བྱས་ཏེ་བྱུག་གོ། །ཡང་ན་སྨན་གོང་མ་དེ་ཉིད་ཀྱི་སྟེང་དུ་ནིམ་པའི་ལོ་མ་དང་། ན་ལེ་ཤམ་དང་། སྦྲང་རྩིའི་ཚིགས་མ་དང་། དེ་རྣམས་ཡུངས་མར་དང་ལྷན་ཅིག་བསྐོལ་བས་རྨ་
[346b.7]བྱུང་བ་ལ་བསྐུ་བྱུག་བྱའོ། །རྣ་བ་སྟོབས་ཀྱིས་དྲངས་ཏེ་འོལ་བ་ལ་ནི་ཐོག་མར་ལུས་དག་པར་བྱ་སྟེ། ཇི་ལྟར་སྦྱོར་བའི་ཐབས་སུ་མཚམས་སྦྱར་རོ། །རྣ་བ་འོལ་མ་ཐག་པ་ལ་ནི་ཁྲག་དག་པ་དེས་དེ་མ་ཐག་སྦྱར་ལ་དེ་ནས་སློན་ཁྲུས་ཀྱིས་ལུས་དག་པར་བྱའོ། །དེའི་འོག་ཏུ་རྣ་དྲུང་གི་སྐྲ་
[347a]
[347a.1]ཚོམས་ནས་བཅིངས་ཏེ། དེ་ནས་མཚོན་གྱིས་རྣ་ཤལ་བཅད་པ་དང་། བཞར་ལ་ཅི་རིགས་པར་མཐོན་དམན་མེད་པར་ལེགས་པར་སྦྱར་ལ། ཞུན་མར་དང་སྦྲང་རྩིས་བྱུགས་ལ་རས་བལ་གྱིས་གླན་ཏེ། སྐུད་པས་མི་དམ་མི་ལྷོད་པར་བཅིང་ངོ་། །
[347a.2]དེ་ནས་གཏར་གའི་ཆོ་ག་བཞིན་དུ་ཁྲག་དབྱུང་སྟེ། རྨ་ལ་ཕན་པའི་སྨན་གྱི་ཕྱེ་མ་ཡང་གདབ་པར་བྱའོ། །གསོ་བ་གཞན་དག་ནི་རྨ་གསོ་བའི་ཆོ་ག་ལྟར་བྱའོ། །དེ་ནས་ཞག་བདུན་ལོན་པ་དང་། འབྲུ་མར་མ་ཚོས་པས་བསྐུས་ལ་རས་བལ་གྱིས་གླན་པ་དལ་བུས་བཀྲོལ་ལོ། །དེ་ནས་
[347a.3]རྨ་འདྲུབས་ཏེ་མཐོན་དམན་མེད་ཅིང་བརྟན་ལ་སྔ་མ་ལྟར་སོར་ཆུད་ཅིང་ནད་མེད་པ་ལྟ་ན་བུ་ག་ཡང་རིམ་གྱིས་བརྒྱང་ངོ་། །ཉ་ལྕིབས་དང་། ཁ་སྲལ་ཕྲེའུ་དང་། སེར་པོ་རྣམ་གཉིས་དང་། བྲི་ཧ་ཏིའི་འབྲས་བུ་དང་། ཨ་ཤྭ་གན་དྷ་དང་། བ་ལ་དང་། ཧསྟི་པི་པི་ལིང་དང་། ཡུངས་
[347a.4]ཀར་སེར་པོ་དང་། ཀ་ཤ་ཏ་ཀི་དང་། ཨ་ཤྭ་མ་ར་དང་། རུ་ཤི་དང་། ཤིང་ལོ་མ་བདུན་པ་དང་། འདི་རྣམས་ཀྱི་རྩ་བ་དང་། ཚུད་ཙུན་དྷ་རི་ཞེས་བྱ་བ་ན་ད་མུ་ཤི་དང་། ས་ནག་པོ་དང་། སྦྲང་མའི་མཁར་དང་། བྱེའུ་དང་། ཆུ་ལས་སྐྱེས་པའི་སྲིན་བུ་པདྨའི་ཤ་དང་། སེང་ཕྲོམ་
[347a.5]དཀར་པོའི་རྩ་བ་དང་། འདི་རྣམས་ཆམ་ཆོམ་དུ་བརྡུངས་ཏེ། ཏིལ་མར་དང་། མ་ཧེའི་མར་དང་། རྟ་དང་། གླང་པོ་ཆེའི་གཅིན་དང་ཆེས་རབ་ཏུ་བསྐོལ་ཏེ་མར་ལུས་པ་ལས་རྣ་བར་བསྐུས་ན། རྣ་བའི་བུ་ག་སྐྱེད་ཅིང་འབྱོར་པའི་མཆོག་ཡིན་ནོ། །དེ་ལ་སྐྱེས་བུ་ན་ཚོད་
[347a.6]ལ་གནས་པ་གང་ཞིག་གི་རྣ་བ་ཆད་པར་གྱུར་ན་ཐོག་མར་ལུས་དག་པར་བྱས་ལ། དེའི་འོག་ཏུ་གསོ་བར་བྱ་སྟེ། རྣ་བའི་རྨ་ཅི་ཙམ་པའི་བདག་ཉིད་མཁུར་ཚོས་ཀྱི་པགས་པ་ཤིང་ཤུན་བཤུས་པ་བཞིན་དུ་བཤུས་ལ་ཤ་མ་སྣད་པར་བྱ་སྟེ། རྣ་བའི་ཕྱོགས་ཀྱི་པགས་པའི་ཟུར་མི་བཅད་པར་རྣ་བའི་
[347a.7]རྨ་ལ་བསྐུས་ཏེ། དེ་ནས་རྣ་བའི་རྨ་ལེགས་པར་བཞར་ལ་མཁུར་ཚོས་ཀྱི་པགས་པ་བཤུས་མ་ཐག་པ་གསར་པས་གླན་ཏེ། རས་སྐུད་ཕྲ་མོས་ལེགས་པར་བཙེམས་ལ་རས་ཀྱིས་དཀྲིས་ལ་གཞག་གོ། །དབུགས་བདེ་བར་འབྱུང་བར་བྱ་བའི་ཕྱིར་ཤིང་བུ་སྦུ་གུ་ཅན་གཉིས་ཀྱི་ཐམ་བུ་བཅུག་ལ་
[347b]
[347b.1]གཞུག་གོ། །དེའི་འོག་ཏུ་ཏིལ་མར་ཚོས་པས་བསྐུས་ལ། དེ་ནས་རྨ་ཤིང་དང་། ཤིང་མངར་དང་། སྟང་ཟིལ་དང་། གཞན་ཡང་གཏར་གའི་གསོ་བའི་སྨན་རྣམས་ཞིབ་ཏུ་བཏགས་པའི་ཕྱེ་མས་གདབ་པོ། །བཅིངས་པའི་སྟེང་ནས་སྦྲང་རྩི་དང་མར་སྦྱར་བས་བསྐུའོ། །ཉེ་བར་སྤྱད་
[347b.2]པ་ཐམས་ཅད་ཀྱང་ཆུ་དྲོན་པོས་བྱའོ། །གསོ་བ་གཞན་རྣམས་ནད་གཞིའི་བྱེ་བྲག་ཤེས་པར་བྱ་སྟེ། དེ་དང་མཐུན་པར་རྨ་གསར་པ་གསོ་བའི་ཆོ་ག་ཐམས་ཅད་འདིར་བྱའོ། །དེ་ལྟར་རྨ་ལེགས་པར་འདྲུབས་ནས་རྣ་བའི་ཉེ་འཁོར་གྱི་ཤ་འཕྱང་བ་དང་། ལྷག་པ་ལྟར་སྣང་ཡང་ལེགས་
[347b.3]པར་བཅད་དེ་ཡང་མཚམས་ཞིབ་ཏུ་བཙེམ་མོ། །གང་དུ་དམའ་འམ་བཤོར་བ་ལྟར་སྣང་ན་ནི་སྐྱེད་དེ། རྣ་བའི་དབྱིབས་ཅི་རིགས་པར་ལེགས་པར་སྦྱར་རོ། །རྣ་བ་དེ་མ་ཐག་གསར་དུ་ཆད་པ་ཡིན་ན་ཡང་ཆོ་ག་དེ་ལྟར་བྱའོ། །རྣ་བའི་ཐམ་བུའི་ཤིང་གཉིས་ཀྱང་མཆུའི་དྲང་ཐད་ནས་
[347b.4]རྣ་བའི་དབྱིབས་མི་ཉམས་པའི་ཕྱིར་དྲང་པོར་ལེགས་པར་གཞག་གོ། །རྣ་བའི་ནད་གསོ་བའི་ལེའུ་སྟེ་བཅོ་བརྒྱད་པ་རྫོགས་སོ།། །།དེ་ནས་སྣ་ནད་ཀྱི་དམིགས་བརྟགས་པའི་ལེའུ་བཤད་པར་བྱ་སྟེ། དེ་ལ་སྣ་ནད་ཆམ་པ་ཞེས་བྱ་བའི་རྒྱུ་ནི་ཁ་སྦུབ་ཏུ་ཉལ་བ་དང་། སྣའི་
[347b.5]ནང་དུ་རྡུལ་ཞུགས་པ་དང་། དྲག་ཏུ་སྨྲ་བ་དང་། ཉིན་པར་གཉིད་ལོག་པ་དང་། ནུབ་མོ་གཉིད་མ་ལོག་པ་དང་། གོས་ངན་པ་དང་། ཡང་ན་གོས་ལྕི་བ་གྱོན་པ་དང་། དྲོ་བའི་རྗེས་ལ་ཆུ་གྲང་འཐུང་བ་དང་། ཉལ་པོ་དང་། ལམ་གྱིས་དུབ་པའི་འོག་ཏུ་ཆུ་མང་དུ་འཐུང་བ་དང་།
[347b.6]སྐྱུག་པ་དང་། མཆི་མ་འབྱུང་བ་བཀག་པའི་རྒྱུས་རླུང་ནད་ཤས་ཆེར་འཁྲུགས་པར་འགྱུར་ཏེ། སྣ་ཆུ་འཛག་ཅིང་ཆམ་པ་སྐྱེད་པ་ཡིན་ནོ། །དེ་གསོ་བར་མ་བྱས་ན་ཀླད་པ་ཟད་པར་བྱེད་དོ། །དེ་ལ་རླུང་ལས་གྱུར་པའི་སྣ་ནད་ཆམ་པའི་མཚན་མ་ནི་གདོང་སྐེམ་པ་དང་། སྦྲིད་པ་དྲག་ཏུ་
[347b.7]འབྱུང་བ་དང་། སྣ་སུབས་ཤིང་ན་བ་དང་། སོ་དང་མུར་འགྲམ་དང་། ཀླད་པ་ན་བ་དང་། སྨིན་མའི་སྟེང་དུ་གྲོག་མ་རྒྱུ་བ་སྙམ་བྱེད་པ་དང་། སྐད་ཞེན་པ་དང་། མྱུར་དུ་མ་སྨིན་པ་དང་། སྣ་ནད་མཆིལ་མ་དང་སྣབས་བསིལ་བར་འཛག་པ་ཡིན་ནོ། །དེ་ལ་ཁྲག་དང་མཁྲིས་
[348a]
[348a.1]པ་ལས་གྱུར་པའི་མཚན་མ་ནི། སྐོམ་དད་ཆེ་བ་དང་། ལུས་ཚ་བ་དང་། སྣའི་ཕྱི་ནང་དུ་འབྲུམ་བུ་ཕྲ་མོ་འབྱུང་བ་དང་། སྣའི་རྩེ་མོ་བཙེས་པ་འདྲ་བ་དང་། མགོ་འཁོར་བ་དང་། འཛག་པ་ཡང་མདོག་དམར་བ་དང་། སེར་བ་
[348a.2]ཡང་ཡིན་ནོ། །བད་ཀན་ལས་གྱུར་པའི་སྣ་ནད་ཀྱི་མཚན་མ་ནི་ཁ་ཟས་ཡི་གར་མི་འོང་བ་དང་། དབུགས་མི་བདེ་བ་དང་། ལུས་ལྕི་བ་དང་། སྐྱུག་པ་དང་། ཁ་མངར་མི་བྲོ་བ་དང་། གཡའ་བ་དང་། སྣུམ་པ་དང་། འཛག་པ་དཀར་ཞིང་སྐ་བ་རྣམས་ཡིན་ནོ། །འདུས་པ་ལས་
[348a.3]གྱུར་པའི་སྣ་ནད་ཀྱི་མཚན་མ་ནི་ནད་ལྡང་དུབ་ཏུ་བྱེད་པ་རྣམས་ཡིན་ནོ། །ཁྲག་མ་རུང་བར་སྣའི་རྩ་སླུབས་ཀྱི་ནང་དུ་ཞུགས་ནས་ཆམ་པར་གྱུར་པའི་མཚན་མ་ནི་བྲང་གི་ནང་བེམ་བེམ་པོར་གྱུར་པ་དང་། མིག་དམར་བ་དང་། དབུགས་དྲི་མི་ཞིམ་པ་དང་། སྣ་གཡའ་བ་དང་། མཆི་མ་
[348a.4]དང་སྣ་ཆུ་འཛག་པ་དང་གཞན་ཡང་མཁྲིས་པའི་མཚན་ཉིད་ཀྱང་འདིར་ལྟའོ། །སྣ་ནད་ཆམ་པ་དེ་དག་ཀུན་ཡལ་བར་བོར་ཏེ་གསོ་བར་མ་བྱས་ན་ནི་ཤས་ཆེར་འཕེལ་བར་འགྱུར་ཏེ། གོང་དུ་བཤད་པའི་ནད་དེ་དག་པས་ཚབས་ཆེར་སྐྱེས་ནས་དབང་པོ་རྣམས་གཟིར་བར་འགྱུར་ཏེ་མེ་དྲོད་
[348a.5]ཉམས་པ་དང་། ཚ་བ་ཆེ་བ་དང་། དབུགས་མི་བདེ་བ་དང་། ལུད་པ་དང་། བྲང་དང་། རྩིབ་ལོགས་སུ་ཟུག་ཅིང་ན་བ་དང་། གློ་བུར་དུ་ནད་མང་དུ་འཁྲུག་ཅིང་ཁ་དྲི་མི་ཞིམ་ཞིང་སྐམ་པ་དང་། སྣའི་ནང་རུལ་བ་དང་། སྐེམ་པ་དང་། སྣབས་བཙིར་ན་འགག་ཅིང་མི་ཕྱིན་པ་དང་། འཛག་པ་ཡང་
[348a.6]རིལ་རིལ་པོར་རྣག་འདྲ་བར་འབྱུང་ཞིང་དེ་ཡང་དཀར་བ་དང་། གནག་པའི་མདོག་ཏུ་སྲིན་བུ་དང་བཅས་པ་འབྱུང་ཞིང་། སྲིན་བུ་དེ་ཡང་སྣུམ་ཞིང་རིང་བ་དང་དཀར་ཞིང་ཕྲ་བ་རྣམས་ཡིན་ཏེ། དེ་ཉིད་སྨིན་པའི་མཚན་མ་ནི་ལུས་ཡང་བ་དང་། སྦྲིད་པ་ཞི་བ་དང་འཛག་པ་ཡང་འཇམ་
[348a.7]ཞིང་སེར་བ་དང་། དྲི་དང་རོ་མི་ཚོར་བ་རྣམས་ཡིན་ནོ། །དེ་ལ་དུད་པ་རྣོན་པོ་བརྔུབས་པ་དང་། ཉི་མའི་འོད་ཀྱིས་ཤས་ཆེར་ཕོག་པ་དང་། སྐུད་པ་དང་རྩ་ལ་སོགས་པས་སྣད་པས་སྣའི་རྨེན་བུ་རྙི་མ་མ་རུང་བར་བྱས་པས་རླུང་འཁྲུགས་ཏེ་རྩ་སྒོ་འགགས་ཤིང་། སྣའི་སུམ་མདོར་རླུང་
[348b]
[348b.1]ཞུགས་ཏེ་དྲག་ཏུ་སྦྲིད་པ་འོང་ཞིང་སྣ་ཆུ་འཛག་པ་ཡང་ཡོད་དོ། །སྣའི་སྦུབས་སུ་འཛག་པ་རླུང་གིས་བསྐམས་ཏེ། ནང་དུ་གྲ་མས་གང་བ་སྙམ་སེམས་ཤིང་དབུགས་བདེ་བར་མི་ཕྱིན་ཏེ་འབྱུང་དཀའ་བ་དང་། སྣ་བུས་པ་བཞིན་དུ་གང་བར་འགྱུར་ཏེ། དེ་ནི་སྣ་ནད་སྐམ་པ་ཞེས་བྱའོ། །སྣའི་ནང་དུ་
[348b.2]བད་ཀན་གྱིས་རླུང་བཀག་སྟེ་རེང་བུ་སྲ་བས་གང་བ་སྙམ་སེམས་ཤིང་། དབུགས་ཀྱི་འབྱུང་རྔུབ་བཀག་ནས་རྒྱུན་སྲང་རྣམས་དོགས་པར་གྱུར་པའི་ནད་ཀྱང་ཡོད་དོ། །མཁྲིས་པས་སྣ་ནད་སྨིན་ཏེ་ཤ་དང་། པགས་པ་ཟུག་གཟེར་དང་བཅས་ཤིང་འཛག་པ་ཆུ་དང་འདྲ་བ་སླ་བར་འབྱུང་སྟེ།
[348b.3]ཁྱད་པར་དུ་ནུབ་མོ་འཛག་པ་དེ་ནི་སྣ་ནད་སྨིན་པ་འཛག་པ་ཞེས་བྱའོ། །བད་ཀན་ཤས་ཆེ་བའི་སྣ་ནད་ཀྱི་རྟགས་ནི་སྣའི་རྩ་རྒྱུན་འགགས་པ་དང་། དབུགས་སྒྲ་དང་བཅས་པར་འབྱུང་བ་དང་། སྔ་མ་བས་ཆེས་སྣ་ཆུ་འཛག་པ་དང་། ནད་སྨིན་པ་དང་། སྣ་སྦུབས་ནས་རྣག་སྐ་བ་དང་། སེར་
[348b.4]བ་མཆི་མ་འཛག་པ་བཞིན་དུ་རྒྱུན་དུ་འབྱུང་སྟེ། དེ་ཡང་སྤྱི་བག་ཏུ་འབྱུང་ཞིང་འདུག་པ་ཡིན་ནོ། །ཁྲག་མ་རུང་བའི་སྣ་ནད་སྐྱེས་པའི་རྟགས་ནི་སྣའི་ཕྱི་ནང་རབ་ཏུ་ཚ་བ་དང་། རེག་ན་མི་བཟོད་པ་དང་། དབུགས་འབྱུང་བ་ཡང་ཚ་ཞིང་དཀུ་བ་འབྱུང་བ་ཡང་ཡིན་ནོ། །རྐན་ཕུགས་སུ་
[348b.5]ནད་གཞི་འཁྲུགས་ཏེ། རླུང་དང་བད་ཀན་དང་བཅས་པའི་རྣག་སྣ་དང་ཁ་ནས་འཛག་ཅིང་འབྱུང་བར་འགྱུར་ཏེ། དེ་ནི་སྣ་ནད་རྣག་ཅན་ཞེས་བྱའོ། །འདུས་པ་ལས་གྱུར་པའམ། གློ་བུར་དུ་སྣད་པ་ལས་གྱུར་ཀྱང་རུང་། རྣག་དང་ཁྲག་སྣའི་སྒོ་ནས་འཛག་ཅིང་སྤྱི་བོ་ཚ་བ་དེ་ནི་སྣ་
[348b.6]ནད་རྣག་ཁྲག་ཅན་ཞེས་བྱའོ། །མཁྲིས་པ་དང་བད་ཀན་གྱི་རྒྱུན་སྲང་རླུང་གིས་འགགས་ཏེ། སྣ་ནང་གི་འཛག་པ་རྣམས་བསྐམས་ནས་བསྒོངས་པ་སྐམ་པོ་དེ་ནི་བད་ཀན་བསྒོངས་པ་ཞེས་བྱའོ། །སྣ་ནད་ཐོར་བུ་དང་འབྲུམ་བུ་ཅན་ཞེས་བྱ་བ་ནི། ནད་གཞི་དང་མཐུན་པའི་
[348b.7]མདོག་ཏུ་སྣང་བའི་འབྲུམ་བུ་འབྱུང་ལ། དེ་ཐམས་ཅད་དབུགས་འབྱུང་དཀའ་ཞིང་སྣ་ཆུ་འཛག་པ་དང་། སྦྲིད་པ་རྟག་ཏུ་འབྱུང་བ་དང་། སྣ་སྐད་དུ་སུབས་པར་སྨྲ་བ་དང་། རྣག་འཛག་པ་དང་ཀླད་པ་ན་བ་རྣམས་ཡིན་ནོ། །དེ་རྣམས་ནི་རྣམ་པ་བཅོ་བརྒྱད་དེ། དེ་ལས་གང་
[349a]
[349a.1]ཡང་རུང་བའི་གསོ་བ་མ་བྱས་ན་ནི་ནད་འཕེལ་ཞིང་ཐུ་བར་འགྱུར་རོ། །སྣ་ནད་ཀྱི་དམིགས་བརྟག་པའི་ལེའུ་སྟེ་བཅུ་དགུ་པ་རྫོགས་སོ།། །།དེ་ནས་སྣ་ནད་གསོ་བའི་ལེའུ་བཤད་པར་བྱ་སྟེ། དེ་ལ་སྣ་ནད་ཆམ་བ་ཐམས་ཅད་ལ། ཐོག་མར་ནད་པ་རླུང་མེད་པའི་
[349a.2]ཁང་པར་བཞག་སྟེ། སྣུམ་ཆོས་དང་། དུགས་དང་། སློན་དང་། དུ་བ་བརྔུབ་པ་དང་། མཁུར་བར་བཅང་བ་དེ་རྣམས་བསྟེན་ལ། གོས་ཀྱང་ལྕི་ཞིང་དྲོ་བ་དང་། མགོ་ལ་ཐོད་ཆེན་པོ་བཅིང་བ་དང་། ཁ་ཟས་ཡང་བ་དང་། སྐྱུར་བ་དང་། ལན་ཚྭ་དང་། སྣུམ་པ་དང་། དྲོ་
[349a.3]བག་དང་། མི་སླ་བ་དང་། སྐམ་སའི་ཤ་དང་། བུ་རམ་དང་། འོ་མ་དང་། མོན་སྲན་ཙ་ན་ཀ་དང་། ཞོ་དང་སེའུ་འབྲུ་དང་། ཚ་བ་གསུམ་ཤས་ཆེ་བའི་གཡོས་སུ་སྦྱར་བ་དང་། ནས་དང་། གྲོ་ཤས་ཆེ་བའི་གཡོས་ཁ་ཟས་དང་། ལ་ཕུག་གཞོན་ནུ་དང་། རྒྱ་སྲན་ཀུ་ལངྠའི་
[349a.4]ཁུ་བཅུད་ཀྱང་རབ་ཏུ་བསྔགས་སོ། །རྩ་བ་བཅུ་པ་བསྐོལ་བའི་ཁུ་བ་དྲོ་འཇམ་ཙམ་མམ། ཆང་རྙིང་པ་བཏུང་བར་བླུད་དོ། །ཙ་རོང་དང་། ཨགྣི་མནྠ་དང་། ཤུ་དག་དང་། ཟི་ར་དང་། ཟི་ར་ནག་པོ་དང་། དེ་རྣམས་ཀྱི་ཕྱེ་མ་དང་སྣུམ་སྦྱར་བར་བྱའོ། །ཚ་བ་གསུམ་དང་། བལ་བུའི་
[349a.5]ལོ་མ་དང་། དབྱི་མོ་དང་། ད་ཏྲིག་དང་། སྟར་བུ་དང་། ཙི་ཏྲ་ཀ་དང་། ཟི་ར་དང་། དེ་རྣམས་སྲང་གཉིས་གཉིས་དང་། ཤིང་ཚ་དང་། སུག་སྨེལ་དང་། གན་དྷ་བྷ་དྲ་དེ་དག་སྲང་ཕྱེད་ཕྱེད་དང་། བུ་རམ་རྙིང་པ་སྲང་ལྔ་བཅུ་དང་ཚུལ་བཞིན་དུ་བསྐོལ་ཏེ་རི་ལུར་བྱས་པ་ཟོས་ན་སྣ་ནད་ཆམ་པ་
[349a.6]དང་། དབུགས་མི་བདེ་བ་དང་། ལུད་པ་ལུ་བ་རྣམས་འཇོམས་ཏེ། ཡི་ག་འབྱེ་བ་དང་། སྐད་སྙན་པར་བྱེད་པའི་མཆོག་ཡིན་ནོ། །ཤུ་ཏིའི་ཤུན་པ་དང་། བ་ལ་དང་། སོ་ན་ཀ་དང་། ཨེ་རཎྜ་དང་། བིལ་བ་དང་། དོང་ག་དེ་རྣམས་ཀྱི་རྩ་བ་དང་། ཞག་དང་མར་དང་
[349a.7]སྤྲ་ཚིལ་དང་སྦྱར་བའི་དུད་པས་བདུགས་པའམ། ཡང་ན་ཁམ་ཕོར་ཁ་སྦྱར་ཆུང་ངུའི་ནང་དུ་མར་དང་ཕྱེ་བསྲེས་པ་བཅུག་ལ་བསྲེགས་པའི་དུད་པས་བདུགས་ན་ཕན་ནོ། །སྣ་ནད་ཅན་གྱིས་སྤང་བར་བྱ་བ་ནི་ལུས་བཀྲུ་བ་དང་། ལུས་གཙང་སྦྲ་སྤྱོད་པ་དང་། ཤས་ཆེར་ངལ་བ་དང་། ཆུ་གྲང་མོ་རྣམས་
[349b]
[349b.1]སྤང་བར་བྱའོ། །དེ་ལ་རླུང་ལས་གྱུར་པའི་སྣ་ནད་ཆམ་པ་ལ་ནི་རླུང་འཇོམས་པའི་སྨན་དང་བསྐོལ་བའི་མར་རམ། ལན་ཚྭ་རྣམ་ལྔའམ། སྨན་བི་ད་རིའི་སྡེ་ཚན་ནམ། དེ་དག་གང་ཡང་རུང་བ་མར་དང་བསྐོལ་བ་བླུད་པའམ། དེ་བཞིན་དུ་དུགས་དང་སྣ་སྨན་ལ་སོགས་པ་བྱས་ཏེ། ཀླད་པ་
[349b.2]ཕྱེད་ན་བའི་སྨན་ཡང་འདིར་སྦྱར་རོ། །དེ་ལ་མཁྲིས་པ་དང་ཁྲག་ལས་གྱུར་པའི་སྣ་ནད་ལ་ནི་སྨན་མངར་བའི་སྡེ་ཚན་དང་། མར་ལྷན་ཅིག་བསྐོལ་བ་བླུད་པ་དང་། དེ་བཞིན་དུ་སྨན་གྱིས་བླུགས་པ་དང་། བྱུག་པ་ཡང་སྨན་བསིལ་བའི་ནུས་པ་དང་ལྡན་པ་ལ་སྦྱར་རོ། །སྨན་དྲ་བའི་ཤུན་པ་དང་།
[349b.3]འབྲས་བུ་གསུམ་དང་། ཁྲེ་དང་། ཤིང་པརྞི་དང་། ཤིང་མངར་དང་། སེང་ཕྲོམ་དང་། ཏིལ་མར་དང་། དེའི་བཅུ་འགྱུར་གྱི་འོ་མ་དང་། སྐྱེར་པ་དང་དེ་རྣམས་ལྷན་ཅིག་བསྐོལ་ཏེ་མར་ལུས་པ་ལས་སྣ་སྨན་གཏང་བར་བྱའོ། །བད་ཀན་ལས་གྱུར་པའི་སྣ་ནད་ལ་ནི་སྨྱུང་བར་འདུག་པ་དང་།
[349b.4]ཡུངས་ཀར་གྱི་འདག་གུས་མགོ་ལ་བྱུག་པ་དང་། ཡ་བཀྵ་ར་མར་དང་བཅས་པ་བླུད་དེ་སློན་དུ་གཞུག་གོ། །ལན་ཚྭ་དང་། ཚ་བ་གསུམ་དང་། བྱི་དང་ག་དང་། དུག་མོ་ཡུངས་དང་། ཟི་ར་དང་དེ་རྣམས་ར་གཅིན་དང་བཏགས་ཏེ་སྣར་བླུགས་པར་བྱའོ། །འདུས་པ་ལས་གྱུར་པའི་སྣ་
[349b.5]ནད་ཆམ་པ་ལ་ནི་སྨན་ཚ་བ་དང་། རྣོ་བ་དང་སྦྱོར་བའི་མར་གྱིས་སྣར་བླུགས་པ་དང་། མཁུར་བར་བཅང་བ་རྣམས་བྱས་ན། གཅོང་ཆེན་པོ་དང་། སྲིན་བུའི་ནད་དང་། སྣ་ནད་མ་རུང་བ་རྣམས་སེལ་ཏོ། །ཚ་བ་གསུམ་དང་། ཨེ་རཎྜ་དང་། བྱི་དང་ག་དང་། ཐང་ཤིང་དང་།
[349b.6]བོང་ང་དཀར་པོ་དང་། རུ་རྟ་དང་། ཨིང་གུ་ཏ་དང་། བར་ཏ་ཀའི་ས་བོན་དང་། ཤིང་ཉེ་རོང་དང་། ཡུངས་ཀར་དང་། པུ་ཏི་མད་ཚ་ག་དང་། ཨགྣི་མནྠའི་མེ་ཏོག་དང་། པི་ལུ་དང་། ན་ལེ་ཤམ་དཀར་པོ་དང་། རྟ་རྟུག་བཙིར་བའི་ཁུ་བ་དང་། དེའི་གཅིན་དང་། གླང་པོ་ཆེའི་
[349b.7]གཅིན་དང་དེ་རྣམས་ལྷན་ཅིག་སྦྱར་བའི་འདག་གུས་ཟར་མའི་སྐུད་པ་ལ་བསྒོས་ཏེ་རེང་བུར་བྱས་ལ། དེའི་དུད་པས་སྣ་དང་། ཁར་བརྔུབས་ན་ཕན་ནོ། །སྦྲིད་པ་མང་དུ་འབྱུང་བ་དང་བད་ཀན་སྣར་བསྒོངས་པ་གཉིས་ལ་ནི་སྨན་རྣོན་པོ་བུད་པར་བྱས་ན་ཕན་ནོ། །བཅའ་སྒ་དང་། རུ་རྟ་དང་། པི་
[350a]
[350a.1]པི་ལིང་དང་། བྱི་དང་ག་དང་། རྒུན་འབྲུ་དང་དེ་རྣམས་བསྐོལ་བའི་ནང་དུ་སྨན་དེ་ཉིད་ཀྱི་ཕྱེ་མ་དང་། མར་རམ་ཏིལ་མར་གང་འབྱོར་པ་དང་ཡང་བསྐོལ་ཏེ། མར་ལུས་པ་ལས་སྣ་སྨན་བཏང་ན། སྦྲིད་པ་མང་དུ་འབྱུང་བ་དང་བད་ཀན་བསྒོངས་པ་སེལ་ཏོ། །སྣ་སྐམ་པ་
[350a.2]ལ་ནི་འདྲུ་མར་གྱི་བཟའ་བ་དང་བཏུང་བ་ལ་སོགས་པ་བྱས་ཏེ་ཤ་ཁུ་དང་སྦྱར་བ་གཏང་ངོ་། །དེ་བཞིན་དུ་བ་ལའི་མར་གྱིས་སྣུམ་ཆོས་དང་བདུག་པ་དང་། དུགས་ལ་སོགས་པ་སྣ་བུས་པ་ལྟར་གང་བ་ལ་ཡང་དེ་ལྟར་བྱའོ། །སྣ་ནད་དབུགས་ཚ་ཞིང་དཀུ་བ་ལ་ནི་མཁྲིས་པ་འཇོམས་པའི་སྨན་
[350a.3]དང་། སྣ་སྨན་རྣོན་པོ་ལ་སོགས་པས་སྣ་ཆུ་འཛག་གོ། །སྣ་ནད་རྣག་ཅན་ལ་ནི་བད་ཀན་གྱི་སྣ་ནད་ཀྱི་གསོ་བ་རྣམས་བྱའོ། །ཡང་ན་ཐོག་མར་སློན་བྱ་སྟེ། དེའི་འོག་ཏུ་རྒྱ་སྐྱེགས་དང་། ཀ་རཉྫ་དང་། ན་ལེ་ཤམ་དང་། བྱི་དང་ག་དང་། ཤིང་ཀུན་དང་། པི་པི་ལིང་དང་།
[350a.4]བུ་རམ་དང་། དེ་རྣམས་ལུག་གི་གཅིན་དང་བཏགས་ཏེ་སྣ་སྨན་གཏང་ངོ་། །ཡང་ན་ཤི་ཀྲུ་དང་། བྲི་ཧ་ཏི་དང་། དན་ཏི་དང་། ཚ་བ་གསུམ་དང་། ལྕེ་མྱང་ཚ་དང་། བྱི་དང་ག་དང་། བྱེའུ་རུག་པ་དང་དེ་རྣམས་ཏིལ་མར་དང་སྦྱར་ཏེ། སྣ་སྨན་བྱས་ན་མཆོག་ཏུ་ཕན་ནོ། །སྣ་
[350a.5]ནད་ཁྲག་ཅན་ཞེས་བྱ་བ་ལ་ནི་ཁྲག་ལས་གྱུར་པའི་སྣ་ནད་ཀྱི་གསོ་བ་ལྟར་སྦྱར་རོ། །སྣ་ནད་ཐོར་བུ་དང་། འབྲུམ་བུ་ཅན་ཞེས་བྱ་བ་ཤས་ཆེར་སྐྱེས་པ་ལ་ནི་རྨ་འཁྱིམས་པའི་གསོ་བ་ཇི་ལྟ་བ་བཞིན་དུ་བྱའོ། །དེ་བཞིན་དུ་དན་ཏི་དང་། ཤིང་ཉེ་རོང་དང་། རྒྱམ་ཚ་དང་། ལྡོང་
[350a.6]རོས་དང་། པི་པི་ལིང་དང་། ཙི་ཏྲ་ཀ་དང་། དེ་རྣམས་བཏགས་པའི་ཕྱེ་མ་མར་དང་སྦྲང་རྩིར་སྦྱར་བའི་རེང་བུ་བྱས་ཏེ་སྣར་བཅུག་ན་ཕན་ནོ། །གཞན་ཡང་ཤིང་ཀུན་ལ་སོགས་པའི་སྣ་སྨན་ཡང་དེ་ལྟར་སྦྱར་ཏེ། ལྷག་མ་སྣ་ནད་ཁྲག་ཅན་གྱི་གསོ་བ་ཡང་འདི་ལ་སྦྱར་
[350a.7]རོ། །སྣ་ནད་གསོ་བའི་ལེའུ་སྟེ་ཉི་ཤུ་པ་རྫོགས་སོ།། །།དེ་ནས་ཁ་ནད་ཀྱི་དམིགས་བརྟག་པའི་ལེའུ་བཤད་པར་བྱ་སྟེ། ཉ་དང་། མ་ཧེ་དང་། ཕག་དང་། དེ་རྣམས་ཀྱི་ཤ་ཟོས་པ་དང་། ལ་ཕུག་རྗེན་པ་ཟོས་པ་དང་། མོན་སྲན་སྡེའུའི་ཚོད་མ་དང་། ཞོ་དང་།
[350b]
[350b.1]འོ་མ་དང་། ཧྭགས་དང་། དེ་དག་བསྟེན་པ་དང་། ཁས་བུབ་ཏུ་ཉལ་བ་དང་། སོ་ཤིང་གིས་སྣད་པ་དང་། དུད་པ་དང་། སྐྱུག་པ་དང་། མཁུར་བ་ན་བའི་སྨན་ཉེས་པ་དང་། གཏར་ག་ཉེས་པ་སྟེ། རྒྱུ་དེ་དག་གིས་བད་ཀན་ཤས་ཆེར་འཁྲུགས་ནས་ཁའི་ནད་སྐྱེད་པ་ཡིན་ནོ། །
[350b.2]དེ་ལ་རླུང་ལས་གྱུར་པའི་མཆུ་ནད་འགས་ཤིང་དུམ་བུར་སོང་བ་ཡོད་དེ། དེ་ནི་མཆུ་འགས་པའི་ནད་ཅེས་བྱའོ། །ཡང་ན་རླུང་གིས་མཆུ་རེངས་ཤིང་ཟུག་གཟེར་དང་བཅས་པ་དེ་ནི་རླུང་གི་མཆུ་ནད་ཅེས་བྱའོ། །མཆུ་དྲུད་ཅིང་དྲལ་བ་སྙམ་བྱེད་པ་དང་། རེག་ན་རྩུབ་པོ་རུད་རུད་པོར་འདུག་པ་
[350b.3]དང་། མདོག་གནག་པ་དེ་ནི་མཆུ་གཤགས་པ་ལྟ་བུའི་ནད་ཅེས་བྱའོ། །མཁྲིས་པའི་མཆུ་ནད་ཀྱི་རྟགས་ནི་ཁ་ཟས་རྣོ་བ་ཟ་མི་འདོད་པ་དང་། འབྲུམ་བུ་ཕྲ་མོ་སྐེ་ཚེའི་འབྲུ་ལྟ་བུས་ཁྱབ་པར་འདུག་པ་དང་། དེ་ཡང་མྱུར་དུ་སྨིན་ཅིང་མང་དུ་རྣགས་པ་ཡིན་ནོ། །བད་ཀན་ལས་གྱུར་པའི་མཆུའི་
[350b.4]ནད་ཀྱང་གྲང་བ་མི་བཟོད་པ་དང་། ལྕི་བ་དང་། སྐྲང་པ་ལྟར་འདུག་པ་དང་། འབྲུམ་བུ་དཀར་པོས་ཁྱབ་པ་ལྟར་འདུག་པ་ཡིན་ནོ། །འདུས་པ་ལས་གྱུར་པའི་མཆུ་ནད་ནི། མདོག་སྣ་ཚོགས་སུ་འདུག་པ་དང་། དྲིང་བ་དང་། སྤྱི་བག་ཏུ་འཛག་པ་དང་། གློ་བུར་དུ་མདོག་ནག་པོར་
[350b.5]འགྱུར་བ་དང་། སྐྲང་པ་དང་། སྨིན་པ་མི་སྙོམས་པ་ཡིན་ནོ། །ཁྲག་འཁྲུགས་པ་ལས་གྱུར་པའི་མཆུ་ནད་ནི་མདོག་དམར་བ་དང་། ཁྲག་ཟད་པ་དང་། འབྲ་གོ་འདྲ་བའི་ཐོར་བུ་འབྱུང་བ་ཡིན་ནོ། །ཤ་ལས་གྱུར་པའི་མཆུ་ནད་ནི་ཤའི་འབྲུམ་བུ་མཆུ་ལ་སྣང་ཞིང་རིམ་གྱིས་སྲིན་བུ་སྐྱེ་བ་
[350b.6]ཡིན་ནོ། །ཚིལ་ལས་གྱུར་པའི་མཆུའི་ནད་ནི་སྐྲང་ཞིང་རྣགས་ཏེ་འབྲུ་མར་ལྟ་བུར་འཛག་པ་དང་། གཡའ་བ་དང་བཅས་ཤིང་རེག་ན་འཇམ་པ་ཡིན་ནོ། །སྣད་པ་ལས་མཆུ་ནད་དུ་གྱུར་པ་ནི་མཆུ་ཡང་དང་ཡང་གཤགས་ཤིང་བསྡུས་པ་སྙམ་སེམས་པ་དང་། གཡའ་བ་རྣམས་
[350b.7]ཡིན་ནོ། །རླུང་དང་བད་ཀན་འདྲེས་པའི་མཆུའི་ནད་ནི་ཆུ་བུར་ལྟ་བུའི་འབྲུམ་ནད་ཅེས་བྱའོ། །དེ་ལ་མཁུར་བའི་མེ་དབལ་ཕྲ་མོ་ཞེས་བྱ་བ་ནི་སྐྲང་པ་བརྟན་ཞིང་མཁུར་བ་ཉིད་ཚ་འུར་འུར་པོར་འདུག་པ་ཡིན་ནོ། །དེ་ལ་རླུང་ལས་གྱུར་པའི་སོ་
[351a]
[351a.1]ནད་ནི་དྲོ་བས་རེག་ན་བདེ་བ་དང་། གྲང་བས་རེག་ན་ལྷག་པར་ན་བ་དང་། སོ་ཟུག་གཟེར་ཆེ་ཞིང་ཆག་པ་སྙམ་བྱེད་པ་ཡིན་ནོ། །དེ་ནི་སོ་ནད་གྲང་ཞིང་ཆག་པ་ལྟ་བུའི་ནད་ཅེས་བྱའོ། །རླུང་གིས་ཕོག་པ་དང་སྐྱུར་བའི་ཟས་ཀྱིས་སོ་བརྩེ་སྟེ། ཁ་ཟས་གྲང་མོ་ཟོས་ན་སོས་མི་
[351a.2]བཟོད་པ་དང་། སྐྱུར་བ་དེ་ཉིད་ཟོས་ན་ནད་དང་བཅས་ཤིང་བྱུང་བ་སྙམ་བྱེད་པ་དེ་ནི་སོ་བརྩེ་བའི་ནད་ཅེས་བྱའོ། །སོ་ན་ཞིང་ཟུག་ལ་བྱེ་ཞིང་ཆག་པར་འགྱུར་བ་ཡང་ཡོད་དེ་དེ་ནི་སོ་བྱེ་བའི་ནད་ཅེས་བྱའོ། །སོ་འགུལ་ཞིང་ཁ་ཟས་ཟོས་ན་ཆེར་ན་བ་ནི་སོ་འགུལ་བའི་ནད་ཅེས་བྱའོ། །གང་གི་སོ་
[351a.3]བརྩེགས་མར་སྐྱེས་པ་ནི་སོ་ལྷག་གི་ནད་ཅེས་བྱའོ། །གང་གི་སོ་ལྷག་སྐྱེས་པའི་དུས་སུ་ལྷག་པར་ན་ཞིང་སྐྱེས་ཕན་ཆད་ཞི་བ་དེ་ནི་སོ་སྐྱེས་པའི་ནད་ཅེས་བྱའོ། །རླུང་དང་བད་ཀན་གྱིས་སོ་སྐམས་པ་འམ། སོའི་དྲི་མ་མ་བཀྲུས་པས་དྲི་མི་ཞིམ་པར་འགྱུར་ཏེ། དེ་ཉིད་ཡལ་བར་བོར་ན་སོ་ནད་
[351a.4]ཁ་ར་ལྟ་བུ་ཞེས་བྱ་བ་འབྱུང་ངོ་། །ཡང་གང་གི་སོ་དུམ་བུ་དུམ་བུར་ཡང་དང་ཡང་གོགས་པ་དེ་ནི་སོ་དུམ་བུར་གོགས་པའི་ནད་ཅེས་བྱའོ། །ཡང་ཁྲག་དང་མཁྲིས་པ་དང་། རླུང་གིས་སོ་སྔོ་བསངས་སུ་གྱུར་པ་དེ་ནི་སོ་ནད་སྔོ་བསངས་ཞེས་བྱའོ། །སོའི་རྩ་བར་རླུང་ལ་སོགས་
[351a.5]པའི་ཉེས་པ་འཁྲུགས་ཏེ། སོའི་ནང་སྐམས་ཤིང་སྟོང་པར་བྱས་ནས་དྲི་མས་གང་བར་འགྱུར་ཏེ། དེ་ནི་སོ་རྩའི་ནད་ཁོང་སྟོང་ཞེས་བྱའོ། །ཡང་སོའི་རྩ་བ་རྣམས་སུ་སྲིན་བུ་ཕྲ་མོ་སྐྱེས་ནས་ལྡང་དུབ་ཏུ་དྲག་ཏུ་ན་བ་དང་འགུལ་བ་དེ་ནི་སྲིན་བུའི་ནད་རྣག་ཅན་ཞེས་བྱའོ། །ཡང་སོ་ཕྱུང་བ་ལས་
[351a.6]རྣག་དང་ཁྲག་འཛག་སྟེ། དེའི་ནང་དུ་སྲིན་བུ་སྐྱེ་བ་ནི་སོ་ནད་སྲིན་བུ་ཅན་ཞེས་བྱའོ། །གཞན་གྱི་རྒྱུ་མེད་པར་བད་ཀན་དང་ཁྲག་གཉིས་ཀྱིས་རྣག་དང་ཁྲག་འཛག་ལ། སོའི་རྙིལ་རང་འབབ་པ་དང་། རེག་ན་འཇམ་པ་དང་། རུལ་བ་དང་། མདོག་དཀར་བར་འགྱུར་ཏེ། དེ་ནི་སོ་ནད་ཁྲག་འཛག་
[351a.7]པ་ཞེས་བྱའོ། །གྲང་ཞིང་བསིལ་བའི་ཉེས་པས་མཁྲིས་པ་དང་ཁྲག་སྐྱེས་ཏེ་སྨིན་པ་དང་། སོའི་རྙིལ་ཚོས་པར་བྱེད་པ་དང་། ཤ་གློ་ཞིང་ཁྲག་འབྱུང་བ་སྟེ། དེ་ནི་ཨུ་པ་ཀོ་ཤ་ཞེས་བྱ་བའི་སོ་ནད་ཅེས་བྱའོ། །སོ་རྩི་གཡའ་སྟེ་ཁྲག་གིས་གང་ཞིང་ཁྲག་འཛག་པ་དེ་ནི་ཁྲག་
[351b]
[351b.1]འཛག་པའི་རྙིལ་ནད་ཅེས་བྱའོ། །སོ་འགུལ་ཞིང་ཟུག་གཟེར་ཆུང་ལ་ཁ་རུལ་བྲོ་བ་དེ་ནི་རུལ་བའི་རྙིལ་ནད་ཅེས་བྱའོ། །བད་ཀན་དང་ཁྲག་གི་རྒྱུས་སོ་གཉིས་སམ་གསུམ་གྱི་བར་དུ་རྒྱ་ཤུག་གི་ཚི་གུ་ཙམ་སྐྲངས་པ་དེ་ནི་སོའི་ནད་ཤ་འབུར་བ་ཞེས་བྱའོ། །ནད་གཞི་གསུམ་ཁྲག་
[351b.2]དང་བཅས་པས་རྙིལ་ཕྱི་ནང་དུ་སྐྲང་ཞིང་ལྕི་བ་དང་། ན་བ་དང་། ཚ་བ་དང་། བརྟོལ་ན་རྣག་དང་ཁྲག་འཛག་པ་དེ་ནི་སོ་རྙིལ་གྱི་འབྲས་ནད་ཅེས་བྱའོ། །མཁྲིས་པ་དང་ཁྲག་གིས་སོའི་རྩ་བར་སྐྲངས་པ་དང་། ན་བ་དང་། ཁ་ཆུ་འཛག་པ་དང་། རྙིལ་རང་ཉིད་འདྲུལ་ཞིང་འབྱུང་བ་
[351b.3]དེ་ནི་ཁོང་སྟོང་ཞེས་བྱའོ། །འདུས་པ་ལས་གྱུར་པའི་སོ་རྩའི་ནད་ནི་ཚ་བ་དང་ལྡན་ཞིང་རྣག་ཁྲག་འཛག་པ་དང་། སོ་དང་འབྲེལ་བའི་རྒྱུས་པ་རྙིད་ཅིང་སྟོང་པ་དེ་ནི་སོ་རྩའི་ནད་ཁོང་སྟོང་ཆེན་པོ་ཞེས་བྱ་བ་ཡིན་ནོ། །བད་ཀན་གྱིས་སོའི་བར་དུ་ཤའི་གཟེར་བུ་ལྟ་བུར་སྐྲངས་པ་
[351b.4]དང་། འགྲམ་པ་དང་རྣ་བ་རབ་ཏུ་ན་བ་དང་། གསོ་བ་བྱས་ཀྱང་མི་རུང་བ་དེ་ནི་སོའི་ཤ་ལྷག་ཅེས་བྱའོ། །གློ་བུར་དུ་སོ་ཤིང་ལ་སོགས་པས་སྣད་ཅིང་རེག་པ་ལས་རྙིལ་གྱི་ནད་དྲག་ཅིང་ཆེ་བ་འབྱུང་སྟེ། གོང་དུ་སོ་འགུལ་བ་དེ་ནི་བི་ད་རི་ཞེས་བྱ་བའི་སོ་རྩའི་ནད་ཡིན་ནོ། །རྙིལ་གྱི་
[351b.5]ནད་དེ་གསོ་བ་མ་བྱས་ན་ནི་གསོར་མི་རུང་བའི་ནད་དུ་འགྱུར་རོ། །ཁའི་ནང་དུ་ནད་གཞི་རྣམས་ཀྱིས་པགས་པ་དང་། ཤ་དང་རུས་པ་རྣམས་རུལ་བར་བྱས་ཏེ། ཉེས་པ་རྣག་དང་བཅས་པར་རྩ་སྦུབས་ཕྲ་མོ་ནས་ཡང་དང་ཡང་འཛག་པ་ཡོད་དེ། དེ་ཡང་ནད་གཞི་རྣམ་པ་
[351b.6]ལྔ་སོ་སོའི་མཚན་ཉིད་བཞིན་དུ་ཤེས་པར་བྱའོ། །དེ་ལ་རླུང་ལས་གྱུར་པའི་ལྕེའི་ནད་ནི་ལྕེ་རྩུབ་པ་ཤ་ཁའི་ལོ་མ་འདྲ་བ་དང་། རོ་མི་ཚོར་བ་དང་། ལྕེ་གས་པ་རྣམས་ཡིན་ནོ། །མཁྲིས་པ་ལས་གྱུར་པའི་ལྕེའི་ནད་ནི་ཚ་བ་དང་། ཤའི་འབྲུམ་བུ་མདོག་དམར་པོས་ཁེབས་
[351b.7]པ་ཡིན་ནོ། །བད་ཀན་ལས་གྱུར་པའི་ལྕེའི་ནད་ནི་ཤིང་ཤལ་མ་ལའི་ཚེར་མས་ཁེབས་པ་ལྟ་བུར་འདུག་པ་དང་ལྕི་ཞིང་མཐུག་པ་དག་ཡིན་ནོ། །བད་ཀན་དང་མཁྲིས་པར་ལྡན་པའི་ལྕེའི་ནད་ནི་ལྕེའི་འོག་ཏུ་སྐྲང་ཞིང་མཐོ་བ་དང་། ལྕེ་གྱོང་བ་དང་། སྨིན་པ་དང་། ཉའི་དྲི་བྲོ་བ་
[352a]
[352a.1]དང་། ལྕེའི་ཤ་འདྲུལ་བ་དེ་ནི་ལྕེ་ནད་ཨ་ལ་ས་ཞེས་བྱའོ། །ལྕེའི་འོག་གི་རྩར་ལྕེའི་རྩེ་མོ་འདྲ་བར་སྐྲང་ཞིང་ཤའི་མྱུ་གུ་སྐྱེས་ཏེ་ཁ་ཆུ་འཛག་པ་དང་། ལྕེ་རེངས་པ་དང་། རེག་ན་རྩུབ་པ་དེ་ནི་བད་ཀན་དང་མཁྲིས་པ་དང་ཁྲག་ལས་གྱུར་པ་ཡིན་ཏེ། དེ་ནི་ལྕེ་ལྷག་
[352a.2]ཅེས་བྱ་སྟེ། ན་ཞིང་གཡའ་བ་དང་། སྨྲ་མི་ནུས་ཤིང་ཁ་ཟས་ཟ་མི་ནུས་པར་འགྱུར་རོ། །དེ་དང་འདྲ་བར་ལྕེ་ཕུགས་སུ་ཡང་ལྕེ་ལྷག་སྐྱེས་པ་ཡིན་ཏེ་དེ་ནི་ལྕེའི་སྟེང་ན་གནས་པ་ཡིན་ནོ། །དེ་ལ་རྐན་གྱི་ཤ་ནང་དུ་རླུང་འཁྲུགས་ཏེ། འབྲུམ་བུ་ཕྲ་མོ་སྲ་བ་མང་དུ་མཐུག་པ་
[352a.3]འབྱུང་སྟེ། དེ་ཡང་ནད་དང་བཅས་ཤིང་འཛག་པ་དང་ལྡན་པ་དེ་ནི་བད་ཀན་གྱི་འབྲུམ་བུ་ཞེས་བྱའོ། །རྐན་ཕུགས་སུ་བད་ཀན་དང་ཁྲག་འཁྲུགས་ཏེ། ཉའི་ལྒང་པ་འདྲ་བར་སྐྲང་ཞིང་འོག་ཏུ་བབ་སྟེ། རེག་ན་འཇམ་པ་དང་། སྤྱི་བག་ཏུ་འདུག་པ་དང་། ཟས་ཟོས་
[352a.4]པ་རྣམས་སྣ་ནས་འབྱུང་ཞིང་། ལྐོག་མ་འགག་པར་བྱེད་པ་དང་། སྐོམ་དད་ཆེ་བ་དང་། ལུད་པ་ལུ་བ་དང་། སྐྱུག་པར་བྱེད་དེ་དེའི་མིང་ནི་ལྕེའུ་ཆུང་གི་ནད་ཅེས་བྱའོ། །ཡང་རྐན་གྱི་ནང་གི་ཤ་ཆེར་སྐྱེས་ཏེ་ནད་མེད་པ་དེ་ནི་ཤའི་ཚོགས་ཞེས་བྱ་བའི་ནད་ཡིན་ནོ། །
[352a.5]རྐན་གྱི་ཕུགས་སུ་པདྨ་དམར་པོའི་མདོག་དང་འདྲ་བར་སྐྲངས་པ་དེ་ནི་རྐན་གྱི་ནད་ཆུ་བུར་ལྟ་བུ་ཞེས་བྱའོ། །ཡང་རྐན་གྱི་དབུས་སུ་རུས་སྦལ་གྱི་རྒྱབ་འདྲ་བའི་ཤ་ཡུན་རིང་པོ་ནས་འཕེལ་ཞིང་སྐྱེ་ལ་ནད་མེད་པ་དེ་ནི་བད་ཀན་ལས་གྱུར་པ་ཡིན་ཏེ། དེ་ནི་རུས་སྦལ་གྱི་རྒྱབ་འདྲ་
[352a.6]བའི་ནད་ཅེས་བྱའོ། །ཡང་རྐན་ལ་རྒྱ་ཤུག་གི་འབྲས་བུ་ལྟ་བུའི་འབྲུམ་བུ་ནད་མེད་ཅིང་བརྟན་པར་འདུག་པ་དེ་ནི་བད་ཀན་དང་ཚིལ་ལས་གྱུར་པ་ཡིན་ཏེ་དེ་ནི་རྐན་གྱི་ནད་འབུར་བ་ཞེས་བྱའོ། །མཁྲིས་པ་ལས་གྱུར་པའི་རྐན་གྱི་ནད་ནི་མྱུར་དུ་སྨིན་པ་དང་། རྣག་འཛག་ཅིང་ཆེར་ན་བ་
[352a.7]དེ་ནི་རྐན་ནད་སྨིན་པ་ཞེས་བྱའོ། །རླུང་དང་མཁྲིས་པའི་རྐན་ནད་ནི་ཚ་བ་དང་། བྱ་རྨྱང་བྱེད་པ་དང་། རྐན་སྐམས་པ་དེ་ནི་རྐན་སྐམས་པའི་ནད་ཅེས་བྱའོ། །དེ་ལྟར་ན་རྐན་ནད་བརྒྱད་དུ་བཤད་པ་ཡིན་ནོ། །ལྕེའི་རྩ་བ་ལྐོག་མ་དང་འབྲེལ་པའི་ནང་དུ་ཤའི་
[352b]
[352b.1]མྱུ་གུ་ལྟ་བུར་སྐྱེས་ཏེ། མྱུར་དུ་འཕེལ་ཞིང་མགུལ་བ་སྐེམ་པ་ལ་འཕྲལ་བ་དང་། རྣ་བ་ན་བ་དེ་ནི་རླུང་ལས་གྱུར་པ་ཡིན་ནོ། །ཤ་ལྷག་དེ་མྱུར་དུ་མི་བཟད་པར་སྲ་ལ་རྒྱུན་སྲང་རྣམས་བཀག་ནས་འདུག་པ་དེ་ནི་རོ་ཧི་ན་ཞེས་བྱ་སྟེ། མྱུར་དུ་མ་གསོས་ན་སྲོག་ལ་འབབ་
[352b.2]པར་འགྱུར་བས་གསོ་བ་མྱུར་དུ་བྱའོ། །མཁྲིས་པ་ལས་གྱུར་པའི་ལྐོག་མའི་ནད་ནི་ཚ་ཞིང་རབ་ཏུ་ན་བ་དང་། སྐོམ་དད་ཆེ་བ་དང་། རྨོངས་བག་ཏུ་འདུག་པ་དང་། ལྐོག་མར་དུད་པས་བདུག་པ་སྙམ་བྱེད་པ་དང་། ནད་མྱུར་དུ་འཕེལ་བ་དང་། མྱུར་དུ་སྨིན་
[352b.3]པ་དང་། ལྷག་པར་དམར་བ་དང་། རེག་མི་བཟོད་པ་དག་ཡིན་ནོ། །བད་ཀན་ལས་གྱུར་པའི་ལྐོག་མའི་ནད་ནི་འཇམ་ཞིང་དཀར་བ་ཡིན་ནོ། །ཁྲག་ལས་གྱུར་པ་ནི་འབྲུམ་བུ་ཕྲ་མོ་མེའི་འདབ་མ་ལྟར་དམར་བས་ཁྱབ་པ་དང་། རྣ་བ་ན་བར་བྱེད་པ་དང་མཚན་མ་གཞན་ནི་ལྐོག་
[352b.4]མའི་མཁྲིས་པའི་ནད་དང་འདྲའོ། །འདུས་པ་ལས་གྱུར་པའི་ནད་ནི་ཟབས་སུ་སྨིན་ཅིང་མཚན་མ་ཀུན་དང་ལྡན་པ་ཡིན་ནོ། །བད་ཀན་ཤས་ཆེ་བའི་ལྐོག་མའི་ནད་ནི་རྒྱ་ཤུག་གི་འབྲས་བུ་ཙམ་དུ་སྐྲང་ཞིང་གོང་བུར་འདུག་པ་ཡིན་ཏེ། དེ་ཡང་ནང་དུ་ཚེར་མས་ཟུག་པ་
[352b.5]བཞིན་དུ་ན་ལ་རྒྱུན་སྲང་འགགས་པ་དེ་ནི་ཤ་ལུ་ཀ་ཞེས་བྱའོ། །ལྐོག་མའི་ནང་དུ་འབྲུམ་བུ་མཐོ་ཞིང་ཟླུམ་པ་འབྱུང་སྟེ། དེ་ཡང་ཚ་འུར་འུར་པོར་འདུག་པ་དང་། རིམས་ཀྱིས་འདེབས་པ་དང་། ལྐོག་མའི་ངོས་གཉིས་སུ་མཆེད་ཅིང་འགྲམ་པའི་ཚིགས་གཉིས་
[352b.6]སུ་བརྟེན་པ་དང་། མགུལ་བའི་ནང་དུ་རས་བལ་གྱི་འབྲས་བུ་འདྲ་བར་འདུག་པ་དེ་ནི་ལྐོག་ནད་བྲིན་ད་ཞེས་བྱའོ། །ཡང་མགུལ་བའི་ནད་ནང་སྐྲང་ཞིང་རེག་ན་སྤྱི་བག་ཏུ་འདུག་པ་དེ་ནི་ལྐོག་མའི་ནང་དུ་དྷི་ཀེ་རི་ཀ་ཞེས་བྱའོ། །ཡང་ན་ལྐོག་མའི་ཕྱི་ནང་དུ་ཚབས་ཆེར་
[352b.7]སྐྲང་ཞིང་བརྟན་པ་དང་། དྲ་བས་འགུལ་བའི་ལམ་བཀག་པ་དང་། མགོ་ལྕི་བ་དང་། སྙོམ་པ་དང་། ཁ་ཆུ་འཛག་པ་དང་། རིམས་ཀྱིས་འདེབས་པར་བྱེད་པ་ཡིན་ཏེ། དེ་ནི་ལྐོག་མའི་ནད་གསོ་དཀའ་ཞེས་བྱའོ། །ཡང་ལྐོག་མའི་ནང་དུ་གདུ་བུ་ལྟར་སྐྲངས་ཏེ། དེ་
[353a]
[353a.1]ཡང་རྒྱ་ཆེ་བ་དང་། མཐོན་པོར་འདུག་ལ་ནད་ཚབས་ཆུང་བ་ནི་ལྐོག་མའི་ནད་གདུ་བུ་ལྟ་བུ་ཞེས་བྱའོ། །ཡང་ལྐོག་མའི་ནང་དུ་ནད་གཞིའི་ཉེས་པ་དང་། ཤའི་མཛེར་བ་གཅིག་གམ་མང་ཡང་རུང་སྐྱེས་ལ། དེ་ཡང་ནད་ཆུང་བ་ལ་ནི་ཤ་མཛེར་ལྟ་བུའི་ལྐོག་ནད་ཅེས་བྱའོ། །ནད་ཀྱིས་རྩ་རྣམས་སུ་ཁྱབ་
[353a.2]སྟེ་དབུགས་ཤིན་ཏུ་དཀའ་བས་འཐོན་པ་དེ་ནི་ལྐོག་ནད་ཀྱི་ལ་ཡུ་ཀ་ཞེས་བྱའོ། །ལྐོག་མའི་ནང་དུ་ཤའི་མྱུ་གུ་མང་པོས་ཁྱབ་སྟེ། ཤིན་ཏུ་སྐོམ་དད་ཆེ་བ་དང་། ཚ་བ་ཆེ་བ་དང་། མགོ་བོ་ན་བ་དེ་ནི་ཤའི་མྱུ་གུ་ལྟ་བུའི་ནད་ཅེས་བྱའོ། །ལྐོག་མའི་ནད་ཤའི་རེང་བུ་ལྟ་བུས་ལྐོག་མའི་ནང་ཁྱབ་སྟེ། ཚབས་ཆེར་
[353a.3]ན་བ་ནི་ཤ་ཏག་གྷི་ནེ་ཞེས་བྱའོ། །ལྐོག་མའི་ནང་དུ་ནད་ཀྱིས་མྱུར་དུ་ཁྱབ་པ་དང་། ཚབས་ཆེར་ན་བ་དང་། ལྐོག་མའི་ནང་དུ་སྐྲང་བ་དང་། རྣག་དང་འདྲ་བ་འཛག་པ་དེ་ནི་ལྐོག་མའི་འབྲས་ནད་ཅེས་བྱའོ། །ལྐོག་མ་ནས་ལྕེའི་ཐ་མའི་བར་དུ་སྨིན་མི་ཤེས་པར་སྐྲང་ཞིང་ཁྲག་དང་བཅས་པར་བརྟན་པར་
[353a.4]བྱེད་པ་དེ་ནི་ལྐོག་མའི་ནད་རྨེན་བུ་ཞེས་བྱའོ། །རླུང་དང་བད་ཀན་དང་ཚིལ་གྱིས་སྐྲངས་པ་ཡུན་རིང་པོ་ནས་འཕེལ་ཞིང་། རླིག་པ་བཞིན་དུ་ཕྱི་རོལ་དུ་གློ་བར་སྐྱེ་བ་དེ་ནི་ལྐོག་མའི་ནད་ལྦ་བ་ཅན་ཞེས་བྱའོ། །ཡང་ན་དེ་ཉིད་རྩ་གནག་ཅིང་ཤས་ཆེར་ན་བ་དང་། རྩ་སྔོ་བསངས་ཀྱིས་ཁྱབ་པ་དང་། ལྐོག་མ་
[353a.5]དང་། རྐན་སྐམས་པ་དང་། ལྕེས་རོ་མི་ཚོར་བ་དེ་ནི་རླུང་གི་ལྐོག་མའི་ནད་ཅེས་བྱའོ། །བད་ཀན་ལས་གྱུར་པའི་ལྐོག་མའི་ལྦ་བ་ནི་བརྟན་པ་དང་། མདོག་དཀར་བ་དང་། རེག་ན་གྲང་བ་དང་ལྕི་བ་ཡིན་ཏེ། ཚབས་ཆེར་སྐྱེས་ན་ནི་ལྐོག་མ་དང་རྐན་བད་ཀན་གྱིས་རླུང་གཡོས་ཤིང་ཁ་མངར་བ་ཡིན་ནོ། །
[353a.6]བད་ཀན་དང་ཚིལ་འདྲེས་པ་ལས་གྱུར་པའི་ལྐོག་ནད་ལྦ་བ་ཆེར་སྐྱེས་ན་ནི་དྲོད་མེད་པ་དང་། ལུས་ལ་ཆེར་མཆེད་པ་དང་། སྒྲ་ངར་ངར་པོར་འདོན་ཅིང་སྐད་ཆུང་བར་འགྱུར་རོ། །བད་ཀན་གྱིས་རླུང་བཀག་སྟེ་མགུལ་པ་སྐམས་ཤིང་སྐད་འགགས་པ་དང་། ཏ་མྱ་འཁྲུགས་པ་དང་། རྟག་ཏུ་དབུགས་མི་
[353a.7]བདེ་བ་ཡིན་ཏེ། དེ་ནི་ལྐོག་མའི་ནད་སྐད་ཉམས་པ་ཞེས་བྱའོ། །རླུང་གིས་ཁའི་ནང་ཀུན་དུ་རྨ་སྐྱེད་དེ། རྨ་དེ་ཡང་མདོག་དམར་སྐྱར་འདུག་པ་དང་། རྩུབ་པ་དང་། ཕན་ཚུན་འཕོ་བ་དང་། མཆུ་ཤིན་ཏུ་དམར་བ་དང་། པགས་པ་འགུལ་བ་དང་། ལྕེས་གྲང་བ་མི་བཟོད་པ་དང་། ལྕེ་བསྒུལ་
[353b]
[353b.1]དཀའ་བ་དང་། འགགས་པ་དང་། ཚེར་མ་གཤིབས་པ་ལྟར་འདུག་པ་དང་། ལྕེ་འབྱིན་པར་དཀའ་བ་དེ་ནི་ཁའི་ནད་སྨིན་པ་ཞེས་བྱའོ། །གཞང་འབྲུམ་དང་། སྐྲན་དང་། བད་ཀན་རྣམས་ཀྱིས་སྨད་ཀྱི་རླུང་རང་གི་གནས་ནས་ཉམས་པར་བྱས་ནས་སྟོད་དུ་འབྱུང་སྟེ། ཁ་དྲི་མི་ཞིམ་པར་བྱེད་
[353b.2]པ་ནི་ཨུར་དྷ་གྷུ་ད་ཞེས་བྱའོ། །མཁྲིས་པ་ལས་གྱུར་པའི་ཁའི་ནད་ནི་སྨིན་པ་དང་། ཚ་འུར་འུར་པོ་དང་། དབུགས་གྲང་མོ་རྔུབ་འདོད་པ་དང་། ཁ་བྲོ་བ་དང་། སྣད་པ་རྨའི་སྟེང་དུ་ཐལ་སྨན་བླུགས་པ་སྙམ་སེམས་པ་ཡིན་ནོ། །ཁྲག་ལས་གྱུར་པའི་ཁ་ནད་ཀྱང་དེ་དང་འདྲ་བར་
[353b.3]བལྟའོ། །བད་ཀན་ལས་གྱུར་པའི་ཁའི་ནད་ནི་ཁ་མངར་བ་དང་། གཡའ་བ་དང་། རྨ་འབྱིལ་བག་ཅན་དུ་ཡང་འདུག་པ་ཡིན་ནོ། །ཡང་བད་ཀན་ལས་གྱུར་པའི་འབྲུམ་བུ་མཁུར་ཚོས་ཀྱི་ནང་དུ་བརྟེན་ཏེ་འབྱུང་བ་མདོག་གནག་ཅིང་སྐྱ་བ་སྐྱེས་ཏེ་བདར་ཞིང་བཅད་དེ་མཉེས་པ་ལ་སོགས་
[353b.4]པ་བྱས་ན་ནི་ཕྱིར་ཞིང་ཐུ་བར་བྱེད་དོ། །ནད་གཞི་འདུས་པ་ལས་ཁྲག་དང་བཅས་པའི་ཁ་ནད་སྨིན་པ་ནི་ནད་གཞི་ཀུན་གྱི་མཚན་མ་དང་ལྡན་པ་ཡིན་ནོ། །སོ་ཤིང་ལ་སོགས་པས་ཁའི་ནང་མ་རུངས་པར་བྱས་ཏེ་རྣག་འཛག་པར་གྱུར་ན་ནི་ཁ་ནད་རྣག་འཛག་པར་འགྱུར་བ་ཞེས་བྱ་སྟེ།
[353b.5]དེ་ལྟར་ཁ་ནད་རྣམ་པ་བརྒྱད་དུ་བཤད་པ་ཡིན་ནོ། །མཆུ་དང་མཁུར་ཚོས་དང་། སོ་དང་། སོའི་རྩ་བ་དང་། ལྕེ་དང་། རྐན་དང་། མགུལ་པ་དང་། ཁ་དང་འདི་རྣམས་ཀུན་ལ་སྤྱིར་ནད་བདུན་ཅུ་རྩ་ལྔར་བཤད་དེ། དེ་ཡང་བཅུ་གཅིག་དང་། གཅིག་དང་། བཅུ་དང་། བཅུ་
[353b.6]གསུམ་དང་། དྲུག་དང་། བརྒྱད་དང་། བཅོ་བརྒྱད་དང་། བརྒྱད་དེ་མཆུ་ལ་སོགས་པའི་ནད་དང་གོ་རིམས་བཞིན་དུ་སྦྱར་རོ། །སོའི་ནད་ཀ་ར་ལ་དང་། ཤ་དང་ཁྲག་ལས་སྐྱེས་པའི་མཆུ་ནད་དང་། མཆུའི་འབྲུམ་བུ་དང་། འབྲུམ་བུ་སྐམ་པོ་དང་། རུས་སྦལ་གྱི་
[353b.7]རྒྱབ་འདྲ་བའི་ནད་དང་། ཤ་ལུ་ཀ་དང་། ཁོང་སྟོང་དང་། ཁོང་སྟོང་ཆེན་པོ་རྣམས་གསོར་མི་རུང་ངོ་། །སྐད་ཉམས་པ་དང་། ཨུར་དྷ་གུ་ད་དང་། སྔོ་བསངས་དང་། ཤག་ཏག་གྷི་ནི་དང་། གདུ་བུ་ལྟ་བུ་དང་། རྨ་འཁྱིལ་པ་ལྟ་བུའི་ནད་དང་། འདུས་པ་ལས་གྱུར་པ་དང་།
[354a]
[354a.1]ཁྲག་ལས་གྱུར་པ་དང་། རོ་ཧི་ནའི་ནད་ཐམས་ཅད་དང་། སོ་འགས་པའི་ནད་དང་། སོ་ཆག་པ་དང་། སྨིན་པའི་ནད་དང་། ལྕེ་ལྷག་དང་། ལྦ་བ་དང་། སྐད་ཉམས་པ་དང་། དབུགས་དཀའ་བས་ཐོན་པ་དང་། ཁ་ནད་སྨིན་པ་དང་། སོ་བརྩེ་བའི་ནད་དང་།
[354a.2]སོ་གོགས་པའི་ནད་དང་། དེ་དག་ནི་མི་ལ་བ་ཙམ་དུ་གསོར་རུང་ངོ་། །ལྷག་མ་ནི་མཚོན་དང་། སྨན་གྱིས་གསོ་བར་བྱའོ། །ཁ་ནད་ཀྱི་དམིགས་བརྟག་པའི་ལེའུ་སྟེ་ཉི་ཤུ་རྩ་གཅིག་པ་རྫོགས་སོ།། །།དེ་ནས་ཁ་ནད་གསོ་བའི་ལེའུ་བཤད་པར་བྱའོ། །དེ་ལ་མཆུ་འགས་
[354a.3]པའི་ནད་ལ་ནི་དང་པོ་མཚོན་གྱིས་དྲས་ཏེ། དེའི་འོག་ཏུ་བཙེམས་ལ་དེ་ནས་རྨ་གསོ་བའི་ཆོ་ག་ཇི་ལྟ་བ་བཞིན་དུ་བྱའོ། །ཤིང་མངར་དང་། ཁྲེ་དང་། སེང་ཕྲོམ་དང་། ཤྲ་བ་ནི་དང་། ཐལ་ཏྲེས་དང་། ཨུཏྤ་ལ་དང་། པ་ཏོ་ལ་དང་། ཀ་ཀ་མ་ཙི་དང་། དེ་རྣམས་ཏིལ་མར་དང་
[354a.4]ལྷན་ཅིག་བསྐོལ་ཏེ་བསྐུ་བར་བྱའོ། །ཡང་ན་སྣུམ་འཇོམས་པའི་སྨན་མངར་བ་ཇི་སྙེད་པ་ཏིལ་མར་དང་བསྐོལ་ཏེ། ཏིལ་མར་ལུས་པ་ལས་སྣ་སྨན་དུ་སྦྱར་རོ། །ཡང་ན་སྣུམ་ཆེན་པོ་བཞིས་རླུང་འཇོམས་པའི་སྨན་དང་བསྐོལ་བའི་མར་གྱིས་རས་བལ་གྱི་འདབ་མ་དང་བསྒོས་
[354a.5]ཏེ་མཆུ་ལ་གླན་ན་རླུང་ལས་གྱུར་པའི་མཆུའི་ནད་སེལ་ཏོ། །སཱ་ལའི་ཐང་ཆུ་སྤྲ་ཚིལ་དང་། གུ་གུལ་དང་། ཐང་ཤིང་དང་། ཤིང་མངར་དང་དེ་རྣམས་ཀྱི་ཕྱེ་མས་རྨ་ལ་གདབ་པར་བྱའོ། །མཆུ་གཤགས་པ་ལྟ་བུའི་ནད་ལ་ནི་ཨེ་རཎྜའི་ལོ་མ་དང་འོ་མ་བསྐོལ་
[354a.6]བས་དུགས་བྱའོ། །མཆུ་འགས་པའི་སྣ་སྨན་དུ་བཤད་པ་ཡང་འདིར་ཀླད་པར་དུགས་བྱ་སྟེ་ཉམས་བརྟ་བར་བྱའོ། །མཁྲིས་པ་དང་སྣད་པ་ལས་གྱུར་པའི་མཆུ་ནད་ལ་ནི་སྲིན་བུ་པད་པས་ཁྲག་དབྱུང་ངོ་། །ཡང་ན་སེང་ཕྲོམ་དང་། སྲ་རྩི་ཕོག་དང་། ཤིང་མངར་དང་། སྦྲང་
[354a.7]རྩི་དང་བཅས་པའི་ཕྱེ་མས་མཆུ་ལ་གདབ་པོ། །ཡང་ན་སླེ་ཏྲེས་དང་། ཤིང་མངར་དང་། རྨ་ཤིང་མར་དང་ལྷན་ཅིག་བསྐོལ་ཏེ་མར་ལུས་པ་ལས་བསྐུ་བྱུག་བྱའོ། །ཤ་དང་ཁྲག་ལས་གྱུར་པའི་མཆུ་ནད་ལ་ནི་མཁྲིས་པའི་ཁོང་འབྲས་ཀྱི་གསོ་བ་འདིར་སྦྱར་རོ། །
[354b]
[354b.1]མཆུ་ནད་གསར་དུ་བྱུང་བ་ལ་ཡང་དེ་བཞིན་དུ་བྱའོ། །བད་ཀན་ལས་གྱུར་པའི་མཆུ་ནད་ལ་ནི་ཁྲག་གཏར་ཏེ། དེའི་འོག་ཏུ་པ་ཏིའི་ཐལ་བ་དང་། སྦྲང་རྩི་དང་ཚ་བ་གསུམ་སྦྱར་བས་བསྐུའོ། །དེ་བཞིན་དུ་དུ་བ་བཏང་བ་དང་། སྣ་སྨན་དང་མཁུར་བར་བཅང་བ་རྣམས་ཀྱང་བད་ཀན་
[354b.2]འཇོམས་པའི་སྨན་དང་སྦྱར་བ་གཏང་ངོ་། །ཚིལ་ལས་གྱུར་པའི་མཆུ་ནད་ལ་ནི། ཐོག་མར་དུགས་བྱས་ལ་དེའི་འོག་ཏུ་དྲལ་ཏེ་ཚིལ་ཕྱུང་ལ་དེ་ནས་མེས་བསྲེགས་ཏེ། པྲི་ཡང་ཀུ་དང་། སེང་ཕྲོམ་དང་། འབྲས་བུ་གསུམ་དང་། སྦྲང་རྩི་དང་སྦྱར་བས་བསྐུ་བར་བྱའོ། །ཆུ་
[354b.3]བུར་ལྟ་བུའི་མཆུའི་ནད་ལ་ནི་ཐོག་མར་བརྟོལ་ལ། སྨན་རྣོན་པོ་དང་སྦྲང་རྩི་དང་སྦྱར་བས་བྱུག་པར་བྱའོ། །ཆུ་བུར་དེ་ཚབས་ཆེར་སྐྱེས་པ་ལ་ནི་ཐལ་སྨན་ནམ་མེའི་ལས་ཀྱིས་གསོ་བར་བྱའོ། །མཁུར་བའི་ནད་མེ་དབལ་ཕྲ་མོས་ཁྱབ་པ་ལ་ནི་སྐྲང་ནད་ཀྱི་གསོ་བ་ཐམས་ཅད་འདིར་སྦྱར་རོ། །
[354b.4]སོ་ནད་གསོ་བ། དེ་ལ་རླུང་ལས་གྱུར་པའི་སོ་ནད་ལ་ནི་ཐོག་མར་དུགས་བྱ་སྟེ། དེའི་འོག་ཏུ་སོ་རྩ་མཚོན་གྱིས་དྲལ་ལ་མེས་བསྲེག་གོ། །གླ་སྒང་དང་། རྒྱམ་ཚ་ཤས་ཆེ་བ་དང་། སྦྲང་རྩི་དང་ཏིལ་མར་སྦྱར་བས་བསྐུའོ། །སེའི་ཤུན་པ་དང་། འབྲས་བུ་གསུམ་དང་། སྐྱེར་
[354b.5]ཁཎྜ་དང་། འཛམ་བུའི་རྐང་དང་། པྲི་ཡང་ཀུ་དང་། བཅའ་སྒ་དང་། དེ་རྣམས་འོ་མ་དང་ལྷན་ཅིག་བསྐོལ་བའི་ཁུ་བ་མཁུར་བར་བཅང་ངོ་། །ཨེ་རཎྜའི་མར་སྣ་སྨན་དུ་སྦྱར་རོ། །སོ་བརྩེ་བ་དང་། སོ་བྱེ་བའི་ནད་ལ་ནི་རླུང་འཇོམས་པའི་གསོ་བ་ཐམས་ཅད་བྱའོ། །ཡང་ན་ཏིལ་
[354b.6]མར་དང་། ཤིང་མངར་དང་། སྦྲང་རྩི་དང་། འོ་མ་རྣམས་བསྐོལ་ཏེ། མཁུར་བར་བཅང་ངོ་། །སོ་འགུལ་བའི་ནད་ལ་ནི་རྩ་བ་བཅུ་པ་མར་དང་བསྐོལ་ཏེ་མཁུར་བར་བཅངས་ན་ཕན་ནོ། །ཡང་ན་སྤངས་མ་དང་། སེང་ཕྲོམ་དང་། པི་པི་ལིང་དང་། འབྲས་བུ་གསུམ་
[354b.7]དང་། ཤིང་མངར་དང་། ལན་ཚྭ་དང་། དེ་རྣམས་བདར་བའི་ཁུ་བ་སྨན་དུ་སྦྱར་རོ། །སྣར་བླུགས་པ་དང་མཁུར་བ་སྤོ་བ་དང་། ཁ་ཟས་ལ་སོགས་པ་ཡང་གནས་སྐབས་ཇི་ལྟ་བ་བཞིན་དུ་སྣུམ་དང་སྦྱར་བ་གཏང་ངོ་། །སོ་ལྷག་གི་ནད་དང་། སོ་དུམ་བུར་གོགས་པ་
[355a]
[355a.1]གཉིས་ལ་ནི་ཐལ་སྨན་གང་རྙེད་པས་སོ་བསྐུ་བར་བྱའོ། །སོའི་ནད་སྲིན་བུ་ཅན་ནི་ཐོག་མར་བཏྲལ་ལ། གོང་མ་བཞིན་དུ་ཐལ་སྨན་གྱིས་བཏབ་སྟེ་ཁྲག་གཟགས་ལ། ཁྲག་ཟད་པ་དང་བསྲེགས་ལ་རྨ་གསོ་བའི་ཆོ་ག་ཐམས་ཅད་བྱའོ། །སོ་ནད་ཤ་ཁ་ར་ཞེས་བྱ་བ་ལ་
[355a.2]ནི། ཨ་ཧྲིད་ཤྲ་དང་དནྡའི་རྩ་བ་གཉིས་ཀྱིས་སོ་བྲུད་ལ། དེའི་འོག་ཏུ་ཐལ་སྨན་གྱི་ཕྱེ་མ་སྦྲང་རྩི་དང་སྦྱར་བས་བསྐུའོ། །སོ་ནད་དུམ་བུར་གོགས་པ་ལ་ནི་སོ་བརྩེ་བའི་གསོ་བ་རྣམས་འདིར་སྤྱད་དོ། །སོ་ནད་སྲིན་བུ་ཅན་སོ་མི་འགུལ་བ་ལ་ནི་ཐོག་མར་དུགས་བྱས་ལ་ཁྲག་དབྱུང་ངོ་། །
[355a.3]སྣུམ་ཆོས་བྱ་བ་དང་། བྱུག་པ་དང་། མཁུར་བར་བཅང་བ་དང་། སྣར་བླུགས་པ་ལ་སོགས་པ་རླུང་འཇོམས་པའི་སྨན་དང་། སྣུམ་དང་བཅས་པར་སྦྱར་བ་གཏང་ངོ་། །སོའི་ནད་ཁོང་སྟོང་དུ་འདུག་པ་ལ་ནི་བུ་རམ་མམ། སྤྲ་ཚིལ་གང་ཡང་རུང་བས་ནང་སྟོང་པ་བཀང་སྟེ་བསྲེག་པ་འམ། ཡང་
[355a.4]ན་ཤིང་ལོ་མ་བདུན་པ་དང་། ཨརྒའི་ལོ་མས་བཀང་ན་སྲིན་བུའི་ཟུག་གཟེར་འཇོམས་སོ། །ཤིང་ཀུན་དང་། ཀད་པ་ལ་དང་། ནག་ཚུར་དང་། སྭརྫི་ཀ་དང་། རུ་རྟ་དང་། བྱི་དང་ག་དང་། དེ་རྣམས་ཀྱི་ཕྱེ་མ་སོ་ལ་གདབ་པ་དང་། ཡང་ན་ཕྱེ་མ་དེ་ཉིད་རས་ལ་བསྒོས་ཏེ་སོ་ལ་གདབ་ཅིང་
[355a.5]གླན་ན་སོའི་ཟུག་གཟེར་འཇོམས་སོ། །ཡང་ན་སྨན་དེ་ཉིད་ཏིལ་མར་དང་བསྐོལ་བས་མཁུར་བར་བཅངས་ན་ཡང་ཕན་ནོ། །ཡང་ན་ཨེ་རཎྜ་དང་། བྲི་ཧ་ཏི་རྣམ་གཉིས་དང་། བྷུ་ག་དམ་པ་དང་། དེ་རྣམས་བསྐོལ་བའི་ཁུ་བ་མཁུར་བར་བཅང་ངོ་། །གསོ་བའི་སྦྱོར་བ་མང་དུ་བྱས་ཀྱང་ནད་མ་ཞི་སྟེ།
[355a.6]ནད་གཏིང་ཟུག་པ་ལྟ་ན་དང་པོ་སྐམ་པ་ཆུང་ངུའམ། སོ་དབྱུང་བའི་སྤྱད་ཀྱིས་སོ་ཐོག་མར་རྩ་བ་ནས་དབྱུང་ངོ་། །དེ་ནས་ཤིང་མངར་གྱི་ཕྱེ་མ་ཏིལ་མར་དང་སྦྱར་བ་མཁུར་བར་བཅང་བར་བྱའོ། །དེའི་འོག་ཏུ་སྨན་བི་ད་རི་དང་། ཤིང་མངར་དང་། ཤྲིང་ག་ཏ་ཀ་དང་། རྒུན་འབྲུ་དང་། ཏིལ་མར་དང་།
[355a.7]དེའི་བཅུ་འགྱུར་གྱི་འོ་མ་དང་ལྷན་ཅིག་བསྐོལ་ཏེ་མར་ལུས་པ་སྣ་སྨན་དུ་སྦྱར་རོ། །དེ་ལ་སོ་དབྱུང་དུ་མི་རུང་བ་ནི། ལུས་སྐམ་ཞིང་ཉམ་ཆུང་བ་དང་། རྒན་པོ་དང་རླུང་ནད་ཀྱིས་ཉམ་ཐག་པ་དང་ཡ་སོ་དང་དེ་དག་དབྱུང་བར་མི་བྱ་སྟེ། གལ་ཏེ་ཕྱུང་ན་ནི་བླ་བརྣན་མང་དུ་འབྱུང་བར་འགྱུར་རོ། །དེ་ལྟར་
[355b]
[355b.1]ཡིན་ན་ཡང་གལ་ཏེ་ཕྱུང་བ་ལྟ་ན་ནི་སྣུམ་པ་དང་། མངར་བ་དང་། བསིལ་བའི་རིམ་པ་རྣམས་བྱས་ན་ཕན་ནོ། །སོ་ནད་ཁྲག་མང་དུ་བྱུང་སྟེ་གྲང་བ་ལ་སོགས་པས་ཉེས་པ་ལྟ་ན་ནི་གླ་སྒང་དང་། ཨརྫུ་ནའི་ཤུན་པ་དང་། འབྲས་བུ་གསུམ་དང་། སྲི་ཡང་ཀུ་དང་། སྐྱེར་ཁཎྜ་དང་།
[355b.2]བཅའ་སྒ་དང་། དེ་རྣམས་ཀྱི་ཕྱེ་མ་སྦྲང་རྩི་དང་བཅས་པས་གདབ་པའམ་སྨན་དེ་ཉིད་བསྐོལ་བའི་ཁུ་བ་མཁུར་བར་སྤོ་བར་བྱ་བ་དང་། སྨན་མངར་བའི་སྡེ་ཚན་ཏིལ་མར་དང་སྦྱར་བས་སྣར་བླུགས་པ་རྣམས་བྱའོ། །སོ་རྙིལ་གྱི་ནད་ཨུ་པ་ཀུ་ཤ་ཞེས་བྱ་བ་ལ་ནི་ཆུ་ཚན་མཁུར་བར་བཅངས་
[355b.3]ཏེ་དུགས་བྱའོ། །དེ་ནས་དཀྱིལ་འཁོར་གྱི་དབྱིབས་འདྲ་བ་དང་། ཤིང་ཤ་ཁའི་ལོ་མ་འདྲ་བའི་མཚོན་གྱིས་ལན་མང་དུ་བྲུད་པར་བྱའོ། །དེའི་འོག་ཏུ་མར་གྱི་སྙིང་ཁུ་སྦྲང་རྩི་དང་སྦྱར་བས་བསྐུའོ། །རྒྱ་སྐྱེགས་དང་། པྲི་ཡང་ཀུ་དང་། རྨ་ཤིང་དང་། རྒྱམ་ཚ་དང་། བཙག་དང་། རུ་རྟ་
[355b.4]དང་། བཅའ་སྒ་དང་། ན་ལེ་ཤམ་དང་། ཤིང་མངར་དང་། སྐྱེར་ཁཎྜ་དང་། དེ་རྣམས་བསྐོལ་བའི་ཁུ་བ་དྲོ་འཇམ་ཙམ་མཁུར་བ་སྤོ་ཞིང་བཅངས་ཏེ། དེའི་འོག་ཏུ་མར་གྱི་སྙིང་ཁུའམ་ཏིལ་མར་གང་ཡང་རུང་བ་མཁུར་བར་བཅིང་ངོ་། །སྨན་མངར་བའི་སྡེ་ཚན་དང་མར་སྦྱར་བ་
[355b.5]ནི་སྣ་སྨན་དང་མཁུར་བར་བཅང་བར་བཟང་ངོ་། །སོ་ནད་འབུར་བ་ཞེས་བྱ་བ་ལ་ནི་ཐོག་མར་དུགས་བྱས་ལ། དེའི་འོག་ཏུ་བཅད་པ་དང་། དབུག་པ་དང་། བྲུད་པ་རྣམས་བྱའོ། །དེ་ནས་ཤིང་མངར་དང་། སྭརྫི་ཀ་དང་། བཅའ་སྒ་དང་། རྒྱམ་ཚ་དང་། དེ་རྣམས་ཀྱི་ཕྱེ་མས་གདབ་པོ། །
[355b.6]སོ་རྙིལ་གྱི་འབྲས་ནད་ལ་ནི་སྨན་ཚ་བ་དང་། རྣོ་བ་དང་། དྲོ་བ་དང་། རྩུབ་པ་རྣམས་ཀྱིས་མཁུར་བ་བཅང་བ་དང་། བསྐུ་བ་རྣམས་བྱའོ། །པུ་ཙེ་ཤེལ་དང་། རུ་རྟ་དང་། བ་སྤྲུ་བ་དང་། སྐྱེར་པ་དང་། དེ་རྣམས་ཀྱི་ཕྱེ་མས་བྲུད་པར་བྱའོ། །སྨན་བསིལ་བའི་ནུས་པ་དང་ལྡན་པས་སྨིན་
[355b.7]དུ་མི་གཞུག་པར་མཚོན་གྱིས་བསྲུང་ངོ་། །གལ་ཏེ་སྨིན་པ་ལྟ་ན་ནི་མཚོན་གྱིས་དབྲལ་ལ་ཚོས་པ་ཉིད་དུ་བསྲེག་གོ། །རྙིལ་གྱི་ནད་ཁོང་སྟོང་ཞེས་བྱ་བ་ལ་ནི་ཐོག་མར་མཚོན་གྱིས་བཅད་པ་འམ་བྲུད་དེ་དེའི་འོག་ཏུ་སེང་ཕྲོམ་དང་། གླ་སྒང་དང་། ཤུ་ཏི་དང་། འབྲས་བུ་གསུམ་དང་།
[356a]
[356a.1]སྐྱེར་ཁཎྜ་དང་། རྨ་ཤིང་དང་། རྒྱ་སྐྱེགས་ཤིང་དང་། དེ་རྣམས་ཀྱི་ཕྱེ་མ་སྦྲང་རྩི་དང་སྦྱར་བས་གདབ་པར་བྱའོ། །སྨན་དེ་དག་ཉིད་ཀད་པ་ལ་དང་བཅས་པར་བསྐོལ་བའི་ཁུ་བ་མཁུར་བར་བཅང་བར་བྱའོ། །ཤིང་མངར་དང་། སེང་ཕྲོམ་དང་། དཱུར་བ་དཀར་
[356a.2]པོ་དང་། ཐལ་ཏྲེས་དང་། ཨ་ཀ་རུ་དང་། ཙནྡན་དང་། བཙག་ཡུག་སྣམ་དང་། ཁ་ར་དཀར་པོ་དང་། དེ་རྣམས་ཏིལ་མར་དང་ལྷན་ཅིག་བསྐོལ་ཏེ་སྣ་སྨན་དུ་སྦྱར་རོ། །སོ་རྩའི་ཤ་ལྷག་སྐྱེས་པའི་ནད་ལ་ནི་མཚོན་གྱིས་བཅད་དེ། དེའི་འོག་ཏུ་ཤུ་དག་དང་། ཏེ་ཛོ་པ་ཏི་དང་། པ་ཐ་དང་།
[356a.3]སྭརྫི་ཀའི་ཐལ་བ་དང་། དེ་རྣམས་ཀྱི་ཕྱེ་མ་སྦྲང་རྩི་དང་སྦྱར་བས་རྨ་ལ་གདབ་པོ། །པ་ཏོ་ལ་དང་། ནིམ་པ་དང་། འབྲས་བུ་གསུམ་བསྐོལ་བའི་ཁུ་བས་ཁ་བཀང་བ་བྱས་ན་ཕན་ནོ། །སོ་རྩའི་ནད་བི་ད་ར་བ་ཞེས་བྱ་བ་ལ་ནི། མཚོན་དཀྱིལ་འཁོར་འདྲ་བས་ཁྲག་དབྱུང་ལ་དེ་ནས་ཐལ་
[356a.4]སྨན་གྱིས་གདབ་པོ། །སྣ་སྨན་དང་མཁུར་བར་བཅང་བ་ཡང་སྨན་བསིལ་བས་བྱའོ། །གཞན་ཡང་ལུས་གོང་འོག་ཏུ་དག་པར་བྱ་ཞིང་མགོའི་ཁྲུས་སྨན་ཡང་སྦྱར་རོ། །སོ་ནང་སྟོང་པའི་རྩ་བར་སོ་སྐྱེས་པ་ནི་ཕྱུང་ལ་བསྲེག་པར་བྱའོ། །གང་གི་སོ་ཡོ་ཞིང་འཆུས་པ་ལྟ་ན་ནི་བསྲང་སྟེ་མཚམས་
[356a.5]སུ་བུ་རམ་མམ་སྤྲ་ཚིལ་གྱིས་དགང་ངོ་། །སྲིང་ཤིང་གི་མེ་ཏོག་དང་། པོ་སོན་ཆ་དང་། སེང་ལྡེང་དང་། སྭ་དུ་ཀན་ཏ་ཀ་དང་། དེ་རྣམས་བསྐོལ་བའི་ཁུ་བས་བཀྲུ་བར་བྱའོ། །ལྕེ་ནད་གསོ་བ་དེ་ལ་རླུང་ལས་གྱུར་པའི་ལྕེ་ནད་ཚེར་མ་ལྟར་རྩུབ་པ་ལ་ནི། ཤིང་འོ་མ་ཅན་གྱིས་ཁ་བཀང་
[356a.6]ཞིང་། ཏིལ་མར་གྱི་སྣ་སྨན་ཡང་སྦྱར་རོ། །དེ་བཞིན་དུ་རླུང་གི་མཆུ་ནད་གསོ་བའི་ཆོ་ག་ཐམས་ཅད་ཀྱང་འདིར་སྦྱར་རོ། །མཁྲིས་པ་ལས་གྱུར་པའི་ལྕེའི་ནད་ལ་ནི་མཚོན་གྱིས་བཞར་ལ་ཁྲག་དབྱུང་ངོ་། །དེའི་འོག་ཏུ་སྨན་གྱིས་གདབ་པ་དང་། མཁུར་བར་བཅང་བ་དང་། སྣ་སྨན་ཡང་སྦྱར་རོ། །
[356a.7]མངར་བའི་སྨན་དང་སྦྱར་བ་བྱས་ན་ཕན་ནོ། །བད་ཀན་ལས་གྱུར་པའི་ལྕེ་ནད་ལ་ནི་དང་པོར་ཡུངས་ཀར་དང་། ཚ་བ་གསུམ་ལ་སོགས་པ་སྨན་རྣོན་པོས་དུགས་བྱས་ན་ཕན་ནོ། །ལྕེ་ནད་ཨ་ལས་ཞེས་བྱ་བ་ལ་ནི་མཚོན་གྱི་ལས་མི་བྱའོ། །ལྕེའི་འོག་ཏུ་ལྕེ་ལྷག་སྐྱེས་པའི་ནད་ལ་ནི་ལྕགས་ཀྱུ་
[356b]
[356b.1]གུག་པོས་བཟུང་ལ་དྲངས་ཏེ་མཚོན་དཀྱིལ་འཁོར་འདྲ་བས་བཅད་དེ། དེའི་འོག་ཏུ་སྨན་རྣོན་པོས་བསྐུ་བ་ལ་སོགས་པ་བྱའོ། །ལྕེ་ཕུགས་སུ་ལྕེ་ལྷག་སྐྱེས་པའི་ནང་ལ་ནི་དང་པོ་ཁྲག་གཟགས་ཏེ་ནས་ཚིག་འཁུས་པའི་ཁུ་བའི་ཐལ་བས་གདབ་པོ། །ལྕེའུ་ཆུང་གི་ནད་ལ་ནི་སྣར་བླུགས་པ་
[356b.2]དང་། མཁུར་བར་བཅང་བ་དང་། བྲུད་པ་ལ་སོགས་པའི་ཆོ་ག་བད་ཀན་གྱི་གསོ་བ་རྣམས་འདིར་སྦྱར་རོ། །ལྕེའུ་ཆུང་གི་ནད་ག་གོན་གྱི་ས་བོན་བཞིན་དུ་ཚབས་ཆེར་སྐྱེས་ཏེ་སྐྲངས་ན་ནི་སྨན་པ་མདུན་དུ་འདུག་སྟེ་ལྕགས་ཀྱུ་གུག་པོས་མདུན་དུ་དྲངས་ལ། མཚོན་དཀྱིལ་འཁོར་འདྲ་བས་
[356b.3]རྩེ་དང་རྩ་བར་མ་སོང་བའི་དབུས་སུ་བཅད་དོ། །བཅད་དྲགས་ན་ནི་ཁྲག་ཟད་དེ་འཆི་བར་བྱེད་དོ། །བཅད་ཆུང་ན་ནི་ནད་འཕེལ་བར་བྱེད་དོ། །དེ་ལྟར་བཅད་པའི་འོག་ཏུ་ན་ལེ་ཤམ་དང་། བོང་ང་དཀར་པོ་དང་། པ་ཐ་དང་། ཤུ་དག་དང་། རུ་རྟ་དང་། གླ་རྩི་དང་། ལན་ཚྭ་དང་། དེ་རྣམས་ཀྱི་ཕྱེ་
[356b.4]མས་གདབ་པོ། །པུ་ཙེ་ཤེལ་དང་། བོང་ང་དཀར་པོ་དང་། པ་ཐ་དང་། ནིས་པ་པ་དང་། རུ་རྟ་དང་། ཤུ་དག་རྣམས་བསྐོལ་བའི་ཁུ་བས་མཁུར་བ་དགང་བར་བྱའོ། །རྐན་ནད་གསོ་བ། རྐན་ནད་ཤའི་ཚོགས་ཞེས་བྱ་བ་དང་། ཆུ་བུར་ལྟ་བུ་དང་། རུས་སྦལ་གྱི་རྒྱབ་འདྲ་བ་དང་གསུམ་ལ་ནི་
[356b.5]མཚོན་གྱིས་བྲུད་པའི་ལས་བྱའོ། །དེ་ཉིད་སྨིན་ཀྱང་རུང་མ་སྨིན་ཀྱང་རུང་། ནག་ཚུར་དང་། སྐྱེར་ཁཎྜ་དང་། སྦྲང་རྩི་དང་སྦྱར་བས་བསྐུའོ། །མངར་ཞིང་བསིལ་བའི་སྨན་བསྐོལ་བའི་ཁུ་བ་མཁུར་བར་བཅང་བར་བྱའོ། །སྨིན་ཟིན་ནས་ནི་པདྨ་བཞིན་དུ་མཚོན་གྱིས་དྲལ་ཏེ། སྨན་
[356b.6]རྣོ་བ་དང་དྲོ་བས་གདབ་བར་བྱའོ། །བ་ཤ་ཀ་དང་། ནིམ་པ་དང་། པ་ཏོ་ལ་ལ་སོགས་པ་རྣོ་བའི་སྨན་རྣམས་ཀྱང་མཁུར་བར་བཅང་ངོ་། །རྐན་སྐམ་པའི་ནད་སྐོམ་དད་མེད་པ་ལ་ནི་ཁ་ཟས་ཀྱི་གོང་དུ་ཞུན་མར་བླུད་དེ། དེའི་འོག་ཏུ་ཁ་ཟས་བཟའོ། །བཏུང་བར་ནི་པི་པི་ལིང་དང་། བཅའ་སྒ་བསྐོལ་
[356b.7]བའི་ཁུ་བ་བླུད་དོ། །མཁུར་བར་བཅང་བ་ནི་སྐྱུར་གང་ཡང་རུང་བས་བྱའོ། །སྣུམ་ཆོས་སུ་ནི་ཐང་ལས་སྐྱེས་པའི་ཤ་ཁུ་སྦྱིན་ལ། ཞུན་མར་དང་འོ་མ་ནི་སྣ་སྨན་དུ་བླུགས་སོ། །ལྐོག་མའི་ནད་གསོ་བ་ཐམས་ཅད་ལ་ཐོག་མར་གཏར་གས་ཁྲག་ཕྱུང་སྟེ། སྣ་སྨན་རྣོན་པོའི་ལས་བྱའོ། །སྐྱེར་པའི་
[357a]
[357a.1]ཤུན་པ་དང་། སྐྱེར་ཁཎྜ་དང་། ནིམ་པ་དང་། དུག་མོ་ཡུངས་བསྐོལ་བའི་ཁུ་བའམ། ཡང་ན་ཨ་རུ་ར་བསྐོལ་བའི་ཁུ་བའི་ནང་དུ་སྦྲང་རྩི་དང་སྦྱར་བ་བླུད་དོ། །སྨིན་པའི་སྨན་བྱའོ། །འབྲས་བུ་གསུམ་དང་། ཚ་བ་གསུམ་དང་། ནས་ཚིག་འཁུས་པའི་ཐལ་བ་དང་།
[357a.2]སྐྱེར་པ་དང་། ཙི་ཏྲ་ཀ་དང་། སྐྱེར་ཁཎྜ་དང་། པ་ཐ་དང་། ཏེ་ཛོ་པ་ཏི་དང་། ནིས་པ་པ་དང་། དེ་རྣམས་ཚྭ་དང་། བ་གཅིན་དང་སྦྱར་བའི་རི་ལུར་བྱས་པ་དང་། ཕྱེ་མར་བྱས་ནས་གདབ་པ་དང་། མཁུར་བར་དགང་བ་ལ་སོགས་པ་ཅི་རིགས་པར་བྱའོ། །ལྕང་མ་དང་། གེ་རི་ཀརྞི་ཀ་
[357a.3]དང་། གླ་སྒང་དང་། ཐང་ཤིང་དང་། བཅའ་སྒ་དང་། ཤུ་དག་དང་། དན་ཏི་དང་། མུར་བ་དང་། དེ་རྣམས་ལྷན་ཅིག་སྦྱར་བའི་ལྡེ་གུ་དྲོ་འཇམ་ཙམ་བསྐུས་ན་ན་ཞིང་སྐྲངས་པ་སེལ་ཏོ། །དེ་ལ་རླུང་ལས་གྱུར་པ་རོ་ཧི་ནའི་ནད་ལ་ནི་ཕྱི་ནང་གཉིས་ནས་དུགས་བྱ་སྟེ། མྱུར་དུ་ལན་ཚྭ་དང་ལྡན་པའི་
[357a.4]མཚོན་ནམ་སེན་མོས་བཞར་ཞིང་དབྲི་བར་བྱའོ། །རྩ་བ་ལྔ་བསྐོལ་བའི་ཁུ་བ་མཁུར་བར་དགང་བ་སྟེ། ཏིལ་མར་གྱི་སྣ་སྨན་ཡང་སྦྱར་རོ། །མཁྲིས་པ་ལས་གྱུར་པའི་ལྐོག་མའི་ནད་ལ་ནི་ཁྲག་ཕྱུང་ལ། ཁ་ར་དཀར་པོ་དང་། པྲི་ཡང་ཀུ་དང་། སྦྲང་རྩི་སྦྱར་བས་བསྐུ་བར་བྱའོ། །
[357a.5]སེང་ཕྲོམ་དང་། རྨ་ཤིང་བསྐོལ་བའི་ཁུ་བ་མཁུར་བར་བཅང་ངོ་། །རྒུན་འབྲུ་དང་། པ་རུ་ཀ་ཤ་བསྐོལ་བའི་ཁུ་བ་མཁུར་བར་བཅངས་ན་ཡང་ཕན་ནོ། །ཁྲག་ལས་གྱུར་པའི་ལྐོག་མའི་ནད་ལ་ནི་ཆོ་ག་གོང་མ་བཞིན་དུ་བྱས་ཏེ་གསོ་བར་བྱའོ། །ཁྲག་ལས་གྱུར་པའི་ལྐོག་མའི་ནད་ནི་གསོ་
[357a.6]དཀའ་སྟེ་སྤང་བར་བྱའོ་ཞེས་ཀྱང་བཤད་དོ། །བད་ཀན་ལས་གྱུར་པའི་ལྐོག་མའི་ནད་ལ་ནི་མེ་མདག་དུད་པ་ཅན་གྱིས་བདུག་པ་དང་། སྨན་ཚ་བ་རྣམས་ཀྱིས་གདབ་པར་བྱའོ། །ཡང་ན་ཨ་པ་མརྒའི་འབྲས་བུ་དང་། གེ་རི་ཀརྞི་དཀར་པོ་དང་། དན་ཏི་དང་། བྱི་དང་ག་དང་། རྒྱམ་ཚ་དང་། དེ་རྣམས་
[357a.7]ཏིལ་མར་དང་སྦྱར་བས་སྣ་སྨན་དང་མཁུར་བར་བཅང་བ་རབ་ཏུ་བསྔགས་སོ། །ལྐོག་མའི་ནད་བྲིན་ད་དང་། ཤ་ལུ་ཀ་དང་། དུ་དྷི་ཀེ་རི་ཀ་དང་། ཀྱི་ལ་ཡུ་ཀ་དང་། དེ་རྣམས་ལ་ཡང་གསོ་བ་གོང་མ་བཞིན་དུ་བྱའོ། །ལྐོག་མའི་འབྲས་ནད་ལ་ནི་ཁྲག་གཟགས་ཏེ། འབྲས་བུ་གསུམ་དང་།
[357b]
[357b.1]གི་ཝང་དང་། སྐྱེར་ཁཎྜ་དང་། བཙག་ཡུག་སྣམ་དང་། སེང་ཕྲོམ་དང་། ལན་ཚྭ་དང་། རྨ་ཤིང་དང་། པི་པི་ལིང་དང་། དེ་རྣམས་ཀྱིས་བྱུག་པ་དང་། མཁུར་བར་བཅང་བར་བྱའོ། །དེ་ལ་རླུང་ལས་གྱུར་པའི་ལྦ་བའི་ནད་ལ་ནི་ཏིལ་དང་། ལེ་བརྒན་རྩི་དང་། ཟར་མ་དང་། པི་ལ་ཡ་དང་། ཨ་ས་ལ་དང་། དེ་
[357b.2]རྣམས་ཀྱི་ས་བོན་བཏགས་པས་དུགས་བྱ་སྟེ། དེའི་འོག་ཏུ་དབྱུང་བར་བྱའོ། །དེ་ནས་རྨ་འདྲུབས་པ་དང་། ཤེ་ཀྲུ་དང་། སེང་ཕྲོམ་དང་། ཨགྣི་མནྠ་དང་། ཧསྟི་པི་པི་ལིང་དང་། བ་སྤྲུ་བ་དང་། ཤིང་ཏ་ལ་དང་། ཨ་རུ་ར་དང་། ཨརྐའི་རྩ་བ་དང་། ཀར་ཀ་ཏའི་མེ་ཏོག་
[357b.3]དང་། དེ་རྣམས་སྦྱར་བའི་ལྡེ་གུས་ཡང་དང་ཡང་བསྐུ་བར་བྱའོ། །ཡང་ན་ཨེ་ཀ་ཤི་ཀ་ཆང་ངམ་རང་སྐྱུར་ལས་བཏགས་ཏེ་བསྐུའོ། །སླེ་ཏྲེས་དང་། ནིམ་པ་དང་། དུག་མོ་ཡུངས་དང་། ཧན་ས་པ་ཏི་དང་། བ་ལ་རྣམ་གཉིས་དང་། ཐང་ཤིང་དང་། པི་པི་ལིང་དང་། དེ་རྣམས་ཏིལ་
[357b.4]མར་དང་ལྷན་ཅིག་སྦྱར་ཏེ་བླུད་དོ། །བད་ཀན་ལས་གྱུར་པའི་ལྦ་བའི་ནད་ལ་ཡང་ཆོ་ག་གོང་མ་ལྟར་བྱའོ། །ཡང་ན་ཨ་ཟ་གན་དྷ་དང་། བོང་ང་དཀར་པོ་དང་། བི་ཤ་ལྱ་དང་། ཨ་ཙ་ཤྲིང་གི་འོལ་མ་སེ་དང་། ཀུ་བ་ཁ་བོ་དང་། ཤུ་ཀ་ཧ་དང་། རྒྱ་སྐྱེགས་ཤིང་གི་ཐལ་བ་དང་། དེ་རྣམས་
[357b.5]བཏགས་པའི་ཕྱེ་མས་བྱུག་པ་དང་། དུགས་ཀྱིས་བཞུ་བ་ལ་སོགས་པ་ཡང་བྱའོ། །མུ་ཀྵ་ཀའི་ཐལ་བ་བ་གཅིན་དང་བསྐྱོས་ཏེ་བཙགས་པའི་ཁུ་བའི་ནང་དུ་ཅི་ཙེ་བཙོས་པའི་ཟས་དང་བཏུང་བ་ཡང་སྤྱད་དོ། །ཡང་ན་དུག་མོ་ཡུངས་ཀྱི་སྡེ་ཚན་དང་། ལན་ཚྭ་རྣམ་ལྔ་དང་། ཏིལ་མར་དང་ལྷན་
[357b.6]ཅིག་བསྐོལ་ཏེ་བླུད་དོ། །དེ་བཞིན་དུ་བད་ཀན་འཛོམས་པའི་བདུག་པ་དང་། སློན་དང་། སྣ་སྨན་ལ་སོགས་པ་ཡང་བསྟེན་པར་བྱའོ། །ཚིལ་ལས་གྱུར་པའི་ལྦ་བའི་ནད་ལ་ནི་དང་པོ་ཁྲག་གཏར་ལ་དེ་ནས་བད་ཀན་འཇོམས་པའི་སྨན་བསྟེན་ནོ། །ཡང་ན་སྨན་ཨ་ས་ནའི་སྡེ་ཚན་བ་གཅིན་དང་
[357b.7]བསྐོལ་བའི་ཁུ་བ་སྔ་དྲོའི་དུས་སུ་བཏུང་ངོ་། །དེ་ལྟར་བྱས་ཀྱང་མ་ཞི་ན་སྨིན་པར་བྱ་བའི་ཆོ་ག་བྱས་ལ་རྨ་གསོ་བའི་ཆོ་ག་ཐམས་ཅད་འདིར་སྦྱར་བར་བྱའོ། །ཁ་ནད་གསོ་བ། ཁ་ནད་སྨིན་པ་ལ་ནི་འབྲས་བུ་གསུམ་དང་། པཱ་ཐ་དང་། རྒུན་འབྲུ་དང་། སྣ་མའི་མེ་ཏོག་དང་། དེ་རྣམས་བསྐོལ་ཏེ་བསྒྲངས་
[358a]
[358a.1]པའི་ནང་དུ་སྦྲང་རྩི་བཏབ་པ་ཁར་བཅང་ཞིང་བསྐུ་བར་བྱའོ། །ཡང་ན་ཞིམ་ཐིག་ལེའི་སྡེ་ཚན་བཏགས་པའི་ཕྱེ་མ་བལྡད་ཅིང་ཁའི་ལྗབ་ལྗིབ་ཕྱིར་དབོའོ། །རླུང་གིས་ཁ་ནད་སྨིན་པ་ལ་ནི་པི་པི་ལིང་དང་། ལན་ཚྭ་དང་། སུག་སྨེལ་གྱི་ཕྱེ་མས་གདབ་པོ། །ཡང་ན་རླུང་འཇོམས་པའི་སྨན་དང་།
[358a.2]བསྐོལ་བའི་སྣ་སྨན་དང་། མཁུར་བར་བཅང་བ་ཡང་བྱའོ། །མཁྲིས་པ་དང་ཁྲག་ལས་གྱུར་པའི་ཁ་ནད་ལ་ནི་ཁྲག་མཁྲིས་འཇོམས་པའི་སྨན་སྦྱར་རོ། །བད་ཀན་ལས་གྱུར་པ་ནི་བད་ཀན་འཇོམས་པའི་སྨན་བསྟེན་ནོ། །ཁའི་འབྲུམ་བུ་སྲ་ཞིང་བརྟན་པ་ལ་ནི་ཤ་ཁ་པ་ཏྲ་ཞེས་བྱ་བའི་མཚོན་གྱིས་
[358a.3]དབྲལ་བར་བྱའོ། །སྐྱོན་གང་དང་གང་གི་ཤས་ཆེ་བ་བརྟགས་ཏེ་འདུས་པའི་ནད་ལ་ཡང་གསོ་བ་དེ་ལྟར་བྱའོ། །ཁའི་འབྲུམ་བུ་ཚབས་ཆེར་སྐྱེས་པ་ལ་ནི་དང་པོ་བཅད་ལ་སྭརྫི་ཀའི་ཐལ་བ་དང་། བཅའ་སྒའི་ཕྱེ་མ་སྦྲང་རྩི་དང་སྦྱར་བས་རྨ་ལ་གདབ་ཅིང་། དེ་གཉིས་བསྐོལ་བའི་ཁུ་བ་སྦྲང་རྩི་དང་སྦྱར་
[358a.4]བ་མཁུར་བར་བཅང་ངོ་། །ཡང་ན་སླེ་ཏྲེས་དང་། ནིམ་པ་བཏགས་པའི་ཕྱེ་མ་སྦྲང་རྩི་དང་ཏིལ་མར་དང་སྦྱར་བ་མཁུར་བར་བཅང་ངོ་། །ཁ་ཟས་ནི་ནས་ལས་བྱས་པ་བཟའ་ཞིང་སྨན་རྣོ་བ་དང་སྦྱར་བའི་ཏིལ་མར་གྱིས་སྣ་སྨན་དང་བསྐུ་བྱུག་བྱའོ། །ཁ་ནས་རྣག་འབྱུང་བ་ལ་ནི་དུ་བ་བརྔུབ་པ་དང་། སྣ་སྨན་
[358a.5]རྣོན་པོ་གཏང་བར་བྱའོ། །བཙོད་དང་། སེང་ཕྲོམ་དང་། ད་ཏ་ཀི་དང་། པྲི་ཡང་ཀུ་དང་། ཤུག་པ་དང་། དེ་རྣམས་ཆུ་དང་སྦྱར་བས་ཁའི་ནང་དུ་བཀྲུ་བར་བྱ་སྟེ། ཕྱེ་མས་ཀྱང་ཁའི་ནང་དུ་གདབ་པོ། །སོ་ནང་ཨུ་པ་ཀུ་ཤའི་བསིལ་ཆོས་དང་སྣ་སྨན་ལ་སོགས་པ་ཡང་འདིར་སྦྱར་རོ། །འབྲས་བུ་གསུམ་དང་།
[358a.6]ཙི་ཏྲ་ཀ་དང་། ཏིག་ཏ་དང་། ཤིང་མངར་དང་། ཡུངས་ཀར་དང་། ཚ་བ་གསུམ་དང་། གླ་སྒང་དང་། སེར་པོ་རྣམ་གཉིས་དང་། ཡ་བཀྵ་ར་དང་། ད་ཏྲིག་དང་། སྐྱུར་དང་། ཙནྡན་དང་། ལྕང་མ་དང་། ཨ་ཤྭངྠ་དང་། འཛམ་བུའི་མྱུ་གུ་དང་། ཤུན་ཕྲག་དང་། ཨ་ཧི་མ་རའི་ཤུན་པ་དང་། སེང་ལྡེང་གི་སྙིང་པོ་དང་
[358a.7]དེ་རྣམས་བསྐོལ་ཏེ་ཚིགས་མ་བོར་ལ་དངས་མ་ཡང་བསྐོལ་ཏེ་སྐན་ཏེར་སོང་བའི་ནང་དུ་སྨན་དེ་ཉིད་ཀྱི་ཕྱེ་མ་བཏབ་སྟེ་རི་ལུར་བྱས་པ་ཁའི་ནང་དུ་རྟག་ཏུ་མུར་ཞིང་བཞག་ན། ལྐོག་མའི་ནད་དང་། མཆུ་ནད་དང་། རྐན་ལ་སོགས་པ་ཁའི་ནད་ཤིན་ཏུ་གསོ་དཀའ་བ་ཡང་འཇོམས་པར་བྱེད་དོ། །ཁྱད་པར་
[358b]
[358b.1]དུ་རོ་ཧི་ནའི་ནད་དང་། ཁ་སྐམས་པ་དང་། ལྕེས་རོ་མི་ཚོར་བ་རྣམས་སེལ་བར་བྱེད་དོ། །ཞེས་ལུས་འཕགས་ཀྱི་བདག་པོས་བཤད་པ་ཡིན་ནོ། །སེང་ལྡེང་སྲང་བརྒྱད་ཅུ་རྩ་གཉིས་ཆུ་སྲང་ཉིས་སྟོང་བཞི་བཅུ་རྩ་བརྒྱད་ཀྱི་ནང་དུ་བསྐོལ་བའི་ཁུ་བའི་ནང་དུ་ཙནྡན་དང་། ཨ་ཀ་རུ་དང་། གུར་གུམ་
[358b.2]དང་། པ་རི་བེ་ལ་དང་། བ་ལ་དང་། པུ་ཤེལ་ཙེ་དང་། ཐང་ཤིང་དང་། སེང་ཕྲོམ་དང་། རྒུན་འབྲུ་དང་། བཙོད་དང་། མོན་ཆ་ར་དང་། ཤུག་པ་དང་། བྱི་དང་ག་དང་། འབུ་སུ་ཧང་དང་། ཆུ་སྲིན་སེན་མོ་དང་། རྒྱ་སྤོས་དང་། ཀད་པ་ལ་དང་། སུག་སྨེལ་དང་། བྱ་མ་ཀ་དང་། རྨ་ཤིང་དང་།
[358b.3]དེ་རྣམས་ཞོ་གཉིས་གཉིས་དང་། ཏིལ་མར་སྲང་སུམ་ཅུ་རྩ་གཉིས་དང་བསྐོལ་ཏེ་མར་འབའ་ཞིག་ལུས་པ་ལས་བཏུང་བ་དང་། སྣ་སྨན་དུ་བཏང་བ་དང་། མཁུར་བ་བཀང་ཞིང་བཅང་བར་བྱས་ན། ཁའི་ནང་གི་ནད་ཐམས་ཅད་སེལ་ཞིང་ཁྱད་པར་དུ་མིག་བྱ་རྒོད་ལྟར་གསལ་བ་དང་། རྣ་བའང་
[358b.4]ཕག་པ་བཞིན་དུ་གསང་བར་བྱེད་དོ། །ཙཀྲ་མརྡ་དང་། སྐྱེར་པ་དང་། སེང་ཕྲོམ་རྣམས་ཀྱིས་ལྡེ་གུ་བྱས་ཏེ་གདོང་ལ་བསྐུས་ན་ངོ་ཁབས་དང་སྨེ་བ་དང་དྲི་མ་ལ་སོགས་པའི་སྐྱོན་ཐམས་ཅད་སེལ་ཞིང་གདོང་པ་ཟླ་བ་ལྟར་མདངས་གསལ་བར་འགྱུར་རོ། །ས་ཧ་ར་ཛ་སྲང་བརྒྱད་ཅུ་ཆུ་སྲང་ཉིས་སྟོང་བཞི་
[358b.5]བཅུ་རྩ་བརྒྱད་དང་བསྐོལ་ཏེ་བཞི་ཆ་ལུས་པའི་ནང་དུ་སེང་ལྡེང་དང་། འཛམ་བུ་དང་། ཤིང་མངར་དང་། ཤུར་བ་དཀར་པོ་དང་། ཤིང་ལྕང་ཀོང་དང་། ཧསྟི་མ་ར་དང་། ཨུཏྤལ་སྔོན་པོ་དང་། དེ་རྣམས་སྲང་ཕྱེད་ཕྱེད་ཞིབ་ཏུ་བཏགས་ཏེ། ཏིལ་མར་སྲང་སུམ་ཅུ་རྩ་གཉིས་དང་བསྐོལ་ཏེ། མར་ལུས་
[358b.6]པ་ལས་མཁུར་བར་བཅང་ན། ཁའི་ནད་ཐམས་ཅད་འཇོམས་པར་བྱེད་ཅིང་། ཁྱད་པར་དུ་སོ་འགུལ་ཞིང་ཡོ་བ་བརྟན་པར་བྱེད་དོ། །སེང་ལྡེང་གི་སྙིང་པོ་སྲང་ཉིས་བརྒྱ་དང་། ཨ་རི་མེ་ད་སའི་ཤུན་པ་སྲང་བརྒྱད་ཆུ་སྲང་ཉིས་སྟོང་བཞི་བཅུ་རྩ་བརྒྱད་དང་ལྷན་ཅིག་བསྐོལ་ཏེ། བཞི་ཆ་ལུས་པ་དང་ཚིགས་མ་
[358b.7]བོར་ལ་དངས་མ་ཡང་བསྐོལ་ལ་སྐན་ཏེར་སོང་སྟེ་བསྒོངས་པའི་ནང་དུ་དབྱི་མོ་དང་། བ་ལ་ཀ་དང་། རྨ་ཤིང་དང་། བཙག་དང་། ཙནྡན་རྣམ་གཉིས་དང་། སེང་ཕྲོམ་དང་། པྲ་པུཎྜ་རཱི་ཀ་དང་། ཤིང་མངར་དང་། རྒྱ་སྐྱེགས་དང་། ཨན་ཛ་ན་རྣམ་གཉིས་དང་། ད་ཏ་ཀི་དང་། ཀད་པ་ལའི་འབྲས་བུ་དང་། སེར་
[359a]
[359a.1]པོ་རྣམ་གཉིས་དང་། འབྲས་བུ་གསུམ་དང་། དྲི་སྣ་བཞི་དང་། ཨ་ག་རུ་དང་། གླ་སྒང་དང་། བཙོ་དང་། ནྱ་གྲོ་དྷའི་མྱུ་གུ་དང་། སྤང་སྤོས་དང་། བྱི་ཚེར་བ་དང་། ཤུག་པ་དང་། ཨོ་ལ་བ་ལུ་ཀ་དང་། བཙོད་དང་། དེ་རྣམས་ཞོ་གཉིས་གཉིས་ཞིབ་ཏུ་བཏགས་པའི་ཕྱེ་མ་དང་། ཛཱ་ཏི་བྷ་དྲ་དང་།
[359a.2]ཛཱ་ཏི་པ་ལ་དང་། ལི་ཤི་དང་། ཀ་ཀོ་ལ་དང་། ཀོ་ལ་ཀ་དང་། དེ་རྣམས་སྲང་རེ་རེ་དང་། ག་པུར་ཤེལ་མདོག་དཀར་པོ་དྲི་མ་མེད་པ་སྲང་ཉི་ཤུ་དང་། དེ་རྣམས་ཀྱི་ཕྱེ་མ་ཡང་བཅུག་སྟེ་རི་ལུར་བྱས་ལ་རྟག་ཏུ་ཁར་བཞག་ན་ཁའི་ནད་ཐམས་ཅད་སེལ་ལོ། །གོང་གི་སྨན་ཀུན་མ་འབྱོར་ན། དེ་ལས་གང་
[359a.3]རྙེད་པའི་སྨན་གྱི་ཕྱེ་མ་དང་། ཏིལ་མར་བསྐོལ་ལ། ཆོ་ག་གོང་མ་བཞིན་དུ་བྱས་ཏེ་མཁུར་བར་བཅངས་ན། ཁའི་ནད་ཐམས་ཅད་སེལ་ལོ་ཞེས་བཤད་དོ། །སོ་བརྟན་པར་བྱེད་པའི་མཆོག་ཡིན་ནོ། །ཡང་སྨན་གོང་མ་དེ་ཉིད་དང་། སེང་ལྡེང་གི་སྙིང་པོ་རི་ལུར་བྱས་པ་དང་། ཨ་རི་མེ་ད་ས་དང་
[359a.4]སྦྱར་བའི་ཏིལ་མར་དང་སྦྱར་ཏེ་བཏུང་ན། ནད་མེད་ཅིང་ཐ་མལ་པ་ཞིག་ན་ཡང་ཉིན་རེ་བསྟེན་ན་སོ་བརྟན་པར་འགྱུར་རོ། །རྒུན་འབྲུ་དང་། སླེ་ཏྲེས་དང་། སུ་མ་ན་དང་། སུ་མ་ནའི་ལོ་མ་དང་། སྐྱེར་པ་དང་། བྱི་ཚེར་བ་དང་། འབྲས་བུ་གསུམ་དང་བསྐོལ་བ་སྦྲང་རྩི་དང་སྦྱར་བ་འདིས་མཁུར་བར་བཅང་བར་
[359a.5]བྱས་ན་ཁའི་ནད་ཐམས་ཅད་སེལ་བར་བྱེད་དོ། །པ་ཐ་དང་། སྐྱེར་པ་དང་། རུ་རྟ་དང་། གླ་སྒང་དང་། བཙོད་དང་། པུ་ཤེལ་ཙེ་དང་། ཡུང་བ་དང་། སེང་ཕྲོམ་དང་། ཏེ་ཛོ་བ་ཏི་དང་། དེ་རྣམས་ཀྱི་ཕྱེ་མ་སྦྲང་རྩི་དང་སྦྱར་བས་བསྐུ་བར་བྱས་ན། སོའི་རྙིལ་ན་བས་ཉམ་ཐག་ཅིང་གཡའ་བ་དང་། སྨིན་པ་དང་། འཛག་པ་
[359a.6]རྣམས་འཇོམས་སོ། །ཁྱིམ་གྱི་དུད་པ་དང་། སྐྱེར་ཁཎྜ་དང་། པ་ཐ་དང་། ཚྭ་བ་གསུམ་དང་། ཡ་བཀྵ་ར་དང་། ཙི་ཏྲ་ཀ་དང་། ལྕགས་ཕྱེ་དང་། འབྲས་བུ་གསུམ་དང་། ཏེ་ཛོ་པ་ཏི་དང་། དེ་རྣམས་ཀྱི་ཕྱེ་མ་སྦྲང་རྩི་དང་སྦྱར་བ་ནི། ཏ་ལ་ཀའི་ཕྱེ་མ་ཞེས་བྱ་བ་སྟེ་ཁར་བཅངས་ན་ཁའི་ནད་དང་། སོ་འགུལ་
[359a.7]བའི་ནད་རྣམས་ལ་ཕན་ནོ། །སྐྱེར་པ་དང་། རྒྱམ་ཚ་དང་། ལྡོང་རོས་དང་། ནས་ཚིག་འཁུས་པའི་ཐལ་བ་དང་། བ་བླ་དང་། དེ་རྣམས་ཀྱི་ཕྱེ་མ་མར་དང་སྦྲང་རྩི་དང་སྦྱར་བ་ནི་སི་ཏྲ་པ་ཞེས་བྱ་བའི་ཕྱེ་མ་ཡིན་ཏེ། དེ་ཁར་བཞག་ན་ཁ་དང་སོ་འགུལ་བའི་ནད་རྣམས་ཞི་བར་བྱེད་དོ། །བ་གཅིན་གྱི་ནང་དུ་ཨ་རུ་
[359b]
[359b.1]རའི་ཚི་གུ་བསྐོལ་ཏེ་ཞུ་བ་དང་། དེའི་ཁུ་བ་བ་ལ་ཀ་དང་། ཤུ་ཏི་དང་། རུ་རྟ་གསུམ་གྱི་ཕྱེ་མ་བསྐོལ་བ་ཁར་བཞག་ན། ཁའི་ནད་ཡུན་རིང་བ་ཡང་འཇོམས་པར་བྱེད་དོ། །ཇི་ལྟར་རྒྱལ་པོས་གནང་བའི་སྐྱེས་བུ་ཕུང་ཁྲོལ་གྱིས་མི་ཚུགས་པ་བཞིན་ནོ། །ལོ་མ་བདུན་པ་དང་། པུ་ཤེལ་ཙེ་དང་། པ་ཏོ་ལ་
[359b.2]དང་། བཅའ་སྒ་དང་། འབྲས་བུ་གསུམ་དང་། པི་ཤ་ལ་དང་། ཀྱི་ལྕེ་བ་དང་། ཏིག་ཏ་དང་། སེར་པོ་རྣམ་གཉིས་དང་། སླེ་ཏྲེས་དང་། དེ་རྣམས་བསྐོལ་བའི་ཁུ་བ་སྦྲང་རྩི་དང་སྦྱར་བ་འཐུངས་པའམ། ཁར་བཞག་ན་ཡང་རུང་སྟེ། ཁའི་ནང་ན་གནས་པའི་ནད་མ་ལུས་པ་སེལ་བར་བྱེད་དོ། །
[359b.3]སྐྱེར་པ་རློན་པ་རང་གི་ཁུ་བ་བསྐོལ་ཏེ། སྐན་ཏེར་སོང་བའི་ནང་དུ་བཙག་གི་ཕྱེ་མས་བཏབ་སྟེ། སྦྲང་རྩི་དང་བཅས་པས་ཁ་བཀང་ཞིང་བཞག་ན། ཁའི་ནད་སྨིན་པ་དང་། རྨ་འཁྱིམས་པ་སེལ་བར་བྱེད་དོ། །པ་ཏོ་ལ་དང་། ནིམ་པ་དང་། ཤིང་མངར་དང་། བ་ཤ་ཀ་དང་། སྣ་མའི་མེ་ཏོག་
[359b.4]དང་། ཨ་རི་མེ་ད་ས་དང་། སེང་ལྡེང་དང་། འབྲས་བུ་གསུམ་དང་། དེ་རྣམས་རེ་རེ་ཡང་སྐྱེར་པའི་ཆོ་ག་བཞིན་དུ་སྦྱར་ཏེ་གཏང་བར་བྱའོ། །སེང་ལྡེང་དང་། ལྕགས་ཕྱེ་དང་། འབྲས་བུ་གསུམ་དང་། ཨརྫུ་ན་དང་། སེན་རྩི་དང་། ཨ་ཏི་མར་དང་། དེ་རྣམས་ཆུ་དང་བསྐོལ་པའི་ཁུ་བ་མཁུར་
[359b.5]བར་བཅང་ན་ཁ་དང་སོ་ནད་རྣམས་ཞི་བར་བྱེད་དོ། །ཁའི་ནད་དང་། སོ་རྩའི་ནད་བད་ཀན་དང་ཁྲག་ཤས་ཆེ་བའི་ནད་རྣམས་ལ་ནི་ཁྲག་ངན་མང་དུ་དབྱུང་སྟེ། ལུས་ཀྱི་སྨན་དང་། སློན་དང་། མགོ་བོའི་བཀྲུ་སྨན་དང་། མཁུར་བར་བཅང་བ་ལ་སོགས་པ་ཡང་ཁ་བ་དང་ཚ་བའི་སྨན་གྱིས་བྱ་སྟེ།
[359b.6]དེ་ནི་ཕལ་ཆེར་བད་ཀན་དང་མཁྲིས་པ་འཇོམས་པའི་སྨན་དཔྱད་བྱའོ། །ཁ་ཟས་ནི་ནས་དང་། ཅི་ཙེ་བ་དང་། ཁྲེ་དང་། བྲ་བོ་དང་། དེ་རྣམས་ཕུབ་མ་མེད་པར་བྱས་ཏེ། ཚ་ཆུའམ་ཐལ་སྨན་གྱི་ཆུ་ནད་དུ་སྦངས་ལ་སྣུམ་མེད་པར་བྱས་ཏེ་བཟའོ། །ཁུ་བཅུད་དང་། ཁུར་བ་ལ་སོགས་པ་གང་ཡང་བད་ཀན་
[359b.7]འཇོམས་པར་བྱེད་པའི་ཟས་བཟའོ། །སྲོག་གི་རླུང་གི་ལམ་ལ་གནས་པ་ཡིན་ཏེ། གལ་ཏེ་ལྐོག་མའི་ནད་ཀྱིས་དབུགས་བདེ་བར་མི་འབྱུང་ཞིང་བཀག་ན་ནི་འཆི་བར་འགྱུར་ཏེ། དེ་བས་ན་ལྐོག་མའི་ནད་ནི་མྱུར་དུ་གསོ་བར་བྱ་བ་ཡིན་ནོ། །ཁ་ནད་གསོ་བའི་ལེའུ་སྟེ་ཉི་ཤུ་རྩ་གཉིས་པ་རྫོགས་སོ།། །།
[360a]
[360a.1]དེ་ལ་མགོ་བོའི་ནད་སྐྱེ་བའི་རྒྱུ་ནི་དུད་པ་དཀུ་བའི་ནང་དུ་འདུག་པ་དང་། ཉི་ཚན་ལ་འདུག་པ་དང་། ཁ་བ་གྲང་མོའི་ནང་དུ་འདུག་པ་དང་། ཆུ་ནང་དུ་རྩེ་བ་དང་། ཉིན་པར་གཉིད་མང་དུ་ལོག་པ་དང་། ནུབ་མོ་གཉིད་མ་ལོག་པ་དེས། རྔུལ་ལ་སོགས་པའི་ནད་སྐྱེད་པ་དང་།
[360a.2]མདུན་ནས་རླུང་གིས་ཕོག་པ་དང་། མཆི་མ་འབྱུང་བ་དགག་པ་དང་། ཧ་ཅང་དུ་དྲགས་པ་དང་། མགོ་ལ་སྲིན་བུ་ཡོད་པ་དང་། འབྱུང་བའི་ཤུགས་བགགས་པ་དང་། ཁུར་ལྕི་བ་ཁུར་བ་དང་། མགོ་ལ་བྱི་དོར་དྲགས་པ་དང་། བསྐུ་བྱུག་དྲགས་པ་དང་། གཞན་ལ་ཞེ་སྡང་ཆེན་པོ་སྐྱེད་
[360a.3]པ་དང་། དངོས་པོ་གཅིག་ལ་ཡུན་རིང་དུ་ལྟ་བ་དང་། མ་གོམས་པའི་ཟས་ཟོས་པ་དང་། དྲིང་བ་བསྣམས་པ་དང་། མ་ཞུ་བ་དང་། སྨྲ་བ་དྲག་པོ་ལ་སོགས་པའི་རྒྱུས་ནད་མགོ་བོའི་ནང་དུ་ཞུགས་ཏེ་ན་བར་བྱེད་དོ། །དེ་ལ་རླུང་ལས་གྱུར་པའི་མགོ་ནད་ཀྱི་རྟགས་ནི་མུར་འགྲམ་གཉིས་སུ་
[360a.4]ཟུག་ཅིང་ན་བ་དང་། སོའི་ཕྲེང་བ་རྣམས་ཕུག་པ་སྙམ་སེམས་པ་དང་། སྨིན་མཚམས་དང་། དཔྲལ་བ་ལྷུང་བ་སྙམ་སེམས་པ་དང་། རྣ་བས་སྒྲ་མི་ཐོས་པ་དང་། མིག་ཕྱུང་བ་སྙམ་དུ་ན་བ་དང་། མགོ་འདམ་པ་དང་། ཚིགས་རྣམས་བྱེ་བ་སྙམ་བྱེད་པ་དང་། རྩའི་དྲ་བ་
[360a.5]རྣམས་འཕར་བ་དང་། གཉའ་བ་དང་། འགྲམ་པ་འབྱར་བ་སྙམ་བྱེད་པ་དང་། གསལ་ཞིང་འཚེར་བ་མཐོང་མི་བཟོད་པ་དང་། སྣ་ཆུ་འཛག་པ་དང་། གློ་བུར་དུ་ལྡང་དུབ་པ་དང་། སྣུམ་གྱིས་བསྐུ་ཞིང་དུགས་དང་མགོ་བཅིང་བ་ལ་སོགས་པ་བྱས་ན་ཅུང་ཞིག་ཞི་ཞིང་མཉེན་པར་
[360a.6]འགྱུར་བ་ཡིན་ནོ། །མགོ་བོ་གཞོགས་ཕྱེད་ན་བའི་རྟགས་ནི་ཀླད་པའི་ཕྱེད་རབ་ཏུ་ན་བ་ཡིན་ཏེ། ཟླ་བ་ཕྱེད་ཕྱེད་དམ་ཟླ་བ་གཅིག་ན་སྟེ་དེའི་འོག་ཏུ་རང་ཉིད་ཞི་བར་འགྱུར་རོ། །ཚབས་ཆེར་སྐྱེས་ན་ནི་མིག་གམ་རྣ་བ་ལ་གནོད་པར་བྱེད་དོ། །མཁྲིས་པ་ལས་གྱུར་པའི་མགོ་ནད་ཀྱི་རྟགས་ནི་
[360a.7]མགོ་རབ་ཏུ་ན་བ་དང་། དབུགས་ཚ་ཞིང་དུ་བ་བྱུང་བ་སྙམ་སེམས་པ་དང་། ཚ་བ་དང་། ལུས་རྔུལ་བ་དང་། མིག་ཚ་འུར་འུར་པོར་འདུག་པ་དང་། བརྒྱལ་བ་དང་། ནུབ་མོ་དང་། གྲང་བའི་དུས་སུ་ཅུང་ཟད་བདེ་བ་རྣམས་ཡིན་ནོ། །བད་ཀན་ལས་གྱུར་པའི་ཀླད་པའི་ནད་ཀྱི་མཚན་མ་ནི་ཁ་
[360b]
[360b.1]ཟས་ཡི་གར་མི་འོང་བ་དང་། མགོ་ལྕི་བ་དང་། ཚོར་བ་མེད་པར་བེམ་བེམ་པོར་འདུག་པ་དང་། རེག་ན་གྲང་བ་དང་། རྩ་མི་འཕར་བ་དང་། སྒྱིད་སྐྱུར་བ་དང་། གནད་རྣམས་སུ་མཚན་མོ་ལྷག་པར་ན་བ་དང་། སྙོམ་པ་དང་། མིག་འབུར་སྐྲང་བ་དང་། རྣ་བ་གཡའ་བ་དང་། སྐྱུར་བ་
[360b.2]རྣམས་ཡིན་ནོ། །ཁྲག་ལས་གྱུར་པའི་མགོ་ནད་ཀྱི་མཚན་མ་ནི་མཁྲིས་པ་བས་ཤས་ཆེར་ན་བ་ཡིན་ནོ། །ལྷག་མ་ནི་མཁྲིས་པ་བཞིན་དུ་བལྟའོ། །འདུས་པ་ལས་གྱུར་པའི་མགོ་ནད་ཀྱི་རྟགས་ནི། ཐམས་ཅད་ཀྱི་མཚན་མ་དང་ལྡན་པ་ཡིན་ནོ། །ཁ་ཟས་ཞག་ལོན་པ་དང་།
[360b.3]རྙིང་པ་དང་། རུལ་པ་ཟོས་པས་མགོའི་ཁྲག་དང་། ཤ་རུལ་བར་བྱས་ཏེ། དེས་འདུས་པའི་ནད་སྐྱེས་ཤིང་འཁྲུགས་ཏེ། མགོ་བོར་སྲིན་བུ་སྐྱེས་ཏེ། ཁྲག་འཐུང་བར་བྱེད་དོ། །དེའི་རྒྱུས་མི་བཟོད་པར་ན་བ་དང་། སེམས་ཉམས་པར་བྱེད་པ་དང་། ལུད་པ་ལུ་བ་དང་།
[360b.4]ཉམས་སྟོབས་ཟད་པ་དང་། མགོ་རྩུབ་པ་དང་། སྐྲངས་པ་དང་། མགོ་བཅད་པ་སྙམ་བྱེད་པ་དང་། ཚ་འུར་འུར་པོར་འདུག་པ་དང་། མགོ་འདམ་པ་དང་། རྣགས་པ་དང་། མགོའི་ཐོད་པ་དང་། རྐན་རྣམས་སུ་གཡའ་བ་དང་། སྐེམ་པ་དང་། སྲིན་བུ་རྒྱུ་བ་སྙམ་སེམས་པ་དང་།
[360b.5]སྣབས་ཟངས་མདོག་བཞིན་དུ་དམར་ཞིང་དངས་པ་འབྱུང་བ་དང་། རྣ་བ་སྒྲ་འུར་འུར་ཟེར་བ་ཡིན་ཏེ། དེ་ནི་ཀླད་པའི་ནད་སྲིན་བུ་ལས་གྱུར་པ་ཞེས་བྱའོ། །དེ་ལ་རླུང་ཤས་ཆེ་བ་མགོའི་ནད་ནི་མགོ་བོ་འགུལ་ཞིང་འདམ་པ་ཡིན་ཏེ། དེའི་མིང་ནི་མགོ་འདམ་པའི་ནད་ཅེས་བྱའོ། །ཁྲག་
[360b.6]མཁྲིས་ཤས་ཆེ་བའི་མགོ་ནད་ནི། མུར་འགྲམ་གཉིས་སྐྲངས་པ་དང་། དྲག་ཏུ་ན་ཞིང་ཚ་བ་དང་ནུབ་མོ་གཉིད་མི་འོང་བ་དང་། གླལ་བ་དང་། རིམས་ཀྱིས་འདེབས་པ་དང་། དྲན་པ་ཉམས་པ་དང་། ཁ་བྲོ་བ་དང་། གདོང་སེར་བ་དང་། དེ་རྣམས་དང་ལྡན་པ་ནི་མུར་འགྲམ་གྱི་ནད་
[360b.7]ཅེས་བྱ་སྟེ། གསོ་བ་མ་བྱས་ཏེ་ཡལ་བར་བོར་ན་ནི། ཞག་བདུན་ནས་ནི་སྲོག་འཕྲོག་པ་ཡིན་ཏེ། གསོ་བ་མྱུར་དུ་བྱས་ན་ནི་འཚོ་བ་ཡིན་ནོ། །མཁྲིས་པ་དང་རླུང་དང་ལྡན་པའི་མགོ་ནད་ཀྱི་རྟགས་ནི་མུར་འགྲམ་དང་། མིག་དང་། སྨིན་མ་དང་། འཕྲལ་བ་རྣམས་སུ་ན་ཞིང་ཟུག་ལ་འབར་
[361a]
[361a.1]བ་ཡིན་ཏེ། དེ་ཡང་ཉི་མ་ཤར་ནས་ཕྱེད་ཀྱི་བར་དུ་ཆེར་ན་བ་དང་། ལྷག་པར་ཉི་མ་ཕྱེད་ལ་ཚབས་ཆེར་ན་ཞིང་འཕར་བ་ཡིན་ཏེ། དེ་ལ་ནི་དོང་གྲ་ལ་སོགས་པས་གསོ་བར་བྱས་ཀྱང་མི་ཕན་ཏེ། ཉི་མ་ཕྱེད་ཕན་ཆད་ནས་རང་ཉིད་རིམ་གྱིས་ཞི་བ་དེ་ནི། མགོའི་ནད་ཉི་མ་ལྟར་
[361a.2]འཁོར་བ་ཡིན་ཞེས་བྱ་བ་སྟེ། དེ་ལྟར་མགོ་ནད་རྣམ་པ་བཅུར་བཤད་པ་ཡིན་ནོ། །མགོ་ནད་དེ་ཉིད་ཀྱི་བྱེ་བྲག་ལས་ཐོད་པའི་ནད་རྣམ་པ་དགུ་བཤད་པ་ཡིན་ཏེ། ཡང་རླུང་ལས་གྱུར་པའི་ཀླད་པའི་ནད་མངལ་གྱི་ནང་ན་ཡོད་པའི་དུས་སུ་ཡང་འབྱུང་བར་འགྱུར་ཏེ། དེ་ཡང་མདོག་གནག་
[361a.3]པ་དང་། ནད་མེད་པ་དང་། སྐྲང་བ་ཡིན་ཏེ། དེ་ནི་ཉེ་བའི་མགོ་ཞེས་བྱ་བའི་ཀླད་པའི་ནད་ཡིན་ནོ། །མགོ་ནད་ཐོར་བུ་ཅན་འབྲུམ་བུ་ཅན་ཞེས་བྱ་བ་ཡོད་དེ། དེ་ཡང་ནད་གཞི་ཇི་ལྟ་བ་བཞིན་དུ་ཤེས་པར་བྱའོ། །མཁྲིས་པ་དང་ཁྲག་དང་། བད་ཀན་ལས་གྱུར་པའི་ཀླད་པའི་ནད་ཡོད་དེ།
[361a.4]ནད་དེས་མགོའི་ནང་རུལ་བར་བྱས་ཏེ། སྲིན་བུ་སྐྱེས་ནས་ཟོས་པ་ལས་འབྲུམ་བུ་ཁྲེའམ། འབྲས་དཀར་པོ་ཙམ་འབྱུང་བ་ནི་བ་ལ་ཏ་ཀ་ལྟ་བུའི་མགོ་ནད་ཅེས་བྱའོ། །བད་ཀན་དང་། རླུང་ལས་གྱུར་པའི་ཀླད་པའི་ནད་མགོ་གཡའ་བ་དང་། སྐྲ་འབྱི་བ་དང་། ཚོར་བ་མེད་པ་དང་། རྩུབ་
[361a.5]པ་ལ་པགས་པའི་ཕྱི་ཤུན་གོག་པ་དེ་ནི་ཀླད་པའི་ནད་རུ་ན་ཀ་ཞེས་བྱ་བ་ཡིན་ནོ། །མཁྲིས་པ་དང་རླུང་འདྲེས་པ་བ་སྤུའི་ཁུང་བུ་ནང་དུ་ཞུགས་ཏེ། སྐྲ་རྩ་འབྱི་བར་འགྱུར་ཞིང་། དེའི་ཤས་ཀྱིས་ནང་དུ་བད་ཀན་དང་ཁྲག་ཞུགས་ཏེ། སྦུབས་རྣམས་སྐྱེར་མི་སྟེར་དེ་འགོག་པར་བྱེད་པ་དེ་ནི་ཀླད་པའི་
[361a.6]ནད་ཨིནྡྲ་ལུ་པ་ཏ་ཞེས་བྱའོ། །གཞན་དག་ནི་རེ་རུ་ཛ་ཞེས་བྱ་བར་འདོད་དོ། །ཁ་ཅིག་ནི་སྤུ་འབྱི་ཞེས་འདོད་དོ། །མི་རྣམས་ཀྱི་ན་ཚོད་འགྱུར་བ་བཞིན་དུ་རིམ་གྱིས་སྐྲ་འབྱི་ཞིང་སྤྱི་ཅེར་དུ་འགྱུར་བ་ཡིན་ཏེ། དེ་ཡང་རླུང་ལས་སྤྱི་ཅེར་དུ་གྱུར་པའི་རྟགས་ནི་ཚིག་པ་བཞིན་དུ་མདོག་གནག་པ་
[361a.7]ཡིན་ནོ། །མཁྲིས་པའི་སྤྱི་ཅེར་ནི་རྩྭ་ཚོས་པ་ལྟ་བུས་ཁྱབ་པ་ཡིན་ནོ། །བད་ཀན་གྱི་སྤྱི་ཅེར་ནི་པགས་པ་མཐུག་ཅིང་མདོག་གནག་པ་དཀར་བ་ཡིན་ཏེ། དེ་ལྟར་ནད་གཞི་རང་རང་གི་མདོག་བཞིན་དུ་པགས་པའི་མདོག་ཀྱང་དེ་ལྟར་ཤེས་པར་བྱའོ། །ནད་གཞི་ཐམས་ཅད་ཀྱི་མཚན་
[361b]
[361b.1]མ་དང་ལྡན་ཏེ། སེན་མོའི་མདོག་ལྟར་སྣང་བ་དང་། ཡང་ན་མེས་བསྲེགས་པ་བཞིན་དུ་སྤུ་མེད་ཅིང་ཚ་འུར་འུར་པོར་འདུག་པ་དེ་ནི་གསོར་མི་རུང་ངོ་། །མྱ་ངན་དང་ཆད་པ་དང་ཁྲོས་པ་ལས་སྐྱེས་པའི་ལུས་ཀྱི་དྲོད་གང་ཡིན་པ་དེ་སྤྱི་བོར་ཞུགས་ནས་དེས་སྐྲའི་རྩ་བར་ཚོས་ཤིང་སྨིན་པར་
[361b.2]བྱས་ནས་སྐྲ་དཀར་སྐྱེ་བར་འགྱུར་རོ། །དེ་ལ་རླུང་ལས་གྱུར་པའི་སྐྲ་དཀར་གྱི་མཚན་མ་ནི་སྤུ་གྲུགས་པ་ཅན་དང་། ཅུང་ཟད་སྔོ་བསངས་སུ་འདུག་པ་དང་། སྲ་ཞིང་རྩུབ་ལ་ཆུའི་ནད་མདོག་ལྟར་འདུག་པ་ཡིན་ནོ། །མཁྲིས་པའི་སྐྲ་དཀར་གྱི་མཚན་མ་ནི་ཚ་བ་དང་། མདོག་ཅུང་ཟད་སྔོ་བསངས་
[361b.3]སུ་འདུག་པ་དང་། བད་ཀན་གྱི་སྐྲ་དཀར་གྱི་མཚན་མ་ནི་སྣུམ་པ་དང་། འཕེལ་བ་དང་། སྦོམ་པ་དང་། མདོག་དཀར་བ་ཡིན་ནོ། །འདུས་པ་ལས་གྱུར་པའི་སྐྲ་དཀར་གྱི་མཚན་མ་ནི་འདྲེས་པ་ཡིན་ནོ། །འདུས་པའི་མགོ་ནད་ལས་གྱུར་པའི་སྤྱི་ཅེར་དང་། སྐྲ་དཀར་ལ་སོགས་པ་
[361b.4]གཞན་དག་ནི་གསོར་མི་རུང་ངོ་། །ལུས་གྱུར་པ་ལས་བྱུང་བའི་སྤྱི་ཅེར་དང་། སྐྲ་དཀར་ནི་བཅུད་ཀྱིས་ལེན་གྱི་ཆོ་གས་གསོ་བར་བྱའོ། །མགོ་ནད་ཀྱི་དམིགས་ཤེས་པར་བྱ་བའི་ལེའུ་སྟེ་ཉི་ཤུ་རྩ་གསུམ་པ་རྫོགས་སོ།། །།དེ་ནས་མགོ་ནད་གསོ་བའི་ལེའུ་བཤད་པར་
[361b.5]བྱ་སྟེ། དེ་ལ་རླུང་ལས་གྱུར་པའི་མགོ་ནད་ལ་ནི་རླུང་གི་ཆོ་ག་རྣམས་སྤྱད་པར་བྱ་སྟེ། དེ་ཡང་ཐོག་མ་དང་ཉལ་ཁར་མགོ་བོ་མར་གྱིས་བསྐུས་ཏེ། མར་ཁུ་དྲོ་འཇམ་དང་། འོ་མ་བཏུང་བར་བླུད་དོ། །སྲན་མ་ཤ་དང་རྒྱ་སྲན་དང་། སྲན་མུངྒ་སྟེ། དེ་ལ་རླུང་ལས་གྱུར་པའི་མགོ་ནད་ལ།
[361b.6]དེ་རྣམས་གང་ཡང་རུང་བ་མར་དང་ལྡན་པར་སྦྱར་བར་བཟའོ། །ཏིལ་མར་དང་འོ་མ་བསྲེས་པའི་བཏུང་བར་བླུད་པའམ། ཏིལ་མར་མ་རྙེད་པ་ན་ཏིལ་བཏགས་པའི་འོ་མ་དང་ལྷན་ཅིག་སྦྱར་བ་བླུད་དོ། །དེའི་འོག་ཏུ་གླན་པའི་དུགས་སམ། ཡང་ན་ཤ་བརྡུངས་པ་འུ་སུ་དང་སྦྱར་བས་
[361b.7]མགོ་ལ་དུགས་བྱས་ན་ཕན་ནོ། །རླུང་འཇོམས་པའི་སྨན་རྩ་བ་བཅུ་པ་ལ་སོགས་པ་འོ་མ་དང་སྦྱར་བས་མགོ་ལ་བླུགས་པར་བྱའོ། །སྣུམ་དང་ལྡན་པའི་སྣ་སྨན་གཏང་བ་དང་། དུ་བ་རྔུབ་པ་དང་། དེ་བཞིན་དུ་མགོ་བོ་དང་། རྣ་བ་རྣམས་ཉམས་བརྟ་བར་བྱའོ། །སྨན་བ་ར་ནའི་
[362a]
[362a.1]སྡེ་ཚན་འོ་མ་དང་ཆུ་དང་བསྐོལ་ལ། འོ་མ་ལུས་པ་དང་། དེ་བསྲུབས་ལ་མར་སར་ཕྱུང་བ་དང་། མངར་བའི་སྡེ་ཚན་གྱི་སྨན་དང་། ཡང་བསྐོལ་བའི་ཁུ་བ་མར་དེས་སྣར་བླུགས་པ་བྱས་ན་རབ་ཏུ་བསྔགས་སོ། །ཡང་ན་མངར་བའི་སྡེ་ཚན་དེ་ཉིད་དང་། འོ་མ་ཡང་བསྐོལ་བ་
[362a.2]མར་དང་ཁ་ར་དང་ལྡན་པ་སྦྱིན་ནོ། །རས་བལ་གྱི་ས་བོན་དང་། ཤིང་ཚ་དང་། གླ་སྒང་དང་། སྣ་མའི་མེ་ཏོག་ཁམ་བྱེ་བ་རྣམས་ཀྱི་ཕྱེ་མ་ཆུ་དྲོན་དང་སྦྱར་ཏེ་སྣ་སྨན་དུ་བཏང་ན། མགོ་ནད་ཟུག་གཟེར་དང་བཅས་པ་འཇོམས་སོ། །ལི་ཁ་ར་དང་། གུར་གུམ་དང་། མར་ལྷན་ཅིག་
[362a.3]བསྐོལ་ཏེ་སྣར་བླུགས་ན། ཁྲག་དང་མཁྲིས་པ་ལས་གྱུར་པའི་ཀླད་ནད་སེལ་ཏོ། །ཡང་ན་རུ་རྟ་དང་། རྒྱ་སྤོས་དང་། ཨུཏྤ་ལ་དང་། ཙནྡན་དང་། དེ་རྣམས་མར་དང་སྦྱར་བའི་འདག་གུས་མགོ་ལ་བྱུགས་ན་ཕན་ནོ། །རླུང་གི་ནད་ལ་གནོད་པས་འདིར་གཏར་ག་ནི་མི་བྱའོ། །
[362a.4]ཇི་སྐད་བསྟན་པ་བཞིན་དུ་གསོ་བ་དེ་དག་གིས་མ་ཞི་ན་ནི་མེའི་ལས་བྱ་སྟེ། བད་ཀན་ལ་ཡང་དེ་ལྟར་མེ་བཙའ་བྱའོ། །ཀླད་པ་ཕྱེད་ན་བའི་རླུང་འཇོམས་པ་ལ་ཡང་ཆོ་ག་དེ་ལྟར་བྱའོ། །དེ་བཞིན་དུ་ནད་གཞིའི་ཚུལ་དང་སྦྱར་ཏེ་གསོ་བ་ཡང་ཅི་རིགས་པར་སྦྱར་ཏེ། ཤྲི་ཤའི་ས་
[362a.5]བོན་དང་། ཨ་བ་མརྒའི་རྩ་བ་དང་། ལན་ཚྭ་ལྕེ་མྱང་ཚ་དང་སྦྱར་བས་སྣ་སྨན་གཏང་ངོ་། །ས་ལ་པརྞིའམ། ཡང་ཙཀྲ་མརྡ་གང་ཡང་རུང་བ་སྐྱུར་དང་སྦྱར་བས་མགོ་བོ་བསྐུའོ། །ཀླད་ནད་ཉི་མ་ལྟར་འཁོར་བ་རྣམས་ལ་ཡང་ཆོ་ག་གོང་མ་ལྟར་བྱ་སྟེ་ཁྱད་པར་དུ་ཁྲག་དབྱུང་
[362a.6]ངོ་། །མཁྲིས་པ་ལས་གྱུར་བའི་མགོ་ནད་ལ་ནི་ཐོག་མར་སྣུམ་ཆོས་བྱ་སྟེ། དེའི་འོག་ཏུ་ཁྲག་གཏར་རོ། །སྨན་བསིལ་བའི་ནུས་པ་དང་ལྡན་པའི་བྱུག་པས་བྱུགས་པ་དང་། བླུགས་པ་དང་། ལུས་སློན་ཁྲུས་ཀྱིས་སྦྱང་བ་དང་། མས་གཏོང་བ་ཡང་བྱའོ། །ཡང་ན་འཚོ་བྱེད་
[362a.7]སྡེ་བཅུ་འོ་མ་དང་མར་དང་ལྷན་ཅིག་བསྐོལ་བའི་མར་གྱི་བཏུང་བ་དང་སྣར་བླུགས་པ་ཡང་སྤྱད་དོ། །ཁྲག་ལས་གྱུར་པའི་མགོ་བོའི་ནད་ལ་ཡང་། མཁྲིས་པའི་གསོ་བ་ཇི་ལྟ་བ་བཞིན་དུ་བྱའོ། །མུར་འགྲམ་གྱི་ནད་ཀྱང་མཁྲིས་པའི་གསོ་བ་ལྟར་བྱ་སྟེ། ཚབས་ཆེ་ཞིང་ཡུན་རིང་
[362b]
[362b.1]བ་ནི་སྤང་བར་བྱའོ། །བད་ཀན་ལས་གྱུར་པའི་མགོ་བོའི་ནད་ལ་ནི་མར་རྙིང་པས་སྣུམ་ཆོས་བྱས་ལ་སྨན་ཚ་བའི་སྐྱུག་སྨན་གཏང་ངོ་། །དུགས་དང་བྱུག་པ་དང་སྣ་སྨན་ལ་སོགས་པའི་རྩུབ་པ་དང་། དྲོ་བ་དང་རྣོ་བའི་སྨན་གྱིས་བྱའོ། །འདུས་བ་ལས་གྱུར་པའི་མགོ་ནད་ལ་ནི་སྨན་
[362b.2]གྱི་གསོ་བ་ཡང་འདྲེས་པར་སྦྱར་ཏེ། སྨྱུང་བ་ཡང་རབ་ཏུ་བསྔགས་སོ། །སྲིན་བུ་ལས་གྱུར་པའི་མགོ་ནད་ལ་ནི་སྲིན་བུ་སྲོག་ཆགས་གང་ཡང་རུང་བའི་ཁྲག་གིས་སྣར་བླུགས་ན། ནང་གི་སྲིན་བུ་ལ་ཁྲག་གིས་རེག་སྟེ། དེའི་དྲིས་སྲིན་བུ་བརྒྱལ་ནས། སྣ་དང་ཁའི་སྒོ་ནས་
[362b.3]ཕྱིར་འབྱུང་བར་འགྱུར་རོ། །དེ་ནས་སྨན་ཤིན་ཏུ་རྣོ་བས་སྣ་སྨན་དང་། དུ་བ་རྔུབ་པ་དང་། བསྐུ་བྱུག་དང་། སྲིན་བུ་ལ་ཕན་པའི་སྨན་སྦྱར་བར་བྱ་སྟེ། བྱི་དང་ག་དང་། སྭརྩི་ཀའི་ཐལ་བ་དང་། དན་ཏི་དང་། ཤིང་ཀུན་དང་། དེ་རྣམས་བ་གཅིན་དང་སྦྱར་བའི་ཁུ་བས་སྦྱོར་
[362b.4]བ་བྱས་ན་ཕན་ནོ། །སྨན་ཚ་བ་གང་ཡང་རུང་བ་དང་། ནིམ་པ་དང་། ཨིང་གུ་ཏི་དང་། བི་ལུ་དང་། དེ་དག་གང་ཡང་རུང་བའི་འབྲུ་མར་གྱི་སྣ་སྨན་ཡང་སྦྱར་རོ། །ཡང་ན་བྱི་དང་ག་རའི་གཅིན་དང་བསྲེས་ནས་སྣར་བླུགས་ན་སྲིན་བུ་འཇོམས་པའི་མཆོག་ཡིན་ནོ། །སྨན་པུ་ཏི་
[362b.5]མད་ཚྭ་དང་། བྱི་དང་ག་གཉིས་སྦྱར་ཏེ་དུ་བ་རྔུབ་པ་དང་། སྣར་བླུགས་པ་དང་། སྨན་དུ་སྦྱར་ན་ཕན་ནོ། །སྲིན་བུས་ཁྲག་འཐུང་བ་ཡིན་པས། འདི་ལ་ཁྲག་མི་དབྱུང་ངོ་། །དེ་ལ་མགོ་འདམ་པའི་ནད་ལ་ནི་རླུང་གི་མགོ་ནད་གསོ་བ་ཐམས་ཅད་བྱ་སྟེ། བསྲེག་པའི་ལས་ནི་མ་
[362b.6]གཏོགས་སོ། །ཉེ་བའི་མགོ་ཞེས་བྱ་བའི་ཀླད་པའི་ནད་སྐྱེས་པའི་སྔ་རོལ་དུའམ་སྐྱེས་མ་ཐག་གསར་དུ་བྱུང་བ་ཡང་རུང་སྟེ། དེ་ལ་ནི་རླུང་ནད་གསོ་བའི་ཆོ་ག་བཞིན་བྱ་ལ། སྨིན་ནས་ནི་འབྲས་ནད་ཀྱི་གསོ་བ་ལྟར་བྱའོ། །མགོ་ནད་ཐོར་བུ་དང་། འབྲུམ་བུ་ཅན་ལ་ནི་ཁོང་འབྲས་
[362b.7]ཅུང་ཟད་སྨིན་པའི་ཆོ་ག་རྣམས་བྱའོ། །བ་ལ་ཏ་ཀ་ལྟ་བུ་ཞེས་བྱ་བའི་མགོ་ནད་ལ་ནི་སྲིན་བུ་པད་བས་གཏར་ཏེ། ནིམ་པའི་ཆུས་བླུགས་པར་བྱའོ། །སྟག་རྟུག་གི་ཁུ་བའི་ནང་དུ་ལན་ཚྭ་ཤས་ཆེར་བཏབ་སྟེ་བྱུག་གོ །ཡང་ན་པ་ཏོ་ལ་དང་། ནིམ་པའི་ལོ་མ་འམ། ཡང་ན་ཡུང་བ་དང་།
[363a]
[363a.1]ཏིལ་གྱི་ཚིགས་མ་རྙིང་པ་དང་། ཁྱིམ་བྱའི་རྟུག་པ་གཉིས་ལྷན་ཅིག་སྦྱར་བ་འམ། སྦྱོར་བ་གསུམ་པོ་གང་ཡང་རུང་བ་བ་གཅིན་དང་སྦྱར་བའི་འདག་གུས་བསྐུས་ན་ཕན་ནོ། །རུ་རྟའི་ཕྱེ་མ་ཏིལ་མར་དང་། སླ་ངའི་ནང་དུ་བརྔོས་ཏེ། མགོ་ནད་པ་ལ་ཏ་ཀ་ཞེས་བྱ་བ་ལ་བསྐུས་ན།
[363a.2]གཡའ་བ་དང་། གནག་པ་དང་། ཚ་འུར་འུར་པོར་འདུག་པ་དང་། ནད་ཀྱིས་ཉམ་ཐག་པ་རྣམས་འཇོམས་སོ། །མ་ལ་ཏི་དང་། ཙི་ཏྲ་ཀ་དང་། ཀ་ར་བཱི་ར་དང་། ཀ་རཉྫ་དང་། དེ་རྣམས་ཏིལ་མར་དང་བསྐོལ་བས་སྐྲ་བྲེགས་པའི་འོག་ཏུ་བསྐུས་ན། བ་ལ་ཏ་ཀ་ཞེས་བྱ་བའི་ནད་ཐམས་
[363a.3]ཅད་སེལ་ཏོ། །དེ་ལྟར་བྱས་ཀྱང་མ་ཞི་ན་སློན་ལ་སོགས་པས་མགོ་ནད་དག་པར་བྱ་བ་ལ་འབད་པར་བྱའོ། །ཀླད་པའི་ནད་ད་རུ་ན་ཀ་ཞེས་བྱ་བ་ལ་ནི་ཐོག་མར་དཔྲལ་བའི་རྩ་ནས་གཏར་ག་བྱས་ལ། མགོ་བཀྲུ་ཞིང་ཕྱི་བདར་ལ་སོགས་པའང་བྱའོ། །སྣ་སྨན་དང་སྣའི་སྦུ་བུའི་
[363a.4]སྨན་ཡང་བྱའོ། །པི་ལ་ཡའི་ས་བོན་དང་། ཤིང་མངར་དང་། རུ་རྟ་དང་། མོན་སྲན་གྲེའུ་དང་། ཡུངས་ཀར་དང་། རྒྱ་སྐྱེགས་དང་། དོང་གའི་ལོ་མ་དང་། ཙཀྲ་མར་དྷ་དང་། སྐྱུ་རུ་རའི་འབྲས་བུ་རྣམས་སྦྲང་རྩི་དང་འདག་གུར་བྱུགས་ན་ཕན་ནོ། །ཁྲེ་རྒོད་ཀྱི་སོག་མ་བསྲེགས་
[363a.5]པའི་ཐལ་བ་ཆུ་དང་སྦྱར་བས་བསྐུས་ན་ཕན་ནོ། །ཀླད་པའི་ཨིནྡྲ་ལུ་པ་ཏ་ཞེས་བྱ་བ་ལ་ནི་ནད་གཞི་ཇི་ལྟ་བ་བཞིན་དུ་ཁྲག་གཏར་བ་དང་། ཞལ་ཞལ་བྱ་སྟེ། དེའི་འོག་ཏུ་ནག་ཚུར་དང་། ལྡོང་རོས་དང་། སྤངས་མ་དང་། ན་ལེ་ཤམ་དང་། འུ་སུ་དང་། ཐང་ཤིང་རྣམས་སམ།
[363a.6]ཡང་ན་འོལ་མའི་འབྲས་བུ་དང་། རྩ་བ་འམ། ཡང་ན་ལིང་གི་རྩ་བ་འམ། ཀ་ར་བཱི་ར་རང་གི་ཁུ་བ་འམ། ཡང་ན་ཀཎྜ་ཀ་རི་རང་གི་ཁུ་བའམ། བསྐོལ་བའི་ཁུ་བ་སྦྲང་རྩི་དང་སྦྱར་བའམ། ཡང་ན་ལུང་ཏང་ཙེའི་འོ་མའམ། སྨན་གོ་བྱེའི་ཁུ་བའམ། ཡང་ན་ཏིལ་གྱི་མེ་ཏོག་དང་།
[363a.7]གཟེམ་མར་དང་སྦྲང་རྩི་དང་སྦྱར་བའམ། ཡང་ན་གླང་པོ་ཆེའི་སོ་བསྲེགས་ཏེ། སྣག་ཚར་བྱས་ལ་ཏིལ་མར་དང་སྦྱར་བའམ། སྦྱོར་བ་བརྒྱད་པོ་དེ་དག་ལས་གང་ཡང་རུང་བས་བསྐུས་ན་ནི་ཨིནྡྲ་ལུ་པ་ཏ་ཞེས་བྱ་བ་སྐྲ་འབྱི་བའི་ནད་ལ་ཕན་པའི་མཆོག་ཡིན་ནོ། །དེ་ལ་སྐྲ་དཀར་སྐྱེས་པའི་
[363b]
[363b.1]ནད་ལ་ནི་སྐྲ་བཞར་ལ་ལུག་གི་རྭ་གླང་པོ་ཆེའི་སོ་བཞིན་དུ་སྣག་ཚར་བྱས་ཏེ་བསྐུས་ལ། ཇི་སྲིད་སྐྲ་ནག་པོར་མ་སོང་གི་བར་དུ་ཆུ་བླུགས་པ་ལ་སོགས་པ་ཡང་སྤང་ངོ་། །སྤྱི་ཅེར་དང་། སྐྲ་དཀར་དང་། གཉེར་མ་དང་སྐྲ་སེར་པོར་གྱུར་ཅིང་སྐྱེས་པ་ལ་ནི་ཐོག་མར་སློན་ཁྲུས་ཀྱིས་ལུས་སྦྱངས་ལ་སྣ་སྨན་དང་
[363b.2]གདོང་དང་མགོ་རྣམས་སུ་བསྐུ་བྱུག་རྣམས་ཡང་དག་པར་སྤྱད་པར་བྱ་སྟེ། བྲི་ཧ་ཏི་ལ་སོགས་པ་རྩ་བ་བཅུ་པ་ཏིལ་མར་དང་བསྐོལ་བའི་མར་གྱིས་སྣ་སྨན་བླུགས་སོ། །ཡང་ན་ནིམ་པའི་མར་གྱིས་ཟླ་བ་གཅིག་གི་བར་དུ་སྣ་སྨན་བླུགས་ཏེ། བཏུང་བ་འོ་མ་བླུད་དོ། །རམས་དང་། ཤྲི་ཤ་དང་།
[363b.3]ཨེ་རཎྜ་དང་། དེ་རྣམས་བྲིང་ག་རཱ་ཛའི་རང་གི་ཁུ་བའི་ནང་དུ་སྦངས་ཏེ་བླུགས་པའམ། ཡང་ན་ལྕགས་སྐྱོགས་འོ་མ་དང་བཏགས་པའི་འདག་གུས་ཤིང་ཨེ་རན་ལུ་དང་། བ་རུ་རའི་ཤིང་དང་། ཏིལ་དང་། ཟངས་མའི་ས་བོན་དང་། ཀཱ་ཀཱ་ཏི་ཀའི་ས་བོན་རྣམས་ཆ་སྙོམས་པ་ལ་བསྒོས་ཏེ། ཉི་མའི་
[363b.4]འོད་ལྟ་བུ་ལ་བསྐམས་ལ། དེའི་འབྲུ་མར་བཙིར་ལ་ཕྱུང་སྟེ། མར་དེ་བཙོས་ནས་སྨན་དུ་བླུགས་པ་དང་། མར་ཉི་ཚེ་འཐུངས་ན་སྐྲ་དཀར་མེད་པར་བྱེད་དོ། །ས་ཧ་ར་ཛ་དང་། བྲིང་ག་རཱ་ཛ་དང་། བྱེའུ་རུག་པ་དང་། དེ་རྣམས་རེ་རེའི་ཁུ་བ་སྲང་སུམ་ཅུ་རྩ་གཉིས་གཉིས། འོ་མ་སྲང་སུམ་
[363b.5]ཅུ་རྩ་གཉིས་དང་། ཏིལ་མར་སྲང་བརྒྱད་དང་། ཤིང་མངར་སྲང་གཅིག་གི་ཕྱེ་མས་བཏབ་སྟེ་བསྐོལ་ལ་མར་ལུས་པ་དང་། རྡོའི་སྣོད་དམ། ཤིང་ཨ་ས་ནའི་སྣོད་དམ། ལུག་གི་རྭའི་ནང་དུ་བཞག་སྟེ། སྣ་སྨན་དུ་བཏང་ན་སྐྲ་དཀར་ལ་ཕན་ནོ། །ཡང་ན་པ་ཡ་སྱ་དང་། ཀ་ར་བཱི་ར་
[363b.6]གཉིས་འོ་མ་དང་བཏགས་ཏེ་སྐྲ་དཀར་ཕྱུང་བའི་རྗེས་ལ་བསྐུ་བར་བྱའོ། །དེ་བཞིན་དུ་སྐྲ་དཀར་འཇོམས་པའི་སྨན་གྱིས་བསྐུའོ། །བི་ལ་ཡ་དང་། ཤིང་མངར་དང་། ཛི་བན་ཏིའི་སྡེ་ཚན་དང་། ཏིལ་ནག་པོ་དང་། ས་ནག་པོ་དང་འོ་མ་རྣམས་སྦྱར་བའི་འདག་གུས་སྦྱར་ཏེ་བསྐུས་ན་སྐྲ་སེར་
[363b.7]བ་དང་། གཉེར་མ་རེངས་པར་བྱེད་དོ། །ཏིལ་དང་། སྐྱུ་རུ་ར་དང་། པདྨའི་གེ་སར་དང་། ཤིང་མངར་དང་། དེ་རྣམས་ཀྱི་ཕྱེ་མ་སྦྲང་རྩི་དང་། འདག་གུར་སྦྱར་ཏེ་མགོ་ལ་བསྐུས་ན་སྐྲ་འཕེལ་ཞིང་རྒྱས་པར་བྱེད་དོ། །སྤང་སྤོས་དང་། རུ་རྟ་དང་། ཏིལ་ནག་པོ་དང་། ཐལ་ཏྲེས་དང་།
[364a]
[364a.1]ཨུཏྤ་ལ་སྔོན་པོ་དང་། དེ་རྣམས་བཏགས་ཏེ་འོ་མ་དང་སྦྲང་རྩི་དང་སྦྱར་བས་བསྐུས་ན་སྐྲ་སྐྱེ་ཞིང་འཕེལ་བའི་མཆོག་ཡིན་ནོ། །ལྕགས་ཕྱེ་དང་། བྲིང་ག་རཱ་ཛ་དང་། འབྲས་བུ་གསུམ་དང་། ས་ནག་པོ་དང་། དེ་རྣམས་ཀྱི་ཕྱེ་མ་བུ་རམ་ཤིང་གི་ཁུ་བའི་ནང་དུ་ཟླ་བ་གཅིག་གི་
[364a.2]བར་དུ་བཞག་ལ། དེ་ནས་མགོ་ལ་བསྐུས་ན་སྐྲ་རྩ་བ་དང་བཅས་པ་ནག་པོར་བྱེད་དེ། སྲན་མ་ཤ་དང་། ཁྲེ་རྒོད་དང་། འབྲས་རྩབས་དང་། ནས་ཐུག་དང་། ལྕགས་ཕྱེ་དང་། དེ་རྣམས་ཚྭ་སྐྱུར་པོའི་ནང་དུ་ཞག་གསུམ་སྦངས་ཏེ། མགོ་ལ་བསྐུས་ན་བྱ་དཀར་ཡང་
[364a.3]མདོག་ནག་པོར་བྱེད་ན། སྐྲ་ལྟ་སྨོས་ཀྱང་ཅི་དགོས། པི་པི་ལིང་དང་། པྲ་པུཎྜ་རཱི་ཀ་དང་། ཤིང་མངར་དང་། ཙནྡན་དང་། ཨུཏྤལ་སྔོན་པོ་དང་། དེ་རྣམས་ཀྱི་ཕྱེ་མ་སྐྱུ་རུ་རའི་ཁུ་བ་དང་། ཏིལ་མར་དང་ལྷན་ཅིག་བསྐོལ་ཏེ། མར་ལུས་པས་སྣ་སྨན་དང་བསྐུ་བྱུག་ཏུ་བསྟེན་
[364a.4]ན། ཀླད་པའི་ནད་ཐམས་ཅད་དང་། སྐྲ་དཀར་མེད་པར་བྱེད་དོ། །ཉེའུ་ཤིང་དང་། ཛི་བན་ཏིའི་ཁུ་བ་དང་། སླེ་ཏྲེས་དང་། འོ་མ་དང་། སྣུམ་རྣམ་གཉིས་ལྷན་ཅིག་བསྐོལ་ཏེ། འོ་མ་དང་མར་ལུས་པའི་ནང་དུ་འཚོ་བྱེད་སྡེ་བཅུའི་སྨན་གྱི་ཕྱེ་མས་བཏབ་ལ་ཡང་བསྐོལ་
[364a.5]ཏེ། མར་ལུས་པ་ལས་སྣར་བླུགས་ན། ནམ་ཚོང་ཡན་ཆད་ཀྱི་ནད་སེལ་བར་བྱེད་དོ། །རྨ་བྱའི་སྒྲོ་དང་། མཁྲིས་པ་དང་། རྒྱུ་མ་དང་། རྐང་པ་དང་། རྟུག་པ་དང་། མཆུ་དང་། དེ་དག་བོར་བའི་ཤ་ཉི་ཚེ་དང་། རྩ་བ་བཅུ་པ་དང་། བ་ལ་དང་། ར་སྣ་དང་། ཤིང་མངར་དང་
[364a.6]སྨན་དེ་རྣམས་སྲང་གསུམ་གསུམ་རྣམས་ཆུ་དང་བསྐོལ་ཏེ། བཞི་ཆ་ལུས་པའི་ནང་དུ་མར་སྲང་སུམ་ཅུ་རྩ་གཉིས་དང་། དེའི་བཞི་འགྱུར་གྱི་འོ་མ་དང་། ཛཱི་བན་ཏི་དང་། འབྲས་བུ་གསུམ་དང་། མེ་ད་དང་། རྒུན་འབྲུམ་དང་། བ་རུ་ར་དང་། པ་རུ་ཤ་ཀ་རྣམ་གཉིས་དང་། ས་མང་ག་
[364a.7]དང་། དབྱི་མོ་དང་། ག་བྲའི་རྩ་བ་དང་། ཏང་པལ་དང་། སུ་ཏི་ཀ་དང་། ཁ་སྲལ་ཕྲེའུ་དང་། མ་ཧཱ་མེ་ད་དང་། ཤིང་ཏ་ལ་དང་། འབྲ་གོ་དང་། པདྨའི་རྩ་ལག་དང་། ཁརྫུ་རའི་རྩ་བ་དང་། ཤིང་མངར་དང་། ཛི་བ་ཀ་དང་། ཉེའུ་ཤིང་དང་། བྱིད་རི་དང་། བུ་རམ་ཤིང་དང་།
[364b]
[364b.1]བྲི་ཧ་ཏི་དང་། ཐལ་ཏྲེས་རྣམ་གཉིས་དང་། བུ་རམ་ཤིང་དང་། མུར་བ་དང་། གཟེ་མ་དང་། ཟངས་རྩི་དང་། ཤིང་ག་ཏ་ལ་ཀ་དང་། རྒུན་འབྲུ་གོ་སྟན་དང་། ར་སྣ་དང་། ཉི་ར་དང་། ལྕ་བ་དང་། སུག་སྨེལ་དང་། ཟུར་བ་དང་། མ་ནུ་དང་། བ་སྤྲུ་བ་དང་། ནུ་གང་དང་། བུ་ཚང་རྡོ་དང་། བྱི་ཚེར་བ་དང་
[364b.2]མེ་ཏོག་མ་ཏུ་ཀ་དང་། སྟར་ཀ་དང་། བཱ་ཏཱ་མ་དང་། མུཉྫ་ཏ་ཀ་དང་། ཤྲི་ཤི་ད་དང་། དེ་རྣམས་ཞོ་གཉིས་གཉིས་བཏགས་པའི་ཕྱེ་མ་བཏབ་ལ་བསྐོལ་ཏེ་མར་ལུས་པ་ནི་རྨ་བྱ་ཆེན་པོའི་སྨན་མར་ཞེས་བྱ་སྟེ་ཡོན་ཏན་གོང་མ་བས་ཆེ་སྟེ། ལུས་ཟུངས་བརྟས་ཤིང་དབང་པོ་གསལ་བར་བྱེད་
[364b.3]པ་དང་། སྐད་འགགས་པ་དང་། ལུད་པ་དང་དབུགས་མི་བདེ་བས་ཉམ་ཐག་པ་འཇོམས་ཏེ། དེ་བཞིན་དུ་ཟླ་མཚན་ཟག་པ་དང་། ཁུ་ཆུའི་སྐྱོན་ལ་རབ་ཏུ་བསྔགས་ཏེ། ནད་མེད་ཅིང་མོ་གཤམ་ལ་ཡང་བུ་སྟེར་བར་བྱེད་དོ། །དེ་བཞིན་དུ་བྱི་བ་དང་། ཁྱིམ་བྱ་དང་། དད་པ་དང་། རི་བོང་དང་།
[364b.4]དེ་རྣམས་གང་ཡང་རུང་བའི་རེ་རེ་ནས་རྨ་བྱའི་ཆོ་ག་བཞིན་དུ་མ་ལུས་པར་བྱས་ན་ཡང་ཕན་ཡོན་དེ་དང་འདྲའོ། །དེ་ལྟར་ནམ་ཚོང་ཡན་ཆད་ཀྱི་ནད་ཉིས་བརྒྱ་སུམ་ཅུ་སོ་གཅིག་པོ་ཕན་ཚུན་མ་འདྲེས་པར་རྒྱ་ཆེར་བཟའ་བ་ཡིན་ནོ། །སྐྱེས་བུ་རྣམས་ཀྱི་ལུས་ཀྱི་རྩ་བ་ནི་མགོ་བོ་ཡིན་ལ་ཡན་
[364b.5]ལག་གཞན་རྣམས་ནི་ཡལ་ག་ལྟ་བུ་ཡིན་ནོ་ཞེས་དྲང་སྲོང་རྣམས་སྨྲ་སྟེ། དེའི་ཕྱིར་མགོ་བོ་ལུས་ཀྱི་རྩ་བ་ལྟ་བུ་ལ་མཚོན་དང་ནད་ལ་སོགས་པས་གནོད་པར་འགྱུར་ན། མྱུར་དུ་གསོ་བར་བྱ་བ་གཅེས་སོ། །དབང་པོ་རྣམས་དང་། སྲོག་ཀྱང་མགོ་ལ་བརྟེན་ཏེ་གནས་པས། དེས་ན་
[364b.6]ཡན་ལག་གི་དམ་པ་མགོ་བོ་བསྲུང་བ་ལ་འབད་པར་བྱའོ། །མགོ་བོའི་ནད་གསོ་བའི་ལེའུ་སྟེ་ཉི་ཤུ་རྩ་བཞི་པ་རྫོགས་སོ།། །།ནམ་ཚོང་ཡན་ཆད་ཀྱི་ནད་གསོ་བའི་རྒྱུད་བཤད་ཟིན་ཏོ།། །།དེ་ནས་རྨ་གསོ་བའི་ལེའུ་བཤད་པར་བྱའོ། །དེ་ལ་རྨ་ལ་རྣམ་པ་གཉིས་ཏེ།
[364b.7]ལྷན་ཅིག་སྐྱེས་པ་དང་། གློ་བུར་དུ་བྱུང་བ་གཉིས་སོ། །དེ་ཡང་རྨ་རེད་པ་དང་། རྨ་མ་རེད་པའི་བྱེ་བྲག་གིས་རྣམ་པ་གཉིས་ཏེ། དེ་ལ་ལྷན་ཅིག་སྐྱེས་པའི་རྨ་ནི་ནད་གཞིའི་དབང་གིས་ལུས་ལས་སྐྱེས་པའོ། །གློ་བུར་དུ་བྱུང་བའི་རྨ་ནི་ཕྱི་རོལ་གྱི་མཚོན་ལ་སོགས་པ་ཕོག་
[365a]
[365a.1]པ་ལས་བྱུང་ངོ་། །དེ་ལ་རྨ་རེད་པ་ནི་ནད་གཞི་དང་བཅས་པ་སྟེ་མ་རུངས་པའོ། །རྨ་མ་རེད་པ་ནི་དག་པ་སྟེ། ནད་གཞི་དང་མི་ལྡན་པའོ། །ནད་གཞི་རྣམས་དང་ཁྲག་འདྲེས་ཏེ། རྨ་རེད་པའི་མཚན་མ་ནི་ཕག་ཆེ་ལ་ཁ་ཆུང་བ་དང་། ཡང་ན་ཁ་ཆེ་ལ་ཕག་ཆུང་བ་དང་
[365a.2]རྨ་སྲ་ཞིང་རྡོ་འདྲ་བ་དང་། ཡང་ན་ཤིན་ཏུ་ཚ་བ་དང་། ཤིན་ཏུ་ཟབ་པ་དང་། ཡང་ན་རྨ་མཐོ་བ་དང་། རྨ་ཤིན་ཏུ་གྲང་བ་འམ། ཡང་ན་ཤིན་ཏུ་དྲོ་བ་དང་། མདོག་དམར་བ་དབལ་སྐྱ་བ་དང་། རྣག་དང་ཆུ་སེར་འཛག་པ་དང་། ལུས་ཟད་པ་དང་། རྣག་དང་། ཤ་དང་། རྒྱུས་པ་དང་།
[365a.3]རྨས་རྩ་གཡོགས་པ་དང་། རྨ་མཆེད་ཅིང་རབ་ཏུ་ན་བ་དང་། ཚ་བ་དང་། སྐྲངས་པས་རབ་ཏུ་ན་བ་དང་། གཡའ་བ་ལ་སོགས་པའི་བླ་བརྣན་དེ་དག་དང་ལྡན་པ་ཡུན་རིང་པོར་རྨ་འཚོ་དཀའ་བ་ཡིན་ཏེ། བཅྭ་ལྔ་པོ་དེ་དག་ནི་རྨ་མ་རུངས་པའི་རྟགས་སོ། །རླུང་ལས་གྱུར་པའི་རྨའི་
[365a.4]མཚན་མ་ནི་རྨ་མདོག་རྩ་གནག་ཅིང་འབྱར་བ་དང་། ཐལ་བ་དང་། ཐི་བ་དང་། རུས་པའི་མདོག་ཏུ་སྣང་བ་དང་། རྨའི་ནང་ནས་ཞོ་ག་ཆུ་དང་། ཤ་བཀྲུས་པའི་ཆུ་དང་འདྲ་བ་སླན་ཏེ་ཉུང་ངུར་འབྱུང་བ་དང་། ཤ་ཟད་ཅིང་ཤིན་ཏུ་ན་ཞིང་ཟུག་པ་དང་། རྩུབ་ཅིང་འགགས་
[365a.5]པ་ཡིན་ནོ། །མཁྲིས་པ་ལས་གྱུར་པའི་རྨའི་མཚན་མ་ནི་རྨ་མྱུར་དུ་སྨིན་པ་དང་། རྨའི་མདོག་སེར་བ་དང་། སྔོ་བ་དང་། སེར་སྐྱ་དང་། ཁམ་པར་འདུག་པ་དང་། གཅིན་གྱི་མདོག་ཏུ་འདུག་པ་དང་། རྒྱ་སྐྱེགས་ཤིང་གི་ཁུ་བ་ལྟ་བུ་དང་། ཐལ་ཆུ་ལྟ་བུ་དང་། ཏིལ་
[365a.6]མར་ལྟ་བུའི་ཆུ་སེར་ཚ་བ་མང་དུ་འབྱུང་བ་དང་། རྨ་ཁ་ཐལ་སྨན་གྱིས་བཏབ་པ་དང་། ཁབ་ཀྱིས་གཙགས་པ་བཞིན་དུ་ན་ཞིང་དམར་ལ་ཚ་ཞིང་སྨིན་པ་དང་ལྡན་པའོ། །བད་ཀན་ལས་གྱུར་པའི་རྨའི་མཚན་མ་ནི་མདོག་སྐྱ་བ་དང་། གཡའ་བ་དང་། ཆུ་སེར་དཀར་
[365a.7]ཞིང་བསྐ་བ་མང་དུ་འཛག་པ་དང་། རྨའི་ཐོན་འཁོར་མཁྲང་ཞིང་མཐོན་པོར་འདུག་པ་དང་། རྒྱུས་པ་དང་། རྩའི་དྲ་བ་སྣང་ཞིང་ཟུག་གཟེར་ཆུང་བ་ཡིན་ནོ། །ཁྲག་ལས་གྱུར་པའི་རྨའི་མཚན་མ་ནི་བྱུ་རུའི་མདོག་ལྟར་ཤིན་ཏུ་དམར་བ་དང་། ཆུ་སེར་ཁྲག་དང་བཅས་
[365b]
[365b.1]པར་འཛག་པ་དང་། རྟའི་གནས་ཀྱི་དྲི་ལྟར་བྲོ་བ་དང་། གཞན་ཡང་མཁྲིས་པའི་རྨའི་མཚན་མ་ཡང་འདིར་སྦྱར་རོ། །ནད་གཞི་གཉིས་འདུས་པ་ལས་གྱུར་པའི་རྨ་དང་། གསུམ་འདུས་པ་ལས་གྱུར་པའི་རྨའི་མཚན་མ་ཡང་གང་དང་གང་འདུས་པ་དེ་དང་དེའི་མཚན་མ་འདྲེས་པ་
[365b.2]བརྟགས་ཏེ་ཤེས་པར་བྱའོ། །རྨ་དག་ཅིང་མ་རེད་དེ་གནོད་པ་བྱེད་པའི་མཚན་མ་ནི། ལྕེའི་མདོག་འདྲ་བས་འཇམ་ཞིང་མཉེན་པ་དང་། རྨའི་ཐོན་འཁོར་སྐྱ་ནར་འདུག་པ་དང་། འབྲུམ་ཕྲན་སྙམ་དུ་འབྱུང་བ་དང་། ཡང་ན་རྨའི་དབུས་སུ་ཆུང་ཞིང་མཐོ་བ་འབྱུང་བ་རྣམས་
[365b.3]ཡིན་ནོ། །པགས་པ་དང་། ཤ་དང་། རྩ་དང་། རྒྱུས་པ་དང་། ཚིགས་དང་། རུས་པ་དང་། ནང་རོལ་དང་། གནད་དང་། བརྒྱད་པོ་དེ་རྣམས་སུ་ཁ་འབྱུང་བ་ནི་གསོ་དཀའ་བ་དང་། དེ་ཡང་གོ་རིམས་བཞིན་དུ་འོག་མ་འོག་མས་གསོ་དཀའོ། །སྐྱེས་བུའི་སྙིང་སྟོབས་ཆེ་
[365b.4]ཞིང་ཕོག་སྙ་དང་ལྡན་པ་དང་། ཤ་ཆེ་ཞིང་མེའི་དྲོད་དང་ལྡན་པ་དང་། ལང་ཚོ་དང་ལྡན་ཞིང་ཉམས་སྟོབས་དང་ལྡན་པ་དང་། རྨའི་སྒྲོས་ཟླུམ་པ་དང་། དཀྱུས་རིང་བ་དང་། ཟུར་གསུམ་དང་། ཟུར་བཞི་པོ་ཡོད་པ་དེ་ནི་གསོ་སླ་བ་ཡིན་ནོ། །དེ་བཞིན་དུ་དཔྱི་དང་། རྐུབ་དང་།
[365b.5]ཕོ་མཚན་དང་། མཆུ་དང་། རྒྱབ་ཀྱི་སྒལ་ཚིགས་དང་། རྒྱབ་ཀྱི་གཞུང་དང་། ཁ་དང་མཁུར་ཚོས་སུ་རྨ་བྱུང་བ་ཡང་གསོ་སླའོ། །རྨ་གསོ་དཀའ་བ་ནི་མིག་དང་། སྙིང་དང་། སྣ་དང་། མིག་འགྲམ་དང་། ལྟེ་བ་དང་། ཕོ་མཚན་དང་། རྐུབ་ཀྱི་བར་བྲེད་བྲེད་
[365b.6]པོ་དང་། ལྟོ་བ་དང་། རྣ་བ་དང་། རྩིབ་ལོགས་དང་། མཆན་ཁུང་དང་། ནུ་མ་རྣམས་སུ་བྱུང་བའི་རྨ་དང་། རྨའི་ནང་ནས་ལྦུ་བ་དང་། ཆུ་སེར་དང་། རྣག་དང་། རླུང་འབྱུང་ཞིང་ཟུག་རྔུ་དང་བཅས་པ་དང་། སྟོད་དུ་སྐྱུགས་པ་དང་། མཚན་བར་རྡོལ་བ་དང་།
[365b.7]གདོང་གི་ནང་དུ་བྱུང་བ་དང་། རྐེད་པ་དང་། རུས་པ་ལ་བརྟེན་པ་ལ། མཛེ་ནད་ཅན་ལ་རྨ་བྱུང་བ་དང་། དུག་བསྟེན་པ་དང་། ལུས་སྐེམ་པ་དང་། གཅིན་ནད་སྦྲང་རྩི་ལྟ་བུས་བཏབ་པ་དང་། དེ་རྣམས་ལ་རྨ་བྱུང་ན་གསོ་དཀའ་བ་ཡིན་ཏེ་འཚོ་བར་ཡང་དཀའོ། །གང་
[366a]
[366a.1]ཡང་རྨའི་སྟེང་དུ་རྨ་བྱུང་བ་དང་། ཤུ་བ་ཆེན་པོའི་ནད་དང་། རིམས་དང་། ཚད་པར་འཁྲུ་བ་དང་། ལུད་པ་ལུ་བ་དང་། སྐོམ་དད་ཆེ་བ་དང་། གཉིད་མེད་པ་དང་། དབུགས་མི་བདེ་བ་དང་། རྨ་རྣགས་མི་ཤེས་པ་དང་། ཀླད་པའི་སྲུབས་བྱེ་ཞིང་ཀླད་རྒྱས་སྣང་བ་
[366a.2]དང་། རྒྱུས་པ་རུལ་བར་བྱས་པ་དང་། རྩ་ཆད་པ་དང་། རྨ་ཕུག་རིང་བ་དང་། སྲིན་བུས་ཟོས་པ་དང་། རུས་པ་ཆད་པ་དང་། ཟུག་རྔུ་དང་། དུག་དང་བཅས་པ་དང་། རྨ་བརྟགས་པ་དང་། ལོག་པར་བཅིངས་པ་དང་། སྣུམ་ཤས་ཆེ་བ་དང་། རྩུབ་པ་དང་། རྨའི་ནང་
[366a.3]དུ་སྤུ་ལ་སོགས་པ་ཞུགས་པ་དང་། འགུལ་བསྐྱོད་མངས་པ་དང་། ཁོང་པ་མ་དག་པ་དང་། འགྲངས་ཆེས་པ་དང་། ལུས་རབ་ཏུ་རྗུད་པ་དང་། ཆང་མང་དུ་འཐུང་བ་དང་། ཉིན་པར་གཉིད་ལོག་པ་དང་། ཉལ་པོ་བསྟེན་པ་དང་། མཚན་མོ་གཉིད་མ་ལོག་པ་དང་།
[366a.4]རྨའི་ཆོ་ག་ལོག་པར་བྱས་པ་དང་། འདི་རྣམས་སྤྱད་ན་ནི་གསོ་བ་བྱས་ཀྱང་མི་འགྲུབ་བོ། །གང་གི་རྨ་གསོ་བ་མདོག་ཐི་བའི་མདོག་ཏུ་འདུག་པ་དང་། ནང་གི་རྣག་ཟད་པ་དང་། ཤའུ་ཕྲ་མོ་བརྟན་པར་འབྱུང་བ་ནི་མྱུར་དུ་འཚོ་བར་འགྱུར་རོ་ཞེས་བཤད་དོ། །གལ་ཏེ་རྨ་
[366a.5]སྐྲངས་པ་ལྟ་ན་ནི་ནད་གཞི་ཇི་ལྟ་བ་བཞིན་དུ་སློན་ཁྲུས་ཀྱིས་སྦྱང་བར་བྱས་ཏེ། ལུས་དག་ནས་དེའི་འོག་ཏུ་སྨན་གྱི་སྦྱོར་བ་བྱས་ན་མྱུར་དུ་འཚོ་བར་འགྱུར་རོ། །ཅི་སྟེ་རྨ་སྐྲངས་པར་གྱུར་ན་ནི། རྒྱུན་དུ་བསིལ་བའི་ཆོ་ག་བྱ་སྟེ། ཇི་ལྟར་སྐྱེས་བུ་མེས་ཚིག་པ་ལ་ཡང་མེ་དེ་ཉིད་
[366a.6]ལ་བདུགས་པས་ཕན་པ་བཞིན་དུ་གང་གི་རྨ་སྐྲངས་ཤིང་མཁྲང་ལ་མདོག་ནག་པར་འགྱུར་ཞིང་ན་བ་དང་བཅས་ལ། དུག་དང་ལྡན་པ་ལ་ནི་ཁྱད་པར་དུ་སྲིན་བུ་པད་པ་ལ་སོགས་པས་ཁྲག་དབྱུང་ངོ་། །དེ་ལྟར་ཁྲག་ངན་དང་བྲལ་བར་ལྟ་ན་དེ་མ་ཐག་སྐྲངས་པ་དང་། མདོག་དམར་
[366a.7]བ་དང་། ཟུག་གཟེར་ཞི་བར་བྱེད་དོ། །དེ་ལྟར་ཁྲག་ཕྱུང་བཞིན་དུ་སྨན་བསིལ་བའི་ནུས་པ་དང་ལྡན་པ་དག་ཅི་ཙམ་དུ་བཏགས་པ་འོ་མ་དང་། བུ་རམ་ཤིང་གི་ཁུ་བའི་ནང་དུ་མར་ལན་བརྒྱ་སྦྲུས་པའི་མར་དང་ལྡན་པར་བྱས་ནས་བསྐུས་ན། སྔ་མ་མ་སྐམས་པར་ཕྱིས་ཀྱང་
[366b]
[366b.1]བསྐུས་ལ་ཞག་རེར་དེ་ལྟར་བྱའོ། །དེ་ལྟར་བྱ་བ་ཡང་བསྐུ་བའི་ཞག་ལ་སྦྱར་གྱི། སྦྱར་ནས་ཞག་ལོན་པ་མི་རུང་ངོ་། །བྱུག་པ་དང་། བླུགས་པ་དང་། བསྐུ་བ་ལ་སོགས་པ་ཡང་འཕྲལ་ལ་བྱས་པ་ཅན་གྱི་རྙིངས་པ་མི་ཕན་ནོ། །ནྱ་གྲོ་དྷ་དང་། ཨུ་དུམྦཱ་ར་དང་། ཨ་ཤྭདྠ་དང་།
[366b.2]པླཀྵ་དང་། ལྕང་མ་དང་། འདི་རྣམས་ཀྱི་ཤུན་ལྤགས་བཏགས་པའི་ཕྱེ་མ་མར་དང་ལྡེ་གུར་སྦྱར་བས་བསྐུས་ན། སྐྲངས་པ་སེལ་བའི་མཆོག་ཡིན་ནོ། །རླུང་ལས་གྱུར་པའི་སྐྲང་པ་མཁྲང་ཞིང་སྲ་བ་ཟུག་གཟེར་ཆེ་ཞིང་ཁྲག་འཛག་བཞིན་དུ་རྨ་སྐྲངས་ཤིང་ན་བ་འདི་ལྟ་བུ་ལ་ནི།
[366b.3]དུགས་དང་གཤེར་སའི་ཤ་ལས་གཡོས་སུ་བྱས་པའི་ཟས་དང་། ཟར་མ་དང་། ཏིལ་མར་བརྔོས་ཏེ། འོ་མ་དང་བཏགས་ལ་བསྐུས་ན། རྨ་ན་ཞིང་ན་ལ་སྐྲངས་པ་ཚབས་ཆེ་བ་ཡང་སེལ་ཏོ། །བད་ཀན་དང་རླུང་གིས་རྨ་སྐྲངས་པ་ལ་ནི་སྲ་ལ་བརྟན་ཞིང་ཟུག་གཟེར་ཆུང་བ་ཡིན་
[366b.4]ཏེ། དེ་ལ་ནི་བད་ཀན་དང་རླུང་འཇོམས་པའི་སྨན་དང་སྦྱར་བའི་ནུས་པ་སྣུམ་གྱིས་བསྐུ་བྱུག་བྱ་སྟེ། དེའི་འོག་ཏུ་འོད་མའི་སྦུ་གུ་ནས་རིམ་གྱིས་དུགས་བྱས་ལ། དེའི་འོག་ཏུ་སྐངས་པ་སྙི་བར་བྱ་བའི་ཕྱིར་ལག་པའི་མཐིལ་ལམ་མཐེ་བོས་མཉེ་བར་བྱའོ། །དེའི་འོག་ཏུ་ནས་དང་།
[366b.5]གྲོ་དང་། མོན་སྲན་སྡེའུ་རྣམས་བསྐོལ་ཏེ་བཏགས་པའི་ཕྱེ་མ་ལྡེ་གུར་བསྐུས་ན་ཡང་སྐྲངས་པ་སྙི་བར་འགྱུར་རོ། །དེས་ཀྱང་ཞི་བར་མ་གྱུར་ན་དུགས་བྱའོ། །དེ་ལ་ཡང་རྨ་སྨིན་ན་ནི་ཞི་བར་འགྱུར་ལ་མ་སྨིན་ན་ནི་དེ་ལྟ་མ་ཡིན་ནོ། །དེ་ལ་དུགས་ནི། རྒྱ་ཤུག་དང་། ཏིལ་
[366b.6]དང་། ཟར་མ་དང་། རྒྱམ་ཚ་དང་། ཕབས་དང་། རུ་རྟའི་ཕྱེ་མ་དང་། སྐྱུར་པོ་དང་སྦྱར་བའི་ཟན་དྲོན་གྱིས་གླན་པའི་དུགས་བྱས་ན་རབ་ཏུ་བསྔགས་སོ། །ལེགས་པར་སྨིན་ན་ནི་སྐྲང་པའི་ཕྱོགས་གཅིག་ཏུ་མཐོན་པོར་འདུས་པར་འགྱུར་ཏེ། དེ་ལ་ནི་ཅི་རིགས་པར་བཙིར་རོ། །
[366b.7]ཤིན་ཏུ་གཞོན་པ་འམ་སྐྱིད་དེ་བ་དག་དྲག་ཏུ་བཙིར་བ་ལ་སོགས་པའི་ལས་མི་བཟོད་པ་ལ་ནི་གུ་གུལ་དང་། ཟར་མ་དང་། བ་བླ་དང་། གཙང་སྨན་ཁྲོན་བུ་དང་། རྟའི་རྟུག་པ་དང་། ཐལ་སྨན་གྱི་སྨན་རྣམས་ཀྱིས་སྐྲང་པ་སྨིན་པ་ལ་རང་རྡོལ་དུ་གཞུག་གོ། །རྨ་ནང་དུ་འཁྱིམས་ཏེ་
[367a]
[367a.1]ཕྱིར་བྱུང་དུ་མ་འདོད་ན། ཕན་ཚུན་མཆེད་པར་རྒྱུ་ཞིང་གནས་རྣམས་སུ་ཞུགས་པ་ལ་ནི་སྣུམ་མེད་སྨན་གྱིས་རྣགས་དབྱུང་བའི་ཆེད་དུ་རྨ་ནང་དུ་བསྐུས་ལ་རྣག་འཇིབ་ཏུ་གཞུག་གོ། །རྨ་སྐོམས་པར་གྱུར་ན་ནི་འཇིབ་སྨན་དང་། སྨན་གྱིས་བསྐུ་བ་རྣམས་སྤང་བར་བྱའོ། །
[367a.2]འཇིབ་སྨན་དང་བྱུག་པ་དེ་དག་ཀྱང་རྨ་ཁར་མི་བསྐུ་སྟེ། སྦྱོར་བ་དེ་དག་བྱས་ན་ཉེས་པ་རྣམས་མི་འབྱུང་ངོ་། །དེ་ལ་འཇིབ་སྨན་ནི་བོད་སྲན་དང་། ནས་དང་། གྲོ་དང་། མོན་སྲན་སྡེའུ་དང་། བྲ་བོ་དང་། གཞན་ཡང་སྨན་སྤྱི་བག་ཅན་རྣམས་ལྷན་ཅིག་སྦྱར་ལ་འཇིབ་རྩི་བྱའོ། །གཅིན་
[367a.3]ནད་དང་། མཛེ་ནད་ཀྱི་རྨན་ཚབས་ཆེར་རེད་པ་ལ་ནི་བྱིའུ་རུག་པ་དང་། དོང་གའི་སྡེ་ཚན་གཉིས་ཀྱི་དང་པོ་སྨན་བདུན་བདུན་བསྐོལ་བའི་ཁུ་བས་རྨ་བཀྲུ་བར་བྱའོ། །ཡང་ན་པ་ཏོ་ལ་དང་། ནིམ་པའི་འོ་མ་བསྐོལ་བས་བཀྲུའོ། །རྨ་དག་པ་ཡང་རུང་མ་དག་པ་ཡང་རུང་སྟེ།
[367a.4]དེ་ལ་ནི་ནྱ་གྲོ་དྷ་ལ་སོགས་པ་གོང་དུ་བསྟན་པའི་སྨན་ལྔའི་ཤུན་ཕྲགས་བསྐོལ་བའི་ཁུ་བས་རྨ་བཀྲུ་བར་བྱའོ། །ཡང་ན་པ་ཏོ་ལ་དང་། ཏིལ་དང་། ཤིང་མངར་དང་། དུར་བྱིད་དང་། དན་ཏི་དང་། སེར་པོ་རྣམ་གཉིས་དང་། ནིམ་པའི་ལོ་མ་དང་། རྒྱམ་ཚ་དང་། འདི་རྣམས་
[367a.5]སྦྱར་བའི་འདག་གུས་བསྐུས་ན་རྨ་སྦྱོང་བར་བྱེད་དོ། །རྨ་ཁ་ཚིགས་དང་གནད་རྣམས་སུ་བྱུང་བ་ལ་ནི་དུར་བྱིད་དང་། དནྟི་དང་། ལང་ག་ལི་དང་། རྒྱམ་ཚ་དང་། སྦྲང་རྩི་དང་སྦྱར་བའི་ཆང་བུ་ཕྲ་མོ་བྱས་ཏེ། རྨ་ནང་དུ་བཅུག་ན་སྦྱོར་བར་བྱེད་དོ། །རླུང་གིས་རྨ་ཟུག་གཟེར་
[367a.6]དྲག་པོ་དང་བཅས་ཤིང་རྣག་ཁྲག་འཛག་པ་ལ་ནི་ནས་དང་། གྲོ་དང་། མོན་ཆ་ར་དང་། ཤྲི་པྲེཥྚ་དང་། ཐང་ཤིང་དང་མར་དང་བཅས་པའི་དུད་པས་བདུག་གོ །ཁྲག་དང་མཁྲིས་པ་ཤས་ཆེ་བའི་རྨ་ལ་ནི་ཤིན་ཏུ་བསིལ་བའི་ནུས་པ་དང་ལྡན་པའི་སྨན་གྱིས་བསྐུའོ། །རྨ་
[367a.7]ཁ་སྐམས་ཤིང་ཤ་བྲི་ལ་རྨ་ཟབ་པ་ལ་ནི་ཤ་སྐྱེད་པའི་སྨན་བྱ་སྟེ། དེ་ཡང་ནྱ་གྲོ་དྷ་དང་། ཤུག་པའི་སྡེ་ཚན་དང་། ཨ་ཤྭ་གནྡྷ་དང་། བ་ལ་དང་། ཏིལ་དང་། དེ་རྣམས་ཀྱིས་བསྐུ་བ་དང་། ཤ་ཟ་བའི་སྲོག་ཆགས་ཀྱི་ཤ་ཆོ་ག་བཞིན་དུ་གཡོས་སུ་བྱས་ཏེ། ཟོས་ན་ཤ་སྐྱེད་དེ།
[367b]
[367b.1]སེམས་ཀྱང་དྲི་མ་མེད་པར་བྱེད་དོ། །རྨ་ཁའི་ཤ་གསར་བ་ཕྱིར་འབུར་ཞིང་རློ་བ་ལ་ནི་སྲིན་བུ་ཤིང་གི་མེ་ཏོག་དང་། ནག་ཚུར་དང་། ལྡོང་རོས་དང་། བ་བླ་དང་། གུ་གུལ་དང་། ཀྲུ་ཏྲུག་ཏྲེས་དང་། འདི་རྣམས་ཀྱི་འདག་གུས་བསྐུས་པ་ཕན་ནོ། །གལ་ཏེ་ཤ་དེ་མཐོན་པོར་
[367b.2]མཐུག་ཅིང་སྲལ་གཡའ་ཞིང་ཡུན་རིང་པོ་ནས་འཚོ་བ་ལ་ནི་ཐལ་སྨན་གྱི་ལས་ཀྱིས་གསོ་བར་བྱའོ། །རྡེའུ་འབྱིན་པའི་རྨ་ལས་གཅིན་འབྱུང་བ་དང་། ཚིགས་སུ་ཆད་པ་རྣམས་ལ་ནི་མདོའི་གནས་སུ་ཇི་སྐད་བསྟན་པའི་ཆོ་ག་རྣམས་བྱའོ། །རྨའི་ཆོ་ག་ཚུལ་བཞིན་བྱས་ཀྱང་མི་
[367b.3]འགྲུབ་པ་ལ་ནི་མེའི་ལས་རྣམས་བྱའོ། །དེ་ལྟར་རྨའི་ཁ་རབ་ཏུ་ཤ་རློ་བ་ལ་སོགས་པའི་ཆོ་ག་གོང་དུ་བསྟན་ནས། ད་ནི་རྨ་འཚོ་ཞིང་འདྲུབ་པར་བྱ་བའི་ཕྱིར་སྨན་སྦྱར་བར་བྱ་སྟེ། ཨ་ཤྭ་གནྡྷ་དང་། སེང་ཕྲོམ་དང་། ཀད་པ་ལ་དང་། ཤིང་མངར་དང་། བཙོད་དང་། ད་ཏ་ཀའི་
[367b.4]མེ་ཏོག་དང་། འདི་རྣམས་ཀྱི་ཕྱེ་མ་སྦྱར་ན་རྨ་འཚོ་བར་བྱེད་པའི་མཆོག་ཡིན་ནོ། །རྨ་མ་སྨིན་པ་དང་། རྨ་ཁའི་ཤ་རུལ་ཞིང་འདྲུབས་སུ་མི་འདོད་པ་ལ་ནི་སྨན་ཁ་བ་དང་། མངར་བ་བསྐོལ་བའི་ནང་དུ་ཏིལ་མར་དང་། ཤིང་མངར་གྱི་ཕྱེ་མ་བཏབ་སྟེ། སྣུམ་དང་ལྡན་པ་དྲོ་
[367b.5]འཇམ་ཙམ་གྱིས་བསྐུས་ན་རྨ་འདྲུབ་པར་འགྱུར་རོ། །གོང་མ་ནི་སྦྱོར་བ་དེའི་སྟེང་དུ་ནིམ་པའི་ལོ་མ་དང་སྦྲང་རྩི་དང་སྦྱར་ཏེ་བསྐུས་ན། རྨའི་ཆོ་ག་སྦྱོང་བའི་མཆོག་ཡིན་ནོ། །ཡང་ན་སྦྱོར་བ་དེ་ཉིད་ཞུན་མར་དང་བཅས་པས་བསྐུས་ན་ཡང་རྨ་མྱུར་དུ་འཚོ་བར་བྱེད་དོ། །གང་
[367b.6]དུ་ཏིལ་མེད་པའི་གནས་སུ་ནས་ཀྱི་སྐྱིན་པ་བྱའོ། །ཞེས་དེ་ཉིད་རིགས་པའི་སྨན་པ་རྣམས་འདོད་དོ། །ཁྲག་དང་མཁྲིས་པ་ལས་གྱུར་པའི་རྨ་དང་། རྨ་དུག་ཅན་དང་། གློ་བུར་དུ་བྱུང་བའི་རྨ་དང་། ཟབས་སུ་སོང་བའི་རྨ་དང་། ཚ་བ་དང་བཅས་པའི་རྨ་ལ་ནི་མར་དང་འོ་མ་
[367b.7]དང་། རྨ་འཚོ་བའི་སྨན་དང་ལྷན་ཅིག་སྦྱར་ཏེ་བཏང་ན་རྨ་འཚོ་བར་འགྱུར་རོ། །བད་ཀན་དང་རླུང་ལས་གྱུར་པའི་རྨ་ལ་ནི་རྨ་སྨན་དང་བསྐོལ་བའི་ནང་དུ་ཏིལ་མར་དང་སྦྱར་བ་བཏང་ན། རྨ་འཚོ་བར་འགྱུར་རོ། །ནག་ཚུར་བྱ་བལ་མ་དང་། སེང་ཕྲོམ་དང་། ཨ་རུ་ར་དང་།
[368a]
[368a.1]སྲ་རྩི་པོག་དང་། ལི་ཁྲི་དང་། དངུལ་རྡོ་དང་། སྤངས་མ་དང་། འདི་རྣམས་ཀྱི་ཕྱེ་མ་པོ་སོན་ཆ་དང་། ཏིལ་མར་དང་བཅས་པ་བཏང་ན་རྨ་འཚོ་བའི་མཆོག་ཡིན་ནོ། །རྨ་ཁ་མཉམ་པ་དང་། རྨའི་ཤ་བརྟན་པ་དང་། པགས་པ་ལ་རྨ་འབྱུང་བ་ལ་ནི་ཀ་ཀུམ་དང་།
[368a.2]ཨུ་དུམྦཱ་ར་དང་། ཨ་ཤྭདྠ་དང་། ཤིང་འཛམ་བུ་དང་། ཀད་ཕ་ལ་དང་། སེང་ཕྲོམ་དང་། འདི་རྣམས་བཏགས་པའི་ཕྱེ་མས་བཏབ་ན་ཡང་རྨ་དག་པ་ཡིན་ནོ། །རྨ་ཁ་གསར་པ་པགས་པ་དང་། ཤའུ་སྐྱེར་མི་འདོད་པ་ལ་ནི། ཀ་གུ་བ་ལ་སོགས་པ་གོང་གི་ཤིང་དེ་རྣམས་ཀྱི་ཕྱེ་
[368a.3]མས་བཏབ་ན་པགས་པ་མྱུར་དུ་སྐྱེ་བར་འགྱུར་རོ། །རྒྱ་སྐྱེགས་དང་། ལྡོང་རོས་དང་། བཙོད་དང་། བ་བླ་དང་། སེར་པོ་རྣམ་གཉིས་དང་། འདི་རྣམས་ཀྱི་ཕྱེ་མ་མར་དང་སྦྲང་རྩི་དང་སྦྱར་བའི་ལྡེ་གུས་བསྐུས་ན། པགས་པའི་རྨ་དག་པར་བྱེད་པའི་མཆོག་ཡིན་ནོ། །སྐྱེར་པ་དང་།
[368a.4]པྲི་ཡང་ཀུ་དང་། ཨ་མྲའི་རུས་པ་དང་། ཧེ་མ་ཀ་ལ་དང་། དངུལ་ཆུ་དང་། འདི་རྣམས་ཀྱི་ཕྱེ་མ་བ་ལང་གི་ལྕི་བ་བཙིར་བའི་ཁུ་བ་དང་སྦྱར་བའི་ལྡེ་གུས་བསྐུས་ན་པགས་པའི་རང་བཞིན་གྱི་མདོག་བསྐྱེད་པའི་མཆོག་ཡིན་ནོ། །སྤུ་སྐྱེད་པའི་དོན་དུ་གླང་པོ་ཆེའི་སོ་སྣོད་ཁ་སྦྱོར་གྱི་ནང་
[368a.5]དུ་དུད་པ་མ་ཤོར་བར་བསྲེགས་པ་དང་། སྐྱེར་ཁ་ཎ་དང་ཏིལ་མར་སྦྱར་བས་བསྐུས་ན་སྤུ་སྐྱེ་བ་དང་། དེ་བཞིན་དུ་སྲོག་ཆགས་རྐང་པ་བཞི་པའི་སེན་མོ་དང་། སྤུ་དང་། རུས་པ་དང་། པགས་པ་དང་། རྭ་དང་། རྨིག་པ་དང་། འདི་རྣམས་གོང་མ་བཞིན་དུ་བསྲེགས་ལ་སྣག་ཚར་
[368a.6]བྱས་པ་ཏིལ་མར་དང་སྦྱར་བས་བསྐུས་ན་སྤུ་སྐྱེ་བར་འགྱུར་རོ། །རྨ་དང་ལྡན་པའི་སྐྱེས་བུས་ནི་ཁ་ཟས་ཀྱི་ཕན་གནོད་གང་བསྲུང་བ་ནི། མདོའི་གནས་མཚོན་གྱི་ལས་བསྟན་པའི་སྐབས་སུ་བལྟ་བར་བྱའོ། །རླུང་ལས་གྱུར་པའི་རྨ་ལ་ནི་རྩ་བ་ཆེ་ཆུང་ལྔའི་སྡེ་ཚན་དང་། རླུང་
[368a.7]འཛོམས་པའི་སྨན་དང་སྦྱར་བ་གཏང་ངོ་། །དེ་བཞིན་དུ་མཁྲིས་པ་ལས་གྱུར་པའི་རྨ་ལ་ནི། ནྱ་གྲོ་དྷ་དང་། ཤུག་པའི་སྡེ་ཚན་གཉིས་དང་། མཁྲིས་པ་འཇོམས་པའི་སྨན་དང་སྦྱར་ཏེ་གཏང་ངོ་། །བད་ཀན་ལས་གྱུར་པའི་རྨ་ལ་ནི། དོང་གའི་སྡེ་ཚན་དང་། གང་བད་
[368b]
[368b.1]ཀན་འཇོམས་པའི་སྨན་དང་སྦྱར་བ་གཏང་ངོ་། །ནད་གཞི་འདྲེས་པ་ལས་གྱུར་པའི་རྨ་ལ་ནི་སྨན་ཡང་འདྲེས་པར་སྦྱར་ལ་གཏང་ངོ་། །གོང་གི་སྨན་གྱི་སྦྱོར་བ་དེ་དག་ནི་བཀྲུ་བ་དང་། བྱུག་པ་དང་། སྨན་མར་དང་། འབྲུ་མར་དང་། ཁུ་བ་བྱ་བ་དང་། ཕྱེ་མ་དང་། གདར་བུ་
[368b.2]དང་སྦྱོར་བ་བདུན་པོ་དེ་དག་གིས་ཇི་ལྟར་རིགས་པ་བཞིན་དུ་སྦྱར་རོ། །ཛཱ་ཏི་དང་། ནིམ་པ་དང་། པ་ཏོ་ལའི་ལོ་མ་དང་། པུ་ཙེ་ཤེལ་དང་། སྐྱེར་པ་དང་། ཡུང་བ་དང་། ཐལ་ཏྲེས་དང་། བཙོད་དང་། ཨ་རུ་ར་དང་། སྤྲ་ཚིལ་དང་། སྤངས་མ་དང་། ཤིང་མངར་དང་།
[368b.3]ཀ་རཉྫའི་ས་བོན་དང་། འདི་རྣམས་མར་དང་ཚུལ་བཞིན་བསྐོལ་ཏེ་སྦྱར་ལ་བཏང་ན་རྨ་ཁ་ཆུང་བ་དང་གནད་ལ་བརྟེན་ཏེ་རྣག་འཛག་པ་དང་། རྨ་ཟབ་ཅིང་ཟུག་གཟེར་དང་བཅས་པ་དང་། རྨ་མཆེད་པ་ལ་ཕན་ཏེ་དེ་དག་ཅིང་འཚོ་བར་བྱེད་དོ། །རྨ་གསོ་བའི་ལེའུ་སྟེ་
[368b.4]ཉི་ཤུ་རྩ་ལྔ་པ་རྫོགས་སོ།། །།དེ་ནས་གློ་བུར་དུ་རྨ་གསོ་བའི་ལེའུ་བཤད་པར་བྱ་སྟེ། དེ་ལ་གློ་བུར་དུ་བྱུང་བའི་རྨ་ནི། འཕྲལ་དུ་མཚོན་ལ་སོགས་པས་སྨས་པ་ལས་འབྱུང་སྟེ། དེ་ཡང་རྨ་འབྱུང་བའི་གནས་ཀྱང་མཐའ་ཡས་མོད་ཀྱི། རེ་ཞིག་
[368b.5]སྨས་པའི་རྨ་རྣམ་པ་བརྒྱད་དུ་བཤད་ཅིང་བརྗོད་པར་བྱ་སྟེ། དེ་ཡང་པགས་པ་བཤུས་པ་དང་། རྨ་ཉིས་རྩེག་ཏུ་འབྱུང་བ་དང་། རྣམ་པར་ཆད་པ་དང་། རབ་ཏུ་འཕྱང་བ་དང་། ཡན་ལག་ལྷུང་བ་དང་། རྔུ་བ་ཟུག་པ་དང་། གནད་དུ་བསྣུན་པ་དང་། གྲུགས་པའི་རྨ་
[368b.6]རྣམས་སོ། །དེ་ལ་པགས་པ་བཤུས་པའི་རྨ་ནི་པགས་པ་ཙམ་ཤུས་ཏེ། ཆུ་སེར་ཉི་ཚེ་འམ། ཁྲག་ཅུང་ཟད་དང་བཅས་པ་འཛག་ལ་ནད་དང་བཅས་པ་ཡིན་ནོ། །རྨ་ཉིས་རྩེག་ཏུ་འབྱུང་བ་ནི་དང་པོར་གཅིག་གིས་བསྣུན་ལ་དེ་དང་ཉེ་བར་ཡང་བསྣུན་པ་ཡིན་ནོ། །རྣམ་
[368b.7]པར་ཆད་པའི་རྨ་ནི་མཚོན་གྱིས་ལན་ཅིག་བཅད་པའི་སྟེང་དུ་ཡང་བརྣན་པའོ། །རབ་ཏུ་འཕྱང་བའི་རྨ་ནི་རུས་པའི་ལྷག་མ་ཙམ་གྱིས་འབྲེལ་ཏེ་འཕྱང་བར་འགྱུར་བའོ། །ཡན་ལག་ལྷུང་བའི་རྨ་ནི་ཡན་ལག་འུར་པོར་ཆད་དེ་ས་ལ་ལྷུང་བའོ། །རྔུ་བ་ཟུག་པ་ཞེས་བྱ་བའི་རྨ་ནི་
[369a]
[369a.1]མཆོན་རྩེ་ཤིན་ཏུ་ཕྲ་བ་ལུས་ལ་ཟུག་སྟེ། ཁོང་པར་ཞུགས་པ་མ་གཏོགས་པར་མཚོན་ནང་དུ་ལུས་པའོ། །བསྣུན་ཞེས་བྱ་བ་ནི་གནད་དུ་བསྣུན་པའོ། །གྲུགས་པ་ཞེས་བྱ་བའི་རྨ་ནི་ཁྲག་དང་རྐང་གཉིས་འབྲེལ་བར་འཁྲུགས་པའོ། །མཚོན་གྱིས་དྲག་ཏུ་
[369a.2]བསྣུན་ཞིང་ཕོག་ན་ནི། རྨ་ཁ་ཡངས་ཤིང་རྒྱ་ཆེན་པོར་སོང་སྟེ། རུས་པ་དང་མཚམས་བྱེ་བ་ཡིན་ནོ། །དེ་ལྟར་རྨ་གློ་བུར་དུ་བྱུང་བ་ལ་ནི་ཤིང་མངར་དང་མར་སྦྱར་བས་བསྐུའོ། །ཡང་ན་ཤིན་ཏུ་ཟུག་གཟེར་ཆེ་བ་ལ་ནི། བ་བླའི་འབྲུ་མར་དྲོ་འཇམ་ཙམ་གྱིས་བསྐུའོ། །སྨས་ཏེ་
[369a.3]ཁྲག་མང་པོ་བྱུང་ཞིང་ཚ་བ་སྐྱེས་ན་དེ་གཞི་ལ་བར་བྱ་བའི་ཕྱིར། སྨན་མངར་བ་དང་བསིལ་བའི་སྨན་སྣུམ་པ་དང་བཅས་པ་རྨ་ཁར་བླུགས་སོ། །གློ་བུར་དུ་འབྱུང་བའི་རྨ་ཁ་རྒྱ་ཆེན་པོར་སོང་ན་ནི་རུབ་པར་བྱ་བའི་ཕྱིར་སྦྲང་རྩི་དང་མར་སྦྱར་བས་བསྐུ་ཞིང་མཁྲིས་པ་འཇོམས་
[369a.4]པའི་བསིལ་བའི་སྨན་རྣམས་ཀྱང་སྦྱར་རོ། །དེའི་འོག་ཏུ་སློན་ཁྲུས་ཀྱིས་ལུས་སྦྱང་བ་དང་། སྨྱུང་བ་བྱ་བ་དང་། ཟས་ཟོས་པའི་འོག་ཏུ་རྟག་ཏུ་གཏར་གས་ཁྲག་དབྱུང་བར་བྱའོ། །དེ་ལ་པགས་པ་བཤུས་པའི་རྨ་དང་། གྲུགས་པའི་རྨ་གཉིས་ལ་ནི་ཁྱད་པར་དུ་ཆོ་ག་གོང་
[369a.5]མ་ལྟར་བྱ་སྟེ། གང་གི་ཕྱིར་ཞེ་ན་དེ་གཉིས་ནི་འཛག་པ་ཉུང་ཞིང་མྱུར་དུ་སྨིན་པས་སོ། །རྨ་གཞན་ནི་ཕལ་ཆེར་རྨ་མང་དུ་འབྱུང་སྟེ། ཁྲག་མང་དུ་འཛག་ཅིང་ཟད་པས། རླུང་འཁྲུགས་ནས་ཟུག་གཟེར་སྐྱེད་པར་བྱེད་དོ། །དེ་ལ་ནི་རླུང་འཇོམས་པའི་སྨན་དང་སྦྱར་
[369a.6]བའི་བཏུང་བ་དང་། བླུགས་པ་དང་། དུགས་དང་། བསྐུ་བ་དང་། བྱུག་པ་དང་། འཇམ་རྩི་མས་གཏོང་བ་རྣམས་བྱའོ། །གློ་བུར་དུ་བྱུང་བའི་རྨ་ལ་འཕྲལ་གྱི་གསོ་བ་དེ་དག་བྱས་ནས་ཞག་བདུན་གྱི་བར་དུ་བཞག་གོ། །དེ་ལྟར་ཞག་བདུན་གྱི་བར་དུ་འདས་ཏེ།
[369a.7]ཟུག་གཟེར་གྱི་ཤུགས་གློད་པ་དང་། དེའི་འོག་ཏུ་གོང་དུ་སྨོས་པའི་ཆོ་ག་རྣམས་སྤྱད་དོ། །དེ་ལྟར་བཤད་པ་དེ་དག་ནི་རྨ་སྤྱིའི་ཆོ་གར་བསྟན་པ་ཡིན་ནོ། །ད་ནི་རེ་རེའི་གསོ་བ་བཤད་པར་བྱ་སྟེ། དེ་ལ་པགས་པ་བཤུས་པའི་རྨ་ལ་ནི་ཟུག་གཟེར་ཆེ་ཞིང་ཞི་བར་བྱ་བའི་ཕྱིར་མྱུར་
[369b]
[369b.1]དུ་རྨ་ལ་སྨན་གྱི་ཕྱེ་མ་སྦྱར་རོ། །རྨ་ཉིས་རྩེག་ཏུ་འབྱུང་བ་ལ་ནི་འདག་གུ་ལ་སོགས་པ་སྦྱར་རོ། །རྣམ་པར་ཆད་པ་དང་། རབ་ཏུ་འཕྱང་བའི་རྨ་ལ་ནི་ཆོ་ག་བཞིན་དུ་བཙེམས་ཏེ་བཅིངས་ལ་རྣག་གཟགས་ཤིང་བཙིར་བར་བྱའོ། །མཚོན་གྱིས་མིག་བཅར་བ་དེ་ནི་གསོར་
[369b.2]མི་རུང་ངོ་། །གང་གི་མིག་གནས་ནས་བསྐྱོད་དེ་ཕྱིར་འབྱུང་ཞིང་འཕྱང་བ་ལ་ནི་སྔ་མའི་གནས་ཇི་ལྟ་བ་བཞིན་དུ་བཞག་ལ། སྨན་པས་མིག་གི་དབུས་སུ་རྩ་ལས་གཏར་ཞིང་པདྨའི་འདབ་མ་གཉིས་ཀྱི་བར་དུ་བཙིར་ཞིང་ཁྲག་གཟག་གོ། །དེ་ནས་མར་གྱིས་
[369b.3]བསྐུ་བ་དང་། སྣ་སྨན་དང་མིག་བརྟ་བའི་ཆོ་ག་བྱས་ན་ཕན་ནོ། །ཤིང་མངར་དང་། ཛི་བ་ཀ་དང་། ཟངས་རྩི་བ་དང་། ཨུཏྤ་ལ་དང་། དེ་རྣམས་རའི་འོ་མ་དང་ལྷན་ཅིག་བསྐོལ་ཏེ་མིག་ཏུ་བླུགས་ན། མིག་ནད་སྣད་པ་ཐམས་ཅད་ལས་རྒྱལ་བར་བྱེད་
[369b.4]པའི་མཆོག་ཡིན་ནོ། །མཚོན་གྱིས་སྣད་དེ་མིག་ཕུགས་སུ་ཞུགས་པ་ལ་ནི་མགུལ་བ་བསྡམས་པ་དང་། སྐྱུག་ཏུ་གཞུག་པ་དང་། ལུད་པ་དང་། སྦྲིད་པ་འབྱུང་བའི་ཐབས་བྱ་བ་དང་། དབུགས་རྔུབ་ཅིང་བསྡམས་པ་རྣམས་བྱས་ན་ཕན་ནོ། །ཡང་ན་མིག་སྣད་
[369b.5]པའི་གསོ་བ་རྣམས་བྱས་ན་ཕན་ནོ། །རྣ་བ་སྣད་ཅིང་སྨས་ཏེ་གནས་ལས་ཉམས་ན་ནི། རྨ་བཙེམས་ལ་རྨའི་ནད་ཐམས་ཅད་ཏིལ་མར་གྱིས་དགོང་ངོ་། །ལྷག་པར་མཚོན་གྱིས་བཅད་དེ་སྨས་ན་ནི་རྨའི་ནང་ནས་རླུང་ལྡང་བར་འགྱུར་ཏེ། དེ་ལ་ནི་དེ་མ་ཐག་མྱུར་
[369b.6]དུ་རྨ་གཉིས་ལེགས་པར་སྦྱར་ཏེ་བཙེམས་ལ་བཅིངས་ཏེ་རའི་མར་གྱིས་བསྐུས་ན་རབ་ཏུ་བསྔགས་སོ། །ནད་པ་དེས་ཁ་ཟས་བཟའ་བ་ཡང་གན་རྐྱལ་བཞག་པའམ། མགོ་ཕྱིར་བསྐྱེད་པས་བཟའོ། །མལ་ཆ་ཡང་མི་འགུལ་བ་ལེགས་པར་བྱས་ཏེ་བཞག་གོ། །རྐང་
[369b.7]ལག་འཕྲེད་དུ་སྨས་ཏེ་རྨ་བྱུང་བ་ནི་རྨ་ཁ་ལེགས་པར་བསྡུས་ཏེ་བཅུག་ལ་རས་བལ་ལྷན་པར་བཙེམས་པར་བྱའོ། །བཙེམས་ལ་དབང་བུ་དང་བཅས་པ་བཅིངས་ཏེ་རས་མཐུག་པོས་དཀྲི་བར་བྱའོ། །ཕྲག་གོང་སྣད་ཅིང་རྨ་བྱུང་བ་ལ་ནི་བ་ལང་གི་པགས་པས་
[370a]
[370a.1]མཆན་ཁུང་ནས་ཡར་ཕྲག་པར་བཅིང་ངོ་། །རླིག་པ་མཚོན་གྱིས་སྨས་ཏེ་རྐང་པ་གཉིས་ཀྱི་བར་ནས་མར་འཕྱང་བ་ལ་ནི་ལྒང་པའི་ནང་དུ་ཆུ་བླུགས་པ་ལ་མས་གཏོང་པའི་སྦུ་བུ་ནས་དྲངས་པའི་ཆུ་དྲག་པོའི་རྒྱུན་གྱིས་བཀྲུ་སྟེ། དེའི་འོག་ཏུ་རླིག་པ་རང་གི་གནས་སུ་
[370a.2]བསྡུས་ཏེ་བཅུག་ལ་རས་བལ་དང་ལྡན་པར་བཙེམ་པར་བྱའོ། །དཔྱི་སྨས་ཤིང་སྣད་པ་ལ་ནི་སྨས་པའི་རྨ་ཁ་རང་གི་ནང་དུ་བསྡུས་ཏེ་བཅུག་ལ། བ་ལང་གི་པགས་པས་བརླ་ཕྲག་ནས་ཡར་བཅིངས་ཏེ། རས་ཀྱི་སྟེང་ནས་དཀྲི་བར་བྱའོ། །དེ་ལ་སྣུམ་གྱི་
[370a.3]བླུགས་པ་ཡང་བྱའོ། །གལ་ཏེ་རྨ་རྣགས་ན་ནི་པྲི་ཡང་ཀུ་དང་། ཨ་ག་རུ་དང་། སུག་སྨེལ་དང་། སྣ་མའི་མེ་ཏོག་དང་། ཙནྡན་དང་། པར་པ་ཏ་དང་། ལྡོང་རོས་དང་། སྐྱེར་པ་དང་། སླེ་ཏྲེས་དང་། སྤངས་མ་དང་། དེ་རྣམས་ཏིལ་མར་དང་སྦྱར་བའི་མར་གྱིས་བསྐུས་ན་རྨ་འཚོ་བར་འགྱུར་
[370a.4]རོ། །རྐང་ལག་འུད་པོར་ཆད་ན་ནི་ཏིལ་མར་བསྐོལ་བའི་ནང་དུ་བཅུག་ཅིང་བསྲེགས་ལ་པགས་པའི་ཤུབས་སུ་བཅུག་སྟེ་བཅིང་བར་བྱའོ། །དེའི་འོག་ཏུ་རྨ་གསོ་བའི་ཆོ་ག་རྣམས་སྤྱད་དོ། །རྔུ་བ་ཟུག་པའི་རྨ་ལ་ནི་ཐོག་མར་ཟུག་རྔུ་བྱུང་ལ་དེའི་འོག་ཏུ་རྨ་གསོ་བའི་ཆོ་ག་
[370a.5]བཞིན་བྱའོ། །གྲུགས་པའི་རྨ་ལ་ནི་རྐང་ལག་ཆག་གྲུགས་ཀྱི་གསོ་བ་རྣམས་སྦྱར་རོ། །མགོ་བོ་ལ་མཚོན་ལ་སོགས་པའི་ཟུག་རྔུས་ཟུག་པ་ལ་ནི་ཐོག་མར་ཟུག་རྔུ་ཕྱུང་ལ་སྐྲ་ཚོམས་བསྙིལ་བས་གཞུག་ཅིང་བཙགས་ལ་བཞག་གོ། །གལ་ཏེ་ཀླད་རྒྱས་འཛག་ན་ནི་རླུང་
[370a.6]འཁྲུགས་ནས་ན་སྟེ། དེ་ནི་རླུང་གི་གསོ་བ་རྣམས་བྱའོ། །གཞན་དུ་བྱས་ན་ནི་འཆི་བར་འགྱུར་རོ། །མགོ་བོའི་རྨ་ལྤགས་ཀྱིས་རུབ་ན་ནི་སྐྲ་ཉག་རེ་རེས་རིམ་གྱིས་དབྱུང་ངོ་། །གང་གི་ཀླད་རྒྱས་མང་དུ་འཛག་སྟེ་བྲི་བར་གྱུར་པ་ལ་ནི་སྲོག་ཆགས་གཞན་འཕྲལ་བསད་མ་
[370a.7]ཐག་པའི་ཀླད་རྒྱས་ཟར་གཞུག་གོ། །ཡན་ལག་གཞན་དུ་ཟུག་རྔུ་ཟུག་པ་ལ་ནི། ཐོག་མར་ཟུག་རྔུ་ཕྱུང་ལ་སྣུམ་དང་ལྡན་པའི་རེང་བུ་བཅུག་ལ་བཙང་ངོ་། །གང་གི་རྨ་ཁ་ཆུང་ཞིང་ཕུགས་སུ་སོང་སྟེ། ཁྲག་མང་དུ་འཛག་པ་ལ་ནི་ཙཀྲ་མར་དྷའི་མར་གྱིས་རྐང་པ་བཀང་
[370b]
[370b.1]སྟེ་མས་གཏོང་བའི་སྦུ་བུ་ཆུང་ངུ་དང་རྨའི་ནང་དུ་ཕུལ་ཞིང་གཏང་ངོ་། །དེ་ལ་རྨ་གནད་དུ་བསྣུན་པའི་རྨ་ལས་ཁོང་པའི་ནང་དུ་བསྣན་པའི་རྟགས་ནི། ལྟོ་བ་ཁྲག་གིས་གང་བ་དང་། བརྒྱལ་བ་དང་། གློ་སྙིང་དང་། རྩིབ་ལོགས་སུ་ཟུག་ཅིང་ན་བ་དང་། རིམས་ཀྱིས་
[370b.2]འདེབས་པ་དང་། ལུས་ཚ་བ་དང་། སྐོམ་དད་ཆེ་བ་དང་། སྦོ་བ་དང་། ཁ་ཟས་ལ་མངོན་པར་མི་དགའ་བ་དང་། བཤང་གཅི་དང་། རླུང་འགགས་པ་དང་། དབུགས་མི་བདེ་བ་དང་། མིག་དམར་བ་དང་། རྔུལ་བ་དང་། ཁ་ནས་ཁྲག་གི་དྲི་བྲོ་བ་དང་།
[370b.3]ལུས་ལས་དྲི་ང་བར་འབྱུང་བ་ཡིན་ནོ། །ཁྲག་དེ་ཕོ་བའི་གནས་སུ་བྱུང་ན་ནི་ཁྲག་གིས་སྐྱུགས་པ་དང་། ལྟོ་སྦོ་བ་དང་། ཤས་ཆེར་ན་ཞིང་ཤིན་ཏུ་མ་རུངས་པར་འགྱུར་རོ། །ཞུ་བའི་གནས་སུ་ལོང་ཀར་ཁྲག་དེ་བྱུང་ན་ནི། ཤིན་ཏུ་ཁོང་ལྕི་ཞིང་ཟུག་གཟེར་དང་བཅས་
[370b.4]པ་དང་། ལྟེ་བའི་འོག་ཏུ་གྲང་བ་དང་། གདོང་གི་བུ་ག་ནས་ཁྲག་འབྱུང་སྟེ། དེ་ཡང་མ་ཞུ་བའི་གནས་ཀྱི་ཁྲག་སྟེང་དུ་འགྲོ་བའི་ལམ་མེད་ན། གང་ནས་འབྱུང་ཞེ་ན། དེ་ནི་རྩ་རྒྱུན་ཕྲ་མོ་ལས་སྟེང་དུ་འཛག་པ་ཡོད་དེ། ཅི་ལྟར་ལྒང་པ་ཁ་ཐུར་དུ་བལྟས་ཀྱང་རྩ་
[370b.5]རྒྱུན་ཕྲ་མོ་ལས་གཅིན་གྱི་ཐིགས་པ་ནང་དུ་འབབ་པ་བཞིན་ནོ། །དེ་ལ་ཁོང་པའི་ནང་དུ་ཁྲག་ཡོད་པ་དང་། ལྒང་པ་སྐྲངས་པ་དང་། དབུགས་མི་བདེ་བ་འཐོན་པ་དང་། མིག་དམར་བ་དང་། གདོང་སྐྱ་བ་དང་། ལྟོ་བ་སྦོ་བའི་མཚན་མ་དང་ལྡན་ན་ནི་སྤང་བར་བྱའོ། །
[370b.6]དེ་ལ་མ་ཞུ་བའི་མཚན་མའི་གནས་སུ་ཁྲག་བྱུང་བ་ལ་ནི། སློན་སྨན་བྱས་ན་ཕན་ནོ། །ཤུ་བའི་གནས་ལོང་ཀར་ཁྲག་བྱུང་བ་ལ་ནི། བཀྲུ་སྨན་དང་ནི་ཧ་རུ་གཉིས་སྣུམ་མེད་ཅིང་དྲོ་བས་སྦྱར་བར་བྱའོ། །ཁ་ཟས་ནི་ནས་དང་། རྒྱ་ཤུག་དང་། རྒྱ་སྲན་གྱི་ཁུ་
[370b.7]བ་སྣུམ་མེད་ཅིང་ནས་ཐུག་རྒྱམ་ཚྭ་དང་བཅས་པ་བཟའོ། །ཁོང་པའི་ནང་དུ་མཚོན་གྱིས་ཕོག་སྟེ་ཁྲག་མང་དུ་འཛག་པ་ལ་ནི་ཁྲག་གི་བཏུང་བ་བླུད་དོ། །ལྟོ་བར་བསྣུན་པའི་རྨ་ལས་ནི་རྒྱུ་མ་ཆད་རྡོལ་དུ་གྱུར་ཏམ། མ་གྱུར་པའི་བྱེ་བྲག་ཤེས་པར་བྱ་སྟེ། དེ་ཡང་མ་
[371a]
[371a.1]རྡོལ་བ་ནི་བརྒྱལ་བ་ལ་སོགས་པའི་བྱེ་བྲག་ཚོར་བ་ཤས་ཆུང་བ་ཡིན་ནོ། །གལ་ཏེ་རྡོལ་ན་ནི་བརྒྱལ་བ་ལ་སོགས་པས་ཤས་ཆེར་མི་བདེ་བ་ཡིན་ནོ། །དེ་ལ་རྒྱུ་མ་མ་རྡོལ་བ་ནི་འཚོ་བ་ཐེ་ཚོམ་དང་བཅས་པ་ཡིན་ནོ། །རྒྱུ་མ་རྡོ་ལ་བ་ནི་འཚོ་བར་མི་འགྱུར་
[371a.2]རོ། །ཁོང་པ་མཚོན་གྱིས་སྨས་ཏེ་བཤང་གཅི་རང་ཚུལ་བཞིན་རང་གི་ལམ་ནས་འབྱུང་ཡང་གནོད་པ་དང་། སྡུག་བསྔལ་དང་བཅས་པ་དེ་ཡང་འཚོ་བར་ཐེ་ཚོམ་དང་བཅས་པ་ཡིན་ནོ། །ཁོང་པ་ནི་རྡོལ་རྒྱུ་མ་ནི་མ་རྡོལ་བར་ཕྱིར་བྱུང་བ་ལ་ནང་དུ་བསྡུས་ཏེ་སླར་གཞུག་
[371a.3]གོ། །གལ་ཏེ་གཞུག་ཏུ་མ་འདོད་ན་ནི་དབུགས་གྱེན་དུ་བརྔུབས་ན། རྒྱུ་མ་རང་གི་གནས་སུ་སླར་ཞུགས་པར་འགྱུར་རོ་ཞེས་ཁ་ཅིག་སྨྲའོ། །རྒྱུ་མ་ཕྱིར་བྱུང་བ་དེ་ནི་ཡུན་རིང་རྡོལ་ཏེ་རྡུལ་ལ་སོགས་པས་གོས་ན་འོ་མས་བཀྲུ་སྟེ། ནང་དུ་ཞུགས་པའམ་ལག་པའི་སེན་མོ་བྲེགས་ལ་
[371a.4]མར་གྱིས་བསྐུས་ཏེ། རིམ་གྱིས་ལེགས་པར་གཞུག་གོ། །རྒྱུ་མ་ཕྱིར་བྱུང་བ་དེ་ནི་ཡུན་རིང་དུ་ལོན་ཏེ་སྐམས་ན་ནི་འོ་མར་སྦང་ཞིང་མར་གྱིས་བསྐུས་ལ་རིམ་གྱིས་ལེགས་པར་གཞུག་གོ། །རྒྱུ་མ་དེ་རང་གི་གནས་སུ་ལེགས་པར་ཕྱིན་པ་རང་ཉིད་ཀྱིས་དབུགས་རྔུབ་པ་ལ་
[371a.5]སོགས་པ་མི་ནུས་ན་གཞན་གྱིས་ལག་པའི་སོར་མོ་ནད་པའི་ལྕེ་ཕུགས་སུ་བཞག་ལ་སྐྱུག་ཏུ་གཞུག་གོ །དེ་བཞིན་དུ་རྒྱུ་མ་ནང་དུ་གཞུག་ཁར་ཟུག་གཟེར་གྱིས་བརྒྱལ་ན་གདོང་ལ་སོགས་པར་ཆུས་གཏོར་རོ། །རྨའི་ཁ་སྒྲོས་ཆུང་ཞིང་། རྒྱུ་མ་སྦོམ་ཞིང་ཆེ་སྟེ། རྒྱུ་མ་ནང་དུ་
[371a.6]ཞུགས་སུ་མ་འདོད་ན། དེ་ཤོང་བའི་ཚད་ཙམ་དྲལ་ལ་ནང་དུ་གཞུག་གོ། །རྒྱུ་མ་དེ་རང་གི་གནས་སུ་ལེགས་པར་ཕྱིན་པར་ཤེས་ན་རྨ་དེ་བཙེམ་པར་བྱའོ། །གལ་ཏེ་རྒྱུ་མ་སྔར་ཇི་ལྟར་འདུག་པ་བཞིན་དུ་མ་སོང་སྟེ། རྒྱུ་མ་འཆུས་ཤིང་འཁྲུག་པར་བཅུག་ན་ནི་འཆི་བར་འགྱུར་རོ། །
[371a.7]དེ་ནས་རས་སྣུམ་གྱིས་བསྒོས་པས་དཀྲིས་ལ་སྟེང་ནས་མར་གྱིས་ཀྱང་བསྐུའོ། །དེའི་འོག་ཏུ་ཙི་ཏྲ་ཀའི་འབྲུ་མར་འོ་མ་དང་སྦྱར་བ་དྲོ་འཇམ་ཙམ་བླུད་ན་བཤང་བ་སླ་ཞིང་རླུང་དང་བཅས་པ་བདེ་བར་འབྱུང་བར་འགྱུར་རོ། །ཆོ་ག་གོང་མ་ཇི་ལྟ་བ་བཞིན་དུ་ལོ་གཅིག་གི་བར་དུ་རྨ་
[371b]
[371b.1]བསྲུང་བ་ལ་འབད་པར་བྱའོ། །སྨས་ཏེ་ལྟོ་ཚིལ་ཕྱིར་བྱུང་ནས་ཐལ་བ་དང་ས་ལ་སོགས་པའི་དྲི་མས་གོས་ན་ནི་རྩ་བ་བཅུ་པའི་སྨན་བཏགས་ལ་ཁོལ་བའི་ཁུ་བས་བཀྲུས་ལ། སྨན་པ་མཁས་པས་ཚིལ་ཇི་ཙམ་ཕྱིར་བྱུང་བའི་མཚམས་སུ་སྐུད་པས་དམ་དུ་བཅིངས་ཏེ་
[371b.2]མཚོན་རྣོན་པོས་བཅད་པའམ། ཡང་ན་མཚོན་མེ་ལ་བསྲེགས་པས་བཞུའོ། །གཞན་དུ་ལོག་པར་བཅད་ན་ནི་ཁོང་པ་ན་ཞིང་ཟུག་ལ་རྒྱུ་མ་སྒྲ་དང་བཅས་པ་འམ། ཡང་ན་འཆི་བར་འགྱུར་རོ། །དེ་ལྟར་བྱས་པའི་འོག་ཏུ་རས་སྦྲང་རྩིས་བྱུགས་པས་བཅིངས་ལ་ཁ་ཟས་
[371b.3]ཞུ་བའི་ཚོད་ཙམ་ན་མར་བླུད་དོ། །དན་དི་དང་། རྒྱ་སྐྱེགས་དང་། གཟེ་མ་དང་། ཤིང་མངར་དང་། དེ་རྣམས་འོ་མ་དང་བསྐོལ་བ་བླུད་པ་འམ་ཡང་ན་གོང་དུ་སྨོས་པའི་ཆོ་ག་བཞིན་དུ་བྱས་ན་ན་ཞིང་ཚ་བ་ལས་རྒྱལ་བར་བྱེད་པའི་མཆོག་ཡིན་ནོ། །ཚིལ་གྱིས་ཐོར་
[371b.4]བུ་གསོ་བའི་ནད་དུ་བཤད་པའི་འབྲུ་མར་གྱི་བསྐུ་བྱུག་བྱས་ན་ཡང་ཕན་ནོ། །བལ་བུའི་ལོ་མ་དང་། ཤུག་པ་དང་། སྤང་སྤོས་དང་། ཧ་རེ་ཎུ་ཀ་དང་། ཨ་ཀ་རུ་དང་། ཙནྡན་དང་། སེར་པོ་རྣམ་གཉིས་དང་། པདྨའི་ས་བོན་དང་། པུ་ཙེ་ཤེལ་དང་། དེ་རྣམས་ཏིལ་
[371b.5]མར་དང་བསྐོལ་བའི་ཁུ་བ་བསྐུས་ན། རྨ་གློ་བུར་དུ་བྱུང་བ་གསོ་བར་བྱེད་པའི་མཆོག་ཡིན་ནོ། །མཚོན་གྱིས་བསྣུན་ཏམ། གཡང་ས་ནས་ལྷུང་སྟེ་དྲན་པ་ཉམས་ཤིང་རྨོངས་བག་ཏུ་གྱུར་པ་ནི་རླུང་དང་། ཁྲག་འཇོམས་པའི་སྨན་གྱིས་མཉེ་བ་དང་། དྲིལ་བ་དང་།
[371b.6]ལུས་དག་པར་བྱེད་པ་ལ་སོགས་པས་ཚིམ་པར་བྱའོ། །ལུས་ཀྱི་ཡན་ལག་གི་ཚིགས་བྱེ་བ་དང་། ལུས་ཚབས་ཆེར་སྣད་པ་དང་། ཁྲག་ཟག་པ་དང་། གནད་དུ་བསྣུན་པ་དང་། དེ་རྣམས་ལ་ནི་ཟོམ་བཟང་པོ་ལུས་ཤོང་བ་ཙམ་ཏིལ་མར་གྱིས་བཀང་སྟེ། ལུས་གཞུག་
[371b.7]ཅིང་དེའི་འོག་ཏུ་ཤ་ཁུ་སྦྱིན་ནོ། །གློ་བུར་དུ་བྱུང་བའི་རྨ་གསོ་བའི་ལེའུ་སྟེ་ཉི་ཤུ་རྩ་དྲུག་པ་རྫོགས་སོ།། །།དེ་ནས་ཆག་གྲུགས་གསོ་བའི་ལེའུ་བཤད་པར་བྱ་སྟེ། དེ་ལ་ཐོག་མར་ལྷུང་བ་དང་། སྣད་པ་ལ་སོགས་པས་རུས་པའི་ཚིགས་དང་། ཚིགས་མ་ཡིན་པར་བྱེ་བ་
[372a]
[372a.1]དང་། ཆག་པ་རྣམ་པ་གཉིས་སུ་འགྱུར་རོ། །དེ་ལ་ཚིགས་བྱུང་བའི་རྟགས་ནི་བརྐྱང་བསྐུམ་གྱི་རྩོལ་བ་ནི་མི་ནུས་སོ། །རུས་པ་ཆག་པའི་མཚན་མ་ནི་ཤས་ཆེར་སྐྲང་བ་དང་། དུས་ཐམས་ཅད་དུ་ཟུག་ཅིང་ན་བ་དང་། བསྒུལ་བསྐྱོད་ཕྲ་མོ་ཙམ་ཡང་མི་ནུས་པ་དང་།
[372a.2]མྱངས་ན་རུས་པ་ཁྲོལ་སྒྲ་གྲག་པ་སྟེ། དེ་དག་ནི་ཆག་པའི་མཚན་ཉིད་མདོར་བསྟན་པའོ། །དེ་ལ་ཆག་གྲུགས་ཀྱི་སྦྱོར་བ་མང་དུ་སྨོས་པ་ལས་སྦྱོར་བ་མང་དུ་ཇི་ལྟ་བ་བཞིན་དུ་ཉུང་ཞིག་བརྗོད་པར་བྱ་སྟེ། ཐོག་མར་རུས་པ་ཆག་པར་གྱུར་ན་རུས་པ་འཁྲོལ་བའི་སྒྲ་གྲག་གོ། །དེ་ལ་
[372a.3]རུས་པ་གང་ཡང་རྐེད་ཁུམས་སུ་ཆག་པ་ནི་གཞུག་པར་སླ་ཞིང་འཚོ་བར་ཡང་སླའོ། །རུས་པ་ཆག་པ་དེ་ཟུག་ཅིང་མ་ཆག་པ་ཙམ་དུ་ལུས་པའམ། ཡང་ན་རུས་པ་གཞོལ་ཕྱོགས་ཆག་སྟེ། དྲངས་ཀྱང་མཐོ་དམན་དུ་སོང་བ་ནི་ཤིན་ཏུ་གསོ་དཀའ་བ་ཡིན་ནོ། །དེ་བཞིན་དུ་
[372a.4]ལུས་རྗུད་པ་དང་། ཉམས་སྟོབས་ཆུང་བ་དང་། རླུང་ནད་ན་བ་དང་། ཟས་ཉུང་ངུ་ཟ་བ་དང་། ཀླད་པའི་ཚིགས་དང་། རྐང་པའི་ཚིགས་བྱེ་ཞིང་འབྱུང་བ་དང་། གདོང་བུའི་རུས་པ་ཆག་པ་དང་། འདི་རྣམས་ནི་གསོ་བ་སྤང་བར་བྱའོ། །གཞན་ཡང་མགོའི་རུས་པ་བྱེ་ཞིང་མི་འབྱོར་
[372a.5]བ་དང་ཕྲད་པའི་རུས་པ་དུམ་བུར་སོང་བ་དང་། མུར་འགྲམ་དང་སྤྱི་གཙུག་སླད་དེ་ཆག་པ་དང་། ཡང་ན་རུས་པ་ཆག་པ་དེ་ལེགས་པར་མ་བཅིངས་པ་དང་། བཅིངས་ཀྱང་བར་དུ་བསྐུལ་བསྐྱོད་ཀྱིས་གྲུགས་པ་དང་། ཡང་ན་ལམ་དུ་འགྲོ་ཞིང་བསྐྱོད་དྲགས་པས་གྲུགས་པ་དང་། གསོ་
[372a.6]བ་ལོག་པ་བྱས་པ་རྣམས་ཀྱང་སྤང་བར་བྱའོ། །གང་ཡན་ལག་ལ་སོགས་པ་གཅུས་པའམ། དྲངས་པས་ཡན་ལག་གི་རུས་པ་ཕྲ་མོ་ཆག་གམ། ཡང་ན་ཚིགས་བྱུང་ངམ། རུས་པ་སྙི་བ་ཆག་གམ། ཡང་ན་རུས་པ་སྦུབས་ཅན་ཆག་གམ། ཡང་ན་ཀླད་པ་ཞོམ་པ་
[372a.7]འམ། དེ་ལས་གཞན་པའི་རུས་པ་ཆག་སྟེ། ཆག་འཕྲོ་མཐོན་དམན་དུ་སོང་ན། གང་མཐོ་བ་མནན་ཅིང་དམའ་བ་བཏེག་སྟེ། དྲང་པོར་ལེགས་པར་གཞུག་གོ། །ཕྲག་པའི་རུས་པ་ཆག་སྟེ། ཆག་འཕྲོ་ཤིན་ཏུ་དམའ་བར་གྱུར་པ་ལས་དམའ་བ་ཡར་བཏེག་སྟེ་བཅུག་
[372b]
[372b.1]ལ་པགས་པ་སར་པས་དམ་དུ་བཅིང་བར་བྱ་བའི་ཆོ་ག་བྱའོ། །ལུས་ཀྱི་ཚིགས་འགུལ་བ་དང་། མི་འགུལ་བ་ཐམས་ཅད་རིག་པར་ཆག་གམ། བྱུང་ན་ཡང་ཆོ་ག་དེ་ལྟར་བྱའོ། །གཞན་ཡང་རྐང་ལག་གི་རུས་པ་ལ་སོགས་པ་ཆག་པ་གང་ཡང་རུང་བ་དེ་དག་ཀྱང་ཅི་ནས་ལེགས་
[372b.2]པར་བཅུག་ལ་མི་འགུལ་བའི་ཐབས་སུ་བྱ་སྟེ། རས་མར་མང་པོ་བསྐུས་པས་དཀྲིས་ལ་བཅིངས་ཏེ། ཀ་དམ་པ་དང་། ཨུ་དུམྦཱ་ར་དང་། ཨ་ཤྭདྠ་དང་། སཱ་ལའི་ཤིང་དང་། ཨ་རྫུ་ནའི་ཤིང་དང་། རྒྱ་སྐྱེགས་ཀྱི་ཤིང་དང་། སྨྱུག་མ་དང་། འོད་མ་དང་། དེ་རྣམས་གང་ཡང་
[372b.3]རུང་བའི་ཤུན་པ་དང་། གཤག་མའི་བྱང་བུ་ཞིང་ཆེ་ཞིང་སྲབ་ལ་འཇམ་པས་དབང་དུ་བྱས་ལ་བསྡམས་ཏེ་ཀུ་ཤའི་སྲད་བུས་བཅིང་བར་བྱའོ། །གལ་ཏེ་ལྷོད་པར་བཅིངས་ན་ནི་འབྱོར་བ་བྱེ་ཞིང་ཆག་པ་བརྟེན་པར་མི་འགྱུར་རོ། །བཅིང་བ་བསྡམ་དྲགས་ན་ནི་ཤིན་ཏུ་ན་ཞིང་ཟུག་གཟེར་
[372b.4]དང་། ཚ་ཞིང་ཁོལ་བ་དང་། སྐྲང་བར་ཡང་འགྱུར་རོ། །བཅིངས་པ་དེ་ཚ་བའི་དུས་ན་ནི་ཞག་གསུམ་གསུམ་ཞིང་ལན་རེ་བཀྲོལ་ལོ། །གྲང་བའི་དུས་ན་ནི་ཞག་བདུན་བདུན་ཞིང་བཀྲོལ་ལོ། །དྲོ་གྲང་མཉམ་པའི་དུས་ན་ནི་ལྔ་ལྔ་ཞིང་བཀྲོལ་ལོ། །ཡང་ཆག་གྲུགས་ཀྱི་ནད་གཞི་
[372b.5]དང་། སྟོབས་ཆེ་ཆུང་དང་སྦྱར་ལ་ཅི་རིགས་པར་གྱིས་ཤིག །བཀྲོལ་བའི་བར་སྐབས་ཀུན་ཏུ་ནྱ་གྲོ་དྷ་ལ་སོགས་པ་བསྐོལ་བའི་ཁུ་བ་བསྒྲངས་པས་བཀྲུ་ཞིང་བླུགས་པར་བྱའོ། །གལ་ཏེ་ཟུག་གཟེར་དང་བཅས་པ་ཡིན་ན་ནི། རྩ་བ་ཆེན་པོ་ལྔ་བསྐོལ་པས་བཀྲུའོ། །དེ་བཞིན་དུ་
[372b.6]སྨན་པས་ཡུལ་དང་དུས་ཀྱི་བྱེ་བྲག་ཤེས་པར་བྱས་ནས། ཙཀྲ་མར་དའི་མར་རླུང་འཇོམས་པའི་སྨན་དང་སྦྱར་བའི་ལྡེ་གུ་དྲོ་འཇམ་ཙམ་གྱིས་བསྐུ་བར་བྱའོ། །གཞན་ཡང་ཤིན་ཏུ་བསིལ་བའི་བྱུག་པ་དང་། བླུགས་པ་ཡང་རྒྱུན་དུ་བྱའོ། །བའི་འོ་མ་དང་མར་དང་སྨན་མངར་བ་དང་
[372b.7]སྦྱར་བ་བསྐོལ་བ་རྒྱ་སྐྱེགས་དང་བཅས་པ་གྲང་མོ་ནང་རེ་བཞིན་བླུད་དོ། །ཆག་གྲུགས་རྨ་དང་བཅས་པ་འབྱུང་བ་ལ་ནི་སྦྲང་རྩི་དང་མར་ཤས་ཆེར་སྦྱར་བས་བསྐུའོ། །གཞན་ཡང་སྐྲངས་པ་གསོ་བའི་ཆོ་ག་ལས་འབྱུང་བ་བཞིན་དུ་སྨན་བསྐོལ་བའི་ཁུ་བ་བླུགས་པ་ལ་སོགས་པ་བྱའོ། །
[373a]
[373a.1]རྨ་ཁ་ལས་ཤའི་དུམ་བུ་འཕྱང་བ་ལྟ་ན་ནི་སྦྲང་རྩི་མར་དང་སྦྱར་བས་བསྐུས་ལ་སླར་སྦྱར་ཏེ་ལེགས་པར་བཅིང་ངོ་། །དེ་ལྟར་བཅིངས་ནས་ཤ་འཕྱང་བ་དེ་ལེགས་པར་སྦྱར་བ་འདྲ་ན་པྲི་ཡང་ཀུ་དང་། སེང་ཕྲོམ་དཀར་པོ་དང་། ཀད་ཕ་ལ་དང་། བཙོད་དང་། ད་ཏ་ཀི་
[373a.2]དང་། འདི་རྣམས་ཀྱི་ཕྱེ་མས་གདབ་པ་འམ། ཡང་ན་ད་ཏ་ཀི་དང་། སེང་ཕྲོམ་གྱི་ཕྱེ་མས་རྨ་ཁ་ལ་བཏབ་ན་མྱུར་དུ་རྨ་འདྲུབ་པར་འགྱུར་རོ། །དེ་དག་ནི་ཆག་གྲུགས་ཀྱི་གསོ་བ་རིམ་པར་བསྟན་པ་ཡིན་ཏེ། ལུས་ཀྱི་ཁམས་ཉམས་པ་དང་། དགུན་གྱི་དུས་དང་། ཉམས་སྟོབས་
[373a.3]དང་། ལུས་ཤས་ཆེ་བ་དང་། ནད་གཞི་ཆུང་བ་རྣམས་ཀྱི་རྨ་ནི་གསོ་སླ་བ་ཡིན་ཏེ། གཞན་དུ་ནི་གསོ་དཀའ་བ་ཡིན་པར་བཤད་དོ། །དེ་ལ་ཐོག་མ་དང་། བར་མ་དང་། ཐ་མའི་བར་དུས་འོ་མ་ཡང་དང་པོ་ནས་རིམ་པར་མྱུར་དུ་བསྐྱེད་དེ། བླུགས་པ་ལ་སོགས་པ་ཆོ་ག་ཇི་ལྟ་བ་
[373a.4]བཞིན་དུ་བྱས་ན། རིམ་གྱིས་རྨ་ཁ་བརྟན་པར་འགྱུར་ཏེ། ཚིགས་བྱུང་བ་དང་། རུས་པ་ཆག་པ་ཡང་སླར་འབྱོར་པར་བྱེད་དོ། །རྐེད་པ་དང་། བརླ་དང་། རྗེ་ངར་གང་ཡང་རུང་བ་ཆག་ན། དེ་ལ་ནི་ལུས་མི་འགྱུར་བའི་ཆོ་ག་བྱ་སྟེ། ཉལ་ཁྲི་སྤང་ལེབ་ལ་གཟེར་བུ་ལྔ་བཏབ་སྟེ།
[373a.5]དེ་ཡང་བྱིན་པ་གཡས་གཡོན་གཉིས་ནས་གཟེར་རེ་རེ་དང་། བརླ་ངོས་གཉིས་ནས་རེ་རེ་དང་། རྐང་པའི་མཐིལ་དྲང་ནས་གཅིག་སྟེ། དེ་ལྟར་གཟེར་ལྔའི་བར་དུ་མི་འགུལ་བར་བཞག་གོ། །སྟ་ཟུར་དང་། སྒལ་ཚིགས་དང་། གདོང་པ་གང་ཡང་རུང་བའི་ཚིགས་བྱུང་ངམ་ཆག་
[373a.6]ན་བཀྲོལ་བ་ལ་སོགས་པའི་ཆོ་ག་གོང་མ་བཞིན་དུ་བྱའོ། །གལ་ཏེ་ཡུན་རིང་པོ་ནས་བཀྲོལ་བ་ལ་སོགས་པ་ཞིག་ཡིན་ན་ནི་སྣུམ་དང་དུགས་ལ་སོགས་པས་འཇམ་པོ་བྱས་ཏེ་གཟོད་བཀྲོལ་ལོ། །བཀྲོལ་བའི་འོག་ཏུ་གལ་ཏེ་ཆག་འཕྲོ་མ་ཞུགས་སམ་གྲུགས་པ་ལྟར་ན་ཡང་གོང་མ་
[373a.7]བཞིན་དུའམ་སྨན་པའི་བློས་ཅི་རིགས་པར་ཡང་ལེགས་པར་བརྟག་སྟེ་གཞུག་གོ། །སྔར་རུས་པ་ཆག་ཅིང་ཤས་ཆེར་ན་བ་དང་བཅས་པ་དེ་ལེགས་པར་འདྲུབ་པར་འགྱུར་བ་ལས་ཕྱིས་སྣད་པའམ། ལྷུང་བ་ལ་སོགས་པས་ཡང་ཆག་པར་གྱུར་ན་ནི་སྔར་ཇི་ལྟར་ཆག་པ་བཞིན་དུ་
[373b]
[373b.1]འམ། སྨན་པའི་བློས་ཅི་རིགས་པར་ཡང་བརྟགས་ཏེ་གསོ་བར་བྱའོ། །དེ་ལྟར་ཆག་གྲུགས་སུ་གྱུར་པ་ལ་ནི་སྨན་པས་ཅི་ནས་རྣགས་པར་མི་འགྱུར་བར་བསྲུངས་ཏེ། གལ་ཏེ་རྣགས་པར་གྱུར་ན་ནི་ཤ་དང་རྩ་དང་རྒྱུས་པ་དང་འདི་རྣམས་ལ་གནོད་པས་འདྲུབ་པར་མི་འགྱུར་ཏེ།
[373b.2]ཞིགས་པར་འགྱུར་རོ། །གཞན་ཡང་རླུང་ནད་ཀྱི་ཆོ་གའི་ནང་དུ་བཤད་པའི་སྣུམ་གྱི་སྦྱོར་བ་རྣམ་པ་བཞི་པོ་སྣ་ནས་གཏང་བ་དང་། འཇམ་རྩི་ལ་སོགས་པ་སྟོབས་བསྐྱེད་པའི་ཕྱིར་འདི་ལ་ཡང་སྦྱར་བར་བྱའོ། །དེ་བཞིན་དུ་ཁ་ཟས་ཀྱང་འབྲས་སཱ་ལུ་དང་། མར་དང་། ཤ་ཁུ་དང་།
[373b.3]འོ་མ་ལ་སོགས་པ་དང་། སྲན་ཆུང་དང་མུངྒ་ལ་སོགས་པ་བསིལ་བའི་ནུས་པ་དང་ལྡན་པ་དག་ཚོད་ཟིན་པར་ཆག་གྲུགས་ཅན་ལ་སྦྱར་བར་བྱ་སྟེ། ཅི་ནས་ཆག་གྲུགས་འབྱོར་བར་བྱེད་པའི་བག་བསྟེན་པར་བྱེད་དོ། །ཆག་གྲུགས་བྱེ་ཞིང་མི་འབྱོར་བའི་རྟགས་ནི་ཁ་བའི་བག་
[373b.4]དང་། ཐལ་སྨན་དང་། སྐྱུར་དང་། ཉལ་པོ་དང་། ཉི་མ་དང་། རྩོལ་བ་རྣམ་གཉིས་བརྟེན་པར་མི་བྱ་སྟེ་སྤང་ངོ་། །དེ་བཞིན་དུ་ཁ་ཟས་རྩུབ་པ་རྣམས་ཀྱང་སྤང་བར་བྱ་སྟེ། མི་བསྔགས་སོ། །ཏིལ་ནག་པོ་ཕུབ་མ་མེད་པ་རས་ཀྱི་ནང་དུ་ཐུམ་པོར་བྱས་ཏེ་དམ་དུ་བཅིངས་
[373b.5]ནས་ཆུའི་ནང་དུ་ཞག་བདུན་གྱི་བར་དུ་ནུབ་རེ་སྦངས་ཉིན་རེ་བསྐམས་ཏེ། དེ་བཞིན་དུ་འོ་མ་དང་། ཤིང་མངར་བསྐོལ་བའི་ཁུ་བ་དང་རེ་རེར་ཡང་ཆོ་ག་གོང་མ་ལྟར་བྱ་སྟེ། དེ་ནས་ཞག་བདུན་གྱི་བར་དུ་འོ་མ་ལ་སོགས་པའི་ནང་དུ་སྦངས་ཤིང་བསྐམས་ཏེ་ཁུ་བ་ཞེན་པ་དང་།
[373b.6]ཏིལ་ནག་པོ་རྡུལ་མེད་པ་བཏགས་པའི་ཕྱེ་མ་དང་། སྤང་སྤོས་དང་། བ་ལ་ཀ་དང་། བཙོད་དང་། ཆུ་སྲིན་སེན་མོ་དང་། ཤུ་ཏི་དང་། གླ་བ་དང་། རུ་རྟ་དང་། བ་བླ་རྣམ་གསུམ་དང་། ཨ་ཀ་རུ་དང་། ཙནྡན་དང་། གུར་གུམ་དང་། ཐལ་ཏྲེས་དང་། ཀོ་ཉོན་རྩེའི་ཐང་ཆུ་དང་།
[373b.7]སྲ་རྩི་པོག་དང་། ཐང་ཤིང་དང་། སྨན་ཤུག་པའི་སྡེ་ཚན་ལ་སོགས་པ་དང་། དྲི་ཞིམ་པོའི་སྦྱོར་བ་དེ་དག་བཏགས་པའི་ཕྱེ་མ་འོ་མ་དང་ལྷན་ཅིག་བསྐོལ་ཏེ། བཙིར་བའི་འབྲུ་མར་འབྱུང་བ་དང་། དེའི་ནང་དུ་རྡོ་དྲེག་དང་། ར་སྣ་དང་། ས་ལ་པརྞི་དང་། ཀ་ཤ་ར་ཀ་དང་།
[374a]
[374a.1]གནྡྷ་པྲི་ཡང་ཀུ་དང་། རྒྱ་སྤོས་དང་། གནྡྷ་བྷ་དྲ་དང་། སེང་ཕྲོམ་དང་། ཀྵི་ར་བི་ད་རི་དང་། རྩ་དཱུར་བ་དང་། གོང་གི་སྤང་སྤོས་ལ་སོགས་པའི་ཕྱེ་མ་དང་ལྷན་ཅིག་ཚུལ་བཞིན་བསྐོལ་བ་ནི་འབྲུ་མར་དྲི་ཞིམ་པོའི་མཆོག་ཅེས་བྱ་སྟེ། དེ་ལས་རན་པར་སྤྱད་ན་ནི་
[374a.2]མྱུར་དུ་ནད་མེད་ཅིང་རུས་པ་བརྟན་པར་བྱེད་དོ། །རླུང་དང་མཁྲིས་པ་ལས་གྱུར་པའི་ནད་ཤས་ཆེ་བ་ཡང་འབྲུ་མར་གྱི་སྦྱོར་བ་འདི་བསྟེན་ན་མྱུར་དུ་ཞི་བར་འགྱུར་རོ། །རྒྱུད་ཕྱི་མ་མཆོག་གྲུབ་པའི་གནས་ལས་ཆག་གྲུགས་གསོ་བའི་ལེའུ་སྟེ་ཉི་ཤུ་རྩ་བདུན་པ་རྫོགས་སོ།། །།
[374a.3]དེ་ནས་མཚན་བར་རྡོལ་བའི་ནད་དམིགས་བསྟན་ཅིང་ནད་གསོ་པའི་ཆོ་གའི་ལེའུ་བཤད་པར་བྱ་སྟེ། དེ་ལ་མཚན་བར་རྡོལ་བའི་ནད་རྒྱུ་ནི་གླང་པོ་ཆེ་དང་རྟ་ལ་རྒྱུན་ཏུ་ཞོན་པ་དང་། མལ་མཁྲང་བ་ལ་ཉལ་བ་དང་། ཙོག་ཙོག་པོར་འདུག་པ་དང་། གཞན་ཡང་གཞང་འབྲུམ་གྱི་ནད་གཞིར་
[374a.4]བསྟན་པར་བསྟེན་པ་དང་། ཁ་ཟས་མི་མཐུན་པས་རྨ་སྨིན་པར་མ་ཚོར་བ་དང་། ཡང་ན་གློ་བུར་དུ་བྱུང་བའི་རྨ་སྨིན་པར་མ་ཚོར་བ་དང་། དམ་པ་རྣམས་ལ་མང་དུ་སྨོད་པའི་ཉེས་པས་ཕལ་ཆེར་རྐུབ་ཀྱི་ཚུ་རོལ་སོར་གཅིག་གམ་གཉིས་ལ་ཕོལ་མིག་སྔོན་དུ་འབྱུང་ཞིང་། དེ་རྡོལ་
[374a.5]བར་བྱེད་པ་ལས་ནང་ངམ་ཕྱི་རོལ་དུ་རྨ་འབྱུང་སྟེ། ཤ་དང་ཁྲག་མ་རུང་བར་བྱས་ཏེ་རུལ་བར་བྱེད་དོ། །དེ་ནས་རྨ་དེ་ཆུ་སོ་དང་། གཅིན་གྱི་གནས་སུ་འགྲོ་བར་བྱེད་དོ། །འཛག་པ་དང་ལྡན་པའི་བདག་ཉིད་ཅན་ཡིན་ཏེ། དེ་གསོ་བ་ལོག་པར་བྱས་ན་ནི་མཚན་བར་རྡོལ་བའི་རྨ་དེ་མཆེད་པར་
[374a.6]བྱེད་དོ། །དེ་ཡང་མོ་མཚན་དང་། ཆུ་སོ་དང་། གཞང་དང་། དེ་རྣམས་སུ་ཆེར་མཆེད་ཅིང་རྒྱས་ལ་རྨ་སྐྱེད་པའི་ནང་ནས་རླུང་དང་གཅིན་དང་ཕྱི་ས་འབྱུང་བར་འགྱུར་རོ། །དེ་ཡང་ནད་གཞི་རེ་རེར་གྱུར་པ་དང་ལྡན་པ་དང་། འདུས་པ་དང་། གློ་བུར་དུ་བྱུང་བ་དང་། རྣམ་པ་བརྒྱད་དུ་
[374a.7]བཤད་པར་བྱའོ། །དེ་སྨིན་པའི་མཚན་བར་རྡོལ་བ་ཞེས་བྱ་སྟེ། དེ་ཡང་ནད་ཀྱི་རྩ་བ་མི་མངོན་པ་དང་། ཚབས་ཆེར་ན་བ་དང་། རྨ་མི་འདྲུབ་ཅིང་འཁྲུགས་པ་རྣམས་ཡིན་ཏེ། གཞན་དུ་ན་ནི་ཕོལ་མིག་ཉི་ཚེ་ཡིན་ནོ། །དེ་ལ་རླུང་ལས་གྱུར་པའི་ཕོལ་མིག་གི་མཚན་མ་ནི་
[374b]
[374b.1]མདོག་སྔོ་ནག་ཏུ་འགྱུར་བ་དང་། ན་ཞིང་ཟུག་པ་དང་། འཕར་བ་དང་། ནད་དང་བཅས་པ་ཡིན་ནོ། །མཁྲིས་པ་ལས་གྱུར་པའི་རྟགས་ནི་རྔ་མོའི་མགྲིན་པ་བཞིན་དུ་མཐོ་བ་དང་། མདོག་དམར་བ་དང་། ཚ་བ་ཆེ་བ་དང་། རིམས་ཀྱིས་འདེབས་པ་རྣམས་ཡིན་ནོ། །བད་ཀན་ལས་གྱུར་
[374b.2]པའི་ཕོལ་མིག་གི་མཚན་མ་ནི་བརྟན་པ་དང་། སྣུམ་པ་དང་། ནད་ཀྱི་རྩ་བ་འཕྲོས་པ་དང་། མདོག་སྐྱ་བ་དང་། གཡའ་བ་རྣམས་ཡིན་ནོ། །རླུང་དང་མཁྲིས་པ་ལས་གྱུར་པའི་མཚན་མ་ནི་མདོག་ནག་པ་དང་། དམར་བ་དང་། ཚ་འུར་འུར་པོར་འདུག་པ་དང་། མི་བཟོད་པར་ན་
[374b.3]བ་རྣམས་ཡིན་ནོ། །བད་ཀན་དང་རླུང་ལས་གྱུར་པའི་ཕོལ་མིག་གི་མཚན་མ་ནི། ཅུང་ཟད་དཀར་ཞིང་ཅུང་ཟད་གནག་པ་ཡིན་ནོ། །འདུས་པ་ལས་གྱུར་པའི་ཕོལ་མིག་གི་མཚན་མ་ནི་རྐང་པའི་མཐེ་བོང་དང་མཉམ་པའི་ཕོལ་མིག་བྱུང་ཞིང་ཟུག་གཟེར་ཆེ་བ་དང་།
[374b.4]ཁ་ཟས་ཡི་གར་མི་འོང་བ་དང་། སྐོམ་དད་ཆེ་བ་དང་། ཚ་འུར་འུར་པོར་འདུག་པ་དང་། རིམས་ཀྱིས་འདེབ་པ་དང་། སློན་པ་ལ་སོགས་པ་ནད་སྣ་ཚོགས་ཀྱིས་གནོད་པ་ཡིན་ནོ། །རླུང་ལས་གྱུར་པའི་ཕོལ་མིག་གསོ་བ་མ་བྱས་ཏེ་སྨིན་ན་ནི་རྨ་ཁ་མང་དུ་འབྱུང་བ་སྟེ། དེ་ཡང་ཇི་
[374b.5]ལྟར་བུག་བརྒྱ་པའི་ཚགས་མ་ལས་ཆུ་འཛག་པ་བཞིན་དུ་རྨ་ཁ་དེ་ལས་ཀྱང་འཛག་པ་དང་། ལྦུ་བ་དང་བཅས་པར་རྒྱུན་དུ་འཛག་པ་དེ་རྨ་ཁ་བརྒྱ་པ་ཞེས་བྱའོ། །མཁྲིས་པ་ལས་གྱུར་པའི་ནད་ཀྱང་རླུང་དང་འདྲ་སྟེ། དེ་ནི་རྔ་མོའི་མགྲིན་པ་ཞེས་བྱའོ། །བད་ཀན་ལས་གྱུར་
[374b.6]པའི་ནད་ནི་འཛག་པ་སྤྱི་དང་སྐབས་མང་དུ་འབྱུང་སྟེ། དེ་ནི་ཀུན་ཏུ་འཛག་པ་ཞེས་བྱའོ། །རླུང་དང་མཁྲིས་པ་ལས་གྱུར་པའི་ནད་ཀྱིས་བཤང་སྒོའི་ཕྱི་རོལ་དུ་ཁྱབ་ཅིང་མཆེད་དེ་འཁོར་བ་ལྟར་འདུག་པ་དེ་ནི་པ་རི་ཀྵ་པ་ཞེས་བྱའོ། །རླུང་དང་བད་ཀན་ལས་གྱུར་པའི་ནད་གཞང་ལ་བརྟེན་ཏེ་
[374b.7]དྲང་པོར་འབྱུང་བ་དེ་ནི་མཚན་བར་རྡོལ་གྱི་ནད་དྲང་པོ་ཞེས་བྱའོ། །བད་ཀན་དང་མཁྲིས་པ་ལས་གྱུར་པའི་ནད་ཐོག་མར་གཞང་འབྲུམ་གྱི་གནས་སུ་བྱུང་ཞིང་དེ་ལ་བརྟེན་ཏེ་འཁྲུགས་ནས་གཞང་འབྲུམ་གྱི་རྩ་བར་གཡའ་བ་དང་། སྐྲང་བ་དང་། ཚ་བ་དང་། གཞང་འབྲུམ་གྱི་རྩ་པ་དེར་
[375a]
[375a.1]མྱུར་དུ་སྨིན་ཏེ་རྡོལ་ཅིང་རྣགས་པས་རྒྱུན་དུ་འཛག་པ་དེ་ནི་གཞང་འབྲུམ་གྱི་མཚན་བར་རྡོལ་བ་ཞེས་བྱའོ། །འདུས་པ་ལས་གྱུར་པའི་ནད་ཀྱི་མཚན་མ་ནི་བཤང་སྒོའི་ཕྱི་རོལ་དུ་དུང་འཁྱིལ་པ་ལྟ་བུར་འབྱུང་ཞིང་དེར་ཡང་འབྲུམ་བུ་མང་དུ་སྣང་སྟེ་ནད་ཀྱི་ཤུགས་དྲག་པ་དེ་ནི་
[375a.2]དུང་འཁྱིལ་བ་ལྟ་བུའི་ནང་མཚན་བར་རྡོལ་བའི་ནད་ཅེས་བྱའོ། །མཚན་བར་རྡོལ་བའི་ནད་ཀྱིས་ཤ་རྣགས་པར་བྱས་ཏེ་ཟད་པ་ལས་གདོང་མོའི་རུས་པ་ལ་ཐུག་པ་དང་། འཕྲེད་དུ་ལམ་ལོག་པར་མཆེད་ཅིང་རྨ་འབྱུང་སྟེ། དེའི་ཚེ་རྣག་རྙིང་པས་ཤུ་བ་བྱུང་ཞིང་སྲིན་བུ་སྐྱེས་ཏེ་དེས་
[375a.3]གཞང་ཀུན་ཏུ་ཟ་བར་བྱེད་ཅིང་གཞང་རྡོལ་བར་འགྱུར་ཏེ། རྨ་བས་ཁྱད་པར་དུ་ཚ་བ་དང་། གཡའ་བ་དང་། ན་བ་ལ་སོགས་བ་སྐྱེས་པ་ཡིན་ཏེ། དེ་ནི་ལམ་ལོག་པར་སོང་བའི་མཚན་བར་རྡོལ་བའི་ནད་ཅེས་ཀྱང་བྱ། ཟད་བྱེད་ཅེས་ཀྱང་བྱའོ། །དེ་རྣམས་ལས་འདུས་པ་ལས་གྱུར་
[375a.4]པ་དང་། ཟད་བྱེད་ཀྱི་མཚན་བར་རྡོལ་གཉིས་ནི་སྤང་བར་བྱའོ། །ལྷག་མ་རྣམས་ནི་གསོ་དཀའོ། །གཞང་གི་གཉེར་མ་འཛུམ་བྱེད་དང་། མཚན་དང་བཤང་སྒོའི་བར་མཚམས་ལ་མཚན་བར་རྡོལ་བའི་ནད་བྱུང་ན་ནི། འབྲུམ་བུ་གསོ་བའི་ཆོ་གས་འབད་པ་དང་བཅས་པར་
[375a.5]གསོའོ། །གོང་འོག་ཏུ་སློན་ཁྲུས་ལ་སོགས་པས་ལུས་སྦྱོང་ཞིང་ཁྲག་བྱུང་བ་ལ་བླུགས་པ་ལ་སོགས་པས་ཅི་ནས་སྨིན་པར་མི་འགྱུར་བའི་ཐབས་བྱའོ། །གལ་ཏེ་སྨིན་ན་ནི་ཉེ་བར་སྣུམ་ཆོས་དང་དུགས་བྱ་བ་དང་ཆུ་ནང་དུ་ལུས་གཞུག་པར་བྱའོ། །མཚན་བར་རྡོལ་གྱི་ནང་དུ་
[375a.6]ནད་བརྟག་པ་ནི། གཞང་འབྲུམ་བརྟག་པའི་ཆ་བྱད་ལྟ་བུའི་གཞང་འབྲུམ་ཇི་ལྟར་བརྟགས་པ་ལྟར་བྱ་སྟེ། དེ་ཡང་ཁ་ཐུར་དུ་ལྟ་བ་དང་། གྱེན་དུ་ལྟ་བ་དང་། ནང་དུ་ལྟ་བ་དང་། ཕྱི་རོལ་ཏུ་ལྟ་བ་ལེགས་པར་བརྟགས་ཏེ། དེ་ལ་ནང་དུ་ལྟ་བ་ནི་སྨན་པས་ལེགས་པར་བརྟགས་ཏེ་མཚོན་
[375a.7]གྱིས་དྲལ་ཞིང་བཅད་དོ། །ཁ་ཕྱིར་ལྟ་བ་ནི་ཐལ་སྨན་གྱིས་གསོའོ། །ཡང་ན་སྨན་པ་མཁས་པས་མེའི་ལས་བྱའོ། །རྔ་མོའི་མགྲིན་པ་ལྟ་བུ་ལ་ཡང་ཐལ་སྨན་གྱི་ལས་བྱའོ། །རྨ་ཁ་བརྒྱ་པ་ལ་ནི་ཆ་སྤྱད་སྦུབས་ཅན་གཅིག་གིས་ནང་དུ་བཅུག་སྟེ་གཅད་པར་བྱ་སྟེ། རྨ་ལེགས་
[375b]
[375b.1]པར་འདྲུབ་ན་ནི་ལེགས་པ་ཡིན་ལ་རྨ་རྙིང་སྟེ་འཚོར་མི་བཏུབ་ན་ནི་ཉེས་པ་ཡིན་ཏེ་འཆི་བ་ཡིན་ནོ། །པ་རི་ཀྵ་པ་ཞེས་བྱ་བའི་མཚན་བར་རྡོལ་བ་ལ་ཡང་ཆོ་ག་གོང་མ་ལྟར་བྱ་སྟེ། ཐལ་སྨན་དང་བ་གཅིན་སྦུ་བུ་ནས་གཏང་བ་ཡང་བྱའོ། །གཞང་འབྲུམ་གྱི་མཚན་མར་རྡོལ་བའི་
[375b.2]ནད་ལ་ནི་སྨན་པས་བརྟགས་ཏེ། གོང་གི་གཞང་འབྲུམ་ལ་ཕན་པའི་སྨན་གྱི་ཕྱེ་མས་གདབ་བོ། །ཟད་བྱེད་ཀྱི་མཚན་མར་རྡོལ་བའི་ནད་ལ་ནི་ཟུག་རྔུ་དབྱུང་བའི་ཆོ་ག་རྣམས་བྱའོ། །སྲིན་བུ་འཇོམས་པའི་བཟའ་བ་དང་། བྱུག་པ་དང་ཁ་ཟས་ཀྱང་སྦྱིན་ནོ། །དེ་བཞིན་དུ་གླན་
[375b.3]པའི་དུགས་དང་། སྦུ་བུའི་དུགས་ལ་སོགས་པ་སྣུམ་ཆོས་བྱས་ན་ཟུག་གཟེར་ལ་ཕན་ནོ། །དུང་འཁྱིལ་བ་ལྟ་བུ་བུ་ག་མང་དུ་བྱུང་བའི་ནད་ལ་ནི་སྨན་པས་བརྟགས་ཏེ་གཅད་པའི་ལས་བྱའོ། །དེ་ལ་མཚོན་ནི་སརྦ་དོ་བྷད་ཏྲ་ཞེས་བྱ་བ་དང་། དེ་ལ་ལང་ག་ཞེས་བྱ་བ་
[375b.4]དང་། ལང་ག་ལང་ཞེས་བྱ་བ་དང་དེ་རྣམས་ཀྱིས་བྱའོ། །ངོས་སུ་བྱུང་བ་ལ་ནི་མཚོན་གོ་ཏིར་ཏ་ཀ་ཞེས་བྱ་བས་བཅད་དོ་ཞེས་འདོད་དོ། །མཚན་མར་རྡོལ་བ་ཐམས་ཅད་ལ་ནི་མཚོན་སརྦ་དོ་བྷད་ཏྲ་ཞེས་བྱ་བས་བཅད་དོ། །ཨད་ག་ལའི་མཚོན་གྱིས་ནི་ངོས་གཉིས་པ་
[375b.5]ལ་ཡོད་པ་བཅད་དོ། །བཅད་པའི་འོག་ཏུ་ནི་ཐམས་ཅད་ཀྱང་བསྲེགས་པར་བྱའོ། །འཛག་པའི་ལམ་ཐམས་ཅད་ཀྱང་དེ་བཞིན་དུ་བསྲེག་པར་བྱ་སྟེ། ཕྱིས་མི་སྐྱེ་བའི་ཕྱིར་རོ། །ཁོང་དག་པར་བྱ་བའི་ཕྱིར་བར་བར་དུ་སྨན་པས་སློན་ཁྲུས་ཀྱིས་ལུས་སྦྱོང་བར་བྱའོ། །བྱི་ལའི་
[375b.6]རུས་པའི་ཕྱེ་མ་འབྲས་བུ་གསུམ་བསྐོལ་བའི་ཁུ་བའི་ནང་དུ་བཏབ་སྟེ་ལྡེ་གུར་བྱས་ཏེ་རྨ་བཀྲུ་བར་བྱའོ། །ཛོ་ཏི་སྨ་ཏི་དང་། མ་ལ་ཡུ་དང་། ལང་ག་ལི་དང་། ཤི་ལུ་དང་། དུར་བྱིད་དང་། པ་ཐཱ་དང་། ཙི་ཏྲ་ཀ་དང་། སྭ་རྫི་ཀའི་ཐལ་བ་དང་། ཀ་ར་བཱི་ར་དང་། ཤུ་དག་དང་།
[375b.7]སུ་དྷ་ཀྵི་ར་དང་། ཨ་པ་མརྒ་དང་། ཏིལ་མར་དང་ལྷན་ཅིག་བསྐོལ་ཏེ་མར་ལུས་པ་ལས་མཚན་མར་རྡོལ་བའི་ནད་པ་ལ་བསྐུ་བྱུག་ཏུ་བྱས་ན་འདི་ནི་ཕན་པར་བྱེད་པའི་མཆོག་ཡིན་ནོ་ཞེས་བཤད་དོ། །ཤིང་མངར་དང་། སེང་ཕྲོམ་དང་། པི་པི་ལིང་དང་། སུག་སྨེལ་དང་། ཧ་རི་ཎུ་ཀ་དང་།
[376a]
[376a.1]སེར་པོ་རྣམ་གཉིས་དང་། པྲི་ཡང་ཀུ་དང་། ལན་ཚྭ་དང་། ཐལ་ཏྲེས་དང་། པདྨའི་སྙིང་པོ་དང་། ཤུག་པ་དང་། ད་ཏ་ཀི་དང་། སྤྲ་ཚིལ་དང་། སྲ་རྩི་པོག་དང་། རུ་རྟ་དང་། བ་རུ་དི་ཀ་དང་། ཁ་ལུང་གི་ལོ་མ་དང་། དེ་རྣམས་འབྲུ་མར་དང་ལྷན་ཅིག་བསྐོལ་ཏེ། མར་ལུས་པ་
[376a.2]ལས་བསྐུ་བྱུག་བྱས་ན་འབྲུམ་ཆེན་དང་། མཛེ་དང་གཅིན་ནད་སྦྲང་རྩི་ལྟ་བུ་དང་དུ་མ་འཇོམས་པར་བྱེད་དོ། །བྱི་དང་གའི་སྙིང་པོ་དང་། འབྲས་བུ་གསུམ་དང་། པི་པི་ལིང་དང་། པི་པི་ལིང་མཱུ་ལ་དང་། དེ་རྣམས་སྦྲང་རྩི་དང་། ཏིལ་མར་སྦྱར་བའི་ལྡེ་གུ་ཟོས་ན་སྲིན་བུའི་ནད་དང་། མཚན་
[376a.3]བར་རྡོལ་བ་དང་། མཛེ་ནད་དང་། གཅིན་སྙི་བ་དང་། སྨས་པ་དང་། རྨ་འཁྱིམས་པ་དང་། དེ་རྣམས་འཇོམས་ཤིང་འཚོ་བར་བྱེད་དོ། །སླེ་ཏྲེས་དང་། སུག་སྨེལ་དང་། བྱི་དང་ག་དང་། དུག་མོ་ཡུངས་དང་། བ་རུ་ར་དང་། ཨ་རུ་ར་དང་། སྐྱུ་རུ་ར་དང་། གུ་གུལ་དང་། དེ་རྣམས་ཀྱི་ཕྱེ་
[376a.4]མ་རིམ་བཞིན་དུ་ཆ་རེས་བསྐྱེད་པའི་ཕྱེ་མ་སྦྲང་རྩི་དང་ལྡེ་གུར་བྱས་ཏེ་ཟོས་ན་འབྲུམ་བུ་དང་། ཚོ་ཞིང་སྦོམ་པ་དང་། མཚན་བར་རྡོལ་གྱི་ནད་རྣམས་ལས་རྒྱལ་བར་བྱེད་དོ། །པི་པི་ལིང་དང་། ཙི་ཏྲ་ཀ་དང་། བྱི་དང་ག་དང་། དུག་མོ་ཡུངས་དང་། དེ་རྣམས་ཆ་སྙོམས་པའི་ཕྱེད་
[376a.5]ཀྱི་འབྲས་བུ་གསུམ་དང་། དེ་རྣམས་སྤྱི་དང་མཉམ་པའི་གུ་གུལ་དང་། དེ་རྣམས་ཀྱི་ཕྱེ་མ་སྦྲང་རྩི་དང་སྦྱར་བ་བལྡགས་ན་ནད་ཐམས་ཅད་འཇོམས་པར་བྱེད་དོ། །གུ་གུལ་སྲང་ལྔ་དང་། པི་པི་ལིང་དང་། འབྲས་བུ་གསུམ་སྲང་རེ་རེ་དང་། ཤིང་ཚ་དང་། སུག་སྨེལ་ཞོ་གཉིས་
[376a.6]གཉིས་ཀྱི་ཕྱི་མ་སྦྲང་རྩི་དང་སྦྱར་བ་ཟོས་ན་མཚན་མར་རྡོལ་བ་དང་། མཛེ་དང་སྐྲན་འཇོམས་པར་བྱེད་དོ། །གོང་གི་སྨན་གྱི་ཕྱེ་མ་དེ་ཉིད་དང་། བཅའ་སྒའི་ཕྱེ་མ་བསྲེགས་པ་རྩ་བ་བཅུ་བསྐོལ་བའི་ཁུ་བས་བསྒོས་པ་མང་དུ་ཟོས་ན་ཁྱད་པར་དུ་རླུང་གི་ནད་ལས་རྒྱལ་བར་བྱེད་དོ། །སེང་
[376a.7]ལྡེང་དམར་པོའི་སྙིང་པོའི་ཕྱེ་མ་སྨན་ཨ་ས་ན་བསྐོལ་བའི་ཁུ་བའི་ནང་དུ་བསྒོས་པ་དང་། དེ་དང་མཉམ་པའི་གུ་གུལ་དང་གཉིས་སྦྲང་རྩི་དང་ལྡེ་གུར་བྱས་ནས་ཟོས་ན་མཛེ་དང་། གཅིན་སྙི་བ་དང་། འབྲུམ་བུ་དང་། མཚན་མར་རྡོལ་བ་རྣམས་སེལ་ཏོ། །དེ་དག་མཚན་མར་རྡོལ་བ་གསོ་
[376b]
[376b.1]བའི་བྱེ་དྲག་ཡིན་ཏེ་ལྷག་མ་བཟའ་བ་དང་བཏུང་བ་ལ་སོགས་པ་རྣམས་ནི་རྨ་གསོ་བའི་ཆོ་ག་ལས་འབྱུང་བ་རྣམས་བསྟེན་ཅིང་སྦྱིན་པར་བྱའོ། །མཚན་བར་རྡོལ་བ་ལ་སོགས་པ་རྨ་སོས་ནས་ཀྱང་ལོ་གཅིག་གམ་དེ་བས་ལྷག་པ་ཡང་རུང་སྟེ། རྟ་ཞོན་པ་དང་། སྟོབས་འགྱེད་པ་དང་།
[376b.2]འབྱུང་བ་འགགས་པ་དང་། ཆང་བཏུང་བ་དང་། ཉལ་པོ་དང་། ཁ་ཟས་ལྕི་བ་དང་། མ་གོམས་པ་དང་། རྩལ་དྲགས་པ་ལ་སོགས་པ་ཡོངས་སུ་སྤང་བར་བྱའོ། །མཚན་མར་རྡོལ་བའི་ནད་དམིགས་བསྟན་ཅིང་གསོ་བའི་ཆོ་གའི་ལེའུ་སྟེ་ཉི་ཤུ་རྩ་བརྒྱད་པ་རྫོགས་སོ།། །།
[376b.3]དེ་ནས་ཐོར་བུ་དང་། འབྲུམ་བུ་དང་། རྐང་བམ་དང་། འབྲུམ་ཆེན་དང་། རྨ་འཁྱིམས་པ་རྣམས་ཀྱི་ནད་དམིགས་བརྟགས་པའི་ལེའུ་བཤད་པར་བྱ་སྟེ། དེ་ལ་བད་ཀན་དང་། ཤ་དང་ཚིལ་དང་ཁྲག་འདུས་པ་ལས་ཐོར་བུ་ཟླུམ་པོ་མཐོ་བ་སྐྲངས་པ་དེ་ནི་ཐོར་བུ་ཞེས་བྱའོ། །དེ་ལ་
[376b.4]ཡང་ནད་གཞི་རྣམས་དང་། རྩ་དང་ཁྲག་དང་ཤ་དང་། ཚིལ་དང་། རུས་པ་དང་། རྨ་ལས་གྱུར་པའི་ཐོར་བུ་དང་རྣམ་པ་དགུར་འགྱུར་རོ། །དེ་ཡང་རླུང་ལས་གྱུར་པའི་ཐོར་བུ་ནི་རྒྱ་ཆེར་མཆེད་པ་དང་། ཟུག་ཅིང་ན་བ་དང་། པགས་པ་མདོག་ནག་པ་དང་། གནས་གཞན་དང་
[376b.5]གཞན་དུ་འཕོ་ཞིང་འགྲོ་བ་དང་། ལྡང་དུབ་བྱེད་པ་དང་། འཇམ་པ་དང་། ལྒང་པ་བུས་པ་ལྟར་འདུག་པ་དང་རྡོལ་ན་ཆུ་སེར་རྣམས་འཛག་པ་ཡིན་ནོ། །མཁྲིས་པ་ལས་གྱུར་པའི་ཐོར་བུ་ནི་ཚ་འུར་འུར་པོར་འདུག་པ་དང་། མདོག་སེར་བའམ་ཡང་ན་དམར་བ་དང་མྱུར་དུ་
[376b.6]སྨིན་པ་དང་བརྟོལ་ན་ཁྲག་དྲོན་མོ་འཛག་པ་ཡིན་ནོ། །བད་ཀན་ལས་གྱུར་པའི་ཐོར་བུའི་མཚན་མ་ནི་ནད་མེད་པ་དང་། སྲ་བ་དང་། རེག་ན་གྲང་བ་དང་། མདོག་དཀར་བ་དང་གཡའ་བ་རྣམས་ཡིན་ནོ། །གལ་ཏེ་སྨིན་ན་ནི་རྣག་སྐ་བ་འཛག་པ་ཡིན་ནོ། །ནད་གཞི་ཁྲག་དང་འདྲེས་པའི་ཐོར་
[376b.7]བུ་ནི་སྲིན་བུ་དང་བཅས་པར་འབྱུང་བ་ཡིན་ནོ། །ཤ་དང་རྩ་འདྲེས་པ་ལས་བྱུང་བའི་ཐོར་བུ་ནི་ཚོར་བ་མེད་ཅིང་བེམ་བེམ་པོར་འདུག་པ་སྟེ། མཚན་མ་གཞན་ནི་མཁྲིས་པ་དང་འདྲའོ། །ཤ་སྐྱེས་པའི་ཟས་བསྟེན་པས་ཤ་རུང་བར་འགྱུར་རོ། །ཐོར་བུ་འབྱུང་ཞིང་དེ་ཡང་སྣུམ་པ་དང་།
[377a]
[377a.1]ཆེ་བ་དང་། སྲ་བ་དང་། རྩའི་དྲ་བས་ཁྱབ་པར་སྣང་སྟེ། མཚན་མ་ལྷག་པ་ནི་བད་ཀན་དང་འདྲའོ། །ཚིལ་སྐྱེ་བའི་ཟས་བསྟེན་པས་ཚིལ་ཟབས་ཆེར་སྐྱེས་ནས་རླུང་གིས་ཤ་དང་པགས་པར་ཚིལ་དྲངས་ཏེ་ཐོར་བུར་གྱུར་པ་ནི་ཤིན་ཏུ་སྣུམ་པ་དང་འཇམ་པ་དང་རྩ་བརྟན་
[377a.2]པ་ཡིན་ཏེ་རྟགས་ལྷག་མ་ནི་བད་ཀན་གྱི་ཐོར་བུ་དང་འདྲ་སྟེ་ལྡང་དུབ་ཀྱང་བྱེད་དོ། །དེ་གལ་ཏེ་རྡོལ་ན་ནི་ཚིལ་མཐུག་པོ་དམར་བ་དང་དཀར་བ་དག་འབྱུང་བ་ཡིན་ནོ། །རུས་པ་ཆག་གམ་ནད་པ་ལ་ཐོར་བུར་གྱུར་པ་ནི་ཤིན་ཏུ་མཐོ་བའམ། ཡང་ན་དམའ་བ་འབྱུང་སྟེ་དེ་ཡང་རྐང་བམ་
[377a.3]ལ་སོགས་པར་བྱུང་སྟེ། དེ་ཡང་ཆུ་ལ་སོགས་པར་བབ་ཆོལ་དུ་སོང་བ་ལས་འབྱུང་བ་ཡིན་ནོ། །རྩོལ་བ་དྲགས་པས་རྩ་དང་ཁྲག་འཁྲུགས་ཤིང་རླུང་གིས་རྩ་འཁུམས་ཏེ་ཡོ་བ་དང་སྐེམ་པ་དང་། མི་འཕར་བ་དང་། ནད་ཉུང་ཞིང་མདུད་པའི་ཐོར་བུར་འགྱུར་ཏེ་དེ་ནི་རྩའི་ཐོར་བུ་ཞེས་བྱའོ། །
[377a.4]རྨ་འདྲུབ་ཀྱང་རུང་། མ་འདྲུབ་ཀྱང་རུང་སྟེ། རོ་ཀུན་དང་ལྡན་པའི་ཟས་བསྟེན་པ་དང་། རྨ་ལ་རས་མ་མཐུག་པོས་དཀྲིས་པ་འམ། ཡང་ན་མ་དཀྲིས་པར་གཞག་པའམ། ལུས་ཀྱི་རྨ་ལ་རྡོ་ལ་སོགས་པས་ཕོག་པ་དང་། རླུང་ནད་ལ་ཁྲག་ཤས་ཆེར་ཕྱུང་བ་འམ། ཡང་ན་མ་ཕྱུང་
[377a.5]བ་ཡང་རུང་རླུང་འཁྲུགས་ཏེ་རྨའི་ཁ་ཟླུམ་པོར་འགྱུར་ཞིང་རྨ་སྐམས་པ་དང་། ཚ་འུར་འུར་པོར་འདུག་པ་དང་གཡའ་བ་རྣམས་ཡིན་ཏེ་དེ་ནི་རྨའི་ཐོར་བུ་ཞེས་བྱའོ། །དེ་ལ་གསོར་རུང་བའི་འབྲུམ་བུའི་ནད་གཞི་གསུམ་དང་། ཁྲག་དང་ཚིལ་ལས་གྱུར་པ་ལ་ནི། མགུལ་པར་རྒྱུ་བ་
[377a.6]སྦོམ་པོ་དང་། གནད་དང་མགུལ་པ་དང་། ལྟོ་བ་རྣམས་སུ་འབྲུམ་བུ་ཆེ་ཞིང་ཟུམ་སྟེ། དེའི་མཚན་ཉིད་ནི་ནང་ན་ཚིལ་ནད་གཞི་རྣམས་དང་ལྷན་ཅིག་འཁྲུགས་པ་ཡིན་ཏེ། དེ་ཡང་བད་ཀན་དང་ཚིལ་ཤས་ཆེ་ཞིང་བརྟན་པ་དང་སྨིན་མི་ཤེས་པ་ཡིན་ནོ། །རྩའི་ནང་དུ་ཁྲག་
[377a.7]གནས་པ་དེ་ནད་གཞི་རྣམས་ཀྱིས་མ་རུང་བར་འགྱུར་ཏེ་ཁྲག་ཚོས་ཤིང་རྒྱས་པས་ཤའི་གོང་བུར་གྱུར་པ་ཡིན་ནོ། །པགས་པའི་ཕྱི་རོལ་དུ་ཤུ་བ་མང་པོས་ཁྱབ་ཅིང་ཤས་ཆེར་སྐྱེས་པ་དང་། རྒྱུན་དུ་ཁྲག་ངན་འཛག་པ་དེ་ནི་ཁྲག་གི་འབྲུམ་བུ་ཞེས་བྱའོ། །འབྲུམ་བུ་དེ་རྣམས་ལས་
[377b]
[377b.1]ཁྲག་དང་ཤ་ལས་གྱུར་པ་ནི་སྤང་བར་བྱའོ། །ལྷག་མ་བཞི་ནི་གསོར་རུང་ངོ་། །དེ་ལ་རྐང་བམ་གྱི་ནད་ནི་ཆུ་སོ་དང་། བརླ་ཕྲག་གཉིས་ཀྱི་བར་དང་། བརླ་ལ་སོགས་པ་ལུས་ཀྱི་སྨད་ལ་བརྟེན་ཏེ་བད་ཀན་དང་། ཤ་དང་། ཁྲག་གི་ཉེས་པ་རིམ་གྱིས་ཡུན་རིང་པོ་ནས་རྐང་པ་འདུས་ཏེ་
[377b.2]སྦོམ་པར་སྐྲངས་ཤིང་སྲ་བ་དེ་ནི་རྐང་བམ་ཞེས་བྱའོ། །དེ་ལ་རླུང་ལས་གྱུར་པའི་རྐང་བམ་གྱི་མཚན་མ་ནི་འབྲུམ་བུ་དང་བཅས་ཤིང་མདོག་གནག་ལ་གློ་བུར་དུ་ན་ཞིང་རྩུབ་པ་ཡིན་ནོ། །མཁྲིས་པའི་རྐང་བམ་གྱི་ནད་ནི་མདོག་སེར་བ་དང་། ཚ་འུར་འུར་པོར་འདུག་པ་དང་།
[377b.3]རིམས་ཀྱིས་འདེབས་པ་ཡིན་ནོ། །བད་ཀན་ལས་གྱུར་པའི་རྐང་བམ་ནི་ཐི་བ་དང་། སྣུམ་པ་དང་། ཟུག་གཟེར་ཆུང་བ་དང་ཤུ་བས་ཁྱབ་པ་ཡིན་ནོ། །རྐང་བམ་དེ་ཚབས་ཆེ་ཞིང་མང་དུ་འཛག་པ་ལ་ལོ་གཅིག་ལས་འདས་པ་དེ་ནི་སྤང་བར་བྱའོ། །སློབ་དཔོན་ཁ་ཅིག་ན་རེ་
[377b.4]རྐང་པ་ལ་རྐང་བམ་ཇི་ལྟར་འབྱུང་བ་བཞིན་དུ་ལག་པ་དང་། རྣ་བ་དང་། མཆུ་དང་སྣ་རྣམས་ཀྱི་ཕྱོགས་དང་ཉེ་བར་རྐང་བམ་གྱི་ནད་འབྱུང་ངོ་ཞེས་སྨྲའོ། །དེ་ལ་འབྲུམ་ཆེན་ཞེས་བྱ་བ་ནི་ནད་གཞི་དང་ཚིལ་འཁྲུགས་ཏེ། དེ་མགུལ་པ་དང་། རྩེའུ་ཆུང་གཉིས་དང་། མིག་དང་།
[377b.5]མཆན་ཁུང་དང་། ཆུ་སོ་དང་བརླ་བྲག་རྣམས་ལ་བརྟེན་ཏེ་མདོག་ནད་གཞི་རང་གི་མདོག་ཏུ་སྣང་ཞིང་སྲ་བ་དང་། སྣུམ་པ་དང་། བུམ་ཤ་དང་། སྐྱུ་རུ་རའི་ཚད་ཙམ་འབྱུང་ཞིང་དེའི་ཉེ་འཁོར་དུ་འབྲས་མང་པོ་འབྱུང་ལ་མྱུར་དུ་མི་སྨིན་པ་དང་སྨིན་ན་ནི་ནད་ཆུང་བ་ཡིན་ནོ། །ཁ་ཅིག་
[377b.6]ནི་སྨིན་ནས་འཛག་པར་འགྱུར། ཁ་ཅིག་ནི་ཞིག་ནས་སྐྱེ། ཁ་ཅིག་ནི་ཡུན་རིང་དུ་གནས་ཁ་ཅིག་ནི་རྩྭ་དཱུར་བ་བཅད་པ་བཞིན་དུ་འཕེལ་བར་བྱེད་དོ། །དེ་ནི་འབྲུམ་ཆེན་གྱི་ནད་འབྲས་ཀྱི་ཕྲེང་བ་ཞེས་བྱའོ། །འབྲས་ཀྱི་ཕྲེང་བའི་ནད་རིམས་དང་། སྐྱུག་པ་དང་རྩིབ་
[377b.7]ལོགས་སུ་ཟུག་པ་དང་། ལུད་པ་ལུ་བ་དང་། སྣ་ཆུ་འཛག་པ་དང་ལྡན་ན་ནི་སྤང་བར་བྱའོ། །དེ་ལ་རྨ་འཁྱིམས་པའི་ནད་ནི་རྨ་སྐྲངས་པ་སྨིན་ནས་མ་རྡོལ་བ་དང་། རྨ་ལ་གནོད་པ་རྣམས་བསྟན་པས་ཤ་ལ་སོགས་པའི་ནང་དུ་རྣག་གིས་གང་ཞིང་རྗེས་སུ་ཞུགས་ནས་
[378a]
[378a.1]ཕུགས་རིང་དུ་འགྲོ་སྟེ་སྦུ་བུ་ནས་ཆུ་འཛག་པ་བཞིན་དུ་རྣག་འཛག་པར་འགྱུར་ཞིང་རྨའི་ཕུགས་དྲང་པོ་གཅིག་ལས་བྱེར་ཏེ་སྣ་ཚོགས་སུ་འགྲོ་བ་ཡིན་ནོ། །དེ་ལ་ཡང་ནད་གཞི་རྣམ་པ་གསུམ་དང་འདུས་པ་དང་ཟུག་རྔུ་སྟེ་རྣམ་པ་ལྔར་འགྱུར་རོ། །དེ་ལ་
[378a.2]རླུང་ལས་གྱུར་པའི་རྨ་འཁྱིམས་པ་ནི་རྨ་ཁ་ཆུང་ཞིང་ནད་དང་བཅས་པ་དང་། མདོག་འགྱུར་བ་དང་འཛག་པ་ལྦུ་བ་དང་བཅས་པར་འབྱུང་ཞིང་ནུབ་མོ་ལྷག་པར་འཛག་པ་ཡིན་ནོ། །མཁྲིས་པ་ལས་གྱུར་པའི་རྨ་ནི་སྐོམ་དད་ཆེ་བ་དང་། རིམས་ཀྱིས་འདེབ་པ་དང་། ལུས་ཚ་
[378a.3]བར་གྱུར་པ་དང་། མདོག་སེར་བ་དང་། རུལ་བའི་དྲི་བྲོ་བ་དང་། རྣག་བྲོ་བ་འབྱུང་བ་དང་། ཉིན་པར་ལྷག་པར་འཛག་པ་རྣམས་ཡིན་ནོ། །བད་ཀན་ལས་གྱུར་པ་ནི་འཛག་པར་སླ་བ་དང་། སྤྱི་བག་ཏུ་འདུག་པ་དང་། གཡའ་བ་དང་། སྲ་བ་དང་མཚན་མོ་ཆེར་རྣགས་པ་ཡིན་ནོ། །
[378a.4]འདུས་པ་ལས་གྱུར་པ་ནི་ཀུན་གྱི་མཚན་མ་དང་ལྡན་པ་ཡིན་ཏེ་སྤང་བར་བྱའོ། །ཟུག་རྔུ་ཟུག་པའི་རྨ་འཁྱིམས་པ་ནི་ཟུག་རྔུ་ནང་ནས་ཡོད་པ་མ་ཕྱུང་ན་རྨ་ཕུགས་བྱེར་བར་བྱེད་དོ། །དེ་ནས་རྣག་ལྦུ་བ་དང་བཅས་པ་དང་། སླ་བ་དང་། དང་བ་དང་། དྲོ་བ་དང་། ཁྲག་དང་བཅས་པར་
[378a.5]འབྱུང་བར་འགྱུར་ཏེ་རྟག་ཏུ་ནད་དང་བཅས་པ་ཡིན་ནོ། །ཐོར་བུ་དང་འབྲུམ་བུ་ལ་སོགས་པའི་ནད་དམིགས་བརྟགས་པའི་ལེའུ་སྟེ་ཉི་ཤུ་རྩ་དགུ་པ་རྫོགས་སོ།། །།དེ་ནས་ཐོར་བུ་དང་འབྲུམ་བུ་ལ་སོགས་པ་གསོ་བའི་ལེའུ་བཤད་པར་བྱ་སྟེ། དེ་ལ་ཐོར་བུ་མ་སྨིན་པ་ལ་
[378a.6]ནི་རང་རང་གི་ནད་གཞི་ཇི་ལྟ་བ་བཞིན་དུ་སྐྲང་བའི་ཆོ་ག་རྣམས་བྱའོ། །ལུས་སྦྱང་ཞིང་དག་པར་འདོད་པས་བྲི་ཧ་ཏི་དང་། ཙི་ཏྲ་ཀ་དང་། ཀཎྜ་ཀ་རི་དང་། པི་པི་ལིང་རྣམས་མར་དང་བསྐོལ་བའི་མར་གྱིས་སྣུམ་ཆོས་བྱས་ཏེ། དེའི་འོག་ཏུ་རྣོ་བའི་སྨན་གྱིས་སློན་ཁྲུས་དང་བྱུག་པ་རྣམས་
[378a.7]སྦྱར་རོ། །ཐོར་བུ་ལ་དུགས་མང་དུ་བྱ་ཞིང་ཡང་དང་ཡང་མཉེ་བར་བྱའོ། །དེ་དག་ནི་ཁྱད་པར་དུ་རླུང་གི་གསོ་བ་བསྟན་པ་ཡིན་ཏེ། མཁྲིས་པའི་ཁྲག་ལས་གྱུར་པ་ལ་ཡང་སྲིན་བུ་པད་པས་ཁྲག་དབྱུང་བ་དང་བསིལ་བའི་ཆོ་ག་མང་དུ་བྱའོ། །བད་ཀན་ལས་གྱུར་པ་ལ་ནི་རླུང་གི་ཆོ་ག་ལྟར་བྱའོ། །
[378b]
[378b.1]ད་ལྟ་མོད་ཀྱིས་མ་སྨིན་པ་ལ་ནི་མཚོན་གྱིས་བཅད་དེ་ཁྲག་དབྱུང་ན་ནི་མེས་བསྲེག་གོ། །མ་ལུས་པར་བཅད་ན་ནི་ལེགས་པ་ཡིན་ལ་ལྷག་མ་ལུས་པར་བཅད་ན་ནི་ཕྱིས་ལྡང་སྟེ་ངེས་པར་རྒྱས་ཤིང་འཕེལ་བར་འགྱུར་རོ། །མས་གཏང་བའི་སྨན་དང་གཏར་ག་ཡང་བྱའོ། །འབྲུམ་བུ་
[378b.2]གསོ་བའི་ཐོར་བུ་གསོ་བ་ཇི་ལྟ་བ་བཞིན་དུ་ནད་གཞི་དང་སྦྱར་ཏེ་གསོ་བ་མ་ལུས་པར་བྱས་ན་ཕན་ནོ། །ཤ་དང་རྨ་ལས་བྱུང་བའི་ཐོར་བུ་ནི་དེ་བཞིན་དུ་གསོས་ན་སོས་ཙམ་དུ་འཇོག་ནུས་སོ། །ཐོར་བུ་ཚིགས་ལས་བྱུང་བ་ལ་ནི་ཐོང་ལྕགས་ལ་སོགས་པའི་ལྕགས་བསྲེགས་པས་
[378b.3]བསྲེག་སྟེ་ཏིལ་གྱི་ལྡེ་གུས་རྨ་ལ་བསྐུས་ན་ཕན་ནོ། །གོས་གཉིས་ཀྱི་དཀྲིས་པ་འམ། ཡང་ན་མཚོན་གྱིས་དྲལ་ལ་ཚིགས་ཕྱུང་སྟེ་རྨ་བསྲེག་གོ། །རྩ་ལས་སྐྱེས་པའི་ཐོར་བུ་གསར་པ་ལ་ནི་ས་ཧ་ར་ཛའི་འབྲུ་མར་བླུད་དེ་དེ་བཞིན་དུ་རླུང་འཇོམས་པའི་སྨན་དང་དུགས་བྱ་སྟེ་མས་གཏང་
[378b.4]བའི་སྨན་དང་གཏར་ག་ཡང་བྱའོ། །འབྲུམ་བུ་གསོ་བ་ནི་ཐོར་བུ་གསོ་བ་ཇི་ལྟ་བ་བཞིན་དུ་ནད་གཞི་དང་སྦྱར་ཏེ་གསོ་བ་མ་ལུས་པར་བྱས་ན་ཕན་ནོ། །རྐང་བམ་གྱི་ནད་ལ་ནི་སྣུམ་ཆོས་དང་དུགས་དང་རླུང་འཇོམས་པའི་སྨན་གྱིས་དུགས་བྱ་སྟེ། ལོང་མོ་ནས་སོར་གཉིས་གྱེན་དུ་བཅལ་
[378b.5]བའི་རྩ་ལ་གཏར་ག་གདབ་བོ། །དེ་ནས་ཟླ་བ་གཅིག་གི་བར་དུ་ཨེ་རཎྜའི་མར་བ་གཅིན་དང་སྦྱར་བ་བླུད་དོ། །སྨན་ཞུ་བའི་རྗེས་ནི་འབྲས་རྙིང་པ་ལ་སོགས་པའི་ཁ་ཟས་བཅའ་སྒ་དང་འོ་མ་བསྐོལ་བ་དང་བཅས་པ་བཟའོ། །ཡང་ན་དུར་བྱིད་དང་འོ་མ་སྦྱར་བ་བླུད་དོ། །ཡང་དེ་ལྟར་
[378b.6]བྱས་ཀྱང་མ་ཞི་ན་བསྲེག་པར་བྱའོ། །མཁྲིས་པའི་རྐང་བམ་ལ་ནི་ལོང་མོའི་འོག་གི་རྩ་ལས་ཁྲག་ཕྱུང་ན་ནི་མཁྲིས་པའི་རྐང་བམ་ཐམས་ཅད་ལས་རྒྱལ་བར་བྱེད་དོ། །བད་ཀན་གྱི་རྐང་བམ་ལ་ནི་རྐང་པའི་མཐེ་བོང་ལ་ཁྲག་གཏར་ཏེ་ཁ་ཟས་སུ་ནས་བསྟེན་ན་ཕན་ནོ། །
[378b.7]སྨན་བསྐོལ་བའི་ཁུ་བ་སྦྲང་རྩི་དང་སྦྱར་བ་བཏུང་ངོ་། །པི་པི་ལིང་དང་ཨ་རུ་ར་བསྐྱེད་པའི་ཆོ་ག་ཡང་བྱའོ། །ཡུངས་ཀར་དང་བར་དྷ་ཀའི་རྩ་བ་གཉིས་ཀྱི་འདག་གུས་བྱུག་པའམ་ཡང་ན་འུ་སུའི་ལོ་མའི་བྱུག་པ་ཡང་བྱའོ། །འབྲུམ་ཆེན་གྱི་ནད་ལ་ནི་སློན་ཁྲུས་ཀྱིས་གོང་འོག་ཏུ་དག་
[379a]
[379a.1]པར་བྱས་ནས་དེའི་འོག་ཏུ་དནྟི་དང་། དྲན་པ་ཏི་དང་། དུར་བྱིད་དང་། ཀ་ཤ་ཧི་དང་། དེ་བ་ད་ལི་དང་། དེ་རྣམས་མར་དང་བསྐོལ་བ་བླུད་པར་བྱའོ། །བད་ཀན་དང་ཚིལ་ལ་ཕན་པའི་སྨན་དང་། དུ་བ་བརྔུབ་པ་དང་། མཁུར་བར་བཅང་བ་དང་། སྣ་སྨན་རྣམས་ཀྱང་
[379a.2]བསྟེན་ན་ཕན་ནོ། །དེ་བཞིན་དུ་གཏར་ག་ཡང་བྱ་ཞིང་སྐྱེར་ཁཎྜ་བ་གཅིན་དང་སྦྱར་བ་བཏུང་ངོ་། །འབྲུམ་ཆེན་ཐོར་བུ་བཞིན་མ་སྨིན་པ་ལ་ནི་ན་ཀུ་ལ་དང་། ལན་ཚྭ་དང་བཅའ་སྒ་རྣམས་ཀྱི་འདག་གུས་བསྐུ་བར་བྱའོ། །རྒྱ་མཚོའི་ཕྱེ་མ་དུམ་བུར་བྱས་ལ་དུགས་བྱ་སྟེ་མཁྲང་བ་མཉེ་བར་བྱའོ། །
[379a.3]ཤ་མི་དང་། ལ་ཕུག་དང་། ཤི་ཀྲུ་དང་། དེ་རྣམས་ཀྱི་ས་བོན་དང་། ནས་དང་། ཡུངས་ཀར་དང་། དེ་རྣམས་བཏགས་པའི་ཕྱེ་མ་དར་བ་སྐྱུར་པོ་དང་བཅས་པས་བསྐུས་ན་འབྲུམ་ཆེན་གྱི་ཐོར་བུ་དང་འབྲས་ནད་རྣམས་འཇོམས་པར་བྱེད་དོ། །དེ་སྨིན་ཏེ་རྨ་ཁ་ནས་ཁྲག་འཛག་པ་ལ་ནི་
[379a.4]མཁྲིས་པ་དང་བད་ཀན་འཇོམས་པའི་གསོ་བ་སྦྱར་རོ། །གལ་ཏེ་མ་སྨིན་ན་ནི་འབྲུམ་ཆེན་གྱི་ནད་ཕྱུང་སྟེ་ཐལ་སྨན་དང་མེའི་ལས་བྱའོ། །འོལ་མ་སེ་དཀར་པོ་དང་། ལང་ག་ལི་དང་། ཨ་ཧི་དང་། ཧ་རེ་ཎུ་ཀ་དང་། ཀ་ཀ་ན་ཏི་པ་ལ་དང་། དེ་བ་ད་ལའི་ས་བོན་དང་། ཀར་ཀོ་ཊི་དང་། བི་
[379a.5]ཤ་ལི་དང་། ཀོ་ཤི་ཏ་ཀི་དང་། པ་ཐ་དང་དེ་རྣམས་སྲང་ཕྱེད་དང་། དུག་ཞོ་གཉིས་དང་། ཀ་རཉྫའི་ས་བོན་མར་སྲང་སུམ་ཅུ་རྩ་གཉིས་དང་། ནི་རྒུན་ཐིའི་རང་གི་ཁུ་བ་སྲང་བརྒྱ་ཉི་ཤུ་རྩ་བརྒྱད་དང་བསྐོལ་ཏེ་མར་ལུས་པ་ལས་བཏུང་བ་དང་བསྐུ་བྱུག་དང་སྣ་སྨན་དུ་སྦྱར་ན་གསོར་མི་རུང་
[379a.6]བའི་འབྲས་ཀྱི་ཕྱེ་མ་ཡུན་རིང་དུ་ལོན་ཞིང་རྣག་མང་དུ་འཛག་པ་ཡང་འདིས་འདྲུབ་པར་འགྱུར་རོ། །ལང་ག་ལིའི་ཕྱེ་མ་དང་། དེའི་བཞི་འགྱུར་གྱི་ཏིལ་མར་དང་། དེའི་བཞི་འགྱུར་གྱི་ནི་རྒུན་ཐིའི་རང་གི་ཁུ་བ་བསྐོལ་ཏེ་མར་ལུས་པ་ལས་སྣ་སྨན་ལ་སོགས་པར་སྦྱར་ན་འབྲུམ་ཆེན་འབྲས་ཀྱི་ཕྲེང་
[379a.7]བ་སེལ་ཏོ། །ཙནྡན་དང་། ཐང་ཤིང་དང་། ན་ལེ་ཤམ་དང་། སེར་པོ་རྣམ་གཉིས་དང་། དུར་བྱིད་དང་། གླ་སྒང་དང་། དེ་རྣམས་སྲང་རེ་རེ་དང་། དུག་སྲང་ཕྱེད་དང་། དེ་རྣམས་བ་གཅིན་ལས་བཏགས་པ་དང་། སྨན་བྲ་ཧྨིའི་ཁུ་བ་དང་། ཨརྐའི་ལོ་མ་དང་། བ་ལང་གི་ལྕི་ཁུ་དང་།
[379b]
[379b.1]ཡུངས་མར་སྲང་སུམ་ཅུ་རྩ་གཉིས་དང་། དེ་རྣམས་ལྷན་ཅིག་བསྐོལ་ཏེ་མར་ལུས་པ་ལས་རན་པར་བསྟེན་ན་མཛེ་དང་། རྨ་འཁྱིམས་པ་དང་འབྲུམ་ཆེན་རྣམས་མྱུར་དུ་སེལ་བར་བྱེད་དོ། །ཤུ་དག་དང་། ཨ་རུ་ར་དང་། རྒྱ་སྐྱེགས་དང་། པུ་ཙེ་ཤེལ་དང་། དེ་རྣམས་ཏིལ་མར་
[379b.2]དང་བསྐོལ་བ་མར་ལུས་པ་ལས་འཐུངས་ན་འབྲུམ་ཆེན་རྩ་བ་ནས་འབྱིན་པར་བྱེད་དོ། །ཤ་ར་པུང་ཀའི་རྩ་བ་འབྲས་ཀྱི་ཆུ་དང་བཏགས་ཏེ་སྣ་སྨན་དང་བྱུག་པར་སྦྱར་ན་འབྲུམ་ཆེན་མ་རུངས་པ་དང་དུག་དང་སྲིན་བུ་རྣམས་ལས་རྒྱལ་བར་བྱེད་དོ། །ཨུ་ཏ་མ་ར་ཀ་རི་ནིའི་རྩ་བ་དང་། པི་ལུའི་ལོ་
[379b.3]མ་དང་། ས་ཧ་ཙ་ར་དང་། སེང་ཕྲོམ་དང་། ཨ་རུ་ར་དང་། ཤིང་མངར་དང་། ཤུ་ཏི་དང་། ཙི་ཏྲ་ཀ་དང་། དེ་རྣམས་འབྲུ་མར་དང་འོ་མ་ཆ་མཉམ་པ་དང་བསྐོལ་བ་ལས་སྣ་སྨན་དང་བསྐུ་བྱུག་དག་རབ་ཏུ་བསྔགས་སོ། །བ་ལང་དང་། ར་དང་། ལུག་དང་། རྟ་དང་། དེ་རྣམས་ཀྱི་རྨིག་པ་
[379b.4]བསྲེགས་ཏེ་ཡུངས་མར་དང་སྦྱར་བས་བསྐུ་བྱུག་བྱའོ། །ཡང་ན་སྦྲུལ་ནག་པོ་དང་། བྱ་རོག་རང་ཤི་བའི་ཤ་བསྲེགས་ཏེ་སྨན་ཨི་གུ་ཏའི་འབྲུ་མར་དང་འདག་གུར་བྱས་ཏེ་བསྐུའོ། །དེ་ལྟར་བྱས་ཀྱང་མ་ཞི་སྟེ། རྩིབ་ལོགས་དང་བྱིན་པ་ལ་གནས་པའི་འབྲུམ་ཆེན་གཞན་འབྱུང་ན་ནི་མས་གཏོང་
[379b.5]བ་རྣམས་བྱ་སྟེ། དེའི་འོག་ཏུ་ཚིལ་བྱུང་ན་མེས་བསྲེག་པར་བྱའོ། །རྐང་པ་གྱེན་དུ་བཏེག་སྟེ་རྟིང་པའི་ཚད་ཙམ་ལོང་མོ་ནས་ཡར་བཅལ་བར་རྨེན་དུ་མཚོན་གྱིས་གཅད་པར་བྱའོ། །ཞེས་ལེགས་ལྡན་མུ་ཁྱུད་ཀྱིས་བཤད་དོ། །རྟིང་པ་ལས་ཡར་སོར་བཅུ་གཉིས་བཅལ་ན་དབང་པོའི་ཆུ་སོ་
[379b.6]ཞེས་བྱ་བའི་གནས་ཡོད་དོ། །དེའི་གཡས་གཡོན་དུ་དབྲལ་ཏེ་དབུས་ན་ཉའི་སྒོ་ང་འདྲ་བ་ཡོད་དེ་དེ་དྲངས་ཤིང་དབྱུང་བར་བྱའོ། །ཞེས་དྲང་སྲོང་ལེགས་པར་ཐོས་ཀྱིས་བཤད་དོ། །ཁ་ཅིག་ན་རེ་ལོང་མོའི་རྩ་བ་ཙོག་ཙོག་པོ་ནས་ཆ་བརྒྱད་ཡར་བཅལ་བ་ན་ཁུ་ཡོད་པ་ཞེས་བྱ་བ་ནད་དབུས་ན་
[379b.7]ཡོད་པ་མ་གཏོགས་པར་དེའི་ངོས་གཉིས་དབང་པོའི་ཆུ་སོ་དང་རྗེ་ངར་གྱི་རུས་པའི་བར་དུ་བ་རུ་རའི་ཚི་གུ་ཙམ་བཅད་དོ་ཞེས་འཆད་དོ། །དེ་ལ་རླུང་ལས་གྱུར་པའི་རྨ་འཁྱིམས་པ་ལ་ནི་དབྲལ་ལ་དུགས་དང་བསྐུ་བྱུག་ལེགས་པར་བྱ་སྟེ། ཨ་པ་མ་རྒའི་འབྲས་བུ་དང་། ཏིལ་དང་
[380a]
[380a.1]རྒྱམ་ཚ་རྣམས་བཏགས་པའི་ཕྱེ་མའི་ལྡེ་གུས་དུགས་བྱའོ། །མཁྲིས་པ་ལས་གྱུར་པའི་རྨ་འཁྱིམས་པ་ལ་ནི་བཙོད་དང་། ཏིལ་དང་། གན་དར་བ་དང་། སེར་པོ་རྣམ་གཉིས་གྱི་ལྡེ་གུས་དུགས་བྱའོ། །བད་ཀན་ལས་གྱུར་པའི་རྨ་འཁྱིམས་པ་ལ་ནི་ཏིལ་དང་
[380a.2]རྒྱམ་ཚ་དང་། དནྟི་དང་། ནིམ་པ་དང་དེ་རྣམས་ཀྱི་ལྡེ་གུས་བྱུགས་པར་བྱའོ། །ཟུག་རྔུ་ཟུག་པའི་རྨ་འཁྱིམས་པ་ལ་ནི་ཏིལ་དང་། སྦྲང་རྩི་དང་། མར་སྦྱར་བའི་ལྡེ་གུས་དུགས་བྱའོ། །དེའི་འོག་ཏུ་དབྲལ་ཏེ་ཟུག་རྔུ་ཕྱུང་ལ་དག་པར་བྱའོ། །མཚོན་གྱིས་དབྲལ་དུ་མི་རུང་བའི་
[380a.3]སྨན་གྱིས་ནི་རྨ་ཚོལ་གྱིས་ཕུག་བཙལ་ཏེ། དེ་ནས་སྐུད་པ་ཐལ་སྨན་གྱི་ཆུའི་ནང་དུ་སྦངས་ལ། རྨ་འཚོལ་གྱི་རྩེ་མོ་ལ་བཏགས་ཏེ་ཕུགས་སུ་བཅུག་ན་རྨ་ཁ་རྒྱ་ཆེན་པོར་འགྱུར་ཏེ་གསོ་སླའོ། །གང་ཡང་རྨ་གསོ་བ་ལ་བཤད་པའི་རེང་བུ་དང་། ཏིལ་མར་བཤད་པ་དེ་ཡང་རྨ་འཁྱིམས་
[380a.4]པ་ལ་རབ་ཏུ་བསྔགས་ཏེ་ཨེ་རཎྜའི་འབྲས་བུ་བཏགས་པའི་ཕྱེ་མའི་ལྡེ་གུས་བྱུག་པ་བྱས་པ་ན་ཡང་རྨ་འཁྱིམས་པ་གསོ་བར་བྱེད་པའི་མཆོག་ཡིན་ནོ། །རྒྱ་ཤུག་གི་འབྲས་བུ་དང་། ཤུན་པ་དང་། ལན་ཚྭ་དང་། རྒྱ་སྐྱེགས་དང་། གླ་གོར་ཞོ་ཤའི་ལོ་མ་དང་། པྲི་ཡང་ཀུ་དང་། འོ་མ་
[380a.5]དང་། སྣུ་ཧི་དང་། ཨ་རྒའི་ལོ་མ་དང་། དེ་རྣམས་ལྷན་ཅིག་སྦྱར་བའི་རེང་བུས་རྨའི་ནང་དུ་བཅུག་ན་རྨ་འཁྱིམས་པ་མྱུར་དུ་འཚོ་བར་བྱེད་དོ། །རྒྱ་མཚོའི་ཚ་དང་། ཁ་རུ་ཚ་དང་། རྒྱམ་ཚ་རྣམས་བསྲེགས་ཏེ་ཚོས་པ་དང་། གླ་གོར་ཞོ་ཤ་དང་། ཁྱིམ་གྱི་དུད་པ་དང་། ཨ་མྲ་ཏ་ཀ་དང་།
[380a.6]སེང་ལྡེང་གི་ལོ་མ་དང་། སྐྱེར་པ་དང་། བི་ཙོ་དང་། དེ་རྣམས་བཏགས་པའི་ཕྱེ་མ་འགམ་པར་བྱའོ། །བསྐུ་བ་དང་རེང་བུ་ལ་སོགས་པར་བྱས་ན་མི་བརྟན་པའི་འབྱོར་བ་བཞིན་དུ་འཕེལ་བའི་ནུས་པ་མེད་པའམ། སྔར་འཆིང་བ་དམ་དུ་བཅིང་བའི་སྐྱེས་བུ་འགྲོ་བའི་ནུས་པ་མེད་པ་བཞིན་དུ་
[380a.7]རྨ་མཆེད་པའི་ནུས་པ་མེད་པར་འགྱུར་རོ། །ཐོར་བུ་དང་འབྲུམ་བུ་ལ་སོགས་པ་གསོ་བའི་ལེའུ་སྟེ་སུམ་ཅུ་པ་རྫོགས་སོ།། །།དེ་ནས་འབྲུམ་བུ་ཕྲ་མོའི་ནད་དམིགས་ཤེས་པར་བྱ་བའི་ལེའུ་བཤད་པར་བྱ་སྟེ། དེ་ལ་བད་ཀན་དང་རླུང་ལས་གྱུར་པའི་འབྲུམ་བུ་ཕྲ་མོའི་ནད་
[380b]
[380b.1]ནི་མོན་སྲན་སྡེའུའི་ཚད་ཙམ་ཟླུམ་པོ་དང་། སྣུམ་པ་དང་། ནད་གཞི་རང་གི་མདོག་ཏུ་འདུག་པ་དང་། ཐ་དད་མེད་ཅིང་བྱིས་པ་ལ་འབྱུང་བ་ཡིན་ཏེ་དེ་ནི་རའི་འགྲམ་པ་ལྟ་བུ་ཞེས་བྱའོ། །ཡང་ན་འབྲུམ་བུ་ནས་ཀྱི་ཚད་ཙམ་མང་པོ་མཐུག་པར་འབྱུང་བ་དེ་ནི་ནས་ལྟ་བུའི་འབྲུམ་བུ་ཞེས་བྱའོ། །
[380b.2]ཡང་མེ་དབལ་ཕྲ་མོ་རྩེ་མོ་མེད་པ་ཟླུམ་པོ་མཐུག་ཅིང་མཐོ་བར་འདུག་པ་དང་རྣག་ཉུང་བ་དེ་ནི་མེ་དབལ་ཕྲ་མོ་ཞེས་བྱའོ། །དེ་ལས་ཐོར་བུ་ལྔའམ་དྲུག་ཏུ་འབྱུང་སྟེ། དེ་ཡང་རུས་སྦལ་གྱི་རྒྱབ་ལྟར་མཐོན་པོར་འདུག་པ་དང་། སྲ་ཞིང་དྲག་ཏུ་ན་བ་དང་རྣ་མཆོག་གམ་རྣ་བ་འཁོར་ལིང་ཀུན་ཏུ་འབྱུང་
[380b.3]བ་དེ་ནི་རུས་སྦལ་ལྟ་བུའི་འབྲུམ་བུ་ཞེས་བྱའོ། །ཡང་འབྲུམ་བུ་ཕྲ་མོ་ཨུཏྤ་ལའི་རྩ་བ་འདྲ་བར་སྐྲངས་ཤིང་ཚབས་ཆུང་ངུར་ན་བ་དང་བརྟན་པར་འདུག་པ་དེ་ནི་པ་ན་སི་ཀ་ཞེས་བྱའོ། །ཡང་འབྲུམ་བུ་འགྲམ་པའི་ཚིགས་མཚམས་ནས་བྱུང་བ་དེ་ནི་པར་ན་ཤ་གར་ཏ་པ་ཞེས་བྱའོ། །ཡང་སྐྱེས་
[380b.4]བུ་ན་ཚོད་ལང་ཚོ་ལ་བབ་པའི་དུས་སུ་འབྲུམ་བུ་ཕྲ་མོ་ཤིང་ཤལ་མ་ལིའི་ཚེར་མ་དང་འདྲ་བ་དང་ནད་དང་བཅས་ཤིང་མཐུག་པ་དང་། ནང་ན་ཚིལ་ཡོད་པ་སྐྱེས་ཏེ་དེས་གདོང་མ་རུངས་པར་བྱེད་པ་དེ་ནི་བཞིན་མ་རུངས་པར་བྱེད་པའི་འབྲུམ་བུ་ཞེས་བྱའོ། །བད་ཀན་དང་རླུང་ལས་གྱུར་
[380b.5]པའི་འབྲུམ་བུ་དཀར་པོ་པདྨའི་ཚེར་མ་བཞིན་དུ་ལུས་ལ་ཁྱབ་བར་འབྱུང་སྟེ། དེ་ནི་འབྲུམ་བུ་པདྨའི་ཚེར་མ་ཅན་ཞེས་བྱའོ། །མཁྲིས་པ་ལས་གྱུར་པའི་འབྲུམ་བུ་ཕྲ་མོ་ཨུ་དུམྦཱ་རིའི་འབྲས་བུ་སྨིན་པ་ལྟར་ཁ་ཆེ་ཞིང་ཚ་བ་དང་། རིམས་ཀྱིས་འདེབས་པར་བྱེད་པ་དེ་ནི་རྨ་ཁ་ཡངས་པར་
[380b.6]བྱེད་པ་འབྲུམ་བུའི་ནད་ཅེས་བྱའོ། །ལུས་དང་ངོ་གདོང་ལ་འབྲུམ་བུ་ཕྲ་མོ་མཐུག་པ་སྲན་ཆུང་གི་ཚད་ཙམ་མདོག་སྲན་ཆུང་འདྲ་བ་ཚ་འུར་འུར་པོར་འདུག་པ་དང་། ཟུག་གཟེར་དང་ལྡན་པ་དེ་ནི་འབྲུམ་བུ་སྲན་ཆུང་ལྟ་བུ་ཞེས་བྱའོ། །དེ་བས་ན་ཤིན་ཏུ་མི་བཟད་པའི་འབྲུམ་བུ་འབྱུང་སྟེ།
[380b.7]ཟུག་གཟེར་དང་བཅས་པ་ཚབས་ཆེར་ན་བ་དེ་ནི་འབྲུམ་བུའི་ནད་ཅེས་བྱའོ། །རླུང་དང་མཁྲིས་པའི་འབྲུམ་བུའི་ནད་པདྨའི་སྙིང་པོ་འདྲ་བར་འབྱུང་ཞིང་དེའི་ཉེ་འཁོར་དུ་འབྲུམ་བུ་ཕྲ་མོས་ཁྱབ་པ་དེ་ནི་འབྲུམ་བུའི་ནད་གར་དྷ་ཞེས་བྱའོ། །ཡང་ན་འབྲུམ་བུ་ཕྲ་མོ་མཆན་ཁུང་དང་ཉེ་འཁོར་
[381a]
[381a.1]དུ་དཀྱིལ་འཁོར་དང་འདྲ་བར་རྒྱ་ཆེ་ཞིང་མཐོ་བ་དང་། མདོག་དམར་བ་དང་། འབྲུམ་བུ་ཕྲ་མོ་རྣམས་ཀྱིས་བསྐོར་བ་འདུག་པ་སྟེ་དེ་ནི་ཕལ་ཆེར་རླུང་ལས་གྱུར་པ་ཡིན་ཏེ། དེའི་མིང་ནི་མཆན་ཁུང་གི་འབྲུམ་བུ་ཞེས་བྱའོ། །མཁྲིས་པ་ཤས་ཆེ་བའི་འབྲུམ་བུ་འབྲས་ཡོས་ལྟ་
[381a.2]བུ་མཐུག་པར་འབྱུང་སྟེ་དེ་ནི་འབྲས་ཡོས་ལྟ་བུའི་འབྲུམ་བུ་ཞེས་བྱའོ། །དེ་དང་འདྲ་བར་འབྲུམ་བུ་ཆེན་པོ་གཅིག་འབྱུང་བ་དེ་ནི་འབྲུམ་བུ་དྲ་བ་ཞེས་གྲགས་སོ། །ལུས་ཚ་བས་གདུངས་པས་རྔུལ་ཏེ་འབྲུམ་བུ་ཕྲ་མོ་མཐུག་པ་དང་ནད་དང་བཅས་པ་དང་། སྐེ་ཚེའི་འབྲུམ་བུའི་ཚད་
[381a.3]ཙམ་མདོག་དམར་པོར་འབྱུང་བ་དེ་ནི་སྐེ་ཚེའི་འབྲུ་ལྟ་བུའི་འབྲུམ་བུ་ཞེས་བྱའོ། །མཁྲིས་པ་ཤས་ཆེ་བའི་འབྲུམ་བུ་མེ་དབལ་ཕྲ་མོ་མཆེད་པ་བཞིན་དུ་བྱེར་ཏེ་དེ་ཡང་སྐྲངས་པ་དང་སྨིན་པ་དང་སྲ་བ་དང་དམར་བ་དང་ཚ་བར་བྱེད་པ་དེ་ནི་ཛ་ལ་གར་དྷ་བ་ཞེས་བྱའོ། །མཁྲིས་པ་ཤས་
[381a.4]ཆེ་བའི་འབྲུམ་བུ་མེ་དབལ་ཤའི་རང་བཞིན་མི་བཟད་པ་དང་། རིམས་ཀྱིས་ལྡན་པ་དང་མེའི་མདོག་ལྟ་བུ་མཆན་ཁུང་ཕྱོགས་སུ་འབྱུང་སྟེ། དེའི་མིང་ནི་མེའི་རོ་ཧི་ནི་ཞེས་བྱ་བ་སྟེ་ཞག་ལྔ་འམ་བདུན་ནམ་ཟླ་བ་ཕྱེད་ལས་འཚོ་བ་ཉམས་པར་འགྱུར་རོ། །ནད་གཞི་གསུམ་གྱི་
[381a.5]འབྲུམ་བུ་ཟླུམ་པོ་ནམ་ཚོང་ཡན་ཆད་དུ་འབྱུང་སྟེ་དེ་ནི་པ་རི་པ་ལ་ཞེས་བྱའོ། །འབྲུམ་བུ་མཆན་ཁུང་དང་། ཆུ་སོ་དང་། བརླ་གཉིས་ཀྱི་བར་དུ་སྨན་བི་ད་རིའི་རྩ་བ་ལྟ་བུ་འབྱུང་སྟེ་དེ་ནི་བི་ད་རི་ལྟ་བུའི་འབྲུམ་བུ་ཞེས་བྱའོ། །ཚིལ་དང་རླུང་ལས་གྱུར་པའི་འབྲུམ་བུ་རྒྱུས་པ་དང་ཤ་དང་
[381a.6]རྩ་ལ་བརྟེན་ཏེ་འབྱུང་ལ་གལ་ཏེ་རྡོལ་ན་ནི་ཞག་དང་མར་དང་སྦྲང་རྩི་ལྟ་བུ་མང་དུ་འཛག་པར་འགྱུར་ཏེ། དེས་རླུང་བསྐྱོད་དེ་ཤ་སྐམས་ཤིང་ཟླུམ་པོར་བསྒོངས་ཏེ། རྨའི་ནང་དུ་གསེག་མ་ལྟ་བུ་སྐྱེས་པ་དང་ཁྲག་དང་རྣག་མདོག་སྣ་ཚོགས་སུ་འབྱུང་བ་དང་། དྲི་མི་ཞིམ་པའི་ནད་གཞི་དང་
[381a.7]བཅས་པ་རྣམས་འཛག་པ་སྟེ་དེ་ནི་འབྲུམ་བུ་གསེག་མ་ལྟ་བུ་ཞེས་བྱའོ། །འདུས་པ་ལས་གྱུར་པའི་འབྲུམ་བུ་ལག་པ་དང་། རྐང་པའི་མཐིལ་དང་། ཚིགས་དང་ནམ་ཚོང་ཡན་ཆད་གྲོག་མའི་མགོ་བོ་འདྲ་བར་རིམ་གྱིས་མང་པོས་ཁྱབ་པར་བྱེད་དོ། །དེ་ཡང་ན་བ་དང་། ཚ་འུར་འུར་པོར་
[381b]
[381b.1]འདུག་པ་དང་གཡའ་བ་དང་ཚབས་ཆེར་རུལ་བ་དེ་ནི་འབྲུམ་བུ་གྲོག་མའི་ཁ་ལྟ་བུ་ཞེས་བྱའོ། །རྐང་པའི་མཐིལ་དུ་གསེག་མ་འམ་ཚེར་མ་ཟུག་པ་ལས་འབྲུམ་བུ་མཛེར་བ་ལྟ་བུར་སྐྱེས་པ་ནི་ཀ་ད་ར་ཞེས་བྱའོ། །ཐོར་བུ་སེལ་བ་ཞེས་བྱ་བའི་རླུང་ནི་གཞང་གི་ནང་ན་གནས་ཏེ། དེ་བཤང་བ་དང་
[381b.2]ལྷན་ཅིག་འཁྲུགས་ནས་གཞང་གི་ཕྱི་ནང་དུ་ཚེར་མ་ལྟ་བུའི་འབྲུམ་བུ་སྐྱེས་ཏེ། བཤང་བ་འབྱུང་དཀའ་ཞིང་སྲ་བ་དེ་ནི་གཞང་འགགས་པ་ཞེས་བྱ་བའི་འབྲུམ་བུ་ཡིན་ནོ། །མཁྲིས་པ་དང་རླུང་ལས་གྱུར་པའི་འབྲུམ་བུ་ནི་སེན་མོ་དང་ཤའི་ནང་དུ་སྨིན་ཅིང་ཟུག་གཟེར་ཚ་བ་དང་ལྡན་པ་དེ་ནི་
[381b.3]འབྲུམ་བུ་ཉེ་བའི་སེན་མོ་ཞེས་བྱའོ། །ཁ་ཅིག་ན་རེ་ཙམ་པ་མ་དང་ཟད་བྱེད་ཀྱི་ནད་ཅེས་བྱའོ་ཞེས་འཆད་དོ། །རྩུབ་བག་བཟའ་བ་དང་། དྲུད་པ་དང་། སྣད་པ་ལས་གྱུར་པའི་འབྲུམ་བུ་སོར་མོ་གནག་པ་དང་རེག་ན་ཤིན་ཏུ་རྩུབ་པ་དེ་ནི་འབྲུམ་བུ་ཀུ་ན་ཁ་ཞེས་བྱའོ། །འདམ་བག་མ་རུངས་
[381b.4]པ་སེན་མོའི་ནང་དུ་ཞུགས་པ་ལས་འབྲུམ་བུར་གྱུར་ཏེ་གཡའ་བ་དང་ནང་དུ་རྣག་དང་བཅས་པ་དེ་ནི་འབྲུམ་བུ་སོར་མོ་སྐྲངས་པ་ཞེས་བྱའོ། །ཏིལ་ནག་པོའི་མདོག་ཏུ་སྣང་བའི་འབྲུམ་བུ་ནི་ཏིལ་ནག་ལྟ་བུའི་འབྲུམ་བུ་ཞེས་བྱའོ། །པགས་པའི་སྟེང་དུ་མདོག་གནག་ཅིང་ནད་མེད་པའི་འབྲུམ་
[381b.5]བུ་མདོག་དམར་བ་སྲོག་ཆགས་སྦྲང་བུ་མཆུ་རིངས་ཙམ་མཐོན་པོར་འདུག་པ་འམ་ཡང་ན་འབྲུམ་བུ་མ་དོག་དཀར་བ་དང་གནག་པ་དེ་ནི་པགས་པའི་མཛེར་པ་ཞེས་བྱའོ། །དེ་བཞིན་དུ་ལྷན་ཅིག་སྐྱེས་པའི་འབྲུམ་བུ་མདོག་དམར་བ་དེ་ནི་ཛ་རུ་མ་ནི་ཞེས་བྱའོ། །མདོག་གནག་པ་དང་
[381b.6]དཀར་བ་ནི་དཀྱིལ་འཁོར་ལན་ཚྭ་ན་ཞེས་བྱའོ། །མྱ་ངན་དང་ཁྲོ་བ་ལ་སོགས་པས་རླུང་དང་མཁྲིས་པ་འཁྲུགས་ཏེ་གདོང་སྲབ་ཅིང་སྔོ་བའི་ཐིག་ལེ་འབྱུང་བ་ནི་དོ་ཤིག་ཅེས་བྱའོ། །ལུས་གཞན་དུ་བྱུང་བ་ལ་ནི་ལི་ག་ཞེས་བྱའོ། །དེ་ལ་རླུང་ལས་གྱུར་པའི་ངོ་ཤིག་ནི་རུད་རུད་པོར་འདུག་པ་དང་
[381b.7]རེག་ན་རྩུབ་པ་དང་མདོག་སྔོ་བསངས་སུ་འདུག་པ་ཡིན་ནོ། །མཁྲིས་པ་ལས་གྱུར་པ་ནི་དབུས་དམར་ཞིང་མཐའ་སྔོ་བ་ཡིན་ནོ། །བད་ཀན་ལས་གྱུར་པ་ནི་དཀར་ཞིང་གཡའ་བ་ཡིན་ནོ། །ཁྲག་ལས་གྱུར་པ་ནི་དབུས་དམར་ཞིང་མཐའ་ཟངས་མའི་མདོག་ལྟར་སྣང་ཞིང་སྐེམ་པ་དང་།
[382a]
[382a.1]ཚ་ཙེག་ཙེག་བྱེད་ཅིང་བེམ་བེམ་པོར་འདུག་པ་ཡིན་ནོ། །རླུང་གིས་བད་ཀན་པགས་པར་སོན་པར་བྱས་ཏེ། དེར་བད་ཀན་སྐམས་ནས་མདོག་དཀར་བ་དང་། ཚོར་བ་མེད་པ་དང་། ཆེར་མི་གཡའ་བ་དང་། མི་གནག་པ་དེ་ནི་པགས་པའི་ནད་ཚོར་བ་མེད་པ་ཞེས་བྱའོ། །སློན་སྨན་ཉེས་
[382a.2]ཏེ་མཁྲིས་པ་དང་བད་ཀན་གཉིས་གཅིག་ལ་གཅིག་འཁྲུགས་ནས་དཀྱིལ་འཁོར་ལྟ་བུའི་ནད་དུ་གྱུར་ཏེ། དེ་ཡང་ཤས་ཆེར་གཡའ་ཞིང་མང་དུ་འབྱུང་བ་དང་ལྡན་པའི་ནད་ཤས་ཆེར་གྱུར་པ་དེ་ནི་ཨ་ཀོ་ཐ་ཞེས་བྱ་བ་དང་། དེ་ལྟར་འབྲུམ་བུ་ཕྲ་མོའི་ནད་ཀྱི་བྱེ་བྲག་སུམ་ཅུ་རྩ་དྲུག་ཏུ་བསྟན་པ་ཡིན་ནོ། །
[382a.3]འབྲུམ་བུ་ཕྲ་མོའི་ནད་དམིགས་བརྟགས་པའི་ལེའུ་སྟེ་སུམ་ཅུ་རྩ་གཅིག་པ་རྫོགས་སོ།། །།དེ་ནས་འབྲུམ་བུ་ཕྲ་མོ་ལ་སོགས་པ་གསོ་བའི་ལེའུ་བཤད་པར་བྱ་སྟེ། དེ་ལ་རའི་འགྲམ་པ་ལྟ་བུའི་ནད་མ་སྨིན་པ་ལ་ནི་སྲིན་བུ་པད་པས་ཁྲག་དབྱུང་ངོ་། །ནས་ལྟ་བུའི་འབྲུམ་བུའི་ནད་
[382a.4]ལ་ནི། ཐོག་མར་དུགས་ཀྱིས་བཞུས་ལ་དེ་ནས་ཐང་ཤིང་དང་། རུ་རྟ་དང་། ལྡོང་རོས་དང་། བ་བླ་རྣམས་ཀྱི་ལྡེ་གུས་བསྐུའོ། །པ་ཤ་ན་ག་ད་བའི་ནད་ལ་ཡང་ཆོ་ག་དེ་ལྟར་བྱའོ། །དེ་བཞིན་དུ་སྨིན་པའི་རྨའི་གསོ་བ་རྣམས་ཀྱང་སྦྱར་རོ། །དེ་ལ་བཞིན་མ་རུངས་པར་གྱུར་པའི་ནད་ལ་ནི་སེང་ཕྲོམ་
[382a.5]དང་། འུ་སུ་དང་། ཤུ་དག་དང་དེ་གསུམ་བཏགས་པའི་ཕྱེ་མའམ་ཡང་ན་ནྱ་གྲོ་དྷའི་ལོ་མ་འམ་རྒྱ་སྟར་གྱི་ལོ་མ་གང་ཡང་རུང་བ་ཚྭ་དང་སྦྱར་བའི་ལྡེ་གུས་བསྐུའོ། །དེས་མ་ཞི་ན་སྐྱུག་སྨན་དང་། སྣ་སྨན་གཏང་བ་དང་དཔྲལ་རྩ་གཏར་བ་རྣམས་བྱའོ། །པདྨའི་ཚེར་མ་ལྟ་བུའི་ནད་ལ་ནི་ནིམ་པའི་ཁུ་
[382a.6]བས་སློན་བྱ་ཞིང་ནིམ་པ་བསྐོལ་བའི་ཁུ་བ་སྦྲང་རྩི་དང་མར་སྦྱར་བ་བླུད་དེ་ནིམ་པ་དང་དོང་ག་སྦྱར་བས་བྱུག་པར་བྱའོ། །དེ་ལ་རྨ་ཁ་ཡངས་པ་ཞེས་བྱ་བ་ནས་གྲང་བ་ཅན་ཞེས་བྱ་བའི་བར་གྱི་ནད་དང་ཨེ་རི་བེ་ལ་ཀ་ཞེས་བྱ་བ་རྣམས་ནི་མཁྲིས་པའི་མེ་དབལ་གྱི་གསོ་བ་ཇི་ལྟར་བསྟན་པ་བཞིན་
[382a.7]བྱའོ། །མེ་རོ་ཧི་ནི་ཞེས་བྱ་བའི་ནད་ལ་ནི་སྤང་བར་བྱའོ། །ཛ་ལ་གར་ད་པ་ཞེས་བྱ་བའི་ནད་ལ་ནི་སྨྱུང་བ་དང་ཁྲག་དབྱུང་བར་བྱ་བ་དང་། རྩུབ་ཆོས་བྱ་བ་དང་། སློན་ཁྲུས་ཀྱིས་ལུས་སྦྱང་བ་དང་སྐྱུ་རུ་རའི་སྦྱོར་བ་དང་། བསིལ་བའི་བྱུག་པ་རྣམས་རྟག་ཏུ་སྦྱར་རོ། །བི་དྷ་རི་
[382b]
[382b.1]ཞེས་བྱ་བ་ནི་ནད་པ་ལ་ཁྲག་གཏར་ཏེ་བད་ཀན་གྱི་ཐོར་བུའི་གསོ་བ་རྣམས་སྦྱར་རོ། །གསེག་མ་ལྟ་བུའི་འབྲུམ་བུ་ལ་ནི་ཚིལ་ལས་གྱུར་པའི་གསོ་བ་རྣམས་བྱའོ། །འབྲུམ་བུ་གྲོག་མའི་ཁ་ལྟ་བུ་ནད་རྐང་པ་དང་ལག་པར་བྱུང་ཞིང་ཚབས་ཆེར་སྐྱེས་པ་དང་། བུ་ག་མང་བ་དང་། སྐྲང་བ་
[382b.2]དང་། གནད་དུ་བྱུང་བ་རྣམས་ནི་སྤང་བར་བྱའོ། །མཚན་མ་དེ་དང་མི་ལྡན་པ་རྣམས་ནི་གསོ་བར་བྱའོ། །དེ་ཡང་ཐོག་མར་ལུས་སྦྱང་ཞིང་ཁྲག་བྱུང་ལ་དེའི་འོག་ཏུ་ལན་ཚྭ་དང་། དོང་ག་དང་། ཨ་ཀ་རུ་དང་། ཅི་ཙེ་བ་དང་། རྒྱ་སྲན་ནག་པོའི་རྩ་བ་དང་། དནྟི་དང་། ཏིལ་བཏགས་པ་
[382b.3]དང་། ནས་ཕྱེ་རྣམས་ཀྱིས་བསྐུས་ལ་སྨིན་པ་དང་། ཤ་མ་རུངས་པ་མཚོན་གྱིས་ལེགས་པར་བཅད་དེ་ཐལ་སྨན་ནམ་མེ་ལ་བསྲེག་པར་བྱའོ། །ཀ་ད་ར་ཀ་ཞེས་བྱ་བའི་ནད་ནི་མཚོན་གྱིས་མ་ལུས་པར་ཕྱུང་སྟེ་མར་བསྐོལ་བས་བསྲེག་པར་བྱའོ། །གཞང་འགགས་པའི་འབྲུམ་བུ་ལ་ནི་
[382b.4]ཛ་ལ་མར་ནིའི་གསོ་བ་རྣམས་བྱའོ། །ཉེ་བའི་སེན་མོ་ཞེས་བྱ་བ་ནི་སློན་ཁྲུས་ཀྱིས་ཚ་བ་ཞི་བར་བྱས་ལ་མཚོན་གྱི་ལས་ཀྱིས་གསོ་བར་བྱའོ། །ཀུན་ཁའི་ནད་མ་རུངས་པ་དང་གསེག་མ་ལྟ་བུའི་ནད་ལ་ཡང་ཆོ་ག་དེ་ལྟར་བྱའོ། །ཡང་ན་རྩབས་ཀྱིས་བླུགས་པར་བྱ་སྟེ། དེ་ནས་
[382b.5]ནག་ཚུར་དང་ཏིལ་དང་རོ་ཙ་ན་དང་ནིམ་པའི་ལོ་མའི་ལྡེ་གུས་ཀྱང་བསྐུའོ། །ཏིལ་ནག་པོ་ལྟ་བུའི་ནད་ལ་ནི་མེའི་ལས་བྱའོ། །པགས་པའི་མཛེར་པ་སྦྲང་བུ་མཆུ་རིངས་ལྟ་བུའི་ནད་ལ་མེ་ཤེལ་སེང་ལྡེང་གི་མེ་ལ་བསྲེགས་པའི་ཐལ་བས་བསྐུའོ། །དེ་བཞིན་དུ་པགས་པའི་ཤ་
[382b.6]མཛེར་དེ་ཉིད་དང་ཛ་རུམ་ནི་གཉིས་ལ་ནི་མཚོན་གྱིས་བཅད་ལ་གོང་མའི་ཐལ་བས་གདབ་པོ། །ལན་ཚྭ་ཞེས་བྱ་བའི་ནད་ལ་ནི་ཇི་ལྟར་གནས་པ་བཞིན་དུ་གཏར་ག་བྱ་སྟེ། ཤིང་འོ་མ་ཅན་གྱི་ཤུན་པ་དང་། མྱུ་གུ་འོ་མ་དང་བཏགས་ཏེ་བྱུག་གོ། །དེ་ཡང་ངོ་ཤིག་ལ་ནི་ཨརྫུ་ནའི་
[382b.7]ཤུན་པ་འམ། བཙོད་གང་ཡང་རུང་བ་སྦྲང་རྩི་དང་སྦྱར་བའི་ལྡེ་གུས་བསྐུ་བ་འམ། ཡང་ན་རྟ་དཀར་པོའི་རྨིག་པ་བསྲེགས་པའི་སྣག་ཚ་མར་གསར་དང་སྦྱར་བས་བསྐུའོ། །ཡང་ན་ཙནྡན་དམར་པོ་དང་། བཙོད་དང་། རུ་རྟ་དང་། སེང་ཕྲོམ་དང་། པྲི་ཡང་ཀུ་དང་། ནྱ་གྲོ་དྷའི་མྱུ་
[383a]
[383a.1]གུ་དང་། སྲན་ཆུང་གི་མྱུ་གུ་རྣམས་ཀྱི་ལྡེ་གུས་བསྐུ་བ་བྱས་ན་གདོང་གི་མདོག་གསལ་ཞིང་ངོ་ཤིག་འཇོམས་སོ། །ཟི་ར་རྣམ་གཉིས་དང་། ཏིལ་ནག་པོ་དང་། ཡུངས་ཀར་དང་དེ་རྣམས་འོ་མ་དང་བཏགས་ཏེ་བསྐུས་ན་གདོང་གི་ངོ་ཤིག་སེལ་བར་བྱེད་དོ། །ཡང་
[383a.2]ན་སྲན་ཆུང་ཕུབ་མ་མེད་པ་བརྔོས་པ་འོ་མ་དང་བཏགས་ཏེ་མར་དང་སྦྲང་རྩི་དང་ལྡེ་གུར་བྱས་པས་བསྐུའོ། །ཡང་ན་ཤལ་མ་ལིའི་ཚེར་མ་རྣོན་པོ་འོ་མ་དང་བཏགས་པས་བསྐུའོ། །ཡང་ན་རྒྱ་ཤུག་གི་ཚི་གུའི་ཕྱེ་མ་བུ་རམ་དང་སྦྱར་བས་བསྐུས་ན་ཕན་ནོ། །ཡང་ན་རི་བོང་གི་
[383a.3]ཁྲག་སྦྲང་རྩི་དང་སྦྱར་བས་བསྐུས་ན་ཕན་ནོ། །ཡང་ན་ཁ་ལུང་གི་ཁུ་བའི་ནང་དུ་རུ་རྟ་ཞག་བདུན་གྱི་བར་དུ་སྦངས་ཏེ་སྦྲང་རྩི་དང་སྦྱར་བས་བསྐུའོ། །ཡང་ན་མུ་ས་ལའི་རྩ་བ་རའི་འོ་མ་དང་བཏགས་པ་སྦྲང་རྩི་དང་སྦྱར་བས་བསྐུས་ན་ཕན་ནོ། །ཡང་ན་བ་ལང་གི་རུས་པ་དང་། མུ་ས་
[383a.4]ལའི་རྩ་བ་མར་དང་སྦྲང་རྩི་དང་སྦྱར་བས་བསྐུས་ན་ཕན་ནོ། །ཡང་ན་རི་བོང་གི་ཁྲག་སྦྲང་རྩི་དང་སྦྱར་བ་དང་། དེ་རྣམས་ཀྱི་ཕྱེ་མ་ཞོ་ག་ཆུ་དང་བུ་རམ་སར་པ་དང་སྦྱར་ཏེ་བསྐུས་ན་ཕན་ནོ། །ཡང་ན་ཤིང་ཏིན་དུ་ཀའི་ལོ་མའི་རང་གི་ཁུ་བའི་ནང་དུ་ཤིང་ཏིན་ཏུ་ཀ་བཏགས་པས་བསྐུས་ན་
[383a.5]གདོང་རང་གི་མདོག་སྐྱེད་པར་བྱེད་དོ། །ཨུཏྤལ་དཀར་པོ་དང་། སྔོན་པོ་དང་། པྲི་ཡང་ཀུ་དང་། རུ་རྟ་དང་། ཀ་ལ་ཡི་ཀ་དང་། རྒྱ་ཤུག་གི་ཚི་གུ་དང་། དེ་རྣམས་ཀྱི་ལྡེ་གུས་གདོང་ལ་དྲིལ་ཞིང་བྱུགས་ན་མེ་ཏོག་པདྨའི་མདོག་བཞིན་དུ་བྱེད་དོ། །ཡང་ན་གོང་མའི་སྨན་དེ་
[383a.6]རྣམས་བཏགས་ཏེ་ཤིང་མངར་བསྐོལ་བའི་ཁུ་བ་དང་སྦྱར་ནས་ནད་གཞི་ཇི་ལྟ་བ་བཞིན་དུ་སྣུམ་དང་སྦྱར་ཏེ་གདོང་ལ་བསྐུའོ། །སྨེ་བའམ་ཁམས་གསོ་བ་ནས་དང་། སྲ་རྩི་པོག་དང་། སེང་ཕྲོམ་དང་། པུ་ཤེལ་ཙེ་དང་། སྤྲ་ཚིལ་དང་། དེ་རྣམས་ཀྱི་ཕྱེ་མ་སྦྲང་རྩི་དང་མར་དང་།
[383a.7]བུ་རམ་དང་། བ་གཅིན་དང་བསྐོལ་ཏེ་དྲིལ་དུ་བཏུབ་པ་ཙམ་གྱི་ལྡེ་གུས་ཉིན་རེ་བཞིན་བསྐུ་བ་བྱས་ན་གདོང་མ་རུང་བར་བྱེད་པའི་ངོ་ཤིག་དང་། ལུས་མ་རུང་བར་བྱེད་པའི་སྨེ་བ་རྣམས་སེལ་བར་བྱེད་དེ་གདོང་ལ་བསྐུས་ན་པདྨ་བཞིན་དུ་བྱེད་དོ། །རྐང་པ་ལ་བསྐུས་ན་ནི་པདྨའི་
[383b]
[383b.1]འདབ་མ་ལྟར་འགྱུར་རོ། །གུར་གུམ་དང་། པུ་ཤེལ་ཙི་དང་། ཀ་ལི་ཡ་ཀ་དང་། རྒྱ་སྐྱེགས་དང་། ཤིང་མངར་དང་། ཙནྡན་དཀར་པོ་དང་། ནྱ་གྲོ་དྷའི་རྐང་པ་གཞོན་ནུ་དང་། ཤུག་པ་དང་། པདྨ་གེ་སར་དང་། ཨུཏྤལ་དང་། བཙོད་དང་། དེ་རྣམས་སྲང་རེ་རེ་ཆུ་སྲང་བརྒྱ་ཉི་ཤུ་རྩ་བརྒྱད་
[383b.2]དང་བསྐོལ་ཏེ་བཞི་ཆ་ལུས་པའི་ནང་དུ་རྒྱ་སྐྱེགས་དང་། ལེ་བརྒན་རྩི་དང་། བཙོད་དང་། ཤིང་མངར་དང་། གུར་གུམ་དང་། དེ་རྣམས་ཞོ་གཉིས་གཉིས་བཏགས་པའི་ཕྱེ་མ་དང་ཏིལ་མར་སྲང་བརྒྱད་དང་། དེའི་ཉིས་འགྱུར་གྱི་འོ་མ་དང་ཚུལ་བཞིན་བསྐོལ་ཏེ་མར་ལུས་པ་
[383b.3]ལས་སྣ་སྨན་གོམས་པར་བྱས་ན་ནི་ལིང་ག་དང་། ངོ་ཤིག་དང་། སྐྲ་དཀར་དང་། གཉེར་མ་དང་། སྨེ་བས་མ་རུངས་པར་གྱུར་པ་རྣམས་འཇོམས་ཏེ་གདོང་གི་ཤ་མདོག་སྐྱེ་བར་བྱེད་དོ། །བཙོད་དང་། ཤ་བ་རིའི་སེང་ཕྲོམ་དང་། ཏུ་བ་རི་དང་། རྒྱ་སྐྱེགས་དང་། སེར་པོ་རྣམ་
[383b.4]གཉིས་དང་། ལྡོང་རོས་དང་། གུར་གུམ་དང་། རུ་རྟ་དང་། གི་ཝང་དང་། ནྱ་གྲོ་དྷ་དཀར་པོའི་ལོ་མ་དང་། ཙནྡན་རྣམ་གཉིས་དང་། ཀ་ལི་ཡ་ཀ་དང་། དངུལ་ཆུ་དང་། རྨ་ཤིང་དང་། ལང་ཏང་ཙེའི་ཤུན་པ་དང་། པདྨའི་ས་བོན་དང་། པདྨ་གེ་སར་དང་། སྤྲ་ཚིལ་དང་། སྤངས་
[383b.5]མ་དང་། ཤུག་པ་དང་། དེ་རྣམས་དང་ཞག་དང་རྐང་དང་མར་དང་འོ་མ་དང་ཤིང་འོ་མ་ཅན་གྱི་འོ་མ་དང་དེ་རྣམས་བསྐོལ་བའི་མར་གྱིས་བསྐུས་ན་ངོ་ཤིག་དང་གཉེར་མ་ལ་སོགས་པ་འཇོམས་ཏེ་གདོང་གི་བཞིན་མདོངས་ཟླ་བ་བཞིན་དུ་རྒྱས་པར་འགྱུར་རོ། །བྲིང་ག་རཱ་ཛའི་རང་
[383b.6]གི་ཁུ་བའི་འོ་མ་དང་ཆུ་དང་ལྷན་ཅིག་བསྐོལ་ཏེ་འོ་མ་ལུས་པ་ལས་སྣ་སྨན་དུ་སྦྱར་ན་སེལ་བ་ཡིན་ནོ། །པགས་པའི་ནད་ཚོར་བ་མེད་པ་ལ་ནི་རླུང་གི་མཛེ་ནད་གསོ་བའི་ཆོ་ག་ལྟར་བྱ་སྟེ་དེ་སའི་འོག་ཏུ་མེས་བསྲེག་པར་བྱའོ། །དེ་ལ་ཨུད་ཀོ་ཐ་ཞེས་བྱ་བའི་ནད་ལ་ནི་བད་ཀན་
[383b.7]དང་མཁྲིས་པ་ལས་གྱུར་པའི་མཛེ་ནད་གསོ་བ་རྣམས་བྱའོ། །ཀོ་ཐ་ཞེས་བྱ་བའི་ནད་ལ་ནི་རླུང་མཁྲིས་ཀྱི་གསོ་བ་ཐམས་ཅད་སྦྱར་རོ། །འབྲུམ་བུ་ཕྲ་མོ་ལ་སོགས་པ་གསོ་བའི་ལེའུ་སྟེ་སུམ་ཅུ་རྩ་གཉིས་པ་རྫོགས་སོ།། །།དེ་ནས་གསང་བའི་གནས་
[384a]
[384a.1]ཀྱི་ནད་དམིགས་བརྟགས་པའི་ལེའུ་བཤད་པར་བྱ་སྟེ། དེ་ལ་ཐོག་མར་ཕོ་མཚན་གྱི་ནད་སྐྱེ་བའི་རྒྱུ་ནི་བུད་མེད་ལ་ཉལ་པོ་བྱས་ཏེ་འདོད་པ་ཟིན་མ་ཐག་ཡང་སྤྱད་པ་དང་། ཡང་ན་མོ་མཚན་ཤིན་ཏུ་ཆུང་བ་ལ་འཇུག་པ་དང་ཟླ་མཚན་གྱི་སྐྱོན་དང་ལྡན་པ་ལ་འཇུག་པས་ནད་གཞི་
[384a.2]རྣམས་འཁྲུགས་པར་འགྱུར་བ་དང་དེ་བཞིན་དུ་གཞན་གྱི་བུད་མེད་ལ་ཆགས་བཞིན་དུ་ཉལ་པོ་བྱེད་པ་དང་། བདག་ཉིད་མི་འདོད་བཞིན་དུ་བུད་མེད་ལ་སྤྱད་པ་དང་། ལམ་མ་ཡིན་པར་འཇུག་པ་དང་། བྱིས་པ་བཙས་མ་ཐག་པ་ལ་འཇུག་པ་དང་། འདོད་པ་སྤྱད་མ་ཐག་པ་ལ་མ་བཀྲུས་པར་བྱེད་
[384a.3]པ་དང་། བུད་མེད་ལ་ཆགས་པའི་དབང་གིས་སྦྱར་ཆུ་འཛག་པ་དང་། ཁུ་ཚུར་དང་། སོ་དང་། སེན་མོས་རེག་པ་དང་། སེན་མོའི་དུག་གིས་རེག་པ་དང་། ཁུ་བ་བྱུང་བས་འགགས་པ་དང་། ཀུ་ཤ་ལ་སོགས་པ་རྩུབ་པས་དྲུད་པ་དང་རྒྱུ་དེ་དག་གིས་ནད་གཞི་རྣམས་འཁྲུགས་ཏེ་གསང་བའི་
[384a.4]གནས་སུ་ཨ་བ་དན་ཤ་ལ་སོགས་པའི་ཕོ་མཚན་གྱི་ནད་ཉི་ཤུ་རྩ་གསུམ་འབྱུང་བར་འགྱུར་ཏེ། ཨ་བ་དན་ཤ་ཞེས་བྱ་བའི་ཕོ་མཚན་གྱི་ནད་ལ་ཡང་རྣམ་པ་ལྔར་ཤེས་པར་བྱ་སྟེ། དེ་ཡང་ནད་གསུམ་ལས་གྱུར་པ་རེ་རེ་དང་། ཁྲག་ལས་གྱུར་པ་དང་འདུས་པ་ལས་གྱུར་པའོ། །རླུང་ལས་
[384a.5]གྱུར་པའི་ཕོ་མཚན་གྱི་ནད་ཀྱི་མཚན་མ་ནི་ཕོ་མཚན་སྐྲང་བ་དང་། ན་བ་དང་། སྣ་ཚོགས་སུ་ན་བ་དང་། རྟག་ཏུ་འགྲེང་བ་དང་། ཕོ་མཚན་གྱི་པགས་པ་གས་པ་ཡིན་ནོ། །མཁྲིས་པ་ལས་གྱུར་པའི་ནད་ལ་ནི་སྐྲང་ཞིང་ཚ་བ་འུར་འུར་པོར་འདུག་པ་དང་། ཨུ་དུམྦཱ་རའི་འབྲས་བུ་སྨིན་པ་བཞིན་དུ་
[384a.6]འདུག་པ་ཡིན་ནོ། །བད་ཀན་ལས་གྱུར་པ་ནི་མཁྲང་བ་དང་། སྣུམ་པ་དང་། གཡའ་བ་དང་། གྲང་བ་དང་ལྕི་བ་རྣམས་ཡིན་ནོ། །ཁྲག་ལས་གྱུར་པ་ནི་ཁྲག་འཛག་པ་དང་འབྲུམ་བུ་ནག་པོ་འབྱུང་བ་དང་ཚ་བ་འུར་འུར་པོར་འདུག་པ་རྣམས་ཡིན་ནོ། །འདུས་པ་ལས་གྱུར་པའི་ཕོ་
[384a.7]མཚན་གྱི་ནད་ལ་ནི་ནད་གཞི་གསུམ་གྱི་མཚན་མ་དང་། རླིག་པ་སྐྲང་བ་དང་། དྲག་ཏུ་ན་བ་དང་། མྱུར་དུ་སྨིན་པ་དང་། འགས་པ་དང་སྲིན་བུ་སྐྱེ་བ་རྣམས་ཡིན་ནོ། །དེ་རྣམས་ཁྲག་ལས་གྱུར་པ་ནི་གསོ་དཀའ་བ་ཡིན་ནོ། །འདུས་པ་ལས་གྱུར་པ་ནི་མི་འཚོ་བ་ཡིན་ནོ། །ཉེས་པ་
[384b]
[384b.1]འཁྲུགས་པས་ཕོ་མཚན་གྱི་ནང་ངམ་ཕྱི་རོལ་དུ་ཤ་དང་ཁྲག་ལས་གྱུར་པ་ཤ་མཛེར་སྐྱེས་ཏེ། ཁྲག་འཛག་པ་དང་གཡའ་བ་ཡིན་ཏེ་དེའི་མིང་ནི་ཤ་མཛེར་པ་ལྟ་བུའི་ནད་ཅེས་བྱའོ། །བུད་མེད་ཀྱི་ནི་འབྱིལ་བག་ཏུ་འདུག་པ་དང་། ཁྲག་འཛག་པ་དང་། གདུགས་ལྟར་འདུག་པ་ཡིན་ཏེ་དེའི་མིང་ནི་
[384b.2]གཞང་འབྲུམ་ལྟ་བུའི་ནད་ཅེས་བྱའོ། །དེ་གསོ་བར་མ་བྱས་ན་ནི་འཆི་བར་འགྱུར་རོ། །ཕོ་མཚན་གྱི་ཕྱིའམ་ནད་དུ་བད་ཀན་དང་ཁྲག་ལས་གྱུར་པའི་འབྲུམ་བུ་ཡུངས་ཀར་གྱི་ཚད་ཙམ་མཐུག་པར་འདུག་པ་དེ་ནི་ཡུངས་ཀར་ལྟ་བུའི་ནད་ཅེས་བྱའོ། །ཡང་ཕོ་མཚན་གྱི་ནད་ཁྲག་དང་བད་ཀན་
[384b.3]ལས་གྱུར་པའི་འབྲུམ་བུ་མང་པོ་རྒྱ་ཆེ་བ་དབུས་སུ་ནས་ཙམ་འབྱུང་སྟེ་ཟུག་པ་དང་བ་སྤུ་ལངས་པ་ཡིན་ཏེ་དེའི་མིང་ནི་ཨ་བ་མན་ཐ་ཞེས་བྱའོ། །ཁྲག་དང་མཁྲིས་པ་ལས་གྱུར་པའི་ནད་འཛམ་བུའི་རུས་པ་ལྟར་འདུག་པ་དེ་ནི་ཀུམ་བྷི་ཀ་ཞེས་བྱའོ། །ཕོ་མཚན་གྱི་ནད་མེ་དབལ་ལྟ་བུ་ཞེས་བྱ་
[384b.4]བ་ཡོད་དེ། དེའི་མཚན་ཉིད་ནི་གཅིན་སྙི་བའི་སྐབས་སུ་བཤད་པ་བཞིན་དུ་བལྟའོ། །ཁྲག་དང་མཁྲིས་པ་ལས་གྱུར་པའི་འབྲུམ་བུ་མོན་སྲན་གྲེའུ་དང་། མུངྒའི་ལོ་མའི་ཚད་ཙམ་ཡོད་པ་དེ་ནི་ཕོ་མཚན་གྱི་ནད་ཨུད་དམ་ཞེས་བྱའོ། །ཕོ་མཚན་གྱི་ནད་འབྲུམ་བུ་གཅིག་
[384b.5]ལ་མང་པོས་ཁྱབ་སྟེ། ཇི་ལྟར་པདྨའི་སྙིང་པོ་ལ་འབྲུམ་བུས་ཁྱབ་པ་ལྟར་སྣང་སྟེ་དེ་ནི་པདྨ་ཅན་ཞེས་བྱའོ། །ཕོ་མཚན་གྱི་ནང་དུ་ལག་པས་དྲུད་པ་ལས་འབྲུམ་བུ་འབྱུང་བ་དེ་ནི་འདྲུད་པའི་འབྲུམ་བུ་ཞེས་བྱའོ། །ཕོ་མཚན་ཤུགས་དྲག་ཏུ་མཉེས་པ་ལས་རླུང་འཁྲུགས་ཏེ་ཡ་ཡོར་
[384b.6]སོང་བ་དང་། མཁྲང་བ་དང་། རྡུལ་བ་དང་ལྡན་པ་དེ་ནི་གཏུན་བུ་ལྟ་བུའི་རླུང་ནད་ཅེས་བྱའོ། །ཕོ་མཚན་མཉེས་པ་ལས་རླུང་འཁྲུགས་ཏེ་པགས་པ་ཕྱིར་བཤུས་པ་ལས་ན་ཞིང་ཚ་བ་འུར་འུར་པོར་འདུག་པ་དང་། ཁ་ཅིག་རྨེན་པར་ཡང་འགྱུར་ཏེ་དེའི་མིང་ནི་པགས་པ་ཕྱིར་བཤུས་
[384b.7]པའི་ནད་ཅེས་བྱའོ། །ཕོ་མཚན་གྱི་པགས་པ་རྩེ་མོ་ནས་འདས་པར་འཕྱང་ཞིང་མདུད་པར་སྣང་བ་དེ་ནི་པགས་པ་ཉིལ་བའི་ནད་ཅེས་བྱའོ། །བད་ཀན་ལས་གྱུར་པའི་ཕོ་མཚན་གྱི་ནད་ནི་ཤིན་ཏུ་གཡའ་བ་དང་། སྲ་བ་དང་། རྨ་འབྱུང་བ་དང་། འགས་པ་དང་། འཚོ་བར་
[385a]
[385a.1]དཀའ་བ་དེ་ནི་ཕོ་མཚན་གྱི་པགས་པའི་ནད་ཨ་བ་པ་ཏི་ཀི་ཞེས་བྱའོ། །རླུང་གིས་ཕོ་མཚན་གྱི་པགས་པ་མ་རུངས་པར་བྱས་ཏེ་ནོར་བུ་ལ་པགས་པ་འབྱར་བས་འབྱུང་དུ་མ་སྟེར་ཏེ་སྦུབས་ནས་གཅིན་འབྱུང་བ་ཡང་རྒྱུན་ཕྲ་བར་འབྱུང་ཞིང་ནད་མེད་པ་ཡིན་ཏེ་དེའི་མིང་ནི་
[385a.2]ནོར་བུ་ཁ་མ་བྱེ་བ་ཞེས་བྱ་བ་འམ། ཡང་ན་ནོར་བུ་འགགས་པའི་ནད་ཅེས་བྱའོ། །བད་ཀན་ལས་གྱུར་པའི་ཕོ་མཚན་གྱི་ནད་གྲ་མས་གང་བ་སྙམ་སེམས་པ་ནི་མདུད་པ་ལྟ་བུའི་ནད་ཅེས་བྱའོ། །གྲ་མས་གང་བའམ་ཁྲག་ལས་གྱུར་པ་ནི་ཕོ་མཚན་གྱི་ནད་ཚོར་བ་མེད་པ་དེ་ནི་ཚོར་བ་
[385a.3]མེད་པའི་ནད་ཅེས་བྱའོ། །རླུང་དང་ཁྲག་འཁྲུགས་པ་ལས་གྱུར་པའི་ཕོ་མཚན་གྱི་ནད་ཅི་ཙེ་ཙམ་གྱི་བུ་གས་ཁྱབ་པར་འབྱུང་བ་དེ་ནི་བུ་ག་བརྒྱ་པའི་ནད་ཅེས་བྱའོ། །མཁྲིས་པ་དང་ཁྲག་ལས་གྱུར་པའི་ཕོ་མཚན་གྱི་ནད་པགས་པ་ཚོས་ཤིང་ཚ་བ་དང་། ཚབས་ཆེར་ཚ་བ་འུར་འུར་པོར་
[385a.4]འདུག་པ་དེ་ནི་པགས་པའི་ནད་སྨིན་པ་ཞེས་བྱའོ། །འདུས་པ་ལས་གྱུར་པའི་པགས་པའི་ནད་སྨིན་པ་ནི་ཕོ་མཚན་གྱི་པགས་པའི་ཤ་ཐམས་ཅད་འདྲུལ་བ་ཡིན་ཏེ་དེ་ནི་ཤ་འདྲུལ་བའི་ནད་ཅེས་བྱའོ། །ཡང་ཕོ་མཚན་གྱི་ནད་འབྲུམ་བུ་ཕྲ་མོ་དམར་བ་དང་གནག་པ་འབྱུང་སྟེ་ཁྱབ་
[385a.5]པ་དང་ན་བ་དེ་ནི་ཁྲག་གི་འབྲུམ་བུ་ཞེས་བྱའོ། །ཕོ་མཚན་ལ་ནི་ཤའི་འབྲུམ་བུ་འབྱུང་བ་ནི་གོང་གི་ཤའི་འབྲུམ་བུ་བཞིན་དུ་བལྟའོ། །ཕོ་མཚན་ལ་འབྲས་འབྱུང་བ་ཡང་འདུས་པ་ལས་གྱུར་པའི་འབྲས་ནད་ཀྱི་མཚན་ཉིད་རྣམས་འདིར་བལྟའོ། །འདུས་པ་ལས་གྱུར་
[385a.6]པའི་འབྲས་ནད་ནི་ཕོ་མཚན་མདོག་ནག་པོར་གྱུར་ཅིང་སྨིན་ལ་རུལ་ཏེ་ཤའུ་འདྲུལ་བ་དེ་ནི་ཏི་ལ་ཀ་ལ་ཀ་ཞེས་བྱའོ། །དེ་ལས་ཀྱང་ཤ་ལས་གྱུར་པའི་འབྲུམ་བུ་དང་། སྨིན་པ་དང་། འབྲས་ནད་དང་། ཏི་ལ་ཀ་ལ་ཀ་ཞེས་བྱ་བ་བཞི་པོ་དེ་དག་ནི་སྤང་བར་བྱའོ། །ལྷག་མ་
[385a.7]རྣམས་ནི་གསོ་བར་བྱའོ། །ཁ་ཟས་མ་རུང་བ་ཟོས་པ་དང་། མལ་སྟན་མི་བདེ་བ་ལ་འདུག་པ་དང་། ཉལ་པོ་ལྷག་པར་བསྟེན་པ་དང་། ཁྲག་ངན་སྐྱེས་པ་དང་། གནོད་པར་འགྱུར་པའི་སྨན་བསྟེན་པ་དང་། སྐྱེས་པའི་ས་བོན་གྱི་ཉེས་པ་དང་། སྔོན་གྱི་ལས་ལས་གྱུར་
[385b]
[385b.1]པ་དང་། རྒྱུ་དེ་དག་གིས་མོ་མཚན་གྱི་ནད་རྣམ་པ་ཉི་ཤུར་འགྱུར་རོ། །དེ་ལ་རླུང་གིས་མོ་མཚན་མ་རུངས་པར་གྱུར་ན་ནི་ན་ཞིང་ཟུག་པ་དང་། གླལ་མང་བ་དང་། ཚོར་བ་མེད་པ་དང་། གྲོག་མ་རྒྱུ་བ་སྙམ་བྱེད་པ་དང་། རེངས་པ་དང་། རྩུབ་པ་དང་། ཁྲག་སླ་བ་ལྦུ་བ་དང་བཅས་
[385b.2]ཤིང་སླ་བ་དང་། མྱུར་དུ་འཛག་པ་དང་། མདོག་རྩ་ནག་པ་དང་། གཞན་ཡང་ཆུ་སོ་དང་། བརླ་མཚམས་དང་རྩིབ་ལོགས་ལ་སོགས་པ་དང་། ལོང་མོ་རྣམས་དང་། དེ་དག་ཏུ་རང་རང་གི་ནད་སྐྱེད་པར་བྱེད་དེ་དེ་ནི་མོ་མཚན་གྱི་ནད་རླུང་ལས་གྱུར་པ་ཡིན་ནོ། །དེ་ཉིད་ལ་ཉལ་པོ་ཤས་
[385b.3]ཆེར་སྤྱད་ན་ནི་སྐྲང་བ་དང་ལྡན་པར་འགྱུར་རོ། །ཤིན་ཏུ་གཞོན་པ་ལ་ཡང་འཁྲིག་པ་སྤྱད་པས་སྒལ་ཚིགས་དང་། བྱིན་པ་དང་། བརླ་གཉིས་ཀྱི་བར་དང་། དེ་དག་ཏུ་རླུང་འཁྲུགས་ཏེ་ནད་སྐྱེད་པ་དེ་ནི་སྔར་སྤྱད་པ་ཞེས་བྱའོ། །འབྱུང་བའི་ཤུགས་ནང་དུ་འཁྱིལ་ཏེ་རླུང་གིས་མོ་མཚན་
[385b.4]ཤིན་ཏུ་སྣང་བར་བྱས་ནས་ཁྲག་ལྦུ་བ་དང་བཅས་པར་སྲི་ཞིང་འགགས་པ་མང་དུ་འབྱུང་སྟེ་དེ་ནི་མོ་མཚན་གྱི་ནད་འཁྱིལ་པ་ཞེས་བྱའོ། །ཡང་རླུང་གིས་ཟླ་མཚན་རྩུབ་ཅིང་མ་རུངས་པར་བྱས་པ་ལས་བུ་ཚ་འབྱུང་ན་ཡང་སྐྱེ་ཞིང་འཆི་བར་བྱེད་དེ། དེ་ནི་བུ་འཆི་བ་ཞེས་བྱ་བའི་མངལ་གྱི་ནད་ཡིན་ནོ། །
[385b.5]ཁ་ཟས་མང་དུ་ཟོས་ཏེ་འགྲངས་པའི་འོག་ཏུ་མལ་སྟན་མི་མཉམ་པ་ལ་འཁྲིག་པ་སྤྱད་པ་ལས་རླུང་གིས་ཁ་ཟས་བཙིར་ཏེ་མོ་མཚན་གྱི་ནང་ན་གནས་པའི་སྦུ་གུ་རྣམས་འཆུས་པར་བྱས་ནས་རུས་པ་དང་། ཤའི་སྦུ་གུ་རྣམས་སུ་ཟུག་གཟེར་བདོ་བ་ནི་མོ་མཚན་གྱི་ནད་ནང་དུ་རྟས་པ་ཞེས་བྱའོ། །
[385b.6]རླུང་ནད་སྐྱེས་པའི་ཁ་ཟས་བསྟེན་པས་ས་བོན་འཛིན་པའི་མོ་མཚན་གྱི་ཁ་ཞུམ་པར་བྱས་པ་དེ་ནི་ཁབ་མིག་ལྟ་བུའི་མོ་མཚན་གྱི་ནད་ཅེས་བྱའོ། །རླུང་ཤས་ཆེར་སྐྱེས་པས་བཤང་གཅི་འགགས་ཤིང་མངལ་སྐམ་པར་བྱེད་པ་དེ་ཚོར་བ་དང་བཅས་པ་དེ་ནི་མངལ་ནད་སྐེམ་བྱེད་ཅེས་བྱའོ། །མངལ་
[385b.7]གྱི་གནས་སུ་ས་བོན་ཞུགས་པ་ལས་རླུང་གིས་ཞག་དྲུག་གམ་ཞག་བདུན་གྱི་བར་དུ་འཇིག་ཅིང་དེ་ནས་ནད་ཡོད་ཀྱང་རུང་མེད་ཀྱང་རུང་ས་བོན་ཕྱིར་འབྱིན་པ་དེ་ནི་ས་བོན་འབྱིན་པ་ཞེས་བྱའོ། །མངལ་གྱི་ནད་རླུང་གིས་གཟིར་བ་ལས་བྱིས་པ་རུམ་དུ་ཆགས་པའི་ས་བོན་ལ་གནོད་པར་
[386a]
[386a.1]བྱས་པས་སྐྱེས་པ་ལ་ཞེ་སྡང་སྐྱེས་པ་དེ་ནི་ཤིན་ཏུ་དམར་བ་ཡིན་པས་གསོ་བ་མ་བྱས་ན་ནི་མོ་གཤམ་དུ་འགྱུར་རོ། །མངལ་གྱི་ནང་དུ་རླུང་སྐྱེད་པ་མོ་མཚན་གྱི་ནད་མངལ་ཤིན་ཏུ་ཁ་ཞུམ་པ་དང་། ཡང་ན་ཁ་བྱེ་བར་བྱེད་པ་དང་། གནས་ནས་ཉམས་པ་དང་། རླུང་གིས་
[386a.2]མོ་མཚན་གྱི་ནད་བཞིན་དུ་ན་བ་དེ་ནི་ཤ་མཐོན་པོ་ཞེས་ཀྱང་བྱ། མོ་མཚན་རྒྱ་ཆེར་སོང་བ་ཞེས་ཀྱང་བྱ། ནད་ཆེན་པོ་ཞེས་ཀྱང་བྱའོ་ཞེས་ཟེར་རོ། །མཁྲིས་པ་ལས་གྱུར་པའི་མོ་མཚན་གྱི་ནད་ནི་མཁྲིས་པ་རང་གི་ནད་གཞི་བསྐྱེད་པའི་རྒྱུ་ཁ་ཟས་ལ་སོགས་པ་བསྟེན་པས་མཁྲིས་
[386a.3]པས་མངལ་ལ་བརྟེན་ཏེ་འཁྲུགས་ནས་ཚ་བ་དང་། སྨིན་པ་དང་། རྣགས་པ་དང་། དྲི་ང་བ་དང་། རིམས་ཀྱིས་འདེབས་པ་དང་། ཁྲག་འཛག་པ་དང་། འཛག་པ་དེ་ཡང་ཤིན་ཏུ་ཚ་བ་དང་། རོ་མྱགས་པ་དང་། མདོག་སྔོ་བ་དང་། སེར་བ་དང་། གནག་པ་ལ་སོགས་པ་
[386a.4]མདོག་སྣ་ཚོགས་སུ་འདུག་པར་སྣང་བ་ཡིན་ནོ། །ཁྲག་ལས་གྱུར་པའི་མོ་མཚན་གྱི་ནད་ནི་ཁྲག་ཚབས་ཆེར་འཛག་པ་ཡིན་ནོ། །ཁ་ཟས་ལ་སོགས་པ་བད་ཀན་འཁྲུག་པར་བྱེད་པའི་རྒྱུ་བསྟེན་པས་མོ་མཚན་ནད་ཆུང་ཞིང་གྲང་བ་དང་། གཡའ་བ་དང་། འཛག་པ་
[386a.5]དཀར་བ་དང་། སྤྱི་བག་ཏུ་འབྱུང་བ་རྣམས་ཡིན་ནོ། །རླུང་དང་མཁྲིས་པ་མོ་མཚན་གྱི་ནང་དུ་འཁྲུགས་ཏེ་ཁྲག་འཛག་ཅིང་ཟད་དེ། ཚ་བ་འུར་འུར་པོར་འདུག་པ་དང་། ལུས་སྐེམ་ཞིང་མདོག་འགྱུར་བ་དེ་ནི་ཁྲག་ཟད་པའི་མངལ་ནད་ཅེས་བྱའོ། །བུད་མེད་རང་བཞིན་གྱིས་ནད་
[386a.6]མཁྲིས་པ་ཤས་ཆེ་བ་དེ་སྐྱེས་པ་དང་ཉལ་པོ་བྱེད་པ་དང་། སྦྲིད་པ་དང་། སྒྲེགས་པ་ལྟ་བུ་འགགས་པས་རླུང་མཁྲིས་པ་དང་བཅས་པ་མངལ་གྱི་ནང་དུ་འཁྲུགས་པར་འགྱུར་ཏེ། དེ་ཡང་སྐྲང་བ་དང་། རེག་མི་བཟོད་པ་དང་། ཉམ་ཐག་པ་བཞིན་ན་བ་དང་། ཁྲག་སྔོན་པོ་དང་།
[386a.7]སེར་པོ་འབྱུང་བ་ཡིན་ནོ། །མ་ཞུ་ད་མངལ་གྱི་ནང་དུ་འཁྲུགས་པ་སྟེ། ཆུ་སོ་དང་མཁལ་མ་ལྕི་ཞིང་ཚད་པར་འཁྲུ་བ་དང་། ཡི་ག་འཆུས་པ་དང་། སྟ་ཟུར་དང་། ཆུ་སོ་དང་། བརླ་གཉིས་ཀྱི་བར་དུ་ན་བ་དང་། ཚ་བར་བྱེད་པ་དེ་ནི་མངལ་གྱི་ནད་མ་ཞུ་བ་ཞེས་བྱའོ། །མངལ་གྱི་ནང་དུ་རླུང་
[386b]
[386b.1]དང་བད་ཀན་གྱི་ནད་ཀྱིས་ཁྱབ་སྟེ་འཛག་པ་དཀར་བ་དང་། འབྱིལ་བག་ཏུ་འབྱུང་བ་དེ་ནི་མོ་མཚན་གྱི་ནད་ཨུ་པ་སླུ་ཏ་ཞེས་བྱའོ། །ཡང་མོ་མཚན་ཁྲུས་དང་གཙང་སྦྲ་མ་བྱས་པས་སྲིན་བུ་སྐྱེས་ནས་མོ་མཚན་རབ་ཏུ་གཡའ་ཞིང་གཡའ་བ་དེས་འདོད་པ་ལ་དགའ་སྟེ་དེའི་མིང་ནི་འབྱིན་བག་ཞེས་བྱའོ། །
[386b.2]དུས་མ་ཡིན་པར་འཁྲིག་པ་སྤྱད་པའི་རྒྱུས་རླུང་དང་། མཁྲིས་པ་དང་། ཁྲག་མངལ་གྱི་ནང་དུ་འཁྲུགས་ཏེ། པདྨའི་སྙིང་པོ་ཞེས་བྱ་བའི་ནད་སྐྱེས་ནས་ཟླ་མཚན་གྱི་ལམ་འགག་པར་བྱེད་དེ་དེ་ནི་པདྨའི་སྙིང་པོ་ཞེས་བྱ་བའི་ནད་ཡིན་ནོ། །ནད་གཞི་གསུམ་མངལ་གྱི་གནས་དང་མོ་མཚན་ལ་བརྟེན་ཏེ་
[386b.3]འཁྲུགས་ནས་རང་རང་གི་ནད་སྐྱེད་དེ་དེ་ནི་མོ་མཚན་གྱི་ནད་འདུས་པ་ལས་གྱུར་པ་ཡིན་ནོ། །དེ་ལྟར་བུད་མེད་ཀྱི་མངལ་དང་མོ་མཚན་གྱི་ནང་དེ་དག་གིས་ཁུ་ཆུ་འཛིན་པའི་ནུས་པ་མེད་དེ་རྒྱུ་དེས་ན་ས་བོན་ནམ་བྱིས་པ་ཆགས་པའི་མཐུ་མེད་པའི་ནད་ཤིན་ཏུ་མི་བཟད་པ་སྐྱེ་བར་འགྱུར་ཏེ། རླུང་ལ་
[386b.4]སོགས་པའི་ནད་དང་། ཟླ་མཚན་གྱི་ནད་དང་། གཞང་འབྲུམ་དང་། སྐྲན་ལ་སོགས་པས་ཤིན་ཏུ་གནོད་པར་འགྱུར་རོ། །གསང་བའི་གནས་ཀྱི་ནད་དམིགས་བརྟགས་པའི་ལེའུ་སྟེ་སུམ་ཅུ་གསུམ་པ་རྫོགས་སོ།། །།དེ་ནས་གསང་བའི་གནས་ཀྱི་ནད་གསོ་བའི་
[386b.5]ལེའུ་བཤད་པར་བྱ་སྟེ། དེ་ལ་ཕོ་མཚན་གྱི་ནད་གསར་པ་དུ་མ་བྱུང་སྟེ་ཕོ་མཚན་གྱི་དབུས་ཀྱི་རྩ་ལས་གཏར་གས་ཁྲག་དབྱུང་ངོ་། །དེའི་འོག་ཏུ་བསིལ་བའི་ཆོ་ག་རྣམས་བྱ་སྟེ། ལྷག་པར་བཀྲུ་སྨན་གྱིས་ལུས་དག་པར་བྱའོ། །དེ་ནས་ཏིལ་གྱི་ཕྱེ་མ་མར་དང་སྦྲང་རྩི་དང་སྦྱར་བས་
[386b.6]བསྐུའོ། །སྨིན་ནས་ནི་དབྲལ་ལ་ཤིང་འཛམ་བུ་དང་། ཨ་མྲ་དང་། ཤྲི་ཤིང་དང་། ག་པ་དང་། ཤྲེ་ཏ་ཀམྦུ་ཛི་དང་། དེ་རྣམས་ཀྱི་མྱུ་གུ་དང་། སྲ་རྩི་པོག་གི་ཤིང་དང་། རྒྱ་ཤུག་དང་། བིལ་བ་དང་། རྒྱ་སྐྱེགས་ཤིང་དང་། དེ་རྣམས་ཀྱི་ཤུན་པ་དང་། ཏི་ནི་ཤ་དང་།
[386b.7]ཤིང་འོ་མ་ཅན་གྱི་ཤུན་པ་དང་། འབྲས་བུ་གསུམ་དང་། དེ་རྣམས་ཆུ་དང་བསྐོལ་བའི་ཁུ་བས་རྨ་བཀྲུ་བར་བྱའོ། །ཁུ་བ་དེ་ཉིད་ཏིལ་མར་དང་བསྐོལ་བའི་མར་གྱིས་རྨ་ལ་བསྐུས་ན་རྨ་འཚོ་བར་འགྱུར་རོ། །སྤངས་མ་དང་། གི་རི་ག་དང་། སེང་ཕྲོམ་དང་། སུག་སྨེལ་
[387a]
[387a.1]དང་། ལྡོང་རོས་དང་། བ་བླ་དང་། སྐྱེར་ཁཎྜ་དང་། ཧ་རེ་ཎུ་དང་། ནག་ཚུར་བྱ་བལ་མ་དང་། རྒྱ་ཚ་དང་། རྒྱམ་ཚ་དང་། དེ་རྣམས་ཀྱི་ཕྱེ་མ་སྦྲང་རྩི་དང་སྦྱར་བས་བསྐུས་ན་ཕོ་མཚན་གྱི་རྨ་འཚོ་བར་བྱེད་དོ། །འབྲས་བུ་གསུམ་རྫེའུ་ཁ་སྦྱར་གྱི་ནང་དུ་བསྲེགས་ཏེ་མར་དང་
[387a.2]སྦྱར་བས་བསྐུས་ན་རྨ་འཚོ་བར་བྱེད་པའི་མཆོག་ཡིན་ནོ། །དེ་དག་ནི་ཕོ་མཚན་གྱི་གསོ་བ་སྤྱིར་བསྟན་པ་ཡིན་ནོ། །ནད་གཞི་རེ་རེ་ལས་གྱུར་པའི་ནད་ནི་སྐྲང་ནད་ཀྱི་གསོ་བ་བཞིན་དུ་སྦྱར་རོ། །སྨན་གྱིས་གསོ་བ་ཕོ་མཚན་གྱི་ནད་ཅི་ནས་ཀྱང་སྨིན་ཅིང་རྣགས་པར་མི་འགྱུར་བའི་
[387a.3]ཐབས་སུ་བྱའོ། །གལ་ཏེ་སྨིན་ན་ནི་རྒྱུས་པ་དང་རྩ་དང་ཤ་རྣམས་ཕལ་ཆེར་འཇིག་པར་འགྱུར་རོ། །གཞང་འབྲུམ་ལྟ་བུའི་ནད་ནི་བཅད་ལ་མེས་བསྲེགས་ཏེ་ལྷག་མ་ནི་ཕོ་མཚན་སྤྱིར་བསྟན་པ་གསོ་བ་གོང་མ་བཞིན་བྱའོ། །ཡུངས་ཀར་ལྟ་བུའི་ནད་ལ་ནི་མཚོན་གྱིས་ཕྲ་བ་བྲིས་
[387a.4]ཏེ། སྨན་གོང་མ་དེ་ཉིད་བསྐོལ་བའི་ཁུ་བས་བླུགས་པ་དང་། ཕྱེ་མས་གདབ་པ་དང་། དེ་ཉིད་ཏིལ་མར་དང་སྦྱར་བས་བསྐུས་ན་རྨ་འཚོ་བར་འགྱུར་རོ། །ཨ་པ་མན་ཐའི་ནད་ལ་ཡང་གསོ་བ་གོང་མ་ལྟར་བྱ་སྟེ་ཁྲག་གཟག་གོ །ཀུམ་བྷི་ཀའི་ནད་སྨིན་པ་ངོས་གཉི་ག་ནས་ཁྲག་
[387a.5]གཏར་ཏེ་རྨ་དག་པར་བྱས་ལ་ཏིནྟུ་ཀ་དང་། འབྲས་བུ་གསུམ་དང་། སེང་ཕྲོམ་དང་། དེ་རྣམས་ཏིལ་མར་དང་སྦྱར་ཏེ་བསྐུ་བ་དང་བྱུག་པ་ལ་སོགས་པ་བྱས་ན་རྨ་འཚོ་བར་འགྱུར་རོ། །ཕོ་མཚན་གྱི་ནད་མེ་དབལ་ལྟ་བུ་ལ་ནི་ཁྲག་གཏར་ཏེ་ཆོ་ག་གོང་མ་ལྟར་བྱའོ། །ཨུ་དམ་
[387a.6]ཞེས་བྱ་བའི་འབྲུམ་བུའི་ནད་ལ་ནི་ལྕགས་ཀྱུ་གུག་པོས་འབྲུམ་བུ་བཅད་དེ་མཁྲིས་པའི་མེ་དབལ་གསོ་བའི་རིམ་པ་བཞིན་དུ་སྨན་གྱི་ཕྱེ་མ་དང་སྨན་བསྐོལ་བའི་ཁུ་བ་དང་དེ་རྣམས་སྦྲང་རྩི་དང་སྦྱར་བ་བཏང་སྟེ་པདྨ་ཅན་ཞེས་བྱ་བ་ལ་ཡང་ཆོ་ག་དེ་ལྟར་མཚུངས་པར་སྦྱར་རོ། །པགས་པ་
[387a.7]སྨིན་པ་དང་། ཚོར་བ་མེད་པ་གཉིས་ལ་ནི་བ་ལའི་མར་དྲོ་འཇམ་ཙམ་གྱིས་བསྐུས་ཤིང་བླུགས་པ་དང་། སྨན་མངར་བའི་སྡེ་ཚན་སྦྱར་བའི་བ་ལའི་མར་གྱིས་དུགས་བྱའོ། །དེ་ལ་གཏུན་བུ་ལྟ་བུའི་ནད་ལ་ནི་ཁྲག་ཕྱུང་སྟེ། བད་ཀན་གྱི་ཐོར་བུའི་གསོ་བ་རྣམས་སྤྱད་དོ། །
[387b]
[387b.1]དེ་ལ་པགས་པ་ཕྱིར་བཤུས་པའི་ནད་ལ་ནི་མར་གྱིས་བསྐུས་པ་ལ་སྨན་གྱི་བྱུག་པས་བྱུགས་ལ་དུགས་བྱའོ། །དེ་ལ་ཞག་གསུམ་མམ་ལྔའི་བར་དུ་སྨན་ཨེ་ལ་བ་ལ་ཞེས་བྱ་བའི་སྨན་གྱིས་སྣུམ་ཆོས་བྱ་སྟེ། ཞེན་པ་དང་དུགས་བྱ་སྟེ། དེ་ནས་ཡང་སྟུམ་ཆོས་བྱས་ལ་སླར་དྲང་ཞིང་
[387b.2]གཞུག་པར་བྱའོ། །པགས་པ་གཉིས་པའི་ནད་ལ་ནི་དང་པོ་དུགས་བྱ་སྟེ་ནོར་བུའི་རྩེ་མོ་ནས་ཡར་རིམ་གྱིས་བཙིར་ཞིང་བཏེག་ལ་སླར་གཞུག་གོ། །དེའི་འོག་ཏུ་ནོར་བུ་ལ་ཡང་དང་ཡང་སྣུམ་ཆོས་བྱ་བ་དང་། ཁ་ཟས་སྣུམ་བག་དང་བཅས་པ་ཟོས་ན་རབ་ཏུ་བསྔགས་སོ། །ཨ་པ་
[387b.3]པ་ཏི་ཀའི་ནད་ལ་ཡང་ཆོ་གའི་རིམ་པ་དེ་བཞིན་དུ་སྦྱར་རོ། །དེ་ལ་བུ་ག་བརྒྱ་པའི་ནད་ཕོ་མཚན་གྱི་སྦུ་བུ་གཉིས་ཀྱི་ནང་ན་སྲིན་བུས་བརྟེན་ཏེ་ཁ་འགགས་པར་བྱས་པ་དེ་ལ་ནི་རླུང་འཇོམས་པའི་སྨན་དང་སྦྱར་བའི་སྣུམ་གྱིས་ཐོག་མར་ནང་དུ་བཅུག་སྟེ། དེའི་འོག་ཏུ་སྨན་མར་དེ་ཉིད་ཀྱིས་
[387b.4]བླུགས་པར་བྱའོ། །ཞག་གསུམ་གསུམ་ཞིང་སྦུ་གུ་ཆེ་ཞིང་ཡངས་པར་གྱུར་ན་ནི་མཚོན་གྱིས་གཅད་པར་བྱའོ། །སྦུ་གུའི་ཁ་སྦྱོར་བ་དེ་དག་གིས་མ་ཞི་ན་ནི་བར་གྱི་སྲུབ་བྱེད་བྲེང་བྲེང་པོ་མ་གཏོགས་པ་མཚོན་གྱིས་གདབ་ཏུ་རུང་བའི་སར་དབྲལ་ཏེ་རྨ་གསར་བའི་ཆོ་ག་བཞིན་དུ་བྱའོ། །
[387b.5]གལ་ཏེ་ཕོ་མཚན་གྱི་ནད་སྲ་ཞིང་མདུད་པ་ལྟར་གྱུར་ན་ནི་སྦུ་གུ་དུགས་བྱ་བ་དང་། སྣུམ་དང་ལྡན་པ་དྲོན་པོས་བྱུག་པ་བྱས་ལ་དེ་ནས་མཚོན་གྱིས་བྲིས་ཏེ། སྨན་བསྐོལ་བའི་ཁུ་བ་སྦྲང་རྩི་དང་སྦྱར་བས་བླུགས་སོ། །ཁྲག་གི་ཤས་ཆེ་བའི་འབྲུམ་བུ་ལ་ནི་ཁྲག་ལས་གྱུར་པའི་ཁོང་
[387b.6]འབྲས་ཀྱི་གསོ་བ་རྣམས་བྱའོ། །གཞན་ཡང་ཕོ་མཚན་ལ་ནད་ཀྱི་གནས་སྐབས་ཇི་ལྟ་བ་བཞིན་དུ་རྨ་གསོ་བ་རྣམས་ཅི་རིགས་པར་གྱིས་ཤིག །མོ་མཚན་གྱི་གསོ་བ་མངལ་གྱི་ནད་དམ་མོ་མཚན་གྱི་ནད་ཐམས་ཅད་ལ་ནི་རླུང་འཇོམས་པའི་སྣུམ་དང་དུགས་དང་མས་གཏོང་བ་ལ་
[387b.7]སོགས་པ་ལས་ཐམས་ཅད་བྱས་ན་རབ་ཏུ་བསྔགས་ཏེ་ལྷག་པར་རླུང་ལས་གྱུར་པའི་ནད་ལ་སྦྱར་རོ། །དེ་ལ་བུད་མེད་ཀྱི་མོ་མཚན་གྱི་ནད་ནི་རླུང་མ་གཏོགས་པ་གཞན་གང་ཡང་མེད་དོ། །དེ་བས་ན་བུད་མེད་ཀྱི་མངལ་གྱི་ནད་གང་ཡང་རུང་བ་ལ་ནི་རླུང་འཇོམས་པའི་སྨན་སྦྱར་བར་བྱ་སྟེ།
[388a]
[388a.1]དེ་ཡང་བ་ལའི་མར་དང་འདྲེས་པ་ཞེས་བྱ་བའི་སྨན་མར་དང་། སུ་ཀུ་མ་རའི་སྨན་མར་དང་། དེ་རྣམས་ཀྱི་སྨན་མར་བླུད་པ་དང་། དུགས་བྱ་བ་དང་། སྣུམ་ཆོས་ལ་སོགས་པ་བྱས་ན་མངལ་དང་མོ་མཚན་ཡོ་བ་ཡང་དྲང་པོར་བྱེད་དོ། །གལ་ཏེ་མོ་མཚན་ཡོ་བར་གྱུར་ན་ལག་
[388a.2]པས་བསྲང་ལ་ཞུམ་པ་ཡང་དབྲལ་ཞིང་བསྐྱེད་པར་བྱའོ། །ཕྱིར་བྱུང་ན་ནང་དུ་གཞུག་པར་བྱའོ། །དེ་དག་ནི་མངལ་རང་གི་གནས་ནས་ཉམས་པར་བྱེད་པ་ཡིན་ཏེ། དེ་ནི་བུད་མེད་ཟུག་རྔུ་དང་བཅས་པ་ཡིན་པར་འདོད་དོ། །དེ་ལྟ་བུའི་ནད་ལ་ནི་སྨན་འཇམ་པོས་སློན་ལ་སོགས་པ་ལས་
[388a.3]རྣམ་པ་ལྔ་ཡང་སྦྱར་བར་བྱ་སྟེ་རྣམ་པ་ཐམས་ཅད་དུ་ལུས་ཡོངས་སུ་འདག་པར་བྱ་བ་དང་། དེ་བཞིན་དུ་མས་གཏོང་བ་དང་། བསྐུ་བྱུག་དང་། བླུགས་པ་དང་། བྱུག་པ་དང་། ཤིང་བལ་གྱི་འདའ་བས་གླན་པ་ལ་སོགས་པ་ཡང་ལྷག་མ་དེ་དག་ཀྱང་བྱའོ། །ཏང་པལ་དང་།
[388a.4]འབྲས་བུ་གསུམ་དང་། རྒུན་འབྲུམ་དང་། ཀ་མར་དྷ་དང་། སེར་པོ་རྣམ་གཉིས་དང་། སླེ་ཏྲེས་དང་། ཤིང་ཤེ་རྒྱ་ཀ་གཏང་བ་དང་། བསྐུ་བྱུག་དང་། བ་སྤྲུ་བ་དང་། བ་ཤ་ཀ་དང་། དེ་རྣམས་ཞོ་གཉིས་གཉིས་དང་། མར་སྲང་སུམ་ཅུ་རྩ་གཉིས་དང་བསྐོལ་ཏེ་མར་ལུས་པ་ལས་རན་
[388a.5]པར་འཐུངས་ན་རླུང་ལས་གྱུར་པའི་མངལ་ནད་ཐམས་ཅད་འཇོམས་ཏེ་བུ་འཛིན་པར་བྱེད་པའི་མཆོག་ཡིན་ནོ། །ཤུ་དག་དང་། ཟི་ར་དང་། གོ་སྙོད་དང་། པི་པི་ལིང་དང་། བ་ཤ་ཀ་དང་། རྒྱམ་ཚ་དང་། ཏི་མུ་ས་ཀ་དང་། ཡ་བཀྵར་དང་། དེ་རྣམས་ཞིབ་ཏུ་བཏགས་ཏེ།
[388a.6]ཆང་གི་དངས་མ་དང་སྦྲུས་ལ་མར་དང་བརྔོས་ཏེ་ཟོས་ན་མོ་མཚན་གྱི་ནད་དང་། རྩིབ་ལོགས་སུ་ན་བ་དང་། གློ་སྙིང་ན་བ་དང་། སྐྲན་དང་། གཞང་འབྲུམ་རྣམས་ཟློག་པར་བྱེད་དོ། །བ་ཤ་ཀ་དང་། ཁ་ལུང་གི་རྩ་བ་དང་། སེན་རྩི་དང་། ལན་ཚྭ་དང་། དེ་རྣམས་ཀྱི་ཕྱེ་མ་ཆང་
[388a.7]དང་སྦྱར་ཏེ་བཏུང་བ་འམ། ཡང་ན་པི་པི་ལིང་དང་། ཨུཏྤ་ཀོན་ཙི་ཀ་ཞེས་བྱ་བ་གོ་སྙོད་དང་། ར་སྣ་དང་། གཟེ་མ་དང་། བ་ཤ་ཀ་དང་། དེ་རྣམས་འོ་མ་དང་བསྐོལ་ལ་འཐུངས་ན་ཟུག་གཟེར་འཕྲོག་པར་བྱེད་དོ། །སླེ་ཏྲེས་དང་། འབྲས་བུ་གསུམ་དང་། དནྟི་དང་། དེ་རྣམས་བསྐོལ་
[388b]
[388b.1]བས་བླུགས་པར་བྱའོ། །རྒྱ་སྤོས་དང་། ཀཎྜ་ཀ་རི་དང་། རུ་རྟ་དང་། རྒྱམ་ཚ་དང་། ཐང་ཤིང་དང་། དེ་རྣམས་ཏིལ་མར་དང་བསྐོལ་བའི་མར་ལས་ཤིང་བལ་གྱི་འདབ་མ་ལ་བསྒོས་ཏེ་མོ་མཚན་ལ་གླན་པ་བྱས་ན་ཟུག་གཟེར་དང་བཅས་པ་འཇོམས་སོ། །མོ་མཚན་གྱི་ནད་
[388b.2]མཁྲིས་པ་ལས་གྱུར་པ་ལ་ནི་བླུགས་པ་དང་། བསྐུ་བྱུག་དང་། རས་བལ་གྱི་འདབ་མ་གླན་པའི་ཆོ་ག་རྣམས་བྱའོ། །མཁྲིས་པ་འཇོམས་ཤིང་བསིལ་བའི་ནུས་པ་དང་ལྡན་པའི་སྨན་དང་སྦྱར་བའི་མར་གྱིས་སྣུམ་ཆོས་བྱའོ། །ཉེའུ་ཤིང་གི་རྩ་བ་སྲང་བཞི་བརྒྱ་
[388b.3]བརྡུངས་ཏེ་བཙིར་བའི་ཁུ་བ་དང་། དེ་དང་མཉམ་པའི་འོ་མ་དང་། མར་སྲང་བརྒྱ་ཉི་ཤུ་རྩ་བརྒྱད་དང་། འཚོ་བྱེད་སྡེ་བཅུ་དང་། ཉེའུ་ཤིང་དང་། རྒུན་འབྲུ་དང་། པ་རུ་ཤ་ཀ་དང་། པི་ཡ་ལ་དང་། བ་ལ་རྣམ་གཉིས་དང་། ཤིང་མངར་དང་། དེ་རྣམས་ཞོ་གཉིས་
[388b.4]གཉིས་ཞིབ་ཏུ་བཏགས་པའི་ཕྱེ་མ་དང་། དེ་རྣམས་ལྷན་ཅིག་བསྐོལ་ཏེ་བསྒྲངས་པའི་ནང་དུ་སྦྲང་རྩི་དང་། པི་པི་ལིང་གི་ཕྱེ་མ་སྲང་བརྒྱད་བརྒྱ་དང་། ཁ་ར་སྲང་སུམ་ཅུ་བཏབ་སྟེ་ལྡེ་གུར་བྱས་པ་ལས་སྲང་ཕྱེད་ཕྱེད་ཟོས་ན་མངལ་གྱི་ནད་དང་། ཁྲག་ནད་དང་། ཁུ་ཆུའི་
[388b.5]ནད་འཇོམས་པར་བྱེད་དོ། །ཉལ་ཕོད་པ་དང་། བུ་སྐྱེ་བའི་མཆོག་ཡིན་ནོ། །དེ་བཞིན་དུ་གློ་འགྲམས་པ་དང་། གློ་གཅོང་ཟད་བྱེད་དང་། ཁྲག་དང་། མཁྲིས་པ་དང་། ལུད་པ་དང་། དབུགས་མི་བདེ་བ་དང་། ཧ་ལི་མ་ཀ་ཞེས་བྱ་བའི་ནད་དང་། མིག་
[388b.6]སེར་དང་། རླུང་དང་། ཁྲག་ལས་གྱུར་པའི་ནད་དང་། མེ་དབལ་དང་། གློ་སྙིང་ན་བ་དང་། མགོ་ན་བ་དང་། བརྗེད་བྱེད་ཀྱིས་ཉམ་ཐག་པ་དང་། ད་རྒན་ནང་དུ་འགུག་པ་དང་། ཕྱིར་གྱེད་པའི་ནད་དང་། མྱོས་པ་དང་། སྨྱོ་བྱེད་རྣམས་འཇིག་པར་བྱེད་དོ། །གོང་
[388b.7]གི་བསྐོལ་བའི་ཁུ་བ་སྲང་སྟོང་ཉི་ཤུ་རྩ་བཞིའི་ནང་དུ་མར་དང་ཏིལ་མར་སྲང་ཕྱེད་བསྲེས་པ་སྲང་བརྒྱ་ཉི་ཤུ་རྩ་བརྒྱད་དང་། དེའི་བཞི་འགྱུར་གྱི་འོ་མ་དང་། པི་པི་ལིང་དང་། ཀ་ཀ་ན་སི་དང་། ཁ་ར་དཀར་པོ་དང་། ཛི་བནྟི་དང་། ཀྵི་ར་ཀ་ཀོ་ལི་དང་། སྟི་ར་
[389a]
[389a.1]དང་། ཉེའུ་ཤིང་དང་། ཟི་ར་རྣམ་གཉིས་དང་། པ་ཡ་སྱ་དང་། ཤྲ་བ་ནི་དང་། མོན་སྲན་སྡེའུ་དང་། ཤིང་པི་ལུ་དང་། མོན་སྲན་གྲེའུ་གསུམ་གྱི་ལོ་མ་དང་། དེ་རྣམས་བཏགས་པའི་ཕྱེ་མ་དང་ལྷན་ཅིག་ཡང་བསྐོལ་ཏེ་མར་ལུས་པ་ལས་འཐུངས་ན་རླུང་
[389a.2]དང་མཁྲིས་པ་ལས་གྱུར་པའི་ནད་འཇོམས་པར་བྱེད་དེ་བུ་སྦྱིན་པར་བྱེད་པ་ཡིན་ཏེ། མོ་མཚན་ནས་ཁྲག་འཛག་པ་དང་། ཟླ་མཚན་སྐྱོན་དང་བཅས་པ་རྣམས་ལ་ནད་གཞི་ཇི་ལྟ་བ་བཞིན་དུ་གང་དང་ལྡན་པ་བརྟགས་ཏེ་ཐུན་ཚད་ཀྱང་དེ་ལྟར་བྱའོ། །ཤིང་མངར་དང་། སྦྲང་རྩི་
[389a.3]དང་། ཆུ་ཤིང་གི་རྩ་བ་དང་། སྐྱེར་པའི་རྩ་བ་དང་། ཤིང་ཏ་ལའི་ས་བོན་དང་། པྲི་ཡང་ཀུ་དང་། དེ་རྣམས་འབྲས་བཀྲུས་པའི་ཆུ་དང་སྦྱར་ཏེ་འཐུངས་ན་ཁྲག་ལེགས་པར་གནས་པར་བྱེད་ཅིང་ཁྲག་དཀར་བ་དང་། ཧ་ཅང་དམར་བ་རྣམས་སེལ་ཏོ། །པ་ཐ་དང་། ཤིང་འཛམ་བུ་
[389a.4]དང་། ཨ་མྲའི་རྐང་པ་དང་། སྲུ་སྲུའི་རྩ་བ་དང་། སྐྱེར་ཁཎྜ་དང་། ཨམ་པ་ཀས་དང་། ཤལ་མ་ལིའི་ཐང་ཆུ་དང་། ས་མངྒ་དང་། དུག་མོ་ཡུངས་ཀྱི་ཤུན་ཕྲག་དང་། བཱ་ལ་ལི་ཀ་དང་། བིལ་བ་དང་། བོང་ང་དཀར་པོ་དང་། སེང་ཕྲོམ་དང་། གླ་སྒང་དང་། བཙག་དང་།
[389a.5]བཅའ་སྒ་དང་། ཤིང་མངར་དང་། མ་ཙི་ཀ་དང་། ཙནྡན་དམར་པོ་དང་། ཀད་ཕ་ལ་དང་། ཀ་དང་ཀ་དང་། དུག་མོ་ཡུངས་དང་། ཨ་ནན་ཏ་དང་། ད་ཏ་ཀི་དང་། ཤིང་ཏོག་མ་དུ་ཀ་དང་། སྟང་ཟིལ་དང་། དེ་རྣམས་བཏགས་པའི་ཕྱེ་མ་སྦྲང་རྩི་དང་། འབྲས་
[389a.6]བཀྲུས་པའི་ཆུ་དང་སྦྱར་བ་རྒྱུ་སྐར་རྒྱལ་ལ་བླུད་ན་གཞང་འབྲུམ་དང་ཚད་པར་འཁྲུ་སྟེ་ཡང་དང་ཡང་ཁྲག་ཏུ་འབྱུང་བ་དང་། སྲིན་བུ་ལས་གྱུར་པའི་ནད་དང་། བྱིས་པ་རྣམས་ཀྱི་སྲིན་ནད་རྣམས་འཇོམས་སོ། །མངལ་དང་མོ་མཚན་གྱི་ནད་ཁྲག་གནག་པ་དང་། དཀར་ལ་རྩ་
[389a.7]གནག་པ་རྣམས་སེལ་ཏོ། །ཕྱེ་མ་འདི་ནི་སྐར་མ་རྒྱལ་དང་རྗེས་སུ་མཐུན་པ་ཡིན་ཏེ་གོང་མའི་ནད་རྣམས་ལ་རབ་ཏུ་ཕན་ནོ། །ཞེས་དྲང་སྲོང་ཆེན་པོ་རྒྱུན་ཤེས་ཀྱི་བུས་མཆོག་ཏུ་བསྔགས་སོ། །བད་ཀན་ལས་གྱུར་པའི་མངལ་གྱི་ནད་ལ་ནི་སྨན་ཐམས་ཅད་རྩུབ་པ་དང་དྲོ་བག་
[389b]
[389b.1]ཏུ་སྦྱར་རོ། །ད་ཏ་ཀི་དང་། སྐྱུ་རུ་རའི་ལོ་མ་དང་། ལིག་བུ་མིག་དང་། ཤིང་མངར་དང་། ཨུཏྤ་ལ་དང་། ཤིང་འཛམ་བུ་དང་། ཨ་མྲའི་ཚི་གུ་དང་། ནག་ཚུར་དང་། སེང་ཕྲོམ་དང་། ཀད་ཕ་ལ་དང་། ཏིན་ཏུ་ཀ་དང་། རྒྱམ་ཚ་དང་། སེའུ་འབྲུ་དང་། ཤིང་ཚྭ་དང་། ཨུ་དུམྦཱ་ར་དང་
[389b.2]བིལ་བ་གཞོན་ནུ་དང་། དེ་རྣམས་ཞོ་གཉིས་བཏགས་པའི་ཕྱེ་མ་ར་གཅིན་དང་དེའི་བཞི་འགྱུར་གྱི་འོ་མ་དང་། ཏིལ་མར་སྲང་སུམ་ཅུ་རྩ་གཉིས་བསྐོལ་བའི་མར་ལུས་པ་ལས་བསྐུ་བྱུག་དང་། རས་བལ་གྱི་འདབ་མས་གླན་པ་དང་། མས་གཏོང་བ་རྣམས་བྱས་ན་མོ་
[389b.3]མཚན་སྐྲང་བ་དང་། མོ་མཚན་ཕྱིར་རློག་པ་དང་། བསྐུ་དཀའ་ཞིང་རེངས་པ་དང་། ནལ་ནལ་པོ་སྤྱི་བག་ཏུ་འཛག་པ་དང་། མོ་མཚན་ཕྱིར་འབུར་བ་དང་། ནང་དུ་ཞུམ་པ་དང་། མོ་མཚན་འབྲུམ་པ་དང་ལྡན་ཞིང་ཟུག་གཟེར་དང་བཅས་པ་རྣམས་ལ་ཕན་ནོ། །ཁ་
[389b.4]ཟས་སུ་ནས་དང་། བཏུང་བ་ནི་ཨ་རུ་རའི་ཆང་དང་བུར་ཆང་དང་ཏིལ་མར་རྣམས་བསྟེན་པར་བྱའོ། །པི་པི་ལིང་དང་། ལྕགས་ཕྱེ་དང་། ཨ་རུ་ར་དང་། དེ་རྣམས་ཀྱི་སྦྱོར་བ་སྦྲང་རྩི་དང་བཅས་པར་སྦྱར་ན་ཕན་ནོ། །ནག་ཚུར་དང་། འབྲས་བུ་གསུམ་དང་། ནག་
[389b.5]ཚུར་བྱ་བལ་མ་དང་། ཨ་མྲ་དང་། ཤིང་འཛམ་བུའི་རུས་པ་དང་། ད་ཏ་ཀི་དང་། དེ་རྣམས་ཀྱི་ཕྱེ་མ་སྦྲང་རྩི་དང་སྦྱར་བ་བླུད་ན་མོ་མཚན་ནས་སྤྱི་བག་ཏུ་འཛག་པ་རྣམས་དཀོན་ཏེ་རྩུབ་པར་བྱེད་དོ། །རྒྱ་སྐྱེགས་ཤིང་དང་། ད་ཏ་ཀི་དང་། ཤིང་འཛམ་བུ་དང་། ནག་
[389b.6]ཚུར་དང་། ས་མང་ག་དང་། མོན་ཆ་ར་དང་། སྲ་རྩི་པོག་དང་། དེ་རྣམས་ཀྱི་ཕྱེ་མ་སྦྲང་རྩི་དང་སྦྱར་ན་མོ་མཚན་དྲི་མི་ཞིམ་པ་དང་། སྤྱི་བག་ཏུ་འཛག་པ་དང་། རྣགས་པ་དང་། རེངས་པ་རྣམས་ལ་འདོད་པ་ཡིན་ནོ། །དོང་གའི་སྡེ་ཚན་བསྐོལ་བའི་ཁུ་བས་
[389b.7]བླུགས་པར་བྱ་བ་དང་། མོ་མཚན་བསྒུལ་དཀའ་ཞིང་རེངས་པ་དང་། རྩུབ་པ་རྣམས་ལ་ནི་མཉེན་པར་བྱ་བའི་ཆོ་ག་རྣམས་བྱ་སྟེ། དེ་ཡང་ཤ་ཁུ་ལེགས་པར་གཡོས་སུ་བྱས་པ་དང་། ཀྲི་ས་ར་དང་། འོ་ཐུག་རྣམས་ཀྱིས་མོ་མཚན་གྱི་ནང་དུ་གཞག་ཅིང་
[390a]
[390a.1]དགང་བར་བྱའོ། །མོ་མཚན་དྲི་ང་བར་གྱུར་པ་ལ་ནི་སྨན་དྲི་ཞིམ་པ་དང་སྦྱར་བའི་ཏིལ་མར་རམ་མར་གྱི་ནང་དུ་ཕྱེ་མས་ལེགས་པར་བཏབ་པ་དང་། ཡང་ན་ཕྱེ་མ་ཉིད་དུ་སྦྱར་ན་མོ་མཚན་དྲི་མི་ཞིམ་པ་རྣམས་སེལ་བར་བྱེད་དོ། །བད་ཀན་ལས་གྱུར་པའི་མོ་
[390a.2]མཚན་གྱི་ནད་ལ་ནི་ཕལ་ཆེར་སྨན་ཚ་བ་དང་། བ་གཅིན་དང་སྦྱར་བ་མས་གཏོང་བར་བྱས་ན་ཕན་ནོ། །མཁྲིས་པ་ལས་གྱུར་པའི་ནད་ལ་ནི་ཕལ་ཆེར་ཤིང་དང་། འོ་མ་དང་བཅས་པ་མས་བཏང་ན་ཕན་ནོ། །རླུང་ལས་གྱུར་པ་ལ་ནི་ཕལ་ཆེར་ཏིལ་མར་དང་སྐྱུར་དང་སྦྱར་བ་མས་
[390a.3]བཏང་ན་ཕན་ནོ། །འདུས་པ་ལས་གྱུར་པ་ལ་ནི་ཐུན་མོང་དུ་སྦྱར་ཏེ་མས་བཏང་ན་ཕན་ནོ། །གསོ་བ་དེ་དག་གིས་མོ་མཚན་དག་པར་གྱུར་ན་ས་བོན་ལ་སྐྱོན་མེད་ཅིང་ཐ་མལ་པར་གྱུར་པ་དང་། རྣམ་པར་ཤེས་པ་འཇུག་པ་དང་། ཚོགས་པ་དེ་དག་ཡོད་ན་བུད་མེད་ཀྱི་བུ་ཆགས་
[390a.4]ཤིང་ཚོར་བར་ཤེས་སོ། །སྐྱེས་པའི་དབང་པོ་ལ་ཡང་ས་བོན་གྱི་མདོག་ལས་ཉེས་པ་རྣམས་བརྟགས་ཏེ། གལ་ཏེ་ནད་དང་བཅས་པ་ཡིན་ན་ནི་དེ་འཇོམས་པར་བྱེད་པའི་མཆོག་སྨན་ལས་རྣམ་པ་ལྔ་ལ་སོགས་པས་དག་པར་བྱའོ། །བཙོད་དང་། རུ་རྟ་དང་། རྒྱ་སྦོས་དང་།
[390a.5]འབྲས་བུ་གསུམ་དང་། ཤུ་དག་དང་། སེར་པོ་རྣམ་གཉིས་དང་། ཤིང་མངར་དང་། མེ་ད་དང་། ལ་ལ་ཕུད་དང་། པུ་ཙེ་ཤེལ་དང་། པ་ཡ་སྱ་དང་། ཤིང་ཀུན་དང་། ར་མཉེ་བ་སེར་པོ་དང་། ཨ་ཤྭ་གནྡྷ་དང་། ཉེའུ་ཤིང་དང་། དེ་རྣམས་ཞོ་གཉིས་གཉིས་བཏགས་པའི་ཕྱེ་མ་
[390a.6]མར་སྲང་སུམ་ཅུ་རྩ་གཉིས་དང་། དེའི་བཞི་འགྱུར་གྱི་འོ་མ་དང་བསྐོལ་ཏེ་མར་ལུས་པ་ལས་རན་པར་འཐུངས་ན་མོ་མཚན་དང་ཁུ་ཆུའི་ཉེས་པ་ཐམས་ཅད་ལ་རབ་ཏུ་བསྔགས་ཏེ། ཚེ་རིང་བ་དང་། ལུས་ཉམས་བརྟ་སྟེ་འཕེལ་ཞིང་རྒྱས་པ་དང་། ཡིད་གཞུངས་པ་དང་། བཀྲ་ཤིས་
[390a.7]པ་དང་། བུ་ཚ་སྐྱེད་པར་བྱེད་པའི་མཆོག་ཡིན་ནོ། །དེ་བཞིན་དུ་ཟླ་མཚན་རྒྱུ་བའི་དུས་སུ་མར་དེ་ལས་རན་པར་བུད་མེད་ལ་བླུད་ན་བུ་སྐྱེ་བར་འགྱུར་ཞིང་མངལ་གྱི་ནང་དུ་བུ་འཆིར་ཉེ་བ་ཡང་མར་འདི་འཐུངས་ན་འཚོ་བར་བྱེད་དེ་རབ་ཏུ་བསྔགས་སོ། །སྨན་མར་འདི་ནི་མཆོག་ཏུ་བྱིས་པ་རྣམས་
[390b]
[390b.1]ཀྱི་གདོན་འཇོམས་པ་དང་། ལུས་བརྟ་བའི་དམ་པ་ཡིན་ཏེ་སྨན་མར་འདིའི་མིང་ནི་འབྲས་བུའི་སྨན་མར་ཞེས་བྱའོ། །གསང་བའི་ནད་གསོ་བའི་ལེའུ་སྟེ་སུམ་ཅུ་རྩ་བཞི་བ་རྫོགས་སོ།། །།སྨན་དཔྱད་ཡན་ལག་ལྔ་པའོ།། །།དེ་ནས་དུག་ནད་ཀྱི་དམིགས་བརྟགས་
[390b.2]ཤིང་གསོ་བའི་ཆོ་གའི་ལེའུ་བཤད་པར་བྱ་སྟེ། སྔོན་ལྷ་དང་ལྷ་མ་ཡིན་རྣམས་བདུད་རྩི་འདོད་པའི་ཕྱིར་རྒྱ་མཚོ་ཆེན་པོ་བསྲུབས་པ་དང་བདུད་རྩིའི་སྔོན་རོལ་དུ་དུག་གི་སྐྱེས་བུའི་གཟུགས་ཅན་ཤིན་ཏུ་མི་བཟད་པར་སྣང་བ་ལུས་ཤིན་ཏུ་འབར་བའི་གཟི་བརྗིད་དང་ལྡན་པ་མཆེ་བ་བཞི་དང་
[390b.3]ལྡན་པ། སྐྲ་སེར་བ་མེ་ལྟར་འབར་བའི་མིག་དང་ལྡན་པ་དེས་འགྲོ་བ་གང་ལ་བལྟས་ཀྱང་བརྒྱལ་ཞིང་ས་ལ་ལྷགས་པར་གྱུར་ཏེ། དེའི་ཕྱིར་དུག་ཅེས་བྱའོ། །དེ་ནས་ཚངས་པ་ཆེན་པོས་ཧཱུཾ་ཞེས་བརྗོད་པས་སྐྱེས་བུ་དུག་གི་གཟུགས་ཅན་དེ་ཡང་གནས་པའི་དུག་དང་འགྲོ་བའི་དུག་
[390b.4]རྣམ་པ་གཉིས་སུ་གྱུར་ནས་རང་གི་ལུས་མི་སྣང་བར་སོང་ངོ་། །དེ་ནས་འཆི་བའི་བདག་ཉིད་ཅན་ཤིན་ཏུ་བརྟན་པ་དང་། རློམ་སེམས་པའི་ནུས་པ་དང་ལྡན་པ་གང་ཡིན་པ་དེ་ཀཱ་ལ་ཀུ་ཏྲ་ཞེས་བྱ་བ་དང་། ཨིཎྜ་ཞེས་བྱ་བ་དང་། བ་ཚ་ན་ཞེས་བྱ་བ་དང་། ཤིང་གི་ཞེས་བྱ་བ་དང་།
[390b.5]ཧ་ལ་ཧ་ལ་ཞེས་བྱ་བ་ལ་སོགས་པའི་རྩ་བའི་ནད་དང་། གཞན་ཡང་སྦྲུལ་དང་། སྲོག་ཆགས་ལུ་ཏ་དང་། མཆེ་བ་ཅན་ལ་སོགས་པ་རྣམས་སུ་ཞུགས་པར་གྱུར་ཏོ། །དེ་གཉིས་ལས་ཀྱང་འགྲོ་བའི་དུག་ནི་ཤིན་ཏུ་མི་བཟད་པ་ཡིན་ནོ། དེ་ལྟར་གནས་པའི་དུག་དང་འགྲོ་
[390b.6]བའི་དུག་རྣམ་པ་གཉིས་ནི་བཅོས་མ་མ་ཡིན་པ་སྟེ་རང་བཞིན་གྱི་དུག་ཅེས་བྱའོ། །བཅོས་མའི་དུག་ནི་དབྱིག་དུག་ཅེས་བྱའོ། །སྨན་སྣ་ཚོགས་པ་ལས་བྱས་པ་ཡིན་ཏེ་སྦྱོར་བའི་དབང་གིས་བྱས་པའི་དུག་དང་འགྲོ་བའི་དུག་ནི་མྱུར་བར་འཆི་བའི་ནུས་པ་མེད་དེ། ཡུན་རིང་བ་ནས་
[390b.7]འཆི་བའམ། ཡང་ན་སྐྲང་བ་དང་། སྐྱ་རྦབ་དང་། དམུ་རྫིང་དང་། སྨྱོ་བྱེད་དང་། གཞང་འབྲུམ་ལ་སོགས་པ་སྐྱེད་པར་བྱེད་དོ། །དེ་ལ་དུག་གི་རང་བཞིན་ནི་རྣོ་བ་དང་། དྲོད་ཆེ་བ་དང་། རྩུབ་པ་དང་། བསྐ་བ་དང་། ལུས་ལ་མྱུར་དུ་ཁྱབ་པར་བྱེད་པ་དང་། ཡང་བ་དང་།
[391a]
[391a.1]ལུས་འབར་ཏེ་མདངས་ཅན་དུ་གྱུར་པ་དང་། ཕྲ་བ་དང་། རོ་མི་གསལ་བ་དང་། མི་བཟད་པར་སྨིན་པ་ཡིན་ནོ། །མིའི་ཁོང་ནས་མདངས་སྐྱེད་པར་བྱེད་པ་ཡོད་ན་དུག་གི་ཡོན་ཏན་རྣོ་བ་ལ་སོགས་པ་རྣམས་ལས་བཟློག་པར་ཡོད་པ་ཡིན་པར་ཤེས་པར་བྱའོ། །
[391a.2]དུག་དེ་རླུང་དང་མཁྲིས་པ་ལ་ཤས་ཆེར་སྐྱེད་པའི་ནུས་པ་དང་ལྡན་ན་ནི་མི་རྣམས་ཀྱི་སྲོག་དེ་མ་ཐག་འཇོམས་པར་བྱེད་དོ། །དུག་དེ་ཐོག་མར་ཁོང་པར་ཕྱིན་ནས་དང་པོ་ཁྲག་འཛག་པ་འཁྲུག་པར་བྱེད་དོ། །ནད་གཞི་རྣམས་ཆ་མཉམ་པ་ཡིན་ན་ཡང་བད་ཀན་དང་། མཁྲིས་པ་
[391a.3]དང་། རླུང་གི་གནས་སུ་འཁྲུག་པར་བྱེད་དོ། །དེ་ནས་སྙིང་གི་གནས་སུ་ཕྱིན་ནས་མི་རྣམས་ཀྱི་སྲོག་འཕྲོག་པར་བྱེད་དོ། །དེ་ལ་གནས་པའི་དུག་གིས་དང་པོ་ལུས་ལ་ཕོག་པའི་ཚུལ་ནི་ལྕེ་གནག་པ་དང་། ཁོང་རེངས་པ་དང་། བརྒྱལ་བ་དང་། སྔང་བ་དང་། ངལ་བ་དང་
[391a.4]སྐྱུག་པ་ཡིན་ནོ། །གནས་སྐབས་གཉིས་པ་ལ་ནི་ནད་ཀྱི་ཤུགས་ལུས་འདར་བ་དང་། རྔུལ་བ་དང་། ཚ་བ་འུར་འུར་པོར་འདུག་པ་དང་། ལྐོག་མ་ན་བ་དང་། དུག་མ་ཞུ་བའི་གནས་སུ་ཕྱིན་ཏེ་སྙིང་ན་བ་དང་། ཟུག་པ་དང་། རྐན་སྐམས་པ་རྣམས་ཡིན་ནོ། །གནས་སྐབས་
[391a.5]གསུམ་པ་ལ་ནི་མ་ཞུ་བའི་གནས་ཕོ་བར་ཕྱིན་ཏེ་ཤིན་ཏུ་ཟུག་པ་དང་། མིག་ཉམས་ཞན་པ་དང་སེར་བ་དང་སྐྲང་བར་འགྱུར་རོ། །གནས་སྐབས་བཞི་པ་ལ་ནི་ཞུ་བའི་གནས་ལོང་ཀར་ཕྱིན་ནས་ན་བ་དང་། སྐྱིགས་བུ་དང་། ལུད་པ་སྐྱེ་ཞིང་རྒྱུ་མ་འཁྲུགས་པ་དང་། མགོ་ལྷག་པར་
[391a.6]ལྕི་བ་དང་། བད་ཀན་རབ་ཏུ་འཛག་པ་དང་། མདོག་སྐྱ་བ་དང་། ཚིགས་རྣམས་སུ་ཟུག་པ་ཡིན་ནོ། །གནས་སྐབས་ལྔ་པ་ལ་ནི་ནད་གཞི་ཐམས་ཅད་འཁྲུགས་ཤིང་ན་བ་དང་ཞུ་བའི་གནས་སུ་ཟུག་ཅིང་ན་བ་ཡིན་ནོ། །གནས་སྐབས་དྲུག་པ་ལ་ནི་འདུ་ཤེས་རབ་ཏུ་ཉམས་པ་དང་།
[391a.7]ལྷག་པར་འཁྲུ་བ་དང་། ཕྲག་གོང་དང་། སྒལ་ཚིགས་མེད་པ་དང་། དཔྱི་དང་། དེ་རྣམས་བྱེ་ཞིང་ལྷོད་པ་ཡིན་ནོ། །གནས་སྐབས་བདུན་པ་ལ་ནི་སྐྱེས་བུ་འཆི་བར་བྱེད་དོ། །དུག་གིས་ཕོག་མ་ཐག་པའི་གནས་སྐབས་སུ་དང་པོ་སྐྱུག་སྨན་བཏང་སྟེ་ཆུ་གྲང་གིས་གཏོར་རོ། །དེ་ནས་
[391b]
[391b.1]དུག་ལ་ཕན་པའི་སྨན་མར་དང་སྦྲང་རྩི་དང་སྦྱར་བ་མྱུར་དུ་སྦྱིན་ནོ། །གནས་སྐབས་གཉིས་པ་ལ་ནི་གོང་མ་བཞིན་དུ་སློན་བྱས་པ་དེའི་འོག་ཏུ་བཀྲུ་སྨན་བྱའོ། །བཏུང་བ་ཡང་གོང་མ་ལྟར་སྦྱར་རོ། །གསུམ་པ་ལ་ནི་དུག་འཇོམས་པའི་སྨན་གྱི་བཏུང་བ་དང་། སྣ་སྨན་དང་། མིག་སྨན་
[391b.2]དང་སྦྱར་ན་ཕན་ནོ། །བཞི་པ་ལ་ནི་སྣུམ་དང་བཅས་པའི་དུག་སྨན་གྱི་བཏུང་བ་སྦྱར་རོ། །གནས་སྐབས་ལྔ་པ་ལ་ནི་ཤིང་མངར་བསྐོལ་བའི་ཁུ་བ་དང་སྦྲང་རྩི་དང་སྦྱར་བ་དུག་ལ་ཕན་པའི་སྨན་གྱི་བཏུང་བ་དང་བཅས་པ་གཏང་ངོ་། །དྲུག་པ་ལ་ནི་འཁྲུ་བ་གསོ་བའི་ཆོ་ག་བྱའོ། །གནས་
[391b.3]སྐབས་བདུན་པ་ལ་ནི་སྣ་སྨན་བུད་པ་དང་། སྤྱི་བོར་རྒྱ་གྲམ་དུ་དབྲལ་ཏེ་དེའི་ནང་དུ་ཤ་འམ་ཁྲག་གཞུག་པར་བྱའོ། །ཀོ་ཤ་ཏ་ཀི་དང་། ལངྒ་ལི་དང་། པ་ཐ་དང་། ལྕམ་པ་དང་། སླེ་ཏྲེས་དང་། ཨ་རུ་ར་དང་། ཤེ་ལུ་དང་། ཤྲི་ཤ་དང་། གེ་རི་ཀརྞི་ཀ་དང་། ཡུང་བ་དང་། ཨ་ཧཱ་
[391b.4]དང་། བ་སྤྲུ་བ་དང་། སྦྲང་རྩི་དང་། ཚ་བ་གསུམ་དང་། བྲི་ཧ་ཏི་རྣམ་གཉིས་དང་། ཐལ་ཏྲེས་དང་། བ་ལ་དང་། དེ་རྣམས་བསྐོལ་བའི་ཁུ་བ་ལས་གཞི་བླངས་པའི་འབྲས་ཐུག་གྲང་བའི་ནང་དུ་མར་དང་སྦྲང་རྩི་དང་བཅས་པས་སློན་ཁྲུས་ལ་སོགས་པའི་ལས་བྱེད་པའི་འོག་ཏུ་དུག་
[391b.5]འཇོམས་པའི་སྨན་འདི་ཐམས་ཅད་སྦྱར་རོ། །དེ་བཞིན་དུ་ཤིང་མངར་དང་། ཤིང་ཏོག་མ་དུ་ཀ་དང་། པདྨ་གེ་སར་དང་། ཙནྡན་དང་། སྟང་ཟིལ་དང་། རྒྱ་སྤོས་དང་། རུ་རྟ་དང་། བ་བླ་དང་། ལྡོང་རོས་དང་། པྲི་ཡང་ཀུ་དང་། ཚ་བ་གསུམ་དང་། འབུ་སུ་ཧང་དང་། ནཱ་ག་པུཥྤ་
[391b.6]དང་། གེ་སར་དང་། ཧ་རེ་ཎྱ་ཀ་དང་། ཆུའི་ཤིང་མངར་དང་། སྤང་སྤོས་དང་། གི་ཝང་དང་། ཀ་ལ་མ་ཀ་དང་། ཤྲི་བེཤྟ་ཀ་དང་། སྲ་རྩི་པོག་དང་། ཤུ་ཏི་དང་། གུར་གུམ་དང་། བ་ལ་དང་། ཏ་མ་ལའི་ལོ་མ་དང་། བལ་བུའི་ལོ་མ་དང་། སྟག་པའི་ལོ་མ་དང་། པུ་ཙེ་ཤེལ་དང་།
[391b.7]སེར་པོ་རྣམ་གཉིས་དང་། དེ་རྣམས་བུ་མོ་གཙང་མ་སྨྱུང་བ་དང་ལུས་ཀྱི་ཁྲུས་བྱས་ཏེ་གོས་གཙང་མ་བགོས་པས་སྨན་བཏགས་ཏེ་སྦྲང་རྩི་དང་སྦྲུས་ལ་རི་ལུར་བྱས་ནས་བྲམ་ཟེ་ལ་མཆོད་པར་བྱས་ནས་ཅི་རིགས་པར་སྦྱར་ཏེ་རི་ལུར་བྱས་ལ་སྨན་པ་དེས་སྔགས་འདི་རྩེ་གཅིག་པར་བཟླས་བརྗོད་བྱའོ། །
[392a]
[392a.1]ན་མཿཔུ་རུ་ཥ་སིདྷཱ་ཡ། ན་མ་ནཱ་རཱ་ཡ་ཙ་ན། ཡ་བ་སའུ་ནཱ་བྷི། ཛཱ་ན་ཏི། ར་ཎེ་ཀྲྀཥྞ་པ་རཱ་ཛ་ཡམ་ཨེ་ཏེ་ནྱ་སྱད་ཏྱ་བ་ཀྲེ་ཎ། ཨ་ན་དོ་མེ་པྲ་སིདྡྷ་རུ། ན་མོ་བཻ་ཌཱུརྱ་མ་ཏེ་ཧཱུ་རུ་ཧཱུ་རུ། རཀྵ་མཱཾ་སརྦ་བྱི་ཤྭེ་བྷྱོ། གོ་རཱི་གནྡྷ་རཱི། ཙཎྜ་ལཱི་མ་ཏཾ་གཱི་སྭཱ་ཧཱ། དེ་ལྟར་སྔགས་ཀྱིས་བཏབ་པའི་
[392a.2]སྨན་དེ་ལྟར་བཏབ་སྟེ་སྔགས་འདི་ཡང་བཟླའོ། །ཧ་རེ་མའི་སྭཱ་ཧཱ། ཞེས་བརྗོད་དོ། །དེས་བཏུང་བ་དང་སྣ་སྨན་དང་། སྐྱུག་སྨན་དང་མཁྲིག་མར་བཅིངས་པ་ལ་སོགས་པ་སྦྱར་ན་དུག་མ་ལུས་པ་ཐམས་ཅད་དང་། རོ་ལངས་ཀྱི་གདོན་དང་། སྡིག་པའི་ལས་ཐམས་ཅད་དང་། མ་ར་ཀ་བྱ་ཏི་དང་། མུ་
[392a.3]གེའི་གནོད་པ་དང་། འཐབ་མོ་དང་། སེར་བའི་འཇིགས་པ་རྣམས་སེལ་ཞིང་བདེ་ལེགས་སུ་འགྱུར་བ་དང་ཞི་བར་བྱེད་པའི་མཆོག་ཡིན་ནོ། །སྦྱོར་བ་འདི་ནི་ཟླ་ཤར་ཞེས་བྱའོ། །ཁོང་པར་དུག་རང་ཞུ་བ་དང་། སྨན་གྱིས་ཞི་བར་བྱས་སམ། །མེས་བསྲེགས་སམ། རླུང་
[392a.4]གིས་བསྐམས་ཀྱང་རུང་སྟེ། དུག་གི་རང་བཞིན་གྱི་ཡོན་ཏན་ནི་མི་འདོར་བ་ཡིན་ཏེ། དེ་ནི་ཉེས་པ་འཁྲུགས་པར་བྱེད་པ་ཞེས་བྱ་བའི་དུག་གི་ལས་དང་ལྡན་པ་ཡིན་ཏེ། དུག་གི་ནུས་པ་ནི་ཆུང་བ་ཡིན། དུག་དེ་བད་ཀན་དང་ལྡན་པ་ཡིན་པར་མ་ཤེས་ན་ནི་ལོ་གྲངས་སུ་ནད་རྗེས་སུ་
[392a.5]འབྲེལ་བ་ཡིན་སྟེ། དུག་དེས་ན་ཞིང་ཉམ་ཐག་པར་གྱུར་ན་ནི་ཕྱི་ས་མདོག་སྣ་ཚོགས་སུ་འབྱུང་ཞིང་ཁོང་འཁྲུགས་དང་། ཁྲག་ནད་མ་རུངས་པར་འགྱུར་བ་དང་། སྐོམ་དད་ཆེ་བ་དང་། ཁ་ཟས་ཡི་གར་མི་འོང་བ་དང་། བརྒྱལ་བ་དང་། སྐྱུགས་པ་དང་། སྐད་འདར་འདར་པོར་སྨྲ་
[392a.6]བ་དང་། མེ་དྲོད་ཉམས་པ་དང་། དུག་གིས་ནད་གཞི་འཁྲུགས་པས་དམུ་རྫིང་གི་རྟགས་ཀྱང་དེ་ལ་སྣང་བ་ཡིན་ནོ། །གལ་ཏེ་དུག་མ་ཞུ་བའི་གནས་ཕོ་བར་བབ་ན་ནི་བད་ཀན་དང་རླུང་གི་ནད་སྐྱེད་པར་བྱེད་དོ། །ཞུ་བའི་གནས་སུ་བབ་ན་ནི་རླུང་དང་མཁྲིས་པ་སྐྱེད་པར་བྱེད་དོ། །
[392a.7]དུག་མགོ་ལ་བབ་ན་ནི་མགོའི་སྐྲ་འབྱི་བར་འགྱུར་རོ། །ཅི་ལྟར་བྱ་འདབ་མ་དང་བྲལ་བ་བཞིན་ནོ། །དུག་དེ་ལུས་ཟུངས་རྣམས་ལ་བབ་ན་ནི་ལུས་ཟུངས་ཀྱི་ནད་སྐྱེས་པའམ་ཡང་ན་ལུས་ཟུངས་ལ་བརྟེན་ནས་ནད་གཞན་སྐྱེད་པར་བྱེད་དོ། །ཡང་ན་ཤར་ཕྱོགས་ཀྱི་རླུང་གིས་ཕོག་སྟེ།
[392b]
[392b.1]དུག་ལངས་པ་དང་། ཁ་ཟས་མ་ཞུ་བ་དང་། ནམ་རྨུགས་ཏེ་གྲང་བ་དང་། ཉིན་པར་གཉིད་ལོག་པ་དང་། ཁ་ཟས་མི་མཐུན་པ་བསྟེན་པས་ལུས་ཟུངས་རྣམས་འཁྲུགས་པར་བྱས་ཏེ་དུག་ལངས་པས་ཉེས་པ་འཁྲུགས་པར་བྱེད་པ་ཞེས་བྱའོ། །དེ་ལ་གསོ་བ་ནི་ཐོག་མར་དུགས་
[392b.2]ལེགས་པར་བྱས་ལ་གོང་འོག་ཏུ་ལུས་སྦྱང་བར་བྱའོ། །ཉེས་པ་འཁྲུགས་པར་བྱེད་པའི་ནད་ལ་ནི་དུག་འཇོམས་པའི་སྨན་སྦྲང་རྩི་དང་སྦྱར་བ་བལྡག་ཏུ་གཞུག་སྟེ། དེ་ཡང་པི་པི་ལིང་དང་། བྱ་མ་ཀ་དང་། སྤང་སྤོས་དང་། སེང་ཕྲོམ་དང་། སུག་སྨེལ་དང་། སྭརྫི་ཀ་དང་།
[392b.3]ཀུ་ཏན་ན་ཏ་དང་། རུ་རྟ་དང་། ཤིང་མངར་དང་། ཙནྡན་དང་། བཙག་ཡུག་སྣམ་དང་། དེ་རྣམས་ནི་དུག་འཇོམས་པའི་སྨན་ཞེས་བྱ་སྟེ། དེས་ན་དུག་འཇོམས་པའི་སྨན་ཉི་ཚེ་དང་སྦྱར་གྱི་གཞན་དུ་ནི་མི་སྦྱར་རོ། །དུག་མདའ་ལ་སོགས་པས་ཕོག་པའི་མཚན་མ་ནི་ཡང་དང་ཡང་ཕྲད་
[392b.4]མ་མ་ཏི་དང་། མདོག་འགྱུར་ཞིང་སྐྱ་བོར་འགྱུར་བ་དང་། ཡང་དང་ཡང་དུ་ཡིད་འབྱུང་བ་དང་། དེའི་ལུས་ལ་སྲིན་བུ་རྒྱུ་བ་སྙམ་དུ་སེམས་པ་དང་། ལུས་ལ་ཚོར་བ་མེད་ཅིང་ཚ་ཙག་ཙག་བྱེད་པ་དང་། ཆུ་སོ་དང་། སྒལ་ཚིགས་དང་། མགོ་དང་། ཕྲག་པ་དང་། ཚིགས་རྣམས་སུ་
[392b.5]ཟུག་གཟེར་དང་བཅས་པར་འགྱུར་བ་དང་། ཁྲག་ནག་པོ་ནད་ཁྲག་མང་དུ་འཛག་པ་དང་། སྐོམ་དད་ཆེ་བ་དང་། བརྒྱལ་བ་དང་། རིམས་ཀྱིས་འདེབས་པ་དང་། ཚ་བ་འུར་འུར་པོར་འདུག་པ་དང་། མིག་དམར་བ་དང་། སྐྱུགས་པ་དང་། དབུགས་མི་བདེ་བ་དང་། སྐྱིགས་བུ་དང་། རྨའི་
[392b.6]མཐའ་འཁོར་དམར་ཞིང་སེར་བ་དང་དབུས་གནག་པ་ཡིན་ནོ། །རྨ་སྐྲངས་ཤིང་སྨིན་པ་དང་། དྲི་མི་ཞིམ་པ་དང་ཤ་ནག་པོར་འགྱུར་བ་དང་། ཤ་རུལ་ཞིང་འདྲུལ་བ་དང་། སྤྱི་བག་ཏུ་འཛག་པ་རྣམས་ཡིན་ནོ། །དུག་མདས་གནད་དུ་མ་བསྣུན་པ་མེད་པ་མྱུར་དུ་སྙིང་གའི་ཕྱོགས་སུ་བསིལ་
[392b.7]བའི་ཆོ་ག་རྣམས་བྱ་སྟེ། ཟུག་རྔུ་ཕྱུང་ལ་དེའི་འོག་ཏུ་ལྕགས་བསྲེགས་པས་རྨ་བསྲེག་པར་བྱའོ། །ཡང་ན་མུ་ཀ་ཀ་དང་། གེ་རི་ཀ་དཀར་པོ་དང་། ཀད་ཕ་ལའི་ཤིང་ཤུན་དང་། དེ་རྣམས་ཏམ་མྲ་བལ་ལི་དང་། ཤི་རི་ཤ་དང་། གྲིད་ད་ན་ཁྱ་དང་འདི་རྣམས་ཀྱི་ཐལ་བས་བསྲེག་གོ། །
[393a]
[393a.1]ཤུ་ཁ་ན་བ་དང་། བོང་ང་དཀར་པོ་དང་། ཀཎྜ་ཀ་རིའི་རྩ་བ་དང་། དེ་རྣམས་ཀྱི་ལྡེ་གུས་རྨ་ལ་བསྐུའོ། །གཞན་ཡང་དུག་འཐུངས་པ་དང་། དུག་གིས་བཟུང་བའི་གསོ་བ་ཇི་ལྟར་འོས་པར་སྦྱར་རོ། །རྨ་རྣགས་པ་ལ་ནི་མཁྲིས་པའི་མེ་དབལ་གྱི་གསོ་བ་རྣམས་སྤྱད་དོ། །
[393a.2]བུད་མེད་རང་སྐལ་བ་དང་ལྡན་པའི་ཆེད་དུ་རང་གི་ཁྱིམ་ཐབ་ལ་དབྱིག་དུག་ཁ་ཟས་དང་སྦྱར་བ་སྦྱིན་པ་འམ། རྒྱལ་པོ་དང་འཁོན་པའི་དགྲས་རྒྱལ་པོའི་འཁོར་ཉེ་བར་གནས་པ་ལ་གླ་རྔན་བྱིན་ཏེ་ཁ་ཟས་ཀྱི་ནང་དུ་དབྱིག་དུག་བྱིན་ན་དབྱིག་དུག་གིས་ཟིན་པའི་མཚན་མ་ནི་མདོག་སྐྱ་བ་དང་། ལུས་སྐེམ་
[393a.3]ཞིང་རྗུད་པ་དང་། མེའི་དྲོད་ཆུང་བ་དང་། ལུད་པ་ལུ་བ་དང་། དབུགས་མི་བདེ་བ་དང་། རིམས་ཀྱིས་ཉམ་ཐག་པ་དང་། རླུང་ལམ་གཞན་དུ་ཞུགས་པ་དང་། རྟག་ཏུ་གཉིད་འོང་བ་དང་། སེམས་ལས་ཆེ་ཞིང་ཡིད་མི་བདེ་བར་འགྱུར་བ་དང་། ལྟོ་བ་དང་། མཆིན་པ་དང་། མཆེར་པ་ཆེར་
[393a.4]སྐྱེས་ཏེ། སྐད་གསང་དམའ་བ་དང་། ཉམ་ཆུང་བ་དང་། སྒྱིད་ཞན་པ་དང་། སྐྲང་བ་དང་། རྟག་ཏུ་ལྟོ་སྦོ་བ་དང་། རྐང་པ་དང་། ལག་པ་སྐེམ་ཞིང་ན་བ་དང་། ཕལ་ཆེར་རྨི་ལམ་གྱི་ནང་དུ་ཅེ་སྤྱང་དང་། བྱི་ལ་དང་། སྲེ་མོ་དང་། སྦྲུལ་འདི་རྣམས་མཐོང་ཞིང་ནགས་དང་མཚོ་
[393a.5]རྣམས་ཀྱང་སྐམ་པར་བྱེད་པ་མཐོང་བ་རྣམས་ཡིན་ནོ། །བདག་ཉིད་ཀྱི་ལུས་དཀར་པོ་ནག་པོར་མཐོང་བ་དང་། སྣ་དང་མིག་ཀྱང་མདོག་འགྱུར་བ་དང་། དབང་པོ་རྣམས་ཀྱང་ཉམས་པར་མཐོང་བར་འགྱུར་བ་ཡིན་ནོ། །དེ་དང་དེ་ལ་སོགས་པའི་གནོད་པ་མང་པོ་སྐྱེ་བར་འགྱུར་བའི་
[393a.6]དབྱིག་དུག་གིས་ཉམ་ཐག་པར་འགྱུར་བ་དེས་ལུས་འཇིག་པར་འགྱུར་རོ། །ལ་ལ་ནི་དེ་མ་ཐག་གསོ་བ་བྱས་ན་འཚོ་བ་ཡོད་དོ། །ཡང་དབྱིག་དུག་གིས་ཉམ་ཐག་པ་ལ་དེ་མ་ཐག་སློན་པའི་ཁ་ཟས་སྦྱིན་ཏེ། འཕྲལ་སྐྱུག་ཏུ་གཞུག་གོ། །དེ་ནས་དག་པར་བྱས་ནས་གསེར་སྦྱིན་པར་
[393a.7]བྱའོ། །ལྷག་མ་ནི་མདོའི་གནས་སུ་བཤད་པའི་ཆོ་ག་བཞིན་དུ་བྱའོ། །གསེར་དང་། དྲུབ་མར་ཅང་དང་། ཁ་ར་དང་། སྦྲང་རྩི་སྦྱར་བའི་ལྡེ་གུ་བལྡག་ཏུ་བཅུག་ན་སྦྱོར་བ་ཐམས་ཅད་ལས་བྱས་པའི་དབྱིག་དུག་དྲག་པོ་ཡང་རབ་ཏུ་ཞི་བར་བྱེད་དོ། །མུར་བ་དང་། སླེ་ཏྲེས་དང་། རྒྱ་སྤོས་
[393b]
[393b.1]དང་། པི་པི་ལིང་དང་། པ་ཏོ་ལ་དང་། དབྱི་མོ་དང་། ཙི་ཏྲ་ཀ་དང་། ཤུ་དག་དང་། གླ་སྒང་དང་། བྱི་དང་ག་དང་། འདི་རྣམས་དར་བ་དང་། ཞོ་ག་ཆུའམ། ཤ་ཁུ་སྐྱུར་པོ་དྲོ་འཇམ་ཙམ་ལ་བཏང་ན་དབྱིག་དུག་གིས་མེའི་དྲོད་ཉམས་པ་ཡང་འཇིག་པར་བྱེད་དོ། །ཕུག་རོན་གྱི་
[393b.2]ཤ་དང་། ཟུར་བ་དང་། མ་ནུ་དང་། འདི་རྣམས་བསྐོལ་ཏེ་གྲངས་པ་བླུད་ན་དབྱིག་དུག་དང་། སྐོམ་དད་ཆེ་བ་དང་། ཟུག་པ་དང་། ལུད་པ་དང་། དབུགས་མི་བདེ་བ་དང་། སྦོས་པ་དང་། ལུས་མི་བདེ་བ་ཚ་བ་རྣམས་འཇོམས་པར་བྱེད་པ་དང་། དུག་གི་རང་བཞིན་ཅན་གྱི་མི་ལ་
[393b.3]ཁ་ཟས་དུས་མ་ཡིན་བར་ཟོས་པས་ནད་གཞི་རྣམས་དང་ལྷན་ཅིག་འཁྲུགས་པ་དེ་ནི་བྱི་ཤ་སང་ག་སྟེ་ཞེས་བྱ་བའི་དུག་ནད་ཡིན་པར་བཤད་དེ། དེ་ལས་རྒྱལ་བར་བྱེད་པས་འགའ་ཞིག་འཚོ་བར་འགྱུར་རོ། །བྱི་ཤ་ས་ཀ་ཞེས་བྱ་བའི་དབྱིག་དུག་གི་ནད་ལ་བསྲུང་བར་བྱ་བ་ནི་
[393b.4]བཀྲེས་པ་དང་། སྐོམ་པ་དང་། ཚ་བ་དང་། ཉམ་ཆུང་བ་དང་། ཁྲོ་བ་དང་། མྱ་ངན་དང་། འཇིགས་པ་དང་། ངལ་བ་དང་། མ་ཞུ་བ་དང་། འཁྲུ་བ་དང་། གང་ཡང་མཁྲིས་པ་དང་། རླུང་འཕེལ་བར་བྱེད་པའི་རྒྱུ་དང་། ཏིལ་མར་གྱི་མེ་ཏོག་དང་། འབྲས་བུ་སྣོམ་
[393b.5]པ་དང་། སའི་རླངས་པ་སྣོམ་པ་དང་། འབྲུག་གི་སྒྲ་དང་། གླང་པོ་ཆེ་དང་། བྱི་བའི་སྒྲ་དང་། རོལ་མོའི་སྒྲ་དང་། ཉན་པ་དང་། ཤར་ཕྱོགས་ཀྱི་རླུང་དང་། ཨུཏྤ་ལའི་དྲི་སྣོམ་པ་དང་། གང་ཡང་མྱོས་པར་འགྱུར་བའི་བག་བསྟེན་ན་དུག་འཕེལ་བར་འགྱུར་བ་ཡིན་ཏེ་
[393b.6]སྤང་བར་བྱའོ། །དབྱར་ནི་ཆར་མང་པོ་འབབ་པའི་དུས་ཡིན་ཏེ། དེའི་ཚེ་དུག་ལ་ཆུ་མང་པོས་བརླན་པར་བྱས་ནས་ཁུ་བ་གཟགས་ཏེ་བཀྲུས་ན་དུག་གི་ནུས་པ་ཞན་པར་འགྱུར་ཏེ། དེ་བས་ན་སྟོན་སྤྲིན་མེད་པའི་དུས་སུ་སྐར་མ་རི་བྱི་ཤར་ཏེ་དེས་དུག་གི་མཐུ་འཕྲོག་པ་ཡིན་ནོ། །དེ་ལྟར་
[393b.7]སྨན་པ་མཁས་པས་ནད་ཀྱི་རང་བཞིན་དང་། གང་ལ་གོམས་པ་མེད་པ་དང་། གནས་སྐབས་གང་དུ་ནད་འཁྲུགས་པ་དང་། ནད་ཀྱི་སྟོབས་ཆེ་ཆུང་བརྟགས་ཏེ་དེའི་འོག་ཏུ་གསོ་བའི་ལས་སྤྱད་པར་བྱ་སྟེ། དེ་ལ་བད་ཀན་གྱི་རང་བཞིན་ཅན་གྱི་དུག་ནད་ལ་ནི་དྲོ་བ་དང་། རྩུབ་པ་དང་།
[394a]
[394a.1]རྣོ་བའི་སྐྱུག་སྨན་དང་བྱུག་པ་སྦྱར་རོ། །ཁ་ཟས་སུ་ནི་རོ་བསྐ་བ་དང་། ཚ་བ་དང་། ཁ་བ་རྣམས་སུ་སྦྱར་ན་དུག་གི་གནོད་པ་ཞི་བར་བྱེད་དོ། །མཁྲིས་པའི་རང་བཞིན་ཅན་གྱི་དུག་ནད་ལ་ནི་བཀྲུ་སྨན་དང་། བྱུག་པ་དང་། བླུགས་པ་རྣམས་ཀྱང་ཤིན་ཏུ་བསིལ་
[394a.2]བའི་ནུས་པ་དང་ལྡན་པར་བྱེད་དོ། །ཁ་ཟས་སུ་ནི་རོ་བསྐ་བ་དང་། ཁ་བ་དང་། མངར་བ་རྣམས་མར་དང་སྦྱར་བ་གཏང་ངོ་། །རླུང་གི་རང་བཞིན་ཅན་གྱི་དུག་ནད་ལ་ནི་སྨན་མངར་བ་དང་། སྣུམ་པ་དང་། སྐྱུར་བ་དང་། ལན་ཚྭ་དང་། མར་དང་སྦྱར་བ་བཟའ་བ་དང་། བྱུག་པ་དང་
[394a.3]ཤ་ལ་སོགས་པ་སྦྱར་ན་ཡང་ཕན་ནོ། །འདུས་པ་ལས་གྱུར་པའི་དུག་ནད་ཐམས་ཅད་ལ་ནི་བཀྲུ་སྨན་དང་། བྱུག་པ་དང་། བཟའ་བ་དང་། སྨན་ཐམས་ཅད་ལ་ཡང་མར་དང་སྦྱར་བ་བསྔགས་ཏེ། དུག་འཇོམས་པ་ལ་ནི་མར་དང་འདྲ་བ་གཞན་གང་ཡང་མེད་དོ། །ལྷག་པར་རླུང་
[394a.4]ཤས་ཆེ་བ་ལ་བཟང་ངོ་། །དུག་བད་ཀན་གྱི་གནས་སུ་བྱུང་ན་ནི་ཚེགས་ཆུང་ངུས་གསོ་སླ་བ་ཡིན་ནོ། །མཁྲིས་པའི་གནས་སུ་བྱུང་ན་ནི་གསོ་དཀའ་བ་ཡིན་ནོ། །དུག་ནད་ཀྱི་དམིགས་བརྟག་ཅིང་གསོ་བའི་ལེའུ་སྟེ་སུམ་ཅུ་རྩ་ལྔ་པ་རྫོགས་སོ།། །།དེ་ནས་སྦྲུལ་
[394a.5]གདུག་པས་ཟིན་པ་གསོ་བའི་ཆོ་གའི་ལེའུ་བཤད་པར་བྱ་སྟེ། དེ་ལ་སའི་སྟེང་ན་གནས་པའི་སྦྲུལ་གདུག་པ་ཅན་གྱི་རིགས་མདོར་བསྡུ་ན་རྣམ་པ་གསུམ་སྟེ། གདེངས་ཀ་ཅན་དང་། ལུས་འཁྱིལ་བ་དང་། ཁྲ་བོའི་རིགས་དང་གསུམ་སྟེ་དབྱེ་ན་རྣམ་པ་དུ་མ་གྲངས་མེད་པ་ཡོད་མོད་
[394a.6]ཀྱི་མདོར་བསྡུས་ཏེ་བཤད་པར་བྱའོ། །སྦྲུལ་གྱི་དུག་དེ་དག་གི་ཡོན་ཏན་ནི་ཁྱད་པར་དུ་རྩུབ་པ་དང་། ཚ་བ་དང་། སྐྱུར་བ་དང་། དྲོད་ཆེ་བ་དང་། མངར་བ་དང་། བསིལ་བ་ཡིན་ནོ། །དེ་ལ་སྦྲུལ་གྱི་རིགས་གདེངས་ཀ་ཅན་དང་། ལུས་འཁྱིལ་བ་དང་། ཁྲ་བོའི་རིགས་གསུམ་གྱི་བྱེ་བྲག་
[394a.7]ལས་རླུང་གི་རང་བཞིན་དང་། མཁྲིས་པ་དང་། བད་ཀན་གྱི་རང་བཞིན་རྣམས་གོ་རིམས་བཞིན་དུ་སོ་སོ་ནས་སྦྱར་རོ། །དེ་ལ་སྦྲུལ་གཞོན་ནུའི་དུག་ནི་དབྱར་གྱི་དུས་སུ་འཕེལ་ལ་སྦྲུལ་བར་མའི་དུག་ནི་དགུན་གྱི་དུས་སུ་འབྱུང་ངོ་། །སྦྲུལ་རྒན་པོའི་དུག་ནི་སོས་ཀ་ཚ་བའི་དུས་སུ་ལྡང་ངོ་། །
[394b]
[394b.1]དེ་ལས་གཞན་པའི་སྦྲུལ་གྱི་དུག་ནི་དུས་ཚིགས་རྣམས་ཀྱི་མཚམས་སུ་འབྱུང་ངོ་། །འཁོར་ལོ་དང་། གཤོལ་དང་། གདུགས་དང་། གཡུང་དྲུང་དང་། ལྕགས་ཀྱུ་དང་། དེ་རྣམས་ཀྱི་རི་མོའི་མཚན་དང་ལྡན་ཞིང་འགྲོས་ཤིན་ཏུ་མྱུར་བ་དང་ལྡན་པ་དེ་ནི་སྦྲུལ་གདེངས་ཀ་ཅན་
[394b.2]ཞེས་བྱའོ། །སྦྲུལ་འཁྱིལ་བ་ཞེས་བྱ་བ་ནི་རི་མོ་འཁྱིལ་བའི་བྱེ་བྲག་སྣ་ཚོགས་སུ་འདུག་པ་ཡིན་ནོ། །སྦྲུལ་གྱི་རིགས་ཁྲ་བོ་ཞེས་བྱ་བ་ནི་ཤིན་ཏུ་མདངས་གསལ་བའི་རི་མོ་དང་ལྡན་ཞིང་སྣུམ་པ་དང་། ཆུ་ཞེང་ཀུན་ཏུ་མདོག་སྣ་ཚོགས་སུ་རི་མོ་དེ་ལྟར་སྣང་བའོ། །གཞན་
[394b.3]ཡང་སྦྲུལ་གྱི་རིགས་སྲོག་ཆགས་གོ་ཏའི་བུ་གོ་ད་ར་ཞེས་བྱ་བའི་དུག་ནི་སྦྲུལ་གདེངས་ཀ་ཅན་དང་འདྲའོ། །དེ་དག་ལས་གཞན་པའི་སྦྲུལ་གྱི་རིགས་རྐང་པ་བཞི་པ་ནི་རིགས་འདྲེས་པ་ཡིན་ཏེ། མཚན་ཉིད་དང་རི་མོ་ཡང་འདྲེས་པར་སྣང་སྟེ་དེས་ཟིན་པ་ནི་འདུས་པའི་ནད་སྐྱེད་པ་ཡིན་ནོ། །
[394b.4]སྦྲུལ་གྱི་དུག་འཕེལ་བར་བྱེད་པའི་རྒྱུ་ནི་བཟའོ་སྙམ་པ་དང་། འཇིགས་པ་དང་། ལྷུང་བ་དང་། གཞན་གྱིས་རེག་པ་དང་། ཁྲོས་པ་དང་། སྡིག་པའི་ལས་དང་། ལྷ་དང་དྲང་སྲོང་རྣམས་ཀྱིས་བསྐུལ་བས་སྦྲུལ་མི་ལ་འཛིན་པ་ཡིན་ཏེ། དེ་དག་ནི་ཡམས་ཀྱི་རིམས་བཞིན་དུ་
[394b.5]ཚབས་ཆེ་བ་ཡིན་ནོ། །དེ་ལྟར་སྦྲུལ་གྱིས་ཟིན་པའི་རྒྱུ་ཇི་ལྟ་བ་བཞིན་དུ་ཤེས་ནས་དེ་ལྟ་དེ་ལྟར་གསོ་བར་བྱའོ། །སྦྲུལ་གྱི་རིགས་དེ་ལས་གཞན་པ་སྡིག་པ་བྱེད་པས་ལམ་བཅད་དེ་གནས་ནས་གང་དུ་སྐྱེས་བུ་རྒྱུ་བའི་ལུས་ཁ་ཆུ་དང་། དྲི་མ་དང་། རྣག་ཙམ་གྱིས་རེག་ཅིང་གནོད་
[394b.6]པར་བྱས་ཏེ་མཆེ་བའི་རྨ་ནི་སྣང་བ་དེ་ནི་མཆུས་གནོད་པར་བྱེད་པ་ཞེས་བྱའོ། །གང་གི་ལུས་ལ་མཆེ་བ་གཅིག་གམ། གཉིས་ཀྱི་རྗེས་སྣང་ཞིང་ཁྲག་མེད་པ་དེ་ནི་བྱ་དི་ད་ཞེས་བྱའོ། །མཆེ་བ་གཉིས་ཀྱི་རྗེས་སྣང་ཞིང་ཁྲག་དང་བཅས་པ་དེ་ནི་བྱ་ལུཔྟ་ཞེས་བྱའོ། །མཆེ་བ་གསུམ་
[394b.7]གྱིས་བཟུང་སྟེ་ཤ་ལ་སོགས་པ་ཕུག་ཅིང་ཁྲག་རྒྱུ་བའི་གནས་རྣམས་སུ་མཆེ་བས་ཕོག་པ་དེ་ནི་བི་ཚི་ན་ཞེས་བྱའོ། །མཆེ་བ་བཞིས་ཁྲག་གི་གནས་ཕུག་སྟེ་ཁྲག་འཛག་པ་དེ་ནི་བི་ཏི་ཏ་ཞེས་བྱའོ། །དེ་ལ་དང་པོ་གཉིས་ནི་དུག་མེད་པ་ཡིན་ནོ། །ཕྱི་མ་གཉིས་གསོ་བ་མེད་དོ། །དེ་ལ་
[395a]
[395a.1]མཆེ་བའི་དུག་གིས་ཟིན་མ་ཐག་ནི་ཐོག་མར་སྐྲང་བ་དེའི་འོག་ཏུ་ཁྲག་ལ་ཞུགས་པས་ན་ཁྲག་མ་རུངས་པས་ལུས་ལ་ཁྱབ་པར་བྱེད་དོ། །དེ་ནས་མཁྲིས་པ་ལ་ཁྱབ་ཅིང་དེས་ལུས་ཐམས་ཅད་ལ་ཁྱབ་པར་འགྲོ་སྟེ། ཇི་ལྟར་ཆུ་ལ་ཏིལ་མར་གྱིས་ཁྱབ་པ་བཞིན་ནོ། །རང་
[395a.2]བཞིན་གྱིས་འཇིགས་པ་སྐྱེ་བའི་མི་ལ་སྦྲུལ་གྱི་ལུས་ཀྱིས་རེག་པ་ལས་སྔངས་ཏེ་རླུང་འཁྲུགས་ནས་བརྒྱལ་བར་བྱེད་སྐྲངས་པར་འགྱུར་བ་དེ་ནི་སྦྲུལ་གྱི་ལུས་ཀྱིས་མངོན་པར་རེག་པའི་དུག་ཅེས་བྱའོ། །དྲི་མི་ཞིམ་པ་ཞེས་བྱ་བའི་སྲོག་ཆགས་ཡོད་དེ། དེས་བཟུང་བའམ་ཡང་
[395a.3]ན་སྲོག་ཆགས་གང་ཡང་རུང་བ་ནུབ་མོ་མ་ཚོར་བར་ཟིན་པ་ལས་བདག་ནི་སྦྲུལ་གྱིས་ཟིན་ནོ་སྙམ་ནས་དུག་གིས་རྟོག་པར་རིམས་དང་། སྐྱུགས་པ་དང་། བརྒྱལ་བ་དང་། ལུས་ཚ་བ་སྐྱེ་བ་འམ། ཡང་ན་མི་བདེ་བ་འམ། རྨོངས་བག་ཏུ་འདུག་པ་དང་། ཚད་པར་འཁྲུ་བ་དེ་
[395a.4]ནི་རྟོག་པ་ལས་གྱུར་པའི་དུག་ནད་ཅེས་བྱའོ། །སྦྲུལ་གྱིས་ཟིན་པའི་རྨ་ནད་དང་བཅས་པ་ལས་སྐྲང་བ་དང་། གཡའ་བ་དང་། ཟུག་གཟེར་དང་ལྡན་པ་དང་། ཚ་བ་འུར་འུར་པོར་འདུག་པ་དང་། རྨེན་བུ་བུ་ག་མདུད་པ་ལྟར་སྣང་ན་ནི་དུག་དང་བཅས་པ་ཡིན་ལ་དེ་ལས་བཟློག་པར་ནི་
[395a.5]དུག་མེད་པ་ཡིན་ནོ། །དེ་ལ་གདེངས་ཀ་ཆེན་པོའི་སྦྲུལ་གྱིས་ཟིན་པའི་དུག་གི་ཤུགས་རྣམ་པ་བདུན་དུ་གྱུར་ཏེ། དེ་ཡང་དང་པོ་ནི་ཁྲག་སྐྱོན་དང་བཅས་ཤིང་ནག་པོར་འགྱུར་བ་དེ་བཞིན་དུ་རྨ་ཁ་ལ་སོགས་པ་ཐམས་ཅད་དུ་མདོག་གནག་ཅིང་ལུས་ལ་གྲོག་མ་མང་པོ་རྒྱུ་བ་སྙམ་
[395a.6]སེམས་པ་ཡིན་ནོ། །གནས་སྐབས་གཉིས་པ་ལ་ཐོར་བུར་སྐྱེ་བར་འགྱུར་རོ། །གསུམ་པ་ལ་ནི་མགོ་ལྕི་ཞིང་དུད་པ་དང་། གློ་སྙིང་མི་བདེ་བ་དང་། རྨ་རྣགས་པའོ། །བཞི་པ་ལ་ནི་མཆིལ་མ་མང་བ་དང་། སྐྱུགས་པ་དང་། ཚིགས་རྣམས་འབྱེ་བ་དང་། སྒྱིད་སྐྱུར་བ་
[395a.7]རྣམས་ཡིན་ནོ། །ལྔ་པ་ལ་ནི་ཚིགས་རྣམས་འཇིག་པ་དང་། ཚ་བ་འུར་འུར་པོར་འདུག་པ་དང་། སྐྱིགས་བུ་འབྱུང་བ་རྣམས་ཡིན་ནོ། །དྲུག་པ་ལ་ནི་གློ་སྙིང་ན་བ་དང་། ཁོང་ལྕི་བ་དང་། བརྒྱལ་བ་དང་། ཁ་ཟས་ཡི་གར་མི་འཇུ་བ་དང་ཚད་པས་འཁྲུ་བ་རྣམས་ཡིན་ནོ། །
[395b]
[395b.1]བདུན་པ་ལ་ནི་ཁུ་ཆུའི་ནུས་པ་ཕྱིན་ཏེ་ཕྲག་གོང་དང་། རྒྱབ་ཀྱི་སྒལ་ཚིགས་དང་། རྐེད་པའི་ཚིགས་རྣམས་འཇིག་པ་དང་། སྤྱོད་ལམ་ཐམས་ཅད་ལས་ལྡོག་ཅིང་ནུབ་པ་ཡིན་ནོ། །སྦྲུལ་འཁྱིལ་བའི་རིགས་ཀྱིས་ཟིན་པ་ལ་ནི་དུག་གི་ཤུགས་ལྔར་འགྱུར་ཏེ། དང་པོ་ལ་ཁྲག་འཛག་
[395b.2]པ་སྐྱོན་ཅན་དུ་བྱས་ནས་སེར་པོར་འགྱུར་ལ་དེས་ལུས་དང་། ཡན་ལག་སེར་པོར་འགྱུར་ཞིང་ཚ་བ་སྐྱེ་བར་འགྱུར་རོ། །གནས་སྐབས་གཉིས་པ་ལ་ནི་སྐྲང་བར་འགྱུར་རོ། །གསུམ་པ་ལ་ནི་རྨ་རྣགས་པ་དང་། རྔུ་བ་ལ་སོགས་པ་སྐྱེ་བར་འགྱུར་རོ། །བཞི་པ་ལ་ནི་རིམས་
[395b.3]ཀྱིས་འདེབས་ཤིང་ལུས་ཚ་བར་འགྱུར་རོ། །ལྔ་པ་ལ་ནི་ལུས་ཐམས་ཅད་དུ་ཁྱབ་པར་འགྱུར་རོ། །སྦྲུལ་ཁྲ་བོའི་རིགས་ཀྱིས་ཟིན་པ་ལ་གནས་སྐབས་ལྔར་འགྱུར་ཏེ། དང་པོ་ནི་ཁྲག་མ་རུངས་པར་བྱས་ནས་མདོག་དཀར་བར་འགྱུར་བ་དང་ལུས་ཐམས་ཅད་ཀྱང་དཀར་པོར་
[395b.4]འགྱུར་རོ། །གཉིས་པ་ལ་ནི་ལུས་ཐམས་ཅད་ཀྱང་ཤིན་ཏུ་ལྕི་བར་འགྱུར་རོ། །གསུམ་པ་ལ་ནི་རྨ་རུལ་ཞིང་རྣགས་པ་དང་། སྣ་དང་། མིག་དང་། ཁའི་ནང་ནས་འཛག་པ་ཡིན་ནོ། །བཞི་པ་ལ་ནི་མགོ་ལྕི་བ་དང་། གཉའ་བ་རེངས་པར་འགྱུར་རོ། །ལྔ་པ་ལ་ནི་སྐད་
[395b.5]ཉམས་པ་དང་། རིམས་ཀྱིས་འདེབས་པ་དང་། གྲང་བ་རྣམས་ཡིན་ནོ། །ལྷག་མ་རྣམས་ནི་སྦྲུལ་གདེངས་ཀ་ཅན་དང་འཁྱིལ་པ་བཞིན་ནོ། །དེ་བས་ན་དུག་གི་ཤུགས་གནས་སྐབས་ལྔ་པ་ལ་ནི་འབད་པ་དང་བཅས་པས་གསོ་བ་མྱུར་དུ་བྱའོ། །སྦྲུལ་ཆུའི་ནང་དུ་བརྒྱལ་བ་
[395b.6]དང་། འཁྲིག་པ་ཟིན་ནས་ཉམ་ཆུང་བ་དང་། སྲེ་མོས་འཇིགས་པ་དང་། སྲེ་མོས་ཕམ་པར་བྱས་ནས། ཤིན་ཏུ་གྲང་བའི་རླུང་གིས་བརྟེན་པ་དང་། ཚ་བས་གདུངས་པ་དང་། ནད་ཀྱིས་གཟིར་བ་དང་། སྐོམ་པ་དང་། བཀྲེས་པས་གདུངས་པ་དང་། ཤིན་ཏུ་ངལ་བ་དང་
[395b.7]ལམ་རིང་པོ་ནས་འོངས་ཏེ་དུབ་པ་དང་། སྦྲུལ་སྤྱོད་ལམ་དེ་དག་ལྟར་འདུག་ན་ནི་སྦྲུལ་གྱི་གདུག་པ་མེད་ཅིང་ཉམ་ཐག་པ་ཡིན་ནོ། །སྦྲུལ་དེ་རྩྭ་ཀུ་ཤ་དང་། སྨན་དང་། ཚེར་མ་དང་ལྡན་པའི་ནགས་རྣམས་སུ་རྒྱུ་བ་ཡིན་ན་ནི་སྦྲུལ་དེའི་དུག་གི་ཉེས་པ་མེད་ཅིང་དུག་དང་བྲལ་བ་ཡིན་
[396a]
[396a.1]ནོ། །སྦྲུལ་དེ་དུར་ཁྲོད་དང་། མཆོད་རྟེན་ལ་སོགས་པའི་ནང་དུ་རྒྱུ་བ་དང་། ཚེས་ལྔ་དང་། བཅོ་ལྔ་དང་། གནམ་སྟོང་དང་། ཚེས་བརྒྱད་དང་། ཚེས་དགུ་དང་། སྲོད་དང་། ཐོ་རངས་དང་། ནམ་ཕྱེད་དང་། ཉི་མ་གུང་དང་། དུས་དེ་དག་ཏུ་སྦྲུལ་གྱིས་ཟིན་པ་དང་།
[396a.2]རྒྱུ་སྐར་བྲ་ཉེ་དང་། སྨིན་དྲུག་དང་། མཆུ་དང་། སྐག་དང་། ས་ག་དང་། གྲེ་དང་། ཆུ་སྟོད་དང་། ཁྲུམས་སྟོད་དང་། སྣུབས་དང་། གཞན་ཡང་ནེ་རེ་ཏ་ཞེས་བྱ་བའི་ཡུད་ཙམ་གྱི་དུས་དང་། དུས་དེ་དག་ཏུ་གནད་དུ་བསྣུན་པར་ཟིན་ན་ནི་སྤང་བར་བྱའོ། །སྐྱེས་བུ་གང་སྦྲུལ་གྱིས་
[396a.3]ཟིན་མ་ཐག་མིག་དང་གདོང་དཀར་པོར་འགྱུར་བ་དང་། སྐྲ་འབྱི་ཞིང་རང་ལྷགས་པ་དང་། ལྕེ་གྱོང་བ་དང་། ཡང་དང་ཡང་བརྒྱལ་བ་དང་། དབུགས་གྲང་མོ་འཐོན་པ་དེ་ནི་མི་འཚོའོ། །གཞན་ཡང་སྦྲུལ་གྱི་དུག་གིས་ཟིན་མ་ཐག་ཏུ་སྐྱིགས་བུ་དང་། དབུགས་མི་བདེ་བ་དང་། ལུད་
[396a.4]པ་ལུ་བ་དང་། སྐྱུགས་པ་དང་། ཅིག་ཅར་གློ་སྙིང་ན་ཞིང་ཟུག་པ་དེ་ནི་མི་འཚོའོ། །དུག་འཐུང་ངམ། དུག་བཟུང་ངམ། དུག་མདས་ཕོག་གམ། དུག་གིས་ཕོག་ཀྱང་རུང་སྟེ། རྟགས་འདི་དག་དང་ལྡན་ན་སྐྱེས་བུ་དེ་ངེས་པར་འཆི་ཞིང་འཚོ་བ་སྤང་བ་ཡིན་ཏེ། དེ་ཡང་ལྦུ་བ་
[396a.5]སྐྱུགས་པ་དང་། འདུ་ཤེས་ཉམས་པ་དང་། རྐང་པ་དང་། ལག་པ་དང་། གདོང་རྣམས་གནག་ཅིང་སྔོ་བསངས་སུ་གྱུར་པ་དང་། སྣ་ཞོམ་པ་དང་། ཡན་ལག་རྣམས་ཞིག་པ་དང་། ཚིགས་ལྷོད་པ་དང་། ཕྱི་ས་སླ་ཞིང་ཁོང་འཁྲུ་བ་རྣམས་ཡིན་ནོ། །གཞན་ཡང་སྣ་སྨན་རྣོན་པོ་ལ་
[396a.6]སོགས་པ་སྦྱར་ཡང་འདུ་ཤེས་མི་རྙེད་པ་དང་། སྨས་སམ་མཚོན་གྱིས་སྨས་ན་ཡང་ཁྲག་མི་འབྱུང་བ་དང་། དབྱུག་པས་བསྣུན་ཀྱང་རྗེས་སུ་རྨུགས་པར་མི་མངོན་པ་དེ་ནི་གཤིན་རྗེའི་ཁྱིམ་གྱི་ནང་དུ་འཇུག་པ་ཡིན་ནོ། །འཆི་བའི་མཚན་མ་དེ་དག་དང་མི་ལྡན་ན་ནི་སྨན་པས་མྱུར་དུ་ཁྱིམ་
[396a.7]ལ་མེ་མཆེད་པ་བཞིན་དུ་གསོ་བར་བྱ་སྟེ། དུག་གི་ནད་ཀྱིས་སྲོག་ལྐོག་མར་ཕྱིན་པ་ཙམ་ལ་བསྲུང་ཞིང་ཞི་བར་བྱ་བ་ལ་འབད་པར་བྱ་བ་ཡིན་ནོ། །སྦྲུལ་གྱིས་བཟུང་མ་ཐག་ནས་སེ་གོལ་གཏོགས་པ་བརྒྱའི་བར་དུ་ནི་རྨ་ཁ་དེ་ཉིད་ན་དུག་འདུག་པ་ཡིན་ནོ། །དེ་ཕན་ཆད་ནི་ལུས་ཀྱི་ཁྲག་ལ་
[396b]
[396b.1]སོགས་པའི་ལུས་ཟུངས་རྣམས་རིམ་གྱིས་ཁྱབ་ཅིང་འགྲོ་བར་བྱེད་དོ། དུག་དེ་ཁྲག་ལས་གྱུར་པའི་ནང་དུ་མ་ཁྱབ་པའི་གོང་དུ་དེ་མ་ཐག་པར་རྨའི་ཐོན་འཁོར་བཅད་པ་ལ་སོགས་པའི་ལས་ཅི་ལྟར་རིགས་པར་བསྙུར་ཏེ་བྱའོ། །སྦྲུལ་གྱིས་ཟིན་པ་དེ་མ་ཐག་པར་སྦྲུལ་དེ་ཉིད་མྱུར་དུ་
[396b.2]བཟུང་སྟེ། རང་གི་སོས་གཅད་པ་འམ། སྦྲུལ་མ་ཟིན་ན་ཡང་རུང་སྟེ་ཉེ་འཁོར་ན་བོང་པའམ་སའམ། ཤིང་ལ་སོགས་པ་ཅི་མཐོང་ཡང་སོས་བཅད་དེ། དེ་མ་ཐག་གློ་བུར་དུ་འབྱུང་ཞིང་རང་གི་མཆིལ་མའམ། རྣ་སྤབས་ཀྱིས་སྦྲུལ་གྱིས་ཟིན་པའི་རྨ་ལ་གདབ་པོ། །དེ་ནས་
[396b.3]རྨའི་གོང་རོལ་དུ་ལུང་ཏང་གི་ཕྲེང་བ་སོར་བཞི་ཙམ་ཆིངས་ཤིག །ཟར་མ་དང་འོད་མ་ལ་སོགས་པའི་སྐུད་པ་ལ་ཤེས་པར་གྲུབ་པའི་སྔགས་ཀྱིས་བཏབ་སྟེ། དམ་དུ་བཅིངས་ཏེ་མནན་ན་ཇི་ལྟར་ཆུ་བོ་ལ་ཆུ་ལོན་གྱིས་བཟློག་པ་དང་འདྲ་བར་རྩའི་རྒྱུན་སྲང་རྣམས་སུ་དུག་རྒྱུར་མི་
[396b.4]སྟེར་ཞིང་གཅོད་པར་བྱེད་དོ། །གནད་དང་ཚིགས་རྣམས་སུ་སྦྲུལ་གྱིས་བཟུང་བ་ལ་ནི་འཕྲལ་དུ་དམ་དུ་བཙིར་ཞིང་དུག་གཟག་ཅིང་དབྱུང་བ་བྱས་ན་དུག་གི་ནད་ཀྱི་ཤུགས་མི་སྐྱེ་ཞིང་ཇི་ལྟར་ས་བོན་ཉམས་པའི་མྱུ་གུ་བཞིན་ནོ། །སྦྲུལ་གྱི་རིགས་འཁྱིལ་བས་བཟུང་བའི་རྨ་ནི་
[396b.5]མཁྲིས་པའི་རང་བཞིན་ཅན་ཡིན་པས་དེ་ལ་ནི་མྱུར་དུ་གསེར་དང་ལྕགས་ལ་སོགས་པ་མེ་ལ་བསྲེགས་པའམ། ཡང་ན་མགལ་མེས་རྨ་ཁ་བསྲེགས་པར་བྱས་ན་དུག་གི་ནུས་པ་ཐལ་བར་རླག་པར་བྱེད་དོ། །དེ་ཙམ་གྱིས་ལས་སུས་མི་བཟོད་དེ་བཟོད་པར་བྱའོ། །མེའི་ལས་དེ་
[396b.6]མ་གཏོགས་པ་གཞན་ནི་མི་བྱའོ། །དེའི་འོག་ཏུ་རྨ་ཁ་གཞིབས་ཏེ་ཁ་བཀང་ལ་ཕྱིར་དབོའོ། །དེ་ནས་སའམ་ཐལ་བའམ། དུག་འཇོམས་པའི་སྨན་ནམ། བ་ལང་གི་ལྕི་བས་རྨ་ཁ་ལ་གདབ་པར་བྱའོ། །གལ་ཏེ་དུག་དེས་ནང་དུ་ཁྱབ་པར་སོང་བ་དང་། ལྷག་པར་ཤ་ཆེ་བ་ལ་
[396b.7]ནི་རྨ་དང་ལུས་སུ་བཅས་པ་ཐམས་ཅད་ལ་དུག་འཇོམས་པའི་སྨན་གྱིས་བསྐུ་བྱུག་བྱའོ། །ཙནྡན་དང་པུ་ཤེལ་ཙེ་ཆུ་དང་སྦྱར་བས་བླུགས་པར་བྱའོ། །དུག་དེས་ཀུན་ལ་ཁྱབ་པ་ལ་ནི་གཏར་ག་བྱས་ཏེ་ཁྲག་ཕྱུང་ན་གསོ་བའི་མཆོག་ཡིན་ཏེ། ཁྲག་མང་དུ་ཕྱུང་ན་ནི་དུག་གི་རང་བཞིན་
[397a]
[397a.1]ནག་པོ་ཡང་འབྱུང་བ་ཡིན་ནོ། །དེ་ལ་དུག་ཡོད་པའི་ཁྲག་ནི་དྲི་ང་བ་དང་། མེའི་ནང་དུ་བསྲེགས་ན་སྲེག་སྲེག་ཟེར་བ་ཡིན་ནོ། །དེ་ལྟར་ཁྲག་ཕྱུང་སྟེ་དག་པ་ལྟ་ན་ཁྲག་དེ་ནད་གཞི་ཅི་ལྟ་བ་བཞིན་དུ་ཤེས་པར་བྱ་སྟེ་བརྟག་གོ། །རྩ་མི་སྣང་བ་ལ་ནི་རྭ་དང་སྲིན་བུ་བད་པ་
[397a.2]གཉིས་ཀྱིས་ཁྲག་དབྱུང་ངོ་། །ཁྲག་ཕྱུང་བའི་ལྷག་མ་ཡོད་པ་དུག་གི་སླན་ཏེར་བྱས་པ་དེ་ནི་ལྷག་པར་བསིལ་བའི་སྨན་གྱིས་བླུགས་པ་དང་། བྱུག་པ་ལ་སོགས་པ་ལན་མང་དུ་བྱས་ཏེ་བཟློག་པར་བྱའོ། །སྦྲུལ་གྱིས་ཟིན་ཏེ་དུག་གི་མཐུས་བརྒྱལ་བར་བྱེད་པ་དང་། སྙིང་འཛག་
[397a.3]པ་ལ་ནི་སྨན་བསིལ་བའི་ནུས་པ་དང་ལྡན་པས་བླུགས་པ་དང་། གཏོར་བ་དང་རླུང་གཡབ་ཀྱིས་གཡབ་པར་བྱས་ཏེ་སྤུ་ཟིང་ཞེས་བྱེད་དུ་བཅུག་ན་དུག་གི་མཐུ་རབ་ཏུ་ཞི་བར་འགྱུར་རོ། །དུག་ཤིན་ཏུ་རྣོ་བས་སྙིང་བྲུས་པ་སྙམ་སེམས་པ་ལ་ནི་མར་ཉི་ཚེའམ། ཡང་ན་དུག་འཇོམས་
[397a.4]པའི་སྨན་དང་། མར་དང་སྦྲང་རྩི་སྦྱར་བ་ཡིན་ནོ། །སྙིང་ལ་དུག་བབ་ན་ནི་དེར་བད་ཀན་ཉེ་བར་ཤས་ཆེར་སོགས་ཤིང་འཕེལ་ཏེ། ལུས་ལྕི་བ་དང་། ནད་འཁྲུགས་ཤིང་བྲང་ཚ་ལ་ཁ་ནས་ཆུ་སྐྱུར་འབྱུང་བ་ཡིན་ཏེ། དེ་ལ་ནི་སྐྱུག་སྨན་གཏང་ངོ་། །དེ་ལྟར་སློན་བྱ་བ་དེ་ཡང་རྩབས་སྐྱུར་
[397a.5]པོ་དང་། རྒྱ་སྲན་དང་། ཏིལ་མར་དང་། ཆང་ལ་སོགས་པ་དེ་དག་སྤངས་ཏེ་གང་ཡང་དུག་འཇོམས་པའི་སྨན་དང་སློན་བྱས་ན་དུག་གིས་ཀུན་ཏུ་ཁྱབ་པར་མི་འགྱུར་རོ། །སྦྲུལ་གྱི་དུག་གི་རང་བཞིན་དང་། མིའི་ནད་གཞིའི་རང་བཞིན་དང་། གནས་ཀྱི་བྱེ་བྲག་ཞིབ་ཏུ་ལེགས་པར་བརྟགས་
[397a.6]ཏེ་གསོ་བ་རྣམས་མ་ནོར་བར་བྱའོ། །ཤིང་སིན་དུ་བ་རའི་རྩ་བ་དང་། གི་རི་ཀར་ནི་ཀ་དཀར་པོ་དང་གཉིས་ཀྱི་བཏུང་བ་སྦྲུལ་གདེངས་ཀ་ཆེན་པོས་ཟིན་པ་ལ་སྦྱར་རོ། །པ་ཀ་ལ་དང་། སྦྲང་རྩི་དང་སྦྱར་བ་རྣམས་སྣ་སྨན་དུ་བླུད་དོ། །སྦྲུལ་ནག་པོས་ཟིན་པ་ལ་ནི་ཐོག་མར་ཁྲག་གཏར་
[397a.7]ཏེ་དེའི་འོག་ཏུ་ཙ་ར་ཏི་དང་། ན་ཀུ་ལི་རྣམ་གཉིས་དང་སྦྱར་བའམ། ཡང་ན་ཤི་ཀྲུ་དང་། བོང་ང་དཀར་པོ་གཉིས་དང་སྦྱར་བ་གང་ཡང་རུང་བའི་ལྡེ་གུས་བསྐུའོ། །བཙོད་དང་། དུད་པ་དང་། མར་དང་། སྦྲང་རྩི་དང་སྦྱར་བ་བཏུང་བར་བླུད་དོ། །རྒྱ་སྣེའུ་དང་། ཏང་ཕལ་དང་། གི་རི་
[397b]
[397b.1]ཀ་རྣམ་གཉིས་དང་། ཁ་ལུང་དང་། ཁ་ར་དཀར་པོ་དང་། ཤེ་ལུ་དང་། དེ་རྣམས་ཀྱི་བཏུང་བ་དང་སྣ་སྨན་དུ་སྦྱར་ན་ཕན་ནོ། །དེ་བཞིན་དུ་གདེངས་ཀ་ཆེན་པོའི་སྦྲུལ་གྱི་གདུག་པ་མི་བཟད་པ་དང་། སྦྲུལ་གྱི་རིགས་ཁྲ་བོ་ལ་ཡང་དུག་འཇོམས་པའི་སྨན་དེ་དག་སྦྱར་རོ། །ཨ་ཤྲ་
[397b.2]གནྡྷ་དང་། རྒུན་འབྲུ་དང་། གི་རི་ཀ་དཀར་པོ་དང་། ས་ནག་པོ་དང་། པི་པི་ལིང་དང་། དེ་རྣམས་ཆ་མཉམ་པ་དང་། བྱིའུ་རུག་པ་དང་། ཀ་ཕིད་ཐ་དང་། བིལ་བ་དང་། སེའུ་དང་། དེ་རྣམས་ཀྱི་ལོ་མ་རྣམས་རེ་རེ་ཡང་ཨ་ཤྭ་གནྡྷའི་ཆ་ཕྱེད་ཕྱེད་སྦྲང་རྩི་དང་ལྡན་པར་སྦྱར་ཏེ་
[397b.3]ཟོས་ན་སྦྲུལ་འཁྱིལ་བ་ཞེས་བྱ་བའི་དུག་ལ་ཁྱད་པར་དུ་ཕན་ནོ། །ཤིང་འོ་མ་ཅན་ལྔའི་ཤུན་པ་དང་། འབྲས་བུ་གསུམ་དང་། ཤིང་མངར་དང་། ནཱ་ག་པུཥྤ་དང་། ཨེ་ལ་བ་ལུ་དང་། ཛི་བ་ཀ་དང་། ཟངས་རྩི་བ་དང་། པུ་ཤེལ་ཙེ་དང་། ཁ་ར་དཀར་པོ་དང་། ཤུག་པ་དང་།
[397b.4]ཨུཏྤ་ལ་དང་། དེ་རྣམས་སྦྲང་རྩི་དང་སྦྱར་བའི་དུག་སྨན་ནི་གངས་ཅན་ཞེས་བྱ་སྟེ། དེའི་འདག་གུས་བསྐུས་ན་སྦྲུལ་འཁྱིལ་བའི་དུག་འཇོམས་ཏེ། དེ་བཞིན་དུ་སྐྲང་བ་དང་། ཤུ་བ་མཆེད་པ་དང་། འབྲུམ་བུ་དང་། རིམས་དང་། ལུས་ཚ་བ་རྣམས་ལ་ཕན་ནོ། །ཏང་པལ་དང་།
[397b.5]ནྱ་གྲོ་དྷའི་མྱུ་གུ་དང་། ཛི་བ་ཀ་དང་། ཟངས་རྩི་བ་དང་། ཁ་ར་དཀར་པོ་དང་། བཙོད་དང་། ཤིང་མངར་དང་། དེ་རྣམས་བསྐོལ་བའི་ཁུ་བ་བླུད་ན་སྦྲུལ་འཁྱིལ་བས་ཟིན་པ་འཇོམས་སོ། །སྨྱུག་མའི་ཤུན་པ་དང་། ས་བོན་དང་། པུ་ཙེ་ཤེལ་དང་། པ་ཏ་ལའི་ས་བོན་དང་། བཅའ་སྒ་
[397b.6]དང་། ཤྲི་ཤའི་ས་བོན་དང་། བོང་ང་དཀར་པོ་དང་། ག་བེ་བུ་གའི་འབྲུ་དང་། རྩ་བ་དང་། ཤུ་དག་དང་། དེ་རྣམས་བ་གཅིན་ལ་བཏབ་པའི་འདག་གུ་ནི་ཡན་ལག་བརྒྱད་པ་ཞེས་བྱ་སྟེ། སྦྲུལ་འཁྱིལ་པས་ཟིན་པའི་རིགས་གོ་ད་ན་ས་ཞེས་བྱ་བས་ཟིན་པ་སེལ་ཏོ། །པུ་ཙེ་ཤེལ་
[397b.7]དང་། བོང་ང་དཀར་པོ་དང་། རུ་རྟ་དང་། ཁྱིམ་གྱི་དུད་པ་དང་། ཧ་རེ་ཎུ་ཀ་དང་། ཚ་བ་གསུམ་དང་། རྒྱ་སྤོས་དང་། དེ་རྣམས་ལྷན་ཅིག་སྦྱར་བ་ཟོས་ན་སྦྲུལ་ཁྲ་བོས་ཟོས་པའི་ནད་སེལ་ཏོ། །འདམ་བུ་མདའ་རྒྱུ་དང་། དན་ཏི་དང་གཉིས་ཀྱི་རྩ་བ་མཐོ་ཉི་ཤུའི་ས་བོན་འོག་ན་
[398a]
[398a.1]མར་བརྐོས་ཏེ་ཕྱུང་ལ་འབྲས་དང་ས་གཉིས་ལྷན་ཅིག་བྱས་ཏེ་བྱུག་པས་བསྐུའོ། །མར་རྙིང་པའི་ནང་དུ་འབྲས་བུ་གསུམ་གྱི་ཕྱེ་མ་བཏབ་སྟེ་བླུད་ལ་དེ་ཞུ་བའི་ཚོད་ཙམ་ནས་ལས་བྱས་པའི་ཟན་ཚོད་མ་དང་བཅས་པ་བཟའོ། །ཀ་ར་བཱི་ར་དང་། ཨརྐའི་མེ་ཏོག་དང་།
[398a.2]མེ་ཏོག་ཀུ་སུ་མ་དང་། ལང་ཀ་ལིའི་རྩ་བ་དང་། པི་པི་ལིང་དང་། པ་ཐ་དང་། ན་ལེ་ཤམ་དང་། དེ་རྣམས་ཀྱི་རྩ་བ་ཕྱེ་མ་རྩབས་སྐྱུར་པོ་དང་སྦྱར་ཏེ་འཐུངས་ན་གོང་མའི་སྦྲུལ་ལས་གཞན་པའི་སྦྲུལ་གྱིས་ཟིན་པའི་དུག་ཐམས་ཅད་ལ་སྦྱར་རོ། །ཤྲི་ཤའི་མེ་ཏོག་གི་རང་
[398a.3]གི་ཁུ་བའི་ནང་དུ་ཤི་ཀྲུ་ཞག་བདུན་གྱི་བར་དུ་སྦངས་ཏེ། དེ་ལས་བཏུང་བ་དང་། སྣར་བླུགས་པ་སྦྱར་ན་སྦྲུལ་གྱིས་ཟིན་པའི་ནད་ཐམས་ཅད་ལ་ཕན་ནོ། །རྒྱ་སྤོས་དང་རུ་རྟ་སྲང་གཉིས་དང་མར་དང་སྦྲང་རྩི་སྲང་གཉིས་དང་སྦྱར་བའི་ལྡེ་གུ་བྱིན་ན་སྦྲུལ་གྱི་རྒྱལ་པོ་འཇོག་པོས་ཟིན་པ་ལ་
[398a.4]ཡང་སྨན་འདི་བླུད་ན་བདེ་བ་སྦྱིན་པར་བྱེད་དོ། །སྦྲུལ་གྱི་རིགས་གདེངས་ཀ་ཆེན་པོས་ཟིན་པའི་གནས་སྐབས་དང་པོ་ལ་ནི་ཁྲག་ཕྱུང་སྟེ། མར་དང་སྦྲང་རྩི་དང་སྦྱར་བ་མྱུར་དུ་བླུད་དོ། །གནས་སྐབས་གཉིས་པ་ལ་ནི་སློན་བྱ་སྟེ་གོང་མ་བཞིན་དུ་མར་དང་སྦྲང་རྩི་དང་སྦྱར་བས་
[398a.5]བསྐུའོ། །གསུམ་པ་ལ་ནི་དུག་འཇོམས་པའི་སྨན་དང་སྦྱར་ཏེ་སྨན་དེ་ཉིད་ཀྱང་སྣར་བླུགས་པར་བྱའོ། །བཞི་པ་ལ་ནི་སྐྱུག་སྨན་བཏང་སྟེ། ནས་ཐུག་དུག་འཇོམས་པའི་སྨན་དང་ལྷན་ཅིག་བླུད་དོ། །ལྔ་པ་དང་དྲུག་པ་ལ་ནི་སྨན་བསིལ་བ་དང་སྦྱར་བའི་དུག་སྨན་གཏང་ངོ་། །དེ་
[398a.6]བཞིན་དུ་བསིལ་བའི་ནུས་པ་སྨན་བླུགས་པ་དང་། བྱུག་པ་ཡང་དང་ཡང་དུ་སྦྱར་ཏེ། སློན་སྨན་རྣོན་པོ་བླུད་ལ་དེའི་འོག་ཏུ་དུག་འཇོམས་པའི་སྨན་དང་ཐུག་པར་སྦྱར་བ་བླུད་དོ། །གནས་སྐབས་བདུན་པ་ལ་ནི་དུག་འཇོམས་པའི་སྨན་རྣོན་པོ་དང་། མིག་སྨན་དང་། སྣ་སྨན་སྦྱར་བ་དང་།
[398a.7]སྤྱི་བོར་མཚོན་གྱིས་རྒྱ་གྲམ་དུ་ཅུང་ཞིག་དབྲལ་བའི་ནང་དུ་ཤ་འམ་ཁྲག་གམ་པགས་པ་གང་ཡང་རུང་བ་གཞུག་གོ། །སྦྲུལ་འཁྱིལ་བས་བཟུང་བའི་གནས་སྐབས་གསུམ་པ་ལ་ནི་སློན་ཁྲུས་བྱས་ཏེ་ཐུག་པ་བླུད་དོ། །དུག་འཇོམས་པའི་སྨན་ནི་རྣོ་བ་དང་། ཡང་ན་ཤུག་པའི་སྡེ་ཚན་
[398b]
[398b.1]བསྐོལ་བའི་ཁུ་བ་བླུད་དོ། །སྦྲུལ་ཁྲ་བོས་ཟིན་པའི་གནས་སྐབས་དང་པོ་ལ་ནི་རྨ་ལ་ཞལ་ཞལ་བྱ་སྟེ། དེའི་འོག་ཏུ་ཀུ་བས་ཁྲག་ཕྱུང་སྟེ། གོང་མ་བཞིན་དུ་དུག་འཇོམས་པའི་སྨན་བླུད་དོ། །དྲུག་པ་ལ་ནི་སྨན་ཤིན་ཏུ་རྣོ་བའི་མིག་སྨན་དང་སྣར་བརྔུབ་པ་རྣམས་སྦྱར་རོ། །གཞན་ཡང་
[398b.2]གྲངས་མ་སྨོས་པ་རྣམས་ནི་སྦྲུལ་གདེངས་ཀ་ཆེན་པོས་ཟིན་པའི་གནས་སྐབས་ཀྱི་གསོ་བ་འདི་ཡང་སྦྱར་རོ། །བུད་མེད་སྦྲུམ་མ་དང་། བྱིས་པ་དང་། རྒན་པོ་རྣམས་ལ་ནི་ཁྲག་ཉུང་ཤས་དབྱུང་ངོ་། །ཤིང་ཚ་དང་། ལྡོང་རོས་དང་། ཡུང་བ་དང་། རྒྱ་སྤོས་དང་། ཀུ་ཤའི་ཁུ་བ་དང་།
[398b.3]ཆུ་སྲིན་སེན་མོ་དང་། ཏ་མ་ལའི་གེ་སར་དང་། འབྲས་ཀྱི་ཆུ་གྲང་མོ་དང་ལྷན་ཅིག་སྦྱར་བ་བླུད་ན་དུག་ཐམས་ཅད་འཇོམས་ཏེ། ཅི་ལྟར་དབང་པོའི་རྡོ་རྗེས་ལྷ་མ་ཡིན་རྣམས་འཇོམས་པ་བཞིན་ནོ། །བིལ་བའི་རྩ་བ་དང་། བྱིའུ་རུག་པའི་མེ་ཏོག་དང་། ཀ་རཉྫ་བ་ལ་དང་།
[398b.4]ཏ་མ་ལའི་གེ་སར་དང་། ཐང་ཤིང་དང་། འབྲས་བུ་གསུམ་དང་། སེར་པོ་རྣམ་གཉིས་དང་། ཚ་བ་གསུམ་དང་། དེ་རྣམས་ར་གཅིན་དང་ཞིབ་ཏུ་བཏགས་པ་ལས་མིག་སྨན་བཏབ་པ་དང་། སྣ་སྨན་དུ་སྦྱར་ན་སྦྲུལ་དང་། སྲོག་ཆགས་ལུ་ཏ་དང་། བྱི་བ་དང་། སྡིག་པ་
[398b.5]ལ་སོགས་པའི་དུག་དང་། གསུད་པ་དང་། མ་ཞུ་བ་དང་། དབྱིག་དུག་དང་། རིམས་ཀྱིས་བཏབ་པ་དང་། གདོན་གྱིས་ཟིན་པ་ལ་སོགས་པས་ཉམ་ཐག་པའི་མི་ལ་ཕན་ཏེ་བདེ་ལེགས་སུ་བྱེད་དོ། །དུག་གིས་ཕོག་པའི་རྨ་ལ་དུག་གི་ལྷག་མ་ཅུང་ཟད་ཅིག་ཡོད་ན་ཡང་བྱུག་པ་
[398b.6]ལ་སོགས་པས་མ་ལུས་པར་ཕྱུང་སྟེ། ལྷག་མ་ལུས་ན་ནི་ཡང་དུག་གི་མཐུ་སྐྱེ་བར་འགྱུར་ཏེ། ཅི་ལྟར་དུག་གིས་ནད་གཞི་འཁྲུགས་པ་བཞིན་ནོ། །དུག་གི་ཉེས་པ་སྣད་པས་རླུང་འཁྲུགས་ཤིང་སྐྱེས་ན་ནི་ཏིལ་མར་དང་། ཆང་དང་། རྒྱ་སྲན་དང་། སྐྱུར་དང་། དེ་རྣམས་མ་གཏོགས་
[398b.7]པའི་ལྷག་མ་རླུང་འཇོམས་པའི་གསོ་བ་ཐམས་ཅད་སྦྱར་རོ། །དུག་གིས་མཁྲིས་པ་སྐྱེས་པ་ལ་ནི་རིམས་འཇོམས་པའི་སྨན་བསྐོལ་བ་དང་། འཇམ་རྩི་མས་གཏོང་བ་རྣམས་བྱའོ། །དུག་གིས་བད་ཀན་སྐྱེས་པ་ལ་ནི་དོང་གའི་སྡེ་ཚན་སྦྲང་རྩི་དང་སྦྱར་བ་གཏང་ངོ་། །མུ་ཟི་དང་། རྒུན་
[399a]
[399a.1]འབྲུ་དང་། པ་ཡ་སྱ་དང་། ཤིང་མངར་དང་། སྦྲང་རྩི་དང་། དེ་སྤྱིའི་ཕྱེད་དང་མཉམ་པའི་ཁ་ར་དཀར་པོ་དང་སྦྱར་བའི་ལྡེ་གུ་བལྡག་གོ། །ཆུ་ལ་སྔགས་ཀྱིས་བཏབ་སྟེ་བཏུང་བ་དང་གཏོར་བ་རྣམས་བྱའོ། །སྙིང་དགའ་བའི་བག་བསྟེན་ཅིང་སེམས་དགའ་བར་བྱེད་དོ། །
[399a.2]སྦྲུལ་གྱི་ལུས་ཀྱིས་རེག་པ་ལས་བྱུང་བའི་དུག་དང་། རྟོག་པ་ལས་བྱུང་བའི་དུག་གིས་ཉམ་ཐག་པ་ཡང་ཆོ་ག་གོང་མ་བཞིན་དུ་སྦྱར་ན་ཕན་ནོ། །རིན་པོ་ཆེ་ཀེ་ཀེ་རུ་དང་། མརྒད་དང་། མུ་ཏིག་དང་། རྡོ་རྗེ་དང་། བཻ་ཌཱུརྱ་དང་། གརྦྷ་མ་ཎི་དང་། པི་ཙུ་ཀ་དང་། བྱི་བའི་
[399a.3]དུག་དང་། དེ་བཞིན་དུ་རི་ཁ་བ་ཅན་ན་སྐྱེས་པའི་སྨན་སོ་མ་ར་ཛ་དང་། བ་སྤྲུ་བ་དང་། དྲོ་ན་དང་། མ་ཧཱ་དྲོ་ན་ཞེས་བྱ་བ་དང་། སྦྲུལ་ལ་ཡོད་པའི་ནོར་བུ་དང་། མ་ན་སི་དང་། དུག་ཞི་བར་བྱ་བར་འགྱུར་རོ། །དེ་བཞིན་དུ་ནུས་པ་དང་ལྡན་པའི་སྨན་རྣོན་པོ་རྣམས་ཀྱང་བཅང་
[399a.4]བར་བྱའོ། །གལ་ཏེ་ནུབ་མོ་རྒྱུ་ན་ཡང་གདུགས་དང་། འཁར་གསིལ་དག་ལག་ཏུ་ཐོགས་ན་དེའི་གྲིབ་མ་དང་སྒྲས་ལག་འགྲོ་རྣམས་སྔངས་ཤིང་འབྱེ་བར་འགྱུར་རོ། །སྦྲུལ་གདུག་པས་ཟིན་པ་གསོ་བའི་ལེའུ་སྟེ་སུམ་ཅུ་རྩ་དྲུག་པ་རྫོགས་སོ།། །།དེ་ནས་
[399a.5]སྲིན་བུ་སྲོག་ཆགས་ལུ་ཏ་ལ་སོགས་པའི་དུག་གིས་ཟིན་པའི་དམིགས་བརྟགས་ཤིང་གསོ་བའི་ལེའུ་བཤད་པར་བྱ་སྟེ། སྲིན་བུའི་དུག་དེ་ཡང་སྦྲུལ་གྱི་ཚིལ་དང་། བཤང་གཅི་དང་། ཁུ་ཆུ་དང་། སྒོ་ང་དང་། ཁོག་པ་དང་། པགས་པ་ལས་སྐྱེས་ཏེ། སྲིན་བུ་དེའི་རང་
[399a.6]བཞིན་ཡང་ནད་གཞི་གསུམ་དང་། འདུས་པ་དང་། རྣམ་པ་བཞི་དང་ལྡན་པ་ཡིན་པར་ཤེས་པར་བྱ་སྟེ། དེ་ཡང་རླུང་གི་རང་བཞིན་ཅན་གྱི་སྲིན་བུའི་དུག་གིས་ཟིན་པའི་རྟགས་ནི་རྨ་ཁ་ཆེ་ཞིང་ཟུག་ཅིང་ན་བ་ཡིན་ནོ། །མཁྲིས་པའི་རང་བཞིན་ཅན་གྱི་སྲིན་བུས་ཟིན་པའི་རྟགས་ནི་
[399a.7]འཛག་པ་ཉུང་བ་དང་། ཚ་བ་དང་། མདོག་དམར་བ་དང་། ཤུ་བ་མཆེད་པ་དང་། ཡང་ན་ཤིང་པི་ལུའི་འབྲས་བུ་སྨིན་པ་དང་། འབྲ་གོའི་འབྲས་བུ་སྨིན་པ་དང་འདྲ་བར་འདུག་པ་ཡིན་ནོ། །བད་ཀན་གྱི་རང་བཞིན་ཅན་གྱི་སྲིན་བུས་ཟིན་པའི་རྟགས་ནི་ཟུག་གཟེར་ཆུང་བ་དང་། ཨུ་
[399b]
[399b.1]དུམྦཱ་ར་སྨིན་པ་འདྲ་བ་ཡིན་ནོ། །འདུས་པའི་རང་བཞིན་ཅན་གྱི་སྲིན་བུས་ཟིན་པ་ནི་ཚབས་ཆེར་འཛག་ཅིང་རྟེན་ཐམས་ཅད་དང་ལྡན་པ་ཡིན་ཏེ་དེ་ནི་སྤང་བར་བྱའོ། །སྲིན་བུ་གདུག་པ་དེ་དག་གི་མཐུའི་གནས་སྐབས་དང་པོ་ལ་སོགས་པ་སྦྲུལ་གྱི་ལྟར་བལྟ་བར་བྱ་སྟེ། དེ་བཞིན་དུ་སྐྲང་
[399b.2]བ་འཕེལ་བ་དང་། ཁྲག་དྲི་ང་བ་འཛག་པ་དང་། མགོ་དང་མིག་ལྕི་བ་དང་། མགོ་འཁོར་བ་དང་། བརྒྱལ་བ་དང་། དབུགས་མི་བདེ་བ་དང་། རབ་ཏུ་ན་བ་ཡིན་ཏེ། སྲིན་བུ་གདུག་པ་སྤྱི་དང་མཐུན་པར་རྨའི་ནང་དུ་པདྨའི་སྙིང་པོ་ལྟ་བུ་འབྱུང་ཞིང་ཚ་བ་དང་། གཡའ་བ་དང་། ཁ་ཟས་ཡི་
[399b.3]གར་མི་འོང་བ་ཡིན་ནོ། །སྡིག་པ་ཤས་ཟིན་པའི་དུག་ནི་ཤིན་ཏུ་རྣོ་བ་ཡིན་ཏེ། དང་པོ་མེ་བཞིན་དུ་ལུས་ལ་སྲེག་པར་བྱེད་ལ་དེ་མ་ཐག་རོ་སྟོད་དུ་མཆེད་པར་འགྲོ་སྟེ། དེའི་འོག་རྨའི་ནང་དུ་འདུག་པ་ཡིན་ཏེ་དེས་བཟུང་མ་ཐག་རབ་ཏུ་ན་ཞིང་སྐྲང་བ་དང་འགས་པ་རྣམས་ཡིན་ནོ། །སྡིག་པ་
[399b.4]དེ་སྐྱེ་བའི་རྒྱུ་ནི་བ་ལང་ལ་སོགས་པའི་ལྕི་བ་དང་། པགས་པ་བསྲེགས་ཏེ་རུལ་ཞིང་རླན་པ་ལས་སྐྱེས་པ་དང་། སྦྲུལ་གྱི་པགས་པ་ལས་སྐྱེས་པ་ཡིན་ཏེ། རྐེད་པ་ཕྲ་བའི་སྡིག་པའི་དུག་ཚབས་ཆེ་བ་ཡིན་ཏེ་དེ་ཡང་མདོག་སེར་བ་དང་། གནག་པ་དང་། རྩུབ་པ་དང་། མདོག་སྣ་
[399b.5]ཚོགས་སུ་སྣང་བ་དང་། ནོར་བུ་གཟི་མདོག་ཏུ་སྣང་བ་ཡིན་ནོ། །སྡིག་པ་ཁ་ཅིག་ནི་སྤུ་མང་ཞིང་ཚིགས་ཀྱང་མང་བ་ཡིན་ནོ། །ཁ་ཅིག་ནི་རྒྱབ་དམར་ཞིང་ལྟོ་དཀར་བ་ཡིན་ནོ། །ཁ་ཅིག་ནི་མདོག་དུད་ཁར་འདུག་ཅིང་ཚིགས་གསུམ་ཡོད་པ་དང་། རྐེད་པ་སེར་སྐྱར་འདུག་པ་ཡིན་ནོ། །ཁ་
[399b.6]ཅིག་ནི་ཐལ་བའི་མདོག་ཏུ་འདུག་པ་དང་། སྲེ་མོའི་མདོག་དང་། ཁྲག་འཐུང་བ་དེ་ནི་དུག་ཆེན་པོ་དང་ལྡན་པ་ཡིན་ནོ། །ཁ་ཅིག་ནི་མེའི་མདོག་ཏུ་སྣང་ཞིང་ཚིགས་གཉིས་ཡོད་པ་དང་། ལྟོ་དཀར་བའམ་དམར་བ་འམ་གནག་པ་ཡིན་ནོ། །སྡིག་པ་དེ་རྣམས་ཀྱིས་ཟིན་པའི་རྟགས་ནི་
[399b.7]ལྕེ་སྐྲང་བ་དང་། ལྕེ་གྱོང་བ་དང་། ལུས་རེངས་པ་དང་། རིམས་ཀྱིས་འདེབས་པ་དང་། ཁ་ལ་སོགས་པའི་སྒོ་ནས་ཁྲག་ནག་པོ་མང་དུ་འཛག་པ་དང་། དབང་པོ་རྣམས་ཀྱིས་དོན་མི་ཚོར་བ་དང་། རྔུལ་བ་དང་། བརྒྱལ་བ་དང་། ཁ་སྐམ་པ་དང་། རྨོངས་པ་དང་། རབ་ཏུ་ན་བ་དང་།
[400a]
[400a.1]ཤ་འདྲུལ་ཞིང་ལྷགས་པ་སྙམ་སེམས་པའི་ནད་པ་དེ་ནི་ཕལ་ཆེར་སྲོག་འདོར་བ་ཡིན་ནོ། །སྲོག་ཆགས་ཨུ་ཙི་ཏིང་ག་ཞེས་བྱ་བའི་སྲོག་ཆགས་ནི་ཁས་འཛིན་པར་བྱེད་པ་དང་། དེ་ཡང་གོང་མ་བས་ཚབས་ཆེར་ན་བ་ཡིན་ཏེ། སྡིག་པ་བས་ལུས་ཀྱི་གཡས་གཡོན་
[400a.2]གཉིས་ཀ་ནས་འཛིན་པ་ཡིན་ནོ། །སྲོག་ཆགས་ལུ་ཏ་ཨུ་ཙི་ཏིང་གས་བཟུང་བའི་མཚན་མ་ནི་ཕོ་མཚན་འགྲེང་བའམ། བ་སྤུ་ལངས་པ་དང་། ལུས་ལས་རྔུལ་འབྱུང་བ་དང་། རྨ་མཆེད་པ་དང་། ཆུ་སེར་གྲང་མོར་འཛག་པ་དང་། སྲིན་བུ་ཨུ་ཙི་ཏིང་གའི་མིང་གི་རྣམ་གྲངས་ནི་རྔ་མོ་
[400a.3]དུད་ཁ་ཞེས་བྱ། མཚན་མོ་རྒྱུ་བ་ཞེས་བྱ། མཚན་མོ་ཅན་ཞེས་ཀྱང་བྱ་སྟེ། དེ་ནི་རླུང་དང་མཁྲིས་ཤས་ཆེ་བ་ཡིན་ནོ། །སྲིན་བུ་ཀ་ན་བ་ཞེས་བྱ་བ་དང་། བི་བ་ཞེས་བྱ་བའི་སྲིན་བུ་གཉིས་ནི་བད་ཀན་ཤས་ཆེ་བ་ཡིན་ནོ། །དེ་ལས་ཀྱང་སྡིག་པའི་དུག་དང་། སྲིན་བུ་རྔ་མོ་དུད་ཀ་ཞེས་བྱ་བ་
[400a.4]གཉིས་ནི་ཕལ་ཆེར་རླུང་ཤས་ཆེ་བ་ཡིན་ནོ། །སྲིན་བུ་ཀ་ན་བ་ཞེས་བྱ་བ་དང་། བི་བ་ཞེས་བྱ་བའི་སྲིན་བུ་ནད་གཞི་གང་དང་གང་གི་ཤས་ཆེ་བ་ལེགས་པར་བརྟགས་ཏེ། དེ་དང་དེའི་སྨན་གྱི་ཡོན་ཏན་གྱིས་གསོ་བར་བྱའོ། །དེ་ལ་རླུང་ཤས་ཆེ་བའི་རྟགས་ནི་གློ་སྙིང་ན་བ་དང་། སྟོད་
[400a.5]དུ་རླུང་འབྱུང་བ་དང་། ལུས་ཁོང་རེངས་པ་དང་། རྩ་བ་རྒྱ་ཆེ་བ་སོང་བ་དང་། རུས་པ་དང་། ཚིགས་སུ་ཟུག་པ་དང་། རྣ་བའི་སྒྲ་ཟ་ཟི་ཟེར་བ་དང་། ལུས་གཅུས་པ་སྙམ་བྱེད་པ་དང་། ལུས་མདོག་གནག་པ་ཡིན་ནོ། །མཁྲིས་པ་ཤས་ཆེ་བའི་རྟགས་ནི་འདུ་ཤེས་ཉམས་པ་དང་།
[400a.6]དྲོད་ཆེ་བ་དང་། དབུགས་ཚ་བ་འབྱུང་བ་དང་། གློ་སྙིང་ཚ་བ་དང་། ཁར་ཁ་བ་བྲོ་བ་དང་། ཤ་འགས་པ་དང་། ལུས་སྐྲང་བ་དང་། མདོག་དམར་ཞིང་སེར་བ་ཡིན་ནོ། །བད་ཀན་ཤས་ཆེ་བའི་དུག་ནད་ཀྱི་རྟགས་ནི་སྐྱུག་པ་དང་། ཁ་ཟས་ཡི་གར་མི་འོང་བ་དང་། བྲང་ཚ་ཞིང་ཁ་ནས་ཆུ་འབྱུང་
[400a.7]བ་དང་། ཆམ་པས་བཏབ་པ་དང་། སྣ་ཆུ་འཛག་པ་དང་། གྲང་བ་དང་། ཁ་མངར་བྲོ་བ་རྣམས་ཡིན་ནོ། །དེ་ལ་རླུང་གི་བདག་ཉིད་ཀྱི་དུག་གིས་ཟིན་པ་ལ་ནི་ཏིལ་གྱི་ཚིགས་མས་བྱུག་པ་དང་། ཏིལ་མར་གྱིས་བསྐུ་བ་དང་། པུ་ལ་ཀ་ཀ་ལ་སོགས་པའི་སྦུ་བུའི་དུགས་བྱ་བ་དང་།
[400b]
[400b.1]ལུས་འཕེལ་ཞིང་ལུས་བརྟ་བའི་ཆོ་ག་རྣམས་བྱས་ན་ཕན་ནོ། །མཁྲིས་པའི་དུག་ནད་ལ་ནི་བསིལ་བའི་ནུས་པ་དང་ལྡན་པ་བླུགས་པ་དང་། བྱུག་པས་འཇམ་རྩི་བཅད་ཅིང་བཟློག་པར་བྱའོ། །བད་ཀན་གྱི་ཤས་ཆེ་བའི་དུག་ལ་ནི་ཐོག་མར་སྐྱུག་སྨན་བཏང་སྟེ། དུགས་བྱ་བ་དང་།
[400b.2]མཚོན་གྱིས་བཅད་ཅིང་བཞར་ན་ཕན་ནོ། །སྲིན་བུའི་རང་བཞིན་ནད་གཞི་རྣམ་པ་གསུམ་དུ་འགྱུར་བ་དེ་བཞིན་དུ་གསོ་བ་ཡང་དེ་ལྟར་བྱས་ན་ཕན་ནོ། །དུགས་དང་། བླུགས་པ་དང་། བྱུག་པ་ལ་སོགས་པ་རྣམས་ཀྱང་ཕལ་ཆེར་དྲོན་པོར་སྦྱར་ན་ཕན་ནོ། །དུག་གིས་ཟིན་པའི་རྨ་
[400b.3]གཞན་དུ་མཆེད་ཅིང་རྣགས་པ་དང་། པགས་པ་རུལ་བ་ལ་ནི་མིའི་སྐྲ་དང་། ཡུངས་ཀར་སེར་པོ་དང་། བུ་རམ་རྙིང་པ་རྣམས་སྦྱར་བའི་དུད་པས་བདུགས་ཏེ། དེ་ནི་དུག་ནད་ཐམས་ཅད་ལ་བདུག་པར་བྱ་སྟེ་ཞེས་དྲང་སྲོང་ཆེན་པོ་འདྲོབ་སྐྱོང་གིས་བཤད་དོ། །སྲིན་བུའི་དུག་དང་། སྡིག་པའི་
[400b.4]དུག་མི་བཟད་པ་གཉིས་ལ་ནི་སྦྲུལ་གྱི་དུག་གི་གསོ་བ་བཞིན་དུ་བྱ་སྟེ། དེ་བཞིན་དུ་དུག་འཇོམས་པའི་སྨན་དང་། གསོ་བ་ཐམས་ཅད་དང་། སློན་ཁྲུས་ཀྱིས་ལུས་དག་པ་རྣམས་སྤྱད་དོ། །མོན་སྲན་རྡེའུ་དམེ་རུ་དང་། དུར་བྱིད་ཆ་སྙོམས་ཏེ་མར་དང་སྦྱར་བ་བླུད་ན་སྲིན་བུའི་དུག་གཡོ་བར་མི་
[400b.5]འགྱུར་ཏེ། ཇི་ལྟར་རླུང་གིས་གངས་ཏེ་སེ་མི་བསྒུལ་བ་བཞིན་ནོ། །ཤིང་འོ་མ་ཅན་གྱི་ཤུན་པ་བཏགས་པའི་ལྡེ་གུས་ལུས་སྦྱང་བའི་འོག་ཏུ་བསྐུས་ན་སྲིན་བུ་ལས་གྱུར་པའི་དུག་ཐམས་ཅད་འཇོམས་སོ། །གོང་དུ་བཤད་པའི་བྱུག་པ་མཆོག་དེས་བསྐུས་ན་སྐྲངས་པ་དང་། ན་ཞིང་ཚ་བ་དང་
[400b.6]བཅས་པའི་རིམས་ནད་སེལ་བར་བྱེད་དོ། །ཤུ་དག་དང་། ཤིང་ཀུན་དང་། བྱི་དང་ག་དང་། རྒྱམ་ཚ་དང་། ཧ་ཏི་པི་པི་ལིང་དང་། པ་ཐ་དང་། བོང་ང་དཀར་པོ་དང་། ཚ་བ་གསུམ་དང་། དེ་རྣམས་ལྷན་ཅིག་སྦྱར་བ་ལ་ནི་ཡན་ལག་བཅུ་པ་ཞེས་བྱ་སྟེ། དེ་ལས་རན་པར་ཟོས་ན་སྲིན་བུའི་དུག་
[400b.7]ཐམས་ཅད་ལས་རྒྱལ་བར་བྱེད་དོ་ཞེས་དྲང་སྲོང་འདྲོབ་སྐྱོང་གིས་བཤད་དོ། །སྡིག་པས་ཟིན་པ་ལ་ནི་དེ་མ་ཐག་ཙཀྲ་མར་དའི་འབྲུ་མར་གྱིས་བསྐུའོ། །ཡང་ན་ས་ལ་པར་ཎི་བསྐོལ་བའི་ཁུ་བ་ཆུ་དྲོ་འཇམ་ཙམ་གྱིས་བསྐུ་བ་འམ། ཡང་ན་རྒྱམ་ཚ་མར་དང་བཅས་པས་ཡང་དང་ཡང་བསྐུའོ། །
[401a]
[401a.1]རང་སྐྱུར་དྲོ་འཇམ་ཙམ་མམ། འོ་མ་དང་བཅས་པའི་ལན་ཚྭས་བསྐུའོ། །མར་བརྔོས་པའི་ནང་དུ་གོ་སྙོད་དང་། རྒྱམ་ཚ་བཏགས་པའི་ཕྱེ་མས་བཏབ་པའི་ལྡེ་གུས་རྨའི་ཐོན་འཁོར་དུ་དུགས་བྱའོ། །དེ་ནས་རྨའི་སྟེང་དུ་ཞལ་ཞལ་བྱས་ལ། ཡུང་བ་དང་། རྒྱམ་ཚ་
[401a.2]དང་། ཚ་བ་གསུམ་དང་། ཤྲི་ཤའི་མེ་ཏོག་དང་། འབྲས་བུ་བཏགས་པའི་ཕྱེ་མ་མ་དུ་ལུང་གའི་ཁུ་བ་དང་། བ་གཅིན་ནམ་ཆང་གི་དངས་མ་དང་སྦྱར་བའི་འདག་གུས་བསྐུའོ། །དེ་བཞིན་དུ་ཏིལ་མར་གྱི་ཚིགས་མའམ། བ་ལང་གི་ལྕི་བ་དྲོ་འཇམ་ཙམ་གྱིས་བྱུག་གོ། །བཏུང་བ་ནི་
[401a.3]མར་དང་སྦྲང་རྩི་དང་བཅས་པ་དང་། འོ་མ་དང་ཤ་ཁ་ར་ཤས་ཆེར་བཏབ་པ་བླུད་དོ། །ཕུག་རོན་གྱི་རྟུག་པ་དང་། མར་དང་། རྒྱ་སྤོས་དང་། བཅའ་སྒ་དང་། འདི་རྣམས་ཀྱི་ཕྱེ་མ་ཁ་ལུང་གི་ཁུ་བའི་ནང་དུ་བཏབ་སྟེ་འཐུངས་ན་སྡིག་པས་ཟིན་པའི་དུག་འཇོམས་པའི་མཆོག་ཡིན་ནོ། །རྔ་མོའི་
[401a.4]མཆེ་བ་ཆུ་བལ་དང་ལྷན་ཅིག་སྦྱར་བ་ནི་སྡིག་པའི་དུག་འཇོམས་པར་བྱེད་དོ། །ཤིང་ཀུན་དང་། བ་བླ་ཁ་ལུང་གི་ཁུ་བའི་ནང་དུ་བཏགས་པའི་ལྡེ་གུས་བྱུག་པ་དང་། མིག་སྨན་དང་། རི་ལུར་བྱས་ཏེ་བསྟེན་པ་དང་སྡིག་པས་ཟིན་པའི་དུག་འཇོམས་པར་བྱེད་པའི་མཆོག་ཡིན་ནོ། །ཀ་རཉྫ་དང་།
[401a.5]ཨརྫུ་ན་དང་། ཤེ་ལུ་ན་དང་། གེ་རི་ཀརྞི་ཀ་དང་། ཤྲི་ཤའི་མེ་ཏོག་དང་། འདི་རྣམས་ཞོ་ག་ཆུ་དང་བཅས་པར་བཏགས་པས་བསྐུས་ན་སྡིག་པས་ཟིན་པའི་དུག་འཇོམས་སོ། །གང་མྱོས་ཤིང་རྨུགས་ཤས་བྱེད་པ་དང་། དབུགས་རྔམ་པ་འཐོན་པ་དང་། གླལ་བ་དང་། མི་བཟད་པར་
[401a.6]ན་བ་དེ་ལ་ནི། ཨ་རུ་ར་དང་། ཡུང་བ་དང་། པི་པི་ལིང་དང་། བཙོད་དང་། བོང་ང་དཀར་པོ་དང་། ན་ལེ་ཤམ་དང་། བ་སྤྲུ་བ་དང་། བཀྲུ་སྨན་དང་། བར་ད་ཀའི་ཁུ་བའི་ནང་དུ་བཏགས་ཏེ་བྱུག་པ་བྱའོ། །དུག་གིས་ཐམས་ཅད་དུ་ཁྲག་ཏུ་ཁྱབ་པ་ལ་ནི་ཞོ་དང་། མར་བླུད་པ་དང་། རྩ་ལས་
[401a.7]ཁྲག་གཏར་བ་རྣམས་དང་། སྣ་སྨན་དང་། མིག་སྨན་ཡང་སྦྱར་རོ། །དྲོ་བ་དང་། སྣུམ་པ་དང་། སྐྱུར་བ་དང་། མངར་བ་དང་། རླུང་འཇོམས་པའི་ཁ་ཟས་ཀྱང་སྦྱར་རོ། །དོང་གྲ་དང་། ཁྱིམ་གྱི་ཐི་བའི་རྟུག་པ་དང་། བ་ལང་གི་ཁུ་བ་དང་། བ་བླ་དང་། རྒྱམ་ཚ་དང་། འདི་རྣམས་སྦྱར་བའི་
[401b]
[401b.1]ལྡེ་གུའི་དུག་སྨན་འདིས་སྦྲང་མའི་རིགས་ཀྱི་དུག་མྱུར་དུ་འཇོམས་པར་བྱེད་དོ། །སྡིག་པས་ཟིན་པའི་རྨ་དུས་ཕྱི་ཞིག་ན་དུག་གི་གནོད་པ་ཡང་དག་པར་བསྐྱེད་པ་ལ་ནི་རྨ་ལ་བྱུག་པས་བསྐུ་བར་བྱའོ། །ཨུ་ཙི་ཏིང་ག་ཞེས་བྱ་བའི་དུག་གི་ཡང་ཆོ་ག་འདི་བཞིན་དུ་བྱའོ། །གླང་པོ་ཆེའི་རྟུག་པ་དང་། ཚད་ཏྲ་དང་།
[401b.2]རོ་ཧི་ཤའི་རྩ་བ་དང་། ཤེ་ལུའི་ཁུ་བ་དང་ལྷན་ཅིག་བསྐུ་བ་དང་། རི་ལུ་དང་བྱུག་པ་ལ་སོགས་པ་བྱས་ན་སྦྲང་མའི་དུག་འཇོམས་པར་བྱེད་པའི་གཙོ་བོ་ཡིན་ཏེ། ཤྲི་ཤའི་ས་བོན་ཨརྒའི་ལོ་མའི་ནང་དུ་ཕོག་གསུམ་བསྒོས་ཏེ། པི་པི་ལིང་གི་ཕྱེ་མས་བསྲེས་ཏེ་དུག་འཇོམས་པའི་སྨན་འདིས་ནི་
[401b.3]སྲོག་ཆགས་གོ་དྷའི་དུག་དང་། སྦྲུལ་གྱི་དུག་དང་། སྲོག་ཆགས་ལུ་ཏའི་དུག་དང་། བྱི་བའི་དུག་དང་། སྡིག་པའི་དུག་རྣམས་སེལ་བར་བྱེད་དོ། །ཤྲི་ཤའི་ས་བོན་དང་། ཀ་རཉྫའི་ས་བོན་དང་། གུར་ཀུམ་དང་། རུ་རྟ་དང་། ལྡོང་རོས་དང་། འདི་རྣམས་ལྷན་ཅིག་སྦྱར་བའི་དུག་འཇོམས་པའི་
[401b.4]སྨན་འདི་ནི་རྒྱལ་བ་སངས་རྒྱས་ཀྱིས་གསུངས་ཏེ། སྲིན་བུ་མཚན་མོ་ཅན་དང་། སྡིག་པའི་དུག་ལུས་ལ་ཁྱབ་པ་གཅིག་ཏུ་སྡུད་པར་བྱེད་དོ། །སྲོག་ཆགས་ཀ་ཏིའི་དུག་པས་ཀྱང་སྲོག་ཆགས་ལུ་ཏའི་དུག་མི་བཟད་པ་ཡིན་ཏེ། དེ་ཡང་སྲོག་ཆགས་ལུ་ཏའི་དབྱེ་བ་ཡང་བཅུ་དྲུག་ཡོད་དོ། །
[401b.5]ཞེས་ཁ་ཅིག་འཆད་དོ། །ཁ་ཅིག་ནི་ཉི་ཤུ་རྩ་བརྒྱད་ཡོད་དོ། །ཞེས་ཟེར་རོ། །གཞན་དག་ནི་ཉི་མའི་ཕྱི་བཞིན་འབྲང་ཞིང་སྟོང་ཕྲག་ཙམ་དུ་ཡོད་དོ། །ཞེས་འཆད་དོ། །སྲོག་ཆགས་ལུ་ཏ་ཞེས་བྱ་བ་དེའི་ཚུལ་ནི་གནོད་པ་བྱེད་པར་སྣང་ན་ཡང་མཚན་ཉིད་ནི་དུག་དང་གཅིག་གོ། །སྲོག་ཆགས་
[401b.6]ལུ་ཏ་དེའི་ལུས་དང་མིང་ཡང་ཤེས་པར་དཀའ་ཞིང་འདྲེས་པ་ཡིན་ཏེ་གནས་སུ་བཞག་པ་ཡང་མེད་དོ། །དེ་བས་ན་ནད་གཞི་ལ་བརྟག་པར་ཤེས་པར་བྱ་སྟེ། དེ་ཡང་ནད་གཞི་རེ་རེ་ལས་གྱུར་པའི་ལུ་ཏའི་དུག་ནི་གསོ་དཀའ་བ་ཡིན་ཏེ། ལུ་ཏའི་ནད་མཁྲིས་པ་ལས་གྱུར་པ་ནི་གསོར་མི་རུང་ངོ་། །
[401b.7]མཁྲིས་པ་ལས་གྱུར་པའི་ལུ་ཏའི་མཚན་མ་ནི་ལུས་ཚ་འུར་འུར་པོར་འདུག་པ་དང་། འབྲུམ་བུ་གསུམ་འབྱུང་བ་དང་། རིམས་ཀྱིས་འདེབས་པ་དང་། རྨོངས་བག་ཏུ་འདུག་པ་དང་། ཚ་བ་ཆེ་བ་དང་། མདོག་སེར་ཞིང་དམར་བ་དང་། རུལ་བ་དང་། རྒུན་འབྲུམ་གྱི་འབྲས་བུ་འདྲ་བ་ཡིན་ནོ། །བད་
[402a]
[402a.1]ཀན་ལས་གྱུར་པའི་ལུ་ཏའི་མཚན་མ་ནི་སྲ་བ་དང་། མདོག་དཀར་བ་དང་། ཤིང་ཏོག་དང་། རུ་ཀའི་དབྱིབས་འདྲ་བ་དང་། གཉིད་ཆེ་བ་དང་། གྲང་བ་དང་། རིམས་ཀྱིས་འདེབས་པ་དང་། ལུད་པ་ལུ་ཞིང་ལྷག་པར་གཡའ་བ་དང་ལྡན་པ་ཡིན་ནོ། །རླུང་ལས་གྱུར་པའི་ལུ་ཏའི་
[402a.2]མཚན་མ་ནི་རྩུབ་ཅིང་རུད་རུད་པོར་འདུག་པ་དང་། མདོག་གནག་པ་དང་། ཚིགས་རྣམས་བྱེ་བ་སྙམ་བྱེད་པ་དང་། རིམས་ཀྱིས་འདེབས་པར་བྱེད་པ་ཡིན་ནོ། །སྲོག་ཆགས་ལུ་ཏ་དེའི་རང་རང་གི་དབྱེ་བ་ཡང་ནད་ཀྱི་རྟགས་ལས་ཤེས་པར་བྱ་བ་དང་། འདུས་པ་ལས་གྱུར་པའི་གསོར་མི་རུང་བའི་ལུ་
[402a.3]ཏའི་ནད་ནི་སྙིང་ཚ་འུར་འུར་པོར་འདུག་པ་དང་། དབུགས་མི་བདེ་བ་དང་། སྐྱིགས་བུའི་ནད་དང་། མགོ་འགྱུར་མི་ཤེས་པ་དང་། འབྲུམ་བུའི་མདོག་དཀར་བ་དང་། སེར་བ་དང་། གནག་པ་དང་། དམར་བ་དང་། སྐྲང་བ་དང་། ལུས་འདར་བ་དང་། སློན་པ་དང་། ལུས་ཚ་བ་དང་། སྐོམ་དད་ཆེ་བ་དང་།
[402a.4]ལོང་བར་འགྱུར་བ་དང་། སྣ་ཡོ་བར་འགྱུར་བ་དང་། མཆུ་དང་ཁ་དང་སོ་གནག་པར་འགྱུར་བ་དང་། རྒྱབ་ཀྱི་སྒལ་ཚིགས་དང་། མགྲིན་པ་ཞིག་པར་འགྱུར་བ་དང་། ཤིང་འཛམ་བུ་སྨིན་པའི་མདོག་འདྲ་བར་སྣང་བ་དང་། རྨའི་སྒོ་ནས་ཁྲག་འཛག་པ་དང་། དེ་ནི་ཕལ་ཆེར་ས་ལས་བྱུང་བའི་སྲོག་
[402a.5]ཆགས་ལུ་ཏའི་དུག་ཡིན་པར་ཤེས་པར་བྱ་སྟེ། ས་ལས་བྱུང་བའི་སྲོག་ཆགས་ལུ་ཏ་དེ་ཡང་དུག་ཤིན་ཏུ་རྣོ་བ་དང་། འབྲིང་དང་། ཐ་མ་དང་། རྣམ་པ་གསུམ་དུ་བཤད་དོ། གསོ་བ་མ་བྱས་ཏེ་ཡལ་བར་བོར་ན་ནི་འཆི་བར་འགྱུར་ཏེ། ཞག་བདུན་དང་། ཞག་བཅུ་དང་། ཟླ་བ་ཕྱེད་དང་གོ་རིམས་
[402a.6]བཞིན་ནོ། །སྲོག་ཆགས་ལུ་ཏས་ཟིན་པའི་རྨ་ཐམས་ཅད་ཀྱང་ཤུ་བའི་འཁོར་ལིང་ལྟ་བུར་སྣང་བ་དང་། དེ་ཡང་དཀར་བ་དང་། རྩ་གནག་པ་དང་། སེར་བ་དང་། སྔོ་བསངས་སུ་འདུག་པ་དང་། འཇམ་པ་དང་། མཐོན་པོར་འདུག་པ་དང་། རྨའི་དབུས་གནག་པ་དང་། ཡང་ན་བར་སྔོ་བསངས་སུ་
[402a.7]འདུག་པ་དང་། རྨའི་ཐ་མ་དྲ་བ་ལྟ་བུས་ཁེབས་པ་ཡིན་ནོ། །རྨ་དེ་ཤུ་བ་མཆེད་པ་དང་། སྐྲང་བ་དང་། ལུས་ཚ་བ་དང་། ཟུག་གཟེར་དང་བཅས་པ་དང་། རིམས་ཀྱིས་འདེབས་པ་དང་། མྱུར་དུ་སྨིན་ཅིང་རྣགས་པ་དང་། སོ་སོ་ནས་འགས་པ་དང་ལྡན་པ་དང་། ལུས་གང་དུ་རྣག་གིས་རེག་
[402b]
[402b.1]པ་དང་རྨ་སྐྱེད་པར་བྱེད་དོ། །གཞན་དག་ན་རེ་སྲོག་ཆགས་ལུ་ཏའི་དུག་རྣམ་པ་བརྒྱད་དོ་ཞེས་བྱ་བ་ནི་དབུགས་དང་། མཆེ་བ་དང་། བཤང་བ་དང་། གཅི་བ་དང་། ཁུ་ཆུ་དང་། སེན་མོ་དང་། ཁྲག་དང་། ཁྱད་པར་དུ་ནི་ཁ་ལ་དུག་ཡོད་དོ། །སྲོག་ཆགས་ལུ་ཏའི་དུག་དེ་ལྟེ་བའི་ཕྱོགས་སུ་
[402b.2]འབྱུང་སྟེ། ལུས་ཀྱི་གོང་འོག་ཏུ་སྲིན་བུ་འབྱུང་ཞིང་རྨ་སྐྱེད་དེ། དེས་རེག་པའི་གོས་ལ་སོགས་པ་དང་རེག་ན་ཡང་ན་བར་བྱེད་དོ། །དེ་ལ་སྲོག་ཆགས་ལུ་ཏས་ཟིན་པའི་དུག་གི་ཤུགས་དང་པོ་ལ་ནི་ཉི་མ་ཕྱེད་ཀྱི་བར་དུ་ཁབ་ཀྱིས་ཕུག་པ་ཙམ་གྱི་བུ་ག་མང་དུ་སྣང་བ་ཡིན་ནོ། །དེའི་མདོག་རབ་ཏུ་མི་
[402b.3]གསལ་བར་སྣང་ཞིང་། ཅུང་ཟད་གཡའ་བ་དང་། ན་བ་དང་ལྡན་པར་བྱེད་དོ། །ཞག་གཉིས་པ་ལ་ནི་གོང་མ་ལྟར་སྣང་བའི་བུ་གའི་ནང་དུ་འབྲུམ་བུས་ཁྱབ་པར་སྣང་ཞིང་། མདོག་གསལ་བ་དང་། དབུས་མཐོན་པོར་འདུག་པ་དང་། གཡའ་བ་དང་། རྨེན་བུ་ལྟར་སྣང་བ་ཡིན་ནོ། །
[402b.4]ཞག་གསུམ་པ་ལ་རིམས་ཀྱིས་འདེབས་པ་དང་། བ་སྤུ་ལངས་པ་དང་། ཁྲག་མདོག་དམར་བ་འཁོར་ལིང་རྫ་དེ་བ་ལྟ་བུར་སྣང་བ་དང་། ཚབས་ཆེར་ན་ཞིང་བ་སྤུའི་ཁུང་བུ་ནས་འཛག་པ་དང་བཅས་པ་ཡིན་ནོ། །ཉིན་ཞག་བཞི་པ་ལ་ནི་ཤས་ཆེར་སྐྲངས་ཤིང་ལུས་ཚ་བ་དང་། དབུགས་མི་བདེ་
[402b.5]བ་དང་། མགོ་འཁོར་བར་བྱེད་དོ། །ཞག་ལྔ་པ་ལ་ནི་དུག་འཁྲུགས་པའི་ནད་དེ་དང་དེར་བྱེད་དོ། །ཞག་དྲུག་པ་ལ་ནི་དུག་གི་ཤུགས་གནད་དུ་འབྱུང་བར་བྱེད་པ་ཡིན་ནོ། །ཞག་བདུན་པ་ལ་ནི་སྲོག་འདོར་བར་བྱེད་དོ། །དེ་བཞིན་དུ་དུག་གི་ཤུགས་རྣོ་བ་དང་། བར་མ་དང་། ཐ་མའི་དབྱེ་བས་ཞག་
[402b.6]བདུན་ནམ། བཅུ་འམ་ཟླ་བ་ཕྱེད་ཀྱིས་འཆི་བར་བྱེད་པ་ཡིན་ནོ། །གལ་ཏེ་འཚོ་བ་ཡིན་ན་ཞག་ཉི་ཤུས་དུག་གི་ཤུགས་རྣམ་པ་ཐམས་ཅད་དུ་ཞི་བར་བྱེད་དོ། །དེ་ནས་སྲོག་ཆགས་ལུ་ཏས་ཟིན་པ་ལ་ནི་མཚོན་གྱིས་མྱུར་དུ་དབྱུང་བར་བྱའོ། །ཤིང་འཛམ་བུ་ལ་སོགས་པ་ཤིང་རྣམ་པ་བརྒྱད་
[402b.7]ཀྱིས་བསྲེག་པར་བྱའོ། །མཁྲིས་པ་ཤས་ཆེ་བ་ལ་ནི་མི་བསྲེག་གོ། །སྲོག་ཆགས་ལུ་ཏས་ཟིན་པའི་རྨ་ནད་ལ་བརྟེན་ཅིང་གནས་བཅས་ཏེ་སྤུ་འབྱི་བ་དང་། རྩུབ་པ་དང་། རྒྱ་ཆེར་སོང་བ་དེ་ནི་བཅད་པ་འམ། བསྲེག་པར་བྱའོ། །གོང་དུ་སྨོས་པའི་དུག་འཇོམས་པའི་སྨན་
[403a]
[403a.1]བཏགས་པའི་ཕྱེ་མ་རྒྱམ་ཚ་དང་། སྦྲང་རྩི་དང་བཅས་ཏེ་བསྐུའོ། །ཤིང་འོ་མ་ཅན་བསྐོལ་བའི་ཁུ་བ་གྲང་མོས་བླུགས་པར་བྱའོ། །ལུས་ཀུན་ཏུ་རྨ་དང་ནད་གང་ན་ཡོད་ཀྱང་གཏར་གས་ཁྲག་དབྱུང་བ་དང་། རྭ་གང་ཡང་རུང་བས་གཏར་ག་བྱའོ། །བྱང་ཆུབ་ཀྱི་ཤིང་དང་།
[403a.2]སྨན་སླེ་མ་ཐང་ཀ་དང་། བ་རུ་ར་དང་། བྲི་ཡང་ཀུ་དང་། སེར་པོ་རྣམ་གཉིས་དང་། ཤུག་པ་དང་། དེ་རྣམས་སྦྲང་རྩི་དང་མར་དང་སྦྱར་བ་གྲང་མོས་བླུགས་པ་དང་། བྱུགས་པ་ལས་ཐམས་ཅད་ལ་སྦྱར་ན་ལུ་ཏ་དང་། སྲིན་བུ་ཤི་ཏ་ལ་སོགས་པའི་དུག་མ་ལུས་པ་འཇོམས་པར་བྱེད་དོ། །
[403a.3]རྨ་ཤིང་དང་། བཙོད་དང་། པདྨ་གེ་སར་དང་། རྒྱ་སྤོས་དང་། དེ་རྣམས་མར་དང་སྦྲང་རྩི་དང་སྦྱར་བའི་ནང་དུ་ཙམ་པ་ཀས་བསྒོས་ཏེ་བཏང་ན་ཕན་ཡོན་གོང་མ་བས་འཕགས་སོ། །སྨན་གོང་མ་དེ་ཉིད་ཀྱི་ནང་དུ་བ་ལང་གི་ལྕི་ཁུ་དང་། ཤ་ཁ་ར་དང་། མར་དང་། སྦྲང་རྩི་དང་སྦྱར་བ་ཡང་ཕན་
[403a.4]ཡོན་གོང་མ་དང་འདྲའོ། །ཨ་པ་མརྒ་དང་། ལྡོང་རོས་དང་། བ་བླ་དང་། སྐྱེར་པ་དང་། བྱ་མ་ཀ་དང་། བཙག་ཡུག་སྣམ་དང་། རྒྱ་སྤོས་དང་། སུག་སྨེལ་དང་། རུ་རྟ་དང་། ན་ལེ་ཤམ་དང་། ཤིང་མངར་དང་། དེ་རྣམས་མར་དང་སྦྲང་རྩི་དང་སྦྱར་བ་ནི་དུག་འཇོམས་པའི་སྨན་
[403a.5]མནྡ་ར་ཞེས་བྱ་སྟེ། ལྡེ་གུ་ལ་སོགས་པ་བྱས་ཏེ་བཟའོ། །རྒྱ་སྤོས་དང་། སེང་ཕྲོམ་དང་། ཤུ་དག་དང་། པུ་ཙེ་ཤེལ་དང་། པ་ཐ་དང་། སུག་སྨེལ་དང་། གུར་གུམ་དང་། དེ་རྣམས་དང་ལྷན་ཅིག་སྦྱར་བའི་དུག་འཇོམས་པའི་སྨན་འདི་ནི་ནད་གཞི་མང་པོ་ལ་སྦྱར་བར་བྱ་སྟེ། གནྡ་མ་
[403a.6]ད་ཞེས་བྱའོ། །ཤིང་མངར་དང་། པོ་སོན་ཆ་དང་། ཨ་གོ་ལ་དང་། ཀོ་ཤ་ཏི་ཀི་དང་། སིན་དུ་བ་ར་དང་། དེ་རྣམས་འབྲས་བུ་གསུམ་བསྐོལ་བའི་ཆུ་དང་སྦྱར་ཏེ་འཐུངས་ན། བད་ཀན་ལས་གྱུར་པའི་དུག་ནད་མི་བཟད་པ་ཕྱིར་འབྱིན་ཏེ་སྐྱུག་པར་བྱེད་དོ། །ཤྲི་ཤའི་ལོ་མ་དང་། རྩ་བ་
[403a.7]དང་འབྲས་བུའམ། ཡང་ན་ཨང་གོ་ལའི་ལོ་མ་དང་། རྩ་བ་དང་། འབྲས་བུ་དང་། དེ་གཉིས་གང་ཡང་རུང་བ་འབྲས་བུ་གསུམ་དང་ལྷན་ཅིག་བསྐོལ་བའི་ཁུ་བའི་ནང་དུ། ནི་ལི་ནི་དང་། དུར་བྱེད་ལ་སོགས་པའི་ཕྱེ་མ་བཏབ་སྟེ་བཀྲུ་སྨན་དུ་སྦྱར་རོ། །སྲོག་ཆགས་ལུ་ཏས་ཟིན་པའི་དུག་ནད་ལ་
[403b]
[403b.1]ཚ་བ་དང་སྐྲང་བ་ལ་སོགས་པའི་ནད་ཞི་བ་དང་། པདྨའི་སྙིང་པོ་ཞེས་བྱ་བའི་ནད་རྨའི་ནང་དུ་འབྱུང་སྟེ། དེ་ལ་ནི་དང་པོ་ལེ་བརྒན་རྩིའི་མེ་ཏོག་དང་། བ་བླ་དང་། གཙང་སྨན་ཁྲོན་བུ་དང་། ཐི་བའི་རྟུག་པ་དང་། དུར་བྱིད་དང་། རྒྱམ་ཚ་དང་། དནྟི་དང་། དེ་རྣམས་སྦྱར་བས་རྨ་ལ་བསྐུས་ན་
[403b.2]པདྨའི་སྙིང་པོ་ཞེས་བྱ་བའི་ནད་འབྱིན་པར་བྱེད་དོ། །ཡང་ན་ཨུཏྟ་མ་ཀ་ནི་རིའི་རྩ་བ་དང་། སྨྱུག་མའི་ཤུན་པ་འམ། ཡང་ན་རྒྱམ་ཚ་དང་། རུ་རྟ་དང་། དནྟི་དང་། པུ་ཙེ་ཤེལ་དང་། དེ་རྣམས་ཞོ་དང་ལྷན་ཅིག་སྦྱར་བ་འམ། ཡང་ན་ར་ཙ་ཀོ་ཤ་ཏ་ཀིའི་རྩ་བ་དང་། ཕབས་གཉིས་དར་བ་
[403b.3]དང་ལྷན་ཅིག་སྦྱོར་བའམ། སྦྱོར་བ་དེ་དག་གང་ཡང་རུང་བས་བསྐུ་བར་བྱས་ན། པདྨའི་སྙིང་པོ་ཞེས་བྱ་བའི་ནད་འབྱིན་པར་བྱེད་དོ། །དེའི་དུས་སུ་དུག་འཇོམས་པའི་སྨན་གྱིས་ཉམས་བརྟ་བར་བྱ་སྟེ། དེ་ཡང་སྣུམ་གྱི་བྱ་བ་མ་ལུས་པ་དང་། མར་རྣམས་ལེགས་པར་སྤྱད་དོ། །
[403b.4]དུག་གི་ནད་ཀྱིས་ཟིན་པ་ལ་ནི་ཏིལ་མར་བླུད་ཅིང་བསྟེན་ན་དུག་འཕེལ་ཞིང་རྒྱས་པར་འགྱུར་ཏེ་ཇི་ལྟར་རྩྭ་ལ་མེ་མཆེད་པ་བཞིན་ནོ། །བ་ལུ་དང་། ཀང་ཀ་ཏ་དང་། ཐལ་ཏྲེས་དང་། གླ་སྒང་དང་། ཤ་རྩི་དང་། སྱོ་ན་ཀ་དང་། ཉ་ལྕིབས་དང་། ཨུཏྤལ་སྔོན་པོ་དང་། རྒྱ་སྤོས་དང་།
[403b.5]ཤིང་མངར་དང་། ཤིང་ཚ་དང་། ན་ཀུ་ལི་དང་། ཤུག་པ་དང་། པོ་སོན་ཆའི་རྐང་དང་། དེ་རྣམས་ལྷན་ཅིག་སྦྱར་བ་འམ། ཡང་ན་སྐྱེར་བ་དང་། འབྲས་གང་དང་། སརྦ་ལོ་ཙ་ན་དང་། པི་པི་ལིང་དང་། བཅའ་སྒ་དང་། པི་པི་ལིང་གི་རྩ་བ་དང་། ཙི་ཏྲ་ཀ་དང་། བ་ར་ན་དང་། ཨ་ཀ་རུ་དང་། བིལ་
[403b.6]བ་དང་། པ་ཏ་ལི་དང་། ནིམ་པ་དང་། རུ་རྟ་དང་། ཤེ་ལུ་དང་། ནཱ་ག་གེ་སར་དང་། དེ་རྣམས་ལྷན་ཅིག་སྦྱར་བ་འམ། ཡང་ན་བིལ་བ་དང་། ཙནྡན་དང་། རྒྱ་སྤོས་དང་། ཨུཏྤ་ལ་དང་། བཅའ་སྒ་དང་། པི་པི་ལིང་དང་། ལྕམ་མ་དང་། བཅུང་ལྕམ་དང་། རུ་རྟ་དང་། ཉ་ཕྱིས་དང་། ཤལ་མ་ལི་
[403b.7]དང་། འབྲས་བུ་གསུམ་དང་། བ་ཏི་ལ་དང་། ག་བྲའི་རྩ་བ་དང་། སེན་དུ་བ་ར་དང་། ཀ་ར་གྷ་ད་དང་། ཤིང་ཚ་དང་། དེ་རྣམས་ལྷན་ཅིག་སྦྱར་བ་འམ། སྦྱོར་བ་དེ་དག་གང་ཡང་རུང་བ་བཏུང་བ་དང་། མིག་སྨན་དང་། སྣར་བླུགས་པ་དང་། བྱུག་པ་དང་། བླུགས་པ་ལ་སོགས་པ་བྱས་ན་དུག་
[404a]
[404a.1]འཇོམས་པའི་སྨན་གྱི་མཆོག་ཡིན་ཏེ། མཁྲིས་པ་དང་། བད་ཀན་དང་། རླུང་ལས་གྱུར་པའི་ལུ་ཏའི་དུག་འཇོམས་པར་བྱེད་དོ། ཅི་ལྟར་ཕོངས་པས་དབང་རྙེད་ན་འབྱོར་པ་འགྲུབ་པ་བཞིན་ནོ། །སེང་ཕྲོམ་དང་། པུ་ཤེལ་ཙི་དང་། ཤུག་པ་དང་། པདྨ་གེ་སར་དང་།
[404a.2]ཙནྡན་སེར་པོ་དང་། ཙནྡན་དམར་པོ་དང་། པྲི་ཡང་ཀུའི་མེ་ཏོག་དང་། པ་ཡ་སྱ་དང་། པདྨའི་རྩ་ལག་དང་། དེ་རྣམས་སྦྱོར་བ་ཐམས་ཅད་སྦྱོར་བ་ལས་སྦྱར་ན་སྲོག་ཆགས་ལུ་ཏའི་དུག་ཐམས་ཅད་འཇོམས་སོ། །སྲིན་བུའི་དུག་ཅན་དང་། སྲོག་ཆགས་ལུ་ཏ་ལ་སོགས་པས་ཟིན་པའི་ནད་
[404a.3]བརྟགས་པ་དང་གསོ་བའི་ལེའུ་སྟེ་སུམ་ཅུ་རྩ་བདུན་པ་རྫོགས་སོ།། །།དེ་ནས་བྱི་བ་དང་ཨ་ལང་ཀའི་དུག་གིས་བཟུང་བའི་ནད་དམིགས་བརྟགས་ཤིང་གསོ་བའི་ཆོ་གའི་ལེའུ་བཤད་པར་བྱ་སྟེ། དེ་ལ་བྱི་བའི་བྱེ་བྲག་ནི་རྣམ་པ་བཅོ་བརྒྱད་ཡོད་དེ། པ་ཙ་ལ་དང་། པུ་ཊ་ལ་དང་།
[404a.4]ཧ་ས་ན་དང་། ཙི་གི་རི་དང་། ཙི་ན་དང་། ཀ་ཤ་ཡ་དནྟ་དང་། ཀོ་ཀི་ལ་དང་། ཀ་བི་ལ་དང་། ཨ་སི་ཏ་དང་། ཨ་རུ་ར་དང་། ས་ཐལ་དང་། ཤྭེ་ཏ་དང་། ཀ་པོ་ཊ་དང་། ཀ་པི་ལུ་དང་། ཨུན་དུ་ར་དང་། ཚུ་ཚུན་ད་ར་དང་། ར་ལ་ས་དང་དེ་རྣམས་ནི་མིང་གི་རྣམ་གྲངས་སོ། །བྱི་བ་དེ་དག་གི་
[404a.5]དུག་གིས་ཟིན་པའི་མཚན་མ་ནི། བྱི་བ་དེ་དག་གི་ཁུ་ཆུས་ལུས་ལ་ཕོག་གམ་བྱི་བའི་ཁུ་ཆུས་ཕོག་པའི་གོས་དང་རེག་ཀྱང་རུང་བ་སྟེ། དེས་ལུས་དང་ཡན་ལག་རྣམས་སུ་ཕོག་ཅིང་རེག་པས་ཁྲག་སྐྱོན་དང་བཅས་པར་བྱས་ནས། མདོག་དཀར་བ་དང་། ཐོར་བུ་དང་། སྐྲང་བ་དང་། ཤུ་བ་འཁོར་
[404a.6]ལིང་དུ་བྱུང་བ་དང་། མགོ་འཁོར་བ་དང་། ཡི་ག་འཆུས་པ་དང་། ལུས་གྲང་བ་དང་། རིམས་ཀྱིས་འདེབས་པ་དང་། རབ་ཏུ་ན་བ་དང་། ལུས་ཉམས་རྨས་པ་དང་། འདར་བ་དང་། ཚིགས་རྣམས་སུ་ཟུག་པ་དང་། སྤུ་ཟིང་ཞེས་བྱེད་པ་དང་། རྣག་ཁྲག་འཛག་པ་དང་། བརྒྱལ་བ་
[404a.7]དང་། ཡུན་རིང་བ་དང་། ནད་དང་འབྲེལ་བ་ཡིན་ནོ། །བྱི་བའི་ཕྲུ་གུ་མང་དུ་བླངས་ཏེ། དེའི་སྐྱུག་པ་མི་ལ་རེག་པས་བད་ཀན་དང་འབྲེལ་པའི་ནད་དུ་འགྱུར་ཏེ་དེ་ཡང་སྐོམ་དད་ཆེ་བ་ཡིན་ནོ། །བྱི་བ་འདོད་པ་སྤྱད་ཅིང་དེའི་ཁུ་བས་མི་ལ་རེག་པའི་དུག་ནི་ཡང་དང་ཡང་ལྡང་བ་ཡིན་ཏེ་གསོ་
[404b]
[404b.1]དཀའ་བ་ཡིན་ནོ། །བརྒྱལ་བ་དང་། ལུས་སྐྲངས་པ་དང་། ལུས་མདོག་འགྱུར་ཞིང་དབལ་སྐྱ་བ་དང་། རྣགས་པ་དང་། རྣ་བས་སྒྲ་མི་ཐོས་པ་དང་། རིམས་ཀྱིས་འདེབས་པ་དང་། མགོ་ལྕི་བ་དང་། ཁ་ཆུ་དང་། ཁ་ནས་ཁྲག་སྐྱུག་པའི་མཚན་མ་འབྱུང་ཞིང་གསོར་མི་རུང་བ་ཡིན་ནོ། །དེ་ལ་བྱི་
[404b.2]བ་ཚུ་ཚུན་ད་ར་ཞེས་བྱ་བའི་དུག་གིས་ཟིན་པའི་རྟགས་ནི་ཆུ་སོར་སྐྲང་བ་དང་། མཆུའི་མདོག་འགྱུར་བ་དང་། བྱི་བ་འདྲ་བར་རྨེན་བུས་ལུས་ལ་ཁྱབ་པ་དང་། བྱི་བ་ཉིད་ཀྱི་དྲི་བྲོ་བ་དེ་ནི་སྤང་བར་བྱའོ། །བྱི་བའི་དུག་གིས་བད་ཀན་གྱི་ནད་འཁྲུགས་པར་བྱས་ཏེ་སྐྲང་བ་དང་། འདུ་ཤས་རྒྱུ་བ་འམ།
[404b.3]ཡང་ན་མི་རྒྱུ་བ་ལ་བརྟེན་ཏེ་ཁོང་པའི་ནང་དྲོ་བ་དང་། ལུས་ཟུངས་རྣམས་འཁྲུག་པར་བྱེད་ཅིང་མི་བཟད་པ་དང་། ཁ་ཆུ་འཛག་པ་དང་། ལོང་བ་དང་། འོན་པར་འགྱུར་བ་དང་། སྐྲང་བ་དེ་ལུས་ཀུན་ཏུ་འཕོ་ཞིང་བྱེར་བ་ཡིན་ནོ། །བྱི་བའི་མཇུག་མ་དང་། འགྲམ་པ་དང་། ཕྲག་གོང་དང་། མགོ་
[404b.4]བོ་རྣམས་ལ་གནས་སྐྱོན་པ་དང་། སྡུག་བསྔལ་གྱི་མགོ་དུད་པ་དང་། དེ་ལྟ་བུའི་བྱི་བའི་དུག་གིས་ཟིན་པའི་རྨ་ནི་ཚོར་བ་ཆུང་བ་དང་། ཁྲག་ནག་པོ་འཛག་ཅིང་དེའི་འོག་ཏུ་མིག་གང་མགོ་བོར་ཟུག་པ་དང་། རིམས་ཀྱིས་འདེབས་པ་དང་། ལུས་ཁོང་རེངས་པ་དང་། སྐོམ་དད་ཆེ་བ་དང་།
[404b.5]བརྒྱལ་བ་དང་། གདུག་པ་ཅན་གཞན་གྱི་མཆེ་བའི་དུག་གིས་ཟིན་པ་ཡང་དེ་བཞིན་དུ་བལྟ་སྟེ། དེ་ཡང་ཅེ་སྤྱང་དང་། དྲེད་དང་། གུང་དང་། སྟག་དང་། སྤྱང་ཀི་ལ་སོགས་པ་རྣམས་ཀྱིས་ཟིན་ན་ནི། གཡའ་བ་དང་། ན་ཞིང་ཟུག་གཟེར་དང་བཅས་པར་མདོག་འགྱུར་བ་དང་། ཚོར་
[404b.6]བ་མེད་པ་དང་། རྣགས་པ་དང་། གཉིད་ཆུང་བ་དང་། རིམས་ཀྱིས་འདེབས་པ་དང་། མགོ་འཁོར་བ་དང་། ཚ་འུར་འུར་པོར་འདུག་པ་དང་། མདོག་དམར་བ་དང་། ན་ཞིང་སྨིན་པ་དང་། སྐྲང་བ་དང་། རྨེན་བུ་སྐྱེས་པ་དང་། ཡན་ལག་འཆུམས་པ་དང་། རྨ་འགས་པ་དང་། འབྲུམ་
[404b.7]བུ་འབྱུང་བ་དང་། པདྨའི་སྙིང་ཕོ་ལྟ་བུའི་ནད་འཁོར་ལིང་དུ་འབྱུང་བ་དང་། མཚན་མ་དེ་དག་དང་ལྡན་ན་ནི་དུག་དང་བཅས་པ་ཡིན་ལ། དུག་མེད་ན་ནི་མཚན་མ་དེ་དག་མི་སྣང་ངོ་། །སྲོག་ཆགས་ལུ་ཏའི་དུག་གིས་ཟིན་ན་ནི་སྐྱེས་བུ་གང་ཡང་རུང་བ་བཟུང་བ་དེ་ཉིད་ཀྱི་རྗེས་སུ་རྟགས་སྟོན་ཅིང་།
[405a]
[405a.1]དེ་མ་ཐག་པ་དང་། རྒྱུ་མེད་པར་འགྱེལ་བ་དང་། མེ་ལོང་དང་ཆུ་ལ་སོགས་པའི་ནང་དུ་མཐོང་བ་དང་། ཆུའི་ནང་དུ་གཞན་གྱིས་མ་བཟུང་བཞིན་དུ་རེངས་པ་འམ། མཐོང་བ་འམ། ཐོས་པ་ཙམ་གྱིས་སྔངས་པ་དེ་ནི་ཆུའི་ནང་དུ་སྔངས་པའི་དུག་ཅེས་བྱ་སྟེ་དེ་ནི་སྤང་བར་བྱའོ། །དེ་ལ་ཐོག་
[405a.2]མར་བྱི་བའི་དུག་གིས་བཟུང་བར་འགྱུར་ན་དེ་མ་ཐག་དེའུ་བསྲེག་པར་བྱའོ། །ཡང་ན་མེ་ལོང་བསྲོས་པས་དུགས་བྱའོ། །དེ་ལྟར་མ་བྱས་ན་ནི་པདྨའི་སྙིང་པོ་ཞེས་བྱ་བའི་ནད་ཤིན་ཏུ་མི་བཟད་པ་ཟུག་གཟེར་དང་བཅས་པར་འགྱུར་རོ། །དེ་ལྟར་བསྲེགས་པའི་འོག་ཏུ་ཆུ་སེར་གཟག་གོ། །ཡང་མཚོན་གྱིས་
[405a.3]ཞལ་ཞལ་བྱས་ལ་དེའི་འོག་ཏུ་ཤྲི་ཤ་དང་། ཡུང་བ་དང་། རྒྱ་སྤོས་དང་། གུར་གུམ་དང་། སླེ་ཏྲེས་དང་། དེ་རྣམས་ཀྱིས་བྱུག་པར་བྱའོ། །སོལ་བ་དང་། ཁྱིམ་གྱི་དུད་པ་དང་། བཙོད་དང་། ཡུང་བ་དང་། རྒྱམ་ཚ་དང་། དེ་རྣམས་ཀྱིས་བྱུག་པ་བྱས་ན། བྱི་བའི་དུག་ལས་རྒྱལ་བར་བྱེད་
[405a.4]པ་དང་། ཀར་ནི་ཀ་ཞེས་བྱ་བའི་དུག་སེལ་ཏོ། །དེ་ནས་རྨ་ཁ་སྐྱུར་གྱིས་བཀྲུས་ཏེ། དེ་ནས་ཡང་སྨན་གྱིས་བསྐུའོ། །སྨན་པི་ལིང་ཏི་དང་། ཀརྣ་ཀ་དཀར་པོ་དང་། བིལ་བའི་རྩ་བ་དང་། སླེ་ཏྲེས་དང་། དེ་དག་གང་ཡང་རུང་བ་དང་གཞན་ཡང་དུག་གིས་སྐྲངས་པ་འཇོམས་པའི་སྨན་དང་ལྷན་ཅིག་
[405a.5]སྦྱར་ཏེ་བྱུག་པ་བྱས་ལ་རྩ་ལས་ཁྲག་ཀྱང་མྱུར་དུ་དབྱུང་བར་བྱའོ། །སྨན་ནི་ལི་ནི་བསྐོལ་བའི་ནང་དུ་ཤྲི་ཤ་དང་། རྒྱ་ཤུག་གི་ཕྱེ་མས་བཏབ་སྟེ་སློན་དུ་གཞུག་གོ། །ཀོ་ཤ་ཏ་ཀི་དང་། ཤྲི་ཤ་དང་། ཛི་ལུ་ཏ་གའི་འབྲས་བུ་དང་། པོ་སོན་ཆ་དང་། དེ་རྣམས་ཕྱེ་མར་བྱས་ཏེ། ཞོ་དང་སྦྱར་བ་བླུད་ནས་
[405a.6]སློན་དུ་གཞུག་གོ། །ཡང་ན་ཤུ་དག་དང་། པོ་སོན་ཆ་དང་། ཛི་མུ་ཏ་དང་། རུ་རྟ་དང་། དེ་རྣམས་བ་གཅིན་དང་བཏགས་ཏེ། གོང་མ་བཞིན་དུ་བྱས་ལ་བླུད་ན་བྱི་བའི་དུག་འཇོམས་སོ། །བཀྲུ་སྨན་དུ་ནི་ལི་ནི་དང་། དུར་བྱེད་དང་། འབྲས་བུ་གསུམ་གྱི་ལྡེ་གུས་འདོད་པ་ཡིན་ནོ། །མགོ་ཁྲུས་ལ་
[405a.7]ནི་ཤྲི་ཤ་དང་། འབྲས་བུ་འདོད་པ་ཡིན་ནོ། །མིག་སྨན་དུ་བའི་ལྕི་བ་བཙིར་བའི་ཁུ་བའི་ནང་དུ་རྩ་བ་གསུམ་གྱི་ཕྱེ་མས་བཏབ་པ་སྦྱར་རོ། །བ་ལང་གི་ལྕི་ཁུའི་དུ་ཀ་པིད་ཏའི་ཕྱེ་མ་དང་། སྦྲང་རྩི་དང་སྦྱར་བས་ལྡེ་གུར་བཟའོ། །མོན་སྣེའུ་དམེ་རུའི་རྩ་བ་མར་དང་ལྷན་ཅིག་བསྐོལ་ཏེ་བཏུང་བར་
[405b]
[405b.1]བླུད་ན་ཕན་ནོ། །སེར་པོ་རྣམ་གཉིས་དང་། གེ་རི་ཀརྞི་ཀ་དང་། བཙོད་དང་། ཤིང་མངར་དང་། སླེ་ཏྲེས་དང་། དེ་རྣམས་མར་དང་སྦྱར་བའི་བཏུང་བ་སྦྱར་ནས་ཡང་བཟའོ། །ཡང་ན་ཐལ་ཏྲེས་ཀྱི་རྩ་བ་མར་དང་བསྐོལ་བ་འམ། ཡང་ན་ཀ་པིད་ཏ་རྣམ་ལྔ་མར་དང་ལྷན་ཅིག་བསྐོལ་བ་གང་
[405b.2]ཡང་རུང་བ་བཏུང་བར་བླུད་ན་ཕན་ནོ། །སིནྡྷུ་ར་དང་། རྒྱ་སྤོས་དང་། ཤི་ཀྲུ་དང་། བིལ་བའི་རྩ་བ་དང་། བ་སྤྲུ་བ་དང་། ཤུ་དག་དང་། གཟེ་མ་དང་། ཛི་མུ་ཏ་རྣམས་བསྐོལ་བའི་ཁུ་བའི་ནང་དུ་སྦྲང་རྩི་དང་ལྡན་པར་བླུད་དོ། །ཁ་ཟས་སུ་ནི་འབྲས་སཱ་ལུའི་ཆན་ཞོ་དང་ལྷན་ཅིག་ཟོས་ན་བྱི་བའི་
[405b.3]དུག་གིས་ཉམ་ཐག་པ་སེལ་ཏོ། །ཤ་ར་ཕུང་ཀའི་རྩ་བ་ས་བོན་བཏགས་པའི་ཕྱེ་མ་དར་བ་དང་སྦྱར་བ་བཏུང་ངོ་། །ཨངྐོ་ལའི་རྩ་བ་བཏགས་པར་ཐུག་གི་གཅིན་དང་སྦྱར་བའི་འདག་གུས་བསྐུ་བ་དང་། བཏུང་བར་སྦྱར་ན་ནི་བྱི་བའི་དུག་ཐམས་ཅད་འཇོམས་སོ། །ཀ་པིད་ཏའི་སྙིང་པོ་དང་།
[405b.4]ཤིང་ཏི་ལ་ཀ་དང་། ཏིལ་དང་། མ་ཀོ་ལའི་རྩ་བ་རྣམས་ཀྱི་ཕྱེ་མ་བ་གཅིན་དང་སྦྱར་བ་བླུད་དོ། །ཡང་ན་ཤིང་ཏི་ལ་ཀ་བཏགས་པའི་ཕྱེ་མ་འོ་མ་དང་སྦྱར་བ་བླུད་དོ། །ཡང་ན་ཤེ་རྒྱ་ཀའི་རྩ་བ་སྦྲང་རྩི་དང་སྦྱར་བ་འབྲས་བཀྲུས་པའི་ཆུ་དང་སྦྱར་བ་བླུད་དོ། །ཡང་ན་ཁུ་བ་ཁ་བའི་སྣོད་ཀྱི་ནང་དུ་ཆུ་
[405b.5]ཞག་གཅིག་སྦྱར་བ་བླུད་པར་བྱའོ། །སིན་དུ་བ་རའི་རྩ་བ་དང་། བྱི་བའི་རུས་པ་དང་། རྒྱ་སྤོས་དང་། བོང་ང་དཀར་པོ་རྣམས་ཆུ་ལ་བཏབ་སྟེ། སྣར་བླུགས་པ་ལ་སོགས་པ་བྱས་ན་བྱི་བའི་དུག་སེལ་བར་བྱེད་དོ། །བྱི་བའི་དུག་དེའི་ལྷག་མ་ལུས་པ་ན་དུས་ཕྱིས་ནད་གཞི་རྣམས་
[405b.6]ཇི་ལྟ་ཇི་ལྟར་སྐྱེད་པའི་དུས་དེ་དང་དེའི་ཚེ་དུག་དེ་ཡང་རྗེས་སུ་འཕེལ་ཞིང་སྐྱེ་བར་འགྱུར་ཏེ། དེ་ལ་ནི་གནས་སྐབས་བརྟགས་ཏེ། ནད་གཞི་རང་རང་གི་དུག་གསོ་བ་ཇི་ལྟ་བ་བཞིན་དུ་འཇོམས་པའི་སྨན་གྱིས་གསོ་བ་ཡང་དེ་ལྟར་སྦྱར་རོ། །ཨ་ལ་ཀ་ཞེས་བྱ་བའི་དུག་གིས་བཟུང་བ་ལ་ནི་
[405b.7]མར་བསྐོལ་བས་རྨ་བསྲེག་པར་བྱའོ། །གོང་དུ་སྨོས་པའི་དུག་འཇོམས་པའི་སྨན་གྱི་ལྡེ་གུས་བསྐུས་ཏེ། མར་རྙིང་པ་བཏུང་བར་བླུད་དོ། །ཨརྒའི་འོ་མ་དང་ལྡན་པའི་བཀྲུ་སྨན་ཡང་མྱུར་དུ་བྱའོ། །ཨང་ཀོ་ལའི་རྩ་བ་བྱང་ཕྱོགས་སུ་ཟུག་པ་དེ་བཏུས་ལ་བསྐོལ་བའི་ཁུ་བའི་ནང་དུ་འབྲས་
[406a]
[406a.1]བུ་གསུམ་དང་། ཤིང་པི་པི་ལིང་དང་། ཕྱེ་མར་བཏབ་བ་བླུད་དོ། །ཡང་ན་ལང་ཏང་རྩེའི་འབྲས་བུ་དང་། གེ་རི་ཀརྞི་དང་། བ་སྤྲུ་བ་རྣམས་བསྐོལ་བའི་ཁུ་བ་བླུད་དོ། །ཏིལ་བཏགས་པའི་ལྡེ་གུ་དང་། རུ་ཤ་དང་། ལྕགས་ཕྱེ་དང་། འོ་མ་དང་། བུ་རམ་བསྲེས་པ་
[406a.2]བླུད་ན། ཨ་ལ་ཀའི་དུག་མི་བཟད་པ་ཡང་འཇོམས་པར་བྱེད་དོ། །ཇི་ལྟར་སྤྲིན་གྱི་ཚོགས་རླུང་གིས་གཏོར་བ་བཞིན་ནོ། །ཨ་ལ་ཀའི་དུག་གིས་ཟིན་པའི་མི་ལ་ནི་གྲུབ་པའི་སྔགས་དང་། སྨན་དང་། རིན་པོ་ཆེ་དང་ལྡན་པས་ལུས་བཀྲུ་བར་བྱའོ། །སྲོག་ཆགས་རྐང་བཞི་པ་དང་། རྐང་བཞི་
[406a.3]པའི་སོ་དང་སེན་མོའི་ནང་དུག་ཡོད་པས་བཟུང་ན་སྨས་པར་འགྱུར་ཏེ། དེས་སྐྲངས་པ་དང་། སྨིན་པ་དང་། མདོག་དམར་བ་དང་། ཚ་བ་སྐྱེས་པ་དང་། ཆུ་སེར་འཛག་པ་དང་། ནད་དང་བཅས་པ་ལ་ནི་སོ་མ་བལ་ཀ་དང་། ཨ་ཤ་གར་ན་དང་། ཁ་ལ་བ་གོ་ཛི་ཧ་དང་། ཧ་ན་ས་པ་ཏི་ཀ་དང་
[406a.4]སེར་པོ་རྣམ་གཉིས་དང་། བཙག་དང་། དེ་རྣམས་ཀྱི་ལྡེ་གུས་རྨ་ལ་བསྐུས་ན། སེན་མོ་དང་། སོ་ལས་གྱུར་པའི་དུག་འཇོམས་སོ། །བྱི་བ་དང་། ཨ་ལ་ཀའི་དུག་གིས་བཟུང་བའི་ནད་དམིགས་བརྟགས་ཤིང་གསོ་བའི་ཆོ་གའི་ལེའུ་སྟེ་སུམ་ཅུ་རྩ་བརྒྱད་པ་རྫོགས་སོ།། །།
[406a.5]སྨན་དཔྱད་ཡན་ལག་བརྒྱད་པ་ལས་དུག་གསོ་བ་བཤད་ཟིན་ཏོ།། །།དེ་ནས་བཅུད་ཀྱིས་ལེན་གྱི་ཆོ་གའི་ལེའུ་བཤད་པར་བྱ་སྟེ། དེ་ལ་བཅུད་ཀྱིས་ལེན་ཞེས་བྱ་བ་ནི། ཚེ་རིང་བ་དང་། དྲན་པ་དང་། ཡིད་གཞུངས་པ་དང་། ནད་མེད་པ་དང་། ན་ཚོད་གཞོན་ནུར་གྱུར་པ་དང་། གཟི་
[406a.6]མདངས་སྐྱེད་པ་དང་། སྐད་གསལ་བ་དང་། ལུས་དང་དབང་པོ་རྣམས་ཀྱི་སྟོབས་སྐྱེ་བ་དང་། ངག་གྲུབ་པ་དང་། རོ་ཙ་བར་འགྱུར་བ་དང་། སྙིང་དུ་སྡུག་པ་རྣམས་ཐོབ་པར་བྱེད་པ་རྣམས་ཡིན་ནོ། །དེ་ལ་ཅིའི་ཕྱིར་བཅུད་ཀྱིས་ལེན་ཞེས་བྱ་ཞེ་ན། བཅུད་ལ་སོགས་པ་ཉམས་པ་དེ་
[406a.7]ཐོབ་པར་བྱེད་པའི་ཐབས་ནི་བཅུད་ཀྱིས་ལེན་ཞེས་བྱའོ། །དེ་སྒྲུབ་པ་ཡང་ན་ཚོད་དང་པོ་དང་། བར་མ་ལ་གཡུལ་ལས་རྒྱལ་བའི་བདག་ཉིད་ཅན་གྱིས་བསྒྲུབ་པར་བྱའོ། །ཐོག་མར་བཅུད་ཀྱིས་ལེན་བསྒྲུབ་པར་འདོད་ན། དང་པོ་རྣམ་པ་ཐམས་ཅད་དུ་སྣུམ་ཆོས་དང་ཁྲག་གཏར་བ་དང་།
[406b]
[406b.1]སློན་ཁྲུས་ཀྱིས་ལུས་དག་པར་བྱ་བ་གཅེས་སོ། །གལ་ཏེ་སློན་ཁྲུས་ཀྱིས་ལུས་མ་དག་ཅིང་ཆོ་ག་ལོག་པར་བཅུད་ཀྱིས་ལེན་གྱིས་དང་པོ་རོ་ཙ་བར་བྱེད་པའི་ཆོ་ག་སྒྲུབ་པར་བྱེད་ན་ནི་འབྲས་བུ་དོན་མེད་དེ། ཇི་ལྟར་དྲི་མ་དང་བཅས་པའི་རས་ལ་རི་མོ་འདྲི་བ་འབྲས་བུ་མེད་པ་བཞིན་ནོ། །དེ་ལ་བཅུད་
[406b.2]ཀྱིས་ལེན་གྱི་སྦྱོར་བ་བསྒྲུབ་པ་ལ་རྣམ་པ་གཉིས་སུ་དྲང་སྲོང་རྣམས་ཀྱིས་བཤད་དོ། །དེ་ཡང་ཁང་པ་རླུང་དང་ཉི་མས་མ་ཕོག་པའི་གནས་སུ་འདུག་པ་དང་། རླུང་དང་ཉི་མ་ལྷགས་པའི་གནས་གཉིས་ལས་གོང་མ་མཆོག་ཡིན་ན། ཁང་པ་བྱ་བ་དེ་ཡང་རླུང་མེད་པ་དང་། འཇིགས་པ་མེད་
[406b.3]པ་དང་ཡང་ཐོག་གི་ནང་དུ་ཞལ་ཞལ་ལ་སོགས་པས་ལེགས་པར་བསྟར་ཏེ། ཡོ་བྱད་རྣམས་དང་། སྨན་པ་མཁས་པས་ཡང་ཡོ་བྱད་དང་བཅས་པ་ཉེ་བར་བསགས་ལ། ཁང་པ་ཡང་དབང་ལྡན་གྱི་ཕྱོགས་སུ་ཁ་བལྟས་ཏེ། གནས་ཤིས་པར་བྱ་བ་དང་། ཁང་པ་སྦྲེལ་མ་གསུམ་དུ་
[406b.4]བྱས་ཏེ་སྐར་ཁུང་ཤིན་ཏུ་ཕྲ་བར་བཏོད་དོ། །དེ་ཡང་དུ་བ་དང་། ཉི་མ་དང་། རུལ་བ་དང་། སྲོག་ཆགས་གདུག་པ་དང་། བུད་མེད་དང་། གླེན་པ་སོགས་མི་བགྲོད་པའི་གནས་སུ་བྱའོ། །དེ་ནས་དེའི་འོག་ཏུ་ཉིན་ཞག་ཤིས་པ་ལ་ཡང་ཕྱི་རོལ་གྱི་ལུས་ཀྱི་ཁྲུས་གཙང་སྦྲ་བྱ་སྟེ། མཆོད་
[406b.5]པར་འོས་པ་རྣམས་ལ་མཆོད་དེ་ཁང་པ་དེར་འདུག་པར་བྱའོ། །དེ་ནས་སློན་ཁྲུས་ཀྱིས་ལུས་སྦྱངས་ནས་ཉམས་སྟོབས་བདེ་བར་སྐྱེས་པ་དང་། ཚངས་པར་སྤྱོད་པ་དང་། བློ་བརྟན་པ་དང་། དད་པ་དང་ལྡན་པ་དང་། གཡུལ་ལས་དབང་པོ་རྣམས་རྒྱལ་བར་བྱ་བ་དང་། སྦྱིན་པ་དང་། ཚུལ་
[406b.6]ཁྲིམས་ལ་སོགས་པ་ལ་གནས་པ་དང་། བདེན་པ་དང་། བརྟུལ་ཞུགས་དང་། ཆོས་བཞིན་དུ་སྤྱོད་པ་དང་། ལྷ་རྗེས་སུ་དྲན་པ་དང་། གཉིད་ལོག་པ་དང་། མི་ལོག་པའི་ཚོད་ཙམ་ཤེས་ཤིང་རིག་པར་སྤྱོད་པ་དང་། སྨན་ལ་དགའ་ཞིང་དེས་པ་དང་ལྡན་པའི་གང་ཟག་གིས་
[406b.7]བཅུད་ཀྱིས་ལེན་བརྩམ་པར་བྱའོ། །དེ་ཡང་ཐོག་མར་སྣུམ་ཆོས་དང་དུགས་བྱས་པའི་སྐྱེས་བུས་བཀྲུ་སྨན་དང་། ཨ་རུ་ར་དང་། སྐྱུ་རུ་ར་དང་། རྒྱམ་ཚ་དང་། བཅའ་སྒ་དང་། ཤུ་དག་དང་། ཡུང་བ་དང་། པི་པི་ལིང་དང་། བྱི་དང་ག་དང་། བུ་རམ་དང་། དེ་རྣམས་ཆུ་དྲོན་
[407a]
[407a.1]དང་སྦྱར་བས་བཀྲུ་སྨན་དུ་བྱའོ། །ཁྲུས་དེ་ལེགས་ཏེ་ལུས་དག་པ་དང་། ཐུག་པ་རྐྱང་རྐྱང་པོ་ལ་སོགས་པ་དང་ཁ་ཟས་ཀྱི་རིམ་པ་སྦྱར་ཏེ། དེ་ཡང་ཞག་གསུམ་མམ་ལྔའམ་བདུན་གྱི་བར་དུ་མར་དང་བཅས་པར་སྦྱོར་རོ། །ཡང་ན་ཡ་བ་ཀ་ཞེས་བྱ་བ་འོ་
[407a.2]མ་དང་ནས་རྙིང་པའི་ཕྱེ་མ་སྦྱར་བ་ལུས་དག་བའི་འོག་ཏུ་སྦྱིན་ནོ། །དེ་ལྟར་ལྟོ་བ་ལེགས་པར་སྦྱངས་ནས་བཅུད་ཀྱིས་ལེན་གྱི་སྦྱོར་བ་ལ་འཇུག་པར་བྱ་སྟེ། དེ་ཡང་སྨན་པ་མཁས་པ་མང་པོས་གང་དང་གང་ལ་སྨན་གོམས་ཤིང་རིག་པས་བརྟགས་ཏེ་སྦྱར་རོ། །ཨ་རུ་རྡོག་མ་སྟོང་
[407a.3]དང་། དེའི་སུམ་འགྱུར་གྱི་སྐྱུ་རུ་ར་དང་། རྩ་བ་ལྔ་པ་སྤྱི་ལ་སྲང་ཉིས་བརྒྱ་དང་། སྨན་དེ་རྣམས་སྤྱིའི་བཅུ་འགྱུར་གྱི་ཆུ་དང་བསྐོལ་ཏེ། ལྷག་མ་བཅུ་ཆ་གཅིག་ལུས་པ་དང་། ཨ་རུ་ར་དང་། སྐྱུ་རུ་ར་དང་། རྩ་བ་ལྔ་པ་སོ་སོར་ཕྱུང་སྟེ། སྐྱུ་རུ་ར་དང་། ཨ་རུ་ར་བརྡུངས་པའི་རུས་པ་ཕྱུང་སྟེ་བོར་
[407a.4]བའི་ཤུན་པ་ཁུ་བའི་ནང་དུ་བཅུག་སྟེ། དེའི་ནང་དུ་ཤིང་ཚ་དང་། སུག་སྨེལ་དང་། ག་དུར་དང་། སྐྱེར་པ་དང་། པི་པི་ལིང་དང་། ཨ་ཀ་རུ་དང་། ཙནྡན་དང་། སྨན་རྒྱ་ཀ་པརྞི་དང་། ཀ་ན་ཀ་དང་། ཤ་ཀ་པུཥྤ་དང་། ཤུ་དག་དང་། བླ་བ་དང་། ཤིང་མངར་དང་། བྱི་དང་ག་དང་།
[407a.5]དེ་རྣམས་སྲང་བཞི་བཞི་བཏགས་པའི་ཕྱེ་མ་དང་། ཁ་ར་དཀར་པོ་སྲང་བརྒྱ་ཕྲག་བཅུ་གཅིག་དང་། མར་སྲང་སུམ་བརྒྱ་བརྒྱད་ཅུ་རྩ་བཞི་དང་། ཏིལ་མར་སྲང་ཉིས་བརྒྱ་ལྔ་བཅུ་རྩ་དྲུག་དང་། དེ་རྣམས་ལྷན་ཅིག་བསྐོལ་ཏེ་ལྡེ་གུ་ཙམ་དུ་གྱུར་པ་དང་། ཕྱིར་ཕྱུང་ལ་བསྒྲངས་པའི་ནང་དུ་སྦྲང་རྩི་
[407a.6]སྲང་སུམ་བརྒྱ་ཉི་ཤུ་བཅུག་ལ་ཁ་གཟར་གྱིས་དཀྲུགས་ཏེ། རྫ་མ་སྣུམ་ཅན་གྱི་ནང་དུ་བཅུག་ལ་ཁ་ཟས་ཞུ་བའི་འོག་ཏུ་དེ་ལས་ཐུན་རབ་འབྲིང་གསུམ་དུ་བཤད་པ་ལས་ཐུན་ཅི་རན་ཞིག་གཏང་བར་བྱའོ། །དེ་ནས་སྨན་དེ་ཞུ་བའི་ཚོད་ཙམ་ན། འབྲས་དྲུག་ཅུ་པ་དང་འོ་མར་སྦྱར་བ་ཁ་ཟས་སུ་བཟའོ། །
[407a.7]དེ་ལྟར་བཤད་པའི་བཅུད་ཀྱིས་ལེན་འདི་ཚངས་པས་བསྟན་པ་ཡིན་ཏེ། དྲང་སྲོང་བི་ག་ན་སྭ་ཞེས་བྱ་བ་དང་། བལ་ཁྱི་ལྱ་ཞེས་བྱ་བ་དང་། དེ་བཞིན་དུ་ཡང་གཞན་ཡང་དྲང་སྲོང་དཀའ་ཐུབ་ཅན་མང་པོས་བསྒྲུབས་ཏེ། དེ་ཡང་སྙོམ་པ་དང་། ངལ་ཞིང་དུབ་པ་དང་། གཉེར་མ་དང་། སྐྲ་དཀར་
[407b]
[407b.1]དང་དེ་རྣམས་ཀྱི་ནད་སེལ་ཞིང་། ཡིད་གཞུངས་པ་དང་། དྲན་པ་གསལ་བ་དང་། སྟོབས་དང་ལྡན་པ་དང་། ཚེ་ཡང་དཔག་ཏུ་མེད་པ་འཚོ་བར་འགྱུར་རོ། །ཨ་རུ་ར་དང་། སྐྱུ་རུ་ར་རྡོག་མ་སྟོང་དང་། པི་པི་ལིང་འབྲུ་སྟོང་དང་། རྒྱ་སྐྱེགས་ཤིང་གཞོན་ནུའི་ཐལ་བ་ཆུ་དང་སྦྱར་ཏེ་བཙགས་པའི་ཁུ་བ་
[407b.2]སྣོད་ཀྱི་ནང་དུ་བཅུག་སྟེ། ཨ་རུ་ར་དང་། པི་པི་ལིང་རྣམས་དེའི་ནང་དུ་སྦངས་ཏེ་གྲིབ་མ་ལ་སྐམས་ཏེ་ཕྱེ་མར་བྱས་པ་དེའི་བཅུ་འགྱུར་གྱི་ཁ་ར་དཀར་པོ་དང་། བཞི་འགྱུར་གྱི་མར་དང་། སྦྲང་རྩི་དང་དེ་རྣམས་མར་སྣོད་ཀྱི་བུམ་པའི་ནང་དུ་བཅུག་སྟེ། ས་བརྐོས་བའི་ནང་དུ་ཟླ་བ་དྲུག་
[407b.3]བཞག་ལ་དེ་ནས་ཕྱུང་སྟེ། མེ་དྲོད་ཇི་ལྟ་བ་བཞིན་དུ་ནང་པར་སྨན་བཟའ་སྟེ། ཁ་ཟས་ཀྱང་ལེགས་པར་སྦྱར་བ་རྟག་ཏུ་བསྟེན་ཅིང་། སྨན་མ་ལུས་པར་ཟོས་ན་ལོ་བརྒྱ་འཚོ་ཞིང་ནད་མེད་པ་དང་། སྐྲ་དཀར་མེད་པ་དང་། ལུས་ཀྱི་ཉམས་སྟོབས་འཕེལ་ཞིང་། ཁྱད་པར་དུ་དྲན་པ་
[407b.4]གསལ་བ་དང་། ཡིད་གཞུངས་པར་འགྱུར་རོ། །རྒྱ་སྐྱེགས་ཤིང་རློན་པ་སྔོན་པོའི་ཐོར་ཏོ་བཅད་དེ་ནང་ཁྲུ་གཉིས་བརྐོས་པའི་ནང་དུ་སྐྱུ་རུ་ར་སར་བ་ལེགས་པར་སྨིན་པས་བཀང་སྟེ། ཕྱི་རོལ་ཀུན་ནས་རྩྭ་ཀུ་ཤས་དཀྲིས་ལ་པདྨ་སྐྱེས་པའི་འདམ་གྱིས་ཕྱི་རོལ་ནས་བསྐུས་ཏེ། རླུང་
[407b.5]མེད་པའི་གནས་སུ་བའི་ལྕི་བའི་མེས་བསྲེགས་ལ་བཙོས་ཏེ། དེ་ནས་སྐྱུ་རུ་ར་ཚོས་པ་དང་། སྐྱེས་བུ་དེས་མར་དང་། སྦྲང་རྩི་དང་བཅས་པ་ཡོག་ཚད་དུ་བཟའ་ཞིང་། བཏུང་བར་ནི་འོ་མ་བསྐོལ་བ་ཅི་འདོད་པ་བླུད་དེ། དེ་ལྟར་ཟླ་བ་གཅིག་གི་བར་དུ་ཁ་ཟས་གཞན་མི་ཟ་བར་དེ་ཉིད་
[407b.6]ཀྱིས་ལུས་གསོ་བར་བྱ་སྟེ། གཞན་ཡང་སྤང་བར་བྱ་བ་ནི་སྤངས་ལ། ཆུ་གྲང་མོ་ནི་འབད་པ་དང་བཅས་པས་ལུས་དང་། ལག་པས་ཀྱང་རེག་ཏུ་མི་རུང་སྟེ་བསྲུང་ངོ་། །དེ་ལྟར་ཚུལ་བཞིན་བསྟེན་ན་ཞག་བཅུ་གཅིག་འདས་པ་དང་། སྐྲ་དང་། སོ་དང་། སེན་མོ་རྣམས་ལྷགས་
[407b.7]པར་འགྱུར་རོ། །ཇི་སྟེ་ཉིན་ཞག་ཉུང་ངུ་སྤྱད་ན་ཡང་གཟུགས་བཟང་ཞིང་བུད་མེད་ལ་ཕོད་པ་དང་། གླང་པོ་ཆེའི་སྟོབས་དང་འདྲ་བ་ཐོབ་སྟེ། ཁྱད་པར་དུ་ཡིད་གཞུངས་པ་དང་། སྟོབས་དང་ལྡན་པ་དང་། བློ་ཆེ་བ་དང་། སྙིང་སྟོབས་དང་ལྡན་པར་འགྱུར་ཏེ། ལོ་སྟོང་གི་བར་དུ་འཚོ་
[408a]
[408a.1]བར་འགྱུར་རོ། །རྩ་བ་བཅུ་པ་དང་། བ་བླ་དང་། གླ་སྒང་དང་། ཛི་བ་ཀ་དང་། ཟངས་རྩི་བ་དང་། ཨུཏྤ་ལ་དང་། འདབ་མ་རྣམ་གཉིས་དང་། པི་པི་ལིང་དང་། མེ་ཤ་ཏི་གི་དང་། མེ་ད་རྣམ་གཉིས་དང་། ལྕ་བ་དང་། ཛི་བནྟི་དང་། སུག་སྨེལ་དང་། ཨ་ཀ་རུ་
[408a.2]དང་། རྒུན་འབྲུམ་དང་། པུཥྐར་མཱུ་ལ་དང་། ཟུར་བ་དང་། བ་སྤྲུ་བ་དང་། ཀ་ཀོ་ལ་རྣམ་གཉིས་དང་། སླེ་ཏྲེས་དང་། ཨ་རུ་ར་དང་། བི་ད་རི་དང་། བ་ཤ་ཀའི་རྩ་བ་དང་། འདི་རྣམས་སྲང་རེ་རེ་ཆུ་སྲང་ལྔ་བརྒྱ་རྩ་བཅུ་གཉིས་དང་། སྐྱུ་རུ་ར་རྡོག་མ་ལྔ་བརྒྱ་ཙམ་དང་ལྷན་ཅིག་
[408a.3]བསྐོལ་ཏེ། བཞི་ཆ་སྲང་ཉི་ཤུ་ལུས་པ་ལས་སྨན་དེ་བཙགས་ནས་སྐྱུ་རུ་རའི་རུས་པ་ཕྱུང་སྟེ། སྣོད་ཀྱི་ནང་དུ་བཅུག་ནས་མར་སྲང་དྲུག་དང་ཏིལ་མར་སྲང་དྲུག་བརྔོས་ཏེ་ཤ་ཁ་ར་སྲང་ལྔ་བཅུ་དང་། སྨན་གོང་མ་དེ་རྣམས་ལྷན་ཅིག་བསྐོལ་ནས་ལྡེ་གུར་བྱས་པ་དང་། གྲང་བའི་ནང་དུ་སྦྲང་རྩི་སྲང་
[408a.4]དྲུག་དང་། སྨིག་རྐང་སྲང་བཞི་དང་། པི་པི་ལིང་སྲང་གཉིས་དང་། དྲི་རྣམ་བཞི་ཞོ་གཉིས་དང་། དེ་རྣམས་ཀྱི་ཕྱེ་མ་བཏབ་སྟེ་ལྡེ་གུར་བྱས་པ་ཁང་པའི་ནང་དུ་འདུག་པ་ནས་ཐུན་རན་པར་བཟའ་ཞིང་ཕན་པའི་ཟས་དང་བཅས་པ་ནི་དྲང་སྲོང་རྩ་བ་ནས་བསྟན་པ་ཡིན་ནོ། །མིང་ཡང་རྩ་བ་ནའི་བཅུད་
[408a.5]ཀྱིས་ལེན་ཞེས་བྱ་སྟེ། དྲང་སྲོང་དེ་སྔོན་རྒས་འཁོགས་པར་གྱུར་པ་ལས་བུད་མེད་རྣམས་ཀྱི་མིག་ཟིམ་པར་བྱེད་པ་དང་། དབུགས་མི་བདེ་བ་དང་། རིམས་དང་། གློ་སྙིང་གི་ནད་དང་། དྲེག་ནད་དང་། གཅིན་དང་། ཁུ་ཆུ་ལ་གནས་པའི་ནད་དང་། སྐད་འགགས་པ་དང་། དེ་བཞིན་དུ་ཉམས་
[408a.6]སྟོབས་སྐྱེ་བ་དང་། གློ་འགྲམས་པ་དང་། གློ་ཉམས་པ་དང་གཅོང་ཟད་བྱེད་ཀྱིས་ལུས་སྐམས་ཤིང་ཉམ་ཆུང་བ་དང་། འཕེལ་བ་བྱེད་པ་དང་། དྲན་པ་དང་། ཡིད་གཞུངས་པ་དང་། གཟི་མདངས་སྐྱེད་པ་དང་ནད་མེད་ཅིང་ཚེ་རབ་ཏུ་འཕེལ་བ་དང་། རླུང་ལུགས་སུ་འབྱུང་བ་དང་། བུད་མེད་
[408a.7]རྣམས་ལ་ཤིན་ཏུ་དགའ་བ་སྐྱེད་པའི་ནུས་པ་དང་ལྡན་པ་དང་། སྟོབས་སྐྱེད་པ་དང་། དབང་པོ་རྣམས་གསལ་བར་བྱེད་པ་དང་། ཆོ་ག་བཞིན་དུ་བྱས་ན་མེའི་དྲོད་ཀྱང་སྐྱེད་པར་བྱེད་དོ། །ཤིང་མངར་དང་། སྨིག་རྐང་དང་། པི་པི་ལིང་དང་། རྒྱམ་ཚ་དང་། ལྕགས་གང་ཡང་རུང་བ་རེ་རེ་དང་
[408b]
[408b.1]ཡང་ན་གསེར་ཉི་ཚེ་དང་། ཤུ་དག་དང་། མར་དང་། སྦྲང་རྩི་དང་། ཁ་ར་དཀར་པོ་དང་། འདི་རྣམས་གང་ཡང་རུང་བ་དང་ལྡན་པར་འབྲས་བུ་གསུམ་གྱི་བཅུད་ཀྱིས་ལེན་ཟླ་བ་གཅིག་གི་བར་དུ་བསྟེན་ན་ནད་ཐམས་ཅད་འཇོམས་པར་བྱེད་དོ། །དྲན་པ་དང་། ཡིད་གཞུངས་པ་དང་། བློ་སྐྱེད་
[408b.2]པར་བྱེད་དོ། །མན་དུ་ཀ་པར་ཎི་རང་གི་ཁུ་བའི་ནང་དུ་ཤིང་མངར་གྱི་ཕྱེ་མ་བཏབ་སྟེ། མེའི་དྲོད་ཇི་ལྟ་བ་བཞིན་དུ་འོ་མ་དང་ལྷན་ཅིག་སྦྱར་བར་བྱའོ། །སླེ་ཏྲེས་བསྐོལ་བའི་ཁུ་བའི་ནང་དུ་སླེ་ཏྲེས་ཀྱི་མེ་ཏོག་དང་། རྩ་བའི་ཕྱེ་མ་བཏབ་པ་དང་། ཤང་ཁ་པུཥྤ་བསྐོལ་བའི་ནང་དུ་དེ་ཉིད་ཀྱི་རྩ་བ་
[408b.3]དང་། མེ་ཏོག་གི་ཕྱེ་མ་བཏབ་པ་སྦྱར་ན་ཚེ་སྦྱིན་པར་བྱེད་པ་དང་། ནད་འཇིག་པར་བྱེད་པ་དང་། སྟོབས་དང་། མདོག་དང་། མེའི་དྲོད་དང་། སྐད་གསལ་བར་བྱེད་པ་དང་། ཡིད་གཞུངས་པར་བྱེད་པ་དང་། བཅུད་ཀྱིས་ལེན་གྱི་སྦྱོར་བ་ལ་དེ་དག་ལས་ཁྱད་པར་དུ་ཤང་ཁ་པུཥྤའི་སྦྱོར་བ་བསྟེན་
[408b.4]པར་བྱའོ། །སྤངས་མ་དང་། པུ་ཙེ་ཤེལ་དང་། པ་ཡ་སྱ་དང་། ཤིང་མངར་དང་། ཙནྡན་དང་། ཐལ་ཏྲེས་དང་། ཤུ་དག་དང་། འབྲས་བུ་གསུམ་དང་། ཚ་བ་གསུམ་དང་། སེར་པོ་རྣམ་གཉིས་དང་། པ་ཏོ་ལའི་རྩ་བ་དང་། རྒྱམ་ཚ་དང་། འདི་རྣམས་ལེགས་པར་བཏགས་ཏེ། མར་
[408b.5]སྲང་ལྔ་བརྒྱ་རྩ་བཅུ་གཉིས་དང་། ཤང་ཁ་པུཥྤ་བསྐོལ་བའི་ཁུ་བ་སྲང་སྟོང་ལྔ་བརྒྱ་སུམ་ཅུ་རྩ་དྲུག་འོ་མ་དང་ལྷན་ཅིག་བསྐོལ་ཏེ་མར་ལུས་པ་ལས་ཉེ་བར་སྦྱར་བར་གྱུར་ན་གླེན་པ་ཡིན་ན་ཡང་ཚིག་ལ་དབང་བ་དང་། ཐོས་པ་འཛིན་པ་དང་། སྤོབས་པ་ཆེ་བ་དང་། ནད་མེད་པར་འགྱུར་རོ། །
[408b.6]པདྨའི་རྩ་བ་དང་། རྩ་ལག་དང་། པདྨ་གེ་སར་རྣམས་འོ་མ་དང་ལྷན་ཅིག་བསྐོལ་ཏེ་མར་ལུས་པ་ལས་གསེར་གྱི་བུམ་པའི་ནང་དུ་བཅུག་པ་དེ་ནི་པདྨ་རྣམ་ལྔའི་བཅུད་ཀྱིས་ལེན་ཞེས་བྱའོ། །ཞེས་ས་སྟེང་ཀུན་ཏུ་གྲགས་སོ། །དེ་ལ་ཚུལ་བཞིན་བསྟེན་ན་སྐྱེས་བུའི་ཉམས་འཇིག་པ་དང་།
[408b.7]ཟད་པ་ཡང་སྐྱེད་པར་བྱེད་དོ། །ཨུཏྤ་ལའི་སྡོང་བུ་དང་། རྩ་བ་དང་། ལོ་མ་དང་། གེ་སར་མར་དང་འོ་མ་དང་ལྷན་ཅིག་བསྐོལ་ཏེ་མར་ལུས་པ་ལས་དེ་གསེར་གྱི་སྣོད་ཀྱི་ནང་དུ་བཅུག་པ་དེ་ཡང་ཨུཏྤ་ལ་རྣམ་པ་ལྔ་ཞེས་བྱ་བའི་སྦྱོར་བ་ཞེས་ས་སྟེང་ཀུན་ཏུ་གྲགས་པའི་སྦྱོར་བ་གཉིས་པ་ཡིན་ཏེ། བྱོལ་
[409a]
[409a.1]སོང་བ་ལང་ཡང་ཡིད་གཞུངས་པར་བྱེད་ན་སྐྱེས་བུ་མི་རྣམས་ལྟ་སྨོས་ཀྱང་ཅི་དགོས། བྲམྷི་དང་། ཤུ་དག་དང་། རྒྱམ་ཚ་དང་། ཤང་ཁ་པུཥྤ་དང་། གནྡྷ་དཱུར་བ་དང་། བྲམྷི་དང་། སོ་བར་རྩ་བ་དང་། བྱི་ཤལ་དང་། པི་པི་ལིང་དང་། འདི་རྣམས་རེ་རེ་ཡང་ནས་
[409a.2]གསུམ་གསུམ་ཙམ་གྱི་ཚད་ཙམ་དང་། གསེར་ནས་འབྲུའི་ཚད་ཙམ་དང་། དུག་ཏིལ་འབྲུ་ཙམ་དང་། འདི་རྣམས་ཞིབ་མོར་བཏགས་ཏེ། མར་སྲང་གཅིག་དང་སྦྱར་བའི་ལྡེ་གུ་བལྡགས་ཏེ། ཞུ་བའི་ཚོད་ཙམ་ན་ཁ་ཟས་མར་ཤས་ཆེ་བ་སྦྲང་རྩི་དང་ལྡན་པ་ཟོས་ལ་ཚུལ་དེ་བཞིན་དུ་ཉིན་རེ་བཞིན་
[409a.3]ལོ་གཅིག་གི་བར་དུ་བསྟེན་ན་བློ་བརྟན་པ་དང་། དྲན་པ་དང་། ཡིད་གཞུངས་པ་དང་། རྒ་བས་ཟིལ་གྱིས་གནོན་པ་དང་། ནད་ཀྱིས་ཟིལ་གྱིས་ནོན་པ་དང་། སྒྱིད་སྐྱུར་བ་དང་། སྙོམ་པ་དང་། ངལ་བ་དང་། དུབ་པ་དང་། ནད་མེད་ཅིང་ལོ་བརྒྱ་བརྒྱ་ཡོངས་སུ་རྫོགས་པར་འཚོ་བར་འགྱུར་རོ། །
[409a.4]དཔལ་དང་། གཟི་བརྗིད་དང་། མདངས་དང་ལྡན་པ་དང་། ལྷག་པར་མཛེ་དང་། ཤ་བཀྲ་དང་། སྐྲན་དང་། དུག་དང་། རིམས་དང་། སྨྱོ་བྱེད་དང་། དབྱིག་དུག་དང་། དམུ་རྫིང་རྣམས་ལས་ཟློག་པར་བྱེད་དོ། །སྲིད་སྲུང་གི་རིག་བྱེད་ལ་སོགས་པས་སྐྱེད་པར་བྱེད་པའི་གཤེད་བྱེད་ཀྱི་གནོད་
[409a.5]པ་དང་། ཤིན་ཏུ་སྟོབས་ཆེ་བའི་རླུང་གི་ནད་ཀྱང་འདིས་ཞི་བར་བྱེད་དོ། །སྟོན་དང་པོའི་དུས་སུ་སྨན་ན་ག་བ་ལའི་རྩ་བ་སྐར་མ་རྒྱལ་དང་ལྡན་པའི་དུས་སུ་ཕྱུང་སྟེ། དེ་ལས་ཞོ་གཉིས་གཉིས་ཀྱི་ཕྱེ་མ་ཐུན་ཚད་ཙམ་འགམས་ལ། དེའི་འོག་ཏུ་འོ་མ་བླུད་པ་འམ། ཡང་ན་མར་དང་སྦྲང་རྩི་དང་ལྡན་
[409a.6]པའི་ལྡེ་གུ་བལྡག་ཅིང་ཁ་ཟས་གཞན་མི་ཟ་བར་འོ་མ་ཉི་ཚེས་གསོ་བར་བྱ་སྟེ། དེ་བཞིན་དུ་སྦྱོར་བ་ལོ་གཅིག་གི་བར་དུ་བྱས་ན་སྟོབས་དང་ལྡན་ཞིང་ལོ་བརྒྱ་འཚོ་བར་བྱེད་དོ། །གཟེ་མའི་འབྲས་བུ་སྐྱེ་བའི་དུས་སུ་རྩ་བ་དང་བཅས་པ་བཏུས་ཏེ། གྲིབ་མ་ལ་སྐམས་ལ་དེ་ལེགས་པར་ཕྱེ་མར་བྱས་
[409a.7]ནས་གཟེ་མ་རང་བསྐོལ་བའི་ཁུ་བས་སྤངས་ནས་ཐུན་ཆེ་ཚད་དུ་བཟའ་བར་བྱའོ། །དེའི་འོག་ཏུ་བཏུང་བར་འོ་མ་དེ་ཉིད་དང་འབྲས་སཱ་ལུ་ཁ་ཟས་སུ་སྦྱིན་ཏེ། དེ་ལྟར་བྱས་པ་ནི་གཟེ་མའི་ཕྱེ་མ་སྲང་བརྒྱ་བའི་སྦྱོར་བ་ཞེས་བྱ་སྟེ། དེ་ལས་ཞག་རེ་སྲང་གཉིས་ཟོས་ན་གཟུགས་བཟང་བ་དང་། སྐལ་བ་དང་ལྡན་
[409b]
[409b.1]པ་དང་། ལོ་བརྒྱ་ཐུབ་པ་དང་། འདོད་པ་སྤྱོད་པ་དང་། ཇི་ལྟར་ནོག་རྒྱས་པ་དང་། ཁྱུ་མཆོག་གིས་བ་ལང་གི་ཁྱུ་ལ་འཇུག་ནུས་པ་བཞིན་ནོ། །སྨན་བ་ར་ཧིའི་ཤུན་ཕྲགས་དང་ཕྲལ་བ་རྩ་བ་ཤིན་ཏུ་རློན་པ་བརྡུངས་པ་འོ་མ་དང་སྦྱར་བཟོས་ན་དེ་ཞུ་བའི་ཚོད་ཙམ་ན་ཁ་ཟས་གཞན་མི་བཟའ་བར་འོ་མ་ཉི་ཚེ་བླུད་
[409b.2]པ་འམ། ཡང་ན་སྨན་བ་ར་ཧིའི་རྩ་བ་དེ་ཉིད་རང་གི་ཁུ་བ་བསྐོལ་བའི་ནང་དུ་ལེགས་པར་སྦངས་ཏེ། མར་དང་། སྦྲང་རྩི་དང་ལྷན་ཅིག་སྦྱར་བའི་ལྡེ་གུ་སྦྱིན་པ་འམ། ཡང་ན་སྨན་བར་ཧི་བསྐོལ་བའི་ཁུ་བའི་ནང་དུ་དེ་ཉིད་ཀྱི་ཕྱེ་མ་དང་ཟོས་ན། མར་རྣམས་ལྷན་ཅིག་བསྐོལ་བའི་མར་ལུས་པ་བླུད་དོ། །ཆོ་ག་བཞིན་
[409b.3]དུ་སྨན་བི་ད་རི་དང་། བ་ལ་དང་། ཨ་ཏི་བ་ལ་དང་། ཤིང་མངར་དང་། ཀ་ཀ་མ་ཙི་དང་། ཛི་བནྟི་དང་། ར་སྣ་དང་། ཨ་རུ་ར་དང་། སྐྱུ་རུ་ར་དང་། སྠི་ར་སྟེ། ས་ལ་པར་ཎི་དང་། སླེ་ཏྲེས་དང་། མནྡུ་ཀ་པརྞི་དང་། ཤང་ཁ་པུཥྤ་དང་། ཨ་ཤྭ་གནྡྷ་དང་། ཉེའུ་ཤིང་དང་། འདི་རྣམས་གང་ཡང་རུང་བ་རེ་རེ་ཆོ་ག་གོང་མ་
[409b.4]བཞིན་དུ་སྦྱར་ན་ཡང་། ཡིད་གཞུངས་པ་དང་། བློ་དང་རྒས་སྲ་ཞིང་ན་ཚོད་བརྟན་པ་དང་། ཉམས་བདེ་བ་དང་སྟོབས་སྦྱིན་པར་བྱེད་དོ། །ཙི་ཏྲ་ཀའི་མེ་ཏོག་སེར་པོ་དང་། དཀར་པོ་དང་། ནག་པོ་ནི་རང་རང་གི་མེ་ཏོག་གི་མདོག་ཇི་ལྟ་བ་བཞིན་དུ་ཙི་ཏྲ་ཀ་སེར་པོ་དང་། དཀར་པོ་དང་། ནག་པོ་ཞེས་བྱ་བ་ཡིན་ཏེ།
[409b.5]བཅུད་ཀྱིས་ལེན་གྱི་ཆོ་ག་བཞིན་དུ་སྤྱད་ན་ཕན་ཡོན་ཕས་ཀྱི་རིམ་བཞིན་དུ་ཆེ་བ་ཡིན་ཏེ། དེ་ནས་ཙི་ཏྲ་ཀའི་རྩ་བ་ཕྱུང་ལ་གྲིབ་སྐམས་སུ་བྱས་ནས་བཏགས་པའི་ཕྱེ་མའི་ཞུན་མར་དང་སྦྲང་རྩི་འམ་འོ་མ་འམ་ཆུ་གང་ཡང་རུང་བ་ལས་ལྡེ་གུ་བྱས་ནས་བལྡགས་ཏེ། དེའི་འོག་ཏུ་ཕན་པའི་ཟས་དང་། དེ་ལྟར་
[409b.6]ཟླ་བ་གཅིག་གི་བར་དུ་བསྟེན་ན་ནད་མེད་ཅིང་ལོ་བརྒྱ་འཚོ་བ་དང་། ཡིད་གཞུངས་པ་དང་། སྟོབས་དང་ལྡན་པ་དང་། ལུས་མདངས་དང་ལྡན་པ་དང་། མེའི་དྲོད་འབར་བར་འགྱུར་རོ། །ཏིལ་མར་དང་ལྡེ་གུར་བྱས་ཏེ་ཟླ་བ་གཅིག་གི་བར་དུ་བསྟེན་ན། རླུང་ནད་གསོ་དཀའ་བ་ཡང་འཇོམས་པར་
[409b.7]བྱེད་དོ། །གཅིན་དང་ལྷན་ཅིག་སྦྱར་ནས་འཐུངས་ན་མཛེ་འཇོམས་པར་བྱེད་དོ། །དར་བ་དང་ལྷན་ཅིག་འཐུངས་ན་གཞང་འབྲུམ་སེལ་ཏོ། །གོ་བྱེ་ལེགས་པར་སྨིན་པར་དཔྱིད་ཀྱི་དུས་སུ་འབྲུའི་ཕུང་པོའི་ནང་དུ་བཅུག་སྟེ། དགུན་གྱི་དུས་སུ་ཕྱུང་ལ་སྨན་མངར་བ་དང་། སྣུམ་པ་དང་། བསིལ་
[410a]
[410a.1]བ་དང་ནུས་པ་དང་ལྡན་པས་ལེགས་པར་སྦྱར་ཏེ་སྨན་དེའི་བརྒྱད་འགྱུར་གྱི་ཆུ་དང་གོ་བྱེ་རྡོག་མ་བརྒྱད་བསྐོལ་ཏེ། ཁུ་བ་བརྒྱད་ཆ་ལུས་པ་དང་། འོ་མ་དང་ལྷན་ཅིག་སྦྱར་བ་གྲང་མོ་བླུད་དེ། དེ་ལྟར་བསྐོལ་བའི་ཁུ་བ་རིམ་པར་ཞག་བདུན་གྱི་བར་དུ་ཉིན་རེ་བཞིན་རེ་རེས་བསྐྱེད་ལ།
[410a.2]དེ་ནས་ཞག་བདུན་གྱི་བར་དུ་རེ་རེས་དབྲི་ཞིང་བརྒྱད་དུ་ཕྱིན་པ་དང་། དེ་ནས་ཞག་བདུན་གྱི་བར་དུ་འབྲུ་རེ་རེས་བསྐྱེད་དེ། ཉི་ཤུ་རྩ་གཅིག་ལོན་པ་དང་། དེའི་འོག་ཏུ་གོ་བྱེའི་འབྲུ་གོང་མ་བརྒྱད་ཀྱི་སྟེང་དུ་གོ་བྱེའི་འབྲུ་གསུམ་གསུམ་གྱིས་ཞག་རེ་རེ་བསྐྱེད་ཅིང་དབྲི་བ་ཡང་གོང་མ་ལྟར་ཞག་ཉི་ཤུའི་བར་དུ་
[410a.3]བྱའོ། །དེ་ལྟར་གོ་བྱེའི་འབྲུ་བཞི་བརྒྱའི་བར་དུ་དབྲི་ཞིང་བསྐྱེད་པར་བྱའོ། །དེའི་འོག་ཏུ་ཞག་བདུན་གྱི་བར་དུ་གོང་མ་བརྒྱད་པའི་སྟེང་དུ་འབྲུ་མར་བདུན་བདུན་གྱིས་བསྐྱེད་ཅིང་དབྲི་བ་ཡང་ཞག་བདུན་གྱི་བར་དུ་བསྐྱེད་པ་ཡང་ཞག་བདུན་གྱི་བར་དུ་བྱས་ཏེ། བསྐྱེད་པའི་ཚུལ་གྱིས་འབྲུ་སྟོང་རྫོགས་ཀྱི་
[410a.4]བར་དུ་ཡང་བྱའོ། །ཁ་ཟས་ཟ་བའི་ལུགས་ནི་མར་དང་། འོ་མ་དང་། འབྲས་དྲུག་ཅུ་པ་སྦྱིན་ནོ། །དེ་བཞིན་དུ་སྨན་གྱི་སྦྱོར་བ་དེ་ཡང་བདུན་དང་གསུམ་གཅིག་གི་བར་དུ་ཡང་མར་འབྲི་བ་དང་། བསྐྱེད་པའི་གོ་བྱེའི་སྦྱོར་བ་ཡང་དེ་ལྟར་ཤེས་པར་བྱའོ། །སྔོན་ལེགས་པར་སྨོན་པ་ཐོབ་པ་ཡང་ཁྱད་
[410a.5]པར་དུ་མེའི་དྲོད་འབར་བ་དང་། གཅིན་སྲི་བ་ཡང་སྲིན་བུའི་ནད་དང་། མཛེ་ནད་དང་། གཞང་འབྲུམ་གྱི་ནད་དང་། ཚིལ་ནད་རྣམས་སེལ་བར་བྱེད་དོ། །གོ་བྱེའི་འབྲས་བུ་སྐྱོན་མེད་པ་བརྡུངས་ཏེ་ཞིབ་ཏུ་བཏགས་པ་ས་བརྐོས་པའི་ནང་དུ་བུམ་པ་བཞག་སྟེ། དེའི་ཁར་བུམ་པ་ཞབས་སུ་བུ་ག་ཕུག་པ་ཞིག་
[410a.6]བཞག་སྟེ། བུམ་པ་སྟེང་མའི་ནང་དུ་བ་ལ་ཏ་ཀའི་ཕྱེ་མ་བཅུག་ལ་ས་ནག་པོའི་འཇིམ་པས་ཁ་དང་མཚམས་ཐམས་ཅད་བསྐུས་ཏེ། བ་ལང་གི་ལྕི་བ་སྐམ་པོའི་མེས་བཙོས་ཏེ། ཚོས་པ་དང་། དེའི་ཁུ་བ་བུམ་པ་འོག་མའི་ནང་དུ་འཛག་པར་འགྱུར་བ་དང་། དེ་བླངས་ནས་དེའི་བརྒྱད་འགྱུར་གྱི་སྦྲང་རྩི་དང་།
[410a.7]ཉིས་འགྱུར་གྱི་མར་དང་སྦྱར་བའི་ལྡེ་གུ་འདི་ཡང་སྦྱོར་བར་བྱའོ། །ཆོ་ག་གོང་མ་བཞིན་དུ་ཁ་ཟས་ལ་སོགས་པ་བསྟེན་ན་ཕན་ཡོན་གོང་མ་དང་འདྲའོ། །གོ་བྱེའི་འབྲས་བུ་སྨིན་ཅིང་རྒྱས་པ་རང་ལྷུང་བ་སྲང་བརྒྱ་ཉི་ཤུ་རྩ་བརྒྱད་ཀྱི་བར་ཚད་ཙམ་སོ་ཕག་ཕྱེ་མར་བྱས་པ་ཞིབ་མོ་བོར་བའི་རྩིང་པོ་དང་། ཆུས་མཉེ་
[410b]
[410b.1]ཤིང་བཀྲུ་སྟེ། དེ་ནས་གོ་བྱེ་རླུང་ལ་སྐམས་ཏེ་ཆམ་ཆོམ་བརྡུངས་ལ། ཆུ་སྲང་ལྔ་བརྒྱ་རྩ་བཅུ་གཉིས་བསྐོལ་ཏེ། བཞི་ཆ་ལུས་པ་དང་ཕྱུང་ལ་བཙགས་ཏེ། ཚིགས་མ་བོར་ལ་གྲངས་པའི་ཁུ་བ་དེ་དང་འོ་མ་སྲང་ལྔ་བརྒྱ་རྩ་བཅུ་གཉིས་དང་། ཡང་བསྐོལ་ཏེ་ཁུ་བ་དུ་ཞིང་འོ་མ་ལུས་པ་དང་། དེ་དང་
[410b.2]མཉམ་པའི་མར་དང་ཡང་བསྐོལ་ཏེ་འོ་མ་ཟད་ཅིང་མར་ཉི་ཚེ་ལུས་པ་དང་། ཤ་ཁ་རའི་ཕྱེ་མ་ཅི་འདོད་པ་བཏབ་སྟེ། གཅིག་ཏུ་གྱུར་པ་དེ་ཁ་གཟར་གྱིས་དཀྲུགས་ཏེ། འབྲུའི་ཕུང་པོའི་ནང་དུ་ཞག་བདུན་གྱི་བར་དུ་སྦངས་ལ། བཅུད་ཀྱི་བདུད་རྩི་དང་འདྲ་བར་གྱུར་པ་དང་། སྐྱེས་བུ་གང་གིས་ནང་རེ་དེ་ལས་རན་པར་
[410b.3]བསྟེན་ཅིང་བཟའ་སྟེ། དེའི་འོག་ཏུ་ཆུ་འམ་འོ་མ་དང་། ཤ་ཁུ་ཚིམ་ཚད་དུ་བླུད་ལ། དྲན་པ་དང་། ཡིད་གཞུངས་པ་དང་། བློ་གྲོས་དང་། སྟོབས་དང་ལྡན་པ་དང་། སྙིང་སྟོབས་དང་ལྡན་པ་དང་། གསེར་གྱི་རི་བོ་འདྲ་བར་མདོག་དཀར་སེར་དུ་འགྱུར་ཞིང་ཚེ་རིང་བ་དང་། འཚོ་བ་ཡུན་རིང་དུ་གནས་པར་འགྱུར་རོ། །
[410b.4]ཆུ་སྲང་ལྔ་བརྒྱ་རྩ་བཅུ་གཉིས་དང་། བ་ལ་ཏ་ཀ་གཤེགས་པ་སྲང་སུམ་བརྒྱ་དང་ལྷན་ཅིག་བསྐོལ་བའི་ཁུ་བ་ལུས་པར་སྲང་བརྒྱ་ཉི་ཤུ་རྩ་བརྒྱད་དང་། དེ་དང་མཉམ་པའི་ཏིལ་མར་རྣམས་སྣོད་ཀྱི་ནང་དུ་བཅུག་སྟེ། ཏིག་ཏ་དང་། བོང་ང་རྣམ་གཉིས་དང་། འབྲས་བུ་གསུམ་དང་། བྲག་ཞུན་དང་། སྐྱེར་
[410b.5]ཁཎྜ་དང་། འདི་རྣམས་ཀྱི་ཕྱེ་མ་བཏབ་སྟེ། ཡང་བསྐོལ་ཏེ་མར་ལུས་པ་ལས་རན་པར་བསྟེན་ན་མཛེ་ནད་ཐམས་ཅད་འཇོམས་པའི་མཆོག་ཡིན་ནོ། །ཡང་གོ་བྱེ་དང་ལྷན་ཅིག་སྐྱུ་རུ་ར་དང་། ཞོའི་སྤྲིས་མ་དང་། ཏིལ་མར་དང་། བུ་རམ་དང་། འོ་མ་དང་། ནས་ཕྱེ་དང་། ཏིལ་དང་། སྦྲང་རྩི་དང་།
[410b.6]ཏིལ་བཏགས་པའི་ཕྱེ་མའི་ལྡེ་གུ་དང་། མོན་སྲན་སྡེའུ་ལ་སོགས་པའི་ཚོད་མ་དང་། འདི་རྣམས་གང་ཡང་རུང་བ་སྲང་གཅིག་བསྟེན་པ་དང་། གོ་བྱེའི་བཅུད་ཀྱིས་ལེན་ཞེས་བྱ་བ་སྟེ། ལུས་སྐྱེ་བར་བྱེད་པ་དང་། ཡིད་གཞུངས་པར་བྱེད་པ་དང་། ཚེ་རིང་བར་བྱེད་པའི་མཆོག་ཡིན་ནོ། །གོ་བྱེའི་
[410b.7]འབྲས་བུ་ནི་ཤིན་ཏུ་རྣོ་བ་ཡིན་ཏེ། ཁོང་དུ་ཞུ་བའི་དུས་ན་མེ་དང་མཉམ་པ་ཡིན་ལ། ཆོ་ག་ཇི་ལྟ་བ་བཞིན་དུ་སྦྱར་ན་ནི་བདུད་རྩི་དང་འདྲ་བ་ཡིན་ནོ། །བད་ཀན་ལས་གྱུར་པའི་ནད་དང་རྗེས་སུ་འབྲེལ་བའི་ནད་གང་ཡང་གོ་བྱེའི་ནད་དང་། སྦྱོར་བ་འདིས་མི་སེལ་བ་གཅིག་ཀྱང་མེད་དེ་ལྷག་པར་ཕོ་བའི་མེ་དྲོད་
[411a]
[411a.1]མྱུར་དུ་སྦྱིན་པར་བྱེད་པ་དང་། དེ་ལྟར་བཅུད་ཀྱིས་ལེན་གྱི་ཆོ་ག་བྱེད་པའི་དུས་སུ་རླུང་དང་ཚད་པར་འདུག་བ་ཁྱད་པར་དུ་སྤང་བར་བྱའོ། །དེ་བཞིན་དུ་རྒྱ་སྲན་ཀུ་ལད་ཐ་དང་། ཞོ་དང་། ཚྭ་དང་། ཏིལ་མར་གྱིས་ལུས་བསྐུ་བ་དང་། མེ་ལ་བསྟེན་པ་རྣམས་སྤང་བར་བྱའོ། །
[411a.2]ཤིང་དུ་བ་རི་ཀ་ཞེས་བྱ་བ་ནུབ་ཕྱོགས་ཀྱི་རྒྱ་མཚོ་དང་། ཕྱི་རོལ་གྱི་ངོགས་ན་སྐྱེ་སྟེ། དེའི་ལོ་མ་དང་། འབྲས་བུ་རླུང་གིས་བསྐྱོད་པ་ལས་ཤིང་བསྒུལ་ཏེ། འབྲས་བུ་དང་། ལོ་མ་རྒྱ་མཚོའི་ནང་དུ་ལྷུང་བ་དང་། དེ་ཆུ་རླབས་ཀྱིས་ཚུ་རོལ་གྱི་འགྲམ་དུ་འོངས་པ་དང་། དེ་དབྱར་སྤྲིན་བྱུང་བའི་དུས་སུ་ལེགས་
[411a.3]པར་སྨིན་པ་བླངས་ལ། འབྲས་བུ་དེའི་ཤུན་པ་བོར་ཏེ་བསྐམས་ལ་བཏགས་པའི་ཕྱེ་མ་ཏིལ་བཙིར་བ་འམ། ལེ་བརྒན་རྩི་བསྐོལ་ཏེ་མར་ཕྱུང་ལ། ཏུ་པ་རིའི་འབྲས་བུའི་མར་ཡང་དེ་ལྟར་བྱུང་སྟེ། དེ་ཆུ་དང་བསྐོལ་ཏེ་ཆུ་དུ་མར་ཉི་ཚེ་ལུས་པ་དང་ཕྱིར་ཕྱུང་ལ་བའི་ལྕི་བའི་ནང་དུ་ཟླ་བ་ཕྱེད་ཀྱི་
[411a.4]བར་དུ་བསྐམས་ལ་བཞག་སྟེ་ཕྱུང་ལ། དེའི་འོག་ཏུ་ཐོག་མར་སྣུམ་ཆོས་དང་། དུགས་བྱས་ལ་ལུས་ཀྱི་དྲི་མ་དག་པར་བྱས་ཏེ། དེ་ནས་ཞག་བཞི་པའི་བར་དུ་འབྲས་ཆན་ཟོས་ལ་ནང་རེ་བཞིན་གོང་མའི་མར་ལས་ལག་མཐིལ་གང་ཙམ་བླུད་ལ་སྦྱིན་ཁར་སྔགས་འདི་བགྲང་བར་བྱའོ། །
[411a.5]མན་ཛཱ་ས་མ་ར་མ་ཧཱ་བཱི་ཧྱ། བ་སརྦ་དྷ་དུ་བི་ཤྭ་དྷ་ཡ། ཤམ་ཁ་ཙཀྲ་ག་དྷ་པ་ཎི་སྟན་ཨཱག་མྱ་བ་ཡ་ཏི་ཛུ་ཏ། དེ་ལྟར་བྱས་པའི་འབྲུ་མར་དེ་ལན་ཅིག་འཐུངས་པས་ཀྱང་ལུས་སྟོད་སྨད་ཀྱི་ནད་ཐམས་ཅད་སེལ་བར་བྱེད་དོ། །དེ་ལྟར་ཞག་ལྔའི་བར་དུ་འཐུངས་པའི་འོག་ཏུ་དགོངས་ཀ་སྣུམ་
[411a.6]དང་ཚྭ་མེད་པའི་ནས་ཐུག་གྲང་མོ་བླུད་དེ། ཟླ་བ་ཕྱེད་ཀྱི་བར་དུ་སྲན་མུངྒའི་ཁུ་བཅུད་དང་བཅས་པའི་ཁ་ཟས་ཟོས་ལ་སྤང་བར་འོས་པ་རྣམས་སྤངས་ན། མཛེ་ནད་ཐམས་ཅད་འཇོམས་སོ། །ཡང་ན་ཏུ་པ་རིའི་མར་དང་། དེའི་སུམ་འགྱུར་གྱི་སེང་ལྡེང་གི་ཁུ་བ་དང་གོང་མ་བཞིན་བསྐོལ་ཏེ།
[411a.7]བསྒྲུབས་ལ་ཟླ་བ་གཅིག་གི་བར་དུ་བསྲུང་བ་ལ་སོགས་པའི་ཆོ་ག་ལེགས་པར་བྱ་སྟེ། ཁ་ཟས་གཞན་མི་བཟའ་བ་དང་། བསྐུ་བྱུག་ལ་སོགས་པ་སྦྱར་ཏེ། སྐྱེས་བུ་མཛེ་ནད་ཅན་རྣམས་ཀྱིས་སྦྱོར་བ་འདི་བསྒྲུབ་པར་བྱའོ། །འོ་མའི་སྦྱོར་བ་ཡང་སེང་ལྡེང་གི་ཁུ་བ་མ་གཏོགས་པ་མར་དང་སྦྲང་རྩི་
[411b]
[411b.1]དང་ལྡན་པ་བཏུང་ཞིང་ཁ་ཟས་སུ་ཤ་ཁུ་ཉི་ཚེ་འཐུངས་ན་ལོ་ཉིས་བརྒྱ་ཐུབ་པར་འགྱུར་རོ། །མར་དེ་ཉིད་ཀྱིས་སྣ་སྨན་དུ་ཞག་ལྔ་བཅུའི་བར་དུ་སྦྱར་ན་ལུས་ཉམས་སྟོབས་དང་ལྡན་པ་དང་། ཐོས་པ་འཛིན་པ་དང་། ལོ་སུམ་བརྒྱ་འཚོ་བར་འགྱུར་རོ། །པི་པི་ལིང་འབྲུ་ལྔའམ། བརྒྱད་དམ། བདུན་
[411b.2]ནམ། བཅུའམ་ཚད་དེ་རྣམས་གང་ཡང་རུང་བ་མར་དང་སྦྲང་རྩི་དང་སྦྱར་ཏེ་བཅུད་ཀྱིས་ལེན་གྱི་ཆོ་ག་ཇི་ལྟར་བཙལ་བ་བཞིན་དུ་སྤྱད་པར་བྱའོ། །པི་པི་ལིང་རྡོག་མ་བརྒྱད་གསུམ་བརྒྱད་རྒྱ་སྐྱེགས་ཤིང་གི་ཐལ་བའི་ནང་དུ་སྦངས་ཏེ། དེ་ནས་ཕྱིར་ཕྱུང་ལ་བསྐམས་ཏེ་མར་དང་ཡང་བརྔོས་ལ་སྦྲང་རྩི་
[411b.3]དང་བསྲེས་ཏེ་སྔ་དྲོ་ཁ་ཟས་ཀྱི་གོང་དུ་གསུམ་གསུམ་བཟའོ། །པི་པི་ལིང་བཅུ་ཞག་བཅུའི་བར་དུ་རེ་རེ་རིམ་གྱིས་བསྐྱེད་དེ། འོ་མ་ཡང་དེ་ལྟར་བསྐྱེད་ལ་དེ་བཞིན་ཉི་ཤུར་ཕྱིན་པ་དང་། རེ་རེས་དབྲི་སྟེ་བཅུ་པ་ལ་ཐུག་པ་དང་། སྨན་དེ་ཞུ་བའི་ཚོད་ཙམ་ན་འབྲས་དྲུག་ཅུ་པ་འོ་མ་དང་མར་དང་
[411b.4]བཅས་པ་ཁ་ཟས་སུ་ཟའོ། །དེ་ལྟར་པི་པི་ལིང་སྟོང་ཟད་ཀྱི་བར་དུ་ཆོ་ག་དེ་ལྟར་བྱས་པ་ནི་པི་པི་ལིང་སྟོད་སྦྱོར་བའི་བཅུད་ཀྱིས་ལེན་ཞེས་བྱའོ། །དེ་ཡང་བཏགས་པའི་ཕྱེ་མ་འོ་མ་དང་སྦྱར་ཏེ་བཟའ་བ་ནི་མེ་དྲོད་ཆེ་བ་ལ་སྦྱིན་ནོ། །མེ་དྲོད་བར་མ་ལ་ནི་བསྐོལ་བ་བླུད་དོ། །དེ་བཞིན་དུ་པི་
[411b.5]པི་ལིང་རའི་འོ་མ་དང་སྦྱར་ཏེ། པི་པི་ལིང་ཉིས་སྟོང་གི་བར་དུ་ཡང་དེ་ལྟར་བྱའོ། །པི་པི་ལིང་གི་སྦྱོར་བ་དེ་རྣམས་ཆོ་ག་གོང་མ་བཞིན་དུ་བྱས་པ་ལ་ནི་ལུད་པ་ལུ་བ་དང་། དབུགས་མི་བདེ་བ་དང་། མགུལ་ནད་ན་བ་དང་། གཅོད་ཆེན་པོ་དང་། གཞང་འབྲུམ་དང་། གཅིན་སྙི་བ་དང་།
[411b.6]སྐྱ་རྦབ་དང་། རིམས་མ་རུངས་པ་དང་། སྐྲངས་པ་དང་། སྐྱུག་པ་དང་། སྐྱིགས་བུ་དང་། མཆེར་པ་ན་བ་དང་། དྲེག་ནད་རྣམས་འཇོམས་པར་བྱེད་དོ། །ཡང་ན་པི་པི་ལིང་སྲང་ཕྱེད་ཆུ་དང་ལྡེ་གུར་བྱས་ཏེ། ལྕགས་སྣོད་ཀྱི་ནང་དུ་བསྐུས་ལ་ནུབ་གཅིག་བཞག་ལ། དེ་ནས་ཆུ་སྙིམ་པ་
[411b.7]གང་དང་ལྷན་ཅིག་ནང་རེ་ལ་བླུད་པར་བྱ་སྟེ། །དེ་ལྟར་ལོ་གཅིག་གི་བར་དུ་ཁ་ཟས་དང་། བཏུང་བ་དང་བཅས་པ་ཅི་འདོད་པ་བསྟེན་ནོ། །བཅའ་སྒ་དང་། བྱི་དང་ག་དང་། འབྲས་བུ་གསུམ་དང་། སླེ་ཏྲེས་དང་། ཤིང་མངར་དང་། ཡུང་བ་དང་། ཨ་ཏི་བ་ལ་དང་། བ་ལ་དང་། གླ་སྒང་དང་།
[412a]
[412a.1]ཐང་ཤིང་དང་། ཨ་རུ་ར་དང་། ཀྲུ་ཏྲུག་ཏྲེས་དང་། མུ་ཟི་དང་། པི་པི་ད་མ་དང་། ཨུཏྤལ་དང་། ད་ཏ་དང་། ཨ་ཤྭ་ཀར་ན་དང་། ཨ་ས་ན་དང་། བ་ལའི་འོ་མའམ་སྙིང་པོ་གང་རྙེད་པ་དང་། དེ་རྣམས་རེ་རེ་ཡང་པི་པི་ལིང་གི་སྦྱོར་བ་བཞིན་དུ་ལྕགས་ཀྱི་སྣོད་ཀྱི་ནང་དུ་
[412a.2]བསྐུ་བ་ལ་སོགས་པའི་སྦྱོར་བ་བྱས་ཏེ་ཟོས་ན་ལོ་བརྒྱ་འཚོ་ཞིང་ནད་དང་རྒས་པ་ལས་གྲོལ་བར་བྱེད་དོ། །གོང་གི་ལྕགས་སྣོད་ལ་བསྐུ་བའི་སྨན་སྣ་རེ་རེའི་སྦྱོར་བ་གང་ཡང་རུང་བ་འདྲ་སྟེ། འོ་མ་སྙིམ་པ་གོང་དང་བཅས་པར་འཐུངས་ན། གོང་དུ་སྨོས་པའི་ཡོན་ཏན་པས་ཉིས་འགྱུར་གྱིས་ཆེར་སྐྱེད་
[412a.3]པར་བྱེད་དོ། །ཤིང་ཨ་ས་ན་དང་། སེང་ལྡེང་བསྐོལ་བའི་ཁུ་བའི་ནང་དུ་སོ་མ་ར་ཛའི་ཕྱེ་མ་སྦངས་ཏེ་མར་དང་། སྦྲང་རྩི་དང་། རུ་རྟ་དང་། ཨ་རུ་ར་དང་། ལྕགས་ཕྱེ་གསུམ་བཏགས་པས་བཏབ་སྟེ། འདག་གུར་བྱས་པ་ལས་ལོ་གཅིག་གི་བར་དུ་ལྡག་ཅིང་ཁ་ཟས་རུང་ཞིང་ཕན་
[412a.4]པ་ཟོས་ན་ཁ་ཟས་ལས་གྱུར་པའི་ནད་ཡུན་རིང་བ་ཡང་འདོར་བར་བྱེད་དོ། །མཛེ་ནད་ཀྱིས་ལུས་ཚ་བ་དང་ཚབས་ཆེར་ཁྱབ་ཅིང་ན་བར་གྱུར་པའི་སྐྱེས་བུ་ནི་སོ་མ་ར་ཛ་དང་། ཏིལ་ནག་པོ་གཉིས་ངེས་པར་ལོ་གཅིག་གི་བར་དུ་ཟོས་ན་ཟླ་བ་བཞིན་དུ་ལུས་མདོག་ཤིན་ཏུ་མཛེས་པར་འགྱུར་རོ། །
[412a.5]སྐྱེས་བུ་གང་གིས་སོ་མ་ར་ཛ་ཕུབ་མ་མེད་པ་བཏགས་པའི་ཕྱེ་མ་འོ་མ་དང་ལྷན་ཅིག་སྣོད་ཀྱི་ནང་དུ་མནན་ཏེ། སྨིན་པ་དང་ཕྱུང་ལ་སྙིང་པོར་གྱུར་པ་དེ་སྦྲང་རྩི་དང་སྦྱར་བའི་ལྡེ་གུ་བལྡགས་ཏེ། དེའི་འོག་ཏུ་དར་བ་ལེགས་པར་རེད་པ་འཐུངས་ན་མཛེ་ནད་ཀྱིས་ལུས་ཀྱི་རྐང་ལག་དང་སྣ་ལ་སོགས་པ་
[412a.6]འདྲུལ་ཞིང་ཆད་པ་ཡང་སོར་མོ་དང་སྣ་ལ་སོགས་པ་སྐྱེ་བར་འགྱུར་ཏེ། ཇི་ལྟར་ཤིང་བཅད་པའི་འོག་ཏུ་ལོ་མ་སྐྱེ་བ་ཤིན་ཏུ་མཛེས་པ་བཞིན་ནོ། །སྒོག་སྐྱ་ནི་ཐོག་མར་སྒྲ་གཅན་ཟིན་གྱིས་བདུད་རྩི་བརྐུས་པ་ལས་ཁྱབ་འཇུག་གིས་འཁོར་ལོ་འཕངས་ཏེ། མགོ་བཅད་པ་ལས་བདུད་རྩིའི་ཐིགས་
[412a.7]པ་ས་ལ་ལྷུང་ཞིང་ཐིགས་པ་ལས་སྒོག་སྐྱ་རྣམས་སུ་གྱུར་ཏོ། །སྒོག་སྐྱ་དེ་བྲམ་ཟེས་མི་ཟ་བ་ནི་ལྷ་མ་ཡིན་གྱི་ལུས་ལས་བྱུང་བའི་ཁྲག་དང་འདྲེས་པ་ཡིན་པས་དེས་མི་ཟ་བ་ཡིན་ནོ། །སྒོག་སྐྱ་དེ་ནི་མངོན་སུམ་གྱིས་བདུད་རྩི་ཉིད་ཡིན་ཏེ། གྲོང་གི་བཅུད་ཀྱིས་ལེན་ཞེས་བྱའོ། །སྒོག་སྐྱ་དེ་ནི་
[412b]
[412b.1]ཁྱད་པར་དུ་གྲང་བའི་དུས་སུ་བསྟེན་པར་བྱའོ། །དཔྱིད་བད་ཀན་ལྡང་བའི་དུས་སུ་ལྷག་བར་སྤྱད་དོ། །དབྱར་སྤྲིན་སྐྱེས་པའི་དུས་སུ་ནི་མེ་དང་རླུང་གིས་ཉམ་ཐག་པ་ཡིན་པས་དེའི་དུས་སུ་བཟའ་བ་འམ་ཡང་ན་རྟག་ཏུ་བསྟེན་པར་བྱའོ། །སོག་ཚ་བའི་དུས་སུ་ནི་དུས་ཀྱི་སྤྱོད་ལམ་བསྟེན་ཅིང་ལུས་
[412b.2]དག་པ་དང་དྲི་མ་མེད་པར་བྱ་སྟེ། སྣུམ་པ་དང་། བསིལ་བ་དང་། མངར་བ་དང་། སྒོག་སྐྱ་ལྷན་ཅིག་བསྟེན་པར་བྱའོ། །དེ་བཞིན་དུ་གོས་དང་རྒྱན་ཡང་དུས་དང་ཇི་ལྟར་མཐུན་པ་དང་། གཡོག་འཁོར་རྣམས་ཀྱང་མཐུན་པ་དང་ལྷན་ཅིག་སྒོག་སྐྱ་བསྟེན་པར་བྱའོ། །རི་ཁ་བ་ཅན་ཞེས་
[412b.3]བྱ་བའི་དྲུང་ན་ཤ་ཁ་ཞེས་བྱ་བའི་ཡུལ་ཡོད་དེ། དེར་སྐྱེས་པའི་སྒོག་སྐྱའི་རྩ་བ་ཡུལ་དེའི་མིས་དཔྱིད་ཀྱི་དུས་སུ་ཤུན་པ་ཕྲལ་ཏེ་ནུབ་མོ་ཆང་དང་ལྷན་ཅིག་ཟོས་པས་མེ་དྲོད་སྐྱེད་དོ། །སྒོག་སྐྱ་ཆམ་ཆོམ་བརྡུངས་ཏེ་བཙིར་བའི་ཁུ་བ་ཆ་གཅིག་དང་ཆང་ལེགས་པར་སྨིན་པ་ཆ་གསུམ་སྦྱར་བ་ནང་
[412b.4]པར་འཐུངས་ན་བཟང་ངོ་། །ཡང་ན་སྒོག་སྐྱའི་ཁུ་བ་དེ་ཆང་གཞན་གང་ཡང་རུང་བ་དང་བཏུང་བ་འམ། ཡང་ན་འབྲུ་མར་དང་། ཞོ་ག་ཆུ་དང་རྩབ་མོ་འམ་དེ་དག་གང་ཡང་རུང་བ་དང་ལྷན་ཅིག་སྒོག་སྐྱའི་ཁུ་བ་ཐུན་ཚད་རན་པར་དཔྱིད་ཀྱི་དུས་སུ་བཏུང་བར་བྱའོ། །ཡང་ན་འོ་མ་དང་། མར་
[412b.5]དང་། ཞག་དང་། རྐང་དང་། སྲོག་ཆགས་ཐང་ལ་གནས་པའི་ཤ་དང་། དེ་དག་གང་ཡང་རུང་བ་དང་ལྷན་ཅིག་བསྐོལ་ཏེ། ནད་གཞི་ཇི་ལྟ་བ་བཞིན་དུ་སྦྱར་ཏེ་བཏུང་བ་འམ། ཡང་ན་སྒོག་སྐྱའི་ཁུ་བ་ཉི་ཚེ་འཐུངས་ན་མཁུར་བ་དགང་བ་ཙམ་གྱིས་ཀྱང་མིད་པ་དག་པར་བྱེད་དོ། །ཟུག་གཟེར་
[412b.6]ཆེ་ཞིང་ན་བ་ལ་ནི་སྒོག་སྐྱའི་ཁུ་བ་དེ་རྒྱུན་དུ་དུགས་བྱས་ན་རབ་ཏུ་བསྔགས་ཏེ་དེའི་འོག་ཏུ་ཆུ་གྲང་སྤོང་བར་བྱ་སྟེ། གལ་ཏེ་ཆུ་གྲང་བསྟེན་ན་ནི་འཕྲལ་ལ་སྐྱུག་ཅིང་བརྒྱལ་བར་འགྱུར་རོ། །གཞན་ཡང་ཟུག་གཟེར་ཆེ་ཞིང་ཚ་བ་དང་། ངལ་ཞིང་དུབ་པའི་དུས་སུ་འཐུངས་ན་ལུས་བརྟན་ཞིང་གཟི་མདངས་སྐྱེ་
[412b.7]བར་འགྱུར་རོ། །གལ་ཏེ་ལུས་ཚ་བ་སྐྱེས་ན་ནི་བསིལ་བའི་སྨན་གྱིས་བསྐུ་ཞིང་ཆུའི་རྒྱུན་ཕྲ་མོའི་ཐིགས་པས་ཕོག་པར་བྱ་བ་དང་། ཨ་ཏི་མུག་ཏི་ཀ་དང་། ག་པུར་མ་ལི་ཀའི་བྲེང་བས་ལུས་ལ་བཏགས་པར་བྱའོ། །སྒོག་སྐྱ་ཉི་ཚེ་སྲང་བརྒྱད་དམ། སྲང་བཞི་པའམ། ཡང་ན་དེའི་རྐང་
[413a]
[413a.1]སྲང་གཅིག་བཏགས་པའི་ཕྱེ་མ་ཁ་ཟས་དང་སྔ་དྲོ་དང་པོ་བསྟེན་པར་བྱའོ། །དེ་ཞུ་བའི་ཚོད་ཙམ་ན་འབྲས་རྙིང་པའི་ཆན་དང་མེ་ཏོག་ཀུན་ད་དང་། ཟླ་བ་ལྟར་དཀར་བའི་ཆན་ཁུ་བཅུད་དང་འོ་མ་དང་ཐང་ལས་སྐྱེས་པའི་ཤ་ཁུ་དང་ལྷན་ཅིག་བཟའ་སྟེ། དེ་མ་ཐག་ཆང་བཏུང་བར་
[413a.2]བྱའོ། །སྐོམ་དད་ཆེ་བ་ལ་ནི་ཆང་ཆུ་དང་ལྷན་ཅིག་བཏུང་ངོ་། །གལ་ཏེ་ཆང་མི་བཏུང་བ་ཞིག་ཡིན་ན་ནི་རྩབ་མོ་དང་རྒུན་འབྲུ་ལ་སོགས་པའི་ཁུ་བ་སླ་བ་བླུད་དོ། །ཡང་ན་སྒོག་པ་བཏགས་པའི་ཕྱེ་མ་མར་དང་ཆ་སྙོམས་ཏེ་འདྲེས་པར་དཀྲུགས་ནས་མར་སྣོད་དུ་བཅུག་སྟེ་ཞག་བཅུ་བཞག་པའམ་
[413a.3]ཡང་ན་ཕྱི་མ་དེ་ཉིད་ཞག་དང་ལྷན་ཅིག་བཟའོ། །སྒོག་སྐྱ་ཤུན་པ་བཤུས་པའི་སྙིང་པོ་དང་། ཐུར་མ་ལ་བསྲེགས་པའི་ཤའམ། ཡང་ན་བཟའ་བ་སྣ་ཚོགས་སམ། ཡང་ན་ཤ་བརྡུངས་པ་དང་ལྷན་ཅིག་གམ། ཡང་ན་མར་དང་ཚྭ་དང་ལྷན་ཅིག་གམ། ཡང་ན་ཆང་ཅི་འདོད་པ་དང་
[413a.4]ལྷན་ཅིག་གམ། ཡང་ན་ཁ་ཟས་ཡང་བ་དང་། པིད་ཚྭ་དང་། དེ་རྣམས་གང་ཡང་རུང་བ་དང་ལྷན་ཅིག་བཟའོ། །ཁྲག་དང་མཁྲིས་པ་མ་གཏོགས་པ་རླུང་ནད་ནད་གཞི་གཞན་དང་ལྷན་ཅིག་པའམ། ཡང་ན་རླུང་ཉི་ཚེ་ལ་ནི་སྒོག་སྐྱ་ལས་ལྷག་པའི་སྨན་གཞན་མེད་དོ། །གང་ཞིག་ཆུ་
[413a.5]དང་། བུ་རམ་དང་། འོ་མ་ལ་སྲེད་ཅིང་། ཤ་དང་ཆང་དང་སྐྱུར་རྣམས་ལ་མི་སྲེད་པ་དང་། ཤིན་ཏུ་སྐོམ་དད་ཆེ་ཞིང་བྲང་ཚ་བ་དང་། འཇུ་སྟོབས་ཆེ་བ་ལ་ནི་སྒོག་སྐྱ་བྱིན་ན་ངེས་པར་གནོད་པ་སྐྱེད་དོ། །དེ་ལྟར་སྒོག་སྐྱ་བསྟེན་པའི་འོག་ཏུ་མཁྲིས་པ་སྐྱེ་བར་དོགས་ན་བཀྲུ་སྨན་འཇམ་པོ་སྦྱར་
[413a.6]ན་དེ་ཉིད་ཀྱིས་བཅུད་ལེན་གྱི་ཡོན་ཏན་ཡོངས་སུ་རྫོགས་པ་ཉམས་སུ་མྱོང་བར་འགྱུར་རོ། །དེ་ལ་བྲག་ཞུན་ཞེས་བྱ་བ་ནི་སོ་ག་ཚ་བའི་ཉི་མའི་དྲོད་ཀྱིས་རི་ལ་ཕོག་པ་ལས་རྒྱ་སྐྱེགས་ཀྱི་བཅུད་འཛག་པ་བཞིན་དུ་གསེར་ལ་སོགས་པའི་རིགས་རྣམ་པ་དྲུག་ཏུ་འབྱུང་ཞིང་འཛག་པ་དེ་ནི་བྲག་ཞུན་
[413a.7]ཞེས་བྱའོ། །གསེར་གྱི་རིགས་ལ་སོགས་པ་དྲུག་པོ་ཀུན་ཀྱང་ཁ་བ་དང་། ཚ་བ་དང་། ཧ་ཅང་དྲོད་མི་ཆེ་བ་དང་། ཞུ་བའི་རྗེས་ཚ་བ་ཡིན་ནོ། །བྲག་ཞུན་གྱི་རིགས་བཅད་དུ་འདོད་པ་དེ་ནི་ལྕགས་ཀྱི་རིགས་ཀྱི་བྲག་ཞུན་ཞེས་བྱའོ། །བྲག་ཞུན་བ་གཅིན་གྱི་དྲི་བྲོ་བ་དང་། གུ་གུལ་གྱི་མདོག་
[413b]
[413b.1]ལྟར་གནག་པ་དང་། འཇམ་པོ་འབྱར་བག་ཏུ་འདུག་པ་དང་། སྣུམ་པ་དང་། མི་སྐྱུར་བ་དང་། རོ་མངར་བ་དང་། འཇམ་པ་དང་། ལྕི་བ་དེ་ནི་བྲག་ཞུན་གྱི་མཆོག་དམ་པ་ཡིན་ནོ། །ནད་ཀྱིས་བཏབ་པའི་སྐྱེས་བུ་ལ་ཡང་བྲག་ཞུན་འདི་རྗེས་སུ་མཐུན་པ་ཡིན་ནོ། །དེ་ལ་ཐོག་མར་བྲག་ཞུན་
[413b.2]ལྕགས་སྣོད་ཀྱི་ནང་དུ་བཅུག་སྟེ། ཆུས་སྦངས་ལ་བཀྲུས་ཏེ་སྐམས་ལ་བསྐམས་པའི་བྲག་ཞུན་དང་མཉམ་པའི་སྨན་བསྐོལ་བའི་ཆུའི་ནང་དུ་སྦང་བར་བྱའོ། །དེ་ནས་ཡང་སྐམས་ལ་དེའི་བརྒྱད་འགྱུར་གྱི་ཆུ་དང་བསྐོལ་ཏེ་བཞི་ཆ་ལུས་པ་དང་། ཚིགས་མ་བོར་ཏེ་ཁུ་བ་དྲོ་འཇམ་ཙམ་གྱི་ནང་
[413b.3]ཁུ་བ་དེ་དང་མཉམ་པའི་བྲག་ཞུན་བླུགས་ལ་ཡང་སྐམས་ཏེ། དེ་ལྟར་རང་རང་དང་མཐུན་བའི་སྨན་བསྐོལ་བའི་ཁུ་བའི་ནང་དུ་སྦང་ཞིང་སྐམ་པ་ལན་བདུན་གྱི་བར་དུ་བྱའོ། །དེའི་འོག་ཏུ་ཏིག་ཏའི་སྨན་མར་གྱིས་སྣུམ་ཆོས་བྱས་ལ་སློན་ཁྲུས་ཀྱིས་ལུས་དག་པར་བྱ་སྟེ། དེ་ནས་བྲག་ཞུན་དེ་འབྲས་
[413b.4]བུ་གསུམ་གྱི་ཁུ་བ་དང་སྦྱར་ལ་ཞག་གསུམ་བླུད་དོ། །དེ་ནས་ཞག་གསུམ་གྱི་བར་དུ་པ་ཏོ་ལའི་ཁུ་བ་དང་སྦྱར་བ་གཏང་ངོ་། །དེ་ནས་ཞག་གསུམ་གྱི་བར་དུ་ཤིང་མངར་གྱི་ཁུ་བ་དང་སྦྱར་བ་བླུད་དོ། །སྦྱོར་བ་དེ་དག་ཀྱང་ཇི་ལྟར་རིགས་པ་དུས་དང་སྦྱར་ཏེ་གཏང་ངོ་། །བྲག་ཞུན་ཞེས་བྱ་བ་དེ་ཉིད་
[413b.5]ནི་ལུས་ལ་ཕན་པར་བྱེད་པ་ཡིན་ཏེ་ཡོན་ཏན་ཐམས་ཅད་འགྲུབ་པར་འགྱུར་རོ། །ཆོ་ག་ལོག་པར་བྱས་ན་ནི་འཕྲལ་ལ་གནོད་པ་སྐྱེད་དོ། །བྲག་ཞུན་ནི་ཞག་བདུན་དང་། ཞག་ཉི་ཤུ་རྩ་གཅིག་དང་། ཞག་ཉི་ཤུ་རྩ་དགུ་ལ་བྲག་ཞུན་ཞོ་གཉིས་དང་། སྲང་ཕྱེད་དང་། སྲང་གཅིག་སྟེ། དེ་
[413b.6]ལྟར་བྲག་ཞུན་གྱི་ཐུན་ཚད་རབ་འབྲིང་གསུམ་དང་། ཞག་བདུན་ལ་སོགས་པ་གོ་རིམས་བཞིན་དུ་སྦྱར་ན་ཕན་ཡོན་ཡང་རིམ་པ་བཞིན་དུ་བཟང་བ་ཡིན་ཏེ། དེ་ལྟར་སྨན་ལེགས་པར་སྦྱར་བ་ཡང་ལུས་ལེགས་པར་སྦྱངས་པ་ལ་བྱ་བ་ཡིན་ནོ། །ཟངས་མ་དང་། ལྕགས་དང་། དངུལ་དང་།
[413b.7]གསེར་དང་། དེ་རྣམས་ཀུན་འབྱོར་ཡང་རུང་སྟེ། དེའི་ཕྱེ་མ་དང་། འོ་མ་དང་། བྲག་ཞུན་ལྷན་ཅིག་བསྲེས་ཏེ་འཐུངས་ན་མྱུར་དུ་བཅུད་ཀྱིས་ལེན་གྱི་ཆོ་ག་འགྲུབ་པར་འགྱུར་རོ། །རྒྱ་སྲན་དང་། ཀ་ཀ་མ་ཙི་དང་། ཕུག་རོན་གྱི་ཤ་རྣམས་ནི་རྟག་ཏུ་སྤང་བར་བྱའོ། །བྲག་ཞུན་གྱི་སྦྱོར་བ་དུས་སུ་ཆོ་ག་
[414a]
[414a.1]བཞིན་འབད་དེ་སྤྱད་ན། སའི་སྟེང་ན་གསོར་རུང་བའི་ནད་གང་ལས་ཀྱང་མི་རྒྱལ་བ་མེད་དེ། ནད་མེད་ཅིང་ཐ་མལ་པར་འདུག་པས་ཀྱང་བསྟེན་ན་ཉམས་སྟོབས་དང་སག་རྩ་འཕེལ་ཞིང་སྦྱིན་པར་བྱེད་དོ། །ཉི་མ་དང་རླུང་ལ་སོགས་པས་མ་ཕོག་པའི་ཁྱིམ་གྱི་ནང་དུ་འདུག་
[414a.2]ཅིང་རྒྱུན་དུ་ཕྱིར་མི་འབྱུང་བར་བྱ་སྟེ། དེ་ལྟར་མ་བྱས་ན་ནི་རྩོམ་པ་དོན་མེད་པར་འགྱུར་རོ། །གང་ཉི་མ་དང་། རླུང་དང་ལྷན་ཅིག་གནས་པའི་སྦྱོར་བའི་བྱེ་བྲག་བཤད་པར་བྱ་སྟེ། གང་གི་ལུས་ལ་གནོད་པར་བྱེད་པའི་རྒྱུ་བདེ་བའི་ཡོ་བྱད་བསྟེན་པས་ཉམས་པ་དང་། ཆུ་གྲང་མོ་དང་། འོ་མ་དང་།
[414a.3]སྦྲང་རྩི་དང་། མར་དང་། དེ་རྣམས་གང་ཡང་རུང་བ་ལ་ཞེ་སྡང་ཞིང་མི་འདོད་པ་ཡང་ཆུ་གྲང་ལ་སོགས་པ་གོང་མ་དེ་ལས་གསུམ་མམ་ཡང་ན་གཉིས་སམ། ཡང་ན་མ་ལུས་པ་ཀུན་ཡང་རུང་སྣོད་གཅིག་ཏུ་འདྲེས་པར་བྱ་སྟེ། སྨན་གྱི་གོང་དུ་ཟོས་ན་ཡང་མི་འགྲུབ་སྟེ་གནོད་པ་སྐྱེད་དོ། །བུ་རམ་དང་།
[414a.4]སྦྲང་རྩི་དང་། བཅའ་སྒ་དང་། པི་པི་ལིང་དང་། རྒྱམ་ཚ་དང་། དེ་རྣམས་གང་ཡང་རུང་བ་དང་ལྷན་ཅིག་ཨ་རུ་ར་གཉིས་རྟག་ཏུ་ཟོས་ན་ལོ་བརྒྱ་བདེ་བར་འཚོ་བར་འགྱུར་རོ། །ཨ་རུ་ར་མར་གྱི་ནང་དུ་བསྐོལ་ལ་བཟའ་ཞིང་དེའི་འོག་ཏུ་མར་འཐུངས་ན། རྒས་སྲ་ཞིང་ན་ཚོད་གནས་པ་དང་། ལུས་ཀྱི་ཉམས་
[414a.5]སྟོབས་འཕེལ་བར་བྱེད་དེ། ཇི་ལྟར་མཁས་པ་ཤེས་རབ་ཅན་གྱིས་གཞན་གྱིས་བྱས་པའི་བཟོ་ལན་ཅིག་བསྟན་པས་ཤེས་པ་བཞིན་ནོ། །སྐྱུ་རུ་རའི་ཁུ་བ་དང་། སྦྲང་རྩི་དང་། ཁ་ར་དཀར་པོ་དང་། མར་དང་དེ་རྣམས་ལྡེ་གུར་བྱ་སྟེ། ཕན་པའི་ཟས་དང་ལྷན་ཅིག་མི་རྣམས་ཀྱིས་བསྟེན་ན། རྒ་བའི་འགྱུར་བ་
[414a.6]རྣམ་པར་འཇིག་ཅིང་ཞི་བར་འགྱུར་ཏེ། ཇི་ལྟར་གཞུང་རྒྱ་ཆེ་བ་དག་འཛིན་པར་མི་ནུས་པ་བཞིན་ནོ། །སྐྱུ་རུ་ར་དང་། བྱི་དང་ག་དང་། ཤིང་ཨ་ས་ནའི་སྙིང་པོ་དང་དེ་རྣམས་ཀྱི་ཕྱེ་མ་དང་། ལྕགས་ཀྱི་ཕྱེ་མ་དང་། ཏིལ་མར་དང་། མར་དང་། སྦྲང་རྩི་དང་། དེ་རྣམས་ལྡེ་གུར་བྱས་ཏེ་རྟག་ཏུ་བསྟེན་ན་གཞོན་
[414a.7]པའི་ན་ཚོད་དང་མཛེས་པ་ཉམས་པ་མེད་པར་འགྱུར་རོ། །ལྕགས་ཕྱེ་དང་། བྱི་དང་གའི་ཕྱེ་མ་མར་དང་སྦྲང་རྩི་དང་བསྲེས་ལ་སྦྱར་ཏེ། ཟ་མ་ཏོག་གི་ནང་དུ་ལོ་གཅིག་ཙམ་བཞག་ལ་སྨིན་ཅིང་སྙིང་པོར་གྱུར་པ་དང་། ལྡེ་གུར་བྱས་ཏེ་བལྡགས་ན་སྟོབས་དང་ལྡན་པ་དང་། འཚོ་བ་ཡུན་རིང་བར་འགྱུར་
[414b]
[414b.1]བ་དང་སྐྲ་ནག་པོར་བྱེད་དོ། །བྱི་དང་ག་དང་། གོ་བྱེ་དང་། བཅའ་སྒ་དང་། དེ་རྣམས་མར་དང་། སྦྲང་རྩི་དང་སྦྱར་བ་ཟོས་ན་རྒ་བའི་ཆུ་བོ་དང་། ནད་ཀྱི་རླབས་ལས་ཐར་ཞིང་སྐྱེས་བུ་དེ་མདོག་བཟང་ཞིང་མཛེས་པར་འགྱུར་རོ། །སེང་ལྡེང་དང་། ཤིང་ཨ་ས་ནའི་ཁུ་བའི་ནང་དུ་འབྲས་བུ་གསུམ་དང་སྦངས་
[414b.2]ལ་སྐམས་པའི་ཕྱེ་མ་མར་དང་སྦྲང་རྩི་དང་སྦྱར་བའི་ལྡེ་གུ་ཆོ་ག་བཞིན་དུ་མི་རྣམས་ཀྱིས་ངེས་པར་བསྟེན་ན་གསོན་བཞིན་དུ་རྒ་བ་མེད་པ་དེ་ནི་ངོ་མཚར་ཆེའོ། །སྨན་ཛི་བ་ཀའི་ཁུ་བ་དང་། ཤ་ཁ་ར་དང་། མར་དང་། སྦྲང་རྩི་དང་། འབྲས་བུ་གསུམ་གྱི་ཕྱེ་མ་ལྡེ་གུར་བྱས་ཏེ། ལག་མཐིལ་དུ་བཞག་སྟེ།
[414b.3]སོར་མོས་བལྡག་ཅིང་བསྟེན་ན། སྐྱེས་བུ་རྣམས་རྒས་པས་གནོད་པ་བྱུང་ཟིན་པ་ཡང་ཟློག་པར་བྱེད་དོ། །བ་སྦྲུ་བ་སར་པ་སྲང་ཕྱེད་བཏགས་པའི་ཕྱེ་མ་འོ་མ་དང་ལྷན་ཅིག་ཟླ་བ་ཕྱེད་དམ་གཉིས་སམ་དྲུག་གམ་ལོ་གཅིག་གི་བར་དུ་བསྟེན་ན་རྒས་འཁོགས་པ་ཡང་ཕྱིར་ཞིང་ལུས་སར་པ་སྐྱེད་པར་བྱེད་
[414b.4]དོ། །མུརྦ་དང་། བྲི་ཧ་ཏི་དང་། ཨཾ་ཤུ་མ་ཏི་དང་། བ་ལ་དང་། པུ་ཤེལ་ཙེ་དང་། པ་ཐ་དང་། ཤིང་ཨ་ས་ན་དང་། ཐལ་ཏྲེས་དང་། ཀ་ལ་ནུ་ས་ར་དང་། ཨ་ཀ་རུ་དང་། ཙནྡན་དང་། དེ་རྣམས་རེ་རེ་ཡང་བ་སྤྲུ་བའི་ཆོ་ག་བཞིན་དུ་བྱས་ན་ཕན་ཡོན་ཡང་དེ་དང་འདྲའོ། །ཉེའུ་ཤིང་བསྐོལ་
[414b.5]བའི་ཁུ་བའི་ནང་དུ་དེ་ཉིད་ཀྱི་ཕྱེ་མ་བཅུག་ལ་ལྡེ་གུར་བྱས་པའི་ནང་དུ་མར་དང་སྦྲང་རྩི་གཉིས་བཏབ་སྟེ་ཟོས་ན། དེའི་འཚོ་བ་བདག་ཉིད་ཅན་དེ་ལ་ནད་ཀྱི་ཆོམ་པོས་ནམ་ཡང་གཙེས་པར་མི་འགྱུར་རོ། །ཨ་ཤྭ་གནྡྷའི་ཕྱེ་མ་མར་དང་། ཏིལ་མར་དང་། ཆུ་དྲོ་འཇམ་ཙམ་དང་། དེ་རྣམས་ལས་
[414b.6]གང་ཡང་རུང་བ་དང་སྦྱར་ཏེ། ཟླ་བ་ཕྱེད་ཀྱི་བར་དུ་བསྟེན་ན་ལུས་སྐྱེ་ཞིང་ཉམ་ཆུང་བ་ཡང་འཕེལ་ཞིང་སྐྱེ་བར་འགྱུར་རོ། །ཇི་ལྟར་ལོ་ཐོག་སར་པ་ལ་ཆར་ལེགས་པར་འབབ་པ་བཞིན་ནོ། །ཏིལ་ནག་པོ་སྲང་གཅིག་ཉིན་རེ་ཞིང་ཟོས་ལ་དེའི་འོག་ཏུ་ཆུ་གྲང་འཐུངས་ན་ལུས་འཕེལ་ཞིང་གསོ་བར་འགྱུར་
[414b.7]ཏེ། ཇི་སྲིད་འཆི་བའི་མཐའ་ལ་ཐུག་གི་བར་དུ་སོ་བརྟན་པར་འགྱུར་རོ། །གཟེ་མ་དང་། སྐྱུ་རུ་ར་དང་། སླེ་ཏྲེས་དང་། དེ་རྣམས་ཀྱི་ཕྱེ་མ་མར་དང་སྦྲང་རྩི་ཆ་རེ་རེ་བསྲེས་པའི་ལྡེ་གུ་ཟོས་ན། བུད་མེད་ལ་ཕོད་པ་དང་། ལུས་བརྟན་པ་དང་། ནད་ཀྱི་སྡུག་བསྔལ་ཞི་བར་བྱེད་པ་དང་། སྐྲ་གནག་ཅིང་
[415a]
[415a.1]ལོ་བརྒྱ་འཚོ་བར་འགྱུར་རོ། །ཏིལ་ནག་པོ་སྐྱུ་རུ་རའམ། བ་རུ་ར་གང་ཡང་རུང་བ་ཞོ་གཉིས་དང་སྦྱར་བའི་ལྡེ་གུ་ཟོས་ན། ཇི་ལྟར་རྨ་བྱ་བཞིན་དུ་མདངས་བཟང་པོ་སྐྱེད་པར་འགྱུར་རོ། །བྲག་ཞུན་དང་། བྱི་དང་ག་དང་། ཨ་རུ་ར་དང་། ལྕགས་ཕྱེ་དང་། མུ་མེན་དང་། དངུལ་
[415a.2]ཆུ་དང་། དེ་རྣམས་མར་དང་སྦྲང་རྩི་དང་སྦྱར་བའི་ལྡེ་གུ་ཟོས་ན་ལུས་རྗུད་ཅིང་ཉམ་ཆུང་བ་རྣམས་ཀྱང་ཡོངས་སུ་རྫོགས་ཤིང་ལུས་ཟུངས་འཕེལ་ལ་རྒྱས་པར་འགྱུར་ཏེ། ཇི་ལྟར་ཟླ་བ་ཡར་གྱི་ངོ་བཞིན་ནོ། །སྨན་བྲིངྒ་རཱ་ཛའི་ཁུ་བ་ཟླ་བ་གཅིག་གི་བར་དུ་ཉིན་རེ་ཞིང་བླུད་ཅིང་དེའི་འོག་ཏུ་འོ་མ་འཐུངས་
[415a.3]ན་སྟོབས་དང་ནུས་པར་བཅས་པའི་ལོ་བརྒྱ་འཚོ་བར་འགྱུར་རོ། །ཤུ་དག་འོ་མ་དང་། འབྲུ་མར་དང་། མར་དང་། དེ་དག་གང་ཡང་རུང་བ་དང་སྦྱར་བ་ཟླ་བ་གཅིག་གི་བར་དུ་བསྟེན་ན། རང་གི་ལུས་སྲིན་བུ་ལ་སོགས་པས་བལྟ་མི་ནུས་ཞིང་མཐོང་བ་དང་། ཡིད་གཞུངས་པ་དང་། ཚིག་གསལ་
[415a.4]ཞིང་མཉེན་པར་འགྱུར་རོ། །མན་སྲུ་ཀ་པར་ཎི་བཏགས་པའི་ཕྱེ་མ་མར་དང་བརྔོས་ཏེ་ཟླ་བ་གཅིག་གི་བར་དུ་ཟོས་ན་ལུས་ཟད་ཅིང་ཉམ་ཆུང་བ་སེལ་ཏོ། །འཚོ་བ་ཡུན་རིང་བ་དང་། གནས་པ་དང་། ལུས་གྲིམས་པ་དང་། གཞོན་ཤ་ཆགས་པ་དང་། ལུས་མཛེས་པ་ལ་སོགས་པའི་གཞིར་
[415a.5]གྱུར་པ་ཡིན་ནོ། །སྨན་ལང་ག་ལི་དང་། འབྲས་བུ་གསུམ་དང་། ལྕགས་ཕྱེ་རྣམས་སྲང་ལྔ་བཅུ་བྲིངྒ་ར་ཛའི་རང་གི་ཁུ་བའི་ནང་དུ་བཏགས་ཏེ་རི་ལུ་སུམ་བརྒྱ་བྱས་ནས་གྲིབ་མ་ལ་སྐམས་ཏེ། ཐོག་མར་རི་ལུའི་ཕྱེད་ཟོས་ལ་དེ་ནས་རེ་རེ་བཟའོ། །དེ་ལ་སྨན་བཟའ་བ་ཡང་ཐོག་མར་
[415a.6]བཀྲུ་སྨན་བྱ་སྟེ་རིམ་གྱིས་ཐུག་པ་རྐྱང་རྐྱང་པོ་དང་། ཕྱར་ལངས་ཙམ་དང་། གར་བ་དང་། ཤ་ཁུ་དང་། འབྲས་ཆན་ལ་སོགས་པ་རིམ་གྱིས་བཟའོ། །བདག་ཉིད་གཅིག་པུ་མ་ཡེངས་པར་བསམ་པ་བརྟན་པར་ཟླ་བ་གཅིག་གི་བར་དུ་མར་གྱིས་སྣུམ་ཆོས་བྱའོ། །དེ་ནས་ཟླ་བ་
[415a.7]གཅིག་གི་བར་དུ་རྣམ་པ་ཐམས་ཅད་དུ་བདག་ཉིད་གཅིག་པུར་འདུག་པར་བྱའོ། །མ་ཞུ་བ་ནི་དུས་ཐམས་ཅད་དུ་འབད་པ་དང་བཅས་པས་སྤང་བར་བྱའོ། །སྦྱོར་བ་དེ་ལྟར་ལོ་གཅིག་གི་བར་དུ་ཉེ་བར་སྦྱར་ན་ནད་གསེར་མི་རུང་བ་ཡང་འདིས་འཇིག་པར་བྱེད་དོ། །ཤིན་ཏུ་རྒས་འཁོགས་
[415b]
[415b.1]པ་ཡང་སྟོབས་དང་། ལུས་མཛེས་པ་དང་། ལུས་ཤིན་ཏུ་འཕེལ་ཞིང་རྒྱས་པ་དང་། རྣ་བ་གསང་བ་དང་། མིག་གསལ་བ་ལ་སོགས་བ་ཡང་ན་ཚོད་གཞོན་ནུ་བཞིན་དུ་མཐོང་ཞིང་ཐོས་ཏེ་ལོ་ལྔ་བརྒྱའི་བར་དུ་འཚོ་བར་འགྱུར་རོ། །སེང་ལྡེང་དང་། ཙི་ཏྲ་ཀ་དང་། ཤིང་ཤ་པ་དང་།
[415b.2]ཨ་ས་ནའི་ཤིང་དང་། བོང་ང་དཀར་པོ་དང་། བྱི་དང་ག་དང་། བ་རུ་ར་དང་། གོ་བྱེ་དང་། འདི་རྣམས་བཏགས་པའི་ཕྱེ་མ་དང་། ཕྱེ་མ་སྤྱིའི་བཅྭ་བརྒྱད་འགྱུར་གྱི་ཆུ་དང་། ལྕགས་ཀྱི་དུམ་བུ་དང་བཅས་པ་ལྕགས་སྣོད་ཀྱི་ནང་དུ་བཅུག་སྟེ། ཞག་གསུམ་ཉི་མ་ལ་བཞག་
[415b.3]ལ་དེའི་འོག་ཏུ་མེ་ཆེ་བ་ལ་བསྐོལ་ཞིང་དཀྲུགས་ལ་ལྕགས་ཀྱི་དུམ་བུ་དང་བཅས་པ་བཞི་ཆ་ལུས་པ་དང་བཙགས་ལ་སྙིགས་མ་བོར་བའི་ཁུ་བ་དང་། འབྲས་བུ་གསུམ་གྱི་ཁུ་བ་དང་། དེ་གསུམ་རེ་རེ་ཡང་སྨན་ཁུ་བ་དང་མཉམ་པ་དང་། འབྲས་བུ་གསུམ་རེ་རེ་ཡང་ཁུ་བའི་
[415b.4]ཆ་གཉིས་གཉིས་དང་། མར་སྲང་ཆ་བཞི་དང་། དེ་རྣམས་ལྷན་ཅིག་བསྲེས་ལ་ལྕགས་སྣོད་ཀྱི་ནང་དུ་བསྐོལ་ཏེ་མར་ལུས་པའི་ནང་དུ་ཧྭགས་དྲི་མ་མེད་པ་དང་། ཁ་ར་དཀར་པོ་དང་། སྦྲང་རྩི་དང་དེ་དག་རིམ་གྱིས་བཅུག་སྟེ་དེ་ལས་ཇི་ལྟར་མདོ་ཁར་འོང་བ་བཏུང་བ་དང་། ཁ་
[415b.5]ཟས་ལ་སོགས་པར་ཟོས་ཤིང་བསྟེན་ན་ནད་མེད་པར་འགྱུར་ཏེ་དཔལ་དང་ལྡན་ཞིང་སྡིག་པ་རྣམས་བྱང་བ་དང་། ནགས་ཀྱི་མ་ཧེ་བཞིན་དུ་སྟོབས་དང་ལྡན་པ་དང་། རྟ་བཞིན་དུ་མགྱོགས་པ་དང་། ཡན་ལག་རྣམས་བརྟན་པ་དང་། སྐྲ་བུང་བའི་མདོག་བཞིན་དུ་སྔོ་བ་དང་།
[415b.6]ཁ་ནས་དྲི་ཞིམ་པོ་དང་མངར་བ་འབྱུང་བ་དང་། བུད་མེད་དུ་མ་ལ་འདོད་པ་སྤྱོད་ནུས་པ་དང་། ཚིག་གསལ་ཞིང་བློ་དང་ངག་ཕུན་སུམ་ཚོགས་པར་འགྱུར་བ་དང་མེ་དྲོད་ཆེ་བར་འགྱུར་རོ། །སྦྱོར་བ་དེ་ལྟར་ཟླ་བ་གཅིག་གི་བར་དུ་བསྟེན་ན་གསེར་བཙོ་མའི་མདོག་དང་ལྡན་པའི་
[415b.7]མིའི་སེང་གེར་འགྱུར་ཏེ། ནམ་དུ་ཡང་ནད་ཀྱིས་བཏབ་ཅིང་བར་དུ་གཅོད་པར་མི་འགྱུར་ཏེ། ཇི་ལྟར་མིའི་སེང་གེ་ལག་ན་འཁོར་ལོ་འབར་བ་ཐོགས་པའི་འཇིགས་པས་ལྷ་མ་ཡིན་རྣམས་ཀྱིས་བར་གཅོད་མ་ནུས་པ་བཞིན་ནོ། །དེ་ལ་ཐོག་མར་སློན་ཁྲུས་ཀྱིས་ཁོང་དག་པར་
[416a]
[416a.1]བྱས་པའི་འོག་ཏུ་བྲིངྒ་རཱ་ཛའི་ལོ་མ་མར་དང་བརྔོས་ཏེ་བསྲུང་བའི་ཆོ་ག་དང་བཅས་པར་བཟའ་བ་དང་། ཤིང་ཨ་ས་ནའི་སྙིང་པོ་འོ་མ་དང་བཅས་པ་བླུད་ཅིང་བཟའ་བའི་དོན་དུ་བསྟེན་ཏེ། ཟླ་བ་གཅིག་གི་བར་དུ་སྦྱར་ན་ལོ་ཉིས་བརྒྱའི་བར་དུ་འཚོ་བར་འགྱུར་བ་དང་།
[416a.2]ལན་ཅིག་བརྗོད་པ་ཙམ་གྱིས་ཀྱང་ཐོས་པ་འཛིན་པ་དང་། དྲན་པའི་དབང་པོ་ཉམས་པར་མི་འགྱུར་རོ། །བྲིངྒ་རཱ་ཛའི་འབྲུ་མར་ཡང་ཆོ་ག་གོང་མ་ལྟར་བྱས་ན་ཡོན་ཏན་དེ་ཉིད་ཐོབ་པར་འགྱུར་རོ། །ཁྱད་པར་དུ་མདོག་ནག་པོར་འགྱུར་རོ། །དེ་ལྟར་བདག་གིས་བཅུད་ཀྱིས་
[416a.3]ལེན་བཤད་པ་འདི་ནི་ནུས་པ་དང་ལྡན་པ་འབྲས་བུ་དང་བཅས་པའི་དུས་དང་རྗེས་སུ་མཐུན་པ་མང་པོས་མཐུན་པར་བསྔགས་པ་ཡིན་ནོ། །བཅུད་ཀྱིས་ལེན་གཞན་ཐོབ་པར་དཀའ་བ་དང་། སྒྲུབ་མི་ནུས་པ་དེ་ནི་འདིར་མ་སྨྲས་སོ། །གལ་ཏེ་བཅུད་ཀྱིས་ལེན་གྱི་ཆོ་ག་ཉམས་
[416a.4]ཏེ་ནད་སྐྱེ་བར་འགྱུར་བ་ན་དེ་ལ་ནི་ནད་གཞི་རང་རང་གི་སྨན་གྱིས་གསོ་བ་ཇི་སྐད་བཤད་པ་བཞིན་དུ་བྱ་སྟེ། བཅུད་ཀྱིས་ལེན་གྱི་ཆོ་ག་ནི་དོར་བར་བྱའོ། །བདེན་པར་སྨ་བ་དང་། ཁྲོ་བ་མེད་པ་དང་། ལྷག་པའི་བསམ་པ་དང་ལྡན་པ་དང་། གཡུལ་རྣམས་ལས་རྒྱལ་བ་དང་།
[416a.5]སེམས་ཞི་བ་དང་། དམ་པ་རྣམས་ལ་རྟག་ཏུ་དགའ་བ་ནི་བཅུད་ཀྱིས་ལེན་སྒྲུབ་པའི་ཡོན་ཏན་ཡིན་ཏེ། ཡོན་ཏན་དེ་རྣམས་ཚོགས་ན་བཅུད་ཀྱིས་ལེན་འགྲུབ་པ་ཡིན་ཏེ། བདག་ཉིད་ཤེས་པ་དང་། ཚེ་རིང་བ་དང་། འཇིག་རྟེན་འདི་དང་ཕྱི་མ་གཉིས་ཀར་དགའ་ཞིང་སྐྱིད་པ་དང་། བསྟན་
[416a.6]བཅོས་དང་རྗེས་སུ་མཐུན་པར་སྤྱོད་པ་དང་། བདག་ཉིད་ཀྱི་སེམས་ལ་ལྟ་བ་དང་། འཁོར་རྣམས་དང་རྗེས་སུ་མཐུན་པར་འཇུག་གོ། །དོན་ཐམས་ཅད་ལ་བློ་མི་འཁྲུལ་བ་དེ་ནི་བཅུད་ཀྱིས་ལེན་ཡོངས་སུ་རྫོགས་པ་ཡིན་ནོ། །བཅུད་ཀྱིས་ལེན་གྱི་ཆོ་ག་བཤད་པའི་ལེའུ་སྟེ་
[416a.7]སུམ་ཅུ་རྩ་དགུ་པ་རྫོགས་སོ།། །།དེ་ནས་ས་བོན་གསོ་ཞིང་རོ་ཙ་བར་བྱ་བའི་ལེའུ་བཤད་པར་བྱ་སྟེ། དེ་ལ་བུད་མེད་ཀྱི་ཡུལ་ལ་རྟག་ཏུ་ཆགས་པའི་སྐྱེས་བུས་ནི་རོ་ཙ་བར་བྱ་བའི་སྨན་བྱ་སྟེ། རོ་ཙ་བའི་སྨན་བྱས་ན་ནི་དགའ་བ་དང་། ལུས་ཀྱི་ཉམས་མཆོག་བརྟ་བ་དང་།
[416b]
[416b.1]བུ་ཚ་རྣམས་སྐྱེ་བའི་ཡོན་ཏན་དང་ལྡན་ཞིང་གནས་པ་ཡིན་ཏེ། བུ་ཚའི་རྒྱུད་མང་དུ་འཕེལ་ཞིང་སྐྱེད་པ་དང་། དེ་མ་ཐག་དགའ་བ་སྐྱེད་པ་དང་། ཇི་ལྟར་རྟ་རྒོད་མ་ལ་འཇུག་ནུས་པ་བཞིན་དུ་བུད་མེད་རྣམས་ལ་ཐོགས་པ་མེད་པར་འཇུག་ནུས་པ་དང་། བུད་མེད་རྣམས་ལ་ཆགས་ཤིང་དགའ་
[416b.2]བར་འགྱུར་བ་དང་། གང་དང་གང་གིས་ས་བོན་འཕེལ་བར་བྱེད་པ་དེ་ནི་རོ་ཙ་བར་བྱེད་པ་ཞེས་བྱ་སྟེ། དེ་ནི་ལུས་ཀྱི་དཔུང་དང་སག་རྩ་སྐྱེ་བའི་མཆོག་ཀྱང་ཡིན་ནོ། །སྐྱེ་བོ་ཚངས་པར་སྤྱོད་པ་ལ་གནས་པའི་སྐྱེས་བུ་ལ་ནི་བདག་རྗེས་སུ་ཡི་རང་སྟེ། གཅིག་ཏུ་དྲི་མ་མེད་ཅིང་ཆོས་དང་གྲགས་
[416b.3]པ་འཕེལ་བ་དང་། ཚེ་འདི་དང་ཕ་རོལ་གཉི་གའི་བཅུད་ཀྱིས་ལེན་པ་ཡིན་ནོ། །འོན་ཀྱང་ལུས་ཀྱི་ཉམས་སྟོབས་ཆུང་བ་དང་། འདོད་ཆགས་ཀྱི་ཉོན་མོངས་པས་གནོད་པར་འགྱུར་བ་དང་། ལུས་ཟུངས་ཟད་པ་བསྲུང་བར་བྱ་བའི་ཕྱིར་རྩ་བའི་སྨན་རྣམས་བརྗོད་པར་བྱའོ། །སྐྱེས་དུ་གང་གིས་
[416b.4]རོ་ཙ་བར་བྱེད་པའི་སྨན་བསྟེན་ན་ཉིན་དང་མཚན་ཐམས་ཅད་དུ་ཉལ་པོ་མ་བཏང་བར་སྤྱད་ཀྱང་ནུས་པར་འགྱུར་ཏེ། ཅི་ལྟར་ཆུ་ཤིང་གི་ཁུ་བ་འཛག་པ་བཞིན་ནོ། །དེ་ནས་ཐོག་མར་སྣུམ་ཆོས་བྱས་ལ་སློན་ཁྲུས་ཀྱིས་ལུས་དག་པར་བྱ་སྟེ། དེའི་འོག་ཏུ་ནི་རུ་ཧ་དང་འཇམ་རྩི་མས་གཏོང་བ་
[416b.5]རྣམས་བྱའོ། །ཐོག་མར་མར་དང་ཏིལ་མར་དང་། ཞག་དང་། སྦྲང་རྩི་དང་། ཤ་ཁ་ར་དང་འོ་མ་དང་ལྡན་པ་སྦྱོར་བ་ཤེས་པའི་སྨན་པས་སྦྱར་ལ་དེའི་འོག་ཏུ་འོ་མ་དང་ཤ་ཁུ་སྦྱིན་ནོ། །རོ་ཙ་བའི་སྦྱོར་བ་དེ་ནི་ཁུ་ཆུ་དང་ཚེ་འཕེལ་བར་བྱེད་དོ། །ཇི་ལྟར་ལྗོན་ཤིང་ཡལ་ག་གཅིག་པ་གྲིབ་མ་
[416b.6]མེད་ཅིང་མེ་ཏོག་དྲི་ང་བ་དང་། འབྲས་བུ་མེད་པ་ཤིན་ཏུ་མི་མཛེས་པ་ནི་སྐྱེས་བུ་བུ་ཚ་མེད་པ་ཡང་དེ་དང་འདྲའོ། །བུ་ཚ་དང་མཉམ་པ་མཐོང་ན་ཡིད་དུ་འོང་བ་དང་ཕྲད་ན་དགའ་བ་བསྐྱེད་པའི་དངོས་པོ་ནི་གང་ཡང་མེད་དོ། །ཇི་ལྟར་བྱིས་པའི་གནས་སྐབས་ན་འཁྱོར་འགྲོས་སུ་འགྲོ་ཞིང་
[416b.7]ཚིག་མི་གསལ་བ་དང་། རྔུལ་དང་ལྷན་ཅིག་འདྲེ་ཞིང་གདོང་ཁ་ཆུ་དང་། སྣབས་ཀྱི་དྲི་མས་རྙོག་པ་དེ་ལ་ཡང་སེམས་དགའ་བར་བྱེད་པའི་གནས་ཡིན་ན་ཡང་རང་གི་བུ་ཆོས་དང་སྙན་པར་སྨྲ་བ་དང་། གྲགས་པས་ང་རྒྱལ་བ་དང་། རིགས་འཕེལ་བར་བྱེད་པའི་བུ་ཚ་ལྟ་སྨོས་ཀྱང་ཅི་
[417a]
[417a.1]དགོས་ཏེ་སེམས་སྤྲོ་ཞིང་སྙིང་དགའ་བར་བྱེད་པ་ཡིན་ནོ། །ཐོག་མར་སློན་ཁྲུས་ཀྱིས་ལུས་དག་པ་དང་། མེའི་འཇུ་སྟོབས་ཇི་ལྟ་བ་བཞིན་དུ་བུད་མེད་ལ་ཕོད་པར་བྱ་བའི་སྦྱོར་བ་རྣམས་སྤྱད་པར་བྱ་སྟེ། འདམ་བུ་མདའ་རྒྱུ་དང་། བུ་རམ་ཤིང་དང་། ཀུ་ཤ་དང་། ཀ་ཤ་
[417a.2]ལ་སོགས་པའི་རྩྭའི་རྩ་བ་དང་། བིད་རི་དང་། པུ་ཤེལ་ཙེའི་རྩ་བ་དང་། ཀཎྜ་ཀ་རི་དང་། ཛི་བ་ཀ་དང་། ཟངས་རྩི་བ་དང་། བ་ལ་དང་། མེ་ད་རྣམ་གཉིས་དང་། ར་མཉེ་བ་རྣམ་གཉིས་དང་། ཉེའུ་ཤིང་དང་། པར་ཎ་རྣམ་པ་གཉིས་དང་། ཨ་ཤྭ་གནྡྷ་དང་། ཨ་ཏི་བ་ལ་དང་། ཁ་སྲལ་
[417a.3]ཕྲེའུ་དང་། བ་སྤྲུ་བ་དང་། བི་ད་རི་དང་། པ་ཡ་སྱ་དང་། ཛི་བནྟི་དང་། རིད་དི་དང་། ར་སྣ་དང་། གཟེ་མ་དང་། ཤིང་མངར་དང་། ས་ལ་པརྞི་དང་། དེ་རྣམས་རེ་རེ་ཡང་སྲང་གསུམ་གསུམ་དང་། མོན་སྲན་གྲེའུ་སྲང་བརྒྱ་ཉི་ཤུ་རྩ་བརྒྱད་དང་། ཆུ་སྲང་སྟོང་ཉི་ཤུ་རྩ་བཞི་དང་ལྷན་ཅིག་
[417a.4]བསྐོལ་ཏེ་ཁུ་བ་སྲང་བརྒྱ་ཉི་ཤུ་རྩ་བརྒྱད་ལུས་པའི་ནང་དུ་མར་དང་། བི་ད་རི་དང་། སྐྱུ་རུ་ར་དང་། བུ་རམ་ཤིང་དང་། དེ་རྣམས་རེ་རེ་ཡང་སྲང་བརྒྱ་ཉི་ཤུ་རྩ་བརྒྱད་དང་། འོ་མ་སྲང་ལྔ་བརྒྱ་རྩ་གཉིས་དང་། སྨན་བི་ད་རི་དང་། ཁ་སྲལ་དང་། ར་མཉེ་བ་རྣམ་གཉིས་དང་། ཤིང་མངར་དང་།
[417a.5]ཕལ་གུ་ནི་དང་། པི་པི་ལིང་དང་། རྒུན་འབྲུ་དང་། བ་ད་རི་དང་། འབྲ་གོ་དང་། ཤིང་ཏོག་མ་དུ་ཀ་དང་། དེ་རྣམས་བཏགས་པའི་ཕྱེ་མ་བཏབ་པ་དང་། ཡང་བསྐོལ་ཏེ་ཏིལ་མར་མ་ལུས་པ་དང་། སྙིགས་མ་ཕྱུང་བའི་ནང་དུ་སྨན་དེ་རྣམས་ཉིད་ཀྱི་ཕྱེ་མ་སྲང་སུམ་ཅུ་རྩ་གཉིས་གཉིས་དང་།
[417a.6]ཤ་ཁ་ར་སྲང་བརྒྱ་དང་། པི་པི་ལིང་སྲང་བཞི་དང་། ན་ལེ་ཤམ་སྲང་གཅིག་དང་། ཤིང་ཚ་དང་། སུག་སྨེལ་དང་། ནཱ་ག་གེ་སར་དང་། དེ་གསུམ་སྲང་ཕྱེད་ཕྱེད་དེ་རྣམས་ཞིབ་ཏུ་བཏགས་པའི་ཕྱེ་མ་དང་། སྦྲང་རྩི་སྲང་བཅུ་དྲུག་དང་དེ་རྣམས་ལྷན་ཅིག་དཀྲུགས་པའི་ལྡེ་གུ་ལས་སྲང་རེ་རེ་ཙམ་
[417a.7]ཟོས་ལ་དེའི་འོག་ཏུ་ཤ་ཁུ་དང་། འོ་མ་འཐུངས་ན་ཇི་ལྟར་རྟ་ཕོ་རྒོད་མ་ལ་འཇུག་ནུས་པ་དང་། བྱིའུ་ཀ་ལིངྐ་ད་བཞིན་དུ་བུད་མེད་ལ་ཉལ་པོ་ནུས་པར་འགྱུར་རོ། །སྨན་བི་ད་རི་དང་། པི་པི་ལིང་དང་། འབྲས་ཤ་ལི་དང་། པི་ཡ་ལ་དང་། གཟེ་མ་དང་། ཁ་སྲལ་དང་། དེ་རྣམས་ཀྱི་ཕྱེ་མ་སྲང་བཞི་བཞི་དང་།
[417b]
[417b.1]སྦྲང་རྩི་སྲང་བརྒྱད་དང་། ཤ་ཁ་ར་སྲང་ལྔ་བཅུ་དང་། མར་སྲང་བཅུ་དྲུག་རྣམས་ལྡེ་གུར་བྱས་པ་དེ་ལས་ཞོ་གཉིས་གཉིས་ཙམ་གྱི་ཐུན་ཚད་དུ་ཟོས་ན་བུད་མེད་བརྒྱའི་ནང་དུ་ཞུགས་ཏེ་འདོད་པ་སྤྱད་ཀྱང་མི་ངོམས་སོ། །ཁ་སྲལ་ཕྲེའུ་དང་། གྲོ་དང་འོ་མ་སྦྱར་བ་བླུད་པ་འམ། ཡང་ན་མོན་
[417b.2]སྲན་གྲེའུ་དང་། མར་དང་སྦྲང་རྩི་སྦྱར་བ་ཟོས་ལ་དེའི་འོག་ཏུ་བ་བེའུ་ཐོག་མ་བཙས་པའི་འོ་མ་བླུད་ན་མཚན་ཐོག་ཐག་གཉིད་མི་ལོག་པར་བུད་མེད་ལ་སྤྱད་ཀྱང་བུད་མེད་དུབ་པ་སྲིད་ཀྱིས་སྐྱེས་པ་ཉལ་པོས་དུབ་པ་མི་སྲིད་དོ། །ར་ཐུག་གི་རླིག་པ་འོ་མ་དང་བསྐོལ་བའི་ནང་དུ་ཏིལ་ལན་མང་དུ་
[417b.3]སྦངས་ཏེ། ཁ་ར་དཀར་པོ་དང་བཅས་པར་གང་གིས་ཟོས་ན་ཡང་བུད་མེད་བརྒྱ་ལ་འདོད་པ་སྤྱད་པར་འགྱུར་རོ། །སྨན་བི་ད་རིའི་ཕྱེ་མ་རང་གི་ཁུ་བའི་ནང་དུ་སྦངས་ཤིང་སྐམས་པ་སྦྲང་རྩི་དང་མར་དང་ལྡེ་གུར་བྱས་ཏེ་ཟོས་ན་བུད་མེད་འདོད་པ་དང་ལྡན་པ་བཅུ་ལ་འཇུག་ནུས་པར་འགྱུར་རོ། །པི་པི་ལིང་
[417b.4]དང་། སྐྱུ་རུ་རའི་ཕྱེ་མ་རང་གི་ཁུ་བ་དང་སྦངས་ཏེ་ཤ་ཁ་ར་དང་། སྦྲང་རྩི་དང་མར་དང་ལྷན་ཅིག་ལྡེ་གུར་བྱས་ཏེ་ལྷགས་ལ་དེའི་འོག་ཏུ་བཏུང་བར་འོ་མ་བླུད་ན་སྐྱེས་བུ་ལོ་བརྒྱད་ཅུ་ལོན་ན་ཡང་ལང་ཚོ་ལ་བབ་པའི་སྐྱེས་བུ་བཞིན་དུ་དགའ་བ་ཐོབ་ཅིང་ནུས་པར་འགྱུར་རོ། །ཤིང་མངར་གྱི་ཕྱེ་མ་ཞོ་གཉིས་
[417b.5]དང་མར་དང་སྦྲང་རྩི་ཆ་མཉམ་པར་སྦྱར་བ་བཟའ་ཞིང་བཏུང་བར་འོ་མ་བླུད་ན་རྟག་ཏུ་འདོད་པ་སྤྱོད་ནུས་པར་འགྱུར་རོ། །ཀར་ཀ་ཏ་ཤྲིང་གིའི་ཕྱེ་མ་འོ་མའི་ནང་དུ་བཏབ་པའི་སྐྱོ་མ་བླུད་ནས། ཁ་ར་དཀར་པོ་དང་མར་དང་འོ་མ་ལྷན་ཅིག་པའི་ཁ་ཟས་ཟོས་ན་བུད་མེད་རྣམས་ལ་ཕོད་པ་ཡིན་ནོ། །སྨན་པ་
[417b.6]ཡ་སྱ་འོ་མ་དང་བསྐོལ་ཏེ་བ་མར་དང་སྦྲང་རྩི་དང་བཅས་པར་བཟའ་ཞིང་བཏུང་བར་འོ་མ་བླུད་ན་ས་བོན་ཟད་མི་ཤེས་པར་འགྱུར་རོ། །ཁ་སྲལ་གྱི་འབྲས་བུ་དང་། མེ་ཏོག་གི་ཕྱེ་མ་དང་། ཤ་ཁ་ར་དང་། འོ་མ་བཞོས་མ་ཐག་དྲོན་པོ་དང་སྦྱར་བ་འཐུངས་ན་ལུང་བོང་བཞིན་དུ་སྐྱེས་བུ་བུད་མེད་ལ་
[417b.7]འཇུག་ནུས་སོ། །ཨུ་ཚ་ཏྲའི་ཕྱེ་མ་དང་ཉེའུ་ཤིང་གི་ཕྱེ་མ་ཡང་གོང་མ་ལྟར་བྱ་སྟེ། ཞོའི་སྤྲིས་མ་ཟླ་བ་ལྟར་དཀར་བ་དང་། ཁ་ར་དཀར་པོ་དང་། འབྲས་དྲུག་ཅུ་པའི་ཆན་དང་། དེ་དག་གོས་ཀྱི་རླུང་ཡབ་ཀྱིས་བསིལ་བར་བྱས་པ་ཟོས་ན། རྒན་པ་ཡང་གཞོན་ནུ་བཞིན་དུ་འདོད་པ་ལ་ཕོད་པ་ཡིན་ནོ། །
[418a]
[418a.1]གཟེ་མ་དང་། ཨ་ག་རུ་དང་། མོན་སྲན་གྲེའུ་དང་། ཁ་སྲལ་གྱི་ས་བོན་དང་། ཉེའུ་ཤིང་དང་དེ་རྣམས་བཏགས་པའི་ཕྱེ་མ་འོ་མ་དང་ལྷན་ཅིག་བླུད་ན་རྒས་འཁོགས་པ་ཡང་བུད་མེད་བརྒྱ་ལ་འཇུག་ནུས་པ་ཡིན་ནོ། །གང་ཡང་མངར་བ་དང་། སྣུམ་བ་དང་། ཉམས་བརྟ་བ་དང་། སྟོབས་
[418a.2]འཕེལ་བ་དང་། ཡི་གར་འོང་བ་དང་། དེ་དག་ཐམས་ཅད་བསྟན་ཀྱང་རོ་ཙ་བའི་བདག་ཉིད་དུ་བཤད་དོ། །དེ་ལྟ་བས་ན་སྨན་གོང་མ་དེ་རྣམས་ཆོ་ག་བཞིན་དུ་བྱས་ན་ནི་འདོད་པས་དྲེགས་ཤིང་བུད་མེད་རྣམས་ལ་འཇུག་ནུས་པར་འགྱུར་ཏེ། བདག་ཉིད་ཀྱང་ཤུགས་དྲགས་པ་དང་། བུད་མེད་ཡོན་
[418a.3]ཏན་དང་ལྡན་པ་ལྷན་ཅིག་བསྟེན་ན་དགའ་བ་སྐྱེད་དོ། །དབང་པོ་རྣམས་བདེ་བར་བྱེད་པའི་དཔག་བསམ་གྱི་ཤིང་གི་མྱུ་གུ་དང་འདྲ་བ་དང་། མེ་ཏོག་གི་མདའ་ལྔ་ཡུལ་ལ་བསམ་པ་ཐག་པ་ནས་དགའ་བ་སྐྱེད་པ་ཡིན་ནོ། །འདོད་པའི་ཡུལ་རེ་རེས་ཀྱང་དགའ་ཞིང་ཚིམ་པར་བྱེད་པའི་མཆོག་ཡིན་ན་
[418a.4]བུད་མེད་ཀྱི་ལུས་ལ་ཡུལ་ཐམས་ཅད་དང་ལྡན་པ་ལྟ་ཅི་སྨོས་ཏེ་དགའ་བ་སྐྱེད་པར་བྱེད་པའི་མཆོག་ཡིན་ནོ། །བུད་མེད་གང་གི་མིང་ཙམ་ཐོས་ན་ཡང་སྙིང་དགའ་བར་བྱེད་པ་ཡིན་ན་མཐོང་བ་དང་མངོན་སུམ་དུ་སྤྱད་ཅིང་ཚིམ་པ་ལ་དགའ་བ་སྐྱེད་པ་ལྟ་ཅི་སྨོས་ཏེ། སྔོན་མ་མྱོང་བའི་བདེ་བ་ཐོབ་པར་བྱེད་པ་
[418a.5]ཡིན་ནོ། །བརྟུལ་ཞུགས་དང་སྡོམ་པ་དང་དབང་པོ་རྣམས་འདྲེན་པར་གྱུར་པའི་ཞགས་པ་ཡིན་ནོ། །བུད་མེད་ཀྱི་སྒྱུ་རྩལ་ལ་མཁས་ཤིང་འཇོ་སྒེག་དང་ལྡན་པ་དང་། ལུས་དང་ན་ཚོད་ཀྱི་བྱིན་བྱིམ་བུད་པ་དང་། ཕྱིར་ངོ་ཚ་དང་བཅས་ཤིང་ཁྲེལ་ཡོད་པ་དང་། དབེན་བར་གྲིམས་ཤིང་བག་དང་བཅས་པ་
[418a.6]དང་། ཚིག་འཇམ་པ་དང་ལྡན་པ་དང་སྐྱེས་པ་ཇི་ལྟར་འདོད་པ་བཞིན་དུ་མངོན་པར་དགའ་བའི་བུད་མེད་དེ་ནི་སྐྱེས་བུ་རྣམས་ཀྱི་རོ་ཙ་བ་སྐྱེད་པའི་མཆོག་ཡིན་ནོ། །འདིར་འདོད་པ་སྤྱད་པའི་ཆོ་ག་མ་ལུས་པ་ནི་འདོད་པ་བཞིན་དུ་མངོན་པར་དགའ་བའི་བུད་མེད་དེ་ནི་སྐྱེས་བུ་རྣམས་ཀྱིས་སྤྱོད་པའི་བསྟན་བཅོས་
[418a.7]ལས་ཇི་སྐད་བཤད་པ་བཞིན་དུ་བྱ་སྟེ། དེ་ཡང་ཡུལ་དང་དུས་དང་ཉམས་སྟོབས་ཇི་བཞིན་དུ་བརྟགས་ཏེ་རྗེས་སུ་མཐུན་པར་དགག་པར་ཡང་བྱའོ། །དེ་ལ་འདོད་པའི་བསྟན་བཅོས་ནི་སྨན་དཔྱད་ཀྱི་རྒྱུད་འདི་ལས་རྒྱ་ཆེར་མ་བསྟན་ཏོ། །བསྐུ་བྱུག་དང་། ལུས་ལ་དྲིལ་བ་དང་། ཆུས་བླུགས་པ་དང་། དྲི་དང་།
[418b]
[418b.1]ཕྲེང་བ་དང་། གོས་སྣ་ཚོགས་དང་། རྒྱན་གྱི་རྣམ་པ་དང་། གླུ་དབྱངས་དང་། སྙན་ངག་ལ་སོགས་པའི་གཏམ་སྙན་པ་དང་། པི་ཝང་གི་སྒྲ་དང་མཐུན་ཞིང་ནེའུ་ལྡངས་རང་གི་དབང་དུ་གྱུར་པའི་གྲོགས་པོ་རྣམས་དང་འགྲོགས་པ་དང་། རང་གི་ཁང་པའི་ནང་ན་རྫིང་བུ་ཉམས་དགའ་བ་ཡོད་ཅིང་དེའི་ནང་
[418b.2]དུ་འཇུག་པ་དང་། པདྨའི་གེ་སར་དང་། བུང་བ་སྣ་ཚོགས་དང་། བྱ་ལྡིང་བ་དང་། རི་ཞོལ་ཐམས་ཅད་སྣང་བའི་རིའི་རྩེ་མོར་འཛེག་པ་དང་། མེ་ཏོག་རྒྱས་པའི་ནགས་ཀྱི་ནང་དུ་ཞུགས་པ་དག་མཐོང་ན་བདེ་བ་ནི་ལྗོན་ཤིང་རིགས་སྣ་ཚོགས་ཡིན་ནོ། །རྣ་བའི་ཡུལ་བདེ་བ་ནི་ཁུ་བྱུག་གི་སྒྲ་སྙན་པ་གྲག་པ་
[418b.3]བཞིན་ཡིན་ནོ། །ལུས་ཀྱི་བདེ་བའི་ཡུལ་ནི་ཁྱད་པར་གྱི་རྒྱན་གྱིས་བརྒྱན་པ་ཡིན་ནོ། །སེམས་བདེ་བའི་ཡུལ་ནི་གཡོག་འཁོར་ཐམས་ཅད་དང་ལོངས་སྤྱོད་པ་ཡིན་ནོ། །སོ་རྩི་དང་། ཆང་གི་དངས་མ་དང་། ཆུང་མ་ཡིད་དུ་འོང་བ་དང་། བདག་ཉིད་ལྷན་ཅིག་དབེན་པར་གནས་པ་དང་། མཚན་
[418b.4]མོ་ཟླ་བའི་འོད་ལ་འདུག་པ་དང་། དངོས་པོ་གང་དང་གང་གིས་ཡིད་ཚིམ་ཞིང་དགའ་བར་བྱེད་པ་དེ་དང་དེ་ནི་རོ་ཙ་བར་བྱེད་པ་ཡིན་ནོ། །ཨུཏྤ་ལའི་དྲིས་བསྒོས་པ་བཏུང་བ་བཞིན་དུ་རང་གི་ཆུང་མའི་ཁ་དྲི་ཞིམ་པ་ལ་འོ་བྱེད་ཅིང་འཁྲུད་པ་དང་། ཚིག་སྙན་ཅིང་ཡིད་དུ་འོང་བར་སྨྲ་བ་དང་། མལ་སྟན་ཡིད་
[418b.5]འཕྲོག་པ་མེ་ཏོག་སྣ་ཚོགས་གཅལ་དུ་བཀྲམ་པ་ནི། ཇི་ལྟར་ལྕུག་མ་གེ་སར་བཅས་པ་ལྟ་བུའི་མལ་སྟན་ལ་ཉལ་བ་དང་། སེམས་ཀྱི་ནད་དང་ལུས་ཀྱི་ནད་གང་ཡང་མེད་པ་དང་། ནོར་གྱིས་ཕོངས་པ་མེད་པ་དང་། སེམས་ཀྱི་གནོད་པ་ཅུང་ཟད་ཀྱང་མེད་པ་དང་། རོ་ཙ་བར་བྱེད་པའི་སྦྱོར་བ་ཐམས་ཅད་
[418b.6]དང་ཡང་ལྡན་པ་དེ་ནི་འདོད་པའི་སྟེང་དུ་འདོད་པ་ཡོངས་སུ་རྫོགས་པར་བྱེད་པ་ཡིན་ནོ། །རིམས་ལ་ནི་གླ་སྒང་དང་པར་པ་ཏ་ཕན་ནོ། །སྐོམ་དད་ཆེ་བ་ལ་ནི་བོང་བ་ཚིག་པ་བསྲེགས་པ་ཆུའི་ནང་དུ་གསུར་བ་སྦྱིན་ན་ཕན་ནོ། །སྐྱུགས་པ་ལ་ནི་འབྲས་ཡོས་ཕན་ནོ། །ཆུ་སོའི་ནད་ཐམས་ཅད་ལ་ནི་བྲག་
[418b.7]ཞུན་བསྔགས་སོ། །གཅིན་སྲི་བ་ལ་ནི་སྐྱུ་རུ་ར་དང་ཡུང་བ་ཕན་ནོ། །སྐྱ་རྦབ་ཀྱི་ནད་ལ་འབྲས་བུ་གསུམ་དང་ལྕགས་ཕན་ནོ། །རླུང་དང་བད་ཀན་ལ་ཨ་རུ་ར་ཕན་ནོ། །མཆེར་པའི་ནད་ལ་པི་པི་ལིང་གཏང་ངོ་། །རྟུག་པ་འགགས་པའི་ནད་ལ་ནི་བྱི་དང་ག་བསྔགས་སོ། །དུག་ལ་ནི་ཀ་ཤ་དར་ཞེས་
[419a]
[419a.1]བྱ་བ་ཤྲི་ཤ་ཕན་ནོ། །ཚིལ་དང་རླུང་འདྲེས་པའི་ནད་ལ་ནི་གུ་གུལ་ཕན་ནོ། །ཁྲག་དང་མཁྲིས་པ་ལ་ནི་བ་ཤ་ཀ་ཕན་ནོ། །ཚད་པར་འཁྲུ་བ་ལ་དུག་མོ་ཡུངས་ཕན་ནོ། །གཞང་འབྲུམ་ལ་ནི་གོ་ཕྱེ་ཕན་ནོ། །དབྱིག་དུག་ལ་ནི་གསེར་ཕན་ནོ། །ཤ་ཆེ་ཞིང་ཚོ་བ་ལ་ནི་སྐྱེར་ཁཎྜ་ཕན་ནོ། །སྲིན་བུའི་
[419a.2]ནད་ལ་ནི་སྲིན་བུ་འཇོམས་པའི་བྱི་དང་ག་ཕན་ནོ། །གློ་གཅོང་སྐེམ་བྱེད་ལ་ནི་རའི་ཤ་འམ་འོ་མ་སྦྱིན་ནོ། །མིག་ནད་ལ་ནི་འབྲས་བུ་གསུམ་ཕན་ནོ། །དྲེག་ནད་ལ་ནི་སླེ་ཏྲེས་ཕན་ནོ། །ཕོ་བའི་ནད་ལ་ནི་དར་བ་ཕན་ནོ། །མཛེ་ནད་ལ་ནི་སེང་ལྡེང་གི་སྙིང་པོ་རྟག་ཏུ་བསྟེན་པར་བྱའོ། །སྨྱོ་བྱེད་ཀྱི་ནད་ལ་ནི་
[419a.3]མར་རྙིང་ཕན་ནོ། །ནད་ཐམས་ཅད་ལ་ནི་ལྡོང་རོས་ཕན་ནོ། །མྱ་ངན་གྱིས་ནོན་པ་ལ་ནི་ཆང་བླུད་ན་བཟང་ངོ་། །བརྗེད་བྱེད་ལ་ནི་སྨན་བྲམྷི་ཕན་ནོ། །གཉིད་མེད་པ་ལ་ནི་འོ་མ་བླུད་ན་ཕན་ནོ། །ཆམ་པ་ལ་ནི་ཞོ་དང་ན་ལེ་ཤམ་དང་ཤ་ཁ་ར་སྦྱར་བ་ཕན་ནོ། །ལུས་རྐེ་ཞིང་ཉམ་ཆུང་བ་ལ་ནི་ཤ་སྦྱིན་ན་ཕན་
[419a.4]ནོ།། རླུང་ནད་ལ་ནི་སྒོག་སྐྱ་སྦྱིན་ན་ཕན་ནོ། །ལུས་རེངས་པ་ལ་དུགས་བྱས་ན་ཕན་ནོ། །མིག་དང་སྣ་དང་ཕྲག་གོང་དང་ལག་ངར་རྣམས་ཀྱི་ནད་ལ་ནི་ཨ་པ་མརྒ་བསྔགས་སོ། །ཀླད་པའི་ཕྱེད་ན་བ་ལ་ནི་མར་སར་དང་ཧྭགས་སྦྱིན་ནོ། །དམུ་རྫིང་གི་ནད་ལ་ནི་རྔ་མོའི་གཅིན་དང་འོ་མ་སྦྱིན་ནོ། །
[419a.5]མགོ་ནད་ཐམས་ཅད་ལ་ནི་སྣ་སྨན་བྱའོ། །ཁོང་འབྲས་གསར་དུ་བྱུང་བ་ལ་ནི་ཁྲག་གཏར་བར་བྱའོ། །ཁ་ནད་ལ་ནི་སྣ་སྨན་དང་མཁུར་བ་དགང་བའི་སྨན་བྱའོ། །མིག་ནད་ལ་ནི་སྣ་སྨན་དང་མིག་སྨན་དང་ཉམས་བརྟ་བའི་སྨན་སྦྱར་རོ། །ལུས་འཕེལ་ཞིང་རྒྱས་པར་བྱེད་པ་ལ་ནི་འོ་མ་དང་ཞུན་
[419a.6]མར་ཕན་ནོ། །བརྒྱལ་བ་ལ་ནི་ཆུ་གྲང་མོ་དང་རླུང་དང་གྲིབ་མ་ཕན་ནོ། །མེ་དྲོད་ཆུང་བ་ལ་ནི་ལུས་ངལ་བར་བྱ་བ་དང་ཚ་དང་སྒེའུ་གཤེར་སྦྱར་བ་ཐུན་རན་པར་བཟའོ། །ལུས་ངལ་ཞིང་དུབ་པ་ལ་ནིར་སྣ་སྦྱིན་ནོ། །སྡུག་བསྔལ་འབྱུང་བ་ལ་ནི་བཟོད་པ་བཟང་ངོ་། །རྩོལ་བ་དྲགས་པ་ལ་ནི་བརྟན་པར་
[419a.7]གནས་པ་ཕན་ནོ། །གཅིན་སྲི་བ་ལ་གཟེ་མ་ཕན་ནོ། །ལུད་པ་ལུ་བ་ལ་ནི་ཀཎྜ་ཀ་རི་ཕན་ནོ། །རྩིབ་ལོགས་སུ་ཟུག་པ་ལ་ནི་མ་ནུ་ཕན་ནོ། །རྒས་སྲ་ཞིང་ན་ཚོད་གནས་པར་བྱ་བ་ལ་ནི་སྐྱུ་རུ་ར་སྦྱིན་ནོ། །རྨ་བྱུང་བ་ལ་འབྲས་བུ་གསུམ་དང་གུ་གུལ་ཕན་ནོ། །དེ་ལྟར་གོང་དུ་བ་ཤད་པ་དེ་དག་སྨན་
[419b]
[419b.1]གྱི་མཆོག་བསྡུས་པ་ཡིན་ཏེ་ནད་ཐམས་ཅད་ཞི་བར་བྱེད་པ་ཡིན་ནོ། །དེ་ཡང་ཡུལ་དང་དུས་དང་ནད་ཀྱི་སྟོབས་ཇི་ལྟ་བ་བཞིན་དུ་བརྟགས་ཏེ་སྦྱར་བར་བྱའོ། །དྲང་སྲོང་རྒྱུན་ཤེས་ཀྱི་བུ་ལ་སོགས་པས་ལེགས་པར་བཤད་པའི་གཞུང་ནི་ངོམས་མི་ཤེས་པ་རྒྱ་ཆེར་ཡོད་མོད་ཀྱི་དྲང་སྲོང་ཆེན་པོ་
[419b.2]གཟིངས་ཅན་དང་། མེ་བཞིན་འཇུག་ལ་སོགས་པའི་དྲང་སྲོང་རྣམས་ཀྱིས་ལྷན་ཅིག་བློ་མཐུན་པར་བྱས་ཏེ་འདུས་ན་དྲང་སྲོང་མེ་བཞིན་འཇུག་གིས་དྲང་སྲོང་རྒྱུན་ཤེས་ཀྱི་བུ་ལ་ཐེ་ཚོམ་བཅད་དེ་ཞུས་པའི་སྐབས་ནས་བདག་གིས་མདོའི་དོན་མདོར་བསྡུས་པ་འདི་བཤད་པ་ཡིན་ནོ། །
[419b.3]བཅོམ་ལྡན་འདས་འདི་ན་ཁ་ཅིག་ནད་པ་སྙིང་སྟོབས་དང་ལྡན་པ་དང་སྨན་གྱི་ཡོན་ཏན་དང་ནད་གཡོག་གི་ཡོན་ཏན་དང་སྨན་པ་རྒན་པོ་རྣམས་ཀྱིས་ལུང་དང་མཐུན་པར་བྱས་ཀྱང་། ནད་ཀྱིས་ལུས་ཟད་ཅིང་སྲོག་འགྱུར་བར་སྣང་བ་ཡོད། ལ་ལ་ནི་སྨན་དང་དཔྱད་མ་བྱས་ཀྱང་ཞི་བར་སྣང་
[419b.4]སྟེ། འོན་ཀྱང་ཕན་པ་དང་མི་ཕན་པའི་འབྲས་བུའི་བྱེ་བྲག་ངེས་པ་མེད་པར་སྣང་ན་འདིར་བསྟན་བཅོས་ཀྱིས་ཞི་བར་བྱེད་པའི་རྟོག་པ་ནི་ཇི་ཞིག་ཡིན་ཞེས་དྲིས་པ་དང་མེ་བཞིན་འཇུག་ལ་སོགས་པ་སློབ་མའི་ཚོགས་རྣམས་ལ་དེ་ཉིད་ཀྱི་དོན་མ་ལུས་པ་སུས་བཤད་པ་དེ་ལྟར་གསོ་བར་
[419b.5]བྱས་པ་དང་། མ་བྱས་པ་ཡང་མཉམ་ཞིང་བྱེ་བྲག་མེད་དེ། ནད་གསོ་བའི་ཡན་ལག་དྲུག་ཅུ་དང་མི་ལྡན་ཞིང་གསོ་བ་མ་བྱས་ཀྱང་ནད་མེད་པར་འགྱུར་བ་ཡང་ཡོད་མོད་ཀྱི། འོན་ཀྱང་ནད་ཀྱི་འདམ་བུར་བྱིང་བ་ལ་ལག་པ་ལས་འདྲེན་པ་ལྟ་བུ་ནི་སྨན་པ་ཡིན་ནོ། །སྲོག་འཚོ་བར་
[419b.6]འདོད་པ་ཐམས་ཅད་ཀྱི་འདྲེན་པར་འགྱུར་བ་ནི་སྨན་ཡིན་ནོ། །འདི་ལྟར་ནད་གསོ་བའི་ཆོ་ག་ནི་ཡལ་བར་མི་བོར་ཞིང་ངེས་པར་བླང་བར་བྱ་སྟེ། ཆོ་ག་བཞིན་དུ་བྱས་ན་གསོར་རུང་བ་ཡིན་ནོ། །དེ་ལས་གཞན་དུ་ཡལ་བར་བོར་ན་ནི་གསོར་མི་རུང་བ་ཡིན་ནོ། །དེ་བས་ན་རྒྱུ་མེད་
[419b.7]པར་བདག་ཉིད་ཞི་བར་འགྱུར་བ་མེད་དོ། །ནད་གང་ལ་གོང་དུ་བསྟན་པའི་གསོ་བ་ཐམས་ཅད་ཕུན་སུམ་ཚོགས་པར་གསོ་བར་བྱས་ན་ནི་དེ་འཆི་བར་མི་འགྱུར་ཏེ་གསོ་བར་བྱ་བ་གཅེས་སོ། །དེ་བས་ན་གསོ་བའི་ཐབས་ཡོད་ཀྱི་གསོ་བའི་ཐབས་མེད་པ་མ་ཡིན་ཏེ་གསོ་བ་ཡོད་དོ། །
[420a]
[420a.1]སྨན་པ་བློ་དང་ལྡན་པས་ཆོ་ག་དང་ལྡན་པར་གསོ་བ་བྱས་ཤིང་སྨན་གྱི་ཡན་ལག་བཅུ་དྲུག་དང་ལྡན་དུ་ཟིན་ཀྱང་སྨན་གྱི་ཡོན་ཏན་སྔོན་གྱི་ལས་ལོག་པར་སོང་སྟེ་མི་འགྲུབ་པ་ཡང་ཡོད་དོ། །ཁ་ཅིག་མེ་ཆུ་དང་། དུགས་བྱས་པ་དང་། འཁྲུ་བཅད་པ་ལ་སོགས་པ་གྲུབ་
[420a.2]པའི་ལས་བྱས་ཀྱང་མི་འགྲུབ་པ་ཡོད་དེ། དེ་བཞིན་དུ་ལུས་ཉམས་བརྟ་བའི་ཕྱིར་འོ་མ་སྦྱིན་ཡང་སྐེམ་པ་དང་། ལུས་ཉམ་ཆུང་བ་ལ་སྨན་བེའུ་ག་སྦྱར་ཡང་བརྟ་བར་བྱེད་པ་དང་། ཁ་ཅིག་ལ་ཤ་དང་། ཁ་སྲལ་ཕྲེའུ་ལ་སོགས་པ་ཉལ་ཕོད་པའི་སྨན་བསྟེན་ཀྱང་རོ་ཙ་མི་ནུས་པ་དང་།
[420a.3]ཁ་ཅིག་ལ་འཁྲུ་བ་བཅད་པའི་སྨན་བྱས་ཀྱང་མི་ཕན་ཏེ། ངེས་པ་མེད་ཅིང་ཐེ་ཚོམ་དང་བཅས་པའང་ཡོད་དོ། །སྔགས་དང་རྒྱུ་མེད་པར་ཁ་ཅིག་གིས་དུག་ཟོས་ཀྱང་འཇུ་བ་ཡོད་ཁ་ཅིག་ནི་མགུལ་པའི་ནད་རོ་ཧི་ད་ཞེས་བྱ་བས་བཏབ་སྟེ་ཞི་བར་བྱེད་པའི་སྨན་མ་བསྟེན་ཀྱང་རང་ཞི་བ་ཡོད་དེ།
[420a.4]འོན་ཀྱང་གྲུབ་པའི་མཐའ་ཐམས་ཅད་ལ་དུས་མ་ཡིན་པར་ངེས་པར་འཆི་བ་ཡོད་དེ། དེ་ལ་འབད་པ་ཆེན་པོས་གསོ་བར་བྱས་ཏེ། བཟུང་ན་ནི་ཇི་ལྟར་ཡང་འཆི་བར་མི་འགྱུར་རོ། །དེ་བས་ན་ཙནྡན་ལ་སོགས་པ་ནི་ཚ་བ་འཇོམས་པར་བྱེད་ལ། རིམས་ལ་ནི་སྨྱུང་བ་དང་ཉམས་
[420a.5]བརྟ་བ་རྣམས་བྱའོ། །ཞེས་སྔོན་ཆད་དུ་བསྟན་བཅོས་དག་ལས་གྲགས་ཤིང་མིང་དུ་ཆགས་པ་ཡིན་ཏེ། ནད་གསོ་བའི་ཡན་ལག་རྣམ་པ་བཞི་འཚོགས་ན་ལེགས་པར་བརྟགས་ཏེ་སྨན་སྦྱར་ཞིང་གསོ་བར་བྱའོ། །དེ་བས་ན་ནད་ཀྱིས་བཏབ་ཅིང་ཉམ་ཐག་ཅིང་གཟིར་བ་ལ་
[420a.6]ནི་ཐེ་ཚོམ་དང་བཅས་པའི་གསོ་བ་མི་བྱ་སྟེ་སོམ་ཉི་སྤངས་ལ་གསོའོ།། །།དེ་ལྟར་སྨན་གྱི་རྒྱུད་འདི་ནི་འགྲོ་བ་རྣམས་ཀྱི་ནད་མངོན་སུམ་དུ་སེལ་བར་བྱེད་པའི་བདུད་རྩི་ཡིན་ཏེ། ནད་ཀྱིས་འཇིགས་ཤིང་སྣང་བ་རྣམས་ཀྱི་རྒུད་པ་མེད་པའི་བསྲུང་བའི་སྐུད་པ་ཡིན་ཏེ།
[420a.7]གལ་ཏེ་སྨན་པ་བློ་ཞན་པ་སྣོད་ངན་པ་འདྲ་བ་སྙིང་ལ་གནས་ན་ནི་དེ་མ་ཐག་དུག་ཧ་ལ་ཧ་ལར་འགྱུར་ཏེ། སྨན་དཔྱད་ཀྱི་དོན་མ་ནོར་བར་མ་ཤེས་ཤིང་ལོག་པར་དཔྱད་དེ་སྨན་དཔྱད་ཀྱི་ཡི་གེ་ཙམ་གཙོར་སྟོན་ཅིང་འདོན་པ་དང་འཆང་བ་དེ་ནི་རིང་དུ་སྤང་བར་བྱ་སྟེ། ཇི་ལྟར་གཤིན་རྗེ་ལག་ན་
[420b]
[420b.1]ཞགས་པ་ཐོགས་པ་བཞིན་ནོ། །སྨན་པ་མཁས་པའི་རྒྱུད་དུ་བྱུང་བའི་ལུང་ལ་བརྟེན་པའི་གསོ་བའི་ལས་ལ་གོམས་པ་དེ་ལྟ་བུ་ལ་བརྟེན་པ་ནི་རབ་ཏུ་བཟང་བ་ཡིན་ཏེ། མཁས་པ་རྣམས་ཀྱིས་མན་ངག་བཟང་པོ་དེ་ལྟ་བུ་ལ་འདོད་པར་བྱའོ། །དེ་ལྟར་སྨན་གྱི་རྒྱུད་ཀྱི་ཡོན་ཏན་ཐམས་ཅད་
[420b.2]དང་ལྡན་ལ་རྒྱུད་ཀྱི་སྐྱོན་ཐམས་ཅད་ནི་སྤངས་པ་ཡིན་ནོ། །གསོ་བའི་དཔྱད་ཀྱི་བསྟན་བཅོས་མ་ལུས་པ་ཐམས་ཅད་ལ་ཁྱབ་ཅིང་གནས་པ་ཡིན་ཏེ། དེ་ཡང་དྲང་སྲོང་ཆེན་པོ་རྣམས་ཀྱི་དགོངས་པ་རྒྱ་ཆེ་ཞིང་དྲི་མ་མེད་པ་རྣམས་ཀྱི་ལུགས་དང་རྗེས་སུ་མཐུན་པ་རྒྱ་མཚོ་ཆེན་པོ་ལྟར་རྒྱ་ཆེ་བའི་ཡན་ལག་
[420b.3]བསྡུས་པའི་དོན་གཉིས་ཉེ་བར་མཚོན་པ་ཡིན་ནོ། །སྨན་དཔྱད་ཡན་ལག་བརྒྱད་པ་རྒྱ་མཚོ་དང་འདྲ་བ་ལས་བསྲུབས་ཏེ། ཡན་ལག་བརྒྱད་པ་བསྡུས་པ་བདུད་རྩིའི་ཕུང་པོ་དང་འདྲ་བ་འདི་ཕྱུང་ངོ་། །ཡན་ལག་བརྒྱད་པ་བསྡུས་པ་དེ་ལས་བློ་ཞན་ཞིང་བརྩོན་པ་ཆུང་བ་རྣམས་ཀྱི་དོན་ཆེད་དུ་རྒྱུད་
[420b.4]འདི་ལོགས་ཤིག་ཏུ་བཤད་དོ། །འདི་ནི་ལུང་ཆེན་པོར་གྲགས་ཤིང་མཆོག་ཏུ་འགྲུབ་པ་ཡིན་ལ་འབྲས་བུ་མངོན་སུམ་དུ་སྟོན་པ་ཡིན་ཏེ། ཇི་ལྟར་སྔགས་ཀྱི་སྦྱོར་བ་གྲུབ་པ་བཞིན་ནོ། །འདི་ནི་སྤྱོད་པ་ཅན་གྱི་གཞུང་ལྟར་དོན་མེད་པ་ནི་མ་ཡིན་ནོ། །འདི་འདོན་པ་དང་རྟོགས་པ་དང་རྗེས་སུ་བསྒྲུབས་པ་
[420b.5]དེ་ནི་ངེས་པར་ཡུན་རིང་དུ་འཚོ་བ་དང་། ནད་མེད་པ་དང་། ཆོས་དང་། ནོར་དང་། བདེ་བ་དང་གྲགས་པ་ཡང་ཐོབ་པར་འགྱུར་རོ། །རྒྱུད་འདི་རྟོགས་ཤིང་འདོན་ན་ནི་ཡན་ལག་བརྒྱད་པ་བསྡུས་པའི་དོན་ཡང་རྟོགས་པར་འགྱུར་ཏེ། རང་གི་གསོ་བའི་ལས་ལ་གོམས་པའི་སྨན་པ་རྣམས་ཀྱང་
[420b.6]སེམས་གཡོས་པར་འགྱུར་ན་ཡང་མངོན་པར་བརྩོན་པར་བྱས་ཏེ། སྨན་དཔྱད་ཀྱི་རྒྱུད་རྒྱ་ཆེ་བ་གཞན་གོ་ཞིང་ཤེས་པ་ནི་ངོ་མཚར་ཀྱང་ཆེ་སྟེ། གལ་ཏེ་ཙ་ར་ཀ་དང་། སྲུ་སྲུ་ཏ་ལ་སོགས་པས་བཤད་པའི་སྨན་གྱི་རྒྱུད་ཤེས་པས་ནི་ནད་རྣམས་ཀྱི་མིང་ཙམ་ཡང་ཁོང་དུ་ཆུད་པར་མི་འགྱུར་རོ། །
[420b.7]ཅི་སྟེ་ཙ་ར་ཀས་བཤད་པའི་སྨན་དཔྱད་ཀྱི་ཡི་གེ་ཁོང་དུ་ཆུད་ཀྱང་དེ་ནི་གསོ་བ་ཡོངས་སུ་རྫོགས་པ་མ་ཡིན་ཏེ། ངེས་པར་ནད་ཀྱིས་ཉམ་ཐག་པ་རྣམས་གསོ་བར་མི་ནུས་སོ། །ལེགས་པར་ཤེས་ཤིང་རིག་པར་བྱ་བའི་སྨན་དཔྱད་ཀྱི་ཡི་གེ་སྐྱེས་བུའི་ཚེའི་རིག་བྱེད་ཀུན་གྱི་སྔོན་དུ་འགྲོ་བ་འདི་ལ་སྐྱོ་བ་མེད་
[421a]
[421a.1]ཅིང་མངོན་པར་བརྩོན་པའི་མཆོག་གིས་མི་འཇུག་པ་དེ་ནི་ཤིན་ཏུ་གཏི་མུག་པ་ཡིན་ནོ། །རླུང་དང་མཁྲིས་པ་དང་བད་ཀན་ལ་ཏིལ་མར་དང་མར་དང་སྦྲང་རྩི་གོ་རིམས་བཞིན་དུ་ཕན་ཞིང་ཞི་བར་བྱེད་དོ་ཞེས་ཚངས་པའམ་ཚངས་པའི་བུས་བཤད་དེ། དེ་ནི་རྩིང་མ་བཏགས་པར་སྨན་གྱི་ནུས་
[421a.2]པའི་བྱེ་བྲག་བཅད་ཅིང་ཕྱེ་བ་ཡིན་ནོ། །དེ་བས་ན་བདག་གིས་སྨན་དཔྱད་ཀྱི་རང་བཞིན་ཤེས་ནས་སྨན་གྱི་ནུས་པ་དང་ཁྱད་པར་ཞིབ་ཏུ་བརྗོད་པ་ཡིན་ཏེ། དེས་ན་ཞེ་སྡང་དང་ཕྲག་དོག་སྤང་ཞིང་གང་རིགས་པ་དེ་བླང་བར་འོས་སོ། །གལ་ཏེ་དྲང་སྲོང་ཆེན་པོ་ཙ་ར་ཀ་དང་། སྲུ་སྲུ་ཏ་དང་། གཟིངས་ཅན་ལ་སོགས་
[421a.3]པས་བཤད་པ་ལ་དད་པ་ཞིག་ཡོད་དེ་ཡོད་ན་ཡང་བདག་གིས་དེའི་ལུང་ཅི་ཞིག་མ་བརྗོད་དེ་སྨྲས་སོ། །དེ་བས་ན་ལེགས་པར་གསུངས་པའི་སྨན་དཔྱད་གྱི་རྒྱུད་འདི་ཉམས་སུ་ལེན་པའི་རིགས་སོ། །རང་གི་རང་བཞིན་ཚེ་ཡི་རིག་བྱེད་རྒྱ་མཚོ་ལས། །སྙིང་པོ་བཞིན་དུ་བསྡུས་པའི་ཆོ་ག་འདི་བཤད་པས། །དགེ་བ་གང་
[421a.4]ཞིག་རབ་ཏུ་བསགས་པ་ཐོབ་གྱུར་པ། །དེས་ནི་འགྲོ་བ་མ་ལུས་བདེ་བ་ཐོབ་གྱུར་ཅིག །རོ་ཙ་བར་བྱེད་པའི་ལེའུ་སྟེ་བཞི་བཅུ་ཐམ་པའོ།། །།སྨན་པའི་བདག་པོ་སེང་གེ་སྦས་པ་ཞེས་བྱ་བའི་བུ་སྨན་པ་ཆེན་པོ་ཕ་ཁོལ་ཞེས་བྱ་བས་ཡན་ལག་བརྒྱད་པའི་སྙིང་པོ་བསྡུས་པ་ལས་རྒྱུད་ཕྱི་མའི་གནས་རྫོགས་ཏེ་ཡན་ལག་
[421a.5]བརྒྱད་པའི་སྙིང་པོ་ལས་གནས་དྲུག་པ་སྟེ་ཐ་མ་རྫོགས་སོ། །སྨན་དཔྱད་ཡན་ལག་བརྒྱད་པའི་སྙིང་པོ་ཞེས་བྱ་བ་ཇི་སྙེད་པའི་བཤད་པ་རྫོགས་སོ། །མ་རིག་དབང་གིས་འདི་དག་ཏུ། །ཅུང་ཟད་ནོངས་པར་གང་གྱུར་ཏེ། །གང་ཕྱིར་བདག་ཉིད་ཁོང་བླུན་པས། །མཁས་པ་རྣམས་ལ་བཟོད་པར་གསོལ། །གལ་
[421a.6]ཏེ་འབྱུང་ཁུངས་བཟང་པོའི་གསེར། །མངོན་སུམ་སྣང་བ་འགྲོ་ལ་གཏད། །བོད་ཀྱི་ལྷ་བཙན་པོ་སློབ་དཔོན་བྱང་ཆུབ་སེམས་དཔའ་ལྷ་བླ་མ་ཛྙཱ་ན་པྲ་བྷཱའི་བཀས། ཚེའི་རིག་བྱེད་ཀྱི་རྒྱ་མཚོ་སྨན་དཔྱད་ཡན་ལག་བརྒྱད་པའི་སྙིང་པོ་ཞེས་བྱ་བའི་བཤད་པ་འདི་འང་བསྒྱུར་ཅིག་ཅེས་བཀའ་སྩལ་ནས་བླ་མའི་
[421a.7]ཞབས་དྲུང་དུ། རྒྱ་གར་གྱི་ཨཱ་ཙརྱ་དྷརྨ་ཤྲཱི་ཝརྨ་དང་། ཞུ་ཆེན་གྱི་ལོ་ཙཱ་བ་ཨི་གུ་དགེ་སློང་ཤཱཀྱ་བློ་གྲོས་ཀྱིས་བསྒྱུར་ཅིང་མར་ལོ་དགེ་སློང་རིག་པ་གཞོན་ནུ་དང་། མཉེལ་བཅོར་དགེ་སློང་དབྱིག་གི་རིན་ཆེན་དང་གསུམ་གྱིས་ཚད་ལ་ཕབ་སྟེ་མཇུག་བསྡུས་ནས་རྫོགས་པར་བགྱིས་སོ།། །།