[1a]
[1b]
[1b.1]{T4127}༄༅༅། །རྒྱ་གར་སྐད་དུ། ཨཱརྱ་མཱུ་ལ་སརྦ་ཨསྟི་#བཱ་དི་ཤྲ་མ་ཎེ་ར་ཀཱ་རི་ཀཱ། བོད་སྐད་དུ། འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ།
[1b.2]ཐམས་ཅད་མཁྱེན་པ་ལ་ཕྱག་འཚལ་ལོ། །མགོན་པོ་ཐམས་ཅད་མཁྱེན་དང་ཆོས། །འཕགས་པའི་ཚོགས་ལ་ཕྱག་འཚལ་ཏེ། །དགེ་ཚུལ་གྱི་ནི་ཆོ་ག་རྣམས། །མདོ་ཙམ་ངེས་པར་བཤད་
[1b.3]པར་བྱ། །ཤཱཀྱ་སེང་གེའི་བསྟན་པ་ལ། །དད་པས་རབ་ཏུ་བྱུང་ནས་ནི། །བརྟུལ་ཞུགས་བརྟན་པས་རབ་བསྒྲིམས་ཏེ། །བདག་གི་ལུས་བཞིན་བསླབ་པ་བསྲུང་། །ནམ་གྱི་ཆ་སྨད་མལ་ནས་
[1b.4]ལངས། །ནམ་ལངས་བར་དུ་ཁ་ཏོན་བྱ། །གདོང་དང་སོ་ཡི་དྲི་བཀྲུས་ནས། །རྫོགས་སངས་རྒྱས་ལ་གུས་ཕྱག་འཚལ། །བླ་མ་གནས་པའི་སྒོ་གླེགས་ལ། །ལག་པས་དལ་གྱིས་བརྡུང་བར་
[1b.5]བྱ། །ནང་ཞུགས་གུས་པས་བླ་མ་ལ། །ཁམས་བདེ་མི་བདེ་ལ་སོགས་དྲི། །འདི་དག་བྱ་ཞེས་དྲིས་ནས་ནི། །དཀྱིལ་འཁོར་ལ་སོགས་རྣམ་བྱའི་ཕྱིར། །ཉ་ཕྱིས་ལ་སོགས་ཆུ་བརྟག་སྟེ། །
[2a]
[2a.1]སྟེང་དང་བར་གཏིང་རིམ་བཞིན་ནོ། །ཉ་ཕྱིས་ལ་སོགས་མེད་ན་ཡང་། །ཁྱོར་བ་འམ་འདབ་མས་བུམ་པ་དགང་། །ཆུ་ཡི་སྐྱེ་བོ་ཆེ་ཆུང་རྣམས། །ཡུན་#ནི་རིང་བར་ནན་ཏན་བརྟག །སྙིང་རྗེ་ཅན་གྱིས་#
[2a.2]ཁུ་བ་རྣམས། །རབ་ཏུ་བརྟགས་ཏེ་སྤྱད་པར་བྱ། །སྲོག་ཆགས་ཡོད་ན་ལེགས་པར་བཙག །སྲོག་ཆགས་རྣམས་ལ་གནོད་མི་བྱ། །རྩྭ་#དང་ལྕི་བ་ཤིང་ལ་སོགས། །དགོས་པ་གང་དང་གང་ཡང་རུང་། །དེ་དག་སྲོག་
[2a.3]ཆགས་མེད་པར་བྱ། །སྡོམ་པས་སྲོག་ཆགས་བསད་པ་བསྲུང་། །སྟན་ཆུ་ས་དང་སོ་ཤིང་དང་། །འདག་པའི་ཆལ་ཡང་སྟ་གོན་བྱ། །ལྷུང་བཟེད་བཀྲུ་ལ་སོགས་པ་དང་། །བླ་མའི་དགོས་པ་ཐམས་ཅད་བྱ། །དེ་ནས་
[2a.4]དུས་རིག་ཕྱག་བྱས་ཏེ། །དེ་བཞིན་གུས་པས་ཐལ་སྦྱར་ནས། །འཚལ་མ་འཚལ་ཞེས་བླ་མ་ལ། །བརྟུལ་ཞུགས་ཅན་གྱིས་དེ་ལྟར་ཞུ། །ལག་པ་བཀྲུས་ནས་ཚུལ་བཞིན་དུ། །དེ་ནས་མི་སྨྲ་ཚོད་རིག་པར། །བྲུ་བའི་ནད་
[2a.5]ལས་བཟློག་པའི་ཕྱིར། །བཟའོ་#སྙམ་པའི་སེམས་ཀྱིས་བཟའ། །ཟོས་ཤིང་དེ་བཞིན་འཐུང་བ་#དང་། །རུང་བའི་ཆུ་ནི་#དེ་འོག་ཏུ། །སྦྱིན་པ་ཡང་དག་སྤེལ་བྱའི་ཕྱིར། །སྦྱིན་པའི་ཚིགས་བཅད་གཉིས་ཤིག་བརྗོད། །མན་ངག་
[2b]
[2b.1]ཡོད་ན་བསམ་གཏན་བྱ། །རབ་ཏུ་འབད་དེ་བཀླག་#པར་བྱ། །སྡོམ་དང་ཆོ་ག་མཁས་པ་དང་། །སྒྲུབ་པ་དག་ལ་བརྩོན་པར་བྱ། །བརྟུལ་ཞུགས་གནས་སེམས་མ་ཉམས་པས། །ཆེད་དུ་བསམས་ཏེ་མ་ནོར་བར། །མི་གཞན་བདག་གམ་གཞན་རྣམས་ཀྱིས། །བསད་ན་བརྟུལ་
[2b.2]ཞུགས་ཉམས་པར་འགྱུར། །ཚུལ་ཁྲིམས་ལྡན་ནམ་ཚུལ་ཁྲིམས་འཆལ། །དེ་བཞིན་ནད་ཀྱིས་བཏབ་པ་ལ། །གང་ཐོས་སྡུག་བསྔལ་ཉམ་ཐག་སྟེ། །ངེས་འཆིའི་ཆོས་གཏམ་དེ་མི་བྱ། །སྨན་དང་སྔགས་དང་རིག་པ་དང་། །འཆི་བའི་ཕྱོགས་སུ་བཏང་བ་དང་། །མི་གཞན་
[2b.3]ཐབས་རྣམས་སྣ་ཚོགས་ཀྱིས། །བསད་ན་བརྟུལ་ཞུགས་ཉམས་པར་འགྱུར། །དུད་འགྲོ་དང་ནི་སེམས་དམྱལ་དང་། །ཡི་དགས་འོན་ཏེ་ལྷ་ཡང་རུང་། །བསད་ན་ངན་འགྲོར་#ལྟུང་བ་ཡི། །སྡིག་པ་སྦོམ་པོ་ཐོབ་པར་འགྱུར། །བརྟུལ་ཞུགས་ཅན་གྱིས་བསད་སྙམ་སྟེ། །ལུས་དང་
[2b.4]ངག་གིས་བཤམས་པ་ལས། །སྐྱེ་བོ་གསོན་ཡང་དེ་ལ་ནི། །ཁ་ན་མ་ཐོ་རྣམ་གསུམ་འགྱུར། །རྡོ་དབྱུག་ཁུ་ཚུར་འཚོག་པ་དང་། །དེ་ལས་གཞན་པའི་གནོད་པ་དང་། །བ་ལང་ལ་སོགས་གནོད་མི་བྱ། །རྟ་ལ་སོགས་པ་མི་ཞོན་ནོ། །དགེ་ཚུལ་བདག་གམ་གཞན་རྣམས་
[2b.5]ཀྱིས། །རྐུ་སེམས་མཐུ་དང་འཇབ་བུ་ཡིས#། །འཁྲུལ་པ་མེད་པར་མི་གཞན་གྱིས། །གནས་ནས་མ་ཤ་ལྔ་ཙམ་མམ། །རང་གི་ཡུལ་ནས་བྱུང་བ་གང་། །ཀཱར་ཥཱ་#པ་ཎ་བཞི་ཆ་བརྐུས། །དེ་བརྐུས་ཚུལ་ཁྲིམས་ཞིག་པར་འགྱུར། །སྦྱོར་བའི་ཚེ་ན་ཉེས་བྱས་སོ། །རྡོག་
[2b.6]གུ་རྩ་བ་འབྲས་བུའི་ཤིང་། །སྡོང་#བུ་ལོ་མ་ཤུན་པ་ཆུ། །མེ་ཏོག་ཆུ་སྐྱེས་ཐང་སྐྱེས་དང་། །ཞིང་དང་ལོ་ཏོག་ས་གཞི་དང་། །གྲུ་དང་ཤིང་དང་ཤོ་གམ་དང་། །དེ་བཞིན་གྲུ་ཡི་བཙས་རྣམས་དང་། །སྲོག་ཆགས་རྐང་པ་མེད་པ་དང་། །རྐང་གཉིས་རྐང་མངས་རྐུ་བ་དང་། །
[2b.7]བརྟུལ་ཞུགས་ཅན་གྱིས་#མི་ཡི་ནོར། །དབྱིག་ལ་སོགས་པ་གང་ཡང་རུང་། །རྐུ་བའི་སེམས་ཀྱིས་གང་བརྐུས་ཀྱང་། །རིན་ཐང་ཚང་ན་སྡོམ་པ་ཞིག །ལྷུང་བཟེད་ལ་སོགས་རྐུན་ཁྱེར་ན། །ཆོས་བཤད་ནས་ནི་བསྒྲུབ་པར་བྱ། །ཡང་ན་རི་བའི་རིན་གྱིས་བླུ། །དེ་ལྟར་
[3a]
[3a.1]མ་བྱས་ཉེས་བྱས་སོ། །སྡོམ་ཅན་ཉམས་པ་མེད་སེམས་ཀྱིས#། །ཉམས་པ་མེད་པའི་སྒོ་གསུམ་དུ། །ཆགས་པས་ནོར་བུ་ནང་དུ་འདས། །དགའ་བ་ཚོར་ན་བརྟུལ་ཞུགས་ཉམས། །སྐྱེས་པ་བུད་མེད་མ་ནིང་གི། །ཚན་ཀར་པོར་ཏི་མནན་པ་ལས། །
[3a.2]གང་གི་བདེ་བའི་རོ་མྱོང་བ། །དེ་#ཡང་སྡོམ་པ་ཞིག་པར་འགྱུར། །ཡན་ལག་སྐྱེས་ནས་བདེ་འདོད་པས། །གདུག་པ་སྦྲུལ་གྱི་#ཁར་བཅུག་སླ#། །ལུས་ལ་#སྡོམ་པ་མི་གཞིག་#ཅེས། །རྫོགས་སངས་རྒྱས་ཀྱིས་བཀའ་སྩལ་ཏོ། །གལ་ཏེ་སྤྲུལ་གྱིས་བསད་#གྱུར་ཀྱང་། །ཚུལ་ཁྲིམས་
[3a.3]གནས་ལ་དེ་ཕན་ཏེ། །ཚུལ་ཁྲིམས་ཉམས་པ་སྡུག་བསྔལ་ཡིན། །མྱ་ངན་འདས་ལའང་སྒྲིབ་པར་འགྱུར། །ལྷ་དག་མཐོང་ཞེས་དེ་ཡི་སྒྲ། །ཐོས་པར་གྱུར་དང་ཀུན་སྨྲ་དང་། །གང་ན་བདག་འདུག་ལྷ་འོང་ཞིང་། །བདག་ཀྱང་དེ་ཡི་དྲུང་འགྲོ་དང་། །དེ་བཞིན་དྲི་ཟ་གྲུལ་བུམ་ཀླུ། །
[3a.4]གནོད་སྦྱིན་ལྟོ་འཕྱེ་ཆེན་པོ་དང་། །ཤ་ཟ་ཡི་དགས་མི་འམ་ཅི། །མཐོང་ངོ་ཞེས་ལ་སོགས་སྨྲས་དང་། །བསམ་གཏན་མངོན་ཤེས་ཚད་མེད་དང་། །རྒྱུན་ཞུགས་ལ་སོགས་འབྲས་བུ་དང་། །ལམ་ལ་རབ་ཏུ་ཞུགས་པའང་རུང་། །བདག་གིས་ཐོབ་ཅེས་སྨྲ་#ན་ནི། །དོན་རིག་པ་ལ་
[3a.5]བརྫུན་པའི་ཚིག །ཁྱད་པར་ཐོབ་པའི་བདག་ཉིད་ཅན། །མ་ཉམས་ང་རྒྱལ་མེད་བཞིན་དུ། །སྨྲས་ན་བརྟུལ་ཞུགས་ཉམས་པར་འགྱུར། །ཁྱད་པར་ཐོབ་པ་མ་གཏོགས་པར། །དེ་ལས་གཞན་པའི་བརྫུན་#ཆིག་རྣམས། །དེ་དག་ཐམས་ཅད་སྡིག་མང་འགྱུར། །དེས་ནི་འོག་མར་
[3a.6]ལྟུང་བར་འགྱུར། །ཇི་ལྟར་མཛའ་བོ་འབྱེད་འགྱུར་བ། །ཕྲ་མའི་ཚིག་རྣམས་སྨྲ་མི་བྱ། །ཐུན་ཚགས་སུ་ནི་སྨྲ་བ་དང་། །ཚིག་རྩུབ་སྨྲ་བར་མི་བྱའོ། །ངན་དུ་ཟེར་ལ་ངན་མི་བརྗོད། །གཤེ་བ་ལ་ཡང་སླར་མི་གཤེ། །མཚང་འབྲུ་བ་ལ་སླར་མི་བྲུ#། །བརྡེག་པ་ལ་ཡང་སླར་མི་བརྡེག །
[3a.7]བློ་ལྡན་བསླབ་པ་#འདོད་པ་ཡིས། །བསྒྲིམས་ཏེ་ངག་གི་སྐྱོན་རྣམས་སྤངས། །དེ་ལྟར་འགྱུར་བར་རིག་ནས་ནི། །ངག་རྣམས་ཤིན་ཏུ་བསྡམ་#པར་བྱ། །འབྲུ་བཏགས་ཕབས་དང་སྦྱར་བ་ཡི། །བཏུང་བའི་བྱེ་བྲག་འབྲུ་ཡི་ཆང་། །སྡོང་བུ་མེ་ཏོག་འབྲས་བུ་ལས། །སྦྱར་བའི་ཁུ་བ་བཅོས་#
[3b]
[3b.1]པའི་ཆང་། །དེས་ནི་མྱོས་པར་འགྱུར་རིག་ནས། །སྡོམ་ཅན་ཕན་འདོད་མི་བཏུང་ངོ་། །དེ་འཐུངས་ན་ནི་དྲན་ཉམས་ཤིང་། །བརྟུལ་ཞུགས་ལྡན་པ་བག་མེད་འགྱུར། །བག་མེད་པ་ལས་བརྟུལ་ཞུགས་ཉམས། །དེ་བས་སྟོན་པའི་བཀའ་དྲན་བྱ། །མྱོས་འགྱུར་ཉེས་པ་འཕེལ་
[3b.2]འགྱུར་བ། །རྩྭ་མཆོག་གིས་ཀྱང་མི་བཏུང་ངོ་། །གླུ་གར་དེ་བཞིན་སིལ་སྙན་རྣམས། །སྡོམ་ལ་གནས་པས་མི་བྱའོ། །ལུས་ལ་སྤོས་ཀྱིས་མི་བྱུག་གོ། །ཙནྡན་ལ་སོགས་མི་བསྐུའོ། །ཡུང་དང་གུར་གུམ་ལ་སོགས་པ། །ཁ་དོག་རྣམས་སུ་བྲི་མི་བྱ། །མེ་ཏོག་མགོ་རྒྱན་
[3b.3]ཕྲེང་བ་དག །བརྟུལ་ཞུགས་ཅན་གྱིས་གདགས་མི་བྱ། །གསེར་ལ་སོགས་པའི་རྒྱན་རྣམས་ཀྱིས། །བདག་ལ་བརྒྱན་པར་མི་བྱའོ། །དུད་པ་ལ་སོགས་མིག་སྨན་རྣམས། །མིག་མིན་བར་མི་བྱུག་གོ། །ཤིང་ཁྲི་ཁྲུ་གང་མཐོ་བ་དང་། །བ་སོ་ལ་སོགས་བརྒྱན་པའི་ཁྲི། །
[3b.4]དམའ་ཡང་ཉལ་ཁྲི་བཟང་པོ་ལ། །ཉལ་ལ་སོགས་པ་མི་བྱའོ། །གླུ་གར་ལ་སོགས་བསྟན་#པ་དང་། །གང་ལ་དྲེགས་པ་སྐྱེ་འགྱུར་བ། །དྲེགས་པའི་ཡན་ལག་སྤངས་ནས་ནི། །བརྟུལ་ཞུགས་གནས་ཞེས་བརྗོད་པ་ཡིན། །ཉི་མ་ཕྱེད་མཚམས་མན་ཆད་ནས། །སྐྱ་རེངས་
[3b.5]མ་ཤར་བར་དུ་ནི། །དེ་ནི་རྒྱལ་བས་དུས་མིན་གསུངས། །སྡོམ་ཅན་གྱིས་ནི་དེར་མི་བཟའ། །སྐྱ་རེངས་ཤར་ནས་ཕྱེད་ཀྱི་བར། །དེ་ཡི་སྐབས་སུ་ཟོས་པ་ནི། །དེ་ནི་བདག་ཤེས་སྡོམ་པ་སྟེ། །བཟའ་བའི་དུས་སུ་ཟོས་པ་ཡིན། །དུས་མིན་དུས་སུ་འདུ་ཤེས་ན། །ནམ་ཡང་
[3b.6]བཟའ་བར་མི་བྱའོ། །སྨན་པས་ཉོན་མོངས་བསྒོས་#ན་ནི། །ནད་པས་ཉེས་#པར་མི་འགྱུར་རོ། །ས་ལེ་སྦྲམ་ནི་གསེར་ཡིན་ཏེ། །དངུལ་ཞེས་བྱ་བ་དངུལ་ཉིད་དོ། །སྦྱིན་བདག་རྣམས་ཀྱིས་དེ་ཕྱིན་#ན། །བརྟུལ་ཞུགས་ཅན་གྱིས་མི་བླང་ངོ་། །བདག་གིས་རུང་བ་མ་ཡིན་འདིས། །རུང་
[3b.7]བའི་དངོས་པོ་བཙལ་སྙམ་དུ། །དེ་ལྟར་མངོན་པར་བསམས་ནས་ནི། །དེ་ནས་གཞན་ཞིག་ལེན་དུ་གཞུག །དཀོན་མཆོག་གསུམ་གྱི་ཆེད་ཀ་དང་། །ཚངས་པ་མཚུངས་པར་སྤྱོད་རྣམས་ཀྱིས། །གསེར་དང་དངུལ་ལ་རེག་གྱུར་ཀྱང་། །ཉེས་པར་འགྱུར་བ་མ་ཡིན་ནོ། །འདོད་
[4a]
[4a.1]པས་བར་དུ་གཅོད་བྱེད་ཅེས། །རྫོགས་སངས་རྒྱས་ཀྱིས་གསུངས་པ་དེ། །བར་དུ་གཅོད་པར་མི་འགྱུར་ཞེས། །དགེ་ཚུལ་གཏི་མུག་མ་སྨྲ་ཅིག །དེ་སྐད་སྨྲ་#ན་དགེ་འདུན་གྱི། །ལོངས་སྤྱོད་ཀུན་དང་ཕྲལ་ནས་ནི། །གཙུག་ལག་ཁང་ནས་བསྐྲད་པར་བྱ། །
[4a.2]དེ་ནས་རོ་དང་འདྲ་བར་འགྱུར། །འཕྱར་དང་རྟ་གད་བྱེད་ལ་སོགས། །འཆི་བར་བསམས་ཏེ་མི་བྱའོ། །གླལ་ཚེ་ལག་ལ་སོགས་པ་ཡིས། །ཁ་དགབ་པར་ཡང་ནན་ཏན་བྱ། །རྒན་ལ་སྦྲིད་བྱུང་ཕྱག་བྱ་སྟེ། །གཞོན་ལ་ནད་མེད་གྱུར་ཅེས་བརྗོད། །ཁྱིམ་པ་སྦྲིད་པ་བྱུང་བ་ལ། །
[4a.3]ཡུན་རིང་འཚོ་#ཞེས་བརྗོད་པར་བྱ། །བླ་མ་གནས་པའི་མདུན་དག་ཏུ། །སྣབས་དང་མཆིལ་མ་མི་འདོར་#ཞིང་། །སོ་ཤིང་བཅའ་བར་མི་བྱའོ། །དེ་བཞིན་སྟན་ལ་མི་འདུག་གོ། །མདུན་དུ་བཅག་པར་མི་བྱ་ཞིང་། །ཁྱེད་རེངས་སུ་ཡང་མི་དབྱུང་ངོ་། །རྒན་ལ་སོགས་པའི་སྡོམ་ཅན་ལ། །
[4a.4]གུས་བཅས་ཞེ་སར་བཅས་པར་བྱ། །ལག་པ་དག་པར་བསྙལ་ན་ནི། །བུམ་པ་ལ་སོགས་རྡུལ་མེད་བྱ། །ཆུ་ཡང་ཡོངས་སུ་བཙགས་ནས་སུ། །བརྟགས་ནས་#རུང་བ་བླང་བར་བྱ། །གནས་མ་བཅས་པར་གནས་མི་བྱ། །དགེ་འདུན་མལ་ཆ་ལ་སོགས་པར། །དྲན་པ་མེད་པར་འདུག་
[4a.5]མི་བྱ། །དྲན་དང་ལྡན་ན་ཉེས་མེད་དོ། །སོ་བཀྲུ་བ་དང་ཆུ་བཏུང་དང་། །བཤང་གཅི་བྱེད་དུ་འགྲོ་བ་དང་། །མཚམས་ནང་སྟོན་#ལ་ཕྱག་བྱ་བ། །དེ་དག་མ་ཞུས་ཉེས་མེད་དོ། །བརྟུལ་ཞུགས་ཅན་གྱིས་བྱ་བ་གཞན། །དེ་དག་ཐམས་ཅད་མ་ལུས་པར། །གལ་ཏེ་བླ་མར་#མ་ཞུས་པར། །བྱས་
[4a.6]ན་དེ་ལ་ཉེས་བྱས་སོ། །མཆོད་རྟེན་ལ་སོགས་ཕྱག་བྱས་ཏེ། །མི་ཉལ་བྱས་ནས་དེ་འོག་ཏུ། །བླ་མའི་རྐང་བཀྲུས་བླ་མ་ལ། །བརྟུལ་ཞུགས་ཅན་གྱིས་ཀུན་ཞུས་ཏེ། །རྐང་པ་གཉིས་ཀ་བཀྲུས་ནས་ནི། །ནམ་གྱི་ཆ་སྟོད་ཆ་སྨད་ལ། །བསྒྲིམས་ཏེ་མི་ཉལ་བ་བྱས་ཏེ། །དེས་ནི་བདེན་
[4a.7]པར་སྨྲ་བར་བྱ། །ལྡང་དང་སྣང་བའི་འདུ་ཤེས་ཀྱིས། །སེང་གེ་ཉལ་ཐབས་བཞིན་དུ་བྱ། །དྲན་དང་ལྡན་ཞིང་དགེ་རྒྱུད་དང་། །དེ་བཞིན་མྱུར་དུ་སད་ནས་ནི། །ཇི་སྐད་བསྟན་པ་བཞིན་དུ་བྱ། །ཇི་ལྟར་ཉོན་མོངས་མྱུར་ཟད་དང་། །བྱང་ཆུབ་དམ་པ་ཐོབ་འགྱུར་བ། །དེ་ལྟར་བསྒྲིམས་དང་
[4b]
[4b.1]ལྡན་པར་བྱ། །ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ་སློབ་དཔོན་ཀླུ་སྒྲུབ་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་མུ་ནི་ཝརྨ་#དང་། ཞུ་ཆེན་གྱི་ལོ་ཙཱ་#བ་སྣ་ནམ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པའོ#།། །།
[4b.2]{T4128}#༄༅༅། །ཐམས་ཅད་མཁྱེན་པ་ལ་ཕྱག་འཚལ་ལོ། །དགེ་སྦྱོང་གི་ཀཱ་རི་ཀཱ་ལྔ་བཅུ་པའི་ཚིག་གི་བརྗེད་བྱང་དུ་བྱས་པ། དཔེར་ན་ས་གཞི་ལ་ས་བོན་བཏབ་ནས་ས་བོན་ལ་བརྟེན་ནས་མྱུ་གུ། མྱུ་གུ་ལ་བརྟེན་ནས་འདབ་མ། འདབ་མ་ལ་བརྟེན་ནས་སྡོང་བུ། སྡོང་བུ་ལ་བརྟེན་ནས་
[4b.3]མེ་ཏོག །མེ་ཏོག་ལ་བརྟེན་ནས་འབྲས་བུ་འབྱུང་བ་དེ་བཞིན་དུ། ཚུལ་ཁྲིམས་ས་གཞི་དང་འདྲ་བ་ལ་བརྟེན་ནས་མྱུ་གུ་ལ་སོགས་པ་ལྟ་བུའི་ཏིང་ངེ་འཛིན་གྱི་ཕུང་པོ་འབྱུང་ངོ་། །ཏིང་ངེ་འཛིན་གྱི་ཕུང་པོ་བྱུང་ནས་དེའི་འོག་ཏུ་མེ་ཏོག་ལྟ་བུའི་ཤེས་རབ་ཀྱི་ཕུང་པོ་འབྱུང་ངོ་། །ཤེས་རབ་ཀྱི་ཕུང་
[4b.4]པོ་བྱུང་ནས་དེའི་འོག་ཏུ་རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་འབྲས་བུ་ལྟ་བུ་འབྱུང་ངོ་། །དེ་བས་ན་དགེ་བ་ཐམས་ཅད་འབྱུང་བའི་གཞི་ཚུལ་ཁྲིམས་ཡིན་པའི་ཕྱིར་ཚུལ་ཁྲིམས་བསྲུང་བ་ལ་ནན་ཏན་བྱའོ། །དགེ་སྦྱོང་གི་བསླབ་ཚིག་#ལྔ་བཅུ་པ་
[4b.5]འདི་མགོ་མཇུག་ཏུ་བསྡུ་ན་དོན་རྣམ་པ་བརྒྱད་ཀྱིས་འཆད་དེ། གང་ཞེ་ན། བསྟོད་ཅིང་ཕྱག་འཚལ་བ་བསྟན་པ་དང་། བསླབ་པ་ཉམས་སུ་བླང་བ་དང་། སྔ་དྲོའི་དུས་ན་ལས་གང་བྱ་བ་དང་། ཟས་ཀྱི་བྱ་བ་བྱས་པའི་འོག་ཏུ་ལས་གང་བྱ་བ་དང་། ཕས་ཕམ་པའི་གནས་དང་། བསླབ་
[4b.6]པ་ཕྲ་མོའི་གནས་དང་། ཕྱི་དྲོ་ཕན་ཆད་ཇི་ལྟར་བྱ་བ་དང་། བརྒྱད་པ་འབྲས་བུ་ཇི་ལྟར་བྱ་བ་བཞིན་དུ་བསྟན་པའོ། །དེ་ལ་མགོན་པོ་ཞེས་བྱ་བ་ནས་བརྩམས་ཏེ། མདོ་ཙམ་ངེས་པར་བཤད་པར་བྱ། །ཞེས་བྱ་བ་ཡན་ཆད་ཀྱིས་རང་གི་ལྷ་ལ་བསྟོད་ཅིང་ཕྱག་འཚལ་བ་བསྟན་#ཏོ། །ཤཱཀྱ་
[4b.7]སེང་གེ་ཞེས་བྱ་བ་ནས་བརྩམས་ཏེ། བདག་གི་ལུས་བཞིན་བསླབ་པ་བསྲུང་། །ཞེས་བྱ་བ་ཡན་ཆད་ཀྱིས་བསླབ་པ་ཉམས་སུ་བླང་བ་བསྟན་ཏོ། །ནམ་གྱི་ཆ་སྨད་ཅེས་བྱ་བ་ནས་བརྩམས་ཏེ། སྦྱིན་པའི་ཚིགས་#བཅད་གཉིས་ཤིག་བརྗོད། །ཅེས་བྱ་བ་ཡན་ཆད་ཀྱིས་སྔ་དྲོའི་དུས་
[5a]
[5a.1]ན་ལས་གང་བྱ་བ་བསྟན་ཏོ། །མན་ངག་ཡོད་ན་བསམ་གཏན་བྱ#། །ཞེས་བྱ་བ་ནས་བརྩམས་ཏེ། བསྒྲུབ་པ་ལ་ནི་བརྩོན་པར་བྱ། །ཞེས་བྱ་བ་ཡན་ཆད་ཀྱིས་དགེ་བ་བྱ་བ་བསྟན་ཏོ། །བརྟུལ་ཞུགས་གནས་སེམས་ཞེས་བྱ་བ་ནས་བརྩམས་ཏེ། ངག་རྣམས་ཤིན་ཏུ་
[5a.2]བསྡམ་པར་བྱ། །ཞེས་པ་ཡན་ཆད་ཀྱིས་ཕས་ཕམ་པའི་གནས་བསྟན་ཏོ། །འབྲུ་བཏགས་ཕབས་དང་སྦྱར་བ་ཡི། །ཞེས་བྱ་བ་ནས་བཟུང་ནས། གུས་བཅས་ཞེ་ས་བཅས་པར་བྱ། །ཞེས་བྱ་བ་ཡན་ཆད་ཀྱིས་བསླབ་པ་ཕྲ་མོ་རྣམས་བསྟན་ཏོ། །ལག་པ་དག་པར་བསྙལ་ནས་#ནི། །ཞེས་
[5a.3]བྱ་བ་ནས་བརྩམས་ཏེ། ཇི་སྐད་བསྟན་པ་བཞིན་དུ་བྱ། །ཞེས་པ་ཡན་ཆད་ཀྱིས་ཕྱི་དྲོ་ཕན་ཆད་ཀྱི་བྱ་བ་བསྟན་ཏོ། །ཇི་ལྟར་ཉོན་མོངས་མྱུར་ཟད་ནས། །བྱང་ཆུབ་དམ་པ་ཐོབ་པར་འགྱུར། །དེ་ལྟར་བསྒྲིམས་དང་ལྡན་པར་བྱ། །ཞེས་བྱ་བས་ནི་འབྲས་བུ་བསྟན་ཏོ། །དེ་ལ་སངས་རྒྱས་ཀྱི་སློབ་
[5a.4]མ་རྣམས་ཀྱི་#ལྷ་ནི་དཀོན་མཆོག་གསུམ་སྟེ། སངས་རྒྱས་དང་། ཆོས་དང་། དགེ་འདུན་དང་#། མགོན་པོ་ཐམས་ཅད་མཁྱེན་ཞེས་བྱ་བ་ནི་#སངས་རྒྱས་ལ་བསྟོད་ཅིང་ཕྱག་འཚལ་བ་བསྟན་#ཏེ། སངས་རྒྱས་ལ་བསྟོད་པ་ཡང་གཞན་གྱི་དོན་མཛད་པ་དང་། རང་གི་དོན་ཕུན་སུམ་ཚོགས་པ་བརྙེས་པའི་སྒོ་
[5a.5]ནས་བསྟོད་དེ#། དེ་ལ་མགོན་པོ་ཞེས་བྱ་བས་གཞན་གྱི་དོན་ཕུན་སུམ་ཚོགས་པར་མཛད་པ་སྟོན་ཏེ། སེམས་ཅན་ངན་སོང་གསུམ་དུ་སྐྱེས་པ་རྣམས་དེ་ལས་ཐར་པའི་སྐྱབས་མཛད་པ་དང་། ལྷ་དང་མིར་སྐྱེས་པ་སྐྱེ་རྒ་ན་འཆིས་གཙེས་པ་ཐམས་ཅད་ཀྱི་སྐྱབས་མཛད་པས་ན་སངས་རྒྱས་ལ་མགོན་
[5a.6]པོ་ཞེས་བྱ་སྟེ། སེམས་ཅན་ཐམས་ཅད་ཀྱི་སྐྱབས་དང་དཔུང་གཉེན་དུ་གྱུར་པ་ཡིན་ནོ་ཞེས་བྱ་བའི་དོན་ཏོ། །དེ་ལ་སེམས་ཅན་ངན་སོང་གསུམ་དུ་སྐྱེས་པ་རྣམས་ལ་ནི་འོད་ཟེར་བཀྱེ་བ་དང་སྤྲུལ་པའི་སྐུ་བསྟན་པའི་སྒོ་ནས་ངན་སོང་ལས་ཐར་པར་མཛད་དོ། །ལྷ་དང་མིར་སྐྱེས་པ་སྐྱེ་རྒ་ན་འཆིས་
[5a.7]གཙེས་#པ་རྣམས་ལ་ནི་འཕགས་པའི་བདེན་པ་བཞི་བཤད་ཅིང་དེ་ལ་བཀོད་ནས་སྐྱེ་རྒ་ན་འཆི་ལས་ཐར་པའི་སྒོ་ནས་སྐྱབས་མཛད་དོ། །ཐམས་ཅད་མཁྱེན་ཞེས་བྱ་བས་བདག་གི་དོན་ཕུན་སུམ་ཚོགས་པ་བརྙེས་པ་བསྟན་ཏེ། ཕུང་པོ་དང་ཁམས་དང་སྐྱེ་མཆེད་དང་རྟེན་ཅིང་འབྲེལ་པར་འབྱུང་བ་
[5b]
[5b.1]ལ་སོགས་པ་ཇི་སྙེད་དུ་ཤེས་པར་བྱ་བའི་ཆོས་ཐམས་ཅད་མ་ལུས་པར་ཤེས་ཤིང་། དེ་དག་ཀྱང་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པའི་མཚན་ཉིད་དུ་ཕྱིན་ཅི་མ་ལོག་པར་ཤེས་པས་ན་སངས་རྒྱས་བཅོམ་ལྡན་འདས་ལ་ཐམས་ཅད་མཁྱེན་པ་ཞེས་བྱ་སྟེ། འདི་དག་བདག་
[5b.2]དང་གཞན་གྱི་དོན་ཕུན་སུམ་ཚོགས་པའི་སངས་རྒྱས་ལ་ཕྱག་འཚལ་ཏེ་ཞེས་བྱ་བར་སྦྱར་རོ། །ཆོས་ཞེས་བྱ་བས་ནི་ཆོས་ལ་བསྟོད་ཅིང་ཕྱག་འཚལ་#བར་བསྟན་ཏེ། དེ་ལ་ཆོས་ལ་ཡང་རྣམ་པ་#གསུམ་མོ། །གང་ཞེ་ན། བཤད་པའི་ཆོས་དང་། སྒྲུབ་པའི་ཆོས་དང་། འབྲས་བུའི་ཆོས་
[5b.3]སོ། །དེ་ལ་གསུང་རབ་ཡན་ལག་བཅུ་གཉིས་ནི་བཤད་པའི་ཆོས་སོ། །རང་གི་ལ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནི་སྒྲུབ་#པའི་ཆོས་སོ། །མྱ་ངན་ལས་འདས་པ་ནི་འབྲས་བུའི་ཆོས་སོ། །ཆོས་དེ་གསུམ་ལ་ཕྱག་འཚལ་ཏེ་ཞེས་བྱ་བར་སྦྱར་རོ། །འཕགས་པའི་ཚོགས་ལ་
[5b.4]ཞེས་བྱ་བས་དགེ་འདུན་ལ་བསྟོད་པ་བསྟན་ཏེ། ཉོན་མོངས་པ་དང་སྡིག་པའི་ཆོས་ལས་རིང་དུ་སྤངས་པ་ལ་ནི་འཕགས་པ་ཞེས་བྱ་ལ། འཕགས་པའི་གང་ཟག་དེ་ལྟ་བུ་མང་པོ་ལ་ནི་འཕགས་པའི་ཚོགས་ཞེས་བྱ་སྟེ། དེ་ཡང་མདོར་ན་སློབ་པའི་གང་ཟག་དང་།# མི་སློབ་པའི་གང་ཟག་
[5b.5]འཕགས་#པ་གཉིས་ཡོད་དོ། །དེ་ལ་སློབ་པའི་གང་ཟག་ནི་བདུན་ཡོད་དེ། རྒྱུན་དུ་ཞུགས་པ་དང་། རྒྱུན་དུ་ཞུགས་པའི་འབྲས་བུ་ཐོབ་པ་དང་། ལན་ཅིག་ཕྱིར་འོང་བ་དང་། ལན་ཅིག་ཕྱིར་འོང་བའི་འབྲས་བུ་ཐོབ་པ་དང་། ཕྱིར་མི་འོང་བ་དང་། ཕྱིར་མི་འོང་བའི་འབྲས་བུ་ཐོབ་#པ་དང་། དགྲ་
[5b.6]བཅོམ་པ་ལ་འཇུག་པ་དང་བདུན་ནོ། །མི་སློབ་པའི་གང་ཟག་ནི་དགྲ་བཅོམ་པའི་འབྲས་བུ་ཐོབ་པ་སྟེ། དེ་དག་ལ་ཡང་ཕྱག་འཚལ་ཏེ་ཞེས་བྱ་བ་སྦྱར་རོ། །དེ་ལ་ཕྱག་འཚལ་བ་ཡང་རྣམ་པ་གསུམ་སྟེ། ལུས་ཀྱིས་#ཕྱག་འཚལ་བ་དང་། དག་གིས་ཕྱག་འཚལ་བ་དང་། ཡིད་ཀྱིས་ཕྱག་
[5b.7]འཚལ་བའོ། །དེ་ལ་ལུས་ཀྱིས་ཕྱག་འཚལ་བ་ནི། དཔྲལ་བ་གཏུགས་པ་ཐལ་མོ་སྦྱར་བ་ལ་སོགས་པ་བྱེད་པའོ། །ངག་གིས་ཕྱག་འཚལ་བ་ནི་དེ་དག་གི་ཡོན་ཏན་ཚིག་ཏུ་རྗོད་#པར་བྱེད་པའོ། །ཡིད་ཀྱིས་ཕྱག་འཚལ་བ་ནི་དེ་དག་ལ་དད་པ་དང་དགའ་བ་དང་མོས་བའི་སེམས་ཀྱིས་ཕྱག་འཚལ་
[6a]
[6a.1]བའོ། །ཕྱག་འཚལ་ཏེ་ཞེས་བྱ་བ་ནི་ཕྱག་འཚལ་ནས་ཞེས་བྱ་བའི་དོན་ཏོ། །ཕྱག་འཚལ་ནས་ཅི་བྱ་ཞེ་ན། དགེ་ཚུལ་གྱི་ནི་ཆོ་ག་རྣམས། །མདོ་ཙམ་ངེས་པར་བཤད་པར་བྱ། །ཞེས་བྱ་བ་སྨོས་ཏེ། དགེ་ཚུལ་དགེ་སྦྱོང་རྣམས་ཀྱི་བསླབ་ཚིག་#དང་ལས་སུ་བྱ་བ་རྣམས་
[6a.2]ལ་བྱའོ། །མདོ་ཙམ་ངེས་པར་#བཤད་པར་བྱ་བ་ནི་དགེ་སྦྱོང་གི་བསླབ་ཚིག་#དང་ལས་སུ་བྱ་བ་རྣམས་ནི་ཀཱ་རི་ཀཱ་སུམ་བརྒྱ་པ་དང་། འདུལ་བ་འབུམ་གྱི་ནང་ནས་འབྱུང་བས་དེར་བརྟག་པར་བྱའོ། །འདིར་མདོ་ཙམ་སྟེ། མི་བྱར་མི་གནང་བའི་དམིགས་པ་ཉི་ཚེ་ཙམ་ཞེས་བྱ་བའི་དོན་ཏོ། །
[6a.3]རང་གི་ལྷ་ལ་ཕྱག་འཚལ་བ་དང་བསྟོད་པའི་བཤད་པ་#རྫོགས་སོ།། །།#བསླབ་པ་ཉམས་སུ་བླང་བ་ཡང་ཚིག་རྣམ་པ་བཞི་ཞིག་གིས་སྟོན་ཏེ། གང་ཞེ་ན། ཆོས་ཕུན་སུམ་ཚོགས་པ་དང་། གང་ཟག་ཕུན་སུམ་ཚོགས་པ་དང་། སྒྲུབ་པ་ཕུན་སུམ་ཚོགས་པ་དང་། ཇི་
[6a.4]ལྟར་བསྒྲུབ་པར་བྱ་བའོ། །ཤཱཀྱ་སེང་གེའི་བསྟན་པ་ལ། །ཞེས་བྱ་བས་ཆོས་ཕུན་སུམ་ཚོགས་པ་བསྟན་ཏེ། དེ་ལ་ཆོས་ཕུན་སུམ་ཚོགས་པ་ཡང་ཚིག་རྣམ་པ་གཉིས་སོ། །སྟོན་པ་ཕུན་སུམ་ཚོགས་པ་དང་། བསྟན་པ་ཕུན་སུམ་ཚོགས་པའོ#། །ཤཱཀྱ་སེང་གེ་ཞེས་བྱ་བས་སྟོན་པ་
[6a.5]ཕུན་སུམ་ཚོགས་པ་བསྟན་ཏེ། སྟོན་པ་ནི་སངས་རྒྱས་བཅོམ་ལྡན་འདས་སོ། །སངས་རྒྱས་བཅོམ་ལྡན་འདས་གསུང་དབྱངས་རྣམ་པར་དག་པ་དང་ཐུགས་རྣམ་པར་དག་པས་ན་སྟོན་པ་ཕུན་སུམ་ཚོགས་པ་ཞེས་བྱ་སྟེ། ཤཱཀྱ་ཞེས་བྱ་བས་གདུང་རུས་རྣམ་པར་དག་པ་སྟོན་ཏེ། སྤྱིར་མི་རྣམས་ཀྱི་ནང་དུ་སྐྱེས་པ་ལ་
[6a.6]རིགས་རྣམ་པ་བཞི་ཡོད་དེ། དམངས་རིགས་དང་། རྗེའུ་རིགས་དང་། བྲམ་ཟེའི་རིགས་དང་། རྒྱལ་རིགས་སོ། །སངས་རྒྱས་བཅོམ་ལྡན་འདས་ནི་ཤཱཀྱ་རྣམས་ཀྱི་ནང་དུ་གཽ་ཏ་མའི་རིགས་ཀྱི་གདུང་རུས་དང་ལྡན་པས་ན་ཤཱཀྱ་ཞེས་བྱའོ། །ཤཱཀྱ་ཞེས་བྱ་བས་ནི་གདུང་རུས་རྣམ་པར་དག་པ་
[6a.7]སྟོན་ཏོ། །སེང་གེ་ཞེས་བྱ་#བས་ཐུགས་རྣམ་པར་དག་པ་སྟོན་ཏོ། །དཔེར་ན་སེང་གེ་ནི་དཔའ་བོའི་སེམས་དང་ལྡན་པས་རི་དགས་#རྣམས་ཀྱིས་མི་སྐྲག་ཅིང་རི་དགས་རྣམས་སེང་གེས་ཟིལ་གྱིས་གནོན་པ་དང་འདྲ་བར་སངས་རྒྱས་བཅོམ་ལྡན་འདས་ཀྱང་མི་འཇིགས་པ་བཞི་བརྙེས་པའི་ཐུགས་#
[6b]
[6b.1]དང་#ལྡན་པས་བདུད་དང་མུ་སྟེགས་པ་རི་དགས་དང་འདྲ་བས་སངས་རྒྱས་ཟིལ་གྱིས་མི་ནོན་ཅིང་སྐྲག་པར་བྱེད་མི་ནུས་ལ། སངས་རྒྱས་ནི་བདུད་དང་མུ་སྟེགས་རི་དགས་དང་འདྲ་བ་རྣམས་ཟིལ་གྱིས་གནོན་ཅིང་སྐྲག་པར་བྱེད་པས་ན་སངས་རྒྱས་ལ་སེང་གེ་ཞེས་བྱ་སྟེ། དེ་བས་ན་སེང་གེའི་སྒྲས་
[6b.2]ཐུགས་དག་པ་སྟོན་ཏོ། བསྟན་པ་ཞེས་བྱ་བས་བསྟན་པ་ཕུན་སུམ་ཚོགས་པ་སྟོན་#ཏོ། །སློབ་མ་རྣམས་ལ་འདི་དག་ནི་བསྒྲུབ་པར་བྱ་བ་ཡིན། འདི་དག་ནི་སྤང་བར་བྱ་བ་ཡིན་ནོ་ཞེས་སྟོན་པའི་ཆོས་ལ་བསྟན་པ་ཞེས་བྱ་སྟེ། འདུལ་བའི་སྡེ་སྣོད་དང་། མདོ་སྡེའི་སྡེ་སྣོད་དང་། མངོན་པའི་
[6b.3]ཆོས་ཀྱི་སྡེ་སྣོད་དོ། །དེ་ལས་རབ་ཏུ་བྱུང་བ་རྣམས་ཀྱིས་བསླབ་ཚིག་#རྣམ་པ་གསུམ་སྟེ། ལྷག་པ་ཚུལ་ཁྲིམས་ཀྱི་བསླབ་པ་དང་། སེམས་ཀྱི་བསླབ་པ་དང་། ཤེས་རབ་ཀྱི་བསླབ་པའོ། །དེ་འདུལ་བའི་སྡེ་སྣོད་ཀྱི་ནང་ནས་ནི་ལྷག་པ་ཚུལ་ཁྲིམས་ཀྱི་བསླབ་པ་འབྱུང་ངོ་། །མདོ་སྡེའི་སྡེ་སྣོད་
[6b.4]ལས་ནི་ལྷག་པ་སེམས་ཀྱི་བསླབ་པ་འབྱུང་ངོ་། །མངོན་པའི་ཆོས་ཀྱི་སྡེ་སྣོད་ནས་ནི་ལྷག་པ་ཤེས་རབ་ཀྱི་བསླབ་པ་འབྱུང་སྟེ། དེ་ལྟར་#སྡེ་སྣོད་གསུམ་ལ་བསྟན་པ་ཞེས་བྱའོ། །དད་པས་རབ་ཏུ་བྱུང་ནས་ནི། །ཞེས་བྱ་བས་གང་ཟག་ཕུན་སུམ་ཚོགས་པ་སྟོན་ཏེ། གང་ཟག་ཕུན་སུམ་
[6b.5]ཚོགས་པ་ཡང་རྣམ་པ་གཉིས་ཀྱིས་ཕུན་སུམ་ཚོགས་སོ། །གང་ཞེ་ན། བསམ་པ་ཕུན་སུམ་ཚོགས་པ་དང་། སྦྱོར་བ་ཕུན་སུམ་ཚོགས་པའོ། །དད་པ་ཞེས་བྱ་བས་བསམ་པ་ཕུན་སུམ་ཚོགས་པ་བསྟན་ཏེ། ལས་དང་འབྲས་བུ་ལ་སོགས་པ་ནི་ཡོད་པར་ཡིད་ཆེས་པ་དང་།
[6b.6]དཀོན་མཆོག་གསུམ་ལ་ནི་ཡོན་ཏན་ཕུན་སུམ་ཚོགས་པ་དང་ལྡན་པར་སེམས་པ་དང་། འཕགས་པའི་ལམ་ནི་བསྒྲུབ་པར་འདོད་པ་དང་། མྱ་ངན་ལས་འདས་པ་ཐོབ་པར་འདོད་པའི་སེམས་ལ་ནི་དང་བ་ཞེས་བྱའོ། །དད་པས་ཞེས་བྱ་བ་ནི། དད་པའི་སེམས་ཀྱིས་རྒྱུར་#བྱས་ནས། །ཞེས་བྱ་བའི་
[6b.7]དོན་ཏོ། །རབ་ཏུ་བྱུང་ནས་ནི་ཞེས་བྱ་བས་ནི་སྦྱོར་བ་ཕུན་སུམ་ཚོགས་པ་བསྟན་ཏེ། དཀོན་མཆོག་གསུམ་ལ་སྐྱབས་སུ་སོང་ཞིང་བསླབ་ཚིག་#བཅུ་མནོས་པ་ལས་རབ་ཏུ་བྱུང་བ་ཞེས་བྱའོ། །ཡང་ན། དད་པས་རབ་ཏུ་བྱུང་ནས་ནི། །ཞེས་བྱ་བའི་ཚིག་འདིས་བཅོམ་ལྡན་འདས་ཀྱིས་འདུལ་བ་ལས་སྐྲ་
[7a]
[7a.1]དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པས་ཡང་དག་པ་ཁོ་ནར་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་ཞེས་རབ་ཏུ་བྱུང་བའི་མཚན་ཉིད་གསུངས་པའི་དོན་བསྟན་པ་ཡིན་ཏེ། ཚིག་འདིས་ནི་རབ་ཏུ་བྱུང་བ་རྣམས་#ཀྱི་ཕུན་སུམ་ཚོགས་པ་རྣམ་པ་བཞི་བསྟན་
[7a.2]པ་ཡིན་ནོ། །རྣམ་པ་བཞི་གང་ཞེ་ན། ཚུལ་ཁྲིམས་ཕུན་སུམ་ཚོགས་པ་དང་། །ལས་ཕུན་སུམ་ཚོགས་པ་དང་། གནས་ཕུན་སུམ་ཚོགས་པ་དག# །བསམ་པ་ཕུན་སུམ་ཚོགས་པའོ། །དེ་ལ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་ཞེས་བྱ་བས་ཚུལ་ཁྲིམས་ཕུན་སུམ་
[7a.3]ཚོགས་པ་བསྟན་ཏེ། དེ་ཚུལ་དེ་ལས་ཉོན་མོངས་པ་སྤོང་བ་དང་མཐུན་པའི་ཚུལ་ཡིན་པས་ཁྱིམ་ན་གནས་པའི་ཚུལ་ལས་འཕགས་པ་ཡིན་ནོ། །དད་པས་ཡང་དག་པ་ཁོ་ནར་ཞེས་བྱ་བས་བསམ་པ་ཕུན་སུམ་ཚོགས་པ་བསྟན་ཏེ། བུ་ལོན་མ་འཁོར་#བ་དང་རྒྱལ་པོ་ལ་སོགས་པའི་འཇིགས་
[7a.4]པས་རབ་ཏུ་བྱུང་བ་མ་ཡིན་གྱི་དད་པའི་སེམས་ཀྱིས་རབ་ཏུ་བྱུང་བ་ཡིན་ནོ། །རབ་ཏུ་བྱུང་ཞེས་བྱ་བས་ནི་ལས་ཕུན་སུམ་ཚོགས་པ་བསྟན་ཏེ། བྱ་བ་མཆོག་ཏུ་གྱུར་པ་ལ་ཞུགས་པའི་ཕྱིར་རོ། །ཁྱིམ་ནས་ཁྱིམ་མེད་པར་རབ་ཏུ་བྱུང་ཞེས་བྱ་བས་ནི་གནས་ཕུན་སུམ་ཚོགས་པ་བསྟན་ཏེ། བུ་སྨད་
[7a.5]དང་ཉེ་དུ་ལ་སོགས་པའི་འཇིགས་པ་མི་བཟད་པའི་གནས་སྤངས་ནས་ཁྱིམ་མེད་པར་ཤིང་དྲུང་དང་བྲག་ཕུག་ན་གནས་པས་ན། གནས་ཕུན་སུམ་ཚོགས་པའོ། །རབ་ཏུ་བྱུང་ནས་ནི་ཞེས་བྱ་བས་ནི་རབ་ཏུ་བྱུང་བའི་འོག་ཏུ་ཞེས་བྱ་བའི་དོན་ཏོ། །བརྟུལ་ཞུགས་བརྟན་#པས་རབ་བསྒྲིམས་ཏེ། །ཞེས་
[7a.6]བྱ་བས་སྒྲུབ་པ་ཕུན་སུམ་ཚོགས་པ་སྟོན་ཏེ། བརྟུལ་ཞུགས་ཞེས་བྱ་བས་ནི་རང་བཞིན་གྱི་#ཁ་ན་མ་ཐོ་བ་དང་། བཅས་པའི་ཁ་ན་མ་ཐོ་བའི་བསླབ་པ་ལ་བྱའོ། །དེ་ལ་རང་བཞིན་གྱི་ཁ་ན་མ་ཐོ་བའི་བསླབ་ཚིག་#ནི་ཕས་ཕམ་པ་བཞིའོ། །བཅས་པའི་ཁ་ན་མ་ཐོ་བའི་བསླབ་ཚིག་#ནི་ཆང་མི་བཏུང་བ་
[7a.7]ལ་སོགས་པ་རྣམ་པ་དྲུག་གོ། །བརྟན་པས་རབ་བསྒྲིམས་#ཏེ་ཞེས་བྱ་བས་ནི་ལུས་ངག་ཡིད་གསུམ་གྱིས་རབ་ཏུ་བསྒྲིམས་ལ་ཕས་ཕམ་པ་མི་འབྱུང་བར་བྱ་བའི་ཕྱིར་བསྟན་#པ་སྟེ། ཉེས་པ་ཕྲན་ཚེགས་#ཀྱང་མི་འབྱུང་བར་བསྲུང་བའོ། །དེ་ཡང་ཤིང་ཆེན་པོ་བསྲུང་ན་དེ་ལ་བསྐོར་བའི་ར་བ་དང་ཤིང་ཐགས་
[7b]
[7b.1]རྣམས་ཅི་ནས་ཀྱང་མི་གཞིག་#པར་བྱའོ། །དེ་དང་འདྲ་བར་ཕས་ཕམ་པ་མི་འབྱུང་བར་བྱ་ན་ར་བ་དང་ཤིང་ཐགས་ལྟ་བུའི་བསླབ་པ་ཕྲན་ཚེགས་རྣམས་མ་ཞིག་པར་བསྲུངས་ན་ཚུལ་ཁྲིམས་བརྟན་པར་བསྲུང་བ་ཡིན་ནོ། །བདག་གི་ལུས་བཞིན་བསླབ་པ་བསྲུང་། །ཞེས་བྱ་བས་ཇི་ལྟར་བསྒྲུབ་
[7b.2]པར་#བསྟན་ཏེ། དཔེར་ན་བདག་གི་ལུས་འདི་ལ་དུག་དང་ཚེར་མ་དང་ངམ་གྲོག་#ལ་སོགས་པས་འཆི་བར་མི་འགྱུར་བར་བསྲུང་བ་དང་། བཟའ་བ་དང་བགོ་བ་དང་སྨན་ལ་སོགས་པས་ཅི་ནས་ཀྱང་མི་བརྙས་པར་བྱ་བའི་ཚུལ་དུ་བསྲུང་བ་དང་འདྲ་བར་ཚུལ་ཁྲིམས་ཀྱང་ཅི་ནས་ཀྱང་མི་ཞིག་པར་བསྲུང་བ་
[7b.3]དང་། རྣམ་པར་དག་པའི་ཚུལ་དུ་བསྲུང་བའོ། །བསླབ་པ་ཉམས་སུ་བླང་བའི་བཤད་པ་རྫོགས་སོ།། །།#སྔ་དྲོའི་དུས་ན་ལས་གང་བྱ་བ་བསྟན་པ་ལ་རྣམ་པ་བརྒྱད་བྱ་བར་བསྟན་ཏེ། ཁ་ཏོན་བྱ་བ་དང་། དེ་བཞིན་གཤེགས་པ་ལ་ཕྱག་འཚལ་བ་དང་། མཁན་པོ་དང་སློབ་
[7b.4]དཔོན་ལ་སྙུན་#གསོལ་ནས་ལས་སུ་བྱ་བ་ཞུ་བ་དང་། ཆུ་བརྟག་པ་དང་། མཁན་པོ་དང་སློབ་དཔོན་གྱི་ལས་སུ་བྱ་བ་བསྒྲུབ་པ་དང་། ཞུ་བ་དང་། ཟས་བཟའ་བ་དང་། བསོད་ནམས་བསྔོ་བ་དང་བརྒྱད་བྱའོ། །ནམ་གྱི་ཆ་སྨད་མལ་ནས་ལངས། །ནམ་ལངས་བར་དུ་ཁ་ཏོན་བྱ། །ཞེས་བྱ་བས་
[7b.5]ཁ་ཏོན་བྱ་བ་བསྟན་ཏོ། །དེ་ནམ་གྱི་ཆ་སྨད་ནི་མཚན་གཅིག་ལ་ཐུན་ལྔར་བགོས་པ་ལས་ཐོ་རངས་ལ་བྱ་སྟེ། ཐོ་རངས་མལ་ནས་ལངས་ནས་ནི་ཙོག་ཙོག་པོར་འདུག་ལ་ལྷ་མ་སྲིན་ལ་ཆོས་ཀྱི་སྦྱིན་པ་བྱའོ་སྙམ་དུ་བསམས་ནས་ལྷ་མ་སྲིན་རྣམས་ལ་ཚིགས་སུ་བཅད་པ་སྟེར་བ་ལ་བོས་ཏེ་ནམ་
[7b.6]ལངས་ཀྱི་བར་དུ་ཁ་ཏོན་ཅི་ནུས་སུ་བྱའོ། །ཁ་ཏོན་བྱས་པའི་བསོད་ནམས་སེམས་ཅན་ཀུན་གྱི་དོན་དུ་བསྔོ་བའོ། །གདོང་དང་སོ་ཡི་དྲི་བཀྲུས་ནས། །རྫོགས་སངས་རྒྱས་ལ་གུས་ཕྱག་བྱ། །ཞེས་བྱ་བས་དེ་བཞིན་གཤེགས་པ་ལ་ཕྱག་བྱ་བ་བསྟན་ཏེ། ལངས་ནས་ཆུ་དང་སོ་ཤིང་ལ་
[7b.7]སོགས་པས་སོ་དང་གདོང་གི་དྲི་མ་བཀྲུས་ནས་རྫོགས་སངས་རྒྱས་ཏེ་སངས་རྒྱས་བཅོམ་ལྡན་འདས་རྣམས་ལ་གུས་པས་ཕྱག་བྱའོ། །དེ་ལ་ཆོས་ཐམས་ཅད་ཐུགས་སུ་ཆུད་ཅིང་ཡོན་ཏན་ཕུན་སུམ་ཚོགས་པ་མ་ལུས་པར་བརྙེས་པས་#ན་རྫོགས་པ་ཞེས་བྱའོ། །སྐྱེས་བུ་གཉིད་ལས་སངས་
[8a]
[8a.1]པ་བཞིན་དུ་མ་རིག་པ་སྤངས་ནས། མ་རིག་པའི་གཉིད་ལས་སངས་པས་ན་སངས་རྒྱས་ཞེས་བྱའོ། །གུས་ཕྱག་བྱ་ཞེས་བྱ་བས་གུས་པར་ཕྱག་བྱ་བ་ལ་#ཡང་རྣམ་པ་གསུམ་སྟེ། ལུས་ཀྱིས་གུས་པར་ཕྱག་བྱ་བ་དང་། ངག་གིས་གུས་པར་ཕྱག་བྱ་བ་དང་། ཡིད་ཀྱིས་
[8a.2]གུས་པར་ཕྱག་བྱ་བའོ། །དེ་ལ་ལུས་སྨད་#ལྔ་ས་ལ་གཏུགས་ཏེ་ཞི་བའི་ཚུལ་གྱིས་ཕྱག་བྱ་བ་ནི་ལུས་ཀྱིས་གུས་པར་ཕྱག་བྱ་བའོ། །མི་དྲག་མི་ངལ་བའི་དབྱངས་གྱིས་དེ་བཞིན་གཤེགས་པ་ལ་བསྟོད་པ་ནི་ངག་གིས་གུས་པར་ཕྱག་བྱ་བའོ། །ལུས་ཀྱིས་གུས་པར་ཕྱག་བྱ་བའི་སྔོན་རོལ་དུ་
[8a.3]སངས་རྒྱས་བཅོམ་ལྡན་འདས་ནི་ཉེས་པ་ཐམས་ཅད་སྤངས་པས་#ཡོན་ཏན་ཕུན་སུམ་ཚོགས་པ་དང་ལྡན་པ་ཐུགས་རྗེ་ཆེན་པོ་ཅན་ཞེས་སེམས་ཅན་ཐམས་ཅད་ཀྱི་མགོན་དང་སྐྱབས་སུ་གྱུར་པ། འགྲོ་བ་ཐམས་ཅད་ཀྱི་བསོད་ནམས་ཀྱི་གཞི་ཡིན་པས་ཕྱག་བྱ་བའི་གནས་ཡིན་ནོ་སྙམ་དུ་སེམས་
[8a.4]པ་ནི་ཡིད་ཀྱིས་#གུས་པར་ཕྱག་བྱ་བ་སྟེ། དེ་ལྟ་བུའི་སེམས་སྔར་བསྐྱེད་ལ་དེ་ནས་གདོད་ལུས་ངག་གིས་ཕྱག་བྱ་བས་ཕྱག་བྱའོ། །བླ་མ་གནས་པའི་སྒོ་གླེགས་ལ། །ལག་པས་དལ་གྱིས་#བརྡུང་བར་བྱ། །ནང་ཞུགས་གུས་པར་བླ་མ་ལ། །ཁམས་བདེ་མི་བདེ་ལ་སོགས་དྲི། །
[8a.5]འདི་དག་བྱ་ཞེས་དྲིས་ནས་ནི། །དཀྱིལ་འཁོར་ལ་སོགས་རྣམ་བྱའི་ཕྱིར། །ཞེས་བྱ་བས་མཁན་པོ་དང་སློབ་དཔོན་ལ་སྙུན་#གསོལ་ནས་ལས་སུ་བྱ་བ་ཞུ་བ་བསྟན་ཏེ། བླ་མ་གནས་པའི་སྒོ་གླེགས་ལ། །ལག་པས་དལ་གྱིས་བརྡུང་བར་བྱ། །ཞེས་བྱ་བ་ལ་དེ་ལྟར་སངས་རྒྱས་ལ་ཕྱག་བྱས་
[8a.6]པའི་འོག་ཏུ་བླ་མ་སྟེ་མཁན་པོ་དང་སློབ་དཔོན་གྱི་གནས་སུ་སོང་ལ་སྒོ་འཕར་ལ་ལག་པས་དལ་གྱིས་བརྡུང་བའམ། སེ་གོལ་གཏོགས་ཏེ་ནང་དུ་ཤོག་ཅིག་ཅེས་ཟེར་ན་ནང་དུ་འགྲོ་བར་བྱའོ། །དེ་ལྟར་སྒྲ་མ་བྱུང་ན་ཡང་ལན་གཉིས་ཀྱི་བར་དུ་དེ་བཞིན་དུ་བྱའོ། །དེ་སྟེ་སྒྲ་མ་བྱུང་ན་ཡང་ལན་གཉིས་ལན་
[8a.7]གསུམ་གྱི་བར་དུ་དེ་བཞིན་དུ་བྱའོ། །དེ་ནས་ནང་དུ་ཤོག་ཅིག་ན་གདོད་ནང་དུ་འགྲོ་བར་བྱའོ། །ཐུག་#ཐུབ་ཏུ་མི་བྱ་བར་ཚུལ་འདི་ལྟར་བྱ་བ་ནི་དགེ་སྦྱོང་གི་ཚུལ་ཞི་བ་དང་དུལ་བའི་རང་བཞིན་ཡིན་པའི་ཚུལ་བསྟན་པར་བྱ་བ་དང་། ཐུག་#ཐུབ་ཏུ་ཞུགས་ན་བླ་མ་རྣམས་ཀྱིས་#དགེ་བའི་བར་ཆད་དུ་གྱུར་#
[8b]
[8b.1]ཞིང་སེམས་འཁྲུག་པར་འགྱུར་བས་བླ་མའི་སེམས་མི་འཁྲུག་པར་བྱ་བའི་ཕྱིར་ཚུལ་དེ་ལྟར་བྱའོ། །དེ་ནས་བླ་མས་ནང་དུ་ཤོག་ཅིག་ཅེས་སྨྲས་ཏེ་ནང་དུ་ཞུགས་ནས་ཅི་བྱ་ཞེ་ན། དེའི་ཕྱིར། ནང་ཞུགས་གུས་པས་བླ་མ་ལ། །ཁམས་བདེ་མི་བདེ་ལ་སོགས་དྲི། །ཞེས་བྱ་བ་སྨོས་ཏེ། ཁམས་ཀྱི་
[8b.2]སྒྲས་ནི་ས་དང་ཆུ་དང་མེ་དང་རླུང་དང་འབྱུང་བ་ཆེན་པོ་བཞི་ལ་བྱ་སྟེ། འབྱུང་བ་ཆེན་པོ་བཞི་ཤས་ཆེ་ཆུང་དུ་གྱུར་པ་ལས་ནད་དུ་འགྱུར་རོ། །དེ་ལ་སའི་ཁམས་ཤས་ཆེ་ན་ནི་ཁ་ཟས་མི་འཇུ་ཞིང་ལུས་ལྕིའོ། །ཆུའི་ཁམས་ཤས་ཆེ་ན་ནི་བད་ཀན་ཤས་ཆེའོ། །མེའི་ཁམས་ཤས་ཆེ་ན་ནི་མཁྲིས་པ་
[8b.3]ཅན་དུ་འགྱུར་རོ། །རླུང་གི་ཁམས་ཤས་ཆེ་#ན་ནི་རླུང་ནད་ཅན་དུ་འགྱུར་རོ། །དེ་ལྟར་ནང་དུ་ཞུགས་ནས་ཞི་བ་དང་དུ་ལ་བ་དང་སྲིད་#ཞུའི་ཚུལ་གྱིས་ཕྱག་བྱ་སྟེ། ཁམས་བཞི་#མ་སྙོམས་པ་ལས་སྙུན་#དུ་གྱུར་པ་མཆིས་སམ་མ་མཆིས་སྙུན་#གསོལ་ལོ། །སོགས་#པའི་སྒྲས་ནི་མཚན་མོ་བདེ་བར་མནལ་
[8b.4]ལམ་མ་མནལ། དགོངས་པ་ལ་བར་ཆད་དུ་གྱུར་ཏམ་མ་གྱུར་ཞེས་བྱའོ། །དེ་ལྟར་སྙུན་#གསོལ་ནས་ཅི་ཞིག་བྱ་ཞེ་ན། དེའི་ཕྱིར་ན། འདི་དག་བྱ་ཞེས་དྲིས་ནས་ནི། །དཀྱིལ་འཁོར་ལ་སོགས་རྣམ་བྱའི་ཕྱིར། །ཞེས་བྱ་བ་སྨོས་ཏེ། སྙུན་#གསོལ་བའི་འོག་ཏུ་མཆོད་རྟེན་ལ་ཕྱག་བྱ་ཞིང་བསྐོར་
[8b.5]བ་དང་བཤང་གཅི་ཆེ་ཆུང་དུ་འགྲོ་བ་མ་གཏོགས་པར་ནང་པར་སྔ་དྲོའི་བར་དུ་ཅི་དང་ཅི་བྱ་བ་ཐམས་ཅད་ཞུའོ། །དེ་ལྟར་ཞུས་#པའི་འོག་ཏུ་དཀྱིལ་འཁོར་བྱས་ལ་དེ་ནས་གདོད་གཡར་ཚུས་བཟའོ། །སོགས་#པའི་སྒྲས་ནི་མེ་ཏོག་དང་བདུག་པ་ལ་སོགས་པ་མཆོད་པ་ཡང་བསྡུའོ། །ཉ་ཕྱིས་ལ་སོགས་
[8b.6]ཆུ་བརྟགས་ཏེ། །སྟེང་དང་བར་གཏིང་རིམ་བཞིན་ནོ། །ཉ་ཕྱིས་ལ་སོགས་མེད་ན་ཡང་། །ཁྱོར་བའམ་འདབ་མས་བུམ་པ་དགང་། །ཆུ་ཡི་སྐྱེ་བོ་ཆེ་ཆུང་རྣམས། །ཡུན་མི་རིང་བར་ནན་ཏན་བརྟག །སྙིང་རྗེ་ཅན་གྱིས་#ཁུ་བ་རྣམས། །རབ་ཏུ་བརྟགས་ཏེ་སྤྱད་པར་བྱ། །སྲོག་ཆགས་
[8b.7]ཡོད་ན་ལེགས་པར་བཙག །སྲོག་ཆགས་རྣམས་ལ་གནོད་མི་བྱ། །རྩྭ་#དང་ལྕི་བ་ཤིང་ལ་སོགས། །དགོས་པ་གང་དང་གང་ཡང་རུང་། །དེ་དག་སྲོག་ཆགས་མེད་པར་བྱ། །སྡོམ་པས་སྲོག་ཆགས་གསད་པ་སྲུང་#། །ཞེས་བྱ་བས་ཆུ་ལ་སོགས་པ་བརྟག་པར་བསྟན་ཏེ། དེ་དག་#
[9a]
[9a.1]དཀྱིལ་འཁོར་བྱས་ནས་གཡར་ཚུས་ཐོབ་པའི་འོག་ཏུ་ཅི་བྱ་ཞེ་ན། དེའི་ཕྱིར། ཉ་ཕྱིས་ལ་སོགས་ཆུ་བརྟགས་ཏེ། །ཞེས་བྱ་བ་ལ་སོགས་པ་སྨོས་ཏེ། དེའི་འོག་ཏུ་ཆུ་ཚགས་ལྔ་འདུལ་བ་ལས་གསུངས་པའི་ཆུ་ཚགས་གང་ཡང་རུང་བ་ཅིག་གིས་ཆུ་བཙག་
[9a.2]གོ། །དེ་ལ་ཆུ་ཚགས་ལྔ་ནི་རིལ་བ་དང་། གྲུ་གསུམ་པ་དང་། ཡུ་བ་ཅན་དང་། ཆོས་ཅན་ཞེས་བྱ་བ་དང་། གྲོལ་བར་བྱེད་པའི་རས་སོ། །དེ་ལྟར་ཆུ་བཙགས་ནས་བཙགས་#པ་ཙམ་གྱིས་ཀྱང་མི་ཆོག་སྟེ། ཉ་ཕྱིས་ལ་སོགས་པ་ཆུས་གང་བར་བཀང་ལ་སྲོག་ཆགས་ཡོད་དམ་
[9a.3]མེད་བརྟག་གོ། །སོགས་#པའི་སྒྲས་ནི་དུང་ཕོར་རྣམས་ཀྱང་བསྡུས་སོ། །ཇི་ལྟར་བརྟག་ཅེ་ན། དེའི་ཕྱིར། སྟེང་དང་བར་གཏིང་རིམ་བཞིན་ནོ། །ཞེས་བྱ་བ་སྨོས་ཏེ། བརྟག་པའི་རིམ་པ་ནི་ཐོག་མར་ཆུའི་སྟེང་ན་སྲོག་ཆགས་ཡོད་དམ་མེད་བརྟག་གོ། །དེ་ནས་བར་དུ། དེ་ནས་གཏིང་#སྟེ་
[9a.4]ཞབས་སུ་བརྟགས་ལ། སྲོག་ཆགས་མེད་ན་ནི་ཆུ་དེ་སྤྱད་དུ་རུང་ངོ་། །སྲོག་ཆགས་ཡོད་ན་ནི་ཆུ་དེ་སྤྱད་དུ་མི་རུང་བས་སླར་སྔ་མའི་གནས་སུ་དབོའོ། །གལ་ཏེ་ཉ་ཕྱིས་དང་དུང་ཕོར་མ་འབྱོར་ན་ཇི་ལྟར་བྱ་སྙམ་པ་ལ། དེའི་ཕྱིར། ཉ་ཕྱིས་ལ་སོགས་མེད་ན་ཡང་། །ཁྱོར་བའམ་འདབ་མས་བུམ་པ་
[9a.5]དགང་#། །ཞེས་བྱ་བ་སྨོས་ཏེ། ཉ་ཕྱིས་དང་དུང་ཕོར་མ་འབྱོར་ན་ཡང་ཁྱོར་བ་#བཀང་སྟེ་བརྟག་གོ། །འདིར་ཡང་སྟེང་དང་བར་གཏིང་རིམ་བཞིན་དུ་བརྟག་པ་ནི་སྔ་མ་བཞིན་ནོ། །འདིའི་སྐབས་སུ་#ཇི་ལྟར་བརྟག་ཅེ་ན། དེའི་ཕྱིར། ཆུ་ཡི་སྐྱེ་བོ་ཆེ་ཆུང་རྣམས། །ཡུན་མི་རིང་བར་ནན་ཏན་བརྟག །
[9a.6]ཅེས་བྱ་བ་སྨོས་ཏེ། ཆུ་བརྟག་པ་ཡང་མིག་ནད་ཀྱིས་ཕོག་པའམ། མིག་ལིང་ཏོག་#གིས་ཁེབས་པས་ནི་མི་བརྟག་གི་མིག་གསལ་བས་ཆུ་ན་གནས་པའི་སྲོག་ཆགས་ཕྲ་མོ་དང་སྦོམ་པོ་རྣམས་ཡོད་དམ་མེད་བརྟག་གོ། །མིག་གསལ་བས་བརྟགས་ན་ཡང་ཡུན་རིང་དུ་མིག་བགྲད་#དེ་
[9a.7]བལྟས་ན་མིག་ཟི་ཟི་པོར་འགྱུར་བས་#སྲོག་ཆགས་མི་མཐོང་བའི་ཕྱིར་ཡུན་མི་རིང་བར་ཡང་ནས་ཡང་དུ་མིག་གསལ་བས་བརྟག་སྟེ། སྲོག་ཆགས་མེད་པར་ཡིད་ཆེས་ཀྱི་བར་དུ་བརྟག་གོ། །དེ་བས་ན་ནན་ཏན་བརྟག་ཅེས་སྨོས་ཏེ། སྲོག་ཆགས་མེད་པར་ཡིད་ཆེས་ཤིང་ཐེ་ཚོམ་མེད་
[9b]
[9b.1]ཀྱི་བར་དུ་བལྟའོ་ཞེས་བྱ་བའི་དོན་ཏོ། །ཅིའི་ཕྱིར་དེ་ལྟར་བརྟག་ཅེ་ན། དེའི་ཕྱིར་སྙིང་རྗེ་ཅན་གྱིས་ཞེས་བྱ་བ་སྨོས་ཏེ། རབ་ཏུ་བྱུང་བ་རྣམས་ནི་སེམས་ཅན་གྱི་སྡུག་བསྔལ་སེལ་བར་བྱེད་པའི་སྙིང་རྗེ་དང་ལྡན་པ་ཡིན་པས། དེའི་ཕྱིར་སེམས་ཅན་གྱི་གནོད་པ་བསལ་བའི་དོན་དུ་སྲོག་ཆགས་ཡོད་
[9b.2]དམ་མེད་བརྟག་གོ། །གལ་ཏེ་ཆུ་ལས་སྐྱེས་པའི་སྲོག་ཆགས་ནི་མེད་ཀྱི་སྦྲང་བུ་ལ་སོགས་པ་གློ་#བུར་དུ་འོངས་པས་ཆུ་དེ་སྲོག་ཆགས་དང་ལྡན་པར་གྱུར་པ་དང་། ཁ་ཟས་ཀྱི་ཁུ་བ་ལ་སོགས་པ་ལ་གློ་#བུར་གྱི་སྲོག་ཆགས་ཡོད་པར་གྱུར་ན་དེ་དག་དོར་བར་ཇི་ལྟར་བྱ་སྙམ་པ་ལ་ཁུ་བ་རྣམས་རབ་ཏུ་
[9b.3]བརྟགས་ཏེ་སྤྱད་པར་བྱ་ཞེས་བྱ་བ་སྨོས་ཏེ། ཆུ་བཙགས་པ་དང་ཁ་ཟས་ཀྱི་ཁུ་བ་ལ་གློ་བུར་དུ་འོངས་པའི་སྲོག་ཆགས་ཡོད་པར་གྱུར་ན་ཡང་ཡོད་དམ་མེད་ལེགས་པར་བརྟགས་ཏེ་སྤྱད་#པར་བྱའོ། །དོར་བར་ནི་མི་བྱའོ། །ཐབས་ཇི་ལྟར་བྱ་ཞེ་ན། དེའི་ཕྱིར། སྲོག་ཆགས་ཡོད་ན་ལེགས་
[9b.4]པར་བཙག །སྲོག་ཆགས་རྣམས་ལ་གནོད་མི་བྱ། །ཞེས་བྱ་བ་སྨོས་ཏེ། བཙགས་པ་དང་ཁ་ཟས་ཀྱི་ཁུ་བ་ལ་གློ་བུར་དུ་འོངས་པའི་སྲོག་ཆགས་ཡོད་ན་ལེགས་པར་མ་སྣད་པར་བཙགས་པར་རིག་#པ་ནི་བཙག །ལག་པས་བསལ་བར་རིག་#པ་ནི་ལེགས་པར་བསལ་ལ་སོ་སོའི་གནས་སུ་
[9b.5]མ་སྣད་མ་ཤི་བར་བསྐྱལ་བར་བྱའོ། །དེ་ལ་ཆུ་གྲང་མོ་ལ་གནས་པའི་སྲོག་ཆགས་རྣམས་ཆུ་དྲོན་མོ་ལ་བསྐྱལ་ན་གནོད་པར་འགྱུར་བས་ཆུ་གྲང་མོ་ཉིད་དུ་བསྐྱལ་ལོ། །ཆུ་དྲོན་མོ་ལ་གནས་པའི་སྲོག་ཆགས་རྣམས་ཆུ་གྲང་མོ་ལ་བསྐྱལ་ན་གནོད་པར་འགྱུར་བས་#ཆུ་དྲོན་མོ་ཉིད་དུ་བསྐྱལ་ལོ། །
[9b.6]གལ་ཏེ་མ་བྱས་པར་སྲོག་ཆགས་དང་བཅས་པའི་ཆུ་འཐུངས་སམ། སྲོག་ཆགས་རྣམས་རང་རང་གི་གནས་མ་ཡིན་པར་བསྐྱལ་ཏེ། ཤི་བར་གྱུར་ན་སྲོག་ཆགས་ཀྱི་གྲངས་དུ་ཡོད་པའི་ཉེས་བྱས་ཀྱི་གྲངས་ཀྱང་དེ་སྙེད་ཅིག་འཐོབ་བོ། །ཆུ་བཙགས་ཏེ་བརྟགས་པ་དེ་ཡང་དེ་རིང་ལྟ་བུའི་ནང་པར་
[9b.7]བརྟགས་ན། དེའི་ཕྱི་#དེ་ཉིད་ཀྱི་ནང་པར་གྱི་བར་དུ་སྤྱད་པར་བྱར་རུང་ངོ་། །ཆུ་རྣམ་པ་ལྔ་ནི་བདག་གིས་མ་བཙགས་མ་བརྟགས་ཀྱང་སྤྱད་དུ་རུང་བའི་ཆུ་སྟེ། ལྔ་གང་ཞེ་ན། ཁོ་ར་ཁོར་ཡུག་འདོམ་གང་དུ་བརྟགས་པའི་ཆུ་དང་། ཁྲོན་པ་ལ་སོགས་པ་དང་། དགེ་སློང་ཡོན་ཏན་ཅན་གྱི་ཆུ་དང་། དགེ་
[10a]
[10a.1]འདུན་གྱི་ཆུ་དང་། ཡིད་ཆས་པའི་ཆུའོ། །དེ་ལ་ཁོ་ར་ཁོར་ཡུག་འདོམ་གང་དུ་བརྟགས་པའི་ཆུ་ནི་ལྟེང་ཀའམ་མཚེའུ་ལ་སོགས་པའི་དབུས་སུ་པུས་མོ་ནུབ་ཙམ་དུ་སོང་ལ་སྲོག་ཆགས་ཡོད་དམ་མེད་བརྟགས་ཏེ་མེད་པར་གྱུར་ན་འདོམ་གང་ཁོ་ར་ཁོར་ཡུག་ཏུ་བརྟགས་པ་ཡིན་པར་སྤྱད་
[10a.2]དུ་རུང་ངོ་། །ཁྲོན་པ་ལ་སོགས་པའི་ཆུ་ནི་ཁྲོན་པ་དང་ལྟེང་ཀ་དང་རྫིང་ལ་སོགས་པར་ཉ་ཕྱིས་གང་གི་ཆུ་བླངས་ཏེ། སྲོག་ཆགས་ཡོད་དམ་མེད་བརྟགས་ཏེ་མེད་ན་ཉིན་ཞག་གཅིག་གི་བར་དུ་སྤྱད་དུ་རུང་ངོ་། །དགེ་སློང་ཡོན་ཏན་ཅན་གྱི་ཆུ་ནི་དགེ་སློང་ཚུལ་ཁྲིམས་ལ་གནས་པ་སྡིག་པ་ལ་འཛེམ་པས་
[10a.3]ཆུ་བཙགས་ཏེ་བཙགས་པ་ལ་བདག་གིས་མ་བརྟགས་མ་བཙགས་པར་སྤྱད་དུ་རུང་ངོ་། །དགེ་འདུན་གྱི་ཆུ་ནི་དགེ་འདུན་སྤྱིའི་ཆུ་ལྟ་བུ་བརྟགས་ནས་བཙགས་ཏེ་#བཞག་པ་ལ་ནི་བདག་གིས་མ་བརྟགས་མ་བཙགས་ཀྱང་སྤྱད་དུ་རུང་ངོ་། །ཡིད་ཆེས་པའི་ཆུ་ནི་བྲག་ཁའམ། རི་ཁ་གཟར་པོ་ནས་འབབ་
[10a.4]པའི་ཆུའམ། སའི་འོག་ནས་གྱེན་དུ་རྡོལ་པའི་#ཆུ་མིག་ལྟ་བུ་ལ་སྲོག་ཆགས་ཡོད་མི་སྲིད་པས་ཡིད་ཆེས་པའི་ཆུ་ཞེས་བྱ་སྟེ་སྤྱད་དུ་རུང་ངོ་། །ཆུ་བཙགས་པའི་བསླབ་ཚིག་#ནི་དགེ་སློང་མོས་པ་ཅན་གྱི་སྲོག་ཆགས་དང་བཅས་པའི་ཆུས་ཆག་ཆག་དང་དཀྱིལ་འཁོར་ལ་སོགས་#བྱས་པ་ལས་བཅས་
[10a.5]སོ། །དེའི་ཕྱིས་#དགེ་སྦྱོང་གིས་ཆུ་ཚགས་ལྔ་ལས་གང་ཡང་རུང་བ་ཅིག་མེད་པར་གནས་སུ་མི་རུང་ངོ་། །མེད་པར་གནས་ན་ཉེས་བྱས་སུ་འགྱུར་རོ། །ཆུ་ལ་དེ་ལྟར་བརྟགས་ཤིང་བཙགས་ནས་སྲོག་ཆགས་མེད་པར་བྱས་ཏེ་སྤྱད་ན། འོ་ན་རྩྭ་དང་ཤིང་ལ་སོགས་པ་ལ་སྲོག་ཆགས་
[10a.6]ཡོད་ན་ཇི་ལྟར་སྤྱད་སྙམ་པ་ལ། དེའི་ཕྱིར། རྩ་#དང་ལྕི་བ་ཤིང་ལ་སོགས། །དགོས་པ་གང་དང་གང་ཡང་རུང་། །དེ་དག་སྲོག་ཆགས་མེད་པར་བྱ། །ཞེས་བྱ་བ་སྨོས་ཏེ། མལ་གྱི་འོག་ཏུ་གདིང་བའི་རྩ་#ལ་སོགས་པ་དང་། དཀྱིལ་འཁོར་དང་ཁང་པ་བཀྲུ་བའི་ལྕི་བ་དང་། མ་#
[10a.7]བུད་པའི་ཤིང་དང་། སོགས་པའི་སྒྲས་ནི་ས་ལ་སོགས་པའི་ཡང་བསྡུས་ཏེ། དགེ་སྦྱོང་གིས་སྤྱད་པར་བྱ་བའི་#རྫས་གང་ཅི་ཡང་རུང་སྟེ་ཀུན་ལ་སྲོག་ཆགས་ཡོད་དམ་མེད་བརྟགས་ནས་སྲོག་ཆགས་ཡོད་ན་བཙགས་ལ་སྲོག་ཆགས་རྣམས་ཀྱང་རང་རང་གི་གནས་སུ་བདེ་བར་བསྐྱལ་ཏེ།
[10b]
[10b.1]སྲོག་ཆགས་མེད་པར་བྱས་ནས་སྤྱད་པར་བྱའོ། །ཆུའི་སྐབས་སུ་བཤད་པ་རྣམས་ཀྱི་དོན་མདོར་བསྡུས་ཏེ་བསྟན་པའི་ཕྱིར། སྡོམ་པས་སྲོག་ཆགས་བསད་པ་བསྲུང་། །ཞེས་བྱ་བ་སྨོས་ཏེ། དགེ་སྦྱོང་རྣམས་ནི་སྙིང་རྗེ་ཅན་ལ་ཁྲིམས་དང་ལྡན་པ་ཡིན་#པས་ཅི་ནས་ཀྱང་སེམས་ཅན་ཆེ་ཕྲ་ཀུན་
[10b.2]གྱི་བསད་པ་བསྲུང་སྟེ། སེམས་ཅན་གང་ཡང་མི་བསད་#དོ། །ཞེས་བྱ་བའི་དོན་ཏོ། །སྟན་ཆུ་ས་དང་སོ་ཤིང་དང་། །འདག་པའི་#ཆལ་ཡང་སྟ་གོན་བྱ། །ལྷུང་བཟེད་བཀྲུ་ལ་སོགས་པ་དང་། །བླ་མའི་དགོས་པ་ཐམས་ཅད་བྱ། །ཞེས་བྱ་བས་མཁན་པོ་དང་སློབ་དཔོན་གྱི་ལས་སུ་བསྒྲུབ་པ་
[10b.3]བསྟན་ཏེ། དེ་ལྟར་བརྟགས་པ་དང་བཙགས་པའི་འོག་ཏུ། བླ་མའི་དགོས་པ་ཐམས་ཅད་བྱ། །ཞེས་སྦྱར་ཏེ། བླ་མ་ནི་མཁན་པོ་དང་སློབ་དཔོན་ལ་བྱ་སྟེ། དེའི་དགོས་པ་ནི་མཁན་པོ་དང་སློབ་དཔོན་གྱི་ལས་སུ་བྱ་བ་རྣམས་ཉམས་སུ་བླང་སྟེ་བསྒྲུབ་བོ་ཞེས་བྱ་བའི་དོན་ཏོ། །ཉམས་སུ་བླང་བ་དེ་དག་ཀྱང་
[10b.4]གང་ཞེ་ན། དེ་བསྟན་པའི་ཕྱིར། སྟན་ཆུ་ས་དང་སོ་ཤིང་དང་། །འདག་པའི་ཆལ་ཡང་སྟ་གོན་བྱ། །ཞེས་བྱ་བ་སྨོས་ཏེ། མཁན་པོ་དང་སློབ་དཔོན་གྱི་ལས་སུ་བྱ་བ་ནི་ནང་བར་མཁན་པོ་དང་སློབ་དཔོན་གང་དུ་ཁ་གདོང་བཀྲུ་བའི་གནས་སུ་གདན་གདིང་བ་དང་། བཀྲུ་བའི་ཆུ་དང་སོ་ཤིང་དང་། འདག་པའི་
[10b.5]ཆལ་ལ་སོགས་པ་སྟ་གོན་བྱ་སྟེ། གཤེགས་པ་དང་། བཤང་གཅི་བྱེད་པའི་གནས་སུ་ས་དང་འདབ་མ་དག་ཀྱང་སྟ་གོན་བྱས་ཏེ་བཞག་གོ། །དེ་ཙམ་ཞིག་བྱས་པས་ཆོག་གམ་ཞེ་ན། མི་ཆོག་པར་བསྟན་པའི་ཕྱིར། ལྷུང་བཟེད་བཀྲུ་ལ་སོགས་པ་དང་། །ཞེས་བྱ་བ་སྨོས་ཏེ། འདིར་མཁན་པོ་དང་སློབ་
[10b.6]དཔོན་གྱི་ལྷུང་བཟེད་བཀྲུའོ། །སོགས་#པའི་སྒྲས་ནི་ཆོས་གོས་བཀྲུ་ཞིང་བཙེམ་པ་དང་གནས་བྱི་དོར་བྱ་བ་ལ་སོགས་པ་ལས་སུ་བྱ་བ་ཐམས་ཅད་བྱའོ། །དེ་ནས་དུས་རིག་ཕྱག་བྱ་སྟེ། །དེ་བཞིན་གུས་པར་ཐལ་སྦྱར་ནས། །ཟས་བཟའ་བྱ་ཞེས་བླ་མ་ལ། །བརྟུལ་#ཞུགས་ཅན་གྱིས་དེ་ལྟར་ཞུ། །ཞེས་
[10b.7]བྱ་བས་ཞུས་ནས་ཟས་བཟའ་བ་བསྟན་ཏེ། དེ་ནས་ཞེས་བྱ་བས་ནི་བླ་མའི་དགོས་པ་ཐམས་ཅད་བྱས་པའི་འོག་ཏུ་ཞེས་བྱ་བའི་དོན་ཏོ། །དུས་རིག་ཕྱག་བྱས་ལ་དགེ་སློང་རྣམས་ཀྱི་ཟས་བཟའ་བའོ། །དུས་ནི་སྐྱ་རེངས་#ཤར་བ་ནས་བརྩམས་ཏེ། འཛམ་བུའི་གླིང་གི་ཉི་མ་དྲོས་མན་ཆད་དེ། དེའི་བར་དུ་ཟས་
[11a]
[11a.1]བཟའ་བར་གནང་བའི་དུས་རིག་ནས་ཞེས་བྱའོ། །ཕྱག་བྱས་ཏེ། དེ་བཞིན་གུས་པས་#ཐལ་སྦྱར་ནས། །ཞེས་བྱ་བ་ལ་མཁན་པོའམ་སློབ་དཔོན་ལ་ཕྱག་བྱས་ཏེ། དེ་བཞིན་ནང་པར་སྔར་ཞུས་པ་#བཞིན་དུ་ལུས་ཀྱིས་#མ་གུས་པ་རྐང་པ་བརྐྱང་བ་དང་། ལག་པ་བརྐྱང་བ་ལ་
[11a.2]སོགས་པ་བྱེད་པ་དང་། ངག་གིས་#མ་གུས་པ་རྟ་གད་བྱེད་པ་ལ་སོགས་པ་བཏང་ལ། ལུས་དང་ངག་ཞི་བ་དང་དུལ་བར་བྱ་སྟེ། ཐལ་མོ་སྦྱར་ལ་འཚལ་མ་འཚལ། །ཞེས་བླ་མ་མཁན་པོ་དང་སློབ་དཔོན་ལ་བརྟུལ་ཞུགས་ཅན་དེ་དགེ་སློང་#གིས་དེ་ལྟར་ཞུའོ། །ལག་པ་བཀྲུས་ནས་ཚུལ་བཞིན་དུ། །
[11a.3]དེ་ནི་མི་སྨྲ་ཚོད་རིག་བྱ། །ཞེས་བྱ་བས་སྦྱོར་བ་ཕུན་སུམ་ཚོགས་པ་བསྟན་ཏེ། ལག་པ་བཀྲུས་ནས་ཞེས་བྱ་བ་ནི་ལག་པ་དང་ལྷུང་བཟེད་གཉིས་ཀ་བཀྲུས་#ཞེས་བྱ་བའི་དོན་ཏོ། །ཚུལ་བཞིན་དུ་ཞེས་བྱ་བས་ནི་ཟས་བཟའ་བའི་ཚེ་གཡས་གཡོན་དུ་མི་བལྟའོ། །ཁ་ཟས་འབྲིམ་པ་ལ་མི་
[11a.4]བལྟའོ། །ཧ་ཅང་ཁམ་ཆེར་མི་ཟའོ། །དེ་#ནི་མི་སྨྲ་ཚོད་རིག་བྱ། །ཞེས་བྱ་བ་ནི་ཟས་ཟ་བའི་ཚེ་གད་མོ་མི་བགད་#དོ། །གཏམ་མི་བྱའོ། །རྐན་སྒྲ་མི་གཏོག་#གོ། །ཅག་ཅག་མི་བྱའོ། །ཚོད་རིག་ཅེས་བྱ་བ་ནི་ཧ་ཅང་མང་དུ་#མི་བཟའ་ལ། ཧ་ཅང་ཉུང་དུ་ཟོས་ན་ཡང་དགེ་བ་བྱེད་མི་ནུས་པས་
[11a.5]ཅི་ཙམ་གྱི་དགེ་བ་བྱེད་པ་དེ་ཙམ་གྱི་ཚོད་དེ་ཙམ་ཞིག་བཟའོ#། །བྲུ་བའི་ནད་ལས་བཟློག་པའི་ཕྱིར། །བཟའོ་སྙམ་པའི་སེམས་ཀྱིས་བཟའ། །ཞེས་བྱ་བས་བསམ་པ་ཕུན་སུམ་ཚོགས་པས་བཟའ་བར་བྱ་བ་བསྟན་ཏེ། འདི་ལྟར་ཟས་ཟ་བའི་ཚེ་སྟོབས་ཆེ་བ་དང་གཟུགས་མཛེས་པར་འདོད་པའི་
[11a.6]བསམ་པས་ཟོས་ན་ནི་ཟས་ཟོས་པ་དེ་ཉིད་མི་དགེ་བར་འགྱུར་རོ། །ཟས་མ་ཟོས་ན་ལུས་ཉམ་ཆུང་བས་དགེ་བ་བྱེད་མི་ནུས་པའི་ཕྱིར་དགེ་བ་བྱེད་པའི་དོན་དུ་ཟས་བཟའོ་སྙམ་པའི་སེམས་ཀྱིས་ཟས་ཟོས་ན་ཟས་ཟོས་པ་དེ་ཉིད་དགེ་བར་འགྱུར་རོ། །དེ་གཉིས་གང་དུ་ཡང་མ་གཏོགས་པར་ཁ་ཟས་བཟའོ་#སྙམ་སྟེ་
[11a.7]ཟས་ཟོས་པ་དེ་ཉིད་#ལུང་མ་བསྟན་དུ་འགྱུར་རོ། །དེ་བས་ན་ཟས་ཟ་བའི་ཚེ་ཡང་ཟས་མ་ཟོས་ན་བཀྲེས་པའི་ནད་ཀྱིས་འདེབས་སོ། །བཀྲེས་པའི་ནད་ཀྱིས་བཏབ་ན་དགེ་བ་བྱེད་མི་ནུས་པས། ཁ་ཟས་ཟོས་ལ་བཀྲེས་པའི་ནད་བཟློག་ལ་དགེ་བ་བྱའོ་སྙམ་པའི་བསམ་བས་ཟས་བཟའ་བར་བྱ་སྟེ། དེ་ལྟ་བུའི་
[11b]
[11b.1]བསམ་པ་བཟང་པོས་ཟོས་ན་ཁ་ཟས་ཟོས་པ་དེ་དགེ་བར་འགྱུར་རོ། །ཟོས་ཤིང་དེ་བཞིན་འཐུངས་པ་དང་། །རུང་བའི་ཆུ་ཡིས་དེ་འོག་ཏུ། །སྦྱིན་པ་ཡང་དག་འཕེལ་བྱའི་ཕྱིར། །སྦྱིན་པའི་ཚིགས་བཅད་གཉིས་ཤིག་བརྗོད། །ཅེས་བྱ་བས་བསོད་ནམས་བསྔོ་བ་བསྟན་ཏེ། ཟོས་ཤིང་ཞེས་བྱ་བས་ནི་བཟའ་
[11b.2]བ་ལྔ་ཟོས་ཤིང་བཅའ་བ་ལྔ་འཆོས་སོ། །དེ་ལ་བཟའ་བ་ནི་ཁ་ཟས་ལ་བྱའོ། །བཅའ་བ་ནི་སྤྱན་གཟིགས་ལ་བྱའོ། །དེ་བཞིན་འཐུངས་པ་དང་ཞེས་བྱ་བས་ནི་བཏུང་བར་བྱ་བ་འཐུངས་པའོ། །རུང་བའི་ཆུ་ཡིས་ཞེས་བྱ་བ་ནི་བཙགས་ཤིང་བརྟགས་#པའི་ཆུས་ལག་པ་དང་ཁ་བཀྲུས་ལ། དེའི་འོག་ཏུ་
[11b.3]ལྷུང་བཟེད་ཀྱང་དག་པར་བཀྲུ་བར་བྱའོ། །དེའི་འོག་ཏུ། སྦྱིན་པ་ཡང་དག་འཕེལ་བྱའི་ཕྱིར། །སྦྱིན་པའི་ཚིགས་བཅད་གཉིས་ཤིག་བརྗོད། །ཅེས་བྱ་བ་ལ། ལག་པ་དང་ལྷུང་བཟེད་བཀྲུས་པའི་འོག་ཏུ་སྦྱིན་པའི་ཡོན་བདག་གི་སྨོན་ལམ་བདག་དང་གཞན་ལ་གནོད་པར་འགྱུར་བ་བཟློག་སྟེ།
[11b.4]སྦྱིན་པའི་འབྲས་བུ་ལྷ་དང་མིའི་ལུས་ཐོབ་པའི་ལོངས་སྤྱོད་ཆེན་པོ་ཐོབ་པར་བྱ་བའི་ཕྱིར་སྦྱིན་པའི་ཡོན་བདག་གི་དོན་དུ་ཚིགས་སུ་བཅད་པ་གཅིག་བཀླགས་#པ་དང་། ཀླུའི་རྒྱལ་པོ་དགའ་བོ་དང་། ཉེ་#དགའ་བོའི་དོན་དུ་ཚིགས་སུ་བཅད་པ་གཅིག་བཀླགས་ཏེ་#དེ་ལྟར་ཚིགས་སུ་བཅད་པ་གཉིས་ཤིག་གདོན་
[11b.5]ཏོ། །མན་ངག་ཡོད་ན་བསམ་གཏན་བྱ། །རབ་ཏུ་འབད་དེ་བཀླག་པར་བྱ། །སྡོམ་དང་ཆོ་ག་མཁས་པ་དང་། །བསྒྲུབ་པ་ལ་ནི་བརྩོན་པར་བྱ། །ཞེས་བྱ་བས་དགེ་བ་བྱ་བ་བསྟན་ཏེ། དེ་རྣམ་པ་བཞི་ཡོད་དེ་བསམ་གཏན་བྱ་བ་དང་། བཀླག་པ་དང་། ལྟུང་བ་དང་། མི་ལྟུང་བ་ལ་མཁས་
[11b.6]པ་དང་། ཚུལ་ཁྲིམས་མ་ཉམས་པར་བསྲུང་བར་བྱའོ། །མན་ངག་ཡོད་ན་བསམ་གཏན་བྱ། །ཞེས་བྱ་བས་བསམ་གཏན་བྱ་བར་བསྟན་ཏེ། དེ་ལ་ཡང་གང་ཟག་རྣམ་པ་བཞི་ཡོད་དེ#། འདོད་ཆགས་ལ་སྤྱོད་པའི་གང་ཟག་དང་། ཞེ་སྡང་ལ་སྤྱོད་པའི་གང་ཟག་དང་། གཏི་མུག་ལ་སྤྱོད་པའི་
[11b.7]གང་ཟག་དང་། རྣམ་པར་རྟོག་པ་ལ་སྤྱོད་པའི་གང་ཟག་གོ། །དེ་ལ་འདོད་ཆགས་ལ་སྤྱོད་པའི་གང་ཟག་གིས་ནི་མི་གཙང་བ་བསྒོམ་#མོ། །ཞེ་སྡང་ལ་སྤྱོད་པའི་གང་ཟག་གིས་ནི་སེམས་ཅན་ཐམས་ཅད་གཉེན་བཤེས་དང་ཉེ་དུ་བཞིན་དུ་སྡུག་པ་དང་ཕངས་པར་བསྒོམ་མོ། །གཏི་མུག་ལ་
[12a]
[12a.1]སྤྱོད་པའི་གང་ཟག་གིས་ནི་རྟེན་ཅིང་འབྲེལ་པར་འབྱུང་བ་ལུགས་བཞིན་འབྱུང་བ་དང་ལུགས་ལས་བཟློག་པའི་མཚན་ཉིད་བསྒོམ་མོ། །རྣམ་པར་རྟོག་པ་ལ་སྤྱོད་པའི་གང་ཟག་གིས་ནི་དབུགས་ཕྱི་ནང་དུ་རྒྱུ་བ་བསྒོམ་མོ། །སྒོམ་པ་འདི་དག་ནི་བདུད་རྩིའི་སྒོ་ཞེས་བྱ་སྟེ།
[12a.2]མྱ་ངན་ལས་འདས་པ་ཐོབ་#པའི་རྒྱུ་ཡིན་ནོ། །གལ་ཏེ་བསམ་གཏན་འདི་དག་ལ་སོགས་པ་མན་ངག་གང་མཁན་པོ་དང་སློབ་དཔོན་ལ་ཐོས་ནས་ཟས་ཟོས་པའི་འོག་ཏུ་བསམ་གཏན་བྱའོ། །རབ་ཏུ་འབད་དེ་ཀླག་པར་བྱེད། །ཅེས་#བྱ་བས་བཀླག་པར་བྱ་བ་བསྟན་ཏེ། གལ་ཏེ་བསམ་གཏན་བསྒོམ་
[12a.3]པའི་མན་ངག་མེད་ན་བཀླག་པར་བྱ་སྟེ་ཁ་ཏོན་བྱ་བའམ། དྷརྨ་གླེགས་བམ་ལ་བཀླག་པར་བྱ་བའོ#། །དེ་ལྟར་ཀློག་པའི་དུས་ན་ཡང་རབ་ཏུ་འབད་དེ་བཀླག་པར་བྱའོ། །དཀྱིལ་འཁོར་དང་མཆོད་པ་ལ་སོགས་པ་བྱས་ལ་སེམས་མ་ཡེངས་པར་རྩེ་གཅིག་ཏུ་བསྡུས་ནས་ལྷ་ཀླུ་ལ་སོགས་པ་ལ་ཆོས་
[12a.4]ཀྱི་སྦྱིན་པ་བྱའོ། །ཧ་ཅང་ཡང་མི་དྲག་ཧ་ཅང་ཡང་#མི་དལ་བར་རེན་#པར་བྱ་སྟེ། ཟུར་ཕྱིན་པར་བཀླག་གོ། །བཀླགས་#པའི་རྗེས་ལ་ཡང་བསོད་ནམས་བདག་དང་སེམས་ཅན་གྱི་དོན་དུ་བསྔོའོ། །སྡོམ་དང་ཆོ་ག་མཁས་པ་དང་། །ཞེས་བྱ་བས་ལྟུང་བ་དང་མི་ལྟུང་བར་བྱ་བ་ལ་མཁས་པར་བྱ་
[12a.5]བ་བསྟན་ཏེ། སྡོམ་པའི་སྒྲ་ནི་ཕས་ཕམ་པ་བཞི་ལ་བྱ་ལ། ཆོ་གའི་སྒྲ་ནི་སྦོམ་པོ་དང་ཉེས་བྱས་ལ་སོགས་པ་བསླབ་ཚིག་#ཕྲ་མོ་དང་དགེ་སྦྱོང་གི་བྱ་བ་རྣམས་ལ་བྱ་སྟེ། མཁས་པ་ཞེས་བྱ་བས་ནི་འདི་ཙམ་གྱི་#ཕས་ཕམ་པར་འགྱུར་ལ། འདི་ཙམ་གྱིས་ཕས་ཕམ་པར་མི་འགྱུར་ཞེས་ཤེས་པར་བྱ་བ་#
[12a.6]དང་། འདི་དག་ནི་ཉེས་བྱས་ཡིན། འདི་དག་ནི་བདག་གི་ལས་སུ་བྱ་བ་ཡིན། འདི་དག་ནི་བདག་གི་#ལས་སུ་བྱ་བ་མ་ཡིན་ནོ་ཞེས་ཤེས་པར་བྱའོ། །བསྒྲུབ་པ་ལ་ནི་བརྩོན་པར་བྱ། །ཞེས་བྱ་བས་ཚུལ་ཁྲིམས་ལྷུར་ལེན་པ་བསྟན་ཏེ། ཕས་ཕམ་པ་དང་སྦོམ་པོ་དང་ཉེས་བྱས་ལ་སོགས་པ་མི་
[12a.7]འབྱུང་བར་བསྲུང་བ་ཉིད་བསྒྲུབ་པར་བྱ་བ་ལ་བརྩོན་པ་ཡིན་ནོ། །ད་ནི་ཕས་ཕམ་པའི་གནས་འཆད་དེ། དེ་ལ་ཕས་ཕམ་པའི་དོན་ཅི་ཞེ་ན། སངས་རྒྱས་བཅོམ་ལྡན་འདས་ནི་ཆོས་ཀྱི་རྒྱལ་པོ། །བདག་ནི་ཆོས་ཀྱི་རྒྱལ་པོའི་རྒྱལ་ཚབ་བོ། །ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ལ་སོགས་པ་བྱང་
[12b]
[12b.1]ཆུབ་ཀྱི་ཕྱོགས་ཀྱི་ཆོས་རྣམས་ནི་བདག་གི་ཉོན་མོངས་པ་ཐམས་ཅད་ཞི་བར་བྱ་བའི་གྲོགས་སམ་མིག་ལྟ་བུ་ཡིན་ཏེ། བྱང་ཆུབ་ཀྱི་ཕྱོགས་ཀྱིས་ཉོན་མོངས་པ་བཅོམ་ནས་ཆོས་ཀྱི་རྒྱལ་པོའི་གནས་ཐོབ་པར་བྱ་བ་ཡིན་པ་ལས། འདོད་ཆགས་ལ་སོགས་པ་ཉོན་མོངས་པའི་དབང་དུ་གྱུར་པ་རྣམས་ཀྱིས་ཚུལ་
[12b.2]ཁྲིམས་ལ་སོགས་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་མེད་པར་བྱས་པས་བདག་གིས་ཆོས་ཀྱི་རྒྱལ་པོའི་གནས་མྱ་ངན་ལས་འདས་པ་ཐོབ་པར་བྱ་བའི་སྐལ་#བ་མེད་པ་ལ་ཕས་ཕམ་པ་ཞེས་པ་བྱ་སྟེ། ཉོན་མོངས་པའི་གནས་སུ་གྱུར་ཞེས་བྱ་བའི་དོན་ཏོ། །དེ་ལ་ཕས་ཕམ་པ་རྣམ་པ་བཞི་སྟེ། སྲོག་
[12b.3]གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་#དུ་སྨྲ་བའོ། །ཕས་ཕམ་པ་འབྱུང་བའི་རྒྱུ་ནི་རྣམ་པ་གསུམ་སྟེ། ཞེ་སྡང་དང་། འདོད་ཆགས་དང་། གཏི་མུག་གོ། །དེ་ལ་ཞེ་སྡང་ལས་ནི་སྲོག་གཅོད་པའི་ཕས་ཕམ་པ་འབྱུང་ངོ་། །འདོད་ཆགས་ལས་ནི་མ་བྱིན་པར་
[12b.4]ལེན་པ་དང་མི་ཚངས་པར་སྤྱོད་པའི་ཕས་ཕམ་པ་འབྱུང་ངོ་། །གཏི་མུག་ལས་ནི་བརྫུན་དུ་སྨྲ་བའི་ཕས་ཕམ་པ་#འབྱུང་ངོ་། །བཅོམ་ལྡན་འདས་ཀྱི་#ཉན་ཐོས་ཀྱི་དགེ་འདུན་ལ་ལོ་བཅུ་གཉིས་ཀྱི་བར་དུ་ལྟ་བ་མཉམས་སྐྱོན་མེད་པས། དེས་ན་བཅོམ་ལྡན་འདས་ཀྱིས་འདིར་མདོར་བསྡུས་ཏེ། ཉན་ཐོས་རྣམས་
[12b.5]ལ་སོ་སོར་ཐར་པའི་མདོ་བཤད་དེ་བསྟན་པ། སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པའོ། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ#། །ཐམས་
[12b.6]ཅད་དུ་ནི་སྡོམ་པ་ལེགས། །ཀུན་དུ་བསྡམས་#པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གོལ#། །ངག་རྣམས་བསྲུངས་ཤིང་ཡིད་ཀྱང་རབ་བསྡམས་ཏེ། །ལུས་ཀྱིས་#མི་དགེ་བ་དག་མི་སྤྱོད་ཅིང་། །ལས་རྣམས་གསུམ་པོ་འདི་དག་རབ་སྦྱངས་ནས#། །དྲང་སྲོང་གསུང་བའི་ལམ་ནི་ཐོབ་པར་འགྱུར། །
[12b.7]ཞེས་གསུངས་པས་སློབ་པར་ཟད་དོ། །ལོ་བཅུ་གཉིས་འདས་ནས་བཅོམ་ལྡན་འདས་ཀྱི་#བསྟན་པ་ལ་སྐྱོན་དང་ཕན་#འབྱུང་ངོ་། །དེ་ལ་དང་པོ་སྲོག་གཅོད་པའི་ཕས་ཕམ་པ་བཤད་དེ། དེ་ཡང་སངས་རྒྱས་བཅོམ་ལྡན་འདས་ཡུལ་བྲི་ཛིའི་#ལྗོངས་ཆུ་བོ་དགའ་སྐྱེད་#ཀྱི་འགྲམ་ཐང་ཤིང་གི་ནགས་སྟུག་#བོ་ན་
[13a]
[13a.1]བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་ལ་མི་གཙང་བ་བསྒོམ་དུ་བཅུག་ནས་དགེ་སློང་དག་མི་གཙང་བ་ལ་བརྟེན་ནས་བསྒོམ་#པ་ལན་མང་དུ་བྱས་ནས་འབྲས་བུ་ཆེ་ཞིང་ལེགས་པ་ཆེན་པོར་འགྱུར་རོ་ཞེས་བསྔགས་པ་བརྗོད་པས། དགེ་སློང་
[13a.2]རྣམས་ཀྱིས་མི་གཙང་བ་བསྒོམས་པས་ལུས་རྣག་ཅན་འདིས་ཡིད་བྱུང་#སྒྱིད་ལུག་སྟེ། རྣམ་པར་སྨོད་#ཅིང་མཚོན་གྱིས་ཀྱང་འདེབས། དུག་ཀྱང་ཟ། འགེགས་ཀྱང་འགེག །གཡང་དུ་ཡང་མཆོང་#། དགེ་སློང་གིས་ཀྱང་དགེ་སློང་ཡང་གསོད#། དེ་ནས་དགེ་སློང་ཞིག་ལུས་ལ་རྣམ་པར་སྨོད་
[13a.3]ཅིང་རི་དགས་དབྱིག་#པ་ཅན་དགེ་སྦྱོང་སྲུང་#བ་ལ་འདི་སྐད་ཅེས་སྨྲའོ། །བཞིན་བཟངས་ང་སོད་#ཅིག་དང་ཆོས་གོས་ཀྱང་ཁྱོད་ཀྱིར་འགྱུར་རོ། །དེ་ནས་དབྱིག་པ་ཅན་གྱིས་དེའི་སྲོག་བཅད་#ནས་རལ་གྲི་ཁྲག་ཅན་ཆུ་བོ་དགའ་སྐྱེད་#ལ་འཁྲུའོ། །དེ་ནས་ལྷའི་བུའི་བདུད་ཅིག་#ཆུ་བོའི་རྒྱུན་ལ་མ་རེག་ཙམ་དུ་འདུག་ནས་
[13a.4]དབྱུག་པ་ཅན་ལ་ལེགས་པའི་བསོད་ནམས་མང་དུ་སྤེལ་ལོ། །སེམས་ཅན་ནོ་ཞེས་བསྟོད་པས་དབྱིག་#པ་ཅན་ཡང་ཆོས་གོས་དང་ལྷུང་བཟེད་འདོད་པས་བསོད་ནམས་བྱའོ་སྙམ་ནས་རལ་གྲི་རྣོན་པོ་མཆན་དུ་བཅུག་སྟེ། གཙུག་ལག་ཁང་ནས་འཆག་སའི་བར་དུ་གཅིག་ནས་གཅིག་ཏུ་དགེ་སློང་དྲུག་ཅུའི་
[13a.5]བར་དུ་སྲོག་བཅད་ནས་དགེ་སློང་རྣམས་ཉུང་ཞིང་འགྲིབས་པར་གྱུར་ཏོ། །དེ་ནས་བཅོམ་ལྡན་འདས་གསོ་སྦྱོང་བཅོ་ལྔ་པའི་ཚེ་དགེ་སློང་གི་དགེ་འདུན་ཐམས་ཅད་ལ་གཟིགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། རྒྱུ་རྐྱེན་གང་གིས་ད་ལྟ་ངའི་དགེ་སློང་ཉུང་ཞིང་འགྲིབས་པར་གྱུར་ཞེས་སྨྲས་པ་
[13a.6]དང་ཇི་ལྟ་བུར་གྱུར་པ་རྒྱས་པར་གསོལ་ཏོ། །བཀའ་སྩལ་པ། ཀུན་དགའ་བོ་དགེ་སློང་གསོད་དམ། བཙུན་པ་འགུམས་ལགས་སོ། །བཅོམ་ལྡན་འདས་ཀྱིས་དགེ་སློང་མ་ཡིན་ཞེས་རྣམ་གྲངས་དུ་མས་སྨད་ནས། ལེགས་པ་བཅུ་གཟིགས་པའི་ཕྱིར་བསླབ་པའི་གནས་བཅས་སོ། །གླེང་
[13a.7]གཞི་ནི་ཡུལ་བྲི་ཛི། གང་ཟག་ནི་དབྱིག་#པ་ཅན་དགེ་སྦྱོང་སྲུང་། ཉོན་མོངས་པ་ནི་མི་བཟོད་པ། ཉེས་པ་ནི་གསོད་པ་དང་། དངོས་པོ་ནི་མིར་ཆགས་པའོ། །སྲོག་གཅོད་པའི་ཕས་ཕམ་པ་འདི་རྣམ་པ་གསུམ་གྱིས་བསྟན་ཏེ། ཕས་ཕམ་པའི་གནས་བསྟན་པ་དང་། སྦོམ་པོའི་གནས་བསྟན་པ་
[13b]
[13b.1]དང་། ཉེས་བྱས་ཀྱི་#གནས་བསྟན་པའོ། །ཕས་ཕམ་པའི་གནས་བསྟན་པ་ལ་གསུམ་སྟེ། བདག་གིས་བསད་#པ་དང་། གཞན་གསོད་དུ་བཅུག་པ་དང་། ཐབས་ཀྱིས་བསད་པའོ། །བརྟུལ་ཞུགས་གནས་སེམས་མ་ཉམས་པས། །ཆེད་དུ་བསམས་ཏེ་མ་ནོར་བར། །མི་གཞན་བདག་
[13b.2]གམ་གཞན་རྣམས་ཀྱིས། །བསད་#ན་བརྟུལ་ཞུགས་ཉམས་པར་འགྱུར། །ཞེས་བྱ་བ་བདག་གིས་བསད་པ་དང་། གཞན་གྱིས་བསད་པ་བསྟན་ཏེ། བརྟུལ་ཞུགས་གནས་ཞེས་བྱ་བས་བསླབ་པ་ཉམས་པར་ཡང་མ་བྱས། བསླབ་པ་ཕུལ་ཡང་མ་ཕུལ་བ་ལ་བརྟུལ་ཞུགས་གནས་ཞེས་བྱའོ། །
[13b.3]འདིར་རྣམ་པ་བཞི་བཞག་གོ#། །བསླབ་པ་ཕུལ་ལ་ཉམས་པར་མ་བྱས་པ་དང་། བསླབ་པ་ཉམས་པར་བྱས་ལམ་ཕུལ་བ་དང་། བསླབ་པ་ཉམས་པར་ཡང་བྱས་ལ་ཕུལ་བ་དང་། བསླབ་པ་ཉམས་པར་ཡང་མ་བྱས་ཕུལ་ཡང་མ་ཕུལ་ལོ། །དེ་ལ་བསླབ་པ་ཕུལ་ལ་ཉམས་པར་མ་བྱས་པ་ནི་འདི་ལྟར་
[13b.4]དགེ་སྦྱོང་ཆགས་པར་གྱུར་ཏམ་མི་དགའ་འམ། སླར་#འབབ་འདོད་དམ། དགེ་སྦྱོང་དོན་དུ་མི་གཉེར་བས་དགེ་སྦྱོང་གི་གན་དུ་སོང་ནས། ཚེ་དང་ལྡན་པ་དགོངས་ཤིག་#བདག་མིང་འདི་ཞེས་བགྱི་བ་བསླབ་པ་འབུལ་ལོ་ཞེས་ཟེར་བ་དང་། སངས་རྒྱས་དང་ཆོས་དང་དགེ་འདུན་འབུལ་བའམ། མཁན་པོ་དང་
[13b.5]སློབ་དཔོན་འབུལ་ལོ་ཞེས་ཟེར་ན་བསླབ་པ་ཕུལ་ལོ་ཞེས་བྱའོ། །བདག་ཁྱིམ་པ་ཡིན་ནོ་ཞེ་འམ། དགེ་བསྙེན་ཡིན་ནོ་ཞེ་འམ། མཚམས་མེད་པ་ལྔ་བྱས་པའམ། མུ་སྟེགས་ཅན་ནམ། ཚངས་པ་#མཚུངས་པར་སྤྱོད་པ་ཁྱེད་དང་ལྷན་ཅིག་འགྲོགས་སུ་མ་དགོངས་སོ་ཞེས་ཟེར་ན་བསླབ་པ་ཕུལ་བ་
[13b.6]ཡིན་ཏེ། བསླབ་པ་ཉམས་པར་བྱས་པ་མ་ཡིན་ནོ། །ཇི་ལྟར་བསླབ་པ་ཉམས་པར་ནི་བྱས་ལ་བསླབ་པ་ཕུལ་བ་མ་ཡིན་ཞེ་ན། འདི་ལྟར་དགེ་སྦྱོང་ཆགས་ཤིང་མི་དགའ་སྟེ་འབབ་#པར་འདོད་ནས་མཁྱེན་པར་མཛོད་ཅིག་ཚངས་པར་སྤྱད་#པས་རབ་ཏུ་དབེན་པ་དང་། དགོན་པ་ནི་སྤྱད་དཀའོ། །
[13b.7]ཕ་མ་བུ་སྲིང་ཕུ་ནུ་མཁན་པོ་དྲན་ནོ། །བདག་བཟོ་སློབ་བོ། །བདག་དགའ་བའི་རིགས་རྣམས་ལ་གཏོད་ཅིག །བབས་པའི་རྟགས་སྨྲས་ཀྱང་བསླབ་པ་འབུལ་ཞེས་མ་སྨྲས་ན་བསླབ་པ་ཉམས་པར་བྱས་ཀྱི་ཕུལ་བ་མ་ཡིན་ནོ། །ཇི་ལྟར་བསླབ་པ་ཉམས་པར་ཡང་བྱས་ཕུལ་བ་ཡང་ཡིན་ཞེ་ན། དགེ་སྦྱོང་
[14a]
[14a.1]ཆགས་ཤིང་འབབ་#པར་འདོད་པས་ཚངས་པར་སྤྱོད་པ་དང་དགོན་པ་ནི་དཀའོ། །ཕ་དང་མ་དང་མཁན་པོ་ལ་སོགས་པ་དྲན་ན་བདག་དགའ་བའི་#རིགས་ལ་གཏོད་ཅིག་ཅེས་སྨྲ་ཞིང་ཚིག་གིས་གོ་བར་བསླབ་པ་འབུལ་ཞེས་ཟེར་ན་བསླབ་པ་ཉམས་པར་ཡང་བྱས་པ་བསླབ་པ་ཕུལ་བ་ཡང་
[14a.2]ཡིན་ནོ། །ཇི་ལྟར་བསླབ་པ་ཉམས་པར་ཡང་མ་བྱས་ལ་ཕུལ་བ་ཡང་མ་ཡིན་ཞེ་ན། ཉམས་པའི་ཚིག་ཀྱང་མ་སྨྲས་འབུལ་བའི་ཚིག་ཀྱང་མ་སྨྲས་པའོ། །དེ་ལ་བསླབ་པ་མ་ཕུལ་ཡང་ཉམས་པར་བྱས་པས་ཀྱང་བསླབ་པ་ཉམས་པ་དང་ཕུལ་བར་འགྱུར་རོ། །བསླབ་པ་མ་ཕུལ་བ་ལས་ཉམས་པར་བྱས་
[14a.3]པ་དང་། བསླབ་པ་ཕུལ་ཡང་མ་ཕུལ་ལ་ཉམས་པར་ཡང་མ་བྱས་པས་ནི་ཕུལ་བར་མི་འགྱུར་རོ། །སེམས་ཉམས་པས་ཞེས་བྱ་བ་ལ་སེམས་ཉམས་པ་ནི་སྨྱོས་ཏེ་མི་དྲན་པ་ལ་བྱ་སྟེ། བདག་སྨྱོས་ཀྱང་མ་སྨྱོས་ཏེ་དྲན་བཞིན་དུ་བསད་ན་ཕས་ཕམ་པར་འགྱུར་རོ། །སྨྱོས་ཏེ་མི་དྲན་པར་གྱུར་ནས་བསད་
[14a.4]ན་ནི་ཕས་ཕམ་པར་མི་འགྱུར་རོ། །ཆེད་དུ་བསམས་ཏེ་ཞེས་བྱ་བ་ལ་བསད་པར་ནི་མ་བསམས་ཀྱི་རྩེད་མོ་ལ་སོགས་པ་བྱེད་བྱེད་དེ་ཤི་ནས་ཕས་ཕམ་པར་མི་འགྱུར་གྱི། ཆེད་དུ་གསད་#པར་བསམས་ཏེ་ཤི་ནས་ཕམ་པར་འགྱུར་རོ། །མ་ནོར་བ་ཞེས་བྱ་བ་ལ་ཡང་མི་རྣམ་པ་གསུམ་བསད་ན་ཕས་ཕམ་
[14a.5]པར་འགྱུར་བ་ལས། བདག་ཀྱང་མིའི་རྒྱུད་དུ་གཏོགས་པ་ཡིན་ཏེ། བདག་གིས་བདག་བསད་པ་ན་ཕས་ཕམ་པར་མི་འགྱུར་གྱི་བདག་གིས་གཞན་བསད་ན་ཕས་ཕམ་པར་འགྱུར་རོ། །བདག་གིས་གཞན་བསད་ན་བརྟུལ་ཞུགས་ཉམས་པར་འགྱུར་ཞེས་བྱ་བར་སྦྱར་ཏེ། བདག་ཉིད་ཀྱིས་ལག་དར་ཏེ་#
[14a.6]མི་རྣམ་པ་གསུམ་བསད་ན་བརྟུལ་ཞུགས་ཉམས་པར་འགྱུར་ཏེ་ཕས་ཕམ་པ་འབྱུང་#བས་དགེ་སྦྱོང་དུ་མི་རུང་ཞིང་འཕགས་པའི་བདེན་པ་མཐོང་བ་དང་མྱ་ངན་ལས་འདས་པ་ཐོབ་པའི་སྐལ་བ་མེད་པར་འགྱུར་རོ་ཞེས་བྱ་བའི་ཐ་ཚིག་གོ། །དེ་ལ་བདག་གིས་བསད་པ་ལ་ཡང་རྣམ་པ་གསུམ་སྟེ། ཟིན་པའི་ལུས་སུ་
[14a.7]གཏོགས་པ་དང་། ཕྱི་#རོལ་གྱིས་#འཕངས་པ་དང་། གཉིས་ཀ་དང་#ཡང་ལྡན་པའོ། །ཇི་ལྟར་ཟིན་པའི་ལུས་སུ་གཏོགས་པས་ཤེ་ན། དགེ་སྦྱོང་གིས་གསད་#སེམས་ཀྱིས་སྐྱེས་པ་དང་། བུད་མེད་དམ་#མ་ནིང་ཁུ་ཚུར་རམ་རྡོའམ་ཐ་ན་སོར་མོ་གཅིག་བསྣུན་ཏེ། ཤི་བར་གྱུར་ཅིག་སྙམ་པ་ལས་དེ་ཉིད་ཀྱི་
[14b]
[14b.1]ཚེའམ་ཕྱིས་ཤི་བར་གྱུར་ན་ནི་ཕས་ཕམ་པར་འགྱུར་རོ། །མ་ཤི་ན་ཉེས་པ་སྦོམ་པོའོ། །ཕྱི་རོལ་གྱིས་འཕངས་པ་གང་ཞེ་ན། དགེ་སྦྱོང་གིས་བསད་སེམས་ཀྱིས་#མི་ལ་མདའ་འཕངས་པའམ། མདུང་དང་། བེ་ཅོན་དང་། ཐ་ན་རྒྱ་ཤུག་གིས་བསྣུན་ཏེ་དེས་ཤི་བར་གྱུར་ཅིག་སྙམ་པ་ལས་དེ་ཉིད་ཀྱི་ཚེའམ་
[14b.2]དུས་ཕྱིས་ཤི་ན་ཡང་པས་ཕམ་པའོ། །མ་ཤི་ན་སྦོམ་པོའོ། །གཉིས་ཀ་དང་ལྡན་པ་གང་ཞེ་ན། དགེ་སྦྱོང་གིས་མི་ལ་བསད་སེམས་ཀྱིས་རལ་གྲི་དང་དབྱིག་#པ་དང་མདུང་ཐུང་གིས་བསྣུན་ཏེ་འདིས་ཤི་བར་གྱུར་ཅིག་སྙམ་པ་ལས་དེ་ཉིད་ཀྱི་ཚེའམ་ཕྱིས་ཤིན་ཡང་ཕས་ཕམ་པར་འགྱུར་རོ། །མ་ཤི་ན་
[14b.3]སྦོམ་པོའོ། །གཞན་རྣམས་ཀྱིས་བསད་ན་བརྟུལ་ཞུགས་ཉམས་པར་འགྱུར་ཞེས་བྱ་བ་ལ། མི་རྣམ་པ་གསུམ་བསད་པའི་ཕྱིར་བདག་གིས་གཞན་ལ་གསོད་དུ་བཅོལ་བ་ལས་དེས་མི་#མ་པ་གསུམ་གང་ཡང་རུང་བས་བསད་ན་ཕས་ཕམ་པར་འགྱུར་རོ། །འདིར་རྣམ་པ་གསུམ་བཞག་སྟེ། ཟིན་པའི་
[14b.4]ལུས་སུ་གཏོགས་པ་དང་། ཕྱི་#རོལ་གྱིས་#འཕངས་པ་དང་། གཉིས་ཀ་དང་ལྡན་པ་བཤད་པ་ནི་སྔ་མ་བཞིན་ནོ། །ཚིག་དེ་དག་གིས་ནི་བདག་གིས་བསད་པ་དང་། གཞན་གྱིས་བསད་པ་སྟོན་ཏོ། །ཚུལ་ཁྲིམས་ལྡན་ནམ་ཚུལ་ཁྲིམས་འཆལ། །དེ་བཞིན་ནད་ཀྱིས་བཏབ་པ་ལ། །གང་ཐོས་
[14b.5]སྡུག་བསྔལ་ཉམ་ཐག་སྟེ། །ངེས་འཆིའི་ཆོས་གཏམ་དེ་མི་བྱ། །སྨན་དང་སྔགས་དང་རིག་པ་དང་། །འཆི་བའི་ཕྱོགས་སུ་བཏང་བའམ། །མི་གཞན་ཐབས་རྣམས་#སྣ་ཚོགས་ཀྱིས། །བསད་ན་བརྟུལ་ཞུགས་ཉམས་པར་འགྱུར། །ཞེས་བྱ་བ་ཡན་ཆད་ཀྱིས་ཐབས་ཀྱིས་གསོད་པ་བསྟན་ཏེ།
[14b.6]ཐབས་ཀྱིས། ཚུལ་ཁྲིམས་ལྡན་ནམ་ཚུལ་ཁྲིམས་འཆལ། །དེ་བཞིན་ནད་ཀྱིས་བཏབ་པ་ལ། །གང་ཐོས་སྡུག་བསྔལ་ཉམ་ཐག་སྟེ། །ངེས་འཆིའི་ཆོས་གཏམ་དེ་མི་བྱ། །ཞེས་བྱ་བས་ཚིག་གི་སྒོ་ནས་ཐབས་ཀྱིས་གསོད་པ་རྣམས་ཤིག་བསྟན་ཏེ། དེ་ཡང་རྣམ་པ་གསུམ་ཡོད་དེ། གང་ཞེ་
[14b.7]ན། ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་བ་དང་། ནད་ཀྱིས་བཏབ་#པ་ལ་ཚུལ་ཁྲིམས་དང་ལྡན་ནམ་ཞེས་བྱ་བ་དང་། གང་ཐོས་ཞེས་བྱ་བ་དང་། ངེས་འཆིའི་ཆོས་གཏམ་དེ་མི་བྱ། །ཞེས་བྱ་བར་སྦྱར་ཏེ། ཚུལ་ཁྲིམས་དང་ལྡན་པ་ལ་འཚོ་བའི་ཡོ་བྱད་འདོད་པའི་ཕྱིར་ཚེ་དང་
[15a]
[15a.1]ལྡན་པ་ཁྱོད་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ཡིན་པས་འདི་ནས་ཤི་འཕོས་ནས་ཚེ་རབས་གཞན་དུ་སྐྱེས་ན་ལོ་ལེགས་པ་དང་འདྲ། མཐོ་རིས་ནི་དར་ལས་ཆོད། ཐར་པ་ནི་ཡོལ་བ་ལྟ་བུས་ཆོད་དེ་ལུས་དང་བྲལ་ནས་ལྷར་སྐྱེས་པར་འགྱུར་གྱིས་རང་གིས་རང་སོད་#ཅིག་ཅེས་
[15a.2]བསྒོ་བ་ལས་དེ་ཤི་ན་ནི་ཕས་ཕམ་པའོ། །མ་ཤི་ན་སྦོམ་པོའོ། །ཚུལ་ཁྲིམས་འཆལ་ཅེས་བྱ་བ་དང་། གང་ཐོས་ཞེས་བྱ་བ་དང་། ངེས་འཆིའི་ཆོས་གཏམ་དེ་མི་བྱ། །ཞེས་བྱ་བར་སྦྱར་ཏེ། ཚུལ་ཁྲིམས་འཆལ་བ་ཅན་ལ་ཡོ་བྱད་འདོད་པའི་ཕྱིར། འཆིར་གཞུག་གོ་སྙམ་དུ་བསམས་ནས་ཚེ་དང་ལྡན་པ་སྡིག་
[15a.3]པའི་ཆོས་ཅན་ལུས་དང་ངག་གིས་ངན་#པར་སྤྱོད་པ་ཁྱོད་ཇི་ཙམ་དུ་ཡུན་རིང་དུ་གསོན་པ་དེ་ཙམ་#ངན་སོང་དུ་སྐྱེ་བར་འགྱུར་བའི་སྡིག་འཕེལ་བས་རང་གིས་#རང་སོད་#ཅིག་ཅེས་བསྒོ་བ་ལས་ཤི་ན་ཕས་ཕམ་པར་འགྱུར་རོ#། །མ་ཤི་ན་སྦོམ་པོའོ། །དེ་བཞིན་ནད་ཀྱིས་བཏབ་པ་ལ། །གང་ཐོས་སྡུག་བསྔལ་ཉམ་ཐག་#
[15a.4]སྟེ། །ངེས་འཆིའི་ཆོས་གཏམ་དེ་མི་བྱ། །ཞེས་བྱ་བས་ནད་པ་སྦྱར་ཏེ། ནད་ཀྱིས་#བཏབ་པའི་ནད་པ་ལ་#ནད་པའི་ཡོ་བྱད་འདོད་པའི་ཕྱིར། ཚེ་དང་ལྡན་པ་ནད་བུ་ཅན་སྡུག་བསྔལ་གྱིས་#རྙོངས་པ་ཇི་སྲད་དུ་ཡུན་རིང་དུ་འཚོ་བ་དེ་སྲིད་དུ་སྡུག་བསྔལ་དུ་འགྱུར་གྱིས་རང་གིས་རང་སོད་#ཅིག་ཅེས་གདོན་མི་ཟ་བར་
[15a.5]འཆི་བའི་གཏམ་མི་བྱའོ། །གལ་ཏེ་གདོན་མི་ཟ་བར་འཆི་བར་འགྱུར་པའི་གཏམ་བྱས་པ་ལས་ཤི་ན་ཕས་ཕམ་པའོ། །མ་ཤི་ན་སྦོམ་པོའོ། །གོང་དུ་སྨོས་པ་ལྟར་བསྟན་པ་ལ་#དགེ་སྦྱོང་གིས་འགྱོད་དེ་ང་ནི་བྱིས་པ་དང་འདྲ་བས་གྱི་ན་ཞིག་སྨྲས་ཀྱི་རང་མ་གསོད་ཅིག་ཅེས་བསྒོ་བ་ལས་ཤི་ཡང་རུང་#མ་ཤི་ཡང་
[15a.6]རུང་ཕྱིས་འགྱོད་དེ་བསྒོ་ན་སྦོམ་པོར་ཟད་དོ། །སྨན་དང་ཞེས་བྱ་བ་ལ། སྨན་དེ་#དུག་གིས་བསད་པའི་གླེང་གཞི་ནི#། བཅོམ་ལྡན་འདས་ཛེ་ཏའི་ཚལ་ན་བཞུགས་སོ། །དེ་ན་ཁྱིམ་བདག་སྟོབས་སྡེ་ཞེས་བྱ་བ་ལོངས་སྤྱོད་ཆེ་བ་ཞིག་འདུག་པ་ཆུང་མ་དང་ཡོངས་སུ་སྤྱོད་པ་ལས་ཁྱེའུ་གཉིས་བདོག་སྟེ།
[15a.7]ཕུ་བོ་#ནི་སྡེ་པ། ནུ་བོ་ནི་ཉེ་#སྡེ་ཞེས་མིང་དུ་བཏགས་སོ། །དེ་ནས་དུས་གཞན་ཞིག་ན་སྡེ་པ་གཞན་དུ་ཚོང་#ལ་ཆས་པས་ནོར་མང་དུ་རྙེད་པས་དེ་ཆགས་ཏེ། ཡུན་རིང་དུ་མ་ལོག་གོ། །དེ་ནས་སྡེ་བའི་ཆུང་མ་འདོད་ཆགས་ཀྱིས་ཁོལ་བར་གྱུར་ནས་ཉེ་སྡེ་ལ་ལན་དུ་མ་ཞིག་བསྒུགས་#པ་ལས། ཉེ་སྡེས་ཀྱང་#
[15b]
[15b.1]ཕྱི་ཞིག་ན་སྤྱད་དེ་བུ་ཆགས་སོ། །དེ་ནས་སྡེ་པ་འོང་བ་ཐོས་ནས་ཉེ་སྡེས་འཇིགས་ནས་ཛེ་#ཏའི་ཚལ་དུ་རབ་ཏུ་བྱུང་ངོ་། །དེས་ཕྱིས་བདག་གི་ཁྱིམ་དུ་ཕྱིན་པ་དང་། སྡེ་པའི་ཆུང་མས་ཁྱོ་ནི་འོང་ཁྱོད་ནི་ཐར་ན་བདག་ཇི་ལྟར་བྱ་ཞེས་དྲིས་པ་དང་། ཉེ་སྡེས་གྲོགས་པོ་སྨན་པ་གཅིག་#ལ་ཇི་ལྟར་གྱུར་པ་རྒྱས་པར་
[15b.2]སྨྲས་ནས། སྨན་པས་བདག་གིས་#མངལ་འཇིག་པར་འགྱུར་བའི་སྨན་གྱིས་མངལ་ན་ཡོད་པ་དེ་དུམ་བུར་ཞིག་པར་འགྱུར་བ་དེ་སྦྱིན་ནོ་ཞེས་བྱས་ཏེ། སྡེ་པའི་ཆུང་མ་ལ་སྨན་ཕྱེ་མ་བླུད་པས་རུམ་ན་ཡོད་པ་ཡང་མེད་པར་གྱུར་ཏོ། །ཉེ་སྡེ་ཡང་སྨན་བྱས་པ་ལ་ཡི་རང་ནས་ཅང་མ་སྨྲས་སོ། །དུས་ཕྱི་ཞིག་
[15b.3]ན་དེ་ལྟར་གྱུར་པ་སྐྱེ་བོ་ཀུན་གྱིས་ཐོས་ནས་དགེ་སློང་ཞེས་འཛེར་ཏོ། །དེ་ལྟར་གྱུར་པ་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏེ། བཅོམ་ལྡན་འདས་ཀྱིས་ཉེ་སྡེ་ལ་ཁྱོད་ཀྱིས་དེ་ལྟར་བྱས་པ་བདེན་ནམ་ཞེས་སྨྲས་ནས། བཙུན་པ་དེ་ལྟར་ནི་མ་བགྱིས་ཀྱི་རྗེས་སུ་ཡི་རང་བ་ནི་བགྱིས་སོ་
[15b.4]ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཉེ་སྡེ་ལ་ནི་ལྟུང་བ་མེད་ཀྱིས་ཕྱིན་ཆད་དེ་ལྟ་བུ་ལ་ཡི་རང་ན་ཉེས་པ་དང་བཅས་པར་འགྱུར་རོ། །དགེ་སྦྱོང་གིས་སྐྱེས་པའམ་བུད་མེད་དམ་མ་ནིང་ལ་གསད་#སེམས་ཀྱིས་ཁ་ཟས་ཀྱི་ནང་དུ་དུག་སྦྱར་མ་བླུགས་པ་དང་། ཁྲུས་ཆུ་དང་། སྐོམ་#
[15b.5]དང་། བདུག་སྤོས་ཀྱི་#ནང་དུ་དུག་གི་ཕྱེ་མ་བླུགས་ཏེ་འདིས་འཆི་བར་འགྱུར་རོ་སྙམ་ན་ཡང་དེ་ཉིད་ཀྱི་ཚེ་ཤིའམ་དུས་ཕྱིས་ཤི་ན་ཕས་ཕམ་པའོ། །མ་ཤི་ན་སྦོམ་པོའོ། །དགེ་སྦྱོང་གིས་#ཆང་ངམ་སྨྱོ་བའི་སྨན་བྱིན་ཏེ་ཤི་བར་གྱུར་ཅིག་སྙམ་པ་ལས་དེ་ཉིད་ཀྱི་ཚེའམ་ཕྱིས་ཤི་ན་ཕས་ཕམ་པའོ། །
[15b.6]མ་ཤི་ན་སྦོམ་པོའོ། །འཆི་བའི་ཕྱོགས་སུ་བཏང་ངམ་#ཞེས་བྱ་བ་ལ་དགེ་སྦྱོང་གིས་གསད་#སེམས་ཀྱིས་གཡང་དུ་ཕུལ་བ་དང་། མེར་ཕུལ་བ་དང་། འཆི་བའི་ཕྱོགས་སུ་བཏང་བ་དང་། སྟག་གཟིག་#ལ་སོགས་པ་གཅན་གཟན་གདུག་#པའི་གནས་སུ་བཏང་བ་དང་། སྦྲུལ་དང་སྡིག་པ་ལ་སོགས་པ་སྲོག་ཆགས་
[15b.7]གདུག་པའི་གནས་སུ་བཏང་བའམ། གསད་#པར་འདོད་པས་གྲང་བའི་ཚེ་གྲིབ་མ་ལ་བཞག་#ནས་ལྷགས་པ་ལ་བོར་བ་དང་། དྲོ་བའི་ཚེ་ཉི་མ་ལ་བཞག་ནས་དྲོ་#ཁུང་དུ་བཞག་སྟེ་ཐབས་འདིས་ཤི་བར་གྱུར་ཅིག་སྙམ་པ་ལས་དེའི་ཚེ་ཤིའམ་ཕྱིས་ཤི་ན་ཡང་ཕས་ཕམ་པའོ། །མི་གཞན་ཐབས་རྣམས་སྣ་ཚོགས་
[16a]
[16a.1]ཀྱིས། །བསད་ན་བརྟུལ་ཞུགས་ཉམས་པར་འགྱུར། །ཞེས་བྱ་བ་ལ་གཞན་གསད་#པའི་བསམ་པས་ཐབས་ཀྱིས་འཆི་བས་བསད་པ་འམ་ཤིང་ལ་འཆིང་བས་བསད་པ་དང་། དེ་ལ་དགེ་སྦྱོང་གིས་གསད་#སེམས་ཀྱིས་སྤྱུགས་ནས་སྟག་གཟིག་གམ་འཕར་སྤྱང་ལ་སོགས་
[16a.2]པས་ཟོས་སམ། ཐབས་ཅི་ཡང་རུང་བས་ཤི་ན་ཕས་ཕམ་པའོ། །དགེ་སྦྱོང་གིས་གསད་#སེམས་ཀྱིས་མི་ཤིང་ལ་འབྲེང་རློན་གྱིས་བཅིངས་ཏེ་བཞག་པ་ལ་སྟག་གཟིག་གམ་འཕར་སྤྱང་ལ་སོགས་པས་ཟོས་སམ་ཅིའི་ཐབས་ཀྱིས་ཤི་ཡང་ཕམ་པའོ། །དགེ་སྦྱོང་གིས་#བུད་མེད་སྦྲུམ་མ་གསད་
[16a.3]པར་བསམས་ཏེ་དཀུ་མཉེས་པ་ལས་མ་ཤི་ན་ཕས་ཕམ་པའོ། །བུ་ཤི་#ལ་མ་མ་ཤི་ན་སྦོམ་པོའོ། །གཉིས་ཀ་མ་ཤི་ན་སྦོམ་པོའོ། །བུ་བསད་པར་འདོད་དེ། དཀུ་མཉེས་པ་ལས་བུ་ཤི་ལ་མ་མ་ཤི་ན་ཕས་ཕམ་པའོ། །བུ་མ་ཤི་ལ་མ་ཤི་ན་ཡང་#སྦོམ་པོའོ། །གཉིས་ཀ་མ་ཤི་ན་ཡང་སྦོམ་
[16a.4]པོའོ། །དེ་བཞིན་དུ་དགེ་སྤྱོང་གིས་གསད་#སེམས་ཀྱིས་སྙིང་ཁར་#འདེབས་པའི་རལ་གྲི་དང་ཆུ་གྲི་བཞག་པ་དང་། གཏོར་མ་བཞག་པ་དང་། ས་མདའ་དང་། རྩང་བཙུགས་པ་ལ་སོགས་པ་བཞག་པ་ལ་ཤི་ན་ཕས་ཕམ་པའོ། །མ་ཤི་ན་སྦོམ་པོའོ། །འདི་ཡན་ཆད་ཀྱིས་ཕས་ཕམ་པའི་ཟླ་ལ་སྦོམ་
[16a.5]པོ་ཡང་བཅད་དེ་བཤད་དོ། །ཡན་ལག་བདུན་དང་ལྡན་ན་སྲོག་གཅོད་པའི་མཚན་ཉིད་ཕས་ཕམ་པར་འགྱུར་རོ། །བདུན་གང་ཞེ་ན། མིའི་རྒྱུད་ཡིན། མི་ཡིན། གཞན་མ་ཡིན། མིར་འདུ་ཤེས། སྦྱོར་བ་བྱས། འཚོ་བ་ཉམས། བདག་མ་སྨྱོས་པའོ། །བྱོལ་སོང་དང་ནི་སེམས་དམྱལ་དང་། །
[16a.6]ཡི་དགས་འོན་ཏེ་ལྷ་ཡང་རུང་#། །བསད་ན་ངན་འགྲོར་ལྷུང་བ་ཡིས#། །སྡིག་པ་སྦོམ་པོ་ཐོབ་པར་འགྱུར། །བརྟུལ་ཞུགས་ཅན་གྱིས་བསད་སྙམ་སྟེ། །ལུས་དང་ངག་གི་སྦྱོར་བ་ལས། །སྐྱེ་བོ་གསོན་ཡང་དེ་ལ་ནི། །ཁ་ན་མ་ཐོ་རྣམ་གསུམ་འགྱུར། །ཞེས་བྱ་བས་ཉེས་པ་སྦོམ་པོའི་གནས་བསྟན་
[16a.7]ཏེ། བྱོལ་སོང་ནི་རྟ་དང་བ་ལང་དང་ལུག་ལ་སོགས་པ་ལ་བྱ་སྟེ། དགེ་སྦྱོང་གིས་གསད་#སེམས་ཀྱིས་བྱོལ་སོང་བསད་ན་སྡིག་པ་སྦོམ་པོ་ཐོབ་པར་འགྱུར་ཞེས་བྱ་བར་སྦྱར་ཏེ། སེམས་ཅན་དམྱལ་བ་དང་ཞེས་བྱ་བ་#སེམས་ཅན་དམྱལ་བ་ལ་རྣམ་པ་གཉིས་ཏེ། སེམས་ཅན་དམྱལ་བ་ཆེན་པོ་
[16b]
[16b.1]དང་། ཕྱོགས་གཅིག་པའི་སེམས་ཅན་དམྱལ་བའོ། །སེམས་ཅན་དམྱལ་བ་ཆེན་པོ་ལ་ཡང་རྣམ་པ་གཉིས་ཏེ། ཚ་བའི་སེམས་ཅན་དམྱལ་བ་དང་། གྲང་བའི་སེམས་ཅན་དམྱལ་བའོ། །དེ་ལ་ཚ་བའི་སེམས་ཅན་དམྱལ་བ་ནི་མནར་མེད་པ་དང་། རབ་ཏུ་ཚ་བ་དང་། ཚ་བ་དང་། ངུ་
[16b.2]འབོད་ཆེན་པོ་དང་། ངུ་འབོད་དང་། བསྡུས་#འཇོམས་དང་། ཐིག་ནག་དང་། ཡང་སོས་སོ། །གྲང་བའི་སེམས་ཅན་དམྱལ་བ་ཆེན་པོ་ལ་ཡང་བརྒྱད་དེ། ཆུ་བུར་དང་། ཆུ་བུར་ཆེན་པོ་དང་། པདྨ་དང་། པདྨ་ཆེན་པོ་དང་། ཨུཏྤ་ལ་དང་། ཨུཏྤ་ལ་ཆེན་པོ་དང་། ཧ་ཧ་ཞེས་ཟེར་བ་དང་། ཧུ་ཧུ་
[16b.3]ཞེས་ཟེར་རོ། །ཕྱོགས་གཅིག་པའི་སེམས་ཅན་དམྱལ་བ་ཞེས་བྱ་བ་ནི་ལྷའི་ལོངས་སྤྱོད་ཀྱང་ཡོད་ལ་བར་འགའ་ནི་སེམས་ཅན་དམྱལ་བའི་སྡུག་བསྔལ་ཡང་མྱོང་བའོ། །དགེ་སྦྱོང་གིས་གསད་#སེམས་ཀྱིས་སེམས་ཅན་དམྱལ་བ་བསད་ན་#སྡིག་པ་སྦོམ་པོ་ཐོབ་པར་འགྱུར་ཞེས་བྱ་བར་སྦྱར་རོ། །
[16b.4]ཡི་དགས་ཞེས་བྱ་བ་ལ། ཡི་དགས་ཞེས་བྱ་བ་ནི་ཕལ་ཆེར་གཅོང་རོང་དང་མྱ་ངན་#དག་ན་གནས་སོ། །དགེ་སྦྱོང་གིས་གསད་#སེམས་ཀྱིས་ཡི་དགས་བསད་ན་སྡིག་པ་སྦོམ་པོ་ཐོབ་པར་འགྱུར་ཞེས་བྱ་བར་སྦྱར་རོ། །ལྷ་ཡང་རུང་ཞེས་བྱ་བས་འདོད་ཁམས་ཀྱི་ལྷ་དང་། གཟུགས་ཁམས་ཀྱི་ལྷ་དང་།
[16b.5]གནས་རིས་བཅུ་བདུན་ཞེས་བྱ་བ་ན་གནས་པའི་ལྷ་རྣམས་དགེ་སྦྱོང་གིས་#བསད་ན་སྡིག་པ་སྦོམ་པོ་ཐོབ་པར་འགྱུར་ཞེས་བྱ་བར་སྦྱར་རོ། །སྡིག་པ་སྦོམ་པོ་ཐོབ་པར་འགྱུར་ཞེས་བྱ་བ་གང་ཞེ་ན། སྡིག་པ་སྦོམ་པོའི་འབྲས་བུ་བསྟན་པའི་ཕྱིར། བསད་ན་ངན་སོང་#ལྟུང་བའི་ཞེས་བྱ་བ་སྨོས་ཏེ། དཔེར་ན་
[16b.6]དུག་ཆེན་པོས་ཀྱང་སྐྱེས་བུ་ཆེན་པོ་གསོད་ལ། དུག་ཆུང་ངུས་ཀྱང་སྐྱེས་བུ་ཆེན་པོ་གསོད་པ་དང་། དེ་བཞིན་དུ་མེ་སྟག་ཆེན་པོས་ཀྱང་ཡུལ་ཆེན་པོ་ཚིག་#ལ་མེ་སྟག་ཆུང་ངུས་ཀྱང་ཡུལ་ཆེན་པོ་སྲེག་#པ་དང་། ཕས་ཕམ་པ་བྱུང་ན་ངན་སོང་གསུམ་དུ་སྐྱེ་བར་#འགྱུར་བ་དེ་བཞིན་དུ་ཉེས་པ་སྦོམ་པོ་བྱུང་བ་ལ་ཚུལ་
[16b.7]བཞིན་དུ་མ་བཤགས་ན་ངན་སོང་གསུམ་དུ་ལྟུང་བར་འགྱུར་རོ་ཞེས་བྱ་བའི་དོན་ཏོ། །བརྟུལ་ཞུགས་ཅན་གྱིས་བསད་སྙམ་སྟེ། །ཞེས་བྱ་བ་ལ། དགེ་སྦྱོང་གིས་སྐྱེས་པ་དང་བུད་མེད་དང་། མ་ནིང་སྟེ་མི་རྣམ་པ་གསུམ་ལས་གང་ཡང་རུང་བ་ཅིག་བསད་དོ་སྙམ་དུ་བསམས་ཏེ་ལུས་དང་ངག་གི་#
[17a]
[17a.1]སྦྱོར་བ་བཤམས་པ་ལས་ཞེས་བྱ་བ་ལ། ལུས་ཀྱིས་བཤམས་ཏེ་ཁུ་ཚུར་དང་ཐལ་མོ་དང་རྡོ་དབྱིག་དང་མཚོན་ཆས་ཀྱང་བཏབ། ངག་གིས་བཤམས་ཏེ་གོང་དུ་བཤད་པ་བཞིན་དུ་ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་བ་དང་། ནད་པ་རྣམས་འཆི་བའི་
[17a.2]རིགས་སོ་ཞེས་བསྔགས་པ་བརྗོད་པ་ལས་ཞེས་བྱ་བའི་ཐ་ཚིག་གོ། །སྐྱེ་བོ་གསོན་ཡང་དེ་ལ་ནི། །ཁ་ན་མ་ཐོ་རྣམ་གསུམ་འགྱུར། །ཞེས་བྱ་བ་ལ། གསད་#པར་ཡང་བསམས་ལུས་དང་ངག་གིས་ཀྱང་བཤམས་པ་ལས་མི་གསུམ་པོ་གསོན་ཏེ་མ་ཤི་ཡང་དགེ་སྦྱོང་དེ་ལ་ཁ་ན་མ་ཐོ་བ་རྣམ་པ་གསུམ་
[17a.3]ཐོབ་པར་འགྱུར་ཏེ། ཡིད་ཀྱི་ཉེས་པ་སྦོམ་པོ་དང་། ལུས་ཀྱི་ཉེས་པ་སྦོམ་པོ་དང་། ངག་གི་ཉེས་པ་སྦོམ་པོ་ཐོབ་པར་འགྱུར་རོ། །དེ་ལ་གསད་#པར་བསམས་པས་ན་ཡིད་ཀྱི་ཉེས་པ་སྦོམ་པོ་ཐོབ་པར་འགྱུར་རོ། །ལུས་ཀྱིས་བཤམས་པས་ན་ལུས་ཀྱི་ཉེས་པ་སྦོམ་པོ་ཐོབ་པར་འགྱུར་རོ། །ངག་གིས་བཤམས་པས་ན་ངག་གི་ཉེས་
[17a.4]པ་སྦོམ་པོ་ཐོབ་པར་འགྱུར་རོ། །དེ་དག་ཚུལ་བཞིན་དུ་མ་བཤགས་ན་ངན་སོང་གསུམ་དུ་ལྟུང་ངོ་ཞེས་སྔར་བཤད་པ་བཞིན་དུ་སྦྱར་#རོ། །རྡོ་དབྱུག་ཁུ་ཚུར་འཚོག་པ་དང་། །དེ་ལས་གཞན་པའི་གནོད་པ་དང་། །བ་ལང་ལ་སོགས་གནོད་མི་#བྱ། །རྟ་ལ་སོགས་པ་མི་བཞོན་#ནོ། །ཞེས་བྱ་བས་ཉེས་
[17a.5]བྱས་ཀྱི་གནས་བསྟན་ཏེ། དེ་ཞེས་བྱ་བ་ལ་གསད་#སེམས་ནི་མེད་ཀྱི་དགེ་སྦྱོང་གིས་#ཁྲོ་སེམས་ཀྱིས་མི་རྣམ་པ་གསུམ་ལ་བཙོགས་#ན་ཉེས་བྱས་སུ་འགྱུར་རོ། །ཁུ་ཚུར་འཚོག་པ་དང་ཞེས་བྱ་བ་ལ་གསད་#སེམས་ནི་མེད་ཀྱིས། ཁྲོ་སེམས་ཀྱིས་མི་རྣམ་པ་གསུམ་བཙོགས་ན་#ཉེས་བྱས་སུ་འགྱུར་
[17a.6]རོ། །དེ་ལས་གཞན་པའི་གནོད་པ་དང་ཞེས་བྱ་བ་ནི་གསད་#སེམས་མེད་པར་ཁྲོ་སེམས་ཀྱིས་#མི་རྣམས་ལ་ཐལ་མོ་བསྣུན་ནམ།# ལྕག་གིས་གཞུས་སམ། ལྷགས་པའི་ཚེ་གྲང་བ་ལ་བོར་ཏམ། ཚ་བའི་ཚེ་དྲོ་བ་ལ་བོར་ན་ཉེས་བྱས་སུ་འགྱུར་ཏེ་དབྱུག་པ་ལ་སོགས་པའི་གྲངས་སུ་#ཕག་པ་ཉེས་བྱས་
[17a.7]ཀྱི་གྲངས་ཀྱང་དེ་སྙེད་ཅིག་འཐོབ་བོ། །བ་ལང་ལ་སོགས་གནོད་མི་བྱ། །ཞེས་བྱ་བ་ནི་གཞན་ཡང་བ་ལང་དང་གླང་པོ་ཆེ་དང་རྟ་དང་ལུག་ལ་སོགས་པ་ལ་ཁལ་དགལ་བ་དང་བརྡེག་པ་ལ་སོགས་པའི་གནོད་པ་མི་བྱ་སྟེ། དེ་ལྟ་བུའི་གནོད་པ་བྱས་ན་ཉེས་བྱས་སུ་འགྱུར་རོ། །རྟ་ལ་སོགས་པ་མི་བཞོན་
[17b]
[17b.1]ནོ། །ཞེས་བྱ་བ་ནི་དགེ་སྦྱོང་གིས་རྟ་དང་གླང་པོ་ཆེ་ལ་སོགས་པ་བཞོན་པར་མི་བྱ་སྟེ། ཞོན་#ན་ཉེས་བྱས་སུ་འགྱུར་རོ། །དེ་ལ་གནོད་#སེམས་མེད་ལ་ཡན་ལག་གཞན་ཡོད་ན་ནི་ཉེས་བྱས་སུ་བཞག་གོ། །གནོད་#སེམས་ཡོད་ལ་ཡན་ལག་གཞན་མི་ལྡན་ན་སྦོམ་པོའོ། །ཡན་ལག་ཐམས་ཅད་
[17b.2]དང་ལྡན་ན་མི་དེ་ནོར་ཏེ་གཞན་བསད་ན་ཡང་སྦོམ་པོའོ། །གསད་#པར་བསམས་ཏེ་སྦྱོར་བ་བྱས་པ་ལས་མ་ཤི་ན་ཡང་སྦོམ་པོའོ། །ཡན་ལག་ཐམས་ཅད་དང་ལྡན་ན་ཕས་ཕམ་པའོ། །ཕས་ཕམ་པ་བཞི་ལས་སྲོག་གཅོད་པའི་ཕས་ཕམ་པ་#རྫོགས་སོ།། །།མ་བྱིན་པར་ལེན་པའི་
[17b.3]གླེང་གཞི་ནི་བཅོམ་ལྡན་འདས་ཡུལ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་#ཀ་གནས་པ་ན་བཞུགས་སོ། །དེའི་ཚེ་སྔོན་རྫ་མཁན་ལས་རབ་ཏུ་བྱུང་བའི་དགེ་སློང་ནོར་ཅན་ཞེས་བྱ་བ་ཞིག་རྒྱལ་པོའི་ཁབ་ཀྱི་དགོན་པ་ན་སྤྱིལ་པོ་བྱས་ནས་གནས་སོ། །དེ་ནས་ནོར་ཅན་གང་གི་ཚེ་རྒྱལ་པོའི་
[17b.4]ཁབ་ཏུ་བསོད་སྙོམས་#ལ་ཞུགས་པ་དེའི་ཚེ་རྒྱལ་པོའི་ཁབ་ཀྱི་ཕྱུགས་རྫི་དང་ཤིང་ཐུན་རྣམས་ཀྱིས་#སྤྱིལ་པོ་བཤིག་དྲལ་ཅིང་རྩྭ་#དང་ཤིང་རྣམས་སོ་སོར་ཁྱེར་རོ། །དེ་ལྟ་བུ་ལན་དུ་མ་ཞིག་བྱས་པ་དང་རྫ་མཁན་ནོར་ཅན་གྱིས་བསམས་པ་འདི་ལྟ་བུ་ཐམས་ཅད་དུ་གཙེས་ཤིང་སྤྱིལ་པོ་བྱེད་པ་ཡང་ཤིན་ཏུ་ཉོན་
[17b.5]མོངས་#ལ་དག་བའི་བར་ཆད་དུ་ཡང་འགྱུར་བས་འོ་ན་བདག་གིས་སྔོན་གྱི་གནས་རྗེས་སུ་བསྒྲུབ་པས་སའི་སྤྱིལ་པོ་ཞིག་བྱས་ལ་སོ་བཏང་སྟེ་གནས་སོ་སྙམ་དུ་བསམས་ནས་ཁང་བུའི་རྨང་བཏིང་ཞིང་བརྩིགས་ནས་སོ་བཏང་ནས་ཤིན་ཏུ་མཛེས་པ་མེ་ཏོག་ཛི་བ་ཀ་བཞིན་དུ་དམར་ཞིང་#འཚེར་བ་ཞིག་བྱས་ཏེ་
[17b.6]གནས་སོ། །དུས་གཞན་ཞིག་ན་བཅོམ་ལྡན་འདས་འཁོར་དགེ་སློང་རྣམས་དང་གནས་རྒྱུ་ཞིང་གཤེགས་པས་ཁང་བུ་གཟིགས་ནས་སུའི་ཡིན། དེ་ནི་དགེ་སློང་ནོར་ཅན་གྱི་ལགས་སོ་ཞེས་སྨྲས་སོ། །འདི་ལྟ་བུའི་ཕྱིར་མུ་སྟེགས་པ་རྣམས་ངལ་འཕྱ་བར་འགྱུར་#གྱིས་ཁང་བུ་ཆོམས་ཤིག་#ཅེས་
[17b.7]བཀའ་སྩལ་ནས། དགེ་སློང་རྣམས་ཀྱིས་ཁང་བུ་བཅོམ་སྟེ་གནས་སོ། །དེ་ནས་ཡང་ནོར་ཅན་གྱིས་#བསམ་པ་རྒྱལ་པོའི་ཁབ་གྱི་ཤིང་སྲུངས་ཀྱི་དཔོན་དང་བདག་མཛའ་བས་ཤིང་གི་ཁང་པ་ཞིག་བྱའོ་སྙམ་དུ་བསམས་ནས། ཤིང་སྲུངས་པ་ལ་ལྷས་ཤིང་བྱིན་#པ་འོན་ཅིག་ཅེས་སྨྲས་པ་དང་། ཤིང་
[18a]
[18a.1]སྲུངས་ཀྱི་དཔོན་པོས་ཀྱང་ལྷས་ཕུལ་ན་བཙུན་པ་ཅི་བདེར་སྣོམས་ཤིག་ཅེས་སྨྲས་ནས། རྒྱལ་པོའི་ཁབ་ཀྱི་ཞིག་རལ་བཅོས་པའི་རྒྱུ་ཤིང་བཅད་པ་དུ་མ་ཞིག་གཤགས་གཏུབས་ཏེ་ཁྱེར་བ་#གྲོང་ཁྱེར་སྲུངས་པའི་#དཔོན་པོས་མཐོང་ནས་རྒྱལ་པོ་མ་སྐྱེས་དགྲ་ལ་སྨྲས་སོ། །རྒྱུ་མཚན་ཅན་བཀུག་#
[18a.2]སྟེ། དགེ་སློང་ཁྱོད་ནི་ཤིང་མ་བྱིན་པར་ལེན་པ་དབང་བྱས་པ་དང་། མི་དབང་གིས་བདག་ལ་སྩལ་ཏོ། །སྔོན་ཡབ་ཀྱིས་ལྷ་ཁྱོད་རྒྱལ་པོར་དབང་བསྐུར་བའི་ཚེ་ངའི་ཡུལ་དགེ་བར་གྲགས་པས་དགེ་སློང་དང་བྲམ་ཟེ་རྣམས་རྩྭ་དང་ཤིང་དང་ཆུ་མ་བྱིན་པར་མི་སྤྱོད་#པ་དེ་ཐམས་ཅད་ཅི་བདེར་སྤྱོད་ཅིག་ཅེས་ཁྱུ་
[18a.3]མཆོག་གི་སྒྲ་ཆེན་པོ་བསྒྲགས་པ་ནི་#མི་དགོངས་སམ། རྒྱལ་པོས་སྨྲས་པ། དེ་ནི་ཡོངས་སུ་བཟུང་བ་མེད་པ་ལ་བྱའི་ཡོངས་སུ་བཟུང་བ་ལ་ནི་མ་ཡིན་ནོ་ཞེས་སྨྲས་པ་དང་། ཡོངས་སུ་མ་བཟུང་བ་ལ་ནི་རྒྱལ་པོས་མངའ་བགྱིར་ཅི་མཆིས་ཞེས་གསོལ་པ་དང་། རྒྱལ་པོ་ཤིན་ཏུ་ཁྲོས་ནས་མ་བྱིན་པར་
[18a.4]ལེན་པའི་དགེ་སློང་བསད་པར་རིགས་ན་ཁྱོད་ད་སླན་ཆད་དེ་ལྟར་མ་བྱེད་ཅིག་ཅེས་སྤྱོས་ནས་སླར་བཏང་ངོ་། །དེ་ནས་དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་སོང་ལ་རྒྱལ་པོའི་གྲོང་དཔོན་དང་
[18a.5]དེད་དཔོན་ལམ་བྱིན་པར་ལེན་པ་ཇི་ཙམ་ཞིག་བླངས་པས་སྲོག་ལ་འབབ་པ་དང་ཡུལ་ནས་དབྱུང་བའི་ཆད་པ་གཅོད་པར་བྱེད་སྨྲོས་ཤིག་ཅེས་བཀའ་སྩལ་པ་དང་། ཀུན་དགའ་བོས་དེ་བཞིན་དུ་སྨྲས་པ་དང་། མ་ཤ་#ཀ་ལྔའམ་ལྔ་ལས་ལྷག་པ་བླངས་པས་སྲོག་ལ་འབབ་པ་དང་ཡུལ་ནས་འབྱིན་
[18a.6]པའི་ཆད་པ་གཅོད་#དོ་ཞེས་མཆི་བ་བཅོམ་ལྡན་འདས་ལ་དེ་བཞིན་གསོལ་པས། དགེ་སློང་ནོར་ཅན་བཀུག་ནས་རྣམ་གྲངས་དུ་མར་སྨད་ནས་འདུལ་བ་ལ་བསླབ་པའི་གནས་བཅས་སོ། །དགེ་ཚུལ་བདག་གམ་གཞན་རྣམས་ཀྱིས། །རྐུ་སེམས་མཐུ་དང་འཇབ་#བུ་ཡིས། །འཁྲུལ་པ་མེད་པར་མི་
[18a.7]གཞན་གྱི། །གནས་ནས་མ་ཤ་ལྔ་ཙམ་མམ། །རང་གི་ཡུལ་ནས་བྱུང་བ་ཡང་། །ཀཱར་ཥཱ་པ་ཎའི་#བཞི་ཆ་བརྐུས#། །དེ་བརྐུས་ཚུལ་ཁྲིམས་ཞིག་པར་འགྱུར། །ཞེས་བྱ་བ་ལ་དགེ་ཚུལ་ནི་རབ་ཏུ་བྱུང་བའི་སྡོམ་པ་ལ་གནས་པའོ། །བདག་གིས་ཀྱང་རྐུ་སེམས་དང་ལྡན་པས་མཐུ་དང་འཇབ་བུ་
[18b]
[18b.1]ཡིས་བརྐུས་ན་ཚུལ་ཁྲིམས་ཞིག་པར་འགྱུར་ཞེས་བྱ་བར་སྦྱར་ཏེ། འདི་ལྟར་རྐུ་སེམས་དང་ལྡན་པས་མཐུ་དང་འཇབ་བུས་ཀཱར་ཥཱ་པཎའི་#བཞི་ཆ་བརྐུས་ཏེ་རིན་ཐང་ཚང་ན་#ཕས་ཕམ་པའོ། །རྐུ་སེམས་མེད་ན་བསྡམ་པར་བྱ་བའི་ཉེས་བྱས་གཅིག །གཞན་གྱིས་#མཐུ་དང་འཇབ་བུས་བརྐུས་ན་ཚུལ་
[18b.2]ཁྲིམས་ཞིག་པར་འགྱུར་ཏེ། བདག་ཉིད་ཀྱིས་ནི་མ་ཡིན་གྱིས་དགེ་སློང་གྲོགས་པོ་ཞིག་ལ་རྐུར་བཅུག་པ་ལས་དེས་མཐུ་དང་འཇབ་བུས་བརྐུས་ཏེ། ནོར་བདག་ཅག་སོ་སོར་བགོས་རིན་ཐང་ཚང་ན་ཕས་ཕམ་པར་འགྱུར་རོ། །རིན་ཐང་མ་ཚང་ན་ཉེས་བྱས་སྦོམ་པོ་རེ་རེ་བརྐུས་ན་བརྐུས་ཤས་ཀྱི་#སྐལ་བ་བླངས་
[18b.3]ན་ཉེས་པ་སྦོམ་པོ་གཅིག །འཁྲུལ་པ་མེད་པར་མི་གཞན་གྱི་ཞེས་བྱ་བ་ལ་འཁྲུལ་པ་ནི་རྨོངས་པ་དང་མི་དྲན་པ་ཡིན་ལ་དེ་མེད་པ་ནི་སེམས་རང་བཞིན་དུ་གནས་པའོ། །ཡང་བརྐུ་བར་བྱ་བའི་རྫས་གང་ཡིན་པ་དེ་ཉིད་མངོན་པར་ཐོབ་པ་ལ་བྱ་སྟེ། བརྐུ་བར་བྱ་བའི་རྫས་ཉིད་ནི་མ་ཐོབ་ཀྱི་བར་དུ་རྫས་
[18b.4]གཞན་གྱིས་ཐོབ་པ་ལས་འཁྲུལ་ཞེས་བྱ་སྟེ་དེ་ནི་རིན་ཐང་ཚང་ཡང་ཕས་ཕམ་པར་མི་བྱ་སྟེ་སྦོམ་པོར་འགྱུར་རོ། །མི་གཞན་ཞེས་བྱ་བ་ནི་བདག་གི་ནོར་དགར་བའི་ཚིག་སྟེ། མི་གཞན་གྱི་ནོར་བརྐུས་ན་ཕས་ཕམ་པར་འགྱུར་རོ#། །བདག་གི་ནོར་བརྐུས་ན་རིན་ཐང་ཚང་ཡང་སྤོམ་པོར་མི་འགྱུར་རོ། །
[18b.5]གནས་ནས་མ་ཤ་ལྔ་ཙམ་ཞེས་བྱ་བ་ལ་གནས་ནི་ནོར་རྫས་གནས་ནས་སྤགས་ཏེ་བར་དུ་ཆོད་རིན་ཐང་ཚང་བ་ལས་ཕམ་པའོ། །དེ་ཡང་གནས་གཅིག་སྟེ་གཞི་མ་ཉམས་པ་ལ་ཚོན་ལ་སོགས་པ་མ་གྲོགས་པ་དང་། ས་སྒར་སྒུར་མེད་ན་གཞི་གཅིག་པ་ཞེས་བྱ་བ་སྟེ་ནམ་ཐ་དད་པ་གཅིག་#གིས་མ་ཆོད་ཀྱི་
[18b.6]བར་དུ་ཕམ་པར་མི་གཞག་#གོ། །མ་ཤ་ལྔ་ཙམ་ཞེས་བྱ་བ་ནི་རྒྱ་གར་གྱི་རིན་ཐང་གཞལ་ན་དངུལ་ཞོ་གཅིག་ཙམ་བརྐུས་ན་ཕམ་པར་བརྩིའོ། །ཡང་ཁ་ཅིག་#གིས་ནི་ཞོའི་བརྒྱད་ཆ་གཅིག་ལ་བྱས་ཏེ་དེ་ཙམ་གྱིས་ནི་རིན་ཐང་ཚང་བར་བརྩིའོ། །རང་གི་ཡུལ་ནས་བྱུང་བ་གང་ཞེས་བྱ་བ་ནི་རིན་ཐང་ཚང་བ་
[18b.7]ཡང་བརྐུས་བའི་དུས་དེ་ཉིད་ན་རིན་ཐང་ཚང་མ་ཚང་བརྩིའོ། །ཁ་ཅིག་#བརྐུས་པའི་དུས་དེ་ཉིད་ན་རིན་ཐང་མ་ཚང་ལ་དཀོན་མོད་དང་སྦྱར་ཏེ། དུས་ཕྱི་ཞིག་ན་རིན་#ཐང་ཚང་བ་ལྟ་བུ་ནི་ཕམ་པར་མི་གཞག་#སྦོམ་པོའོ། །ཀཱཪྵཱ་པ་ཎའི་#བཞི་ཆ་བརྐུས། །ཞེས་བྱ་བ་ནི་གོང་དུ་མ་ཤ་ལྔ་བཤད་པ་དང་འདྲའོ། །
[19a]
[19a.1]སྦྱོར་བའི་ཚེ་ན་ཉེས་བྱས་སོ་ཞེས་བྱ་བ་ནི་དང་པོ་བརྐུ་#བར་བསམས་ཏེ་སྟན་དང་ཁྲི་ལས་ལངས་པའི་དུས་ཉིད་ན་ཉེས་བྱས་སུ་འགྱུར་རོ། །རྡོ་ཁུ་རྩ་བ་འབྲས་བུ་ཤིང་། །ཞེས་བྱ་བ་ལ་རྩ་བ་ནི་གླ་#སྒང་དང་བོང་ང་ཞེས་བྱ་བ་ལ་སོགས་པའོ། །འབྲས་བུ་ནི་ཤིང་ཐོག་ལ་སོགས་པའོ། །
[19a.2]ཤིང་ནི་སྐྱེད་ཤིང་རྣམ་པ་སྣ་ཚོགས་ཏེ། དེ་དག་བརྐུས་ཏེ་རིན་ཐང་ཚང་ན་ཕམ་པ་མ་ཚང་ན་སྦོམ་པོའོ། །སྡོང་བུ་ལོ་མ་ཤུན་པ་ཆུ། །ཞེས་བྱ་བ་ལ། སྡོང་བུ་ནི་མར་དང་སྨན་ཁྲིལ་བུའི་རིགས་སུ་གཏོགས་པའོ། །ལོ་མ་ནི་ཤིང་ལོ་ལྡུམ་#ལོངས་སྤྱད་པར་འོས་པར་རུང་བའོ། །ཤུན་པ་ནི་གྲོ་ག་
[19a.3]ལ་སོགས་པའོ། །ཆུ་ནི་ཁྲུས་ཆུ་དང་བཏུང་ཆུ་ལྟ་བུ་སྟེ་རྒྱ་མཚོར་ཞུགས་པ་དང་མྱ་ངམ་ལྟ་བུར་འགྲོ་བ་སྟེ་ཆུ་ཤིན་དུ་དཀོན་པའི་དུས་ན་བརྐུ་བའོ། །མེ་ཏོག་ཆུ་སྐྱེས་ཐང་སྐྱེས་དང་། །ཞེས་བྱ་བ་ནི་མེ་ཏོག་ཆུ་ནས་#སྐྱེས་པ་པདྨ་དང་ཨུཏྤལ་ལ་སོགས་པའོ། །ཐང་ལས་སྐྱེས་པ་སྟེ་ནཱ་ག་གེ་སར་ལ་སོགས་
[19a.4]པའོ། །ཞིང་དང་ལོ་ཐོག་ས་གཞི་དང་། །ཞེས་བྱ་བ་ལ་ཞིང་གི་མུ་རྐུ་བ་སྟེ། ཡུལ་གྱི་རྒྱལ་པོའི་བཀའ་ཁྲིམས་ལས་བྱུང་བ་བཞིན་རིན་ཐང་བརྩིའོ། །ལོ་ཏོག་ནི་#ཐན་པ་ཆེན་པོའི་ཚེ་གཞན་གྱི་ཞིང་ལ་ཆུ་གཏོང་བ་གཅོད་ཅིང་བདག་གི་ཞིང་ལ་ཆུ་གཏོང་བ་དང་། ཆར་པ་ཆེ་བའི་དུས་ན་བདག་གི་ཞིང་ལ་
[19a.5]ཆུ་བཅད་ནས་གཞན་གྱི་ཞིང་ལ་བཏང་སྟེ་བདག་གི་ལོ་ལེགས་ལ་གཞན་གྱི་ལོ་ཉེས་ན་རིན་ཐང་ཚང་ན་ཕམ་པ། མ་ཚང་ན་སྦོམ་པོའོ། །ལོ་ཏོག་གཉིས་ཀ་ལ་མ་ཕན་ཡང་བླ་སྙམ་པས་ཞིང་རྐུ་#སེམས་དེ་ལྟར་བཏང་སྟེ་ཕ་རོལ་པོ་ལ་ཉེས་པ་སྦོམ་པོར་འགྱུར་རོ། །ཞིང་རྐུ་བ་ལ་རྣམ་པ་གཉིས་ཏེ།
[19a.6]ཤགས་བཀར་#གཏོང་བ་དང་ར་བས་བསྐོར་བའོ། །དགེ་སྦྱོང་གིས་#ཞལ་ཆེ་བའམ་ཡུལ་དཔོན་གྱི་མདུན་དུ་ཤགས་བཀྱེ་ལ་དགེ་སྦྱོང་རྒྱལ་བར་བཅད་ལ་ཁྱིམ་པས་ཀྱང་སྦྱོར་བའི་བསམ་པ་བཏང་ན་ཕམ་པ། སྦྱོར་བའི་བསམ་པ་མ་བཏང་ན་སྦོམ་པོའོ། །རྒྱལ་པོས་#རྒྱལ་བར་བཅད་ན་ཡུལ་གྱི་གཙོ་བོས་#
[19a.7]རྒྱལ་བར་གྱུར་པར་གཅད་#མ་ཐག་ཏུ་ཕམ་པའོ། །བསྐོར་བས་བརྐུ་#བ་ནི་ཞིང་ལ་ར་བ་དང་འོབས་ལྟ་བུས་སྐོར་#བར་བྱེད་པ་ན་ནམ་ལངས་#ཀྱི་སྣ་མ་ཕྲད་ཀྱི་བར་དུ་སྦོམ་པོའོ། །ཕྲད་ན་ཕམ་པར་གཞག་#གོ། །ས་གཞི་ནི་ཁངས་དང་ཚོང་དུས་#ལྟ་བུ་སྟེ། དགེ་སྦྱོང་གིས་#མི་དབང་བཞིན་བརྐུས་ན་རིན་ཐང་ཚང་ན་ཕམ་
[19b]
[19b.1]པའོ། །མཚང་ན་སྦོམ་པོར་བཞག་གོ། །གྲུ་དང་ཤིང་དང་ཤོ་གམ་དང་། །ཞེས་བྱ་བ་ལ་དགེ་སློང་གིས་གྲུ་རྐུ་#བར་བསམས་ཏེ་ཆུ་རྒྱུན་ལས་གྱེན་དུ་བཟློག་དེ་#གྲུ་ཚུགས་ལས་གྲུ་འཇུག་#ཐལ་ན་ཕམ་པ། ཆུ་རྒྱུན་ཐོག་ཐག་ཁྱེར་ཏེ་སྒུར་དང་གད་པ་དང་སྣེའུ་ཆོད་ན་སྦོམ་པོའོ། །དེ་མི་སྣང་ན་ཕམ་པ།
[19b.2]ཐད་ཀར་རྐུ་ན་ཕ་རོལ་གྱི་འགྲམ་སྐམ་ས་ལ་ཕྱིན་ན་ཕམ་པ། དེ་ཉིད་རྫབ་དང་སའི་འོག་ཏུ་སྦས་ན་གྲུ་མི་སྣང་བར་གྱུར་ཙམ་ན་ཕམ་པའོ། །ཤིང་ནི་བཟའ་ཤིང་དང་མེ་ཏོག་གི་ཤིང་དང་གྲིབ་ཤིང་ལྟ་བུ་སྟེ་རིན་ཐང་ཚང་ན་ཕམ་པའོ། །གསེབ་ལམ་དང་ལམ་གྱི་ཤོ་གམ་ལྟ་བུ་བཀའ་ཁྲིམས་གྱིས་མི་སྦྱིན་དུ་མི་
[19b.3]རུང་བ་ལས་གཞན་གྱི་#དགེ་སྦྱོང་གིས་བཟླས་སམ་གང་གིས་གང་ཟག་#གཞན་ལ་གསངས་#ཏེ་ཤོ་གམ་མ་བྱིན་ཏེ་རིན་ཐང་བརྩིས་ཏེ་ཚང་ན་ཕམ་པ། དེ་བཞིན་གྲུ་ཡི་བཙས་#རྣམས་དང་། །ཞེས་པ་དང་ཡང་སྦྱར་བར་བྱའོ། །སྲོག་ཆགས་རྐང་པ་མེད་པ་དང་། །རྐང་མངས་#རྐང་གཉིས་རྐུ་བ་དང་། །
[19b.4]བརྟུལ་ཞུགས་ཅན་གྱིས་#མི་ཡི་ནོར། །དབྱིག་ལ་སོགས་པ་གང་ཡང་རུང་། །རྐུ་#བའི་སེམས་ཀྱིས་གང་བརྐུས་ཀྱང་། །རིན་ཐང་ཚང་ན་སྡོམ་པ་ཞིག །ཅེས་བྱ་བ་ལ། མིའི་ལོངས་སྤྱོད་དགོས་པར་བྱ་བའི་ཕྱིར་གསོས་ཤིང་བཙལ་#བ་སྲོག་ཆགས་རྐང་པ་མེད་པ་སྦྲུལ་དང་འབུ་ལྟ་བུ་དང་། རྐང་
[19b.5]པ་གཉིས་པ་མི་ལྟ་བུ་དང་། ཕ་རོལ་ལ་གནོད་པར་བྱ་བའི་ཕྱིར་རྐང་མངས་སྡིག་པ་ལ་སོགས་པ་ལྟ་བུ། རང་ཉིད་ཀྱིས་བརྐུས་པ་དང་། རྐུར་བཅུག་པ་དང་། ཡང་གཞན་གྱི་#ནོར་གསེར་དངུལ་ལྟ་བུ་རྣམས་རྐུ་བའི་སེམས་ཀྱིས་བརྐུས་ཏེ་རིན་ཐང་ཚང་ན་ཕམ་པའོ། །སྩོགས་པའི་སྒྲས་ནི་མིའི་ནོར་རྙི་
[19b.6]དང་སྤྲེའུ་དང་བྱ་རྒྱ་དང་བོད་རྒྱ་དང་ཉ་རྒྱ་ལ་སོགས་པ་རྐུ་#བ་ཡང་བསྡུ་སྟེ། འདིར་དགེ་སྦྱོང་གིས་བདག་གི་ནོར་དུ་རྐུ་སེམས་ཀྱིས་མིང་དུ་སྨོས་པ་འདི་དག་བརྐུས་ཏེ་རིན་ཐང་ཚང་ན་ཕམ་པའོ། །བདག་གི་དོན་དུ་མ་ཡིན་གྱི་ཕ་རོལ་ལ་གནོད་པ་#བྱ་བའི་བསམ་པས་རྐུ་ན་ཕམ་པའོ། །གཉིས་ཀ་#ལ་ཕན་
[19b.7]གནོད་མེད་པའི་བསམ་པས་དེ་དག་དྲལ་ཞིང་བསྲེགས་ན་ཡང་སྦོམ་པོའོ། །སྙིང་རྗེའི་བསམ་པས་དྲལ་ཞིང་བསྲེགས་ན་ཉེས་བྱས་སོ། །དེ་དག་གིས་ཟིན་པའི་སྲོག་ཆགས་བརྐུས་ཏེ་རིན་ཐང་ཚང་ན་ཕམ་པའོ། །གཉིས་ཀ་ལ་མི་ཕན་པའི་བསམ་པས་བཏང་ན་སྦོམ་པོའོ། །སྙིང་རྗེའི་བསམ་
[20a]
[20a.1]པས་བཏང་ན་ཉེས་བྱས་སོ། །སྔགས་ཀྱི་བདག་པོ་ཡོད་པའི་གཏེར་བདག་གིར་བྱས་པ་སྒྲུབ་པ་ལས་གཏེར་ཕས་འོང་ན་ཇི་ཙམ་མིག་གིས་མ་མཐོང་གི་བར་དུ་སྦོམ་པོའོ། །མཐོང་སྟེ་རིན་ཐང་ཚང་ན་ལག་ཏུ་#མ་ཐོབ་ཀྱང་ཕམ་པའོ། །བདག་པོ་མེད་པའི་གཏེར་བསྒྲུབས་#པ་ལས་ཕས་འོང་བ་མ་
[20a.2]མཐོང་གི་བར་དུ་ཉེས་བྱས། མཐོང་སྟེ་རིན་ཐང་ཚང་ན་སྦོམ་པོའོ། །ལྷུང་བཟེད་ལ་སོགས་རྐུན་ཁྱེར་ན། །ཆོས་བཤད་ནས་ནི་བསྒྲུབ་པར་བྱ། །ཡང་ན་རི་བའི་རིན་གྱིས་བླུ#། །དེ་ལྟར་མ་བྱས་ཉེས་བྱས་སོ། །ཞེས་བྱ་བས་ནི་མ་བྱིན་པར་ལེན་པའི་དངོས་པོ་ཐམས་ཅད་ནས་ཐམས་ཅད་དུ་མི་བྱ་བར་དགག་#
[20a.3]པ་སྟེ། འདི་ལྟར་བདག་གི་འཚོ་བའི་ཡོ་བྱད་མེད་དུ་མི་རུང་བ་ལྷུང་བཟེད་དང་ཁར་#གསིལ་དང་། ཆོས་གོས་ལ་སོགས་པ་རྐུན་པོས་ཁྱེར་ཞིང་ཕྲོགས་ན་རྐུ་བའི་རྣམ་པར་སྨིན་པ་ཡིད་དུ་མི་འོང་བ་ལ་སོགས་པ་རྣམ་པར་སྨིན་པ་ཐོབ་པར་འགྱུར་བའི་ཆོས་བཤད་ནས་སླར་བླང་བར་བྱའོ། །དེ་ལྟར་ཆོས་བཤད་
[20a.4]པ་ལས་སླར་མ་སྟེར་ན་ཡོ་བྱད་དེ་དག་#དགེ་སྦྱོང་བདག་ལ་མེད་དུ་མི་རུང་བས་ཅི་རི་བའི་རིན་གྱིས་བླུས་ཏེ་བླང་པར་བྱའོ། །དེ་ལྟར་མ་བྱས་པར་ནན་གྱིས་བླངས་སམ་ཕྲོགས་ན་ཉེས་བྱས་སུ་འགྱུར་རོ། །ཕས་ཕམ་པ་གཉིས་པ་བཤད་ཟིན་ཏོ།། །།ཕས་ཕམ་པ་གསུམ་པ་མི་ཚངས་པར་སྤྱོད་པའི་
[20a.5]གླེང་གཞི་ནི། བཅོམ་ལྡན་འདས་ཡུལ་ཀ་ལན་ད་ཀ་གནས་པའི་གྲོང་ན་བཞུགས་སོ། །དེའི་ཚེ་ཁྱིམ་བདག་ཀ་ལན་ད་#ཀའི་བུ་བཟང་བྱིན་ཞེས་བྱ་བ་ཞིག་རབ་ཏུ་བྱུང་ནས་གནས་པ་ལས#། དེའི་མས་བུ་ཁྱོད་ཕ་དང་མའི་ནོར་ནི་སྦྱིན་དུ་ཡོད་པ་ལ་བདག་ཅག་བཟའ་བྲན་རྒས་ཏེ་ཤི་བར་གྱུར་ན་ཀུན་ཀྱང་རྒྱལ་པོའི་ནོར་
[20a.6]དུ་#གྱུར་ན་ཁྱོད་སླར་འབབས་སུ་མི་རུང་ན་ཡང་ས་བོན་ཅུང་ཟད་ཅིག་ཞོག་ཅིག་ཅེས་བྱས་ནས། བཟང་བྱིན་གྱི་ཆུང་མ་ཟླ་མཚན་དང་ལྡན་ཞིང་དུས་ལ་བབ་པ་རྒྱན་གྱིས་ཀླུབས་ཏེ་ཁྲིད་དེ་འོངས་པ་དང་། ཚེ་དང་ལྡན་པ་བཟང་བྱིན་ཡང་འདོད་ཆགས་བདོ་བ་དང་ཉེས་དམིགས་མ་མཐོང་བས་མི་ཚངས་པར་སྤྱོད་དོ། །དེ་
[20a.7]ནས་དུས་མི་རིང་བ་ཞིག་ན་བཅོམ་ལྡན་འདས་ཀྱིས་དགེ་སློང་རྣམས་ལ་འདོད་ཆགས་དང་ཞེ་སྡང་དང་གཏི་མུག་གི་ཉེས་པ་ལས་དཔྲལ་བའི་ཕྱིར། སེམས་རྣམ་པར་གྲོལ་བ་དང་ཤེས་རབ་རྣམ་པར་གྲོལ་བར་འགྱུར་བའི་ཆོས་བཤད་པ་དང་། ཚེ་དང་ལྡན་པ་བཟང་བྱིན་ཉེས་པ་དྲན་ནས་ཤིན་ཏུ་འགྱོད་ཅིང་མི་
[20b]
[20b.1]དགའ་ནས། དེ་དགེ་སློང་རྣམས་ཀྱིས་མཐོང་ནས་ཅི་ཉེས་སྨྲས་པ་དང་། ཚེ་དང་ལྡན་པ་བཟང་བྱིན་གྱིས་དྲང་པོར་སྨྲས་སོ། །དེ་ལྟ་བུ་བཅོམ་ལྡན་འདས་ལ་གསོལ་ནས་བཅོམ་ལྡན་འདས་ཀྱིས་བཟང་བྱིན་ལ་རྣམ་པ་དུ་མས་སྨད་ནས་ལེགས་པ་བཅུ་གཟིགས་ཏེ་འདུལ་བ་ལ་བསླབ་པའི་གནས་བཅས་སོ། །
[20b.2]སྡོམ་ཅན་ཉམས་པ་མེད་སེམས་ཀྱིས། །ཉམས་པ་མེད་པའི་སྒོ་གསུམ་དུ། །ཆགས་པས་ནང་དུ་ནོར་བུ་འདས། །དགའ་བ་ཚོར་ན་བརྟུལ་ཞུགས་ཉམས། །ཞེས་བྱ་བས་མི་ཚངས་པར་སྤྱོད་པ་དང་། རང་བཞིན་བསྟན་ཏེ། སྡོམ་པ་ཅན་དགེ་སྦྱོང་བསླབ་པ་མ་ཕུལ་ཞིང་ཉམས་པ་མེད་པའི་སེམས་
[20b.3]རང་བཞིན་དུ་གནས་པས་ཁ་དང་། རྐུབ་དང་། མོ་མཚན་ཏེ་སྒོ་གསུམ་པོ་འདི་དག་མ་རུལ་བ་དང་། རྨ་མ་བྱུང་བ་དང་། འབུ་ཞུགས་པ་ལྟ་བུ་ཉམས་པ་མེད་པ་སྤྱད་དུ་བཟོད་པར་བདག་ཉིད་ཆགས་པའི་སེམས་ཀྱིས་ནང་དུ་བཅུག་སྟེ་མཚམས་འདས་ལ། དགའ་བ་ཚོར་ན་བརྟུལ་ཞུགས་ཉམས་ཏེ་ཕམ་
[20b.4]པར་འགྱུར་རོ་ཞེས་བྱ་བའི་དོན་ཏོ། །དེ་ལ་ཡན་ལག་ནི་རྣམ་པ་ལྔ་སྟེ། སེམས་མ་ཉམས། སྒོ་གསུམ་སྤྱད་བཟོད། ཆགས་སེམས་ཡོད། མཚམས་ལས་འདས། དགའ་བ་ཚོར། དེ་རྣམས་གཅིག་དང་མི་ལྡན་ན་སྦོམ་པོར་གཞག་#གོ། །སྐྱེས་པ་བུད་མེད་མ་ནིང་གིས། །ཚན་#ཀར་
[20b.5]བོར་ཏེ་མནན་པ་ལས། །གང་གིས་བདེ་བའི་རོ་མྱོང་བ། །དེ་ཡང་སྡོམ་པ་ཞིག་པར་འགྱུར། །ཞེས་བྱ་བ་ནི་བདག་དགེ་སྦྱོང་མཐུ་ཆུང་ཞིང་ཞན་པ་ལ། སྐྱེས་པ་དང་བུད་མེད་དང་མ་ནིང་སྟེ། མི་རྣམ་པ་གསུམ་གྱིས་ཚན་#ཀར་བོར་ཏེ་མནན་ནས་བདག་དང་དེ་དག་གི་སྒོ་གསུམ་གང་ཡང་རུང་བར་བཅུག་
[20b.6]པའི་ཚེ། བདག་ཉིད་ཀྱིས་#ཉམས་སུ་བླངས་ཏེ་དགའ་བ་ཚོར་ན་དེ་ཡང་སྡོམ་པ་ཞིག་སྟེ་ཕས་ཕམ་པར་འགྱུར་རོ་ཞེས་བྱ་བའི་དོན་ཏོ། །འདིས་ནི་ཇི་ལྟར་གྱུར་ཡང་ཉམས་སུ་མི་བླང་བ་སྟོན་ཏོ། །ཡན་ལག་སྐྱེས་ནས་བདེ་འདོད་པས། །གདུག་པ་སྦྲུལ་གྱི་ཁར་བཅུག་བླ། །ལུས་ལ་དཀའ་ཐུབ་མི་གཞིག་
[20b.7]ཅེས། །རྫོགས་སངས་རྒྱས་ཀྱིས་བཀའ་སྩལ་ཏོ། །ཞེས་བྱ་བ་ལ། གལ་ཏེ་འདོད་ཆགས་ཀྱི་དབང་གིས་བདག་གི་ཡན་ལག་སྐྱེས་བསྒྲེངས་ཏེ་#ཤིན་ཏུ་བདོ་བར་གྱུར་པ་#འདོད་ཆགས་དེ་དང་བྲལ་ཞིང་བདེ་བར་འདོད་པར་བྱ་བའི་ཕྱིར། སྦྲུལ་གདུག་པའི་ཁར་བཅུག་སྟེ། འདོད་ཆགས་དང་བྲལ་
[21a]
[21a.1]བར་གྱུར་པ་ནི་བདག་ལ་ཕན་པ་ཡིན་པས་བླའི། ལུས་ལ་བདག་གི་སྡོམ་པ་ནི་མི་གཞིག་པར་བྱའོ་ཞེས་རྫོགས་པའི་སངས་རྒྱས་བཅོམ་ལྡན་འདས་ཀྱིས་བཀའ་སྩལ་ཏོ། །ཇི་ལྟར་#ཞེ་ན། གལ་ཏེ་སྦྲུལ་གྱིས་གསད་#གྱུར་ཀྱང་། །ཚུལ་ཁྲིམས་གནས་ལ་དེ་ཕན་ཏེ། །ཞེས་བྱ་
[21a.2]བ་སྨོས་ཏེ། གལ་ཏེ་ཆགས་པའི་དབང་གིས་ཡན་ལག་སྐྱེས་བསྒྲེངས་#ནས་སྦྲུལ་གདུག་པའི་ཁར་བཅུག་སྟེ་ཤི་བར་གྱུར་པ་ནི་སྒོ་གསུམ་#སྣང་བའི་གནས་སུ་མ་བཅུག་པ་ཚུལ་ཁྲིམས་ཅན་དེ་ལ་ཕན་ཏེ་མཐོ་རིས་སུ་སྐྱེས་པའི་ཕྱིར་རོ#། །ཚུལ་ཁྲིམས་དེ་ཞིག་པར་གྱུར་པས་སྡུག་བསྔལ་ཡིན་ཏེ་ངན་སོང་གསུམ་དུ་
[21a.3]སྐྱེའོ། །དེར་ཡང་མ་ཟད་ཀྱི་མྱ་ངན་ལས་འདས་པ་ལའང་སྒྲིབ་པར་འགྱུར་ཏེ། ཚུལ་ཁྲིམས་ཉམས་ན་ཐར་པ་མྱ་ངན་ལས་འདས་པའི་སྐལ་བ་ཡང་མེད་པར་འགྱུར་རོ་ཞེས་བྱ་བའི་དོན་ཏོ། །ཕས་ཕམ་པ་གསུམ་པ་བཤད་ཟིན་ཏོ།། །།ཕས་ཕམ་པ་བཞི་པ་བརྫུན་གྱི་གླེང་གཞི་ནི། བཅོམ་ལྡན་འདས་
[21a.4]ཡུལ་ཡངས་པ་ཅན་གྱི་སྤྲེའུ་རྫིང་གི་འགྲམ་ན་བཞུགས་སོ། །དེའི་ཚེ་མུ་གེ་ཆེན་པོ་བྱུང་ནས་ཁ་ཟས་ཀྱིས་ཤིན་ཏུ་བྲེལ་ཏེ་#ཕ་མ་ཡང་བུ་ལ་ཁ་ཟས་མི་སྟེར་བ་ཙམ་དུ་དཀོན་པའི་ཚེ། དགེ་སློང་རྫུ་འཕྲུལ་ཅན་དང་གནས་བརྟན་རྣམས་ནི་བྱང་གི་སྒྲ་མི་སྙན་ལ་སོགས་པ་ཡུལ་གཞན་འབྱོར་ཅིང་རྒྱས་པ་དག་ཏུ་
[21a.5]དོང་ཞིང་བདག་ཉིད་ཀྱང་ཟ། གང་ཟག་གཞན་ལ་ཡང་སྟོབས་སོ། །དེ་ལ་ཉ་པ་ལས་རབ་ཏུ་བྱུང་བའི་དགེ་སློང་ལྔ་བརྒྱ་ལ་སོགས་པ་དག་གིས་ཀྱང་དགེ་སློང་དེ་དག་ལྟར་བྱ་ཞིང་དབྱར་ཚུལ་དུ་འཇུག་ཏུ་ནི་རྫུ་འཕྲུལ་ཡང་མ་ཐོབ་ཅིང་ཐོས་པ་དག་ཀྱང་ཉུང་ཞིང་དེ་ལྟར་མི་ནུས་ཀྱིས་བདག་ཅག་གིས་ཡུལ་ཉིད་དུ་དབྱར་
[21a.6]ཚུལ་དུ་ཞུགས་ལ་བདག་ཅག་#སོ་སོའི་ཡོན་ཏན་བསྒྲགས་ཏེ་རྙེད་པ་བསྒྲུབ་པོ་སྙམ་ནས་ཚུལ་དུ་ཞུགས་སོ། །དེ་ནས་ལྔ་བརྒྱ་པོ་དེ་དག་གིས་གཅིག་གིས་གཅིག་གི་ཡོན་ཏན་བརྗོད་པ་ལ་ཞུགས་སོ། །འདིས་རྒྱུན་དུ་ཞུགས་པའི་འབྲས་བུ་ཐོབ་བོ། །འདིས་ལན་ཅིག་ཕྱིར་འོང་བའི་འབྲས་བུ་ཐོབ་བོ། །
[21a.7]འདིས་ཕྱིར་མི་འོང་བའི་འབྲས་བུ་ཐོབ་བོ། །འདིས་ནི་དགྲ་བཅོམ་པའི་འབྲས་བུ་ཐོབ་བོ། འདིས་#ནི་འཇིག་རྟེན་པའི་ལམ་གྱིས་གྲུབ་བོ། །འདི་ནི་སྡེ་སྣོད་གསུམ་སྨྲ་བའོ་ཞེས་སོ་སོའི་ཡོན་ཏན་བརྗོད་པས་ཁ་ཟས་ལ་སོགས་པ་#མང་པོ་དུ་མ་རྙེད་དེ་ཤ་ཁྲག་གི་ལུས་ཤིན་ཏུ་རྟས་པས་#གནས་སོ། །དེ་ནས་དབྱར་
[21b]
[21b.1]འདས་ནས་ཚུལ་ནས་བྱུང་སྟེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་ཕྱིན་ཏོ། །དང་པོར་ཀུན་དགའ་བོ་དང་ཕྲད་པ་དང་སྨྲས་པ། མུ་གེ་ཆེན་པོ་བྱུང་བའི་དུས་ན་དགེ་སློང་གཞན་རྣམས་ནི་རྨྱ་སྟེ་ལྷགས་ན། ཁྱོད་ནི་ཤིན་ཏུ་ཚོ་སྟེ་བྱུང་ན་དེ་ཅིའི་རྒྱུ་ཞེས་སྨྲས་པ་དང་། བདག་ཅག་སོ་སོའི་ཡོན་ཏན་བརྗོད་
[21b.2]པས་རྙེད་པ་མང་པོ་བྱུང་སྟེ་ལུས་རྟས་སོ་ཞེས་སྨྲས་སོ། །ཁྱེད་ལ་ཡོན་ཏན་ཡོད་དེ་བརྗོད་དམ་མེད་དེ་བརྗོད། བདག་ཅག་ལ་ཡོན་ཏན་མེད་པར་བརྗོད་དོ་ཞེས་སྨྲས་པ་དང་། ཟང་ཟིང་ཅུང་ཟད་ཙམ་གྱི་ཕྱིར་མིའི་ཆོས་ལས་བླ་མར་གྱུར་པ་མེད་པ་ལ་ཡོད་པ་གཞན་བཞིན་དུ་སྨ་བ་ཤིན་ཏུ་མི་རིགས་སོ་ཞེས་
[21b.3]ཀུན་དགའ་བོ་ལ་སོགས་པ་རྣམས་ཀྱིས་སྨྲས་སོ། །དེ་ལྟར་གྱུར་པ་བཅོམ་ལྡན་འདས་ཀྱིས་གསན་ཏོ། །དེ་ནས་བཅོམ་ལྡན་འདས་གྱིས་#རྣམ་པ་དུ་མས་སྨད་ནས་འདུལ་བ་ལ་#བསླབ་པའི་གནས་བཅས་སོ། །ལྷ་དག་མཐོང་ཞེས་དེ་ཡི་སྒྲ། །ཐོས་པར་གྱུར་དང་ཀུན་སྨྲ་དང་། །ཞེས་བྱ་བ་ལ། དགེ་
[21b.4]སྦྱོང་གིས་#བདག་གིས་#ལྷ་མཐོང་ངོ་། །ལྷའི་སྒྲ་ཐོས་སོ། །ལྷ་རྣམས་དང་བདག་ཏུ་སྨྲ་ཞིང་ཀུན་དུ་སྨྲ་བར་བྱེད་དོ་ཞེས་ཟེར་ན་གསུམ་ཆར་ལ་ཡང་ཕམ་པ་རེ་རེར་འགྱུར་རོ། །གང་ན་བདག་འདུག་ལྷ་འོང་ཞིང་། །བདག་ཀྱང་དེ་ཡི་གནས་འགྲོ་དང་། །ཞེས་བྱ་བ་ལ། དགེ་སྦྱོང་གིས་#བདག་གང་ན་འདུག་
[21b.5]པའི་གནས་སུ་ལྷ་དག་འོང་ངོ་། །བདག་ལྷ་གང་ན་གནས་པའི་གནས་དེ་དག་ཏུ་འགྲོའོ་ཞེ་ན་#ཡང་ཕམ་པ། ཇི་ལྟར་ལྷ་མཐོང་ཞིང་སྒྲ་ཐོས་ཟེར་བ་དང་། ལྷ་དང་སྨྲ་ཞིང་ཀུན་དུ་སྨྲའོ། །བདག་འདུག་པའི་གནས་སུ་འོང་ངོ་ཞེས་སྨྲའོ#། །དེ་བཞིན་དྲི་ཟ་གྲུལ་བུམ་ཀླུ། །གནོད་སྦྱིན་ལྟོ་འཕྱེ་ཆེན་པོ་དང་། །ཤ་ཟ་ཡི་དགས་མིའམ་ཅི། །
[21b.6]མཐོང་ངོ་ཞེས་ལ་སོགས་སྨྲའམ། །ཞེས་བྱ་བ་རྣམས་ལ་ཡང་སྦྱར་བར་བྱའོ། །བསམ་གཏན་མངོན་ཤེས་ཚད་མེད་དང་#། །རྒྱུན་ཞུགས་ལ་སོགས་འབྲས་བུ་དང་། །ལམ་ལ་རབ་ཏུ་ཞུགས་པའང་རུང་། །བདག་གིས་ཐོབ་ཅེས་སྨྲས་#ན་ནི། །དོན་རིག་པ་ལས་བརྫུན་པའི་ཚིག །ཅེས་བྱ་བ་ལ། དགེ་སྦྱོང་
[21b.7]གི་འདུ་ཤེས་སྦས་ནས། གཟུགས་ཀྱི་ཁམས་ཀྱི་བསམ་གཏན་དང་པོ་ཐོབ་བོ་ཞེའམ། གཉིས་པ་ཐོབ་པོ་ཞེའམ། གསུམ་པ་དང་བཞི་པ་ཐོབ་བོ་ཞེས་སྨྲ་ན་ཡང་ཕམ་པ། དེ་བཞིན་དུ་མངོན་པར་ཤེས་པ་ལྔ་ལས་གང་ཡང་རུང་བ་ཞིག་ཐོབ་པོ་ཞེས་སྨྲ་ན་ཡང་ཕམ་པའོ། །ཡང་འདུ་ཤེས་སྦས་ནས་
[22a]
[22a.1]ཚད་མེད་པ་བཞི་གང་ཡང་རུང་བ་ཞིག་གྲུབ་པོ་ཞེས་ཟེར་བ་དང་། དགེ་སྦྱོང་གི་འདུ་ཤེས་སྦས་ནས་འབྲས་བུ་བཞི་ལས་བདག་གིས་རྒྱུན་དུ་ཞུགས་པའི་འབྲས་བུ་ཐོབ་བོ་ཞེའམ། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པའི་འབྲས་བུ་ཐོབ་པོ་ཞེས་སྨྲས་ཏེ། གཞན་
[22a.2]གྱིས་#དོན་གོ་བས་དོན་རིག་སྟེ་གོ་ན་བརྫུན་#གྱི་ཚིག་སྟེ་ཕམ་པར་འགྱུར་རོ། །ལམ་ལ་རབ་ཏུ་ཞུགས་པ་ནི་དགེ་སྦྱོང་གིས་#འདུ་ཤེས་སྦས་ཏེ་འཇིག་རྟེན་ལས་འདས་པའི་ལམ་བདག་གིས་ཐོབ་བོ་ཞེས་སྨྲས་#ན་ཕམ་པའོ། །འཇིག་རྟེན་པའི་ལམ་གྱི་ཞི་གནས་ཀྱི་མཚན་མ་འགའ་ཞིག་ལ་བརྟེན་ཏེ་འདོད་
[22a.3]ཆགས་དང་གནོད་སེམས་ལ་མི་སྤྱོད་དོ་ཞེས་ཟེར་ན་སྦོམ་པོར་འགྱུར་རོ། །ཁྱད་པར་ཐོབ་པའི་བདག་ཉིད་ཅན། །མ་ཉམས་ཞེས་བྱ་བ་ལ། དགེ་སྦྱོང་བདག་གིས་#སེམས་མ་སྨྱོས་པ་ནད་ཀྱིས་གཟིར་བར་མ་གྱུར་ཏེ་རང་བཞིན་དུ་གནས། གོང་དུ་བསྟན་པའི་ཡོན་ཏན་ཁྱད་པར་ཅན་ཐོབ་ཅིང་མཐོང་ཞེས་
[22a.4]སྨྲས་#ན་ཕས་ཕམ་པར་འགྱུར་གྱི། སེམས་སྨྱོས་པ་དང་ནད་ཀྱིས་#གཟིར་བ་རྣམས་ནི་ཕམ་པར་མི་འགྱུར་གྱི་སྦོམ་པོར་གཞག་#གོ་ཞེས་བྱ་བའི་དོན་ཏོ། །ང་རྒྱལ་མེད་བཞིན་དུ། སྨྲས་ན་བརྟུལ་#ཞུགས་ཉམས་པར་འགྱུར། །ཞེས་བྱ་བ་ལ། སྔོན་དགེ་སྦྱོང་ཞིག་དགོན་པ་ན་གནས་པས་འཇིག་རྟེན་པའི་
[22a.5]ལམ་གྱིས་ཉོན་མོངས་པ་བཅོམ་སྟེ། མི་འབྱུང་བར་བྱས་ནས་ཡུན་རིང་མོ་ཞིག་ལོན་པ་ན། ཉོན་མོངས་པ་མི་འབྱུང་བའི་གནས་རྣམས་ལ་བརྟགས་ན་ཉོན་མོངས་པ་#མི་སྐྱེ་བས་བདག་ཅག་གིས་ཉོན་མོངས་པ་སྤངས་སོ་ཞེས་བསམས་ཤིང་#བརྗོད་ནས་སླར་གྲོང་དུ་ལྷགས་པ་ལས་འཇིག་རྟེན་པའི་
[22a.6]ལམ་གྱིས་ཉོན་མོངས་པ་རྩད་ནས་མ་ཕྱིན་པའི་ཕྱིར་ཉོན་མོངས་པ་སྐྱེ་བའི་ཡུལ་བུད་མེད་དང་དགྲ་ལ་སོགས་པ་མངོན་དུ་གྱུར་པ་དང་ཉོན་མོངས་པ་སླར་སྐྱེས་ནས་དགེ་སློང་དེ་དག་བདག་ཅག་གིས་#ཉོན་མོངས་པ་མ་སྤངས་པར་སྤངས་སོ་ཞེས་སྨྲས་ཏེ་མིའི་ཆོས་ལས་བླ་མར་གྱུར་པའི་ཕམ་པར་མ་གྱུར་གྲང་ཞེས་
[22a.7]བཅོམ་ལྡན་འདས་ལ་ཞུས་པ་དང་། མངོན་པའི་ང་རྒྱལ་ཅན་དེ་ལྟ་བུ་#མ་གཏོགས་ཏེ་སླན་ཆད་དེ་ལྟ་བུའི་ཁྱད་པར་ཞིག་ཐོབ་ན་ཡང་སྨྲ་བར་མི་བྱའོ་ཞེས་གསུངས་པ་ལྟ་བུ་སྟེ། དེ་ལྟ་བུ་ནི་ཕམ་པར་མི་གཞག་#གོ། །དགེ་སྦྱོང་གིས་འདུ་ཤེས་སྦས་ཏེ། ལྷ་དང་ཀླུ་དང་གནོད་སྦྱིན་མཐོང་བ་དག་ཡོད་
[22b]
[22b.1]དོ་ཞེས་ནི་སྨྲ་ལ། བདག་ཉིད་ཡིན་ནོ་ཞེས་ནི་མི་སྨྲ་ན་སྦོམ་པོར་འགྱུར་རོ། །ཤ་ཟ་རྣམས་མཐོང་བ་ཡོད་དོ་ཞེས་སྨྲ་ལ། བདག་ཉིད་ཡིན་པར་མི་སྨྲ་ན་ནི་ཉེས་བྱས་སུ་འགྱུར་རོ། །དགོན་པ་ན་དགེ་སློང་དུ་གནས་པ་དེ་ལ་མི་མ་ཡིན་པ་རྣམས་ཀྱིས་གཙེས་པ་ལས་འཕགས་པ་རྣམས་ལ་མི་གཙེ་སྟེ་
[22b.2]བདག་ལ་ཡང་མི་གཙེ་ཟེར་ན་ཕམ་པ། འཕགས་པ་རྣམས་ཀྱི་ཕྱིར་ཁྱིམ་བདག་རྣམས་སྟན་ཁྲ་བོ་འདིངས་ཏེ་བདག་གི་ཕྱིར་ཡང་ཁྱིམ་བདག་སྟན་ཁྲ་བོ་འདིངས་སོ་ཞེས་ཟེར་བ་ཡང་དོན་རིག་ན་ཕམ་པའོ། །ཁྱད་པར་ཐོབ་པ་མ་གཏོགས་པར་ཞེས་བྱ་བ་ལ་སོགས་པས་ཉེས་བྱས་སུ་འགྱུར་བ་བསྟན་ཏོ། །
[22b.3]དེ་ལས་གཞན་པའི་བརྫུན་#ཚིག་རྣམས། །དེ་དག་ཐམས་ཅད་སྡིག་མང་འགྱུར། །ཞེས་བྱ་བ་#ནི་གོང་དུ་ཡོན་ཏན་ཁྱད་པར་ཅན་ཐོབ་བོ་ཞེས་བྱ་བ་ལས་མ་གཏོགས་པར་ཀུ་རེ་དང་ཀྱལ་ཀ་ལ་སོགས་པའི་ཕྱིར། བརྫུན་#པའི་ཚིག་སྨྲས་ན་སྡིག་པ་མང་དུ་འགྱུར་ཏེ་ཉེས་བྱས་ལྕི་བར་འགྱུར་རོ། །ཇི་ལྟར་མཛའ་
[22b.4]བོ་འབྱེད་འགྱུར་བ། །ཕྲ་མའི་ཚིག་རྣམས་སྨྲ་མི་བྱ། །ཞེས་བྱ་བས་ནི་ངག་གི་ཉེས་པ་གཉིས་པ་བསྟན་ཏེ་འདུམ་ཞིང་མཛའ་བར་འགྱུར་བས་#འཐབ་ཅིང་དབྱེ་བར་འགྱུར་བའི་ཕྲ་མའི་ཚིག་གིས་དབྱེ་བ་རྣམས་སླར་མི་སྡུམ་#ཞིང་དབྱེས་སུ་འགྱུར་བ་ཕྲ་མའི་ཚིག་རྣམས་མི་བྱའོ། །ངན་དུ་ཟེར་ལ་ངན་མི་སྨྲ། །
[22b.5]གཤེ་བ་ལ་ཡང་སླར་མི་གཤེ། །མཚང་འབྲུ་བ་ལ་#སླར་མི་འབྲུ། །རྡེག་#པ་ལ་ཡང་སླར་མི་རྡེག# །ཅེས་བྱ་བས་ནི་ངག་གི་ཉེས་པ་སྤོང་བ་དགེ་སྦྱོང་གི་ཚུལ་བཞི་སྟེ། བདག་ཉིད་ལ་ཉེས་པ་རྣམས་ལའང་མི་རིགས་པར་མི་བྱ་ན། སེམས་ཅན་ཉེས་པ་མེད་པ་རྣམས་ལ་བདག་ཉིད་ཀྱིས་མི་རིགས་པར་
[22b.6]བྱ་བ་ལྟ་ཅི་སྨོས། གཞན་གྱིས་ངན་དུ་སྨྲ་བ་ལ་སོགས་པ་བྱས་པ་#སླར་ལན་མི་གླན་ནོ་ཞེས་བྱ་བའི་དོན་ཏོ། །བློ་ལྡན་བསླབ་པ་#འདོད་བ་ཡིན། །བསྒྲིམས་ཏེ་ངག་གི་སྐྱོན་རྣམས་སྤང་། །ཞེས་བྱ་བ་ནི་ངག་གི་ཉེས་པ་བཞི་པ་སྟེ། རྒྱལ་པོའི་གཏམ་དང་། ཆོམ་པོའི་གཏམ་དང་། ཚོང་པའི་གཏམ་
[22b.7]ལ་སོགས་པ་ནི་ཚིག་ཀྱལ་པ་སྟེ་ངག་གི་སྐྱོན་རྣམས་ཏེ་གང་བསླབ་པར་འདོད་པའི་དགེ་སློང་#བློ་དང་ལྡན་པས་སྤང་བར་བྱའོ། །དེ་ལྟར་འགྱུར་བར་#རིག་ནས་ནི། །ངག་རྣམས་ཤིན་ཏུ་བསྡམ་#པར་བྱ། །ཞེས་བྱ་བ་ནི་གོང་དུ་བཤད་པ་ལྟར་ངག་གིས་#ཉེས་པ་བཞི་སྤྱད་ན་བརྫུན་#དང་སྦོམ་པོ་དང་ཉེས་བྱས་སུ་རིག་
[23a]
[23a.1]ནས་དེ་དག་བསྡམ་ཞིང་སྤང་#ངོ་ཞེས་བྱ་བའི་དོན་ཏོ། །ཕམ་པ་བཞི་པ་བཤད་པ་སྟེ་ཕས་ཕམ་པ་བཞིའི་བཤད་པ་རྫོགས་སོ།། །།དེ་ལྟར་ཕས་ཕམ་པའི་གནས་བསྟན་ནས། ད་ནི་བསླབ་པ་ཕྲ་མོའི་གནས་བསྟན་པའི་ཕྱིར། འབྲུ་བཏགས་ཕབས་དང་
[23a.2]སྦྱར་བ་ཡི#། །ཞེས་བྱ་བ་ལ་སོགས་པ་སྨོས་སོ། །དེ་ཡང་རྣམ་པ་དྲུག་སྟེ། འབྲུ་བཏགས་ཕབས་དང་སྦྱར་བ་ཡི། །བཏུང་བའི་བྱེ་བྲག་འབྲུ་ཡི་ཆང་། །ཞེས་བྱ་བ་ནི་ནས་འབྲས་བཏགས་ཏེ་ཆང་དུ་བྱ་བའམ། མ་བཏགས་#པ་ཆང་དུ་བྱས་པ་རྣམས་ཏེ། དེ་ནི་མྱོས་པར་འགྱུར་རིག་ནས། །རྩྭ་#
[23a.3]མཆོག་གིས་ཀྱང་མི་བཏུང་ངོ་། །ཞེས་བྱ་བར་འགྱུར་རོ། །སྡོང་བུ་མེ་ཏོག་འབྲས་བུ་ལས། །སྦྱར་བའི་ཁུ་བ་བཅོས་པའི་ཆང་། །དེ་ནི་མྱོས་པར་འགྱུར་རིག་ནས། །ཞེས་བྱ་བ་དང་། རྩྭ་མཆོག་གིས་ཀྱང་མི་བཏུང་ངོ་། །ཞེས་བྱ་བར་སྦྱར་ཏེ། འདི་ལྟར་སྡོང་བུ་སྟེ་བུ་རམ་ཤིང་བཅིར་བ་ལས་
[23a.4]བྱས་པ་དང་། མེ་ཏོག་འབྲས་བུ་སྟེ་རྒུན་འབྲུམ་ལ་སོགས་པ་སྦྱར་བའི་ཁུ་བས་མྱོས་ཤིང་དྲན་པ་ཉམས་པར་འགྱུར་བར་རིག་ནས་བདག་ཉིད་ཀྱང་རྩྭ་མཆོག་གིས་མི་བཏུང་#ལ་གཞན་ལ་ཡང་སྦྱིན་པར་མི་བྱ་ཞེས་སྟོན་ཏོ། །ཅིའི་ཕྱིར་ཞེ་ན། སྡོམ་ཅན་ཕན་འདོད་མི་བཏུང་ངོ་། །ཞེས་བྱ་བ་སྟེ།
[23a.5]འདི་ལྟར་དགེ་སྦྱོང་སྡོམ་པ་ཅན་བསླབ་#པ་ལ་གནས་པས་བདག་ལ་ཕན་པ་དང་བདེ་བར་བྱ་བའི་ཕྱིར་རོ། །འཐུངས་ན་ཉེས་པ་ཅི་ཡོད་ཅེ་ན། དེ་འཐུངས་ན་ནི་དྲན་ཉམས་ཤིང་། །བརྟུལ་ཞུགས་ལྡན་པ་བག་མེད་འགྱུར། །བག་མེད་པ་ལས་བརྟུལ་ཞུགས་ཉམས། །ཞེས་བྱ་བ་སྟེ། གོང་དུ་
[23a.6]སྨོས་པའི་ཆང་གི་རྣམ་པ་དེ་དག་འཐུངས་ཤིང་གཞན་ལ་བླུད་ན་བདག་དང་གཞན་གྱི་སེམས་རང་བཞིན་དུ་གནས་ཤིང་གསལ་བ་ཉམས་སུ་མྱོང་བའི་དྲན་པ་ཉམས་པས་ལུས་ཀྱིས་རྗེས་སུ་རྡེག་#བཙོག་དང་། ངག་གི་སྒོ་ནས་ཚིག་ངན་པ་ལ་སོགས་པ་བག་མེད་པ་འབྱུང་ངོ་། །དེ་ལྟར་བག་
[23a.7]མེད་པའི་སྒོ་ནས་སྲོག་གཅོད་པ་དང་། མ་བྱིན་པར་ལེན་པ་#ལ་སོགས་པ་བརྟུལ་ཞུགས་ཏེ་ཚུལ་ཁྲིམས་ཉམས་པར་འགྱུར་རོ། །དེ་བས་ན། དེ་བས་སྟོན་པའི་བཀའ་དྲན་བྱ། །མྱོས་འགྱུར་ཉེས་པ་འཕེལ་འགྱུར་བ། །རྩྭ་#མཆོག་གིས་ཀྱང་མི་བཏུང་ངོ་། །ཞེས་སྨོས་ཏེ། དེ་བས་ན་སྟོན་པ་#
[23b]
[23b.1]སངས་རྒྱས་ཀྱི་བཀའ་ཚད་མ་དྲན་པར་བྱས་ལ་དྲན་པ་ཉམས་ཤིང་མྱོས་པར་འགྱུར་བའི་གནས་ཉེས་པ་རྣམ་པ་དུ་མ་འཕེལ་བར་བྱེད་པའི་རྒྱུ་རྩྭ་མཆོག་གིས་ཀྱང་རེག་པར་མི་བྱ་ན་གཞན་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །ཇི་ལྟར་ཆང་འཐུངས་ན་ཉེས་བྱས་སུ་འགྱུར་བ་བཞིན་དུ་གླུ་མ་དང་
[23b.2]སྦང་མ་ཟོས་ན་ཉེས་བྱས་སུ་འགྱུར་རོ། །འདི་ལྟར་ཆང་ལ་ཆང་གི་ཁ་དོག་དང་དྲི་དང་རོ་དང་མྱོས་པར་འགྱུར་བའི་མཐུ་དང་བཞི་ཆར་ལྡན་པ་འཐུངས་ན་ཉེས་པར་གཞག་#གོ། །སྦྲང་རྩི་དང་བྲོ་#བ་ལ་སོགས་པ་མྱོས་པའི་མཐུ་ཡོད་དུ་ཟིན་ཀྱང་ཁ་དོག་དང་དྲི་དང་རོ་ལ་སོགས་པ་དང་། འཇིག་རྟེན་
[23b.3]ལ་སོགས་པ་སྨད་པ་མ་ཡིན་པས་དེ་དག་གིས་མྱོས་པ་ནི་མ་ཡིན་ནོ། །གལ་ཏེ་དགེ་སྦྱོང་ནད་ཀྱིས་ཐེབས་ཏེ་ཆང་གི་ཆོ་ག་བྱ་དགོས་ན་ཆང་གིས་ལུས་ལ་བསྐུ་བར་བྱའོ། །ཡི་ག་#འཆུས་པ་ཕན་པར་བྱ་ན་ཡང་ཁར་བླུགས་པ་ལས་བཏུང་བར་མི་བྱའོ། །ཆང་མ་འཐུངས་ན་ཡང་མི་འཚོ་བ་ཙམ་དུ་
[23b.4]ཐུག་#ན་བསྐོལ་བ་ཆང་གི་རོ་དང་མྱོས་པའི་མཐུ་མེད་པར་བྱས་ཏེ། ཆང་དང་རོ་ཉམས་པ་དང་ཁ་དོག་དང་འདྲ་བ་ཙམ་བྱའོ། །གླུ་གར་རོལ་མོའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །རྒྱལ་པོ་གཟུགས་ཅན་སྙིང་པོས་ཀླུའི་རྒྱལ་པོ་རི་བོ་དང་ཡིད་འོང་གི་ཕྱིར་གཙུག་ལག་ཁང་
[23b.5]བརྩིགས་ནས་དུས་སྟོན་ཆེན་པོ་བྱས་པའི་ཚེ། ལྷོ་ཕྱོགས་ནས་གར་མཁན་འོངས་ཏེ་དྲུག་སྡེ་ཅི་བྱེད་པའི་ལད་མོ་བཟླས་པ་དང་། དྲུག་སྡེ་ཁྲོས་ནས་དུས་གཞན་ཞིག་ན་དུས་སྟོན་བྱེད་པའི་གར་མཁན་ལ་གནོད་པའི་ཕྱིར་དྲུག་སྡེས་བྲོ་གར་བྱས་པ་དང་། སྐྱེ་བོ་ཀུན་གར་མཁན་ལ་མི་ལྟ་བར་དྲུག་སྡེས་
[23b.6]བྲོ་གར་བྱེད་པ་ལ་བལྟས་ནས་རོལ་མོ་མཁན་གྱིས་རྙེད་པ་མ་གྲུབ་སྟེ། འཚོ་བ་ཆད་ནས་རོལ་མོ་མཁན་ཁ་ཟེར་བ་ལ་བཅས། ཡུལ་ནི་རྒྱལ་པོའི་ཁབ། གང་ཟག་ནི་དྲུག་སྡེ#། ཉོན་མོངས་པ་ནི་ཞེ་སྡང་། ཉེས་པ་ནི་གླུ་གར་རོལ་མོའི་སྒྲ་བྱེད་པའོ། །གླུ་གར་དེ་བཞིན་སིལ་སྙན་རྣམས། །སྡོམ་
[23b.7]ལ་གནས་པས་མི་བྱའོ། །ཞེས་བྱ་བས་དྲེགས་པའི་ཉེས་པ་སྤང་བ་#སྟོན་ཏེ། དེ་ལ་གླུ་ནི་ཤར་དང་གན#ད་ར་ལ་སོགས་པའོ། །གར་ནི་རྐང་ལག་གཡོབ་ཅིང་ལུས་སྒྱུར་བར་བྱེད་པའོ། །དེ་གཉིས་སྡོམ་པ་ལ་གནས་པས་བྱས་ན་ཉེས་བྱས་སུ་འགྱུར་རོ། །གཞན་བྱེད་དུ་མི་གཞུག་སྟེ་བྱེད་དུ་བཅུག་
[24a]
[24a.1]ན་ཉེས་བྱས་སོ། །སིལ་སྙན་ནི་མཆོད་པའི་ཡོ་བྱད་དང་རོལ་མོའི་ཆ་བྱད་#དོ། །དེ་གསིལ་#ཞིང་དཀྲོལ་བ་རྣམ་པ་སྣ་ཚོགས་ཏེ། དེ་དག་སྡོམ་པ་ལ་གནས་པས་མི་བྱའོ། །ཅིའི་ཕྱིར་ཞེ་ན། དེ་དག་ནི་རྒྱ་གས་ཤིང་དྲེགས་པར་འགྱུར་བའམ། ཡན་ལག་འཁོར་བར་བྱེད་པའི་རྒྱུ་
[24a.2]ཡིན་པའི་ཕྱིར་རོ། །མཆོད་པ་བྱ་བའི་ཕྱིར་གླུ་གར་བྱེད་དུ་བཅུག་ན་ཡང་གླུ་གར་བྱེད་དུ་མི་གཞུག །ལྷ་དང་ལྷ་མ་ཡིན་གྱི་དབང་པོས་མཆོད་པ་ལྟར་སངས་རྒྱས་ཀྱི་ཞབས་ཀྱི་#རྡུལ་ལ་མཆོད་པ་གྱིས་ཤིག་ཅེས་བྱས་ལ་བྱེད་དུ་གཞུག་གོ། །ཡང་ན་གནང་བ་ནི་སེམས་ཅན་གཞན་རྣམས་དད་པ་བསྐྱེད་པའི་
[24a.3]ཕྱིར། དཀོན་མཆོག་གསུམ་གྱི་ཆེ་བའི་ཡོན་ཏན་བསྟོད་ར་རྣམས་དབྱངས་དང་གླུ་བསྲེས་ཏེ་བྱས་ན་ཉེས་པ་མེད་དོ། །གླུ་དབྱངས་དག་མི་ཤེས་ཏེ་སློབ་འདོད་ན་ཡང་ཤེས་པ་ཁྲིད་དེ་གནས་#དབེན་པར་སློབ་ཏུ་གཞུག་གོ། །འདིར་གླུ་གར་ལ་སོགས་པ་དངོས་སུ་མ་བྱས་ཀྱང་ཆུ་ལ་སོགས་པ་ལ་བརྡ་
[24a.4]ཐབས་དང་ལག་ཐབས་སུ་བྱད་#ན་ཡང་ཉེས་བྱས་སོ། །ཕྲེང་བ་དང་སྤོས་དང་#བྱུག་པ་དང་། རྒྱན་འདོགས་པའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་#ཀ་གནས་པ་ན་བཞུགས་སོ། །དེའི་ཚེ་གཙུག་ལག་ཁང་གི་དུས་#སྟོན་བྱེད་པ་ན་དྲུག་སྡེ་ཁ་དོག་གིས་བརྒྱན་
[24a.5]ནས་གར་བྱས་པ་ལ་བཅས་སོ། །ཡུལ་ནི་རྒྱལ་པོའི་ཁབ། གང་ཟག་ནི་དྲུག་སྡེ#། ཉོན་མོངས་པ་ནི་ཞེ་སྡང་། ཉེས་པ་ནི་རྒྱན་ཕྲེང་དང་ཁ་དོག་འཆང་བའོ། །ལུས་ལ་སྤོས་ཀྱིས་མི་བྱུག་#སྟེ། །ཞེས་བྱ་བ་ལ་སོགས་པ་ཤློ་ཀ་#ཕྱེད་དང་གསུམ་གྱིས་ཁ་དོག་གི་#ཉེས་པ་སྟོན་ཏོ། །དེ་ལ་ལུས་ལ་
[24a.6]སྤོས་ཀྱིས་བྱུག་པ་ནི་ལུས་ཀྱི་མདོག་མཛེས་པ་དང་དྲི་ཞིམ་པར་བྱ་བའི་ཆེད་དུ་ཨ་ཀ་རུ་དང་འབུ་སུག་ལ་སོགས་པ་དྲི་ཞིམ་པོའི་རྣམ་པ་ལྡེ་གུ་དང་ཕྱེ་མར་བྱས་ཏེ་ལུས་ལ་བསྐུ་ཞིང་གདགས་པར་མི་བྱའོ། །དེ་བཞིན་དུ་ཙནྡན་ལ་སོགས་པ་མི་བསྐུའོ། །ཡུང་#དང་གུར་གུམ་ལ་སོགས་པས། ཁ་དོག་
[24a.7]རྣམས་སུ་མི་བྲིའོ་སྟེ། མིང་གིས་སྨོས་པ་འདི་རྣམས་ཀྱིས་ཀྱང་ལུས་ཀྱི་མཛེས་ཤིང་སྤ་བ་དང་དྲི་ཞིམ་པར་བྱ་བའི་ཆེད་དུ་ལུས་ལ་གདགས་ཤིང་བསྐུ་བ་དཔྲལ་བ་ལ་རེས་སུ་མི་བྱའོ། །སྩོགས་པའི་སྒྲས་ནི་མཚལ་དང་ལི་ཁྲི་དང་། ཁ་དོག་མཛེས་པར་འགྱུར་བའི་རྒྱུ་གཞན་དག་ཀྱང་བསྡུའོ། །མེ་
[24b]
[24b.1]ཏོག་མགོ་རྒྱན་ཕྲེང་བ་དག# །བརྟུལ་ཞུགས་ཅན་གྱིས་གདགས་མི་བྱ། །ཞེས་བྱ་བ་ནི་མེ་ཏོག་བརྒྱུས་པའི་ཆུན་པོས་མགོ་དང་མགུལ་དུ་མི་གདགས་ཤིང་སྤང་ངོ་ཞེས་བྱ་བའི་དོན་ཏོ། །གསེར་ལ་སོགས་པའི་རྒྱན་རྣམས་ཀྱིས། །བདག་ལ་བརྒྱན་པར་མི་བྱའོ། །ཞེས་བྱ་བ་ལ། དགེ་སྦྱོང་བདག་ཉིད་
[24b.2]གསེར་དང་དངུལ་དང་མུ་ཏིག་ལ་སོགས་པ་ནོར་བུ་རིན་པོ་ཆེའི་རྒྱན་#རྣམས་ཀྱིས་བདག་གི་མགུལ་དང་རྐང་ལག་ལ་སོགས་པ་བརྒྱན་ཅིང་གདགས་པར་མི་བྱའོ། །དུད་པ་ལ་སོགས་མིག་སྨན་རྣམས། །མིག་མི་ན་བར་མི་བྱུག་གོ། །ཞེས་བྱ་བ་ནི་དགེ་སློང་#བདག་ཉིད་མིག་མི་ན་བར་མཚལ་དང་གུར་གུམ་དང་ག་
[24b.3]བུར་དང་དུད་པ་སྦྱར་བ་ལ་སོགས་པས་མིག་ལ་བསྐུ་བར་མི་བྱའོ། །ལུས་ཀྱི་མདོག་མཛེས་པ་དང་ཆགས་པ་#སྐྱེ་བར་བྱ་བའི་ཕྱིར་མེ་ལོང་དང་ཆུ་དང་བ་ལ་བལྟ་བར་མི་བྱ། སེན་མོ་མི་བཅོས། ཆགས་པའི་བསམ་པས་སོ་རྩི་ལ་སོགས་པ་བཟའ་ཞིང་མཆུ་དམར་པོར་མི་བྱའོ། །གཡན་པ་དང་འབྲུམ་
[24b.4]བུའི་#ནད་མེད་པར་ལུས་འཇམ་པ་དང་། #མཛེས་པར་བྱ་བའི་ཕྱིར་རྡོ་དང་སོ་ཕག་གིས་མི་བྲུད#། ཁྲུས་ཆུ་ལ་སོགས་པའི་ནང་དུ་དྲི་ཞིམ་པོ་སྣ་ཚོགས་སྦྱར་ལ་མི་བླུགས། ཡོན་བདག་དད་པ་ཅན་འགའ་ཞིག་དྲི་འབུལ་ཏེ་ལུས་ལ་མི་བསྐུར་མི་རུང་ན་ཡང་ཡིད་བསྲུང་བའི་ཕྱིར་སྐད་ཅིག་ཙམ་བསྐུས་ལ་
[24b.5]ཡོན་བདག་སོང་མ་ཁད་དུ་མ་ཚོར་བར་དབྱིའོ། །རིམས་ནད་དང་གཡན་པའི་ནད་ལ་ཕན་པའི་ཕྱིར་ཙནྡན་དང་གུར་ཀུམ་#གྱིས་ལུས་ལ་བསྐུ་དགོས་ན་འཇིག་རྟེན་པས་མི་འཕྱ་བར་བསྐུའོ། །ཤིང་ཁྲི་ཁྲུ་#གང་མཐོ་བ་དང་། །ཞེས་བྱ་བ་ལ་སོགས་པ་ཤློ་ཀ་གཅིག་གིས་མཐོན་པོ་ན་འདུག་པའི་ཉེས་པ་#བསྟན་ཏེ།
[24b.6]ཤིང་ཁྲི་ཁྲུ་#གང་ལས་མཐོ་བ་ཞེས་བྱ་བ་སྟེ་དེ་ལ་ཉལ་བར་མི་བྱའོ། །བ་སོ་ལ་སོགས་བརྒྱན་པའི་ཁྲི། །དམའ་ཡང་ཉལ་ཁྲི་བཟང་པོ་ལ། །ཉལ་ལ་སོགས་པ་མི་བྱའོ། །ཞེས་བྱ་བ་ནི་ཁྲུ་གང་སྙེད་དུ་མི་མཐོ་ཟིན་ཀྱང་བ་སོ་དང་དུང་དང་རྭ་#ལས་བྱས་པའི་ཁྲིའམ། དེ་དག་གིས་བརྒྱན་པའི་ཁྲི་བཟང་པོ་#
[24b.7]དམའ་ཡང་ཉལ་བར་མི་བྱའོ། །ཅིའི་ཕྱིར་ཞེ་#ན། མལ་སྟན་མཐོན་པོ་དང་བཟང་པོ་དང་ཆེན་པོ་ལ་ཉལ་ན་མལ་གྱི་བདེ་བ་ལ་ཆགས་ཤིང་རློམ་སེམས་འབྱུང་བའི་ཕྱིར་དང་། གཞན་དུ་ན་བཀྲ་མི་ཤིས་པར་ཡང་འཆད་པས་ཉལ་བར་མི་བྱའོ། །གནང་བ་ནི་དེ་བཞིན་གཤེགས་པའི་གསུང་རབ་ཁ་དོན་#དུ་འདོན་
[25a]
[25a.1]ཅིང་འཆད་པའི་ཚེ་ནི་རིན་པོ་ཆེ་སྣ་ཚོགས་ཀྱིས་བརྒྱན་པའི་ཁྲི་ལ་འདུག་ཏུ་གནང་ངོ་། །དེ་ལ་#འདུག་པའི་ཚེ་ཡང་ཆགས་ཤིང་བདེ་བའི་བསམ་པས་ནི་འདུག་པར་མི་བྱའོ། །འདུ་བྱེད་ཐམས་ཅད་སྐད་ཅིག་མི་རྟག་པའི་རང་བཞིན་ཡིན་པར་བསམས་ཏེ་འདུག་པར་བྱའོ། །གདིང་#
[25a.2]བ་ཀོ་ལྤགས་འཆང་བ་གནང་བ་ནི་ཡུལ་མཐའ་འཁོབ་དང་ལྷགས་པ་ཆེ་བ་དག་ཏུ་ནི་མལ་གོས་དང་སྟན་གཉིས་ཀ་ཀོ་ལྤགས་ལས་བྱེད་དུ་གནང་གི་ཡུལ་དབུས་མ་ག་དྷཱའི་#ཕྱོགས་སུ་ནི་མི་གནང་ངོ་། །ཀོ་ལྤགས་བཅང་དུ་གནང་བ་ཡང་གཞན་གྱི་གནང་གི་པ་གླང་དང་སྟག་དང་སེང་གེ་དང་དོམ་དང་དྲེད་དང་
[25a.3]རྟ་དང་བྱི་ལའི་པགས་#པ་འདི་བདུན་བཀྲ་མི་ཤིས་ཤིང་། འཇིག་རྟེན་པ་རྣམས་ཀྱིས་སྨད་ཅིང་དཀོན་པ་ཡིན་པ་སྤྱོད་ཅིང་འདུག་ཏུ་མི་གནང་ངོ་། །ནད་ཀྱི་གཞི་ལ་ཕན་ན་ནི་སྨན་པས་བསྒོ་བ་ལ་ཉེས་པ་མེད་དོ། །གླུ་གར་ལ་སོགས་བསྟེན་པ་དང་། །གང་ལ་དྲེགས་པ་སྐྱེ་མི་འགྱུར། །དྲེགས་པའི་
[25a.4]ཡན་ལག་སྤངས་ནས་#ནི། །བརྟུལ་ཞུགས་གནས་ཞེས་བརྗོད་པ་ཡིན། །ཞེས་བྱ་བ་ནི་དྲེགས་པའི་ཉེས་པ་སྤངས་པའི་ཕན་ཡོན་ཡིན་ཏེ། འདི་ལྟར་གླུ་དང་གར་ལ་སོགས་པ་དངོས་པོ་གང་བསྟེན་ཅིང་གནས་ན་དྲེགས་#པ་དང་རྒྱགས་པ་སྐྱེ་བར་འགྱུར་བའི་དྲེགས་པའི་ཡན་ལག་གམ་དངོས་
[25a.5]པོ་དེ་ཡང་སྤངས་ན་བརྟུལ་ཞུགས་གནས་པ་སྟེ། སྡོམ་པ་ལ་གནས་པ་ཚུལ་ཁྲིམས་དང་ལྡན་པ་ཡིན་ནོ་ཞེས་བྱ་བའི་དོན་ཏོ། །ཉི་མ་ཕྱེད་མཚམས་ཕན་ཆད་ནས། །ཞེས་བྱ་བ་ལ་སོགས་པ་ཤློ་ཀ་#གསུམ་གྱིས་ནི་དུས་མ་ཡིན་པས་#ཟས་ཟ་བའི་ཉེས་པ་བསྟན་ཏོ#། །དེ་ལ་དགེ་སྦྱོང་གིས་ཟས་ཟ་#བའི་
[25a.6]དུས་མ་ཡིན་པ་ནི་རང་གི་གནས་འཛམ་བུའི་གླིང་དུ་ཉི་མ་ཕྱེད་མཚམས་ཚུན་ཆད་ནས་བཟུང་སྟེ་སྐྱ་རེངས་མ་ཤར་བར་དུ་#ཟ་བའི་དུས་མ་ཡིན་པར་#སངས་རྒྱས་བཅོམ་ལྡན་འདས་ཀྱིས་བཀའ་སྩལ་ཏེ#། དགེ་སྦྱོང་སྡོམ་པ་ལ་གནས་པས་དུས་དེར་ཟས་མི་བཟའ་བར་བྱ་སྟེ། དེ་བས་ན། ཉི་མ་ཕྱེད་མཚམས་
[25a.7]ཕན་ཆད་ནས#། །སྐྱ་རེངས་#མ་ཤར་དུས་མིན་ཏེ། །དེ་ནི་རྒྱལ་བས་དུས་མིན་གསུངས། །སྡོམ་ཅན་རྣམས་ཀྱིས་དེར་མི་བཟའ། །ཞེས་བྱ་བ་བསྟན་པ་ཡིན་ནོ། །འོ་ན་དགེ་སྦྱོང་གི་ཟས་བཟའ་བའི་དུས་གང་ཞེ་ན། སྐྱ་རེངས་#ཤར་ནས་ཕྱེད་ཀྱི་བར། །དེ་ཡི་སྐབས་སུ་ཟོས་ན་ནི། །དེ་ནི་བདག་
[25b]
[25b.1]ཤེས་སྡོམ་པ་སྟེ། །བཟའ་བ་དུས་སུ་ཟོས་པ་ཡིན། །ཞེས་བྱ་བས་བསྟན་ཏེ། འདི་ལྟར་རང་གི་གནས་ནི་འཛམ་བུའི་གླིང་དུ་སྐྱ་རེངས་ཤར་བ་ཉི་མ་ཕྱེད་མ་ཡོལ་གྱི་བར་སྐབས་དེར་བཟའ་བ་ཟོས་པ་ནི་བདག་ཤེས་བཞིན་དང་ལྡན་པ་སྡོམ་པ་ལ་གནས་པ་སྟེ་དགེ་སྦྱོང་གིས་#གནས་བཟའ་བའི་དུས་སུ་
[25b.2]ཟོས་པ་ཡིན་ཏེ་དེ་ནི་དུས་ཡིན་ནོ། །དུས་མིན་དུས་སུ་འདུ་ཤེས་ནས། །ནམ་ཡང་བཟའ་བར་མི་བྱའོ། །ཞེས་བྱ་བ་ནི་ཕྱེད་མཚམས་ཕན་ཆད་དུས་མ་ཡིན་པ་ལས་དུས་ཡིན་ནོ་སྙམ་པའི་འདུ་ཤེས་བཞག་ནས་བཟའ་བ་རྣམས་བཟའ་བར་བྱ་བ་ནི་ནམ་ཡང་མི་བྱའོ་ཞེས་བྱ་བའི་དོན་ཏོ། །དུས་མ་
[25b.3]ཡིན་པར་བཟར་གནང་བ་ནི། སྨན་པས་ཉོན་མོངས་བསྒོ་ན་ནི། །ནད་པས་ཉེས་པར་མི་འགྱུར་རོ། །ཞེས་བྱ་བ་ལ་སོགས་པ་སྟེ། སྔ་དྲོ་ཟོས་པས་འཚོ་བར་མི་ནུས་ན་ཕྱི་དྲོ་ཡང་ཟོ་ཅིག་ཅེས་སྨན་པས་བསྒོ་ན་ཉེས་པར་མི་འགྱུར་བ་དང་། ལམ་དུ་ཞུགས་ཏེ་དཔག་ཚད་གཅིག་ཙམ་དུ་འགྲོ་བ་དང་།
[25b.4]མུ་གེ་ཆེན་པོ་བྱུང་སྟེ་ཉམ་#ཐག་པའི་དུས་སུ་ནི་དུས་དང་སྦྱར་བའི་གཏོལ་མེད་པས་ནམ་ཟས་རྙེད་པའི་ཚེ་དུས་མ་ཡིན་པར་བཟར་གནང་ངོ་། །དགེ་སློང་བ་ལང་བདག་བཞིན་དུ་ལས་ཀྱི་རྣམ་པར་སྨིན་པས་མིད་པ་གཉིས་ཡོད་པར་གྱུར་ན་སྔ་དྲོ་ནི་མིད་པ་གཅིག་ནས་ནང་དུ་རྒྱུ། ཕྱི་དྲོ་ནི་གཅིག་ནས་ཕྱིར་རྒྱུ་ཞིང་
[25b.5]ཟ་བའི་དུས་ཡིན་པས་དེ་ལྟ་བུ་ནི་དང་པོ་ཁམ་གཅིག་གཉིས་ཙམ་གྱིས་ཕྱིར་བོར་ཏེ་སླར་ཁ་བཀྲུ་བར་བྱ། དེའི་ཕྱི་མ་ཕན་ཆད་བཟའ་བར་བྱའོ། །དེ་ལྟ་བུ་མ་གཏོགས་པ་རྣམས་ནི་སྒྲེགས་པའི་ཁྲོད་ན་ཁ་ཟས་ཀྱི་ཚལ་མ་ཞིག་བྱུང་ན་ཁ་ཟས་དང་བཅས་པར་མི་བྱའི་བརྟགས་པའི་ཆུས་ཁ་དག་པར་བཀྲུ་
[25b.6]བར་བྱའོ། །ས་ལེ་སྦྲམ་ནི་གསེར་ཡིན་ཏེ། །ཞེས་བྱ་བ་ལ་སོགས་པ་ཤློ་ཀ་གསུམ་གྱིས་དབྱིག་འཆང་བའི་ཉེས་པ་སྤང་བ་སྟོན་ཏེ། དགེ་སྦྱོང་གིས་བདག་གི་ཆེད་དུ་གསེར་ས་ལེ་སྦྲམ་དང་། བདོག་#པ་ལ་སོགས་པ་དང་། དངུལ་ལ་སོགས་པ་སྟེ་རིན་པོ་ཆེ་རྣམས་སྦྱིན་བདག་རྣམས་ཀྱིས་དེ་
[25b.7]བྱིན་ན། བདག་ཉིད་ཀྱིས་ཀྱང་མི་བླང་ལ། །གཞན་ཡང་ལེན་དུ་མི་གཞུག་གོ། །གལ་ཏེ་དེ་ལྟར་མ་བྱས་པར་བླངས་ན་ཉེས་བྱས་ཏེ་ལྕི་བར་འགྱུར་རོ། །དགེ་སྤྱོང་གིས་#ཁབ་རལ་དང་གྲི་ཤུབས་ལ་སོགས་པ་རྭ་དང་བ་སོ་དང་རུས་པ་ལས་#བྱས་པ་དང་། གསེར་དངུལ་ལ་སོགས་པ་ལས་
[26a]
[26a.1]བྱས་པའམ། གསེར་དངུལ་དང་རིན་པོ་ཆེས་སྤྲས་#པ་ལ་སོགས་པ་གདགས་ཤིང་བཅང་བར་མི་བྱ་སྟེ་བྱས་ན་#ཉེས་བྱས་སོ། །ཚོན་མོ་སྟེང་དང་ཞ་ཉེ་དང་ཁར་#བ་ལ་སོགས་པ་ལ་རེག་ན་ཉེས་བྱས་སོ། །འོ་ན་དགེ་སྦྱོང་གསེར་དངུལ་ལ་སོགས་པ་ལ་ཅི་ནས་ཀྱང་རེག་ཏུ་མི་རུང་ངམ་
[26a.2]ཞེ་ན། བདག་གིས་རུང་བ་མ་ཡིན་འདིས། །རུང་བའི་དངོས་པོ་བཙལ་སྙམ་དུ། །དེ་ལྟར་མངོན་པར་བསམས་ནས་ནི། །དེ་ནས་གཞན་ཞིག་ལེན་དུ་གཞུག །ཅེས་སྨོས་ཏེ། དགེ་སྦྱོང་གིས་བསམས་པ་འདི་གཞན་ཏེ། བདག་གིས་གསེར་དངུལ་ལ་སོགས་པ་རུང་བའི་དངོས་པོ་མ་ཡིན་པ་འདིས།
[26a.3]རུང་བའི་དངོས་པོ་ཆོས་གོས་གསུམ་བཙལ་བའི་ཟོང་དང་། གསེར་དངུལ་ཅུང་ཟད་མ་བཅངས་ན་འཚོ་བ་འཆད་པར་འགྱུར་བས་འཚོ་བའི་ཕྱིར་དང་། སྨན་མེད་#ནད་ཀྱིས་གཙེས་པར་འགྱུར་བས་སྨན་བཙལ་བའི་ཟོང་གི་ཕྱིར་བཅང་ཞིང་བླང་ངོ་སྙམ་དུ་བསམས་ཏེ་དགེ་བསྙེན་ནམ་ཁྱིམ་བདག་གཞན་ལེན་དུ་
[26a.4]གཞུག་གོ། །ཡང་ཉེས་པར་མི་འགྱུར་བ་ནི། དཀོན་མཆོག་གསུམ་གྱི་ཆེད་ཀ་དང་། །ཚངས་པ་མཚུངས་པར་སྤྱོད་རྣམས་ཀྱི། །གསེར་དང་དངུལ་ལ་རེག་གྱུར་ཀྱང་། །ཉེས་པར་གྱུར་པ་མ་ཡིན་ནོ། །ཞེས་པ་སྟེ། འདི་ལྟར་དཀོན་མཆོག་གསུམ་གྱི་ཆེད་དུ་སྟེ་དེའི་དཀོར་དུ་གཏོགས་པ་དང་།
[26a.5]ཚངས་པ་མཚུངས་པར་སྤྱོད་པ་མཁན་པོ་དང་སློབ་དཔོན་གཅིག་པའི་དགེ་སྦྱོང་གི་ཡོ་བྱད་ལྟ་བུ་དང་། མཁན་པོ་དང་སློབ་དཔོན་གྱི་ཡོ་བྱད་དུ་གཏོགས་པའི་གསེར་དངུལ་ལ་དགེ་སྦྱོང་བདག་གིས་རེག་ཀྱང་ཉེས་པར་མི་འགྱུར་རོ། །ཡང་། བདག་གིས་རུང་བ་མ་ཡིན་འདིས། །རུང་བའི་དངོས་པོ་བཙལ་
[26a.6]སྙམ་དུ། །ཞེས་བྱ་བ་ནི་གསེར་དངུལ་འདིས་དེ་བཞིན་གཤེགས་པའི་སྐུ་གཟུགས་ལུགས་སུ་བླུགས་ཤིང་རིས་སུ་བྲིས་པ་དང་། དྷརྨ་བྲིས་ཤིང་གླེགས་བམ་དུ་བྱས་པ་དང་། དགེ་འདུན་སྤྱི་ལ་འབུལ་བའི་བསམས་#པས་བླངས་ན་ཉེས་པར་མི་འགྱུར་རོ་ཞེས་བྱ་བའི་དོན་ཏོ། །དགེ་སྦྱོང་གིས་#ཁེ་སྤོགས་
[26a.7]འདོད་པའི་ཕྱིར་བདག་གི་ནོར་གཞན་ལ་འཚོང་དུ་བཅོལ་ཏམ། གཞན་གྱི་ནོར་བདག་གིས་#བླངས་ཏེ་ཚོང་བྱས་ན་ཉེས་བྱས་སོ། །དཀོན་མཆོག་གསུམ་གྱི་ཕྱིར་རམ། དེ་ལྟར་མ་བྱས་ན་སྨན་#ཟོང་ཙམ་ཡང་མེད་ལ་འཚོ་བ་ཡང་འཆད་པར་འགྱུར་བ་ཞིག་གམ། བསོད་ནམས་བྱ་བ་ཞིག་ཏུ་བསམས་
[26b]
[26b.1]ཏེ་ཚོང་གི་ཁེ་སྤོགས་བྱ་དགོས་ན་ཡང་བདག་ཉིད་ཀྱིས་མི་བྱའི། ཁྱིམ་པ་གཞན་ལ་བཅོལ་བར་བྱའོ། །དེ་ལྟར་བཅོལ་བའི་འོས་མེད་ན་ཡང་བདག་ཉིད་ཚོང་བྱེད་པའི་ཚེ་བདག་གིས་#ནན་དང་མཐུས་མི་བྱའོ། །རུང་ངམ་མི་རུང་དགའ་མི་དགའ། །ཞེས་ལན་གསུམ་གྱི་བར་དུ་དྲིས་ལ། མི་དགའ་བ་མེད་
[26b.2]དེ་རུང་ངོ་ཞེས་ཟེར་ན་ཚོང་བྱའོ། །ཕ་རོལ་པོ་མ་དད་བཞིན་དུ་ནན་གྱིས་ཚོང་བྱས་ཏེ་རིན་བརྩིས་#ལ་ཐོབ་ན་ཕམ་པར་འགྱུར་རོ། །དེ་ལྟར་འདི་ཡན་ཆད་དུ་དགེ་སྦྱོང་གི་བསླབ་ཚིག་#བཅུ་པོ་མདོ་ཙམ་དུ་བཤད་ཟིན་ཏོ།། །།འདོད་པས་བར་དུ་གཅོད་བྱེད་#ཅིང་། །རྫོགས་སངས་རྒྱས་ཀྱིས་#བཀའ་
[26b.3]སྩལ་པ་ནི་བཅོམ་ལྡན་འདས་ཀྱིས་རབ་ཏུ་བྱུང་བ་རྣམས་འདོད་པའི་ཡོན་ཏན་ལྔ་ལ་བརྟེན་#པ་རྣམས་ནི་མོ་ཐ་རིས་དང་ཐར་པ་ལ་བར་དུ་གཅོད་པའོ་ཞེས་བཀའ་སྩལ་པ་ལས། ཉེ་དགའི་སློབ་མ་དགེ་སྦྱོང་ཚེར་མ་ཅན་#དང་མཆོད་སྦྱིན་གཉིས་ན་རེ་འདོད་པས་བར་དུ་གཅོད་པའོ་ཞེས་བཅོམ་ལྡན་འདས་
[26b.4]ཀྱིས་བཀའ་སྩལ་པ་ནི་དེ་ལྟར་མ་ཡིན་ཏེ། འདོད་པ་ལ་བརྟེན་ཀྱང་བར་དུ་གཅོད་པར་མི་འགྱུར་ཏེ་དེའི་དོན་བདག་གིས་ཤེས་སོ་ཞེས་སྨྲས་པ་#ལས། བཅོམ་ལྡན་འདས་ལ་གསོལ་ཏེ་#བཀའ་སྩལ་པ། དེ་སྐད་དུ་སྨྲ་བ་ལ་དང་པོར་ཚིག་འཇམ་པོས་#སྨྲོས་ཤིག །དེས་མ་བཏུབ་ན་གསོལ་བ་དང་།
[26b.5]བཞིའི་ལས་ཀྱིས་དགེ་ཚུལ་གཏི་མུག་མ་སྨྲ་ཤིག་#ཅེས་བསྒོ་ཞིག །དེ་སྐད་དུ་བསྒོ་བ་ལས་ཀྱང་མ་བཏུབ་སྟེ་དེ་སྐད་སྨྲ་ན་དགེ་འདུན་གྱིས་འཚོ་བའི་ཡོ་བྱད་དུ་གཏོགས་པ་ལོངས་སྤྱོད་རྣམས་དང་ཕྲལ་ནས། གཙུག་ལག་ཁང་ནས་བསྐྲད་པར་བྱའོ། །དེ་ལྟར་བསྐྲད་པའི་དགེ་སྦྱོང་དེ་ནི་དགེ་སྦྱོང་#དང་
[26b.6]གཉིས་གནས་ཁང་གཅིག་ཏུ་ཉལ་བ་གནང་བ་དེ་ལ་མེད་ན། ཚངས་པ་མཚུངས་པར་སྤྱོད་པ་རྣམས་དང་སྤྱོད་པ་གཅིག་ཅིང་ཡོ་བྱད་གཅིག་པ་དང་། ལྟ་བ་གཅིག་པ་རྣམས་ཀྱང་དེ་ལ་མེད་པས་ན། དེ་ནས་རོ་དང་འདྲ་བར་འགྱུར་རོ། །འཕྱར་དང་རྟ་གད་བྱེད་ལ་སོགས། །འཆི་བར་བསམས་ཏེ་
[26b.7]མི་བྱའོ། །ཞེས་བྱ་བ་ལ། རབ་ཏུ་བྱུང་བ་རྣམས་ནི་དུལ་ཞིང་ཞི་བའི་རང་བཞིན་པས#། གདོལ་པ་དང་མ་རབས་ཀྱི་#ཆོས་ལུས་ཀྱི་སྒོ་ནས་མཆོང་ཞིང་བརྒལ་བ་ལ་སོགས་པ་དག་དང་། ངག་གི་སྒོ་ནས་རྟ་གད་དྲག་པོ་ལ་སོགས་པ་མི་བྱའོ། །ཅིའི་ཕྱིར་ཞེ་ན། འཕྱར་བ་ནི་མ་བརྟགས་པའི་ཆོས་ཡིན་
[27a]
[27a.1]པ་དང་། རྟ་གད་དང་གག་ཚིལ་བྱེད་པ་ནི་རླུང་འཚུབ་ཅིང་སྔོན་ཤི་བ་དག་བྱུང་བས། དེའི་ཕྱིར་འཆི་བར་བསམས་ཤིང་མི་བྱའོ། །གླལ་ཚེ་ལག་ལ་སོགས་པ་ཡིས། །ཁ་དགབ་པར་ཡང་ནན་ཏན་བྱ། །ཅིའི་ཕྱིར་ཞེ་ན། སོ་སྣང་བ་དང་གཅན་གཟན་ཆད་པ་ལྟར་ཤིན་ཏུ་མི་མཛེས་
[27a.2]པའི་ཕྱིར་རོ། །རྒན་ལ་སྦྲིད་བྱུང་ཕྱག་#བྱ་སྟེ། །གཞོན་ལ་ནད་མེད་གྱུར་ཞེས་བྱ། །ཁྱིམ་པ་སྦྲིད་པ་བྱུང་བ་དང་། །ཡུན་རིང་#སོས་ཞེས་བརྗོད་པར་བྱ། །ཞེས་བྱ་བ་ལས། རྒན་པ་ནི་བདག་པས་ཚུལ་ཁྲིམས་དང་ཤེས་པ་རྒན་པའམ་མཁན་པོ་དང་སློབ་དཔོན་ནོ། །གཞོན་པ་ནི་བདག་པས་ད(་དེ)
[27a.3]དག་གིས་དམའ་བ་ཆུང་བའོ། །ཡུན་རིངས་པོས་#ཞེས་བྱ་བ་ནི་ཁྱིམ་པ་རྣམས་ནི་ཚེ་རིང་བ་ལ་དགའ་བའི་ཕྱིར་རོ། །བླ་མ་དག་གི་མདུན་དག་ཏུ། །སྣབས་དང་མཆིལ་མ་མི་དོར་ཞིང་། །སོ་ཤིང་བཅའ་བར་མི་བྱའོ། །དེ་བཞིན་སྟན་#ལ་མི་འདུག་ཅིང་། །མདུན་དུ་བཅག་པར་མི་བྱའོ། །གོས་#གཅིག་
[27a.4]དག་ཀྱང་བགོ་མི་བྱ། །ཁྱེད་རེངས་སུ་ཡང་མི་དབྱུང་ངོ་། །ཞེས་བྱ་བ་ལ། མཁན་པོ་དང་སློབ་དཔོན་དང་ཤེས་པ་དང་ཚུལ་ཁྲིམས་ཀྱི་ཡོན་ཏན་གྱིས་འཕགས་པ་རྣམས་ནི་བླ་མ་སྟེ། དེ་དག་གི་མདུན་དུ་མིང་གིས་འབྱུང་བ་དེ་དག་མི་དོར་མི་བྱའོ། །ཅིའི་ཕྱིར་ཞེ་ན། མ་རབས་སྨད་པའི་ཆོས་ཡིན་པ་
[27a.5]དང་། མ་གུས་ཤིང་བསྙེམས་པའི་ཚུལ་ཡིན་པས་སྤང་བར་བྱའོ། །སོ་ཤིང་ཟ་ན་ཡང་ཕུ་རུང་གིས་ཁ་བཀབ་#སྟེ་བཟའ་བར་བྱའོ། །བླ་མ་རྣམས་ལ་ཇི་ལྟར་བྱ་ཞེ་ན། རྒན་པོ་རྣམས་ལ་སྡོམ་ཅན་གྱིས། །གུས་བཅས་ཞེ་སར་བཅས་པར་བྱ་བ་སྟེ། རྒན་པ་གོང་དུ་སྨོས་པ་རྣམས་ལ་ལུས་ཀྱི་སྒོ་ནས་
[27a.6]ཀྱང་གུས་ཤིང་ཞི་བར་བྱ་བ་དང་། ངག་གི་སྒོ་ནས་ཀྱང་ཚིག་འཇམ་ཞིང་གསོང་པོར་སྨྲ་བ་དང་ཞེ་ས་དང་བཅས་པར་བྱའོ། །བསླབ་པ་ཕྲ་མོའི་གནས་བསྟན་ཟིན་ཏོ།། །།ལག་པ་དག་པར་བསྙལ་ནས་ནི། །བུམ་པ་ལ་སོགས་རྡུལ་མེད་བྱ། །ཞེས་བྱ་བ་ནི་ཟས་ཟོས་པའི་འོག་ཏུ། ཁ་ལག་
[27a.7]ལེགས་པར་བཀྲུས་ནས་ནང་པར་སྤྱད་པར་བྱ་བའི་ཆུ་བཙག་#ཅིང་བླང་བར་བྱའོ། །ཆུའི་སྣོད་བུམ་པ་ལ་སོགས་པ་རྡུལ་དང་དྲི་མ་མེད་པར་སྲོག་ཆགས་མེད་པར་བརྟགས་ནས་ཆུ་ཡང་བཙག་#ཅིང་བླང་བར་བྱ་སྟེ། ཆུ་བཙག་#པའི་ཐབས་ནི། སྲོག་ཆགས་ཡོད་ན་ལེགས་པར་བཙག །ཅེས་པའི་སྐབས་སུ་
[27b]
[27b.1]བསྟན་པ་བཞིན་ནོ། །གནས་མེད་པར་ནི་གནས་མི་བྱ། །ཞེས་བྱ་བ་ནི་བསྙེན་པར་རྫོགས་ནས་ལོ་བཅུའམ། ལྔ་མ་ལོན་གྱི་བར་དུ་གནས་མ་བཅས་པར་གནས་སུ་མི་དབང་བས་དགེ་སྦྱོང་རྣམས་ཀྱིས་གནས་མེད་པར་ཞག་གཅིག་ཀྱང་གནས་སུ་མི་གནང་ངོ་ཞེས་བཀའ་སྩལ་ཏོ། །དགེ་འདུན་མལ་སྟན་
[27b.2]ལ་སོགས་པ། །དྲན་པ་མེད་པར་འདུག་མི་བྱ། །ཞེས་བྱ་བ་ནི། དགེ་འདུན་སྤྱིའི་མལ་ཆ་དང་སྟན་ཁྲི་དང་ཁྲིའུ་ལ་སོགས་པ་ནི་ཤིན་ཏུ་སྤྱད་པར་བྱ་བ་མ་ཡིན་པས་མི་རྟག་པ་ལ་སོགས་པའི་ཆོས་དྲན་པར་བྱས་ཏེ་འདུག་པར་མི་བྱའོ། །དེ་ལྟ་བུའི་དྲན་པ་མེད་པར་ནི་འདུག་པར་མི་བྱའོ། །དེ་ལྟ་བུའི་ཆོས་
[27b.3]ཡིད་ལ་བྱེད་པ་དང་ལྡན་པས་འདུག་ཏུ་གནང་སྟེ། དེ་བས་ན་དྲན་#དང་ལྡན་ན་ཉེས་#མེད་དོ། །སོ་བཀྲུ་བ་དང་ཆུ་བཏུང་#དང་། །བཤང་གཅི་བྱེད་དུ་འགྲོ་བ་དང་། །མཚམས་ནང་སྟོན་ལ་ཕྱག་བྱ་བ། །དེ་དག་མ་ཞུས་ཉེས་མེད་དོ། །ཞེས་བྱ་བའི་མིང་གིས་འབྱུང་བ་འདི་དག་ནི་མཁན་པོ་དང་སློབ་དཔོན་ལ་
[27b.4]མ་ཞུས་ཀྱང་ཉེས་པར་མི་འགྱུར་རོ་ཞེས་བསྟན་ཏོ། །བརྟུལ་ཞུགས་ཅན་གྱིས་བྱ་བ་གཞན། །དེ་དག་ཐམས་ཅད་མ་ལུས་པར། །གལ་ཏེ་བླ་མ་མ་ཞུས་པར། །བྱས་ན་དེ་ནི་ཉེས་བྱས་འགྱུར། །ཞེས་བྱ་བ་ལ། དགེ་སྦྱོང་གིས་བསྒོམ་ཞིང་བཀླག་#པར་བྱ་བ་དང་། གོས་དྲ་བ་དང་འདྲུབ་པ་ལ་
[27b.5]སོགས་པ་ལས་སུ་ཅི་བྱ་བ་ཀུན་ཀྱང་#མཁན་པོ་ལ་ཞུ་བར་བྱ་སྟེ། གལ་ཏེ་མ་ཞུས་པར་སྣ་འགའ་བྱས་ན་ཉེས་བྱས་སུ་འགྱུར་རོ་ཞེས་གསུངས་སོ། །མཆོད་རྟེན་ལ་སོགས་ཕྱག་བྱས་ཏེ། །མི་ཉལ་བྱས་ནས་དེ་འོག་ཏུ། །བླ་མའི་རྐང་བཀྲུ། །ཞེས་བྱ་བ་ལ། ནུབ་མོ་དགེ་སྦྱོང་གིས་མཆོད་རྟེན་དང་སྐུ་
[27b.6]གཟུགས་ལ་སོགས་པ་ལ་ཕྱག་བྱས་ཏེ། ཞུ་བའི་གནས་གང་ཡིན་པའི་གང་ཟག་ལ་སང་ནང་པར་གྱི་བར་དུ་མི་ཉལ་བར་དགེ་བ་རྔོ་ཐོགས་#ཚད་དུ་བགྱི་ཞེས་ཞུ་ཞིང་དེ་ལྟར་བྱས་པའི་འོག་ཏུ་མཁན་པོ་དང་སློབ་དཔོན་གཉིས་ཀ་#དང་བླ་མ་རྣམས་ཀྱི་རྐང་པ་ཆུ་གཙང་མས་#བཀྲུ་བར་བྱའོ། །བླ་མ་ལ། །
[27b.7]བརྟུལ་ཞུགས་ཅན་གྱིས་ཀུན་ཞུས་ཏེ། །ཞེས་བྱ་བ་ནི་དེ་ལྟར་བླ་མའི་རྐང་ལག་བཀྲུ་བར་བྱས་ནས་དགེ་བ་ལ་སོགས་པ་ཅི་བྱ་བརྟུལ་ཞུགས་ཅན་དགེ་སྦྱོང་བདག་གིས་ཞུས་ནས་ཞེས་བྱ་བའི་ཐ་ཚིག་གོ། །ཅི་བྱ་ཞེ་ན། རྐང་པ་གཉིས་ཀ་བཀྲུས་ནས་ནི། །ནམ་གྱི་ཆ་སྟོད་ཆ་སྨད་ལ། །བསྒྲིམས་ཏེ་མི་
[28a]
[28a.1]ཉལ་བྱ་བ་སྟེ། །ཞེས་བྱ་བ་སྟེ། སླར་བདག་གི་གནས་ཁང་དུ་#ཕྱིན་ནས། རྐང་པ་གཉིས་དག་ཏུ་བཀྲུས་ཏེ་ཞུས་པ་བཞིན་ནམ་གྱི་ཆ་སྟོད་སྲོད་དང་ནམ་གྱི་ཆ་སྨད་ཐོ་#རངས་ལ་བསྒྲིམས་པ་བརྩོན་འགྲུས་ཆེན་པོས་མི་ཉལ་བར་དགེ་སྦྱོར་བྱའོ། །དེ་ལྟར་བྱས་ན་ཞུས་པ་
[28a.2]བཞིན་དགེ་སྦྱོང་དེས་ནི་བདེན་པར་སྨྲ་བར་འགྱུར་ཏེ། ཞུས་པ་བཞིན་དུ་བྱས་པ་ཡིན་ནོ། །ལྡང་དང་སྣང་བའི་འདུ་ཤེས་ཀྱིས། །སེང་གེའི་ཉལ་ཐབས་བཞིན་དུ་བྱ། །ཞེས་བྱ་བ་ལ། གཉིད་འོང་སྟེ་མལ་དུ་ལུས་ཕབ་པའི་ཚེ་ན་ཡང་བསམ་པ་མེད་པར་ཉལ་བར་མི་བྱའི། མྱུར་དུ་ལྡང་བའི་
[28a.3]བསམ་པ་དང་མྱུར་དུ་སད་ཅིང་སྣང་#བའི་འདུ་ཤེས་ཡིད་ལ་བྱས་ནས་སེང་གེ་བཞིན་དུ་གློ་གཡས་པ་ཕབ་སྟེ་ཉལ་བར་བྱའོ། །དྲན་དང་བསམ་པའི་རྒྱུད་དག་དང་། །དེ་བཞིན་མྱུར་དུ་སད་ནས་ནི། །ཇི་སྐད་བསྟན་པ་བཞིན་དུ་བྱ། །ཞེས་བྱ་བ་ལ། དེ་ལྟར་སྣང་བ་དང་ལྡང་བའི་འདུ་ཤེས་ཀྱིས་ཉལ་བ་ནི་དྲན་
[28a.4]པའི་བསམ་པ་དང་ལྡན་པ་ཞེས་བྱ་བ་སྟེ། དེས་ནི་མྱུར་དུ་སད་ཅིང་ལྡང་བར་འགྱུར་རོ། །དེ་ལྟར་སད་ནས། ནམ་གྱི་ཆ་སྨད་མལ་ནས་ལངས། །ནམ་ལངས་བར་དུ་ཁ་ཏོན་#བྱ། །ཞེས་ཇི་སྐད་བསྟན་པ་བཞིན་དུ་བསྒྲུབ་ཅིང་བསྒོམ་པར་བྱའོ་ཞེས་#བྱ་བའི་དོན་ཏོ། །ཕྱི་དྲོ་ཕན་ཆད་ཀྱི་བྱ་བ་བསྟན་ཟིན་ཏེ#། །ད་ནི་ཚིག་རྐང་
[28a.5]གསུམ་གྱིས་#དགེ་སྦྱོང་གི་བསླབ་ཚིག་བསྲུང་བ་དང་། སྔ་དྲོ་དང་ཕྱི་དྲོའི་དུས་སུ་ཁ་ཟས་བཟའ་ཞིང་ཆུ་གཙང་བ་དང་། མཁན་པོ་དང་སློབ་དཔོན་དང་བླ་མ་རྣམས་ལ་ལུས་ངག་གི་སྒོ་ནས་བཀུར་སྟི་ལ་སོགས་པའི་ལས་སུ་བྱ་བ་ཇི་ལྟར་བསྟན་པ་བཞིན་དུ་ཉམས་སུ་བླངས་ཏེ་བསྒྲུབས་ན་ཡོན་ཏན་དང་འབྲས་བུ་གསུམ་འཐོབ་
[28a.6]བོ་ཞེས་བསྟན་པའི་ཕྱིར། ཇི་ལྟར་ཉོན་མོངས་མྱུར་ཟད་ནས། །བྱང་ཆུབ་དམ་པ་འཐོབ་འགྱུར་བ། །དེ་ལྟར་བསྒྲིམས་དང་ལྡན་པར་བྱ། །ཞེས་བྱ་བ་སྨོས་ཏེ། དེ་ལྟར་བསྒྲིམས་དང་ལྡན་པར་བྱ། །ཞེས་བྱ་བ་ནི་གོང་དུ་བསྟན་པ་བཞིན་ནན་ཏན་བྱས་ན་#ཚེ་འདིར་ཡང་ཉོན་མོངས་པ་མྱུར་དུ་ཟད་པར་འགྱུར་
[28a.7]ལ། མ་འོངས་པ་ན་ཡང་བྱང་ཆུབ་རྣམ་པ་གསུམ་ལས་དམ་པ་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །དགེ་སྤྱོང་གི་ཀཱ་རི་ཀཱ་ལྔ་བཅུ་པ་མདོ་ཙམ་དུ་བཤད་པ། སློབ་དཔོན་ཀ་མ་ལ་ཤཱི་ལས་མཛད་པ་རྫོགས་སོ།། །།
[28b]
[28b.1]{T4129}༄༅༅། །རྒྱ་གར་སྐད་དུ། སརྦ་ཨ་སྟི་བཱ་དི་ཤྲ་མ་ཎེ་ར་ཀ་ར་ཎ། བོད་སྐད་དུ། ཐམས་ཅད་ཡོད་པར་སྨྲ་བ་རྣམས་ཀྱི་དགེ་ཚུལ་གྱི་བྱ་བ། ཐམས་ཅད་ཡོད་པར་སྨྲ་བ་རྣམས་ཀྱིས་ཞེས་བྱ་བ་ནི་དུས་གསུམ་དང་། རྣམ་པར་རིག་བྱེད་མ་ཡིན་པའི་གཟུགས་དང་། འདུས་མ་བྱས་
[28b.2]བཞི་དང་། ཁ་དོག་བཅུ་གཉིས་དང་། དབྱིབས་བརྒྱད་དང་། འདི་དག་ལ་སོགས་པ་རྫས་སུ་ཡོད་པར་འདོད་ཅིང་། དོན་དམ་པར་ཡང་དེ་བཞིན་དུ་ལྟ་བས་ན་ཐམས་ཅད་ཡོད་པར་སྨྲ་བ་ཞེས་བྱའོ། །རྣམས་ཀྱི་ཞེས་པ་སྔ་མ་འདས་པའི་དགེ་ཚུལ་དང་། ད་ལྟར་བྱུང་བའི་དགེ་ཚུལ་དང་། མ་འོངས་པའི་དགེ་ཚུལ་དང་།
[28b.3]དེ་དག་གི་བྱ་བ་ཡིན་པས་ན་རྣམས་ཞེས་བྱའོ། །དགེ་ཚུལ་ཞེས་པ་ནི་ངལ་བ་བྱེད་པའི་དོན་ཏོ། །ཁ་ཏོན་བྱ་བ་ལ་སོགས་པས་དུབ་ཅིང་ངལ་བའི་ཕྱིར་ཏེ། དོན་དུ་ན་དགེ་བ་ལ་བརྟུན་པའམ། དགེ་བ་སྤྱོད་པ་ལ་དགེ་ཚུལ་ཞེས་བྱ་སྟེ། ཞིབ་ཏུ་འོག་ནས་འཆད་དོ། །བྱ་བ་ཞེས་བྱ་བ་ནི་རྣམ་པ་གཉིས་ཏེ། བསྒྲུབ་
[28b.4]པར་བྱ་བ་དང་། བསྲུང་བར་བྱ་བའོ། །དེ་ལ་བསྒྲུབ་པར་བྱ་བ་ནི། བླ་ན་མེད་པའི་བྱང་ཆུབ་བོ། །བསྲུང་བར་བྱ་བ་ནི་ཚུལ་ཏེ་བསླབ་པར་བྱ་བའོ། །ཡང་ན་དགེ་ཚུལ་དུ་གྱུར་པའམ། དགེ་ཚུལ་གྱིས་ཇི་ལྟར་བྱ་བའོ། །མགོན་པོ་ཞེས་བྱ་བ་ནི་སངས་རྒྱས་ལ་བྱ་སྟེ། སེམས་ཅན་ཐམས་ཅད་ཀྱི་
[28b.5]མགོན་དང་རྟེན་དང་དཔུང་གཉེན་དུ་གྱུར་པས་ན་མགོན་པོ་ཞེས་བྱའོ། །ཐམས་ཅད་ཅེས་བྱ་བ་ནི་ཕྱི་ནང་གི་རྒྱུ་རྐྱེན་དང་། དུས་གསུམ་དང་། དུས་ཀྱིས་བསྐལ་པ་དང་། རང་བཞིན་གྱིས་བསྐལ་པ་ལ་སོགས་པའོ། །མཁྱེན་དང་ཞེས་པ་ནི། ཐོགས་པ་དང་ཆགས་པ་མི་མངའ་བའི་ཡེ་ཤེས་
[28b.6]ཀྱིས་རྟག་ཏུ་སྨོས་པ་རྣམས་དང་། ཤེས་བྱ་མཐའ་དག་མ་ལུས་པར་མཁྱེན་པའོ། །ཆོས་ཞེས་བྱ་བ་ནི་ཉན་ཐོས་ཀྱི་སྡེ་སྣོད་གསུམ་ལ་བྱ་བ་སྟེ། དེ་ལ་འདུལ་བས་ནི་དུལ་བར་བྱས། མདོ་སྡེས་ནི་ཞི་བར་བྱས། མ་མོས་ནི་མྱ་ངན་ལས་འདས་པར་བྱེད་པའི་ཕྱིར་ཆོས་ཞེས་བྱའོ། །ཡང་ན་ཡིག་
[28b.7]འབྲུ་ཙམ་ལ་མི་བྱའི། མྱ་ངན་ལས་འདས་པའི་ལམ་གང་ཟག་ལ་བདག་མེད་པའི་ཆོས་སོ། །འཕགས་པའི་ཞེས་བྱ་བ་ནི། ཁམས་གསུམ་གྱི་ཉོན་མོངས་པ་ལས་རིང་དུ་གྱུར་པའམ། རྒྱང་བསྲིངས་པའི་ཕྱིར་འཕགས་པའོ། །ཚོགས་ལ་ཞེས་བྱ་བ་ནི་དེ་ཡང་གང་ཞེ་ན། ཟག་པ་ཟད་པ། ཁུར་བོར་བ།
[29a]
[29a.1]དགྲ་བཅོམ་པ་དག་སྟེ། སྐྱེས་བུ་ཟུང་བཞི་དང་གང་ཟག་ཡ་བརྒྱད་ཀྱི་ཚོགས་ཏེ། དེ་དག་འདུས་པ་ལ་བྱའོ། །ཡང་ན་ད་ལྟར་གྱི་དགེ་འདུན་བཞི་ཡན་ཆད་དོ། །དེ་ལ་ཟག་པ་ནི་འདོད་པ་དང་མ་རིག་པ་དང་། ལྟ་བ་དང་། སྲིད་པའི་ཟག་པའོ། །ཁུར་བོར་བ་ནི་ཕུང་
[29a.2]པོ་ལྔའི་ཁུར་བོར་བའོ། །དགྲ་བཅོམ་པ་ནི་ལས་གཅིག་དང་ཉོན་མོངས་པའི་དགྲ་བཅོམ་པའམ་བདག་ཏུ་འཛིན་པའི་དགྲ་བཅོམ་པའོ། །ཕྱག་འཚལ་ཏེ་ཞེས་པ་ནི་དཀོན་མཆོག་གསུམ་ལ་ལུས་དང་། ངག་དང་། ཡིད་ཀྱིས་ཕྱག་བྱ་བའོ། །དེ་ལ་ལུས་ཀྱིས་ཕྱག་བྱ་བ་ནི། ལུས་སྨད་ལྔས་ལ་
[29a.3]གཏུགས་པའོ། །ངག་གིས་ཕྱག་བྱ་བ་ནི། དཀོན་མཆོག་གསུམ་གྱི་ཡོན་ཏན་བརྗོད་ཅིང་བསྟོད་པ་བྱེད་པའོ། །ཡིད་ཀྱིས་ཕྱག་བྱ་བ་ནི། སངས་རྒྱས་དག་མངོན་པར་བཞུགས་པར་རྩེ་གཅིག་ཏུ་དམིགས་པའོ། །དེ་ལ་ཡང་ནད་པ་ཚབས་པོ་ཆེའི་ནི་ཡན་ལག་དང་ལྡན་པས་བྱའོ། །ནད་པ་ནི་ཡན་
[29a.4]ལག་གཉིས་དང་ལྡན་པས་སོ། །མི་ན་བས་ནི་ཡན་ལག་གསུམ་ཀས་སོ། །དགེ་བ་ནི་ལུས་དང་ངག་དང་ཡིད་གསུམ་གྱི་སྒོ་ནས་དགེ་བ་སྟེ། དེ་ལ་ལུས་ཀྱི་སྒོ་ནས་དགེ་བ་ནི། སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་སྤོང་བའོ། །ངག་གི་དགེ་བ་ནི་བརྫུན་
[29a.5]དུ་སྨྲ་བ་དང་། ཕྲ་མ་དང་། ཐུན་ཚགས་སུ་སྨྲ་བ་དང་། ཚིག་རྩུབ་མོ་དག་སྤངས་པའོ། །ཡིད་ཀྱི་དགེ་བ་ནི་ལོག་པར་ལྟ་བ་དང་། ངན་དུ་སེམས་པ་དང་། ཆགས་སེམས་སྤངས་པའོ། །ཡང་ན་ལུས་ཀྱི་དགེ་བ་སྤྱོད་ལམ་བཞི་མཛེས་པ་དང་། ངག་གི་དགེ་བ་ཅལ་ཅོལ་དུ་མི་སྨྲ་ཞིང་
[29a.6]དུས་སུ་སྨྲ་བ་དང་། ཡིད་ཀྱི་དགེ་བ་དཀོན་མཆོག་གསུམ་རྗེས་སུ་དྲན་ཞིང་ཚད་མེད་པ་བཞི་དང་ལྡན་པའོ། །ཚུལ་གྱི་ཞེས་བྱ་བ་ནི་དགེ་སྦྱོང་གི་ཚུལ་བཞིའོ། །ཆོ་ག་རྣམས་ཞེས་བྱ་བ་ནི། ཚུལ་ཁྲིམས་བཅུ་དང་། དགེ་ཚུལ་རྣམས་ཀྱི་ཆོ་གའོ། །མདོ་ཙམ་ཞེས་བྱ་བ་ནི་འདུལ་བ་འབུམ་པའི་ནང་
[29a.7]ནས་དགེ་སློང་ཁྲིམས་ཉིས་བརྒྱ་ལྔ་བཅུ་འབྱུང་བ་ལས་དགེ་ཚུལ་མི་སྲུང་བ་ནི་དགེ་འདུན་ལྷག་མ་བཅུ་གསུམ་དུ་ཟད་མོད་ཀྱི། ཐམས་ཅད་ནི་ལྷག་ཏུ་མ་མཆིས་ཏེ་རྩ་བ་ཉི་ཚེ་བཏུས་པས་ན་མདོ་ཙམ་ཞེས་བྱའོ། །ངེས་པར་ཞེས་བྱ་བ་ནི། མཁན་པོས་རང་བཟོ་བྱས་པ་ནི་མ་ཡིན་གསུང་རབ་ཀྱི་ལུང་
[29b]
[29b.1]འདུལ་བའི་ནང་ནས་བཏུས་པས་ན་ངེས་པ་ཞེས་བྱ་བའོ། །བཤད་པར་བྱ་ཞེས་པ་ནི་བསྟན་པ་དང་བཤད་པ་དང་། སྨྲས་པ་ཞེས་པ་ནི་རྣམ་གྲངས་སོ། །ཡང་ན་དེ་ལྟར་ཕྱག་བཙལ་བ་དང་། དམ་བཅས་པ་དང་གདམས་ངག་ལྟ་བུར་སྟོན་ཏོ། །ཤཱཀྱ་ཞེས་པ་ནི་དེ་ཡང་སྟོན་པ་རྣམས་
[29b.2]ཀྱིས་དམ་བཅས་པས་སྔོན་ཏེ། གང་ཞེ་ན། ཁྱིམ་པའི་རིགས་ཡོངས་སུ་དག་པ་དང་། རབ་ཏུ་བྱུང་བའི་རིགས་ཡེ་ཤེས་ཡོངས་སུ་དག་པར་བསྟན་ཏོ། །དེ་ལ་ཤཱཀྱ་ཞེས་བྱ་བ་ནི་རིགས་བཞི་ཡོད་པས་རྒྱལ་རིགས་ཀྱི་ནང་ན་ཡང་ཤཱཀྱའི་རིགས་གཙང་ཞིང་ཁ་དྲག་པའི་ནང་དུ་བཅོམ་ལྡན་
[29b.3]འདས་འདུལ་བའི་དབང་གི་ཕྱིར་དགའ་ལྡན་གནས་ནས་རིགས་དེར་སྐྱེས་པ་ན་རིགས་ལ་མཚན་དུ་གསོལ་ཏོ། །ཤཱཀྱའི་བསྟན་པ་ལ་བདག་ཉིད་དད་པས་རབ་ཏུ་བྱུང་བས་ལུས་བཞིན་བསླབ་པ་བསྲུང་བར་བསྟན་ཏོ། །སེང་གེ་ཞེས་པ་ནི་བྱོལ་སོང་གི་རྒྱལ་པོ་སེང་གེ་རལ་པ་ཅན་ཇི་ལྟར་རི་དགས་
[29b.4]ཐམས་ཅད་ཟིལ་གྱིས་གནོན་པ་དེ་བཞིན་དུ་སངས་རྒྱས་ཀྱང་མུ་སྟེགས་ཅན་དང་ཕྱིར་རྒོལ་བ་ཐམས་ཅད་སྦ་བཀོང་ཞིང་ཟིལ་གྱིས་གནོན་པར་མཛད་དེ། །སེང་གེ་དང་འདྲ་བའི་ཕྱིར་དཔེ་དེ་ལས་མཚན་དུ་གསོལ་ཏོ། །འདིས་ནི་རབ་ཏུ་བྱུང་བའི་ཡོངས་སུ་དག་པར་སྟོན་ཏོ། །བསྟན་པ་ལ་
[29b.5]ཞེས་པ་ནི་ཉན་ཐོས་ཀྱི་སྡེ་སྣོད་གསུམ་ལ་བྱ་སྟེ། ཐེག་པ་ཆེན་པོའི་གསུང་རབ་མདོ་སྡེ་བཅུ་གཉིས་ལ་བྱའོ། །དད་པས་ཞེས་པ་ནི་དཀོན་མཆོག་གསུམ་དང་ལྡན་པ་བཞི་དང་། ལས་དང་འབྲས་བུ་ལ་ཡིད་ཆེས་ཤིང་མངོན་པར་དད་པས་སེམས་དང་བའོ། །རབ་ཏུ་བྱུང་བས་ཞེས་པས་རབ་
[29b.6]ཏུ་བྱུང་བ་ལ་རྣམ་པ་བཞི་སྟེ། ཕྱི་རོལ་གྱི་རྐྱེན་གྱིས་ཕོངས་ཏེ་རབ་ཏུ་བྱུང་བ་ནི་མ་སྨོས་ཏེ། འདིར་ནི་ཁྱིམ་པའི་མཚན་མ་སྤངས་ཏེ། དགེ་ཚུལ་གྱི་མཚན་མ་དང་ལྡན་པ་ཡིན་གྱི། རྐྱེན་གྱིས་རབ་ཏུ་བྱུང་བ་ནི་མ་ཡིན་ནོ། །བརྟུལ་ཞུགས་ཞེས་པ་ནི་མུ་སྟེགས་ཀྱི་བརྟུལ་ཞུགས་ཞེས་བྱ་བ་ཡོད་
[29b.7]མོད་ཀྱི། འདིར་སྦྱངས་པའི་ཡོན་ཏན་བཅུ་གཉིས་ཡི་དམ་དུ་འཛིན་པ་ལ་བརྟུལ་ཞུགས་ཞེས་བྱའོ། །བརྟན་པས་ཞེས་བྱ་བ་ནི་རབ་ཏུ་བྱུང་བ་དེ་ཡང་སྐད་ཅིག་གམ་ལོ་ཟླའི་བར་དུ་སྡོམ་པ་བླངས་ཏེ་དེ་ལ་གནས་པ་མ་ཡིན་གྱི་ནམ་འཚོའི་བར་དུའམ་སྙིང་བོ་བྱང་ཆུབ་ལ་ཐུག་གི་བར་དུ་ཞེས་དམ་
[30a]
[30a.1]བཅས་པ་ནི་བརྟན་པས་ཏེ། ཇི་ལྟར་དང་པོ་ཡི་དམ་བཅས་པ་ལས་སླར་མི་ལྡོག་ཅིང་མི་ནུར་བ་ནི་བརྟན་པར་བྱའོ། །སྡོམ་པ་ལ་རྣམ་པ་གསུམ་སྟེ། ཚུལ་ཁྲིམས་ཀྱི་ཡན་ལག་དང་། བག་བྱ་བའི་ཡན་ལག་དང་། བརྟུལ་ཞུགས་ཀྱི་ཡན་ལག་གོ། །དེ་ལ་ལུས་དང་། ངག་
[30a.2]དང་། ཡིད་ཀྱི་སྒོ་གསུམ་སྡོམ་པ་ནི་ཚུལ་ཁྲིམས་ཀྱི་ཡན་ལག་ཡིན་ནོ། །ཆང་མི་འཐུང་བ་ནི་བག་བྱ་བའི་ཡན་ལག་གོ། །ལྷག་པ་རྣམས་ནི་བརྟུལ་ཞུགས་ཀྱི་ཡན་ལག་གོ། །རབ་བསྒྲིམས་ཏེ་ཞེས་པ་ནི་ནན་ཏན་གྱིས་འབད་པའི་དོན་ཏོ། །ཡང་ན་དཀའ་ཐུབ་བསླབ་པ་ལ་ཐེ་ཚོམ་དང་ནེམ་ནུར་མེད་
[30a.3]པར་བསླབ་པ་ལ་རིམ་གྲོ་བྱ་བའོ། །ཡང་ན་ཉེས་བྱས་ཡན་ཆད་ལ་འཛེམ་པ་སྟེ། དཔེར་ན་རྒྱལ་བུ་རྒྱང་གྲགས་གཅིག་ཏུ་མར་ཁུ་ཁྱེར་བ་དང་འདྲ་བར་བལྟའོ། །ཡང་ན་བདག་གི་ལུས་ལ་རྨའི་སྐྱོན་སྤངས་པ་བཞིན་དུ་བསྒྲིམས་ཏེ་ཤིན་ཏུ་བག་བྱའོ། །བདག་གི་ལུས་བཞིན་བསླབ་པ་སྲུངས། །
[30a.4]ཞེས་པ་ནི་དཔེར་ན་སེམས་ཅན་ཐམས་ཅད་ནི་བདག་གི་ལུས་ལས་འཕགས་པ་མེད་དེ། དེ་ལ་སྐྱོན་བྱུང་དུ་དོགས་ནས་རིམ་གྲོ་བྱེད་ཅིང་འབད་པ་དེ་བཞིན་དུ། ཚུལ་དང་པོ་ཆོ་ག་དང་ཁྲིམས་བཅུ་ཐམས་ཅད་ལ་ཡང་སྐྱོན་མི་འབྱུང་བར་བསྲུང་ཞིང་འབད་པར་བྱའོ། །ནམ་གྱི་ཆ་སྨད་མལ་ནས་ལངས། །ཞེས་པ་ནི་
[30a.5]རྒྱ་གར་གྱི་ཚུལ་གྱིས་མཚན་གཅིག་ལ་ནམ་གྱི་བཞི་ཆར་བགོས་ཏེ། བཞི་ཆ་གསུམ་འདས་ནས་གཅིག་ལུས་པ་ཙམ་ན་མི་ཉལ་བར་ཙོག་བུར་འདུག་སྟེ་སེམས་གསལ་བར་བྱའོ། །ནམ་ལངས་བར་དུ་ཞེས་པ་ནི་ནམ་མཁའ་ལ་ཉི་མའི་འོད་ཀྱིས་ཁྱབ་པར་བཤད་པའམ། ཡང་ན་ནམ་ལངས་
[30a.6]པའི་ཚད་ནི་ལག་མཐིལ་གྱི་རི་མོ་སྣང་བ་ལ་གཟུང་ངོ་། །ཁ་དོན་དུ་བྱ་ཞེས་པ་ནི་མདོ་སྡེའམ། འདུལ་བའམ། སྔགས་སམ་གང་བསླབ་པ་ལ་རྒྱུན་དུ་དྲན་པར་བྱ་བའི་ཕྱིར་ཁ་དོན་བྱའོ། །གདོང་དང་སོ་ཡི་དྲི་བཀྲུས་ནས། །ཞེས་པ་ནི། ནམ་ལངས་ནས་ཀ་ཤི་པ་ལྟ་བ་ལ་ཕྲག་པ་ལ་ཐོགས་ཏེ། དྲན་པ་དང་
[30a.7]ལྡན་བཞིན་དུ་ཕྱི་རོལ་དུ་ཁ་གདོང་དག་པར་བཀྲུའོ། །དེ་ལྟར་ཡང་སྒེག་ཅིང་ཆགས་པའི་ཕྱིར་ནི་མ་ཡིན་གྱི། སྐྱེ་བོ་དག་གིས་མི་འཕྱས་པ་དང་། དཀོན་མཆོག་གི་སྤྱན་སྔར་མི་མཛེས་པ་སྤངས་པའི་ཕྱིར། ཁ་གདོང་དང་སོའི་དྲི་མ་བཀྲུས་ནས་གཙང་བར་བྱའོ། །རྫོགས་ཞེས་བྱ་བ་ནི་མཁྱེན་པ་དང་
[30b]
[30b.1]ཡེ་ཤེས་མཐར་ཕྱིན་པར་བྱ་བ་རྫོགས་པ་ལ་བྱ་བའམ། ཡང་ན་བྱང་ཆུབ་ཀྱི་སྤྱོད་པ་མཐར་ཕྱིན་ཏེ་རྫོགས་པ་ལ་ཡང་བྱ། །སངས་པ་ནི་མ་རིག་པ་ལ་སོགས་པའི་གཉིད་དང་མི་ཤེས་པའི་སྒྲིབ་པ་ལས་སངས་པ་སྟེ། དཔེར་ན་མི་གཉིད་ཀྱིས་ལོག་པ་ལས་སངས་པ་བཞིན་ནོ། །རྒྱས་པ་ཞེས་པ་ནི་བསོད་
[30b.2]ནམས་དང་ཡེ་ཤེས་ཀྱི་ཚོགས་གང་ཞིག་རྒྱས་པ་སྟེ། དཔེར་ན་པདྨ་རྒྱས་པ་བཞིན་ནོ། །ལ་གུས་ཕྱག་བྱ་ཞེས་པ་ནི་ཡང་དག་པར་རྫོགས་པའི་སངས་རྒྱས་མངོན་སུམ་དུ་བཞུགས་པར་བསམས་ཏེ། དེ་ལ་མཆོད་པ་དང་སྐོར་བ་ལ་སོགས་པ་བྱའོ། །ཡང་དག་པར་རྫོགས་པའི་སངས་རྒྱས་ལ་
[30b.3]ཞེས་འབྱུང་བས། ཉན་ཐོས་དག་ལ་མི་བྱ་བར་སྟོན་ཏོ། །བླ་མ་གནས་པའི་སྒོ་གླགས་ལ། །ཞེས་པ་ནི། ཐམས་ཅད་ཀྱི་གམ་དུ་འགྲོ་ན་ཡང་སྒོ་བརྡུང་མོད་ཀྱིས། འོན་ཀྱང་ཞུ་བའི་ཕྱིར་འགྲོ་བ་ཡིན་པས་མཁན་པོའམ་སློབ་དཔོན་གང་ན་བཞུགས་པ་དེ་བླ་མ་ཞེས་བྱའོ། །ལག་པས་དལ་གྱིས་
[30b.4]བརྡུང་བར་བྱ། །ཞེས་པ་ནི་ཧ་ཅང་དྲག་པར་མི་བརྡུང་སྟེ། རན་པར་དལ་གྱིས་བརྡུང་བར་བྱས་ཏེ། སུ་ཡིན་ཞེས་ཟེར་ན་མིང་ནས་ཕྱུང་སྟེ་ནང་དུ་ཤོག་ཅིག་ཟེར་ན་འགྲོ་ཞིང་ཅི་ཡང་མི་ཟེར་ན་ལན་གསུམ་གྱི་བར་དུ་བརྡུང་ངོ་། །འོན་ཀྱང་ཅང་མི་ཟེར་ན་བླ་མ་གཞན་དག་ལ་ཞུས་ལ་མཎྜལ་དག་བྱའོ། །ནང་
[30b.5]ཞུགས་གུས་པས་བླ་མ་ལ། །ཞེས་པ་ནི། ནང་དུ་འགྲོ་བའི་ཚེ་སྒོ་དལ་གྱིས་ཕྱེ་ལ་ཐུག་ཆོམ་མེད་པར་བྱ། དེ་ནས་ནང་དུ་ཕྱིན་ནས་གུས་པར་ཐལ་མོ་སྦྱར་ཏེ། དེ་ལ་ཐོག་མར་ཕྱག་བྱས་ནས་པུས་མོ་ས་ལ་བཙུགས་ནས་འདུག་པར་བྱའོ། །ཁམས་བདེ་མི་བདེ་ལ་སོགས་དྲི། །ཞེས་པ་ནི། འབྱུང་བ་ཆེན་
[30b.6]པོ་བཞིའི་ཁམས་མི་མཉམ་པ་ལས་ནང་དུ་གྱུར་པས་ཐུགས་བདེའམ་མི་བདེ་ཞེས་གུས་པར་སྙུན་གསོལ་ཏོ། །འདི་མན་ཆད་མ་རབས་སྤང་བར་བྱའོ་ཞེས་སྟོན་ཏོ། །འདི་དག་བྱ་ཞེས་དྲིས་ནས་ནི། །ཞེས་པ་ནི། ཆག་ཆག་གདབ་མཎྜལ་བགྱི་བ་སྤྱིར་སུག་ལས་འཚལ་བགྱི་བ་མཆིས་ན་ཡང་ཚུལ་
[30b.7]ལས་མི་འགལ་བར་འཚལ་ཞེས་ཞུའོ། །དཀྱིལ་འཁོར་ཞེས་པ་ནི་གྲུ་བཞི་དང་ཟླུམ་པོ་དང་། ཟླ་གམ་ལ་སོགས་པའོ། །ལ་སོགས་རྣམས་བྱ་ཞེས་པ་ནི། སྨོན་ལམ་གདབ་པ་ཡན་ཆད་མཆོད་པའི་ཆོ་ག་རྫོགས་པར་བྱེད་པར་འཚལ་པའི་དོན་ཏོ། །ཉ་ཕྱིས་ལ་སོགས་ཆུ་བརྟག་སྟེ། །ཞེས་
[31a]
[31a.1]པ་ནི། སྲོག་ཆགས་ལ་སྙིང་བརྩེ་བའི་ཕྱིར་ཁར་ཕོར་དུང་ཕོར་ཉ་ཕྱིས་འདབ་མ་བུམ་པ་ལ་སོགས་པའི་ནང་དུ་སྐྱེ་བོ་ཡོད་དམ་མེད་བརྟག་གོ། །སྟེང་དང་བར་གཏིང་རིམ་བཞིན་ནོ། །ཞེས་བྱ་བ་ནི་ཉ་ཕྱིས་ལ་སོགས་ཆུས་བཀང་བ་ལ་ཆུའི་སྟེང་དང་དབུས་དང་ཞབས་སུ་ཕྲ་མོ་ཅི་ཡོད་པ་
[31a.2]རིམ་པ་བཞིན་དུ་བརྟག་གོ། །ཉ་ཕྱིས་ལ་སོགས་མེད་ན་ཡང་། །ཞེས་བྱ་བ་ནི་ཆུ་བརྟག་པའི་སྣོད་ཉ་ཕྱིས་ལ་སོགས་པ་མེད་ན་འོག་ནས་འབྱུང་བ་བཞིན་བྱའོ། །སྐྱོར་བའམ་འདབ་མས་བུམ་པ་དགང་། །ཞེས་པ་ནི་རྐྱེན་ཞིག་བྱུང་སྟེ་ཆ་བརྟག་པའི་སྣོད་མེད་ན་ལག་པའི་སྐྱོར་བའམ་ཤིང་གི་འདབ་མའམ་
[31a.3]ཤོ་མང་ལ་སོགས་པའི་ནང་དུ་ཆུས་བཀང་སྟེ་བརྟག་གོ། །ཆུ་ཡི་སྐྱེ་བོ་ཆེ་ཆུང་རྣམས། །ཞེས་པ་ནི། ཆུའི་ནང་དུ་སྐྱེས་པའི་སྐྱེ་བོ་ཆེ་ཕྲ་རྣམས་ཏེ། ལས་དང་ཉོན་མོངས་པའི་དབང་གིས་སྐྱེས་པས་ན་སྐྱེ་བོ་ཞེས་བྱ་སྟེ། དབང་མེད་པར་སྐྱེའོ་ཞེས་བྱ་བའི་ཐ་ཚིག་གོ། །འདིའི་སྐབས་སུ་རྫུ་འཕྲུལ་གྱི་སྤྱན་
[31a.4]གྱིས་གཟིགས་པའི་ཚུལ་མི་བྱའོ། །ཡུན་མི་རིང་བར་ནན་ཏན་བལྟ། །ཞེས་པ་ནི། སེམས་ཅན་ཡོད་དམ་མེད་པའི་བརྟགས་པའི་ཚད་ནི། ཤིང་རྟའི་འཁོར་ལོ་འོད་མས་བཀང་བ་གླང་དོར་དྲུག་གིས་ལན་ཅིག་འཁོར་བའི་ཚད་ཀྱིས་བཟུང་སྟེ། དེ་ལས་ཡུན་ཐུང་ན་ཡང་མི་རྟོགས། ཡུན་རིང་ན་ཡང་མིག་སྦྲིད་
[31a.5]དེ་མི་མཐོང་བས་ཅི་རན་དུ་བརྟག་པའི་ཚད་ནི་འདི་ཡིན་ནོ། །སྙིང་རྗེ་ཅན་གྱིས་ཁུ་བ་རྣམས། །ཞེས་པ་ནི་སྙིང་རྗེ་ནི་རྒྱུ་ཡིན་ཏེ། དེ་དང་ལྡན་པས་ཚོད་མའི་ཁུ་བ་དང་རྩབ་མོའི་ཁུ་བ་ལ་སོགས་པ་ཤིན་ཏུ་ལེགས་པར་བརྟག་གོ། །རབ་ཏུ་བརྟགས་ཏེ་སྤྱད་པར་བྱ། །ཞེས་པ་ནི། ཇི་ལྟར་ཆུ་བརྟགས་པ་བཞིན་དུ་འཕྲལ་དུ་སྤྱད་དུ་དགོས་པའམ།
[31a.6]བཏུང་བ་ལ་སོགས་པ་ཡང་དེ་བཞིན་དུ་བརྟག་གོ། །སྲོག་ཆགས་ཡོད་ན་ལེགས་པར་བཙག །ཅེས་པ་ནི། སྲོག་ཆགས་ལ་མི་གནོད་པར་བྱ་བའི་ཕྱིར། གལ་ཏེ་ཆུ་ཚགས་ཀྱི་རས་དེ་ཐགས་བཟང་པོ་ཞིག་ལ་བཙགས་ཏེ། ཆུ་འཛག་ཏུ་མི་བཏུབ་པ་དང་། ཆང་བཙིར་གྱིས་བཙིར་ན་སྲོག་ཆགས་
[31a.7]ཞར་བར་འགྱུར་བའི་ཕྱིར་དེ་ལྟར་མི་བྱ་སྟེ། ཆུ་ཚགས་ཀྱི་རས་ཀྱི་དང་དུ་བག་ཡངས་སུ་བཙག་གོ། །སྲོག་ཆགས་རྣམས་ལ་གནོད་མི་བྱ། །ཞེས་པ་ནི། ཆུ་ཚགས་ལ་ཆགས་ཤིང་འདུག་པའི་སེམས་ཅན་རྣམས་ཐང་ལ་སོགས་པར་མི་དོར་བར་གང་ནས་འོངས་པའི་གནས་དེར་སླར་ལེགས་པར་
[31b]
[31b.1]བསྐྱལ་ལོ། །རྩྭ་དང་ཞེས་པ་ནི་གོས་སྐམས་པའམ། བཙོ་བླག་བྱས་པའི་གཞིའི་རྩྭ་དག་གོ། །ལྕི་བ་ཞེས་པ་ནི་དཀྱིལ་འཁོར་དང་། བཀྲུ་བཤལ་བྱ་བ་དང་གནས་ཁང་དུ་བྱུག་པ་ལ་སོགས་པ་དག་གོ། །ཤིང་ཞེས་པ་ནི་དགེ་འདུན་དང་མཁན་པོ་དང་སློབ་དཔོན་དག་གིས་གནང་བའི་ཤིང་ངམ།
[31b.2]ལྡམ་ལྡུམ་དག་གོ། །ལ་སོགས་ཞེས་པ་ནི་དགེ་སློང་དང་དགེ་ཚུལ་གྱི་ཡོ་བྱད་ཀྱི་དགོས་པ་ཀུན་བསྡུའོ། །དགོས་པ་གང་དང་གང་ཡང་རུང་། །ཞེས་པ་ནི་དགོས་སོ་ཅོག་སྟེ། སྒོ་དང་ཚ་དང་ཚོད་མ་དང་། འབྲུ་དང་ཤིང་ཐོག་དང་ཞོ་དར་ལ་སོགས་པ་དང་། ཚོན་དང་སེན་མོ་དང་ཆུ་དང་མེ་ལ་
[31b.3]སོགས་པ་བརྟག་གོ། །དེ་དག་སྲོག་ཆགས་མེད་པར་བྱ་སྟེ་ཞེས་པ་ནི། རྩྭ་ལ་སོགས་པ་ཅི་དགོས་པ་ཐམས་ཅད་ལ་སེམས་ཅན་མེད་པར་བྱའོ། །སྡོམ་པ་ཞེས་པ་ནི་ལུས་དང་ངག་གི་ཉེས་པ་སྡོམ་པའོ། །སྲོག་ཆགས་ཞེས་པ་ནི་སྐྱེ་གནས་བཞི་ལས་སྐྱེས་པའི་འཚོ་བའི་དབང་པོ་དང་ལྡན་པའོ། །བསད་
[31b.4]པ་བསྲུང་ཞེས་པ་ནི། ལུས་དང་ངག་དང་ཡིད་གསུམ་སྡོམ་པ་དང་ལྡན་པས་ལུས་ཀྱི་ཉེས་པ་གསོད་པ་སྟེ་དེ་ཡང་བསྲུང་ངོ་། །གསོད་པ་ཞེས་པ་ནི་འཚོ་བ་དང་བྲལ་བར་བྱེད་པའོ། །འདི་ཡན་ཆད་ནི་གནོད་པ་སྤངས་པར་བསྟན་པའོ། །བསྟན་ཞེས་པ་ནི་མཁན་པོའམ་སློབ་དཔོན་གྱི་སྒོམ་པ་དང་དགེ་
[31b.5]བ་སྤྱོད་པའི་སར་སྟན་ནས་ཁྲིའུ་དག་གང་དགོས་པ་གདིང་ངོ་། །ཆུ་ཞེས་པ་ནི་ཕྱི་རོལ་ཆེ་ཆུང་དང་རིལ་བ་བཀྲུ་བ་དང་། ལུས་ཀྱི་ཁྲུས་བྱ་བ་ལ་སོགས་པའི་ཆུའོ། །ས་ཞེས་པ་ནི་ཕྱི་རོལ་ཆེན་པོའི་བཀྲུ་བའི་ས་དང་མཎྜལ་བྱ་བའི་ས་དག་གོ། །སོ་ཤིང་ཞེས་པ་ནི་ནང་པར་གྱི་སོ་ཤིང་དག་ཀྱང་བྱས་ཏེ་གཞག་
[31b.6]གོ། །འདག་པའི་ཆལ་ཡང་སྟ་གོན་བྱ། །ཞེས་པ་ནི་ལྕི་སྐམ་གྱི་རིལ་བུར་བྱས་ཏེ། སྨྱུག་མའི་གསེབ་ཏུ་གཟེར་བུ་ལ་བཅུག་ལ་ཆབ་ཁུང་ཆེ་ཆུང་གི་སར་གཞག་གོ། །རྒྱ་གར་གྱི་ནི་བ་གླང་གཞོན་ནུའི་ལྕི་བ་དང་ས་བསྲེས་ཏེ་རིལ་བུར་བྱས་ནས་དེས་འཁྲུ་བས་ན་དེ་དག་འདག་པའི་ཆལ་ཞེས་བྱའོ། །
[31b.7]ཡང་ན་བུལ་ཏོག་དང་སུག་པས་དྲི་མ་འདག་པར་བྱེད་པས་ན་འདག་པའི་ཆལ་ཞེས་དེ་དག་ཀྱང་མཁན་པོ་དང་སློབ་དཔོན་གྱི་ཕྱིར་སྟ་གོན་བྱའོ། །ལྷུང་བཟེད་བཀྲུ་བ་ལ་སོགས་པ་དང་ཞེས་པ་ནི། བདག་ཉིད་ལྷུང་བཟེད་དང་ཁམ་ཕོར་ཁ་གཟར་ལ་སོགས་པ་བཀྲུས་ཏེ་གྲོང་དུ་འཇུག་པར་བྱའོ། །ཟས་
[32a]
[32a.1]ཟ་བའི་ཚེ་བཤལ་མ་དང་ཟོས་ཟིན་ནས་བཀྲུ་ཞིང་སྐམས་ཏེ་གནས་སུ་གཞག་གོ། །བླ་མའི་དགོས་པ་ཐམས་ཅད་བྱ། །ཞེས་པ་ནི་དགེ་སློང་ཐམས་ཅད་ཀྱང་བླ་མ་བཞིན་གྱི། སྐབས་འདིར་ནི་དེ་དག་ལ་མི་བྱའོ། །གནས་བཅས་པ་རྣམས་བླ་མ་ཞེས་བྱ་སྟེ། དེའི་
[32a.2]དགོས་པ་ཐམས་ཅད་ཀྱང་བྱའོ། །འདི་མན་ཆད་ནི་ང་རྒྱལ་མེད་པར་བསླབ་པའི་རིམ་པར་བྱེད་པར་སྟོན་ཏོ། །དེ་ནས་དུས་རིག་ཕྱག་བྱ་སྟེ། །དུས་རྣམ་པ་གཉིས་ཏེ། བསོད་སྙོམས་ལ་འཇུག་པའི་དུས་ཤེས་པར་བྱ་བ་དང་། གཙུག་ལག་ཁང་ན་འདུག་པའི་ཚེ། གཎྜཱི་བརྡུངས་ན་དུས་སུ་རིག་
[32a.3]པར་བྱ་སྟེ་དེ་གཉིས་གང་ཡིན་པ་ལ་ཚུལ་བཞིན་དུ་བྱའོ། །དེ་བཞིན་གུས་པས་ཐལ་སྦྱར་ནས། །ཞེས་པ་ནི་བླ་མ་ལ་གུས་པའི་ཚུལ་དེ་ལྟར་བྱའོ། །འཚལ་མ་འཚལ་ཞེས་བླ་མ་ལ། །ཞེས་པ་ནི་གསུམ་གྱི་ཞུ་བའི་ཚུལ་བཞིན་དུ་བྱའོ། །བརྟུལ་ཞུགས་ཅན་གྱིས་དེ་ལྟར་ཞུ། །ཞེས་པ་ནི་
[32a.4]སངས་རྒྱས་ཀྱི་བཀའ་ལུང་བཞིན་དུ་བྱེད་པའོ། བརྟུལ་ཞུགས་ཅན་ཞེས་བྱ་སྟེ་དགེ་ཚུལ་བཞིན་དུ་ཞུ་བ་ལ་བྱའོ། །ལག་པ་བཀྲུས་ནས་ཞེས་པ་ནི་གདུགས་ཚོད་ལ་བབ་པའི་ཚེ་ལག་པ་དག་པར་བཀྲུའོ། །ཚུལ་བཞིན་དུ་ཞེས་པ་ནི་ཟན་ཟ་བའི་ཚེ་ཁམ་གྱིས་ཁ་བཀང་སྟེ་མི་སྨྲ་བ་དང་། ཕུ་བུ་དང་། ཅག་ཅག་
[32a.5]དང་། རྐན་གཏོགས་པ་དང་། གཞིབ་པའི་རོ་མྱང་བ་དང་། འགྲམ་པ་སྤོ་བ་དང་། སྒྲ་དང་ཁམ་འཕྲོ་ལ་སོགས་པར་མི་བྱའོ། །དེ་ནི་མི་སྨྲ་ཞེས་པ་ནི་ཟས་ཟ་བའི་ཚེ་བདག་གཙང་སྦྱོར་ཞིག་ཡིན་ན་ནི་སྨྲའོ། །གཙང་སྤྱོར་ཡིན་ཏེ་སྨྲ་ན་ཡང་ཁ་ཟས་ཡོད་བཞིན་སྨྲ་བར་མི་བྱའོ། །ཚོད་རིག་བྱ་ཞེས་པ་ནི་ཧ་
[32a.6]ཅང་འགྲངས་པ་ཡང་མ་ཡིན། བཀྲེས་པ་ཡང་མ་ཡིན་པར་ཟས་ཀྱི་ཚོད་རན་པར་བྱའོ། །འཁྲུ་བའི་ནད་ལས་བཟློག་པའི་ཕྱིར། །ཞེས་པ་ནི་ཞིམ་པ་དང་ཆགས་པའི་ཕྱིར་བཟའ་བ་མ་ཡིན་གྱི། དགེ་བ་སྤྱད་པའི་ཕྱིར་ལུས་གསོ་བའོ། །ཅིའི་ཕྱིར་ཞེ་ན། ལུས་ནི་ཁམས་གསུམ་གྱི་སྐྱེ་ཤི་ལས་
[32a.7]སྒྲོལ་བའི་གཟིངས་ལྟ་བུ་ཡིན་པས་དེའི་ཕྱིར་ལུས་གསོ་བར་བྱའོ། །བཟའོ་སྙམ་པའི་སེམས་ཀྱིས་བཟའ། །ཞེས་པ་ན་དེ་ལྟ་བུའི་འདུ་ཤེས་ཀྱིས་ཁ་ཟས་བཟའོ། །ཟོས་ཤིང་དེ་བཞིན་འཐུངས་པ་དང་། །ཞེས་པ་ནི། གདུགས་ཚོད་ཟོས་ཏེ་བཏུང་བ་ལས་རྩབ་མོ་འཐུངས་པ་ལ་སོགས་པ་འཐུངས་
[32b]
[32b.1]ནས་ཚུལ་འོག་ནས་འབྱུང་བ་བཞིན་བྱའོ། །འདི་མན་ཆད་ནི་ཁ་བཀྲུ་བའི་ཆོ་ག་སྟོན་ཏོ། །རུང་བའི་ཆུ་ཡིས་ཞེས་པ་ནི་སྔར་བཙགས་ནས་བཞག་པའི་ཆུ་དེས་ཁ་ལན་གསུམ་བཤལ་ཏེ། བོར་ནས་ལན་ཅིག་ཅི་རན་ཙམ་ཞིག་ལྟོ་བར་བཏུང་ངོ་། །དེའི་འོག་ཏུ་ཞེས་པ་ནི་ཟས་ཟོས་པའི་འོག་ཏུ་འོག་ནས་
[32b.2]འབྱུང་བ་བཞིན་དུ་བྱའོ། །སྦྱིན་པ་ཡང་དག་སྤེལ་བའི་ཕྱིར། །ཞེས་བྱ་བ་ནི་ཁ་བཀྲུས་ནས་ཡོན་བདག་གི་བསོད་ནམས་ཕྱིན་ཅི་ལོག་ཏུ་འཕེལ་བ་དག་དགག་སྟེ། སྔོན་བྲམ་ཟེས་སྨོན་ལམ་བཏབ་པས་དགེ་སློང་ལྔ་བརྒྱ་གླང་དུ་སྐྱེས་པ་དག་དགག་པའི་ཕྱིར་རོ། །སྦྱིན་པའི་ཚིགས་བཅད་གཉིས་ཤིག་
[32b.3]བརྗོད། །ཅེས་པ་ནི་ཞལ་ནས་གསུངས་པའི་ཚིགས་བཅད་གཅིག་དང་བདག་ལ་བསྔོ་བའི་ཚིགས་བཅད་གཅིག་སྟེ་གཉིས་ཤིག་བརྗོད་པར་བྱའོ། །འདི་མན་ཆད་ནི་འཚལ་མ་འཚལ་ཞེས་དེའི་འོག་ཏུ་དགེ་བ་ཇི་ལྟར་བྱ་བའི་གོ་རིམས་དང་ཐབས་བསྟན་པའོ། །མན་ངག་ཡོད་ན་བསམ་གཏན་བྱ། །
[32b.4]ཞེས་པ་ནི། དགེ་བའི་བཤེས་གཉེན་གྱི་བསམ་གཏན་གྱི་ལུང་སྟོན་པས་ཏེ་བསམ་གཏན་དང་པོ་ནི་འདི་ལྟར་བྱའོ། །དེའི་གཉེན་པོ་ནི་འདི་ལྟར་བསྐྱེད་དོ་ཞེས་ལུང་སྟོན་ནུས་ཡོད་ན་དེའི་མན་ངག་མནོས་ཏེ་བསམ་གཏན་བྱའོ། །རབ་ཏུ་འབད་དེ་བཀླག་པར་བྱ། །ཞེས་པ་ནི་དེ་ལྟར་ལུང་སྟོན་པ་མེད་ན་ལེ་ལོའི་
[32b.5]དབང་དུ་མ་གྱུར་ཅིང་སེམས་མ་ཡེངས་པར་ཚིག་དང་དོན་བསྟུན་ཅིང་ཡི་གེའི་འབྲུ་རྣམས་ཀྱང་ཟུར་ཕྱིན་འདོད་ཀྱང་བསམ་ཞིང་བཏོན་ནམ་བཀློག་པ་དག་བྱའོ། །ཡང་དགེ་སྦྱོང་གི་ལས་ནི་གཉིས་ཏེ། སྒོམ་པ་དང་ཀློག་པའོ། །སྡོམ་དང་ཆོ་ག་མཁས་པ་དང་། །ཞེས་པ་ནི་འཁོར་ལོ་སྡོམ་པ་དང་ལྡན་པ་ལ་བྱ།
[32b.6]བསླབ་པ་ལྕི་ཡང་ལས་སུ་བྱའམ། བྱེ་བྲག་ཕྱེད་པར་བྱའོ། །ཡང་ན་སྡོམ་པ་ལ་མཁས་པར་བྱ་བ་ནི་བསླབ་ཚིག་བཅུའི་ཚིག་ལ་མཁས་པའོ། །ཆོ་ག་མཁས་པ་ནི་སྤྱོད་ལམ་བཞིར་ཇི་ལྟར་སྤྱད་པ་དང་མཁན་པོ་ལ་སོགས་པ་ལ་ཇི་ལྟར་སྤྱད་གསལ་བར་བྱེ་བྲག་ཕྱེད་ཅིང་གསལ་བའོ། །ཡང་ན་སྡོམ་པ་
[32b.7]ནི་སྒོ་གསུམ་སྡོམ་པའོ། །ཆོ་ག་ནི་གཞུང་ལ་བརྟེན་ཏེ་ཚུལ་ཁྲིམས་བསྲུང་ཞིང་དྲག་དལ་མེད་པར་བི་ཝང་གི་བརྒྱུད་བཞིན་དུ་བྱའོ། །བསྒྲུབ་པ་ལ་ནི་བརྩོན་པར་བྱ། །ཞེས་པ་ནི། སྡོམ་པ་ཇི་ལྟ་བུ་དང་། ཆོ་ག་ཇི་ལྟར་བྱུང་བ་དེ་བཞིན་དུ་ལུས་དང་ངག་གིས་དེ་བཞིན་དུ་བསྒྲུབ་ཅིང་ཉམས་སུ་ལེན་ནའོ། །དོན་
[33a]
[33a.1]ཡིད་ཀྱིས་གྱི་ན་ཤེས་པ་ཙམ་དུ་ཟད་དེ། དེ་ཁོ་ན་བཞིན་དུ་མི་བསྒྲུབས་ན་དེ་དག་ལ་མཁས་ཀྱང་དོན་མེད་དོ། །ཡང་ན་སྒྲུབ་པ་ནི་བླ་ན་མེད་པའི་བྱང་ཆུབ་བོ། །བརྩོན་པ་ནི་ནན་ཏན་གྱིས་འབད་པར་བྱའོ། །འདི་ཚུན་ཆད་ནི་ཚུལ་ཁྲིམས་བཅུའི་དངོས་པོར་བསྟན་ཏེ། དེ་དག་ལས་གྱང་
[33a.2]རྩ་བ་བཅས་པའི་རིམ་པ་བཞིན་དུ་མ་བཞག་གི་དགེ་བ་བཅུའི་རིམ་པ་ལྟར་བཞག་པས་དང་པོར་སྲོག་གཅོད་པ་འཆད་དེ་དེ་ལ་བསླབ་ཚིག་བཅུ་པ་ཀུན་གྱིས་སྡོམ་པ་མེད་པར་འགྱུར་བ་མ་ཡིན་གྱི། རྩ་བ་བཞི་ལས་གཅིག་ཞིག་པས་མེད་པར་འགྱུར་རོ། །བཞི་པོ་དེ་ཡང་ཡན་ལག་དང་མི་ལྡན་ན་མེད་པ་
[33a.3]མ་ཡིན་གྱི། མིའི་རྒྱུད་དང་རྒྱུད་མ་ཡིན་པས་བྱེ་བྲག་དབྱེའོ། །འདི་ནི་དངོས་པོ་ལ་བབ་སྟེ། དེ་ཡང་བསྡུས་པའི་དོན་བཅུའོ། །དེ་ཡང་གང་ཞེ་ན། སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཆང་འཐུང་བ་དང་། གར་ལ་སོགས་པ་
[33a.4]བྱེད་པ་དང་། ཕྲེང་བ་ལ་སོགས་པས་མི་བརྒྱན་པ་དང་། བླ་མའི་ཁྲི་སྟན་ལ་མི་འདུག་པ་དང་། དུས་མ་ཡིན་པའི་ཟས་སྤང་བ་དང་། གསེར་དངུལ་ལེན་པ་སྤང་བ་དང་བཅུའོ། །གསོད་པ་ནི་རྩིས་མགོ་རྣམ་པ་ལྔ་དང་ལྡན་ན་ཕམ་པར་འགྱུར་ཏེ། གང་ཞེ་ན། མི་ཡིན་པ་དང་། མིར་འདུ་ཤེས་པ་
[33a.5]དང་། གསོད་སེམས་ཡོད་པ་དང་། གསོད་པར་སྦྱོར་བ་དང་། འཚོ་བའི་དབང་པོ་འགག་པ་དང་། ཡན་ལག་དེ་དག་ལྔ་དང་ལྡན་པས་མིའི་རྒྱུད་གསུམ་ལས་གང་ཡང་རུང་སྟེ། བསྡུས་ན་ཕམ་པར་འགྱུར། ཡན་ལག་གཅིག་དང་མི་ལྡན་ན་ཉེས་བྱས་སུ་འགྱུར། དེ་དང་པོ་བཅས་པ་ནི་
[33a.6]སངས་རྒྱས་ཡུལ་སྤྲེའུ་རྫིང་གི་ལྗོངས་ན་བཞུགས་པའི་ཚེ། དགེ་སློང་ཞིག་མི་གཙང་བའི་བསམ་གཏན་བསྒོམས་ནས་ལུས་མི་གཙང་བས་སྐྱོ་བར་གྱུར་ཏེ། དགེ་སློང་དབྱུག་པ་ཅན་ལ་གསོད་དུ་བཅུག་པས་བཅས་སོ། །བརྟུལ་ཞུགས་གནས་པ་ཞེས་པ་ནི་བརྟུལ་ཞུགས་ལ་གནས་པ་ནི་ཁོ་ནས་
[33a.7]འབྱུང་སྟེ། སྡོམ་པ་ལ་གནས་པའི་དོན་ཏོ། །སེམས་མ་ཉམས་པ་ཞེས་པ་ནི་རྣམ་པ་བཞི་ལྟ་བུར་སེམས་ཀྱང་མ་ཉམས་པ་སྟེ། གང་ཞེ་ན་འདྲེ་ལ་སོགས་པས་བྱིན་གྱིས་བརླབས་ཏེ། མྱོས་པར་གྱུར་པ་དང་འབྱུང་བ་ཆེན་པོ་བཞིའི་ལས་ཉམས་པར་གྱུར་པ་དང་། སྔོན་གྱི་ལས་ཀྱི་རྣམ་པར་
[33b]
[33b.1]སྨིན་པ་ལས་གྱུར་པ་དང་། གནད་དུ་བབས་ཏེ་བརྒྱལ་ནས་མི་དྲན་པར་འགྱུར་རོ། །ཆེད་དུ་བསམས་ཏེ་མ་ནོར་བར། །ཞེས་པ་ནི་མི་དེ་ཁོ་ན་ཡིན་གྱིས་ཞེས་ཏེ་དེ་ཁོ་ན་ལ་དམིགས་ཏེ་གསད་པར་ཡང་བསམས་ཏེ། གསོད་སེམས་ཡང་ལྡན་ལ་ནོར་ཀྱང་མ་ནོར་བའོ། །མི་གཞན་བདག་གམ་གཞན་རྣམས་
[33b.2]ཀྱི། །ཞེས་པ་ནི་གསོད་ན་སྡོམ་པ་མེད་པར་འགྱུར་བས་བདག་ལས་གཞན་པའི་མིའོ། །དེ་ལ་མི་དང་མིར་ཟིན་པའོ། །དེ་ལ་མི་ལ་ཡང་རྣམ་པ་གསུམ་སྟེ། སྐྱེས་པ་དང་། བུད་མེད་དང་། མ་ནིང་གསུམ་མོ། །མིར་ཟིན་པ་ནི་མིའི་མངལ་ན་དབང་པོ་གསུམ་དང་ལྡན་པ་ལ་བྱ་སྟེ། འཚོ་བའི་
[33b.3]དབང་པོ་དང་། ཡིད་ཀྱི་དབང་པོ་དང་། ལུས་ཀྱི་དབང་པོ་སྟེ་གསུམ་དང་ལྡན་པའོ། །གསོད་པར་སྦྱོར་བ་ལ་གཉིས་ཏེ། བདག་གིས་བསམས་པའམ། གཞན་ལ་བཅོལ་ཏེ་གསོད་དུ་བཅུག་པའོ། །གཞན་ལ་བཅོལ་བ་ལ་ཡང་རྣམ་པ་གཉིས་ཏེ། བྲིད་པ་ལས་དང་། མངོན་སུམ་དུ་བཅོལ་
[33b.4]བའོ། །བསད་ན་བརྟུལ་ཞུགས་ཉམས་པར་འགྱུར། །ཞེས་པ་ནི། འཚོ་བའི་དབང་པོ་དང་བྲལ་ན་དགེ་ཚུལ་གྱི་སྡོམ་པ་ཞིག་པར་འགྱུར་རོ། །ཚུལ་ཁྲིམས་ལྡན་ནམ་ཞེས་པ་ནི། །གསོད་པར་བྱེད་པའི་ཚིག་སྟེ་ནད་པ་འཆི་བར་བྱ་བའི་ཕྱིར་ཁྱོད་ཀྱིས་བསོད་ནམས་ཀྱི་ཚོགས་ཀྱང་བསགས། ཚུལ་
[33b.5]ཁྲིམས་དང་ཡང་ལྡན་པས་མཐོ་རིས་དང་ཐར་པ་ནི་དར་དང་ཡོལ་བས་ཆོད་པ་ཙམ་གྱིས་མྱུར་དུ་ཤི་ཡང་སྡིག་པ་མི་འཕེལ་གྱི། འཆི་བར་རིགས་སོ་ཞེས་བསྔགས་པ་བརྗོད་པའོ། །ཚུལ་ཁྲིམས་འཆལ་ཞེས་པ་ནི་ནད་པ་ལ་ཁྱོད་ཀྱི་ཚུལ་ཁྲིམས་ངན་པའི་སྟེང་དུ་འདིར་ཇི་སྲིད་དེ་གནས་པ་དེ་སྲིད་སྡིག་
[33b.6]པ་སོག་ཅིང་འདུག་པས་དམྱལ་བར་ཡུན་རིང་དུ་གནས་པར་འགྱུར་གྱིས་འདུག་པར་མི་རིགས་ཏེ། མྱུར་དུ་འཆི་བར་རིགས་སོ་ཞེས་བསྔགས་པ་བརྗོད་པ་དག་སྨྲ་བའོ། །ཚིག་གིས་གསད་པར་བྱ་བའི་ཡུལ་གསུམ་སྟེ་ཚུལ་ཁྲིམས་དང་ལྡན་པ་དང་། ཚུལ་ཁྲིམས་ངན་པ་དང་ནད་པ་ལའོ། །
[33b.7]དེ་དག་ལ་ཡོ་བྱད་སྡུ་གུ་བདོག་པ་དེ་འདོད་པའི་ཕྱིར་དེ་དག་ལ་འཆི་བའི་བསྔགས་པ་བརྗོད་དེ། །དེས་ཤི་ན་སྡོམ་པ་ཞིག་གོ། །དེ་ལས་བཟློག་པ་ལས་ཤིའམ་མ་ཤི་ཡང་རུང་སྟེ། ཉེས་བྱས་སུ་འགྱུར་རོ། །དེ་བཞིན་ནད་ཀྱིས་བཏབ་པ་ལ། །ཞེས་པ་ནི་ནད་ཀྱིས་སྡུག་བསྔལ་ཞིང་མི་བདེ་བར་འདུག་པ་
[34a]
[34a.1]ལ་ཤི་ན་ནད་འདི་དང་བྲལ་བར་འགྱུར་རོ། །འཆི་བའི་རིགས་སོ་ཞེས་བསྔགས་པ་བརྗོད་ཅིང་མཚོན་བྱིན་ནམ་མཚོན་ཐོགས་པ་གཉེར་བའོ། །ནད་པ་བསླང་པ་ལ་དེས་དབུགས་བཅད་དེ་ཤི་བ་ལ་ཉེས་པ་མེད་དོ། །གང་ཐོས་ཞེས་པ་ནི་དེ་ལྟར་དེ་གསུམ་ལ་གང་དང་གང་ཐོས་པའོ། །སྡུག་
[34a.2]བསྔལ་ཉམ་ཐག་སྟེ་ཞེས་པ་ནི་ཚུལ་ཁྲིམས་ངན་པ་ཡང་ངན་སོང་གི་རྒྱུ་ཡིན་པས་སྡུག་བསྔལ་ལོ། །ཚུལ་ཁྲིམས་དང་ལྡན་པ་ཡང་ད་ལྟར་ལུས་ལ་སྡུག་བསྔལ་བར་བལྟའོ། །ནད་པ་ནི་འཕྲལ་དུ་ཉམ་ཐག་གོ། །ངེས་འཆིའི་ཆོས་གཏམ་དེར་མི་བྱ། །ཞེས་པ་ནི་ངེས་པའམ་གདོན་མི་ཟ་བར་འཆི་བར་འགྱུར་
[34a.3]བའི་གཏམ་ནད་པ་དག་ལ་མི་བྱའོ། །སྨན་དང་ཞེས་པ་ནི་ནད་པ་དང་མི་མཐུན་པ་འཆི་བར་འགྱུར་བ་མི་སྦྱིན་ནོ། །དེ་ལ་འཆི་བའི་སྨན་ནི་དཔེར་ན་རྐུན་པོ་ལག་པ་གཅད་པ་མི་དྲུག་ཅུ་ལ་དགེ་སློང་མས་རྩབ་མོ་ལན་ཚྭ་ཅན་གྱི་བྱིན་པས་རྐུན་པོ་ན་བ་ལྟ་བུའོ། །རྩབ་མོ་ལན་ཚྭ་ཅན་ནི། རྒྱ་གར་གྱི་སྐད་
[34a.4]ཀྱིས་ཀཉྫིན་ཞེས་བྱའོ། །ཁམས་མི་མཉམ་པ་དང་མི་འཕྲོད་པའི་སྨན་ཅི་ཡང་རུང་སྟེ་མི་སྦྱིན་ནོ། །སྔགས་དང་ཞེས་པ་ནི་གསང་སྔགས་ཨ་བྷི་ཙ་ར་སྟེ། མངོན་སྤྱོད་པའོ། །རིག་པ་ཞེས་པ་ནི་འཇིག་རྟེན་དང་འཇིག་རྟེན་ལས་འདས་པའི་རིག་པ་སྟེ། དེ་ལ་འཇིག་རྟེན་པའི་རིག་པ་ནི་མུ་
[34a.5]སྟེགས་ཅན་ནམ་བྲམ་ཟེའི་རིག་པའོ། །འཇིག་རྟེན་ལས་འདས་པའི་རིག་པ་ནི་སངས་རྒྱས་པའི་རིག་པ་སྟེ། རིག་པ་དེ་གཉིས་གང་ཡང་རུང་བས་ཕ་རོལ་ལ་གནས་པར་བྱེད་པའོ། །འཆི་བའི་ཕྱོགས་སུ་བཏང་བའམ། །ཞེས་པ་ནི། དགེ་སྦྱོང་ལ་དབང་པོ་ཡོད་ན་མི་དག་འགུམ་ཁུངས་སུ་བཏང་
[34a.6]བའམ། ཡང་ན་མི་འཕྲོད་པའི་ཡུལ་དང་། གནོད་སྦྱིན་གདུག་པའམ། གཅན་ཟན་ཁྲོ་བོའི་གདུག་པའི་གནས་སམ། མི་རྒོད་ཡོད་པའི་ཕྱོགས་སུའམ། ར་རོ་བ་གཡང་ས་ཕྱོགས་སུ་བཏང་བ་ལ་སོགས་པས་ཏེ། འཆི་བར་བསྒྲུབ་པའི་གནས་སུ་བཏང་བའོ། །མི་གཞན་ཞེས་པ་ནི་
[34a.7]བདག་བསད་པ་ལ་སྡོམ་པ་ཞིག་པར་མི་འགྱུར་བས་གཞན་མི་ཡིན་པའི་མི་གཞན་དག་གོ། །ཐབས་སྣ་ཚོགས་ཀྱིས་ཞེས་པ་ནི་གོང་དུ་སྨོས་པར་ཟད་དོ། །དུག་དང་གཏོར་མ་འཇོལ་དང་ས་མདའ་ལ་སོགས་པས་འཆི་བར་འགྱུར་བའི་ཐབས་འདི་ལྟ་བུ་སྣ་ཚོགས་ཀྱིས་བརྡས་ཀྱང་རུང་རྩས་མགོ་དང་
[34b]
[34b.1]སྦྱར་ཏེ་དེ་ལ་རྩིས་མགོ་ཚང་བ་མང་ཡང་ལྕི་ཡང་ཡོད་དེ། གསོད་སེམས་དང་མི་ལྡན་པ་ལ་རྩིས་མགོ་གཞན་དང་ལྡན་ཀྱང་ཉེས་བྱས་ཕྲ་མོར་འགྱུར་རོ། །གསོད་སེམས་དང་ལྡན་པ་ལ་མ་ཤི་བ་ནི་ཉེས་བྱས་སྦོམ་པོར་འགྱུར་རོ། །བསད་ན་བརྟུལ་ཞུགས་ཉམས་པར་འགྱུར། །ཞེས་པ་ནི་སྲོག་བཅད་པ་ཙམ་
[34b.2]གྱིས་སྡོམ་པ་ཉམས་པར་འགྱུར་ཏེ། མི་བསད་པ་འབའ་ཞིག་གིས་སྡོམ་པ་ཞིག་པར་འགྱུར་རོ། །འདི་མན་ཆད་ཅི་ཞིག་གིས་ལས་སུ་བྱས་ནས་ཀྱང་རུང་སྟེ། དགེ་ཚུལ་དུ་མི་རུང་བར་མི་འགྱུར་བས་གོང་མ་ལས་བྱེ་བྲག་ཏུ་བྱས་པའི་ཕྱིར་རོ། །བྱོལ་སོང་དང་ནི་ཞེས་པ་ནི་བདེ་འགྲོ་ལས་བྱོལ་ཏེ། ངན་
[34b.3]འགྲོའི་གནས་སུ་སྐྱེས་པ་ཀླུ་མན་ཆད་དང་། གྲོག་སྦུར་ཡན་ཆད་དོ། །སེམས་དམྱལ་དང་ཞེས་པ་ནི་དམྱལ་བ་ཆེན་པོར་མ་ཕྱིན་ཀྱང་སོ་སོ་རེ་རེའི་དམྱལ་བས་ཏེ། དཔེར་ན་རྒྱ་མཚོར་སོང་སོང་བ་ལས། རྒྱ་མཚོའི་གླིང་ན་དམྱལ་དང་ཕྲད། །ཅེས་བྱ་བ་ལ་སོགས་པ་ལྟ་བུའོ། །ཡི་དགས་ཞེས་པ་
[34b.4]ནི་ཕྱག་དར་ཁྲོད་ཀྱི་འདྲེ་ཡན་ཆད་དོ། །འོན་ཏེ་ལྷ་ཡང་རུང་ཞེས་པ་ནི་ཤིང་ལྷ་ཡན་ཆད་ནས་འོག་མིན་གྱི་གནས་ཀྱི་ལྷའི་བར་དུའོ། །བསད་ན་ངན་སོང་ལྷུང་བའི་ཞེས་པ་ནི། བྱོལ་སོང་ནས་ལྷའི་བར་དུ་དེ་དག་བསད་ན་ངན་སོང་གསུམ་དུ་ལྟུང་ངོ་། །སྡིག་པ་སྦོམ་པོ་ཐོབ་པར་འགྱུར། །ཞེས་པ་ནི་
[34b.5]དགེ་སྦྱོང་གི་ཚུལ་ཁྲིམས་ལས་ཐལ་བྱུང་དུ་བླངས་པས་སྦོམ་པོ་ཞེས་སྨོས་ཀྱི། དགེ་ཚུལ་ལ་ནི་ཉེས་བྱས་སུ་འགྱུར་རོ། །བརྟུལ་ཞུགས་ཅན་གྱིས་བསད་སྙམ་སྟེ། །ཞེས་པ་ནི་སྡོམ་པ་ལ་གནས་པས་མི་ལ་སོགས་པ་གསོད་པར་སེམས་པས་སོ། །ལུས་དང་ཞེས་པ་ནི་ལུས་ཀྱིས་མདའ་འཕངས་པ་
[34b.6]དང་རལ་གྲི་དང་མདུང་ལ་སོགས་པས་འདེབས་པའོ། །ངག་གིས་བཤམས་པ་ལས་ཞེས་པ་ནི་ངག་གིས་འཆི་བའི་བསྔགས་པ་བརྗོད་པ་ལ་སོགས་པའོ། །སྐྱེ་བོ་གསོན་ཡང་དེ་ལ་ནི། །ཞེས་པ་ནི་གསད་པར་ཡང་བསམས་ལ། ཆས་ཀྱང་ཆས་ཏེ་མདའ་ལ་སོགས་པས་ཕོག་གམ་འཆི་བར་འགྱུར་
[34b.7]བའི་བསྔགས་པ་བརྗོད་པར་འགྱུར་བ་ལས་བདག་གིས་དེ་ཡང་དག་པར་ཤི་སྙམ་པ་ལས། དེ་ཕྱིས་སོང་སྟེ་མ་ཤི་ཡང་འོག་མ་ལྟར་འགྱུར་རོ། །ཁ་ན་མ་ཐོ་རྣམ་གསུམ་འགྱུར། །ཞེས་པ་ནི་རྣམ་པ་གསུམ་སྟེ། སྦྱོར་བའི་ཁ་ན་མ་ཐོ་བ་དང་། རྩ་བའི་ཁ་ན་མ་ཐོ་བ་དང་། རྒྱབ་ཀྱི་ཁ་ན་མ་ཐོ་བའོ། །དེ་ལ་
[35a]
[35a.1]སྦྱོར་བའི་ཁ་ན་མ་ཐོ་བ་ནི་ཐོག་མར་གསད་པར་སེམས་པའོ། །རྩ་བའི་ཁ་ན་མ་ཐོ་བ་ནི་གསོད་པའི་ཚེ་སྟེ། ལུས་ཀྱིས་འདེབས་པ་དང་། ངག་གིས་བསྔགས་པ་བརྗོད་པའི་ཚེ་བསད་སྙམ་པའོ། །རྒྱབ་ཀྱི་ཁ་ན་མ་ཐོ་བ་ནི་ཕྱིས་རྗེས་སུ་ཡི་རང་བ་སྟེ། དུས་གཞན་དུ་ངས་བསད་
[35a.2]དེ་ཞེས་ཡི་རང་ཞིང་ཡང་དང་ཡང་དུ་སེམས་པའོ། །དེ་ལྟར་ན་སྦྱོར་བའི་ཁ་ན་མ་ཐོ་བ་དང་། རྩ་བའི་ཁ་ན་མ་ཐོ་བ་དང་། རྒྱབ་ཀྱི་ཁ་ན་མ་ཐོ་བའོ། །དེ་ལ་དང་པོ་ནི་འགྱོད་པས་ཚངས། བར་མ་ནི་གང་ཟག་ལ་མཐོལ་བས་ཚངས། ཐ་མ་ནི་དཀོན་མཆོག་གསུམ་དང་དགེ་འདུན་ལ་མཐོལ་བས་ཚངས་པར་འགྱུར་
[35a.3]རོ། །དེ་བཞིན་དུ་བསོད་ནམས་ལ་ཡང་རྣམ་པ་གསུམ་དུ་དབྱེ་སྟེ། ལས་ཐམས་ཅད་ལ་ཡང་སྦྱར་རོ། །རྡོ་དབྱུག་ཁུ་ཚུར་འཚོག་པ་དང་། །ཞེས་པ་ནི་འདི་དག་ཀྱང་གསོད་པའི་ཡན་ལག་ཏུ་བསྡུའོ། །དེ་ལས་གཞན་པའི་གནོད་པ་དག །ཅེས་པ་ནི་རྡོ་དབྱུག་ལ་སོགས་པ་སྦྱོར་བའམ་གནོད་པའི་
[35a.4]རྒྱུར་གྱུར་པ་གང་ཡང་རུང་བས་མི་ལ་ཡང་འཚོག་པ་ནས་སྦྱོར་བ་ཡན་ཆད་དུ་ཕ་རོལ་ལ་གནོད་པར་འགྱུར་བའི་བག་མི་བྱའོ། །བ་གླང་ལ་སོགས་གནོད་མི་བྱ། །ཞེས་པ་ནི་ཕྱུགས་སོ་ཅོག་བསྡུ་སྟེ། དེ་དག་ལ་གནོད་པ་མི་བྱའོ། །རྟ་ལ་སོགས་པ་མི་ཞོན་ནོ། །ཞེས་པ་ནི་དཀོན་མཆོག་གསུམ་
[35a.5]དང་། ཕ་མ་དང་། རྒྱལ་པོའི་ཆད་ལ་མི་འགྲོར་མི་རུང་ཞིང་རྐང་གིས་འགྲོ་མི་ནུས་ཀྱི་བར་དུ་བྱའོ། །མི་ནུས་ན་བཞོན་ཏེ། དེ་ཡང་ཕ་རྐང་ཆག་ལ་ཞོན་པ་བཞིན་དུ་སྙིང་རྗེ་བྱའོ། །འདི་ཡན་ཆད་བསད་པའི་བཤད་པ་འདས། །ད་ནི་མ་བྱིན་པར་ལེན་པ་འཆད་དེ། དེ་ཡང་ཡན་ལག་དྲུག་
[35a.6]དང་ལྡན་ན་ཕམ་པ་སྟེ་གང་ཞེ་ན། མ་བྱིན་པར་ལེན་པ་དང་། རྐུ་སེམས་ཡོད་པ་དང་། རིན་ཐང་ཚང་བ་དང་། མིས་ཡོངས་སུ་བཟུང་བ་དང་། བཟུང་བར་འདུ་ཤེས་པ་དང་། བདག་གིར་བྱས་པའོ། །ཡན་ལག་དེ་རྣམས་དང་ལྡན་ན་ཕམ་པ། དེ་དག་གཅིག་དང་ཡང་མི་ལྡན་ན་ཉེས་བྱས་སུ་འགྱུར་
[35a.7]རོ། །དེ་དག་དང་པོ་བཅས་པ་ནི་རྒྱལ་པོའི་ཁབ་འོད་མའི་ཚལ་ན་བཞུགས་པའི་ཚེ་རྫ་བ་ལས་རབ་ཏུ་བྱུང་བའི་དགེ་སློང་ནོར་ཅན་གྱིས་རབ་ཏུ་བྱུང་ཞིང་མ་བྱིན་པར་བླངས་པས་བཅས་སོ། །དགེ་ཚུལ་ཞེས་པ་ནི་དགེ་བའི་ཕྱོགས་ལ་འབད་པའམ། རྩོལ་བར་བྱེད་དེ་དལ་བའི་ཕྱིར་ན་དགེ་ཚུལ་ཞེས་བྱའོ། །
[35b]
[35b.1]བདག་གམ་གཞན་རྣམས་ཀྱི་ཞེས་པ་ནི་རྐུན་པོ་ལ་རྣམ་པ་གཉིས་ཏེ། བདག་ཉིད་ཀྱིས་རྐུ་བ་དང་། གཞན་རྣམས་ལ་རྐུ་བ་བཅོལ་བའོ། །བཅོལ་བ་ལ་ཡང་རྣམ་པ་གཉིས་ཏེ། མངོན་སུམ་དུ་བཅོལ་བ་དང་། ཐ་ན་སྤྲིངས་ནས་བཅོལ་བའོ། །རྐུ་སེམས་ཞེས་པ་ནི་རྐུའོ་སྙམ་པའི་སེམས་ཀྱིས་
[35b.2]བརྐུ་བའོ། །མཐུ་དང་ཞེས་པ་ནི་བཙན་ཐབས་སུ་འཕྲོག་པ་ལྟ་བུའོ། །འཇབ་བུ་ཡིས་ཞེས་པ་ནི་རྐུན་པོ་ལ་མང་སྟེ། འཇབ་བུ་དང་། སྒྱུ་དང་། གཡོ་དང་། དོར་ལ་སོགས་པ་བྱས་ཏེ་བརྐུ་བའོ། །འཁྲུལ་པ་མེད་པར་ཞེས་པ་ནི་བདག་གི་ཡིན་པར་འདུ་ཤེས་པ་དང་། ནོར་བ་མེད་པ་སྟེ། མདོར་ན་
[35b.3]བདག་གི་རྫས་སུ་མ་ནོར་བ་སེམས་མྱོས་པ་ལ་སོགས་པར་མ་གྱུར་པ་དེ་ནི་རྐུ་སེམས་དང་ལྡན་པའི་དོན་ཏོ། །མི་གཞན་གྱི་ཞེས་པ་ནི་བདག་གི་རྫས་བརྐུས་ཀྱང་ཕམ་པར་མི་འགྱུར་ཏེ། སྔོན་བཅས་པ་མ་ཡིན་པས་ཡན་ལག་ཏུ་མི་དགོས་པའི་ཕྱིར་རོ། །བདག་ལས་གཞན་ཏེ་ཕ་རོལ་ལོ། །གནས་
[35b.4]ནས་ཞེས་པ་ནི་མ་བསྐྱོད་ན་ཇི་ལྟར་རྐུ་སེམས་དང་ལྡན་ཡང་སྡོམ་པ་ཞིག་པར་མི་འགྱུར་ཏེ། མདོར་ན་རྫས་ལ་སོགས་པ་གང་ན་འདུག་པའི་མཚམས་ལས་འདས་པའོ། །མཚམས་ནི་བར་དུ་ནམ་མཁས་ཆོད་པ་དང་། ས་དག་ལས་སའི་ཁ་དོག་ལྟ་བུ་འདས་པ་དང་། ཕྱུགས་ཚོན་པོ་ཞིག་ན་རྒྱབ་ལས་
[35b.5]མགོའམ་མཇུག་གི་མཐའ་ལས་བྲལ་བ་དང་། རིད་དེ་མ་ཤི་ན་རྩིབ་མའི་དག་ལ་ལས་བྲལ་བའོ། །མ་ཤ་ལྔ་ཙམ་ཞེས་པ་ནི་ཀཱར་ཥཱ་པ་ཎ་གཅིག་ལ་མ་ཤ་ཀ་ཉི་ཤུ་རི་བས། ཀཱར་ཥཱ་པ་ཎ་བཞི་ཆ་ལ་མ་ཤ་ཀ་ལྔའོ། །དེ་ལ་མ་ཤ་ཀ་ནི་དབྲིའོ། ཀཱར་ཥཱ་པ་ཎ་ནི་དབྲི་བ་མེད་དོ། །དེ་བཞིན་དུ་དངུལ་ལ་ནི་
[35b.6]འགྱུར་བ་མེད་དོ། །འབྲུ་དག་ལ་ནི་ཡང་རུང་དུ་འགྱུར་ཏེ། དངུལ་ཞོ་གཅིག་གི་ཆ་ལས་བརྩིས་ཏེ། མ་ཤ་ཀ་ལྔ་ལ་ཕམ་པའོ། །རང་གི་ཡུལ་ནས་བྱུང་བ་གང་། །ཞེས་པ་ནི་ཡུལ་ཐང་བརྩན་པར་བྱ་སྟེ། བདག་གང་ན་འདུག་པ་དང་། རྐུན་མོ་ཡུལ་གང་དུ་བྱས་པ་མདོར་ན་ཡུལ་དེ་ཉིད་ཀྱི་རིན་ཐང་
[35b.7]བརྩི་བའོ། །ཀཱར་ཥཱ་པ་ཎི་བཞི་ཆ་བརྐུས་ཞེས་པ་ནི་མ་ཤ་ཀ་ལྔ་ནས་ཡར་བརྩིས་ཏེ། ཀཱར་ཥཱ་པ་ཎ་གཅིག་ལ་མ་ཤ་ཀ་ཉི་ཤུ་ཡོད་པས། ཀཱར་ཥཱ་པ་ཎ་བཞི་ཆ་ལས་མ་ཤ་ཀ་ལྔ་སྟེ། རིན་ཐང་བརྩིས་ན་ཞོ་བཞིའི་བརྒྱད་ཆ་གཅིག་གོ། །དེ་བརྐུས་ཚུལ་ཁྲིམས་ཞིག་པར་འགྱུར། །ཞེས་པ་ནི་དངུལ་
[36a]
[36a.1]ཞོ་གཅིག་གི་བརྒྱད་ཆ་ཡོད་པ་དེ་བརྐུས་ན་ཕམ་པར་འགྱུར་རོ། །སྦྱོར་བའི་ཚེ་ན་ཉེས་བྱས་སོ་ཞེས་པ་ནི་དགེ་སློང་གི་ལྟར་ཉེས་པ་རྣམས་མང་དུ་དབྱེར་མེད་དོ། །ཐོག་མར་བརྐུ་བར་བཤམས་པ་ནས། རྫས་དུ་ལ་རང་གནས་ནས་མ་སྤགས་ཀྱི་བར་དུ་ཉེས་བྱས་སུ་འགྱུར་
[36a.2]རོ། །རྡོ་ཁུ་ཞེས་པ་ནི་ཉུང་རྡོག་ལྟ་བུ་ལ་སོགས་པའོ། །རྩ་བ་ཞེས་པ་ནི་སྨན་ལ་སོགས་པའོ། །འབྲས་བུ་ཞེས་པ་ནི་ཤིང་ཐོག་སྟེ། ཀུ་ཤུ་དང་ཁམ་བུ་དང་རྒུན་འབྲུམ་ལ་སོགས་པའོ། །ཤིང་ཞེས་པ་ནི་སྐྱེད་ཤིང་ལྟ་བུ་སྟེ་ལོ་མ་དང་། ཤིང་ཏོག་དང་འབྲས་བུ་བཟང་པོ་སྐྱེས་པའི་ཤིང་
[36a.3]ལྟ་བུ་སྟེ། རྩ་གཞན་བཅད་ན་ཉེས་བྱས། རྩ་བ་གཅིག་བཅད་ན་རིན་ཐང་བརྩིའོ། །སྡོང་བུ་ཞེས་པ་ནི་བུ་རམ་ཤིང་དང་ལྕུག་མ་ལ་སོགས་པ་ལྟ་བུ་སྟེ། སྤགས་སམ་བཅད་ན་ཕམ་པར་འགྱུར་རོ། །ལོ་མ་ཞེས་པ་ནི་ཤང་རྩེ་དག་བསྡུས་ཏེ་ཚོད་པ་དང་ཡུངས་ཀར་ལྟ་བུ་དག་བརྐུས་ནའོ། །ཤུན་
[36a.4]པ་ཞེས་པ་ནི། ཤིང་རྩ་ལ་སོགས་པའོ། །ཆུ་ཞེས་པ་ནི་ཤིང་ཆུ་དང་མྱ་ངམ་དུ་འགྲོ་བའི་བཏུང་ཆུ་རྣམས་ཁྱེར་ཏེ་དོང་བ་ལས་མིའི་བཏུང་ཆུ་བརྐུས་ན་ཕམ་པའོ། །ཕྱུགས་ཀྱིས་བརྐུས་ན་ཉེས་བྱས་སུ་འགྱུར་རོ། །མེ་ཏོག་ཞེས་པ་ནི་མེ་ཏོག་རྣམ་པ་གཉིས་ཏེ་འོག་ནས་འབྱུང་བ་དག་གོ། །ཆུ་
[36a.5]སྐྱེས་ཞེས་པ་ནི་པདྨོ་ལ་སོགས་པ་ལྟ་བུ་སྟེ། ཆུའི་ནང་དུ་སྐྱེས་པའི་མེ་ཏོག་གོ། །ཐང་སྐྱེས་ཞེས་པ་རི་ལས་སྐྱེས་པ་སྟེ། ཐང་ལས་སྐྱེས་པའི་མེ་ཏོག་ཀྱང་བསྡུའོ། །ཞིང་དང་ཞེས་པ་ནི་རྐུ་བ་ལ་རྣམ་པ་གཉིས་ཏེ། ཐམས་ཅད་རྐུ་བ་དང་མུ་ནས་རྐུ་བའོ། །དེ་ཡང་བསྐོར་བ་དང་ཁད་ཀྱིས་
[36a.6]རྐུ་བའོ། །དེ་ལ་ཡང་བསྐོར་བ་ནི་ཞིང་དེར་བས་བསྐོར་བ་སྟེ། ཀུན་ནས་ར་བའི་མཚམས་འབྱོར་ཏེ་བདག་པོས་བསམ་པ་ཐག་བཅད་ན་ཕམ་པ། མི་དབང་བ་ལ་ཤགས་འགྱེད་པའམ། དབང་ཡོད་པས་མི་དབང་བཞིན་དུ་ཐོབ་པར་བཅད་ན་ཕམ་པ། རྟོག་ཅེས་པ་ནི་གཉིས་ཏེ། རྐུ་བའམ་
[36a.7]མ་རུངས་པར་བྱེད་པས་ཏེ། དཔེར་ན་ཤྭ་ཁ་སྒྱུར་བ་ལྟ་བུ་སྟེ། དེས་མ་རུང་བར་གྱུར་པའི་རིན་ཐང་ཚང་ན་ཕམ་པ། ས་གཞི་དང་ཞེས་པ་ནི་གནས་ཁང་དང་གཙུག་ལག་ཁང་དང་ཚོང་ཁང་དག་གི་གཞི་ལ་སོགས་པ་ལྟ་བུ་སྟེ། ཞིང་རྐུ་བའི་རྩིས་མགོ་ལྟ་བུ་དང་འདྲའོ། །གྲུ་དང་ཞེས་པ་ནི་གྲུ་རྐུ་བ་
[36b]
[36b.1]ལ་རྣམ་པ་བཞི་སྟེ། ཆུའི་རྒྱུན་དུ་རྐུ་བ་དང་། རྒྱུན་ལས་གྱེན་དུ་རྐུ་བ་དང་། ཐད་ཀར་རྐུ་བ་དང་། བཅིངས་པའི་རྒྱུན་དུ་རྐུ་བའོ། །ཐད་ཀར་རྐུ་བ་ནི་མི་སྣང་བའི་ཚད་ཀྱིས་བཟུང་ངོ་། །གྱེན་དུ་རྐུ་བ་ནི་གྲུ་གང་འཕགས་པས་ཕམ་གྱི། མ་ངེས་པ་ནི་ཆུའི་ནང་དུ་ནུབ་པས་ཕམ་མོ། །ཤིང་ཞེས་པ་ནི་
[36b.2]ལོ་མ་ལ་སོགས་པ་བཟང་པོ་སྐྱེ་བའི་ཤིང་དང་། ཡང་ན་ཤིང་དག་གོ། །ཤོག་མ་དང་ཞེས་པ་ནི་བདག་གི་ཤོ་གམ་འདས་ན་རིན་ཐང་བརྩི། གཞན་གྱི་བདག་གིས་བཟླས་ཏེ་བླངས་ན་ཡང་རིན་ཐང་བརྩི་བདག་ཉིད་ཀྱི་ནོར་མ་ཡིན་ཏེ། དཀོན་མཆོག་དང་ཕ་མ་ལ་སོགས་པ་ནི་ཉེས་བྱས་སུ་འགྱུར་
[36b.3]རོ། །དེ་བཞིན་གྲུ་ཡི་བཙས་རྣམས་དང་། །ཞེས་པ་ནི་གོང་མའི་ཤོ་གམ་བཞིན་དུ་སྒྲོལ་གྲུ་འདས་པའམ་དབྱར་དབབ་པའི་ཕྱིར་གྲུ་ལ་བདག་གྱེན་དུའམ་ཆུ་འབྱམ་དང་ཐད་ཀར་ཡང་རུང་སྟེ། ཞོན་ལ་མ་བྱིན་པ་ལ་རིན་ཐང་བརྩིའོ། །སྲོག་ཆགས་རྐང་པ་མེད་པ་དང་། །ཞེས་པ་ནི་དངོས་སུ་སྦྲུལ་
[36b.4]ལྟ་བུ་སྟེ། དེ་ཡང་རྒྱལ་པོའི་གཉེར་བ་ལ་ནན་ཏུར་དག་བྱ་བའི་དགོས་པ་དང་། འཚེ་བའི་ཕྱིར་ཏེ་ནེའུ་ལེ་དང་སྦྲུལ་འཐབ་པ་དག་མཛའ་བར་བྱས་ནས་འཚོ་བ་ཚོལ་ཏེ་དེ་ལྟ་བུ་བརྐུས་ན་རིན་ཐང་བརྩིའོ། རྐང་གཉིས་ཞེས་པ་ནི་མི་དང་བྱ་སྟེ། དེ་ལ་བྱ་ནི་ཁྲའམ་ལོངས་སྤྱོད་ཀྱི་ཕྱིར་ཁྲུང་ཁྲུང་དང་ངང་པ་ལ་
[36b.5]སོགས་པའི་གསོན་མ་དག་གོ། །མི་ནི་མཚན་མ་དང་། དུས་དང་གནས་སུ་ཕྱིན་པས་བསམ་མོ། །བྱ་ནི་རྐུ་བའི་ཕྱིར་སྒྲོགས་པའམ་གནས་ས་ནས་བདག་གི་གནས་སུ་སྦུར་བས་ཕམ། རྐང་མངས་རྐུ་བ་དང་ཞེས་པ་ནི་རྐང་པ་བཞི་པ་ཡན་ཆད་ལ་བྱ་སྟེ། སྦྲང་སེར་དང་སྲིན་བུ་པད་པ་དང་སྡིག་པ་དག་
[36b.6]གོ། །དེ་ལ་སྦྲང་སེར་ནི་རྒྱ་མཚོར་དགོས་སོ། །སྲིན་བུ་ནི་སྨན་པ་ལ་དགོས་སོ། །སྡིག་པ་ནི་རྒྱལ་པོའི་ནན་ཏུར་དུ་དགོས་སོ། །བརྟུལ་ཞུགས་ཅན་གྱིས་ཞེས་པ་ནི་བསླབ་ཚིགས་བཅུ་ལ་ཞུགས་པའོ། །མིའི་ནོར་ཞེས་པ་ནི་མདོར་བསྡུས་ཏེ་མིའི་ནོར་དུ་གཏོགས་སོ་ཅོག་གིས་སྡུམ་པ་བཞི་པར་
[36b.7]འགྱུར་རོ། །དབྱིག་ལས་ཞེས་པ་ནི་རིན་པོ་ཆེ་ལ་སོགས་པའི་ནོར་ཆེན་པོའོ། །སྩོགས་པ་ཞེས་པ་ནི་གསེར་དང་དངུལ་དང་གཡུ་དང་མུ་ཏིག་དང་དར་ཟབ་ལ་སོགས་པ་ཆུང་ངུ་ཡན་ཆད་ཀྱང་བསྡུའོ། །གང་ཡང་རུང་བ་ཞེས་པ་ནི་མདོར་བསྡུས་པའི་ཚིག་གོ། །རྐུ་བའི་སེམས་ཀྱིས་གང་བརྐུས་
[37a]
[37a.1]ཀྱང་། །ཞེས་པ་ནི་མཛའ་ཡང་རུང་མི་མཛའ་ཡང་རུང་སྐད་ཅིག་ཙམ་བླངས་པ་ལ་སོགས་ཏེ། རྐུ་སེམས་ཡོད་ན་སྡོམ་པ་ཞིག་པར་འགྱུར་བས། དེ་ལྟར་ཁྱད་པར་དུ་དབྱེ་བའི་ཕྱིར་རྐུ་སེམས་དང་ལྡན་པའི་འདུ་ཤེས་ཀྱིས་མིའི་ནོར་དུ་གཏོགས་པ་གང་ཡང་རུང་འོག་ནས་འབྱུང་བ་
[37a.2]བཞིན་དུ་འགྱུར་རོ། །རིན་ཐང་ཚང་ན་སྡོམ་པ་ཞིག །ཅེས་པ་ནི་དངུལ་སྐྱ་ཞོ་གཅིག་གི་བརྒྱུད་པ་ཚང་ན་སྡོམ་པ་ཞིག་པར་འགྱུར་རོ། །ལྷུང་བཟེད་ལ་སོགས་རྐུན་ཁྱེར་ནས། །ཞེས་པ་ནི་འཚོ་བའི་ཡོ་བྱད་ཀྱི་མཆོག་ནི་ལྷུང་བཟེད་དང་ཆོས་གོས་དག་ཡིན། དེ་དག་རྐུན་པོས་ཁྱེར་ན་ཐབས་འོག་
[37a.3]ནས་འབྱུང་བ་བཞིན་དུ་བྱའོ། །ཆོས་བཤད་ནས་ནི་བསྒྲུབ་པར་བྱ། །ཞེས་པ་ནི་རྐུན་པོ་ལ་གདོང་ལ་དེ་ནི་དགོས་པ་ལ་ཁྱེར་ལ་ནོར་ཆེན་པོ་མི་རུང་ན་ཕྱིར་བྱིན་ཅིག་ཅེས་བྱ་སྟེ། བྱིན་ན་ནི་ལེགས་ཏེ་དེ་མ་བྱིན་ན་འདི་སྐད་ཅེས་བྱའོ། །འདི་དག་བརྐུས་ན་ངན་སོང་གསུམ་དུ་འགྲོ་བ་ལ་སོགས་པ་
[37a.4]བཞིན་དུ་བཤད་དོ། །ཡང་ན་རི་བའི་རིན་གྱིས་བླུ། །ཞེས་པ་ནི་འདི་ལྟར་བྱས་ན་ཤིན་ཏུ་སྡུག་བསྔལ་བར་འགྱུར་གྱིས་སླར་བྱིན་ཅིག་ཅེས་བྱའོ། །དེ་སྟེ་མི་སྟེར་ན་རི་བའི་རིན་གྱིས་བླུའོ། །དེ་ལྟར་མ་བྱས་ཉེས་བྱས་འགྱུར། །ཞེས་པ་ནི་དགེ་སློང་གིས་ཡོ་བྱད་དཀོན་པའི་ཕྱིར་དེ་ལྟར་མ་བྱས་
[37a.5]པར་བླངས་ན་ཉེས་བྱས་པའི་དམིགས་པ་ནི་སེམས་ཐག་མ་ཆད་པ་ལས་བྱེ་བྲག་ཏུ་བྱས་ཏེ་བཤད་པ་ཡིན་ནོ། །འདི་ཆེད་དུ་མ་བྱིན་པར་ལེན་པ་འདས་སོ།། །།ད་ནི་མི་ཚངས་པར་སྤྱོད་པ་འཆད་དེ། དེ་ཡང་ཡན་ལག་གསུམ་དང་ལྡན་ན་ཕམ་སྟེ། གང་ཞེ་ན། བཅུག་པ་དང་། རེག་པ་དང་།
[37a.6]དགའ་བར་ཚོར་བ་གསུམ་དང་ལྡན་པར་ཕོའི་སྒོ་གཉིས་དང་མོའི་སྒོ་གསུམ་སྟེ། གང་དུ་སྤྱད་ཀྱང་བསམ་པ་གཅིག་དང་མི་ལྡན་ན་ཉེས་བྱས་སོ། །དེ་ལ་དང་པོ་བཅས་པ་ནི་སངས་རྒྱས་ཤཱཀྱ་ཐུབ་པ་མངོན་པར་བྱང་ཆུབ་སྟེ། ཉན་ཐོས་ཀྱི་འཁོར་དང་ལྡན་ནས་ལོ་བཅུ་གཉིས་ཀྱི་བར་དུ་ཐམས་
[37a.7]ཅད་ཀྱང་ཚངས་པར་སྤྱོད་པ་ལ་གནས་ཏེ་ལྟུང་བ་མེད་དོ། །ལོ་བཅུ་གསུམ་ལ་འདས་ནས་བབ་པའི་ཚེ་ཚོང་དཔོན་གྱི་བུ་བཟང་སྦྱིན་གྱིས་མི་ཚངས་པར་སྤྱད་པ་ལས་ལྟུང་བ་དང་པོ་བཅས་པའོ། །སྡོམ་ཅན་ཞེས་པ་ནི་ཚུལ་ཁྲིམས་བསྲུངས་ཏེ་མ་ཞིག་པར་གནས་པའི་སྡོམ་པ་དང་ལྡན་པས་སྡོམ་པ་
[37b]
[37b.1]ཅན་ཞེས་བྱའོ། །ཉམས་པ་མེད་སེམས་ཀྱིས་ཞེས་པ་ནི་རྣམ་པ་བཞི་ལྟ་བུ་སེམས་ཀྱང་མ་ཉམས་པ་སྟེ། བཞི་གང་ཞེ་ན། འདྲེ་གདོན་ལ་སོགས་པས་བྱིན་གྱིས་བརླབས་ནས་མྱོས་པ་ལྟ་བུ་མ་ཡིན་པ་དང་། འབྱུང་བ་ཆེན་པོ་བཞིའི་ཁམས་ཉམས་པར་གྱུར་པ་མ་ཡིན་པ་དང་། སྔོན་གྱི་ལས་ཀྱི་རྣམ་པར་
[37b.2]སྨིན་པ་མ་ཡིན་པ་དང་། གནད་དུ་བབ་སྟེ་བརྒྱལ་བ་ལྟ་བུ་མ་ཡིན་པ་སྟེ། མདོར་ན་སེམས་དྲན་པ་གསལ་བཞིན་དུ་འོག་མ་ལྟར་བྱས་ན་ཉེས་པར་འགྱུར་རོ། །ཉམས་པ་མེད་པའི་སྒོ་གསུམ་དུ། །ཞེས་པ་ནི་སྐྱེས་པ་ལ་ནི་སྒོ་གཉིས། སྒོ་དེ་དག་མེས་ཚིག་པ་ལྟ་བུའམ། རུལ་བ་ལྟ་བུའམ།
[37b.3]ཞིག་པའམ། འབུ་ཞུགས་པ་ལྟ་བུར་མ་གྱུར་པར་འོག་ནས་འབྱུང་བ་བཞིན་དུ་བྱས་ན་ཉེས་པར་འགྱུར་རོ། །ཆགས་པས་ནང་དུ་ནོར་བུ་འདས། །ཞེས་པ་ནི་འདོད་ཆགས་དང་ལྡན་པའི་སེམས་ཀྱིས་བྱས་ནས་ཁའི་ནང་དུ་སོ་ལས་འདས་པ་དང་། རྐུབ་ནི་འཛུམས་པའི་མཚམས་འདས་པ་
[37b.4]དང་། མོ་མཚན་ནི་ཕྱི་ཤུན་གྱི་མཚམས་སུ་ནོར་བུ་ནུབ་ཅེས་པས་མཚམས་འདས་ཞེས་བྱའོ། །དགའ་བར་ཚོར་ན་བརྟུལ་ཞུགས་ཉམས། །ཞེས་པ་ནི་བདག་གིར་བྱས་ན་ཞེས་བྱ་བའི་དོན་ཏོ། །ཕས་བྱེད་དམ་ཚུས་བྱེད་ཀྱང་རུང་སྟེ། ཉམས་སུ་ལེན་ན་སྡོམ་པ་ཞིག་གོ། །དགེ་སློང་མ་ནི་ཕས་བྱེད་
[37b.5]པ་བཅབས་པ་ཡོད་དོ། །དེས་ན་ཁས་བླང་ཞིང་ཉམས་སུ་ལེན་ན་སྡོམ་པ་ཞིག་གོ། །སྐྱེས་པ་ཞེས་པ་ནི་དགེ་སློང་མ་ནི་སྐྱེས་པའོ། །ཡང་ན་དགེ་ཚུལ་ཕས་སྐྱེས་པ་ཉིད་ལ་བྱའོ། །བུད་མེད་ཅེས་པ་ནི་དགེ་ཚུལ་ཕ་ནི་དགེ་ཚུལ་ཕ་ལ་བུད་མེད་ཀྱིས་སོ། །མ་ནིང་གིས་ཞེས་པ་ནི་མ་ནིང་ལྔ་སྟེ།
[37b.6]མཚན་གཉིས་པ་དང་། ཟླ་བ་ཕྱེད་ཅིང་འགྱུར་བ་དང་། མཚན་མ་དང་གསུམ་མོ། །མཚན་ཁར་བོར་ཏེ་མནན་པ་ལས། །ཞེས་པ་ནི་གོང་མ་གསུམ་གྱི་མཐུ་རྩལ་གྱིས་མནན་ཏེ་མི་ཚངས་པར་སྤྱོད་པའོ། །གང་གིས་བདེ་བའི་རོ་མྱོང་བ། །ཞེས་པ་ནི་གང་གིས་ཉམས་སུ་བླངས་ཏེ་དགའ་བར་
[37b.7]ཚོར་བའོ། །དེས་ནི་སྡོམ་པ་ཞིག་པར་འགྱུར། །ཞེས་པ་ནི་ཚོར་བ་དེ་ཡང་ཚུལ་ཁྲིམས་མེད་པར་རོ། །ཡན་ལག་སྐྱེས་ནས་ཞེས་པ་ནི་ཕོ་མཚན་འདོད་ཆགས་ཀྱི་ཡན་ལག་སྐྱེས་པ་ཞེས་བྱའོ། །བདེ་བ་འདོད་པས་ཞེས་པ་ནི་འདོད་ཆགས་འདོད་པ་དེ་ཞི་བར་བྱ་བའི་བདེ་བ་འདོད་པ་དང་
[38a]
[38a.1]དགའ་བར་ཚོར་བའི་བདེ་བ་འདོད་པ་ལ་བྱའོ། །གདུག་པ་སྦྲུལ་གྱི་ཁར་བཅུག་པ། །ཞེས་པ་ནི་ཚུལ་ཁྲིམས་དང་བྲལ་ན་གསོན་ཡང་མི་རུང་སྟེ། དེ་བས་ན་འདོད་ཆགས་ཀྱི་ཉོན་མོངས་པ་དེ་བཟློག་པའི་ཕྱིར་གསུངས་པས་སྦྲུལ་གདུག་པ་རྣམ་པ་གཉིས་ཡོད་དེ། སྒོ་གསུམ་
[38a.2]གྱི་སྦྲུལ་དུག་ཅན་ནོ། །དེ་ལ་སྦྲུལ་དུག་ཅན་གྱི་ཁར་བཅུག་སྟེ་ཤི་བ་ནི་ཤི་ཡང་མ་ཤི་ཞེས་བྱའོ། །སྒོ་གསུམ་གྱི་སྦྲུལ་གདུག་པ་ཅན་གྱི་དབང་དུ་གྱུར་ནས་ཚུལ་ཁྲིམས་ཉམས་པ་ནི་ཚེ་རབས་དུ་མར་སྦྲུལ་གྱིས་ཟིན་པར་གྱུར་པས་མ་ཤི་ན་ཡང་ཤི་བ་ཞེས་བྱའོ། །ལུས་ལ་དཀའ་ཐུབ་མི་ཞིག་ཅེས་པ་ནི་
[38a.3]ལུས་ཀྱི་དཀའ་ཐུབ་གསུམ་ལས་སྐབས་འདིར་ནི་ཚངས་པར་སྤྱོད་པ་ལ་བྱ་སྟེ། དོན་དུ་ན་སྦྲུལ་གདུག་པའི་ཁར་བཅུག་ཀྱང་བླའི། སྡོམ་པ་ཅན་གྱིས་ནམ་དུ་ཡང་ནི་མི་ཚངས་པར་མི་སྤྱོད་དོ། །རྫོགས་སངས་རྒྱས་ཀྱིས་བཀའ་སྩལ་ཏོ། །ཞེས་པ་ནི་དེ་སྐད་ཅེས་དེ་བཞིན་གཤེགས་པ་དགྲ་བཅོམ་
[38a.4]པ་ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་ཏོ། །གལ་ཏེ་སྦྲུལ་གྱིས་བསད་གྱུར་ཀྱང་། །ཞེས་པ་ནི་སྦྲུལ་གདུག་པའི་ཁར་བཅུག་ནས་འཆི་སྟེ་འཆི་བར་གྱུར་ཀྱང་ངོ་། །ཚུལ་ཁྲིམས་གནས་ལ་དེ་ཕན་ཏེ། །ཞེས་པ་ནི་དེས་ཤི་ན་ཡང་ཚུལ་ཁྲིམས་མི་འཇིག་སྟེ། མེད་པས་མེད་
[38a.5]འགྱུར་བས་མཐོ་རིས་སུ་སྐྱེས་པས་ན་དེ་ནི་ཕན་པ་ཞེས་བྱའོ། །ཚུལ་ཁྲིམས་ཉམས་པ་སྡུག་བསྔལ་ཡིན། །ཞེས་པ་ནི་ཆོས་ལ་གནས་པས་མྱུར་དུ་བདག་ཤི་བླའོ། །ཆོས་ལ་རྒྱབ་ཀྱིས་ཕྱོགས་པའང་ཅིར་མི་རུང་། །ཆོས་གནས་སུམ་ཅུ་རྩ་གསུམ་ལྷ་ཡི་བདེ་བ་འཐོབ། །ཆོས་ཐོབ་བྲལ་བ་མྱུར་དུ་ངན་
[38a.6]སོང་འཇིགས་ལྟུང་ངོ་། །ཁྱིམ་བདག་དེ་ན་ཕས་མི་རྒོད་བརྒྱད་ཅུ་ལ་སྨྲ་བ་དེ་ལྟ་བུ་སྟེ། ཚུལ་ཁྲིམས་མེད་པ་དེ་ནི་སྡུག་བསྔལ་ཡིན་ཏེ། མྱ་ངན་ལས་འདས་པ་ལ་སྒྲིབ་པར་འགྱུར་རོ། །དེ་ལྟ་བས་ན་ཚུལ་ཁྲིམས་དང་མི་ལྡན་པའི་དགེ་སྦྱོར་ནི་ཁང་པ་ཕུག་རྡོལ་ཅན་མེས་ཚིག་པའི་མགལ་དུམ་དང་
[38a.7]འདྲའོ། །མྱ་ངན་འདས་ལ་སྒྲིབ་པར་འགྱུར། །ཞེས་པ་ནི་དེ་ལྟར་ཚུལ་ཁྲིམས་ཞིག་པར་གྱུར་ན་ངན་སོང་དུ་ལྟུང་བ་འབའ་ཞིག་ཏུ་ཡང་མ་ཟད་དེ། མྱ་ངན་ལས་འདས་པའི་བར་དུ་ཡང་གཅོད་པར་འགྱུར་རོ། །དེ་འཁོར་བའི་ཡན་ལག་ཐམས་ཅད་ལ་ཡང་མི་ཚངས་པར་སྤྱོད་པ་ཞེས་བྱའོ། །མདོར་
[38b]
[38b.1]ན་སེམས་བྱང་བའི་ཐབས་ཙམ་དུ་གསུངས་སོ། །ཇི་ལྟར་ཞེ་ན། ལུས་ཀྱིས་དཔྱད་དུ་མེད་ན་ཡིད་ཀྱིས་བརྟགས་པ་མང་དུ་མི་བྱེད་པའི་ཕྱིར་རོ། །འདི་ཡན་ཆད་དུ་མི་ཚངས་པར་སྤྱོད་པའི་བཤད་པ་འདས་སོ།། །།ད་ནི་བརྫུན་དུ་སྨྲ་བ་འཆད་དེ། དེ་ཡང་ཡན་ལག་ལྔ་དང་ལྡན་ན་ཕམ་སྟེ།
[38b.2]ལྔ་གང་ཞེ་ན། བླ་མའི་ཆོས་ཡིན་པ་དང་། འདུ་ཤེས་བསྒྱུར་བ་རང་ཉིད་ཀྱིས་ཁར་སྨྲས་པ་དང་། ངས་ཐོབ་བོ་ཞེས་བརྗོད་པ་དང་ལྡན་པ་དང་། གཞན་གྱིས་དོན་གོ་བའོ། །ཡན་ལག་འདི་ལྔ་དང་ལྡན་ན་བསམ་གཏན་དང་། མངོན་པར་ཤེས་པ་དང་། དགེ་སྦྱོང་གི་འབྲས་བུ་བཞི་ལ་སོགས་པ་
[38b.3]ཐོབ་པོ་ཞེས་པ་ནས་ལྷ་དང་ཀླུ་ལ་སོགས་པ་མཐོང་ངོ་ཞེས་བྱ་བའི་བར་དུ་སྨྲས་ན་ཕམ་པར་འགྱུར་རོ། །ཡན་ལག་གཅིག་དང་མི་ལྡན་ན་ཉེས་བྱས་སུ་འགྱུར་རོ། །དེ་ལ་དང་པོ་བཅས་པ་ནི་སངས་རྒྱས་ཡུལ་ཡངས་པ་ཅན་གྱི་འོད་མའི་གྲོང་འདབ་ན་བཞུགས་པའི་ཚེ། ཉ་པ་ལྔ་བརྒྱ་ལ་དེ་བཞིན་
[38b.4]གཤེགས་པས་ཆུ་སྲིན་ཉའི་རིགས་ཀྱི་རྣམ་པར་སྨིན་པ་བཤད་པ་ལས་སེམས་གཡོས་ཏེ། དགེ་སློང་དུ་གྱུར་པ་ལྔ་བརྒྱ་པོས་དེ་མུ་གེ་ཆེན་པོ་ཞིག་བྱུང་སྟེ། ཉ་པའི་རིགས་ཀྱི་གྲོང་འདབ་དུ་སྤྱོད་པ་བཅས་ནས་བདག་ཅག་གཅིག་གིས་གཅིག་ཡོན་ཏན་མེད་པར་བསྟོད་པ་ལས་བཅས། ལྷ་
[38b.5]དག་ཀུན་སྨྲ་དང་ཞེས་པ་ནི་ལྷ་དང་ཕན་ཚུན་ལྷན་ཅིག་གཏམ་བྱས་ཏེ། དེ་དང་བདེ་བར་གནས་པ་ལ་སོགས་པ་ན་གཉེན་དང་མཛའ་བའི་ཚུལ་དུ་སྨྲ་བ་ལ་སོགས་པའོ། །གང་ན་བདག་འདུག་ལྷའོ་ཞེས་པ་ནི་ང་གང་ན་བར་ལྷ་དག་འོང་ཞེས་ཟེར་བའོ། །མཐོང་ཞིང་ཞེས་པ་ནི་བདག་གིས་ལྷ་མཐོང་
[38b.6]བ་དང་། ལྷས་ཀྱང་བདག་མཐོང་ཞེས་པའོ། །དེའི་སྒྲ་ཞེས་པ་ནི་གཅིག་གི་སྒྲ་གཅིག་གིས་ཐོས་པའོ། །ཐོས་པར་གྱུར་གང་ཞེས་པ་ནི་ལྷས་སྨྲས་པ་བདག་གིས་ཐོས་པ་དང་། བདག་གི་སྒྲ་ལྷས་ཐོས་ཞེས་ཟེར་བའོ། །བདག་ཀྱང་དེ་དག་གམ་འགྲོ་དང་། །ཞེས་པ་ནི་ང་ལྷའི་གན་དུ་འགྲོའོ་
[38b.7]ཞེས་ཟེར་བའོ། །དེ་བཞིན་ཞེས་པ་ནི་གང་ཇི་ལྟར་བདག་གིས་ལྷ་མཐོང་བ་དང་། དེ་དང་གཏམ་བྱས་ཞེས་པ་ནི་ལྷན་ཅིག་འགྲོགས་ནས་ཟེར་བ་དེ་བཞིན་སྨྲའོ། །དྲི་ཟ་ཞེས་པ་ནི་དྲིས་བཅོས་པས་ན་དྲི་ཟ་ཞེས་བྱའོ། །གྲུལ་བུམ་ཞེས་པ་ནི་ཡི་དགས་གླུགས་པ་ཆེན་པོའོ། །ཀླུ་ཞེས་པ་ནི་བྱོལ་
[39a]
[39a.1]སོང་གི་རྒྱལ་པོའོ། །གནོད་སྦྱིན་ཞེས་པ་ནི་གནོད་སྦྱིན་མདོག་དང་མདངས་འཕྲོག་པའོ། །ལྟོ་འཕྱེ་ཆེན་པོ་དང་ཞེས་པ་ནི། སྦྲུལ་ལྟ་བུ་གསུས་པས་འགྲོ་བའོ། །ཤ་ཟ་ཡི་དགས་ཞེས་པ་ནི་དངོས་སུ་ཟད། མིའམ་ཅི་ཞེས་པ་ནི་མིའི་ལུས་ལ་རྟ་མགོ་ཅན་ནོ། །མཐོང་ངོ་ཞེས་
[39a.2]ལ་སོགས་པ་སྨྲའོ་ཞེས་པ་ནི་དྲི་ཟ་ནས། མིའམ་ཅིའི་བར་དུ་མིང་གིས་སྨོས་པ་དེ་དག་བདག་གིས་མཐོང་ངོ་། །དེ་དག་གིས་ཀྱང་བདག་མཐོང་། དེ་དག་དང་ཡང་ལྷན་ཅིག་ཏུ་འགྲོགས་སོ་ཞེས་ཟེར་བའོ། །བསམ་གཏན་ཞེས་པ་ནི་གཟུགས་ཀྱི་བསམ་གཏན་བཞི་དང་། གཟུགས་མེད་
[39a.3]པའི་བསམ་གཏན་བཞི་པ་སྟེ། འཇིག་རྟེན་གྱི་བསམ་གཏན་བརྒྱད་དོ། །མངོན་ཤེས་ཞེས་པ་ནི། མངོན་པར་ཤེས་པ་ལྔའམ་དྲུག་གོ། །ཚད་མེད་དང་ཞེས་པ་ནི་ཚད་མེད་པ་བཞིའོ། །རྒྱུན་ཞུགས་ལ་སོགས་འབྲས་བུ་དང་། །ཞེས་པ་ནི་ཁམས་གསུམ་གྱི་ཉོན་མོངས་པ་མཐོང་བས་སྤང་
[39a.4]བར་བྱ་བ་བརྒྱ་རྩ་བརྒྱད་སྤངས་པས་རྒྱུན་དུ་ཞུགས་པའོ། །འདོད་པའི་ཁམས་ཀྱི་བསྒོམ་པར་བྱ་བའི་ཉོན་མོངས་པ་དགུ་སེལ་བས། དྲུག་སྤངས་པ་ནི་ལན་ཅིག་ཕྱིར་འོང་བའོ། །འདོད་པའི་ཁམས་ཀྱི་དགུ་ཆར་སྤངས་པ་ནི། ཕྱིར་མི་འོང་བའོ། །སྲིད་པའི་རྩེ་མོ་མན་ཆད་ཀྱི་ཉོན་མོངས་པ་ཐམས་ཅད་སྤངས་
[39a.5]པ་ནི་དགྲ་བཅོམ་པའོ། །ལམ་ལ་རབ་ཏུ་ཞུགས་པའང་རུང་ཞེས་པ་ནི་འཕགས་པའི་ལམ་ཡན་ལག་བརྒྱད་ཐོབ་བོ་ཞེས་བྱ་བ་ལ་སོགས་པའོ། །བདག་གིས་ཐོབ་ཅེས་སྨྲ་ན་ནི་ཞེས་པ་ནི་མི་ལས་བླ་མའི་ཆོས་གང་སྨྲ་བ་དེ་གོང་དུ་བཤད་པའི་ཡོན་ཏན་དེ་ལྟ་བུ་ལ་སོགས་པ་དག་མ་ཐོབ་པར་ཐོབ་ཅེས་སྨྲ་
[39a.6]བའོ། །དོན་རིག་པ་ལ་བརྫུན་པའི་ཚིག་ཅེས་པ་ནི་ཕ་རོལ་པོ་དེ་བས་སམ། གླེན་པའམ་བྱིས་པ་ལ་སོགས་པ་ཡིན་ཏེ། ཚུལ་སྨྲ་བ་ལ་འདུ་ཤེས་སྦས་ཏེ། དེས་ཀྱང་དེ་དང་པར་ཤེས་པའམ། རིག་པའི་འདུ་ཤེས་མེད་པར་སྦས་ལ་དོན་གཞན་དུ་འདུག་ལ་ཚིག་གཞན་དུ་སྨྲ་
[39a.7]བའོ། །ཁྱད་པར་ཐོབ་པའི་ཞེས་པ་ནི་གོང་མ་ལྟར་ཡོན་ཏན་རྣམ་པ་དེ་དག་ཅིག་ལྟོས་ནས་ཁྱད་པར་དུ་སྨྲ་བའོ། །བདག་ཉིད་ཅན་ཞེས་པ་ནི་དེ་དང་ལྡན་པའི་བདག་ཉིད་དུ་གྱུར་ཏོ་ཞེས་ཟེར་ནའོ། །མ་ཉམས་ཞེས་པ་ནི་མི་དྲན་པར་ཡང་མ་གྱུར་ཏེ། སེམས་ཉམས་པའོ། །ང་རྒྱལ་མེད་བཞིན་དུ་ཞེས་པ་ནི་
[39b]
[39b.1]མངོན་པའི་ང་རྒྱལ་ཏེ་སྔོན་དགེ་སྦྱོང་དགོན་པའི་ཡུལ་མངོན་སུམ་དུ་བྱུང་བའི་ཕྱིར་ང་རྒྱལ་སྐྱེས་པ་མ་ཡིན་པས་གདེང་མེད་བཞིན་དུ་འོག་མ་ལྟར་སྨྲས་ན་ཉེས་པར་འགྱུར་རོ། །སྨྲས་ན་སྡོམ་པ་ཉམས་པར་གྱུར། །ཞེས་པ་ནི་སྨྲས་ཏེ་ཕ་རོལ་པོས་དོན་གོ་ན་ཚུལ་ཁྲིམས་མེད་པར་འགྱུར་རོ། །
[39b.2]འདི་མན་ཆད་ནི་སྡོམ་པ་ཞིག་པར་མི་འགྱུར་བའི་ཡན་ལག་སྟོན་ཏོ། །ཁྱད་པར་ཐོབ་པ་མ་གཏོགས་པ། །ཞེས་པ་ནི་གོང་དུ་སྨོས་པ་ལྟག་མཐོང་ལ་སོགས་པ་དག་ནི་བསམ་གཏན་ལ་བརྟེན་ནས་མཐོང་བར་འགྱུར་བའི་ཕྱིར། ཁྱད་པར་འཐོབ་དང་གདེང་ཡོད་པ། །དེས་སྨྲས་ན་ནི་ཉེས་
[39b.3]པར་མི་འགྱུར་རོ། །དེ་ལས་གཞན་པའི་བརྫུན་ཚིག་རྣམས། །ཞེས་པ་ནི་གོང་དུ་སྨོས་པ་མ་གཏོགས་པར་གཞན་ཅི་ཡང་རུང་བའི་བརྫུན་ཚིག་ནི་བསམ་གཏན་ལ་བརྟེན་ཏེ་མཐོང་བར་མི་དགོས་པ་མཐོང་བ་དང་། ཤེས་པར་རུང་བ་སྡོམ་པ་ཞིག་པར་མི་གཞག་སྟེ། རྩ་བ་བཞི་ཆར་ཡང་
[39b.4]ཉེས་པར་མི་འགྱུར་བར་དབྱེའོ། །འདིར་ཡང་ཉེས་པར་འགྱུར་བར་དབྱེ་སྟེ། གོང་མ་ལས་བརྫུན་ཕྲན་ཚེགས་ཕྱག་དར་ཁྲོད་ན་ཤ་ཟ་དག་མཐོང་ངོ་ཞེས་བྱ་བ་དང་། ཤེས་བཞིན་གྱིས་བརྫུན་ཕྲན་ཚེགས་དག་སྨྲས་ན་ཉེས་པའི་དམིགས་འོག་མ་ལྟར་འགྱུར་རོ། །དེ་དག་ཐམས་ཅད་སྡིག་མང་
[39b.5]འགྱུར། །ཞེས་པ་ནི་དེ་དག་སྨྲས་ན་བསོད་ནམས་མ་ཡིན་པ་མང་དུ་འཕེལ་ཏེ། དེས་ངན་སོང་དུ་ནི་ཁྲིད་པར་བྱེད་ལ་སྡོམ་པ་ནི་འཇིག་པར་མི་འགྱུར་རོ། །དེས་ནི་འོག་མར་ལྟུང་བར་བྱེད། །ཅེས་པ་ནི་ཤེས་བཞིན་དུ་བརྫུན་གྱི་ཚིག་སྨྲས་པ་དེས་ནི་མི་ལས་འོག་མ་གསུམ་དུ་ལྟུང་བར་བྱེད་དོ།། །།
[39b.6]འདི་མན་ཆད་ནི་ཕྲ་མོའི་ཉེས་པ་འཆད་དེ། ཇི་ལྟར་མཛའ་བོ་དབྱེ་འགྱུར་བའི། །ཞེས་པ་ནི་མི་གཉིས་ཡིད་མཐུན་ཞིང་མཛའ་བ་དེ་ལ་ཐབས་གང་གིས་དབྱེ་བར་འགྱུར་བའི་ཚིག་འོག་མ་ལྟ་བུའི་ཚིག་སྨྲས་སོ། །ཕྲ་མའི་ཚིག་རྣམས་སྨྲ་མི་བྱ། །ཞེས་བྱ་བ་ནི་ཞེ་སྡང་གིས་དབྱེ་བའི་ཕྱིར་ཚིག་བདེན་པ་ཡང་
[39b.7]རུང་བརྫུན་པ་ཡང་རུང་སྟེ། ཕན་ཚུན་བསྐྱལ་ཞིང་སྨྲ་བར་མི་བྱའོ། །ཕྲ་མ་ལ་རྣམ་པ་གཉིས་ཏེ་ཞེ་སྡང་གིས་དབྱེ་བ་དང་། ཕན་པར་བྱ་བའི་ཕྱིར་དབྱེ་བ་སྟེ། དེ་ལ་ཕན་པར་བྱ་བའི་ཕྱིར་དབྱེ་བའི་ཕྲ་མ་ཟེར་བ་ནི་ཉེས་པར་མི་གཞག་གོ། །འདི་དག་ནི་དགེ་ཚུལ་གྱི་ཁྲིམས་ཀྱི་དངོས་པོ་མ་ཡིན་མོད་
[40a]
[40a.1]ཀྱི། ངག་གི་ཉེས་པ་སྤང་བའི་སྐབས་སུ་དགེ་བ་བཅུའི་རྒྱུད་ཀྱིས་བསྡམས་ནས་ངག་གི་སྐྱོན་འདི་དག་སྤང་བར་བསྟན་ཏོ། །ཐུན་ཚགས་སུ་ནི་སྨྲ་བ་དང་། །ཞེས་བྱ་བ་འདི་ཚིག་རྐང་འདིས་ཐུན་ཚགས་སུ་སྨྲ་བ་འཆད་དེ། དགོས་པའི་དོན་མེད་པར་སྒྲུང་གཏམ་དང་། ལྡེའུ་
[40a.2]དང་། གླུ་ཚིག་དང་། སྙན་ངག་དང་། གར་དང་། བྲེ་མོ་གཏམ་དང་། བོན་སྨྲ་བ་ལ་སོགས་པ་སྨྲས་པའོ། །ཚིག་རྩུབ་སྨྲ་བར་མི་བྱའོ། །ཞེས་བྱ་བ་ནི་ཕ་རོལ་ཞེར་འདེབས་པའི་ཚིག་དག་སྨྲ་བར་མི་བྱའོ། །འདི་མན་ཆད་ནི་དགེ་སྦྱོང་གི་ཚུལ་བཞི་སྟོན་ཏེ། དེ་ལ་དགེ་སྦྱོང་དུ་གྱུར་ཏམ།
[40a.3]དགེ་སྦྱོང་ཞེས་བྱ་བ་དེ་ཐོབ་ནས་འདི་དག་བསྲུང་དགོས་སོ། །ངན་དུ་ཟེར་ལའང་ངན་མི་བརྗོད། །ཅེས་བྱ་བ་ནི་ཕ་རོལ་ཚིག་ངན་པ་ཕའི་ཤ་ཟོ་ཞེས་ཟེར་བ་ལ་སོགས་པའི་ཚིག་ངན་པ་ཟེར་ཡང་ཚུལ་འདིའི་ལན་ཚིག་ངན་པའི་བག་ཟུར་ཡང་སྨྲ་བར་མི་བྱའོ། །གཤེ་ལ་ལན་དུ་སླར་མི་གཤེ། །ཞེས་བྱ་བ་
[40a.4]ནི་ཕས་ཚུར་བདག་ལ་ངན་པ་འདི་ཞེས་པ་ལ་སོགས་པའི་ཚིག་ངན་པས་བརྒྱད་བཀག་ཀྱང་། དེའི་ལན་གཤེ་བའི་ཚིག་དག་ཀྱང་མི་བྱའོ། །མཚང་འབྲུ་བ་ལ་སླར་མི་འབྲུ། །ཞེས་པ་ནི་ཕས་ཚུར་བདག་ལ་སྐྱོན་ཅི་ཡོད་པའི་བག་མཚང་འབྲུ་བ་དེ་ལ་སླར་དེའི་མཚང་འབྲུ་བག་ཙམ་ཡང་མི་བྱའོ། །རྡེག་པ་ལ་
[40a.5]ཡང་སླར་མི་རྡེག །ཅེས་བྱ་བ་ནི་ཕས་ཚུར་མཚོན་ཆ་དང་། དབྱུག་པ་ལ་སོགས་པ་དག་གིས་བདག་ལ་བརྡེག་ཀྱང་དེའི་ལན་དུ་རྡུལ་ཙམ་མི་བྱའོ། །བློ་ལྡན་ཞེས་བྱ་བ་ནི་བློ་དང་ཤེས་རབ་དང་རིག་པ་དང་རྟོགས་པ་དག་ནི་རྣམ་གྲངས་ཏེ། མདོར་ན་ཤེས་རབ་དང་ལྡན་ཞེས་བྱ་བའི་དོན་ཏོ། །བསླབ་པ་འདོད་
[40a.6]པ་ཡིས་ཞེས་བྱ་བ་ནི་དེ་བཞིན་གཤེགས་པས་བསྟན་པའི་བསླབ་པའམ། ཚུལ་ཁྲིམས་དེ་ལ་དད་པས་སོ། །བསྒྲིམས་ཏེ་ཞེས་བྱ་བ་ཤིན་ཏུ་ནན་ཏན་དུ་འབད་དོ། །ངག་གི་སྐྱོན་རྣམས་སྤང་ཞེས་པ་ནི་ཕ་རོལ་བོའི་ཡིད་མི་དགའ་བར་གྱུར་ན་བདག་ཉིད་ཀྱང་དེས་དམྱལ་བ་དག་ཏུ་ཁྲིད་པར་བྱེད་པས་སྐྱོན་ཏེ།
[40a.7]དེ་བས་ན་ངག་གི་སྐྱོན་རྣམས་སྤང་བར་བྱ་བ་ཐམས་ཅད་ལས་བྱུང་བས་ན་དང་པོ་ངག་གི་ཉེས་པ་བསྡམ་པར་བྱའོ། །དེ་ལྟར་འགྱུར་བར་རིག་ནས་ནི། །ཞེས་བྱ་བ་ནི་དེ་ལྟར་ངག་དེའི་ཉེས་པ་བཞི་ནི་བཤད་དེ་འདས་སོ།། །།ད་ནི་ལྔ་པ་ལ་བབ་སྟེ། ཆང་མི་བཏུང་བ་འཆད་དོ། །འབྲུ་བཏགས་ཕབས་དང་སྦྱར་བ་ཡི། །ཞེས་བྱ་
[40b]
[40b.1]བ་ནི་ས་བོན་བཏབ་ནས་ལོ་ཏོག་ལས་སྐྱེས་པའི་གྲོ་ནས་དང་འབྲས་ལ་སོགས་པ་ཀུན་བསྡུས་ཏེ། ལོ་ཏོག་ལས་བཏགས་པའི་ཆང་སྟེ། ཟན་ཆང་ལྟ་བུ་ཕབས་དང་སྦྱར་བ་ཆང་དུ་ཡང་གྱུར། ཆང་དུ་ཡང་འདུ་ཤེས། བདག་གིས་ཀྱང་འཐུངས། མྱོས་པར་ཡང་འགྱུར་ནའོ། །བཏུང་བའི་བྱེ་བྲག་འབྲུ་ཡི་
[40b.2]ཆང་། །ཞེས་བྱ་བ་ནི་ཆང་གི་རྣམ་གྲངས་ཏེ། རྒུན་འབྲུམ་དང་། བུར་མ་སྤང་རྩི་ལས་ཆང་དུ་བྱས་པ་དང་། མེ་ཏོག་དང་ལོ་ཏོག་ཐམས་ཅད་ཀྱི་ཆང་ངོ་། །དེ་ལ་ཆང་ལ་རྣམ་པ་བཞི་སྟེ། ཁ་དོག་གི་ཆང་དང་། དྲིའི་ཆང་དང་། རོའི་ཆང་དང་། ཞམ་ཆུ་ཆང་གི་དང་བཞིའོ། །དེ་ལ་མཐུ་དང་མི་ལྡན་པར་
[40b.3]འཐུངས་པས་ནི་ཉེས་བྱས་ལ་བརྩིའོ། །གཞན་ཡང་རྣམ་པ་མང་དུ་འཆད་དེ། རྒྱ་གར་སྐད་ཀྱིས་བར་མ་འཐུངས་ན་ཉེས་པའོ་ཞེས་འཆད་དོ། །ཡང་རོ་ཅན་མི་བཏུང་སྟེ་འཐུངས་ན་ཉེས་བྱས་སོ་ཞེས་འཆད་དོ། །སྡོང་བུ་ཞེས་བྱ་བ་ནི་བུ་རམ་ཤིང་གི་ཆང་དག་གོ། །མེ་ཏོག་གང་ཞེས་བྱ་བ་ནི་སྦྲང་ཆང་དག་
[40b.4]གོ། །འབྲས་བུ་ལས་ཞེས་བྱ་བ་ནི་རྒུན་ཆང་དག་བསྡུའོ། །སྦྱར་བའི་ཁུ་བ་འབྲས་བུའི་ཆང་། །ཞེས་བྱ་བ་ནི་ཕབས་དང་སྦྱར་བའི་ཆང་ངོ་། །དེས་ནི་མྱོས་པར་འགྱུར་རིག་ནས། །ཞེས་བྱ་བ་ནི་རྒྱ་གར་གྱི་སྐད་དུ་མར་ཏ་ཞེས་བྱ་སྟེ། བར་མ་དང་སྦྱོར་བར་འགྱུར་བ་ཀུན་མི་སྣང་སྟེ། དེ་ལ་མདོར་བསྡུས་
[40b.5]ཏེ་སྨྲས་པའོ། །སྡོམ་ཅན་ཕན་འདོད་མི་བཏུང་ངོ་། །ཞེས་བྱ་བ་ནི་ཚུལ་ཁྲིམས་ལ་གནས་པ་བདག་ལ་ཕན་པར་འདོད་པས་གོང་དུ་སྨྲས་པའི་ཆང་དེ་དག་མི་བཏུང་ངོ་། །དེ་འཐུངས་ནས་ནི་ཞེས་བྱ་བ་ནི་འཐུངས་ན་ཅི་ཉེས་ཤེ་ན། གོང་མ་ལྟར་དུ་འགྱུར་རོ། །དྲན་པ་ཉམས་ན་ཞེས་བྱ་བ་ནི་མྱོས་པའི་བློར་འགྱུར་
[40b.6]རོ། །བརྟུལ་ཞུགས་ལྡན་པ་བག་མེད་འགྱུར། །ཞེས་བྱ་བ་ནི་སྡོམ་པ་ལ་ཞུགས་པ། སྡོམ་པ་ལ་གནས་པ། སྡོམ་པ་དང་ལྡན་པ་དེ་ཚུལ་ཁྲིམས་ཞིག་པར་འགྱུར་རོ། །དཔེར་ན་ཆུང་བ་དགེ་བསྙེན་ཅིག་ལ་རྐྱལ་བྱ་བའི་ཕྱིར་ཆང་རྫེའུ་གང་དང་ལུག་ཅིག་བུད་མེད་ཅིག་ཁྲིད་དེ་འོངས་པ་ལས་ཆང་འཐུངས་པ་
[40b.7]དང་ཁྲིམས་ལྔ་ཆར་དྲལ་བ་ལྟ་བུའོ། །བག་མེད་པ་ལས་བརྟུལ་ཞུགས་ཉམས། །ཞེས་བྱ་བ་ནི་གོང་མ་བསྣན་ཏེ་སྨྲས་པ་ཙམ་དུ་ཟད་དོ། །ཡང་ན་ཚུལ་ཁྲིམས་ཀྱི་ཡན་ལག་དང་། བརྟུལ་ཞུགས་ཀྱི་ཡན་ལག་དང་གསུམ་ལུས་དང་ངག་གིས་བསྲུང་བ་སྟེ། ཕམ་པའི་གཞི་ནི་ཚུལ་ཁྲིམས་ཀྱི་ཡན་ལག་
[41a]
[41a.1]གོ། །གླུ་གར་དག་ནི་བརྟུལ་ཞུགས་ཀྱི་ཡན་ལག་སྟེ། ཁྱིམ་པ་ལས་ཁྱད་པར་དུ་བྱའོ། །དེ་བས་སྟོན་པའི་བཀའ་དྲན་བྱ། །ཞེས་བྱ་བ་ནི་སངས་རྒྱས་དེ་ཕྱིན་ཅི་མ་ལོག་པར་སྟོན་པའོ། །དེ་བས་ན་ཇི་སྐད་གསུངས་ཤེ་ན། ཆང་ནི་ཉེས་དགུ་མཚོན་པ་སྟེ། །བག་ཆགས་བསྒྲིབས་
[41a.2]པས་རྣལ་འབྱོར་ཉམས། །ཞེས་བཀག་པས་ན་དེའི་བཀའ་དྲན་པར་གཞག་གོ། །མྱོས་འགྱུར་ཉེས་པ་འཕེལ་འགྱུར་བ། །ཞེས་བྱ་བ་ནི་ཆང་འཐུངས་པས་མྱོས་པ་ཙམ་དུ་མ་ཟད་ཀྱི་ཉེས་པ་གཞན་ཡང་མང་དུ་འཕེལ་བར་འགྱུར་གྱི། རྩ་མཆོག་ཙམ་ཡང་མི་བཏུང་ངོ་། །དེ་བས་ན་རྩའི་ཐོར་ཏོ་ལ་
[41a.3]ཆགས་པ་ཙམ་ཡང་མི་བཏུང་ན་མང་དུ་འཐུངས་པ་ལྟ་ཅི་སྨོས། ད་འདི་མན་ཆད་དགེ་ཚུལ་གྱི་བསླབ་ཚིགས་བཅུའི་དངོས་པོ་ལ་ལྔ་ནི་འདས། ད་ནི་དྲུག་པ་ལ་བབ་སྟེ། གླུ་གར་མི་བྱ་བར་འཆད་དོ། །གླུ་གར་དེ་བཞིན་སིལ་སྙན་རྣམས། །ཞེས་བྱ་བ་ནི་རོལ་མོའི་སྤྱད་དང་རོལ་མོ་བྱ་བ་ཐམས་ཅད་བསྲུང་བ་
[41a.4]སྟེ། བདག་ཉིད་ཀྱང་མི་བྱ། གཞན་བྱེད་དུ་ཡང་མི་གཞུག །བདག་ཉིད་ཉན་པའི་ཕྱིར་ན་དཀོན་མཆོག་གི་སྤྱན་སྔར་བྱེད་དུ་ཡང་མི་གཞུག །བདག་ཉན་པའི་ཕྱིར་མ་ཡིན་མོད་ཀྱི། དཀོན་མཆོག་གསུམ་ལ་མཆོད་པའི་ཕྱིར་ནི་ཉེས་པ་མེད་དོ། །དྲིལ་བུ་དཀྲོལ་བ་དང་དཀོན་མཆོག་གསུམ་ལ་མཆོད་
[41a.5]པའི་ཕྱིར་ཉེས་པ་མེད་དོ། །ཆུ་ལ་བྱེའུ་ཟུལ་བྱེད་པ་ལ་སོགས་པ་ཆུ་ལ་རྩེ་བ་སྣ་ཚོགས་ཀྱང་མི་བྱའོ། །རྐྱལ་མི་ཤེས་ན་དབེན་པར་བསླབ་པ་དང་སྨན་པས་བསྒོས། སྨན་གྱི་ཆོགས་ཆུའི་ནང་དུ་རྐྱལ་བ་དག་ལ་ཉེས་པ་མེད་དོ། །གླུའི་དབྱངས་ཐམས་ཅད་མི་བྱའོ། །ཆོས་འཆད་པ་དང་ཡི་གེ་ཀློག་
[41a.6]པ་དང་། དཀོན་མཆོག་གསུམ་ལ་བསྟོད་པའི་ཚེ་དབྱངས་ལེན་པ་ལ་ཉེས་པ་མེད་དོ། །སྡོམ་པ་ལ་གནས་པས་མི་བྱའོ། །བསླབ་ཚིགས་བཅུའི་དངོས་པོ་ལས་དེ་ཡན་ཆད་དྲུག་ནི་འདས། ད་ནི་བདུན་པ་ལ་བབ་སྟེ། ལུས་ལ་སྤོས་ཀྱིས་མི་བྱུག་པ་འཆད་དོ། །ལུས་ལ་སྤོས་ཀྱིས་མི་བྱུག་སྟེ། །ཞེས་
[41a.7]བྱ་བ་ནི་ལུས་ལ་དྲི་ཞིམ་པོའི་བག་ཐམས་ཅད་ཀྱིས་མི་བྱུག་མི་བསྐུའོ། །ལུས་ལ་མདངས་བཟང་བ་དང་། དྲི་ཞིམ་པར་བྱ་བའི་ཕྱིར་རོ། །གོས་ལ་སོགས་པ་ལ་མི་བྱུག་གོ། །ཅིའི་ཕྱིར་ཞེ་ན། དེ་དག་ཀྱང་འཁོར་བ་ལ་ཆགས་པའི་རྒྱུ་ཡིན་པའི་ཕྱིར་རོ། །ཙནྡན་ལ་སོགས་མི་བསྐུའོ། །ཞེས་བྱ་བ་ནི་དྲི་
[41b]
[41b.1]ཞིམ་པོར་སྦྱར་བ་ལ་སོགས་པ་ལུས་ལ་མི་བྱུག་གོ། །ཡུང་དང་གུར་གུམ་ལ་སོགས་པས། །ཞེས་བྱ་བ་ནི་མདངས་ནི་གུར་གུམ་དག་མདངས་སེར་པོར་འདོད་པའི་ཕྱིར་མི་བྱའོ། །ཁ་དོག་རྣམས་སུ་བྲི་མི་བྱ། །ཞེས་བྱ་བ་ནི་སེར་པོ་ལ་སོགས་པའི་ཁ་དོག་དག་གོ། །མེ་ཏོག་མགོ་རྒྱན་ཕྲེང་བ་དག །ཅེས་བྱ་བ་ནི་
[41b.2]མེ་ཏོག་གང་ཡང་རུང་། སྐུད་པ་དག་དང་། ཤིང་བུ་དག་ལ་བརྒྱུས་པའི་ཕྲེང་བ་དག་གི་སེ་རལ་ཁ་ལ་སོགས་པར་མི་གདགས་སོ། །བརྟུལ་ཞུགས་ཅན་གྱིས་གདགས་མི་བྱ། །ཞེས་བྱ་བ་ནི་བསླབ་པ་ལ་གནས་པས། འདི་དག་གདགས་པར་མི་བྱའོ། །གསེར་ལ་སོགས་པ་རྣམས་ཀྱིས་ཞེས་བྱ་བ་ནི་
[41b.3]གསེར་དངུལ་ལ་སོགས་པའི་སོར་གདུབ་དང་། རྣ་ཆ་དང་། མགོ་རྒྱན་དང་། དཔུང་རྒྱན་དག་གིས་བདག་བརྒྱན་པར་མི་བྱའོ། །དུད་པ་ལ་སོགས་མིག་སྨན་རྣམས། །ཞེས་བྱ་བ་ནི་ལི་ཁྲི་དང་མཚལ་ལ་སོགས་པ་མིག་སྨན་རྣམས་ཀྱིས། མིག་མི་ན་བར་མི་བསྐུའོ། །འདི་ཡན་ཆད་དགེ་ཚུལ་གྱི་བསླབ་ཚིགས་
[41b.4]བཅུའི་དངོས་པོ་ལས་བདུན་ནི་འདས། ད་ནི་བརྒྱད་པ་ལ་བབ་སྟེ། བླ་མའི་ཁྲི་ལ་མི་འདུག་པ་འཆད་དེ། ཤིང་ཁྲི་ཁྲུ་གང་མཐོ་བ་དང་། །ཞེས་བྱ་བ་ནི་ཁྲིའམ་སྟེགས་བུ་ཁྲུ་གང་ཡན་ཆད་ལས་མཐོ་བ་དག་གོ། །བ་སོ་ཞེས་བྱ་བ་ནི་བ་སོ་ལས་བྱས་པའི་ཁྲི་དག་གོ། །ལ་སོགས་ཞེས་བྱ་བ་ནི་རིན་པོ་ཆེ་ལ་
[41b.5]སོགས་པའོ། །བརྒྱན་པའི་ཁྲི་ཞེས་བྱ་བ་ནི་རིན་པོ་ཆེ་སྣ་ཚོགས་དང་། གསེར་དངུལ་ལ་སོགས་པས་བརྒྱན་པའི་ཁྲིའོ། །དམའ་ཡང་ཉལ་ཁྲི་བཟང་པོ་ལས། །ཞེས་བྱ་བ་ནི་བ་སོ་དང་རིན་པོ་ཆེ་ལ་སོགས་པས་བརྒྱན་པའི་ཁྲི་ཁྲུ་གང་དུ་མ་ཕྱིན་ཀྱང་། དེ་ཉིད་རིན་པོ་ཆེའི་ཡིན་པས་དམའ་ཡང་ཉེས་
[41b.6]པའོ། །ཆོས་འཆད་པ་དང་ཁ་ཏོན་བྱེད་པ་ལ་གནང་ངོ་། །ཉལ་ལ་སོགས་པ་མི་བྱའོ། །ཞེས་བྱ་བ་ནི་ཆོས་འཆད་པའི་ལྷའི་ཡུལ་དུ་ཕྱིན་པའི་ཚེ། རིན་པོ་ཆེ་འབའ་ཞིག་སྤྱོད་པ་དང་། གཞན་ཡང་རིན་པོ་ཆེ་འབའ་ཞིག་སྤྱོད་པའི་ཡུལ་ན་ནི་རིན་པོ་ཆེ་ལ་སོགས་པའི་ཁྲི་ལ་ཉལ་ཞིང་འདུག་ཀྱང་ཉེས་པ་མེད་དོ། །
[41b.7]ཆོས་འཆད་པའི་ཚེ་ན་ཁྲི་མཐོན་པོ་ལ་འདུག་ཀྱང་ཉེས་པ་མེད་དོ། །གླུ་གར་ལ་སོགས་པ་ཞེས་བྱ་བ་ནི་བོན་སྨྲང་དང་། སྒྲུང་གཏམ་དང་། རྩེད་མོ་དང་། འབོད་པ་དག་བསྡུའོ། །བསྟན་པ་དང་ཞེས་བྱ་བ་ནི་གླུ་གར་ལ་སོགས་པ་བདག་ཉིད་འདོད་པའོ། །གང་ལས་དྲེགས་པ་སྐྱེ་འགྱུར་བ། །
[42a]
[42a.1]ཞེས་བྱ་བ་ནི་གོང་དུ་སྨྲས་པ་དེ་དག་ལ་བརྟེན་ནས་རྒྱགས་པས་དང་དྲེགས་པས་ཏྲོག་ཏྲོག་པོར་འགྱུར་བས། དྲེགས་པའི་ཡན་ལག་སྤངས་ནས་ནི། །ཞེས་བྱ་བ་ནི་དེ་ལྟར་དྲེགས་པའི་རྐྱེན་དུ་གྱུར་བ་དེ་དག་སྤངས་ནས། བརྟུལ་ཞུགས་གནས་ཞེས་བརྗོད་པ་ཡིན། །ཞེས་བྱ་བ་
[42a.2]སྟེ། བསླབ་པ་ལ་གནས་ཞེའམ་སྡོམ་པ་དང་ལྡན་ཞེས་བྱ་བ་ཡིན་ནོ། །འདི་ཡན་ཆད་དུ་དགེ་ཚུལ་གྱི་བསླབ་ཚིགས་བཅུའི་དངོས་ལས་བརྒྱད་ནི་འདས། ད་ནི་དགུ་པ་ལ་བབ་སྟེ། ཉི་མ་ཕྱེད་མན་ཆད་ཟས་མི་བཟའ་བ་འཆད་དེ། ཉི་མ་ཕྱེད་མཚམས་མན་ཆད་ནས། །སྐྱ་རེངས་མ་ཤར་དུས་
[42a.3]མིན་ཏེ། །ཞེས་བྱ་བ་ནི་སྐྱ་རེངས་ལ་རྣམ་པ་གསུམ་སྟེ། སྔོ་རེང་དང་། སེར་རེང་དང་། དམར་རེང་ངོ་། །དེ་ལ་སེར་རེང་མེད་པའི་ཚད་ཀྱིས་བཟུང་སྟེ། དེ་ནི་རྒྱལ་བས་དུས་མིན་གསུངས། །ཞེས་བྱ་བ་ནི་ཉི་མ་ཕྱེད་མན་ཆད་ནས་སྐྱ་རེངས་མ་ཤར་གྱི་བར་དུ་ཁ་ཟས་བཟའ་བའི་དུས་མ་ཡིན་ནོ་ཞེས་བདུད་
[42a.4]བཞི་ལས་རྒྱལ་བའི་རྒྱལ་བས་གསུངས་སོ། །སྡོམ་ཅན་གྱིས་ནི་དེར་མི་བཟའ། །ཞེས་བྱ་བ་ནི་བསླབ་པ་ལ་གནས་པས་དུས་མ་ཡིན་པ་དེར་བཟའ་བ་ལྔ་དང་བཅའ་བ་ལྔ་དག་མི་བཟའོ། །སྐྱ་རེངས་ཤར་ནས་ཕྱེད་ཀྱི་བར། །ཞེས་བྱ་བ་ནི་དུས་གང་དག་ཏུ་བཟའ་ཞེ་ན། སྐྱ་རེངས་ཤར་ནས་ཉི་མ་ཕྱེད་ཀྱི་
[42a.5]བར་དུ་བཟའོ། །དེ་ཡི་སྐབས་སུ་ཟོས་ནས་ནི། །ཞེས་བྱ་བ་ནི། བདག་གིས་ཀྱང་དུས་སུ་ཟོས་པར་ཤེས་པ་དང་སྡོམ་པ་ལ་གནས་པའོ་ཞེས་བྱ་བའི་དོན་ཏོ། །དེ་ལས་བཟློག་པ་ནི་བདག་ཤེས་པའི་སྡོམ་པ་མ་ཡིན་ནོ། །བཟའ་བའི་དུས་སུ་ཟོས་པ་ཡིན། །ཞེས་བྱ་བ་ནི་དེ་ལྟར་སྐྱ་རེངས་ཤར་ནས་ཉི་མ་
[42a.6]ཕྱེད་ཕྱེད་ཀྱི་བར་དུ་ཡང་ཡིན་ལ། དུས་ཡིན་པར་ཡང་འདུ་ཤེས་ཡོད་བཞིན་དུ་ཟོས་པ་ནི་བཟའ་བའི་དུས་སུ་ཟོས་པ་ཡིན་ཞེས་བྱའོ། །དུས་མིན་དུས་སུ་འདུ་ཤེས་ནས། །ཞེས་བྱ་བ་ནི་ཉི་མ་ཕྱེད་ཙམ་ཕན་ཆད་ནས་སྐྱ་རེངས་མ་ཤར་གྱི་བར་དུ་བཟའ་བའི་དུས་མ་ཡིན་པ་ལ་དུས་སོ་ཞེས་འདུ་ཤེས་པར་བྱས་
[42a.7]ནས་ནམ་ཡང་བཟའ་བར་མི་བྱ་སྟེ། དུས་མ་ཡིན་པ་ལ་འདུ་ཤེས་སོ་ཞེས་འདུ་ཤེས་པར་བྱས་ནས། ནམ་ཡང་བཟའ་བ་ལྔ་དང་བཅའ་བ་ལྔ་དག་བཟའ་བར་མི་བྱའོ། །སྨན་པས་ཉོན་མོངས་བསྒོ་ནས་ནི། །ཞེས་བྱ་བ་ནི་ན་བའི་རྐྱེན་ཅིག་གིས་ཉི་མ་ཕྱེད་མན་ཆད་ནས་སྐྱ་རེངས་མ་ཤར་གྱི་བར་དུ་བཟའ་བའི་
[42b]
[42b.1]དུས་མ་ཡིན་པའི་ཚེ། སྨན་དཔྱད་ཀྱིས་དེར་ཁ་ཟས་མ་ཟོས་ན་ཉེན་ཆེད་པོར་འགྱུར་གྱིས་ཁ་ཟས་ཟོ་ཤིག་ཅེས་བསྒོ་ན། ནད་པས་ཉེས་པར་མི་འགྱུར་རོ། །འདི་མན་ཆད་ནི་དགེ་ཚུལ་བའི་བསླབ་ཚིགས་བཅུའི་དངོས་པོ་ལས་དགུ་ནི་འདས། ད་ནི་བཅུ་ལ་བབ་སྟེ། གསེར་དངུལ་ལ་མི་རེག་པ་འཆད་
[42b.2]དོ། །ས་ལེ་སྦྲམ་ནི་གསེར་ཡིན་ཏེ། །ཞེས་བྱ་བ་ནི་རྒྱ་གར་ལས་གཟུགས་དངུལ་ཅན་ཞས་བྱ་བ་འབྱུང་སྟེ། གསེར་དངུལ་ཞེས་བྱ་བ་གོ་རིམས་བཞིན་དུ་སྦྱར་ཏེ། དངུལ་ཞེས་བྱ་བ་དངུལ་ཉིད་ཡིན། །ཞེས་བྱ་བའོ། །སྦྱིན་བདག་རྣམས་ཀྱིས་དེ་བྱིན་ཞེས་བྱ་བ་ནི་བདག་གི་གསེར་དངུལ་ཡིན་
[42b.3]པ་བདག་གི་འདུ་ཤེས་པ་ལ་ཉེས་པར་མ་གྱུར་ཏེ། དེ་བས་ན་སྦྱིན་བདག་གིས་ཡིན་པས་རྒྱལ་པོའམ་དད་པའི་བྲམ་ཟེ་ལ་སོགས་པས་བྱིན་ན། བརྟུལ་ཞུགས་ཅན་གྱིས་མི་བླང་ངོ་། །ཞེས་བྱ་སྟེ། བསླབ་པ་ལ་གནས་པའི་སྡོམ་པ་ཅན་གྱིས་སོ། །བདག་གིས་རུང་བ་མ་ཡིན་འདིས། །
[42b.4]ཞེས་བྱ་བ་ནི། གསེར་དངུལ་དེ་དག་དགེ་ཚུལ་གྱིས་བཟུང་བར་མ་བརྟགས་པ་ཡིན་པས་ན་གསེར་དངུལ་འདིས་རུང་བའི་དངོས་པོ་བཙལ་སྙམ་དུ་ཞེས་བྱ་བ་སྟེ། ལྷུང་བཟེད་དམ་ཆོས་གོས་སམ་སྨན་དག་ཏུ་བསྒྱུར་རོ། །དེ་ལྟར་མངོན་པར་བསམས་ནས་ནི། །ཞེས་བྱ་བ་ནི་གོང་དུ་སྨྲས་པ་ལྟར་
[42b.5]བསམ་པ་མངོན་པར་འདུ་བྱས་ནས། དེ་ནས་གཞན་ཞིག་ལེན་དུ་གཞུག །ཅེས་བྱ་བ་ནི་དེ་ནས་གདོད་གཡོག་གམ་སྐྱེ་བོ་དག་ལེན་དུ་གཞུག་གོ། །དཀོན་མཆོག་གསུམ་གྱི་ཆེད་ཀ་དང་། །ཞེས་བྱ་བ་ནི་དཀོན་མཆོག་གསུམ་ལ་གསེར་དངུལ་གྱིས་མཆོད་པ་ལ་ནི་ཉེས་པ་མེད་དོ། །ཚངས་
[42b.6]པ་མཚུངས་པར་སྤྱོད་རྣམས་ཀྱི། །ཞེས་བྱ་བ་ནི་དགེ་སློང་དང་དགེ་ཚུལ་གྲོགས་པོ་དག་གི་སྟེ། མདོར་ན་བདག་གིས་མ་ཡིན་པའི། །གསེར་དང་དངུལ་ལ་རེག་གྱུར་ཀྱང་། །ཞེས་བྱ་བ་ནི་རིན་པོ་ཆེ་དག་བསྡུས་ཏེ། དེ་དག་ལ་བདག་གིས་རེག་ཅིང་བཟུང་ཡང་། ཉེས་པར་འགྱུར་བ་མ་ཡིན་ནོ་ཞེས་
[42b.7]བྱ་བ་སྟེ། བསླབ་པ་ཉམས་པར་མི་འགྱུར་རོ། །འདི་མན་ཆད་ནི་དགེ་ཚུལ་དང་། བླ་མ་དང་། འོག་མའི་ཁྱད་པར་དང་རིམ་པར་སྟོན་ཏོ། །འདོད་པས་བར་དུ་གཅོད་བྱེད་ཅེས། །རྫོགས་སངས་རྒྱས་ཀྱིས་གསུངས་པ་དེ། །བར་དུ་གཅོད་པར་མི་འགྱུར་ཞེས། །དགེ་ཚུལ་གཏི་མུག་མ་སྨྲ་ཤིག །
[43a]
[43a.1]ཅེས་བྱ་བ་ནི་སྡེ་བཅས་པའི་དགེ་ཚུལ་ཀཎྜ་ཀ་དང་མ་ཧཱ་ཞེས་བྱ་བ་གཉིས་ཡོད་དེ། དེ་སྐད་ཅེས་ཟེར་བ་ལས་བཅས་ཏེ། དགེ་ཚུལ་བག་མེད་པ་བྱུང་རྒྱལ་དུ་སྨྲ་བ་ཁ་ཅིག་འདི་སྐད་ཅེས་ཟེར། འདོད་པ་དེ་དག་བར་དུ་སྤྱད་ཀྱང་དགེ་བ་སྤྱོད་པ་དང་ཐར་བར་འགྱུར་བ་ལ་བར་དུ་གཅོད་བྱེད་
[43a.2]ཅེས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་པ་དེ་སྤྱད་ཀྱང་། དག་པ་སྤྱོད་པ་དང་ཐར་པར་འགྱུར་བ་དག་གི་བར་ཆད་དག་ཏུ་མི་འགྱུར་རོ། །དགེ་ཚུལ་ཞེས་དགེ་ཚུལ་གཏི་མུག་པ་དག་ལ་མ་སྨྲ་ཤིག །དེ་སྐད་སྨྲས་ན་དགེ་འདུན་གྱིས། །ཞེས་བྱ་བ་ནི་དགེ་ཚུལ་གྱིས་
[43a.3]གོང་མ་སྐད་དུ་སྨྲས་ན། དེ་ནི་དགེ་འདུན་གྱིས། ལོངས་སྤྱོད་ཀུན་དང་ཕྲལ་ནས་ནི། །ཞེས་བྱ་སྟེ། ཆོས་ཀྱི་ལོངས་སྤྱོད་དང་། ཟང་ཟིང་གི་ལོངས་སྤྱོད་དང་བྲལ་ནས། གཙུག་ལག་ཁང་ནས་བསྐྲད་པར་བྱ། །ཞེས་བྱ་བ་ནི་གཙུག་ལག་ཁང་གི་ནང་ནས་གཎྜཱི་བརྡུངས་ཏེ། མཚམས་ཀྱི་ཕྱི་རོལ་དུ་
[43a.4]ཕྱུང་སྟེ་བསྐྲད་པའོ། །དེ་ནས་རོ་དང་འདྲ་བར་འགྱུར། །ཞེས་བྱ་བ་ནི་དགེ་བའི་ཕྱོགས་ཉམས་པའམ་ཞིག་པས་དགེ་ཚུལ་དེ་རོ་དང་འདྲ་སྟེ་ཇི་ལྟར་རོ་ལ་ཡོན་ཏན་མེད་པ་བཞིན་དུ། དེ་ཡང་དགེ་བའི་ཕྱོགས་ཉམས་པས་རོ་དང་འདྲའོ། །ཡང་ན་རོ་དང་འདྲ་བར་བྱས་ནས་བསྐྲད་ཅེས་འབྱུང་བས་ན།
[43a.5]ཤི་བའི་གཎྜཱི་བརྡུངས་ཏེ་བསྐྲད་པའི་ཕྱིར་རོ། །འཕྱར་དང་རྟ་གད་བྱེད་ལ་སོགས། །ཞེས་བྱ་བ་ནི་དགེ་བའི་ཕྱོགས་ལ་སེམས་མི་གནས་ཤིང་། སྔོན་དགོད་པ་ལ་སོགས་པ་བྱེད་པ་དག་དྲན་ནམ་འཕྱར་རམ་གཡེང་བ་ལ་སོགས་པ་མི་བྱའོ། །བླ་མ་དང་དགེ་འདུན་གྱི་མདུན་དུ་རྟ་གད་ལ་སོགས་པ་རྩེད་
[43a.6]མོའི་བག་མི་བྱའོ། །འཆི་བར་བསམས་ཤིང་མི་བྱའོ། །ཞེས་བྱ་བ་ནི་རྐྱེན་གང་ལ་བསམ་སྟེ་མི་བྱ་ཞེ་ན། འཆི་བ་ལ་བསམས་ནས་སོ། །ཅིའི་ཕྱིར་ཞེ་ན། སྐད་ཅིག་མ་སྟེ། དགེ་ཚུལ་དག་སྐད་ཅིག་མ་ལ་འཆི་ཞེས་གསུངས་པ་ལྟ་བུའོ། །གཞན་ཡང་མི་རྟག་པ་ཆེན་པོ་འཆི་བ་དེ་འུ་རེ་འོང་སྟེ།
[43a.7]ཇི་ཙམ་ན་འང་བ་གཏོལ་མེད་པས་བསོད་ནམས་མ་བསགས་པར་འཆི་ན་མི་རུང་ངོ་ཞེས་དེ་ལྟ་བུར་བསམས་ནས་མི་བྱའོ། །གླལ་ཚེ་ལག་པས་ཞེས་པ་ནི་སྔོན་དགེ་སྦྱོང་ཞིག་ཁ་གླལ་བའི་ཚེ་ན་གཅིག་གིས་དེར་ཕོ་མཚན་བཅུག་པ་ལས་བཅས་པ་ལྟ་བུའོ། །དགེ་ཚུལ་ལ་དགེ་འདུན་གྱི་ནང་དུ་འདུག་གམ་བླ་
[43b]
[43b.1]མའི་ཚེ་གླལ་བྲོ་ན་ཁ་མི་གདོང་ཞིང་དགབ་པར་བྱའོ། །སྒྲེགས་པ་ནི་དྲི་ང་བའི་ཕྱིར་ཁ་དགབ་པར་བྱའོ། །སོགས་པ་ཡིས་ཞེས་བྱ་བ་ནི་གོས་དག་གི་མཐའ་འམ། ལོ་མ་དག་གིས། ཁ་དགབ་པར་ཡང་ནན་ཏན་བྱ། །ཞེས་བྱ་བ་སྟེ་རིམ་གྲོ་དང་ནན་ཏན་དག་བྱའོ། །རྒན་ལ་སྦྲིད་བྱུང་ཕྱག་བྱ་སྟེ། །
[43b.2]ཞེས་བྱ་བ་ནི་བླ་མའམ་གོང་མའི་ཁྱད་པར་བསྟན་ཏེ། བདག་པས་རྒན་པ་ཞིག་ཡིན་ན་ནི་དགེ་ཚུལ་དང་། དགེ་སློང་གང་ཡང་རུང་སྟེ། དེ་དག་སྦྲིད་པ་བྱུང་ནས་ཕྱག་བྱའོ། །གཞོན་ལ་ནད་མེད་གྱུར་ཅེས་བྱ། །ཞེས་བྱ་བ་ནི་བདག་པས་ཁྲིམས་ཀྱིས་གཞོན་པ་ལ་སྦྲིད་པ་བྱུང་ན་ནི་ནད་མེད་གྱུར་ཅེས་བྱའོ། །
[43b.3]ཁྱིམ་པའི་སྦྲིད་པ་བྱུང་བ་ལ། །ཡུན་རིངས་སོས་ཞེས་བརྗོད་པར་བྱ། །ཞེས་བྱ་བ་ནི་ཁྱིམ་པ་ཕོ་མོ་དག་ལ་སྦྲིད་པ་བྱུང་ན་ཡུན་དུ་འཚོ་བར་ཤོག་ཅིག་ཅེས་བྱའོ། །བླ་མ་རྣམས་ཀྱི་མདུན་དག་ཏུ། །སྣབས་དང་མཆིལ་མ་མི་འདོར་ཞིང་། །སོ་ཤིང་བཅའ་བར་མི་བྱའོ། །ཞེས་བྱ་བ་ནི་མཁན་པོ་དང་
[43b.4]སློབ་དཔོན་བདག་པས་རྒན་པ་དང་། མཆོད་རྟེན་དག་གི་མདུན་དག་ཏུ་སྣབས་དང་མཆིལ་མ་དང་སོ་ཤིང་བཅའ་བ་དང་། འཁྲུལ་པའི་བག་ཐམས་ཅད་མི་འདོར་རོ། །ས་གཞན་དུ་མཆིལ་མ་འདོར་ན་ཡང་སེ་གོལ་བརྡབས་ཏེ་དོར་བར་བྱའོ། །དེ་བཞིན་སྟན་ལ་མི་འདུག་གོ། །བླ་མ་དག་
[43b.5]འཆག་གམ་འགྲོ་བའི་མདུན་དུ་སྟན་ལ་འདུག་པར་མི་བྱའོ། །མདུན་ན་འཆག་པར་མི་བྱ་ཞིང་། །ཞེས་བྱ་བ་ནི་ཆོས་འཆད་པ་ལ་སོགས་པའི་ཚེ་དེ་དག་གི་མདུན་དུ་འཆག་པར་མི་བྱའོ། །ཁྱེད་རེངས་སུ་ཡང་མི་འབྱུང་སྟེ། །ཞེས་བྱ་བ་ནི་ཤམ་ཐབས་འབའ་ཞིག་གོན། ཆོས་གོས་མ་གྱོན་
[43b.6]པར་འདུག་པར་མི་བྱའོ། །རྒན་ལ་སོགས་པ་སྡོམ་ཅན་གྱི། །ཞེས་བྱ་བ་ནི་མཁན་པོ་དང་སློབ་དཔོན་བདག་པས་གཞོན་པ་ལ་ཡང་ཡོན་ཏན་ཆེ་བ་མཁས་ཤིང་མང་ལ་ཡོན་ཏན་གྱིས་བརྒྱན་པ་ལ། གུས་བཅས་ཞེ་སར་བཅས་པར་བྱ། །ཞེས་བྱ་བ་ནི་འདུད་པ་དང་། གུས་པ་དང་། ཕྱག་
[43b.7]བཅལ་བ་དང་། རྗེ་ས་བྱའོ། །ལག་པ་དག་པར་བསྙལ་ནས་ནི། །ཞེས་བྱ་བ་ནི་བདག་ཉིད་སྔར་ལག་པ་དྲི་མ་མེད་པར་ནན་ཏན་དུ་བསྙལ་ནས། བུམ་པ་ལ་སོགས་རྡུལ་མེད་བྱ། །ཞེས་བྱ་བ་སྟེ། རྫ་མ་ལ་སོགས་པ་ཆུ་སྣོད་ཆེ་ཆུང་ཀུན་རྡུལ་དང་དྲི་མ་དག་མེད་པར་བྱས་ནས་སོ། །ཆུ་ཡང་ཡོངས་
[44a]
[44a.1]སུ་བཙགས་ནས་སུ། །ཞེས་བྱ་བ་ནི་དགོས་པའི་དོན་དུ་ཆུ་ཀུན་བཙགས་ཏེ། ལ་ལ་མ་བཙགས་པ་ལྟ་བུ་མ་ཡིན་གྱི། ཐམས་ཅད་བཙགས་པའི་ཐ་ཚིག་གོ། །བརྟགས་ཏེ་རུང་ན་བླང་བར་བྱ། །ཞེས་བྱ་བ་ནི་ཆུ་བཙགས་པ་འབའ་ཞིག་གིས་མི་ཆོག་གོ། །ཡིད་ཆེས་པར་བརྟགས་
[44a.2]ཏེ་སེམས་ཅན་མེད་པར་གྱུར་པའི་ཆུ་དེ་ནི་རུང་བྱའོ། །གནས་མ་བཅས་པར་གནས་མི་བྱ། །ཞེས་བྱ་བ་ནི་མཁན་པོ་དག་མེད་ན་ཡང་བདག་གར་འོངས་པའི་གནས་དེ་ན། དགེ་སློང་ཡོན་ཏན་ཅན་ཆོས་འདུལ་བ་ལ་མཁས་པ་དགེ་སྦྱོང་འཆོས་ཤིང་འདུལ་ནུས་པ་ལ་གསོལ་བ་བཏབ་སྟེ་གནས་པར་
[44a.3]བྱའོ། །དགེ་འདུན་མལ་ཆ་ལ་སོགས་ལ། །ཞེས་བྱ་བ་ནི། དགེ་འདུན་གྱི་སྔས་དང་གློ་གནས་དགབ་པ་དང་། འོག་ཏུ་གདིང་བ་དག་བསྡུའོ། །དྲན་པ་མེད་པར་འདུག་མི་བྱ། །ཞེས་བྱ་བ་ནི་གང་ཟག་གོང་བཞིན་དུ་སྤྱད་དུ་མི་རུང་སྟེ། མཐའ་ལ་གཞར་ཡང་ཅི་ནས་ཀྱང་དགེ་འདུན་གྱི་མལ་ཆ་དག་ལ་
[44a.4]མི་གནོད་པ་དྲན་པ་ཉེ་བར་གཞག་ནས་འདུག་པར་བྱའོ། །སྔོན་དགེ་སྦྱོང་རྒྱབ་ནག་ལྟར་གདིང་བ་མེད་པར་དགེ་འདུན་གྱི་མལ་ཆ་དང་སྟན་དག་ལ་ཤམ་ཐབས་རེག་པར་མི་བྱའོ། །དྲན་དང་ལྡན་ན་ཉེས་མེད་དོ། །ཞེས་བྱ་བ་ནི། དགེ་འདུན་གྱི་མལ་ཆ་དང་སྟན་དག་ལ་ཤམ་ཐབས་ཀྱིས་མི་རེག་པར་
[44a.5]འདུག་གོ། །དྲན་པ་དང་ལྡན་བཞིན་པ་ལ་ཉེས་པ་མེད་དོ། །འདི་མན་ཆད་ནི་མཁན་པོ་དག་ལ་མ་ཞུས་ཀྱང་ཉེས་པ་མེད་པ་སྟོན་ཏེ། སོ་བཀྲུ་བ་དང་ཆུ་བཏུང་དང་། །ཞེས་བྱ་བ་ནི། སོ་ཤིང་བཟའ་བ་དང་། བཀྲུ་བ་དང་། རྐང་ལག་བཀྲུ་བ་དང་། སྐོམ་ཆུ་བཏུང་བ་དང་། འདི་དག་ཞུ་མི་དགོས་སོ། །བཤང་
[44a.6]གཅི་བྱེད་དུ་འགྲོ་བ་དང་། །ཞེས་བྱ་བ་ནི་ཕྱི་རོལ་ཆེ་ཆུང་དུ་འགྲོ་བ་དག་གོ། །མཚམས་ནང་སྟོན་ལ་ཕྱག་བྱ་བ། །ཞེས་བྱ་བ་ནི་མཚམས་ཀྱི་ནང་དུ་སྐུ་གཟུགས་དང་མཆོད་རྟེན་ལ་ཕྱག་བྱའོ། །དེ་དག་མ་ཞུས་ཉེས་མེད་དོ། །ཞེས་བྱ་བ་ནི་སོ་ཤིང་ཟ་བ་ནས་སྟོན་པའི་སྐུ་གཟུགས་དག་ལ་ཕྱག་བྱ་བའི་བར་དུ་མ་ཞུས་ཀྱང་ཉེས་པ་
[44a.7]མེད་དོ། །བརྟུལ་ཞུགས་ཅན་གྱིས་བྱ་བ་གཞན། །ཞེས་བྱ་བ་ནི། བསླབ་པ་ལ་གནས་པས་གོང་དུ་མིང་སྨོས་པ་རྣམས་མ་གཏོགས་པ་གཞན་ཐམས་ཅད་ཞུའོ། །དེ་དག་ཐམས་ཅད་ཡིད་ཀྱིས་བསྡམས་པའི་ཉེས་བྱས་སུ་འགྱུར་རོ། །མཆོད་རྟེན་ལ་སོགས་ཕྱག་བྱ་སྟེ། །ཞེས་བྱ་བ་
[44b]
[44b.1]ནི་མཆོད་རྟེན་ལ་སོགས་པའི་དོན་ཏོ། །མི་ཉལ་བྱས་ན་དེ་འོག་ཏུ། །ཞེས་བྱ་བ་ནི་སྲོད་ལ་དགེ་བ་ཁ་ཏོན་དག་བྱས་ནས། བླ་མའི་རྐང་བཀྲུས་བླ་མ་ལ། །ཞེས་བྱ་བ་ནི་མཁན་པོ་དང་སློབ་དཔོན་དག་སྲོད་ལ་དགེ་བ་བྱས་ནས་ཉལ་བའི་ཚེ་དེ་དག་གི་རྐང་པ་དག་བཀྲུའོ། །བརྟུལ་ཞུགས་ཅན་གྱིས་ཀུན་ཞུས་ཏེ། །
[44b.2]ཞེས་བྱ་བ་ནི་བསླབ་པ་ལ་གནས་པས་མལ་དག་བྱའོ། །རྐང་ལག་བཀྲུའོ། །སྲོད་ཐོ་རངས་ཀྱི་དགེ་བ་དག་འཚལ་ལོ་ཞེས་དེ་དག་ཀུན་ཞུའོ། །རྐང་པ་གཉིས་ཀ་བཀྲུས་ནས་ནི། །ཞེས་བྱ་བ་ནི་བདག་ཉིད་ཀྱི་རྐང་བ་བཀྲུ་བར་བྱ་བའི་དོན་ཏོ། །ནམ་གྱི་ཆ་སྟོད་ཆ་སྨད་ལ། །ཞེས་བྱ་བ་ནི་མཚན་
[44b.3]གཅིག་ལ་ཐུན་བཞིར་བགོས་པའི་ཐུན་དང་པོ་དང་ཐ་མ་གཉིས་སོ། །ཡང་ན་སྲོད་དང་ཐོ་རངས་གཉིས་སོ། །བསྒྲིམས་ཏེ་མི་ཉལ་བྱ་བ་སྟེ། །ཞེས་བྱ་བ་ནི་ལྟག་ཏུ་སྨོས་པ་དེ་དག་ལ་བསྒྲིམས་ཏེ་མི་ཉལ་བར་བགྱིའོ། །དེས་ནི་བདེན་པར་སྨྲ་བར་བྱ། །ཞེས་བྱ་བ་ནི་ཇི་ལྟར་ཞུས་པ་དེ་བཞིན་དུ་
[44b.4]བསྒྲིམས་ཏེ་བྱས་ན་ནི་བརྫུན་དུ་མི་འགྱུར་གྱི། ཇི་སྐད་དུ་ཞུས་པ་དེ་བཞིན་དུ་མ་བྱས་ན་ཤེས་བཞིན་གྱི་བརྫུན་ཡང་བྱས་སོ་ཞེས་པའི་དོན་ཏོ། །ལྡང་དང་སྣང་བའི་འདུ་ཤེས་ཀྱིས། །ཞེས་བྱ་བ་ནི་ནམ་འདི་ཙམ་ན་ལྡང་ངོ་ཞེས་ནམ་གྱི་མཚན་མ་ཡིད་ལ་སྣང་བར་བྱས་ནས། དེ་ཁོ་ནའི་དུས་སུ་སད་པར་
[44b.5]འགྱུར་བའི་ཕྱིར་ལྡང་དང་སྣང་བའི་མཚན་མ་ཡིད་ལ་བྱའོ། །སེང་གེའི་ཉལ་ཐབས་བཞིན་དུ་བྱ། །ཞེས་བྱ་བ་ནི་ཇི་ལྟར་གཅན་གཟན་གྱི་རྒྱལ་པོ་སེང་གེ་ལག་པ་གཡས་པ་འོག་ཏུ་བཅུག་སྟེ་ཉལ་བ་དེ་བཞིན་དུ། ལག་པ་གཡས་པ་འགྲམ་པའི་འོག་ཏུ་བཅར་ཏེ། གཡས་ཕྱོགས་སུ་ཉལ་བའོ། །འདོད་
[44b.6]ཆགས་ལ་སྤྱོད་པ་དག་གི་གཡོན་ཕྱོགས་སུ་ཉལ་བས། འདོད་ཆགས་སྤང་བར་སྦྱོར་བ་ཀུན་གཡས་ཕྱོགས་ཀྱིས་ཉལ་བའི་ཕྱིར། དེ་བཞིན་གཤེགས་པ་མྱ་ངན་ལས་འདས་པ་དང་དེ་ལྟ་བུའི་ཚུལ་དུའོ། །དྲན་དང་ལྡན་ཞིང་དགེ་རྒྱུད་དང་། །ཞེས་བྱ་བ་ནི་དེ་ལྟར་དྲན་པ་དང་ལྡན་པར་བྱས་ནས་
[44b.7]ཉལ་ཀར་ཡང་དཀོན་མཆོག་གསུམ་དང་། མཆོད་རྟེན་ཆེན་པོ་བརྒྱད་ལ་སོགས་པ་དགེ་བའི་རྒྱུན་དུ་བྱས་ནས་ཉལ་ན་རྨི་ལམ་ན་ཡང་དགེ་བ་སྤྱོད་པའི་ཕྱིར་རོ། །དེ་བཞིན་མྱུར་དུ་སད་ནས་ནི། །དེ་ལྟར་བྱས་ནས། ཇི་སྐད་བསྟན་པ་བཞིན་དུ་བྱ། །ཞེས་བྱ་བ་ནི། ཇི་སྐད་ཞུས་པ་དང་། གོང་
[45a]
[45a.1]དུ་བསྟན་པ་བཞིན་དུ་བྱའོ། །ཇི་ལྟར་ཉོན་མོངས་མྱུར་ཟད་དང་། །ཞེས་བྱ་བ་ནི་དེ་དག་འདོར་ཅི་དགོས་ཤེ་ན། ཉོན་མོངས་པ་ལས་འབྱུང་ངོ་། །ལས་ལས་ཀྱང་ཚེ་འབྱུང་ངོ་། །ཚེ་ལས་ཀྱང་ཉོན་མོངས་པ་འབྱུང་བའི་ཕྱིར་ཏེ། རྟེན་ཅིང་འབྲེལ་ཏེ་འབྱུང་བ་ཡང་ཚུལ་དེ་ལྟ་བུ་ལགས་
[45a.2]ཏེ། དེ་ལྟ་བས་ན་ཉོན་མོངས་པའི་དུག་ཟད་པར་བྱ་བ་ཆེད་ཆེའོ། །བྱང་ཆུབ་དམ་པ་ཐོབ་འགྱུར་བ། །ཞེས་བྱ་བ་ནི་ཉན་ཐོས་དག་བྱང་ཆུབ་ཡིན་མོད་ཀྱི། དེ་དག་དམ་པ་མ་ཡིན་པས་དེ་དག་ལ་ནི་མི་བྱའོ། །བླ་ན་མེད་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ལ་དམ་པ་ཞེས་བྱའོ། །དེ་
[45a.3]ལ་བྱང་ཆུབ་གོང་མར་བསྒྲུབས་སོ། །མ་ནུས་ན་ཞར་ལ་འགྲུབ་པས་བླ་ན་མེད་པའི་བྱང་ཆུབ་འཐོབ་པར་འགྱུར་བ་ལ། དེ་ལྟར་བསྒྲིམས་དང་ལྡན་པར་བྱ། །ཞེས་བྱ་བ་ནི་སྨོན་ལམ་གདབ་པ་དང་ལྡན་པར་བྱའོ། །ཐམས་ཅད་ཡོད་པར་སྨྲ་བ་རྣམས་ཀྱི་དགེ་ཚུལ་གྱི་བྱ་བ་རྫོགས་སོ།། །།
[45a.4]{T4130}༄༅། །རྒྱ་གར་སྐད་དུ། ཤྲ་མ་ཎི་ར་ཤིཀྵ་པ་དཱད་སྲུ་ཏྲ། བོད་སྐད་དུ། དགེ་ཚུལ་གྱི་བབེེབ་སྣོ་པའི་གཞིའི་མདོ། ཐམས་ཅད་མཁྱེན་པ་ལ་ཕྱག་འཚལ་ལོ། །སངས་རྒྱས་ཆོས་དང་ཚོགས་ཀྱི་མཆོག །དགེ་འདུན་ལ་ཡང་ཕྱག་འཚལ་ཏེ། །དགེ་ཚུལ་ཆེད་དུ་བྱ་བ་ཡི། །མདོ་ནི་ཅུང་ཟད་
[45a.5]བཤད་པར་བྱ། །དེ་བཞིན་གཤེགས་པས་དགེ་ཚུལ་རྣམས་ཀྱི་བསླབ་པའི་གཞི་བཅུ་པོ་གང་དག་མདོར་བསྡུས་ཏེ་གསུངས་པ་ནི་འདི་ལྟ་སྟེ། སྲོག་གཅོད་པ་སྤོང་བའི་བསླབ་པའི་གཞི་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་དང་སྦྱར་
[45a.6]བའི་ཆང་མྱོས་པར་འགྱུར་བ་བག་མེད་པའི་གནས་དང་། གར་དང་གླུ་དང་རོལ་མོའི་སྒྲ་དང་། ཕྲེང་བ་དང་། སྤོས་འབྱུག་པ་དང་། རྒྱན་དང་ཁ་དོག་འཆང་བ་དང་། མལ་མཐོན་པོ་དང་། མལ་ཆེན་པོ་དང་། དུས་མ་ཡིན་པའི་ཁ་ཟས་དང་། གསེར་དངུལ་ལེན་པ་སྤོང་བའི་བསླབ་པའི་གཞི་ཞེས་བྱ་བའོ་ཞེས་
[45a.7]བྱ་བ་འདི་ནི་བཅོམ་ལྡན་འདས་ཀྱིས་བསླབ་པའི་གཞི་བཅུ་པོ་མདོར་བསྡུས་ཏེ་གསུངས་པ་ཡིན་ནོ། །གང་ཡང་བཙུན་པ་ཤཱཀྱ་འོད་ཀྱིས་དེ་དག་ཏུ་གཏོགས་པའི་ཚིག་ལེའུར་སྦྱར་བ་དང་། གང་ཡང་ཁོ་བོས་སློབ་དཔོན་དང་མཁན་པོ་དག་ལས་ཅུང་ཟད་བསླབ་པའི་ཕྱིར་ཁོ་བོས་ཚངས་པ་མཚུངས་པར་སྤྱོད་
[45b]
[45b.1]པ་རྣམས་ཀྱི་དོན་དུ་མདོ་ཅུང་ཟད་བརྩམ་པར་བྱའོ། །སྲོག་གཅོད་པ་སྤོང་བ་ཞེས་བྱ་བ་ནི་བསམས་བཞིན་དུ་བུད་མེད་དང་སྐྱེས་པ་དང་མ་ནིང་དང་། ལྷའི་འགྲོ་བར་གཏོགས་པའི་སྲོག་གཅོད་པར་མི་བྱེད་ཅིང་། གཞན་གྱི་སྒོ་ནས་ཀྱང་མི་བྱེད་པ་དང་། སྔགས་པ་ལ་སོགས་པ་ལ་ཐབས་ཀྱིས་གསོད་པར་མི་
[45b.2]བྱེད་པ་དང་། གསད་པར་བྱ་བའི་ཕྱིར་བཟུང་བ་དང་། གསོད་བཞིན་པ་དང་། གསོད་པ་ལ་བག་མེད་པར་མི་བྱེད་པ་དང་། སྲོག་གཅོད་པ་མཐོང་བ་ལ་ཡིད་དགའ་བར་མི་བྱེད་པ་དང་། ཐམས་ཅད་དུ་བྱ་བ་མ་ཡིན་པ་ལ་རྗེས་སུ་ཡི་རང་བར་མི་བྱེད་ལ། སྦྱོར་བར་ཡང་མི་བྱེད་ཅིང་གཞན་དག་ལ་སྲོག་
[45b.3]གཅོད་པར་ཡང་དག་པར་འཛིན་དུ་མི་འཇུག་པ་དང་། སྲོག་ཆགས་གྲོག་སྤུར་ཕྲ་མོ་རྣམས་ཀྱང་བསམས་བཞིན་གསོད་པར་མི་བྱེད་པའོ། །སྲོག་ཆགས་དང་བཅས་པའི་ཆུ་ལ་སོགས་པ་ལོངས་སྤྱད་པར་མི་བྱའོ། །དྲན་པ་དང་ཤེས་བཞིན་དང་ལྡན་པ་རྣམས་ཉི་མ་ཤར་བ་ན་ཆུ་ལ་སོགས་པ་བརྟག་པར་
[45b.4]བྱ་ཞིང་མི་གཡོ་བ་འདི་ལ་བརྟག་པར་བྱ་སྟེ། ལྷའི་མིག་གིས་མ་ཡིན། ཡུན་རིང་དུ་མ་ཡིན། མྱུར་བར་མ་ཡིན་ཞིང་། དུས་ཇི་སྲིད་ཀྱིས་སེམས་དག་པའི་དུས་དེ་སྲིད་དུ་བརྟག་པར་བྱའོ། །བརྟགས་པ་འདི་ཡང་ཇི་སྲིད་དུ་ཉི་མ་མ་ཤར་བ་དེ་སྲིད་དུ་ལོངས་སྤྱད་དུ་རུང་བ་ཡིན་ནོ། །བཙགས་པ་
[45b.5]ལ་སོགས་པ་དང་འབྲེལ་པ་སྐྱོན་མེད་པར་བྱས་ནས་བརྟགས་པའི་ཆུ་ལམ་དུ་འགྲོ་བའི་ཚེ་རྒྱང་གྲགས་ལྔའི་བར་དུ་བཏུང་བར་བྱའོ། །ཆུ་ཚགས་ལྔ་པོ་རྣམས་ཀྱི་ནང་ནས་གདོན་མི་ཟ་བར་ཆུ་ཚགས་གཅིག་བཅངས་ནས་ལམ་དུ་འགྲོ་བར་བྱའོ། །ཆུ་ཚགས་ལྔ་ནི་ཆུ་ཚགས་གྲུ་གསུམ་དང་། བུམ་
[45b.6]ཚགས་དང་རིལ་བ་ཞབས་ཚགས་ཅན་དང་། བུམ་ཚགས་གཅེའུ་ཅན་དང་། བསལ་ཚགས་སོ། །རང་གིས་མ་བརྟགས་པའི་ཆུ་ནི་ཡིད་ཆེས་པའི་ཚིག་གིས་ཉེ་བར་ལོངས་སྤྱད་པར་མི་བྱའོ། །གལ་ཏེ་གཞན་དང་མ་འདྲེས་པ་ཡིན་ན་རྒྱང་གྲགས་ཀྱི་མཐའི་བར་དུ་ཆུ་ཀླུང་འབབ་པ་ལ་
[45b.7]བརྟགས་ནས་བཏུང་བར་བྱའོ། །ཆུས་གང་བའི་བུམ་པ་ལ་སོགས་པ་ལ་བརྟག་པར་བྱའོ། །ཆུ་བཙགས་པ་ནི་གལ་ཏེ་སྲོག་ཆགས་ཡོད་ན་ཆུའི་ཁྲོན་པ་དབེན་པར་ཐར་པར་བྱེད་པའི་སྣོད་ཀྱིས་སྲོག་ཆགས་དང་བཅས་པ་བཏང་ཞིང་དབོ་བར་བྱ་སྟེ། ས་ལ་དབོ་བར་མི་བྱའོ། །སྲོག་ཆགས་
[46a]
[46a.1]མེད་པའི་ཆུ་ལ་ཡང་མ་ཡིན་ནོ། །མི་སྨྲ་བར་གྱུར་པ་དང་ཤེས་བཞིན་དང་ལྡན་པ་རྣམས་ཀྱིས་ལོ་མ་ལ་སོགས་པ་ལ་བརྟག་པར་བྱའོ། །ལོ་མ་ལ་སོགས་པ་ལ་བརྟགས་པ་ན་གལ་ཏེ་སྲོག་ཆགས་ཡོད་ན་རྩྭ་སྔོན་པོ་དང་བཅས་པའི་སའི་ཕྱོགས་སུ་དོར་བར་བྱའོ། །སྲོག་ཆགས་
[46a.2]དང་བཅས་པའི་ཆུ་ལ་སྲོག་ཆགས་དང་བཅས་པར་འདུ་ཤེས་པ་དང་། ཡིད་གཉིས་ཟ་བ་དང་། སྲོག་ཆགས་མེད་པ་ལ་སྲོག་ཆགས་དང་བཅས་པར་འདུ་ཤེས་པ་དང་། ཡིད་གཉིས་ཟ་བར་གྱུར་ན་ཉེ་བར་ལོངས་སྤྱད་པར་མི་བྱའོ། །མཐོང་བ་དང་ཐོས་པ་དང་དོགས་པའི་གཞི་གསུམ་གྱི་
[46a.3]ཡོངས་སུ་དག་པའི་ཤ་ཡིན་ན་བཟའ་བར་བྱའོ། །གང་དང་གང་བཟའ་བའམ་བཏུང་བར་གྱུར་པ་དེ་དང་དེ་དག་ཉིད་སོ་སོར་བརྟག་པར་བྱའོ། །གོས་ལ་སོགས་པ་རྣམས་ལ་སྲོག་ཆགས་རྣམས་བརྟག་པར་བྱ་ཞིང་དག་པར་བྱའོ། །དུས་དང་དུས་སུ་ཟང་ཟིང་ཆུ་དང་བཅས་པ་དང་ཟང་ཟིང་མེད་པར་
[46a.4]ལོངས་སྤྱོད་པའི་བུམ་པ་གཙང་བར་བྱ་ཞིང་། བཀྲུ་བ་དང་བསྐམ་པར་བྱ་སྟེ། གང་གི་ཕྱིར་སྣོད་སྐྱོན་དང་བཅས་པར་ཡིན་ན་སྲོག་ཆགས་སྐྱེ་བར་འགྱུར་བའི་ཕྱིར་རོ། །ཤིག་རྣམས་ནི་རས་མར་བཅུག་ལ་རྩིག་པ་ལ་སོགས་པ་བུ་གའི་ནང་དུ་གཞུག་པར་བྱའོ། །རྩྭ་ཤིག་རྣམས་ནི་དཔྱིད་ཀྱི་དུས་སུ་རྩྭ་དྲུར་
[46a.5]བ་དང་བཅས་པའི་བསེལ་བའི་ས་ཕྱོགས་སུ་དོར་བར་བྱ་ཞིང་། དགུན་ནི་དྲོ་བའི་ཕྱོགས་སུའོ། །ནད་པ་ལ་དུག་དང་མཚོན་དང་འདོད་པའི་ཟས་བཏུང་བ་སྦྱིན་པར་མི་བྱའོ། །སྨན་པ་མཁས་པ་ལ་དྲིས་ནས་འདི་ལ་འདོད་པའི་ཟས་དང་བཏུང་བ་དང་སྨན་སྦྱིན་པར་བྱའོ། །གླེན་པ་དང་མི་ཤེས་པ་
[46a.6]ལ་འདིའི་སྨན་དཔྱད་བརྟག་པར་མི་བྱ་མོད་ཀྱི། འོན་ཀྱང་མཁས་པ་ལ་བརྟེན་པར་བྱའོ། །གང་གིས་འདིའི་སེམས་གཞན་དུ་གནས་པར་འགྱུར་བ་དེ་ལྟ་བུའི་ཆོས་ནད་པ་ལ་བཤད་པར་མི་བྱའོ། །འདི་ལ་ནད་ཀྱི་འཇིགས་པ་ལས་ཐར་ཏེ་ཚེ་རིང་ཞིང་བརྟན་པ་དང་། བདེ་བར་འགྱུར་བ་དེ་ལྟར་སྨྲ་བར་
[46a.7]བྱའོ། །འདི་ཇི་སྲིད་དུ་ཆོས་སྤྱོད་པར་འཚོ་བ་དེ་སྲིད་དུ་དགེ་བ་མང་པོ་རབ་ཏུ་སྐྱེ་བར་འགྱུར་རོ་ཞེས་བྱ་བར་སྤྲོ་བ་བསྐྱེད་པར་ཡང་བྱའོ། །ནད་པ་ལ་འཆི་བའི་བསྔགས་པ་བརྗོད་པར་མི་བྱའོ། །འཆི་བ་ཡང་དག་པར་འཛིན་པར་བྱེད་དུ་མི་གཞུག་གོ། །བརྩེ་བ་མེད་པའི་སེམས་ཀྱིས་ནད་གཡོག་མི་བྱའོ། །
[46b]
[46b.1]ཤི་ན་རྙེད་པ་འཐོབ་པའི་ཕྱིར་ཡང་མ་ཡིན་ནོ། །རིམ་གྲོ་དམ་པའི་ནད་གཡོག་བྱའོ། །རྡེག་པར་མི་བྱའོ། །སྦྱོར་དུ་གཞུག་པར་མི་བྱའོ། །རྣམ་པར་འགྱུར་བར་མི་བྱའོ། །འཇིགས་པར་མི་བྱའོ། །ཀུན་ནས་དཀྲིས་པ་ལ་གནས་པས་ཁྲོ་བ་ལ་བཟོད་པར་བྱའོ། །རྡོ་ལ་རི་མོ་བྲིས་པ་ལྟ་བུའི་སེམས་
[46b.2]སུ་མི་བྱ་མོད་ཀྱི། འོན་ཀྱང་ཆུ་ལ་རི་མོ་བྲིས་པ་ལྟ་བུར་བྱའོ། །བསམས་བཞིན་དུ་འགྱོད་པར་མི་བྱའོ། །བཞད་གད་ཀྱི་ཕྱིར་ག་ག་ཚིལ་མི་བྱའོ། །བརྒྱ་ལ་ནད་པ་ན་རེ་གལ་ཏེ་ཁྱོད་ངའི་དགྲ་ལ་སོགས་པ་གསོད་པར་བྱེད་དམ་གཞན་ལ་བསྒོ་ནས་གསོད་པར་བྱེད་པ་དེ་ལྟ་ན་ང་ནད་ལས་ལྡང་བ་དང་
[46b.3]འཚོ་བ་ཡིན་པར་སྨྲ་བའི་ཚིག་དེ་རྣམས་ནི་རྣམ་པ་ཐམས་ཅད་དུ་མི་བྱའོ། །ནད་པས་ཁྱོད་ང་གསོད་དམ་གཞན་བསྒོ་ནས་གསོད་པའི་རང་བཞིན་གྱིས་ཁ་ན་མ་ཐོ་བ་དང་བཅས་པ་མི་བྱའོ། །གཞན་བསྒོ་ནས་གསོད་པར་བྱེད་པ་ཡང་མི་བྱའོ། །ནད་པས་སྲོག་གཅོད་པར་མི་བྱའོ། །ཤི་བའི་
[46b.4]རོ་ལ་ཕོལ་ཡོད་པ་དེ་ལ་དྲལ་ནས་སྲོག་ཆགས་བརྟགས་ཏེ་བསྲེག་པར་བྱའོ། །སེམས་ཅན་ཐམས་ཅད་ལ་བྱམས་པའི་སེམས་ཉེ་བར་གཞག་པར་བྱའོ། །སེམས་ཅན་འདི་རྣམས་ཉམས་སམ། བཅིངས་སམ་ཕམ་པར་གྱུར་ཏམ། ཆད་པས་གཅད་པ་ལ་ལྟོས་པ་མེད་པའི་སེམས་
[46b.5]སུ་མི་བྱའོ། །དེ་ལྟ་བུ་ལ་སོགས་པའི་སྲོག་གཅོད་པ་རྣམ་པ་དུ་མ་ཡིན་པ་དེའི་ཕྱིར་སྲོག་གཅོད་པ་རྣམ་པ་ཐམས་ཅད་དུ་ཐབས་ཐམས་ཅད་ཀྱི་སྒོ་ནས་སྲོག་ལ་བབ་ཀྱང་བསྲུང་བར་བྱའོ། །ཇི་སྐད་བརྗོད་པ་ལས་འདས་ན་ཐམས་ཅད་འདིར་ཉེས་བྱས་སུ་འགྱུར་རོ། །ཇི་ལྟར་བདག་ཉིད་ཀྱི་སྲོག་
[46b.6]བསྲུང་བ་དེ་བཞིན་དུ་གཞན་དག་གི་ཡང་བསྲུང་བར་བྱ་བ་སྟེ། གང་གི་ཕྱིར་སྲོག་གཅོད་པར་བྱེད་པ་ནི་ཚངས་པ་མཚུངས་པར་སྤྱོད་པ་རྣམས་ཀྱིས་ཡོངས་སུ་སྤོང་བར་འགྱུར་བ་དང་། དམྱལ་བར་ཡང་ལྟུང་བར་འགྱུར་བའི་ཕྱིར་རོ། །ཐམས་ཅད་དུ་ཡང་ཐབས་ཐམས་ཅད་ཀྱི་སྒོ་ནས་ཤེས་བཞིན་དང་
[46b.7]ལྡན་པར་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་སྲོག་གཅོད་པ་སྤོང་བ་ཞེས་བྱ་བའི་བསླབ་པའི་གཞི་དང་པོའོ།། །།མ་བྱིན་པར་ལེན་པ་སྤོང་བ་ཞེས་བྱ་བ་ནི། རྐུ་སེམས་ཀྱིས་དགེ་འདུན་ནམ་གང་ཟག་གི་རྫས་མི་ལེན་ཅིང་གཞན་གྱི་སྒོ་ནས་ཀྱང་མི་ལེན་ལ། རྐུ་སེམས་ཀྱིས་གནས་
[47a]
[47a.1]ནས་གཞན་དུ་བསྐྱོད་པར་མི་བྱེད་པའོ། །གལ་ཏེ་རྫས་དགོས་པ་ཡིན་ལ། ཡིད་གཅུགས་པ་ཡིན་ན། ཡིད་གཅུགས་པ་དང་འབྲེལ་བས་བླང་བར་བྱའི། རྐུ་བའི་བློས་ནི་མ་ཡིན་མོད་ཀྱི་འོན་ཀྱང་དེ་དང་འདྲ་བའམ་རིན་དུ་གྱུར་པ་སྦྱིན་པར་བྱ་སྙམ་པ་འདི་ལྟ་བུའི་སེམས་ཀྱིས་
[47a.2]བླང་བར་བྱ་ཞིང་། དེ་དང་འདྲ་བ་བགྲངས་ལ་རིན་སྦྱིན་པར་བྱའོ། །གཙུག་ལག་ཁང་མང་པོ་རུང་མོད་ཀྱི་ཐམས་ཅད་ནས་རྙེད་པ་ལ་སོགས་པ་བླང་བར་ནི་མི་བྱ་སྟེ། གང་ཁོ་ནར་གནས་པ་དེ་ཁོ་ནར་བླང་པར་བྱའོ། །རྐུ་སེམས་ཀྱིས་གཞན་གྱི་ཏིལ་གྱི་ཕུབ་མ་ཡང་བླང་བར་མི་བྱའོ། །གཏམས་པ་དབྲོག་པར་
[47a.3]མི་བྱའོ། །གལ་ཏེ་ཁྱིམ་པ་འགའ་ཞིག་གིས་གཏམས་ཏེ་བཞག་པ་ལས་ང་ཤི་ན་ཁྱོད་ཀྱི་ཡིན་ནོ་ཞེས་སྨྲ་བ་ན་ལོངས་སྤྱོད་པ་ལ་ཉེས་པ་མེད་དོ། །འོན་ཏེ་མ་དང་ཕ་དང་བུ་དང་ཉེ་དུ་དང་བཤེས་རྣམས་ལ་བྱིན་ཅིག་ཟེར་ན་སྦྱིན་པར་བྱའོ། །གལ་ཏེ་དགེ་འདུན་ལ་ཕུལ་ཅིག་ཟེར་ན་དབུལ་བར་བྱའོ། །
[47a.4]འོན་ཏེ་ཅུང་ཟད་ཀྱང་མ་སྨྲས་པར་ཤི་བར་གྱུར་ན་ཉམས་པར་མི་བྱའོ། །གལ་ཏེ་མ་དང་ཕ་དང་བུ་དང་ཉེ་དུ་ལ་སོགས་པ་སློང་དུ་འོངས་ནས་ཆེ་གེ་མོས་ཁྱོད་ལ་འདི་དང་འདི་བཞག་པ་ལ་ཁོ་བོ་ནི་དེའི་ཉེ་དུ་ཡིན་པས་དེ་ཁོ་བོ་ལ་བྱིན་ཅིག་ཅེས་ཟེར་ན། གལ་ཏེ་ཉེ་དུ་ཡིན་པར་ཤེས་པར་གྱུར་ན་དབང་པོའི་མངོན་
[47a.5]སུམ་དུ་སྦྱིན་པར་བྱའོ། །གང་གི་ཕྱིར་ཁྱིམ་པ་རྣམས་ནི་ལྟོས་པ་དང་བཅས་པས་དུས་བྱེད་ལ། རབ་ཏུ་བྱུང་བ་རྣམས་ནི་ལྟོས་པ་མེད་པས་ཡིན་ནོ། །འོན་ཏེ་འགའ་ཞིག་ཀྱང་སློང་དུ་འོང་བ་མེད་ན། དེའི་ཆེད་དུ་ཤི་བའི་བསོད་ནམས་བྱའོ། །དགེ་སློང་ངམ་དགེ་ཚུལ་གྱིས་ཉེ་བར་གཞག་སྟེ་ཤི་བར་གྱུར་
[47a.6]ན་དགེ་འདུན་ལ་དབུལ་བར་བྱའོ། །གལ་ཏེ་འགའ་ཞིག་གིས་ཅུང་ཟད་བཅོལ་ཏེ་བཞག་པར་གྱུར་ལ། དེ་དུས་གཞན་དུ་ནི་གཞན་འགའ་ཞིག་ལེན་དུ་བཏང་ན་དེ་འདི་ལ་སྦྱིན་པར་བྱ་སྟེ། མྱུར་བ་ཉིད་དུ་ནི་སྦྱིན་པར་མི་བྱ་མོད་ཀྱི་འོན་ཀྱང་འདི་སྐད་དུ་དན་རྟགས་ཁྱེར་ལ་ཤོག་ཤིག་ཅེས་བརྗོད་པར་བྱ་
[47a.7]ཞིང་། གལ་ཏེ་ཁྱེར་ཏེ་འོངས་པ་ན་དན་རྟགས་འདྲ་བར་གྱུར་ན་སྦྱིན་པར་བྱའོ། །ཡང་ན་ཆེ་གེ་མོ་ལ་ངས་འདི་དང་འདི་ལྟ་བུའི་དན་རྟགས་བྱིན་པ་དེས་ཁྱོད་ལ་གཏད་པར་བྱ་བ་ཡིན་པར་དེ་ཉིད་ཀྱིས་བརྗོད་ན་སྦྱིན་པར་བྱའོ། །ཡང་ཕོ་ཉའི་ཐད་དུ་མི་ཤེས་པ་ཡིན་ན་རང་ཉིད་ཀྱིས་གཏད་པར་བྱ་བའམ་
[47b]
[47b.1]ཡིད་ཆེས་པའི་ལག་ཏུ་བསྐུར་བར་བྱའོ། །རྐུན་མ་དང་ལྷན་ཅིག་གྲོགས་པོ་མི་བྱ་ཞིང་ལམ་བསྟན་པར་ཡང་མི་བྱའོ། །དེ་དང་ལྷན་ཅིག་འགྲོ་བར་མི་བྱའོ། །རྐུན་མ་ལ་ཉེ་བར་མཁོ་བ་བཅང་བར་མི་བྱའོ། །རྔོན་པ་ལ་སོགས་པ་རྣམས་ཀྱིས་རི་དགས་ལ་སོགས་པ་སྐྱབས་ཀྱི་དོན་དུ་གཙུག་ལག་ཁང་དུ་བྲོས་
[47b.2]ནས་འོངས་པ་ཡིན་ན་དེ་དག་བསྲུང་བར་བྱའོ། །ཤི་ན་དེ་དག་ཉིད་ལ་སྦྱིན་པར་བྱའོ། །གལ་ཏེ་བུ་ལོན་བླངས་ནས་དུས་ལས་འདས་པར་གྱུར་ན་བགོ་བར་བྱས་ལ། ཡོ་བྱད་ལ་སོགས་པ་རྣམས་ཀྱིས་བུ་ལོན་དེ་དག་པར་བྱའོ། །ནད་པ་འཆི་འདོད་པས་ནད་གཡོག་ལ་འདི་སྐད་དུ་ང་ཤི་ན་ངའི་གོས་ལ་
[47b.3]སོགས་པ་གང་ཡིན་དེ་ཁྱོད་ཀྱི་ཡིན་ནོ་ཞེས་སྨྲས་ན་བླང་བར་བྱའོ། །འོན་ཏེ་གཞན་ནམ་དགེ་འདུན་གྱི་ཡིན་ཟེར་ན་བླང་བར་མི་བྱའོ། །གྲུར་ཞུགས་པ་ན་ལྷུང་བཟེད་ལ་སོགས་པ་གོ་བར་བྱ་སྟེ་གཏོང་བ་ན་ངས་བཏང་གི་བཟུང་ངམ་ཞེས་སྨྲས་པ་ན། གལ་ཏེ་ལྷུང་ན་རིན་སྦྱིན་པར་མི་བྱའོ། །མ་སྨྲས་
[47b.4]པ་ར་ལྷུང་ན་རིན་སྦྱིན་པར་བྱའོ། །གོས་ལ་སོགས་པ་གཙུག་ལག་ཁང་གི་ནང་དུ་ལྷུང་བ་རྙེད་པར་གྱུར་ན། གལ་ཏེ་འགའ་ཞིག་འོངས་ནས་འཕགས་པ་ངའི་འདི་དང་འདི་ལྟ་བུ་སྟོར་བ་དེ་ཁྱེད་ཀྱིས་གལ་ཏེ་བླངས་ན་དེ་སྦྱིན་པར་བྱའོ་ཞེས་ཟེར་ན་བླངས་མོད་ཀྱི་འོན་ཀྱང་དན་རྟགས་ཅི་ཡོད་ཅེས་བརྗོད་པར་
[47b.5]བྱའོ། །གལ་ཏེ་དན་རྟགས་དང་བཅས་པར་རྗོད་པར་བྱེད་ན་དབང་པོའི་མངོན་སུམ་དུ་སྦྱིན་པར་བྱའོ། །འོན་ཏེ་ཅུང་ཟད་ཀྱང་མེད་དུ་འོངས་པ་མེད་ན་རང་གིས་ལོངས་སྤྱད་པར་བྱ་བ་མ་ཡིན་གྱི་དགེ་འདུན་ལ་དབུལ་བར་བྱའོ། །གཞན་ལ་སྙད་བཏགས་པར་སྨྲ་བས་ཕ་རོལ་པོ་གཞན་གྱི་ནོར་དབྲོག་པར་
[47b.6]མི་བྱའོ། །མ་བྱིན་སྤྱོ་པ་ལ་གཞན་དག་ཡང་དག་པར་འཛིན་པར་བྱེད་དུ་མི་གཞུག་གོ། །སྤྲོ་བར་ཡང་མི་བྱའོ། །ནད་པས་ནི་བྱིན་པ་ལ་རྐུ་སེམས་ཀྱིས་བླང་བར་མི་བྱའོ། །གཞན་གྱི་སྒོ་ནས་ཀྱང་བླང་བར་མི་བྱའོ། །གཅིག་ཡིན་ཡང་མ་བྱིན་པར་ལེན་པ་རྣམ་པ་དུ་མ་ཡིན་པ་དེའི་ཕྱིར་
[47b.7]སྲོག་ལ་བབ་ཀྱང་མ་བྱིན་པར་བླང་བར་མི་བྱའོ། །ཇི་ལྟར་བདག་ཉིད་ཀྱི་ནོར་བསྲུང་བ་དེ་ལྟར་གཞན་གྱི་ཡང་ཡིན་ཏེ། གང་གི་ཕྱིར་མ་བྱིན་པར་ལེན་པར་བྱེད་པ་ནི་ཚངས་པ་མཚུངས་པར་སྤྱོད་པ་རྣམས་ཀྱིས་སྤོང་བར་འགྱུར་བ་དང་། དམྱལ་བར་ལྟུང་བར་ཡང་འ་བའི་ཕྱིར་རོ། །དེའི་
[48a]
[48a.1]ཕྱིར་མ་བྱིན་པར་ལེན་པ་ནི་རྣམ་པ་ཐམས་ཅད་དུ་ཐམས་ཅད་ཀྱི་སྒོ་ནས་བསྲུང་ཞིང་ཐམས་ཅད་དུ་ཤེས་བཞིན་དང་ལྡན་པར་བྱ་བ་ཡིན་ནོ། །དགེ་ཚུལ་གྱི་བསླབ་པའི་གཞིའི་མདོ་ལས་མ་བྱིན་པར་ལེན་པ་སྤོང་བ་ཞེས་བྱ་བའི་བསླབ་པའི་གཞི་གཉིས་པའོ།། །།
[48a.2]མི་ཚངས་པར་སྤྱོད་པ་སྤོང་བ་ཞེས་བྱ་བ་ནི་བུད་མེད་ཀྱི་ཟག་བྱེད་དང་བཤང་བ་དང་ཁའི་ལམ་རྣམས་སུ་རང་གི་ཡན་ལག་གི་རྣམ་པ་བཅུག་ནས་རེག་པ་བདག་གིར་མི་བྱེད་པའོ། །དེ་བཞིན་དུ་སྐྱེས་པ་དང་། མ་ནིང་དང་། མི་དང་། དུད་འགྲོའི་འགྲོ་བར་གཏོགས་པ་ལ་སོགས་པ་རྣམས་ལ་ཡང་
[48a.3]ངོ་། །ཚོར་བ་དང་། རང་བཞིན་ཉམས་པའི་གནས་སྐབས་དང་། མི་འདོད་པ་ལས་གལ་ཏེ་མི་ཚངས་པར་སྤྱོད་པར་བྱེད་པ་ན་བདག་གིར་མི་བྱའོ། །ཁྱིམ་པ་དང་། དགེ་སློང་དང་། དགེ་ཚུལ་གཞན་དང་ལྷན་ཅིག་ལུས་ལ་རེག་པས་ཉལ་བར་མི་བྱ་མོད་ཀྱི་འོན་ཀྱང་སོ་སོར་ཐ་དད་པར་བྱའོ། །
[48a.4]གནས་མ་རྙེད་ན་གོས་ཀྱིས་ལུས་སོ་སོར་དཀྲིས་ལ་མལ་གཅིག་ཏུ་ཉལ་བར་བྱའོ། །མུ་སྟེགས་ཅན་དང་ཁྱིམ་པ་དང་ལྷན་ཅིག་ནུབ་གསུམ་པ་ལ་ཉལ་དུ་མི་རུང་ངོ་། །སྣང་བ་ལ་ཡང་མ་ཡིན་ནོ། །བསམས་བཞིན་དུ་ཁུ་བ་དབྱུང་བར་མི་བྱའོ། །རྨི་ལམ་གྱི་ནང་དུ་ནི་ཉེས་པ་མེད་དོ། །གང་ལའམ་
[48a.5]དེ་ལའམ་ཐབས་གང་གིས་སམ། དེས་ཡན་ལག་གི་རྣམ་པ་བཟུང་བ་སྔོན་དུ་འགྲོ་བས་བརྩལ་ཏེ་ཁུ་བ་དབྱུང་བར་མི་བྱའོ། །བུད་མེད་དག་མཐོང་ནས་འདོད་ཆགས་ཀྱི་སེམས་སུ་གྱུར་ན་མི་སྡུག་པ་བསྒོམ་པར་བྱའོ། །བུད་མེད་ལ་འཁྲིག་པ་བསླང་བར་མི་བྱའོ། །འཁྲིག་པའི་རྒྱུ་མཚན་ཡང་བསྟན་
[48a.6]པར་མི་བྱའོ། །འཁྲིག་པའི་གཏམ་མི་བྱའོ། །བུད་མེད་དང་ལྷན་ཅིག་དབེན་པར་ཉི་མ་ནུབ་ཀྱི་བར་དུ་འདུག་པར་མི་བྱའོ། །ཡང་དང་ཡང་དུ་བུད་མེད་ལ་བལྟ་བར་མི་བྱའོ། །གལ་ཏེ་འགའ་ཞིག་འགའ་ཞིག་ཏུ་མི་ཚངས་པར་སྤྱོད་པར་བྱེད་པ་དེར་འགྲོ་བར་མི་བྱའོ། །དེར་འདུག་པར་མི་བྱ་ཞིང་
[48a.7]བལྟ་བར་ཡང་མི་བྱའོ། །བུད་མེད་ལ་རེག་པར་མི་བྱའོ། །ཆུ་ལ་ལྷུང་བ་ཉེ་བར་བྱུང་ཤིག་ཅེས་འོ་དོད་འབོད་པར་བྱེད་པ་ལ། འགའ་ཞིག་ཀྱང་གནས་པ་མེད་ན་མ་དང་བུ་མོ་དང་སྲིང་མོའི་འདུ་ཤེས་བྱས་ཏེ་ཉེ་བར་གདོན་པར་བྱའོ། །བུད་མེད་རྣམས་ལ་ཆགས་པ་མེད་པའི་སེམས་ཀྱིས་ཆོས་སྨྲ་
[48b]
[48b.1]བར་བྱའོ། །གཅིག་པུ་བུད་མེད་རྣམས་ལ་ཆོས་བསྟན་པར་མི་བྱའོ། །བུད་མེད་དང་ལྷན་ཅིག་ཁྱིམ་གཅིག་དུ་ཉལ་བར་མི་བྱའོ། །སྟན་གཅིག་ལ་འདུག་པར་མི་བྱའོ། །ལམ་དུ་འགྲོ་བར་ཡང་མི་བྱའོ། །གལ་ཏེ་སྐྱེས་པ་ཡོད་ན་ཉེས་པ་མེད་དོ། །བུད་མེད་རྣམས་མཐོང་ན་ལོའི་ཚད་དང་རྗེས་སུ་མཐུན་པར་
[48b.2]ཤེས་ནས་མ་དང་བུ་མོ་དང་སྲིང་མོའི་འདུ་ཤེས་སུ་བྱའོ། །བུད་མེད་གནས་ཁང་དུ་འཇུག་པ་སྦྱིན་པར་མི་བྱའོ། །གལ་ཏེ་སྨན་ལ་སོགས་པ་དང་དགེ་བའི་ཕྱོགས་བྱེད་ན་ཉེས་པ་མེད་དོ། །དེར་ཡང་གཅིག་པུ་འདུག་པར་མི་བྱའོ། །བུད་མེད་དང་ལྷན་ཅིག་བཟའ་བར་མི་བྱའོ། །སྣོད་མེད་ན་ཕ་མ་དག་དང་ལྷན་
[48b.3]ཅིག་དབེན་པའི་ཕྱོགས་སུ་བཟའ་བར་བྱའོ། །ཡང་ན་དེ་དག་འུ་བུ་ཅག་ལྷན་ཅིག་བཟའོ་ཞེས་ཟེར་ན་བདག་ཉིད་དབེན་པའི་ཕྱོགས་སུ་བཟའ་བར་བྱའོ། །གལ་ཏེ་བུད་མེད་བྱ་བ་མ་ཡིན་པ་མི་རིགས་པས་མགྲོན་དུ་གཉེར་ན་ལྷག་པར་གནས་པར་མི་བྱའོ། །བུད་མེད་གལ་ཏེ་མདུན་དུ་བུད་མེད་སླུ་
[48b.4]ཞིང་། བུད་མེད་གཡོ་བྱེད་ཅིང་། བུད་མེད་སྒྱུ་བྱེད་པ་ལ་བལྟ་བར་མི་བྱའོ། །ལམ་དུ་འགྲོ་བས་བུད་མེད་དང་ལྷན་ཅིག་རེག་པས་འགྲོ་བར་མི་བྱའོ། །བུད་མེད་ཀྱི་གཏམ་མི་བྱའོ། །གང་དུ་བུད་མེད་ཁྲུས་བྱེད་པ་དེས་མི་བྱའོ། །བུད་མེད་གཅེར་བུ་ཡོད་པ་དེར་འདུག་པར་མི་བྱ་ཞིང་བལྟ་བར་ཡང་
[48b.5]མི་བྱའོ། །རང་གོས་མེད་པས་ཀྱང་བུད་མེད་ཀྱི་དྲུང་དུ་འདུག་པར་མི་བྱའོ། །བུད་མེད་ཀྱི་ཡན་ལག་དང་ཉིང་ལག་ལ་བལྟ་བར་མི་བྱའོ། །བུད་མེད་འཁྲིག་པ་ཡང་དག་པར་འཛིན་པར་བྱེད་དུ་མི་གཞུག་གོ། །གཞན་ལ་འཁྲིག་པའི་ཕྱིར་རིན་སྦྱིན་པར་མི་བྱའོ། །བུད་མེད་ཀྱི་གར་དང་། གླུ་དང་རོལ་
[48b.6]མོ་དང་། གོས་རྣམས་དང་། རྒྱན་རྣམས་ཀྱི་སྒྲ་ལ་ཉན་པས་རོ་མྱང་བར་མི་བྱའོ། །བུད་མེད་ཀྱི་ཐད་ལས་དྲིལ་ཕྱིས་དང་། ཁྲུས་དང་། བསྐུ་མཉེ་བདག་གིར་མི་བྱའོ། །ཨེ་མ་བདག་ཚུལ་ཁྲིམས་སམ། བརྟུལ་ཞུགས་སམ། དཀའ་ཐུབ་ཀྱི་ཚངས་པར་སྤྱོད་པ་ལ་བརྟེན་པ་འདིས་ལྷ་ཉིད་དམ།
[48b.7]གཞན་གང་ཡང་རུང་སྙེམ་དུ་སྨོན་པས་ཚངས་པར་སྤྱོད་པ་སྤྱད་པར་མི་བྱའོ། །བུད་མེད་དང་ལྷན་ཅིག་དགོད་པ་དང་རྩབ་ཧྲལ་དང་རྩེད་མོ་མི་བྱའོ། །མི་ཚངས་པར་སྤྱོད་པ་བྱེད་པ་ལ་ལྟ་བ་དང་དགའ་བར་མི་བྱ་ཞིང་སྤྲོ་བར་ཡང་མི་བྱའོ། །གང་ཡང་གཞོན་ནུ་མི་ཚངས་པར་སྤྱོད་པ་འཁྲིག་པའི་
[49a]
[49a.1]ཆོས་བསྟེན་པའི་མཐུ་དང་ལྡན་པ་དེ་ཡང་སྔར་བསྟན་པའིརྣམ་པས་ཡོངས་སུ་དོར་བར་བྱའོ། །གལ་ཏེ་ནད་པ་འདི་སྐད་དུ་གང་བདག་བུད་མེད་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཅིང་བ་དག་ལ་བུད་མེད་ཁྱེར་ཏེ་འོང་བ་དེ་ལྟ་ན་བདག་འཚོ་ཞེས་སྨྲ་ན་རྐྱེན་དེས་
[49a.2]མི་འཚོ་ན་ཡང་འདི་ལ་ཀུན་ཏུ་སྦྱིན་པར་མི་བྱའོ། །ནད་པས་མི་ཚངས་པར་སྤྱོད་པ་མི་བྱའོ། །མི་ཚངས་པར་སྤྱོད་པ་བྱེད་པ་ལ་ལྟ་བ་ཐག་རིང་པོར་ཡོངས་སུ་སྤང་བར་བྱའོ། །ཇི་ལྟར་འབར་བའི་མེའི་ཕྲེང་བས་ཁྱབ་པ་ཡོངས་སུ་དོར་བར་བྱ་བ་ཡིན་པ་དེ་བཞིན་དུ་བུད་མེད་ཀྱང་ཡོངས་སུ་དོར་བར་བྱའོ། །དེ་
[49a.3]ལྟ་བུ་ལ་སོགས་པ་མི་ཚངས་པར་སྤྱོད་པ་རྣམ་པ་དུ་མ་ཡིན་པ་དེའི་ཕྱིར་རྣམ་པ་ཐམས་ཅད་དུ་ཐབས་ཐམས་ཅད་ཀྱི་སྒོ་ནས་སྲོག་ལ་བབ་ཀྱང་མི་ཚངས་པར་སྤྱོད་པ་བསྲུང་བར་བྱ་སྟེ། གང་གི་ཕྱིར་མི་ཚངས་པར་སྤྱོད་པ་བྱེད་པ་ལ་ནི་ཚངས་པ་མཚུངས་པར་སྤྱོད་པ་རྣམས་ཀྱིས་སྤོང་བ་དང་། དམྱལ་བར་
[49a.4]ལྟུང་བ་ཡང་ཡིན་ནོ། །དགེ་ཚུལ་གྱེ་བསླབ་པའི་གཞིའི་མདོ་ལས་མི་ཚངས་པར་སྤྱོད་པ་སྤོང་བ་ཞེས་བྱ་བའི་བསྦབ་པའི་གཞི་གསུམ་པའོ།། །།བརྫུན་དུ་སྨྲ་བ་སྤོང་བ་ཞེས་བྱ་བ་ནི་མིའི་ཆོས་བླ་མ་མེད་པ་ལ་མེད་བཞིན་དུ་ཡོད་པར་མི་སྨྲ་བ་སྟེ། འདི་ལྟ་སྟེ། དཔེར་ན་ལྷ་ལ་སོགས་པ་
[49a.5]རྣམས་མཐོང་ངོ་། །ལྷ་ལ་སོགས་པ་རྣམས་ཀྱིས་ཀྱང་བདག་མཐོང་ངོ་། །ལྷ་ལ་སོགས་པ་རྣམས་ཀྱི་སྒྲ་ཐོས་སོ། །ལྷ་ལ་སོགས་པ་རྣམས་ཀྱིས་ཀྱང་བདག་གི་སྒྲ་ཐོས་སོ་ཞེས་བྱ་བ་ལ་སོགས་པ་དང་། དེ་བཞིན་དུ་བསམ་གཏན་དང་། ཚད་མེད་པ་དང་། གཟུགས་མེད་པ་དང་། འབྲས་བུ་དང་།
[49a.6]མངོན་པར་ཤེས་པ་དང་། འདུ་ཤེས་མེད་པ་ལ་སོགས་པ་ཟག་པ་མེད་པའི་ཆོས་རྣམས་བདག་གིས་ཐོས་པ་མི་སྨྲ་བའོ། །སྟན་ཁྲ་བོ་ལ་སོགས་པ་ནི་དགྲ་བཅོམ་པས་རྙེད་ལ། བདག་གིས་ཀྱང་དེ་རྙེད་ཀྱི་གཞན་གྱིས་ནི་མ་ཡིན་ནོ། །བདག་གིས་དགྲ་བཅོམ་པ་ཐོབ་སྟེ་བདག་ཁྱད་པར་ཐོབ་པ་ལས་
[49a.7]ཡོངས་སུ་ཉམས་སོ། །ཁྱིམ་འདི་གང་གིས་ཡིན་པ་འདོད་ཆགས་དང་བྲལ་བ་ཡིན་ཏེ། བདག་གིས་ཡང་འདི་ཡིན་ནོ། །དགྲ་བཅོམ་པས་བདག་མཐོང་ནས་སྨིན་པར་བྱེད་པ་དེ་ལ་སོགས་པའི་ཚིག་བརྗོད་པར་མི་བྱའོ། །བདག་གི་ཕྱིར་རམ་ཟང་ཟིང་གི་ཕྱིར་ཡང་ཤེས་བཞིན་དུ་བརྫུན་དུ་སྨྲ་བ་བརྗོད་
[49b]
[49b.1]པར་མི་བྱའོ། །བདག་གི་ལུས་སམ་ངག་གིས་སྡིག་པའི་ལས་ཅུང་ཟད་བྱས་པ་དེ་ལ་མཁན་པོ་ལ་སོགས་པ་རྣམས་ཀྱིས་ཅི་འདི་དང་འདི་ལྟ་བུ་ཁྱོད་ཀྱིས་བྱས་སམ་ཞེས་འདྲི་ན་དེ་ལ་ཇི་ལྟར་གྱུར་པ་བཞིན་དུ་བརྗོད་པར་བྱའོ། །ཉེ་དུ་དང་གྲོགས་ལ་སོགས་པ་རྣམས་དང་། གཞན་དང་གཞན་གྱི་ལུས་དང་
[49b.2]ངག་གིས་སྡིག་པའི་ལས་ཅུང་ཟད་བྱས་པར་གྱུར་ན་དེ་ལ་རྒྱལ་པོའི་ཕོ་བྲང་འཁོར་དུ་གཏོགས་པའམ། གཞན་གྱི་འཁོར་དུ་གཏོགས་པའི་དབང་པོ་ལ་འཕགས་པ་འདིས་ཅི་ཞིག་བྱས་ཞེས་འདྲི་བར་གྱུར་ན། དེ་ལ་འདི་སྐད་དུ་གལ་ཏེ་འདི་ལ་ཉེ་བར་གནོད་པ་ཅུང་ཟད་ཀྱང་མི་བྱེད་པ་དེ་ལྟ་ན་བདག་ཆེ་བཞི་
[49b.3]བྱེད་ཀྱི་གཞན་དུ་མ་ཡིན་ནོ་ཞེས་བརྗོད་པར་བྱའོ། །གལ་ཏེ་མི་བྱེད་ཅེས་ཟེར་ན་དམ་ཚིག་ལ་བཀོད་ན་ཇི་ལྟ་བ་བཞིན་དུ་གྱུར་པའི་ཆེ་བཞི་དབྱེ་བར་བྱའོ། །འོན་ཏེ་མི་སྨྲ་ན་རྣམ་པ་ཐམས་ཅད་དུ་སྲོག་ལ་བབ་ཀྱང་བརྗོད་པར་མི་བྱའོ། །བཞད་གད་ཀྱི་ཕྱིར་ཡང་ཤེས་བཞིན་དུ་བརྫུན་དུ་སྨྲ་བར་མི་
[49b.4]བྱའོ། །སློབ་དཔོན་དང་མཁན་པོ་དང་ཚངས་པ་མཚུངས་པར་སྤྱོད་པ་རྣམས་ཀྱིས་དྲིས་པའི་ཚིག་ལ་གཞན་དང་གཞན་དུ་སྤྲོ་བར་མི་བྱ་མོད་ཀྱི། འོན་ཀྱང་གཡོ་སྒྱུ་བྱེད་པ་མ་ཡིན་པས་གང་ཁོ་ན་དྲིས་པ་དེ་ཁོ་ན་བརྗོད་པར་བྱའོ། །གལ་ཏེ་མི་གསད་པར་བྱ་བ་བྲོས་པ་མཐོང་ན་དེ་ལ་གསོད་པར་བྱེད་
[49b.5]པས་ཁྱོད་ཀྱིས་འདི་ལྟ་བུ་བྲོས་པ་མཐོང་ངམ་ཞེས་འདྲི་ན། དེ་ལ་གཞན་དང་གཞན་སྤྲོ་བར་བྱའོ། །དེ་ལྟར་བྱས་པ་ན་གལ་ཏེ་འཕགས་པས་སྨྲ་བར་བྱ་བ་རྗོད་ཅིག་ཅེས་ཟེར་ན་རེ་ཞིག་སེན་མོ་མཐོང་ངོ་རེ་ཞིག་ནམ་མཁའ་མཐོང་ངོ་ཞེས་བརྗོད་པར་བྱའོ། །དེ་ལྟར་བྱས་ཀྱང་འཕགས་པས་སྨྲ་བར་བྱ་བ་
[49b.6]རྗོད་ཅིག །གཞན་དྲིས་པ་ན་གཞན་ལུང་བསྟན་པས་ཅི་བྱ་ཞེས་ཟེར་ན། ཕྱོགས་བཞིར་བལྟས་ཏེ་འདི་སྐད་དུ་དོན་དམ་པར་སེམས་ཅན་མ་མཐོང་ཞེས་བརྗོད་པར་བྱའོ། །ཉེ་བར་གནོད་པ་རྣམས་ཡོངས་སུ་བསྲུང་བའི་ཕྱིར་གཞན་དང་གཞན་དུ་སྤྲོ་བར་བྱའོ། །སློབ་དཔོན་དང་མཁན་པོ་རྣམས་ཅུང་
[49b.7]ཟད་སྨྲ་ན་ཆོས་དང་ལྡན་པའི་ཚིག་རྣམས་བྱ་སྟེ། གང་གི་ཕྱིར་དེ་བཞིན་གཤེགས་པ་དང་། དགྲ་བཅོམ་པ་དང་། སློབ་དཔོན་དང་། མཁན་པོ་དང་། དགེ་འདུན་དང་། དགེ་འདུན་གྱི་གནས་བརྟན་དང་། རྒྱལ་པོ་དང་། དེའི་འཁོར་རྣམས་ཀྱི་ཚིག་སྤང་བར་བྱ་བ་མ་ཡིན་ནོ། །རྣམ་པར་འགྱུར་
[50a]
[50a.1]བ་ཐོབ་པའི་སློབ་དཔོན་དང་མཁན་པོ་ནི་དོར་བར་བྱའོ། །ཚིག་རྩུབ་པོ་སྨྲ་བར་མི་བྱའོ། །མིའི་སྐྱོན་ནས་སྨྲ་བར་མི་བྱའོ། །ཆེ་གེ་མོའི་རིགས་ནི་རིགས་འདི་ཡིན་ནོ་ཞེས་བརྗོད་པར་མི་བྱ་སྟེ། དེ་བཞིན་དུ་རྫ་མཁན་དང་། མགར་བ་ལ་སོགས་པའི་རིགས་ཀྱང་ངོ་། །
[50a.2]ཕྲ་མ་མི་བྱའོ། །ནད་པས་བརྫུན་སྨྲ་བར་མི་བྱའོ། །གཞན་ལ་བརྫུན་དུ་སྨྲ་བ་ཡང་དག་པར་འཛིན་དུ་གཞུག་པར་མི་བྱ་ཞིང་། སྤྲོ་བ་བསྐྱེད་པར་མི་བྱའོ། །དེ་ལྟ་བུ་ལ་སོགས་པ་བརྫུན་དུ་སྨྲ་བ་རྣམ་པ་དུ་མ་ཡིན་པ་དེའི་ཕྱིར་སྲོག་ལ་བབ་ཀྱང་ཤེས་བཞིན་དུ་བརྫུན་དུ་སྨྲ་བར་མི་བྱའོ། །བརྫུན་དུ་སྨྲ་བ་ནི་
[50a.3]རྣམ་པ་ཐམས་ཅད་ཀྱིས་ཐབས་ཐམས་ཅད་དུ་བསྲུང་བར་བྱ་སྟེ། གང་གི་ཕྱིར་བརྫུན་དུ་སྨྲ་བ་ནི་ཚངས་པ་མཚུངས་པར་སྤྱོད་པ་རྣམས་ཀྱིས་སྤོང་བར་འགྱུར་བ་དང་།དམྱལ་བར་ལྟུང་བར་འགྱུར་བའི་ཕྱིར་རོ། །བསླབ་པའི་གཞི་བཞི་པོ་འདི་རྣམས་ནི་རང་བཞིན་གྱི་ཁ་ན་མ་ཐོ་བ་དང་བཅས་པ་ཡིན་པས་
[50a.4]སྲོག་ལ་བབ་ཀྱང་འདི་རྣམས་ནད་པས་ཀྱང་སྤྱད་པར་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་བརྫུན་དུ་སྨྲ་བ་སྤོང་བ་ཞེས་བྱ་བའི་བསླབ་པའི་གཞི་བཞི་པའོ།། །།འབྲུའི་ཆང་དང་བཅོས་པའི་ཆང་མྱོས་པར་འགྱུར་བའི་ཁུ་བ་སྤོང་བ་ཞེས་བྱ་བ་ནི་འབྲུའི་ཆང་དང་། བཅོས་
[50a.5]པའི་ཆང་ཐ་ན་རྩྭའི་མཆོག་མས་ཀྱང་བཏུང་བར་མི་བྱེད་པའོ། །འབྲུའི་ཆང་ནི་ཟས་ཀྱི་བཏུང་བའོ། །བཅོས་པའི་ཆང་ནི་མེ་ཏོག་དང་སྡོང་བུའི་བཏུང་བའོ། །མྱོས་པར་འགྱུར་བ་ན་འབྲས་བུའི་བཏུང་བའོ། །མྱོས་པར་བྱེད་པའི་འབྲས་བུ་གང་ཡིན་པ་དེ་ནི་བཟའ་བར་མི་བྱ་སྟེ་ཀོ་ཊ་བ་ཡང་ངོ་། །
[50a.6]མྱོས་པར་འགྱུར་བའི་བཏུང་བ་ལ་མྱོས་པར་འགྱུར་བར་འདུ་ཤེས་པའམ། ཡིད་གཉིས་ཟ་བའམ་མྱོས་པར་འགྱུར་བ་མ་ཡིན་པ་ལ་མྱོས་པར་འགྱུར་བར་འདུ་ཤེས་པར་བཏུང་བར་མི་བྱའོ། །ཚིགས་མ་བཟའ་བར་མི་བྱའོ། །མྱོས་པར་འགྱུར་བ་བསྐོལ་བ་ལ་ཉེས་པ་མེད་དེ། །དེ་ཡང་གལ་
[50a.7]ཏེ་མྱོས་པར་འགྱུར་བའི་རོ་དང་དྲི་དང་བྲལ་བ་ཡིན་ཞིང་མྱོས་པར་འགྱུར་བའི་ཁ་དོག་དང་ལྡན་པ་ལ་ཉེས་པ་མེད་དོ། །གཞན་ལ་འབྲུའི་ཆང་དང་བཅོས་པའི་ཆང་གི་ཁུ་བ་མི་སྦྱིན་ཞིང་སྦྱིན་དུ་ཡང་མི་གཞུག་གོ། །འབྲུའི་ཆང་དང་བཅོས་པའི་ཆང་གི་རིན་མི་སྦྱིན་ཞིང་སྦྱིན་དུ་ཡང་མི་གཞུག་གོ།
[50b]
[50b.1]ནད་པས་འབྲུའི་ཆང་དང་བཅོས་པའི་ཆང་མྱོས་པར་འགྱུར་བའི་བཏུང་བ་བཏུང་བར་མི་བྱ་སྟེ། བཅས་པའི་ཁ་ན་མ་ཐོ་བ་དང་བཅས་པ་ཡང་ཡིན་པའི་ཕྱིར་རོ། །བསྐོལ་བའི་ཁུ་བའི་རྣམ་པ་ལྟ་བུ་དང་། ཆབ་ལྟ་བུ་བཏུང་བར་བྱའོ། །བུམ་པ་ནི་གསུམ་སྟེ། བཤང་བའི་བུམ་པ་དང་། གཅི་བའི་བུམ་
[50b.2]པ་དང་། ཆང་གི་བུམ་པའོ། །དེ་ལ་ཇི་ལྟར་བསྟན་མ་ཐག་པའི་བུམ་པ་གཉིས་པོ་ཡོངས་སུ་དོར་བར་བྱ་བ་ཡིན་པ་དེ་བཞིན་དུ་ཆང་གི་བུམ་པ་ཡང་ངོ་། བཅོམ་ལྡན་འདས་ཀྱིས་ཀྱང་དགེ་སློང་དག་ང་ལ་སྟོན་པར་སྨྲ་བ་རྣམས་ཀྱིས་མྱོས་པར་འགྱུར་བ་ཐ་ན་རྩྭའི་མཆོག་མས་ཀྱང་མི་སྦྱིན་ཞིང་མི་བཏུང་ངོ་
[50b.3]ཞེས་གསུངས་སོ། །འབྲུའི་ཆང་དང་བཅོས་པའི་ཆང་མྱོས་པར་འགྱུར་བའི་བཏུང་བ་ཡང་དག་པར་འཛིན་དུ་མི་གཞུག་གོ། །དེ་ལྟ་བུ་ལ་སོགས་པ་མྱོས་པར་འགྱུར་བའི་བཏུང་བ་རྣམ་པ་དུ་མ་ཡིན་པ་དེའི་ཕྱིར་འབྲུའི་ཆང་དང་བཅོས་པའི་ཆང་ཐབས་ཐམས་ཅད་ཀྱི་སྒོ་ནས་ཐམས་ཅད་དུ་བསྲུང་བར་བྱ་
[50b.4]སྟེ། གང་གི་ཕྱིར་འབྲུའི་ཆང་དང་བཅོས་པའི་ཆང་འཐུངས་པ་ལ་ཚངས་པ་མཚུངས་པར་སྤྱོད་པ་རྣམས་ཀྱིས་ཡོངས་སུ་སྤོང་བར་འགྱུར་བ་དང་། དམྱལ་བར་ལྟུང་བར་ཡང་འགྱུར་བའི་ཕྱིར་རོ། །དགེ་ཚུལ་གྱི་བསླབ་པའི་གཞིའི་མདོ་ལས་འབྲུའི་ཆང་དང་བཅོས་པའི་ཆང་གི་བཏུང་བ་སྤོང་བ་ཞེས་
[50b.5]བྱ་བའི་བསླབ་པའི་གཞི་ལྔ་པའོ།། །།གར་དང་གླུ་དང་རོལ་མོའི་སྒྲ་སྤོང་བ་ཞེས་བྱ་བ་ནི་གར་དང་གླུ་དང་རོལ་མོའི་སྒྲ་མི་བྱ་ཞིང་གཞན་བྱེད་དུ་གཞུག་པར་ཡང་མི་བྱ་བའོ། །མཆོད་པའི་དོན་དུ་སངས་རྒྱས་བཅོམ་ལྡན་འདས་ལ་བསྟོད་པ་དང་། རྒྱུན་ཆགས་གསུམ་པ་ལ་དབྱངས་ཀྱིས་འདོན་པར་
[50b.6]བྱེད་པ་ལ་ཉེས་པ་མེད་དོ། །དབྱངས་ཀྱི་ང་རོ་རང་བཞིན་མངོན་པར་མི་ཤེས་ན་དབེན་པར་ཞུགས་ཏེ་བསླབ་པར་བྱའོ། །གར་མཁན་ལ་སོགས་པ་གར་བྱོད་པ་ལ་བལྟ་བར་མི་བྱའོ། །གང་དུ་གར་བྱེད་པ་དང་། གླུ་ལེན་པ་དེར་འདུག་པར་མི་བྱའོ། །སྟེང་དུ་འགྲོ་བ་དང་། མཆོང་བ་དང་།
[50b.7]རྒྱུག་པ་དང་། རྩེད་མོ་མི་བྱའོ། །ཆུ་ལ་རྩེད་མོ་ཉམས་སུ་མྱོང་བར་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་གར་དང་གླུ་དང་རོལ་མོ་སྤོང་བ་ཞེས་བྱ་བའི་བསླབ་པའི་གཞི་དྲུག་པའོ།། །།ཕྲེང་བ་དང་སྤོས་ཉུག་པ་དང་རྒྱན་དང་ཁ་དོག་འཆང་བ་དང་སྤོང་བ་ཞེས་བྱ་བ་ནི་ཕྲེང་བ་དང་།
[51a]
[51a.1]མེ་ཏོག་སིལ་མ་དག་བདག་གི་ལུས་ལ་མི་འདོགས་པ་དང་། རང་ལ་དྲིའི་ཆུས་ཁྲུས་མི་བྱེད་པ་དང་། དགའ་བའི་ཕྱིར་གདུ་བུ་དང་། །དཔུང་རྒྱན་དང་། མགུལ་རྒྱན་ལ་སོགས་པས་བདག་ཉིད་ཀྱི་ལུས་ལ་རྒྱན་མི་བྱེད་པ་དང་། བདག་ཉིད་ལ་དྲི་ཞིམ་པོའི་རྫས་ཀྱིས་ཉུག་པ་
[51a.2]ལ་སོགས་པ་མི་བྱེད་ཅིང་། ལུས་ལ་དྲི་ཞིམ་པོའི་རྫས་ཀྱིས་ཡང་དག་པར་འབྱུག་པར་མི་བྱེད་བའོ། །ཆོས་གོས་ལ་བདུག་སྤོས་ཀྱིས་བདུག་པར་མི་བྱའོ། །གལ་ཏེ་དྲི་མི་ཞིམ་པ་ཡིན་ན་དྲི་ང་བ་སྤང་བའི་ཕྱིར་ཆོས་གོས་ལ་བདུག་སྤོས་ཀྱིས་བདུག་པ་དེ་ཉིད་བྱའོ། །སངས་རྒྱས་བཅོམ་
[51a.3]ལྡན་འདས་ལ་ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་ལ་སོགས་པ་དྲི་མ་ཞིམ་པོའི་རྫས་ཀྱིས་ཉུག་པར་བྱའོ། །གལ་ཏེ་དགེ་བསྙེན་དད་པ་ཅན་གྱིས་དྲི་ཆུ་དང་ཁྲུས་བྱེད་ན་བཀྲུ་བར་བྱས་ཏེ། དེའི་བསོད་ནམས་སྤེལ་བར་བྱ་བའི་ཕྱིར་རོ། །ཨུཏྤལ་སྔོན་པོ་ལ་སོགས་པའི་མེ་
[51a.4]ཏོག་རྙེད་པར་གྱུར་ན་བསྣམ་པར་བྱ་སྟེ། །སློབ་དཔོན་དང་། །མཁན་པོ་དང་། །དགེ་སློང་དང་། །འཇིག་རྟེན་པའི་མདུན་དུ་ནི་མ་ཡིན་ནོ། །གང་གི་ཕྱིར་དྲི་ཞིམ་པོ་ཐམས་ཅད་ནི་མིག་དང་རྗེས་སུ་མཐུན་པ་ཡིན་ནོ། །སོ་ཕག་དག་གིས་རྐང་པ་དག་མ་གཏོགས་པའི་ལུས་ལ་ཡོངས་སུ་
[51a.5]ཁྲུད་པར་མི་བྱའོ། །གལ་ཏེ་དད་པ་ཅན་དག་གིས་ལག་པ་རྐང་པ་དག་ལ་དྲི་ཞིམ་པོས་འབྱུག་པར་བྱེད་ན་དེའི་མདུན་དུ་དོར་བར་མི་བྱའོ། །དེ་བཞིན་གཤེགས་པ་དང་། ཉན་ཐོས་ཀྱི་སྐུ་གཟུགས་དང་། མཆོད་རྟེན་དག་ལ་རྗེས་སུ་བྱུག་པར་བྱའོ། །གལ་ཏེ་དེཁྱོད་འདི་ལྟར་ལོངས་
[51a.6]སྤྱོད་པར་མཛོད་ཅིག་ཅེས་ཟེར་ན་དེའི་ཕྱིར་དགེ་བསྙེན་གྱི་ཚིག་ལས་ལོངས་སྤྱོད་པར་བྱའོ། །ནད་པ་ལ་སྨན་པའི་ཚིག་གིས་དྲི་ཞིམ་པོ་འབྱུག་པ་དང་། དྲིའི་ཆུས་ཁྲུས་བྱེད་ན་ནད་པ་ལ་ཉེས་པ་མེད་དོ། །དགེ་ཚུལ་གྱི་བསླབ་པའི་གཞིའི་མདོ་ལས་ཕྲེང་བ་དང་སྤོས་ཉུག་པ་དང་། རྒྱན་དང་ཁ་
[51a.7]དོག་འཆང་བ་སྤོང་བ་ཞེས་བྱ་བའི་བསླབ་པའི་གཞི་བདུན་པའོ།། །།མལ་མཐོན་པོ་དང་། མལ་ཆེན་པོ་སྤོང་བ་ཞེས་བྱ་བ་ལ་མལ་མཐོན་པོ་ནི་གང་ཞིག །སྟན་ལ་འདུག་པའི་རྐང་པ་ས་ལ་མ་རེག་པ་ཡིན་ལ། མལ་ཆེན་པོ་ནི་དངུལ་དང་གསེར་དང་མུ་ཏིག་ལ་སོགས་པ་རྣམས་ལས་
[51b]
[51b.1]བྱས་པ་ཡིན་ཏེ། དེ་ལ་ཉལ་བ་དང་འདུག་པར་མི་བྱའོ། །དངུལ་དང་གསེར་དང་ནོར་བུ་དང་མུ་ཏིག་ལ་སོགས་པ་རྣམས་ལས་བྱས་པའི་སེང་གེའི་ཁྲི་ལ་མི་རྟག་པའི་འདུ་ཤེས་ཀྱིས་འདུག་ལ་ཆོས་ཉན་པ་སྦྱིན་པར་བྱ་སྟེ། དམ་པའི་ཆོས་མཆོད་པའི་ཕྱིར་རོ། །སྟན་མཐོན་པོ་བཀྲ་བའམ་ཉེ་བར་
[51b.2]བཀྲ་བ་ལ་འདུག་སྟེ་ཆོས་མཉན་པ་སྦྱིན་པར་བྱའོ། །མ་གསོལ་བར་ཆོས་ཉེ་བར་བསྟན་པར་མི་བྱའོ། །བཀྲ་བ་དང་ཉེ་བར་བཀྲ་བའི་སྟན་ལ་ཐུན་མོང་གི་གནས་སྐབས་སུ་འདུག་པར་མི་བྱའོ། །གལ་ཏེ་དད་པ་ཅན་གྱིས་ཁྱིམ་གྱི་ནང་དུ་ཉེ་བར་མགྲོན་དུ་བོས་པ་དེར་དངུལ་དང་གསེར་ལ་སོགས་
[51b.3]པ་རྣམས་ལས་བྱས་པའི་སྟན་བསྟབས་པར་གྱུར་ན། དེ་ལ་མི་རྟག་པའི་འདུ་ཤེས་ཀྱིས་འདུག་པར་བྱ་བ་དང་། དད་པ་ཅན་རྣམས་ལ་ཆོས་སྦྱིན་ཞིང་ལོངས་སྤྱད་པར་བྱ་བའི་ཡང་ཕྱིར་རོ། །གཡོགས་མ་མེད་པར་དགེ་འདུན་ནམ་གང་ཟག་གི་མལ་ཆ་དང་སྟན་ལ་སོགས་པ་ལོངས་སྤྱད་
[51b.4]པར་མི་བྱའོ། །ཀོ་ལྤགས་ཀྱི་རང་བཞིན་ནམ། ཀོ་ལྤགས་དང་བརྟགས་པའི་སྟན་ལ་འདུག་པར་མི་བྱ་བ་དང་། ཉལ་བར་ཡང་མི་བྱ། ཁྱིམ་པའི་ཁྱིམ་གྱི་ནང་དུ་སྟན་མེད་ན་འདུག་པ་ལ་ཉེས་པ་མེད་དོ། །གཙུག་ལག་ཁང་གི་ནང་དུ་ཤིང་གི་རང་བཞིན་གྱི་ལྷམ་བགོ་བར་མི་བྱའོ། །གཅི་བའི་
[51b.5]ཁང་པའམ། བཤང་བའི་ཁང་པའམ། ཁྱིམ་ཀྱི་ནང་དུ་ནི་དོར་བར་མི་བྱའོ། །རྗེས་སུ་མ་གནང་བར་སྟན་ལ་འདུག་པར་མི་བྱའོ། །མཛེ་ཅན་གྱིས་ཀྱང་མ་ཡིན་ཏེ། དགེ་འདུན་གྱི་ཁྲི་དང་མལ་ཆ་དང་སྟན་ལ་སོགས་པ་ཡང་སྤང་བར་བྱའོ། །གཙུག་ལག་ཁང་གི་ཕྱི་རོལ་དུ་འདིའི་གནས་
[51b.6]ཁང་བྱའོ། །ནད་པའམ་རྒན་པོ་དག་གིས་ནི་ཁྱོགས་ལ་འགྲོ་བར་བྱའི། ཐུན་མོང་གི་གནས་སྐབས་སུ་ནི་གླང་པོ་ཆེ་དང་། རྟ་དང་། ཤིང་རྟའི་བཞོན་པས་འགྲོ་བར་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་མལ་མཐོན་པོ་དང་མལ་ཆེན་པོ་སྤོང་བ་ཞེས་བྱ་བའི་བསླབ་པའི་
[51b.7]གཞི་བརྒྱད་པའོ།། །།དུས་མ་ཡིན་པའི་ཁ་ཟས་སྤོང་བ་ཞེས་བྱ་བ་ནི་དུས་མ་ཡིན་པར་ཟ་བར་མི་བྱེད་པ་སྟེ། ཇི་སྲིད་སྐྱ་རེངས་སྔོན་པོ་ཤར་ནས་རང་གི་ཉི་མ་ཕྱེད་ཀྱི་བར་དེ་སྲིད་དུ་དུས་ཡིན་ལ། དེ་ལས་གཞན་པ་ནི་དུས་མ་ཡིན་པའོ། །ནང་པར་ལངས་ནས་གདོང་བཀྲུ་བར་བྱའོ། །དུས་ལས་
[52a]
[52a.1]ཡོལ་བ་ན་ལོ་མ་དང་འབྲས་བུ་ལ་སོགས་པ་ལོངས་སྤྱད་པར་མི་བྱ་ཞིང་། ཟང་ཟིང་ཡོངས་སུ་མ་དག་པ་ཅུང་ཟད་ཀྱང་སྤྱད་པར་མི་བྱའོ། །རྒུན་འབྲུམ་ལ་སོགས་པའི་བཏུང་བ་མྱོས་པར་མི་འགྱུར་བ་དང་། ཙང་ཤུ་དག་རས་ཀྱིས་བཙགས་ལ་ཟང་ཟིང་མེད་པར་བྱས་ནས། དུས་
[52a.2]མ་ཡིན་པར་བཏུང་བར་བྱའོ། །སྐོམ་པར་གྱུར་ན་བུ་རམ་དང་ལྷན་ཅིག་པ་དང་སྦྲང་རྩི་དང་ལྷན་ཅིག་པའི་ཆུ་ཡོངསསུ་བཙགས་ཏེ་དུས་མ་ཡིན་པར་བཏུང་བར་བྱའོ། །ཡ་རབས་རྣམས་ཀྱིས་གནང་བའི་ཉ་དང་ཤ་གང་ཡིན་པ་ད་ནི་གཞི་གསུམ་གྱིས་ཡོངས་སུ་དག་པ་ན་ལོངས་སྤྱད་པར་བྱའོ། །རོ་
[52a.3]ལ་སོགས་པ་ལ་སྲེད་པར་མི་བྱའོ། །ཤན་པ་ལས་ཁྱིམ་པ་དད་པ་ཅན་གྱིས་ཉོས་ལ་བཟའ་བར་བྱའོ། །ཤ་རྗེན་པ་མི་ཟའོ། །ནད་པ་ལ་དུས་མ་ཡིན་པར་ཟ་བ་ལ་ཉེས་པ་མེད་དོ། །ནད་པ་ཉིད་ནི་ནུས་པ་མེད་པ་ཉིད་མཐར་ཐུག་པ་ཡིན་ནོ། །ཟང་ཟིང་དང་བཅས་པའི་ཆུ་ལ་སོགས་པ་བཏུང་བར་མི་
[52a.4]བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་དུས་མ་ཡིན་པའི་ཟས་སྤོང་བ་ཞེས་བྱ་བའི་བསླབ་པའི་གཞི་དགུ་པའོ།། །།གསེར་དངུལ་ལེན་པ་སྤོང་བ་ཞེས་བྱ་བ་ནི་ས་ལེ་སྦྲམ་དང་དངུལ་བདག་གིར་བྱེད་པ་མི་རུང་བ་ཡིན་གྱི། ལེན་པ་ནི་རུང་བ་ཡིན་ནོ། །འགའ་ཞིག་གསེར་དང་
[52a.5]དངུལ་ལ་སོགས་པ་ཡོན་གྱི་ཆེད་དུ་འབུལ་བར་བྱེད་ན། དེ་ལ་འདི་སྐད་དུ་ངའི་ཆོས་གོས་དང་བཟའ་བ་ཉོས་ལ་བྱིན་ཅིག་ཅེས་བརྗོད་པར་བྱའོ། །ཡང་ན་འདིས་བདག་གིས་ཆོས་གོས་དང་བཟའ་བ་ལ་སོགས་པ་ཉོ་བར་བྱའོ་སྙམ་པ་འདི་ལྟ་བུའི་སེམས་ཀྱིས་བླང་བར་བྱ་བའམ། སྦྱིན་བདག་
[52a.6]སྤྲོ་བར་བྱ་སྟེ་བླང་བར་བྱའོ། །གླང་པོ་ཆེ་དང་། རྟ་དང་། བ་ལང་དང་། ཁྱི་དང་། ཕག་དང་། བུད་མེད་དང་། །སྐྱེས་པ་དང་། ཁྱེའུ་དང་། བུ་མོ་དང་། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ལ་སོགས་པའི་ཡོན་ནི་བླང་བར་མི་བྱའོ། །ལོག་པར་འཚོ་བས་རྙེད་པ་
[52a.7]བསྒྲུབ་པར་མི་བྱའོ། །ཚུལ་འཆོས་དང་། ཁ་གསག་དང་། གཞོགས་སློང་སྒྱུདང་། ཐོབ་ཀྱིས་འཇལ་བ་དང་། རྙེད་པས་རྙེད་པར་བྱེད་འདོད་པ་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་གསེར་དངུལ་ལེན་པ་སྤོང་བ་ཞེས་བྱ་བའི་བསླབ་པའི་གཞི་བཅུ་པའོ།། །།ཁྱིམ་པའི་
[52b]
[52b.1]རྟགས་སྤོང་བ་ཞེས་བྱ་བ་ནི་ཇི་ལྟར་ཁྱིམ་བདག་གོས་གྱོན་པ་དེ་ལྟར་གོས་གྱོན་པར་མི་བྱེད་པ་དང་། ཉིན་པར་ཕྱི་རོལ་ནས་གོས་དཀར་པོ་དང་། ཁ་ཚར་རིང་པོ་ཅན་གྱོན་པར་མི་བྱེད་པའོ། །ཚོན་རྩི་གསུམ་པོ་དག་གིས་ཁ་བསྒྱུར་བར་བྱས་ནས་འཆང་དུ་རུང་སྟེ། ཚོན་རྩི་གསུམ་ནི་ངུར་སྨྲིག་དང་། ནི་ལི་
[52b.2]ཀ་དང་། དམར་པོ་དག་ཡིན་ནོ། །ཚོན་ཆེན་པོ་བརྒྱད་པོ་དག་ནི་མི་རུང་སྟེ། མཚལ་དང་། རྒྱ་སྐྱེགས་དང་། བཙོད་དང་། གུར་གུམ་དང་། མཐིང་ཤིང་དང་། ལི་ཁྲི་དང་། རྨ་ཤིང་དང་། ལེ་བརྒན་ཞེས་བྱ་བ་ནི་ཚོན་ཆེན་པོ་དག་ཡིན་ནོ། །ཆོས་གོས་ཐམས་ཅད་ནི་སྔོན་པོའི་ཁ་དོག་ཅན་དུ་བགོ་
[52b.3]བར་མི་བྱའོ། །ཁྲ་བོ་ཉེ་བར་བཀྲ་བའི་གདུགས་ཤེ་བཅང་བར་མི་བྱའོ། །སྟེའུའི་སོ་ཅི་ལྟ་བ་དེ་བཞིན་དུ་སེན་མོ་གཅད་པར་བྱའོ། །དགོན་པར་གནས་པས་ནི་སྐྲ་སོར་གཉིས་ལས་ལྷག་པར་གཞག་ཕྱེ་པར་མི་བྱའོ། །གྲོང་མཐའ་བས་ནི་དེ་ལས་དམན་པའོ། །གྲི་གུ་དང་ཆན་པས་སྐྲ་བྲེག་པར་
[52b.4]མི་བྱའོ། །བྱིན་པ་དང་། མཆན་ཁུང་དང་། རྐེད་པ་དང་། སྨིན་མ་བྲེག་པར་མི་བྱའོ། །སྐྲ་བྲེགས་པའི་རྗེས་ལ་ཁྲུས་བྱའོ། །ཚོགས་པ་མེད་ན་ཡན་ལག་ལྔ་བཀྲུ་བར་བྱའོ། །ཕྱོགས་གང་དུ་སྐྲ་བྲེགས་པའི་ཕྱོགས་དེར་ཆག་ཆག་གདབ་པར་བྱ་ཞིང་སྐྱང་ནུལ་བྱའོ། །རྔའི་རྣམ་
[52b.5]པ་ལྟ་བུའམ་མདུང་རྩེའི་རྣམ་པ་ལྟ་བུའི་དཀྱིལ་འཁོར་བྱའོ། །མིག་ལ་དུད་པ་བྱུག་པར་མི་བྱའོ། །གལ་ཏེ་མིག་ན་བ་ཡིན་ན་ཉེས་པ་མེད་དོ། །མེ་ལོང་ལ་གདོང་བལྟ་བར་མི་བྱའོ། །སྐྱོ་བ་བསྐྱེད་པའི་ཆེད་དུ་ནི་ཉེས་པ་མེད་དོ། །ཁུར་ལྕི་བ་མི་བསྐུར་ཞིང་། ཕྲག་པ་དང་། རྐེད་པ་དང་།
[52b.6]མགོ་བོ་རྣམས་ཀྱིས་བསྡུས་ཁུར་བུ་མ་ཡིན་ནོ། །ཆུའི་ཕྱོགས་སུ་རྩ་བར་ཞྭ་གཟུང་བར་བྱའོ། །སྨད་ཤམ་ཐབས་ཀུན་ནས་ཟླུམ་པོར་བགོ་བར་བྱ་ཞིང་། སྟོད་དུ་ཀུན་ནས་ཆོས་གོས་ཀྱང་ངོ་། །བྱ་བ་བྱེད་པའི་ཚེ་ཆོས་གོས་ཀྱི་མཐའ་མར་མདུད་པ་བཅིངས་ལ་ལས་བྱའོ། །རྣམ་པ་ཐམས་
[52b.7]ཅད་དུ་ཁྱིམ་པའི་རྟགས་ཀུན་ཏུ་སྤྱད་པར་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་ཁྱིམ་པའི་རྟགས་སྤོང་བ་ཞེས་བྱ་བ་རྫོགས་སོ།། །།རབ་ཏུ་བྱུང་བའི་རྟགས་ཡང་དག་པར་ལེན་པ་ཞེས་བྱ་བ་ནི་རེ་ཞིག་རིམ་གྱིས་བརྗོད་པར་བྱ་སྟེ། མཁན་པོ་དང་སློབ་དཔོན་དག་ལ་ཉེ་བར་
[53a]
[53a.1]ལྡང་བར་བྱའོ། །ཇེ་དང་པོར་བཤང་བ་དང་གཅི་བའི་ཁང་པར་འགྲོ་བར་བྱ་སྟེ། ཆོས་གོས་བརྫེས་ལ་སེ་གོལ་བྱས་ནས་འཆག་པའི་ཁང་པར་འཇུག་པར་བྱའོ། །བཤང་བ་དང་གཅི་བ་བྱས་ནས་མཆན་ཁུང་དུ་བུམ་པ་བཟུང་སྟེ་ལག་པ་གཡོན་པས་བཤང་བའི་ལམ་དང་པོར་
[53a.2]ས་འཇམ་པོའམ་བོང་བས་ཕྱི་བར་བྱའོ། །དེ་ནས་ས་ཕུང་གསུམ་པོ་དག་གིས་བཤང་བའི་ལམ་དག་པར་བྱས་ནས་ཕྱིར་བྱུང་སྟེ། རྗེས་སུ་མཐུན་པའི་གནས་སུ་ས་ཕུང་བདུན་སོ་སོར་གཞག་པར་བྱའོ། །དེ་ནས་གཞན་ས་ཕུང་བདུན་པོ་དག་གིས་ལག་པ་གཡོན་པ་དག་པར་བྱའོ། །
[53a.3]དེ་ནས་ལག་པ་གཉིས་ས་ཕུང་དེ་རྣམས་ཀྱིས་དག་པར་བྱའོ། །ས་བླངས་ནས་སེན་མོའི་དྲི་མ་བསལ་བར་བྱའོ། །ས་བླངས་ནས་ལག་ངར་དག་པར་བཀྲུ་བར་བྱའོ། །བུམ་པ་ནི་ས་ཕུང་གཅིག་གིས་དག་པར་བྱའོ། །བྱིན་པ་དག་དང་རྐང་པ་དག་བཀྲུ་བར་བྱའོ། །རབ་ཏུ་དབེན་པའི་
[53a.4]ཕྱོགས་སུ་བཤང་གཅི་བྱའོ། །དེ་དག་དང་ཉེ་བར་གཏམ་སྣ་ཚོགས་མི་བྱ། ཡུན་རིང་དུ་གནས་པར་ཡང་མི་བྱའོ། །ཁ་དོན་དང་བཙོ་བླག་ལ་སོགས་པ་ཡང་དེར་མི་བྱའོ། །དེ་ལས་དལ་བུས་འོངས་ནས། དལ་བུ་དལ་བུས་སྒོ་གཏན་ཕྱེ་སྟེ། གནས་ཁང་དུ་འཇུག་པར་བྱ་ཞིང་སྒོ་སྐྱེས་ལ་
[53a.5]མ་བརྗེད་པར་བྱའོ། །རུང་བའི་ཆུའི་ལག་པ་དག་མཁྲིག་མའི་བར་དུ་བཀྲུ་བའམ་ཕྱི་བ་བྱའི། རྡུལ་ལམ་སས་ནི་མ་ཡིན་ནོ། །རིལ་བ་སྤྱི་བླུགས་ཐོགས་ཏེ་རབ་ཏུ་དབེེན་པའི་ཕྱོགས་སུ་སོང་ནས་སོ་ཤིང་དོར་བར་བྱའོ། །སོ་ཤིང་ནི་རྣམ་པ་གསུམ་སྟེ། ཆེན་པོ་དང་། འབྲིང་དང་།
[53a.6]ཆུང་ངུ་དང་། ཆེན་པོ་ནི་སོར་བཅུ་གཉིས་པའོ། །ཆུང་ངུ་ནི་སོར་བརྒྱད་པའོ། །འབྲིང་ནི་དེ་དག་ལས་བར་པའོ། །དེ་རྣམས་ལས་གཞན་གང་ཡང་རུང་བས་དོར་བར་བྱའི་ཤིན་ཏུ་རྩུབ་པ་དང་ཕྲ་བ་དག་གིས་དང་ཡུན་རིང་དུ་ཡང་མ་ཡིན་ནོ། །དེ་རྣམ་པ་གཉིས་སུ་བཀས་ཏེ་ཕན་ཚུན་འབྲུད་པ་ལ་
[53a.7]དལ་བུས་ལྕེ་བཞར་བར་བྱའོ། །ཆུས་བཀྲུ་བའམ་རྡུལ་ལམ། སོ་ལ་བྲུད་པར་བྱའོ། །དེ་བཞིན་གཤེགས་པའམ། མཆོད་རྟེན་ནམ། སློབ་དཔོན་ནམ། མཁན་པོའི་མདུན་དུ་སོ་ཤིང་དོར་བར་མི་བྱའོ། །དགེ་སློང་མཆོག་ཏུ་གནས་བརྟན་རྣམས་ཀྱི་དྲུང་དུ་མ་ཡིན་ནོ། །ཉེ་བར་ལོངས་སྤྱོད་
[53b]
[53b.1]པའི་གནས་སུ་མ་ཡིན་ནོ། །འཆག་ས་དང་ཉེ་བར་མ་ཡིན་མོད་ཀྱི་འོན་ཀྱང་རབ་ཏུ་དབེན་པར་བྱའོ། །ཁ་གདོང་བཀྲུས་ནས་དེ་མ་ཐག་པ་ཉིད་དུ་བཅོམ་ལྡན་འདས་ལ་ཕྱག་འཚལ་ལོ། །དེ་གལ་ཏེ་མཁན་པོ་ལ་ཕྱག་བྱེད་ན་མཁན་པོས་གདོང་བཀྲུ་བ་དང་སོ་ཤིང་དོར་བར་བྱས་ནས། དེའི་ཕྱིར་
[53b.2]དགོངས་སུ་གསོལ་ཞེས་བྱ་བས་ཕྱག་བྱས་ནས་གུས་པ་དང་བཅས་པས་བསྒུལ་ལ་མཉམ་མམ་དྲི་བ་དང་། ཀུན་ཏུ་དྲི་བར་བྱའོ། །མཁན་པོ་དགོངས་སུ་གསོལ། ཆག་ཆག་དང་། ཕྱག་དར་དང་། སྐྱང་ནུལ་དང་། ཀློག་པ་དང་། ཁ་དོན་དང་། ཀུན་ཏུ་སྤྱོད་པ་དག་བགྱིད་ཅེས་ཞུ་བར་
[53b.3]བྱའོ། །བརྩམ་པའི་བྱ་བ་ཐམས་ཅད་ཀུན་ཏུ་དྲི་བར་བྱའོ། །ཀུན་ཏུ་ཞུས་ཏེ་དེ་བཞིན་གཤེགས་པ་ལ་དཀྱིལ་འཁོར་བྱ་བ་དང་། ཆག་ཆག་དང་། ཕྱག་དར་དང་། སྐྱང་ནུལ་དང་། བསྟོད་པ་མངོན་པར་བརྗོད་པ་དག་བྱ་བ་དང་། དེ་བཞིན་གཤེགས་པ་ལ་བསྐོར་བ་བྱ་བ་དང་། ཡན་
[53b.4]ལག་ལྔས་དགེ་སློང་རྣམས་ལ་ཕྱག་དག་བྱའོ། །ཚུལ་ཁྲིམས་འཆལ་པ་ལ་ཡན་ལག་ལྔས་ཕྱག་མི་བྱའོ། །ནང་དང་བཅས་པ་ལའང་ཕྱག་མི་བྱའོ། །གཉིས་པོ་དག་དང་ལྷན་ཅིག་སྟན་གཅིག་ལ་འདུག་པར་མི་བྱའོ། །དེའི་རྗེས་ལ་ཉི་མ་ཤར་བ་ན་ཆུ་བརྟག་པར་བྱའོ། །མཁན་པོ་ལ་ཀུན་
[53b.5]ཏུ་ཞུས་ཏེ་མདུན་དུ་འགྲོ་བ་གུས་པར་བྱའོ། །མ་ཞུས་པར་མཚམས་ཀྱི་ནང་དུ་མཆོད་རྟེན་ལ་ཕྱག་བྱེད་པ་དང་། ཆུ་བཏུང་བ་དང་། སོ་ཤིང་དོར་བ་དང་། བཤང་གཅི་དག་བྱའོ། །མ་ཞུས་པར་ནི་ཐ་ན་ཁབ་མིག་ཏུ་སྐུད་པ་གཞུག་པར་ཡང་མི་བྱའོ། །མཁན་པོ་གནས་པ་མེད་ན་གནས་
[53b.6]ཀྱི་སློབ་དཔོན་ལ་ཞུ་བར་བྱའོ། །གནས་ཀྱི་སློབ་དཔོན་གནས་པར་མ་གྱུར་ན་དགེ་སློང་འགྲོགས་བཤེས་ལ་ཀུན་ཏུ་ཞུ་བར་བྱའོ། །མ་ཞུས་པར་གནས་པར་མི་བྱའོ། །གནས་མེད་པར་ལྗོངས་རྒྱུ་ཞིང་འགྲོ་བར་མི་བྱའོ། །ཚུལ་ཁྲིམས་འཆལ་བ་དང་། ནང་དང་བཅས་པ་དང་། ལྷན་ཅིག་
[53b.7]གང་དུའང་འགྲོ་བར་མི་བྱའོ། །དྲན་པ་དང་ཤེས་བཞིན་དང་ལྡན་པ་དང་། གཉའ་ཤིང་གང་ཙམ་བལྟ་བ་དང་། ཕྱོགས་སུ་མི་བལྟ་བ་དང་། ཞི་བའི་སྤྱོད་ལམ་དང་། གཏམ་སྣ་ཚོགས་མི་བྱེད་པ་དང་། ཆོས་ཀྱི་གཏམ་སྨྲ་བའམ། འཕགས་པའི་མི་སྨྲ་བ་ཉིད་ཀྱིས་འགྲོ་བར་བྱའོ། །
[54a]
[54a.1]གལ་ཏེ་མཆོད་སྟོན་གྱི་དུས་སུ་དགེ་འདུན་གྱི་ནང་དུ་འཇུག་པ་ན་ཆོས་གོས་ཀྱི་མཐའ་མར་སྒྲོ་གུ་བཅིངས་ནས་ལག་པ་གཉིས་བཀྲུས་ཏེ། རྐང་པ་དག་བཀྲུས་ནས་གུས་པ་དང་བཅས་པས་དགེ་འདུན་གྱི་ནང་དུ་འཇུག་པར་བྱས་ལ། གྲལ་རིམས་ཇི་ལྟ་བ་བཞིན་དུ་འདུག་སྟེ།
[54a.2]དྲན་པ་དང་ཤེས་བཞིན་དང་ལྡན་པས་ལོངས་སྤྱད་པར་བྱའོ། །སྐད་གསང་མཐོན་པོས་བྲིམ་པར་བྱ་བ་འབྲིམ་དུ་མི་གཞུག་གོ། །བྱིན་ཅིག་བྱིན་ཅིག་ཅེས་བརྗོད་པར་མི་བྱ་མོད་ཀྱི་འོན་ཀྱང་བྲིམས་ཤིག་ཅེས་སོ། །བསོད་སྙོམས་ལ་ཡོངས་སུ་ལོངས་སྤྱོད་པ་ནི་རྒྱགས་པའི་ཕྱིར་མ་ཡིན། སྒེག་
[54a.3]པའི་ཕྱིར་མ་ཡིན། བརྒྱན་པའི་ཕྱིར་ཡང་མ་ཡིན་མོད་ཀྱི་འོན་ཀྱང་ཇི་སྲིད་ཁོ་ནར་ལུས་འདི་གནས་པར་བྱ་བའི་ཕྱིར་དང་།ཚངས་པར་སྤྱོད་པ་རྗེས་སུ་གཟུང་བར་བྱ་སྙམ་པ་དེ་ལྟ་བུའི་སེམས་ཀྱིས་ལོངས་སྤྱད་པར་བྱའོ། །བཅའ་བ་དང་བཟའ་བ་ལ་སོགས་པ་གྱ་ནོམ་པ་རྙེད་ན་དེ་མཁན་པོ་དང་སློབ་དཔོན་དག་
[54a.4]ལ་བསྟབས་པར་བྱའོ། །དེ་དག་གིས་ཀྱང་ཚོད་རིག་པར་བྱ་བ་ཡིན་ནོ། །ཁ་ཁམ་དང་བཅས་པས་སྨྲ་བར་མི་བྱའོ། །ཁམ་ཆུང་བའམ། ཆེ་བ་གཞུག་པར་མི་བྱ། མགྲོན་དུ་མ་བོས་པའི་ཟས་མི་བཟའ། སྐོག་པ་བཟའ་བར་མི་བྱའོ། །ནད་པས་ནི་སྨན་པས་ལུང་ཕོག་ན་བཟའ་བར་བྱའོ། །
[54a.5]ཇི་སྲིད་དུ་དྲི་དང་མ་བྲལ་བ་དེ་སྲིད་དུ་དབེན་པའི་ཕྱོགས་སུ་གནས་པར་བྱའོ། །དགེ་འདུན་གྱི་ནང་དུ་མཆིལ་ལྷམ་བགོས་ནས་འཇུག་པར་མི་བྱའོ། །ཟས་ཀྱི་ཚོད་རིག་པར་བྱ་བ་ཡིན་ནོ། །བྱ་རོག་རྣམས་ཀྱིས་ལྷག་མར་བྱས་པ་གང་ཡིན་པ་དེ་ནི་མཆུས་སླེབ་ཚད་བོར་ནས་བཟའ་བར་བྱའོ། །ཆེད་
[54a.6]དུ་མི་བྱ་བར་ཟས་ཀྱི་ཆང་པ་གཞག་པར་བྱའོ། །སྣོད་དམ་ཚོགས་པ་མེད་ན་ཕ་མ་དང་ཉེ་དུ་རྣམས་སམ། འགྲོགས་བཤེས་དང་། ཚུལ་ཁྲིམས་དང་ལྡན་པའི་དགེ་ཚུལ་དང་ལྷན་ཅིག་དབེན་པའི་ཕྱོགས་སུ་བཟའ་བར་བྱའོ། །ཚུལ་ཁྲིམས་འཆལ་པ་དང་། ལྷན་ཅིག་བཟའ་བར་ནི་མི་
[54a.7]བྱའོ། །ཟང་ཟིང་མེད་པའི་ཆུ་དང་། ལྕེ་བཞར་དང་། སོ་ཤིང་དག་གིས་ཁ་ཟང་ཟིང་མེད་པར་བྱའོ། །དེ་ནས་མཁན་པོ་ལ་ཡན་ལག་ལྔས་ཕྱག་བྱས་ནས་ཀུན་དུ་ཞུ་བར་བྱའོ། །མཁན་པོ་དགོངས་སུ་གསོལ། ཀློག་པ་དང་། ཁ་དོན་དང་། ཀུན་དུ་སྤྱོད་པ་དག་སྤྱད་པར་ཞུའོ་ཞེས་ཞུས་ནས་
[54b]
[54b.1]ཀློག་པ་དང་ཁ་ཏོན་ལ་སོགས་པ་བྱའོ། །ཟན་ཟོས་པའི་དེ་མ་ཐག་ཉིད་དུ་སྦྱིན་བདག་གི་ཡོན་བཤད་པར་བྱའོ། །སྒྲ་བརྡ་བྱས་ནས་མཆིལ་མ་ལ་སོགས་པ་དོར་བར་བྱའོ། །དགེ་འདུན་གྱི་རྩིག་པའམ། ཀ་བའམ་ཁང་པའམ། རྗེས་སུ་མཐུན་པའི་གནས་པ་གཞན་དུ་ནི་མ་ཡིན་ནོ། །ཤམ་
[54b.2]ཐབས་ཀྱི་མཐའ་མ་གཉིས་དང་དབུས་སུ་བཟུང་ནས་ཡ་གད་ལ་སོགས་པ་ལ་འཛེགས་པ་དང་ཐུར་དུ་འབབ་པ་དང་། ཉིན་པར་གཉིད་ལོག་པར་བྱའོ། །སློབ་དཔོན་དང་མཁན་བོ་དག་གི་ཐད་དུ་མ་དང་ཕའི་འདུ་ཤེས་ཉེ་བར་གཞག་པར་བྱའོ། །དེ་དག་ལ་ཡང་རྐང་པ་དག་བཀྲུ་བ་ལ་སོགས་པས་བསྟེན་
[54b.3]བཀུར་བྱའོ། །དེ་དག་གིས་ཀྱང་དེའི་སྟེང་དུ་བུ་ལྟ་བུའི་འདུ་ཤེས་ཉེ་བར་གཞག་པར་བྱའོ། །དེ་དག་ལ་ཡང་སྟོན་པ་བཞིན་དུ་གུས་པས་བསྙེན་བཀུར་བྱའོ། །མཆོག་ཏུ་ཚུལ་ཁྲིམས་འཆལ་པ་ཡིན་ན་ཡང་སློབ་དཔོན་དང་མཁན་པོ་དང་མ་དང་ཕ་དང་ནད་པ་དག་ལ་བསྙེན་བཀུར་བྱའོ། །སློབ་
[54b.4]དཔོན་དང་མཁན་པོ་ལ་སོགས་པ་རྣམས་ལ་མུན་ཁུང་དུ་ཕྱག་མི་བྱ། ནད་པ་རྣམས་ལ་མ་ཡིན། གོས་གཅིག་པ་རྣམས་ལ་མ་ཡིན། ཁྱིམ་གྱི་ནང་དུ་གནས་པ་རྣམས་ལ་མ་ཡིན། ཟས་ཟ་བ་རྣམས་ལ་མ་ཡིན། ཁ་ཟང་ཟིང་དང་བཅས་པ་རྣམས་ལ་མ་ཡིན། བཤང་བ་དང་གཅི་བའི་ཁང་
[54b.5]པའི་སྟེང་དུ་གནས་པ་རྣམས་ལ་མ་ཡིན། བྱ་བ་གཞན་ལ་སེམས་གཡེངས་པ་རྣམས་ལ་ཕྱག་མི་བྱའོ། །རང་ཉིད་དེ་ལྟ་བུར་གྱུར་པས་ཀྱང་ཕྱག་མི་བྱའོ། །ཕྱག་བྱེད་པར་འདོད་པས་དགོངས་སུ་གསོལ་ཞེས་བརྗོད་པར་བྱའོ། །ཅང་མི་སྨྲ་བར་བྱེད་ན་ཕྱག་དག་བྱའོ། །ཡང་མ་བྱེད་ཅིག་
[54b.6]ཅེས་ཟེར་ན་མི་བྱའོ། །སློབ་དཔོན་དང་མཁན་པོ་དང་ཚངས་པ་མཚུངས་པར་སྤྱོད་པ་རྣམས་མཐོང་ནས་དེ་མ་ཐག་པ་ཉིད་དུ་སྟན་སྤང་བར་བྱའོ། །ཕྱག་ནི་རྣམ་པ་གཉིས་ཏེ། སྒྱིད་པ་ནས་བཟུང་བ་དང་། ཡན་ལག་ལྔས་སོ། །གལ་ཏེ་བདག་ཉིད་སྐྲ་བྲེགས་པར་གྱུར་ན་སློབ་དཔོན་དང་
[54b.7]མཁན་པོ་ལ་སོགས་པ་དང་། བཅོམ་ལྡན་འདས་ལ་ཡན་ལག་ལྔས་ཕྱག་བྱའོ། །སློབ་དཔོན་དང་མཁན་པོ་ལ་སོགས་པ་རྣམས་ཀྱི་སྐྲ་བྲེགས་པར་གྱུར་ན་ཡན་ལག་ལྔས་ཕྱག་བྱའོ། །གསར་བུ་དང་ཁྱིམ་པ་དག་གིས་གལ་ཏེ་ཕྱག་བྱས་པར་གྱུར་ན་ཨ་རོག་གྱ་ཞེས་བརྗོད་པར་བྱའོ། །
[55a]
[55a.1]ཁྱིམ་པ་ལ་ཕྱག་མི་བྱ། ལྷ་གཞན་དག་ལ་ཕྱག་མི་བྱའོ། །ལམ་དུ་འགྲོ་བའི་ཚེ་ལྷ་གཞན་གྱི་རྟེན་མཐོང་ན་བདེ་བར་གཤེགས་པའི་ཚིགས་སུ་བཅད་པ་གདོན་པར་བྱའོ། །ཁྲོན་པ་ལ་སོགས་པ་རྣམས་ནས་ཆུ་བླངས་ནས་སྦྱིན་པ་དང་ལྡན་པའི་ཚིགས་སུ་བཅད་པ་གདོན་
[55a.2]པར་བྱའོ། །ཤིང་ལྗོན་པའི་རྩ་བ་དང་། ལྷ་ཁང་ལ་སོགས་པ་རྣམས་སུ་གནས་པ་ན་རྒྱུན་ཆགས་གསུམ་པ་བརྗོད་པར་བྱའོ། །རྒྱུན་ཆགས་གསུམ་པ་ནི། དཀོན་མཆོག་གསུམ་ལ་ཕྱག་འཚལ་བ་དང་། བསོད་ནམས་ཡོངས་སུ་བསྔོ་བ་དང་། ངེས་པར་བྱ་བ་དག་ཡིན་ནོ། །ལག་པ་དག་དང་
[55a.3]རྐང་པ་དག་བཀྲུས་ནས་ཆོས་གོས་རྣམས་སྦྲུགས་ལ་མཆིལ་ལྷམ་དག་ཕྱིས་ཏེ་ཞི་བའི་སྤྱོད་ལམ་གྱིས་གཙུག་ལག་ཁང་དུ་འཇུག་པར་བྱའོ། །དེ་གླལ་བར་གྱུར་ན་ལག་པའམ་གཞན་གོས་ཀྱིས་ཁ་དགབ་པར་བྱའོ། །མཆོད་རྟེན་གྱི་གྲིབ་མའམ་བདེ་བར་གཤེགས་པའི་སྐུ་གཟུགས་ཀྱི་གྲིབ་མ་
[55a.4]མཐོང་ནས་གཙུག་ལག་ཁང་གི་ཚིགས་སུ་བཅད་པ་བརྗོད་ལ་འགོམ་པར་བྱའོ། །འཐབ་པར་བྱེད་པའམ། འཐབ་ཏུ་གཞུག་པའམ། བལྟ་བར་ཡང་མི་བྱའོ། །རྒྱན་པོ་བྱེད་པ་མི་བྱའོ། །གང་དུ་ཆོ་ལོ་བྱེད་པ་དེར་འདུག་པར་མི་བྱའོ། །དཔང་པོ་བྱེད་པ་དེར་འདུག་པར་མི་བྱའོ། །གཉའ་བོ་
[55a.5]མི་བྱའོ། །ཆོས་ཟོང་དུ་མི་བྱའོ། །བསོད་ནམས་ཀྱི་བློས་ལས་བྱའི་གླ་རྔན་གྱིས་ནི་མ་ཡིན་ནོ། །དད་པས་སྦྱིན་པར་བྱ་བ་དགེ་འདུན་ནམ་གང་ཟག་ལས་བྱུང་བ་ཡོངས་སུ་ལོངས་སྤྱད་ནས་སྙོམ་ལས་ཀྱིས་དུས་འདའ་བར་མི་བྱའོ། །འོན་ཀྱང་ཀློག་པ་དང་ཁ་ཏོན་དག་གིས་སོ། །རྒོད་པ་མེད་པ་དང་
[55a.6]རྣམ་པར་གཡེངས་པ་མེད་པར་བྱའོ། །གནས་བརྟན་རྣམས་དང་བར་མ་རྣམས་དང་། གསར་བུ་རྣམས་ལ་གུས་པ་དང་བཅས་པ་དང་། ཞེ་ས་དང་བཅས་པར་བྱའོ། །མུ་ཅོར་མ་ཡིན་པ་དང་། རྣམ་པར་གཡེངས་པའི་ཚིག་མ་ཡིན་པར་བྱའོ། །ངོ་ཚ་དང་ལྡན་པར་བྱ་ཞིང་དབང་པོའི་སྒོ་
[55a.7]བསྡམ་པར་བྱའོ། །གསོང་པོར་སྨྲ་བ་དང་། དགའ་བའི་གཏམ་དང་། ཀྱེ་ཚུར་ཤོག་འོངས་པ་ལེགས་སོ་ཞེས་སྨྲ་བ་དང་། ཁྲོ་གཉེར་མེད་པ་དང་། འཛུམ་པ་སྔོན་དུ་འགྲོ་བར་བྱའོ། །དུས་སུ་མཁན་པོ་ལ་ཀུན་ཏུ་དྲི་བར་བྱ་སྟེ། མཁན་པོ་དགོངས་སུ་གསོལ། ཀུན་ཏུ་དྲི་བ་ནི་བདག་
[55b]
[55b.1]ཀློག་པ་དང་། ཁ་ཏོན་དང་། ཀུན་ཏུ་སྤྱོད་པ་དག་བགྱིད་ཅིང་། མཚན་མོའི་ཐུན་དང་པོ་དང་། མཚན་མོའི་ཐུན་ཐ་མ་ལ་མི་ཉལ་བར་སྦྱོར་བ་ལ་རྗེས་སུ་བརྩོན་པར་བགྱིད་དོ་ཞེས་ཀུན་ཏུ་དྲི་བར་བྱའོ། །ཀུན་ཏུ་དྲིས་ནས་ཀྱང་ཀློག་པ་དང་། ཁ་ཏོན་ལ་སོགས་པ་དག་བྱ་ཞིང་མཚན་མོའི་ཐུན་དང་བོ་དང་།
[55b.2]མཚན་མོའི་ཐུན་ཐ་མ་ལ་མི་ཉལ་བར་སྦྱོར་བའི་རྗེས་སུ་བརྩོན་པ་ཉིད་དུ་བྱའོ། །དུས་སུ་སྤྱད་པར་བྱའི་དུས་མ་ཡིན་པར་སྤྱད་པར་མི་བྱའོ། །འདུག་པ་ལ་མཁས་པ་དང་། ཉལ་བ་ལ་མཁས་པར་བྱའོ། །འདུག་པ་དང་ཉལ་བ་ལ་སོ་སོར་བརྟག་པར་བྱའོ། །ཤིན་ཏུ་ཁྱད་པར་ཅན་དང་། ཤིན་ཏུ་
[55b.3]དམན་པའི་གོས་བགོ་བར་མི་བྱའོ། །ལྷག་པར་ཆགས་པ་མེད་པའམ། མགོ་ལྷག་པར་གཡོགས་པ་མེད་པར་བྱ་བའམ། རྐང་པའི་སྟེང་དུ་རྐང་པ་མི་གཞག་པའམ། ཀུན་ནས་གཡོགས་པར་མི་བྱ་བའམ། དེ་བཞིན་གཤེགས་པའམ། སློབ་དཔོན་ནམ་མཁན་པོའམ་གནས་པ་
[55b.4]རྣམས་སམ། དགེ་སློང་རྣམས་ཀྱི་མདུན་དུ་འདུག་པར་མི་བྱའོ། །དེ་དག་གི་མདུན་དུ་བཅག་པར་ཡང་མི་བྱ་བ་ཉིད་དོ། །འདུག་པ་ལ་འགྲེང་སྟེ་ཆོས་བཤད་པར་མི་བྱ། ཉལ་བ་ལ་འདུག་པས་མ་ཡིན། སྟན་ཆེས་མཐོ་བར་འདུག་པ་ལ་སྟན་ཆེས་དམའ་བར་འདུག་པས་མ་ཡིན། མགོ་ཞྭ་ཅན་
[55b.5]དང་། ཅོད་པན་ཅན་ལ་མ་ཡིན། གླང་པོ་ཆེ་ལ་ཞོན་པ་དང་། རྟ་དང་ཤིང་རྟ་དང་ཁྱོགས་ན་འདུག་པའམ། མཆིལ་ལྷམ་ཅན་ལ་མ་ཡིན་ནོ། །ལྷུང་བཟེད་གཉིས་བཅང་བར་བྱ་སྟེ། ས་དང་ལྕགས་ཀྱི་རང་བཞིན་ནོ། །གོ་བར་བྱ་བའི་ཕྱིར་དང་། ཁྱི་རྣམས་བསྐྲད་པར་བྱ་བའི་ཕྱིར་ཁར་སིལ་སྒྲ་དང་
[55b.6]ལྡན་པ་བཅང་བར་བྱའོ། །རྒན་པོ་ལ་ནི་གནས་བརྟན་ནམ། བཙུན་པའི་ཚིག་གིས་བརྗོད་པར་བྱའོ། །བར་མ་ལ་ནི་གནས་བརྟན་གྱི་ཚིག་གིས་སོ། །གསར་བུ་ལ་ནི་ཚེ་དང་ལྡན་པའི་ཚིག་གིས་སོ། །སློབ་དཔོན་དང་མཁན་པོ་དང་གནས་བརྟན་རྣམས་ལ་ནི་ཚེ་དང་ལྡན་པའི་ཚིག་གིས་ཀུན་
[55b.7]ཏུ་བརྗོད་པར་མི་བྱའོ། །གཞན་དག་ལ་སློབ་དབོན་དང་མཁན་པོ་དག་གི་མིང་གིས་བརྗོད་པར་མི་བྱའོ། །དབྱར་རྣམས་ལས་སྔ་མའམ་ཕྱི་མ་དག་ཏུ་དབྱར་ཉེ་བར་ཁས་བླང་བར་བྱའོ། །སྔ་མ་ནི་ཇི་སྲིད་དབྱར་ཟླ་ཐ་ཆུངས་ཀྱི་ཟླ་བའི་ཚེས་གཅིག་ནས། སྟོན་ཟླ་འབྲིང་པོའི་ཚེས་བཅོ་ལྔའི་དགག་དབྱེའི་
[56a]
[56a.1]བར་དེ་སྲིད་དུ་དབྱར་འདྲལ་བར་མི་བྱའོ། །ཕྱི་མ་ནི་ཇི་སྲིད་སྟོན་ཟླ་ར་བའི་ཚེས་གཅིག་ནས་སྟོན་ཟླ་ཐ་ཆུངས་ཀྱི་བླ་བ་ཡར་གྱི་ངོའི་ཚེས་བཅོ་ལྔའི་བར་དེ་སྲིད་དུ་དབྱར་འདྲལ་བར་མི་བྱའོ། །དེ་ལྟར་ཡང་དབྱར་ཉེ་བར་ཁས་བླང་བར་བྱ་སྟེ། མཁན་པོའམ། སློབ་དབོན་ནམ།
[56a.2]དགེ་སློང་གཞན་དག་གི་མདུན་དུ་ཙོག་པུས་འདུག་སྟེ། ཐལ་མོ་སྦྱར་བ་བྱས་ནས་ཚིག་འདི་སྐད་ཅེས་བརྗོད་པར་བྱའོ། །མཁན་པོ་དགོངས་སུ་གསོལ། དེང་དགེ་འདུན་གྱི་དབྱར་ཟླ་འབྲིང་པོ་ཉེ་བར་བསྒྲུབ་པའི་དུས་ཡིན་ལ། བདག་དགེ་ཚུལ་མིང་འདི་ཞེས་བགྱི་བའི་ཡང་དབྱར་ཟླ་འབྲིང་པོ་དབྱར་
[56a.3]ཉེ་བར་བསྒྲུབ་པའི་དུས་ཡིན་ཏེ། བདག་དགེ་ཚུལ་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་ཇི་སྲིད་དུ་འདི་ལྟ་སྟེ། གནས་རལ་བ་དང་། འདྲུམས་པ་བཅོས་པའི་སླད་དུ་སྦྱིན་བདག་ཆེ་གེ་མོ་ཞེས་བགྱི་བ་དང་། ཞལ་ཏ་བྱེད་པ་ཆེ་གེ་མོ་ཞེས་བགྱི་བ་དང་། ནད་གཡོག་
[56a.4]བྱེད་པ་ཆེ་གེ་མོ་ཞེས་བགྱི་བ་དང་། སྤྱོད་ཡུལ་གྱི་གྲོང་ཁྱེར་ཆེ་གེ་མོ་ཞེས་བགྱི་བས་དབྱར་ཟླ་བ་གསུམ་ཉེ་བར་ཁས་བླང་བར་བགྱི་སྟེ། བདག་དབྱར་འདི་ནས་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ། །དེ་བཞིན་དུ་ལན་གཉིས་ལན་གསུམ་དུའོ། །ཐབས་ཡིན་ནོ། །ལེགས་སོ། །
[56a.5]དབྱར་ཉེ་བར་ཁས་བླངས་ནས་གལ་ཏེ་གཞན་གང་ཡང་རུང་བ་ཞིག་ཏུ་འགྲོ་བ་ན་ཆོས་ཀྱི་དོན་དུ་ཞག་བདུན་བྱིན་གྱིས་བརླབ་པར་བྱའོ། །མཁན་པོའམ། སློབ་དཔོན་ནམ་དགེ་སློང་གཞན་གང་ཡང་རུང་བའི་མདུན་དུ་ཕྱག་འཚལ་ནས་ཙོག་པུས་འདུག་སྟེ་འདི་སྐད་བརྗོད་པར་བྱའོ། །མཁན་པོ་དགོངས་
[56a.6]སུ་གསོལ། བདག་དགེ་ཚུལ་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་པ་ལས་བདག་དགེ་ཚུལ་མིང་འདི་ཞེས་བགྱི་བ་ཆོས་དང་ལྡན་པའི་བགྱི་བ་ཉིད་ཀྱིས་ཞག་བདུན་མཚམས་ཀྱི་སླད་རོལ་དུ་མཆི་བ་དང་དེ་ཚུན་ཆད་ཀྱིས་སླར་
[56a.7]མཆི་བར་བྱིན་གྱིས་བརླབ་བོ། །བདག་དབྱར་འདི་ནས་མཆིས་ཤིང་བདག་གི་དབྱར་གྱི་གནས་འདི་ལགས་སོ། །དེ་བཞིན་དུ་ལན་གཉིས་ལན་གསུམ་མོ། །ཐབས་ཡིན་ནོ། །ལེགས་སོ། །བྱིན་གྱིས་བརླབས་ནས་འགྲོ་བ་ན་ཞག་བདུན་ནས་སླར་ལྡོག་པར་བྱ་ཞིང་དེ་བཞིན་དུ་ལན་གཉིས་དབྱར་འདྲལ་
[56b]
[56b.1]བར་མི་བྱའོ། །སྲོག་གི་བར་ཆད་དང་། ཚངས་པར་སྤྱོད་པའི་བར་ཆད་དང་། བསོད་སྙོམས་ཆད་པར་གྱུར་ན་དབྱར་རལ་བ་ལ་ཉེས་པ་མེད་དོ། །དེ་ཇི་ལྟ་བ་བཞིན་དུ་དབྱར་ཕྱི་མ་ཁས་ལེན་པ་དང་། ཁས་བླངས་པ་བྱིན་གྱིས་བརླབས་པ་དག་ཅི་རིགས་པར་བརྗོད་པར་བྱའོ། །དེ་ནས་དགག་
[56b.2]དབྱེའི་ཉིན་མོ་དགག་དབྱེ་བྱའོ། །འདི་ལྟར་དགག་དབྱེ་བྱ་སྟེ། མཁན་པོའམ་སློབ་དཔོན་ནམ་གཞན་གང་ཡང་རུང་བའི་མདུན་དུ་ཙོག་པུས་འདུག་པ་ཉིད་ཀྱིས་ལག་པས་རྩྭ་དྲུར་བ་ལ་བཟུང་སྟེ། ཐལ་མོ་སྦྱར་བ་བྱས་ནས་འདི་སྐད་ཅེས་བརྗོད་པར་བྱའོ། །མཁན་པོ་དགོངས་སུ་གསོལ།
[56b.3]དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། བདག་དགེ་ཚུལ་མིང་འདི་ཞེས་བགྱི་བའི་ཡང་དགག་དབྱེ་བཅོ་ལྔ་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བས་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བའི་ཕྱིར་དགེ་འདུན་མ་ཚོགས་པས་དེང་དེ་སྲིད་ཚུན་ཆད་མཁན་པོའི་
[56b.4]མདུན་དུ་དགག་དབྱེ་བྱིན་གྱིས་བརླབ་བོ། །གང་གི་ཚེ་ཡང་དགེ་འདུན་ཚོགས་པ་རྙེད་པ་དེའི་ཚེ་དགེ་འདུན་ཚོགས་པ་དང་ལྷན་ཅིག་དགག་དབྱེ་བགྱིའོ། །དེ་བཞིན་དུ་ལན་གཉིས་ལན་གསུམ་དུའོ། །ཐབས་ཡིན་ནོ། །ལེགས་སོ། །ཅུང་ཟད་སྡིག་པའི་ལས་བྱས་པ་གང་ཡིན་པ་དེ་ནི་མཁན་
[56b.5]པོའམ་སློབ་དཔོན་ནམ་གཞན་དགེ་སློང་གང་ཡང་རུང་བའི་མདུན་དུ་ཙོག་ཙོག་པོར་འདུག་སྟེ། ཐལ་མོ་སྦྱར་ལ་སོ་སོར་བཤགས་པར་བྱའོ། །མཁན་པོ་དགོངས་སུ་གསོལ། བདག་དགེ་ཚུལ་མིང་འདི་ཞེས་བགྱི་བ་ལ་དུས་འདིའི་ནང་དུ་ལུས་དང་ངག་ལས་བྱུང་བའི་ཉེས་བྱས་ཀྱི་ལྟུང་བ་དཔག་ཏུ་
[56b.6]མ་མཆིས་པ་བྱུང་བ་གང་ཡིན་པ་དེ་བདག་དགེ་ཚུལ་མིང་འདི་ཞེས་བགྱི་བས། ཉེས་བྱས་ཀྱི་ལྟུང་བ་དཔག་ཏུ་མ་མཆིས་པ་དེ་འདི་ཉིད་དུ་མཐོལ་རབ་ཏུ་སྟོན་ཏོ། །འཆགས་སོ། །རྣམ་པར་སྨད་དོ། །མི་འཆབ་བོ། །མཐོལ་ཞིང་བཤགས་ན་བདག་དགེ་ཚུལ་མིང་འདི་ཞེས་བགྱི་བ་ལ་ཉེས་
[56b.7]བྱས་ཀྱི་ལྟུང་བ་དཔག་ཏུ་མ་མཆིས་པ་རྣམས་སྤངས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ལྟུང་བར་མཐོང་ངམ། མཐོང་ངོ་། །ཕྱིན་ཆད་སྡོམ་མམ། སྡོམ་མོ། །ལེགས་པར་ཤིན་ཏུ་སྡོམ་པར་བྱེད་དམ། སླན་ཆད་དེ་ལྟར་མི་བགྱིད་
[57a]
[57a.1]དོ་། །དེ་བཞིན་དུ་ལན་གཉིས་ལན་གསུམ་དུའོ། །ཐབས་ཡིན་ནོ། །ལེགས་སོ། །བཤགས་ནས་སླར་མི་བྱེད་ཅིང་དེ་ལྟར་བཤགས་ན་བདག་བདེ་བ་ལ་རེག་པར་གནས་པར་འགྱུར་རོ། །བཤགས་པ་བྱས་ནས་ཀྱང་གསོ་སྦྱོང་བྱའོ། །འདི་ལྟར་བྱ་སྟེ་མཁན་པོའམ་སློབ་དཔོན་ནམ་
[57a.2]གཞན་དགེ་སློང་གང་ཡང་རུང་བ་ལ་ཕྱག་བྱས་ནས་མདུན་དུ་ཙོག་ཙོག་པོར་འདུག་སྟེ། ཐལ་མོ་སྦྱར་བ་བྱས་ནས་འདི་སྐད་ཅེས་བརྗོད་པར་བྱ་སྟེ། མཁན་པོ་དགོངས་སུ་གསོལ། དགེ་འདུན་གྱི་གསོ་སྤྱོང་བཅུ་བཞི་པའམ། བཅོ་ལྔ་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བའི་
[57a.3]ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བགྱི་བའི་སླད་དུ་ལྟུང་བ་བྱིན་གྱིས་བརླབས་ཤིང་བཤགས་ཏེ། བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་ཉིད་མཆིའོ། །དེ་བཞིན་དུ་ལན་གཉིས་ལན་གསུམ་དུའོ། །ཐབས་ཡིན་ནོ། །ལེགས་སོ། །ཐམས་ཅད་དུ་བསླབ་པ་ལ་གུས་
[57a.4]པར་བྱའོ། །ཡོངས་སུ་དག་པར་ཡང་ཚུལ་ཁྲིམས་ཡོངས་སུ་བསྲུངས་པ་ལས་རྙེད་པ་འཐོབ་པ་དང་། མཐོ་རིས་ལ་སོགས་པ་མཐོ་བ་དང་། ལེགས་པར་ཚངས་པར་སྤྱོད་པ་དང་བཅས་པས་རང་གི་ཡོན་ཏན་གྲགས་པ་ཡིན་ནོ། །བཅོམ་ལྡན་འདས་ཀྱིས་ཀྱང་། གྲགས་དང་རྙེད་པ་འཐོབ་པ་
[57a.5]དང་། །ཕ་རོལ་དུ་ནི་མཐོ་རིས་དག །བདེ་བ་གསུམ་པོ་དོན་གཉེར་བས། །ཤེས་བཞིན་དུ་ནི་ཚུལ་ཁྲིམསབསྟེན། །ཞེས་གསུངས་སོ། །ཡང་། གནས་རྣམས་འདི་དག་མཐོང་བ་ཡིས། །མཁས་པ་ཚུལ་ཁྲིམས་ལ་བརྟེན་པ། །འཕགས་པའི་མཐོང་བ་ཐོབ་པ་སྟེ། །འཇིག་རྟེན་དུ་ནི་ཞི་བ་
[57a.6]འཐོབ། །ཅེས་གསུངས་སོ། །མེ་ཏོག་དྲི་ནི་རྫི་ཕྱོགས་མིན་མི་འགྲོ། །རྩྭའམ་རྒྱ་སྤོས་ཙནྡན་ཡང་མ་ཡིན། །མཁས་རྣམས་དྲི་ནི་རྫི་ཕྱོགས་མི་འགྲོ་སྟེ། །སྐྱེས་བུ་དམ་པས་ཕྱོགས་རྣམས་ཀུན་ཏུ་འགྲོ། །རྒྱ་སྤོས་དང་ནི་ཙནྡན་ཉིད། །དབྱར་གྱི་དུས་ཀྱི་ཨུཏྤལ་བཅས། །དྲི་ཡི་རྣམ་པ་དེ་དག་ལས། །
[57a.7]ཚུལ་ཁྲིམས་དྲི་ནི་བླ་ན་མེད། །ཚུལ་ཁྲིམས་རྣམ་པར་མ་དག་པས། །དམྱལ་བའི་སྡུག་བསྔལ་ཆེན་པོ་ཡིན། །འདི་ལྟ་སྟེ་མིག་དབྱུང་བ་དང་། ཤིང་བཞིན་དུ་གཤགས་པ་དང་། འབྲས་བུ་བཞིན་དུ་བཙོས་པ་དང་། བུ་རམ་ཤིང་བཞིན་བཙིར་བ་དང་། གཏུན་གྱིས་ཕྱེ་མར་འཐག་པ་དང་།
[57b]
[57b.1]ལག་པ་དང་། རྐང་པ་དང་། ལྕེ་གཅོད་པ་དང་། ཟངས་བསྐོལ་བ་འཐུང་བ་དང་། ལྕགས་ཀྱི་ཐུ་ལུམ་འབར་བ་ཟ་བ་དང་། ཐལ་ཚན་གྱི་ཆུ་བོ་ལས་རྒལ་བ་དང་། ལྕགས་ཀྱི་ཤལ་མ་རིའི་སྡོང་པོ་ལ་འཛེག་པ་དང་། ལྕགས་ཀྱི་བུམ་པའི་ནང་དུ་འཇུག་པ་དང་། མཆེ་བ་རྣོན་པོ་ཅན་གྱི་ཁྱིས་
[57b.2]ཟ་བ་དང་། རལ་གྱི་ལོ་མའི་ནགས་ཚལ་ལ་འཛེག་པ་སྟེ། དེ་ལྟ་བུ་ལ་སོགས་པ་དང་། རྣམ་པ་དུ་མས་དམྱལ་བ་རྣམས་སུ་སྲེག་པ་དང་། འཚེ་བ་དང་།རྡུང་བ་ལ་སོགས་པའི་སྡུག་བསྔལ་རྣམས་ཏེ། ལྷའི་ཕོ་ཉའི་མདོ་དང་། སྟོབས་ལ་མཁས་པའི་མདོ་ལས་བལྟ་བར་བྱའོ། །ཡི་དགས་
[57b.3]རྣམས་ཀྱང་བཀྲེས་པ་དང་། སྐོམ་པ་དང་། གནོད་པའི་སྡུག་བསྔལ་རྣམས་དང་། དུད་འགྲོ་གཅིག་ལ་གཅིག་ཟ་བའི་འཇིགས་པ་ལ་སོགས་པའི་སྡུག་བསྔལ་རྣམས་ཏེ། ཚུལ་ཁྲིམས་ཡོངས་སུ་མ་དག་པ་ལ་ཉེས་དམིགས་དེ་ལྟ་བུ་དང་གཞན་ཡང་ཡིན་ནོ། །ཇི་ལྟར་དགེ་སློང་རྣམས་ཆོས་
[57b.4]བཞི་དང་ལྡན་པས་དགེ་སློང་མ་ཡིན་པར་གྱུར་པ་དེ་བཞིན་དུ་དགེ་ཚུལ་ཡང་དགེ་ཚུལ་མ་ཡིན་པར་འགྱུར་བ་ཡིན་ནོ། །དེ་ལྟ་བས་ན་སྲོག་ལ་བབ་ཀྱང་ཡོངས་སུ་དག་པར་ཚུལ་ཁྲིམས་བསྲུང་བར་བྱའོ། །དགེ་ཚུལ་ཀྱི་བསླབ་པའི་གཞིའི་མདོ་ལས་རབ་ཏུ་བྱུང་བའི་རྟགས་ཡང་དག་པར་བླང་བ་རྫོགས་
[57b.5]སོ།། །།དགེ་ཚུལ་རྣམས་ཀྱི་བསླབ་པའི་གཞི། །ཡང་དག་བསྡུས་པ་བྱས་པ་ལས །བསོད་ནམས་བྱུང་བ་གང་བསགས་པས། །སྐྱེ་བོ་དགེ་བའི་སྐལ་ལྡན་ཤོག། །།མདོ་སྡེ་འཛིན་པའི་སློབ་དཔོན་ཀ་ལྱྙ་ཎ་མི་ཏྲས་མཛད་པ། དགེ་ཚུལ་གྱི་བསླབ་པའི་གཞིའི་མདོ་རྫོགས་སོ།། །།
[57b.6]ཁ་ཆེའི་མཁན་པོ་གྲོང་ཁྱེར་དཔེ་མེད་ཀྱི་པཎྜི་ཏ་མ་ཧཱ་ཛ་ན་དང་། ཤཱཀྱའི་དགེ་སློང་གཞོན་ནུ་མཆོག་གིས་བསྒྱུར་ཅིང་ཞུས་ཏེ་གཏན་ལ་ཕབ་པ་ལས། སླད་ཀྱིས་ཁ་ཆེའི་པཎྜི་ཏ་པ་ར་ཧེ་ཏ་དང་། ལོ་ཙཱ་བ་ཤཱཀྱའི་དགེ་སློང་གཞོན་ནུ་མཆོག་གིས་བཅོས་ཤིང་ཞུས་པའོ།། །།
[57b.7]{T4131}༄༅༅། །རྒྱ་གར་སྐད་དུ། ནི་དཱ་ན་པུངྒ་ལ་སཾ་གྲ་ཧ་ཀཱ་རི་ཀཱ། བོད་སྐད་དུ། གླེང་གཞི་དང་གང་ཟག་བསྡུས་པའི་ཚིག་ལེའུར་བྱས་པ། དཀོན་མཆོག་གསུམ་ལ་ཕྱག་འཚལ་ལོ། །ཡོན་ཏན་གཞི་དང་ཡོན་ཏན་རྒྱུད། །ཀུན་མཁྱེན་ལ་ནི་ཕྱག་འཚལ་ནས། །དང་པོ་གླེང་གཞི་
[58a]
[58a.1]རྣམས་བྱུང་བའི། །སྟོན་བྱེད་ཅུང་ཟད་བཤད་པར་བྱ། །མ་ཡི་ཚིག་ནི་ཐོབ་པའི་ཕྱིར། །བཟང་བྱིན་ས་བོན་འདུ་ཤེས་ཀྱིས། །སྤོང་བྱེད་ཡུལ་དུ་འཁྲིག་པ་བྱུང་། །དང་པོ་ཆུ་བུར་བྱུང་བ་ཡིན། །དེ་མ་ཐག་ཏུ་མ་བྱིན་ལེན། །རབ་ཏུ་འཐོབ་པར་བཤད་པར་བྱ། །རྒྱལ་པོའི་ཁབ་ཏུ་
[58a.2]ནོར་ཅན་གྱིས། །ཤིང་ནི་མ་བྱིན་ལེན་པ་བྱུང་། །མི་སྡུག་ཆོས་དང་ཕྲད་པའི་ཕྱིར། །རི་དྭགས་དབྱིག་པ་ཅན་ཕྲད་ན། །སྲོག་གཅོད་པ་ཡི་བསླབ་གཞི་འདི། །སྤོང་བྱེད་ཡུལ་དུ་ཀུན་ཏུ་བྱུང་། །བསོད་ནམས་དོན་དུ་གཉེར་བ་ཡི། །ཡིད་འོང་འགྲམ་གྱི་དགེ་སློང་གིས། །བསམ་གཏན་དེ་མེད་
[58a.3]སྟོན་བྱེད་ཕྱིར། །ཡངས་པ་ཅན་དུ་བརྫུན་ཚིག་སྨྲས། །འཆར་ཀ་ཡིས་ནི་མཉན་ཡོད་དུ། །བསོད་སྙོམས་ཕྱིར་ནི་སྔོན་དུ་བྱུང་། །དེ་ནས་བྱུང་ནས་ཆགས་བཅས་པས། །ཁུ་བ་འབྱིན་པ་བྱུང་བ་ཡིན། །ཆོས་ནི་སྟོན་པར་བྱེད་བཞིན་དུ། །དེ་ཡིས་ཀུན་དུ་ཆགས་པ་ལས། །དགེ་འདུན་ལྷག་
[58a.4]མའི་ལྟུང་བ་ནི། །ལུས་ཀྱི་རེག་པ་བྱུང་བ་ཡིན། །དེ་ཉིད་ཀྱིས་དེར་རྒྱ་སོགས་ཀྱིས། །གནས་ངན་ལེན་ཚིག་བྱས་པ་ཡིན། །གལ་ཏེ་དེ་སྟོབས་བཅས་ཡིན་ན། །དེ་ལས་ཉེས་པ་ཡོངས་སུ་འཛིན། །ད་ལྟའི་དགེ་སློང་ཚུལ་ཁྲིམས་ལྡན། །དགེ་བའི་ཆོས་ཅན་ཚངས་སྤྱོད་དེ། །བདག་ལ་
[58a.5]བསྙེན་བཀུར་བྱེད་པ་ཡི། །བསྔགས་པ་བརྗོད་པ་འདི་ཡང་བཅས། །དགེ་སློང་ནག་པས་མཉན་ཡོད་དུ། །བུད་མེད་འདོད་པས་ཁྱེམ་རྣམས་སུ། །སྐྱེས་པས་བླང་བར་བྱས་པ་སྟེ། །སྨན་ནི་རྫོགས་པར་བྱས་པ་ཡིན། །དེ་ཡང་ཁང་པར་རབ་གསུངས་པ། །གང་ཚེ་ཚད་ལས་འདས་
[58a.6]པ་དང་། །དགེ་སློང་རྣམས་ཀྱི་ཆོས་ལུགས་འདས། །དེ་ཡིས་ལྟུང་བ་རྫོགས་པར་འགྱུར། །དྲུག་སྡེས་ལྗོན་ཤིང་བཅད་ནས་ནི། །རྗེས་སུ་གནང་བར་མ་བྱས་པར། །གནས་ཁང་དག་ནི་ཆེན་པོར་བྱས། །དགེ་འདུན་ལྷག་མ་ཐོབ་པ་ཡིན། །དགེ་སློང་མཛའ་བོ་ས་ལས་སྐྱེས། །རྒྱལ་
[58a.7]པོའི་ཁབ་ཏུ་མཛའ་བོ་ཡིས། །གྱད་བུ་ནོར་ལ་ལྷག་མེད་ཀྱིས། །ཡང་དག་མིན་པར་སྐུར་བ་བཏབ། །དེས་ནི་རི་དགས་མཐོང་བའི་ཕྱིར། །ཉེས་པ་བག་ཙམ་ཕྱོགས་གཏོགས་པ། །ཉོན་མོངས་བཅས་པ་དེ་ལ་ནི། །ཞེ་འགྲས་རྒྱུ་ནི་བཞག་པ་ཡིན། །རྒྱལ་པོའི་ཁབ་དག་ཉིད་དུ་ནི། །ལྷས་མཆོད་
[58b]
[58b.1]འབྲེལ་པའི་དགེ་འདུན་དག །ལས་ཀྱིས་རྗེས་སུ་འཕྲང་ཡིན་ཕྱིར། །ལྷས་བྱིན་གྱིས་ནི་ཐ་དད་ཕྱེ། །དེར་ནི་ཀོ་ཀ་ལི་ཀ་སོགས། །ཆོས་ནི་རྣམ་འགྱུར་བྱེད་པ་ཡི། །དགེ་སློང་སྡིག་པའི་ལས་ཅན་རྣམས། །དེ་དག་དེ་ཡི་གྲོགས་སུ་གྱུར། །རེ་ལྡེ་རི་ལ་གནས་བཅས་པའི། །
[58b.2]ནབ་སོ་འགྲོ་མགྱོགས་ལ་སོགས་པས། །ཁྱིམ་རྣམས་སུན་ཕྱུང་མཉན་ཡོད་དུ། །འདིར་ནི་བསླབ་པ་བཅས་པ་ཡིན། །ལྟུང་བ་མི་འདོད་བདུན་པ་ཡིན། །ཀཽ་ཤཱམ་བཱི་རུ་དགེ་སློང་ལ། །རྣམ་འགྱུར་བཀའ་བློ་མི་བདེ་བར། །ཉམས་པར་གྲགས་པ་མ་ཡིན་ནམ། །དགེ་འདུན་ལྷག་
[58b.3]མ་གླེང་གཞི་རུ། །ཡང་དག་དགོས་པ་བཤད་པ་ཡིན། །ད་ནི་འཆད་པར་འགྱུར་རྣམས་ཀྱི། །མདོར་བསྡུས་ནས་ནི་བཤད་པར་བྱས། །མཉན་ཡོད་དུ་ནི་འཆར་ཀ་ཡིས། །སྦེད་མ་དང་ནི་ལྷན་ཅིག་ཏུ། །བརླ་དང་བརླ་སྤྲད་དབེན་པར་གནས། །དེ་ཚེ་ས་ག་མ་ཡིས་མཐོང་། །རྒྱལ་པོའི་
[58b.4]ཁབ་ཏུ་ཤི་རི་ཀས། །གསོ་སྦྱོང་འཕགས་དང་ལྷན་ཅིག་ཏུ། །ལེགས་སྐྱེས་ཚིག་གིས་རྣམ་པར་བྱས། །འདས་མ་ཐག་པ་དེ་བཞིན་བྱས། །དགེ་སློང་རྣམས་ཀྱིས་མཉན་ཡོད་དུ། །གོས་ལྷག་བྱིན་གྱིས་མ་བརླབས་པར། །ཞག་བཅུ་ལས་ནི་འདས་པར་བཅངས། །དེ་ཕྱིར་སྤངས་
[58b.5]པ་ཉིད་དུ་ཤེས། །སྟོད་གཡོགས་སྨད་གཡོགས་བཅས་འགྲོ་བས། །སྐྱ་རེངས་དག་ནི་ཤར་བ་ལས། །དགེ་འདུན་གནང་བ་མ་གཏོགས་པ། །དགེ་སློང་རྣམས་ལ་འབྲལ་བ་བཤད། །གོས་ནི་མང་པོ་མེད་པ་ཡིན། །དགེ་སློང་གི་ནི་ཁ་སོགས་ཕྱིར། །འདོད་པས་བརྟགས་ན་ཟླ་
[58b.6]གཅིག་ཏུ། །གཞག་བྱ་ལྷག་པར་མ་ཡིན་ནོ། །ཆོས་བསྟན་པས་ནི་གང་གི་ཚེ། །འཆར་ཀ་ཆགས་ནས་དགེ་སློང་མ། །ཉེ་དུ་མ་ཡིན་སྦེད་མ་ཡི། །ལམ་མཆོག་ཏུ་ནི་གོས་ཁྲུས་བྱས། །ཉེ་དགའ་སྒོ་ན་གནས་པ་ཡིས། །ཨུཏྤ་ལ་ཡི་མདོག་ལ་ནི། །རས་ཀྱི་མཆོག་ནི་བླངས་པ་
[58b.7]ལ། །བརྗེ་བ་མ་གཏོགས་བླང་མི་བྱ། །ཉེ་དགའ་ཡིས་ནི་ཁྱིམ་པ་ལ། །ཆོས་བསྟན་ནས་ནི་དུས་བྱུང་གྲོས། །དེ་མེད་པར་ནི་དེ་ཡིས་ཀྱང་། །མངོན་དུས་ཕྱེད་ཀྱིས་བགོས་པ་ཡིན། །དྲུག་སྡེ་རྣམས་ནི་ཆགས་ནས་ནི། །སྟོད་གཡོགས་སྨད་གཡོགས་བཅས་ལྷག་པར། །སློང་
[59a]
[59a.1]བ་འཕྲོག་པའི་དགེ་སློང་རྣམས། །རུང་བ་ལ་ནི་བརྟེན་པ་ཡིན། །ཉེ་དགའ་ཡིས་ནི་གཞན་དག་གི། །འཁྲིག་པ་ན་ནི་ཆགས་པ་བརྟུལ། །ཇི་སྲིད་རྣམ་པར་སྤགས་པའི་གོས། །དེས་ནི་མངོན་དུས་ཕྱེད་ཀྱིས་བགོས། །གོས་ནི་སོ་སོར་སྤགས་པ་ལས། །ཅུང་ཟད་
[59a.2]ཙམ་གྱི་ཕྱོགས་ཀྱིས་ཤེས། །དེས་ནི་དེ་ཡི་ཇི་སྲིད་དུ། །མངོན་དུས་ཕྱེད་ཀྱིས་བསླངས་པ་ཡིན། །དབྱར་འབྱེད་ཀྱིས་ནི་ཕོ་ཉ་ལ། །གཟོད་བྱིན་ནས་ནི་ཉེ་དགའ་དེས། །སྤོས་འཚོང་དེ་ལ་ཆད་པ་དེས། དགག་པ་རབ་ཏུ་བྱས་པ་ཡིན། །དགེ་སློང་གིས་ནི་སྟན་གྱི་ཕྱིར། །སྲིན་བལ་ལས་
[59a.3]ནི་བྱས་པ་ཡིན། །སྲོག་ཆགས་གསོད་པའང་དེ་ཡི་ཕྱིར། །སྟན་ལས་དེ་ནི་སྡོག་པ་ཡིན། །དེ་བཞིན་དེ་ཉིད་དག་ལ་ནི། །བལ་གྱི་སྟན་ལས་ཆས་སྐྱེས་ཏེ། །བལ་ནི་ནག་པོ་ཚོལ་གྱུར་པས། །དེ་ཕྱིར་ཀློག་པ་ཉམས་པར་གྱུར། །འཁོབ་བལ་གྱིས་ནི་ཆ་གཅིག་དང་། །དེ་བཞིན་དུ་ནི་
[59a.4]དཀར་པོ་དང་། །བལ་ནི་ནག་པོ་ཕྱེད་ཕྱིན་ཏེ། །འདི་ནི་སྟན་དུ་བྱ་བ་ཡིན། །སྟན་བྱས་ནས་ནི་དགེ་སློང་གིས། །ལོ་དྲུག་བར་དུ་བཅངས་བྱས་ཏེ། །ལས་སར་པ་ནི་མ་གཏོགས་པར། །དེ་ཡི་ནང་དུ་དོར་བྱའི་ཕྱིར། །རབ་ཏུ་དད་བྱས་ཚོང་པ་ཡིས། །གང་ཚེ་གོས་ཀྱི་སྦྱིན་པ་ཕུལ། །མཐོ་
[59a.5]གང་བར་གྱིས་གླན་བྱ་བ། །ཞེས་བྱའི་བསླབ་པ་བཅས་པ་ཡིན། །དྲུག་སྡེས་ནེ་བ་ལ་ཡུལ་དུ། །ཕྱིན་ནས་དེ་ནས་སླར་འོངས་ཏེ། །ཤིང་རྟ་ཡི་ནི་ཚོགས་ཀྱི་བལ། །དེ་དག་གིས་ནི་ཁུར་གྱིས་ཁྱེར། །འཕགས་མ་སྐྱེ་དགུ་བདག་མོ་ལ། །འཆར་ཀས་བལ་གྱི་ལས་ཀྱི་ཕྱིར། །ཅུང་
[59a.6]ཟད་བལ་རྨེལ་བཅོལ་དེའི་ཕྱིར། །ཉེ་དུ་མིན་པས་རྨེལ་མི་བྱ། །ས་ལེ་སྦྲམ་ལེན་རྒྱལ་ཁབ་ཏུ། །ནོར་བུ་གཙུག་ཕུད་ཅན་གྱིས་བཀག །དྲུག་སྡེ་དག་ནི་དེ་བཞིན་དུ། །ཡོངས་སུ་ལེན་པར་བྱེད་པའང་ཡིན། །མཉན་ཡོད་དུ་ནི་ཉེ་དགའ་ཡིས། །གཅེར་བུ་པ་ལས་ལ་བ་བླངས། །དེ་
[59a.7]ཕྱིར་དཀོན་མཆོག་མ་གཏོགས་པར། །མངོན་མཚན་ཅན་ནི་བཀག་པ་ཡིན། །དེ་དག་ཉིད་ལ་མདོར་བསྡུས་ནི། །ཉོ་ཚོང་དག་ནི་བྱུང་བ་ཡིན། །དེ་ཕྱིར་དེ་ནི་ཉོ་ཚོང་དག །དགེ་སློང་རྣམས་ལ་རབ་ཏུ་བཀག །རྙེད་ཅིང་རྙེད་ཅིང་ལྷུང་བཟེད་རྣམས། །སྐྱེས་བུ་ཆེ་བའི་སྟོབས་རྣམས་ནི། །རྨོངས་
[59b]
[59b.1]པ་ཡིས་ནི་འཆང་བར་བྱེད། །འོན་ཀྱང་ཞག་བཅུ་བཅང་བྱ་སྟེ། །དེ་ལས་ལྷག་པར་བཅང་མི་བྱ། །གང་ཕྱིར་དེ་བཞིན་ཉེ་དགའ་ནི། །བསོད་སྙོམས་པ་ཡི་སྦྱོར་བ་ཡིན། །ལྷུང་བཟེད་ཡོངས་སུ་བཙལ་བར་བྱས། །དེ་ཚེ་ཐུབ་པས་བཀག་པ་ཡིན། །བསླངས་པས་སྔོན་འགྲོ་སྣལ་མ་
[59b.2]ཡིས། །དགེ་སློང་ཉེ་དགས་རྒྱལ་པོ་ཡི། །སྐྱེས་བུ་ཆེ་བའི་སྟོབས་ཀྱིས་ནི། །རས་ཡུག་འཐག་ཏུ་བཅུག་པ་ཡིན། །ཆུང་མ་དང་ནི་ལྷན་ཅིག་ཏུ། །ཁྱིམ་བདག་གང་ཞིག་དེ་ཡིས་བཏུལ། །ཇི་སྲིད་དེ་ཡི་ཁྱིམ་སོང་ནས། །འཐག་པ་བསྐྱེད་པར་མི་བྱའོ། །སྦྱིན་པ་བྱིན་པའི་རྒྱུ་ཡིས་སུ། །
[59b.3]དགའ་བོས་ཆོས་ལ་སྣམ་སྦྱར་བྱིན། །ཁྲོས་པས་སླར་ཡང་དེ་ལས་བླངས། །དེ་ཕྱིར་སྤང་བའི་ལྟུང་བར་ཤེས། །དབྱར་གནས་ཀྱི་ནི་རྙེད་པ་དག །དབྱར་གྱི་ནང་དུ་བགོ་མི་བྱ། །དྲུག་སྡེ་རྣམས་ཀྱིས་འབད་པ་ཡིས། །དབྱར་གྱི་ནང་དུ་བགོས་པ་ཡིན། །དགོན་པ་བ་ཡི་སྡོམ་བརྩོན་གྱི། །ཆོས་གོས་
[59b.4]ཁྱིམ་གཞན་ཡོད་ན་ནི། །ཞག་དྲུག་མཚམས་ཀྱི་ཕྱི་རོལ་དུ། །གནས་བྱ་བདུན་པ་མ་ཡིན་ནོ། །གཅེར་བུས་ཁྲུས་བྱས་ལས་བྱུང་བའི། །དབྱར་གྱི་རས་ཆེན་ཚོལ་ལགས་ན། །རྟག་ཏུ་དུས་མིན་དེ་སྲིད་དུ། །ཐུབ་པ་ཡིས་ནི་དགག་པ་མཛད། །ཁྱིམ་པ་འགའ་ཡིས་དགེ་འདུན་ལ། །སྔར་ནི་ཆོས་
[59b.5]གོས་བསྡོམ་པ་ལས། །མཐུ་དང་ལྡན་ཕྱིར་ཉེ་དགའ་ཡིས། །བདག་ཉིད་ལ་ནི་ཡོངས་སུ་བསྒྱུར། །འཕགས་པ་པི་ལིན་ད་པ་ཡི། །སློབ་མས་སྨན་དག་བསྲེས་པ་ལས། །ཇི་སྲིད་འཚོ་བའི་འདུ་ཤེས་ཀྱིས། །རྒྱལ་པོའི་ཁབ་ཏུ་ཟོས་པ་ཡིན། །སྤང་བ་རྣམས་ཀྱི་གླེང་གཞི་ནི། །ཅུང་ཟད་
[59b.6]ཕྱོགས་ཙམ་བསྟན་པ་ཡིན། །ད་ནི་དག་པའི་ལྟུང་བྱེད་པའི། །ཡང་དག་བསྒྲུབ་ཕྱིར་བསྟན་པར་བྱ། །སྒྲ་གཅན་དང་ནི་ལག་རྒྱུད་ཀྱི། །དད་པ་ཅན་རྣམས་རྣམ་འགྱུར་ཞིང་། །རྒོལ་བ་དེ་ལྟར་གྱུར་པ་ཡིན། །རྒྱལ་པོའི་ཁབ་ཏུ་བརྫུན་ཚིག་སྨྲས། །ཁྲོས་པར་གྱུར་པའི་དྲུག་སྡེ་ཡིས། །དགེ་སློང་
[59b.7]རྣམས་ལ་མཉན་ཡོད་དུ། །སྐྱེས་བུ་སྨན་པས་སྟོན་བྱེད་ཚིག །ཁྱེད་ནི་ཐེང་པོ་ཡིན་སྨྲས་གྲག །དགེ་སློང་དབྱེ་བའི་བྱེད་པ་པོར། །དེ་ཡང་དེར་ནི་རབ་ཏུ་བསྒྲགས། །འདི་ནས་ཐོས་ནས་གཞན་སོང་སྟེ། །ཕྱིན་ཅི་ལོག་ཏུ་སྨྲ་བར་བྱེད། །ཆོས་ཀྱིས་ཀྱང་ལས་བྱས་པ་ཡང་། །སྐྱོ་སྔོགས་
[60a]
[60a.1]བྱེད་པར་ཤེས་ནས་ནི། །ལེགས་བྱས་སླར་ནི་བྱ་བ་ལ། །ཞི་བ་དག་ནི་མ་ཡིན་ཉིད། །ཡན་ལག་ནོར་བུའི་རིགས་ཐོབ་ནས། །བུད་མེད་ཡུལ་ལ་སྟོན་པ་བཀག །དེ་ཡིས་རིག་པ་གནས་པ་དང་། །ཐེ་ཚོམ་ཅན་ལ་སྟོན་པར་བྱེད། །བྲམ་ཟེ་སྔགས་ནི་འདོན་པ་
[60a.2]ལྟར། །དགེ་ཚུལ་རྣམས་དང་ལྷན་ཅིག་ཏུ། །དགེ་སློང་མཉམ་པའི་ཚིག་དག་གིས། །ཆོས་ནི་འདོན་པར་བྱེད་པ་ཡིན། །གནས་བརྟན་འདི་ནི་ཆོས་བསྙེན་བཀུར། །བྲམ་ཟེ་རྣམས་ནི་སྨྲ་བར་བྱེད། །མ་ཡིན་དེ་དག་ལྷག་མ་ཅན། །དྲུག་སྡེ་དག་ནི་སྟོན་པར་བྱེད། །ཆུ་ཀླུང་ཡིད་འོང་
[60a.3]འགྲམ་གནས་པའི། །དགེ་སློང་དག་གི་བདེན་བ་ཡིན། །བླ་མའི་ཆོས་ནི་ཟབ་པའི་ཕྱིར། །ཡངས་པ་ཅན་དུ་སྨྲས་པ་ཡིན། །རྒྱལ་པོའི་ཁབ་ཏུ་གྱད་ནོར་ལ། །ཚོགས་པས་གསོལ་བ་བྱས་ནས་ནི། །དགེ་འདུན་གྱིས་ནི་ཆོས་གོས་བྱིན། །མཛའ་བོ་སོགས་ཀྱིས་སྐུར་པ་བཏབ། །མཉན་
[60a.4]ཡོད་དུ་ནི་ཟླ་ཕྱེད་ཅིང་། །སོ་སོར་ཐར་པ་རྟག་ཏུ་འདོན། །ཅི་ཡི་ཕྱིར་ནི་རྨ་སོས་པ། །འདྲལ་བར་བྱེད་པ་དྲུག་སྡེས་ཤེས། །སྔོན་ནི་ཤིང་མཁན་གྱུར་པ་ཡིས། །ཤིང་བཅད་ནས་ནི་གཙུག་ལག་ཁང་། །བྱས་ཏེ་ལྷ་ཉིད་དག་ལ་ཡང་། །མཆོག་ཏུ་གནོད་པ་བྱུང་གྱུར་པ། །དགེ་འདུན་གྱི་ནི་
[60a.5]ལས་དང་འབྲེལ། །རྒྱལ་པོའི་ཁབ་ཏུ་ཕྱིན་པ་ཡི། །གྱད་ནོར་དེ་ལ་དེ་དག་གིས། །ཡོན་ཏན་སུན་པར་བྱས་པ་ཡིན། །མདོར་བསྡུས་པ་ནི་ཀཽ་ཤཱམ་བཱིར། །འདུན་པ་དེ་ཡིས་ལྟུང་ཤེས་ནས། །ཁས་ལེན་པར་ནི་མི་བྱེད་པས། །བསྒོ་བ་རྣ་ལ་གཟོན་པ་ཡིན། །དགེ་སློང་དག་གིས་མཉན་
[60a.6]ཡོད་དུ། །གནས་མལ་བླ་གབ་མེད་བོར་ནས། །ཟས་ཀྱི་དོན་དུ་སོང་བར་གྱུར། །དེ་ནས་ཐུབ་པས་གསུངས་མཛད་དོ། །ལྷོ་ཕྱོགས་ནས་ནི་འོངས་པ་ཡི། །བསྙེན་བཀུར་དོན་དུ་དགེ་སློང་དག །རྒྱལ་བྱེད་ཚལ་དུ་ཕྱིན་པ་ཡིན། །རྩྭ་ཡི་སྟན་ནི་བཏིང་ནས་སོང་། །སྔོན་ནི་འཆར་ཀས་མཉན་
[60a.7]ཡོད་དུ། །སློབ་མ་གཙུག་ལག་ཁང་དུ་ཕྱུང་། །སླར་ནི་བྱ་བ་མ་ཡིན་ཏེ། །བཟློག་པའི་དོན་དུ་བྱས་པ་ཡིན། །དེས་ནི་འདུ་འཛིའི་གཏམ་བྱས་ནས། །ཕྱི་ནས་སྒོ་ནི་འབྱེད་པར་བྱེད། །ཉལ་བ་རྣམས་ཀྱིས་བར་དེ་ནི། །ཉལ་བ་རྣམས་ལ་གནོད་པ་བྱས། །ཁྲོས་པར་གྱུར་པས་ཉེ་དགའ་
[60b]
[60b.1]ཡིས། །འབྱུང་དུ་རུང་བའི་ཁྲི་རྐང་གིས། །དེར་འོག་འདུག་པའི་གྲོགས་པོ་ཡི། །མགོ་ནི་མཚན་མོ་འགས་པར་བྱས། །འདུན་པ་ཡིས་ནི་ཀཽ་ཤཱམ་བཱིར། །སྲོག་ཆགས་དག་དང་བཅས་པ་ཡི། །ཆུ་དང་ས་དག་ངེས་པར་བསྲེས། །ཕྱི་ནས་རྩྭ་དང་ལྕི་སོགས་བསྲེས། །ཆུ་ཁུང་མེད་པ་ཉིད་
[60b.2]དང་ནི། །སྦྱང་གི་རྣམ་པ་ལྟ་བུ་ཡི། །འདིར་ནི་གཙུག་ལག་ཁང་པ་བརྩིགས། །དེ་ལྟ་བུ་ནི་མི་བྱའོ། །མཉན་ཡོད་དུ་ནི་དྲུག་སྡེ་ཡིས། །དགེ་སློང་རྣམས་ཀྱིས་མ་བསྐོས་པར། །དགེ་སློང་མ་རྣམས་གདམས་པ་ཡིན། །ཕན་ཚུན་འདོད་པས་གཟུང་བར་བྱས། །དགའ་བྱེད་ཀྱིས་
[60b.3]ནི་དུས་མིན་པར། །དགེ་སློང་མ་རྣམས་ཆོས་སྟོན་བྱས། །ཕྱི་རོལ་དུ་ནི་གནས་པའི་བར། །སྐྱེ་བོ་རྣམས་ཀྱིས་སྨན་པ་ཡིན། །ཟང་ཟིང་དག་ནི་ཅུང་ཟད་ཙམ། །དགེ་སློང་མ་ཡི་དགག་དབྱེ་ལ། །འཇིགས་པ་མེད་པར་བྱ་ཕྱིར་ཕུལ། །དེ་ཕྱིར་ཉེ་དགས་སྐུར་པ་བཏབ། །འཆར་ཀས་
[60b.4]འདིར་ནི་སྒུད་པ་ཡིས། །སྦེད་མ་ཡི་ནི་ཆོས་གོས་ལ། །སྦེད་མ་འཁྱུད་པ་དང་ལྡན་པའི། །རང་གི་གཟུགས་ནི་བྲིས་པར་གླན། །དགེ་སློང་མ་ནི་བརྩོན་པ་ཡིས། །དགེ་སློང་གིས་ནི་ཆོས་གོས་བྱིན། །ལྷག་མ་མེད་པས་གནོད་པའི་ཕྱིར། །དེ་བཞིན་དུ་ནི་བསླབ་པ་བཅས། །སྤོམ་དགའ་མོ་
[60b.5]ཡི་གྲོགས་དང་ནི། །ལྷན་ཅིག་དྲུག་སྡེ་འགྲོ་བར་བྱེད། །ཆུང་མར་སྨྲ་བའི་གླེང་གཞི་ལས། །དེ་ཕྱིར་སྨད་པར་བྱས་པ་ཡིན། །དེ་ཉིད་ཀྱི་ནི་རྒྱུན་གནས་ཏེ། །གྲུ་ཡི་བཞོན་པས་འགྲོ་མི་བྱ། །རྒྱུན་ཕྱོགས་སུ་ཡང་མི་བྱ་ཉིད། །འབད་པ་ཡིས་ནི་ཕ་རོལ་འགྲོ། །སྔོན་གྱི་རྩེད་མོ་རྣམས་དང་ནི། །
[60b.6]ཉམས་རྣམས་དང་ནི་དྲན་པ་ཡིས། །འཆར་ཀ་སྦེད་མ་ལྷན་ཅིག་ཏུ། །དབེན་པར་ལྷན་ཅིག་འདུག་སྟེ་གནས། །དེ་ནི་རིམ་པ་དེ་ཉིད་ཀྱིས། །དབེན་པར་གནས་ཏེ་སྤྱོད་མ་ཡིན། །དགེ་སློང་གིས་ནི་དགེ་སློང་མ། །དེ་ཉིད་ཀྱང་ནི་བསྒྲུབ་འདིར་ཤེས། །སྦྱིན་པ་པོ་ནི་དེ་དག་གིས། །ལྔ་
[60b.7]པོ་རྣམས་ལ་བསད་སྙོམས་སྤགས། །དྲུག་སྡེ་རྣམས་ལ་དགེ་སློང་མ། །སྦོམ་དགའ་མོ་ཡིས་བསྐོ་ཤམ་བྱས། །དྲག་ཤུལ་ཅན་གྱིས་མགྲོན་བོས་པའི། །དྲུག་སྡེས་ཡངས་པ་ཅན་དུ་ནི། །ཨ་མྲ་དང་ནི་ཁུར་བ་དང་། །གཞན་དུ་ཟོས་ནས་མ་དད་བྱས། །མཉན་ཡོད་དུ་ནི་ཕྱི་རོལ་ཏུ།
[61a]
[61a.1]རབ་ཏུ་བྱུང་བ་རྣམས་ཀྱི་ཕྱིར། །ཁྱིམ་པ་ཡི་ནི་འདུག་གནས་བྱས། །དྲུག་སྡེས་དེར་སོང་མ་དད་གྱུར། །གཡས་ཞར་བག་མར་བླངས་པ་ཡིས། །རྒྱུ་མཚན་བཟང་བ་གང་ཡིན་པ། །ལྷུང་བཟེད་བྱུར་བུར་བསྒྲུབ་པ་ཡིས། །དྲུག་སྡེས་བླངས་པས་དེ་མ་གྲུབ། །
[61a.2]སྤངས་པ་དང་ནི་མ་སྤངས་པ། །དྲུག་སྡེ་དག་གིས་ཟོས་པ་ཡིན། །དེ་ཕྱིར་ཐམས་ཅད་མཁྱེན་པ་ཡིས། །ཕྱིས་ནི་ལྷག་པོར་རྗེས་སུ་གནང་། །སློབ་དཔོན་འདི་ཡིས་བདག་ཀུན་དུ། །ཀླན་ཀ་དག་ནི་བཙལ་སྙམ་ནས། །ཡང་ཡང་ལྟུང་བྱུང་རྒན་ཞུགས་དེས། །ལྷག་པོར་མ་བྱས་པས་
[61a.3]བསླུས་གྲག །རྒྱལ་པོའི་ཁབ་ཀྱི་གནས་སུ་ནི། །དགེ་སློང་ལྔ་བརྒྱ་དང་ལྷན་ཅིག །ལྷ་སྦྱིན་གྱིས་ནི་བཟའ་བ་ཟོས། །དེ་ཚེ་འདུས་ཤིང་ཟ་བ་དྲན། །མཉན་ཡོད་སྐྱེད་མོས་ཚལ་དུ་ནི། །ཁྱིམ་པ་རྣམས་དང་ལྷན་ཅིག་ཏུ། །བཅུ་བདུན་སྡེ་ཡིས་བཟའ་བ་ཟོས། དེ་ཕྱིར་དུས་མིན་བསླབ་པ་
[61a.4]བཅས། །དགེ་སློང་ནག་པོས་འབྲས་ཆན་ནི། །བསོད་སྙོམས་བྱས་ཏེ་བསྐམ་བྱས་ནས། །བཞག་པར་བྱས་པ་མ་ཡིན་ནམ། །དེ་ཕྱིར་དེ་ནི་བསླབ་པ་བཅས། །དུར་ཁྲོད་གཅན་གཟན་ཟོས་པའི་ཕྱིར། །ནག་པོ་ཆེན་པོ་སྨད་པ་ཡིན། །བྱིན་ལེན་མ་བྱས་པ་ཡི་ཟས། །བཀག་པ་དྲུག་སྡེ་
[61a.5]རྣམས་ཀྱིས་ཟོས། །དེ་མ་ཐག་ཏུ་སེར་སྐྱ་བཞིན། །མིང་ཆེན་གྱི་ནི་གནས་སུ་ནི། །ཟ་བཞིན་པ་ཡི་དྲུག་སྡེ་ཡིས། །གཞན་ནས་འོ་མ་བླངས་ནས་སྤྱད། །འདུས་པས་སྲོག་ཆགས་དང་འདྲེས་པའི། །ཆུ་ནི་གང་ཕྱིར་ཉེར་སྤྱད་པ། །དེ་ཕྱིར་བཅོམ་ལྡན་འདས་ཀྱིས་ནི། །ཀཽ་ཤཱམ་བཱིར་ནི་
[61a.6]བཀག་ཅེས་གྲགས། །ཚོང་པ་ཆགས་དེ་ལ་གནོད་ཕྱིར། །འཆར་ཀ་ཁྱིམ་དུ་མྱུར་སོང་ནས། །ཆོས་ནི་སྟོན་པར་བྱེད་པ་ཡིས། །གནས་པར་འགྱུར་བ་མ་ཡིན་ནམ། །དེར་དེ་ལྟ་བུའི་རྣམ་པ་རུ། །ཤེས་ནས་འཆར་ཀ་དེ་བཞིན་ཡང་། །ཁྱིམ་དུ་མྱུར་དུ་སོང་ནས་ནི། །སྒོ་ཡི་རྒྱབ་ཏུ་
[61a.7]གནས་པ་ཡིན། །མཉན་ཡོད་སྒུད་འཁལ་རྣམས་ཟས་ལ། །འཕགས་པ་ཀུན་དགའ་ཞལ་ཏ་བྱེད། །གཅེར་བུ་མོ་ལ་འཁུར་བ་གཉིས། །ལྟུང་བས་ཉེས་པ་ཀུན་ནས་སློང་། །དམག་ནི་འཐབ་ཕྱིར་ཡང་དག་འབྱུང་། །དྲུག་སྡེས་བོང་བུ་ལྟར་སྨྲས་པས། །ཁྲོས་པར་གྱུར་པ་དེ་ཡི་ཚེ། །
[61b]
[61b.1]དམག་ལ་ལྟ་བར་གྱུར་པ་བཀག །དེ་ཚེ་དེ་ལྟར་ཉིད་སོང་བ། །དེ་དག་གིས་ནི་སྨད་ཅིང་དཀྲུགས། །གནས་པར་མི་བྱ་རྐྱེན་ཡོད་ན། །ནུབ་གཉིས་བར་དུ་གནས་པར་བྱ། །གང་ཕྱིར་དེ་ན་གནས་པས་ཀྱང་། །བཤམས་པའི་རིམ་པ་དཀྲུགས་བྱེད་ཅིང་། །འཇིགས་པ་སྐྱེད་པར་བྱེད་པ་ཉིད། །
[61b.2]དེ་ཕྱིར་ཐུབ་པས་བཀག་པ་ཡིན། །ཉེ་དགའ་ལ་ནི་བརྟེན་པ་ནི། །བཅུ་བདུན་སྡེ་རྣམས་བཙོ་བླག་གི། །ལས་ཀྱི་དོན་དུ་རབ་ཏུ་བོས། །དེ་དག་མི་ཉན་དེ་ཚེ་རྡེག །དེ་བཞིན་དུ་ནི་ལས་བྱའི་ཕྱིར། །མངོན་བརྗོད་གང་ཚེ་མི་བྱེད་ལ། །དེ་ཡིས་དེ་དག་རྡེག་ལྡུ་པར་གཟས། །དེ་ཚེ་བསླབ་པ་བཅས་པ་
[61b.3]ཡིན། །དགེ་འདུན་ལྷག་མ་བཅས་པར་ནི། །དགེ་སློང་ཆོས་ཀྱིས་མཐོང་འགྱུར་ཏེ། །ཉེ་དགའ་ཡིས་ནི་བཟློག་བྱས་ཀྱང་། །དེས་ནི་དགེ་འདུན་ལ་རིག་བྱས། །སྔོན་གྱི་གནོད་པ་བྱེད་པ་ཡི། །རྒྱུ་མཚན་ཡོངས་སུ་བསམས་ནས་ཀྱང་། །ཉེ་དགས་དགེ་སློང་ཆོས་ཀྱི་ནི། །ཟན་ནི་ཡོངས་སུ་
[61b.4]གཅོད་པར་བྱེད། །ལྗོན་པ་ལ་ནི་མེ་བཏང་བས། །སྦྲུལ་ནི་ལྟུང་བར་གྱུར་ཕྱིར་དང་། །དྲུག་སྡེས་མགལ་མེས་བསྐོར་བྱས་ཕྱིར། །མེ་ལ་རེག་པ་བཀག་པ་ཡིན། །ཉེ་དགའ་གནས་ནས་དབྱུང་བའི་ཕྱིར། །དགེ་སློང་རྣམས་ཀྱིས་སྦྱོར་བ་བརྩམས། །འདུན་པ་བྱིན་པ་དགའ་བོ་ཡིས། །སླར་ནི་
[61b.5]ཉམས་པར་བྱས་པ་ཡིན། །དགེ་ཚུལ་རྣམས་དང་དགེ་སློང་རྣམས། །ལྷན་ཅིག་ཏུ་ནི་ཉལ་བ་བཀག །སྒྲ་གཅན་འཛིན་ལ་བརྟེན་ནས་ནི། །ནུབ་གཉིས་རྗེས་སུ་གནང་བ་དང་། །རྒྱལ་པོའི་ཁབ་ཏུ་བད་ཚ་ཆོས། །སྡིག་ཅན་ལྟ་བུ་ཀུན་ཏུ་སྐྱེས། །ཉེས་པ་བྱེད་པའི་འཆི་ལྟས་ནི། །བཟློག་
[61b.6]བཞིན་དུ་ཡང་དེ་མི་གཏོང་། །གནས་ནས་ཕྱུང་ཡང་ཉེ་དགའ་ཡིས། །འདུ་འཛིའི་གཏམ་གྱིས་གནས་པར་བྱེད། །སྔར་སྨོས་བྱེཆོས་དང་ཟང་ཟིང་གིས། །མཆོག་ཏུ་ལྟུང་བ་བཅས་པར་འགྱུར། །ལྟུང་བ་བྱུང་ནས་གྲོལ་བ་ཡང་། །ཚེར་མ་དང་ནི་ཆེན་པོ་བའི། །མཐོང་བའི་ཡུལ་དུ་གྱུར་པའི་
[61b.7]བར། །བསྙིལ་བསྡུད་པ་ཡི་ཉེས་པ་ཡིན། །རི་བོ་ཡིད་འོང་དུས་སྟོན་ཚེ། །གར་མཁན་གྱི་ནི་བཞད་གད་པའི། །དྲུག་སྡེ་དག་གིས་དཀར་པོའི་གོས། །གོན་བྱས་དེ་ནི་མི་བྱའོ། །ལི་ཙྪའི་སྐྱེད་མོས་ཚལ་དང་ནི། །རོལ་མོ་རྒྱན་དང་དེ་བཞིན་དུ། །གཡུལ་འགྱེད་པ་ན་སྤྱོད་པའི་ཕྱིར། །
[62a]
[62a.1]ཡངས་པར་རིག་པའི་ཉེས་པ་བྱུང་། །རྒྱལ་པོ་ཁབ་ཀྱི་ཆུ་དྲོན་དུ། །དྲུག་སྡེ་དག་གིས་གཟུགས་ཅན་སྙིང་། །གནོད་བྱས་དེ་ནི་རབ་ཏུ་བཀག །ཇི་སྲིད་ཟླ་ཕྱེད་རྗེས་སུ་གནང་། །འཆར་ཀ་ཡིས་ནི་མཉན་ཡོད་དུ། །བསོད་སྙོམས་དོན་དུ་འགྲོ་བྱེད་པས། །འཕོང་གི་
[62a.2]གནས་སུ་ཞུགས་ནས་ནི། །ཇི་སྲིད་བྱ་རོག་གསད་པར་བྱས། །ཉེ་དགའ་ཡིས་ནི་བགྲོས་བྱས་ནས། །ཤིན་ཏུ་ཐོས་པར་འཛིན་བྱེད་པའི། །གཞོན་ནུ་བཅུ་བདུན་སྡེ་རྣམས་ལ། །འགྱོད་པ་སྐྱེད་པའི་གཏམ་བྱས་སོ། །དེ་རྣམས་ཀྱི་ནི་གནས་དང་གཅིག །དགེ་སྐོས་སུ་ནི་ཡང་དག་སྦྱར། །
[62a.3]ཡང་དག་ནང་དུ་ཞུགས་གཉིད་ལོག །དེ་ཁྲོས་ག་ག་ཚིལ་གྱིས་ཤི། །དེ་དག་ཆུ་ཀླུང་གནས་ཅན་དུ། །རྩེད་མོས་ཀུན་ཏུ་གནས་པའི་ཕྱིར། །རྒྱལ་པོས་མི་དག་རིག་པར་བྱེད། །ཆུ་ལ་རྩེ་བ་བཀག་པ་ཡིན། །མ་འགགས་པས་ནི་ལམ་ཞུགས་པས། །སྐྱེས་བུ་མེད་པའི་བུད་མེད་དང་། །ལྷན་
[62a.4]ཅིག་ཁྱིམ་དུ་ཉལ་བྱས་པས། །དེ་ཕྱིར་ཉེས་དམིགས་བྱུང་བར་གྱུར། །ཉེ་དགས་ལ་བ་གྱོན་ནས་ནི། །མཚན་མོ་ཀློག་པ་མངོན་བརྩོན་པའི། །བཅུ་བདུན་སྡེ་ཡི་བདག་ཉིད་དག །ངེས་པ་ཉིད་དུ་སྐྲག་པར་བྱེད། །ཉེ་དགའ་ལ་སོགས་པ་དག་གིས། །ཆུ་ནང་ནུབ་པ་བཅུ་བདུན་སྡེའི། །ལྷུང་བཟེད་
[62a.5]ལ་སོགས་སྦ་བྱས་པས། །བཟའ་བའི་དོན་དུ་སོང་བ་ཡིན། །ཉེ་དགས་རང་གི་ཆོས་གོས་ནི། །སློབ་མ་རྣམས་ལ་བྱིན་པ་དག །སླར་ནི་སྤྱད་ནས་སླར་ཡང་ནི། །དེ་བཞིན་དུ་ནི་བཞག་པ་ཡིན། །རྒྱལ་པོའི་ཁབ་ཏུ་དེ་བཞིན་དུ། །གྱད་བུ་ནོར་ལ་དེ་དག་གིས། །ཆོས་གོས་མགོ་ལ་རེག་མཐོང་ནས། །
[62a.6]དགེ་འདུན་ལྷག་མས་སྐུར་པ་བཏབ། །དགེ་སློང་མཉན་ཡོད་དུ་འགྲོ་ཞིང་། །ཐག་མཁན་བུད་མེད་དེ་བཞིན་སོང་། །ང་ཡི་ཆུང་མ་འདིར་ཁྱེར་སྙམ། །ཐག་པ་ཡིས་ནི་བརྡེག་པར་བྱས། །རྒྱལ་པོའི་ཁབ་ཏུ་དགེ་སྦྱོང་ཞིག །ཤོ་གམ་འཇོམས་པའི་ཚོང་པ་དང་། །ལྷན་ཅིག་འགྲོ་བར་གྱུར་པ་
[62a.7]ན། །ཤོ་གམ་པས་མཐོང་བཅོམ་པར་གྱུར། །འཕགས་པ་སྤངས་ནས་སྐྱེས་པ་དེས། །བྱིས་པ་ཉི་ཤུ་མ་ལོན་པ། །བསྙེན་པར་རྫོགས་པར་བྱས་པ་དག །དེ་དག་བཀྲེན་པས་ངུ་བར་བྱེད། །ཉེ་དགའ་ལ་སོགས་རྣམས་ཀྱིས་ནི། །མཉན་ཡོད་དུ་ནི་བརྟེན་བྱས་ནས། །ས་ནི་རྐོའམ་
[62b]
[62b.1]རྐོར་འཇུག་བྱས། །དེ་ཕྱིར་ཆད་པས་ཀུན་ནས་བསླང་། །མིང་ཆེན་གྱིས་ནི་ཟླ་བ་བཞིར། །འཕགས་པའི་དགེ་འདུན་བསྟབས་པས་ན། །དྲུག་སྡེ་དེ་ལས་ལྷག་པར་ཡང་། །སྤོང་བར་བྱེད་པས་དེ་ཕྱིར་བཀག །དགེ་འདུན་གཉིས་གཏོགས་བསླབ་པ་ནི། །ལམ་པ་ཡིས་ནི་བསྒོ་བྱས་པ། །
[62b.2]རྨོངས་པ་ཁྱོད་ལ་སུ་ཞིག་སློབ། །དྲུག་སྡེ་དག་གིས་རབ་ཏུ་སྤངས། །བཅུ་བདུན་སྡེ་ཡི་བདག་ཉིད་ནི། །དྲུག་སྡེ་གནས་ནས་དབྱུང་བའི་ཚེ། །མཉན་ཡོད་དུ་ནི་གྲོས་བྱེད་པར། །དེ་དག་སོང་ནས་ཉན་རྣ་བྱས། །ཉེ་དགའ་གནས་ནས་དབྱུང་ལ་སོགས། །དེ་ལྟར་དེ་དག་གིས་བརྩམས་
[62b.3]པ། །སྟན་ལ་ལ་བ་བཞག་ནས་ནི། །དེ་ཕྱིར་དགའ་བོ་མི་སྨྲ་སོང་། །གང་ཚེ་དགེ་འདུན་གྱིས་ངེས་པར། །རྩོད་པ་ཞི་བར་བྱས་པ་ན། །དགེ་སློང་ནག་པ་རྒྱལ་ཁབ་ཏུ། །མ་གུས་པ་ནི་བྱས་པ་ཡིན། །འཕགས་པ་ལེགས་འོང་བཟང་པོ་ཡིས། །ཆང་དང་བསྲེས་པའི་བཏུང་བ་དག །
[62b.4]མཉན་ཡོད་དུ་ནི་འཐུངས་ནས་སུ། །མྱོས་པར་གྱུར་པས་སྲང་དུ་འགྱེལ། །གཏུམ་མོའི་མནའ་མའི་ཁྱིམ་དུ་ནི། །འཆར་ཀས་སྟན་ལ་ཉེར་སྤྱད་ཕྱིར། །སོང་བར་གྱུར་ནས་ཇི་སྲིད་དུ། །ཉེ་བར་བསད་པར་གྱུར་པ་ཡིན། །ཁྱིམ་པ་རབ་ཏུ་དད་གྱུར་པས། །ཇི་སྲིད་དེ་ཡི་ཚིག་གིས་ནི། །
[62b.5]དགེ་འདུན་མགྲོན་དུ་བོས་པས་ན། །ཉེ་དགའ་ཁྱིམ་གཞན་སོང་ནས་འདུག །དེས་ནི་འཆར་ཀ་མྱུར་རབ་ཏུ། །འཕྲེང་ལྡན་མ་ནི་གློག་པའི་ཕྱིར། །བཙུན་མོའི་ཕོ་བྲང་དུས་མིན་སོང་།བསླབ་པ་བཅས་པ་ཀུན་ནས་བསླང་། །དྲུག་སྡེ་རྣམས་ནི་སོ་སོར་ཐར །མ་གུས་པས་ནི་ཉན་པར་
[62b.6]བྱེད། །འདི་ནི་སངས་རྒྱས་ཀྱིས་བཤད་པར། །ཁོ་བོ་ཅག་གིས་ད་གདོད་ཐོས། །བ་སོ་མཁན་པོ་ཆོས་ཀྱིས་ནི། །རང་བཟོས་དགེ་སློང་མགྲོན་དུ་གཉེར། །སྦྱིན་པའི་སྤྱོར་བས་ལོངས་སྤྱོད་དག །ཟད་པར་ཉེ་བར་སོང་བར་གྱུར། །རྐང་པ་དམའ་བའི་ཁྲི་དག་ཀྱང་། །སྔོན་ནི་སྡོམ་
[62b.7]བརྩོན་ལྟ་བུ་ཡི། །དབང་དུ་བྱས་ནས་བཀག་པ་སྟེ། །ཁྲུ་གང་གི་ནི་ཚད་དང་ལྡན། །དགེ་འདུན་ཁྲི་ནི་ཉེ་དགའ་ཡི། །གཞན་བྱིས་ཐོབ་པར་འགྱུར་སྙམ་དུ། །ཤིང་བལ་གྱིས་ནི་གོས་པར་བྱས། །ཤིང་བལ་གྱིས་ནི་དཀར་པོར་གྱུར། །དགེ་སློང་མང་པོ་ལ་བརྟེན་ནས། །གོས་ཀྱི་ཚོགས་ནི་
[63a]
[63a.1]མང་དུ་གྱུར། །གདིང་བའི་ཚད་ནི་མཐོ་གསུམ་སྟེ། །ཞེང་དུ་ཕྱེད་ཀྱི་ཚད་ཡིན་ནོ། །གཡན་པའི་ནད་ལ་བརྟེན་ནས་ནི། །གཡན་པ་དགབ་པར་བཤད་པ་ཡིན། །མཐོ་བཞི་དང་ནི་མཐོ་གཉིས་ཀྱི། །ཚད་དང་ལྡན་པའི་བར་དུ་བྱས། །ཆོས་གོས་བསྲུང་བར་བྱ་བའི་
[63a.2]ཕྱིར། །དབྱར་ཀྱི་གོས་ནི་རས་ཆེན་བྱ། །མཐོ་རྣམས་ཕྱེད་དང་གསུམ་དང་ནི། །དྲུག་དག་ཁོ་ན་ལྷག་མི་བྱ། །ཉེ་དགའ་ཡིས་ནི་མཉན་ཡོད་དུ། །ཐུབ་པ་ཡིས་ནི་ཆོས་གོས་བྱས། །མཐོ་བཅུ་དག་གི་ཚད་དང་ནི། །དྲུག་ཅེས་བྱ་བ་དག་ཀྱང་ཡིན། །ད་ནི་སོ་སོར་བཤགས་པའི་ཆོས། །
[63a.3]བཤད་པར་བྱས་ཏེ་གཞན་དག་གི། །བྱུང་བ་རྗེས་སུ་འབྲངས་ནས་ནི། །འཆད་བར་འགྱུར་བ་དེ་བཞིན་བཤད། །རྒྱལ་པོའི་ཁབ་ཏུ་ཉེ་དགའ་ཡིས། །ཨུཏྤ་ལ་མདོག་དགེ་སློང་མའི། །བསོད་སྙོམས་དག་ནི་རབ་ཏུ་བླངས། །ཀུན་ཏུ་བརྒྱལ་ནས་ས་ལ་འགྱེལ། །དྲུག་སྡེས་བདག་ཅག་
[63a.4]མཉན་ཡོད་དུ། །སྦོམ་དགའ་མོ་ལ་སྟོན་མོའི་ཚེ། །གྱ་ནོམ་བསྐོ་ཤམ་གྱིས་ཞེས་བརྗོད། །དེ་ཡིས་ཀྱང་ནི་དེ་ལྟར་བྱས། །ཡངས་པ་ཅན་དུ་སྦྱིན་བཏང་བས། །སེང་གེའི་ལོངས་སྤྱད་མ་ལུས་འགྲིབ། །དེ་ཕྱིར་ཁྱེམ་དུ་བསོད་སྙོམས་ཕྱིར། །འགྲོ་བར་མི་བྱ་ཞེས་གྲགས་སོ། །དགོན་
[63a.5]པ་དྲུག་སྡེ་རྣམས་ལ་ནི། །སེར་སྐྱ་གཞི་ན་གནས་པ་ཡི། །གོས་དང་བྲལ་བའི་བུད་མེད་རྣམས། །དེ་ཡིས་བྱིན་ལེན་སྟོབས་སུ་བཅུག །རི་དགས་གནས་སུ་སྡོམ་བརྩོན་གྱིས། །ཁྱིམ་པ་རྣམས་ཀྱི་ཚུལ་དུ་ནི། །ཆོས་གོས་རྣམས་ནི་གོམས་པར་འགྱུར། །ཟླུམ་པོ་རུ་ནི་དྲུབ་པར་བྱ།།
[63a.6]སྣད་གཡོགས་ཀྱི་ནི་དྲུག་དག་དང་། །སྟོད་གཡོགས་ཀྱི་ནི་གསུམ་རྣམས་ཀྱི། །བྱེད་པ་པོ་ནི་དྲུག་སྡེར་བཤད། །དེ་ཕྱིར་བསླབ་པ་རབ་ཏུ་བསྟན། །ཤིན་ཏུ་བསྡམ་སོགས་ལྔ་རྣམས་དང་། །མགོ་གཡོགས་སོགས་ཀྱིའང་དེ་བཞིན་དུ། །མཆོད་སོགས་ལྡན་པ་ལྔ་རྣམས་ཀྱི། །ལུས་དག་ལྔ་
[63a.7]ནི་དེ་བཞིན་ནོ། །བྲམ་ཟེའི་སྟན་ལ་མཉན་ཡོད་དུ། །ཉེ་དགའ་འདུག་པ་ལ་བརྟེན་ནས། །རྗེས་སུ་གནང་བ་མ་བྱས་པར། །སྟན་ལ་འདུག་པ་བཀག་པ་ཡིན། །འཕགས་པ་འཆར་ཀ་ལ་བརྟེན་ནས། །བྱིས་པ་བསད་པར་གྱུར་པ་ཡིན། །དེ་ཕྱིར་ཁྱེམ་དུ་མ་བརྟགས་པར། །
[63b]
[63b.1]སྟན་ནི་རབ་ཏུ་བཀག་པ་ཡིན། །བཙུན་མོའི་འཁོར་དུ་མ་སྦྱངས་པའི། །ཁྲིའུ་ལ་ནི་འདུག་པའི་ཕྱིར། །དེ་ཕྱིར་དེ་ལ་བརྟེན་ནས་ནི། །ལུས་ཀུན་གྱིས་ནི་འདུག་པ་དཀའ། །འཆག་པར་འགྱུར་བ་དྲུག་པོ་ཡི། །འདུག་པའི་བདག་ཉིད་དག་གི་ཡང་། །བྱེད་པོ་དྲུག་སྡེར་ཤེས་བྱ་ཡི། །གཞན་ནི་བརྗོད་
[63b.2]པར་མི་བྱ་ཡི། །བྱིས་པ་གསོད་རི་མཉན་ཡོད་དུ། །རྟོགས་ལྡན་ཁྱིམ་དུ་དྲུག་སྡེ་ཉིད། །བྱེན་ལེན་བརྒྱད་ཀྱི་བྱེད་པ་པོར། །ཡང་དག་པར་ནི་བཤད་པ་ཡིན། །ཟས་བྱས་ལེགས་བྱས་ལྔ་རྣམས་ཀྱི། །ཙུག་ཙུག་ལ་ཡང་དེ་བཞིན་ནོ། །ཐ་དད་བྱེད་པ་ལྔ་རྣམས་ཀྱི། །མཉན་ཡོད་དུ་ནི་ཤེས་པར་
[63b.3]བྱ། །ལག་པ་ལྡག་པ་ལྔ་རྣམས་དང་། །འཕྱ་བ་དག་ནི་གསུམ་པོ་དང་། །རྟོགས་ལྡན་ཁྱིམ་དུ་ཆུ་འབོད་པའི། །གང་ཡིན་པ་ནི་བཞི་པ་ཡི། །ལྷུང་བཟེད་གཅིག་གིས་དྲུག་སྡེ་ཡིན། །དགུ་པོ་ཡིས་ནི་དགེ་སློང་གཞན། །འགྲེང་བར་བྱེད་སོགས་ལྔ་པོ་ནི། །དྲུག་སྡེ་ཞེས་བྱར་རབ་ཏུ་གྲགས། །
[63b.4]མགོ་གཡོགས་ལ་སོགས་ལྔ་རྣམས་དང་། །དེ་བཞིན་གླང་ཆེན་སོགས་ཞོན་པ། །དོ་ཀེར་ཅན་སོགས་ལ་དེ་བཞིན། །འཁར་བ་དྲུག་ལ་དེ་ཉིད་ཤེས། །ཉེ་དགའ་ཡིས་ནི་བཤད་པ་དག །འགྲེངས་ནས་བཏང་བར་བྱས་པ་དག །སེར་སྐྱའི་གྲོང་དུ་དེ་དག་ཉིད། །དེ་ཡིས་རྩྭ་སྔོན་ཉམས་པར་བྱས། །
[63b.5]བཙོ་གླག་མཁན་གྱི་བཀྲུ་བཤལ་སར། །ཉེ་དགས་མི་གཙང་བས་བཀང་བའི། །གྱོ་མོ་རབ་ཏུ་བཅུག་པ་ཡིན། །དེ་ཕྱིར་སྨོད་པ་ཀུན་དུ་སློང་། །མཉན་ཡོད་དུ་ནི་ལྗོན་ཤིང་རྩེར། །མངོན་པར་འཛེག་པར་བྱས་ནས་ནི། །བསོད་སྙོམས་ལེན་པའི་དགེ་སློང་ལ། །ལྟ་བ་རབ་ཏུ་བརྩམས་པ་
[63b.6]ཡིན། །འགྱེད་དང་མི་གདམས་པ་དང་ནི། །ལྟུང་དང་བྱ་བ་ཞེས་བྱ་བའི། །རྩོད་པ་བཞི་པོ་འདི་དག་ཉིད། །རྗེས་སུ་རྟོགས་པར་བྱ་བ་ཡིན། །མུ་ཏིག་གིས་ཕུལ་མུ་ཏིག་ལས། །ཆོས་ཀྱི་སྐལ་བ་བགོ་བའི་ཕྱིར། །མདོ་སྡེ་འཛིན་སོགས་རྩོད་པ་ལས། །མཉན་ཡོད་དུ་ནི་དེ་དག་བྱུང་། །
[63b.7]གང་མང་རབ་ཏུ་འབྱེད་པ་དང་། །གཅིག་ཏུ་ངེས་པར་བྱེད་པ་ཡིས། །གཉིས་ཀྱིས་འགྱེད་པ་ཞི་བྱེད་པ། །སྔོན་ནི་ཐུབ་པས་བསྟན་པ་ཡིན། །མངོན་སུམ་དྲན་དང་མ་སྨྱོས་པས། །མི་གདམས་པ་ནི་ཞི་བར་བྱེད། །ཡང་དག་ལྟུང་བའི་རང་བཞིན་གྱེས། །གསུམ་པ་གཞན་ནི་ཁས་བླངས་
[64a]
[64a.1]དང་། །རྩྭ་བཀྲམ་པ་དང་མངོན་སུམ་དང་། །དེ་ཉིད་ཚོལ་བས་ཞི་བར་བྱེད། །བྱ་བའི་བདག་ཉིད་ཞི་བ་ནི། །བདུན་པོ་དེ་ཡིས་ངེས་པར་འགྱུར། །བསླབ་པ་འདོད་པའི་དགེ་སློང་གིས། །རྩོད་པ་སྟན་ལ་དབབ་བྱའི་ཕྱིར། །གནས་ནི་རབ་ཏུ་གཟུང་བྱ་སྟེ། །བརྩོན་པས་
[64a.2]གནས་ནི་རྣམ་པར་དབྱེ། བསྡུས་པའི་དགེ་བ་འདི་ལས་ནི། །བདག་གིས་བསོད་ནམས་གང་བསགས་དེས། །འདི་ནི་འཇིག་རྟེན་ཉོན་མོངས་དང་། །ཉེ་བའི་ཉོན་མོངས་སྤོང་བར་ཤོག །བསླབ་པའི་ས་ལ་བརྟེན་ནས་ནི། །མདོ་ཡི་གཞུ་ནི་བཟུང་ནས་ནི། །སེམས་ཀྱི་མདའ་ནི་
[64a.3]བཀང་བྱས་ནས། །ཉོན་མོངས་དགྲ་རྣམས་ཉམས་པར་བྱས། །གལ་ཏེ་ཁྱོད་ལ་ཐར་པ་ཡི། །ཁྱིམ་དུ་གནས་པར་འདོད་ཡོད་ན། །དེ་ལྟ་བས་ན་ཁྱོད་ཀྱིས་ནི། །སེམས་ཅན་དོན་བྱེད་ལ་འབད་ཀྱི། །བྱང་ཕྱོགས་ཀྱི་ཁ་ཆེའི་ཡུལ་ནས་བྱུང་བའི་པཎྜི་ཏ་འདུལ་བ་འཛིན་པ་ཤཱཀྱའི་དགེ་
[64a.4]སློང་བ་ལ་ཤྲཱི་བྷ་དྲས་མཛད་པ་གླེང་གཞི་དང་གང་ཟག་བསྡུས་པའི་ཚིག་ལེའུར་བྱས་པ་རྫོགས་སོ།། །།ཐོ་ལིང་གི་གཙུག་ལག་ཁང་དུ་རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་བ་ཤཱཀྱའི་དགེ་སློང་གཞོན་ནུ་མཆོག་གིས་བསྒྱུར་ཅིང་ཞུས་ཏེ་གཏན་ལ་ཕབ་
[64a.5]པའོ།། །།{T4132}#༄༅༅། །རྒྱ་གར་སྐད་དུ། ཤྲ་མ་ཎེ་ར་པཪྵཱ་གྲཾ#། བོད་སྐད་དུ། དགེ་ཚུལ་གྱི་དང་པོའི་ལོ། སངས་རྒྱས་ལ་ཕྱག་འཚལ་ལོ། །མཁན་པོ་དགོངས་སུ་གསོལ། ཕྱག་འཚལ་ལོ། །
[64a.6]དགུང་ལ་ཀུན་དུ་བདེའམ་ཞེས་དྲི། ཆག་ཆག་དང་ཕྱག་དར་དང་དཀྱིལ་འཁོར་བགྱིད། ཀློག་པ་དང་། ཁ་ཏོན་དང་དགེ་བའི་ཕྱོགས་ཀྱི་#ཀུན་དུ་སྤྱོད་#པ་རྣམས་ལ་ཆོས་དང་མཐུན་པར་བགྱིད། གཎྜཱིའི་#དུས་སུ་བརྗོད་#པར་བྱ་བ་ཡང་ངོ་། །མཁན་པོ་དགོངས་སུ་གསོལ། ཕྱག་འཚལ་ལོ། །
[64a.7]བདེ་བར་གསོལ་ལམ་#ཞེས་དྲི། ཀློག་པ་དང་ཁ་ཏོན་བགྱིད། ངལ་བསོ་#བ་ཡང་ངོ་། །མཁན་པོ་དགོངས་སུ་གསོལ། ཕྱག་འཚལ་ལོ། །གདུགས་ལ་#ཀུན་དུ་བདེའམ་ཞེས་དྲི། རྐང་པ་དག་བཀྲུ། མཆིས་#མལ་བཤམ། སྲོད་དང་ཐོ་རངས་ལ་མི་ཉལ་བར་སྦྱོར་བ་#བགྱིད།
[64b]
[64b.1]ངལ་སོ་བ་ཡང་ངོ་། །སློབ་དཔོན་དགོངས་སུ་གསོལ། ཕྱག་འཚལ་ལོ། །དགུང་ལ་ཀུན་ཏུ་བདེའམ་ཞེས་དྲི། ཆག་ཆག་དང་ཕྱག་དར་ཡང་དེ་བཞིན་ནོ། །བདག་དཀྱིལ་འཁོར་བགྱིད་ཅེས་སོ། །ཀློག་པ་དང་ཁ་ཏོན་དང་དགེ་བའི་ཕྱོགས་ཀྱི་ཀུན་དུ་སྤྱོད་པ་སྦྱིན་པ་ལ་སོགས་པའོ། །གཎྜཱིའི་#
[64b.2]དུས་སུ་ཡང་ཟས་སོ། །འཆག་པ་དང་འདུག་པ་དང་ཞབས་ལ་བསྐུ་མཉེ་#ལ་སོགས་པའོ། །ཐོས་པ་དང་བསམ་པ་ལ་སོགས་པ་ཐམས་ཅད་བགྱིད། དེ་ནི་ཁྱོད་ཀྱི་རྗེས་སུ་གནང་བས་སོ། །རྒྱལ་པོ་ཤག་བྱུང་བའི་དུས་ན་ལོ་དགུ་བརྒྱ་བཞི་བཅུ་རྩ་ལྔ་ལོན་པའི་འོག་ཏུ་དཔལ་ལྡན་ས་
[64b.3]སྐྱོང་ལྷ་རྣམ་པར་རྒྱལ་བས་རྒྱལ་སྲིད་མཛད་ནས་ལོ་བཅུ་དགུ་འདས་པ་ན། དབྱར་ཟླ་ར་བའི་མར་གྱི་ངོའི་ཚེས་གསུམ་ལ་ཡུལ་མ་ག་དྷཱའི་#དཔལ་སེང་གེ་གོ་ཆ་#འབྱུང་བའི་གཙུག་ལག་ཁང་ཆེན་པོར་རབ་ཏུ་བྱུང་། བདག་ཉིད་ནི་ཤཱཀྱའི་དགེ་ཚུལ་མཐའ་ཡས་དཔལ་སྐྱོང་ངོ་། །ཚེ་དང་ལྡན་
[64b.4]པ་ཁྱོད་ལོ་དུ་ལོན་ཞེ་ན། ལོ་དུ་ལོན་པའམ་མ་ལོན་ནོ། །དུས་གང་ཞེ་ན་སོ་གའོ། །སོ་ག་ནས་ཅི་ཙམ་ན་ཐོབ་ཅེ་ན། ཞག་གཉིས་དམན་པའི་ཟླ་བ་གསུམ་མོ། །ཟས་ཀྱི་སྔ་རོལ་ལམ་ཟས་ཀྱི་འོག་རོལ་ཞེ་ན། བདག་ཟས་ཀྱི་སྔ་རོལ་ལོ། །སྐྱེས་བུ་དང་རྩ་བའི་ཚད་དུ་ཞེ་ན།
[64b.5]སྐྱེས་བུ་དང་རྩ་བ་གཅིག་གི་ཚད་ཀྱི་གྲིབ་མའོ། །མཁན་པོ་གང་ཡིན་ཞེ་ན། དོན་གྱི་སླད་དུ་མཚན་ནས་སྨོས་ཏེ་བླ་མ་མཁན་པོ་ལྷ་དབང་སྐྱོང་ངོ་། །སློབ་དཔོན་གང་ཞེ་ན། བདག་གི་སློབ་དཔོན་རིན་ཆེན་འབྱུང་གནས་སྐྱོང་ངོ་། །དུས་གང་ཞེ་ན། ལྔ་རྣམས་སོ། །ལྔ་རྣམས་གང་ཞེ་
[64b.6]ན། དགུན་དང་། སོ་ག་དང་། དབྱར་དང་། དབྱར་ཐུང་ངུ་དང་། དབྱར་རིང་པོའོ། །དེ་ལ་དགུན་གྱི་ཚད་ཇི་ཙམ་ཞེ་ན། ཟླ་བ་བཞི་རྣམས་སོ། །བཞི་པོ་རྣམས་གང་ཞེ་ན། དགུན་ཟླ་ར་བ་དང་། དགུན་ཟླ་འབྲིང་པོ་དང་། དགུན་ཟླ་ཐ་ཆུངས་#དང་། དཔྱིད་ཟླ་ར་བའོ། །སོ་ག་ཇི་ཙམ་
[64b.7]ཞེ་ན། ཟླ་བ་བཞི་རྣམས་སོ། །བཞི་པོ་རྣམས་གང་ཞེ་ན། དཔྱིད་ཟླ་འབྲིང་པོ་དང་། དཔྱིད་ཟླ་ཐ་ཆུངས་#དང་། དབྱར་ཟླ་ར་བ་དང་། དབྱར་ཟླ་འབྲིང་པོ་རྣམས་སོ། །དབྱར་གྱི་ཚད་ཇི་ཙམ་ཞེ་ན། ཟླ་བ་གཅིག་སྟེ། དབྱར་ཟླ་ཐ་ཆུངས་སོ#། །དབྱར་ཐུང་ངུའི་ཚད་ཇི་ཙམ་ཞེ་ན། ཉིན་ཞག་གཅིག་
[65a]
[65a.1]གོ། །ཉིན་ཞག་གཅིག་པོ་གང་ཞེ་ན། སྟོན་ཟླ་ར་བའི་ཚེས་གཅིག་གི་ཉིན་ཞག་གཅིག་གོ། །དབྱར་རིང་པོའི་ཚད་ཇི་ཙམ་ཞེ་ན། ཉིན་ཞག་དེས་མ་ཆོག་པའི་ཟླ་བ་གསུམ་མོ། །ཟླ་བ་གསུམ་པོ་གང་ཞེ་ན། སྟོན་ཟླ་ར་བ་དང་། སྟོན་ཟླ་འབྲིང་པོ་དང་། སྟོན་ཟླ་ཐ་ཆུངས་
[65a.2]སོ#། །ཡང་སྨྲས་#པ། གཅིག་གིས་#དམན་པའི་ཟླ་བ་རྣམས། །བཞི་རྣམས་དེ་བཞིན་བཞི་པོ་རྣམས། །ཟླ་བ་གཅིག་ཡིན་ཞག་གཅིག་ཡིན། །ཞེས་བྱ་དུས་རྣམས་ལྔ་པོར་དྲན། །སྡེ་པ་གང་ཞེ་ན། འཕགས་པ་གཞི་ཐམས་ཅད་ཡོད་པར་#སྨྲ་བའི་སྡེའོ། །སྡེ་པ་དུ་ཞེ་ན། བཞི་རྣམས་
[65a.3]སོ། །བཞི་པོ་རྣམས་གང་ཞེ་ན། འཕགས་པ་ཐམས་ཅད་ཡོད་པར་སྨྲ་བ་དང་། འཕགས་པ་དགེ་འདུན་ཕལ་ཆེན་པ་དང་། འཕགས་པ་དགེ་འདུན་མང་བོས་བཀུར་བ་དང་། འཕགས་པ་གནས་བརྟན་#པའོ། །དེ་དག་ལ་དབྱེ་ན་དུ་ཡོད་ཅེ་ན། བཅོ་བརྒྱད་དོ། །བཅོ་བརྒྱད་པོ་རྣམས་
[65a.4]གང་ཞེ་ན། ཐམས་ཅད་ཡོད་པར་སྨྲ་བ་རྣམས་ཀྱི་དབྱེ་བ་ནི་བཞིའོ། །དེ་བསྟན་པར་བྱ་#སྟེ། འོད་སྲུངས་པ་དང་ས་སྟོན་སྡེ#། །ཆོས་སྲུང་བ་ཡི་མིང་ཅན་རྣམས། །གཞི་ཀུན་ཡོད་པར་སྨྲ་བ་སྟེ། །འདོད་པའི་བྱེ་བྲག་འབའ་ཞིག་གི། །རྒྱུ་ཡིས་#འདི་དག་ཐ་དད་བྱས། །སྟོན་པ་ཐ་དད་ཡོད་
[65a.5]མ་ཡིན། །དགེ་འདུན་པ་ལ་ཆེན་དབྱེ་བ་ནི། །དྲུག་སྡེ་ཤར་གྱི་རི་བོ་དང་། །དེ་བཞིན་བྱང་གི་#རི་བོ་དང་། །དབུས་པ་ཞེས་བྱ་དེ་ལས་གཞན། །རྣམ་པར་ཕྱེ་སྟེ་སྨྲ་བ་དང་། །གཞན་ནི་དེ་བཞིན་བཏགས་#པར་སྨྲ། །འཇིག་རྟེན་འདས་པར་སྨྲ་བ་སྟེ། །དེ་དག་ཏུ་ནི་ཡང་དག་སྨྲ། །མང་
[65a.6]པོས་བཀུར་བའི་དབྱེ་བ་ནི། །རྣམ་པ་#ལྔར་ནི་མཁས་པས་བསྔགས། །གོས་དམར་བ་དང་སྲུང་བ་པ། །ས་སྒྲོགས་རིས་དང་དེ་བཞིན་གཞན། །མང་དུ་ཐོས་རྣམས་སྨྲ་བ་དང་། །གནས་མའི་བུ་ཡི་མིང་ཅན་རྣམས། །རྒྱལ་བྱེད་ཚལ་ན་གནས་པ་དང་། །འཇིགས་བྱེད་རི་ལ་གནས་པ་དང་། །
[65a.7]གཙུག་ལག་ཁང་ཆེན་ལ་གནས་པ། །གནས་བརྟན་རྣམས་ནི་གསུམ་དུ་འདོད། །ཤཱཀྱ་སེང་གེའི་བསྟན་པ་ནི། །དེ་ལྟར་དབྱེ་བ་བཅོ་བརྒྱད་དུ། །གྱུར་ཏེ་#འགྲོ་བའི་བླ་མ་དེའི། །སྔོན་གྱི་ཕྲིན་#ལས་ངེས་པ་#ཡིན། །བསླབ་པ་རྣམས་#དུ་ཞེ་ན། བཅུ་རྣམས་སོ། །བཅུ་པོ་རྣམས་གང་
[65b]
[65b.1]ཞེ་ན། གང་ཞིག་སྲོག་གཅོད་གཞན་གྱི་ནོར་འཕྲོག་#དང་། །མི་ཚངས་སྤྱོད་བརྫུན་#བཅོས་པའི་ཆང་ལ་སོགས། །གར་སོགས་ཕྲེང་སོགས་མལ་ཆེན་མཐོ་བ་དང་། །དུས་མིན་ཟས་དང་གསེར་དངུལ་སྤོང་བ་སྟེ#། །དགེ་ཚུལ་བརྟུལ་ཞུགས་ཆུ་ལོན་བརྩིགས་པ་དང་། །མཐར་བྱེད་པ་ཡི་མཆི་བ་
[65b.2]འབྱུང་བའི་ཐབས། །རྫོགས་པའི་བྱང་ཆུབ་དཔལ་ནོད་དབང་བསྐུར་#ཡིན། །ཉོན་མོངས་དགྲ་ཡི་གཡུལ་ལས་རྒྱལ་བྱེད་ཚུལ། །ལྟུང་བར་འགྱུར་བའི་ཆོས་དུ་ཞེ་ན། བཞི་རྣམས་སོ། །བཞི་པོ་རྣམས་གང་ཞེ་ན། སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་།
[65b.3]མིའི་ཆོས་བླ་མའི་ཚིག་སྨྲ་བའོ། །དགེ་སྦྱོང་དུ་བྱེད་པའི་ཆོས་རྣམས་དུ་ཞེ་ན། བཞི་རྣམས་སོ། །བཞི་པོ་#རྣམས་གང་ཞེ་ན། ཁྲོས་#ཀྱང་སླར་མི་ཁྲོ་བ་དང་། གཤེ་ཡང་སླར་མི་གཤེ་བ་དང་། མཚང་བྲུས་ཀྱང་སླར་མི་བྲུ་#བ་དང་། རྡེག་#ཀྱང་སླར་མི་རྡེག་#པའོ། །ཡིད་བརྟན་པ་རྣམས་#དུ་
[65b.4]ཞེ་ན། ལྔ་རྣམས་སོ། །ལྔ་པོ་རྣམས་གང་དག་ཅེ་ན། ཆུ་ཚགས་ཡིད་བརྟན་པ་དང་། བཀོད་མ་ཡིད་བརྟན་པ་དང་། རྫིང་བུ་ཡིད་བརྟན་པ་དང་། དགེ་སློང་ཡིད་བརྟན་པ་དང་། དགེ་འདུན་ཡིད་བརྟན་པའོ། །ཡོངས་སུ་ལོངས་སྤྱད་པ་རྣམས་#དུ་ཞེ་ན། ལྔ་རྣམས་སོ། །ལྔ་
[65b.5]རྣམས་གང་ཞེ་ན། བདག་པོས་ཡོངས་སུ་ལོངས་སྤྱད་པ་དང་། བྱིན་པས་ཡོངས་སུ་ལོངས་སྤྱད་#པ་དང་། རྗེས་སུ་གནང་བས་ཡོངས་སུ་ལོངས་སྤྱད་པ་དང་། སྐྱིན་པོས་ཡོངས་སུ་ལོངས་སྤྱད་པ་དང་། ཡོངས་སུ་ལོངས་མ་#སྤྱད་པ་དང་ལྔའོ། །དེ་སྐད་དུ་ཡང་། མི་སློབ་པ་ནི་བདག་
[65b.6]པོར་བཤད། །སློབ་པ་བྱིན་ལེན་སྤྱོད་པ་ཡིན། །བསམ་གཏན་འདོན་#དང་ལྡན་པ་དང་། །རྗེས་སུ་གནང་རྣམས་དཀའ་ཐུབ་ཅན། །སྐྱིན་པོས་སྤྱོད་པ་ལྷག་མ་རྣམས། །ལེ་ལོས་ཉམས་པའི་བདག་ཉིད་ཡིན། །གཙུག་ལག་ཁང་སོགས་ཉེར་ལོངས་སྤྱོད། །ཚུལ་འཆལ་#རྣམས་ཀྱིས་
[65b.7]བཀག་པའོ། །ཞེས་སོ། །ལོ་ཚིགས་རྣམས་ཀྱི་གསོ་སྦྱོང་དུ་ཞེ་ན། ཉི་ཤུ་རྩ་བཞི་རྣམས་སོ། །རྒྱལ་དང་དབོ་དང་ས་ག་ཅན། །ཆུ་སྟོད་ཁྲུམས་སྨད་སྨིན་དྲུག་ཅན། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པའོ། །ལྷག་མ་རྣམས་ནི་བཅོ་ལྔ་པའོ། །དགེ་ཚུལ་
[66a]
[66a.1]གྱི་དང་པོའི་ལོ་དྲི་བ་#རྫོགས་སོ།། །།ཁ་ཆེའི་མཁན་པོ་ན་ར་ས་དེ་བ་དང་། ལོ་ཙཱ་#བ་ཤཱཀྱའི་དགེ་སློང་རྒྱལ་བའི་ཤེས་རབ་ཀྱིས་བསྒྱུར་བའོ།། །།{T4133}#༄༅༅། །རྒྱ་གར་སྐད་དུ། བྷི་ཀྵུ་བཪྵཱ་#གྲཾ་པྲྀཙྪ།
[66a.2]བོད་སྐད་དུ། དགེ་སློང་གི་དང་པོའི་ལོ་དྲི་བ། ཐམས་ཅད་མཁྱེན་པ་ལ་ཕྱག་འཚལ་ལོ། །མཁན་པོ་དགོངས་སུ་གསོལ། ཕྱག་འཚལ་ལོ། །དགུང་ལ་བདེའམ་ཞེས་དྲི། ཆག་ཆག་དང་ཕྱག་དར་དང་། མཎྜལ་བགྱིད#། ཀློག་པ་དང་། ཁ་ཏོན་དང་། དགེ་བའི་ཕྱོགས་ཀྱི་#ཀུན་དུ་སྤྱད་
[66a.3]པ་ལ་ཆོས་དང་མཐུན་པར་བགྱིད། གཎྜཱིའི་#དུས་སུ་བརྗོད་པར་བྱ་བ་ནི། མཁན་པོ་དགོངས་སུ་གསོལ། ཕྱག་འཚལ་ལོ། །བདེ་བར་གསོལ་ལམ་ཞེས་དྲི། ཀློག་པ་དང་། ཁ་ཏོན་བགྱིད#། ཅུང་ཞིག་ངལ་བསོ་#ཞེས་ཞུ། མཁན་པོ་དགོངས་སུ་གསོལ། ཕྱག་འཚལ་ལོ། །གདུགས་
[66a.4]ལ་བདེའམ་ཞེས་དྲི། རྐང་པ་དག་བཀྲུ། མཆིས་མལ་འཆའ། སྲོད་དང་ཐོ་རངས་ལ་མི་ཉལ་བར་#སྦྱོར་བ་བགྱིད#། ཅུང་ཞིག་ངལ་བསོ་ཞེས་ཞུ། སློབ་དཔོན་དགོངས་སུ་གསོལ། ཕྱག་འཚལ་ལོ། །དགུང་ལ་བདེའམ་ཞེས་དྲི། ཆག་ཆག་དང་། ཕྱག་དར་དང་། མཎྜལ་ལ་སོགས་
[66a.5]པ་བགྱིད། ཀློག་པ་དང་ཁ་ཏོན་བགྱིད། བསམ་གཏན་བགྱིད་ཅེས་ཞུ། གཎྜཱིའི་#དུས་སུ་ནི། ཟས་ལ་ཀུན་དུ་སྤྱད་པར་བགྱིད། ཞབས་ལ་སྐུ་མཉེ་ལ་སོགས་པ་བགྱིད། མཉན་པ་དང་བསམ་པ་ལ་སོགས་པ་བགྱིད་ཅེས་ཞུ། དེ་ནི་ཁྱོད་ཀྱི་རྗེས་སུ་གནང་བས་སོ། །གློ་བུར་དུ་འོངས་པ་ལ་དྲི་
[66a.6]ཞིང་ལན་གདབ་པ། ལོ་དུ་ལོན་ཞེ་ན། ལོ་ལོན་པའམ་མ་ལོན་པ་ཞེས་བྱ་བ་ལ་སོགས་པ་བརྗོད། དུས་གང་ཞེ་ན། སོས་ཀའི་#དུས་ལ་སོགས་པའོ། །ཅི་ཙམ་ཐོབ་ཅེ་ན། ཟླ་བ་གཅིག་གམ། ཟླ་བ་ཕྱེད་དམ། ཞག་བཅུ་པ་ལ་སོགས་པའོ། །ཟས་ཀྱི་#སྔ་རོལ་ལམ་ཟས་ཀྱི་འོག་རོལ་ཞེ་ན།
[66a.7]དེ་བཞིན་དུ་ཟས་ཀྱི་སྔ་རོལ་ལམ་ཟས་ཀྱི་འོག་རོལ་ཞེས་ལན་གདབ་བོ། །སྐྱེས་བུ་དུ་དང་རྩ་བ་དུ་ཞེ་ན། སྐྱེས་བུ་གཅིག་དང་རྩ་བ་གཉིས་ཞེས་བྱ་བ་ལ་སོགས་པ་བརྗོད་དོ། །མཁན་པོ་གང་ཡིན་ཞེ་ན། དོན་གྱི་སླད་དུ་མཚན་ནས་སྨོས་ཏེ། བླ་མ་མཁན་པོ་ཆེ་གེ་མོ་ཞེས་བྱའོ། །ལས་བྱེད་པའི་སློབ་
[66b]
[66b.1]དཔོན་གང་ཞེ་ན། སློབ་དཔོན་ཆེ་གེ་མོ་ཞེས་སོ། །གསང་སྟེ་བསྟོན་པའི་སློབ་དཔོན་གང་ཞེ་ན། སློབ་དཔོན་ཆེ་གེ་མོ་ཞེས་སོ། །དུས་སུ་ཡོད་ཅེ་ན་ལྔའོ། །ལྔ་པོ་དག་གང་ཞེ་ན། དགུན་#དང་། སོས་ཀ་#དང་། དབྱར་དང་། དབྱར་ཐུང་ངུ་དང་། དབྱར་རིང་པོ་ཞེས་བྱ་བའོ། །དེ་ལ་དགུན་གྱི་ཚད་#ཇི་ཙམ་ཞེ་ན།
[66b.2]ཟླ་བ་བཞིའོ། །བཞི་པོ་དག་གང་ཞེ་ན། དགུན་#ཟླ་ར་བ་དང་། དགུན་#ཟླ་འབྲིང་པོ་དང་། དགུན་#ཟླ་ཐ་ཆུངས་དང་། དཔྱིད་ཟླ་ར་བ་ཞེས་སོ། །སོས་ཀའི་#དུས་ཚོད་ཇི་ཙམ་ཞེ་ན། ཟླ་བ་བཞིའོ། །དཔྱིད་ཟླ་འབྲིང་པོ་དང་། དཔྱིད་ཟླ་ཐ་ཆུངས་དང་། དབྱར་ཟླ་ར་བ་དང་། དབྱར་ཟླ་འབྲིང་པོ་དག་གོ། །དབྱར་གྱི་#དུས་ཇི་
[66b.3]ཙམ་ཞེ་ན། ཟླ་བ་གཅིག་སྟེ། དབྱར་ཟླ་ཐ་ཆུངས་སོ#། །དབྱར་ཐུང་ངུའི་དུས་ཇི་ཙམ་ཞེ་ན། ཉིན་ཞག་གཅིག་སྟེ། ཉིན་ཞག་གཅིག་པོ་གང་ཡིན་ཞེ་ན། སྟོན་ཟླ་ར་བ་ཚེས་གཅིག་གི་ཉིན་ཞག་གོ། །དབྱར་རིང་པོའི་ཚད་ཇི་ཙམ་ཞེ་ན། ཉིན་ཞག་དེ་ཉིད་མ་ཚང་བའི་ཟླ་བ་གསུམ་མོ། །ཟླ་བ་གསུམ་པོ་
[66b.4]དག་གང་ཡིན་ཞེ་ན། སྟོན་ཟླ་ར་བ་དང་། སྟོན་ཟླ་འབྲིང་པོ་དང་། སྟོན་ཟླ་ཐ་ཆུངས་སོ#། །ཡང་སྨྲས་པ། ཞག་གཅིག་མ་ཚང་ཟླ་#གསུམ་དང་། །བཞི་དང་དེ་བཞིན་བཞི་པ་#དང་། །ཟླ་བ་གཅིག་ཡིན་ཞག་གཅིག་ཡིན། །ཞེས་བྱ་དུས་ནི་#ལྔ་པོར་བརྗོད། །སྡེ་པ་གང་ཞེ་ན། འཕགས་པ་ཐམས་ཅད་
[66b.5]ཡོད་པར་སྨྲ་བ་ཞེས་བྱ་བ་ལ་སོགས་པའོ།། །།དེའི་དབྱེ་བ་གང་ཞེ་ན། འཕགས་པ་གཞི་ཐམས་ཅད་ཡོད་པར་སྨྲ་བ་ཞེས་བྱ་བ་ལ་སོགས་པའོ། །#ཡང་སྡེ་པ་དུ་ཞེ་ན། #འཕགས་པ་ཐམས་ཅད་ཡོད་པར་སྨྲ་བ་དང་། འཕགས་པ་དགེ་འདུན་ཕལ་ཆེན་པ་དང་། འཕགས་པ་མང་པོས་
[66b.6]བཀུར་བ་དང་། འཕགས་པ་གནས་བརྟན་པའོ། །#དེ་དག་ལ་དབྱེ་བ་དུ་ཡོད་ཅེ་ན། བཅོ་བརྒྱད་དོ། །བཅོ་བརྒྱད་པོ་གང་#དག །ཇི་ལྟར་ན་བཅོ་བརྒྱད་དུ་འགྱུར་ཞེ་ན། འཕགས་པ་ཐམས་ཅད་ཡོད་པར་སྨྲ་བའི་དབྱེ་བ་བཞིའོ། །དེ་བསྟན་པར་བྱ་སྟེ། འོད་སྲུངས་ཞེས་བྱ་ས་སྲུང་དང་། །ཆོས་
[66b.7]སྲུང་བ་ཞེས་བྱ་བ་དང་། །གཞི་ཀུན་ཡོད་པར་སྨྲ་བ་སྟེ། །ལྟ་བའི་བྱེ་བྲག་འབའ་ཞིག་གི#། །རྒྱུ་ཡིས་འདི་དག་ཐ་དད་བྱས། །སྟོན་པ་ཐ་དད་ཡོད་མ་ཡིན། །དགེ་འདུན་ཕལ་ཆེན་དབྱེ་བ་ནི། །དྲུག་སྟེ་#ཤར་གྱི་རི་བོ་དང་། །དེ་བཞིན་ནུབ་རི་ཞེས་བྱ་དང་། །གང་གནས་ཞེས་བྱ་དེ་ལས་གཞན། །
[67a]
[67a.1]རྣམ་པར་ཕྱེ་སྟེ་སྨྲ་བ་དང་། །གཞན་ནི་དེ་བཞིན་བཏགས་#པར་སྨྲ། །འཇིག་རྟེན་འདས་སྨྲ་ཞེས་བྱ་བ། །དེ་དག་ཏུ་ནི་ཡང་དག་སྨྲས། །#མང་པོས་བཀུར་#བའི་བྱེ་བྲག་ནི། །རྣམ་པ་ལྔར་ནི་མཁས་པས་བསྒྲགས། །གོས་དམར་བ་དང་སྲུང་བ་པ། །ཀུ་རུ་ཀུལླེ་དེ་ལས་
[67a.2]གཞན། །མང་དུ་ཐོས་པ་ཞེས་བྱ་དང་། །གནས་མ་བུ་ཞེས་བྱ་བའོ། །རྒྱལ་བྱེད་ཚལ་ན་གནས་པ་དང་། །འཇིགས་མེད་རི་ལ་གནས་པ་དང་། །གཙུག་ལག་ཁང་ཆེན་ལ་གནས་དང་། །གནས་བརྟན་དབྱེ་བ་གསུམ་དུ་འདོད། །དེ་ལྟར་བྱེ་བྲག་བཅོ་བརྒྱད་དུ། །ཤཱཀྱ་སེང་གེའི་བསྟན་པ་ནི། །#
[67a.3]གྱུར་ཏེ་འགྲོ་བའི་བླ་མ་དེའི། །སྔོན་གྱི་ཕྲིན་ལས་ངེས་#པ་ཡིན། །#རྟེན་དུ་ཞེ་ན། བཞི་སྟེ། བཞི་པོ་#གང་དག་ཅེ་ན། གོས་ཕྱག་དར་ཁྲོད་ལ་བརྟེན་པ་དང་། ཟས་བསོད་སྙོམས་ལ་བརྟེན་པ་དང་། གནས་མལ་ཤིང་དྲུང་ལ་བརྟེན་པ་དང་། །སྨན་བཀུས་#ཏེ་བོར་བ་ལ་བརྟེན་པའོ། །#ལྟུང་བར་གྱུར་པའི་#
[67a.4]ཆོས་དུ་ཞེ་ན། བཞི་སྟེ། བཞི་པོ་གང་དག་ཅེ་ན། མི་ཚངས་པར་སྤྱོད་པ་དང་། གཞན་གྱི་#ནོར་འཕྲོག་པ་དང་། མིའི་#སྲོག་གཅོད་པ་དང་། མིའི་ཆོས་#བླ་མ་སྨྲ་བའོ། །#དགེ་སྦྱོང་དུ་བྱེད་པའི་ཆོས་དུ་ཞེ་ན། བཞི་སྟེ། བཞི་པོ་གང་དག་ཡིན་ཞེ་ན། གཤེ་བ་ལ་ཡང་སླར་མི་གཤེ་བ་དང་། ཁྲོས་
[67a.5]ཀྱང་སླར་མི་ཁྲོ་བ་དང་། བརྡེགས་#ཀྱང་སླར་མི་རྡེག་པ་དང་། མཚང་བྲུས་ཀྱང་སླར་མི་བྲུ་བའོ། །#ལྟུང་བ་རིས་དུ་ཡོད་ཅེ་ན། ལྔ་སྟེ། ལྔ་པོ་གང་དག་ཅེ་ན། ཕས་ཕམ་པར་འགྱུར་བའི་རིས་དང་། དགེ་འདུན་ལྷག་མའི་རིས་དང་། ལྟུང་བྱེད་ཀྱི་རིས་དང་། སོ་སོར་བཤགས་པའི་རིས་དང་། བསླབ་པའི་
[67a.6]རིས་ཞེས་བྱ་བའོ། །དེ་ལ་ཕས་ཕམ་པར་འགྱུར་བ་དུ་ཡོད་ཅེ་ན། བཞི་སྟེ། བཞི་པོ་གང་དག་ཡིན་ཞེ་ན། མི་ཚངས་པར་སྤྱོད་པ་དང་། མ་བྱིན་པར་ལེན་པ་དང་། མི་གསོད་པ་དང་། མིའི་ཆོས་བླ་མ་སྨྲ་བའོ། །དགེ་འདུན་ལྷག་མའི་ཆོས་དུ་ཡོད་ཅེ་ན། བཅུ་གསུམ་མོ། །བཅུ་གསུམ་པོ་གང་དག་ཡིན་ཞེ་ན། འབྱིན་
[67a.7]པ་དང་། ལུས་ཀྱིས་རེག་པ་དང་། འཁྲིག་ཚིག་སྨྲ་བ་དང་། བསྙེན་བཀུར་བསྔགས་པ་དང་། སྨྱན་བྱེད་པ་དང་། ཁང་པ་རྩིག་#པ་དང་། གཙུག་ལག་ཁང་རྩིག་#པ་དང་། གཞི་མེད་པའི་ཆོས་ཀྱིས་སྨྲ་བ་དང་། གཞན་གྱི་ཆ་དང་མཐུན་པས་རྗེས་སུ་སྨྲ་བ་དང་། དགེ་འདུན་གྱི་དབྱེན་བྱེད་པ་དང་དེའི་
[67b]
[67b.1]རྗེས་སུ་#ཕྱོགས་པ་དང་། ཁྱིམ་སུན་འབྱིན་པ་དང་། བཀའ་བློ་མི་བདེ་བར་བྱེད་པའོ། །ལྟུང་བྱེད་ཀྱི་ཆོས་དུ་ཡོད་ཅེ་ན། བརྒྱ་ཕྲག་གཅིག་དང་ཉི་ཤུ་ལྷག་པའོ། །སྤང་བའི་ལྟུང་བྱེད་ཀྱི་ཆོས་སུམ་ཅུ་པོ་གང་དག་ཡིན། ལྟུང་བ་འབའ་ཞིག་#དགུ་བཅུ་ནི་གང་དག་ཡིན། སྤང་བའི་ལྟུང་བྱེད་ཀྱི་ཆོས་སུམ་ཅུ་པོ་ནི་
[67b.2]གོས་འཆང་བ་དང་། འབྲལ་བ་དང་། ཟླ་བ་གཅིག་ལས་ལྷག་པ་དང་། འཁྲུར་འཇུག་པ་དང་། ལེན་པ་དང་། སློང་བ་དང་། སྟོད་གཡོགས་སྨད་གཡོགས་མཐར་ཐུག་པ་ལས་ལྷག་པ་དང་། མ་བསྟབས་པའི་གོས་ཀྱི་རིན་དང་། སོ་སོ་བ་དང་། གོས་ཀྱི་རིན་བསྐུར་བ་ཞེས་བྱ་བའོ། །
[67b.3]སྲིན་བལ་#དང་། ནག་པོ་འབའ་ཞིག་#དང་། ཆ་གཉིས་དང་། ལོ་དྲུག་དང་། གདིང་བ་མཐོ་གང་མ་གླན་#པ་དང་། བལ་ཁུར་བ་དང་། བལ་གྱི་ལས་དང་། གསེར་དངུལ་ལེན་པ་དང་། མངོན་མཚན་ཅན་དང་། ཉོ་ཚོང་ངོ་། །ལྷུང་བཟེད་ལྷག་པ་#འཆང་བ་དང་། ལྷུང་བཟེད་གཞན་ཚོལ་བ་དང་།
[67b.4]འཐག་པ་དང་། འཐག་པ་བསྐྱེད་པ་དང་། བྱིན་འཕྲོག་དང་། བརྟད་པ་ལས་བྱུང་བ་དང་། ཞག་དྲུག་ལས་ལྷག་པར་འབྲལ་བ་དང་། དབྱར་གྱི་གོས་རས་ཆན་#གྱི་དང་། བསྔོས་པ་གཞན་དུ་བསྐྱུར་བ་དང་། ཞག་བདུན་པ་ཞེས་བྱ་བ་དག་གོ། །ལྟུང་བ་འབའ་ཞིག་དགུ་བཅུ་གང་དག་ཡིན་ཞེ་ན།
[67b.5]བརྫུན་དུ་སྨྲ་བ་དང་། དགེ་སློང་གི་སྐྱོན་སྨྲ་བ་དང་། དགེ་སློང་གི་དབྱེན་དང་། ལས་དཀྲུགས་#པ་དང་། སྟོན་པ་དང་། འདོན་པ་དང་། གནས་ངན་ལེན་བརྗོད་པ་དང་། མི་ཆོས་བླ་མ་སྒྲོགས་པ་དང་། སྐུར་པ་འདེབས་པ་དང་། བསླབ་པ་ལ་ཁྱད་དུ་གསོད་པའོ། །ས་བོན་འཇོམས་པ་དང་།
[67b.6]འཕྱ་བ་དང་། བསྒོ་བ་དང་། མལ་ཁྲི་དང་། གདིང་བ་དང་། གཙུག་ལག་ཁང་ནས་སྐྲོད་པ་དང་། ཕྱིས་གནོན་བྱེད་པ་དང་། རྐང་པ་དབྱུང་བའི་ཁྲི་ལ་འདུག་པ་དང་། སྲོག་ཆགས་དང་བཅས་པའི་ཆུ་ལ་སྤྱོད་པ་དང་། གཙུག་ལག་ཁང་ཞེས་བྱ་བའོ། །མ་བསྐོས་པར་སྟོན་པ་དང་། ཉི་མ་
[67b.7]ནུབ་ཀྱི་བར་དུ་སྟོན་པ་དང་། ཟས་ཅུང་ཟད་ཙམ་གྱི་ཕྱིར་སྟོན་པ་དང་། གོས་སྦྱིན་པ་དང་། གོས་བྱེད་པ་དང་། དགེ་སློང་མ་དང་བཅས་པའི་ལམ་དང་། དགེ་སློང་མ་དང་བཅས་པའི་ཆུ་ལ་#འགྲོ་བ་དང་། བུད་མེད་དང་སྟན་གཅིག་#པ་དང་། དགེ་སློང་མ་དང་གནས་གཅིག་པ་དང་། དགེ་
[68a]
[68a.1]སློང་མས་ཉེ་བར་སྦྱོར་དུ་བཅུག་པའི་ཟས་སོ། །ཟས་ཡང་ཡང་ཟ་བ་དང་། འདུག་གནས་གཅིག་ཏུ་ལྷག་པར་ཟ་བ་དང་། ལྟུང་བཟེད་དོ་གསུམ་ལས་ལྷག་པར་ལེན་པ་དང་། སྟན་གཅིག་པའི་ཟས་དང་། སྤངས་པ་ལ་སྟོབས་པ་དང་། འདུས་ཤིང་ཟ་བ་དང་། དུས་མ་
[68a.2]ཡིན་པར་ཟ་བ་དང་། སོགས་འཇོག་ཟ་བ་དང་། བྱིན་ལེན་མ་བྱས་པར་ཟ་བ་དང་། བསོད་པ་བླངས་ནས་ཟ་བའོ། །ཡང་སྲོག་ཆགས་#ཡོད་པའི་ཆུ་ལ་སྤྱོད་པ་དང་། ཉལ་པོ་བྱེད་པར་འདུག་པ་དང་། དེར་འགྲེང་བ་དང་། གཅེར་བུ་པ་ལ་སྦྱིན་པ་དང་། དམག་ལ་ལྟ་བ་དང་། དེར་ཞག་གཉིས་
[68a.3]ལས་ལྷག་པར་གནས་པ་དང་། དེར་ཡང་བཤམས་པ་དཀྲུགས་པ་དང་། རྡེག་པ་དང་། གཟས་པ་དང་། དགེ་སློང་གི་ལྟུང་བ་འཆབ་པའོ། །ཟས་གཅོད་པ་དང་། མེ་ལ་རེག་པ་དང་། འདུན་པ་ཕྱིར་ལེན་པ་དང་། བསྙེན་པར་མ་རྫོགས་པ་དང་། ནུབ་གཉིས་ལས་ལྷག་པར་ཉལ་#
[68a.4]བ་དང་། བར་ཆད་ཀྱི་ཆོས་བར་དུ་མི་གཅོད་ཟེར་བ་དང་། དེ་དང་གནས་གཅིག་ཏུ་ཉལ་བ་དང་། དགེ་ཚུལ་བསྙིལ་བ་སྡུད་པ་དང་། ཁ་དོག་མ་བསྒྱུར་བ་དང་། གཞན་གྱི་རིན་པོ་ཆེ་ལ་རེག་པ་དང་། ཁྲུས་ཡང་ཡང་བྱེད་པའོ། །དུད་འགྲོ་གསོད་པ་དང་། འགྱོད་པ་བསྐྱེད་པ་དང་། གཡའ་
[68a.5]དགག་#པ་དང་། ཆུ་ལ་རྩེ་བ་དང་། བུད་མེད་དང་ལྷན་ཅིག་ཉལ་བ་དང་། སྡངས་པར་བྱེད་པ་དང་། སྦེད་པ་དང་། གདེང་#མེད་པར་སྤྱོད་པ་དང་། གཞི་མེད་པར་སྐུར་#བ་དང་། བུད་མེད་དང་འགྲོན་ལམ་དུ་འགྲོགས་པའོ། །རྐུན་མ་དང་འགྲོགས་པ་དང་། ལོ་མ་ཚང་བར་བསྙེན་པར་རྫོགས་པ་དང་།
[68a.6]ས་རྐོ་བ་དང་། ལྷག་པར་བདག་གིར་བྱེད་པ་དང་། བསླབ་པ་སྟོན་པ་ལས་ཕྱིར་ཟློག་#པ་དང་། ཉན་རྣས་འདུག་པ་དང་། མི་སྨྲ་བར་འགྲོ་#བ་དང་། མ་གུས་པ་དང་ཆང་འཐུང་བ་དང་། དུས་མ་ཡིན་པར་སྤྱོད་པ་ཞེས་བྱ་བའོ#། །གྲོང་དུ་#རྒྱུ་བ་དང་། རྒྱལ་པོའི་ཁྱིམ་དུ་ནུབ་མོ་འགྲོ་བ་དང་། བསླབ་པའི་གཞི་
[68a.7]འདོན་པ་ན་རྒོད་པས་གནས་པ་དང་། ཁབ་རལ་སྒྲུབ་པ་དང་། ཁྲི་རྐང་མཐོན་པོ་བྱེད་པ་དང་། ཤིང་བལ་བཏིང་བ་དང་། གདིང་བ་དང་གཡན་པ་དག་#དགབ་པ་དང་། དབྱར་གྱི་གོས་རས་ཆེན་གྱི་དང་། བདེ་བར་གཤེགས་པའི་ཆོས་གོས་ཀྱི་དག་གོ། །སོ་སོར་བཤགས་པའི་ཆོས་དུ་ཡོད་ཅེ་ན། བཞི་
[68b]
[68b.1]སྟེ་དགེ་སློང་མ་ལ་བསོད་སྙོམས་ལེན་པ་དང་། དེ་ཞལ་ཏ་#བྱེད་པ་ལ་མ་བསྒོ་བར་ཟ་བ་དང་། ཁྱིམ་སྡོམ་པས་བསྡམས་པ་འདྲལ་བ་དང་། དགོན་#པ་འཇིགས་པ་དང་བཅས་པའི་ཞེས་བྱའོ། །བསླབ་པའི་ཆོས་དུ་ཞེ་ན། བརྒྱ་རྩ་བཅུ་གཉིས་ཏེ། གང་དག་ཅེ་ན། ཤམ་ཐབས་ལ་ཡང་རྣམ་བདུན་ཏེ#། ཀུན་
[68b.2]ནས་ཟླུམ་པོར་བགོ་བ་དང་། ཧ་ཅང་རྩེངས་པ་མ་ཡིན་པ་དང་། ཧ་ཅང་འཇོལ་བ་དང་། གླང་པོ་ཆེའི་སྣ་ལྟ་བུ་དང་། རྟ་ཡའི་ལོ་མ་ལྟ་བུ་དང་། འབྲུའི་ཕུར་མ་ལྟ་བུ་དང་། སྦྲུལ་མགོའི་གདེངས་ཀ་ལྟ་བུར་མ་ཡིན་པར་ཅིག་ཅར་བསླབ་པར་བྱའོ། །དེ་ལ་ཆོས་གོས་ལ་ཡང་རྣམ་པ་གསུམ་སྟེ།
[68b.3]ཆོས་གོས་ཟླུམ་པོར་བགོ་བ་དང་། ཧ་ཅང་རྩེངས་པ་དང་། འཇོལ་བ་མ་ཡིན་པར་#བགོ་བའོ། །ཤིན་ཏུ་བསྡམས་པ་ལ་སོགས་པ་ནི་ལྔ་སྟེ། ཁྱིམ་དུ་འགྲོ་བའི་བསླབ་པའོ། །ཤིན་ཏུ་བསྡམས་པ་དང་། ལེགས་པར་བགོས་པ་དང་། སྒྲ་བསྐྱུང་བ་དང་། མིག་མི་གཡེངས་པ་#དང་། གཉའ་
[68b.4]ཤིང་གང་ཙམ་དུ་བལྟ་ཞིང་འགྲོ་བའོ། །མགོ་གཡོགས་པ་ལ་སོགས་པ་ནི་ལྔ་སྟེ། ཁྱིམ་དུ་འགྲོ་བའི་བསླབ་པའོ། །མགོ་མི་གཡོགས་པ་དང་། མི་བརྫེ་#བ་དང་། མི་གཟར་བ་དང་། གཉའ་གོང་དུ་མི་བསྣོལ་བ་དང་། ལྷག་པར་མི་བསྣོལ་བའོ། །མི་མཆོང་བ་ལ་སོགས་པ་#ལྔ་ཡང་།
[68b.5]ཁྱིམ་དུ་འགྲོ་བའི་བསླབ་པ་སྟེ། མི་མཆོང་བ་དང་། མི་བརྐྱང་བ་དང་། ཙོག་པུས་མ་ཡིན་པ་དང་། བྲང་བས་མ་ཡིན་པ་དང་། དཀུར་#མི་བརྟེན་པའོ། །ལུས་ལ་སོགས་པ་ལྔ་ཡང་། ཁྱིམ་དུ་འགྲོ་བའི་བསླབ་པ་སྟེ། ལུས་མི་བསྒྱུར་བ་དང་། ལག་པ་མི་ཀྱོག་#པ་དང་། མགོ་#མི་བསྒྱུར་བ་
[68b.6]དང་། ཕྲག་པ་མི་སྤྲད་པ་དང་། ལག་པ་མི་སྦྲེལ་བའོ། །འདུག་པར་བྱ་བ་#སྟན་ནི་དགུ་སྟེ། ཁྱིམ་དུ་འདུག་པའི་བསླབ་པའོ། །སྟན་ལ་མ་བསྐོ་བ་དང་། མ་བརྟགས་པ་དང་། ལྗིད་#ཀྱིས་མི་དབབ་པ་དང་། རྐང་པ་མི་བསྣོལ་བ་དང་། བརླ་མི་བསྣོལ་བ་དང་། ལོང་དུ་མི་བརྩེགས་#པ་དང་།
[68b.7]རྐང་པ་མི་དགུག་པ་དང་། རྐང་པ་མི་གདངས་པ་#དང་། མདོམས་#མི་བསྟན་པའོ། །བྱིན་ལེན་བྱ་བ་ནི་#བརྒྱད་དེ། ཟས་བླང་བའི་དུས་ཀྱི་བསླབ་#པའོ། །ལེགས་པར་ཟས་བླང་བ་དང་། མུ་དང་མཉམ་པར་མ་ཡིན་པ་དང་། ཚོད་མ་དང་མཉམ་པར་མ་ཡིན་པ་དང་། མཐར་ཆགས་དང་། ལྷུང་
[69a]
[69a.1]བཟེད་ལ་བལྟ་#བ་དང་། མ་འོངས་པར་ལྷུང་བཟེད་མི་བཟེད་པ་དང་། འདོད་པའི་ཕྱིར་ཕན་ཚུན་མི་དགབ་#པ་དང་། བཟའ་བ་དང་བཅའ་བའི་#སྟེང་དུ་ལྷུང་བཟེད་མི་གཟུང་བར་རོ#། །ཟས་ལ་ལེགས་པར་བྱ་བ་དྲུག་ནི། ཟས་ཟ་བའི་དུས་ཀྱི་བསླབ་#པ་སྟེ། ལེགས་པར་ཟས་
[69a.2]བཟའ་བ་དང་། ཁམ་#ཧ་ཅང་མི་ཆེ་བ་དང་། ཆུང་བ་མ་ཡིན་པ་དང་། རན་པ་དང་། མ་གཟས་#པར་ཁ་མི་གདངས་པ་#དང་། ཁ་ཁམ་གྱིས་བཀང་སྟེ་མི་སྨྲ་བའོ། །ཙུག་ཙུག་ལ་སོགས་པ་ལྔ་ཡང་། ཟས་ཟ་བའི་དུས་ཀྱི་བསླབ་པ་སྟེ། ཙུག་ཙུག་དང་། ལྕག་ལྕག་དང་། ཧུ་ཧུ་དང་། ཕུ་ཕུ་
[69a.3]མི་བྱ་བ་དང་། ལྕེ་ཕྱུང་སྟེ་ཟས་མི་ཟ་བའོ། །#འབྲུ་ནས་ཐ་དད་བྱེད་པ་ལྔ་#ཡང་། ཟས་ཟ་བའི་དུས་ཀྱི་བསླབ་པ་སྟེ། འབྲུ་ནས་ཐ་དད་དུ་མ་ཡིན་པ་དང་། འཕྱས་མི་གདགས་པ་དང་། མཁུར་#བ་མི་སྤོ་བ་དང་། རྐན་#མི་གཏོགས་པ་དང་། ཁམ་འཕྲོར་མི་གཅད་#པར་ཟས་བཟའ་བའོ། །ལག་པ་
[69a.4]ལྡག་པ་ལ་སོགས་པ་ལྔ་ཡང་། ཟས་ཟ་བའི་དུས་ཀྱི་བསླབ་པ་སྟེ་ལག་པ་མི་སྤྲུགས་#པ་དང་། ལྷུང་བཟེད་མི་བྱོག་#པ་དང་། ལག་པ་མི་ལྡག་པ་དང་། ལྷུང་བཟེད་མི་བསྐྱམ་པ་དང་། མཆོད་རྟེན་འདྲ་བ་བཅོམ་སྟེ་མི་བཟའ་བའོ། །#འཕྱས་ལ་སོགས་པ་རྣམ་པ་བཞི་ནི། གཞན་གྱི་#སེམས་
[69a.5]བསྲུང་བ་ལ་སོགས་པའི་བསླབ་པ་སྟེ། འཕྱས་ཀྱི་བསམ་པས་མི་བལྟ་བ་དང་། ལག་པ་ཟས་དང་འབགས་#པས་ཆུ་སྣོད་ལ་མི་གཟུང་#བ་དང་། ཟས་དང་འབགས་#པས་དྲུང་ན་མོ་ལ་མི་གཏོར་བ་དང་། མ་དྲིས་པར་ཆུ་ཟས་དང་འབགས་པ་ཁྱིམ་གཞན་དུ་མི་དབོ་བར་བསླབ་པར་བྱའོ། །#ལྷུང་བཟེད་
[69a.6]ལ་ཡང་རྣམ་པ་བཅུ་སྟེ། ལྷུང་བཟེད་ཀྱི་བསླབ་པ་སྟེ་ཟས་ཀྱི་ལྷག་མ་ལྷུང་བཟེད་ཀྱིས་མི་དོར་བ་དང་། གཞི་མེད་པར་ལྷུང་བཟེད་མི་གཞག་པ་དང་། གད་ཁར་མ་ཡིན་པ་དང་། གཡང་སར་མ་ཡིན་པ་དང་། དཀན་གཟར་#པོར་ལྷུང་བཟེད་མི་གཞག་པ་དང་། འགྲེང་སྟེ་མི་བཀྲུ་བ་
[69a.7]དང་། གད་ཁ་དང་། གཡང་ས་དང་། དཀན་གཟར་པོ་#མ་ཡིན་པར་ལྷུང་བཟེད་གཞག་པར་བྱ། རྒྱུན་ལས་བཟློག་སྟེ་མི་བཅུ་བར་བསླབ་པར་བྱའོ། །#འགྲེང་བར་བྱེད་པ་ལ་སོགས་པ་ལྔ་ནི། ཆོས་བཤད་པའི་དུས་ཀྱི་བསླབ་#པ་སྟེ། མི་ན་བར་འདུག་པ་དང་། ཉལ་བ་དང་། སྟན་
[69b]
[69b.1]མཐོན་#པོ་ལ་འདུག་པ་དང་། མདུན་དུ་འགྲོ་བ་དང་། ལམ་ནས་འགྲོ་བ་ལ་འགྲེང་བ་དང་། འདུག་པ་དང་། དམའ་བ་ལ་འདུག་པ་དང་། ཕྱི་ནས་འགྲོ་བ་དང་། འགྲམ་ནས་འགྲོ་བ་ལ་ཆོས་མི་བཤད་པའོ། །#མགོ་གཡོགས་པ་རྣམ་པ་ལྔ་ཡང་། ཆོས་བཤད་པའི་དུས་ཀྱི་#བསླབ་པ་སྟེ། མི་ན་
[69b.2]བར་མགོ་གཡོགས་པ་དང་། བརྫེས་པ་དང་། གཟར་བ་དང་། གཉར་བསྣོལ་བ་དང་། ལྟག་པར་བསྣོལ་བ་ལ་ཆོས་མི་བཤད་དོ། །དོ་ཀེར་ཅན་ལ་སོགས་པ་ལྔ་ཡང་། དུས་དེའི་བསླབ་པ་སྟེ། མི་ན་བར་སྐྲ་དོ་ཀེར་ཅན་དང་། ཞྭ་གྱོན་པ་དང་། མགོ་ཅོད་པན་ཅན་དང་། ཕྲེང་བ་ཅན་
[69b.3]དང་། དཀྲིས་པ་ལ་ཆོས་མི་བཤད་དོ། །གླང་ཆེན་ལ་སོགས་པ་བཞོན་#པ་ལྔ་ཡང་། དུས་དེའི་བསླབ་པ་སྟེ། གླང་པོ་ཆེ་དང་། རྟ་དང་། ཁྱོགས་དང་བཞོན་#པའི་སྟེང་ན་འདུག་པ་དང་། མཆིལ་ལྷམ་གྱོན་པ་རྣམས་ལ་ཆོས་མི་བཤད་དོ། །ལག་ན་འཁར་བ་ལ་སོགས་དྲུག་འདི་ཡང་།
[69b.4]དེའི་དུས་ཀྱི་བསླབ་པ་སྟེ། མི་ན་བར་ལག་ན་འཁར་བ་དང་། གདུགས་དང་། མཚོན་ཆ་དང་། རལ་གྲི་དང་། དགྲ་ཆ་ཐོགས་པ་དང་། གོ་ཆ་གྱོན་པ་ལ་ཆོས་མི་བཤད་དོ། །ན་བ་རྣམ་པ་བཞི་རྣམས་ཏེ། མི་ན་བའི་དུས་ཀྱི་བསླབ་པར་བྱའོ#། །མི་ན་བར་འགྲེང་བས་དུས་ཀྱིས་བཤང་གཅི་#
[69b.5]མི་བྱ། ཆུའི་ནང་དུ་བཤང་གཅི་དང་། མཆིལ་མ་དང་། སྣབས་དང་། སྐྱུགས་པ་དང་། རླུགས་པ་མི་དོར་རོ། །རྩྭ་#སྔོན་པོ་ལ་དེ་དག་མི་དོར་རོ། །གནོད་པ་མ་བྱུང་བར་ཤིང་ལ་མི་གང་ལས་འཐོར་མི་འཛེག་པར་བསླབ་པར་བྱའོ། །དེ་ལྟ་བུའི་བསླབ་པའི་གནས་ཉིས་བརྒྱ་ལྔ་བཅུ་རྩ་
[69b.6]གསུམ་ལྷག་པ་#འདི་དག་བསྲུངས་ཤིང་མ་འདས་ན་དེའི་འབྲས་བུ་ནི་གང་། ཕན་ཡོན་ནི་ཅི་ཡོད། གང་གིས་མ་བསྲུངས་ཤིང་འདས་པ་དེ་དག་གི་རྣམ་པར་སྨིན་པ་ནི་གང་ཡིན་ཉེས་དམིགས་ནི་ཅི་ཡོད་ཅེ་ན། དེ་ལ་གང་བསྲུངས་པ་#དེ་ནི་ཚངས་པ་#མཚུངས་པར་སྤྱོད་པ་མཁས་པ་#རྣམས་ཀྱིས་
[69b.7]རབ་ཏུ་བསྔགས་པར་འགྱུར། འཆི་བའི་དུས་བྱེད་པའི་ཚེ་འགྱོད་པ་མེད་པར་འགྱུར་རོ། །དེ་ལ་ཕས་ཕམ་པར་འགྱུར་བ་བསྲུངས་#ན། ལུས་ཞིག་པའི་འོག་ཏུ་གཞན་འཕྲུལ་#དབང་བྱེད་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དགེ་འདུན་ལྷག་མ་བསྲུངས་ན་#ལུས་
[70a]
[70a.1]ཞིག་པའི་འོག་ཏུ་འཕྲུལ་དགའི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་ལ་ལྟུང་བ་སྦོམ་པོ་བསྲུངས་ན་ལུས་ཞིག་པའི་འོག་ཏུ་དགའ་ལྡན་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །ལྟུང་བྱེད་བསྲུངས་#ན་འཐབ་བྲལ་དུ་སྐྱེའོ། །སོ་སོར་
[70a.2]བཤགས་པ་བསྲུངས་པས་ནི་སུམ་ཅུ་རྩ་གསུམ་པའོ། །བསླབ་པའི་ཆོས་བསྲུངས་པས་ནི་རྒྱལ་ཆེན་བཞིའི་རིགས་ཀྱི་ལྷར་སྐྱེའོ། །གལ་ཏེ་ཡང་དག་པར་བསྟེན་ན་ནི་མྱ་ངན་ལས་འདས་སོ། །དེ་ལ་#དེ་དག་མ་བསྲུངས་པས་ནི། ཚངས་པ་མཚུངས་པར་སྤྱོད་པ་རྣམས་ཀྱིས་སྨད་པར་
[70a.3]འགྱུར། འགྱོད་པ་དང་བཅས་པས་འཆི་བའི་དུས་བྱེད་པར་འགྱུར་རོ། །ཕས་ཕམ་པར་འགྱུར་བ་ལས་འདས་པས་ནི། ཚ་བའི་དམྱལ་བ་ཆེན་པོར་སྐྱེ་བར་འགྱུར་རོ། །ལྷག་མའི་ཆོས་ལས་འདས་པས་ནི་ངུ་འབོད་ཆེན་པོར་རོ། །ལྟུང་བ་སྦོམ་པོ་ལས་འདས་པས་ནི་ངུ་འབོད་དུའོ། །
[70a.4]ལྟུང་བྱེད་ལས་འདས་པས་ནི་བསྡུས་འཇོམས་སུའོ། །སོ་སོར་བཤགས་པ་ལས་འདས་པས་ནི་ཐིག་ནག་ཏུའོ། །བསླབ་པའི་ཆོས་ལས་འདས་པས་ནི་ཡང་སོས་སུ་སྐྱེའོ། །མ་ངེས་པ་ནི་གཉིས་ཏེ། དབེན་པ་སྐྱབས་ཡོད་འདུག་པའོ། །རྩོད་པ་ཞི་བར་བྱེད་པའི་ཆོས་དུ་ཡོད་ཅེ་ན། རྩོད་
[70a.5]པ་ཞི་བར་བྱེད་པའི་#ཆོས་ནི་བདུན་ཏེ། མངོན་སུམ་དྲན་པ་མ་མྱོས་དང་། །དེ་བཞིན་གང་མང་ངོ་བོ་ཉིད། །རྩྭ་#རྣམས་བཀྲམ་པ་ལྟ་བུ་དང་། །ཁས་བླང་བར་ཡང་བྱ་བའོ། །ཡིད་བརྟན་པར་བྱ་བ་དུ་ཡོད་ཅེ་ན། ལྔ་སྟེ། ལྔ་གང་དག་ཅེ་ན། ཆུ་ཚགས་#ཡིད་བརྟན་པ་དང་། བཀོད་མ་ཡིད་བརྟན་
[70a.6]པ་#དང་། ཡིད་ཆེས་པས་ཡིད་བརྟན་པ་དང་། དགེ་སློང་ཡིད་བརྟན་པ་དང་། དགེ་འདུན་ཡིད་བརྟན་པའོ། །#ཡོངས་སུ་ལོངས་སྤྱོད་པ་དུ་ཡོད་ཅེ་#ན། བཞི་སྟེ། བཞི་པོ་གང་དག་ཅེ་ན། བདག་པོ་ཡོངས་སུ་ལོངས་སྤྱོད་པ་དང་། བྱིན་པ་ལེན་པ་#ཡོངས་སུ་ལོངས་སྤྱོད་པ་དང་། རྗེས་སུ་
[70a.7]གནང་བ་ཡོངས་སུ་ལོངས་སྤྱོད་པ་དང་། སྦྱིན་པོ་ཡོངས་སུ་ལོངས་སྤྱོད་པ་དང་། མི་སྤྱོད་#པའི་ཡོངས་སུ་ལོངས་སྤྱོད་པའི་#ལྔ་པའོ། །#ཡང་སྨྲས་པ། མི་སློབ་པ་ནི་བདག་པོར་བཤད། །སློབ་པ་ལེན་པ་སྤྱོད་པ་ཡིན། །བསམ་གཏན་ཀློག་དང་ལྡན་པ་ནི། །གཟི་བརྗིད་ལྡན་པས་རྗེས་གནང་
[70b]
[70b.1]བརྗོད། །སྐྱིན་པོ་སྤྱོད་པ་ལྷག་མ་སྟེ། །ལེ་ལོས་ཉམས་པའི་བདག་ཉིད་ཡིན། །གཙུག་ལག་ཁང་སོགས་ལོངས་སྤྱོད་ལ། །ཚུལ་འཆལ་རྣམས་ཀྱིས་#སྤྱོད་པ་བཀག །གསོ་སྦྱོང་དུ་ཡོད། ཉི་ཤུ་རྩ་བཞི་སྟེ། དགུན་ཟླ་འབྲིང་པོ་དང་། དཔྱིད་ཟླ་ར་བ་དང་། ཐ་ཆུངས་དང་། དབྱར་
[70b.2]ཟླ་འབྲིང་པོ་དང་། སྟོན་ཟླ་ར་བ་དང་། ཐ་ཆུངས་རྣམས་ཀྱི་#མར་ངོའི་གསོ་སྦྱོང་ནི་བཅུ་བཞི་པའོ། །ལྷག་མ་རྣམས་ནི་བཅོ་ལྔ་པའོ། །དགེ་སློང་དང་པོའི་ལོ་དྲི་བ་རྫོགས་སོ།། །།དཔལ་ར་སའི་གཙུག་ལག་ཁང་གི་འོད་མཆོག་དངོས་གྲུབ་གཙུག་ལག་ཁང་དུ། རྒྱ་གར་གྱི་
[70b.3]མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་#བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པ། །{T4134}༄༅། །རྒྱ་གར་སྐད་དུ། བི་ན་ཡ་པྲཤཱ་ཀཱ་རི་ཀཱ། བོད་སྐད་དུ། འདུལ་བ་དྲི་བའི་ཚིག་ལེའུར་བྱས་པ།
[70b.4]ཐམས་ཅད་མཁྱེན་པའི་ཉི་མ་ཐེ་ཚོམ་གྱི་མུན་པ་མང་པོ་མི་བཟད་པ་བསལ་བ་ལ་ཕྱག་འཚལ་ལོ། །རྒྱལ་བ་ཉི་མ་ཐེ་ཚོམ་གྱེ། །མུན་འཇོམས་ཡུན་རིངས་ཕྱག་འཚལ་ནས། །འདུལ་བ་ལས་ནི་ལེགས་བཏུས་ཏེ། །དྲི་བ་ཀུན་ལས་བཏུས་པ་བཤད། །གང་ཞིག་འདུལ་བ་ལ་བརྙས་
[70b.5]ཞིང་། །དེ་རིག་པ་ལ་རྣམ་སྨོད་པ། །བདག་ཉིད་ལ་ཡང་སྙེམས་འཆང་བ། །དེ་ཡི་ཆེད་དུ་འདི་བརྗོད་དོ། །སེམས་ཅན་མི་ཡི་འགྲོ་བ་ཡིན། །བར་ཆད་རྣམས་ཀྱང་སྤངས་པ་ལ། །སྡོམ་པ་མི་འཆགས་པར་གསུངས་པ། །ཇི་ལྟ་བུ་ཡིན་བསྒྲིམས་ཏེ་སྨྲོས། །ཕ་མ་ཆེད་དུ་བསམས་
[70b.6]གསོད་དང་། །དགེ་སློང་མ་ནི་སུན་ཕྱུང་དང་། །དགེ་འདུན་དབྱེན་བྱེད་སྡོམ་པ་ཡི། །ཞིང་དུ་གསུངས་པ་ཇི་ལྟ་བུ། །སྔོན་དུ་ཕམ་པ་བྱས་གྱུར་ལ། །དགེ་སློང་རྣམས་ལ་རབ་བསྒྲིམས་ཏེ། །བསྙེན་རྫོགས་གསོལ་བ་གང་ཡིན་པ། །དེ་ལ་ཇི་ལྟར་འཆགས་འགྱུར་སྨྲོས། །བསམ་
[70b.7]པ་ཐག་པས་དཀོན་མཆོག་གསུམ། །ཕྱིར་སྤོང་བར་ནི་བྱེད་པ་ལ། །སྡོམ་པ་མེད་པར་མི་འགྱུར་བ། །ཅི་ཕྱིར་འདི་ལ་ལན་བརྗོད་ཅིག །སྔོན་དུ་ལས་ཀྱི་ཆོ་ག་ཡིས། །ལེགས་པར་བསྙེན་པར་རྫོགས་བྱས་ཏེ། །འཁྲིག་པ་བསྟེན་པ་བྱས་ནས་ཕྱིས། །ཅི་ཕྱིར་དགེ་སློང་མིང་མི་འདོར། །གང་
[71a]
[71a.1]ཞིག་དགེ་སློང་ཉིད་གནས་ཤིང་། །འདོད་པ་ལ་ཡང་སྟེན་བྱེད་པ། །དེ་ལ་མཐར་མ་གསུངས་ཅི་ཕྱིར། །དྲི་ཡིས་དེ་ནི་བདག་ལ་སྨྲོས། །དགེ་སློང་གཅིག་པུ་ཟླ་མེད་པར། །གནས་ན་འདུག་པར་གྱུར་པ་ལ། །ཕས་ཕམ་འགྱུར་བ་ཇི་ལྟ་བུ། །སྡོམ་བརྩོན་སོམས་ཏེ་སྨྲ་
[71a.2]བར་གྱིས། །གང་གིས་ཡན་ལག་ལྔ་ལྡན་པས། །གཞན་གྱི་ནོར་ནི་བརྐུ་བྱས་པས། །དེ་ལ་ཕམ་པར་མ་གསུངས་པ། །དེ་ནི་ཅི་ཕྱིར་གསལ་བར་སྨྲོས། །སྡོམ་བརྩོན་བློ་ལྡན་གང་ཞིག་གིས། །གཞན་རྫས་འགྲང་འདས་བརྐུས་པ་དེ། །ཅི་ཕྱིར་ཕམ་པར་མ་གསུངས་པ། །དེ་ནི་
[71a.3]བདག་ལ་མྱུར་དུ་སྨྲོས། །སྡོམ་བརྩོན་རིན་ཐང་ཚང་བ་ཡི། །ཡོ་བྱད་གནས་ནས་མ་སྤངས་པར། །མཐར་འགྱུར་བ་ནི་ཅི་ཕྱིར་ཀྱེ། །བདག་ལ་ངེས་པར་ལེགས་པར་སྨྲོས། །སྡོམ་བརྩོན་རྐུ་བའི་སེམས་ཀྱིས་ནི། །མ་བྱིན་གནས་ནས་སྤགས་པ་ལ། །ཕས་ཕམ་མི་གསུང་ཇི་ལྟ་བུ། །ཁྱོད་
[71a.4]ཀྱིས་བདག་ལ་རྒྱུ་སྨྲོས་ཤིག །དགེ་སློང་ཚུལ་ཁྲིམས་ལྡན་པ་ཡིས། །མ་བྱིན་ཡན་ལག་ལྔ་ལྡན་པར། །བརྐུས་ན་ལྟུང་བ་མེད་གསུངས་པ། །ཅི་ཕྱིར་ཁྱོད་ཀྱིས་ཐེ་ཚོམ་ཆོད། །དུད་འགྲོའི་མངལ་ན་གནས་པ་ཡི། །བུ་ནི་གསད་སེམས་ཀྱིས་བསད་ན། །ཐུབ་པ་དེ་ཉིད་མཁྱེན་པ་
[71a.5]ཡིས། །ཕམ་འགྱུར་གསུངས་པ་ཇི་ལྟ་བུ། །སྡོམ་བརྩོན་གསད་པའི་སེམས་ལྡན་གྱིས། །མི་ཡི་མངལ་ནས་ལྟུང་བྱེད་པ། །ཕམ་བྱེད་མིན་གསུངས་ཇི་ལྟ་བུ། །གལ་ཏེ་ཁྱོད་ལ་མཐུ་ཡོད་སྨྲོས། །ཕ་མ་བསམས་བཞིན་གསད་པ་ལ། །ཕམ་འགྱུར་མིན་ཞིང་མནར་མེད་པའང་། །
[71a.6]མིན་ཞེས་གསུངས་པ་ཅི་ཡི་ཕྱིར། །དེ་དྲིས་བདག་གི་མདུན་དུ་སྨྲོས། །བརྡ་ཕྲད་མདུན་དུ་བདག་སངས་རྒྱས། །དགྲ་བཅོམ་སྟོན་པ་ཞེས་སྨྲས་པ། །ཕམ་པར་མ་གསུངས་ཅི་ཡི་ཕྱིར། །ཁོ་བོ་དོན་དུ་གཉེར་གྱིས་སྨོས། །ཁྱོད་འབྲས་ཐོབ་ཅེས་དེ་སྐད་འདྲིས། །དེ་བཞིན་ནོ་ཞེས་གསལ་
[71a.7]སྨྲས་ན། །ཕམ་འགྱུར་བྱེད་པ་ཡིན་གསུངས་པ། །ཅི་ཕྱིར་དོན་བཞིན་སྨྲ་བར་གྱིས། །བརྡ་ཕྲད་པ་ཡི་མིའི་མདུན་དུ། །འབྲས་བུ་རྣམ་པ་བཞི་སྨྲས་པ། །དེ་ཉིད་གཟིགས་པས་མཐར་འགྱུར་བ། །ཅི་ཡི་ཕྱིར་ན་གསུངས་པ་ཡིན། །དགེ་སློང་འབྲས་ཅིག་སྨྲ་བྱ་ལས། །གལ་ཏེ་
[71b]
[71b.1]འབྲས་བུ་གཞན་སྨྲས་ན། །མཐར་འགྱུར་བྱེད་པ་མིན་གསུངས་པ། །ཅི་ཕྱིར་རྒྱུ་འདི་སྨྲ་བར་གྱིས། །འདུལ་བ་དྲི་བའི་ཚིག་ལེའུར་བྱས་པ་ལས་ལེའུ་དང་པོའོ།། །།ཡན་ལག་བཅུ་ལྡན་འབྱིན་བྱེད་པ། །དགེ་འདུན་ལྷག་མ་བྱེད་པ་ཞེས། །བདེ་བར་གཤེགས་པས་མ་གསུངས་པ། །
[71b.2]ཇི་ལྟར་རྒྱུ་ནི་བདག་མདུན་སྨྲོས། །འདོད་ཆགས་ལ་སོགས་མཚུངས་ལྡན་པའི། །སེམས་ཀྱིས་བུད་མེད་བཟོད་པ་ལ། །རེག་པ་དགེ་འདུན་ལྷག་མ་ཞེས། །ཐུབ་པས་མ་གསུངས་ཇི་ལྟ་བུ། །སྡོམ་བརྩོན་བསམས་བཞིན་དགེ་འདུན་གྱི། །ལྷག་མ་བྱས་ནས་ཆོ་ག་བཞིན། །བཤགས་
[71b.3]པ་ལ་སོགས་མ་བྱས་པར། །ངག་གསུང་ཅི་ཕྱིར་ངེས་པར་སྨྲོས། །གང་ཟག་གཅིག་ལ་སྤོ་བ་དང་། །སྤྱད་པ་ཉིད་དེ་བཞི་པོ་དག །གང་གིས་སྲིད་པར་སྨྲ་བར་གྱིས། །ཇི་སྲིད་འཚོ་བར་རང་གི་གོས། །རབ་ཏུ་མང་པོ་མ་བསྔོས་ཤིང་། །བྱིན་མ་བརླབས་པར་འཆང་ཡང་ནི། །དྲི་མ་
[71b.4]མེད་པར་ཇི་ལྟར་བཞེད། །ཐ་དད་གནས་ནི་སྤངས་པའི་གནས། །གཅིག་ན་གནས་པའི་དགེ་སློང་ལ། །འབྲེལ་བའི་དྲི་མས་དྲི་མ་དང་། །བཅས་པར་གྱུར་པ་ཇི་ལྟ་བུ། །ཟླ་བས་སྤང་གོས་དགེ་སློང་གིས། །ཇི་སྲིད་འཚོ་བར་མ་སྤངས་ན། །ཅི་ཕྱིར་ལྟུང་བ་མེད་པ་ཞེས། །གསུངས་
[71b.5]པ་དྲི་ཡིས་གསལ་བར་སྨྲོས། །སྡོམ་བརྩོན་ཅན་ནི་ཕ་མ་ལས། །ཆོས་གོས་རུང་བ་བླངས་བྱས་ནས། །ཅི་ཕྱིར་སྤངས་པའི་ཉེས་པ་ཡིས། །དྲི་མ་ཅན་དུ་གྱུར་པར་གསུངས། །ཞག་བདུན་པ་ཡི་སྨན་དག་ནི། །ཇི་སྲིད་འཚོ་བའི་བར་བཅངས་ན། །ཇི་ལྟར་སྡོམ་བརྩོན་ལྟུང་མེད་པར། །
[71b.6]གསུངས་པའི་དོན་དེ་སྨྲ་བར་གྱིས། །ཤེས་བཞིན་དུ་ནི་བརྫུན་གྱི་ཚིག །སྨྲས་ན་ལྟུང་བྱེད་མེ་ཡིས་ནི། །ཅི་ཡི་ཕྱིར་ན་སྡོམ་བརྩོན་ཅན། །ཤིན་ཏུ་སྲེག་མིན་གསལ་པོར་སྨྲོས། །དགེ་སློང་གིས་ནི་དགེ་སློང་ལ། །སྐྱོན་ནས་སྨྲ་བར་བྱེད་པ་ལ། །ཀུན་མཁྱེན་ཐུབ་པས་ཅི་ཡི་ཕྱིར། །ལྟུང་བྱེད་
[71b.7]མ་གསུངས་ངེས་པར་སྨྲོས། །དགེ་སློང་ཉོན་མོངས་ཅན་སེམས་ཀྱིས། །དགེ་སློང་གིས་སྨྲས་ཕྲ་མ་ནི། །དགེ་སློང་ལ་བྱས་ཐུབ་པ་ཡིས། །ཇི་ལྟར་དག་གསུངས་ཁྱོད་བཅོལ་སྨྲོས། །སྡོམ་བརྩོན་གྱིས་ནི་རུང་བ་ཡི། །ས་བོན་རྣམ་པ་ལྔ་ཟོས་ན། །ཇི་ལྟར་ལྟུང་བྱེད་བྱེད་པར་གསུངས།
[72a]
[72a.1]སྡོམ་བརྩོན་གྱིས་ནི་བསྒྲིམས་ཏེ་སྨྲོས། །གཡོགས་མ་མེད་པར་དགེ་འདུན་གྱིས། །གནས་མལ་རུང་བ་བཤམས་ནས་ནི། །མ་བྲུབས་མ་བལྟབས་པར་སོང་ན། །ཇི་ལྟར་བུར་ན་དག་པ་གསུངས། །སྡོམ་བརྩོན་གྱི་ནི་རུང་བའི་གོས། །ཉེ་དུ་མིན་པའི་དགེ་
[72a.2]སློང་མ། །བྱིན་ལ་ལྟུང་བ་མེད་པ་ཞེས། །གསུངས་པ་ཅི་ཕྱིར་ངེས་པར་སྨྲོས། །མཚན་གཅིག་གནས་པའི་དགེ་སློང་དག །མང་པོ་ཁ་ཟས་མ་བསྲུལ་དང་། །ཐ་དད་ཟ་བ་ཅི་ཡི་ཕྱིར། །དག་པར་གསུངས་པ་གསལ་བར་སྨྲོས། །ཁ་ཟས་བཅའ་བར་བྱ་ལ་སོགས། །རུང་བ་དུས་མིན་
[72a.3]ཟ་བྱེད་པ། །ཇི་ལྟར་དག་པ་ཞེས་གསུངས་པ། །ཐེ་ཚོམ་གཏན་ལ་དབབ་པར་གྱིས། །དགེ་སློང་ཆོ་ག་སྔོན་འགྲོ་བའི། །བྱིན་ལེན་བྱས་ནས་ཟ་བྱེད་པ། །ཇི་ལྟར་ལྟུང་དང་བཅས་ཞེས་གསུངས། །ཁྱོད་ལ་མཐུ་ཡོད་གསལ་བར་སྨྲོས། །དགེ་སློང་གིས་ནི་དགེ་སློང་ལ། །ཉོན་མོངས་
[72a.4]སེམས་ཀྱིས་རྡེག་བྱེད་པ། །ཐུབ་པས་ཇི་ལྟར་ཉེས་བྱས་གསུངས། །ཁྱོད་ཀྱིས་གསལ་བར་ལན་ཐོབ་ཅིག །སྡོམ་བརྩོན་མེ་ལ་རེག་བྱེད་པ། །ཀུན་མཁྱེན་ཐུགས་རྗེ་ལྡན་པ་ཡིས། །ཅི་ཕྱིར་ལྟུང་བ་ཉེས་བྱས་གསུངས། །དྲི་ཡིས་ངེས་པར་སྨྲ་བར་གྱིས། །དགེ་སློང་ནུབ་གཉིས་
[72a.5]ལས་ལྷག་པར། །བསྙེན་པར་རྫོགས་དང་བྲལ་བ་དང་། །ཉལ་བར་བྱེད་པ་ཇི་ལྟ་བུར། །ཉེས་བྱས་ལྟུང་བར་བྱེད་པར་འགྱུར། །སྡོམ་བརྩོན་ཚོན་རྩི་སྣ་གསུམ་གྱིས། །ཁ་མ་བསྒྱུར་བའི་གོས་གྱོན་པ། །ཅི་ཕྱིར་ལྟུང་བ་མེད་གསུངས་པ། །ཁོ་བོས་བཅོལ་གྱི་ཁྱོད་སྨྲོས་ཤིག །སྡོམ་
[72a.6]བརྩོན་ཚོན་རྩི་སྣ་གསུམ་གྱིས། །ལེགས་པར་ཁ་བསྒྱུར་གོས་གྱོན་པ། །ཅི་ཕྱིར་ལྟུང་བ་བཅས་གསུངས་པ། །ཐེ་ཚོམ་གྱི་ནི་མཆོག་ཆོད་ཅིག །སྡོམ་བརྩོན་རིན་ཆེན་ལ་རེག་ན། །ཇི་ལྟར་དགེ་འདུན་ལྷག་མ་དང་། །སྦོམ་གསུངས་མཛའ་བོ་ཁོ་བོ་ཡི། །ཐེ་ཚོམ་བརྟན་པོ་མྱུར་དུ་ཆོད། །རིན་
[72a.7]པོ་ཆེ་དང་དེ་སྨོས་ལ། །རེག་པའི་དགེ་སློང་ཇི་ལྟ་བུར། །ཉེས་བྱས་གསུངས་པ་ཁོ་བོ་ཡི། །ཐེ་ཚོམ་བསལ་བས་རངས་པར་གྱིས། །དགེ་སློང་རིན་ཆེན་ལ་རེག་པ། །ཐུབ་པས་ཇི་ལྟར་ལྟུང་མེད་ཅེས། །གསུངས་པ་ཁོ་བོ་དོན་གཉེར་ཁྱོད། །མྱུར་དུ་གསལ་བར་སྨྲ་བར་གྱིས། །སྡོམ་བརྩོན་རྟག་ཏུ་ཁྲུས་
[72b]
[72b.1]བྱེད་པ། །བདེ་བར་གཤེགས་པས་ཇི་ལྟ་བུར། །ཉེས་པ་ཅིར་ཡང་མ་གསུངས་ཁྱོད། །གལ་ཏེ་འདུལ་དོན་ཤེས་ན་སྨྲོས། །གལ་ཏེ་སྡོམ་ཅན་གྱིས་ནི་དུས། །བྱིན་གྱིས་བརླབས་ནས་བརྟག་བྱེད་ན། །ཐུབ་པ་ཐམས་ཅད་གཟིགས་པ་ཡིས། །ཇི་ལྟར་ལྟུང་དང་བཅས་པར་གསུངས། །དགེ་སློང་གིས་ནི་དགེ་སློང་
[72b.2]ལ། །གཡའ་བསྒག་བསམ་པས་ག་ག་ཚིལ། །བྱེད་པ་ཅི་ཕྱིར་ཐུབ་པ་ཡིས། །ཉེས་བྱས་ལྟུང་གསུངས་བཅོལ་གྱིས་སྨྲོས། །ལོ་ནི་ཉི་ཤུ་མ་ལོན་པ། །བསྙེན་པར་རྫོགས་པར་བྱེད་པ་ལ། །ཇི་ལྟར་ལྟུང་བ་མེད་པ་དང་། །དེ་དོན་གཉེར་ལའང་ཆགས་པར་གསུངས། །སྡོམ་བརྩོན་མྱོས་
[72b.3]འགྱུར་འདུ་ཤེས་ཀྱིས། །ཆང་འཐུངས་ཇི་ལྟར་ཉེས་བྱས་ཀྱི། །ལྟུང་བར་གསུངས་བ་གལ་ཏེ་མཐུ། །ཡོད་ན་དོགས་པ་མེད་པས་སྨྲོས། །སྡོམ་བརྩོན་མཚན་མོ་རིན་ཆེན་དག །འདུག་བཞིན་དུ་ནི་རྒྱལ་པོ་ཡིས། །གཏན་བརྟེན་བཙུན་མོའི་གནས་ཡོད་ལ། །གཏུགས་ན་ཇི་ལྟར་ལྟུང་བ་མེད། །
[72b.4]གྲོང་གནས་དགེ་སློང་མ་ལ་ནི། །སྡོམ་བརྩོན་དེ་ན་གནས་དག་གིས། །ཁ་ཟས་བླངས་ན་ཇི་ལྟ་བུར། །སོ་སོར་བཤགས་བྱའི་ཉེས་བྱས་གསུངས། །འདུལ་བ་དྲི་བའི་ཚིག་ལེའུར་བྱས་པ་ལས་ལེའུ་གཉིས་པའོ།། །།དགེ་སློང་སོ་སོར་ཐར་པ་ཡི། །གདོན་པ་ལྔ་ཆར་མ་བཏོན་པར། །
[72b.5]ཇི་ལྟར་དེ་ཡི་གསོ་སྦྱོང་བྱས། །དྲི་ཡི་ཁོ་བོ་ལ་སྨོས་ཤིག །སོ་སོར་ཐར་པ་མི་འདོན་ཅིང་། །གཞན་གྱི་དྲུང་དུ་བྱིན་མི་རློབ། །ཅི་ཕྱིར་གསོ་སྦྱོང་བྱས་འགྱུར་འདིར། །བདག་ལ་ཐེ་ཚོམ་ཡོད་ཀྱིས་སྨྲོས། །དགེ་འདུན་རྙེད་པ་དགེ་སློང་ནི། །གཅིག་པུས་བླངས་ན་ཇི་ལྟ་བུར། །ཉེས་མེད་
[72b.6]གསུངས་པ་ཁོ་བོ་ཡིས། །དོན་དུ་གཉེར་གྱིས་ཁྱོད་གསལ་སྨོས། །སྡོམ་བརྩོན་ཅན་གྱིས་དགེ་འདུན་གྱི། །རྙེད་པ་རུང་བ་བདག་གིར་བྱས། །ལྟུང་བཅས་ཞེས་གསུངས་རྒྱུ་ཅི་ཡོད། །འབད་དེ་བདག་ལ་སྨྲ་བར་གྱིས། །མཆོད་རྟེན་ལ་ཕུལ་རྙེད་པ་གང་། །དེ་ལས་དགེ་སློང་གིས་བླངས་ན། །
[72b.7]ཇི་ལྟར་ལྟུང་བ་མེད་པ་ཞེས། །རྒྱལ་བས་གསུངས་པ་སྡོམ་བརྩོན་སྨྲོས། །ཉན་ཐོས་ཀྱི་ལ་བསྔོས་པའི་རྫས། སྡོམ་བརྩོན་མཆོད་རྟེན་ལས་བླངས་ན། །ཇི་ལྟར་ལྟུང་བ་དང་བཅས་པར། །ཐུབ་པས་གསུངས་པ་སྡོམ་བརྩོན་སྨྲོས། །སྤོ་བ་སྤྱོད་གཉིས་གནས་གཅིག་ན། །གནས་བྱེད་ཅི་ཕྱིར་
[73a]
[73a.1]ཉེས་མེད་ཉིད། །ཁྱོད་ལ་ནུས་པ་ཡོད་ཅེ་ན། །ཁོ་བོ་ལ་ནི་ཤིན་ཏུ་སྨྲོས། །ནམ་ཡང་ལྟུང་བ་མེད་ཅེས་པ། །ཅི་ཡི་ཕྱིར་ན་ཐུབ་པ་ཡིས། །སྤོ་བར་འོས་པ་ཡིན་པར་གསུངས། །བརྩེ་ལྡན་ཁྱོད་ནི་གསལ་བར་སྨྲོས། །ལྟུང་བ་ཡོད་པ་མ་ཡིན་ལ། །གལ་ཏེ་སྤོ་བ་སྦྱིན་
[73a.2]བྱེད་ན། །ཅི་ཕྱིར་ཐུབ་པས་ལྟུང་མེད་གསུངས། །ཁོ་བོ་ལ་ནི་ངེས་པར་སྨྲོས། །གསར་བུས་རྒན་པོ་ལས་འདས་ན། །གནས་མལ་ལེན་པར་བྱེད་པ་ལ། །ཅི་ཕྱིར་ལྟུང་བ་མེད་པར་གསུངས། །ཁོ་བོ་ཐེ་ཚོམ་བཟློག་པར་གྱིས། །གནས་མལ་དེ་ཉིད་སྤྱོད་པ་ལ། །ཅི་ཡི་ཕྱིར་ན་ཐུབ་པ་ཡིས། །
[73a.3]ཉེས་པ་མེད་དང་ཉེས་བྱས་གསུངས། །འབོད་དེ་གསལ་བར་སྨྲ་བར་གྱིས། །དགེ་འདུན་གྱི་ནི་གནས་མལ་ལ། །རང་གི་གོས་ཀྱིས་མ་གཡོགས་པར། །སྤྱོད་པ་ཅི་ལྟར་ལྟུང་མེད་གསུངས། །བརྟུལ་ཞུགས་ཅན་གྱིས་བདག་ལ་སྨྲོས། །འདུལ་བ་དྲི་བའི་ཚིག་ལེའུར་བྱས་པ་ལས་ལེའུ་
[73a.4]གསུམ་པའོ།། །།ལྟུང་བ་རྣམ་པར་རིག་བྱེད་དམ། །ཅི་ཞིག་གཟུགས་ཅན་བསྟན་ཡོད་དམ། །ཐོགས་དང་བཅས་སམ་ཟག་བཅས་སམ། །འདུས་བྱས་ཡིན་ནམ་འོན་ཏེ་ཅི། །འཇིག་རྟེན་པའམ་ཕུང་པོར་ལྡན། །ཁམས་དང་སྐྱེ་མཆེད་ལྡན་པའམ། །ཟིན་པའམ་
[73a.5]ལུང་བསྟན་འབྱུང་བར་ལྡན། །དེ་བཞིན་འབྱུང་བ་ལས་གྱུར་པའམ། །ཀུན་སྦྱོར་སྒྲིབ་པའམ་ཉོན་མོངས་ཅན། །ཟང་ཟིང་བཅས་པའམ་འོན་ཏེ་ན། །ཞེན་པ་བརྟེན་པའམ་འཐབ་བཅས་སམ། །དམིགས་པ་དང་བཅས་ཡིན་ནམ་ཅི། །སེམས་སམ་ལས་སམ་འོན་ཏེ་ན། །རྣམ་སྨིན་
[73a.6]བཅས་སམ་དེ་ལས་གཞན། །འདས་པའམ་མ་འོངས་ད་ལྟར་ཡིན། །དགེ་བའམ་འདོད་དང་གཟུགས་ཁམས་ལྡན། །སློབ་པའམ་འོན་ཏེ་མི་སློབ་བམ། །ཅི་ཞིག་དེ་ཉིད་སྤང་བྱའམ། །ཅི་ཞིག་བསྒོམ་པས་སྤང་བྱའམ། །འོན་ཏེ་མཐོང་བས་བྱ་བ་ཡིན། །ལུས་ཀྱི་འམ་འོན་ཏེ་ངག་
[73a.7]གི་འམ། །འོན་ཏེ་ཅི་ཞིག་སེམས་ཀྱི་ཡིན། །དགེ་སློང་བདག་ལ་མྱུར་དུ་ནི། །དོན་བཞིན་དག་ཏུ་སྨྲ་བར་གྱིས། །ཅི་དངོས་དེ་ཉིད་བྱེད་པ་ལ། །ལྟུང་བ་དང་ནི་ལྟུང་བ་མེད། །གཉིས་སུ་འགྱུར་བ་སྲིད་ཡོད་དམ། །ཁྱོད་ལ་དྲི་ཡིས་མྱུར་དུ་སྨྲོས། །ཅི་ཞིག་གང་གིས་ལྷག་མེད་པར། །འགྱུར་
[73b]
[73b.1]བའི་གཞི་ནི་དེ་ཉིད་ཀྱིས། །ལྷག་མ་དང་བཅས་ལྟུང་འགྱུར་རམ། །དྲི་ཡིས་བདག་ལ་གསལ་པོར་སྨྲོས། །ཅི་ཞིག་གང་གིས་ཕས་ཕམ་པའི། །ལྟུང་འགྱུར་གཞི་ནི་དེ་ཉིད་ཀྱིས། །དགེ་འདུན་ལྷག་འགྱུར་དེ་བཞིན་ལྟུང་། །འགྱུར་རམ་ཇི་ལྟར་བདག་ལ་སྨྲོས། །གང་གིས་དགེ་འདུན་
[73b.2]ལྷག་འགྱུར་བའི། །གཞི་དེ་ཉིད་ཀྱིས་དགེ་སློང་ལ། །ལྟུང་བྱེད་དང་ནི་དེ་བཞིན་དུ། །ཉེས་བྱས་སུ་ཡང་ཅི་ཕྱིར་འགྱུར། །ཅི་ཞིག་གང་གིས་ལྟུང་བྱེད་པའི། །ལྟུང་བར་འགྱུར་བ་དེ་ཉིད་ཀྱིས། །སོ་སོར་བཤགས་འགྱུར་ཅི་ཡི་ཕྱིར། །དགེ་སློང་ཇི་ལྟར་འདོད་བཞིན་སྨྲོས། །གཞི་ཅི་གང་གི་
[73b.3]ལྟུང་བྱེད་ཀྱི། །ལྟུང་བར་འགྱུར་བ་དེ་ཉིད་ཀྱིས། །ཉེས་པར་འགྱུར་རམ་དགེ་སློང་ཁྱོད། །གལ་ཏེ་ནུས་པ་ཡོད་བདག་སྨྲོས། །གང་གིས་སོ་སོར་བཤགས་པ་ཡི། །ལྟུང་བར་འགྱུར་བའི་གཞི་དེ་ཅི། །ཉེས་བྱས་སྲིད་དམ་མཐུ་ཡོད་ན། །དྲི་ཡིས་བདག་གི་མདུན་དུ་སྨྲོས། །ཇི་ལྟར་དགེ་
[73b.4]ལུང་མ་བསྟན་པའི། །སེམས་གནས་པ་ལ་གསོད་བྱེད་པ། །མནར་བར་གསུངས་མི་དགེ་བ་ཡི། །སེམས་ལ་གནས་པ་ལས་མ་གསུངས། །དགེ་སློང་རུང་བ་གནས་གཅིག་དང་། །མཚམས་གཅིག་གནས་བཞིན་དེ་ཡི་ཚིག །མེད་པར་དགེ་འདུན་ལས་བྱས་ན། །ཉེས་བྱས་མིན་གསུངས་
[73b.5]ཅི་འདྲ་སྨྲོས། །ཁྱིམ་པ་གནས་བཞིན་དགེ་འདུན་གྱིས། །ལས་ཤིག་བྱས་ན་ཇི་ལྟ་བུར། །དེ་ཡིས་ལས་ཀྱང་བྱས་འགྱུར་ཞིང་། །ལྟུང་བ་མེད་པར་འགྱུར་བ་སྨྲོས། །དགེ་དང་ལུང་མ་བསྟན་སེམས་ལ། །གནས་པ་ལ་ནི་ཇི་ལྟ་བུར། །ལྟུང་དང་བཅས་པ་ཞེས་གསུངས་སྲིད། །བདག་མདུན་
[73b.6]ཇི་ལྟར་འདོད་པ་སྨྲོས། །ཅི་དགྲ་བཅོམ་ལ་ལྟུང་འབྱུང་ངམ། །འདི་ལ་བདག་ལ་ཐེ་ཚོམ་ནི། །བརྟན་པོ་ཡོད་ཀྱིས་འབོད་དེ་ཁྱོད། །དོགས་པ་མེད་པར་བདག་མདུན་སྨྲོས། །དགེ་འདུན་དབྱེན་བྱེད་གང་ཡང་རུང་། །དེ་ཀུན་བསྐལ་པར་གནས་སམ་ཅི། །དགེ་སློང་གལ་ཏེ་ཁྱོད་བྱམས་ན། །
[73b.7]ཁོ་བོའི་ཐེ་ཚོམ་མྱུར་དུ་སོལ། །དགེ་སློང་གྱུར་ནས་ལྟུང་འགྱུར་དང་། །བཟློག་པ་ཡང་ནི་ཇི་ལྟ་བུར། །བདག་གི་ཐེ་ཚོམ་མྱུར་དུ་ཆོད། །དགེ་སློང་གཉིད་མ་ལོག་པའི་ཚེ། །ལྟུང་བ་བྱས་ནས་གཉིད་ལོག་ན། །ལྟུང་བར་འགྱུར་དང་བཟློག་པ་ཡང་། །ཇི་ལྟར་དྲི་ཡིས་གསལ་བར་སྨྲོས། །སྟན་གཅིག་
[74a]
[74a.1]ལ་ནི་འདུག་པ་ཡི། །དགེ་སློང་ལ་ནི་རྒྱུ་གང་གིས། །ལྟུང་བ་རིས་ནི་ལྔ་པོ་དག །འབྱུང་བར་འགྱུར་བ་སྲིད་ཡོད་དམ། །དགེ་སློང་སྦྱོར་བ་གཅིག་གིས་ནི། །ཇི་ལྟར་ལྟུང་བ་སྟོང་བྱེད་འགྱུར། །གལ་ཏེ་དེ་ཉིད་རིག་ཅེ་ན། །དྲི་ཡིས་ཁྱོད་ནི་སྨྲ་བར་གྱིས། །བསམ་
[74a.2]གཏན་དང་པོ་ལ་སོགས་ལ། །སྙོམས་པར་ཞུགས་པ་ཐུབ་པ་ཡིས། །དགེ་འདུན་ལྷག་མར་ཅི་ཡི་ཕྱིར། །རབ་ཏུ་གསུངས་པ་བདག་ལ་སྨྲོས། །དགེ་སློང་ཐ་ན་ཉེས་བྱས་ཀྱི། །ལྟུང་བ་ནམ་དུའང་མི་འབྱིན་ཀྱང་། །འོན་ཀྱང་དགེ་སློང་མ་ཡིན་པར། །གསུངས་པ་ཅི་ཕྱིར་གསལ་བར་
[74a.3]སྨྲོས། །དགེ་སློང་མ་ནི་ནམ་དུ་ཡང་། །ཉེས་བྱས་ཀྱང་ནི་མི་བྱེད་ཀྱང་། །འོན་ཀྱང་ཇི་ལྟར་དགེ་སློང་མ། །མིན་གསུངས་བདག་དོན་གཉེར་གྱིས་སྨྲོས། །གལ་ཏེ་དགེ་སློང་དགྲ་བཅོམ་མིན། །ཕ་མིན་བསད་ན་ཇི་ལྟ་བུར། །མཚམས་མེད་པ་དང་དེ་བཞིན་དུ། །ཕས་ཕམ་
[74a.4]གསུངས་པར་འགྱུར་བ་སྨྲོས། །གཞན་གྱིས་ཚིག་སྨྲས་གཞན་ལ་ནི། །ཇི་ལྟར་ལྟུང་བ་རིས་ལྔ་པོ། །འབྱུང་བར་འགྱུར་བ་བདག་ལ་ནི། །སྡོམ་བརྩོན་མྱུར་དུ་སྨྲ་བར་གྱིས། །ཇི་ལྟར་དགེ་སློང་གཅིག་པུ་ལ། །ཕས་ཕམ་འགྱུར་བ་བཞི་འབྱུང་བ། །དྲི་ཡིས་ཁྱོད་ཀྱིས་བདག་ལ་ནི། །
[74a.5]དོན་བཞིན་དུ་ནི་སྨྲ་བར་གྱིས། །འདུལ་བ་དྲི་བའི་ཚིག་ལེའུར་བྱས་པ་ལས་ལེའུ་བཞི་པའོ།། །།འདི་ལ་གསོལ་བའི་ལས་དང་ནི། །གསོལ་བར་བཅས་པ་དུ་ཞིག་ཡོད། །ལེགས་གྲགས་དེ་དང་རྣམ་དབྱེ་བ། །ཁྱོད་ནི་འབོད་དེ་སྨྲ་བར་གྱིས། །ཚིག་ཏུ་ཡང་ནི་མི་སྨྲ་ལ། །ལུས་ཀྱི་
[74a.6]རྩོལ་བ་མི་བྱེད་པར། །ཕས་ཕམ་ལྟུང་བ་འབྱུང་འགྱུར་བ། །ཇི་ལྟ་བུར་ནི་ཁྱོད་སྨྲོས་ཤིག །ལྟུང་བ་རིས་ལྔ་བྱས་ནས་ནི། །འཆགས་པར་ཡང་ནི་མི་བྱེད་ཅིང་། །ཕྱིར་བཅོས་པར་ཡང་མི་བྱེད་པར། །ཇི་ལྟར་དག་པར་གསུངས་པར་སྨྲོས། །གཞན་གྱིས་ཕས་ཕམ་བྱས་གྱུར་ལ། །
[74a.7]གཞན་ཞིག་ཕམ་པར་འགྱུར་བ་ནི། །ཐུབ་པས་ཇི་ལྟར་གསུངས་པ་དྲིས། །དེས་ན་འདི་ལྟར་བདག་ལ་སྨྲོས། །ལྟུང་བ་ཀུན་ལ་གང་གིས་ནི། །བསྟན་པ་དང་ནི་བསྡུ་བར་འགྱུར། །ངག་གིས་ཀུན་ནས་བསླང་བ་ཡི། །ཁ་ན་མ་ཐོ་གང་ཆེ་དང་། །ལུས་ཀྱི་ཁ་ན་མ་ཐོ་ཆེ། །གང་ཡིན་
[74b]
[74b.1]ཕྲ་མས་གང་ཞིག་འགྱུར། །དགེ་འདུན་གང་ཟག་ལས་བྱུང་ཁྱེད། །ཁ་ན་མ་ཐོ་གང་ཆེར་འདོད། །སྲོག་གཅོད་རྒྱུ་ལས་སྡིག་ཆེན་ཡང་། །ཁྱོད་ནི་གསལ་བར་སྨྲ་བར་གྱིས། །འཁྲིག་དང་བརྫུན་ལས་གང་ཡིན་ཏེ། །དེས་ནི་བདག་ལ་སྨྲ་བར་གྱིས། །མང་དུ་སྨྲ་ལྟ་ཅི་ཞིག་དགོས། །མདོར་བསྡུས་
[74b.2]ཚིག་གཅིག་ཁྱོད་ལ་ནི། །ཁྲོ་སྤངས་མཛའ་བོར་གྱུར་བྱས་ནས། །རབ་ཏུ་བསྒྲིམས་ཏེ་སྨྲ་བར་བྱ། །སྡོམ་པ་ཀུན་ལ་ཀུན་མཁྱེན་གྱིས། །སྐྱབས་གསུམ་དགེ་སློང་ཉིད་ལ་ནི། །ཇི་ལྟ་བུར་ནི་མ་གསུངས་པ། །དེ་ནི་བདག་ལ་གསལ་བར་སྨྲོས། །དེ་ལྟར་འདུལ་བ་རྒྱ་མཚོ་ལས། །དྲི་བ་ཐིགས་
[74b.3]པ་ཙམ་བརྒྱ་ཞིག །བདག་གིས་འབད་དེ་བརྙས་བྱེད་ལ། །མ་རངས་ནས་ནི་བརྒྱུས་པ་ཡིན། །ནོངས་བགྱིས་བླ་མས་ཐུགས་རྗེས་ཀྱང་། །བཅོས་ཤིང་བཟོད་པ་མཛད་དུ་གསོལ། །མཐོང་བ་རྣམས་ཀྱིས་ལོང་བ་ནི། །དམ་པའི་ལམ་དུ་ཅིས་མི་གཟུང་། །འདུལ་བ་དྲི་བ་རྣམས་བྱས་ནས། །
[74b.4]དགེ་བ་ཟླ་བ་ལྟ་བུར་ནི། །དཀར་པོ་བརྩམས་པ་དེ་ཡིས་ནི། །འགྲོ་བ་རྟག་ཏུ་དགེ་ལེགས་ཤོག །འདུལ་བ་དྲི་བའི་ཚིག་ལེའུར་བྱས་པ་ལེའུ་ལྔ་པ་རྫོགས་སོ།། །།འདུལ་བ་དྲི་བའི་ཚིག་ལེའུར་བྱས་པ་སློབ་དཔོན་མདོ་སྡེ་འཛིན་པ་ཀ་ལྱཱ་ཎ་མི་ཏྲས་མཛད་པ་རྫོགས་སོ།། །།
[74b.5]རྒྱ་གར་གྱི་མཁན་པོ་དྷརྨ་ཀ་ར་དང་། ཞུ་ཆེན་གྱི་ལོ་ཙཱ་བ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།{T4135}༄༅༅། །རྒྱ་གར་སྐད་དུ། །བི་ན་ཡ་ཀ་པྲ་ཤྣ་ཊཱི་ཀ །བོད་སྐད་དུ། འདུལ་བ་དྲི་བ་རྒྱ་ཆེར་འགྲེལ་པ།
[74b.6]བདེ་བར་གཤེགས་པ་སེང་གེ་མུ་སྟེགས་ཅན་གླང་པོ་ཆེའི་ཚོགས་འཇོམས་པ་ལ་ཕྱག་འཚལ་ལོ། །ཤཱཀྱ་སེང་གེ་ངན་སྨྲ་བའི། །རྐང་གཉིས་འཇོམས་ལ་ཕྱག་འཚལ་ནས། །འདུལ་བའི་དྲི་བ་བསྡུས་པ་ཡི། །དོན་ཙམ་བདག་གིས་བཤད་པར་བྱ། །སྟོན་པ་ལ་གུས་པ་སྐྱེས་པའི་
[74b.7]སློབ་མ་རྣམས་ནི་དེས་བསྟན་པའི་དོན་རྣམ་པར་དཔྱད་པའི་རབ་ཏུ་བྱེད་པ་ལ་ཡང་གུས་པ་སྐྱེ་བས་རབ་ཏུ་བྱེད་པར་བརྩམས་པ་ལ་རང་གིས་སྟོན་པ་རབ་ཏུ་བྱེད་པའི་དོན་གསུངས་པའི་ཡོན་ཏན་བརྗོད་པ་སྔོན་དུ་འགྲོ་བའི་ཕྱག་འཚལ་བ་བརྩམ་པར་རྒྱལ་བ་ཉི་མ་ཞེས་བྱ་བ་ལ་སོགས་པ་སྨོས་སོ། །
[75a]
[75a.1]རྒྱལ་བ་ཉིད་མི་ཤེས་པའི་མུན་པ་སེལ་བའི་ཕྱིར་དང་། ཡེ་ཤེས་ཀྱི་སྣང་བ་མཛད་པའི་ཕྱིར་ཉི་མ་ཡིན་པས་རྒྱལ་བ་ཉི་མ་སྟེ། སངས་རྒྱས་བཅོམ་ལྡན་འདས་སོ། །དེ་ཉིད་ཀྱི་ཕྱིར་ཐེ་ཚོམ་གྱི་མུན་འཇོམས་ཞེས་བྱ་བ་སྨོས་ཏེ། ཐེ་ཚོམ་ཉིད་མུན་པ་སྟེ་མུན་ནག་གོ། །དེ་
[75a.2]འཇོམས་པ་ནི་སེལ་བར་མཛད་པ་སྟེ། དངོས་པོ་དང་འབྲེལ་པའི་མི་ཤེས་པ་དྲུངས་ཕྱིན་པར་མཛད་པ་ཞེས་བྱ་བའི་ཐ་ཚིག་གོ། །དེ་ལ་ཕྱག་འཚལ་ནས་ཞེས་བྱ་བ་ནི་བྱས་ནས་སོ། །རྒྱལ་བ་ཉི་མ་ཡོན་ཏན་གྱི་ཁྱད་པར་དེ་ལྟ་བུ་དང་ལྡན་པ་དེ་ལ་ཕྱག་འཚལ་ནས་ཅི་ཞིག་བྱ་ཞེ་ན། དྲི་བ་ཀུན་ལས་
[75a.3]བཏུས་པ་བཤད་ཅེས་བྱ་བ་སྨོས་ཏེ། དྲི་བ་སྟེ་བརྒལ་ཞིང་བརྟག་པ་རྣམས་བསྡུས་པ་བཤད་དོ། །ཅི་རང་གི་བློས་བྱས་པའི་དྲི་བ་བསླང་ཞིང་བསླངས་ནས་བཤད་དམ་ཞེ་ན། འདུལ་བ་ལས་བཏུས་ཏེ་ཞེས་བྱ་བ་སྨོས་ཏེ། འདུལ་བ་ནི་འདུལ་བའི་སྡེ་སྣོད་ལས་བཏུས་ཏེ། འདིས་སློབ་མ་རྣམས་འདུལ་ཞིང་རྗེས་སུ་སྟོན་པའི་ཕྱིར་རོ། །
[75a.4]བྱ་བ་དང་བྱ་བ་མ་ཡིན་པ་ཉེ་བར་སྟོན་པ་གཞུང་གི་ཚད་འབུམ་པའི་ཁྱད་པར་རོ་ཞེས་བྱ་བའི་ཐ་ཚིག་སྟེ་དེ་ལས་སོ། །ཆོས་མངོན་པའི་དྲི་བའི་ཚིག་ལེའུར་བྱས་པ་དག་ཀྱང་ཡོད་པས་དེའི་ཕྱིར་འདུལ་བ་ཞེས་བྱ་བ་སྨོས་སོ། །བཏུས་ཏེ་ཞེས་བྱ་བ་ནི་ཕ་ཀི་ཚུ་ཀི་སིལ་བུར་འདུག་པ་ལས་བཏུས་
[75a.5]པ་སྟེ། འདིས་ནི་རང་གི་ཚིག་ལེའུར་བྱས་པ་བྱེད་པ་གཞན་ལ་རག་ལས་པར་རབ་ཏུ་སྟོན་ཏོ། །ཇི་ལྟར་བཏུས་ཏེ་བཤད་ཅེ་ན། ལེགས་ཞེས་བྱ་བ་སྨོས་སོ། །ལེགས་པ་ནི་ཕྱིན་ཅི་མ་ལོག་པ་སྟེ། བདག་གིས་འདི་དག་ཇི་ལྟར་འཕགས་པ་ཉེ་བ་འཁོར་གྱིས་ཞུས་པ་བྱས་པ་རྣམས་བཅོམ་
[75a.6]ལྡན་འདས་ཀྱིས་ལན་བཏབ་པ། དེ་བཞིན་དུ་བསྡུས་ཀྱི། རང་གི་བློས་དཔགས་ཏེ་མ་ཡིན་ནོ་སྙམ་དུ་བསམས་པ་ཡིན་ནོ། །མཁས་པ་རྣམས་ནི་དོན་མེད་པའི་རབ་ཏུ་བྱེད་པ་མི་བྱེད་པས་ཅིའི་ཕྱིར་བཤད་ཅེ་ན། གང་ཞིག་གིས་ཞེས་བྱ་བ་ལ་སོགས་པ་སྨོས་ཏེ། གང་ཞིག་ཅེས་བྱ་བ་ནི་
[75a.7]འདུལ་བ་ལ་སྡང་བ་སྟེ། མིང་མ་སྨོས་པའི་འདུལ་བ་ལས་ནི་འདི་བྱའོ། །འདི་མི་བྱའོ་ཞེས་བྱ་བ་ནི་འདི་ཙམ་ཞིག་ཡོངས་སུ་ཤེས་པར་འགྱུར་གྱི། འདི་ལས་ཕུང་པོ་དང་། ཁམས་དང་། སྐྱེ་མཆེད་དང་། རྟེན་ཅིང་འབྲེལ་བར་འབྱུང་བ་ལ་སོགས་པའི་ཚིག་གི་དོན་དང་འབྲེལ་བའི་རྣམ་
[75b]
[75b.1]པར་དཔྱོད་པ་ཡང་མི་བྱེད་ལ། འདིས་དེ་དག་ཡོངས་སུ་ཤེས་པར་ཡང་མི་འགྱུར་བས་རིག་བྱེད་བཞིན་དུ་བླུན་པོར་བྱེད་པའི་ངོ་བོའི་བསྟན་བཅོས་སྐམ་ཐག་ཆད་པ་འདི་རྟོགས་པ་ནི་དོན་མེད་དོ་ཞེས་བྱ་བ་དེ་ལྟ་བུ་ལ་སོགས་པས་བརྙས་པ་སྟེ། ཚིག་གི་དོན་ནི་འདུལ་བའི་ལྔ་ཚན་གྱི་ཡོན་ཏན་མ་ཐོས་
[75b.2]པས་བླ་མའི་རིགས་མ་བསྟེན་པ། ངན་སོང་གསུམ་གྱི་གཡང་སར་ལྟུང་བ་ལ་གཅིག་ཏུ་གཞོལ་བ། བདེ་འགྲོ་གཉིས་ལས་ཕྱིར་ཕྱོགས་པ། ཞི་བའི་རྒྱུན་གྱི་གནས་སྐབས་ཐག་བསྲིངས་པ་དང་ཇི་ལྟར་བྲིས་པའི་བསྟན་བཅོས་གཅིག་ཙམ་རྟོགས་པས་བསྟན་བཅོས་ཐམས་ཅད་ཁོང་དུ་
[75b.3]ཆུད་པས་འདྲེས་པར་དམ་བཅའ་བ། བདག་ཉིད་བསྟོད་པའི་ཉེས་པ་མ་མཐོང་བ། འདུལ་བ་ལ་སོགས་པའི་བསྟན་བཅོས་རྟོགས་པས་བློ་གསལ་བ། རྣོ་བ་དྲི་མ་མེད་པ། རྣམ་པར་དག་པར་འགྱུར་བ་སྤོང་བར་བྱེད་པའི་ཆེད་དུ་འདི་བརྩམས་སོ་ཞེས་བྱ་བ་ཡིན་ནོ། །དེ་ལ་བརྙས་པ་ནི་
[75b.4]མ་གུས་པའམ་སྨོད་པའོ། །དེ་ལ་རིག་པ་ཞེས་བྱ་བ་ནི་འདུལ་བ་ཤེས་པ་སྟེ་འདུལ་བ་འཛིན་པ་ཞེས་བྱ་བའི་ཐ་ཚིག་གོ། །རྣམ་སྨོད་ནི་རྣམ་པར་སྨོད་པའོ། །སྙེམས་པ་ནི་དྲེགས་པའམ་ང་རྒྱལ་ལོ། །འཆང་བ་ནི་བསྲེལ་བའོ། །དེའི་ཆེད་དུ་ཞེས་བྱ་བ་ནི་འདུལ་བ་འཛིན་པ་ལ་རྣམ་པར་
[75b.5]སྨོད་པའི་ཆེད་དུའོ། །འདི་ཞེས་བྱ་བ་ནི་འདུལ་བའི་དྲི་བ་བསྡུས་པ་སེམས་ལ་གཞག་པའོ། །བརྗོད་དོ་ཞེས་བྱ་བ་ནི་བསྙད་པ་སྟེ། ཕྱི་རོལ་དུ་སྟོན་ཏོ་ཞེས་བྱ་བའི་ཐ་ཚིག་གོ། །ཁ་ཅིག་ཞེ་སྡང་གིས་འདུལ་བ་ཤེས་པ་ཁོ་ན་ལ་རྣམ་པར་སྨོད་པར་བྱེད་ཀྱི། འདུལ་བ་ལ་ནི་མ་ཡིན་པས་
[75b.6]འདུལ་བ་ལས་ཞེས་བྱ་བ་སྨོས་སོ། །ལ་ལ་ནི་འདི་གཉིས་ལ་སྨོད་པར་བྱེད་ཀྱི་ང་རྒྱལ་གྱིས་ཁོང་གང་བའི་སེམས་ཀྱིས་བདག་ཉིད་ཁེངས་པ་མ་ཡིན་པས་དེའི་ཕྱིར་ཡང་ཞེས་བྱ་བའི་སྒྲས་དེ་ལ་ཡོད་པའི་སྙེམས་པ་བསྡུའོ། །དྲི་བ་ཀུན་ལས་བཏུས་པ་བཤད་དོ་ཞེས་དམ་བཅས་པ་གང་
[75b.7]གི་དོན་དུ་འདི་བརྩམས་པ་དེ་བརྗོད་དགོས་པས། །སེམས་ཅན་མིའི་འགྲོ་བ་ཡིན་ཞེས་བྱ་བ་ལ་སོགས་པ་སྨོས་ཏེ། སེམས་ཅན་གྱི་སེམས་པ་ཕུན་སུམ་ཚོགས་པའི་ཕྱིར་སེམས་དང་སེམས་ལས་བྱུང་བའི་རྒྱུད་མ་ཉམས་པ་སྟེ། ཐ་སྙད་པའི་བློ་མ་ཉམས་པ་ཞེས་བྱ་བའི་དོན་ཏོ། །སེམས་
[76a]
[76a.1]ཅན་ཞེས་སྨོས་པས་ནི་སྨྱོན་པ་ལ་སོགས་པ་བཀག་གོ། །མིའི་འགྲོ་བ་ནི་མིའི་འགྲོ་བར་སྐྱེས་པ་སྟེ། མིའི་འགྲོ་བ་ཞེས་སྨོས་པས་ནི་མིའི་འགྲོ་བ་མ་ཡིན་པ་བསལ་ཏོ། །བར་ཆད་རྣམས་ཀྱང་བསལ་བ་ལ་ཞེས་བྱ་བ་ནི་མ་བསད་པ་དང་ཕ་བསད་པ་ཉིད་ལ་སོགས་
[76a.2]པ་སྡོམ་པ་སྐྱེ་བའི་གེགས་བྱེད་པ་རྣམས་མེད་པའོ། །སྡོམ་པ་ནི་དགེ་ཚུལ་ལ་སོགས་པའི་ངོ་བོ་སྟེ། འཆལ་པའི་ཚུལ་ཁྲིམས་ཀྱི་རྒྱུན་འགོག་པར་བྱེད་པའོ། །མི་འཆགས་པ་ནི་མི་སྐྱེ་བའོ། །གསུངས་པ་ནི་བཅོམ་ལྡན་འདས་ཀྱི་འདུལ་བ་ལས་སོ། །ཇི་ལྟ་བུ་ཡིན་ཞེས་བྱ་བ་ནི་རྣམ་པ་གང་གིས་
[76a.3]སོ། །བསྒྲིམས་ཏེ་ཞེས་བྱ་བ་ནི་འབོད་དེ་ཞེས་བྱ་བ་སྟེ། དེ་བཞིན་དུ་འོག་མ་དག་ལ་ཡང་ཤེས་པར་བྱའོ། །འདི་ལ་འདྲི་བའི་བསམ་པ་ནི་མིའི་འགྲོ་བ་ཡང་ཡིན་ལ། སྨྱོན་པ་ལ་སོགས་པ་བར་ཆད་ཀྱི་ཆོས་དང་ཡང་བྲལ་བ་གང་ཡིན་པ་དེ་ལ་སྡོམ་པ་སྐྱེ་བ་ཀོ་ཐེ་ཚོམ་ཡང་མེད་པ་ཁོ་ན་ཡིན་ན།
[76a.4]འོན་ཀྱང་བཅོམ་ལྡན་འདས་ཀྱིས་ཁ་ཅིག་ལས་འདི་ལ་སྡོམ་པ་སྐྱེ་བ་མེད་པ་ཉིད་དུ་གསུངས་པ་དེ་འདི་ལ་སྡོམ་པ་སྐྱེ་བའི་གེགས་ཇི་ལྟ་བུ་ཞིག་ཡོད་པར་གསུངས་པ་ཁྱོད་ཀྱིས་འབོད་དེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། བྱང་གི་སྒྲ་མི་སྙན་པའི་མིའི་དབང་
[76a.5]དུ་མཛད་ནས་དེ་སྐད་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་རྣམས་ཀྱིས་བྱང་གི་སྒྲ་མི་སྙན་པའི་གང་ཟག་གཅིག་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ། མ་རྫོགས་པ་ཞེས་བགྱི། ཉེ་བ་འཁོར་བསྙེན་པར་མ་རྫོགས་པའོ་ཞེས་
[76a.6]བྱ་བ་ཡིན་ནོ། །གལ་ཏེ་བྱང་གི་སྒྲ་མི་སྙན་པ་ཡང་བར་ཆད་ཡིན་ནོ་ཞེ་ན་མ་ཡིན་ཏེ། བཀོལ་བ་ཆད་པ་ཡན་ཆད་ཡིན་ནོ། །འདི་ལ་སྐྱེ་བའི་ཆོས་ཉིད་མེད་པར་འདྲའོ། །དེ་ལྟ་བུའི་རྟགས་ཅན་ནི་བསྙིལ་བར་བྱ་བ་འདིར་བར་ཆད་ཀྱི་ཆོས་ཀྱི་ནང་དུ་མ་བསྟན་པའི་ཕྱིར་རོ། །དེ་བཞིན་དུ་འོག་མ་
[76a.7]དག་ལའང་ཅི་རིགས་པར་ཤེས་པར་བྱའོ། །རྣམ་པ་གཅིག་ཏུ་ན་མཁན་པོ་དགེ་སློང་མ་ཡིན་པ་ཉིད་དུ་ཤེས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། མཁན་པོ་རྐུ་ཐབས་སུ་གནས་པ་ཞིག་གིས་བསྙེན་པར་རྫོགས་པར་འཚལ་བ་བསྙེན་པར་རྫོགས་པར་བགྱིད་
[76b]
[76b.1]ན་བསྙེན་བར་རྫོགས་པ་ཞེས་བགྱིའམ་བསྙེན་པར་མ་རྫོགས་པ་ཞེས་བགྱི། བཀའ་སྩལ་པ། གལ་ཏེ་བདག་གི་མཁན་པོ་རྐུ་ཐབས་སུ་གནས་པ་ཡིན་ནོ་ཞེས་བྱ་བར་ཤེས་ན་བསྙེན་པར་མ་རྫོགས་པ་ཞེས་བྱའོ། །གལ་ཏེ་མི་ཤེས་ན་བསྙེན་པར་རྫོགས་པ་ཞེས་བྱའོ་ཞེས་བྱ་བ་ཡིན་ནོ། །
[76b.2]རྣམ་པ་གཅིག་ཏུ་ན་མཁན་པོ་སྤོང་བ་ལ་དགོངས་ནས་དེ་སྐད་གསུངས་ཏེ། དེ་བཞིན་དུ་འདིར་གཞུང་ནི། བསྙེན་པར་རྫོགས་པར་བགྱིད་པའི་ཚེ་མཁན་པོ་སྤོང་བར་བགྱིད་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། བཀའ་སྩལ་པ། བསྙེན་པར་མ་
[76b.3]རྫོགས་པ་ཞེས་བྱའོ་ཞེས་བྱ་བ་ཡིན་ནོ། །རྣམ་པ་གཅིག་ཏུ་ན་བསྙེན་པར་རྫོགས་པར་བྱ་བ་དང་མཁན་པོ་དག་གི་མིང་མ་སྨོས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། གང་ཟག་གསུམ་ནི་བསྙེན་པར་མ་རྫོགས་པ་ཡིན་ཏེ། བདག་གི་མིང་ནས་མི་
[76b.4]བརྗོད་པ་དང་། མཁན་པོའི་མིང་ནས་མི་བརྗོད་པ་དང་། བསྙེན་པར་རྫོགས་པར་མི་ཤེས་པའོ། །དེ་བཞིན་དུ་ལས་བྱེད་པས་མཁན་པོ་དང་བསྙེན་པར་རྫོགས་པར་འདོད་པ་དང་། དགེ་འདུན་ཏེ་གསུམ་གྱི་མིང་མི་སྒྲོགས་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཡང་ན་འདི་ནི་ཁྱིམ་
[76b.5]པའམ་མུ་སྟེགས་ཅན་གྱི་རྒྱལ་མཚན་འཆང་བའམ་གཅེར་བུ་པའམ་འཁྲུག་པ་ལ་དགོངས་ནས་གསུངས་པ་ཡིན་ཏེ། འདི་ལ་བདག་གི་ལུང་གི་ཁུངས་ནི་མ་རྙེད་དོ། །མདོ་བྱེད་པ་ལ་བརྟེན་ནས་སྨྲས་པ་ཡིན་པར་བལྟ་བར་བྱ་སྟེ། དེ་བཞིན་དུ་འདི་ལ་མདོ་བྱེད་པས་བཤད་པ་ནི་ཁྱིམ་པ་དང་མུ་
[76b.6]སྟེགས་ཅན་གྱི་རྒྱལ་མཚན་ཅན་ལའང་མི་སྐྱེའོ། །སྒྲེན་མོ་དང་འཁྲུག་པ་དང་མཚན་དུག་མ་དག་ལ་ཡང་མི་སྐྱེའོ་ཞེས་བྱ་བ་ཡིན་ནོ། །སྔ་མ་ལ་ཡང་མདོ་བྱེད་པས་བཤད་པ་ནི་མི་མ་ཡིན་པའི་འགྲོ་བ་པ་དང་བྱང་གི་སྒྲ་མི་སྙན་པ་གཉིས་ནི་སྡོམ་པའི་ཞིང་ཉིད་མ་ཡིན་ནོ། །དེ་དགེ་སློང་ཉིད་
[76b.7]མ་ཡིན་པར་ཤེས་ན་མི་སྐྱེའོ། །དེའི་ཕྱིར་སྤོང་བ་ལ་ཡང་མི་སྐྱེའོ། །དེ་གཉིས་ཀྱི་མིང་མ་བརྗོད་ན་ཡང་མི་སྐྱེའོ། །དགེ་འདུན་གྱི་ན་ཡང་དེའི་སྐྱེ་གནས་ཀྱི་མི་སྐྱེའོ་ཞེས་བྱ་བ་ཡིན་ནོ། །ཕ་དང་མ་ནི་ཕ་མའོ། །ཆེད་དུ་བསམས་པ་ནི་བློ་སྔོན་དུ་བཏང་བའོ། །ཆེད་དུ་བསམས་པ་ཞེས་སྨོས་པ་
[77a]
[77a.1]ནི་ཆེད་དུ་བསམས་པ་མ་ཡིན་པ་དེ་དགག་པའི་ཕྱིར་ཏེ། འདི་ལྟར་ཆེད་དུ་མ་བསམས་པར་གྲུབ་པ་ནི་བྱེད་པ་པོ་ཉིད་མ་ཡིན་ནོ་ཞེས་འབྱུང་བས་ཆེད་དུ་བསམས་པ་མ་ཡིན་པར་དེ་དག་བསད་པ་ལ་མཚམས་མེད་པ་ལྡང་བར་མ་གསུངས་པའི་ཕྱིར་རོ། །གསོད་པ་ནི་
[77a.2]གསོད་པར་བྱེད་པའོ། །དགེ་སློང་མ་ནི་སུན་ཕྱུང་དང་། །ཞེས་བྱ་བ་ནི་དགེ་སློང་མ་མ་རུང་བར་བྱེད་པའོ། །དགེ་འདུན་དབྱེན་བྱེད་པ་ནི་དགེ་འདུན་སྟོན་པ་དང་ལམ་གཞན་ལ་འདོད་པ་སྐྱེད་པའི་སྒོ་ནས་རྣམ་གཉིས་སུ་བྱེད་པའི་ཕྱིར་ཏེ། སྟོན་དང་ལམ་གཞན་ལ་བཟོད་པ། །དབྱེ་བའོ་ཞེས་
[77a.3]འབྱུང་བའི་ཕྱིར་རོ། །སྡོམ་པའི་ཆེད་དུ་ཞེས་བྱ་བ་ནི་སྡོམ་པ་སྐྱེ་བའི་སྣོད་ཉིད་དུའོ། །འདི་ལ་འདྲི་བའི་བསམ་པ་ནི་མ་གསོད་པ་དང་། ཕ་གསོད་པ་དང་། དགེ་སློང་མ་སུན་དབྱུང་བ་དང་། དགེ་འདུན་གྱི་དབྱེན་བྱེད་པ་ནི་འདི་ལྟར་མཚམས་མེད་པ་ལ་སོགས་པ་བྱེད་པ་ཡིན་པའི་ཕྱིར་
[77a.4]བཅོམ་ལྡན་འདས་ཀྱིས་སྡོམ་པ་སྐྱེ་བ་འབྱུང་བར་མི་རུང་བ་ཉིད་དུ་གསུངས་ལ། འོན་ཀྱང་རྣམ་པ་གཞན་འགའ་ཞིག་གིས་སྡོམ་པ་སྐྱེ་བར་འོས་པ་ཉིད་དུ་ཡང་གསུངས་པས་དེ་ལྟ་བུ་ཡིན་པ་ཁོ་བོ་ལ་སྨྲོས་ཤིག་བྱ་བ་འདི་ཡིན་ནོ། །མ་བསད་པ་དང་། ཕ་བསད་པ་དང་། དགེ་སློང་མ་སུན་ཕྱུང་
[77a.5]བ་དང་། དགེ་འདུན་གྱི་དབྱེན་བྱེད་པ་འདི་དག་ནི་དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་དག་གི་དཔེ་ཙམ་དུ་ཟད་དོ། །འདི་ལ་ལན་ནི་འདི་ཡིན་ཏེ། གཞན་གྱི་འདུ་ཤེས་ཀྱིས་བསད་པ་ལ་སོགས་པ་ལ་དགོངས་ནས་དེ་སྐད་གསུངས་པ་ཡིན་
[77a.6]ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་རྣམས་ཀྱིས་མ་བཀུམས་པའི་གང་ཟག་གཅིག་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཉེ་བ་འཁོར་ཁ་ཅིག་ནི་བསྙེན་པར་རྫོགས་པ་ཞེས་བྱ་ལ། ཁ་ཅིག་ནི་
[77a.7]བསྙེན་པར་མ་རྫོགས་པ་ཞེས་བྱ་སྟེ། གང་ཞིག་གིས་གཞན་གྱི་འདུ་ཤེས་སམ། གཞན་གྱིས་སྦྱོར་བས་མ་བསད་ན་འདི་ནི་བསྙེན་པར་རྫོགས་པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་མི་བྱའོ། །གང་ཞིག་གིས་ཆེད་དུ་བསམས་ཏེ་མ་བསད་པར་གྱུར་ན་འདི་ནི་བསྙེན་པར་མ་རྫོགས་
[77b]
[77b.1]པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་བྱའོ། །མ་བསད་པ་ཇི་ལྟ་བར་ཕ་བསད་པ་དང་། དགྲ་བཅོམ་པ་བསད་པ་ཡང་དེ་དང་འདྲའོ་ཞེས་བྱ་བ་ཡིན་ནོ། །རྣམ་པ་གཅིག་ཏུ་ན་ཕ་དང་མ་དུད་འགྲོའི་སྐྱེ་གནས་སུ་གཏོགས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་
[77b.2]དུ་འདིར་གཞུང་ནི། བཙུན་པ་དགེ་སློང་གིས་ཕ་དང་མ་དག་བཀུམས་ལ་མཐར་ཡང་མི་འགྱུར། མཚམས་མ་མཆིས་པའི་ཁ་ན་མ་ཐོ་བས་རེག་པར་ཡང་མི་འགྱུར་བ་ལྟ་མཆིས་སམ། ཡོད་དེ། གང་གི་ཕ་དང་མ་དུད་འགྲོའི་སྐྱེ་གནས་སུ་གཏོགས་པ་དག་ཡིན་ནའོ་ཞེས་བྱ་བ་ཡིན་ནོ། །རྣམ་པ་གཅིག་
[77b.3]ཏུ་ན་སྐྱེད་པར་བྱེད་པ་མ་ཡིན་པའི་ཕ་དང་མ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་མས་ནི་བསྐྱེད་ལ་གཞན་གྱིས་ནི་གསོས་པས་གང་ཞིག་བཀུམས་པས་མཐར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བས་ཀྱང་རེག་པར་འགྱུར་བ་
[77b.4]ལགས། གང་གིས་བསྐྱེད་པའོ་ཞེས་བྱ་བ་ཡིན་ནོ། །དེ་ཉིད་ཀྱི་ཕྱིར་མདོ་བྱེད་པས་མི་མ་ཡིན་པའི་འགྲོ་བ་པ་གཉིས་ནི་མ་ཡིན་ནོ། །དེ་གཉིས་ལས་མཚམས་མེད་པར་མི་འགྱུར་རོ། །དེ་ནི་སྐྱེད་པར་བྱེད་པ་གཉིས་ལས་དེ་ཡིན་ནོ། །མ་བསད་པ་ལ་སོགས་པ་དེ་བྱས་པ་དེ་ཉིད་གཙོ་བོ་ཞེས་
[77b.5]བཤད་དོ། །རྣམ་པ་གཅིག་ཏུ་ནམ་ལ་ཡོད་པའི་ནུར་ནུར་པོ་ཟགས་པ་དེ་གཞན་གྱི་མངལ་དུ་བླུགས་པ་ལས་སྐྱེས་པའི་མ་བསད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་གང་ལས་ཁྲག་ནི་བྱུང་བ་མ་ཞེས་བཤད་དོ། །ཡང་ན་ཟག་པ་དང་བཅས་པའི་ལས་ཀྱི་སྲིད་པ་དང་སྲེད་པ་
[77b.6]བསད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཕ་བཀུམས་ལ་མཐར་ཡང་མི་འགྱུར། མཚམས་མ་མཆིས་པའི་ཁ་ན་མ་ཐོ་བས་རེག་པར་མི་འགྱུར་བ་ལྟ་མཆིས་ལགས་སམ། ཡོད་དེ། ཟག་པ་དང་བཅས་པའི་ལས་ཀྱི་སྲིད་པ་བསད་
[77b.7]ནའོ། །ཉེ་བ་འཁོར་ཟག་པ་དང་བཅས་པའི་ལས་ཀྱི་སྲིད་པ་ནི་མངོན་པར་སྒྲུབ་པའི་དོན་གྱིས་ཕ་ཞེས་བྱའོ། །བཙུན་པ་དགེ་སློང་གིས་མ་བཀུམས་ལ་མཐར་ཡང་མི་འགྱུར། མཚམས་མ་མཆིས་པའི་ཁ་ན་མ་ཐོ་བས་རེག་པར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་སྲེད་པ་
[78a]
[78a.1]བསད་ནའོ། །ཉེ་བ་འཁོར་སྲེད་པ་ནི་སྐྱེད་པའི་དོན་གྱིས་མ་ཞེས་བྱ་བ་ཡིན་ནོ། །དེ་ཉིད་ཀྱི་ཕྱིར། མི་ནི་སྲེད་པས་སྐྱེད་པར་བྱེད། །འདི་ཡི་སེམས་ནི་རྣམ་པར་རྒྱུག །སེམས་ཅན་འཁོར་བར་གཏོགས་པ་སྟེ། །དེ་ཡི་ལས་ནི་འཇིགས་པ་ཆེ། །ཞེས་གསུངས་
[78a.2]སོ། །དེ་ཉིད་ལ་དགོངས་ནས། ཕ་དང་མ་ནི་བསད་བྱས་ཤིང་། །རྒྱལ་པོ་གཙང་སྦྲ་ཅན་གཉིས་དང་། །ཡུལ་འཁོར་འཁོར་དང་བཅས་བཅོམ་ན། །མི་དེ་དག་པར་འགྱུར་ཞེས་བཤད། །ཅེས་གསུངས་སོ། །དེ་བཞིན་དུ་དགེ་སློང་མ་སུན་ཕྱུང་བ་ལ་སོགས་པའི་གཞུང་ཡང་འདི་ཡིན་ཏེ། བཙུན་
[78a.3]པ་རེ་ཞིག་དགེ་སློང་རྣམས་ཀྱིས་དགེ་སློང་མ་སུན་ཕྱུང་བ་ཞིག་བསྙེན་པར་རྫོགས་པར་བགྱིད་ན། བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཉེ་བ་འཁོར་ཁ་ཅིག་ནི་བསྙེན་པར་རྫོགས་པ་ཞེས་བྱ་ལ། ཁ་ཅིག་ནི་བསྙེན་པར་མ་རྫོགས་པ་ཞེས་བྱ་སྟེ། གང་གིས་
[78a.4]མི་ཚངས་པར་སྤྱོད་པས་དགེ་སློང་མ་སུན་ཕྱུང་བ་དེ་ནི་བསྙེན་པར་མ་རྫོགས་པ་ཞེས་བྱ་བས་བསྙེན་པར་རྫོགས་ན་ཡང་བསྙིལ་བར་བྱའོ། །གང་གིས་ལུས་ཀྱིས་རེག་པས་དགེ་སློང་མ་སུན་ཕྱུང་བ་དེ་ནི་བསྙེན་པར་རྫོགས་པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་མི་བྱའོ་ཞེས་བྱ་བ་ཡིན་
[78a.5]ནོ། །ཡང་ན་ཉམས་སུ་མྱོང་བ་མེད་པའི་དགེ་སློང་མ་སུན་ཕྱུང་བའི་དབང་དུ་མཛད་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་ཇི་ཙམ་གྱིས་ན་དགེ་སློང་མ་སུན་ཕྱུང་བ་ཞེས་བགྱི། གང་གིས་མི་ཚངས་པར་སྤྱོད་པས་དགེ་སློང་མ་འདུན་པས་སུན་ཕྱུང་བར་གྱུར་ནའོ་ཞེས་བྱ་བ་
[78a.6]ཡིན་ནོ། །དེ་ཉིད་ཀྱི་ཕྱིར་མདོ་བྱེད་པས་ཕམ་པར་འགྱུར་བ་མ་བྱུང་བ་ཉིད་ལ་མི་ཚངས་པར་སྤྱོད་པས་ཉམས་སུ་མྱོང་བ་དག་སུན་ཕྱུང་བ་ཉིད་ཡིན་ནོ་ཞེས་བཤད་དོ། །ཤུགས་ཀྱིས་ན་ཉམས་སུ་མྱོང་བ་མེད་པར་སུན་ཕྱུང་བ་ནི་དགེ་སློང་མ་སུན་ཕྱུང་བ་ཉིད་མ་ཡིན་ནོ་ཞེས་བལྟ་བར་བྱའོ། །ཡང་ན་
[78a.7]སོ་སོ་ནས་གཞི་བརྒྱད་ཀྱིས་དགེ་སློང་མ་སུན་ཕྱུང་བ་ཉིད་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་གང་ཟག་བརྒྱད་ཀྱིས་སོ་སོ་ནས་གཞི་བརྒྱད་ཀྱིས་དགེ་སློང་མ་སུན་འབྱིན་པར་བགྱིད་ན་དགེ་སློང་དེ་སུན་ཕྱུང་བ་ཞེས་བགྱིའམ། ཉེ་བ་འཁོར་སུན་
[78b]
[78b.1]ཕྱུང་བ་ཞེས་བྱའོ། །དེ་ལ་གང་ཞིག་དགེ་སློང་མ་སུན་ཕྱུང་བ་ཞེས་བགྱི། བཀའ་སྩལ་པ། གང་ཡང་མ་ཡིན་ནོ། །བཙུན་པ་དགེ་སློང་རྣམས་ཀྱིས་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཞིག་བསྙེན་པར་རྫོགས་པར་བགྱིད་ན་བསྙེན་པར་རྫོགས་བ་ཞེས་བགྱིའམ། བསྙེན་པར་མ་
[78b.2]རྫོགས་པ་ཞེས་བགྱི། ཉེ་བ་འཁོར་ཁ་ཅིག་ནི་བསྙེན་པར་རྫོགས་པ་ཞེས་བྱ་ལ། ཁ་ཅིག་ནི་བསྙེན་པར་མ་རྫོགས་པ་ཞེས་བྱ་སྟེ། གང་གིས་དེ་བཞིན་གཤེགས་པ་ལ་ཆེད་དུ་བསམས་ཏེ་ངན་སེམས་ཀྱིས་ཁྲག་ཕྱུང་བར་གྱུར་པ་དེ་ནི་བསྙེན་པར་མ་རྫོགས་པ་ཞེས་བྱ་བས་བསྙེན་པར་རྫོགས་ན་ཡང་བསྙིལ་
[78b.3]བར་བྱའོ། །གང་གིས་དེ་བཞིན་གཤེགས་པ་ལ་ཆེད་དུ་མ་བསམས་པར་ངན་སེམས་ཀྱིས་ཁྲག་ཕྱུང་བར་གྱུར་པ་དེ་ནི་བསྙེན་པར་རྫོགས་པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་མི་བྱའོ་ཞེས་བྱ་བ་ཡིན་ནོ། །འདི་ཉིད་ལ་དགོངས་ནས། སངས་རྒྱས་བཀྲོངས་པར་མི་འདོད་པའི། །
[78b.4]མཚམས་མེད་མ་ཡིན་ཞེས་བཤད་དོ། །བཙུན་པ་རེ་ཞིག་གང་ཟག་དགེ་འདུན་གྱི་དབྱེན་བགྱིས་པ་ཞིག་བསླབ་པ་ཕུལ་ནས་བབས་པར་གྱུར་ལ། དེ་སླར་ཡང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ལ། དེ་དགེ་སློང་རྣམས་
[78b.5]ཀྱིས་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཉེ་བ་འཁོར་ཁ་ཅིག་ནི་བསྙེན་པར་རྫོགས་པ་ཞེས་བྱ་ལ། ཁ་ཅིག་ནི་བསྙེན་པར་མ་རྫོགས་པ་ཞེས་བྱ་སྟེ། གང་གིས་ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པ་དང་།
[78b.6]དབྱེ་བ་ལ་ཆོས་མ་ཡིན་པར་འདུ་ཤེས་པས་དགེ་འདུན་ཕྱེ་བར་གྱུར་པ་དེ་ནི་བསྙེན་པར་མ་རྫོགས་པ་ཞེས་བྱ་བས་བསྙེན་པར་རྫོགས་ནས་ཀྱང་བསྙིལ་བར་བྱའོ། །གང་གིས་ཆོས་མ་ཡིན་པ་ལ་ཆོས་སུ་འདུ་ཤེས་པས་དགེ་འདུན་ཕྱེ་བར་གྱུར་པ་དེ་ནི་བསྙེན་པར་རྫོགས་པ་ཞེས་བྱ་བས་བསྙེན་པར་རྫོགས་ནས་
[78b.7]ཀྱང་བསྙིལ་བར་མི་བྱའོ། །ཡང་ན་ལས་ཀྱི་དབྱེན་གྱིས་བདག་ཉིད་ཀྱིས་དགེ་འདུན་གྱི་དབྱེན་ལ་དགོངས་ཏེ་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། ཀཽ་ཤཱམ་བཱིའི་དགེ་འདུན་སུས་ཕྱེ། ཆོས་མ་ཡིན་པ་སྨྲ་བ་དག་གིས་ཏེ། མཚམས་ཀྱི་ནང་ན་མཚུངས་པར་གནས་པ་ལས་
[79a]
[79a.1]མ་འདྲེས་པའི་ཆོས་གསོ་སྦྱོང་བགྱིས་སོ་ཞེས་བྱ་བ་ཡིན་ནོ། །ཡང་ན་བཞད་གད་ཀྱི་བསམ་པ་ལ་དགོངས་ནས་དེ་སྐད་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། གང་ཞིག་དེ་ལྟར་ཀུ་རེའི་བསམ་པས་རྗེས་སུ་སྒྲོགས་སམ་ཚུལ་ཤིང་འབྲིམ་པར་བགྱི་ན་དགེ་
[79a.2]འདུན་བྱེ་ཞེས་བགྱིའམ། ཉེ་བ་འཁོར་མ་ཡིན་ནོ། །ལས་བགྱིད་པ་ལ་ཇི་ལྟར་འགྱུར་ལགས། དབྱེན་གྱི་ཉེར་བསྡོགས་ཀྱི་ནི་ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །ཡང་ན་དགེ་འདུན་དུ་མ་གྱུར་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་
[79a.3]ནི། ལྔ་པ་སྤངས་པ་ཡིན་ན་དགེ་འདུན་མ་བྱེའོ་ཞེས་བརྗོད་པར་བྱའོ། །དགུ་པ་རྐུ་ཐབས་སུ་གནས་པ་ཞིག་གིས་དགེ་འདུན་ཕྱེ་ན་དགེ་འདུན་མ་བྱེའོ་ཞེས་བརྗོད་པར་བྱའོ། །མཚན་གཉིས་པ་ཞིག་གིས་ཚུལ་ཤིང་བྲིམས་སམ་རྗེས་སུ་སྒྲོགས་པར་བགྱིད་ན་ཅི་དགེ་འདུན་བྱེ་བ་ཞེས་བགྱིའམ་མ་བྱེ་བ་
[79a.4]ཞེས་བགྱི། བཀའ་སྩལ་པ། མ་བྱེ་བ་ཞེས་བྱ་བ་ཡིན་ནོ། །ཡང་ན་མ་འོངས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་ཟ་མས་ཚུལ་ཤིང་བྲིམ་ཞིང་ལས་དག་བགྱིར་དབང་ལགས་སམ། ཉེ་བ་འཁོར་མི་དབང་ངོ་། །དེ་བཞིན་དུ་མ་ནིང་དང་།
[79a.5]དགེ་སློང་མ་སུན་ཕྱུང་བ་དང་། མ་བཀུམས་པ་དང་། ཕ་བཀུམས་པ་དང་། དགྲ་བཅོམ་པ་བཀུམས་པ་དང་། མུ་སྟེགས་ཅན་ཞུགས་པ་དང་། རྐུ་ཐབས་སུ་གནས་པ་དང་། ཐ་དད་དུ་གནས་པས་ཚུལ་ཤིང་བྲིམ་ཞིང་ལས་དག་བགྱིར་དབང་ལགས་སམ། ཉེ་བ་འཁོར་མི་དབང་ངོ་ཞེས་བྱ་བ་
[79a.6]ཡིན་ནོ། །དེ་བཞིན་དུ་འདིར་མདོ་བྱེད་པས་ཀྱང་། ཆོས་དང་ཆོས་མ་ཡིན་པ་གཉི་ག་ལ་དེ་བཞིན་དུ་ཤེས་ན་མཚམས་མེད་པའོ། །དབྱེ་བ་ལ་ཆོས་སུ་འདུ་ཤེས་པས་ཀྱང་ངོ་ཞེས་བཤད་དོ། །འདི་ལ་འགྲེལ་པ་བྱེད་པས་ཀྱང་། ཆོས་མ་ཡིན་པ་ལ་ཡང་ཆོས་མ་ཡིན་པ་ཉིད་དུ། ཆོས་ལ་ཡང་
[79a.7]ཆོས་ཉིད་ཁོ་ནར་ཤེས་ཤིང་དགེ་འདུན་གྱི་དབྱེན་བྱེད་ན་མཚམས་མེད་པའི་ཁ་ན་མ་ཐོ་བ་དང་ལྡན་གྱི། ཆོས་མ་ཡིན་པ་ལ་ཆོས་སུ་འདུ་ཤེས་པ་དང་། ཆོས་ལ་ཆོས་མ་ཡིན་པར་འདུ་ཤེས་པ་ལ་ནི་མ་ཡིན་ཏེ། དེ་ལ་བསམ་པ་ལོག་པར་ཞུགས་པ་མེད་པའི་ཕྱིར་རོ་ཞེས་བྱ་བ་ལ་སོགས་པ་བཤད་དོ།
[79b]
[79b.1]དེ་བཞིན་དུ་ཆོས་མ་ཡིན་པ་སྨྲ་བ་དག་གིས་དབྱེ་བའི་སེམས་ཀྱིས་མཚམས་ཀྱི་ནང་དུ་ལས་ཐ་དད་པར་བྱས་ན་དེ་དབྱེ་བ་ཡིན་ནོ། །བཞད་གད་ཀྱི་དངོས་པོས་ནི་གང་གིར་ཡང་མི་འགྱུར་རོ། །མི་འཆགས་པའི་བློས་དབྱེན་བྱེད་པ་དང་གནས་ནས་འབྱིན་པ་དག་ལ་ནི་སྦོམ་པོའོ། །དགེ་འདུན་དུ་མ་གྱུར་པ་ཉིད་ན་ཉེས་བྱས་
[79b.2]སོ། །དབྱེན་རྗེས་སུ་སྒྲུབ་པ་ནི་གསོལ་བ་དང་འདྲའོ། །གང་ཁ་སྐོང་བར་མི་འོས་པ་དེ་མདུང་དོར་བར་ཡང་ངོ་། །དགེ་འདུན་གྱི་དབྱེན་ལ་ཡང་འོས་པ་མ་ཡིན་པས་ཚུལ་ཤིང་དག་འབྲིམ་པ་མི་འཆགས་སོ། །དབྱེ་བར་བྱེད་པ་དག་དགེ་འདུན་གྱི་ཚད་མ་ཡིན་པ་དང་། མཚམས་ཀྱི་ནང་
[79b.3]ན་གཞན་དགེ་འདུན་གྱི་ཚད་དག་ཀྱང་མེད་པ་ཉིད་ཡིན་ན་དེ་མི་འཆགས་སོ་ཞེས་བཤད་དོ། །དེ་ཉིད་ལ་དགོངས་ནས། དགེ་སློང་ལྟ་སྤྱད་ཚུལ་ལྡན་པས། །འབྱེད་དོ་གཞན་དུའོ་བྱིས་པ་རྣམས། །སྟོན་དང་ལམ་གཞན་ལ་བཟོད་པ། །བྱེ་བའོ་དེ་ནི་མི་གནས་སོ། །དེ་ནི་འཁོར་ལོའི་
[79b.4]དབྱེན་དུ་འདོད། །འཛམ་བུའི་གླིང་དུའོ་དགུ་སོགས་ཀྱིས། །བཤད་དོ། །སྔོན་དུ་ཕས་ཕམ་འགྱུར་བྱས་ལ། །ཞེས་བྱ་བ་ལ་སོགས་པ་ལ་སྔོན་ཕས་ཕམ་པར་འགྱུར་བར་བྱས་པ་ནི་སྔོན་བསྙེན་པར་རྫོགས་པའི་ཚེ་ཕས་ཕམ་པར་འགྱུར་བ་བྱེད་པའི་ངང་ཚུལ་ཅན་ནི་སྔོན་ཕས་ཕམ་པར་
[79b.5]འགྱུར་བ་བྱས་པ་སྟེ་སྔོན་ཕམ་པ་བྱུང་བ་ཞེས་བྱ་བའི་ཚིག་གོ། །དེ་ལ་ཕས་ཕམ་པར་འགྱུར་བ་ནི་ཕས་ཕམ་པ་སྟེ། དགེ་སློང་གི་དངོས་པོ་དང་དེའི་འབྲས་བུ་འཕགས་པའི་ལམ་ལས་ལྟུང་བ་ཞེས་བྱ་བའི་ཐ་ཚིག་གོ། །ཕས་ཕམ་པ་ལས་འབྱུང་བའི་ལྟུང་བ་ནི་ཕས་ཕམ་པར་འགྱུར་བ་སྟེ་དེ་
[79b.6]བྱེད་པས་དེ་སྐད་ཅེས་བྱའོ། །དགེ་སློང་རྣམས་ལ་བསྙེན་པར་རྫོགས་པ་གསོལ་བ་ཞེས་བྱ་བ་ནི་དགེ་སློང་གི་དགེ་འདུན་ལ་བསྙེན་པར་རྫོགས་པའི་དོན་དུ་གཉེར་བ་སྟེ། དགེ་འདུན་ལས་བསྙེན་པར་རྫོགས་པར་བྱའོ་ཞེས་འབྱུང་བས་བསྙེན་པར་རྫོགས་པ་ནི་དགེ་འདུན་ལ་རག་ལས་པའི་ཕྱིར་རོ། །
[79b.7]དགེ་སློང་ཞེས་སྨོས་པ་ནི་དགེ་སློང་མ་བསལ་བའི་ཕྱིར་ཏེ། འདི་ལྟར་འདིར་དགེ་འདུན་གྱིས་བསྣན་པར་བྱའོ་ཞེས་འབྱུང་བས་དགེ་སློང་མ་རྣམས་ཀྱི་བསྙེན་པར་རྫོགས་པ་ཡང་དགེ་སློང་གི་དགེ་འདུན་ལ་རག་ལས་པ་ཁོ་ན་ཡིན་ནོ། །རབ་བསྒྲིམས་ཏེ་ཞེས་བྱ་བ་ནི་བསམ་པ་ཐག་པ་ནས་ཏེ། མྱ་
[80a]
[80a.1]ངན་ལས་འདས་པའི་བསམ་པས་ཞེས་བྱ་བའི་དོན་ཏོ། །རབ་ཏུ་བསྒྲིམས་པ་སྨོས་པ་ནི་འཇིགས་སྐྱོབ་ཀྱི་བསམ་པས་སྡོམ་པ་ལེན་པ་སྐྱེ་བ་གང་ཡིན་པ་དེ་བསལ་བའི་ཕྱིར་ཏེ། མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་སྐྱེ་བ་མེད་དོ་ཞེས་འབྱུང་བའི་ཕྱིར་
[80a.2]རོ། །དེ་ལ་ཞེས་བྱ་བ་ནི་སྔོན་ཕས་ཕམ་པར་འགྱུར་བ་བྱས་པ་ལའོ། །འཆགས་པ་ནི་སྐྱེ་བ་སྟེ་དོན་གྱི་དབང་གིས་ན་བསྙེན་པར་རྫོགས་པར་གཟུང་ངོ་། །འདི་ལ་འདྲི་བའི་བསམ་པ་ནི་སྔོན་ཕམ་པ་བྱུང་བ་ལ་བཅོམ་ལྡན་འདས་ཀྱིས་བསྙེན་པར་རྫོགས་པ་དགེ་སློང་གི་དངོས་པོ་བཀག་གོ་ཞེས་འབྱུང་
[80a.3]བ་འདི་ནི་ལེགས་པར་ཤེས་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་འདི་བསྙེན་པར་རྫོགས་པར་གནང་ངོ་ཞེས་བྱ་བ་འདི་ལྟ་བུ་ཡིན་ལ། ཁོ་བོའི་ཐེ་ཚོམ་དེ་སོལ་ཅིག་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་འདི་ཡིན་ཏེ། དགེ་སློང་མ་ཐུན་མོང་མ་ཡིན་པའི་
[80a.4]ཕམ་པར་འགྱུར་བ་བྱས་པ་བསླབ་པ་ཕུལ་ནས་མཚན་གྱུར་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་སྔར་ཕམ་པ་བྱུང་བ་རབ་ཏུ་དབྱུང་བར་མི་བྱ་ཞིང་བསྙེན་པར་རྫོགས་པར་མི་བྱའོ་ཞེས་བཀའ་སྩལ་པ་གང་ལགས་པ།
[80a.5]བཙུན་པ་དགེ་སློང་རྣམས་ཀྱིས་སྔར་ཕམ་པ་བྱུང་བ་ཞིག་རབ་ཏུ་འབྱིན་པར་བགྱིད་ཅིང་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་ཀྱང་བགྱི། ལྟུང་བར་ཡང་མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་མ་
[80a.6]ཞིག་གིས་ཐུན་མོང་མ་ཡིན་པའི་ཕས་ཕམ་པར་འགྱུར་བའི་ལྟུང་བ་སྤྱད་ལ་དེ་བསླབ་པ་ཕུལ་ནས་བབས་པ་དང་དེ་མཚན་གྱུར་ཏེ་ཕོར་རེད་པ་དང་རབ་ཏུ་འབྱིན་ཅིང་བསྙེན་པར་རྫོགས་པར་བྱེད་ན་ལྟུང་བ་མེད་དོ་ཞེས་བྱ་བ་ཡིན་ནོ། །དེ་བཞིན་དུ་འདིར་མདོ་བྱེད་པས་ཀྱང་། བུད་མེད་བསླབ་པ་ཕུལ་
[80a.7]ནས་སྐྱེས་པ་ཉིད་དུ་གྱུར་པ་ནི་རབ་ཏུ་འབྱུང་བ་དང་བསྙེན་པར་རྫོགས་པར་རུང་བ་ཉིད་དོ། །ཕམ་པར་འགྱུར་བ་ཐུན་མོང་མ་ཡིན་པ་ལྷག་པར་སྤྱད་པ་ཅན་ཡང་ངོ་ཞེས་བཤད་དོ། །བསམ་པ་ཐག་པས་ཞེས་བྱ་བ་ལ་སོགས་པ་ལ་བསམ་པ་ཐག་པ་ཞེས་བྱ་བ་ནི་སྙིང་ཐག་པ་ནས་ཏེ། མི་ལྟ་བའི་
[80b]
[80b.1]སེམས་ཀྱིས་ཡིན་གྱི་ཚིག་ཙམ་གྱིས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དཀོན་མཆོག་གསུམ་ནི་སངས་རྒྱས་དང་། །ཆོས་དང་དགེ་འདུན་ཞེས་བྱ་བ་རིན་པོ་ཆེ་དང་འདྲ་བར་རྙེད་དཀའ་བའི་ཕྱིར་དང་། རིན་ཐང་མེད་པའི་ཕྱིར་དང་། ཕན་པ་དཔག་ཏུ་མེད་པ་མཛད་པའི་ཕྱིར་དཀོན་མཆོག་གོ། །དེ་
[80b.2]ཕྱིར་སྤོང་བར་བྱེད་པ་ལ་སྟེ། ཕྱིར་སྤོང་བ་ནི་འདོར་བ་ཡིན་པས་བདག་ལ་འདིར་མི་དགོས་སོ་ཞེས་དེ་སྐད་སྤོང་བའོ་ཞེས་བྱ་བའི་དོན་ཏོ། །མེད་པར་མི་འགྱུར་བ་ནི་འབྲལ་བར་མི་འགྱུར་བ་སྟེ་ཉམས་པར་མི་འགྱུར་བ་ཞེས་བྱ་བའི་ཐ་ཚིག་གོ། །ལན་ནི་ལན་གདབ་པའོ། །རྗོད་ཅིག་ཅེས་བྱ་བ་ནི་སྨྲོས་
[80b.3]ཤིག་པའོ། །འདི་ལ་ཕ་རོལ་པོའི་བསམ་པ་ནི་འགའ་ཞིག་སངས་རྒྱས་སམ་ཆོས་སམ་དགེ་འདུན་སྤོང་བར་བྱེད་ཅིང་དེ་ལྟར་བསམ་པ་ཐག་པ་ནས་དཀོན་མཆོག་གསུམ་ཡོངས་སུ་སྤོང་བར་བྱེད་པ་གང་ཡིན་པ་དེས་ཐེ་ཚོམ་མེད་པ་ཁོ་ནར་ཕྱིར་སྤངས་པ་ལ་ཡིན་ནོ་ཞེས་བྱ་བ་འདི་ནི་དེ་ལྟར་བསྟན་
[80b.4]པ་ལ་ཞུགས་པ་བདེ་བར་གཤེགས་པ་ཐམས་ཅད་ཀྱིས་བདེ་བླག་ཏུ་གོ་ན། འོན་ཀྱང་བཅོམ་ལྡན་འདས་ཀྱིས་དེ་ཕྱིར་སྤངས་པར་མ་གསུངས་སོ་ཞེས་བྱ་བ་ཁོ་བོའི་སེམས་ཐེ་ཚོམ་གྱི་འཕྱང་ཐག་ལ་འཇུ་བ་ཡུན་རིང་པོ་ནས་བསྡོགས་པ་གཡོ་བ་འདི་ལན་ལེགས་པ་ཞིག་གིས་རྣལ་དུ་ཕོབ་ཤིག་
[80b.5]ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། རྟེན་ནམ་ཐར་པའི་ཚུལ་གཞན་ལ་དགོངས་ནས་དེ་སྐད་དུ་གསུངས་པ་ཡིན་ཏེ། འདི་ལྟར་གཞན་མུ་སྟེགས་ཅན་ལས་རབ་ཏུ་བྱུང་བའི་དགེ་སློང་མ་ནག་མོས་དགེ་སློང་མ་དག་དང་ལྷན་ཅིག་ཐབ་མོ་བྱུང་བ་དང་། སངས་རྒྱས་སྤོང་
[80b.6]ངོ་། །ཆོས་དང་དགེ་འདུན་སྤོང་ངོ་ཅི་ཤཱཀྱའི་བུའི་དགེ་སློང་དག་ཁོ་ན་ཚུལ་ཁྲིམས་དང་ལྡན་པ་དང་། ཡོན་ཏན་དང་ལྡན་པ་དང་། དེས་པ་དང་དགེ་བའི་ཆོས་ཅན་ཡིན་ནམ། དགེ་སློང་གཞན་དག་ཀྱང་ཚུལ་ཁྲིམས་དང་ལྡན་པ་དང་། ཡོན་ཏན་དང་ལྡན་པ་དང་། དེས་པ་དང་དགེ་བའི་ཆོས་
[80b.7]ཅན་དག་ཡོད་ཀྱིས་བདག་གིས་དེ་དག་གི་ཐད་དུ་ཚངས་པར་སྤྱད་པ་སྤྱོད་དོ་ཞེས་བྱ་བ་ལ་སོགས་པ་སྨྲས་སོ། །དེའི་ཚེ་བཅོམ་ལྡན་འདས་ཀྱིས་ཆོས་འདི་ནི་དེའི་ལྟུང་བ་དང་པོ་སྟེ། ངེས་པར་འབྱུང་བ་ཡིན་ནོ་ཞེས་བྱ་བ་ལ་སོགས་པ་བཀའ་སྩལ་པས་དེ་ལ་དགེ་འདུན་གྱི་ལྷག་མར་འགྱུར་བར་
[81a]
[81a.1]གསུངས་སོ། །དེ་བཞིན་དུ་འགྲེལ་པ་བྱེད་པས་ཀྱང་རྟེན་ནམ་ཐར་པའི་ཚུལ་གཞན་ཡོད་དེ། འདི་ནི་རྟེན་ནམ་ཐར་པའི་ཚུལ་མ་ཡིན་ནོ་སྙམ་པའི་བསམ་པ་འདིས་ཕྱིར་སྤང་ན་ནི་སྤངས་པར་མི་འགྱུར་རོ། །དེ་ལྟ་བུ་ཅུང་ཟད་ཡོད་དོ་ཞེའམ། དེ་ལྟ་བུ་ཅུང་ཟད་ཀྱང་མེད་
[81a.2]དོ་ཞེའམ། དེ་ལྟ་བུ་ཡོད་ཀྱང་རུང་མེད་ཀྱང་རུང་སྟེ། རེ་ཞིག་བདག་ལ་ནི་དེ་དགོས་སོ་ཞེས་བྱ་བའམ། ཐར་པའི་ཚུལ་མེད་པ་ཉིད་དོ། ཚུལ་དེ་ཡོད་ཀྱང་རུང་མེད་ཀྱང་རུང་རེ་ཞིག་བདག་ལ་ནི་དེ་མི་དགོས་སོ་ཞེས་བྱ་བ་དེ་ལྟ་བུ་དག་ཏུ་རྣམ་པར་མི་རྟོག་ན་ནི་ཕྱིར་སྤངས་པ་ཡིན་ནོ་ཞེས་བཤད་
[81a.3]དོ། །ཡང་ན་ཉམས་པའི་བསམ་པའི་དབང་དུ་མཛད་ནས་དེ་སྐད་དུ་བཤད་དེ། དེ་བཞིན་དུ་ཞུ་བའི་གཞུང་ཁ་ཅིག་ལས། བཙུན་པ་དགེ་སློང་ལ་ཁྱོད་སུ་ཡིན་ཞེས་དྲིས་པ་ལས། ང་དགེ་སྦྱོང་མ་ཡིན་ནོ་ཞེས་སྨྲས་ན་བསླབ་པ་ཕུལ་བ་ཞེས་བགྱིའམ། ཉེ་བ་འཁོར་མ་ཡིན་ནོ། །ཅིར་
[81a.4]འགྱུར་ལགས། ཤེས་བཞིན་དུ་བརྫུན་སྨྲས་པས་ལྟུང་བྱེད་དུའོ། །དེ་བཞིན་དུ་དགེ་ཚུལ་མའོ་ཞེས་བགྱི་བ་དང་། དགེ་སློང་མའོ་ཞེས་བགྱི་བ་དང་། ཁྱིམ་ན་གནས་པའོ་ཞེས་བགྱི་བ་དང་། ཀུན་དུ་རྒྱུའོ་ཞེས་བགྱི་བ་དང་། གཞན་མུ་སྟེགས་ཅན་ནོ་ཞེས་བགྱི་བ་དང་། ཀླུའོ། །གནོད་
[81a.5]སྦྱིན་ནོ། །དྲི་ཟའོ། །མི་འམ་ཅིའོ། །ཡི་དྭགས་སོ། །ཤ་ཟའོ། །གྲུལ་བུམ་མོ་ཞེས་བགྱིས་ན་ཐམས་ཅད་དུ་བསླབ་པ་ཕུལ་བ་ཞེས་བགྱིའམ། ཉེ་བ་འཁོར་མ་ཡིན་ཏེ། འོན་ཀྱང་ཤེས་བཞིན་དུ་བརྫུན་སྨྲས་པས་ལྟུང་བྱེད་དུ་འགྱུར་རོ་ཞེས་བཤད་དོ། །དེ་བཞིན་དུ་རྣམ་པར་འབྱེད་
[81a.6]པ་ལས་ཀྱང་ཉམས་པའི་བསམ་པ་ཁོ་ནས་སྤངས་པ་ཡིན་པར་གསུངས་པ་ཡིན་ཏེ། འདི་སྐད་དུ་འདི་ལྟར་དགེ་སློང་དགའ་བར་གྱུར་ཀྱང་རུང་། མི་དགའ་ཡང་རུང་། བབས་པར་འདོད་ཀྱང་རུང་། དགེ་སློང་དོན་དུ་མི་གཉེར་བ་ཡང་རུང་། དགེ་སྦྱོང་གིས་གནོང་ཞིང་ངོ་ཚ་ནས་སྨོད་པར་བྱེད། རྣམ་
[81a.7]པར་སྨོད་པར་བྱེད་ཅིང་དགེ་སློང་གི་དྲུང་དུ་སོང་སྟེ་འདི་སྐད་ཅེས། ཚེ་དང་ལྡན་པ་དགོངས་ཤིག །བདག་མིང་འདི་ཞེས་བྱ་བ་བསླབ་པ་འབུལ་ལོ་ཞེས་སྨྲས་ན་ཞེས་བྱ་བ་ལ་སོགས་པ་འབྱུང་ངོ་། །ནག་མོས་ཕྱིར་སྤངས་པ་བཤད་མ་ཐག་པ་ཡང་འདིར་སྦྱར་བར་བྱ་སྟེ། དེ་བཞིན་དུ་འགྲེལ་པ་བྱེད་པས་
[81b]
[81b.1]ཀྱང་། འདི་ལ་ནི་ཉམས་པའི་བསམ་པ་དགོས་སོ་ཞེས་བྱ་བ་ལ་སོགས་པ་བཤད་དོ། །སྔོན་དུ་ཞེས་བྱ་བ་ལ་སོགས་པ་ལ་སྔོན་དུ་ཞེས་བྱ་བ་ནི་མི་ཚངས་པར་སྤྱོད་པ་སྤྱད་པའི་སྔོན་རོལ་དུ་སྟེ། སྔོན་དུ་སྨོས་པ་ནི་དེ་ལས་གཞན་པའི་བར་ཆད་ཀྱི་ཆོས་མེད་པ་བསྟན་པ་ཡིན་ནོ། །ལས་ཀྱི་
[81b.2]ཆོ་ག་ཡིས་ཞེས་བྱ་བ་ལ་སོགས་པ་ལ་ལས་ནི་གསོལ་བ་དང་བཞིའི་ལས་ཀྱིས་སོ། །ཆོ་གས་ཞེས་བྱ་བ་ནི་ཡང་དག་པའི་ཆོ་གས་ཏེ། དགེ་འདུན་དུ་ཚང་བ་དང་། ལས་བྱེད་པ་དགེ་སློང་ཉིད་ཡིན་པ་དང་། ཉན་པ་པོ་རྣམས་གོར་བཏུབ་པ་ཉིད་ཅེས་བྱ་བ་ལ་སོགས་པ་ཆོས་བཞིན་དུ་ཞེས་བྱ་
[81b.3]བའི་དོན་ཏོ། །ཆོ་ག་སྨོས་པ་ནི་ལས་ལེགས་པར་མ་བྱས་པ་བསལ་བའི་ཕྱིར་རོ། །ལེགས་པར་ཞེས་བྱ་བ་ནི་བསམ་པ་ཐག་པ་ནས་ཏེ་མྱ་ངན་ལས་འདས་པའི་བསམ་པ་ཅན་ལ་དགེ་སློང་གི་སྡོམ་པ་སྐྱེ་བའི་ཕྱིར་མྱ་ངན་ལས་འདས་པའི་བསམ་པས་ཞེས་བྱ་བའི་ཐ་ཚིག་གོ། །བསྙེན་པར་རྫོགས་
[81b.4]པར་བྱས་ཏེ་ཞེས་བྱ་བ་ནི་དགེ་སློང་གི་དངོས་པོ་བསྒྲུབ་པས་ཏེ་དགེ་སློང་གི་སྡོམ་པ་སྐྱེས་པའོ་ཞེས་བྱ་བའི་དོན་ཏོ། །འཁྲིག་འབྱུང་ཞེས་བྱ་བ་ལ་འཁྲིག་པ་ནི་ཟུང་སྟེ་ཕོ་དང་མོ་ཞེས་བྱ་བ་ཡིན་ནོ། །དེ་ལས་བྱུང་བ་ནི་འཁྲིག་འབྱུང་སྟེ། ཉོན་མོངས་པ་ཅན་གྱི་བདེ་བ་སྤྱོད་པ་ཡིན་ཏེ། བཅུག་པའི་
[81b.5]རེག་པ་བདག་གིར་བྱེད་པའི་མཚན་ཉིད་ཅེས་བྱ་བའི་ཐ་ཚིག་གོ། །ཕྱིས་ཞེས་བྱ་བ་ནི་འཁྲིག་པ་སྤྱོད་པའི་འོག་རོལ་དུའོ། །ཅིའི་ཕྱིར་ཞེས་བྱ་བ་ནི་རྒྱུ་གང་གི་ཕྱིར་རོ། །དགེ་སློང་མིན་ཞེས་བྱ་བ་ནི་ཕས་ཕམ་པར་འགྱུར་བར་བྱེད་པའོ། །མི་འདོད་ཅེས་བྱ་བ་ནི་མི་འགྱུར་བའོ། །འདི་ལ་
[81b.6]འདྲི་བའི་དོན་ནི་གང་ཞིག་ཡང་དག་པའི་ཆོ་གས་ལེགས་པར་བསྙེན་པར་རྫོགས་ཤིང་དགེ་སློང་གི་སྡོམ་པ་སྐྱེ་བ་ལ་ཕྱིས་མི་ཚངས་པར་སྤྱོད་པ་འཁྲིག་པ་བསྟེན་པ་དེ་དག་གོ། །འདི་ལྟར་ཕས་ཕམ་པར་འགྱུར་བ་སྤྱད་པས་དགེ་སློང་མ་ཡིན་པར་འགྱུར་རོ་ཞེས་བྱ་བ་ཐེ་ཚོམ་ཡང་མེད་པ་ཉིད་དེ།
[81b.7]འདི་ནི་ལེགས་པར་ཤེས་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་འདི་དགེ་སློང་ཉིད་དུ་གསུངས་པ་དེ་རྒྱུ་གང་གིས་ཡིན་པ་ཁོ་བོ་ལ་སྨྲོས་ཤིག་ཅེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། ལས་དང་པོ་བ་ལ་དགོངས་ནས་གསུངས་པའམ། ཡང་ན་སྨྱོན་པ་
[82a]
[82a.1]ལ་བསྟེན་པའམ། ཡང་ན་སེམས་འཁྲུགས་པ་ལ་དགོངས་པའམ། ཡང་ན་ཚོར་བས་ཉེན་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་
[82a.2]བས་ཉེན་པ་ལ་ཉེས་པ་མེད་དོ་ཞེས་བྱ་བ་ཡིན་ནོ། །རྣམ་པ་གཅིག་ཏུ་ན་འདི་ནི་བསླབ་པ་བྱིན་པ་ལ་དགོངས་ནས་གསུངས་པ་ཡིན་ཏེ། འདི་ལྟར་བསླབ་པ་བྱིན་པ་སྟེ་ཕས་ཕམ་པར་འགྱུར་བ་སྤྱད་པ་ཡིན་ཡང་དགེ་སློང་ཉིད་དེའི་སོ་ན་འདུག་པ་ཁོ་ན་སྟེ། འདི་ལྟར་དེ་ལ་ཡང་ཕས་ཕམ་པར་
[82a.3]འགྱུར་བ་དང་དགེ་འདུན་ལྷག་མ་ལ་སོགས་པའི་ལྟུང་བ་རྣམས་རྣམ་པར་གཞག་པའི་ཕྱིར་རོ། །དེ་བཞིན་དུ་འདིར་གཞུང་ནི། དགེ་སློང་ལ་མི་ཚངས་པར་སྤྱོད་པའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་ཏེ་ཞེས་བྱ་བ་ལ་སོགས་པ་
[82a.4]ལྟུང་བའི་རིགས་ལྔ་ཅི་རིགས་པར་བརྗོད་པར་བྱ་བ་ཡིན་ནོ། །དེ་བཞིན་དུ་འདི་ལ་མདོ་བྱེད་པས་ཀྱང་བསླབ་པ་བྱིན་པ་ནི་འདྲ་བ་ཉིད་དོ་ཞེས་བཤད་དོ། །ཡང་ན་རྨའི་སྒོ་ཉམས་པ་དག་ཏུ་མི་ཚངས་པར་སྤྱོད་པ་བྱེད་པ་ཐུགས་ལ་བཞག་ནས་དེ་སྐད་གསུངས་པ་ཡིན་ཏེ། འདི་ལ་ནི་ཉེས་པ་སྦོམ་
[82a.5]པོར་བསྟན་པའི་ཕྱིར་རོ། །དེ་བཞིན་དུ་འདིར་གཞུང་ནི། འདི་ལྟར་དགེ་སློང་བསྟེན་པ་འཁྲིག་པ་ལ་གཞོལ་བ་དང་། བསྟེན་པ་ལ་འབབ་པ་དང་། བསྟེན་པ་ལ་བབ་པའི་སེམས་སུ་གྱུར་ཅིང་། དེ་བསྟེན་པ་ལ་གཞོལ་བ་དང་། བསྟེན་པ་ལ་འབབ་པ་དང་། བསྟེན་པ་ལ་བབ་པའི་སེམས་
[82a.6]ཀྱིས་མིའི་བུད་མེད་གསོན་པ་ཉམས་པ་ལ་བར་ཆད་དང་བཅས་པས་བར་ཆད་དང་བཅས་པ་དང་། བར་ཆད་མེད་པས་བར་ཆད་མེད་པར་ཟག་བྱེད་དུ་ཟག་བྱེད་འཇུག་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་ཡིན་ནོ། །འདི་ལ་གཞུང་གཞན་ནི་བཙུན་པ་དགེ་སློང་མི་ཚངས་
[82a.7]པར་སྤྱོད་པས་ཕས་ཕམ་པར་འགྱུར་ཞིང་། འོན་ཀྱང་མི་ཚངས་པར་སྤྱོད་པ་བགྱིས་པས་ཕས་ཕམ་པར་འགྱུར་བའི་ལྟུང་བར་མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། གང་ཞིག་གསོན་པོ་ཉམས་པ་དང་ལྷན་ཅིག་མི་ཚངས་པར་སྤྱོད་པ་བྱེད་པ་
[82b]
[82b.1]དེ་ནི་ཕས་ཕམ་པར་འགྱུར་ལ། གང་ཞིག་གསོན་པོ་ཉམས་པ་དང་ལྷན་ཅིག་མི་ཚངས་པར་སྤྱོད་པ་བྱེད་པ་ལ་ནི་ཕས་ཕམ་པར་འགྱུར་བའི་ལྟུང་བར་མི་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། ཉམས་པ་དག་ལས་ནི་སྤོམ་པོ་ཞེས་བཤད་དོ། །ཡང་ན་དེ་ནི་བར་ཆད་
[82b.2]དང་བཅས་པར་མི་ཚངས་པར་སྤྱོད་པ་བྱེད་པའི་དབང་དུ་མཛད་ནས་གསུངས་པ་ཡིན་ཏེ། འདི་ལ་གཞུང་ནི་བཤད་མ་ཐག་པ་དེ་ཉིད་ཡིན་ནོ། །དེ་བཞིན་དུ་འདི་ཉིད་ལ་གཞུང་གཞན་ནི། བཙུན་པ་རེ་ཞིག་དགེ་སློང་གིས་གོས་སྟུག་པོའམ་ཕྱིང་བུས་དཀྲིས་ནས་འཇུག་པར་བགྱིད་ན་ཅིར་འགྱུར་
[82b.3]ལགས། ཉེས་པ་སྦོམ་པོར་རོ། །དེ་བཞིན་དུ་མདོ་བྱེད་པས་ཀྱང་། མཐའ་ཉིད་བརྗོད་པའི་གཡོགས་པ་ནི་བསྒྲིབས་པ་སྟེ་དེས་གཡོགས་པ་ལ་ཐམས་ཅད་ཀྱི་ཐམས་ཅད་དུ་རེག་པར་མི་འགྱུར་བ་མ་ཡིན་ནོ། །གཞན་གྱིས་གཡོགས་པ་ཉིད་ནི་མི་རེག་པར་འཇུག་པས་རྣམ་པར་བཤད་པ་
[82b.4]ཡིན་ནོ་ཞེས་བཤད་དོ། །ཡང་ན་མ་རེག་པར་བཅུག་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་བཤང་བའི་ལམ་མམ་གཅི་བའི་ལམ་མམ། ཁའི་ལམ་དུ་མ་རེག་པར་འཇུད་པར་བགྱིད་ན་ཅིར་འགྱུར་ལགས།
[82b.5]ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །ཡང་ན་བལྟབས་ཏེ་བཅུག་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་བལྟབས་ནས་འཇུད་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །དེ་
[82b.6]བཞིན་མདོ་བྱེད་པས་བལྟབས་པ་དང་མི་རེག་པར་བཅུག་པ་གཉིས་སོ་ཞེས་བཤད་དོ། །ཡང་ན་རྨའི་ཁ་གསུམ་གྱི་མཚམས་སྦྱར་བ་འཕྲོ་མངོན་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་བུད་མེད་ཕྱེད་དུ་བཙལ་བའི་ཚལ་
[82b.7]བ་གཉིས་སྦྱར་ནས་འཇུག་པར་བགྱིད་ན་ཅིར་འགྱུར་ལགས། གལ་ཏེ་འཕྲོ་མི་མངོན་ན་མཐར་འགྱུར་རོ། །འོན་ཏེ་འཕྲོ་མངོན་ན་ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་འདི་ལ་གཞུང་གཞན་ནི། བཙུན་པ་རེ་ཞིག་བུད་མེད་ཕྱེད་དུ་བཀུམས་པར་གྱུར་ཅིང་དེའི་རྨའི་སྒོ་གསུམ་པོ་དག་
[83a]
[83a.1]ཀྱང་ཉམས་པར་གྱུར་ལ། དེ་དག་ཀྱང་དགེ་སློང་གི་ཁམ་ཚད་དང་ཁམ་ཚད་དུ་འཕྲོ་སྦྱར་ནས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་བསྟན་པར་བྱ་བའི་དབུས་ཕྱེ་བའི་
[83a.2]མཚམས་མི་མངོན་པ་ལ་ཡང་ངོ་། །མངོན་པ་ལ་ནི་ཚིག་འོག་མར་འགྱུར་རོ་ཞེས་བཤད་དོ། །ཡང་ན་མགོ་བཅད་པ་དང་མི་ཚངས་པར་སྤྱོད་པ་བྱེད་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་བུད་མེད་མགོ་བཀུམས་པ་དང་ལྷན་ཅིག་
[83a.3]མི་ཚངས་པར་སྤྱོད་པ་འཁྲིག་པའི་ཆོས་བསྟེན་པར་གྱུར་ན་ཅིར་འགྱུར་ལགས། གལ་ཏེ་བཤང་བའི་ལམ་མམ་གཅི་བའི་ལམ་དུ་བསྟེན་པར་བྱེད་ན་མཐར་འགྱུར་རོ། །འོན་ཏེ་ཁའི་ལམ་མམ་མིད་པ་འམ་མཆན་ཁུང་དུ་བསྟེན་པར་བྱེད་ན་ཉེས་པ་སྦོམ་པོར་འགྱུར་རེ་ཞེས་བྱ་བ་ཡིན་ནོ། །དེ་བཞིན་
[83a.4]དུ་མདོ་བྱེད་པས་ཀྱང་མགོ་བཅད་པའི་ཁར་རོ་ཞེས་བཤད་དོ། །ཡང་ན་མཚམས་ཀྱི་ཕྱི་རོལ་དུ་མི་ཚངས་པར་སྤྱོད་པ་བྱེད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་སོའི་སླད་རོལ་གྱི་མཆུར་མི་ཚངས་པར་སྤྱོད་པ་འཁྲིག་པའི་ཆོས་
[83a.5]བསྟེན་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་མཆུ་གཉིས་ལའོ། །ཕྱི་རོལ་གྱི་མཚམས་ལ་ཐུག་པར་རོ་ཞེས་བཤད་དོ། །གང་ཞིག་དགེ་སློང་ཉིད་ཅེས་བྱ་བ་ལ་སོགས་པ་ལ། གང་ཞིག་ཅེས་བྱ་བ་ནི་སྤྱིར་བསྟན་པའོ། །དགེ་སློང་གི་
[83a.6]དངོས་པོ་ནི་དགེ་སློང་ཉིད་དོ། །དགེ་སློང་གི་སྒྲ་འཇུག་པའི་རྒྱུ་མཚན་ཞེས་བྱ་བའི་ཐ་ཚིག་སྟེ། གང་གི་དབང་གིས་འདི་དགེ་སློང་ཡིན་ནོ་ཞེས་ཐ་སྙད་འདོགས་པའོ་ཞེས་བྱ་བའི་དོན་ཏོ། །དེ་ལ་གནས་པ་ནི་རྣམ་པར་གནས་པ་སྟེ། དགེ་སློང་གི་སྡོམ་པ་སྐྱེས་པ་ཞེས་བྱ་བའི་ཐ་ཚིག་གོ། །འདོད་
[83a.7]པ་ལ་ཡང་བསྟེན་ཞེས་བྱ་བ་ནི་མི་ཚངས་པར་སྤྱོད་པའོ། །དེ་ལ་ཞེས་བྱ་བ་ནི་དགེ་སློང་ལའོ། །མཐའ་ནི་ཕས་ཕམ་པར་འགྱུར་བ་སྟེ། ལྟུང་བ་འདི་ནི་ཐ་མ་དང་། ཐ་མལ་པ་དང་། ཐ་ཆད་པ་དང་། མི་མཐུན་པ་དང་མི་འཕྲོད་པ་ཡིན་ནོ་ཞེས་འབྱུང་བའི་ཕྱིར་རོ། །མ་གསུངས་པ་ནི་བཀའ་
[83b]
[83b.1]མ་སྩལ་བའོ། །ཅིའི་ཕྱིར་ཞེས་བྱ་བ་ནི་རྒྱུ་གང་གི་ཕྱིར་རོ། །དྲི་ཡིས་ཞེས་བྱ་བ་ནི་རྨས་ཞེས་བྱ་བ་ཡིན་ནོ། །དེ་ནི་ཞེས་བྱ་བ་ནི་འདོད་པ་བསྟེན་པ་སྤྱད་པ་མཐར་མ་གསུངས་པའོ། །སྨྲོས་ཞེས་བྱ་བ་ནི་ཤོད་ཅིག་པའོ། །འདི་ལ་འདྲི་བའི་བསམ་པ་ནི་གང་ཞིག་དགེ་སློང་གི་སྡོམ་པ་ལེགས་པར་
[83b.2]སྐྱེས་ལ་མི་ཚངས་པར་སྤྱོད་པ་བྱེད་པ་དེ་ནི་ངེས་པར་ཕས་ཕམ་པར་འགྱུར་བའི་ལྟུང་བ་བྱུང་བ་ཡིན་ནོ་ཞེས་བྱ་བ་དེ་གོ་གསལ་བ་ཁོ་ནར་རྟོགས་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་ཕས་ཕམ་པར་མ་གསུངས་བ་དེ་ཁོ་བོ་ལ་རྒྱས་པར་རབ་ཏུ་སྟོན་ཅིག་ཅེས་བྱས་པ་འདི་
[83b.3]ཡིན་ནོ། །འདིར་ནི་སྤྱིར་མཐར་མ་གསུངས་མོད་ཀྱི། འོན་ཀྱང་ལ་ལར་ནི་ལྟུང་བ་མེད་པ། ལ་ལར་ནི་ཉེས་བྱས། ལ་ལར་ནི་ཉེས་པ་སྦོམ་པོར་གསུངས་ཏེ་ཅི་རིགས་པར་སྦྱར་རོ། །འདི་ལ་ལན་ནི་འདི་ཡིན་ཏེ། ལས་དང་པོ་པའི་དགེ་སློང་གི་དབང་དུ་མཛད་ནས་དེ་སྐད་གསུངས་པ་ཡིན་ནོ། །ཡང་
[83b.4]ན་སྨྱོན་པའམ། སེམས་འཁྲུགས་པའམ། ཚོར་བས་ཉེན་པའི་དབང་དུ་མཛད་པ་ཡིན་ཏེ། འདི་ལ་གཞུང་ནི་སྔ་མ་བཞིན་ནོ། །ཡང་ན་སྔར་ཕམ་པ་བྱུང་བའམ། རྐུ་ཐབས་སུ་གནས་པའམ། དང་པོ་ནས་མི་མཐུན་པ་ཅན་ནམ། ཟ་མ་འམ། དགེ་སློང་མ་སུན་ཕྱུང་བ་ལ་དགོངས་ནས་
[83b.5]གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་མིའི་བུད་མེད་དང་ལྷན་ཅིག་ཉམས་པར་བགྱིད་ལ། མཐར་མི་འགྱུར་བ་ལྟ་མཆིས་ལགས་སམ། ཡོད་དེ། སྔོན་ཕམ་པ་བྱུང་བའམ། རྐུ་ཐབས་སུ་གནས་པའམ། དང་པོ་ནས་མི་མཐུན་པ་ཅན་ནམ།
[83b.6]ཟ་མའམ། དགེ་སློང་མ་སུན་འབྱིན་པ་ཞིག་གིས་ཉམས་པར་བགྱིད་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་ཉམས་པ་དང་མ་སྐྱེས་པ་གཉིས་ལྟུང་བ་ལ་སྦྱོར་བ་ནི་ཉེས་བྱས་སོ་ཞེས་བཤད་དོ། །འདིར་ནི་བདག་ཉིད་དགེ་སློང་གི་ཚུལ་དུ་ཉེ་བར་སྟོན་པས་དགེ་སློང་ཉིད་
[83b.7]དུ་ཤེས་པར་བྱའི་ཁྱད་པར་དུ་ནི་མ་ཡིན་ནོ། །དེ་ཉིད་ཀྱི་ཕྱིར་འགྲེལ་པ་བྱེད་པས། གང་དུ་བདག་ཉིད་ཚུལ་དུ་ཉེ་བར་སྟོན་པ་དེ་ནི་དེ་དང་མཐུན་པ་མ་ཡིན་ཏེ་ཆགས་ན་དེ་ལ་ཉེས་བྱས་ཀྱི་ངོ་བོ་ཞེས་བཤད་དོ། །ཡང་ན་ཉམས་པའི་དགེ་སློང་གི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། འདི་
[84a]
[84a.1]ལ་ཡང་དགེ་སློང་ཉིད་ཀྱི་ཐ་སྙད་འདོགས་པ་སྟེ། དགེ་སློང་འདི་ཡང་ཕས་ཕམ་པར་གྱུར་པ་ཡིན་གྱི་གནས་པར་མི་བྱའོ་ཞེས་བྱ་བ་དང་། དེ་བཞིན་དུ་དགེ་སློང་ཚུལ་ཁྲིམས་འཆལ་པ་ཡིན། སྡིག་པའི་ཆོས་ཅན་ཡིན་ཞེས་བྱ་བ་དང་། དེ་བཞིན་དུ་དགེ་སྦྱོང་བཞི་སྟེ་ལྔ་པོ་
[84a.2]མེད་དོ་ཞེས་འབྱུང་ངོ་། །འདི་ཉིད་ལ་དགོངས་ནས། བུ་ལོན་ནོར་བཞིན་ཁ་ཅེ་རྣམས་འབྱུང་བ་ལ་ནི་གཉིས་སུ་འདོད་ཅེས་བཤད་དོ། །ཡང་ན་དེའི་རྨའི་སྒོ་ཉམས་པའི་དབང་དུ་མཛད་ནས་གསུངས་པའམ། བར་ཆད་དང་བཅས་པར་འཇུག་པ་ཞེས་བྱ་བ་དེའི་དབང་དུ་མཛད་པའམ། མ་རེག་
[84a.3]པར་འཇུད་པའམ། བལྟབས་ཏེ་འཇུག་པའམ། རྨའི་སྒོ་གསུམ་མཚམས་སྦྱར་བའམ། མགོ་བཅད་པར་རམ། མཚམས་ཀྱི་ཕྱི་རོལ་དུ་འཇུག་པ་ལ་དགོངས་པ་ཡིན་ཏེ། དེ་བཞིན་དུ་འདིར་གཞུང་ནི་ཚིག་ལེའུར་བྱས་པ་བཤད་མ་ཐག་པ་ལས་དགེ་སློང་སྨོས་པ་བསླབ་པ་བྱིན་པ་མ་གཏོགས་པ་རྣམས་
[84a.4]ཡིན་ནོ། །གཞུང་དེ་ཐམས་ཅད་ལ་ཡང་མི་ཚངས་པར་སྤྱད་པ་སྤྱོད་པ་ལ་མཐར་མ་གསུངས་ཀྱི། འོན་ཀྱང་ཉེས་པ་སྤོམ་པོར་གསུངས་པས་ཉེས་པ་སྦོམ་བོའི་སྐབས་ཀྱིས་ཀྱང་དྲི་བ་དང་ལན་དག་རུང་ངོ་། །དགེ་སློང་གཅིག་པུ་ཞེས་བྱ་བ་ལ་སོགས་པ་ལ། གཅིག་པུ་ཞེས་བྱ་བ་ནི་གྲོགས་མེད་པའོ། །
[84a.5]གནས་ནི་གནས་ལྔ་ལ་སོགས་པ་གནས་སོ། །གནས་ན་གྲོགས་དང་བཅས་པ་ཡོད་པས་གཅིག་པུ་ཞེས་བྱ་བ་སྨོས་སོ། །ཟླ་མེད་པར་ཞེས་བྱ་བ་ནི་ཟླ་གྲོགས་མེད་པ་སྟེ། ཟླ་ཞེས་བྱ་བའི་སྦྱོར་བ་ནི་འདིར་ཟླ་གྲོགས་ཀྱི་ཡུལ་ཅན་ཡིན་པར་བལྟ་བར་བྱའོ། །འདི་ལ་ཟླ་གྲོགས་མེད་པས་ན་ཟླ་མེད་པ་སྟེ་དེའོ། །
[84a.6]ཇི་ལྟ་བུ་ཞེས་བྱ་བ་ནི་དྲི་བའོ། །སྡོམ་བརྩོན་ཞེས་བྱ་བ་ནི་དགེ་སློང་ངོ་། །སོམས་ཏེ་ཞེས་བྱ་བ་ནི་གཟོབས་ཏེའོ། །འདི་ལ་ཕ་རོལ་པོའི་བསམ་པ་ནི་ཟླ་ལ་ལྟོས་ནས་མི་ཚངས་པར་སྤྱོད་པ་ལ་སོགས་པའི་ཕས་ཕམ་པར་འགྱུར་བ་བྱུང་ན། ཅི་དེ་གཅིག་པུ་ལ་དེ་འབྱུང་བ་གང་ཡིན་པ་སྲིད་པ་ཡོད་དམ་ཞེས་བྱ་
[84a.7]བདེ་ལེགས་པར་རྟོགས་ཏེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཟླ་དང་བཅས་པའི་མི་ཚངས་པར་སྤྱོད་པ་ལ་སོགས་པར་གཏོགས་པའི་སྦྱོར་བ་བྱེད་པའི་དབང་དུ་མཛད་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་
[84b]
[84b.1]གཅིག་པུ་སྡུམ་པ་ལ་ཞུགས་པ་ལ་མི་ཚངས་པར་སྤྱོད་པའི་རྐྱེན་གྱིས་མཐར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དཔེར་ན་མཚན་རིངས་དད་རྒྱབ་མཉེན་ལྟ་བུ་ཞེས་བྱ་བ་ཡིན་ཏེ། དེ་ལ་དོན་ནི་འདི་ཡིན་ཏེ། ཟླ་གྲོགས་སྐྱེས་པ་དང་བུད་མེད་ལ་སོགས་པ་དང་ལྷན་ཅིག་པ་
[84b.2]ལས་ཕས་ཕམ་པར་འགྱུར་བའི་རྣམ་པར་གཞག་པ་གང་ཡིན་པའི་ངེས་པ་དེ་ནི་མེད་ཀྱི། འོན་ཀྱང་གཅིག་པུ་ལ་ཡང་སྲིད་པ་ཉིད་དེ། དཔེར་ན་མཚན་རིངས་དང་རྒྱབ་མཉེན་ལྟ་བུའོ། །ཁྱིམ་བདག་གི་བུ་ཞིག་ཕོ་མཚན་ཚད་ལས་འདས་པར་གྱུར་པ་དང་གཞི་དེས་དེའི་གཉེན་རྣམས་ཀྱིས་
[84b.3]མཚན་རིངས་ཞེས་བྱ་བར་མིང་བཏགས་སོ། །རེ་ཞིག་ཅིག་ན་དེ་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཕོ་མཚན་དེ་རང་གི་བཤང་བའི་ལམ་དུ་བཅུག་སྟེ་རེག་པ་བདག་གིར་བྱས་སོ། །དེ་བཞིན་དུ་ཁྱིམ་བདག་གི་བུ་ཞིག་དཔེར་ན་རི་བོང་ངམ་བྱི་ལ་ལྟ་བུར་རྒྱབ་མཉེན་པོར་གྱུར་པ་དང་དེ་ལ་
[84b.4]བརྟེན་ནས་དེའི་མིང་རྒྱབ་མཉེན་དུ་བཏགས་སོ། །རེ་ཞིག་ཅིག་ན་དེ་ཡང་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་ནས་ཕོ་མཚན་ཁའི་ནང་དུ་བཅུག་ནས་རེག་པ་བདག་གིར་བྱས་སོ་ཞེས་བྱ་བ་འདི་རྒྱས་པར་རྣམ་པར་འབྱེད་པ་ལས་འབྱུང་ངོ་། །དེ་བཞིན་དུ་འདི་ཉིད་ལ་གཞུང་གཞན་ནི།
[84b.5]བཙུན་པ་དགེ་སློང་གཅིག་པུ་གཙུག་ལག་ཁང་དུ་ཞུགས་ལ་ཕས་ཕམ་པར་འགྱུར་བ་བཞི་སྤྱོད་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ་མི་ཚངས་པར་སྤྱོད་པའི་རྐྱེན་གྱིས་ཇི་ལྟ་བུ་ལགས། དཔེར་ན་མཚན་རིངས་དང་རྒྱབ་མཉེན་ལྟ་བུའོ། །
[84b.6]མ་བྱིན་པར་ལེན་པའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་སྦྱོར་བ་བྱས་ནས་གཙུག་ལག་ཁང་དུ་ཞུགས་པ་དང་དེའི་ཡང་བརྐུས་པ་ལྟ་བུའོ། །བཀུམས་པའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་གསོད་པའི་སྦྱོར་བ་བྱས་ནས་གཙུག་ལག་ཁང་དུ་ཞུགས་པ་དང་དེ་ཡང་
[84b.7]བསད་པ་ལྟ་བུའོ། །སྨྲ་བའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་འདི་སྐད་ཅེས་ང་ནི་དགྲ་བཅོམ་པ་སངས་རྒྱས་སོ་ཞེས་ཟེར་བ་ལྟ་བུའོ། །གང་གིས་ཡན་ལག་ལྔ་ལྡན་པར་ཞེས་བྱ་བ་ལ་སོགས་པ་ནི་དགེ་སློང་གང་གི་ཕས་ཕམ་པ་འབྱུང་བའི་རྒྱུ་ལྔའོ། །མ་བྱིན་པ་ལེན་པ་ཉིད་དང་། མ་
[85a]
[85a.1]ཤ་ཀ་ལྔ་ཉིད་དང་། རྐུ་སེམས་ཉིད་དང་། མིའི་འགྲོ་བས་བཟུང་བ་ཉིད་དང་། དེར་འདུ་ཤེས་པ་ཉིད་དང་ཞེས་བྱ་བ་དང་ལྡན་ཞིང་འབྱོར་པ་སྟེ། ཡན་ལག་ལྔ་ཞེས་སྨོས་པ་ནི་ཡན་ལག་གཅིག་མ་ཚང་ན་སྨད་པར་གསུངས་པ་དག་གོ། །གཞན་གྱི་ནོར་ནི་གཞན་སྐྱེས་པ་དང་།
[85a.2]བུད་མེད་དང་མ་ནིང་ལ་སོགས་པས་བདག་གིར་བྱས་པའི་ནོར་ཏེ་འདིས་ནི་རང་གི་ནོར་བསལ་ཏོ། །ནི་ཞེས་བྱ་བ་ནི་ཁྱད་པར་དུ་བྱའོ། །རྐུ་ཞེས་བྱ་བ་ནི་བླང་བ་བྱས་པའོ། །དེ་ལ་ཞེས་བྱ་བ་ནི་དགེ་སློང་ལའོ། །དེ་ནི་ཞེས་བྱ་བ་ནི་གཞན་གྱི་ནོར་རྐུ་བར་གཏོགས་པའི་ཕས་ཕམ་པར་འགྱུར་བར་མ་གསུངས་
[85a.3]པའོ། །གསལ་བར་སྨྲོས་ཞེས་བྱ་བར་སྦྱར་ཏེ། །གསལ་བར་ཞེས་བྱ་བ་ནི་གསལ་པོར་རོ། །དེ་ལ་དོན་ནི་འདི་ཡིན་ཏེ། བཅོམ་ལྡན་འདས་ཀྱིས་དགེ་སློང་གང་ཞིག་གཞན་གྱི་ནོར་གྱི་རིགས་པར་བྱིན་པ་ཉིད་ལ་སོགས་པ་ཡན་ལག་ལྔ་དང་ལྡན་པ་རྐུ་བ་དེ་ལ་ཕས་ཕམ་པར་འགྱུར་བར་གསུངས་
[85a.4]ན། འོན་ཀྱང་རྣམ་གྲངས་འགའ་ཞིག་གིས་དེ་ལ་ཕས་ཕམ་པར་འགྱུར་བར་མ་གསུངས་པ་དེ་ཁོ་བོ་ལ་ངེས་པར་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་གཞན་གྱི་དོན་དུ་རྐུ་བའི་སྐབས་ཀྱིས་གསུངས་པ་ཡིན་ནོ། །འདི་ལྟར་ཡན་ལག་ཐམས་ཅད་ཡོད་
[85a.5]ཀྱང་གཞན་གྱི་དོན་དུ་རྐུ་བ་ལ་ཉེས་པ་སྦོམ་པོར་གསུངས་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མ་སྨྲས་པར་གཞན་གྱི་དོན་དུ་རྐུ་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི་དགེ་སློང་གིས་དགེ་སློང་ཞིག་ལ་འདི་སྐད་
[85a.6]ཅེས་ཁྱོད་ཀྱིས་དགེ་སློང་ཆེ་གེ་མོ་ཞིག་གི་ཡོ་བྱད་དེ་ལྟ་བུ་དང་དེ་ལྟ་བུ་ཤེས་སམ། ཤེས་སོ། །སོང་ལ་དེ་རྐུས་ཤིག །གནས་ནས་གནས་སུ་སྤོགས་ཤིག་ཅེས་སྨྲས་ལ། གལ་ཏེ་རྐུ་བའི་སེམས་ཀྱིས་དེ་བརྐུས་རྫས་གནས་ནས་གནས་སུ་སྤོགས་ནས་བྱེད་པ་མཚུངས་པར་འགྱུར་རོ། །འོན་
[85a.7]ཏེ་དེ་འདི་སྙམ་དུ་འདི་ནི་ཁོ་བོའི་ཡིན་ནོ་སྙམ་ན་ལེན་པ་ལ་ཉེས་པ་མེད་དོ། །རྐུར་འཇུག་པ་གང་ཡིན་པ་དེ་ལ་ནི་དངོས་པོ་ཇི་ལྟ་བ་བཞིན་དུ་འགྱུར་རོ་ཞེས་བྱ་བ་ཡིན་ནོ། །ཡང་ན་བྱང་གི་སྒྲ་མི་སྙན་གྱི་གླིང་ནས་བརྐུས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་བྱང་གི་
[85b]
[85b.1]སྒྲ་མི་སྙན་གྱི་གླིང་ནས་བརྐུས་ན་ཅིར་འགྱུར་ལགས། ཉེ་བ་འཁོར་དེ་ན་མ་བྱིན་པར་ལེན་པ་ནི་མེད་དེ། གལ་ཏེ་དེར་རྐུ་བའི་སེམས་བསྐྱེད་ན་ནི་ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་ལས་ཀྱང་། བྱང་གི་སྒྲ་མི་སྙན་ན་ནི་ཡོངས་སུ་འཛིན་པ་མེད་པ་ཉིད་དོ། །དེ་ནི་རང་
[85b.2]གི་དང་འདྲའོ་ཞེས་བཤད་དོ། །ཡང་ན་ཕྱོགས་བཞིའི་དགེ་འདུན་གྱི་བརྐུས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་ལུང་ནི། བཙུན་པ་རེ་ཞིག་དགེ་སློང་གིས་ཕྱོགས་བཞིའི་དགེ་འདུན་གྱིས་མ་སྩལ་བ་བརྐུས་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་
[85b.3]ཡིན་ནོ། །དེ་བཞིན་དུ་མདོ་བྱེད་པས་ཀྱང་། བདག་པོ་ཐ་དད་པ་མ་ཡིན་པ་ནི་རང་གི་དང་འདྲའོ་ཞེས་བཤད་དོ། །ཡང་ན་འགྲོ་བ་གཞན་གྱི་ལ་བརྟེན་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། མི་མ་ལགས་པའི་མ་སྩལ་བ་ལ་མི་མ་ལགས་པའི་འདུ་ཤེས་ཀྱིས་བརྐུས་ན་
[85b.4]ཅིར་འགྱུར་ལགས། ཉེས་བྱས་སུའོ། །མི་མ་ལགས་པའི་མ་སྩལ་བ་ལ་མིའི་འདུ་ཤེས་ཀྱིས་བརྐུས་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་མིའི་རྒྱུད་ཀྱིས་ཡོངས་སུ་གཟུང་བའོ། །དེར་འདུ་ཤེས་པས་སོ་ཞེས་བཤད་དོ། །ཡང་ན་
[85b.5]ཉེས་བྱས་སུ་གསུངས་པ་ནི་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་གསུངས་པ་ཡིན་ཏེ། འདིར་ཡང་གཞུང་ནི་སྔ་མ་བཞིན་ནོ། །སྡོམ་བརྩོན་ཞེས་བྱ་བ་ལ་སོགས་པ་ལ་སྡོམ་བརྩོན་ནི་དགེ་སློང་ངོ་། །བློ་ལྡན་ཞེས་བྱ་བ་ནི་སྔ་ཕྱི་བརྟགས་པ་སྟེ་ཆེད་དུ་བསམས་ནས་ཞེས་བྱ་བའི་དོན་ཏོ། །
[85b.6]བློ་ལྡན་ཞེས་བྱ་བ་ནི་གྱི་ནར་བསླང་བ་སྩལ་བ་ཡིན་ནོ། །གྲངས་འདས་ཞེས་བྱ་བ་ནི་མ་ཤ་ཀ་ལྔ་ལས་ལྷག་པའི་ཚད་དང་ལྡན་པ་སྟེ་བརྒྱ་སྟོང་རི་བ་ཡང་ཞེས་བྱ་བའི་ཐ་ཚིག་གོ། །དེ་ཞེས་བྱ་བ་ནི་སྡོམ་བརྩོན་ནོ། །ཅི་སྟེ་ཞེས་བྱ་བ་ནི་དྲི་བའོ། །དེ་ནི་ཞེས་བྱ་བ་ནི་སྨྲས་མ་ཐག་པའི་དངོས་པོའོ། །མྱུར་དུ་
[85b.7]ཞེས་བྱ་བ་ནི་སྐྱེན་པར་རོ། །སྨྲོས་ཞེས་བྱ་བ་ནི་སྨྲོས་ཤིག་པའོ། །འདི་ལ་གཞན་གྱི་བསམ་པ་ནི་འདི་ཡིན་ཏེ། བརྒྱ་སྟོང་རི་བ་ཡང་རྐུ་ལ་ཡན་ལག་ཐམས་ཅད་ཀྱང་ཡོད་ན་གདོན་མི་ཟ་བར་ཕས་ཕམ་པར་འགྱུར་ན། འོན་ཀྱང་བཅོམ་ལྡན་འདས་ཀྱིས་སྐབས་འགའ་ཞིག་གིས་འདི་ཕས་ཕམ་པར་
[86a]
[86a.1]འགྱུར་བ་འབྱུང་བ་མ་གསུངས་པ་དེ་བདག་ལ་མ་ཐོགས་པར་སྨྲོས་ཤིག་ཅེས་བྱ་བའི་ཐ་ཚིག་གོ། །འདི་ལ་ལན་ནི་འདི་ཡིན་ཏེ། དེ་ནི་མ་ཤ་ཀ་རེ་རེ་ནས་བརྐུ་བ་ལ་བརྟེན་ནས་ཡིན་ནོ། །དེ་བཞིན་དུ་འདིར་གཞུང་ནི་བཙུན་པ་བཅོམ་ལྡན་འདས་ཀྱིས་མ་ཤ་ཀ་བརྐུས་ན་མཐར་འགྱུར་
[86a.2]རོ་ཞེས་བཀའ་སྩལ་པ་གང་ལགས་པ། བཙུན་པ་དགེ་སློང་གིས་མ་ཤ་ཀ་ལྔ་བརྐུས་ལ་མཐར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་མ་ཤ་ཀ་རེ་རེ་ནས་སམ། གཉིས་གཉིས་སམ། གསུམ་གསུམ་མམ། བཞི་བཞི་རྐུ་ནའོ། །དེ་བཞིན་དུ་མདོ་བྱེད་པས་ཀྱང་། ཕུང་
[86a.3]པོ་ལས་རྐུན་ལན་རེ་རེ་ཞིང་བླངས་པ་ཐ་དད་དོ་ཞེས་བཤད་དོ། །ཡང་ན་བོར་བར་འདུ་ཤེས་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་མ་ཤ་ཀ་ལྔ་རྐུ་ན་མཐར་འགྱུར་རོ་ཞེས་བཀའ་སྩལ་པ། གང་ལགས་པ། བཙུན་པ་དགེ་
[86a.4]སློང་གིས་མ་ཤ་ཀ་སྟོང་བརྐུས་ལ་མཐར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་བོར་བའི་འདུ་ཤེས་ཀྱིས་རྐུ་ནའོ། །བོར་བའི་འདུ་ཤེས་ཞེས་བྱ་བ་ནི་འདིར་ཡོངས་སུ་བཏང་བའི་འདུ་ཤེས་དང་ངེས་པར་མ་བཏང་བའི་འདུ་ཤེས་ཞེས་བྱ་བའི་ཐ་ཚིག་གོ། །སྡོམ་བརྩོན་རིན་
[86a.5]ཐང་ཚང་བའི་ཞེས་བྱ་བ་ལ་སོགས་པ་ལ། རིན་ཐང་ཚང་བ་ནི་མ་ཤ་ཀ་ལྔ་ལ་སོགས་པའི་ཚད་གསུངས་པའོ། །ཡོ་བྱད་ནི་གསེར་དང་དངུལ་ལ་སོགས་པ་སྟེ། འདིས་འཚོ་བ་སྦྱོར་བར་བྱེད། སྐྱོང་བར་བྱེད་པའི་ཕྱིར་རོ། །གནས་ནས་ཞེས་བྱ་བ་ནི་བཞག་པའི་ཕྱོགས་ནས་ཏེ། འདིར་
[86a.6]བཞག་པས་ན་གནས་སོ། །མ་སྤགས་པ་ཞེས་བྱ་བ་ནི་མ་བསྐྱོད་པར་རོ། །འགྱུར་བ་ནི་ཐོབ་སྟེ་མཐའི་ལྟུང་བ་དང་ལྡན་པར་འགྱུར་རོ། །ཀྱེ་ཞེས་བྱ་བ་ནི་བོད་པའོ། །ངེས་པར་སྨྲོས་ཞེས་བྱ་བར་སྦྱར་ཏེ། ངེས་པར་ཞེས་བྱ་བར་སྦྱར་བ་ནི་གཏན་ལ་ཕབ་པར་རོ། །ལེགས་པ་ཞེས་བྱ་བ་ནི་བཟང་
[86a.7]པོར་ཏེ་སྔ་ཕྱི་མི་འགལ་བར་ཞེས་བྱ་བའི་ཐ་ཚིག་གོ། །འདི་ལ་གཞན་གྱི་བསམ་པ་ནི་གསེར་དང་དངུལ་ལ་སོགས་པའི་ནོར་མ་ཤ་ཀ་ལྔ་རི་བ་གནས་ནས་སྤགས་པ་ཙམ་ཁོ་ནས་ཕས་ཕམ་པར་འགྱུར་ན། འོན་ཀྱང་བཅོམ་ལྡན་འདས་ཀྱིས་གནས་ནས་ཀྱང་མ་སྤགས་པ་འདི་ལ་ཕས་ཕམ་པར་འགྱུར་བ་གསུངས་
[86b]
[86b.1]པ་དེ་ཀྱེ་དགེ་སློང་ཁོ་བོ་ལ་ངེས་པར་ཁ་ན་མ་ཐོ་བ་མེད་པར་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ས་ཕྱོགས་ནོར་དང་བཅས་ཏེ་སྤགས་པ་ཐུགས་ལ་བཞག་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་ཡོ་བྱད་རིན་ཐང་
[86b.2]ཚང་བ་གནས་ནས་སྤགས་ན་མཐར་འགྱུར་རོ་ཞེས་བཀའ་སྩལ་པ་གང་ལགས་པ། བཙུན་པ་དགེ་སློང་གིས་ཡོ་བྱད་རིན་ཐང་ཚང་བ་གནས་ནས་མ་སྤགས་ལ་མཐར་ཡང་འགྱུར་བ་ལྟ་མཆིས་ལགས་སམ། ཡོད་དེ། དཔེར་ན་གནས་ཁང་པ་ན་འདུག་པ་དང་བཅས་ཏེ་བརྐུས་པ་ལྟ་བུའོ། །གང་དུ་བཞག་
[86b.3]པར་འགྱུར་བའི་གནས་ནས་བརྐུས་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། གནས་དང་བཅས་པ་ཡང་མ་ཡིན་ནོ་ཞེས་བཤད་དོ། །སྡོམ་བརྩོན་རྐུ་བའི་སེམས་ཀྱིས་ཞེས་བྱ་བ་ལ་སོགས་པ་ལ། རྐུ་བའི་སེམས་ཀྱིས་ཞེས་བྱ་བ་ནི་བརྐུ་བར་བྱ་སེམས་ཀྱིས་སོ། །མ་བྱིན་པ་
[86b.4]ཞེས་བྱ་བ་ནི་བྱིན་པར་མ་གྱུར་པ་སྟེ་གཞན་གྱི་རྫས་ཞེས་བྱ་བའི་ཐ་ཚིག་གོ། །སྤགས་པ་ལ་ཞེས་བྱ་བ་ནི་བསྐྱོད་པ་ལའོ། །རྒྱུ་ཞེས་བྱ་བ་ནི་གཏན་ཚིགས་སོ། །འདི་ལ་འདྲིའོ་བསམ་པ་ནི་འདི་ཡིན་ཏེ། གཞན་གྱི་ནོར་གནས་ནས་སྤགས་པའི་དགེ་སློང་ཁོ་ན་ཕས་ཕམ་པར་འགྱུར་བར་རྣམ་པར་བཞག་
[86b.5]ན། འོན་ཀྱང་རྣམ་པ་འགའ་ཞིག་གིས་འདི་ལ་ཕམ་པར་མ་གསུངས་པ་དེ་ཁོ་བོ་ལ་སྒྱུ་ཐབས་བརྗོད་པར་གྱིས་ཤིག་ཅེས་བྱ་བའི་དོན་ཏོ། །འདི་ལ་དོན་ནི་འདི་ཡིན་ཏེ། དེ་ནི་ཕྱོགས་གཅིག་གནས་ནས་མ་འཕགས་པའི་རྐུ་བ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི་
[86b.6]བཙུན་པ་བཅོམ་ལྡན་འདས་ཀྱིས་དགེ་སློང་གིས་ཡོ་བྱད་རིན་ཐང་ཚང་བ་གནས་ནས་གནས་སུ་སྦེད་པར་བྱེད་ན་མཐར་འགྱུར་རོ་ཞེས་བཀའ་སྩལ་པ་གང་ལགས་པ། དགེ་སློང་གི་ཡོ་བྱད་རིན་ཐང་ཚང་བ་ཤིན་ཏུ་རིང་བར་འཚལ་ཀྱང་མཐར་མ་འགྱུར་བ་ལྟ་མཆིས་ལགས་སམ། ཡོད་དེ། དགེ་སློང་གི་
[86b.7]ཡོ་བྱད་རིན་ཐང་ཚང་བ་མཐའ་གཅིག་ནས་བཟུང་སྟེ་ཤིན་ཏུ་ཐག་རིང་པོར་དྲངས་ཀྱང་མཐའ་ཅིག་ཤོས་གནས་དེ་ནས་མ་འཕགས་ན་ཉེས་པ་སྤོམ་བོར་འགྱུར་རོ་ཞེས་བྱ་བ་ཡིན་ནོ། །འདི་ལ་མདོ་བྱེད་པས་ཀྱང་། ཕྱོགས་གཅིག་གནས་ནས་མ་འཕགས་པ་ཡང་མ་ཡིན་ནོ། །བཤལ་བ་ལ་ནི་ངོས་
[87a]
[87a.1]ཀྱི་གཞིའི་མཚམས་ལས་ངོས་ཅིག་ཤོས་འདས་ནའོ་ཞེས་བཤད་དོ། །དགེ་སློང་ཚུལ་ཁྲིམས་ལྡན་པ་ཡིས། །ཞེས་བྱ་བ་ལ་སོགས་པ་ལ། ཚུལ་ཁྲིམས་ལྡན་པ་ནི་ཕས་ཕམ་པར་འགྱུར་བ་མ་བྱུང་བ་སྟེ། ཚུལ་ཁྲིམས་དང་ལྡན་པ་སྨོས་པ་ནི་ཚུལ་ཁྲིམས་འཆལ་པ་
[87a.2]ལ་སོགས་པ་བསལ་བའི་ཕྱིར་རོ། །ཡན་ལག་ལྔ་ལྡན་ཞེས་བྱ་བ་ནི་མ་བྱིན་པ་ཉིད་ལ་སོགས་པ་ཡན་ལག་ལྔ་དང་ལྡན་པ་སྟེ། ཡན་ལག་ལྔ་དང་བཅས་པར་ཞེས་བྱ་བའི་ཐ་ཚིག་གོ། །ལྟུང་བ་མེད་པར་ཞེས་བྱ་བ་ནི་ལྟུང་བ་ཡོང་པ་མ་ཡིན་པའོ། །ཉེས་པ་མེད་པ་ཞེས་བྱ་བའི་དོན་ཏེ་འདི་ལ་ཉེས་
[87a.3]པ་མེད་པས་སོ། །ཐེ་ཚོམ་ནི་སོམ་ཉིའོ། །ཆོད་ཅེས་བྱ་བ་ནི་སོལ་ཅིག་པའོ། །འདི་ལ་དོན་ནི་གལ་ཏེ་དགེ་སློང་བསྙེན་པར་རྫོགས་པ་དང་བཅས་ཤིང་མ་ཉམས་པས་གཞན་གྱི་ནོར་རྫས་མ་བྱིན་པ་ཉིད་ལ་སོགས་པ་ཡན་ལག་ལྔ་དང་ལྡན་པར་བརྐུས་ན་དེའི་ཚེ་དེ་ལ་གདོན་མི་ཟ་བར་ཕས་ཕམ་པར་འགྱུར་བ་
[87a.4]འབྱུང་ན། འོན་ཀྱང་བཅོམ་ལྡན་འདས་ཀྱིས་མ་བྱིན་པར་ལེན་པ་དེ་ལྟ་བུ་ལ་ལྟུང་བ་འགའ་ཡང་མ་གསུངས་པ་ཞེས་བྱ་བ་ནི་བདག་གི་ཐེ་ཚོམ་ཡུན་རིང་པོ་ནས་སོལ་ཅིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ལས་དང་པོ་པ་དང་། སྨྱོན་པ་དང་། སེམས་འཁྲུགས་པ་དང་། ཚོར་བས་
[87a.5]ཉེན་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། ལས་དང་པོ་བ་དང་། སྨྱོས་པ་དངང་། སེམས་འཁྲུགས་པ་དང་། ཚོར་བས་ཉེན་པ་ལ་ལྟུང་བ་མེད་དོ་ཞེས་བྱ་བ་ཡིན་ནོ། །ཡང་ན་དེ་ནི་ཆོས་རྐུ་བ་ལ་བརྟེན་ནས་བསྟན་པ་ཡིན་ཏེ། དེ་བཞིན་དུ་འདིར་ནི། བཙུན་པ་རྐུ་བ་དུ་ཞིག་མཆིས་ལགས།
[87a.6]ཉེ་བ་འཁོར་དྲུག་སྟེ། བཅོམ་ནས་རྐུ་བ་དང་། ནན་གྱིས་རྐུ་བ་དང་། ཕྱིར་སྦྱིན་པ་རྐུ་བ་དང་། བཞག་པ་རྐུ་བ་དང་། གཏམས་པ་རྐུ་བ་དང་། ཆོས་རྐུ་བའོ། །བཙུན་པ་བཅོམ་ལྡན་འདས་ཀྱིས་རྐུ་བ་དྲུག་གསུངས་པ་གང་དག་ལགས་པ་དེ་དག་ལས་གང་གིས་མཐར་འགྱུར་ལགས། ཉེ་བ་འཁོར་ཆོས་རྐུ་བ་མ་གཏོགས་པ་ལྷག་མ་
[87a.7]རྣམས་ཀྱིས་མཐར་འགྱུར་རོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་། དཔེ་བྲི་བ་ལ་ནི་ཉེས་པ་མེད་པ་ཉིད་དོ་ཞེས་བཤད་དོ། །ཡང་ན་ཕས་ཕམ་པར་འགྱུར་བའི་ལྟུང་བ་མེད་པ་ལ་དགོངས་ནས་ལྟུང་བ་མེད་པར་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་མ་སྩལ་
[87b]
[87b.1]བ་བླངས་པས་ཕས་ཕམ་པར་འགྱུར་ཞིང་། འོན་ཀྱང་མ་སྩལ་བར་བླངས་ན་ཕས་ཕམ་པར་འགྱུར་བའི་ལྟུང་བར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གང་གིས་མི་རྣམས་ཀྱི་ཡོ་བྱད་རིན་ཐང་ཚང་བ་མ་བྱིན་པར་བླངས་པ་དེ་ནི་ཕས་ཕམ་པར་འགྱུར་རོ། །གང་གིས་མི་མ་ཡིན་པ་རྣམས་
[87b.2]ཀྱི་ཡོ་བྱད་རིན་ཐང་ཚང་བ་མ་བྱིན་པར་བླངས་པ་དེ་ལ་ནི་ཕས་ཕམ་པའི་ལྟུང་བར་མི་འགྱུར་རོ། །འདི་ལ་མདོ་བྱེད་པས་ཀྱང་། མིའི་རྒྱུད་ཀྱིས་ཡོངས་སུ་བཟུང་བའོ་ཞེས་བཤད་དོ། །དུད་འགྲོའི་མངལ་ན་ཞེས་བྱ་བ་ལ་སོགས་པ་ལ། དུད་འགྲོའི་ཞེས་བྱ་བ་ནི་དུད་འགྲོའི་སྐྱེ་གནས་སུ་གཏོགས་པ་ཕྱུགས་
[87b.3]ལ་སོགས་པ་ཞེས་བྱ་བའི་དོན་ཏོ། །མངལ་ན་གནས་པ་ཞེས་བྱ་བ་ནི་མངལ་ན་འདུག་པའོ། །བུ་ཞེས་བྱ་བ་ནི་བུ་ཆགས་པ་ལ་སོགས་པའོ། །གསད་སེམས་ཀྱིས་ཞེས་བྱ་བ་ནི་གསོད་པའི་བསམ་པས་སོ། །གསད་ན་ཞེས་བྱ་བ་ནི་བཅོམ་ནའོ། །ན་ཞེས་བྱ་བ་ནི་དོན་གཞན་ཉེ་བར་བསྟན་པའི་ཕྱིར་ཏེ་དེས་
[87b.4]ན་གསད་པར་གྱུར་ན་ཞེས་བྱ་བའི་དོན་ཏོ། །ཐུབ་པ་ཞེས་བྱ་བ་ནི་ཉོན་མོངས་པས་བྱས་པའི་བརྗོད་པ་མི་མངའ་བའི་ཕྱིར་ཏེ་དེས་སོ། །དེ་ཉིད་མཁྱེན་པ་ཡིས་ཞེས་བྱ་བ་ནི་བླང་བ་དང་དོར་བར་བྱ་བའི་དེ་ཁོ་ན་ཉིད་ཐབས་དང་བཅས་པ་མཁྱེན་པས་དེ་ཐམས་ཅད་མཁྱེན་པ་ཞེས་བྱ་བའི་ཐ་ཚིག་གོ། །འདི་ལ་འདྲི་བའི་དོན་
[87b.5]ནི་བཅོམ་ལྡན་འདས་ནི་ཁོ་བོ་ཅག་ལ་དུད་འགྲོའི་འདུ་ཤེས་ཀྱིས་སྲོག་དང་བྲལ་བའི་བསམ་པས་དུད་འགྲོའི་འགྲོ་བ་པ་གསོད་ཅིང་སྲོག་དང་ཡང་བྲལ་ན་ལྟུང་བྱེད་དུ་འགྱུར་རོ་ཞེས་བསྟན་ལ། འོན་ཀྱང་བཅོམ་ལྡན་འདས་ཀྱིས་དེ་ལ་ཕས་ཕམ་པར་གསུངས་པ་དེ་ཇི་ལྟ་བུ་ཡིན་པ་དེ་ཁོ་བོ་ལ་སྨྲོས་ཤིག་ཅེས་བྱ་བ་
[87b.6]འདི་ཡིན་ནོ། །འདི་ལ་ལན་ནི་འདི་ཡིན་ཏེ། དུད་འགྲོའི་མངལ་ན་མིའི་འགྲོ་བ་པའི་བུ་ཡོད་པ་བསད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དུད་འགྲོའི་སྐྱེ་གནས་སུ་གཏོགས་པའི་བུད་མེད་ཀྱི་མངལ་ན་མཆིས་པའི་མི་བཀུམས་
[87b.7]ན་ཅིར་འགྱུར་ལགས། མཐར་འགྱུར་རོ་ཞེས་བྱ་བ་ཡིན་ནོ། །སྡོམ་བརྩོན་ཞེས་བྱ་བ་ལ་སོགས་པ་ལ། གསད་པའི་སེམས་ལྡན་གྱིས་ཞེས་བྱ་བ་ནི་སྲོག་བཅད་པའི་བསམ་པས་སོ། །མིའི་ཞེས་བྱ་བ་ནི་མིའི་འགྲོ་བར་གཏོགས་པའོ། །ལྟུང་བྱེད་པ་ཞེས་བྱ་བ་ནི་གསོད་པར་བྱེད་པ་སྟེ་མངལ་རླུགས་པ་
[88a]
[88a.1]ལ་སོགས་པའི་སྦྱོར་བས་གསོད་པར་བྱེད་པ་ཞེས་པའི་ཐ་ཚིག་གོ། །གལ་ཏེ་ཞེས་བྱ་བ་ནི་ཇི་སྟེའོ། །མཐུ་ཡོད་ཅེས་བྱ་བ་ནི་ནུས་པ་ཡོད་ནའོ། །འདི་ལ་བསྡུས་པའི་དོན་ནི་དགེ་སློང་གིས་མིའི་འགྲོ་བར་སྐྱེས་པའི་བུད་མེད་ཀྱི་མངལ་ལྟུང་བར་བྱེད་ན་ཕས་ཕམ་པར་འགྱུར་
[88a.2]རོ་ཞེས་བྱ་བ་ནི་ལེགས་པར་གྲགས་ན། འོན་ཀྱང་ལ་ལར་འདི་ལ་ཕས་ཕམ་པར་མ་གསུངས་སོ་ཞེས་པ་འདི་ལ་གལ་ཏེ་ཁྱོད་ལ་སྨྲ་བའི་ནུས་པ་ཞིག་ཡོད་ན་དེ་ཁོ་བོ་ལ་ལན་ཐོབ་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་མིའི་འགྲོ་བ་པའི་བུད་མེད་ཀྱི་མངལ་ན་དུད་འགྲོའི་
[88a.3]སྐྱེ་གནས་པའི་བུ་ཡོད་པ་བསད་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མིའི་བུད་མེད་ཀྱི་མངལ་ན་དུད་འགྲོའི་སྐྱེ་གནས་སུ་གཏོགས་པའི་བུ་མཆིས་པ་གསོད་པར་བགྱིད་ན་ཅིར་འགྱུར་ལགས། ལྟུང་བྱེད་དུའོ་ཞེས་བྱ་བ་ཡིན་ནོ། །ཕ་མ་
[88a.4]བསམས་བཞིན་བསད་པ་ལ་ཞེས་བྱ་བ་ལ་སོགས་པ་ལ། མནར་མེད་པ་ཞེས་བྱ་བ་ནི་མནར་མེད་པའི་དམྱལ་བར་འགྲོ་བའི་མཚམས་མེད་པ་བྱེད་པ་ཞེས་བྱ་བའི་ཐ་ཚིག་སྟེ། འདི་ལ་བདེ་བར་སྣང་བའི་བར་སྐབས་མེད་པས་སོ་ཞེས་བྱ་བ་ནི་བཤད་མ་ཐག་པ་སྐད་དུའོ། །མདུན་དུ་ཞེས་བྱ་བ་ནི་མངོན་སུམ་
[88a.5]དུའོ། །འདི་ལ་བསྡུས་པའི་དོན་ནི་བློ་སྔོན་དུ་བཏང་སྟེ་ཕ་དང་མ་བསད་ན་གདོན་མི་ཟ་བར་ཕས་ཕམ་པ་དང་མཚམས་མེད་པར་འགྱུར་ན། འོན་ཀྱང་བཅོམ་ལྡན་འདས་ཀྱིས་ཕས་ཕམ་པར་འགྱུར་བ་ཡང་མ་གསུངས་ལ་མཚམས་མེད་པར་ཡང་མ་གསུངས་སོ་ཞེས་བྱ་བ་འདི་ལ་ཁོ་བོ་ལ་རྒྱུ་བརྗོད་པར་བྱའོ་
[88a.6]ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཕ་མ་དུད་འགྲོའི་སྐྱེ་གནས་སུ་གཏོགས་པ་བསད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་ལུང་ནི། བཙུན་པ་དགེ་སློང་གིས་ཕ་མ་བཀུམས་ལ་མཐར་ཡང་མི་འགྱུར་མཚམས་མ་མཆིས་པའི་ཁ་ན་མ་ཐོ་བས་ཀྱང་རེག་
[88a.7]པར་མི་འགྱུར་བ་ལྟ་མཆིས་ལགས་སམ། ཡོད་དེ། གང་གིས་ཕ་མ་དུད་འགྲོའི་སྐྱེ་གནས་སུ་གཏོགས་པ་དག་ཡིན་ནའོ། །དེ་བཞིན་དུ་མདོ་བྱེད་པས་ཀྱང་། མི་མ་ཡིན་པའི་འགྲོ་བ་པ་གཉིས་ནི་མ་ཡིན་ནོ། །དེ་གཉིས་ལས་མཚམས་མེད་པར་མི་འགྱུར་རོ་ཞེས་བཤད་དོ། །ཡང་ན་སྐྱེད་
[88b]
[88b.1]པར་བྱེད་པ་མ་ཡིན་པའི་ཕ་མ་དག་ལ་དགོངས་ནས་དེ་སྐད་དུ་བཤད་པ་ཡིན་ཏེ། དེ་བཞིན་དུ་འདིར་ལུང་ནི། བཙུན་པ་མས་མ་བསྐྱེད་ལ་གཞན་གྱིས་ནི་བསྐྱེད་ན་གང་ཞིག་བཀུམས་པས་མཐར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བས་ཀྱང་རེག་པར་འགྱུར་ལགས། སྐྱེད་པར་བྱེད་པ་གང་ཡིན་པའོ་
[88b.2]ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། དེ་ནི་སྐྱེད་པར་བྱེད་པ་གཉིས་ལས་ཏེ་ཞེས་བཤད་དོ། །ཡང་ན་ཟག་པ་དང་བཅས་པའི་ལས་ཀྱིས་སྲིད་པ་དང་སྲེད་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཕ་བཀུམས་ལ་མཐར་
[88b.3]ཡང་མི་འགྱུར། མཚམས་མ་མཆིས་པའི་ཁ་ན་མ་ཐོ་བས་རེག་པར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། ཟག་པ་དང་བཅས་པའི་ལས་ཀྱིས་སྲིད་པ་བསད་ནའོ། །ཉེ་བ་འཁོར་ཟག་པ་དང་བཅས་པའི་ལས་ཀྱིས་སྲིད་པ་ནི་མངོན་པར་བསྒྲུབ་པའི་དོན་གྱིས་ཕ་ཞེས་བྱའོ། །བཙུན་
[88b.4]པ་དགེ་སློང་གིས་མ་བཀུམས་ལ་མཐར་ཡང་མི་འགྱུར་མཚམས་མ་མཆིས་པའི་ཁ་ན་མ་ཐོ་བས་རེག་པར་ཡང་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་སྲེད་པ་བསད་ནའོ། །ཉེ་བ་འཁོར་སྲེད་པ་ནི་སྐྱེད་པའི་དོན་གྱིས་མ་ཞེས་བྱའོ་ཞེས་བྱ་བ་ལ་སོགས་པ་ཡིན་ནོ། །དོན་འདི་ནི་བཤད་མོད་
[88b.5]ཀྱི་ཕས་ཕམ་པར་འགྱུར་བའི་སྐབས་ཀྱིས་ཡང་བཤད་དོ། །བརྡ་ཕྲད་མདུན་དུ་ཞེས་བྱ་བ་ལ་སོགས་པ་ལ་བརྡ་སྤྲད་མདུན་ཞེས་བྱ་བ་ནི་དོན་གོ་བའི་མངོན་སུམ་དུ་སྟེ། བརྡ་ཕྲད་པ་ཞེས་སྨོས་པ་ནི། །བརྫུན་ཚིག་འདུ་ཤེས་གཞན་བསྒྱུར་བས། །ཚིག་དོན་མངོན་པར་གོ་བའོ། །ཞེས་འབྱུང་བའི་བརྡ་
[88b.6]མི་ཕྲད་པའི་དྲུང་དུ་ནི་ན་སྨད་པར་བཤད་པའི་ཕྱིར། སངས་རྒྱས་ཞེས་བྱ་བ་ནི་འདས་པ་དང་མ་འོངས་པ་དང་ད་ལྟར་བྱུང་བའི་དོན་ལག་མཐིལ་དུ་སྐྱུ་རུ་ར་བཞག་པ་བཞིན་གསལ་བར་མཁྱེན་པའི་ཕྱིར་རོ། །དགྲ་བཅོམ་པ་ནི་ཉོན་མོངས་པའི་དགྲ་བཅོམ་པའི་ཕྱིར་དང་། འགྲོ་བ་མཐའ་དག་གིས་མཆོད་པར་འོས་
[88b.7]པའི་ཕྱིར་དང་། མི་སྐྱེ་བའི་ཆོས་ཅན་གྱི་ཕྱིར་རོ། །སྟོན་པ་ནི་ཕན་པ་དང་མི་ཕན་པ་ཉེ་བར་སྟོན་པའི་ཕྱིར་རོ། །དོན་དུ་གཉེར་གྱིས་ཞེས་བྱ་བ་ནི་བཅོལ་གྱིས་ཞེས་བྱ་བའོ། །དེས་ན་ཚིག་གི་དོན་ནི་གང་གི་ཚེ་དགེ་སློང་གིས་བརྡ་ཕྲད་པའི་མདུན་དུ་ང་ནི་སངས་རྒྱས་སོ། །ང་ནི་དགྲ་བཅོམ་པའོ། །ང་ནི་སྟོན་པའོ་
[89a]
[89a.1]ཞེས་སྨྲས་པ་དེའི་ཚེ་དེ་ལ་གདོན་མི་ཟ་བར་ཕས་ཕམ་པར་འགྱུར་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་དེས་ཕས་ཕམ་པར་འགྱུར་བ་མ་ཡིན་པར་གསུངས་པ་དེ་ཇི་ལྟ་བུ་ཡིན་པ་དེ་ཁོ་བོ་ལ་ཇི་ལྟ་བ་བཞིན་དུ་སྨྲོས་ཤིག་ཅེས་བྱ་བ་འདི་ཡིན་ནོ། །
[89a.2]འདི་ལ་ལན་ནི་འདི་ཡིན་ཏེ། མིང་མཐུན་པའི་དོན་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་འདི་སྐད་དུ་སངས་རྒྱས་ཡིན་ནོ་ཞེས་སྨྲས་ན་ཅིར་འགྱུར་ལགས། གལ་ཏེ་སྡིག་པ་མི་དགེ་བའི་ཆོས་རྣམས་རྟོགས་པ་ཉིད་དང་།
[89a.3]རྟོགས་པར་བྱེད་པ་ཉིད་ལ་བསམས་ནས་ལུང་སྟོན་ན་ནི་ཉེས་པ་སྦོམ་པོར་འགྱུར་རོ། །འོན་ཏེ་སངས་རྒྱས་ཀྱི་ཆོས་མེད་པ་ལུང་སྟོན་པར་བྱེད་ན་ནི་མཐར་འགྱུར་རོ། །བཙུན་པ་རེ་ཞིག་དགེ་སློང་གིས་འདི་སྐད་དུ་ང་ནི་སྟོན་པའོ་ཞེས་སྨྲས་ན་ཅིར་འགྱུར་ལགས། གལ་ཏེ་འདི་སྙམ་དུ་བདག་ནི་འདོམས་པར་བྱེད་
[89a.4]པའོ། །རྗེས་སུ་སྟོན་པར་བྱེད་པའོ་ཞེས་བྱ་བར་བསམས་ཏེ་སྨྲས་ན་ཉེས་པ་སྦོམ་པོར་འགྱུར་རོ། །འོན་ཏེ་སྟོན་པའི་ཆོས་ལུང་སྟོན་པར་བྱེད་ན་ནི་མཐར་འགྱུར་རོ། །བཙུན་པ་རེ་ཞིག་དགེ་སློང་གིས་འདི་སྐད་དུ་ང་ནི་མི་སློབ་པའོ་ཞེས་སྨྲས་ན་ཅིར་འགྱུར་ལགས། གལ་ཏེ་ཉོན་མོངས་པ་སྤངས་པར་ལུང་སྟོན་
[89a.5]ན་མཐར་འགྱུར་རོ། །འོན་ཏེ་འདི་སྙམ་དུ་བདག་ནི་བཟོ་འགའ་ལ་ཡང་མི་སློབ་བོ་ཞེས་བྱ་བར་བསམས་ཏེ་སྨྲས་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། བླ་མ་བརྗོད་པའི་འདུན་པས་མིང་མཐུན་པའི་དོན་བརྗོད་ན་སྦོམ་པོའི་ཞེས་བཤད་དོ། །ཡང་ན། དེ་ནི་ལས་དང་པོ་པ་དང་
[89a.6]སྨྱོན་པ་དང་སེམས་འཁྲུགས་པ་དང་ཚོར་བས་ཉེན་པ་ལ་དགོངས་ནས་གསུངས་པའམ། མི་མ་ཡིན་པའི་འགྲོ་བའི་མངོན་སུམ་དུ་སྨྲས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མི་མ་ལགས་པའི་འདུ་ཤེས་ཀྱིས་མིའི་ཆོས་བླ་མ་ལུང་སྟོན་པར་བགྱིད་
[89a.7]ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ལ་སོགས་པ་ཡིན་ནོ། །ཡང་ན་སྨྱོན་པ་དང་སེམས་འཁྲུགས་པའི་མངོན་སུམ་དུ་སྨྲས་པ་ལ་བརྟེན་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་སྨྱོན་པའི་དྲུང་དུ་མིའི་ཆོས་བླ་མ་བརྗོད་ན་ཅིར་འགྱུར་ལགས། ཉེས་པ་སྦོམ་པོར་རོ། །
[89b]
[89b.1]སེམས་འཁྲུགས་པ་ལ་སོགས་པ་ལ་ཡང་དེ་བཞིན་དུ་བལྟ་བར་བྱའོ་ཞེས་བྱ་བ་ཡིན་ནོ། །ཡང་ན་དེ་ནི་དབུས་པ་ལ་མཐའ་འཁོབ་པའི་ཚིག་ཏུ་སྨྲས་པ་ལ་བརྟེན་ནས་གསུངས་པ་ཡིན་པར་ཤེས་པར་བྱ་སྟེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་དབུས་པ་ཞིག་གིས་མཐའ་
[89b.2]འཁོབ་པའི་སྐད་དུ་སྨྲ་བ་ལ་མིའི་ཆོས་བླ་མ་བརྗོད་ལ། དབུས་པས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ལ་སོགས་པ་ཡིན་ནོ། །འདི་ལ་མདོའི་ཁུངས་ཀྱང་གོ་རིམས་བཞིན་དུ་མ་བཅས་པ་ཉིད་ལ་ཡང་ངོ་། །ཐ་སྙད་དུ་རུང་བའི་འདུ་ཤེས་
[89b.3]ཉམས་པ་ལ་ནི་ཕམ་པར་འགྱུར་བ་མན་ཆད་ཀྱི་ལྟུང་བ་ཡང་མི་འབྱུང་ངོ་། །མིའི་འགྲོ་བ་ལ་ནི་ཐ་སྙད་དུ་བྱ་བ་ཉིད་ཡིན་ནོ། །རང་བཞིན་ཉམས་པ་ནི་མ་ཡིན་ནོ། །རྣམ་པར་རིག་བྱེད་ལ་ནི་དོན་གོ་བའོ་ཞེས་བཤད་དོ། །ཡང་ན་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་
[89b.4]གཞུང་ནི་སྔར་བཤད་པ་བཞིན་ནོ། །ཡང་ན་མངོན་པའི་ང་རྒྱལ་ལ་བརྟེན་པ་ཡིན་ཏེ། འདིར་གཞུང་ནི། བཙུན་པ་དགེ་སློང་གིས་བདག་ཉིད་ལ་མིའི་ཆོས་བླ་མ་མཆིས་ཤིང་བདོག་བཞིན་དུ་བརྗོད་ན་ཕས་ཕམ་པར་འགྱུར་ཞིང་། འོན་ཀྱང་བདག་ཉིད་ལ་མིའི་ཆོས་བླ་མ་མཆིས་ཤིང་མི་བདོག་བཞིན་དུ་བརྗོད་
[89b.5]ན་ཕས་ཕམ་པར་འགྱུར་བའི་ལྟུང་བར་མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། གཡོས་ཤེས་པ་ལུང་སྟོན་ན་ཕས་ཕམ་པར་འགྱུར་རོ། །མངོན་པའི་ང་རྒྱལ་གྱིས་ཀུན་ཤེས་པ་ལུང་སྟོན་ན་དེ་ལ་ཕས་ཕམ་པར་འགྱུར་བའི་ལྟུང་བར་མི་འགྱུར་རོ་ཞེས་བྱ་བ་
[89b.6]ཡིན་ནོ། །ཁྱོད་འབྲས་ཐོབ་ཅེས་དེ་སྐད་དྲིས་ཞེས་བྱ་བ་ལ་སོགས་པ་ལ། ཁྱོད་ཅེས་བྱ་བ་ནི་ཁྱོད་ཀྱིས་སོ། །འབྲས་བུ་ནི་རྒྱུན་དུ་ཞུགས་པ་ལ་སོགས་པ་འཕགས་པའི་ལམ་གྱི་འབྲས་བུ་སྟེ། དགེ་སློང་ཚུལ་ནི་དྲི་མེད་ལམ། །འབྲས་བུ་འདུས་བྱས་འདུས་མ་བྱས། །ཞེས་འབྱུང་བའི་ཕྱིར་རོ། །
[89b.7]དེ་སྐད་ཅེས་བྱ་བ་ནི་སྨྲས་མ་ཐག་པའི་སྐད་དུའོ། །དེ་བཞིན་དུ་ཞེས་བྱ་བ་ནི་དེ་ལྟར་ཡིན་ནོ་ཞེས་བྱ་བ་སྟེ་ཁས་ལེན་པའི་དོན་ཏོ། །སྨྲས་ན་ཞེས་བྱ་བ་ནི་བརྗོད་ནའོ། །དོན་བཞིན་ཞེས་བྱ་བ་ནི་དོན་གྱི་རྗེས་སུ་འབྲངས་ནས་ཏེ་དོན་ཇི་ལྟ་བ་བཞིན་དུ་ཞེས་བྱ་བའི་ཐ་ཚིག་གོ། །འདི་ལ་དོན་འདིར་ལ་ལ་ཞིག་ལ་
[90a]
[90a.1]འགའ་ཞིག་གིས་ཁྱོད་ཀྱིས་འབྲས་བུ་ཐོབ་བམ་ཞེས་དྲིས་ལ། དེས་ཀྱང་འདི་སྐད་དུ་དེ་བཞིན་ནོ་ཞེས་ཁས་བླངས་ན། འོན་ཀྱང་དེ་ལ་ཕས་ཕམ་པར་མ་གསུངས་སོ་ཞེས་བྱ་བ་དེ་ཁོ་བོ་ལ་ངེས་པར་གསལ་བར་སྨོས་ཤིག་ཅེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ཡང་
[90a.2]མིང་མཐུན་པའི་དོན་བརྗོད་པའི་དབང་དུ་མཛད་ནས་གསུངས་པ་ཡིན་པར་བལྟ་བར་བྱ་སྟེ། ལུང་ལས་འབྱུང་བ་གཞན་ཉིད་ལ་བརྟེན་ནས་ཡང་བཀོད་དོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་ལ་ཁྱིམ་བདག་ཅིག་གིས་ཁྱོད་ཀྱིས་འབྲས་བུ་ཐོབ་བམ་ཞེས་དྲིས་པ་དང་། དེས་ཀྱང་ལོ་མ་དང་
[90a.3]འབྲས་བུ་དང་མེ་ཏོག་དང་། འབྲས་བུ་མ་སྨིན་པ་དག་ཅིག་བླངས་ནས་དེས་འདི་སྐད་དུ་དེ་བཞིན་ནོ་ཞེས་སྨྲས་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །ཡང་ན་དེ་ནི་ལས་དང་པོ་པ་ལ་སོགས་པ་ལ་དགོངས་ནས་གསུངས་པ་ཡིན་ནོ། །བརྡ་ཕྲད་པའི་མིའི་མདུན་དུ་ཞེས་བྱ་བ་ལ་
[90a.4]སོགས་པ་ལ། བརྡ་ཕྲད་པའི་ཞེས་བྱ་བའི་རྟོགས་པའོ། །མིའི་ཞེས་བྱ་བ་ནི་སྐྱེས་པ་སྟེ་མིའི་འགྲོ་བ་པའི་ཞེས་བྱ་བའི་ཐ་ཚིག་གོ། །སྐྱེས་པ་སྨོས་པ་ནི་ཉེ་བར་མཚོན་པར་ཟད་དེ་བུད་མེད་ཀྱི་ཡུལ་ལ་ཡང་དེ་དང་འདྲ་བར་བལྟ་བར་བྱའོ། །མདུན་དུ་ཞེས་བྱ་བའི་དོན་ནི་བཤད་ཟིན་ཏོ། །འབྲས་བུ་རྣམ་པ་བཞི་ནི་
[90a.5]འབྲས་བུ་བཞི་པོ་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ལན་ཅིག་ཕྱིར་མི་འོང་བ་དང་། དགྲ་བཅོམ་པ་ཉིད་ཀྱི་མཚན་ཉིད་ཀྱི་འབྲས་བུ་རྣམ་པ་བཞིའོ། །དེ་ཉིད་གཟིགས་པས་ཞེས་བྱ་བ་ནི་དོན་དམ་པ་གཟིགས་པ་སྟེ། ཡང་དག་པར་རྫོགས་པའི་སངས་རྒྱས་ཀྱིས་ཞེས་བྱ་བའི་ཐ་ཚིག་གོ། །
[90a.6]མ་ཡིན་ཞེས་བྱ་བ་ནི་དགག་པའིའོ། །འདི་ལ་འདྲི་བའི་དོན་ནི་གང་གི་ཚེ་རྒྱུན་དུ་ཞུགས་པ་ལ་སོགས་པའི་འབྲས་བུ་བཞི་མིའི་འགྲོ་བར་གཏོགས་པ་བརྡ་ཕྲད་པའི་མདུན་དུ་ལུང་སྟོན་པ་དེའི་ཚེ་དེ་ལ་གདོན་མི་ཟ་བར་ཕས་ཕམ་པའི་ལྟུང་བར་འགྱུར་རོ་ཞེས་བྱ་བ་དེ་ཙམ་ནི་ཤིན་ཏུ་ངེས་ལ། འོན་ཀྱང་བཅོམ་ལྡན་འདས་
[90a.7]ཀྱིས་རྣམ་གྲངས་འགའ་ཞིག་གིས་དེ་ལ་ཕས་ཕམ་པར་འགྱུར་བར་མ་གསུངས་སོ་ཞེས་བྱ་བའི་རྒྱུ་དེ་བདག་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ཡང་མིང་མཐུན་པའི་དོན་བརྗོད་པ་ལ་བརྟེན་ནས་གསུངས་པ་ཡིན་པར་ཤེས་པར་བྱ་སྟེ། སྐབས་བཞིན་དུ་གསུངས་པའི་གཞུང་ལས་བསམས་ནས་
[90b]
[90b.1]ཡང་བཀོད་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་འདི་སྐད་དུ་བདག་གིས་རིམ་གྲོར་ནི་རྒྱུན་དུ་ཞུགས་པའི་འབྲས་བུའོ། །བྱ་སྐྱིབས་ངོགས་སུ་ནི་ལན་ཅིག་ཕྱིར་འོང་བའི་འབྲས་བུའོ། །བྱ་རྒོད་ཀྱི་ཕུང་པོ་ལ་ནི་ཕྱིར་མི་འོང་བའི་འབྲས་བུའོ། །འོད་མའི་ཚལ་དུ་
[90b.2]ནི་འབྲས་བུ་མཆོག་དགྲ་བཅོམ་པའོ་ཞེས་སྨྲ་ན་ཅིར་འགྱུར་ལགས། གལ་ཏེ་འདི་སྙམ་དུ་བདག་གིས་འདིར་ལུང་མནོས་ཁ་ཏོན་བྱས་ཏེ་བདག་གིས་ལེ་ལོ་མ་བྱས་སོ་ཞེས་བྱ་བ་ལས་བསམས་ནས་སྨྲས་ན་ནི་ཉེས་པ་སྦོམ་པོར་འགྱུར་རོ། །འོན་ཏེ་དགེ་སྦྱོང་གི་ཚུལ་གྱི་འབྲས་བུ་དག་ལུང་སྟོན་ན་ནི།
[90b.3]མཐར་འགྱུར་བའོ། །དགེ་སློང་འབྲས་གཅིག་སྨྲ་བྱས་ལས། །ཞེས་བྱ་བ་ལ་སོགས་པ་ལ། འབྲས་གཅིག་ཅེས་བྱ་བ་ནི་རྒྱུན་དུ་ཞུགས་པའི་འབྲས་བུ་ལ་སོགས་པའི་ནང་ནས་བརྗོད་པར་འདོད་པའི་འབྲས་བུ་གང་ཡང་རུང་བ་ཞིག་གོ། །འབྲས་བུ་གཞན་ཞེས་བྱ་བ་ནི་རྒྱུན་དུ་ཞུགས་པའི་
[90b.4]འབྲས་བུ་ལས་ལན་ཅིག་ཕྱིར་འོང་བའི་འབྲས་བུ་ལ་སོགས་པ་གཞན་དེ་བརྗོད་པར་མི་འདོད་པའོ། །འདི་ལ་དོན་ནི་རྒྱུན་དུ་ཞུགས་པའི་འབྲས་བུ་ལ་སོགས་པ་སྨྲ་བར་འདོད་པའི་དགེ་སློང་གིས་གལ་ཏེ་འབྲས་བུ་གཞན་ལན་ཅིག་ཕྱིར་འོང་བའི་འབྲས་བུའམ། ཕྱིར་མི་འོང་བའི་འབྲས་བུའམ། དགྲ་བཅོམ་
[90b.5]པ་ཉིད་ཅིག་ལུང་སྟོན་ན་ཅིའི་ཕྱིར་དེ་ལ་ཕས་ཕམ་པར་འགྱུར་བར་མ་གསུངས་ཞེས་བྱ་བར་བསྙད་པར་བྱ་བ་ལ་ཁྱོད་ཀྱིས་ཁོ་བོ་ལ་འབྲེལ་བ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་མངོན་པར་འདོད་པ་མ་ཡིན་པའི་འབྲས་བུ་བརྗོད་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་
[90b.6]དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་རྒྱུན་དུ་ཞུགས་པའི་འབྲས་བུ་ལུང་བསྟན་ཏོ་སྙམ་པ་ལས་ལན་ཅིག་ཕྱིར་འོང་བའི་འབྲས་བུ་ལུང་བསྟན་ཏམ། ལན་ཅིག་ཕྱིར་འོང་བའི་འབྲས་བུ་ལུང་བསྟན་ཏོ་སྙམ་པ་ལས་ཕྱིར་མི་འོང་བའི་འབྲས་བུ་ལུང་བསྟན་ཏམ། ཕྱིར་མི་འོང་བའི་འབྲས་བུ་ལུང་
[90b.7]བསྟན་ཏོ་སྙམ་པ་ལས་དགྲ་བཅོམ་པ་ཉིད་ཀྱི་འབྲས་བུ་ལུང་བསྟན་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་འདི་ལ་མདོ་བྱེད་པས་ཀྱང་ནོར་ན་ཡང་ངོ་ཞེས་བཤད་དོ། །འདུལ་བ་དྲི་བའི་ཚིག་ལེའུར་བྱས་པ་ལེའུ་དང་པོའི་གཏན་ལ་དབབ་པའོ།། །།
[91a]
[91a.1]ཡན་ལག་བཅུ་ལྡན་འབྱིན་བྱེད་པ། །ཞེས་བྱ་བ་ལ་སོགས་པ་ལ། འབྱིན་བྱེད་པ་ཞེས་བྱ་བ་ནི་ཁུ་ཆུ་འབྱིན་པར་བྱེད་པ་སྟེ། དང་པོའི་གནས་ནས་སྤོས་པའི་ཞེས་བྱ་བའི་ཐ་ཚིག་གོ། །གྱི་ནར་ཡང་འབྱུང་བ་ཡོད་པ་དེའི་ཕྱིར་ཡན་ལག་བཅུ་ལྡན་ཞེས་བྱ་བ་སྨོས་སོ། །གང་ལ་
[91a.2]ཡང་ཡན་ལག་བཅུ་ཡོད་པ་དེ་ནི་ཡན་ལག་བཅུ་ལྡན་པ་སྟེ། རྒྱུ་བཅུ་དང་ལྡན་པར་ཁུ་ཆུ་འབྱིན་པའི་ཐ་ཚིག་གོ། །ཡན་ལག་བཅུ་པོ་དེ་དག་ནི་འདི་ལྟ་སྟེ། ཕྱུང་བ་དང་། དབྱུང་བར་འདུན་པ་དང་། རང་གི་ཁུ་ཆུ་དང་། དང་པོའི་གནས་དང་། ཕོ་མཚན་དང་། དེ་ལ་བརྩལ་བ་དང་། དེ་ལ་རེག་པ་
[91a.3]དང་། དེ་གཞན་གྱི་རྒྱུད་དུ་གཏོགས་པས་ཀྱང་རུང་བ་དང་། སེམས་ཅན་དུ་བགྲང་བ་ཉིད་དང་། སེམས་ཅན་དུ་བགྲང་བའི་རྣམ་པར་གནས་པ་ཉིད་དོ། །དགེ་འདུན་ལྷག་མ་བྱེད་པ་ནི་གང་ལ་ལྟུང་བ་ཕྱིར་བཅོས་པའི་ཕྱིར་ལྷག་མ་ཉི་ཤུ་ལ་སོགས་པའི་དགེ་འདུན་ཡོད་པ་དེ་ནི་ལྷག་མ་སྟེ། ལྟུང་བ་དེ་ནི་
[91a.4]དགེ་འདུན་ལ་རག་ལུས་པ། དགེ་འདུན་ཁ་ན་ལས་པ་དགེ་འདུན་ལ་བརྟེན་པས་ཏེ། དགེ་འདུན་གྱི་ལྟུང་བ་ལས་ལྡང་བར་འགྱུར་གྱི་གང་ཟག་ལས་ནི་མ་ཡིན་ནོ་ཞེས་འབྱུང་བའི་ཕྱིར་རོ། །དེ་བྱེད་པའི་ངང་ཚུལ་ཅན་ནི་དགེ་འདུན་ལྷག་མ་བྱེད་པ་སྟེ། དགེ་འདུན་ལྷག་མའི་ལྟུང་བ་བྱུང་བ་ཞེས་
[91a.5]བྱ་བའི་ཐ་ཚིག་གོ། །བདེ་བར་གཤེགས་པ་ནི་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་བག་ཆགས་དང་བཅས་ཏེ་བྲལ་བ་དང་། དངོས་པོ་མ་ལུས་པའི་དེ་ཁོ་ན་ཉིད་ལེགས་པར་རྟོགས་པའོ། །གཞན་དག་ན་རེ་ཕྱིར་མི་ལྡོག་པར་མ་ལུས་པར་གཤེགས་པའམ། དེ་ཁོ་ན་ཉིད་བསྟན་པའི་
[91a.6]ཁྱད་པར་མ་ལུས་པར་མཁྱེན་པའི་ཕྱིར་བཀྲ་ཤིས་པ་ཡིན་ནོ་ཞེས་ཟེར་ཏེ། དོན་དུ་ན་དེ་བཞིན་གཤེགས་པའོ། །མ་གསུངས་པ་ཞེས་བྱ་བ་ནི་བཀའ་མ་སྩལ་པའོ། །ཇི་ལྟར་ཞེས་བྱ་བ་ནི་རྣམ་པ་གང་གིས་སོ། །རྒྱུ་ཞེས་བྱ་བ་ནི་བྱེད་རྒྱུའོ། །འདི་ལ་གཞན་གྱིས་བསམ་པ་ནི་གང་གི་ཚེ་དགེ་སློང་
[91a.7]གིས་ཕྱུང་བ་ལ་སོགས་པ་ཡན་ལག་བཅུ་དང་ལྡན་པར་རང་གི་ཁུ་ཆུ་འབྱིན་པ་དེའི་ཚེ་དེ་ལ་དགེ་འདུན་གྱི་ལྷག་མའི་ལྟུང་བར་འགྱུར་རོ་ཞེས་བྱ་བ་ཡང་གོ་ཐེ་ཚོམ་ཡང་མེད་ན། འོན་ཀྱང་དེ་ལ་དགེ་འདུན་གྱི་ལྷག་མའི་ལྟུང་བར་མ་གསུངས་སོ་ཞེས་བྱ་བ་འདི་ལ་ཁྱོད་ཀྱིས་ཁོ་བོ་ལ་རྒྱུ་ཅུང་ཟད་ཅིག་གདོན་མི་ཟ་བར་
[91b]
[91b.1]བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ཤུགས་བཏང་བ་ལ་དགོངས་ནས་གསུངས་པ་ཡིན་པར་ཤེས་པར་བྱ་སྟེ། དེ་བཞིན་དུ་འདིར་གཞུང་ནི། ཤུགས་བཏང་ནས་ཁུ་ཆུ་བྱུང་ན་ཉེས་པ་སྦོམ་པོར་འགྱུར་རོ་ཞེས་བྱ་བ་འདི་ཡིན་ནོ། །དེ་བཞིན་དུ་མདོ་བྱེད་པས་
[91b.2]ཀྱང་ཤུགས་ཀྱི་གནས་སྐབས་སུ་བཏང་བ་རྫོགས་པར་མ་བྱས་པ་ཉིད་དོ་ཞེས་བཤད་དོ། །ཡང་ན་མཚན་གྱུར་པ་ལ་བརྟེན་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་དགེ་འདུན་གྱི་ལྷག་མའི་ལྟུང་བར་འགྱུར་བའི་གཞི་དེས་དགེ་འདུན་གྱི་ལྷག་མའི་ལྟུང་བར་
[91b.3]མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་གིས་ཆེད་དུ་བསམས་ཏེ་ཁུ་ཆུ་ཕྱུང་ནས་དགེ་འདུན་ལྷག་མར་འགྱུར་རོ། །དགེ་སློང་མས་ཕྱུང་ན་དེ་ལ་དགེ་འདུན་གྱི་ལྷག་མའི་ལྟུང་བར་མི་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་
[91b.4]ནི། བཙུན་པ་རེ་ཞིག་དགེ་སློང་ཁུ་ཆུ་འབྱིན་པར་བགྱིད་པ་ལས་མཚན་གྱུར་ཏེ་དགེ་སློང་མར་རེད་ན་ཅིར་འགྱུར་ལགས། ལྟུང་བྱེད་དུའོ་ཞེས་བྱ་བ་ཡིན་ནོ། །ཡང་ན་དེ་ནི་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་ལུང་ནི་སྔ་མ་བཞིན་ནོ། །འདོད་
[91b.5]ཆགས་ལ་སོགས་མཚུངས་ལྡན་པའི། །ཞེས་བྱ་བ་ལ་སོགས་པ་ལ། འདོད་ཆགས་དང་མཚུངས་པར་ལྡན་པའི་སེམས་ནི་འདོད་པའི་འདོད་ཆགས་མངོན་དུ་གྱུར་པའི་སེམས་སོ། །སོགས་པ་ཞེས་བྱ་བ་སྨོས་པས་ནི་དེའི་བདེ་བ་ཉམས་སུ་མྱོང་བའི་འདུན་པ་ཞེས་བྱ་བ་སྟེ་བསྡུས་ཏེ། གོ་རིམས་བཞིན་དུ་
[91b.6]དྲལ་ཅིང་ཡོངས་སུ་འགྱུར་བའི་སེམས་ཀྱིས་ཞེས་བྱ་བའི་དོན་ཏོ། །བཟོད་པ་ལ་ཞེས་བྱ་བ་ནི་མི་ཚངས་པར་སྤྱོད་པ་བསྟེན་པར་སྤྱོད་པར་བཟོད་པ་ལའོ། །རེག་པ་ནི་ལུས་སྤྲོད་པར་བྱེད་པའོ། །དགེ་འདུན་ལྷག་མ་ནི་འདི་ལ་ལྷག་མ་དང་དགེ་འདུན་ཡོད་པས་ན་དགེ་འདུན་ལྷག་མ་ཞེས་བྱ་བ་དེ་སྐད་དུའོ། །འདི་
[91b.7]ལ་འདྲི་བའི་དོན་ནི་དགེ་སློང་གང་ཞིག་གིས་དྲལ་ཅིང་ཡོངས་སུ་གྱུར་པའི་སེམས་ཀྱིས་མི་ཚངས་པར་སྤྱད་པ་བརྟེན་པར་བྱ་བ་བཟོད་པའི་བུད་མེད་དང་ལུས་སྤྲོད་པར་བྱེད་པ་དེ་ལ་ལུས་ལ་རེག་པའི་དགེ་འདུན་ལྷག་མར་འགྱུར་བར་གསལ་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་
[92a]
[92a.1]དེ་ལ་དགེ་འདུན་ལྷག་མར་མ་གསུངས་སོ་ཞེས་བྱ་བ་འདི་ལ་རྒྱུ་གང་ཡིན་པ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་དེ་ནི་འགྲོ་བ་གཞན་པའི་བུད་མེད་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་
[92a.2]འགྲོ་བ་གཞན་པའི་བུད་མེད་དང་ལྷན་ཅིག་ལུས་སྤྲོད་ན་ཅིར་འགྱུར་ལགས། ཉེས་པ་སྦོམ་པོར་རོ། །དེ་བཞིན་དུ་མདོ་བྱེད་པས་ཀྱང་རེག་པ་ནི་ཐ་སྙད་དང་འདྲའོ་ཞེས་བཤད་དོ། །ཡང་ན་གོས་ཀྱིས་བར་དུ་ཆོད་པའི་བུད་མེད་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་
[92a.3]གཞུང་ནི། བུད་མེད་བཟོད་པ་ལ་དགེ་འདུན་ལྷག་མར་འགྱུར་བ་གང་ཡིན་པ་དེ་ནི་གོས་ཀྱིས་བར་དུ་ཆོད་པ་ལ་ཉེས་པ་སྦོམ་པོའོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི། བཙུན་པ་རེ་ཞིག་དགེ་སློང་གིས་བར་ཆད་དང་བཅས་པ་ལ་བར་ཆད་དང་བཅས་པར་འདུ་ཤེས་པས་ལུས་རེག་པར་བགྱིད་ན་
[92a.4]ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་གོས་ཀྱིས་བར་དུ་ཆོད་པ་ལ་ནི་འོག་མར་རོ་ཞེས་བཤད་དོ། །ཡང་ན་དེ་ནི་བུད་མེད་གཞན་གྱི་འདུ་ཤེས་ཀྱིས་རེག་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་
[92a.5]སློང་གིས་བུད་མེད་གཞན་དང་ལྷན་ཅིག་ཀུན་དུ་ཆགས་ལ། བུད་མེད་གཞན་དང་ལྷན་ཅིག་ལུས་སྤྲོད་ན་ཅིར་འགྱུར་ལགས། ཉེས་པ་སྦོམ་པོར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་བསམས་པ་ནི་དེ་ཉིད་ཡིན་ནོ་ཞེས་བཤད་དོ། །ཡང་ན་དེ་ནི་ལུས་ཀྱི་དབང་པོ་ཉམས་པ་ལ་དགོངས་
[92a.6]ནས་བཤད་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་བུད་མེད་ཀྱི་ལུས་ཀྱི་དབང་པོ་ཉམས་ལ་དགེ་སློང་གིས་དེ་དང་ལྷན་ཅིག་ལུས་སྤྲོད་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་རོ། །བཙུན་པ་རེ་ཞིག་དགེ་སློང་ལུས་ཀྱི་དབང་པོ་ཉམས་ལ། དེ་ནི་བུད་མེད་དང་ལྷན་
[92a.7]ཅིག་ལུས་སྤྲོད་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་རོ། །བཙུན་པ་རེ་ཞིག་གཉིས་ཀ་ལུས་ཀྱི་དབང་པོ་ཉམས་ལ་དེ་དག་ལུས་སྤྲོད་པར་བགྱིད་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་རེག་པར་བྱ་བ་ཉིད་ནི་མ་ཉམས་པའོ་ཞེས་བཤད་
[92b]
[92b.1]དོ། །ཡང་ན་མཉེན་པ་དང་། འཇམ་པ་དང་། དྲོ་བར་བསམས་པས་རེག་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མཉེན་པའི་བསམ་པས་ལུས་རེག་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་རོ། །འཇམ་
[92b.2]པའི་བསམ་པ་དང་། དྲོ་བའི་བསམ་པ་ཡང་དེ་དང་འདྲའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། འཇམ་པ་དང་དྲོ་བ་དང་སྙི་བ་ཉིད་སྦོམ་པོའོ་ཞེས་བཤད་དོ། །ཡང་ན་དེ་ནི་སྔོན་ཕམ་པ་བྱུང་བ་ལ་སོགས་པའི་སྐབས་སམ་ལས་དང་པོ་པ་ལ་སོགས་པའི་དབང་གིས་གསུངས་
[92b.3]པ་ཡིན་ཏེ་སྔ་མ་བཞིན་ནོ། །སྡོམ་བརྩོན་བསམས་བཞིན་དགེ་འདུན་གྱི་ཞེས་བྱ་བ་ལ་སོགས་པ་ལ། དགེ་འདུན་གྱི་ལྷག་མ་ནི་ཁུ་ཆུ་འབྱིན་པ་ལ་སོགས་པའོ། །ཅི་བསམས་བཞིན་དུའམ་བསམས་བཞིན་དུ་མ་ཡིན་ཞེ་ན། བསམས་བཞིན་དུ་ཞེས་བྱ་བ་སྨོས་ཏེ་བློ་སྔོན་དུ་བཏང་སྟེའོ། །འདི་ནི་
[92b.4]བསམས་བཞིན་མ་ཡིན་པ་སྩལ་ཏོ། །ཆོ་ག་བཞིན་ཞེས་བྱ་བ་ནི་ཆོ་ག་ལས་མ་འདས་པར་ཏེ། ཆོ་ག་དང་མཐུན་པར་ཞེས་བྱ་བའི་ཐ་ཚིག་གོ། །མ་བྱས་པར་ཞེས་བྱ་བར་སྦྱར་ཏེ། དེས་ན་འདུལ་བ་ལས་བཤད་ན་སྦོམ་པོ་ལ་སོགས་པ་སྤྱད་པའི་མཚན་ཉིད་ཀྱི་ཆོ་གའི་རིམ་པ་མ་བྱས་པར་ཞེས་བྱ་
[92b.5]བའི་དོན་ཡིན་ནོ། །ཅི་ཞིག་མ་བྱས་པར་ཞེ་ན། བཤགས་པ་ལ་སོགས་ཞེས་བྱ་བ་ལ་སོགས་པ་སྨོས་ཏེ། བཤགས་པ་ནི་འདིར་གོ་བར་བྱ་བའོ། །ཡང་ནི་བཤགས་པ་ཡིན་ཏེ་འདུལ་བ་འཛིན་པ་ལ་སོགས་པ་དགེ་སློང་གཅིག་གི་མདུན་དུ་མི་བྱ་བའི་བསམ་པས་དགེ་འདུན་ལྷག་མའི་ལྟུང་བ་ལན་
[92b.6]གསུམ་སྒྲོགས་པ་ཡིན་ནོ། །སོགས་པ་སྨོས་པས་ནི་སྤོ་བ་དང་མགུ་བར་བྱ་བ་དང་དབྱུང་བ་རྣམས་འཕངས་སོ། །དེ་མ་བྱས་པར་ཏེ་ཕྱིར་བཅོས་པ་མ་བྱས་པར་རོ། །དག་ཅེས་བྱ་བ་ནི་ལྟུང་བ་མེད་པ་སྟེ་ལྟུང་བ་ལས་ལངས་པ་ཞེས་བྱ་བའི་ཐ་ཚིག་གོ། །འདི་ལ་འདྲི་པའི་བསམ་པ་ནི་གང་འགའ་
[92b.7]ཞིག་གིས་བསམས་བཞིན་དུ་ཁུ་ཆུ་འབྱིན་བ་ལ་སོགས་པའི་ལྟུང་བ་སྤྱད་ལ། ཕྱིས་སྤོ་བ་དང་མགུ་བར་བྱ་བ་དབྱུང་བའི་རིམ་གྱིས་ཆོ་ག་བཞིན་དུ་སྒྲུབ་ན་ཡོངས་སུ་དག་པར་འགྱུར་རོ་ཞེས་བྱ་བ་འདི་ནི་གསལ་བར་ངེས་ན། འོན་ཀྱང་ཆོ་ག་བཞིན་དུ་མ་བྱས་པའི་དགེ་སློང་ཡང་བཅོམ་ལྡན་འདས་ཀྱིས་
[93a]
[93a.1]རྣམ་པ་གཞན་གྱིས་ཇི་ལྟར་དག་པ་ཁོ་ནར་གསུངས་པ་ཞེས་བྱ་བ་དེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །དེ་ལ་ལན་ནི་འདི་ཡིན་ཏེ། དེ་ནི་མཚན་གྱུར་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་དགེ་འདུན་གྱི་ལྷག་
[93a.2]མའི་ལྟུང་བ་འབྱུང་བ་འཆགས་པར་ཡང་མི་བགྱིད། སླར་འཆོས་པར་ཡང་མི་བགྱིད་ལ། ལྟུང་བ་ལས་ལྡང་བར་ཡང་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་ཐུན་མོང་མ་ཡིན་པའི་དགེ་འདུན་གྱི་ལྷག་མའི་ལྟུང་བ་བྱུང་བར་གྱུར་པ་ལ་དེ་མཚན་གྱུར་ནས་དགེ་སློང་མར་
[93a.3]རེད་ན་ལྟུང་བ་ལས་ལངས་པ་ཞེས་བྱའོ། །དགེ་འདུན་གྱི་ལྷག་མར་འགྲོ་བར་གྱུར་པའི་ཉེས་བྱས་ཀྱི་ལྟུང་བ་ནི་བཤགས་པར་བྱའོ། །དེ་བཞིན་དུ་འདིར་གཞུང་གཞན་ནི། དགེ་སློང་གི་ཚེ་ལྟུང་བ་བྱུང་ལ་དགེ་སློང་མ་ལགས་པའི་ཚེ་ལྡང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་ཐུན་མོང་མ་ཡིན་པའི་དགེ་འདུན་
[93a.4]གྱི་ལྷག་མའི་ལྟུང་བ་ཕྱུང་ལ་དེ་མཚན་གྱུར་ནས་དགེ་སློང་མར་རེད་ན་ལྟུང་བ་ལས་ལངས་པ་ཞེས་བྱའོ། །དེ་བཞིན་དུ་འདིར་གཞུང་གཞན་ནི། བཙུན་པ་དགེ་སློང་ཐུན་མོང་མ་ལགས་པའི་ལྟུང་བའི་རིས་བཞི་བྱུང་བ་འཆགས་པར་ཡང་མི་བགྱིད། ཕྱིར་འཆོས་པར་ཡང་མི་བགྱིད་ལ། ལངས་པ་ཞེས་ཀྱང་བགྱི།
[93a.5]ལྟུང་བ་མ་མཆིས་པར་ཡང་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། མཚན་གྱུར་ནའོ། །བཙུན་པ་དགེ་སློང་མ་ཐུན་མོང་མ་ལགས་པའི་ལྟུང་བའི་རིས་ལྔ་བྱུང་བ་འཆགས་པར་ཡང་མི་བགྱིད། ཕྱིར་འཆོས་པར་ཡང་མི་བགྱིད་ལ། ལངས་པ་ཞེས་
[93a.6]ཀྱང་བགྱི་ལྟུང་བ་མ་མཆིས་པར་ཡང་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། མཚན་གྱུར་ནའོ། །དེ་བཞིན་དུ་མདོ་བྱེད་པས་ཀྱང་ཞིང་མ་ཡིན་པ་ཉིད་ལ་ནི་ཉམས་སོ་ཞེས་བཤད་དོ། །ཡང་ན་ལས་དང་པོ་པ་ལ་སོགས་པ་ལ་བརྟེན་ནས་དེ་སྐད་གསུངས་
[93a.7]པ་ཡིན་ཏེ་སྔ་མ་བཞིན་ནོ། །གང་ཟག་གཅིག་ལ་སྤོ་བ་དང་ཞེས་བྱ་བ་ལ་སོགས་པ་ལ། གང་ཟག་ནི་སེམས་ཅན་ཏེ་དགེ་སློང་ཞེས་བྱ་བའི་ཐ་ཚིག་གོ། །གཅིག་ལ་ཞེས་བྱ་བ་ནི་དགེ་འདུན་གྱི་ལྷག་མ་བྱུང་བ་ལའོ། །སྤོ་བ་ནི་དགེ་འདུན་གྱི་ལྷག་མ་བྱུང་བ་བཅབས་པའི་ཉེས་པ་གཞོམ་པའི་ཕྱིར་ཇི་ལྟར་བཅས་
[93b]
[93b.1]པ་བཞིན་ཆད་པའི་ལས་སྤྱད་པའི་ཕྱིར་རོ། །སྤྱད་པ་ཉིད་ནི་སྤོ་བ་སྤྱད་པ་སྟེ་བཅབས་པ་བཞིན་ཆད་པའི་ལས་སྤྱད་ལ་ད་དུང་མགུ་བར་བྱ་བ་མ་ཡིན་པའི་ཕྱིར་རོ། །མགུ་བར་བྱ་བ་ནི་སྤོ་བ་སྤྱད་པ་ལ་དགེ་སློང་རྣམས་ཀྱིས་སེམས་མགུ་བར་བྱ་བའི་ཕྱིར་ན་ཞག་དྲུག་ཏུ་མགུ་བར་བྱ་བ་སྦྱིན་པའི་ཕྱིར་རོ། །
[93b.2]སྤྱད་པ་ཉིད་ནི་མགུ་བར་བྱ་བ་སྤྱད་པ་སྟེ་མགུ་བར་བྱ་བ་སྤྱད་ཟིན་པས་ཞེས་བྱ་བའི་ཐ་ཚིག་གོ། །དེ་ལ་མགུ་བ་ནི་ཡིད་ལ་འཐད་ཅིང་ཡིད་འབབ་སྟེ་སེམས་རངས་པ་ཞེས་བྱ་བའི་ཐ་ཚིག་གོ། །བཞི་པོ་དག་སྲིད་པ་ཞེས་བྱ་བར་སྦྱར་ཏེ་བཞི་པོ་སྤོ་བ་དང་། སྤོ་བ་སྤྱད་པ་དང་། མགུ་བར་བྱ་བ་དང་། མགུ་བར་བྱ་བ་སྤྱད་པའི་མཚན་
[93b.3]ཉིད་ཀྱི་ཚིག་བཞི་པོ་དག་གོ། །གང་གིས་ཞེས་བྱ་བ་ནི་རྒྱུ་གང་གིས་སོ། །སྲིད་པ་ནི་བཏུབ་པའོ། །འདི་ལ་གཞན་གྱིས་བསམས་པ་ནི་དགེ་འདུན་གྱི་ལྷག་མའི་ལྟུང་བ་བྱུང་བའི་གང་ཟག་གཅིག་ཁོ་ན་སྤོ་བ་པའམ། སྤོ་བ་སྤྱད་པའམ། མགུ་བར་བྱ་བ་སྤྱད་པ་ཞིག་ཏུ་འགྱུར་རོ་ཞེས་བྱ་བ་དེ་ཙམ་ཞིག་ནི་
[93b.4]ཚིག་རྣམས་ཐ་དད་པར་གྱུར་པའི་ཕྱིར་ཤིན་ཏུ་མངོན་ན་འོན་ཀྱང་བཅོམ་ལྡན་འདས་ཀྱིས་ལྟུང་བ་བྱུང་བ་གཅིག་ཁོ་ན་ལ་བཞི་སྲིད་པར་གསུངས་པ་དེ་ཇི་ལྟ་བུ་ཡིན་པ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་སྲིད་པའི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་
[93b.5]འདིར་གཞུང་ནི། བཙུན་པ་གང་ཟག་དེ་ཉིད་སྤོ་བ་ཡང་ལགས། དེ་ཉིད་སྤོ་བ་སྤྱད་པ་ཡང་ལགས། དེ་ཉིད་མགུ་བ་པ་ཡང་ལགས། དེ་ཉིད་མགུ་བར་བགྱི་བ་སྤྱད་པ་ཡང་ལགས་པ་ལྟ་མཆིས་ལགས་སམ། ཡོད་དེ་གང་ཟག་སྤོ་བ་བྱ་བ་སྤྱད་པ་ཞིག་ཏུ་དགེ་འདུན་གྱི་ལྷག་མའི་ལྟུང་བ་འཆབ་པ་
[93b.6]མེད་པ་བྱུང་ལ། དེ་དགེ་འདུན་གྱི་དྲུང་དུ་སོང་ནས་མགུ་བར་བྱ་བ་གསོལ་ཏེ། དེ་མགུ་བར་བྱ་བ་ཕལ་ཆེར་སྤྱད་ནས་དགེ་འདུན་གྱི་ལྷག་མའི་ལྟུང་བ་གཅིག་ཞག་གཅིག་བཅབས་པ་དང་། གཉིས་པ་ཞག་གཉིས་བཅབས་པ་དང་གཉིས་ཤིག་བྱུང་བ་དང་། དེ་དག་དགེ་འདུན་གྱི་དྲུང་དུ་སོང་སྟེ་སྤོ་བ་
[93b.7]གསོལ་བ་ལས་དེ་ལ་དགེ་འདུན་གྱིས་སྤོ་བ་བྱིན་ན་དེ་ལྟུང་བ་གཅིག་གི་ནི་སྤོ་བ་སྤྱད་པ་མ་ཡིན་ནོ། །གཉིས་པའི་ནི་སྤོ་བ་སྤྱད་པ་ཡིན་ནོ། །གསུམ་པའི་ནི་མགུ་བར་བྱ་བ་སྤྱད་པ་ཡིན་ནོ། །བཞི་པའི་ནི་མགུ་བར་བྱ་བ་སྤྱད་པ་ཡིན་ནོ། །ཇི་སྲིད་འཚོ་བར་ཞེས་བྱ་བ་ལ་སོགས་པ་ལ། ཇི་སྲིད་
[94a]
[94a.1]འཚོའི་བར་ནི་ཇི་སྲིད་འཚོ་བ་མཐར་ཐུག་པའི་བར་རོ། །རང་གི་གོས་ནི་བདག་ཉིད་ཀྱི་གོས་དག་གིའོ། །རབ་ཏུ་མང་པོ་ནི་བཅུ་ལ་སོགས་པ་དཔག་ཏུ་མེད་པ་དག་གོ། །མ་བསྔོས་ཤིང་ཞེས་བྱ་བ་ནི་མཁན་པོ་ལ་སོགས་པའི་མིང་གིས་སྔགས་སྔོན་དུ་འགྲོ་བའི་བདག་གིར་མ་
[94a.2]བྱས་ཤིང་ངོ་། །བྱིན་གྱིས་མ་བརླབས་པར་ཞེས་བྱ་བ་ནི་སྔོན་དུ་འགྲོ་བ་ཁོ་ནའི་བདག་གིར་མ་བྱས་པར་རོ། །ཡང་ཞེས་བྱ་བ་ནི་འོན་ཀྱང་ངོ་། །དྲི་མ་མེད་པར་ཞེས་བྱ་བ་ནི་སྤངས་པའི་ལྟུང་བའི་དྲི་མ་དང་བྲལ་བའོ། །འདི་ལ་འདྲི་བའི་དོན་ནི་གང་གི་ཚེ་བྱིན་གྱིས་མ་བརླབས་ཤིང་མ་བསྔོས་པའི་གོས་
[94a.3]གཅིག་ཀྱང་ཞག་བཅུ་འདས་པར་འཆང་ན་དེའི་ཚེ་དེ་ལ་བཅོམ་ལྡན་འདས་ཀྱིས་ཞག་བཅུ་པའི་སྤང་བར་འགྱུར་རོ་ཞེས་གསུངས་ན་འོན་ཀྱང་ཡང་འདི་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་འདི་ལ་ཁོ་བོ་ལ་རྒྱུ་བརྗོད་པར་བྱའོ་ཞེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། རིམ་གྱིས་བྱིན་གྱིས་
[94a.4]རློབ་པ་ལ་དགོངས་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་གོས་བྱིན་གྱིས་མ་བརླབས་ཤིང་མ་བསྔོས་པ་བརྒྱད་དམ་དགུ་ཇི་སྲིད་འཚོའི་བར་དུ་བཅངས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་
[94a.5]དགེ་སློང་གིས་ཉིན་རེ་ཉིན་རེ་ཞིང་ཆོས་གོས་ཀྱི་སྔགས་བྱུང་ལ་གཞན་བྱིན་གྱིས་བརླབས་ནའོ། །ཡང་དེ་ཞག་བཅུ་ཚུན་ཆད་ཅིག་ཏུ་ཤི་བ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་གོས་ལྷག་པ་བཅངས་ལ་
[94a.6]ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཞག་བཅུ་ཚུན་ཆད་ཅིག་ཏུ་ཤི་བར་གྱུར་ནའོ། །ཡང་ན་རུང་བ་མ་ཡིན་པའི་གོས་འཆང་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་
[94a.7]པ་དགེ་སློང་གིས་གོས་ལྷག་པ་ཞག་བཅུ་ལས་འདས་པར་བཅངས་ལ་སྤང་བའི་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་གོས་ཀྱི་སྤུན་རུང་ལ་རྒྱུ་རུང་བ་མ་ཡིན་པ་དང་། རྒྱུ་རུང་ལ་སྤུན་རུང་བ་མ་ཡིན་པ་དང་། གཉིས་
[94b]
[94b.1]ཀ་རུང་བ་མ་ཡིན་པའོ། །རུང་བ་མ་ཡིན་པ་ནི་རྔ་བལ་དང་། རྣག་གི་སྤུ་དང་། རི་དྭགས་ཀྱི་བལ་དང་བསྲེས་པ་དང་། མ་བཏགས་པ་སྟེ། གོས་དེ་ལྟ་བུ་ཞག་བཅུ་ལས་འདས་པར་འཆང་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་།
[94b.2]རབ་ཏུ་བྱུང་བའི་རྫས་དག་ལ་ནི་རུང་བ་ཉིད་དང་ཞེས་བཤད་དོ། །འོག་མ་དག་ལ་ཡང་ལུགས་ནི་འདི་ཡིན་ནོ། །ཡང་ན་གཞན་གྱི་ཆེད་དུ་འཆང་བའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་ལྷུང་ཟེད་འཆང་བའི་སྐབས་ནས་རབ་ཏུ་འབྱུང་བར་འདོད་བའི་ཆེད་དུ་འཆང་ན་ལྟུང་
[94b.3]བ་མེད་དོ་ཞེས་གསུངས་སོ། །ལྷུང་བཟེད་ལ་དེ་སྐད་དུ་གསུངས་མོད་ཀྱི་འོན་ཀྱང་གོས་ལ་ཡང་རུང་ངོ་ཞེས་བྱ་བར་ཤེས་པར་བྱའོ། །དེ་བཞིན་མདོ་བྱེད་པས་འདིར་སྤྱིར་རབ་ཏུ་བྱུང་བའི་དོན་དུ་ངེས་པར་བྱས་པ་ཡང་དེ་ཉིད་དོ་ཞེས་བཤད་དོ། །འགྲེལ་པ་བྱེད་པས་ཀྱང་འདི་ལ་ནི་ལྷུང་བཟེད་ལ་རབ་ཏུ་
[94b.4]བྱུང་བར་འདོད་པའི་ཆེད་དུ་འཆང་ན་ལྟུང་བ་མེད་དོ་ཞེས་གསུངས་པ་གང་ཡིན་པ་དེའི་བཤད་པ་ཡིན་ནོ་ཞེས་རྗེས་སུ་བཟླས་སོ། །ཡང་ན་ལས་དང་པོ་པ་ལ་སོགས་པའམ་སྔོན་ཕམ་པ་བྱུང་བ་ལ་སོགས་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ་ཞེས་བྱ་བར་ཤེས་པར་བྱའོ། །དྲི་བ་དང་ལན་འདི་ནི་
[94b.5]ལྷུང་བཟེད་དུ་གཏོགས་པ་ལ་ཡང་རུང་བས་མ་བཤད་ཀྱང་ཐམས་ཅད་བདག་ཉིད་ཀྱིས་བརྟག་པར་བྱའོ། །ཐ་དད་མཚམས་ནི་སྤངས་པའི་གནས། །གཅིག་ན་གནས་པའི་དགེ་སློང་ལ། །ཞེས་བྱ་བ་ལ་སོགས་པ་ལ། གནས་གཅིག་ན་ཞེས་བྱ་བ་ནི་གནས་ཁང་ལ་སོགས་པ་འདུག་གནས་གཅིག་
[94b.6]པ་སྟེ། གནས་གཅིག་སྨོས་པས་ནི་འདུག་གནས་གཉིས་དང་། གསུམ་དང་། བཞི་ལ་སོགས་པ་བཀག་པ་ཡིན་ནོ། །གནས་པ་ཞེས་བྱ་བ་ནི་འདུག་པའོ། །གཅིག་ཡིན་ཡང་བཀད་པ་ལ་སོགས་པ་གནས་ཆེན་པོ་ལ་ནང་ན་ཆུ་ལ་སོགས་པས་མཚམས་ཐ་དད་པ་ཉིད་ཀྱང་སྲིད་ན་དེ་ཅི་ལ་
[94b.7]རྣམ་པར་བཞག་པ་ཉིད་ཡིན་ནམ་ཞེ་ན། ཐ་དད་མཚམས་ནི་སྤངས་པ་ཡིན། །ཞེས་བྱ་བ་སྨོས་ཏེ། ཆུ་ལ་སོགས་པས་མཚམས་ཐ་དད་པ་དང་བྲལ་བའི་ཡིན་ཏེ་མཚམས་གཅིག་པའི་ཞེས་བྱ་བའི་ཐ་ཚིག་གོ། །འབྲལ་བའི་དྲི་མས་ཞེས་བྱ་བ་ནི་འབྲལ་བའི་སྤང་བའི་ལྟུང་བས་སོ། །དྲི་མ་དང་འདྲ་
[95a]
[95a.1]བས་དྲི་མ་སྟེ། ལྟུང་བའི་དྲི་མ་ཞེས་བྱ་བའི་དོན་ཏོ། །དྲི་མ་དང་བཅས་པའི་ཞེས་བྱ་བ་ནི་ཉེས་པ་དང་བཅས་པ་སྟེ། ལྟུང་བའི་དྲི་མས་ཉེ་བར་གོས་ཞེས་བྱ་བའི་ཐ་ཚིག་གོ། །འདི་ལ་འདྲི་བའི་དོན་ནི་རང་འཁྲུངས་དང་བཅོས་མས་མཚམས་བཅད་པ་མེད་པའི་གནས་ཆེན་པོ་
[95a.2]ཡང་རུང་། ཆུང་ངུ་ཡང་རུང་། གཅིག་ན་གནས་པའི་དགེ་སློང་ལ་གདོན་མི་ཟ་བར་འབྲལ་བའི་སྤང་བའི་ལྟུང་བྱེད་འབྱུང་མི་སྲིད་དོ་ཞེས་བྱ་བ་འདི་ནི་མངོན་ན། འོན་ཀྱང་ཅི་རྣམ་གྲངས་འགའ་ཞིག་གིས་གནས་དེ་ལྟ་བུ་ལ་གནས་པ་ལ་འབྲལ་བའི་སྤང་བའི་ལྟུང་བ་འབྱུང་བར་འགྱུར་རམ་ཞེས་བྱ་བ་ནི་ཁོ་བོ་ལ་
[95a.3]བརྗོད་པར་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མུ་སྟེགས་ཅན་གྱི་གནས་ཀྱི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་དགབ་པ་གཅིག་པའི་གནས་གཅིག་ན་མཆིས་ཤིང་དེ་ཉིད་དུ་དེའི་ཆོས་གོས་དེ་དང་འབྲལ་བར་
[95a.4]འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་གནས་ཏེ་མུ་སྟེགས་ཅན་གྱི་དགེ་སྦྱོང་དང་། རྒྱུ་བ་པ་དང་། ཀུན་དུ་རྒྱུ་སྣ་ཚོགས་པའམ། སྤུན་ནི་ནོར་བགོས་པ་རྣམས་ཀྱི་ཡིན་ནའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདིར། ནོར་ལས་དང་ལྟ་བ་ལས་ཐ་
[95a.5]དད་པ་མ་ཡིན་པའི་ཡང་ངོ་ཞེས་བཤད་དོ། །དེ་བཞིན་དུ་འདིར་གཞུང་གཞན་ནི། དགེ་འདུན་གྱི་གཙུག་ལག་ཁང་མུ་སྟེགས་ཅན་རྣམས་དང་ཉེར་སྤྱོད་ཀྱིས་གཅིག་པ་ན་གནས་པ་རྣམས་ལས་གང་ཞིག་སྒོ་གང་ལ་གནས་པ་ལ་ནི་ལྟུང་བ་མེད་དོ་ཞེས་བྱ་བ་ཡིན་ཏེ། དེའི་ཕྱིར་འདིས་
[95a.6]ནི་ཐ་དད་པ་ཉིད་ཡིན་ནོ་ཞེས་བཤད་པ་ཡིན་ནོ། །དེ་བཞིན་དུ་འདིར་གཞུང་གཞན་ནི། བཙུན་པ་དགེ་སློང་མཚམས་ཀྱི་ནང་མཆིས་ལ་ཆོས་གོས་ཀྱང་མཚམས་ཀྱི་ནང་ན་བཞག་ན་ཆོས་གོས་དེ་དང་འབྲལ་བར་འགྱུར་བ་ལྟ་མཆིས་ལགས་སམ། །ཉེ་བ་འཁོར་ཡོད་དེ། མཚམས་བཅད་པ་བྱས་ལ་ཆོས་
[95a.7]གོས་དང་མི་འབྲལ་བའི་སྡོམ་པ་མ་བྱས་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། དེར་གནང་བ་བྱས་ན་ནི་ཆོས་གོས་དག་དང་འབྲལ་བར་མི་འགྱུར་རོ་ཞེས་བཤད་དོ། །ཡང་ན་གནས་གཅིག་གམ་མཚམས་གཅིག་ན་གནས་པ་ལ་ཞེས་བྱ་བ་ལ་སོགས་པ་ལྟ་བུར་འདྲི་བ་རྣམ་པ་
[95b]
[95b.1]གཉིས་བྱ་ལ་ལན་ཡང་བཤད་མ་ཐག་པ་དེ་ལྟ་བུའི་གཞུང་རྣམ་པ་གཉིས་བརྗོད་པར་བྱའོ། །ཡང་ན་ལས་དང་པོ་པ་ལ་སོགས་པའམ་སྔོན་ལྟུང་བ་བྱུང་བ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། སྔ་མ་བཞིན་ནོ། །ཟླ་བ་པའི་གོས་དགེ་སློང་གིས་ཞེས་བྱ་བ་ལ་སོགས་པ་ནི་ཅིའི་ཕྱིར་ལྟུང་
[95b.2]བ་མེད་པར་གསུངས་ཞེས་བྱ་བར་སྦྱར་ཏེ། ཟླ་བའི་གོས་ནི་ཟླ་བ་འདས་པའི་གོས་སོ། །མ་སྤངས་པ་ཞེས་པ་ནི་མ་བཏང་བའོ། །ལྟུང་བ་མེད་པ་ནི་ཁ་ན་མ་ཐོ་བ་མེད་པའོ་ཞེས་གསུངས་ཞེས་བྱ་བ་ནི་དེ་སྐད་དུ་གསུངས་པའོ། །གསལ་བར་སྨྲོས་ཞེས་བྱ་བ་ནི་གསལ་པོར་ཤེས་པའོ། །འདི་ལ་གཞན་གྱི་
[95b.3]བསམ་པ་ནི་ཟླ་བའི་སྤངས་པ་ནི་ཟླ་བ་འདས་པ་ཁོ་ནས་བྱུང་ངོ་ཞེས་བྱ་བ་དེ་ནི་ཁོ་བོ་ཅག་ལ་ངེས་པ་ཁོ་ན་ཡིན་ན། འོན་ཀྱང་བཅོམ་ལྡན་འདས་ཀྱིས་རྣམ་པ་གཞན་གྱིས་ཇི་སྲིད་འཚོའི་བར་དུ་འཆང་བའི་དགེ་སློང་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་འདི་ལ་ཅི་སྟེ་འདི་སྐད་དུ་གསུངས་ཞེས་བྱ་བའི་རྒྱུ་
[95b.4]ཁོ་བོ་ལ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཟླ་བ་གཅིག་ཚུན་ཆད་དུ་ཤི་བ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཇི་སྲིད་འཚོའི་བར་དུ་བཞག་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་
[95b.5]ཡོད་དེ། ཟླ་བ་གཅིག་ཚུན་ཆད་དུ་ཤི་ནའོ་ཞེས་བྱ་བ་ཡིན་ནོ། །ཡང་ན་ཆོས་གོས་རུང་བ་མ་ཡིན་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཆོས་གོས་དགུང་ཟླ་བ་གཅིག་ཕན་ཆད་དུ་བཞག་ལ་སྤང་བའི་ལྟུང་བྱེད་དུ་ཡང་མི་འགྱུར་བ་ལྟ་
[95b.6]མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཆོས་གོས་དེ་སྤུན་རུང་ལ་རྒྱུ་རུང་བ་མ་ཡིན་པ་དང་ཞེས་བྱ་བ་ཡིན་ཏེ་སྔ་མ་བཞིན་ནོ། །ཡང་ན་སྲ་བརྐྱང་བཏིང་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཆོས་གོས་དགུང་ཟླ་དྲུག་ཏུ་
[95b.7]བཞག་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཆོས་གོས་རྙེད་ནས་ཞག་སུམ་ཅུ་ལོན་པ་དང་སྲ་བརྐྱང་བཏིང་བར་གྱུར་ནའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་། འདི་གསུམ་ནི་སྲ་བརྐྱང་བཏིང་བ་ལ་མི་འབྱུང་ངོ་ཞེས་བཤད་དོ། །ཡང་ན་སྔོན་ཕམ་པ་བྱུང་བ་ལ་
[96a]
[96a.1]སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། སྔ་མ་བཞིན་ནོ། །སྡོམ་བརྩོན་ཅན་ནི་ཕ་མ་ལས་ཞེས་བྱ་བ་ལ་སོགས་པ་ལ། ཕ་མ་ལས་ཞེས་བྱ་བ་ནི་ཕ་དང་མ་དག་ལས་སོ། །རུང་བ་ནི་བཏགས་པ་ལ་སོགས་པ་སྟེ། དཔག་བསམ་གྱི་གོས་ལ་
[96a.2]སོགས་པ་མ་ཡིན་པ་ཞེས་བྱ་བའི་ཐ་ཚིག་གོ། །རུང་བ་ཞེས་བྱ་བ་སྨོས་པ་ནི་རུང་བ་མ་ཡིན་པ་བཀག་གོ། །བླང་བྱས་ན་ཞེས་བྱ་བ་ནི་རང་གིས་བྱས་ནའོ། །སྤངས་པའི་ཉེས་པ་ཡིས་ཞེས་བྱ་བ་ནི་སྤང་བའི་ལྟུང་བས་སོ། །དྲི་མ་ཅན་དུ་གྱུར་པ་ཞེས་བྱ་བ་ནི་མ་རུང་བར་རོ། །འདི་ལ་དོན་ནི་དགེ་སློང་
[96a.3]གིས་ཕ་མ་ལས་ཆོས་གོས་རུང་བ་བླངས་པ་ནི་ཉེས་པ་མེད་པ་ཁོ་ནའོ་ཞེས་བྱ་བ་དེ་ནི་ཁོ་བོ་ལ་གསལ་བ་སྙམ་བྱེད་ན། འོན་ཀྱང་བཅོམ་ལྡན་འདས་ཀྱིས་རྣམ་གྲངས་འགའ་ཞིག་གིས་དེ་ལ་སྤང་བའི་ལྟུང་བྱེད་དུ་གསུངས་སོ་ཞེས་བྱ་བ་དེ་ལྟ་བུ་ཡིན་ཞེས་བྱ་བ་འདི་ལ་ཁྱོད་ཀྱིས་ཅུང་ཟད་ཅིག་བརྗོད་པར་བྱའོ་
[96a.4]ཞེས་བྱ་བ་ནི་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དགེ་འདུན་ལ་བསྔོས་པ་དང་རང་གིར་བྱེད་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཕ་མ་ལས་ཆོས་གོས་བླངས་ལ་སྤང་བའི་ལྟུང་བྱེད་དུ་འགྱུར་བ་ལྟ་མཆིས་ལགས་
[96a.5]སམ། ཉེ་བ་འཁོར་ཡོད་དེ། འདི་ལྟར་ཆོས་གོས་ཕ་མས་དགེ་འདུན་ལ་བསྔོས་པ་ཡིན་ལ་ངེས་ཤེས་བཞིན་དུ་གང་ཟག་བདག་ཉིད་ཀྱིས་སྒྱུར་བར་བྱེད་ན་ཆོས་གོས་གྲུབ་ན་སྤང་བའི་ལྟུང་བྱེད་དོ་ཞེས་བྱ་བ་ཡིན་ནོ། །འདི་ལ་ཞུ་བ་ལས་བྱུང་བ་གཞུང་གཞན་ཡང་བཅོམ་ལྡན་འདས་ཀྱིས་ཉེ་དུ་མ་ཡིན་པ་
[96a.6]ལས་ཆོས་གོས་ལེན་ན་སྤང་བའི་ལྟུང་བྱེད་དུ་འགྱུར་རོ་ཞེས་བཀའ་སྩལ་པ་གང་ལགས་པ། དགེ་སློང་གིས་དགེ་སློང་མ་ལས་ཆོས་གོས་བླངས་ལ་དེ་ཡང་སྤང་བའི་ལྟུང་བར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གལ་ཏེ་དེས་དགེ་འདུན་ལ་སྤགས་པ་ཡིན་ལ། དགེ་སློང་གིས་བདག་
[96a.7]ཉིད་ལ་སྦྱོར་བར་བྱེད་ནའོ་ཞེས་འབྱུང་ངོ་། །འདི་ལ་མདོ་བྱེད་པས་ཀྱང་གཞན་གྱིས་གང་ཟག་གཞན་ནམ། དགེ་འདུན་ལ་བསྔོས་པའི་རྙེད་པ་ཤེས་བཞིན་དུ་བདག་ཉིད་ལ་བསྒྱུར་ཏེ་ཐོབ་ནའོ་ཞེས་བཤད་དོ། །ཞག་བདུན་པའི་སྨན་དག་ནི་ཞེས་བྱ་བ་ལ་སོགས་པ་ལ། བྱིན་གྱིས་བརླབས་པ་དུས་ཞག་བདུན་གྱི་
[96b]
[96b.1]མཐར་ཐུག་པར་འཆང་བའི་ཕྱིར་ཏེ། མར་སར་དང་འབྲུ་མར་ལ་སོགས་པའི་སྨན་ནི་ཞག་བདུན་པའི་སྨན་ཞེས་བྱའོ། །སྨན་དག་བཅངས་ན་ཞེས་བྱ་བར་སྦྱར་ཏེ། བཅངས་ན་ཞེས་བྱ་བ་ནི་བཞག་ནའོ། །ལྟུང་བ་མེད་པར་གསུངས་པ་ཞེས་བྱ་བ་ནི་སྡོམ་བརྩོན་ཞེས་བྱ་བར་སྦྱར་རོ། །འབོད་དེ་སྨྲ་བར་གྱིས་ཞེས་
[96b.2]བྱ་བ་ནི་བསྒྲིམས་ཏེ་སྨྲོས་ཤིག་པའོ། །འདི་ལ་ཚིག་ལེའུར་བྱས་པའི་དོན་ནི་ཞག་བདུན་པའི་སྨན་ནི་ཞག་བདུན་འདས་པ་ཁོ་ནས་སྤང་བའི་ལྟུང་བྱེད་ཀྱི་ལྟུང་བ་འབྱུང་བར་འགྱུར་རོ་ཞེས་བྱ་བ་དེ་ནི་ཁོ་བོ་ཅག་ལ་ངེས་ན། འོན་ཀྱང་བཅོམ་ལྡན་འདས་ཀྱིས་ཞག་བདུན་པའི་སྨན་ཇི་སྲིད་འཚོའི་བར་དུ་བཅངས་པ་ལ་
[96b.3]ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་ཅིའི་ཕྱིར་དེ་སྐད་དུ་བཀའ་སྩལ་པ་སྙིང་ནས་སོམས་ལ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཞག་བདུན་ཚུན་ཆད་དུ་ཤི་བ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་
[96b.4]སློང་གིས་ཞག་བདུན་པའི་སྨན་ཇི་སྲིད་འཚོའི་བར་དུ་བཅངས་པ་སྤང་བའི་ལྟུང་བྱེད་དུའང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཞག་བདུན་ཚུད་ཆད་དུ་ཤི་ནའོ། །ཡང་ན་རུང་བ་མ་ཡིན་པའི་སྨན་འཆང་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི།
[96b.5]བཙུན་པ་དགུང་བདུན་པའི་སྨན་དགུང་བདུན་ལས་འདས་པར་བཅངས་ལ་སྤང་བའི་ལྟུང་བྱེད་དུ་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། སྨན་རུང་བ་མ་ཡིན་པ་དང་འདྲེས་པར་གྱུར་པ་དེ་གང་དགེ་སློང་རྣམས་ཀྱིས་སྤྱད་དུ་རུང་བ་མ་ཡིན་ནོ་ཞེས་བྱ་བ་ཡིན་ནོ། །ཡང་ན་ལས་དང་པོ་པའམ་
[96b.6]སྔོན་ཕམ་པ་བྱུང་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། ཤེས་བཞིན་དུ་ནི་བརྫུན་གྱི་ཚིག་ཅེས་བྱ་བ་ལ་སོགས་པ་ལ། ཤེས་བཞིན་དུ་ཕྱིན་ཅི་ལོག་པའི་འདུ་ཤེས་ཉམས་སུ་མྱོང་བ་སྟེ་ཆེད་དུ་བསམས་ནས་ཞེས་བྱ་བའི་ཐ་ཚིག་གོ། །བརྫུན་ནི་དོན་ལོག་པའོ། །
[96b.7]ཚིག་ནི་དོན་བརྗོད་པ་སྟེ་ཤེས་བཞིན་དུ་སླུ་བ་ལ་སོགས་པའི་ཆེད་དུ་དོན་གཞན་དུ་རྣམ་པར་གནས་པ་གཞན་དུ་བརྗོད་པ་ཞེས་བྱ་བའི་ཐ་ཚིག་གོ། །ཤེས་བཞིན་དུ་སྨོས་པས་ནི་བློ་སྔོན་དུ་བཏང་བའི་བརྫུན་གྱི་ཚིག་བསལ་ཏོ། །དེ་སྨྲས་ན་སྟེ་བརྗོད་ནའོ། །ལྟུང་བྱེད་མེ་ཡིས་ནི་ཞེས་བྱ་བ་ལ་ལྟུང་བྱེད་ནི་དམྱལ་བ་ལ་སོགས་པར་ལྟུང་བར་བྱེད་པའི་
[97a]
[97a.1]ཕྱིར་ཏེ་ངན་སོང་ངན་འགྲོ་ལོག་པར་ལྟུང་བ་དམྱལ་བ་དང་དུད་འགྲོ་དང་ཡི་དྭགས་རྣམས་སུ་སྲེག་པར་བྱེད། འཚེད་པར་བྱེད། ལྟུང་བར་བྱེད་པས་ཞེས་བྱ་བས་སོ། །དེ་ཉིད་མེ་ཡིན་ཏེ་སྡུག་བསྔལ་བའི་རྒྱུ་ཡིན་པའི་ཕྱིར་རོ། །ཤིན་ཏུ་སྲེག་ཅེས་བྱ་བ་ནི་ཤིན་ཏུ་སྡུག་བསྔལ་བསྐྱེད་
[97a.2]པས་སོ། །མིན་ཞེས་ལྟུང་བྱེད་བཀག་པ་སྨོས་པས་ཉེས་བྱས་སུ་བརྗོད་པ་ནི་གནང་བ་ཡིན་ཏེ། འོག་མ་དག་ལ་ཡང་དེ་བཞིན་ཁོ་ནར་ཤེས་པར་བྱའོ། །གསལ་པོར་སྨྲོས་ཞེས་བྱ་བ་ནི་ངེས་པར་སྨྲོས་ཤིག་པའོ། །འདི་ལ་གཞན་གྱིས་བསམ་པ་ནི་གང་དགེ་སློང་འགའ་ཞིག་གི་ཆེད་དུ་
[97a.3]བསམས་ཏེ་བརྫུན་སྨྲས་ན་དེ་ལ་གདོན་མི་ཟ་བར་ལྟུང་བྱེད་བྱུང་ན། འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བྱེད་མ་གསུངས་སོ་ཞེས་བྱ་བ་དེ་ལ་རྒྱུ་ཅི་ཞིག་ཡོད་ཅེས་བྱ་བ་དེ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་སྨྱོས་པ་ལ་སོགས་པའི་མདུན་དུ་སྨྲས་པའི་
[97a.4]དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་སྨྱོན་པའི་དྲུང་དུ་བརྫུན་སྨྲས་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་སེམས་འཁྲུགས་པ་དང་། ཚོར་བས་ཉེན་པ་དང་གླེན་པ་དང་འོན་པ་དང་གཉིད་ཀྱིས་ལོག་པ་དང་། མྱོས་པ་དང་རབ་
[97a.5]ཏུ་མྱོས་པ་དང་། སྨྱོན་པར་ཞུགས་པ་དང་། འགྲོ་བ་གཞན་པའི་དྲུང་དུ་བརྫུན་སྨྲས་ན་ཅིར་འགྱུར་ལགས། ཉེས་བྱས་སོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། རང་བཞིན་ཉམས་པ་ནི་མ་ཡིན་ནོ། །མིའི་འགྲོ་བ་ནི་ཐ་སྙད་དུ་བྱ་བ་ཉིད་ཡིན་ནོ་ཞེས་བཤད་དོ། །འོག་མ་དག་ལ་ཡང་
[97a.6]དེ་བཞིན་དུ་ཤེས་པར་བྱའོ། །ཡང་ན་དབེན་པ་ལ་དབེན་པར་འདུ་ཤེས་པ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དབེེན་པ་ལ་དབེེན་པའི་འདུ་ཤེས་ཀྱིས་བརྫུན་སྨྲས་ན་ཅིར་འགྱུར་ལགས། ཉེས་བྱས་སོ་ཞེས་བྱ་བ་ལ་སོགས་པ་
[97a.7]ཡིན་ནོ། །ཡང་ན་དབུས་པས་དབུས་པ་ལ་མཐའ་འཁོབ་པའི་སྐད་དུ་སྨྲས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་དབུས་པས་དབུས་པ་ལ་མཐའ་འཁོབ་པའི་སྐད་དུ་བརྫུན་སྨྲས་ལ་དེས་ཀྱང་མཐའ་འཁོབ་པའི་སྐད་དེམ་འཚལ་ན་ཅིར་འགྱུར་
[97b]
[97b.1]ལགས། ཉེས་བྱས་སུའོ་ཞེས་བྱ་བ་ལ་སོགས་པ་ཡིན་ནོ། །མདོ་བྱེད་པས་ཀྱང་། འདི་ལ་རྣམ་པར་རེག་བྱེད་ལ་ནི་དོན་གོ་བའོ་ཞེས་བཤད་དོ། །འོག་མ་དག་ལ་ཡང་དེ་བཞིན་དུ་ཤེས་པར་བྱའོ། །དེ་ཉིད་ལ་དགོངས་ནས། བརྫུན་ཚིག་འདུ་ཤེས་གཞན་བསྒྱུར་བའི། །ཚིག་དོན་མངོན་
[97b.2]པར་གོ་བའོ། །ཞེས་བཤད་དོ། །ཡང་ན་ལས་དང་པོ་པ་དང་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་དེ་སྐད་གསུངས་པ་ཡིན་ཏེ་སྔ་མ་བཞིན་ནོ། །དགེ་སློང་གིས་དགེ་སློང་ལ་ཞེས་བྱ་བ་ལ་སོགས་པ་ནི་ཁྱིམ་པ་དང་རབ་ཏུ་བྱུང་བ་ལ་སོགས་པ་ལ་ཡང་མིའི་སྐྱོན་ནས་སྨྲ་སྲིད་པས་དགེ་
[97b.3]སློང་ལ་ཞེས་སྨོས་སོ། །སྐྱོན་ནས་སྨྲ་བ་ནི་ཁྱོད་ནི་ཞར་བའོ། །ཐེང་པོ་སྒུར་པོ་སྤྱི་ཅེར་རོ། །མགོ་སྐྱའོ། །ཁྲོ་བའོ་ཞེས་བྱ་བ་ལ་སོགས་པས་སྐྱོན་ཉིད་ནས་སྨྲ་ཞིང་བརྗོད་པ་སྟེ། སྨད་པའི་བསམ་པས་སྨྲས་པའི་ཐ་ཚིག་གོ། །དེ་རབ་ལ་ཞེས་བྱ་བ་ནི་བྱེད་པ་པོ་ལ་སྟེ། ཡི་གེ་ལྷག་པ་ལས་ན་དོན་
[97b.4]ལྷག་པ་ཡོད་པས་སྐྱོན་བརྗོད་པར་འདོད་པའི་འདུན་པས་ཞེས་བྱ་བའི་ཁྱད་པར་བལྟ་བར་བྱའོ། །དེ་ལྟར་ཡང་དགེ་སློང་གིས་མིའི་སྐྱོན་བརྗོད་པའི་བསམ་པས་ཞེས་གསུངས་སོ། །ཀུན་མཁྱེན་ནི་ཐམས་ཅད་མཁྱེན་པའོ། །ངེས་པར་སྨྲོས་ཞེས་བྱ་བ་ནི་གཏན་ལ་བབ་པར་སྨྲོས་ཤིག་པའོ། །འདི་
[97b.5]ལ་གཞན་གྱིས་བསམ་པ་ནི་གང་གི་ཚེ་དགེ་སློང་གིས་དགེ་སློང་གི་ཡུལ་འདིའི་སྐྱོན་ཉིད་བརྗོད་དོ་སྙམ་པའི་བསམ་པ་དེས་མིའི་སྐྱོན་ནས་སྨྲ་བ་རབ་ཏུ་སྦྱོར་བ་དེའི་ཚེ་དེ་ལ་ཐེ་ཚོམ་མེད་པ་ཁོ་ནར་ལྟུང་བྱེད་དུ་འགྱུར་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་གིས་དེ་ལ་དེ་འབྱུང་བར་མ་
[97b.6]གསུངས་སོ་ཞེས་བྱ་བ་འདི་ལ་ཁོ་བོ་ལ་རྒྱུ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་མིའི་སྐྱོན་ནས་སྨྲ་བ་ཕོ་ཉ་ལ་བཏང་བ་ཀུན་ཏུ་སྤྱོད་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་མིའི་སྐྱོན་ནས་སྨྲ་བ་ཕོ་
[97b.7]ཉ་ལ་བཏང་བས་ཀུན་ཏུ་སྤྱད་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་ཡི་གེ་དང་། ལག་བརྡ་དང་། གཞན་ལ་སྙད་འདོགས་པ་དང་། བརྒྱུད་པས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་ངག་གིའོ། །རང་གིའོ། །
[98a]
[98a.1]བདག་ཉིད་དང་འབྲེལ་བའོ་ཞེས་བཤད་དོ། །ཡང་ན་སྨྱོན་པ་ལ་སོགས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི་སྔ་མ་བཞིན་ནོ། །ཡང་ན་དབུས་པས་དབུས་པའི་དགེ་སློང་ལ་མཐའ་འཁོབ་པའི་སྐད་དུ་སྨྲས་པ་ལ་བརྟེན་ནས་གསུངས་
[98a.2]པ་ཡིན་ཏེ། དེ་བཞིན་དུ་འདིར་གཞུང་ནི་སྔ་མ་བཞིན་ནོ། །ཡང་ན་ལས་དང་པོ་པ་དང་སྔོན་ཕམ་པ་བྱུང་བ་ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །དགེ་སློང་ཉོན་མོངས་ཅན་སེམས་ཀྱིས། །ཞེས་བྱ་བ་ལ་སོགས་པ་ལ། དགེ་སློང་སྨོས་པས་ནི་དགེ་སྦྱོང་ལ་སོགས་པ་
[98a.3]བསལ་བའི་ཕྱིར་རོ། །ཉོན་མོངས་ཅན་སེམས་ཀྱིས་ཞེས་བྱ་བ་ནི་དབྱེ་བའི་བསམ་པ་སྟེ། ཉོན་མོངས་ཅན་ཞེས་སྨོས་པས་ནི་ཉོན་མོངས་པ་ཅན་མ་ཡིན་པའི་སེམས་བཀག་པའོ། །དགེ་སློང་གིས་སྨྲས་ཞེས་བྱ་བ་ནི་དགེ་སློང་གིས་སྨྲས་པའོ། །ཕྲ་མ་ནི་དབྱེན་གྱི་ཚིག་གོ། །དགེ་སློང་ལ་
[98a.4]ཞེས་བྱ་བ་ནི་དགེ་སློང་གི་ཡུལ་ལའོ། །དག་ཅེས་བྱ་བ་ནི་ལྟུང་བ་མེད་པར་རོ། །བཅོལ་ཞེས་བྱ་བ་ནི་དོན་དུ་གཉེར་གྱིས་ཞེས་བྱ་བའོ། །འདི་ལ་གཞན་གྱིས་བསམ་པ་གང་གི་ཚེ་དགེ་སློང་ཞིག་གིས་དགེ་སློང་གི་ཡུལ་ལ་དགའ་ཡང་རུང་མི་དགའ་ཡང་རུང་དགེ་སློང་ཞིག་གིས་མངོན་སུམ་དུ་འདི་ནི་
[98a.5]ཁྲོ་བའོ། །འཆབ་པའོ། །ཚིག་པའོ། །མཛེ་ཅན་ནོ་ཞེས་ཟེར་རོ་ཞེས་བྱ་བ་ལ་སོགས་པ་བདེན་ཡང་རུང་བརྫུན་ཡང་རུང་བ་སྨྲ་ལ་དེ་ཡང་གལ་ཏེ་དགེ་སློང་གིས་སྨྲས་པ་དེ་དགེ་སློང་གི་ཡུལ་ལ་དབྱེན་གྱི་བསམ་པས་སྨྲས་ན་དེས་ན་དེ་ལ་ལྟུང་བྱེད་དུ་འགྱུར་རོ་ཞེས་བྱ་བ་གསལ་བ་ཉིད་ན། འོན་ཀྱང་
[98a.6]བཅོམ་ལྡན་འདས་ཀྱིས་དེས་འགྱུར་བར་མ་གསུངས་སོ་ཞེས་བྱ་བ་འདི་ལ་ཁྱོད་ཀྱིས་ཁོ་བོ་ལ་རྒྱུ་ཉེ་བར་བསྟན་པར་བྱའོ་ཞེས་བྱ་བ་ནི་འདི་ཡིན་ནོ། །འདི་ལ་ལན་ནི་མིའི་སྐྱོན་ནས་སྨྲ་བ་ལ་བཤད་པ་ཐམས་ཅད་ཡིན་པ་ཉིད་ལ། ལུང་དང་མདོ་ལས་བཤད་པའི་གཞུང་ཡང་དེ་ཉིད་ཡིན་ཏེ་སྔ་མ་བཞིན་
[98a.7]ནོ། །སྡོམ་བརྩོན་ཅན་གྱིས་རུང་བའི་ཞེས་བྱ་བ་ལ་སོགས་པ་ལ་རུང་བ་ནི་རུང་བ་ཞེས་བྱ་བ་མེ་དང་རྨ་བྱུང་བ་དང་མཚོན་དང་སེན་མོ་དང་ནེ་ཅོ་དང་རྙིས་པ་དང་བཀྲུམ་པ་དང་བཀས་པ་དང་བཅད་པ་ཞེས་བྱ་བ་དག་གིས་ཅི་རིགས་པར་རུང་བར་བྱས་པ་སྟེ། ཆོ་ག་བྱས་པ་ཞེས་བྱ་བའི་དོན་ཏོ། །ས་བོན་རྣམ་པ་
[98b]
[98b.1]ལྔ་ནི་རྩ་བ་དང་། སྡོང་བུ་དང་། རྩེ་མོ་དང་། འགས་པ་དང་། ས་བོན་གྱི་ས་བོན་ཞེས་བྱ་བ་དག་གོ། །ལྟུང་བྱེད་བྱེད་པ་ཞེས་བྱ་བ་ནི་ལྟུང་བྱེད་ཀྱི་ལྟུང་བ་དང་ལྡན་པར་རོ། །འདི་ལ་གཞན་གྱི་བསམ་པ་ནི་གང་ཞིག་རྩ་བ་ལ་སོགས་པ་ས་བོན་གྱི་རིས་ལྔ་པོ་རྨ་བྱུང་བ་ལ་སོགས་པའི་ཆོ་གས་རུང་བར་བྱས་
[98b.2]པ་ཟ་བ་དེ་ལ་ནི་ལྟུང་བྱེད་ཀྱི་ལྟུང་བ་མེད་པ་ཉིད་དོ་ཞེས་བྱ་བ་དེ་ནི་ལེགས་པར་ཤེས་ན། འོན་ཀྱང་བཅོམ་ལྡན་འདས་ཀྱིས་ལ་ལར་དེ་ལ་ལྟུང་བྱེད་དུ་གསུངས་སོ་ཞེས་བྱ་བ་འདི་ཁོ་བོ་ལ་འབད་དེ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། རུང་བར་བྱས་པ་རྣམས་མྱུ་གུ་སྐྱེས་པ་ཡོངས་སུ་ལོངས་
[98b.3]སྤྱོད་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ས་བོན་གྱི་རིས་ལྔ་པོ་ཞུགས་ཀྱིས་རུང་བ་བགྱིས་ཏེ། འཚལ་ལ་ལྟུང་བྱེད་ཀྱི་ལྟུང་བར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ས་བོན་གྱི་རིས་ལྔ་པོ་རུང་བར་བྱས་པ་
[98b.4]ས་ལ་བཞག་པའམ་སྣོད་དུ་བཞག་པའམ་གདང་ལ་བཏགས་པ་ལས་མྱུར་དུ་སྐྱེས་པར་གྱུར་ནའོ་ཞེས་བྱ་བ་ཡིན་ཏེ། འདིར་མེས་རུང་བར་བྱ་བ་ནི་རྨད་བྱུང་བ་ལ་སོགས་པ་གཞན་དག་གི་དཔེ་ཙམ་དུ་ཟད་པར་ཤེས་པར་བྱའོ། །གཡོགས་མ་མེད་པར་ཞེས་བྱ་བ་ལ་སོགས་པ་ནི་གཡོགས་མ་མེད་པར་གནས་མལ་
[98b.5]རུང་བ་བཤམས་ནས་མ་བྲུ་བས་ཤིང་མ་བལྟས་པར་སོང་ན་ཇི་ལྟར་དག་པར་གསུངས་ཞེས་བྱ་བར་སྦྱར་རོ། །དེ་ལ་གཡོགས་མ་མེད་པར་ཞེས་བྱ་བ་ནི་བླ་གབ་མེད་པར་རོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །གནས་མལ་ནི་ཁྲི་དང་ཁྲིའུ་དང་སྟན་ནང་
[98b.6]ཚངས་ཅན་ལ་སོགས་པའོ། །རུང་བ་ཞེས་བྱ་བ་ནི་ཁྲི་དང་སྟན་ནང་ཚངས་ཅན་ལ་སོགས་པ་བ་སོ་དང་གསེར་དང་དངུལ་ལ་སོགས་པ་ལས་བྱས་པ་དང་དཔག་བསམ་གྱི་ཤིང་གི་གོས་དང་། ཚད་ལས་ལྷག་པ་ལ་སོགས་པ་དང་བྲལ་ཞིང་ཚད་དང་ལྡན་པ་ཞེས་བྱ་བའི་ཐ་ཚིག་གོ། །བཤམས་ཞེས་བྱ་
[98b.7]བ་ནི་མ་བཀྲམ་ནས་སོ། །མ་བྲུབས་ཞེས་བྱ་བ་ནི་མ་བརྟུལ་ཅིང་ངོ་། །མ་བལྟས་པར་ཞེས་བྱ་བ་ནི་བལྟ་བ་མ་བྱས་པར་ཏེ་མ་བཅོལ་བར་ཞེས་བྱ་བའི་དོན་ཏོ། །སོང་ན་ཞེས་བྱ་བ་ནི་མཚམས་ལས་འདས་ནའོ། །ཇི་ལྟ་བུར་ན་ཞེས་བྱ་བ་ནི་རྒྱུ་གང་གིས་ནའོ། །དག་པར་ཞེས་བྱ་བ་ནི་ལྟུང་བ་མེད་པར་རོ། །འདི་
[99a]
[99a.1]ལ་འདྲི་བའི་དོན་ནི་གང་འགའ་ཞིག་གིས་དགེ་འདུན་གྱི་གནས་མལ་དུ་རུང་བ་ལ་ཁྲི་དང་ཁྲིའུ་ལ་སོགས་པ་བདག་ཉིད་ཀྱིས་བླ་གབ་མེད་པར་བཤམས་ལ། ཕྱིས་དགེ་སློང་ལ་སོགས་པ་ལ་བལྟར་མ་བཅུག་པར་མཚམས་ཀྱི་ཕྱི་རོལ་དུ་འགྲོ་ན་དེའི་ཕྱིར་དེ་ལ་ལྟུང་བྱེད་ཀྱི་
[99a.2]ལྟུང་བར་འགྱུར་རོ་ཞེས་བྱ་བ་དེ་ནི་ཤིན་ཏུ་ངེས་ན། འོན་ཀྱང་བཅོམ་ལྡན་འདས་ཀྱིས་ཁ་ཅིག་ཏུ་དེ་ལ་ལྟུང་བ་མེད་པར་གསུངས་སོ་ཞེས་བྱ་བ་འདི་ལ་ཁྱོད་ཀྱིས་ཅི་སྟ་ད་སྐད་གསུངས་པ་ཁོ་བོ་ལ་རྒྱུ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། བར་ཆད་ཀྱི་དབང་དུ་མཛད་
[99a.3]ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་འདུན་གྱི་གནས་མལ་བཀྲམ་མམ་འགྲེམས་སུ་སྩལ་ནས། མ་བྲུབས་ཤིང་འབྲུམ་དུ་ཡང་མ་སྩལ། དགེ་སློང་གཞི་པ་ལ་བལྟར་ཡང་མ་སྩལ་བར་ཉེ་འཁོར་ལས་འདས་ལ་ལྟུང་བར་ཡང་མི་འགྱུར་བ་ལྟ་
[99a.4]མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་ལ་གཙུག་ལག་ཁང་དེར་བར་ཆད་བརྒྱད་ལས་བར་ཆད་གང་ཡང་རུང་བ་ཅིག་ཉེ་བར་གནས་པར་གྱུར་ནའོ་ཞེས་བྱ་བ་ཡིན་ནོ། །དེ་བཞིན་དུ་གཞན་ལས་ཀྱང་རྐྱེན་དེ་ལྟ་བུ་ནི་མ་གཏོགས་སོ་ཞེས་གསུངས་སོ། །མདོ་བྱེད་པས་ཀྱང་
[99a.5]ཉམ་ང་བ་དང་ཕྲད་པ་ལ་ཡང་མི་འབྱུང་ངོ་ཞེས་བཤད་དོ། །ཡང་ན་དེ་ནི་ལས་དང་པོ་པ་དང་སྔོན་ཕམ་པ་བྱུང་བ་ལ་སོགས་པ་ལ་བརྟེན་ནས་གསུངས་པ་ཡིན་པར་ཤེས་པར་བྱ་སྟེ་སྔ་མ་བཞིན་ནོ། །སྡོམ་བརྩོན་ཅན་གྱིས་ཞེས་བྱ་བ་ལ་སོགས་པ་ནི་སྡོམ་བརྩོན་ཅན་གྱིས་ཆོས་གོས་རུང་བ་དགེ་སློང་མ་ཉེ་
[99a.6]དུ་མ་ཡིན་པ་ལ་བྱིན་ན་ཅིའི་ཕྱིར་ལྟུང་བ་མེད་པ་ཞེས་གསུངས་ཞེས་བྱ་བར་སྦྱར་རོ། །དེ་ལ་རུང་བ་ནི་རྔ་མོ་དང་གནག་དང་རི་དྭགས་ཀྱི་སྤུ་ལ་སོགས་པ་དང་བྲལ་བའོ། །གོས་ནི་བགོ་བ་སྟེ་སྣམ་སྦྱར་བླ་གོས་དང་མཐར་གོས་ལ་སོགས་པའོ། །ཉེ་དུ་ནི་ཕ་མ་དག་ནས་བདུན་པ་ཚུན་ཆད་ལས་སྔ་མ་གཅིག་
[99a.7]ལས་སྐྱེས་པའོ། །ཉེ་དུ་མ་ཡིན་པ་ནི་ཉེ་དུ་མིན་པ་སྟེ་དེ་ལའོ། །བྱིན་ཞེས་བྱ་བ་ནི་ཡོངས་སུ་བཏང་ནའོ། །ལྟུང་བ་མེད་པ་ཞེས་བྱ་བ་ནི་ཉེས་པ་མེད་པའོ་ཞེས་གསུངས་པ་ཞེས་བྱ་བ་ནི་བཅོམ་ལྡན་འདས་ཀྱིས་དེ་སྐད་དུ་བཀའ་སྩལ་པ་སྟེ་ངེས་པར་སྨྲོས་ཞེས་བྱ་བར་སྦྱར་རོ། །འདི་ལ་དོན་ནི་གང་གི་
[99b]
[99b.1]ཚེ་དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་གོས་རུང་བ་བྱིན་པ་དེའི་ཚེ་དེ་ལ་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་དེ་ནི་ངེས་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་གིས་དེ་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་འདི་ལ་ཁྱོད་ཀྱིས་ཁོ་བོ་ལ་རྒྱུ་སྨྲོས་ཤིག་ཅེས་བྱ་
[99b.2]བ་འདི་ཡིན་ནོ། །དེ་ལ་ལན་ནི་འདི་ཡིན་ཏེ། དེ་ནི་ཚད་དུ་མ་ཆོག་པ་དང་ལྷག་པ་ལ་བརྟེན་ནས་གསུངས་པ་ཡིན་པར་བལྟའོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་སློང་མ་ཉེ་དུ་མ་ལགས་པ་ལ་གོས་སྩལ་ལ་ལྟུང་བར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་
[99b.3]ཡོད་དེ། གོས་ཁྲུ་གང་དུ་མ་ཆོག་པའམ་བདེ་བར་གཤེགས་པའི་ཆོས་གོས་ཀྱི་ཚད་ཡིན་ནོ། །ཡང་ན་དེ་ནི་རིན་དུ་བྱིན་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་སློང་མ་ཉེ་དུ་མ་ལགས་པ་ལ་གོས་སྩལ་ལ་ལྟུང་བར་ཡང་མི་འགྱུར་བ་ལྟ་
[99b.4]མཆིས་ལགས་སམ། ཉེ་བ་འཁོར་ཡོད་དེ། རིན་དུ་བྱིན་ལ་རིན་བླངས་ནའོ་ཞེས་བྱ་བ་ཡིན་ནོ། །ཡང་ན་དེ་ནི་དགེ་འདུན་ལ་གོས་འབུལ་བར་བྱེད་པའམ། ལེགས་པར་སྨྲ་བའམ། བསྙེན་པར་རྫོགས་པར་བྱེད་པའམ། བོར་རླག་བྱུང་བའམ། སྐྱིན་པར་བྱིན་པ་ལ་བརྟེན་ནས་གསུངས་པ་ཡིན་
[99b.5]ཏེ། དེ་བཞིན་དུ་འདིར་གཞུང་ནི། དགེ་འདུན་ལ་གོས་འབུལ་བར་བྱེད་དམ། ལེགས་པར་སྨྲ་བ་ལ་བྱིན་ནམ། བསྙེན་པར་རྫོགས་པར་བྱེད་པ་ལ་སྦྱིན་ནམ། བོར་རླག་བྱུང་བའམ། སྐྱིན་པར་སྦྱིན་པ་ལ་ལྟུང་བ་མེད་དོ་ཞེས་བྱ་བ་ཡིན་ནོ། །ཡང་ན་ལས་དང་པོ་པ་ལ་སོགས་པ་ལ་དགོངས་ནས་
[99b.6]གསུངས་པ་ཡིན་ཏེ་སྔ་མ་བཞིན་ནོ། །མཚམས་གཅིག་གནས་པའི་ཞེས་བྱ་བ་ནི་མཚམས་ཀྱི་ནང་ན་གནས་པའོ། །མང་པོ་ཞེས་བྱ་བ་ནི་བཞི་ལ་སོགས་པའོ། །ཁ་ཟས་མ་སྩལ་བར་ཞེས་བྱ་བ་ནི་འདི་དག་ལ་ཁ་ཟས་བཟའ་བ་དང་བཅའ་བ་ལ་སོགས་པ་ཨ་རུ་ར་ཙམ་ཡང་བསྲུལ་ཞིང་བསྐུར་བ་མེད་
[99b.7]པས་ཟས་མ་སྩལ་བར་རོ། །ཐ་དད་ཅེས་བྱ་བ་ནི་སོ་སོར་རོ། །བཟའ་བ་ནི་ཟ་བར་བྱེད་པ་སྟེ། དགེ་སློང་དག་ཅེས་བྱ་བར་སྦྱར་རོ། །འདི་ལ་བསམ་པ་ནི་གང་གི་ཚེ་མཚམས་གཅིག་ན་དགེ་སློང་བཞི་ལ་སོགས་པ་སོ་སོར་སྡེར་བཅས་ནས་ཟན་ཟ་བ་དེའི་ཚེ་དེ་དག་ལ་འདུས་ཤིང་ཟ་བའི་ལྟུང་བྱེད་དུ་འགྱུར་
[100a]
[100a.1]ལ། གལ་ཏེ་ཁ་ཟས་ཀྱིས་བསྲུལ་བ་བྱས་ན་ནི་དེའི་ཚེ་ལྟུང་བ་མེད་པ་ཁོ་ནར་འགྱུར་རོ་ཞེས་བྱ་བ་ནི་ངེས་པ་ཁོ་ན་ཡིན་ན། འོ་ན་བཅོམ་ལྡན་འདས་ཀྱིས་ཁ་ཅིག་ཏུ་ལྟུང་བ་མེད་པ་ཁོ་ནའོ་ཞེས་གསུངས་པ་འདི་ལ་ཁྱེད་ཀྱིས་རྒྱུ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་
[100a.2]ལན་ནི་འདི་ཡིན་ཏེ། དུས་ཡོད་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། དུས་མ་གཏོགས་པར་འདུས་ཤིང་ཟ་བ་ལ་ལྟུང་བྱེད་དུ་འགྱུར་རོ་ཞེས་བྱ་བ་ལ་སོགས་པ་ཡིན་ནོ། །དེ་བཞིན་དུ་འདི་ལ་གཞུང་གཞན་ནི། བཙུན་པ་དགེ་སློང་གིས་འདུས་ཤིང་
[100a.3]འཚལ་བ་བགྱིས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དུས་དྲུག་ལས་དུས་གང་ཡང་རུང་བ་ཞིག་ཉེ་བར་གྱུར་ནའོ་ཞེས་བྱ་བ་ཡིན་ནོ། །ཡང་ན་དགེ་སློང་གསུམ་ཟན་ཟ་བ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་
[100a.4]པ་གནས་གཅིག་ཏུ་མཚམས་གཅིག་ན་དགེ་སློང་མང་པོ་དག་སོ་སོར་འཚལ་མ་འཚལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གལ་ཏེ་གསུམ་ཟན་ཟའི་བཞི་མ་ཡིན་ནའོ་ཞེས་བྱ་བ་ཡིན་ནོ། །ཡང་ན་ཟས་ཀྱི་གནས་སོ་སོར་ངེས་པ་ལ་དགོངས་ནས་དེ་སྐད་དུ་
[100a.5]གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་འདུས་ཤིང་འཚལ་བ་བགྱིས་པ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཟས་ཀྱི་གནས་སོ་སོར་ངེས་པ་ཡིན་ནའོ་ཞེས་བྱ་བ་ཡིན་ནོ། །ཡང་ན་ལས་དང་པོ་པ་ལ་སོགས་པ་
[100a.6]ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །ཁ་ཟས་བཅའ་བར་བྱ་བ་ལ་སོགས་པ་ཞེས་བྱ་བ་ནི་ཁ་ཟས་བཅའ་བར་བྱ་བ་ལ་སོགས་པ་རུང་བ་དུས་མ་ཡིན་པར་ཟན་ཇི་ལྟར་དག་པ་ཞེས་བྱ་བར་གསུངས་ཞེས་བྱ་བར་སྦྱར་རོ། །དེ་ལ་ཁ་ཟས་ནི་མིད་པར་བྱ་བའོ། །མིད་པར་བྱ་བའི་ཟས་བུ་རམ་ཧགས་
[100a.7]ལ་སོགས་པ་ཡང་ཡོད་པས་བཅའ་བར་བྱ་བ་ལ་སོགས་པ་ཞེས་བྱ་བ་སྨོས་ཏེ། བཅའ་བར་བྱ་བ་ཞེས་བྱ་བ་ནི་བཅའ་བར་བྱ་བ་ལྔ་པོ་བཅའ་བར་བྱ་བ་རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུ་ཞེས་བྱ་བ་རྣམས་སོ། །སོགས་པ་ཞེས་སྨོས་པས་ནི་བཟའ་བར་བྱ་བ་ལྔ་པོ་འབྲས་
[100b]
[100b.1]ཆན་དང་། ཟན་དྲོན་དང་། ལྡེ་གུ་དང་། ཤ་དང་། སྣུམ་ཁུར་ཞེས་བྱ་བ་རྣམས་བསྡུས་ཏེ། བཅའ་བར་བྱ་བ་དང་བཟའ་བར་བྱ་བ་ཞེས་བྱ་བའི་ཐ་ཚིག་གོ། །བཅའ་བར་བྱ་བ་དང་བཟའ་བར་བྱ་བ་དེ་ཡང་རུང་བ་མ་ཡིན་པ་གླང་པོ་ཆེ་དང་། རྟའི་ཤ་ལ་སོགས་པ་དང་རུང་བ་མ་ཡིན་པ་དང་འདྲེས་པ་ཡང་ཡོད་
[100b.2]པས་རུང་བ་ཞེས་བྱ་བ་སྨོས་ཏེ་རུང་བར་གྱུར་པའོ། །དུས་མིན་ཅེས་བྱ་བ་ལ་དུས་ནི་སྐྱ་རེངས་ཤར་ནས་ཉི་མ་ཕྱེད་ཀྱི་མཐར་ཐུག་པའི་བར་ཡིན་ནོ། །དེ་ལས་བཟློག་པ་ནི་དུས་མ་ཡིན་པ་སྟེ་དེར་རོ། །ཟ་བྱེད་ལ་ཞེས་བྱ་བ་ནི་མིད་པར་བྱེད་པའོ། །དག་པ་ནི་ལྟུང་བ་མེད་པའོ། །ཐེ་ཚོམ་གཏན་ལ་དབབ་པར་
[100b.3]ཞེས་བྱ་བ་ནི་ཐེ་ཚོམ་བསལ་བར་རོ། །འདི་ལ་བསྡུས་པའི་དོན་ནི་གང་གི་ཚེ་དགེ་སློང་གིས་དུས་མ་ཡིན་པར་བཅའ་བར་བྱ་བ་མ་ཡིན་པ་བཟའ་བར་བྱ་བ་ཟོས་པ་དེའི་ཚེ་དེ་ལ་ལྟུང་བྱེད་ཀྱི་ལྟུང་བ་འབྱུང་བར་འགྱུར་རོ་ཞེས་བྱ་བ་དེ་ལ་ནི་ཁོ་བོ་ཅག་མི་མཐུན་པ་ཡང་མེད་ན། འོན་ཀྱང་བཅོམ་ལྡན་འདས་ཀྱིས་ཚུལ་
[100b.4]འགའ་ཞིག་གིས་དེ་ལ་ལྟུང་བ་མེད་པ་ཁོ་ནར་གསུངས་པས་དེའི་ཕྱིར་ཁོ་བོའི་ཡིད་གཉིས་བཟློག་པར་གྱིས་ཤིག་ཅེས་བྱ་བ་འདི་ཡིན་ནོ། །འདི་ལ་ཐེ་ཚོམ་བཅད་པ་ནི་འདི་ཡིན་ཏེ། དེ་ནི་གླིང་གཞན་དུ་སོང་བ་དུས་མ་ཡིན་པར་ཟ་བའི་རྒྱུ་མཚན་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་
[100b.5]གཞུང་ནི། བཙུན་པ་དགེ་སློང་གིས་དུས་མ་ལགས་པར་བཅའ་བར་བགྱི་བ་དང་བཟའ་བར་བགྱི་བ་འཚལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གླིང་གསུམ་པོ་དག་ཏུ་འཛམ་བུའི་གླིང་གི་དུས་སུ་ཟ་ནའོ་ཞེས་བྱ་བ་ཡིན་ནོ། །ཡང་ན་ལྷའི་བདུད་རྩི་ཡོངས་སུ་
[100b.6]ལོངས་སྤྱོད་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཅོམ་ལྡན་འདས་དགེ་སློང་གིས་དུས་མ་ལགས་པར་གཡར་ཟས་འཚལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ལྷའི་བདུད་རྩི་ཟ་ནའོ་ཞེས་བྱ་བ་ཡིན་ནོ། །ཡང་ན་ནད་
[100b.7]པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་ནད་པ་ལ་བཅས་པའི་ཁ་ན་མ་ཐོ་བ་ཐམས་ཅད་གནང་བར་གཏོགས་པའི་གཞུང་ནི། བཙུན་པ་བྲོ་འཚལ་བ་ལ་ཇི་ལྟར་རིམ་གྲོ་བགྱི་ལགས། ཉེ་བ་འཁོར་རང་བཞིན་གྱིས་ཁ་ན་མཐོ་བ་མ་གཏོགས་པ་ཇི་ལྟར་ནད་པ་སོས་པར་འགྱུར་བ་
[101a]
[101a.1]ལྟར་རོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི། བཙུན་པ་བྲོ་འཚལ་བ་ལ་ཇི་ལྟར་རིམ་གྲོ་བགྱི་ལགས། ཉེ་བ་འཁོར་སྟོན་པའི་འདུ་ཤེས་ཉེ་བར་བཞག་ལ་ཕན་པ་དང་མཐུན་པའི་སྨན་དག་གིས་རིམ་གྲོ་བྱའོ། །བཙུན་པ་བྲོ་འཚལ་བ་ལ་ཅི་ཞིག་སྩལ་
[101a.2]བར་བགྱི། ཉེ་བ་འཁོར་རང་བཞིན་གྱིས་ཁ་ན་མ་ཐོ་བ་མ་གཏོགས་པ་གང་གིས་ནད་པ་སོས་པར་འགྱུར་བ་དེ་སྦྱིན་པར་བྱའོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི། བཙུན་པ་བྲོ་འཚལ་བ་ལ་ཅི་ཞིག་སྩལ་བར་བགྱི། ཉེ་བ་འཁོར་བཅས་པའི་ཁ་ན་མ་ཐོ་བ་གང་གིས་ནད་
[101a.3]པ་འཚོ་བར་འགྱུར་བ་དེ་ནད་པ་ལ་སྦྱིན་པར་བྱའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། རང་བཞིན་གྱི་ཁ་ན་མ་ཐོ་བ་དང་བཅས་པ་ལས་གཞན་པ་ཐམས་ཅད་ལ་གསོ་བའི་དོན་ཉིད་མ་གཏོགས་པ་ཞེས་བྱ་བའི་ལྷག་མའོ་ཞེས་བྱ་བ་དང་། དེ་བཞིན་དུ་གསོ་བའི་ཕྱིར་ནུབ་མོ་ཟ་བ་ནི་
[101a.4]ཚུལ་དང་མི་མཐུན་པ་མ་ཡིན་ནོ་ཞེས་བཤད་དོ། །དགེ་སློང་ཆོ་ག་སྔོན་འགྲོ་བ་ཞེས་བྱ་བ་ནི་ཆོ་ག་གང་གིས་བྱིན་ལེན་བྱུང་བས་ཏེ་མངོན་སུམ་དུ་མཚམས་ཀྱི་ནང་དུ་འཐོབ་པའི་ཕྱོགས་སུ་གནས་པ་ལག་པ་བཀན་པས་ལུས་སམ་དེ་དང་འབྲེལ་བས་གྱེན་དུ་འདེགས་ནུས་པ་རྫོགས་པར་མ་བསྙེན་པ་མི་མ་ཡིན་
[101a.5]པ་ལས་ཀྱང་སྦྱིན་པར་འདོད་པས་ཡན་ལག་གིས་སམ་དེ་དང་འབྲེལ་པས་བྱིན་པ་མནོས་པ་ནི་བྱིན་ལེན་ནོ་ཞེས་བྱ་བའི་ཆོ་ག་དེ་བསྒྲུབ་པ་སྟེ། ཆོ་ག་ཡང་དག་པར་སྤྱོད་པས་ཡིན་གྱི། གྱི་ན་ནི་མ་ཡིན་ནོ་ཞེས་བྱ་བའི་དོན་ཏོ། །བྱིན་ལེན་བྱས་ནས་ཞེས་བྱ་བ་ནི་མཚམས་ཀྱི་ནང་དུ་རུང་བ་བྱེད་པ་ལ་སོགས་པ་
[101a.6]འཐོབ་ཏུ་རུང་བར་གནས་པ་ལས་མངོན་སུམ་དུ་བླངས་ནས་སོ། །ཅི་ཞིག་ཅེ་ན། བཅའ་བར་བྱ་བ་ལ་སོགས་པ་ཞེས་བྱ་བར་སྦྱར་རོ། །ལྟུང་དང་བཅས་ཞེས་བྱ་བ་ནི་ཉེས་པ་དང་བཅས་པའོ། །འདི་ལ་དོན་ནི་དགེ་སློང་གང་ཞིག་ཇི་སྐད་བཤད་པའི་ཆོ་ག་བརྗོད་ཅིང་བཅའ་བར་བྱ་བ་དང་བཟའ་བར་བྱ་བ་དེ་
[101a.7]ལ་བྱིན་ལེན་བྱས་ཏེ་ཟ་བ་དེ་ལ་ལྟུང་བ་མེད་པ་ཁོ་ནའོ་ཞེས་བྱ་བ་དེ་ནི་ཤེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བ་དང་བཅས་པ་ཉིད་དུ་གསུངས་པ་དེ་གལ་ཏེ་ཁྱོད་ལ་འདིར་འདུལ་བ་ལ་གསལ་བར་ཤེས་པའི་ནུས་པ་ཞིག་ཡོད་པ་དེ་ལྟ་ན་ཁོ་བོ་ལ་ལན་ཐོབ་ཤིག་ཅེས་བྱ་བ་འདི་ཡིན་ནོ། །འདི་ལ་
[101b]
[101b.1]ལན་ནི་འདི་ཡིན་ཏེ། དེ་བཞིན་དུ་དེ་ནི་གཞན་གྱིར་འདུ་ཤེས་པ་ལ་དགོངས་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་བཅའ་བར་བགྱི་བ་བྱིན་ལེན་བགྱིས་པ་འཚལ་ལ་ལྟུང་བ་དང་བཅས་པར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ།
[101b.2]གཞན་གྱི་འདུ་ཤེས་ཀྱིས་བྱིན་ལེན་བྱས་ནས་ཟ་ནའོ། །ཡང་ན་དེ་ནི་བྱིན་པར་རུང་བ་མ་ཡིན་པ་གསོག་འཇོག་བྱས་པ་དུས་མ་ཡིན་པར་ཟ་བའི་དབང་དུ་མཛད་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་འཚལ་མ་ལན་ཅིག་འཚལ་ལ་ལྟུང་བ་ལན་ཅིག་བཞི་
[101b.3]འབྱུང་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། བྱིན་ལེན་མ་བྱས་པ་རུང་བ་མ་ཡིན་པ་གསོག་འཇོག་བྱས་པ་དུས་མ་ཡིན་པར་ཟ་ནའོ། །དགེ་སློང་གིས་དགེ་སློང་ལ་ཞེས་བྱ་བ་ལ་སོགས་པ་ལ། ཉོན་མོངས་སེམས་ཀྱིས་ཞེས་བྱ་བ་ནི་ཉོན་མོངས་པ་དང་མཚུངས་པར་ལྡན་པའི་སེམས་
[101b.4]ཀྱིས་སོ། །གསལ་བར་ལན་ཐོབ་ཤིག་ཅེས་བྱ་བ་ནི་ངེས་བར་སྨྲོས་ཤིག་པའོ། །འདི་ལ་དོན་ནི་གང་གི་ཚེ་དགེ་སློང་གིས་ཁྲོས་ནས་དགེ་སློང་ལ་རྡེག་པ་དེའི་ཚེ་དེ་ལ་ཐེ་ཚོམ་མེད་པར་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་དེ་ནི་ཤེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་ཉེས་བྱས་སུ་
[101b.5]གསུངས་སོ་ཞེས་བྱ་བ་དེ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་འདྲན་ཐོར་ལ་སོགས་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་སློང་ལ་བརྒྱབ་པ་ལ་ལྟུང་བྱེད་དུ་ཡང་མི་འགྱུར་བ་ལ་ལྟ་མཆིས་ལགས་
[101b.6]སམ། ཉེ་བ་འཁོར་ཡོད་དེ། འདྲེན་ཐོར་གྱི་བསམ་པའམ། གསད་པའི་བསམ་པས་རྡེག་ནའོ་ཞེས་བྱ་བ་ཡིན་ནོ། །ཡང་ན་གཞན་གྱི་དོན་དུ་རྡེག་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་གཞན་གྱི་སླད་དུ་དགེ་སློང་
[101b.7]ལ་བརྒྱབ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་གཞན་རྡེག་ཏུ་འཇུག་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དགེ་སློང་ལ་གཞན་གྱིས་རྡེག་ཏུ་སྩོལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་
[102a]
[102a.1]བ་ཡིན་ནོ། །ཡང་ན་དགེ་སློང་སྨྱོན་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དགེ་སློང་སྨྱོན་པ་ལ་བརྒྱབ་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་དགེ་སློང་སེམས་འཁྲུགས་པ་དང་ཚོར་
[102a.2]བས་ཉེན་པ་དང་གླེན་པ་དང་འོན་པ་དང་གཉིད་ཀྱིས་ལོག་པ་དང་མྱོས་པ་དང་སྙོམས་པར་ཞུགས་པ་དང་འགྲོ་བ་གཞན་དུ་གནས་པ་ལ་བརྒྱབ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་
[102a.3]ནོ། །སྡོམ་བརྩོན་མེ་ལ་རེག་བྱེད་པ། །ཞེས་བྱ་བ་ལ་སོགས་པ་ནི་ཐམས་ཅད་མཁྱེན་པས་མེ་ལ་རེག་པ་ཅིའི་ཕྱིར་ཉེས་བྱས་ཀྱི་ལྟུང་བར་གསུངས་པ་ངེས་པར་ཁོ་བོ་ལ་སྨྲོས་ཤིག་ཅེས་བྱ་བར་སྦྱར་ཏེ། དེ་ལ་མེ་ལ་རེག་པ་བྱེད་པ་ཞེས་བྱ་བ་ནི་མེ་ལེན་པར་བྱེད་པའོ། །རེག་པར་བྱེད་པ་ཞེས་སྨོས་པ་
[102a.4]ནི་རེག་པ་ཡང་བསྡུ་སྟེ། ཡང་དགེ་སློང་གང་མི་ན་བར་འདོད་ནས་བདག་ཉིད་ཀྱི་ཕྱིར་མེ་ལ་རེག་གམ་རེག་ཏུ་འཇུག་ན་ཞེས་འབྱུང་བའི་ཕྱིར་རོ། །ཀུན་མཁྱེན་ནི་འདས་པ་དང་མ་འོངས་པ་དང་ད་ལྟར་བྱུང་བའི་དོན་བླང་བར་བྱ་བ་དང་། དོར་བར་བྱ་བའི་མཚན་ཉིད་ཐབས་དང་བཅས་པ་ཐམས་ཅད་ལག་
[102a.5]མཐིལ་དུ་སྐྱུ་རུ་ར་བཞག་པ་བཞིན་དུ་ཡོངས་སུ་མཁྱེན་པའི་ཕྱིར་རོ། །ཐུགས་རྗེ་དང་ལྡན་པའི་ཞེས་བྱ་བ་ནི་ཐུགས་རྗེ་ཆེན་པོ་དང་ལྡན་པས་སོ། །འདི་ལ་དོན་ནི་གང་གི་ཚེ་དགེ་སློང་གིས་མེ་ལ་རེག་གམ་རེག་ཏུ་འཇུག་པ་དེའི་ཚེ་ལ་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་དེ་ནི་ངེས་པ་ཉིད་ཡིན་ན།
[102a.6]འོན་ཀྱང་བཅོམ་ལྡན་འདས་ཀྱིས་དེ་ལ་ཉེས་བྱས་སུ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །དེ་ལ་ལན་ནི་འདི་ཡིན་ཏེ། དེ་ནི་གཞན་གྱི་དོན་དུ་རེག་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་
[102a.7]གཞན་དུ་ཞུགས་པ་ལ་རེག་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་འདི་ཡིན་ནོ། །དེ་བཞིན་དུ་མདོ་ལས་ཀྱང་། འདི་སྐད་དུ་ཡང་དགེ་སློང་གང་མིན་བར་བདེ་བར་འདོད་ནས་བདག་གི་ཕྱིར་མེ་ལ་རེག་གམ་རེག་ཏུ་འཇུག་ན་ལྟུང་བྱེད་དོ་ཞེས་འབྱུང་སྟེ་བདག་ཅིས་སྨོས་པའི་ཕྱིར་གཞན་གྱི་ཆེད་དུ་ནི་ཉེས་
[102b]
[102b.1]བྱས་སུའོ་ཞེས་བྱ་བར་མངོན་ནོ། །དེ་བཞིན་དུ་མདོ་བྱེད་པས་ཀྱང་། རང་གི་དོན་ཉིད་གཙོ་ཆེར་ཡོད་པའོ། །ཞེས་བཤད་དོ། །ཡང་ན་ཕོ་ཉ་ལ་རེག་ཏུ་འཇུག་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཕོ་ཉ་ལ་ཞུགས་ལ་
[102b.2]རེག་ཏུ་སྩོལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །དེ་བཞིན་དུ་ཡི་གེ་དང་ལག་བརྡ་དང་གཞན་ལ་སྙད་འདོགས་པ་དང་། བརྒྱུད་པས་རེག་ཏུ་སྩོལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ཏེ། འདི་ལ་མདོ་བྱེད་པས་བཤད་པ་ཡང་སྔ་མ་བཞིན་ནོ། །
[102b.3]དགེ་སློང་ནུབ་གཉིས་ལས་ལྷག་པར་ཞེས་བྱ་བ་ལ་སོགས་པ་ནི་དགེ་སློང་ནུབ་གཉིས་ལས་ལྷག་པར་བསྙེན་པར་རྫོགས་པ་དང་བྲལ་བ་དང་ཉལ་བར་བྱེད་པ་ཇི་ལྟར་ཉེས་བྱས་ཀྱི་ལྟུང་བ་བྱེད་པར་གསུངས་ཞེས་བྱ་བར་སྦྱར་རོ། །ཅི་བསྙེན་པར་མ་རྫོགས་པ་དང་། ལྷན་ཅིག་རྟག་ཏུ་ཁྱིམ་ན་ཉལ་བ་ལ་
[102b.4]ལྟུང་བ་རྣམ་པར་གཞག་གམ་ཞེ་ན། ནུབ་གཉིས་ལས་ལྷག་པར་ཞེས་བྱ་བ་སྨོས་ཏེ། ནུབ་གཉིས་ཀྱི་འོག་ཏུ་ཞེས་བྱ་བའི་ཐ་ཚིག་གོ། །སུ་དང་ལྷན་ཅིག་ཅེ་ན། བསྙེན་པར་རྫོགས་པ་དང་བྲལ་བ་ཞེས་བྱ་བ་སྨོས་ཏེ། བསྙེན་པར་རྫོགས་པ་དང་བྲལ་བ་བསྙེན་པར་མ་རྫོགས་པ་དང་དགེ་སྦྱོང་
[102b.5]ལ་སོགས་པ་དང་ལྷན་ཅིག་ཅེས་བྱ་བའི་དོན་ཏོ། །དེ་ལ་རྫོགས་པ་ནི་བཀྲ་ཤིས་པ་སྟེ། མྱ་ངན་ལས་འདས་པ་ཞེས་བྱ་བའི་ཐ་ཚིག་གོ། །དེ་ནི་སྡུག་བསྔལ་ཐམས་ཅད་མེད་པའི་ཕྱིར་དང་། གཅིག་ཏུ་ཞི་བའི་མཚན་ཉིད་ཡིན་པའི་ཕྱིར་རྫོགས་པ་ཞེས་བྱ་བའི་སྒྲར་བརྗོད་དེ། དྲི་མ་ཐམས་ཅད་
[102b.6]བཅོམ་ནས་ནི། །མྱ་ངན་ལས་འདས་རྫོགས་པ་ཐོབ། །སྡུག་བསྔལ་ཐ་མར་བྱེད་པ་སྟེ། །ཐམས་ཅད་ཕུན་སུམ་ཚོགས་པར་འགྱུར། །ཞེས་འབྱུང་བའི་ཕྱིར་རོ། །དགེ་སློང་ཉིད་རྫོགས་པ་དང་ཉེ་བར་བསྙེན་པའི་ངོ་བོར་འདུག་པའི་ཕྱིར་བསྙེན་པར་རྫོགས་པར་བརྗོད་པར་བྱ་བར་ཤེས་པར་བྱ་སྟེ།
[102b.7]ངའི་དགེ་སློང་ཚུལ་ཁྲིམས་དྲི་མ་མེད་པ་དེ་ལ་མཐོ་རིས་ནི་རས་ཡུག་གིས་ཆོད་པ་ཙམ་ལ་ཐར་པ་ནི་ཡོལ་བས་ཆོད་པ་ཙམ་མོ་ཞེས་འབྱུང་བའི་ཕྱིར་རོ། །དེ་དང་བྲལ་བ་སྟེ་བསྙེན་པར་རྫོགས་པ་མེད་པ་དང་ཞེས་བྱ་བའི་ཐ་ཚིག་གོ། །ཉལ་བ་ནི་ཉལ་ཏེ་གཉིད་ཀྱིས་ལོག་པའི་མཚན་ཉིད་དེ། ཉལ་ན་
[103a]
[103a.1]ཞེས་བྱ་བ་ནི་གཉིད་ཀྱིས་ལོག་ནའོ་ཞེས་འབྱུང་བའི་ཕྱིར་རོ། །བྱེད་པ་ཞེས་བྱ་བ་ནི་ལྷག་པར་སྤྱོད་པའོ། །ཉེས་བྱས་ལྟུང་བ་བྱེད་པར་ཞེས་བྱ་བ་ནི་ཉེས་བྱས་ཀྱི་ལྟུང་བ་དང་ལྡན་པར་རོ། །འདི་ལ་བསྡུས་པའི་དོན་ནི་དགེ་སློང་གང་ཟག་བསྙེན་པར་མ་རྫོགས་པ་དགེ་སྦྱོང་ལ་སོགས་པ་དང་
[103a.2]ལྷན་ཅིག་ཁྱིམ་གཅིག་ཏུ་ནུབ་གཉིས་ཉལ་ནས་ནུབ་གསུམ་པ་ལ་དེ་ཉིད་དང་ལྷན་ཅིག་ཉལ་ན་དེའི་ཕྱིར་དེ་ལ་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་དེ་ནི་ཤིན་ཏུ་གྲགས་ན། འོན་ཀྱང་དགེ་སློང་བསྙེན་པར་མ་རྫོགས་པ་དང་ལྷན་ཅིག་ཉལ་ན་དེ་ལ་ལྟུང་བྱེད་དུ་འགྱུར་བར་མ་གསུངས་ཀྱི་ཉེས་བྱས་སོ་ཞེས་བྱ་བ་དེ་བརྗོད་པར་
[103a.3]བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་གནས་མ་བསྐོར་བའམ་མ་གཡོགས་པའི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གང་ཟག་བསྙེན་པར་མ་རྫོགས་པ་དང་ལྷན་ཅིག་ཏུ་སྡུམ་པར་ནུབ་གཉིས་ལྷག་པར་མཆིས་ཉལ་བར་
[103a.4]བགྱིད་ལ་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་གནས་དེ་ཀུན་ནས་གཡོགས་ལ་མ་བསྐོར་བའམ། ཕྱེད་བསྐོར་བ་ཡིན་པའམ། ཀུན་ནས་བསྐོར་ལ་མ་གཡོགས་པའམ། ཕྱེད་གཡོགས་པ་ཡིན་ལ་གནས་དེ་ལྟ་བུར་ཉལ་བར་བྱེད་ན་ཉེས་བྱས་སུ་འགྱུར་
[103a.5]རོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདི་ལ་ཕལ་ཆེར་གཡོགས་པ་དང་བསྐོར་བ་ནི་གནས་ཀྱི་མཐའ་ཡིན་ནོ་ཞེས་བཤད་དོ། །ཡང་ན་རིའི་ཕུག་ལ་སོགས་པར་ཉལ་བར་བྱེད་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ་དེ་བཞིན་དུ་འདིར་གཞུང་ནི་བཙུན་པ་རེ་ཞིག་དགེ་སློང་རི་ཕུག་
[103a.6]གམ་ཤིང་གི་བུ་ག་དག་གམ་རྩིག་པའི་བུ་ག་དག་ཏུ་གང་ཟག་བསྙེན་པར་མ་རྫོགས་པ་དང་ལྷན་ཅིག་ནུབ་གཉིས་ལས་ལྷག་པར་གནས་སུ་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་གིས་ཤིང་དྲུང་དུ་གང་ཟག་བསྙེན་པར་མ་རྫོགས་པ་དང་ལྷན་ཅིག་ནུབ་
[103a.7]གཉིས་པས་ལྷག་པར་གནས་སུ་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདི་ལ་ཤིང་ལྗོན་པའི་དྲུང་དང་། རྩིག་པའི་བར་དང་། ཚང་ཚིང་གི་དྲུང་དག་ནི་ཕྱེད་ཉིད་དོ་ཞེས་བཤདདོ། །ཡང་ན་སྨྱོན་པ་དང་ལྷན་ཅིག་ཏུ་ཉལ་བར་བྱེད་པ་ལ་དགོངས་ནས་
[103b]
[103b.1]དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་སྨྱོན་པ་དང་ལྷན་ཅིག་ནུབ་གཉིས་སྡུམ་པར་མཆིས་ཉལ་ལ་ནུབ་གསུམ་པ་ལ་རང་བཞིན་དུ་གནས་པ་དང་ལྷན་ཅིག་མཆིས་ཉལ་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་རང་བཞིན་
[103b.2]དུ་གནས་པ་དང་ལྷན་ཅིག་ནུབ་གཉིས་མཆིས་ཉལ་ལ་ནུབ་གསུམ་པ་ལ་སྨྱོན་པ་དང་ལྷན་ཅིག་མཆིས་ཉལ་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་སེམས་འཁྲུགས་པ་དང་ཚོར་བས་ཉེན་པ་དང་གླེན་པ་དང་འོན་པ་དང་འགྲོ་བ་གཞན་ན་གནས་པ་དང་ལྷན་ཅིག་མཆིས་ཉལ་ན་ཅིར་འགྱུར་
[103b.3]ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་སྔར་ཕམ་པ་བྱུང་བ་ལ་སོགས་པ་ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །དྲི་བ་དང་ལན་འདི་དག་ནི་བུད་མེད་དང་ལྷན་ཅིག་ཉལ་བ་ལ་ཡང་རུང་བས་དེ་ལ་ཡང་ནུབ་གཉིས་ལས་ལྷག་པར་ལྷན་ཅིག་གནས་ན་ཉལ་བ་མ་
[103b.4]གཏོགས་པར་ཅི་རིགས་པར་བརྟག་པར་བྱ་སྟེ། དེ་ལ་གཞུང་ནི། བཙུན་པ་རེ་ཞིག་དགེ་སློང་བུད་མེད་དང་ལྷན་ཅིག་རིའི་ཕུག་དག་གམ་ཤིང་དྲུང་ངམ་ཚང་ཚིང་གི་ནང་ངམ་ཤིང་གི་བུ་ག་དག་ཏུ་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་བུད་མེད་དང་ལྷན་
[103b.5]ཅིག་ཀུན་ནས་གཡོགས་པ་ལ་མ་བསྐོར་བར་རམ། ཕྱེད་བསྐོར་བར་མཆིས་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་བུད་མེད་དང་ལྷན་ཅིག་ཀུན་ནས་བསྐོར་ལ་མ་གཡོགས་པའམ་ཕྱེད་གཡོགས་པར་མཆིས་ཉལ་བར་བགྱིད་ན་ཅིར་འགྱུར་ལགས།
[103b.6]ཉེས་བྱས་སུའོ། །བཙུན་པ་རེ་ཞིག་དགེ་སློང་དུད་འགྲོའི་སྐྱེ་གནས་སུ་གཏོགས་པའི་བུད་མེད་དང་ལྷན་ཅིག་སྡུམ་པ་ན་མཆིས་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་བུད་མེད་དང་ལྷན་ཅིག་སྟེང་གི་ནམ་མཁའ་ལ་མཆིས་ཉལ་བར་བགྱིད་ན་ཅིར་འགྱུར་
[103b.7]ལགས། ཉེས་བྱས་སུའོ། །བཙུན་པ་རེ་ཞིག་དགེ་སློང་སྨྱོན་པ་དང་ལྷན་ཅིག་སྡུམ་ན་མཆིས་ཉལ་བར་བགྱིད་ན་ཅིར་འགྱུར་ལགས། ཉེས་བྱས་སུའོ། །དེ་བཞིན་དུ་སེམས་འཁྲུགས་པ་དང་ཚོར་བས་ཉེན་པ་དང་འགྲོ་བ་གཞན་དུ་གནས་པ་དང་ལྷན་ཅིག་སྡུམ་པ་ན་མཆིས་ཉལ་བར་བགྱིད་ན་ཅིར་འགྱུར་ལགས།
[104a]
[104a.1]ཉེས་བྱས་སུའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདི་ལ་རང་བཞིན་ཉམས་པ་ནི་མ་ཡིན་ནོ། །མིའི་འགྲོ་བ་པ་ནི་ཐ་སྙད་དུ་བྱ་བ་ཉིད་ཡིན་ནོ་ཞེས་བཤད་དོ། །སྡོམ་བརྩོན་ཚོན་རྩི་སྣ་གསུམ་གྱིས། །ཞེས་བྱ་བ་ལ་སོགས་པ་ལ། ཚོན་རྩི་སྣ་གསུམ་ནི་རམས་དང་།
[104a.2]བཙག་དང་། བསྐ་བ་ཞེས་བྱ་བ་དག་གོ། །གོས་ནི་གོས་སོ། །གྱོན་པ་ནི་བགོས་པའོ། །བཅོལ་བ་ནི་གསོལ་བ་གདབ་པ་སྔོན་དུ་འགྲོ་བའི་དོན་དུ་གཉེར་བའོ། །འདི་ལ་དྲི་བའི་དོན་ནི་དགེ་སློང་གིས་གང་གི་ཚེ་གོས་ལྷག་ཅིག་རྙེད་ནས་ཚོན་རྩི་གསུམ་པོ་རམས་དང་། བཙག་དང་། བསྐ་བ་ཞེས་བྱ་བས་
[104a.3]ཁ་དོག་བསྒྱུར་བ་མ་བྱས་པ་གྱོན་ན་དེའི་ཚེ་དེ་ལ་ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བ་བསྟན་པ་ནི་བསྟན་པ་འདི་ལ་ཞུགས་པ་རྣམས་ལ་གྲགས་པ་ཡིན་ནོ། །འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་འདི་ལ་རྒྱུ་ཅི་ཞིག་ཡོད་ཁོ་བོ་ལ་སྨྲོས་ཤིག་ཅེས་བྱ་
[104a.4]བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། རང་བཞིན་གྱི་ཚོན་གྱིས་ཁ་བསྒྱུར་བའི་གོས་གྱོན་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཆོས་གོས་ཁ་དོག་ངན་པར་བགྱི་བ་གསུམ་པོ་དག་ལས་གང་ཡང་རུང་བ་ཞིག་གིས་
[104a.5]ཁ་དོག་ངན་པར་མ་བགྱིས་པར་འཚལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གིས་རང་བཞིན་གྱི་ཚོན་ཅན་གྱི་གོས་གྱོན་པའོ་ཞེས་བྱ་བ་ཡིན་ནོ། །ཡང་ན་ཚད་དུ་མཆོག་པའམ་ལྷག་པ་ལ་བརྟེན་ནས་དངོས་གཞི་མེད་པ་ལ་
[104a.6]དགོངས་ནས་ལྟུང་བ་མེད་པར་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་རད་པ་ཁྲུ་གང་དུ་མ་འཚལ་བའམ་བདེ་བར་གཤེགས་པའི་ཆོས་གོས་ཀྱི་ཚད་གཅིག་ཁ་དོག་ངན་པར་བགྱི་བ་གསུམ་པོ་གང་ཡང་རུང་བ་ཞིག་གིས་ཁ་དོག་ངན་པར་མ་
[104a.7]བགྱིས་པར་འཚལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་གོས་རྙིང་པའི་དབང་དུ་མཛད་པ་ཡིན་ཏེ། འདི་ལ་ལན་ནི། གོས་སར་པ་རྙེད་ནས་ཞེས་བྱ་བ་ལ་སོགས་པ་ཡིན་ནོ། །སར་པ་སྨོས་པ་ནི་རྙིང་པ་ཁ་དོག་མ་བསྒྱུར་བ་གྱོན་ན་ཞེས་ཤུགས་ཀྱིས་ཉེས་བྱས་སུ་ཤེས་
[104b]
[104b.1]པར་བྱ་བ་ཡིན་ནོ། །འདིར་དེ་ལྟར་ཡིན་པར་རྣམ་པར་འབྱེད་པ་ལས། སར་པ་ཞེས་བྱ་བ་ནི་སར་པ་གཉིས་ཏེ་སར་པའི་སྒོ་ནས་སར་པ་དང་། རྙེད་པའི་སྒོ་ནས་སར་པའོ། །དོན་འདི་ལ་ནི་སར་པའི་སྒོ་ནས་སར་པ་ཡིན་པར་དགོངས་ནས་ཞེས་བཤད་དོ། །ཡང་ན་དེ་ནི་ལས་དང་པོ་པ་ལ་སོགས་པ་
[104b.2]ལ་དགོངས་ནས་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་ཚོན་རྩི་རྣམ་གསུམ་གྱིས། །ཞེས་བྱ་བ་ལ་སོགས་པ་ལ། ལེགས་པར་ཁ་བསྒྱུར་ཅེས་བྱ་བ་ནི་ཏེ་པོར་ཁ་བསྒྱུར་བའོ། །གྱོན་པ་ནི་བགོས་པའོ། །མཆོག་ནི་ཕུལ་དུ་ཕྱིན་པའོ། །ཆོད་ཅིག་ཅེས་བྱ་བ་ནི་སོལ་ཅིག་པ་སྟེ།
[104b.3]འདི་ལ་ཁོ་བོ་ལ་ཏེ་པོར་ཐེ་ཚོམ་ཡོད་ཀྱི་དེ་སོལ་ཅིག་ཅེས་བྱ་བའི་དོན་ཏོ། །འདི་ལ་གཞན་གྱི་བསམ་པ་ནི་དགེ་སློང་གིས་གང་གི་ཚེ་ཚོན་རྩི་སྣ་གསུམ་གྱིས་ཁ་བསྒྱུར་བའི་གོས་བགོས་པ་དེའི་ཚེ་དེ་ལ་ལྟུང་བ་མེད་པར་འགྱུར་བ་གསལ་བ་ཉིད་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་
[104b.4]ཞིག་གིས་ལྟུང་བ་ཁོ་ནར་གསུངས་སོ་ཞེས་བྱ་བ་འདི་ལ་རྒྱུ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ཚོན་རུང་བ་མ་ཡིན་པས་ཁ་བསྒྱུར་བའི་གོས་གྱོན་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་སར་པ་ཁ་
[104b.5]དོག་ངན་པར་བགྱི་བ་གསུམ་པོ་དག་ལས་གང་ཡང་རུང་བ་ཞིག་གིས་ཁ་དོག་ངན་པར་བགྱིས་ཏེ་འཚལ་ལ་ལྟུང་བ་དང་བཅས་པ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཚོན་ཆེན་པོས་ཁ་དོག་བསྒྱུར་ནའོ། །དེ་ལ་འདི་དག་ཚོན་ཆེན་པོ་ཡིན་ཏེ། ལི་ཁྲི་དང་ཐིང་ཤིང་དང་རྒྱ་
[104b.6]སྐྱེགས་དང་མཚལ་དང་གུར་གུམ་དང་། བཙོད་དང་རྨ་ཤིང་དང་ལེ་བརྒན་རྩིའོ། །ཚོན་དེ་ལྟ་བུ་དག་གིས་ཁ་བསྒྱུར་བ་འཚལ་ན་ཅིར་འགྱུར་ལགས། ཉེས་བྱས་སོ། །མདོ་བྱེད་པས་ཀྱང་། འདི་ལ་ཁ་དོག་ཆེན་པོར་བསྒྱུར་བའི་གོས་བསྟེན་པར་མི་བྱའོ་ཞེས་བཤད་དོ། །ཡང་ན་གོས་
[104b.7]ཐམས་ཅད་སྔོན་པོ་དང་སེར་པོ་དང་། དམར་པོ་གྱོན་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་རད་པ་ཁ་དོག་ངན་པར་བགྱི་བ་གསུམ་པོ་གང་ཡང་རུང་བ་ཞིག་གིས་ཁ་དོག་ངན་པར་མ་བགྱིས་པར་འཚལ་ལ་ལྟུང་བ་དང་བཅས་
[105a]
[105a.1]པ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གིས་གོས་ཐམས་ཅད་སྔོན་པོའམ་དམར་པོ་བགོས་ནའོ། །མདོ་བྱེད་པས་ཀྱང་འདིར་ཐམས་ཅད་སྔོན་པོ་བགོས་ན་ཉེས་བྱས་སུ་བཤད་དོ། །ཡང་ན་རུང་བ་མ་ཡིན་པ་ཁ་དོག་མ་བསྒྱུར་བ་གྱོན་
[105a.2]པ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་སར་པ་སར་པ་ལ་ཁ་དོག་ངན་པ་བགྱི་བ་གསུམ་པོ་གང་ཡང་རུང་བ་ཞིག་གིས་ཁ་དོག་ངན་པར་མ་བགྱིས་པར་འཚལ་ལ་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་
[105a.3]དེ། གོས་རུང་བ་མ་ཡིན་པ་གྱོན་ནའོ། །དེ་ལ་རུང་བ་མ་ཡིན་པ་ནི་འདི་དག་ཡིན་ཏེ། རྔ་བལ་དང་གནག་གི་སྤུ་དང་རི་དྭགས་ཀྱི་བལ་དང་བསྲེས་པ་དང་ཐགས་སུ་མ་བཏགས་པའི་གོས་གྱོན་ན་ཅིར་འགྱུར་ཞེ་ན། ཉེས་བྱས་སུ་འགྱུར་བའོ། །མདོ་བྱེད་པས་ཀྱང་འདི་ལ་རབ་ཏུ་བྱུང་བའི་རྫས་དག་ལ་ནི་
[105a.4]རུང་བ་ཉིད་དང་ཞེས་བཤད་དོ། །ཡང་ན་སྔར་ལྟུང་བ་བྱུང་བ་ལ་སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་རིན་ཆེན་ལ་རེག་ན། །ཞེས་བྱ་བ་ལ་སོགས་པ་ནི་ཀྱེ་མཛའ་བོ་སྡོམ་བརྩོན་ཅན་གྱིས་རིན་པོ་ཆེ་ལ་རེག་ན་ཇི་ལྟར་དགེ་འདུན་གྱི་ལྷག་མ་དང་སྦོམ་པོར་
[105a.5]གསུངས་པ་མྱུར་དུ་སྨྲོས་ཤིག་ཅེས་བྱ་བར་སྦྱར་ཏེ། རིན་ཆེན་ལ་རེག་ན་ཞེས་བྱ་བ་ལ་རིན་པོ་ཆེ་ནི་ནོར་བུ་དང་མུ་ཏིག་དང་བེེ་ཌཱུརྱ་དང་ཤང་ཀ་ཤི་ལ་དང་བྱི་རུ་དང་དངུལ་དང་གསེར་དང་རྡོའི་སྙིང་པོ་དང་སྤུག་དང་དམར་པོ་དང་གཡས་སུ་འཁྱིལ་བ་ལ་སོགས་པ་བདེ་བ་སྒྲུབ་པའི་ཕྱིར་རོ། །དེ་ལ་རེག་པ་ནི་རེག་པར་
[105a.6]བྱེད་པ་སྟེ་རེག་པ་ཡོད་ནའོ། །སྦོམ་ཞེས་བྱ་བ་ནི་ཉེས་པ་སྦོམ་པོའོ། །འདི་ལ་ལྟུང་བ་སྦོམ་ཞིང་ལྕི་བ་ཡོད་པ་སྟེ་དགེ་སློང་མང་པོ་ཚོགས་པ་ལ་བཤགས་པས་ལྡང་བའི་ཕྱིར་རོ། །མཛའ་བོ་ཞེས་བྱ་བ་ནི་མཛའ་བོ་ཞེས་བརྗོད་པས་འབོད་པ་ཡིན་ནོ། །བརྟན་པོ་ཞེས་བྱ་བ་ནི་བརྟན་པའོ། །དེ་
[105a.7]ལ་དོན་ནི་དགེ་སློང་གིས་རིན་པོ་ཆེ་བདག་ཉིད་ཀྱི་ཡིན་ལ་དེ་རུང་བ་མ་བྱས་པ་ལ་རེག་ན་སྤང་བའི་ལྟུང་བར་འགྱུར་རོ། །འོན་ཏེ་གཞན་གྱི་ཡིན་ན་དེའི་ཚེ་དེ་ལ་རེག་པ་ལ་ལྟུང་བྱེད་འབའ་ཞིག་ཏུ་འགྱུར་རོ་ཞེས་བྱ་བ་དེ་ནི་ཁྱོད་དང་ཁོ་བོས་ཀྱང་ཤེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་རིན་པོ་ཆེ་ལ་
[105b]
[105b.1]རེག་ན་དགེ་འདུན་གྱི་ལྷག་མ་དང་ཉེས་པ་སྤོམ་པོར་གསུངས་པ་དེ་ལ་རྒྱུ་ཅི་ཞིག་ཡོད་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། བུད་མེད་རིན་པོ་ཆེ་དང་། ཁྱིམ་བདག་དང་། བློན་པོ་དང་། གླང་པོ་ཆེ་དང་། རྟ་རིན་པོ་ཆེ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་
[105b.2]འདིར་གཞུང་ནི། བཙུན་པ་དགེ་སློང་གིས་རང་གི་སུག་པས་རིན་པོ་ཆེ་ལ་བཟུང་ན་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། བུད་མེད་རིན་པོ་ཆེ་ལ་སོགས་པ་རིན་པོ་ཆེ་ལྔ་ལ་བཟུང་ནས་གཞི་ཇི་ལྟ་བ་བཞིན་འགྱུར་རོ། །འོན་ཏེ་ནོར་བུ་རིན་པོ་ཆེའམ་འཁོར་ལོ་རིན་པོ་
[105b.3]ཆེ་ལ་བཟུང་ན་ལྟུང་བྱེད་དུ་འགྱུར་རོ་ཞེས་བྱ་བ་ཡིན་ནོ། །འདི་ལ་གཞི་ནི་ཇི་ལྟ་བ་བཞིན་གྱི་དོན་ནི་འདི་ཡིན་ཏེ། ཀུན་དུ་ཆགས་པའི་སེམས་ཀྱིས་བུད་མེད་རིན་པོ་ཆེ་ལ་རེག་ན་དགེ་འདུན་གྱི་ལྷག་མའོ། །གལ་ཏེ་མ་ཡིན་ན་ཉེས་བྱས་སོ། །ཁྱིམ་བདག་དང་བློན་པོ་རིན་པོ་ཆེ་དག་ལ་འདོད་ཆགས་དང་མཚུངས་
[105b.4]པར་ལྡན་པའི་སེམས་ཀྱིས་རེག་ན་སྦོམ་པོའོ། །གལ་ཏེ་མ་ཡིན་ན་ལྟུང་བ་མེད་དོ། །གླང་པོ་ཆེ་དང་རྟ་རིན་པོ་ཆེ་དག་ལ་ཀུན་དུ་ཆགས་པའི་སེམས་ཀྱིས་རེག་ན་ཉེས་བྱས་སོ། །གལ་ཏེ་མ་ཡིན་ན་ལྟུང་བ་མེད་དོ། །རིན་པོ་ཆེ་དང་དེར་སྨོས་པ་ཞེས་བྱ་བ་ལ་སོགས་པ་ལ། རིན་པོ་ཆེ་ནི་འདི་སྐད་
[105b.5]བཤད་པའི་ངོ་བོའོ། །དེར་སྨོས་པ་ནི་རིན་པོ་ཆེར་སྨོས་པ་སྟེ། རོལ་མོའི་འཚོག་ཆས་ཝང་དང་འོད་མ་དང་བ་ལ་རི་དང་མ་ཧཱ་ཏི་དང་སུ་གྷོ་ཤ་ལ་སོགས་པ་རྩེད་མོ་བྱ་བའི་ཆ་བྱད་དང་། གཡུལ་ངོའི་ཆ་བྱད་རལ་གྲི་དང་རལ་གྲི་ཀྱོག་པོ་དང་རལ་གྲི་སོ་གཅིག་པ་དང་མདུང་ཐུང་དང་འཕང་མདུང་དང་ལྕགས་
[105b.6]ཀྱོ་ལ་སོགས་པ་དང་ལྕགས་མདའ་དང་མདའ་ཕྱེད་ལྕགས་ལ་སོགས་པ་མཚོན་ཆའོ། །དེ་བཞིན་དུ་མདོ་བྱེད་པས་ཀྱང་། ནོར་བུ་དང་། མུ་ཏིག་དང་། བཻ་ཌཱུརྱ་དང་ཤང་ཀ་ཤི་ལ་དང་བྱེ་རུ་དང་དངུལ་དང་གསེར་དང་རྡོའི་སྙིང་པོ་དང་སྦུག་དང་དམར་པོ་དང་གཡས་སུ་འཁྱིལ་པ་ལ་སོགས་པའི་རིན་པོ་ཆེའོ། །
[105b.7]རེག་གམ་རེག་ཏུ་བཅུག་ན་བྱེད་པ་པོ་ཉིད་ཡིན་ནོ་ཞེས་བྱ་བ་དང་། དེར་སྨོས་པ་ཡང་དེ་ནི་གཡུལ་དུ་སྤྱད་པའི་མཚོན་ཆ་དང་རོལ་མོར་སྤྱད་པའི་ལག་ཆའོ་ཞེས་བཤད་དོ། །དེ་དག་ཀྱང་རིན་པོ་ཆེ་བཞིན་དུ་བདེ་བ་བསྒྲུབ་པའི་ཕྱིར་རིན་པོ་ཆེ་དང་འདྲ་བས་རིན་པོ་ཆེར་སྨོས་པ་ཞེས་བྱའོ། །ཁོ་བོ་ཞེས་བྱ་བ་ནི་
[106a]
[106a.1]བདག་གིའོ། །ཐེ་ཚོམ་བསལ་བ་ཞེས་བྱ་བ་ནི་ཐེ་ཚོམ་བཅད་པས་སོ། །རངས་པར་ཞེས་བྱ་བ་ནི་མགུ་བར་རོ། །འདི་ལ་གཞན་གྱི་བསམ་པ་ནི་དགེ་སློང་གིས་རིན་པོ་ཆེ་དང་རིན་པོ་ཆེར་སྨོས་པ་དག་ལ་རེག་ན་ལྟུང་བྱེད་དུ་འགྱུར་རོ་ཞེས་བྱ་བ་དེ་ཙམ་ཞིག་ནི་ཤེས་པ་ཉིད་ན། འོན་
[106a.2]ཀྱང་བཅོམ་ལྡན་འདས་ཀྱིས་ཉེས་བྱས་སུ་གསུངས་སོ་ཞེས་བྱ་བ་འདིར་ཁྱོད་ཀྱིས་ཁོ་བོའི་ཐེ་ཚོམ་ཡུན་རིང་པོ་ནས་བསྡོགས་པ་བསལ་བས་ཡིད་བདེ་བར་གྱིས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་ལྷའི་རིན་པོ་ཆེ་དང་རིན་པོ་ཆེར་སྨོས་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་
[106a.3]དུ་འདིར་གཞུང་ནི། བཙུན་པ་དགེ་སློང་གིས་རིན་པོ་ཆེའམ་རིན་པོ་ཆེར་སྨོས་པ་ལ་བཟུང་བ་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ལྷའི་རིན་པོ་ཆེར་སྨོས་པ་ལ་བཟུང་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །ཡང་ན་དེ་ནི་རིན་པོ་ཆེའམ་རིན་པོ་ཆེར་སྨོས་པ་
[106a.4]སྤྲུལ་པ་ལ་རེག་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་རིན་པོ་ཆེའམ། རིན་པོ་ཆེར་སྨོས་པ་སྤྲུལ་པ་ལ་བཟུང་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་རིན་པོ་ཆེའམ་རིན་པོ་ཆེར་སྨོས་པ་ཉམས་པ་ལ་
[106a.5]རེག་པ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་རིན་པོ་ཆེའམ་རིན་པོ་ཆེར་སྨོས་པ་ཉམས་པ་ལ་རེག་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་དེ་ནི་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་
[106a.6]གསུངས་པ་ཡིན་ཏེ་སྔ་མ་བཞིན་ནོ། །དགེ་སློང་རིན་ཆེན་ལ་རེག་པ་ཞེས་བྱ་བ་ལ་སོགས་པ་ནི་དགེ་སློང་རིན་པོ་ཆེ་ལ་རེག་པ་ཇི་ལྟ་བུར་ཐུབ་པས་ལྟུང་བ་མེད་པར་གསུངས་ཞེས་བྱ་བ་ཡང་གསལ་པོར་སྨྲོས་ཤིག་ཅེས་བྱ་བར་སྦྱར་ཏེ། ལྟུང་བ་མེད་ཅེས་བྱ་བ་ནི་ཉེས་པ་མེད་པའོ་ཞེས་བྱ་བ་དེ་སྐད་དུ་གསུངས་
[106a.7]པ་སྟེ་རེག་ན་ཡང་ལྟུང་བ་མེད་པ་ཁོ་ནར་གསུངས་ཞེས་བྱ་བའི་དོན་ཏོ། །དོན་གཉེར་ཞེས་བྱ་བ་ནི་བཅོལ་བའོ། །འདི་ལ་གཞན་གྱི་བསམ་པ་ནི་དགེ་སློང་གིས་རིན་པོ་ཆེ་ལ་རེག་ན་གདོན་མི་ཟ་པར་ལྟུང་བྱེད་དམ་ཉེས་བྱས་སུ་འགྱུར་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་གིས་ལྟུང་བ་
[106b]
[106b.1]མེད་པར་གསུངས་སོ་ཞེས་བྱ་བ་འདི་ལ་རྒྱུ་ཅི་ཞིག་ཡོད་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། སྦས་པ་ལེན་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་རིན་པོ་ཆེ་ལ་བཟུང་ན་ལྟུང་བར་ཡང་མི་འགྱུར་བ་ལྟ་མཆིས་ལགས་
[106b.2]སམ། ཉེ་བ་འཁོར་ཡོད་དེ། སྦས་པ་ལེན་ནའོ་ཞེས་བྱ་བ་ཡིན་ནོ། །ཡང་ན་དེ་ནི་ལྷའི་གནས་ལ་སོགས་པར་སྣོད་དང་ཟས་དང་སྟན་དང་གདིང་བ་ལ་སོགས་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་རིན་པོ་ཆེ་ལ་བཟུང་ལ་ལྟུང་བར་ཡང་མི་འགྱུར་
[106b.3]བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ལྷའི་གནས་སམ། ཀླུའི་གནས་སམ། གནོད་སྦྱིན་གྱི་གནས་སམ། རྒྱལ་པོའི་ཕོ་བྲང་ངམ། བློན་པོ་ཆེན་པོའི་གནས་དག་ཏུ་སོན་ལ་དེ་ཡང་སྟན་ནམ། སྣོད་གཞན་མེད་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་འཇིགས་
[106b.4]པར་འགྱུར་ན་རང་གི་ལ་མི་གནོད་ན་དགེ་འདུན་གྱི་དང་མཆོད་རྟེན་གྱི་དབྱིག་དང་གསེར་སྦས་ནས་སམ་ཁྱེར་ནས་འགྲོ་བར་བྱའོ། །དད་པ་ཅན་ནམ་དགེ་ཚུལ་གྱིས་སོ། །མེད་ན་རང་གིས་སོ། །དེས་བརྐོ་བར་བྱའོ། །བྲལ་ན་སྦྱིན་ནོ། །བྲུ་བ་ཡང་དེ་དང་འདྲའོ་ཞེས་བཤད་དོ། །དགེ་སློང་གིས་དགེ་
[106b.5]སློང་ལ་ཞེས་བྱ་བ་ལ་སོགས་པ་ལ། གཞན་གྱིས་བསམ་པ་ནི་གང་གི་ཚེ་དགེ་སློང་གིས་ག་ག་ཚིལ་བྱ་བའི་བསམ་པས་དགེ་སློང་ལ་ག་ག་ཚིལ་བྱེད་པ་དེའི་ཚེ་དེའི་དུས་ན་ལྟུང་བྱེད་དུ་འགྱུར་རོ་ཞེས་བྱ་བ་དེ་ནི་ཤེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་ཏུ་དེ་ལ་ཉེས་བྱས་
[106b.6]བྱེད་པར་གསུངས་སོ་ཞེས་བྱ་བ་དེ་དོན་འདི་ལ་ཁོ་བོ་ཁྱོད་ལ་གསོལ་བ་འདེབས་ཀྱི་ཡང་དག་པ་ཇི་ལྟ་བ་བཞིན་སྨྲས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ལུས་ཀྱི་དབང་པོ་ཉམས་པས་ག་ག་ཚིལ་བྱེད་པའི་རྒྱུ་མཚན་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་
[106b.7]དུ་འདིར་གཞུང་ནི། བཙུན་པ་རེ་ཞིག་དགེ་སློང་ལུས་ཀྱི་དབང་པོ་ཉམས་པས་ལུས་ཀྱི་དབང་པོ་ཉམས་པ་ལ་ག་ག་ཚིལ་བྱ་བ་བགྱིས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །བཙུན་པ་རེ་ཞིག་དགེ་སློང་ལུས་ཀྱི་དབང་པོ་མ་ཉམས་པས་ལུས་ཀྱི་དབང་པོ་ཉམས་པ་ལ་ག་ག་
[107a]
[107a.1]ཚིལ་བགྱིས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་རེག་པར་བྱ་བ་ཉིད་ནི་མ་ཉམས་པའོ། །ག་ག་ཚིལ་བྱེད་པ་ལ་ཡང་ངོ་ཞེས་བཤད་དོ། །ཡང་ན་བར་ཆད་དང་བཅས་པར་ག་ག་ཚིལ་བྱེད་པ་ལ་བརྟེན་ནས་དེ་སྐད་དུ་གསུངས་
[107a.2]པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་རྨ་ནས་ག་ག་ཚིལ་བགྱིས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་རྨར་གཏོགས་པའི་ག་ག་ཚིལ་བྱེད་པའི་རྒྱུ་མཚན་གྱིས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་
[107a.3]ཞིག་དགེ་སློང་གིས་རྨ་ནས་ག་ག་ཚིལ་བགྱིས་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ནོ། །ཡང་ན་ལུས་ཀྱི་ཕྱོགས་གཞན་གྱིས་ག་ག་ཚིལ་བྱེད་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། འདིར་གཞུང་ནི། །བཙུན་པ་རེ་ཞིག་དགེ་སློང་གིས་སོར་མོས་ག་ག་ཚིལ་བགྱིད་པ་
[107a.4]མ་ལགས་པ་དེ་ལས་གཞན་པའི་ལུས་ཀྱི་ཕྱོགས་མགོ་འམ་དཔུང་མགོ་འམ་གྲུ་མོ་འམ་པུས་མོའམ་རྟིང་པའམ་ཞུགས་ཤིང་ངམ་གོར་མའམ་བོང་བས་ག་ག་ཚིལ་བགྱིད་ན་ཅིར་འགྱུར་ལགས། །ཉེས་བྱས་སུའོ། །སོ་དང་སེན་མོ་དང་སྤུ་དག་གིས་ཀྱང་དེ་བཞིན་དུ་བརྗོད་པར་བྱའོ་ཞེས་བྱ་བ་ཡིན་ནོ། །
[107a.5]ཡང་ན་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །ལོ་ནི་ཉི་ཤུར་མ་ལོན་པ་ཞེས་བྱ་བ་ལ་སོགས་པ་ནི་ཉི་ཤུར་མ་ལོན་པར་བསྙེན་པར་རྫོགས་པར་བྱེད་ན་ཇི་ལྟར་ལྟུང་བ་མེད་པ་དང་དེ་དོན་དུ་གཉེར་བ་ལ་ཡང་འཆགས་པར་གསུངས་ཞེས་བྱ་བར་
[107a.6]སྦྱར་ཏེ། ཅི་ཞིག་མ་ལོན་ཞེ་ན། ལོ་ནི་ཞེས་བྱ་བ་སྨོས་སོ། །ལོ་གྲངས་ཇི་སྙེད་ཅིག་ཏུ་ཞེ་ན་ཉི་ཤུར་ཞེས་བྱ་བ་སྨོས་སོ། །ཅི་ཞིག་བྱེད་པ་ལ་ལྟུང་བ་མེད་ཅེ་ན། བསྙེན་པར་རྫོགས་པར་བྱེད་པ་ལ་ཞེས་སྨྲས་སོ། །འོ་ན་བསྙེན་པར་རྫོགས་པར་བྱ་བ་ལ་ཅིར་འགྱུར་ཞེ་ན། དེ་དོན་གཉེར་ལའང་
[107a.7]འཆགས་ཞེས་བྱ་བ་ལ་སོགས་པར་སྨོས་ཏེ། སྡོམ་པ་སྐྱེ་བར་འགྱུར་ཞེས་བྱ་བའི་ཐ་ཚིག་གོ། །དེ་དོན་གཉེར་ལ་ཞེས་བྱ་བ་ནི་བསྙེན་པར་རྫོགས་པ་དོན་དུ་གཉེར་བ་ལ་སྟེ་བསྙེན་པར་རྫོགས་པར་འདོད་པ་ལ་ཞེས་བྱ་བའི་ཐ་ཚིག་གོ། །ཡང་ཞེས་བྱ་བའི་སྒྲ་ནི་བསྡུ་བ་སྟེ། མཁན་པོ་ལ་སོགས་པ་
[107b]
[107b.1]ལ་ལྟུང་བ་མེད་པ་འབའ་ཞིག་ཏུ་མ་ཟད་ཀྱི། བསྙེན་པར་རྫོགས་པར་འདོད་པ་ལ་ཡང་སྡོམ་པ་འཆགས་པ་སྙམ་དུ་བསམས་པ་ཡིན་ནོ། །འདི་ལ་འདྲི་བའི་བསམ་པ་ནི་འདི་ཡིན་ཏེ། གང་གི་ཚེ་ལོ་ཉི་ཤུ་མ་ལོན་པར་བསྙན་པར་རྫོགས་པར་བྱེད་པ་དེའི་ཚེ་མཁན་པོ་ལ་སོགས་པ་ལ་ཡང་ལྟུང་བ་
[107b.2]མེད་པ་ལ་བསྙེན་པར་རྫོགས་པར་འདོད་པ་ལ་ཡང་བསྙེན་པར་རྫོགས་པ་འཆགས་སོ་ཞེས་བྱ་བ་དེ་ལྟ་བུ་ཞིག་འདིར་ལོ་ཉི་ཤུ་མ་ལོན་པར་བསྙེན་པར་རྫོགས་པར་བྱེད་ན་མཁན་པོ་ལ་ནི་ལྟུང་བྱེད། གཞན་དག་ལ་ནི་ཉེས་བྱས། བསྙེན་པར་རྫོགས་པ་ལ་ནི་མི་འཆགས་པར་བསྟན་ཏོ་ཞེས་བྱ་བ་འདི་
[107b.3]ཡིན་ནོ། །འདི་ལ་ལན་ནི་འདི་ཡིན་ཏེ། ལོ་ཉི་ཤུ་མ་ལོན་པར་ཁྱིམ་སོ་བཟུང་བ་ཞིག་བསྙེན་པར་རྫོགས་པར་བྱེད་པའི་དབང་དུ་མཛད་ནས་དེ་སྐད་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་ལོ་ཉི་ཤུ་མ་ལགས་པ་ཞིག །དགུང་ལོ་ཉི་ཤུར་མ་ལགས་པའི་འདུ་ཤེས་ཀྱིས་བསྙེན་
[107b.4]པར་རྫོགས་པར་བགྱིད་ལ་ལྟུང་བྱེད་ཀྱི་ལྟུང་བར་ཡང་མི་འགྱུར་ལ། བསྙེན་པར་ལེགས་པར་རྫོགས་པ་ཡང་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ལོ་ཉི་ཤུ་མ་ལོན་པ་ཁྱིམ་སོ་བཟུང་བ་ཞིག་བསྙེན་པར་རྫོགས་པར་བྱེད་ནའོ་ཞེས་བྱ་བ་ཡིན་ནོ། །ཡང་ན་ལོ་ཉི་ཤུ་ལོན་པར་
[107b.5]འདུ་ཤེས་པའམ་མི་ཤེས་པའམ་མི་དྲན་པ་འམ་ཐེ་ཚོམ་ཟ་བ་དང་ལྡན་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དགུང་ལོ་ཉི་ཤུར་མ་ལགས་པ་ཞིག་དགུང་ལོ་ཉི་ཤུ་མ་ལགས་པའི་འདུ་ཤེས་ཀྱིས་བསྙེན་པར་རྫོགས་པར་
[107b.6]བགྱིད་ན་བསྙེན་པར་རྫོགས་པ་ཞེས་བགྱིའམ། ཉེ་བ་འཁོར་དང་པོ་ནས་མི་མཐུན་པ་ཅན་གཉིས་མ་གཏོགས་པར་ལྷག་མ་བརྒྱད་ནི་བསྙེན་པར་རྫོགས་པ་ཞེས་བྱ་བའོ་ཞེས་བྱ་བ་ཡིན་ནོ། །མདོ་བྱེད་པས་ཀྱང་འདི་ལ་ཅིག་ཤོས་ལ་ནི་ལོན་པར་འདུ་ཤེས་པ་ཉིད་ནའོ། །མི་ཤེས་པ་དང་མི་དྲན་པ་དང་ཡིད་གཉིས་
[107b.7]ཟ་བ་དག་ལ་ཡང་ངོ་ཞེས་བཤད་དོ། །ཡང་ན་ལས་དང་པོ་པ་ལ་སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་མྱོས་འགྱུར་འདུ་ཤེས་ཀྱིས། །ཞེས་བྱ་བ་ལ་སོགས་པ་ལ་མྱོས་འགྱུར་འདུ་ཤེས་ཀྱིས་ཞེས་བྱ་བ་ནི་གང་ལ་འདི་ནི་མྱོས་པ་བསྐྱེད་པ་
[108a]
[108a.1]ཡིན་ནོ་སྙམ་པ་དེ་འདི་ལྟ་བུའི་འདུ་ཤེས་ཏེ་སེམས་ཡོད་པ་དེ་ལ་འདི་སྐད་ཅེས་བྱའོ། །འབྲུའི་ཆང་དང་བཅོས་པའི་ཆང་མྱོས་པ་སྐྱེད་པ་འཐུང་བ་ནི་མིད་པར་མིད་པའོ། །དོགས་པ་མེད་པར་ཞེས་བྱ་བ་ནི་བློ་ལ་ཐེ་ཚོམ་མེད་པར་རོ། །འདི་ལ་འདྲི་བའི་བསམ་པ་ནི་འབྲུའི་
[108a.2]ཆང་དང་བཅོས་པའི་ཆང་མྱོས་པར་འགྱུར་བ་འཐུང་ན་ལྟུང་བྱེད་དུ་འགྱུར་རོ་ཞེས་བྱ་བ་དེ་ནི་ངེས་པ་ཉིད་ན། འོན་ཀྱང་བཅོམ་ལྡན་འདས་ཀྱིས་དེ་ལ་ཉེས་བྱས་སུ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པར་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ལྷའི་ཆང་འཐུང་བ་ལ་
[108a.3]དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་སྐྱེམས་འཚལ་ལ་ལྟུང་བྱེད་དུ་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ལྷའི་ཆང་དག་འཐུངས་ན་ཅིར་འགྱུར་ཞེ་ན། ཉེས་བྱས་སུའོ་ཞེས་བྱ་བ་ཡིན་ནོ། །ཡང་
[108a.4]ན་སྔོན་ཕམ་པ་བྱུང་བ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །སྡོམ་བརྩོན་མཚན་མོ་རིན་ཆེན་དག །ཅེས་བྱ་བ་ལ་སོགས་པ་ནི་སྡོམ་བརྩོན་ཅན་གྱིས་མཚན་མོ་རིན་པོ་ཆེ་དག་འདུག་བཞིན་དུ་རྒྱལ་པོའི་བཙུན་མོའི་གནས་ན་ཡོད་པའི་གཏན་པའི་རྟེན་ལ་གཏུགས་
[108a.5]ན་ཇི་ལྟར་ལྟུང་བ་མེད་ཅེས་བྱ་བར་སྦྱར་རོ། །དེ་ལ་མཚན་མོ་ཞེས་སྨོས་པ་ནི་ཉིན་པར་བཀག་སྟེ་དེ་ལ་ཉེས་བྱས་སུ་གསུངས་པའི་ཕྱིར་རོ། །རིན་ཆེན་ནི་མར་མེ་དང་བསྲུང་བ་ལ་སོགས་པའི་ཆེད་ཀྱི་ནོར་བུ་ལ་སོགས་པའོ། །རིན་ཆེན་ཞེས་སྨོས་པས་ནི་སྐབས་ཀྱིས་ན་རིན་པོ་ཆེར་སྨོས་པ་རལ་གྲི་དང་
[108a.6]པི་ཝང་དང་འོད་མ་ལ་སོགས་པས་བསྲུང་བ་དང་རྩེད་མོའི་ཆ་བྱད་རྣམས་ཀྱང་བསྡུས་སོ། །འདུག་བཞིན་དུ་ཞེས་བྱ་བ་ནི་མ་བསྡུས་པར་ཏེ་རང་གི་གནས་ནས་མ་བཏོན་པར་རོ། །འདིས་ནི་བཙུན་མོའི་གནས་རྣལ་མར་མི་འདུག་ན་དེའི་ཉེན་ཆེན་པོའི་གནས་སུ་གྱུར་པའི་ཕྱིར་འཇུག་པ་ཤིན་ཏུ་འོས་པ་མ་ཡིན་ནོ་
[108a.7]ཞེས་བྱ་བ་བསྟན་ཏོ། །གཏན་རྟེན་ནི་རྒྱལ་པོའི་བཙུན་མོའི་གནས་ཀྱི་སྒོ་བཅད་པའི་ཤིང་ངོ་། །དེ་ནི་དབང་པོས་ལྷ་མ་ཡིན་རྣམས་འཇུག་ཏུ་མི་སྟེར་བ་བཞིན་དུ་ཕུར་པས་འདེབས་པར་བྱེད་པ་འགོག་པར་བྱེད་པའི་ཕྱིར་རོ། །རོ་ལངས་མི་ལྡང་བར་བྱ་བ་ལ་ཇི་སྐད་དུ་སྒོར་གཏན་པའི་རྟེན་བཙུགས་ན་ཞེས་བྱ་
[108b]
[108b.1]བ་ལ་སོགས་པ་ལྟ་བུའོ། །གཏན་པའི་རྟེན་དེ་གང་ན་ཡོད་པ་ཞིག་ཅེ་ན། བཙུན་མོའི་གནས་ཡོད་ལ་ཞེས་བྱ་བ་སྨོས་ཏེ། བཙུན་མོའི་གནས་ནི་རྒྱལ་པོའི་བཙུན་མོ་གནས་པའི་གནས་སོ། །དེ་ན་ཡོད་ཅིང་དེ་དང་འབྲེལ་པ་ནི་བཙུན་མོའི་གནས་ཡོད་དེ། རྒྱལ་པོའི་བཙུན་མོ་གནས་པའི་གནས་ནི་ཉེན་
[108b.2]ཆེན་པོའི་གནས་སུ་གྱུར་པ་ཉིད་ཀྱི་ཕྱིར་ལྟུང་བྱེད་དུ་འགྱུར་ལ། དེ་ལས་གཞན་པ་དང་འབྲེལ་པའི་གཏན་པའི་རྟེན་ལ་གཏུགས་པ་ལ་ནི་ཉེས་བྱས་སུ་གསུངས་པའི་ཕྱིར་རོ། །གཏུགས་ན་ནི་ཞེས་བྱ་བ་ནི་ཞུགས་ནའོ། །འདི་ལ་ནི་དོན་ནི་གང་གི་ཚེ་དགེ་སློང་གིས་མཚན་མོ་རིན་པོ་ཆེ་དང་རིན་པོ་ཆེར་སྨོས་པ་
[108b.3]དག་མ་བསྡུས་པར་རྒྱལ་པོའི་བཙུན་མོའི་གནས་ཀྱི་གཏན་པའི་རྟེན་ཙམ་དུ་ཡང་ཞུགས་ན་དེའི་ཚེ་དེ་ལ་ལྟུང་བྱེད་དུ་འགྱུར་རོ་ཞེས་བྱ་བ་དེ་ནི་ཁོ་བོས་ཤེས་ན་འོན་ཀྱང་བཅོམ་ལྡན་འདས་ཀྱིས་ཁ་ཅིག་ལས་དེ་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པར་བརྗོད་པར་བྱའོ་ཞེས་བྱ་བ་འདི་ཡིན་ནོ། །
[108b.4]འདི་ལ་ལན་ནི་འདི་ཡིན་ཏེ། དེ་ནི་བཙུན་མོའི་གནས་སྟོང་པར་ཞུགས་པའི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགུང་ལ་སང་སྐྱ་རེངས་མ་ཤར་བར་རིན་པོ་ཆེའམ་རིན་པོ་ཆེར་སྨོས་པ་དག་མ་བསྡུས་པར་དག་པའི་མཐའི་གཏན་པའི་རྟེན་པ་ལ་
[108b.5]གཏུགས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གིས་བཙུན་མོའི་གནས་སྟོང་པར་ཞུགས་ན་ཞེས་བྱ་བ་ཡིན་ནོ། །དེ་ལ་དོན་ནི་འདི་ཡིན་ཏེ། འདི་ལ་དག་པ་མ་འདྲེས་པ་གཞན་དག་ཐུན་མོང་མ་ཡིན་པ་རྒྱལ་པོ་དང་ཉེ་བ་ཡོད་པས་ན་དག་
[108b.6]པའི་མཐའ་ཡིན་ནོ། །ཡང་ན་དེ་ནི་དེ་ལྟ་བུའི་རྐྱེན་གྱིས་འཇུག་པ་ལ་བརྟེན་ནས་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། རྒྱལ་པོས་བོས་སམ་བཙུན་མོའམ་རྒྱལ་བུའམ། ཁྲོམ་གྱི་རུ་འམ་གྲོང་མི་འམ་ལྗོངས་ཀྱི་མིས་བོས་ན་ལྟུང་བ་མེད་དོ་ཞེས་བྱ་བ་ཡིན་ནོ། །ཡང་ན་ལས་དང་པོ་པ་
[108b.7]ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ་སྔ་མ་བཞིན་ནོ། །གྲོང་ནས་དགེ་སློང་མ་ལ་ནི་ཞེས་བྱ་བ་ལ་སོགས་པ་ནི་གྲོང་ན་གནས་པའི་དགེ་སློང་མ་ལ་ཞེས་བྱ་བར་སྦྱར་ཏེ། དེ་ན་གནས་ཞེས་བྱ་བ་ནི་གྲོང་ན་གནས་པའོ། །དེ་སུ་ཞིག་ཅེ་ན་སྡོམ་བརྩོན་ཞེས་བྱ་བ་སྨོས་ཏེ་དགེ་སློང་ཞེས་བྱ་
[109a]
[109a.1]བའི་དོན་ཏོ། །ཅི་གཞན་ལེན་དུ་འཇུག་པ་ཡང་ཡིན་ནམ་ཞེ་ན། བདག་གིས་ཞེས་བྱ་བ་སྨོས་ཏེ། བདག་ཉིད་ཀྱིས་ཡིན་གྱི་གཞན་གྱིས་ནི་མ་ཡིན་ནོ་ཞེས་བྱ་བའི་ཚིག་གོ། །གྲོང་ན་གནས་པས་ཅི་ཞིག་བྱས་ཤེ་ན། བླངས་ན་ཞེས་བྱ་བ་སྨོས་ཏེ། ཀུན་དུ་བླངས་ནའོ། །ཅི་
[109a.2]ཞིག་བླངས་ཤེ་ན། ཁ་ཟས་ཞེས་བྱ་བ་སྨོས་ཏེ། བཅའ་བར་བྱ་བའི་བདག་ཉིད་ཀྱི་ཁ་ཟས་སོ། །ཉེས་མེད་ཅེས་བྱ་བ་ནི་ཉེས་པ་མེད་པར་རོ། །ཅི་ཐམས་ཅད་ཀྱི་ཐམས་ཅད་དུ་ཉེས་པ་མེད་པར་གསུངས་སམ་ཞེ་ན། སོ་སོར་བཤགས་བྱའི་ཞེས་བྱ་བ་ནི་སྨོས་ཏེ། སོ་སོར་བཤགས་དགོས་པ་ནི་སོ་སོར་
[109a.3]བཤགས་པར་བྱ་བའོ། །དེ་སྟེ་སོ་སོར་བཤགས་པར་བྱ་བའི་ཉེས་པ་དང་མི་ལྡན་པར་གསུངས་ཀྱི་ཐམས་ཅད་དུ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལ་སོ་སོར་བཤགས་པར་བྱ་བ་ནི་རབ་ཏུ་བསྒྲགས་པ་ཙམ་གྱིས་ལྟུང་བ་བཟློག་པའི་ཕྱིར་ཏེ། དེ་སྨྲ་བའི་རྣམ་པར་བརྗོད་པ་ལས་སོ་སོར་བཤགས་པ་
[109a.4]ཉིད་དུ་བརྗོད་ཀྱི་བཤགས་པ་ནི་མ་ཡིན་ནོ། །གཞན་དག་ན་རེ་ཇི་ལྟར་བཤགས་པ་ལྟུང་བྱེད་ཀྱི་ལྟུང་བ་གཅིག་ཅིག་གི་མདུན་དུ་བཤགས་པར་བྱ་བ་ལྟར་འདི་ཡང་དེ་དང་འདྲའོ་ཞེས་ཟེར་རོ། །འདི་ལ་འདྲི་བའི་བསམ་པ་ནི་གང་གི་ཚེ་དགེ་སློང་གྲོང་ན་གནས་པས་དགེ་སློང་མ་གྲོང་ན་གནས་པ་ཞིག་ལས་
[109a.5]བཅའ་བར་བྱ་བ་དང་བཟའ་བར་བྱ་བ་བླངས་ཏེ་འཆོས་སམ་ཟོས་ན་དེའི་ཚེ་དེ་ལ་སོ་སོར་བཤགས་པར་བྱ་བའི་ལྟུང་བར་འགྱུར་རོ་ཞེས་བྱ་བ་དེ་ནི་ཤེས་ན། འོན་ཀྱང་བཅོམ་ལྡན་འདས་ཀྱིས་དེ་ལ་ཉེས་བྱས་ཀྱི་ལྟུང་བ་ཁོ་ནར་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་ཞེས་བྱ་བ་ཡིན་ནོ། །འདི་ལ་ལན་འདི་ཡིན་
[109a.6]ཏེ། ཁ་ཟས་རུང་བ་མ་ཡིན་པ་ལེན་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་སློང་མ་ཉེ་དུ་མ་ལགས་པ་ཤུལ་པོ་ཆེ་ན་མཆིས་པ་ལ་བསོད་སྙོམས་བླངས་ཏེ་འཚལ་ལ་སོ་སོར་བཤགས་པར་བགྱི་བའི་ལྟུང་བར་ཡང་མི་འགྱུར་བ་ལྟ་
[109a.7]མཆིས་ལགས་སམ། ཉེ་བ་འཁོར་ཡོད་དེ། ཁ་ཟས་རུང་བམ་ཡིན་པ་བླངས་ནས་ཟ་བར་བྱེད་ནའོ་ཞེས་བྱ་བ་ཡིན་ནོ། །ཡང་ན་དགེ་སློང་མ་སྨྱོན་པ་ལ་སོགས་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་རེ་ཞིག་དགེ་སློང་གིས་དགེ་སློང་མ་
[109b]
[109b.1]སྨྱོན་མ་ཤུལ་པོ་ཆེ་ན་མཆིས་པ་ལ་བསོད་སྙོམས་རང་གི་སུག་པར་བླངས་ཏེ་འཚལ་ན་ཅིར་འགྱུར་ལགས། ཉེས་བྱས་སུའོ་ཞེས་བྱ་བ་ཡིན་ཏེ། སེམས་འཁྲུགས་མ་ལ་སོགས་པས་ཀྱང་དེ་བཞིན་དུ་བརྗོད་པར་བྱ་སྟེ་སྔ་མ་བཞིན་ནོ། །ཡང་ན་སྔོན་ཕམ་པ་བྱུང་བ་ལ་སོགས་པ་ལ་ཉེས་བྱས་སུ་འགྱུར་བ་ཡིན་ཏེ་སྔ་
[109b.2]མ་བཞིན་ནོ། །འདུལ་བ་དྲི་བའི་ཚིག་ལེའུར་བྱས་པ་ལེའུ་གཉིས་པའི་གཏན་ལ་དབབ་པའོ།། །།དགེ་སློང་སོ་སོར་ཐར་པའི་ཞེས་བྱ་བ་ལ་སོགས་པ་ནི་དགེ་སློང་གིས་སོ་སོར་ཐར་པའི་མདོ་འདོན་པ་ལྔ་ཆར་ཡང་མ་བཏོན་པར་ཇི་ལྟར་དེས་གསོ་སྦྱོང་བྱས་པར་འགྱུར་བ་དྲིས་སྨྲོས་ཤིག་ཅེས་བྱ་བར་སྦྱར་རོ། །
[109b.3]དེ་ལ་སོ་སོར་ཐར་པའི་མདོ་འདོན་པ་ནི་གླེང་གཞི་དང་ཕམ་པར་འགྱུར་བ་དང་། དགེ་འདུན་ལྷག་མ་དང་། མ་ངེས་པ་དང་། རིལ་གྱིས་འདོན་པའི་མཚན་ཉིད་དག་གོ། །དེ་དག་མ་བཏོན་པར་ཞེས་བྱ་བ་ནི་དགེ་འདུན་གྱི་ནང་དུ་མ་བརྗོད་པར་རོ། །དེ་དག་གང་དག་འབྲེལ་པ་ཞེ་ན། སོ་སོར་ཐར་པའི་ཞེས་སྨོས་
[109b.4]སོ། །སོ་སོར་ཐར་པ་ནི་དེས་དང་པོར་སྡིག་པ་ལས་ཐར་པའི་ཕྱིར་དེ་དེའི་ཡིན་ནོ། །དེ་ཡིས་ཞེས་བྱ་བ་ནི་དགེ་སློང་གིས་སོ། །གསོ་སྦྱོང་ནི་ཚུལ་ཁྲིམས་གསོ་བའི་ཕྱིར་དང་སྡིག་པ་རྣམ་པར་སྦྱོང་བའི་ཕྱིར་ཏེ། འདི་ལྟར། དགེ་བ་མཐའ་དག་ཡང་དག་གསོ་བྱེད་ཅིང་། །སྡིག་པ་མཐའ་དག་ཡང་དག་
[109b.5]འདིར་སྦྱོང་བ། །དེ་གསོ་ཕྱིར་དང་སྡིག་པ་རྣམ་སྦྱོང་ཕྱིར། །དེ་བཞིན་གཤེགས་པས་གསོ་སྦྱོང་ཞེས་གསུངས་སོ། །ཞེས་གསུངས་པ་ལྟ་བུའོ། །འདི་ལ་དོན་ནི་གང་གི་ཚེ་དགེ་སློང་གིས་སོ་སོར་ཐར་པའི་མདོ་བཏོན་པ་ལྔ་པོ་དག་ལས་སོ་སོར་ཐར་པའི་མདོ་འདོན་པ་འགའ་ཙམ་བཏོན་ན་ཡང་དེའི་ཚེ་དེས་གསོ་
[109b.6]སྦྱོང་བྱས་པར་གྱུར་པ་ཡིན་ནོ་ཞེས་བྱ་བ་ནི་ཤེས་ན། འོན་ཀྱང་འགའ་ཡང་མ་བཏོན་ལ་གསོ་སྦྱོང་ཡང་བྱས་པར་འགྱུར་རོ་ཞེས་བྱ་བ་དེ་ཇི་ལྟ་བུ་ཡིན་པ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པའི་རྒྱུ་ནི་འདི་ཡིན་ཏེ། དགག་དབྱེ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། དེ་བཞིན་
[109b.7]དུ་འདིར་གཞུང་ནི། བཙུན་པ་དགེ་སློང་གིས་སོ་སོར་ཐར་པའི་མདོ་འདོན་པ་ལྔ་པོ་དག་ལས་སོ་སོར་ཐར་པའི་མདོ་འདོན་པ་གང་ཡང་རུང་བ་མ་བཏོན་ལ་གསོ་སྦྱོང་ཡང་བགྱིས་པར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དགག་དབྱེའི་ཚེ་དགག་དབྱེ་བྱེད་ནའོ། །དེ་བཞིན་དུ་མདོ་བྱེད་པས་
[110a]
[110a.1]ཀྱང་དགག་དབྱེ་བྱས་ན་འདི་མ་གྲུབ་པ་ཉིད་མ་ཡིན་ནོ་ཞེས་བཤད་དོ། །སོ་སོར་ཐར་པའི་མདོ་མི་འདོན་ཅིང་ཞེས་བྱ་བ་ལ་སོགས་པ་ལ། སོ་སོར་ཐར་པ་ཞེས་བྱ་བ་དང་། གསོ་སྦྱོང་ཞེས་བྱ་བའི་དོན་དེ་ནི་བཤད་ཟིན་ཏོ། །དེ་མི་འདོན་ཅིང་ཞེས་བྱ་བ་ནི་དགེ་འདུན་གྱི་ནང་དུ་མི་
[110a.2]བརྗོད་པའོ། །དེ་བས་ན་འདི་ནི་མཐུན་པའི་གསོ་སྦྱོང་བསལ་ཏོ། །བྱིན་གྱིས་བརླབས་པ་ནི་རྒྱུད་དག་པའོ། །དེ་ལྟར་ན་འོ་ན་གཞན་ཉེ་ན་བྱིན་གྱིས་རློབ་པར་འགྱུར་རོ་ཞེ་ན། གཞན་གྱི་དྲུང་དུ་བྱིན་མི་རློབ། །ཅེས་བྱ་བ་ལ་སོགས་པ་སྨོས་ཏེ། གཞན་གྱི་དྲུང་དུ་ཞེས་བྱ་བ་ནི་དགེ་སློང་ཚུལ་ཁྲིམས་དང་ལྟ་བ་དང་
[110a.3]ལྡན་པའི་མདུན་དུ་སྟེ། གསོ་སྦྱོང་བྱིན་གྱིས་མི་རློབ་པ་ཞེས་བྱ་བར་སྦྱར་རོ། །དེ་བས་ན་འདིས་ནི་གསོ་སྦྱོང་བྱིན་གྱིས་བརླབ་པ་བཀག་གོ། །འདིར་ཞེས་བྱ་བ་ནི་གསོ་སྦྱོང་བྱས་པ་ཡིན་ལའོ། །འདི་ལ་ཚིག་གི་དོན་ནི་གང་གི་ཚེ་དགེ་སློང་གིས་སོ་སོར་ཐར་པའི་མདོ་འདོན་པས་ཀྱང་གསོ་སྦྱོང་མི་བྱེད་ལ། དགེ་
[110a.4]སློང་གཞན་གྱི་དྲུང་དུ་ཡང་བྱིན་གྱིས་མི་རློབ་ན་དེའི་ཚེ་མ་བྱས་པ་ཡིན་ནོ་ཞེས་བྱ་བ་དེ་ནི་ཁོ་བོ་ལ་ངེས་ན། འོན་ཀྱང་བཅོམ་ལྡན་འདས་ཀྱིས་དེས་གསོ་སྦྱོང་བྱས་པར་འགྱུར་རོ་ཞེས་གསུངས་པ་དེ་ཇི་ལྟ་བུ་ཡིན་པ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། སེམས་བསྐྱེད་
[110a.5]པའི་བྱིན་གྱིས་བརླབ་པ་ལ་དགོངས་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ཚིག་ཏུ་ཡང་མ་སྨྲས་པ་ལ་གསོ་སྦྱོང་ཡང་བགྱིས་པར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དོ། །སེམས་ཀྱིས་ནའོ་ཞེས་བྱ་བ་ཡིན་ནོ། །འདི་ལ་གཞུང་གཞན་
[110a.6]ཡང་། བཙུན་པ་དགེ་སློང་གིས་གསོ་སྦྱོང་ལྔ་པོ་དག་ལས་གསོ་སྦྱོང་གང་ཡང་རུང་བ་ཞིག་ཉམས་སུ་མྱོང་བར་མི་བགྱིས་པ་གསོ་སྦྱོང་བགྱིས་པར་ཡང་འགྱུར་ལ། ལྟུང་བ་ཡང་མ་མཆིས་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། གསོ་སྦྱོང་བྱིན་
[110a.7]གྱིས་བརླབས་ནའོ་ཞེས་བྱ་བ་ཡིན་ནོ། །དེ་བཞིན་དུ་འདི་ལ་གཞུང་གཞན་ནི། དགེ་སློང་དག་ལྔ་པོ་འདི་དག་ནི་སེམས་བསྐྱེད་པས་འགྲུབ་པར་འགྱུར་བ་སྟེ། གསོ་སྦྱོང་དང་། དགག་དབྱེ་དང་། གོས་བྱིན་གྱིས་བརླབ་པ་དང་། གོས་བསྔོ་བ་དང་། གང་ཟག་མགྲོན་དུ་བོས་པའོ་ཞེས་བྱ་བ་ཡིན་ནོ། །
[110b]
[110b.1]དགེ་འདུན་རྙེད་པ་དགེ་སློང་ནི། །ཞེས་བྱ་བ་ལ་སོགས་པ་ལ། དགེ་འདུན་ལ་འབྱུང་བ་ནི་དགེ་འདུན་གྱིའོ། །རྙེད་པ་ནི་གོས་ཀྱི་རྙེད་པ་ལ་སོགས་པའོ། །གཅིག་པུས་ཞེས་བྱ་བ་ནི་གྲོགས་མེད་པར་རོ། །བླངས་ནས་ཞེས་བྱ་བ་ནི་རང་གིར་བྱས་ནའོ། །ཉེས་མེད་ཅེས་བྱ་བ་ནི་ལྟུང་བ་མེད་པ་ཉིད་དུའོ། །
[110b.2]གསལ་བར་ངེས་པར་སྨྲོས་ཞེས་བྱ་བར་སྦྱར་ཏེ། འདི་ལ་དོན་ནི་དགེ་འདུན་ལ་བསྔོས་པའི་རྙེད་པ་དགེ་སློང་གིས་རང་གིར་བྱས་ན་སྤང་བའི་ལྟུང་བ་འབྱུང་ངོ་ཞེས་བྱ་བ་ནི་ངེས་པ་ཁོ་ན་ཡིན་ནོ། །འོན་ཀྱང་བཅོམ་ལྡན་འདས་ཀྱིས་ལྟུང་བ་མེད་པ་ཉིད་དུ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་ངེས་པར་
[110b.3]བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། གཅིག་པུ་གནས་པས་རྙེད་པ་རང་གིར་བྱས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གཅིག་པུས་དགེ་འདུན་གྱི་རྙེད་པ་རང་གིར་བགྱིས་ལ་ལྟུང་བར་ཡང་མི་འགྱུར་བ་
[110b.4]ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གཅིག་པུ་ཞིག་གནས་ལ། དེར་ཡང་མི་དག་གིས་དགེ་འདུན་གྱི་ཆེད་དུ་གོས་ཕུལ་ནའོ་ཞེས་བྱ་བ་ཡིན་ནོ། །དེ་བཞིན་དུ་འདི་ལ་གཞུང་གཞན་ནི། བཙུན་པ་དགེ་སློང་གཅིག་པུ་གནས་ན་མཆིས་ལ་དེར་ཡང་མི་དག་གིས་དགེ་
[110b.5]འདུན་ལ་གོས་བགོར་བཏུབ་པ་དགེ་འདུན་མངོན་དུ་གྱུར་པ་ལ་བགོ་བར་བགྱི་བ་ཞིག་ཕུལ་ན་དེས་ཇི་ལྟར་བྱིན་གྱིས་བརླབ་པར་བགྱི་ལགས། ཉེ་བ་འཁོར་དགེ་སློང་དེས་གོས་བྱུང་བ་ལས། གནས་འདི་ན་ནི་བདག་གཅིག་པུ་གནས་པ་དགེ་འདུན་གྱིས་གོས་བྱུང་བ་འདི་ནི་བགོར་བཏུབ་པ་དགེ་འདུན་མངོན་དུ་
[110b.6]གྱུར་པ་ལས་བགོ་བར་བྱ་བ་ཡིན་པས། གོས་འདི་བདག་གི་སྐལ་བ་ཡིན་ཏེ་བཅོས་ལེགས་བྱའོ། །སྦ་བར་བྱའོ། །བདག་གིས་བྱིན་གྱིས་བརླབ་པོ། །བདག་གིས་གོས་འདི་བཅོས་ལེགས་བྱའོ། །བདག་གིར་བྱིན་གྱིས་བརླབ་པོ་ཞེས་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱའོ། །
[110b.7]འོན་ཏེ་དེ་ལྟར་མ་བྱས་ན་དགེ་སློང་དེ་གཅིག་བུས་གོས་དེ་རང་གིར་མི་བྱ་སྟེ། གལ་ཏེ་རང་གིར་བྱེད་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་དབང་བ་གཅིག་ཉིད་ཀྱིས་ཤིན་ཏུ་མང་པོ་ཐོབ་པ་ལ་ནི་མི་དབང་བའི་རྒྱུར་འགྱུར་བ་མེད་དོ་ཞེས་བཤད་དོ། །འགྲེལ་པ་བྱེད་པས་ཀྱང་
[111a]
[111a.1]འདི་ལ་འདི་ལྟར་དེད་དཔོན་ཞིག་གིས་དགེ་འདུན་གྱི་ཆེད་དུ་རྙེད་པ་རབ་ཏུ་མང་པོ་གཙུག་ལག་ཁང་དུ་བསྐུར་བ་དང་གཙུག་ལག་ཁང་དེ་ན་དགེ་སློང་གཅིག་པུ་ཞིག་གནས་པ་མི་རུང་ངོ་སྙམ་ནས་ལེན་པར་མི་བྱེད་པ་དང་། བཅོམ་ལྡན་འདས་ཀྱིས་དེ་ནི་དེ་ན་གང་གནས་པ་དེ་དབང་ངོ་ཞེས་
[111a.2]རྗེས་སུ་གནང་ངོ་ཞེས་བཤད་དོ། །སྡོམ་བརྩོན་ཅན་གྱིས་དགེ་འདུན་གྱི་ཞེས་བྱ་བ་ལ་སོགས་པ་ལ། རུང་བ་ནི་ཁ་ན་མ་ཐོ་བ་མེད་པ་སྟེ། རུང་བ་ཞེས་སྨོས་པ་ནི་རུང་བ་མ་ཡིན་པ་གསེར་དང་དངུལ་ལ་སོགས་པའམ་རུང་བ་མ་ཡིན་པའི་གོས་རྔ་བལ་དང་གནག་གི་སྤུ་དང་རི་དྭགས་ཀྱི་བལ་ལ་སོགས་
[111a.3]པའམ་སྤངས་པའམ་ཟས་ཀྱི་རྙེད་པ་སོག་འཇོག་བྱས་པའམ། བྱིན་ལེན་མ་བྱས་པའམ། ནང་དུ་ཞག་ལོན་པ་ལ་སོགས་པའམ། མཚམས་ཀྱི་ཕྱི་རོལ་ན་འདུག་པའམ་སྦྱིན་པར་བྱ་བ་མ་ཡིན་པ་བསལ་ཏོ་ཞེས་བྱ་བ་ནི་དེ་སྐད་དུའོ། །རྒྱུ་ཅི་ཡོད་ཅེས་བྱ་བ་ནི་འབྲེལ་པ་ཅི་ཡོད་ཅེས་བྱ་བའོ། །འབོད་དེ་
[111a.4]སྨྲོས་ཤིག་ཅེས་བྱ་བར་སྦྱར་ཏེ། འབོད་དེ་ཞེས་བྱ་བ་ནི་སྔ་ཕྱི་བརྟགས་ཏེའོ། །རེ་ཞིག་དགེ་སློང་གོས་ཀྱི་རྙེད་པའམ་ཟས་ཀྱི་རྙེད་པའམ་རུང་བ་རང་གིར་བྱེད་པ་ལ་ནི་ལྟུང་བ་མེད་པ་ཉིད་དུ་གནང་ན། འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བ་ཁོ་ནར་གསུངས་སོ་ཞེས་བྱ་བ་ལ་རྒྱུ་ཅི་ཞིག་ཡོད་པ་སྨྲོས་ཤིག་
[111a.5]ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དགེ་འདུན་གྱི་རྙེད་པར་བསྔོས་པ་རང་གིར་བྱེད་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་དགེ་འདུན་གྱི་རྙེད་པ་རུང་བ་རང་གིར་བགྱིས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ།
[111a.6]ཉེ་བ་འཁོར་ཡོད་དེ། དགེ་འདུན་ལ་བསྔོས་པ་ཡིན་ནའོ་ཞེས་བྱ་བ་ཡིན་ནོ། །འདི་ལ་གཞུང་གཞན་ཡང་། བཙུན་པ་དགེ་སློང་གིས་ཕ་མ་ལས་བླངས་ལ་སྤང་བའི་ལྟུང་བྱེད་དུ་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཕ་མས་གོས་དེ་དགེ་འདུན་ལ་བསྔོས་པ་ཡིན་ལ། དེ་
[111a.7]དགེ་སློང་གིས་ཤེས་བཞིན་དུ་གང་ཟག་བདག་ཉིད་ཀྱིར་སྒྱུར་བ་བྱེད་ན་གོས་སྔོན་དུ་གྲུབ་ན་སྤང་བའི་ལྟུང་བྱེད་དོ་ཞེས་བྱ་བ་ཡིན་ནོ། །མཆོད་རྟེན་ལ་ཕུལ་བ་རྙེད་པ་དག་ཅེས་བྱ་བ་ནི་མཆོད་རྟེན་ལ་ཕུལ་བའི་རྙེད་པ་མཆོད་རྟེན་དེ་ལས་དགེ་སློང་གིས་བླངས་ན་ཇི་ལྟར་ལྟུང་བ་མེད་པ་ཞེས་གསུངས་ཞེས་བྱ་བ་དེ་བཞིན་
[111b]
[111b.1]དུ་སྡོམ་བརྩོན་སྨྲོས་ཤིག་ཅེས་བྱ་བར་སྦྱར་ཏེ་དེ་ལ་ཕུལ་བ་ནི་བྱིན་པའོ། །གང་ལ་ཞེ་ན་མཆོད་རྟེན་ལ་ཞེས་བྱ་བ་སྨོས་སོ། །དེ་ལ་དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་ལ་སོགས་
[111b.2]པའི་ཡོན་ཏན་གྱི་གཟུགས་བརྙན་དུ་གྱུར་པའི་ཕྱིར་དང་། འཇིག་རྟེན་པའི་ཡོན་ཏན་དག་ལས་ཡང་དག་པར་འཕགས་པའི་ཕྱིར་མཆོད་རྟེན་ཏེ་དེ་ལའོ། །རྙེད་པ་ནི་གོས་དང་རྒྱན་ལ་སོགས་པའི་རྫས་སོ། །དེ་ལས་ཞེས་བྱ་བ་ནི་མཆོད་རྟེན་ལས་སོ་ཞེས་བྱ་བ་ནི་དེ་སྐད་དུའོ། །རྒྱལ་བ་ནི་བདུད་བཞིའི་དགྲ་ལས་
[111b.3]ངེས་པར་རྒྱལ་བ་སྟེ། སྡིག་པའི་ཆོས་ལས་ང་རྒྱལ་བས། །དེ་བས་ཉེ་འགྲོ་ང་རྒྱལ་བ། །ཞེས་པ་འབྱུང་བའི་ཕྱིར་ཏེ། འདི་ལ་དོན་ནི་སྤྱིར་མཆོད་རྟེན་ལ་ཕུལ་བའི་རྫས་བླངས་ན་གདོན་མི་ཟ་བར་ལྟུང་བར་འགྱུར་ན། འོན་ཀྱང་བཅོམ་ལྡན་འདས་ཀྱིས་དེ་ལ་ལྟུང་བ་མེད་པ་ཁོ་ནར་གསུངས་སོ་ཞེས་བྱ་བ་དེ་ཇི་
[111b.4]ལྟ་བུ་ཡིན་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཉན་ཐོས་ཀྱི་མཆོད་རྟེན་ལ་བསྔོས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། དབྱར་གྱི་ནང་རོལ་དག་ཏུ་མཆོད་རྟེན་དང་མཆོད་རྟེན་ལ་འདུ་བའི་རྙེད་པ་བགོས་ལ་ལྟུང་བར་མི་འགྱུར་ཞིང་། རུང་
[111b.5]བར་ཡང་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཉན་ཐོས་ཀྱི་མཆོད་རྟེན་ལ་བསྔོས་པ་ཡིན་ལ་ཤི་བའི་ཡོ་བྱད་ཡིན་པར་བསམས་ནས་བགོས་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་ཉན་ཐོས་ཀྱི་མཆོད་རྟེན་ལ་ཕུལ་བ་ནི་ཚངས་པ་མཚུངས་པར་སྤྱོད་པ་རྣམས་དབང་བ་
[111b.6]ཉིད་ཡིན་ནོ་ཞེས་བཤད་དོ། །ཡང་ན་དྲི་བ་དང་ལན་འདི་ནི་དོན་གྱི་དབང་གིས་གཞན་དུ་ཡང་སྦྱར་བར་རུང་བས། ཉན་ཐོས་ཀྱི་ལ་བསྔོས་པའི་རྫས་ཞེས་བྱ་བ་ལ་སོགས་པ་སྨོས་ཏེ། ཉན་ཐོས་ཀྱི་མཆོད་རྟེན་ལ་བསྔོས་པའི་རྫས་སྡོམ་ཅན་གྱིས་བླངས་ན་ཇི་ལྟར་ཐུབ་པས་ལྟུང་བ་དང་བཅས་པར་
[111b.7]གསུངས་པ་སྡོམ་བརྩོན་ཅན་སྨྲོས་ཤིག་ཅེས་བྱ་བར་སྦྱར་རོ། །བསྔོས་པ་ནི་ངེས་པར་བཏང་བ་སྟེ་བྱིན་པ་ཞེས་བྱ་བའི་དོན་ཏོ། །དེ་ཅི་ཞིག་ཅེ་ན། རྫས་ཞེས་བྱ་བ་སྨོས་ཏེ། གོས་དང་རྒྱན་ལ་སོགས་པའོ། །གང་ལ་བསྔོས་པ་ཞེ་ན་མཆོད་རྟེན་ལའོ། །མཆོད་རྟེན་ལ་སྟེ་དེའི་དོན་ནི་བཤད་
[112a]
[112a.1]ཟིན་ཏོ། །འོག་ནས་མཆོད་རྟེན་ལས་ཞེས་འཆད་པར་འགྱུར་ཏེ། དེས་ན་དོན་གྱི་དབང་གིས་རྣམ་པར་དབྱེ་བ་སྒྱུར་ལ་མཆོད་རྟེན་ལ་ཞེས་བདུན་པར་བྱའོ། །མཆོད་རྟེན་ལ་ཞེས་བྱ་བ་ནི་དེ་བཞིན་གཤེགས་པའི་མཆོད་རྟེན་ལ་ཡང་ཡོད་པས་གང་དང་འབྲེལ་པའི་མཆོད་རྟེན་ལ་ཞེ་ན།
[112a.2]ཉན་ཐོས་ཀྱི་ལ་ཞེས་སྨོས་སོ། །ཀུན་ཤེས་པའི་འབྲས་བུ་སྒྲོགས་པས་ན་ཉན་ཐོས་དེ་དགྲ་བཅོམ་པ་ལ་སོགས་པ་ལ་ཞེས་བྱ་བའི་ཐ་ཚིག་གོ། །རྫས་གང་ལས་བླངས་ན་ཞེ་ན། མཆོད་རྟེན་ལས་ཞེས་བྱ་བ་སྨོས་སོ། །སྡོམ་བརྩོན་ཞེས་བྱ་བ་ནི་བོད་པའོ། །དེས་ན་དོན་གྱིས་ཉན་ཐོས་ཀྱི་མཆོད་
[112a.3]རྟེན་ལ་ཕུལ་བའི་རྫས་ནི་བཅོམ་ལྡན་འདས་ཀྱིས་ཚངས་པ་མཚུངས་པར་སྤྱོད་པ་རྣམས་ཁོ་ན་ལ་འོས་པ་ཉིད་ཡིན་ནོ་ཞེས་བཀའ་སྩལ་པ་ལྟུང་བ་མེད་པ་ཉིད་དུ་གསུངས་ན། འོན་ཀྱང་བཅོམ་ལྡན་འདས་ཀྱིས་རྣམ་པ་འགའ་ཞིག་དེ་ལྟུང་བ་དང་བཅས་པ་ཉིད་དུ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་དེ་
[112a.4]ཁོ་བོ་ལ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། འཕགས་པ་བ་ར་དྭ་ཛ་བསོད་སྙོམས་ལེན་ལ་སོགས་པ་བཞུགས་པའི་ཉན་ཐོས་ཀྱི་མཆོད་རྟེན་གྱི་དཀོར་བླངས་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། དབྱར་གྱི་ནང་དག་ཏུ་མཆོད་
[112a.5]རྟེན་དང་མཆོད་རྟེན་ལ་འདུ་བའི་རྙེད་པ་བགོས་ན་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཉན་ཐོས་ཀྱི་མཆོད་རྟེན་ལ་བསྔོས་པ་ཡིན་ལ་ཤི་བའི་ཡོ་བྱད་ཡིན་པར་བསམས་ནས་བགོས་ནའོ་ཞེས་བྱ་བ་ཡིན་ནོ། །འདིས་ནི་འཕགས་པ་ཤཱ་རིའི་བུ་ལ་སོགས་པ་ཡོངས་
[112a.6]སུ་མྱ་ངན་ལས་འདས་པའི་མཆོད་རྟེན་ལ་ཕུལ་བའི་རྫས་ནི་ཤི་བའི་ཡོ་བྱད་ཡིན་པར་བསམས་ནས་བགོ་བར་བྱ་བ་ཉིད་ཡིན་གྱི། འཕགས་པ་བ་ར་དྭ་ཛ་བསོད་སྙོམས་ལེན་ལ་སོགས་པ་ཡོངས་སུ་མྱ་ངན་ལས་འདས་པའི་ནི་མ་ཡིན་ནོ་ཞེས་བསྟན་པ་ཡིན་ནོ། །དེ་ནི་བསྟན་པ་ཡོངས་སུ་བསྲུང་བའི་ཕྱིར་
[112a.7]འཁོར་དགྲ་བཅོམ་པ་ལྔ་བརྒྱ་ད་རུང་ཀླུའི་རྒྱལ་པོ་ཧུ་རུའི་གནས་ན་བཞུགས་ཞེས་བརྗོད་དོ། །སྤོ་བ་སྤྱོད་གཉིས་གནས་གཅིག་ན། །ཞེས་བྱ་བ་ལ་སོགས་པ་ནི་སྤོ་བ་སྤྱོད་པ་དང་ལྡན་པ་གཉིས་གནས་གཅིག་ན་སྟེ་གནས་པར་བྱེད་ཅིང་ཞག་ཏུ་གནས་པས་གནས་པར་བྱེད་ན་ཅིའི་ཕྱིར་ཉེས་པ་མེད་པ་དེ་ཉིད་
[112b]
[112b.1]ཅེས་བྱ་བ་ཁོ་བོ་ལ་ཏེ་པོར་སྨྲོས་ཤིག་ཅེས་བྱ་བར་སྦྱར་ཏེ། ཏེ་པོར་ཞེས་བྱ་བ་ནི་ཤིན་ཏུའོ། །འདི་ལ་དོན་ནི་སྤོ་བ་སྤྱོད་པ་གཉིས་གནས་གཅིག་ན་གནས་པར་བྱེད་ན། བཅོམ་ལྡན་འདས་ཀྱིས་ཉེས་བྱས་དང་ཞག་གི་བུལ་དུ་མི་ཆུད་པར་གསུངས་ན། འོན་ཀྱང་དེ་གཉིས་ལ་ལྟུང་བ་མེད་པ་ཁོ་ནར་གསུངས་
[112b.2]སོ་ཞེས་བྱ་བ་དེ་འདི་ལ་གལ་ཏེ་ཁྱོད་ལ་འདུལ་བ་ཡོངས་སུ་ཤེས་པའི་ནུས་པ་ཅི་ཞིག་ཡོད་ཅེ་ན། དེ་ནུས་པ་དང་མཐུན་པར་ཁོ་བོ་ལ་མྱུར་དུ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མུ་སྟེགས་ཅན་སྤོ་བའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་
[112b.3]གཞུང་ནི། བཙུན་པ་བཅོམ་ལྡན་འདས་ཀྱིས་སྤོ་བ་པ་གཉིས་གནས་གཅིག་ན་གནས་པར་མི་བྱའོ་ཞེས་བཀའ་སྩལ་པ་གང་ལགས་པ། བཙུན་པ་སྤོ་བ་པ་གཉིས་གནས་གཅིག་ན་གནས་ན་ལྟུང་བར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གཞན་མུ་སྟེགས་ཅན་དག་ཅིག་
[112b.4]སྤོ་བ་ལ་གནས་པ་ཡིན་ནའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། དེ་དང་མུ་སྟེགས་ཅན་གནས་པ་ལ་གནས་པ་དང་དེར་ལྷན་ཅིག་པ་ལ་ཉེས་པ་མེད་དོ་ཞེས་བཤད་དོ། །ནམ་ཡང་ལྟུང་བ་མི་བྱེད་པ་ཞེས་བྱ་བ་ལ་སོགས་པ་ནི་ནམ་ཡང་ལྟུང་བ་མི་བྱེད་ན་ཅིའི་ཕྱིར་ཐུབ་པས་སྤོ་
[112b.5]བར་འོས་པར་གསུངས་པ་སྙིང་རྗེ་དང་ལྡན་པ་ཁྱོད་གསལ་བར་སྨྲོས་ཤིག་ཅེས་བྱ་བར་སྦྱར་ཏེ། ནམ་ཡང་ཞེས་བྱ་བ་ནི་ཚེའི་མཐས་གཏུགས་ཀྱི་བར་དུའོ། །ལྟུང་བ་ནི་དགེ་འདུན་ལྷག་མའོ། །མི་བྱེད་པ་ཞེས་བྱ་བ་ནི་དགག་པའོ། །སྤོ་བར་འོས་པ་སྤོ་བར་སྤྱད་པར་བཤད་པའོ། །བརྩེ་
[112b.6]ལྡན་ནི་སྙིང་རྗེ་དང་ལྡན་པའོ། །འདི་ལ་དོན་ནི་ཚེའི་མཐར་ཐུག་གི་བར་དུ་དགེ་འདུན་ལྷག་མའི་ལྟུང་བ་འགའ་ཡང་མི་བྱེད་ན། འོན་ཀྱང་བཅོམ་ལྡན་འདས་ཀྱིས་སྤོ་བ་པ་ཁོ་ནར་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ། གཞན་ལ་ཕན་པ་ལ་བརྩོན་པ་ཁྱོད་ཁོ་བོ་ལ་གསལ་བར་སྨྲོས་ཤིག་ཅེས་བྱ་བ་
[112b.7]འདི་ཡིན་ནོ། །འདི་ལ་ལན་ནི་འདི་ཡིན་ཏེ། མུ་སྟེགས་ཅན་སྤོ་བ་བྱིན་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་ནམ་ཡང་ལྟུང་བ་མི་འབྱིན་ལ་དེ་ཡང་སྤོ་བ་པ་ལགས་ལ་ལྟ་མཆིས་ལགས་སམ། ཉེ་བ་འཁོར་ཡོད་དེ། མུ་སྟེགས་ཅན་སྤོ་བ་པ་
[113a]
[113a.1]ཡིན་ནའོ། །ལྟུང་བ་ཡོད་པ་མ་ཡིན་ལ་ཞེས་བྱ་བ་ལ་སོགས་པ་ལ་ལྟུང་བ་ཡོད་པ་མ་ཡིན་པ་ལ་གལ་ཏེ་སྤོ་བ་སྦྱིན་པར་བྱེད་ན་ཅིའི་ཕྱིར་ཐུབ་པས་ལྟུང་བ་མེད་པར་གསུངས་པ་ཁོ་བོ་ལ་ངེས་པར་སྨྲོས་ཤིག་ཅེས་བྱ་བར་སྦྱར་ཏེ། དེ་ལ་ལྟུང་བ་ཡོད་པ་མ་ཡིན་པ་ནི་དགེ་འདུན་ལྷག་མ་མི་
[113a.2]སྤྱོད་པའོ། །སྤོ་བ་ནི་ཆད་པའི་ལས་སོ། །དེས་ན་དགེ་འདུན་གྱི་ལྷག་མ་བྱུང་བ་ལ་དགེ་འདུན་གྱིས་ཅིའི་ཕྱིར་སྤོ་བ་བྱིན། འོན་ཀྱང་དགེ་འདུན་ལ་ལྟུང་བ་འགར་ཡང་མ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་ཁོ་བོ་ལ་སྨྲོས་ཤིག །འདི་ལ་ལན་ནི་འདི་ཡིན་ཏེ། མུ་སྟེགས་ཅན་སྤོ་བ་ལ་དགོངས་ནས་དེ་
[113a.3]སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་འདུན་གྱིས་ལྟུང་བ་མ་བྱུང་བ་ཞིག་ལ་སྤོ་བ་སྩལ་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། མུ་སྟེགས་ཅན་ལའོ་ཞེས་བྱ་བ་ཡིན་ནོ། །གསར་བུས་རྒན་པོ་ལས་འདས་ནའོ་ཞེས་བྱ་བ་
[113a.4]ལ་སོགས་པ་ལ། འདས་ན་ཞེས་བྱ་བ་ནི་ཐོད་རྒལ་དུ་སྟེ་རྒན་རིམས་ལས་རྒལ་ན་ཞེས་བྱ་བའི་ཐ་ཚིག་གོ། །སུ་ཞིག་ལས་འདས་ན་ཞེ་ན་རྒན་པོ་ལས་ཞེས་བྱ་བ་སྨོས་སོ། །སུ་ཞིག་གིས་ཤེ་ན། གསར་བུས་ཞེས་བྱ་བ་སྨོས་ཏེ། གཞོན་རབས་ཀྱིས་སོ། །གནས་མལ་ནི་གཙུག་ལག་
[113a.5]ཁང་ལ་སོགས་པ་སྟེ་འདིར་གནས་ཤིང་འདུག་པས་སོ། །བཟློག་པར་གྱིས་ཤིག་ཅེས་བྱ་བ་ནི་གསོལ་གཅིག་པའོ། །དེས་ན་གང་གི་ཚེ་དགེ་སློང་གསར་བུས་རྒན་རིམས་བཀོལ་ནས་གནས་མལ་གཙུག་ལག་ཁང་དང་ཁྲི་དང་ཁྲིའུ་ལ་སོགས་པ་དང་པོར་ལེན་ན་དེའི་ཚེ་རྒན་རིམས་ལས་འདས་པའི་
[113a.6]ཕྱིར་ཉེས་བྱས་ཀྱི་ལྟུང་བར་འགྱུར་རོ་ཞེས་བྱ་བ་ནི་ངེས་པ་ཉིད་ན། ཤིང་དག་ཀྱང་རྒན་རིམས་བཞིན་དུ་བསྐོར་བར་བྱའོ་ཞེས་འབྱུང་ལ། དེ་བཞིན་དུ་ཐམས་ཅད་ལ་ཡང་རྒན་རིམས་བཞིན་དུ་ཞེས་གསུངས་ན། འོན་ཀྱང་བཅོམ་ལྡན་འདས་ཀྱིས་རྒན་རིམས་ཇི་ལྟ་བ་ལས་འདས་པ་འདི་ལ་ལྟུང་བ་མེད་
[113a.7]པ་ཁོ་ནར་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པ་བརྗོད་དགོས་སོ། །འདི་ལ་ལན་ནི་འདི་ཡིན་ཏེ། གཞིའི་སྤང་བ་ཐོབ་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་དགེ་སློང་གཞོན་རབས་ཀྱིས་དགེ་སློང་རྒན་རབས་བཀོལ་ཏེ་
[113b]
[113b.1]གནས་མལ་ནོད་པར་མི་བྱའོ་ཞེས་བཀའ་སྩལ་པ་གང་ལགས་པ། བཙུན་པ་དགེ་སློང་གཞོན་རབས་ཀྱིས་དགེ་སློང་རྒན་རབས་བཀོལ་ཏེ་གནས་མལ་མནོས་ལ་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། གང་གིས་དགེ་འདུན་ལས་གཞིའི་སྤང་བའམ་རིམ་གྲོའི་
[113b.2]སྤང་བ་འཐབ་པའམ་འཇིགས་པ་དང་བཅས་ནས་ཕྱོགས་ནས་འབྲོས་པར་འདོད་པ་ཡིན་ནའོ་ཞེས་བྱ་བ་ཡིན་ནོ། །གནས་མལ་དེ་ཉིད་སྤྱོད་པ་ལ་ཞེས་བྱ་བ་ལ་སོགས་པ་ནི་གནས་མལ་དེ་ཉིད་སྤྱོད་པ་ལ་ནི་ཅིའི་ཕྱིར་ཐུབ་པས་ཉེས་པ་མེད་པ་དང་ཉེས་པ་དང་བཅས་པར་གསུངས་པའོ། །འབོད་དེ་ཁོ་བོ་
[113b.3]ལ་གསལ་བར་སྨྲོས་ཤིག་ཅེས་བྱ་བར་སྦྱར་ཏེ། གནས་མལ་ནི་གདིང་བ་དང་གདིང་བའི་གདིང་བ་ལ་སོགས་པའོ། །དེ་ཉིད་ཅེས་བྱ་བ་ནི་བརྗོད་པར་འདོད་པའོ། །ཉེས་པ་མེད་པ་ནི་ལྟུང་བ་མེད་པའོ། །དང་ཞེས་བྱ་བ་ནི་བསྡུ་བའོ། །ཉེས་བཅས་ཞེས་བྱ་བ་ནི་ལྟུང་བ་དང་བཅས་པའོ། །འདི་ལ་དོན་ནི་
[113b.4]གནས་མལ་ལ་རེས་འགའ་ཆོས་ཉམས་པར་སྤྱོད་ན་ལྟུང་བ་ཁོ་ནར་འགྱུར་ལ། འོན་ཏེ་ཆོ་ག་ལས་འབྱུང་བ་བཞིན་སྤྱད་ན་ནི་ལྟུང་བ་མེད་པ་ཁོ་ན་ཡིན་ནོ། །འོན་ཀྱང་བཅོམ་ལྡན་འདས་ཀྱིས་ཡུལ་གཅིག་ལ་ལྟུང་བ་དང་ལྟུང་བ་མེད་པར་མ་གསུངས་སོ་ཞེས་བྱ་བ་དེ་ཇི་ལྟ་བུ་ཡིན་པར་བརྗོད་པར་བྱའོ་ཞེས་བྱ་བ་འདི་
[113b.5]ཡིན་ནོ། །འདི་ལ་ལན་ནི་འདི་ཡིན་ཏེ། གང་ཟག་གི་དགེ་འདུན་གྱི་གནས་མལ་སྤྱོད་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གནས་མལ་དེ་ཉིད་སྤྱོད་པ་ལ་ལྟུང་བ་དང་བཅས་ཤིང་དེ་ཉིད་སྤྱོད་པ་ལ་ལྟུང་བ་མ་མཆིས་པ་ལྟ་མཆིས་ལགས་སམ།
[113b.6]ཉེ་བ་འཁོར་ཡོད་དེ། གང་ཟག་གི་གནས་མལ་ཁ་དོག་ངན་པར་མ་བྱས་པའམ། ཁ་ཚར་རིང་པོ་སྤྱོད་ན་ལྟུང་བ་དང་བཅས་སོ། །དགེ་འདུན་གྱི་སྤྱོད་ན་ལྟུང་བ་མེད་དོ་ཞེས་བྱ་བ་ཡིན་ནོ། །དགེ་འདུན་གྱི་གནས་མལ་ལ་ཞེས་བྱ་བ་ལ་སོགས་པ་ལ། དགེ་འདུན་གྱི་ཞེས་བྱ་བ་ལ་ནི་དགེ་འདུན་མང་
[113b.7]བའོ། །གནས་མལ་ཞེས་བྱ་བ་ནི་སྤྱོད་པ་ཞེས་བྱ་བར་སྦྱར་རོ། །རང་གི་གོས་ཀྱིས་ནི་ཞེས་བྱ་བ་ནི་གང་ཟག་གི་གདིང་བ་དང་གདིང་བའི་གདིང་བས་སོ། །མ་གཡོགས་པར་ཞེས་བྱ་བ་ནི་མ་བཀབ་པར་རོ། །བརྟུལ་ཞུགས་ཅན་ཞེས་བྱ་བ་ནི་དགེ་སློང་ལ་འབོད་པ་སྟེ། འདི་ལྟར་བརྟུལ་ཞུགས་
[114a]
[114a.1]དགེ་སློང་གི་སྡོམ་པ་ཡོད་པས་སོ། །ངེས་ཚིག་གི་དོན་ནི་གང་གི་ཚེ་དགེ་འདུན་གྱི་གནས་མལ་སྟན་ནང་ཚངས་ཅན་ལ་སོགས་པ་ལ་གང་ཟག་གི་གདིང་བའི་གདིང་བས་མ་གཡོགས་པར་སྤྱོད་ན་དེའི་ཚེ་དེ་ལ་ཉེས་བྱས་ཀྱི་ལྟུང་བར་འགྱུར་ན། འོན་ཀྱང་དགེ་སློང་གི་དགེ་འདུན་གྱི་
[114a.2]གནས་མལ་ལ་གདིང་བའི་གདིང་ངས་མ་གཡོགས་པར་སྤྱོད་ཀྱང་ལྟུང་བ་མེད་དོ་ཞེས་གསུངས་སོ་ཞེས་བྱ་བ་དེ་དགེ་སློང་ཁོ་བོ་ལ་སྨྲོས་ཤིག་ཅེས་བྱ་བ་འདི་འབྱུང་ངོ་། །འདི་ལ་ལན་ནི་འདི་ཡིན་ཏེ། དེ་ནི་གདིང་བ་བགོ་བ་ཉིད་དུ་ཕུལ་བ་སྤྱོད་པ་ལ་བརྟེན་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་
[114a.3]ནི། བཙུན་པ་བཅོམ་ལྡན་འདས་ཀྱིས་དགེ་སློང་གི་དགེ་འདུན་གྱི་གཞི་ལ་བར་དུ་མ་བཅད་པར་སྤྱད་པར་མི་བྱའོ་ཞེས་བཀའ་སྩལ་པ་གང་ལགས་པ། བཙུན་པ་དགེ་སློང་གི་བར་དུ་མ་བཅད་པར་སྤྱད་པར་ལྟུང་བར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་ཁྱིམ་བདག་
[114a.4]གིས་གདིང་བའི་གདིང་བའམ། བགོ་བ་བར་ཆད་མ་བྱས་པར་སྤྱད་པར་དགེ་འདུན་ལ་ཕུལ་བ་ཡིན་ནའོ་ཞེས་བྱ་བ་ཡིན་ནོ། །འདུལ་བ་དྲི་བའི་ཚིག་ལེའུར་བྱས་པ་ལེའུ་གསུམ་པའི་གཏན་ལ་དབབ་པའོ།། །།ལྟུང་བ་ཞེས་བྱ་བ་ལ་སོགས་པ་ནི་ལྟུང་བ་རྣམ་པར་རིག་བྱེད་ཡིན་ནམ། ཅི་ཞིག་ཅེས་
[114a.5]བྱ་བ་ལ་སོགས་པ་མྱུར་དུ་ཁོ་བོ་ལ་དོན་ཇི་ལྟ་བ་བཞིན་དུ་སྨྲོས་ཤིག་ཅེས་བྱ་བར་དྲི་བ་རེ་རེ་ལ་སྦྱར་བར་བྱའོ། །རྣམ་པར་རིག་བྱེད་ནི་གཞན་དག་ལ་གོ་བར་བྱེད། ཁོང་དུ་ཆུད་པར་བྱེད་པའི་ཕྱིར་ཏེ། གཞན་དག་ལ་བདག་ནི་དགེ་བ་དང་མི་དགེ་བ་དང་། ལུང་དུ་མ་བསྟན་པའི་སེམས་དང་སེམས་ལས་བྱུང་བ་ལ་
[114a.6]འཇུག་པ་དག་གིས་ཀུན་ནས་བསླང་ངོ་ཞེས་བྱ་བར་གོ་བར་བྱེད་པ་ཞེས་བྱ་བའི་དོན་ཏོ། །ཅི་ཞིག་ཅེས་བྱ་བ་ནི་འདྲི་བའོ། །གཟུགས་ཅན་ནི་འདི་ལ་གཟུགས་ཡོད་པའི་ཕྱིར་རོ། །བསྟན་མོད་ཅེས་བྱ་བ་ནི་འདི་ནའོ། །ཆེ་གེ་མོ་ཞིག་ནའོ་ཞེས་བསྟན་པར་ནུས་པའི་ཕྱིར་རོ། །ཐོགས་དང་བཅས་པ་ནི་སྒྲིབ་པ་
[114a.7]ཐོགས་པས་རང་གི་ཡུལ་དུ་གཞན་འབྱུང་བའི་གགས་བྱེད་པའི་ཕྱིར་རོ། །ཟག་བཅས་ནི་ཟག་པ་ཡོད་པའི་ཕྱིར་རོ། །འདུས་བྱས་ནི་རྒྱུ་དང་རྐྱེན་གྱིས་བྱས་པའི་ཕྱིར་རམ། འདུས་བྱས་ཀྱི་མཚན་ཉིད་དང་ལྡན་པའི་ཕྱིར་རོ། །འོན་ཏེ་ཞེས་བྱ་བ་ནི་འདྲི་བའོ། །ཅི་ཞེས་བྱ་བ་ནི་ཡང་འདྲི་བ་ཉིད་དོ། །འཇིག་
[114b]
[114b.1]རྟེན་པ་ནི་འཁོར་བའི་ཁོངས་སུ་གཏོགས་པའི་ཕྱིར་རོ། །ཕུང་པོར་ལྡན་པ་ནི་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཞེས་བྱ་བ་སྤུངས་པའི་མཚན་ཉིད་ཕུང་པོ་དག་གི་ཁོངས་སུ་གཏོགས་པ་སྟེ་ཕུང་པོར་གཏོགས་པ་ཞེས་བྱ་བའི་ཐ་ཚིག་གོ། །ཁམས་
[114b.2]དང་ལྡན་པ་ནི་ཡུལ་དང་། དབང་པོ་དང་། རྣམ་པར་ཤེས་པ་ཞེས་བྱ་བ་རྣམ་པ་བཅོ་བརྒྱད་ཀྱི་ངོ་བོ་ཉིད་ཀྱིས་ཁམས་རྣམས་ཀྱི་ཁོངས་སུ་གཏོགས་པའི་ཕྱིར་ཏེ་ཁམས་དང་ལྡན་པ་ཞེས་བྱ་བའི་ཐ་ཚིག་གོ། །སྐྱེ་མཆེད་དང་ལྡན་པ་ནི་ཡུལ་དང་དབང་པོ་དང་། ཡིད་དང་། ཆོས་ཞེས་བྱ་
[114b.3]བ་སེམས་དང་སེམས་ལས་བྱུང་བ་སྐྱེ་བའི་སྒོར་གྱུར་པའི་སྐྱེ་མཆེད་དག་གི་ནང་དུ་ཆུད་པའི་ཕྱིར་ཏེ་སྐྱེ་མཆེད་དུ་གཏོགས་པ་ཞེས་བྱ་བའི་ཐ་ཚིག་གོ། །ཟིན་པ་ནི་སེམས་དང་སེམས་ལས་བྱུང་བ་རྣམས་ཀྱི་གནས་ཀྱི་ངོ་བོར་ཉེ་བར་བཟུང་བ་སྟེ་ཕན་པ་དང་གནོད་པ་དག་གིས་ཕན་ཚུན་རྗེས་སུ་བྱེད་པའི་
[114b.4]ཕྱིར་རོ། །ལུང་བསྟན་ཞེས་བྱ་བ་ནི་འབྲས་བུ་ཡིད་དུ་འོང་བའི་ཕྱིར་རམ། དགེ་བ་དང་མི་དགེ་བའི་ངོ་བོར་ལུང་དུ་བསྟན་པའི་ཕྱིར་བསྟན་པ་ཞེས་བྱ་བའི་ཐ་ཚིག་གོ། །འབྱུང་བ་ནི་ས་དང་། ཆུ་དང་། མེ་དང་། རླུང་གི་མཚན་ཉིད་དོ། །དེ་བཞིན་ཞེས་བྱ་བ་ནི་བསྡུ་བའོ། །འབྱུང་བ་ལས་གྱུར་པ་ནི་
[114b.5]འབྱུང་བ་དག་ལ་ཡོད་པའི་ཕྱིར་ཏེ་འབྱུང་བ་ལ་བརྟེན་པ་ཞེས་བྱ་བའི་ཐ་ཚིག་གོ། །དེ་ནི་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱའི་ཕྱོགས་གཅིག་དང་རྣམ་པར་རིག་བྱེད་མ་ཡིན་པའི་མཚན་ཉིད་དོ། །ཀུན་སྦྱོར་ནི་འཆིང་བའི་
[114b.6]བདག་ཉིད་ཡིན་པའི་ཕྱིར་རོ། །བསྒྲིབས་པ་ནི་ཉོན་མོངས་པའི་དྲི་མས་ཁེབས་པའི་ཕྱིར་རོ། །འམ་ཞེས་བྱ་བ་ནི་རྣམ་པར་རྟོག་པ་སྟེ། འོག་མ་དག་ལ་ཡང་དེ་དང་འདྲའོ། །ཉོན་མོངས་ཅན་ནི་མི་དགེ་བའི་ཕྱིར་རོ། །ཟང་ཟིང་དང་བཅས་པ་ནི་འདོད་ཆགས་ལ་སོགས་པའི་ཉོན་མོངས་པ་ཀུན་དུ་
[114b.7]སྤྱོད་ན་དེས་མངོན་པར་འདོད་པའི་དངོས་པོ་ཐོབ་པར་རོ་མྱང་བའི་བྱ་བ་ཡིན་པའི་ཕྱིར་རོ། །འོན་ཏེ་ཞེས་བྱ་བ་ནི་དྲི་བའོ། །ཞེན་པ་རྟེན་པ་ནི་འདོད་པའི་ཡོན་ཏན་དང་ལྡན་པའི་ཕྱིར་རོ། །འཐབ་བཅས་ནི་འདོད་ཆགས་ལ་སོགས་པའི་ཉོན་མོངས་པ་རྣམས་ནི་བདག་དང་གཞན་ལ་གནོད་པར་བྱེད་པའི་བདག་ཉིད་
[115a]
[115a.1]ཀྱི་ཕྱིར་འཐབ་པ་ཞེས་བྱ་སྟེ་དེ་དང་དེར་ལྷན་ཅིག་འབྲེལ་པར་སྤྱོད་པའི་ཕྱིར་རོ། །དམིགས་པ་དང་བཅས་པ་ནི་ཡུལ་འཛིན་པའི་ཕྱིར་རོ། །སེམས་ནི་རྣམ་པར་ཤེས་པའི་ངོ་བོ་སྟེ། དགེ་བ་དང་མི་དགེ་བ་དང་ལུང་དུ་མ་བསྟན་པ་ལ་སོགས་པའི་ཕྱིར་རམ། དགེ་བ་དང་མི་དགེ་བ་དང་ལུང་དུ་
[115a.2]མ་བསྟན་པའི་ཆོས་རྣམས་ཀྱིས་བསྩགས་པའི་ཕྱིར་རོ། །ལས་བྱ་བའི་ངོ་བོ་ཉིད་ཡིན་པའི་ཕྱིར་རོ། །འམ་ཞེས་བྱ་བའི་སྒྲ་ནི་འོན་ཏེ་ཞེས་བྱ་བ་དང་བཅས་ཏེ་དྲི་བའི་དོན་ཡིན་པར་ཤེས་པར་བྱའོ། །རྣམ་སྨིན་བཅས་པ་ནི་འབྲས་བུ་ཡིད་དུ་འོང་བ་དང་ཡིད་དུ་འོང་བ་མ་ཡིན་པའི་ཕྱིར་ཏེ་རྣམ་པར་སྨིན་པ་ཡོད་པས་
[115a.3]སོ། །དེ་ལས་གཞན་པ་ནི་བཤད་པ་ལས་བཟློག་པའོ། །དེ་བས་ན་ཐམས་ཅད་ལ་སོ་སོའི་དྲི་བ་འདི་སྦྱར་བར་བྱ་སྟེ། དེས་ན་དེ་ལས་གཞན་ཞེས་བྱ་བའི་སྒྲས་ལྟུང་བ་ཅི་ཞིག་རྣམ་པར་རིག་བྱེད་མ་ཡིན་པ་ཞིག་གམ། གཟུགས་ཅན་མ་ཡིན་པ་ཞིག་གམ། བསྟན་དུ་མེད་པ་ཞིག་གམ།
[115a.4]ཐོགས་པ་མེད་པ་ཞིག་གམ། ཟག་པ་མེད་པ་ཞིག་གམ། འདུས་མ་བྱས་པ་ཞིག་གམ། འཇིག་རྟེན་ལས་འདས་པ་ཞིག་གམ། ཕུང་པོ་དང་། ཁམས་དང་། སྐྱེ་མཆེད་དང་མི་ལྡན་པ་ཞིག་གམ། མ་ཟིན་པ་ཞིག་གམ། ལུང་དུ་མ་བསྟན་པ་ཞིག་གམ། ཀུན་དུ་སྦྱོར་བ་མ་ཡིན་
[115a.5]པ་ཞིག་གམ། མ་བསྒྲིབས་པ་ཞིག་གམ། ཉོན་མོངས་པ་མ་ཡིན་པ་ཞིག་གམ། ཟང་ཟིང་མེད་པ་ཞིག་གམ། ངེས་པར་འབྱུང་བ་ལ་བརྟེན་པ་ཞིག་གམ། འཐབ་པ་དང་བཅས་པ་མ་ཡིན་པ་ཞིག་གམ། དམིགས་པ་མེད་པ་ཞིག་གམ། སེམས་མ་ཡིན་པ་ཞིག་པ་ཞིག་གམ། ལས་མ་ཡིན་
[115a.6]པ་ཞིག་གམ། རྣམ་པར་སྨིན་པ་མ་ཡིན་པ་ཞིག་ཅེས་བྱ་བ་དེ་རྣམས་གོ་རིམས་བཞིན་དུ་འཕགས་པར་བལྟ་བར་བྱའོ། །འདས་པ་ནི་འདས་པའི་དུས་སུ་བསྡུས་པ་སྟེ། བྱེད་པ་ཞེས་བྱ་བའི་ཐ་ཚིག་གོ། །འམ་ཞེས་བྱ་བ་ནི་དྲི་བའོ། །མ་འོངས་པ་ནི་མ་འོངས་པའི་དུས་སུ་བསྡུས་པ་སྟེ། བྱེད་
[115a.7]པ་མ་ཐོབ་པ་ཞེས་བྱ་བའི་ཐ་ཚིག་གོ། །ད་ལྟར་ནི་ད་ལྟར་གྱི་དུས་སུ་བསྡུས་པ་སྟེ་བྱེད་པ་ཞེས་བྱ་བའི་དོན་ཏོ། །ཡིན་ཞེས་བྱ་བ་ནི་ཡིན་པའོ། །དགེ་བ་ནི་རྣམ་པར་སྨིན་པ་ཡིད་དུ་འོང་བའི་ཕྱིར་རོ། །དེ་ལས་གཞན་ཞེས་བྱ་བ་ནི་རྗེས་བསྙགས་ཏེ་དེས་ན་ཅི་ཞིག་མི་དགེ་བའམ་ཞེས་བྱ་བའི་ཐ་ཚིག་ཏུ་
[115b]
[115b.1]འགྱུར་རོ། །ལུང་དུ་མ་བསྟན་པའི་དྲི་བ་ནི་སྔར་བཤད་ཟིན་ཏོ། །འདོད་པའི་ཁམས་དང་ལྡན་པ་ནི་འདོད་པའི་ཁམས་དང་ལྡན་པ་སྟེ། འདོད་པ་ན་སྤྱོད་པའི་སྲེད་པས་བདག་གིར་བྱས་པ་ཞེས་བྱ་བའི་དོན་ཏོ། །དེ་བཞིན་དུ། གཟུགས་ཁམས་ལྡན་ཞེས་བྱ་བ་ནི་གཟུགས་ཀྱི་ཁམས་དང་ལྡན་པ་སྟེ།
[115b.2]གཟུགས་ན་སྤྱོད་པའི་སྲེད་པས་བདག་གིར་བྱས་སོ་ཞེས་བྱ་བའི་ཐ་ཚིག་གོ། །ཡང་ཞེས་བྱ་བའི་སྒྲས་ནི་གཟུགས་མེད་པའི་ཁམས་དང་ལྡན་པའམ་ཞེས་བྱ་བ་བརྗོད་དེ། དེས་ན་ཅི་ཞིག་གཟུགས་དང་ལྡན་པ་ཞིག་ཡིན་ནམ་ཞེས་བྱ་བ་ཡིན་ནོ། །གཟུགས་མེད་པའི་ཁམས་དང་ལྡན་པ་སྟེ། གཟུགས་
[115b.3]མེད་པ་ན་སྤྱོད་པའི་སྲེད་པས་བདག་གིར་བྱས་བ་ཞེས་བྱ་བའི་ཐ་ཚིག་གོ། །སློབ་པ་ནི་འཕགས་པའི་གང་ཟག་བདུན་གྱི་རྒྱུད་ལ་སྐྱེས་པའི་ཕྱིར་རོ། །འོན་ཏེ་ཞེས་བྱ་བ་ནི་དྲི་བའོ། །མི་སློབ་པ་ནི་དགྲ་བཅོམ་པའི་རྒྱུད་ལ་སྐྱེས་པའི་ཕྱིར་རོ། །དེ་གཉིས་སྤངས་པ་ནི་སློབ་པ་དང་མི་སློབ་པའི་མཚན་ཉིད་རྣམ་
[115b.4]གཉིས་དང་བྲལ་བ་སྟེ། ཅི་ཞིག་སློབ་པ་ཡང་མ་ཡིན་མི་སློབ་པ་ཡང་མ་ཡིན་པ་ཞིག་གམ་སྙམ་དུ་བསམས་པ་བཞིན་ནོ། །བསྒོམ་པས་སྤང་བྱ་ཞེས་བྱ་བ་ནི་བསྒོམ་པས་སྤང་བར་བྱ་ན་ཞེས་བྱ་བའི་དོན་ཏོ། །བསྒོམ་པ་ནི་གོམས་པའོ། །དེས་ན་གང་ཞིག་འཕགས་པའི་ལམ་ཡང་དང་ཡང་དུ་བསྒོམ་
[115b.5]པས་སྤང་བར་བྱ་བ་དེ་ལ་དེ་སྐད་ཅེས་བྱའོ། །འོན་ཏེ་ཞེས་བྱ་བ་ནི་དྲི་བའོ། །མཐོང་བས་ཞེས་བྱ་བ་ནི་སྤང་བར་བྱ་བ་ཞེས་བྱ་བའི་རྗེས་བསྙེག་གོ། །དེས་ན་དྲི་བའི་དོན་ནི་ཅི་ཞིག་མཐོང་བས་སྤང་བར་བྱ་བ་ཞིག་གམ་ཞེས་བྱ་བར་འབྱུང་སྟེ། བདེན་པ་བཞི་མཐོང་བས་སྤང་བར་བྱ་བ་ཞིག་ཅེས་བྱ་བའི་
[115b.6]ཐ་ཚིག་གོ། །ལུས་ཀྱི་ནི་ལུས་ལ་བརྟེན་ནས་བསྐྱེད་པའི་ཕྱིར་རོ། །ངག་གི་ནི་ངག་ལ་བརྟེན་ནས་བསྐྱེད་པའི་ཕྱིར་རོ། །སེམས་ཀྱི་ནི་སེམས་ལ་བརྟེན་ནས་བསྐྱེད་བའི་ཕྱིར་རོ། །འདིར་ཇི་སྐད་བསྟན་པའི་རྣམ་པར་གཞག་པ་ནི་འདི་ཡིན་ཏེ། དེ་ལ་ལྟུང་བ་ནི་ཅི་ཞིག་རྣམ་པར་རིག་བྱེད་དམ།
[115b.7]རྣམ་པར་རིག་བྱེད་མ་ཡིན་པ་ཞིག་ཡིན་སྨྲས་པ། གང་ཡིན་པ་དེ་ལ་བཤད་པ་ནི་འདི་ཡིན་ཏེ། ལྟུང་བ་ནི་རྣམ་པར་རིག་བྱེད་དམ་རྣམ་པར་རིག་བྱེད་མ་ཡིན་པའི་ངོ་བོ་ཡིན་ནོ། །དེ་བཞིན་དུ་འདིར་གཞུང་ནི། ཉེ་བ་འཁོར་ལྟུང་བ་ནི་རྣམ་པར་རིག་བྱེད་ཅེས་ཀྱང་བྱ་ལ། རྣམ་པར་རིག་བྱེད་མ་ཡིན་པ་
[116a]
[116a.1]ཞེས་ཀྱང་བྱའོ་ཞེས་བྱ་བ་ཡིན་ཏེ། དེ་བཞིན་དུ་འོག་མ་དག་ལ་ཡང་ལན་ཅི་རིགས་པར་སྦྱར་རོ། །གཟུགས་ཅན་ནམ། གཟུགས་ཅན་མ་ཡིན་པ་ཞེས་འདྲི་བ་ལ། ལྟུང་བ་ནི་གཟུགས་ཅན་དུ་བརྗོད་པའོ། །བསྟན་དུ་ཡོད་པའམ། བསྟན་དུ་མེད་པ་ཞེས་འདྲི་
[116a.2]བ་ལ། བསྟན་དུ་མེད་པར་བརྗོད་པར་བྱའོ། །ཐོགས་པ་དང་བཅས་པའམ། ཐོགས་པ་མེད་པ་ཞེས་འདྲི་བ་ལ། ཐོགས་པ་མེད་པ་ཞེས་བརྗོད་པར་བྱའོ། །ཟག་པ་དང་བཅས་པའམ། ཟག་པ་མེད་པ་ཞེས་འདྲི་བ་ལ། ཟག་པ་དང་བཅས་པར་བརྗོད་པར་བྱའོ། །འདུས་བྱས་
[116a.3]སམ་འདུས་མ་བྱས་ཞེས་འདྲི་བ་ལ། འདུས་བྱས་སུ་བརྗོད་པར་བྱའོ། །འཇིག་རྟེན་པའམ་འཇིག་རྟེན་ལས་འདས་པ་ཞེས་འདྲི་བ་ལ་འཇིག་རྟེན་པར་བརྗོད་པར་བྱའོ། །ཕུང་པོ་དང་ཁམས་དང་སྐྱེ་མཆེད་དུ་གཏོགས་སམ་མ་གཏོགས་ཞེས་འདྲི་བ་ལ། ཕུང་པོ་དང་ཁམས་དང་སྐྱེ་
[116a.4]མཆེད་དུ་གཏོགས་པར་བརྗོད་པར་བྱའོ། །ཟིན་པའམ་མ་ཟིན་པ་ཞེས་འདྲི་བ་ལམ་ཟིན་པ་ཞེས་བརྗོད་པར་བྱའོ། །ལུང་དུ་བསྟན་པའམ་ལུང་དུ་མ་བསྟན་པ་ཞེས་འདྲི་བ་ལ། ལུང་དུ་བསྟན་པ་ཡང་ཡིན་ལ། ལུང་དུ་མ་བསྟན་པ་ཡང་ཡིན་པར་བརྗོད་པར་བྱའོ། །འབྱུང་བའམ་འབྱུང་བ་ལས་
[116a.5]གྱུར་པ་ཞེས་འདྲི་བ་ལ། འབྱུང་བ་ལས་གྱུར་པར་བརྗོད་པར་བྱའོ། །ཀུན་དུ་སྦྱོར་བའམ་སྦྱོར་བ་མ་ཡིན་པ་ཞེས་འདྲི་བ་ལ། ཀུན་དུ་སྦྱོར་བར་བརྗོད་པར་བྱའོ། །བསྒྲིབས་པའམ་མ་བསྒྲིབས་པ་ཞེས་འདྲི་བ་ལ། བསྒྲིབས་པར་བརྗོད་པར་བྱའོ། །ཉོན་མོངས་པ་ཅན་ནམ། ཉོན་མོངས་
[116a.6]པ་ཅན་མ་ཡིན་པ་ཞེས་འདྲི་བ་ལ་ཉོན་མོངས་པ་ཅན་དུ་བརྗོད་པར་བྱའོ། །ཟང་ཟིང་དང་བཅས་པའམ། ཟང་ཟིང་མེད་པ་ཞེས་འདྲི་བ་ལ་ཟང་ཟིང་དང་བཅས་པར་བརྗོད་པར་བྱའོ། །ཞེན་པ་རྟེན་པའམ་ངེས་པར་འབྱུང་བ་རྟེན་པ་ཞེས་འདྲི་བ་ལ། ཞེན་པ་རྟེན་པ་ཞེས་བརྗོད་པར་བྱའོ། །འཐབ་པ་
[116a.7]དང་བཅས་པའམ། འཐབ་པ་མེད་པ་ཞེས་འདྲི་བ་ལ་འཐབ་པ་དང་བཅས་པར་བརྗོད་པར་བྱའོ། །དམིགས་པ་དང་བཅས་པ་འམ་དམིགས་པ་མེད་པ་ཞེས་འདྲི་བ་ལ། དམིགས་པ་མེད་པར་བརྗོད་པར་བྱའོ། །སེམས་སམ་སེམས་མ་ཡིན་པ་ཞེས་འདྲི་བ་ལ། སེམས་མ་ཡིན་པར་བརྗོད་པར་
[116b]
[116b.1]བྱའོ། །ལས་སམ་ལས་མ་ཡིན་པ་ཞེས་འདྲི་བ་ལ་ལས་སུ་བརྗོད་པར་བྱའོ། །རྣམ་པར་སྨིན་པ་དང་བཅས་པའམ་རྣམ་པར་སྨིན་པ་མེད་ཅེས་འདྲི་བ་ལ། རྣམ་པར་སྨིན་པ་དང་བཅས་པ་ཡང་ཡིན་ལ་རྣམ་པར་སྨིན་པ་མེད་པ་ཡང་ཡིན་པར་བརྗོད་པར་བྱའོ། །འདས་པའམ་མ་འོངས་པའམ་
[116b.2]ད་ལྟར་ཞེས་འདྲི་བ་ལ། འདས་པའང་མ་ཡིན་ལ་མ་འོངས་པའང་མ་ཡིན་ད་ལྟར་ཡང་མ་ཡིན་པར་བརྗོད་པར་བྱའོ། །དགེ་བའམ་མི་དགེ་བའམ་ལུང་དུ་མ་བསྟན་པ་ཞེས་འདྲི་བ་ལ། མི་དགེ་བ་དང་ལུང་དུ་མ་བསྟན་པར་བརྗོད་པར་བྱའོ། །འདོད་པ་དང་གཟུགས་དང་གཟུགས་མེད་
[116b.3]པའི་ཁམས་དང་ལྡན་པ་ཞེས་འདྲི་བ་ལ། འདོད་པའི་ཁམས་སུ་གཏོགས་པར་བརྗོད་པར་བྱའོ། །སློབ་པའམ་མི་སློབ་པའམ་སློབ་པ་ཡང་མ་ཡིན་མི་སློབ་པ་ཡང་མ་ཡིན་ཞེས་འདྲི་བ་ལ། སློབ་པ་ཡང་མ་ཡིན་མི་སློབ་པ་ཡང་མ་ཡིན་པར་བརྗོད་པར་བྱའོ། །མཐོང་བའམ་བསྒོམ་པས་
[116b.4]སྤང་བར་བྱ་ཞེས་འདྲི་བ་ལ། བསྒོམ་པས་སྤང་བར་བརྗོད་པར་བྱའོ། །ལུས་ཀྱིའམ་ངག་གིའམ་སེམས་ཀྱི་ཞེས་འདྲི་བ་ལ། ལུས་ཀྱི་ཡང་ཡིན་ངག་གི་ཡང་ཡིན་སེམས་ཀྱི་ཡང་ཡིན་པར་བརྗོད་པར་བྱའོ། །འདྲི་བའི་ལན་བཅོམ་ལྡན་འདས་ཀྱིས་གསུངས་པ་ཁོ་ནར་བལྟ་བར་བྱ་སྟེ། བདག་གིས་
[116b.5]གཞུང་མངས་པས་འདིར་མ་སྨོས་སོ། །འདྲི་བའི་ལན་འདི་དག་ནི་བདག་གིས་ཅི་རིགས་པར་གཞུང་བླ་མའི་རྒྱ་ཆེར་བཤད་པའི་ནང་དུ་བཀོད་པས་བརྟག་པར་བྱ་སྟེ་གཞུང་མངས་པས་འདིར་མ་སྨོས་སོ། །ཅི་དངོས་དེ་ཉིད་བྱེད་པ་ལ། །ཞེས་བྱ་བ་ལ་སོགས་པ་ལ་དངོས་ནི་དོན་ཏོ། །དེ་ཉིད་ཅེས་བྱ་བ་ནི་སྤྱིར་
[116b.6]སྨོས་པའོ། །བྱེད་པ་ལ་ཞེས་བྱ་བ་ནི་ལྷག་པར་སྤྱོད་པ་ལའོ། །གཉིས་སུ་འགྱུར་བ་ནི་དངོས་པོ་གཉིས་སུ་འགྱུར་བའོ། །སྲིད་ཡོད་དམ་ཞེས་པ་ནི་བཏུབ་བམ་ཞེས་པའོ། །དེ་ཉིད་བསྟན་པ་ལྟུང་དང་ཞེས་བྱ་བ་ལ་སོགས་པ་སྨོས་ཏེ། དང་ཞེས་བྱ་བ་ནི་བསྡུ་བའོ། །མྱུར་དུ་ཞེས་བྱ་བ་ནི་མྱུར་
[116b.7]བར་རོ། །འདི་ལ་དོན་ནི་གཞི་གཅིག་པ་རྟག་པ་དང་མི་རྟག་པ་ལྟ་བུར་འགལ་བའི་ཆོས་ཉིད་གཉིས་སུ་འགྱུར་བ་མི་སྲིད་པར་ནི་ཤེས་པ་ཉིད་ན། ཅི་གཞི་གཅིག་ལ་ལྟུང་བ་དང་ལྟུང་བ་མེད་པ་དག་འབྱུང་བ་གང་ཡིན་པ་དེ་སྲིད་པ་ཡོད་དམ་ཞེས་བྱ་བ་དེ་ཁོ་བོ་ལ་མྱུར་དུ་སྨྲོས་ཤིག་ཅེས་བྱ་བ་འདི་ཡིན་
[117a]
[117a.1]ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། སྲ་བརྐྱང་བཏིང་བ་དང་མ་བཏིང་བ་དང་གནས་སུ་འབྲལ་བ་ལ་སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དངོས་པོ་དེ་ཉིད་སྤྱོད་པ་ལ་ལྟུང་བར་འགྱུར་ཞིང་དངོས་
[117a.2]པོ་དེ་ཉིད་སྤྱོད་པ་ལ་ལྟུང་བ་མ་མཆིས་པར་འགྱུར་བ་ལྟ་མཆིས་ལགས་སམ། བཀའ་སྩལ་པ། དངོས་པོ་དེ་ཉིད་སྤྱོད་པ་ལ་ལྟུང་བར་འགྱུར་ཞིང་དངོས་པོ་དེ་ཉིད་སྤྱོད་པ་ལ་ལྟུང་པ་མེད་པར་འགྱུར་བ་ཡོད་དོ། །བཙུན་པ་དངོས་པོ་དེ་ཉིད་སྤྱོད་པ་ལ་ལྟུང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་
[117a.3]སློང་གིས་སྲ་བརྐྱང་མ་བཏིང་བའི་གནས་སུ་གོས་རུང་བ་མ་ཡིན་པ་ཅི་ཙམ་འདོད་པ་བཅངས་པའམ། སྣམ་སྦྱར་མེད་པར་གྲོང་དུ་འཇུག་གམ། མགྲོན་དུ་མ་བོས་པར་གྲོང་དུ་འཇུག་གམ། འདུས་ཤིང་ཟའམ། ཡང་ཡང་ཟ་ན་ལྟུང་བར་འགྱུར་རོ། །ལྟུང་བ་མ་མཆིས་པར་འགྱུར་བ་ཇི་ལྟ་བུ་ལགས།
[117a.4]འདི་ལྟར་དགེ་སློང་གིས་སྲ་བརྐྱང་བཏིང་བའི་གནས་སུ་གོས་རུང་བ་མ་ཡིན་པ་ཅི་ཙམ་འདོད་པ་བཅངས་པའམ། སྣམ་སྦྱར་མེད་པར་གྲོང་དུ་འཇུག་གམ། མགྲོན་དུ་མ་བོས་པར་གྲོང་དུ་འཇུག་གམ། འདུས་ཤིང་ཟའམ། ཡང་ཡང་ཟན་ལྟུང་བ་མེད་པར་འགྱུར་ཏེ། དེ་ལྟར་ན་དངོས་པོ་དེ་
[117a.5]ཉིད་སྤྱོད་པ་ལ་ལྟུང་བར་འགྱུར་ཞིང་། དངོས་པོ་དེ་ཉིད་སྤྱོད་པ་ལ་ལྟུང་བ་མེད་པར་འགྱུར་རོ་ཞེས་བྱ་བ་ཡིན་ནོ། །ཅི་གཞི་གང་གིས་ལྷག་མ་མེད་པར་ཞེས་བྱ་བ་ལ་སོགས་པ་ལ། གང་གིས་ཞེས་བྱ་བ་ནི་སྤྱིར་སྨོས་པའོ། །ལྷག་མ་མེད་པ་ནི་འདི་ལ་དགེ་སློང་གི་དངོས་པོ་ལས་ལྷག་མ་མ་
[117a.6]ལུས་པའི་ཕྱིར་རོ། །དེ་ཉིད་ཀྱིས་ཞེས་བྱ་བ་གཞི་རྣམ་པར་སྤྱོད་པའི་ཕྱིར་ངེས་པར་གཟུང་བ་ཡིན་ནོ། །ལྷག་མ་དང་བཅས་པ་ནི་དགེ་འདུན་ལྷག་མ་ལ་སོགས་པ་སྟེ་དེ་དག་ལྷག་པར་སྤྱད་ན་དགེ་སློང་གི་དངོས་པོ་མེད་པར་མི་འགྱུར་བའི་ཕྱིར་ཏེ། ཕས་ཕམ་པར་འགྱུར་བའི་ཆོས་བཞི་པོ་དག་ནི་
[117a.7]ལྷག་མ་མེད་པ་ཡིན་གྱི། འདི་ནི་ལྷག་མ་དང་བཅས་པའོ་ཞེས་གསུངས་པའི་ཕྱིར་རོ། །འདི་ལ་དོན་ཅིག་ཞི་གཅིག་ལྷག་པར་སྤྱོད་པ་ལ་ཕས་ཕམ་པར་འགྱུར་བ་དང་དགེ་འདུན་ལྷག་མར་འགྱུར་བ་གཉིས་ཀ་སྲིད་དམ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཐུན་མོང་མ་ཡིན་
[117b]
[117b.1]པའི་ཕས་ཕམ་པར་འགྱུར་བ་ལྷག་པར་སྤྱོད་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་ལྷག་མ་མ་མཆིས་པའི་ལྟུང་བར་འགྱུར་བའི་གཞི་དེས་ལྷག་མར་བཅས་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་
[117b.2]བཀའ་སྩལ་པ། ཡོད་དེ། འདི་ལྟར་དགེ་སློང་མས་ཐུན་མོང་མ་ཡིན་པའི་ཕས་ཕམ་པར་འགྱུར་བ་གཞི་ལྷག་པར་སྤྱད་ན་ལྷག་མ་མེད་པར་འགྱུར་རོ། །དགེ་སློང་གིས་སྤྱད་ན་དགེ་འདུན་ལྷག་མའོ་ཞེས་བྱ་བ་ཡིན་ནོ། །ཅི་གཞི་གང་གིས་ཕས་ཕམ་པའི་ཞེས་བྱ་བ་ལ་སོགས་པའི་ནི་གཞི་གང་གིས་
[117b.3]ཞེས་བྱ་བར་སྦྱར་ཏེ། གཞི་གང་ཞིག་ལྷག་པར་སྤྱོད་པའི་གཞི་དེ་ཉིད་ཀྱིས་སོ། །གཞི་དེས་དགེ་འདུན་ལྷག་མར་འགྱུར་རམ་ཞེས་བྱ་བར་སྦྱར་རོ། །བསྒྲེ་བ་བསྟན་པའི་ཕྱིར་དེ་བཞིན་ཞེས་བྱ་བ་སྨོས་ཏེ། དེ་བཞིན་ཞེས་བྱ་བ་དེ་དང་འདྲ་བར་རོ། །ཇི་ལྟར་འགྱུར་ཞེས་བྱ་བར་སྦྱར་ཏེ། ཇི་ལྟར་
[117b.4]ལྟུང་བྱེད་ཀྱི་ལྟུང་བར་འགྱུར་རོ་ཞེས་བྱ་བའི་ཐ་ཚིག་གོ། །དེས་ན་ཅི་གཞི་གང་གིས་ཕས་ཕམ་པར་འགྱུར་བའི་ལྟུང་བར་འགྱུར་བའི་གཞི་དེས་ལྟུང་བྱེད་ཀྱི་ལྟུང་བར་འགྱུར་རམ་ཞེས་བྱ་བའི་དོན་ཡིན་ནོ། །འདི་ལ་གཏན་ལ་དབབ་པའི་སྦྱར་བ་ནི་འདི་ཡིན་ཏེ། ཐུན་མོང་མ་ཡིན་པའི་ཕམ་པར་འགྱུར་
[117b.5]བ་ལྷག་པར་སྤྱོད་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་ཕས་ཕམ་པར་འགྱུར་བའི་ལྟུང་བར་འགྱུར་བའི་གཞི་དེས་དགེ་འདུན་ལྷག་མར་འགྱུར་བ་ལྟ་མཆིས་ལགས་སམ། བཀའ་སྩལ་པ། ཡོད་དེ། དགེ་སློང་མས་ལུས་རེག་
[117b.6]པ་སྤྱད་ན་ཕས་ཕམ་པར་འགྱུར་ལ། དགེ་སློང་གིས་སྤྱད་ན་དགེ་འདུན་ལྷག་མར་འགྱུར་རོ། །གཞི་གང་གིས་ཕས་ཕམ་པའི་ལྟུང་བར་འགྱུར་བའི་གཞི་དེས་ལྟུང་བྱེད་དུ་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དགེ་སློང་མས་ཤེས་བཞིན་དུ་དགེ་སློང་མའི་གནས་ངན་ལེན་གྱི་ལྟུང་
[117b.7]བ་འཆབ་པར་བྱེད་ན་སྐྱ་རེངས་ཤར་ནས་ཕས་ཕམ་པར་འགྱུར་ལ། དགེ་སློང་གིས་བཅབས་ན་ལྟུང་བྱེད་དུ་འགྱུར་རོ་ཞེས་བྱ་བ་ཡིན་ནོ། །གང་གིས་དགེ་འདུན་ལྷག་མར་འགྱུར་བའི་ཞེས་བྱ་བ་ལ་སོགས་པ་ནི་འདི་ཡང་ཉེས་བྱས་ལ་བསྒྲེ་བར་བསྟན་པའི་ཕྱིར་དེ་བཞིན་དུ་བྱ་བ་ལ་སོགས་པ་སྨོས་ཏེ། ཡང་
[118a]
[118a.1]ཞེས་བྱ་བ་ནི་དྲི་བའོ། །དེས་ན་དོན་ནི་སྤྱིའི་ངོ་བོའི་གཞི་གང་ཞིག་ལྷག་པར་སྤྱད་པས་དགེ་འདུན་ལྷག་མའི་ལྟུང་བར་འགྱུར་བའི་གཞི་དེ་ཉིད་ཀྱིས་ལྟུང་བྱེད་ཀྱི་ལྟུང་བར་འགྱུར་རམ། དེ་བཞིན་དུ་གཞི་གང་གིས་དགེ་འདུན་ལྷག་མའི་ལྟུང་བར་འགྱུར་བའི་གཞི་དེ་ཉིད་ཀྱིས་ཅི་
[118a.2]ཉེས་བྱས་ཀྱི་ལྟུང་བར་འགྱུར་རམ་ཞེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། ཐུན་མོང་མ་ཡིན་པའི་ཁུ་ཆུ་འབྱིན་པ་ལྷག་པར་སྤྱོད་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་དགེ་འདུན་ལྷག་མར་འགྱུར་བའི་གཞི་དེས་ལྟུང་
[118a.3]བྱེད་དུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་གིས་ཆེད་དུ་བསམས་ཏེ་ཁུ་ཆུ་འབྱིན་པར་བྱེད་ན་དགེ་འདུན་ལྷག་མར་འགྱུར་ལ། དགེ་སློང་མས་ཕྱུང་ན་ལྟུང་བྱེད་དོ། །དགེ་སློང་མ་ཞིག་སྡེ་ཞིང་གནས་ན་དགེ་འདུན་ལྷག་མར་འགྱུར་
[118a.4]ལ། དགེ་སློང་གནས་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །ཅི་གཞི་གང་གིས་ལྟུང་བྱེད་ཀྱི་ཞེས་བྱ་བ་ལ་སོགས་པ་ལ། ཇི་ལྟར་འདོད་བཞིན་ཞེས་བྱ་བ་ནི་ཇི་ལྟར་དགའ་བ་བཞིན་དུ་སྟེ། ཇི་ལྟར་བསམས་པ་བཞིན་དུ་ཞེས་བྱ་བའི་ཐ་ཚིག་གོ། །འདི་ལ་དོན་ནི་གཞི་གང་གིས་གང་ཞིག་
[118a.5]ལྷག་པར་སྤྱད་པས་ལྟུང་བྱེད་ཀྱི་ལྟུང་བར་འགྱུར་བའི་གཞི་དེ་ཉིད་ཀྱིས་ཅི་སོ་སོར་བཤགས་པར་བྱ་བའི་ལྟུང་བར་འགྱུར་རམ་ཞེས་བྱ་བ་དེ་ཇི་ལྟར་བསམས་པ་བཞིན་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཐུན་མོང་མ་ཡིན་པའི་ལྟུང་བ་ལྷག་པར་སྤྱོད་པ་ལ་དགོངས་ནས་དེ་སྐད་དུ་གསུངས་
[118a.6]པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་ལྟུང་བྱེད་ཀྱི་ལྟུང་བར་འགྱུར་བའི་གཞི་དེས་སོ་སོར་བཤགས་པར་བགྱི་བའི་ལྟུང་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་གིས་ཉེ་དུ་མ་ཡིན་པ་དག་ལས་ཁ་ཟས་
[118a.7]བསོད་པ་བླངས་ན་ལྟུང་བྱེད་དུ་འགྱུར་ལ། དགེ་སློང་མས་བླངས་ན་སོ་སོར་བཤགས་པར་བྱ་བར་འགྱུར་རོ་ཞེས་བྱ་བ་ཡིན་ནོ། །ཅི་གཞི་གང་གིས་ལྟུང་བྱེད་ཀྱི་ཞེས་བྱ་བ་ལ་སོགས་པ་ལ། ཁྱོད་ཅེས་བྱ་བ་ནི་ཁྱོད་ལའོ། །ནུས་པ་ནི་མཐུའོ། །དེས་ན་ཚིག་གི་དོན་ནི། དགེ་སློང་གིས་གང་
[118b]
[118b.1]ཞིག་ལྷག་པར་སྤྱད་པས་ལྟུང་བྱེད་ཀྱི་ལྟུང་བར་གསུངས་པ་དེས་ཅི་ཉེས་བྱས་ཀྱི་ལྟུང་བ་རྣམ་པར་གཞག་པ་སྲིད་དམ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཐུན་མོང་མ་ཡིན་པའི་ལྟུང་བྱེད་ལྷག་པར་སྤྱོད་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི།
[118b.2]བཙུན་པ་གཞི་གང་གིས་ལྟུང་བྱེད་ཀྱི་ལྟུང་བར་འགྱུར་བའི་གཞི་དེས་ཉེས་བྱས་སུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་མས་རྩྭ་སྔོན་པོ་ཡོད་པའི་ཕྱོགས་སུ་བཤང་བ་དང་གཅི་བ་དག་བྱས་ན་ལྟུང་བྱེད་དུ་འགྱུར་ལ། དགེ་སློང་གིས་བྱས་
[118b.3]ན་ཉེས་བྱས་སོ་ཞེས་བྱ་བ་ཡིན་ནོ། །གང་གིས་སོ་སོར་བཤགས་པ་ལ་སོགས་པ་ལ་སྲིད་དམ་ཞེས་བྱ་བ་ནི་བཏུབ་བམ་ཞེས་བྱ་བའོ། །བདག་གི་མདུན་དུ་ཞེས་བྱ་བ་ནི་བདག་གི་ཐད་དུའོ། །དེས་ན་དོན་ནི་རྣམ་པ་གང་གིས་སོ་སོར་བཤགས་པར་བྱ་བའི་ལྟུང་བར་རྣམ་པར་གཞག་པ་དེ་ཉིད་ཀྱིས་ཅི་ཉེས་
[118b.4]བྱས་ཀྱི་ལྟུང་བར་འགྱུར་བ་སྲིད་དམ་ཞེས་བྱ་བ་དེ་དགེ་སློང་གལ་ཏེ་ཁྱོད་ལ་མཐུ་ཡོད་ན་ཁོ་བོའི་མངོན་དུ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་ཐུན་མོང་མ་ཡིན་པའི་སོ་སོར་བཤགས་པར་བྱ་བའི་ལྟུང་བའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་
[118b.5]པ་གཞི་གང་གིས་སོ་སོར་བཤགས་པར་འགྱུར་བའི་ལྟུང་བར་འགྱུར་བའི་གཞི་དེས་ཉེས་བྱས་སུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་གིས་ནགས་ཚལ་གྱི་བསེལ་བ་མ་བསྐོས་པར་ཀུན་དགའ་ར་བའི་ཕྱི་རོལ་དུ་བཅའ་བར་བྱ་བ་དང་བཟའ་
[118b.6]པར་བྱ་བ་ལེན་ན་སོ་སོར་བཤགས་པར་བྱ་བར་འགྱུར་ལ། དགེ་སློང་མས་བླངས་ན་ཉེས་བྱས་སུ་འགྱུར་རོ་ཞེས་བྱ་བ་ཡིན་ནོ། །ཇི་ལྟར་དགེ་སློང་ལུང་མ་བསྟན་པའི་ཞེས་བྱ་བ་ལ་སོགས་པའི་སེམས་གནས་ཞེས་བྱ་བའི་སྒྲ་ནི་གཉིས་ཀ་ལ་ཡང་སྦྱར་ཏེ། དགེ་བའི་སེམས་ལ་གནས་པ་དང་།
[118b.7]ལུང་དུ་མ་བསྟན་པའི་སེམས་ལ་གནས་པའི་ཞེས་བྱ་བའི་དོན་ཏོ། །ཕ་མ་ནི་ཕ་དང་མ་དག་གོ། །མནར་མེད་པ་བྱ་བ་ནི་མཚམས་མེད་པར་བྱེད་པར་རོ། །མི་དགེ་བའི་སེམས་ལ་གནས་པ་ལ་མཚམས་མེད་པར་མ་གསུངས་ཞེས་བྱ་བར་སྦྱར་ཏེ། མི་དགེ་བས་སྨོས་པས་ནི་ལུང་དུ་མ་བསྟན་པའི་
[119a]
[119a.1]སེམས་ལ་གནས་པ་བསྡུའོ། །འདི་ལ་དོན་གང་གི་ཚེ་དགེ་སློང་གིས་དགེ་བ་སྟེ། འབྲས་བུ་ཡིད་དུ་འོང་བ་དང་ཡིད་དུ་མི་འོང་བ་དང་བྲལ་བའི་སེམས་ཀྱིས་ཕ་དང་མ་སྲོག་དང་བྲལ་ན་དེའི་ཚེ་མཚམས་མེད་པ་ཡིན་པར་གསུངས་ཀྱི་མི་དགེ་བ་སྟེ། འབྲས་བུ་ཡིད་
[119a.2]དུ་མི་འོང་བ་དང་ལུང་དུ་མ་བསྟན་པའི་སེམས་ཀྱིས་ནི་མ་ཡིན་ནོ་ཞེས་བྱ་བ་འདི་ལ་རྒྱུ་ཅི་ཡོད་ཅེས་པ་འདི་ཡིན་ནོ། །འདི་ལ་བསམ་པ་ནི་དེ་ནི་ཕ་དང་མ་ནད་ཚོར་བ་དྲག་པོ་ཉམས་སུ་མྱོང་བ་དག་བསོད་ནམས་ཀྱི་བློས་གསད་པ་ལ་དགོངས་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི།
[119a.3]བཙུན་པ་ཅི་ལགས། དགེ་སློང་གིས་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་ལ། མི་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་མི་འགྱུར་ཞིང་མཚམས་མ་མཆིས་
[119a.4]པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་མི་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་ཡོད་དེ། དགེ་སློང་གིས་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་
[119a.5]པར་འགྱུར་ལ། མི་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་མི་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་བ་ཡོད་དེ། དེ་བཞིན་དུ་མི་དགེ་བ་དང་ལུང་དུ་མ་བསྟན་པའི་སེམས་ཀྱིས་ཀྱང་རྒྱས་པར་བརྗོད་པར་བྱའོ། །བཙུན་པ་ཇི་ལྟར་དགེ་སློང་གིས་དགེ་
[119a.6]བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་འགྱུར་ལ་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་ཡང་འགྱུར་ལ། མི་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་མི་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་མི་
[119a.7]འགྱུར་ལགས། ཉེ་བ་འཁོར་འདི་ལྟར་དགེ་སློང་གིས་མ་ནད་པ་ཞིག་སྟེ་ཡུན་རིང་པོར་སྡུག་བསྔལ་བའི་ཚོར་བ་མི་ཟད་པ་རྩུབ་པ་དྲག་པ་ཡིད་དུ་མི་འོང་བ་མྱོང་པ། དེས་དེ་རྐྱེན་དེས་སྲོག་དང་ཕྲལ་ན་ཕས་ཕམ་པར་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་ཡང་འགྱུར་རོ། །
[119b]
[119b.1]དེ་བཞིན་དུ་མདོ་བྱེད་པས་ཀྱང་ཕན་པར་འདོད་པ་ཉིད་ཀྱིས་འཆི་བའི་ཕྱིར་སྨན་མ་ཡིན་པ་བྱིན་པ་ལ་ནི་ན་སྨད་པ་མེད་དོ་ཞེས་བཤད་དོ། །འདི་ལྟར་དགེ་སློང་གིས་མ་ནད་པ་ལ་འབྲས་ཆན་མངར་ཐུག་གམ་འུ་ཤའམ་ཤ་བྱིན་པ་ལ་དེ་ཡང་རྐྱེན་དེས་དུས་ལས་འདས་ན་དེ་ལ་ཕས་ཕམ་པའི་ལྟུང་བར་ཡང་མི་འགྱུར་ལ་
[119b.2]མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་ཡང་མི་འགྱུར་རོ། །དེ་བཞིན་དུ་མདོ་བྱེད་པས་ཀྱང་། མིད་པར་བྱ་བ་མི་འཕྲོད་པས་སྦྱིན་ནའོ་ཞེས་བཤད་དོ། །བཙུན་པ་ཇི་ལྟར་དགེ་སློང་གིས་མི་དགེ་བའི་སེམས་ཀྱིས་མ་སྲོག་དང་ཕྲལ་ན་ཕས་ཕམ་པར་འགྱུར་ཞིང་མཚམས་མ་མཆིས་
[119b.3]པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་ལ། མི་དགེ་བའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་མི་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་མི་འགྱུར་ལགས། ཉེ་བ་འཁོར་ཡོད་དེ། འདི་ལྟར་དགེ་སློང་གིས་ནོར་རམ་དབང་གིས་བསླུ་བའི་
[119b.4]ཕྱིར་མ་སྲོག་དང་ཕྲལ་བ་ནི་ཕས་ཕམ་པར་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་རོ། །འདི་ལྟར་དགེ་སློང་གིས་མི་དགེ་བའི་སེམས་ཀྱིས་གནག་གམ་ལུག་གམ་ར་ལ་བསྣུན་པར་བྱས་ལ། ལས་དེ་ཡང་མ་ལ་བསྣུན་པ། དེ་ཡང་རྐྱེན་དེས་དུས་ལས་འདས་ལ་ཕས་
[119b.5]ཕམ་པས་ལྟུང་བར་ཡང་མི་འགྱུར་བ་ལ་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་ཡང་མི་འགྱུར་རོ། །བཙུན་པ་ཇི་ལྟར་དགེ་སློང་གིས་ལུང་དུ་མ་བསྟན་པའི་སེམས་ཀྱིས་མ་སྲོག་དང་ཕྲལ་ན་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་
[119b.6]པར་འགྱུར་ལ། ལུང་དུ་མ་བསྟན་པའི་སེམས་ཀྱིས་མ་སྲོག་དང་ཕྲལ་ན་ཡང་ཕས་ཕམ་པར་མི་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་མི་འགྱུར་ལ། འདི་ལྟར་དགེ་སློང་གིས་མ་གསད་པའི་སྦྱོར་བ་བྱེད་ཅིང་དེས་མ་གསད་པའི་སྦྱོར་བ་བྱས་ནས་ཉལ་ལ་དེ་
[119b.7]གཉིད་ལོག་པ་དང་མ་སྲོག་དང་ཕྲལ་ན་ཕས་ཕམ་པར་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་རོ། །དེ་ལ་དགེ་སློང་གིས་ལུང་དུ་མ་བསྟན་པའི་སེམས་ཀྱིས་སའམ་ཤིང་ངམ་ལོ་མའི་སྤྱིལ་བུ་ལ་བསྣུན་པར་བྱས་པ་ལས། དེ་ཡང་མ་ལ་བསྣུན་ལ་དེ་ཡང་རྐྱེན་
[120a]
[120a.1]དེས་དུས་ལས་འདས་ན་དེ་ལ་ཕས་ཕམ་པའི་ལྟུང་བར་ཡང་མི་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་ཡང་མི་འགྱུར་ཏེ། ཕ་དང་དགྲ་བཅོམ་པ་སྲོག་དང་འབྲལ་བར་བྱད་ན་ཡང་དེ་བཞིན་དུ་བརྗོད་པར་བྱའོ་ཞེས་བྱ་བ་ཡིན་ནོ། །དགེ་སློང་རུང་བ་
[120a.2]གནས་གཅིག་དང་ཞེས་བྱ་བ་ལ་སོགས་པ་ལ་རུང་བ་ནི་ཚུལ་ཁྲིམས་དང་ལྟ་བ་དང་ལྡན་པ་སྟེ་ཚོགས་ཀྱི་ཁ་བསྐང་བར་འོས་པ་ཞེས་བྱ་བའི་ཐ་ཚིག་གོ། །དེ་ནི་གནས་ཀྱང་ཡིན་ལ་གཅིག་ཀྱང་ཡིན་པས་གནས་གཅིག་གོ། །དེ་ནི་མཚམས་ཀྱང་ཡིན་ལ་གཅིག་ཀྱང་ཡིན་པས་མཚམས་གཅིག་གོ། །
[120a.3]གནས་གཅིག་མཚམས་གཅིག་ནི་གནས་གཅིག་དང་མཚམས་གཅིག་གོ། །གནས་གཅིག་དང་མཚམས་གཅིག་ན་གནས་པས་ན་གནས་གཅིག་དང་མཚམས་གཅིག་ན་གནས་པ་སྟེ་དེ་ཡོད་པ་བཞིན་དུའོ། །གནས་གཅིག་སྨོས་པས་ནི་གནས་མང་པོ་བཀག་གོ། །གནས་གཅིག་པ་ཉིད་
[120a.4]ཡིན་ཡང་རེས་འགའ་བར་དུ་ཆུ་ལ་སོགས་པས་རྣམ་པར་ཆོད་པས་མཚམས་ཐ་དད་པ་ཉིད་དུ་ཡང་འགྱུར་བས་དེའི་ཕྱིར་མཚམས་གཅིག་ཅེས་སྨོས་སོ། །དེས་ན་མཚམས་ཐ་དད་པ་མ་ཡིན་པའི་གནས་གཅིག་ན་གནས་པའི་གནས་པ་ཞེས་བྱ་བའི་དོན་ཏོ། །དེའི་ཚིག་ཅེས་བྱ་བ་ནི་བཤད་མ་ཐག་པའི་
[120a.5]དགེ་སློང་གི་ཚིག་གི་ངག་སྟེ། འདུན་པ་བྱིན་པ་ཞེས་བྱ་བའི་ཐ་ཚིག་སྟེ་དེ་མེད་པར་རོ། །ཉེས་བྱེད་མིན་ཞེས་བྱ་བ་ནི་ལྟུང་བ་མེད་པར་ཏེ་ཚུལ་ཁྲིམས་དང་ལྟ་བ་དང་ལྡན་པ་འོས་པ་མཚམས་ཀྱི་ནང་ན་གནས་པའི་འདུན་པ་མ་བྱིན་པ་ལ་སོགས་པའི་ལས་དེས་བསྙེན་པར་རྫོགས་པ་ལ་སོགས་པ་ནི་ལྟུང་
[120a.6]བ་མེད་པ་ཞེས་བྱ་བའི་ཐ་ཚིག་གོ། །འདི་ལ་གཞན་གྱི་བསམ་པ་ནི་གང་གི་ཚེ་མཚམས་དེ་ན་འདུག་པ་ཚོགས་ཀྱི་ཁ་བསྐང་བར་འོས་པ་ལུས་སམ་འདུན་པའི་སྒོ་ནས་ཚོགས་པར་མ་ཞུགས་པ་དེ་ལས་གཞན་པའི་དགེ་སློང་དགེ་འདུན་དུ་གྱུར་པས་གསོལ་བ་ལ་སོགས་པའི་ལས་བྱས་ན་དེའི་ཚེ་མི་མཐུན་པ་
[120a.7]ཉིད་ཀྱིས་ལས་སུ་མི་འགྱུར་རོ་ཞེས་བྱ་བ་དེ་ནི་ལེགས་པར་གྲགས་ན། འོན་ཀྱང་གང་གི་ཚེ་དགེ་སློང་དེ་ལྟ་བུ་ཡོད་བཞིན་དུ་དགེ་འདུན་གྱི་ལས་བྱས་ན་དེའི་ཚེ་ལྟུང་བ་མེད་དོ་ཞེས་གསུངས་སོ་ཞེས་བྱ་བ་དེ་གོ་ཇི་ལྟ་བུ་ཞིག་ཅེས་བྱ་བ་ཡིན་ནོ། །འདི་ལ་བཤད་པ་ནི་འདི་ཡིན་ཏེ། དེ་ནི་དེ་བཞིན་གཤེགས་
[120b]
[120b.1]པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་འདུན་གྱིས་དགེ་སློང་དང་པོ་ནས་མ་བསྙིལ་བར་མཚམས་ཀྱི་ནང་ན་མཚུངས་པར་གནས་པར་གྱུར་པ་དེའི་ཚེ་ཚིག་མཆིས་པར་ལས་ཐམས་ཅད་
[120b.2]བགྱིས་ན་བགྱིས་པ་ཞེས་ཀྱང་བགྱི་ཞིང་ལྟུང་བ་ཡང་མ་མཆིས་པར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིན་ནའོ། །ངས་འདི་སྐད་དུ་མཽད་གལ་གྱི་བུ་དེ་ལྟ་བས་ན་ཟླ་བ་ཕྱེད་ཕྱེད་ཅིང་སོ་སོར་
[120b.3]ཐར་པའི་མདོ་ཐོན་ཅིག་ཅེས་བཀའ་སྩལ་ཏོ། །སོ་སོར་ཐར་པ་སྟོན་པར་མཛད་པ་དེ་བཞིན་གཤེགས་པ་བྱོན་ཏོ་ཞེས་ནི་བཀའ་མ་སྩལ་ཏོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། རྒྱལ་བ་ནི་མི་མཐུན་པ་བྱེད་པ་ཉིད་མ་ཡིན་ནོ། །ཁ་སྐོང་བར་བྱེད་པ་ཉིད་ཀྱང་མ་ཡིན་ནོ་ཞེས་
[120b.4]བཤད་དོ། །ཁྱིམ་པ་གནས་བཞིན་དགེ་འདུན་གྱིས། །ཞེས་བྱ་བ་ལ་སོགས་པ་ལ། ཁྱིམ་པ་ནི་ཁྱིམ་ཅན་ཏེ་འདི་ལ་ཁྱིམ་ཞེས་བྱ་བ་ཁང་ཁྱིམ་ཡོད་པས་སོ། །གནས་བཞིན་ཞེས་བྱ་བ་ནི་འཁོར་བཞིན་དུ་སྟེ་འདུག་བཞིན་དུ་ཞེས་བྱ་བའི་ཐ་ཚིག་གོ། །དགེ་འདུན་གྱིས་ཞེས་བྱ་བ་ནི་བཞིའི་
[120b.5]ཚོགས་ལ་སོགས་པའི་དགེ་འདུན་གྱིས་སོ། །ལས་ཤིག་བྱས་ན་ཞེས་བྱ་བ་ནི་ལས་བརྒྱ་རྩ་གཅིག་ཉམས་སུ་མྱོང་བར་བྱས་ན་སྟེ། ལས་ཀྱང་བྱས་པར་འགྱུར་ཞེས་བྱ་བ་དང་འདིར་སྦྱར་རོ། །དེ་ཡིས་ཞེས་བྱ་བ་ནི་ཁྱིམ་པ་འདུག་པར་གྱུར་པའི་ལས་ཀྱིས་སོ། །ལས་བྱས་པ་ནི་ཆོས་དང་མཐུན་པར་
[120b.6]ལས་བྱས་པའི་ཕྱིར་ཏེ། དགེ་འདུན་གྱི་ལས་ཀྱང་བྱས་པར་འགྱུར་ཞིང་ཞེས་བྱ་བར་སྦྱར་རོ། །ཡང་ཞེས་བྱ་བ་ནི་བསྡུ་བའོ། །འདི་ལ་གཞན་གྱི་བསམ་པ་ནི་བཅོམ་ལྡན་འདས་ཀྱིས་ཐམས་ཅད་ཚུལ་ཁྲིམས་ཡོངས་སུ་དག་པ་དང་། ལྟ་བ་མཚུངས་པ་དག་དང་ལྷན་ཅིག་གསོལ་བ་དང་། གསོལ་
[120b.7]བ་དང་གཉིས་དང་གསོལ་བ་དང་བཞིའི་ལས་བྱ་བར་གསུངས་ཀྱི་ཁྱིམ་པ་འདུག་པ་ལ་ནི་མ་ཡིན་ནོ་ཞེས་བྱ་བ་ལ་སོགས་པ་གསུངས་ན། འོན་ཀྱང་བཅོམ་ལྡན་འདས་ཀྱིས་ཁྱིམ་པ་འདུག་བཞིན་དུ་དགེ་སློང་དག་གི་ལས་བྱས་པ་ཞེས་ཀྱང་བྱ་ལ་ལྟུང་བ་ཡང་མེད་དོ་ཞེས་གསུངས་པ་དེ་ཇི་ལྟ་བུ་ཡིན་པ་
[121a]
[121a.1]ཁོ་བོ་ལ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་རྒྱལ་པོ་དད་པ་བསྐྱེད་པའི་ཕྱིར་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་བཅོམ་ལྡན་འདས་ཀྱིས་ཁྱིམ་པ་འདུག་པར་དགེ་འདུན་གྱིས་གསོ་སྦྱོང་མི་བྱའོ་ཞེས་
[121a.2]གསུངས་པ་གང་ལགས། ཁྱིམ་པ་མཆིས་བཞིན་དུ་དགེ་འདུན་གྱིས་གསོ་སྦྱོང་བགྱི་ཞིང་སོ་སོར་ཐར་པའི་མདོ་གདོན་པ་བཏོན་ན་བཏོན་པ་ཞེས་ཀྱང་བགྱི་ལ། ལྟུང་བ་ཡང་མ་མཆིས་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། ངས་འདི་སྐད་
[121a.3]དུ་དགེ་སློང་དག་ཁྱེད་ཀྱིས་རྒྱལ་པོའི་ཁྲོམ་རྣམས་སོགས་ལ་རྒྱལ་པོ་གསལ་རྒྱལ་གྱི་མདུན་དུ་སོ་སོར་ཐར་པ་ཐོན་ཅིག་དང་དེ་དད་པར་འགྱུར་རོ་ཞེས་བཀའ་སྩལ་ཏོ་ཞེས་བྱ་བ་ཡིན་ནོ། །དེ་བཞིན་དུ་འདིར་གཞུང་གཞན་ནི། །ཀུན་དགའ་བོ་ཁྱོད་ཀྱིས་ཉེས་ཏེ་གལ་ཏེ་རྒྱལ་པོ་གཟུགས་ཅན་སྙིང་པོས་སོ་སོར་
[121a.4]ཐར་པ་ཐོས་པར་གྱུར་ན་ལྷག་པར་དད་པར་འགྱུར་ཞིང་དད་ནས་ཀྱང་དད་པའི་ལྷག་པའི་བྱ་བ་བྱེད་པར་འགྱུར་བ་གང་ཡིན་པ་དེ་དག་གནས་ཡོད་དོ། །ཀུན་དགའ་བོ་དེ་ལྟ་བས་ན་རྗེས་སུ་གནང་གི་སྐྱེ་བོ་གཙོ་བོ་དད་པ་ཅན་དེ་ལྟ་བུ་གང་དག་ཡིན་པ་དེ་དག་ལ་བསྒྲགས་པར་བྱའོ། །འདི་ལ་ཁ་ཅིག་དབང་
[121a.5]ཕྱུག་ལགས་ན་དེ་དག་དད་པ་ཅན་མ་ལགས་སོ། །ཁ་ཅིག་ནི་དད་པ་ཅན་ལགས་ལ་དེ་དག་དབུལ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་ཡང་བསྒྲགས་པར་བྱའོ་ཞེས་གསུངས་པ་ཡིན་ནོ། །དེ་བཞིན་དུ་མདོ་བྱེད་པས་ཀྱང་། དད་པ་ཅན་དང་གཙོ་བོ་དག་
[121a.6]དགའ་བར་འགྱུར་བ་ལྟ་ན་ཆོ་ག་རྗེས་སུ་བསྒྲགས་པ་ལ་ཁ་ན་མ་ཐོ་བ་མེད་དོ། །དྲུང་དུ་གསོ་སྦྱོང་བྱེད་པ་ལ་ཡང་ངོ་ཞེས་བཤད་དོ། །དགེ་དང་ལུང་མ་བསྟན་སེམས་ལ། །ཞེས་བྱ་བ་ལ་སོགས་པ་ལ་སེམས་ཞེས་བྱ་བའི་སྒྲ་དང་གནས་པ་ཞེས་བྱ་བའི་སྒྲ་ནི་གཉིས་ཀ་དང་སྦྱར་བར་བྱ་སྟེ།
[121a.7]དེས་ན་ཚིག་གི་དོན་ནི་དགེ་བའི་སེམས་ལ་གནས་པ་དང་ལུང་དུ་མ་བསྟན་པའི་སེམས་ལ་གནས་པ་ལ་ཞེས་བྱ་བར་འགྱུར་རོ། །དེ་ལ་དགེ་བའི་སེམས་ནི་དད་པ་ལ་སོགས་པ་དང་མཚུངས་པར་ལྡན་པའི་སེམས་ཏེ། རྣམ་པར་སྨིན་པ་ཡིད་དུ་འོང་བ་ཅན་ཞེས་བྱ་བའི་དོན་ཏོ། །ལུང་དུ་མ་བསྟན་
[121b]
[121b.1]པའི་སེམས་ནི་བཟོ་འདྲུབ་པ་ལ་སོགས་པ་དང་མཚུངས་པར་ལྡན་པའི་སེམས་ཏེ། རྣམ་པར་སྨིན་པ་ཡིད་དུ་འོང་བ་དང་མི་འོང་བ་དང་བྲལ་ཞེས་བྱ་བའི་ཐ་ཚིག་གོ། །དྲི་ཡིས་བདག་གི་བདག་ཏུ་ཇི་ལྟར་འདོད་པར་སྨྲས་ཞེས་བྱ་བར་སྦྱར་ཏེ། བདག་ཅེས་བྱ་བ་ནི་བདག་གིའོ། །ཇི་ལྟར་འདོད་པའི་
[121b.2]ཞེས་བྱ་བ་ནི་དགའ་བར་རོ། །འདི་ལ་གཞན་གྱིས་བསམས་པ་ནི་འབྲས་བུ་ནི་རྒྱུ་དང་མཐུན་པར་འགྱུར་རོ་ཞེས་འབྱུང་བས་རེ་ཞིག་མི་དགེ་བའི་སེམས་ལ་གནས་པ་ལ་ནི་ལྟུང་བ་འབྱུང་བར་མཐོང་སྟེ་སཱ་ལུའི་ས་བོན་ལས་སཱ་ལུའི་མྱུ་གུ་ལྟ་བུ་ཡིན་ན། དེས་ན་ཅི་དགེ་བ་དང་ལུང་དུ་མ་བསྟན་པའི་སེམས་
[121b.3]ལ་ཡང་དེ་འབྱུང་ངམ་ཞེས་བྱ་བ་དེ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མཆོད་རྟེན་གྱི་འཁོར་སར་རྩྭ་སྔོན་མེད་པར་བྱེད་པ་དང་བསམས་བཞིན་མ་ཡིན་པར་བསླབ་པའི་གཞི་ལས་འདས་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་
[121b.4]གཞུང་ནི། བཙུན་པ་ཅི་ལགས་དགེ་སློང་དགེ་བའི་སེམས་དང་ལྡན་པ་ལ་ལྟུང་བ་འབྱུང་བ་ལགས་སམ། འོན་ཏེ་མི་དགེ་བའི་སེམས་དང་ལྡན་པའམ། འོན་ཏེ་ལུང་དུ་མ་བསྟན་པའི་སེམས་དང་ལྡན་པ་ལ་ལྟུང་བ་འབྱུང་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་
[121b.5]དགེ་སློང་དགེ་བའི་སེམས་དང་ལྡན་པ་ལ་ཡང་ལྟུང་བ་འབྱུང་ལ། མི་དགེ་བའི་སེམས་དང་ལྡན་པ་ལ་ཡང་ལྟུང་བ་འབྱུང་། ལུང་དུ་མ་བསྟན་པའི་སེམས་དང་ལྡན་པ་ལ་ཡང་འབྱུང་ངོ་། །དགེ་བའི་སེམས་དང་ལྡན་པ་ལ་ཇི་ལྟ་བུ་ཞེ་ན། འདི་ལྟར་དགེ་སློང་གསར་བུ་བསླབ་པའི་ལོ་རྒྱུས་ཀྱིས་མཁས་པ་
[121b.6]མཆོད་རྟེན་གྱི་འཁོར་སར་རྩྭ་སྔོན་པོ་མེད་པར་བྱེད་ཅིང་འཆག་པའི་སྲང་དག་ནས་མེ་ཏོག་དག་འཐོག་པར་བྱེད་པ་སྟེ། དེ་ལྟར་ན་དགེ་བའི་སེམས་དང་ལྡན་པ་ལ་འབྱུང་བར་འགྱུར་རོ། །མི་དགེ་བའི་སེམས་དང་ལྡན་པ་ལ་ཇི་ལྟ་བུ་ཞེ་ན། གང་ཞིག་བསམས་བཞིན་དུ་སངས་རྒྱས་ཀྱི་བསླབ་པའི་གཞི་བཅས་པ་
[121b.7]ལས་འདའ་བར་བྱེད་པ་སྟེ། དེ་ལྟར་ན་མི་དགེ་བའི་སེམས་དང་ལྡན་པ་ལ་འབྱུང་བར་འགྱུར་བ་ཡིན་ནོ། །ལུང་དུ་མ་བསྟན་པའི་སེམས་དང་ལྡན་པ་ལ་ཇི་ལྟ་བུ་ཞེ་ན། གང་ཞིག་བསམས་བཞིན་དུ་མ་ཡིན་པར་སངས་རྒྱས་ཀྱི་བསླབ་པའི་གཞི་བཅས་པ་ལས་འདའ་བར་བྱེད་པ་སྟེ། དེ་ལྟར་ན་ལུང་དུ་
[122a]
[122a.1]མ་བསྟན་པའི་སེམས་དང་ལྡན་པ་ལ་འབྱུང་བར་འགྱུར་རོ་ཞེས་བྱ་བ་ཡིན་ནོ། །དེ་ཉིད་ཀྱི་ཕྱིར། རབ་ཏུ་འཇུག་བྱེད་དགེ་སོགས་ལས། །རྗེས་སུ་འཇུག་པའང་རྣམ་པ་གསུམ། །ཞེས་བཤད་དོ། །མི་དགེ་བའི་སེམས་དང་ལྡན་པ་ལས་ལྟུང་བ་འབྱུང་བ་ལ་ནི་ཐེ་ཚོམ་
[122a.2]མེད་པས་འདིར་དྲི་བ་མ་བྱས་སོ་ཞེས་བྱ་བར་ཤེས་པར་བྱའོ། །ཅི་དགྲ་བཅོམ་པ་ལ་ལྟུང་བ་འབྱུང་ངམ་ཞེས་བྱ་བ་ལ་སོགས་པ་ནི་དགྲ་བཅོམ་པ་ལ་ལྟུང་བ་འབྱུང་ངམ་ཞེས་བྱ་བ་ཁོ་བོའི་མདུན་དུ་འབོད་དེ་སྨྲོས་ཤིག །འདི་ལྟར་ཁོ་བོ་ལ་ནི་དགྲ་བཅོམ་པའི་ཡུལ་འདི་ལ་མི་དགེ་བའི་ཆོས་ཐམས་ཅད་
[122a.3]སྤངས་པའི་ཕྱིར་ལྟུང་བ་འབྱུང་ངོ་ཞེས་བྱ་ཏེ་པོར་ཐེ་ཚོམ་ཡོད་དོ་ཞེས་བྱ་བའི་ཐ་ཚིག་གོ། །འབྱུང་ངམ་ཞེས་བྱ་བ་ནི་སྐྱེའམ་ཞེས་པ་སྟེ། དགྲ་བཅོམ་པའི་ཡུལ་འདི་ལ་ལྟུང་བ་འབྱུང་ན་བདག་ལ་ཐེ་ཚོམ་བརྟན་པོ་ཡོད་ཀྱིས་ཞེས་བྱ་བར་སྦྱར་རོ། །འདི་ལ་དོན་ནི་རེ་ཞིག་མི་དགེ་བའི་སེམས་དང་ལྡན་པ་ལ་ནི་ལྟུང་
[122a.4]བ་འབྱུང་ན་དགྲ་བཅོམ་པའི་སེམས་ནི་མི་དགེ་བའི་སེམས་ཐམས་ཅད་སྤངས་པ་ཁོ་ན་ཡིན་ན་དེ་ཅི་འདི་ལ་ལྟུང་བ་འབྱུང་ངམ། འོན་ཏེ་མ་ཡིན་ཞེས་བྱ་བ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ལུང་དུ་མ་བསྟན་པའི་སེམས་དང་ལྡན་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །
[122a.5]དེ་བཞིན་དུ་འདིར་གཞུང་ནི། བཙུན་པ་ཅི་ལགས་དགེ་སློང་དགྲ་བཅོམ་པ་དགེ་བའི་སེམས་དང་ལྡན་པ་ལ་ལྟུང་བ་འབྱུང་བར་འགྱུར་རམ། འོན་ཏེ་ལུང་དུ་མ་བསྟན་པའི་སེམས་དང་ལྡན་པ་ལ་འབྱུང་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དགྲ་བཅོམ་པ་ལ་ལྟུང་བ་གང་ཅུང་
[122a.6]ཟད་ཅི་འབྱུང་བ་དེ་ཐམས་ཅད་ནི་ལུང་དུ་མ་བསྟན་པའི་སེམས་དང་ལྡན་པ་ལ་འབྱུང་བར་བརྗོད་པར་བྱའོ། །བཙུན་པ་ཇི་ལྟར་དགེ་སློང་དགྲ་བཅོམ་པ་ལ་ལྟུང་བ་གང་ཅུང་ཟད་ཅི་འབྱུང་བ་ཐམས་ཅད་ལུང་དུ་མ་བསྟན་པའི་སེམས་དང་ལྡན་པ་ལ་འབྱུང་བར་བརྗོད་པར་བགྱི་ལགས་སམ། ཉེ་བ་འཁོར་འདི་ལྟར་
[122a.7]བརྒྱ་ལ་རེས་འགའ་ཞིག་དྲན་པ་བརྗེད་ནས་གོས་རུང་བ་མ་ཡིན་པ་ཅི་ཙམ་འདོད་པ་འཆང་ངམ། སྣམ་སྦྱར་མེད་པར་གྲོང་དུ་འཇུག་གམ། མགྲོན་དུ་མ་བོས་པར་གྲོང་དུ་འགྲོའམ། ཡང་ཡང་ཟའམ། འདུས་ཤིང་ཟའམ། གཉིད་ལོག་པ་ལས་མལ་སྟན་མཐོན་པོ་དང་མལ་སྟན་ཆེན་པོ་
[122b]
[122b.1]ལ་བཞག་གམ། བུད་མེད་ཀྱི་མལ་དུ་བསྙལ་ལམ། ནུབ་གསུམ་པ་ལ་བསྙེན་པར་མ་རྫོགས་པ་དག་ཕྱུང་སྟེ་ཉལ་བ་ལས་དེའི་འོག་ཏུ་བསྙེན་པར་མ་རྫོགས་པ་དག་ཞུགས་ན་དེ་དག་དང་བསད་ནས་ལྟུང་བ་དེ་ཆོས་བཞིན་དུ་སླར་འཆོས་པ་སྟེ། དེ་ལྟར་ན་དགེ་སློང་དགྲ་བཅོམ་པ་ལ་ལྟུང་བ་གང་ཅུང་ཟད་
[122b.2]ཅིག་འབྱུང་བ་དེ་ཐམས་ཅད་ནི་ལུང་དུ་མ་བསྟན་པའི་སེམས་དང་ལྡན་པ་ལ་འབྱུང་བར་བརྗོད་པར་བྱའོ་ཞེས་བྱ་བ་ཡིན་ནོ། །དགེ་འདུན་དབྱེན་བྱེད་གང་ཡང་རུང་། །ཞེས་བྱ་བ་ལ་སོགས་པ་ལ། གང་དུ་ཡང་རུང་ཞེས་བྱ་བ་ནི་མིང་མ་སྨོས་པའོ། །བསྐལ་པ་ནི་བར་གྱི་བསྐལ་པ་ལ་སོགས་པ་དུས་ཀྱི་
[122b.3]བྱེ་བྲག་གོ། །དེར་གནས་པས་ན་བསྐལ་པར་གནས་པ་སྟེ། མནར་མེད་པའི་བར་གྱི་བསྐལ་པར་གནས་པའི་ཕྱིར་རོ་སྙམ་དུ་བསམས་པ་ཡིན་ནོ། །བྱམས་ན་ཞེས་བྱ་བ་ནི་འགྲོགས་བཤེས་ཡིན་ཏེ། བཤེས་པ་ཡིན་ན་ཞེས་བྱ་བའི་ཐ་ཚིག་གོ། །ཐེ་ཚོམ་མྱུར་དུ་སོལ་ཅིག་ཅེས་བྱ་བར་སྦྱར་
[122b.4]ཏེ། མྱུར་དུ་ཞེས་བྱ་བ་ནི་སྐྱེན་པར་རོ། །སོལ་ཅིག་ཅེས་བྱ་བ་ནི་བོར་ཅིག་པའོ། །འདི་ལ་གཞན་གྱི་བསམ་པ་ནི་གང་ལ་ལ་དགེ་འདུན་གྱི་དབྱེན་བྱེད་པ་དེ་ཐམས་ཅད་བསྐལ་པར་གནས་པར་འགྱུར་རོ་ཞེས་བྱ་བ་དེ་ནི་ངེས་ན། ཅི་དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་ཡང་
[122b.5]མ་ཡིན་ནོ་ཞེས་བྱ་བ་དེ་སྲིད་པ་ཡོད་དམ་ཞེས་བྱ་བ་དེ་ཁོ་བོའི་ཐེ་ཚོམ་དེ་ལྟ་བུ་སོལ་ཅིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མུ་བཞི་སྲིད་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། གང་ལ་ལ་དགེ་འདུན་གྱི་དབྱེན་བྱེད་པ་དེ་ཐམས་ཅད་
[122b.6]བསྐལ་པར་གནས་པ་ཡང་ཡིན་ནམ། གང་ལ་ལ་བསྐལ་པར་གནས་པ་དེ་ཐམས་ཅད་ཀྱིས་དགེ་འདུན་གྱི་དབྱེན་བྱེད་པ་ཡང་ཡིན་ནམ་ཞེ་ན། དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་མ་ཡིན་པ་ཡོད། བསྐལ་པར་གནས་པ་ཡིན་ལ་དགེ་འདུན་གྱི་དབྱེན་བྱེད་པ་མ་ཡིན་པ་ཡོད།
[122b.7]དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་ཡིན་པ་ཡང་ཡོད། དགེ་འདུན་གྱི་དབྱེན་བྱེད་པ་ཡང་མ་ཡིན་ལ་བསྐལ་པར་གནས་པ་ཡང་མ་ཡིན་པ་ཡང་ཡོད་དོ། །ཉེ་བ་འཁོར་དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་མ་ཡིན་པ་ཡང་གང་ཞེ་ན། གང་གིས་ཆོས་མ་ཡིན་
[123a]
[123a.1]པ་ལ་ཆོས་སུ་འདུ་ཤེས་ཤིང་བྱེ་བ་ལ་ཡང་ཆོས་མ་ཡིན་པར་འདུ་ཤེས་པས་དགེ་འདུན་ཕྱེ་བར་གྱུར་པ་སྟེ། འདི་ནི་དགེ་འདུན་གྱི་དབྱེན་བྱེད་པ་ཡིན་ལ་བསྐལ་པར་གནས་པ་མ་ཡིན་ནོ། །བསྐལ་པར་གནས་པ་ཡིན་ལ་དགེ་འདུན་གྱི་དབྱེན་བྱེད་པ་མ་ཡིན་པ་གང་ཞེ་ན། ཀླུའི་
[123a.2]རྒྱལ་པོས་སྲུང་གི་བུ་དང་། ཀླུའི་རྒྱལ་པོ་རབ་གནས་དང་། ཀླུའི་རྒྱལ་པོ་ཡིད་ལས་བྱུང་དང་། ཀླུའི་རྒྱལ་པོ་དགའ་བོ་དང་། ཉེ་དགའ་བོ་དང་། ཀླུའི་རྒྱལ་པོ་ལ་བ་ཅན་དང་། མགྱོགས་འགྲོ་དག་དང་། ཀླུའི་རྒྱལ་པོ་གཤིན་རྗེ་དང་། ཚངས་རིས་ཀྱི་ལྷ་རྣམས་ཏེ། འདི་དག་ནི་བསྐལ་པར་
[123a.3]གནས་པ་ཡིན་ལ་དགེ་འདུན་གྱི་དབྱེན་བྱེད་པ་མ་ཡིན་ནོ། །དགེ་འདུན་གྱི་དབྱེན་བྱེད་པ་ཡང་ཡིན་ལ་བསྐལ་པར་གནས་པ་ཡང་ཡིན་པ་གང་ཞེ་ན། ལྷ་སྦྱིན་ཏེ། འདི་ནི་དགེ་འདུན་གྱི་དབྱེན་བྱེད་པ་ཡང་ཡིན་ལ་བསྐལ་པར་གནས་པ་ཡང་ཡིན་ནོ། །དགེ་འདུན་གྱི་དབྱེན་བྱེད་པ་ཡང་མ་ཡིན་ལ་བསྐལ་
[123a.4]པར་གནས་པ་ཡང་མ་ཡིན་པ་གང་ཞེ་ན། རྣམ་པ་དེ་དག་མ་གཏོགས་པའོ་ཞེས་བྱ་བ་ཡིན་ནོ། །དགེ་སློང་མིན་པས་ལྟུང་བྱས་ལ། །ཞེས་བྱ་བ་ལ་སོགས་པ་ལ། དགེ་སློང་མིན་ཞེས་བྱ་བ་ནི་དགེ་སློང་ཉིད་དང་བྲལ་བས་སོ། །ལྡང་འགྱུར་ཞེས་བྱ་བ་ནི་ལྟུང་བ་མེད་པའོ། །དང་ཞེས་བྱ་བ་ནི་
[123a.5]དོན་གཞན་དྲང་པའི་ཕྱིར་ཏེ་འོག་མ་དག་ལ་ཡང་དེ་བཞིན་ནོ། །བཟློག་པ་ནི་ཇི་སྐད་བཤད་པ་ལས་བཟློག་པའོ། །དེ་ལ་བཟློག་པའི་དོན་ནི། དགེ་སློང་གིས་ནི་ལྟུང་བྱས་ལ། །དགེ་སློང་མིན་པས་ཇི་ལྟར་ལྡང་། །ཞེས་བྱ་བ་འདི་ཡིན་ནོ། །ཐེ་ཚོམ་མྱུར་དུ་སོལ་ཅེས་བྱ་བར་སྦྱར་ཏེ།
[123a.6]མྱུར་དུ་ཞེས་བྱ་བ་ནི་མི་ཐོགས་པར་རོ། །ཆོད་ཅེས་བྱ་བ་ནི་སོལ་ཅིག་པའོ། །འདི་ལ་དོན་ནི་གང་གི་ཚེ་དགེ་སློང་མ་ཡིན་པ་དགེ་སྦྱོང་ལ་སོགས་པས་ལྟུང་བ་ལྷག་པར་སྤྱད་པ་དེའི་ཚེ། དགེ་སློང་དུ་གྱུར་ནས་ཇི་ལྟར་ལྡང་བར་གསུངས་པའམ། གང་གི་ཚེ་དགེ་སློང་གིས་ལྟུང་བ་བྱུང་བ་དེའི་ཚེ་
[123a.7]དགེ་སློང་མ་ཡིན་པར་གྱུར་ནས་ལྟུང་བ་ལས་ཇི་ལྟར་ལྡང་བར་འགྱུར་ཞེས་བྱ་བ་བདག་གི་ཐེ་ཚོམ་དེ་ལྟ་བུ་མྱུར་དུ་སོལ་ཅིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། མཚན་གྱུར་པའི་དབང་དུ་མཛད་ནས་དེ་སྐད་དུ་གསུངས་པའི་ཚེ་ཡིན་ནོ། །དེ་བཞིན་དུ་འདིར་གཞུང་ནི། བཙུན་
[123b]
[123b.1]པ་དགེ་སློང་མ་ལགས་པས་ལྟུང་བ་བྱུང་ལ་དགེ་སློང་དུ་གྱུར་ནས་ལྡང་བར་འགྱུར་ཞིང་། དགེ་སློང་གིས་ལྟུང་བ་ཕྱུང་ལ་དགེ་སློང་མ་ལགས་པར་གྱུར་པས་ལྡང་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དོ། །དགེ་སློང་མ་ལགས་པས་
[123b.2]ལྟུང་བ་བྱུང་ལ་དགེ་སློང་དུ་གྱུར་པས་ལྡང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་མས་ཐུན་མོང་མ་ཡིན་པའི་དགེ་འདུན་ལྷག་མའི་ལྟུང་བ་ཕྱུང་ལ་དེའི་མཚན་གྱུར་ནས་དགེ་སློང་དུ་རེད་ན་ལངས་པ་ཞེས་བརྗོད་པར་བྱ་སྟེ། དེ་ལྟར་ན་དགེ་སློང་མ་ཡིན་པས་ལྟུང་བ་ཕྱུང་ལ་དགེ་སློང་དུ་གྱུར་ནས་ལྡང་
[123b.3]བ་ཡིན་ནོ། །དགེ་སློང་གིས་ལྟུང་བ་ཕྱུང་ལ་དགེ་སློང་མ་ལགས་པར་གྱུར་ནས་ལྡང་བ་ཇི་ལྟ་བུ་ལགས། འདི་ལྟར་དགེ་སློང་གིས་ཐུན་མོང་མ་ཡིན་པའི་དགེ་འདུན་ལྷག་མའི་ལྟུང་བ་ཕྱུང་ལ་དེའི་ཚེ་མཚན་གྱུར་ཏེ། མཚན་གྱུར་ནས་དགེ་སློང་མར་རེད་ན་ལངས་བ་ཞེས་བརྗོད་པར་བྱ་བ་སྟེ།
[123b.4]དེ་ལྟར་དགེ་སློང་གིས་ལྟུང་བ་ཕྱུང་ལ་དགེ་སློང་མ་ཡིན་པར་རེད་ནས་ལྡང་བ་ཡིན་ནོ་ཞེས་བྱ་བ་ཡིན་ནོ། །དགེ་སློང་གཉིད་མ་ལོག་པའི་ཚེ་ཞེས་བྱ་བ་ལ་སོགས་པ་ལ། གཉིད་མ་ལོག་པ་ནི་མ་ཉལ་བའོ། །བྱས་ནས་ཞེས་བྱ་བ་ནི་ལྟུང་བ་ཞེས་བྱ་བར་སྦྱར་རོ། །གཉིད་ལོག་ནས་ཞེས་བྱ་བ་ནི་
[123b.5]ཉལ་ནའོ། །དང་ཞེས་བྱ་བའི་སྒྲས་ནི་བཟློག་པ་ཡང་གསལ་བར་སྨྲོས་ཤིག་ཅེས་བྱ་བ་བསྡུས་ཏེ། བཟློག་པ་ནི་བཤད་པ་ལས་བཟློག་པའོ། །དེ་ལས་བཟློག་པའི་དོན་ནི། དགེ་སློང་གཉིད་ལོག་ལྟུང་བྱས་ནས། །སད་ནས་ཇི་ལྟར་ལྡང་བར་འགྱུར། །དྲི་ཡིས་ཁྱོད་ནི་སྨྲ་བར་
[123b.6]གྱིས། །ཞེས་བྱ་བ་འདི་ཡིན་ནོ། །དེ་ལ་གཏན་ལ་དབབ་པ་འདི་ཡིན་ཏེ། ལས་བརྗོད་པ་དང་གཞན་གྱི་ཐོ་འཚམས་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཉིད་ཀྱིས་མ་ལོག་པ་ན་ལྟུང་བ་བྱུང་ལ་གཉིད་ཀྱིས་ལོག་ནས་ལྟུང་བ་ལས་ལྡང་
[123b.7]ཞིང་གཉིད་ཀྱིས་ལོག་པ་ན་བྱུང་ལ་གཉིད་སད་ནས་ལྡང་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། གཉིད་ཀྱིས་མ་ལོག་པ་ན་ལྟུང་བ་བྱུང་ལ་གཉིད་ཀྱིས་ལོག་ནས་ལྡང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་དགེ་འདུན་ལྷག་
[124a]
[124a.1]མ་བྱུང་བ་དབྱུང་བར་བྱ་བའི་ལས་རྗོད་པར་བྱེད་པ་ན་གསོལ་བ་ཐོས་ནས་ཉལ་ཏེ་དེ་གཉིད་ལོག་པ་དང་ལས་བརྗོད་པ་གསུམ་པ་མཐར་ཕྱིན་ནས་ཏེ། དེ་ལྟར་གཉིད་ཀྱིས་མ་ལོག་པ་ལས་ན་ལྟུང་བ་ཕྱུང་ལ་གཉིད་ཀྱིས་ལོག་ནས་ལྡང་བར་འགྱུར་བ་ཡིན་ནོ། །
[124a.2]གཉིད་ཀྱིས་ལོག་པ་ན་ལྟུང་བ་བྱུང་ལ་གཉིད་སད་ནས་ལྡང་བར་འགྱུར་བ་ཇི་ལྟ་བུ་ལགས། འདི་ལྟར་དགེ་སློང་གཉིད་ལོག་པ་ལས་མལ་སྟན་མཐོན་པོ་དང་མལ་སྟན་ཆེན་པོ་ལ་བཞག་པའམ། གཉིད་ལོག་པ་ལས་བུད་མེད་ཀྱི་མལ་དུ་བསྙལ་བའམ། ནུབ་གསུམ་པ་ལ་བསྙེན་
[124a.3]པར་མ་རྫོགས་པ་དག་ཕྱིར་ཕྱུང་ཏེ་ཉལ་བ་ལས་དེའི་འོག་ཏུ་བསྙེན་པར་མ་རྫོགས་པ་དག་ཞུགས་ན། དེ་དེ་དག་དང་སད་ནས་ལྟུང་བ་དེ་ཆོས་བཞིན་སླར་འཆོས་པ་སྟེ། དེ་ལྟར་ན་གཉིད་ལོག་པ་ན་ལྟུང་བ་འབྱུང་ལ་གཉིད་སད་ནས་ལྡང་བར་འགྱུར་བ་ཡིན་ནོ་ཞེས་བྱ་བ་ལ་སོགས་པ་ཡིན་ནོ། །
[124a.4]སྟན་གཅིག་ལ་འདུག་པའི་ཞེས་བྱ་བ་ལ་སོགས་པ་ནི་སྟན་གཅིག་ལ་འདུག་པའི་དགེ་སློང་ལ་རྒྱུ་གང་གིས་ལྟུང་བའི་རིས་ལྔ་འབྱུང་ཞེས་བྱ་བར་སྦྱར་རོ། །སྟན་ནི་ཁྲིའུ་ལ་སོགས་པ་སྟེ། འདིར་གཞན་འདུག་ཅིང་གནས་པས་སོ། །འདུག་པ་ནི་གནས་པའོ། །རྒྱུ་གང་གིས་ཞེས་བྱ་བ་
[124a.5]ནི་བྱེད་རྒྱུ་གང་གིས་སོ། །ལྟུང་བའི་རིས་ནི་ལྔ་པོ་དག་ཅེས་བྱ་བ་ནི་ཕས་ཕམ་པར་འགྱུར་བ་དང་དགེ་འདུན་ལྷག་མ་དང་། ལྟུང་བྱེད་དང་། སོ་སོར་བཤགས་པར་བྱ་བ་དང་། ཉེས་བྱས་ཞེས་བྱ་བ་རིས་ལྔ་པོ་དག་གོ། །འདི་ལ་འདྲི་བའི་བསམ་པ་ནི་ཕན་ཚུན་འགྲོ་བ་དང་བྱ་བའི་ལྟུང་བའི་
[124a.6]རིས་ལྔ་པོ་དག་མ་བྱུང་བར་མཐོང་གི་སྟན་གཅིག་ཁོ་ན་ལ་འདུག་པ་ལ་ནི་མ་ཡིན་ན། འདི་ལ་ཁྱོད་ཀྱིས་རྒྱུ་གང་གིས་འདི་དག་འབྱུང་བའི་རྒྱུ་ཁོ་བོ་ལ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། སྟན་གཅིག་ལ་འདུག་པ་དང་། འབྲེལ་པའི་ལྟུང་
[124a.7]བ་སྲིད་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་སྟན་གཅིག་ལ་མཆིས་པ་ལ་ལྟུང་བའི་རིས་ལྔ་པོ་ཐམས་ཅད་འབྱུང་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། ཆོས་གོས་
[124b]
[124b.1]མེད་པར་ཟན་ཟ་ན་ཉེས་བྱས་སུ་འགྱུར་རོ། །བསླབ་པའི་སྡོམ་པས་བསྡམས་པའི་སློབ་པའི་ཁྱིམ་དག་ནས་རང་གི་ལག་གིས་བཅའ་བར་བྱ་བ་དང་བཟའ་བར་བྱ་བ་དག་ལེན་ན་སོ་སོར་བཤགས་པར་འགྱུར་རོ། །བུད་མེད་ལ་ཚིག་ལྔའམ་དྲུག་ལས་ལྷག་པར་ཆོས་སྟོན་ན་ལྟུང་བྱེད་དུ་འགྱུར་རོ། །
[124b.2]བུད་མེད་ལ་གནས་ངན་ལེན་བརྗོད་པ་སྨྲ་ན་དགེ་འདུན་ལྷག་མར་འགྱུར་རོ། །བདག་ཉིད་མིའི་ཆོས་བླ་མ་མེད་ཅིང་མི་བདོག་བཞིན་དུ་བརྗོད་ན་ཕས་ཕམ་པར་འགྱུར་རོ་ཞེས་བྱ་བ་ནི། དགེ་སློང་སྦྱོར་བ་གཅིག་གིས་ནི་ཞེས་བྱ་བ་ནི་དགེ་སློང་གཅིག་གིས་སྦྱོར་བ་གཅིག་གིས་ཇི་ལྟར་ལྟུང་བ་སྟོང་བྱེད་པར་
[124b.3]འགྱུར་ཞེས་བྱ་བར་སྦྱར་རོ། །སྦྱོར་བ་གཅིག་གིས་བྱ་བ་ནི་བྱེད་པ་གཅིག་གིས་ཏེ་རྩོམ་པ་གཅིག་གིས་ཞེས་བྱ་བའི་ཐ་ཚིག་གོ། །སྟོང་ཞེས་བྱ་བ་ནི་བརྒྱ་དང་སྟོང་མཚོན་པ་ཡིན་ནོ། །དེ་ཉིད་རིག་པ་ནི་དོན་དམ་པ་རིག་པ་སྟེ་འདུན་པའི་དོན་ཁོང་དུ་ཆུད་པ་ཞེས་བྱ་བའི་དོན་ཏོ། །འདི་ལ་བསམ་པ་ནི་
[124b.4]སྦྱོར་བ་ཐ་དད་པ་ཉིད་ལ་ནི་ལྟུང་བ་མང་པོ་དག་འབྱུང་བར་བཏུབ་ཀྱི་སྦྱོར་བ་གཅིག་གིས་ནི་མ་ཡིན་ན་དེ་ཇི་ལྟ་བུ་ཞིག་ཡིན་པར་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། ཁྲོས་ནས་གཞན་དག་ལ་བྱེ་མ་ལ་སོགས་པའི་སྤར་བས་བསྣུན་པ་ལ་དགོངས་ནས་དེ་སྐད་
[124b.5]དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་སྦྱོར་བ་གཅིག་གིས་ལྟུང་བ་བརྒྱའམ་ལྟུང་བ་སྟོང་ངམ། དེ་ལས་ལྷག་པ་འབྱུང་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་ཁྲོས་འཁྲུགས་རྔམ་མ་རངས་ནས་སྐྱེ་
[124b.6]བོ་ཕལ་པོ་ཆེ་འདུས་ཤིང་འཁོད་པ་ལ་སྲན་སྤར་གྱིས་བཏབ་བམ། མོན་སྲན་སྡེའུ་སྤར་གྱིས་བཏབ་བམ། བྱེ་མ་སྤར་གྱིས་བཏབ་སྟེ་བསྣུན་ན་ཇི་སྙེད་ཕོག་པ་དེ་སྙེད་ཀྱི་ལྟུང་བར་འགྱུར་རོ་ཞེས་བྱ་བ་ཡིན་ནོ། །བསམ་གཏན་དང་པོ་ལ་སོགས་ལ་ཞེས་བྱ་བ་ལ་སོགས་པ་ལ། བསམ་གཏན་
[124b.7]དང་པོ་ནི་རྟོག་པ་དང་བཅས་ཤིང་དཔྱོད་པ་དང་བཅས་པ། བསམ་གཏན་ནི་མཉམ་པར་གཞག་པ་དགེ་བ་རྩེ་གཅིག་པའོ། །སོགས་པ་ཞེས་སྨོས་པས་ནི་རྟོག་པ་ཡང་མེད་དཔྱོད་པ་ཡང་མེད་པ་ལ་སོགས་པའི་མཚན་ཉིད་བསམ་གཏན་གཉིས་པ་ལ་སོགས་པ་བསྡུའོ། །ཅིའི་ཕྱིར་
[125a]
[125a.1]ཞེས་བྱ་བ་ནི་རྒྱུ་གང་གིས་སོ། །འདི་ལ་དོན་ནི་རེ་ཞིག་དགེ་བའི་སེམས་ལ་གནས་པ་ལ་ཡང་ལྟུང་བ་འབྱུང་བ་མེད་པས་བསམ་གཏན་དང་པོ་ལ་སོགས་པ་ལ་སྙོམས་པར་ཞུགས་པ་ལ་ལྟ་སྨོས་ཀྱང་ཅི་དགོས་ན་དེ་ལ་དེ་འབྱུང་ངོ་ཞེས་བྱ་བ་དེ་ཇི་ལྟ་བུ་ཡིན་པར་བརྗོད་པར་བྱའོ་
[125a.2]ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། ཁང་པ་བྱ་བ་བསྐོ་བའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞི་གང་གིས་བསམ་གཏན་དང་པོ་ལ་སྙོམས་པར་མ་ཞུགས་པ་ལ་དགེ་འདུན་ལྷག་མར་འགྱུར་བའི་
[125a.3]གཞི་དེས་བསམ་གཏན་དང་པོ་ལ་སྙོམས་པར་ཞུགས་པ་ལ་དགེ་འདུན་ལྷག་མར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་བསམ་གཏན་དང་པོ་ལ་སྙོམས་པར་ཞུགས་པའི་ཚེ་ངའི་ཁང་པ་རྩིགས་ཤིག་ཅེས་བསྒོ་ཞིང་བསྒོས་
[125a.4]ནས་བསམ་གཏན་དང་པོ་ལ་སྙོམས་པར་ཞུགས་པ་དེ་བསམ་གཏན་དང་པོ་ལ་སྙོམས་པར་ཞུགས་པ་དང་། ཁང་པ་མཐར་ཕྱིན་པར་གྱུར་ན་དགེ་འདུན་ལྷག་མར་འགྱུར་རོ། །གཞི་གང་གིས་བསམ་གཏན་གཉིས་པ་ལ་སོགས་པ་ལ་སྙོམས་པར་མ་ཞུགས་པ་ལ་དགེ་འདུན་ལྷག་མར་འགྱུར་བའི་
[125a.5]གཞི་དེས་བསམ་གཏན་གཉིས་པ་དང་། གསུམ་པ་དང་། བཞི་པ་ལ་སོགས་པར་ཞུགས་པ་ལ་དགེ་འདུན་ལྷག་མར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་བསམ་གཏན་གཉིས་པ་དང་། གསུམ་པ་དང་། བཞི་
[125a.6]པ་ལ་སོགས་པར་འཇུག་པའི་ཚེ་ངའི་ཁང་པ་རྩིགས་ཤིག་ཅེས་བསྒོ་ཞིང་བསྐོས་ནས་བསམ་གཏན་བཞི་པའི་བར་ལ་སྙོམས་པར་ཞུགས་ལ། དེ་བསམ་གཏན་བཞི་པའི་བར་ལ་སྙོམས་པར་ཞུགས་པ་དང་ཁང་པ་མཐར་ཕྱིན་པར་གྱུར་ན་དགེ་འདུན་ལྷག་མར་འགྱུར་རོ་ཞེས་བྱ་བ་ཡིན་ནོ། །དགེ་
[125a.7]སློང་ཐ་ན་ཉེས་བྱས་ཀྱིས་ཞེས་བྱ་བ་ལ་སོགས་པ་ལ། ཐ་ན་ཞེས་བྱ་བ་ནི་ཆུང་ངུ་ནའོ། །ནམ་དུའང་ཞེས་བྱ་བ་ནི་གཞར་ཡང་སྟེ། འདིས་ནི་གཏན་དུ་མི་འབྱུང་བར་སྟོན་པར་བྱེད་དོ། །འོན་ཀྱང་ཞེས་བྱ་བ་ནི་དེ་ལྟ་ན་ཡང་ངོ་། །འདི་ལ་འདྲི་བའི་དོན་ནི་གང་ལ་ལས་ཕས་ཕམ་པར་འགྱུར་བ་ལྷག་པར་
[125b]
[125b.1]སྤྱོད་པ་དེ་དགེ་སློང་མ་ཡིན་པར་གསུངས་ཀྱི། ཉེས་བྱས་ཀྱི་ལྟུང་བ་འབྱུང་བ་ཡང་ནི་མ་ཡིན་ནོ། །འོན་ཀྱང་དགེ་སློང་མ་ཡིན་པ་ཞེས་གསུངས་པ་དེ་ཇི་ལྟ་བུ་ཡིན་པར་བརྗོད་པར་བྱའོ་ཞེས་བྱ་བ་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། མཚན་གྱུར་པ་ལ་དགོངས་ནས་དེ་སྐད་དུ་
[125b.2]གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་གིས་ནམ་ཡང་ཐ་ན་ཉེས་བྱས་ཀྱི་ལྟུང་བ་ཡང་མ་བྱུང་ལ། འོན་ཀྱང་དགེ་སློང་མ་ལགས་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། དགེ་སློང་མཚན་
[125b.3]གྱུར་ནའོ་ཞེས་བྱ་བ་ཡིན་ནོ། །དགེ་སློང་མ་ནི་ནམ་དུ་ཡང་ཞེས་བྱ་བ་ལ་སོགས་པ་ལ་ནམ་དུ་ཡང་ཞེས་བྱ་བ་ནི་གཞར་ཡང་ངོ་། །མི་བྱེད་ཅེས་བྱ་བ་ནི་དགག་པའོ། །འདི་ལ་སྐབས་ཀྱི་དོན་ནི་ཐུན་མོང་ངམ་ཐུན་མོང་མ་ཡིན་པའི་ཕས་ཕམ་པར་འགྱུར་བ་ལྷག་པར་སྤྱོད་ན་དགེ་སློང་མ་མ་ཡིན་པ་རྣམ་
[125b.4]པར་གཞག་གི། དགེ་སློང་མ་ཉེས་བྱས་ཀྱི་ལྟུང་བ་ལྷག་པར་སྤྱོད་པ་ཡང་ནི་མ་ཡིན་ནོ། །འོན་ཀྱང་དགེ་སློང་མ་མ་ཡིན་ཞེས་གསུངས་པ་ཇི་ལྟ་བུ་ཡིན་པ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་མཚན་གྱུར་པ་ལ་དགོངས་ཏེ་གསུངས་པ་ཡིན་ཏེ། དེ་
[125b.5]བཞིན་དུ་འདིར་གཞུང་ནི། དགེ་སློང་མས་ནམ་དུ་ཡང་ཐ་ན་ཉེས་བྱས་ཀྱི་ལྟུང་བ་ཡང་མ་བྱུང་ལ། འོན་ཀྱང་དགེ་སློང་མ་མ་ལགས་པར་འགྱུར་བ་ལྟ་མཆིས་ལགས་སམ། ཡོད་དེ། དགེ་སློང་མ་མཚན་གྱུར་ནའོ་ཞེས་བྱ་བ་ཡིན་ནོ། །གལ་ཏེ་དགེ་སློང་དགྲ་བཅོམ་མིན། །ཞེས་བྱ་བ་ལ་སོགས་
[125b.6]པ་ལ་དགྲ་བཅོམ་མིན་ཞེས་བྱ་བ་ནི་དགྲ་བཅོམ་པ་ལས་གཞན་པ་སྟེ་སོ་སོའི་སྐྱེ་བོའོ། །ཕ་མིན་ཞེས་བྱ་བ་ནི་ཕ་ལས་གཞན་པའི་སེམས་ཅན་མིའི་འགྲོ་བར་སྐྱེས་པའོ། །དེ་བཞིན་དུ་ཞེས་བྱ་བ་ནི་གཞན་འདྲེན་པ་དེ་ཇི་ལྟ་བུར་ཕས་ཕམ་པར་འགྱུར་བར་གསུངས་ཞེས་བྱ་བར་སྦྱར་རོ། །འདི་ལ་དོན་ནི་གང་
[125b.7]དགེ་སློང་འགའ་ཞིག་གིས་དགེ་སློང་དགྲ་བཅོམ་པ་མ་ཡིན་པ་སོ་སོའི་སྐྱེ་བོ་ཞིག་བསད་ན་དེ་ལ་ཕས་ཕམ་པར་འགྱུར་བ་འབའ་ཞིག་ཏུ་ཟད་ན། འོན་ཀྱང་དེས་ཕས་ཕམ་པ་དང་མནར་མེད་པར་ཡང་གསུངས་སོ་ཞེས་བྱ་བ་དེ་ལྟ་བུ་ཡིན་པ་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་
[126a]
[126a.1]ཏེ། མཚན་གྱུར་པ་ལ་བརྟེན་ནས་དེ་སྐད་དུ་གསུངས་པ་ཡིན་ཏེ། འདིར་གཞུང་ནི། བཙུན་པ་དགེ་སློང་ཞིག་གིས་དགེ་སློང་ཞིག་གི་སྲོག་བཀུམ་ལ་དེ་ཕ་ཡང་མ་ལགས་དགྲ་བཅོམ་པ་ཡང་མ་ལགས་ན། འོན་ཀྱང་ཕས་ཕམ་པར་འགྱུར་ཞིང་མཚམས་མ་མཆིས་
[126a.2]པའི་ཁ་ན་མ་ཐོ་བའི་ལས་ཀྱིས་ཀྱང་རེག་པ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་གིས་མ་རབ་ཏུ་ཕྱུང་ཞིང་བསྙེན་པར་རྫོགས་པར་གྱུར་ན། དེ་མཚན་གྱུར་ཏེ་མཚན་གྱུར་ནས་བསད་ན་ཕས་ཕམ་པར་འགྱུར་ཞིང་མཚམས་མེད་པའི་ཁ་
[126a.3]ན་མ་ཐོ་བའི་ལས་ཀྱིས་ཀྱང་རེག་པར་འགྱུར་རོ་ཞེས་བྱ་བ་ཡིན་ནོ། །འདི་ལ་འདྲི་བའི་དོན་ནི། དགེ་སློང་མ་ནི་དགྲ་བཅོམ་མིན། །མ་མིན་བསད་ན་ཇི་ལྟ་བུར། །མཚམས་མེད་པ་དང་དེ་བཞིན་དུ། །ཕས་ཕམ་འགྱུར་བ་གསུངས་པར་སྨྲོས། །ཞེས་བྱ་བ་ཡང་རུང་སྟེ། དེ་ལ་དགྲ་བཅོམ་མིན་ཞེས་
[126a.4]བྱ་བ་ནི་དགྲ་བཅོམ་པ་ལས་གཞན་པ་སོ་སོའི་སྐྱེ་བོའོ། །མ་མིན་པ་ཞེས་བྱ་བ་ནི་མ་ལས་གཞན་པའི་སེམས་ཅན་མིའི་འགྲོ་བར་སྐྱེས་པའོ། །འདིར་ཡང་ལན་ནི་འདི་ཡིན་ཏེ། ཕ་མཚན་གྱུར་པ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་
[126a.5]སློང་མས་དགེ་སློང་མ་ཞིག་བཀུམ་ལ་དེ་ཡང་མ་ཡང་མ་ལགས། དགྲ་བཅོམ་པ་ཡང་མ་ལགས་ན། འོན་ཀྱང་ཕས་ཕམ་པར་འགྱུར་ཞིང་མཚམས་མ་མཆིས་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ།
[126a.6]དགེ་སློང་མ་གང་གིས་ཕ་རབ་ཏུ་བྱུང་ཞིང་བསྙེན་པར་རྫོགས་པར་གྱུར་ལ། དེ་མཚན་གྱུར་ནས་བསད་ན་ཕས་ཕམ་པར་ཡང་འགྱུར་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ཀྱང་རེག་པར་ཡང་འགྱུར་རོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་མཚན་གྱུར་པ་གཉིས་
[126a.7]ལས་ཀྱང་ངོ་ཞེས་བཤད་དོ། །གཞན་གྱིས་ཚིག་སྨྲས་གཞན་ལ་ནི། །ཞེས་བྱ་བ་ལ་སོགས་པ་ལ། གཞན་གྱིས་ཞེས་བྱ་བ་ནི་དགེ་སློང་ལ་སོགས་པས་སོ། །ཚིག་སྨྲས་པ་ནི་ཚིག་ཏུ་བརྗོད་པའོ། །གཞན་ལ་ཞེས་བྱ་བ་ནི་བརྗོད་པར་འདོད་པའི་དགེ་སློང་འགའ་ཞིག་ལའོ། །མྱུར་དུ་
[126b]
[126b.1]ཞེས་བྱ་བ་ནི་སྐྱེན་པར་རོ། །འདི་ལ་དོན་ནི་ལྟུང་བའི་རིས་ལྔ་པོ་དག་ནི་ཅི་རིགས་པར་རང་གི་ངག་དང་འབྲེལ་པ་ཡིན་ན། འོན་ཀྱང་གཞན་གྱིས་ཚིག་སྨྲ་བ་བྱས་ནས་དགེ་སློང་ལ་འདི་དག་འབྱུང་བ་དེ་ཇི་ལྟ་བུ་ཡིན་པ་དེ་བརྗོད་པར་བྱའོ་ཞེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། ལས་
[126b.2]བརྗོད་པ་ལ་སོགས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། བཙུན་པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་ཕས་ཕམ་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་མས་དགེ་སློང་གི་
[126b.3]དགེ་འདུན་མཐུན་པས་དགེ་སློང་ཞིག་མ་མཐོང་བའི་ཕྱིར་བསྐྲད་པར་ཤེས་བཞིན་དུ་རྗེས་སུ་ཕྱོགས་ཤིང་དགེ་འདུན་གྱི་ནང་དུ་ལན་གསུམ་གྱི་བར་དུ་བསྒོ་ཡང་གཏོང་དུ་མི་བཏུབ་ན་ཕས་ཕམ་པར་འགྱུར་རོ། །བཙུན་པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་དགེ་འདུན་
[126b.4]ལྷག་མར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་དགེ་འདུན་གྱི་དབྱེན་བྱེད་པ་དང་། དེའི་རྗེས་སུ་ཕྱོགས་པ་དང་། ཁྱིམ་སུན་འབྱིན་པ་དང་། བཀའ་བློ་མི་བདེ་བ་དགེ་འདུན་གྱི་ནང་དུ་ལན་གསུམ་གྱི་བར་དུ་བསྒོ་
[126b.5]ཡང་གཏོང་དུ་མི་བཏུབ་ན་དགེ་འདུན་ལྷག་མར་འགྱུར་རོ། །བཙུན་པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་ལ་ལྟུང་བྱེད་དུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་གིས་སྡིག་པ་ཅན་གྱི་ལྟ་བ་ཡང་
[126b.6]དག་པར་བླངས་ལ་བླངས་ནས་འདོར་དུ་མི་བཏུབ་ན་ལྟུང་བྱེད་དུ་འགྱུར་རོ། །བཙུན་པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་ལ་སོ་སོར་བཤགས་པར་བགྱི་བར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་ཁྱིམ་
[126b.7]དག་ཏུ་མགྲོན་དུ་བོས་ཏེ་ཟན་ཟ་ལ་དེ་ན་ཡང་དགེ་སློང་མ་བསྐོ་ཤམ་བྱེད་པ་ཞིག་ཡོད་དེ་འདི་ལ་ནི་བཟའ་བ་བྱིན་ཅིག །འདི་ལ་ནི་འབྲས་ཆན་བྱིན་ཅིག །འདི་ལ་ནི་སྲན་ཚོད་བྱིན་ཅིག་འདི་ལ་ནི་མང་དུ་བྱིན་ཅིག་ཟེར་ལ། དེ་ལ་མ་བསྒོ་བར་ཟན་སོ་སོར་བཤགས་པར་བྱ་བར་འགྱུར་རོ། །བཙུན་
[127a]
[127a.1]པ་གཞན་གྱིས་ཚིག་སྨྲས་ལ་དེས་སྨྲས་པའི་རྐྱེན་གྱིས་གཞན་ལ་ཉེས་བྱས་སུ་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་སོ་སོར་ཐར་པའི་མདོ་གདོན་པར་འདོད་པའི་ཚེ་དགེ་འདུན་གྱི་དབུས་སུ་
[127a.2]ལན་གསུམ་གྱི་བར་དུ་བསྒྲགས་ཀྱང་ལྟུང་བ་དྲན་བཞིན་དུ་མི་འཆགས་ན་དེས་སྨྲས་པའི་རྐྱེན་གྱིས་ཉེས་བྱས་སུ་འགྱུར་རོ་ཞེས་བྱ་བ་ལ་སོགས་པ་ཡིན་ནོ། །ཇི་ལྟར་དགེ་སློང་གཅིག་པུ་ལ་ཞེས་བྱ་བ་ལ་སོགས་པ་ལ། གཅིག་པུ་ཞེས་བྱ་བ་ནི་གྲོགས་མེད་པ་ལ་བྱའོ། །ཕས་ཕམ་པར་
[127a.3]འགྱུར་བ་བཞི་ཞེས་བྱ་བ་ནི་མི་ཚངས་པར་སྤྱོད་པ་དང་། མ་བྱིན་པར་ལེན་པ་དང་། གསོད་པ་དང་། སྨྲ་བ་དང་ཞེས་པ་དག་གོ། །དོན་བཞིན་དུ་ཞེས་བྱ་བ་ནི་ཡང་དག་པ་ཇི་ལྟ་བ་བཞིན་དུའོ། །འདི་ལ་བསམ་པ་ནི་ཟླ་ཞིག་ཡོད་ན་ཕས་ཕམ་པར་འགྱུར་བ་རྣམས་འབྱུང་ངོ་ཞེས་བྱ་བ་དེ་ནི་ཤིན་
[127a.4]ཏུ་གྲགས་ན། ཅི་གཅིག་པུ་ཁོ་ན་ལ་ཕས་ཕམ་པ་བཞི་འབྱུང་བ་གང་ཡིན་པ་དེ་སྲིད་པ་ཡོད་དམ་མེད་བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པར་བྱ་བ་ནི་འདི་ཡིན་ཏེ། དུས་གཞན་ན་སྦྱོར་བ་བྱས་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་
[127a.5]འདིར་གཞུང་ནི། བཙུན་པ་དགེ་སློང་གཅིག་པུ་གཙུག་ལག་ཁང་དུ་ཞུགས་པ་ལ་ཕས་ཕམ་པ་བཞི་འབྱུང་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། མི་ཚངས་པར་སྤྱོད་པའི་རྐྱེན་གྱིས་ཇི་ལྟ་བུ་ལགས། དཔེར་ན་མཚན་རིངས་དང་རྒྱབ་མཉེན་ལྟ་
[127a.6]བུའོ། །མ་བྱིན་པར་ལེན་པའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་སྦྱོར་བ་བྱས་ནས་གཙུག་ལག་ཁང་དུ་ཞུགས་ནས་དེ་བརྐུས་ནའོ། །གསོད་པའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་སྦྱོར་བ་བྱས་ནས་གཞལ་ཡས་ཁང་དུ་ཞུགས་ལ་དེ་ཡང་བསད་ནའོ། །
[127a.7]སྨྲ་བའི་རྐྱེན་གྱིས་ཇི་ལྟ་བུ་ལགས། འདི་ལྟར་དགེ་སློང་གིས་འདི་སྐད་དུ་བདག་ནི་དགྲ་བཅོམ་པ་བདག་ནི་སངས་རྒྱས་སོ་ཞེས་སྨྲས་སོ་ཞེས་བྱ་བ་ཡིན་ཏེ། དོན་འདི་ནི་བཤད་ཟིན་མོད་ཀྱིས་ཕས་ཕམ་པ་བཞི་འབྱུང་བའི་སྐབས་ཀྱིས་ཡང་བཤད་དོ། །འདུལ་བ་དྲི་བའི་ཚིག་ལེའུར་བྱས་པ་ལེའུ་
[127b]
[127b.1]བཞི་པའི་གཏན་ལ་དབབ་པའོ།། །།འདི་ལ་གསོལ་བའི་ལས་དང་ནི། །ཞེས་བྱ་བ་ལ་སོགས་པ་ལ་འདི་ལ་ཞེས་བྱ་བ་ནི་ལས་དག་ལའོ། །གསོལ་བ་ནི་བྱེད་པར་འགྱུར་བའི་ལས་གོ་བར་བྱེད་པའོ། །གསོལ་བ་ཉིད་ལས་ཡིན་པས་གསོལ་བའི་ལས་སོ། །དེ་བས་ན་གསོལ་
[127b.2]བའི་བདག་ཉིད་ཀྱི་ལས་དག་ནི་གསོལ་བའི་ལས་ཏེ། དེ་དག་དུ་ཞིག་ཡོད་ཅེས་བྱ་བ་གྲངས་སུ་ཞེས་བྱ་བའི་ཐ་ཚིག་གོ། །དང་ཞེས་བྱ་བ་ནི་བསྡུ་བ་སྟེ། འོག་མ་ལ་ཡང་དེ་དང་འདྲའོ། །གསོལ་བར་བཅས་པའི་ལས་ཞེས་བྱ་བར་སྦྱར་ཏེ། ལས་ནི་བརྗོད་པ་བཟླས་པ་ཞེས་བྱ་བའི་
[127b.3]ཐ་ཚིག་གོ། །དེས་ན་གསོལ་བ་དང་བཅས་པའི་ལས་ནི་དུ་ཞིག་ཡོད་ཅེས་བྱ་བར་སྦྱར་རོ། །ལེགས་གྲགས་ཞེས་བྱ་བ་ནི་ཀུན་གྱིས་ཤེས་པ་སྟེ། དེ་ནི་དོན་མི་གསལ་བ་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་ཞེས་བྱ་བ་ནི་བཤད་མ་ཐག་པའོ། །རྣམ་པར་དབྱེ་བ་སྨྲ་བར་གྱིས་ཞེས་བྱ་བར་
[127b.4]སྦྱར་ཏེ། རྣམ་པར་དབྱེ་བ་ནི་ཐ་དད་པ་ཉིད་དོ། །དོན་གང་ལས་དེ་སྐད་དུ་གསུངས་ཞེས་བྱ་བའི་དོན་ཏེ། འབོད་དེ་སྨྲ་བར་གྱིས་ཞེས་སྦྱར་བར་བྱའོ། །འདི་ལ་དོན་ནི་གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་ཇི་སྙེད་ཡོད་པ་དང་དེ་དག་གི་རྣམ་པར་དབྱེ་བ་ཇི་ལྟ་བ་
[127b.5]བཞིན་དེ་ནི་ཀུན་ལ་གྲགས་ཏེ། དེ་ལས་ཟབ་པ་ཅི་ཡང་མེད་པས་དེ་ནི་གསོལ་བ་ཉིད་ལས་དེ་ཁོ་བོ་ལ་འབོད་དེ་སྨྲོས་ཤིག་ཅེས་བྱ་བ་ཡིན་ནོ། །འདི་ལ་ལན་ནི་འདི་ཡིན་ཏེ། དེ་ནི་ལས་བརྒྱ་རྩ་གཅིག་གི་དབང་དུ་མཛད་ནས་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། ལས་དུ་ཞིག་
[127b.6]གིས་ལས་ཐམས་ཅད་བསྡུས་ལགས། བཅོམ་ལྡན་འདས་ཀྱིས་བཀའ་སྩལ་པ། གསུམ་གྱིས་ཏེ། གསོལ་བ་དང་ལས་དང་། གསོལ་བ་དང་གཉིས་དང་། གསོལ་བ་དང་བཞིས་སོ། །བཙུན་པ་བཅོམ་ལྡན་འདས་ཀྱིས་ལས་བརྒྱ་རྩ་གཅིག་བཀའ་སྩལ་པ་གང་ལགས་པ། དེ་
[127b.7]ལ་གསོལ་བའི་ལས་ཀྱིས་ནི་དུ་ཞིག་བསྡུས་ལ། གསོལ་བ་དང་གཉིས་ཀྱི་ལས་ཀྱིས་ནི་དུ་ཞིག་བསྡུས། གསོལ་བ་དང་བཞིའི་ལས་ཀྱིས་ནི་དུ་ཞིག་བསྡུས་ལགས། བཅོམ་ལྡན་འདས་ཀྱིས་བཀའ་སྩལ་པ། གསོལ་བའི་ལས་ནི་ཉི་ཤུ་རྩ་བཞིའོ། །གསོལ་བ་དང་གཉིས་ཀྱི་ལས་ནི་
[128a]
[128a.1]བཞི་བཅུ་རྩ་བདུན་ནོ། །གསོལ་བ་དང་བཞིའི་ལས་ནི་སུམ་ཅུའོ་ཞེས་བྱ་བ་ཡིན་ནོ། །འདི་དག་ནི་རྣམ་པར་དབྱེ་བ་ཡང་མདོ་བྱེད་པས་བཤད་དེ། གསང་དང་ནང་དུ་དྲི་ཕྱིར་དང་། །གསོ་སྦྱོང་དེ་ལ་ལྟུང་བཅས་དང་། །དེ་ལ་དགེ་འདུན་ཡིད་གཉིས་དང་། །
[128a.2]རྩོད་དང་ངེས་ཉིད་མ་ཡིན་དང་། །དེ་ཡི་དོན་དུ་ལྔ་པོ་དག །ཐམས་ཅད་དགག་དབྱེར་གཏོགས་པ་ཡིན། །དབྱར་གནས་ཁས་བླངས་ཉིད་དང་ནི། །ཤི་བའི་རྫས་དང་ནོར་འདྲ་དང་། །ཆོས་གོས་སྦྱིན་པར་བྱ་བ་དང་། །གནས་ངན་ལེན་ནི་བརྗོད་པ་དང་། །གྲངས་སུ་གཞུག་པ་བཞི་
[128a.3]དག་དང་། །ཁྱིམ་གྱི་སྡོམ་དང་དེ་གཞིག་དང་། །ལྷུང་བཟེད་ཁས་བུབ་བྱ་བ་དང་། །དེ་ཉིད་བཟློག་པར་བྱ་བ་དག །གསོལ་བ་འབའ་ཞིག་ལས་ཡིན་ནོ། །གནས་དང་མཚམས་ནི་གཉིས་པོ་དང་། །མི་འབྲལ་སྨྱོས་དང་དགག་དབྱེ་དང་། །གནས་མལ་སྟོབས་པར་བྱེད་པ་དང་། །རུང་བའི་
[128a.4]ས་གཞི་བསྐོ་བ་དང་། །སྲ་བརྐྱང་དང་ནི་དེ་གདིང་དང་། །སྤོང་དང་ལག་གི་བླ་དང་ནི། །གནས་ཁང་བསྐོ་ལ་སོགས་པ་དང་། །གཟུ་དང་གསལ་དང་སྦེད་པ་དང་། །ཚུལ་ཤིང་འདྲིམ་པར་བྱེད་པ་དང་། །ཁང་པ་ཁང་ཆེན་བསྟན་པ་དང་། །གླེང་དང་འབྲལ་བར་མི་འགྱུར་དང་། །སྟན་དང་ལྷུང་
[128a.5]བཟེད་འདྲི་མ་པ་དང་། །མ་དང་གོ་བྱར་བྱ་བ་དང་། །སྟོན་པ་དང་ནི་ནགས་ཉུལ་དང་། །ཕྱག་མི་བྱ་དང་མང་ཕྱིར་དང་། །ཁར་བ་དྲ་བའི་ཕྱིར་དང་ནི། །རྙེད་པ་གཅིག་ཏུ་བྱ་ཕྱིར་དང་། །བསླབ་པ་སྦྱིན་དང་ཉེར་གནས་དང་། །བུ་དང་ཉེ་དུ་ཕྱིར་འགྲོ་དག །གསོལ་དང་གཉིས་ཀྱི་ལས་ཡིན་ནོ། །
[128a.6]བསྙེན་པར་རྫོགས་པར་བྱ་བ་དང་། །མུ་སྟེགས་གནས་དང་མཚམས་དགྲོལ་དང་། །མཐུན་སྦྱིན་གསོ་སྦྱོང་བདུན་པོ་དང་། །བརྒྱད་དང་དྲན་དང་མ་སྨྱོས་དང་། །དེ་ཉིད་ཚོལ་དུ་གཞུག་པ་དང་། །བསྒོ་བར་བྱ་བ་རྣམས་དང་ནི། །ཉམས་པ་སྦྱིན་པར་བྱ་བ་དག །གསོལ་དང་བཞི་ཡི་ལས་ཡིན་ནོ། །
[128a.7]འདི་ཉིད་ལ་བརྒལ་བ་དང་ལན་དུ་བཅས་པའི་ཚིག་ལེའུར་བྱས་པ་དག་ཅིག་ཀྱང་ཡོད་དོ། །ཁོ་བོས་བྱས་པའི་ལས་བརྒྱ་རྩ་གཅིག་རྣམ་པར་དབྱེ་བ་ཡོད་པས་དེ་ཡང་བལྟ་བར་བྱའོ། །གཞུང་མངས་ཀྱིས་དོགས་ནས་འདིར་ནི་ཉེ་བར་མ་བཀོད་དོ། །ཚིག་ཏུ་ཡང་ནི་མི་སྨྲ་ལ། །ཞེས་བྱ་བ་ལ་སོགས་པ་
[128b]
[128b.1]ལ། ཚིག་ཏུ་སྨྲ་བ་ནི་ཚིག་ཏུ་བརྗོད་པའོ། །མི་སྨྲ་ལ་ཞེས་བྱ་ནི་དགག་པའོ། །ལུས་ཀྱིས་རྩོལ་བར་མི་བྱེད་པ། །ཞེས་བྱ་བར་སྦྱར་ཏེ། འང་ཞེས་བྱ་བ་ནི་བསྡུ་བའོ། །མི་བྱེད་པ་ནི་དགག་པའོ། །ལུས་ཀྱིས་རྩོལ་བ་ནི་ལུས་ཀྱིས་བྱེད་པའོ། །ཕས་ཕམ་པ་འབྱུང་བར་འགྱུར་བ་ཇི་ལྟ་བུ་ཡིན་
[128b.2]ཞེས་བྱ་བར་སྦྱར་རོ། །འདི་ལ་དོན་ནི་ཕས་ཕམ་པར་འགྱུར་བ་ནི་ཡང་ན་ནི་ཚིག་རྣམ་བཞག་སྟེ། དཔེར་ན་བླ་མ་སྨྲ་བ་ལྟ་བུའོ། །ཡང་ན་ལུས་ཀྱིས་བྱེད་པ་སྟེ། དཔེར་ན་མི་ཚངས་པར་སྤྱོད་པ་ལྟ་བུ་ཡིན་ནོ། །འོན་ཀྱང་ལུས་དང་ངག་གི་བྱེད་པ་མེད་པར་དེ་འབྱུང་ངམ་མི་འབྱུང་བ་ཇི་ལྟ་བ་བཞིན་དུ་ཁོ་བོ་ལ་
[128b.3]སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་ལན་ནི་འདི་ཡིན་ཏེ། ཕས་ཕམ་པར་འགྱུར་བ་བཅབས་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་ཚིག་ཏུ་ཡང་མི་སྨྲ་ལུས་ཀྱིས་རྩོལ་བ་ཡང་མི་བགྱིད་པར་འོན་ཀྱང་དགེ་སློང་མ་མ་ལགས་པར་
[128b.4]འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་མས་དགེ་སློང་མ་ཞིག་ཕས་ཕམ་པར་འགྱུར་བའི་ལྟུང་བ་བྱུང་བ་མཐོང་ལ། དེ་བཅབས་ཏེ་སྐྱ་རེངས་ཤར་ན་ཕས་ཕམ་པར་འགྱུར་རོ་ཞེས་བྱ་བ་ཡིན་ནོ། །ལྟུང་བའི་རིས་བྱས་ན་
[128b.5]ནི་ཞེས་བྱ་བ་ལ་སོགས་པ་ལ་བྱས་ན་ཞེས་བྱ་བ་ནི་ལྷག་པར་སྤྱད་ནས་སོ། །ནི་ཞེས་བྱ་བ་ནི་མ་བཟོད་པའོ། །ཡང་ནི་ཞེས་བྱ་བ་ནི་བསྡུ་བའོ། །མི་བྱེད་ཅིང་ཞེས་བྱ་བ་ནི་དགག་པའོ། །ཕྱིར་འཆོས་པ་ནི་ལྡོག་པའི་བསམ་པའོ། །དག་པར་ཞེས་བྱ་བ་ནི་ལྟུང་བ་མེད་པར་རོ། །འདི་
[128b.6]ལ་དོན་ནི་ཉེས་བྱས་ཙམ་བྱས་ནས་གལ་ཏེ་ཕྱིར་མ་བཅོས་ན། དེའི་ཚེ་དེ་ངེས་པར་མ་དག་པ་ཞེས་བྱས་ན་ལྟུང་བའི་རིས་ལྔ་རིལ་འབྱུང་ལ་མ་དག་པར་འགྱུར་བ་ལྟ་སྨོས་ཀྱང་ཅི་དགོས་ཏེ། སྲིད་པ་ཡང་མེད་པ་ཉིད་ནའོ། །འོན་ཀྱང་བཅོམ་ལྡན་འདས་ཀྱིས་དག་པ་ཉིད་དུ་གསུངས་སོ་ཞེས་བྱ་བ་
[128b.7]དེ་ཇི་ལྟ་བུ་ཉིད་དུ་ཡིན་ན། བརྗོད་པར་བྱའོ་ཞེས་བྱ་བ་འདི་ཡིན་ནོ། །འདི་ལ་བཤད་པ་ནི་འདི་ཡིན་ཏེ། མཚན་གྱུར་པ་ལ་དགོངས་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་དགེ་སློང་མས་ཐུན་མོང་མ་ལགས་པའི་ལྟུང་བ་རིས་ལྔ་བྱུང་ལ། འཆགས་པར་ཡང་
[129a]
[129a.1]མི་བགྱིད། ཕྱིར་འཆོས་པར་ཡང་མི་བགྱིད་པར་ལངས་པར་ཞེས་ཀྱང་བརྗོད་ལ། ལྟུང་བ་མ་མཆིས་པར་ཡང་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། མཚན་གྱུར་ནའོ། །འདི་ལ་གཞུང་གཞན་ཡང་དགེ་
[129a.2]སློང་ཐུན་མོང་མ་ལགས་པའི་ལྟུང་བ་རིས་ལྔ་ཕྱུང་ལ་དེ་མཚན་གྱུར་ནས་དགེ་སློང་དུ་རེད་ན་ལངས་པ་ཞེས་བརྗོད་པར་བྱའོ་ཞེས་བྱ་བ་ཡིན་ནོ། །དེ་བཞིན་དུ་མདོ་བྱེད་པས་ཀྱང་ཞིང་མ་ཡིན་པ་ཉིད་ལ་ནི་ཉམས་སོ་ཞེས་བཤད་དོ། །གཞན་གྱིས་ཕས་ཕམ་པར་འགྱུར་ལ་ཞེས་བྱ་བ་ལ་སོགས་པ་
[129a.3]ལ། གཞན་གྱིས་ཞེས་བྱ་བ་ནི་མངོན་པར་འདོད་པའི་དགེ་སློང་ལ་སོགས་པ་འགའ་ཞིག་གིས་སོ། །དེ་ནི་ཞེས་བྱ་བ་ནི་སྨོས་མ་ཐག་པའོ། །ད་ལྟར་ཞེས་བྱ་བ་ནི་ངའོ། །འདི་ལ་དོན་ནི་དགེ་སློང་བདག་ཉིད་གྱིས་ཕས་ཕམ་པར་འགྱུར་བ་ལྷག་པར་སྤྱད་ན། ཕས་ཕམ་པར་འགྱུར་བའི་ལྟུང་བ་
[129a.4]རྣམ་པར་གཞག་གི། གཞན་གྱིས་བྱས་ན་གཞན་ལ་ལྟུང་བ་འབྱུང་བ་མ་ཡིན་ན་ཞེས་བྱ་བ་འདི་ཡིན་ཏེ། འདི་ནི་ཐེ་ཚོམ་ཅན་གྱི་བློ་གྲོས་ཅན་འདྲི་བ་ཡིན་ནོ། །འདི་ལ་ལན་ནི་འདི་ཡིན་ཏེ། དགེ་སློང་མ་ལ་བརྟེན་ནས་དེ་སྐད་དུ་གསུངས་པ་ཡིན་ནོ། །དེ་བཞིན་དུ་འདིར་གཞུང་ནི། བཙུན་པ་གཞན་
[129a.5]གྱིས་མི་ཚངས་པར་སྤྱད་པ་བགྱིས་ལ། གཞན་གྱིས་ཕས་ཕམ་པར་འགྱུར་བ་ལྟ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། འདི་ལྟར་དགེ་སློང་མས་དགེ་སློང་མ་ཞིག་མི་ཚངས་པར་སྤྱོད་པ་བྱེད་པ་མཐོང་ལ། དེ་བཅབས་ནས་སྐྱ་རེངས་ཤར་ན་ཕས་ཕམ་པར་
[129a.6]འགྱུར་རོ་ཞེས་བྱ་བ་ཡིན་ནོ། །ལྟུང་བ་ཀུན་ལ་གང་གིས་ནི། །ཞེས་བྱ་བ་ལ་སོགས་པ་ལ། ལྟུང་བ་ཀུན་ལ་ཞེས་བྱ་བ་ནི་ལྟུང་བའི་རིས་ལྔ་པོའོ། །གང་གིས་ཞེས་བྱ་བ་ནི་རྒྱུ་གང་གིས་སོ། །བསྟན་པ་ནི་ཐ་སྙད་དུ་བྱ་བའོ། །བསྡུ་བ་ནི་ཁོངས་སུ་བསྡུ་བའོ། །འགྱུར་ཞེས་བྱ་བ་ནི་
[129a.7]བཏུབ་པའོ། །ངག་གིས་ཀུན་ནས་བསླང་བ་ནི་ངག་ལ་བརྟེན་ནས་བྱུང་བའོ། །ཁ་ན་མ་ཐོ་བ་ཆེན་པོ་ནི་ཉེས་པ་ཆེན་པོ་སྐྱེད་པ་སྟེ། དམྱལ་བ་དག་ཏུ་དུས་མཐའ་ཡས་པ་སྡུག་བསྔལ་བ་སྐྱེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །ལུས་ཀྱི་ཞེས་བྱ་བ་ནི་ལུས་ལ་བརྟེན་ནས་ཞེས་བྱ་བ་སྟེ། ཁ་ན་མ་
[129b]
[129b.1]ཐོ་བ་ཆེན་པོའི་ལྟུང་བ་གང་ཡིན་པ་ཞེས་སྦྱར་བར་བྱའོ། །དགེ་འདུན་གང་ཟག་ལས་བྱུང་ཞེས་བྱ་བ་ནི་དགེ་འདུན་ལ་བརྟེན་ནས་བྱུང་བ་སྟེ། དགེ་འདུན་གྱིས་ཀུན་ནས་བསླང་ཞེས་བྱ་བའི་དོན་ཏོ། །དེ་བཞིན་དུ་གང་ཟག་ལས་བྱུང་བ་ནི་གང་ཟག་ལ་བརྟེན་ནས་བྱུང་བ་སྟེ། གང་ཟག་གིས་
[129b.2]ཀུན་ནས་བསླང་བ་ཞེས་བྱ་བའི་ཐ་ཚིག་གོ། །འདོད་ཅེས་བྱ་བ་ནི་མངོན་པར་འདོད་པ་སྟེ། མངོན་པར་བསམས་ཞེས་བཤད་པར་འགྱུར་རོ། །སྲོག་གཅོད་ཅེས་བྱ་བ་ནི་སྲོག་གཅོད་པས་ཀུན་ནས་བསླང་བ་སྟེ། ཐམས་ཅད་དུ་ཁ་ན་མ་ཐོ་བ་ཆེན་པོ་གང་ཡིན་ཞེས་བྱ་བར་སྦྱར་རོ། །དང་ཞེས་བྱ་བའི་
[129b.3]སྒྲ་ཡང་ཐམས་ཅད་དུ་བསྡུ་བ་ཡིན་ཏེ། གསལ་བར་བདག་ལ་སྨྲ་བར་གྱིས་ཤིག་ཅེས་བྱ་བར་སྦྱར་རོ། །འདི་ལ་དོན་ནི་རྒྱུ་གང་གིས་ལྟུང་བ་ཐམས་ཅད་ཀྱི་བསྟན་པ་དང་དེ་བཞིན་དུ་བསྡུ་བ་རྣམ་པར་གཞག །ངག་གིས་ཀུན་ནས་བསླང་བའི་ལྟུང་བ་ཁ་ན་མ་ཐོ་བ་ཆེན་པོ་ནི་གང་ཡིན། དེ་བཞིན་དུ་
[129b.4]ལུས་ཀྱིས་ཀུན་ནས་བསླང་བའི་ནང་ནས་ཁ་ན་མ་ཐོ་བ་ཆེན་པོ་ནི་གང་ཡིན། ཕྲ་མས་ཀུན་ནས་བསླང་བ་དང་། གང་ཟག་གིས་ཀུན་ནས་བསླང་བ་དང་། དགེ་འདུན་གྱིས་ཀུན་ནས་བསླང་བ་དང་། སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་
[129b.5]སྨྲ་བས་ཀུན་ནས་བསླང་བའི་ལྟུང་བ་སྡུག་བསྔལ་དཔག་ཏུ་མེད་པ་སྐྱེད་པར་བྱེད་པ་ནི་གང་ཡིན་པ་དྲིས། དེ་རིམ་པ་གསལ་བ་ཡང་དག་པ་ཇི་ལྟ་བ་བཞིན་དུ་སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། བསྟན་པ་ནི་སྡོམ་པ་མ་ཡིན་པའོ། །བསྡུ་བ་
[129b.6]ཡང་སྡོམ་པ་མ་ཡིན་པའོ། །ངག་གིས་ཀུན་ནས་བསླང་བ་ལ་ནི་དེ་བཞིན་གཤེགས་པ་ལ་མི་སྙན་པར་བརྗོད་པའོ། །ལུས་ཀྱིས་ཀུན་ནས་བསླང་བ་ལ་ནི་ངན་སེམས་ཀྱིས་ཁྲག་འབྱིན་པའོ། །ཕྲ་མས་ཀུན་ནས་བསླང་བ་ལ་ནི་དགེ་འདུན་གྱི་དབྱེན་ནོ། །དགེ་འདུན་གྱིས་ཀུན་ནས་
[129b.7]བསླང་བ་ལ་ནི་དགེ་འདུན་གྱི་དབྱེན་ཉིད་དེ།། གང་ཟག་གིས་ཀུན་ནས་བསླང་བ་ལ་ནི་ཡང་དག་པ་མ་ཡིན་པར་སྐུར་བ་འདེབས་པའོ། །སྲོག་གཅོད་པས་ཀུན་ནས་བསླང་བ་ལ་ནི་རང་སངས་རྒྱས་གསོད་པའོ། །མ་བྱིན་པར་ལེན་པས་ཀུན་ནས་བསླང་བ་ལ་ནི་དགེ་འདུན་གྱི་འདུ་བའི་སྒོ་འཕྲོག་
[130a]
[130a.1]པའོ། །མི་ཚངས་པར་སྤྱོད་པས་ཀུན་ནས་བསླང་བ་ལ་ནི་དགྲ་བཅོམ་མ་མི་ཚངས་པར་སྤྱོད་པས་སུན་འབྱིན་པའོ། །བརྫུན་དུ་སྨྲ་བས་ཀུན་ནས་བསླང་བ་ལ་ནི་ཕྲ་མ་སྨྲ་བའོ། །དེ་བཞིན་དུ་འདིར་གཞུང་གི་དོན་གོ་རིམས་བཞིན་ཏེ། དགེ་སློང་དག་རྒྱུ་
[130a.2]གཅིག་གིས་ལྟུང་བ་ཐམས་ཅད་བསྟན་པ་ཡིན་ཏེ། འདི་ལྟ་སྟེ་སྡོམ་པ་མ་ཡིན་པས་སོ། །འདི་ལ་དོན་ནི་འདི་ཡིན་ཏེ། སྡོམ་པ་མ་ཡིན་པས་ཞེས་བྱ་བ་ནི་མི་ལྡོག་པའི་བསམ་པ་སྟེ། མི་ལྡོག་པའི་བསམ་པ་ཅན་ལ་ནི་བཤགས་པ་ལ་སོགས་པའི་སྒྲུབ་པ་ཡོད་དུ་ཟིན་ཀྱང་ལྟུང་བ་ཡོད་
[130a.3]དོ་ཞེས་བྱ་བར་བསྟན་ཅིང་ཐ་སྙད་གདགས་པ་འཇུག་གོ་ཞེས་བྱ་བའི་ཐ་ཚིག་གོ། །མདོ་བྱེད་པས་ཀྱང་གཞན་ལ་ནི་དེ་དང་བཅས་པའི་བཤགས་པའོ་ཞེས་བཤད་པའི་ཕྱིར་རོ། །རྒྱུ་གཅིག་གིས་ལྟུང་བ་ཐམས་ཅད་བསྡུས་པར་འགྱུར་ཏེ། འདི་ལྟ་སྟེ་སྡོམ་པ་མ་ཡིན་པས་སོ། །འདི་ལ་ཡང་
[130a.4]དོན་ནི་དེ་ཁོ་ནར་ཟད་དོ། །ངག་གིས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་དེ་བཞིན་གཤེགས་པ་ལ་ཡང་དག་པ་མ་ཡིན་པས་མི་སྙན་པར་བརྗོད་པ་གང་ཡིན་པའོ། །ལུས་ཀྱིས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་དེ་བཞིན་
[130a.5]གཤེགས་པ་ལ་ངན་སེམས་ཀྱིས་ཁྲག་འབྱིན་པ་གང་ཡིན་པའོ། །ཕྲ་མས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་དབྱེ་བར་རྩོམ་པ་གང་ཡིན་པའོ། །དགེ་འདུན་གྱིས་ཀུན་ནས་བསླང་བའི་ལྟུང་བ་
[130a.6]གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་འདི་ལྟ་སྟེ་དགེ་འདུན་གྱི་དབྱེན་ནོ། །གང་ཟག་གིས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི། འདི་ལྟ་སྟེ་ཡང་དག་པ་མ་ཡིན་པས་སྐུར་པ་འདེབས་པའོ། །སྲོག་གཅོད་པས་ཀུན་ནས་བསླང་བའི་ལྟུང་བ་གཅིག་
[130a.7]ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་རང་སངས་རྒྱས་གསོད་པ་གང་ཡིན་པའོ། །མ་བྱིན་པར་ལེན་པས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་འདུ་བའི་སྒོ་འཕྲོག་པ་གང་ཡིན་པའོ། །མི་ཚངས་པར་སྤྱོད་པས་
[130b]
[130b.1]ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་ཁ་ན་མ་ཐོ་བ་ཆེ་བ་ནི་མ་དགྲ་བཅོམ་པ་སུན་འབྱིན་པའོ། །བརྫུན་དུ་སྨྲ་བས་ཀུན་ནས་བསླང་བའི་ལྟུང་བ་གཅིག་ཀུན་གྱི་ནང་ནས་སྡིག་པ་ཆེ་བ་ནི་མིའི་ཆོས་བླ་མ་བྱེད་ཅིང་མི་བདོག་བཞིན་དུ་བརྗོད་པའོ་ཞེས་བྱ་བ་ཡིན་ནོ། །འདི་
[130b.2]ལྟར་མཇུག་བསྡུ་བའི་ཐབས་ཀྱིས་དྲི་བ་གཅིག་ཁོ་ན་ཞིག་བཤམ་པའི་རིམ་པས་དྲི་བར་བྱ་བའི་ཕྱིར། མང་དུ་སྨྲ་ཡང་ཅི་ཞིག་དགོས། །ཞེས་བྱ་བ་ལ་སོགས་པ་སྨོས་ཏེ། མང་དུ་སྨྲ་ཞེས་བྱ་བ་ནི་བཤད་མ་ཐག་པའི་ཚུལ་ལམ། འདུལ་བར་གཏོགས་པ་མ་བཤད་པའོ། །
[130b.3]ཅི་ཞིག་དགོས་ཞེས་བྱ་བ་ནི་ཅིར་ཡང་མི་དགོས་པ་ཉིད་དོ་ཞེས་བྱ་བའི་ཐ་ཚིག་གོ། །མདོར་སྡུས་ཤིག་ཅེས་བྱ་བ་ནི་སྤྲོས་པ་དང་བྲལ་བ་སྟེ། གང་གི་ཕྱིར་དྲི་བ་ཟབ་མོ་རྣམས་ཧ་ཅང་ཟབ་མོ་བྱས་ན། ཡུན་རིང་པོ་ཞིག་ཏུ་ཉོན་མོངས་པ་དང་། ཁྱོད་ཁོ་བོ་ལ་མ་རངས་པར་འགྱུར་བ་དེའི་
[130b.4]ཕྱིར། ཁོ་བོས་ཁྱོད་ལ་མདོར་བསྡུས་པའི་ཚིག་གཅིག་ཁོ་ན་ཅིག་སྨྲའོ་ཞེས་བྱ་བའི་དོན་ཏོ། །ཁྲོ་སྤངས་ཞེས་བྱ་བ་ནི་མི་དགའ་བ་ཡོངས་སུ་བཏང་སྟེའོ། །མཛའ་བར་གྱུར་བྱས་ནས་ཞེས་བྱ་བ་ནི་བཤེས་སུ་བྱས་ནས་ཏེ། ཁྲོ་སྤངས་ཕན་པར་འདོད་པས་གཡོ་དང་སྒྱུ་མེད་པས་ཁྱོད་ལ་
[130b.5]སྨྲའི་བརྙས་པར་འདོད་པས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །སྡོམ་པ་ཀུན་ལ་བརྟན་ཞེས་བྱ་བ་ནི། དགེ་བསྙེན་དང་། དགེ་བསྙེན་མ་དང་། དགེ་སྦྱོང་དང་། དགེ་སྦྱོང་མ་དང་། བསྙེན་གནས་ལ་གནས་པ་དག་ལའོ། །ཀུན་མཁྱེན་གྱིས་ཞེས་བྱ་བ་ནི་ཐམས་ཅད་མཁྱེན་
[130b.6]པས་སོ། །སྐྱབས་ཞེས་བྱ་བ་ནི་དཀོན་མཆོག་གསུམ་ལ་སྐྱབས་སུ་འགྲོ་བ་སྟེ། འདིར་ངན་སོང་དམྱལ་བ་ལ་སོགས་པའི་སྡུག་བསྔལ་འཇིགས་པར་འགྱུར་བས་སོ། །དགེ་སློང་ཉིད་ལས་ཞེས་བྱ་བ་ནི་དགེ་སློང་གི་སྡོམ་པ་ལའོ། །གསལ་བར་ཞེས་བྱ་བ་ནི་སལ་སལ་པོར་ཁོ་བོ་ལ་
[130b.7]སྨྲོས་ཤིག་ཅེས་བྱ་བར་སྦྱར་རོ། །འདི་ལ་དོན་ནི་འདུལ་བར་གཏོགས་པའི་དྲི་བ་ཟབ་མོ་གཞན་ཡང་མང་པོ་ཞིག་ཡོད་དེ་དེ་དག་ལ་ཁོ་བོས་ཁྱོད་ལ་དྲི་བ་དྲིས་ན་ཡུན་རིང་མོ་ཞིག་ཏུ་ཉོན་མོངས་པར་འོང་བས། དེའི་ཕྱིར་རེ་ཞིག་ལག་སྤྲད་པས་སྔོན་དུ་འགྲོ་བའི་གནས་པས་ཕན་པར་འདོད་ཅིང་དེའི་ཕྱིར་དགེ་སློང་
[131a]
[131a.1]གི་སྡོམ་པ་ཡང་དག་པར་བླངས་པའི་དུས་ན་ནི། དཀོན་མཆོག་གསུམ་ལ་སྐྱབས་སུ་འགྲོ་བ་མ་གསུངས་ལ། སྐྱབས་སུ་མ་སོང་བ་ལ་མིན་ཞེས་འབྱུང་བས་གཞན་དག་ལ་ནི་གསུངས་ཞེས་བྱ་བའི་དྲི་བ་གཅིག་ཅིག་དྲིས་ཏེ། ཁོ་བོ་ལ་ཡང་དག་པ་ཇི་ལྟ་བ་བཞིན་དུ་
[131a.2]སྨྲོས་ཤིག་ཅེས་བྱ་བ་འདི་ཡིན་ནོ། །འདི་ལ་གཏན་ལ་དབབ་པ་ནི་འདི་ཡིན་ཏེ། བསྙེན་པར་རྫོགས་པ་ཞེས་སྨོས་པས་སྐྱབས་སུ་འགྲོ་བ་གྲུབ་པའི་དབང་དུ་མཛད་ནས་དེ་སྐད་དུ་གསུངས་པ་ཡིན་ཏེ། དེ་བཞིན་དུ་འདིར་གཞུང་ནི། དགེ་འདུན་བཙུན་པ་རྣམས་ཀྱིས་བདག་བསྙེན་པར་རྫོགས་
[131a.3]པར་བྱ་བར་མཛད་དུ་གསོལ། དགེ་འདུན་བཙུན་པ་རྣམས་ཀྱིས་བདག་རྗེས་སུ་གཟུང་དུ་གསོལ་ཞེས་བྱ་བ་ལ་སོགས་པ་ཡིན་ནོ། །དེ་བཞིན་དུ་འགྲེལ་པ་བྱེད་པས་བསྙེན་པར་རྫོགས་ཞེས་བྱ་བའི་སྒྲ་ཁོང་ནས་དེའི་དོན་འགྲུབ་པའི་ཕྱིར་ཏེ། བྱ་བ་མ་ཡིན་པ་ཐམས་ཅད་ལས་ལྡོག་པའི་མཚན་
[131a.4]ཉིད་ཡིན་པའི་ཕྱིར་རོ། །བདག་ཉིད་ཐམས་ཅད་ཀྱིས་མྱ་ངན་ལས་འདས་པ་ཁས་ལེན་པ་ནི་བསྙེན་པར་རྫོགས་པ་སྟེ། འདི་ལྟར་བསྙེན་པར་རྫོགས་པ་ནི་མྱ་ངན་ལས་འདས་པ་ལ་ཁང་བསྙེན་ཏེ་རྣམ་པར་གནས་པ་ཡིན་ནོ་ཞེས་བཤད་དོ། །དེ་བཞིན་དུ་ཡང་ངའི་ཉན་ཐོས་ཚུལ་ཁྲིམས་ལྡན་པ་
[131a.5]དེ་ལ་མཐོ་རིས་ནི་རས་ཡུག་གིས་བར་དུ་ཆོད་པ་ཙམ་མོ། །ཐར་པ་ནི་ཡོལ་བས་ཆོད་པ་ཙམ་མོ་ཞེས་གསུངས་སོ། །ཡང་། རབ་ཏུ་བསྔགས་དང་ནོར་རྙེད་དང་། །ཕ་རོལ་མཐོ་རིས་དགའ་བ་ཡིས། །བདེ་བ་གསུངས་དོན་གཉེར་བྱེད་པ། །བློ་དང་ལྡན་པས་ཚུལ་ཁྲིམས་བསྟེན། །གནས་
[131a.6]གསུམ་དེ་དག་ལེགས་མཐོང་བའི། །མཁས་པས་ཚུལ་ཁྲིམས་བསྟེན་པར་བྱ། །འཕགས་པའི་མཐོང་བའི་ཕུན་ཚོགས་ཏེ། །འཇིག་རྟེན་ན་ནི་ཞི་བ་བསྟེན། །ཞེས་གསུངས་སོ། །དེ་ལྟར་རྣམ་པ་སྣ་ཚོགས་མང་པོ་བརྗོད་པས་གཞན་སྤོབས་པ་མེད་པར་བྱས་ནས་མཇུག་བསྡུ་བ་དང་།
[131a.7]དེ་ལྟས་འདུལ་བ་རྒྱ་མཚོ་ལས། །ཞེས་བྱ་བ་ལ་སོགས་པ་སྨོས་ཏེ། དེ་ལྟས་ཞེས་བྱ་བ་ནི་བཤད་མ་ཐག་པའི་རྣམ་པར་རོ། །བསྡུས་པ་ནི་ཕྱུང་བའོ། །གང་ལས་ཤེ་ན། རྒྱ་མཚོ་ལས་ཞེས་བྱ་བ་སྨོས་ཏེ། འདུལ་བ་རྒྱ་མཚོ་ཆེན་པོ་ལས་སོ། །ཇི་ལྟར་རྒྱ་མཚོ་དེ་གཏིང་དང་ཕ་རོལ་མེད་
[131b]
[131b.1]ཅེས་གྲགས་པ་དེ་བཞིན་དུ། འདུལ་བ་རྒྱ་མཚོ་འདི་ཡང་། བྱུང་བ་དང་བཅའ་བ་དང་། སྔོན་གྱི་གཏམ་དང་། རྟོགས་པ་བརྗོད་པ་དང་། སྐྱེས་པ་རབས་དང་། འཁོར་ལོ་ལྟར་སྦྱར་བ་དང་། མུ་བཞི་པ་ལ་སོགས་པས་གཏིང་དང་མཐའ་མེད་དེ། དེའི་ཕྱིར་རྒྱ་མཚོ་ཉིད་ཀྱིས་ཉེ་བར་
[131b.2]དཔག་གོ། །དེ་ལས་ཇི་ཙམ་ཅིག་བཏུས་ཤེ་ན། དྲི་བ་ཐིགས་པ་ཙམ་ཞེས་བྱ་བ་སྨོས་སོ། །ཐིགས་པ་ཙམ་ནི་ཉུང་ཞིག་སྟེ། ཙམ་ཞེས་བྱ་བ་སྨོས་པས་ནི། བརྟགས་པས་ཧ་ཅང་རྣམ་པ་མང་པོ་བསལ་ཏོ། །བརྒྱ་ཞིག་ཅེས་བྱ་བ་ནི་རྟོགས་པར་དཀའ་བའི་དོན་དྲི་བ་བརྒལ་ཞིང་བརྟག་པ་བརྒྱ་
[131b.3]ཞིག་སྟེ། ཚིགས་སུ་བཅད་པ་བཀོད་པ་དོན་ཡོངས་སུ་རྫོགས་ལ། ཕལ་ཆེ་བ་ལས་བརྩམས་ནས། བརྒྱ་ཞིག་ཅེས་སྨོས་ཏེ། འོན་ཀྱང་ལྟུང་བ་རྣམ་པར་རིག་བྱེད་ཅིག་ཡིན་ནམ། གཟུགས་ཅན་ཞིག་གམ། བསྟན་དུ་ཡོད་པ་ཞིག་གམ་ཞེས་བྱས་ཏེ། དེ་ལྟ་བུ་ལ་སོགས་པ་ཚིགས་
[131b.4]སུ་བཅད་པའི་སྐབས་ན། དྲི་བ་ལྷག་པ་དག་ཀྱང་ཡོད་དོ། །བདག་ནི་ཞེས་བྱ་བ་ནི་འདུལ་བ་དྲི་བའི་ཚིག་ལེའུར་བྱས་པ་བྱེད་པ་བདག་ཉིད་ཡིན་པར་སྟོན་ཏོ། །འབད་དེ་ཞེས་བྱ་བ་ནི་བསྒྲིམས་ནས་སོ། །འདིས་ནི་དྲི་བ་རྣམས་ཟབ་པ་ཉིད་དུ་བསྟན་ཏེ། དོན་ཟབ་མོ་དཔྱད་པར་བྱ་བ་ལ། བདག་
[131b.5]ལྟ་བུ་བློ་རྩིང་པོ་རྣམས་ཀྱིས་བློ་བབ་ཅོལ་དུ་གཏིང་མི་སླེབས་སོ་ཞེས་བྱ་བ་བརྩམས་པའོ། །ཅིའི་ཕྱིར་ཞེ་ན། མ་རངས་ནས་ཞེས་བྱ་བ་སྨོས་ཏེ་མ་མགུ་ནས་སོ། །ཡུལ་གང་ལ་མ་རངས་ཤེ་ན། བརྙས་བྱེད་ལ་ཞེས་བྱ་བ་སྨོས་ཏེ། བརྙས་བྱེད་ཅེས་བྱ་བ་ནི་ཁྱད་དུ་གསོད་པར་བྱེད་པའོ། །འདི་
[131b.6]ལ་དོན་ནི་བདག་ཀྱང་སོ་སོའི་སྐྱེ་བོར་རད་པས་འདུལ་བ་དང་འདུལ་བ་འཛིན་པ་ལ་བརྙས་པར་བྱེད་པས། ཐུགས་ཐུབ་ཅན་ཉིད་གོ་བདག་ཉིད་ཀྱི་ཚོད་ཀྱང་མི་འཛིན་པར། ཇི་ལྟར་གཞན་ལ་བརྙས་པར་བྱེད་སྙམ་ནས་མ་རངས་ཏེ། འདུལ་བ་རྒྱ་མཚོ་ལས་དྲི་བ་ཉུང་ཤས་འདི་བཏུ་བར་བྱས་སོ་
[131b.7]ཞེས་བྱ་བ་ཡིན་ནོ། །ད་ནི་དྲི་བ་བྱེད་པས་བདག་ཉིད་ཀྱི་ཚིག་དང་དོན་ངེས་པར་འཛིན་པར་གཏོགས་པའི་ཉེས་པ་བཤགས་ཤིང་བླ་མ་དག་ལ་ཡང་བཟོད་པ་གསོལ་བ་ནི། ནོངས་བགྱིས་བླ་མས་ཐུགས་རྗེས་ཀྱང་། །ཞེས་བྱ་བ་ལ་སོགས་པ་སྨོས་ཏེ། ནོངས་བགྱིས་ཞེས་བྱ་བ་ནི་དྲི་བ་བྱེད་པས་
[132a]
[132a.1]ཚིག་དང་དོན་དུ་གཏོགས་པའི་ཉེས་བྱས་སོ། །བླ་མས་ཞེས་བྱ་བ་ནི་མཁན་པོ་དང་། །འདུལ་བ་འཛིན་པ། འདུལ་བར་གཏོགས་པའི་དོན་གྱི་རང་གི་ངོ་བོ་རྟོགས་པར་དཀའ་བ་མ་ལུས་པར། རབ་ཏུ་རྣམ་པར་འབྱེད་པའི་སྒོ་ནས། སེམས་དང་སེམས་ལས་བྱུང་བའི་རྒྱུད་གསལ་
[132a.2]བར་བྱས་པ་རྣམས་ཀྱིས་སོ། །བཅོས་ཤིང་ཞེས་བྱ་བ་ནི་དོན་གྱི་བདག་ཉིད་དང་ཚིག་གི་བདག་ཉིད་ཀྱིས་བཅོས་ཤིང་ངོ་། །བཟོད་པ་མཛད་དུ་གསོལ་ཞེས་བྱ་བ་ནི། ཉེས་པ་བཟོད་པར་བྱས་ཏེ། ཉེས་པ་བཀོད་པར་གཏོགས་པའི་ཉེས་པ་བདག་ལ་བཟོད་པ་མཛོད་ཅིག་པའོ། །ཅི་ཚིག་ཙམ་གྱིས་
[132a.3]སམ་ཞེ་ན། ཐུགས་རྗེ་ཞེས་བྱ་བ་སྨོས་ཏེ། ཐུགས་རྗེ་ནི་སྡུག་བསྔལ་དང་སྡུག་བསྔལ་གྱི་རྒྱུ་ལས་དྲང་བར་འདོད་པའི་བརྩེ་བ་སྟེ་ངེས་སོ། །ཀྱང་ཞེས་བྱ་བ་ནི་བསྡུ་བ་སྟེ། བཅོས་པ་འབའ་ཞིག་ཏུ་མ་ཟད་ཀྱི་ཐུགས་རྗེ་རྒྱུར་གྱུར་པས་བཟོད་པ་མཛོད་ཅིག་པ་སྟེ། བདག་ཉིད་ཆེན་པོ་དེ་དག་ཉེས་
[132a.4]པ་དུ་མ་ཞིག་གིས་སྐྱོན་ཆགས་སུ་ཟིན་ཀྱང་། དེ་དག་གིས་བྱས་པའི་ཉེས་པ་ལས་གདོན་པར་འདོད་པས། ཐོག་མར་དྲངས་པའི་སྙིང་རྗེས་སེམས་ཀྱི་རྒྱུད་བརླན་པས་ཉེས་པ་ཆེན་པོ་ཡང་བཟོད་དོ། །དེ་ཉིད་ཀྱི་དོན་གཞན་ཉེ་བར་དགོད་པས་བསྟན་པར་བྱ་བའི་ཕྱིར། མཐོང་བ་རྣམས་ཀྱིས་ལོང་
[132a.5]བ་ནི། །ཞེས་བྱ་བ་ལ་སོགས་པ་སྨོས་ཏེ། མཐོང་བ་རྣམས་ཀྱིས་ཞེས་བྱ་བ་ནི་ཡང་དག་པའི་ལྟ་བ་ཕུན་སུམ་ཚོགས་པ་རྣམས་ཀྱིས་སོ། །ལོང་བ་ནི་ཤེས་རབ་དང་བྲལ་བ་སྟེ། ལོང་བ་དང་འདྲ་བར་ལོང་བ་ཡིན་པས་སོ། །དམ་པའི་ལམ་ཞེས་བྱ་བ་ནི་ཡང་དག་པའི་ལམ་ལའོ། །ཅི་ཞེས་བྱ་བ་ནི་
[132a.6]དྲི་བའོ། །མི་གཟུང་བ་ཞེས་བྱ་བ་ནི་མི་དགོད་པ་སྟེ། དམ་པའི་ལམ་ལ་དགོད་པར་བྱ་བ་ཉིད་དོ་སྙམ་དུ་བསམས་པའོ། །འདི་ལ་དོན་གྱི་ཕྱོགས་གང་ན་གང་ཟག་འདུལ་བ་འཛིན་པ་གནས་པའི་ཕྱོགས་དེ་སྣང་བར་འགྱུར་བར་སྣང་ངོ་། །གསལ་བར་འགྱུར་བ་དང་། རབ་ཏུ་གསལ་བར་འགྱུར་བར་སྣང་ངོ་ཞེས་
[132a.7]གསུངས་པས། བླ་མ་མི་ཤེས་པའི་མུན་པའི་རབ་རིབ་ཀྱི་ལིང་ཏོག་གི་ཚོགས་དང་རྣམ་པར་བྲལ་བ། རིག་པ་ཁ་ན་མ་ཐོ་བ་མེད་པས་གསལ་བར་བྱས་པའི་མིག་ཅན་རྣམས་ཀྱི་འདུལ་བར་གཏོགས་པའི་དོན་གྱི་རང་གི་ངོ་བོ་མཐུན་པ་དང་། མི་མཐུན་པར་རབ་ཏུ་སྟོན་པ་ལ། བརྩོན་པ་ཉིད་ཀྱིས་
[132b]
[132b.1]འཇིག་རྟེན་གྱི་མིག་ཏུ་གྱུར་པ་ཡིན་ལ། དབང་གིས་སྔ་ཕྱི་བརྟག་པའི་མིག་དང་བྲལ་བས་ལོང་བ་ལྟ་བུ་སྟེ། དེ་བས་ན་མ་རིག་པའི་མུན་པས་དྲི་མ་ཅན་དུ་བྱས་པའི་ཡིད་དང་ལྡན་པ་དག་དམ་པ་མ་ཡིན་པའི་ལམ་ལས་བཟློག་སྟེ། ལོང་བས་ཐག་རིང་པོ་དང་ཕྲ་བ་དང་། བསྒྲིབས་པ་
[132b.2]མི་མཐོང་བ་བཞིན་དུ་ལམ་དམ་པ་ལ་ཤོག་ཤིག་ཅེས་བྱ་བ་འདི་ཡིན་ནོ། །ད་ནི་འདུལ་བ་དྲི་བའི་ཚིག་ལེའུར་བྱས་པས་ཀུན་ནས་བསླང་བའི་དགེ་བ་མངོན་པར་འདོད་པའི་འབྲས་བུའི་ཁྱད་པར་དུ་ཡོངས་སུ་བསྔོ་བར་བྱ་བ་འདུལ་བའི་དྲི་བ་རྣམས་བྱས་ནས་ཞེས་བྱ་བ་ལ་སོགས་པ་སྨོས་སོ། །འདུལ་
[132b.3]བ་དྲི་བ་རྣམས་ཞེས་བྱ་བ་ནི་འདུལ་བར་གཏོགས་པའི་དྲི་བ་ནི་འདུལ་བའི་དྲི་བ་སྟེ། ཆོས་མངོན་པར་གཏོགས་པའི་དྲི་བ་དག་ཀྱང་ཡོད་པས་དེའི་ཕྱིར་འདུལ་བའི་ཞེས་ཁྱད་པར་དུ་བྱས་སོ། །བྱས་ནས་ཞེས་བྱ་བ་ནི་བརྩམས་ནས་སམ་སྨྲས་ནས་སོ། །དགེ་བ་ནི་དགེ་ལེགས་སོ། །དཀར་པོ་ནི་དཀར་
[132b.4]བའོ། །ཇི་ལྟ་བུ་ཞིག་ཅེ་ན། ཟླ་བ་ལྟ་བུར་ཞེས་བྱ་བ་སྨོས་ཏེ་ཟླ་བ་འདྲ་བའོ། །དྲི་མ་མེད་པ་ཞེས་བྱ་བ་ནི་ཚིག་སྟེ་དགེ་བ་དེས་སོ། །འགྲོ་བ་ནི་ཁམས་གསུམ་པའོ། །རྟག་ཏུ་ཞེས་བྱ་བ་ནི་དུས་ཐམས་ཅད་དུའོ། །དགེ་བ་ཞེས་བྱ་བ་ནི་བཀྲ་ཤིས་པར་རོ། །ཤོག་ཅེས་བྱ་བ་ནི་གྱུར་ཅིག་པའོ། །
[132b.5]འདི་ལ་དོན་ནི་བདག་གིས་འདུལ་བ་དྲི་བའི་ཚིག་ལེའུར་བྱས་པ་བསྡེབས་ནས། བསོད་ནམས་སྟོན་ཁའི་ཟླ་བའི་འོད་ཟེར་ལྟ་བུར་ཤིན་ཏུ་དཀར་བ་བསྒྲུབས་པ་དེས་ཁམས་གསུམ་པའི་འགྲོ་བ་འདིའི་ཉོན་མོངས་པ་ཐམས་ཅད་རྣམ་པར་ཟློག་པར་གྱུར་ཅིག་ཅེས་བྱ་བ་ཡིན་ནོ། །བདག་གིས་
[132b.6]འདུལ་བའི་དྲི་བ་ནི། །བསྡུས་པ་རྣམ་པར་ཕྱེ་ནས་གང་། །དགེ་བ་ཐོབ་པ་དེ་ཡིས་ནི། །འཇིག་རྟེན་དགེ་བཤེས་བྱེད་པར་ཤོག །འདུལ་བ་དྲི་བའི་ཚིག་ལེའུར་བྱས་པ་ལྔ་པའི་གཏན་ལ་དབབ་པ་རྫོགས་ཏེ། འདུལ་བ་དྲི་བའི་ཚིག་ལེའུར་བྱས་པའི་གཏན་ལ་དབབ་པ། སློབ་དཔོན་མདོ་སྡེ་
[132b.7]འཛིན་པ་ཀ་ལྱཱ་ཎ་མི་ཏྲས་མཛད་པ་རྫོགས་སོ།། །།གལ་ཏེ་བདག་ནི་རྨོངས་པ་ཡིས། །ལན་ཞིག་ལེགས་པར་མ་ཐེབས་ན། །འདི་ནི་ཕྱོགས་ཙམ་བསྟན་པར་བྱས། །མཁས་པས་བདེ་ལེགས་གདབ་ཏུ་གསོལ། །སྡུག་ཅིང་གདུང་བ་སེལ་བྱེད་པ། །ཇི་ལྟར་འདོད་པའི་འབྲས་བུ་སྟེར། །
[133a]
[133a.1]གྲིབ་མ་སྟུག་པོའི་ཤིང་མཆོག་ལྟར། །གཞན་དོན་དགའ་བའི་ཕྱིར་འཁྲུངས་པ། །ཀུན་དགའ་གོ་ཆས་བདག་ལ་ནི། །ཤིན་ཏུ་བཅོལ་ཏེ་དེ་ཡི་ཕྱིར། །ཅི་དྲན་བ་ཞིག་འབད་དེ་བྱས། །ང་རྒྱལ་གྱི་ནི་ཕྱིར་མ་ཡིན། །རྒྱ་གར་གྱི་མཁན་པོ་དྷརྨཱ་ཀ་ར་དང་། ཞུ་ཆེན་གྱི་
[133a.2]ལོ་ཙཱ་བ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། ཤློ་ཀ་སྟོང་དྲུག་བརྒྱ་དྲུག་ཅུ་རྩ་བཞི་ཡོད་དོ།། {T4136}༄༅། །རྒྱ་གར་སྐད་དུ། བི་ན་ཡ་སྟོཏྟྲ། བོད་སྐད་དུ། འདུལ་བ་ལ་བསྟོད་པ། དཀོན་མཆོག་གསུམ་ལ་ཕྱག་འཚལ་ལོ། །དུལ་བ་རྒྱལ་
[133a.3]པོ་རྗེ་ཡི་རིགས་སུ་འཁྲུངས། །སློབ་མ་འདུལ་མཛད་ཉེས་པ་རབ་ཐུལ་བ། །སངས་རྒྱས་འདུལ་བའི་གཙོ་ལ་ཕྱག་འཚལ་ཏེ། །འདུལ་བའི་བསྔགས་པ་ཅུང་ཟད་བརྗོད་པར་བྱ། །ཕ་རོལ་མ་མཐོང་གཏིང་རྟོགས་མ་གྱུར་ཅིང་། །གླགས་པའི་མུན་ནག་སློབ་དཔོན་ཚོགས་རྣམས་ཀྱི། །
[133a.4]དབྱེ་བ་ཐ་དད་འདུལ་བ་རྒྱ་མཚོ་ལ། །ཡོན་ཏན་ཀུན་བསྟོད་རྩོལ་བློ་བདག་ལ་མེད། །ཇི་ལྟར་འདི་ན་ཤིང་རྩ་གཙོ་བོ་སྟེ། །རྣམ་པར་འཕེལ་དང་ཀུན་འཛིན་གཉིས་ཀྱི་གཞི། །དེ་བཞིན་དམ་ཆོས་ཚོགས་རྣམས་ཀུན་གྱི་ཡང་། །རྒྱུ་དང་རྩ་བ་འདུལ་བ་ཡིན་པར་གསུངས། །ཇི་ལྟར་ས་ནི་
[133a.5]སྐྱེ་དགུ་རྣམས་ཀྱི་གཞི། །དེ་ལས་འབྲུ་རྣམས་སྐྱེ་བར་འགྱུར་བ་ལྟར། །དེ་བཞིན་འདུལ་བའང་སྡོམ་བརྩོན་རྣམས་ཀྱི་གཞི། །དེ་བཞིན་དེ་ལས་བསོད་ནམས་རྣམས་ཀྱང་སྐྱེ། །ཚུལ་ཁྲིམས་ཡོན་ཏན་རྣམས་ཀྱི་གནས་སུ་དགོངས། །དེ་ཡི་གནས་ནི་འདུལ་བ་ཡིན་པར་གསུངས། །
[133a.6]འདི་ལ་གནས་པར་གྱུར་ན་མཐར་ཕྱིན་འགྱུར། །འདི་ལ་མི་གནས་མཐར་ཕྱིན་ག་ལ་འགྱུར། །ཇི་ལྟར་ཆུ་ལོན་མི་ཕྱེད་སྲ་པ་ཡིས། །ཆུ་ཀླུང་ཆེ་ཡང་བཟློག་པར་འགྱུར་བ་ལྟར། །དེ་བཞིན་འདུལ་བ་འཕགས་པའི་ཆུ་ལོན་འདིས། །ཚུལ་ཁྲིམས་འཆལ་བའི་ཆུ་ཀླུང་བཟློག་པར་འགྱུར།
[133a.7]སངས་རྒྱས་རྣམས་དང་རང་རྒྱལ་རྣམས་ཀྱིས་ཀྱང་། །བྱང་ཆུབ་གང་བརྙེས་ཐུབ་སློབ་རྣམ་དག་པའི། །སེམས་ཅན་དགྲ་བཅོམ་ཡོན་ཏན་ལྡན་པ་རྣམས། །དེ་ལའང་རྒྱུ་ནི་འདུལ་བ་ཡིན་པར་གསུངས། །ཇི་སྲིད་འགྲོ་འདིར་རྒྱལ་བ་ཐམས་ཅད་ཀྱི། །མཛོད་མཆོག་འདུལ་བ་རྫོགས་པ་
[133b]
[133b.1]འདི་གནས་པ། །དེ་སྲིད་ཆོས་སྒྲོན་འདི་ནི་གནས་འགྱུར་ཞིང་། །བཟློག་པར་གྱུར་ན་ཞི་བ་ཐོབ་པར་འགྱུར། །སངས་རྒྱས་མི་བཞུགས་འཇིག་རྟེན་ཚིགས་བཅད་དང་། །མདོ་སྡེ་ཡན་ལག་དེ་དང་དེ་དག་སྤྱོད། །བསླབ་འཇུག་མེད་ན་འདུལ་བའང་མེད་འགྱུར་བས། །དེ་ཕྱིར་རྒྱལ་བ་དག་
[133b.2]པས་ཆེས་འདི་དཀོན། །འཇོག་བྲལ་སེམས་གླང་ལྕགས་ཀྱུ་འདི་ཡིན་ཏེ། གདུལ་བྱ་མ་དུལ་བ་ཡི་སྲབ་འདི་ཡིན། །ར་བའི་མཚམས་ཀྱི་འོབས་དང་འདྲ་བ་སྟེ། །ཟག་པ་ཀུན་གྱི་ཆུ་ལོན་འདུལ་བ་ཡིན། །རྒྱལ་བ་སྟོན་པ་དེ་ཡི་བསྟན་བཅོས་དག །མདོ་དང་ཆོས་མངོན་ཡིན་
[133b.3]གསུངས་འདུལ་བ་ནི། །སྟོན་དང་བསྟན་བཅོས་དངོས་ཡིན་དེ་ཡི་ཕྱིར། །གཉིས་གྱུར་ཕྱག་བྱས་སངས་རྒྱས་ཆོས་གཅིག་བཞིན། །གང་ལ་བརྟེན་ཏེ་གནས་པའི་སངས་རྒྱས་རྣམས། །དེ་ལ་གུས་བཅས་ཞེ་སར་བཅས་འགྱུར་ཞིང་། །དེ་ནི་མགོན་པས་མགོན་ཡིན་སྐྱབས་གནས་
[133b.4]ཡིན། །དེ་ཕྱིར་རབ་བསྒྲིམས་འདུལ་ལ་ཕྱག་འཚོལ་ཅིག །གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་འཐོབ། །སྨྱིག་ཚལ་བྲེགས་པས་ཨ་མྲའི་ཚལ་ཉམས་བཞིན། །འདི་ན་ལ་ལས་
[133b.5]རྒྱལ་བུའི་ཚིག་ཆེན་ཡང་། །བཟླས་ན་ལན་འགའ་ཆད་པ་ཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་བཟླས་བྱས་ན། །དུད་འགྲོར་འགྲོ་འགྱུར་ཨེ་ལའི་འདབ་ཀླུ་བཞིན། །སོ་སོར་ཐར་བྱ་གང་ཡིན་པ། །སངས་རྒྱས་འདུལ་བ་གང་ཆེན་མཚོ། །གཏིང་མཐའ་མེད་པ་ཐམས་
[133b.6]ཅད་ཀྱི། །གནས་པའི་སྙིང་དང་སྙིང་པོ་ཡིན། །འདི་ནི་དམ་ཆོས་རྒྱལ་པོ་ཡི། །ཆོས་ཀུན་གྱི་ནི་འདྲེན་པ་མཆོག །འདི་ནི་དགེ་སློང་ཚོང་ཚོགས་ཀྱི། །བསླབ་ཟོང་ཚོང་ཁང་ཆེན་པོ་ཡིན། །ཚུལ་ཁྲིམས་འཆལ་བས་ཟིན་རྣམས་ཀྱི། །བདུག་པ་རྣམས་སེལ་སྨན་འདི་ཡིན། །
[133b.7]འདི་ནི་ལང་ཚོ་རྣམ་འཁྲུལ་པའི། །རྐང་གཉིས་གཞོན་ནུའི་ལྕགས་ཀྱུ་ཡིན། །མཚོ་བས་ཟབ་པའི་འཁོར་བ་ལས། །སྒྲོལ་བའི་རྒལ་ཐབས་འདི་ཡིན་ཏེ། །འདི་ནི་བཟང་འགྲོར་འགྲོ་བ་ཡི། །ངེས་པའི་ཆུ་ལོན་ཟམ་པ་ཡིན། །འདི་ནི་ཉོན་མོངས་ཕམ་བྱེད་ལམ། །རྒྱལ་པོ་
[134a]
[134a.1]ཡི་ནི་འདྲེན་པ་མཆོག །འདི་ནི་ཐར་པའི་གྲོང་འཇུག་པའི། །ཐེམ་སྐས་གཞི་དང་འདྲ་བར་གནས། །ང་ནི་མྱ་ངན་འདས་གྱུར་ནས། །འདི་ནི་ཁྱེད་ཀྱི་སྟོན་པ་ཞེས། །རང་བྱུང་ཉིད་ཀྱིས་གུས་བྱས་པར། །ནན་ཏན་དགེ་སློང་ཚོགས་མདུན་བསྟོད། །འདུལ་
[134a.2]འདི་སོ་སོར་ཐར་དེ་ཡི། །རྣམ་འབྱེད་ཡིན་པར་དགོངས་པས་ན། །ཐར་འདོད་རྣམས་ཀྱིས་གུས་བྱ་སྟེ། །འདི་ནི་ནན་ཏན་མཉན་པར་བྱ། །འདུལ་བ་ལ་བསྟོད་པ་བཙུན་པ་ཆོས་ཀྱི་ཚོང་དཔོན་གྱིས་མཛད་པ་རྫོགས་སོ།། །།དབང་ཕྱུག་དམ་པའི་མངའ་བདག་དཔལ་ལྷ་བཙན་
[134a.3]པོའི་བཀའ་ལུང་གིས་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཁ་ཆེ་བྱེ་བྲག་ཏུ་སྨྲ་བའི་སློབ་དཔོན་ཛི་ན་མི་ཏྲ་དང་། ཞུ་ཆེན་གྱི་ལོ་ཙཱ་བ་བནྡེ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །{T4137}༄༅༅། །རྒྱ་གར་སྐད་དུ། བི་ན་ཡ་སྟོཏྟྲ་
[134a.4]པ་ད་བྱཱ་ཁྱཱ་ན། བོད་སྐད་དུ། འདུལ་བ་ལ་བསྟོད་པའི་ཚིག་གི་རྣམ་པར་བཤད་པ། དཀོན་མཆོག་གསུམ་ལ་ཕྱག་འཚལ་ལོ། །ཐུབ་པ་སྲིད་རྒྱུན་ཐམས་ཅད་བྲལ་ལ་ཕྱག་འཚལ་ཏེ། །རྣམ་པར་འཆད་འདོད་ཡིད་ལྡན་རྣམ་པར་འབྱེད་པ་ཡི། །ཡུལ་ལ་བསྟོད་པའི་ཉམས་པས་ཡིད་
[134a.5]ཀྱི་ག་གས་བསྐྱེད་པ། །ཡང་དག་རྣམ་བཤད་ཚུལ་གྱིས་ཞི་བ་ཐོབ་པར་བྱ། །སློབ་མ་གུས་བར་བྱས་ཏེ་འདུལ་བ་ཉེན་པ་ལ་ངེས་པར་སྦྱོར་བར་འདོད་པ་ཞིག་གིས་གུས་པ་བསྐྱེད་པའི་ཕྱིར་འདུལ་བའི་ཡོན་ཏན་རྣམ་པར་འབྱེད་པའི་དང་པོར་འདུལ་བ་ལ་བསྟོད་པ། དུལ་བ་རྒྱལ་པོ་རྗེ་
[134a.6]ཡི་རིགས་སུ་འཁྲུངས། །སློབ་མ་འདུལ་མཛད་ཉེས་པ་རབ་ཐུལ་བ། །སངས་རྒྱས་འདུལ་བའི་གཙོ་ལ་ཕྱག་འཚལ་ཏེ། །འདུལ་བའི་བསྔགས་པ་ཅུང་ཟད་བརྗོད་པར་བྱ། །ཞེས་བྱ་བ་ལ་སོགས་པ་བརྩམས་སོ། །དེ་ལ་འདུལ་བའི་ཡོན་ཏན་དག་ནི་བརྗོད་པར་བྱའོ། །དེ་རྟོགས་པས་
[134a.7]འདུལ་བ་ལ་གུས་པའི་དགོས་པའོ། །གུས་པ་དེ་ཡང་བསྟོད་པ་འདིས་བྱེད་པས། །ཐབས་དང་ཐབས་ལས་བྱུང་བའི་ཚུལ་ནི་འབྲེལ་པའོ། །འདུལ་བ་ལ་གུས་པས་ཞུགས་པའི་ཚུལ་ཁྲིམས་ཡོངས་སུ་དག་ན་འཕགས་པའི་ལམ་བསྒོམས་པས་མྱ་ངན་ལས་འདས་པ་ཐོབ་པ་ནི་དགོས་པའི་ཡང་
[134b]
[134b.1]དགོས་པའོ། །དེ་ལ་འདུལ་བ་ཞེས་བྱ་བ་ནི། རང་གི་ཆོས་ལུགས་སུ་གནས་པ་དག་གོ། །རྒྱལ་པོ་ཞེས་བྱ་བ་ནི་མིའི་བདག་པོ་དག་གོ། །དེ་དག་ནི་དུལ་བ་ཡིན་ལ་རྒྱལ་པོ་ཡང་ཡིན་པས་དུལ་བ་རྒྱལ་པོ་ཞེས་བྱའོ། །དེ་དག་གི་རྗེ་ཞེས་བྱ་བ་ནི་རྗེ་བོ་དག་སྟེ། དུལ་བ་རྒྱལ་པོ་དག་གི་
[134b.2]རྗེ་དཔོན་མང་པོས་བཀུར་བ་ལ་སོགས་པ་འཁོར་ལོས་སྒྱུར་བ་དག་གོ། །དེ་དག་གི་རིགས་ཞེས་བྱ་བ་ནི། རིགས་རྒྱུད་མ་ཆད་པ་སྟེ། དུལ་བ་རྒྱལ་པོ་དག་གི་རྗེའུ་རིགས་ཤཱཀྱའི་རིགས་རྒྱུད་དོ། །དེ་འཁྲུངས་ཞེས་བྱ་བ་ནི་སྐྱེས་པ་སྟེ། འདུལ་བའི་དོན་དུ་གཤེགས་ཤིང་འདུལ་བ་རྒྱལ་པོ་
[134b.3]དག་གི་རྗེའི་རིགས་སུ་འཁྲུངས་པའོ། །དུལ་བ་རྒྱལ་པོ་དག་གི་རྗེའི་རིགས་སུ་འཁྲུངས་པ་དེ་ལ་ཕྱག་འཚལ་ཏེ་ཞེས་བྱ་བ་སྦྱར་ཏེ་དེ་གང་ཞེ་ན། འོག་ནས་སངས་རྒྱས་འབྱུང་བ་དང་སྦྱར་རོ། །དེ་ཇི་ལྟར་སངས་རྒྱས་ཡིན་ནོ། །དོན་མཐུན་པའི་མཚན་བསྟན་པའི་ཕྱིར། སློབ་མ་འདུལ་མཛད་
[134b.4]ཉེས་པ་རབ་ཐུལ་བ། །ཞེས་བྱ་བ་གསུངས་ཏེ། གང་གིས་སློབ་མ་རྣམས་དངོས་པོ་ཐམས་ཅད་ཀྱི་མཆོག་ཁྱད་པར་དུ་འཕགས་པ་མྱ་ངན་ལས་འདས་པར་ཁྲིད་པར་མཛད་པ་དེ་ནི་སློབ་མ་འདུལ་མཛད་ཅེས་བྱའོ། །གང་གི་རྒྱུད་ལ་ཀུན་དུ་སྤྱོད་པའི་དྲི་མ་དག་རྣམ་པར་སྨིན་པའི་དྲི་མས་སྐྱོན་ཆགས་
[134b.5]པར་བྱེད་པའི་ཉེས་པ་འདོད་ཆགས་ལ་སོགས་པ་མཆོག་ཏུ་ཞིག་པར་གྱུར་ཅིང་། རང་གི་རྒྱུད་ལ་བག་ཆགས་དང་བཅས་པ་ཕྱུང་བར་གྱུར་པ་དེ་ནི་ཉེས་པ་རབ་ཐུལ་བ་ཞེས་བྱ་སྟེ། དེ་ལྟ་བུ་དེ་ལ་ཕྱག་འཚལ་ཏེ་ཞེས་བྱ་བར་སྦྱར་ཏེ། ཐམས་ཅད་ལ་ནི་མ་ཡིན་ནོ། །དེ་ལ་ཉེས་པ་རབ་ཐུལ་བ་
[134b.6]ཞེས་བྱ་བ་ཉིད་ཀྱིས་ནི་ཉོན་མོངས་པ་བག་ཆགས་དང་བཅས་པ་སྤངས་བ་ཐུན་མོང་མ་ཡིན་པ་ཉེ་བར་བསྟན་ནས་གཏི་མུག་གི་གཉིད་མ་ལུས་པ་དང་བྲལ་བའི་ཕྱིར། སངས་རྒྱས་ཉིད་དང་བདག་ལ་ཕན་པ་ཕུན་སུམ་ཚོགས་པ་སྟོན་ཏོ། །སློབ་མ་འདུལ་མཛད་ཅེས་བྱ་བ་ཉིད་ཀྱིས་ནི། དངོས་པོ་
[134b.7]ཐམས་ཅད་ངེས་པར་ཐུགས་སུ་ཆུད་པའི་ཕྱིར་སངས་རྒྱས་ཉིད་དང་གཞན་ལ་ཕན་པ་ཕུན་སུམ་ཚོགས་པ་སྟོན་ཏེ། འདི་ལྟར་ཐམས་ཅད་མཁྱེན་པ་མ་ཡིན་པས་ནི་རང་དབང་ཉིད་ཀྱིས་འདུལ་བའི་དོན་ཐམས་ཅད་ཇི་ལྟ་བ་བཞིན་བསྒྲུབ་པར་མི་ནུས་ཏེ། དེ་ལ་ཉེ་བར་སྦྱར་བའི་དོན་རྣམས་རྣམ་པ་
[135a]
[135a.1]ཐམས་ཅད་ཁོང་དུ་ཆུད་པའི། དེ་ལྟར་བདག་ལ་ཕན་པ་ཕུན་སུམ་ཚོགས་པ་དང་། གཞན་ལ་ཕན་པ་ཕུན་སུམ་ཚོགས་པ་དང་ལྡན་པ་དེ་གང་ཞེ་ན། དེའི་ཕྱིར་སངས་རྒྱས་ཞེས་བྱ་བ་གསུངས་ཏེ། དོན་ཐམས་ཅད་ངེས་པར་ཐུགས་སུ་ཆུད་པའི་ཕྱིར་རམ། ཉོན་
[135a.2]མོངས་པ་བག་ཆགས་དང་བཅས་པའི་གཉིད་དང་བྲལ་བའི་ཕྱིར། བཅོམ་ལྡན་འདས་ནི་སངས་རྒྱས་ཞེས་བྱ་སྟེ། དེ་ལ་ཕྱག་འཚལ་ཏེ་ཞེས་བྱ་བར་སྦྱར་རོ། །དེ་ལ་ཕྱག་འཚལ་ཏེ་ཅི་ཞིག་བརྗོད་པར་བྱ་ཞེ་ན། འོག་ནས་འདུལ་བའི་བསྔགས་པ་ཅུང་ཟད་བརྗོད་པར་བྱ་ཞེས་
[135a.3]འབྱུང་བས་བརྗོད་པར་བྱའོ། །འོ་ན་རང་དབང་ཉིད་ཀྱིས་འདུལ་བའི་བསྔགས་པ་བརྗོད་པར་བྱ་བ་ལ་ཅིའི་ཕྱིར་སངས་རྒྱས་བཅོམ་ལྡན་འདས་ལ་ཕྱག་འཚལ་ཏེ་འདུལ་བའི་བསྔགས་པ་བརྗོད་པར་བྱེད་ཅེ་ན། དེའི་ཕྱིར་འདུལ་བའི་གཙོ་བོ་ཞེས་བྱ་བ་གསུངས་ཏེ། འདི་ལྟར་སངས་
[135a.4]རྒྱས་བཅོམ་ལྡན་འདས་དེ་ནི་འདུལ་བ་འདིའི་གཙོ་བོ་ཡིན་ཏེ་འཇུག་པ་མཛད་པ་ཡིན་པའི་ཕྱིར་རོ། །དེའི་ཕྱིར་དེ་ལ་ཕྱག་འཚལ་ཏེ་འདུལ་བའི་བསྔགས་པ་བརྗོད་པར་བྱའོ་ཞེས་བྱ་བར་སྦྱར་རོ། །འདིས་ནི་སྟོན་པར་མཛད་པ་ཉེ་བར་བསྟན་ནས་འདུལ་བ་ལ་སློབ་མ་དད་པས་རྗེས་སུ་འབྲང་བ་
[135a.5]རྣམས་ཀྱིས་སྐྱེད་པར་བྱེད་དོ། །དེ་ལྟར་དུལ་བ་རྒྱལ་པོ་དག་གི་རྗེའི་རིགས་སུ་འཁྲུངས་ལ་སློབ་མ་རྣམས་འདུལ་བར་མཛད་པ། ཉེས་པ་རྣམས་རབ་ཏུ་ཐུལ་བའི་སངས་རྒྱས་འདུལ་བའི་གཙོ་བོ་དེ་ལ་ཕྱག་འཚལ་ལོ་ཞེས་བྱ་བ་ནི་ལུས་དང་ངག་དང་ཡིད་དག་གིས་ཕྱག་འཚལ་ལོ། །སྟེ་ཞེས་
[135a.6]བྱ་བའི་སྒྲ་ནི་བརྗོད་པར་བྱ་ཞེས་འོག་ནས་འབྱུང་བ་དེ་བྱའོ། །སྟེ་ཞེས་དམ་བཅའ་ལ་ལྟོས་པའི་ཚིག་ཡིན་ནོ། །དེ་ལྟར་སངས་རྒྱས་བཅོམ་ལྡན་འདས་ལ་ཕྱག་འཚལ་ཏེ་ཅི་ཞིག་རྗོད་པར་བྱེད་ཅེ་ན། དེའི་ཕྱིར། འདུལ་བའི་བསྔགས་པ་ཅུང་ཟད་བརྗོད་པར་བྱ། །ཞེས་བྱ་བ་གསུངས་ཏེ། བསྔགས་
[135a.7]པ་བརྗོད་པར་བྱ་སྟེ་ཞེས་བྱ་བར་སྦྱར་རོ། །གང་གི་བསྔགས་པ་ཞེ་ན། དེའི་ཕྱིར་འདུལ་བའི་ཞེས་བྱ་བ་གསུངས་ཏེ། གང་གིས་སློབ་མ་རྣམས་མྱ་ངན་ལས་འདས་པར་འགྲོ་བའི་ཚོགས་པ་བྱེ་བྲག་ཏུ་ཁྲིད་ཅིང་སློབ་པར་བྱེད་པ་དེ་ནི་འདུལ་བ་ཞེས་བྱའོ། །དེ་ཡང་བྱ་བ་དང་བྱ་བ་མ་ཡིན་པ་ཉེ་བར་སྟོན་
[135b]
[135b.1]པ་ནི། གཞུང་སྟོང་ཕྲག་བརྒྱ་པའི་ཚད་ལ་བྱ་སྟེ། དེའིའོ། །དེའི་བསྔགས་པ་ཞེས་བྱ་བ་ནི། བསྔགས་པར་བྱ་བ་ཡིན་པས་བསྔགས་པ་སྟེ། ཡོན་ཏན་ནོ། །ཅི་དེའི་བསྔགས་པ་ཐམས་ཅད་བརྗོད་པར་བྱའམ་ཞེ་ན། དེའི་ཕྱིར་ཅུང་ཟད་ཅེས་བྱ་བ་གསུངས་ཏེ། བདག་ཉིད་རང་
[135b.2]གིས་ཐོས་པ་དང་། བསམ་པ་གང་ཡིན་པ་དེའི་ཕྱོགས་འགར་གྱུར་པ་དེའི་བསྔགས་པ་བརྗོད་པར་བྱའི་ཐམས་ཅད་ནི་མ་ཡིན་ཏེ། དེའི་རྣམ་པ་ཐམས་ཅད་ནི་བདག་དང་འདྲ་བ་དག་གིས་བརྗོད་པར་མི་ནུས་སྙམ་དུ་བསམས་པའོ། །དེ་ལྟར་འདིར་སྤྱི་དོན་ནི་འདི་ཡིན་ཏེ། སློབ་མ་རྣམས་གུས་པ་
[135b.3]བསྐྱེད་པར་བྱ་བའི་ཕྱིར་དང་། གདུལ་བར་བྱ་བ་བསྒྲུབ་པའི་ཕྱིར་སངས་རྒྱས་བཅོམ་ལྡན་འདས་འཁོར་ལོས་སྒྱུར་བའི་རིགས་སུ་གཤེགས་པ་བདག་ལ་ཕན་པ་ཕུན་སུམ་ཚོགས་པ་བླ་ན་མེད་པ་རྗེས་སུ་བསྒྲུབ་པ་འདུལ་བ་སྟོན་པར་མཛད་པ་ལ་ཕྱག་འཚལ་ཏེ། འདུལ་བར་སྨྲ་བར་འདོད་པའི་ཡོན་
[135b.4]ཏན་རང་གི་བློ་དང་མཐུན་པ་ཅུང་ཟད་ཅིག་བརྗོད་པར་བྱའོ་ཞེས་བསྟན་ཏོ། །ཅིའི་ཕྱིར་བསྔགས་པ་ཐམས་ཅད་རྗོད་པར་མི་བྱེད་ཅེ་ན། དེའི་ཕྱིར། ཕ་རོལ་མ་མཐོང་གཏིང་རྟོགས་མ་གྱུར་ཅིང་། །གླགས་པའི་མུན་ནག་སློབ་དཔོན་ཚོགས་རྣམས་ཀྱི། །དབྱེ་བ་ཐ་དད་འདུལ་བའི་རྒྱ་མཚོ་ལ། །
[135b.5]ཡོན་ཏན་ཀུན་བསྟོད་རྩོལ་བློ་བདག་ལ་མེད། །ཅེས་བྱ་བ་གསུངས་ཏེ། གང་གི་ཕྱིར་འདུལ་བ་རྒྱ་མཚོ་འདིའི་ཕ་རོལ་མྱ་ངན་ལས་འདས་པའི་འགྲམ་གཉིས་མ་མཐོང་ལ། བདག་གིས་འདི་ལ་འཇུག་པར་མཛད་པ་དེ་བཞིན་གཤེགས་པའི་དགོངས་པའི་གཏིང་རྟོགས་པར་མ་གྱུར་ཅིང་ངོ་བོ་
[135b.6]ཉིད་ཀྱིས་ཀྱང་འཁོར་ལོ་ལྟ་བུའི་འདྲེས་ལ་སོགས་པ་རྦ་ཀློང་གིས་གླགས་པའི་མུན་ནག་ལ་རྣམ་པར་བཤད་པ་བྱེད་པའི་སློབ་དཔོན་ཚོགས་རྣམས་ཀྱི་བློའི་དབྱེ་བས་རྣམ་པ་སྣ་ཚོགས་སུ་བསྟན་པ་ཐ་དད་པར་གྱུར་པ་དེའི་ཕྱིར་འདུལ་བ་རྒྱ་མཚོ་ལྟ་བུ་འདི་ལ་ཡོན་ཏན་ཀུན་གཞི་བསྟོད་པར་བརྩོན་ཞིང་
[135b.7]འབད་པ་བདག་ལ་མེད་པས་དེས་ན་བསྔགས་པ་ཅུང་ཟད་བརྗོད་པར་བྱའི་ཐམས་ཅད་མ་ཡིན་ནོ་ཞེས་བྱ་བའི་ཐ་ཚིག་གོ། །འོ་ན་འདུལ་བའི་བསྔགས་པ་དེ་སྨྲོས་ཤིག །དེའི་ཕྱིར། ཇི་ལྟར་འདི་ན་ཤིང་རྩ་གཙོ་བོ་སྟེ། །རྣམ་པར་འཕེལ་དང་ཀུན་འཛིན་གཉིས་ཀྱི་གཞི། །དེ་བཞིན་དམ་ཆོས་
[136a]
[136a.1]ཚོགས་རྣམས་ཀུན་གྱི་ཡང་། །རྒྱུ་དང་རྩ་བ་འདུལ་བ་ཡིན་པར་གསུངས། །ཞེས་བྱ་བ་གསུངས་ཏེ། དེ་ལ་རྣམ་པར་འཕེལ་དང་ཞེས་བྱ་བ་ནི་ཁྱད་པར་དུ་འཕེལ་བ་སྟེ། ཡལ་ག་དང་ཡལ་ག་གྱེས་པ་ལ་སོགས་པ་སྐྱེ་བའོ། །ཀུན་འཛིན་ཞེས་བྱ་བ་ནི་ཆུད་མི་
[136a.2]འཛའ་བའོ། །རྣམ་པར་འཕེལ་བ་དང་ཀུན་འཛིན་གྱིས་ཏེ། དེ་གཉིས་ཀྱི་གཞི་ཞེས་བྱ་བ་རྒྱུའི་གཙོ་བོ་ནི་རྩ་བ་ཡིན་ནོ། །དམ་ཆོས་ཞེས་བྱ་བ་ནི་མཛེས་པའི་ཆོས་ཏེ། དོན་ཇི་ལྟ་བ་བཞིན་དུ་ཉེ་བར་བསྟན་ཏོ། །དེའི་ཚོགས་ཞེས་བྱ་བ་ནི་འདུས་པ་སྟེ། མདོ་སྡེ་དང་ཆོས་མངོན་པ་
[136a.3]ལ་སོགས་པའོ། །དམ་པའི་ཆོས་ཀྱི་ཚོགས་དེ་རྣམས་ཀུན་གྱི་རྣམ་པར་འཕེལ་བ་དང་ཀུན་འཛིན་པའི་རྒྱུ་དང་རྩ་བ་འདུལ་བ་ཡིན་པར་བདག་ཉིད་ཆེན་པོ་ཡིན་པར་གསུང་ངོ་། །འདི་སྐད་བསྟན་ཏེ། ཇི་ལྟར་ན་འཇིག་རྟེན་འདི་ན་ཤིང་ནྱ་གྲོ་དྷ་ལ་སོགས་པའི་ཤིང་ལྗོན་པའི་རྩ་བ་སའི་
[136a.4]ནང་དུ་སོང་བའི་སྦུབས་ནི་ཤིང་ལྗོན་པ་རྣམ་པར་འཕེལ་བ་དང་། ཀུན་འཛིན་པ་གཉིས་ཀྱི་གཞི་ཞེས་བྱ་བ་རྒྱུའི་གཙོ་བོ་དང་རྒྱུའི་དངོས་པོ་ཡིན་ཏེ། དང་པོའི་རྒྱུ་ཡིན་པས་དེ་བཞིན་དུ་ཐུབ་པའི་དབང་པོའི་གསུང་རབ་འདི་དག་ཐམས་ཅད་ཀྱི་རྒྱུ་དང་རྩ་བ་འདུལ་བའི་སྡེ་སྣོད་ཡིན་པར་གསུངས་
[136a.5]སོ། །འདི་ལྟར་འདུལ་བའི་གཞི་དག་ལ་དམ་པའི་ཆོས་ཀྱི་ཤིང་ལྗོན་པ་རྣམས་ཀྱི་བསམ་གཏན་དང་གཟུགས་མེད་པ་དང་དགེ་སྦྱོང་གི་ཚུལ་གྱི་འབྲས་བུ་ལ་སོགས་པ་རྣམ་པར་འཕེལ་དང་མ་ཉམས་པའི་དགེ་སློང་གི་མཚན་ཉིད་ཀུན་འཛིན་པ་དག་འདུལ་བའི་རྟེན་གྱིས་འབྱུང་བའི་ཕྱིར་
[136a.6]རོ། །ཇི་ལྟར་ས་འདི་སྐྱེ་དགུ་ཀུན་གྱི་གཞི། །དེ་ལས་འབྲུ་རྣམས་སྐྱེ་བར་འགྱུར་བ་ལྟར། །དེ་བཞིན་འདུལ་བའང་སྡོམ་བརྩོན་རྣམས་ཀྱི་གཞི། །དེ་བཞིན་དེ་ལས་བསོད་ནམས་རྣམས་ཀྱང་སྐྱེ། །ཞེས་བྱ་བ་ནི་ཇི་ལྟར་ས་གཞི་ལ་བརྟེན་ཏེ་སྐྱེ་དགུ་སེམས་ཅན་དུ་བགྲང་བ་གཟུགས་ཀྱི་
[136a.7]དངོས་པོ་རྣམས་གནས་པར་འགྱུར་བ་དང་། ཏིལ་དང་གྲོ་ལ་སོགས་པ་འབྲུའི་བདག་ཉིད་ཀྱི་འབྲུ་རྣམས་སྐྱེ་ཞིང་འབྱུང་བར་འགྱུར་བ་དེ་བཞིན་དུ་འདུལ་བ་ལ་བརྟེན་ནས་སྡོམ་བརྩོན་དགེ་སློང་དང་དགེ་ཚུལ་ལ་སོགས་པ་རབ་ཏུ་བྱུང་བ་རྣམས་ཀྱང་གནས་པར་འགྱུར་ཏེ། དེས་སྡོམ་པ་སྐྱེ་བ་བསྲུང་
[136b]
[136b.1]བ་དང་ལེགས་པར་སྦྱོར་བའི་ཕྱིར་རོ། །བྱམས་པ་བསྒོམ་པ་ལ་སོགས་པ་དགེ་བའི་ཆོས་བསོད་ནམས་རྣམས་ཀྱང་སྐྱེ་བར་འགྱུར་རོ། །ཇི་ལྟར་འདུལ་བ་ས་དང་ཆོས་མཐུན་པ་ཡིན་ཞེ་ན། དེ་ཕྱིར། ཚུལ་ཁྲིམས་ཡོན་ཏན་རྣམས་ཀྱི་གནས་སུ་དགོངས། །དེ་ཡི་གནས་ནི་འདུལ་བ་ཡིན་
[136b.2]པར་གསུངས། །འདི་ལ་གནས་པར་གྱུར་ན་མཐར་ཕྱིན་འགྱུར། །འདི་ལ་མི་གནས་མཐར་ཕྱིན་ག་ལ་འགྱུར། །ཞེས་བྱ་བ་གསུངས་ཏེ། འདི་ལྟར་དེ་ལྟ་བས་ན་ཚུལ་ཁྲིམས་འདི་དག་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་ནས་མཆོག་ཉིད་ཐོབ་པར་བྱེད་དོ་ཞེས་
[136b.3]གསུངས་པས། ཚུལ་ཁྲིམས་ནི་བསམ་གཏན་ལ་སོགས་པ་ཡོན་ཏན་གྱི་གནས་དང་རྟེན་ཡིན་པར་དེ་བཞིན་གཤེགས་པ་རྣམས་ཀྱིས་དགོངས་ལ་ཚུལ་ཁྲིམས་དེའི་གནས་ནི་འདུལ་བ་ཡིན་པར་གསུངས་ཏེ། དེས་དེའི་རྣམ་པ་ཐམས་ཅད་ཉེ་བར་སྟོན་པའི་ཕྱིར་རོ། །དེ་ལྟ་བས་ན་འདུལ་
[136b.4]བ་ས་དང་ཆོས་མཐུན་པ་ཉིད་ཡིན་ནོ། །དེའི་ཕྱིར་ཕན་ཡོན་དང་ཉེས་དམིགས་ཀྱང་འདི་ལྟ་བུར་འགྱུར་ཏེ། གང་འདུལ་བ་འདི་ལ་གནས་པར་གྱུར་ཅིང་ཇི་ལྟ་བ་བཞིན་དུ་རྗེས་སུ་སྒྲུབ་པར་བྱེད་པ་དེ་ནི་ཉེ་བའི་ཕྱིར། མཐའ་མྱ་ངན་ལས་འདས་པར་ཕྱིན་པར་འགྱུར་བར་ཤེས་པར་བྱའོ། །གང་
[136b.5]འདུལ་བ་འདི་ལ་མི་གནས་ཤིང་ཐམས་ཅད་ཇི་ལྟ་བ་བཞིན་དུ་རྗེས་སུ་སྒྲུབ་པར་མི་བྱེད་པ་དེ་ནི། རེ་ཞིག་མཐའ་མྱ་ངན་ལས་འདས་པར་ཕྱིན་པར་ག་ལ་འགྱུར་ཏེ། སྡིག་པའི་ལས་བསགས་པ་ལ་སོགས་པས་མྱ་ངན་ལས་འདས་པར་འགྲོ་བའི་ལམ་འགག་པའི་ཕྱིར་རོ། །གཞི་ཉིད་ཡིན་པས་
[136b.6]འདུལ་བ་ལ་བསྟོད་ནས། ད་ནི་བསྲུང་བ་ཉིད་ཀྱིས་སྟོད་པར་བྱེད་པར། ཇི་ལྟར་ཆུ་ལོན་མི་ཕྱེད་སྲ་བ་ཡིས། །ཆུ་ཀླུང་ཆེ་ཡང་བཟློག་པར་འགྱུར་བ་ལྟར། །དེ་བཞིན་འདུལ་བ་འཕགས་པའི་ཆུ་ལོན་འདིས། །ཚུལ་ཁྲིམས་འཆལ་པའི་ཆུ་ཀླུང་བཟློག་པར་འགྱུར། །ཞེས་བྱ་བ་ནི། ཇི་ལྟར་ཆུ་
[136b.7]ལོན་མི་ཕྱེད་སྲ་བ་བྱས་ན་ཆུ་ཀླུང་ཆེན་པོ་ཡང་ཟློག་པར་བྱེད་ཅེས་བསྒྱུར་བ་དེ་བཞིན་དུ། འདུལ་བ་ལ་འཕགས་པས་བསྟོད་པར་འོས་པ་ཆུ་ལོན་འདི་ལྟ་བུ་འདིས་ཀྱང་ཚུལ་ཁྲིམས་འཆལ་པའི་ཆུ་ཀླུང་བཟློག་པར་འགྱུར་ཞིང་ཕྱིར་སྒྱུར་བར་བྱེད་པ་དེ། འདི་ལྟར་ཚུལ་ཁྲིམས་འཆལ་པའི་རྒྱུར་གྱུར་པ་
[137a]
[137a.1]བུད་མེད་ལ་སོགས་པ་ཐམས་ཅད་ཟློག་པར་བྱེད་ལ། དེ་ལས་བྱུང་བའི་ཚུལ་ཁྲིམས་འཆལ་པ་ནི་སྦྱོང་བར་སྟོན་པར་བྱེད་པའི་ཕྱིར་རོ། །ད་ནི་བྱང་ཆུབ་གསུམ་གྱི་ཚོགས་ཉིད་ཀྱིས་འདུལ་བ་ལ་བསྟོད་པའི་ཕྱིར། སངས་རྒྱས་རྣམས་དང་རང་རྒྱལ་རྣམས་ཀྱིས་ཀྱང་། །
[137a.2]བྱང་ཆུབ་གང་བརྙེས་ཐུབ་སློབ་རྣམ་དག་པའི། །སེམས་ཅན་དགྲ་བཅོམ་ཡོན་ཏན་ལྡན་པ་རྣམས། །དེ་ལའང་རྒྱུ་ནི་འདུལ་བ་ཡིན་པར་གསུངས། །ཞེས་བྱ་བ་གསུངས་ཏེ། སངས་རྒྱས་བཅོམ་ལྡན་འདས་ཀྱིས་བླ་ན་མེད་པའི་བྱང་ཆུབ་བརྙེས་པ་གང་ཡིན་པ་དང་། རང་རྒྱལ་དང་སངས་རྒྱས་
[137a.3]རྣམས་ཀྱིས་བྱང་ཆུབ་བར་མ་བརྙེས་པ་གང་ཡིན་པ་དང་། ཐུབ་པ་བཅོམ་ལྡན་འདས་ཀྱི་སློབ་མ་རྣམ་པར་དག་པའི་སེམས་ཅན་དག་པའི་ཚོགས་བསགས་པ་རྣམས་དགྲ་བཅོམ་པའི་འབྲས་བུ་འཁོར་དང་བཅས་པའི་ཡོན་ཏན་ལྡན་པར་གྱུར་པ་འཕགས་པ་ཤཱ་རིའི་བུ་ལ་སོགས་པ་དེ་ལ་ཡང་རྒྱུ་ནི་
[137a.4]འདུལ་བ་ཡིན་པར་གསུངས་ཏེ། དེ་ཚུལ་ཁྲིམས་བསྟན་པ་ཚུལ་ཁྲིམས་ལ་བརྟེན་ཏེ། ལམ་བསྒོམ་པའི་ཕྱིར་རོ། །ད་ནི་བསྟན་པའི་རྒྱུ་ཉིད་ཀྱིས་སྟོད་པར་བྱེད་དེ། ཇི་སྲིད་འགོ་འདིར་རྒྱལ་བ་ཐམས་ཅད་ཀྱི། །མཛོད་མཆོག་འདུལ་བ་རྫོགས་པ་འདི་གནས་པ། །དེ་སྲིད་ཆོས་སྒྲོན་
[137a.5]འདི་ནི་གནས་འགྱུར་ཞིང་། །བཟློག་པར་གྱུར་ན་ཞི་བ་ཐོབ་པར་འགྱུར། །ཞེས་བྱ་བ་ལ་རྫོགས་པ་ཞེས་བྱ་བ་ནི་ཚངས་པ་སྟེ། གསོལ་བ་དང་ལས་ལ་སོགས་པ་ལ་འཇུག་ནུས་པའོ། །དེ་སྲིད་ཆོས་སྒྲོན་འདི་ནི་གནས་འགྱུར་ཞིང་། །ཞེས་བྱ་བའི་སྒྲ་ནི་ངེས་པར་གཟུང་བའི་དོན་ཏོ། །ངེས་འདིར་
[137a.6]དོན་དུ་ན་དུས་ཇི་སྲིད་དུ་འགྲོ་བ་འཇིག་རྟེན་འཛམ་བུའི་གླིང་འདིར་རྒྱལ་བ་ཐམས་ཅད་ཀྱི་དམ་པའི་ཆོས་ཀྱི་མཛོད་ཀྱི་མཆོག་འདུལ་བ་རྫོགས་པ་འདི་གནས་པར་འགྱུར་བའི་དུས་ཇི་སྲིད་ཁོ་ན་བཞིན་གཤེགས་པའི་ཆོས་ཀྱི་སྒྲོན་མ་ལྷག་མ་འདི་ཡང་གནས་པར་འགྱུར་ཞིང་། །དེ་ལས་རྫོགས་པར་འགྱུར་
[137a.7]བ་འདུལ་བ་རྫོགས་པར་ནུས་པར་གྱུར་ན་དམ་པའི་ཆོས་ཀྱི་སྒྲོན་མ་ལྷག་མ་ཡང་ཞི་བ་ཐོབ་པར་འགྱུར་ཏེ་ནུབ་པ་ཁོ་ནར་འགྱུར་རོ་ཞེས་བྱའོ། །ད་ནི་དཀོན་པར་བྱེད་པའི་སྒོ་ནས་བསྟོད་པ་ནི། སངས་རྒྱས་མི་བཞུགས་འཇིག་རྟེན་ཚིགས་བཅད་དང་། །མདོ་སྡེ་ཡན་ལག་དེ་དང་དེ་དག་སྤྱོད། །བསླབ་
[137b]
[137b.1]འཇུག་མེད་ན་འདུལ་བའང་མེད་འགྱུར་བས། །དེ་ཕྱིར་རྒྱལ་བ་དག་པས་ཆེས་འདི་དཀོན། །ཞེས་བྱ་བ་ལ་མི་བཞུགས་ཞེས་བྱ་བས་ནི་མེད་པའི་དོན་བསྟན་ཏོ། །དེ་དང་དེ་དག་ཅེས་བྱ་བ་ནི་བཟླས་པའི་ཚིག་སྟེ། མང་བ་ཉིད་དུ་བསྟན་ཏོ། །དེས་ན་འདི་ལྟར་སངས་རྒྱས་མི་བཞུགས་སུ་ཟིན་ཀྱང་།
[137b.2]འཇིག་རྟེན་འཛམ་བུའི་གླིང་འདི་ནི། །འདོད་པ་ཁྱོད་ཀྱི་རྩ་བ་ཤེས། ཁྱོད་ནི་ཀུན་དུ་རྟོག་ལས་བྱུང་། །ཁྱོད་ལ་ཀུན་དུ་བརྟག་མི་བྱ། །དེས་ན་ངལ་ཁྱོད་མི་འབྱུང་། །ཞེས་བྱ་བ་ལ་སོགས་པ་ཚིགས་བཅད་དེ་དང་དེ་ལྟ་བུ་དག་དང་། ལྷའི་མདོ་ལ་སོགས་པ་མདོ་སྡེའི་ཡན་ལག་དམ་
[137b.3]དུམ་མང་པོ་དེ་དང་དེ་དག་སྤྱོད་པ་ཡོད་ཀྱི། བཅོམ་ལྡན་འདས་བྱུང་དུ་ཟིན་ཀྱང་བསླབ་པ་འཇུག་པ་མེད་ཅིང་བསླབ་པ་བཅའ་བ་མེད་ན་འདུལ་བའང་མེད་ཅིང་སྤྱོད་པར་མི་འགྱུར་བས་དེའི་ཕྱིར་རྒྱལ་བ་སངས་རྒྱས་བཅོམ་ལྡན་འདས་དག་པས་ཀྱང་ཆེས་འདུལ་བ་འདི་དཀོན་པ་ཡིན་ན། མདོ་
[137b.4]སྡེ་ལ་སོགས་པ་དག་པས་དཀོན་པ་ལྟ་ཅི་སྨོས་ཞེས་བྱ་བའི་ཐ་ཚིག་གོ། །དེ་ནི་དཔེའི་སྒོ་ནས་བསྟན་པའི་ཕྱིར། འཇོག་བྲལ་སེམས་གླང་ལྕགས་ཀྱོ་འདི་ཡིན་ཏེ། །གདུལ་བྱ་མ་ཐུལ་འདུལ་བའི་སྲབ་འདི་ཡིན། །ར་བ་མཚམས་ཀྱི་འོབས་དང་འདྲ་བ་སྟེ། ཟག་པ་ཀུན་གྱི་ཆུ་ལོན་འདུལ་
[137b.5]བ་ཡིན། །ཞེས་བྱ་བ་གསུངས་ཏེ་དེ་ལ་འདིས་སེམས་དོན་རྣམས་ལ་འཇོག་པར་བྱེད་པས་ན་འཇོག་པ་ནི་ཏིང་ངེ་འཛིན་ཏོ། །འཇོག་པ་དང་བྲལ་བའི་ཕྱིར་འཇོག་པ་དང་བྲལ་བ་ནི་མཉམ་པར་མ་བཞག་པ་སྟེ། དེ་ཉིད་སེམས་ཡིན་པས་འཇོག་བྲལ་སེམས་སོ། །དེ་ཉིད་གླང་པོ་ཆེ་དང་མཐུན་པ་
[137b.6]ཉིད་ཡིན་ཏེ། འཇོག་པ་དང་བྲལ་བའི་སེམས་ནི་གླང་པོ་ཆེ་དང་འདྲ་བས་འཇོག་བྲལ་སེམས་གླང་ཞེས་སྨོས་སོ། །གླང་པོ་ཆེ་དེ་གནས་མ་ཡིན་པ་ལས་བཟློག་ཅིང་གནས་བདེ་བར་འཇོག་པར་བྱེད་པ་ལྕགས་ཀྱོ་ཡིན་པ་དང་འདྲ་བར་འཇོག་པ་དང་བྲལ་བའི་སེམས་གླང་པོ་ཆེ་དང་འདྲ་བ་དེ་གནས་མ་ཡིན་པ་
[137b.7]ལས་བཟློག་ཅིང་གནས་བདེ་བར་འཇོག་པར་བྱེད་པའི་ལྕགས་ཀྱོ་ཡང་འདུལ་བ་ཡིན་ཏེ་འདྲ་བའི་ཕྱིར་རོ། །གདུལ་བྱ་ཅེས་བྱ་བ་ནི་འདུལ་བར་བྱ་སྟེ་རྟའོ། །མ་ཐུལ་བ་ཅེས་བྱ་བ་ནི་མ་བསླབས་པ་སྟེ་སེམས་ཀྱི་རྟ་འདུལ་བར་བྱ་བ་མ་ཐུལ་བ་དེ་འདུལ་བའི་སྲབ་ཀྱི་ཁ་ལྕགས་དང་འདྲ་བ་ཡང་འདུལ་བ་འདི་
[138a]
[138a.1]ཡིན་ཏེ། ཕན་པ་དང་གནོད་པ་ལ་འཇུག་པ་ལྡོག་པར་བྱེད་པའི་ཕྱིར་རོ། །ར་བ་མཚམས་ཞེས་བྱ་བ་ནི་ར་བའི་ཕྱི་མཚམས་ཏེ་དེའི་འོབས་དང་འདྲ་བ་ཡང་འདུལ་བ་འདི་ཡིན་ཏེ། འདའ་བ་དང་འདའ་བར་བྱ་བ་མ་ཡིན་པའི་མཚམས་ཀྱི་མུ་ཐུག་པ་ཡིན་པའི་ཕྱིར་རོ། །
[138a.2]ཟག་པ་ཞེས་བྱ་བའི་གང་གིས་འཛག་པར་བྱེད་པ་ཉོན་མོངས་པ་རྣམས་གང་ནས་འཛག་པར་འགྱུར་བ་ལུས་དང་ངག་དང་ཡིད་ཀྱི་སྒོ་དག་སྟེ་དེ་དག་ཀུན་འགོག་པའི་ཆུ་ལོན་ཡང་འདུལ་བ་འདི་ཡིན་ཏེ་འདི་ལྟར་ཉོན་མོངས་པ་མངོན་དུ་གྱུར་པ་དག་དང་། དེ་ལས་བྱུང་པའི་ལུས་དང་ངག་དང་
[138a.3]ཡིད་ཀྱི་ལས་དག་ཀྱང་འདུལ་བས་ཟློག་པར་བྱེད་པའི་ཕྱིར་རོ། །ད་ནི་སྟོན་པ་དང་འདྲ་བ་ཉིད་ཀྱིས་བསྟོད་པའི་ཕྱིར། རྒྱལ་བ་སྟོན་པ་དེ་ཡི་བསྟན་བཅོས་དག །མདོ་དང་ཆོས་མངོན་ཡིན་གསུངས་འདུལ་བ་ནི། །སྟོན་དང་བསྟན་བཅོས་དངོས་ཡིན་དེ་ཡི་ཕྱིར། །གཉིས་འགྱུར་ཕྱག་
[138a.4]བྱས་སངས་རྒྱས་ཆོས་གཅིག་བཞིན། །ཞེས་བྱ་བ་གསུངས་ཏེ། འདི་ལྟར་རྒྱལ་བ་བཅོམ་ལྡན་འདས་ནི་སྟོན་པ་ཡིན་ཏེ། བསྟན་པ་ཐམས་ཅད་འཛུགས་པར་མཛད་པའི་ཕྱིར་རོ། །སྟོན་པ་དེའི་བསྟན་བཅོས་དག་ནི་མདོ་སྡེ་དང་ཆོས་མངོན་པ་དག་ནི་ཞེས་བྱ་བ་གཞུང་དང་ཡིན་པ་དེ་གཉིས་
[138a.5]ཡིན་པར་གསུངས། དེ་གཉིས་ཀྱིས་ཡོངས་སུ་སྨིན་པ་དང་རྣམ་པར་གྲོལ་བར་མཛད་པའི་ཕྱིར་རོ། །འདུལ་བ་ནི་དངོས་སུ་སྟོན་པ་ཡང་ཡིན་ཏེ། དེ་བཞིན་གཤེགས་པ་དང་འདྲ་བར་རྟག་ཏུ་གྲོལ་བ་དང་། རྣམ་པར་མ་གྲོལ་བ་རྣམས་རྗེས་སུ་སྟོན་པའི་ཕྱིར་རོ། །བསྟན་བཅོས་
[138a.6]དངོས་དང་ཡིན་ཏེ། གཞུང་གི་རང་བཞིན་ཡིན་པའི་ཕྱིར་རོ། །དེའི་ཕྱིར་འདུལ་བ་འདི་ནི་ངོ་བོ་ཉིད་གཅིག་ལས་གཉིས་སུ་གྱུར་པ་ཡིན་ཏེ། སྟོན་པ་དང་བསྟན་བཅོས་ཀྱི་ངོ་བོ་ཉིད་དུ་གྱུར་པ་ཡིན་པས་འདུལ་བ་འདི་ནི་ཕྱག་བྱ་བའི་འོས་ཡིན་ཏེ། འདི་ལ་ངེས་པ་ཁོ་ནར་ཕྱག་བྱའོ། །
[138a.7]ཅི་ཞིག་དང་འདྲ་བར་གཉིས་སུ་གྱུར་པ་ཡིན་ཞེ་ན། ཆོས་མཐུན་པའི་དཔེ་བསྟན་པའི་ཕྱིར། སངས་རྒྱས་ཆོས་གཅིག་བཞིན་ཞེས་བྱ་བའི་དཔེ་གསུངས་ཏེ། དཔེར་ན་སངས་རྒྱས་བཅོམ་ལྡན་འདས་དང་ཆོས་ནི་ངོ་བོ་ཉིད་ཐ་དད་པ་མ་ཡིན་ཏེ། ཐམས་ཅད་མཁྱེན་པ་ཉིད་ཡིན་པའི་ཕྱིར་
[138b]
[138b.1]དེ་སངས་རྒྱས་བཅོམ་ལྡན་འདས་ཡིན་ལ། མྱ་ངན་ལས་འདས་པ་ཐོབ་པར་མཛད་པའི་ཕྱིར་སྟོན་པ་ཡང་ཡིན་ལ་གཞུང་གི་རང་བཞིན་ཡིན་པའི་ཕྱིར་ནི་བསྟན་བཅོས་ཡིན་པས་དེའི་ཕྱིར་སྟོན་པ་དང་། བསྟན་བཅོས་ཀྱི་ངོ་བོ་ཉིད་དུ་གྱུར་པ་དེ་ནི་ཕྱག་བྱ་བའི་འོས་ཁོ་ན་ཡིན་ནོ། །ད་ནི་དེ་
[138b.2]བཞིན་གཤེགས་པ་བས་ཀྱང་བླ་མ་ཡིན་པའི་ཕྱིར་འདི་ལ་ཕྱག་བྱ་བ་ཉིད་དུ་བསྟན་པའི་ཕྱིར་རོ། །གང་ལ་བརྟེན་ཏེ་གནས་པའི་སངས་རྒྱས་རྣམས། །དེ་ལ་གུས་བཅས་ཞེ་སར་བཅས་འགྱུར་ཞིང་། །དེ་ནི་མགོན་པས་མགོན་ཡིན་སྐྱབས་གནས་ཡིན། །དེ་ཕྱིར་རབ་བསྒྲིམས་
[138b.3]འདུལ་ལ་ཕྱག་འཚོལ་ཅིག །ཅེས་བྱ་བ་གསུངས་ཏེ་འདུལ་བ་གང་ལ་བརྟེན་ཅིང་གནས་པ་དེ་དང་འགལ་རྐྱེན་ཀུན་ཏུ་མི་སྤྱོད་པ་ཐ་སྙད་མཛད་པའི་སངས་རྒྱས་བཅོམ་ལྡན་འདས་རྣམས་འདུལ་བ་དེ་ལ་ངོ་བོ་ཉིད་ཁོ་ནས་གུས་པ་དང་བཅས་པ་དང་དེ་ལ་འཇིག་རྟེན་གྱིས་སྨད་པའི་དབང་གིས་
[138b.4]དགོངས་པ་གཏོད་པའི་སྒོ་ནས་ཞེ་ས་དང་བཅས་པར་འགྱུར་བ་དེ་དང་འདྲ་བའི་འདུལ་བ་འདི་ལ་རབ་ཏུ་བསྒྲིམས་ཏེ་ཕྱག་འཚོལ་ཅིག་ཅེས་བྱ་བར་སྦྱར་རོ། །ཅིའི་ཕྱིར་ཞེ་ན། དེ་ནི་མགོན་པས་མགོན་ཡིན་སྐྱབས་གནས་ཡིན། །ཞེས་བྱ་བ་གསུངས་ཏེ། གང་གི་ཕྱིར་འདུལ་བ་དེ་ནི་བདག་ཅག་
[138b.5]གི་བླ་མ་མགོན་པོ་སངས་རྒྱས་བཅོམ་ལྡན་འདས་བས་ཀྱང་བླ་མ་མགོན་ཡིན་ཏེ། དེ་དེ་ལ་གུས་པ་དང་བཅས་ཞེས་དང་བཅས་པའི་ཕྱིར་དང་། འདུལ་བ་དེ་ནི་སྐྱབས་ཡིན་ཏེ་ཁྱིམ་ཡོངས་སུ་སྤོང་བ་དང་། བརྟུལ་ཞུགས་ཀྱི་བགོ་བཤའ་ལེགས་པར་བྱེད་པའི་རྒྱུ་ཡིན་པའི་ཕྱིར་དང་། འདུལ་བ་དེ་
[138b.6]ནི་གནས་ཡིན་ཏེ་བརྟུལ་ཞུགས་བླངས་པ་རྣམས་ལ་སྐྱོབ་བ་དང་སྲུང་བ་དང་བརྟུལ་ཞུགས་ཀྱང་ཡོངས་སུ་སྲུང་བར་བྱེད་པ་དེའི་ཕྱིར་རབ་ཏུ་བསྒྲིམས་ལ་འདུལ་བ་འདི་ལ་ངེས་པ་ཁོ་ནར་ཕྱག་འཚོལ་ཅིག་ཅེས་བྱ་བའི་ཐ་ཚིག་གོ། །ད་ནི་གནོད་པའི་རྒྱུ་ཉིད་ཀྱིས་གུས་པ་སྐྱེད་པའི་ཆེད་དུ་བསྟོད་པའི་ཕྱིར།
[138b.7]གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་འཐོག །སྨྱིག་ཚལ་བྲེགས་པས་ཨ་མྲའི་ཚལ་ཉམས་བཞིན། །ཞེས་བྱ་བ་གསུངས་ཏེ། རབ་ཏུ་བྱུང་བ་བག་མེད་པ་དང་ལྡན་པ་གང་ལ་ལ་ཞིག་སྟོན་
[139a]
[139a.1]པ་བཅོམ་ལྡན་འདས་ཐུགས་རྗེ་དང་ལྡན་པས་ཕན་པ་ཉེ་བར་སྟོན་པ་བསྟན་པ་ལ་འདུལ་བ་ལས་གསུངས་པའི་བཀའ་ལུང་ལ་བཅས་པའི་ཁ་ན་མ་ཐོ་བ་ཡང་ཡིན་པས་དེ་ལས་འདས་ན་ཉེས་བྱས་ལ་སོགས་པ་ཇི་ཙམ་འབྱུང་སེམས་ཤིང་རྟོག་པ་ན་དོན་མེད་
[139a.2]པ་ཉིད་དོ་སྙམ་དུ་བློ་སྔོན་དུ་གཏོང་ཞིང་ཅུང་ཟད་འདའ་ཞིང་འགལ་བ་བྱེད་པའི་རབ་ཏུ་བྱུང་བ་བག་མེད་པ་དང་ལྡན་པ་དེ་ནི་བསྟན་ལས་འདས་པ་དེ་ལས་འཇིག་རྟེན་ཕ་རོལ་དུ་ལུས་དང་སེམས་ཀྱི་སྡུག་བསྔལ་ཆེན་པོས་གདུང་བར་བྱེད་པའི་སེམས་ཅན་དམྱལ་བའི་སྲུང་མ་ལ་སོགས་པ་དང་འབྲེལ་
[139a.3]གཞན་ལ་རག་ལས་ཤིང་གཞན་གྱི་དབང་དུ་གྱུར་པ་ཐོབ་པར་འགྱུར་བས་དེའི་ཕྱིར་སྟོན་པའི་ཕྱིར་བསྟན་པ་རྗེས་སུ་བསྒྲུབ་པར་བྱའོ་ཞེས་བྱ་བའི་ཐ་ཚིག་གོ། །དེ་ཉིད་དཔེས་བསྟན་པའི་ཕྱིར། སྨྱིག་ཚལ་བྲེགས་པས་ཨ་མྲའི་ཚལ་ཉམས་བཞིན། །ཞེས་བྱ་བ་གསུངས་ཏེ། དཔེར་ན་རྒྱལ་པོས་
[139a.4]ཨ་མྲའི་ཚལ་བསྲུང་བའི་ཕྱིར། ཁོར་ཁོར་ཡུག་ཏུ་སྨྱིག་མ་ཚེར་མ་ཅན་གྱི་ཚལ་གྱིས་བསྐོར་བ་བྱས་མི་བག་མེད་པ་ལ་ལ་ཞིག་གིས་འདི་ནི་དགོས་པ་མེད་དེ་ཁྱོད་ཡང་བ་མ་ཡིན་སྙམ་དུ་སེམས་ཤིང་བྲེགས་པས། ཨ་མྲའི་ཚལ་ལའང་རྟ་ལ་སོགས་པ་དག་གིས་ཟོས་པ་ལ་སོགས་པ་
[139a.5]དག་གིས་ཉམས་ཤིང་གནོད་པར་འགྱུར་བ་ནི་མི་དེ་ལ་གཞི་དེས་རྒྱལ་པོ་ཁྲོས་པ་ལ་སོགས་པས་ཆད་པ་རྔམ་པོ་ཆེ་ལ་གཏུགས་པ་ལས་བྱུང་བའི་སྡུག་བསྔལ་ཐོབ་པར་འགྱུར་བ་དེ་བཞིན་དུ་འདིར་ཡང་བཅས་པའི་ཁ་ན་མ་ཐོ་བ་དང་བཅས་པ་སྨྱིག་མའི་ཚལ་ལྟ་བུ་དེ་ལས་འདས་ཤིང་རང་བཞིན་གྱི་ཁ་ན་མ་ཐོ་བ་
[139a.6]ཨ་མྲའི་ཚལ་ལྟ་བུ་དེ་ཉམས་པས་ན་རྒྱལ་པོ་ཁྲོས་པ་ལ་སོགས་པ་ལྟ་བུ་རྒྱལ་བའི་བཀའ་ཁྱད་དུ་བསད་ཅིང་། བསླབ་པ་དྲལ་བ་དེ་ལས་རྒྱལ་པོའི་ཆད་པའི་སྡུག་བསྔལ་གཞན་གྱི་དབང་དུ་གྱུར་པ་ཐོབ་པ་ལྟ་བུ་འཇིག་རྟེན་ཕ་རོལ་དུ་དམྱལ་བའི་སྲུང་མ་ལ་སོགས་པས་གནོད་པའི་སྡུག་བསྔལ་ཆེན་པོ་
[139a.7]འཐོབ་པར་འགྱུར་བས་དེའི་ཕྱིར། བཅས་པའི་ཁ་ན་མ་ཐོ་བ་ཡང་སྨྱིག་མའི་ཚལ་ལྟ་བུ་དེ་ཉིད་ལས་གུས་པ་དང་བཅས་པས་བསྲུང་བར་བྱའོ། །ད་ནི་ཁྱད་དུ་གསོད་པ་དང་བཅས་པའི་ཁ་ན་མ་ཐོ་བ་དང་བཅས་པ་ལས་འདས་པའི་ཉེས་པ་བརྗོད་པའི་ཕྱིར། འདི་ན་ལ་ལས་རྒྱལ་པོའི་ཚིག་ཆེན་
[139b]
[139b.1]ལས། །བཟླས་ན་ཚུལ་མིན་ཆད་པ་ཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་བཟླས་བྱས་ན། །དུད་འགྲོར་སྐྱེ་འགྱུར་ཨེ་ལའི་འདབ་ཀླུ་བཞིན། །ཞེས་བྱ་བ་གསུངས་ཏེ། འཇིག་རྟེན་འདི་ན་སྐྱེ་བོ་ལ་ལས་མ་གུས་པས་རྒྱལ་པོའི་ཚིག་ཆེན་པོ་ཡང་བཟླས་ན་ལན་འགས་བྱམས་
[139b.2]པའི་གནས་ལྟ་བུའམ། གཡུལ་འཁྲུག་པ་ལ་སོགས་པའི་གནས་སྐབས་ན་རྒྱལ་པོའི་ཆད་པ་མི་ཐོབ་པ་ཡང་སྲིད་ཀྱི། ཐུབ་པ་བཅོམ་ལྡན་འདས་ཐུགས་རྗེ་དང་ལྡན་པ་ཕན་པ་མཛད་པ་བླ་ན་མེད་པའི་བཀའ་ལུང་བསླབ་པ་ཚུལ་མ་ཡིན་པས་ཁྱད་དུ་གསོད་པས་བཅས་པའི་ཁ་ན་མ་ཐོ་བ་
[139b.3]དང་བཅས་པ་ཙམ་ཡང་བཟླས་པ་བྱས་ན། ཕལ་ཆེར་ངན་སོང་དུད་འགྲོའི་སྐྱེ་གནས་སུ་འགྲོ་བར་འགྱུར་བས་དེའི་ཕྱིར་གུས་པ་ཞེས་བྱའོ། །དེ་ཉིད་དཔེས་བསྟན་པའི་ཕྱིར་ཨེ་ལའི་འདབ་ཀླུ་བཞིན་ཞེས་བྱ་བ་གསུངས་ཏེ། བཅོམ་ལྡན་འདས་འོད་སྲུངས་ཀྱི་དགེ་སློང་སྤོང་བ་པ་དེས་འཆག་པའི་
[139b.4]ཚེ་མགོ་བོའི་སྟེང་དུ་ཤིང་ཨེ་ལའི་འདབ་མས་རེག་པ་ན་བཅོམ་ལྡན་འདས་ཀྱི་བཀའ་ཁྱད་དུ་བསད་དེ། ཤིང་ཨེ་ལའི་འདབ་མ་དེ་བཅད་པས་གཞི་དེས་དགེ་སློང་དེ་ཀླུ་ཨེ་ལའི་འདབ་མ་ཞེས་བྱ་བར་སྐྱེས་ཏེ་མགོ་ལ་ཤིང་ཨེ་ལའི་འདབ་དྲུད་ཅིག་སྐྱེས་ཤིང་དེ་འགུལ་བ་ན་སྡུག་བསྔལ་གྱི་ཚོར་བ་མི་
[139b.5]བཟད་པ་རྩུབ་པ་ཚ་བ་ཉམས་སུ་མྱོང་སྟེ། དེ་ནས་ཁྲག་དང་རྣག་འབབ་པས་ཟས་སུ་ཟ་བར་གྱུར་པ་ལྟ་བུ་དང་དེ་དང་འདྲ་བ་གཞན་དག་ཏུ་ཡང་འགྲོ་བར་འགྱུར་བའོ། །ད་ནི་སོ་སོར་ཐར་པའི་རྣམ་པར་བཤད་པ་ཉིད་ཀྱིས་འདུལ་བ་ལ་བསྟོད་པའི་ཕྱིར། སོ་སོར་ཐར་བྱ་གང་ཡིན་པ། །སངས་
[139b.6]རྒྱས་འདུལ་བ་གང་ཆེན་མཚོ། །གཏིང་མཐའ་མེད་པ་ཐམས་ཅད་ཀྱི། །གནས་པའི་སྙིང་དང་སྙིང་པོ་ཡིན། །ཞེས་བྱ་བ་ལ་སོགས་པའི་ཚིགས་སུ་བཅད་པ་དྲུག་གསུངས་སོ། །དེ་ལ་དོན་ནི་འདི་ཡིན་ཏེ་གང་གི་ཕྱིར་སོ་སོར་ཐར་པ་ཞེས་བྱ་བ་གང་ཡིན་པ་དེ་ནི་ཡོན་ཏན་དང་ཕན་ཡོན་
[139b.7]དུ་མས་ཡང་དག་པར་རྒྱས་པ་ཡིན་པས་རྣམ་པར་འབྱེད་པ་དང་ཕྲན་ཚེགས་ལ་སོགས་པ་འདུལ་བ་འདི་དག་ཐམས་ཅད་ནི་སོ་སོར་ཐར་པ་དེའི་རྒྱ་ཆེར་བཤད་པ་ཡིན་པར་གསུངས་པ་དེའི་ཕྱིར་ཐར་པ་འདོད་པ་དག་གིས་འདུལ་བ་འདི་ལ་གུས་པས་མཉན་པའི་སྤྲོ་བ་བརྟན་པོ་བྱའོ་ཞེས་སྟོན་ཏོ། །འོ་ན་
[140a]
[140a.1]སོ་སོར་ཐར་པ་ཞེས་བྱ་བ་དེ་ཇི་ལྟ་བུ་ཞིག་ཡིན་ཞེ་ན། དེའི་ཕྱིར། སོ་སོར་ཐར་བྱ་གང་ཡིན་པ། །ཞེས་བྱ་བ་ལ་སོགས་པ་གསུངས་ཏེ། དེ་ལ་སངས་རྒྱས་ཀྱིས་གསུངས་པའི་འདུལ་བ་གང་ཆེན་མཚོ་ཞེས་བྱ་བ་རྒྱ་མཚོ་ལྟ་བུ་གང་ལ་གཏིང་ཞེས་བྱ་བ་ནི་ཀུན་ནས་སློང་བ་
[140a.2]དང་མཐའ་ཞེས་བྱ་བ་ནི་འབྲས་བུ་དེ་གཉིས་དཔག་ཏུ་མེད་པ་ནི་སངས་རྒྱས་ཀྱི་འདུལ་བ་གང་ཆེན་མཚོ་སྟོང་ཕྲག་བརྒྱ་པ་ཐམས་ཅད་ཀྱི་གནས་པ་ཞེས་བྱ་བ་མཚན་ཉིད་རྣམ་པར་གཞག་པ་དེའི་སྙིང་ཞེས་བྱ་བ་འཕེལ་བ་དང་ས་བོན་དང་ཀུན་ནས་སློང་བ་དང་། སྙིང་པོ་ཞེས་བྱ་བ་བསྟན་པ་རྣམ་པར་མི་
[140a.3]གཡོ་བ་ནི་སོ་སོར་ཐར་པ་ཞེས་བྱ་བ་ནི་སྡིག་པ་ལས་ཐར་པའམ་འཁོར་བ་ལས་ཐར་པ་མདོའི་སྡེར་བསྟན་པ་ཡིན་ནོ། །འདི་ནི་དམ་ཆོས་རྒྱལ་པོ་ཡི། །ཆོས་ཀུན་གྱི་ནི་འདྲེན་པའི་མཆོག །འདི་ནི་དགེ་སློང་ཚོང་ཚོགས་ཀྱི། །བསླབ་ཟོང་ཚོང་ཁང་ཆེན་པོ་ཡིན། །ཞེས་བྱ་བ་ནི་སོ་སོར་
[140a.4]ཐར་པ་འདི་ནི་དམ་ཆོས་རྒྱལ་པོ་ཞེས་བྱ་བ། སངས་རྒྱས་བཅོམ་ལྡན་འདས་གྱི་མདོ་སྡེ་ལ་སོགས་པ་བསྟན་པའི་ཆོས་ཀུན་གྱི་འདྲེན་པ་མཆོག་ཡིན་ཏེ་བློན་པོ་རིན་པོ་ཆེ་དང་འདྲའོ་ཞེས་བྱ་བའི་ཐ་ཚིག་གོ། །ཡང་དེ་ཉིད་བྱེ་བྲག་ཏུ་བྱ་བའི་ཕྱིར། འདི་ནི་དགེ་སློང་ཚོང་ཚོགས་ཀྱི། །བསླབ་ཟོང་
[140a.5]ཚོང་ཁང་ཆེན་པོ་ཡིན། །ཞེས་བྱ་བ་གསུངས་ཏེ། སོ་སོར་ཐར་པ་འདི་ནི་མྱ་ངན་ལས་འདས་པའི་ནོར་བུ་རིན་པོ་ཆེ་འདོད་པའི་དགེ་སློང་ཚོང་པའི་ཚོགས་འགྲོན་པ་རྣམས་ཀྱི་བསླབ་ཟོང་ཚུལ་ཁྲིམས་ཀྱི་ནོར་གང་ཡིན་པ་དེའི་ཚོང་ཁང་ཆེན་པོ་ཞེས་བྱ་བ་ཟོང་བཅེར་བའི་གནས་དང་འདྲ་བ་ཡིན་
[140a.6]ནོ། །ཚུལ་ཁྲིམས་འཆལ་པས་ཟིན་རྣམས་ཀྱི། །གདུག་པ་རྣམ་སེལ་སྨན་འདི་ཡིན། །འདི་ནི་ལང་ཚོས་རྣམ་འཁྲུལ་པའི། །རྐང་གཉིས་གཞོན་ནུའི་ལྕགས་ཀྱོ་ཡིན། །ཞེས་བྱ་བ་ནི་གང་དག་ཚུལ་ཁྲིམས་འཆལ་པ་བསླབ་པ་རལ་པ་ལྷག་མ་དང་བཅས་པ་སྤྲུལ་ཆེན་པོས་མྱུར་དུ་
[140a.7]ཁྱབ་པར་བྱེད་པས་ཟིན་ཅིང་རེག་པ། དེ་རྣམས་ཀྱི་ལྟུང་བ་གདུག་པ་རྣམ་སེལ་ཅིང་རྣམ་པར་འགོག་པའི་སྨན་གནོད་པ་སེལ་བ་ནི་སོ་སོར་ཐར་པ་འདི་ཡིན་ཏེ། འདིས་དེ་སྦྱོར་བར་བྱེད་པ་སྟོན་པའི་ཕྱིར་རོ། །སོ་སོར་ཐར་པ་འདི་ནི་གང་དག་ལང་ཚོ་གཞོན་པ་ཉིད་རྣམ་པར་འཁྲུལ་ཞིང་རྨོངས་པའི་
[140b]
[140b.1]མི་དང་གཉིས་གཞོན་ནུ་དེ་དག་གི་ལྕགས་ཀྱོ་དང་འདྲ་བའི་ཕྱིར་བཟློག་པ་ཡིན་ཏེ། བསྙིལ་བ་དང་ཡོངས་སུ་གནས་པ་སྤྱད་པ་ལ་སོགས་པའི་ཉེས་དམིགས་སྟོན་པས་ཀུན་ཏུ་སྐྲག་པར་བྱེད་པ་ཡིན་པའི་ཕྱིར་རོ། །མཚོ་བས་ཟབ་པའི་འཁོར་བ་ལས། །སྒྲོལ་བའི་རྒལ་ཐབས་འདི་ཡིན་ཏེ། །
[140b.2]འདི་ནི་བཟང་འགྲོར་འགྲོ་བ་ཡི། །ངེས་པའི་ཆུ་ལོན་ཟམ་པ་ཡིན། །ཞེས་བྱ་བ་ནི་རྒྱ་མཚོ་དུག་ཅན་པས་ཀྱང་ཟབ་ཅིང་གཏིང་སླེབ་པར་དཀའ་བ་འགྲོ་བ་ལྔའི་འཇིག་རྟེན་གང་ཡིན་པ་དེ་ལས་སྒྲོལ་ཅིང་རྣམ་པར་གྲོལ་བར་འགྱུར་བའི་རྒལ་ཐབས་ཟམ་པ་དང་། གྲུ་དང་གཟིངས་དང་རྐྱལ་པ་ལ་
[140b.3]སོགས་པ་ལྟ་བུ་ནི་སོ་སོར་ཐར་པ་འདི་ཡིན་ཏེ། ཚུལ་ཁྲིམས་རྣམ་པར་དག་པ་ནི་ལམ་སྐྱེ་བའི་ཕྱིར་རོ། །སོ་སོར་ཐར་པ་འདི་ནི་བཟང་འགྲོར་འགྲོ་ཞིང་འཇུག་པའི་ངེས་པ་བསྟན་པ་གཅིག་ཏུ་གྱུར་པའི་ཆུ་ལོན་ཟམ་པ་ཞེས་བྱ་བས་གཞི་དང་འབྲེལ་བའི་རྒྱུན་ས་ཡིན་ཏེ་ཚུལ་ཁྲིམས་ནི་བདེ་འགྲོའི་རྒྱུ་
[140b.4]ཡིན་པའི་ཕྱིར་རོ། །འདི་ནི་ཉོན་མོངས་ཕམ་བྱེད་ལམ། །རྒྱལ་པོ་ཡི་ནི་འདྲེན་པ་མཆོག །འདི་ནི་ཐར་པའི་གྲོང་འཇུག་པའི། །ཐེམ་སྐས་གཞི་དང་འདྲ་བར་གནས། །ཞེས་བྱ་བ་ནི་སོ་སོར་ཐར་པ་འདི་ནི་འདོད་ཆགས་ལ་སོགས་པ་ཉོན་མོངས་པ་ཕམ་ཞིང་སྤང་བར་བྱ་བ། འཕགས་པའི་ལམ་
[140b.5]མིའི་བདག་པོ་རྒྱལ་པོ་དང་འདྲ་བའི་འདྲེན་པ་སྙིང་ཚོགས་མཆོག་ལྟ་བུ་ཡིན་ནོ། །སོ་སོར་ཐར་པ་འདི་ནི་ཐར་པ་མྱ་ངན་ལས་འདས་པའི་གྲོང་ཁྱེར་བརྩེགས་མར་འཇུག་ཅིང་འཛོག་པའི་ལམ་གྱི་སྐས་ཀྱི་ཐེམ་དང་པོ་དང་འདྲ་བར་གནས་ཏེ། ལམ་གྱི་གཞི་ནི་ཚུལ་ཁྲིམས་ཡིན་པའི་ཕྱིར་རོ། །
[140b.6]ང་ནི་མྱ་ངན་འདས་གྱུར་ནས། །འདི་ནི་ཁྱོད་ཀྱི་སྟོན་པ་ཞེས། །རང་བྱུང་ཉིད་ཀྱིས་གུས་བཅས་པར། །ནན་ཏན་དགེ་སློང་ཚོགས་མདུན་བསྟོད། །ཅེས་བྱ་བ་ནི་སྟོན་པ་ཆེན་པོ་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་ཚེ་ན། དགེ་སློང་དག་ད་ཕྱིན་ཆད་བདག་ཅག་ལ་སྟོན་པ་
[140b.7]མེད་པར་འགྱུར་རོ་སྙམ་དུ་དོགས་པ་བཟློག་པའི་ཕྱིར་འདི་སྐད་ཅེས། ང་མྱ་ངན་ལས་འདས་པར་གྱུར་པ་ན་སོ་སོར་ཐར་པ་འདི་ཁྱོད་ལ་སྟོན་པ་བྱེད་པར་འགྱུར་བས་འདི་ནི་ཁྱོད་ཀྱི་སྟོན་པ་ཡིན་ནོ་ཞེས་རང་བྱུང་གཞན་གྱི་ལུང་བསྟན་མེད་པའི་མཁྱེན་པ་བརྙེས་པ་སངས་རྒྱས་བཅོམ་ལྡན་འདས་ཉིད་ཀྱིས་
[141a]
[141a.1]རང་གི་ཞལ་ནས་གུས་པ་དང་བཅས་པར་དགོངས་པ་གཏད་དོ། །ནན་ཏན་དུ་དགེ་སློང་རྣམས་ལ་བཀའ་སྩལ་ནས་དགེ་སློང་གི་ཚོགས་དགེ་འདུན་གྱི་མདུན་དུ་བསྟོད་པ་མཛད་པས། དེའི་ཕྱིར་འདི་ནི་སྟོན་པ་ཉིད་ཀྱི་ཞལ་དང་འདྲ་བར་སྟོན་པའོ། །འདུལ་བའི་སོ་སོར་
[141a.2]ཐར་དེ་ཡི། །རྣམ་འབྱེད་ཡིན་པར་དགོངས་པས་ན། །ཐར་འདོད་རྣམས་ཀྱིས་གུས་བྱས་ཏེ། །འདི་ནི་ནན་ཏན་མཉན་པར་བྱ། །ཞེས་བྱ་བ་དེ་ནི་དེ་ལྟར་གང་གི་ཕྱིར་སོ་སོར་ཐར་པ་ཞེས་བྱ་བ་གང་ཡིན་པ་དེ་ནི་ཡོན་ཏན་དང་ཕན་ཡོན་དུ་མས་ཡང་དག་པར་རྒྱས་པ་ཡིན་ལ། རྣམ་པར་འབྱེད་པ་
[141a.3]དང་ཕྲན་ཚེགས་ལ་སོགས་པ་འདུལ་བ་འདི་དག་ཐམས་ཅད་སོ་སོར་ཐར་པ་དེའི་རྒྱ་ཆེར་རྣམ་པར་འབྱེད་པ་ཡིན་པའི་ཕྱིར་ཐར་པ་འདོད་པ་དག་གིས་གུས་པར་བྱས་ཏེ། སོ་སོར་ཐར་པ་དེའི་རྣམ་པར་འབྱེད་པར་གྱུར་པ་འདུལ་བ་འདི་དག་རྣམས་རྣམ་པ་ཐམས་ཅད་དུ་ནན་གྱིས་མཉན་པར་བྱ་ཞིང་ཐོས་
[141a.4]ནས་ཀྱང་འབྲས་བུ་དང་བཅས་པར་བྱའོ་ཞེས་བསྟན་ཏོ། །འདུལ་བ་རྣམ་པར་བཤད་པ་གགས་བསལ་ཏེ། །དེ་ལས་བདག་གིས་དགེ་བསགས་གང་ཡིན་པས། །འཆིང་བ་མ་ལུས་རབ་ཏུ་གྲོལ་བྱའི་ཕྱིར། །འཇིག་རྟེན་ཀུན་གྱི་གགས་ནི་ཉམས་གྱུར་ཅིག །འདུལ་བ་ལ་བསྟོད་པ་བཙུན་
[141a.5]པ་ཆོས་ཀྱི་ཚོང་དཔོན་གྱིས་མཛད་པ། སློན་དཔོན་དུལ་བའི་ལྷས་བཤད་པ་རྫོགས་སོ།། །།{T4138}༄༅༅། །རྒྱ་གར་སྐད་དུ། ས་མ་ཡ་བྷེ་དོ་བྱཱུ་ཧ་ཙ་ཀྲཾ། བོད་སྐད་དུ། གཞུང་ལུགས་ཀྱི་བྱེ་བྲག་བཀོད་པའི་འཁོར་ལོ། །ཐམས་ཅད་མཁྱེན་པ་ལ་ཕྱག་
[141a.6]འཚལ་ལོ། །རྫོགས་པའི་སངས་རྒྱས་མྱ་ངན་འདས། །ལོ་བརྒྱ་རྫོགས་པར་ཚང་ནས་སུ། །བསྟན་པ་ལ་ནི་གནོད་བགྱིད་པ། །གྱེས་པ་ཇི་ལྟར་བྱུང་བ་བཞིན། །སྡེ་པ་རྣམས་ནི་ཕན་ཚུན་དུ། །བློ་གྲོས་ཐ་དད་བྱུང་བ་བཞིན། །སྐྱོང་བར་བྱེད་པ་དེ་རྣམས་ནི། །བདག་ལ་ཡོད་པ་
[141a.7]བརྟེན་ནས་བཤད། །དེ་ཚེ་དབྱིག་བཤེས་བློ་ལྡན་པ། །ཤཱཀྱའི་དགེ་སློང་བློ་ཆེན་པོ། །བྱང་ཆུབ་སེམས་དཔའ་བློ་གྲོས་ཆེ། །ཁྱད་པར་སེམས་ལ་བརྟག་བྱ་སྟེ། །འཇིག་རྟེན་ལྟ་བ་སྣ་ཚོགས་ཀྱིས། །རྣམ་པར་གཡེངས་ལ་ཀུན་བརྟགས་ཤིང་། །ཐུབ་པའི་བཀའ་ནི་གྱེས་པ་བཞིན། །
[141b]
[141b.1]གཞུང་ལུགས་དེ་དང་དེ་དག་བཤད། །འཕགས་པའི་བདེན་པའི་གཏམ་གྱི་གནས། །སངས་རྒྱས་བསྟན་པ་ཀུན་བསྟན་ནས། །རྡུལ་རྣམས་ལ་ནི་གསེར་བཞིན་དུ། །དེ་ཕྱིར་དེ་ལས་སྙིང་པོ་བླང་། །འདི་སྐད་ཅེས་གྲག་སྟེ། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་
[141b.2]འདས་ཤིང་རྒྱལ་བའི་ཉི་མ་ནུབ་ནས་ལོ་བརྒྱ་ལོན་ཏེ། དུས་ཅུང་ཟད་ཅིག་འདས་ནས་ཤིང་སྐྱ་ནར་གྱི་བུ་མེ་ཏོག་གི་གྲོང་བར་གྱི་རྟེན་མ་རྒྱལ་པོ་མྱ་ངན་མེད་གདུགས་གཅིག་པའི་ས་སྐྱོང་ཞིང་རྒྱལ་སྲིད་མཛད་པའི་དགེ་འདུན་ཕལ་ཆེན་པ་གྱེས་པ་བྱུང་སྟེ། འདི་ལྟ་སྟེ། གཞན་གྱིས་ཉེ་བར་བསྒྲུབ་པ་དང་།
[141b.3]མི་ཤེས་པ་དང་། སོ་མ་ཉི་དང་། གཞན་གྱིས་རྣམ་པར་སྤྱོད་པ་དང་། ལམ་སྒྲ་འབྱིན་པ་དང་བཅས་པ་འདི་ནི། སངས་རྒྱས་ཀྱི་བསྟན་པ་དང་བཅས་པ་འདི་ནི་སངས་རྒྱས་ཀྱི་བསྟན་པ་ཡིན་ནོ་ཞེས་གནས་ལྔ་རྗེས་སུ་བརྗོད་ཅིང་རྗེས་སུ་སྒྲོགས་པར་གནས་བརྟན་གླུ་དང་། ཤར་ཕྱོགས་པ་དང་།
[141b.4]མོང་དུ་ཐོས་པ་བྱུང་བར་གྱུར་ཏོ། །གནས་ལྔ་པོ་དེ་དག་པར་རྗེས་སུ་བརྗོད་ཅིང་རྗེས་སུ་བསྒྲགས་ནས་ཀྱང་དགེ་འདུན་ཕལ་ཆེན་པོའི་སྡེ་དང་། གནས་བརྟན་པའི་སྡེ་ཞེས་བྱ་བ་སྡེ་པ་གཉིས་རྣམ་པར་གཞག་གོ། །ལོ་བརྒྱ་དེ་ཉིད་ལ་གནས་པའི་ཚེ་སྡེ་པ་དགེ་འདུན་ཕལ་ཆེན་པོའི་སྡེ་ལས་ཐ་སྙད་གཅིག་
[141b.5]པའི་སྡེ་དང་། འཇིག་རྟེན་འདས་སྨྲའི་སྡེ་དང་། བྱ་གག་རིས་ཀྱི་སྡེ་ཞེས་བྱ་བ་སྡེ་པ་གཞན་དག་ཀྱང་རྣམ་པར་བཀོད་དོ། །ལོ་བརྒྱ་པ་དེ་ཉིད་ཀྱི་ཚེ་སྡེ་པ་དགེ་འདུན་ཕལ་ཆེན་པའི་སྡེ་ལས་མང་དུ་ཐོས་པའི་སྡེ་པ་ཞེས་བྱ་བ་སྡེ་པ་གཞན་ཡང་རྣམ་པར་གཞག་གོ། །ལོ་བརྒྱ་པ་དེ་ཉིད་ཀྱི་ཚེ། སྡེ་པ་
[141b.6]དགེ་འདུན་ཕལ་ཆེན་བོའི་སྡེ་ལས་བཏགས་པར་སྨྲ་བའི་སྡེ་ཞེས་བྱ་བ་སྡེ་པ་གཞན་ཡང་རྣམ་པར་གཞག་གོ། །ལོ་ཉིས་བརྒྱ་པ་ལ་གནས་པའི་ཚེ་ཀུན་དུ་རྒྱུ་ལྷ་ཆེན་པོ་ཞེས་བྱ་བ་རབ་ཏུ་བྱུང་སྟེ་མཆོད་རྟེན་གྱི་རིལ་གནས་པས་དགེ་འདུན་ཕལ་ཆེན་པོའི་ལུགས་ལྔ་བོ་དེ་དག་ཡང་དག་པར་རྗེས་སུ་བརྗོད་
[141b.7]ཅིང་། ཡང་དག་པར་རྗེས་སུ་བསྒྲགས་ནས་མཆོད་རྟེན་པའི་སྡེ་དང་། ནུབ་ཀྱི་རི་བོའི་སྡེ་དང་། བྱང་གི་རི་བོའི་སྡེ་ཞེས་བྱ་བ་སྡེ་པ་གསུམ་རྣམ་པར་བཀོད་དོ། །དེ་ལྟར་ན་དགེ་འདུན་ཕལ་ཆེན་པའི་སྡེ་པ་དེ་ནི་དགེ་འདུན་ཕལ་ཆེན་པའི་སྡེ་དང་། ཐ་སྙད་གཅིག་པའི་སྡེ་དང་། འཇིག་རྟེན་འདས་
[142a]
[142a.1]སྨྲའི་སྡེ་དང་། བྱ་གག་རིས་ཀྱི་སྡེ་དང་། མང་དུ་ཐོས་པའི་སྡེ་དང་། བཏགས་པར་སྨྲ་བའི་སྡེ་དང་། མཆོད་རྟེན་པའི་སྡེ་དང་། ནུབ་ཀྱི་རི་བོའི་སྡེ་དང་། ཞེས་བྱ་བ་སྡེ་པ་བཞི་དང་། རྣམ་པ་ལྔར་རྣམ་པར་བཀོད་དོ། །སྡེ་པ་གནས་བརྟན་པའི་སྡེ་དང་དུས་ཅུང་
[142a.2]ཟད་ཅིག་རྗེས་སུ་ཞུགས་ནས་ལོ་སུམ་བརྒྱ་པ་ལ་གནས་པའི་ཚེ། རྩོད་པ་འགའ་ཞིག་གི་ཕྱིར་ཐམས་ཅད་ཡོད་པར་སྨྲ་བའི་གང་དག་རྒྱུར་སྨྲ་བའི་སྡེ་ཞེས་བྱ་བ་དང་། སྔོན་གནས་བརྟན་པའི་སྡེ་གང་དག་གངས་རི་བའི་སྡེ་ཞེས་བྱ་བ་སྡེ་པ་གཉིས་རྣམ་པར་གཞག་གོ། །ལོ་སུམ་བརྒྱ་པ་
[142a.3]དེ་ཉིད་ཀྱི་ཚེ་སྡེ་པ་ཐམས་ཅད་ཡོད་པར་སྨྲ་བའི་སྡེ་ལས་གནས་མའི་བུའི་སྡེ་ཞེས་བྱ་བ་སྡེ་པ་གཞན་རྣམ་པར་གཞག་གོ། །ལོ་བརྒྱ་པ་དེ་ཉིད་ལ་གནས་པའི་ཚེ། སྡེ་པ་གནས་མ་བུའི་སྡེ་ལས་ཆོས་མཆོག་བའི་སྡེ་དང་། བཟང་པོའི་བུའི་སྡེ་དང་། ཀུན་གྱིས་བཀུར་བའི་སྡེ་དང་། གྲོང་ཁྱེར་དྲུག་
[142a.4]པའི་སྡེ་དང་ཞེས་བྱ་བ་སྡེ་པ་གཞན་དག་རྣམ་པར་བཀོད་དོ། །ལོ་བརྒྱ་པ་དེ་ཉིད་ལ་གནས་པའི་ཚེ། སྡེ་པ་ཐམས་ཅད་ཡོད་པར་སྨྲ་བའི་སྡེ་ལས་ས་སྟོན་གྱི་སྡེ་དང་ཞེས་བྱ་པ་སྡེ་པ་གཞན་དག་རྣམ་པར་གཞག་གོ། །ལོ་བརྒྱ་པ་དེ་ཉིད་ལ་གནས་པའི་ཚེ། སྡེ་པ་ས་སྟོན་པའི་སྡེ་ལས་དེ་དག་ལས་
[142a.5]སློབ་དཔོན་མཽད་གལ་ཡིན་པར་སྟོན་པས། ཆོས་སྤུང་སྡེ་ཞེས་བྱ་བ་སྡེ་པ་གཞན་རྣམ་པར་གཞག་གོ། །ལོ་བརྒྱ་པ་དེ་ཉིད་ལ་གནས་པའི་ཚེ། སྡེ་པ་ཐམས་ཅད་ཡོད་པར་སྨྲ་བའི་སྡེ་ལས་ལ་ལར་འོད་སྲུངས་ཀྱི་སྡེ་ཞེས་བྱ་བ་བྱུང་སྟེ། ལོ་བཟང་བའི་སྡེ་ཞེས་བྱ་བ་སྡེ་པ་གཞན་རྣམ་པར་གཞག་
[142a.6]གོ། །ཡང་ལོ་བཞི་བརྒྱ་ལ་གནས་པའི་ཚེ། སྡེ་པ་ཐམས་ཅད་ཡོད་པར་སྨྲ་བའི་སྡེ་ལས། དེ་དག་སློབ་དཔོན་ཆོས་མཆོག་ཡིན་པར་སྟོན་པས་ལ་ལར་མདོ་སྡེ་སྨྲ་བའི་སྡེ་ཞེས་བྱ་བ་སྟེ། འཕོ་བར་སྨྲ་བའི་སྡེ་ཞེས་བྱ་བ་སྡེ་པ་གཞན་རྣམ་པར་གཞག་གོ། །དེ་ལྟར་གནས་བརྟན་པའི་སྡེ་ཞེས་བྱ་
[142a.7]བའི་སྡེ་པ་དེ་ནི་ཐམས་ཅད་ཡོད་པར་སྨྲ་བའི་སྡེ་དང་། གངས་རི་པའི་སྡེ་དང་། གནས་མ་བུའི་སྡེ་དང་། ཆོས་མཆོག་པའི་སྡེ་དང་། བཟང་པོའི་བུའི་སྡེ་དང་། ཀུན་གྱིས་བཀུར་བའི་སྡེ་དང་། གྲོང་ཁྱེར་དྲུག་པའི་སྡེ་དང་། ས་སྟོན་པའི་སྡེ་དང་། ཆོས་སྲུང་སྡེ་དང་། འོད་སྲུངས་ཀྱི་སྡེ་དང་།
[142b]
[142b.1]འཕོ་བར་སྨྲ་བའི་སྡེ་ཞེས་བྱ་བ་རྣམ་པ་བཅུ་གཅིག་ཏུ་རབ་ཏུ་རྣམ་པར་གཞག་གོ། །དེ་དག་གི་གཞིའི་གཞུང་ལུགས་དང་། བར་གྱི་གཞུང་ལུགས་རྣམས་རྣམ་པར་བཤད་པར་བྱའོ། །དེ་ལ་དགེ་འདུན་ཕལ་ཆེན་པོའི་སྡེ་ཞེས་བྱ་བ་ཐ་སྙད་གཅིག་པའི་སྡེ་དང་། འཇིག་རྟེན་འདས་སྨྲའི་སྡེ་དང་།
[142b.2]བྱ་གག་རིས་ཀྱི་སྡེ་ཞེས་བྱ་པ་རྣམས་ཀྱི་གཞིའི་གཞུང་དག་ཡོད་དེ། དེ་དག་སངས་རྒྱས་བཅོམ་ལྡན་འདས་འཇིག་རྟེན་ཐམས་ཅད་ལས་འདས་པའི་དེ་བཞིན་གཤེགས་པའི་ཆོས་མི་མངའོ། །དེ་བཞིན་གཤེགས་པའི་གསུང་ཐམས་ཅད་ནི་ཆོས་ཀྱི་འཁོར་ལོ་རྗེས་སུ་བསྐོར་བའོ། །ཐམས་ཅད་
[142b.3]རྫས་སུ་མངོན་པར་གསུངས་པའོ། །ཐམས་ཅད་དོན་ཅི་ལྟ་བ་བཞིན་ཉིད་དུ་གསུངས་པ་ཉིད་དོ། །དེ་བཞིན་གཤེགས་པ་ཉིད་ལ་གཟུགས་ཀྱི་མཐའ་མི་མངའོ། །སངས་རྒྱས་བཅོམ་ལྡན་འདས་རྣམས་གྱི་མཐུ་མཐའ་ཡས་པའོ། །སྐུ་ཚེ་དཔག་ཏུ་མེད་པའོ། །རབ་ཏུ་དད་པར་མཛད་པའོ། །
[142b.4]ཆོག་པར་མི་འཛིན་པའོ། །མནལ་བར་ཡང་མི་མཛད་དོ། །ཞུས་ན་དགོངས་པར་ཡང་མཛད་དོ། །མེད་ཅེས་ཀྱང་མི་གསུང་སྟེ། རྟག་ཏུ་མཉམ་པར་གཞག་པ་ཉིད་ཀྱི་ཕྱིར་རོ། །འོན་ཀྱང་སེམས་ཅན་གྱི་ཚོགས་རྣམས་ལ་མིང་དང་ངེས་པའི་ཚིག་གིས་ཡང་དག་པར་གསུང་ངོ་། །སེམས་
[142b.5]གཅིག་གིས་ཆོས་ཐམས་ཅད་རྣམ་པར་མཁྱེན་ཏོ། །སེམས་ཀྱི་སྐད་ཅིག་གཅིག་དང་མཚུངས་པར་ལྡན་པའི་ཤེས་རབ་ཀྱི་ཆོས་ཐམས་ཅད་ཡོངས་སུ་མཁྱེན་ཏོ། །རྟག་པར་རྒྱུན་དུ་ཡོངས་སུ་མྱ་ངན་ལས་འདས་པའི་བར་དུ་སངས་རྒྱས་བཅོམ་ལྡན་འདས་རྣམས་ཀྱིས་ཟད་པ་དང་མི་སྐྱེ་བའི་
[142b.6]ཡེ་ཤེས་དག་རྗེས་སུ་འཇུག་གོ། །བྱང་ཆུབ་སེམས་དཔའ་རྣམས་ཡུམ་གྱི་ལྷུམས་སུ་ནུར་ནུར་པོ་དང་། མེར་མེར་པོ་དང་། ནར་ནར་པོ་དང་། གོར་གོར་བོའི་དངོས་པོ་ལེན་པར་མི་མཛད་དོ། །བྱང་ཆུབ་སེམས་དཔའ་རྣམས་གླང་པོ་ཆེར་གྱུར་ནས་ཡུམ་གྱི་ལྷུམས་སུ་འཇུག་གོ། །བྱང་
[142b.7]ཆུབ་སེམས་དཔའ་རྣམས་ཡུམ་གྱི་ལྷུམས་བརྟོལ་ནས་འབྱུང་བར་མཛད་དོ། །བྱང་ཆུབ་སེམས་དཔའ་རྣམས་ལ་འདོད་པའི་འདུ་ཤེས་མི་འབྱུང་ངོ་། །གནོད་སེམས་ཀྱི་འདུ་ཤེས་མི་འབྱུང་ངོ་། །རྣམ་པར་འཚེ་བའི་འདུ་ཤེས་མི་འབྱུང་ངོ་། །བྱང་ཆུབ་སེམས་དཔའ་རྣམས་བཞེད་ན་
[143a]
[143a.1]སེམས་ཅན་ཡོངས་སུ་སྨིན་པར་བྱ་བའི་ཕྱིར་ངན་སོང་རྣམས་སུ་སྐྱེ་བར་མཛད་དོ། །མངོན་པར་རྟོགས་པའི་མཐའ་ལས་བྱུང་བའི་ཡེ་ཤེས་གཅིག་གིས་འཕགས་པའི་བདེན་པ་བཞི་མཚན་ཉིད་མི་འདྲ་བ་རྣམས་མཁྱེན་ཏོ། །རྣམ་པར་ཤེས་བའི་ཚོགས་ལྔས་ཀུན་དུ་འདོད་
[143a.2]ཆགས་པ་དང་། འདོད་ཆགས་དང་བྲལ་བར་འགྱུར་རོ། །གཟུགས་དང་གཟུགས་མེད་པའི་ཁམས་རྣམ་པར་ཤེས་པའི་ཚོགས་དྲུག་དམིགས་སོ། །དབང་པོ་ལྔ་རིལ་པོ་ཤའི་མིག་གིས་གཟུགས་རིལ་པོ་རྣམས་མི་མཐོང་ངོ་ཞེས་བྱ་བ་ནས་ལུས་ཀྱི་རེག་པ་རྣམས་ལ་མི་རེག་གོ་ཞེས་བྱ་བའི་བར་
[143a.3]དུའོ། །མཉམ་པར་གཞག་པའི་ཚིག་བརྗོད་པ་ཡོད་དོ། །སེམས་ལ་ཡང་ལུས་ཡོད་དོ། །ཡིད་ལ་བྱེད་པ་ལ་ཡང་ལུས་ཡོད་དོ། །ཆོས་བཞིན་དུ་བྱས་པ་རྣམས་ལ་སྐབས་མེད་དོ། །རྒྱུན་དུ་ཞུགས་པའི་སེམས་དང་སེམས་ལས་བྱུང་བ་རྣམས་ཀྱི་ངོ་བོ་ཉིད་ཤེས་སོ། །དགྲ་
[143a.4]བཅོམ་པ་ལ་གཞན་ཉེ་བར་བསྒྲུབ་པ་དང་། གཞན་གྱིས་རྣམ་པར་སྤྱོད་པ་དང་། ལམ་སྒྲ་འབྱིན་པ་དང་བཅས་པའོ། །ལམ་ནི་སྡུག་བསྔལ་བྱེད་པའོ། །ཕན་གདགས་པ་ནི་སྡུག་བསྔལ་བརྗོད་པའོ། །སྡུག་བསྔལ་སྤངས་པའི་ཕྱིར་ཤེས་རབ་ཀྱི་སྦྱོར་བ་དང་། བདེ་བའི་ཡོ་བྱད་དོ། །བརྒྱད་
[143a.5]པ་ཡུན་རིང་དུ་གནས་པར་ཡང་བྱེད་དོ་ཞེས་བྱ་བ་ནས་རིགས་ཀྱི་ཆོས་ཀྱི་བར་ལས་ཀྱང་ཡོངས་སུ་ཉམས་པར་འགྱུར་རོ་ཞེས་བརྗོད་པར་བྱའོ། །རྒྱུན་དུ་ཞུགས་པ་ནི་ཡོངས་སུ་ཉམས་པའི་ཆོས་ཅན་ནོ། །དགྲ་བཅོམ་པ་ནི་ཡོངས་སུ་མི་ཉམས་པའི་ཆོས་ཅན་ནོ། །འཇིག་རྟེན་པའི་ཡང་དག་པའི་ལྟ་
[143a.6]བ་མེད་དོ། །འཇིག་རྟེན་པའི་དད་པའི་དབང་པོ་མེད་དོ། །ལུང་དུ་མི་སྟོན་པའི་ཆོས་རྣམས་མེད་དོ། །ཡང་དག་པ་ཉིད་སྐྱོན་མེད་པར་འཇུག་པས་ཀུན་དུ་སྦྱོར་བ་ཐམས་ཅད་མ་སྤངས་པར་བརྗོད་པར་བྱའོ། །རྒྱུན་དུ་ཞུགས་པ་ལ་ནི་མཚམས་མེད་པ་རྣམས་མ་གཏོགས་པར་སྡིག་པ་ཐམས་ཅད་
[143a.7]བྱེད་དོ། །མདོ་སྡེ་ཐམས་ཅད་ངེས་པའི་དོན་ཡིན་ནོ། །སོ་སོར་བརྟགས་པའི་འགོག་པ་དང་། ནམ་མཁའ་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་།
[143b]
[143b.1]རྟེན་ཅིང་འབྲེལ་པར་འབྱུང་བ་རྣམས་དང་། གློ་བུར་དུ་འོངས་པའི་ཉེ་བའི་ཉོན་མོངས་པས། སེམས་རང་བཞིན་གྱིས་འོད་གསལ་བ་ནི་འདུས་མ་བྱས་ཀྱི་དངོས་པོ་དགུའོ། །བག་ལ་ཉལ་དག་ནི་སེམས་མ་ཡིན། སེམས་ལས་བྱུང་བ་མ་ཡིན་པར་བརྗོད་པར་བྱའོ། །དམིགས་
[143b.2]པ་མེད་པར་བརྗོད་པར་བྱའོ། །བག་ལ་ཉལ་དག་གཞན་ལ་ཀུན་ནས་དཀྲིས་པ་དག་གཞན་ཡིན་པར་བརྗོད་པར་བྱའོ། །བག་ལ་ཉལ་རྣམས་ནི་སེམས་དང་མི་ལྡན་པ་ཡིན་པར་བརྗོད་པར་བྱའོ། །ཀུན་ནས་དཀྲིས་པ་དག་ནི་སེམས་དང་མཚུངས་པར་ལྡན་བདག་གོ། །འདས་པ་དང་། མ་
[143b.3]འོངས་པ་མེད་དོ། །ཆོས་ཀྱི་སྐྱེ་མཆེད་ནི་ཤེས་པར་བྱ་བ་མ་ཡིན། རྣམ་པར་ཤེས་པར་བྱ་བ་མ་ཡིན་ནོ། །བར་མདོའི་སྲིད་པ་མེད་དོ། །རྒྱུན་དུ་ཞུགས་པ་ལ་ནི་བསམ་གཏན་ཐོབ་པ་ཡིན་ནོ་ཞེས་བྱ་བ་ཟེར་ཏེ་དེ་དག་ནི་གཞིའི་གཞུང་ལུགས་དག་གོ། །དེ་དག་གི་བར་གྱི་གཞུང་ལུགས་ནི་འདི་
[143b.4]དག་ཡིན་ཏེ། ཇི་ལྟ་ཇི་ལྟར་བདེན་པ་རྣམས་ཕྱེ་བ་དེ་ལྟ་དེ་ལྟར་མངོན་པར་རྟོགས་པ་འབྱུང་ངོ་། །ཅུང་ཟད་ནི་རང་གིས་བྱས་པའོ། །ཅུང་ཟད་ནི་གཞན་གྱིས་བྱས་པའོ། །ཅུང་ཟད་ནི་གཉིས་ཀས་བྱས་པའོ། །ཅུང་ཟད་ནི་རྟེན་ཅིང་འབྲེལ་པར་འབྱུང་བས་བྱས་པའོ། །དུས་གཅིག་ཏུ་སེམས་
[143b.5]གཉིས་ཕྲད་དོ། །ཉོན་མོངས་པ་དང་ལམ་ཕྲད་དོ། །ལས་དང་རྣམ་པར་སྨིན་པ་ཕྲད་དོ། །ས་བོན་ཉིད་མྱུ་གུར་འགྱུར་རོ། །དབང་པོའི་འབྱུང་བ་ཆེན་པོ་རྣམས་ནི་འགྱུར་བའོ། །སེམས་དང་སེམས་ལས་བྱུང་བ་རྣམས་ནི་མི་འགྱུར་རོ། །སེམས་ཀྱིས་ནི་ལུས་ལ་ཁྱབ་པ་དང་སེམས་
[143b.6]འདུག་པ་ཡང་དམིགས་སོ། །དེ་ལྟར་དེ་ལ་སོགས་པ་གཞན་དང་གཞན་དག་དམིགས་པ་ཅན་དག་འདོད་དེ། དེ་ལྟར་དེ་དག་ནི་བར་གྱི་གཞུང་ལུགས་དག་ཡིན། དེ་ལ་མང་དུ་ཐོས་པའི་སྡེ་རྣམས་གཞིའི་གཞུང་ལུགས་དག་ཡོད་དེ། དེ་བཞིན་གཤེགས་པའི་དབྱངས་ལྔ་བོ་མི་རྟག་
[143b.7]པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་དང་། མྱ་ངན་ལས་འདས་པ་ནི་ཞི་བ། ལམ་ནི་ངེས་པར་འབྱིན་པ་འཇིག་རྟེན་ལས་འདས་པ་དག་ཡིན་པར་བརྗོད་པར་བྱའོ། །ལྷག་མ་རྣམས་ནི་འཇིག་རྟེན་པ་དག་ཡིན་ནོ། །དགྲ་བཅོམ་པ་ལ་གཞན་གྱི་ཉེས་པར་བསྒྲུབ་པ་དང་།
[144a]
[144a.1]མི་ཤེས་པ་དང་། སོམ་ཉི་དང་། གཞན་གྱི་རྣམ་པར་སྤྱོད་པ་དང་། ལམ་སྒྲ་འབྱིན་པ་དང་བཅས་པ་ཡོད་དོ། །ལྷག་མ་རྣམས་ནི་ཐམས་ཅད་ཡོད་པར་སྨྲ་བའི་ལུགས་དག་ཡིན་ནོ། །དེ་བཏགས་པར་སྨྲ་བ་རྣམས་ཀྱི་གཞིའི་ལུགས་དག་ནི་བསྡུ་བ་ལྔ་ནི་ཕུང་
[144a.2]པོ་མེད་པའོ། །སྐྱེ་མཆེད་དག་ནི་ཡོངས་སུ་མ་རེག་པ་དག་གོ། །འདུ་བྱེད་རྣམས་ཕན་ཚུན་བཏགས་པའི་སྒོ་ནས་སྡུག་བསྔལ་བའོ། །སྐྱེས་བུའི་བྱེད་པ་མེད་དོ། །དུས་མ་ཡིན་པའི་འཆི་བ་མེད་དོ། །སྔོན་གྱི་ལས་ཀྱིས་འཐོབ་བོ། །རྣམ་པར་སྨིན་པ་མངོན་པར་གྲུབ་པ་ནི་ལས་འཕེན་པའི་རྒྱུ་
[144a.3]ལས་བྱུང་བའོ། །བསོད་ནམས་དག་གིས་ཀུན་ཆུབ་པར་བྱས་ནས་ལམ་འཐོབ་བོ། །ལམ་བསྒོམ་པར་བྱ་བ་མ་ཡིན་ནོ། །ལམ་ནི་འཇིགས་པར་མི་འགྱུར་བའོ། །ལྷག་མ་རྣམས་ནི་དགེ་འདུན་ཕལ་ཆེན་སྡེའི་ལུགས་དག་ཡིན་ནོ། །དེ་ལ་ཐམས་ཅད་ཡོད་པར་སྨྲ་བའི་སྡེ་པ་རྣམས་ཀྱི་
[144a.4]གཞུང་ལུགས་ནི་ཐམས་ཅད་ཡོད་དོ། །གང་ཇི་ལྟར་ཡོད་པ་དེ་དེ་བཞིན་དུ་ཡོད་དོ། །མིང་དང་གཟུགས་གཉིས་ཀྱིས་འདུས་བྱས་ཐམས་ཅད་བསྡུས་སོ། །འདས་པ་དང་མ་འོངས་པ་ཡོད་དོ། །ཆོས་ཀྱི་སྐྱེ་མཆེད་ནི་ཤེས་པར་བྱ་བ་དང་། རྣམ་པར་ཤེས་པར་བྱ་བ་དང་། མངོན་པར་
[144a.5]ཤེས་པར་བྱ་བ་ཡིན་ནོ། སྐྱེ་བ་དང་། འགག་པ་དང་། གནས་པ་དང་། མི་རྟག་པ་ཉིད་དང་། སེམས་དང་མི་ལྡན་པའི་འདུ་བྱེད་རྣམས་ནི་འདུ་བྱེད་ཀྱི་ཕུང་པོས་བསྡུས་པ་དག་གོ། །བསྡུ་བའི་དངོས་པོ་དག་གསུམ་མོ། །འདུས་མ་བྱས་ཀྱི་དངོས་པོ་དག་གསུམ་མོ། །འདུས་བྱས་ཀྱི་
[144a.6]མཚན་ཉིད་དག་གསུམ་མོ། །བདེན་པ་འདུས་བྱས་དག་གསུམ་མོ། །འདུས་མ་བྱས་གཅིག་གོ། །འཕགས་པའི་བདེན་པ་བཞི་མཐར་གྱིས་མངོན་པར་རྫོགས་པ་ཡིན་ནོ། །སྟོང་པ་ཉིད་དང་སྨོན་པ་མེད་པས་ཡང་དག་པ་ཉིད་སྐྱོན་མེད་པར་འཇུག་གོ། །འདོད་པ་དང་ལྡན་པའི་འདུ་བྱེད་རྣམས་
[144a.7]ཡིད་ལ་བྱེད་པས་ཡང་དག་པར་སྐྱོན་མེད་པར་འཇུག་གོ། །ཡང་དག་པ་ཉིད་སྐྱོན་མེད་པར་ཞུགས་པས་སེམས་བསྐྱེད་པ་བཅོ་ལྔ་ལ་རྒྱུན་དུ་ཞུགས་པ་ཞེས་བརྗོད་པར་བྱའོ། །བཅུ་དྲུག་པ་ལ་རྒྱུན་དུ་ཞུགས་པའོ། །འཇིག་རྟེན་པའི་ཆོས་ཀྱི་མཆོག་རྣམས་ནི་སེམས་གཅིག་པ་རྣམ་པ་གསུམ་མོ། །
[144b]
[144b.1]འཇིག་རྟེན་པའི་ཆོས་ཀྱི་མཆོག་རྣམས་ལས་ཡོངས་སུ་ཉམས་པར་མི་འགྱུར་རོ། །རྒྱུན་དུ་ཞུགས་པ་ནི་ཡོངས་སུ་མི་ཉམས་པ་ཅན་ནོ། །དགྲ་བཅོམ་པ་ནི་ཡོངས་སུ་ཉམས་པའི་ཆོས་ཅན་ནོ། །དགྲ་བཅོམ་པ་ཐམས་ཅད་ཀྱིས་མི་སྐྱེ་བར་ཤེས་པ་མི་འཐོབ་བོ། །སོ་སོའི་སྐྱེ་བོས་འདོད་
[144b.2]པའི་འདོད་ཆགས་དང་གནོད་སེམས་གཉིས་སྤོང་ངོ་། །ཕྱི་རོལ་པའི་མངོན་པར་ཤེས་པ་ལྔ་ཡོད་དོ། །ལྷ་རྣམས་ལ་ཚངས་པར་སྤྱོད་པ་ལ་གནས་པ་ལ་དམིགས་སོ། །སྙོམས་པར་ཞུགས་པ་བདུན་ལ་བྱང་ཆུབ་ཀྱི་ཡན་ལག་རྣམས་དམིགས་ཀྱི་གཞན་རྣམས་ལ་མ་ཡིན་ནོ། །བསམ་གཏན་རྣམས་ནི་དྲན་
[144b.3]པ་ཉེ་བར་གཞག་པ་རྣམས་ཀྱི་བསྡུས་སོ། །བསམ་གཏན་ལ་བརྟེན་ནས་ནི་ཡང་དག་པ་ཉིད་སྐྱོན་མེད་པ་ཉིད་དུ་འཇུག་གོ། །དགྲ་བཅོམ་པ་ཉིད་ཀྱང་འཐོབ་བོ། །གཟུགས་དང་གཟུགས་མེད་པའི་ཁམས་དག་ལ་བརྟེན་ནས་དགྲ་བཅོམ་པ་ཉིད་རྗེས་སུ་འཐོབ་ཀྱི་ཡང་དག་པ་ཉིད་སྐྱོན་མེད་པར་མི་འཇུག་
[144b.4]གོ། །འདོད་ཁམས་སུ་ཡང་དག་པ་ཉིད་སྐྱོན་མེད་པར་འཇུག་གོ། །དགྲ་བཅོམ་པ་ཉིད་ཀྱང་འཐོབ་བོ། །གཟུགས་ཀྱི་ཁམས་སུ་དགྲ་བཅོམ་པ་ཉིད་འཐོབ་ཀྱི་ཡང་དག་པ་ཉིད་སྐྱོན་མེད་པར་མི་འཇུག་གོ། །བྱང་གི་སྒྲ་མི་སྙན་དག་ན་འདོད་ཆགས་དང་བྲལ་བ་མེད་དོ། །དེར་འཕགས་
[144b.5]པ་རྣམས་སྐྱེ་བར་མི་འགྱུར་རོ། །འདུ་ཤེས་མེད་པའི་སེམས་ཅན་ལྷ་རྣམས་ཀྱི་ནང་དུ་མི་སྐྱེའོ། །མཐར་གྱིས་དགེ་སྦྱོང་གི་ཚུལ་གྱི་བྲས་བུ་བཞི་ཐོབ་པར་ངེས་པ་མེད་དོ། །སྐྱོན་མེད་པར་ཞུགས་པ་འཇིག་རྟེན་པའི་ལམ་གྱིས་འདོད་པའི་འདོད་ཆགས་དང་བྲལ་བས་ལན་ཅིག་ཕྱིར་འོང་བའི་
[144b.6]འབྲས་བུ་དང་། ཕྱིར་མི་འོང་བའི་འབྲས་བུ་འཐོབ་པར་བྱེད་དོ། །དྲན་པ་ཉེ་བར་གཞག་པ་བཞིན་ནི་ཆོས་ཐམས་ཅད་ཡིན་པར་བརྗོད་པར་བྱའོ། །ཕྲ་རྒྱས་རྣམས་ནི་སེམས་ལས་བྱུང་བའི་སེམས་དང་མཚུངས་པར་ལྡན་པ་རྣམས་སོ། །ཕྲ་རྒྱས་ཐམས་ཅད་ནི་ཀུན་ནས་དཀྲིས་པ་དག་ནི་ཕྲ་རྒྱས་དག་མ་
[144b.7]ཡིན་ནོ། །རྟེན་ཅིང་འབྲེལ་པར་འབྱུང་བ་དག་འདུས་བྱས་སོ། །དགྲ་བཅོམ་པ་ལ་རྟེན་ཅིང་འབྱུང་བའི་ཡན་ལག་ཁ་ཅིག་རྗེས་སུ་འཇུག་གོ། །དགྲ་བཅོམ་པ་ལ་བསོད་ནམས་འཕེལ་བ་ཡོད་དོ། །འདོད་པའི་ཁམས་དང་། གཟུགས་ཀྱི་ཁམས་ན་བར་མ་དོའི་སྲིད་པ་དམིགས་སོ། །རྣམ་པར་
[145a]
[145a.1]ཤེས་པའི་ཚོགས་ལྔས་ཀུན་ཏུ་འདོད་ཆགས་པར་འགྱུར་གྱི་འདོད་ཆགས་བྲལ་བར་ནི་མི་འགྱུར་རོ། །རྣམ་པར་ཤེས་པའི་ཚོགས་ལྔ་ནི་རང་གི་མཚན་ཉིད་འཛིན་པ་དང་། རྣམ་པར་མི་རྟོག་པ་ཡིན་ནོ། །སེམས་དང་སེམས་ལས་བྱུང་བའི་ཆོས་རྣམས་ཡོད་དོ། །སེམས་དང་སེམས་ལས་
[145a.2]བྱུང་བའི་ཆོས་རྣམས་ཀྱི་དམིགས་པ་ཡོད་དོ། །ངོ་བོ་ཉིད་ནི་ངོ་བོ་ཉིད་དང་མི་ལྡན་པའོ། །སེམས་ནི་སེམས་དང་མི་ལྡན་པའོ། །འཇིག་རྟེན་པའི་ཡང་དག་པའི་ལྟ་བ་ཡོད་དོ། །འཇིག་རྟེན་པའི་དད་པའི་དབང་པོ་ཡོད་དོ། །ལུང་དུ་མི་སྟོན་པའི་ཆོས་རྣམས་ཡོད་དོ། །དགྲ་བཅོམ་བ་ལ་སློབ་པ་ཡང་མ་ཡིན་མི་སློབ་པ་ཡང་མ་
[145a.3]ཡིན་པའི་ཆོས་རྣམས་ཡོད་དོ། །དགྲ་བཅོམ་པ་ཐམས་ཅད་བསམ་གཏན་ཐོབ་པ་ཡིན་ཀྱང་ཐམས་ཅད་དུ་བསམ་གཏན་མངོན་དུ་མི་བྱེད་དོ། །དགྲ་བཅོམ་པ་ལ་སྔོན་གྱི་ལས་ཡང་དག་པར་མྱོང་བར་འགྱུར་བ་ཡོད་དོ། །སོ་སོའི་སྐྱེ་བོ་ལ་འཆི་བའི་མཐའ་ལས་བྱུང་བའི་སེམས་མི་དགེ་བ་ཡོད་དོ། །
[145a.4]མཉམ་པར་གཞག་པ་ལ་དེའི་ཚེ་འཆི་བའི་དུས་བྱེད་པ་མེད་དོ། །བྱང་ཆུབ་སེམས་དཔའ་ལ་ནི་སོ་སོའི་སྐྱེ་བོ་དང་ཀུན་དུ་སྦྱོར་བ་དང་བཅས་པ་དང་། ཡང་དག་པ་ཉིད་སྐྱོན་མེད་པར་མ་ཞུགས་པ་དང་། སོ་སོའི་སྐྱེ་བོའི་སར་ཞུགས་པ་ཡིན་པར་བརྗོད་པར་བྱའོ། །སེམས་ཅན་དུ་གདགས་པ་རྣམས་
[145a.5]ལ་ཟིན་པའི་རྒྱུད་ཡིན་པར་བརྗོད་པར་བྱའོ། །འདུ་བྱེད་ཐམས་ཅད་ནི་སྐད་ཅིག་མ་དག་གོ། །འཇིག་རྟེན་འདི་ནས་འཇིག་རྟེན་ཕ་རོལ་དུ་ཆོས་གང་ཡང་འཕོ་བ་མེད་ཀྱང་གང་ཟག་འཕོ་ཞེས་བརྡར་བརྗོད་པར་བྱའོ། །འཆི་བཞིན་དུ་འདུ་བྱེད་ཀྱི་ཕུང་པོ་ལྷག་མ་མེད་པར་འགགས་ཀྱང་ཕུང་པོ་རྣམས་ལ་འགྱུར་
[145a.6]བ་ནི་མེད་དོ། །འཇིག་རྟེན་ལས་འདས་པའི་བསམ་གཏན་ཡོད་དོ། །རྣམ་པར་རྟོག་བ་ཟག་པ་མེད་པ་ཡོད་དོ། །རྣམ་པར་རྟོག་པ་སྲིད་པའི་དགེ་བ་ཡོད་དོ། །མཉམ་པར་གཞག་པ་ལ་ཚིག་བརྗོད་པ་མེད་དོ། །ཆོས་ཀྱི་འཁོར་ལོ་ནི་འཕགས་པའི་ལམ་ཡན་ལག་བརྒྱད་པའོ། །དེ་བཞིན་གཤེགས་
[145a.7]པའི་གསུང་ཐམས་ཅད་ནི་ཆོས་ཀྱི་འཁོར་ལོ་རྗེས་སུ་བསྐོར་བ་ཡིན་ནོ། །ཐམས་ཅད་རྫས་སུ་མངོན་པར་གསུངས་པ་མ་ཡིན་ནོ། །ཐམས་ཅད་དོན་ཇི་ལྟ་བ་བཞིན་གསུངས་པ་མ་ཡིན་ནོ། །མདོ་སྡེ་ཐམས་ཅད་ངེས་པའི་དོན་གྱིས་གསུངས་པ་མ་ཡིན་ནོ། །མདོ་སྡེ་ཐམས་ཅད་ངེས་པའི་དོན་མ་
[145b]
[145b.1]ཡིན་ཏེ། ངེས་པའི་དོན་གྱི་མདོ་སྡེ་ཡོད་དོ། །དེ་ལྟར་དེ་དག་གི་གཞིའི་གཞུང་ལུགས་དག་གོ། །བར་གྱི་གཞུང་ལུགས་དག་ནི་མཐའ་ཡས་སོ། །དེ་ལ་གངས་རི་པའི་གཞིའི་གཞུང་ལུགས་དག་ནི་བྱང་ཆུབ་སེམས་དཔའ་སོ་སོའི་སྐྱེ་བོ་དག་བརྣབ་སེམས་མེད་པར་བརྗོད་པར་བྱའོ། །བྱང་
[145b.2]སེམས་དཔའ་དགོངས་བཞིན་དུ་ཡུམ་གྱི་ལྷུམས་སུ་འཇུག་གོ། །ཕྱི་རོལ་པ་ལ་མངོན་པར་ཤེས་པ་ལྔ་མེད་དོ། །ལྷ་རྣམས་ལ་ཚངས་པར་སྤྱོད་པ་ལ་གནས་པ་མི་དམིགས་སོ། །དགྲ་བཅོམ་པ་ལ་གཞན་གྱི་ཉེ་བར་བསྒྲུབ་པ་དང་། མི་ཤེས་པ་དང་། སོམ་ཉི་དང་། གཞན་གྱིས་རྣམ་པར་
[145b.3]སྤྱོད་པ་དང་། ལམ་སྒྲ་འབྱིན་པ་དང་བཅས་པ་ཡོད་དོ། །ལྷག་མ་རྣམས་ནི་ཐམས་ཅད་ཡོད་པར་སྨྲ་བའི་སྡེ་པའི་ལུགས་དག་ཡིན་ནོ། །དེ་ལ་གནས་མ་བུའི་སྡེ་རྣམས་ཀྱི་གཞིའི་གཞུང་ལུགས་དག་ནི་ཕུང་པོ་རྣམས་གང་ཟག་མ་ཡིན་ནོ། །ཕུང་པོ་རྣམས་ལས་གུད་ན་ཡང་མེད་དོ། །ཕུང་པོ་
[145b.4]དང་། ཁམས་དང་། སྐྱེ་མཆེད་ལ་བརྟེན་ཏེ་གདགས་སོ། །འདུ་བྱེད་ཐམས་ཅད་ནི་དུས་གཞན་ལ་སྐད་ཅིག་དག་གོ། །གང་ཟག་མ་གཏོགས་པ་འཇིག་རྟེན་འདི་ནས་འཇིག་རྟེན་ཕ་རོལ་དུ་གང་འཕོ་བའི་ཆོས་གང་ཡང་མེད་དོ། །གང་ཟག་འཕོའོ་ཞེས་བརྗོད་པར་བྱའོ། །ཕྱི་རོལ་པའི་མངོན་པར་
[145b.5]ཤེས་པ་ལྔ་ཡོད་དོ། །རྣམ་པར་ཤེས་པའི་ཚོགས་ལྔས་ཀུན་དུ་འདོད་ཆགས་པ་མེད་དོ། །འདོད་ཆགས་དང་བྲལ་བ་མ་ཡིན་ནོ། །འདོད་ཆགས་དང་ལྡན་པའི་ཀུན་དུ་སྦྱོར་བ་སྤང་བར་བྱ་བ་རྣམས་སྤངས་པས་འདོད་པའི་འདོད་ཆགས་དང་བྲལ་བར་འགྱུར་རོ། །བཟོད་པ་དང་། མིང་དང་། མཚན་དང་།
[145b.6]ཆོས་ཀྱི་མཆོག་རྣམས་ལ་ཡང་དག་པར་ཞུགས་ནས་ཀུན་དུ་སྦྱོར་བ་མཐོང་བས་སྤང་བར་བྱ་བ་རྣམས་སྤངས་པས་སེམས་སྐྱེད་པ་བཅུ་གཉིས་པ་ནི་འཇུག་པ་ཡིན་ནོ། །བཅུ་གསུམ་པ་ནི་འབྲས་བུ་ལ་གནས་པ་ཡིན་ནོ། །དེ་དང་ཁྱད་པར་མེད་པའི་ཆོས་མཆོག་པའི་སྡེ་དང་། བཟང་པོའི་བུའི་སྡེ་དང་། ཀུན་
[145b.7]གྱིས་བཀུར་བའི་སྡེ་དང་། གྲོང་ཁྱེར་དྲུག་པའི་སྡེ་རྣམས་ནི། །གློལ་བ་རྣམས་ནི་བརྡེག་པོས་འགྱུར། །ཡོངས་སུ་འཆུམས་པའང་སླར་ལྷགས་ཤིང་། །དགའ་བྱའི་དགའ་བ་དེ་ཐོབ་བྱ། །བདེ་དང་ལྡན་པ་རྣམས་ནི་སྡེ། །ཞེས་བྱ་བའི་ཚིགས་སུ་བཅད་པ་དེ་ལ་རྩོད་པར་གྱུར་ཏོ། །དེ་ལས་སྟོ་
[146a]
[146a.1]གྱི་སྡེ་པ་རྣམས་ཀྱི་གཞིའི་གཞུང་ལུགས་དག་ནི་འདས་པ་དང་། མ་འོངས་པ་མེད་དོ། །ད་ལྟར་བྱུང་བ་དང་འདུས་མ་བྱས་ཡོད་དོ། །འཕགས་པའི་བདེན་པ་བཞི་མངོན་བར་རྟོགས་པ་ཡིན་ནོ། །སྡུག་བསྔལ་མ་མཐོང་བས་བདེན་པ་རྣམས་མ་མཐོང་ངོ་། །མཐོང་
[146a.2]བ་ནི་མཐོང་བ་དག་ཡིན་ནོ། །ཕྲ་རྒྱས་རྣམས་ནི་སེམས་མ་ཡིན། །སེམས་ལས་བྱུང་བ་རྣམས་མ་ཡིན་ནོ། །དམིགས་པ་མེད་པ་དག་གོ། །ཕྲ་རྒྱས་དག་གཞན་ལ་ཀུན་ནས་དཀྲིས་པ་གཞན་ཡིན་ནོ། །ཕྲ་རྒྱས་རྣམས་ནི་སེམས་དང་མི་ལྡན་པ་དག་ཡིན་ནོ། །ཀུན་ནས་དཀྲིས་པ་རྣམས་མཚུངས་
[146a.3]པར་ལྡན་པ་དག་ཡིན་ནོ། །སོ་སོའི་སྐྱེ་བོ་འདོད་པའི་འདོད་ཆགས་དང་གནོད་སེམས་གཉིས་མི་སྤོང་ངོ་། །ཕྱི་རོལ་པའི་མངོན་པར་ཤེས་པ་ལྔ་མེད་དོ། །ལྷ་རྣམས་ལ་ཚངས་པར་སྤྱོད་པ་གནས་པ་དམིགས་སོ། །བར་མ་དོའི་སྲིད་པ་མེད་དོ། །དགྲ་བཅོམ་པ་ལ་བསོད་ནམས་འཕེལ་བ་མེད་དོ། །རྣམ་
[146a.4]པར་ཤེས་པའི་ཚོགས་ལྔས་ཀུན་དུ་འདོད་ཆགས་པ་དང་འདོད་ཆགས་དང་བྲལ་བ་དག་ཏུ་འགྱུར་རོ། །རྣམ་པར་ཤེས་པའི་ཚོགས་དྲུག་ནི་རྟོག་པ་དང་བཅས་དཔྱོད་པ་དང་མཚུངས་པར་ལྡན་པ་དག་གོ། །གང་ཟག་མགོ་མཉམ་པ་ཡོད་དོ། །འཇིག་རྟེན་པའི་ཡང་དག་པའི་ལྟ་བ་ཡོད་དོ། །
[146a.5]འཇིག་རྟེན་ལས་འདས་པའི་བསམ་གཏན་མེད་དོ། །རྣམ་པར་རྟོག་པ་ཟག་པ་མེད་པ་ཉིད་མེད་དོ། །སྲིད་པའི་རྒྱུད་དགེ་བ་མེད་དོ། །རྒྱུན་དུ་ཞུགས་པ་ནི་ཡོངས་སུ་ཉམས་པའི་ཆོས་ཅན་ནོ། །དགྲ་བཅོམ་པ་ནི་ཡོངས་སུ་མི་ཉམས་པའི་ཆོས་ཅན་ནོ། །ལམ་ཡན་ལག་རྣམས་ནི་དྲན་པ་ཉེ་བར་གཞག་
[146a.6]པ་རྣམས་ཀྱིས་གསུངས་སོ། །འདུས་མ་བྱས་ཀྱི་དངོས་པོ་དགུ་སྟེ། སོ་སོར་བརྟགས་པ་མ་ཡིན་པའི་འགོག་པ་དང་། ནམ་མཁའ་དང་། མི་གཡོ་བ་དང་། དགེ་བའི་ཆོས་རྣམས་ཀྱི་དེ་བཞིན་ཉིད་དང་། མི་དགེ་བའི་ཆོས་རྣམས་ཀྱི་དེ་བཞིན་ཉིད་དང་། ལུང་དུ་མི་སྟོན་པའི་ཆོས་རྣམས་ཀྱི་དེ་བཞིན་ཉིད་
[146a.7]དང་། ལམ་གྱི་དེ་བཞིན་ཉིད་དང་། རྟེན་ཅིང་འབྲེལ་བར་འབྱུང་བའི་དེ་བཞིན་ཉིད་དོ། །མི་ལ་ཐོག་མ་དང་ཐ་མའི་དབང་པོ་འབྱུང་བ་རྣམས་ནི་འགྱུར་བའོ། །སེམས་དང་སེམས་ལས་བྱུང་བའི་ཆོས་རྣམས་ནི་འགྱུར་བའོ། །སངས་རྒྱས་ནི་དགེ་འདུན་ལ་དམིགས་སོ། །དགེ་འདུན་ལ་ཕུལ་བ་
[146b]
[146b.1]ནི་འབྲས་བུ་ཆེའོ། །སངས་རྒྱས་ལ་ནི་མ་ཡིན་ནོ། །སངས་རྒྱས་རྣམས་དང་ཉན་ཐོས་རྣམས་ནི་ལམ་གཅིག་གོ། །རྣམ་པར་གྲོལ་བ་གཅིག་གོ། །འདུ་བྱེད་ཐམས་ཅད་སྐད་ཅིག་མ་དག་གོ། །འཇིག་རྟེན་འདི་དང་ཕ་རོལ་དུ་འཕོ་བའི་ཆོས་གང་ཡང་མེད་དོ། །དེ་ལྟར་དེ་དག་གི་གཞིའི་གཞུང་
[146b.2]ལུགས་དག་གོ། །དེ་དག་གི་བར་གྱི་གཞུང་ལུགས་དག་ནི་འདི་ཡིན་ཏེ། འདས་པ་དང་མ་འོངས་པ་ཡོད་དོ། །བར་མ་དོའི་སྲིད་པ་ཡོད་དོ། །ཆོས་ཀྱི་སྐྱེ་མཆེད་ནི་ཤེས་པར་བྱ་བ་དང་། རྣམ་པར་ཤེས་པར་བྱ་བ་ཡིན་ནོ། །སེམས་པ་ལ་ནི་ལས་ཡིན་ནོ། །ལུས་དང་ངག་གི་ལས་ནི་མེད་དོ། །
[146b.3]རྟོག་པ་དང་དཔྱོད་པ་དག་ནི་མཚུངས་པར་ལྡན་པ་དག་ཡིན་ནོ། །ས་ནི་བསྐལ་པས་གནས་པ་ཡིན་ནོ། །མཆོད་རྟེན་ལ་མཆོད་པའི་ལས་ནི་འབྲས་བུ་ཆུང་བའོ། །ཕྲ་རྒྱས་རྣམས་ནི་རྟག་ཏུ་དེ་ལྟར་བྱུང་བ་ཡིན་ནོ། །འཆི་བར་བྱེད་པའི་ཆོས་ལྔ་པོ་མ་རིག་པ་དང་། ང་རྒྱལ་དང་། སྲེད་པ་དང་། ལྟ་བ་
[146b.4]དང་། ལྔ་པ་ལས་ཀྱི་ལམ་ནི་རྟག་ཏུ་མཚན་མ་ཡིན་ཏེ། དེ་ལས་སྡུག་བསྔལ་རབ་ཏུ་འབྱུང་བ་ཡིན་ནོ། །དེ་ལྟར་དེ་དག་ནི་བར་གྱི་གཞུང་ལུགས་དག་ཡིན་ནོ། །དེ་ལ་ཆོས་སྲུང་སྡེ་རྣམས་ཀྱི་གཞིའི་གཞུང་ལུགས་དག་ནི་སངས་རྒྱས་ནི་དགེ་འདུན་ལ་དམིགས་སོ། །སངས་རྒྱས་ལ་ཕུལ་བ་ནི་འབྲས་
[146b.5]བུ་ཆེ་བའོ། །དགེ་འདུན་ལ་ནི་མ་ཡིན་ནོ། །ཉན་ཐོས་རྣམས་ཀྱི་ལམ་གཞན་ཡིན་ལ། སངས་རྒྱས་ཀྱི་གཞན་ཡིན་ནོ། །ཕྱི་རོལ་པའི་མངོན་པར་ཤེས་པ་ལྔ་མེད་དོ། །དགྲ་བཅོམ་པའི་ལུས་ནི་ཟག་པ་མེད་དོ། །ལྷག་མ་རྣམས་ནི་དགེ་འདུན་ཕལ་ཆེན་སྡེའི་ལུགས་དག་ཡིན་ནོ། །དེ་ལ་འོད་
[146b.6]སྲུངས་ཀྱི་སྔ་རྣམས་ཀྱི་གཞུང་ལུགས་ནི་སྤངས་པ་ཡོངས་སུ་ཤེས་པ་ཡོད་དོ། །མ་སྤངས་པ་ཡོངས་སུ་ཤེས་པ་མེད་དོ། །རྣམ་པར་སྨིན་པ་རྣམ་པར་སྨིན་པར་འགྱུར་བའི་ལས་ཡོད་དོ། །རྣམ་པར་སྨིན་པར་མི་འགྱུར་བ་མེད་དོ། །འདུ་བྱེད་རྣམས་འདས་པའི་རྒྱུ་ལས་བྱུང་བ་དག་ཡོད་དོ། །འདུ་
[146b.7]བྱེད་ཐམས་ཅད་མ་འོངས་པའི་རྒྱུ་ལས་བྱུང་བ་དག་ནི་མེད་དོ། །སློབ་པའི་ཆོས་རྣམས་ནི་རྣམ་པར་སྨིན་པ་དང་བཅས་པའི་ཆོས་དག་གོ། །ལྷག་མ་རྣམས་ནི་ཆོས་སྲུང་སྡེའི་ལུགས་དག་ཡིན་ནོ། །དེ་ལ་འཕོ་བར་སྨྲ་བའི་སྡེ་རྣམས་ཀྱི་གཞིའི་གཞུང་ལུགས་ནི་འཇིག་རྟེན་འདི་ནས་འཇིག་རྟེན་ཕ་རོལ་དུ་ཕུང་
[147a]
[147a.1]པོ་འཕོའོ་ཞེས་ཟེར་རོ། །འཕགས་པའི་ལམ་མེད་པར་ཕུང་པོ་རྣམས་འགག་གོ། །གཞིའི་མཐའ་ལས་བྱུང་བའི་ཕུང་པོ་རྣམས་ཡོད་དོ། །ཕུང་པོ་རོ་གཅིག་པ་རྣམས་ཡོད་དོ། །དོན་དམ་པར་གང་ཟག་ཡོད་དོ། །ལྷག་མ་རྣམས་ནི་ཐམས་ཅད་ཡོད་པར་སྨྲ་བའི་སྡེའི་ལུགས་
[147a.2]དག་ཡིན་ནོ་ཞེས་ཟེར་རོ། །གཞུང་ལུགས་ཀྱི་བྱེ་བྲག་བཀོད་པའི་འཁོར་ལོ་བཙུན་པ་དབྱིག་གི་བཤེས་གཉེན་གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དྷརྨཱ་ཀ་ར་དང་། ལོ་ཙཱ་བ་བནྡེ་བཟང་སྐྱོང་གིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།
[147a.3]{T4139}༄༅༅། །རྒྱ་གར་སྐད་དུ། ཀཱ་ཡ་བྷེ་དོ་བི་བྷཾ་ག་བྱཱ་ཁྱཱ་ན། བོད་སྐད་དུ། སྡེ་པ་ཐ་དད་པར་བྱེད་པ་དང་རྣམ་པར་བཤད་པ། དཀོན་མཆོག་གསུམ་ལ་ཕྱག་འཚལ་ལོ། །སྡེ་པ་བཅོ་བརྒྱད་པོ་དག་ནི་གང་ཡིན། དེ་དག་གི་བྱེ་བྲག་ནི་ཇི་ལྟར་བྱུང་ཞེ་ན། བདག་གི་བླ་མ་གཅིག་ནས་གཅིག་ཏུ་
[147a.4]བརྒྱུད་པ་ལས་འདི་ལྟར་རྗེས་སུ་ཐོས་ཏེ། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ནས། ལོ་བརྒྱ་དྲུག་ཅུ་ལོན་པ་ན་གྲོང་ཁྱེར་མེ་ཏོག་གིས་རྒྱས་པ་ཞེས་བྱ་བར་རྒྱལ་པོ་དྷརྨ་ཨ་ཤོ་ཀ་ཞེས་བྱ་བ་རྒྱལ་སྲིད་བྱེད་པའི་ཚེ། རྩོད་པའི་ཆོས་འགའ་ཞིག་བྱུང་བའི་དབང་གིས་དགེ་འདུན་གྱི་
[147a.5]དབྱེན་ཆེན་པོར་གྱུར་ཏོ། །དེས་རེ་ཞིག་དང་པོར་སྡེ་པ་གཉིས་སུ་ཆད་ནས་གནས་ཏེ། དགེ་འདུན་ཕལ་ཆེན་པ་དང་གནས་བརྟན་པའོ། །དེ་ལ་དགེ་འདུན་ཕལ་ཆེན་པའི་སྡེ་པ་ཡང་རིམ་གྱིས་བྱེ་བར་གྱུར་པ་ན་རྣམ་པ་བརྒྱད་དུ་གནས་ཏེ། དགེ་འདུན་ཕལ་ཆེན་སྡེ་པ་དང་། ཐ་སྙད་གཅིག་པ་དང་།
[147a.6]འཇིག་རྟེན་པས་འདས་པར་སྨྲ་བ་དང་། མང་དུ་ཐོས་པ་དང་། བཏགས་པར་སྨྲ་བ་དང་། མཆོད་རྟེན་པ་དང་། ཤར་གྱི་རི་བོ་དང་། ནུབ་ཀྱི་རི་བོ་བའོ། །གནས་བརྟན་པ་ཡང་རིམ་གྱིས་བྱེ་བར་གྱུར་པ་ན་རྣམ་པ་བཅུར་གྱུར་ཏེ། འདི་ལྟ་སྟེ་གནས་བརྟན་པ་ཉིད་ལ་གངས་རི་བ་ཞེས་ཀྱང་བརྗོད་པ་དང་།
[147a.7]ཐམས་ཅད་ཡོད་པར་སྨྲ་བ་པ་ཉིད་ལ་རྣམ་པར་ཕྱེ་སྟེ་སྨྲ་བ་དང་། རྒྱུར་སྨྲ་བ་དང་། ཁ་ཅིག་མུ་རུན་ཏ་ཀ་པ་ཞེས་ཀྱང་ཟེར་བ་དང་། གནས་མའི་བུ་དང་། ཆོས་མཆོག་པ་དང་། བཟང་པོའི་ལམ་བའོ། །ཀུན་གྱིས་བཀུར་བ་ལ་ཁ་ཅིག་ནི་ཨ་པན་ཏ་ཀ་པ་ཞེས་ཀྱང་ཟེར། ཁ་ཅིག་ནི་ཀུ་རུ་ཀུ་ལ་པ་ཞེས་
[147b]
[147b.1]ཀྱང་ཟེར་བ་དང་། མང་སྟོན་པ་དང་། ཆོས་སྦས་པ་དང་། ཆོས་བཟང་འབེབས་ཞེས་བྱ་བ་ལ་ཁ་ཅིག་ནི་འོད་སྲུངས་པ་ཞེས་ཟེར་བ་དང་། བླ་མ་ལ་ཁ་ཅིག་ནི་འཕོ་བར་སྨྲ་བ་ཞེས་ཟེར་བ་སྟེ། སྡེ་པ་བཅོ་བརྒྱད་ཀྱི་དབྱེ་བ་ནི་དེ་དག་གོ། །དེ་ལ་དགེ་འདུན་ཡང་ཡིན་ལ་ཕལ་ཆེན་པ་ཡང་ཡིན་པས་དགེ་
[147b.2]འདུན་ཕལ་ཆེན་ཏེ། དེ་ཉེ་བར་སྟོན་པར་བྱེད་པ་ནི་དགེ་འདུན་ཕལ་ཆེན་པའོ། །ཁ་ཅིག་ནི་སངས་རྒྱས་བཅོམ་ལྡན་འདས་རྣམས་ཀྱིས་ཆོས་ཐམས་ཅད་ཐུགས་གཅིག་རྣམ་པར་མཁྱེན་ཅིང་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཆོས་ཐམས་ཅད་ཡོངས་སུ་མཁྱེན་ཏོ་ཞེས་ཐ་སྙད་འདོགས་ཏེ།
[147b.3]དེས་ན་ཐ་སྙད་གཅིག་པ་ཞེས་བྱའོ། །འཇིག་རྟེན་ཐམས་ཅད་ཀྱི་འཇིག་རྟེན་པ་ལས་སངས་རྒྱས་བཅོམ་ལྡན་འདས་རྣམས་འདས་པར་གྱུར་པས་དེ་བཞིན་གཤེགས་པ་ལ་འཇིག་རྟེན་པའི་ཆོས་མི་མངའ་འོ་ཞེས་སྨྲ་བ་ནི་འཇིག་རྟེན་ལས་འདས་པར་སྨྲ་བ་པའོ། །མང་དུ་ཐོས་པའི་སློབ་དཔོན་
[147b.4]གྱིས་རྗེས་སུ་སྟོན་པར་བྱེད་པས་ན་མང་དུ་ཐོས་པར་སྨྲ་བའོ། །འདུས་བྱས་རྣམས་ཕན་ཚུན་བརྟགས་པ་ཉིད་ཀྱིས་སྡུག་བསྔལ་པ་ཡིན་ནོ་ཞེས་སྨྲ་བའི་ཕྱིར་བཏགས་པར་སྨྲ་བའོ། །མཆོད་རྟེན་ཅན་གྱི་རི་ལ་གནས་བཅས་པ་ཉིད་ནི་མཆོད་རྟེན་པའོ། །ཤར་གྱི་རི་དང་ནུབ་ཀྱི་རི་ལ་གནས་པ་
[147b.5]ཉིད་ནི། ཤར་གྱི་རི་བོ་པ་དང་། ནུབ་ཀྱི་རི་བོ་པའོ། །གནས་བརྟན་འཕགས་པའི་རིགས་ཡིན་པར་སྟོན་པ་ནི་གནས་བརྟན་པའོ། །དེ་ཉིད་ལ་གངས་རི་པ་ཞེས་ཀྱང་ཟེར་ཏེ། གངས་ཀྱི་རིལ་བརྟེན་ནས་གནས་པའི་ཕྱིར་རོ། །གང་ཅུང་ཞིག་འདས་པ་དང་། མ་འོངས་པ་དང་། ད་
[147b.6]ལྟར་བྱུང་བ་ཐམས་ཅད་ཡོད་དོ་ཞེས་སྨྲ་བའི་ཕྱིར། ཐམས་ཅད་ཡོད་པར་སྨྲ་བའོ། །དེ་དག་ཉིད་ལས་འགའ་ཞིག་ནི་ཡོད་དེ་འདས་པའི་ལས་འབྲས་བུ་མ་ཕྱུང་བ་གང་ཡིན་པའོ། །ལ་ལ་ནི་མེད་དེ། གང་འབྲས་བུ་མྱོང་ཟིན་པ་དང་། མ་འོངས་པ་དག་གོ་ཞེས་རྣམ་པར་ཕྱེ་ནས་སྨྲ་བར་བྱེད་པའི་
[147b.7]ཕྱིར། དེ་ཉིད་ལ་རྣམ་པར་ཕྱེ་སྟེ་སྨྲ་བ་ཞེས་བྱའོ། །དེ་དག་ཉིད་ལས་གང་ཅུང་ཞིག་བྱུང་བ་དང་། འབྱུང་བ་དང་། འབྱུང་བར་འགྱུར་བ་དེ་ཐམས་ཅད་ནི་རྒྱུ་དང་བཅས་པའོ་ཞེས་སྨྲ་བས་རྒྱུར་སྨྲ་བའོ། །དེ་རྣམས་ཉིད་ལ་ཁ་ཅིག་མུ་རུན་ཏའི་རིལ་གནས་པའི་ཕྱིར་མུ་རུན་ཏ་པ་ཀ་ཞེས་བྱའོ། །གནས་པའི་
[148a]
[148a.1]རིགས་ཉིད་ཀྱི་བུད་མེད་ནི་གནས་མ་ཡིན་ལ། དེ་ལས་སྐྱེས་པའི་བུ་ནི་གནས་མའི་བུ་སྟེ། དེའི་རིགས་ཡིན་པར་སྟོན་པ་ནི་གནས་མའི་བུའོ། །སློབ་དཔོན་ཆོས་མཆོག་གི་རྗེས་སུ་སྟོན་པར་བྱེད་པ་ནི་ཆོས་མཆོག་པའོ། །བཟང་པོའི་ལམ་པའི་སློབ་མ་ནི་བཟང་པོའི་
[148a.2]ལམ་པའོ། །ཀུན་གྱིས་བཀུར་བའི་སློབ་དཔོན་གྱི་ལུགས་སྟོན་པར་བྱེད་པ་ནི་ཀུན་གྱིས་བཀུར་བ་བའོ། །དེ་ཉིད་ལས་ཨ་པན་ཏའི་གྲོང་ཁྱེར་དུ་ཡང་དག་པར་བསྡུ་བ་བྱ་བའི་ཕྱིར་ཨ་པ་ན་ཏ་ཀ་པའོ། །ཁ་ཅིག་ནི་ཀུ་རུ་ཀུ་ལའི་རི་ལ་གནས་པའི་ཕྱིར་ཀུ་རུ་ཀུ་ལ་པའོ། །ས་སུའི་སྐད་ཀྱི་
[148a.3]དབྱིངས་ལས་རྫས་སུ་སྟོན་དུ་བསྒྱུར་ཏེ། སྐྱེ་བོའི་ཚོགས་ཆེན་པོ་ལ་ཡང་སྲིད་པར་མི་འབྱུང་བར་རྗེས་སུ་སྟོན་པར་བྱེད་པ་ནི་མང་སྟོན་པའོ། །སློབ་དཔོན་ཆོས་སྦས་ཀྱིས་ཡིན་པར་སྨྲ་བ་ནི་ཆོས་སྦས་པའོ། །རབ་ཏུ་བསྔགས་པའི་དམིགས་པའི་ཆོས་ཀྱི་ཆར་འབེབས་པར་བྱེད་པས་ན་
[148a.4]ཆར་བཟངས་འབེབས་པའོ། །དེ་ཉིད་སློབ་དཔོན་འོད་སྲུངས་ཀྱི་ཡིན་པར་སྨྲ་བས་ནི་འོད་སྲུངས་པའོ། །དེ་བཞིན་དུ་བླ་མ་པའི་ཡིན་པར་སྨྲ་བ་ནི་བླ་མ་བའོ། །དེ་ཉིད་ལས་ཁ་ཅིག་ན་རེ། འཇིག་རྟེན་འདི་ནས་འཇིག་རྟེན་ཕ་རོལ་དུ་གང་ཟག་འཕོ་བར་འགྱུར་རོ་ཞེས་སྨྲ་བ་ནི་འཕོ་བར་
[148a.5]སྨྲ་བ་པའོ། །དེ་རྣམས་ལས་སྔར་བསྟན་པའི་དགེ་འདུན་ཕལ་ཆེན་པ་ལ་སོགས་པ་བརྒྱད་དང་། ཕྱིས་བསྟན་པའི་ཕྱིར་གནས་བརྟན་པ་དང་། ཐམས་ཅད་ཡོད་པར་སྨྲ་བ་དང་། མང་སྟོན་པ་དང་། ཆོས་མཆོག་པ་དང་། འོད་སྲུངས་པ་རྣམས་ནི་བདག་མེད་པར་སྨྲ་བ་ཡིན་ཏེ། མུ་སྟེགས་པའི་
[148a.6]འདོད་པས་བརྟགས་པའི་བདག་དང་བདག་གི་དག་ནི་སྟོང་པ་ཡིན་པ་དང་། ཆོས་ཐམས་ཅད་ནི་བདག་མེད་པ་ཡང་ཡིན་པར་སྨྲ་བ་ཡིན་ནོ། །ལྷག་མ་གནས་མའི་བུ་ལ་སོགས་པ་སྡེ་པ་ལྔ་ནི་གང་ཟག་ཏུ་སྨྲ་བ་ཡིན་ཏེ། གང་ཟག་ནི་ཕུང་པོ་དག་ལས་དེ་ཉིད་དང་གཞན་དུ་བརྗོད་དུ་མེད་པ་རྣམ་པར་ཤེས་པ་དྲུག་
[148a.7]གིས་ཤེས་པར་བྱ་བ་འཁོར་བར་འགྱུར་བ་ཡོངས་སུ་གསལ་བར་གྱུར་པ་ཡིན་ནོ་ཞེས་ཟེར་རོ། །དེ་དག་ནི་སྡེ་པ་བཅོ་བརྒྱད་ཀྱི་དབྱེ་བ་ཡིན་ནོ།། །།གཞན་ཉིད་ཀྱིས་སྨྲ་བ་ནི་གཞི་ནི་སྔ་མ་བཞིན་དུ་བརྗོད་པར་བྱའོ། །རྩ་བའི་དབྱེ་བ་ནི་གསུམ་སྟེ། འདི་ལྟར་གནས་བརྟན་པ་དང་། དགེ་འདུན་ཕལ་
[148b]
[148b.1]ཆེན་པ་དང་། རྣམ་པར་ཕྱེ་སྟེ་སྨྲ་བའོ། །དེ་ལ་གནས་བརྟན་པ་ཡང་རྣམ་པ་གཉིས་ཏེ། ཐམས་ཅད་ཡོད་པར་སྨྲ་བ་དང་། གནས་མའི་བུའི་སྡེ་པ་ཞེས་བྱའོ། །ཡང་ཐམས་ཅད་ཡོད་པར་སྨྲ་བ་ཡང་རྣམ་པ་གཉིས་ཏེ། ཐམས་ཅད་ཡོད་པར་སྨྲ་བ་དང་། མདོ་སྡེ་སྨྲ་བ་ཞེས་བྱ་བའོ། །
[148b.2]གནས་མའི་བུ་ཡང་རྣམ་བ་བཞི་སྟེ། མང་པོས་བཀུར་བ་དང་། ཆོས་མཆོག་པ་དང་། བཟང་པོའི་ལམ་པ་དང་། གྲོང་ཁྱེར་དྲུག་པ་ཞེས་བྱ་བ་སྟེ་དེ་ལྟར་ན་གནས་བརྟན་པ་ནི་རྣམ་པ་དྲུག་ཏུ་གནས་སོ། །ཡང་དགེ་འདུན་ཕལ་ཆེན་སྡེ་ནི་རྣམ་པ་བརྒྱད་དེ། དགེ་འདུན་ཕལ་ཆེན་པ་དང་།
[148b.3]ཤར་གྱི་རི་བོ་དང་། ནུབ་ཀྱི་རི་བོ་དང་། རྒྱལ་པོ་རི་བོ་དང་། གངས་རི་པ་དང་། མཆོད་རྟེན་པ་དང་། བརྟེན་གྲུབ་པ་དང་། བ་ལང་གནས་པ་ཞེས་བྱ་བ་སྟེ། དེ་ལྟར་ན་དེ་དག་ནི་དགེ་འདུན་ཕལ་ཆེན་པའི་དབྱེ་བ་ཡིན་ནོ། །རྣམ་པར་ཕྱེ་སྟེ་སྨྲ་བ་ཡང་རྣམ་པ་བཞི་སྟེ། ས་སྟོན་པ་དང་།
[148b.4]འོད་སྲུངས་པ་དང་། ཆོས་སྦས་པ་དང་། གོས་དམར་བ་ཞེས་བྱའོ། །དེ་ལྟར་འདི་དག་ནི་འཕགས་པའི་སྡེ་རྣམས་རྣམ་པར་ཕྱེ་བ་ནས་རྣམ་པ་བཅོ་བརྒྱད་དུ་གྱུར་པའོ།། །།ཡང་གཞན་དག་ནི་འདི་སྐད་སྨྲ་སྟེ། བཅོམ་ལྡན་འདས་ཡོངས་སུ་མྱ་ངན་ལས་འདས་པ་ནས་བཟུང་ནས།
[148b.5]ལོ་བརྒྱ་སུམ་ཅུ་རྩ་བདུན་ལོན་པ་ན་རྒྱལ་པོ་དགའ་བོ་དང་པདྨ་ཆེན་པོ་ཞེས་བྱ་བས་གྲོང་ཁྱེར་པ་ཏ་ལི་པུ་ཏྲའི་ནང་དུ་སྡུད་པར་བྱེད་པ་ལ་སོགས་པའི་འཕགས་པ་ཕལ་ནི་ཡང་ལེན་པ་མེད་པར་བསིལ་བའི་དངོས་པོ་ཐོབ་པར་གྱུར་པ་ན་འཕགས་པ་འོད་སྲུངས་ཆེན་པོ་དང་། འཕགས་པ་སྤུ་ཆེན་པོ་དང་།
[148b.6]གཏོང་བ་ཆེན་པོ་དང་། བླ་མ་དང་། རེ་བ་ཏ་ལ་སོགས་པ་སོ་སོ་ཡང་དག་པར་རིག་པ་ཐོབ་པའི་དགྲ་བཅོམ་པའི་དགེ་འདུན་དེ་ལྟར་བཞུགས་པ་ན་བདུད་སྡིག་ཏོ་ཅན་བཟང་པོ་ཐམས་ཅད་ཀྱི་མི་མཐུན་པའི་ཕྱོགས་སུ་གྱུར་པ། དགེ་སློང་གི་ཆ་བྱད་འཛིན་པས་རྫུ་འཕྲུལ་སྣ་ཚོགས་བསྟན་ནས། གཞི་
[148b.7]ལྔས་དགེ་འདུན་གྱི་དབྱེན་ཆེན་པོ་བསྐྱེད་དེ། གནས་བརྟན་ཀླུ་ཞེས་བྱ་བ་དང་། ཡིད་བརྟན་པ་ཞེས་བྱ་བ་མང་དུ་ཐོས་པ་དག་གི་གཞི་ལྔ་བསྔགས་པར་བྱེད། རྗེས་སུ་སྟོན་པར་བྱེད་ཅིང་དེ་གཞན་ལ་ལན་གདབ་པ་དང་། མི་ཤེས་པ་དང་། ཡིད་གཉིས་དང་། ཡོངས་སུ་བརྟགས་པ་དང་། བདག་
[149a]
[149a.1]ཉིད་གསོ་བར་བྱེད་པ་ནི་ལམ་ཡིན་ཏེ། འདི་ནི་སངས་རྒྱས་ཀྱི་བསྟན་པ་ཡིན་ནོ་ཞེས་ཟར་རོ། །དེ་ནས་སྡེ་པ་གཉིས་སུ་ཆད་ནས་གནས་ཏེ། གནས་བརྟན་པ་དང་། དགེ་འདུན་ཕལ་ཆེན་སྡེ་ཞེས་བྱའོ། །དེ་ལྟར་ལོ་དྲུག་ཅུ་རྩ་གསུམ་གྱི་བར་དུ་དགེ་འདུན་བྱེ་ནས་འཁྲུག་
[149a.2]ལོང་གིས་གནས་སོ། །དེ་ནས་ལོ་བརྒྱ་ཕྲག་གཉིས་འདས་པའི་རྗེས་ལ་གནས་བརྟན་གནས་མའི་བུས་བསྟན་པ་ཡང་དག་པར་བསྡུས་སོ། །དེས་ཡང་དག་པར་བསྡུས་པ་ན་དགེ་འདུན་ཕལ་ཆེན་པ་ཡང་རྣམ་པ་གཉིས་སུ་བྱུང་བར་གྱུར་ཏེ། ཐ་སྙད་གཅིག་པ་དང་། བ་ལང་གནས་
[149a.3]པ་ཞེས་བྱའོ། །དེ་ལ་ཐ་སྙད་གཅིག་པ་རྣམས་ཀྱི་དམ་ཚིག་གི་རྩ་བ་ནི་སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་ལས་འདས་པ་སྟེ། དེ་བཞིན་གཤེགས་པ་ལ་འཇིག་རྟེན་གྱི་ཆོས་ནི་མི་མངའོ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བའི་རྗེས་སུ་
[149a.4]གསུང་ནི་མི་འཇུག་གོ། །དེ་བཞིན་གཤེགས་པ་ཐམས་ཅད་ཀྱི་གསུང་ནི་སྙིང་པོ་ལ་མངོན་པར་མོས་པའོ། །དེ་བཞིན་གཤེགས་པ་ལ་གནས་དེར་གཟུགས་ཉེ་བར་ལེན་པ་ནི་མི་མངའོ། །བྱང་ཆུབ་སེམས་དཔའི་དུས་ན་ནུར་ནུར་པོ་དང་། མེར་མེར་པོ་དང་། ལྟར་ལྟར་པོས་འཇུག་
[149a.5]བ་མ་ཡིན་ཏེ། གླང་པོ་ཆེར་གྱུར་ནས་ཡུམ་གྱི་དཀུ་ནས་ཞུགས་ནས་རང་ཉིད་ངེས་པར་འབྱུང་བ་ཡིན་གྱི། བྱང་ཆུབ་སེམས་དཔའ་རྣམས་ལ་འདོད་པའི་འདུ་ཤེས་ནི་མི་འབྱུང་ངོ་། །ངན་འགྲོ་རྣམས་སུ་བདག་ཉིད་ཀྱི་འདོད་པས་སྐྱེ་བ་བླངས་ཏེ་སེམས་ཅན་ཡོངས་སུ་སྨིན་པར་བྱེད་དོ། །ཡེ་ཤེས་
[149a.6]གཅིག་གིས་བདེན་པ་བཞི་རྣམས་ཡོངས་སུ་ཤེས་སོ། །རྣམ་པར་ཤེས་པ་དྲུག་པོ་དག་ནི་འདོད་ཆགས་དང་བཅས་པ་དང་འདོད་ཆགས་དང་བྲལ་བ་ཡིན་ནོ། །མིག་གིས་ནི་གཟུགས་རྣམས་མཐོང་ངོ་། །དགྲ་བཅོམ་པ་རྣམས་ཀྱང་གཞན་དག་གིས་བསྟན་པ་སྒྲུབ་པར་བྱེད་དོ། །མི་ཤེས་པ་དང་།
[149a.7]ཡིད་གཉིས་དང་། ཡོངས་སུ་བརྟགས་པ་དང་། སྡུག་བསྔལ་སྤོང་བའི་ལམ་ཡང་ཡོད་དོ། །མཉམ་པར་གཞག་པའི་ཚེ་ངག་འཇུག་པ་ཡང་ཡོད་དོ། །མི་གཙང་བ་སྤངས་པ་ཡང་ཡོད་དོ། །ཡང་དག་པར་སྡོམ་པ་མངོན་དུ་བྱས་པ་ཉིད་ཀྱིས་ཀུན་དུ་སྦྱོར་བ་ཐམས་ཅད་རབ་ཏུ་སྤངས་པར་བརྗོད་
[149b]
[149b.1]བར་བྱའོ། །དེ་བཞིན་གཤེགས་པ་རྣམས་ལ་འཇིག་རྟེན་པའི་ཡང་དག་པར་ལྟ་བ་ནི་མི་མངའོ། །སེམས་ནི་རང་བཞིན་གྱིས་འོད་གསལ་བ་ཡིན་བས་བག་ལ་ཉལ་བ་རྣམས་སེམས་དང་མཚུངས་པར་ལྡན་ཞེའམ། མི་ལྡན་ཞེས་བརྗོད་པར་མི་བྱའོ། །བག་ལ་ཉལ་བ་ཡང་གཞན་ལ།
[149b.2]ཀུན་ནས་ལྡང་བ་ཡང་གཞན་ཡིན་ནོ། །འདས་པ་དང་མ་འོངས་པ་ནི་མེད་དོ། །རྒྱུན་དུ་ཞུགས་པ་ནི་བསམ་གཏན་ཐོབ་པ་ཡིན་ནོ་ཞེས་བྱ་བ་སྟེ་དེ་ལྟ་བུ་རྣམས་ནི་ཐ་སྙད་གཅིག་པ་རྣམས་ཀྱི་དམ་ཚིག་ཡིན་ནོ། །ཡང་བ་ལང་གནས་པ་རྣམས་ཀྱི་དབྱེ་བ་ནི་མང་དུ་ཐོས་པ་དང་བཏགས་པར་སྨྲ་བ་ཞེས་བྱའོ། །དེ་ལ་མང་དུ་ཐོས་པ་རྣམས་
[149b.3]ཀྱི་རྩ་བའི་དམ་ཚིག་ནི་ངེས་པར་འབྱུང་བའི་ལམ་ལ་ནི་རྣམ་པར་དཔྱོད་པ་མེད་དོ། །སྡུག་བསྔལ་གྱི་བདེན་པ་དང་། ཀུན་རྫོབ་ཀྱི་བདེན་པ་དང་། འཕགས་པའི་བདེན་པ་ནི་བདེན་པའོ། །འདུ་བྱེད་ཀྱི་སྡུག་བསྔལ་རྣམས་མཐོང་བས་ཡང་དག་པར་སྐྱོན་མེད་པ་ལ་འཇུག་གི །སྡུག་བསྔལ་གྱི་སྡུག་བསྔལ་དང་
[149b.4]འགྱུར་བའི་སྡུག་བསྔལ་མཐོང་བས་ནི་མ་ཡིན་ནོ། །དགེ་འདུན་ནི་འཇིག་རྟེན་ལས་འདས་པའོ། །དགྲ་བཅོམ་པ་རྣམས་ལ་ཡང་གཞན་གྱིས་ཉེ་བར་བསྟན་པ་བསྒྲུབ་པ་ཡོད་དོ། །ཡང་དག་པར་བསྒྲགས་པའི་ལམ་ཡང་ཡོད་དོ། །མཉམ་པར་གཞག་པ་ལ་ཡང་དག་པར་འཇུག་པ་ཡོད་དོ་ཞེས་བྱ་བ་རྣམས་ནི་
[149b.5]མང་དུ་ཐོས་པ་རྣམས་ཀྱི་དམ་ཚིག་གོ། །ཡང་བཏགས་པར་སྨྲ་བ་རྣམས་ཀྱི་ཕུང་པོ་མེད་པའི་སྡུག་བསྔལ་ཡང་ཡོད་དོ། །ཡོངས་སུ་མ་རྫོགས་པའི་སྐྱེ་མཆེད་ཀྱང་ཡོད་དོ། །འདུ་བྱེད་རྣམས་ནི་ཕན་ཚུན་བརྟགས་པ་ཡིན་ནོ། །ཡང་སྡུག་བསྔལ་ནི་དོན་དམ་པར་རོ། །སེམས་ལས་བྱུང་བ་ནི་ལམ་མ་ཡིན་ནོ། །
[149b.6]དུས་མ་ཡིན་པར་འཆི་བ་ནི་མེད་དོ། །སྐྱེས་བུ་བྱེད་པ་ཡང་མེད་དོ། །སྡུག་བསྔལ་ཐམས་ཅད་ནི་ལས་ལས་བྱུང་བ་ཡིན་ནོ་ཞེས་བྱ་བ་དེ་ལྟ་བུ་ནི་བཏགས་པར་སྨྲ་བ་རྣམས་ཀྱི་རྩ་བའི་དམ་ཚིག་ཡིན་ནོ། །ཡང་བ་ལང་གནས་པ་རྣམས་ཀྱི་བྱེ་བྲག་ལས་གནས་བརྟན་མཆོད་རྟེན་པ་ཞེས་བྱ་བ་སྟེ། དེ་ནི་ལྷ་ཆེན་པོ་ཞེས་
[149b.7]བྱ་བའི་ཀུན་དུ་རྒྱུ་ཞིག་རབ་ཏུ་བྱུང་ནས་མཆོད་རྟེན་ཅན་གྱི་རིལ་གནས་པ་ཡིན་ཏེ། ཡང་དེ་ནི་དགེ་འདུན་ཕལ་ཆེན་པའི་གཞི་འདོན་པར་གྱུར་པ་ན་མཆོད་རྟེན་པ་ཞེས་བྱ་བའི་སྡེ་པར་རྣམ་པར་བཞག་སྟེ། དེ་དག་ནི་དགེ་འདུན་ཕལ་ཆེན་པ་རྣམས་ཀྱི་སྡེ་པ་དྲུག་ཏུ་བཞག་པ་ཡིན་ནོ། །ཡང་གནས་བརྟན་པ་ཡང་རྣམ་པ་
[150a]
[150a.1]གཉིས་ཏེ། སྔར་གྱི་གནས་བརྟན་པ་དང་། གངས་རི་པ་ཞེས་བྱ་བའོ། །སྔར་གྱི་གནས་བརྟན་པའི་རྩ་བའི་དམ་ཚིག་ནི་དགྲ་བཅོམ་པ་རྣམས་ལ་གཞན་གྱིས་སྟོན་ཅིང་བསྒྲུབ་པ་ནི་མེད་དོ། །དེ་བཞིན་དུ་གཞི་ལྔ་པོ་ཡང་མེད་དོ། །གང་ཟག་ནི་ཡོད་དོ། །སྲིད་པ་བར་མ་ནི་ཡོད་
[150a.2]དོ། །དགྲ་བཅོམ་པ་ཡོངས་སུ་མྱ་ངན་ལས་འདས་བ་ནི་ཡོད་དོ། །འདས་པ་དང་མ་འོངས་པ་ཡང་ཡོད་དོ། །མྱ་ངན་ལས་འདས་པའི་དོན་ནི་ཡོད་དོ་ཞེས་བྱ་བ་ནི་གནས་བརྟན་པའི་རྩ་བའི་དམ་ཚིག་གོ། །དེ་ལ་གངས་རི་བའི་རྩ་བའི་དམ་ཚིག་ནི་བྱང་ཆུབ་སེམས་དཔའ་ནི་སོ་སོའི་སྐྱེ་བོ་མ་ཡིན་ཞེས་བྱའོ། །
[150a.3]ཕྱི་རོལ་པ་ལ་ཡང་མངོན་པར་ཤེས་པ་ལྔ་ནི་ཡོད་དོ། །ཕུང་པོ་ལས་གང་ཟག་ནི་གཞན་ཡིན་པར་བརྗོད་པར་བྱ་སྟེ། མྱ་ངན་ལས་འདས་པར་འགྱུར་བ་ན་གང་དུ་ཕུང་པོ་འགགས་པ་ན་གང་ཟག་ནི་གནས་པའི་ཕྱིར་རོ། །མཉམ་པར་གཞག་པ་ལ་ངག་འཇུག་པ་ནི་ཡོད་དོ། །ལམ་གྱི་སྡུག་བསྔལ་སྤོང་ངོ་ཞེས་བྱ་བ་དེ་དག་
[150a.4]ནི་གངས་རི་པའི་དམ་ཚིག་གོ། །ཡང་དང་པོའི་གནས་བརྟན་པ་ཡང་རྣམ་པ་གཉིས་སུ་གྱུར་ཏེ། ཐམས་ཅད་ཡོད་པར་སྨྲ་བ་དང་། གནས་མའི་བུའི་ཞེས་བྱའོ། །དེ་ལ་ཐམས་ཅད་ཡོད་པར་སྨྲ་བའི་རྩ་བའི་དམ་ཚིག་ནི་གཉིས་ཀྱིས་ཐམས་ཅད་བསྡུས་ཏེ། འདུས་བྱས་དང་འདུས་མ་བྱས་སོ། །དེ་སྐད་སྨྲས་
[150a.5]པས་ཅིར་འགྱུར། གང་ཟག་ནི་མེད་ཅེས་བྱ་བ་སྟེ། ཇི་སྐད་དུ། བདག་མེད་པ་ཡི་ལུས་འདི་འབྱུང་བ་ན། །བྱེད་པ་མེད་ཅིང་རིག་པ་པོ་ཡང་མེད། །ཇི་ལྟར་འཁོར་བའི་ཆུ་ཀླུང་འཇུག་འགྱུར་བ། །ཉན་པའི་མཆོག་ཁྱོད་དེ་ནི་བསྟན་གྱིས་ཉོན། །ཞེས་གསུངས་པ་ལྟ་བུའོ། །དེ་དག་ནི་ཐམས་ཅད་ཡོད་པར་
[150a.6]སྨྲ་བའི་རྩ་བའི་དམ་ཚིག་གོ། །ཡང་དེ་དག་གི་རྩ་བའི་དམ་ཚིག་ནི་མིང་དང་གཟུགས་ཀྱིས་ཐམས་ཅད་བསྡུས་སོ། །འདས་པ་དང་། མ་འོངས་པ་ནི་ཡོད་དོ། །རྒྱུན་དུ་ཞུགས་པ་ནི་མི་ཉམས་པའི་ཆོས་ཅན་ཡིན་པར་བརྗོད་པར་བྱའོ། །འདུས་བྱས་རྣམས་ཀྱི་མཚན་ཉིད་ནི་གསུམ་ཡིན་ནོ། །འཕགས་པའི་
[150a.7]བདེན་པ་བཞི་ནི་རིམ་གྱིས་རྟོགས་པར་འགྱུར་རོ། །སྟོང་པ་ཉིད་དང་། སྨོན་པ་མེད་པ་དང་། མཚན་མ་མེད་པ་དག་གིས་སྐྱོན་མེད་པ་ལ་འཇུག་པར་འགྱུར་རོ། །སྐད་ཅིག་མ་བཅོམ་ལྔས་ནི་རྒྱུན་དུ་ཞུགས་པའི་འབྲས་བུ་ལ་ཞུགས་པ་ཡིན་ནོ། །རྒྱུན་དུ་ཞུགས་པ་ནི་བསམ་གཏན་ཐོབ་པ་ཡིན་ནོ། །དགྲ་བཅོམ་
[150b]
[150b.1]པ་ཡང་ཉམས་པ་སྲིད་དོ། །སོ་སོའི་སྐྱེ་བོ་ལ་ཡང་འདོད་པའི་འདོད་ཆགས་སམ་གནོད་སེམས་སྤོང་བ་ཡོད་དོ། །ཕྱི་རོལ་བ་ལ་ཡང་མངོན་པར་ཤེས་པ་ལྔ་ཡོད་དོ། །ལྷ་རྣམས་ལ་ཡང་ཚངས་པར་སྤྱོད་པ་ལ་གནས་པ་ཡོད་དོ། །མདོ་སྡེ་ཐམས་ཅད་ནི་དྲང་བའི་དོན་ཡིན་ནོ། །སྐྱོན་མེད་པ་ལ་འཇུག་པར་
[150b.2]འགྱུར་བ་ནི་འདོད་པའི་ཁམས་ནས་སོ། །འདོད་པའི་འཇིག་རྟེན་པའི་ཡང་དག་པའི་ལྟ་བ་ནི་ཡོད་དོ། །རྣམ་པར་ཤེས་པའི་ཚོགས་ལྔ་ནི་འདོད་ཆགས་དང་བཅས་པ་ཡང་མ་ཡིན། འདོད་ཆགས་དང་བྲལ་བ་ཡང་མ་ཡིན་ནོ་ཞེས་བྱ་བ་འདི་དག་ནི་ཐམས་ཅད་ཡོད་པར་སྨྲ་བའི་དམ་ཚིག་གོ། །ཡང་ཐམས་ཅད་ཡོད་པར་སྨྲ་
[150b.3]བའི་བྱེ་བྲག་ནི་རྣམ་པར་ཕྱེ་སྟེ་སྨྲ་བ་ཡིན་ནོ། །ཡང་རྣམ་པར་ཕྱེ་སྟེ་སྨྲ་བའི་བྱེ་བྲག་ནི་མང་སྟོན་པ་དང་། ཆོས་སྦས་པ་དང་། གོས་དམར་བ་དང་། འོད་སྲུངས་པ་ཞེས་བྱའོ། །དེ་ལ་མང་སྟོན་པ་རྣམས་ཀྱི་རྩ་བའི་དམ་ཚིག་ནི་འདས་པ་དང་མ་འོངས་པ་ནི་མེད་དོ། །ད་ལྟར་བྱུང་བའི་འདུས་བྱས་ཉིད་ནི་ཡོད་དོ། །སྡུག་བསྔལ་
[150b.4]མཐོང་བས་བདེན་པ་བཞི་ཆར་མཐོང་བར་འགྱུར་རོ། །བག་ལ་ཉལ་ཡང་གཞན་ཡིན་ལ་མངོན་དུ་རྒྱུ་ཡང་གཞན་ཡིན་ནོ། །སྲིད་པ་བར་མ་ནི་མེད་དོ། །ལྷའི་གནས་ན་ཡང་ཚངས་པར་སྤྱོད་པ་ནི་ཡོད་དོ། །དགྲ་བཅོམ་པ་ཡང་བསོད་ནམས་བསོག་གོ། །རྣམ་པར་ཤེས་པའི་ཚོགས་ལྔ་ལ་ཡང་འདོད་ཆགས་དང་བཅས་པ་
[150b.5]དང་འདོད་ཆགས་དང་བྲལ་བ་ཡོད་དོ། །གང་ཟག་ནི་མགོ་ལ་སོགས་པ་ལུས་དང་མཉམ་པོ་ཡིན་ནོ། །རྒྱུན་དུ་ཞུགས་པ་ནི་བསམ་གཏན་ཐོབ་པའོ། །སོ་སོའི་སྐྱེ་བོས་ཀྱང་འདོད་ཆགས་སམ་གནོད་སེམས་སྤོང་ངོ་། །སངས་རྒྱས་ནི་དགེ་འདུན་གྱི་ཁོངས་སུ་གཏོག་པའོ། །དགེ་འདུན་ནི་འབྲས་བུ་ཆེན་པོ་འབྱུང་བར་
[150b.6]བྱེད་ཀྱི་སངས་རྒྱས་ནི་དེ་ལྟ་མ་ཡིན་ནོ། །སངས་རྒྱས་དང་ཉན་ཐོས་ཀྱི་རྣམ་པར་གྲོལ་བ་ནི་གཅིག་གོ། །གང་ཟག་ནི་མི་མཐོང་ངོ་། །སེམས་དང་སེམས་ལས་བྱུང་བ་འབའ་ཞིག་ནི་སྐྱེ་བའི་ཆོས་ཅུང་ཟད་ཙམ་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ནི་མེད་པ་ཉིད་དོ། །འདུས་བྱས་ཐམས་ཅད་ནི་སྐད་ཅིག་
[150b.7]མའོ། །འདུ་བྱེད་རྒྱས་པར་གྱུར་བ་ལས་ནི་སྐྱེ་བ་ཡིན་ནོ། །འདུ་བྱེད་རྣམས་གནས་པ་ནི་མེད་དོ། །སེམས་ཇི་ལྟ་བ་དེ་ལྟར་ལས་ཡིན་གྱི་ལུས་དང་ངག་གི་ལས་ནི་མེད་དོ། །ཉམས་པར་མི་འགྱུར་བའི་ཆོས་མེད་དོ། །མཆོད་རྟེན་མཆོད་པ་ལ་ནི་འབྲས་བུ་མེད་དོ། །ད་ལྟར་བྱུང་བ་རྟག་ཏུ་བ་ནི་བག་ལ་ཉལ་བ་ཡིན་
[151a]
[151a.1]ནོ། །འདུས་བྱས་མཐོང་བའི་སྐྱོན་མེད་པ་ལ་འཇུག་པར་འགྱུར་རོ་ཞེས་བྱ་བ་འདི་དག་ནི་མང་སྟོན་པ་རྣམས་ཀྱི་རྩ་བའི་དམ་ཚིག་ཡིན་ནོ། །ཡང་ཆོས་སྦས་པ་རྣམས་ཀྱི་རྩ་བའི་དམ་ཚིག་ནི་སངས་རྒྱས་ནི་དགེ་འདུན་གྱི་ཁོངས་སུ་གཏོགས་པ་མ་ཡིན་ནོ། །སངས་རྒྱས་ལས་འབྲས་བུ་
[151a.2]ཆེན་པོ་འབྱུང་བ་དེ་དག་དགེ་འདུན་ལས་ནི་མ་ཡིན་ནོ། །ལྷའི་གནས་ན་ཡང་ཚངས་པར་སྤྱོད་པ་ནི་ཡོད་དོ། །འཇིག་རྟེན་པའི་ཆོས་ནི་ཡོད་དོ་ཞེས་བྱ་བ་དེ་དག་ནི་ཆོས་སྦས་པ་རྣམས་ཀྱི་རྩ་བའི་དམ་ཚིག་ཡིན་ནོ། །དེ་ལ་འོད་སྲུངས་པ་རྣམས་ཀྱི་དམ་ཚིག་ནི་རྣམ་པར་སྨིན་པ་རྣམ་པར་སྨིན་པའི་ཆོས་རྣམས་ཀྱང་འབྱུང་
[151a.3]བར་འགྱུར་བའི་ཆོས་ནི་ཡོད་དོ། །སྤངས་ལ་ཡོངས་སུ་མ་ཤེས་པ་ཡོད་དོ་ཞེས་བྱ་བ་དང་། ཆོས་སྦས་པའི་ཐམས་ཅད་ཀྱང་འདོད། དེ་དག་ནི་འོད་སྲུངས་པའི་དམ་ཚིག་ཡིན་ནོ། །གོས་དམར་བ་རྣམས་ཀྱི་དམ་ཚིག་ནི་གང་ཟག་ནི་མེད་དོ་ཞེས་བྱའོ། །ཡང་ཐམས་ཅད་ཡོད་པར་སྨྲ་བ་རྣམས་ཀྱི་བྱེ་བྲག་སློབ་དཔོན་བླ་
[151a.4]མའི་གཞུང་སྟོན་པར་བྱེད་པའི་འཕོ་བར་སྨྲ་བ་རྣམས་ཀྱི་རྩ་བའི་དམ་ཚིག་ནི་ཕུང་པོ་ལྔ་ནི་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བའོ། །ལམ་མ་རྟོགས་པར་ཕུང་པོ་འགག་པ་མེད་དོ། །རྩ་བའི་ལྟུང་བ་དང་བཅས་པའི་ཕུང་པོ་ནི་ཡོད་དོ། །གང་ཟག་ནི་དོན་དམ་པར་མི་དམིགས་སོ། །ཀུན་ཀྱང་མི་རྟག་གོ་
[151a.5]ཞེས་བྱ་བ་དེ་དག་ནི་འཕོ་བའི་དམ་ཚིག་ཡིན་ཏེ། རྣམ་པ་བདུན་པོ་དེ་ལྟ་བུ་དག་ཏུ་ཐམས་ཅད་ཡོད་པར་སྨྲ་བར་དམ་ཚིག་དག་གནས་སོ། །ཡང་གནས་མའི་བུའི་དམ་ཚིག་ནི་ཉེ་བར་བླང་བ་ཉེ་བར་ལེན་པ་དང་ལྡན་པ་ནི་བཏགས་པའོ། །ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་མེད་དོ། །གང་
[151a.6]ཟག་ནི་ཕུང་པོ་ལྔ་ཉེ་བར་བླངས་ནས་འཕོ་བར་འགྱུར་རོ། །འདུས་བྱས་ནི་སྐད་ཅིག་མ་དང་སྐད་ཅིག་མ་མ་ཡིན་པ་ཡང་ཡོད་དོ། །གང་ཟག་ནི་ཉེ་བར་བླངས་པའི་ཕུང་པོ་ཉིད་དང་། གཅིག་པའམ་གཅིག་པ་མ་ཡིན་པར་བརྗོད་པར་མི་བྱའོ། །མྱ་ངན་ལས་འདས་པ་ནི་ཆོས་ཐམས་ཅད་དང་གཅིག་པ་ཉིད་དང་ཐ་དད་པ་
[151a.7]ཉིད་དུ་མི་བརྗོད་དོ། །མྱ་ངན་ལས་འདས་པ་ནི་ཡོད་པ་ཉིད་དམ་མེད་པ་ཉིད་དུ་མི་བརྗོད་དོ། །རྣམ་པར་ཤེས་པའི་ཚོགས་ལྔའི་ནི་འདོད་ཆགས་དང་བཅས་པ་ཡང་མ་ཡིན་འདོད་ཆགས་དང་བྲལ་བ་ཡང་མ་ཡིན་ནོ་ཞེས་བྱ་བ་ནི་གནས་མའི་བུ་བ་རྣམས་ཀྱི་དམ་ཚིག་ཉིད་དོ། །ཡང་གནས་མའི་བུ་ཡང་རྣམ་པ་གཉིས་ཏེ།
[151b]
[151b.1]རི་ཆེན་པོ་དང་། མང་པོས་བཀུར་བ་པའོ། །དེ་ལ་མང་པོས་བཀུར་བ་པ་རྣམས་ཀྱི་རྩ་བའི་དམ་ཚིག་ནི་འབྱུང་བར་འགྱུར་བ་དང་། འབྱུང་བ་དང་འགག་པར་འགྱུར་བ་དང་། འགག་པ་དང་སྐྱེ་བར་འགྱུར་བ་དང་། སྐྱེ་བ་དང་། འཆི་བར་འགྱུར་བ་དང་། འཆི་བ་དང་། བྱེད་པར་འགྱུར་བ་དང་། བྱེད་
[151b.2]པ་དང་། ཆད་པར་འགྱུར་པ་དང་། ཆད་པ་དང་། འགྲོ་བར་འགྱུར་བ་དང་། འགྲོ་བ་དང་། རྣམ་པར་ཤེས་པར་འགྱུར་བ་དང་། རྣམ་པར་ཤེས་པ་ནི་ཡོད་དོ་ཞེས་བྱ་བ་དེ་ལྟ་བུ་ནི་མང་པོས་བཀུར་བ་པ་རྣམས་ཀྱི་རྩ་བའི་དམ་ཚིག་གོ། །ཡང་རི་ཆེན་པོ་པ་ཡང་རྣམ་པ་གཉིས་ཏེ། ཆོས་མཆོག་པ་དང་། ལམ་བཟངས་
[151b.3]བ་ཞེས་བྱ་བའོ། །ཆོས་མཆོག་པ་རྣམས་ཀྱི་རྩ་བའི་དམ་ཚིག་ནི་སྐྱེ་ལ་མ་རག་པ་དང་། སྐྱེ་བ་དང་། འགག་པ་ལ་མ་རག་པ་དང་། འགག་པའོ། །ལམ་བཟངས་པའི་ཡང་དེ་བཞིན་ནོ། །གྲོང་ཁྱེར་དྲུག་པ་ལ་ཁ་ཅིག་ན་རེ་རི་ཆེན་པོ་པའི་བྱེ་བྲག་ཡིན་ཟེར། གཞན་དག་གིས་སྨྲས་པ་ནི། མང་པོས་བཀུར་བ་པའི་
[151b.4]བྱེ་བྲག་ཡིན་པར་འདོད་དེ། དེ་ལྟར་དེ་རྣམས་ནི་གནས་མའི་བུའི་སྡེ་པ་རྣམ་པ་བཞིར་གནས་པ་ཡིན་ནོ། །གང་དེ་དག་ནི་སློབ་དཔོན་དག་གི་རྗེས་སུ་འབྲངས་པའི་རིམ་གྱིས་རྣམ་པ་བཅོ་བརྒྱད་དུ་གྱུར་པ་ཡིན་ཏེ། དེ་དག་ནི་རྩ་བའི་རྟོག་པ་དག་ཡིན་ནོ། །གཞན་ནང་གསེས་ཀྱི་དབྱེ་བ་ནི་མང་དུ་ཡོད་པས་བརྗོད་པར་བྱའོ། །ཅི་
[151b.5]ལྟ་ཞེ་ན། ཐམས་ཅད་ཡོད་པར་སྨྲ་བ་རྣམས་ཀྱི་འདོད་གཞུང་གི་བྱེ་བྲག་ཀྱང་དབྱེ་བ་རྣམ་པ་བཞི་སྟེ་དངོས་པོ་དང་། མཚན་ཉིད་དང་། གནས་སྐབས་དང་། གཞན་གཞན་དུ་འགྱུར་བ་ཉིད་ཀྱི་བྱེ་བྲག་གིས་སོ། །དེ་ལ་དང་པོ་དངོས་པོ་གཞན་ཉིད་དུ་འགྱུར་པ་ནི་བཙུན་པ་ཆོས་སྐྱོབ་ཀྱི་སྟེ། དེ་ནི་ཆོས་རྣམས་དུས་ཀྱིས་
[151b.6]འཇུག་པར་གྱུར་པ་ན། དངོས་པོ་གཞན་དུ་གྱུར་པ་ཉིད་ཡིན་གྱི། རྫས་གཞན་དུ་གྱུར་པ་ཉིད་ནི་མ་ཡིན་ཏེ། གསེར་གྱི་སྣོད་བཅོམ་ནས་གཞན་དུ་བྱས་པ་ན་དབྱིབས་གཞན་དུ་གྱུར་པ་ཉིད་ཡིན་གྱི་རྫས་གཞན་དུ་གྱུར་པ་ནི་མ་ཡིན་ནོ། །ཇི་ལྟར་འོ་མ་ལ་ཞོར་གྱུར་པ་ན། རོ་དང་ནུས་པ་དང་སྨིན་པ་གཞན་དུ་གྱུར་པ་ལས་
[151b.7]ཁ་དོག་ནི་མ་ཡིན་པ་དེ་བཞིན་དུ་ཆོས་རྣམས་ཀྱང་འདས་པའི་དུས་ནས་ད་ལྟར་གྱི་དུས་སུ་བྱུང་བ་ན། འདས་པའི་དུས་ཀྱི་དངོས་པོ་ཉམས་པ་ཡིན་གྱི་རྫས་ནི་མ་ཡིན་ནོ། །དེ་བཞིན་དུ་ད་ལྟར་གྱི་དུས་ནས་མ་འོངས་པར་འགྱུར་བ་ན་ཡང་། ད་ལྟར་གྱི་དངོས་པོ་ཉམས་པ་ཡིན་གྱི་རྫས་ཀྱི་དངོས་པོ་ནི་མ་ཡིན་ནོ་ཞེས་ཟེར་རོ། །
[152a]
[152a.1]མཚན་ཉིད་གཞན་དུ་གྱུར་པ་ནི་བཙུན་པ་དབྱངས་སྒྲོགས་ཀྱི་སྟེ། དེ་ན་རེ་ཆོས་རྣམས་དུས་ཀྱིས་འཇུག་པར་གྱུར་པ་ན། འདས་པའི་མཚན་ཉིད་དང་ལྡན་པ་ནི་མ་འོངས་པ་དང་ད་ལྟར་གྱི་མཚན་ཉིད་དང་མི་ལྡན་པ་ཡང་མ་ཡིན་ལ། མ་འོངས་པ་ཡང་མ་འོངས་པའི་
[152a.2]མཚན་ཉིད་དང་ལྡན་པ་ནི་འདས་པ་དང་ད་ལྟར་གྱི་ངག་དང་མི་ལྡན་པ་ནི་མ་ཡིན་ནོ། །དཔེར་ན་སྐྱེས་བུ་བུད་མེད་གཅིག་ལ་ཆགས་པར་གྱུར་པ་ན། ལྷག་མ་རྣམས་ལ་ཆགས་པ་དང་བྲལ་བ་ནི་མ་ཡིན་ནོ་ཞེས་ཟེར་རོ། །གནས་སྐབས་སུ་གཞན་དུ་གྱུར་པ་ནི་བཙུན་པ་དབྱིག་བཤེས་ཀྱི་སྟེ། དེ་ནི་ཆོས་
[152a.3]རྣམས་དུས་ཀྱིས་འཇུག་པར་གྱུར་པ་ན་གཞན་དང་གཞན་དུ་རྗོད་པར་བྱེད་པ་ནི་གནས་སྐབས་གཞན་དུ་གྱུར་པ་ཡིན་གྱི། རྫས་གཞན་དུ་གྱུར་པ་ནི་མ་ཡིན་ཏེ། དཔེར་ན་སྡོང་བུ་གཅིག་པུ་བགྲང་བའི་ཚེ་ནི་གཅིག་ཅེས་བརྗོད་པར་གྱུར་པ་ལ། གྲངས་བརྒྱར་གཏོགས་པའི་ཚེ་ནི་བརྒྱ་ཞེས་བྱ། །
[152a.4]གྲངས་སྟོང་དུ་བགྲང་བའི་ཚེ་ནི་སྟོང་ཞེས་བྱ་བ་དང་འདྲའོ་ཞེས་ཟེར་རོ། །གཞན་གཞན་དུ་གྱུར་པ་ནི་བཙུན་པ་སངས་རྒྱས་ལྷའི་སྟེ། དེ་ནི་ཆོས་རྣམས་སུ་དུས་ཀྱིས་འཇུག་པར་གྱུར་པ་ན་སྔོན་དང་ཕྱི་མ་ལ་ལྟོས་ནས་གཞན་དང་གཞན་དུ་བརྗོད་པར་བྱ་སྟེ། དཔེར་ན་བུད་མེད་གཅིག་ལ་མ་ཞེས་
[152a.5]ཀྱང་བརྗོད། བུ་མོ་ཞེས་ཀྱང་བརྗོད་པ་ཡིན་ནོ། །བཞི་པོ་དེ་དག་ཇི་ལྟ་བ་བཞིན་དུ་ཐམས་ཅད་ཡོད་ཅེས་སྨྲ་བའི་ཕྱིར་ཐམས་ཅད་ཡོད་པར་སྨྲ་བའོ། །དེ་བཞིན་དུ་ཁ་ཅིག་རྐྱེན་བདུན་ཏེ། རྒྱུ་དང་། དམིགས་པ་དང་། དེ་མ་ཐག་པ་དང་། བདག་པོ་དང་། ལས་དང་། ཟས་དང་། རྟེན་ཞེས་
[152a.6]བྱའོ། །དེ་བཞིན་དུལ་ལ་ནི་རྟོགས་པའི་སེམས་བཞི་སྟེ། བདེན་པ་སོ་སོ་པའོ། །གཞན་རྣམས་ནི་ཆོས་ཤེས་པ་དང་། རྗེས་སུ་ཤེས་པ་བརྒྱད་ཡིན་ཏེ། སོ་སོར་རྟོག་པའི་ཡེ་ཤེས་ནི་མ་ཡིན་ནོ་ཞེས་ཟེར། གཞན་རྣམས་ནི་བཅུ་གཉིས་སུ་འདོད་དོ། །དེ་ལས་ཀྱང་གཞན་པ་རྣམས་ནི་བཅུ་
[152a.7]དྲུག་ཏུ་འདོད་དོ། །དེ་བཞིན་དུ་སེམས་མེད་པའི་གཉིད་ལ་ནི་སེམས་མ་ཡིན་ནོ། །མཚུངས་པར་ལྡན་པ་ལྷག་མ་རྣམས་ལ་ནི་ཡོད་དོ། །འདུ་ཤེས་དང་ཚོར་བ་འགོག་པ་ལ་འདུ་ཤེས་དང་ཚོར་བ་འགོག་པ་ནི་ཡོད་དོ། །ལྷག་མ་རྣམས་ལ་ནི་མཚུངས་པར་ལྡན་པ་ཡོད་དོ། །ཇི་ལྟར་ཡིད་ཀྱིས་
[152b]
[152b.1]སྐྱོ་བར་གྱུར་པ་ནི་སྤྱོད་པ་མེད་པའི་བསམ་གཏན་ལ་སྙོམས་པར་འཇུག་ལ། དགའ་བས་སྐྱོ་བར་གྱུར་པ་ནི་དགའ་བ་མེད་པའི་བསམ་གཏན་ལ་སྙོམས་པར་འཇུག་བཞིན་དུ་འདུ་ཤེས་པ་དང་། ཚོར་བས་སྐྱོ་བར་གྱུར་པ་ནི་འདུ་ཤེས་དང་ཚོར་བ་འགོག་པ་ལ་སྙོམས་པར་འཇུག་ལ། དེ་བཞིན་
[152b.2]དུ་ཁ་ཅིག་ན་རེ་སེམས་ཀྱིས་ཡུལ་གྱི་ཁྱད་པར་ཐོབ་པ་ནི་མྱ་ངན་ལས་འདས་པ་ཐོབ་པ་ཡིན་ནོ་ཞེས་ཟེར་རོ། །ལ་ལ་ན་རེ་ཕུང་པོ་མེད་པར་གྱུར་པར་མྱ་ངན་ལས་འདས་པ་ཡིན་གྱི་དངོས་པོའི་དོན་ནི་མ་ཡིན་ཞེས་ཟེར། ཁ་ཅིག་ན་རེ་རང་བཞིན་གྱིས་ལུང་དུ་བསྟན་དུ་མེད་པ་ནི་མྱ་ངན་ལས་
[152b.3]འདས་པ་ཡིན་ནོ་ཞེས་བརྗོད་དོ། །དེ་བཞིན་དུ་ལ་ལ་ན་རེ་ཚད་མེད་པ་རྣམས་ནི་བྱང་ཆུབ་ཀྱི་ཡན་ལག་ཡིན་ནོ་ཡང་ཟེར་རོ། །ཁ་ཅིག་ན་རེ་འབྲས་བུ་ཆེ་བ་ནི་གསུམ་སྟེ། གཞན་གྱི་སེམས་ཀྱི་འབྲས་བུ་དང་། འབྲས་བུ་ཆེ་བ་དང་། ཚད་མེད་པའི་འབྲས་བུ་ཞེས་བྱ་བའོ། །དེ་བཞིན་དུ་ཉོན་
[152b.4]མོངས་པའི་དབང་གིས་འགྲོ་བར་འགྲོ་བ་ན་གྲོགས་སུ་གྱུར་པ་ནི་ལས་ཡིན་ནོ། །དེ་བཞིན་དུ་དེ་སྤངས་པར་གྱུར་པ་ནི་འགྲོ་བ་དེ་དག་ཏུ་འགྲོ་བར་མི་འགྱུར་རོ། །ཡང་ལ་ལ་ན་རེ་སྔར་བྱས་པའི་ལས་རྣམས་ཀྱི་དབང་གིས་དང་པོར་འགྲོ་བར་འདོད་དོ། །ཁ་ཅིག་ནི་ཇི་ལྟར་གོམས་པའི་ལས་རྣམས་ཀྱིས་
[152b.5]ཡིན་པར་འདོད་དོ། །ལ་ལན་རེ་རྣམ་པ་ལྔས་གོམས་པས་ཏེ། སྔ་མ་བཞི་དང་རྐྱེན་གྱི་ཁྱད་པར་གོམས་པས་སོ། །ཁ་ཅིག་ན་རེ་འདས་པའི་ཉེ་བར་ལེན་པ་ལས་མེ་འབར་རོ་ཞེས་ཟེར་རོ། །ཁ་ཅིག་ན་རེ་ད་ལྟར་གྱི་ལས་སོ་ཞེས་ཟེར་རོ། །ཁ་ཅིག་ན་རེ་སྒྲིབ་པ་ལྔ་པོ་རྣམས་ལས་གང་ཡང་རུང་བ་ལ་
[152b.6]མི་མཐུན་པར་སེམས་པ་ལས་སོ་ཞེས་ཟེར། ཁ་ཅིག་ནི་གཟུགས་ཀྱི་ཁམས་ནི་ཁམས་བཞི་པར་ཁ་དོག་བཞི་པར་འདོད་དོ། །གཞན་ནི་ཁ་དོག་གཅིག་པར་འདོད་དོ། །དེ་བཞིན་དུ་གཞན་དག་ནི་གང་ཟག་ནི་ཡོད་དོ། །དེ་ཡང་ཕུང་པོ་ལས་གཞན་ཡིན་ནོ་ཞེས་ཟེར། ཕུང་པོ་ཙམ་ཡང་མ་
[152b.7]ཡིན་ཏེ། ཕུང་པོ་ཉེ་བར་བླངས་པ་དང་ལྡན་པར་བརྟག་པའོ། །ཉེ་བར་ལེན་པ་མེད་པ་ནི་མྱ་ངན་ལས་འདས་པ་ཡིན་པས་སོ། །འདི་ལྟར་འཕགས་པའི་བདེན་པ་བཞི་ལས་རིམ་གྱིས་བརྟགས་ནས་མངོན་པར་རྟོགས་པར་འགྱུར་ཏེ། བར་མ་དོར་མི་མཐུན་པའི་སེམས་འབྱུང་བ་མེད་དོ། །སྡུག་
[153a]
[153a.1]བསྔལ་ལ་དམིགས་པའི་བྱང་ཆུབ་ཀྱི་ཡན་ལག་གིས་སྐྱོན་མེད་པར་འཇུག་གོ། །འདོད་པར་གཏོགས་པའི་འདུ་བྱེད་མི་རྟག་པར་ཡིད་ལ་བྱེད་པ་ལ་བརྟེན་པའི་སེམས་བཅུ་གསུམ་གྱིས་རྒྱུན་དུ་ཞུགས་པའི་འབྲས་བུ་ཐོབ་པར་འགྱུར་ཏེ། ཆོས་དེ་ལ་གནས་པ་ལ་
[153a.2]ཉམས་པ་མེད་དོ། །དེ་བཞིན་དུ་ཞུགས་པ་ཡང་ངོ་། །དགྲ་བཅོམ་པ་ལ་ཡང་ཉམས་པའི་ཆོས་ཡོད་དོ། །སྲིད་པ་བར་མ་དོ་ཡང་ཡོད་དོ། །འདས་པ་དང་མ་འོངས་པ་ཡང་ཡོད་དོ། །གཅིག་ཏུ་དགེ་བའི་ཆོས་ཀྱི་དོན་མྱ་ངན་ལས་འདས་པ་ནི་ཡོད་དོ། །ཕུང་པོ་འགག་པ་ནི་དུས་ལས་རྣམ་པར་གྲོལ་
[153a.3]བ་ཡིན་ནོ། །ལྷ་ལ་ཡང་ཚངས་པར་སྤྱོད་པ་ལ་གནས་པ་ཡོད་དོ། །འདོད་པའི་ཁམས་ནས་སྐྱོན་མེད་པ་ལ་འཇུག་པར་འགྱུར་རོ། །སོ་སོའི་སྐྱེ་བོས་ཀྱང་འདོད་པའི་འདོད་ཆགས་དང་གནོད་སེམས་སྤོང་ངོ་། །རྣམ་པར་ཤེས་པའི་ཚོགས་ལྔ་ནི་འདོད་ཆགས་དང་བཅས་པའམ་བྲལ་བ་ཡང་མ་
[153a.4]ཡིན་ཏེ་རྣམ་པར་རྟོག་པ་མེད་པའི་ཕྱིར་རོ། །དྲུག་པ་ནི་འདོད་ཆགས་དང་བཅས་པ་དང་འདོད་ཆགས་དང་བྲལ་བ་ཡང་ཡིན་ནོ། །དགྲ་བཅོམ་པ་ནི་ཟག་པ་དང་བཅས་པའི་གཟུགས་དང་སེམས་ཀྱིས་ཟག་པ་དང་བཅས་པ་དང་། ཟག་པ་མེད་པ་ལས་དམིགས་པ་ཡིན་ནོ། །སེམས་ཀྱིས་ཡུལ་གཞན་དུ་
[153a.5]ཕྱིན་པ་ནི་མ་ཡིན་གྱི། འདི་ན་གནས་བཞིན་དུ་ཐག་རིང་པོ་ན་གནས་པ་ལ་དམིགས་པར་བྱེད་དོ། །གཟུགས་མེད་པའི་ཁམས་ན་གཟུགས་མེད་དོ། །དགྲ་བཅོམ་པ་ལ་ཡང་ཉམས་པའི་ཆོས་ཡོད་དོ། །དུས་མ་ཡིན་པར་འཆི་བ་ཡོད་དོ། །སྐྱེས་བུའི་བྱེད་པ་ཡོད་དོ། །འཇིག་རྟེན་པའི་ཡང་དག་
[153a.6]པའི་ལྟ་བ་ཡོད་དོ། །ཕྱི་རོལ་པ་ལ་ཡང་མངོན་པར་ཤེས་པ་ལྔ་ཡོད་དོ། །དགྲ་བཅོམ་པ་ལ་གཞན་གྱིས་བསྟན་ཅིང་བསྒྲུབ་པ་མེད་དོ། །མི་ཤེས་པ་མེད་དོ། །ཡིད་གཉིས་མེད་དོ། །གཞན་གྱི་ལ་ཡོངས་སུ་བརྟག་པ་མེད་དོ། །ངག་འཇུག་པའི་སྨྲ་བ་མེད་དོ། དབང་པོ་དང་སྟོབས་དང་བྱང་
[153a.7]ཆུབ་ཀྱི་ཡན་ལག་བསྐྱེད་པའི་ཕྱིར་རོ། །བཅོམ་ལྡན་འདས་ཀྱི་ཉན་ཐོས་རྣམས་བྱང་གི་སྒྲ་མི་སྙན་དང་། བདུད་རིས་དང་། འདུ་ཤེས་མེད་པའི་སེམས་ཅན་དུ་སྐྱེ་བ་ནི་མེད་དོ། །རྒྱུན་དུ་ཞུགས་པས་བསམ་གཏན་རྣམས་ཐོབ་པ་མ་ཡིན་ནོ། །མདོ་སྡེ་ཐམས་ཅད་ནི་ངེས་པའི་དོན་ཡིན་ནོ། །མཚུངས་པར་
[153b]
[153b.1]མི་ལྡན་པའི་བག་ལ་ཉལ་དང་སེམས་ལས་བྱུང་བའི་བག་ལ་ཉལ་ཡང་ཡོད་དོ། །འདུས་བྱས་ནི་སྐད་ཅིག་མ་དང་། སྐད་ཅིག་མ་ཡིན་པ་ཡང་ཡོད་དོ། །འགག་པར་འགྱུར་བའི་ཉེ་བར་ལེན་པ་ལས་མེ་འབར་བར་འགྱུར་རོ། །སེམས་ཅན་གཅིག་ཅིག་འཆི་ཞིང་སྐྱེ་བོ་མི་ཤེས་
[153b.2]པའི་གཞི་ལས་འཆི་བའི་མཐར་ཐུག་གི་བར་དུའོ། །འཆི་བའི་རྐྱེན་བྱེད་པའི་སེམས་གཅིག་པོ་དེ་ཉིད་ཡང་དག་པར་ཞི་བར་བྱའོ། །ཚད་མེད་པ་རྣམས་ནི་བྱང་ཆུབ་ཀྱི་ཡན་ལག་མ་ཡིན་ནོ། །སྙོམས་པར་འཇུག་པ་དྲུག་ཅུ་རྩ་བདུན་གྲུབ་པར་བྱས་ནས་སྙོམས་པར་འཇུག་པ་བཅུ་དགུ་
[153b.3]དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་རྣམས་བྱང་ཆུབ་སེམས་དཔས་ཡང་དག་པར་སྦྱོང་བར་བྱེད་དོ། །ཀུན་དུ་སྦྱོར་བ་རྣམས་མ་གཏོགས་པ་ཉིད་ནི་བར་ཆད་མེད་པའི་ལམ་གྱིས་སྤང་བར་བྱ་བ་རྣམས་སོ། །འགྲོ་བ་དང་བཅས་པའི་ལམ་ནི་ངེས་པར་གཉིས་ཉིད་
[153b.4]ཡིན་ནོ། །དགེ་སྦྱོང་གི་འབྲས་བུ་ནི་རིམ་གྱིས་ཐོབ་པ་མ་ཡིན་ནོ། །འཇིག་རྟེན་པའི་ལམ་གྱིས་ཀྱང་ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་མངོན་དུ་བྱེད་དོ། །འཁོར་བ་གཞན་དུ་འགྱུར་བ་ཡང་ཡོད་དོ། །ཆོས་ཅུང་ཞིག་ཀྱང་འཇིག་རྟེན་འདི་ནས་འཇིག་རྟེན་ཕ་
[153b.5]རོལ་དུ་འགྲོ་བ་མེད་དོ། །ཕུང་པོ་ཉེ་བར་བླངས་ནས་སེམས་ཅན་ནི་འཕོ་བར་འགྱུར་རོ། །གཟུགས་ཀྱི་ཁམས་ནི་ཁ་དོག་བཞི་པ་ཡིན་ནོ། །དེ་བཞིན་དུ་སྲིད་པ་བར་མ་ནི་ཁ་དོག་བཅུའམ་ཉ་ཕྱིས་ཀྱི་མདོག་འདྲ་བ་ཡིན་ནོ། །དེ་བཞིན་དུ་སྲིད་པ་བར་མ་ནི་ཞག་ལྔའམ་བདུན་དུ་གནས་
[153b.6]པའམ་ཡུན་རིང་པོར་ཡང་ངོ་། །དེ་བཞིན་དུ་ལས་ནི་ནམ་ཡང་མེད་པར་མི་འགྱུར་རོ། །ཉམས་པར་མི་འགྱུར་རོ། །འཕྲོགས་པར་མི་འགྱུར་རོ། །ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་བ་ནི་མེད་དོ། །སྲིད་པ་ཇི་སྲིད་ཀྱི་བར་དུ་རིགས་ཀྱི་ངོ་བོ་དང་ལྷན་ཅིག་ཏུ་གནས་
[153b.7]སོ། །སྔར་ཉེ་བར་བསགས་པ་དང་ཕྱིས་ཉེ་བར་བསགས་པའི་ལས་ཀྱི་རྐྱེན་ཉེ་བར་རྙེད་པར་གྱུར་ནས་འགྲོ་བ་རྣམས་སུ་འགྲོ་བར་བྱེད་དོ། །ངེས་པའི་ལས་ནས་བཟློག་པར་མི་ནུས་སོ། །བྱང་ཆུབ་སེམས་དཔའ་ནི་སྐྱེས་བུའི་གཟུགས་ཀྱིས་ལྷུམས་སུ་ཞུགས་པ་ཡིན། ཡུམ་གྱི་དཀུ་ནས་གླང་པོ་
[154a]
[154a.1]ཆེར་གྱུར་ནས་ཞུགས་པ་ནི་མ་ཡིན་ཏེ། དེ་ནི་དེའི་རྨི་ལམ་གྱི་རྣམ་རྟོག་ཡིན་ནོ། །ནུར་ནུར་པོ་དང་། མེར་མེར་པོ་དང་། ལྟར་ལྟར་པོའི་ངོ་བོར་ཡང་འགྱུར་རོ། །སྐྱེ་གནས་ན་ཡང་སྒྲིབ་པ་མེད་པའི་རྣམ་པར་གྲོལ་བའི་ནུས་པ་ཅན་དུ་འགྱུར་རོ། །སངས་རྒྱས་བཅོམ་
[154a.2]ལྡན་འདས་རྣམས་ཀྱི་ཡེ་ཤེས་ནི་ལོངས་སྤྱོད་པ་ལ་འཇུག་པར་འགྱུར་རོ། །སོ་སོའི་སྐྱེ་བོ་ཉིད་ཀྱང་སེམས་གཅིག་གིས་འགོག་གོ། །སེམས་གཅིག་གིས་སྒྲིབ་པ་ཐམས་ཅད་སྤོང་། སེམས་གཅིག་གིས་ཐམས་ཅད་མཁྱེན་པའི་སྒྲིབ་པ་མེད་པའི་རྣམ་པར་ཐར་པ་ཡང་རབ་ཏུ་ཐོབ་བོ། །སེམས་
[154a.3]གཅིག་གིས་ཞུགས་པའི་ཆོས་རྣམས་འགག་པར་བྱེད་ཅིང་འབྲས་བུ་ལ་གནས་པ་རྣམས་སྐྱེད་པར་བྱེད་དོ། །རྐྱེན་བཞི་ཉིད་ཀྱིས་རྐྱེན་ཐམས་ཅད་བསྡུས་སོ། །སྡུག་བསྔལ་གྱིས་སྤང་བར་བྱ་བའི་ཀུན་ནས་ལྡང་བ་ལ་གནས་པ་ནི་མཚམས་མེད་པ་དག་བྱེད་པ་ཡིན་གྱི་གཞན་གྱིས་ནི་མ་ཡིན་ནོ། །
[154a.4]མཐོང་བས་སྤང་བར་བྱ་བའི་བག་ལ་ཉལ་བཞིས་བསྡུས་པས་ཐམས་ཅད་བསྡུས་པ་སྟེ་དེས་དགེ་བའི་རྩ་བ་ཐམས་ཅད་གཅོད་པར་བྱེད་ཀྱི་བསྒོམ་པས་སྤང་བར་བྱ་བས་ནི་མ་ཡིན་ནོ། །བསྒོམ་པའི་རང་བཞིན་ཐམས་ཅད་ལ་འཇིག་རྟེན་ཇི་སྲིད་གནས་ཀྱི་བར་དུ་གཞན་གྱིས་གནོད་པར་བྱེད་པའི་
[154a.5]འབད་པས་གནོད་པར་མི་འགྱུར་གྱི། བདག་ཉིད་ཀྱི་ཚེ་ཟད་པས་དུས་བྱེད་པར་འགྱུར་རོ། །དགྲ་བཅོམ་པ་ཐམས་ཅད་ནི་འབྲལ་བས་འཆི་བར་འགྱུར་གྱི། འཕོ་བས་ནི་འཆི་བ་མེད་དེ། ཇི་སྐད་དུ་ལུས་དང་བྲལ་བས་དུས་བྱེད་པར་འགྱུར་ཏེ། དགྲ་བཅོམ་པ་ནི་ལུས་ཐ་མ་དང་བྲལ་བས་འབྲལ་
[154a.6]བའི་ཕྱིར་རོ་ཞེས་བྱ་བར་གསུངས་པ་ལྟ་བུ་སྟེ། ལུས་ནི་འདིར་དབང་པོའི་ལུས་ལ་བྱ་བར་བཞེད་དོ། །འབྱུང་བར་འགྱུར་བ་དང་། འབྱུང་བ་དང་། འགག་པར་འགྱུར་བ་དང་། འགག་པ་དང་། སྐྱེ་བར་འགྱུར་བ་དང་། སྐྱེ་བ་དང་། འཆི་བར་འགྱུར་བ་དང་། འཆི་བ་དང་། བྱེད་པར་
[154a.7]འགྱུར་བ་དང་། བྱེད་པ་དང་། ཆད་པར་འགྱུར་བ་དང་། ཆད་པ་དང་། འགྲོ་བར་འགྱུར་བ་དང་། འགྲོ་བ་དང་། རྣམ་པར་ཤེས་པར་འགྱུར་བ་དང་། རྣམ་པར་ཤེས་པའོ། །ཕུང་པོ་གསུམ་གྱིས་སེམས་ཐམས་ཅད་བསྡུས་ཀྱི་ཆོས་ཐམས་ཅད་ནི་མ་ཡིན་ནོ། །ཆོར་བ་ཐམས་ཅད་ནི་ལས་
[154b]
[154b.1]ལས་བྱུང་བ་ཡིན་ནོ། །སྔར་བྱས་པའི་སྒོམ་པས་སྤང་བར་བྱ་བའི་ལས་ཐམས་ཅད་ཀྱི་རྣམ་པར་སྨིན་པར་འགྱུར་རོ་ཞེས་བྱ་བའི་བར་རྣམས་སོ།། །།སྡེ་པ་ཐ་དད་པར་བྱེད་པ་དང་རྣམ་པར་བཤད་པ་སློབ་དཔོན་བྷ་བྱས་མཛད་པ་རྫོགས་སོ།། །།ར་ས་འཕྲུལ་སྣང་གི་གཙུག་ལག་ཁང་དུ་དགེ་
[154b.2]སློང་ལེགས་པའི་ཤེས་རབ་ཀྱིས་གསོལ་བ་བཏབ་ནས་རྒྱ་གར་ཤར་ཕྱོགས་བཾ་ག་ལའི་མཁས་པ་ཆེན་པོ་འདི་པཾ་ཀ་ར་ཤྲཱི་ཛྙཱ་ན་ཞེས་བྱ་བའི་པཎྜི་ཏའི་ཞལ་སྔ་ནས་དང་། བོད་ཀྱི་ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།
[154b.3]{T4140}༄༅༅། །རྒྱ་གར་སྐད་དུ། ས་མ་ཡ་བྷེ་དོ་པ་ར་ཝ་ཙ་ན་ཙཀྲ་སེ་ན་ཀཱ་ཡ་བྷེ་དོ་པ་རི་དེ་ཤ་ནཾ་ནཱ་མ་སཾ་གྲ་ཧ། བོད་སྐད་དུ། གཞུང་ཐ་དད་པ་རིམ་པར་བཀླག་པའི་འཁོར་ལོ་ལས་སྡེ་པ་ཐ་དད་པ་བསྟན་པ་བསྡུས་པ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །ཤར་དང་ནུབ་
[154b.4]དང་གངས་རིར་གནས། །འཇིག་རྟེན་འདས་པར་སྨྲ་བའི་སྡེ། །བཏགས་པར་སྨྲ་བའི་སྡེ་པ་དང་། །ལྔ་ཚན་དགེ་འདུན་ཕལ་ཆེན་པ། །གཞི་ཀུན་པ་དང་འོད་སྲུངས་སྡེ། །ས་སྟོན་སྡེ་དང་ཆོས་སྲུང་སྡེ། །མང་ཐོས་གོས་དམར་སློབ་མ་དང་། །རྣམ་པར་ཕྱེ་སྟེ་སྨྲ་བའི་སྡེ། །ཐམས་ཅད་ཡོད་པར་
[154b.5]སྨྲ་བ་ཡིན། །རྒྱལ་བྱེད་ཚལ་གནས་འཇིགས་མེད་གནས། །གཙུག་ལག་ཁང་ཆེན་གནས་བརྟན་པ། །ས་སྒྲོགས་རིས་དང་སྲུང་བ་པ། །གནས་མ་བུ་ཡི་སྡེ་རྣམས་ནི། །ཀུན་གྱིས་བཀུར་བ་རྣམ་པ་གསུམ། །ཡུལ་དོན་སློབ་དཔོན་བྱེ་བྲག་གིས། །ཐ་དད་རྣམ་པ་བཅོ་བརྒྱད་གསུངས། །སྡེ་
[154b.6]པ་བཅོ་བརྒྱད་ལས་འཕགས་པ་དགེ་འདུན་ཕལ་ཆེན་པའི་སྡེ་པ་རྣམ་པ་ལྔའི་ནང་ནས་འཇིག་རྟེན་ལས་འདས་པར་སྨྲ་བའི་སྡེ་བའི་ལྟ་བ་ལ་གཞན་དང་མི་མཐུན་པའི་རྣམ་གྲངས་མངའ་བས་ན་སྔར་དེ་བཤད་ལ། ལྷག་མ་གཞན་རྣམས་ཕྱིས་བཤད་ན་བདེ་བའི་ཕྱིར་དེ་དང་པོར་བཤད་དོ། །དེ་ལ་འཇིག་
[154b.7]རྟེན་ལས་འདས་པར་སྨྲ་བའི་སྡེ་པ་རྣམས་ནི་འདི་སྐད་ཅེས་ཟེར་ཏེ། ཐུབ་པ་ནི་འཇིག་རྟེན་ལས་འདས་པ། རྫས་ཡོད་པ། སྐུ་དང་ཚེ་དང་མཐའ་ཡས་པ། མཉམ་པར་གཞག་པ། སྐད་ཅིག་སྐད་ཅིག་ལ་ཐམས་ཅད་མཁྱེན་པ། ཟད་པ་དང་མི་སྐྱེ་བའི་བློ་རྟག་ཏུ་མངའ་བ་ཡིན་ནོ། །ཆོས་ཀྱི་འཁོར་
[155a]
[155a.1]ལོ་བསྐོར་བ་ནི་ཚིག་གི་ཡིན་ནོ། །བྱང་ཆུབ་སེམས་དཔའ་ལ་ནི་འདོད་ཆགས་ལ་སོགས་པ་སྐྱེ་བ་དང་། མེར་མེར་པོ་ལ་སོགས་པ་ལས་སྐྱེ་བ་མེད་དོ། །བདེན་པ་ནི་ཅིག་ཅར་མཐོང་ངོ་། །མིག་ལ་སོགས་པའི་སེམས་ཀྱིས་ཀྱང་འདོད་ཆགས་དང་བྲལ་བར་འགྱུར་རོ། །
[155a.2]གཟུགས་དང་གཟུགས་མེད་པ་ན་ཡང་མིག་ལ་སོགས་པའི་རྣམ་པར་ཤེས་པ་ཡོད་དོ། །དབང་པོ་རྣམས་ཀྱིས་ནི་ཡུལ་མི་འཛིན་ནོ། །མཉམ་པར་གཞག་པ་ཡང་ཚིག་སྨྲའོ། །སེམས་ལ་ཡང་གཟུགས་ཡོད་དོ། །རང་རིག་པ་ཡིན་ནོ། །དགྲ་བཅོམ་པ་རྣམས་ལ་ཡང་སོམ་ཉི་དང་མི་ཤེས་
[155a.3]པ་ཡོད་དེ་བསྟན་དགོས་སོ། །འབྲས་བུ་ལ་གཞན་གྱིས་བརྡ་སྤྲད་དགོས་སོ། །སྡུག་བསྔལ་སྨོས་ཤིང་སྡུག་བསྔལ་ཚིག་ཏུ་བརྗོད་པས་ལམ་སྐྱེ་བར་འགྱུར་རོ། །འཇིག་པ་ཡང་ཡོད་དོ། །བརྒྱད་པ་ལ་ཡང་ཡུན་རིང་དུ་གནས་སོ། །ཆོས་ཀྱི་ཆོ་ག་ལས་ཀྱང་ཉམས་པར་འགྱུར་རོ། །རྒྱུན་དུ་
[155a.4]ཞུགས་པ་དང་དགྲ་བཅོམ་པ་ལས་ནི་ཉམས་པ་མེད་དོ། །དང་པོ་ཤོས་ནི་མཚམས་མེད་པ་མ་གཏོགས་པ་གཞན་བྱེད་དོ། །འཇིག་རྟེན་པ་ལ་ནི་ཡང་དག་པའི་ལྟ་བའི་དབང་པོ་མེད་དོ། །མ་གསུངས་པ་ལ་ནི་བཅས་བཅོས་བྱར་མེད་དོ། །དྲང་བའི་དོན་ནི་མེད་དོ། །གཟུགས་མེད་པ་ནི་གཟུགས་
[155a.5]མེད་པ་བཞི་དང་། འདུས་མ་བྱས་གསུམ་དང་། ལམ་དང་རྟེན་ཅིང་འབྲེལ་པར་འབྱུང་བའི་ལུགས་སུ་གཏོགས་པ་དགུའོ། །སངས་རྒྱས་མང་པོ་ཅིག་ཅར་འབྱུང་བ་ཡོད་དོ། །སེམས་གཉིས་ཅིག་ཅར་འབྱུང་བ་དང་། ཉོན་མོངས་པ་དང་ལམ་ཅིག་ཅར་འབྱུང་བ་དང་། ལས་དང་ལས་ཀྱི་འབྲས་བུ་ཅིག་ཅར་
[155a.6]འབྱུང་བ་དང་། ས་བོན་དང་མྱུ་གུ་ཅིག་ཅར་འབྱུང་བ་ཡོད་དོ། །ལུས་ལ་ནི་སེམས་ཀྱིས་ཁྱབ་པོ། །སེམས་ནི་འོད་གསལ་བའོ། །ཕྲ་རྒྱས་ནི་མི་ལྡན་པའོ། །ཀུན་ནས་དཀྲིས་པ་ནི་མཚུངས་པར་ལྡན་པའོ། །ཞིག་པར་གྱུར་པ་དང་མ་སྐྱེས་པ་དང་། བར་མ་དོའི་སྲིད་པ་ནི་མེད་དོ། །རྒྱུན་དུ་ཞུགས་པ་
[155a.7]ནི་བསམ་གཏན་ཐོབ་པའོ། །དྲུག་པ་ནི་ཤེས་པར་བྱ་བ་ཡང་མ་ཡིན། རྣམ་པར་ཤེས་པར་བྱ་བ་ཡང་མ་ཡིན་ནོ་ཞེས་འཇིག་རྟེན་ལས་འདས་པར་སྨྲ་བའི་སྡེ་པ་རྣམས་ཟེར་རོ། །དེ་ལས་གཞན་པ་རྣམས་ཀྱི་ཁྱད་པར་འདི་ཡིན་ཏེ། ཐུབ་པ་ནི་བཏགས་པའི་སྒོ་ནས་བླ་མ་ཡིན་ནོ་ཞེས་ཟེར་རོ། །
[155b]
[155b.1]བཏགས་པར་སྨྲ་བའི་སྡེ་པ་རྣམས་ནི་སྐྱེས་བུ་བྱེད་པའི་རྩལ་དང་། དུས་མ་ཡིན་པར་འཆི་བ་མེད་དོ། །ལམ་ནི་བསོད་ནམས་ཀྱིས་འཐོབ་བོ། །ལམ་ནི་བསྒོམ་པར་བྱ་བ་ཡིན་ནོ། །ལམ་ནི་འཇིག་པར་མི་འགྱུར་རོ་ཞེས་ཟེར་རོ། །ཤར་གྱི་རི་བོའི་སྡེ་དང་། ནུབ་ཀྱི་རི་བོ་ལ་གནས་པའི་སྡེ་པ་རྣམས་
[155b.2]ནི་བྱང་ཆུབ་སེམས་དཔའ་ནི་ངན་འགྲོ་ལས་རྣམ་པར་གྲོལ་བ་མ་ཡིན་ནོ། །མཆོད་རྟེན་ལ་མཆོད་པ་ནི་འབྲས་བུ་མཆོག་ཏུ་གྱུར་པ་མ་ཡིན་ནོ་ཞེས་ཟེར་རོ། །གངས་རི་པའི་སྡེ་པ་རྣམས་ནི་ཕྱི་རོལ་པ་ལ་ནི་མངོན་པར་ཤེས་པ་ལྔ་མེད་དོ། །ལྷ་རྣམས་ལ་ནི་ལམ་བསྒོམ་པ་མེད་དོ་ཞེས་ཟེར་རོ། །
[155b.3]འཕགས་པ་ཐམས་ཅད་ཡོད་པར་སྨྲ་བའི་སྡེ་པ་རྣམ་པ་བདུན་ལས་གཞི་ཐམས་ཅད་ཡོད་པར་སྨྲ་བའི་སྡེ་པ་རྣམས་ནི་དུས་གསུམ་དང་། མིང་དང་། གཟུགས་ཀྱིས་ནི་འདུས་བྱས་ཐམས་ཅད་བསྡུས་སོ། །དྲུག་པ་དང་མི་ལྡན་པ་རྣམས་དང་། འདུས་མ་བྱས་རྣམས་ནི་ཤེས་པར་བྱ་བ་ཡང་མ་ཡིན། རྣམ་
[155b.4]པར་ཤེས་པར་བྱ་བ་ཡང་མ་ཡིན་ནོ། །འདུས་མ་བྱས་ནི་རྣམ་པ་གསུམ་མོ། །ཉོན་མོངས་པ་ནི་མཚུངས་པར་ལྡན་པའོ། །ཐུབ་པ་ནི་རྣམ་པ་གཉིས་སོ། །དེའི་གསུང་རབ་དང་དབང་པོ་རྣམས་ནི་གཟུགས་ཅན་རྣམས་ཉི་ཚེ་ལ་ཡོད་དོ། །མཆོད་རྟེན་ལ་མཆོད་པ་ནི་འབྲས་བུ་ཆེའོ། །བྱང་ཆུབ་སེམས་
[155b.5]དཔའ་ངན་འགྲོ་སྤངས་པ་ནི་རྣམ་པ་གཉིས་སུ་འདོད་པ་ཡོད་དོ་ཞེས་ཟེར་རོ། །བསོད་ནམས་ལམ་གྱི་ཚོགས་སུ་འགྱུར་རོ་ཞེས་ཟེར་བ་ལ་སོགས་པ་ནི་མི་འདོད་དོ། །དེ་ལས་གཞན་པ་རྣམས་ཀྱི་ཁྱད་པར་ནི་འོད་སྲུངས་སྡེའི་སློབ་མ་རྣམས་ནི་ཡོངས་སུ་ཤེས་ལ་མ་སྤངས་པ་དང་། མ་འོངས་པའི་རྒྱུད་
[155b.6]ལས་འབྱུང་བ་མེད་དོ། །སློབ་མའི་ཆོས་རྣམས་ནི་རྣམ་པར་སྨིན་པ་ཡོད་པའོ་ཞེས་བྱ་བའི་གཞུང་ལ་བརྟེན་ཏོ། །ས་སྟོན་སྡེའི་སློབ་མ་རྣམས་ཀྱི་གཞུང་ལུགས་ནི་མ་འོངས་པ་མེད་དོ། །འདས་པ་མེད་དོ། །མ་འོངས་པ་མེད་དོ། །ད་ལྟར་བྱུང་བ་མེད་དོ། །བདེན་པ་ཅིག་ཅར་མཐོང་ངོ་། །
[155b.7]ཕྱི་རོལ་པ་ལ་ཉོན་མོངས་པ་ཟད་པ་མེད་དོ། །ལྷ་ཡུལ་པ་ལ་ནི་ལམ་མེད་དོ། །བར་མ་དོའི་སྲིད་པ་མེད་དོ། །དགྲ་བཅོམ་པ་ལ་ཡང་བསོད་ནམས་སྐྱེ་བ་ཡོད་དོ། །ཕྲ་རྒྱས་ནི་སེམས་ལས་ཐ་དད་དོ། །འདུས་མ་བྱས་ཀྱི་དངོས་པོ་ནི་དགུ་སྟེ། མི་གཡོ་བ་དང་ལྡན་པ་གསུམ་དང་། དགེ་བ་དང་མི་
[156a]
[156a.1]དགེ་བ་དང་ལུང་དུམ་བསྟན་པ་གཉིས་དང་། རྟེན་ཅིང་འབྲེལ་པར་འབྱུང་བ་དང་། ལམ་རྣམས་ཏེ་རྟག་ཏུ་གནས་པ་ཡིན་ནོ། །སྟོན་པ་ནི་དགེ་འདུན་གྱི་ནང་དུ་གཏོགས་ཏེ། དེའི་ཕྱིར་དགེ་འདུན་ལ་ཕུལ་བ་ལྷག་པར་དོན་ཆེའོ། །རྒྱལ་བ་ཉན་ཐོས་དང་བཅས་པ་རྣམས་ནི་
[156a.2]ལམ་དང་རྣམ་པར་གྲོལ་བ་གཅིག་གོ་ཞེས་དེ་སྐད་ཅེས་ཟེར་རོ། །ཆོས་སྲུང་སྡེ་པ་རྣམས་ནི་སངས་རྒྱས་ནི་དགེ་འདུན་གྱི་ནང་དུ་མ་གཏོགས་སོ། །སངས་རྒྱས་ལ་ཕུལ་བ་འབྲས་བུ་ཆེའོ། །སངས་རྒྱས་དང་། ཉན་ཐོས་རྣམས་ཀྱི་ལམ་ནི་ཐ་དད་དོ། །ཕྱི་རོལ་པ་ལ་ནི་མངོན་པར་ཤེས་པ་མེད་དོ། །
[156a.3]དགྲ་བཅོམ་པའི་ལུས་ནི་ཟག་པ་མེད་པའོ་ཞེས་ཟེར་རོ། །མང་དུ་ཐོས་པའི་སྡེ་པ་རྣམས་ནི་མི་རྟག་པ་དང་། བདག་མེད་པ་དང་། སྟོང་པའི་ཤེས་པ་དང་། ལམ་དང་། མྱ་ངན་ལས་འདས་པ་འདི་རྣམས་ནི་ཐུབ་པའི་འཇིག་རྟེན་ལས་འདས་པའི་ཆོས་ཡིན་ནོ། །ལྷག་མ་རྣམས་ནི་འཇིག་རྟེན་པའོ་
[156a.4]ཞེས་ཟེར་རོ། །དགྲ་བཅོམ་པ་ལ་སོམ་ཉི་ཡོད་དོ་ཞེས་བྱ་བ་ལ་སོགས་པར་འདོད་དོ། །འཕོ་བར་སྨྲ་བ་དེ་དག་ནི་གོས་དམར་གྱི་སྡེ་པ་ཉིད་དེ། དེའི་ཕྱིར་སེམས་ཅན་འཕོའོ། །ཕུང་པོ་བཞི་ནི་རང་བཞིན་གཅིག་ཏུ་ངེས་སོ། །ལམ་གྱི་མཐུས་ནི་ཕུང་པོ་རྣམས་འགག་གོ་ཞེས་ཟེར་རོ། །
[156a.5]རྣམ་པར་ཕྱེ་སྟེ་སྨྲ་བའི་སྡེ་པ་རྣམས་ནི་གང་ཟག་ནི་དོན་དམ་པར་ཡོད་དོ། །འབྲས་བུ་མ་སྨིན་པའི་དོན་མ་གཏོགས་པ་འདས་པ་མེད་དོ། །འབྲས་བུ་ལས་གཞན་པའི་མ་འོངས་པ་མེད་དོ། །རིགས་མི་མཐུན་པའི་ད་ལྟར་བྱུང་བ་ཡང་མེད་དོ། །ཆོས་ནི་དེ་མ་ཐག་པའི་རྒྱུར་མི་འགྱུར་རོ། །གཟུགས་
[156a.6]ཀྱི་འདྲ་བའི་རྒྱུ་ཡང་མེད་དོ་ཞེས་དེ་ལྟར་བལྟའོ། །འཕགས་པ་གནས་བརྟན་པའི་སྡེ་པ་རྒྱལ་བྱེད་ཚལ་གནས་པའི་སྡེ་དང་། འཇིགས་མེད་རིང་གནས་པའི་སྡེ་དང་། གཙུག་ལག་ཁང་ཆེན་གནས་པའི་སྡེ་འདི་གསུམ་ནི་ལྟ་བ་མཐུན་ཏེ། ལྷ་རྣམས་ལ་ནི་ལམ་བསྒོམ་པ་མེད་དོ་ཞེས་ཟེར་རོ། །
[156a.7]འཕགས་པ་ཐམས་ཅད་ཡོད་པར་སྨྲ་བའི་སྡེ་པ་རྣམ་པ་བདུན་ལས་གཞི་ཐམས་ཅད་ཡོད་པར་སྨྲ་བ་ལས་བྱུང་ངོ་། །ཐུབ་པ་ནི་ལེགས་པར་སྦྱར་བ་མི་གསུང་ངོ་། །བྱང་ཆུབ་སེམས་དཔའ་ནི་བསྐལ་པ་གྲངས་མེད་པ་བཅུ་ཕན་ཆད་ནས་སུམ་ཅུ་ཚུན་ཆད་ཀྱིས་འགྲུབ་བོ། །ཐར་པ་མ་གཏོགས་
[156b]
[156b.1]པ་འདུས་མ་བྱས་པ་མེད་དོ། །ལོག་པར་ཤེས་པ་དང་མི་ཤེས་པ་མེད་དོ། །ཕྲ་རྒྱས་ནི་སེམས་ལས་ཐ་དད་དོ། །འགོག་པའི་སྙོམས་པར་འཇུག་པ་ལ་ནི་སེམས་ཡོད་དོ་ཞེས་ཟེར་རོ། །འཕགས་པ་ཀུན་གྱིས་བཀུར་བའི་སྡེ་པས་སྒྲོགས་རིགས་ཀྱི་སྡེ་དང་། སྲུང་བ་པའི་སྡེ་དང་། གནས་མའི་
[156b.2]བུའི་སྡེ་འདི་གསུམ་ཡང་ལྟ་བ་མཐུན་ཏེ། གང་ཟག་ནི་ཕུང་པོ་རྣམས་ཀྱང་མ་ཡིན་ལ། ཕུང་པོ་རྣམས་ལས་ཐར་པ་ཐ་དད་པ་ཡང་མ་ཡིན་ནོ། །ཕུང་པོ་རྣམས་ནི་དུས་གཞན་དུ་ཡང་བརྟན་པར་འདུག་གོ། །རྣམ་པར་ཤེས་པ་ལྔའི་སྒོ་ནས་ནི་འདོད་ཆགས་སྐྱེ་བར་ཡང་མི་འགྱུར་ལ། འདོད་ཆགས་
[156b.3]དང་བྲལ་བར་ཡང་མི་འགྱུར་རོ། །མཐོང་བའི་ལམ་ནི་སེམས་ཀྱི་སྐད་ཅིག་བཅུ་གཉིས་སོ། །དེ་ཕན་ཆད་ནི་འབྲས་བུ་དང་ལྡན་པར་གནས་སོ། །ཤེས་པར་བྱ་བ་ནི་བརྗོད་དུ་ཡོད་པ་དང་། བརྗོད་དུ་མེད་པའོ་ཞེས་ཟེར་ཏེ། ཡུལ་དང་སློབ་དཔོན་གྱི་བྱེ་བྲག་གིས་འདིར་བྱེ་བྲག་དྲུག་ཏུ་བརྗོད་དོ། །
[156b.4]གཞུང་ཐ་དད་པ་རིམ་པར་བཀླག་པའི་འཁོར་ལོ་བཙུན་པ་དབྱིག་བཤེས་ཀྱིས་མཛད་པ་ལས། སྡེ་པ་ཐ་དད་པ་བསྡུས་པ་ཞེས་བྱ་བ་འདུལ་བ་འཛིན་པ་སློབ་དཔོན་དུལ་བའི་ལྷས་མཛད་པ་རྫོགས་སོ།། །།
[156b.5]{T4141}༄༅༅། །རྒྱ་གར་སྐད་དུ། ཨུ་པ་སི་ཀ་སཾ་བ་རཱཥྚ་ཀ །བོད་སྐད་དུ། དགེ་བསྙེན་གྱི་སྡོམ་པ་བརྒྱད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སྡོམ་གནས་བླ་མ་མཁས་པ་ལས། །གསུམ་ལ་སྐྱབས་འགྲོ་བླངས་ནས་ནི། །ཇི་སྲིད་འཚོ་
[156b.6]བར་གསོད་དང་འཕྲོག །ལོག་པར་སྤྱོད་དང་བརྫུན་གྱི་ཚིག །ཆང་གི་བཏུང་བ་དག་ལས་ལྡོག །ཡན་ལག་ཚང་བ་ཆོ་ག་བཞིན། །བརྫུན་གྱི་ཚིག་ལས་ལྡོག་པ་ཡིས། །དེ་ཡི་སྐྱོན་ནི་གཞན་ལས་ཀྱང་། །ལྡོག་བར་བྱ་སྟེ་ལྡོག་བཤད་པ། །དེ་ཡང་ཤིན་ཏུ་སྨད་པའི་ཕྱིར། །གང་ཕྱིར་ལུས་ངག་མི་
[156b.7]དགེ་ལས། །ལྡོག་པ་ཡིད་ཀྱི་དགེ་བ་ལས། །དེ་ཕྱིར་བརྣབ་སེམས་གནོད་པའི་སེམས། །ལྟ་ལས་ལྡོག་རྣམས་གྲུབ་པ་ཡིན། །ཡན་ལག་ལྔ་ཡི་སྡོམ་བཤད་ཉིད། །གཞུག་པ་རུ་ནི་འདོད་པས་སོ། །མི་གསོད་པ་དང་དངོས་པོ་རྐུ། །ཡོངས་སུ་རྫོགས་དང་གཞན་བུད་མེད། །བདག་གིར་བྱེད་དང་
[157a]
[157a.1]བརྫུན་ཚིག་སྨྲ། །སྡོམ་པ་ཉམས་པའི་རྒྱུ་རྣམས་སོ། །སྡོམ་པ་སླར་ཡང་བླང་བར་བྱ། །དེ་འདྲའི་གང་ཟག་ཉིད་ལས་སོ། །གཞན་དག་ཇི་ལྟ་བར་ནི་བཤགས། །མཁས་ལ་ཡང་རྣམས་ཡང་དག་བསྡམ། །འདི་ལྟར་སྡོམ་པའི་ཚུལ་ཁྲིམས་གནས། །འཇུག་པ་ལ་
[157a.2]ཡང་སྟོབས་ཇི་ལྟར། །གུས་པར་བྱ་སྟེ་དེའི་སྦྱོར་བས། །འབྲས་བུ་སྣ་ཚོགས་དེས་ནི་སྟེར། །འདི་ལ་འབད་དེ་སྦྱར་བར་བྱ། །བདེ་འགྲོ་ཡང་ནི་འདོད་པ་ཡིས། །ཁྲེ་ཡི་མྱུ་གུའི་རྒྱུ་རུ་ནི། །སཱ་ལུའི་ས་བོན་གང་དུ་མཐོང་།། །།དགེ་བསྙེན་གྱི་སྡོམ་པ་བརྒྱད་པ། སློབ་དཔོན་ཆེན་པོ་སུ་ན་
[157a.3]ཡ་ཤྲཱིས་མཛད་པ་རྫོགས་སོ། །རྒྱ་གར་གྱི་མཁན་པོ་དེ་ཉིད་དང་། ལོ་ཙཱ་བ་དགེ་སློང་དར་མ་གྲགས་ཀྱིས་བསྒྱུར་བའོ།། {T4142}༄༅༅། །རྒྱ་གར་སྐད་དུ། ཨུ་པ་སི་ཀ་སམྦ་རཱཥྚ་ཀཾ་བི་བ་ར་ཎཾ། བོད་སྐད་དུ། དགེ་བསྙེན་གྱི་སྡོམ་པ་བརྒྱད་པའི་བཤད་པ། སངས་རྒྱས་དང་
[157a.4]བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བསླབ་གསུམ་རྒྱ་མཚོའི་ཕ་རོལ་བྱོན། །བདེ་བར་གཤེགས་ལ་ཕྱག་འཚལ་ནས། །བསླབ་པ་ལྔ་ཡི་གོ་འཕང་གནས། །སྤང་ཞིང་གསལ་བར་བཤད་པར་བྱ། །འདིར་ངེས་པར་གང་ཟག་གསུམ་སྟེ། ཁ་ཅིག་ནི་འདོད་པ་ཉེས་པར་སྤྱོད་
[157a.5]པ་དག་ལས་དབེན་པར་སྤྱོད་པ་དང་། ཁ་ཅིག་ནི་འདོད་པ་སྤྱོད་པ་ཙམ་ལས་དབེན་བར་སྤྱོད་པ་དང་། ཁ་ཅིག་ནི་ཉེས་པར་སྤྱོད་པ་ཙམ་ལས་དབེན་པར་སྤྱོད་པ་སྟེ། དེ་བཞིན་དུ་སྔར་གོམས་པའི་ཕྱིར་རོ། །སྤང་དཀའ་བའི་འདོད་པ་ཙམ་ལས་དབེན་པར་སྤྱོད་ཅིང་ཉེས་བ་ལ་སྤྱོད་པ་མི་སྲིད་པ་
[157a.6]དང་། བསླབ་པའི་ཉེས་པར་སྤྱོད་པའི་དབེེན་པ་ཙམ་ལ་སྤྱོད་ཅིང་འདོད་པ་ཙམ་ལ་སྤྱོད་པ་མི་སྲིད་པ་མ་ཡིན་ནོ། །དཔེར་ན་ཤིན་ཏུ་སྲ་བའི་ཤིང་གཅོད་པ་ལ་སྒྲིན་པ་ཤིན་ཏུ་འཇམ་པའི་ཨུཏྤལ་སྔོན་པོའི་འདབ་མ་གཅོད་པ་ལ་ལེ་ལོ་ཅན་དུ་མཐོང་བ་དང་། སྤོས་ཀྱི་གླང་པོ་ཆེ་སྨྱོན་པའི་ཚོགས་ལ་འཐབ་ཏུ་འགྲོ་
[157a.7]བའི་སྐྱེས་བུར་བྱེད་པའི་སེང་གེའི་ཕྲུ་གུ་ནི། ཡང་རླུང་གི་སྟོབས་ཀྱིས་བསྐྱོད་པའི་ཡལ་འདབ་ལ་སོགས་པ་འགུལ་པ་ཙམ་གྱིས་སྐྲག་པའི་ཤ་བ་ལ་སོགས་པ་ལ་རྩོད་པས་འཇིགས་པ་ནི་མི་སྲིད་དོ། །གཞན་ནི་དབེན་པ་གཉི་ག་ལ་མ་སྦྱངས་པའོ། །དེ་ལ་གང་ཟག་དང་པོའི་དབང་དུ་བྱས་ཏེ་རབ་ཏུ་བྱུང་བ་དང་
[157b]
[157b.1]བསྙེན་པར་རྫོགས་པར་བཅས་སོ། །གཉིས་པ་ལས་བརྩམས་ཏེ་ཡན་ལག་ལྔའི་དགེ་བསྙེན་གྱི་སྡོམ་པ་ཡང་དག་པར་བཤད་དོ། །གསུམ་པ་ལ་གཏད་དེ་གསོ་སྦྱོང་བརྗོད་དོ། །དེ་ལ་དང་པོའི་སྡོམ་པ་གཉིས་འདུལ་བའི་དབང་དུ་བྱས་པས་དེ་ཉིད་དུ་གོ་བར་བྱའོ། །ལྷག་མ་དག་ནི་སླར་ཡང་སྡོམ་པ་
[157b.2]གཉིས་པོའི་ནང་ནས་དགེ་བསྙེན་གྱི་སྡོམ་པ་ལེན་པའི་ཆོ་ག་བརྗོད་པར་བྱ་སྟེ། སྡོམ་གནས་བླ་མ་མཁས་པ་ལས། །གསུམ་ལ་སྐྱབས་འགྲོ་བླངས་ནས་ནི། །ཇི་སྲིད་འཚོ་བར་གསོད་དང་འཕྲོག །ལོག་པར་སྤྱོད་དང་བརྫུན་གྱི་ཚིག །ཆང་གི་བཏུང་བ་དག་ལས་ལྡོག །ཡན་ལག་ཚང་བ་ཆོ་ག་
[157b.3]བཞིན། །ཞེས་བྱ་བ་ལ་སྡོམ་གནས་ཞེས་བྱ་བ་ནི་དགེ་བསྙེན་གྱི་སྡོམ་པ་ལ་སློབ་པ་རྣམས་ཡིན་གྱི་གཞན་ལས་མ་ཡིན་ཏེ་མི་དབང་བའི་ཕྱིར་རོ། །བླ་མ་ལ་སྟེ་མ་བརྙས་པ་ལས་སོ། །དེ་ལ་ལྟོས་པས་ཚོགས་པ་ཚང་ཡང་བསླབ་པའི་གོ་འཕང་ལས་མི་ཉམས་པ་སྲིད་པའི་ཕྱིར་རོ། །མཁས་པ་ལས་
[157b.4]ཏེ་སྡོམ་པ་རབ་ཏུ་སྟེར་བ་ལ་མཁས་པ་ལས་སོ། །གཞན་ལས་ནི་མ་ཡིན་ཏེ། ཆོ་ག་ཉམས་པ་ལས་སྡོམ་པ་མི་འཐོབ་པའི་ཕྱིར་རོ། །བླངས་ཞེས་བྱ་བ་ནི་སྡོམ་པ་བླངས་པའོ། །གསུམ་ལ་སྐྱབས་སུ་འགྲོ་བ་ནི་དཀོན་མཆོག་གསུམ་ལའོ། །སྐྱབས་སུ་འགྲོ་བ་ནི་སྡོམ་པ་ཐམས་ཅད་ལེན་པ་ལ་
[157b.5]སྒོར་གྱུར་པའི་ཕྱིར་དང་པོར་བསྟན་ཏོ། །ཇི་སྲིད་འཚོ་བར་ནི་གསོན་པོའི་མཐའ་སྟེ། འདིར་ཡང་དག་པར་བླངས་པ་ནི་ཇི་སྲིད་འཚོ་བ་ཡིན་པས་སོ། །གསོད་པ་ནི་འདི་གསད་པར་བྱའོ་ཞེས་ཡང་དག་པར་བསམས་ཏེ་དེ་ཉིད་བསད་པ་སྟེ། བློ་སྔོན་དུ་སོང་བ་དང་། དེ་ཉིད་གཞན་དུ་མ་འཁྲུལ་ནས་མི་
[157b.6]ཡིན་པས་སོ། །འདི་ལྟར་འོག་མ་ལ་ཡང་རིག་པར་བྱའོ། །བདག་པོའི་མངོན་སུམ་དུ་དེ་ལ་ལྟོས་པ་དང་ལྐོག་ཏུ་གྱུར་པ་ཡང་རུང་སྟེ་གཞན་གྱི་རྫས་ཁྱེར་བ་ནི་འཕྲོགས་པའོ། །ལོག་པར་སྤྱོད་པ་ནི་འདོད་པ་ལ་ལོག་པར་སྤྱོད་པ་སྟེ། ཕྱོགས་གཅིག་གིས་ཀུན་མཚོན་པ་སྟེ། དཔེར་ན་བདེན་པའི་བྷྲ་མ་
[157b.7]ལ་བྷྲ་མ་ཞེས་པའོ། །དེ་ཡང་བཞི་སྟེ། འགྲོ་བར་མི་བྱ་བ་ལ་འགྲོ་བ་དང་། ཡན་ལག་མ་ཡིན་པ་ལ་འགྲོ་བ་དང་། ཡུལ་མ་ཡིན་པ་ལ་འགྲོ་བ་དང་། དུས་མ་ཡིན་པ་ལ་འགྲོ་བ་སྟེ། འདི་རྣམས་ནི་འདིར་མངས་པས་འཇིགས་པས་འདིར་མ་སྨོས་སོ། །བརྫུན་གྱི་ཚིག་ནི་དག་གཞན་ནོ། །མྱོས་
[158a]
[158a.1]པ་སྐྱེད་པར་བྱེད་པའི་ཆང་ལ་སོགས་པའི་དངོས་པོ་འབྱུང་བ་ནི་ཆང་གི་བཏུང་བའོ། །བརྗོད་མ་ཐག་པ་འདི་རྣམས་ལས་ལྡོག་པ་ནི་ལྡོག་པར་བྱའོ། །གང་གིས་དགེ་བསྙེན་གྱི་སྡོམ་པ་རྫོགས་པར་ཐོབ་པའི་ཡན་ལག་ནི་དེའོ། །ཡན་ལག་རྣམས་ཀྱང་རེ་ཞིག་དད་པ་སྟེ། དད་པ་
[158a.2]མེད་པའི་མི་རྣམས་ལ་ནི་དཀར་པོའི་ཆོས་རྣམས་མི་སྐྱེའོ། །དཔེར་ན་ས་བོན་མེའི་ཚིག་པ་རྣམས་ལ་མྱུ་གུ་དང་ལྗང་བུ་བཞིན་ནོ་ཞེས་པའི་ཚིག་གིས་སོ། །བུད་མེད་ཀྱི་དབང་པོ་དང་སྐྱེས་པའི་དབང་པོ་ཡང་མ་ཚང་བ་མེད་པ་དང་། མཚམས་མེད་པ་ལྔ་ལ་སོགས་པ་ཡང་སྤངས་པས་སོ། །ཆོ་ག་བཞིན་ནི་
[158a.3]ཆོ་ག་ལས་མ་རྒལ་བའོ། །དེ་ལ་འདི་ནི་ཆོ་ག་སྟེ། དགེ་བསྙེན་གྱི་སྡོམ་པ་འདོད་པས་བླ་མའི་ཞབས་གཉིས་ལ་ཕྱག་འཚལ་ཏེ། བདག་ལ་དགེ་བསྙེན་གྱི་སྡོམ་པ་རིགས་ཀྱི་བུའམ། བཙུན་པས་སྩལ་དུ་གསོལ་ཞེས་གསོལ་བ་བཏབ་སྟེ། སྟོད་གཡོགས་ཕྱོགས་གཅིག་ཏུ་བྱས། ཙོག་ཙོག་
[158a.4]པོར་འདུག་པའམ། པུས་མོ་གཡས་པའི་ལྷ་ང་ས་ལ་བཙུགས་ཏེ་སྙིམ་པ་ཐལ་མོ་སྦྱར་ཏེ། དེས་བརྗོད་པའི་རྗེས་སུ་བཟླས་པས་ཡང་དག་པར་བླང་བར་བྱའོ། །འདི་ལྟར་བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་སངས་རྒྱས་ལ་སྐྱབས་སུ་མཆིའོ། །བདག་
[158a.5]མིང་འདི་ཞེས་བགྱི་བ་ཆོས་ལ་སྐྱབས་སུ་མཆིའོ། །བདག་མིང་འདི་ཞེས་བགྱི་བ་དགེ་འདུན་ལ་སྐྱབས་སུ་མཆིའོ། །ལན་གསུམ་མོ། །བདག་མིང་འདི་ཞེས་བགྱི་པ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་སྲོག་གཅོད་པ་ལས་སླར་ལྡོག་པར་བགྱིའོ། །དེ་བཞིན་དུ་མ་བྱིན་པར་ལེན་པ་དང་།
[158a.6]འདོད་པས་ལོག་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་གི་བཏུང་བ་ལས་སླར་ལྡོག་པར་བགྱིའོ། །གསུམ་ཉིད་དུའོ། །གསུམ་ལ་སྐྱབས་སུ་སོང་ནས་བསླབ་པའི་གནས་ལྔ་བླངས་པའི་དགེ་བསྙེན་དུ་བདག་སློབ་དཔོན་གྱིས་གཟུང་དུ་གསོལ། འདི་ལྟར་བསླབ་
[158a.7]པའི་ཡན་ལག་ལྔ་པོ་འདི་ནི། དགེ་བསྙེན་གྱི་སྡོམ་པ་ཡོངས་སུ་རྫོགས་པར་བརྗོད་དོ། །ཐམས་ཅད་ལས་ལྡོག་པར་ནུས་པ་མེད་ན་ཡང་རེ་རེ་ལ་ཡང་ངེས་པ་སྔོན་དུ་སོང་བ་ལས་ལོག་ན་འབྲས་བུ་ཆེན་པོ་ཉིད་དོ། །གསོ་སྦྱོང་ནི་ཡང་ཉི་མ་ཤར་བ་ལ་བརྟེན་པའི་ཉི་མ་ལ་གློ་བུར་བའི་རྒྱན་རྣམས་བསལ་
[158b]
[158b.1]ཏེ་བླང་བར་བྱའོ། །འདིར་གསུམ་ལ་སྐྱབས་སུ་འགྲོ་བ་ནི་སྔ་མ་བཞིན་ནོ། །འདི་ནི་ཁྱད་པར་ཏེ། ཇི་ལྟར་འཕགས་པ་དགྲ་བཅོམ་པ་དེ་དག་གིས་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དང་། དབྱིག་པ་སྤངས་པ་དང་། མཚོན་ཆ་སྤངས་པ་དང་། ངོ་ཚ་དང་ལྡན་པས་སྲོག་ཆགས་
[158b.2]སུ་གྱུར་པའི་སེམས་ཅན་ཐམས་ཅད་ལ་ཐ་ན་གྲོག་མ་ཕྲ་མོ་ཡང་ཉེ་བར་བཟུང་བ་དེ་བཞིན་དུ་བདག་མིང་འདི་སྐད་ཅེས་བགྱི་བ་ཡང་དུས་འདི་ནས་བཟུང་སྟེ། ཇི་སྲིད་སང་གི་ཉི་མ་ཤར་བ་ལ་ཐུག་པར་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་འཕགས་པ་
[158b.3]དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཇི་ལྟར་འཕགས་པ་དགྲ་བཅོམ་པ་དེ་རྣམས་ཀྱིས་ཡང་ཉི་མ་ཤར་གྱི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུ་དང་བཅོས་པའི་ཆང་མྱོས་པར་འགྱུར་བའི་
[158b.4]གནས་དང་། གར་དང་། གླུ་དང་། རོལ་མོ་དང་། དགའ་བའི་ལྟད་མོ་དང་། ཕྲེང་བ་དང་། དྲི་དང་། བྱུག་པ་དང་། ཁ་དོག་གི་རྒྱན་འཛིན་པ་དང་། ཁྲི་སྟན་མཐོན་པོ་དང་། མལ་སྟན་ཆེན་པོ་དང་། དུས་མ་ཡིན་པའི་ཁ་ཟས་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བ་ཡང་
[158b.5]དུས་འདི་ནས་བཟུང་སྟེ། ཇི་སྲིད་སང་ཉི་མ་འཆར་བ་ལ་ཐུག་པར་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང་། གར་དང་གླུ་དང་རོལ་མོ་དང་། དགའ་བའི་ལྟད་མོ་དང་། ཕྲེང་བ་དང་།
[158b.6]དྲི་དང་། བྱུག་པ་དང་། ཁ་དོག་གི་རྒྱན་འཛིན་པ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་ཀྱང་སྤངས་ཏེ། ཇི་སྲིད་དུ་དུས་མ་ཡིན་པའི་ཁ་ཟས་ལས་སླར་ལྡོག་པར་བགྱིད་དོ། །ཇི་སྲིད་དུ་ཡན་ལག་བརྒྱད་པ་འདིས་འཕགས་པ་དགྲ་བཅོམ་པ་དེ་
[158b.7]རྣམས་ཀྱི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །འདི་ལྟར་ལན་གསུམ་མོ་གསོ་སྦྱོང་ཅན་དུ་བདག་སློབ་དཔོན་གྱིས་གཟུང་དུ་གསོལ། འདི་ལྟར་ཡན་ལག་བརྒྱད་པའི་བསྙེན་གནས་ཀྱི་སྡོམ་པར་འགྱུར་རོ། །འདིས་འཕགས་པ་རྣམས་ལ་བསྙེན་ནས་གནས་པས་
[159a]
[159a.1]བསྙེན་གནས་སུ་བརྗོད་དོ། །དགེ་བའི་ས་བོན་གསོ་བར་བྱེད་པས་གསོ་སྦྱོང་དུ་བརྗོད་དོ། །གསོ་སྦྱོང་འདི་བླངས་པ་དབེན་པ་རྣམ་པ་གཉིས་ལ་སྦྱར་བའི་དོན་དུ། བསྙེན་གནས་ཀྱིས་ཀྱང་བསྙེན་གནས་ཀྱི་དུས་དང་། ཆོ་འཕྲུལ་གྱི་ཕྱོགས་ལ་ཉམས་སུ་བླང་ངོ་། །རིམ་
[159a.2]གྱིས་སྦྱར་བས་ཤིན་ཏུ་སྤྲོ་བ་འདི་ཇི་སྲིད་འཚོ་བའི་བར་དུ་བླང་ངོ་། །ཞག་གཅིག་ཙམ་གྱིས་དུས་ངེས་པས་ནི་གང་ཟག་དབང་པོ་གདུལ་དཀའ་བའི་དབང་གིས་སོ། །སླར་ཡང་གཞན་དུ་སྡོམ་པ་མི་འཆགས་པ་ནི་མ་ཡིན་ནོ། །ཇི་སྲིད་འཚོ་བའི་བར་དུ་ཡང་འདི་རྣམས་བྱིན་པས་གོ་མིའི་སྡོམ་པ་བླང་བ་
[159a.3]ཡིན་ནོ་ཞེས་འདོད་དོ། །ཉིན་མཚན་ནི་བུད་མེད་དང་ཤན་པ་བཞིན་དུ་ལྡོག་པར་མི་ནུས་ན་ཉིན་མོ་ཙམ་དང་། མཚན་མོ་ཙམ་དུ་ཡང་སྤང་བར་བྱའོ། །དེ་ལ་ཉིན་མོ་ཙམ་ལེན་ན་ཡང་ཉི་མ་ནུབ་པ་ལ་ཐུག་པ་ཞེས་བརྗོད་དོ། །མཚན་མོ་ཙམ་ལེན་ན་ཡང་སྔར་བཞིན་ནོ། །དེ་ལྟར་ན་ལེགས་པར་
[159a.4]སྤྱད་པ་ཙམ་དུ་འགྱུར་གྱི་གསོ་སྦྱོང་ནི་མ་ཡིན་ཏེ་ཉིན་མཚན་གྱི་དུས་ཡིན་པའི་ཕྱིར་རོ། །ཅི་སྟེ་དགེ་བསྙེན་གྱི་སྡོམ་པ་འདི་ལེན་པ་ན་རང་བཞིན་གྱི་ཁ་ན་མ་ཐོ་བ་བཞི་དང་། བཅས་པའི་ཁ་ན་མ་ཐོ་བ་ལྔ་རྣམས་ཏེ། ཆང་གི་བཏུང་བ་ལས་ལྡོག་ན་དགེ་བ་བཅུའི་ལས་ཀྱི་ལམ་ལ་འཇུག་པ་ཡིན་ཞེ་ན་དེ་བརྗོད་པ།
[159a.5]བརྫུན་གྱི་ཚིག་ལས་ལྡོག་པ་ཡིས། །དེ་ཡི་སྐྱོན་ནི་གཞན་ལས་ཀྱང་། །ལྡོག་པར་བྱ་སྟེ་གང་ཡང་བརྫུན་གྱི་ཚིག་ལས་ལྡོག་པ་དེས་ནི་དེའི་ཚིག་སྟེ། ཕྱོགས་གཅིག་གཟུང་བའི་ཕྱིར་རོ། །གཞན་ལས་ཀྱང་སྟེ་ཕྲ་མ་དང་། ཚིག་རྩུབ་དང་། ཚིག་འཁྱལ་བར་གྲགས་པའི་ཉེས་པ་ལས་ལྡོག་པར་བྱའོ། །གཅིག་གི་ཚིག་
[159a.6]ནི་ཉེས་པའི་རིགས་ལས་ལྡོག་པས་སོ། །དེ་ལ་ཉོན་མོངས་པའི་བསམ་པས་གཞན་འབྱེད་པའི་ཚིག་ནི་ཕྲ་མའོ། །དེ་འདྲ་བའི་སེམས་ཉིད་ཀྱིས་བརྩེ་བ་མ་ཡིན་པའི་བརྗོད་པ་ནི་ཚིག་རྩུབ་མོའོ། །འདི་འདྲ་ཉིད་ཀྱི་ཡིད་ཀྱིས་བརྫུན་ལ་སོགས་པ་ལས་གཞན་ཆགས་པ་ལ་སོགས་པའི་ཚིག་དེ་ནི་ཚིག་
[159a.7]འཁྱལ་པའོ། །གལ་ཏེ་དེ་ལྟར་ན་བརྫུན་གྱི་ཚིག་གཅིག་ཁོ་ན་བསླབ་པའི་ཚོགས་བསྟན་པ་ལ་བརྗོད་དོ། །ཡང་ཕྲ་མ་ལ་སོགས་པ་ཡང་མ་ཡིན། ལྡོག་བཤད་པ། དེ་ཡང་ཤིན་ཏུ་སྨད་པའི་ཕྱིར། དེ་ཉིད་དེ་བརྫུན་གྱི་ཚིག་ཉིད་དོ། །གང་ཐམས་ཅད་ལ་ངེས་པར་བཟུང་བ་དང་བཅས་པའི་ཕྱིར་རོ། །ལྡོག་
[159b]
[159b.1]བཤད་པ་ནི་ཤིན་ཏུ་སྨད་པའི་ཕྱིར་རོ། །ཤིན་ཏུ་སྨད་པ་ནི་བརྫུན་གྱི་ཚིག་སྟེ། འཇུག་པ་ཙམ་གྱི་སྡིག་པ་གཞན་ཐམས་ཅད་ལ་འཇུག་པས་སོ། །དེ་གསུངས་པ། ཆོས་གཅིག་ལས་ནི་བརྒལ་བ་སྟེ། །བརྫུན་གྱི་ཚིག་ནི་ལུས་ཅན་ནོ། །འཇིག་རྟེན་ཕ་རོལ་ལས་རྒལ་བའི། །སྡིག་པ་མི་བྱ་ཅུང་
[159b.2]ཟད་མེད། །ཅེས་པས་སོ། །དེ་ལྟར་ཡིན་ན་ལུས་དང་ངག་གི་ཉེས་པར་སྤྱོད་པ་ལས་ལྡོག་པས། ཡིད་ཀྱི་ཉེས་པར་སྤྱོད་པ་ལས་ལྡོག་པ་ཡང་ཇི་ལྟར་གྲུབ་ཅེ་ན། གང་ཕྱིར་ལུས་ངག་མི་དགེ་ལས། །ལྡོག་པ་ཡིད་ཀྱི་དགེ་ལས་སོ། །དེ་ཕྱིར་བརྣབ་སེམས་གནོད་པའི་སེམས། །ལྟ་ལས་
[159b.3]ལྡོག་རྣམས་གྲུབ་པ་ཡིན། །གང་ཕྱིར་ནི་བརྗོད་མ་ཐག་པའོ། །ལུས་དང་ངག་གི་ཉེས་པར་སྤྱོད་པ་ལས་ལྡོག་པ་ནི་དགེ་བ་ལས་ཏེ་མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པའི་རང་བཞིན་གྱི་ཡིད་གྲུབ་པར་འགྱུར་ཏེ། ཡིད་ནི་སྔོན་དུ་སོང་བའི་ཆོས་ཞེས་བྱ་བའི་ཚིག་ལས་སོ།
[159b.4]དེ་ལས་ནི་བརྣབ་སེམས་ལས་དང་། གནོད་སེམས་ལས་དང་། ལྟ་བ་ལས་ནི་ལོག་ལྟ་ལ་སྟེ། ཕྱོགས་གཅིག་གིས་ནི་ཀུན་མཚོན་ཏེ་སྔར་བཞིན་ནོ། །ལྡོག་རྣམས་གྲུབ་རྣམས་ཡིན་ཏེ། ལྡོག་རྣམས་ཞེས་བྱ་བ་ནི་ལྡོག་པ་དུ་མའི་ཕྱིར་ལོག་པ་རྣམས་ཀྱང་མང་པོའི་ཚིག་གོ། །དེ་ལ་བརྣབ་སེམས་ནི་
[159b.5]གང་ལ་ཕ་རོལ་གྱི་བུད་མེད་དང་། ནོར་ལ་སོགས་པ་དེ་བདག་གིས་གྱུར་ཅིག་ཅེས་འདོད་པ་ངན་པའོ། །སེམས་ཅན་འདི་རྣམས་ལ་རྒྱོབ་ཅིག་ཅེས་བྱ་བ་ལ་སོགས་པའི་རྣམ་པར་སེམས་རྩུབ་པ་ནི་གནོད་སེམས་སོ། །ལོག་པར་ལྟ་བ་ནི་ལས་དེའི་འབྲས་བུ་ལ་སོགས་པ་ལ་སྐུར་པ་འདེབས་པའི་ཉོན་མོངས་
[159b.6]པ་ཅན་འཆལ་པའི་ཤེས་རབ་བོ། །གལ་ཏེ་དེ་ལྟར་ན་ཡན་ལག་བཅུ་གཅིག་གི་དགེ་བསྙེན་གྱི་སྡོམ་པར་འགྱུར་ཏེ་ཇི་ལྟར་ཡན་ལག་ལྔར་འགྱུར། ཡན་ལག་ལྔ་ཡི་སྡོམ་པ་ཉིད། །གཞུག་པ་རུ་ནི་འདོད་པའོ། །འདི་ནི་བདེན་ཏེ་ཡན་ལག་ལྔའི་དགེ་བསྙེན་གྱི་སྡོམ་པ་ཞེས་པ་ནི་སྔར་བཅོམ་ལྡན་
[159b.7]འདས་ཀྱིས་བཤད་པ་རེ་ཞིག་བློ་ཡང་བ་རྣམས་གཞུག་པའོ། །རིམ་གྱིས་མི་དགེ་བ་གཞན་རྣམས་ལས་ཀྱང་ལྡོག་པར་ནུས་སོ་ཞེས་དགོངས་པའོ། །བཅོམ་ལྡན་འདས་ཀྱིས་དགོངས་པ་ནི་ཐམས་ཅད་ཉིད་ལས་ལྡོག་པའོ་ཞེས་གང་གསུངས་པ་འདིར་ནི་དགེ་སློང་རྣམས་སམ། རིགས་ཀྱི་བུ་འམ་རིགས་
[160a]
[160a.1]ཀྱི་བུ་མོ་ཡང་དད་པ་དང་ལྡན་པར་འགྱུར་རོ། །དད་པ་མང་པོར་འགྱུར་རོ། །ལས་ཀྱི་རྣམ་པར་སྨིན་པ་ཐམས་ཅད་ལ། དད་པར་བྱེད་པ་དང་། ངེས་པར་བྱེད་པ་དང་། ཐེ་ཚོམ་མེད་པར་འགྱུར་རོ། །དེ་ནག་པོ་དང་དཀར་པོའི་ལས་ཀྱི་འབྲས་བུ་ཆུད་མི་ཟ་བར་རིག་ནས་སྲོག་གི་ཕྱིར་
[160a.2]ཡང་བྱ་བ་མ་ཡིན་པ་མི་བྱེད་དོ། །དེ་སྲོག་གཅོད་པ་ལས་སླར་ལྡོག་པར་འགྱུར་རོ། །མ་བྱིན་པར་ལེན་པ་ལས་དང་། འདོད་པས་ལོག་པར་གཡེམ་པ་ལས་དང་། བརྫུན་དུ་སྨྲ་བ་ལས་དང་། ཕྲ་མ་ལས་དང་། ཚིག་རྩུབ་མོ་ལས་དང་། ཚིག་འཁྱལ་པ་ལས་དང་། བརྣབ་སེམས་ལས་དང་།
[160a.3]གནོད་སེམས་ལས་དང་། ལོག་པར་ལྟ་བ་ལས་དང་ལྡོག་པར་འགྱུར་རོ། །དེ་དགེ་བཅུའི་ལས་ཀྱི་ལམ་རྣམས་ཡང་དག་པར་བླངས་པ་ལ་འཇུག་གོ། །མི་དགེ་བ་བཅུའི་ལས་ཀྱི་ལམ་རྣམས་མི་བྱེད་དོ་ཞེས་པ་ལ་སོགས་པའོ། །འདི་ལྟར་ཡན་ལག་བརྒྱད་པའི་བསྙེན་གནས་ཀྱི་སྡོམ་པར་རིག་པར་
[160a.4]བྱའོ། །འདི་ལྟར་བཅུ་གཅིག་པོ་རྣམས་ལས་ལྡོག་པ་གྲུབ་པར་འགྱུར་ཏེ། ཡང་ཐམས་ཅད་ཉམས་སུ་བླངས་པས་སམ། ཡང་ཁ་ཅིག་གིས་སྡོམ་པ་ཉམས་པར་བྱེད། མི་གསོད་པ་དང་དངོས་པོ་རྐུ། །ཡོངས་སུ་རྫོགས་དང་གཞན་བུད་མེད། །བདག་གིར་བྱེད་པ་བརྫུན་ཚིག་སྨྲ། །སྡོམ་
[160a.5]པ་ཉམས་པའི་རྒྱུ་རྣམས་སོ། །ཡན་ལག་ལྔ་མངོན་པར་གྲུབ་པའི་ལྟོ་ན་གནས་པའམ་ཕྱིར་བྱུང་བའི་མི་རྣམས་ལ་སྨན་དང་མཚོན་ལ་སོགས་པས་ཚེའི་བར་ཆད་ཀྱི་རྒྱུ་ནི་ལྟུང་བའི་ཆོས་གཅིག་གོ། །ཡོངས་སུ་རྫོགས་པའི་ཀཱར་ཥཱ་པ་ཎ་བཞི་ཆའམ། དེའི་རིན་གྱི་དངོས་པོ་འཕྲོག་པ་ནི་གཉིས་པའོ། །
[160a.6]གཞན་གྱི་བུད་མེད་སྟོབས་ཀྱིས་སམ་དེའི་འདོད་པས་ཁས་ལེན་པ་ནི་གསུམ་པའོ། །བརྫུན་སྨྲ་བའི་ཆོས་བརྗོད་པ་གཞན་གྱི་སེམས་ཤེས་པ་ལ་སོགས་པ་བདག་ལ་ཡོད་དོ་ཞེས་དམ་བཅས་པ་ནི་བཞི་པའོ། །ཅི་སྟེ་དགེ་བསྙེན་འདི་བཞི་པོ་རྣམས་ལས་ལྟུང་བའི་ཆོས་གཅིག་བྱུང་བས་ཕམ་པ་བྱུང་བའི་དགེ་སློང་སྣོད་
[160a.7]མ་ཡིན་པ་བཞིན་དུ་མཐོང་བའི་ཆོས་ལ་སླར་ཡང་སྡོམ་པ་ལེན་ནམ་མ་ཡིན། སྡོམ་པ་སླར་ཡང་བླང་བར་བྱ། །དེ་འདྲའི་གང་ཟག་ཉིད་ལས་སོ། །དེ་ལྟ་བུ་ལས་ཏེ། སྔར་བཤད་པའི་གང་ཟག་ཉིད་ལས་སོ། །བྱང་ཆུབ་སེམས་དཔའི་སྡོམ་པ་བཞིན་དུ་སླར་རང་ཉིད་ནི་མ་ཡིན་ནོ། །སོ་སོར་
[160b]
[160b.1]ཐར་པའི་སྡོམ་པ་ཐོབ་པ་ནི་གཞན་གྱི་རྣམ་པར་རིག་བྱེད་ལས་འདོད་དོ། །སླར་དགེ་བསྙེན་གྱི་སྡོམ་པ་གོ་རིམས་ཇི་ལྟ་བར་བླང་ངོ་། །འོ་ན་ཆོས་གཞན་བྱུང་ན་ཇི་ལྟར་བྱ་ཞེས་གཞན་དག་ཇི་ལྟ་བར་ནི་བཤགས། མཁས་པ་ལ་ནི་མཁས་པ་སྟེ། ངག་གི་རྣམ་པར་རིག་བྱེད་དང་། དེའི་དོན་རྟོགས་པའི་
[160b.2]སྟོབས་དང་ལྡན་པ་ལས་དང་། སྡོམ་པ་དང་ལྡན་པའི་གང་ཟག་ལའོ། །ལྟུང་བར་འགྱུར་བ་རྣམས་ལས་གཞན་སྲོག་གཅོད་པ་ལ་སོགས་པ་དང་། ཕྲ་མ་ལ་སོགས་པ་དང་། མི་ཚངས་པར་སྤྱོད་པ་ལ་སོགས་པའི་ལྟུང་བ་རྣམས་དང་། ཆང་གི་བཏུང་བ་སྤང་ངོ་། །ཇི་ལྟ་བར་ཞེས་བྱ་བ་ནི་ལྟུང་བ་
[160b.3]ཉིད་ཅེས་པ་དང་ལྡན་པ་ཞེས་ངེས་པར་བྱ་སྟེ། གུས་པ་དང་བཅས་པས་ལུས་ཀྱི་སྦྱོར་བ་བླངས་ཏེ། དབུས་སུ་འདོམ་གང་དུ་བླ་གོས་ཕྱོགས་གཅིག་ཏུ་བྱས་ཏེ། ཙོག་ཙོག་པོའམ་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་དངོས་པོ་བསྒྲགས་ཏེ་བཤགས་པར་བྱའོ། །
[160b.4]དེའི་བཤགས་པ་བརྗོད་པ་འདི་ཡིན་ཏེ། རིགས་ཀྱི་བུའམ་བཙུན་པའམ་སློབ་དཔོན་བདག་ལ་དགོངས་སུ་གསོལ། བདག་མིང་འདི་སྐད་ཅེས་བྱ་བ། དགེ་བསྙེན་ལ་ཇི་སྐད་བརྗོད་པ་ལྟུང་བའི་གཞི་དང་ལྡན་པས་དེ་གཅིག་ཏུ་བཟླུམས་ནས་རིགས་ཀྱི་བུའམ། སློབ་དཔོན་ནམ། བཙུན་པའི་མདུན་
[160b.5]དུ་བཤགས་པར་བགྱིའོ། །བཤགས་ན་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ་ཞེས་བརྗོད་པར་བྱ་སྟེ། རིགས་ཀྱི་བུ་ཁྱོད་ཀྱིས་ལྟུང་བ་མཐོང་ངམ། འདིས་བརྗོད་པ་མཐོང་ལགས་སོ། །སླར་ཡང་དེས་བརྗོད་པ་ཕྱིན་ཆད་སྡོམ་མམ། སླར་ཡང་འདིས་
[160b.6]སྡོམ་ལགས་སོ། །ཤིན་ཏུ་ལེགས་པས་སྤྱི་བོས་ལེན་ཏོ། །ཤེས་ཤིང་མཐོང་བ་དང་། དྲན་པ་ན་ཆོས་ཇི་ལྟ་བ་དང་། འདུལ་བ་ཇི་ལྟ་བ་བཞིན་དུ་བགྱིད་དོ། །འདི་ལྟར་ལན་གསུམ་མོ། །གང་གི་ཕྱིར་གཞན་ཡང་བ་རྣམས་སྤྱོད་པ་ན་ཇི་ལྟར་བསྒྲུབ། ཡང་རྣམས་ཡང་དག་བསྡམ་ཞེས་པ་ནི་གང་
[160b.7]ལྟུང་བར་འགྱུར་བ་རྣམས་ལས་གཞན་སྲོག་གཅོད་པ་ལ་སོགས་པ་ཡན་ལག་མ་ཚང་བ་དང་། ཕྲ་མ་ལ་སོགས་པ་ཡན་ལག་མ་ཚང་བ་དེ་རྣམས་ཡང་བ་སྟེ་བསྡམ་པར་བྱ་བ་དེ་མཛེས་པའོ། །དེ་ལྟ་བུ་སྤྱོད་པ་སླར་ཡང་སྡོམ་པར་བགྱིད་དོ་ཞེས་སེམས་བསྐྱེད་པར་བྱའོ་ཞེས་བྱ་བའི་བར་དུའོ། །བཤགས་པར་མི་བྱ་
[161a]
[161a.1]བ་ནི་བསྡམས་པ་ཙམ་གྱིས་ལྡང་བའི་ཕྱིར་རོ། །ལས་ཀྱི་སྒྲིབ་པ་ཐམས་ཅད་སྦྱང་བའི་དོན་དུ་ཡང་ཕུང་པོ་གསུམ་པའི་ཆོས་ཀྱི་རྣམ་གྲངས་དང་། སྒོ་དྲུག་པའི་གཟུངས་ཉིན་མཚན་དུ་ལན་དྲུག་ཏུ་རྟག་ཏུ་གདོན་པར་བྱའོ། །ལྡོག་པའི་ཚུལ་ཁྲིམས་བཤད་ནས་འཇུག་པའི་ཚུལ་ཁྲིམས་ལ་གུས་
[161a.2]པར་བྱེད་དེ། འདི་ལྟར་སྡོམ་པའི་ཚུལ་ཁྲིམས་གནས། འཇུག་པ་ལ་ཡང་སྟོབས་ཇི་ལྟར་གུས་པར་བྱ་སྟེ་དེ་ལྟར་བརྗོད་པའི་རིམ་པས་ལྡོག་པའི་ཚུལ་ཁྲིམས་བརྟན་པོར་གྱུར་ནས། འཇུག་པའི་ཚུལ་ཁྲིམས་ནི་རབ་ཏུ་འཇུག་པས་ཚུལ་ཁྲིམས་ཏེ། ཐོས་པ་དང་བསམས་པ་ལ་སོགས་པའི་ངོ་བོ་
[161a.3]དང་། སྦྱིན་པ་ལ་སོགས་པའི་རང་བཞིན་ནོ། །སྟོབས་ཇི་ལྟར་ཏེ། ནུས་པ་ཇི་ལྟ་བ་བཞིན་དུ་གུས་པར་བྱའོ། །དེ་ཅིའི་ཕྱིར་ཞེ་ན། དེའི་སྦྱོར་བས་འབྲས་བུ་སྣ་ཚོགས་སྟེར་བ། དེ་ནི་ལྡོག་པའི་ཚུལ་ཁྲིམས་ཏེ། དེ་དང་འཇུག་པའི་ཚུལ་ཁྲིམས་སྦྱོར་བ་ནི་འབྲེལ་པས་སོ། །སྣ་ཚོགས་ནི་བདག་གི་
[161a.4]དོན་དུ་ཕུན་སུམ་ཚོགས་པ་སྟེར་བའོ། །ད་ནི་མཇུག་བསྡུ་བས་ཚུལ་ཁྲིམས་རྣམ་པ་གཉིས་ལ་སྦྱོར་བར་བྱེད་དེ། འདི་ལ་འབད་དེ་སྦྱར་བར་བྱ། །བདེ་འགྲོ་ཡང་ནི་འདོད་པ་ཡིས། །འདི་ནི་དེའི་ཕྱིར་དེ་ཚུལ་ཁྲིམས་རྣམ་པ་གཉིས་ལ་འབད་པ་སྟེ་བརྩོན་པར་བྱའོ། །བདེ་འགྲོ་ཡང་ནི་ལྷ་དང་མིར་བཅས་
[161a.5]པའི་ཕུན་སུམ་ཚོགས་པའི་མཚན་ཉིད་ལ་འདོད་པ་ནི་མངོན་པར་འདོད་པ་སྟེ། ཐར་པ་འདོད་པ་ལ་ལྟ་ཅི་སྨོས། ཅི་སྟེ་གང་གི་ཕྱིར་ཚུལ་ཁྲིམས་རྣམ་པ་གཉིས་ལས་ཇི་ལྟར་ཡང་ངན་འགྲོ་ཉིད་དུ་འགྱུར་གྱི། བདེ་འགྲོ་མ་ཡིན་ན་དེ་ལྟར་འདོད་པས་ཀྱང་འཇུག་ཅེ་ན། ཁྲེ་ཡི་མྱུ་གུའི་རྒྱུ་རུ་ནི། །སཱ་ལུའི་ས་
[161a.6]བོན་གང་དུ་མཐོང་། །སཱ་ལུའི་ས་བོན་ནི་ཁྲེའི་མྱུ་གུའི་རྒྱུ་རུ་ནི་གང་དུ་མཐོང་སྟེ། ཁ་ཅིག་ཏུ་ནི་རིག་ཅིང་ཤེས་པ་མ་ཡིན་ནོ། །དེ་གང་གི་ཕྱིར་སཱ་ལུའི་ས་བོན་ཉིད་ཀྱིས་ཏེ་རྒྱུ་དང་འབྲས་བུར་ངེས་པའི་ཕྱིར་རོ། །དེ་བཞིན་དུ་བདེ་འགྲོའི་རྒྱུ་ཚུལ་ཁྲིམས་ཀྱང་ཇི་ལྟར་ན་ངན་འགྲོར་སྐྱེ་བའི་རྒྱུར་འགྱུར་ཞེས་
[161a.7]བསམས་པའོ། །འདི་ལྟ་བུའི་ཡུལ་རྒྱུ་དང་འབྲས་བུའི་ངེས་པ་ནི་འཁོར་གསུམ་ཡོངས་སུ་དག་པའི་ལུང་ཉིད་དེ་ཐབས་གཞན་ནི་མི་སྲིད་པའི་ཕྱིར་རོ། །དགེ་བསྙེན་སྡོམ་པ་བརྒྱད་པའི་ཚིག་གི་འགྲེལ་པ་བདག་གིས་གསལ་བར་བཤད་པ་ཡིས། །བསོད་ནམས་སྟོབས་ལྡན་བདག་ལ་གང་སྐྱེས་
[161b]
[161b.1]ཉི་མའི་ཤིང་རྟ་འཇུག་པའི་ལམ་ལ་གཏུགས་གྱུར་པ། །དེས་ནི་འཁོར་བའི་རྒྱ་མཚོར་འཇུག་པའི་རྒལ་བར་དཀའ་བའི་ཕ་རོལ་སྒྲོལ་བ་ལ་བརྩོན་པ། །སྐྱེ་བོ་རྣམས་ནི་ཤིན་ཏུ་ངོ་མཚར་གཟིགས་ལ་སྤྱོད་པས་ཕུལ་བྱུང་སྦྱོར་བར་ཤོག །དགེ་བསྙེན་གྱི་སྡོམ་པ་བརྒྱད་པའི་བཤད་པ་སློབ་དཔོན་ཆེན་པོ་སུན་ཡ་
[161b.2]ཤྲཱི་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་ཆེན་པོ་སུ་ན་ཡ་ཤྲཱི་དང་། བོད་ཀྱི་ལོ་ཙཱ་བ་ཆེན་པོ་དགེ་སློང་དར་མ་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། {T4143}༄༅༅། །རྒྱ་གར་སྐད་དུ། བི་མུཀྟི་མཱརྒེ་དྷཱུ་ཏ་གུ་ཎ་ནི་རྡེ་ཤ་ནཱ་མ།
[161b.3]བོད་སྐད་དུ། རྣམ་པར་གྲོལ་བའི་ལམ་ལས་སྦྱངས་པའི་ཡོན་ཏན་བསྟན་པ་ཞེས་བྱ་བ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དེ་ནས་དེ་ལྟར་ཚུལ་ཁྲིམས་རྣམ་པར་དག་པའི་རྣལ་འབྱོར་པ་སྤྱོད་པ་སྒྲུབ་པར་འདོད་པ། ཡོན་ཏན་དོན་དུ་གཉེར་བས་སྦྱངས་པའི་ཡོན་ཏན་
[161b.4]ཡང་དག་པར་བླངས་ཏེ་འཇུག་པར་བྱའོ། །རྣལ་འབྱོར་སྤྱོད་པའི་སྦྱངས་པའི་ཡོན་ཏན་ཡང་དག་པར་བླངས་པ་ནི་རྣམ་གྲངས་དུ་མས་ཡོངས་སུ་རྟོག་པའི་བཞིན་ཅན་དེ་འདི་སྙམ་དུ་གང་དག་བྱིས་པ་བླུན་པོ་མི་གསལ་བ། མི་མཁས་པ་དེ་ཡང་དངོས་པོ་འདི་དག་ཤེས་ན་འདོད་ཆགས་ཀྱི་སེམས་མི་བསྐྱེད་ན།
[161b.5]ཤེས་རབ་དང་ལྡན་པ་རང་བཞིན་ཅན་ལྟ་སྨོས་ཀྱང་ཅི་དགོས་སྙམ་དུ་སེམས་སོ་ཞེས་ཇི་སྐད་གང་ངས་བཤད་པ་ལྟ་བུའོ། །དོན་རྣམ་པར་ངེས་པའི་མདོ་ལས་ཀྱང་འབྱུང་སྟེ། དགེ་སློང་དག་འདི་ལ་དགེ་སློང་དག་དགོན་པ་ན་འདུག་ཀྱང་རུང་། ཤིང་དྲུང་ན་འདུག་ཀྱང་རུང་། ཁང་སྟོང་ན་འདུག་ཀྱང་རུང་སྟེ། ལུས་
[161b.6]འདི་ཉིད་ལ་འོག་གི་རྐང་མཐིལ་ཡན་ཆད་སྐྲ་དང་། གླད་པ་ལ་ཐུག་གི་བར་དུ་མི་གཙང་བ་རྣམ་པ་སྣ་ཚོགས་ཀྱིས་གང་བར་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་སྟེ། ལུས་འདི་ལ་ཡོད་པ་སྐྲ་དང་། སྤུ་དང་། སེན་མོ་དང་། སོ་དང་། རྡུལ་དང་། དྲི་མ་དང་། པགས་པ་དང་། ཤ་དང་། རུས་པ་དང་།
[161b.7]རྒྱུས་པ་དང་། རྩ་དང་། མཁལ་མ་དང་། སྙིང་དང་། གློ་བ་དང་། མཆིན་པ་དང་། ཕོ་བ་དང་། ལོང་ཁ་དང་། རྒྱུ་མ་དང་། གཉེ་མ་དང་། ལྒང་པ་དང་། སུལ་མང་དང་། མཆེར་པ་དང་། ཕྱི་ས་དང་། མཆིལ་མ་དང་། རྔུལ་དང་། ངར་སྣབས་དང་། མཆི་མ་དང་། ཞག་དང་། ཆུ་སེར་དང་།
[162a]
[162a.1]རྐང་དང་། ཚིལ་དང་། རྣག་དང་། བད་ཀན་དང་། མཁྲིས་པ་དང་། ཁྲག་དང་། གླད་པ་དང་། གླད་རྒྱས་དང་། གཅིན་དང་། མིག་རྡུལ་དང་། རྣ་སྦབས་དང་། སེན་མོའི་དྲི་མ་དང་། ལྕེའི་དྲི་མ་དག་ཡོད་དེ། མི་གཙང་བ་རྣམ་པ་སྣ་ཚོགས་ཀྱིས་གང་བར་ཡང་
[162a.2]དག་པ་ཇི་ལྟ་བ་བཞིན་དུ་སོ་སོར་རྟོག་གོ། །དགེ་སློང་དག་འདི་ལྟ་སྟེ་དཔེར་ན་འབྲས་སཱ་ལུ་དང་། འབྲུ་དང་། ནས་དང་། གྲོ་དང་། མོན་སྲན་གྲེའུ་དང་། མོན་སྲན་སྡེའུ་དང་། རྒྱ་སྲན་དང་། འབྲས་ནི་སྤ་བ་དང་། སྲན་ཆུང་དང་། མོན་སྲན་ནེ་གུ་དང་། ཡུངས་ཀར་དང་། འབྲུ་རྣམ་པ་སྣ་
[162a.3]ཚོགས་ཀྱིས་གང་བའི་སྦྱང་བ་ཞིག་ཁ་གཉི་ག་ཕྱེ་བ་དེ་ལ་མིག་དང་ལྡན་པའི་མི་ཞིག་གིས་བླུགས་ནས་སོ་སོར་རྟོག་སྟེ། སོ་སོར་བརྟགས་ན་འདི་དག་ནི་འབྲས་སཱ་ལུའོ། །འདི་དག་ནི་འབྲུའོ། །འདི་དག་ནི་ནས་སོ། །འདི་དག་ནི་གྲོའོ། །འདི་དག་ནི་མོན་སྲན་གྲེའུའོ། །འདི་དག་ནི་མོན་སྲན་སྡེའུའོ། །
[162a.4]འདི་དག་ནི་རྒྱ་སྲན་ནོ། །འདི་དག་ནི་འབྲས་ནི་སྤ་བའོ། །འདི་དག་ནི་སྲན་ཆུང་ངོ་། །འདི་དག་ནི་མོན་སྲན་ནེ་གུའོ། །འདི་དག་ནི་ཏིལ་ལོ། །འདི་དག་ནི་འབྲས་དྲུས་པའོ། །འདི་དག་ནི་ཡུངས་ཀར་རོ་ཞེས་བྱ་བར་ཤེས་སོ། །དགེ་སློང་དག་དེ་བཞིན་དུ་དགོན་པ་ན་འདུག་ཀྱང་རུང་། ཤིང་དྲུང་ན་
[162a.5]འདུག་ཀྱང་རུང་། ཁང་སྟོང་ན་འདུག་ཀྱང་རུང་སྟེ། ལུས་འདི་ཉིད་ལ་འོག་གི་རྐང་མཐིལ་ཡན་ཆད་ན་སྐྲ་དང་། གླད་པ་ལ་ཐུག་གི་བར་དུ་མི་གཙང་བ་རྣམ་པ་སྣ་ཚོགས་ཀྱིས་གང་བར་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་ཅེས་གསུངས་སོ། །དཔས་བྱིན་གྱིས་ཞུས་པའི་མདོ་ལས་ཀྱང་། འདི་ལ་བྱང་
[162a.6]ཆུབ་སེམས་དཔའ་ལུས་འདི་ཐོག་མའི་དང་ཐ་མའི་རྒྱུ་ལ་སོ་སོར་བརྟག་པར་བྱའོ། །ཕ་མའི་ཁུ་ཆུ་དང་ཁྲག་འདུས་པ་ལས་བྱུང་སྟེ། ལུས་འདི་ལ་ཁུ་ཆུ་དང་། ཁྲག་ནི་ལུས་ཀྱི་ཐོག་མའི་རྒྱུ་ཡིན་ནོ། །ཐ་མའི་རྒྱུ་ནི་ཟས་འདུ་བ་ལ་སོགས་པ་སྟེ། ཁམ་གྱིས་བཟའ་བ་ཟས་ཟོས་མ་ཐག་ཏུ་བད་ཀན་གྱི་གནས་
[162a.7]སུ་འགྲོའོ། །བད་ཀན་གྱི་གནས་སུ་ཕྱིན་ནས། བད་ཀན་གྱིས་རྐྱང་རྐྱང་པོར་བྱས་ཏེ། ཤིན་ཏུ་མི་གཙང་བར་འགྱུར་རོ། །དེའི་འོག་ཏུ་མཁྲིས་པའི་གནས་སུ་འགྲོ་སྟེ། མཁྲིས་པའི་གནས་སུ་ཕྱིན་ནས་ཞུ་ཞིང་སྐྱུར་པོར་གྱུར་ཏོ། །རླུང་གི་གནས་སུ་འགྲོའོ། །ཞུ་སྟེ་རླུང་གི་གནས་སུ་ཕྱིན་ནས་རླུང་གིས་
[162b]
[162b.1]ཚིགས་མ་ལོགས་ཤིག །དྭངས་མ་ལོགས་ཤིག་ཏུ་རྣམ་པར་བྱེ་སྟེ་ཚིགས་མ་ལས་ནི་གཅིན་དང་། ངན་སྐྱུགས་ལ་སོགས་ཏེ་དྲི་མ་རྣམས་འབྱུང་། དྭངས་མ་ལས་ནི་ཁྲག་ཏུ་འགྱུར་ཏེ། ཁྲག་ལས་ཤའོ། །ཤ་ལས་ཚིལ་ལོ། །ཚིལ་ལས་རུས་པའོ། །རུས་པ་ལས་རྐང་ངོ་། །རྐང་ལས་ཁུ་
[162b.2]ཆུའོ། །ཁུ་ཆུ་ལས་འདི་ལྟ་སྟེ། དེ་ལྟར་ཐོག་མ་དང་ཐ་མའི་རྒྱུ་མི་གཙང་བའི་ཕྱིར་ལུས་མི་གཙང་བར་བྱང་ཆུབ་སེམས་དཔས་བསམ་པར་བྱའོ་ཞེས་གསུངས་སོ། །ཡང་དེ་ཉིད་ལས་འབྱུང་བ་འདི་ལྟར་མི་གཙང་བའི་ཕུང་པོས་ལུས་ལ་ནི། གཟུགས་མངོན་ང་རྒྱལ་ཅན་གང་གུས་བྱེད་པ། །བྱིས་
[162b.3]པའི་བློ་ཅན་དེ་ནི་སྔོན་བཞིན་དུ། །མི་ཤེས་ངན་སྐྱུགས་བུམ་པ་ཐོགས་ཤིང་འགྲོ། །ད་ཡི་སྣ་ནས་རྣག་གི་རྣམ་པར་འཛག །ཁ་ནས་དྲི་མི་ཞིམ་པ་རྟག་ཏུ་འབྱུང་། །མིག་རྡུལ་ཆགས་ཤིང་སྐྱེ་བོའི་སྲིན་བུ་ཅན། །དེ་ལ་སུ་ཞིག་ཆགས་ཤིང་གུས་པར་བྱེད། །དཔེར་ན་བྱིས་པ་སོལ་བ་ཐོགས་ནས་
[162b.4]སུ། །འདི་ནི་དཀར་པོར་བྱ་ཞེས་བདར་ཀྱང་ནི། །དཀར་པོའི་དངོས་པོར་མི་འགྱུར་ཟད་པར་འགྱུར། །བྱིས་བློ་ཕྱིན་ཅི་ལོག་གི་ང་རྒྱལ་ཅན། །དེ་ལྟར་མི་གཙང་གཙང་སྦྲའི་བློ་གྲོས་ཅན། །ང་ཡང་ལུས་འདི་གཙང་བར་བྱ་ཞེས་ཏེ། །བསྐུས་ཕྱིས་འབབ་སྟེགས་བརྒྱར་ནི་ཁྲུས་བྱས་ཀྱང་། །
[162b.5]འཆི་བདག་དབང་གིས་ཟད་འགྱུར་གཙང་མི་འགྱུར། །ཞེས་གསུངས་སོ། །འཕགས་པ་དྲི་མ་མེད་པར་གྲགས་པས་བསྟན་པ་ལས་ཀྱང་། དེ་ནས་ལི་ཙྪ་བཱི་དྲི་མ་མེད་པར་གྲགས་པ་ཚད་མེད་པའི་ཐབས་ལ་མཁས་པའི་ཡེ་ཤེས་དང་ལྡན་ཏེ་ཡངས་པའི་གྲོང་ཁྱེར་ཆེན་པོ་ན་གནས་ཤིང་འདུག་གོ། །
[162b.6]དེ་ཐབས་ལ་མཁས་པས་བདག་ཉིད་ན་བ་ལྟ་བུར་གྱུར་ནས། དེ་ལ་ནད་དྲི་བའི་ཕྱིར་ཡངས་པའི་གྲོང་ཁྱེར་ཆེན་པོ་ནས་རྒྱལ་པོ་དང་། བློན་པོ་ཆེན་པོ་དང་། གཞོན་ནུ་དང་། འཁོར་དང་། བྲམ་ཟེ་དང་། ཁྱིམ་བདག་དང་། ཚོང་དཔོན་དང་། གྲོང་པ་དང་། ཡུལ་གྱི་མི་དང་། དེ་མ་ཡིན་པའི་སྲོག་ཆགས་
[162b.7]སྟོང་ཕྲག་མང་པོ་ནད་འདྲེར་འདས་ཏེ། དེ་ལྷགས་པ་དེ་དག་ལ་ལིཙྪ་བཱི་དྲི་མ་མེད་བར་གྲགས་པས་འབྱུང་བ་ཆེན་པོ་བཞིའི་ལུས་འདི་ཉིད་ལས་བརྩམས་ནས་ཆོས་སྟོན་ཏེ། གྲོགས་པོ་རྣམས་ལུས་འདི་ནི་འདི་ལྟར་མི་རྟག་པ། འདི་ལྟར་མི་བརྟན་པ། འདི་ལྟར་ཡིད་བརྟན་དུ་མི་རུང་བ། འདི་ལྟར་ཉམ་ཆུང་བ།
[163a]
[163a.1]འདི་ལྟར་སྙིང་པོ་མེད་པ། འདི་ལྟར་ཞིག་པ། འདི་ལྟར་ཡུན་ཐུང་བ། འདི་ལྟར་སྡུག་བསྔལ་པ། འདི་ལྟར་ནད་མང་བ། འདི་ལྟར་འགྱུར་བའི་ཆོས་ཅན་ནོ། །གྲོགས་པོ་དག་འདི་ལྟར་ལུས་འདི་ནི་ནད་མང་པོའི་སྣོད་དེ། མཁས་པས་དེ་ལ་གནས་པར་མི་བྱའོ། །
[163a.2]གྲོགས་པོ་དག་ལུས་འདི་ནི་ཅང་མི་བཟོད་པ་སྟེ་དབུ་བ་རྡོས་བ་ལྟ་བུའོ། །ལུས་འདི་ནི་རིང་དུ་མི་གནས་པ་སྟེ། ཆུའི་ཆུ་བུར་ལྟ་བུའོ། །ལུས་འདི་ནི་ཉོན་མོངས་པའི་སྲེད་པས་བྱུང་བ་སྟེ་རྒྱུ་ལྟ་བུའོ། །ལུས་འདི་ནི་སྙིང་པོ་མེད་པ་སྟེ་ཆུ་ཤིང་གི་ཕུང་པོ་ལྟ་བུའོ། །ཀྱེ་མ་ལུས་འདི་ནི་རུས་པ་ལ་རྒྱུས་པས་
[163a.3]འབྲེལ་བ་སྟེ་འཁྲུལ་འཁོར་ལྟ་བུའོ། །ལུས་འདི་ནི་ཕྱིན་ཅི་ལོག་ལས་བྱུང་བ་སྟེ་སྒྱུ་མ་ལྟ་བུའོ། །ལུས་འདི་ནི་ཡང་དག་པ་མ་ཡིན་པ་མཐོང་བ་སྟེ་རྨི་ལམ་ལྟ་བུའོ། །ལུས་འདི་ནི་སྔོན་གྱི་ལས་ཀྱིས་གཟུགས་བརྙན་སྣང་བ་སྟེ་གཟུགས་བརྙན་ལྟ་བུའོ། །ལུས་འདི་ནི་རྐྱེན་ལ་རག་ལས་པའི་ཕྱིར་བྲག་ཅ་
[163a.4]ལྟ་བུའོ། །ལུས་འདི་ནི་སེམས་འཁྲུགས་ཤིང་འགྱེས་པའི་མཚན་མ་སྟེ་སྤྲིན་ལྟ་བུའོ། །ལུས་འདི་ནི་སྐད་ཅིག་ཏུ་འཇིག་པ་དང་ལྡན་ཞིང་མི་གནས་པ་སྟེ་གློག་དང་མཚུངས་པའོ། །ལུས་འདི་ནི་རྐྱེན་སྣ་ཚོགས་ལས་བྱུང་བ་སྟེ་བདག་པོ་མེད་པའོ། །ལུས་འདི་ནི་ས་དང་འདྲ་སྟེ་བྱེད་པ་མེད་པའོ། །ལུས་
[163a.5]འདི་ནི་ཆུ་དང་འདྲ་སྟེ་བདག་མེད་པའོ། །ལུས་འདི་ནི་མེ་དང་འདྲ་སྟེ་སྲོག་མེད་པའོ། །ལུས་འདི་ནི་རླུང་དང་འདྲ་སྟེ་གང་ཟག་མེད་པའོ། །ལུས་འདི་ནི་ནམ་མཁའ་དང་འདྲ་སྟེ་རང་བཞིན་མེད་པའོ། །ལུས་འདི་ནི་འབྱུང་བ་ཆེན་པོ་རྣམས་ཀྱི་གནས་ཏེ་ཡང་དག་པ་མ་ཡིན་པའོ། །ལུས་འདི་ནི་བདག་
[163a.6]དང་བདག་གི་མེད་པ་སྟེ་སྟོང་པའོ། །ལུས་འདི་ནི། རྩྭ་དང་། ཤིང་དང་། རྩིག་པ་དང་། བོང་བ་དང་། མིག་ཡོར་ལྟ་བུ་སྟེ་བེམས་པོའོ། །ལུས་འདི་ནི་འཁྲུལ་འཁོར་དང་ལྡན་པ་འབྱུང་སྟེ་ཚོར་བ་མེད་པའོ། །ལུས་འདི་ནི་རྣག་དང་མི་གཙང་བ་བསགས་པ་སྟེ་གསོག་པའོ། །ལུས་འདི་ནི་རྟག་ཏུ་
[163a.7]བྱུག་པ་དང་། མཉེ་བ་དང་། འཇིག་པ་དང་། འགྱེས་པའི་ཆོས་ཅན་ཏེ་གསོབ་བོ། །ལུས་འདི་ནི་ནད་བཞི་བརྒྱ་རྩ་བཞིས་གཙེས་པའོ། །ལུས་འདི་ནི་རྟག་ཏུ་རྒ་བས་ཟིལ་གྱིས་ནོན་པ་སྟེ་ཁྲོན་པ་རྙིང་པོ་དང་འདྲའོ། །ལུས་འདི་ནི་འཆི་བའི་མཐར་ཐུག་པ་སྟེ། མཐར་མི་གནས་པའོ། །ལུས་
[163b]
[163b.1]འདི་ནི་ཕུང་པོ་དང་། ཁམས་དང་སྐྱེ་མཆེད་ཀྱིས་ཡོངས་སུ་ཟིན་པ་སྟེ། གཤེད་མ་དང་དུག་དྲག་པོ་དང་། གྲོང་སྟོང་ལྟ་བུའོ། །ཁྱེད་ཀྱིས་དེ་ལྟ་བུའི་ལུས་དེ་ལ་སུན་པ་དང་། སྐྱོ་བ་བསྐྱེད་ཅིང་དེ་བཞིན་གཤེགས་པའི་སྐུ་ལ་མོས་པ་བསྐྱེད་པར་བྱའོ། །གྲོགས་པོ་རྣམས་དེ་བཞིན་གཤེགས་པའི་སྐུ་
[163b.2]ནི་ཆོས་ཀྱི་སྐུ་སྟེ་བསོད་ནམས་ལས་སྐྱེས་པའོ། །དེ་བཞིན་གཤེགས་པའི་སྐུ་ནི་སྦྱིན་པ་ལས་སྐྱེས་པ། ཚུལ་ཁྲིམས་ལས་སྐྱེས་པ། ཏིང་ངེ་འཛིན་ལས་སྐྱེས་པ། ཤེས་རབ་ལས་སྐྱེས་པ། རྣམ་པར་གྲོལ་བ་ལས་སྐྱེས་པ། རྣམ་པར་གྲོལ་བའི་ཡེ་ཤེས་མཐོང་བ་ལས་སྐྱེས་པ། བྱམས་པ་དང་།
[163b.3]སྙིང་རྗེ་དང་། དགའ་བ་དང་། བཏང་སྙོམས་ལས་སྐྱེས་པ། སྦྱིན་པ་དང་། དུལ་བ་དང་། ཡང་དག་པར་སྡོམ་པ་ལས་སྐྱེས་པ། དགེ་བ་བཅུའི་ལས་ཀྱི་ལམ་ལས་སྐྱེས་པ། བཟོད་པ་དང་། དེས་པ་ལས་སྐྱེས་པ། བརྩོན་འགྲུས་བརྟན་པའི་དགེ་བའི་རྩ་བ་ལས་སྐྱེས་པ། བསམ་གཏན་
[163b.4]དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ལས་སྐྱེས་པ། ཐོས་པ་དང་། ཤེས་རབ་དང་། ཐབས་ལས་སྐྱེས་པ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལས་སྐྱེས་པ་དང་། ཞི་གནས་དང་། ལྷག་མཐོང་ལས་སྐྱེས་པ། སྟོབས་བཅུ་ལས་སྐྱེས་པ། མི་འཇིགས་
[163b.5]པ་བཞི་ལས་སྐྱེས་པ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལས་སྐྱེས་པ། ཕ་རོལ་ཏུ་ཕྱིན་པ་ཐམས་ཅད་ལས་སྐྱེས་པ། མངོན་པར་ཤེས་པ་དང་། རིག་པ་ལས་སྐྱེས་པ། མི་དགེ་བའི་ཆོས་ཐམས་ཅད་སྤོང་བ་ལས་སྐྱེས་པ། དགེ་བའི་ཆོས་ཐམས་ཅད་ཡང་དག་པར་སྡུད་པ་ལས་སྐྱེས་
[163b.6]པ། བདེན་པ་ལས་སྐྱེས་པ། ཡང་དག་པ་ཉིད་ལས་སྐྱེས་པ། བག་ཡོད་པ་ལས་སྐྱེས་པའོ། །གྲོགས་པོ་དག་དེ་བཞིན་གཤེགས་པའི་སྐུ་ནི་དགེ་བའི་ལས་ཚད་མེད་པ་ལས་སྐྱེས་པ་སྟེ། ཁྱོད་ཀྱིས་དེ་ལྟར་སྐུ་ལ་མོས་པ་བསྐྱེད་པར་བྱའོ་ཞེས་གསུངས་སོ། །དབང་ཕྱུག་གི་གནས་རྙེད་ནས་ཡང་སུས་
[163b.7]ཀྱང་ལོག་པར་སྒྲུབ་པར་མི་བྱེད་དེ། ཡང་དག་པར་སྒྲུབ་པ་ལ་ནན་ཏན་དུ་བྱའོ། །དེ་ལ་ཡང་དག་པར་སྒྲུབ་པ་ནི་བདེན་པའི་ལེའུ་ལས་འབྱུང་བ། སྐྱེ་དགུ་བསྐྱངས་པ་ལ་བརྩོན་པའི་ཆོས་ཀྱི་རྒྱལ་པོས་འདུ་ཤེས་ལ་གནས་པ་བརྒྱད་ཀྱིས་མང་དུ་གནས་པར་བྱའོ། །བརྒྱད་གང་ཞེ་ན། སྐྱེ་དགུའི་རིགས་
[164a]
[164a.1]སུ་གཏོགས་པའི་སེམས་ཅན་རྣམས་ལ་བུའི་འདུ་ཤེས་དང་། མི་སྲུན་པ་རྣམས་ལ་ནད་པའི་འདུ་ཤེས་དང་། སྡུག་བསྔལ་བ་རྣམས་ལ་སྙིང་རྗེའི་འདུ་ཤེས་དང་། བདེ་བ་རྣམས་ལ་དགའ་བའི་འདུ་ཤེས་དང་། མི་མཛའ་བ་རྣམས་ལ་དེའི་གཞི་ལ་ཉེས་པར་ལྟ་བའི་འདུ་ཤེས་དང་།
[164a.2]མཛའ་བ་རྣམས་ལ་རྗེས་སུ་སྲུང་བའི་འདུ་ཤེས་དང་། ལོངས་སྤྱོད་རྣམས་ལ་སྨན་གྱི་འདུ་ཤེས་དང་། བདག་ལ་བདག་མེད་པའི་འདུ་ཤེས་སོ། །རྒྱལ་པོ་ཆེན་པོ་དེ་ལ་སྐྱེ་དགུའི་རིགས་སུ་གཏོགས་པའི་སེམས་ཅན་རྣམས་ལ་བུའི་འདུ་ཤེས་ཀྱིས་གནས་པ་ནི་རྒྱལ་པོ་དེ་ཕས་བུ་བཅོས་པ་ལྟར་མི་སྲུན་པར་ཚར་
[164a.3]གཅོད་པ་ལ་འདུག་ཀྱང་སྙིང་རྗེའི་བསམ་པ་མི་གཏོང་བའོ། །མི་སྲུན་པ་རྣམས་ལ་ནད་པའི་འདུ་ཤེས་ཀྱིས་གནས་པ་ནི་སྨན་པ་ལྟར་གནོད་པ་བྱེད་པ་ལ་མི་ཁྲོ་ཞིང་། སྐྱོན་རབ་ཏུ་བསལ་བའི་ཕྱིར་སྦྱོར་བའོ། །སྡུག་བསྔལ་བ་རྣམས་ལ་སྙིང་རྗེའི་འདུ་ཤེས་ཀྱིས་གནས་པ་ནི་གནོད་པ་ཐམས་ཅད་ཡོངས་སུ་སྤོང་
[164a.4]ཞིང་ཕན་པ་སྒྲུབ་པའི་ཕྱིར་འཇུག་པའོ། །བདེ་བ་རྣམས་ལ་དགའ་བའི་འདུ་ཤེས་ཀྱིས་གནས་པ་ནི་གཞན་གྱི་ནོར་དང་ཡོ་བྱད་ལ་བརྣབ་སེམས་དང་། ཕྲག་དོག་གི་སེམས་མི་བསྐྱེད་པའོ། །མི་མཛའ་བ་རྣམས་ལ་དེའི་གཞི་ལས་ཉེས་པར་ལྟ་བའི་འདུ་ཤེས་ཀྱིས་གནས་པ་ནི་གཞི་ཡོངས་སུ་སྤོང་
[164a.5]བ་སྟེ། དེས་སྐྱེ་བོ་གཞན་ལྟ་ཅི་སྨོས་ཀྱི་དགྲ་རྣམས་དང་ཡང་མཛའ་བར་བྱེད་དོ། །མཛའ་བ་རྣམས་ལ་རྗེས་སུ་སྲུང་བའི་འདུ་ཤེས་ཀྱིས་གནས་པ་ནི་མཛའ་བ་བརྟན་པ་དང་ཐམས་ཅད་དང་མཛའ་བའོ། །ལོངས་སྤྱོད་རྣམས་ལ་སྨན་གྱི་འདུ་ཤེས་ཀྱིས་གནས་པ་ནི་འདོད་པ་ལ་ལོག་པར་གཡེམ་པ་ལ་
[164a.6]ཡོངས་སུ་མི་སྤྱོད་ཅིང་ལོངས་སྤྱོད་རྣམས་ལ་མ་ཆགས་པར་ཡོངས་སུ་སྤྱོད་པའོ། །བདག་ལ་བདག་མེད་པའི་འདུ་ཤེས་ཀྱིས་གནས་པ་ནི་ཆོས་དོན་དུ་གཉེར་ཞིང་དགེ་སྦྱོང་དང་བྲམ་ཟེ་རྣམས་ཀྱི་དྲུང་དུ་སོང་སྟེ་རྗེས་སུ་མཐུན་པའི་ཆོས་སྒྲུབ་པ་ལ་འཇུག་པ་སྟེ། རྒྱལ་པོ་ཆེན་པོ་འདུ་ཤེས་ལ་གནས་པ་བརྒྱད་པོ་དེ་དག་གིས་
[164a.7]གནས་པའི་ཆོས་དང་ལྡན་པའི་རྒྱལ་པོ་ནི་སྐྱེས་ཕུལ་བ་ཙམ་གྱིས་ཀྱང་ལོངས་སྤྱོད་རྣམས་ཤིན་ཏུ་མང་དུ་འཕེལ་བར་འགྱུར་གྱི་ཆོས་དང་མི་ལྡན་པ་ནི་གཡོའི་སྦྱོར་བ་དང་། བདུན་པ་རྣམ་པ་ཐམས་ཅད་ཀྱིས་བསྒྲུབས་ཀྱང་དེ་ལྟར་འཕེལ་བར་མི་འགྱུར་རོ་ཞེས་གསུངས་སོ། །ཡིད་གཉིས་ལེགས་པར་
[164b]
[164b.1]འཇོམས་པའི་མདོ་ལས་ཀྱང་ཆོས་བཞི་དང་ལྡན་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལོག་པར་མི་ལྟུང་བའི་ཆོས་ཅན་དུ་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱུར་དུ་མཉེས་པར་བྱེད་ཅིང་། ལོངས་སྤྱོད་ཆེན་པོ་ཕུན་སུམ་ཚོགས་པ་ཡང་
[164b.2]ཡོངས་སུ་འཛིན་ཏོ། །བཞི་གང་ཞེན་འདི་ལྟ་སྟེ་དེ་བཞིན་གཤེགས་པའི་བསྟན་པ་སྲུང་བའི་ཕྱིར་གནས་པ་ཡིན། སྡིག་པ་མི་དགེ་བའི་ཆོས་ལ་སྨོད་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་ཡོངས་སུ་འཛིན་པ་དང་། བླ་ན་མེད་པ་ཡང་དག་པར་རྫོགས་པའི་
[164b.3]བྱང་ཆུབ་ཏུ་སེམས་བསྐྱེད་པའོ་ཞེས་གསུངས་སོ། །མི་དགེ་བ་ཡོངས་སུ་སྤང་བར་བྱ་བ་གང་ཞེ་ན། ཉི་མའི་སྙིང་པོའི་ལེའུ་ལས་འབྱུང་བ་མ་འོངས་པའི་དུས་ན་རྒྱལ་རིགས་དང་། བྲམ་ཟེའི་རིགས་དང་། རྗེའུ་རིགས་དང་། དམངས་རིགས་དག་ཆོས་ཀྱིས་གནས་པའི་དགེ་སློང་རྣམས་ལ་
[164b.4]བྱིན་པའི་ཁྱིམ་གྱི་གཞི་དང་། ཞིང་གི་གཞི་དང་། ཀུན་དགའ་ར་བའི་གཞི་དང་། སྐྱེད་མོས་ཚལ་དང་། བྲན་མོ་དང་། བྲན་ཕོ་དང་། ལས་བྱེད་པ་དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་ནས་རྐང་འགྲོས་ཀྱི་བར་དུ་བྱིན་པ་ལ་རྐུ་བ་དང་། རིལ་གྱིས་འཕྲོག་པ་
[164b.5]དག་འབྱུང་བར་འགྱུར་ཏེ། རྒྱལ་རིགས་ནས་དམངས་རིགས་ཀྱི་བར་དུ་དེ་དག་ཚེ་འདི་ལ་མི་འདོད་པའི་ཆོས་ཉི་ཤུ་དང་མྱུར་དུ་ལྡན་པར་འགྱུར་རོ། །ཉི་ཤུ་གང་ཞེ་ན། ལྷ་འཕང་བར་འགྱུར་བ་དང་། ཕྱོགས་དང་ཕྱོགས་མཚམས་སུ་དེའི་མི་སྙན་པ་གྲགས་པར་འགྱུར་བ་དང་། དེའི་མཛའ་བ་དང་།
[164b.6]ཉེ་དུ་དང་། སྣག་གི་མཉེན་མཚམས་ཀྱིས་བོར་བར་འགྱུར་བ་དང་། དེ་ལ་དགྲ་མང་བར་འགྱུར་བ་དང་། ནོར་དང་འབྲུ་དང་ཡོ་བྱད་འགྲིབ་པར་འགྱུར་བ་དང་། གཡེང་བ་མང་བར་འགྱུར་བ་དང་། ཡན་ལག་མ་ཚང་བར་འགྱུར་བ་དང་། དེ་གཉིད་མེད་པར་འགྱུར་བ་དང་། དེ་རྟག་ཏུ་སྐོམ་པས་
[164b.7]ཉེན་པར་འགྱུར་བ་དང་། དེ་ལ་བཏུང་བ་ཡང་དུག་ཏུ་འགྱུར་བ་དང་། མཛའ་བ་ཡིད་དུ་འཐད་པ་དང་ཡང་མྱུར་དུ་འབྲལ་བར་འགྱུར་བ་དང་། རྟག་ཏུ་གཞན་དང་འཐབ་པར་འགྱུར་བ་དང་། ཕ་མ་དང་། ཆུང་མ་དང་། བུ་ཕོ་དང་། བུ་མོ་དང་། བྲན་མོ་དང་། བྲན་ཕོ་དང་། བྲན་དག་བསྒོ་བའི་རྗེས་
[165a]
[165a.1]སུ་མཐུན་པར་མི་བྱེད་པར་འགྱུར་བ་དང་། དེའི་ཚིག་གསང་བ་དང་། ནོར་གསང་བ་དང་། བཙུན་མོའི་འཁོར་གསང་བ་དང་། དེ་གསང་བའི་དངོས་པོ་ཐམས་ཅད་སྣང་ཞིང་མངོན་པར་འགྱུར་བ་དང་། བགོ་སྐལ་ལ་སྤྱོད་པ་མི་སྡུག་པ་དག་གི་ལོངས་སྤྱོད་རྣམས་ཆུད་
[165a.2]གསོན་པར་འགྱུར་བ་དང་། མྱུར་དུ་ནད་དྲག་པོས་བཏབ་པར་འགྱུར་བ་དང་། སྨན་དང་ནད་གཡོག་མེད་ཅིང་ཤ་དང་ཁྲག་སྐམས་པ་སྡུག་བསྔལ་མྱོང་བར་འགྱུར་བ་དང་། བདག་གི་གཅིན་གྱིས་ཀྱང་རེག་སྟེ་འཆི་བའི་དུས་བྱེད་པར་འགྱུར་ཏེ། རྒྱལ་པོ་ཆེན་པོ་མི་འདོད་པའི་ཆོས་ཉི་ཤུ་པོ་འདི་དག་དང་
[165a.3]མྱུར་དུ་ཕྲད་པར་འགྱུར་རོ། །གང་ཆོས་ཀྱིས་གནས་པའི་དགེ་སློང་རྣམས་ལ་སྦྱིན་པ་ལོངས་སྤྱོད་དང་། ཡོངས་སུ་སྤྱོད་པ་དང་ནོར་དང་ཡོ་བྱད་ཕྲོགས་སམ། བདག་སྤྱོད་དམ་གཞན་སྤྱོད་དུ་འཇུག་ན། དེ་འཆི་བའི་དུས་བྱས་ནས་མནར་མེད་པའི་སེམས་ཅན་དམྱལ་བ་ཆེན་པོར་སྐྱེ་སྟེ། དེས་ན་ཚེ་
[165a.4]བསྐལ་པའི་བར་དུ་ཟངས་བཞུ་བའི་ཁུ་བ་འཐུང་ཞིང་། ལྕགས་ཀྱི་ཐུ་ལུམ་ཟ་ལ། མེའི་གོས་གྱོན་ཅིང་ཤིན་ཏུ་མི་བཟད་པའི་སྡུག་བསྔལ་སྣ་ཚོགས་མྱོང་བར་འགྱུར་རོ། །བསྐལ་པར་འདུག་པའི་ཚེ་ཟད་ནས་མྱ་ངམ་དགོན་པ་ཆུ་མེད་པ་ན་ལམ་གོལ་བའི་ཡི་དྭགས་དང་སྐལ་བ་མཉམ་པར་སྐྱེས་ན་
[165a.5]ཡང་རྐང་པ་དང་། ལག་པ་དང་། མིག་མེད་པར་སྐྱེའོ། །དེ་ནི་ཕྱོགས་བཞིའི་རླུང་ཚ་བས་སྲེག་ཅིང་སྤུ་གྲི་འདྲ་བའི་སོག་ལེས་འདྲ་སྟེ། ལོ་བརྒྱ་སྟོང་དུ་མའི་བར་དུ་དེ་ན་འདི་འདྲ་བར་སྡུག་བསྔལ་མྱོང་བར་འགྱུར་རོ། །དེ་བརྒྱ་ལ་ཅི་སྟེ་དེ་ནས་ཤི་འཕོས་ན་ཡང་རྒྱ་མཚོ་ཆེན་པོར་ཤ་སྣ་གུའི་ལུས་དཔག་
[165a.6]ཚད་བརྒྱ་བར་སྐྱེ་སྟེ། དེའི་སྔོན་གྱི་ལས་ཀྱི་རྒྱུས་དཔག་ཚད་བརྒྱ་ཁོ་ར་ཁོར་ཡུག་ཏུ་ཆུ་ཟངས་བཞུ་བའི་ཁུ་བ་འདྲ་བ་བྱུང་ནས། །དེས་ཆུའི་ནང་དུ་ལོ་བརྒྱ་སྟོང་དུ་མའི་བར་དུ་སེམས་ཅན་དམྱལ་བའི་གནོད་པ་མྱོང་བར་འགྱུར་རོ། །དེ་ནས་ཤི་འཕོས་ནས་ཀྱང་མྱང་ངམ་དགོན་པར་བརྫུས་ཏེ་སྐྱེས་ནས། ཤ་
[165a.7]སྣ་གུ་ཆེན་པོ་རི་ཙམ་དུ་འགྱུར་ཏེ། དེ་ཕྱོགས་གཞན་ནས་རླུང་ཤིན་ཏུ་ཚ་བས་སྲེག་ཅིང་དེར་ཕྱོགས་བཞི་ནས་གཅན་གཟན་དང་བྱ་ཀུན་ལྷགས་ཏེ་ཟའོ། །དེ་བརྒྱ་ལ་ཅི་སྟེ་ཡུན་རིང་མོ་ཞིག་ན། དེ་ནས་ཤི་འཕོས་ནས་ཀྱང་སེམས་ཅན་དམྱལ་བ་ཆེན་པོར་སྐྱེའོ། །དེ་ནས་ཤི་འཕོས་ནས་ཀྱང་རྣམ་པ་འདི་ལྟ་
[165b]
[165b.1]བུའི་སྡུག་བསྔལ་ཆེན་པོ་མྱོང་བར་འགྱུར་རོ། །ཡོངས་སུ་བརྟག་པ་བཟུང་སྟེ། དེ་བརྒྱ་ལ་ཅི་སྟེ་མི་རྣམས་དང་སྐལ་བ་མཉམ་པར་སྐྱེ་ན་ཡང་། སངས་རྒྱས་མེད་པའི་སངས་རྒྱས་ཀྱི་ཞིང་སྙིགས་མ་ལྔ་ཅན་དུ་སྐྱེས་ཤིང་མིག་མེད་ལ་མི་སྡུག་པར་འགྱུར་ཏེ། རྒྱལ་པོ་ཆེན་པོས་ཆོས་ཀྱིས་གནས་
[165b.2]པའི་དགེ་སློང་རྣམས་ཀྱི་ལོངས་སྤྱོད་དང་། ཡོངས་སུ་སྤྱོད་པ་དང་། ནོར་དང་ཡོ་བྱད་ཕྲོགས་ན་དེ་ལྟ་བུར་སྡུག་བསྔལ་བར་འགྱུར་རོ་ཞེས་གསུངས་སོ། །ནམ་མཁའི་སྙིང་པོའི་ལེའུ་ལས་ཀྱང་། རིགས་ཀྱི་བུ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་རྩ་བའི་ལྟུང་བ་ལྔ་སྟེ། ལྟུང་བའི་རྩ་བ་དེ་
[165b.3]དག་གིས་རྒྱལ་རིགས་སྤྱི་བོ་ནས་དབང་བསྐུར་བ་དགེ་བའི་རྩ་བ་སྔོན་བསྐྱེད་པ་ཐམས་ཅད་ཆུད་གསན་ཏེ། ཕམ་ཞིང་ལྷ་དང་མིའི་བདེ་བའི་གནས་ཐམས་ཅད་ནས་ལྟུང་ནས་ངན་སོང་དུ་འགྲོ་བར་འགྱུར་རོ། །ལྔ་གང་ཞེ་ན། རིགས་ཀྱི་བུ་རྒྱལ་རིགས་སྤྱི་བོ་ནས་དབང་བསྐུར་བ་མཆོད་རྟེན་གྱི་རྫས་
[165b.4]ཕྲོགས་སམ། དགེ་འདུན་གྱི་དང་། ཕྱོགས་བཞིའི་དགེ་འདུན་ལ་ཕུལ་བ་འཕྲོག་ཏུ་འཇུག་པ་འདི་ནི་ལྟུང་བའི་རྩ་བ་དང་པོའོ། །གང་ཡང་ཆོས་སྤོང་ཞིང་འགོག་ཏུ་འཇུག་སྟེ། ཉན་ཐོས་ངེས་པར་འབྱུང་བ་བཤད་པའམ། ཐེག་པ་ཆེན་པོ་ངེས་པར་འབྱུང་བ་བཤད་པ་སྤོང་ཞིང་འགོག་ཏུ་འཇུག་པ་འདི་
[165b.5]ནི་རྩ་བའི་ལྟུང་བ་གཉིས་པའོ། །གང་ཡང་ངའི་ཕྱིར་རབ་ཏུ་བྱུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་པ་བསླབ་པ་བཟུང་ཡང་རུང་བསླབ་པ་མ་བཟུང་ཡང་རུང་། ཚུལ་ཁྲིམས་འཆལ་པ་ཡང་རུང་། ཚུལ་ཁྲིམས་ལྡན་པ་ཡང་རུང་། དེའི་གོས་ངུར་སྨྲིག་ཕྲོགས་སམ། ཁྱིམ་ན་གནས་པར་བྱེད་
[165b.6]དུ་འཇུག་གམ། ལུས་ཀྱི་ཆད་པ་བཞི་རྡེག་བྱེད་དམ། ཆད་པས་གཅོད་དུ་འཇུག་གམ། བཙོན་རར་འཇུག་གམ། སྲོག་དང་བྲལ་བར་བྱེད་དུ་འཇུག་པ་འདི་ནི་ལྟུང་བའི་རྩ་བ་གསུམ་པའོ། །རྒྱལ་རིགས་གང་ཡང་ཆེད་དུ་བསམས་ཏེ་མའི་སྲོག་གཅོད་པ་དང་། ཕ་དང་བཅོམ་ལྡན་འདས་ཀྱི་
[165b.7]ཉན་ཐོས་དགྲ་བཅོམ་པའི་སྲོག་གཅོད་པ་དང་། དགེ་འདུན་འདུམ་པ་འབྱེད་པ་དང་། ཆེད་དུ་བསམས་ཏེ་ཡང་དག་པར་རྫོགས་པའི་སངས་རྒྱས་ལ་ངན་སེམས་ཀྱིས་ཁྲག་འབྱིན་པ་དང་། མཚམས་མེད་པའི་ལས་ལྔ་པོ་འདི་དག་ལས་གང་ཡང་རུང་བའི་ལས་བྱེད་པ་ནི་རྩ་བའི་ལྟུང་བ་བཞི་
[166a]
[166a.1]པའོ། །རྒྱལ་རིགས་གང་ཡང་རྒྱུ་མེད་པར་སྨྲ་བར་གྱུར་ལ། འཇིག་རྟེན་ཕ་རོལ་ལ་གཡེལ་ཏེ། མི་དགེ་བ་བཅུའི་ལས་ཀྱི་ལམ་ཡང་དག་པར་བཟུང་ནས་གནས་སེམས་ཅན་གཞན་མང་པོ་དག་ཀྱང་། མི་དགེ་བ་བཅུའི་ལས་ཀྱི་ལམ་ཡང་དག་པར་འཛིན་དུ་འཇུག་སྟེ། འདུལ་
[166a.2]ཞིང་འཛུད་ལ་འགོད་པ་དེ་ནི་ལྟུང་བའི་རྩ་བ་ལྔ་པའོ། །ཡང་བློན་པོའི་རྩ་བའི་ལྟུང་བ་ལྔ་སྟེ། ལྔ་གང་ཞེ་ན། བློན་པོ་གང་མཆོད་རྟེན་གྱི་རྫས་སམ། དགེ་འདུན་གྱི་དང་། ཕྱོགས་བཞིའི་དགེ་འདུན་གྱི་རྫས་འཕྲོག་པ་འདི་ནི་རྩ་བའི་ལྟུང་བ་དང་པོའོ། །གང་ཡང་གྲོང་འཇོམས་པ་དང་། ལྗོངས་
[166a.3]འཇོམས་པ་དང་། གྲོང་ཁྱེར་འཇོམས་པ་དང་། ཡུལ་འཁོར་འཇོམས་པར་བྱེད་པ་འདི་ནི་ལྟུང་བའི་རྩ་བ་གཉིས་པའོ། །ཡང་བློན་པོ་གང་ཆོས་སྤངས་ཏེ་ཉན་ཐོས་ངེས་པར་འབྱུང་བ་འདོད་པ་ཆུང་བ་ཉིད་དང་། ཆོག་ཤེས་པ་ཉིད་དང་། ཡོ་བྱད་བསྙུངས་པ་རྒྱས་པ་དང་། བརྩོན་འགྲུས་རྩོམ་
[166a.4]པ་དང་། དགང་སླ་བ་ཉིད་དང་། རེག་པར་གནས་པ་ཉིད་དང་། ཡོངས་སུ་ཞེན་པ་རབ་ཏུ་གཅོད་པར་འགྱུར་ཞིང་། འདི་ནི་ཚུལ་ཁྲིམས་ལེགས་པར་བསྲུངས་པ་དང་། ཏིང་ངེ་འཛིན་གྱི་ཚོགས་དང་། འཕགས་པའི་རིགས་སྣང་བར་ཡང་འགྱུར་ལ་ཡོན་ཏན་གྱི་མཆོག་དག་ལ་
[166a.5]ཡང་སྣང་བར་ཡང་འགྱུར་རོ། །དེ་ལ་སྦྱངས་པའི་ཡོན་ཏན་བཅུ་གསུམ་ལ་གོས་དང་ལྡན་པ་གཉིས་ཏེ། ཕྱག་དར་ཁྲོད་པ་ཉིད་དང་། ཆོས་གོས་གསུམ་པ་ཉིད་དོ། །ཟས་དང་ལྡན་པ་ལྔ་སྟེ། བསོད་སྙོམས་པ་ཉིད་དང་། མཐར་ཆགས་སུ་རྒྱུ་བ་ཉིད་དང་། སྟན་གཅིག་པ་ཉིད་དང་། ཟས་
[166a.6]ཆོག་པ་ཉིད་དང་། ཟས་ཕྱིས་མི་ལེན་པ་ཉིད་དོ། །གནས་མལ་དང་ལྡན་པ་ལ་ལྔ་སྟེ། དགོན་པ་ཉིད་དང་། ཤིང་དྲུང་པ་ཉིད་དང་། བླ་གབ་མེད་པ་ཉིད་དང་། དུར་ཁྲོད་པ་ཉིད་དང་། གཞི་ཇི་བཞིན་པ་ཉིད་དོ། །བརྩོན་འགྲུས་དང་ལྡན་པ་གཅིག་སྟེ། ཅོག་པུ་བ་ཉིད་དོ། །དེ་ལ་ཕྱག་དར་ཁྲོད་པའི་
[166a.7]ཡན་ལག་གི་ངོ་བོ་ཉིད་ནི་ཕྱག་དར་ཁྲོད་པ་ཉིད་དོ། །ལྷག་མ་རྣམས་ཀྱི་ཚིག་གི་དོན་ཡང་དེ་བཞིན་དུ་བརྗོད་པར་བྱའོ། །དེ་ལ་ཕྱག་དར་ཁྲོད་པ་ཉིད་ནི་ཁྱིམ་བདག་གི་གོས་སྤོང་བ་ཡིན་ནོ། །ཆོས་གོས་གསུམ་པ་ཉིད་ནི་གོས་བཞི་པ་སྤོང་བ་ཡིན་ནོ། །བསོད་སྙོམས་པ་ཉིད་ནི་མགྲོན་དུ་འགྲོ་བ་སྤོང་བ་ཡིན་ནོ།།
[166b]
[166b.1]མཐར་ཆགས་སུ་རྒྱུ་བ་ཉིད་ནི་རྙོགས་པར་རྒྱུ་བ་སྤོང་བ་ཡིན་ནོ། །སྟན་གཅིག་པ་ཉིད་ནི་ལན་གཉིས་སུ་འདུག་པ་སྤོང་བ་ཡིན་ནོ། །ཟས་ཆོག་པ་ཉིད་ནི་ཟས་མང་པོ་སྤོང་བ་ཡིན་ནོ། །ཟས་ཕྱིས་མི་ལེན་པ་ཉིད་ནི་ཟས་ལྷག་པ་སྤོང་བ་ཡིན་ནོ། །དགོན་པ་པ་ཉིད་ནི་གྲོང་མཐའ་བར་གནས་པ་སྤོང་བ་ཡིན་ནོ། །
[166b.2]ཤིང་དྲུང་པ་ཉིད་ནི་གཡོགས་པར་གནས་པ་སྤོང་བ་ཡིན་ནོ། །བླ་གབ་མེད་པ་ཉིད་ནི་གཡོགས་པ་དང་། ཤིང་དྲུང་དུ་གནས་པ་སྤོང་བ་ཡིན་ནོ། །དུར་ཁྲོད་པ་ཉིད་ནི་གཞན་དུ་གནས་པ་སྤོང་བ་ཡིན་ནོ། །གཞི་ཇི་བཞིན་པ་ཉིད་ནི་བརྐམ་ཆགས་ཀྱི་གནས་མལ་སྤོང་བ་ཡིན་ནོ། །ཅོག་པུ་པ་ཉིད་ནི་ཉལ་
[166b.3]བ་སྤོང་བ་ཡིན་ནོ། །དེ་ལ་ཕྱག་དང་ཁྲོད་པ་ཉིད་ཇི་ལྟར་ཡང་དག་པར་ལེན་ཞེ་ན། ཁྱིམ་བདག་གི་གོས་ཚོལ་བ་དང་། ཡོངས་སུ་འཛིན་པ་དང་། གཞན་ལ་གསོལ་བ་བྱེད་པའི་ཉེས་དམིགས་ཀྱང་མཐོང་། ཕྱག་དར་ཁྲོད་པ་ཉིད་ཀྱི་ཡོན་ཏན་ཀྱང་མཐོང་ནས་གོས་ནར་མ་ལ་གནས་པ་འདི་སྐད་དུ། དེ་སླན་
[166b.4]ཆད་ཁྱིམ་བདག་གི་གོས་སྤངས་ཏེ། ཕྱག་དར་ཁྲོད་པ་ཉིད་ནི་ཡང་དག་པར་ལེན་ཏོ་ཞེས་ཡང་དག་པར་ལེན་ཏོ། །དེ་ལ་ཕྱག་དར་ཁྲོད་པ་ཉིད་ཀྱི་ཡོན་ཏན་ནི་འདི་དག་ཡིན་ཏེ་གནས་དམ་བཅས་པ་ཉིད་དང་། མཐུན་པ་ཉིད་དང་། གཞན་ལ་རག་མ་ལས་པ་ཉིད་དང་། མ་རུང་བ་མི་བྱེད་པ་ཉིད་དང་། ཡོངས་སུ་
[166b.5]སྤྱོད་པ་ན་ལྷག་པར་མ་ཆགས་པ་ཉིད་དང་། བརྐམ་ཆགས་མེད་པ་ཉིད་དང་། ཆོམ་རྐུན་གྱིས་མི་འཕྲོགས་པ་ཉིད་དང་། དུས་མ་ལགས་པ་ཉིད་དང་། འབགས་པ་ཆུང་བ་ཉིད་དང་། ཡོ་བྱད་བསྙུངས་པའི་ཚུལ་ཅན་དང་། སྐྱེས་བུ་དམ་པའི་སྤྱོད་པ་ཉིད་དང་། དང་བར་བྱེད་པའི་ཡོན་ཏན་དང་ལྡན་པ་
[166b.6]ཉིད་དང་། སྐྱེས་བུ་ཕྱི་མས་མཐོང་ནས་རྗེས་སུ་འཇུག་པ་ཉིད་དང་། ཡང་དག་པའི་སྒྲུབ་པ་སྣང་བ་ཉིད་དང་། རྒྱལ་བས་བསྔགས་པ་སྟེ། དེ་ལྟ་བུ་ལ་སོགས་པ་ནི་ཕྱག་དར་ཁྲོད་པ་ཉིད་ཀྱི་ཡོན་ཏན་དག་ཡིན་ནོ། །ཕྱག་དར་ཁྲོད་པ་ཉིད་ནི་རྣམ་པ་དུ་ཞིག །ཕྱག་དར་ཁྲོད་པ་ནི་གང་ཞིག་ཡིན།
[166b.7]གང་གིས་ནི་ཕྱག་དར་ཁྲོད་པ་ཉིད་འཇིག་ཅེ་ན། ཕྱག་དར་ཁྲོད་པ་ནི་རྣམ་པ་གཉིས་ཏེ། བདག་པོ་མེད་པ་དང་། རང་བཞིན་གྱི་མི་རྣམས་ཀྱིས་སྨད་པར་གྲགས་པའོ། །དེ་ལ་དུར་ཁྲོད་དམ། ཕྱག་དར་གྱི་ཕུང་པོའམ། ཚང་འདུས་སམ། ལམ་པོ་ཆེ་ནས་དམ་དུམ་དག་བཏུས་ནས་སྣམ་སྦྱར་བྱས་ཏེ་འཆང་
[167a]
[167a.1]བ་འདི་ནི་བདག་པོ་མེད་པའི་ཕྱག་དར་ཁྲོད་པ་ཡིན་ནོ། །ཁ་ཚར་བཅད་པ་དང་། ཕུན་ཚར་བཅད་པ་དང་། བ་ལང་གིས་ཟོས་པ་དང་། བྱི་བས་ཟོས་པ་དང་། མེས་ཚིག་པ་དང་། ཡ་སྟགས་དང་། རོ་བག་གི་གོས་དང་། མུ་སྟེགས་ཅན་གྱི་མཚན་མ་འདི་དག་ནི་རང་
[167a.2]བཞིན་གྱི་མི་རྣམས་ཀྱིས་སྨད་པར་གྲགས་པའི་ཕྱག་དར་ཁྲོད་པ་ཡིན་ནོ། །ཕྱག་དར་ཁྲོད་པ་ནི་ཁྱིམ་བདག་གི་གོས་སྤོང་བ་ཡིན་ནོ། །ཁྱིམ་བདག་གི་གོས་བླངས་པས་ནི་ཕྱག་དར་ཁྲོད་པ་ཉིད་འཇིག་གོ། །ཆོས་གོས་གསུམ་པ་ཉིད་ཇི་ལྟར་ཡང་དག་པར་ལེན་ཞེ་ན། ཆོས་གོས་ལྷག་པ་ཚོལ་བ་དང་།
[167a.3]སྦེད་པ་དང་། རུང་བར་བྱ་བ་དང་། འབགས་པའི་ཉེས་དམིགས་ཀྱང་མཐོང་། ཆོས་གོས་གསུམ་པ་ཉིད་ཀྱི་ཡོན་ཏན་ཀྱང་མཐོང་ནས། འདི་སྐད་དུ་དེང་སླན་ཆད་གོས་བཞི་པ་སྤངས་ཏེ་ཆོས་གོས་གསུམ་པ་ཉིད་ཡང་དག་པར་ལེན་ཏོ་ཞེས་ཡང་དག་པར་ལེན་ཏོ། །དེ་ལ་ཆོས་གོས་གསུམ་
[167a.4]པ་ཉིད་ཀྱི་ཡོན་ཏན་ནི་འདི་དག་ཡིན་ཏེ། འགོར་ཡང་བའི་ཚུལ་ཅན་ཉིད་དང་། གསོག་འཇོག་ཡོངས་སུ་སྤངས་པ་ཉིད་དང་། ཁུར་ཆུང་བ་ཉིད་དང་། ལུས་འཚོ་བ་ཙམ་གྱིས་ཆོག་ཤེས་པ་ཉིད་དང་། བྱ་བཞིན་དུ་གང་དགའ་བར་འགྲོ་བ་ཉིད་དང་། སྐྱེས་བུ་དམ་པའི་སྤྱོད་པ་དང་། ཡོ་བྱད་
[167a.5]བསྙུངས་པའི་ཚུལ་ཅན་ཏེ་དེ་ལྟ་བུ་ལ་སོགས་པ་ནི་ཆོས་གོས་གསུམ་པ་ཉིད་ཀྱི་ཡོན་ཏན་དག་ཡིན་ནོ། །ཆོས་གོས་གསུམ་པ་ཉིད་ནི་ཅི་ཞིག་ཡིན་ཆོས་གོས་གསུམ་པ་ཉིད་ནི་གང་ཞིག་གང་གིས་ནི་ཆོས་གོས་གསུམ་པ་ཉིད་འཇིག་ཅེ་ན། སྣམ་སྦྱར་དང་བླ་གོས་དང་མཐོང་གོས་ཏེ། འདི་དག་ནི་ཆོས་གོས་གསུམ་
[167a.6]བདག་ཡིན་ཏེ། ཆོས་གོས་གསུམ་ནི་གོས་བཞི་པ་སྤོང་བ་ཡིན་ནོ། །གོས་བཞི་པ་འཆང་བས་ནི་ཆོས་གོས་གསུམ་པ་ཉིད་འཇིག་གོ། །བསོད་སྙོམས་པ་ཉིད་ཇི་ལྟར་ཡང་དག་པར་ལེན་ཅེ་ན། མགྲོན་དུ་སོང་ནས་རང་གི་ལས་ཉམས་པ་དང་། གཞན་གྱི་དབང་དུ་གྱུར་པ་དང་། མི་མཐུན་པ་དང་ཕྲད་པ་དང་། འདུག་ན་
[167a.7]ཉམ་ང་བའི་ཉེས་དམིགས་ཀྱང་མཐོང་། བསོད་སྙོམས་པ་ཉིད་ཀྱི་ཡོན་ཏན་དག་ཀྱང་མཐོང་ནས་འདི་སྐད་དུ་དེང་སླན་ཆད་མགྲོན་དུ་འགྲོ་བ་སྤངས་ཏེ་བསོད་སྙོམས་པ་ཉིད་ལ་ཡང་དག་པར་ལེན་ཏོ་ཞེས་ཡང་དག་པར་ལེན་ཏོ། །དེ་ལ་བསོད་སྙོམས་པ་ཉིད་ཀྱི་ཡོན་ཏན་ནི་འདི་དག་ཡིན་ཏེ། གནམ་བཅས་
[167b]
[167b.1]པ་དང་མཐུན་པ་ཉིད་དང་། རང་དབང་ཡོད་པ་ཉིད་དང་། གཞན་གྱི་གསོ་བ་ཉིད་དང་། ལེ་ལོ་མེད་པ་ཉིད་དང་། ང་རྒྱལ་བཅོམ་པ་ཉིད་དང་། སེམས་ཅན་ལ་ཕན་འདོགས་པས་ཞུགས་པ་ཉིད་དང་། རོའི་སྲེད་པ་ལས་ལོག་པ་ཉིད་དང་། ཕྱོགས་རྣམས་སུ་ཐོགས་པ་མེད་པ་ཉིད་དང་། སྐྱེས་བུ་
[167b.2]དམ་པའི་སྤྱོད་པ་ཉིད་དང་། ཡོ་བྱད་བསྙུངས་པའི་ཚུལ་ཅན་ཏེ། དེ་ལྟ་བུ་ལ་སོགས་པ་ནི་བསོད་སྙོམས་པ་ཉིད་ཀྱི་ཡོན་ཏན་དག་ཡིན་ནོ། །མགྲོན་ཡན་ལག་དུ་པ་ཡིན། བསོད་སྙོམས་པ་གང་ཡིན། གང་གིས་ནི་བསོད་སྙོམས་འདི་འཇིག་ཅེ་ན། མགྲོན་ནི་ཡན་ལག་གསུམ་པ་སྟེ།
[167b.3]ཟས་རྣམ་པ་ལྔ་གང་ཟ་ཡང་རུང་བ་ཞིག་ལ་དེ་རིང་ངམ་སང་ངམ་ནམ་དགའ་བ་ལ་མགྲོན་དུ་བོས་པས་ནི་མགྲོན་ཡིན་ནོ། །བསོད་སྙོམས་པ་ནི་མགྲོན་དུ་འགྲོ་བ་སྤོང་བ་ཡིན་ནོ། །མགྲོན་ཁས་ལེན་པས་ནི་བསོད་སྙོམས་པ་ཉིད་འཇིག་གོ། །མཐར་ཆགས་སུ་རྒྱུ་བ་ཉིད་ཇི་ལྟར་ཡང་དག་པར་ལེན་ཅེ་ན། ནར་
[167b.4]མར་སྟེར་བ་ལ་གང་དང་གང་དུ་མང་པོ་དང་གྱ་ནོམ་པ་ནར་མ་རྙེད་པ་དེ་དང་དེ་ཁོ་ན་ཞེས་ཡང་དག་པར་ལེན་ཏེ། འགྲོ་ན་ཟན་ནར་མ་དང་འདྲ་བས་ཡོ་བྱད་བསྙུངས་པ་མ་ཡིན་པའི་ཉེས་དམིགས་ཀྱང་མཐོང་མཐར་ཆགས་སུ་རྒྱུ་བ་ཉིད་ཀྱི་ཡོན་ཏན་དག་ཀྱང་མཐོང་ནས་འདི་སྐད་དུ་དེང་སླན་ཆད་ནར་མར་སྟེར་བ་སྤངས་ཏེ།
[167b.5]མཐར་ཆགས་སུ་རྒྱུ་བ་ཉིད་ཡང་དག་པར་ལེན་ཏོ། །དེ་ལ་མཐར་ཆགས་སུ་རྒྱུ་བའི་ཡོན་ཏན་ནི་འདི་དག་ཡིན་ཏེ། སེམས་སྙོམས་པ་ཉིད་དང་། སེམས་ཅན་ལ་སྙིང་བརྩེ་བ་ཉིད་དང་། ཁྱིམ་ལ་སེར་སྣ་སྤོང་བ་ཉིད་དང་། ཁྱིམ་དུ་འགྲོ་བའི་ཉེས་དམིགས་མེད་པ་དག་འབོད་པ་ལ་མངོན་པར་མི་དགའ་
[167b.6]བ་ཉིད་དང་། ཟས་བཟང་པོ་མི་འདམ་པ་ཉིད་དང་། མིའི་འཛིན་པ་ལས་ཡོངས་སུ་གྲོལ་བ་དང་། ལྷན་ཅིག་སྤྱོད་པ་རྣམ་པར་སྤོང་བ་ཉིད་དང་། ཡོ་བྱད་བསྙུངས་པའི་ཚུལ་ཅན་ཏེ། དེ་ལྟ་བུ་ལ་སོགས་པ་ནི་མཐར་ཆགས་སུ་རྒྱུ་བ་ཉིད་ཀྱི་ཡོན་ཏན་དག་ཡིན་ནོ། །མཐར་ཆགས་སུ་རྒྱུ་བ་ནི་གང་ཞིག་
[167b.7]ཡིན། བརྙོགས་པར་རྒྱུ་བ་ནི་གང་གིས་སྤོང་། གང་གིས་ནི་མཐར་ཆགས་སུ་རྒྱུ་བ་ཉིད་འཇིག་ཅེ་ན། མཐར་གྱིས་རྒྱུ་བ་ནི་བསོད་སྙོམས་སྤྱོད་པ་ན་ཁྱིམ་དང་པོས་བཟུང་སྟེ། ཁྱིམ་མཐར་ཆགས་སུ་རྒྱུ་བ་ཡིན་ནོ། །མཐར་ཆགས་རྒྱུ་བ་ནི་བརྙོགས་པར་རྒྱུ་བ་སྤོང་བ་ཡིན་ནོ། །བརྙོགས་པར་རྒྱུ་བས་ནི་མཐར་
[168a]
[168a.1]ཆགས་སུ་རྒྱུ་བ་ཉིད་འཇིག་གོ། །སྟན་གཅིག་པ་ཉིད་ཇི་ལྟར་ཡང་དག་པར་ལེན་ཅེ་ན། ལན་གཉིས་སུ་འདུག་སྟེ་ཟ་ན་ཡང་ནས་ཡང་དུ་འདུག་ནས་བྱིན་ལེན་བྱ་བ་དང་། ཡོངས་སུ་ལོངས་སྤྱོད་པའི་བཟའ་བས་ཡོ་བྱད་བསྙུངས་པ་མ་ཡིན་པའི་ཉེས་དམིགས་ཀྱང་མཐོང་། སྟན་གཅིག་
[168a.2]བ་ཉིད་ཀྱི་ཡོན་ཏན་དག་ཀྱང་བླངས་ནས་ཡང་མི་ལེན་པའོ། །ཟས་ཕྱིས་མི་ལེན་པ་ནི་ཟས་ལྷག་པར་སྤོང་བ་ཡིན་ནོ། །ཟས་ལྷག་པ་ཟ་བས་ནི་ཟས་ཕྱིས་མི་ལེན་པ་ཉིད་འཇིག་གོ། །དགོན་པ་པ་ཉིད་དེ་ལྟར་ཡང་དག་པར་ལེན་ཅེ་ན། གྲོང་མཐར་གནས་ན་མི་འདོད་པའི་ཡུལ་གྱིས་འཁྲུག་པ་དང་། ཆགས་པ་སྐྱེ་བ་དང་
[168a.3]འཛིན་པར་གནས་པ་ཉིད་ཀྱི་ཉེས་དམིགས་ཀྱང་མཐོང་། དགོན་པ་པ་ཉིད་ཀྱི་ཡོན་ཏན་དག་མཐོང་ནས་འདི་སྐད་དུ་དེང་སླན་ཆད་གྲོང་མཐར་གནས་པ་སྤངས་ཏེ། དགོན་པར་གནས་པ་ཉིད་ཡང་དག་པར་ལེན་ཏོ་ཞེས་ཡང་དག་པར་ལེན་ཏོ། །དེ་ལ་དགོན་པ་པ་ཉིད་ཀྱི་ཡོན་ཏན་ནི་འདི་དག་ཡིན་ཏེ། མི་འདོད་པའི་ཡུལ་ཡོངས་
[168a.4]སུ་སྤོང་བ་ཉིད་དང་། གཏམ་གྱི་གཞི་བཅུ་ཡང་དག་པར་སྟོན་པ་དང་། ཤིན་ཏུ་མཛེས་པ་ཉིད་དང་། ལྷས་བསྐུལ་བ་ཉིད་དང་འདུ་འཛི་ལ་དགའ་བ་དོན་དུ་མི་གཉེར་བ་ཉིད་དང་། དབེན་པའི་བདེ་བ་ཅི་འདོད་པ་ཐོབ་པ་ཉིད་དང་། སྒྲ་ཆུང་བས་རྣལ་འབྱོར་དང་མཐུན་པ་ཉིད་དང་། སྐྱེས་བུ་དམ་པའི་སྤྱོད་པ་ཉིད་
[168a.5]དང་། ཡོ་བྱད་བསྙུངས་པའི་ཚུལ་ཅན་ཏེ། དེ་ལྟ་བུ་ལ་སོགས་པ་ནི་དགོན་པ་པ་ཉིད་ཀྱི་ཡོན་ཏན་དག་ཡིན་ནོ། །དགོན་པའི་གནས་མལ་གྱི་མཐའ་ནི་གང་ཡིན། དགོན་པ་པ་ནི་གང་ཡིན། གང་གིས་ནི་དགོན་པ་པ་ཉིད་འཇིག་ཅེ་ན། གྲོང་དང་། གྲོང་གི་ཉེ་འཁོར་དང་། ཀུན་དགའི་ར་བ་དང་། ཀུན་དགའི་ཉེ་
[168a.6]འཁོར་མ་གཏོགས་པ་མི་འབྲིང་གི་ཁྲུ་བཞི་ལ་གཞུ་སྟེ། གཞུ་དེ་ལྟ་བུའི་གཞུ་ལྔ་བརྒྱ་འདི་ནི་དགོན་པའི་གནས་མལ་གྱི་མཐའ་ཡིན་ནོ། །དགོན་པ་པ་ནི་གྲོང་མཐར་གནས་པ་སྤོང་བ་ཡིན་ནོ། །ཤིང་དྲུང་པ་ཉིད་ཇི་ལྟར་ཡང་དག་པར་ལེན་ཅེ་ན། གཡོགས་པར་གནས་པ་ཡོངས་སུ་གཟུང་བ་དང་། བཅོས་ལེགས་བྱ་བ་དང་།
[168a.7]གཞན་ལ་གསོལ་བ་དང་། ལོངས་སྤྱོད་ཀྱི་ཉེས་དམིགས་དག་ཀྱང་མཐོང་། ཤིང་དྲུང་པ་ཉིད་ཀྱི་ཡོན་ཏན་དག་ཀྱང་མཐོང་ནས་འདི་སྐད་དུ། དེང་སླན་ཆད་གཡོགས་པར་གནས་པ་སྤངས་ཏེ་ཤིང་དྲུང་པ་ཉིད་ཡང་དག་པར་ལེན་ཏོ་ཞེས་ཡང་དག་པར་ལེན་ཏོ། །དེ་ལ་ཤིང་དྲུང་པ་ཉིད་ཀྱི་ཡོན་ཏན་ནི་འདི་དག་ཡིན་ཏེ།
[168b]
[168b.1]གནས་དམ་བཅས་པ་དང་། མཐུན་པ་ཉིད་དང་། ཡོ་བྱད་བསྙུངས་པ་ཉིད་དང་། ལས་ལ་དགའ་བ་ཡོངས་སུ་སྤོང་བ་ཉིད་དང་། ལྷས་བསྐུལ་བ་ཉིད་དང་། གནས་ལ་སེར་སྣ་སྤོང་བ་ཉིད་དང་། ཆགས་པ་རབ་ཏུ་སྤོང་བ་ཉིད་དང་། སྐྱེས་བུ་དམ་པའི་སྤྱོད་པ་ཉིད་དང་། ཡོ་བྱད་བསྙུངས་པ་སྟེ། དེ་ལྟ་བུ་
[168b.2]ལ་སོགས་པ་ནི་ཤིང་དྲུང་པ་ཉིད་ཀྱི་ཡོན་ཏན་དག་ཡིན་ནོ། །ཤིང་དྲུང་གི་ཚད་ཅི་ཙམ་ཞིག་ཡིན། ཤིང་ཇི་ལྟ་བུ་ནི་སྤོང་བར་བྱ། ཤིང་དྲུང་པ་ནི་གང་ཡིན། གང་གིས་ནི་ཤིང་དྲུང་པ་ཉིད་འཇིག་ཅེ་ན། ཉི་མ་གུང་གི་དུས་སུ་གྲིབ་མས་ཇི་སྲིད་ཁྱབ་པ་དང་། རླུང་མེད་པར་ལོ་མ་དག་ཇི་སྲིད་དུ་ལྷགས་པ་དེ་སྲིད་ནི་ཤིང་
[168b.3]དྲུང་གི་ཚད་ཡིན་ནོ། །ཤིང་དྲུང་པས་སྡོང་རྒན་དང་། ཤིང་ཁོང་སྟོང་དང་། ཤིང་ཉེན་ཅན་སྤང་བར་བྱའོ། །ཤིང་དྲུང་པ་ནི་གཡོགས་པར་གནས་པ་སྤོང་བ་ཡིན་ནོ། །གཡོགས་པར་གནས་པས་ནི་ཤིང་དྲུང་པ་ཉིད་འཇིག་གོ། །བླ་གབ་མེད་པ་ཉིད་ཇི་ལྟར་ཡང་དག་པར་ལེན་ཅེ་ན། གཡོགས་པ་དང་།
[168b.4]ཤིང་དྲུང་གི་གནས་ཚོལ་བ་དང་། ཡོངས་སུ་བཟུང་བས་ཡོ་བྱད་བསྙུངས་པ་མ་ཡིན་པའི་ཉེས་དམིགས་ཀྱང་མཐོང་ནས་འདི་སྐད་དུ་དེང་སླན་ཆད་གཡོགས་པ་དང་། ཤིང་དྲུང་དུ་གནས་པ་སྤོང་བ་སྟེ། བླ་གབ་མེད་པ་ཉིད་ཡང་དག་པར་ལེན་ཏོ་ཞེས་ཡང་དག་པར་ལེན་ཏོ། །དེ་ལ་བླ་གབ་མེད་པའི་ཡོན་ཏན་ནི་འདི་དག་
[168b.5]ཡིན་ཏེ། བརྩོན་པ་མི་གཏོང་བ་ཉིད་དང་། རྨུགས་པ་དང་གཉིད་སྤངས་པ་དང་། རི་དྭགས་ལྟ་བུ་ཉིད་དང་། ཕྱོགས་བཞི་སྤྱད་པ་དང་། རྟེན་པ་མེད་པ་ཉིད་དང་། སྐྱེས་བུ་དམ་པའི་སྤྱོད་པ་ཉིད་དང་།ཡོ་བྱད་བསྙུངས་པའི་ཚུལ་ཅན་ཏེ། དེ་ལྟ་བུ་ལ་སོགས་པ་ནི་བླ་གབ་མེད་པ་ཉིད་ཀྱི་ཡོན་ཏན་དག་ཡིན་ནོ། །
[168b.6]བླ་གབ་མེད་པ་ནི་གང་ཞིག་ཡིན། གང་གིས་བླ་གབ་མེད་པ་ཉིད་འདི་འཇིག་ཅེ་ན། བླ་གབ་མེད་པས་ནི་གཡོགས་པ་དང་། ཤིང་དྲུང་དུ་གནས་པ་སྤོང་བ་ཡིན་ནོ། །གཡོགས་པ་དང་ཤིང་དྲུང་ན་གནས་པས་ནི་བླ་གབ་མེད་པ་ཉིད་འདི་འཇིག་གོ། །དུར་ཁྲོད་པ་ཉིད་ཇི་ལྟར་ཡང་དག་པར་ལེན་ཅེ་ན། གཞན་དུ་
[168b.7]གནས་ན་སེམས་ཡིད་མི་འབྱུང་བ་ཉིད་དང་བག་མེད་པ་མང་བ་ཉིད་ཀྱི་ཉེས་དམིགས་ཀྱང་མཐོང་། མཐོང་ནས་ཀྱང་འདི་སྐད་དུ་དེང་སླན་ཆད་ལན་གཉིས་སུ་འདུག་སྟེ་ཟ་བ་སྤངས་ཏེ་སྟན་གཅིག་པ་ཉིད་ཡང་དག་པར་ལེན་ཏོ། །དེ་ལ་སྟན་གཅིག་པ་ཉིད་ཀྱི་ཡོན་ཏན་འདི་དག་ཡིན་ཏེ། ཟོས་པ་འཇུ་བ་ཉིད་དང་། བརྐམ་
[169a]
[169a.1]ཆགས་མེད་པ་ཉིད་དང་། ཟས་ལྷག་པར་མི་ཟ་བ་ཉིད་དང་། འདོད་པ་ཆུང་བ་ཉིད་དང་། ཟོ་མདོག་བདེ་བ་ཉིད་དང་། རང་གི་ལས་མི་ཉམས་པ་ཉིད་དང་། རེག་པར་གནས་པ་ཉིད་དང་། སྐྱེས་བུ་དམ་པའི་སྤྱོད་པ་ཉིད་དང་། ཡོ་བྱད་བསྙུངས་པའི་ཚུལ་ཅན་ཏེ། དེ་ལྟ་བུ་ལ་སོགས་པ་ནི་
[169a.2]སྟན་གཅིག་པ་ཉིད་ཀྱི་ཡོན་ཏན་དག་ཡིན་ནོ། །སྟན་གཅིག་པ་ནི་དུ་ཞིག་སྟན་གཅིག་པ་ནི་གང་ཞིག་ཡིན། ཟས་ཀྱི་མཐའ་ནི་གང་ཡིན། གང་གིས་ནི་སྟན་གཅིག་པ་འཇིག་ཅེ་ན། སྟན་གཅིག་པ་གསུམ་སྟེ་སྟན་གྱི་མཐའ་པ་དང་། ཆུའི་མཐའ་པ་དང་། ཟས་ཀྱི་མཐའ་པའོ། །དེ་ལ་སྟན་གྱི་མཐའ་པ་ཞེས་བྱ་བ་
[169a.3]ནི་ཟོས་ནས་སྟན་ལས་ལངས་ཏེ་ཡང་མི་ཟ་བ་ཡིན་ནོ། །ཆུའི་མཐའ་པ་ཞེས་བྱ་བ་ནི་ཟོས་ནས་སྟན་ལ་འདུག་ཀྱང་ལྟུང་བཟེད་དུ་ཆུ་བླངས་ནས་ཡང་མི་ཟ་བ་ཡིན་ནོ། །ཟས་ཀྱི་མཐའ་པ་ཞེས་བྱ་བ་ནི་ཟ་བ་ན་ཁམ་གྱི་ཐ་མ་མེད་ནས་ཡང་མི་ཟ་བ་ཡིན་ནོ། །སྟན་གཅིག་པ་ནི་ལན་གཉིས་སུ་འདུག་སྟེ། ཟབ་སྤོང་བ་ཡིན་ནོ། །
[169a.4]ཟས་ཀྱི་མཐའ་ནི་ཆུ་དང་སྨན་མ་གཏོགས་པ་མེད་པར་བྱ་བ་གང་ཅུང་ཟད་ཅི་ཡང་རུང་བ་ཡིན་ནོ། །ལན་གཉིས་སུ་འདུག་སྟེ་ཟ་བས་སྟན་གཅིག་པ་ཉིད་འཇིག་གོ། །ཟས་ཆོག་པ་པ་ཇི་ལྟར་ཡང་དག་པར་ལེན་ཅེ་ན། ཟས་མང་དུ་ཟོས་ན་ལུས་ལྕི་བར་བྱེད་པ་དང་། ཕུལ་སྐྱེ་བ་དང་། འདོད་ཆེན་ཆེ་བ་ཉིད་དང་། ཡོ་བྱད་
[169a.5]བསྙུངས་པ་མ་ཡིན་པའི་ཉེས་དམིགས་ཀྱང་མཐོང་། ཟས་ཆོག་པ་པ་ཉིད་ཀྱི་ཡོན་ཏན་དག་ཀྱང་མཐོང་ནས་འདི་སྐད་དུ་དེང་སླན་ཆད་ཟས་མང་པོ་སྤངས་ཏེ་ཟས་ཆོག་པ་པ་ཉིད་ཡང་དག་པར་ལེན་ཏོ་ཞེས་ཡང་དག་པར་ལན་ཏོ། །དེ་ལ་ཟས་ཆོག་པ་པ་ཉིད་ཀྱི་ཡོན་ཏན་ནི་འདི་དག་ཡིན་ཏེ། ཕུལ་མི་སྐྱེ་བ་ཉིད་དང་།
[169a.6]ཟས་ཀྱི་ཚོད་ཟིན་པ་ཉིད་དང་། ཟས་མང་དུ་ཟ་བའི་གནད་ཤེས་པ་ཉིད་དང་ལུས་ཀྱི་གནས་ངན་ལེན་བསྲབས་པ་དང་། དེ་ལ་ཆགས་པ་སྤོང་བ་དང་། གནོད་པ་ཆུང་བ་ཤེས་པ་དང་། ཀུན་ནས་ལྡང་བ་ཡང་དག་པར་སྤོང་བ་དང་། སྐྱེས་བུ་དམ་པའི་སྤྱོད་པ་ཉིད་དང་། ཡོ་བྱད་བསྙུངས་པའི་ཚུལ་ཅན་ཏེ། དེ་ལྟ་
[169a.7]བུ་ལ་སོགས་པ་ནི་ཟས་ཆོག་པ་པའི་ཡོན་ཏན་དག་ཡིན་ནོ། །ཟས་ཀྱི་ཚད་ནི་ཇི་ལྟར་འཛིན། ཟས་ཆོག་པ་པ་ནི་གང་ཡིན་ནོ། །གང་གིས་ནི་ཟས་ཆོག་པ་པ་འཇིག་ཅེ་ན། འབྲས་བྲེའུ་ཆུང་གང་གི་འབྲས་ཆན་ལྷུང་བཟེད་དུ་བླངས་ནས་ཆོག་པའི་མཚན་མ་ལ་ཉེ་བར་རྟོག་ཅིང་། དེའི་འོག་ཏུ་མི་བླང་བའི་མཚན་
[169b]
[169b.1]མ་ལ་མཁས་པ་ཡིན་ཏེ། གོམས་པ་ན་ལྟོའི་ཚད་ཀྱང་ཤེས་པར་འགྱུར་རོ། །ཟས་ཆོག་པ་པ་ནི་ཟས་མང་པོ་སྤོང་བ་ཡིན་ནོ། །ཟས་ཚད་ལས་ལྷག་པས་ནི་ཟས་ཆོག་པ་པ་ཉིད་འཇིག་གོ། །ཟས་ཕྱིས་མི་ལེན་པ་ཉིད་ཇི་ལྟར་ཡང་དག་པར་ལེན་ཅེ་ན་ཟས་ལྷག་པར་ཟོས་ན་ཕུལ་སྐྱེ་བ་དང་། གཞན་ལ་
[169b.2]རག་ལས་པ་ཉིད་དང་། ཡོ་བྱད་བསྙུངས་པ་མ་ཡིན་པའི་ཉེས་དམིགས་ཀྱང་མཐོང་།ཟས་ཕྱིས་མི་ལེན་པ་ཉིད་ཀྱི་ཡོན་ཏན་དག་ཀྱང་མཐོང་ནས་འདི་སྐད་དུ་དེང་སླན་ཆད་ཟས་ལྷག་པ་སྤངས་ཏེ་ཟས་ཕྱིས་མི་ལེན་པ་ཉིད་ཡང་དག་པར་ལེན་ཏོ་ཞེས་ཡང་དག་པར་ལེན་ཏོ། །དེ་ལ་ཟས་ཕྱིས་མི་ལེན་པ་
[169b.3]ཉིད་ཀྱི་ཡོན་ཏན་ནི་འདི་དག་ཡིན་ཏེ། རེ་བ་རབ་ཏུ་ཆད་པ་དང་། དགང་སླ་བ་དང་། གཞན་ལ་རག་མ་ལས་པ་ཉིད་དང་། གསོག་འཇོག་ཡོངས་སུ་སྤོང་བ་དང་། ཡོང་མི་ཚོལ་བ་ཉིད་དང་། བརྐམ་ཆགས་མེད་པ་ཉིད་དང་། ཕུལ་མི་སྐྱེ་བ་ཉིད་དང་། སྐྱེས་བུ་དམ་པའི་སྤྱོད་པ་ཉིད་དང་། ཡོ་བྱད་
[169b.4]བསྙུངས་བའི་ཚུལ་ཅན་ཏེ་དེ་ལྟ་བུ་ལ་སོགས་པ་ནི་ཟས་ཕྱིས་མི་ལེན་པའི་ཡོན་ཏན་དག་ཡིན་ནོ། །ཟས་ཕྱིས་མི་ལེན་པ་ནི་དུ་ཞིག །ཟས་ཕྱིས་མི་ལེན་པ་ནི་གང་ཞིག་ཡིན། གང་གིས་ནི་ཟས་ཕྱིས་མི་ལེན་པ་ཉིད་འདི་འཇིག་ཅེ་ན། ཟས་ཕྱིས་མི་བླང་བ་ནི་གཉིས་ཏེ། ལྷག་པའི་མཐའ་པ་ཉིད་དང་། བཟུང་བའི་
[169b.5]མཐའ་པའོ། །དེ་ལ་ལྷག་པའི་མཐའ་པ་ཞེས་བྱ་བ་ནི་ཟོས་ཏེ་སྤངས་ནས་ཡང་མི་ཟ་བའོ། །བཟུང་བའི་མཐའ་པ་ཞེས་བྱ་བ་ནི་བདག་ཉིད་ཀྱི་རང་བཞིན་གྱི་སྐལ་བ་གཅིག །དུར་ཁྲོད་པ་ཉིད་ཀྱི་ཡོན་ཏན་དག་ཀྱང་མཐོང་ནས་འདི་སྐད་དུ། དེང་སླན་ཆད་གཞན་དུ་གནས་པ་སྤངས་ཏེ། དུར་ཁྲོད་པ་ཉིད་ཡང་དག་པར་ལེན་
[169b.6]ཏོ་ཞེས་ཡང་དག་པར་ལེན་ཏོ། །དེ་ལ་དུར་ཁྲོད་པའི་ཡོན་ཏན་ནི་འདི་དག་ཡིན་ནོ། །འཆི་བ་རྗེས་སུ་དྲན་པ་འཐོབ་བ་དང་། མི་སྡུག་པའི་མཚན་མ་འཐོབ་པ་དང་། མིས་བླ་མར་བཀུར་བ་དང་། མི་མ་ཡིན་པས་བླ་མར་བཀུར་བ་དང་། བག་ཡོད་པའི་རྒྱུ་སྐྱེ་བ་དང་། འདོད་པའི་འདོད་ཆགས་རྣམ་པ་སྤོང་བ་ཉིད་དང་།
[169b.7]ཡིད་འབྱུང་བ་མང་བ་ཉིད་དང་། འཇིགས་པ་དང་སྐྲག་པ་བཟོད་པ་ཉིད་དང་། གསོན་པས་རྒྱགས་པ་སྤོང་བ་ཉིད་དང་། ལུས་ཀྱི་རང་བཞིན་ལ་ཡང་དང་ཡང་དུ་སོ་སོར་རྟོག་པ་ཉིད་དང་། སྐྱེས་བུ་དམ་པའི་སྤྱོད་པ་ཉིད་དང་། ཡོ་བྱད་བསྙུངས་པའི་ཚུལ་ཅན་ཏེ། དེ་ལྟ་བུ་ལ་སོགས་པ་ནི་དུར་ཁྲོད་པ་ཉིད་ཀྱི་ཡོན་ཏན་
[170a]
[170a.1]དག་ཡིན་ནོ། །དུར་ཁྲོད་ཇི་ལྟ་བུར་ནི་གནས་པར་བྱའོ། །དུར་ཁྲོད་པ་ནི་གང་ཡིན། གང་གིས་ནི་དུར་ཁྲོད་པ་ཉིད་འཇིག་ཅེ་ན། དང་པོར་ནི་རྟག་ཏུ་སྲེག་པ་དང་། དུ་བ་དང་། འབར་བ་དང་། དུ་བ་ཡོད་པ་དེ་ལྟ་བུའི་དུར་ཁྲོད་དུ་གནས་པར་བྱ་ལ། དེ་ནས་ནི་དུར་ཁྲོད་གཞན་གང་ཡང་རུང་
[170a.2]བར་གནས་པར་བྱའོ། །དུར་ཁྲོད་པས་དུར་ཁྲོད་དུ་སྤྱིལ་བུ་དང་། ཁང་པ་མི་བྱ། རླུང་ཡས་ལྡང་བ་མས་ལྡང་བར་གནས་པར་མི་བྱ། ཁུ་འཕྲིག་ཅན་དུ་གནས་པར་མི་བྱ། ཉ་ཤ་དང་། ཤ་དང་། འོ་མ་དང་། ཏིལ་གྱི་ཆུར་ཕྱེ་དང་། མོན་སྲན་གྲེའུའི་བཟའ་བ་བསྟེན་པར་མི་བྱ། ལྷུང་བཟེད་སྦྱིན་
[170a.3]པར་མི་བྱ། ཁྱིམ་དུ་འདུག་པར་མི་བྱ། སྐྱེ་བོ་མང་པོའི་ཚོགས་ལྷགས་ན་ཁྲིའུ་དང་ཆོས་གོས་དང་། རིལ་བ་བླངས་ཏེ་སོང་ན་སྲེག་པ་ནས་ཧ་ཅང་ཡང་མི་རིང་བ་རྡོ་རྒྱང་གིས་སླེབ་ཙམ་གྱི་ནང་དུ་དུར་ཁྲོད་དུ་གནས་བར་བྱ་ཞིང་། སྐྱེ་རེངས་ཤར་ནས་ཁྲིའུ་དང་། ཆོས་གོས་དང་། རིལ་བ་བླངས་ནས་
[170a.4]སླར་འགྲོ་བར་བྱ་བ་འདི་ནི་འདིའི་སྤྱོད་པ་ཡིན་ནོ། །དུར་ཁྲོད་པ་ནི་གཞན་དུ་གནས་སྤངས་པ་ཡིན་ནོ། །གཞན་དུ་གནས་པ་ཁས་ལེན་པས་ནི་དུར་ཁྲོད་པ་ཉིད་འཇིག་གོ། །གཞི་ཇི་བཞིན་པ་ཉིད་ཇི་ལྟར་ཡང་དག་པར་ལེན་ཅེ་ན། བརྐམ་ཆགས་ཀྱི་གནས་མལ་ལ་ཕན་ཚུན་ལྡང་བ་ཕ་རོལ་ལ་གནོད་པ་བྱེད་པའི་
[170a.5]ཉེས་དམིགས་ཀྱང་མཐོང་། གཞི་ཇི་ལྟ་བ་བཞིན་པ་ཉིད་ཀྱི་ཡོན་ཏན་དག་ཀྱང་མཐོང་ནས་འདི་སྐད་ཅེས་དེང་སླན་ཆད་བརྐམ་ཆགས་ཀྱི་གནས་མལ་སྤངས་ཏེ་གཞི་ཇི་བཞིན་པ་ཉིད་ཡང་དག་པར་ལེན་ཏོ་ཞེས་ཡང་དག་པར་ལེན་ཏོ། །དེ་ལ་གཞི་ཇི་བཞིན་པ་ཉིད་ཀྱི་ཡོན་ཏན་ནི་འདི་དག་ཡིན་ཏེ། ནང་དུ་ཡང་དག་
[170a.6]འཇོག་ལ་བླ་མར་བཀུར་བ་དང་། དེ་ལྟར་རྙེད་པས་ཆོག་ཤེས་པ་དང་། དེ་ལ་ཆགས་པ་སྤོང་བ་དང་། བྱམས་པའི་སེམས་དང་། གཅིག་པུ་ཉིད་ལ་དགའ་བ་དང་། དད་པར་བྱ་བ་ཉིད་དང་། སྐྱེས་བུ་དམ་པའི་སྤྱོད་པ་ཉིད་དང་། ཡོ་བྱད་བསྙུངས་པའི་ཚུལ་ཅན་ཏེ། དེ་ལྟ་བུ་ལ་སོགས་པ་ནི་གཞི་ཇི་བཞིན་
[170a.7]པ་ཉིད་ཀྱི་ཡོན་ཏན་དག་ཡིན་ནོ། །གཞི་ཇི་བཞིན་པ་ནི་གང་ཡིན། གང་གིས་ནི་གཞི་ཇི་བཞིན་པ་ཉིད་འཇིག་ཅེ་ན། གཞི་ཇི་བཞིན་པ་ནི་བརྐམ་ཆགས་ཀྱི་གནས་མལ་སྤོང་བ་ཡིན་ཏེ། བརྐམ་ཆགས་ཀྱི་གནས་མལ་སྤོང་བ་ཞེས་བྱ་བ་ནི་སྔ་ན་འདུག་པ་བསླང་ནས་གནས་མལ་ལེན་པར་མི་བྱེད་དོ། །བརྐམ་
[170b]
[170b.1]ཆགས་ཀྱི་གནས་མལ་ལེན་པས་ནི་གཞི་ཇི་བཞིན་པ་ཉིད་འཇིག་གོ། །ཇི་ལྟར་ཅོག་པུ་པ་ཉིད་ཡང་དག་པར་ལེན་ཅེ་ན། ཉལ་ན་རྨུགས་པ་དང་གཉིད་དང་། ལེ་ལོའི་དབང་དུ་འགྲོ་བའི་ཉེས་དམིགས་ཀྱང་མཐོང་། །ཅོག་པུ་བ་ཉིད་ཀྱི་ཡོན་ཏན་དག་ཀྱང་མཐོང་ནས་འདི་སྐད་ཅེས་དེང་སླན་ཆད་
[170b.2]ཉལ་བ་སྤངས་ཏེ་ཅོག་པུ་པ་ཉིད་ཡང་དག་པར་ལེན་ཏོ་ཞེས་ཡང་དག་བར་ལེན་ཏོ། །དེ་ལ་ཅོག་པུ་པ་ཉིད་ཀྱི་ཡོན་ཏན་ནི་འདི་དག་ཡིན་ཏེ། ལེ་ལོའི་གཞི་ཡོངས་སུ་སྤོང་བ་དང་། ལུས་ལ་ཆགས་པ་དང་། སེར་སྣ་ཡོངས་སུ་སྤོང་བ་དང་། འཕྲེས་པའི་བདེ་བ་ལ་མ་ཆགས་པ་དང་། བརྩལ་བ་
[170b.3]ཉུང་བ་དང་། གཉིད་ཆུང་བ་དང་། རྣལ་འབྱོར་དང་མཐུན་པ་དང་། ལུས་ཀྱི་གནས་རྒྱ་སྐྱེ་བ་དང་། སྐྱེས་བུ་དམ་པའི་སྤྱོད་པ་ཉིད་དང་། ཡོ་བྱད་བསྙུངས་པའི་ཚུལ་ཅན་ཏེ་དེ་ལྟ་བུ་ལ་སོགས་པ་ནི་ཅོག་པུ་པ་ཉིད་ཀྱི་ཡོན་ཏན་དག་ཡིན་ནོ། །ཅོག་པུ་པ་ནི་གང་ཡིན། གང་གིས་ནི་ཅོག་པུ་པ་ཉིད་
[170b.4]འཇིག་ཅེ་ན། ཅོག་པུ་པ་ནི་ཉལ་བ་སྤོང་བ་ཡིན་ནོ། །ཉལ་བ་ཁས་ལེན་པས་ནི་ཅོག་པུ་པ་ཉིད་འཇིག་གོ། །དེ་ལ་ཕྱག་དར་ཁྲོད་པ་ཉིད་ཀྱི་སྐབས་ཕྱེ་བ་ནི་ཕྱག་དར་ཁྲོད་པ་ནར་མར་སྤྱོད་པ་ལ་གལ་ཏེ་ཁྱིམ་བདག་དག་གིས་ཆོས་གོས་གསོ་རས་སམ། རས་བལ་གྱི་རས་སམ་མོན་དར་རམ། ལ་བ་
[170b.5]དག་བྱིན་པར་གྱུར་ན་སྐབས་ཕྱེ་བས་བླང་བར་བྱ་སྟེ། ཕྱག་དར་ཁྲོད་པ་ཉིད་ཉམས་པར་མི་འགྱུར་རོ། །ཆོས་གོས་གསུམ་པ་ཉིད་ཀྱི་སྐབས་ཕྱེ་བ་ནི་ཁ་བསྐང་བའི་རེ་བ་ཡོད་ན་གོས་ལྷག་ཞག་བཅུར་འཆང་བ་དང་། གནས་མལ་སྲུང་བའི་ཕྱིར་གདིང་བ་དང་། སྟེང་དུ་གདིང་བ་དང་། ནད་ཀྱི་རྐྱེན་གཡན་
[170b.6]པ་དགབ་པ་དང་། གདོང་ཕྱིས་ཀྱི་གོས་དང་། དབྱར་གྱི་རས་ཆེན་དང་། གཞན་གྱི་རུང་བ་བཅོལ་བ་སྐབས་ཕྱེ་བས་བླང་བར་བྱ་སྟེ། ཆོས་གོས་གསུམ་པ་ཉིད་ཉམས་པར་མི་འགྱུར་རོ། །བསོད་སྙོམས་པ་ཉིད་ཀྱི་སྐབས་ཕྱེ་བ་ནི་བརྐོས་པའི་ཟས་དང་། ཚུལ་ཤིང་གི་ཟས་དང་། ཟླ་བ་ཕྱེད་པའི་
[170b.7]ཟས་དང་། གསོ་སྦྱོང་བ་དང་། དགེ་འདུན་གྱི་ཟས་དང་། གཙུག་ལག་ཁང་གི་ཟས་སྐབས་ཕྱེ་བས་ཡོངས་སུ་ལོངས་སྤྱོད་པར་བྱ་སྟེ། བསོད་སྙོམས་པ་ཉིད་འཇིག་པར་མི་འགྱུར་རོ། །འོན་ཀྱང་ཉེས་དམིགས་སུ་ལྟ་བས་ནི་ཡོངས་སུ་ལོངས་སྤྱད་པར་བྱའོ། །མཐར་ཆགས་སུ་རྒྱུ་བ་ཉིད་ཀྱི་
[171a]
[171a.1]སྐབས་ཕྱེ་བ་ནི་ཁྱིམ་གྱི་སྒོ་ནས་གླང་པོ་ཆེ་དང་། རྟ་འམ། ཁྱུ་མཆོག་གམ། ཁྱི་འམ། འཐབ་པའམ། ངོ་ཚ་བར་འགྱུར་བ་དེ་ལྟ་བུ་གཞན་མཐོང་ནས་ཐོད་རྒལ་དུ་རྒྱུ་བ་དང་། ཟས་བཟར་མི་རུང་བའི་ཁྱིམ་མམ། ལྷུང་བཟེད་ཁས་ཕུབ་པའམ། སློབ་བར་གྲགས་པའི་ཁྱིམ་
[171a.2]བརྒལ་ནས་རྒྱུ་བ་དང་། སློབ་དཔོན་ནམ། མཁན་པོའམ། གློ་བུར་བའམ། ལྷན་ཅིག་རྒྱུ་ན་སྐབས་ཕྱེ་བས་ཐོད་རྒལ་དུ་ཡང་རྒྱུ་བར་བྱ་སྟེ། མཐར་ཆགས་སུ་རྒྱུ་བ་ཉིད་ཉམས་པར་མི་འགྱུར་རོ། །སྟན་གཅིག་པ་ཉིད་ཀྱི་སྐབས་ཕྱེ་བ་ནི་ཟས་ཟ་བ་ན་གླང་པོ་ཆེའམ། རྟའམ། ཁྱུ་མཆོག་གམ།
[171a.3]སྦྲུལ་ལམ། ཐོག་འབབ་པའམ། མཁན་པོའམ། སློབ་དཔོན་ནམ། གློ་བུར་བ་འོངས་པ་མཐོང་ནས་གལ་ཏེ་ལངས་པར་འགྱུར་ན་སྐབས་ཕྱེ་བས་ཡང་བཟའ་བར་བྱ་སྟེ། སྟན་གཅིག་ཉིད་འཇིག་པར་མི་འགྱུར་རོ། །ཟས་ཆོག་པ་པ་ཉིད་དང་། ཟས་ཕྱིས་མི་ལེན་པ་ཉིད་ལ་ནི་སྐབས་ཕྱེ་བ་མེད་དོ། །
[171a.4]དགོན་པ་པ་ཉིད་ཀྱི་སྐབས་ཕྱེ་བ་ནི་བསྙེན་པར་རྫོགས་པར་ལས་ཀྱི་ཆེད་དམ། ལྟུང་བ་ལས་བསླང་བའི་ཆེད་དམ། ཆོས་མཉན་པའི་ཆེད་དམ། གསོ་སྦྱོང་ངམ། དགག་དབྱེའམ། ན་བའམ། ནད་པའི་བྱ་བའམ། མངོན་པར་མི་ཤེས་པའི་མདོ་ཀུན་ཆུབ་པར་བྱ་བའམ། གཞན་ཡང་དེ་ལྟ་
[171a.5]བུའི་རྐྱེན་ཡོད་ན་སྐབས་ཕྱེ་བས་གྲོང་མཐར་གནས་པར་བྱ་སྟེ་དགོན་པ་པ་ཉིད་འཇིག་པར་མི་འགྱུར་རོ། །ཤིང་དྲུང་པ་ཉིད་ཀྱི་སྐབས་ཕྱེ་བ་ནི་རྐྱེན་དེ་ལྟ་བུའམ། ཁྱིམ་དུ་ཞུགས་པ་ལས་ཆར་གྱིས་ནོན་ན། དེ་ཉིད་དུ་སྐྱ་རེངས་ཤར་ཡང་ཤིང་དྲུང་པ་ཉམས་པར་མི་འགྱུར་རོ། །དགོན་པ་པའི་སྐབས་ཕྱེ་བ་ཇི་སྙེད་པ་ནི་
[171a.6]ཤིང་དྲུང་བ་ཉིད་དང་། བླ་གབ་མེད་པ་ཉིད་དང་། དུར་ཁྲོད་པ་ཉིད་ལ་ཡང་བལྟ་བར་བྱའོ། །གཞི་ཇི་བཞིན་པ་ཉིད་ཀྱི་སྐབས་ཕྱེ་བ་ནི་རྐྱེན་དེ་ལྟ་བུ་ཡོད་ལ་གཞན་གྱི་གནས་མལ་རྙེད་ན་རྗེས་སུ་གནང་ངོ་། །ཅོག་པུ་པ་ལ་ནི་སྐབས་ཕྱེ་བ་མེད་དོ། །ཁ་ཅིག་ན་རེ་སྣའི་དཔྱད་བྱེད་ན་སྐབས་ཕྱེ་བར་བྱ་སྟེ། ཅོག་པུ་
[171a.7]བ་ཉིད་ཉམས་པར་མི་འགྱུར་རོ་ཞེས་ཟེར་རོ། །སྦྱངས་པའི་ཡོན་ཏན་བཅུ་གསུམ་པོ་དེ་དག་ནི་མདོར་བསྡུས་ན་བརྒྱད་ཁོ་ནར་འགྱུར་ཏེ། ཆོས་མངོན་པ་ལས་ཇི་སྐད་དུ་སྦྱངས་པའི་ཡོན་ཏན་ནི་བརྒྱད་དོ་ཞེས་འབྱུང་བ་ལྟ་བུའོ། །གལ་ཏེ་དེ་ཇི་ལྟ་བུ་ཡིན་ཞེ་ན། ཟས་ཆོག་པ་ཉིད་དང་། སྟན་གཅིག་པ་ཉིད་ནི་
[171b]
[171b.1]ཟས་ཕྱིས་མི་ལེན་པ་ཉིད་ཀྱི་ནང་དུ་འདུ་བར་འགྱུར་རོ། །དེ་ཅིའི་ཕྱིར་ཞེ་ན། བཟུང་བའི་མཐའ་པའི་བདག་ཉིད་ཀྱི་རང་སྐལ་གཅིག་ལེན་པ་ཡིན་ཏེ། དེ་ལྟ་བས་ན་ཟས་ཆོག་པ་པ་ཉིད་ཀྱི་ནང་དུ་འདུ་བར་འགྱུར་རོ། །ཡང་ལན་གཉིས་སུ་མི་ཟ་སྟེ། དེ་ལྟ་བས་ན་སྟན་གཅིག་པ་ཉིད་དུ་འདུ་བར་འགྱུར་རོ། །
[171b.2]ཤིང་དྲུང་པ་ཉིད་དང་། བླ་གབ་མེད་པ་ཉིད་དང་། དུར་ཁྲོད་པ་ཉིད་ནི་དགོན་པ་པ་ཉིད་ཀྱི་ནང་དུ་འདུ་བར་འགྱུར་རོ། །དེ་ཅིའི་ཕྱིར་ཞེ་ན། དགོན་པ་པ་ནི་དགོན་པར་སྤྱིལ་བུ་དང་། ཡང་ཐོག་ལ་སོགས་པ་བྱེད་ན་ལས་དགའ་བ་ཉིད་དང་། ཡོངས་སུ་འཛིན་པ་དང་། ཆགས་པ་ནི་བདག་གི་ཆ་མ་ཡིན་ནོ་སྙམ་ནས་
[171b.3]ཤིང་དྲུང་ངམ། བླ་གབ་མེད་པ་འམ། དུར་ཁྲོད་དུ་གནས་སོ། །དེ་ལྟ་བས་ན་བརྒྱད་ཁོ་ནར་འགྱུར་ལ། བརྒྱད་པོ་དེ་དག་ཀྱང་དགོན་པ་པ་ཉིད་དང་། ཕྱག་དར་ཁྲོད་པ་ཉིད་དང་། བསོད་སྙོམས་པ་ཉིད་དང་གསུམ་གྱིས་རྫོགས་པར་འགྱུར་རོ། །དེ་ལྟར་ན་སྦྱངས་པའི་སྒོ་གསུམ་རྫོགས་པར་བྱེད་ན།
[171b.4]སྦྱངས་པའི་ཡོན་ཏན་ཐམས་ཅད་རྫོགས་པར་འགྱུར་རོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་ཚེ་དང་ལྡན་པ་མཛེས་དགའ་བོལ་བརྟེན་ནས་དགའ་བོ་ནམ་ཞིག་དགོན་པ་དང་། ཕྱག་དར་ཁྲོད་པ་དང་། ངན་ངོན་གྱིས་འཚོ་ཞིང་འདོད་པ་རྣམས་ལ་ནི་ལྟ་བ་མེད་པ་མཐོང་ཞིག་གུ་ཞེས་གསུངས་སོ། །དེ་ལ་སྦྱངས་པའི་ཡན་ལག་
[171b.5]ནི་ཅི་ཞིག་ཡིན། སྦྱངས་པའི་ཆོས་ནི་དུ་ཞིག་ཡོད། ཅི་སྤྱོད་པའི་གང་ཟག་དག་ནི་སྦྱངས་པའི་ཡོན་ཏན་བསྟེན་པར་དགའ། སྦྱངས་པའི་ཡན་ལག་ནི་དུ་ཞིག །མཐར་ཐུག་པ་ནི་དུ་ཞིག །ཅི་སྦྱངས་པའི་དེ་ཉིད་སྦྱངས་པ་སྨྲ་བ་ཡང་དེ་ཡིན་ནམ་ཞེ་ན། དེ་ལ་སྦྱངས་པའི་ཡན་ལག་ཅེས་བྱ་བ་ནི་གཞི་བཅུ་
[171b.6]གསུམ་པོ་དེ་དག་གི་སྤོང་བ་གང་ཡིན་པ་དེ་ནི་སྦྱངས་པའི་ཡན་ལག་ཡིན་ནོ། །སྦྱངས་པའི་ཡོན་ཏན་ཅིར་བརྗོད་པར་བྱ་ཞེ་ན། དགེ་བ་བརྗོད་པར་བྱའོ། །སྦྱངས་པའི་ཆོས་དུ་ཞེ་ན། སྦྱངས་པའི་ཆོས་ནི་གཉིས་ཏེ་མ་ཆགས་པ་དང་། གཏི་མུག་མེད་པ་སྟེ། བཅོམ་ལྡན་འདས་ཀྱིས་ཇི་སྐད་དུ་ཕྱག་དར་ཁྲོད་པ་
[171b.7]གང་ཡིན་པ་དེ་ནི་འདོད་པ་ཆུང་བ་ཉིད་ལ་བརྟེན། ཆོག་ཤེས་པ་ཉིད་ལ་བརྟེན། ཡོ་བྱད་བསྙུངས་པ་ཉིད་ལ་བརྟེན། རབ་ཏུ་དབེེན་པ་ཉིད་ལ་བརྟེན། འདིས་ཆོག་པ་ཉིད་ལ་བརྟེན་ནས་ཕྱག་དར་ཁྲོད་པར་འགྱུར་རོ་ཞེས་གསུངས་པ་ལྟ་བུའོ། །རྣམ་པ་གཅིག་ཏུ་ན་མ་ཆགས་པས་རྗེས་སུ་གནང་བ་འཚམ་པར་བསྟེན་
[172a]
[172a.1]པས་འདོད་པའི་བསོད་སྙོམས་ཀྱི་རྗེས་སུ་བརྩོན་པ་སླུ་བ་སེལ་ལ་སྦྱངས་པའི་ཡོན་ཏན་གཏི་མུག་མེད་པ་ནི་ཡོ་བྱད་བསྙུངས་པར་འཚམ་པར་བསྟེན་པས་བདག་ཉིད་དུབ་པའི་རྗེས་སུ་བརྩོན་པའི་སླུ་བ་སེལ་ཏེ། དེ་ལྟ་བས་ན་སྦྱངས་པའི་ཆོས་ནི་གཉིས་ཏེ། མ་ཆགས་པ་དང་། གཏི་མུག་
[172a.2]མེད་པ་ཡིན་ནོ། །དེ་ལ་འདོད་པ་ཆུང་བ་ཉིད་དང་། ཆོག་ཤེས་པ་ཉིད་དང་། རབ་ཏུ་དབེན་པ་ཉིད་ནི་མ་ཆགས་པ་ཡིན་ནོ། །ཡོ་བྱད་བསྙུངས་པ་ཉིད་དང་། འདིས་ཆོག་པ་ཉིད་ནི་གཏི་མུག་མེད་པ་ཉིད་ཡིན་ནོ། །དེ་ལ་མ་ཆགས་པས་ནི་སྤང་བའི་གཞི་བཅུ་གསུམ་ལ་ཆགས་པ་སེལ་ལ། གཏི་མུག་
[172a.3]མེད་པས་ནི་གཞི་དེ་དག་ཉིད་ལ་ཉེས་དམིགས་མི་ཤེས་པ་སེལ་ཏོ། །ཡང་ཅི་སྤྱོད་པའི་གང་ཟག་རྣམས་སྦྱངས་པའི་ཡོན་ཏན་བསྟེན་པར་དགའ་ཞེ་ན། འདོད་ཆགས་སྤྱོད་པ་དང་། གཏི་མུག་སྤྱོད་པ་སྦྱངས་པའི་ཡོན་ཏན་བསྟེན་པར་དགའི། ཞེ་སྡང་སྤྱོད་པ་ནི་མ་ཡིན་ནོ། །ཅིའི་ཕྱིར་འདོད་ཆགས་སྤྱོད་
[172a.4]པ་དང་། གཏི་མུག་སྤྱོད་པ་སྦྱངས་པའི་ཡོན་ཏན་བསྟེན་གྱི། ཞེ་སྡང་སྤྱོད་པའི་མ་ཡིན་ཞེ་ན། སྦྱངས་པའི་ཡོན་ཏན་བསྟེན་པ་ནི། བསྒྲུབ་དགའ་བ་ཡིན་པས་འདོད་ཆགས་སྤྱོད་པ་བསྒྲུབ་དགའ་བ་ལ་བརྟེན་ནས་འདོད་ཆགས་རྣམ་པར་གནོན་པར་འགྱུར་ལ། གཏི་མུག་སྤྱོད་པ་ཡང་སྦྱངས་པའི་ཡོན་
[172a.5]ཏན་བསྟེན་པ་ཡང་དག་པར་བླངས་པ་ཡོ་བྱད་བསྙུངས་པ་ལ་བརྟེན་ནས་རྟག་ཏུ་བག་ཡོད་པར་འགྱུར་ཞིང་བག་ཡོད་ན་གཏི་མུག་རྣམ་པར་གནོན་པར་འགྱུར་རོ། །དེ་ལྟ་བས་ན་འདོད་ཆགས་སྤྱོད་པ་དང་། གཏི་མུག་སྤྱོད་པ་སྦྱངས་པའི་ཡོན་ཏན་བསྟེན་པར་དགའི། ཞེ་སྡང་སྤྱོད་པ་ནི་བསྒྲུབ་དགའ་ན་མཁྲིས་པའི་ནད་
[172a.6]ལ་དྲོད་བག་བྱིན་པ་བཞིན་དུ་ཕྱིར་ཞེ་སྡང་སྐྱེ་བར་འགྱུར་ཏེ། དེ་ལྟ་བས་ན་ཞེ་སྡང་སྤྱོད་པ་ནི་སྦྱངས་པའི་ཡོན་ཏན་བསྟེན་པར་དགའ་བ་ཡིན་ནོ། །གཞན་དག་ན་རེ་ཞེ་སྡང་སྤྱོད་པ་ནི་དགོན་པ་པ་ཉིད་དང་། ཤིང་དྲུང་པ་ཉིད་དག་གོ། །དེ་ཅིའི་ཕྱིར་ཞེ་ན། དགོན་པ་དང་། ཤིང་དྲུང་ན་གནས་ན་དེ་དག་ཏུ་མི་
[172a.7]འདོད་པས་གཙེ་བའི་ཉེས་པ་མེད་པའི་ཕྱིར་རོ་ཞེས་ཟེར་རོ། །སྦྱངས་པའི་ཡན་ལག་ནི་དུས་ཀྱི་མཐར་ཐུག་པའི་དུ་ཞིག་ཅེས་བྱ་བ་ནི། སྦྱངས་པའི་ཡན་ལག་གསུམ་པོ་ཤིང་དྲུང་པ་ཉིད་དང་། བླ་གབ་མེད་པ་ཉིད་དང་། དུར་ཁྲོད་པ་ཉིད་ཟླ་བ་བརྒྱད་ཀྱི་མཐར་ཐུག་པར་བྱ་སྟེ། དབྱར་ནི་གཡོགས་པར་གནས་
[172b]
[172b.1]པར་བཅོམ་ལྡན་འདས་ཀྱིས་གནང་ངོ་། །ཅི་སྦྱངས་པ་དེ་ཉིད་སྦྱངས་པར་སྨྲ་བ་ཡང་དེ་ཡིན་ནམ་ཞེས་བྱ་བ་ནི་སྦྱངས་པ་ཡིན་ལ། སྦྱངས་པ་སྨྲ་བ་ཡང་དེ་ཡིན་ནམ་ཞེས་བྱ་བ་ནི་སྦྱངས་པ་ཡིན་ལ་སྦྱངས་པ་སྨྲ་བ་ཡིན་པ་ཡང་ཡོད། སྦྱངས་པ་མ་ཡིན་ལ་སྦྱངས་པ་སྨྲ་བ་མ་ཡིན་པ་ཡང་ཡོད། སྦྱངས་པ་
[172b.2]ཡང་མ་ཡིན། སྦྱངས་པ་སྨྲ་བ་མ་ཡིན་པ་ཡང་ཡོད་དོ། །དེ་ལ་སྦྱངས་པ་ཡང་ཡིན། སྦྱངས་པ་སྨྲ་བ་ཡང་ཡིན་པ་ཡང་ཡོད་ཅེས་བྱ་བ་ནི། དགྲ་བཅོམ་པ་སྦྱངས་པའི་ཡོན་ཏན་ཡང་དག་པར་བླངས་པ་དང་ལྡན་པའོ། །སྦྱངས་པ་མ་ཡིན་ལ། སྦྱངས་པ་སྨྲ་བ་ཡིན་པ་ཡང་ཡོད་ཅེས་བྱ་བ་ནི་དགྲ་
[172b.3]བཅོམ་པ་སྦྱངས་པའི་ཡོན་ཏན་ཡང་དག་པར་བླངས་པ་དང་མི་ལྡན་པའོ། །སྦྱངས་པ་ཡིན་ལ་སྦྱངས་པ་སྨྲ་བ་མ་ཡིན་པ་ཡང་ཡོད་ཅེས་བྱ་བ་ནི། སློབ་པའམ། སོ་སོའི་སྐྱེ་བོ་སྦྱངས་པའི་ཡོན་ཏན་ཡང་དག་པར་བླངས་པ་དང་ལྡན་པའོ། །སྦྱངས་པ་ཡང་མ་ཡིན། སྦྱངས་པའི་ཡོན་ཏན་སྨྲ་བ་ཡང་མ་
[172b.4]ཡིན་པ་ཡོད་ཅེས་བྱ་བ་ནི། སློབ་པའམ། སོ་སོའི་སྐྱེ་བོ་སྦྱངས་པའི་ཡོན་ཏན་ཡང་དག་པར་བླངས་པ་དང་མི་ལྡན་པའོ། །སྦྱངས་པའི་ཡོན་ཏན་གྱི་མཚན་ཉིད་ཅི་ཡིན། མནོག་ནི་ཅི་ཡིན། ཉེ་བར་གནས་པ་ནི་ཅི་ཞེ་ན་སྦྱངས་པའི་ཡོན་ཏན་གྱི་མཚན་ཉིད་ནི་འདོད་པ་ཆུང་བ་ཉིད་དོ། །མནོག་ནི་ཆོག་ཤེས་
[172b.5]པ་ཉིད་དོ། །ཉེ་བར་གནས་པ་ནི་ཡོ་བྱད་བསྙུངས་པའོ། །རྣམ་པ་གཅིག་ཏུ་མཚན་ཉིད་ནི་མ་འབགས་པའོ། །མནོག་ནི་ཉེས་དམིགས་མེད་པའོ། །ཉེ་བར་གནས་པ་ནི་བརྩོན་པ་མི་འདོར་བའོ། །སྦྱངས་པའི་ཡོན་ཏན་གྱི་ཐོག་མ་ནི་གང་ཡིན། བར་མ་ནི་གང་ཡིན། ཐ་མ་ནི་གང་ཡིན་ཞེ་ན་སྦྱངས་པའི་
[172b.6]ཡོན་ཏན་གྱི་ཐོག་མ་ནི་ཡང་དག་པར་ལེན་པའོ། །བར་མ་ནི་སྟེན་པའོ། །ཐ་མ་ནི་རབ་ཏུ་དགའ་བའོ། །རྣམ་པར་གྲོལ་བའི་ལམ་ལས་སྦྱངས་པའི་ཡོན་ཏན་བསྟན་པ་ཞེས་བྱ་བ་སྟེ་ཀུན་ནས་བཏུས་པ་གསུམ་པ་རྫོགས་སོ།། །།རྒྱ་གར་གྱི་མཁན་པོ་བིཌྱཱ་ཀ་ར་པྲ་བྷ་དང་། ཞུ་ཆེན་གྱི་ལོ་ཙཱ་
[172b.7]བ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། {T4144}༄༅༅། །རྒྱ་གར་སྐད་དུ། སུ་ཝཎྜི་ཝཎྜི་ཨ་བ་དཱ་ནཾ། བོད་སྐད་དུ། གསེར་མདོག་གི་རྟོགས་པ་བརྗོད་པ། དཀོན་མཆོག་གསུམ་ལ་ཕྱག་འཚལ་ལོ། །འདི་ལྟར་རྗེས་སུ་ཐོས་ཏེ། གནས་
[173a]
[173a.1]བརྟན་འོད་སྲུངས་ཆེན་པོ་ཡོངས་སུ་མྱ་ངན་ལས་འདས་ནས་གནས་བརྟན་ཀུན་དགའ་བོ་བདག་ཉིད་ཆེ་བ། གནས་བརྟན་ཤ་ར་དྭ་ཏིའི་བུ་དང་། ཤེས་རབ་མཉམ་པ། དེ་བཞིན་གཤེགས་པ་བཞིན་དུ་སྙིང་རྗེ་ཆེན་པོས་སེམས་ཤིང་། ཡུལ་དང་། གྲོང་ཁྱེར་དང་། གྲོང་
[173a.2]རྡལ་དང་། ཚོང་འདུས་ལ་སོགས་པ་དེ་དང་དེར་གདུལ་བྱ་དེ་དང་དེ་ཐབས་ཀྱི་བྱེ་བྲག་དེ་དང་དེ་དག་གིས་འདུལ་བར་གྱུར་ཏོ། །ཅི་ཙམ་ན་དུས་གཞན་ཞིག་གི་ཚེ་གདུལ་བྱའི་དབང་གིས་སེམས་ཅན་བྱེ་བ་བརྒྱ་སྟོང་དཔག་ཏུ་མེད་པ་ལ་དམ་པའི་ཆོས་སྟོན་པའི་བདུད་རྩིའི་ཆར་འབེེབས་པས་ཡང་དག་པར་ཚིམ་པར་
[173a.3]བྱེད་ཅིང་། ཡངས་པ་ཅན་གྱི་གནས་ཨ་མྲ་སྲུང་བའི་ཚལ་གང་ན་བ་ན་གནས་སོ། །ཡང་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ན། དེད་དཔོན་ཉི་མ་ཞེས་བྱ་བ། ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ་རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་
[173a.4]གྱིས་འགྲན་པ་ཞིག་གནས་ཏེ། དེར་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེ་རྩེ་ཞིང་དགའ་ལ་དགའ་མགུར་སྤྱོད་ཀྱང་བུ་ཡང་མེད་བུ་མོ་ཡང་མེད། དེ་བུ་མེད་པས་བུ་ཤིན་ཏུ་འདོད་པས་ཡོངས་སུ་གདུངས་ཤིང་འདུག་པ་
[173a.5]ན་སུམ་ཅུ་རྩ་གསུམ་གྱི་ལྷའི་ནང་ན་ལྷའི་བུ་བསོད་ནམས་ཀྱི་མཐུ་ཆེན་པོ་དང་ལྡན་པ་ཞིག་ལ་འཆི་བའི་ལྟས་རྣམ་པ་ལྔ་བྱུང་བར་གྱུར་པ་དང་། སངས་རྒྱས་འབྱུང་བས་བརྒྱན་པའི་འཇིག་རྟེན་ལ་བལྟས་ནས། མྱ་ངན་ལས་འདས་པ་ལ་མངོན་པར་དགའ་བས་མིའི་ནང་དུ་མཚམས་སྦྱར་བར་འདོད་པ་དང་། ལྷའི་དབང་པོ་
[173a.6]བརྒྱ་བྱིན་གྱིས་ལྷའི་བུ་དེ་འཆི་འཕོ་བ་མཐོང་ཞིང་། སངས་རྒྱས་འབྱུང་བས་བརྒྱན་པའི་འཇིག་རྟེན་གྱི་ཁམས་ལ་བལྟས་ནས་མྱ་ངན་ལས་འདའ་བར་མངོན་པར་འདོད་པས་མི་རྣམས་ཀྱི་ནང་དུ་ཉིང་མཚམས་སྦྱོར་བར་འདོད་པ་ཡང་མཐོང་ངོ་། །མཐོང་ནས་ཀྱང་ལྷའི་བུ་དེའི་ཐད་དུ་སོང་སྟེ་དེ་སྐད་ཅེས་སྨྲས་སོ། །གྲོགས་
[173a.7]པོ་ཁྱེད་མི་རྣམས་ཀྱི་ནང་དུ་ཉིང་མཚམས་སྦྱོར་བར་འདོད་ན་རྒྱལ་པོའི་ཁབ་ཀྱི་གྲོང་ཁྱེར་དེ་ན་དེད་དཔོན་ཉི་མའི་ཆུང་མ་ཡོད་པའི་མངལ་དུ་ཉིང་མཚམས་སྦྱོར་ཅིག །དེས་སྨྲས་པ། ཀཽ་ཤི་ཀ་དེད་དཔོན་དེ་ནི་དད་པ་མེད་པ་སྟེ། དེ་ལ་ནི་སངས་རྒྱས་ཀྱི་བསྟན་པ་ལ་རབ་ཏུ་དད་པ་མེད་དོ། །བརྒྱ་བྱིན་གྱིས་སྨྲས་པ།
[173b]
[173b.1]གྲོགས་པོ་ཉིང་མཚམས་སྦྱོར་ཅིག་དང་། ཇི་ལྟར་དེད་དཔོན་དེ་སངས་རྒྱས་ཀྱི་བསྟན་པ་ལ་མངོན་པར་དད་པ་དེ་ལྟར་ངས་བྱའོ། །ལྷའི་བུས་སྨྲས་པ། ཀཽ་ཤི་ཀ་གལ་ཏེ་དེད་དཔོན་ཆུང་མ་དང་བཅས་པར་ཇི་སྲིད་འཚོའི་བར་དུ་དཀོན་མཆོག་གསུམ་ལ་སྐྱབས་སུ་འགྲོ་ན་དེ་ལྟ་ན་ནི་དེད་དཔོན་དེའི་ཆུང་མའི་མངལ་དུ་ཉིང་མཚམས་སྦྱོར་
[173b.2]བར་བྱའོ། །དེ་ནས་ལྷའི་དབང་པོ་བརྒྱ་བྱིན་སུམ་ཅུ་རྩ་གསུམ་ནས་མི་སྣང་བར་གྱུར་ཏེ། རྒྱལ་པོའི་ཁབ་ཀྱི་གྲོང་ཁྱེར་དུ་དེད་དཔོན་ཉི་མའི་ཁྱིམ་གྱི་སྟེང་གི་ཁང་གི་གཞི་ལ་གནས་པར་གྱུར་པ་དང་། ལྷའི་དབང་པོ་བརྒྱ་བྱིན་གྱི་ཁ་དོག་གི་མཐུས་ཁྱིམ་དེ་ཐམས་ཅད་ལྷའི་སྣང་བས་སྣང་བར་བྱས་སོ། །དེད་དཔོན་ཉི་མས་
[173b.3]ལྷའི་སྣང་བ་དེ་མཐོང་ཞིང་བལྟས་ནས་ཡང་ངོ་མཚར་གྱིས་མིག་གདངས་ཏེ་ཕྱོགས་བཞིར་ལྟ་བར་བསམས་པ་དང་། ཅི་ཙམ་ན་ལྷའི་དབང་པོ་བརྒྱ་བྱིན་མཐོང་ནས་ཡང་མྱུར་བ་ཉིད་དུ་དེའི་རྐང་པ་གཉིས་ལ་ཕྱག་བྱས་ཏེ་སྨྲས་པ། གང་ཁྱེད་བདག་གི་ཁང་པར་བྱོན་པས་ཁང་པ་འདི་ལྟར་བྱས་པ་ནི་རྙེད་པ་ཤིན་ཏུ་ལེགས་
[173b.4]པར་རྙེད་དོ། །ཁྱེད་འདིར་བྱོན་པའི་དགོངས་པ་གང་ཡིན་པ་གསུངས་ཤིག །ལྷའི་དབང་པོ་བརྒྱ་བྱིན་གྱིས་སྨྲས་པ། དེད་དཔོན་ཁྱེད་ནི་བུ་མེད་དེ་བུ་ཡོད་པར་མངོན་པར་དགའ་ན་ཆུང་མ་དང་བཅས་པར་དེང་ནས་བཟུང་སྟེ། ཇི་སྲིད་འཚོའི་བར་དུ་དཀོན་མཆོག་གསུམ་ལ་སྐྱབས་སུ་སོང་ཤིག །ཁྱོད་ལ་བུ་ཡོད་
[173b.5]པར་འགྱུར་རོ། །དེད་དཔོན་ཉི་མ་དགའ་བ་དང་མགུ་བ་དང་རབ་ཏུ་དགའ་བའི་ཡིད་ཀྱིས་སྨྲས་པ། ལྷའི་དབང་པོ་ཁྱོད་ཀྱིས་ཇི་ལྟར་བཀའ་སྩལ་པ་དེ་ལྟར་འཚལ་ཏེ། བདག་ཆུང་མ་དང་བཅས་པར་དེང་ནས་བཟུང་སྟེ། ཇི་སྲིད་འཚོའི་བར་དུ་དཀོན་མཆོག་གསུམ་ལ་སྐྱབས་སུ་མཆིའོ། །དེ་ནས་ལྷའི་དབང་པོ་བརྒྱ་
[173b.6]བྱིན་གྱིས་དེད་དཔོན་ཉི་མ་ཆུང་མ་དང་བཅས་པ་སྐྱབས་སུ་འགྲོ་བ་ལ་བཀོད་ནས་རྒྱལ་པོའི་ཁབ་ནས་མི་སྣང་བར་གྱུར་ཏེ། སུམ་ཅུ་རྩ་གསུམ་གྱི་གནས་སུ་ལྷའི་བུ་དེའི་གཞལ་ཡས་ཁང་དུ་འཁོད་པར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་དེ་ལ་གཏམ་གྱི་རྣམ་པ་རྒྱས་པར་སྨྲས་པ་དང་། ཇི་ཙམ་
[173b.7]ན་ལྷའི་བུ་དེ་སུམ་ཅུ་རྩ་གསུམ་གྱི་ལྷའི་གནས་ནས་འཕོས་ཏེ། རྒྱལ་པོའི་ཁབ་ཀྱི་གྲོང་དུ་དེད་དཔོན་ཉི་མའི་ཆུང་མའི་མངལ་དུ་ཞུགས་པར་གྱུར་ཏོ། །དེ་གང་གི་ཚེ་དེའི་མངལ་དུ་འཕོས་པ་དེ་ཉིད་ཀྱི་ཚེ་དེད་དཔོན་གྱི་ཆུང་མའི་ལུས་ལ་ཁ་དོག་ཤིན་ཏུ་རྒྱས་པ་དང་། དྲི་ཡིད་དུ་འོང་བ་བྱུང་བར་གྱུར་ཏོ། །བུད་མེད་མཁས་པ་
[174a]
[174a.1]རྣམས་ལ་ནི་ཐུན་མོང་མ་ཡིན་པ་ཆོས་རྣམ་པ་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་ཡང་ཤེས་ཤིང་། མ་ཆགས་པར་ཡང་ཤེས་པ་དང་། དུས་ཤེས་ཤིང་ས་བོན་ཤེས་པ་དང་། མངལ་དུ་འཇུག་པ་ཤེས་པ་དང་། གང་ལས་མངལ་དུ་འཇུག་པ་དེ་ཤེས་
[174a.2]པ་དང་། ཁྱེའུར་གྱུར་པར་ཤེས་ཤིང་བུ་མོར་གྱུར་པ་ཤེས་ཏེ། གལ་ཏེ་ཁྱེའུར་གྱུར་ན་ནི་དཀུ་གཡས་པར་རྟེན་ཅིང་གནས་ལ། གལ་ཏེ་བུ་མོར་གྱུར་ན་ནི་དཀུ་གཡོན་པར་རྟེན་ཅིང་གནས་སོ། །དེ་ནས་དགའ་བ་དང་མཆོག་ཏུ་དགའ་བའི་ཡིད་ཀྱིས་ཁྱོ་ལ་སྨྲས་པ། རྗེའི་སྲས་དགྱེས་པ་བསྐྱེད་དུ་གསོལ།
[174a.3]བདག་སེམས་ཅན་དང་ལྡན་པར་གྱུར་ཏེ། ཇི་ནས་ཀྱང་བདག་གི་དཀུ་གཡས་པར་རྟེན་ཅིང་གནས་པ་ལས་ན་ངེས་པར་ཁྱེའུར་འགྱུར་རོ། །དེས་དེ་ཐོས་པ་དང་དེ་ཡང་ཤིན་ཏུ་དགའ་བ་དང་མཆོག་ཏུ་དགའ་བའི་ཡིད་ཀྱིས་རོ་སྟོད་བཏེག་ནས་ལག་པ་གཡས་པ་བརྐྱང་སྟེ། ཆེད་དུ་བརྗོད་པ་ཆེད་དུ་བརྗོད་པ། ཀྱེ་
[174a.4]མ་འོངས་ཀྱང་ཡུན་རིང་དུ་མངོན་པར་འདོད་པའི་བུའི་གདོང་ལ་བལྟ་བར་འགྱུར་ལ། སྐྱེས་ཤིང་བྱུང་ནས་ཀྱང་ངའི་བྱ་བ་བྱས་ཏེ། དེ་རིགས་རྒྱུད་ཕུན་སུམ་ཚོགས་ཤིང་ངའི་རིགས་ཡུན་རིང་དུ་གནས་པར་བྱེད་པ་དང་། བདག་ཅག་ཤི་ཞིང་དུས་བྱས་ནས་ཀྱང་ནོར་ཉུང་དུའམ་མང་པོ་སྦྱིན་པར་ནི་གཏོང་། བསོད་ནམས་
[174a.5]ནི་བྱས་ནས་འདི་དེ་གཉིས་གང་དང་གང་དུ་སྐྱེས་པའི་རྗེས་བཞིན་དུ་འགྲོ་བར་གྱུར་ཅིག་ཅེས་བདག་གི་མིང་གིས་ཡོན་བསྔོ་བར་འགྱུར་རོ། །འདི་ནི་སེམས་ཅན་དང་ལྡན་པར་གྱུར་ཏོ་སྙམ་དུ་ཤེས་ནས་སྟེང་གི་ཁང་བཟངས་ཀྱི་གཞི་ལ་ཉམ་ང་བ་མེད་པར་འཇོག་སྟེ། དེའི་མངལ་ཡོངས་སུ་སྨིན་པར་བྱ་བའི་ཕྱིར་
[174a.6]ཡིད་དུ་མི་འོང་བའི་སྒྲ་ཅུང་ཟད་ཀྱང་མི་ཐོས་ཤིང་གྲང་བ་དང་གྲང་བའི་ཡོ་བྱད་དང་དྲོ་བ་དང་དྲོ་བའི་ཡོ་བྱད་དང་། སྨན་པས་བསྟན་པའི་ཁ་ཟས་ཧ་ཅང་ཁ་བ་མ་ཡིན་པ་དང་། ཧ་ཅང་སྐྱུར་བ་མ་ཡིན་པ་དང་། ཧ་ཅང་ལན་ཚྭ་ཆེ་བ་མ་ཡིན་པ་དང་། ཧ་ཅང་མངར་བ་མ་ཡིན་པ་དང་། ཧ་ཅང་ཚ་བ་མ་ཡིན་
[174a.7]པ་དང་། ཧ་ཅང་བསྐ་བ་མ་ཡིན་པ་སྟེ། ཁ་བ་དང་། སྐྱུར་བ་དང་། ལན་ཚྭ་ཆེ་བ་དང་། མངར་བ་དང་། ཚ་བ་དང་། བསྐ་བ་སྤངས་པའི་ཁ་ཟས་ཀྱིས་བསྙེན་བཀུར་བྱེད་ཅིང་དོ་ཤལ་དང་། སེ་མོ་དོས་ལུས་བརྒྱན་ནས་ལྷའི་བུ་མོ་དགའ་བའི་ཚལ་ན་རྒྱུ་བ་བཞིན་དུ་ཁྲིའུ་ནས་ཁྲིའུ་དང་། ཁྲི་ནས་
[174b]
[174b.1]ཁྲིར་རྒྱུ་སྟེ། འོག་གི་ས་གཞི་ལ་མི་འབབ་པོ། །དེ་ཟླ་བ་བརྒྱད་དམ་དགུ་ལོན་པ་དང་། ཁྱེའུ་གཟུགས་བཟང་བ། བལྟ་ན་སྡུག་པ་མཛེས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། གསེར་བཙོ་མའི་མདོག་གི་ཁ་དོག་ཤིན་ཏུ་རྒྱས་པ་དང་ལྡན་པ། འགྲོ་བ་
[174b.2]ཐམས་ཅད་ཀྱི་ཡིད་དང་མིག་འཕྲོག་པ། གསེར་གྱི་མདོག་ཅན་གྱི་གོས་ཀྱིས་ལུས་དཀྲིས་པ། དེའི་ཡན་ལག་ཐམས་ཅད་ནས་ཙན་དན་གྱི་དྲི་འབྱུང་བ། དེའི་ཁ་ནས་ཨུཏྤ་ལའི་དྲི་འབྱུང་བ། དེ་སྐྱེས་པ་ཙམ་གྱིས་ཁྱིམ་དེར་གོས་ཀྱི་ཆར་དང་། མེ་ཏོག་ཀར་ནི་ཀ་རིའི་ཆར་བབ་སྟེ། གོས་དེ་དག་ཀྱང་གསེར་གྱི་མདོག་
[174b.3]ཅན་ཡིན་ནོ། །དེ་ནས་ངོ་མཚར་རྨད་དུ་བྱུང་བ་དེ་དང་དེའི་གཟུགས་ཕུན་སུམ་ཚོགས་པ་རྒྱ་ཆེན་པོ་མཐོང་བ་དང་། དེད་དཔོན་ཉི་མའི་ཆུང་མ་དང་འཁོར་རྣམས་ཤིན་ཏུ་ངོ་མཚར་སྐྱེས་པར་གྱུར་ཏོ། །དེད་དཔོན་ཉི་མ་སྒོའི་ཕྱི་རོལ་ན་གནས་པ་ལ། དེད་དཔོན་ཁྱེད་ཀྱི་སྲས་བལྟམ་པ་ཙམ་གྱིས་དགྱེས་པ་སྐྱེད་ཅིག་
[174b.4]ཅེས་གོ་བར་བྱས་པ་དང་། དེ་དགའ་བ་དང་མགུ་བ་དང་། རབ་ཏུ་དགའ་བའི་ཡིད་ཀྱིས་ཁྱིམ་དུ་ཞུགས་པ་དང་། ཇི་ཙམ་ན་གཞོན་ནུ་གཟུགས་ཤིན་ཏུ་བཟང་བ། བལྟ་ན་སྡུག་པ། མཛེས་པ། ཡན་ལག་དང་། ཉིད་ལག་ཐམས་ཅད་དང་ལྡན་པ། གསེར་བཙོ་མའི་ཁ་དོག་ལྟ་བུས་མདོག་རྒྱས་པ་དང་
[174b.5]ལྡན་པ། འགྲོ་བ་ཐམས་ཅད་ཀྱི་མིག་དང་ཡིད་འཕྲོག་པ། གསེར་གྱི་མདོག་ཅན་གྱི་གོས་ཀྱིས་ལུས་དཀྲིས་པ་འདིའི་ཡན་ལག་ཐམས་ཅད་ནས་ཙན་དན་གྱི་དྲི་འབྱུང་བ། དེའི་ཁ་ནས་ཨུཏྤ་ལའི་དྲི་འབྱུང་བ། དེ་སྐྱེས་པ་ཙམ་གྱིས་ནི་ཁྱིམ་དེར་གོས་ཀྱི་ཆར་དང་། མེ་ཏོག་ཀར་ནི་ཀ་རིའི་ཆར་བབ་སྟེ། གོས་དེ་
[174b.6]དག་ཀྱང་གསེར་གྱི་ཁ་དོག་ཅན་དུ་མཐོང་ངོ་། །མཐོང་ནས་ཀྱང་དགའ་བ་དང་མགུ་བ་དང་རབ་ཏུ་དགའ་བ་སྐྱེས་ཏེ། ཆེད་དུ་བརྗོད་པ་དག་ཆེད་དུ་བརྗོད་པ། ཨེ་མའོ་རྙེད་པ་རྣམས་ནི་ཤིན་ཏུ་རྙེད་དེ། ཨེ་མའོ་གང་འདི་ལྟ་བུའི་བསོད་ནམས་ཀྱི་མཐུ་ཆེན་པོ་དང་ལྡན་པའི་བུ་སྐྱེས་པ་ནི་བདག་གི་ཡིད་ལ་བསམ་པ་
[174b.7]ཡོངས་སུ་རྫོགས་པར་གྱུར་ཏོ་ཞེས་དགའ་བ་དང་མགུ་བ་དང་རབ་ཏུ་དགའ་བའི་ཡིད་ཀྱིས་གོས་དེ་རྣམས་དགེ་སྦྱོང་དང་། བྲམ་ཟེ་དང་། ཕོངས་པ་དང་། ཕོངས་ཤིང་སྡུག་བསྔལ་བ་དང་། མཛའ་བཤེས་དང་། གཉེན་དང་། སྣག་གི་གཉེན་མཚམས་྅ལ་བྱིན་ཏེ། གཞོན་ནུ་དེའི་བཙས་པའི་བཙས་སྟོན་
[175a]
[175a.1]བདུན་གསུམ་ཉི་ཤུ་རྩ་གཅིག་གི་བར་དུ་རྒྱ་ཆེར་བྱས་ནས་གྲོགས་པོ་དག་ཁྱེའུ་འདིའི་མིང་ཅིར་གདགས་ཞེས་མིང་འདོགས་པར་བྱེད་པ་དང་། ཉེ་དུ་རྣམས་ཀྱིས་སྨྲས་པ། གཞན་ནུ་འདི་གསེར་བཙོ་མའི་མདོག་གིས་ཤིན་ཏུ་རྒྱས་པ་དང་ལྡན་ཏེ། དེ་བས་ན་གཞོན་ནུ་འདིའི་
[175a.2]མིང་གསེར་མདོག་ཅེས་གདགས་པར་བྱའོ་ཞེས་ཏེ། དེ་ལ་གསེར་མདོག་ཅེས་བྱ་བའི་མིང་བཏགས་སོ། །གཞོན་ནུ་གསེར་མདོག་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེད་གྲོགས་ཀྱི་མ་མ་གཉིས་ཏེ།
[175a.3]མ་མ་བརྒྱད་ལ་རྗེས་སུ་གཏད་ནས་དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་ཉིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྐྱེད་པར་བྱེད། སྲིང་བར་བྱེད་ཅིང་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །དེ་
[175a.4]གང་གི་ཚེ་ཆེན་པོར་གྱུར་པ་དེའི་ཚེ། ཡི་གེ་དང་། གྲངས་དང་། རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་ལ་ཉེ་བར་ཞུགས་ཤིང་བརྟག་པ་བརྒྱད་པོ། གཞི་བརྟག་པ་དང་། གོས་བརྟག་པ་དང་། རིན་པོ་ཆེ་བརྟག་པ་དང་། ཤིང་རྟ་བརྟག་པ་དང་།
[175a.5]གླང་པོ་ཆེ་བརྟག་པ་དང་། རྟ་བརྟག་པ་དང་། གཞོན་ནུ་བརྟག་པ་དང་། གཞོན་ནུ་མ་བརྟག་པ་དང་། འབྱེད་པ་དང་། ཀློག་པ་ལ་མཁས་པ་དང་། གཡེར་པོར་གྱུར་ཏོ། །དེ་ཡང་བསོད་ནམས་ཀྱི་སྐལ་བ་ཆེན་པོ་དང་ལྡན་པ། བསམ་པ་དགེ་བ། བདག་དང་གཞན་ལ་ཕན་པར་ཞུགས་
[175a.6]པ། སྙིང་རྗེ་དང་ལྡན་པ། བདག་ཉིད་ཆེན་པོ་ཆོས་འདོད་པ། སྐྱེ་དགུ་རྣམས་ལ་མཉེས་གཤིན་པ་སྟེ། དེ་བསྟན་བཅོས་ཐམས་ཅད་ཀློག་པ་དང་། དེ་ཤིན་ཏུ་བསོད་ནམས་ཀྱི་མཐུ་ཆེ་བ་ཡིན་པས་གོས་ལ་སོགས་པ་དང་ནོར་རྣམས་གང་བསམས་པ་དང་གང་གསོལ་བ་དེ་ཐམས་ཅད་དེ་བཞིན་
[175a.7]དུ་འབྱོར་པར་འགྱུར་མོད་ཀྱི། བདག་ནི་འདི་ལྟར་བསོད་ནམས་ཀྱི་མཐུ་ཆེན་པོ་དང་ལྡན་ནོ་སྙམ་དུ་མི་སེམས་སོ། །དེད་དཔོན་ཉི་མ་འདི་སྙམ་དུ་བདག་དཀོན་མཆོག་གསུམ་ལ་སྐྱབས་སུ་འགྲོ་བའི་དྲིན་གྱིས་བུ་སྐྱེས་སོ་ཞེས་བཅོམ་ལྡན་འདས་ཀྱི་བསྟན་པ་ལ་ཤིན་ཏུ་ཡང་མངོན་པར་དད་ནས་
[175b]
[175b.1]དེ་དུས་དང་དུས་སུ་བཅོམ་ལྡན་འདས་ཀྱི་བསྟན་པ་ལ་བྱ་བ་བྱེད་པར་གྱུར་ཏོ། །ཡང་དེའི་ཚེ་དེའི་དུས་ན་རྒྱལ་པོའི་ཁབ་ཀྱི་གྲོང་ཁྱེར་དུ་དེད་དཔོན་དྲི་མ་མེད་པ་ཞེས་བྱ་བ་རྒྱ་མཚོ་ནས་གྲུ་གྲུབ་སྟེ། སླར་འོངས་ནས་དེས་བཅོམ་ལྡན་འདས་དགེ་སློང་སྟོང་ཉིས་བརྒྱ་ལྔ་བཅུས་བསྐོར་བ་ལ་བཤོས་དྲངས་ཏེ། དགེ་
[175b.2]སློང་རེ་རེ་ཞིང་ཆོས་གོས་གསུམ་གསུམ་ཕུལ་བ་དང་། སྐྱེས་བུ་དམ་པ་འདིའི་རྒྱ་མཚོ་ཆེན་པོར་ཞུགས་པ་དང་དེད་དཔོན་གྱི་སྒྲ་ནི་འབྲས་བུ་དང་བཅས་པར་གྱུར་ཏེ། འདི་ལྟར་བཅོམ་ལྡན་འདས་ཀྱི་བསྟན་པ་ལ་བྱ་བ་བྱས་སོ་ཞེས་བྱ་བའི་གྲགས་པས་འཇིག་རྟེན་ཐམས་ཅད་དུ་ཁྱབ་པར་གྱུར་པ་དང་། དེད་
[175b.3]དཔོན་ཉི་མས་ཐོས་པ་ན་འགྲན་འདོད་པར་གྱུར་ཏེ། ང་ཡང་རྒྱ་མཚོ་ཆེན་པོར་ཞུགས་ལ་གལ་ཏེ་དེ་ནས་གྲུ་ལེགས་པར་གྲུབ་ནས་བཅོམ་ལྡན་འདས་ལ་ཞུས་ཏེ། བཅོམ་ལྡན་འདས་ཀྱི་ཉན་ཐོས་འཛམ་བུའི་གླིང་ན་ཇི་སྙེད་ཅིག་གནས་པ་དེ་རྣམས་གཅིག་ཏུ་བསྡུས་ནས་ཟས་བསོད་པ་རྣམས་ཀྱིས་ཚིམ་
[175b.4]པར་བྱས་ལ་དགེ་སློང་རེ་རེ་ཞིང་རིན་པོ་ཆེའི་ཆོས་གོས་གསུམ་གསུམ་གྱིས་དགའ་བར་བྱའོ་སྙམ་ནས་དེ་ཆུང་མ་ལ་གཏམ་དེ་སྨྲས་པ་དང་། དེས་སྨྲས་པ། བདག་པོ་ཁྱོད་ཀྱིས་ཡང་དག་པར་རྟོག་པར་འབྱོར་པར་གྱུར་ཅིང་ཡིད་ལ་རེ་བ་རྫོགས་པར་གྱུར་ཅིག །དེ་ནས་དེད་དཔོན་ཉི་མས་རྒྱལ་པོའི་
[175b.5]ཁབ་ཀྱི་གྲོང་ཁྱེར་དུ་ལན་གསུམ་གྱི་བར་དུ་དྲིལ་བསྒྲགས་ཏེ། ཚོང་པ་ལྔ་བརྒྱས་ཡོངས་སུ་བསྐོར་ནས་རྒྱ་མཚོ་ཆེན་པོར་ཞུགས་སོ། །དེ་རྒྱ་མཚོ་ཆེན་པོ་དེར་ཞུགས་པ་དང་། བཅོམ་ལྡན་འདས་ཡོངས་སུ་མྱ་ངན་ལས་འདས་སོ། །དེ་དེ་ཉིད་ན་གནས་པའི་ཚེ་གནས་བརྟན་འོད་སྲུངས་ཆེན་པོ་ཡང་
[175b.6]ཡོངས་སུ་མྱ་ངན་ལས་འདས་སོ། །ཇི་ཙམ་ན་དུས་གཞན་ཞིག་ན་གཞོན་ནུ་གསེར་མདོག་འོད་མའི་ཚལ་དུ་སོང་བ་དང་། དེ་ནས་དགེ་སློང་ཞིག་མི་རྟག་པ་ཉིད་དང་རབ་ཏུ་ལྡན་པའི་ཚིགས་སུ་བཅད་པ་འདོན་པར་གྱུར་ཏེ། ཚེ་འདི་ཉིད་དང་མཚན་མོ་དང་། །འགྲོ་བ་དང་ནི་ལྡོག་པ་དང་། །ཆུ་
[175b.7]ཀླུང་ཆེན་པོའི་རྒྱུན་བཞིན་དུ། །ཕྱིར་མི་ལྡོག་པར་འགྲོ་བར་འགྱུར། །ཆུ་ཆུང་གི་ནི་ཉ་ལྟ་བུར། །གང་ཞིག་ཉིན་མཚན་འདའ་བ་ཡི། །ཚེ་ནི་ཤིན་ཏུ་ཐུང་གྱུར་ན། །དེ་ལ་བྱ་དགར་ཅི་ཞིག་ཡོད། །གསོན་མཐའ་འཆི་བ་ཡིན་པས་ན། །ལུས་འདི་ཡོངས་སུ་རྒས་པ་དང་། །ནད་ཀྱི་ཚད་ནི་
[176a]
[176a.1]མྱུར་འཇིག་ཅིང་། །རྣག་གི་ཚོགས་ཀྱང་འཇིག་པར་འགྱུར། །ཀྱེ་མ་ལུས་འདི་མི་ཐོགས་པར། །སྟོང་ཞིང་རྣམ་ཤེས་དང་བྲལ་ནས། །དུར་ཁྲོད་བོར་བའི་མགལ་དུམ་ལྟར། །སའི་སྟེང་དུ་འགྱེལ་བར་འགྱུར། །རྒྱུན་དུ་ནད་ཀྱིས་མངོན་གདུངས་ཤིང་། །
[176a.2]རྟག་ཏུ་མི་གཙང་འཛག་པ་དང་། །རྒ་དང་འཆི་བས་འཚེར་འགྲིབ་པའི། །ལུས་འདི་དོར་ན་ཅིར་མི་རུང་། །མྱུར་དུ་འཇིག་ཅིང་རྣ་བ་དང་། །རྣག་དང་ལྡན་བའི་ལུས་འདི་ཡིས། །གྲུབ་དང་བདེ་བ་བླ་མེད་དང་། །ཞིང་མཆོག་དོན་དུ་གཉེར་བར་གྱིས། །ཚིགས་སུ་བཅད་པ་འདི་
[176a.3]ཐོས་པ་དང་། །གཞོན་ནུ་གསེར་མདོག་འཁོར་བ་ལས་ཡོངས་སུ་སྐྱོ་ཞིང་། ཡོངས་སུ་མྱ་ངན་ལས་འདས་པའི་ཡོན་ཏན་མཐོང་བས་དགེ་སློང་དེ་ལ་ཕྱག་བྱས་ཏེ་དྲིས་པ། འཕགས་པ་འདི་ཅི་ཞིག་ལགས། དགེ་སློང་གིས་སྨྲས་པ། རིགས་ཀྱི་བུ་འདི་ནི་སངས་རྒྱས་ཀྱི་བཀའ་
[176a.4]ཡིན་ནོ། །དེས་དེ་ཐོས་པ་དང་བཅོམ་ལྡན་འདས་ཀྱི་བསྟན་པ་ལ་དད་པ་ཆེན་པོ་སྐྱེས་ནས་རབ་ཏུ་འབྱུང་བ་དང་ཐར་པ་མངོན་པར་འདོད་པར་གྱུར་ཏོ། །དེ་ནས་དགེ་སློང་དེ་ལ་རིམ་གྲོ་བྱས་ཏེ་རྐང་པ་གཉིས་ལ་གཏུགས་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་གྱིས་
[176a.5]ཐུགས་བརྩེ་བས་ཉེ་བར་བཟུང་སྟེ་རབ་ཏུ་དབྱུང་དུ་གསོལ། དགེ་སློང་དེས་སྨྲས་པ། རིགས་ཀྱི་བུ་ཕ་དང་མ་གཉིས་ཀྱིས་གནང་ངམ་དེས་སྨྲས་པ། མ་གནང་ལགས་སོ། །དགེ་སློང་གིས་སྨྲས་པ། རིགས་ཀྱི་བུ་སོང་ལ་ཕ་དང་མ་ལ་དྲིས་ཤིག་དང་། ཕ་དང་མ་གཉིས་ཀྱིས་མ་
[176a.6]གནང་བར་རབ་ཏུ་འབྱིན་པར་མི་བྱེད་དོ། །དེས་སྨྲས་པ། དེ་བཞིན་དུ་བགྱིའོ། །དེ་ནས་གཞོན་ནུ་གསེར་མདོག་འཁོར་བས་འཇིགས་ཤིང་སྐྱོ་བའི་ཡིད་དང་ལྡན་པས་རང་གི་ཁྱིམ་དུ་དོང་སྟེ་མའི་རྐང་བ་ལ་གཏུགས་ནས་ཡུམ་མཁྱེན་པར་མཛོད་ཅིག །བདག་ནི་ལེགས་པར་གསུངས་
[176a.7]པའི་ཆོས་འདུལ་བ་ལ་རབ་ཏུ་འབྱུང་ངོ་། །དེ་སྐད་ཅེས་སྨྲས་པ་ཐོས་པ་དང་མ་ཤིན་ཏུ་མྱ་ངན་གྱིས་གདུངས་ཏེ། བྲང་བརྡུངས་ནས་སྨྲས་པ། བུ་ཁྱོད་ནི་ངའི་བུ་གཅིག་པ། སྡུག་པ། ཡིད་དུ་འོང་བ། མཛེས་པ། རྗེས་སུ་མཐུན་པ། ཡིད་ལ་རེ་བ་རྒྱས་པ་ཐོབ་པ་ཡིན་ན་ཁྱོད་ཇི་ལྟར་
[176b]
[176b.1]དེ་ཡང་སྤངས་ནས་རབ་ཏུ་འབྱུང་། །དེས་སྨྲས་པ། ཡུམ་སྡུག་པ་རྣམས་དང་ནི་ངེས་པར་འབྲལ་བར་འགྱུར་ཏེ། དེ་མཁྱེན་པར་མཛོད་ལ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་དབྱུང་བར་རྗེས་སུ་གནང་བར་མཛད་དུ་གསོལ། དེས་ཐོས་པ་དང་ཡིད་ལ་
[176b.2]གདུང་བ་ཆེན་པོ་སྐྱེས་ནས་དེ་མཆི་མས་བརྣངས་བཞིན་དུ་སྨྲས་པ། བུ་ང་ཁྲག་དྲོན་མོ་ཁ་ནས་སྐྱུག་པར་འགྱུར་གྱི་ལན་གསུམ་གྱི་བར་དུ་དེ་སྐད་མ་ཟེར་ཅིག །དེས་ཡང་བསམས་པ། འདིའི་འབད་པ་འདི་ལྟ་བུ་ལས་ན་ངས་བཟློག་པར་མི་ནུས་ཀྱིས་ཐབས་ཤིག་སྦྱར་བར་
[176b.3]བྱའོ་སྙམ་མོ། །དེ་ནས་དེས་སྨྲས་པ། བུ་ཁྱོད་ཀྱི་ཕ་ནི་སངས་རྒྱས་ཀྱི་བསྟན་པ་ལ་བྱ་བ་བྱའོ་སྙམ་ནས་རྒྱ་མཚོ་ཆེན་པོར་ཞུགས་ཀྱི་དེ་ཇི་སྲིད་མ་འོངས་པ་དེ་སྲིད་ཁྱོད་ལ་རྗེས་སུ་མི་གནང་ངོ་། །གལ་ཏེ་འོངས་ན་ཁྱོད་རྗེས་སུ་གནང་ནས་རབ་ཏུ་དབྱུང་བར་བྱའོ། །དེ་མ་ལ་གུས་པ་
[176b.4]ཡིན་པས་བསམས་པ། གལ་ཏེ་ཡང་འདི་ལ་སྨྲས་ན་ནི་བརྒྱ་ལ་འདི་གདུང་བ་ཤིན་ཏུ་ཆེན་པོ་སྐྱེ་བར་འགྱུར་གྱི། ཇི་སྲིད་ངའི་ཕ་འོངས་པ་དེ་སྲིད་དུ་འདུག་པར་བྱའོ་སྙམ་ནས་དེ་ཅང་མི་སྨྲ་བར་འདུག་གོ། །གང་གི་ཚེ་གཞོན་ནུ་གསེར་མདོག་ཚོང་འདུས་སུ་རྒྱུ་བ་ན་དེའི་ཚེ་དེའི་
[176b.5]གཟུགས་ཕུན་སུམ་ཚོགས་པ་རྒྱ་ཆེན་པོ་མཐོང་བ་དང་འཇིག་རྟེན་པ་རྣམས་བལྟས་ཀྱང་ངོམས་པར་མ་གྱུར་ཏེ། དེ་སྐྱེ་བོའི་ཚོགས་མང་པོའི་ཡིད་དུ་འོང་བར་གྱུར་ཏོ། །དེའི་གཟུགས་ཕུན་སུམ་ཚོགས་པས་ཡིད་དྲངས་ཀྱང་འདོད་པ་ལ་ཤིན་ཏུ་རྒྱབ་ཀྱིས་ཕྱོགས་པར་མཐོང་
[176b.6]ནས་མས་བསམས་པ། ཀྱི་ཧུད་འདིའི་འབད་པ་འདི་ལྟ་བུ་འདིས་ནི་ང་སྤངས་ནས་རབ་ཏུ་འབྱུང་བར་འགྱུར་རོ་སྙམ་མོ། །དེ་ནས་རྟག་ཏུ་དོགས་པ་དང་བཅས་པས་རྗེས་སུ་མཐུན་པར་འཇུག་པར་བརྩམས་སོ། །གཞོན་ནུ་གསེར་མདོག་ནི་ཡང་དང་ཡང་དུ་མཁས་པ་དང་
[176b.7]དགེ་སྦྱོང་དང་བྲམ་ཟེ་རྣམས་ལ་རྟེན་པར་བྱེད་ཅིང་། དེ་དེར་ལེགས་པར་བཤད་པ་ཐར་བའི་ལམ་དང་རྗེས་སུ་མཐུན་པར་གང་དང་གང་ཐོས་པ་དེ་དང་དེ་གླེགས་བམ་ལ་འདྲིའོ། །རྒྱལ་པོའི་ཁབ་ཀྱི་གྲོང་ཁྱེར་གྱི་ཕྱི་རོལ་ན་དེད་དཔོན་ཉི་མའི་སྐྱེད་མོས་ཚལ་མེ་ཏོག་དང་། འབྲས་
[177a]
[177a.1]བུ་དང་། ཆུ་ཕུན་སུམ་ཚོགས་པ་ཞིག་ཀྱང་ཡོད་པ་དང་། དེ་ནས་གཞོན་ནུ་གསེར་མདོག་ཕའི་སྐྱེད་མོས་ཚལ་དེར་ཉིན་རེ་ཞིང་སོང་ནས་ལེགས་པར་བཤད་པའི་གླེགས་བམ་དག་ཀློག་ཅིང་འདུག་གོ། །ཡང་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ན་ཀ་ཤི་མཛེས་དགའ་
[177a.2]མོ་ཞེས་བྱ་བའི་བུད་མེད་སྨད་འཚོང་མ་གཟུགས་དང་ལང་ཚོ་དང་སྒྱུ་རྩལ་ཕུན་སུམ་ཚོགས་པ། སྐྱེ་བོ་མང་པོའི་སྙིང་དུ་སྡུག་པ་ཞིག་གནས་པ་དང་། རྒྱལ་པོ་མ་སྐྱེས་དགྲའི་བློན་པོ་རབ་གཏུམ་ཞེས་བྱ་བ་རྒྱལ་པོས་ཤིན་ཏུ་བཀུར་བ་དེ་བུ་མོ་ཀ་ཤི་མཛེས་དགའ་མོ་ལ་ཤིན་ཏུ་ཡང་སེམས་
[177a.3]ཆགས་པས་ཉིན་རེ་ཞིང་རང་གི་སྐྱེད་མོས་ཚལ་དུ་སོང་ནས་དེ་དང་ལྷན་ཅིག་རྩེ་ཞིང་དགའ་ལ་དགའ་མགུར་སྤྱོད་པར་གྱུར་ཏོ། །ཅི་ཙམ་ན་དུས་གཞན་ཞིག་གི་ཚེ་བུ་མོ་ཀ་ཤི་མཛེས་དགའ་མོ་རྒྱན་ཐམས་ཅད་ཀྱིས་བརྒྱན་ཏེ་རྒྱལ་པོའི་ཁབ་ནས་བྱུང་ནས་བློན་པོ་རབ་གཏུམ་གྱི་སྐྱེད་མོས་ཚལ་
[177a.4]དུ་ཆས་པ་དང་། གཞོན་ནུ་གསེར་མདོག་རྒྱལ་པོའི་ཁབ་ཀྱི་གྲོང་ཁྱེར་ནས་བྱུང་སྟེ། རང་གི་སྐྱེད་མོས་ཚལ་དུ་འགྲོ་བ་བུ་མོ་ཀ་ཤི་མཛེས་དགའ་མོས་བལྟས་པ་དང་། གཞོན་ནུ་གསེར་མདོག་ཤིན་ཏུ་ཡང་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང་ཉིང་
[177a.5]ལག་ཐམས་ཅད་དང་ལྡན་པ། སྐྱེ་བོ་ཐམས་ཅད་ཀྱི་ཡིད་དང་མིག་འཕྲོག་པ། གསེར་མདོག་ཅན་གྱི་གོས་སེར་པོ་ལུས་ལ་གྱོན་པ་མཐོང་བ་དང་། ཡང་དེ་འདི་སྙམ་དུ་སེམས་ཏེ། ཨེ་མའོ་གཟུགས་ཕུན་སུམ་ཚོགས་པ་རྒྱ་ཆེ་བ། ཨེ་མའོ་ཁ་དོག་ཤིན་ཏུ་རྒྱས་པ་འདི་ལྟ་བུ་བུད་མེད་
[177a.6]གང་གི་ཁྱོར་གྱུར་པ་དེ་ནི་སྐལ་པ་བཟང་པོ་བྱས་པ་ཡིན་ནོ་སྙམ་དུ་སེམས་ཤིང་། དེ་དེ་ལ་སེམས་ཤིན་ཏུ་ཞེན་པས་རྟོག་ཅིང་གང་འདི་ལྟ་བུའི་སྐྱེས་བུ་དང་ལྷན་ཅིག་དགའ་ཞིང་རྩེ་བ་མ་མྱོང་བའི་བུད་མེད་དེ་ནི་སྐལ་པ་ཆུང་བ་ཡིན་ནོ། །ཡང་བསམས་པ། བདག་ནི་གཟུགས་ཀྱིས་འཚོ་
[177a.7]བ། སྐྱེས་བུ་རྣམས་ཀྱི་ཐུན་མོང་དུ་གྱུར་པ་ཡིན་ལ། གཞོན་ནུ་འདི་ནི་ལང་ཚོ་ལ་བབ་པ་དང་ལྡན་པ་ཡིན་གྱི་མ་ལ་བདག་འདི་དང་ལྷན་ཅིག་ཀུན་དུ་སྦྱོར་བར་འགྱུར་བ་དེ་ལྟར་བྲིད་པར་བྱའོ་སྙམ་ནས་དེ་དེའི་མདུན་དུ་འདུག་སྟེ། བུད་མེད་ཀྱི་སྟེག་པའི་མཚན་མ་དག་བསྟན་པར་
[177b]
[177b.1]བརྩམས་པ་དང་། བདག་ཉིད་ཆེན་པོ་དེ་རང་བཞིན་གྱིས་འདོད་པ་ལ་རྒྱབ་ཀྱིས་ཕྱོགས་ཤིང་མྱ་ངན་ལས་འདས་པ་ལ་གཞོལ་བས་དེ་ལ་སེམས་གཏོད་པར་མ་གྱུར་པ་དང་། དེས་བསམས་པ་འདི་ནི་ངེས་པར་ང་ལ་མི་སེམས་པ་ནི་ངོ་ཆ་བ་ཡིན་གྱི། ཡང་འདི་སྐྱེད་མོས་ཚལ་དུ་འགྲོ་བས་
[177b.2]ང་ཡང་དེ་ཉིད་དུ་སོང་ལ་དེར་འདི་ལྐོག་ཏུ་བྲིམ་པར་བྱའོ་སྙམ་ནས་དེ་དེའི་ཕྱི་བཞིན་འབྲང་བ་དང་། གཞོན་ནུ་གསེར་མདོག་གིས་ཤེས་ནས་དེའི་སྔོན་དུ་སྐྱེད་མོས་ཚལ་དུ་ཞུགས་ཏེ་སྒོ་བཅད་དོ། །བུ་མོ་ཀ་ཤི་མཛེས་དགའ་མོས་སྨྲས་པ། གཞོན་ནུ་བདག་ནི་ཁྱོད་ལ་བསམས་ཏེ་འོང་ན་
[177b.3]ཁྱོད་འདི་ལྟ་བུའི་རང་བཞིན་ངན་པ་སྟོན་པར་བྱེད་པ་ནི་རིགས་པ་མ་ཡིན་ནོ་ཞེས་སྨྲས་ཀྱང་། དེས་དེ་ལ་ཚིག་གི་ལན་མ་བླན་པ་དང་། དེས་བསམས་པ། འདི་ལ་རྒྱུ་གཉིས་ཡོད་དེ། ཤིན་ཏུ་འདོད་པ་དོན་དུ་མི་གཉེར་བའམ། ཡང་ན་ཆེས་བཟང་བ་གཞན་ཞིག་ལ་ཞེན་པ་ཡིན་ཏེ།
[177b.4]རྣམ་པ་ཐམས་ཅད་དུ་འདི་ལ་ངའི་གཟུགས་སམ་ཚིག་གིས་མགུ་བར་བྱེད་མི་ནུས་ཀྱི་འདི་ལ་རེག་པས་མགུ་བར་བྱའོ་སྙམ་ནས། འདིས་ང་མཐོང་ནས་སྒོ་བཅད་ན་གང་ཞིག་གིས་འདི་ལྐོག་ཏུ་ཆགས་པར་འགྱུར་བའི་ཐབས་ཅི་ཞིག་ཡོད། ཡང་ན་འདི་ངས་ཤེས་ཀྱིས་ནང་པར་འདིའི་
[177b.5]ཆེས་སྔོན་དུ་སོང་ལ་སྐྱེད་མོས་ཚལ་དུ་འདུག་གི། ཕྱིས་འདི་འོངས་པ་དང་འཁྲིག་པ་ལ་སོགས་པའི་ལུས་ཀྱི་རེག་པ་རྣམས་ཀྱིས་ཇི་ལྟར་ངའི་དབང་དུ་འགྱུར་བ་དེ་ལྟར་མགུ་བར་བྱའོ་སྙམ་མོ། །དེ་དེ་ལྟར་རྗེས་སུ་སེམས་ཤིང་སླར་ལོག་ནས་གྲོང་ཁྱེར་དུ་ཞུགས་ཏེ། ཉི་མ་དེ་ལ་
[177b.6]རབ་གཏུམ་གྱི་སྐྱེད་མོས་ཚལ་དུ་མ་སོང་ངོ་། །བློན་པོ་རབ་གཏུམ་ཡང་རང་གི་སྐྱེད་མོས་ཚལ་དུ་དེ་ཡུན་རིང་དུ་རྟོག་པས་ཡོངས་སུ་དུབ་པ་དང་ཉི་མ་ནུབ་པའི་དུས་སུ་གྲོང་ཁྱེར་དུ་ཞུགས་ནས་དེ་རང་གི་ཁྱིམ་ནས་ཀ་ཤི་མཛེས་དགའ་མོ་ལ་ཅིའི་ཕྱིར་ཁྱེད་དེང་ངའི་སྐྱེད་མོས་ཚལ་དུ་
[177b.7]མ་འོངས་ཞེས་ཕོ་ཉ་བཏང་བ་དང་། བུ་མོ་མཛེས་དགའ་མོས་རྗེའི་སྲས་དེང་ནི་བདག་དེང་གླད་ནད་ཀྱིས་ཤིན་ཏུ་གདུངས་པ་གང་ཡིན་པ་དེས་ཁྱེད་ཀྱི་སྐྱེད་མོས་ཚལ་དུ་མ་འོངས་ཞེས་བསླུས་སོ། །འཇིག་རྟེན་ན་ནི་མཛའ་མོ་དང་། དགྲ་དང་། ཐ་མལ་པ་ཡོད་པས། གཞན་ཞིག་
[178a]
[178a.1]གིས་སྨྲས་པ། དེ་ལ་ནི་གླད་པའི་ནད་ཀྱིས་གཟིར་བ་མེད་དེ། གཞན་དུ་ན་འདི་གཞོན་ནུ་གསེར་མདོག་གི་སྐྱེད་མོས་ཚལ་དེ་ནས་སླར་འོངས་པ་མཐོང་ངོ་ཞེས་སྨྲས་པ་ཐོས་པ་དང་། འདི་ལྟར་བུད་མེད་ཀྱི་ཡུལ་ནས་བྱུང་བའི་ཤ་ཁོན་ནི་ཤ་ཁོན་གྱི་ཐ་ཆད་
[178a.2]ཡིན་པས་བློན་པོ་རབ་གཏུམ་ཁྲོ་བས་ཀུན་ཏུ་འཁྲུགས་པར་གྱུར་ནས་བསམས་པ། ཅི་ནས་ཀྱང་བུ་མོ་ཀ་ཤི་མཛེས་དགའ་མོ་དང་གཞོན་ནུ་གསེར་མདོག་གཉི་ག་མེད་པར་འགྱུར་བདེ་ལྟ་བུའི་གནོད་པ་བྱའོ་སྙམ་སྟེ། དེ་ཁྲོ་བའི་མེས་སྙིང་བསྲགས་བཞིན་དུ་མཚན་མོ་སྡུག་
[178a.3]བསྔལ་བས་འདའ་བར་བྱས་སོ། །དེ་ནས་མཚན་མོ་འདས་ཏེ་ནམ་ལངས་པ་དང་སྐྱེས་བུ་ཡིད་བརྟན་དུ་རུང་བ་ཞིག་བོས་ཏེ་སྨྲས་པ། རྒྱལ་པོའི་ཁབ་ཀྱི་ཕྱི་རོལ་གྱི་སྐྱེད་མོས་ཚལ་དུ་འདེང་། དེ་རང་ལ་ཤིན་ཏུ་ཆེད་ཆེ་བའི་དགོས་པ་ཞིག་ཡོད་ཀྱི་རལ་གྲི་ཐོགས་ཤིག །དེས་ཀྱང་བློན་པོ་
[178a.4]དེ་བཞིན་དུ་བགྱིའོ་ཞེས་སྨྲས་ཏེ། སྐྱེས་བུ་དེ་རལ་གྲི་ཐོགས་ནས་དེའི་ཕྱི་བཞིན་དུ་འབྲངས་སོ། །དེ་ནས་བློན་པོ་རབ་གཏུམ་སྐྱེས་བུ་དེ་དང་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ནས་བྱུང་སྟེ་དེད་དཔོན་ཉི་མའི་སྐྱེད་མོས་ཚལ་དུ་ཞུགས་ནས་གནས་སོ། །བུ་མོ་ཀ་ཤི་མཛེས་དགའ་
[178a.5]མོ་ཡང་ལུས་ལ་གོས་དང་རྒྱན་སྣ་ཚོགས་ཀྱིས་བརྒྱན་ཏེ་རྒྱལ་པོའི་ཁབ་ནས་བྱུང་ནས་དེད་དཔོན་ཉི་མའི་སྐྱེད་མོས་ཚལ་དུ་སོང་སྟེ། དེ་དེར་ཞུགས་པ་དང་ཇི་ཙམ་ན་བློན་པོ་རབ་གཏུམ་མཐོང་བ་དང་སླར་ཀུན་དུ་སྐྲག་པས་བསམས་པ། འདི་ནི་རང་བཞིན་གྱིས་གཏུམ་པས་ངེས་པར་དེང་ང་
[178a.6]ལ་གནོད་པ་ཆེན་པོ་བྱེད་པར་འགྱུར་རོ་སྙམ་ནས་སླར་ལོག་པར་འདོད་པ་དང་། དེ་ནས་བློན་པོ་རབ་གཏུམ་གྱིས་མཐོང་ནས་ཁྲོ་བའི་མེས་ཡིད་བསྲེགས་ནས་དཔྲལ་པར་ཁྲོ་གཉེར་གསུམ་བསྡུས་ཏེ་ཤིན་ཏུ་བརྒྱུགས་སོ། །དེ་ནས་ཚམ་ཚོམ་མེད་པར་དེའི་སྐྲ་ནས་བཟུང་ནས་སྙིང་རྗེ་མེད་པས་
[178a.7]མགོ་ཐུར་དུ་ས་ལ་བསྒྱེལ་ཏེ་བཤལ་བཞིན་དུ་འདི་སྐད་ཅེས་སྨྲས་ཏེ། ཁྱོད་འདིར་འོངས་ནས་གཞོན་ནུ་གསེར་མདོག་དང་ལྷན་ཅིག་དགའ་མགུར་སྤྱད་ནས། ང་ལ་གླད་བ་ན་བས་ཤིན་ཏུ་གཟིར་ཏེ་དེས་ཁྱེད་ཀྱི་གན་དུ་མ་འོངས་སོ་ཞེས་སྨྲའམ། ངས་དེང་གང་གིས་སླར་ཡང་འཚོ་བའི་
[178b]
[178b.1]འཇིག་རྟེན་མཐོང་ཞིང་གཞོན་ནུ་གསེར་མདོག་དང་ལྷན་ཅིག་དགའ་མགུར་སྤྱོད་པར་མི་འགྱུར་བ་དེ་ལྟ་བུའི་ཆད་པ་གཅོད་པར་བྱའོ། །བུ་མོ་ཀ་ཤི་མཛེས་དགའ་མོས་དེ་ཐོས་པ་དང་། ཕན་ཚུན་དྲུད་པའི་སྡུག་བསྔལ་ལ་མ་བསམས་པར་མཆི་མས་བརྣངས་བཞིན་སྐད་འདར་བཞིན་དུ་ཀྱི་
[178b.2]ཧུད་ད་ནི་འཚོ་བར་མི་འགྱུར་རོ་སྙམ་ནས་ལུས་འདར་བཞིན་དུ་བློན་པོ་རབ་གཏུམ་གྱི་རྐང་པ་གཉིས་ལ་གཏུགས་ཏེ། སྙིང་རྗེ་རྗེ་སྐད་དུ་གཅོམ་ཆུང་ངུས་ཚིག་རེ་རེ་ནས་སྨྲས་པ། རྗེའི་སྲས་བཟོད་པར་མཛོད་ཅིག །བདག་ནི་གསད་པར་འོས་པ་མ་ལགས་ཏེ། བུད་མེད་ཀྱི་ཡུལ་ནི་རྟག་
[178b.3]ཏུ་སྐྱོན་དང་བཅས་པ་ལགས་ཀྱིས་དེང་ནས་བརྩམས་ནས་སླན་ཆད་འདིར་ཅི་ཡང་མི་བགྱིད་ཀྱི། ཇི་སྲིད་འཚོའི་བར་དུ་ཁྱེད་ཀྱི་འབངས་མོ་བགྱིད་ཀྱིས་མ་བརྟགས་པ་འདི་མ་མཛད་པར་སྲོག་སྩོལ་ཅིག །རང་བཞིན་ངན་པ་དེ་དེ་ལྟ་བུའི་སྙིང་རྗེ་རྗེ་སྐད་དུ་གཅོམ་ཆུང་དུས་ཚིག་རེ་རེ་ནས་
[178b.4]སྨྲས་ཀྱང་ཁྲོ་བའི་མེ་འཕེལ་བ་ཉིད་དོ། །དེ་ནས་དེའི་གྲོགས་པོའི་སྐྱེས་བུ་ལ་སྨྲས་པ། རལ་གྲི་འདིས་འདིའི་མགོ་དྲུངས་ནས་མྱུར་དུ་ཆོད་ལ་ས་ལ་ལྟུང་བར་གྱིས་ཤིག་ཅེས་སྨྲས་པ་དང་། དེ་ནས་སྐྱེས་བུ་དེས་བདག་ཉིད་ངན་པ་དེའི་རིགས་པ་དང་མི་ལྡན་པའི་ཚིག་ངན་པ་ཐོས་པ་
[178b.5]དང་འདར་བར་གྱུར་ཅིང་བསམས་པ། ཀྱེ་མའོ་སྙིང་རྗེ་མེད་པ། བུད་མེད་འདི་ནི་འདིས་རྣམ་པ་དུ་མར་རྗེས་སུ་ལོངས་སྤྱོད་ན་དེ་ཇི་ལྟར་ཉེས་པ་ཆུང་ངུའི་ཕྱིར་གསོད་པར་འདོད། ཀྱེ་མའོ་ང་ཡང་འཚོ་བའི་འཇིགས་པ་དང་སྐྲག་པས་སྐྱེས་བུ་ཐ་མ་སྦྲུལ་གྱི་དུག་དང་མཚུངས་པའི་གན་
[178b.6]དུ་གནས་པར་བྱེད། ང་ནི་རྣམ་པ་ཐམས་ཅད་དུ་ཉམ་ང་བ་ཆེན་པོར་ཞུགས་སོ། །འདི་ཇི་ལྟར་བསྒྲུབ་པར་བྱ། ཡང་ན་གསལ་བར་སྨྲ་བར་བྱའི། །གལ་ཏེ་གསལ་བར་སྨྲས་ན་སྡིག་པ་དང་ཆོས་མ་ཡིན་པ་ལས་ལྡོག་ཀྱང་སྲིད་དོ་སྙམ་ནས་ཀུན་དུ་སྐྱོ་བ་དང་། དེ་ལ་བུད་མེད་དེ་ཤིན་
[178b.7]ཏུ་སྙིང་རྗེ་བས་རྒྱུད་ཞི་བར་བྱས་པས་མིག་མཆི་མས་ཁེངས་པ་དང་ཐལ་མོ་སྦྱར་ཏེ། བློན་པོ་རབ་གཏུམ་ལ་སྨྲས་པ། ཇོ་བོ་བཟོད་པར་མཛོད་ཅིག །འདི་ལྟ་བུའི་བྱ་བམ་ཡིན་པ་ལ་བདག་སྦྱར་བ་ནི་མི་རིགས་སོ། །བདག་ནི་བརྩེ་བ་མེད་པ་མ་ལགས་ཏེ། གསོད་མ་པ་ཡང་
[179a]
[179a.1]མ་ལགས་ན་ཇི་ལྟར་ན་བདག་གསོད་མ་རྣམས་ཀྱང་བྱེད་པར་སྤྲོ་བ་མ་ཡིན་པའི་ལས་གང་ཡིན་པ་དེ་ལ་བདག་པོས་བཅུད་དམ། བུད་མེད་འདི་ཡང་ཤིན་ཏུ་གཟུགས་བཟང་བ། བལྟ་ན་སྡུག་པ། མཛེས་པ། སྒྱུ་རྩལ་ཤེས་པར་གྲགས་པ་རྒྱལ་པོའི་ཁབ་ན་གནས་
[179a.2]པ་རྣམས་དང་། ཕྱོགས་གཞན་ནས་ལྷགས་པའི་སྐྱེ་བོ་མཁས་པ་རྣམས་ཀྱི་སྙིང་དུ་སྡུག་པ། འདི་ནི་མི་རྣམས་ཀྱི་ཐུན་མོང་གི་དགའ་བའི་གནས་སུ་གྱུར་པ་ལགས་ན། བདག་པོ་ཤེས་རབ་དང་ལྡན་ཞིང་མཁས་པའི་མི་རྣམས་རྗེས་སུ་ཆགས་པའི་གནས་འདི་ལ་སྡང་བར་ཇི་ལྟར་བྱེད་
[179a.3]འདི་ལྟ་བུའི་འཇིག་རྟེན་གཉི་ག་དང་འགལ་བར་གྱུར་པའི་རྩོལ་བ་འདི་ལ་ལྡོག་པར་མཛོད་ཅིག །བཟོད་པར་མཛོད་ལ་བདག་དང་ཁྱེད་ཀྱང་ཉེས་པར་སྤྱོད་པའི་མེ་འདིས་བསྲེག་པར་འོས་པ་མ་ཡིན་ནོ། །གཙོ་བོ་གཞན་ཡང་། ཤིན་ཏུ་གཞོན་པའི་ཡན་ལག་འདི། །གཟུགས་
[179a.4]དང་ལང་ཚོ་རྣམ་བརྒྱན་པ། །འདི་ནི་མི་ཡི་དགའ་བ་དག །གཟུགས་དང་ལྡན་པ་བཞིན་དུ་ཤེས། །དམན་ཞིང་སྙིང་ནི་རྗེ་རྗེའི་ལྟའི། །སྙན་པའི་ཚིག་ནི་འདི་དག་གིས། །གཙོ་བོ་ཁྱོད་ལ་གསོལ་འདེབས་ན། །བདག་གི་ཡིད་ནི་མགུ་བར་མཛོད། །ཁྱོད་ཚིག་འབར་བར་ཐོས་པས་
[179a.5]ན། །དེར་ནི་བདག་ཉིད་འདར་བར་འགྱུར། །གང་ཞིག་འདི་འདྲ་གསོད་གྱུར་པའི། །སྙིང་རྗེ་མེད་པ་སུ་ཞིག་མཆིས། །ཤིན་ཏུ་སྙིང་རྗེ་མེད་པ་ཡི། །ཀླ་ཀློ་འང་འདི་གསོད་མི་སྤྲོ་ན། །གཙོ་བོས་བདག་ཡིད་ཇི་ལྟར་ན། །མི་གསོད་པར་ནི་སྤྲོ་བ་སྐྱེད། །གང་ཞིག་ཕྱུགས་ཀྱིས་
[179a.6]མཐོང་ན་ཡང་། །རྗེས་ཆགས་ཆེན་པོ་སྐྱེ་འགྱུར་བ། །དེ་ལ་གང་ཞིག་མིར་གྱུར་ནས། །མཚོན་གྱིས་འདེབས་པ་བགྱིད་མ་མཆིས། །གཙོ་བོ་ཤིན་ཏུ་མི་བཟད་པའི། །ལས་འདི་མཉན་པའང་རིགས་མིན་ན། །སྤྱོད་པར་བགྱིད་པ་སྨོས་ཅི་འཚལ། །དེ་བས་བཟོད་པ་མཛད་
[179a.7]པའི་རིགས། །དེ་ནས་སྐྱེས་བུ་རང་བཞིན་ངན་པས་བསམ་པ་ཉམས་པ་དེ་ལ་དེ་ལྟ་བུའི་སྙིང་ལ་བབ་པའི་ཚིག་སྙན་པ་དེས་སྨྲས་སུ་ཟིན་ཀྱང་རང་གི་སེམས་ཞི་བ་མ་རྙེད་པར་གྱུར་ཏེ། དེ་ཁྲོས་ཕས་སྨིན་མ་བསྡུས་ཤིང་བཞིན་མི་སྡུག་པས་དེ་ལ་སྨྲས་པ། ཀྭའི་མི་ཁྱོད་ངའི་ཚིག་ལས་
[179b]
[179b.1]འདའ་བར་བྱས་ཏེ། འདི་ལ་ཁྱོད་རྗེས་སུ་ཆགས་པར་བྱེད་ནས་གསོད་པར་མི་འདོད་དམ། རྣམ་པ་ཐམས་ཅད་དུ་ཁྱོད་ཀྱིས་འདི་བསད་པར་གྱུར་ན་ལེགས་ཀྱི་གལ་ཏེ་མ་བསད་ན་དང་ཁྱོད་ཀྱི་སྲོག་མེད་པར་བྱའོ། །དེ་ནས་སྐྱེས་བུ་དེ་དེའི་ཚིག་རྩུབ་མོའི་རྩོམ་པ་ཤེས་ནས་འཇིགས་པས་
[179b.2]སེམས་པ་ལ་ཞུགས་པར་གྱུར་ཏེ། ཀྱེ་མའོ་བདག་ནི་ཤིན་ཏུ་ཉམ་ང་བར་གྱུར་ཏེ། གལ་ཏེ་འདིའི་ཚིག་བཞིན་མ་བྱས་ན་ངེས་པར་དེང་བདག་ཉིད་སྲོག་དང་བྲལ་བར་བྱེད་དེ། གང་ཞིག་འདི་ལྟ་བུའི་བུད་མེད་རྣམ་པ་དུ་མར་ཉེ་བར་ལོངས་སྤྱོད་པ་ཡང་གསོད་པར་རྩོམ་ན་དེང་ང་མི་གསོད་
[179b.3]པར་ག་ལ་འགྱུར། ཅི་འདི་ལྟ་བུའི་སྐྱེ་བོའི་ཆོགས་ཀྱི་ཡིད་དུ་འོང་བའི་བུད་མེད་ཀྱི་ལུས་ལ་མཚོན་གྱིས་འདེབས་པར་བྱེད་ན། བདག་ཉིད་མིར་ཡང་མི་རུང་གི། རྣམ་པ་ཐམས་ཅད་དུ་རང་གི་སྲོག་དང་བྲལ་བ་ནི་བླའི་འདི་ལྟ་བུ་འདི་ལ་སྣུན་པར་མི་བྱའོ་ཞེས་ངེས་པར་བསམས་ནས་ཡང་
[179b.4]དེའི་སླར་སྐྱེས་པ་གང་འདི་རལ་གྲི་ཁྱེར་ལ་འབྲོས་པར་བྱའི། དེས་ནི་ངའི་ལུས་དང་བུ་མོ་ཀ་ཤི་མཛེས་དགའ་མོའི་ལུས་ཀྱང་ཡོངས་སུ་བསྲུངས་པར་འགྱུར་རོ་སྙམ་ནས་རལ་གྲི་ཐོགས་ནས་སྐྱེད་མོས་ཚལ་ནས་བྱུང་ནས་བང་ཐམས་ཅད་གཏུགས་པ་དང་བྲོས་པར་གྱུར་ཏོ། །བློན་པོ་
[179b.5]རབ་གཏུམ་གྱིས་ཀྱང་དེའི་རྗེས་བཞིན་སྒོའི་ཕྱི་རོལ་གྱི་བར་དུ་བསྙེགས་སོ། །དེ་ནས་བུ་མོ་ཀ་ཤི་མཛེས་དགའ་མོ་བདག་ཉིད་སྲོག་སྟོར་བ་སླར་རྙེད་པ་ཙམ་དུ་སེམས་ཤིང་རིངས་པ་རིངས་པར་བྲོས་ཏེ་ར་བའི་རྩར་ཕྱིན་པ་དང་། ར་བ་དེ་ཡང་མཐོ་བས་བརྒལ་བར་མ་ནུས་པ་ན་བློན་པོ་རབ་གཏུམ་
[179b.6]སླར་ལོག་ནས་ཇི་སྲིད་ཕྱོགས་དེ་ན་བུ་མོ་ཀ་ཤི་མཛེས་དགའ་མོ་མ་མཐོང་ནས་ཕན་ཚུན་ཀུན་དུ་བལྟས་པར་བརྩམས་པ་དང་། ཅི་ཙམ་ན་ར་བའི་རྩར་ཕྱིན་པ་མཐོང་ནས་རིངས་པ་རིངས་པར་དེའི་གན་དུ་འགྲོ་བར་བརྩམས་སོ། །དེ་ན་ཡང་སྦྲུལ་ནག་པོ་ཞིག་གནས་ཏེ། དེས་བུ་མོའི་རྐང་པ་གཡས་
[179b.7]པ་ནས་བཟུང་བ་དང་དེས་དེ་མཐོང་ནས་བྲོས་སོ། །བུ་མོ་ཀ་ཤི་མཛེས་དགའ་མོས་བསམས་པ། བློན་པོ་རབ་གཏུམ་འདི་འོངས་ནས་གསོད་པར་འགྱུར་རོ་སྙམ་པ་དེར་གཏོད་པའི་ཡིད་དང་འཆི་བའི་འཇིགས་པས་སྦྲུལ་ནག་པོས་ཟིན་པར་མ་ཤེས་ནས་ཨ་ཏི་མུག་ཏིའི་ཚང་ཚིང་དུ་ཞུགས་པ་དང་།
[180a]
[180a.1]བློན་པོ་རབ་གཏུམ་ཡང་ཨ་ཏི་མུག་ཏིའི་ཡལ་གའི་ཚང་ཚིང་དུ་ཕྱིན་ཏོ། །དེ་ནས་རང་བཞིན་ངན་པ་སྙིང་རྗེ་མེད་པའི་སེམས་ཀྱིས་ཞེ་སྡང་དྲག་པོས་ཀུན་དུ་འཁྲུགས་པའི་ཡིད་ཀྱིས་བུ་མོ་ཀ་ཤི་མཛེས་དགའ་མོ་ཨ་ཏི་མུག་ཏིའི་ཡལ་གའི་ཚང་ཚིང་ནས་དྲངས་ཏེ།
[180a.2]དེའི་མགོ་ལ་རྐང་པའི་རྟིང་པ་དང་རྡོག་པས་བསྣུན་ཏོ། །བུད་མེད་དེ་ནི་ཤིན་ཏུ་གཞོན་ཤ་ཅན་ཡིན་པས་རྡོག་པས་བསྣུན་བ་དེ་དང་དུག་གི་ཞུགས་ཀྱིས་བརྒྱལ་བར་གྱུར་ཏོ། །བློན་པོ་རབ་གཏུམ་དེ་ལྟ་བར་བསམས་པ་དང་། ཅི་ཙམ་ན་སེམས་མེད་པར་ས་ལ་འགྱེལ་བར་མཐོང་
[180a.3]ནས་དེ་འདི་སྙམ་དུ་སེམས་ཏེ་འདི་ནི་ཤི་ཟིན་གྱིས་ད་ནི་འགྲོ་བར་བྱས་ཏེ། འགའ་ཞིག་གིས་མཐོང་ན་མི་རུང་ངོ་སྙམ་ནས་ར་བ་རྒལ་ཏེ་ལམ་གཞན་ནས་རྒྱལ་པོའི་ཁབ་ཏུ་ཞུགས་སོ། །དེར་ཕྱིན་ནས་རྒྱལ་པོའི་སྐྱེས་བུ་གཞན་དག་ཅིག་ལ་སྨྲས་པ། ཤེས་ལྡན་དག་སོང་ལ་དེད་
[180a.4]དཔོན་ཉི་མའི་སྐྱེད་མོས་ཚལ་ལྟོས་ཤིག །དེ་ཡང་ཆས་སོ། །གཞོན་ནུ་གསེར་མདོག་ཀྱང་རྒྱལ་པོའི་ཁབ་ནས་བྱུང་སྟེ་སྐྱེད་མོས་ཚལ་དེར་ཕྱིན་པ་དང་། ཇི་སྲིད་ཅིག་ན་བུ་མོ་ཀ་ཤི་མཛེས་དགའ་མོ་ཕན་ཚུན་དུ་བཤལ་ཞིང་དྲུད་པ་དང་། སྐྲ་གྲོལ་ལ་སེམས་མེད་པར་ས་ལ་འགྱེལ་
[180a.5]བར་མཐོང་བ་དང་། དེ་སྐྱོ་བ་ཆེན་པོ་སྐྱེས་པར་གྱུར་ནས་དེས་བསམས་པ་ནི་རང་བཞིན་ངན་པ་སྙིང་རྗེ་མེད་པའི་སེམས་འཇིག་རྟེན་ཕ་རོལ་སྤངས་པ་ཤ་ཁོན་དང་བཅས་པ་སུ་ཞིག་གིས་འདིར་ཁྱེར་ཏེ་འོངས་ནས་བསད་པར་གྱུར། ཀྱི་ཧུད་ངན་ཅིང་སྡུག་བསྔལ་ཏེ། འདི་ལྟ་བུའི་བུད་
[180a.6]མེད་བརྩེ་བ་མེད་པས་གསོད་པའི་སེམས་ཅན་སུ་ཞིག་བྱུང་སྙམ་ནས་སྐྱེད་མོས་ཚལ་དེ་ཐམས་ཅད་དུ་བལྟས་ནས་སུ་ཡང་མ་མཐོང་བ་དང་། དེ་འདི་སྙམ་དུ་སེམས་ཏེ། བུད་མེད་འདི་ནི་ཀུན་གྱིས་ཤེས་པ་ཡིན་ལ། འདི་སྐྱེད་མོས་ཚལ་འདིར་བསད་ནས་འདིར་སུ་ཡང་མི་སྣང་བ་ནི་
[180a.7]རྣམ་པ་ཐམས་ཅད་དུ་འགའ་ཞིག་གིས་རང་གི་རང་བཞིན་ངན་པ་སྦས་ནས་གྲགས་པ་མ་ཡིན་པའི་སེར་བ་ངའི་མགོར་དབབ་པའི་ཕྱིར་དེས་འདིར་མངོན་དུ་ཕྱུང་ངོ་སྙམ་ནས་དེ་དེ་ལྟར་མི་དགའ་བཞིན་དུ་ལག་པ་འགྲམ་པ་ལ་གཏད་དེ་ཤིན་ཏུ་སེམས་པ་ལ་ཞུགས་ཤིང་འདུག་པ་དང་།
[180b]
[180b.1]རྒྱལ་པོའི་སྐྱེས་བུ་དེ་རྣམས་ཀྱང་ཕྱིན་ནས་དེར་ཞུགས་ཏེ། སྐྱེད་མོས་ཚལ་དེ་བལྟ་བར་བརྩམས་པ་དང་། ཇི་ཙམ་དུ་བུ་མོ་ཀ་ཤི་མཛེས་དགའ་མོ་ཕན་ཚུན་བཤལ་ནས་དྲུད་པ་དང་། སྐྲ་གྲོལ་ཞིང་ས་ལ་དྲུད་པ་དང་འགྱེལ་བ་མཐོང་བ་དང་། གཞོན་ནུ་གསེར་མདོག་གི་སྔོན་གྱི་ལས་ཀྱི་རྣམ་
[180b.2]པར་སྨིན་པའི་སྟོབས་ཀྱིས་དེ་སུས་ཀྱང་ངེས་པ་མ་རྙེད་ཅིང་བརྒྱལ་བ་ཡིན་ནམ། འོན་ཏེ་དུས་བྱས་པ་ཡིན་པར་ཤེས་པར་ཡང་མ་གྱུར་ཏོ། །དེ་ནས་རྒྱལ་པོའི་སྐྱེས་བུ་དེ་དག་ཕན་ཚུན་དུ་སྨྲས་པ། ཤེས་ལྡན་དག་བུད་མེད་འདི་ནི་འགའ་ཞིག་གིས་བསད་དོ་ཞེས་ཏེ། དེ་རྣམས་ཀྱིས་སྐྱེད་
[180b.3]མོས་ཚལ་ཀུན་དུ་བལྟས་ནས་གཞོན་ནུ་གསེར་མདོག་མ་གཏོགས་པ་སུ་ཡང་མཐོང་བར་མ་གྱུར་པ་དང་། དེ་རྣམས་ཀྱིས་གསེར་མདོག་ལ་དྲིས་པ། གཞོན་ནུ་བུད་མེད་འདི་སུས་བསད། དེས་སྨྲས་པ། ཤེས་ལྡན་དག་ངས་ཀྱང་མི་ཤེས་ཏེ། འདི་ཁོ་བོས་ཀྱང་འདི་ཁོ་ན་ལྟར་མཐོང་
[180b.4]ངོ་། །དེ་ནས་རྒྱལ་པོའི་སྐྱེས་བུ་དེ་དག་ཕན་ཚུན་སྨྲ་བར་རྩོམ་པ། ཤེས་ལྡན་དག་གཞོན་ནུ་འདི་ནི་ཤིན་ཏུ་དུལ་བ་ཡིན་པས་འདི་ནི་ལས་འདི་བྱེད་པར་མི་སྲིད་པ། འདིར་གཞན་སུ་ཡང་མ་མཐོང་བས་ཡུ་བུ་ཅག་ནི་རྣམ་པ་ཐམས་ཅད་དུ་ཤིན་ཏུ་ཉམ་ང་བཞུགས་ལ་འདི་ལ་ཇི་ལྟར་བསྒྲུབ་
[180b.5]པར་བྱ། དེ་ལ་གཅིག་གིས་སྨྲས་པ། ཤེས་ལྡན་དག་ཡུ་བུ་ཅག་གིས་འདི་ཡོངས་སུ་གཅོད་ནུས་པ་མ་ཡིན་གྱི། བུད་མེད་འདི་དག་གཞོན་ནུ་ཞལ་མཆུའི་གནས་སུ་ཁྱེར་ན་དེར་བློན་པོ་རྣམས་ཀྱིས་ཡོངས་སུ་གཅོད་པར་འགྱུར་རོ། །དེ་ནས་རྒྱལ་པོའི་སྐྱེས་བུ་རྣམས་ཀྱིས་བུད་
[180b.6]མེད་དེ་ཁྱོགས་ལ་བཏེག་པ་དང་། གཞོན་ནུ་གསེར་མདོག་ཀྱང་ཁྱེར་ཏེ། ཞལ་མཆུའི་གནས་སུ་སོང་ངོ་། །ཞལ་མཆུའི་གནས་དེ་ན་ཡང་བློན་པོ་རབ་གཏུམ་རྗེས་སུ་མཐུན་པའི་ལས་བྱེད་པ་རྣམས་དང་ལྷན་ཅིག་འདུག་པར་གྱུར་ཅིང་འདུས་པར་གྱུར་པ་དང་། རྒྱལ་པོའི་སྐྱེས་བུ་དེ་རྣམས་
[180b.7]འོང་བ་དེས་རིང་པོ་ཉིད་ནས་མཐོང་ནས་དྲིས་པ། ཤེས་ལྡན་དག་འདི་ཅི་ཞིག་ཡིན། བུད་མེད་འདི་བདག་ཅག་རྣམས་ཀྱིས་དེད་དཔོན་ཉི་མའི་སྐྱེད་མོས་ཚལ་དུ་དུས་བྱས་པ་མཐོང་ལགས་ཏེ། སྐྱེད་མོས་ཚལ་དེར་བདག་ཅག་རྣམས་ཀྱིས་བལྟས་ན་གཞོན་ནུ་གསེར་མདོག་མ་གཏོགས་པ་སུ་
[181a]
[181a.1]ཡང་མ་མཐོང་ནས་འདི་ཉིད་ལ་བདག་ཅག་གིས་གཞོན་ནུ་བུད་མེད་འདི་སུ་ཞིག་གིས་བསད་ཅེས་དྲིས་པ། ཤེས་ལྡན་དག་ངས་ཀྱང་མི་ཤེས་ཏེ། ཁོ་བོས་ཀྱང་འདི་ཁོ་ན་ལྟར་མཐོང་ངོ་ཞེས་གླེང་ན་ད་ནི་གཙོ་བོ་ཁྱེད་རྣམས་ཀྱིས་རྣམ་པར་དཔྱོད་ཅིག །བློན་པོ་རབ་གཏུམ་
[181a.2]གྱིས་སྨྲས་པ། ཁྱེད་རྣམས་འདིར་ཡུད་ཙམ་ཅིག་སྡོད་ཅིག །ངས་རྒྱལ་པོ་ལ་ཞུ་བར་བྱའོ་ཞེས་སྨྲས་ནས། དེས་རྒྱལ་པོ་མ་སྐྱེས་དགྲའི་ཕོ་བྲང་དུ་སོང་སྟེ། སྒོ་སྲུངས་ཀྱི་སྐྱེས་བུ་ལ་དྲིས་པ། ཀྱེ་སྐྱེས་བུ་ལྷ་ཅི་ཞིག་མཛད། དེར་སྨྲས་པ། སྟེང་གི་ཁང་བཟངས་ཀྱི་གཞི་ན་སྐྱེས་པ་
[181a.3]མེད་པར་བུད་མེད་ཀྱི་རོལ་མོས་རྩེ་བར་མཛད་དགའ་བར་མཛད་དགའ་མགུར་སྤྱད་པར་མཛད་དོ། །དེས་སྐབས་རྙེད་པས་སྒོ་དཔོན་མོ་ཆེན་པོ་ཞིག་ལ་སྨྲས་པ། སོང་ལ་ལྷ་ལ་བློན་པོ་རྣམས་ཀྱིས་ཞུ་བ་འདི་སྐད་ཞུས་ཤིག །དེད་དཔོན་ཉི་མའི་བུས་བསྐྱེད་མོས་ཚལ་དུ་བུ་མོ་ཀ་
[181a.4]ཤི་མཛེས་དགའ་མོ་བཀུམ་ལ་དེ་ཡང་གཡར་གྱིས་འཆེས་པར་མི་བགྱིད་ན། འདི་ལ་བདག་ཅག་རྣམས་ཀྱིས་ཅི་ལྟར་བསྒྲུབ་པར་བགྱི། དེ་སོང་སྟེ་རྒྱལ་པོ་ལ་ཞུས་པ། རྒྱལ་པོ་དགའ་བའི་རོལ་མོ་དེ་ལ་ཤིན་ཏུ་ཆགས་ནས་སྨྲས་པ། སོང་ལ་བློན་པོ་ལ་ཁྱེད་རྣམས་ཉིད་ཀྱིས་
[181a.5]ལེགས་པར་དཔྱོད་ཅིག་ཅེས་སྨྲས་སོ། །དེ་ཕྱིར་བྱུང་སྟེ། བློན་པོ་རབ་གཏུམ་ལྷས་འདི་སྐད་ཅེས་བཀའ་སྩལ་ཏོ་ཞེས་སྨྲས་སོ། །དེ་ནས་བློན་པོ་རབ་གཏུམ་ཞལ་ཆེའི་གནས་སུ་འོངས་ནས་རྒྱལ་པོའི་སྐྱེས་བུ་རྣམས་ལ་སྨྲས་པ། ཤེས་ལྡན་དག་ཁྱེད་སོང་ལ་གསོད་མ་པ་
[181a.6]རྣམས་སྦྲོན་ཅིག །དེ་རྣམས་ཀྱིས་ཀྱང་སྦྲན་པ་དང་བློན་པོ་རབ་གཏུམ་གྱིས་གསོད་མ་བ་རྣམས་ལ་སྨྲས་པ། གཞོན་ནུ་འདིས་བུ་མོ་ཀ་ཤི་མཛེས་དགའ་མོ་འདི་བསད་ཀྱི་ཁྱེད་རྣམས་སོང་ལ་ངན་པར་སྤྱོད་པ་འདི་རྒྱ་བ་ལག་དམ་པོར་ཆིངས་ལ་སྒྲ་རྩུབ་པའི་རྔ་བརྡུངས་ཤིང་ལམ་
[181a.7]པོ་ཆེ་དང་། ཚོང་འདུས་དང་། བཞི་མདོ་དང་། སུམ་མདོ་རྣམས་སུ་བསྒྲགས་པའི་སྒོར་བསྒྲགས་ལ་གྲོང་ཁྱེར་གྱི་ལྷོ་ཕྱོགས་ཀྱི་སྒོར་ཕྱུང་སྟེ། དུར་ཁྲོད་ཆེན་པོར་ཁྱེར་ལ་གསལ་ཤིང་ལ་སྐྱོན་ཅིག །ཤི་བ་དང་བུ་མོ་ཀ་ཤི་མཛེས་དགའ་མོ་དང་ལྷན་ཅིག་རོ་བསྲེགས་པའི་
[181b]
[181b.1]གནས་ཅིག་ན་ཞོག་ལ་སྲེགས་ཤིག །དེ་ནས་གསོད་མ་པ་རྣམས་ཀྱིས་གཞོན་ནུ་གསེར་མདོག་ཤིན་ཏུ་གཟུགས་བཟང་བ་གསེར་བཙོ་མའི་རིའི་རྩེ་མོ་ལྟ་བུར་དཔལ་གྱིས་འབར་བ་ལ་བལྟས་ཏེ་ཀུན་དུ་ཡི་མུག་པར་གྱུར་ནས་ཕན་ཚུན་སྨྲས་པ། ཤེས་ལྡན་དག་ཇི་ལྟར་ཡུ་བུ་
[181b.2]ཅག་གསོད་མ་པ་ཡིན་ཡང་སྐྱེས་བུ་མཐོང་བར་དཀའ་བ་ཁྱད་པར་ཅན་འདི་ལྟ་བུ་ཇི་ལྟར་གསད་པར་བྱ། རྣམ་པ་ཐམས་ཅད་ཡུ་བུ་ཅག་ཉིད་རང་གི་སྲོག་དོར་བ་ནི་བླའི་འདི་ལྟ་བུ་གསད་པར་ནི་མི་བྱའོ། །བློན་པོ་རབ་གཏུམ་གྱིས་ཕན་ཚུན་གཅིག་ལ་གཅིག་སྨྲ་བར་བྱེད་པ་དེ་
[181b.3]མཐོང་བ་དང་དེ་རྣམས་ལ་སྨྲས་པ། ཤེས་ལྡན་དག་ཅི་སྟེ་འདུག་འདི་མྱུར་དུ་ཁྱེར་ཅིག་དེ་རྣམས་ཀྱིས་ཐལ་མོ་སྦྱར་ཏེ་གསོལ་བ་བཏབ་པ། བདག་པོ་བཟོད་པར་མཛོད་ཅིག །ཇི་ལྟར་བདག་ཅག་གསོད་མ་པ་རྣམས་ལགས་ཀྱང་འདི་ལྟ་བུའི་སྐྱེས་བུ་ཁྱད་པར་ཅན་སྐྱེ་བ་
[181b.4]མང་པོའི་ཡིད་དུ་འོང་བ་གསོད་པར་རྔོ་མི་ཐོགས་སོ། །བློན་པོ་རབ་གཏུམ་ཤིན་ཏུ་འཁྲུགས་ནས་གལ་ཏེ་ཁྱེད་རྣམས་ཀྱིས་འདི་མ་བསད་ན་དེང་ཁྱེད་རྣམས་ཉིད་བུ་དང་ནང་མི་དང་གཉེན་འདུན་དང་བཅས་པ་རྣམས་ཀྱི་སྲོག་མེད་པར་བྱའོ་ཞེས་སྨྲས་པ་དང་། དེ་རྣམ་སྐྲག་པས་ཕན་
[181b.5]ཚུན་སྨྲས་པ། ཤེས་ལྡན་དག་བློན་པོ་འདིའི་རྩོམ་པ་ནི་རིགས་པ་དང་མི་ལྡན་པ་སྟེ། གང་འདི་གཞོན་ནུ་གསེར་མདོག་འདི་ལྟར་མཐོང་བར་དཀའ་བ་སྐྱེས་བུ་ཁྱད་པར་ཅན་ཡོངས་སུ་སྤོང་བར་བརྩོན་ན་དེ་ཡུ་བུ་ཅག་རྣམས་ཀྱི་བུ་དང་ཆུང་མ་དང་གཉེན་འདུན་དང་བཅས་པ་
[181b.6]གསོད་པར་ཅི་སྟེ་མི་བྱེད་དེ། །འདི་ལྟ་བུ་ཤིན་ཏུ་ཉམ་ང་བར་ཞུགས་ན། འདི་ལ་ཇི་ལྟ་བུར་བསྒྲུབ་པར་བྱ། ཡང་དེ་རྣམས་འཆི་བས་འཇིག་སྐྲག་པས་བློ་སྐྱེས་པ། གཞོན་ནུ་འདི་སྐྱེ་བོ་མང་པོའི་ཡིད་དུ་འོང་བ་ཡིན་འདི་རེ་ཞིག་ལམ་པོ་ཆེར་དགྱེར་གྱི་སྐྱེ་བོ་མང་པོའི་ཚོགས་གང་ཡིན་པ་
[181b.7]འདི་ཐར་བར་བྱེད་པའི་གནས་ནི་ཡོད་དོ། །འདི་གསོད་པ་ལ་བཏང་སྙོམས་སུ་འཇོག་པ་སུ་ཞིག་གིས་ནུས་སྙམ་ནས་དེ་རྣམས་དེའི་གན་དུ་སོང་ནས་འདི་རྒྱབ་ལག་བཅིང་ངོ་སྙམ་པ་དང་། དེའི་གཟུགས་ཕུན་སུམ་ཚོགས་པ་རྒྱ་ཆེན་པོར་མཛེས་པ་མཐོང་བ་དང་རེག་པར་མ་ནུས་སོ། །
[182a]
[182a.1]དེ་ནས་ཡན་ལག་དང་ཉིང་ལག་འདར་ཞིང་མཆི་མ་འཛག་ལ་སྐད་འཛེར་བཞིན་དུ་སྨྲེ་སྔགས་འདོན་པར་རྩོམ་པ། ཀྱི་ཧུད་འདི་ལྟ་བུའི་སྡིག་པ་བྱད་དུ་བཅུག་པ་བདག་ཅག་ནི་ཤིན་ཏུ་སྡུག་བསྔལ་ཏེ། སུ་ཞིག་གིས་འདི་ལྟ་བུའི་བྱ་བ་མ་ཡིན་པ་ལ་སྦྱར་བར་འགྱུར། དེ་
[182a.2]ནས་བློན་པོ་རབ་གཏུམ་གྱིས་ཤིན་ཏུ་རྩུབ་པ་དང་བཅས་པའི་ལུང་ཡང་བསྒོ་བ། ཁྱེད་རྣམས་ཅི་ལ་འགོར་དེ་ནས་དེ་རྣམས་སྐྲག་ཅིང་ཀུན་དུ་བྲེད་པར་གྱུར་པས་དེ་རྣམས་མཆི་མས་མིག་ཁེངས་ཤིང་འདར་བཞིན་དུ་དེ་བཟུང་སྟེ། གསེར་གྱི་མདོག་ཅན་གྱི་གོས་སེར་པོ་དེ་ཉིད་ཀྱིས་རྒྱབ་
[182a.3]ལག་ཏུ་བཅིངས་སོ། །རྒྱབ་ལག་ཏུ་བཅིང་བས་བཅིངས་པ་དེ་མཐོང་བ་དང་། བློན་པོ་རབ་གཏུམ་མ་གཏོགས་པའི་ཞལ་ཆེའི་གནས་སུ་ཚོགས་པའི་སྐྱེ་བོའི་ཚོགས་དེ་དག་ཐམས་ཅད་དེ་དང་བྲལ་བའི་གདུང་བས་སེམས་ཀྱི་རྒྱུད་ཞུ་བར་གྱུར་ནས་མཆི་མ་ཀློག་པར་གྱུར་ཏེ། ཀྱི་
[182a.4]ཧུད་ད་ནི་མཐོང་བར་དཀའ་བའི་གཞོན་ནུ་འདི་ལྟ་བུ་མེད་པར་འགྱུར་རོ་ཞེས་སྨྲས་སོ། །དེ་ནས་གསོད་མ་པ་རྣམས་ཀྱིས་དེ་ལམ་པོ་ཆེར་བཏེག་པ་དང་། དེ་ནས་བར་སྐབས་དེར་ཅ་ཅོའི་སྒྲ་བྱུང་བ་དང་། ཅ་ཅོའི་སྒྲ་དེ་ཐོས་པས་རྒྱལ་པོའི་ཁབ་ན་གནས་པ་དང་། ཕྱོགས་སྣ་
[182a.5]ཚོགས་པ་ནས་ལྷགས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། སྐྱེ་བོའི་ཚོགས་རྣམས་འདུས་པར་གྱུར་པ་དང་། གཞོན་ནུ་གསེར་མདོག་རྒྱབ་ལག་ཏུ་བཅིང་བ་དམ་པོས་བཅིངས་པ་བལྟས་ཏེ། ཐམས་ཅད་སྐྱོ་བའི་ཡིད་ཀྱིས་རྟབས་བག་དང་བཅས་
[182a.6]པར་འདྲི་བར་རྩོམ་པ། ཤེས་ལྡན་དག་འདི་ཅི་ཞིག་ཡིན། དེ་ནས་གསོད་མ་པ་དེ་རྣམས་མཆི་མ་ཤིན་ཏུ་འཛག་ཅིང་སྐད་འཛེར་བཞིན་དུ་སྨྲེ་ཞིང་སྨྲས་པ། གཞོན་ནུ་འདིས་བུ་མོ་ཀ་ཤི་མཛེས་དགའ་མོ་བསད་དོ་ཞེས་གྲག་ནས་བསད་པའི་ཕྱིར་ཡོངས་སུ་སྤངས་ཏེ། ལམ་པོ་ཆེ་
[182a.7]དང་། ཚོང་འདུས་དང་། བཞི་མདོ་དང་། སུམ་མདོ་རྣམས་སུ་བསྒྲགས་པའི་སྒོར་བསྒྲགས་ནས་འདི་དུར་ཁྲོད་ཆེན་པོར་ཁྱེར་ཏེ་རིང་པོ་མི་ཐོགས་པར་གསོད་པ་ཡིན་ནོ། །དེ་ཐོས་པ་དང་། སྐྱེ་བོའི་ཚོགས་ཆེན་པོ་དེ་དག་དེ་དང་བྲལ་བའི་སྡུག་བསྔལ་གྱིས་གདུངས་པས་སྒྲ་གཅིག་
[182b]
[182b.1]ཏུ་གསང་མཐོན་པོས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་ཀྱི་ཧུད་ཇི་ལྟར་གཞོན་ནུ་འདི་འདི་ལྟར་གཟུགས་བཟང་བ་བལྟ་ན་སྡུག་པ་མཛེས་པ་ཡན་ལག་དང་ཉིང་ལག་ཐམས་ཅད་འབྱེས་པ་དང་ལྡན་པ། གསེར་བཙོ་མ་ལྟ་བུའི་ཁ་དོག་རྒྱས་པ་དང་ལྡན་པ། སྐྱེ་བོ་ཐམས་ཅད་ཀྱི་
[182b.2]མིག་དང་ཡིད་འཕྲོག་པ། མཁས་པ། དུལ་བ། དེས་པ། སྒྲིན་པ། སྙིང་རྗེ་ཅན། བདག་ཉིད་ཆེ་བ། ཆོས་འདོད་པ། སྐྱེ་དགུ་རྣམས་ལ་མཉེས་གཤིན་པ་གསོད་ན་ཅི་སྟེ་དམ་པ་རྣམས་ནུབ་པར་གྱུར་ཏམ། ཅིའི་ཕྱིར་ཆོས་ནུབ་པར་གྱུར་ཏམ། ཅིའི་ཕྱིར་ཆོས་མ་ཡིན་པའི་
[182b.3]ས་འབྱོར་པར་གྱུར་ཅིང་རྒྱལ་སྲིད་ཀྱི་དབང་ཕྱུག་ལ་གནས་པར་གྱུར་ཏམ། ཀྱི་ཧུད་སྡུག་བསྔལ་ལོ། །འདི་ཡི་གཟུགས་དང་མདོག་མདངས་དང་། །ཕུན་ཚོགས་རྒྱན་གྱི་མཆོག་རྣམས་ནི། །མཐོང་ཞིང་མཐོང་ཞིང་བདག་ཅག་རྣམས། །སྔོན་ཆད་མཆོག་ཏུ་དགའ་བར་གྱུར། །ད་ལྟར་
[182b.4]དེ་ཉིད་གསོད་མ་པའི། །སྐྱེས་བུས་ཟིན་པ་མཐོང་བས་ན། །མྱ་ངན་དྲག་པོས་ཟིལ་མནན་པས། །བདག་ཅག་སྙིང་ནི་གས་སྙམ་བྱེད། །ཡིད་དང་མིག་ནི་འཕྲོག་བྱེད་ཅིང་། །སྐྱེ་བོ་མང་པོའི་ཡིད་འོང་གང་། །དེ་ལ་ཅི་ཕྱིར་རྒྱལ་པོ་ཡི། །ཆད་པ་དག་ནི་འབེབས་པར་འགྱུར། །
[182b.5]རྟག་ཏུ་བལྟས་པར་གྱུར་ཀྱང་ནི། །ལུས་ཅན་ངོམས་པར་མི་འགྱུར་བ། །སྙིང་རྗེ་སྤངས་པའི་བློན་པོ་ཡིས། །གསོད་པའི་ཕྱིར་ནི་ཅི་ཡི་ཕྱིར། །གང་ཞིག་ཐུབ་པ་ལྟ་བུ་ཡི། །ཀུན་སྤྱོད་དུལ་བར་ལྡན་གྲགས་པའི། །དེ་ལ་ཉེས་པ་འདི་འདྲ་བ། །འབྱུང་བར་འགྱུར་བ་ག་ལ་
[182b.6]སྲིད། །འདི་ལྟར་ཡོན་ཏན་ཅན་འདི་དང་། །འབྲལ་བ་འདིར་ནི་ཉེར་གནས་པ། །ཀྱེ་མ་ཆོས་མིན་མེལ་ཙེ་བྱེད། །ཆོས་ནི་ཤིའམ་གཉིད་ལོག་གྱུར། །དེ་ལ་བུད་མེད་རྣམས་ཤིན་ཏུ་དགའ་བ་ཡིན་པས་དེར་བུད་མེད་ལ་ལ་ནི་དེ་དང་བྲལ་བའི་སྡུག་བསྔལ་གྱིས་གདུངས་
[182b.7]པས་ས་ལ་འགྲེ་ལྡོག་པར་བྱེད་དོ། །ལ་ལ་ནི་བྲང་རྡུང་ངོ་། །ལ་ལ་ནི་དྲན་པ་སྟོར་བར་གྱུར་ཏེ། དེ་རེ་རེ་ཞིང་བུ་གཅིག་པ་དང་བྲལ་བ་ལྟ་བུའི་སྡུག་བསྔལ་ཉམས་སུ་མྱོང་བར་གྱུར་ཏོ། །བདག་ཉིད་ཆེན་པོ་དེ་ནི་སྐྱེ་བོ་མང་པོའི་ཡིད་དུ་འོང་བ་ཡིན་པས་རྒྱལ་པོའི་ཁབ་ཀྱི་གྲོང་
[183a]
[183a.1]ཁྱེར་ན་གནས་པའི་སྐྱེ་བོའི་ཚོགས་ཆེན་པོ་དེ་དང་བྲལ་བའི་སྡུག་བསྔལ་གྱིས་གདུངས་པས་ཆོ་ངེ་འདེབས་པ་ལ་ཞུགས་པའི་ཕྱིར། རྒྱལ་པོའི་ཁབ་ཀྱི་གྲོང་ཁྱེར་ཤིན་ཏུ་འཁྲུགས་པར་ཤེས་ཤིང་དེ་དང་བྲལ་བའི་སྡུག་བསྔལ་གྱིས་གདུངས་བས་གཡོ་བར་གྱུར་
[183a.2]ཏོ། །དེད་དཔོན་ཉི་མའི་ཁྱིམ་ནས་བུ་མོ་གཅིག་ལམ་པོ་ཆེ་དེར་སོང་བ་དང་། དེས་ཇི་ལྟར་གྱུར་པ་དེ་ཐོས་པ་དང་། དེ་བྲང་བརྡུངས་སྨྲེ་སྔགས་འདོན་ཏེ། རིངས་པ་རིངས་པར་ཁྱིམ་དུ་སོང་ནས་གཞོན་ནུ་གསེར་མདོག་གི་མ་གང་ན་བ་དེར་སོང་སྟེ་ཕྱིན་པ་དང་། དེའི་མདུན་དུ་བདག་ཉིད་
[183a.3]འགྱེལ་ཏོ། །དེ་ནས་གཞོན་ནུ་གསེར་མདོག་གི་མས་རྟབས་བག་གིས་དྲིས་པ། བུ་མོ་ཅི་ཞིག་ཡིན་སྨྲོས་ཤིག །དེ་གསང་མཐོན་པོས་ཆོ་ངེས་འདེབས་ཤིང་རྗེའི་སྲས་གཞོན་ནུ་གསེར་མདོག་གིས་སྐྱེད་མོས་ཚལ་དུ་བུ་མོ་ཀ་ཤི་མཛེས་དགའ་མོ་བསད་ཅེས་གྲག་གོ་ཞེས་ཟེར་ནས་
[183a.4]མ་བརྟགས་པར་རྒྱབ་ལག་བཅིང་བ་དམ་པོས་བཅིང་ནས་གསོད་པའི་ཕྱིར་ཡོངས་སུ་སྤངས་ཏེ། གསོད་མ་པ་རྣམས་ཀྱིས་ཡོངས་སུ་བསྐོར་ནས་ལམ་པོ་ཆེ་དང་། ཚོང་འདུས་དང་། བཞི་མདོ་དང་། སུམ་མདོ་རྣམས་སུ་བསྒྲགས་པའི་སྒོར་བསྒྲགས་ཏེ། དུར་ཁྲོད་ཆེན་པོར་
[183a.5]ཁྱེར་ནས་འདི་ཡུན་རིང་པོ་མི་ཐོགས་པར་གསོད་པར་བྱེད་དོ། །དེ་ཐོས་པ་དང་གཞོན་ནུ་གསེར་མདོག་གི་མ་མྱ་ངན་གྲག་པོས་ནོན་ཏེ། བརྒྱལ་ནས་ས་ལ་འགྱེལ་ཏོ། །དེ་ནས་ཆུ་གཏོར་བས་སླར་དབུགས་ཕྱུང་སྟེ་བསླང་བ་དང་། ཀྱི་ཧུད་ཀྱི་ཧུད་བུ་ཞེས་ཆོ་ངེས་འདེབས་ལ། སྐྲ་
[183a.6]འབལ་ཞིང་བྲང་བརྡུངས་ཏེ། འདར་བཞིན་དུ་ཡང་དང་ཡང་དྲན་པ་སྟོར་བར་གྱུར་པ་དང་གྲོང་ཁྱེར་ནས་བྱུང་སྟེ། ལམ་པོ་ཆེར་ཞུགས་པ་དང་། དེ་བུ་དང་བྲལ་བའི་སྡུག་བསྔལ་གྱིས་གདུངས་པས་ཡིད་རྨོངས་པ་དང་། སྨྲེ་སྔགས་འདོན་ཅིང་རེ་རེ་ནས་དྲིས་པ། ལམ་གང་ནས་
[183a.7]གཞོན་ནུ་གསེར་མདོག་ཁྱེར་བར་གྱུར། ཀྱི་ཧུད་བུ་སྡུག་མ་མཐོང་གིས་སྐྱོབས་ཤིག །སྐྱོབས་ཤིག །བུ་སྡུག་ང་ལ་སྟོན་ཅིག་ཅེས་ཟེར་ཞིང་དུ་བཞིན་དུ་ལམ་པོ་ཆེའི་དབུས་སུ་ཆས་པ་དང་། ཇི་ལྟ་ཇི་ལྟར་དེད་དཔོན་གྱི་ཆུང་མས་གཞོན་ནུ་གསེར་མདོག་མ་མཐོང་བ་དེ་ལྟ་དེ་ལྟར་
[183b]
[183b.1]སྡུག་བསྔལ་མི་བཟད་པའི་སྡུག་བསྔལ་གྱིས་གདུངས་ཏེ་ཆོ་ངེས་འདེབས་ཤིང་རེ་རེའི་རྐང་པ་ལ་གཏུགས་ནས་ཐལ་མོ་སྦྱར་ཏེ། གསོལ་བ་འདེབས་པ་བདག་གི་སྐྱབས་མཛོད་ཅིག །བདག་གི་སྐྱབས་མཛོད་ཅིག །ཇི་སྲིད་གཞོན་ནུ་ལམ་འདི་ནས་འདའ་བར་མ་གྱུར་གྱི་བར་དུ་
[183b.2]མྱུར་དུ་སྐབས་དབྱེ་བར་མཛོད་ཅིག །ལམ་འདི་ནས་བདག་གི་བུ་གསེར་མདོག་ཁྱེར་བ་དེ་ཇི་ལྟར་མཐོང་བར་འགྱུར་བ་དེ་ལྟ་བུའི་དྲིན་གྱིས་བདག་ལ་བསྐྱབ་ཏུ་གསོལ། དེ་ཡང་དེ་ན་གོ་སྐབས་མ་ཕྱེད་པས་ཀྱི་ཧུད་བུ་རྙེད་པར་མ་གྱུར་ཅེས་ཟེར་ཞིང་ལུས་ཐམས་ཅད་བདག་ཉིད་
[183b.3]ཀྱིས་ས་ལ་བརྡབས་ཏེ། དེ་ན་ཆུ་ནས་བཏོན་པའི་ཉ་བཞིན་དུས་ལ་འགྲེ་ལྡོག་པ་དང་། བྱ་ཁྲུང་ཁྲུང་ཕྲུ་གུ་སྟོར་བ་ལྟར་སྙིང་རྗེ་རྗེ་སྐད་དུ་ངུ་བ་དང་། བ་བེེའུ་སྟོར་བ་འབུ་སྒྲ་འདོན་པ་བཞིན་སྨྲེ་སྔགས་འདོན་ཏེ། ཀྱི་ཧུད་བུ་སྡུག་ཅིང་ཡིད་དུ་འོང་བ། ཀྱི་ཧུད་བཟོད་པ། ཀྱི་ཧུད་རྗེས་
[183b.4]སུ་མཐུན་པ། ཀྱི་ཧུད་ཡིད་ལ་རེ་བ་བརྒྱས་ཐོབ་པ། ཀྱི་ཧུད་གཟུགས་བཟང་བ། བལྟ་ན་སྡུག་པ་མཛེས་པ། ཀྱི་ཧུད་ཡན་ལག་ཐམས་ཅད་འབྱེས་པ་དང་ལྡན་པ། ཀྱི་ཧུད་གསེར་བཙོ་མའི་ཁ་དོག་ལྟ་བུ། མདོག་ཤིན་ཏུ་རྒྱས་པ་དང་ལྡན་པ། ཀྱི་ཧུད་སྐྱེ་བོ་ཐམས་ཅད་ཀྱི་མིག་
[183b.5]དང་ཡིད་འཕྲོག་པ། ཀྱི་ཧུད་སྐྱེ་བོ་ཐམས་ཅད་ཀྱི་ཡིད་དུ་འོང་བ། ཀྱི་ཧུད་མི་ཀུན་དགའ་བར་བྱེད་པ། ཀྱི་ཧུད་མཁས་པ། དུལ་བ། རྣམ་པར་བྱང་བ། ཡིད་དུ་འོང་བའི་ཚིག་སྨྲ་བ། ཀྱི་ཧུད་སྙིང་རྗེ་ཅན་ཆོས་འདོད་པ། སེམས་ཅན་ལ་མཉེས་གཤིན་པ། ཀྱི་ཧུད་ངའི་
[183b.6]རིགས་ཀྱི་སྒྲོན་མ། ཀྱི་ཧུད་ངའི་སྙིང་དུ་སྡུག་པ། ཀྱི་ཧུད་ངའི་སྙིང་ཐམས་ཅད་པ། ཀྱི་ཧུད་ངའི་གཅེས་པ་རྣམས་བསྡུས་པ། ཀྱི་ཧུད་ངའི་མིག་གི་བདུད་རྩི། ཀྱི་ཧུད་ངའི་སྡུག་པའི་འཆིང་བ། ཀྱི་ཧུད་ངའི་རིགས་ཀྱི་ཐམས་ཅད་པ། ཀྱི་ཧུད་ཇི་ལྟར་ན་མ་བརྟགས་པར་
[183b.7]མགོན་མེད་པར་གསད་པའི་ཕྱིར་ཁྱེར་བར་གྱུར་ཅེས་སྨྲས་སོ། །སླར་ཡང་ཐལ་མོ་སྦྱར་ཏེ་གྲོང་ཁྱེར་པ་རྣམས་ལ་གསོལ་བ་འདེབས་ཤིང་ཡིད་དུ་འོང་བས་སྨྲས་པ། ཀྱི་ཧུད་དགའ་བྲལ་བཅོམ་བ་བདག །ང་ནི་ད་གོ་ཇི་ལྟར་གནས། །འདི་ནི་རྨིས་པའམ་ཡང་ན་མྱོས།།
[184a]
[184a.1]འོན་ཏེ་སེམས་ནི་འཁྲུགས་གྱུར་ཏམ། །དགེ་བ་བུ་ཡི་མྱ་ངན་ནི། །དྲག་པོ་ཡིས་ནི་གཡེངས་བཞིན་དུ། །དེ་ནི་ཡང་ཡང་སྨྲེ་སྔགས་འདོན། །གྲོང་ཁྱེར་བ་ལ་གསོལ་བ་འདེབས། །མ་དུལ་པའམ་གཟུགས་ངན་པ། །བདག་གི་ཡིད་འོང་མ་ཡིན་
[184a.2]པའི། །བདག་གི་བུ་ནི་ཁྱེར་གྱུར་ན། །ཁྱེད་རྣམས་བཏང་སྙོམས་བྱེད་ལ་རབ། །ཡོན་ཏན་ཅན་གྱི་ཕྱོགས་བྱེད་པ། །གལ་ཏེ་བརྩེ་བ་ཡོད་ཅེ་ན། །ཇི་ལྟར་ངས་ནི་བུ་མཐོང་བ། །དེ་ལྟར་གྲོང་ཁྱེར་པ་རྣམས་མཛོད། །དེང་བདག་གིས་ནི་ཙན་དན་སོགས། །བྱུག་པ་རྣམས་ཀྱིས་མ་བྱུགས་
[184a.3]ཤིང་། །གི་ཝང་ཐིག་ལེས་ཡན་ལག་ལ། །མང་དུ་བརྒྱན་པ་མ་བྱས་སོ། །གདུ་བུ་ལ་སོགས་རྒྱན་རྣམས་ཀྱིས། །བདག་གིས་དེང་དེ་མ་བརྒྱན་ཅིང་། །ཕེབས་པས་ཡོངས་སུ་མ་འཁྱུད་ལ། །འོ་ཡང་མང་དུ་མ་བྱས་སོ། །ང་ལ་བསྐོར་བ་མ་བྱས་ཤིང་། །འདི་ཡིས་ཕྱག་ཀྱང་མ་
[184a.4]བྱས་ན། །ཚམ་ཚོམ་མེད་པར་འདི་ལྟ་བུར། །ང་ཡི་བུ་ནི་ཁྱེར་བར་བྱེད། །དེང་བདག་ཕྱོགས་ཀུན་སྟོང་པ་སྟེ། །བདག་གི་ལུས་འདི་འདར་བ་དང་། །སྙིང་ཡང་སྲེག་པར་འགྱུར་བ་དང་། །ཡིད་ནི་ཀུན་དུ་རྨོངས་པར་གྱུར། །བརྩེ་བ་མེད་པའི་གསོད་མ་པས། །རིངས་པ་རིངས་པར་
[184a.5]ཁྱེར་གྱུར་པས། །སྙིང་དུ་སྡུག་པའི་བུ་འདི་ནི། །ཀྱི་ཧུད་ཀྱི་ཧུད་སླར་མི་མཐོང་། །བུ་ཡི་མྱ་ངན་འདི་འདྲ་བས། །རྩྭ་བཞིན་སྙིང་ནི་སྲེག་གྱུར་པ། །བདག་གིས་སྡིག་པ་མི་བཟད་པ། །སྐྱེ་བ་གཞན་དུ་བྱས་པར་ངེས། །བདེན་པ་གང་གིས་བདག་གི་སེམས། །སྡིག་ཅན་དགྲ་ལའང་མ་བསྐྱེད་པའི། །
[184a.6]བདེན་པ་དེས་ནི་བདག་གི་བུ། །ཕངས་པ་འདི་ལས་ཐར་པར་ཤོག །ཅེས་སྨྲས་སོ། །དེད་དཔོན་ཉི་མ་ཡང་རྒྱ་མཚོ་ཆེན་པོ་ལས་གྲུ་ལེགས་པར་གྲུབ་ནས་རྒྱལ་པོའི་ཁབ་ཏུ་ཕྱིན་ཏེ། དེ་རྒྱལ་པོའི་ཁབ་ཀྱི་གྲོང་ཁྱེར་དུ་ཕྱིན་པ་ན་བཀྲ་མི་ཤིས་པའི་ལྟས་མཐོང་སྟེ། དེའི་སྙིང་འདར་བ་དང་། །ཡན་
[184a.7]ལག་རྔུལ་བ་དང་། །མིག་འགུལ་བ་དང་། བྱ་རྣམས་དེའི་མདུན་དུ་སྒྲ་དྲག་པོ་སྒྲོགས་པར་རྩོམ་པར་གྱུར་པ་དང་། དེ་ལྟས་ལ་མཁས་ཤིང་བྱ་སྐད་ལ་མཁས་པས་སེམས་པ་ལ་ཞུགས་པར་གྱུར་ཏེ། འདི་ལྟ་བུའི་ལྟས་ངན་པ་ཀུན་དུ་མཐོང་བ་ལས་ན་གཞོན་ནུ་གསེར་མདོག་དེང་ངེས་པར་
[184b]
[184b.1]སྡུག་བསྔལ་ཆེན་པོས་ཀྱང་གནས་པར་ཡང་ངེས་ལ། དེ་ཡང་མཚན་མ་འདི་དག་ནི་དེ་དང་བྲལ་བར་སྟོན་པ་ཡིན་ནོ། །ཡང་སྨྲས་པ། ཇི་ལྟར་བདག་མིག་འགུལ་པ་དང་། །ཇི་ལྟར་བྱ་རྣམས་སྒྲ་སྒྲོགས་ནས། །ད་ནི་ངེས་པར་བུ་དང་དེང་། །བྲལ་བར་ཉེ་བར་གནས་པ་ཡིན། །
[184b.2]ཇི་ལྟར་ཡན་ལག་རྔུལ་བ་དང་། །ང་ཡི་སྙིང་ནི་འདར་བ་ལས། །ངེས་པར་བུ་དང་བྲལ་བ་སྟེ། །མི་བཟད་པ་ནི་ཉེ་བར་གནས། །དེ་འདི་ལྟར་སྡུག་བསྔལ་བརྒྱ་སྟོང་སེམས་ཤིང་ལུས་དང་ཡན་ལག་རྡུལ་ལ་འདར་བས་གོམ་པ་འདོར་མི་ནུས་བཞིན་དུ་ཉམ་ཐག་པས་རྒྱལ་པོའི་ཁབ་ཏུ་
[184b.3]ཞུགས་པ་དང་། ཅི་སྲིད་ཅིག་ན་སྐྱེ་བོའི་ཚོགས་མང་པོ་ང་རོ་འདོན་པའི་སྒྲ་ཐོས་ཏེ། དེ་སྨྲེ་སྔགས་ཀྱི་སྒྲ་དེའི་རྗེས་སུ་འབྲངས་ནས་ལམ་པོ་ཆེར་ཞུགས་པ་དང་། ཇི་སྲིད་ཅིག་ན་སྐྱེ་བོའི་ཚོགས་མང་པོའི་སྲིན་པོས་གཙེས་པ་བཞིན་དུ་གྲོང་ཁྱེར་ན་སྡུག་བསྔལ་གྱིས་གདུངས་
[184b.4]ཤིང་ང་རོ་འདོན་པ་མཐོང་ནས་དེ་མདུན་ནས་འོངས་པའི་སྐྱེས་བུ་གཞན་ཞིག་ལ་དྲིས་པ། ཀྱེ་ནང་རྗེ་འདི་ཅི་ཞིག་ཡིན། དེས་ཀྱང་འདི་ནི་དེད་དཔོན་ཉི་མ་ཡིན་ནོ་སྙམ་དུ་མ་ཤེས་ནས་དེས་སྨྲས་པ། དེད་དཔོན་ཉི་མ་ཞེས་བྱ་བའི་བུ་གཞོན་ནུ་གསེར་མདོག་ཅེས་བྱ་བ་གཟུགས་ལ་སོགས་
[184b.5]པ་ཡོན་ཏན་ཕུན་སུམ་ཚོགས་པ་དང་ལྡན་པ་ཞིག་ཡོད་པ་དེས། སྐྱེད་མོས་ཚལ་དུ་བུ་མོ་ཀ་ཤི་མཛེས་དགའ་མོ་བསད་ཅེས་གྲག་གོ་ཞེས་ནས་མ་བརྟགས་པར་གསད་པའི་ཕྱིར་ཡོངས་སུ་སྤངས་ཏེ། ལམ་པོ་ཆེ་དང་། ཚོང་འདུས་དང་། བཞི་མདོ་དང་། སུམ་མདོར་བསྒྲགས་
[184b.6]ནས་རིང་པོ་མི་ཐོགས་པ་དུར་ཁྲོད་ཆེན་པོར་ཁྱེར་ཏེ་གསོད་པར་འགྱུར་རོ། །དེ་ཐོས་པ་དང་དེད་དཔོན་ཉི་མ་བུ་དང་བྲལ་བའི་སྡུག་བསྔལ་གྱིས་གདུངས་བས་འཕྲལ་དུ་བརྒྱལ་ཏེ་ས་ལ་འགྱེལ་ཏོ། །དེ་ནས་ཆུ་གཏོར་བས་སླར་དབུགས་ཕྱུང་བ་དང་། མཆི་མའི་ཆུ་རླབས་ཀྱིས་གདོང་
[184b.7]གི་པདྨ་ཁེབས་བཞིན་དུ་ཀུན་དུ་འཁོར་ལ་དེ་ལྟ་བཞིན་དུ་ཀྱི་ཧུད་ལམ་གང་ནས་གཞོན་ནུ་གསེར་མདོག་ཁྱེར་བར་གྱུར་ཅེས་ཟེར་ཞིང་ལམ་པོ་ཆེའི་དབུས་སུ་རིངས་པ་རིངས་པར་སོང་བ་དང་། ཇི་སྲིད་ཅིག་ན་ཆུང་མ་སྐྲ་གྲོལ་བ། །ལག་པ་གཉིས་ཀྱིས་བྲང་བརྡུང་བ། །ཉམ་ཐག་པའི་ང་
[185a]
[185a.1]རོ་དང་། དེ་དང་དེའི་སྨྲེ་སྔགས་འདོན་པ་དང་། བུ་དང་བྲལ་བ་ལས་བྱུང་བའི་སྡུག་བསྔལ་མི་བཟད་པ། རྩུབ་པ། ཚ་བ། ཡིད་དུ་མི་འོང་བའི་ཚོར་བ་ཉམས་སུ་མྱོང་བར་མཐོང་ནས་དེ་ཡང་དྲག་ཅིང་ཉམ་ཐག་པས་སྐད་མཛེར་ཞིང་བརྣངས་བཞིན་དུ་མཆི་མས་མིག་
[185a.2]ཁེངས་པ་དང་། དེའི་གན་དུ་སོང་ངོ་། །ཆུང་མས་དེ་མཐོང་བ་དང་ཉིས་འགྱུར་བས་ལྷག་པའི་སྡུག་བསྔལ་གྱི་ཟུག་རྔུས་གཟིར་ཏེ། མཆི་མའི་ཆུ་རླབས་ཀྱིས་བཞིན་གྱི་པདྨ་ཁེབས་ཤིང་རྟབས་བག་ཏུ་རིངས་པ་རིངས་པར་ལངས་ཏེ། དེའི་མདུན་དུ་བདག་ཉིད་འགྱེལ་བར་
[185a.3]གྱུར་ཏོ། །དེ་ནས་དེད་དཔོན་ཉི་མས་ཉམ་ཐག་པའི་སྐད་ཀྱི་ང་རོས་སྨྲ་ཞིང་འཁྱུད་ནས་བསླང་བ་དང་། དེ་དེའི་རྐང་པ་གཉིས་ལ་གཏུགས་ཏེ་སྨྲས་པ། དེད་དཔོན་སྐྱབས་མཛོད་ཅིག་སྐྱབས་མཛོད་ཅིག །ང་ལ་བུའི་སློང་སྩོལ་ཅིག །ཡང་སྨྲས་པ། སྐལ་བ་ངན་ཅིང་དགའ་བྲལ་བ། །
[185a.4]ད་ལྟར་དབུགས་ནི་དབྱུང་དུ་གསོལ། །བུ་དང་བྲལ་བར་གྱུར་པ་ཡི། །སྡུག་བསྔལ་དྲག་པོས་རྣམ་པར་དུ། །གང་ཞིག་སྐྱེས་ཚེ་བདག་པོ་ཁྱེད། །མཆོག་ཏུ་དགྱེས་པར་གྱུར་པ་ཡི། །ཡིད་དུ་འོང་བའི་བུ་དེ་ཉིད། །དེད་ནི་གསོད་ཕྱིར་ཁྱེར་བར་གྱུར། །དུལ་ཞིང་དེས་ལ་མཁས་པ་
[185a.5]དང་། །བསྟན་བཅོས་ཀུན་ལ་མཁས་གྱུར་ཅིང་། །གང་ཞིག་གཟུགས་ནི་མཉམ་མེད་པ། །མཁས་པར་གྱུར་པའི་བུ་ཁྱེར་རོ། །ཁྱེད་ཀྱི་རིགས་རྒྱུད་ཆད་གྱུར་ཅིང་། །རིགས་ཀྱི་མཚམས་སྦྱོར་འཛིན་པ་དང་། །དཔལ་ལྡན་རིགས་ནི་གསལ་བྱེད་པའི། །ཁྱེད་ཀྱི་སྒྲོན་མ་མེད་པར་
[185a.6]གྱུར། །འདི་ནི་སྙིང་གི་ཐམས་ཅད་དེ། །འདི་ནི་དགའ་བའི་འཆིང་བ་ཡིན། །མི་རྣམས་མིག་གི་བདུད་རྩི་འདི། །གཤེད་མ་རྣམས་ཀྱིས་ཁྱེར་བར་གྱུར། །འདི་དག་ཐམས་ཅད་བཅིངས་པ་དང་། །མིག་ནི་འདི་དག་འགག་པ་སྟེ། །བུ་ཞེས་བཏགས་པའི་སྙིང་གང་ཡིན། །འདི་ནི་བཏོན་
[185a.7]ཏེ་ཁྱེར་བར་གྱུར། །བུ་འདི་རབ་ཏུ་ཐར་པའི་ཕྱིར། །འབད་པ་དེ་ནི་མྱུར་དུ་མཛོད། །ནོར་ནི་ཐམས་ཅད་བྱིན་ནས་སུ། །བདག་དང་བུ་ནི་ཐར་བར་མཛོད། །ཁྱོད་ཀྱིས་ལེགས་རྟོགས་འབྱོར་པ་དང་། །ཁྱེད་ཡིད་བསམ་པ་འགྲུབ་ནས་ནི། །འདི་ལྟར་ཡང་ནི་འཚོ་བ་ཡི། །ཁྱེད་ཀྱི་བུ་ནི་
[185b]
[185b.1]བལྟ་བར་བགྱི། །དེ་ནས་དེད་དཔོན་ཉི་མ་བུ་དང་བྲལ་བའི་སྡུག་བསྔལ་གྱིས་ཡིད་གདུངས་པར་གྱུར་ཀྱང་བརྟན་པས་སྲན་ཚུགས་པའི་སེམས་དང་ལྡན་པས་ཐལ་མོ་སྦྱར་ཏེ་གྲོང་ཁྱེར་པ་རྣམས་ལ་སྨྲས་པ། ཀྱེ་ཀྱེ་གྲོང་ཁྱེར་བ་རྣམས་ཉོན་ཅིག །ཅི་ལྟར་ན་ང་ལ་འདི་ལྟ་བུའི་སྡུག་བསྔལ་ཉེ་བར་གནས་པ་
[185b.2]ལ་ཁྱེད་རྣམས་བཏང་སྙོམས་སུ་བྱེད་པ་ནི་རིགས་པ་མ་ཡིན་ཏེ། ཅིའི་ཕྱིར་འབྲོག་སྟོང་པ་བཞིན་དུ་གྲོང་ཁྱེར་གྱི་དབུས་སུ་མ་བརྟགས་པར་ཁྱེད་རྣམས་ཀྱིས་མཐོང་བཞིན་དུ་ངའི་གཞོན་ནུ་ཡོན་ཏན་གསལ་བར་སྟོན་པ་ལྟ་བུ་གསོད་པའི་ཕྱིར་ཁྱེར་ན། ཅིའི་ཕྱིར་སེམས་ལས་ཆུང་བས་གནས། །ཅིའི་
[185b.3]ཕྱིར་ཉེ་བར་དཔྱད་པའི་ཐབས་མི་སེམས། ཅིའི་ཕྱིར་གཞོན་ནུ་ཐར་པའི་དོན་དུ་བརྩོན་པར་མི་བྱེད། དེ་རྣམས་ཀྱིས་སྨྲས་པ། དེད་དཔོན་འདི་ལྟ་བུའི་གཞོན་ནུ་ཡོན་ཏན་དང་ལྡན་པ་འདི་ནི་ཁྱེད་གཅིག་པུ་ལ་འདི་ལྟར་སྡུག་བསྔལ་བར་མ་ཟད་ཀྱི། གཞན་དུ་ན་བདག་ཅག་ཐམས་ཅད་
[185b.4]ཀྱང་སྡུག་བསྔལ་མོད་ཀྱི། འོན་ཀྱང་གཞོན་ནུ་འདི་ཐར་བར་བྱ་བའི་ཐབས་མ་མཐོང་ནས། གང་འདི་ལྟ་བུའི་ཡི་མུག་པས་གནས་པ་ཡིན་ནོ། །དེད་དཔོན་ཉི་མས་སྨྲས་པ། ཤེས་ལྡན་དག་ཁྱེད་རྣམས་ཀྱིས་ཡོངས་སུ་ཤེས་པ་ཉིད་དེ། གཞོན་ནུ་འདི་ཇི་ལྟ་བུ་ཤིན་ཏུ་སྙིང་རྗེ་བ་དང་ལྡན་པ།
[185b.5]བདག་ཉིད་ཆེ་བ། ཆོས་འདོད་པ། སེམས་ཅན་ཐམས་ཅད་ལ་མཉེན་གཤིན་པ་ཡིན་ཏེ། འདིས་འདི་ལྟ་བུ་བྱ་བ་མ་ཡིན་པ་ལ་འཇུག་པ་སེམས་ཀྱིས་ཀྱང་མི་ནུས་ན། ཀུན་དུ་སྤྱོད་པར་བྱེད་པ་ལྟ་སྨོས་ཀྱང་ཅི་དགོས། དེ་བས་ན་གཞོན་ནུ་དེ་སླར་དཔྱད་པའི་དོན་ལ་འབད་པས་རྩོམ་པར་གྱིས་
[185b.6]ཤིག །གལ་ཏེ་གཞོན་ནུ་ལེགས་པར་དཔྱད་ན་ངེས་པར་སྡུག་བསྔལ་འདི་ལས་ཐར་བར་འགྱུར་རོ། །ཁྱེད་རྣམས་ཀྱང་དམ་པ་སྐྱེ་བོ་ཐམས་ཅད་ལ་ཐུན་མོང་དུ་གྱུར་པ་ཡིན་པས་ཁྱེད་རྣམས་ཀྱིས་དེ་གསོལ་པ་ལ་ཉེས་པར་ནི་གང་ཡང་མ་མཐོང་སྟེ། གཞན་དུ་ན་བདག་ལ་རྗེས་སུ་བརྩེ་
[185b.7]བ་ཁོ་ནར་སྣང་བ་དང་། དམ་པ་ཉིད་ཀྱིས་ན་ཡོན་ཏན་ལ་རྗེས་སུ་དགའ་བ་ཉིད་སྟོན་པར་འགྱུར་གྱི། དེ་བས་ན་གང་སྙིང་རྗེའི་སེམས་ཉེ་བར་འཇོག་པས་སོང་ལ་རྒྱལ་པོའམ་བློན་པོ་ལ་ཞུས་ཤིག །གལ་ཏེ་དེ་དོན་ལ་སྲེད་པ་ཤིན་ཏུ་རིགས་པ་དང་ལྡན་པ་ཁྱེད་རྣམས་ཀྱི་ཚིག་ཀྱང་གཞན་
[186a]
[186a.1]དུ་མི་འགྱུར་རོ། །བདག་ཀྱང་བུ་དང་བྲལ་བས་ཤིན་ཏུ་གདུངས་ཀྱིས་བདག་གི་ནོར་འདི་ཐམས་ཅད་ཀྱང་ཕུལ་ལ། །ཇི་ལྟར་གཞོན་ནུ་ལེགས་པར་དཔྱད་པ་དེ་ལྟར་མཛོད་ཅིག །དེད་དཔོན་དེ་ནི་ཀུན་གྱིས་ཤེས་པ་དང་། མཛའ་བོར་བྱས་པ་ཡོད་པ་དེ་རྣམས་ཀྱིས་
[186a.2]དེའི་ཚིག་དང་། གཞོན་ནུ་ཡོན་ཏན་ལ་དགའ་བས་ཁས་བླངས་སོ། །དེ་ནས་གྲོང་ཁྱེར་པ་དེ་རྣམས་ཀྱིས་ཐ་སྙད་ལ་ཤིན་ཏུ་བྱང་བའི་གྲོང་ཁྱེར་བ་ཞིག་རྒྱལ་པོའི་ཕོ་བྲང་དུ་བཏང་སྟེ་བསྒོ་བ། གལ་ཏེ་དེང་གཞོན་ནུ་ཤིན་ཏུ་ལེགས་པར་དཔྱད་པ་མཛད་ན་བདག་ཅག་རྣམས་ཀྱིས་ཀྱང་རྒྱལ་
[186a.3]པོ་ལ་གསེར་སྲང་འབུམ་དབུལ་ལོ། །དེ་ནས་ཐ་སྙད་ལ་བྱང་བའི་གྲོང་ཁྱེར་བ་ཞལ་ཆེའི་གནས་སུ་སོང་བ་དང་། བློན་པོ་རབ་གཏུམ་གྱིས་འོང་བ་རིང་པོ་ནས་མཐོང་སྟེ་སྨྲས་པ། ཤེས་ལྡན་དག་ཁྱེད་འདིར་འོངས་པའི་དགོས་པ་ཅི་ཡོད། དེས་སྨྲས་པ། རྒྱལ་པོའི་ཁབ་ན་གནས་
[186a.4]པའི་གྲོང་ཁྱེར་པ་རྣམས་འདི་སྐད་དུ་ཞུ་བ་གསོལ་ཏོ། །གཞོན་ནུ་གསེར་མདོག་འདི་ནི་ཤིན་ཏུ་གཟུགས་ཕུན་སུམ་ཚོགས་པ་རྒྱ་ཆེན་པོ་དང་ལྡན་པ། སྐྱེ་བོ་མང་པོའི་ཡིད་དུ་འོང་བ་ལགས་པ་ལས་དེ་དང་བྲལ་བ་རྒྱལ་པོའི་ཁབ་ན་གནས་པའི་སྐྱེ་བོ་ཚོགས་ཤས་ཆེར་སྡུག་བསྔལ་བར་གྱུར་
[186a.5]པ་དང་། འདི་ནི་རྟག་ཏུ་ཆོས་ལ་མངོན་པར་དགའ་བའི་ཕྱིར་དང་། དུལ་བ་ལ་སོགས་པའི་ཡོན་ཏན་དང་ལྡན་པས་སྡིག་པའི་ཉེས་པ་གང་ལ་ཡིད་མངོན་པར་དགའ་བ་མ་ལགས་ཏེ། ད་བདག་ཅག་རྣམས་གསེར་སྲང་འབུམ་འབུལ་ལ། དེད་དཔོན་ཉི་མའི་ནོར་ཐམས་ཅད་ཀྱང་འབུལ་བར་
[186a.6]བདག་ཅག་རྩོལ་གྱིས་གཞོན་ནུ་གསེར་མདོག་སླར་བཟློག་པ་ལ་ཤིན་ཏུ་ལེགས་པར་དཔྱད་ནས་སྦྱར་དུ་གསོལ། དེ་ལྟར་མཛད་ན་ནི་བདག་ཅག་རྣམས་ཀྱིས་གསོལ་བ་ཡང་འབྲས་བུ་དང་བཅས་པར་འགྱུར་ལ། རྒྱལ་པོའི་བང་མཛོད་ཀྱང་འཕེལ་བར་འགྱུར་རོ། །བློན་པོ་རབ་གཏུམ་གྱིས་ཐོས་
[186a.7]ནས་ཁྲོས་ཏེ་སྨྲས་པ། ཤེས་ལྡན་འདི་ཅི་ཞིག་མ་བརྟགས་པ་ཡོད་ནས་གང་ལ་སླར་དཔྱད་པར་བྱ། རྒྱལ་པོའི་བང་མཛོད་རྒྱས་པར་འགྱུར་རོ་ཞེས་གང་ཞིག་སྨྲ་ན། དེ་ཡང་ཅི་ངེད་ཀྱི་རིགས་པ་དང་མི་ལྡན་པར་བསགས་པའི་ནོར་གྱིས་རྒྱལ་པོའི་བང་མཛོད་འཕེལ་བར་བྱའམ། ཁྱེད་རྣམས་
[186b]
[186b.1]ཀྱིས་རྒྱལ་པོའི་དགོངས་པ་ཡང་མི་ཤེས་ཏེ། གང་འདི་ལྟར་ཐབས་འདི་ལྟ་བུས་རྣམ་པ་ཐམས་ཅད་དུ་ཡངས་པ་ཅན་གྱི་གྲོང་ཁྱེར་གྱི་མི་རྣམས་ཀྱིས་ཐབས་ཀྱི་སྦྱོར་བས་ངེས་པར་རྒྱལ་པོ་ལ་གནོད་པ་ཆེན་པོ་བྱེད་པར་འདོད་པ་ཡིན་ཏེ། འདི་ལྟར་མ་བརྟགས་པར་སྐྱེ་བོ་རྣམས་ལོག་པར་བྱེད་པས་
[186b.2]རྒྱལ་པོ་ནི་མི་རིགས་པར་བྱེད་པ་ཉིད་ཡིན་ནོ་ཞེས་རྒྱལ་པོའི་གྲགས་པ་མ་ཡིན་པ་སྒྲོགས་པར་འདོད་པ་ཡིན་ནོ་སྨྲས་ཏེ། དེས་དེ་ཚར་བཅད་དོ། །ཚར་གཅད་ནས་གཤིན་རྗེའི་སྐྱེས་བུ་དང་འདྲ་བའི་མི་ཤིན་ཏུ་ཡང་དྲག་པོའི་ལས་ཅན་རྟག་ཏུ་གོམས་པའི་དབང་གིས་རྒྱུད་སྙིང་རྗེ་མེད་པར་བྱས་པ་
[186b.3]བརྩེ་བ་མེད་པ་བཞི་ཞིག་ཡོད་དེ། དེ་རྣམས་བོས་ནས་སྨྲས་པ། མྱུར་བར་སོང་ལ་གསོད་མ་པ་རྣམས་བསྐུལ་ཞིང་ངའི་ཚིག་ཀྱང་འདི་སྐད་དུ་འདི་གྲོང་ཁྱེར་ནས་མྱུར་དུ་ཐོན་ལ་ཇི་ལྟར་བསྒོ་བའི་ལས་ཀྱིས་སོད་ཅིག །ཁྱེད་རྣམས་ཀྱིས་ངའམ་རྒྱལ་པོའི་ལུང་མ་གཏོགས་པ་གཞན་གང་གི་
[186b.4]ཚིག་ཀྱང་མ་བཏང་ཅིག །དེ་ལྟར་བྱས་ན་ལེགས་ཀྱི་གཞན་དུ་བྱས་ནངས་ཁྱེད་རྣམས་ཆད་པ་ཆེན་པོས་གཅད་བར་བྱའོ་སྨྲོས་ཤིག །དེས་ཀྱང་རྒྱལ་པོ་དེ་ལྟར་བགྱིའོ་ཞེས་སྨྲས་ཏེ། རྒྱལ་པོའི་སྐྱེས་བུ་དེ་དག་དེའི་ཚིག་མཉན་ནས་ལག་ཏུ་རལ་གྲི་ཐོགས་ཏེ་ཆས་སོ། །གསོད་མ་པ་དེ་
[186b.5]རྣམས་ཀྱང་ཕྱི་ཤོལ་གྱི་ཐབས་བརྒྱ་སྙེད་བྱེད་ཅིང་དལ་བུས་དལ་བུས་གཞོན་ནུ་གསེར་མདོག་ལམ་པོ་ཆེ་དང་། ཚོང་འདུས་དང་། བཞི་མདོ་དང་། སུམ་མདོ་རྣམས་སུ་སྒྲ་སྒྲོགས་ཤིང་ཡོངས་སུ་བསྐོར་ཏེ། ཀྱེ་མ་ཀྱི་ཧུད་གཞོན་ནུ་ནི་གཏོང་བར་སུ་ཞིག་བྱེད་པར་འགྱུར། བདག་ཅག་
[186b.6]ཀྱང་འདི་ལྟ་བུའི་བྱ་བ་མ་ཡིན་པ་མི་བྱེད་པ་སུ་ཞིག་སྒྲུབ་པར་འགྱུར་ཞེས་སྨྲས་སོ། །རྒྱལ་པོའི་སྐྱེས་བུ་དེ་དག་ཀྱང་རལ་གྲི་ཕྱུང་བ་ལག་ན་ཐོགས་ཏེ་ཕྱིན་ནས་དེས་གསོད་མ་པ་དེ་རྣམས་ལ་དེས་ཇི་ལྟར་བསྒོ་བ་དེ་ལྟར་སྨྲས་སོ། །འདི་སྐད་ཅེས་ཀྱང་སྨྲས་ཏེ། གལ་ཏེ་འདི་མྱུར་བར་གྲོང་
[186b.7]ཁྱེར་ལས་བཏོན་ཏེ། ཇི་ལྟར་བསྒོ་བ་བཞིན་དུ་མ་བསད་ན་ངེད་ཀྱིས་ཁྱེད་ཅག་འཕྲལ་དུ་གསད་པར་བྱའོ། །དེ་རྣམས་ཀྱིས་ཤིན་ཏུ་ཡང་སྡུག་ཅིང་རལ་གྲི་ཕྱུང་བ་ལག་ན་ཐོགས་པ་གཤིན་རྗེའི་སྐྱེས་བུ་དང་མཚུངས་པ་དེ་ལ་བལྟས་ནས་ཀུན་དུ་སྐྲག་པར་གྱུར་ཏོ། །དེ་ནས་འཆི་བས་འཇིགས་
[187a]
[187a.1]སྐྲག་པས་སེམས་པ་ལ་ཞུགས་ཏེ། ཀྱི་ཧུད་སུས་ཀྱང་གཞོན་ནུའི་སྐྱབས་མ་བྱས་པ་ནི་སྡུག་བསྔལ་ལོ། །བདག་ཅག་རྣམས་ཀྱང་འདིས་འཕྲལ་དུ་གསོད་པར་འགྱུར་རོ་སྙམ་ནས་མཆི་མས་ཁེངས་པའི་མིག་དང་། རྒྱལ་པོའི་སྐྱེས་བུ་དེ་རྣམས་ཀྱིས་སྲུང་བཞིན་དུ་གཞོན་ནུ་གསེར་མདོག་
[187a.2]གྲོང་ཁྱེར་ནས་ཕྱུང་བར་བརྩམས་པ་དང་། དེ་གྲོང་ཁྱེར་ལས་འབྱིན་པར་འགྱུར་བ་ལ་བལྟས་ནས་སྲོག་ཆགས་བརྒྱ་སྟོང་དཔག་ཏུ་མེད་པ་སྒྲ་གཅིག་ཏུ་གསང་མཐོན་པོས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་དེད་དཔོན་ཉི་མ་ཐམས་ཅད་དང་བྲལ་བར་གྱུར་པ་ནི་སྡུག་བསྔལ་ལ། །དེད་དཔོན་
[187a.3]ཉི་མ་འདིའི་ཕ་མའི་རིགས་ཆད་པར་གྱུར་ཏོ། །དེད་དཔོན་ཉི་མ་འདིའི་རིགས་ཀྱི་སྒྲོན་མ་ནུབ་པར་གྱུར་ཏོ། །དེད་དཔོན་ཉི་མ་འདིའི་རིགས་རྣམས་ཀྱི་ཀུན་དུ་དགའ་བ་ནུབ་པར་གྱུར་ཏོ། །དེད་དཔོན་ཉི་མ་འདིའི་རིགས་ཀྱི་གཙུག་གི་ནོར་ཕྲོགས་སོ། །དེད་དཔོན་ཉི་མ་འདིའི་མིག་ཕྲོགས་པར་
[187a.4]གྱུར་ཏོ། །དེད་དཔོན་ཉི་མ་འདིའི་རིགས་ཀྱི་རྒྱན་ཕྲོགས་པར་གྱུར་ཏོ། །དེད་དཔོན་ཉི་མ་འདིའི་སྙིང་ཕྱུང་ངོ་། །དེད་དཔོན་ཉི་མ་འདིའི་སྲོག་ལུས་དང་ལྡན་བཞིན་དུ་ཕྲོགས་སོ། །ཀྱི་ཧུད་འདི་འབྲོག་སྟོང་པར་འཁྱམས་པ་བཞིན་དུ་ཡོངས་སུ་བསྐོར་ནས་ཕྱུང་བ་ལས་སུས་ཀྱང་སྐྱབས་མ་བྱས་
[187a.5]པར་སྡུག་བསྔལ་ལོ། །ད་ནི་རྒྱལ་པོའི་ཁབ་ཀྱི་གྲོང་ཁྱེར་གྱི་ཟླ་བ་འདི་འཆི་བདག་གི་སྒྲ་གཅན་གྱིས་གཟུང་ངོ་། །རྒྱལ་པོའི་ཁབ་ཀྱི་གྲོང་ཁྱེར་གྱི་ཉི་མ་འདི་ནམ་མཁའི་དཀྱིལ་དུ་ནུབ་བོ། །རྒྱལ་པོའི་ཁབ་ཀྱི་གྲོང་ཁྱེར་ན་གནས་པའི་མིག་གི་བདུད་རྩི་འདི་མཐོང་བའི་ལམ་ན་མི་གནས་
[187a.6]པར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་བ་རྣམས་ཀྱི་དགའ་བའི་རྒྱུན་འདི་མི་སྣང་བར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་གྱི་རྒྱན་འདི་ཕྲོགས་པར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་བ་རྣམས་ཀྱི་གཙུག་གི་ནོར་བུ་འདི་ཕྲོགས་པར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་
[187a.7]ན་གནས་པའི་གྲོང་ཁྱེར་པ་རྣམས་ཀྱི་ཡིད་དུ་འོང་བ་ཕྲོགས་ཏེ་ཁྱེར་ན་རྒྱལ་པོའི་ཁབ་ཀྱི་གྲོང་ཁྱེར་ན་གནས་པའི་མི་རྣམས་སུ་ཞིག་ལ་མིག་མི་འཛུམས་པར་ལྟ་བར་བྱེད། ད་ནི་གང་ཞིག་མཐོང་ན་ཡིད་དགའ་བར་བྱེད་ཅེས་ཡི་ཆད་པར་གྱུར་ཏོ། །བློན་པོ་རབ་གཏུམ་གྱིས་སྐྱེས་བུ་
[187b]
[187b.1]གཞན་ཞིག་སླར་ལོག་ནས་གཞོན་ནུ་གསེར་མདོག་གྲོང་ཁྱེར་ནས་ཕྱུང་ངོ་ཞེས་སྨྲས་པ་དང་། དེ་ཐོས་ནས་ཡིད་ཤིན་ཏུ་དགའ་བར་གྱུར་ཏོ། །དེ་ནས་གྲོང་ཁྱེར་པ་རྣམས་ཀྱི་ཕོ་ཉ་དེས་དེ་ཐོས་ནས་རེ་ཐག་ཆད་པར་གྱུར་ཏོ། །དེ་སོང་ནས་གྲོང་ཁྱེར་བ་དེ་རྣམས་ལ་རྣམ་པ་དེ་དག་རྒྱ་ཆེར་
[187b.2]སྨྲས་སོ། །དེ་ཐོས་པ་དང་གྲོང་ཁྱེར་པ་རྣམས་ཀྱང་རེ་ཐག་བཅད་ཅིང་ཤིན་ཏུ་ཡི་མུག་པས་ཕན་ཚུན་སྨྲ་བ། ཤེས་ལྡན་དག་རྩོད་པའི་རྒྱལ་པོ་འདིས་ཕ་ཆོས་དང་ལྡན་པ་ཆོས་ཀྱི་རྒྱལ་པོ་དེ་ལྟ་བུ་བསད་ནས་ད་ནི་འདི་ལྟ་བུའི་ཡོན་ཏན་དང་ལྡན་པར་གྲགས་པ། སྐྱེ་བོ་མང་པོའི་
[187b.3]ཡིད་དུ་འོང་བ་ཁྱད་པར་ཅན་གྱི་སྐྱེས་བུ་ཉེས་པ་མེད་པ་གནོད་པ་མི་བྱེད་པ་འདི་ལྟ་བུ་གསོད་པ་ནི། ཨེ་མའོ་སྙིང་རྗེ་མེད་པ། ཨེ་མའོ་ཡོན་ཏན་མི་ཤེས་པ། ཨེ་མའོ་ཁྱད་པར་མི་ཤེས་པའོ། །བློན་པོ་རྣམས་ཀྱང་གང་འདི་ལྟ་བུའི་གཟུགས་ཕུན་སུམ་ཚོགས་པ་རྒྱ་ཆེན་པོ་དང་ལྡན་
[187b.4]པ་ནི་མཆོད་པར་འོས་པ་ཡིན་ན། འདི་ལྟ་བུའི་ཡོན་ཏན་དང་ལྡན་པའི་སྐྱེས་བུ་ཁྱད་པར་ཅན་ཅིའི་ཕྱིར་མ་བརྟགས་པར་གསོད་ཅིང་ཡོངས་སུ་སྤོང་བར་བྱེད། ཡང་ན་དུས་འདི་ལྟ་བུ་ཉེ་བར་གནས་པ་ཡིན་ཏེ། གང་དམ་པ་མ་ཡིན་པ་རྣམས་ནི་འཕེལ་བར་འགྱུར་ལ། ཡོན་ཏན་
[187b.5]འདི་ལྟ་བུ་དང་ལྡན་པའི་སྐྱེ་བོ་དང་བྲལ་བར་འགྱུར་བ་དུས་འགྲིབས་པའི་ཉེས་པའི་བདག་ཉིད་བྱུང་བ་ཡིན་ནོ། །དེད་དཔོན་ཉི་མ་ལ་རྣམ་པ་འདི་དག་རྒྱ་ཆེར་སྨྲས་པ་དང་། དེ་ཐོས་ནས་དེད་དཔོན་ཉི་མ་རེ་ཐག་ཆད་པར་གྱུར་ཏེ། མྱ་ངན་དྲག་པོའི་སྡུག་བསྔལ་གྱིས་གདུངས་ནས་
[187b.6]བརྒྱལ་ཏེ་ས་ལ་འགྱེལ་བར་གྱུར་ཏོ། །དེ་ནས་ཆུ་གཏོར་པས་སླར་དབུགས་དབྱུང་བ་དང་། ཡི་མུག་པའི་ཡིད་ཀྱིས་ཀུན་དུ་དགའ་བ་དང་བྲལ་བ་སུ་ཞིག་ད་ལྟར་ངའི་བུ་གསོད་པར་བྱེད་ཅེས་གསང་མཐོན་པོས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད། མིག་ནི་དགའ་བར་བྱེད་པ་ཡི། །
[187b.7]ང་ཡི་རིགས་ཀྱི་རྒྱུན་གྱུར་པ། །སྐལ་ལྡན་ཕ་ནི་ང་ལྟ་བུ། །སྨྲེ་ས་མེད་པར་གསོད་པར་བྱེད། །ང་ཡི་ཡིད་ནི་རྨོངས་པ་དང་། །ཕྱོགས་རྣམས་ད་ནི་འཁྲུལ་པར་བྱེད། །ཁྱོད་བྲལ་མྱ་ངན་མེས་གདུངས་པས། །ཀྱེ་མ་བདག་ཉིད་ཚིག་པར་གྱུར། །ཀྱི་ཧུད་མཁས་ཤིང་ཤིན་ཏུ་དུལ། །
[188a]
[188a.1]སྙིང་རྗེ་ལ་ནི་དགའ་གྱུར་བ། །བུ་ཁྱོད་ལ་ནི་སྡུག་བསྔལ་དག །མི་བཟད་ཇི་ལྟར་འོངས་པར་གྱུར། །བུ་ཁྱོད་འོངས་པར་གྱུར་པའི་ཚེ། །དགའ་བ་མཉམ་མེད་ངས་ཐོབ་པ། །བུ་བཟང་ཁྱོད་དང་བྲལ་བའི་ས། །སླར་ཡང་མྱ་ངན་མེད་ལྟུང་འགྱུར། །བརྩེ་མེད་ཁྱད་པར་མི་
[188a.2]ཤེས་པའི། །ཨེ་མ་རྒྱལ་པོའི་བློན་པོ་དག །གང་ཞིག་འདི་འདྲ་ཁྲིམས་ལྡན་པས། །བུ་ཁྱོད་རྣམ་པར་མ་བརྟགས་སོ། །ཨེ་མའོ་ས་བདག་དེ་ཡིས་ནི། །གང་གིས་འདི་ལྟར་དེ་མ་བརྟགས། །བུ་ཁྱོད་ཡོངས་སུ་སྤངས་གྱུར་པ། །རང་གི་བརྩེ་མེད་གསལ་སྒྲོགས་ཡིན། །ཁྱད་པར་
[188a.3]དུ་ཡང་དམ་པ་ངན། །སེམས་ནི་ངེས་པར་ནུབ་པ་སྟེ། །བུ་གང་ཡོན་ཏན་ལྡན་པ་ཡང་། །སྨྲེ་ས་མེད་པར་གསོད་པར་བྱེད། །ཡོན་ཏན་ལྡན་མི་འདི་འདྲ་བ། །གསོད་ཀྱང་བཏང་སྙོམས་བྱེད་པ་ནི། །གྲོང་ཁྱེར་གྱི་ནི་ལྷ་ཐམས་ཅད། །དེ་དག་བྲོས་པར་གྱུར་ཏམ་ཅི། །དབང་བཅས་འཇིག་རྟེན་
[188a.4]སྐྱོང་བཅས་དང་། །གང་ཡང་མཐུ་ཆེན་ལྡན་པའི་ལྷའི། །ཐུགས་བརྩེ་བས་ནི་ཉེར་བཟུང་སྟེ། །དེ་རྣམས་བདག་གི་བུ་སྲུངས་ཤིག །བརྟུལ་ཞུགས་གྲུབ་པའི་བདག་ཉིད་ཆེ། །ཐུབ་པ་གང་ཞིག་ད་ལྟར་བཞུགས། །དེས་ནི་ཐུགས་བརྩེ་སྔོན་བཞག་སྟེ། །བདག་གི་བུ་ནི་བསྲུང་དུ་གསོལ། །
[188a.5]ཡང་དེའི་བློ་སྐྱེས་པ་ཅིའི་ཕྱིར་བདག་བློ་ཞུམ་པར་བྱེད། གང་བཅོམ་ལྡན་འདས་འགྲོ་བ་ཐམས་ཅད་ཀྱི་གཉེན་གཅིག་བུ་ཐུགས་རྗེ་དང་ལྡན་པ་དེ་རྗེས་སུ་དྲན་པར་བྱའོ། །བཅོམ་ལྡན་འདས་དེ་ཡང་མགོན་མེད་པ་རྣམས་ཀྱི་མགོན། སྐྱབས་མེད་པ་རྣམས་ཀྱི་སྐྱབས། །སྐྱོབ་པ་
[188a.6]མེད་པ་རྣམས་ཀྱི་སྐྱོབ་པ། དཔུང་གཉེན་མེད་པ་རྣམས་ཀྱི་དཔུང་གཉེན་ཡིན་ལ། དེ་བཞིན་དུ་བཅོམ་ལྡན་འདས་དེས་ཉམ་ཐག་པར་ཞུགས་པའི་སེམས་ཅན་མང་པོ་འཇིགས་པ་ཆེན་པོ་དེ་དང་དེ་ལས་ཐར་པར་མཛད་དེ། དེ་ཡང་ཚོང་པ་རྒྱ་མཚོའི་དབུས་སུ་ཆུད་པ་ཆུ་སྲིན་དང་
[188a.7]ཉའི་འཇིགས་པས་སྐྲག་པ་རྣམས་ལ་དེ་རྗེས་སུ་དྲན་པ་ཙམ་གྱིས་འཇིགས་པ་ཆེན་པོ་དེ་ལས་ཡོངས་སུ་སྐྱོབ་པར་མཛད་པ་དང་། དེ་བཞིན་དུ་སོར་ཕྲེང་གིས་དྲག་ཅིང་གཏུམ་བས་མཚོན་ཆ་ཕྱར་ཏེ་སྐྱེས་བུ་དུ་མ་བསད་ལ་དེའི་མ་སྲོག་དང་དབྲལ་བར་འདོད་བ་ལས་འཇིགས་པ་དེ་ལས་
[188b]
[188b.1]སྐྱོབ་པར་མཛད་པ་དང་། དེ་བཞིན་དུ་སྔོན་གྱི་སྐྱེ་པོའི་ཤ་ཁོན་དང་རྗེས་སུ་འབྲེལ་བའི་སྟོབས་ཀྱིས་སྲོག་ཆགས་བརྒྱ་སྟོང་དུ་མ་གསོད་ཅིང་ཁྲོ་བའི་མེ་ཤིན་ཏུ་འབར་བ། མིའི་ཤ་དང་རྐང་ལ་ཆགས་པས་ལྡག་པ་ན་ལྕེ་ལས་ཁ་ཆུའི་ཐིགས་པ་འཛག་ཅིང་། མཆེ་བ་རིང་ཞིང་རྣོ་བ་གཙིགས་
[188b.2]པས་འཇིགས་སུ་རུང་བའི་གནོད་སྦྱིན་ལ་ཟས་ཀྱི་ཕྱིར་དེའི་ཁའི་གན་དུ་ཕྱག་བཞག་སྟེ། འབྲོག་གནས་ལས་སེམས་ཅན་འཆི་བས་འཇིགས་པ་ལས་ཡོངས་སུ་སྐྱོབ་པར་མཛད་པ་ཡིན་པས་ན་བཅོམ་ལྡན་འདས་དེ་ནི་བདག་གི་བུ་ཡང་ཉམ་ང་བ་ཆེན་པོ་འདི་ལས་ཡོངས་སུ་ཐར་པར་མཛད་
[188b.3]པར་སྤྱོད་ཅིག །གང་འདི་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་མཆོག་ཏུ་མ་ཉེས་གཤིན་པའི་རང་བཞིན་ཅན་དེ་བདག་གིས་རྗེས་སུ་དྲན་པར་བྱའོ་སྙམ་ནས་གན་ན་གནས་པའི་དགེ་བསྙེན་ཞིག་ལ་བཅོམ་ལྡན་འདས་དེ་ལྟ་གང་ན་བཞུགས་ཞེས་དྲིས་པ་དང་། དགེ་བསྙེན་དེ་
[188b.4]བཅོམ་ལྡན་འདས་རྗེས་སུ་དྲན་ནས། མཆི་མ་འཛག་ཅིང་སྐད་འཛེར་བཞིན་དུ་སྨྲས་པ། དེད་དཔོན། གང་ཞིག་འཇིག་རྟེན་དེད་དཔོན་འགྱུར། །གང་ཞིག་འཇིག་རྟེན་བདེ་སྩོལ་བ། །འཇིག་རྟེན་ཀུན་གྱི་གཉེན་གཅིག་པུ། །སྟོན་པ་ཆེ་དེ་མྱ་ངན་འདས། །གང་ཞིག་སྒྲོན་མེད་རྣམས་ཀྱི་
[188b.5]སྒྲོན། །གང་ཞིག་སྐྱབས་དང་དཔུང་གཉེན་གྱུར། །རྒྱལ་བ་སྣུམ་ཟད་མར་མེ་བཞིན། །འཇིག་རྟེན་སྒྲོན་མ་མྱ་ངན་འདས། །དེ་སྐད་ཐོས་པ་དང་། དེད་དཔོན་ཉི་མ་བཅོམ་ལྡན་འདས་དང་བྲལ་བས་ཉིས་འགྱུར་གྱི་མྱ་ངན་གྱི་ཟུག་རྔུས་ཟུག་སྟེ་ས་ལ་འགྱེལ་ཏོ། །དེ་ནས་ཆུ་གཏོར་བ་དང་
[188b.6]དབུགས་སླར་རྙེད་དེ་སློང་བ་དང་། ཕྱོགས་གང་དུ་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེར་ཕྱོགས་ཏེ་གསང་མཐོན་པོས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་ཆོས་རྒྱལ་ཐམས་ཅད་མཁྱེན། །ཉེས་པའི་དགྲ་ཚོགས་འདུལ་མཛད་པ། །མགོན་མེད་འགྲོ་བ་སྤངས་
[188b.7]ནས་ནི། །འཇིག་རྟེན་མགོན་པོ་ཅི་ཕྱིར་གཤེགས། །ཀྱི་ཧུད་མཛད་པར་གྲགས་གྱུར་གཙོ། །སེམས་ཅན་ཀུན་གྱི་གཉེན་གཅིག་པུ། །སྦྱོར་བ་ཀུན་ལས་ཡང་དག་འདས། །མྱ་ངན་འདས་ལམ་སྟོན་པ་པོ། །ཀྱི་ཧུད་ཀྱེ་མ་འཇིག་རྟེན་འདི། །མ་རིག་པས་ནི་མིག་ཁེབས་པ། །མགོན་
[189a]
[189a.1]པོ་ཁྱོད་དང་བྲལ་བས་ན། །འཁོར་བར་རྣམ་པར་འཁྱམས་པར་གྱུར། །དཔའ་བོ་གཞན་ལ་རྗེས་བརྩེ་བ། །ཁྱེད་ནི་མྱ་ངན་འདས་གཤེགས་པས། །འཇིག་རྟེན་འདི་ནི་མགོན་མེད་དེས། །མགོན་དུ་སུ་ཞིག་སྟེན་པར་གྱུར། །གང་ཞིག་ཁྱེད་ཆོས་ལས་བྱུང་བའི། །གདུལ་བྱ་
[189a.2]རྒྱལ་བའི་སྲས་པོ་རྣམས། །དེ་ཀུན་ཁྱེད་དང་བྲལ་གྱུར་ན། །གནས་ནི་གང་ཞིག་བགྱིད་པར་གྱུར། །མང་པོའི་བསམ་པ་འབྲས་བཅས་མཛད། །སྡུག་བསྔལ་ངེས་པར་གདུལ་མཛད་ནས། །འགྲོ་བ་རེ་ཐག་གཅོད་མཛད་པ། །ཐུབ་ཁྱོད་ཕྱོགས་ནི་གང་དུ་བཞུད། །གང་ཕྱིར་ཁྱོད་གསུང་མཉན་
[189a.3]པར་ནི། །དགའ་བས་གྲོང་ཁྱེར་མ་མཆིས་ན། །ད་ལྟར་ཁྱོད་ནི་མྱ་ངན་འདས། །དམ་ཆོས་སུ་ཞིག་རྗེས་སུ་སྟོན། །ཀྱི་ཧུད་སྣང་བྱེད་འཇིག་རྟེན་འདི། །མི་འམ་ཅི་ལྟར་བཅས་འཇིག་རྟེན། །མགོན་པོ་ཤིན་ཏུ་རྙེད་དཀའ་བའི། །ཐུབ་པ་ཁྱོད་དང་བྲལ་བས་བཅོམ། །སྲོག་ཆགས་ཆོས་
[189a.4]ལ་ཡིད་དགའ་པའི། །བསྟན་ལ་དགའ་རྣམས་མགོན་པོ་ཁྱོད། །མྱ་ངན་འདས་པ་ཐོབ་གྱུར་ན། །དེ་དག་ཇི་ལྟར་བགྱིད་པར་འགྱུར། །ཐུགས་རྗེ་དང་གཅིག་དཔའ་བོ་ནི། །བརྩེར་ལྡན་ཁྱེད་ལ་བརྟེན་ནས་སུ། །གང་ཞིག་ཡོན་ཏན་ཐོབ་གྱུར་པ། །སླར་དེ་སུ་ཞིག་སྟོན་པར་བགྱིད། །
[189a.5]ཅི་ཕྱིར་འཇིག་རྟེན་གསུམ་དོན་དུ། །ཐུགས་རྗེ་ཆེན་པོ་སྐྱེད་མཛད་པའི། །འཇིག་རྟེན་འདི་ཉིད་མཁྱེན་བརྩེར་ལྡན། །ཅི་ཕྱིར་བཏང་སྙོམས་ཁྱེད་བརྟེན་མཛད། །ཀྱི་ཧུད་ཡོན་ཏན་རིན་ཆེན་རྒྱས། །བསྐལ་པ་བྱེ་བར་བསྒྲུབས་པ་ནི། །འཆི་བདག་ས་འོག་གིས་ཟིན་ཏེ། །ཆོས་ཀྱི་གྲུ་
[189a.6]ནི་འགྱེལ་བར་འགྱུར། །ཀྱི་ཧུད་མ་རིག་མདོངས་པ་གང་། །བློ་དང་སྟོན་པ་པོ་བྲལ་བ། །འཇིག་རྟེན་སྐྱོང་བ་མགོན་པོ་རུ། །རབ་ཏུ་འཇིག་ཅིང་ངལ་བར་གྱུར། །ཀྱེ་མ་འཇིག་རྟེན་ཆེ་བ་ནི། །ཉམས་པ་ཉིད་དུ་ཉེ་གནས་ཏེ། །སངས་རྒྱས་རིན་ཆེན་ཆེན་པོ་དང་། །འདི་ནི་ད་ལྟར་བྲལ་བར་གྱུར། །ཁྱུ་མཆོག་
[189a.7]མེད་པའི་བ་ལང་བཞིན། །ཁྱེད་ཀྱི་དགེ་སློང་ཚོགས་རྣམས་སྟོང་། །མཁས་པ་རྣམས་ནི་མཐོང་ན་སྙིང་། །ཅི་ཡི་ཕྱིར་ན་གས་མ་གྱུར། །ལྷ་རྣམས་དད་པས་ཡན་ལག་གི། མཆོག་བཏུད་ནས་ནི་སྤྱི་བོ་ལ། །ཞབས་ཀྱི་རྡུལ་གྱི་མཆོག་གྱུར་པ། །གང་ཞིག་ཡང་ནི་འཇིག་པར་འགྱུར། །
[189b]
[189b.1]སེམས་ཅན་ཀུན་ལ་མཉམ་མཉེས་པས། །རྟག་ཏུ་གནོད་པ་བྱེད་པ་དག །གང་ཡིན་པ་ལ་ད་རུང་ཁྱོད། །ཕྱོགས་ལྟུང་མཛད་པས་མ་མཐོང་ངོ་། །ཡན་ལག་བརྒྱད་ལྡན་སྨན་གྱིས་ནི། །ཉོན་མོངས་ནད་གསོ་མཛད་པ་པོ། །སྟོན་པ་ཐུགས་རྗེ་ཆེར་ལྡན་པ། །སྨན་པའི་རྒྱལ་པོ་
[189b.2]མེད་པར་གྱུར། །ཀྱི་ཧུད་བརྩེ་མེད་འཇིག་རྟེན་མགོན། །མྱ་ངན་འདས་པ་ཧ་ཅང་སྔས། །འཇིག་རྟེན་ལོང་བར་གྱུར་པ་ལ། །བླ་མེད་མིག་ནི་སྩོལ་བ་ཡིན། །ཁྱོད་ཀྱི་མྱ་ངན་འདས་ཀྱང་དེང་། །སྡིག་པ་མེད་པའི་ནོར་ཆེན་བུ། །གསོད་པའི་དོན་དུ་འདིས་སྤངས་ན། །སུ་ཞིག་འཕྲལ་
[189b.3]དུ་ཐར་བར་བགྱིད། །མགོན་མེད་རྣམས་ཀྱི་སྐྱོབ་པ་ཁྱོད། །བགྲོད་པ་མཆོག་ཏུ་གཤེགས་གྱུར་པ། །ཀྱི་ཧུད་བུ་ནི་འཚོ་བ་ཡི། །རེ་བ་ད་ནི་མ་མཆིས་སོ། །བདག་ཉིད་ཆེན་པོ་ཁྱོད་ཀྱིས་གང་། །སྡུག་པ་ཀུན་དང་བྲལ་འགྱུར་ཞེས། །གསུང་གི་དམ་པ་བཀའ་སྩལ་ཏེ། །ལེགས་
[189b.4]གསུང་ཡིན་པར་དེང་འཚལ་ཏོ། །དེ་དེ་ལྟར་རྣམ་པ་མང་པོར་སྨྲེ་སྔགས་འདོན་ཅིང་དགེ་བསྙེན་དེ་ལ་སྨྲས་པ། ཀྱེ་བཅོམ་ལྡན་འདས་དེའི་ཉན་ཐོས་ཆེན་པོ་འགའ་ཞིག་ལུས་པ་ཡོད་དམ། བཅོམ་ལྡན་འདས་ཀྱིས་བསྟན་བ་སུ་ལ་རྗེས་སུ་གཏད་ནས་མྱ་ངན་ལས་འདས་པར་མཛད། དེ་
[189b.5]ནས་དགེ་བསྙེན་དེས་སྨྲས་པ། །དེད་དཔོན་བཅོམ་ལྡན་འདས་ཀྱིས་གནས་བརྟན་འོད་སྲུངས་ཆེན་པོ་ལ་ཡོངས་སུ་གཏད་ནས་མྱ་ངན་ལས་འདས་སོ། །གནས་བརྟན་འོད་སྲུངས་ཆེན་པོས་ཀྱང་བཅོམ་ལྡན་འདས་ཀྱི་བཀའ་ཉིད་ཀྱིས་གནས་བརྟན་ཀུན་དགའ་བོ་ལ་བསྟན་པ་རྗེས་སུ་གཏད་ནས་
[189b.6]མྱ་ངན་ལས་འདས་སོ་ཞེས་ཐོས་ཏེ། ད་ལྟར་ནི་གནས་བརྟན་ཀུན་དགའ་བོ་བདག་ཉིད་ཆེ་བ། བསྟན་པ་གཅེས་པར་འཛིན་པ་ཡིན་ཏེ། དེ་ད་ལྟར་དེ་བཞིན་གཤེགས་པ་བཞིན་དུ་སྙིང་རྗེས་གྲོང་དང་གྲོང་ཁྱེར་དང་། གྲོང་རྡལ་དང་། ཚོང་འདུས་ལ་སོགས་པ་དེ་དང་དེར་སོང་ནས་སྡུག་པའི་
[189b.7]སེམས་ཅན་རྣམས་རྗེས་སུ་འཛིན་པར་བྱེད་དོ། །དེ་བཞིན་དུ་སེམས་ཅན་དགེ་བའི་རྩ་བ་མ་བསྐྱེད་པ་རྣམས་ནི་དགེ་བའི་རྩ་བ་སྐྱེད་པར་བྱེད་དོ། །དགེ་བའི་རྩ་བའི་རྒྱུན་ཡང་དག་པར་བསགས་པ་རྣམས་ནི་ཡོངས་སུ་སྨིན་པར་བྱེད་དོ། །དགེ་བའི་རྩ་བའི་རྒྱུད་ཡོངས་སུ་སྨིན་པ་རྣམས་ནི་རྣམ་པར་གྲོལ་
[190a]
[190a.1]བར་བྱེད་དོ། །དེ་བཞིན་དུ་སྨན་པ་བཟང་པོ་བཞིན་དུ་ཉོན་མོངས་པའི་ནད་ཀྱིས་ཟིན་པའི་སེམས་ཅན་རྣམས་ནི་ཆོས་སྟོན་པའི་སྨན་གྱི་སྦྱིན་པས་གསོ་བར་བྱེད་དོ། །ཉི་མ་བཞིན་ཉོན་མོངས་པའི་མུན་པར་ཞུགས་པའི་སེམས་ཅན་རྣམས་ལ་ནི་དམ་པའི་ཆོས་སྟོན་པའི་འོད་ཟེར་གྱི་ཚོགས་
[190a.2]ཀྱིས་ཉོན་མོངས་པའི་མུན་པ་སེལ་བར་བྱེད་དོ། །ཟླ་བ་བཞིན་དུ་ཚིག་གི་འོད་ཟེར་གྱི་ཚོགས་ཀྱིས་གདུལ་བྱའི་ཀུ་མུ་ཏའི་ཚལ་གྱི་ཁ་དབྱེ་བར་བྱེད་དོ། །འཁོར་ལོས་སྒྱུར་པའི་རྒྱལ་པོ་བཞིན་དུ་གདུལ་བྱ་ཁམས་ཀྱི་རྒྱལ་པོ་སྟོང་ཕྲག་དམ་པའི་ཆོས་སྟོན་པས་འདུལ་བར་བྱེད་དོ། །
[190a.3]སེང་གེ་ལྟར་རང་གི་ཤེས་རབ་ཀྱི་སྤོབས་པའི་སྒྲས་མུ་སྟེགས་ངན་པའི་རི་དྭགས་ཀྱི་ཚོགས་དག་འབྱེར་བར་བྱེད་དོ། །ལམ་སྟོར་བ་དག་ཡང་དག་པར་སྟོན་པས་གདུལ་བྱའི་ཚོང་པ་རྣམས་སྒྲོལ་བར་བྱེད་དོ། །དེད་དཔོན་ལྟར་དམ་པའི་ཆོས་ཀྱི་ཟོང་ལ་འཇུག་པར་བྱེད་དོ། །སྤྲིན་ཆེན་པོ་ལྟར་
[190a.4]དགེ་བའི་རྩ་བའི་ས་བོན་སྐྱེད་པར་བྱེད་དོ། །ཕ་དང་མ་ལྟར་ཕན་པ་དང་གནོད་པ་ཉེ་བར་སྟོན་པར་བྱེད་ཅིང་མ་དུལ་བའི་སེམས་ཅན་རྣམས་ནི་འདུལ་བར་བྱེད་དོ། །མ་གྲོལ་བ་རྣམས་ནི་གྲོལ་བར་བྱེད་དོ། །དབུགས་མ་ཕྱིན་པ་རྣམས་ནི་དབུགས་འབྱིན་པར་བྱེད་དོ། །ཡོངས་སུ་མྱ་ངན་
[190a.5]ལས་མ་འདས་པ་རྣམས་ནི་ཡོངས་སུ་མྱ་ངན་ལས་འདའ་བར་བྱེད་དོ། །དེ་བཞིན་དུ་ཉམ་ཐག་པ་ཆེན་པོས་ཉེན་པའི་སེམས་ཅན་རྣམས་ནི་འཇིག་པ་ཆེན་པོ་ལས་ཐར་བར་བྱེད་དོ། །མདོར་ན་བདག་ཉིད་ཆེན་པོ་དེས་ནི་སངས་རྒྱས་ཀྱི་བྱ་བ་བྱེད་དོ། །དེ་ཉིད་རྗེས་སུ་སྦྲོན་ཅིག་དང་། དེས་ནི་ཁྱེད་ཀྱི་བུ་ཉམ་
[190a.6]ང་བ་འདི་ལས་ཐར་བར་བྱེད་པར་ནུས་སོ། །དེ་ཐོས་པ་དང་དེད་དཔོན་ཉི་མ་སྲོག་སྟོར་བ་ལས་སླར་རྙེད་པ་བཞིན་དུ་ཤིན་ཏུ་དགའ་སྟེ་རྟབས་བག་གིས་དྲིས་པ། འཕགས་པ་ཀུན་དགའ་བོ་དེད་ལྟ་གང་ན་བཞུགས། དེས་སྨྲས་པ། དེད་དཔོན་གནས་བརྟན་ཀུན་དགའ་བོ་ནི་ད་ལྟར་
[190a.7]ཡངས་པ་ཅན་གྱི་ཨ་མྲ་སྐྱོང་བའི་ནགས་ན་བཞུགས་སོ་ཞེས་ཐོས་སོ། །དེ་ནས་དེད་དཔོན་ཉི་མ་དེ་མ་ཐག་ལངས་ཏེ་པུས་མོའི་ལྷ་ང་གཉིས་ས་ལ་བཙུགས་ནས་ཡངས་པ་ཅན་གང་ན་བ་དེར་བཏུད་ནས་བུ་དང་བྲལ་བའི་སྡུག་བསྔལ་གྱིས་ཉེན་ཅིང་མཆི་མའི་ཆུ་རླབས་ཀྱིས་གདོང་
[190b]
[190b.1]གི་པདྨོ་ཁེབས་བཞིན་དུ་མཆི་མས་ཀུན་དུ་ཁྱབ་པ་དང་ལྡན་ཞིང་བསམ་པ་དྲག་པོས་གནས་བརྟན་ཀུན་དགའ་བོ་ལ་གསོལ་བ་འདེབས་པ་ལ་ཞུགས་པར་གྱུར་ཏོ། །གལ་ཏེ་ཁྱེད་ནི་སློབ་དཔོན་མཆོག །སེམས་ཅན་བསམ་མཁྱེན་མཆོག་ཡིན་ན། །བསམ་དང་བག་ལ་ཉལ་
[190b.2]མཁྱེན་ཏོ། །གསོལ་བ་འདེབས་པ་འདི་གསོན་ཅིག །སངས་རྒྱས་བཅོམ་ལྡན་སློབ་མ་ནི། །རྫུ་འཕྲུལ་རྩེ་དང་མྱ་ངན་འདས། །དེ་ཡི་བསྟན་པ་འཕེལ་བྱེད་པའི། །ཁྱེད་གཅིག་པུ་ནི་ལུས་པར་གྱུར། །ཁྱོད་ནི་འགྲོ་བའི་དཔུང་གཉེན་དང་། །ཁྱོད་ནི་དབུགས་ཕྱིན་གྱུར་པ་ཡིན། །
[190b.3]རྟག་ཏུ་སེམས་ཅན་དོན་མཛད་པ། །ད་ལྟར་དགོངས་པ་གཟིར་བར་མཛོད། །མགོན་ཁྱོད་མ་ལུས་བསྲུང་བ་ནི། །འདི་འདྲ་དེ་རིང་བཞུགས་བཞིན་དུ། །སྨྲེ་ས་མེད་པར་བདག་གི་བུ། །ཅི་ཕྱིར་འདི་ལྟར་གསོད་པར་བྱེད། །གལ་ཏེ་འགྲོ་དོན་མི་མངའ་ན། །ཁྱེད་འདྲ་བ་ནི་བཞུགས་མི་
[190b.4]འགྱུར། །འགྲོ་བ་དང་ལྡན་གསོད་བཞིན་དུ། །འདི་ལ་ཇི་ལྟར་བཏང་སྙོམས་མཛད། །འགྲོ་བའི་དོན་དུ་སྐུ་ལུས་ནི། །བརྟུལ་ཞུགས་བཟང་པོ་འཛིན་མཛད་པའི། །ཐུགས་རྗེ་དེ་མངོན་མཛད་ནས་ནི། །བདག་གི་བུ་ལ་དགོངས་སུ་གསོལ། །ལས་ཀྱི་སྒོ་ཀུན་བཅོམ་གྱུར་ཅིང་། །སྐྱབས་
[190b.5]མེད་དཔུང་གཉེན་མེད་པར་ནི། །མྱ་ངན་འདམ་ལ་ནུབ་པ་བདག །ཆུང་མར་བཅས་པ་གདོན་དུ་གསོལ། །ཤཱཀྱའི་སེང་གེས་ཁྱེད་ཉིད་ནི། །ད་ལྟར་གཙོ་བོར་བསྟན་མཛད་ན། །འགྲོ་ལ་ཕན་པ་གཞན་གང་ལ། །གཞན་གང་ལ་ནི་གསོལ་བ་བཏབ། །གཙོ་བོ་ཁྱོད་ནི་མ་གཏོགས་
[190b.6]པ། །བུ་ཡི་སྐྱབས་གཞན་མ་མཆིས་པས། །དེ་བས་རིངས་པར་བྱོན་ནས་ནི། །བདག་གི་བུ་ནི་བསྐྱབ་ཏུ་གསོལ། །བུ་ཡི་མྱ་ངན་བཟོད་དཀའ་ལ། །རང་བཞིན་ངན་པའི་སྒྲས་ཟིན་པའི། །ཆུང་མར་བཅས་པ་དགའ་བྲལ་བ། །ཀུན་དགའ་དེང་ནི་དགའ་སྐྱེད་གསོལ། །དེ་ནས་བར་
[190b.7]སྐབས་དེར་གནས་བརྟན་ཀུན་དགའ་བོ་སྙིང་རྗེས་གདུངས་བཞིན་དུ་ཉིན་ལན་གསུམ་མཚན་ལན་གསུམ་དུ་ཉན་ཐོས་ཀྱི་མིག་གིས་འཇིག་རྟེན་ལ་བལྟས་ཏེ། སུ་ནི་འགྲིབ། སུ་ནི་འཕེལ། སུ་ནི་གསོད་པར་གྱུར། སུ་ནི་ཉམ་ང་བར་གྱུར། སུ་ནི་སྡུག་བསྔལ་བར་གྱུར། སུ་ནི་
[191a]
[191a.1]ངན་སོང་ལ་གཞོལ། སུ་ནི་ངན་སོང་ལ་བབ། སུ་ནི་ངན་སོང་ལམ་ལས་བླན་ཏེ་མཐོ་རིས་དང་ཐར་པ་ལ་གཞག་པར་བྱ། སུ་ནི་འདོད་བའི་འདམ་དུ་བྱིང་བ་ལག་ནས་དྲང་བར་བྱ། སུ་ནི་འཕགས་པའི་ནོར་དང་བྲལ་བ་ལ་འཕགས་པའི་ནོར་གྱི་དབང་ཕྱུག་གི་བདག་པོ་
[191a.2]ལ་རབ་ཏུ་གཞག་པར་བྱ་ཞེས་གནས་བརྟན་ཀུན་དགའ་བོས་གནས་བརྟན་ཤཱ་རིའི་བུ་དང་མཉམ་པའི་མིག་གིས་བལྟས་ན། གཞོན་ནུ་གསེར་མདོག་དགེ་བའི་རྩ་བའི་ཚོགས་ཉེ་བར་བསགས་པ་ཉམ་ཐག་པ་ཆེན་པོས་ཉེན་པར་གྱུར་པར་མཐོང་ངོ་། །མཐོང་ནས་ཀྱང་ཡང་དེ་ཉིད་ནས་གནས་
[191a.3]གཞན་དུ་རྫུ་འཕྲུལ་གྱིས་གླང་པོ་ཆེའི་སྣ་ལྟ་བུའི་ལག་པ་བརྐྱང་ནས་དེའི་མོད་ཁོ་ན་ལས་རྒྱལ་པོ་མ་སྐྱེས་དགྲ་ཁང་བཟངས་ཀྱི་སྟེང་གི་གཞི་ན་ཤིན་ཏུ་བག་མེད་པར་གནས་པ་ན། སེ་གོལ་གི་སྒྲས་གོ་བར་བྱས་ནས་སྒྲ་གསལ་བར་སྨྲས་པ། རྒྱལ་པོ་ཆེན་པོ་གང་གཞོན་ནུ་གསེར་མདོག་རང་
[191a.4]ཉིད་ཀྱིས་རྣམ་པར་མ་དཔྱད་པ་ནི་ལེགས་པར་བྱས་པ་མ་ཡིན་ནོ། །དེ་ཡང་ད་ལྟ་གནོད་པ་མེད་ཅིང་ཉེས་པ་མ་བྱས་བཞིན་དུ་རྒྱལ་པོའི་ཁབ་ནས་ཕྱུང་སྟེ་དུར་ཁྲོད་ཆེན་པོར་ཁྱེར་ནས་གསོད་ཀྱིས་དེ་ལས་ཟློག་ཤིག །དེ་ནས་གནས་བརྟན་ཀུན་དགའ་བོའི་ཚིག་དེ་ཐོས་པ་དང་། རྒྱལ་པོ་
[191a.5]རྟབས་བག་ཏུ་རིངས་པར་གནས་བརྟན་ཀུན་དགའ་བོ་ཁང་བཟངས་ཀྱི་སྟེང་ན་འདུག་པ་ལ་ཕྱག་བྱས་ཏེ་ལངས་ནས་སྒྲ་ཆེན་པོར་ཕྱོགས་པ་ཞིར་བོས་པ། ཀྱེ་ཉོན་ཅིག་གང་དུར་ཁྲོད་ཆེན་པོར་རིངས་པ་རིངས་པར་སོང་ནས། །གཞོན་ནུ་གསེར་མདོག་གསོད་པར་བྱེད་པ་ལ་ངའི་ཚིག་
[191a.6]གིས་ཐར་པར་བྱེད་པ་དེ་ལངས་གསེར་གྱི་ཟམ་ཏོག་ཆེན་པོ་དང་། ཡུལ་གྱི་མཆོག་ལྔ་སྦྱིན་ནོ། །རྒྱལ་པོའི་ཚིག་དེ་ཐོས་པ་དང་། གཞོན་ནུ་དེ་ནི་སྐྱེ་བོ་མང་པོའི་ཡིད་དུ་འོང་བ་ཡིན་པས་སྲོག་ཆགས་བརྒྱ་སྟོང་དུ་མས་རིངས་པར་བརྒྱུགས་པར་གྱུར་ཏོ། །དེ་ནས་བར་སྐབས་དེར་
[191a.7]གཤེད་མ་པ་རྣམས་རྒྱལ་པོའི་སྐྱེས་བུ་དེ་རྣམས་ཀྱིས་བསྲུངས་ནས་གཞོན་ནུ་གསེར་མདོག་ཁྱེར་ཏེ་དུར་ཁྲོད་ཆེན་པོར་ཕྱིན་ཏོ། །བུ་མོ་ཀ་ཤི་མཛེས་དགའ་མོ་ཡང་རང་གི་ཉེ་དུ་རྣམས་ཀྱིས་གོས་སྔོན་པོ་དང་། སེར་པོ་དང་། དམར་པོ་དང་། དཀར་པོས་བརྒྱན་པ་བྱས་པའི་ཁྱོགས་
[191b]
[191b.1]ལ་བཏེག་སྟེ་དུར་ཁྲོད་ཆེན་པོར་ཁྱེར་ནས་དེའི་གཉེན་རྣམས་ཀྱིས་དེ་ཕྱོགས་གཅིག་ཏུ་བཞག་སྟེ། ཤིང་བསྡུས་ནས་རོ་བསྲེགས་པའི་ཤིང་བརྩིག་པ་ལ་ཞུགས་ཏེ། གཤེད་མ་པ་དེ་རྣམས་ཀྱིས་སྨྲས་པ། ཁྱེད་རྣམས་ཀྱིས་རེ་ཞིག་འདིའི་རོ་བསྲེག་པའི་ཤིང་མ་བརྩིག་པར་ཅི་ཙམ་ན་
[191b.2]ཁྱེད་ཀྱིས་ངེད་ཀྱི་གཞོན་ནུ་གསེར་མདོག་གསལ་ཤིང་ལ་སྐྱོན་ཏེ། བསད་ཀྱི་བར་དུ་ཡུད་ཙམ་ཞིག་སྡོད་ཅིག །དེ་ཅིའི་ཕྱིར་ཞེ་ན། གཞོན་ནུ་གསེར་མདོག་དེ་དང་བུ་མོ་ཀ་ཤི་མཛེས་དགའ་མོ་རོ་བསྲེག་ཤིང་གཅིག་ལ་བཞག་སྟེ་བསྲེག་པར་བྱའོ་ཞེས་སྨྲས་ནས། གསལ་ཤིང་ལ་
[191b.3]བཙུགས་པར་གྱུར་ཏོ། །གཞོན་ནུ་གསེར་མདོག་གསལ་ཤིང་ས་ལ་བཙུགས་པ་བལྟས་ནས་མ་རྗེས་སུ་དྲན་ཏེ། སྡུག་བསྔལ་དྲག་པོས་རྒྱུད་ཞུ་བར་བྱས་པས་མཆི་མ་གློག་པ་ལ་ཞུགས་པར་གྱུར་ཏེ། དེ་ལྟར་མ་ང་དང་བྲལ་བར་ཐོས་པ་དང་གནས་སྐབས་ཅིར་གྱུར་ཞིག་གུ། གང་
[191b.4]གི་ཚེ་ཐུན་དང་པོའི་མཚན་ཕྱེད་ལ་མ་མཐོང་ན་ཡང་ཤིན་ཏུ་གནོད་པ་དྲག་པོ་མྱོང་ན་དེས་དེང་བུ་གཅིག་པ་དང་བྲལ་ན་སྲོག་ཇི་ལྟར་འཛིན་པར་འགྱུར། ཀྱི་ཧུད་ང་ནི་འདི་ལྟ་བུའི་སྐལ་བ་ངན་པ་སྟེ། ང་སྐྱེས་པས་མ་ང་དང་བྲལ་བའི་སྡུག་བསྔལ་ཉམས་སུ་མྱོང་བར་གྱུར་ཏོ། །དེ་ནས་གཤེད་
[191b.5]མ་པ་རྣམས་ཀྱིས་གསལ་ཤིང་དེ་ས་ལ་བཙུགས་ཏེ་ཕན་ཚུན་སྨྲ་བར་རྩོམ་པ། བདག་ཅག་ལས་སུ་ཞིག་གིས་གཞོན་ནུ་འདི་གསལ་ཤིང་ལ་བསྐྱོན་པར་བྱ། དེར་ཡང་རེ་རེ་ནས་སྒྱུ་བྱེད་པ་ལ་ཞུགས་ཏེ། ཁྱེད་རྣམས་ཀྱིས་སྐྱོན་ཅིག །ང་ནི་དེང་མགོ་བོའི་ནད་ཀྱིས་ཤིན་ཏུ་གཟིར་ཏོ། །
[191b.6]དེ་བཞིན་དུང་ནི་རྒྱབ་ནས་གཟེར་རོ། །ང་ནི་མཆན་ཁུང་ནས་གཟེར་རོ་ཞེས་ཟེར་ཞིང་དེ་རྣམས་གང་ཡང་བྱ་བ་མ་ཡིན་པ་དེ་བྱེད་པར་སྤྲོ་བར་མ་གྱུར་ཏོ། །དེ་ནས་གཞོན་ནུ་གསེར་མདོག་གིས་དེ་རྣམས་ཕན་ཚུན་སྨྲ་བ་ཐོས་ནས་གསལ་ཤིང་ས་ལ་བཙུགས་པ་ལ་བལྟས་ཏེ། ཀྱི་ཧུད་ད་ནི་ངེས་པར་
[191b.7]ང་མེད་པར་འགྱུར་རོ་ཞེས་འཁོར་བའི་ཉེས་པ་ལ་སྐྱོ་ཞིང་ཐར་པའི་ལམ་མངོན་པར་འདོད་པས་བདག་ཉིད་དགའ་བ་དང་བྲལ་བར་ཤེས་ནས་མཆོག་ཏུ་འཇིགས་པའི་མྱ་ངན་གྱིས་གཡོ་བའི་མིག་གིས་ལྟ་ཞིང་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་སྡུག་བསྔལ་ལོ། །ད་ནི་ངའི་ཤིན་ཏུ་
[192a]
[192a.1]རྙེད་པར་དཀའ་བའི་དམ་པའི་ཆོས་ཀྱི་དགའ་སྟོན་རྙེད་ནས་དོན་གྱི་བྱ་བ་མ་བྱས་པ་ཉིད་ན་འཆི་བར་འགྱུར་རོ། །ཀྱི་ཧུད་ཡང་འཁོར་བར་འཁོར་བར་འགྱུར་རོ། །སླར་འཁོར་བའི་བཙོན་ར་ཆེན་པོར་གནས་པར་འགྱུར་རོ། །ཡང་འཁོར་བའི་འབྲོག་སྟོང་པར་ཡོངས་
[192a.2]སུ་འཁྱམས་པར་འགྱུར་རོ། །ཡང་འཁོར་བའི་ཚང་ཚིང་ཆེན་པོར་ཞུགས་པར་འགྱུར་རོ། །ཡང་འཁོར་བའི་གཡང་ས་ཆེན་པོ་རབ་ཏུ་ལྟུང་བར་འགྱུར་རོ། །ཡང་འཁོར་བའི་འདམ་རྫབ་ཀྱི་ནང་དུ་གནས་པར་འགྱུར་རོ། །ཡང་བདག་ནི་ཡང་སོས་དང་། ཐིག་ནག་དང་། བསྡུས་
[192a.3]འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་ལ་སོགས་པའི་དམྱལ་བ་རྣམས་སུ་སྐྱེ་བར་འགྱུར་རོ། །སླར་ཡང་བདག་གླང་པོ་ཆེ་དང་། བ་ལང་དང་། མ་ཧེ་དང་། རི་བོང་དང་། ཤ་ར་བཱ་དང་། རི་དྭགས་རུ་རུ་དང་།
[192a.4]བྱི་ལ་སྟེ་སྣ་ཚོགས་པའི་སྐྱེ་གནས་སུ་སྐྱེ་བར་འགྱུར་རོ། །སླར་ཡང་རྟག་ཏུ་བཀྲེས་པ་དང་། སྐོམ་པ་ལ་སོགས་པའི་སྡུག་བསྔལ་ཆེན་པོ་དང་། སྡུག་བསྔལ་བ་དང་། ཡིད་མི་བདེ་བས་ཉེན་པ་རྣམས་དང་། བཟའ་བ་དང་། བཏུང་བའི་སྒྲ་རྣམས་ཡང་མི་ཐོས་ཤིང་བཤང་བ་
[192a.5]དང་། གཅིན་དང་། མཆིལ་མ་དང་། ངར་སྣབས་ལ་སོགས་པ་ཟ་ཞིང་ཡི་དགས་ལྐོག་མའི་ལྦ་བ་ཅན་དུ་སྐྱེ་བར་འགྱུར་རོ། །དཔེར་ན་ཨུ་དུམ་བཱ་རའི་མེ་ཏོག་ནི་བརྒྱ་ལམ་ན་ལན་འགའ་འབྱུང་བ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
[192a.6]སངས་རྒྱས་ནི་འཇིག་རྟེན་དུ་བརྒྱ་ལམ་ན་ལན་འགའ་འབྱུང་བར་འགྱུར་རོ་ཞེས་ཐོས་ཏེ། དེ་བཞིན་གཤེགས་པས་གསུངས་པའི་ཆོས་འདུལ་བ་འཇིག་རྟེན་དུ་སྟོན་པར་མཛད་པ་ཡང་འབྱུང་བར་དཀའ་བར་ཤེས་སོ། །དལ་འབྱོར་ནི་རྙེད་པར་དཀའོ། །མིར་སྐྱེ་བ་ནི་རྙེད་པར་དཀའོ། །
[192a.7]འཕགས་པའི་ཡུལ་དུ་སྐྱེས་པ་དང་། དབང་པོ་ཚང་བ་དང་། གླེན་པ་མ་ཡིན་པ་དང་། འོན་པ་མ་ཡིན་པ་དང་། ལྐུགས་པ་མ་ཡིན་པ་དང་། ལག་བརྡས་མི་སྨྲ་བ་དང་། ལེགས་པར་བཤད་པ་དང་། ཉེས་པར་བཤད་པའི་ཆོས་རྣམས་ཀྱི་དོན་བཤད་པ་རྙེད་པར་དཀའོ་ཞེས་
[192b]
[192b.1]ཐོས་ལ། བདག་ཀྱང་སྐྱབས་དང་བྲལ་བས་དེང་ནི་མེད་པར་འགྱུར་ཏེ། མི་ཁོམ་པ་བརྒྱད་ལས་ཐར་པའི་མིར་སྐྱེ་བ་ཉིད་ཀྱང་ད་ནི་འབྲས་བུ་མེད་པར་འགྱུར་ན་དེ་ལ་ད་ཅི་ཞིག་བྱ། ཅི་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པའི་སངས་རྒྱས་བཞུགས་པ་ནི་གང་ཞིག་རྗེས་སུ་དྲན་པས་
[192b.2]ང་གནས་སྐབས་འདི་ལྟ་བུ་མགོན་མེད་པ། སྐྱབས་མེད་པ། སྐྱོབ་པ་མེད་པ། དཔུང་གཉེན་མེད་པ། སྣང་བ་མེད་པ། ཤིན་ཏུ་ཉམ་ཐག་པའི་སྡུག་བསྔལ་གྱིས་ཉེན་པར་གྱུར་པ་ལ་ཐུགས་རྗེ་ཆེན་པོའི་དབང་གིས་བྱོན་ནས་ཡོངས་སུ་སྐྱོབ་པར་མཛད་པར་གྱུར་པ་ཞིག་ན། བཅོམ་
[192b.3]ལྡན་འདས་དེ་ཡང་ངའི་སྐལ་བ་ངན་པའི་ཉེས་པས་མྱུར་བ་མྱུར་བར་ཡོངས་སུ་མྱ་ངན་ལས་འདས་པས་དེ་ལ་ད་སུ་ཞིག་གནས་སྐབས་འདིར་རྗེས་སུ་དྲན་པར་བྱ། སུ་ཞིག་ང་ལ་དེ་བཞིན་གཤེགས་པ་བཞིན་དུ་ཐུགས་རྗེ་ཆེན་པོས་བྱོན་ནས་ཡོངས་སུ་སྐྱོབ་པར་བྱེད་པར་འགྱུར་
[192b.4]ཞེས་རེ་ཐག་ཆད་དེ་དཔྱོད་འདར་བ་ལ་ཞུགས་པ་དང་། དེ་ལ་ཡང་བློ་སྐྱེས་པ། གནས་བརྟན་ཀུན་དགའ་བོ་ཞེས་བྱ་བ་བདག་ཉིད་ཆེན་པོ་བཞུགས་ཀྱིས་དེ་རྗེས་སུ་དྲན་པར་བྱ་སྟེ། བདག་ཉིད་ཆེན་པོ་དེ་ལ་སེམས་ཅན་ཐམས་ཅད་ལ་ཕན་པར་སེམས་པ་ལ་རྩེ་གཅིག་པའི་རྒྱུད་ཆེན་པོ་དང་ལྡན་
[192b.5]པ་བཅོམ་ལྡན་འདས་དེ་དང་གནས་བརྟན་འོད་སྲུངས་ཆེན་པོས་བསྟན་པ་མ་ལུས་པར་རྗེས་སུ་གཏད་པ་ཡིན་ཏེ། དེས་ད་ལྟར་སེམས་ཅན་ཐམས་ཅད་ལ་ཕན་པ་མཛད་པ། དེ་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་པར་ཐོས་ཏེ། གནས་བརྟན་ཀུན་དགའ་བོས་ནི་ཕོངས་པ་འདི་ལས་བདག་
[192b.6]ཡོངས་སུ་སྐྱོབ་པར་སྤྱོད་ཅིག། །དེ་ཉིད་རྗེས་སུ་དྲན་པར་བྱའོ་སྙམ་དུ་བསམས་ནས་མཆི་མས་མིག་ཁེབས་ཤིང་འཁོར་བའི་འཇིགས་པས་སྐྱོ་ལ་མཆོག་ཏུ་ཡིད་བྱུང་བར་གྱུར་པའི་བསམ་པ་དྲག་པོས་གནས་བརྟན་ཀུན་དགའ་བོ་སྤྱན་དྲང་བ་ལ་ཞུགས་སོ། །འཁོར་བའི་འཇིགས་
[192b.7]པས་སྐྲག་གྱུར་པ། །དགའ་དང་བྲལ་བར་གནས་པ་དག །གནས་བརྟན་ཀུན་དགའ་བོ་ལ་ཞུས། །བདག་ལ་ཁྱོད་གསན་མཛད་པའི་རིགས། །ཀུན་མཁྱེན་ཐུགས་རྗེའི་བདག་ཉིད་ཅན། །དེ་ནི་མྱ་ངན་འདས་གྱུར་ལ། །བདག་ཉིད་ཆེན་པོ་འོད་སྲུངས་ལ། །འགྲོ་བའི་དོན་གྱི་
[193a]
[193a.1]ཁུར་གཏད་དོ། །གནས་བརྟན་འོད་སྲུངས་ཆེན་པོས་ནི། །དོན་བྱས་མྱ་ངན་འདས་ནས་ནི། །འགྲོ་བའི་དོན་ནི་འབྱོར་བའི་ཕྱིར། །ཁྱེད་ཉིད་ལ་ནི་ཁུར་ཡང་གཏད། །འཇིག་རྟེན་གཉེན་འགྱུར་རྫོགས་སངས་རྒྱས། །འགྲོ་བ་ཀུན་ལ་ཕན་བརྩོན་དང་། །གྲགས་ལྡན་འོད་
[193a.2]སྲུངས་ཆེན་པོ་ཡང་། ད་ལྟར་མྱ་ངན་འདས་པར་གྱུར། །ཁྱེད་ནི་མགོན་མེད་རྣམས་ཀྱི་མགོན། །འཇིགས་པ་རྣམས་ལ་མི་འཇིགས་སྩོལ། །ངལ་བ་རྣམས་ཀྱི་བསྟི་ས་དང་། །སྐྱབས་དོན་གཉེར་བ་རྣམས་ཀྱི་སྐྱབས། །སྟོན་པའི་བྱ་བ་ཁྱེད་མཛད་པས། །ཁྱེད་ཉིད་འཇིག་རྟེན་
[193a.3]གཉེན་གཅིག་པུ། །སངས་རྒྱས་སློབ་མ་རྣམས་ཀྱི་མཆོག །ཁྱེད་ནི་བསྟན་པ་གཅེས་མཛད་པ། །གལ་ཏེ་སྡུག་བསྔལ་ས་འོག་ལས། །དེང་བདག་གདོན་པར་མ་མཛད་ན། །ཁྱེད་ལས་གཞན་པའི་མགོན་པོ་ནི། །ད་ལྟར་མེད་པས་བདག་བཅོམ་ལགས། །སྐྱེས་ནས་ངེས་
[193a.4]པར་འཆི་བས་ན། །འཆི་བས་བདག་སྐྲག་མ་ལགས་ཀྱིས། །ཇི་ལྟར་འཁོར་བའི་བཙོན་ར་ལས། །འབྱིན་པར་མཛད་པ་ཁྱེད་ཀྱིས་མཁྱེན། །དེ་བཞིན་མི་ཁོམ་བརྒྱད་སྤངས་པའི། །དལ་བ་ཐོབ་པ་རྙེད་དཀའ་བ། །དོན་མ་བྱས་པས་འཆི་འགྱུར་བས། །དེས་བདག་ཤས་
[193a.5]ཆེར་སྡུག་བསྔལ་གྱུར། །སངས་རྒྱས་ཐམས་ཅད་གཟིགས་པ་ནི། །འབྱུང་བ་ངེས་པར་རྙེད་དཀའ་བས། །ཁྱེད་གཤེགས་ནས་ནི་ཇི་ལྟར་བདག །འབྲས་མེད་མི་འགྱུར་དེ་ལྟར་མཛོད། །ཁྱེད་ནི་ཐུགས་རྗེ་མི་གཡོ་བ། །སྲོག་ཆགས་ཀུན་ལ་མངའ་གྱུར་པ། །ཐར་པའི་ལས་ནི་
[193a.6]མངོན་འདོད་པའི། །བདག་ལ་བཏང་སྙོམས་མི་མཛད་རིགས། །གལ་ཏེ་ཁྱེད་ནི་གཙོ་ཅན་ཏེ། །སེམས་ཅན་ཀུན་གྱི་དོན་བརྩོན་ན། །ཤིན་ཏུ་ཉམ་ངར་ཞུགས་གྱུར་པ། །བདག་ལ་གཟིགས་པར་མཛད་དུ་གསོལ། །དེ་ལྟར་སྐྱོབ་པ་མེད་པ་ལ། །ལྷ་ཡི་སྤྱན་གྱིས་གཟིགས་
[193a.7]ནས་ནི། །ཁྱེད་དེང་མྱུར་དུ་གཤེགས་ནས་སུ། །བདག་ལ་སྐྱབས་པར་མཛད་པའི་རིགས། །དེ་ནས་བར་སྐབས་དེར་གནས་བརྟན་ཀུན་དགའ་བོ་བདག་ཉིད་ཆེ་བ། འགྲོ་བ་མ་ལུས་པའི་དོན་ཡོངས་སུ་རྫོགས་པར་བྱ་བའི་ཕྱིར་ངེས་པར་ཞུགས་པ། སྙིང་རྗེ་དང་ལྡན་པ་དེས་དེ་བཞིན་
[193b]
[193b.1]དུ་སེམས་ཅན་མཐའ་ཡས་པའི་སྤྱོད་པ་ལ་ལྟ་ཞིང་ཕན་པར་སེམས་པའི་རྒྱུད་དང་ལྡན་པའི་མཆོག་ཏུ་ཉོན་མོངས་པ་དང་ལྡན་པའི་ལྷའི་མིག་གིས་གཞོན་ནུ་གསེར་མདོག་གནས་སྐབས་འདི་ལྟ་བུར་འདུག་པ་མཐོང་ནས། སེམས་ཀྱི་འཇུག་པ་སྙིང་རྗེས་ཡང་དག་པར་བསྐུལ་བས་ལྷའི་
[193b.2]སྣང་བས་སའི་དཀྱིལ་འཁོར་རྣམས་སྣང་བར་བྱས་ནས་དགྲ་བཅོམ་པ་ལྔ་བརྒྱས་ཡོངས་སུ་བསྐོར་ཏེ། འཕྲལ་དུ་རྫུ་འཕྲུལ་གྱིས་ནམ་མཁའི་གཞི་ལ་འཕགས་ཏེ་འཚམས་ཀྱི་སྤྲིན་གྱིས་གཡོགས་པ་བཞིན་དུ་ནམ་མཁའི་ངོས་ཀུན་དུ་བཀང་སྟེ། སའི་དཔལ་གྱི་ཚོགས་
[193b.3]བཞིན་དུ་དཔལ་གྱིས་ལུས་འབར་བར་གྱུར་ཅིང་དུར་ཁྲོད་དུ་མངོན་པར་བལྟས་ཏེ་ཡང་དག་པར་ཆས་པ་དང་། རྒྱལ་པོ་མ་སྐྱེས་དགྲ་ཁང་བཟངས་ཀྱི་སྟེང་ན་འདུག་པས་གནས་བརྟན་ཀུན་དགའ་བོ་དགེ་སློང་གི་དགེ་འདུན་ཆེན་པོ་དང་ལྷན་ཅིག་ཟླ་བ་ཁམ་པ་ལྟ་བུར་ཉེ་བར་
[193b.4]བསྐོར་ཏེ། རྫུ་འཕྲུལ་གྱིས་ནམ་མཁའ་ལ་འཕགས་ནས་མཚམས་ཀྱི་སྤྲིན་བཞིན་དུ་ནམ་མཁའི་ངོས་བརྒྱན་ཏེ། དུར་ཁྲོད་ཆེན་པོར་མངོན་པར་ཕྱོགས་ནས་འགྲོ་བར་མཐོང་ངོ་། །དེ་མཐོང་བ་དང་ཡང་དེ་འདི་སྙམ་དུ་སེམས་ཏེ། གནས་བརྟན་ཀུན་དགའ་བོ་ནི་གཞོན་ནུ་
[193b.5]གསེར་མདོག་གི་ཕྱིར་གཤེགས་པ་ཡིན་ལ། དེ་བཞུད་ནས་ཀྱང་ངོ་མཚར་ཤིན་ཏུ་ཆེ་བའི་ཆོས་སྟོན་པར་མཛད་པ་ཡིན་གྱི་ང་ཡང་དུར་ཁྲོད་ཆེན་པོར་འགྲོ་བར་བྱ་སྙམ་མོ། །དེ་ནས་དེའི་མོད་ལ་གནས་བརྟན་ཀུན་དགའ་བོ་འཁོར་དང་བཅས་པ་ལ་ཕྱག་བྱས་ཏེ། ཁང་བཟངས་ནས་རིངས་
[193b.6]པ་རིངས་པར་བབས་ཏེ། སྲོག་ཆགས་བརྒྱ་སྟོང་དུ་མས་ཡོངས་སུ་བསྐོར་ནས་རྐང་པ་གཉིས་ཀྱིས་དུར་ཁྲོད་ཆན་པོར་ཆས་སོ། །བར་སྐབས་ཀྱི་གཤེད་མ་པ་རྣམས་རྒྱལ་པོའི་སྐྱེས་བུ་དེ་རྣམས་ཀྱིས་མཚོན་ཕྱར་ཏེ་བསྡིགས་པ། ཅིའི་ཕྱིར་འདི་ལྟར་ཕྱི་ཤོལ་བྱེད། མྱུར་དུ་གཞོན་ནུ་
[193b.7]འདི་གསལ་ཤིང་ལ་སྐྱོན་ཅིག །དེ་ནས་གཤེད་མ་པ་དེ་སྐྲག་ཏེ། གཞོན་ནུ་གསེར་མདོག་གསལ་ཤིང་ལ་བསྐྱོན་པར་བྱའོ་ཞེས་སྨྲས་ནས་གསལ་ཤིང་ལ་བསྐྱོན་པར་བརྩམས་པ་དང་། གཞོན་ནུ་གསེར་མདོག་འཁོར་པའི་ཉེས་པས་ཡིད་བྱུང་བའི་སེམས་དང་། རེ་ཐག་ཆད་
[194a]
[194a.1]པར་གྱུར་ནས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་འཕགས་པ་ཀུན་དགའ་བོས་བདག་ཡོངས་སུ་སྤངས་ཏེ་གང་ལ་མཁྱེན་པར་གསོལ་ཡང་ཡོངས་སུ་མ་བསྐྱབས་པ་ནི་སྡུག་བསྔལ་ལོ། །དེ་ནས་བར་སྐབས་དེར་གནས་བརྟན་ཀུན་དགའ་བོ་བདག་ཉིད་ཆེ་བས་རིང་པོ་
[194a.2]ཉིད་ནས་འོངས་བཞིན་དུ་སྐད་ཤིན་ཏུ་གསལ་བས་ཕྱོགས་ཀུན་དུ་ཁྱབ་པར་བྱས་ཏེ། གཞོན་ནུ་གསེར་མདོག་དབུགས་དབྱུང་བའི་ཕྱིར་སྨྲས་པ། བུ་མ་འཇིགས་ཤིག །ཁྱེད་ལྟ་བུའི་གདུལ་བྱ་རྣམས་ཀྱི་དོན་དུ་ངས་སྦྲུལ་དུག་ཅན་ལྟ་བུའི་ལུས་འདི་བཟུང་བ་ཡིན་གྱི་བུ་མ་འཇིགས་
[194a.3]ཤིག །ངས་དེང་ཁྱོད་ཉམ་ང་པ་འདི་ལས་ཡོངས་སུ་ཐར་པར་བྱའོ། །དེང་ངས་སངས་རྒྱས་བཅོམ་ལྡན་འདས་ཀྱི་ཐུགས་ལ་དགོངས་པ་རྫོགས་པར་བྱའོ། །དེང་ཉིད་ངས་གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་
[194a.4]ཅིང་གཟིགས་པ་དང་། གནས་བརྟན་འོད་སྲུངས་ཆེན་པོས་བསྟན་པ་ང་ཁྲུལ་གཏད་པ་དེ་ཡང་འབྲས་བུ་ཡོད་པར་བྱའོ། །དེང་ངས་དེ་བཞིན་གཤེགས་པའི་ཉན་ཐོས་རྣམས་ཀྱི་མཆོག་གི་བདག་ཉིད་ཆེ་བ་ཉེ་བར་བརྟན་པར་བྱའོ། །དེང་ཁྱེད་ཀྱི་ཡིད་ལ་རེ་བ་ཡོངས་སུ་རྫོགས་
[194a.5]པར་བྱའོ། །དེང་ཁྱེད་ཀྱི་འཆི་བའི་འཇིགས་པ་འདི་དང་འཁོར་བའི་འཇིགས་པ་བསལ་བར་བྱའོ། །དེང་ཁྱེད་ཀྱི་ཐེ་ཚོམ་གྱི་རྣམ་པ་ཡིན་ནམ་མ་ཡིན་སྙམ་པའི་ཟུག་རྡུ་དབྱུང་བར་བྱའོ། །ལྟ་བ་ངན་པའི་རབ་རིབ་ཀྱིས་ཁེབས་པའི་ཡེ་ཤེས་ཀྱི་མིག་སྨན་གྱི་ཐུར་མས་རྣམ་པར་
[194a.6]སྣང་བར་བྱའོ། །དེང་ཁྱེད་ཀྱི་ཁྲོ་བའི་མེ་གཞིག་པར་བྱའོ། །དེང་ཁྱེད་འདོད་ཆགས་དང་བྲལ་བས་བསྐྱབ་པར་བྱའོ། །དེང་ཁྱེད་ཀྱི་དགེ་བའི་ས་བོན་བསྐྱེད་པར་བྱའོ། །དེང་ཁྱེད་འཁོར་བའི་འདམ་ལས་གདོན་པར་བྱའོ། །དེང་ཁྱེད་སྡུག་བསྔལ་གྱི་རྒྱ་མཚོ་ལས་བསྒྲལ་
[194a.7]བར་བྱའོ། །དེང་ཁྱེད་འཁོར་བའི་འབྲོག་དགོན་པའི་མཐར་དབྱུང་བར་བྱའོ། །དེང་ཁྱེད་ཉོན་མོངས་པའི་འཆིང་བ་གཅད་པར་བྱའོ། །དེང་ཁྱེད་ཉོན་མོངས་པའི་སྒོ་གླེགས་གཅད་པར་བྱའོ། །དེང་ངས་ཇི་ལྟར་ཁྱེད་ཀྱི་མཐའ་བྱེ་བ་བརྒྱ་སྟོང་དཔག་ཏུ་མེད་པར་ཤིན་ཏུ་རྙེད་པར་
[194b]
[194b.1]དཀའ་བ་ཉོན་མོངས་པ་དང་ཉེ་བའི་ཉོན་མོངས་པ་སྤངས་ནས་དགྲ་བཅོམ་པ་ཉིད་ཐོབ་པ་དེ་ལྟར་ངས་བྱའོ། །དེང་ནི་ཉོན་མོངས་བུད་ཤིང་ཀུན། །ཡེ་ཤེས་མེ་ཡིས་བསྲེག་པར་བྱ། །དེ་ནི་ཐེ་ཚོམ་མེད་པའི་བློས། །རིགས་དང་བྲལ་བ་ཉིད་དུ་གྱུར། །དེང་ནི་བུ་ཁྱོད་མི་
[194b.2]ཐོགས་པར། །ཡུན་རིང་སྐྱེད་པའི་སྐྱེ་བའི་ཤིང་། །ཡེ་ཤེས་ཆེན་པོའི་རྡོ་རྗེ་ཡིས། །བཅད་དཀའ་ཤིན་ཏུ་གཅོད་པར་འགྱུར། །ཆགས་ཆུ་དྲེགས་པའི་དབའ་ཀློང་ཅན། །ང་རྒྱལ་ཆུ་རླབས་སྲིད་མཚོ་ལས། །བརྩོན་པའི་གཟིངས་ལ་ལེགས་ཞོན་ཏེ། །ཁྱོད་ནི་རབ་ཏུ་
[194b.3]རྒལ་བར་གྱུར། །སྐྱེ་བའི་ལྷན་ཅིག་དགའ་བའི་རྩེ། །འཆི་བའི་རི་ཁྲོད་དོག་པ་ནི། །ཡེ་ཤེས་རྡོ་རྗེ་ཆེན་པོ་ཡིས། །སྡུག་བསྔལ་རི་བོ་གཞིག་པར་འགྱུར། །བསྐལ་པ་བྱེ་བ་བརྒྱ་སྟོང་དུ། །གང་ཞིག་ཁྱོད་ཀྱིས་མ་ཐོབ་གནས། །དེ་འདྲ་ཤིན་ཏུ་རྙེད་དཀའ་ཡི། །གནས་
[194b.4]མེད་དེང་ནི་ཐོབ་པར་འགྱུར། །དེ་ནས་གནས་བརྟན་ཀུན་དགའ་བོ་ལས་དེ་དག་ཐོས་པ་དང་། གཞོན་ནུ་གསེར་མདོག་གཏོར་བ་ལས་སླར་རྙེད་པ་བཞིན་དུ་དབུགས་ཕྱིན་ཅིང་རྙེད་ནས་ཤིན་ཏུ་དགའ་བས་བ་སྤུ་ལྡང་བ་དང་། ནམ་མཁའི་ངོས་སུ་ཤས་ཆེར་ལྟ་ཞིང་གནས་བརྟན་ཀུན་
[194b.5]དགའ་བོ་ལ་དགའ་བས་བསྡུས་པའི་ཡིད་རྩེ་གཅིག་ཏུ་གྱུར་ཏོ། །དེ་ནས་རྒྱལ་པོའི་སྐྱེས་བུ་དེ་རྣམས་ཀྱིས་གསོད་མ་པ་རྣམས་ལ་སྨྲས་པ། ཤེས་ལྡན་དག་དགེ་སློང་ནམ་མཁའི་ངོས་ལ་རྟེན་ཅིང་འོང་བ་འདི་དག་ནི་སྙིང་རྗེ་ཅན་ཡིན་པས་འདི་དག་འོངས་ནས་གལ་ཏེ་བར་ཆོད་བྱེད་ཀྱི་
[194b.6]མྱུར་དུ་གཞོན་ནུ་འདི་གསལ་ཤིང་ལ་སྐྱོན་ཅིག །ཁྱེད་རྣམས་རྒྱལ་པོའི་ཁྲིམས་ལས་འདས་པས་སྡུག་བསྔལ་ཆེན་པོ་ཐོབ་པར་གྱུར་ཏ་རེ། དེ་ནས་གཤེད་མ་པ་དེ་རྣམས་བུ་དང་། བུ་མོ་དང་། ནང་མི་དང་། ཉེ་དུ་དང་། སྲོག་དང་བྲལ་བས་འཇིགས་སྐྲག་ནས་གཞོན་ནུ་གསེར་
[194b.7]མདོག་བཏེག་སྟེ་གསལ་ཤིང་ལ་གཟུགས་པར་བརྩམས་པ་དང་། གནས་བརྟན་ཀུན་དགའ་བོས་དེའི་མོད་ཁོ་ན་ལ་ཇི་ལྟར་གསལ་ཤིང་དེའི་སྟེང་དུ་ཟླ་བའི་དཀྱིལ་འཁོར་དང་འགྲན་དུ་རུང་བ། ལྟེ་བ་ཡངས་པ་དང་ལྡན་པའི་པདྨ་ཆེན་པོ་བྱུང་བར་གྱུར་ལ། ཟླ་བའི་སྟེང་དུ་ལྟེ་བ་ལ་
[195a]
[195a.1]གཞོན་ནུ་གསེར་མདོག་སྐྱིལ་མོ་ཀྲུང་གིས་འདུག་པ་དེ་ལྟར་བྱིན་གྱིས་བརླབས་སོ། །པདྨ་དེའི་ལྟེ་བའི་སྟེང་ན་གཞོན་ནུ་གསེར་མདོག་སྐྱིལ་མོ་ཀྲུང་གིས་འདུག་པ་མཐོང་བ་དང་། ནམ་མཁའ་ལས་ལྷ་བྱེ་བ་བརྒྱ་སྟོང་དཔག་ཏུ་མེད་པས་ཅ་ཅོའི་སྒྲ་བཏོན་ཏེ། ཀྱེ་མའོ་བསྟན་
[195a.2]པའི་བདག་ཉིད་ཆེ། །ཀུན་མཁྱེན་གྱི་ནི་རྨད་བྱུང་དང་། །དེ་བཞིན་གཤེགས་པའི་རྣམ་འཕྲུལ་གང་། །དེ་བཞིན་ཉན་ཐོས་རྣམས་ཀྱང་བྱེད། །དེ་ནི་འཕགས་པ་ཀུན་དགའ་བོས། །བདག་ཉིད་ཆེ་མཐོ་རབ་སྟོན་ཅིང་། །བདེ་གཤེགས་བཞིན་དུ་བྱེད་པ་ནི། །ཡང་དག་ཤིན་ཏུ་རྨད་
[195a.3]བྱུང་ཆེ། །ཕོངས་པའི་མུན་པ་ཀུན་སེལ་བའི། །རྒྱལ་པོའི་ཉི་མ་ནུབ་གྱུར་ཀྱང་། །ཀྱེ་མ་གནས་བརྟན་ཀུན་དགའ་བོས། །དཔལ་ལྡན་ཉི་མ་འདི་ཤར་རོ། །འགྲོ་བ་ནམ་མཁའི་དཀྱིལ་འཁོར་དུ། །གནས་བརྟན་ཀུན་དགའི་ཟླ་བ་ཡིས། །རང་གི་བདག་ཉིད་ཤེས་རབ་ཆེའི། །འོད་
[195a.4]ཀྱི་དྲི་མ་མེད་པར་བྱས། །བདེར་གཤེགས་སྒྲོན་མ་དང་བྲལ་བས། །འགྲོ་བའི་མུན་པས་ཁྱབ་གྱུར་ལ། །འཕགས་པ་ཀུན་དགའི་སྒྲོན་མ་ཡིས། །དེང་ནི་ཡང་དག་གསལ་བར་བྱས། །ཡོན་ཏན་བསམ་མི་ཁྱབ་ཀུན་ལྡན། །སངས་རྒྱས་རིན་ཆེན་ནུབ་གྱུར་ཀྱང་། །དཔལ་ལྡན་
[195a.5]འགྲོ་བའི་གཙུག་ནོར་བུ། །འཕགས་པ་ཀུན་དགའ་ཡང་དག་འཕགས། །དེ་ནས་གནས་བརྟན་ཀུན་དགའ་བོས་སྟོན་ཀའི་ཟླ་བའི་དཀྱིལ་འཁོར་བལྟར་མེད་པ་བས་ལྷག་པའི་འོད་དང་ལྡན་པ་མཚམས་ཀྱི་སྤྲིན་གྱིས་བསྐོར་བའི་ཉི་མ་ལྟ་བུ་སའི་དཔལ་མ་ལུས་པ་བཞིན་དུ་དཔལ་
[195a.6]གྱིས་ལུས་འབར་བར་གྱུར་པ། རང་གི་གཟི་བརྗིད་ཀྱིས་ཉི་མའི་འོད་ཟིལ་གྱིས་གནོན་པ། དགྲ་བཅོམ་པ་ལྔ་བརྒྱས་ཡོངས་སུ་བསྐོར་ཏེ་ཕྱིན་པ་དང་། ནམ་མཁའི་ངོས་ཉིད་ན་གནས་བཞིན་དུ་གཞོན་ནུ་གསེར་མདོག་ལ་གསུངས་པ། །འཇིག་རྟེན་དུ་ནི་ལན་འགའ་ཞིག །
[195a.7]མིག་ལྡན་གཡུལ་གྱི་མཐར་བྱོན་པ། །ལྷ་དང་མི་ཡི་སྟོན་པ་ཡི། །དེ་བཞིན་གཤེགས་པ་འབྱུང་བར་འགྱུར། །སྡུག་བསྔལ་ཐམས་ཅད་རྣམ་སེལ་བའི། །ཆོས་གང་རབ་ཏུ་སྟོན་པ་དང་། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འདས་པ་
[195b]
[195b.1]དང་། །འཕགས་པའི་ལམ་ནི་ཡན་ལག་བརྒྱད། །ཞི་བ་མྱ་ངན་འདས་འགྲོ་བ། །ཆོས་འདི་སྟོན་པར་མཛད་པ་ན། །སྡུག་བསྔལ་ཐམས་ཅད་སེལ་བྱེད་པའི། །ཤེས་པས་མི་ཤེས་བཅོམ་ནས་ནི། །སླར་ནི་འབྱུང་བར་མི་འགྱུར་རོ། །དེ་ནས་ཚིག་འདི་ཐོས་པའི་རྗེས་ཐོགས་
[195b.2]ཉིད་ལ་གཞོན་ནུ་གསེར་མདོག་འཇིག་ཚོགས་ལ་ལྟ་བའི་རི་བོ་མཐོན་པོ་ཉི་ཤུ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །དེ་ནས་གཞོན་ནུ་གསེར་མདོག་ཚོང་པ་རྙེད་པ་རྙེད་པ་ལྟ་བུའམ། ཞིང་པ་ལོ་ལེགས་པ་ལྟ་བུའམ། དཔའ་བོ་
[195b.3]གཡུལ་ལས་རྒྱལ་བ་ལྟ་བུའམ། འཁོར་ལོས་སྒྱུར་བའི་རྒྱལ་པོ་ཐོབ་པ་ལྟར་མཆོག་ཏུ་དགའ་བ་དང་། མགུ་བ་སྐྱེས་པར་གྱུར་ནས་དེ་ཉིད་དུ་གནས་བཞིན་དུ་ལག་པ་ཐལ་མོ་སྦྱར་ཏེ་གནས་བརྟན་ཀུན་དགའ་བོ་ལ་མངོན་པར་བསྟོད་པར་བརྩམས་པ། གནས་བརྟན་ཀུན་
[195b.4]དགའ་ཕྱག་འཚལ་ལོ། །གནས་བརྟན་མཆོག་ལ་ཕྱག་འཚལ་ལོ། །རྒྱལ་སྲས་རྣམས་ཀྱི་ཏོག་གྱུར་པའི། །ཐུབ་པ་ཆེ་ལ་ཕྱག་འཚལ་ལོ། །ཨེ་མའོ་ཁྱོད་ཀྱི་ཐུགས་རྗེ་རྒྱས། །ཨེ་མའོ་ཐུགས་རྗེ་མཆོག་ལྡན་པ། །གང་གིས་བདག་ནི་ཉམ་ང་བ། །ཆེན་པོ་ལས་ནི་དེང་
[195b.5]མཛད་ཐར། །འཇིགས་པས་ཉེན་ཅིང་མགོན་མེད་བདག །མགོན་པོ་ཁྱོད་ཀྱིས་ཐར་མཛད་པ། །འཇིག་རྟེན་མགོན་ཞེས་མི་ཡུལ་གྱི། །གནས་སུ་ཁྱེད་ཀྱི་སྒྲ་བསྒྲགས་གྱུར། །སྡུག་བསྔལ་ཚ་བས་གདུངས་པ་ཡི། །འཇིག་རྟེན་ཁྱེད་ཀྱིས་འཛིན་མཛད་ཅིང་། །བྱམས་དང་
[195b.6]སྙིང་རྗེ་བསིལ་བའི་འོད། །ཐུབ་པ་ཟླ་བ་ཤར་བ་ཡིན། །དགེ་བའི་བཤེས་དང་མཇལ་ནས་ནི། །ཁྱེད་ཀྱིས་བདག་ལ་གང་ཐོབ་མཛད། །བྱ་བ་དེ་ནི་མས་མིན་ཞིང་། །ཕ་དང་གཉེན་རྣམས་ཀྱིས་མ་ཡིན། །ངན་སོང་ཐམས་ཅད་སྒོ་གཅད་ཅིང་། །ཐར་པའི་སྒོ་ནི་ཀུན་དུ་ཕྱེ། །རྒྱ་མཚོ་
[195b.7]ཐམས་ཅད་སྐམས་པ་དང་། །རུས་པའི་རི་ལས་ཐར་བར་མཛད། །འཁོར་བ་ཐོག་མཐའ་དབུས་མེད་ཅིང་། །ཉོན་མོངས་འཇིགས་པས་དཀྲུགས་པ་ལས། །བློ་དང་བཅས་པའི་ཡོན་ཏན་གྱིས། །ཁྱེད་ཀྱི་མཐར་ནི་བཞག་པར་གྱུར། །ཐོག་མེད་དུས་ནས་ཞེན་པ་ཡི། །
[196a]
[196a.1]ལྟ་བའི་ཟུག་རྔུ་ལེགས་འབྱིན་པའི། །སྨན་པའི་མཆོག་འདིར་རྙེད་པས་ན། །བདག་ནི་ནད་མེད་བདེ་བ་སྐྱེས། །དེ་ནས་ལྷ་རྣམས་ཀྱིས་གནས་བརྟན་ཀུན་དགའ་བོའི་སེམས་ལ་བལྟས་ནས་སྐད་ཅིག་མ་དེ་ཉིད་ལ་དུར་ཁྲོད་ཆེན་པོའི་རྡོ་དང་གསེག་མ་དང་། གྱོ་མོ་
[196a.2]རྣམས་བསལ་བ་དང་། ཙནྡན་གྱི་ཆུས་ཆག་ཆག་བཏབ་ཅིང་སྤོས་ཀྱི་དྲི་ཞིམ་པོས་གཏུལ་ཏེ། གདུགས་དང་རྒྱལ་མཚན་དང་། བ་དན་དང་། རྟ་བབས་བསྒྲེངས་པ་དང་། མུ་ཏིག་གི་དོ་ཤལ་གྱི་ཚོགས་དང་། གོས་ཀྱི་ཆུན་འཕྱང་མང་པོ་དཔྱངས་པ་དང་། མེ་ཏོག་དྲི་ཞིམ་པོ་
[196a.3]སྣ་ཚོགས་ཀྱི་སིལ་མ་བཀྲམ་སྟེ། ལྷ་རྣམས་དགའ་བའི་ཚལ་བཞིན་དུ་ཤིན་ཏུ་ཉམས་དགའ་བར་བྱས་སོ། །དེར་ཡང་གནས་བརྟན་ཀུན་དགའ་བོའི་དོན་དུ་རིན་པོ་ཆེ་སྣ་ཚོགས་པས་རྣམ་པར་སྤེལ་ཅིང་སྤྲས་པས་ཁྱད་པར་ཅན་དུ་ཕྱེ་ཞིང་ཐམས་ཅད་ལྷའི་གསེར་ལས་བྱས་པ། རྐང་
[196a.4]རྟེན་དང་བཅས་པས་ལྷའི་སེང་གེའི་ཁྲི་ཆེན་པོ་བཅས་པ་དང་། དགྲ་བཅོམ་པ་ལྔ་བརྒྱ་པོ་དེ་རྣམས་ཀྱི་དོན་དུ་ཡང་ལྷའི་གདན་རྣམས་བཏིང་ངོ་། །དེ་ནས་གནས་བརྟན་ཀུན་དགའ་བོ་ནམ་མཁའ་ལས་བབས་ཏེ། སེང་གེའི་ཁྲི་དེའི་སྟེང་དུ་བཞུགས་སོ། །དགྲ་བཅོམ་པ་ལྔ་
[196a.5]བརྒྱ་པོ་དེ་རྣམས་ཀྱང་བབས་ཏེ་གདན་བཤམས་པ་ལ་འདུག་པར་གྱུར་ཏོ། །རྒྱལ་པོ་མ་སྐྱེས་དགྲ་ཡང་སྲོག་ཆགས་བརྒྱ་སྟོང་དཔག་ཏུ་མེད་པས་ཡོངས་སུ་བསྐོར་ནས་ཕྱིན་པ་དང་། ཅི་ཙམ་ན་འབྱོར་པ་དེ་དག་ཀྱང་མཐོང་ཞིང་། གཞོན་ནུ་གསེར་མདོག་ཟླ་བའི་དཀྱིལ་འཁོར་
[196a.6]དང་འགྲན་དུ་རུང་བའི་པདྨའི་ལྟེ་བའི་སྟེང་ན་འདུག་པ་སྤྲིན་རུམ་སྟུག་པོ་ལས་བྱུང་བའི་སྟོན་ཀའི་ཟླ་བ་རྒྱས་པ་ལྟ་བུའམ། གསེར་གྱི་མཆོད་སྡོང་ལྟར་དཔལ་གྱིས་འབར་བ་མཐོང་བ་དང་། དེ་བལྟས་ཏེ་སེམས་ཀྱི་རྒྱུད་ངོ་མཚར་ཤིན་ཏུ་བསྡུས་པར་གྱུར་ནས་བ་སྤུ་ལྡང་བར་གྱུར་པ་
[196a.7]དང་། མཆོག་ཏུ་དགའ་བའི་རླབས་འཁྱིལ་པའི་གདོང་གི་པདྨ་རྒྱས་པ་དང་། མཆོག་ཏུ་དད་པའི་ཤུགས་ཀྱིས་སེམས་ཤིན་ཏུ་བསྡུས་པ་དང་། ལུས་ཐམས་ཅད་ཀྱིས་གནས་བརྟན་ཀུན་དགའ་བོའི་ཞབས་གཉིས་ལ་ཕྱག་འཚལ་ལོ། །དེ་ནས་ཞབས་ལ་བྱུགས་ཏེ་
[196b]
[196b.1]ལངས་ནས་པུས་མོ་གཉིས་ས་ལ་བཙུགས་ཏེ། ལག་པ་ཐལ་མོ་སྦྱར་ནས་གནས་བརྟན་ཀུན་དགའ་བོ་ལ་ལྟ་ཞིང་སྨྲས་པ། གང་གིས་དེ་ཉིད་འགྲོ་བ་འདི། །ཡོངས་སུ་སྐྱོབ་པར་མཛད་པ་དང་། །བདག་ཉིད་ཀྱང་ནི་དོན་མཛད་པའི། །སློབ་དཔོན་མཆོག་ལ་ཕྱག་འཚལ་ལོ། །
[196b.2]ད་ནི་སྐྱེ་བོ་འདི་དག་ལ། །ཁྱེད་ཀྱིས་དགོངས་པ་མ་མཛད་ན། །སྨོད་པའི་སེར་བ་འབེབས་པ་ཡིས། །ཐུབ་པ་བདག་ནི་བརླག་པར་འགྱུར། །ཐུབ་པ་སེམས་ལ་བཏང་སྙོམས་མཛད། །གལ་ཏེ་སྐྱོབ་ཁྱོད་མི་བཞུགས་ན། །རྗེས་སུ་འགྱོད་པའི་ནགས་མེས་ནི། །བདག་
[196b.3]ཉིད་དེང་ཉིད་སྲེག་པར་འགྱུར། །ཨེ་མའོ་ཡེ་ཤེས་ཆེ་བ་ཉིད། །ཐུགས་རྗེའི་ཐུགས་ནི་དམ་པ་ཡིས། །རྨད་དུ་བྱུང་བའི་སྤྱོད་པ་འདི། །ཨེ་མའོ་ཡང་དག་བསྟན་པར་མཛད། །སྡིག་མེད་ཁྱོད་ཀྱི་ཆོ་འཕྲུལ་དང་། །རྨད་བྱུང་ཆེན་པོ་འདི་ཐོས་ན། །དེ་བཞིན་གཤེགས་པ་
[196b.4]མཆོག་ཏུ་ནི། །ཞི་བར་གཤེགས་པ་མི་སྙམ་སེམས། །ཉམ་ཐག་གྱུར་པའི་འཇིག་རྟེན་གྱི། །ཁྱེད་ནི་མགོན་ཡིན་ཁྱེད་དཔུང་གཉེན། །སེམས་ཅན་ཀུན་ལ་ཕན་མཛད་པས། །བཅོམ་ལྡན་བཞིན་མཉེས་གཤིན་པ་པོ། །བཅོམ་ལྡན་འདས་དེ་ཁུམས་པ་དང་། །དགའ་བ་
[196b.5]གང་ཞིག་སྔོན་སྐྱེ་བ། །རྒྱལ་བའི་བསྟན་པ་གཅེས་འཛིན་པ། །ཁྱོད་དེ་དེ་དང་འདྲ་བར་ཁུམས། །དེ་ནས་རྒྱལ་པོ་དེས་གནས་བརྟན་ཀུན་དགའ་བོ་ལ་དེ་ལྟར་མངོན་པར་བསྟོད་ནས་ལངས་ཏེ། མཆོག་ཏུ་དགའ་བས་ཡིད་རྒྱས་པ་དང་རིངས་པ་རིངས་པར་གསལ་ཤིང་གི་
[196b.6]གན་དུ་སོང་སྟེ། ལག་པ་གཉིས་བརྐྱང་ནས་ཡིད་དུ་འོང་བའི་བུ་སྟོར་བ་ལས་སླར་རྙེད་པ་ལྟར་མཆོག་ཏུ་དགའ་བས་གཞོན་ནུ་གསེར་མདོག་རང་ཉིད་ཀྱི་སྟན་དེ་ལ་ཕབ་སྟེ། དམ་དུ་འཁྱུད་ནས་ཡང་དང་ཡང་དུ་མགོ་ལ་འོ་བྱས་ཤིང་དགའ་བས་བྱུང་བའི་མཆི་མས་ཀུན་དུ་ཁེབས་
[196b.7]པས་གཞོན་ནུ་གསེར་མདོག་ལ་མིག་མི་འཛུམས་པར་ལྟ་ཞིང་སྨྲས་པ། ཉམ་ཐག་འདི་ལས་ཁྱོད་ཐར་ནས། །གནས་པ་ད་ལྟར་མཐོང་བ་ན། །དགའ་བར་གྱུར་པ་དེ་འདྲ་སྔོན། །རྒྱལ་པོ་ཐོབ་ནའང་མ་མྱོང་ངོ་། །ཟླ་བ་རྒྱས་པའི་མདངས་འཕྲོགས་ཤིང་། ཨུཏྤལ་སྔོན་པོ་འདབ་
[197a]
[197a.1]འདྲའི་མིག །བུ་ཡི་གདོང་གི་པདྨ་ནི། །མཐོང་བ་དེ་ནི་བལྟ་བར་བྱ། །བཙོ་མའི་གསེར་གྱི་མདངས་ལྡན་ཞིང་། །ཡོན་ཏན་ཕུན་ཚོགས་རྣམས་ཀྱིས་བརྒྱན། །ཡན་ལག་ཐམས་ཅད་འབྱས་གྱུར་པའི། །ཁྱེད་ལུས་མཐོང་བ་བལྟ་བར་བྱ། །སྙིང་རྗེ་མེད་ཅིང་
[197a.2]བདག་ཉིད་ངན། །གང་གི་རང་བཞིན་ངན་སྨྲས་ནས། །སུས་ནི་མི་རྣམས་ཡིད་འོང་ཁྱོད། །བསད་པའི་ཕྱིར་ནི་ཡོངས་སུ་སྤངས། །སྤྱོད་པ་དུལ་བར་ལྡན་པ་དང་། །ཚིག་ནི་མཉན་ལ་དགའ་བྱེད་ལ། །གཟུགས་ནི་ཤིན་ཏུ་རྨད་བྱུང་བའི། །སུ་ཡི་ཡིད་དུ་མི་འོང་སྨྲས། །ཡོན་ཏན་
[197a.3]ལྡན་པ་སུ་ཞིག་ལྡང་། །གང་ཞིག་རྟག་ཏུ་ཉེ་རྗེས་འབྲངས། །རྡོ་རྗེ་སྙིང་པོ་མཉམ་སེམས་གང་། །ཁྱད་པར་མི་ཤེས་སུ་ཞིག་ཡིན། །བུ་སྡུག་ཁྱོད་ལ་སྡང་བ་གང་། །དེ་ནི་རྡོ་ཡི་རང་བཞིན་ནམ། །སེམས་དང་བྲལ་བས་བྱས་པའམ། །སྙིང་ནི་ཕྱུང་བར་གྱུར་པར་ངེས། །སྐྱེ་
[197a.4]བོ་ཀུན་ལ་སྡུག་པ་ཁྱོད། །གང་གིས་གསོད་པར་ལུང་བསྒོ་བ། །རྡོ་རྗེ་རབ་འབར་ཐོགས་ནས་ནི། །ང་ཡི་སྤྱི་བོར་འཕེན་པ་ཡིན། །འགུལ་པར་མཚོན་གྱིས་འདེབས་པ་དང་། །མདུང་གིས་སྙིང་གར་རབ་བསྣུན་ཞིང་། །གྲགས་པ་མིན་པའི་སེར་བ་འདི། །སུ་ཞིག་གིས་ནི་
[197a.5]དབབ་པར་བརྩམས། །ཀྱི་ཧུད་སུ་ཡིས་མི་བཟད་པའི། །ཚིག་གིས་ལས་འདི་བྱེད་དུ་བཅུག །སུ་ཞིག་ངའི་དགྲར་འབྲེལ་གྱུར། །ང་ནི་གང་ཡིད་མི་འང་གྱུར། །སུ་ཞིག་མཆི་བདག་དག་གིས་འཁྱུད། །སུ་ཞིག་སྲོག་ལས་སྐྱོབ་པར་གྱུར། །གང་གིས་ཁྱོད་ལ་ལུང་བསྒོ་བ། །
[197a.6]མྱུར་དུ་སྨྲ་བར་བྱ་བའི་རིགས། །དེ་ནས་གཞོན་ནུ་གསེར་མདོག་སེམས་པ་ལ་ཞུགས་པར་གྱུར་ཏེ། གལ་ཏེ་རྒྱལ་པོ་འདི་ལ་བློན་པོ་རབ་གཏུམ་གྱིས་བདག་ལ་ལས་འདི་བྱེད་དུ་བཅུག་གོ་ཞེས་སྨྲ་བ་ནི་ད་ལྟ་ཉིད་ནི་བློན་པོ་རབ་གཏུམ་གསོད་པར་འགྱུར་ཏེ། བློན་པོ་རབ་གཏུམ་ལ་
[197a.7]རྒྱལ་པོས་ལས་བྱེད་པར་གྱུར་པའི་གནས་ཡོད་ན་འདིར་ཇི་ལྟར་བསྒྲུབ་པར་བྱ། ཡང་བསམས་པ་ལས་བདག་གིས་བྱ་བ་ལ་དམིགས་པར་བྱ་སྟེ། ངེས་པར་ན་ངས་སྐྱེ་བ་གཞན་དུ་སྡིག་པ་མི་དགེ་བའི་ལས་བྱས་པ་གང་ཡིན་པ་དེའི་རྣམ་པར་སྨིན་པ་འདི་ཡིན་ཏེ། སྔོན་གྱི་
[197b]
[197b.1]ལས་ཀྱི་རྣམ་པར་སྨིན་པ་མ་གཏོགས་པར་སྡིག་པ་མེད་པ་འདི་ལྟར་གསོད་པར་འོང་བ་སུ་ཞིག་བྱེད་ཅེས་ངེས་པར་བསམས་ནས་རྒྱལ་པོ་ལ་སྨྲས་པ། ལྷ་ཅིག་གང་ལ་ཡིད་འདྲ་བའི། །རྣམ་སྨིན་ཉེ་བར་གནས་པ་འདི། །སྡིག་པ་སྔོན་གྱི་ཚེ་རབས་སུ། །བདག་ཉིད་ཀྱིས་ནི་
[197b.2]བྱས་པ་ཡིན། །བདག་ཉིད་ཀྱིས་ནི་བྱས་པའི་ལས། །ཡིད་དུ་མི་འོང་ཞེས་བྱ་དེ། །རྣམ་སྨིན་ལ་ནི་ལོངས་སྤྱོད་ན། །ཁྱོད་ལ་བདག་གིས་སུ་ཞིག་བསྟན། །དེ་སྐད་ཅེས་སྨྲས་ནས་གནས་བརྟན་ཀུན་དགའ་བོའི་གན་དུ་སོང་སྟེ། ལུས་ཐམས་ཅད་ཀྱིས་གནས་བརྟན་ཀུན་དགའ་བོའི་
[197b.3]རྐང་པ་གཉིས་ལ་ཕྱག་བྱས་པ་དང་། གནས་བརྟན་ཀུན་དགའ་བོས་སྨྲས་པ། བུ་བུ་མོ་ཀ་ཤི་མཛེས་དགའ་མོ་འདི་ནི་དུག་གི་ཤུགས་ཀྱིས་ཟིན་པ་ཡིན་གྱི། དེ་བདེན་པའི་བྱིན་གྱིས་རླབས་ཀྱིས་སློང་ལ་བདེ་ལེགས་སུ་གྱིས་ལ་སྐྱེ་བོའི་ཚོགས་མང་པོ་ཡང་ཡིད་ཆེས་པར་གྱིས་
[197b.4]ཤིག །གཞོན་ནུ་གསེར་མདོག་གནས་བརྟན་ཀུན་དགའ་བོའི་ལུང་མཉན་ཏེ། སེམས་ཅན་ཐམས་ཅད་ལ་ལྷག་པའི་བསམ་པས་འཇུག་པའི་སེམས་དང་། བདེན་པའི་བྱིན་གྱིས་རླབས་བྱེད་པ་ལ་ཞུགས་ཏེ། བདེན་པ་དང་བདེན་པའི་ཚིག་གང་གིས་བུ་མོ་ཀ་ཤི་མཛེས་དགའ་
[197b.5]མོ་འདི་ལ་འདོད་ཆགས་སམ། ཞེ་སྡང་ངམ། གཏི་མུག་གམ། ཐེ་ཚོམ་མམ། གཞན་གང་ཡང་རུང་བའི་ཉོན་མོངས་པའམ། ཉེ་བའི་ཉོན་མོངས་པ་ཐ་ན་ཕྲན་ཚེགས་ཙམ་ཡང་མ་སྐྱེས་པའི་བདེན་པ་དང་། བདེན་པའི་ཚིག་འདིས་འདིའི་ལུས་ལ་དུག་རྣམ་པར་འཇིག་པར་གྱུར་
[197b.6]ཅིག་ཅེས་སྨྲས་སོ། །དེ་ནས་བདེན་པའི་བྱིན་གྱི་རླབས་བྱས་པའི་མོད་ཁོ་ན་ལ་བུ་མོ་ཀ་ཤི་མཛེས་དགའ་མོའི་ལུས་ལ་དུག་མེད་པར་གྱུར་ཏེ། བདེ་བར་གནས་ནས་གཉིད་ལོག་པ་ལས་སད་པ་བཞིན་དུ་ལངས་ནས་དེ་ལུས་བདེ་བར་གྱུར་པ་དང་། ལངས་པ་ལས་བལྟས་ནས་སྐྱེ་བོ་
[197b.7]མང་པོའི་ཚོགས་དང་། ལྷ་བརྒྱ་སྟོང་དུ་མ་རྣམས་ཀྱིས་སྒྲ་གཅིག་ཏུ་སྒྲ་གསུང་མཐོན་པོས་སྨྲས་པ། ཨེ་མའོ་ངོ་མཚར་ཆེ་སྟེ། ཨེ་མའོ་གཞོན་ནུ་བསམ་པ་རྣམ་པར་དག་གོ། །གཞོན་ནུ་འདི་ནི་རྫུ་འཕྲུལ་ཆེ་བ་དང་མཐུ་ཆེ་བ་སྟེ། གང་འདིར་བདེན་པའི་བྱིན་གྱི་རླབས་ཀྱི་སྟོབས་
[198a]
[198a.1]ཀྱིས་འདི་བུ་མོ་ཀ་ཤི་མཛེས་དགའ་མོ་བསླང་ཞིང་ཡིད་དུ་འོང་བའི་སྲོག་གིས་སྐྱོབས་པར་གྱུར་ཏོ། །དེ་ནས་བུ་མོ་ཀ་ཤི་མཛེས་དགའ་མོ་ཕྱོགས་ཀུན་དུ་ལྟ་བར་རྩོམ་པ་དང་། ཇི་སྲིད་ཅིག་ན་དུར་ཁྲོད་ཆེན་པོར་གནས་བརྟན་ཀུན་དགའ་བོ་དགེ་སློང་གི་དགེ་འདུན་ལྔ་
[198a.2]བརྒྱ་དང་ཐབས་ཅིག་ཏུ་ཟླ་བ་ཁམ་པ་ལྟར་བསྐོར་ནས་རིན་པོ་ཆེ་སྣ་ཚོགས་ཀྱིས་སྤྲས་པའི་ལྷའི་སེང་གེའི་ཁྲི་ཆེན་པོ་ལ་བཞུགས་པ་དང་། རྒྱལ་པོ་མ་སྐྱེས་དགྲ་ཡང་སྲོག་ཆགས་བརྒྱ་སྟོང་དཔག་ཏུ་མེད་པས་ཡོངས་སུ་བསྐོར་བ་དང་། བདག་ཉིད་ཀྱང་གོས་སྔོན་པོ་དང་།
[198a.3]སེར་པོ་དང་། དམར་པོ་དང་། དཀར་པོའི་ཁྱོགས་ལ་བཏེག་པ་མཐོང་ངོ་། །མཐོང་ནས་ཀྱང་སེམས་སོམ་ཉི་དང་བཅས་པས་སེམས་པ་ལ་ཞུགས་ཏེ། ཅི་འདི་རྨི་ལམ་ཡིན་ནམ། འོན་ཏེ་སེམས་ཀྱི་འཁྲུལ་བ་ཡིན་ནམ། ཡང་ན་འགའ་ཞིག་གིས་ང་ལ་སྒྱུ་མའི་ལས་
[198a.4]འདི་ལྟ་བུ་བསྟན་པ་ཡིན་ནམ་སྙམ་པ་དང་། ཅི་ཙམ་ན་དེའི་ཉེ་དུ་རྣམས་ཀྱིས་དེ་རྒྱ་ཆེར་བརྗོད་དེ་དེ་ཡང་སྨྲས་པ། གང་ཁྱོད་ཀྱིས་འཚོ་བ་འདི་དང་། འདི་དག་ཐམས་ཅད་ནི་གནས་བརྟན་ཀུན་དགའ་བོ་བྱོན་ནས་རྣམ་པ་ཐམས་ཅད་ཡོད་པར་གྱུར་ཏོ། །དེ་སྐད་ཅེས་ཐོས་
[198a.5]པ་དང་བུ་མོ་ཀ་ཤི་མཛེས་དགའ་མོ་གནས་བརྟན་ཀུན་དགའ་བོ་ལ་མཆོག་ཏུ་དགའ་བ་སྐྱེས་ཏེ། རབ་ཏུ་དད་པས་ཤིན་ཏུ་རྟོག་པ་ལ་ཞུགས་སོ། །དེ་ནས་བུ་མོ་ཀ་ཤི་མཛེས་དགའ་མོ་སྐྱེད་མོས་ཚལ་ཡང་དག་པར་དྲན་ཅིང་བློན་པོ་རབ་གཏུམ་ཡང་དྲན་ཏེ། ཀུན་ནས་སྐྱོ་
[198a.6]བའི་ཡིད་ཀྱིས་འཆི་བའི་འཇིགས་པའི་ཡི་མུག་པས་རྨོངས་པའི་མིག་དང་། གནས་སྐབས་དེ་དང་འདྲ་བར་གཞན་ཡང་ཤེས་ཤིང་བུད་མེད་ཀྱི་དངོས་པོར་གྱུར་པའི་མྱ་ངན་བྱེད་པ་ལ་ཞུགས་ཏེ། ཨེ་མའོ་བུད་མེད་ཅེས་བྱ་བ་ནི་ཤིན་ཏུ་སྨད་པ་སྟེ། སྡུག་བསྔལ་ཐམས་
[198a.7]ཅད་ཀྱི་གནས་སུ་གྱུར་པ་གང་ཞིག་ཐོབ་ནས། བདག་གནས་སྐབས་འདི་ལྟ་བུར་གྱུར་ཏོ་སྙམ་ནས་ཀུན་དུ་སྐྱོ་བའི་ཡིད་ཀྱིས་མྱུར་བར་ལངས་ཏེ། གོས་གཅིག་བླངས་ནས་གནས་བརྟན་ཀུན་དགའ་བོའི་གན་དུ་ཉེ་བར་སོང་སྟེ། གོས་གཅིག་པོ་དེ་གནས་བརྟན་ཀུན་དགའ་བོ་ལ་
[198b]
[198b.1]ཕུལ་ནས་ཞབས་གཉིས་ལ་ཕྱག་བྱས་ཏེ། དད་པའི་ཤུགས་དགྲ་པོས་གནས་བརྟན་ཀུན་དགའ་བོའི་ཡོན་ཏན་རྗེས་སུ་དྲན་པ་སྔོན་དུ་འགྲོ་བས་བདེན་པའི་བྱིན་གྱི་རླབ་བྱ་བར་བརྩམས་པ། བདེན་པ་དང་བདེན་པའི་ཚིག་གང་གིས་ཐུབ་པ་ཁྱེད་ཀྱི་སྐུ་འཕགས་པ་དང་སངས་
[198b.2]རྒྱས་ཀྱི་སློབ་མ་ཐམས་ཅད་ཀྱི་མཆོག་བརྙེས་པ། མཆོག་དམ་པ་དང་། ཁྱད་པར་དུ་འཕགས་པ་དང་། རབ་མཆོག་དང་བླ་མ་དང་། བླ་ན་མེད་པ་དང་། ཉན་ཐོས་ཀྱི་གཙོ་བོ་དང་། ཉན་ཐོས་ཀྱི་སེང་གེ་དང་། ཉན་ཐོས་ཀྱི་ཁྱུ་མཆོག་དང་། ཉན་ཐོས་ཀྱི་ཅང་ཤེས་དང་། ཉན་ཐོས་
[198b.3]ཀྱི་པདྨ་དང་། ཉན་ཐོས་ཀྱི་ཀུ་མུ་ཏ་དང་། ཉན་ཐོས་ཀྱི་པུཎྜ་རཱི་ཀ་དང་། ཉན་ཐོས་ཀྱི་ཁ་ལོ་སྒྱུར་བ་དང་། ཉན་ཐོས་ཀྱི་དེད་དཔོན་དང་། ཉན་ཐོས་ཀྱི་ཟླ་བ་དང་། ཉན་ཐོས་ཀྱི་ཉི་མ་དང་། ཉན་ཐོས་ཀྱི་རིན་པོ་ཆེ་དང་། ཉན་ཐོས་ཀྱི་གཙུག་གི་ནོར་བུ་དང་། བསྟན་པའི་གྲུ་པ་དང་།
[198b.4]བསྟན་པ་གཅེས་པར་འཛིན་པ་དང་། དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་དུ་སྦྱོར་བ། ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། རྫུ་འཕྲུལ་
[198b.5]ཆེ་བ། མཐུ་ཆེ་བ། བྱིན་གྱི་རླབས་ཆེ་བ། སྦྱིན་གནས་ཆེན་པོ་ཡིན་པའི་བདེན་པ་དང་། བདེན་པའི་ཚིག་འདིས་དེ་ཉིད་བདག་གི་བུད་མེད་ཀྱི་དབང་པོ་མི་སྣང་བར་གྱུར་ནས་སྐྱེས་པའི་དབང་པོ་འབྱུང་བར་གྱུར་ཅིག་ཅེས་སྨྲས་སོ། །དེ་ནས་བདེན་པའི་བྱིན་གྱི་རླབས་གསོལ་
[198b.6]བའི་མོད་ཁོན་ལ་དེའི་བུད་མེད་ཀྱི་དབང་པོ་མི་སྣང་བར་གྱུར་ནས་སྐྱེས་པའི་དབང་པོ་བྱུང་བར་གྱུར་ཏེ། གཟུགས་བཟང་བ། མཛེས་པ། བལྟ་ན་སྡུག་པ། ལུས་ལ་གོས་དང་རྒྱན་རྣམ་པ་སྣ་ཚོགས་ཀྱིས་བརྒྱན་པའི་སྐྱེས་པར་གྱུར་ཏོ། །ནམ་མཁའི་ངོས་ནས་འདིའི་ལྷའི་གོས་
[198b.7]རྣམ་པ་སྣ་ཚོགས་པ་ཡིད་དུ་འོང་བ་ཡང་བབ་པར་གྱུར་ཏོ། །གཞན་ཡང་དེར་གོས་ཀྱི་ཆར་དེ་བབ་པ་ན་ཇི་ལྟར་སྐད་ཅིག་དེ་ལ་དུར་ཁྲོད་ཆེན་པོའི་ཉི་མའི་འོད་ཟེར་ཡང་མི་སྣང་བར་གྱུར་པ་དེ་ལྟར་ན་ནམ་མཁའི་དཀྱིལ་འཁོར་ཁེབས་པ་ཞིག་བབ་པོ། །དེ་ནས་གནས་བརྟན་ཀུན་
[199a]
[199a.1]དགའ་བོའི་ཡོན་ཏན་གྱི་བདག་ཉིད་ཆེ་བ་ལྷ་དང་མི་རྣམས་འདུན་པར་བྱེད་པའི་ངོ་མཚར་དེ་མཐོང་བ་དང་། ནམ་མཁའི་ངོས་ན་གནས་པའི་ལྷ་བྱེ་བ་བརྒྱ་སྟོང་དུ་མ་ཅ་ཅོའི་སྒྲ་བྱུང་སྟེ། ཨེ་མའོ་ངོ་མཚར་ཆེའོ། །ཨེ་མའོ་རྨད་དུ་བྱུང་བ་ཆེན་པོ། །ཨེ་མའོ་གནས་
[199a.2]བརྟན་ཀུན་དགའ་བོ་ཡོན་ཏན་གྱི་བདག་ཉིད་ཆེན་པོ། །ཨེ་མའོ་རྒྱ་ཆེ་བ་ཉིད། ཨེ་མའོ་སྦྱིན་པའི་ཞིང་རྣམ་པར་དག་པ། གང་ལ་གོས་གཅིག་ཕུལ་བ་ཙམ་གྱིས་སྨོན་ལམ་བཏབ་པའི་རྗེས་ཐོགས་ཉིད་ལ། བུ་མོ་ཀ་ཤི་མཛེས་དགའ་མོ་བུད་མེད་ཀྱི་དབང་པོ་མི་སྣང་བར་
[199a.3]གྱུར་པས་སྐྱེས་པའི་དབང་པོ་བྱུང་ཞིང་དེ་ལྟ་བུའི་སྦྱོར་བ་དང་ལྡན་པར་གྱུར་ཏོ། །དེ་ནས་ལྷའི་བུ་དེ་རྣམས་རབ་ཏུ་དད་པའི་ཡིད་ཀྱི་ལྷའི་མེ་ཏོག་གི་ཆར་འབེབས་པ་དང་། ལྷའི་མེ་ཏོག་ཤིན་ཏུ་ལྟུང་བར་གྱུར་ཏོ། །དེ་ནས་སྐྱེས་བུ་ཀ་ཤི་མཛེས་དགའ་མོ་གནས་བརྟན་ཀུན་
[199a.4]དགའ་བོའི་མཐུ་སྟོབས་ཀྱིས་ཤིན་ཏུ་ཡིད་དུ་འོང་ཞིང་བདག་ཉིད་ཇི་ལྟར་འདོད་པས་འཕྲལ་དུ་སྨིན་པའི་འབྲས་བུ་ལ་བལྟས་ཏེ། མཆོག་ཏུ་ངོ་མཚར་དུ་གྱུར་པས་འདུན་པར་གྱུར་པའི་སེམས་ཀྱི་རྒྱུད་ལ་མཆོག་ཏུ་དགའ་བ་སྐྱེས་ནས་བ་སྤུ་ལྡང་བས་ལུས་རྩུབ་པར་བྱས་པ་དང་།
[199a.5]ལངས་ཏེ་པུས་མོ་གཉིས་ས་ལ་བཙུགས་ནས་ཐལ་མོ་སྦྱར་ཏེ། གནས་བརྟན་ཀུན་དགའ་བོ་ལ་བསྟོད་པ་བྱེད་པ་ལ་ཞུགས་སོ། །གང་གིས་དེ་ཉིད་མགོན་མེད་བདག །ཁྱོད་ཀྱིས་བདག་ལ་སྲོག་སྩོལ་བ། །ཤིན་ཏུ་རྣམ་དག་ཡོན་ཏན་བསགས། །དཔག་ཡས་རྙེད་དཀའ་ཕྱག་འཚལ་
[199a.6]ལོ། །རྣམ་དག་ཡེ་ཤེས་སྤྱན་ལྡན་པ། །གལ་ཏེ་ཁྱོད་སྐྱབས་མ་མཛད་ན། །བདག་སྲོག་ལྷག་མ་མ་མཆིས་ཏེ། །ཐུབ་ཁྱོད་བདག་སྲོག་སྩོལ་བ་ལགས། །ཨེ་མའོ་ཡོན་ཏན་ཆེ་བདག་ཉིད། །ཨེ་མའོ་སེམས་ཅན་ཕན་བཞེད་པ། །གང་ཞིག་ཉམ་ཐག་མི་བཟད་པ། །འདི་ལས་
[199a.7]འགྲོ་བ་ཁྱོད་ཀྱིས་སྐྱབས། །ཨེ་མའོ་ཁྱོད་ནི་སྦྱིན་པའི་ཞིང་། །ཤིན་ཏུ་རྣམ་དག་རབ་རྙེད་དཀའ། །གང་ལ་གོས་གཅིག་ཕུལ་བས་ཀྱང་། །རིན་ཆེན་འདི་འདྲ་ཐོབ་པར་གྱུར། །བདག་གིས་ཐུབ་པ་ཆེ་ཁྱོད་ལ། །དེ་ལྟར་གོས་གཅིག་ཕུལ་བ་ཡིས། །འཕྲལ་དུ་འབྲས་བུ་བཟང་པོ་
[199b]
[199b.1]འདི། །ཇི་ལྟར་མངོན་པར་འདོད་པ་ཐོབ། །ཉེས་པ་ཆེན་པོ་དག་གི་ཡང་། །གཞིར་གྱུར་བཞིན་དུ་ཤེས་པ་ཡང་། །བུད་མེད་ཉིད་དེ་དེ་སྤངས་ནས། །སྐྱེས་པ་ཉིད་དུ་བདག་གྱུར་ཏོ། །དེ་ཡང་ལྷ་དང་འདྲ་བ་ཉིད། །ལྷ་ཡི་རྒྱན་གྱིས་རྣམ་པར་བརྒྱན། །ནམ་མཁའ་ལ་ཡང་གོས་ཀྱི་
[199b.2]ཆར། །ཡིད་དུ་འོང་བ་བབ་པར་གྱུར། །བཞིན་བཟངས་ཡོན་ཏན་ལྡན་འདི་ལ། །གང་ཞིག་བསྙེན་བཀུར་མི་བྱེད་པ། །རྨོངས་སོགས་ཉོན་མོངས་དག་རྣམས་ཀྱིས། །སྐལ་ངན་དེང་ནི་སླུས་པ་ཡིན། །དེས་དེ་ལྟར་གནས་བརྟན་ཀུན་དགའ་བོ་ལ་མངོན་པར་བསྟོད་ནས་ལས་ཀྱི་འབྲས་
[199b.3]བུ་མངོན་སུམ་དུ་མཐོང་བ་དང་། སེམས་པ་ལ་ཞུགས་ཏེ། དེ་ནི་བདག་ཡིད་དུ་འོང་བ་དང་། ཡིད་དུ་མི་འོང་བའི་ལས་ཀྱི་འབྲས་བུ་མངོན་སུམ་དུ་མཐོང་བཞིན་དུ་སླར་ཡང་ཁྱིམ་གྱི་ནང་དུ་འདུག་པ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས། དེ་ནས་གནས་བརྟན་ཀུན་
[199b.4]དགའ་བོའི་རྐང་པ་ལ་ཕྱག་བྱས་ཏེ་སྨྲས་པ། འཕགས་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་བསྙེན་པར་རྫོགས་ནས་དགེ་སློང་གི་དངོས་པོར་གྱུར་ནས་གནས་བརྟན་གྱི་ཐད་དུ་ཚངས་པར་སྤྱད་པར་བགྱིའོ། །དེ་ཡང་གནས་བརྟན་ཀུན་དགའ་བོས་
[199b.5]རབ་ཏུ་ཕྱུང་བ་ནས། ཇི་ལྟར་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པའི་འབྲས་བུ་ཐོབ་པར་གྱུར་པ་དེ་ལྟར་ཆོས་བསྟན་ཏོ། །དེ་ནས་པར་སྐབས་དེར་དེད་དཔོན་ཉི་མ་ཆུང་མ་དང་བཅས་པ་བུ་དང་བྲལ་བའི་མྱ་ངན་གྱི་སྡུག་བསྔལ་གྱིས་གཟིར་ཞིང་། རྒྱལ་པོའི་ཁབ་ཀྱི་
[199b.6]གྲོང་ཁྱེར་གྱི་དབུས་ཀྱི་སུམ་མདོ་ནས་ལྡང་ཞིང་བདག་ཉིད་འགྱེལ་པར་གྱུར་པར་ཡང་དང་ཡང་ས་ལ་འགྲེ་ལྡོག་པར་བྱེད་ཅིང་ལག་པ་གཉིས་ཀྱིས་བདག་ཉིད་ལ་བརྡེགས་ཏེ་ཀྱི་ཧུད་བུ་ཀྱི་ཧུད་བུ་ཞེས་ཉམ་ཐག་པའི་སྒྲའི་ང་རོ་འདོན་པར་གྱུར་པ་ན། དེད་དཔོན་ཉི་མས་གནས་བརྟན་ཀུན་
[199b.7]དགའ་བོ་ནམ་མཁའི་དཀྱིལ་ནས་བྱོན་ཏེ། གཞོན་ནུ་གསེར་མདོག་ཡོངས་སུ་སྐྱོབ་ཅིང་དུར་ཁྲོད་ཆེན་པོ་ན་ངོ་མཚར་དང་རྨད་དུ་བྱུང་བས་བཞུགས་སོ་ཞེས་ཐོས་པ་དང་། ཆུང་མ་དང་བཅས་པར་བདུད་རྩིའི་རྒྱུན་ལུས་ལ་བླུགས་པ་བཞིན་དུ་ཡིད་མཆོག་ཏུ་དགའ་བ་དང་། །
[200a]
[200a.1]འཁོར་ལོས་སྒྱུར་བའི་རྒྱལ་པོར་དབང་བསྐུར་བ་ཐོབ་པ་བཞིན་དུ་མཆོག་དུ་དགའ་བ་སྐྱེས་པར་གྱུར་ནས། དེའི་མོད་ལ་ལངས་ཏེ་རིངས་པར་འགྲོ་བ་གོམ་སྟབས་ཀྱིས་རྒྱལ་པོའི་ཁབ་ནས་བྱུང་སྟེ་དུར་ཁྲོད་ཆེན་པོར་ཕྱིན་པ་དང་། ཇི་སྲིད་ཅིག་ན་གསེར་མདོག་
[200a.2]སྟོན་ཁའི་ཟླ་བ་རྒྱས་པ་སྒྲ་གཅན་གྱིས་ཟིན་པ་ལས་རྣམ་པར་ཐར་པ་ལྟ་བུ་གནས་བརྟན་ཀུན་དགའ་བོའི་གན་ན་འདུག་པ་དེ་དང་། གནས་བརྟན་ཀུན་དགའ་བོའི་ཡོན་ཏན་གྱི་སྟོབས་ལས་བྱུང་བའི་འབྱོར་པ་ཡང་མཐོང་ངོ་། །དེ་ནས་ལྷ་དང་མིའི་ཡིད་སྡུད་པར་བྱེད་པའི་རྨད་དུ་བྱུང་བའི་ཚེ་
[200a.3]འཕྲུལ་དེ་ཡང་མཐོང་ནས་གནས་བརྟན་ཀུན་དགའ་བོ་ལ་ཡིད་མགུ་བ་སྐྱེས་ཏེ། མཆོག་ཏུ་དད་པའི་ཤུགས་ཀྱིས་བརླན་པའི་སེམས་གྱི་རྒྱུ་དང་། ལུས་ཐམས་ཅད་ཀྱིས་གནས་བརྟན་ཀུན་དགའ་བོའི་ཞབས་གཉིས་ལ་ཕྱག་བྱས་ཏེ། ལངས་ནས་པུས་མོ་གཉིས་ས་ལ་བཙུགས་
[200a.4]ཏེ་དགའ་བའི་མཆི་མའི་ཆུ་རླབས་ཀྱིས་བཞིན་གྱི་པདྨ་ཁེབས་པ་དང་། ཐལ་མོ་སྦྱར་ཏེ་གནས་བརྟན་ཀུན་དགའ་བོ་ལ་བསྟོད་པ་བྱེད་པར་བརྩམས་པ། ཨེ་མའོ་སྐལ་བ་ཆེ་ཁྱོད་ཀྱི། བདག་ཉིད་ཆེན་པོ་སྟོན་མཛད་པ། །གང་ཞིག་ཉམ་ཐག་མི་བཟད་པས། །ཁྱོད་ཀྱིས་འགྲོ་བའི་
[200a.5]སྐྱབས་མཛད་དོ། །ཨེ་མའོ་ཐུགས་བརྩེའི་བདག་ཉིད་ཆེ། །ཨེ་མའོ་ཡེ་ཤེས་ཕུན་སུམ་ཚོགས། །བཅོམ་ལྡན་ཐམས་ཅད་མཁྱེན་པ་བཞིན། །རྣམ་དག་ཡང་དག་བསྟན་པ་མཛད། །དེ་བཞིན་བདག་གི་བུ་སྡུག་འདི། །སྡུག་བསྔལ་རྒྱ་མཚོ་ཆེན་པོ་ལས། །ཐུགས་རྗེ་ཡེ་
[200a.6]ཤེས་དག་གི་མཐུས། །ཁྱེད་ཀྱིས་ཡང་དག་སྟོན་པར་མཛད། །གལ་ཏེ་འདི་ལས་ཁྱེད་ཀྱིས་ནི། །དེ་ཉིད་དགོངས་པར་མཛད་ན་ནི། །བདག་ནི་ཆུང་མར་བཅས་པ་འདི། །ཡུན་རིང་སྡུག་བསྔལ་འདམ་རྫབ་ནུབ། །ཐུགས་རྗེ་ཆེན་པོ་སྲས་ཀྱི་མཆོག །ཁྱོད་ནི་དེ་རིང་ཕྱིན་ནས་སུ། །
[200a.7]བདག་སུའི་སྡུག་བསྔལ་རྒྱ་མཚོ་བསྒྲལ། །མྱ་ངན་འབྲོག་ལས་རྣམ་པར་བཏོན། །མྱ་ངན་རང་བཞིན་རྙི་ལས་ཐར། །མྱ་ངན་བཅོམ་པ་ལས་བྱུང་ཞིང་། །མྱ་ངན་ཉོན་མོངས་འཇིགས་ལས་གྲོལ། །སྡུག་བསྔལ་གཟེབ་ལས་ཐར་བར་གྱུར། །མྱ་ངན་འདམ་ལས་དེང་མ་
[200b]
[200b.1]གོས། །མྱ་ངན་ཚེར་མས་མ་ཟུག་ཅིང་། །མྱ་ངན་སྦྲུལ་གྱིས་མ་ཟིན་ལ། །མྱ་ངན་མདའ་ཡིས་མ་ཕོག་གོ། །མྱ་ངན་རལ་གྲིས་མ་བཅད་ཅིང་། །མྱ་ངན་དགྲ་ཡིས་མ་རྙེད་ལ། །མྱ་ངན་ཆུ་སྲིན་གྱིས་མ་ཟིན། །མྱ་ངན་མེ་ཡིས་མ་བསྲེགས་སོ། །ཁྱོད་ཉིད་ཀྱིས་ནི་སེམས་ཅན་
[200b.2]ཚེ། །དེ་རིང་དབུགས་ནི་འབྱིན་མཛད་ཅིང་། །མིག་ནི་ཕྱེ་བར་མཛད་པ་དང་། །ཡིད་ཀྱང་ཚིམ་པར་མཛད་པར་གྱུར། །གང་གིས་འདི་ལྟར་མཛད་གྱུར་པས། །བདག་ཅག་མཆོག་ཏུ་དགའ་འགྱུར་ཏེ། །ཀུན་དགའ་ཞེས་བྱའི་མཚན་བཏགས་འདི། །ཨེ་མའོ་དོན་དང་བཅས་
[200b.3]པར་འགྱུར། །དེ་ནས་དེད་དཔོན་ཉི་མས་གནས་བརྟན་ཀུན་དགའ་བོ་ལ་བསྟོད་ནས་ལངས་ཏེ་གཞོན་ནུ་གསེར་མདོག་གི་གན་དུ་སོང་ནས་ཆུང་མ་དང་བཅས་པས་མགུལ་ནས་དམ་དུ་འཁྱུད་དེ་ཡང་དང་ཡང་དུའོ་བྱས་ལ། རབ་ཏུ་དགའ་བ་ལས་བྱུང་བའི་མཆི་མས་ཀུན་དུ་ཁེབས་པའི་
[200b.4]མིག་གིས་གཞོན་ནུ་གསེར་མདོག་ལ་མིག་མི་འཛུམས་པར་ལྟ་ཞིང་སྨྲས་པ། སྟོན་ཀའི་ཟླ་རྒྱས་གཟུགས་ཀྱི་དཔལ། །མདངས་དང་གཟི་ནི་འཕྲོག་པའི་ལུས། །ཡིད་ལ་རེ་བ་རྒྱས་ཐོབ་པ། །མཐོང་གིས་ཁྱེད་ལ་སླར་ཡང་ལྟ། །སྣུམ་ཞིང་སྔོ་ལ་ཡངས་པ་དང་། །ཐ་མར་
[200b.5]མིག་ནི་བསྔགས་འོས་པ། །ཁྱེད་གདོད་གནས་བརྟན་ཀུན་དགའ་བོ། །བྱོན་ནས་སླར་ཡང་བལྟ་བ་ཡིན། །དེ་ནས་གཞོན་ནུ་གསེར་མདོག་འཁོར་བའི་ཉེས་པས་ཀུན་དུ་སྐྱོ་བའི་སེམས་ཀྱིས་ཕ་དང་མ་ལ་གནང་བ་གསོལ་ཏོ། །གནས་བརྟན་ཀུན་དགའ་བོའི་རྐང་པ་གཉིས་ལ་བཏུད་
[200b.6]ནས་གནས་བརྟན་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ནས་དགེ་སློང་གི་དངོས་པོ་ཐོབ་པར་གྱུར་ནས། ལེགས་པར་གསུངས་པའི་ཆོས་འདུལ་བ་ལ་ཚངས་པར་སྤྱད་པར་འཚལ་ལོ། །དེ་ཡང་གནས་བརྟན་ཀུན་དགའ་བོས་
[200b.7]རབ་ཏུ་བྱུང་ནས་ཇི་ལྟར་འདི་སྐད་ཅིག་མ་དེ་ཉིད་ལ་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་ཐོབ་པ་དེ་ལྟར་ཡང་དག་པར་རྗེས་སུ་བསྟན་པ་དང་། དེས་ཀྱང་དགྲ་བཅོམ་པ་ཉིད་ཐོབ་སྟེ། སྔོན་གྱི་སྐྱེ་བ་གཅིག་ནས་གཅིག་ཏུ་བརྒྱུད་པར་བལྟས་པར་བརྩམས་པ་
[201a]
[201a.1]དང་། ཇི་ཙམ་དུ་བདག་ཉིད་བསོད་ནམས་ཀྱི་མཐུ་ཆེན་པོ་དང་ལྡན་པར་མཐོང་ནས་དེས་འདི་སྙམ་དུ་སེམས་ཏེ། བདག་ཉིད་ཀྱིས་འདི་ལྟར་ཤེས་ཀྱི་ང་ནི་བསོད་ནམས་ཀྱི་མཐུ་ཆེན་པོ་དང་ལྡན་པ་ཡིན་པར་ཤེས་ལ། ངས་ཇི་ཙམ་ཞིག་སྦྱིན་པ་བྱིན་པ་དང་། བསོད་ནམས་བྱས་པ་
[201a.2]མཐར་ཕྱིན་པར་འགྱུར་བ་ཡིན་ལ། དེ་ནི་དེ་ལྟར་ཡང་སེམས་ཅན་རྣམས་བསོད་ནམས་ལ་གུས་པ་བསྐྱེད་པར་བྱ་བའི་ཕྱིར་བསོད་ནམས་ཀྱི་བདག་ཉིད་ཆེ་བ་བསྟན་པར་བྱའོ་སྙམ་མོ། །དེ་ནས་གོས་དེ་རང་གི་ལུས་ལས་ཕུད་པ་དང་། ཡང་དེ་ལྟ་བུའི་གཉིས་པ་བྱུང་བར་གྱུར་ཏོ། །དེ་ནས་
[201a.3]ཡང་ནས་ཡང་དུ་དབུད་པར་བརྩམས་པ་དང་། དེ་བཞིན་དུ་ཡང་དང་ཡང་དུ་བྱུང་བར་གྱུར་ཏེ། དེས་ཕུད་ཅིང་ཕུད་ཅིང་གནས་བརྟན་ཀུན་དགའ་བོའི་མདུན་དུ་གོས་ཀྱི་ཕུང་པོ་ཞིག་བྱས་ལ། གོས་ཀྱི་ཕུང་པོ་དེ་དག་ཀྱང་ཤིན་ཏུ་རིན་ཆེ་བ་འཛམ་བུ་ཆུ་བོའི་གསེར་གྱི་ཕུང་པོ་ལ་ཉི་མ་འཆར་
[201a.4]ཀའི་གཟེར་གྱིས་ཕོག་པ་ལྟར་འོད་འབར་བར་འདུག་པ་ལ་སྐྱེ་བོའི་ཚོགས་མང་པོས་བལྟས་ནས། མཆོག་ཏུ་ངོ་མཚར་གྱི་དགའ་བའི་ཡིད་ཀྱིས་སྨྲས་པ། ཨེ་མའོ་ངོ་མཚར་ཆེ་བ། ཨེ་མའོ་རྨད་དུ་བྱུང་བ། ཨེ་མའོ་བསོད་ནམས་ཀྱི་བདག་ཉིད་ཆེན་པོ། །ཨེ་མའོ་ལེགས་པར་བྱས་པའི་
[201a.5]བསོད་ནམས་ཀྱི་བདག་ཉིད་ཆེན་པོ་འདིས་རྟག་ཏུ་རྒྱུན་མི་འཆད་པར་རིན་པོ་ཆེའི་གོས་ཕུད་དུ་ཟིན་ཡང་མཐར་ཐུག་པ་ཡང་མི་སྣང་ངོ་། །དེ་ནས་དེས་གོས་དེ་རྣམས་ཀྱང་ཕ་དང་མ་ལ་བྱིན་ལ། དེ་གཉིས་ཀྱིས་ཀྱང་གནས་བརྟན་ཀུན་དགའ་བོ་ལ་སོགས་པ་དགེ་སློང་གི་དགེ་འདུན་ཐོག་མར་
[201a.6]བྱས་པ་ནས། ཇི་སྲིད་དུ་དུར་ཁྲོད་ཆེན་པོར་འདུས་པའི་སྐྱེ་བོའི་ཚོགས་ཆེན་པོ་རྣམས་ལ་བྱིན་ཏེ། དེར་སྲོག་ཆགས་རེ་རེ་ལ་ཡང་གོས་ཟུང་རེ་བསྐོན་ཡང་དགེ་སློང་གསེར་མདོག་གི་བསོད་ནམས་ཀྱི་མཐུས་གོས་དེ་ཡང་ཡོངས་སུ་གཏུགས་པར་མ་གྱུར་ཏོ། །དེ་ནས་དགེ་སློང་གསེར་
[201a.7]མདོག་སྟེང་གི་ནམ་མཁའ་ལ་མངོན་པར་འཕགས་ཏེ་རྫུ་འཕྲུལ་གྱིས་རྒྱལ་པོའི་ཁབ་ཀྱི་གྲོང་ཁྱེར་དུ་སོང་ནས་སུམ་མདོའི་དབུས་སུ་འདུག་སྟེ། མདུན་དུ་གསེར་མདོག་ཅན་གྱིས་གོས་ལུས་ལས་ཕུད་ཅིང་གོས་ཀྱི་ཕུང་པོ་ཆེན་པོ་བྱས་ཏེ། སྒྲས་རྒྱལ་པོའི་ཁབ་ཀྱི་གྲོང་ཁྱེར་འགེངས་
[201b]
[201b.1]ཤིང་། སྨྲས་པ། ཤེས་ལྡན་དག་ངས་གོས་ཀྱི་ཕུང་པོ་འདི་ཡོངས་སུ་གཏང་གིས་ཁྱེད་རྣམས་གང་ལ་ཇི་ཙམ་དགོས་པ་དེ་ཙམ་ལོང་ཤིག་ཅེས་བསྒྲགས་པ་ཐོས་པ་དང་། སྐད་ཅིག་ཙམ་དེ་ཉིད་ལ་སྲོག་ཆགས་བརྒྱ་སྟོང་དཔག་ཏུ་མེད་པ་འདུས་པར་གྱུར་པ་དང་། ཅི་ཙམ་ན་གྲོང་
[201b.2]ཁྱེར་གྱི་དབུས་ཀྱི་སུམ་མདོ་ན་གསེར་གྱི་མདོག་ཅན་གྱི་གོས་སེར་པོའི་ཕུང་པོ་ཤིན་ཏུ་ཆེ་བ། འཛམ་བུ་ཆུ་བོའི་གསེར་གྱི་ཕུང་པོ་ལ་ཉི་མ་འཆར་ཀའི་འོད་ཀྱིས་ཕོག་པ་ལྟར་འབར་བར་གྱུར་པ་དང་། ཚེ་དང་ལྡན་པ་གསེར་གྱི་མདོག་ཅན་གསེར་བཙོ་མའི་རིའི་རྩེ་མོ་ལྟར་དཔལ་གྱིས་
[201b.3]མཆོག་ཏུ་འབར་ཞིང་ནམ་མཁའི་དཀྱིལ་ན་འདུག་པ་མཐོང་བ་དང་། སྐྱེ་བོའི་ཚོགས་མང་པོ་མཆོག་ཏུ་ངོ་མཚར་གྱིས་བསྡུས་པའི་སེམས་ཀྱི་རྒྱུད་དང་མཆོག་ཏུ་དགའ་བའི་རླབས་ཀྱིས་གང་བའི་བཞིན་གྱི་པདྨ་དང་། དེ་ལ་ལྟ་ཞིང་བསམས་པ་དང་། ཨེ་མའོ་ངོ་མཚར་ཆེ་བ།
[201b.4]ཨེ་མའོ་རྨད་དུ་བྱུང་བ། བདག་ཉིད་ཆེན་པོ་འདིས་ལས་གང་ཞིག་བྱས་ན་གང་གིས་འདི་ལྟར་རྫུ་འཕྲུལ་ཆེ་བ། མཐུ་ཆེ་བར་གྱུར་པ། གལ་ཏེ་བདག་ཅག་རྣམས་ཀྱིས་ཤེས་ན་ནི་བདག་ཀྱང་དེ་ལྟར་བྱ་སྟེ། བདག་གིས་བདག་ཅག་རྣམས་ཀྱང་འདི་ལྟར་མཐུ་ཆེ་བར་འགྱུར་བ་དེ་
[201b.5]ལྟར་བྱའོ་ཞེས་མངོན་པར་འདོད་པ་སྐྱེས་ཤིང་སོམ་ཉིའི་དཔྱང་ཐག་ལ་འཇུག་བཞིན་དུ་ཕན་ཚུན་སྨྲ་བར་རྩོམ་པ་ན། དེ་རྣམས་འདི་སྙམ་དུ་སེམས་ཏེ། འདི་ནི་འདི་ལྟར་བདག་ཉིད་ཆེ་བ། རྫུ་འཕྲུལ་ཆེ་བ། མཐུ་ཆེ་བ། བརྟུལ་ཞུགས་གྲུབ་པ། ལྷའི་ཤེས་པ་དང་ལྡན་
[201b.6]པ་ཡིན་པས་འདི་ཉིད་ལ་ཡོངས་སུ་དྲི་བར་བྱའོ་སྙམ་མོ། །དེ་ནས་སྐྱེ་བོའི་ཚོགས་ཆེན་པོ་དེ་ངོ་མཚར་གྱི་མཆོག་ཏུ་མིག་གདངས་པ་དང་ཐལ་མོ་སྦྱར་ཏེ། ནམ་མཁའི་དཀྱིལ་དུ་ཞེན་པར་ལྟ་ཞིང་། ཚེ་དང་ལྡན་པ་གསེར་མདོག་ལ་ཕྱག་བྱས་ཏེ་སྒྲ་གཅིག་ཏུ་སྨྲས་པ། ལྷ་ཡི་ཡེ་ཤེས་སྤྱན་
[201b.7]དང་ནི། །སྐལ་པ་ཆེན་པོ་ཁྱོད་ལྡན་པས། །གང་གིས་ཁྱེད་ནི་མཐུ་ཆེ་བ། །དེ་ནི་ཡང་དག་བཤད་པའི་རིགས། །འཇིག་རྟེན་འདི་དང་ཕ་རོལ་དུ། །ལོངས་སྤྱོད་དང་ནི་ཡོན་ཏན་རྣམས། །ཕུན་ཚོགས་གང་གིས་ཐོབ་པར་གྱུར། །དེ་ནི་བདག་ཅག་ལ་བཤད་རིགས། །དེ་ནས་སེམས་
[202a]
[202a.1]ཅན་ཆེན་པོ་དེ། །སྙིང་རྗེས་དྲངས་པའི་ཡིད་ལྡན་པས། །དེ་དག་ཚིམ་པའི་ཚིག་ཆེན་གྱི། །སྒྲས་ནི་ཕྱོགས་རྣམས་འགེངས་པར་གྱུར། །འདི་ཉིད་དོན་ནི་བཤད་པའི་ཕྱིར། །ཁྱེད་རྣམས་ལ་ནི་ངས་འདི་བསྟན། །གོ་རིམས་བཞིན་དུ་ངས་བཤད་ཀྱི། །ང་ཡི་ཚིག་
[202a.2]འདི་མཉན་པར་གྱིས། །འཇིག་རྟེན་འདི་དང་ཕ་རོལ་དུ། །ལོངས་སྤྱོད་དང་ནི་ཡོན་ཏན་རྣམས། །ཕུན་ཚོགས་བསོད་ནམས་ཀྱིས་ཐོབ་ཅིང་། །བསོད་ནམས་ཀྱིས་བདག་རྫུ་འཕྲུལ་ཆེ། །གལ་ཏེ་སྡུག་བསྔལ་ཁྱེད་མི་འདོད། །བདེ་བ་ཕུན་སུམ་ཚོགས་འདོད་ན། །བསོད་ནམས་
[202a.3]སོགས་པ་བདེ་འགྱུར་བས། །མྱུར་བ་ཉིད་དུ་བསོད་ནམས་ཀྱིས། །འཇིག་རྟེན་འདི་དང་ཕ་རོལ་དུ། །བདེ་བ་གང་ཅིའང་རུང་བ་དང་། །མྱ་ངན་འདས་པ་ཐོབ་པ་ནི། །བསོད་ནམས་ཉིད་ཀྱི་འབྲས་བུ་ཡིན། །ནོར་ཅན་ཆང་དཔོན་བྲམ་ཟེ་དང་། །དེད་དཔོན་ལ་སོགས་གང་དག་ནི། །
[202a.4]ལོངས་སྤྱོད་རྒྱ་ཆེན་སྤྱོད་འགྱུར་བ། །དེ་ནི་བསོད་ནམས་འབྲས་བུ་ཡིན། །མངོན་པར་ཡིད་དགའ་བུ་དང་འཁོར། །མཛའ་བོ་ལ་སོགས་ཕུན་ཚོགས་པ། །གང་ཞིག་མི་ལ་ཡོད་འགྱུར་བ། །དེ་ནི་བསོད་ནམས་འབྲས་བུ་ཡིན། །གཟུགས་དང་མདངས་ནི་ཕུན་སུམ་ཚོགས། །ཡིད་དང་
[202a.5]མིག་ནི་འཕྲོག་བྱེད་པ། །འཐོབ་ཅིང་མི་ཡུལ་རྒྱལ་སྲིད་གང་། །དེ་ནི་བསོད་ནམས་འབྲས་བུ་ཡིན། །མི་ཕྱེད་པ་ཡི་འཁོར་ཉིད་དང་། །མི་ཟད་ནོར་གྱི་ཕུན་སུམ་ཚོགས། །མི་ཡུལ་ན་ནི་ངེས་ཐོབ་གང་། །དེ་ནི་བསོད་ནམས་འབྲས་བུ་ཡིན། །སྐྱེ་བ་དྲན་ཅིང་སྐལ་བཟང་དང་། །
[202a.6]ཐོས་ལྡན་ཚིག་ནི་གཟུང་བར་འོས། །མིས་ནི་གང་ཞིག་ཐོབ་འགྱུར་བ། །དེ་ནི་བསོད་ནམས་འབྲས་བུ་ཡིན། །ལོངས་སྤྱོད་ཕུན་ཚོགས་རྒྱ་ཆེན་དང་། །རྟག་པར་གཉེན་དང་ལྷན་ཅིག་ཏུ། །དགའ་བས་མི་ཡུལ་གང་སྤྱོད་པ། །དེ་ནི་བསོད་ནམས་འབྲས་བུ་ཡིན། །གྲངས་མེད་
[202a.7]ནོར་ནི་ཕུན་ཚོགས་དང་། །འགྲན་ཟླ་མེད་ཅིང་བརྟན་པ་ཉིད། །མི་ལ་གང་ཞིག་ཡོད་གྱུར་པ། །དེ་ནི་བསོད་ནམས་འབྲས་བུ་ཡིན། །གང་ཞིག་སྒྲ་མི་སྙན་གླིང་དུ། །བདག་གི་མེད་ཅིང་ཡོངས་འཛིན་མེད། །མི་ཡི་ཚེ་ནི་ངེས་གྱུར་པ། །དེ་ནི་བསོད་ནམས་འབྲས་བུ་ཡིན། །
[202b]
[202b.1]འབྲས་ཀྱི་སཱ་ལུའི་འབྲས་བུ་ནི། །མ་རྨོས་པ་ནི་རིན་ཆེ་བ། །གང་ཞིག་དེ་ནི་མི་རྣམས་སྤྱོད། །དེ་ནི་བསོད་ནམས་འབྲས་བུ་ཡིན། །དཔག་བསམ་ཤིང་ལས་སྣ་ཚོགས་པའི། །གོས་དང་རྒྱན་རྣམས་བྱུང་བ་ཡིས། །མི་རྣམས་རབ་ཏུ་འགེབས་གྱུར་པ། །དེ་ནི་བསོད་ནམས་འབྲས་བུ་
[202b.2]ཡིན། །གང་ཞིག་སྒྲ་མི་སྙན་གླིང་དུ། །མི་རྣམས་འཕོས་པའི་རྗེས་ཐོགས་ལ། །དེ་ནི་ལྷ་རྣམས་དག་ཏུ་སྐྱེ། །དེ་ནི་བསོད་ནམས་འབྲས་བུ་ཡིན། །བདུད་རྩི་འབྲས་ཆེན་སོགས་ཕུན་ཚོགས། །ས་བླ་ཡི་ནི་ལྷ་བུ་ལྟར། །ལྷ་ཡི་ལོངས་སྤྱོད་ལ་སྤྱོད་པ། །དེ་ནི་བསོད་ནམས་
[202b.3]འབྲས་བུ་ཡིན། །གང་གི་མཐུ་ཡིས་རྒྱལ་པོའི་དཔལ། །ལྷ་འདྲའི་ཕུན་སུམ་ཚོགས་ཐོབ་པའི། །མི་ཡི་དབང་པོ་རྣམ་མཛེས་པ། །དེ་ནི་བསོད་ནམས་འབྲས་བུ་ཡིན། །བྱིས་པས་འཁོར་ལོས་སྒྱུར་བ་ཉིད། །ས་ཆེན་ལ་ནི་ལོངས་སྤྱོད་ཐོབ། །ལྷ་དབང་བཞིན་དུ་རྣམ་མཛེས་གང་། །
[202b.4]དེ་ནི་བསོད་ནམས་འབྲས་བུ་ཡིན། །མ་ལུས་པ་ཡི་མི་རྣམས་དང་། །རིན་ཆེན་བདུན་སོགས་ཕུན་ཚོགས་པའི། །འཁོར་ལོས་སྒྱུར་ལ་སྤྱོད་པ་གང་། །དེ་ནི་བསོད་ནམས་འབྲས་བུ་ཡིན། །ཕུན་ཚོགས་སུམ་ཅུ་རྩ་དབང་འདྲ། །ཐོབ་ནས་གང་ཞིག་སྤྱོད་པ་དང་། །ཐགས་ཟངས་
[202b.5]རིས་སོགས་ལྷ་མིན་རྣམས། །དེ་ནི་བསོད་ནམས་འབྲས་བུ་ཡིན། །འཇིག་རྟེན་སྐྱོང་བ་བཞི་རྣམས་ཀྱིས། །ནོར་གྱིས་གཞི་ཡི་འབྱོར་པ་ལ། །དགའ་བས་སྣ་ཚོགས་ལོངས་སྤྱོད་གང་། །དེ་ནི་བསོད་ནམས་འབྲས་བུ་ཡིན། །དགའ་བའི་ཚལ་ལ་སོགས་པ་ནི། །ལྷ་མོ་རྣམས་དང་ལྡན་
[202b.6]ཅིག་ཏུ། །འབྱོར་ལྡན་ལྷ་རྣམས་སྤྱོད་པ་གང་། །དེ་ནི་བསོད་ནམས་འབྲས་བུ་ཡིན། །སྣ་ཚོགས་ལྷ་ཡི་རྒྱལ་སྲིད་སོགས། །ཕུན་སུམ་ཚོགས་ལ་ལྷ་དབང་ནི། །རྟག་ཏུ་དགའ་བས་སྤྱོད་པ་གང་། །དེ་ནི་བསོད་ནམས་འབྲས་བུ་ཡིན། །གཞལ་ཡས་ཁང་གནས་ལྷ་རྣམས་ནི། །
[202b.7]ཇི་ལྟར་མངོན་འདོད་ལྷ་རྣམས་ཀྱིས། །ལོངས་སྤྱོད་ལ་ནི་ལོངས་སྤྱོད་གང་། །དེ་ནི་བསོད་ནམས་འབྲས་བུ་ཡིན། །གང་སུ་གནས་ནི་བཅུ་པོ་ཡི། །ཚེ་དང་མདོག་ལ་སོགས་པ་ཡིས། །ལྷ་རྣམས་ལས་ཀྱང་ལྷག་པའི་ལྷ། །དེ་ནི་བསོད་ནམས་འབྲས་བུ་ཡིན། །འདོད་ཁམས་མཆོག་
[203a]
[203a.1]གྱུར་སྣ་ཚོགས་པའི། །ལྷ་ཡི་ལོངས་སྤྱོད་ཕུན་སུམ་ཚོགས། །འདོད་ཁམས་དབང་ཕྱུག་ལ་སྤྱོད་གང་། །དེ་ནི་བསོད་ནམས་འབྲས་བུ་ཡིན། །ལྷ་རྣམས་དང་ནི་མི་རྣམས་སུ། །ཇི་ལྟར་དགའ་བའི་འདོད་པ་ནི། །འབད་པ་མེད་པ་ཐོབ་གྱུར་གང་། །དེ་ནི་བསོད་ནམས་འབྲས་
[203a.2]བུ་ཡིན། །གང་ཡང་ཚངས་པ་ལྷ་སོགས་ལྷ། །བསམ་གཏན་ས་པ་བསམ་གཏན་གྱི། །བདེ་བའི་དམ་པ་ཐོབ་གྱུར་པ། །དེ་ནི་བསོད་ནམས་འབྲས་བུ་ཡིན། །བསམ་གཏན་བསམ་གཏན་ལས་བྱུང་དང་། །སྲེད་པ་ཟད་པའི་བདེ་བ་གང་། །ཞི་བའི་བདེ་བ་ཐོབ་གྱུར་པ། །དེ་ནི་བསོད་ནམས་
[203a.3]འབྲས་བུ་ཡིན། །རྫོགས་སངས་རྒྱས་དང་ཉན་ཐོས་གང་། །ཡོན་ཏན་མཆོག་དང་ལྡན་གྱུར་ཅིང་། །རྫུ་འཕྲུལ་ཆེ་ཞིང་བདག་ཉིད་ཆེ། །དེ་ནི་བསོད་ནམས་འབྲས་བུ་ཡིན། །གང་ཡང་བསྐལ་པ་བརྒྱ་འདས་ནས། །རང་སངས་རྒྱས་ཀྱི་བྱང་ཆུབ་ནི། །བདག་ཉིད་ཆེ་བ་ཐོབ་གྱུར་པ། །
[203a.4]དེ་ནི་བསོད་ནམས་འབྲས་བུ་ཡིན། །ཚད་མེད་པ་དང་དཔེ་མེད་པའི། །ཡོན་ཏན་གྱིས་ནི་ལེགས་བརྒྱན་པའི། །རྫོགས་སངས་རྒྱས་སུ་གྱུར་པ་གང་། །དེ་ནི་བསོད་ནམས་འབྲས་བུ་ཡིན། །གཟུགས་དང་ལང་ཚོ་བསྔགས་པར་འོས། །སྐྱེས་བུ་རིགས་ཀྱི་རྒྱུན་གྱུར་དང་། །རང་དང་རྗེས་
[203a.5]མཐུན་ཡིད་འཕྲོག་པའི། །བུད་མེད་བསོད་ནམས་བདག་གིས་འཐོབ། །བསོད་ནམས་ཀྱིས་ནི་མཐོ་རིས་འཐོབ། །ལྷ་ཡི་བུ་མོའང་བསོད་ནམས་ཀྱིས། །འདོད་པ་ཀུན་ཡང་ཡང་དག་འབྱོར། །མངོན་འདོད་བསོད་ནམས་རྣམས་ཀྱང་འཐོབ། །བསོད་ནམས་ཀྱིས་ནི་བློ་རྣོ་དང་། །དེ་
[203a.6]བཞིན་བློ་གྲོས་དྲི་མེད་འཐོབ། །བསོད་ནམས་ཀྱིས་ནི་གནས་ལ་དད། །བསོད་ནམས་ཀྱིས་ནི་དྲང་གསལ་འཐོབ། །སྡུག་པ་ཉིད་དང་སྒྲ་མཁས་དང་། །དབྱངས་སྙན་གྲགས་ལྡན་བསོད་ནམས་ཀྱིས། །དགེ་བའི་བཤེས་གཉེན་འབྱོར་པ་རྣམས། །ཐམས་ཅད་བསོད་ནམས་དག་
[203a.7]གིས་འཐོབ། །བསོད་ནམས་ཀྱིས་ནི་མི་འཐོབ་པའི། །བདེ་བ་འཇིག་རྟེན་དག་ན་མེད། །དེ་བས་བདེ་བ་འདོད་རྣམས་ཀྱིས། །རྟག་ཏུ་བསོད་ནམས་བསགས་པར་བྱ། །དེ་བཞིན་གཤེགས་པ་རྣམ་གཟིགས་ལ། །བསོད་ནམས་ཉུང་ཟད་ངས་བྱས་པས། །འབྲས་བུ་ཤིན་ཏུ་རྒྱ་ཆེ་བ། །
[203b]
[203b.1]ཇི་ལྟར་མངོན་པར་འདོད་པ་འཐོབ། །འདོད་ཁམས་ལྷ་ཚོགས་དྲུག་པོ་རུ། །རྒྱལ་སྲིད་དབང་ཕྱུག་བདག་པོ་ནི། །སྐྱེ་བ་སྟོང་ཕྲག་བྱེ་བ་རུ། །ང་ཡིས་བདེ་ལོ་ཡང་དག་སྤྱད། །དཔག་མེད་འགྲན་ཟླ་མེད་པ་དང་། །དེ་བཞིན་མི་ཡི་དམ་པ་ཡི། །འཁོར་ལོ་བསྒྱུར་ཆོགས་གྱུར་པ་
[203b.2]ཡི། །ང་ཡིས་ལོངས་སྤྱོད་ཕུན་ཚོགས་སྤྱད། །བསོད་ནམས་དེ་ཡི་བདག་ཉིད་ཆེ། །ང་ནི་གང་དང་གར་སྐྱེས་པ། །དེ་དང་དེར་ནི་མཐུ་ཆེ་བའི། །བདེ་དང་བདག་ནི་ལྡན་པར་གྱུར། །གཟུགས་ལྡན་ཐོས་པ་ཕུན་སུམ་ཚོགས། །ཁ་ནས་ཨུ་ཏྤལ་དྲི་བྱུང་ཞིང་། །སྡུག་ཅིང་ཚིག་ནི་གཟུང་
[203b.3]འོས་དང་། །ཤིན་ཏུ་ཡིད་འོང་དབྱངས་སྙན་ལྡན། །ད་ལྟ་འང་བསོད་ནམས་དེ་ཉིད་ཀྱིས། །ང་ཡི་གཟུགས་སོགས་ཡོན་ཏན་ནི། །ཕུན་སུམ་ཚོགས་ཤིང་ཡིད་འོང་བ། །མངོན་པར་འདོད་པ་འདི་ལ་ལྟོས། །ནོར་རྫས་ལོངས་སྤྱོད་ཆེ་བ་ཡི། །རྒྱལ་ཆེན་རིགས་སུ་སྐྱེས་པ་དང་། །འཛམ་
[203b.4]བུའི་ཆུ་བོའི་གསེར་འདྲ་བའི། །གོས་ཀྱིས་ལུས་ལ་བཀབ་བ་ཡིན། །ངའི་ལུས་ཡན་ལག་ཐམས་ཅད་ལས། །ཙན་དན་ལྟ་བུའི་དྲི་བྱུང་ཞིང་། །ཁ་ནས་ཨུཏྤལ་སྔོན་པོ་ཡི། །དྲི་ཉིད་འབྱུང་བར་གྱུར་པ་ཡིན། །གོས་དང་རིན་ཆེན་ལ་སོགས་པའི། །ཕུན་ཚོགས་གང་ཞིག་མངོན་
[203b.5]འདོད་ན། །དེ་ཡང་བསམས་པ་ཙམ་གྱིས་ནི། །ཐམས་ཅད་ང་ནི་འབྱོར་པར་གྱུར། །ཤཱཀྱ་སེང་གེའི་བསྟན་པ་ལས། །རབ་ཏུ་བྱུང་བ་ངས་རྙེད་ནས། །དགྲ་བཅོམ་ཉིད་ནི་ངས་ཐོབ་སྟེ། །ང་ནི་བསིལ་གྱུར་མྱ་ངན་འདས། །འདི་ངའི་སྐྱེ་བ་ཐ་མ་སྟེ། །ཡང་སྲིད་བདག་ལ་ཡོད་མ་
[203b.6]ཡིན། །གནས་མེད་མྱ་ངན་འདས་ནས་ནི། །སླར་ཡང་ང་ནི་འོང་མི་འགྱུར། །རྣམ་སྨིན་འབྲས་བུ་རྒྱ་ཆེ་བའི། །ལས་གང་བསྒྲུབ་པར་གྱུར་པ་ནི། །ད་ལྟར་འདི་ལྟར་ཡོད་ཟིན་ཀྱང་། །དེ་ཡི་མཐར་ཐུག་མ་གཏོགས་སོ། །དེ་ལྟར་དེ་ལས་རྨད་དུ་བྱུང་བ་དང་། དཔག་ཏུ་མེད་པ་
[203b.7]དང་། བསམ་གྱིས་མི་ཁྱབ་པའི་བསོད་ནམས་ཀྱི་ཆེ་བའི་བདག་ཉིད་ཐོབ་པས་སྲོག་ཆགས་བརྒྱ་སྟོང་བྱེ་བ་དཔག་ཏུ་མེད་པ་མཆོག་ཏུ་དད་པས་བརླན་པའི་སེམས་ཀྱི་རྒྱུད་དང་། བཅོམ་ལྡན་འདས་ཀྱི་བསྟན་པ་ལ་བསྙེན་བཀུར་བྱ་བ་ལ་རྒྱབ་ཀྱིས་ཕྱོགས་པ་རྣམས་ཀྱང་སྦྱིན་པ་ནི་
[204a]
[204a.1]གཏོང་བསོད་ནམས་དག་ནི་བྱེད་ཅིང་སྨོན་ལམ་འདེབས་པར་གྱུར་ཏོ། །དེ་ནས་ཚེ་དང་ལྡན་པ་གསེར་མདོག་གིས་སྐྱེ་བོའི་ཚོགས་མང་པོ་དེ་ལྟར་རྣམ་པ་དུ་མར་བསོད་ནམས་ལ་གུས་པ་བསྐྱེད་པར་བྱ་བའི་ཕྱིར་བསོད་ནམས་ཀྱི་བདག་ཉིད་ཆེ་བ་རབ་ཏུ་བཤད་ནས། སྟེང་གི་
[204a.2]ནམ་མཁའ་དེ་ཉིད་ནས་རྫུ་འཕྲུལ་གྱིས་དུར་ཁྲོད་ཆེན་པོར་སོང་སྟེ། གནས་བརྟན་ཀུན་དགའ་བོ་ལ་སོགས་པ་དགེ་སློང་གི་དགེ་འདུན་ལ་རིམ་བཞིན་དུ་ཕྱག་བྱས་ནས་ཕྱོགས་གཅིག་ཏུ་འདུག་གོ། །དེ་ནས་རྒྱལ་པོ་མ་སྐྱེས་དགྲས་བློན་པོ་རབ་གཏུམ་ཕྲག་དོག་གི་རང་བཞིན་ཅན་
[204a.3]གྱིས་བུ་མོ་ཀ་ཤི་མཛེས་དགའ་མོ་སྡུག་བསྔལ་འདི་དང་འདི་བྱས་ལ་གཞོན་ནུ་གསེར་མདོག་ལ་སྐུར་པ་བཏབ་སྟེ། ཉེས་པ་མེད་པ་ཉིད་དུ་གསད་པའི་ཕྱིར་ཡོངས་སུ་སྤངས་སོ་ཞེས་ཇི་ལྟར་གྲགས་པ་ཐོས་སོ། །ཐོས་ནས་ཀྱང་ཤིན་ཏུ་ཁྲོས་པས་འཁྲུགས་པའི་མིག་གིས་ནང་འཁོར་རྣམས་
[204a.4]ལ་སྨྲས་པ། ཤེས་ལྡན་དག་ཅིའི་ཕྱིར་འདི་ལྟ་བུའི་སྐྱེས་བུ་ངན་པ་འདིས་ལས་སུ་བྱ་བའི་ཐ་སྙད་བྱ། བློན་པོ་རབ་གཏུམ་ནི་ངས་རྣམ་པ་ཐམས་ཅད་དུ་སྤངས་སོ། །བློན་པོ་རབ་གཏུམ་ཡང་དེ་ཉིད་དུ་འདུས་པར་གྱུར་ཏོ། །དེ་ནས་བློན་པོ་རབ་གཏུམ་གྱིས་རྒྱལ་པོའི་ཚིག་དེ་ཐོས་པ་དང་། འཆི་
[204a.5]བས་འཇིགས་སྐྲག་ཅིང་ཡི་མུག་ལ་རྨོངས་པའི་མིག་གིས་ཡན་ལག་ཐམས་ཅད་རབ་ཏུ་འདར་བཞིན་དུ་མྱུར་བར་ལངས་ཏེ་རིངས་པར་འབྲོས་པར་བརྩམས་པ་དང་། དེར་སྐྱེ་བོའི་ཚོགས་མང་པོའི་ནང་དུ་ཞུགས་ཏེ་གནས་པས་དེའི་ཕྱི་ནས་སྲོག་ཆགས་བརྒྱ་སྟོང་དུ་མ་ཞིག་གིས་བདས་
[204a.6]ཏེ། སྐྱེ་བོའི་ཚོགས་མང་པོས་ཀུན་ནས་བསྐོར་ནས་གཟུང་ངོ་། །བཟུང་ནས་ཀྱང་ཐལ་ལྕག་དང་རྡོག་པ་ལ་སོགས་པས་བསྣུན་པ་ལ་ཞུགས་ཏེ། དེ་བརྡེགས་བཞིན་དུ་ཤིན་ཏུ་སྡུག་བསྔལ་དྲག་པོའི་ཤུགས་ཀྱིས་ཉམ་ཐག་ཅིང་ཆོ་ངེས་འདེབས་པ་ལ་ཞུགས་ཏེ། འཕགས་
[204a.7]པ་ཀུན་དགའ་བོ་ཡོངས་སུ་སྐྱོབས་ཤིག །བདག་ནི་མགོན་མེད་པ། སྐྱོབ་པ་མེད་པ། སྐྱབས་མེད་པ། སྣང་བ་མེད་པ་ལགས་ཀྱི་སྡུག་པའི་སྲོག་གིས་བསྐྱབ་ཏུ་གསོལ། གནས་བརྟན་ཀུན་དགའ་བོས་ཀྱང་སྐྱེ་བོའི་ཚོགས་མང་པོ་ལ་སྨྲས་པ། ཤེས་ལྡན་དག་ཁྱེད་རྣམས་
[204b]
[204b.1]ཀྱིས་འདི་མ་བསད་ཅིག །ངས་རྒྱལ་པོ་མ་སྐྱེས་དགྲ་ལ་ཤེས་པར་བྱའོ། །དེ་ནས་སྐྱེ་བོ་མང་པོའི་ཚོགས་དེ་རྣམས་ཀྱིས་གནས་བརྟན་ཀུན་དགའ་བོའི་ཚིག་ཐོས་ནས་དེ་བཏང་ངོ་། །གནས་བརྟན་ཀུན་དགའ་བོས་ཀྱང་རྒྱལ་པོ་ལ་གཟིགས་པ་དང་། རྒྱལ་པོས་གསོལ་པ། ཅི་ཞིག་
[204b.2]གསུང་། གནས་བརྟན་ཀུན་དགའ་བོས་སྨྲས་པ། རྒྱལ་པོ་ཆེན་པོ་འདི་ཐོང་ཤིག །རྒྱལ་བོས་གསོལ་པ། དམ་ཞིག་བཅས་ལ་གཏང་བར་བགྱི་སྟེ། གལ་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་ཇི་སྲིད་འཚོའི་བར་དུ་གནས་བརྟན་གྱི་བསྙེན་བཀུར་བགྱིད་ན་
[204b.3]གཏང་བར་བགྱིའོ། །གནས་བརྟན་ཀུན་དགའ་བོས་སྨྲས་པ། དེ་བཞིན་དུ་བྱའོ། །དེ་ཡང་སྐྱེ་བོའི་ཚོགས་དེ་རྣམས་ཀྱིས་བརྩེ་བ་མེད་པར་བརྡེགས་པར་སྡུག་བསྔལ་དྲག་པོའི་ཚོར་བས་བཅོམ་ནས་བརྒྱལ་ཏེ་འདུག་པ་དང་། གནས་བརྟན་ཀུན་དགའ་བོས་ཚེ་དང་ལྡན་པ་གསེར་མདོག་
[204b.4]ལ་གསུངས་པ། བདེན་པའི་བྱིན་གྱི་རླབས་ཀྱིས་བློན་པོ་རབ་གཏུམ་གྱི་ལུས་ལ་སྡུག་བསྔལ་གྱི་ཚོར་བ་རབ་ཏུ་སོལ་ཅིག །དེ་ནས་ཚེ་དང་ལྡན་པ་གསེར་མདོག་སེམས་ཅན་ཐམས་ཅད་ལ་ཕན་པའི་ལྷག་པའི་བསམ་པས་རབ་ཏུ་ཞུགས་པའི་སེམས་དང་། བདེན་པའི་བྱིན་གྱི་རླབས་
[204b.5]བྱེད་པ་ལ་ཞུགས་ཏེ། བདེན་པ་དང་བདེན་པའི་ཚིག་གང་གིས་བློན་པོ་རབ་གཏུམ་འདི་ལྟར་ཤིན་ཏུ་གནོད་པ་བྱེད་པ་ཡིན་ཡང་བདག་གིས་ཐ་ན་ཁོང་ཁྲོ་བ་ཕྲན་ཚེགས་ཀྱང་མ་བསྐྱེད་པའི་བདེན་པ་དང་བདེན་པའི་ཚིག་དེས་འདིའི་ལུས་ལ་སྡུག་བསྔལ་གྱི་ཚོར་བ་མེད་དེ་སླར་སོས་པར་
[204b.6]གྱུར་ཅིག །བདེན་པའི་བྱིན་གྱི་བརླབས་བྱས་པའི་མོད་ཁོན་ལ་བློན་པོ་རབ་གཏུམ་གྱི་ལུས་སྡུག་བསྔལ་གྱི་ཚོར་བ་དང་བྲལ་ཏེ། ལུས་བདེ་བར་གྱུར་ནས་ལངས་ཏེ། བཅོམ་ལྡན་འདས་ཀྱི་བསྟན་པ་ལ་ཤིན་ཏུ་དད་པར་གྱུར་ནས་གནས་བརྟན་ཀུན་དགའ་བོའི་གན་དུ་སོང་སྟེ། ཞབས་
[204b.7]གཉིས་ལ་ཕྱག་བྱས་ནས་སྨྲས་པ། གནས་བརྟན་ཀུན་དགའ་བོ་བདག་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་སྟེ་བསྙེན་པར་རྫོགས་ཤིང་དགེ་སློང་གི་དངོས་པོ་ཐོབ་པར་བགྱིས་ལ། བདག་གནས་བརྟན་ཀུན་དགའ་བོའི་ཐད་དུ་ཚངས་པར་སྤྱོད་པ་སྤྱད་པར་བགྱི་
[205a]
[205a.1]བར་འཚལ་ལོ། །དེ་ནས་གནས་བརྟན་ཀུན་དགའ་བོས་ཀྱང་རབ་ཏུ་ཕྱུང་སྟེ། ཇི་ལྟར་དེས་སྐད་ཅིག་མ་དེ་ཉིད་ལ་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་ཐོབ་པ་དེ་ལྟར་རྗེས་སུ་བསྟན་པ་མཛད་པ་དང་། དེས་ཀྱང་དགྲ་བཅོམ་པ་ཉིད་ཐོབ་པ་དང་། དེ་ནམ་
[205a.2]མཁའི་དཀྱིལ་དུ་འཕགས་ཏེ། ཆོ་འཕྲུལ་རྣམ་པ་སྣ་ཚོགས་པས་སྐྱེ་བོའི་ཚོགས་མང་པོ་ཡིད་ཚིམ་བར་བྱས་ནས་ནམ་མཁའི་དཀྱིལ་ནས་བབས་ཏེ། གནས་བརྟན་ཀུན་དགའ་བོ་ལ་སོགས་པ་དགེ་སློང་གི་དགེ་འདུན་རྣམས་ལ་རིམ་བཞིན་དུ་ཕྱག་བྱས་ནས་ཕྱོགས་གཅིག་ཏུ་འདུག་
[205a.3]གོ། །དེ་ནས་རྨད་དུ་བྱུང་བ་དེ་དང་། གནས་བརྟན་ཀུན་དགའ་བོའི་བདག་ཉིད་ཆེ་བ་མཐོང་ནས་འཁོར་དེ་རྣམས་གནས་བརྟན་ཀུན་དགའ་བོ་ལ་རབ་ཏུ་དད་པར་གྱུར་ཏོ། །དེ་ནས་འཁོར་དེ་རྣམས་དེ་ལྟར་མངོན་པར་དད་པ་ལ་གཟིགས་ནས་གནས་བརྟན་ཀུན་དགའ་བོས་གང་ཞིག་ཐོས་པས་
[205a.4]སྲོག་ཆགས་བརྒྱ་སྟོང་དཔག་ཏུ་མེད་པ་རྣམས་ཀྱིས་ཁྱད་བར་ཆེན་པོ་ཐོབ་པར་གྱུར་པ་དེ་ལྟར་ཆོས་བསྟན་པར་མཛད་དེ། ལ་ལ་ནི་རྒྱུན་དུ་ཞུགས་པའི་འབྲས་བུ་ཐོབ་པ་ནས། དགྲ་བཅོམ་པ་ཉིད་མངོན་དུ་བྱས་པའི་བར་དང་། ལ་ལ་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་པ་ནས་ལ་
[205a.5]ལ་ནི་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པའི་བར་ལ་རྣམ་པར་བཀོད་དོ། །དེད་དཔོན་ཉི་མ་ཆུང་མ་དང་བཅས་པས་ཀྱང་བདེན་པ་མཐོང་བར་གྱུར་ཏོ། །དེ་ནས་ལྷ་བརྒྱ་སྟོང་དཔག་ཏུ་མེད་པ་རབ་ཏུ་དང་བའི་ཡིད་དང་ལྡན་པ་རྣམས་ཀྱིས་ལྷའི་གོས་
[205a.6]ཀྱི་ཆར་ཕབ་ཅིང་ལྷའི་རོལ་མོ་རྣམས་ཀྱང་བརྡུངས་པར་གྱུར་པ་དང་། ལྷའི་མེ་ཏོག་ཨུཏྤལ་དང་། པདྨ་དང་། ཀུ་མུ་ཏ་དང་། པུཎྜ་རཱི་ཀ་དང་། མན་དཱ་རབ་ལ་སོགས་པ་མེ་ཏོག་པུས་མོ་ནུབ་པ་ཙམ་རྣམ་པ་སྣ་ཚོགས་པས་དུར་ཁྲོད་ཆེན་པོ་དེར་ཆལ་བར་བཀྲམ་མོ། །དེ་ནས་རྒྱལ་
[205a.7]པོ་མ་སྐྱེས་དགྲས་ལྷ་དང་མི་རྣམས་ཤིན་ཏུ་འདུན་པར་བྱེད་པའི་ཆོ་འཕྲུལ་རྨད་དུ་བྱུང་བ་དེ་མཐོང་བ་དང་། མཆོག་ཏུ་དད་པས་སེམས་ཀྱི་རྒྱུད་དགའ་བར་གྱུར་ནས་ཆེད་དུ་བརྗོད་པ་ཆེད་དུ་བརྗོད་དེ། ཨེ་མའོ་ངོ་མཚར་ཆེ་བ། ཨེ་མའོ་རྨད་དུ་བྱུང་བ། ཨེ་མའོ་འཕགས་པ་ཀུན་དགའ་
[205b]
[205b.1]བོ་རང་གི་ཡོན་ཏན་གྱི་བདག་ཉིད་ཆེན་པོ་རབ་ཏུ་བསྟན་ཏེ། ཨེ་མའོ་དེ་བཞིན་གཤེགས་པའི་བསྟན་པའི་བདག་ཉིད་ཆེ་བ་གསལ་བར་མཛད་པ། ཨེ་མའོ་གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཞིང་གཟིགས་
[205b.2]པ་དེ་དང་། གནས་བརྟན་འོད་སྲུངས་ཆེན་པོས་འདི་ལ་བསྟན་པ་རྣམ་པར་གཏད་པ་དེ་ནི་འབྲས་བུ་ཡོད་པར་མཛད་དོ། །ཨེ་མའོ་དེ་བཞིན་གཤེགས་པའི་ཉི་མ་ནུབ་པར་གྱུར་ནས་འཕགས་པ་ཀུན་དགའ་བོའི་ཉི་མ་རང་གི་ཡོན་ཏན་གྱི་འོད་ཟེར་གྱི་དྲ་བས་ཕྱོགས་ཐམས་ཅད་དུ་
[205b.3]ཁྱབ་པར་མཛད་དོ། །ཨེ་མའོ་དེ་བཞིན་གཤེགས་པའི་ཟླ་བ་མི་རྟོག་པའི་ལྷ་མ་ཡིན་གྱི་དབང་པོ་སྒྲ་གཅན་གྱིས་ཟིན་ནས། འཕགས་པ་ཀུན་དགའ་བོའི་ཟླ་བས་རང་གི་བླ་གོས་ཀྱི་འོད་ཟེར་རྣམ་པར་བཀྱེ་བས་གདུལ་བྱའི་ཀུ་མུ་ཏའི་ནགས་རབ་ཏུ་རྒྱས་པར་མཛད་དོ། །
[205b.4]ཨེ་མའོ་དེ་བཞིན་གཤེགས་པ་དང་བྲལ་བའི་སྡུག་བསྔལ་ཚ་བ་རྩུབ་པའི་ཉི་མའི་འོད་ཟེར་གྱིས་ཀུན་དུ་གདུངས་པ་གནས་བརྟན་ཀུན་དགའ་བོའི་སྤྲིན་ཆེན་པོས་རང་གི་བདུད་རྩིའི་ཆར་གྱིས་འཇིག་རྟེན་རྣམས་ཚིམ་པར་མཛད་དོ། །ཨེ་མའོ་དེ་བཞིན་གཤེགས་པའི་ཐུགས་ལ་དགོངས་
[205b.5]པ་ཡང་དག་པར་རྫོགས་པར་མཛད་དོ། །ཨེ་མའོ་དེ་བཞིན་གཤེགས་པའི་བསྟན་པའི་གྲུབ་པ་ཉིད་བསྟན་པ་མཛད་དོ། །ཨེ་མའོ་དེ་བཞིན་གཤེགས་པའི་བསྟན་པ་གཅེས་པར་འཛིན་པ་ཉིད་གསལ་བར་མཛད་དོ། །ཨེ་མའོ་ཉན་ཐོས་ཀྱི་མཆོག་ཉིད་འབྲས་བུ་ཡོད་པར་མཛད་
[205b.6]དོ། །ཤིན་ཏུ་རྨད་དུ་བྱུང་བ་འདི་དང་རང་གི་ཡོན་ཏན་གྱི་ཆེ་བའི་སྟོབས་དང་། མཐའ་ཡས་པའི་སེམས་ཅན་རྣམས་རྫོགས་པར་མཛད་པས་ཐམས་ཅད་མཁྱེན་པའི་ཡོན་ཏན་གྱི་བདག་ཉིད་ཆེ་བ་རབ་ཏུ་མཛད་དོ། །ཨེ་མའོ་བདག་ཉིད་ཆེན་པོ་འདིས་བཅོམ་ལྡན་འདས་ཐུགས་
[205b.7]རྗེ་ཆེན་པོ་དང་ལྡན་པ་དེའི་བཀའ་དྲིན་ལ་ལན་གླན་པའི་བློ་གྲོས་སྟོན་པར་མཛད་པ་ཡིན་ནོ། །དེ་ནས་རྒྱལ་པོ་དེ་གནས་བརྟན་ཀུན་དགའ་བོ་ལ་རབ་ཏུ་དད་པའི་ཤུགས་ཀྱི་བསྔས་པའི་སེམས་ཀྱི་རྒྱུད་ཀྱི། གནས་བརྟན་ཀུན་དགའ་བོའི་གན་དུ་སོང་སྟེ། ལུས་ཐམས་ཅད་ཀྱིས་གཞེས་
[206a]
[206a.1]བརྟན་ཀུན་དགའ་བོའི་ཞབས་གཉིས་ལ་ཕྱག་བྱས་ཏེ། ལངས་ནས་པུས་མོ་གཉིས་ས་ལ་བཙུགས་ཏེ། རབ་ཏུ་དད་པས་བ་སྤུ་ལངས་པར་རྩུབ་པར་བྱས་པའི་ལུས་དང་ལག་པ་ཐལ་མོ་སྦྱར་ཏེ་གནས་བརྟན་ཀུན་དགའ་བོ་ལ་མངོན་པར་བསྟོད་པར་རྩོམ་པ།
[206a.2]སྐྱེས་བུའི་མཆོག་ལ་ཕྱག་འཚལ་ལོ། །ཐོས་པའི་རྒྱ་མཚོ་ཕྱག་འཚལ་ལོ། །རྒྱལ་བའི་བསྟན་པ་གཅེ་ས་འཛིན་པ། །རྨད་བྱུང་བསམ་ཡས་ཕྱག་འཚལ་ལོ། །ཨེ་མའོ་སངས་རྒྱས་བསྟན་པ་ཡི། །བདག་ཉིད་ཆེ་བ་ཡང་དག་བསྟན། །རྨད་བྱུང་བསམ་གྱིས་མི་ཁྱབ་པའི། །འགྲོ་ལ་
[206a.3]ཕན་དེ་ཁྱོད་ཀྱིས་མཛད། །གང་དེ་བཅོམ་ལྡན་འདས་དང་ནི། །འཕགས་པ་འོད་སྲུངས་བློ་ལྡན་པས། །ཁྱོད་ལ་བསྟན་པ་རྣམས་གཏད་པ། །དེང་དེ་འབྲས་བུ་བཅས་པར་མཛད། །རྨད་བྱུང་བསམ་གྱིས་མི་ཁྱབ་པའི། །འགྲོ་བའི་དོན་ཆེན་མཛད་པ་འདི། །ཀུན་མཁྱེན་ཡོན་ཏན་བདག་
[206a.4]ཉིད་ཆེ། །དེ་རིང་ཁྱེད་ལ་གཟུགས་བརྙན་གྱུར། །གལ་ཏེ་རྫོགས་པའི་སངས་རྒྱས་ནི། །དེ་ལྟར་འགྲོ་དོན་མཛད་གྱུར་ཀྱང་། །འདི་ནི་ཀུན་མཁྱེན་ཐམས་ཅད་གཟིགས། །ཐུགས་རྗེ་ལྡན་པས་མཚར་མི་ཆེ། །ཁྱེད་ནི་ཉན་ཐོས་ཉིད་འགྱུར་ཞིང་། །ཐུགས་རྗེ་ཆེ་ལྡན་དེ་བཞིན་དུ། །སེམས་
[206a.5]ཅན་དོན་ཆེན་གང་མཛད་པ། །འདི་ནི་ཤིན་ཏུ་ངོ་མཚར་ཆེ། །ཨེ་མའོ་འདི་ལྟར་བག་མེད་པ། །མ་ག་དྷཱ་ཡི་སྐྱེ་བོ་འདིས། །ཁྱེད་འདྲ་ཕན་ལ་བརྩོན་མཛད་པ། །རྙེད་པ་ལེགས་པར་རྙེད་པ་ཡིན། །དེ་བཞིན་གཤེགས་པའི་གནས་འདི་ནི། །བསྟན་པ་ཁྱེད་ལ་གཏད་གྱུར་པ། །གང་གིས་
[206a.6]དེར་ནི་བདེ་གཤེགས་བཞིན། །རྨད་བྱུང་ཤིན་ཏུ་ཆེན་པོ་མཛད། །དེ་ནས་གནས་བརྟན་ཀུན་དགའ་བོའི་ཡོན་ཏན་གྱི་བདག་ཉིད་ཆེན་པོའི་ངོ་མཚར་གྱིས་ཡང་དག་པར་རྫོགས་པའི་སངས་རྒྱས་རྗེས་སུ་དྲན་ནས་རྟག་ཏུ་ཕྱག་འཚལ་བ། རྫོགས་པའི་སངས་རྒྱས་རྐང་གཉིས་
[206a.7]མཆོག །གང་ཁྱེད་ཉན་ཐོས་འདི་ལྟ་བུར། །རྟག་ཏུ་འགྲོ་ལ་ཕན་བརྩོན་པ། །དཔའ་བོ་ཆེན་པོ་ཕྱག་འཚལ་བསྟོད། །དེ་བཞིན་གཤེགས་པའི་བདག་ཉིད་ཆེ། །མཐོང་བ་ཉིད་དུ་ཡང་དག་བསྟན། །ཇི་ལྟར་འགྲོ་ཚོགས་འདི་ཁྱེད་ཀྱིས། །སྟོང་པ་མིན་པ་སྙམ་དུ་སེམས། །དེ་
[206b]
[206b.1]ནས་རྒྱལ་པོས་གནས་བརྟན་ཀུན་དགའ་བོ་ལ་ཞུས་པ། གནས་བརྟན་དེད་དཔོན་ཉི་མ་ཆུང་མ་དང་བཅས་པས་སུག་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་བ་དང་། ནོར་ཆེ་བ་དང་། ལོངས་སྤྱོད་ཆེ་བར་གྱུར་པ་དང་། བཅོམ་ལྡན་འདས་ཀྱི་བསྟན་པ་ལ་བདེན་པ་
[206b.2]མཐོང་བར་གྱུར། དགེ་སློང་ཀ་ཤི་མཛེས་དགའ་བོ་དང་། དགེ་སློང་རབ་གཏུམ་གྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ཕྱུག་པ་དང་། ནོར་ཆེ་བ་དང་། ལོངས་སྤྱོད་ཆེ་བར་སྐྱེས་ཤིང་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་
[206b.3]ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བགྱིས། དགེ་སློང་གསེར་མདོག་གིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་ཅིང་ནོར་ཆེ་བ་དང་ལོངས་སྤྱོད་ཆེ་བའི་རིགས་སུ་སྐྱེས་ཤིང་འདི་ལྟར་གཟུགས་བཟང་བ་དང་། བལྟ་ན་སྡུག་པ་དང་། མཛེས་པ་དང་། ཡན་
[206b.4]ལག་དང་། ཉིང་ལག་ཐམས་ཅད་དང་ལྡན་པ་དང་། གསེར་བཙོ་མའི་མདོག་གི་ཁ་དོག་ཤིན་ཏུ་རྒྱས་པ་དང་། ལྡན་པ་དང་། འགྲོ་བ་ཐམས་ཅད་ཀྱི་ཡིད་དང་མིག་འཕྲོག་པ་དང་། གསེར་གྱི་མདོག་ཅན་གྱི་གོས་ཀྱིས་ལུས་དཀྲིས་པ་དང་། འདིའི་ཡན་ལག་ཐམས་ཅད་
[206b.5]ནས་ཙན་དན་གྱི་དྲི་འབྱུང་བ་དང་འདིའི་ཁ་ནས་ཨུཏྤ་ལའི་དྲི་འབྱུང་བ་དང་། དེ་སྐྱེས་པ་ཙམ་གྱིས་ཁྱིམ་དེར་གོས་ཀྱི་ཆར་དང་། མེ་ཏོག་ཀར་ནི་ཀ་རའི་ཆར་འབབ་པར་གྱུར་ཅིང་གོས་དེ་དག་ཀྱང་གསེར་གྱི་མདོག་ཅན་ཉིད་དུ་གྱུར་བ་དང་། འདི་ལྟར་ཤིན་ཏུ་རྫུ་འཕྲུལ་ཆེ་ཞིང་མཐུ་
[206b.6]ཆེ་བ་དང་། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བགྱིས་ལགས། གནས་བརྟན་ཀུན་དགའ་བོས་གསུངས་པ། རྒྱལ་པོ་ཆེན་པོ་འདི་རྣམས་ཉིད་ཀྱིས་སྔོན་གྱི་སྐྱེ་བ་གཞན་དུ་ལས་གང་ཞིག་
[206b.7]བྱས་ཤིང་བསགས་པས། འདི་རྣམས་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། རྒྱལ་པོ་ཆེན་པོ་ལས་བྱས་ཤིང་བསགས་པ་དག་ནི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་
[207a]
[207a.1]ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་རྣམས་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་
[207a.2]ཟ་ཞིང་ཚོགས་དང་དུས། །རྙེད་ནས་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །རྒྱལ་པོ་ཆེན་པོ་སྔོན་བྱུང་བ་འདས་པའི་དུས་བསྐལ་པ་དགུ་བཅུ་རྩ་གཅིག་ན། བཅོམ་ལྡན་འདས་རྣམ་པར་གཟིགས་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་
[207a.3]རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་མཉན་ལྡན་ཞེས་བྱ་བའི་རྒྱལ་པོའི་ཕོ་
[207a.4]བྲང་ནས་བྱུང་སྟེ། མཉན་ལྡན་གྱི་ཚལ་ཞེས་བྱ་བ་ན་བཞུགས་སོ། །ཡང་དེའི་ཚེ་དེའི་དུས་ན་རྒྱལ་པོའི་ཕོ་བྲང་མཉེན་ལྡན་ན་རྣ་ཅན་ཞེས་བྱ་བའི་དེད་དཔོན་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ།
[207a.5]རྣམ་ཐོས་ཀྱི་བུ་ལ་ནོར་གྱིས་འགྲན་པ་རྒྱལ་པོའི་ཕོ་བྲང་མཉེན་ལྡན་ན་སྐྱེས་བུའི་མཆོག་ཏུ་གྱུར་པ་ཞིག་གནས་པ་དང་། དེར་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེ་ལྟར་རྩེ་ཞིང་དག་ལ་དགའ་མགུར་
[207a.6]སྤྱོད་པས་ཆུང་མ་སེམས་ཅན་དང་ལྡན་པར་གྱུར་པ་ནས། ཇི་སྲིད་དེད་དཔོན་རྣ་ཅན་ཚོང་བ་ལྔ་བརྒྱས་བསྐོར་ཏེ། རྒྱ་མཚོ་ཆེན་པོར་ཞུགས་ཀྱི་བར་དུ་སྦྱར་རོ། །དེ་ཡང་མངལ་དུ་ཇི་ལྟར་སྐྱེ་བར་གྱུར་པ་དེ་ལྟར་དེད་དཔོན་རྣ་ཅན་གྱི་ཚོང་སར་གཏོགས་པ་དང་། ཞིང་དུ་གཏོགས་པ་དང་།
[207a.7]ཡུལ་གཞན་དུ་གཏོགས་པའི་ནོར་གྱི་རིགས་ལས་དེར་ལ་ལ་ནི་མེས་ཚིག །ལ་ལ་ནི་རྐུན་མས་ཁྱེར། ལ་ལ་ནི་མི་རྣམས་ཀྱིས་ཁྱེར་ཏེ་བྲོས་པར་གྱུར་ཏོ། །ཇི་ཙམ་ན་དེད་དཔོན་རྣ་ཅན་གྱི་ཆུང་མ་ཟླ་བ་ཚང་པ་དང་བུ་སྐྱེས་པར་གྱུར་ཏེ། པགས་པ་ནག་པོ། ཤིན་ཏུ་གཟུགས་
[207b]
[207b.1]མི་སྡུག་པ། མི་སྡུག་པའི་མཚན་མ་བཅོ་བརྒྱད་གྱིས་ལུས་སྨད་པར་བྱས་པ། དེའི་ཁ་དང་དེའི་ལུས་ལས་གང་ཞིག་བསྣམས་ན་ཁྱིམ་ན་གནས་པའི་འཁོར་ཤིན་ཏུ་ཡང་གདོང་རྒྱབ་ཀྱིས་ཕྱོགས་པར་གྱུར་པ་དེ་ལྟ་བུའི་ཤིན་ཏུ་དྲི་མི་ཞིམ་པར་གྱུར་ཏོ། །ཁྱེའུ་དེ་སྐྱེས་པ་ཙམ་གྱིས་
[207b.2]གང་གི་ཁྱིམ་དེར་རྫས་མ་ལུས་པར་ཚིག་པར་གྱུར་པ་དེ་ལྟ་བུའི་མེ་བྱུང་བ་དང་། དེད་དཔོན་གྱི་ཆུང་མ་ཉམ་ཐག་པས་ཁྱེའུ་དེ་ཐོགས་ཏེ་ཁྱིམ་དེ་ལས་བྱུང་ངོ་། །གང་གི་ཚེ་ཡང་མེ་དེས་ཁྱིམ་དེ་དང་རྫས་མ་ལུས་པར་བསྲེགས་ནས་རང་ཉིད་ཞི་བར་གྱུར་པ་དེའི་ཚེ་དེད་དཔོན་གྱི་ཆུང་མ་
[207b.3]གནས་ངན་པ་ཕྱེད་ཚིག་པའི་ཞིག་རལ་ཅན་ཞིག་ཏུ་ཞུགས་ནས་གོས་ཕྱེད་ས་ལ་བཏིང་སྟེ་བྱིས་པ་བསྙལ་ནས་ཚ་བའི་དབུགས་རིང་པོ་ཕྱུང་སྟེ། དེད་དཔོན་རྗེས་སུ་དྲན་ཞིང་དུ་བ་ལ་ཞུགས་སོ། །ཀྱི་ཧུད་འདི་ལྟ་བུའི་ཕྱིན་ཅི་ལོག་ཀུན་དུ་གནས་པ་ནི་སྡུག་བསྔལ་ལོ། །དེད་དཔོན་རྣ་ཅན་
[207b.4]གྱི་བྲན་ཕོ་དང་། བྲན་མོ་དང་། ལས་བྱེད་པའི་སྐྱེས་བུ་རྣམས་ཀྱིས་རྒུད་པ་གང་ཡིན་པ་དེ་མཐོང་བ་དང་། ཡུ་བུ་ཅག་ཀུན་ཀྱང་བརླག་པར་འགྱུར་གྱི། འདེང་ཞེས་སྨྲས་ཏེ། སྐྲག་པས་དེད་དཔོན་གྱི་ཆུང་མ་སྤངས་ནས་ཐམས་ཅད་བྲོས་པར་གྱུར་ཏོ། །དེར་མངག་གཞུག་པའི་བུ་མོ་
[207b.5]གཅིག་གིས་བསམས་པ། ངས་ནི་དེད་དཔོན་རྣ་ཅན་གྱི་ཁྱིམ་ཕུན་སུམ་ཚོགས་པ་དུ་མ་ལ་ཀུན་དུ་ལོངས་སྤྱད་ནས། ད་དེད་དཔོན་གྱི་ཆུང་མ་གནས་སྐབས་འདི་ལྟ་བུར་གྱུར་པ་ན་གཅིག་པུ་སྤངས་ནས་འབྲོས་པ་གང་ཡིན་པ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས། དེ་གཅིག་
[207b.6]པུ་དེད་དཔོན་རྣ་ཅན་གྱི་ཆུང་མའི་གན་ན་འདུག་གོ། །དེད་དཔོན་གྱི་ཆུང་མ་དེའི་ནོར་ཐམས་ཅད་མེས་བསྲེགས་པས་ཉི་མ་གཅིག་གི་བཟའ་བ་ཡང་མེད་པར་གྱུར་ཏོ། །དེ་ནས་བུ་མོ་མངག་གཞུག་དེ་དེད་དཔོན་རྣ་ཅན་གྱི་མཛའ་བོ་དང་འབྲེལ་པ་དང་། གཉེན་རྣམས་གང་ཡིན་པ་དེ་རྣམས་ཀྱི་
[207b.7]གན་དུ་སོང་སྟེ་སྨྲས་པ། བཞིན་བཟངས་དག་དེད་དཔོན་རྣ་ཅན་གྱི་ཆུང་མ་གནས་སྐབས་འདི་ལྟ་བུ་ལ་གནས་ན་དེ་གསོ་ཞིང་བསྐྱང་བར་མཛོད་ཅིག་དང་ཞེས་སྨྲས་པ་དང་། དེ་ནས་དེ་རྣམས་དེ་གསོ་ཞིང་བསྐྱང་བ་ལ་ཞུགས་པ་དེ་ཉིད་ཀྱི་ཚེ་དེ་རྣམས་ཀྱི་རིགས་ལ་ཡང་སྡུག་བསྔལ་
[208a]
[208a.1]བརྒྱ་ཕྲག་བྱུང་བར་གྱུར་བ་དང་། དེ་རྣམས་ཀྱིས་བསམས་པ་དེད་དཔོན་རྣ་ཅན་གྱི་བུ་འདི་ཤིན་ཏུ་བཀྲ་མི་ཤིས་པ་ཞིག་སྟེ། འདིའི་བསོད་ནམས་མ་ཡིན་པའི་སྟོབས་ཀྱིས་དེད་དཔོན་རྣ་ཅན་གྱི་ཁྱིམ་གྱི་འབྱོར་བ་ཤིན་ཏུ་རྒྱ་ཆེ་བ་རྣམ་པར་འཇིག་པར་འགྱུར་ལ། དེ་གལ་
[208a.2]ཏེ་ཡུ་བུ་ཅག་རྣམས་ཀྱིས་གསོས་ཤིང་བསྐྱབ་ན་ཡུ་བུ་ཅག་རྣམས་ཀྱི་ཁྱིམ་དུ་ཡང་འདི་ལྟ་བུའི་གནས་སྐབས་འབྱུང་བར་འགྱུར་གྱི། འདི་ལྟར་ཡང་རྣམ་པ་ཐམས་ཅད་དུ་མིང་ཙམ་ཡང་གཟུང་བར་རིགས་པ་མ་ཡིན་ནོ་སྙམ་ནས། བུ་མོ་མངག་གཞུག་པ་དེ་ལ་སྨྲས་པ། ཁྱེད་ཕྱིན་ནས་ཀྱང་
[208a.3]ངེད་ཀྱི་ཁྱིམ་དུ་འཇུག་པར་ཡང་མ་བྱེད་ཅིག །བུ་མོ་དེ་ལྟར་བར་བཅད་པ་དང་བསམས་པ། ད་ནི་དེད་དཔོན་གྱི་ཆུང་མ་རྣམ་པ་ཐམས་ཅད་ནས་ཐམས་ཅད་དུ་སྨྲ་བ་མེད་པར་གྱུར་ན་དེ་ཇི་ལྟར་བསྒྲུབ་པར་བྱ། གཞན་དུ་ན་ངས་ནི་ཁུར་འདི་བླངས་པ་ཡིན་གྱི། ཤིན་ཏུ་འབད་པ་ཉིད་ཀྱིས་ད་བདག་
[208a.4]གིས་དེད་དཔོན་གྱི་ཆུང་མ་བསྐྱང་པར་བྱའོ་སྙམ་མོ། །དེ་ནས་གཞན་གྱི་ཁྱིམ་དུ་སོང་ནས་གླ་བའི་ལས་བྱེད་པ་ལ་ཞུགས་ནས་དེར་གླ་གང་དག་རྙེད་པ་དེས་དེད་དཔོན་གྱི་ཆུང་མ་བདག་ཉིད་དང་། ཁྱེའུ་གསོ་བ་ལ་ཞུགས་སོ། །ཁྱེའུ་དེ་ནི་ཤིན་ཏུ་ཡང་མི་སྡུག་པས་མི་སྡུག་པ་ཞེས་མིང་བཏགས་
[208a.5]སོ། །བུ་མོ་མངག་གཞུག་མོ་དེ་ཡང་ལས་ཀྱི་དབང་གིས་ཉི་མ་རེ་རེ་ཞིང་གླའི་རྙེད་པ་ཐོབ་པར་གྱུར་ཏོ། །དེ་ནས་དེ་སྲོག་ཆགས་གསུམ་པོ་ཤིན་ཏུ་ཉམ་ང་བས་གསོ་བར་རྩོམ་པ་དང་། དེད་དཔོན་གྱི་ཆུང་མས་བསམས་པ། ང་ནི་བྲན་ཕོ་དང་། བྲན་མོ་དང་། ལས་བྱེད་པའི་མི་དང་། མཛའ་
[208a.6]བཤེས་དང་། ཉེ་དུ་རྣམས་ཀྱིས་ཡོངས་སུ་སྤངས་ནས་གང་བདག་ཅུང་ཟད་འཚོ་བ་འདི་ནི་བུ་མོ་མངག་གཞུག་མ་འདིའི་ཡོན་ཏན་ཡིན་པས་འདི་ནི་ངའི་མ་དང་འདྲ་བར་བརྩེ་པ་ཡིན་མོད་ཀྱི། དེ་དུས་ཇི་སྲིད་ཅིག་ཏུ་གཅིག་པུས་ལས་བྱེད་མི་ནུས་ཏེ་ཡོངས་སུ་སྐྱོ་བར་འགྱུར་ལ། གླ་ཇི་ཙམ་
[208a.7]རྙེད་པ་དེས་ཀྱང་འཚོ་བ་མི་ནུས་ཀྱིས། དེས་ན་ངས་ཀྱང་རང་གི་ཉེས་པ་ཉམས་སུ་མྱོང་བར་བྱ་ཞིང་གླ་མིའི་ལས་བྱའོ་ཞེས་རྣམ་པར་བསམས་ནས། བུ་མོ་མངག་གཞུག་མ་དེ་དང་ལྷན་ཅིག་གཞན་གྱི་ཁྱིམ་དུ་ཞུགས་ཏེ་གླ་མིའི་ལས་བྱེད་པར་བརྩམས་པ་དང་། དེ་ཤིན་ཏུ་ཡང་གཞོན་ཤ་
[208b]
[208b.1]ཅན་ཡིན་པས་བཀྲེས་པ་ལ་སོགས་པའི་སྡུག་བསྔལ་གྱིས་ཡོངས་སུ་གཟིར་ཞིང་ལས་པ་ན་ཡང་དང་ཡང་དུ་བརྒྱལ་བར་གྱུར་ཏོ། །དེ་ནས་ཡོངས་སུ་སྐྱོ་བས་དབུགས་ཚ་བ་རིང་པོ་བྱུང་ནས་དེད་དཔོན་རྣ་ཅན་རྗེས་སུ་དྲན་ཞིང་དུ་བ་ལ་ཞུགས་ཏེ། ཀྱི་ཧུད་འདི་ལྟ་བུའི་ཕྱིན་ཅི་ལོག་ཀུན་དུ་གནས་པ་ནི་སྡུག་
[208b.2]བསྔལ་ལོ། །གང་གྲོང་ཁྱེར་མ་ལུས་པའི་མཆོག་དུ་གྱུར་ཅིང་། དཔལ་གྱི་ཕུན་སུམ་ཚོགས་པ་ཉམས་སུ་མྱོང་ནས་ཀྱང་ཚེ་འདི་ལ་གྲོང་ཁྱེར་ཐམས་ཅད་ཀྱི་མཆོག་ཏུ་གྱུར་ནས། ད་ལྟར་གཞན་གྱི་ཁྱིམ་དུ་གླ་མིའི་ལས་བྱེད་པའི་སྡུག་བསྔལ་དང་ཡིད་མི་བདེ་བ་རྗེས་སུ་མྱོང་བར་གྱུར་ཏོ། །དེ་དེ་
[208b.3]ལྟར་སྡུག་བསྔལ་གྱིས་ཡོངས་སུ་གཟིར་ཞིང་ངུ་བ་ལ་བལྟས་ནས་བུ་མོ་མངག་གཞུག་མ་དེ་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་ཚེ་འདི་ཉིད་ལ་དེད་དཔོན་རྣ་ཅན་གྱི་ཆུང་མ་རས་ཀ་ཤི་པ་ལ་སོགས་པ་གོས་སྣ་ཚོགས་གྱོན་པ་དང་། ལུས་ལ་དྲི་ཞིམ་པའི་མེ་ཏོག་གི་ཕྲེང་བ་དུ་མས་
[208b.4]བརྒྱན་པ་དང་། ཁུར་བ་ལ་རྫས་དྲི་ཞིམ་པོ་དུ་མ་སྦྱར་བའི་དྲི་ཞིམ་པོས་བསྒོས་པ་དང་། ལྷའི་བུ་མོ་བཞིན་དུ་དགའ་བའི་ཚལ་གྱི་སྐྱེད་མོས་ཚལ་དུ་སོང་ནས་བྲན་པོ་དང་། བྲན་མོ་དང་། ལས་བྱེད་པའི་མི་དང་། མཛའ་བཤེས་དང་། ཉེ་དུ་རྣམས་དང་། ཟས་དང་སྐོམ་དང་། གོས་དང་།
[208b.5]རྒྱན་ལ་སོགས་པ་ཅི་རིགས་པར་འགེད་པ་ཡིན་ན། ད་ནི་ཚེ་འདི་ཉིད་དུ་སྐྲ་སྤགས་ཤིང་ལུས་ལ་དྲི་མའི་ཚོགས་ཀྱིས་གོས་པ་དང་། བཀྲེས་པ་ལ་སོགས་པའི་སྡུག་བསྔལ་གྱིས་ལུས་དང་། ཡན་ལག་ལ་སོགས་པ་ཐམས་ཅད་ཡོངས་སུ་སྐམས་པ། རས་རྙིངས་ཤིང་དེངས་ལ་ཤིན་ཏུ་དྲི་མ་ཅན་
[208b.6]གྱི་དུམ་བུ་རས་རྙིང་ཞིག་བརྒྱ་སྟོང་གི་གནས་སུ་གྱུར་པས་རྐེད་པའི་ཕྱོགས་བཀབ་པ། གྲོང་ཁྱེར་བ་ཐམས་ཅད་ཀྱི་ཐ་ཆད་དུ་གྱུར་ནས་གཞན་གྱི་ཁྱིམ་དུ་གླ་མིའི་ལས་བྱེད་པས་སྡུག་བསྔལ་དང་། ཡིད་མི་བདེ་བ་ཆེན་པོ་ཉམས་སུ་མྱོང་བར་འགྱུར་རོ། །ཀྱེ་མའོ་སྐལ་བའི་ཕྱིར་ཅི་ལོག །ཀྱེ་མའོ་
[208b.7]ལོངས་སྤྱོད་རྣམས་ཀྱིས་ཤིན་ཏུ་གཡོ་བ། ཀྱེ་མའོ་ལས་རྣམས་ཀྱི་རྣམ་པ་སྣ་ཚོགས་པ་ཡང་སྨྲས་པ། དར་གྱི་གོས་སོགས་རབ་གྱོན་ཞིང་། །རྒྱན་རྣམས་ཀུན་གྱིས་རབ་བརྒྱན་ཏེ། །སྔོན་ཆད་ལྷ་ཡི་བུ་མོ་འདྲ། །ད་ལྟར་ལམ་པོ་ཆེན་འཁྱམས། །སྐལ་བ་དེ་ཉིད་ཟད་གྱུར་པས། །ལུས་ལ་དྲི་མས་གོས་གྱུར་
[209a]
[209a.1]ཅིང་། །རས་རྙིང་དྲི་ངའི་དུམ་བུ་གྱོན། །ད་ལྟ་འདི་འདྲ་གྱུར་པ་ཡིན། །སྔོན་ནི་ལྷ་ཡི་བུ་མོ་ལྟར། །སྐྱེས་པའི་མིག་གི་བདུད་རྩིར་གྱུར། །ད་ལྟར་ཡི་དྭགས་མོ་འདྲ་བར། །མཐོང་ནས་དེ་ཉིད་ཡིད་ཀྱང་སྐྱོ། །སྔོན་ནི་ནོར་གྱིས་ཕུན་སུམ་ཚོགས། །གྲོང་ཁྱེར་པ་ཡི་མཆོག་གྱུར་གང་། །དེ་ནི་ད་ལྟར་
[209a.2]ཕོངས་པ་བས། །ཤིན་ཏུ་ཕོངས་པ་ཉིད་དུ་འགྱུར། །སྔོན་གྱི་ཕུན་ཚོགས་ཆེན་པོ་ལ། །དགའ་བས་ཡོངས་སུ་ལོངས་སྤྱོད་པ། །མྱ་ངན་སྡུག་བསྔལ་ལྡན་པ་ཡི། །གནས་སྐབས་དེ་འདིས་ཐོབ་པར་གྱུར། །ཀྱེ་མའོ་འཁོར་བའི་བདག་ཉིད་ངན། །ཀྱེ་མའོ་ཕུན་ཚོགས་མི་རྟག་ཉིད། །གང་ཞིག་དེ་ལྟར་བདེར་
[209a.3]གྱུར་ཉིད། །སྡུག་བསྔལ་སྣོད་ཅན་ཉིད་དུ་གྱུར། །དེ་ནས་དེད་དཔོན་གྱི་ཆུང་མ་མངག་གཞུག་པའི་བུ་མོ་དང་ལྷན་ཅིག་ཏུ་རིམ་པ་དེ་ཉིད་ཀྱིས་གཞན་གྱི་ཁྱིམ་དུ་གླ་མིའི་ལས་བྱེད་པ་ལ་ཞུགས་པ་ན་གཞོན་ནུ་གཟུགས་ངན་གྱི་བསོད་ནམས་ཀྱི་དབང་གིས་ཉིན་རེ་ཞིང་གླ་རྙེད་པ་འགྲིབས་པར་གྱུར་ཏོ། །ཇི་ཙམ་
[209a.4]ན་དུས་གཞན་ཞིག་གི་ཚེ་ཉི་མ་མ་ནུབ་བར་དུ་ཉིན་མོ་ལས་བྱེད་དུ་བཅུག་ཀྱང་ཅི་ཡང་རྙེད་པར་མ་གྱུར་པ་ནས། ཇི་སྲིད་ལས་ཀྱང་སུས་ཀྱང་བྱེད་དུ་མ་བཅུག་པ་དང་། ཇི་ཙམ་ན་དེད་དཔོན་གྱི་ཆུང་མ་མངག་གཞུག་མའི་བུ་མོ་དེ་དང་ལྷན་ཅིག་ཀུན་དུ་སྨྲ་བ་རྩོམ་པ། ཡང་ད་ནི་ལས་ཀྱང་བྱེད་དུ་མ་བཅུག་གིས་རྣམ་པ་
[209a.5]ཐམས་ཅད་དུ་སློང་མོ་སྤྱད་པར་བྱའོ་ཞེས་བགྲོས་ཏེ། དེ་སློང་ཕོར་ཐོགས་ནས་སློང་མོ་སྤྱད་པ་ལ་ཞུགས་སོ། །གང་གི་ཚེ་གཞོན་ནུ་མི་སྡུག་པ་འགྲོ་ནུས་པ་དེའི་ཚེ་དེ་ལ་མས་བུ་ད་ནི་ཁྱོད་རང་ཉིད་སློང་མོ་སྤྱོད་དུ་སོང་ལ་ལོངས་སྤྱོད་ཅིག་ཅེས་སྨྲས་ནས། དེས་དེ་ལ་སློང་ཕོར་བྱིན་པ་དང་། དེ་སློང་ཕོར་དེ་
[209a.6]ཐོགས་ནས་ཚོང་འདུས་སུ་ཞུགས་པ་དང་། དེ་ཡང་པགས་པའི་མདོག་ཤིན་ཏུ་གནག་པ། གཟུགས་ཤིན་ཏུ་མི་སྡུག་པ། མཚན་མ་ངན་པ་བཅོ་བརྒྱད་དང་ལྡན་པས་ལུས་སྨད་པར་འོས་པ་མཐོང་བ་དང་། འཇིག་རྟེན་པ་རྣམས་ཤིན་ཏུ་ཡང་རྒྱབ་ཀྱིས་ཕྱོགས་པར་གྱུར་ནས་ཐུར་དུ་ལྟ་ཞིང་འགྲོའོ། །
[209a.7]དེ་གང་གི་ཁྱིམ་གྱི་སྒོར་སོང་བ་དེར་དེའི་ལུས་ལས་དྲི་ཤིན་ཏུ་མི་ཞིམ་པ་འབྱུང་བ་དང་། མོད་ཁོ་ན་ལ་སྣ་ཁུང་གཉིས་བཀག་ནས་ཤིང་དང་རྡོ་བ་དང་གྱོ་མོ་ལ་སོགས་པས་བརྡེགས་ཏེ་འདི་ནས་མྱུར་དུ་སོང་ཤིག་ཅེས་གྲོང་ཁྱེར་གྱི་མི་གཙང་བ་འདམ་རྫབ་འགྲོ་ཤེས་པ་ལྟ་བུར་ལྟ་ཞིང་སྐྲོད་པར་བྱེད་དེ།
[209b]
[209b.1]གང་དང་གང་དུ་སོང་བ་དེ་དང་དེར་ཤིང་དང་རྡོ་དང་གྱོ་མོ་ལ་སོགས་པ་རྣམས་ཀྱིས་བརྡེགས་ནས་སྐྲོད་པར་བྱེད་དོ། །དེས་སློང་མོ་གཅིག་ཀྱང་རྙེད་པར་མ་གྱུར་ཅིང་ཤིང་དང་རྡོ་དང་གྱོ་མོ་ལ་སོགས་པ་རྣམས་ཀྱིས་བརྡེགས་པས་སློང་ཕོར་ཡང་ཆག་པར་གྱུར་ནས། སྨྲེ་སྔགས་འདོན་བཞིན་དུ་མའི་དྲུང་དུ་ཕྱིན་ཏེ།
[209b.2]ཤིན་ཏུ་ཡང་ཞུམ་པར་གྱུར་པས་ཆོ་ངེས་འདེབས་པ་ལ་ཞུགས་སོ། །དེ་ནས་དེ་མཐོང་བ་དང་བྲང་བརྡུངས་ཏེ། སྨྲས་པ། ཀྱི་ཧུད་བུ་ཁྱོད་སྡུག་བསྔལ་ཏེ། །སུ་ལའང་གནོད་པ་མ་བྱས་པར། །སྙིང་རྗེ་སྤངས་པ་གང་ཞིག་གིས། །འདི་ལྟར་བརྡེགས་པས་ཁྱོད་སྡུག་བསྔལ། །དེ་ནས་གཞོན་ནུ་མི་སྡུག་
[209b.3]པས་སྒྲ་དང་བཅས་པར་རབ་ཏུ་དུས་ཏེ་སྨྲས་པ། གང་དང་གང་གི་ཁྱིམ་སྒོར་ནི། །སློང་མོ་སྤྱད་ཕྱིར་བདག་འགྲོ་བ། །དེ་དང་དེར་ནི་གྱོ་མོ་རྡོ། །ཤིང་ལ་སོགས་པ་བདག་ལ་རྡེག །དེ་ཐོས་པ་དང་དེད་དཔོན་གྱི་ཆུང་མས་གཞོན་ནུ་མི་སྡུག་པའི་མགུལ་ནས་འཁྱུད་དེ། སྒྲ་དང་བཅས་པས་དུས་ཏེ་སྨྲས་
[209b.4]པ། ཉེས་པ་མེད་ཀྱང་ཤིན་ཏུ་ནི། །གང་དག་གཞན་གྱིས་བརྡེགས་གྱུར་པས། །སྐྱེ་བ་གཞན་དུ་བུ་ཁྱོད་ཀྱིས། །སྡག་པ་མི་བཟད་བྱས་པར་ངེས། །ཀྱི་ཧུད་ཁྱོད་ནི་སྡུག་བསྔལ་ལོ། །བདེ་བ་ཀུན་དང་རྣམ་བྲལ་བ། །ཤིན་ཏུ་མི་སྡུག་གྱུར་པ་འདི། །དམན་པ་ཅི་ཙམ་མཐོང་ན་གོ། སེམས་ལྡན་སྙིང་རྗེ་
[209b.5]ཅིས་མི་སྐྱེ། །ཀྱི་ཧུད་བཅོམ་ཞིང་ཉམས་པ་བདག །བུ་ཁྱོད་ཀྱི་ནི་སློང་མོ་སྣོད། །བཅོམ་པས་ལུས་ཀྱང་བཅོམ་ཡིན་ཏེ། །སློང་མོ་ཙམ་གྱིས་འཚོ་བ་ཡིན། །ཕ་དང་མ་དང་བྲལ་བ་དང་། །ཁྱིམ་གྱི་རྟེན་ནི་མེད་གྱུར་ལ། །གང་གིས་སྙིང་རྗེ་སྤངས་ནས་ནི། །ཁྱོད་ཀྱི་སློང་སྣོད་དེ་བཅག་གྱུར། །རིགས་
[209b.6]རྒྱུད་ཐམས་ཅད་ཉམས་གྱུར་ཅིང་། །བཤེས་དང་གཉེན་གྱིས་རྣམ་སྤངས་པས། །བླ་མ་མཛའ་བོ་མགོན་གྱུར་ཉིད། །སློང་སྣོད་སུ་ཡིས་བཅག་པར་གྱུར། །ཀྱི་ཧུད་བུ་སྡུག་དམན་པ་མཐོང་ནས་ནི། །ཁྱོད་ལ་སུ་ཡིས་དཔལ་ཚུལ་བསྟན་པར་གྱུར། །ཀྱི་ཧུད་སྔོན་གྱི་རང་གི་ལས་ཀྱིས་ནི། །བུ་སྡུག་ཁྱོད་ནི་
[209b.7]གནོད་པས་བཅོམ་པར་གྱུར། །ཀྱི་ཧུད་དམན་པའི་བུ་ལ་དཔའ་བ་ནི། །གང་གི་སྙིང་ལ་བརྩེ་བ་མི་སེམས་པས། །རྡོ་དང་སོ་ཕག་རྩུབ་པ་ལྟ་བུ་ཡི། །སེམས་ཅན་གང་ཡིན་དེ་རིང་ཁྱོད་ཀྱིས་སྨྲོས། །ཀྱི་ཧུད་སྒོ་བརྒྱས་བཅོམ་པ་ཡི། །སྡུག་བསྔལ་གྱིས་གདུངས་སློང་མོ་རྒྱུ། །ཇི་ལྟར་ཁྱོད་ལ་གཞན་
[210a]
[210a.1]རྡེག་པར། །འཇིག་རྟེན་ཡིད་ནི་སྤྲོ་བར་གྱུར། །བཀྲེས་དང་སྐོམ་པས་ཡོངས་དུབ་ཅིང་། །ཕུན་ཚོགས་ཀུན་གྱིས་རྣམ་སྤངས་པ། །ནད་དང་སྡུག་བསྔལ་རྣམས་ཀྱིས་གདུངས། །ཁྱེད་ལ་སུ་ཞིག་བརྡེག་པར་བརྩོན། །ཉམ་ཐག་དམན་པའི་བཞིན་གྱིས་ནི། །ངུ་ཞིང་བཀྲེས་པས་རབ་གཟིར་བ། །
[210a.2]ལྐོག་མ་སྐམ་པ་མཐོང་ན་དེང་། །ཁྱོད་ལ་སུ་ཡིས་བརྩེ་མ་བྱས། །དེར་ནི་ནད་ཀྱིས་ཟིལ་མནན་ཅིང་། །སྡུག་བསྔལ་ལྡན་པ་བརྩེ་སྤངས་ཏེ། །རིགས་སྙེམས་དྲེགས་པས་དཀྲུགས་པ་ནི། །གང་གིས་བུ་ཁྱོད་ཇི་ལྟར་རྡེགས། །ཀྱི་ཧུད་གང་གིས་ཁྱེད་བཀྲེས་གཟིར། །སློང་མོས་ཉེས་བསགས་གྱུར་པ་ཡིས། །
[210a.3]བཟའ་བ་ཆུང་དུ་དེ་ཡང་དེང་། །ཁྱི་དང་ཝ་ཡང་སྤྱོད་པར་བྱེད། །ཀྱི་ཧུད་བུ་སྡུག་བསྔལ་ངན་པ། །དྭ་གོ་ད་ནི་ཇི་ལྟར་བྱེད། །སྔོན་བྱས་སྡིག་པ་བྱེད་པ་པོ། །མི་སྡུག་ལས་ཀྱིས་བཅོམ་པར་གྱུར། །དེ་ལྟར་དེ་རྣམ་པ་དུ་མས་མྱ་ངན་བྱེད་བཞིན་དུ་འཆག་ཅིང་གྲུགས་པའི་གནས་ཀྱི་བུམ་བུའི་མདུན་དུ་ཁྲག་
[210a.4]གི་རྒྱུན་གྱིས་ཡན་ལག་གོས་པའི་བུ་ལ་འཁྱུད་ནས། ཕྱག་དར་དང་། གྱོ་མོ་མི་གཙང་བ་དང་། ཚེར་མ་ལ་སོགས་པས་ཁྱབ་པའི་སར་བསྙལ་ཏེ། དལ་བུ་དལ་བུས་ལག་པས་མཉེ་བར་བརྩམས་པ་དང་། ཇི་ཙམ་ན་སྲང་བར་དེ་ན་ཚོང་དཔོན་གྱི་བུ་དང་། དེད་དཔོན་གྱི་བུ་དང་། གཞན་ཡང་
[210a.5]མཐོ་ཞིང་མཐོ་བའི་བྲམ་ཟེ་དང་ཁྱིམ་བདག་རྣམས་ཀ་ཤི་ཀའི་རས་དང་། བ་ཀུ་ལའི་རས་དང་། ཀོ་ཏམ་པའི་རས་དང་། དར་དང་མོན་དར་དང་། རས་ཕྲ་ཞིང་རིན་ཆེ་བ་སྣ་ཚོགས་གྱོན་པ་དང་། མགུལ་གདུབ་དང་། གདུ་བུ་དང་། དཔུང་རྒྱན་དང་། རྣ་ཆ་དང་། དོ་ཤལ་དང་། སེ་མོ་དོ་སྣ་
[210a.6]ཚོགས་པའི་རྒྱན་གྱིས་བརྒྱན་པ་དང་། དྲི་ཞིམ་པའི་མེ་ཏོག་གི་ཚོགས་ཁ་བྱེ་བ་རྣམ་པ་སྣ་ཚོགས་ཀྱིས་ལུས་ལ་སྤུད་པ་འགྲོ་བ་མཐོང་བ་དང་། དེ་བདག་ཉིད་ཤིན་ཏུ་སྡུག་བསྔལ་བའི་གནས་སྐབས་ལ་བལྟས་ཤིང་། བུ་མི་སྡུག་པ་དེ་ཡང་དེ་བཞིན་དུ་བཞིན་དམན་པ་ལ་བལྟས་ནས་དབུགས་
[210a.7]ཚ་བ་རིང་པོ་ཕྱུང་སྟེ། མཆི་མ་དང་བཅས་པས་ཤིན་ཏུ་དམན་པའི་ཚིག་གསང་མཐོན་པོས་སྨྲས་པ། ཕུན་ཚོགས་དུ་མ་བརྒྱས་ཁྱབ་པ། །རིན་ཆེན་གྱིས་ནི་རྒྱ་མཚོ་བཞིན། །རྒྱས་པའི་རིས་སུ་གྱུར་ནས་ཀྱང་། །བདེ་བའི་མཆོག་ལ་རྗེས་སུ་སྤྱད། །རྒུད་པའི་ཆ་ལས་བྱུང་བས་ན། །ཕྱག་དར་
[210b]
[210b.1]ཁྲོད་ཀྱི་སེབ་གནས་ཤིང་། །ཟས་མ་རྙེད་པས་བཀྲེས་པ་དང་། །ཤིན་ཏུ་ཉམ་ངས་འཚོ་བར་གྱུར། །མྱ་ངན་རྒྱ་མཚོ་སྡུག་བསྔལ་ཆུ་རླབས་འཇིགས། །གདུང་བའི་ཆུ་སྲིན་མི་ཟད་བརྒྱ་ཡིས་ཁྱབ། །དབུལ་བའི་ཆུ་ཀླུང་རྒྱ་མཚོར་ཞུགས་གྱུར་ནས། །ཀྱེ་ཧུད་བཅོམ་ཞེས་སྒྲ་ནི་རྣམ་པར་སྒྲོགས། །
[210b.2]རྒུད་པའི་ཆུ་སྲིན་བརྒྱ་ཡིས་ཀུན་དུ་དཀྲུགས། །ཕོངས་པའི་རྦ་རླབས་འཇིགས་པ་རབ་ཏུ་གཡོ། །ནད་ཅེས་འཇིགས་པ་མི་བཟད་ནུབ་པ་ཡིས། །དབུ་བའི་རང་བཞིན་ཆུ་བོར་ཞུགས་པར་གྱུར། །སྡུག་བསྔལ་རྡོ་ཁྲོད་ནད་ནི་རྩུབ་པས་ཁྱབ། །གདུང་བའི་སེང་གེའི་སྒྲ་ཡིས་གང་བའི་ཡུལ། །མྱ་ངན་བྱ་
[210b.3]ནི་བརྒྱ་ཕྲག་ལྷགས་གྱུར་པ། །དབུལ་བའི་སྡུག་བསྔལ་གནས་ནི་ཐོབ་པར་གྱུར། །བག་མེད་འཁྲུལ་པ་དག་གིས་བསམས་པས་སྔོན། །དམ་པ་རྣམས་ལ་སྦྱིན་པ་མ་བྱིན་པས། །ད་ལྟ་འདི་ནས་སྐལ་ངན་དམན་པ་ཡིས། །དྲེགས་ལྡན་གདོང་ལ་རྟག་ཏུ་ལྟ་བར་བྱེད། །དམན་དང་སྐལ་པ་དང་བྲལ་
[210b.4]རྨོངས་དང་ནི། །སློང་མོ་ལ་སྤྱོད་སློང་མོའང་མང་དུ་མ་བྱིན་པས། །གང་དེས་གནས་ཁང་ཙམ་ཡང་འབྱོར་པར་མ་གྱུར་པའི། །དམན་ཞིང་ཕོངས་པའི་མི་བཟད་དག་ཏུ་ཞུགས་པར་གྱུར། །ངེས་པར་ས་སྟེང་ཀུན་གྱིས་བཀུར་བའི་བླ་མ་དང་། །ཡང་དག་ཕྲད་ཀྱང་བརྙས་ཤིང་བསྙེན་བཀུར་མ་བྱས་པ། །
[210b.5]གང་དེས་དེ་ལྟར་ཡུ་བུ་བརྙས་པར་གྱུར་པ་དང་། །དེ་ལྟར་འགྲོ་བའི་རྨོངས་པའི་སྣོད་དུ་གྱུར་པ་ཡིན། །གང་གིས་རྡོ་དང་བོང་པ་ཡིས། །འགྲོ་འདི་བདག་ཅག་བརྡེགས་གྱུར་པ། །སྔོན་གྱི་སྐྱེ་བར་ལེགས་བསྡམས་པ། །མང་པོ་ངེས་པར་བརྡེགས་པ་ཡིན། །གང་གིས་འཇིག་རྟེན་པ་རྣམས་ནི། །ཀུན་
[210b.6]ནས་ཡོངས་སུ་སྣོད་གྱུར་པ། །སྔོན་ནི་བླ་མའི་སྐྱེ་བོ་ལ། །ཡོངས་སུ་སྤྱོས་པར་གྱུར་པར་ངེས། །གང་འདིས་བརྙས་པའི་སྡུག་བསྔལ་ནི། །ཤིན་ཏུ་མི་བཟད་རྗེས་ཐོབ་པ། །སྔོན་ཆད་བླ་མའི་སྐྱེ་བོ་ལ། །ཡོངས་སུ་བརྙས་པར་གྱུར་པར་ངེས། །ཡུ་བུས་སྔོན་གྱི་སྐྱེ་བོ་ལ། །བློ་བུར་ལྷགས་ལ་གོས་དག་
[210b.7]ནི། །མ་བྱིན་པ་ནི་གང་ཡིན་པས། །ད་ལྟར་ཡུ་བུ་གོས་མེད་གྱུར། །གང་གིས་གཉེན་བཤེས་དང་བྲལ་ཏེ། །ཡུ་བུ་སྡུག་བསྔལ་ཡུན་རིང་དུ། །སྐྱེ་བོ་མང་པོ་དུ་བ་ཡི། །ང་རོ་འདོན་དུ་བཅུག་པ་ཡིན། །གང་གིས་གསེག་མ་རྡོས་ཁྱབ་པའི། །ས་གཞིར་ཡུ་བུ་ཉལ་གྱུར་པ། །སྣ་ཚོགས་གོས་ནི་བཀབ་པ་
[211a]
[211a.1]ཡིས། །མལ་སྟན་སྔོན་མ་བྱིན་པ་ཡིན། །སྟན་ནི་རྣམ་པ་སྣ་ཚོགས་པ། །དམ་པ་རྣམས་ནི་མ་བྱིན་པས། །གང་གི་ཚེར་མ་མང་པོ་ཡིས། །ཁྱབ་པའི་ས་ཡི་གཞི་ལ་གནས། །གང་གི་ཚེར་མས་ཁྱབ་པ་ཡི། །ས་གཞིར་ཡུ་བུ་རྣམ་རྒྱུ་བ། །སྔོན་ཆད་ལྷམ་དང་བཞོན་པ་ནི། །བདེ་བ་སྐྱེད་
[211a.2]པ་མ་བྱིན་ཡིན། །ཉི་མའི་འོད་ཚོགས་རྣམས་ཀྱིས་དབུས་ཀྱི་ཆ་སྣང་བྱས། །ཕྱག་དར་ཕུང་པོ་གང་གིས་འདི་ནི་ཡུ་བུ་གནས། །སློང་བའི་འགྲོ་ལ་ཁང་པའི་གནས་ཙམ་ཕལ་ཆེར་ནི། །གནས་ཀྱི་སེར་སྣས་ངེས་པར་མ་བྱིན་གྱུར་པ་ཡིན། །གང་གིས་ད་ལྟར་ཡུ་བུ་ཤིན་ཏུ་ཁ་སྐམས་ལ། །མགྲིན་
[211a.3]པར་སྐམས་ཤིང་ཁ་དང་འགྲམ་པ་ཡོངས་སྐམས་པ། །ཡིད་ལ་ཆུ་འདོད་ཀུན་དུ་བལྟས་ནས་སྔོན་ཆད་ནི། །དེ་ལ་བསིལ་གྱུར་ཆུ་ནི་སྦྱིན་པ་མ་བྱིན་ཞིང་། །སློང་དང་སྡུག་ཕོངས་པ་ལ་ཟས་མ་བྱིན་པ་དང་། །གཉེན་དང་མཛའ་བཤེས་ལ་མིན་རྩ་ལག་ཚོགས་ལའང་མིན། །ལེགས་པར་སྤྱད་ནས་
[211a.4]ཐམས་ཅད་ལས་ཀྱིས་ལོངས་སྤྱོད་པ། །དེས་ན་འདིར་ནི་ཟས་བྲལ་ཡུ་བུ་ཡོངས་སུ་འཁྱམས། །སྲིད་པ་གཞན་དུ་རྣམ་པ་མང་པོར་ངེས་པར་ནི། །གཞན་གྱི་དོན་སྒྲུབ་མཁས་པ་རྣམས་ལ་མཚང་འདྲུ་བས། །གང་གིས་འདི་ན་ད་ལྟར་འཇིག་རྟེན་དམན་པའི་ཡང་། །ཤིན་ཏུ་མཚང་འདྲུའི་གནས་སུ་ཡུ་བུ་
[211a.5]ཉེ་བར་གྱུར། །ཡུ་བུས་ཉེས་པ་རྣམ་མང་དུ། །རིགས་ཀྱིས་ཁེངས་ཤིང་དྲེགས་བརྟེན་ལ། །ཡོན་ཏན་ལྡན་པའང་བརྡེགས་པས་ན། །གང་གིས་དེ་ལྟར་མི་བཟད་སྐྱེད། །འཁོར་བའི་རྒྱ་མཚོ་འདི་ཉིད་དུ། །ནད་རྣམས་ཐམས་ཅད་སེལ་བྱེད་པའི། །སྨན་ནི་སྔོན་ཆད་མ་བྱིན་པས། །གང་གིས་ནད་
[211a.6]ཀྱིས་མངོན་གདུངས་ཡིན། །ཕ་ལ་ཁྲུས་མ་བྱས་ཤིང་མ་དང་བཤེས་ལའང་མིན། །བླ་མ་ཚིམ་པར་མ་བྱས་འཇིག་རྟེན་མགོན་ལའང་མིན། །གང་གིས་ཁྲུས་དང་གདུང་བྲལ་བྱས་པས་སྐྱེས་གྱུར་ཅིང་། །འདི་ནི་སྡུག་བསྔལ་བརྒྱ་ཡིས་སྐལ་བཅོམ་མགོན་མེད་གྱུར། །བཀྲེས་དང་སྐོམ་པས་ཡོངས་
[211a.7]དུབ་ཅིང་། །གཟའ་དང་བགོ་བ་རྣམ་བྲལ་བ། །ནད་དང་སྡུག་བསྔལ་གྱིས་གདུངས་པ། །ཡུ་བུ་སུ་ཞིག་སྐྱོང་བར་གྱུར། །འཇིག་རྟེན་དུ་ནི་རྙེད་དཀའ་བའི། །གང་གིས་དེ་ནི་སྲོག་སྟོར་ཞིང་། །ཡུ་བུས་གང་གི་བྲན་དང་ནི། །དེ་རིང་སུ་ཡི་ལས་བྱེད་བྱ། །ཀྱེ་མའོ་དབུལ་བ་སྡུག་བསྔལ་ཏེ། །
[211b]
[211b.1]ཀྱེ་མའོ་བསོད་ནམས་མ་བྱས་ཉིད། །འདི་ལྟར་རྒྱས་པའི་གྲོང་ཁྱེར་དུའང་། །མགོན་མེད་ཡུ་བུ་ཇི་བཞིན་ནོ། །འདི་དང་གཞན་དག་ཡང་དེད་དཔོན་གྱི་ཆུང་མ་བཀྲེས་པས་ཡོངས་སུ་གདུངས་པའི་ཡིད་དང་བདག་ཉིད་སྨྲེ་སྔགས་འདོན་ཞིང་གནས་སོ། །དེད་དཔོན་རྣ་ཅན་ཡང་རྒྱ་མཚོ་ཆེན་པོར་གྲུ་ཞིག་པ་
[211b.2]དང་། སྟེས་དབང་གིས་བྱིས་པ་གཅིག་དང་ལྷན་ཅིག་སྤང་ལེབ་ལ་འཇུས་ཏེ་ཆུའི་གནས་ནས་རྒལ་ནས་ཤིན་ཏུ་ཉམ་ཐག་པ་ཆེན་པོས་སློང་མོ་རྒྱུ་ཞིང་རྒྱལ་པོའི་ཕོ་བྲང་མཉན་ལྡན་དུ་ཕྱིན་པ་དང་། དེ་དེར་ཕྱི་རོལ་གྱི་ཞིང་གཅིག་ཏུ་མཚན་མོ་གནས་པར་གྱུར་པ་ན། དེར་ཡང་ཞོ་ཤས་འཚོ་བའི་སྐྱེས་བུ་གཞན་
[211b.3]ཞིག་གནས་པ་དེས་དེ་ཤེས་པ་དང་། དེ་འདི་སྙམ་དུ་སེམས་ཏེ། དེད་དཔོན་འདི་ཤིན་ཏུ་རིང་པ་དང་། བདོག་བའི་རྫས་ཐམས་ཅད་ཉམས་པ་དང་། ཁྱེའུ་གཅིག་དང་ལྷན་ཅིག་འོངས་ན་དེ་ལ་ཁྱིམ་གྱི་ལོ་རྒྱུས་ཇི་ལྟར་བརྗོད་པར་བྱ། ཡང་ན་རང་ཉིད་ཀྱིས་ཤེས་པར་འགྱུར་གྱི་སྙམ་ནས་དེས་དེ་ལ་ལག་པ་
[211b.4]བཀྲུ་བའི་ཆུ་བྱིན་ཏེ། མ་ཤའི་སྣུམ་ཁུར་གཉིས་བྱིན་ནོ། །དེ་ནས་དེད་དཔོན་རྣ་ཅན་ལག་པ་སྟོང་པས་ཁྱིམ་དུ་འཇུག་པར་མི་བྱའོ་སྙམ་ནས། མ་ཤའི་སྣུམ་ཁུར་གཅིག་བཞག་ནས་ཁྱེའུའི་ལག་ཏུ་གཏད་ཅིང་། གཅིག་ཕྱེད་ཕྱེད་དུ་བགོས་ཏེ་བཟའ་བའི་དོན་དུ་ཁྱེའུ་དེ་དང་ལྷན་ཅིག་ཟོས་སོ། །དེ་ནས་
[211b.5]ཉི་མ་གཉིས་པ་ལ་མ་ཤའི་སྣུམ་ཁུར་དེ་ཐོགས་ནས་ཤིན་ཏུ་རྩུབ་ཅིང་ལུས་ཉམ་ཆུང་བ་དང་། ཤིན་ཏུ་དྲི་མ་དང་བཅས་པའི་རས་གཅིག་ཙམ་ཞིག་གྱོན་ནས་རྒྱལ་པོའི་ཕོ་བྲང་མཉན་ལྡན་དུ་ཞུགས་ཏེ། རང་གི་ཁྱིམ་དུ་ཆས་སོ། །གཞོན་ནུ་མི་སྡུག་པའམ་ནམ་ལངས་པའི་དུས་ཉིད་ན་བཀྲེས་པ་དང་། སྐོམ་
[211b.6]པས་ཡོངས་སུ་ཉམ་ཆུང་བ་བཞིན་དུ་དང་། སྐལ་པ་ངན་པ་བདག་ཉིད་འདི་ན་གནས་པས་ཅི་ཞིག་བྱ། སྲོག་ཀྱང་དགོས་པ་མེད་ཀྱིས་སོང་ལ་བདག་ཉིད་གསོད་པར་བྱའོ་སྙམ་ནས། དེས་མ་ལ་སྨྲས་པ། མ་བདག་ནི་ཕའི་སྐྱེད་མོས་ཚལ་དུ་མཆི་ཞེས་སྨྲས་ཏེ། སྐྱེད་མོས་ཚལ་དེར་ཆས་སོ། །དེད་
[211b.7]དཔོན་རྣ་ཅན་ཡང་རང་གི་ཁྱིམ་དང་ཉེ་བར་ཕྱིན་པ་དང་། ཅི་ཙམ་ཞིག་ནས་རིང་པོ་མ་ལོན་པར་དུར་ཁྲོར་གྱི་མདོག་ཅན་གྱི་སའི་ཚོགས་ཙམ་ལྷག་མར་ལུས་པ་མཐོང་ནས་བལྟས་ཏེ། འདི་ཅི་ཞིག་ཡིན་ཞེས་བསམས་ནས། གནས་ཞིག་པའི་ཕྱེད་དུམ་དེར་ཕྱིན་པ་དང་། གནས་ཞིག་པའི་ཕྱེད་དུམ་དེ་ན་
[212a]
[212a.1]ཆུང་མ་བྲན་མོ་ཞིག་དང་ལྷན་ཅིག་གནས་ལ། ཤིན་ཏུ་དམན་པས་ཉམ་ཆུང་བའི་བཞིན་དང་། རས་ཀྱི་དུམ་བུ་དྲི་མ་ཅན་གྱིས་སྐེད་པའི་ཕྱོགས་བཀབ་པ་དྲི་མའི་ཚོགས་ལུས་ལ་གོས་པ་མཐོང་ངོ་། །མཐོང་ནས་ཀྱང་ཀྱི་ཧུད་འདི་ཅི་ཞིག་ཡིན་ཞེས་སྨྲས་ཏེ། བརྒྱལ་ནས་ས་ལ་འགྱེལ་བ་དང་།
[212a.2]རླུང་གྲང་མོས་ཕོག་པས་ཡུན་རིང་མོ་ཞིག་ནས་དྲན་པ་རྙེད་དེ། དེ་ཆུང་མའི་ཐད་དུ་ཕྱིན་པ་དང་འདི་ཅི་ཞིག་ཡིན་ཞེས་སྨྲས་ཏེ། གསང་མཐོན་པོས་ཆོ་ངེས་འདེབས་པ་ལ་ཞུགས་སོ། །དེ་ནས་ཆུང་མ་ལས་ཇི་ལྟར་གྱུར་པ་ཐོས་པ་དང་། དབུགས་ཚ་བ་རིང་པོ་ཕྱུང་སྟེ་སྨྲས་པ། ངས་ནི་ངེས་པར་སྦྱིན་པའི་
[212a.3]ཞིང་ལ་བྱ་བ་མ་བྱས་པ་གང་གིས་འདི་ལྟར་རྒུད་པར་གྱུར་ན། ད་འདི་ལ་ཇི་ལྟར་བསྒྲུབ་པར་བྱ། གང་ལ་སྐྱབས་སུ་འགྲོ་བར་བྱ། སུའི་བཞིན་ལ་བལྟ་བར་བྱ། འཇིག་རྟེན་དམན་ཞིང་ཞན་པ་ལ་ཐུགས་བརྩེ་བ་ནི་སུ་ཞིག་ཡིན། སུ་ཞིག་འོངས་ནས་ང་དབུལ་བའི་རྒྱ་མཚོ་འདི་ལས་བརྒལ་བར་
[212a.4]བྱ། སུ་ཞིག་འོངས་ནས་ཆུང་པའི་འདམ་འདི་ལྟ་བུ་བཀྲུ་བར་བྱ། སུ་ཞིག་འོངས་ནས་སྡུག་བསྔལ་གྱི་ཆུ་བོ་འདི་ལས་བརྒལ་བར་བྱ། སུ་ཞིག་འོངས་ནས་དབུལ་བའི་དགྲ་འདི་ལས་རྒྱལ་བར་བྱ། སུ་ཞིག་འོངས་ནས་སྡུག་བསྔལ་ཐམས་ཅད་ཀྱི་རྩ་བའི་ཤིང་དབྱུང་བར་བྱ། སུ་ཞིག་འོངས་ནས་
[212a.5]སྡུག་བསྔལ་གྱི་ཤིང་འདི་རྩ་བ་ནས་གདོན་པར་བྱ། སུ་ཞིག་འོངས་ནས་བཀྲེས་པ་དང་སྐོམ་པའི་མཆེ་བ་གཙིགས་པའི་ཁ་ནས་ཧ་ཧ་ཞེས་འཇིགས་པའི་སྒྲ་ཅན་གྱི་དབུལ་བའི་སྲིན་པོ་ཆེན་པོ་མེད་པར་བྱ། སུ་ཞིག་འོངས་ནས་དབུལ་བའི་གྱད་འདི་ལས་རྒྱལ་བར་བྱ། སུ་ཞིག་འོངས་ནས་བཀྲེས་པ་དང་སྐོམ་
[212a.6]པ་ལ་སོགས་པས་རབ་ཏུ་འབར་བའི་མེ་འདི་གསད་པར་བྱ། སུ་ཞིག་འོངས་ནས་རྒུད་པ་གསོ་བའི་གླང་པོ་ཆེ་འདི་གདུལ་བར་བྱ། སུ་ཞིག་འོངས་ནས་ངའི་སྡུག་བསྔལ་དཔག་ཏུ་མེད་པའི་དུག་གི་མཆེ་བ་དང་ལྡན་པའི་སྦྲུལ་ཆེན་འདིའི་དུག་འདི་དུག་མེད་པར་བྱ། སུ་ཞིག་འོངས་ནས་ངའི་ཐམས་
[212a.7]ཅད་འཕྲོག་པའི་དབུལ་བའི་དཔའ་བོ་བཟློག་པར་བྱ། སུ་ཞིག་འོངས་ནས་ངའི་སྡུག་བསྔལ་ཐམས་ཅད་ཀྱིས་བསྡམས་པའི་བདག་ཉིད་ཅན་གྱི་དབུལ་བའི་ལྕགས་སྒྲོག་འདི་གཅད་པར་བྱ། སུ་ཞིག་འོངས་ནས་ངའི་དབུལ་བའི་བཙོན་ར་འདི་ལས་བརྒལ་བར་བྱ། སུ་ཞིག་འོངས་ནས་ངའི་
[212b]
[212b.1]དབུལ་བའི་སྒོ་གླེགས་འདི་དབྱེ་བར་བྱ། སུ་ཞིག་འོངས་ནས་ངའི་དབུལ་བའི་གཤིན་རྗེ་འདི་མི་སྣང་བར་བྱ། སུ་ཞིག་འོངས་ནས་ངའི་སྲེད་པའི་རྒྱ་མཚོ་འདི་ལས་བརྒལ་བར་བྱ། སུ་ཞིག་འོངས་ནས་ངའི་དབུལ་བའི་འབྲོག་དགོན་པ་འདི་ལས་ཐར་པར་བྱ་ཞེས་བྱ་བ་ལ་སོགས་པ་སྙིང་
[212b.2]རྗེ་ཞིང་དམན་པ་ལ་དམིགས་པའི་ཚིག་རྣམ་པ་དུ་མ་བརྗོད་ཅིང་ཆོ་ངེས་འདེབས་པར་གྱུར་ཏོ། །གནས་སྐབས་དེར་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པའམ། མི་གཟིགས་པའམ། ཐུགས་སུ་མ་ཆུད་པའམ། རྣམ་པར་མི་རིག་པ་ཅི་ཡང་མི་མངའ་བ་ནི་ཆོས་
[212b.3]ཉིད་ཡིན་པས། སངས་རྒྱས་བཅོམ་ལྡན་འདས་སྟོན་ཀའི་ཉི་མ་འཆར་ཀ་ལྟར་འོད་ཟེར་དམར་སེར་འགྱེད་པ་དང་། ནོར་བུ་རང་གི་ཡོན་ཏན་གྱིས་ཡོངས་སུ་སྤྲས་པས། ཀུན་ནས་དམར་སེར་དུ་སྣང་བ་དང་། ཉི་མ་འཆར་ཀས་ཕྱེ་བའི་པདྨའི་གེ་སར་མ་ལུས་པའི་ཚོགས་དང་། ཨུཏྤ་ལ་དང་།
[212b.4]མརྒད་དང་། འཇའ་ཚོན་དང་། དྲི་མ་མེད་པའི་གློག་འཁྱིལ་པ་དང་། མར་གྱི་རྒྱུན་བླུགས་པའི་མེའི་ཚོགས་ལྟར་ཤིན་ཏུ་འབར་བའི་འོད་ཀྱི་ཚོགས་བཀྲ་ཤིས་པའི་འོད་ཟེར་གྱི་ཚོགས་ཀྱིས་རབ་རིབ་དཔག་ཏུ་མེད་པའི་ཚོགས་རྣམ་པར་འཇིག་ཅིང་། རྒ་ཤི་སྲིད་པའི་གཟེབ་འཛིན་པར་མཛད་པ།
[212b.5]དགེ་བའི་རྩ་བ་དཔག་ཏུ་མེད་པ་ལ་མཉམ་པར་གཞག་པ་སྟོབས་སུ་གྱུར་པས་ཀུ་མུ་ཏ་དང་། དུང་དང་། ཀུནྡ་དང་། དྲི་མ་མེད་པའི་དངུལ་དང་། མུ་ཏིག་དང་། ཁ་བ་དང་། པདྨའི་རྩ་བ་དང་། དྲི་མ་མེད་པའི་གླང་པོ་ཆེའི་སོ་བཅག་པ་དང་། འཛམ་བུའི་ཆུ་བོའི་གསེར་གྱི་ཕུང་པོའི་རྩེ་ན་གནས་པའི་མིག་སྟོང་ལྡན་
[212b.6]གྱི་གཞུ་ལྟ་བུའི་འོད་ཟེར་འཁྱིལ་པའི་སྣང་བ་དང་། ནམ་མཁའི་མཐའ་མེད་པར་ཟླ་བ་བརྒྱ་སྟོང་འཆར་བ་ལྟར་དཀར་ཞིང་འཇམ་ལ། སྣུམ་ཞིང་གཡས་སུ་འཁྱིལ་བའི་འོད་འདོམ་གང་བ་དང་། སྨིན་མ་མཛེས་པའི་བར་ནས་བྱུང་བའི་སྨིན་མཚམས་ཀྱི་མཛོད་སྤུ་རྣམ་པར་མཛེས་པ་དང་། པདྨ་ཁ་བྱེ་
[212b.7]མ་ཐག་ལྟ་བུའི་ཞལ་མངའ་བ། བསྐལ་པ་གྲངས་མེད་པ་གསུམ་དུ་ཕྱག་དང་། ཞབས་དང་། སྤྱན་དང་། ཡན་ལག་མཆོག་དབུ་དང་། ཉིད་ཀྱི་ཤ་དང་། རྐང་དང་། པདྨ་གཞོན་ནུ་ལྟ་བུའི་རང་བཞིན་དང་ལྡན་པའི་སྲས་དང་བཙུན་མོ་དང་། གླང་པོ་དང་། རྟ་དང་། ཤིང་རྟ་དང་། རྒྱན་དང་། གོས་
[213a]
[213a.1]དང་། སྟན་དང་། མལ་སྟན་དང་། ནོར་བུ་དང་། གསེར་དང་། དངུལ་དང་། དངོས་པོ་ཐམས་ཅད་དང་། རྒྱལ་སྲིད་ལ་སོགས་པ་ཡོངས་སུ་གཏོང་བས་བླ་ན་མེད་པའི་བྱང་ཆུབ་ཀྱི་ཚོགས་ཡོངས་སུ་འཕེལ་བར་མཛད་པ། ཆགས་པ་མི་མངའ་བས་བདུད་ཀྱི་སྟོབས་རྣམས་རབ་ཏུ་
[213a.2]བཅོམ་པར་མཛད་པས་སྟོན་ཀའི་ཟླ་བ་དྲི་མ་མེད་པ་ལྟར་ཤིན་ཏུ་དཀར་ཞིང་གསལ་བའི་གྲགས་པའི་ཚོགས་སྟོང་གི་ཕྲེང་བས་བསྐོར་བ་རི་བོ་ལ་འཆར་ཀའི་ཟླ་བའི་འོད་ཟེར་གྱི་ཚོགས་ཀྱི་ལྕུག་མའི་རལ་པའི་དཀྱིལ་འཁོར་དང་། ཉི་མ་འཆར་ཀའི་འོད་ཟེར་གྱི་ཚོགས་དང་། སྤྲིན་གྱི་ཚོགས་ལས་བྱུང་
[213a.3]བའི་གློག་བརྒྱ་སྟོང་དང་། བརྒྱ་བྱིན་གྱི་གླང་པོ་ཆེའི་མཆེ་བ་མདུང་གིས་བསྒྱེལ་བ་དང་། ས་འོག་འཁྲུགས་པ་དང་། འོ་མའི་རྒྱ་མཚོའི་རྦ་རླབས་གྱེས་པ་དང་། དབང་པོའི་གཞུའི་འོད་ཀྱི་རྩེ་མ་དང་། ནོར་བུ་མར་གད་བཅག་པ་དང་། ཟླ་བ་རྒྱས་པ་དང་། པདྨའི་འདབ་མ་དང་། ཀླུའི་དབང་
[213a.4]པོའི་གཙུག་གི་ནོར་བུ་དང་། བཻ་ཌཱུཪྻའི་རྡོ་ལེབ་དང་། ཙམ་པ་ཀ་རྒྱས་པ་རྨ་མེད་པ་ལྟ་བུའི་འོད་ཀྱི་དཀྱིལ་འཁོར་གྱིས་སྐུ་ལ་བསྐོར་བར་གྱུར་པ། ཉིད་ཀྱི་ཐུགས་སུ་ཆུད་པའི་ཡེ་ཤེས་ཀྱིས་མེས་ཉོན་མོངས་པའི་ཚང་ཚིང་སྲེག་པར་མཛད་པ། ལྷ་བརྒྱ་སྟོང་གིས་ཞབས་ལ་བཏུད་ཅིང་ཅོད་པན་གྱིས་
[213a.5]གཏུགས་པས་ནོར་བུ་དང་། གསེར་གྱི་འོད་ཟེར་གྱིས་ཤིན་ཏུ་མཛེས་ཤིང་བརྒྱན་པའི་ཞབས་ཀྱི་པདྨ་དང་ལྡན་པ། གླང་པོ་ཆེ་གཞོན་ནུའི་དཀན་དང་། རྒྱ་སྐྱེགས་ཀྱི་ཁུ་བ་དང་། པདྨ་དང་། སྟོན་ཀའི་མཚམས་ཀྱི་སྤྲིན་གྱི་ཚོགས་དང་། ཨ་ཤོ་ཀ་དང་། ལེ་བརྒན་རྩིའི་མེ་ཏོག་གི་ཆུན་པོ་དང་།
[213a.6]ཟངས་ཀྱི་མདོག་ཅན་གྱི་ཞབས་དང་ལྡན་པ། སེན་མོ་སྲབ་ཅིང་ཟངས་ལྟར་དམར་བའི་ཟླ་ཚེས་དགོད་བ་ལྟ་བུ་མེད་པའི་ཞབས་ཀྱི་པདྨ་དང་ལྡན་པ། སྲེད་པའི་ཁྲི་ཤིང་བཏོན་པ། གཏི་མུག་གི་མུན་པ་མ་ལུས་པ་རྣམ་པར་བསལ་བ། འགྲོ་བ་མ་ལུས་པའི་གཉེན་དུ་གྱུར་པ། དགོས་པ་མེད་
[213a.7]པར་གཞན་ལ་མཉེས་གཤིན་པར་གྱུར་པ། ཡེ་ཤེས་ཀྱི་སྤྱོད་ཡུལ་བསམ་གྱིས་མི་ཁྱབ་པ། འདོད་ཆགས་ཆེན་པོའི་དུག་རྣམ་པར་བསལ་བ། དགའ་བ་བརྒྱ་སྟོང་གིས་བསྙེལ་བའི་ཡོན་ཏན་གྱི་ཚོགས་དང་ལྡན་པ། བསོད་ནམས་ཀྱི་ཚོགས་ཉེ་བར་བསགས་ཤིང་ཤེས་རབ་ཀྱིས་
[213b]
[213b.1]སྤྲས་པས་ཉོན་མོངས་པ་མ་ལུས་པའི་ཤིང་རྩ་ནས་འདོན་པར་མཛད་པ། ཚངས་པ་དང་། དབང་པོ་དང་། ཉེ་དབང་དང་། མེ་དང་། གཤིན་རྗེ་དང་། བདེན་བྲལ་དང་། ཆུ་ལྷ་དང་། རླུང་ལྷ་དང་། ལུས་ངན་པོ་དང་། དབང་ལྡན་ལ་སོགས་པས་བསྟན་པ་མངོན་པར་བསྟོད་པ། ཐུགས་རྗེ་
[213b.2]ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་བ། ཉག་གཅིག་དཔའ་བ། ཟླ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་ལ་གནས་པར་མཛད་པ། འདུལ་བའི་བསྡུས་པ་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་
[213b.3]འཕྲུལ་གྱི་རྐང་པ་བཞིའི་ཞབས་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་གོམས་པ། ཡན་ལག་ལྔ་སྤངས་པ། ཡན་ལག་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། བྱང་ཆུབ་ཀྱི་ཡན་ལག་
[213b.4]བདུན་གྱི་མེ་ཏོག་གིས་བྱུགས་པ། ཡན་ལག་བརྒྱད་པའི་ལམ་སྟོན་པར་མཛད་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལ་ཁྱད་པར་དུ་
[213b.5]འཕགས་པ་རྣམས་ནི་ཉིན་ལན་གསུམ་མཚན་ལན་གསུམ་དུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་སུ་ནི་འཕེལ། སུ་ནི་འགྲིབ། སུ་ནི་གནོད་པར་གྱུར། སུ་ནི་ཉམ་ང་བར་འགྱུར། སུ་ནི་སྡུག་བསྔལ་བར་གྱུར། སུ་ནི་ངན་སོང་ལ་གཞོལ། སུ་ནི་ངན་སོང་ལ་
[213b.6]འབབ། སུ་ནི་འཁོར་བའི་རྒྱ་མཚོ་ཆེན་པོ་ལས་ཉེ་བར་འདོན་པར་བྱ། སུ་ནི་དེང་ངས་འཁོར་བའི་སྲིན་པོས་རྣམ་པར་གཙེས་པ་ལས་ཐར་བར་བྱ། སུ་ནི་དེང་ངས་དབུལ་བའི་སྤྲུལ་གྱིས་བདས་པ་ལས་ཡོངས་སུ་བསྐྱབ་པར་བྱ། སུ་ནི་དེང་ངས་ཞེ་སྡང་གི་མེས་ལུས་ཀུན་ནས་བསྲེགས་པ་ལས་
[213b.7]དམ་པའི་ཆོས་ཀྱི་ཆར་གྱིས་དབང་བསྐུར་བར་བྱ། སུ་ནི་དེང་ངས་གཏི་མུག་གི་མུན་ནག་གི་ནང་དུ་ཞུགས་པ་ལ་རབ་རིབ་མེད་པའི་སྣང་བ་བླ་ན་མེད་པའི་ཏིང་ངེ་འཛིན་མཆོག་གི་རྩེ་མོ་ལ་བསྐྱོན་པར་བྱ། སུ་ནི་དེང་ངས་སྡུག་བསྔལ་ཐམས་ཅད་ཟད་པར་བྱེད་པའི་ལམ་གྱི་མཆོག་ཡན་ལག་
[214a]
[214a.1]བརྒྱད་པ་བསྟན་པར་བྱ། སུ་ནི་དེང་ངས་དབུལ་བའི་སྒོ་གླེགས་མཐའ་མེད་པར་གཞིག་པར་བྱ། སུ་ནི་དེང་ངས་མི་ཤེས་པའི་རབ་རིབ་ཀྱིས་མིག་མདོངས་པ་ལ་ཡེ་ཤེས་ཀྱི་མིག་སྨན་རྗེས་སུ་སྦྱིན་པར་བྱ། སུ་ནི་དེང་ངས་ལྕགས་སྒྲོག་ཆེན་པོས་བཅིངས་པ་ལས་ཐར་པར་བྱ་
[214a.2]ཞེས་མཁྱེན་པའི་གཟིགས་པ་འཇུག་གོ། །ཡང་སྨྲས་པ། རྒྱ་མཚོ་ཆུ་སྲིན་རྣམས་ཀྱི་གནས། །དུས་རླབས་ཡོལ་བར་འགྱུར་ཡང་སྲིད། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་བ་མེད། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་
[214a.3]པར་གཟིགས། འཇིག་རྟེན་མ་ལུས་པ་འདི་དག་ལ་གཟིགས་པར་གྱུར་པ་དང་། བཅོམ་ལྡན་འདས་ཀྱི་དེད་དཔོན་རྣ་ཅན་དབུལ་བའི་སྡུག་བསྔལ་གྱི་འདམ་རྫབ་ཏུ་ཤིན་ཏུ་ནུབ་ཅིང་བདག་ཉིད་ཤིན་ཏུ་མྱ་ངན་གྱིས་སྨྲེ་ཞིང་གནས་པར་གཟིགས་སོ། །གཟིགས་ནས་ཀྱང་ཐུགས་རྗེ་ཆེན་པོས་ཡང་
[214a.4]དག་པར་སྐུལ་བའི་ཐུགས་ཀྱིས་ལྷུང་བཟེད་བསྣམས་ཤིང་ཆོས་གོས་མནབས་ཏེ། མཉན་ལྡན་གྱི་སྐྱེད་མོས་ཚལ་ནས་མངོན་པར་བྱུང་ནས་མཉན་ལྡན་དུ་གཤེགས་སོ། །ཡང་དག་པར་རྫོགས་པའི་སངས་རྒྱས་རྣམ་པར་གཟིགས་རྒྱལ་པོའི་ཕོ་བྲང་མཉན་ལྡན་དུ་བསོད་སྙོམས་ལ་གཤེགས་
[214a.5]པ་དང་། དེ་མཐོང་ནས། རྒྱལ་པོ་དང་། བློན་པོ་དང་། ཚོང་དཔོན་དང་། བྲམ་ཟེ་དང་། ཁྱིམ་བདག་དང་། གྲོང་ཁྱེར་གྱི་སྐྱེ་བོ་རྣམས་དང་། དེད་དཔོན་རྣམས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་འདིར་བསོད་སྙོམས་ལ་བྱོན་གྱི། བཅོམ་ལྡན་འདས་འདིའི་བསོད་
[214a.6]སྙོམས་པས་དགང་བར་བྱའོ་སྙམ་ནས་སྲོག་ཆགས་བརྒྱ་སྟོང་དཔག་ཏུ་མེད་པ་བཟའ་བ་དང་བཅའ་བ་རྣམས་ཐོགས་ཏེ་གནས་སོ། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དེད་དཔོན་རྣ་ཅན་ལ་རྗེས་སུ་ཐུགས་བརྩེ་བས་ཚོང་འདུས་ཀྱི་དབུས་ན་
[214a.7]ཐུགས་རབ་ཏུ་ཞི་ཞིང་སྐུ་ལ་ཉི་མ་འཆར་ཀའི་འོད་པས་ལྷག་པའི་འོད་ཀྱིས་འབར་བ་ལྟ་བུ་སྟོན་ཀའི་ཟླ་བ་རྒྱས་པའི་མཚམས་ཀྱི་སྤྲིན་གྱིས་བསྐོར་བ་ལྟ་བུ་དང་། ལྷའི་སྐྱེད་མོས་ཚལ་གྱི་དཔག་བསམ་གྱི་ཤིང་ལྟ་བུ་དང་། གསེར་གྱི་མཆོད་སྡོང་བདུད་རྩིའི་བྱི་རུའི་ཤིང་གི་ཡལ་གས་བརྒྱན་
[214b]
[214b.1]པ་ལྟ་བུ་དང་། གསེར་གྱི་གཞོང་པའི་སྟེང་དུ་ཏིལ་མར་གྱི་མར་མེ་བལྟམས་པ་ལྟ་བུ་དང་། རིན་པོ་ཆེའི་རི་བོ་རིན་པོ་ཆེ་ཕྲ་མོ་སྣ་ཚོགས་ཀྱིས་སྤྲས་པ་ལྟ་བུ་དང་། ངང་པའི་རྒྱལ་པོ་གསེར་གྱི་པདྨའི་རྡུལ་གྱིས་གོས་པ་ལྟ་བུ་དང་། ས་སྲུང་དལ་གྱིས་འབབ་པའི་པདྨའི་རྡུལ་གྱིས་བརྒྱན་པ་ལྟ་བུ་དང་།
[214b.2]སེང་གེ་ལྡོང་རོས་ཀྱིས་བྱུགས་པ་ལྟ་བུ་དང་། ས་ཐམས་ཅད་ཀྱི་དཔལ་གྱི་ཚོགས་ལྟ་བུ་དང་། སྐུ་ཤིན་ཏུ་འབར་བ་ལྟ་བུ་དང་། ཞབས་ཀྱི་མཐིལ་གཉིས་ཤིན་ཏུ་ལེགས་པར་བྱས་པའི་ཤིང་རྟའི་འཁོར་ལོ་ནོར་བུས་སྤྲས་པའི་འོད་དང་ལྡན་པ་ལྟ་བུ་དང་། ཞབས་ཀྱི་མཐིལ་རབ་ཏུ་གསར་པའི་པདྨའི་
[214b.3]ཁ་རྒྱས་པ་ལྟར་ཤིན་ཏུ་མཉེན་ཤིང་གཞོན་ཤ་ཆགས་པ་དང་། ཞབས་ཀྱི་མཐིལ་དཔལ་བེའུ་དང་། གཡུང་དྲུང་དང་། དགའ་བ་འཁྱིལ་པ་དང་། ཉ་དང་ལྡོང་རོས་ཀྱིས་བརྒྱན་པ་དང་། ཞབས་གཉིས་ལ་ཟླ་བ་རྒྱས་པའི་དབྱིབས་ལྟ་བུ་ལ་ཟངས་ཤིན་ཏུ་སྦྱངས་པ་ལྟ་བུའི་མདངས་དང་།
[214b.4]འོད་དང་ལྡན་པའི་སེན་མོ་ཤིན་ཏུ་དྲི་མ་མེད་པ་གཅིག་ཏུ་གསལ་བ། ལེགས་པར་སྐྱེས་པ། བལྟ་ན་སྡུག་ཅིང་མཐོ་བའི་སེན་མོ་དག་དང་ཞབས་ཀྱི་སེན་མོའི་ཐིག་ལེའི་ཕྲེང་བས་སྤྲས་ཤིང་ཉམས་པ་མེད་པ་དང་། ལེགས་པར་སྐྱེས་པ་དང་། རིང་ཞིང་ཟླུམ་པ་ཡངས་པའི་སེན་མོ་དང་། འཇམ་
[214b.5]ཞིང་ཤིན་ཏུ་མཉེན་ལ་ཤིང་བལ་ལྟར་རེག་ན་བདེ་བའི་རྟིང་པ་གཉིས་དང་། དཔལ་གྱིས་འབར་བའི་ཉི་མ་ནམ་མཁའི་དཀྱིལ་ན་འདུག་པ་ལྟ་བུར་ཕྱོགས་ཀྱི་དཀྱིལ་འཁོར་ཐམས་ཅད་མ་ལུས་པར་ཀུན་དུ་སྣང་བར་མཛད་ཅིང་། དེད་དཔོན་རྣ་ཅན་གྱི་གནས་ཞིག་པའི་ཕྱེད་དུམ་དེར་བྱོན་ཏོ། །
[214b.6]དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས། གསེར་བཙོ་མ་བཞིན་དུ་སྦྱངས་པའི་འོད་འཕྲོ་བ་ལྟ་བུ་དང་། མར་གྱི་རྒྱུན་གྱིས་བླུགས་པའི་མེའི་ཚོགས་ལྟ་བུ་དང་། ཤིན་ཏུ་ཁ་རྒྱས་པའི་ཀིང་ཤུ་ཀ་དང་ཨ་ཤོ་ཀ་དང་། ཨུཏྤལ་དམར་པོ་དང་། ཨུན་རན་ད་ཀ་དམར་
[214b.7]པོ་དང་། ཀ་ར་བཱི་ར་དང་། ཙམ་པ་ཀ་དང་། ལེ་བརྒན་རྩིའི་ཁུ་བ་དང་། མཚམས་ཀྱི་སྤྲིན་དང་། གླང་པོ་ཆེའི་དཀན་དང་། པདྨ་དམར་པོ་དང་། གློག་བརྒྱ་སྟོང་བས་ལྷག་པའི་འོད་ཟེར་ཡང་དག་པར་འགྱེད་པར་མཛད་ཅིང་། གང་གིས་དེའི་མོད་ཁོ་ན་ལ་གནས་ཞིག་པའི་ཕྱེད་དུམ་ཕྱི་
[215a]
[215a.1]དང་ནང་དུ་བཅས་པ་གསེར་ཞུན་མ་ལྟར་སྣང་བར་གྱུར་པ་དེ་ལྟར་མཛད་དོ། །དེ་མཐོང་ནས་དེད་དཔོན་རྣ་ཅན་གྱིས་འདི་ཅི་ཞིག་ཡིན་སྙམ་ཏེ་ལངས་པ་དང་། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་མཚན་སུམ་བཅུ་རྩ་གཉིས་ཀྱིས་
[215a.2]བརྒྱན་པ། ཆོས་ཞེས་བྱ་བ་ལུས་དང་ལྡན་པ་ལྟ་བུ་དང་། མར་གྱི་སྤྱིན་བླུགས་པའི་རྗེས་ཐོགས་ཀྱི་མེ་ལྟ་བུ་དང་། གསེར་བཞུ་བའི་ཁུ་བའི་མདངས་དང་། ཀར་ནི་ཀ་ར་དང་། གུར་གུམ་དང་། ལེ་བརྒན་རྩི་དང་། ལྡོང་རོས་དང་། བ་བླ་དང་། ཨུཏྤལ་དམར་པོ་དང་། སྟོན་གྱི་
[215a.3]མཚམས་ཀྱི་སྤྲིན་དང་། རྨ་བྱའི་ལྐོག་མའི་མདངས་དང་། གསེར་དང་། མཐིང་ཤིང་དང་། མཚལ་དང་། ཨ་ཏི་མུག་ཏ་དང་། ཀུ་རན་ད་ཀ་ལྟ་བུའི་འོད་ཀྱི་དཀྱིལ་འཁོར་གྱིས་སྐུ་ལ་བསྐོར་བ་མཐོང་ངོ་། །མཐོང་ནས་ཀྱང་དེད་དཔོན་རྣ་ཅན་དེ་ཤིན་ཏུ་དད་པ་ཆེན་པོ་སྐྱེས་ནས་ངས་བཅོམ་
[215a.4]ལྡན་འདས་ལ་ཅི་ཞིག་དབུལ་བར་བྱ་སྙམ་དུ་སེམས་ཏེ། བདག་ཉིད་ཀྱི་འབྱོར་པ་ལ་བལྟས་པ་དང་། མ་ཤའི་སྣུམ་ཁུར་གཅིག་པོ་ཡོད་པར་མཐོང་ནས་དེས་དེ་བླངས་ཏེ་ཆུང་མ་ལ་སྨྲས་པ། བཟང་མོས་ངས་ནི་ལག་པ་སྟོང་པས་ངའི་ཁྱིམ་དུ་འཇུག་པར་མི་བྱའོ་སྙམ་ནས། མ་ཤའི་སྣུམ་ཁུར་
[215a.5]ཅིག་ཁྱེར་ཏེ་འོངས་ཏེ། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་འདི་ཡང་ཡོན་གནས་ཀྱི་དམ་པ། དམན་པ་དང་ཞན་པ་རྣམས་ལ་རྗེས་སུ་ཐུགས་བརྩེ་བ་ཡིན་ལ། འདི་ལ་སྦྱིན་པའི་ས་བོན་ཉུང་ཟད་ཙམ་ཞིག་བཏབ་པས་ཀྱང་དབུལ་བའི་སྡུག་བསྔལ་རྩ་ནས་འབྱིན་
[215a.6]པར་མཛད་པ་ཡིན་ན། བཅོམ་ལྡན་འདས་དེ་ལ་ངས་མ་ཤའི་སྣུམ་ཁུར་འདི་དབུལ་བར་བྱའམ། དེས་སྨྲས་པ། རྗེའི་སྲས་ལེགས་ཀྱིས་དེ་ལྟར་མཛོད་ཅིག །འདི་ཙམ་གྱི་དགེ་བའི་རྩ་བས་ཀྱང་འཁོར་བ་ན་བདེ་བའི་རྒྱུར་འགྱུར་རོ། །དེ་སྐད་ཅེས་སྨྲས་པ་དང་། དེད་དཔོན་གྱིས་བསམས་པ།
[215a.7]མ་ཤའི་སྣུམ་ཁུར་འདི་ནི་ཤིན་ཏུ་ཞན་པ་ཡིན་ལ། ད་ནི་གྲོང་ཁྱེར་འདི་ཉིད་དུ་དེ་ལྟ་བུ་ཞིག་ཏུ་གྱུར་ནས་ང་འདི་ལྟ་བུའི་ངན་པ་རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་དང་། གྲོང་ཁྱེར་གྱི་སྐྱེ་བོ་དང་། དེད་དཔོན་རྣམས་ཀྱིས་མི་མཐོང་བ་ཇི་ལྟར་ནི་བཅོམ་ལྡན་འདས་ལ་དབུལ་བར་
[215b]
[215b.1]བྱ། གཞན་དུ་ན་ལོ་མས་དཀྲིས་ལ་དབུལ་བར་བྱ་སྟེ། དེ་ལྟར་མ་བྱས་ན་ནི་འདི་རྣམས་ཀྱིས་ཤེས་པར་འགྱུར་རོ་སྙམ་ནས། རང་གི་གནས་ཞིག་པའི་ཕྱེད་ཀྱི་ནང་དུ་ཞུགས་ཏེ། ལོ་མ་བཙལ་བར་སེམས་པ་དང་ཅི་ཡང་མ་རྙེད་པར་གྱུར་ཏོ། །དེ་ནས་དེད་དཔོན་དེ་ཤིན་ཏུ་ཡང་ཡི་མུག་པར་གྱུར་ཏེ།
[215b.2]ཀྱི་ཧུད་འདི་ལྟ་བུའི་སྐལ་བ་ཞན་པ་ནི་སྡུག་བསྔལ་ལོ་ཞེས་དབུགས་ཚབ་རིང་པོ་ཕྱུང་ནས། དེའི་མོད་ལ་གནས་ཞིག་པའི་ཕྱེད་དུམ་དེ་ནས་བྱུང་སྟེ། དད་པ་ཆེན་པོའི་ཤུགས་ཀྱིས་མ་ཤའི་སྣུམ་ཁུར་དེ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ལྷུང་བཟེད་དུ་ཕུལ་ལོ། །
[215b.3]ཕུལ་ནས་ཀྱང་ཞབས་གཉིས་ལ་ཕྱག་བྱས་ཏེ། སྨོན་ལམ་བྱེད་པར་བརྩམས་པ། བཅོམ་ལྡན་འདས་སྦྱིན་པར་བྱ་བའི་ཆོས་ཡོངས་སུ་ཕུལ་བའི་དགེ་བའི་རྩ་བ་འདིས་སྐྱེ་བ་འདི་ཉིད་ནས་གཟུང་སྟེ། ཉིན་ཞག་གཅིག་ཙམ་ཡང་དབུལ་པོར་ནམ་ཡང་མ་གྱུར་ཅིང་། ཤིན་ཏུ་ཕྱུག་པ་
[215b.4]དང་། ནོར་དང་ལོངས་སྤྱོད་ཡོངས་སུ་རྫོགས་པ་དང་ལྡན་པར་གྱུར་ཅིག །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་ལ། དེད་དཔོན་རྣ་ཅན་གྱིས་བཏུད་པ་ཙམ་དེ་ཉིད་ཀྱི་རྗེས་ཐོགས་ཁོ་ན་ལ་ཤིན་ཏུ་ཞན་ཅིང་རིད་པ་དེ་མི་སྣང་བར་གྱུར་ནས། སྔོན་
[215b.5]གྱི་མདོག་མདངས་ལྟ་བུ་དང་ལྡན་པར་གྱུར་ཏོ། །དེ་ནས་དེད་དཔོན་རྣ་ཅན་གྱིས་སྨོན་ལམ་བཏབ་ནས་ལངས་པ་དང་། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་སླར་བཞུད་དེ། མཉན་ལྡན་གྱི་སྐྱེད་མོས་ཚལ་དུ་གཤེགས་སོ། །དེ་ནས་དེད་དཔོན་རྣ་ཅན་མཉན་ལྡན་གྱི་ཚོང་དཔོན་
[215b.6]དང་། དེད་དཔོན་རྣམས་ཀྱིས་ངོ་ཤེས་པར་གྱུར་ཏོ། །དེ་ནས་དེད་དཔོན་ཞིག་གིས་གྲོང་ཁྱེར་པ་དེ་རྣམས་ལ་འདི་སྐད་ཅེས་སྨྲས་སོ། །ང་དང་ཁྱེད་རྣམས་ཀྱི་དེད་དཔོན་རྣ་ཅན་རྒུད་པར་གྱུར་པ་ལ། བཏང་སྙོམས་སུ་འཇོག་པ་ནི་རིགས་པ་མ་ཡིན་ནོ། །དེ་ནས་རས་གཅིག་བཏིང་སྟེ་ཡང་སྨྲས་པ།
[215b.7]གྲོགས་པོ་དག་མང་པོས་ནི་གཅིག་ལེགས་པར་གདོན་ནུས་ཀྱི། གཅིག་གིས་ནི་མང་པོ་མ་ཡིན་པས། དེ་ལ་གང་གིས་འདིར་ཡོངས་སུ་བཏང་བ་དེ་རས་འདིའི་སྟེང་དུ་ཞོག་ཤིག་ཅེས་སྨྲས་པ་དང་། དུ་མ་ཞིག་གིས་མགུལ་གདུབ་དང་། གདུ་བུ་དང་། དཔུང་རྒྱན་དང་། དོ་ཤལ་དང་། སེ་མོ་
[216a]
[216a.1]དོ་དང་། ལག་གདུབ་ལ་སོགས་པ་རྒྱན་བརྒྱ་སྟོང་དཔག་ཏུ་མེད་པ་ཞིག་བྱིན་པ་དང་། ཀ་ཤིའི་རས་དང་། དུ་ཀུ་ལའི་རས་དང་། ཀོ་ཏམ་པའི་རས་དང་། དར་དང་མོན་དར་ལ་སོགས་པ་ཤིན་ཏུ་ཕྲ་ཞིང་རིན་ཆེ་བ་སྣ་ཚོགས་པའི་གོས་ཟུང་བརྒྱ་སྟོང་དཔག་ཏུ་མེད་པ་བྱིན་ཏེ། དེ་ལ་
[216a.2]སྐད་ཅིག་མ་དེ་ཉིད་དུ་གོས་དང་རྒྱན་གྱི་ཕུང་པོ་ཞིག་ཏུ་གྱུར་ཏོ། །དེ་ནས་དེད་དཔོན་རྣ་ཅན་གྱིས་འབྱོར་པ་དེ་ལ་བལྟས་ནས་ཆུང་མ་ལ་སྨྲས་པ། བཟང་མོ་ཞིང་གཤིན་པ་ལ་སྦྱིན་པའི་ས་བོན་བཏབ་པའི་མྱུ་གུ་འཐོན་པ་ལ་ལྟོས། དེ་ཡང་དགའ་བ་དང་མགུ་བ་སྐྱེས་ཏེ། ཡང་དག་པར་རྫོགས་པའི་
[216a.3]སངས་རྒྱས་རྣམ་པར་གཟིགས་དེ་ལ་ཕྱག་བྱས་ནས་རྒྱན་དང་གོས་དེ་རྣམས་གནས་ཞིག་པའི་ཕྱེད་དུམ་དེར་གཞུག་པར་བརྩམས་སོ། །ཁྱེའུ་མི་སྡུག་པ་དེ་ཡང་ཕའི་སྐྱེད་མོས་ཚལ་དེར་ཞུགས་ནས་བཀྲེས་པས་གདུངས་པའི་ཡིད་དང་། རང་ཉིད་མཆོག་ཏུ་གཟུགས་ངན་པས་འདི་ལྟར་ཡང་དང་ཡང་
[216a.4]དུ་མྱ་ངན་བྱེད་ཅིང་བསམས་པ། ཤིན་ཏུ་སྡིག་པའི་ལས་བྱེད་པ། མཆོག་ཏུ་སྡུག་བསྔལ་བའི་སྐལ་བ་ཅན་ཤིན་ཏུ་གཟུགས་ངན་པ། མཐོང་ན་བཀྲ་མི་ཤིས་པ་ང་གསོན་པས་ཀྱང་དགོས་པ་ཅི་ཞིག་ཡོད་དེ། བདག་ཉིད་ཀྱི་སྲོག་དང་འབྲལ་བར་བྱའོ་སྙམ་ནས་སྒྱིད་ལུག་པའི་ཡིད་ཀྱིས་མོད་ཁོ་
[216a.5]ན་ལ་པ་ལའི་ཤིང་གི་ཡལ་གའི་རྩེར་མོར་འཛེགས་པ་དང་། ཤིང་གི་ཡལ་ག་ཆག་ནས། ཤིང་གི་ཡལ་ག་དང་ལྷན་ཅིག་ཏུ་ལྷུང་སྟེ། ཚོར་བ་ཉམས་ཤིང་འདུག་གོ། །བར་སྐབས་དེར་སངས་རྒྱས་བཅོམ་ལྡན་འདས་ལ་ནི་མི་མཁྱེན་པའམ། མི་གཟིགས་པའམ། ཐུགས་སུ་མི་
[216a.6]ཆུད་པའམ། རྣམ་པར་མི་རིག་པ་ཅི་ཡང་མི་མངའ་བས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་སངས་རྒྱས་ཀྱི་ལྷའི་སྤྱན་རྣམ་པར་དག་པ། མིའི་ལས་འདས་པས་ཁྱེའུ་མི་སྡུག་པ་དེ་ལྟར་སྡུག་བསྔལ་བ་གཟིགས་སོ། །གཟིགས་ནས་ཀྱང་ཐུགས་རྗེ་ཆེན་པོས་
[216a.7]ཡང་དག་པར་བསྐུལ་ཏེ། སྐྱེད་མོས་ཚལ་དེར་རྫུ་འཕྲུལ་གྱིས་གཤེགས་ནས་ཉིད་ཀྱི་སྐུ་ལས་འོད་ཟེར་འགྱེད་པར་མཛད་དེ། བཀྲེས་པ་དང་སྐོམ་པའི་སྡུག་བསྔལ་དེ་ཡང་རྒྱུན་ཆད་པར་གྱུར་ནས་དེའི་མོད་ལ་ལངས་པ་དང་། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་
[216b]
[216b.1]བསྐལ་པ་བྱེ་བ་བརྒྱ་སྟོང་དཔག་ཏུ་མེད་པ་མཐོང་བ་ཤིན་ཏུ་རྙེད་པར་དཀའ་བ་དང་། མཚན་སུམ་ཅུ་རྩ་གཉིས་ཀྱི་སྣང་བས་འབར་བར་བྱས་པའི་སྐུ་དང་ལྡན་པ་མཐོང་ངོ་། །དེ་མཐོང་བའི་མོད་ལ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་དད་པ་ཆེན་པོ་
[216b.2]སྐྱེས་ཏེ། དེས་ཀྱང་ཡུང་བས་བཙོས་པའི་གོས་ཀྱི་དུམ་བུ་ཁྲུ་གང་གྱོན་ཏེ་འདུག་པ་ལས། དེས་དད་པའི་ཤུགས་ཀྱིས་ལུས་ལས་ཕུད་དེ། དེ་དང་ཀར་ནི་ཀའི་མེ་ཏོག་ཅིག་དད་པའི་ཤུགས་ཆེན་པོས་འཕྲལ་དུ་བཅོམ་ལྡན་འདས་རྣམ་པར་གཟིགས་ཀྱི་སྐུ་ལ་གསོལ་ལོ། །དེ་ཡང་
[216b.3]བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཇི་ལྟར་གོས་ཀྱི་དུམ་བུ་དེ་བཞིན་གཤེགས་པའི་སྐུ་ཚད་དང་ལྡན་པ་ཙམ་དུ་གྱུར་ནས་སྐུ་ལ་གསོལ་པ་དང་། མེ་ཏོག་ཀར་ནི་ཀ་ཡང་དབུའི་སྟེང་དུ་ཤིང་རྟའི་འཕང་ལོ་ཙམ་དུ་
[216b.4]གྱུར་ནས་གདུགས་ལྟར་གནས་པ་དེ་ལྟར་བྱིན་གྱིས་བརླབས་སོ། །དེ་མཐོང་བ་དང་ཁྱེའུ་མི་སྡུག་པ་ཤིན་ཏུ་ཡང་དད་པ་ཆེན་པོ་སྐྱེས་ནས། དེ་དད་པ་ཆེན་པོའི་ཤུགས་ཀྱིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་གཉིས་ལ་ཕྱག་བྱས་ཏེ། སྒྲ་གསང་ཆེན་
[216b.5]པོས་སྨོན་ལམ་བྱེད་པར་བརྩམས་པ། རྐང་གཉིས་མཆོག་གྱུར་སྦྱིན་པ་འདི། །འདི་ཡིས་འདི་ནས་གཟུགས་ངན་ཉིད། །དེ་ལས་བརྩམས་ཏེ་ལེགས་སྤངས་ནས། །བདག་ཉིད་གཟུགས་བཟང་ཉིད་ཐོབ་ཤོག །གསེར་གྱི་གདོང་ཅན་གོས་རྣམས་ནི། །གསེར་སྦྱངས་ལྟ་བུ་གྱོན་པ་དང་། །བདག་
[216b.6]གིས་ལུས་དང་ཁ་ནས་ཀྱང་། །ཙན་དན་ཨུཏྤལ་དྲི་ལྟར་ཤོག །གསེར་གྱི་མདོག་ལྟར་སྣང་གྱུར་ཅིང་། །འཇིག་རྟེན་ཀུན་གྱི་ཡིད་དུ་འོང་། །ནད་ཀུན་ལས་ནི་རྣམ་ཐར་ཅིང་། །བསྟན་བཅོས་ཀུན་དུ་ཕ་རོལ་ཕྱིན། །ཀུན་དུའང་ནོར་དང་ཡང་དག་ལྡན། །སྡུག་བསྔལ་ཐམས་ཅད་རྣམ་
[216b.7]སྤངས་པ། །ཀུན་མཆོག་ཀུན་གྱིས་ལྟ་བར་འོས། །རྒྱན་རྣམས་ཀུན་གྱིས་རྣམ་བརྒྱན་ཤོག །རྫོགས་སངས་རྒྱས་དོན་ཀུན་གྲུབ་ཅིང་། །སེམས་ཅན་རྣམས་ལ་མཉེས་གཤིན་ཤོག །དྲི་མེད་ཡོན་ཏན་དཔལ་ལྡན་ལྷ། །བདེ་ཞིང་རྫས་ཀུན་ལྡན་པར་ཤོག །དེས་སྨོན་ལམ་འདི་བྱས་
[217a]
[217a.1]པ་དང་དུས་མཉམ་པ་ཉིད་ལ་ཁྱེའུ་མི་སྡུག་པ་འཕྲལ་དུ་མི་སྣང་བར་གྱུར་ཅིང་། མཛེས་པ་ལྟ་ན་སྡུག་པ། ལུས་ཀྱི་པགས་པའི་མདོག་གསེར་གྱི་མདོག་ཅན་གྱི་གཟུགས་བཟང་བར་གྱུར་ཏོ། །འཕྲལ་དུ་དེ་ལ་ནམ་མཁའ་ལས་གསེར་གྱི་མདོག་ཅན་གྱི་གོས་བྱུང་བས་ལུས་
[217a.2]ལ་བཀབ་ཅིང་རིན་པོ་ཆེའི་དབུ་རྒྱན་དང་། རྣ་ཆ་ལ་སོགས་པའི་རྒྱན་གྱི་ཁྱད་པར་རྣམས་བྱུང་བས་བརྒྱན་ཏོ། །ལྷ་རྣམས་ཀྱིས་ཀྱང་མེ་ཏོག་ཀར་ནི་ཀ་དང་། ཨུཏྤལ་དང་། ཙམ་པ་ཀ་དང་། པདྨ་དང་། ཀུ་མུ་ཏ་དང་། མན་དཱ་ར་བ་ལ་སོགས་པ་མེ་ཏོག་གི་ཆར་ཆེན་པོ་ཕབ་པ་དང་། ལྷའི་
[217a.3]ཙན་དན་དང་། ཨ་ཀ་རུ་དང་། གུར་གུམ་དང་། ཏ་མ་ལའི་ལོ་མའི་ཕྱེ་མའི་ཆར་ཕབ་ཅིང་འདི་སྐད་ཅེས་ཀྱང་སྨྲས་སོ། །ཨེ་མའོ་དེ་བཞིན་གཤེགས་པ་ལ་བསྐྲུན་པའི་སྦྱིན་པའི་ས་བོན་ཁྱད་པར་ཅན་གྱི་མྱུ་གུ་ཡང་དག་པར་འབྱུང་བ་ཡིན་ནོ། །ལྷའི་མེ་ཏོག་དང་། ཕྱེ་མའི་ཆར་ཡང་པུས་མོ་
[217a.4]ནུབ་པ་ཙམ་དུ་སྐྱེད་མོས་ཚལ་དེ་ཐམས་ཅད་དུ་བབ་ནས་གནས་སོ། །དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་སྐྱེད་མོས་ཚལ་དེ་ནས་མངོན་པར་ཕྱུང་སྟེ་མཉན་ལྡན་གྱི་སྐྱེད་མོས་ཚལ་དུ་གཤེགས་སོ། །དེད་དཔོན་རྣ་ཅན་གྱིས་ཆུང་མ་ལ་སྨྲས་པ། བཟང་མོ་
[217a.5]གང་ཞིག་སྐྱེས་ནས་དེ་ལས་འདི་ལྟ་བུའི་རྒུད་པ་བྱུང་བར་གྱུར་པའི་བུ་དེ་གར་སོང་། དེས་སྨྲས་པ། དེས་སྐྱེད་མོས་ཚལ་དུ་འགྲོའོ་ཞེས་ཟེར་རོ། །དེས་སྨྲས་པ། དེས་དེ་ཉིད་དུ་ཡི་མུག་པས་བདག་ཉིད་གསོད་པར་འགྱུར་གྱི་དེ་མྱུར་དུ་བཞུད་ཅིག །དེད་དཔོན་རྣ་ཅན་གྱིས་སྨྲས་པ།
[217a.6]ཡུ་བུའི་བུའི་མིང་ནི་ཅི། །གཟུགས་ནི་ཅི་ལྟ་བུ་ཞིག་ཡོད། །དེས་སྨྲས་པ། རྗེའི་སྲས་ཤིན་ཏུ་བལྟ་ན་མི་སྡུག་པས་མི་སྡུག་པ་ཞེས་བགྱིའོ། །དེ་ནས་དེད་དཔོན་རྣ་ཅན་དེ་ཤིན་ཏུ་མྱུར་བའི་གོམ་སྟབས་ཀྱིས་སྐྱེད་མོས་ཚལ་དེར་སོང་བ་དང་། གཞོན་ནུ་མི་སྡུག་པ་ལུས་གསེར་གྱི་མདོག་ཅན་རིན་
[217a.7]པོ་ཆེའི་གོས་སེར་པོ་ཕྲ་བ་ལུས་ལ་གྱོན་པ། རྒྱན་ཐམས་ཅད་ཀྱིས་བརྒྱན་པ། མཐོང་ན་ཡིད་འཕྲོག་པ། ལྷའི་བུ་གཞོན་ནུ་བཞིན་དུ་དཔལ་གྱི་མཆོག་ཏུ་འབར་བ་མཐོང་ངོ་། །མཐོང་ནས་ཀྱང་ཨེ་མའོ་གང་ལ་འདི་ལྟ་བུའི་བུ་ཡོད་པ་དེ་ནི་སྐྱེས་བུ་སྐལ་བ་དང་ལྡན་པའོ་ཞེས་ཟེར་ཞིང་གཞོན་
[217b]
[217b.1]ནུ་ལ་སྨྲས་པ། ཁྱེའུ་ཁྱོད་སུའི་བུ་ཡིན། དེས་སྨྲས་པ། རྣ་ཅན་ཞེས་བྱ་བའི་དེད་དཔོན་ཞིག་ཡོད་དེ། ང་ནི་དེའི་བུ་ཡིན་ནོ། །དེད་དཔོན་རྣ་ཅན་གྱིས་བསམས་པ་ལ། གཞོན་ནུ་འདིས་ནི་ང་ལ་བསྟིངས་སོ་སྙམ་དུ་སེམས་ཤིང་། ཤིན་ཏུ་ལྟད་མོ་སྐྱེས་ཏེ། མིག་མི་འཛུམས་པར་ལྟ་ཞིང་
[217b.2]གཞོན་ནུ་དེ་ལ་ཡང་སྨྲས་པ། ཀྱེ་གཞོན་ནུ་སུའི་བུ་ཡིན་པ་བདེན་པར་སྨྲོས་ཤིག །མི་སྡུག་པས་སྨྲས་པ། འདིར་ཅི་ཞིག་བརྟག་པར་བྱ་སྟེ། ང་ནི་བདེན་པ་ཉིད་དུ་དེད་དཔོན་རྣ་ཅན་གྱི་བུ་ཡིན་ནོ། །དེས་སྨྲས་པ། ཨེ་མའོ་གཞོན་ནུ་འདིས་ནི་ང་ལ་ཤིན་ཏུ་ཡང་བསྟིངས་སོ་སྙམ་ནས་སྨྲས་པ།
[217b.3]གཞོན་ནུ་ངས་ནི་ཤིན་ཏུ་མི་སྡུག་གོ་ཞེས་ཐོས་ན། ཁྱེད་ནི་གཟུགས་བཟང་ན། དེ་ཐབས་གང་གིས་གཟུགས་བཟང་བར་གྱུར། གཞོན་ནུ་མི་སྡུག་པས་དགའ་བས་མིག་གདངས་ཏེ་སྒྲ་གསང་ཆེན་པོས་སྨྲས་པ། དེང་ནི་དབུལ་བའི་སྡུག་བསྔལ་མེས། །སེམས་ནི་ཡོངས་སུ་གདུངས་པས་
[217b.4]ན། །ཤིང་གི་ཡལ་གའི་རྩེར་འཛེགས་ཏེ། །བདག་གིས་རང་ཉིད་ལྟུང་བར་བྱས། །ལྷུང་བས་ཡན་ལག་སྣད་པས་གཟིར། །བདག་ནི་བ་རྒྱལ་བ་ཉིད་དུ་གྱུར། །སེམས་ནི་དབུགས་མེད་མ་ཐོན་པར། །སྐད་ཅིག་ཙམ་ཞིག་རྣམ་པར་གནས། །དེ་ནས་རྣམ་གཟིགས་རྫོགས་སངས་
[217b.5]རྒྱས། །སེམས་ཅན་རྣམས་ལ་རྗེས་བརྩེ་བ། །མགོན་པོ་བདག་ལ་ཐུགས་བརྩེའི་ཕྱིར། །སྐྱེད་མོས་ཚལ་ནི་འདིར་བྱོན་ཏོ། །སུམ་ཅུ་རྩ་གཉིས་མཚན་འཆང་ཞིང་། །པགས་པ་གསེར་ནི་སྦྱངས་པ་འདྲ། །བཙོ་མའི་གསེར་འདྲའི་འོད་རྣམས་ཀྱིས། །ཕྱོགས་བཅུ་དག་ནི་འགེངས་
[217b.6]པར་མཛད། །དེ་སྐུའི་འོད་ཟེར་རབ་བསིལ་བས། །བདག་ལ་རེག་པ་ཙམ་གྱིས་ན། །མཉམ་མེད་བདུད་རྩིའི་རྒྱུན་གྱིས་ནི། །འདི་དག་ཐམས་ཅད་ཚིམ་པར་མཛད། །བཀྲེས་སྐོམ་ལྟུང་བའི་སྡུག་བསྔལ་དང་། །མ་ལུས་བདག་གི་བཀྲ་མི་ཤིས། །དེ་ཡི་མོད་ལ་ཞི་གྱུར་ཅིང་། །
[217b.7]བདག་ནི་སེམས་ཅན་རྙེད་པར་གྱུར། །འདི་ཅི་ཡིན་ཞེས་སྤྲོ་བཅས་པར། །བདག་ལངས་དེ་ཚེ་ཐུབ་པ་ཡི། །ཤིན་ཏུ་མདངས་བཟངས་འགྲོ་བ་ཡི། །ཕུན་སུམ་ཚོགས་པའི་གནས་གྱུར་མཐོང་། །བདག་གིས་བལྟ་བྱའི་རིན་ཆེན་དེ། །མགོན་པོ་དཔལ་གྱི་མཆོག་གིས་ནི། །ཕྱོགས་
[218a]
[218a.1]རྣམས་རྒྱས་པར་གསལ་མཛད་པ། །མཐོང་ནས་བདག་སྔར་དད་པར་གྱུར། །དེ་ནས་རབ་དགའི་སེམས་ཀྱིས་སུ། །བདག་གིས་གོས་ཀྱི་དུམ་བུ་ནི། །ཡུང་བས་བཙོས་པ་དེ་ཉིད་ལ། །མཆོག་ཏུ་དགའ་བས་ཕུལ་བར་གྱུར། །ཀར་ནི་ཀ་ཡི་མེ་ཏོག་གཅིག །
[218a.2]བདག་གིས་བརྟུལ་ཞུགས་བཟང་དེ་ལ། །གཏོར་བ་དེ་ཡང་ཐུབ་པ་ཡི། །སྟེང་དུ་གདུགས་བཞིན་གནས་པར་གྱུར། །དེས་ན་དགའ་ཞིང་མགུ་བ་ཡིས། །ཞབས་གཉིས་ལ་ནི་རབ་བཏུད་དེ། །ཤིན་ཏུ་དང་བ་བསྐྱེད་པ་ཡིས། །བདག་གིས་སྨོན་ལམ་འདི་བྱས་སོ། །མགོན་པོ་
[218a.3]སྦྱིན་པ་འདི་ཡིས་ནི། །དེ་ཉིད་བདག་ནི་གཟུགས་ངན་པ། །ཡོངས་སུ་སྤངས་ཤིང་གཟུགས་བཟང་བའང་། །སྲིད་པའི་རྒྱ་མཚོ་ཐོབ་པར་ཤོག །གསེར་གྱི་མདོག་ཅན་གོས་རྣམས་ཀྱང་། །གསེར་སྦྱངས་ལྟ་བུ་གྱོན་པ་དང་། །བདག་གི་ལུས་དང་ཁ་དོག་ཀྱང་། །ཙན་དན་ཨུཏྤལ་
[218a.4]དྲི་ལྡན་ཤོག །བདག་གི་སྨོན་ལམ་དེ་དག་ནི། །འདིས་ནི་བྱས་པར་གྱུར་པ་ན། །གཟུགས་དང་ཁ་དོག་འདི་འདྲ་བ། །ཡིད་དུ་འོང་བ་བྱུང་བར་གྱུར། །གོས་ནི་རིན་ཐང་ཆེར་གྱུར་པ། །སེར་ཞིང་ཤིན་ཏུ་འཇམ་པ་དང་། །བདག་གི་ལུས་ལ་འཕྲལ་དུ་ནི། །སྐད་ཅིག་དེ་ཉིད་དག་ལས་བྱུང་། །
[218a.5]ནམ་མཁའི་ངོས་ནས་ལྷ་རྣམས་ཀྱིས། །མེ་ཏོག་དང་ནི་ཙན་དན་དང་། །ཨ་ག་རུ་དང་ཏ་མ་ལ། །ཨ་ག་རུ་སོགས་ཆར་འདི་ཕབ། །ཅ་ཅོ་རྣམ་པ་ཆེན་པོ་དང་། །ཡིད་འཕྲོག་པ་ཡི་རྔ་བརྡུང་ཞིང་། །སངས་རྒྱས་བཅོམ་ལྡན་ཕྱག་འཚལ་ཞེས། །བྱ་བའི་སྒྲ་ནི་སྨྲ་བར་གྱུར། །དེང་ནི་དགེ་
[218a.6]བ་འདི་བྱས་པས། །བདག་གི་གཟུགས་ནི་འདི་དག་དང་། །གསེར་འདྲའི་མདོག་ནི་ཡིད་འོང་བ། །འདི་ནི་བྱུང་བར་གྱུར་པ་ཡིན། །དེ་ནས་དེད་དཔོན་རྣ་ཅན་གྱིས་དེ་སྐད་ཐོས་པ་དང་། འཕྲལ་དུ་དད་པའི་ཤུགས་ཀྱིས་བ་སྤུའི་བུ་ག་ཐམས་ཅད་ལྡང་བར་གྱུར་ཅིང་དེ་བཞིན་གཤེགས་པ་རྣམ་པར་
[218a.7]གཟིགས་ལ་ཡང་དང་ཡང་དུ་ཕྱག་འཚལ་ཞིང་མཆོག་ཏུ་ཡིད་དགའ་བ་སྐྱེས་པ་དང་། བུ་གཟུགས་བཟང་བ་ལ་མིག་མི་འཛུམས་པས་བལྟས་ཏེ་སྨྲས་པ། བུ་ཚུར་ཤོག་ཡུ་བུ་འདེངས། དེ་ནས་གཞོན་ནུ་གཟུགས་བཟང་ཀྱིས་བདག་ནི་ཕ་འདི་ལས་སྐྱེས་པ་ཡིན་ནོ་སྙམ་ནས་ཤིན་ཏུ་གུས་པ་དང་བཅས་
[218b]
[218b.1]པས་ཕའི་རྐང་པ་ལ་ཕྱག་བྱས་ནས་ཡབ་ལེགས་པར་བྱོན་ཏམ་ཞེས་སྨྲས་ཏེ། ཕ་དང་ལྷན་ཅིག་ཁྱིམ་དུ་ཆས་སོ། །དེའི་ཚེ་ལྷའི་དབང་པོ་བརྒྱ་བྱིན་ལྷའི་ཤེས་པས་འོག་ཏུ་འཇུག་པར་འགྱུར་བ་ཡིན་པས་དེ་འདི་སྙམ་དུ་སེམས་ཏེ། དེད་དཔོན་རྣ་ཅན་འདི་ནི་སངས་རྒྱས་བཅོམ་ལྡན་འདས་ལ་ལྷག་པར་བྱ་བ་བྱས་པ་ཡིན་ནོ། །
[218b.2]དེ་རྩྭ་ཁྱིམ་ན་གནས་པ་ནི་རིགས་པ་མ་ཡིན་ནོ་སྙམ་ནས་ལྷའི་བུ་ལས་སྣ་ཚོགས་པ་ལ་སྨྲས་པ། ལས་སྣ་ཚོགས་པ་སོང་ལ་དེད་དཔོན་རྣ་ཅན་གྱི་ཁང་པ་རིན་པོ་ཆེ་སྣ་བཞི་ལས་གྲུ་བཞི་པའི་རྣམ་པ་གྱིས་ཤིག །དེ་ནས་ལས་རྣམ་པ་སྣ་ཚོགས་པས་བརྒྱ་བྱིན་གྱི་ཚིག་སྨྲས་ཏེ། སྐད་ཅིག་དེ་ཉིད་ལ་
[218b.3]རྒྱལ་པོའི་ཕོ་བྲང་མཉན་ལྡན་དུ་འོངས་ནས་རིན་པོ་ཆེ་སྣ་བཞིའི་ཕ་གུ་ལས་བརྩིགས་ཤིང་ཀ་བས་བཏེག་པ། ཁྱམས་མཐོ་ཞིང་མཛེས་པ་དང་། སྐར་ཁུང་དང་། སྒོ་ཁང་དང་། ངོས་ན་ལྕོག་གིས་ལེགས་པར་བཀོད་པའི་ཡན་ལག་ཅན་དང་། གདུང་ཕྲན་ལ་སྤང་ལེབ་ལེགས་པར་བཀོད་
[218b.4]པ། ཤིན་ཏུ་མཐོ་བའི་ཁང་པ་ཟུར་བཞི་པ། ཤིན་ཏུ་ཡིད་དུ་འོང་བའི་རྟ་བབས་ཀྱིས་སྒོ་ཉེ་བར་མཛེས་པ་དང་། སྟོན་ཀའི་སྤྲིན་མཛེས་པ་དང་། གངས་ཀྱི་ཕུང་པོ་དང་། ཟླ་བའི་འོད་ཟེར་དང་། པདྨའི་རྩ་བ་ལྟར་དཀར་བ། གདུགས་དང་རྒྱལ་མཚན་དང་། བ་དན་བསྒྲེང་བ་དང་། མུ་ཏིག་གི་ཆུན་འཕྱང་དང་གོས་
[218b.5]ཀྱི་ཆུན་འཕྱང་གི་ཚོགས་བཏགས་པ། གྲོང་ཁྱེར་གྱི་མཆོག་མ་ལུས་པ་ཉེ་བར་མཛེས་པར་བྱེད་པའི་གནས་སུ་གྱུར་པ། ཤིན་ཏུ་འབར་བའི་གསེར་གྱི་རང་བཞིན་ཅན་གསར་དུ་མངོན་པར་འབྱུང་བའི་ཨ་ནུའི་རྒྱན་བྱས་ཤིང་ཡན་ལག་བརྒྱད་པའི་ཆུས་ཡོངས་སུ་གང་བའི་བུམ་པ་བརྒྱད་ཀྱིས་སྒོ་ཉེ་བར་
[218b.6]གནས་པར་བྱས་པ། དཔག་ཏུ་མེད་པའི་དངུལ་དང་། བཻ་ཌཱུཪྻ་དང་། ཤེལ་དང་། སྤུག་དང་། མཐོན་ཀ་དང་། མཐོན་ཀ་ཆེན་པོ་ལ་སོགས་པའི་རིན་པོ་ཆེ་རྣམས་ཀྱིས་ཡོངས་སུ་སྐོར་བ། གཏེར་དུ་མས་ཡོངས་སུ་ཁེངས་པ། རིན་པོ་ཆེའི་རྫིང་དང་། ཡོ་བྱད་ཀྱིས་ཡོངས་སུ་གང་བའི་ཁང་
[218b.7]པའི་མཆོག་ཅིག་བྱས་སོ། །དེ་ནས་དེད་དཔོན་རྣ་ཅན་གྱིས་ཁྱིམ་དུ་འོངས་པ་དང་། དེའི་ཆུང་མ་དགའ་ཞིང་མགུ་ལ་རངས་པས། གསེར་གྱི་རིལ་བ་ལས་ཆུ་བྱིན་ཏེ་སྨྲས་པ། རྗེའི་སྲས་ཁྱེད་ཀྱི་བསོད་ནམས་ཀྱི་མཐུས་འགའ་ཞིག་གིས་འདི་ལྟ་བུའི་ཁང་པའི་མཆོག་བྱས་སོ། །དེ་ནས་
[219a]
[219a.1]དེད་དཔོན་རྣ་ཅན་གཞལ་ཡས་ཁང་དེ་ལ་མངོན་པར་ལྟ་ཞིང་། མཆོག་ཏུ་དགའ་བ་དང་ཡིད་བདེ་བ་སྐྱེས་ནས། སངས་རྒྱས་བཅོམ་ལྡན་འདས་ལ་ཤིན་ཏུ་ཡང་དད་པ་སྐྱེས་ཏེ། བ་སྤུ་ལྡང་བ་དང་ཐལ་མོ་སྤྱི་བོར་སྦྱར་ཏེ། དེ་བཅོམ་ལྡན་འདས་དེ་བཞིན་གཤེགས་པ་དགྲ་
[219a.2]བཅོམ་པ་ཡང་དག་པར་རྫོགས་པའི་སངས་རྒྱས་བསམ་གྱིས་མི་ཁྱབ་པའི་ཡིད་བཞིན་གྱི་ནོར་བུ་རིན་པོ་ཆེ་བསོད་ནམས་ཀྱི་ཞིང་བླ་ན་མེད་པ་ལ་ཕྱག་འཚལ་ལོ་ཞེས་སྨྲས་ཏེ་ཕྱག་བྱས་ནས་རབ་ཏུ་དགའ་བས་རྒྱས་པའི་བཞིན་དང་བས་སྨྲས་པ། ཨེ་མའོ་ཡོན་ཏན་རང་བཞིན་ཞི། །ཉེས་པ་ཐམས་
[219a.3]ཅད་རབ་སྤངས་པས། །གང་དུ་བདག་གིས་ས་བོན་བཏབ། །འབྲས་བུ་དེ་ཉིད་སྩོལ་བར་མཛད། །སྦྱིན་པ་ངན་ངོན་དེ་ཙམ་ནི། །ལེགས་པར་སྦྱར་བ་ཀུན་བྲལ་གང་། །ཉམས་དགའ་མཐོང་བའི་གསེར་དང་ནི། །རིན་ཆེན་རང་བཞིན་ཁྱིམ་འདི་གང་། །རྩིག་པའི་ལྷག་མ་ལུས་པ་ཙམ། །བདག་
[219a.4]ཁྱིམ་མྱ་ངན་འཕེལ་བྱེད་པའི། །སྤྲིན་དང་ངེས་པར་བྲལ་བ་ཡི། །ཟླ་བའི་འོད་ལྟར་དཀར་འདི་གང་། །བྱི་བ་འབུས་རྟོལ་བུ་ག་ཡི། །སྐར་ཁུང་ལྡན་པའི་ཁྱིམ་ཡང་གང་། །རིན་ཆེན་རབ་མཆོག་དུ་མ་ཡི། །སྐར་ཁུང་ལྡན་པའི་ཁྱིམ་འདི་གང་། །ཁྲོས་པའི་ཁྱིམ་ཁྱབ་ཚེར་མ་དང་། །མི་གཙང་ཚོགས་
[219a.5]ཀྱིས་གཟིངས་དེ་གང་། །ཁྱིམ་འདི་སྔོན་ཆད་དེ་འདྲ་ལས། །རིན་ཆེན་བསགས་འདི་གང་ཡིན་མཚར། །སྦྲུལ་གྱིས་བོར་བའི་ལྤགས་རྙིང་འདི། །འཕྱང་བའི་གོས་ཀྱིས་ཁྱབ་དེ་གང་། །ཕྲ་བའི་གོས་ནི་ཕུན་ཚོགས་བཀྲ། །རྔ་ཡབ་འཕྱང་བ་འདི་ནི་གང་། །ཁྱི་མོས་བསྡུས་པའི་རུས་གོང་ནི། །དཀར་པོས་
[219a.6]གཅལ་བཀྲམ་ཁྱིམ་དེ་གང་། དྲི་ཞིམ་མེ་ཏོག་བཟང་པོ་འདི། །སིལ་མས་ཉེ་བར་མཛེས་འདི་གང་། །མྱ་ངན་འཆི་མའི་རྒྱུན་གྱིས་ནི། །རྟག་ཏུ་བརླན་པའི་ཁྱིམ་དེ་གང་། །དྲི་ཞིམ་གླ་རྩི་ཙན་དན་གྱི། །ཆུ་ཡིས་ཆག་ཆག་བཏབ་འདི་གང་། །མེ་ལྕེས་ཚིག་ཅིང་ཁྭ་རྣམས་ཀྱིས། །མི་རྣམས་རྟ་བབས་ཅན་དེ་གང་། །
[219a.7]གསེར་དང་རིན་ཆེན་མུ་ཏིག་མཆོག །ཕྲེང་བས་ཉེ་བར་མཛེས་འདི་གང་། །སྤང་ལེབ་ཆག་པའི་སྒོ་ཡིས་ནི། །བསྒྲིབས་པ་ཡི་ནི་ཁྱིམ་འདི་གང་། །ཤེལ་ལས་བསྒྲུབས་པའི་སྒོ་གླེགས་ནི། །སྒོ་འཕར་ལྡན་པ་འདི་ནི་གང་། །ང་ནི་ཡུན་རིང་ཉམས་པ་ཡི། །འཇིག་དུམ་ཕྱེད་པའི་ཁྱིམ་འདི་གང་། །ནོར་
[219b]
[219b.1]བུའི་རང་བཞིན་ཀ་བ་དང་། །སྒོ་གང་གིས་ནི་བརྒྱན་འདི་གང་། །སྨྲེ་སྔགས་སྒྲ་ཡིས་ཀུན་དུ་ནི། །ཁྱབ་པའི་བཞི་མདོ་དེ་ནི་གང་། །རོལ་མོའི་སྒྲ་དང་གླིང་བུ་ཡི། །སྐད་དང་ཡང་དག་ལྡན་ནི་གང་། །སྔོན་ནི་ཐོད་པའི་ཚོགས་དང་ནི། །ཕྱག་དར་ཕུང་པོས་སེམས་ཏེ་གང་། །རིན་ཆེན་ཕུང་པོས་མཛེས་པ་གང་། །
[219b.2]གང་དུ་བསགས་པ་འདི་ནི་གང་། །ལྕོག་དང་གདུང་ཕྲན་བཀོད་པ་རྣམས། །མ་ལུས་ལྷག་པར་གྱུར་ཏེ་གང་། །ནང་ན་མཐོན་ཀ་ཆེན་པོ་དང་། །ཤེལ་ནི་ཆེན་པོ་བཞག་འདི་གང་། །སྟན་དང་བྲལ་བའི་སོ་ཕག་ནི། །གཅིག་ལ་བརྟེན་པར་གྱུར་དེ་གང་། །སྣ་ཚོགས་གོས་གཡོགས་ནང་ཚངས་ཅན། །
[219b.3]བརྒྱ་ཕྲག་དང་ནི་ལྡན་དེ་གང་། །སྔོན་ནི་གསེགས་མས་ཁྱབ་གྱུར་པའི། །ས་ཡི་ཆ་ཡི་མལ་དེ་གང་། །རྒྱ་ཆེན་དང་ལྡན་དཔལ་གྱི་ཁྲི། །ཉམས་སུ་དགའ་བ་འདི་ནི་གང་། །རྩྭས་གཡོགས་པ་ཡི་མལ་སྟན་ནི། །བདག་ལ་རབ་ཏུ་རྩུབ་སྟེ་གང་། །ཤིང་བལ་ཡང་ཞིང་འཇམ་པའི་སྟན། །དེང་རབ་
[219b.4]ཡིད་དུ་འོང་བ་གང་། །ཁྱིམ་ནས་ཁྱི་ཡིས་གང་གྱུར་པས། །ཤིན་ཏུ་དྲི་མི་ཞིམ་དེ་གང་། །གཞལ་ཡས་ཁང་ན་ཡིད་འོང་བ། །དྲི་ཞིམ་དམ་པས་བསྒོས་འདི་གང་། །སྔོན་ཆད་ཁང་པའི་ཕྱི་ནང་ན། །གོས་དེངས་སྣལ་མས་ཁྱབ་དེ་གང་། །སྣ་ཚོགས་རིན་ཆེན་མཆོག་གྱུར་པས། །རྣམ་སྤྲས་
[219b.5]ཉམས་དགའ་འདི་ནི་གང་། །ཁྲ་ཡིས་མི་གཙང་རི་མོ་ཡིས། །དཀར་པོ་བརྒྱ་རབ་འཆང་དེ་གང་། །རྒྱན་རྣམས་སྣ་ཚོགས་མུ་ཏིག་གིས། །དྲ་བས་ཉེ་བར་མཛེས་འདི་གང་། །སྡུག་བསྔལ་ཚིག་སྨྲེ་ལག་པ་དག །བསྒྲེང་བའི་ཁང་པ་དེ་ནི་གང་། །དྲི་མེད་གདུགས་དང་བ་དན་དག །བསྒྲེངས་
[219b.6]པས་བརྒྱན་པར་གྱུར་འདི་གང་། །སྐྱོབ་པ་བསོད་ནམས་ཞིང་གྱུར་པ། །གང་ཞིག་བྱོན་པས་བདག་དེང་ཉིད། །དབུལ་བའི་རྒྱ་མཚོ་ལས་སྒྲོལ་བ། །མགོན་པོ་དེ་ལ་ཕྱག་འཚལ་ལོ། །གང་ཞིག་བྱོན་པས་བདག་དེ་ཉིད། །ཕུན་ཚོགས་འདི་འདྲ་ཐོབ་འགྱུར་བ། །ཐམས་ཅད་མཁྱེན་པ་རྣམ་
[219b.7]པར་གཟིགས། །འཇིག་རྟེན་མགོན་ལ་ཕྱག་འཚལ་ལོ། །རྣམ་པར་རྒྱལ་བཞིན་བསམ་ཡས་པའི། །ཡོན་ཏན་དཔག་མེད་རྣམས་ཀྱིས་བརྒྱན། །ཡང་དག་བྱོན་ནས་དེ་བདག་ནི། །གཞལ་ཡས་ཁང་མཆོག་ཐོབ་པར་མཛད། །སྟོན་པ་དེ་ནི་ལེགས་རྙེད་པས། །ཏི་སེའི་རྩེ་མོ་བསྒྲེངས་པ་
[220a]
[220a.1]ལྟའི། །སྟོན་ཀའི་ཟླ་བ་ལྟར་དཀར་བའི། །གཞལ་ཡས་ཁང་མཐོ་ཐོབ་པར་གྱུར། །དེ་ཉིད་གྲོང་ཁྱེར་འདི་མགོན་མེད། །དབུལ་བའི་སྡུག་བསྔལ་ཅན་གྱུར་ནས། །དེ་ཉིད་ཀུན་གྱི་མཆོག་གྱུར་ཅིང་། །ནོར་ཆེ་བ་དང་ལྡན་པར་གྱུར། །ས་བོན་དེ་ཉིད་བཏབ་ཙམ་གྱིས། །འབྲས་
[220a.2]བུ་འཕྲལ་དུ་སྩོལ་བ་པོ། །འཇིག་རྟེན་མཆོག་གྱུར་ཁྱབ་བདག་དེ། །སུ་ཞིག་གིས་ནི་མཆོག་འོས་མིན། །དེ་ནས་དེད་དཔོན་རྣ་ཅན་དད་པའི་ཤུགས་དྲག་པོས་སེམས་ཀྱི་རྒྱུད་བརླན་པ་དང་བསམས་པ། བཅོམ་ལྡན་འདས་བྱོན་ནས། །ངལ་འབྱོན་པ་འདི་ལྟ་བུ་ཐོབ་པར་མཛད་པ་ཡིན་པས།
[220a.3]ད་ཡང་ངས་དང་པོ་ཉིད་དུ་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ཁང་པ་འདིར་སྤྱན་དྲངས་ལ། ཉན་ཐོས་ཀྱི་ཚོགས་དང་བཅས་པ་ལ་བཤོས་གཙང་དབུལ་བར་བྱའོ་སྙམ་ནས། གུས་པ་ཆེན་པོས་དེ་བཞིན་གཤེགས་པ་རྣམ་པར་གཟིགས། ཉན་ཐོས་ཀྱི་དགེ་འདུན་
[220a.4]དང་བཅས་པ། ཁང་པའི་ནང་དུ་སྤྱན་དྲངས་ཏེ། ཞལ་ཟས་རོ་བརྒྱ་པ་ཉིན་ཞག་བདུན་གྱི་བར་དྲངས་ནས་ཞབས་གཉིས་ལ་ཕྱག་བྱས་ཏེ། ཇི་སྲིད་འཚོའི་བར་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པར་གྱུར་ཏོ། །དེ་ནས་ཉི་མ་གཞན་ཞིག་ལ་ཞིང་བསྲུང་བའི་སྐྱེས་བུ་ཞོ་ཤལ་འཚོ་བ་ཞིག་ལ།
[220a.5]རྗེ་བོས་འབྲས་ཆན་གྱི་ཐུམ་བུ་ཞིག་བྱིན་པ་དང་། དེ་ཐོགས་ཏེ་ཞིང་ལས་ལ་ཆས་པ་དང་། ལམ་གྱི་བར་ཞིག་ཏུ་ཞོ་ཤས་འཚོ་བའི་སྐྱེས་བུ་དེས་དགེ་བསྙེན་གཞན་ཞིག་ལ། དེད་དཔོན་རྣ་ཅན་གྱིས་མ་ཤའི་སྣུམ་ཁུར་གཅིག་སངས་རྒྱས་བཅོམ་ལྡན་འདས་ལ་ཕུལ་བས། འབྱོར་བ་འདི་ལྟ་བུ་ཐོབ་ཅེས་
[220a.6]ཐོས་སོ། །ཐོས་ནས་ཀྱང་། སྐྱེས་བུ་དེས་དགེ་བསྙེན་དེ་ལ་སྨྲས་པ། ཀྱེ་བཞིན་བཟངས་བཅོམ་ལྡན་འདས་དེ་ཆེ་བའི་ཡོན་ཏན་དེ་ཇི་ལྟ་བུ་ཞིག་ཡོད། དེས་སྨྲས་པ། བཞིན་བཟངས་བཅོམ་ལྡན་འདས་དེའི་ཡོན་ཏན་དེའི་ཁྱད་པར་སྨྲ་བར་ག་ལ་ནུས། འོན་ཀྱང་མདོར་བསྡུས་པའི་དོན་འདི་ཉོན་
[220a.7]ཅིག །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་དེ་ནི་སྐྱེས་བུ། རབ་མཆོག་མཚན་གྱིས་བརྒྱན་པས། གསེར་གྱི་རི་ལྟར་སྣང་བས། ཉི་མ་དང་ཟླ་བ་བས་ལྷག་པའི་འོད་གཅིག་པུ་ལ། དུལ་བ། བརྟུལ་ཞུགས་བཟང་བ། ཐུགས་དུལ་བ། གསུང་སྙན་བ། ཆ་ལུགས་བཟང་བ།
[220b]
[220b.1]སྐུ་མཛེས་པ། ཞལ་མཛེས་པ། སྤྱན་མཛེས་པ། ཕྲིན་ལས་བཟང་བ། ཆོས་བཟང་བ། བཟོད་པ་དང་ལྡན་པ། སྤོབས་པ་དང་ལྡན་པ། དེས་པ་ཤིན་ཏུ་འདྲེན་པ་དུལ་བ་མཁྱེན་པ། ཞི་བ་མཁྱེན་པ། སྤྱན་ཡངས་པ། བྱས་པ་མཁྱེན་པ། དབང་པོ་རབ་ཏུ་ཞི་བ། དབང་པོའི་རྟ་ཤིན་ཏུ་དུལ་བ།
[220b.2]དབང་པོ་ཤིན་ཏུ་ཞི་བ། ཆོས་ཀྱི་རྒྱལ་པོ་ཆེན་པོ། སེམས་ཅན་གྱི་སྙིང་པོ་ཆེན་པོ། འཇིག་རྟེན་གྱི་མགོན་པོ་ཆེན་པོ། ཡེ་ཤེས་ཀྱི་ཏོག་ཆེན་པོ། སྨྲ་བའི་དཔའ་བོ་ཆེན་པོ། བསོད་ནམས་ཀྱི་མཛོད་ཆེན་པོ། ཆོས་ཀྱི་གྲུ་ཆེན་པོ། དེད་དཔོན་ཆེན་པོ། སྦྱིན་གནས་ཆེན་པོ། གྲུབ་ཆེན་པོ་
[220b.3]ཆོས་ཀྱི་སྦྱིན་བདག་ཆེན་པོ། སྲེད་པ་རྣམས་གཅོད་པར་མཛད་པ། རྨོངས་པ་ངེས་པར་འཇིག་པར་མཛད་པ། ཁྲོ་བ་ཞི་བར་མཛད་པ། ཐར་པ་སྟོན་པར་མཛད་པ། ཆོས་ཡང་དག་པར་མཛད་པ། ངན་པ་ལས་འཕོ་བར་མཛད་པ། ལམ་བཟང་པོ་སྟོན་པར་མཛད་པ། ཐེ་ཚོམ་གཅོད་པར་
[220b.4]མཛད་པ། བདེན་པ་ཡང་དག་པར་སྟོན་པར་མཛད་པ། ཉོན་མོངས་པ་ཞི་བར་མཛད་པ། བདུད་འཇོམས་པར་མཛད་པ། འཇིག་རྟེན་རྣམས་སྒྲོལ་བར་མཛད་པ། ཚངས་པས་མཆོད་པ། བརྒྱ་བྱིན་གྱིས་ཡང་དག་པར་བཀུར་བ། འཇིག་རྟེན་ཐམས་ཅད་པས་ལྷག་པ། འཇིག་རྟེན་ཐམས་ཅད་
[220b.5]ཀྱི་མཛེས་པ། སེམས་ཅན་ཐམས་ཅད་ཀྱི་མཆོག །སྡུག་བསྔལ་ཐམས་ཅད་གཅོད་པར་མཛད་པ། ཐམས་ཅད་རིག་པ། ཚུལ་དང་དུལ་བ་ལ་མཁས་པ། ཟག་པ་ཐམས་ཅད་ལས་འདས་པ། སྨྲ་བའི་གཙོ་བོ་ཟིལ་གྱིས་མ་མནན་པ། ཉེས་པ་ཐམས་ཅད་ཟིལ་གྱིས་མ་གཡེངས་པ། དོན་ཐམས་
[220b.6]ཅད་ལ་མངོན་པར་བརྩོན་པ། གཟུགས་དང་ལྡན་པ། ཚུལ་ཁྲིམས་དང་ལྡན་པ། བསམ་གཏན་དང་ལྡན་པ། བརྩོན་འགྲུས་དང་ལྡན་པ། ཡེ་ཤེས་དང་ལྡན་པ། རེ་བ་མི་མངའ་བ། སྒྱུ་མི་མངའ་བ། ནན་མི་མངའ་བ། སྤྲོས་པ་མི་མངའ་བ། སྐྱོན་མེད་པར་ཞུགས་པ། འཇུག་པ་དང་ཟད་པའི་
[220b.7]སྟོབས་ཉེ་བར་སྟོན་པར་མཛད་པ། སེམས་ཅན་ཐམས་ཅད་ལ་བྱམས་པའི་དགོངས་པ་ཅན། སྡིག་པ་རྣམས་ལས་གྲོལ་བ། ལྷག་པར་མོས་པ་དང་ལྡན་པ། བླ་ན་མེད་པ། གཙོ་བོ། སྟོན་པ་པོ། ཉོན་མོངས་པའི་ནད་ཀྱིས་གདུངས་པ་རྣམས་ཀྱི་སྨན་པ་ཆེན་པོ། རང་བྱུང་ཁྱབ་བདག་ཡང་
[221a]
[221a.1]དག་པར་སྡོམ་པའི་བདག་ཉིད་ཅན། མཐུ་ཚད་མེད་པ། མཛད་པ་ཉུང་བ། ཆོ་ག་མཁྱེན་པ་དང་ལྡན་པ། དུས་དང་ལྡན་པ། ཡེ་ཤེས་དང་ལྡན་པ། ཉོན་མོངས་པའི་དགྲ་ལས་ངེས་པར་རྒྱལ་བ། མེ་རབ་ཏུ་ཞི་བ། མི་བསྐྱོད་པའི་ཆོས་དང་ལྡན་པ། མཆོག་ཏུ་སྡུག་བསྔལ་བའི་འཇིག་
[221a.2]རྟེན་མ་རིག་པའི་འདམ་ལ་ནུབ་པ་ལ་གཟིགས་ཤིང་དེ་ལ་ཉིད་ཀྱིས་ཡང་དག་པར་འདོན་པར་སྤྱོད་ལ། ཉིད་ཀྱི་མཐུའི་བདག་ཉིད་སེམས་ཅན་ཐམས་ཅད་ལ་མཚུངས་པར་ཡོད་པར་བཞེད་པའི་ཐུགས་རྗེ་ཆེན་པོས་དོན་མཛད་པའི་བློ་གྲོས་ཀྱི་མཆོག་གིས་འདི་ལས་འགྲོ་བ་འདོན་པར་མཛད་པ།
[221a.3]ཇི་ལྟར་སྡུག་བསྔལ་རྣམས་གནོན་པར་བྱ། ཇི་ལྟར་སྐྲག་པ་རྣམས་དབུགས་དབྱུང་བར་བྱ། ཇི་ལྟར་ན་འཁོར་བར་ནུབ་པ་རྣམས་གདོན་པར་བྱ། ཇི་ལྟར་ན་བཀྲེས་པ་རྣམས་ཚིམ་པར་བྱ་ཞེས་དེ་ལྟ་བུའི་བརྟན་པོ་ཡང་དག་པར་བསྐྱེད་དེ། བརྩོན་འགྲུས་མཆོག་རྩོམ་པར་མཛད་ཅིང་། སྐུ་ཚེ་བྱེ་བ་བརྒྱ་སྟོང་
[221a.4]དུ་སྔ་མ་བཞིན་དུ་ཟས་དང་། སྐོམ་དང་གནས་དང་། ལྷམ་དང་། བཟའ་བ་དང་། གདུགས་དང་། བཞོན་པ་དང་། སྟན་ལ་སོགས་པ་ཡིད་དུ་འོང་བ་དང་། གླང་པོ་ཆེ་དང་། རྟ་དང་ཆུང་མ་དང་བུ་དང་། བྲན་ཕོ་དང་། བྲན་མོ་དང་། མགོ་དང་། མིག་དང་། བདག་གི་ཤ་དྲོན་པོ་བཅད་ནས་བརྒྱ་བྱིན་ཁྲའི་
[221a.5]གཟུགས་ཅན་ལ་སོགས་པ་དང་། སེམས་ཅན་ཐམས་ཅད་ལ་ཐབས་ཐམས་ཅད་ཀྱིས་ཕན་པར་དགོངས་པ། དུས་ཐམས་ཅད་དུ་ཡང་རྒས་པ་དང་། ན་བ་དང་། ཕོངས་པ་དང་། ཀུན་དུ་རྨོངས་པ་དང་། ཀུན་དུ་འཁྲུལ་པ་དང་། འཁྲུགས་པ་དང་། མི་བདེ་བར་གནས་པ་རྣམས་ལ་གཟིགས་ནས་ཐམས་
[221a.6]ཅད་དབུགས་ཕྱུང་སྟེ། ཡོད་དམ་མེད་པ་ལ་ཡང་སྤྱོད་པ་ཇི་ལྟ་བས་བརྟན་པར་མཛད་པ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ལ་སོགས་པའི་ཡོན་ཏན་སྐུ་ཚེ་བརྒྱ་སྟོང་དུ་མར་བསགས་པས་ཞི་བའི་བྱང་ཆུབ་ཀྱི་མཆོག་བླ་ན་མེད་པ་བརྙེས་
[221a.7]པའོ། །གཞན་ཡང་ཡང་དག་པར་རྫོགས་པའི་སངས་རྒྱས་གྲགས་པས་ཁྱབ་པ། དབུགས་འབྱིན་པའི་ཆོས་ཐུགས་རྗེ་སྟོན་པར་མཛད་པ་ཡེ་ཤེས་ཡོངས་སུ་རྫོགས་པ། བརྩོན་འགྲུས་ཆེ་བ། དམ་བཅས་པ་ཐམས་ཅད་མཐར་ཕྱིན་པར་མཛད་པའོ། །ཉེས་པ་ཐམས་ཅད་ལས་ཉེ་བར་གྲོལ་བ་རྨོངས་
[221b]
[221b.1]པ་རྣམས་ཉེ་བར་བསལ་བ། དུལ་བ་དང་། ཞི་བ་དང་། དབང་པོའི་ཡུལ་ཐམས་ཅད་ལ་མ་ཆགས་པ། ཐམས་ཅད་ཀྱི་དབང་ཕྱུག །ལུས་ཀྱི་ཐ་མ་བརྙེས་པ། ཚད་མེད་པའི་མཐུའི་འོད་ཀྱིས་བརྒྱན་པའི་ཡེ་ཤེས་ཀྱི་མཛོད། ཟླ་བ་རྒྱས་པ་བས་ལྷག་པའི་འོད་དང་ལྡན་པའི་ཞལ་མངའ་བ། ལྷའི་དབང་
[221b.2]པོ་དང་། ལྷ་མ་ཡིན་གྱི་དབང་པོ་དང་། ཀླུའི་དབང་པོ་རྣམས་ཀྱིས་མོས་པས་རབ་ཏུ་དང་བ་དང་། རྟག་ཏུ་ཕྱག་བྱས་པ། གཟི་བརྗིད་རབ་ཏུ་འབར་བ། བསོད་ནམས་དང་གྲགས་པ་དང་ལྡན་པ། དྲང་སྲོང་ཆེན་པོ་བྱུང་བ། གསེར་ཤིན་ཏུ་སྦྱངས་པ། ཆོས་ཀྱི་དབང་ཕྱུག་མཆོག་གི་ཆོས་ཀྱི་ཕ་རོལ་
[221b.3]ཏུ་ཕྱིན་པ། སེམས་ཅན་གྱི་མཆོག །ཅང་ཤེས་པ་གྲོལ་བ། དཔའ་བ། ལྷའི་ཡང་ལྷ། ཡང་དག་པར་རྫོགས་པའི་སངས་རྒྱས། དེའི་ཡོན་ཏན་མ་ལུས་པར་སྟོན་པ་སུ་ཞིག་གིས་ནུས། གཞན་ཡང་། གཟུགས་དང་མདངས་བཟང་ཐམས་ཅད་ཀྱི། །ཕུན་སུམ་ཚོགས་པས་ལེགས་བརྒྱན་པ། །
[221b.4]སྐུར་ལྡན་སངས་རྒྱས་མ་གཏོགས་པ། །འདི་འདྲའི་མཆོག་གཞན་ཡོད་མ་ཡིན། །སངས་རྒྱས་འདྲ་བའི་སྟོན་པ་མེད། །སངས་རྒྱས་འདྲ་བའི་བློ་བཟང་མེད། །སངས་རྒྱས་འདྲ་བའི་རྟོགས་པ་མེད། །སངས་རྒྱས་འདྲ་བའི་ཐུབ་པ་མེད། །སངས་རྒྱས་འདྲ་བའི་སྣོད་མེད་དེ། །སངས་རྒྱས་འདྲ་བའི་
[221b.5]བདེ་ལྡན་མེད། །སངས་རྒྱས་འདྲ་བའི་དུལ་བ་མེད། །སངས་རྒྱས་འདྲ་བའི་གཙོ་བོ་མེད། །སངས་རྒྱས་འདྲ་བའི་སྨྲ་བ་མེད། །སངས་རྒྱས་འདྲ་བའི་ཕ་མེད་དེ། །སངས་རྒྱས་འདྲ་བའི་གཉེན་འདུན་མེད། །སངས་རྒྱས་འདྲ་བའི་བཤེས་མེད་དོ། །བདག་གི་མེད་ཅིང་དྲེགས་པ་མེད། །འཇིགས་
[221b.6]པ་མེད་ཅིང་ཉེས་པ་མེད། །སྲིད་པའི་དགོན་པ་ངེས་རྒལ་ཞིང་། །འགྲན་ཟླ་མེད་ཅིང་སྐྱོན་མི་མངའ། །མཛེས་དུལ་ཞི་ཞིང་གཙང་བ་དང་། །དྲན་ལྡན་སྟོབས་ལྡན་དབང་དང་ལྡན། །སེམས་ཅན་ཀུན་ལ་ཕན་མཛད་པ། །སངས་རྒྱས་འདྲ་བ་གཞན་མེད་དོ། །མདོར་ན་ཡོན་ཏན་དམ་པ་ནི། །ཁྱད་པར་
[221b.7]སྣ་ཚོགས་ལྡན་པས་ན། །ཁམས་གསུམ་ན་ནི་སངས་རྒྱས་དང་། །མཉམ་པ་མེད་པར་གཟུང་བར་གྱིས། །དེ་ཐོས་པ་དང་ཞོ་ཤས་འཚོ་བའི་སྐྱེས་བུ་དེ་དད་པས་བ་སྤུ་ལྡང་ཞིང་ཤིན་ཏུ་རྙེད་པར་དཀའ་བའི་སྤོབས་པ་འཕྲལ་དུ་སྐྱེས་ཏེ། དེས་སྨྲས་པ། དེད་དཔོན་རྣ་ཅན་གྱི་སྲེད་པས་དེ་ལྟ་བུའི་སྦྱིན་
[222a]
[222a.1]གནས་དམ་པ་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ལ་མ་ཤའི་སྣུམ་ཁུར་ཅིག་ཕུལ་ནས། སྐད་ཅིག་དེ་ཉིད་ལ་དེད་དཔོན་དེ་དབུལ་བ་མེད་པར་གྱུར་ཅིག་ཅེས་དེ་ལྟར་སེམས་ཀྱི་ནོར་བུ་རིན་པོ་ཆེར་གྱུར་པ་དེ་བཞིན་གཤེགས་པ་ལས་རྙེད་དེ། ཤིན་
[222a.2]ཏུ་ཞན་པ་ལ་ལོངས་སྤྱོད་ཀྱི་རྒྱུར་གྱུར་པའི་སྨོན་ལམ་བཏབ་པ་ཡིན་ལ། ང་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པ་བྱེ་བ་བརྒྱ་སྟོང་དཔག་ཏུ་མེད་པར་ཡང་མི་མཐོང་བ། ཤིན་ཏུ་བལྟ་བར་འོས་པ། བླ་ན་མེད་པ་
[222a.3]བསྐལ་པ་བརྒྱ་སྟོང་དཔག་ཏུ་མེད་པར་སེམས་ཅན་ཐམས་ཅད་ཀྱི་དོན་ལ་ཞུགས་པར་བསགས་པའི་བསོད་ནམས་ཀྱི་ཚོགས་མངའ་བ་ཐུགས་རྗེ་ཆེན་པོ་ལས་མི་ལྡོག་པ། འཁོར་བ་དུ་མའི་ཉོན་མོངས་པའི་དུག་ཅན་གྱི་སྦྲུལ་ཆེན་པོས་ཟིན་པའི་དམན་པ་རྣམས་ལ་རྗེས་སུ་ཐུགས་བརྩེ་བ། རྣམ་པར་
[222a.4]ལྟུང་པའི་འགྲོ་བ་རྣམས་ལ་ཁྱད་པར་དུ་མཉེན་གཤིན་པ་རྗེས་སུ་མི་སྤོང་བའི་ཉེ་དུ་ཡིན་ལ། ངས་ནི་དུས་དཔག་ཏུ་མེད་པར་ལོངས་སྤྱོད་མ་བསྒྲུབས་པ་ཡིན་ཏེ། ངས་ཞིང་ལས་ཀྱིས་བསྒྲུབས་པའི་འབྲས་ཆན་གྱི་སློང་མོ་ཤིན་ཏུ་ཞན་པ་རྙེད་པ་འདི་ཕུལ་ལ་མཉེས་པར་བྱ་སྟེ། དེའི་ཚེ་གང་གིས་སེམས་ཅན་
[222a.5]ཐམས་ཅད་ཀྱི་མཆོག་ཏུ་འགྱུར་བ་དེ་ལྟ་བུའི་སྨོན་ལམ་གདབ་པར་བྱའོ་སྙམ་པའི་ཡིད་ལ་བརྗོད་པའི་རྗེས་ཐོགས་ཉིད་ལ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་སེམས་དང་སེམས་ཀྱི་རྟོགས་པ་མཁྱེན་ནས་རྫུ་འཕྲུལ་གྱིས་གཤེགས་ཏེ་དེའི་མདུན་དུ་བཞུགས་
[222a.6]སོ། །ལས་བྱེད་པའི་སྐྱེས་བུ་དེས་དེ་བཞིན་གཤེགས་པ་རྣམ་པར་གཟིགས་སྐུ་བལྟ་བས་ཆོག་མི་ཤེས་པ། གསེར་ཤིན་ཏུ་སྦྱངས་པ་ལྟར་མངོན་པར་མཛེས་པའི་མདངས་དང་ལྡན་པའི་ལྷའི་རིའི་རྩེ་མོ་ལ་ཉི་མ་འཆར་ཀའི་འོད་ཟེར་རྣམ་པར་འབྱུང་བས་མཚམས་སྣང་བར་བྱས་པས་ཤིན་ཏུ་གསལ་བར་
[222a.7]བྱས་པ་ལྟ་བུའི་སྐུ་ལ་འོད་དང་ལྡན་པ་མཐོང་ངོ་། །མཐོང་ནས་ཀྱང་མཆོག་ཏུ་དགའ་བ་དང་ཡིད་བདེ་བ་སྐྱེས་ནས་དད་པའི་ཤུགས་ཆེན་པོས་འབྲས་ཆན་ཐུམ་བུ་བླངས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ལྷུང་
[222b]
[222b.1]བཟེད་དུ་ཕུལ་ཏེ། དད་པའི་ཤུགས་ཆེན་པོས་ཞབས་གཉིས་ལ་ཕྱག་བྱས་ཏེ་སྨོན་ལམ་བྱེད་པར་བརྩམས་པ། མགོན་པོའི་བསོད་ནམས་འདི་ཡིས་ནི། །སྐྱེ་བ་འདི་ནས་བཟུང་ནས་སུ། །སེམས་ཅན་ཀུན་ལ་ཕན་སེམས་ཤིང་། །སྙིང་རྗེའི་བདག་ཉིད་ཅན་གྱུར་ཅིག །ཇི་ལྟར་ཁྱོད་ནི་མཚན་ལྡན་ཞིང་། །བླ་
[222b.2]མེད་བྱང་ཆུབ་བརྙེས་གྱུར་པ། །དེ་བཞིན་བདག་ཀྱང་རྫོགས་བྱང་ཆུབ། །དྲི་མེད་ཡང་དག་ཐོབ་གྱུར་ཅིག །ཇི་ལྟར་ཁྱེད་ནི་ཀུན་མཁྱེན་ཞིང་། །ཆོས་རྣམས་ཇི་ལྟར་སྟོན་མཛད་པ། །བརྙེས་པ་དེ་བཞིན་བདག་ཀྱང་ནི། །ཀུན་མཁྱེན་ཉིད་ནི་ཐོབ་པར་ཤོག །ཇི་ལྟར་ཁྱེད་བདུད་ལས་རྒྱལ་ཞིང་། །ཆོས་ཀྱི་
[222b.3]འཁོར་ལོ་བསྐོར་མཛད་པ། །དེ་བཞིན་བདག་ཀྱང་ངེས་རྒྱལ་ནས། །ཆོས་ཀྱིས་འཁོར་ལོ་བསྐོར་གྱུར་ཅིག །ཇི་ལྟར་མགོན་པོས་འཁོར་བ་ཡི། །རྒྱ་མཚོའི་ངོགས་སུ་སྒྲོལ་མཛད་བཞིན། །ཐུབ་པའི་དམ་པ་དེ་ལྟར་ནི། །བདག་གིས་སེམས་ཅན་མང་དགྲོལ་བགྱི། །དེ་ནས་བཅོམ་ལྡན་འདས་ཡང་དག་
[222b.4]པར་རྫོགས་པའི་སངས་རྒྱས་རྣམ་པར་གཟིགས་ཆར་དང་བཅས་པའི་སྤྲིན་བཞིན་ཟབ་ཅིང་གསལ་བའི་གསུང་གིས་བཀའ་སྩལ་པ། བཞིན་བཟངས་དོན་གྲུབ་ཅེས་བྱའི་སྟོན་པར་ནི། །མཐུ་ལྡན་ཁྱོད་ནི་སྟོན་པར་རབ་འགྱུར་ཏེ། །བདུད་སྡེ་བཅས་ལས་འདི་ན་མངོན་རྒྱལ་ཞིང་། །ཀུན་ནས་འཇིགས་པ་
[222b.5]མངོན་པར་ལྟུང་བྱེད་འགྱུར། །དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་སྐྱེས་བུ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། ལུང་བསྟན་ཟིན་པ་དང་། ཇི་ལྟར་གྱུར་པ་དེ་རྒྱལ་པོའི་ཕོ་བྲང་མཉན་ལྡན་ཀུན་དུ་གྲགས་པར་གྱུར་ཏོ། །ཇི་ཙམ་ན་
[222b.6]རྒྱལ་པོ་མཉན་ལྡན་གྱིས་ཐོས་པ་དང་། དེར་རང་ཉིད་སོང་སྟེ། དགེ་བའི་རྩ་བའི་ཚོགས་དེས་སྤྲོ་བའི་སེམས་ཀྱིས་སྐྱེས་བུ་དེ་ལ་བསྙེན་བཀུར་ཆེན་པོས་གླང་པོ་ཆེའི་རྒྱབ་ལ་བསྐྱོན་ཏེ་ཕོ་བྲང་དུ་ཁྱེར་ནས་སྟན་ཕྱེད་ལ་བཞག་སྟེ། རྒྱལ་སྲིད་ཀྱི་ཕྱེད་བྱིན་པས་མཆོད་པ་དང་། དེས་སྨྲས་པ། རྒྱལ་པོ་
[222b.7]ཆེན་པོ་བདག་ནི་འདོད་པ་དོན་དུ་གཉེར་བ་མ་ལགས་ཏེ། བདག་རབ་ཏུ་བྱུང་ནས་ཚངས་པར་སྤྱོད་པ་སྤྱད་པར་གནང་བར་མཛད་དུ་གསོལ། །དེ་ཡང་རྒྱལ་པོས་གནང་ནས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས། དེ་དེར་ཇི་སྲིད་འཚོའི་བར་དུ་ཚངས་པར་སྤྱོད་པ་སྤྱད་དེ། དུས་བྱས་
[223a]
[223a.1]ནས་འཕྲུལ་དགའི་ལྷ་རྣམས་སུ་སྐྱེས་སོ། །རྒྱལ་པོ་མཉན་ལྡན་ཡང་དུས་བྱས་ནས་དེའི་རྒྱལ་སྲིད་ལ་བཞག་གོ། །དེས་ཀྱང་དུས་ཆུང་ཟད་ཅིག་རྒྱལ་སྲིད་བྱས་ནས་དུས་བྱས་པ་དང་། བློན་པོ་རྣམས་ཀྱིས་བསྙེན་བཀུར་ཆེན་པོས་གཟུགས་བཟང་རྒྱལ་པོར་བསྐོས་ཏེ། དེ་ལོ་དྲུག་
[223a.2]ཁྲིའི་བར་དུ་ཆོས་ཀྱི་རྒྱལ་པོ་བྱས་ཏེ། དེ་ནས་ཤི་འཕོས་ནས་དགའ་ལྡན་གྱི་ལྷའི་ནང་དུ་སྐྱེས་སོ། །རྒྱལ་པོ་ཆེན་པོ་འདི་ཇི་སྙམ་དུ་སེམས། དེའི་ཚེ་དེའི་དུས་ན་གཟུགས་བཟང་ཞེས་བྱ་བའི་རྒྱལ་པོ་དེ་གཞན་ཞིག་ཡིན་པ་སྙམ་དུ་སེམས་ན་དེ་དེ་ལྟར་མི་བལྟ་སྟེ། གསེར་མདོག་འདི་དེའི་ཚེ་དེའི་དུས་ན་
[223a.3]གཟུགས་བཟང་ཞེས་བྱ་བའི་རྒྱལ་པོར་གྱུར་ཏེ། གང་འདིས་དེ་བཞིན་གཤེགས་པ་རྣམ་པར་གཟིགས་ལ་ཡུང་བས་བཙོས་པའི་གོས་ཀྱི་དུམ་བུ་ཕུལ་ནས་སྨོན་ལམ་བཏབ་སྟེ། ལས་ཀྱི་རྣམ་པར་སྨིན་པ་འདིས་ལྷ་དང་མི་རྣམས་ཀྱི་བདེ་བ་དཔག་ཏུ་མེད་པ་ཉམས་སུ་མྱོང་སྟེ། གང་དང་གང་དུ་སྐྱེས་པ་
[223a.4]དེ་དང་དེར་ལུས་གསེར་གྱི་མདོག་ཅན་དང་གསེར་གྱི་མདོག་ཅན་གྱི་གོས་ལུས་ལ་གྱོན་པ་དང་། བཙས་པའི་དུས་སུ་ཡང་ཀར་ནི་ཀ་རའི་མེ་ཏོག་གི་ཆར་བབ་པར་གྱུར་པ་དང་། ཇི་སྲིད་ད་ལྟར་ཡང་རང་གི་ལུས་ལ་གོས་ལན་ཅིག་ཕུད་ན་དེའི་སྐད་ཅིག་ཉིད་ལ་ལུས་ལས་སྐྱེས་པར་འགྱུར་བའི་བསོད་
[223a.5]ནམས་ཀྱི་མཐུ་ཆེན་པོ་དང་ལྡན་པ་ཡིན་ནོ། །དེའི་ཚེ་དེའི་དུས་ན་དེད་དཔོན་རྣ་ཅན་ཞེས་བྱ་བ་དེ་ནི་དེད་དཔོན་ཉི་མ་འདི་ཉིད་ཡིན་ནོ། །དེད་དཔོན་རྣ་ཅན་གྱི་ཆུང་མ་གང་ཡིན་པ་དེ་ནི་ད་ལྟར་དེད་དཔོན་ཉི་མའི་ཆུང་མ་ཡིན་ནོ། །བྲན་མོ་ནི་ཀ་ཤི་མཛེས་དགའ་མོ་ཡིན་ནོ། །དེའི་ཚེ་དེའི་དུས་ཀྱི་བྲན་པོ་ནི་བློན་
[223a.6]པོ་རབ་གཏུམ་ཡིན་ནོ། །ཡང་རྒྱལ་པོ་མ་སྐྱེས་དགྲས་གནས་བརྟན་ཀུན་དགའ་བོ་ལ་འདི་སྐད་ཅེས་གསོལ་ཏོ། །བཙུན་པ་ཀུན་དགའ་བོ་དགེ་སློང་གསེར་མདོག་གིས་ལས་ཅི་ཞིག་བགྱིས་ན་ལས་གང་གི་རྣམ་པར་སྨིན་པས་ཉེས་པ་མེད་ཅིང་གནོད་པ་མི་བྱེད་པ་གསལ་ཤིང་ལ་བསྐྱོན་པ་དང་། རབ་
[223a.7]ཏུ་བྱུང་ནས་ཀྱང་དགྲ་བཅོམ་པ་ཉིད་ཐོབ་པ་ལགས། གནས་བརྟན་ཀུན་དགའ་བོས་བཀའ་སྩལ་པ། རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་ཡང་དག་པར་རྫོགས་པའི་སངས་རྒྱས་ཟླ་བ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་
[223b]
[223b.1]སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་རྒྱལ་པོའི་ཕོ་བྲང་གཞན་ཞིག་ན་ཉེ་བར་བསྟེན་ཞིང་བཞུགས་སོ། །ཡང་དེའི་ཚེ་དེའི་དུས་ན་གཙུག་
[223b.2]ལག་ཁང་གཞན་ཞིག་ན་དགེ་སློང་ག་གེ་མོ་ཞེས་བྱ་བའི་ཆོས་སྟོན་པ་ཞིག་གནས་པ་དང་། དེ་དུས་དང་དུས་སུ་འོང་ཞིང་འགྲོ་བའི་བྲམ་ཟེ་དང་། ཁྱིམ་བདག་རྣམས་ལ་ཆོས་སྟོན་པར་བྱེད་པ་ན་དེས་རྙེད་པ་དང་བཀུར་སྟི་ཆེན་པོ་ཐོབ་པར་གྱུར་ཏོ། །ཇི་ཙམ་ན་དུས་གཞན་ཞིག་ན་མ་ཕམ་པ་ཞེས་བྱ་བའི་
[223b.3]དགེ་སློང་ཆོས་སྨྲ་བ། རིག་པ་དང་གྲོལ་བའི་སྤོབས་པ་ཅན། སྣ་ཚོགས་པའི་གཏམ་དང་། སྙན་པའི་གཏམ་དང་། ཡུལ་གྱི་ལྗོངས་རྒྱུ་ཞིང་གཙུག་ལག་ཁང་དེར་འོངས་པ་དང་། དེ་འཁོར་བཞི་པོ་ལ་ཚངས་པར་སྤྱོད་པ། ཐོག་མར་དགེ་བ་དང་། བར་དུ་དགེ་བ་དང་། ཐ་མར་དགེ་བ་དང་།
[223b.4]དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་དག་པ། ཡོངས་སུ་བྱང་བ་ཡོངས་སུ་རྫོགས་པ་ཡང་དག་པར་སྟོན་ཏེ། དེས་ཡུལ་གྱི་ཕྱོགས་དེ་ན་གནས་པའི་སྐྱེ་བོ་ཐམས་ཅད་མངོན་པར་དད་པར་བྱས་ཤིང་། དེ་ཆོས་གོས་དང་བསོད་སྙོམས་དང་། མལ་སྟན་དང་། ནད་ཀྱི་
[223b.5]གསོས་སྨན་དང་། ཡོ་བྱད་རྣམས་རྙེད་པར་གྱུར་ཅིང་། གཞི་ན་གནས་པའི་ཆོས་སྨྲ་བ་དེའི་རྙེད་པ་དང་བཀུར་སྟི་ཆད་པར་གྱུར་པ་དང་། དེ་འདི་སྙམ་དུ་སེམས་ཏེ། དགེ་སློང་མ་ཕམ་པས་ངའི་རྙེད་པ་དང་། བཀུར་སྟི་རྒྱུན་བཅད་པར་བྱས་ཏེ། ཇི་སྲིད་འདི་ན་གནས་པ་དེ་སྲིད་ཀྱི་བར་བུ་ངས་རྙེད་པ་དང་བཀུར་སྟི་ག་ལ་རྙེད་
[223b.6]ཀྱི་འགྲོ་བའི་ཕྱིར་ཐབས་བསམ་པར་བྱའོ་སྙམ་མོ། །ཡང་བསམས་པ། འདི་ནི་ཐོས་པ་མང་བ་ཡིན་པས་བསྙེན་བཀུར་མེད་པས་འཇིགས་པ་ཡིན་ཏེ། དེ་བས་ན་བསྙེན་བཀུར་མེད་པ་ལ་སྦྱར་བར་བྱའོ་སྙམ་ནས་བྲམ་ཟེ་མོ་གཞོན་ནུ་མ་གཞན་ཞིག་ལ་སྨྲས་པ། སྲིད་
[223b.7]མོ་ངས་ཁྱོད་ལ་རས་ཟུང་ཅིག་སྦྱིན་པར་བྱ་ཡིས་ཁྱེད་ཀྱིས་འདི་དང་ལྷན་ཅིག་མི་ཚངས་པར་སྤྱད་པར་བྱ་བ་ཡིན་ནོ་ཞེས་དགེ་སློང་མ་ཕམ་པ་ལ་སྐུར་པ་ཐོབ་ཤིག །དེས་སྨྲས་པ། འཕགས་པ་ངས་དེ་ལྟར་སྨྲས་ན་ང་སུ་ཞིག་ལན་པར་འགྱུར་ཏེ། ཇི་སྲིད་འཚོའི་བར་དུ་ཕ་དང་མ་གསོ་བར་བྱེད་པ་ཞིག་ཏུ་མི་
[224a]
[224a.1]འགྱུར་རམ། དེས་སྨྲས་པ། ངས་ཇི་ལྟར་ན་སྐྱེ་བོ་མང་པོས་ཤེས་པར་མི་འགྱུར་བ་དེ་ལྟར་བྱ་ཡིས་གཞན་དུ་ནང་འདི་ན་དགེ་སློང་གཞན་གསུམ་མམ་བཞི་དང་ལྷན་ཅིག་འདུག་གིས། དེའི་ཚེ་ཁྱོད་གསང་བའི་ཚིག་གིས་སྨྲོས་ཤིག །དེས་དེ་ལྟར་བགྱིའོ་ཞེས་ཁས་བླངས་སོ། །
[224a.2]ཇི་ཙམ་ན་ཉི་མ་གཞན་ཞིག་ན་ཆོས་སྟོན་པའི་དགེ་སློང་དེ་དགེ་སློང་དེ་རྣམས་དང་ལྷན་ཅིག་ཁང་པའི་སྒོ་ན་འདུག་སྟེ་གཏམ་གྱིས་སྦྱོར་བར་གནས་པ་དང་། བྲམ་ཟེ་མོ་དེ་འོངས་ན་སྨྲས་པ། འཕགས་པ་ཁྱེད་རྣམས་ནི་རབ་ཏུ་བྱུང་བ་ལགས་སོ་སྙམ་ནས་བདག་ཅག་བག་ཕེབས་པས་འགྲོ་ཞིང་རྒྱུ་བར་བྱའོ་
[224a.3]སྙམ་དུ་བདག་སེམས་ན། གང་དགེ་སློང་མ་ཕམ་པ་འདིས་བདག་སྟོབས་ཀྱིས་གཟུང་ནས་གཞོན་ནུ་མའི་ཚུལ་ཉམས་པར་བྱས་ན། ཅི་རིགས་པ་ལགས་སམ་དེ་ནས་དགེ་སློང་དེ་རྣམས་ཀྱིས་རྣ་བ་བཀག་སྟེ། སྲིང་མོ་དེ་སྐད་མ་ཟེར་ཅིག །འདི་ནི་མཉན་པར་བྱ་བ་མ་ཡིན་ནོ། །དེ་ནས་ཆོས་སྟོན་པའི་དགེ་སློང་
[224a.4]དེས་ལེགས་པར་བྱས་པ་མ་ཡིན་ནོ། །ལེགས་པར་བྱས་པ་མ་བྱས་པ་ཡིན་ནོ་ཞེས་ཟེར་ཞིང་དགེ་སློང་མ་ཕམ་པའི་གྲགས་པ་མ་ཡིན་པ་སྒྲོགས་སོ། །ཅི་ཙམ་ན་ཐོས་པ་གཅིག་ནས་གཅིག་ཏུ་བརྒྱུད་པས་དགེ་སློང་མ་ཕམ་པས་ཐོས་སོ། །ཐོས་ནས་ཀྱང་སྨྲས་པ། སུ་ཞིག་དེ་སྐད་ཟེར། ཡང་སྨྲས་པ། དགེ་
[224a.5]སློང་ཆོས་སྟོན་པ་འདི་དེ་སྐད་ཟེར་རོ། །དེ་ནས་དེ་ཆོས་སྨྲ་བའི་དགེ་སློང་གང་ན་བ་དེར་སོང་སྟེ་ཕྱིན་ནས་ཀྱང་སྨྲས་པ། བཙུན་པ་བདག་གིས་ཁྱེད་ལ་གནོད་པ་ཅི་ཞིག་བྱས་ན་གང་འདི་ལྟ་བུའི་བསྔགས་པ་མ་ཡིན་པ་སྒྲོགས་པར་བྱེད། དེས་དེ་ལ་སེམས་ཤིན་ཏུ་འཁྲུགས་པས་ངག་གི་ལས་ཤིན་ཏུ་མི་
[224a.6]བཟད་པ་སྨྲས་པ། ཁྱོད་ཀྱིས་ནི་གང་གིས་གསལ་ཤིང་ལ་གཟུགས་པར་འོས་པ་དེ་བྱས་སོ། །དེ་ཐོས་པ་དང་དགེ་སློང་མ་ཕམ་པ་འདི་སྙམ་དུ་སེམས་ཏེ། དཀའ་ཐུབ་ཅན་འདི་ནི་ཉེ་བར་བཅོམ་ཞིང་ཉམས་པར་གྱུར་ཏོ་སྙམ་ནས། ཆོས་གོས་དང་ལྷུང་བཟེད་བླངས་ཏེ། ཇི་ལྟར་ཡོངས་སུ་ལོངས་
[224a.7]སྤྱོད་པའི་མལ་སྟན་བསྡུས་ནས་གཙུག་ལག་ཁང་དེ་ནས་བྱུང་སྟེ་ཆས་སོ། །དེ་ཆས་པ་མཐོང་ནས་དགེ་སློང་དང་། དགེ་སློང་མ་དང་། ཡུལ་དེ་ན་གནས་པའི་སྐྱེ་བོའི་ཚོགས་རྣམས་དེ་བཟློག་པའི་ཕྱིར་ཕྱི་བཞིན་འབྲངས་སོ། །ཆོས་སྨྲ་བའི་དགེ་སློང་དེ་ཡང་འདི་སྙམ་དུ་ངས་ནི་བཟང་པོ་བྱས་པ་
[224b]
[224b.1]མ་ཡིན་ཏེ། གང་རྙེད་པ་དང་བཀུར་སྟི་ཙམ་གྱི་ཕྱིར་འདི་ལྟ་བུའི་ངན་སོང་ཙམ་དུ་འགྲོ་བར་འཇུག་པའི་ལས་བྱེད་པ་ལ་ཞུགས་པ་ནི་བདག་གིས་ལེགས་པར་བྱས་པ་མ་ཡིན་ནོ་སྙམ་ནས་འགྱོད་པ་སྐྱེས་ཏེ། ཡིད་མི་བདེ་བར་གྱུར་ནས་བསམས་པ། སོང་ལ་བཟོད་པར་གསོལ་བར་བྱའོ་སྙམ་ནས་རིངས་པ་
[224b.2]རིངས་པར་གཙུག་ལག་ཁང་དེ་ནས་བྱུང་སྟེ། ཤིན་ཏུ་སྐྱོ་བའི་ཡིད་དང་། མཆི་མའི་རྒྱུན་གྱིས་བརླན་པར་གྱུར་པའི་དམན་པའི་བཞིན་དང་། བྱིས་པ་གཞོན་ནུ་བཞིན་དུ་གསང་མཐོན་པོས་ངུ་ཞིང་བྲམ་ཟེ་དང་། ཁྱིམ་བདག་བརྒྱ་སྟོང་དཔག་ཏུ་མེད་པས་མཐོང་ཞིང་དགེ་སློང་མ་ཕམ་པའི་རྐང་པ་ལ་ཕྱག་བྱས་
[224b.3]ནས། མི་རིགས་པར་བགྱིས་ཀྱི་མཐོལ་ལོ་མཐོལ་ལོ་ཞེས་འཆགས་པར་རྩོམ་སྟེ། བཙུན་པ་བྱིས་པ་ཇི་ལྟ་བ་དང་། རྨོངས་པ་ཇི་ལྟ་བ་དང་། བྱེ་བྲག་མི་ཕྱེད་པ་ཇི་ལྟ་བའི་དགེ་བས་རྙེད་པ་དང་། བཀུར་སྟི་ཟིལ་གྱིས་མནན་ཏེ། བདག་གིས་ཁྱེད་ལ་མེད་བཞིན་དུ་བསྔགས་པ་མ་ཡིན་པ་བསྒྲགས་པ་དེ་བཟོད་པར་
[224b.4]མཛོད་ཅིག །མི་རིགས་པར་བགྱིས་པ་དེ་འཆགས་ཀྱི་ཐུགས་བརྩེ་བས་ཟུང་ལ་བཟོད་པ་མཛོད་ཅིག །དགེ་སློང་མ་ཕམ་པས་ཚེ་དང་ལྡན་པ་བཟོད་པ་གྱིས་ཞེས་སྨྲས་ཏེ། ཤིན་ཏུ་སྐྱོ་བའི་སེམས་དང་ཤིང་དྲུང་གཞན་ཞིག་ལ་རྟེན་ཅིང་འདུག་ནས་སྐྱིལ་མོ་ཀྲུང་བཅས་ཏེ་ལུས་དྲང་པོར་བསྲང་ནས་དྲན་པ་
[224b.5]ཉེ་བར་བཞག་སྟེ། དེས་དེ་ཉིད་དུ་ཤིན་ཏུ་སྐྱོ་བས་བརླན་པར་བྱས་པའི་སེམས་དང་། འབད་ཅིང་རྩོལ་ལ། བརྩོན་འགྲུས་བརྩམས་པས་འཁོར་བའི་འཁོར་ལོ་ཕོལ་མིག་ལྔ་དང་བཅས་པ་གཡོ་བ་དང་མི་གཡོ་བ་ཤེས་ནས། ཇི་སྲིད་དབང་པོ་དང་། ཉེ་དབང་དང་བཅས་པའི་ལྷ་རྣམས་ཀྱིས་མཆོད་ཅིང་རྗེད་ལ།
[224b.6]མངོན་པར་བསྟོད་པའི་དགྲ་བཅོམ་པ་ཞིག་ཏུ་གྱུར་ནས། དེ་ངང་པའི་རྒྱལ་པོ་འདབ་མ་བརྐྱང་བ་བཞིན་དུ་ནམ་མཁའི་དཀྱིལ་དུ་མངོན་པར་འཕགས་ཏེ་སྐྱེ་བོའི་ཚོགས་ཆེན་པོ་ཡིད་མངོན་པར་དད་པར་བྱེད་པའི་ཆོ་འཕྲུལ་སྣ་ཚོགས་པ་བྱ་བར་བརྩམས་སོ། །དགེ་སློང་ཆོས་སྨྲ་བ་དེ་ཡང་ནམ་མཁའི་དཀྱིལ་
[224b.7]ན་གནས་པ་དེ་ལ་བལྟས་ཏེ། ཀྱི་ཧུད་འདི་ལྟ་བུའི་དྲང་སྲོང་ཆེན་པོ་ལ་ངན་སེམས་ཀྱིས་སྨད་ཅིང་སྐུར་བ་བཏབ་བོ་ཞེས་སྨྲས་ནས་བརྒྱལ་ཏེ་ས་ལ་འགྱེལ་བར་གྱུར་ཏོ། །བར་སྐབས་དེར་ཡང་དག་པར་རྫོགས་པའི་སངས་རྒྱས་ཟླ་བ་ཐུགས་རྗེ་ཆེན་པོས་ཡོངས་སུ་གདུངས་པའི་ཐུགས་དང་ལྡན་པས་དགེ་སློང་ཆོས་སྨྲ་བ་ཁྲག་
[225a]
[225a.1]དྲོན་མོ་སྐྱུགས་ནས་འཆི་བར་གྱུར་ན་མི་རུང་ངོ་སྙམ་དུ་དགོངས་ནས་རྫུ་འཕྲུལ་གྱིས་ས་ཕྱོགས་དེར་གཤེགས་སོ། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བས་འཁོར་ལོ་དང་། གཡུང་དྲུང་དང་། དགའ་བ་འཁྱིལ་པ་དང་། དྲ་བས་འབྲེལ་བ་དང་། བསོད་ནམས་དཔག་
[225a.2]ཏུ་མེད་པ་ལས་བྱུང་བ་དང་། སྐྲག་པ་རྣམས་དབུགས་འབྱིན་པར་མཛད་པའི་ཕྱག་གིས་དགེ་སློང་ཆོས་སྨྲ་བའི་མགོ་ལ་བྱུགས་སོ། །དེས་རེག་པ་ཙམ་གྱིས་དྲན་པ་སླར་རྙེད་དེ་ལངས་ནས་བཅོམ་ལྡན་འདས་དང་། དགེ་སློང་གི་དགེ་འདུན་ལ་བདག་ནི་མི་རིགས་པའོ་ཞེས་འཆགས་པར་བརྩམས་སོ། །དེ་ནས་
[225a.3]བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བས་དེའི་ཚེ་ཚིགས་སུ་བཅད་དེ་གསུངས་པ། སྐྱེས་བུ་སྐྱེས་པའི་ཁ་ནས་ནི། །ཚིག་ངན་སྨྲ་བར་བྱེད་པ་ཡི། །ཚིག་གི་སྟ་རེ་སྐྱེས་གྱུར་ནས། །བདག་ཉིད་གཅོད་པར་བྱེད་པར་འགྱུར། །གང་ཞིག་སྨད་འོས་སྐྱེ་བོ་སྟོད་བྱེད་དང་། །བསྟོད་འོས་སྐྱེ་བོ་རྣམ་
[225a.4]པར་སྨོད་བྱེད་པ། །དེ་ནི་ཁའི་འཐབ་ཀྲོལ་ཀུན་སྩོགས་ཤིང་། །འཐབ་ཀྲོལ་ཅན་གང་དེས་ནི་བདེ་མི་འཐོབ། །གང་འདིར་ཆོ་ལོས་རང་ནོར་ཕམ་བྱེད་པ། །འཐབ་ཀྲོལ་དེ་ནི་ཅུང་ཟད་ཙམ་དུ་ཟད། །གང་ཡིད་བདེ་བར་གཤེགས་ལ་ཡིད་འཁྲུགས་པ། །དེ་འདིར་འཐབ་ཀྲོལ་ཤིན་ཏུ་ཆེན་པོ་ཡིན། །ངག་ཡིད་
[225a.5]འཕགས་པས་སྨད་པའི་སྡིག་བསྟེན་ན། །བྱེ་བ་ཆུ་བུར་ཅན་དང་སྟོང་ཕྲག་ནི། །བཞི་བཅུ་གཅིག་ཏུ་ཆུ་བུར་རྡོལ་བ་ཡི། །སེམས་ཅན་དམྱལ་བ་རྣམས་སུ་སྐྱེ་བར་འགྱུར། །སྡིག་པའི་སེམས་ཀྱིས་མ་ཉེས་སྐྱོན་བརྗོད་པ། །བདག་ཉིད་བསད་ཕྱིར་དམྱལ་བ་སྤེལ་བར་ཟད། །སྟོབས་ལྡན་ཉེས་མེད་པ་དག་
[225a.6]བཟོད་བྱེད་ཅིང་། །དེ་ལ་སེམས་ཀྱང་འཁྲུགས་པར་མི་བྱེད་དོ། །སེམས་ནི་འཁྲུགས་པར་གྱུར་པའི་རྒྱུས། །སེམས་ཅན་ངན་འགྲོར་འགྲོ་འགྱུར་ལ། །སེམས་ནི་རབ་ཏུ་དང་བའི་རྒྱུས། །སེམས་ཅན་བདེ་འགྲོ་རྣམས་སུ་འགྲོ། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བས་ཇི་སྲིད་
[225a.7]ཆོས་དང་ལྡན་པའི་གཏམ་གྱིས་ཡང་དག་པར་མགུ་བར་གྱུར་གྱི་བར་དུ་མཛད་དེ། གདན་ལས་བཞེངས་ནས་གཤེགས་སོ། །རྒྱལ་པོ་ཆེན་པོ་ཇི་སྙམ་དུ་སེམས། །དེའི་ཚེ་དེའི་དུས་ན་དགེ་སློང་ཆོས་སྟོན་པ་དེ་གཞན་ཞིག་ཡིན་པ་སྙམ་དུ་སེམས་ན་དེ་ལྟར་མི་བལྟ་སྟེ། གཞན་དུ་ན་དགེ་སློང་གསེར་མདོག་
[225b]
[225b.1]འདི་ཉིད་ཡིན་ཏེ། དེའི་ཚེ་དེའི་དུས་ན་དགེ་སློང་དེ་ལ་སེམས་འཁྲུགས་ཤིང་ངག་གི་ལས་རྩུབ་པ་སྨྲས་པས་ལས་དེའི་རྣམ་པར་སྨིན་པས་སྐྱེ་བ་ལྔ་བརྒྱའི་བར་དུ་སེམས་ཅན་དམྱལ་བ་ཉམས་སུ་མྱོང་ནས། མིར་སྐྱེས་ནས་ཀྱང་སྐྱེ་བ་ལྔ་བརྒྱའི་བར་དུ་ཉེས་པ་མེད་ཅིང་གནོད་པ་མི་བྱེད་བཞིན་དུ་གསལ་ཤིང་ལ་
[225b.2]བསྐྱོན་ཏེ། ད་ལྟར་ཡང་ལས་དེ་ཉིད་ཀྱི་དབང་གིས་ཡང་གནོད་པ་མི་བྱེད་པར་གསལ་ཤིང་ལ་བསྐྱོན་པ་ཡིན་ནོ། །གལ་ཏེ་འདི་ལས་དེ་མི་རིགས་པ་ཡིན་པར་ཕན་ཚུན་བཤགས་པ་མ་བྱས་ན་ནི་སེམས་ཅན་དམྱལ་བ་རེ་རེར་ཡང་སྐྱེ་བ་ལྔ་བརྒྱ་ལྔ་བརྒྱ་མྱོང་བར་འགྱུར་ཞིང་། སྐྱེ་བ་ལྔ་བརྒྱར་ནི་ཡི་དྭགས་རྣམས་
[225b.3]སུ། སྐྱེ་བ་ལྔ་བརྒྱར་ནི་དུད་འགྲོ་རྣམས་སུ་སྐྱེ་བར་འགྱུར་རོ། །གང་ཡང་འདིས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བའི་བསྟན་པ་ལ་རབ་ཏུ་བྱུང་སྟེ། ཚངས་པར་སྤྱོད་པ་སྤྱད་པས་ལས་དེའི་རྣམ་པར་སྨིན་པས་ད་ལྟར་ཡང་འདི་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ། ཉོན་མོངས་
[225b.4]པ་ཐམས་ཅད་སྤངས་ནས་དགྲ་བཅོམ་པའི་འབྲས་བུ་ཉིད་མངོན་སུམ་དུ་བྱས་པ་ཡིན་ནོ། །རྒྱལ་པོ་ཆེན་པོ་དེ་བས་ན་བདག་སྡུག་བསྔལ་བར་མི་འདོད་པས་གཞན་དག་ལ་ཐ་ན་སེམས་ཀྱིས་སྨད་པ་ཙམ་ཡང་མི་བྱའོ། །གྲགས་པ་མེད་པས་འཇིགས་པས་གཞན་དག་ལ་གྲགས་པ་མ་ཡིན་པ་བསྒྲགས་པར་མི་
[225b.5]བྱའོ། །བདག་ཉིད་བདེ་བར་འདོད་པས་གཞན་རྣམས་ཀྱི་བདེ་བ་དབྲོག་པར་མི་བྱའོ། །དེ་ནས་ཆོས་ཀྱི་རྣམ་གྲངས་འདི་བསྟན་པ་ན་སྲོག་ཆགས་བརྒྱ་སྟོང་དུ་མ་དཔག་ཏུ་མེད་པས་ཁྱད་པར་རྟོགས་པར་གྱུར་ཏེ། ལ་ལ་ནི་རྒྱུན་དུ་ཞུགས་པའི་འབྲས་བུ་དང་། ལ་ལ་ནི་ལན་ཅིག་ཕྱིར་འོང་པའི་འབྲས་
[225b.6]བུའོ། །ལ་ལ་ནི་རབ་ཏུ་བྱུང་བས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་སོ། །ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལ་ལ་ནི་ཉན་ཐོས་ཀྱི་བྱང་ཆུབ་བོ། །ལ་ལ་ནི་སྐྱབས་སུ་སོང་ཞིང་བསླབ་པའི་གཞི་རབ་ཏུ་བཟུང་བར་གྱུར་
[225b.7]ཏོ། །ཡང་འཁོར་ཕལ་མོ་ཆེ་སངས་རྒྱས་ལ་གཞོལ་བ་དང་། ཆོས་ལ་བབ་པ་དང་། དགེ་འདུན་ལ་བབ་པ་ལ་བཞག་པར་གྱུར་ཏོ། །དེ་ནས་དེད་དཔོན་ཉི་མ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ངས་ལ་བཙུགས་ཏེ། ཐལ་མོ་སྦྱར་ཏེ་གནས་བརྟན་ཀུན་དགའ་བོ་ལ་འདི་སྐད་
[226a]
[226a.1]ཅེས་གསོལ་ཏོ། །འཕགས་པ་ཀུན་དགའ་བོ་བདག་གིས་སངས་རྒྱས་ལ་སོགས་པའི་དགེ་སློང་གི་དགེ་འདུན་རྣམས་ལྡུམ་བུའི་ནང་དུ་སྤྱན་དྲངས་ལ་ཞལ་ཟས་རོ་དྲུག་ཅུ་པའི་བཤོས་དྲངས་ཏེ། དགེ་སློང་རེ་རེ་ཞིང་སྲང་འབུམ་རི་བའི་ཆོས་གོས་དབུལ་བར་བྱའོ་སྙམ་དུ་དགོངས་ན་
[226a.2]བཅོམ་ལྡན་འདས་དེ་ཡོངས་སུ་མྱ་ངན་ལས་འདས་པས། ད་ནི་འཕགས་པ་ཀུན་དགའ་བོ་ལ་སོགས་པ་དགེ་སློང་གི་དགེ་འདུན་རྣམས་ལ་བཤོས་གཙང་སྦྱར་བར་འཚལ་ལོ། །གནས་བརྟན་ཀུན་དགའ་བོས་བཀའ་སྩལ་པ། དེད་དཔོན་དེ་བཞིན་དུ་གྱིས་ཤིག །ངས་ཇི་ལྟར་བཅོམ་ལྡན་འདས་ཀྱི་
[226a.3]ཉན་ཐོས་ཀྱི་དགེ་འདུན་འཛམ་བུའི་གླིང་ན་ཇི་སྙེད་ཅིག་གནས་པ་ཐམས་ཅད་འདིར་འདུ་བར་འགྱུར་བ་དེ་ལྟར་བྱའོ། །དེ་ནས་དེད་དཔོན་ཉི་མ་རབ་ཏུ་དགའ་བས་རྒྱས་པའི་ཡིད་དང་། རྒྱལ་པོའི་ཁབ་ཀྱི་གྲོང་ཁྱེར་གྱི་ཕྱི་རོལ་འདུ་བའི་གནས་རྡོ་དང་གྱོ་མོ་དང་གསེག་མ་བསལ་ཏེ། ཙན་དན་གྱི་ཆུས་ཆག་
[226a.4]ཆག་བཏབ་ནས་གདུགས་དང་། རྒྱལ་མཚན་དང་། བ་དན་བསྒྲེངས་ཏེ། མུ་ཏིག་དང་། གོས་ཀྱི་ཆུན་འཕྱང་གདགས་ཤིང་། མེ་ཏོག་སྣ་ཚོགས་ཀྱི་གཅལ་བཀྲམ་པ་དང་། སྤོས་དྲི་ཞིམ་པོའི་སྤོས་སྣོད་ཉེ་བར་བཀྲམ་པ་དང་། ཤིན་ཏུ་མཛེས་པའི་བླ་རེ་དང་། རྟ་བབས་བྲེས་པས་ཤིན་ཏུ་ཉམས་
[226a.5]དགའ་བ་བྱེད་དུ་བཅུག་སྟེ། དེ་ཉིད་ཀྱི་མཚན་མོ་གཙང་ཞིང་བསོད་པའི་བཟའ་པ་དང་བཅའ་བ་རྣམས་གཡོས་ཏེ། ནང་པར་སྔ་བ་ཉིད་དུ་ལངས་ནས་གདན་བཤམས་ཏེ། ཆུ་བཞག་ནས། གནས་བརྟན་ཀུན་དགའ་བོ་ལ་ཕོ་ཉས་དུས་ལ་བབ་པར་གསོལ་པ། བཙུན་པ་བཟའ་བ་དང་། བཅའ་བ་
[226a.6]རྣམས་སྟ་གོན་བགྱིས་ལགས་ཏེ། ད་དེ་དུས་ལ་བབ་པ་ལགས་པར་མཁྱེན་པར་མཛད་དུ་གསོལ། དེ་ནས་གནས་བརྟན་ཀུན་དགའ་བོ་རྫུ་འཕྲུལ་གྱིས་ནམ་མཁའི་དཀྱིལ་དུ་མངོན་པར་འཕགས་ཏེ། འཛམ་བུའི་གླིང་འདི་མ་ལུས་པར་གསེར་བཙོ་མ་ལྟ་བུའི་མདོག་གིས་ཀུན་དུ་སྣང་བར་མཛད་ནས་
[226a.7]རང་ཉིད་ཀྱིས་གཎྜི་བརྡུངས་ཏེ། ཆུ་དང་བཅས་པའི་སྤྲིན་གྱིས་འབྲུག་སྒྲ་བཞིན་དུ་ཟབ་ཅིང་གསལ་བའི་སྐད་ཀྱིས་སྒྲ་བསྒྲགས་པ། བཅོམ་ལྡན་འདས་ཀྱི་ཉན་ཐོས་ལས་གང་རྫུ་འཕྲུལ་ཐོབ་པ་རྣམས་ནི་རང་ཉིད་ཀྱི་རྫུ་འཕྲུལ་གྱིས་ཤོག་ཤིག །གང་དག་སོ་སོའི་སྐྱེ་བོ་རྣམས་ནི་ངའི་རྫུ་འཕྲུལ་
[226b]
[226b.1]གྱིས་ཤོག་ཤིག །དེ་ནས་གྷཎྜཱི་དེ་ཐོས་པས་ཁ་བ་ཅན་དང་། འབིགས་བྱེད་དང་མ་ལ་ཡ་དང་། བ་རི་ཡ་ཏྲ་དང་སྤོས་ཀྱི་ངད་ལྡང་དང་། རིའི་རྒྱལ་པོ་རི་རབ་དང་། གཉའ་ཤིང་འཛིན་དང་། གཤོལ་མདའ་འཛིན་དང་། སེང་ལྡེང་ཅན་དང་། བལྟ་ན་སྡུག་དང་། རྟ་རྣ་རིན་དང་། རྣམ་པར་འདུད་དང་། མུ་
[226b.2]ཁྱུད་འཛིན་ལ་སོགས་པ་ནགས་ཚལ་དང་། འབབ་ཆུ་དང་གཡའ་ཆུ་དང་། རྒྱ་མཚོ་དང་། གྲོང་རྡལ་དང་། ཤིང་གི་མཆོག་དང་། གཙུག་ལག་ཁང་རྣམས་ན་གང་དག་གནས་པ་དང་། ཆུ་མདོ་དང་། ཁང་སྟོང་དང་། དུར་ཁྲོད་ལ་སོགས་པ་ན་དགེ་སློང་གང་ཞིག་ཏིང་ངེ་འཛིན་ལ་སྙོམས་པར་ཞུགས་
[226b.3]ཤིང་བདེ་བ་ཐོབ་ནས་རབ་ཏུ་གནས་པ་རྣམས་སྐད་ཅིག་མ་དེ་ལ་དེ་དག་ཐམས་ཅད་ནམ་མཁའི་ངོས་ནས་ཨ་ཤོ་ཀ་དང་། ཀིང་ཤུ་ཀ་དང་། ཟངས་དང་། དུས་མཚམས་ཀྱི་སྤྲིན་དྲི་མ་མེད་པས་ནམ་མཁའ་ཁེབས་པ་དེ་ལྟ་བུར་བྱས་ཏེ། རྒྱལ་པོའི་ཁབ་ཀྱི་གྲོང་ཁྱེར་དུ་ལྷགས་ནས་འདུ་བའི་གནས་དེར་འཚོགས་
[226b.4]ཏེ། སྐད་ཅིག་མ་དེ་ཉིད་ལ་དགེ་སློང་བྱེ་བ་ཕྲག་གསུམ་ཡང་དག་པར་འདུས་པར་གྱུར་ཏེ། བྱེ་བ་གཅིག་ནི་ཟག་པ་ཟད་པ་རྣམས་སོ། །གཉིས་པ་ནི་བསླབ་པ་ལ་ཞུགས་པ་རྣམས་སོ། །གསུམ་པ་ནི་སོ་སོའི་སྐྱེ་བོ་དགེ་བ་ཅན་རྣམས་ཏེ། དེ་ནས་རྒན་པའི་རིམ་པ་ཇི་ལྟ་བ་བཞིན་དུ་གདན་བཤམས་པ་ལ་
[226b.5]བཞུགས་སོ། །དེ་ནས་དེད་དཔོན་ཉི་མས་གནས་བརྟན་ཀུན་དགའ་བོ་ལ་སོགས་པ། དགེ་སློང་གི་དགེ་འདུན་རྣམས་བདེ་བར་གཤེགས་པར་རིག་ནས་གཙང་ཞིང་བསོད་པའི་བཟའ་བ་དང་། བཏུང་བ་རྣམས་རང་གི་ལག་ནས་ཀུན་དུ་ཚིམ་པར་བསྟབས་ཏེ། ཇི་སྲིད་དགེ་སློང་གི་དགེ་འདུན་གྱིས་ལོངས་སྤྱད་པར་རིག་
[226b.6]ནས། བྱག་བཅབས་ཤིང་ལྷུང་བཟེད་བསྡུས་ནས་ཆོས་གོས་གསུམ་པོ་བརྒྱ་སྟོང་དུ་མ་གསོལ་བར་འདོད་ནས་དགེ་སློང་དང་དགེ་འདུན་དེ་རྣམས་ལ་བལྟས་པ་དང་། ཡིད་ཤིན་ཏུ་དགའ་བ་སྐྱེས་པར་གྱུར་ཏོ། །དགེ་སློང་གསེར་མདོག་གིས་བསམ་པ་ཤེས་ནས་སྨྲས་པ། ཡབ་ཁྱེད་ཐུགས་ལས་ཆུང་བར་མཛོད་
[226b.7]ཅིག །བདག་ཉིད་ཀྱིས་དགེ་སློང་གི་དགེ་འདུན་ལ་གསེར་གྱི་མདོག་ཅན་གྱི་ཆོས་གོས་གསུམ་གསུམ་དབུལ་བར་བགྱིའོ། །དེ་ནས་དགེ་སློང་གསེར་མདོག་གི་རང་གི་ལུས་ལས་གསེར་གྱི་མདོག་ཅན་གྱི་གོས་ཕུད་ཅིང་ཕུད་ཅིང་སྲང་འབུམ་རི་བའི་ཆོས་གོས་གསུམ་གསུམ་དགེ་སློང་བྱེ་བ་ཕྲག་གསུམ་ལ་རྒན་པའི་རིམ་པ་
[227a]
[227a.1]བཞིན་དུ་བསྟབས་སོ། །བར་སྐབས་དེར་ལྷ་བརྒྱ་སྟོང་དུ་མས་ཅ་ཅོའི་སྒྲ་སྒྲོགས་ཤིང་རོལ་མོ་སྣ་ཚོགས་ཡང་དག་པར་རྡུང་བ་དང་། ལྷའི་མེ་ཏོག་དང་། ཕྱེ་མ་དང་། གོས་ཀྱི་ཆར་ཕབ་པར་གྱུར་ཏོ། །ཇི་ལྟར་ཕྱོགས་དེར་ཕྱོགས་སྣ་ཚོགས་ནས་ལྷགས་པའི་སྐྱེ་བོའི་ཚོགས་རྣམས་དང་།
[227a.2]རྒྱལ་པོ་མ་སྐྱེས་དགྲ་བཙུན་མོ་དང་། གཞོན་ནུ་དང་། བློན་པོ་དང་། གྲོང་ཁྱེར་པ་རྣམས་དང་། སྐྱེ་བོའི་ཚོགས་དང་བཅས་པ་དེ་རྣམས་ཀྱིས་རྣམ་པ་དེ་ལྟ་བུའི་ངོ་མཚར་ལ་བལྟས་ནས་རྨད་དུ་བྱུང་ནས་མིག་གདངས་ཏེ། ལན་གསུམ་གྱི་བར་དུ་ཆེད་དུ་བརྗོད་པ་ཆེད་དུ་བརྗོད་དེ། ཨེ་མའོ་བསོད་ནམས་ཀྱི་
[227a.3]འབྲས་བུའི་རྣམ་པར་སྨིན་པ། ཨེ་མའོ་བསོད་ནམས་ཀྱི་སྟོབས། ཨེ་མའོ་སྦྱིན་གནས་ཀྱི་ཞིང་ལ་སྦྱིན་པའི་ས་བོན་བཏབ་པའི་རྣམ་པར་སྨིན་པར་གདའ་བར་མི་བྱེད་པ་ཡིན་ན། མཁས་པ་སུ་ཞིག་གིས་རྣམ་པ་འདི་ལྟ་བུའི་བསོད་ནམས་ཀྱི་འབྲས་བུའི་རྣམ་པར་སྨིན་པ་ཡང་དག་པར་མཐོང་ན། སྦྱིན་པའི་ཞིང་ལ་སུ་ཞིག་སྦྱིན་
[227a.4]པར་མི་བྱེད་ཅེས་ཟེར་ཞིང་། དེ་ལྟར་སྲོག་ཆགས་བརྒྱ་སྟོང་དུ་མ་རྣམས་ཐལ་མོ་སྦྱར་ཏེ། སྒྲ་གསང་མཐོན་པོས་སངས་རྒྱས་ལ་ཕྱག་འཚལ་ཞེས་ཟེར་བར་གྱུར་ཏོ། །དེ་ནས་གནས་བརྟན་ཀུན་དགའ་བོས་སྦྱིན་པའི་རབ་བཏོན་པ་མཛད་དོ། །དེ་ནས་དེད་དཔོན་ཉི་མ་སྟན་
[227a.5]ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཉིས་ས་ལ་བཙུགས་ཏེ། གནས་བརྟན་ཀུན་དགའ་བོ་གང་ན་བ་དེར་ཐལ་མོ་སྦྱར་ཏེ། ཕྱག་བྱས་ནས་ལན་གསུམ་གྱི་བར་དུ་ཆེད་དུ་བརྗོད་པ་ཆེད་དུ་བརྗོད་དེ། བཙུན་པ་གང་བདག་ཅག་ལ་འཕགས་པ་ཀུན་དགའ་བོས་
[227a.6]མཛད་པ་འདི་ནི་མས་ཀྱང་མ་བགྱིས། ཕས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། ནང་མི་དང་ཉེ་དུའི་ཚོགས་ཡིད་དུ་འོང་བས་ཀྱང་མ་བགྱིས། སྔོན་གུམས་པ་རྣམས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་སྐམས་པ་ནས། །ལྷ་དང་
[227a.7]ལྷ་མིན་རྣམས་ཀྱིས་མཆོད་གྱུར་ཅིང་། །སྐྱེ་བ་རྒ་ཤིའི་སྐྱོན་དང་རྣམ་བྲལ་བས། །སྲིད་པ་བརྒྱ་སྟོང་དག་ན་མཐོང་དགའ་བ། །ཐུབ་པ་ཁྱོད་མཐོང་དེང་བདག་འབྲས་ལྡན་གྱུར། །དེ་ནས་གནས་བརྟན་ཀུན་དགའ་བོས་རྒྱལ་པོ་དང་བཅས་པའི་འཁོར་དེ་རྣམས་ཆོས་དང་ལྡན་པའི་གཏམ་ཡང་དག་པར་
[227b]
[227b.1]བསྟན་པ་དང་། ཡང་དག་པར་འཛིན་དུ་འཇུག་པར་མཛད་པ་དང་། ཡང་དག་པར་གཟེངས་བསྟོད་པ་དང་། ཡང་དག་པར་རབ་ཏུ་དགའ་བར་མཛད་ནས་ལྷ་བརྒྱ་སྟོང་དེ་དག་དང་། རྒྱལ་པོའི་ཁབ་ན་གནས་པའི་སྲོག་ཆགས་བརྒྱ་སྟོང་གིས་ཕྱག་བྱས་ནས་གདན་ལས་བཞེངས་ཏེ་གཤེགས་སོ། །དེ་ལྟར་ན་
[227b.2]སངས་རྒྱས་བཅོམ་ལྡན་འདས་ལ་ནི་བྱ་བ་ཅུང་ཟད་ཅིག་བྱས་ན་ཡང་འབྲས་བུ་ཆེན་པོར་འགྱུར་བ་ཡིན་ནོ། །གསེར་མདོག་གི་རྟོགས་པ་བརྗོད་པ་རྫོགས་སོ།། །།རྒྱ་གར་གྱི་མཁན་པོ་དྷརྨ་ཤྲཱི་བྷ་དྲ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པོ།། །།
[227b.3]{T4145}༄༅༅། །རྒྱ་གར་སྐད་དུ། ཀུན་ལ་ཨ་བ་དཱ་ནཾ། བོད་སྐད་དུ། ཀུན་ལའི་རྟོགས་པ་བརྗོད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཀུན་ལའི་རྟོགས་པ་བརྗོད་པ་ལ། འདི་ལྟར་རྒྱལ་པོ་ཨ་ཤོ་ཀའི་ན་ཚོད་གསུམ་གྱི་ཚད་དུ་གྱུར་པ་ལ། དེ་ན་ཚོད་དང་པོ་ལ་ནི་
[227b.4]འདོད་པའི་ཨ་ཤོ་ཀར་གྱུར་ཏོ། །ན་ཚོད་གཉིས་པ་ལ་ནི་གཏུམ་པའི་ཨ་ཤོ་ཀར་གྱུར་ཏེ། གང་གིས་བཙོན་ར་བཟང་པོ་བྱས་ནས་སྐྱེ་བོ་བྱེ་བའི་སྲོག་བརླག་པར་གྱུར་ཏོ། །ན་ཚོད་གསུམ་པ་ལ་ནི་ཆོས་ཀྱི་ཨ་ཤོ་ཀར་གྱུར་ཏེ། གང་གིས་ཆོས་ཀྱི་རྒྱལ་པོ་པ་བརྒྱད་ཁྲི་བཞི་སྟོང་རབ་ཏུ་གནས་ཤིང་སྤྱན་ཕྱེའོ། །དེ་
[227b.5]ནས་ཉི་མ་དེ་ཉིད་ལ་རྒྱལ་པོ་ཨ་ཤོ་ཀའི་བཙུན་མོ་པདྨ་ཅན་ཞེས་བྱ་བ་ལ་བུ་བཙས་པ་དང་། དེ་ལས་བུ་གཟུགས་བཟང་བ་མཛེས་པ་བལྟ་ན་སྡུག་པ་དེའི་མིག་ཤིན་ཏུ་མཛེས་པ་ཞིག་སྐྱེས་སོ། །དེ་ནས་སྐྱེས་བུ་ཉུང་རུམ་ཞིག་རྒྱལ་པོའི་ཁབ་ཏུ་སོང་སྟེ་སྨྲས་པ། ལྷ་ཁྱེད་ལ་སྲས་བལྟམ་གྱིས་དགྱེས་པ་བསྐྱེད་དུ་གསོལ།
[227b.6]རྒྱལ་པོས་སྨྲས་པ། དེང་ནི་ང་ཡིས་དགའ་བ་རྒྱ་ཆེན་ཐོབ། །དཔའ་བོའི་རིགས་ཀྱི་སྒྲ་ནི་གྲགས་གྱུར་ཅིང་། །ཆོས་ཀྱིས་རྒྱལ་སྲིད་རྣམ་པར་འཕེལ་བ་ན། །བུ་སྐྱེས་པས་ནི་ཆོས་ཀྱི་རྣམ་འཕེལ་འགྱུར། །དེ་ནས་རྒྱལ་བོ་མྱ་ངན་མེད་དེས་བཙས་སྟོན་བྱ་བར་བརྩམས་ཏེ། གྲོང་ཁྱེར་པ་ཏི་ལི་པུ་ཏྲ་ཐམས་ཅད་
[227b.7]དང་ལྡན་པ་ལེགས་པར་ཆག་ཆག་བཏབ་ཅིང་ཕྱག་དར་བྱས་ཤིང་སྦྱངས་ཏེ། རྡོ་དང་། གསེག་མ་དང་། གྱོ་མོ་བསལ་ཞིང་། ཤིང་དང་། སོ་ཕག་དང་། མི་གཙང་བའི་འདམ་རྫབ་དང་། ཕྱག་དར་གྱི་ཚོགས་མེད་པར་བྱས་ནས་དར་དང་མེ་ཏོག་གི་ཆུན་འཕྱང་བཏགས་ཏེ། བདུག་སྤོས་ཀྱི་སྣོད་ནས་སྤོས་གཏུལ་
[228a]
[228a.1]ནས་ཁྱིམ་དང་། སྲང་བར་དང་། བཞི་མདོ་དང་། སུམ་མདོ་ལ་སོགས་པ་བརྒྱན་པར་བྱས་པ་ནི་འདི་ལྟ་སྟེ། རས་དང་། དར་དང་། བེའུ་རས་དང་། དར་ལྭ་དང་། ཟར་མའི་རས་དང་། དུ་གུ་ལའི་རས་དང་། རས་ཡུག་ཆེན་ལ་སོགས་པ་བཏགས་པ་དང་། རྔ་ཡབ་དང་། མཛེས་པའི་
[228a.2]གདུ་བུ་དང་། དཔུང་རྒྱན་དང་། དོ་ཤལ་དང་། སེ་མོ་དོ་དང་། མུ་ཏིག་གི་ཆུན་འཕྱང་དང་། དྲིལ་བུ་དང་། ནོར་བུ་ཆུ་ཤེལ་དང་། མེ་ཤེལ་ལ་སོགས་པ་དང་། ནོར་བུ་ཆེན་པོའི་རྣ་རྒྱན་བཏགས་པ་དང་། བ་དན་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་བསྒྲེང་བའི་
[228a.3]ཤིང་དང་། ཁྱིམ་ལ་བཏགས་པ་དང་། རས་ཀྱི་བླ་རེ་དང་། དར་གྱི་བླ་རེས་སྤུད་པས་གྲོང་ཁྱེར་པ་ཏ་ལི་པུ་ཏྲ་ཀུན་ནས་དྲི་ཟའི་རྒྱལ་པོའི་གནས་དང་འདྲ་བར་རྣམ་པར་བཞག་པར་གྱུར་ཏོ། །པ་ཏ་ལི་པུ་ཏྲ་དང་། པ་ཏ་ལི་པུ་ཏྲའི་ཉེ་འཁོར་ཇི་སྙེད་པར་སིལ་སྙན་གྱི་སྒྲ་སྒྲོགས་པ་རྣམས་རབ་ཏུ་གནས་པ་ནི་
[228a.4]འདི་ལྟ་སྟེ། གར་མཁན་དང་། གར་སྟོན་པ་དང་། གཏམ་བརྗོད་པ་དང་། བཞད་གད་བྱེད་པ་དང་། མཛེས་བྱེད་པ་དང་། གླུ་ལེན་པ་དང་མིག་འཕྲུལ་མཁན་དང་། མཆོད་པ་དང་། བུད་མེད་ཀྱི་ཆ་ལུགས་འགེབས་པ་དང་། ཁར་གསིལ་དཀྲོལ་བ་དང་། རྔ་རྐེད་ཉག་རྡུང་བ་དང་། བྱིས་པ་ལྔ་
[228a.5]ཚོམས་པ་དང་། སྲང་བར་ན་རྩེ་བ་སྟེ། དེ་དག་ཐམས་ཅད་སྲང་དང་། སྲང་བར་དང་། བཞི་མདོ་དང་སུམ་མདོ་དེ་ཐམས་ཅད་དུ་རང་རང་གི་བྱ་བ་ཐམས་ཅད་ཀྱིས་མཛེས་པར་བྱས་སོ། །གྲོང་ཁྱེར་གྱི་སྒོ་བཞིར་ཡང་སྦྱིན་པ་ནི་གཏོང་། བསོད་ནམས་དག་བྱེད་པ་ནི་འདི་ལྟ་སྟེ། ཟས་འདོད་པ་རྣམས་
[228a.6]ལ་ནི་ཟས། གོས་འདོད་པ་རྣམས་ལ་ནི་གོས། དྲི་དང་། ཕྲེང་བ་དང་། བྱུག་པ་འདོད་པ་རྣམས་ལ་ནི་དྲི་དང་ཕྲེང་བ་དང་། བྱུག་པ། རས་ཟུང་དང་། རས་ཡ་བ་དང་། ཀཱཪྵཱ་པ་ཎ་འདོད་པ་རྣམས་ལ་ནི། རས་ཟུང་དང་རས་ཡ་བ་དང་ཀཱཪྵཱ་པ་ཎ་སྦྱིན་པར་བྱེད་པ་དང་། རབ་ཏུ་དགའ་བའི་རོལ་མོ་རྣམས་
[228a.7]རྡུང་། སྤྱི་བོ་ལ་ཏིལ་མར་གྱིས་ནི་ཉུག་པར་བྱེད་དོ། །ཞག་གཅིག་ལ་ཇི་ལྟ་བ་དེ་བཞིན་དུ་གསུམ་པ་ནས་བདུན་པ་ནས། ཉིན་ཞག་ཉི་ཤུ་རྩ་གཅིག་གི་བར་དུ་བཙས་སྟོན་རྒྱ་ཆེར་བྱས་ཏེ། པང་ན་འཚོ་བའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། རྩེད་གྲོགས་
[228b]
[228b.1]ཀྱི་མ་མ་གཉིས་ཏེ་མ་མ་བརྒྱད་ལ་གཏད་དོ། །དེ་ལྟར་གཞོན་ནུ་དེ་མ་མ་བརྒྱད་པོ་ཐམས་ཅད་ཀྱིས་རང་གི་བཟོ་ལེགས་པར་བྱས་པས་ཡོངས་སུ་བསྐྱངས་ཤིང་། མཁས་པ་དང་ལྡན་པ་རྣམས་ཀྱིས་འོ་མ་དང་། མར་སར་དང་། ཞོ་དང་། མར་གྱི་སྙིང་པོ་དང་། སྦྲང་རྩིས་སྐྱེད་པར་བྱེད་པར་རྩོམ་པར་གྱུར་ཏོ། །དེ་
[228b.2]ནས་རྒྱལ་པོ་ཨ་ཤོ་ཀ་བུ་བལྟ་བར་མངོན་པར་དགའ་བས་སླས་རྣམས་ལ་གཞོན་ནུ་ཅི་འདྲ་བ་བལྟ་བར་བྱའོ་ཞེས་སྨྲས་སོ། །དེ་ནས་མ་མ་རྣམས་ཀྱིས་རྒྱལ་པོ་ལ་བསྟན་པའི་ཕྱིར་ཁྱེར་བ་དང་། མཐོང་ནས་རྒྱལ་པོས་གཞོན་ནུའི་མིང་ཇི་ལྟར་གདགས་པར་བྱ་ཞེས་བསམས་པ་དང་། གང་གི་ཕྱིར་འདི་ནི་ང་ལ་ཆོས་
[228b.3]རབ་ཏུ་ཞུགས་པ་ན་སྐྱེས་པས་ན་དེའི་ཕྱིར་ཆོས་འཕེལ་བ་ཉིད་དུ་མིང་གདགས་པར་བྱའོ་ཞེས་སྨྲས་ནས། གཞོན་ནུ་རྒྱལ་པོ་ཨ་ཤོ་ཀས་བླངས་སོ། །དེ་ནས་རྒྱལ་པོས་གཞོན་ནུ་ལ་བལྟས་ནས་དགའ་བཞིན་དུ་སྨྲས་པ། ངའི་བུ་ལ་མིག་བཟང་ལེགས་སྐྱེས་པ། །ཨུཏྤལ་སྔོ་འདྲ་རབ་ཡངས་རྫི་མ་ཅན། །གང་
[228b.4]གིས་བཞིན་རྒྱན་མཛེས་པར་བྱས་པ་ནི། །སྒྲ་གཅན་ཁ་ལས་ཐར་པའི་ཟླ་བ་འདྲ། །ཇི་ཙམ་ན་རྒྱལ་པོས་བློན་པོ་རྣམས་ལ་སྨྲས་པ། ཁྱེད་རྣམས་ཀྱིས་འགའ་ཞིག་ལ་འདི་ལྟ་བུའི་མིག་ཡོད་པ་མཐོང་ངམ། བློན་པོ་རྣམས་ཀྱིས་སྨྲས་པ། ལྷ་མ་མཐོང་ལགས་སོ། །དེ་ནས་དེ་ན་གནས་པའི་འཁོར་རྣམས་ལ་དེ་
[228b.5]སྐད་རྒྱལ་པོས་སྨྲས་པ་དང་། རིའི་རྒྱལ་པོ་ཁ་བ་ཅན་ན་ལོར་བསྟེན་པའི་བྲམ་ཟེ་རྣམས་དེ་ཉིད་དུ་ལྷགས་པ་དང་། དེ་རྣམས་ལ་རྒྱལ་པོས་གཞོན་ནུ་བསྟན་ཏེ། ཁྱེད་རྣམས་ཀྱིས་ཀྱང་འགའ་ཞིག་ལ་འདི་ལྟ་བུའི་མིག་ཡོད་པར་མཐོང་ངམ། ལྷ་མིར་གྱུར་པ་རྣམས་ལ་ནི་མ་མཐོང་སྟེ། དེ་ལྟ་མོད་ཀྱི་འོན་ཀྱང་
[228b.6]ལྷ་རིའི་རྒྱལ་པོ་ཁ་བ་ཅན་ན་ཀུན་ལ་ཞེས་བྱ་བའི་བྱ་དེ་ལ་འདི་ལྟ་བུའི་མིག་མཆིས་སོ། །ཡང་སྨྲས་པ། རི་རྒྱལ་ཁ་བ་ཅན་ནི་བྲག་གི་རྩེ། །མེ་ཏོག་མང་ཞིང་ཆུ་ཕྲན་རབ་འབབ་པ། །དེ་ན་ཀུན་ལ་ཞེས་བྱ་བའི་བྱ། །འདི་ཡི་མིག་དང་རྣམ་པར་འདྲ་བ་ཡོད། །དེ་ནས་རྒྱལ་པོས་བྱ་ཀུན་ལ་མྱུར་དུ་ཁྱེར་ལ་ཤོག་
[228b.7]ཅིག་ཅེས་སྨྲས་པ་དང་། དེའི་སྟེང་གི་དཔག་ཚད་ཅིག་ཙམ་དུ་གནོད་སྦྱིན་རྣམས་ཀྱིས་ཐོས་སོ། །འོག་གི་དཔག་ཚད་གཅིག་ཙམ་དུ་ནི་ཀླུ་རྣམས་ཀྱིས་ཐོས་སོ། །དེ་ནས་གནོད་སྦྱིན་གྱིས་སྐད་ཅིག་མ་དེ་ཉིད་ལ་བྱ་ཀུན་ལ་ཁྱེར་ཏེ་འོངས་སོ། །དེ་རྒྱལ་པོས་གཞོན་ནུ་དང་། ཀུན་ལའི་མིག་ལ་ཤིན་ཏུ་ཡུན་རིང་
[229a]
[229a.1]བར་བརྟགས་ན་ཁྱད་པར་ཅུང་ཟད་ཀྱང་མ་རྟོགས་སོ། །དེ་ནས་རྒྱལ་པོས་སྨྲས་པ། ཨེ་མ་ཧོ། གཞོན་ནུ་དང་། ཀུ་ན་ལའི་མིག་ཤིན་ཏུ་འདྲ་བ་ཡིན་པས་ན་གཞོན་ནུ་ལ་མིང་ཀུན་ལ་ཞེས་གདགས་པར་བྱའོ། །ཡང་སྨྲས་པ། ས་བདག་དེ་ནི་མིག་ལ་རྗེས་དགའ་བས། །དེ་ཚེ་བུ་ལ་ཀུ་ན་
[229a.2]ལ་ཞེས་སྨྲས། །དེ་ནས་འཕགས་པའི་སེམས་ཅན་རྒྱལ་པོའི་བུ། །དེ་ཡི་མིང་ནི་ས་སྟེངས་རབ་ཏུ་གྲགས། །དེ་ནས་རྒྱ་ཆེར་གཞོན་ནུ་ཆེན་པོར་གྱུར་བའི་བར་དུ་སྟེ། དེ་ལ་གསེར་ཕྲེང་ཅན་ཞེས་བྱ་བའི་བུ་མོ་ཆུང་མའི་དོན་དུ་བཀུག་ནས་བྱིན་ཏེ། ཕའི་བཟོའི་གནས་དང་ལས་ཀྱི་གནས་འདི་ལྟ་སྟེ། གླང་པོ་
[229a.3]ཆེའི་གཉར་བཞོན་པ་དང་། རྟ་ལ་བཞོན་པ་དང་། ཤིང་རྟའི་ཐབས་དང་། མདའ་གཞུའི་ཐབས་དང་། ལྕགས་ཀྱུས་བསྒྱུར་བའི་ཐབས་དང་། མདའ་བོ་ཆེ་འཕེན་པའི་ཐབས་དང་། ལྕགས་མདའ་འཕེན་པའི་ཐབས་དང་། ཐག་མདུང་འཕེན་པའི་ཐབས་དང་། མདུན་དུ་བསྣུར་བ་དང་།
[229a.4]ཕྱིར་བསྣུར་བ་དང་། བཅད་པ་དང་། དྲལ་བ་དང་། རྒྱང་ནས་ཕོག་པ་དང་། སྒྲ་གྲགས་པར་ཕོག་པ་དང་། གནད་དུ་ཕོག་པ་དང་། མི་འཆོར་བར་ཕོག་པ་དང་། ཚབས་ཆེ་བ་དང་། དགས་པ་དང་། འཛིན་སྟངས་དང་། གོམ་སྟངས་ལ་བྱང་བར་གྱུར་ཏོ། །རྒྱལ་པོ་ཨ་ཤོ་ཀས་དེའི་དོན་དུ་ཁྱིམ་
[229a.5]གསུམ་བྱེད་དུ་བཅུག་སྟེ། གཅིག་ནི་རྒུན་གྱིའོ། །གཉིས་པ་ནི་སོ་གའི་འོ། །གསུམ་པ་ནི་དབྱར་གྱིའོ། །དེ་ལ་རེ་ཞིག་རྒུན་གྱི་ནི་གཅིག་ཏུ་དྲོ་བའོ། །སོ་གའི་ནི་གཅིག་ཏུ་བསིལ་བའོ། །དབྱར་གྱི་ནི་དེ་གཉིས་ཀ་ཡོད་པ་སྟེ། ཤིན་ཏུ་གྲང་བ་ཡང་མ་ཡིན། ཤིན་ཏུ་དྲོ་བ་ཡང་མ་ཡིན་པའོ། །ཆུང་མ་
[229a.6]རྣམ་པ་གསུམ་འཇོག་སྟེ། ཆེ་བ་དང་བར་མ་དང་ཆུང་བའོ། །དེ་ནས་གཞོན་ནུ་ལྷའི་བུ་མོ་དང་འདྲ་བའི་བུད་མེད་ཀྱི་རབ་མཆོག་དགོད་པ་དང་མིག་ཟུར་དང་སྟེག་པ་དང་། སྒེག་པ་དང་། གར་དང་། གླུའི་ཉེ་བར་སྤྱོད་པ་ལ་མཁས་པ་རྣམས་དང་ལྷན་ཅིག་ཁང་བཟངས་ཀྱི་སྟེང་གི་གཞིར་གཏོགས་པ་ན་བཙུན་མོ་
[229a.7]གསེར་ཕྲེང་ཅན་དང་ལྷན་ཅིག་དགའ་བ་དང་། རྩེ་བ་དང་། ཡོངས་སུ་སྤྱོད་པ་ནས་ཇི་སྲིད་དུས་གཞན་ཞིག་ན་རྒྱལ་པོ་ཀུན་ལ་དང་ལྷན་ཅིག་ཁྱིམ་བྱའི་ཀུན་དགའ་ར་བར་སོང་བ་དང་། དེ་ནས་གནས་བརྟན་གྲགས་པ་མངོན་པར་ཤེས་པ་དྲུག་དང་ལྡན་པ་དེས་མཐོང་ངོ་། །མཐོང་ནས་ཀྱང་ཀུན་ལའི་མིག་ནི་ཡུན་རིང་
[229b]
[229b.1]བོར་མི་ཐོགས་པར་འཇིག་པར་འགྱུར་རོ་སྙམ་ནས་དེས་རྒྱལ་པོ་ལ་སྨྲས་པ། ཅིའི་ཕྱིར་གཞོན་ནུ་རང་གི་ལས་མ་སྦྱར། དེ་ནས་རྒྱལ་པོས་ཀུན་ལ་ལ་སྨྲས་པ། ཀུ་ན་ལ་དགེ་འདུན་གྱི་གནས་བརྟན་ཇི་སྐད་གསུངས་པ་དེ་དྲིས་ཤིག །དེ་ནས་གཞོན་ནུས་གནས་བརྟན་གྱི་རྐང་པ་གཉིས་ལ་བཏུད་དེ་སྨྲས་པ། གནས་བརྟན་
[229b.2]ཅི་ཞིག་བཀའ་སྩལ། གནས་བརྟན་གྱིས་སྨྲས་པ། ཀུན་ལ་མིག་ནི་མི་རྟག་པའོ་ཞེས་ཡིད་ལ་གྱིས་ཤིག །ཡང་སྨྲས་པ། གང་དུ་འགྲོ་མང་རྗེས་སུ་ཆགས་གྱུར་ནས། །མི་ཕན་ཐོབ་པའི་ལས་རྣམས་བྱེད་པ་ཡི། །མིག་ནི་རབ་གཡོ་སྡུག་བསྔལ་སྟོང་ལྡན་པར། །རྟག་ཏུ་སོ་སོར་རྟོག་བྱོས་ཀུན་ལ། །དེ་དེ་
[229b.3]བཞིན་དུ་སློབ་པར་བྱེད་པའི་ཡིད་ལ་བྱེད་པ་དང་རབ་ཏུ་ལྡན་ཞིང་གཅིག་པུར་མངོན་པར་དགའ་བ་དང་། རབ་ཏུ་ཞི་བ་ལ་མངོན་པར་དགའ་བར་གྱུར་ཏོ། །དེ་ཡང་རྒྱལ་པོའི་ཕོ་བྲང་གི་གནས་དབེེན་པར་འདུག་ཅིང་། མིག་གི་ཉེས་དམིགས་དང་། སྐྱེ་མཆེད་མི་རྟག་པ་ལ་སོགས་པའི་རྣམ་པར་ཡོངས་སུ་
[229b.4]རྟོག་པར་བྱེད་དོ། །དེ་ནས་རྒྱལ་སྲུང་མ་ཞེས་བྱ་བའི་བཙུན་མོ་དམ་པ་ཕྱོགས་དེར་ཉེ་བར་སོང་བ་དང་། དེས་ཀུན་ལ་དེ་གཅིག་པུ་འདུག་པ་མཐོང་ནས། མིག་ལ་རྗེས་སུ་ཆགས་པས་ལུས་ལ་ཀུན་དུ་འཁྱུད་དེ། སྨྲས་པ། ཁྱེད་ཀྱི་ལུས་ལས་ངེས་བབ་པའི། །འདོད་ཆགས་མེ་ནི་སྟོབས་ཅན་གྱིས། །
[229b.5]ནགས་མེ་སྟོབས་ཅན་གཡོ་བ་ནི། །མང་པོས་རྣམ་པར་བསྲེགས་པར་གྱུར། །གཞོན་ནུ་བདག་དང་ལྷན་ཅིག་ཏུ། །དགའ་བ་རྗེས་སུ་མྱོང་བར་བྱ། །དེས་ཐོས་པ་དང་། ཀུན་ལས་ལག་པ་གཉིས་ཀྱིས་རྣ་བ་བཀག་སྟེ་སྨྲས་པ། ཁྱེད་ནི་ཚིག་འདི་སྨྲ་བར་མི་རིགས་ཏེ། །བུ་ཡི་མ་བཞིན་ཁྱེད་ནི་བདག་
[229b.6]གི་མ། །འདི་ནི་ངན་འགྲོའི་ལམ་གྱི་སྒོ་ཡིན་པས། །ཆོས་མིན་འདོད་ཆགས་ཡོངས་སུ་སྤང་བར་གྱིས། །དེ་ནས་རྒྱལ་སྲུང་མས་སྨྲས་པ། །འདིར་ཉེས་པ་ཅི་ཞིག་མཐོང་། །གཞན་ཡང་གཞོན་ནུ་རེ་ཞིག་ཉོན་ཅིག །དཔེར་ན་ཉི་མའི་གཟི་བརྗིད་བསྟན་པའི་ཚ་བས་གདུངས་ཏེ་ཆུ་ནི་འཐུངས་པ་
[229b.7]དང་། ཇི་ལྟར་ལུས་ནི་ཆུ་ཡིས་ཚིམ་བར་བྱེད་ལ་སྡིག་པ་ཡོད་པར་རིགས་མ་ཡིན། །དེ་བཞིན་འདོད་པའི་མེ་ནི་ཆེན་པོས་ལྷག་པར་ཤིན་ཏུ་གདུངས་པར་གྱུར་པ་ན། །ལུས་ལ་རེག་པའི་ཆུ་ཡི་དགའ་བ་དེ་ལས་ཆོས་མིན་ཅི་ཞིག་འབྱུང་། །ཀུ་ན་ལས་སྨྲས་པ། ང་ཡི་གྲགས་པར་མི་འགྱུར་མཆོག་ཏུ་བརྙས་
[230a]
[230a.1]ཤིང་ཕྱི་ནས་རྗེས་སུ་འགྱོད་པར་འགྱུར། །ང་ཡི་ཀུན་དུ་སྤྱོད་པར་མི་འགྱུར་དེ་བཞིན་རིགས་ཉམས་པ་ཡང་ཉིད་དུ་འགྱུར། །འཕགས་པ་ཉིད་དུ་མི་འགྱུར་བཀྲེན་འགྱུར་ངན་པར་ཚིག་གིས་ཆད་པ་བཅད་པར་འགྱུར། །སྤྱོས་པས་འགྱུར་གྱི་གྲགས་པར་མི་འགྱུར་ཆོས་ཀྱང་མི་སྣང་ཉིད་དུ་
[230a.2]འགྱུར་བའོ། །རྒྱལ་སྲུང་མས་སྨྲས་པ། ཀུན་ལ་དེ་ལྟ་ཡིན་མོད་ཀྱི་གང་ཁྱེད་འཇིགས་པར་འགྱུར་བ་འདི་འགའ་ཞིག་གིས་མཐོང་ནས་གྲགས་པར་འགྱུར་བ་མ་ཡིན་ཏེ། དེ་ཡང་རྣམ་པར་དབེན་ཞིང་མིའི་འདུ་བ་དང་བྲལ་བའི་ཕྱིར་རོ། །ཡང་སྨྲས་པ། ཡུ་བུའི་མཐོང་ནས་སྨྲ་བ་ནི། །བུད་མེད་དག་གམ་
[230a.3]སླས་རྣམས་ཀྱང་། །གང་ཡང་ཡོད་པ་མ་ཡིན་ཏེ། །དེ་བས་བདག་གི་ཚིག་ཉོན་ཅིག །འདོད་དང་བཅས་པའི་བུད་མེད་ནི། །དབེན་པར་ཡོངས་སུ་སྤོང་བྱེད་ན། །དེ་ཡི་ཆོས་ཆེན་འཇིག་འགྱུར་ཞེས། །ཐོས་པ་ལས་གྲགས་ཐོས་སམ་ཅི། །གཟུགས་ཀྱི་རྗེས་སུ་མཐུན་པ་ཡི། །སྦྱིན་གནས་སྡིག་མེད་
[230a.4]མཐོང་ནས་ནི། །དེར་གང་ལེགས་པའི་མདངས་རྣམས་དང་། །ན་ཚོད་དང་ནི་འདྲ་བར་གྱིས། །ཀུ་ན་ལས་སྨྲས་པ། གང་ཁྱོད་ཀྱིས་འདི་ན་གནས་ཀྱང་མི་མཐོང་ངོ་ཞེས་སྨྲས་ན། དེ་རེ་ཞིག་ཉོན་ཅིག །འདི་ནི་གཟི་བརྗིད་འབར་བའི་ཤིང་ལ་གནས་པའི་མེ་ལྷས་བདག་ནི་མཐོང་གྱུར་ལ། །ཚངས་པས་
[230a.5]མཐོང་ཞིང་བརྒྱ་བྱིན་དག་དང་ཆུ་ལྷ་ཟླ་བ་གཤིན་རྗེ་དག་གིས་མཐོང་། །གཞན་ཡང་གཞལ་ཡས་ཁང་པ་མཆོག་ན་གནས་པ་གཞན་གྱིས་ངེས་པར་མཐོང་འགྱུར་ན། །བྱིས་པ་ཁྱེད་ཀྱིས་བདག་དང་གཉེན་གྱི་སྐྱེ་བོ་མི་མཐོང་རང་ཡང་མཐོང་མ་གྱུར། །མི་ནི་གང་ཞིག་དབེེན་པར་མེར་འཇུག་བྱེད་ན་དེ་ཅི་མེ་ཡིས་
[230a.6]མི་འཚིག་གམ། །གང་ཞིག་དྲེགས་པས་འབྲས་བུ་མངར་ལྟར་དུག་ཟ་དེ་ནི་ཉམས་པར་མི་འགྱུར་རམ། །མི་ནི་གང་ཞིག་བྲང་འགྲོ་གདུག་པས་ཟིན་པ་དེ་ནི་གནོད་པར་མི་འགྱུར་རམ། །མི་ནི་གང་ཞིག་དབེན་པར་གཏོགས་པར་སྡིག་བྱས་གོས་པར་མི་འགྱུར་དེ་མི་སྲིད། །དེ་ནས་རྒྱལ་སྲུང་མས་སྨྲས་པ།
[230a.7]གཞོན་ནུ་རེ་ཞིག་ཁྱོད་དེ་ལྟར་བུར་ཞེན་པས་གནས་པར་མ་བྱེད་ཅིག །དེ་ཡང་། དུས་ཀྱི་སྒོ་ཡི་རྫོང་དང་བིནྡའི་རིགས་ཡང་འདོད་པའི་དོན་དུ་རབ་འཇུག་ལ། །འདོད་པའི་རྒྱ་མཚོའི་ཆུ་ཡང་རྒལ་ཅིང་མཛའ་བོ་གང་ཡིན་དག་ཀྱང་འབྱེ་བ་ཡོད། །འདོད་པའི་ཕྱིར་ནི་བརྟུལ་ཞུགས་ཐལ་བ་ཤིང་གོས་འཆང་
[230b]
[230b.1]པའི་དཀའ་ཐུབ་དེས་དེ་ཐུབ། དེ་འདིར་བདེ་བ་ཡང་དག་ཐོབ་པ་འདི་ལ་ཅི་ཕྱིར་ཀུན་དུ་ཆགས་མི་བྱེད། །ཀུ་ན་ལས་སྨྲས་པ། ཁྱེད་ཀྱིས་ང་ནི་ཟིལ་གནོད་མི་འགྱུར་ཏེ། །ལྷ་ཡི་བུ་མོ་འདྲ་བའི་བུད་མེད་དག །དེ་ཡང་དམྱལ་བའི་སྡུག་བསྔལ་ཡོད་པས་ན། །གཞན་གྱི་བུད་མེད་ཡོངས་སུ་སྤང་བ་
[230b.2]ཡིན། །དེ་ནས་རྒྱལ་སྲུང་མས་རང་གི་འདོད་པའི་རྣམ་པ་ཐོབ་པར་མ་གྱུར་པས། །ཁྲོས་ཏེ་སྨྲས་པ། ཤིན་ཏུ་འདོད་པས་གདུངས་པར་གྱུར་བ་ན། །གལ་ཏེ་འདི་ན་ང་ཡིས་མི་འདོད་ན། །བློ་ངན་ཁྱོད་ནི་རིང་པོར་མི་ཐོགས་པར། །དངོས་པོ་ཐམས་ཅད་མེད་པར་འགྱུར་དུ་འོང་། །མིག་ནི་གཉིས་པོ་གང་
[230b.3]ཡིན་པས། །ཁྱོད་ནི་འདི་ན་དྲེགས་ཐོབ་པ། །མི་རིང་བ་ནི་དེ་དག་གིས། །རྒུད་པར་གྱུར་ལ་བལྟ་བར་བྱ། །ཀུ་ན་ལས་སྨྲས་པ། ཆོས་ནི་རྣམ་དག་གྱུར་ན་བདག་ནི་མྱུར་དུ་འཆི་བར་གནས་པར་གྱུར་ཀྱང་བླ། །སྐྱེ་བོ་དམ་པས་བདག་སྨད་གྱུར་པའི་འཚོ་བ་བདག་ལ་དགོས་མ་ཡིན། །གང་ལས་མཐོ་རིས་དག་
[230b.4]དང་ཆོས་འཇིག་འགྱུར་བའི་འཚོ་དེས་ཅི་ཞིག་བྱ། །མཁས་པས་ཟིལ་གྱིས་མནན་པའི་བཀྲེན་གྱུར་བདག་ནི་འཆི་བ་ཉིད་ཡིན་མོད། །ཇི་ཙམ་ན་རྒྱལ་སྲུང་མ་དེ་ཀུན་ལ་ལ་གླགས་སྐབས་ཚོལ་ཞིང་གནས་པར་གྱུར་ཏོ། །དེ་ནས་རྒྱལ་པོ་ཨ་ཤོ་ཀས་བྱང་ཕྱོགས་ཀྱི་གྲོང་ཁྱེར་རྡོ་འཇོག་པ་དང་རྩོད་པར་གྱུར་
[230b.5]པ་ཐོས་པ་དང་། རྒྱལ་པོ་རང་ཉིད་ཆས་པར་གྱུར་ཏོ། །དེ་ནས་བློན་པོ་རྣམས་ཀྱིས་སྨྲས་པ། ལྷ་གཞོན་ནུ་བརྫང་དུ་གསོལ། །དེས་ནི་ཐུལ་པར་འགྱུར་ལགས་སོ། །དེ་ནས་རྒྱལ་པོས་ཀུན་ལ་བོས་ཏེ་སྨྲས་པ། ཀུན་ལ་གྲོང་ཁྱེར་རྡོ་འཇོག་འདུལ་བར་འགྲོ་ནུས་སམ། ཀུན་ལས་སྨྲས་པ། ལྷ་རབ་
[230b.6]ཏུ་མཆི་ལགས་སོ། །དེ་ནས་རྒྱལ་པོས་ཡིད་ལ་རབ་དད་པའི། །བུ་ཞེས་བྱ་བའི་བསམ་པ་ཤེས་པ་དང་། །བརྩེ་དང་ཕུན་ཚོགས་ན་ཚོད་ལ་རིགས་པའི། །ཆད་པའི་རྐྱེན་ནི་ལུང་དུ་བསྒོ་བར་གྱུར། །དེ་ནས་རྒྱལ་པོ་ཨ་ཤོ་ཀས་གྲོང་ཁྱེར་བརྒྱན་པ་དང་། ལམ་མཛེས་པར་བྱས་ཏེ། རྒན་པོ་དང་།
[230b.7]ནད་པ་དང་། བཀྲེན་པ་རྣམས་རང་གི་ལམ་ནས་བསལ་ཏེ། གཞོན་ནུ་དང་ལྷན་ཅིག་ཤིང་རྟ་ལ་ཞོན་ཏེ། བ་ཏི་ལི་པུ་ཏྲ་ནས་བྱུང་ཏེ་བསྐྱལ་ནས། ལྡོག་པ་ན་ཀུན་ལའི་མདུན་ནས་ཡོངས་སུ་འཁྱུད་ནས་མིག་ལྟ་ཞིང་དུས་ཏེ་སྨྲས་པ། འདབ་ཆགས་རབ་མཆོག་ཀུན་ལ་མཚུངས་པའི། །མིག་ནི་
[231a]
[231a.1]ཡངས་ཤིང་ཨུཏྤལ་སྔོན་པོ་དང་། །འདྲ་བ་འདི་ལ་བལྟ་བ་གང་ཡིན་པ། །དེར་ནི་དཔལ་ཡོད་བདེ་ལྡན་རིམས་ནད་བྲལ། །ཇི་ཙམ་ན་བྲམ་ཟེ་མཚན་མཁན་ཞིག་གིས་མཐོང་བ་དང་། ཀུ་ན་ལའི་མིག་ནི་ཡུན་རིང་པོ་མི་ཐོགས་པར་འགྱུར་ཏེ། རྒྱལ་པོ་ཨ་ཤོ་ཀས་དེའི་མིག་གཉིས་ལ་
[231a.2]ཤིན་ཏུ་ཆགས་པ་ལྟས་མཁན་དེས་མཐོང་ནས་སྨྲས་པ། མི་དབང་བུ་ཡི་མིག་ནི་རྣམ་དག་ལ། །ས་བདག་ཀྱང་ནི་མིག་ལ་རྗེས་ཆགས་པས། །རྣམ་དག་དཔལ་ལམ་ཡིད་དང་རྗེས་མཐུན་པ། །རིང་པོ་མི་ཐོགས་འཇིག་པར་འགྱུར་བ་མཐོང་། །ལྷ་ཡུལ་ལྟ་བུར་རབ་དགའི་གྲོང་ཁྱེར་འདི། །གཞོན་ནུ་
[231a.3]མཐོ་བ་ལས་བྱུང་སྐོམ་བ་དག །མིག་དང་བྲལ་ནས་འདི་ཡི་སེམས། །མྱ་ངན་དག་གིས་ཡོངས་སུ་གདུངས་པར་གྱུར། །ཅི་ཙམ་ན་ཀུན་ལ་རིམ་གྱིས་གྲོང་ཁྱེར་རྡོ་འཇོག་ཏུ་ཉེ་བར་ཕྱིན་པ་དང་། རྡོ་འཇོག་གི་གྲོང་ཁྱེར་པས་ཐོས་ནས། དཔག་ཚད་ཕྱེད་དང་གསུམ་གྱི་བར་དུ་གྲོང་ཁྱེར་བརྒྱན་པ་དང་། ལམ་
[231a.4]མཛེས་པར་བྱས་ཏེ། བུམ་པ་གང་བ་མར་སར་གྱིས་བརྒྱན་པས་མདུན་བསུས་སོ། །ཡང་བཤད་པ། རྡོ་འཇོག་པ་ཡི་གྲོང་བས་ཐོས་ནས་ནི། །རིན་ཆེན་བུམ་གང་པ་ལ་སོགས་པ་ཡི། །མཆོད་པ་ཐོགས་ཏེ་མདུན་དུ་སོང་ནས་ནི། །ས་བདག་དེ་ལ་མང་དུ་རྗེད་པར་གྱུར། །མདུན་བསུས་ནས་ཐལ་མོ་སྦྱར་ཏེ་སྨྲས་
[231a.5]པ། བདག་ཅག་རྣམས་ནི་གཞོན་ནུ་ལ་འགལ་བར་བགྱིད་པ་ཡང་མ་ལགས་ལ། རྒྱལ་པོ་ཨ་ཤོ་ཀ་ལ་ཡང་མ་ལགས་མོད་ཀྱི། འོན་ཀྱང་བློན་པོ་མི་སྲུན་པ་དག་འོངས་ནས་བདག་ཅག་ལ་བརྙས་པར་བགྱིས་ལགས་མོད། ཅི་ཙམ་ན་ཀུན་ལ་བསྙེན་བཀུར་ཆེན་པོས་གྲོང་ཁྱེར་རྡོ་འཇོག་ཏུ་ཞུགས་པར་གྱུར་
[231a.6]ཏོ། །དེ་ནས་རྒྱལ་པོ་ཨ་ཤོ་ཀ་ལ་ནད་ཆེན་པོ་ཞིག་བྱུང་བར་གྱུར་ཏེ། དེའི་ཁ་ནས་ངན་སྐྱུགས་འོང་ཞིང་། བ་སྤུའི་བུ་ག་ཐམས་ཅད་ནས་མི་གཙང་བ་འཛག་པར་གྱུར་ཀྱང་གསོ་བར་མ་ནུས་སོ། །དེ་ནས་རྒྱལ་པོས་སྨྲས་པ། ཀུན་ལ་ཁུག་ཅིག །དེ་རྒྱལ་སྲིད་ལ་གཞག་པར་བྱ་སྟེ། ཁོ་བོ་ཡང་སླར་
[231a.7]འཚོ་བས་ཅི་ཞིག་བྱ། དེ་ཐོས་ནས་རྒྱལ་སྲུང་མས་བསམས་པ། གལ་ཏེ་ཀུན་ལ་རྒྱལ་སྲིད་ལ་བཞག་ན། ངའི་འཚོ་བ་མེད་པར་འགྱུར་རོ་སྙམ་ནས་དེས་སྨྲས་པ། ལྷ་བདག་གིས་ཁྱེད་གསོས་པར་བགྱི་ལགས་ཀྱི། འོན་ཀྱང་སྨན་པ་རྣམས་ནང་དུ་མཆི་བ་དགག་ཏུ་གསོལ། ཇི་ཙམ་ན་རྒྱལ་པོས་
[231b]
[231b.1]སྨན་པ་རྣམས་འོང་བ་བཀག་པར་གྱུར་ཏོ། །དེ་ནས་རྒྱལ་སྲུང་མས་སྨན་པ་རྣམས་ལ་སྨྲས་པ། གལ་ཏེ་སྐྱེས་པའམ། བུད་མེད་འདི་ལྟ་བུའི་ནད་ཀྱིས་ཟིན་པ་ཡོད་ན་དེ་ཁྱེད་རྣམས་ཀྱིས་ང་ལ་སྟོན་ཅིག །དེ་ནས་རི་ཁྲོད་པ་གཞན་ཞིག་དེ་ལྟ་བུའི་ནད་ཀྱིས་ཟིན་པ་དང་། དེའི་ཆུང་མས་སྨན་པ་ལ་ནད་དེ་
[231b.2]སྨྲས་པ་དང་། སྨན་པས་སྨྲས་པ། ནད་པ་དེ་ནི་འོང་དུ་ཆུ་གཅིག། ནད་བལྟས་ལ་སྨན་བསྟན་བར་བྱའོ། །ཅི་ཙམ་ན་དེ་བཀུག་ནས་སྨན་པའི་གམ་དུ་ཕྱིན་པ་དང་། སྨན་པས་རྒྱལ་སྲུང་མའི་གམ་དུ་ཁྱེར་རོ། །རྒྱལ་སྲུང་མས་ཀྱང་ཤིན་ཏུ་དབེེན་པའི་ས་ཕྱོགས་སུ་དེ་བསད་ནས་བལྟས་པ་དང་། དེ་ཞུ་
[231b.3]བའི་གནས་ན་རྒྱུ་མར་འབུ་ཆེན་པོ་ཞིག་བྱུང་སྟེ། དེ་སྟེང་དུ་འགྲོ་བ་དང་། དེའི་ངན་སྒྱུགས་གྱེན་དུ་འབྱུང་ངོ་། །གལ་ཏེ་ཐུར་དུ་འགྲོ་ན་ནི་འོག་ཏུ་འབྱུང་ངོ་། །དེས་དེར་ན་ལེ་ཤམ་བཏགས་ཏེ་བླུགས་ཀྱང་མ་ཤིའོ། །དེ་བཞིན་དུ་པི་པི་ལིང་དང་། སྲིང་ག་དང་། ལན་ཚྭ་ལ་སོགས་པ་བླུད་པ་ནས་ཇི་ཙམ་ན་སྒོག་སྐྱ་བླུགས་པ་དང་།
[231b.4]རེག་པ་ཙམ་གྱིས་ཤི་ནས། བཤང་བའི་ལམ་ནས་བྱུང་ངོ་། །དེས་དེ་ལྟ་བུའི་རྣམ་པ་རྒྱལ་པོ་ལ་གོ་བར་བྱས་ཏེ། ལྷ་སྒོག་སྐྱ་གསོལ་ཅིག །དེས་ན་ཁྱེད་སོས་པར་འགྱུར་རོ། །རྒྱལ་པོས་སྨྲས་པ། ལྷ་མོ་ང་ནི་རྒྱལ་རིགས་སྤྱི་བོ་ནས་དབང་བསྐུར་བ་ཡིན་ན། ཇི་ལྟར་ན་སྒོག་པ་ལ་ཡོངས་སུ་ལོངས་སྤྱོད། བཙུན་
[231b.5]མོས་སྨྲས་པ། ལྷ་འདི་ནི་སྲོག་གི་དོན་གྱི་སྨན་ཡིན་པས་ཉེ་བར་སྤྱོད་པར་མཛོད་ཅིག །ཇི་ཙམ་ན་རྒྱལ་པོས་ཡོངས་སུ་ལོངས་སྤྱད་ནས་འབུ་དེ་ཡང་ཤི་སྟེ། བཤང་བའི་ལམ་ནས་བྱུང་ངོ་། །རྒྱལ་པོ་སོས་པར་གྱུར་ནས། དེས་རྒྱལ་སྲུང་མ་ལ་མཆོག་སྦྱིན་པར་བརྩམས་སོ། །ཁྱོད་ལ་
[231b.6]མཆོག་ནི་ཅི་ཞིག་སྦྱིན་པར་བྱ། དེས་སྨྲས་པ། བདག་ལ་ཞག་བདུན་གྱི་བར་དུ་རྒྱལ་སྲིད་གསོལ་ཅིག །འོ་ན་ཁོ་བོ་ཅིར་འགྱུར། བཙུན་མོས་སྨྲས་པ། ཞག་བདུན་འདས་པ་དང་ལྷ་ཉིད་རྒྱལ་པོ་མཛོད་ཅིག །ཅི་ཙམ་ན་རྒྱལ་སྲུང་མ་ལ་ཞག་བདུན་གྱི་བར་དུ་རྒྱལ་སྲིད་སྦྱིན་ནོ། །དེ་བློ་སྐྱེས་པ།
[231b.7]ད་ནི་བདག་གིས་ཀུན་ལ་ལ་འཁོན་གཅུགས་མངོན་དུ་བྱའོ་ཞེས་དེས་རྡོ་འཇོག་པའི་གྲོང་ཁྱེར་པ་རྣམས་ཀྱིས་ཀུན་ལའི་མིག་བརླག་པར་གྱིས་ཤིག་ཅེས་བཅོས་མའི་ཡི་གེ་བྲིས་ཏེ། དེ་ཡང་རྒྱལ་པོ་མྱ་ངན་མེད་ཀྱིས་བཀའ་སྩལ་པ། ཤིན་ཏུ་དཔའ་ཞིང་སྟོབས་དང་ཕ་རོལ་གནོན་པ་ཐོགས་པ་མེད་པའི་
[232a]
[232a.1]རྩལ་གྱིས་རྣམ་པར་གནོན་པ་ཐོབ་པའི་རྒྱལ་པོ་རྒྱ་མཚོ་བཞི་དང་། སའི་བདག་པོའི་སྤྱི་བོའི་ཅོད་པན་གྱིས་སྟན་དང་། རྐང་པར་ཡོངས་སུ་གཏུགས་པ། མྱ་ངན་དང་བྲལ་ནས་མྱ་ངན་མེད་པ། མ་ག་དྷཱའི་གྲོང་ཁྱེར་ནས་པ་ཏི་ལི་པུ་ཏྲ་དང་། རྡོ་འཇོག་ལ་གནས་པའི་བར་ལ་རྒྱུན་མི་འཆད་པར་
[232a.2]དགེ་བའི་ལས་ཀྱི་རྩོམ་པས་ཉེ་བར་འཚོ་བ། སྡེ་ཚོམ་གསུམ་པའི་གྲོང་ཁྱེར་གྱི་སྐས་ལ་གནས་པའི་སྐྱེ་བོ་རྣམས་ལ་ཇི་ལྟར་གྲོང་ཁྱེར་པ་རྣམས་ཀྱིས་ཤེས་པར་འགྱུར་བ་དེ་ལྟར་ཁོང་དུ་ཆུད་པར་གྱིས་ཤིག །འདིར་ངའི་བུ་ཞེས་བཏགས་པའི་དགྲ་བཅོས་མའི་སྤྱོད་པ་འཇམ་པ་ལ་མཁས་པས་སྦྱར་
[232a.3]བའི་རྒྱུའི་བསྒྱིངས་པས་ཐལ་མོ་སྦྱར་བ་བྱས་པ། རིགས་ཀྱི་སོལ་བར་གྱུར་པའི་ཀུན་ལ་དེས། ཤིན་ཏུ་གཅམ་བག་གི་ཚུལ་གྱིས་ཁོ་བོ་ཕེབས་པར་བྱས་ནས། བག་ཕེབས་པས་གནོད་པ་བྱེད་ཅིང་། བཙུན་མོའི་འཁོར་ལ་ལྟ་བར་བྱེད་པས། གང་གི་ཕྱིར་འདི་ནི་མ་བརྟགས་པར་བྱེད་པ། སྙིང་རྗེ་
[232a.4]མེད་པ། འཇིག་རྟེན་ཕ་རོལ་སྤངས་པ་ཕའི་ཆུང་མ་ལ་ཡོངས་སུ་ལྟ་བས་དེའི་མོད་ལ་དངོས་པོའི་རྗེས་སུ་ཞུགས་པ། གཟུགས་ཀྱིས་ཁེངས་ཤིང་མའི་ཕྱོགས་ལ་དྲེགས་པ་འཕེལ་བར་བྱེད་པ། རིགས་ཀྱི་ཆོས་ཀྱི་གཞུང་ལུགས་སུན་འབྱིན་པར་བྱེད་པའི་མིག་གཉིས་མྱུར་དུ་ཕྱུང་ནས་བཀྲེན་
[232a.5]པ་ཉིད་དུ་གྱིས་ལ་ཤིན་ཏུ་དེངས་པའི་གོས་བསྐོན་ཏེ། ཆུང་མ་དང་བཅས་པ་ཕྱི་རོལ་དུ་སྐྲོད་ཅིག །གང་གི་མིག་གཉིས་ཀྱིས་དྲེགས་ཤིང་ཁེངས་པར་བྱེད་པ་དེ་མེད་པར་གྱིས་ལ། དེ་ཡང་སྐྱེ་བོ་རྣམས་ཀྱིས་མཐོང་བར་གྱིས་ཤིག །དེའི་ལན་གྱི་ཡི་གེ་ཡང་གཏོང་བར་མ་བྱེད་ཅིག །བྱས་པ་མི་
[232a.6]གཟོ་བའི་ཕོངས་པ་ཐོས་པས་ཀྱང་ངའི་སྙིང་འདར་བར་མ་བྱེད་ཅིག །ངས་ཁྱེད་རྣམས་ལ་གཞུང་ལུགས་བཞག་པའི་ལུང་བསྒོ་བ་འདི་ཁྱེད་རྣམས་ཀྱིས་གྱིས་ཤིག །ཡང་སྨྲས་པ། རྒྱལ་པོ་མྱ་ངན་མེད་གཏུམ་སྟོབས་ལྡན་པའི། །བཀའ་བཞིན་རྡོ་འཇོག་གྲོང་ཁྱེར་པ་ཡིས་གྱིས། །རྒྱལ་པོ་
[232a.7]ལ་གནོད་ཀུན་ལ་ཞེས་བྱའི། །མིག་གཉིས་མྱུར་དུ་དབྱུང་བ་ཉིད་དུ་གྱིས། །དེ་ལྟར་རྒྱལ་སྲུང་མ་དེས་ཡི་གེ་བྲིས་ནས། རྒྱལ་པོ་མྱ་ངན་མེད་པའི་སོའི་རྒྱས་ཡི་གེ་ལ་རྒྱ་གདབ་པར་བྱའོ་སྙམ་ནས། ཇི་ཙམ་ན་རྒྱལ་སྲུང་མས་ཡི་གེ་དེ་རྒྱལ་པོ་གཉིད་ལོག་པ་དང་སོའི་རྒྱས་གདབ་པར་བྱའོ་སྙམ་
[232b]
[232b.1]ཏེ། རྒྱལ་པོ་དང་ཉེ་བར་སོང་བ་དང་རྒྱལ་པོ་སྐྲག་པས་སད་པར་གྱུར་ཏོ། །ཆུང་མས་སྨྲས་པ། ལྷ་འདི་ཅི་ཞིག་ལགས། རྒྱལ་པོས་སྨྲས་པ། ལྷ་མོ་ངས་རྨི་ལམ་མི་དགེ་བ་མཐོང་སྟེ། བྱ་རྒོད་གཉིས་ཀྱིས་ཀུ་ན་ལའི་མིག་འབྱིན་པར་འདོད་པར་མཐོང་ངོ་། །བཙུན་མོས་སྨྲས་པ་གཞོན་ནུ་བདེ་
[232b.2]བར་གནས་ལགས་ཀྱི། དེ་བཞིན་དུ་རྒྱལ་པོ་སྐྲག་པས་སད་ནས་སྨྲས་པ། ལྷ་མོངས་རྨི་ལམ་རྨིས་སོ། །རྒྱལ་སྲུང་མས་སྨྲས་པ། རྨི་ལམ་ཇི་ལྟ་བུ། རྒྱལ་པོས་སྨྲས་པ། ཀུན་ལ་སྐྲ་དང་སེན་མོ་རིང་པོ་འཆང་ཞིང་གོས་དྲི་མ་ཅན་གྱོན་པ་མཐོང་ངོ་། །བཙུན་མོས་སྨྲས་པ། གཞོན་ནུ་
[232b.3]བདེ་བར་གནས་ལགས་ཀྱི། ཇི་ཙམ་ན་རྒྱལ་པོ་གཉིད་ཀྱིས་ལོག་པ་དང་། རྒྱལ་སྲུང་མས་ཡི་གེ་དེ་སོའི་རྒྱས་བཏབ་ནས་རྡོ་འཇོག་ཏུ་བསྐུར་རོ། །ཡང་རྒྱལ་པོ་གཉིད་ལོག་པ་ན་རང་གི་སོ་ལྷགས་པར་གྱུར་པ་རྨིས་སོ། །དེ་ནས་རྒྱལ་པོ་མཚན་མོ་དེ་ཉིད་འདས་པ་དང་། ལྟས་མཁན་རྣམས་
[232b.4]བོས་ཏེ་རྨི་ལམ་བཟླས་ནས་འདི་དག་སྟོན་པར་གྱིས་ཤིག་ཅེས་བསྒོའོ། །ལྟས་མཁན་རྣམས་ཀྱིས་སྨྲས་པ། ལྷ་གང་གིས་འདི་ལྟ་བུའི་ལྟས་མཐོང་བ་དེས་ནི་བུའི་མིག་འཇིག་པར་མཐོང་བར་འགྱུར་རོ། །ཡང་སྨྲས་པ། གང་གི་སོ་ནི་དེངས་པ་དང་། །རྨི་ལམ་ནང་ན་ལྷགས་གྱུར་པ། །བུ་ཡི་མིག་
[232b.5]ནི་འཇིག་པ་དང་། །བརླག་པའི་བུ་ནི་དེས་མཐོང་འགྱུར། །དེ་སྐད་ཐོས་པ་དང་། རྒྱལ་པོ་མྱ་ངན་མེད་སྟན་ལས་མྱུར་བར་ལངས་ཏེ། ཕྱོགས་བཞིར་ལྷ་རྣམས་ལ་གསོལ་བ་འདེབས་པ་ལ་ཞུགས་པར་གྱུར་ཏོ། །སྨྲས་པ། སངས་རྒྱས་ཆོས་དང་ཚོགས་ཀྱི་གཙོར་གྱུར་པའི། །དགེ་འདུན་མངོན་
[232b.6]དང་ལྷ་ནི་གང་ཡིན་དང་། །གང་ཡང་འཇིག་རྟེན་དྲང་སྲོང་དཀའ་ཐུབ་མཆོག །བདག་གི་བུ་སྡུག་ཕོངས་ལས་བསྲུང་བར་མཛོད། །ཡི་གེ་དེ་ཡང་རིམ་གྱིས་རྡོ་འཇོག་ཏུ་ཕྱིན་ཏོ། །དེ་ནས་རྡོ་འཇོག་པའི་གྲོང་ཁྱེར་བ་དེ་རྣམས་ཀྱིས་ཡི་གེ་དེ་མཐོང་ནས་ཀུན་ལའི་ཡོན་ཏན་རྒྱ་ཆེན་པོས་ཡོངས་སུ་མགུ་བས་མི་དགའ་བས་དེ་
[232b.7]བརྡའ་སྤྲོད་པར་མ་ནུས་ཏེ། ཡུན་རིང་པོར་རྣམ་པར་དཔྱད་ནས་རྒྱལ་པོ་གཏུམ་པོ་དང་ཚུལ་ངན་པ་བུ་ལ་ཡང་བཟོད་པར་མི་བྱེད་ན། བདག་ཅག་རྣམས་ལ་བཟོད་པར་ལྟ་ག་ལ་བྱེད། ཡང་སྨྲས་པ། ཐུབ་པའི་ངང་ཚུལ་ཅན་དུལ་བ། །འབྱུང་པོ་ཀུན་ལ་ཕན་འདོད་པའི། །ཀུན་ལ་ལའང་སྡང་བྱེད་ན། །
[233a]
[233a.1]བདག་ཅག་རྣམས་ལ་ཅིས་མི་འབྱུང་། །ཅི་ཙམ་ན་གྲོང་ཁྱེར་པའི་སྐྱེ་བོ་དེ་རྣམས་ཀྱིས་ཡི་གེ་དེ་གཞོན་ནུ་ལ་བསྟན་ཏོ། །དེ་ནས་གཞོན་ནུས་ཕའི་ཡི་གེ་སྤྱི་བོས་བླངས་ཏེ། ཡི་གེ་པ་ལ་སྨྲས་པ། ཡི་གེ་པ་ཁྱོད་རྣམས་ཀྱིས་རྒྱལ་པོས་འདིར་ཅི་ཞིག་བྲིས་པ་ཡི་གེ་ཀློགས་ཤིག། །རྒྱལ་པོ་མྱ་ངན་མེད་
[233a.2]རང་ཉིད་ཀྱིས་བྲིས་སོ་ཞེས་བྱ་བའི་བར་དུའོ། །དེ་ནས་ཡི་གེ་བཀླགས་པ་དང་། མིག་མཆི་མ་དང་བཅས་པར་གྱུར་ཅིང་ཀུན་དུ་རྨོངས་པར་གྱུར་པས་ལག་པ་ལས་ཡི་གེ་ལྟུང་བར་གྱུར་ཏོ། །ཡི་གེ་པ་གཉིས་པས་བླངས་པ་དང་། དེ་ཡང་ཀུན་དུ་རྨོངས་པར་གྱུར་ནས་དེ་བཞིན་དུ་ལག་པ་ལས་ལྟུང་བར་གྱུར་
[233a.3]ཏོ། །དེ་བཞིན་དུ་ཡི་གེ་པ་མང་པོས་བླངས་ཏེ། ཡི་གེའི་དོན་ཐོས་པ་དང་། ཀུན་ལའི་ཡོན་ཏན་ཡོངས་སུ་དྲན་པས་ཀྱི་ཧུད་འདི་ཅི་ཞིག་ཡིན་ཞེས་རྣམ་པར་སེམས་ཤིང་ཡི་གེ་ལྟུང་བར་གྱུར་ཏོ། །དེ་ནས་གཞོན་ནུས་དེ་རྣམས་ཀྱི་སྦྱོར་བ་དེ་མཐོང་ནས་སྨྲས་པ། རི་དྭགས་གཞོན་ནུའི་མིག་འདྲ་ཞིང་། །
[233a.4]བཞིན་ནི་པདྨའི་འདབ་འདྲ་བ། །པདྨ་ཞེས་བྱ་སྙན་སྨྲ་བའི། །ང་ཡི་མ་དུས་མ་བྱས་སམ། །ལྷ་ཡིས་མཐོང་ན་དགའ་བ་ཡི། །རྒྱལ་སྲུང་མ་ཞེས་བྱ་བ་དེ། །གང་ཞིག་མྱ་ངན་ནད་ཀྱིས་ནི། །དེ་ནི་དུས་བྱས་མ་གྱུར་ཏམ། །མིག་བཟང་འཇིག་རྟེན་གྲགས་པས་གསལ་བར་ནི། །གྲོང་ཁྱེར་མཆོག་གི་
[233a.5]བདེ་འབྱོར་མཐོང་ནས་ནི། །ཇི་ལྟར་མཆི་མས་མིག་ཁེབས་འཁྲུགས་པ་དང་། །སྐྱེ་བོའི་ངུ་སྒྲ་འདྲ་བ་འདི་ཅི་ཡིན། །དེ་བས་ན་རེ་ཞིག་ཡི་གེ་ཁྱེར་ལ་ཤོག་དང་། འདིར་ཅི་ཞིག་བྲིས་པ་ང་ཉིད་ཀྱིས་བཀླག་པར་བྱའོ་ཞེས་གཞོན་ནུ་རང་ཉིད་ཡི་གེ་ཀློག་པ་ལ་ཞུགས་པར་གྱུར་པ་དང་། རྒྱལ་པོ་ཨ་
[233a.6]ཤོ་ཀ་རང་ཉིད་ཀྱིས་བྲིས་སོ་ཞེས་བྱ་བའི་བར་དུ་རྒྱས་པར་རོ། །དེ་ནས་གཞོན་ནུས་ཡི་གེ་བཀླགས་ནས་གནས་བརྟན་གྲགས་པས་སྨྲས་པ་མངོན་དུ་གྱུར་པར་བྱས་ཏེ། གནས་བརྟན་གྲགས་པས་མིག་ནི་མི་རྟག་པའོ་ཞེས་བྱ་བ་ནི་ལེགས་པར་གསུངས་སོ། །དེ་ནས་གཞོན་ནུས་སྨྲས་པ། ཁྱེད་
[233a.7]རྣམས་ལས་འགའ་ཞིག་གིས་བག་ཕེབས་པ་ཉིད་ཀྱིས་ངའི་མིག་འབྱིན་པར་སྤྲོའམ། དེ་ནི་བྱ་དགོས་སོ། །དེ་རྣམས་ལས་འགའ་ཡང་སྤྲོ་བར་མ་གྱུར་ཏོ། །ཇི་ཙམ་ན་རིགས་ངན་རྣམས་བཀུག་ནས་ཀུན་ལས་མིག་ཕྱུང་ཤིག་ཅེས་སྨྲས་པ་དང་། དེ་རྣམས་ཀྱིས་ཐལ་མོ་སྦྱར་ཏེ་སྨྲས་པ། བདག་
[233b]
[233b.1]ཅག་རྣམས་ཀྱིས་རྡོ་མི་ཐོགས་ཏེ། ཅིའི་ཕྱིར་ཞེ་ན། གང་ཞིག་ཟླ་བའི་མདངས་ལྡན་པ། །བཞིན་ལས་འབྱིན་པར་བྱེད་པའི་མི། །དེ་ནི་ཟླ་འདྲའི་ཞལ་ནས་ནི། །ཁྱེད་ཀྱི་སྤྱན་ནི་འབྱིན་པར་བགྱེད། །དེ་ནས་གཞོན་ནུས་རྡོ་འཇོག་པའི་གྲོང་ཁྱེར་པ་རྣམས་ལ་གང་བསོད་ནམས་འདོད་པ་དེ་ཆོས་ཀྱི་རྒྱལ་པོ་ཅན་
[233b.2]དུ་ཤོག་ཤིག་ཅེས་དྲིལ་བསྒྲགས་སོ། །ཇི་ཙམ་ན་ཆོས་ཀྱི་རྒྱལ་པོ་ཅན་དུ་མར་མེའི་ཕྲེང་བ་བྱས་ནས། ཉི་མ་གཉིས་པ་ལ་དགེ་སློང་རྣམས་བཟའ་བ་དང་བཅའ་བས་བསྙེན་བཀུར་བྱ་བ་དང་། མེ་ཏོག་གི་གདུགས་བཏགས་པ་བྱས་སོ། །དེ་ལྟར་བྱས་ནས་ཆོས་ཀྱི་རྒྱལ་པོ་ཅན་ནས་བྱུང་སྟེ་སྐྱེ་བོའི་
[233b.3]ཚོགས་ཆེན་པོས་བསྐོར་ནས་རྡོ་ལེབ་གཞན་པ་གང་ན་བ་དེར་སོང་སྟེ་ཕྱིན་པ་དང་། དེར་འདུག་ཏེ་གསེར་གྱི་སྒྲོམ་བླངས་ནས་སྨྲས་པ། གང་ཞིག་སྤྲོ་བ་དེས་གསེར་གྱི་སྒྲོམ་འདི་ལོང་ལ་ངའི་མིག་ཕྱུང་ཤིག་ཅེས་སྨྲས་ཀྱང་ཐམས་ཅད་དུ་འགའ་ཡང་སྤྲོ་བར་མ་གྱུར་ཏོ། །ཇི་ཙམ་ན་རྒྱལ་པོ་མྱ་ངན་མེད་ཀྱི་
[233b.4]རྨི་ལམ་དུ་སྐྱེས་བུ་སྤྱི་ཅེར་མིག་སེར་བ་གཉིས་ཀྱིས། གཞོན་ནུའི་མིག་འབྱིན་པར་བྱེད་པར་མཐོང་བ་ཅི་འདྲ་བ་དེ་ལྟ་བུ་ཉིད་རིང་པོ་ཁོ་ན་ནས་འོང་བ་གཞོན་ནུས་མཐོང་ནས། སྨྲས་པ། ཀྱེ་གྲོང་ཁྱེར་པ་རྣམས་སྐྱེས་བུ་འོང་བ་འདི་དག་གིས་ངའི་མིག་དབྱུང་བར་བྱའོ། །གཞོན་ནུས་སྐྱེས་
[233b.5]བུ་དེ་གཉིས་ལ་བོས་ཏེ་དྲིས་པ། ཁྱེད་ཀྱིས་ངའི་མིག་འབྱིན་པར་སྤྲོའམ། སྐྱེས་བུ་གཉིས་ཀྱིས་སྨྲས་པ། གལ་ཏེ་ཁྱེད་དགའ་ན་མགོ་བོ་ཡང་དགས་པར་ནུས་ན། ཆུའི་ཆུ་བུར་ལྟ་བུའི་མིག་གཉིས་ལྟ་སྨོས་ཀྱང་ཅི་དགོས། དེ་ནས་གཞོན་ནུ་སྟན་ལས་ལངས་ཏེ། ཐལ་མོ་སྦྱར་བ་བྱས་ནས་
[233b.6]ཐམས་ཅད་དང་ལྡན་པའི་འཁོར་རྣམས་ལ་བཟོད་པ་གསོལ་བ་ལ་ཞུགས་པར་གྱུར་ཏོ། །བདག་ནི་བྱིས་པར་གྱུར་པས་གང་བྱས་དང་། །དབང་ཆེར་གྱུར་པའམ་འོན་ཏེ་མི་རིགས་བྱས། །དེ་ནི་དཔལ་ཉམས་ཤིན་ཏུ་སྡུག་བསྔལ་བ། །བདག་ལ་བརྩེ་བས་བཟོད་པར་བྱ་བའི་རིགས། །གཞན་
[233b.7]ཡང་། གཟུགས་རྣམས་མཐོང་བར་གྱུར་ཀྱང་འདི། །ཐ་མ་དག་ཏུ་གྱུར་པ་ཡི། །གཞོན་ནུ་ཀུན་ལ་ལ་ནི། །གནོད་བྱས་གང་ཡིན་བཟོད་པར་གྱིས། །དེའི་ཚེ་གཞོན་ནུས་གནས་བརྟན་གྱི་ཚིག་མངོན་སུམ་དུ་བྱས་ནས། དེ་རྗེས་སུ་དྲན་བཞིན་དུ་སྙས་པ། རྒུད་པ་འདི་ནི་མཁྱེན་ནས་སུ། །
[234a]
[234a.1]མིག་གི་བདག་ཉིད་ཀུན་ལ། །མི་རྟག་ཡང་དག་ལྟོས་ཤིག་ཅེས། །དེ་ཉིད་སྨྲ་བ་དེ་ཡིས་གསུངས། །དེ་ནི་བདག་གི་དགེ་བའི་བཤེས། །འདོད་དོན་ཕན་པར་བཞེད་པ་ཡིན། །གང་ཞིག་ཆོས་འདི་སྟོན་པ་ནི། །ཕོངས་ལ་བརྟན་པར་བྱེད་པ་ཡིན། །མི་རྟག་འགྱུར་བས་དེ་ནི་རྟག་
[234a.2]མིན་བར། །བླ་མས་བསྟན་པས་ཁྱེད་ཀྱིས་ཡིད་ལ་གྱིས། །དངོས་པོ་འདི་དག་རང་བཞིན་གཡོ་བས་ན། །དེང་ཁྱོད་གནོད་པ་ལ་ནི་ང་མི་འཇིགས། །ཇི་ལྟར་ས་བདག་བཞེད་པ་ལྟར། །ཁྱེད་ཀྱིས་མིག་ནི་དབྱུང་བར་གྱིས། །མི་རྟག་སོགས་ཀྱིས་ཟག་མེད་པའི། །སྙིང་པོའི་མིག་ནི་ང་ལེན་ཏོ། །
[234a.3]དེ་ནས་ཀུན་ལས་སྐྱེས་བུ་དེ་ལ་སྨྲས་པ། ཀྱེ་སྐྱེས་བུ་དེས་ན་རེ་ཞིག་ངའི་མིག་གཅིག་ཕྱུང་ལ་ངའི་ལག་ཏུ་བྱིན་ཅིག །ཇི་ཙམ་ན་སྐྱེས་བུ་དེས་ཀུན་ལའི་མིག་འབྱིན་པར་བརྩམས་སོ། །དེ་ནས་སྲོག་ཆགས་བརྒྱ་སྟོང་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་སྡུག་བསྔལ་ལོ། །དྲི་མེད་ཟེར་ལྡན་
[234a.4]ཟླ་བ་འདི། །ནམ་མཁའ་ལས་ནི་ལྷུང་བར་གྱུར། །པདྨ་དཀར་པོའི་ནགས་ལས་ཀྱང་། །དཔལ་གྱི་པདྨ་འབྱིན་པར་བྱེད། །དེ་ནས་སྲོག་ཆགས་བརྒྱ་སྟོང་དུ་བཞིན་དུ་དེས་ཀུན་ལའི་མིག་གཅིག་ཕྱུང་སྟེ། ལག་ཏུ་བྱིན་ནོ། །དེ་ནས་གཞོན་ནུས་མིག་དེ་བླངས་ཏེ། ཡོངས་སུ་བསྒོ་བས་སྨྲས་པ།
[234a.5]འབྱུང་བ་ཆེན་པོའི་མཐུ་དང་ནི། །ལས་ཀྱི་རྒྱུ་ལས་འདི་བྱུང་སྟེ། །སྲོག་མེད་འཚོ་བ་མེད་སྟོང་པ། །མི་ཡི་སྲོག་གི་རྣམ་སྤངས་པའོ། །ཇི་ལྟར་སྔོན་ཆད་ཤའི་གོང་བུ་ཁྱོད། །བྱད་བཞིན་དེང་ནི་གཟུགས་ལ་ཅིས་མི་ལྟ། །མི་མཁས་ཁྱོད་ལ་བདག་ཏུ་གནས་བྱེད་པ། །དེ་བསླུས་དེ་ན་སྨད་པར་
[234a.6]བྱ་བ་ཡིན། །དབུ་བ་འདྲ་ཞིང་ཆུ་བུར་དག་དང་མཚུངས། །ཤིན་ཏུ་ཉམ་ཆུང་གནོད་བྱེད་རང་དབང་མེད། །དེ་ལྟར་མཐོང་བ་རྟག་ཏུ་དྲེགས་མེད་ཅིང་། །དེ་ལྟར་སླར་ཡང་སྡུག་བསྔལ་མཐོང་མི་འགྱུར། །དེ་ལྟར་རྣམ་པར་བསམས་པ་དང་། དེས་དངོས་པོ་ཐམས་ཅད་ལ་མི་རྟག་པ་ཉིད་
[234a.7]དུ་མཐོང་ཞིང་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་པར་སྐྱེ་བོའི་ཚོགས་རྣམས་ཀྱིས་ཀྱང་ཤེས་སོ། །དེ་ནས་གཞོན་ནུས་བདེན་པ་མཐོང་བ་དང་། །སྐྱེས་བུ་དེ་ལ་སྨྲས་པ། བག་ཕེབས་པས་ཇི་ལྟར་མངོན་པར་འདོད་པར་མིག་གཉིས་པ་ཡང་ཕྱུང་ཤིག །ཇི་ཙམ་ན་སྐྱེས་བུ་
[234b]
[234b.1]དེས་མིག་གཉིས་པ་ཡང་ཕྱུང་ནས་ཀུན་ལའི་ལག་ཏུ་བྱིན་ནོ། །དེ་ནས་ཀུན་ལའི་ཤའི་མིག་ཕྱུང་བ་དང་། ཆོས་ཀྱི་མིག་རྣམ་པར་དག་པས་སྨྲས་པ། ང་ཡི་ཤ་ཡི་མིག་ཕྱུང་ཡང་། །འོན་ཀྱང་ཤིན་ཏུ་རྙེད་དཀའ་འདི། །ཤེས་རབ་མིག་ནི་རྣམ་དག་པ། །མ་སྨད་པ་ནི་ང་ཡིས་ཐོབ། །རྒྱལ་པོས་
[234b.2]རང་གི་བུ་ཡི་ནི། །བརྟགས་པ་སྤངས་པར་གྱུར་ཀྱང་ནི། །ཆོས་ཀྱི་རྒྱལ་པོའི་སྲས་གྱུར་པ། །བདག་ཉིད་ཆེན་པོ་ཐོབ་པར་གྱུར། །དབང་ཕྱུག་ལས་ནི་ཉམས་གྱུར་ཀྱང་། །མྱ་ངན་སྡུག་བསྔལ་རྣམས་སྤངས་པས། །སྡུག་བསྔལ་མྱ་ངན་རྣམ་འཇིག་པའི། །ཆོས་ཀྱི་དབང་ཕྱུག་ཐོབ་པར་གྱུར། །དེ་
[234b.3]ནས་ཀུན་ལའི་མིག་ཕྱུང་བ་མཐོང་བ་དང་། སྐྱེ་བོའི་ཚོགས་ཆེན་པོས་མགྲིན་གཅིག་ཏུ་སྨྲེ་སྔགས་འདོན་ཞིང་ལ་ལ་ནི་གོས་དང་རྒྱན་རྣམས་གཅོད་པར་བྱེད། ལ་ལ་ནི་ས་ལ་འགྲེ་ཞིང་ལྡོག་པར་བྱེད། ལ་ལ་ནི་དབྱིག་པ་དང་གཏུན་ཤིང་ལག་ན་ཐོགས་ཏེ་སྐྱེས་བུ་གཉིས་པོ་དེ་བརླག་པའི་ཕྱིར་བརྩོན་པར་
[234b.4]བྱེད། གཞན་དག་ནི་རྒྱལ་པོ་ལ་ཡོངས་སུ་སྨོད་པར་བྱེད་དེ། ཀྱེ་མའོ་རྒྱལ་པོ་ཁྲོ་བོའི་སྟོབས་ཅན། ཀྱེ་མའོ་རྒྱལ་པོ་ཤེས་རབ་ཞ་ནག་ཀྱེ་མའོ་རྒྱལ་པོ་དབང་ཕྱུག་གི་དྲེགས་པ་གང་ན་བུ་གཅིག་པར་གྱུར་པ་ལ་ཡང་གནས་སྐབས་འདི་ལྟ་བུར་བྱེད་ཅེས་དེ་ལྟ་བུའི་ཚུལ་རྣམ་པ་མང་པོར་སྨྲ་བཞིན་དུ་
[234b.5]གྲོང་ཁྱེར་དུ་ཞུགས་པར་གྱུར་ཏོ། །ཅི་ཙམ་ན་ཀུ་ན་ལས་འདི་ནི་རྒྱལ་པོ་མྱ་ངན་མེད་ཀྱི་བཀའ་མ་ཡིན་གྱི། གཞན་དུ་ན་སྦྱོར་བ་འདི་ནི་རྒྱལ་སྲུང་མའི་ཡིན་ནོ་ཞེས་ཐོས་སོ། །ཐོས་ནས་ཡང་སྨྲས་པ། གང་གིས་སྦྱོར་བ་འདི་ནི་བཀུར་བ་ཡིས། །གང་ཞིག་མྱོང་ནས་རང་དོན་བྱས་གྱུར་པའི། །རྒྱལ་
[234b.6]ཞེས་བྱ་བ་ཡུན་རིང་བདེར་གྱུར་ཅིང་། །ལྷ་མོའི་ཚེ་དང་སྟོབས་ནི་སྐྱོང་བར་ཤོག །དེ་ནས་གསེར་ཕྲེང་ཅན་མས་ཀུན་ལའི་མིག་ཕྱུང་ངོ་ཞེས་ཐོས་སོ། །ཐོས་ནས་ཀྱང་ཁྱོ་ལ་བརྩེ་བས་ཀུན་ལའི་ཐད་དུ་སོང་སྟེ། འཁོར་རྣམས་བསལ་ནས། ཀུན་ལའི་མིག་ཕྱུང་བ་ལུས་ལ་ཁྲག་གིས་གང་བ་མཐོང་བ་
[234b.7]དང་། བརྒྱལ་ཏེ་ས་ལ་འགྱེལ་བར་གྱུར་ཏོ། །དེ་ཅི་ཙམ་ན་ཆུས་གཏོར་ཏེ་བསླངས་སོ། །དེ་ནས་ཇི་ཞིག་ལྟར་འདུ་ཤེས་རྙེད་པ་དང་། ང་རོ་དང་བཅས་པར་རབ་ཏུ་ངུ་ཞིང་སྨྲས་པ། ཁྱེད་ཀྱི་མིག་ནི་ཡིད་དུ་འོང་བ་གང་། །ང་ཡིས་བལྟས་ན་ཤིན་ཏུ་དགའ་གྱུར་པ། །དེ་ནི་ད་ལྟར་བལྟས་ན་འཇིགས་སྐྱེད་
[235a]
[235a.1]ཅིང་། །སེམས་ཀྱི་མྱ་ངན་མ་ལུས་འབྱིན་པར་བྱེད། །དེ་ནས་ཀུན་ལས་ཆུང་མ་ལ་རྗེས་སུ་བརྩེ་བས་སྨྲས་པ། མྱ་ངན་ལ་སྟེན་པ་རིགས་པ་མ་ཡིན་གྱི་ངུ་བ་ཐོང་། ཅིའི་ཕྱིར་ཞེ་ན། འདི་ནི་རང་གིས་བྱས་པའི་ལས་ཀྱི་འབྲས་བུ་ཉེ་བར་གནས་པ་ཡིན་ནོ། །འཇིག་རྟེན་འདི་ལས་བདག་ཉིད་
[235a.2]ཅན་དུ་ཤེས། །འགྲོ་བ་སྡུག་བསྔལ་དངོས་པོ་དང་ལྡན་པར། །ཤེས་ན་སྡུག་དང་བྲལ་ལ་ཞེན་མི་བྱ། །དེ་བས་སྡུག་པ་མཆི་མ་འབྱིན་མི་རིགས། །གཞན་ཡང་མིག་ཕྱུང་བ་ངས་ད་ཅི་ཞིག་བྱ་ཉེ་དུའི་གན་དུ་སོང་། ཁྱོད་ཀྱང་སྡུག་བསྔལ་གྱི་སྐལ་པ་ཅན་དུ་མ་བྱེད་ཅིག །གསེར་ཕྲེང་མས་སྨྲས་པ།
[235a.3]སྐྱེས་བུ་གང་ཞིག་དཔལ་རྒྱས་བུད་མེད་ནི། །བརྩེ་བས་རྗེས་འཇུག་པ་ལ་ངོ་མཚར་མེད། །གང་ཚེ་དཔལ་ཉམས་པ་ན་རྗེས་འབྲང་བའི། །བུད་མེད་དེ་ནི་མི་ནང་ལྷ་དང་མཚུངས། །དེ་ནས་ཀུན་ལ་ཆུང་མ་དང་ལྷན་ཅིག་གྲོང་ཁྱེར་ལས་བྱུང་བ་དང་། མངལ་དུ་ཞུགས་པ་ནས་བརྩམས་ཏེ། ཤིན་
[235a.4]ཏུ་གཞོན་ཤ་ཅན་གྱི་ལུས་དང་ལྡན་པས། ལས་ཅི་ཡང་བྱེད་པར་མི་ནུས་ཀྱི། གཞན་དུ་ན་པི་ཝང་དག་རྡུང་ཞིང་གླུ་དག་ལེན་པར་ནུས་སོ། །དེ་ནས་དེ་གསེར་ཕྲེང་མའི་ལག་པ་ལ་འཇུས་ཏེ། གཞོན་ནུ་སྐྱེད་བྱེད་ཕྲག་པར་ཁུར་ནས་འདི་སྐད་ཅེས་སྨྲས་སོ། །བུ་སྡུག་དཔའ་བོའི་རིགས་
[235a.5]ལས་སྐྱེས། །ཁྱོད་དང་རབ་སྡུག་བསྔལ་ཏེ། །ཡུ་བུས་མཐར་ནི་སློང་མོ་ཐོབ། །མི་བཟད་ལས་ནི་སྔོན་བྱས་ཡིན། །སྒྱུ་མ་ལྟ་བུར་མི་བརྟན་པའི། །དབང་ཕྱུག་ལ་ནི་སུ་ཡིད་རྟོན། །མྱ་ངན་མེད་ཀྱི་བུར་གྱུར་ལ། །གནས་སྐབས་འདི་འདྲ་ཐོབ་པར་གྱུར། །ལས་བྱས་པ་ནི་ཚོགས་པ་
[235a.6]དང་། །ལྡན་པའི་འབྲས་བུ་འདི་ལྟ་བུ། །ལས་ནི་ལྷན་ཅིག་བྱས་པས་ན། །ལྷན་ཅིག་ལོངས་ནི་སྤྱད་པར་གྱུར། །དེ་བས་ན་ད་ཅི་ཞིག་བྱ་སྟེ། པ་ཏ་ལི་པུ་ཏྲར་སོང་ལ། རྒྱལ་པོ་མྱ་ངན་མེད་པ་ལ་གསོལ་བ་གདབ་པར་བྱའོ། །འཛམ་གླིང་དབང་ཕྱུག་མངའ་བདག་དེ། །ང་ཡི་དཀའ་བ་
[235a.7]བྱེད་པའི་ཕ། །དེ་ནི་སྦྱིན་པའི་གནས་ཡིན་ཞིང་། །ང་ལ་རྟག་ཏུ་རྗེས་བརྩེ་ཡིན། །དེ་ནས་ཀུན་ལས་པི་ཝང་རྡུང་ཞིང་གླུ་ལེན་པ་དང་། གཞན་གྱི་ཁྱིམ་རྣམས་སུ་ཚུལ་འདིས་འཚོ་བ་སྒྲུབ་ཅིང་ཆས་སོ། །བསྙེན་བཀུར་ཆེན་པོ་ལས་ཉམས་ཤིང་། །འོང་བསྐལ་དམན་སེམས་ཅན་ནི། །
[235b]
[235b.1]སློང་མོས་རྒྱུ་བར་བྱེད་པ་ལ། །ཆོས་ལྡན་སྐྱེས་བུ་སུ་ཞིག་སྟེར། །ཕ་དང་མ་སྤངས་ལོངས་སྤྱོད་དང་། །ཟས་དང་མལ་ཆ་ཁྱེམ་མེད་པ། །ཉམ་ངར་རབ་ཞུགས་ལོང་བ་ལ། །སློང་མོ་མ་ཡིས་སྟེར་བར་མཛོད། །ལོངས་སྤྱོད་གློག་འགྱུ་དང་འདྲ་ཞིང་། །ཟིལ་པའི་ཆུ་ཐིགས་འདྲ་བ་ལ། །འགྲོ་བཀྲེན་
[235b.2]སྙན་ཚིག་སྦྱིན་པ་ཡིས། །སྙིང་པོ་མྱུར་དུ་ལེན་པར་གྱིས། །དབུལ་པོ་སྐྲ་ནི་བརྫེས་གྱུར་ཅིང་། །འཇིག་རྟེན་ཀུན་གྱིས་བརྙས་པ་དང་། །དཔལ་ཉམས་ཁྱིམ་ཁྱིམ་སློང་མོས་རྒྱུ། །ངལ་མ་ཡིས་སློང་མོ་བྱིན། །དེ་ནས་ཀུན་ལས་སློང་མོ་རྙེད་པ་རྣམས་ཆུང་མ་དང་ལྷན་ཅིག་ཡོངས་སུ་ལོངས་སྤྱོད་པར་གྱུར་ཏོ། །
[235b.3]གསེར་ཕྲེང་མ་ཡང་ལམ་གང་ནས་པ་ཏ་ལི་པུ་ཏྲ་ནས་འོངས་པའི་ལམ་དེ་ཉིད་ནས་རྗེས་སུ་འབྲང་བར་འགྲོའོ། །དེ་སོང་བ་དང་ཆོས་ཀྱི་འཁོར་ལོའི་གནས་སུ་ཕྱིན་ཏོ། །དེ་ནས་ཀུན་ལས་གསེར་ཕྲེང་མ་ལ་དྲིས་པ། བཟང་མོ་གང་ཡུ་བུས་ཕྱིན་པའི་གྲོང་ཁྱེར་འདི་གང་ཞིག་ཡིན། བཙུན་མོས་མཐོང་
[235b.4]བ་དང་། བརྒྱལ་ཏེ་ས་ལ་འགྱེལ་ཏོ། །སྐད་ཅིག་ཙམ་ན་འདུ་ཤེས་རྙེད་དེ་སྨྲས་པ། གང་ཚེ་དཔལ་དང་ལྡན་པར་འགྲོ་བ་ན། །སྐྱེ་བོ་བྱེ་བ་གནས་འདིར་ལྷགས་པར་ལྷགས། །ཁྱེད་མིག་བྲལ་ནས་དེང་ནི་འདིར་འོངས་པས། །འདུ་བྱེད་གཡོ་བ་དེ་ནི་ཅིར་མི་རུང་། །ཇི་ཙམ་ན་རིམ་གྱིས་པ་ཏི་ལི་པུ་
[235b.5]ཏྲར་ཕྱིན་ཏོ། །དེ་ནས་སྐྱེད་མོས་ཚལ་ཡིད་འཕྲོགས་པ་ཞེས་བྱ་བ་རྒྱལ་པོ་མྱ་ངན་མེད་ཀྱིས་རང་གི་བུ་ཀུན་ལའི་དོན་དུ་བྱས་པ་ཞིག་ཡོད་པ་དེར་ཞུགས་པར་བརྩམས་ཏེ་ཞུགས་པ་དང་། ཇི་ཙམ་ན་སྐྱེད་མོས་ཚལ་སྲུང་བས་མཐོང་ནས་སྨྲས་པ། ལོང་བ་བཀྲ་མི་ཤིས་ཤིང་མི་བསྔགས་པ་འདི་སུ་ཞིག་
[235b.6]ཡིན་ནས་སྐྱེད་མོས་ཚལ་འདིར་ཞུགས། ཀྱེ་མའོ་ལོང་བ་འཛམ་བུའི་གླིང་གི་དབང་ཕྱུག་གི་རྒྱལ་པོ་མྱ་ངན་མེད་པའི་བུ་ཀུན་ལ་ཞེས་བྱ་བའི་དོན་དུ་སྐྱེད་མོས་ཚལ་འདི་སྲུང་བ་ཁྱེད་ཀྱིས་མི་ཤེས་སམ། གསེར་ཕྲེང་མས་སྨྲས་པ། ཀྱེ་ཧུད་སྡུག་བསྔལ་ལོ། །སྐྱེད་མོས་ཚལ་ནི་ནགས་རྒྱས་པར། །
[235b.7]ང་ཡི་བུ་འདི་དགའ་འགྱུར་ཞེས། །བུ་ལ་བརྩེ་བས་ས་བདག་གིས། །གང་གི་དོན་དུ་བྱས་གྱུར་པ། །བདག་ཅག་གནས་པའི་དོན་དུ་དེར། །འཚོ་བ་ཞན་པས་ཕྱིན་གྱུར་ན། །སྐལ་བ་དམན་པས་མ་ཤེས་ནས། །དེ་ལས་དེ་ལྟར་སྐྲོད་པར་གྱུར། །གང་དུ་གཞོན་ནུ་གླུའི་སྒྲ་སྙན་ཅིང་ཡིད་དུ་འོང་བ་
[236a]
[236a.1]དང་། བེེ་ཌཱུཪྻའི་རྐང་རྟེན་དང་ལྡན་པའི་མལ་ཁྲི་ལ་ཉལ་ནས་རྩེ་ཞིང་རོལ་པའི་གནས་པས་དགའ་བའི་གནས་གང་ཡིན་བ་དེར་བགྲོད་པ་ཙམ་ཡང་ཐོབ་པར་མ་གྱུར་ཏོ། །དེ་ནས་ཀུ་ན་ལས་དེ་ཡིད་བསྲིང་བར་བྱ་བའི་ཕྱིར་སྨྲས་པ། བདེ་བར་གཤེགས་པས་རྒྱལ་སྲིད་དཔལ་དག་ནི། །
[236a.2]སྒྱུ་མ་རྨི་ལམ་སྨིག་རྒྱུ་འདྲ་བར་གསུངས། །ཕུན་ཚོགས་རྒུད་པ་དེ་ལ་རིམ་བྱུང་ན། །མཁས་པ་སུ་ཞིག་རྒྱལ་སྲིང་བདེ་བ་འདོད། །དེ་ནས་གཞོན་ནུ་སླར་ལོག་ནས། །པ་ཏ་ལི་པུ་ཏྲར་འཇུག་པར་བྱའོ་ཞེས་ངེས་པར་བསམས་ནས་དེར་ཕྱིན་པ་དང་སྒོར་གསེར་ཕྲེང་མ་ངུ་བ་ལ་ཞུགས་པར་གྱུར་ཏོ། །
[236a.3]ཀུ་ན་ལས་སྨྲས་པ་འདི་ཅི་ཞིག་ཡིན། དེས་སྨྲས་པ། གང་ལས་སྔོན་ནི་བྱུང་བ་ན། །གང་གིས་གྲོང་ཁྱེར་བརྒྱན་གྱུར་པའི། །ད་ནི་དེ་ལ་དེ་མེད་དེ། །ཕྲེང་བ་སྐམས་པ་དོར་བར་འགྱུར། །ཇི་ཙམ་ན་རིམ་གྱིས་ཕའི་གླང་པོ་ཆེའི་བྲེས་སུ་མཚན་མོ་གནས་བཅས་པར་གྱུར་ཏོ། །དེ་ནས་རྒྱལ་པོ་མྱ་ངན་
[236a.4]མེད་དེའི་མཚན་མོ་ཁང་བཟངས་ཀྱི་སྟེང་ན་ཉལ་བ་དང་། མཚན་ཕྱེད་ཀྱི་དུས་འདས་པ་ན་སད་པ་དང་། དེ་གཞོན་ནུ་ཡིད་ལ་བྱེད་པ་ལ་ཞུགས་ཏེ། ངའི་བུ་བདེན་པའི་ཚིག་ཅན་དེ་ཅིར་གྱུར་ཞིག་གུ། རྒྱལ་སྲུང་མས་སྨྲས་པ། གཞོན་ནུ་བདེ་བར་གནས་ལགས་ཀྱི། །རྒྱལ་པོས་སྨྲས་པ། ང་ཡི་
[236a.5]བུ་ཡི་ཕོ་ཉ་མེད། །འཕྲིན་མེད་ཡི་གེའང་ཡོད་མིན་ན། །དེ་ཡིས་ང་ནི་བརྗེད་གྱུར་ཏམ། །འོན་ཏེ་ང་ལ་སྡོ་བར་གྱུར། །དེ་ནས་གླང་པོ་ཆེའི་རྫི་བོ་དེས་སྨྲས་པ། ཀྱེ་གླུ་མཁན་ལོངས་ཤིག །རེ་ཞིག་པི་ཝང་སྦྲེངས་ལ་གླུ་ལོངས་ཤིག །ཁོ་བོས་མཉན་པར་བྱའོ། །དེ་ནས་ཀུ་ན་ལ་ལངས་ནས་
[236a.6]པི་ཝང་ལེན་པར་ཞུགས་ཏེ། དེ་ཇི་ལྟར་མིག་ཕྱུང་བས་བདེན་བ་མཐོང་བར་ཡང་བྱས་ནས། སློང་མོ་པའི་ཚུལ་གྱིས་པ་ཏ་ལི་པུ་ཏྲར་ཕྱིན་པ་དང་། རིགས་ལས་བྱུང་བའི་གླུ་ལེན་པར་བརྩམས་སོ། །མི་གང་མིག་དང་བྲལ་བར་གྱུར་པ་དེ་ལ་སྲོག་གི་དགོས་པ་ཅི་ཞིག་ཡོད། །གཉེན་གྱི་སྐྱེ་
[236a.7]བོས་སྤངས་ཤིང་ཁྲོས་པའི་བཞིན་རས་དག་ལ་ལྟ་བར་བྱེད་པ་ན། །ཆུ་ཤིང་བཤིག་ལྟར་སྙིང་པོ་མེད་པའི་འདུས་བྱས་དག་ལ་མཁས་པ་སུ་མི་སྐྱོ། །གང་གིས་ང་ནི་རིན་ཆེན་རང་བཞིན་ཤིང་ལྟར་འབད་པས་རྣམ་པར་གསོས་གྱུར་ཅིང་། །བུ་ཡི་སྲེད་པ་ཀུ་ན་ལ་ཞེས་མིང་བཏགས་བྱ་དང་འདྲར་
[236b]
[236b.1]གྱུར་པ། །མི་ཡི་བདག་པོའི་བུ་རུ་གྱུར་ཀྱང་བཀྲེན་པའི་ཚུལ་དུ་ང་ནི་སྤྱོང་པར་བྱེད། །གཞན་ཡང་། སྐྱེ་མཆེད་རྣམས་ཀྱི་ངོ་བོ་ཉིད། །མིག་སོགས་ཡེ་ཤེས་སྒྲོན་མ་ནི། །དག་པའི་ཤེས་རབ་ཀྱིས་མཐོང་གང་། །དེ་ནི་སྐྱེ་བོ་རྣམས་ལས་གྲོལ། །གལ་ཏེ་ཁྱོད་ནི་སྲིད་པའི་སྡུག་བསྔལ་རྣམས་ཀྱིས་གཟིར། །
[236b.2]སྲིད་པའི་ཉེས་པ་རྣམ་པར་ངེས་བྱས་བློ་རུ་བྱ། །གལ་ཏེ་འདི་ན་བརྟན་པའི་བདེ་བ་འདོད་གྱུར་ན། །སྐྱེ་མཆེད་ཉིད་ལ་བརྟན་པ་ཉིད་དུ་གསོལ་བ་ཐོབ། །དེའི་གླུའི་སྒྲ་དེ་རྒྱལ་པོ་མྱ་ངན་མེད་ཀྱིས་ཐོས་སོ། །ཐོས་ནས་ཀྱང་དགའ་བཞིན་དུ་སྨྲས་པ། གླུ་ནི་ཀུ་ན་ལའི་དང་རབ་ཏུའང་ལྡན་གྱུར་ཅིང་། །ཡུན་རིང་ཞིག་ན་པི་
[236b.3]ཝང་སྒྲ་ཡང་ཐོས་གྱུར་ན། །ཅིག་འདི་རུ་ཀུན་ལ་ནི་འོང་གྱུར་ཏམ། །མ་འོངས་པར་ནི་བདག་ནི་མཐོང་བར་དགའ་བར་གྱུར། །དེ་ནས་རྒྱལ་པོ་མྱ་ངན་མེད་ཀྱིས་ཉུང་རུམ་གྱི་སྐྱེས་བུ་ཞིག་ལ་སྨྲས་པ། ཀྱེ་སྐྱེས་བུ། ཅིག་གླུ་ཡི་སྒྲ་འདི་ནི། །ཀུ་ན་ལ་དང་རབ་འདྲ་བས། །བརྟན་དང་ཞུམ་པ་མི་མཐུན་པར། །སྟོན་
[236b.4]པ་ལྟ་བུར་ཤེས་པར་གྱུར། །དེ་བས་འདིར་ནི་སྒྲ་འདི་ཡི། །བརྟན་ལས་ཤིན་ཏུ་གཡོས་གྱུར་ཏེ། །སེང་གེ་ཉིད་ཀྱི་སྒྲ་ཡིས་ནི། །གླང་པོ་རབ་ཏུ་སྐྲག་ལྟར་གྱུར། །དེ་ནས་ཉུང་རུམ་གླང་པོ་ཆེའི་བྲེས་སུ་སོང་བ་དང་། །ཀུ་ན་ལ་མིག་ཕྱུང་བ་རླུང་དང་ཚ་བས་ལུས་ཚིག་པ་དེ་མཐོང་བ་དང་ངོ་མ་ཤེས་སོ། །དེ་
[236b.5]ནས་གླང་པོ་ཆེ་སྐྱོང་བ་ལ་སྨྲས་པ། །འདི་སུ་ཞིག་ཡིན། གླང་པོ་ཆེའི་རྫི་བོས་སྨྲས་པ། འདི་ནི་ལོང་བ་མིག་མེད་པ་ཞིག་གོ། །དེ་སོང་ནས་རྒྱལ་པོ་ལ་གསོལ་པ། །ལྷ་ལོང་བ་ཞིག་པི་ཝང་ཐོགས་ཏེ་ཆུང་མ་དང་ལྷན་ཅིག་ལྷའི་གླང་པོ་ཆེའི་བྲེས་ན་མཆིས་སོ། །དེ་ཐོས་ནས་རྒྱལ་པོས་བསམས་པ།
[236b.6]ཇི་ལྟར་ངས་རྨི་ལམ་མི་དགེ་བ་མཐོང་བ་ལས་ན། གཞོན་ནུའི་མིག་ངེས་པར་ཉམས་པར་གྱུར་ཏོ་སྙམ་མོ། །ཡང་སྨྲས་པ། ང་ཡིས་སྔོན་ནི་རྨི་ལམ་དུ། །མཚན་མ་ཇི་ལྟར་མཐོང་བ་ལས། །ཐེ་ཚོམ་མེད་པར་ཀུ་ན་ལའི། །མིག་ནི་བརླག་པ་ཉིད་དུ་ངེས། །དེ་ནས་རྒྱལ་པོ་རབ་ཏུ་ངུ་ཞིང་སྨྲས་པ། བུ་ཡི་
[236b.7]སྡུག་བསྔལ་དོགས་པ་ཡིས། །ང་ཡི་སེམས་ནི་ཞིར་མ་གྱུར། །དེ་ནི་ང་ཡི་ཐད་ཉིད་དུ། །མྱུར་བ་ཁོ་ནར་ཁྱེར་ལ་ཤོག །ཇི་སྲིད་ན་སྐྱེས་བུ་དེ་ཡང་གླང་པོ་ཆེའི་བྲེས་སུ་སོང་སྟེ། ཀུ་ན་ལ་ལ་སྨྲས་པ། ཁྱོད་སུའི་བུ་ཡིན། ཁྱོད་ཀྱི་མིང་ནི་ཅི་ཞེས་བྱ། །ཀུ་ན་ལས་སྨྲས་པ། མྱ་ངན་མེད་པ་ཞེས་བྱའི་རྒྱལ། །
[237a]
[237a.1]དཔའ་བོ་ཡི་ནི་རིགས་དགའ་བ། །གང་གིས་ས་འདི་རྒྱས་པ་ནི། །མངག་གཞུག་པར་ནི་དབང་དུ་གྱུར། །ང་ནི་རྒྱལ་པོ་དེ་ཡི་བུ། །ཀུ་ན་ལ་ཞེས་རྣམ་པར་གྲགས། །སངས་རྒྱས་ཉི་མའི་གཉེན་གྱུར་པ། །ཆོས་ཅན་སྲས་ཀྱང་ང་ཡིན་ནོ། །དེ་ནས་ཀུ་ན་ལ་ཆུང་མ་དང་ལྷན་ཅིག་རྒྱལ་པོ་མྱ་ངན་
[237a.2]མེད་ཀྱི་གན་དུ་སོང་ངོ་། །དེ་ནས་རྒྱལ་པོ་མྱ་ངན་མེད་ཀྱིས་ཀུ་ན་ལའི་མིག་ཕྱུང་བ་རླུང་དང་ཐན་པས་ལུས་ཚིག་པ། ཕྱག་དར་གྱི་དུམ་བུ་བསྡུས་པའི་གོས་གྱོན་པ་དང་། སྨད་དཀྲིས་བྱས་པས་ངོ་ཤེས་པར་མ་གྱུར་གྱི། དབྱིབས་ཙམ་ཞིག་མཐོང་ནས་སྨྲས་པ། བུ་ཁྱོད་ཀུ་ན་ལ་ཡིན་ནམ། །ལྷ་དེ་ལྟ་
[237a.3]ལགས་ཏེ་བདག་ནི་ཀུ་ན་ལའོ། །དེ་ཐོས་པ་དང་རྒྱལ་པོ་བརྒྱལ་ནས་ས་ལ་འགྱེལ་ཏོ། །དེ་ནས་ཀུ་ན་ལའི་གདོང་བལྟས་ན། །མིག་བྲལ་མྱ་ངན་གྱིས་ནི་སེམས་གདུངས་ཤིང་། །མྱ་ངན་མེད་པ་སར་ལྷུང་འདུ་ཤེས་བྲལ། །ཀྱི་ཧུད་བུ་གཅིག་བུ་གཅིག་ཅེས་པར་སྨྲས། །ཇི་ཙམ་ན་རྒྱལ་པོ་ཆུས་
[237a.4]གཏོར་ནས་ས་ལས་བསླངས་ཏེ་སྟན་ལ་བཞག་གོ། །དེ་ནས་རྒྱལ་པོ་ཅི་ཞིག་ལྟར་འདུ་ཤེས་རྙེད་ནས་ཀུ་ན་ལ་པང་པར་བཞག་སྟེ་སྨྲས་པ། དེ་ནས་ཡུད་ཙམ་དབུགས་ནི་ཕྱུང་ནས་སུ། །མགུལ་པ་མཆི་མར་བཅས་པས་མགུལ་འཁྱུད་དེ། །བུ་ཡི་གདོང་ལ་ཡོངས་སུ་བྱུགས་ནས་སུ། །རྒྱལ་པོ་
[237a.5]རྣམ་པ་མང་དུ་སྨྲེ་བར་གྱུར། །ཀུ་ན་ལ་དང་མཚུངས་པའི་མིག་བརྟགས་ནས། །ང་ཡིས་རང་བཞིན་དེ་ནི་མིང་བཏགས་གང་། །བུ་དེའི་མིག་ནི་ཕྱུང་བ་ལ་བལྟས་ནས། །ཀུ་ན་ལ་ཞེས་ཇི་ལྟར་སྨྲ་བར་བྱ། །ཡང་སྨྲས་པ། ཁྱེད་ཀྱི་མཛེས་ཤིང་མདངས་ལྡན་བཞིན་འདི་ནི། །ནམ་མཁའི་ཟླ་བ་སྐར་མ་
[237a.6]དང་བྲལ་ལྟར། །མཛེས་པའི་མིག་དང་བྲལ་བར་ཁྱེད་སུས་བྱས། །བུ་སྡུག་རེ་ཞིག་སྨྲོས་ཤིག་སྨྲོས་ཤིག་དང་། །སྙིང་རྗེ་མེད་པའི་སེམས་ལྡན་སུ་ཡིས་ཁྱེད། །ཐུབ་འདྲ་འཕགས་པའི་བདེན་པ་རྟོགས་གྱུར་པ། །ཁྱེད་ཀྱི་མིག་བཟང་དགྲ་མེད་འཁོན་བཟུང་ནས། །རང་བཞིན་འདི་བྱས་
[237a.7]ང་ཡི་མྱ་ངན་རྩ། །དོན་འདི་མྱུར་བ་ཉིད་དུ་སྨྲོས་ཤིག་སྨྲོས། །ང་ཡི་ལུས་འདིའང་འཇིག་པར་འགྱུར་དུ་འོང་། །ཁྱེད་ཀྱི་བཞིན་རྒུད་མྱ་ངན་གྱིས་བསྲེགས་པ། །དགྲ་ཡིས་ནགས་བཅད་བསྲེགས་པ་ལྟ་བུར་གྱུར། །དེ་ནས་ཀུ་ན་ལས་ཕ་ལ་སྨྲས་པ། འདས་པའི་དོན་ལ་ནི་མྱ་ངན་བྱ་བའི་མི་རིགས་ཏེ། །
[237b]
[237b.1]སྔོན་ལས་རྣམས་ལས་སངས་རྒྱས་ཀྱང་མི་འདའ། །དེ་བཞིན་རང་རྒྱལ་འབྲས་བུ་ལ་གནས་དང་། །སོ་སོའི་སྐྱེ་བོའང་གྲོལ་བར་མི་འགྱུར་ཞེས། །ཐུབ་པའི་གསུང་ནི་ཁྱེད་ཀྱིས་མ་གསན་ནམ། །རྒྱལ་པོ་སྐྱེས་བུས་མི་དགེའི་ལས་བྱས་རྣམས། །འབྲས་བུ་མེད་པར་ནམ་ཡང་མི་འགྱུར་ན། །འདི་ན་རང་
[237b.2]བྱས་ལས་ཀྱི་འབྲས་བུ་ལ། །འདི་ནི་གཞན་གྱིས་བྱས་ཞེས་ཇི་ལྟར་སྨྲ། །རྒྱལ་པོ་ཆེན་པོ་བདག་གིས་ནོངས་བགྱིས་ཏེ། །ནོངས་བཅས་མ་ཡིན་ནམ་ཡང་འདི་འདྲ་མིན། །མཚོན་དང་རྡོ་རྗེ་དུག་དང་སྦྲུལ་རྣམས་ཀྱིས། །ནམ་མཁའ་འགྱུར་ཞིང་གནོད་བྱེད་མི་ནུས་སོ། །ལས་ཀྱི་བདག་ཉིད་ཅན་ནི་ལུས་
[237b.3]མཚོན་པའི། །ལུས་ཅན་རྣམས་ལ་མི་དགེའི་སྡུག་བསྔལ་འབྱུང་། །དེ་ནས་རྒྱལ་པོ་མྱ་ངན་མེད་མྱ་ངན་གྱི་མེས་གདུངས་པའི་ཡིད་ཀྱིས་སྨྲས་པ། ང་ཡི་བུ་ཡི་མིག་བཟངས་སུ་ཡིས་ཕྱུང་བར་གྱུར། །སུ་ཞིག་ཤིན་ཏུ་སྡུག་པའི་སྲོག་ནི་གཏོང་བ་ཞུགས། །ང་ཡི་ཡིད་འདི་མྱ་ངན་མེ་ཡིས་བསྲེགས་
[237b.4]གྱུར་གྱིས། །གང་ལ་ཆད་པས་གཅད་བྱ་བུ་སྡུག་མྱུར་དུ་སྨྲོས། །ཀུ་ན་ལས་སྨྲས་པ། གཞོན་ནུ་ཀུ་ན་ལ་འདི་ཡི། །མིག་ནི་གཉིས་ཀ་ཕྱུང་ཤིག་ཅེས། །ཚེམས་ཀྱི་རྒྱ་ཡིས་རྒྱས་བཏབ་ནས། །ཡི་གེ་ལྷ་ཡིས་བསྐུར་བ་ལགས། །རྒྱལ་པོས་སྨྲས་པ། བྱ་བ་འདི་དག་རྣམ་བསམས་པ། །རྨི་ལམ་
[237b.5]དུ་ཡང་མ་དྲན་ན། །ཅི་ཡི་ཕྱིར་ན་ཚིག་འདི་དག །ང་ནི་རབ་ཏུ་སྨྲ་བར་བྱེད། །དེ་ནས་གཞོན་ནུ་མིག་མཆི་མས་གང་བ་དང་བཅས་པའི་རྒྱལ་པོ་ལ་བལྟས་ནས་སྨྲས་པ། མི་ཡི་བདག་པོ་མྱ་ངན་དག་གིས་འཁྲུགས་མ་མཛད། །རང་གི་མིག་དང་བྲལ་བ་མཛེས་པ་མིན་ལ་གཟིགས། །འདི་ནི་མི་ཡིས་
[237b.6]རང་བྱས་སྡིག་པའི་ཁུར་བསྐུར་ཏེ། །ས་བདག་གཞན་བྱས་འབྲས་བུ་གཞན་ནི་སྤྱོད་མི་འགྱུར། །ས་བདག་མི་དགེའི་ལས་རྣམས་བྱས་པར་གྱུར་པ་དག །སྨིན་པའི་དུས་སུ་འཇིགས་པར་ནམ་ཡང་མི་འགྱུར་ཏེ། །དེ་འདྲའི་འབྲས་བུ་འདི་ནི་རང་གིས་བྱས་པ་ལ། །གཞན་གྱིས་འདི་དག་བྱས་ཞེས་ཇི་ལྟར་
[237b.7]བརྗོད་པར་བགྱི། །ལྷ་གཞན་ཡང་བཅོམ་ལྡན་འདས་ཀྱིས་ཇི་སྐད་དུ་གསུངས་པ་མ་གསན་ནམ། འཇིག་རྟེན་གསུམ་གྱི་སྙིང་པོ་ལྷ་མིས་མཆོད་གྱུར་པ། །སྟོབས་ཀྱིས་སྟོབས་ཕྱུག་པ་ཡང་སྟོབས་མཐའ་ལས་མི་ཐར། །སྔོན་བྱས་ལས་ལས་ནམ་ཡང་ཐར་པར་མི་འགྱུར་ན། །འདི་ན་བདག་འདྲ་
[238a]
[238a.1]གཞན་དག་སྨོས་ཀྱང་ཅི་ཞིག་འཚལ། །ཇི་ཙམ་ན་རྒྱལ་པོ་མྱ་ངན་མེད་ཀྱིས་སྦྱོར་བ་འདི་ནི་རྒྱལ་སྲུང་མས་བྱས་ཞེས་ཐོས་སོ། །ཐོས་ནས་ཀྱང་རྒྱལ་པོས་རྒྱལ་སྲུང་མ་བོས་ཏེ་སྨྲས་པ། སྐལ་མེད་ཅི་ཕྱིར་ས་ར་ནི་ནུབ་མ་གྱུར། །ཆོས་བཤིག་ང་ཡང་མི་དགར་བྱས་པས་ན། །ཆོས་
[238a.2]མིན་ལྡན་པ་བདག་དཔལ་འཕྲོག་འདྲ་བ། །ཤིན་ཏུ་སྡིག་བྱེད་ཁྱོད་ནི་སྤང་བར་བྱ། །དེ་ནས་རྒྱལ་པོ་ཁྲོ་བོའི་མེ་འབར་བ་དང་། རྒྱལ་སྲུང་མ་ལ་བལྟས་ཏེ་སྨྲས་པ། འདིའི་མིག་དབྱུང་ངམ་འོན་ཏེ་འདི་ཡི་ལུས། །སེན་མོ་ཤིན་ཏུ་རྣོ་བས་དྲལ་བའམ། །ཡང་ན་གསོན་པོར་མདུང་རྩེར་བསྐྱོན་བའམ། །འདིའི་
[238a.3]ལུས་སོགས་ལེས་རྣམ་པར་དགས་པར་བྱ། །ཡང་ན་ལྕེ་ནི་སྤུ་གྲིས་གཏུབས་བྱས་ཤིང་། །དགྲ་སྟས་བསྣུན་བས་མགོ་བོ་གཅད་པར་བྱ། །ཡང་ན་བསྐལ་པའི་མེ་འདྲར་གཞུག་བྱ་ཞིང་། །འོན་ཏེ་དུག་གིས་ལུས་འདི་དགང་བར་བྱ། །དེ་ལ་སོགས་པ་གསོད་བཅས་སྦྱོར་བ་ནི། །རྣམ་མང་མི་ཡི་དབང་པོས་
[238a.4]སྨྲས་པ་དང་། །སྙིང་རྗེའི་བདག་ཉིད་ཅན་ཀུ་ན་ལས་ཐོས་ནས། །བདག་ཉིད་ཆེན་པོ་དེ་ལ་གསོལ་བ་འདེབས། །དེ་ནས་རྒྱལ་པོ་མྱ་ངན་མེད་ཁྲོ་བའི་མེ་ཀུན་དུ་འབར་བས་དཀྲུགས་པ་དང་། རྒྱལ་སྲུང་མ་བརླག་པའི་ཐབས་ཚོལ་བ་ལ་བརྩོན་པ་ལ་ཀུ་ན་ལས་སྤྱི་བོས་ཕྱག་བྱས་ཏེ། སྙིང་རྗེ་རྗེ་སྐད་དུ་སྨྲས་
[238a.5]པ། ལྷ་བུད་མེད་འདི་གསད་པར་རིགས་པ་མ་ལགས་སོ། །རྒྱལ་པོས་སྨྲས་པ། གང་གིས་ཁྱོད་དང་ངའི་ལུས་བཅོམ་རབ་ཏུ་བྱས་གྱུར་ལ། །འདི་ལྟའི་ཚིག་ནི་སྨྲ་བྱེད་ཁྱེད་ནི་རིགས་པ་མ་ཡིན་ནོ། །ཀུ་ན་ལས་སྨྲས་པ། དེ་དེ་ལྟ་ལགས་སུ་ཟིན་ཀྱང་། བདག་ནི་དེའི་ཚེ་ནས་ད་ལྟ་དེའི་བར་དུ་འདི་དང་གཤེད་མ་
[238a.6]པའི་སྐྱེས་བུ་དེ་གཉིས་ལ་གཞོན་ནུ་སྐྱེད་བྱེད་ལ་ཁོང་ཁྲོ་བའི་སེམས་མེད་པ་དེ་བཞིན་དུ་དེ་རྣམས་ལ་སྙིང་རྗེ་དང་བྱམས་པའི་སེམས་ཉིད་ཤིན་ཏུ་བསྒོམ་ལགས་སོ། །རྒྱལ་པོས་སྨྲས་པ། ཁྱོད་སྙིང་རྗེའི་དབང་དུ་གྱུར་པ་ཡིན་པར་ཚིག་འདི་ལྟ་བུ་ལ་སུ་ཞིག་ཡིད་ཆེས་པར་གྱུར། ཀུ་ན་ལས་སྨྲས་པ། ངེས་
[238a.7]པར་ནང་དུ་བདག་ཉིད་ཚད་མར་གྱུར་པ་དང་། དེ་བཞིན་དུ་མངོན་པར་ཤེས་པ་དྲུག་དང་ལྡན་པར་བདག་ཉིད་ཆེན་པོ་གཞན་གྱི་སེམས་ཤེས་པ་གཞན་དག་དཔང་དུ་གྱུར་པ་ལགས་སོ། །རྒྱལ་པོས་སྨྲས་པ། གལ་ཏེ་དེ་ལྟ་ཡིན་ན། ང་དང་འཇིག་རྟེན་རྣམས་ཀྱི་མངོན་དུ་གྱིས་ཤིག །དེ་ཡང་འདི་ལྟར་
[238b]
[238b.1]ཤི་བིའི་རྒྱལ་པོས་ཕུག་རོན་གྱི་དོན་དུ་ལུས་བཅད་ནས། བདེན་པ་བདར་བས་སྔོན་གྱི་ལུས་ཇི་ལྟ་བ་བཞིན་དུ་གྱུར་ཏོ་ཞེས་ཐོས་ཀྱི་དེ་བཞིན་དུ་ཁྱོད་ཀྱིས་ཀྱང་བདེན་པ་བདར་བས་སྔོན་གྱི་མིག་ཇི་ལྟ་བ་བཞིན་དུ་གྱིས་ཤིག །དེ་བཞིན་དུ་བགྱིའོ་ཞེས་སྨྲས་པ། ཀུ་ན་ལས་བྲམ་ཟེ་དང་ཁྱིམ་བདག་བརྒྱ་སྟོང་དུ་མ་
[238b.2]འདུས་པ་དང་། རྒྱལ་པོ་འཁོར་དང་བཅས་པའི་ནང་དུ་བཅོམ་ལྡན་འདས་ཀྱི་ཐུགས་རྗེ་ལ་སོགས་པའི་ཡོན་ཏན་མངོན་དུ་བྱས་ཏེ་ཤར་ཕྱོགས་སུ་བལྟས་ནས་བདེན་པའི་ཚིག་འདི་སྐད་ཅེས་བརྗོད་དོ། །བདེན་པ་གང་གིས་རྒྱལ་སྲུང་མ་དང་སྐྱེས་བུ་གཉིས་པོའི་བར་ལ་དེའི་ཚེ་དང་ད་ལྟའི་བར་དུ་སྐྱོ་བའི་
[238b.3]སེམས་མེད་ཅིང་། བདག་གི་བུ་གཅིག་པ་སྐྱེད་བྱེད་ཇི་ལྟ་བར་སྙིང་རྗེ་དང་བྱམས་པའི་སེམས་མཉམ་པར་གྱུར་པའི་བདེན་པའི་ཚིག་དེས་སྔོན་གྱི་མིག་ཇི་ལྟ་བ་བཞིན་དུ་གྱུར་ཅིག །ཚིག་བརྗོད་པ་དང་དུས་མཉམ་པ་ཉིད་དུ་ཀུ་ན་ལའི་མིག་སྔོན་གྱི་ཇི་ལྟ་བ་བཞིན་དུ་གྱུར་ཏོ། །དེ་ནས་རྒྱལ་པོ་དང་། གྲོང་ཁྱེར་
[238b.4]པ་རྣམས་ཀྱེ་མ་ཀྱེ་མ་ཞེས་སྒྲ་གསང་མཐོན་པོ་སྒྲོགས་ཤིང་། རྣམ་པ་དེ་ལྟ་བུའི་ངོ་མཚར་ལ་ལྟའོ། །དེ་ནས་རྒྱལ་པོ་མྱ་ངན་མེད་ཀྱིས་ཀུ་ན་ལ་རྒྱལ་ཚབ་ཏུ་དབང་བསྐུར་བར་ཞུགས་པ་དང་། ཀུ་ན་ལས་སྨྲས་པ། རྒྱལ་པོ་ཆེན་པོ་བདག་ལ་ནི་རྒྱལ་སྲིད་དགོས་པ་མ་མཆིས་སོ། །བདག་གིས་ནི་བདེན་པ་
[238b.5]མཐོང་ལགས་སོ། །དེ་ནས་གཞོན་ནུ་སྐྱེད་བྱེད་རྒྱལ་ཚབ་ཏུ་དབང་བསྐུར་རོ། །དེ་ནས་བར་སྐབས་སུ་ཡང་རྒྱལ་སྲུང་མའི་ཕྱིར་གསོལ་བ་འདེབས་པ། གལ་ཏེ་རྒྱལ་སྲུང་འཕགས་མིན་ལས་བགྱིས་ཀྱང་། །ཁྱེད་འཕགས་ལས་མཛོད་བུད་མེད་འགུ་མ་མི་བགྱི། །བཟོད་དང་འདྲ་བའི་སྟོབས་ནི་ཡོད་མིན་
[238b.6]ཞེས། །བདེ་གཤེགས་བསྔགས་པས་གཙོ་བོ་བཟོད་མཛད་རིགས། །ཇི་ཙམ་ན་རྒྱལ་པོ་མྱ་ངན་མེད་ཤིན་ཏུ་ཁྲོས་པས་རྒྱལ་སྲུང་མ་རྒྱ་སྐྱེགས་ཀྱི་ཁང་པར་བཅུག་སྟེ་བསྲེགས་སོ། །རྡོ་འཇོག་པའི་གྲོང་ཁྱེར་པ་རྣམས་ཀྱང་རབ་ཏུ་བཅོམ་མོ། །དེ་ནས་དགེ་སློང་ཅིའི་ཕྱིར་ཀུ་ན་ལས་ལས་གང་ཞིག་བྱས་
[238b.7]ན་འདིའི་མིག་ཕྱུང་བ་དང་། སླར་སྐྱེས་པ་ཡིན་ཞེས་ཐེ་ཚོམ་སྐྱེས་ལ། དེ་ལྟར་ཐེ་ཚོམ་སྐྱེས་པ་གནས་བརྟན་གྲགས་པ་ལ་དྲིས་པ་དང་། གནས་བརྟན་གྲགས་པས་སྨྲས་པ། དེ་བས་ན་ཚེ་དང་ལྡན་པ་དག་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན་གྲོང་ཁྱེར་བཱ་རཱ་ཎ་སཱི་ན་རྔོན་པ་ཞིག་གནས་ཏེ།
[239a]
[239a.1]དེ་ཁ་བ་ཅན་དུ་སོང་ནས་རི་དྭགས་རྣམས་གསོད་དོ། །དེ་དུས་གཞན་ཞིག་ན་ཁ་བ་ཅན་དུ་སོང་བ་དང་། དེར་སེར་བ་བབ་པར་གྱུར་ལ། རི་དྭགས་ལྔ་བརྒྱ་ཕུག་གཅིག་ཏུ་ཞུགས་པ་ཞིག་རྙེད་པ་དང་། དེས་རྒྱས་ཐམས་ཅད་བཟུང་ནས་དེ་ལ་བློ་སྐྱེས་པ། གལ་ཏེ་ཐམས་ཅད་དུས་གཅིག་ཏུ་བསད་
[239a.2]ན་ནི་ཤ་རུལ་པར་འགྱུར་བས་ཐབས་གཞན་ཞིག་བརྩམ་པར་བྱའོ་སྙམ་ནས་དེས་རི་དགས་ལྔ་བརྒྱའི་མིག་ཕྱུང་ངོ་། །མིག་ཕྱུང་བ་དེ་རྣམས་གང་དུ་ཡང་འབྲོས་པར་མ་ནུས་སོ། །དེ་བཞིན་དུ་རྒྱ་ཆེར་རི་དགས་བརྒྱ་ཕྲག་མང་པོའི་མིག་ཕྱུང་ངོ་། །ཚེ་དང་ལྡན་པ་དག་རི་དགས་ཀྱི་རྔོན་པ་གང་ཡིན་པ་དེ་ནི་
[239a.3]གཞན་མ་ཡིན་གྱི་ཀུ་ན་ལ་འདི་ཉིད་ཡིན་ནོ། །གང་དེར་རི་དགས་མང་པོའི་མིག་ཕྱུང་བ་དེའི་ལས་ཀྱི་རྣམ་པར་སྨིན་པས་ལོ་བརྒྱ་སྟོང་མང་པོར་དམྱལ་བར་སྡུག་བསྔལ་རྗེས་སུ་མྱོང་ལ། དེ་ནས་ལས་ཀྱི་ལྷག་མ་སྐྱེ་བ་ལྔ་བརྒྱར་མི་རྣམས་ཀྱི་ནང་དུ་སྐྱེས་པ་ན་མིག་ཕྱུང་བར་གྱུར་ཏོ། །ལས་ཅི་ཞིག་བྱས་ན་
[239a.4]ལས་གང་གི་རྣམ་པར་སྨིན་པས་རིགས་མཐོན་པོར་སྐྱེས་ཤིང་རབ་ཏུ་མཛེས་པར་གྱུར་ལ། བདེན་པ་མཐོང་བར་བྱས་པ་དེ་ཡང་ཚེ་དང་ལྡན་པ་དག་ཉོན་ཅིག །སྔོན་བྱུང་བའི་དུས་སྐྱེ་དགུ་རྣམས་ཀྱི་ཚེ་ལོ་བཞི་ཁྲི་ཐུབ་པ་ན། ཡང་དག་པར་རྫོགས་པའི་སངས་རྒྱས་འཁོར་བ་འཇིག་ཅེས་བྱ་བ་འཇིག་
[239a.5]རྟེན་དུ་བྱུང་སྟེ། གང་གི་ཚེ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གིས་སངས་རྒྱས་ཀྱི་མཛད་པ་མ་ལུས་པ་མཛད་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང་། དེ་ལ་རྒྱལ་པོ་མཛེས་པ་ཞེས་བྱ་བས་རིན་པོ་ཆེ་སྣ་བཞི་ལས་
[239a.6]བྱས་པའི་མཆོད་རྟེན་ཆུ་ཞེང་དཔག་ཚད་ཙམ་བྱས་སོ། །གང་གི་ཚེ་རྒྱལ་པོ་མཛེས་པ་དུས་བྱས་ནས་དད་པ་མེད་ཅེས་བྱ་བ་རྒྱལ་སྲིད་ལ་བཞག་པ་ན། རིན་པོ་ཆེ་དེ་རྣམས་མ་བྱིན་པར་ལེན་པ་རྣམས་ཀྱིས་བརྐུས་ཏེ། ཕྱག་དར་དང་ཤིང་ཙམ་ཞིག་ལུས་པ་དང་། དེར་སྐྱེ་བོའི་ཚོགས་སོང་བ་ན།
[239a.7]མཆོད་རྟེན་རྣམ་པར་དེངས་པ་མཐོང་ནས་ཀྱི་ཧུད་ཀྱི་ཧུད་སྡུག་བསྔལ་ལོ་ཞེས་ཡང་དག་པའི་ང་རོས་ངུའོ། །ཚོང་དཔོན་གྱི་བུ་ཞིག་ཀྱང་འོངས་ནས། དེས་སྨྲས་པ། ཅིའི་ཕྱིར་དུ། དེ་རྣམས་ཀྱིས་སྨྲས་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་མཆོད་རྟེན་རིན་པོ་ཆེ་སྣ་བཞིའི་རང་བཞིན་
[239b]
[239b.1]ཅན་ཞིག་ཡོད་དེ་ཞེས་བྱ་བ་ནས་དེ་རྣམས་ཀྱིས་རྒྱ་ཆེར་མཆོད་རྟེན་དེ་སྔོན་བཞིན་དུ་བཞག་པར་གྱུར་ཏོ་ཞེས་བྱ་བའི་བར་དུའོ། །དེ་ནས་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་སྐུའི་ཚད་ཀྱི་སྐུ་གཟུགས་ཡོད་པ་ལས་དེ་ཞིག་པ་དང་། ལེགས་པར་གསོས་ཏེ། སྟོན་པ་འཁོར་བ་འཇིག་ཅི་འདྲ་བ་
[239b.2]དེ་འདྲའི་སྟོན་པ་མཉེས་པར་བྱེད་ཀྱི་མི་མ་ཉེས་བ་བྱེད་པར་མ་གྱུར་ཅིག་ཅེས་སྨོན་པ་བྱས་སོ། །ཚེ་དང་ལྡན་པ་དག་འདི་ཇི་སྙམ་དུ་སེམས། ཚོང་དཔོན་གྱི་བུ་གང་ཡིན་པ་དེ་ནི་ཀུ་ན་ལ་འདི་ཉིད་ཡིན་ཏེ། གང་དེར་བཅོམ་ལྡན་འདས་འཁོར་བ་འཇིག་གི་མཆོད་རྟེན་ལེགས་པར་གསོས་པའི་དེའི་ལས་ཀྱི་
[239b.3]འབྲས་བུས་རིགས་མཐོ་བར་སྐྱེས་པ་ཡིན་ལ། གང་སྐུ་གཟུགས་གསོས་པ་དེའི་ལས་ཀྱིས་གཟུགས་བཟང་བར་སྐྱེས་པ་ཡིན་ལ། གང་ཡང་དག་པར་སྨོན་པར་བྱས་པ་དེའི་ལས་ཀྱི་འབྲས་བུ་དེ་དང་འདྲ་བའི་སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་མཉེས་པར་བྱས་ཀྱི་མི་
[239b.4]མཉེས་པར་མ་བྱས་པ་ཡིན་ནོ། །བདེན་པ་མཐོང་བར་བྱས་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན། ཡང་དག་པར་རྫོགས་པའི་སངས་རྒྱས་འཁོར་བ་འཇིག་དེ་ཉིད་ཀྱི་མཆོད་རྟེན་རིན་པོ་ཆེ་སྣ་བཞི་ལས་བྱས་པ་རྒྱལ་པོ་མཛེས་པས་བྱས་པ་དང་། མཆོད་
[239b.5]རྟེན་དེར་ས་ལས་བྱས་པའི་སྐུ་གཟུགས་ཅིག་ཀྱང་བྱས་སོ། །ཇི་ཙམ་ན་ཚོང་དཔོན་ཞིག་གི་བྱིས་པ་མ་མ་དང་ལྷན་ཅིག་མཆོད་རྟེན་དེར་སོང་བ་དང་། དེ་བྱིས་པར་གྱུར་པས་མདེའུ་བླངས་ཏེ་སངས་རྒྱས་ཀྱི་སྐུ་གཟུགས་ཀྱི་སྤྱན་ཕྱུང་ངོ་། །ཇི་སྲིད་དུ་གཞན་ཞིག་ན་ཆེན་པོར་འགྱུར་ནས། ཡང་མཆོད་
[239b.6]རྟེན་དེ་ཉིད་དུ་སོང་ངོ་། །དེས་མཐོང་མ་ཐག་ཏུ་སྐུ་གཟུགས་འདི་བྱིས་པར་གྱུར་པས་བདག་གིས་བྱས་སོ་དྲན་པ་དང་། དེ་ཁྱིམ་ནས་རྫས་བླངས་ཏེ། དེ་དང་རིན་པོ་ཆེ་སྣ་བཞི་ལས་བྱས་པའི་སྐུ་གཟུགས་བྱས་ནས། མིག་གཉིས་སུ་རིན་ཐང་ཆེ་བའི་ནོར་བུ་ཨིན་དྲ་ནཱི་ལ་བཅུག་སྟེ། མཆོད་རྟེན་དེ་ལ་
[239b.7]ཡང་མཆོད་པ་ཆེན་པོ་དང་བསྐོར་བ་བྱས་ནས། གང་བདག་བྱིས་པར་གྱུར་པས། བཅོམ་ལྡན་འདས་ཀྱི་སྤྱན་ཕྱུང་ནས་སྡིག་པའི་ལས་བགྱིས་ཏེ། སྡིག་པའི་ལས་འདིའི་སྐལ་བ་ཅན་དུ་མ་གྱུར་ཅིག །དགེ་བའི་རྩ་བ་འདིས་ཀྱང་སྟོན་པ་འདི་ལྟ་བུ་མཉེས་པར་བྱེད་ཀྱི། མི་མཉེས་པ་བྱེད་པར་མ་གྱུར་
[240a]
[240a.1]ཅིག་ཅེས་སྨོན་པ་བྱས་སོ། །དགེ་སློང་དག་ཚོང་དཔོན་གྱི་བུ་གང་ཡིན་པ་དེ་ཅི་གཞན་དག་ཡིན་པར་སེམས་སམ། དེའི་ཚེ་དེའི་དུས་སུ་ཀུ་ན་ལ་འདི་ཉིད་ཚོང་དཔོན་གྱི་བུར་གྱུར་ཏོ། །གང་འདིས་སྡིག་པ་ཅན་གྱི་ལས་བྱས་པ་དེས་སྐྱེ་བ་ལྔ་བརྒྱར་ཚེ་རབས་ཚེ་རབས་སུ་མིག་དང་བྲལ་བར་གྱུར་ཏོ། །
[240a.2]གང་དེས་ཉེས་པ་བཤགས་ནས་སྨོན་ལམ་བྱས་པ་དེས་རིགས་མཐོ་བ་དང་། གཟུགས་མཛེས་པར་གྱུར་ཏོ། །གང་ཨིན་དྲ་ནཱི་ལའི་སྤྱན་བཅུག་པ་དེས་ན་འདི་ཚེ་རབས་ཚེ་རབས་སུ་མིག་མཛེས་པར་གྱུར་པ་ཡིན་ནོ། །གང་དེས་སྟོན་པ་འདི་ལྟ་བུ་མཉེས་པར་བྱེད་པར་གྱུར་ཅིག་ཅེས་པ་དེས་ན་རྒྱུན་དུ་
[240a.3]ཞུགས་པའི་འབྲས་བུ་ཐོབ་པ་ཡིན་ནོ། །གང་དེས་སྤྱན་ཕྱུང་ནས་སླར་ཡང་ཨིན་དྲ་ནཱི་ལའི་སྤྱན་བཅུག་པ་དེའི་ལས་ཀྱི་འབྲས་བུ་མིག་ཕྱུང་ནས་ཡང་ཐོབ་པ་ཡིན་ནོ། །གནས་བརྟན་གྲགས་པས་དེ་སྐད་ཅེས་སྨྲས་པ་དང་། དགེ་སློང་དག་མངོན་པར་དགའོ། །ཀུ་ན་ལའི་རྟོགས་པ་བརྗོད་པ་རྫོགས་
[240a.4]སོ།། །།རྒྱ་གར་གྱི་མཁན་པོ་པདྨ་ཀ་ར་བརྨ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།{T4146}༄༅༅། །རྒྱ་གར་སྐད་དུ། ཨཱརྱ་ནན་དི་མི་ཏྲ་ཨ་བ་དཱ་ན་ནཱ་མ། བོད་སྐད་དུ། འཕགས་པ་དགའ་བའི་བཤེས་གཉེན་གྱི་རྟོགས་པ་
[240a.5]བརྗོད་པ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་ཏེ། བཅོམ་ལྡན་འདས་མྱ་ངན་ལས་འདས་ནས་ལོ་བརྒྱད་བརྒྱ་ལོན་པར་གྱུར་པ་ན། དེའི་ཚེ་དེའི་དུས་ན་ཡུལ་ཤི་བི་ཀ་ཞེས་བྱ་བ་ན་གྲོང་ཁྱེར་བྱིན་གྱིས་བརླབས་པ་ཞེས་
[240a.6]བྱ་བ་ཡོད་དེ། དེ་ན་རྒྱལ་པོ་རིགས་པའི་སྡེ་ཞེས་བྱ་བ་གནས་སོ། །དེའི་ཚེ་རྒྱལ་པོ་རིགས་པའི་སྡེའི་ཡུལ་ན་དགེ་སློང་དགའ་བའི་བཤེས་གཉེན་ཞེས་བྱ་བ་རྣམ་པར་ཐར་པ་བརྒྱད་ལ་བསམ་གཏན་པ་མངོན་པར་ཤེས་པ་དྲུག་དང་ལྡན་པ། རྫུ་འཕྲུལ་ཆེ་བ། མཐུ་ཆེ་བ། དཔག་ཚད་བརྒྱ་སྟོང་ཕྲག་དུ་མ་ན་
[240a.7]གནས་པའི་སེམས་ཅན་རྣམས་ལས་གྲོག་མོ་དང་ཀུ་ཏའི་སེམས་ཀྱི་སྤྱོད་པ་ཤེས་པ་ཞིག་གནས་ཏེ། དེ་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་དགེ་སློང་གི་དགེ་འདུན་འདུས་པ་རྣམས་ཀྱིས་འདི་སྐད་དུ། ཁྱོད་ལྟ་བུ་མྱ་ངན་ལས་འདས་ན་སངས་རྒྱས་ཀྱི་བསྟན་པ་ནུབ་པར་མི་འགྱུར་རམ་
[240b]
[240b.1]ཞེས་སྨྲས་པ་དང་དེས་དེ་དག་ལ་སྨྲས་པ། ནུབ་པར་མི་འགྱུར་ཏེ། བཅོམ་ལྡན་འདས་ཀྱིས་ལུང་བསྟན་ནས་བཤད་དོ། །འདི་ལྟར་ཡང་དགེ་སློང་རྣམས་ཐེ་ཚོམ་སྐྱེས་ནས་དྲིས་པ། གནས་བརྟན་ཡུན་ཇི་སྲིད་ཅིག་གི་བར་དུ་བཅོམ་ལྡན་འདས་ཤཱཀྱ་ཐུབ་པའི་དམ་པའི་ཆོས་གནས་པར་འགྱུར།
[240b.2]དེས་སྨྲས་པ། བཞིན་བཟངས་དག་དོགས་པ་མེད་ཀྱིས་མྱ་ངན་དང་སྨྲེ་སྔགས་མ་འདོན་ཅིག། །དེ་ཅིའི་ཕྱིར་ཞེ་ན། བཅོམ་ལྡན་འདས་ཡོངས་སུ་མྱ་ངན་ལས་འདས་པའི་དུས་ཀྱི་ཚེ་གནས་བརྟན་ཆེན་པོ་བཅུ་དྲུག་གི་ལག་ཏུ་དམ་པའི་ཆོས་གཏད་པར་གྱུར་ཏེ། སྦྱིན་བདག་དང་སྦྱིན་
[240b.3]པ་པོའི་སྦྱིན་པ་ཡོངས་སུ་དག་པར་བྱ་བའི་ཕྱིར་རོ། །དེ་སྐད་ཅེས་སྨྲས་པ་དང་། གནས་བརྟན་དགའ་བའི་བཤེས་གཉེན་ལ་དགེ་སློང་རྣམས་ཀྱིས་འདི་སྐད་ཅེས་སྨྲས་སོ། །གནས་བརྟན་བདག་ཅག་གིས་གནས་བརྟན་དེ་དག་གི་མཚན་ཡང་མི་འཚལ་ལོ། །གནས་བརྟན་གྱིས་སྨྲས་པ།
[240b.4]ཚེ་དང་ལྡན་བ་དག་གནས་བརྟན་དང་པོའི་མཚན་ནི་བར་དྭ་ཛ་བསོད་སྙོམས་ལེན་ཞེས་བྱའོ། །གནས་བརྟན་གཉིས་པའི་མཚན་ནི་གསེར་བེའུ་ཞེས་བྱའོ། །གནས་བརྟན་གསུམ་པའི་མཚན་ནི་བ་ར་དྭ་ཛ་ཞེས་བྱའོ། །གནས་བརྟན་བཞི་པའི་མཚན་ནི་མི་ཕྱེད་པ་ཞེས་བྱའོ། །གནས་བརྟན་ལྔ་པའི་
[240b.5]མཚན་ནི་ཤིང་ཤུན་ཅན་ཞེས་བྱའོ། །གནས་བརྟན་དྲུག་པའི་མཚན་ནི་བཟང་པོ་ཞེས་བྱའོ། །གནས་བརྟན་བདུན་པའི་མཚན་ནི་ནག་པོ་ཞེས་བྱའོ། །གནས་བརྟན་བརྒྱད་པའི་མཚན་ནི་བད་སའི་བུ་ཞེས་བྱའོ། །གནས་བརྟན་དགུ་པའི་མཚན་ནི་བ་ལང་སྐྱོང་ཞེས་བྱའོ། །གནས་བརྟན་བཅུ་
[240b.6]པའི་མཚན་ནི་ལམ་པ་ཞེས་བྱའོ། །གནས་བརྟན་བཅུ་གཅིག་པའི་མཚན་ནི་སྒྲ་གཅན་འཛིན་ཞེས་བྱའོ། །གནས་བརྟན་བཅུ་གཉིས་པའི་མཚན་ནི་ཀླུ་སྡེ་ཞེས་བྱའོ། །གནས་བརྟན་བཅུ་གསུམ་པའི་མཚན་ནི་ཟུར་གྱིས་ཤེས་ཞེས་བྱའོ། །གནས་བརྟན་བཅུ་བཞི་པའི་མཚན་ནི་ནགས་ན་གནས་
[240b.7]ཞེས་བྱའོ། །གནས་བརྟན་བཅོ་ལྔ་བའི་མཚན་ནི་མི་ཕམ་པ་ཞེས་བྱའོ། །གནས་བརྟན་བཅུ་དྲུག་པའི་མཚན་ནི་གཙུག་གི་ལམ་པ་ཞེས་བྱའོ། །གནས་བརྟན་དེ་དག་ནི་རིག་པ་གསུམ་དང་ལྡན་པ་སྡེ་སྣོད་གསུམ་པ། ཁམས་གསུམ་པའི་འདོད་ཆགས་དང་བྲལ་བ། རྫུ་འཕྲུལ་གྱི་སྟོབས་
[241a]
[241a.1]ཀྱིས་ཚེ་བྱིན་གྱིས་བརླབས་ཏེ་བསྲིངས་ནས་བཅོམ་ལྡན་འདས་ཀྱི་བཀས་གནས་པ་ཡིན་ནོ། །སྦྱིན་པ་པོ་དང་སྦྱིན་བདག་རྣམས་ཀྱི་སྦྱིན་པ་ཡོངས་སུ་དག་པར་བྱེད་དོ། །དེ་སྐད་ཅེས་སྨྲས་པ་དང་། དགེ་སློང་རྣམས་ཀྱིས་གནས་བརྟན་དགའ་བའི་བཤེས་གཉེན་ལ་འདི་སྐད་ཅེས་
[241a.2]སྨྲས་སོ། །གནས་བརྟན་བདག་ཅག་གིས་གནས་བརྟན་དེ་དག་གང་ན་བཞུགས་པ་མི་འཚལ་ལོ། །གནས་བརྟན་གྱིས་སྨྲས་པ། ཚེ་དང་ལྡན་པ་དག་གནས་བརྟན་དང་པོ་བ་ར་དྭ་ཛ་བསོད་སྙོམས་ལེན་ནི་འཁོར་དགྲ་བཅོམ་པ་སྟོང་དང་ལྷན་ཅིག་བ་ལང་སྤྱོད་ཀྱི་གླིང་ན་གནས་སོ། །གནས་
[241a.3]བརྟན་གསེར་བེེའུ་ཞེས་བྱ་བ་ནི་འཁོར་དགྲ་བཅོམ་པ་ལྔ་སྟོང་དང་ལྷན་ཅིག་ཤར་གྱི་ལུས་འཕགས་པོའི་གླིང་ན་གནས་སོ། །གནས་བརྟན་བ་ར་དྭ་ཛ་ནི་འཁོར་དགྲ་བཅོམ་པ་དྲུག་སྟོང་དང་ལྷན་ཅིག་བྱང་ཕྱོགས་ཀྱི་ཁ་ཆེའི་ཡུལ་ན་གནས་སོ། །གནས་བརྟན་མི་ཕྱེད་པ་ནི་འཁོར་དགྲ་
[241a.4]བཅོམ་པ་བདུན་སྟོང་དང་ལྷན་ཅིག་འཛམ་བུའི་གླིང་ན་གནས་སོ། །གནས་བརྟན་ཤིང་ཤུན་ཅན་ནི་འཁོར་དགྲ་བཅོམ་པ་དྲུག་སྟོང་དང་ལྷན་ཅིག་བྱང་གི་སྒྲ་མི་སྙན་གྱི་གླིང་ན་གནས་སོ། །གནས་བརྟན་བཟང་པོ་ནི་འཁོར་དགྲ་བཅོམ་པ་དགུ་སྟོང་དང་ལྷན་ཅིག་ཟངས་གླིང་ན་གནས་སོ། །
[241a.5]གནས་བརྟན་ནག་པོ་ནི་འཁོར་དགྲ་བཅོམ་པ་ཁྲི་དང་ལྷན་ཅིག་སིང་ག་ལའི་གླིང་ན་གནས་སོ། །གནས་བརྟན་བད་སའི་བུ་ནི་འཁོར་དགྲ་བཅོམ་པ་ཁྲི་ཆིག་སྟོང་དང་ལྷན་ཅིག་པ་ན་སའི་གླིང་ན་གནས་སོ། །གནས་བརྟན་བ་ལང་སྐྱོང་ནི་འཁོར་དགྲ་བཅོམ་པ་བརྒྱད་སྟོང་དང་ལྷན་ཅིག་རི་བོ་
[241a.6]སྤོས་ཀྱི་དད་ལྡང་ལ་གནས་སོ། །གནས་བརྟན་ལམ་པ་ནི་འཁོར་དགྲ་བཅོམ་པ་སྟོང་ཕྲག་བཅུ་གསུམ་དང་ལྷན་ཅིག་ལྷའི་གནས་སུམ་ཅུ་རྩ་གསུམ་ན་གནས་སོ། །གནས་བརྟན་སྒྲ་གཅན་འཛིན་ནི་འཁོར་དགྲ་བཅོམ་པ་སྟོང་དང་ལྷན་ཅིག་ཕྲི་ཡང་ཀུའི་གླིང་ན་གནས་སོ། །གནས་
[241a.7]བརྟན་ཀླུ་སྡེ་ནི་འཁོར་དགྲ་བཅོམ་པ་སྟོང་ཕྲག་བཅུ་གཉིས་དང་ལྷན་ཅིག་རི་བོ་སྐྱ་བོན་བཞུགས་སོ། །གནས་བརྟན་ཟུར་གྱིས་ཤེས་ནི་འཁོར་དགྲ་བཅོམ་པ་སྟོང་ཕྲག་གསུམ་དང་ལྷན་ཅིག་རི་བོ་ངོས་ཡངས་ན་གནས་སོ། །གནས་བརྟན་ནགས་ན་གནས་ནི་འཁོར་དགྲ་བཅོམ་པ་
[241b]
[241b.1]སྟོང་ཕྲག་བཅུ་བཞི་དང་ལྷན་ཅིག་ལུས་འཕགས་ཀྱི་རི་ལ་གནས་སོ། །གནས་བརྟན་མི་ཕམ་པ་ནི་འཁོར་དགྲ་བཅོམ་པ་སྟོང་ཕྲག་བཅོ་ལྔ་དང་ལྷན་ཅིག་རྒྱལ་པོའི་ཁབ་བྱ་རྒོད་ཕུང་པོའི་རི་ལ་གནས་སོ། །གནས་བརྟན་གཙུག་གི་ལམ་པ་ནི་འཁོར་དགྲ་བཅོམ་པ་སྟོང་ཕྲག་དྲུག་ཅུ་དང་ལྷན་
[241b.2]ཅིག་རི་བོ་གཉའ་ཤིང་འཛིན་ན་གནས་སོ། །གནས་བརྟན་དེ་དག་གིས་ནི་མི་ཤེས་པའམ། མ་མཐོང་བའམ། མ་ཐོས་པའམ། མངོན་སུམ་དུ་མ་བྱས་པ་ནི་ཅུང་ཟད་ཀྱང་མེད་དོ། །དགེ་འདུན་གྱི་བཞེས་པའམ། སྤྱན་དྲང་བའམ། བཅོ་ལྔ་སྟོན་ནམ། གཙུག་ལག་ཁང་འབུལ་བའམ།
[241b.3]རབ་གནས་སམ། གང་ཅུང་ཟད་མི་ཤེས་པ་མེད་དོ། །དེ་དག་ཏུ་གནས་བརྟན་བཅུ་དྲུག་པོ་དེ་དག་ལ་འཁོར་དུ་མ་དང་བཅས་པ་ཆ་ལུགས་གཞན་དང་གཞན་གྱིས་དེ་དང་དེར་བྱོན་ཞིང་གནས་ཏེ། དེ་ལྟར་སྦྱིན་བ་ཡོངས་སུ་དག་པར་བྱེད་དོ། །མ་འོངས་པ་ན་མཚོན་གྱི་བསྐལ་པ་བྱུང་བ་འདས་ནས་མི་
[241b.4]རྣམས་དགེ་བ་བཅུ་དང་ལྡན་བས་ཚེ་སླར་འཕེལ་ཏེ། ལོ་བརྒྱད་ཅུ་ཐུབ་པ་ན་སྟོན་པའི་ཉན་ཐོས་དེ་དག་ཡང་ཕྱིར་ལ་འཛམ་བུའི་གླིང་དུ་བྱོན་ནས་དམ་པའི་ཆོས་ཡང་དག་པར་སྟོན་པར་བྱེད་ཅིང་རབ་ཏུ་འབྱིན་པར་བྱེད་དོ། །ཇི་སྲིད་སྐྱེ་དགུ་རྣམས་ཀྱི་ཚེ་ལོ་དྲུག་བརྒྱ་པར་གྱུར་པ་དེ་སྲིད་དུ་བཅོམ་ལྡན་
[241b.5]འདས་ཤཱཀྱ་ཐུབ་པའི་བསྟན་པ་དམ་པའི་ཆོས་གནས་པར་གྱུར་ཏེ། མི་རྣམས་ཀྱི་ཚེ་ལོ་བདུན་བརྒྱ་པར་གྱུར་པ་ན་ཉན་ཐོས་དེ་དག་གིས་གང་སའི་སྟེང་འདི་ན་བཅོམ་ལྡན་འདས་ཤཱཀྱ་ཐུབ་པའི་བསྟན་པའི་ཚོགས་ཇི་སྙེད་པ་དེ་དག་གཅིག་ཏུ་བསྡུས་ནས་རིན་པོ་ཆེ་སྣ་བདུན་གྱི་མཆོད་རྟེན་
[241b.6]གཅིག་བྱས་ཏེ་ཀུན་ནས་བསྐོར་ནས་སྐྱིལ་མོ་ཀྲུང་བཅས་ཏེ་འདུག་ནས་འདི་སྐད་ཅེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་འདུད་པས་ཕྱག་འཚལ་ལོ་ཞེས་བརྗོད་དེ། ཕྱག་བྱས་ནས་ཕུང་པོ་ལྷག་མ་མེད་
[241b.7]པའི་ཡོངས་སུ་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་རོ། །རིན་པོ་ཆེ་སྣ་བདུན་གྱི་མཆོད་རྟེན་དེ་ཡང་ནུབ་ནས་འོག་གི་གསེར་ཀྱི་ས་གཞི་གང་ཡིན་པ་དེ་ལ་གནས་སོ། །དེ་ནས་བཅོམ་ལྡན་འདས་ཤཱཀྱ་ཐུབ་པའི་བསྟན་པ་དམ་པའི་ཆོས་ནུབ་པར་
[242a]
[242a.1]འགྱུར་རོ། །དེ་ནས་དེའི་རྗེས་ལ་རང་སངས་རྒྱས་བྱེ་བ་ཕྲག་བདུན་འཇིག་རྟེན་དུ་འབྱུང་ངོ་། །དེ་ནས་མི་རྣམས་ཀྱི་ཚེ་ལོ་བརྒྱད་ཁྲི་པར་གྱུར་པ་ན་དེ་བཞིན་གཤེགས་པ་བྱམས་པ་ཞེས་བྱ་བ་འཇིག་རྟེན་དུ་འབྱུང་ངོ་། །དེའི་ཚེ་འཛམ་བུའི་གླིང་ནི་འབྱོར་བ་རྒྱས་པ། བདེ་བ། ལོ་ལེགས་པ།
[242a.2]མི་དང་སྐྱེ་བོ་མང་པོས་ཡོངས་སུ་གང་ཞིང་། བྱ་གག་འཕུར་བ་ཙམ་ན་གྲོང་ཁྱེར་དང་། གྲོང་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་ཡོད་པར་འགྱུར་རོ། །ལན་ཅིག་ས་བོན་བཏབ་པས་ལོ་བདུན་གྱི་བར་དུ་འབྲས་བུ་རྣམས་སྐྱེ་བར་འགྱུར་རོ། །
[242a.3]དེའི་ཉན་ཐོས་འདུས་པ་ཡང་གསུམ་དུ་འགྱུར་ཏེ། འདུས་པ་དང་པོ་ལ་ནི་ཉན་ཐོས་འདུས་པ་བྱེ་བ་ཕྲག་དགུ་བཅུ་རྩ་དྲུག་འབྱུང་བར་འགྱུར་རོ། །འདུས་པ་གཉིས་པ་ལ་ནི་ཉན་ཐོས་འདུས་པ་བྱེ་བ་ཕྲག་དགུ་བཅུ་རྩ་བཞི་འབྱུང་བར་འགྱུར་རོ། །འདུས་པ་གསུམ་པ་ལ་ནི་ཉན་ཐོས་བྱེ་བ་ཕྲག་
[242a.4]དགུ་བཅུ་རྩ་གཉིས་ཀྱི་འདུས་པ་ཆེན་པོ་འབྱུང་བར་འགྱུར་བ་ཡིན་ཏེ། གང་འདི་དག་ནི་སྦྱིན་པ་པོ་དང་སྦྱིན་བདག་ཡིན་ཏེ། ཡང་དེ་དག་གིས་གཞན་དུ་བཅོམ་ལྡན་འདས་ཤཱཀྱ་ཐུབ་པའི་གསུང་རབ་ལ་སངས་རྒྱས་ལ་དགེ་བའི་རྩ་བ་བསྐྲུན་ཞིང་བྱ་བ་བྱས་པར་གྱུར་པ་ཡིན་ཏེ། འདི་ལྟ་སྟེ།
[242a.5]གསེར་གྱི་རང་བཞིན་དང་དངུལ་གྱི་རང་བཞིན་དང་། བཻ་ཌཱུརྱའི་རང་བཞིན་དང་། ཤེལ་གྱི་རང་བཞིན་དང་། རིན་པོ་ཆེའི་རང་བཞིན་དང་། ར་གན་གྱི་དངོས་པོ་དང་། ཁར་བའི་དངོས་པོ་དང་། མུ་ཏིག་དང་། ལྕགས་ཀྱི་རང་བཞིན་དང་། ཟངས་ཀྱི་དངོས་པོ་དང་། ཙན་དན་གྱི་རང་བཞིན་དང་།
[242a.6]ཨ་ཀ་རུའི་རང་བཞིན་དང་། དུང་གི་རང་བཞིན་དང་། རྭའི་རང་བཞིན་དང་བ་སོའི་རང་བཞིན་དང་། སའི་རང་བཞིན་དང་། སྣ་ཚོགས་པའི་རང་བཞིན་དང་། རུས་པའི་རང་བཞིན་དང་ས་ལས་སྐུ་གཟུགས་སམ་མཆོད་རྟེན་བཞེངས་སུ་གསོལ་ཞིང་། ཐ་ན་སོར་མོ་ཙམ་གྱི་སྐུའམ་མཆོད་རྟེན་
[242a.7]བཞེངས་སུ་གསོལ་བས་དགེ་བའི་རྩ་བ་བསྐྱེད་པ་དེ་དག་ཐམས་ཅད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པའི་གསུང་རབ་ལ་མིའི་འཐོབ་པ་རབ་ཏུ་ཐོབ་ནས། འདུས་པ་དང་པོ་ལ་དང་བ་དང་དང་པ་དང་ལྡན་
[242b]
[242b.1]བས་རབ་ཏུ་བྱུང་ནས་སྐྲ་དང་ཁ་སྤུ་བྲེགས་ཏེ་ཆོས་གོས་བགོས་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། སྨོན་ལམ་ཇི་ལྟ་བ་བཞིན་དུ་ཡོངས་སུ་མྱ་ངན་ལས་འདའོ། །ཚེ་དང་ལྡན་པ་དག་རེ་ཞིག་སངས་རྒྱས་ལ་དགེ་བའི་རྩ་བ་བསྐྲུན་པ་ཡིན་ནོ། །ཡང་གང་དག་སྣང་བ་ཆོས་ཀྱི་ཕུང་
[242b.2]པོ་བརྒྱད་ཁྲི་པོ་བཅོམ་ལྡན་ཤཱཀྱ་ཐུབ་པའི་ཆོས་ཀྱི་བདུད་རྩི་ལ་དགེ་བའི་རྩ་བ་བསྐྱེད་པར་གྱུར་ཅིང་། སྐྱེད་དུ་བཅུག་པ་དང་། བྲིས་པ་དང་། འདྲིར་བཅུག་པ་དང་། བཀླགས་པ་དང་། ཀློག་ཏུ་བཅུག་པ་དང་། གང་དག་ཐེག་པ་ཆེན་པོའི་མདོ་སྡེ་ཟབ་པ་ཟབ་བར་གྱུར་པ་སྟོང་པ་ཉིད་
[242b.3]དང་ལྡན་པ་ནི་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་། དམ་པའི་ཆོས་པདྨ་དཀར་པོ་དང་། རྒྱ་ཆེར་རོལ་པ་དང་། གསེར་འོད་དམ་པ་དང་། ཡོན་ཏན་འོད་མཆོག་དང་། སྟོང་པ་ཉིད་ཀྱི་འོད་མཆོག་དང་། ཕྱག་ན་རྡོ་རྗེ་གསང་བ་ལ་སོགས་པ་དང་སྒྱུ་མ་ལྟ་བུའི་ཏིང་ངེ་འཛིན་
[242b.4]དང་། ཆོ་འཕྲུལ་ཆེན་པོའི་ཏིང་ངེ་འཛིན་དང་། བསོད་ནམས་ཐམས་ཅད་ལ་བསྡུས་པའི་ཏིང་ངེ་འཛིན་དང་། འཕགས་པ་ཟླ་བ་སྒྲོན་མའི་ཏིང་ངེ་འཛིན་དང་། དེ་བཞིན་གཤེགས་པའི་ཡེ་ཤེས་ཀྱི་ཏིང་ངེ་འཛིན་དང་། གཟི་བརྗིད་དང་ལྡན་པའི་ཏིང་ངེ་འཛིན་དང་། བྱང་ཆུབ་ཀྱི་ཏིང་ངེ་འཛིན་
[242b.5]དང་། བྱང་ཆུབ་བསྡུས་པ་དང་། སངས་རྒྱས་ཐམས་ཅད་ཡོངས་སུ་འཛིན་པ་དང་། གླང་པོའི་རྩལ་དང་། སྤྲིན་ཆེན་པོ་དང་། སོར་མོའི་ཕྲེང་བ་དང་། ལང་ཀར་གཤེགས་པ་དང་། ཡོངས་སུ་མྱ་ངན་ལས་འདས་པ་ཆེན་པོ་དང་། ཟླ་བའི་སྙིང་པོ་དང་། ཉི་མའི་སྙིང་པོ་དང་། ནམ་མཁའི་
[242b.6]སྙིང་པོ་དང་། སའི་སྙིང་པོ་དང་། བྱམས་པས་ཞུས་པ་དང་། ཚངས་པས་ཞུས་པ་དང་། ལེགས་པའི་མཚན་གྱིས་ཞུས་པ་དང་། དྲག་ཤུལ་ཅན་གྱིས་ཞུས་པ་དང་། དྲ་བ་ཅན་གྱིས་ཞུས་པ་དང་། ཀླུའི་རྒྱལ་པོ་རྒྱ་མཚོས་ཞུས་པ་དང་། དྲང་སྲོང་རྒྱས་པས་ཞུས་པ་དང་། བརྒྱ་བྱིན་
[242b.7]གྱིས་ཞུས་པ་དང་། ལག་ན་རིན་ཆེན་གྱིས་ཞུས་པ་དང་། མིའམ་ཅིའི་རྒྱལ་པོ་ལྗོན་པས་ཞུས་པ་དང་། དཔའ་བོ་ནམ་མཁས་ཞུས་པ་དང་། བུ་མོ་འོད་ལྡན་མས་ཞུས་པ་དང་། བུ་མོ་རིན་ཆེན་ལྡན་གྱིས་ཞུས་པ་དང་། བུ་མོ་གསེར་གྱི་འོད་མཆོག་གིས་ཞུས་པ་དང་། བད་སའི་
[243a]
[243a.1]རྒྱལ་པོ་འཆར་བྱེད་ཀྱིས་ཞུས་པ་དང་། དབང་ཕྱུག་ཆེན་པོས་ཞུས་པ་དང་། རྒྱལ་པོ་གཟུགས་ཅན་སྙིང་པོས་ཞུས་པ་དང་། དགེ་བ་བཟང་པོ་གང་གིས་ཞུས་པ་དང་། ལྷའི་བུ་མོ་ལེགས་པའི་མཚན་གྱིས་ཞུས་པ་དང་། ལྷའི་བུ་ཙན་དན་གྱིས་ཞུས་པ་དང་། ལྷའི་བུ་
[243a.2]རང་གི་རྒྱན་གྱིས་ཞུས་པ་དང་། ལག་བཟངས་ཀྱིས་ཞུས་པ་དང་། སེང་གེས་ཞུས་པ་དང་། སེང་གེ་རྣམ་པར་རོལ་པས་ཞུས་པ་དང་། དཔས་བྱིན་གྱིས་ཞུས་པ་དང་། གཙུག་ན་རིན་ཆེན་གྱིས་ཞུས་པ་དང་། ཟུང་གི་མདོ་དང་། བྱང་ཆུབ་སེམས་དཔའི་ཟློས་གར་དང་། སྟག་རྣའི་
[243a.3]རྟོགས་པ་བརྗོད་པ་དང་། ལམ་རྣམ་པར་བཤད་པ་དང་། བློ་གྲོས་མི་ཟད་པས་བསྟན་པ་དང་། བློ་གྲོས་རྒྱ་མཚོས་བསྟན་པ་དང་། དྲི་མ་མེད་པར་གྲགས་པས་བསྟན་པ་དང་། བདེན་པ་ལ་འཇུག་པ་དང་། མ་སྐྱེས་དགྲའི་འགྱུར་བ་དང་། སྲེད་མེད་ཀྱི་བུའི་འགྱུར་བ་དང་། སྟོང་
[243a.4]འགྱུར་དང་། འཛམ་བུའི་གླིང་འགྱུར་བ་དང་། འདུས་པར་འགྱུར་བ་དང་། སངས་རྒྱས་ཀྱི་རྒྱན་དང་། ཐབས་ལ་མཁས་པ་དང་། ལག་ན་ཨུཏྤ་ལ་དང་། སངས་རྒྱས་བཅུ་པ་དང་། ཆོས་བཅུ་པ་དང་། ས་བཅུ་པ་དང་། འོད་དཔག་མེད་ཀྱི་བཀོད་པ་དང་། བདེ་བ་ཅན་གྱི་བཀོད་པ་
[243a.5]དང་། དམ་པའི་ཆོས་ཀྱི་ཡོན་ཏན་བཀོད་པ་དང་། ཚོགས་ཀྱི་བཀོད་པ་དང་། རྣམ་དག་མེ་ཏོག་བསྡུས་པ་དང་། འཇིག་རྟེན་དག་པས་བསྡུས་པ་དང་། བྱང་ཆུབ་སེམས་དཔའ་དག་པས་བསྡུས་པ་དང་། ཐམས་ཅད་སྡེགས་ལས་བབས་པ་དང་། དེ་བཞིན་གཤེགས་པ་
[243a.6]ཐམས་ཅད་ལྷ་ལས་བབས་པ་དང་། རིན་པོ་ཆེའི་ཏོག་དང་། རིན་པོ་ཆེའི་ཕུང་པོ་དང་། རིན་པོ་ཆེའི་ཟ་མ་ཏོག་དང་། མཛེས་པ་བརྩེགས་པ་དང་། རིན་ཆེན་སྐར་མདའ་དང་། རིན་ཆེན་སྤྲིན་དང་། རིན་ཆེན་ལྗོན་པ་དང་། རིན་ཆེན་གཙུག་དང་། རིན་ཆེན་འབྱུང་གནས་དང་།
[243a.7]ཅོད་པན་དྲ་བ་ཅན་དང་། སྡོང་པོ་བཀོད་པ་དང་། འདི་དག་ལ་སོགས་པ་བྱེ་བ་ཕྲག་བརྒྱ་ནི་ཐེག་པ་ཆེན་པོའི་སྡེ་སྣོད་ཡིན་ནོ། །དེ་བཞིན་དུ་ཉན་ཐོས་ཀྱི་སྡེ་སྣོད་དེ། མངོན་པའི་སྡེ་སྣོད་དང་། འདུལ་བའི་སྡེ་སྣོད་དང་། མདོ་སྡེའི་སྡེ་སྣོད་འདི་ལྟ་སྟེ། ལུང་རིང་པོ་དང་། ལུང་
[243b]
[243b.1]བར་མ་དང་། གཅིག་ལས་འཕྲོས་པའི་ལུང་དང་། ཡང་དག་པར་ལྡན་པའི་ལུང་དང་། ལུང་ཕྲ་མོའོ། །དེ་དག་ནི་མདོ་སྡེའི་སྡེ་སྣོད་ཅེས་བྱའོ། །མངོན་པའི་སྡེ་སྣོད་གང་ཞེ་ན། འདི་ལྟ་སྟེ། དྲི་བ་དྲུག་དང་ཡང་དག་པར་སྦྱར་བ་བསྡུས་པ་ལ་ནི་མངོན་པའི་སྡེ་སྣོད་ཅེས་བྱའོ། །དེ་ལ་
[243b.2]འདུལ་བའི་སྡེ་སྣོད་གང་ཞེ་ན། འདི་ལྟ་སྟེ། དགེ་སློང་གི་འདུལ་བ་དང་། དགེ་སློང་མའི་འདུལ་བ་དང་། མ་མོའི་འདུལ་བ་དང་། འདུལ་བའི་མ་མོ་སྟེ། ཚེ་དང་ལྡན་པ་དག །དེ་དག་ལ་ནི་འདུལ་བའི་སྡེ་སྣོད་ཅེས་བྱའོ། །འདི་དག་ནི་སྐྱེས་པའི་རབས་ཏེ། རྟོགས་པ་བརྗོད་པའི་རབས་དང་།
[243b.3]རང་སངས་རྒྱས་ཀྱི་རབས་དང་། སངས་རྒྱས་ཀྱིས་གསུངས་པ་དང་། རང་སངས་རྒྱས་ཀྱིས་བསྟན་པ་དང་། བྱང་ཆུབ་སེམས་དཔས་བསྟན་པ་དང་། ཉན་ཐོས་ཀྱིས་བསྟན་པ་དང་། ལྷས་བསྟན་པ་དང་། བྱུང་པ་བསྡུས་པ་དང་། ཆོས་ཉེ་བར་བསྡུས་པ་དང་། ཐ་ན་ཚིག་བཞི་པའི་ཚིགས་སུ་བཅད་པ་
[243b.4]གཅིག་གསུང་པར་འགྱུར་བ་ཡང་བཀླགས་པར་གྱུར་པ་དང་། བཟུང་བར་གྱུར་པ་དང་། གླེགས་བམ་དུ་བྲིས་པར་གྱུར་པ་དང་། ཆོས་སྨྲ་བ་ལ་མཆོད་པར་གྱུར་པ་དང་། དེ་དག་དང་། ནང་པ་སངས་རྒྱས་པ་ལ་མཆོད་པར་གྱུར་པ་དང་། དྲི་དང་། ཕྲེང་བ་དང་། བྱུག་པ་དང་། སྤོས་དང་།
[243b.5]མར་མེ་དང་། གདུགས་དང་། རྒྱལ་མཚན་དང་། གླེགས་བམ་ལ་ཁ་དོག་སྣ་ཚོགས་པའི་གོས་རྣམས་གཡོགས་ཤིང་དཀྲིས་པ་དང་། གླེགས་ཤིང་མཆོག་བྱས་པར་གྱུར་པ་དང་། གླེགས་ཐག་ཁ་དོག་སྣ་ཚོགས་པས་གླེགས་བམ་བཅིངས་པར་གྱུར་པས་དགེ་བའི་རྩ་བ་བསྐྱེད་
[243b.6]པ་དེ་དག་ཐམས་ཅད་ནི་བཅོམ་ལྡན་འདས་དེ་བཞིན་གཤེགས་པ་བྱམས་པའི་གསུང་རབ་ལ་མིའི་འཐོབ་པ་རབ་ཏུ་ཐོབ་ནས་དད་པས་ཁྱིམ་སྤངས་ཏེ། སྐྲ་དང་ཁ་སྤུ་བྲེགས་ནས་ཆོས་གོས་བགོས་ཏེ་ཁྱིམ་ནས་ཁྱིམ་མེད་པར་འདུས་པ་གཉིས་པ་ལ་རབ་ཏུ་དབྱུང་སྟེ། སྨོན་ལམ་ཇི་ལྟ་
[243b.7]བ་བཞིན་དུ་ཡོངས་སུ་མྱ་ངན་ལས་འདའ་བར་འགྱུར་རོ། །ཚེ་དང་ལྡན་པ་དག་དེ་དག་ནི་རེ་ཞིག་ཆོས་ལ་དགེ་བའི་རྩ་བ་བསྐྲུན་པ་ཡིན་ནོ། །འདི་ལྟར་འདི་དག་ནི་སྦྱིན་པ་པོ་དང་སྦྱིན་བདག་ཡིན་ཏེ། དགེ་འདུན་ལ་དགེ་བའི་རྩ་བ་བསྐྲུན་པ་དང་། སྐྱེད་དུ་བཅུག་པ་ཡིན་ཏེ། འདི་ལྟར་འདི་
[244a]
[244a.1]དགེ་འདུན་སྤྱན་འདྲེན་པ་བསྒྲགས་པ་དང་། དགེ་བ་ལ་འཛུད་པ་དང་། བརྒྱད་སྟོན་བྱེད་པ་དང་། གསོ་སྦྱོང་བྱེད་པ་དང་། རབ་ཏུ་མགྲོན་ཏུ་འབོད་པ་དང་། དགེ་འདུན་ལ་མཆོད་སྟོན་གསོལ་བ་དང་། སྤྱན་འདྲེན་པ་དང་། གློ་བུར་དུ་སྤྱན་འདྲེན་པ་དང་། ཟླ་སྟོན་བྱེད་པ་དང་།
[244a.2]སྟག་རེས་སྐོར་བྱེད་པ་དང་། ཆོས་སྒྲོགས་པ་སྤྱན་འདྲེན་པ་དང་། ལོ་ལྔ་སྟོན་བྱེད་པ་དང་། གཙུག་ལག་ཁང་དབུལ་བ་དང་། མལ་སྟན་འདིངས་པ་དང་། ཆོས་གོས་འབུལ་བ་དང་། གཙུག་ལག་ཁང་གསར་པའི་རབ་གནས་བྱེད་པ་དང་། སྨན་འབུལ་བ་དང་། ཡོ་བྱད་འབུལ་
[244a.3]བས་དགེ་བའི་རྩབ་བསྐྱེད་པ་དེ་དག་ཐམས་ཅད་ནི་བཅོམ་ལྡན་འདས་དེ་བཞིན་གཤེགས་པ་བྱམས་པའི་གསུང་རབ་ལ་མིའི་འཐོབ་པ་རབ་ཏུ་ཐོབ་ནས་འདུས་པ་གསུམ་པ་ལ་དད་པས་ཁྱིམ་སྤངས་ཏེ། སྐྲ་དང་ཁ་སྤུ་ཕྱི་ནས་ཆོས་གོས་བགོས་ཏེ། ཡང་དག་པའི་ཁྱིམ་ནས་ཁྱིམ་
[244a.4]མེད་པར་རབ་ཏུ་བྱུང་སྟེ། སྨོན་ལམ་ཇི་ལྟ་བ་བཞིན་དུ་ཡོངས་སུ་མྱ་ངན་ལས་འདའ་བར་འགྱུར་རོ། །ཚེ་དང་ལྡན་པ་དེ་དག་ནི་རེ་ཞིག་དགེ་འདུན་ལ་དགེ་བའི་རྩ་བ་བསྐྱེད་པ་ཡིན་ནོ། །དེ་ནས་གནས་བརྟན་དགའ་བའི་བཤེས་གཉེན་གྱིས་རྣམ་པར་རྒྱ་ཆེར་བཤད་ནས། ཤིང་ཏ་ལ་
[244a.5]བདུན་སྲིད་ཙམ་དུ་ནམ་མཁའ་ལ་འཕགས་ནས་དགེ་འདུན་དེ་དག་གི་མདུན་དུ་ཆོ་འཕྲུལ་ཡ་མ་ཟུང་སྣ་ཚོགས་བསྟན་ཏེ། སྟེང་གི་ནམ་མཁའ་ལ་འདུག་ནས་ཚེའི་འདུ་བྱེད་དང་སྲོག་གི་འདུ་བྱེད་བཏང་སྟེ། ཡོངས་སུ་མྱ་ངན་ལས་འདས་སོ། །དེ་ནས་དགེ་སློང་དེ་དག་གིས་
[244a.6]གནས་བརྟན་དགའ་བའི་བཤེས་གཉེན་ལ་ལུས་བསྲེགས་ནས་མཆོད་རྟེན་བྱས་ཏེ། དྲི་དང་། མེ་ཏོག་དང་། སྤོས་དང་། མར་མེ་དང་། གདུགས་དང་། རྒྱལ་མཚན་དང་། བ་དན་རྣམས་ཀྱིས་མཆོད་པར་བྱས་སོ། །རྣམ་པ་འདི་དག་འཕགས་པ་ནས་འཕགས་པར་བརྒྱུད་ནས་བཤད་དོ། །
[244a.7]དེ་ཅིའི་ཕྱིར་ཞེ་ན། སྦྱིན་པ་པོ་དང་། སྦྱིན་བདག་གང་ཡིན་པ་རྣམས་བཅོམ་ལྡན་འདས་ཀྱི་གསུང་རབ་ཡུན་རིང་དུ་གནས་པར་གྱུར་ཏོ་སྙམ་ནས་དགའ་བ་རབ་ཏུ་བསྐྱེད་པའི་ཕྱིར་རྟོགས་པ་བརྗོད་པ་འདི་འཕགས་པ་དགའ་བའི་བཤེས་གཉེན་གྱིས་བཤད་དོ། །འཕགས་པ་དགའ་བའི་
[244b]
[244b.1]བཤེས་གཉེན་གྱི་རྟོགས་པ་བརྗོད་བ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཨ་ཛི་ཏ་ཤྲཱི་བྷ་དྲ་དང་། དགེ་སློང་ཤཱཀྱ་འོད་ཀྱིས་བསྒྱུར།། །།{T4147}༄༅༅། །རྒྱ་གར་སྐད་དུ། སབྷ་ཀུ་མཱ་རཱི་ཀ་ཨ་བ་དཱ་ནཾ། བོད་སྐད་དུ། གཞོན་ནུ་མ་བདུན་གྱི་རྟོགས་པ་བརྗོད་པ། དཀོན་མཆོག་
[244b.2]གསུམ་ལ་ཕྱག་འཚལ་ལོ། །ཆགས་བྲལ་ལྡན་དང་ལེགས་པར་བཤད་པ་དང་། །ངོ་མཚར་དང་ནི་དེ་ཉིད་དོན་ངེས་དང་། །དམ་པ་རྣམས་ཀྱི་གཅིག་ཏུ་མཉན་བྱ་ཡི། །རྟོགས་པ་བརྗོད་པ་བདག་གིས་བཤད་ཀྱིས་ཉོན། །འདི་ལྟར་དགེ་བའི་རྩ་བ་ཡོངས་སུ་སྨིན་པ་རྣམས་ལ་ནི། ལོངས་
[244b.3]སྤྱོད་ཆེན་པོའམ། ལང་ཚོས་བར་དུ་གཅོད་པར་མི་འགྱུར་བས་མཛེས་པར་གྱུར་པ་ཡིན་ནོ། །དེ་ཡང་འདི་ལྟར་རྗེས་སུ་ཐོས་ཏེ། རྒྱལ་པོ་ཀྲི་ཀཱི་ཞེས་བྱ་བ་ཚུལ་དང་དུ་ལ་བ་ལ་སོགས་པ་ཡོན་ཏན་གྱི་དཔལ་ཕུན་སུམ་ཚོགས་པ་དང་ལྡན་པ། བཅོམ་ལྡན་འདས་ཡང་དག་བར་རྫོགས་པའི་
[244b.4]སངས་རྒྱས་འོད་སྲུངས་ལ་དད་པ་ཡང་དག་པར་ཐོབ་པ་ཞིག་བྱུང་བར་གྱུར་པ་དེ། དེའི་བུ་མོ་བདུན་སྔོན་དུ་བྱུང་བའི་སངས་རྒྱས་རྣམས་ལ་དགེ་བའི་རྩ་བ་རྒྱ་ཆེར་བསྐྲུན་པའི་སྟོབས་དང་ལྡན་པ་དེ་དག་འཁོར་བས་ཤིན་ཏུ་ཡིད་བྱུང་བར་གྱུར་ནས། དེ་རྣམས་ཀྱིས་དུལ་བ་དང་ཞེ་སར་བཅས་
[244b.5]པས་ཕ་ལ་ཕྱག་བྱས་ཏེ་སྙན་པའི་ཚིག་གིས་སྨྲས་པ། འཇིག་རྟེན་གནས་པ་ཆུ་ནང་སོང་བའི་ཟླ་བའི་གཟུགས་བཞིན་གཡོ་བར་མཐོང་། །འདོད་པ་ཁྲོས་པའི་སྦྲུལ་གྱིས་ལུས་སྐྱིལ་གདེངས་ཀའི་གྲིབ་མ་ལྟ་བུར་མཐོང་། །འགྲོ་བ་འདི་དག་སྡུག་བསྔལ་མེ་ཡིས་ཀུན་དུ་འབར་བ་
[244b.6]མཐོང་བས་ན། །རྒྱལ་པོ་བདག་ཅག་ངེས་པར་འབྱུང་ལ་མངོན་དགའ་དུར་ཁྲོད་དག་ཏུ་མཆི། །རྒྱལ་པོས་སྨྲས་པ། ཁྱེད་ནི་བྱིས་པ་བདེ་ལ་བརྟེན་འོས་ཤིང་། །ཡིད་ལ་བསམས་པའི་དོན་ཡང་མ་བྱས་ན། །དཀའ་ཐུབ་གནས་སུ་ཁྱེད་རྣམས་སོང་ཤིག་ཅེས། །ཇི་ལྟ་བུར་ནང་ཡིས་
[244b.7]སྨྲ་བར་ནུས། །བུ་མོས་སྨྲས་པ། ས་བདག་ཁྱེད་ཀྱི་མཛད་སྤྱོད་བདག་ཅག་རྣམས་ཀྱིས་འཚལ་ལགས་ཏེ། །འགྲོ་ལ་ཐུགས་རྗེས་བརླན་ཞིང་དེས་པའི་ངང་ཚུལ་ལྡན་བས་ན། །དགོས་པ་མེད་ལའང་བྱམས་པར་མཛད་ན་ཉིད་ཀྱི་ཕང་པར་ནི། །རྣམ་བསྐྱེད་སྡིག་མེད་ཉེར་སོན་བདག་
[245a]
[245a.1]ཅག་རྣམས་ལྟ་སྨོས་ཅི་འཚལ། །ཁྱེད་དང་ལྷན་ཅིག་གནས་ཀྱང་དབང་མེད་བྲལ་བ་མངོན་ཕྱོགས་པའི། །ཕོངས་པ་འདི་ཡིས་ཕྱིར་ཞིང་ཉེ་བར་གདུང་བར་མ་གྱུར་ཅེས། །རྒྱལ་པོ་ཤིན་ཏུ་དགའ་བའི་གནས་སུ་གྱུར་པ་གང་དག་ཡིན་པ་ཡི། །ཞི་བའི་གོ་འཕང་ཐོབ་པར་འཚལ་
[245a.2]བའི་ཡིད་ནི་སྐྱེས་པར་གྱུར། །དེ་ནས་རྒྱལ་པོ་དེ་སྙིང་བརྩེ་བའི་དབང་གིས་ཡིད་རྣམ་པར་ཉམས་ཤིང་། མིག་གཉིས་ཟངས་ལྟར་དམར་ལ་མི་འགྱུར་བས་ཡང་དང་ཡང་དུ་བལྟས་ནས་སྨྲས་པ། ཅི་ཕྱིར་ཁང་བཟངས་རང་དགར་གྱུར་དང་འཇམ་ཡངས་པའི། །སྣ་ཚོགས་སྟན་བཟངས་རྒྱ་ཆེན་རྣམ་པར་
[245a.3]སྤངས་ནས་ནི། །དུར་ཁྲོད་མི་བཟད་སྐྱེ་བོ་ངན་པའི་ཡིད་འདྲ་ཞིང་། །ས་གཞི་རུས་པ་དཀར་པོའི་ཚལ་པས་བཀྲམ་པས་སྟན། །གདུང་བའི་གདོང་ཅན་ཕ་དང་ཡུལ་རྨུགས་ལྟ་བུར་ནི། །མཆི་མའི་གདོང་ཅན་མ་ཡང་ཅིག་ཅར་ཇི་ལྟར་འདོར། །གཡོ་མེད་སེམས་ཀྱི་རྒྱུན་དུ་ཡིད་ནི་བརྩེ་བ་ཡི །
[245a.4]མཛའ་བཤེས་སྤངས་ནས་ཅི་ཕྱིར་དཀའ་ཐུབ་བསྟན་པར་དགའ། །དེ་ནས་བུ་མོ་དེ་རྣམས་ཀྱིས་ཤིན་ཏུ་བརྟན་པའི་ཡིད་ཀྱིས་བསྙེམས་པར་བྱས་ནས། སྨྲས་པ། ཕ་དང་མ་དང་མཛའ་བཤེས་གཅེས་པ་ཐ་སྙད་ཙམ། །འདི་དག་སྲིད་པར་ཕྱིར་ཡང་ལྷུང་དང་གནོད་པའི་གཞི། །འབྱུང་བའི་དོན་མཐོང་
[245a.5]ལྐོག་ཏུ་གྱུར་པའི་དྲི་མ་ཡིས། །མི་ཡི་བདག་པོ་འཇིག་རྟེན་འཇིག་པས་ཡོངས་སུ་སྐྱོ། །མཛའ་བཤེས་རང་མི་གཉེན་གྱི་ངོ་བོ་སྣ་ཚོགས་པ། །གཡོན་ཅན་ཕུང་ཁྲོལ་ལྡན་པ་འདི་ལ་སུ་ཞིག་ཆགས། །འཚོ་བའི་འཇིག་རྟེན་རྨི་ལམ་མིག་འཕྲུལ་དང་འདྲ་ལ། །འདི་ན་སུ་ཞིག་གང་གིས་རང་མིའམ་
[245a.6]སྐྱེ་བོར་བརྟག །མི་ཡི་དབང་པོ་འཇིག་རྟེན་དམ་ཆོས་གསུང་གི་འོད་ཟེར་སྣང་བཅས་ཤིང་། །ཇི་སྲིད་སངས་རྒྱས་ཉི་མའི་ཡིད་འོང་གྲགས་པའི་འོད་ཟེར་ཕྲེང་ཡོད་པ། །དེ་སྲིད་ཕོངས་པའི་མུན་ནག་ཚོགས་ཀྱིས་ཤིན་ཏུ་གཡོགས་གྱུར་པའི། །སྲིད་པའི་མུན་པ་མི་ཟད་མུན་རུམ་ནས་ནི་འབྱུང་བར་
[245a.7]བྱ་བའི་རིགས། །ཇི་ལྟར་རླུང་གིས་བརྡབས་པས་བསྐྱོད་པའི་མེ་ལྕེ་འབར་བའི་ཁྱིམ་ལས་ནི། །འབྱུང་བར་བྱེད་པའི་སྐྱེས་བུ་དེ་ལ་ཕན་པར་འདོད་རྣམས་ཟློག་མི་བྱེད། །དེ་བཞིན་སྡུག་བསྔལ་མེ་ཆེན་རྩེར་གནས་སྲིད་པ་མ་ལུས་གནོད་པ་ཡི། །དྲ་བ་ལས་ནི་ངེས་པར་འབྱུང་ལ་ཕན་ཕྱིར་
[245b]
[245b.1]དམ་པས་བཟློག་མི་བྱ། །དེ་ནས་རྒྱལ་པོ་དེས་བུ་མོ་དེ་རྣམས་མཛའ་བཤེས་དང་རང་མི་དང་རྩ་ལག་རྣམས་ལ་ལྟོས་པ་མེད་པའི་ཚིག་རྩུབ་པོ་དང་། རང་གི་ལུས་དང་སྲོག་ལ་ཡང་ཤིན་ཏུ་མ་ཆགས་པའི་ཚིག་གིས་ལྷག་པར་ཡང་མྱ་ངན་གྱིས་གདུངས་པར་གྱུར་པའི་ཡིད་ཀྱིས་དེ་རྣམས་ལ་ཡང་སྨྲས་
[245b.2]པ། དུས་མིན་དཀའ་ཐུབ་མངོན་པར་འདོད་པ་ནི། །ཡིད་དང་རྗེས་མཐུན་དོན་དུ་མི་འགྱུར་ཏེ། །བུ་མོ་དུས་མིན་མངལ་དང་ལྡན་པ་ལ། །ཡན་ལག་ཆ་ཤས་མཛེས་པ་མི་སྐྱེ་བཞིན། །དུས་ལ་བབ་པར་དཀའ་ཐུབ་ལ་སྦྱོར་བ། །ཟླ་བ་སྐྱོན་དང་བྲལ་བ་ལྟ་བུར་མཛེས། །དེ་བས་གཞོན་ནུས་ཕན་
[245b.3]མེད་བློ་འགྱུར་འདིའི། །ལོག་པའི་ལམ་དུ་འཇུག་ལས་བཟློག་པར་གྱིས། །བདེ་ལ་བརྟེན་ཞིང་སྡུག་བསྔལ་མ་མཐོང་བས། །ལུས་ཀྱིས་སྡུག་བསྔལ་བཟོད་པར་མི་འགྱུར་ཏེ། །ཨ་མྲའི་ཤིང་ནི་རྩ་བ་མ་ཟུག་ལ། །གླང་ཆེན་མཆོག་གི་མཆེ་བ་བསྣུན་དང་མཚུངས། །ཁོང་ནས་མེ་འབར་
[245b.4]ལྟས་ངན་སྒྲ་འབྱིན་པའི། །ཅེ་སྤྱང་འཇིགས་པའི་སྒྲ་སྒྲོགས་ཚང་ཚིང་གང་། །འཇིགས་པ་རྣམས་ཀྱང་འཇིགས་པར་བྱེད་པ་ཡི། །མི་བཟད་དུར་ཁྲོད་དག་ནི་འཇིགས་པར་བཅས། །ཁྱེད་ལུས་པདྨའི་རྩ་ལྟར་འཇམ་པ་ལ། །སེམས་གང་སོག་ལེས་ལྟ་བུར་བརྩེ་མེད་འདིས། །གཞན་
[245b.5]གྱི་ངོར་བྱེད་པ་ནི་སྤངས་གྱུར་པ། །ཨེ་མ་ཧོ་གནམ་བསྐོས་བདག་ལ་བརྩེ་མེད་སྡང་། །བཻ་ཌཱུཪྻ་ལྟར་སྔོ་ལྗང་ངུར་པའི་གོས་གྱོན་ཅིང་། །མེ་ཏོག་རྣམ་པ་དུ་མའི་ཚོགས་ནི་བཀྲམ་གྱུར་དང་། །བུང་བ་མྱོས་པའི་ཚོགས་ཀྱིས་ཁྱབ་པའི་རྩེད་མོའི་ཚལ། །འདིར་ནི་བུ་མོ་ཁྱེད་རྣམས་མངོན་པར་
[245b.6]དགའ་བར་གྱིས། །སྐྱེད་མོས་ཚལ་ན་རྫིང་ཁང་ངོགས་ན་མེ་ཏོག་ཤིང་འཕྱང་ཞིང་། །རླུང་གིས་བསྐྱོད་པའི་ཆུ་རླབས་མཛེས་པའི་ཕྲེང་བས་སྐ་རགས་བཅིངས། །པདྨ་དག་དང་ཨུཏྤ་ལ་རྒྱས་གསེབ་དང་པ་སྒྲ་སྒྲོགས་པ། །བརྒྱ་བྱིན་གྱིས་ཀྱང་རྙེད་དཀའ་བུ་མོ་དགའ་བས་གནས་པར་
[245b.7]གྱིས། །མེ་ཏོག་ན་པ་མ་ལི་ཀ་ཡི་དྲིས་བསྒོས་གྱུར་པ་ཡི། །ཆུ་རླབས་མཛེས་པར་གྱུར་པའི་ཉེ་བར་གཡོ་བ་ཡི། །རླུང་དང་བཅས་པའི་ཁྱིམ་འདི་དང་ནི་ནགས་ཚལ་ནི། །ཁུ་བྱུག་སྒྲ་འབྱིན་པ་ཡི་བུ་མོ་དགའ་བར་གྱིས། །སྐར་ཁུང་དྲ་བ་ཅན་ནང་བྱ་རྣམས་སྐད་འབྱིན་མེ་ཏོག་དྲིས་
[246a]
[246a.1]བསྒོས་དང་། །སྒེག་པས་ཁྲུས་བྱས་དྲི་ཞིམ་བསྒོས་པའི་ནགས་དང་འདྲ་བའི་རླུང་དག་ནི། །ཁང་བཟངས་མདའ་ཡབ་ཅན་དང་བྱ་གག་བདེ་བར་ཉལ་བ་གང་ཡིན་འདིར། །བུད་མེད་འདུས་པའི་གླུ་དབྱངས་རོལ་མོ་ལྡན་པར་ཁྱེད་རྣམས་དགའ་བར་གྱིས། །དེ་ནས་གཞོན་
[246a.2]ནུ་མ་རྣམས་ཕའི་ཚིག་དེས་ཡི་མ་རངས་པར་གྱུར་ནས་སྨྲས་པ། མི་ཡི་བདག་པོ་ལྷ་ཡུལ་ས་སྟེང་ན། །བརྒྱ་ཕྲག་སྟོང་དུ་སྤྱད་པ་མ་བྱས་པའི། །བདེ་བ་གཞན་དག་ཅི་ཡང་ཡོད་མིན་ཏེ། །བདག་ཅག་རྣམས་ནི་དོན་མེད་མཁས་པ་ཡིན། །ཡུལ་ལ་ལྷག་པར་སྲེད་ཅིང་གོམས་པས་
[246a.3]ན། །དབང་པོ་རྣམས་ནི་ཡུལ་གྱིས་ངོམས་པ་མེད། །སྲིད་པས་འཇིགས་པའི་རྟོག་པའི་བློ་ཅན་དག །སྲིད་པའི་ལོངས་སྤྱད་ཟད་པར་བྱ་ཕྱིར་འཇུག །ངོ་བོ་ཉིད་ཀྱིས་འགྱུར་ཞིང་མི་བརྟན་ལ། །རླུང་གིས་བསྐྱོད་པའི་ཆུ་རླབས་ལྟར་འཇིགས་པས། །སྡོམ་ཅན་དབང་པོ་དྲུག་ལས་རྣམ་རྒྱལ་
[246a.4]རྣམས། །ཕྱིར་ཞིང་སྲིད་པར་འཇུག་ལས་ལྡོག་པར་བྱེད། །བྱིས་པ་སྲིད་པའི་བཙོན་རར་ཕག་ལྟ་བུར། །སེམས་ཀྱི་སྤགས་པའི་སྤྱོད་པས་བསླུས་གྱུར་ཏེ། །བདེ་བར་མངོན་པར་རློམ་ཞིང་བརྐམ་པ་དག །ཕོངས་ཤིང་འཇིགས་པའི་གཡང་ས་མཐའ་མེད་ལྷུང་། །བདག་ཏུ་
[246a.5]རྟོག་པས་སེམས་གཡེངས་སྐྱེས་གྱུར་པ། །དེ་ནི་རབ་འབར་མཚོན་ཆའི་འཁྲུལ་འཁོར་འདྲ། །ཡུལ་ལ་རྗེས་སུ་བརྟེན་པས་སེམས་བཅོམ་པ། །ཡོངས་སུ་སྨིན་ན་སྡུག་བསྔལ་མི་བཟང་རྒྱུ། །འགྲོ་བ་འདི་དག་མི་བརྟན་དབང་མེད་ཅིང་། །སྦྲུལ་གདུག་མཚོན་གྱིས་ཟིན་འདྲའི་
[246a.6]ཡུལ་རྣམས་དག །རྟོགས་ཀྱང་གང་ཞིག་སྲིད་ལ་ཆགས་གྱུར་པ། །དེ་ནི་མི་ཡི་གཟུགས་ལྡན་ཕྱུགས་ཉིད་ཡིན། །རྔ་རྩིད་ཤིང་ལ་ཐོགས་པའི་གཡག་བཞིན་དུ། །བློ་ཡི་ལམ་ནི་རྙོག་པས་ཉེར་འགགས་ཤིང་། །ལོག་པར་ཆགས་པའི་ཡལ་གས་སེམས་ཐོགས་པའི། །སྐྱེས་བུ་
[246a.7]ངན་པའི་ཁྱིམ་རྟེན་ཕུང་བར་འགྱུར། །དགའ་བའི་རྒྱུ་ཙམ་འཚོ་བའི་འཇིག་རྟེན་ལ། །ཕོངས་པ་རྒྱུན་མི་འཆད་པར་འབྱུང་འགྱུར་ན། །ཡབ་ཅིག་སྲིད་པའི་དགའ་བ་མང་པོ་ལས། །སླུ་བར་མི་འགྱུར་གང་ཞིག་མཆིས་པར་གསུངས། །མི་དབང་སྲིད་ན་སྐལ་བ་མཉམ་
[246b]
[246b.1]པ་ཡིས། །ཉེ་བར་བསྒྲུབས་ཤིང་བསགས་པར་གྱུར་ཀྱང་ནི། །བཅོམ་ཞིང་སེམས་ནི་དམན་པ་དམན་པ་ཡིས། །སྲིད་པའི་དགོན་པ་གཞན་དུ་འགྲོ་བར་འགྱུར། །རྒྱལ་པོ་རྒྱར་ཆུད་གྱུར་པའི་ཉ་བཞིན་དུ། །སྐྱེས་བུ་ལེགས་པར་བརྟགས་ཤིང་བྱེད་པ་དང་། །ཐ་སྙད་ཀུན་
[246b.2]ལ་ངང་གིས་མཁས་པ་ཡང་། །ཁྱིམ་གྱི་བཙོན་རར་གནས་ན་འཇིག་པར་འགྱུར། །ས་ཡི་བདག་པོ་འབད་པ་མང་པོ་ཡིས། །ཁྱིམ་དུ་རྫས་རྣམས་བསགས་པ་བྱས་པ་དག །མི་ཡིས་སྐད་ཅིག་གིས་ནི་འདོར་འགྱུར་ཏེ། །ལེགས་བཤད་གཅིག་པུ་འདི་ཉིད་ལམ་དུ་
[246b.3]བསྟན། །དེ་བས་འཇིག་རྟེན་མགོན་པོས་འཚོ་བ་ཡི། །འཇིག་རྟེན་མི་རྣམས་ལས་བདག་བྱར་གསུངས་ཏེ། །འཆི་བ་མངོན་ཕྱོགས་མི་ལ་རང་གི་ལས། །བ་ལ་བེའུ་བཞིན་དུ་རྗེས་སུ་འབྲངས། །ཡོངས་སུ་གྱུར་ན་མི་བཟད་གཉེན་སྡུག་དང་། །སྡུག་དང་འདྲེ་བར་མངོན་པས་འདོད་
[246b.4]དེས་ཆོག །སྡུག་དང་ཕྲད་པས་དགའ་བར་སེམས་པ་དག །ངེས་པར་སྡུག་དང་བྲལ་བའི་སྡུག་བསྔལ་འཐོབ། །མི་དབང་གཞན་ཡང་ངང་གིས་མཐར་འཇིག་པའི། །འཚོ་བའི་འཇིག་རྟེན་དག་ན་སྡུག་པ་སུ། །དམ་པའི་དོན་ལ་རྣམ་དཔྱོད་མཁས་པ་ཡང་། །སྡུག་ཅེས་
[246b.5]བྱ་བ་འདིས་བློ་རྣམ་པར་གཡེངས། །ས་བདག་ཁྱེད་ནི་གལ་ཏེ་བདག་ཅག་ལ། །སྡུག་པ་འགའ་ཞིག་མཆིས་ན་བདག་ཅག་རྣམས། །མ་སྨད་འཕགས་པས་བསྟེན་ཞིང་མི་ཕྲོགས་པའི། །བདེ་བ་ཡིད་ལ་འདོད་པ་སྒྲུབ་ཏུ་གསོལ། །དེ་ནས་རྒྱལ་པོ་དེ་བརྩེ་བའི་ཡི་མ་རངས་
[246b.6]པར་གྱུར་ཀྱང་། བདེ་བར་གཤེགས་པའི་བསྟན་པ་ལ་མངོན་པར་དད་པས་ཆོས་ལ་བར་ཆད་བྱེད་པའི་འཇིགས་པ་སྐྱེས་པ་དང་། །རང་གི་བུ་མོ་རྣམས་ཀྱིས་སྔོན་གྱི་སྐྱེ་བ་རྗེས་སུ་དྲན་ཏེ་འགྲོ་བར་འདོད་པས་ན་སྐྱེ་བ་དྲན་པས་ཉེས་སོ་སྙམ་དུ་བསམས་ཏེ་ཤིན་ཏུ་ཡུན་རིང་པོར་ཅང་མི་སྨྲ་
[246b.7]བར་གྱུར་ཏོ། །མི་ཡི་སྐྱེས་བུ་དེ་ཡིས་ནི། །འཆི་བ་མེད་པར་ཤེས་པས་ན། །སོང་བས་ཡོངས་སུ་མ་སྤངས་པར། །ཅི་ཞིག་ལྟར་ནི་རྗེས་སྣང་སྨྲས། །དེ་ནས་བུ་མོ་དེ་རྣམས་ཀྱིས་མེ་ཏོག་ཕྲེང་བ་དང་བྱུག་པ་དང་རྒྱན་རྣམས་སྤངས་ནས། དུལ་བ་དང་ལྡན་པར་ཞུགས་པའི་ལུས་ལ་གོས་དཀར་
[247a]
[247a.1]པོ་ཕྲ་ཞིང་རབ་ཏུ་འཕྱང་བ་གྱོན་བས་ཆུ་བོ་རླུང་གི་ཤུགས་ཀྱིས་བསྐྱོད་པའི་དབུ་བའི་ཕྲེང་བ་ལྟ་བུའམ། སྟོན་ཀའི་མཚན་མོ་ཟླ་བའི་འོད་ཀྱིས་གོས་ཀྱིས་བཀབ་པ་ལྟ་བུའམ། དྲང་སྲོང་སྨེ་བདུན་གྱི་སྐར་མ་རང་གི་འོད་ཟེར་གྱི་དྲ་བས་གཡོགས་པ་ལྟ་བུ་དང་། རིམ་གྱིས་
[247a.2]རོ་བསྲེག་པའི་གནས་མེའི་དབུས་སུ་རོ་བཞག་པ་ཅིལ་ཅིལ་ཟེར་བ་རྣམ་པར་བཀྲམ་པ་དང་། རོ་རྣམ་པར་མནམ་པ་དྲི་མི་ཞིམ་ཅིང་འཇིགས་སུ་རུང་བ་དང་། མིའི་ཐོད་པ་བྱ་རྒོད་ཀྱིས་མཆུའི་རྩེ་མོ་རྣོན་པོས་བརྡོལ་བའི་བུ་ག་ནས་གླད་པ་དང་ཆུ་སེར་རྣམ་པར་འཇིགས་པས་མི་རོའི་གདོང་ལ་སྤགས་པས་
[247a.3]མཐའ་མ་ཁྱབ་ཅིང་འཇིགས་པ་དང་། རྙིངས་ཤིང་དེངས་ལ་མདོག་རྣམ་པར་འགྱུར་བའི་རུས་པ་དུམ་བུའི་ཚོགས་ཀྱིས་ནོན་ཅིང་རྩུབ་པས་སའི་ཕྱོགས་རྣམས་བགྲོད་པར་དཀའ་བ་དང་། ལུས་ཅན་དག་ཡོངས་སུ་ཡིད་འབྱུང་བར་བྱེད་པ་གཤིན་རྗེའི་གནས་བཞིན་མྱ་ངན་དང་ཡིད་མི་
[247a.4]བདེ་བ་དང་། སྡུག་བསྔལ་བའི་གནས་སུ་གྱུར་པའི་དུར་ཁྲོད་དུ་ཕྱིན་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། མི་ཡི་ཁྲག་དང་ཞག་གིས་དྲི་མི་ཞིམ་པས་མྱོས་བར་གྱུར་པའི་བྱ་རྒོད་དང་། རྒྱུ་ལྟོ་ནར་བས་ཁྱབ་ཅིང་མི་སྡུག་འཇིགས་པའི་རོ་ཡི་ཡན་ལག་རྣམས་ཀྱིས་ཁེབས། །ཀུན་ད་འདྲ་བར་དཀར་
[247a.5]ཞིང་རྟག་ཏུ་དགོད་པ་འདྲ་བར་མཐའ་གས་ཐོད་པ་དང་། །ནྱ་གྲོ་དྷ་སྙིང་སུལ་ནས་འུག་པ་སྣ་ཚོགས་ཧཱུཾ་སྒྲོགས་འཇིགས་པའི་དུར་ཁྲོད་ཕྱིན། །ཅེ་སྤྱང་ཁ་ནི་མེར་བཅས་བརླང་བའི་སྒྲ་དག་སྒྲོགས་པས་འཇིགས་པ་དང་། །ལ་ལར་ཐོད་པ་དཀར་པོའི་དྲ་བས་ཁྱབ་ཅིང་བགྲོད་དཀའ་དང་། །
[247a.6]སྲིན་བུ་རིགས་ཀྱི་ཚིགས་ཀྱིས་གཟེངས་ཤིང་རྣ་ཁུང་བསྐྱོད་པ་དང་། །བུང་བ་སྦྲང་བུ་བརྒྱ་ཕྲག་མང་པོ་རོལ་འཕུངས་ཤིང་འདུ། །རུས་པ་དཀར་དང་དམར་རློན་རླུང་གིས་བསྐྱོད་པར་གྱུར་བ་དང་། །རོ་བསྲེགས་མེ་གསལ་འཕྲོ་དང་ཤིང་སྐམ་རྩ་ན་སྦྲུལ་ཉལ་དང་། །ལ་ལར་མི་ཡི་
[247a.7]ལུས་ནི་མདུང་རྣོས་ཕུག་ནས་བསྐྱོན་པ་དག །གཤིན་རྗེ་རྟག་ཏུ་དགའ་སྟོན་བྱེད་ལ་འཇུག་པའི་ཚང་བང་འདྲ། །ལ་ལར་མི་མགོའི་ཐོད་པའི་གསེབ་ནས་ཁྲག་དང་ཆུ་སེར་འཛགས་པ་ཡི། །ཁུ་བ་མི་སྡུག་དག་ལ་སྲེད་པའི་ཤ་ཟའི་ཚོགས་ཀྱིས་ཁྱབ། །ལ་ལར་ཅིལ་ཅིལ་ཟེར་བའི་རོ་
[247b]
[247b.1]བསྲེག་མེ་ཡིས་བསྐོར་བ་དང་། །མི་རོའི་ཁོང་ནས་རྒྱུ་ལོང་ཕྱུང་བ་གཏོར་བས་ཁྱབ་པར་གྱུར། །སྐྱོ་བས་བརླན་པའི་སེམས་ཀྱིས་ནི། །དེར་ནི་བུད་མེད་དེར་བརྟགས་ནས། །འཚོ་བའི་འཇིག་རྟེན་རྒྱུ་མི་རྒྱུའི། །ངོ་བོ་ཉིད་ནི་སེམས་པར་གྱུར། །སྐྲ་ཡི་སྙིང་ནི་རྡུལ་གྱིས་རྩུབ་ཅིང་དམར། །
[247b.2]མིག་སྦུབས་བྱ་ཡི་མཆུ་དང་སྡེར་མོས་བྲུས། །གསང་གནས་འགྱུར་ཞིང་མི་སྡུག་རྣག་བཅས་པར། །བོར་བའི་བུད་མེད་ལུས་དེར་རབ་ཏུ་བལྟས། །དམ་པའི་སྤྱོད་པ་ཐང་ཅིག་གཉེར་གཡོས་ཤིང་། །ཨུཏྤལ་འདབ་ལྟར་དཀྱུས་རིང་མིག་གིས་ནི། །རོ་ཡི་གཟེབ་དེ་མངོན་པར་
[247b.3]བལྟས་ནས་ཀྱང་། །ཚིག་མང་རྣམ་པ་དུ་མ་སྨྲས་པར་གྱུར། །འདི་ཉིད་རྡོ་ཐལ་བྱུགས་པས་དགའ་བའི་གནས་ཁང་ནི། །ཟླ་ཟེར་གསལ་བས་སྤྲས་པར་བྱས་པ་རུ། །སྡུག་པའི་ཕོང་པར་བརྟེན་ཞིང་གནས་པ་ལས། །དེ་ནི་ས་ཡི་དཀྱིལ་འཁོར་གཞི་ལ་ཉལ། །སྡུག་པའི་ལག་པའི་
[247b.4]གཟེབ་ཏུ་ཉལ་བ་ན། །འབྲུག་སྒྲ་སྒྲོགས་པ་ཡིས་ནི་ཁྱོད་སྐྲག་ན། །མེར་བཅས་ལྟས་ངན་ཅེ་སྦྱང་སྒྲ་ཡིས་ནི། །དཀའ་ཐུབ་མ་ཁྱོད་ཅི་ཕྱིར་འདིར་མི་འཇིགས། །འདི་ཉིད་རང་གི་ཁྱིམ་འཁོར་ཟླ་ཟེར་དེ། །རོ་སྨད་ལྕི་བའི་ཁུར་གྱིས་དལ་འགྲོ་ལ། །རོལ་ཅིང་དགོད་ལ་སྒེག་པར་རྣམ་
[247b.5]ལྟ་བ། །བརྩེ་མེད་བྱ་རྣམས་ད་ལྟར་ཟ་བར་བྱེད། །འགྲོ་བ་འདི་དག་ངན་ཅིང་མི་བརྟན་ཏེ། །སྙིང་རྗེ་མེད་པའི་སྡུག་དེས་ཅི་ཡི་ཕྱིར། །མི་རོ་བརྒྱ་ཡིས་ཁྱབ་པར་གྱུར་པ་ཡི། །དུར་ཁྲོད་འདི་རུ་ཁྱོད་ནི་བོར་བར་འགྱུར། །རང་མི་རྩ་ལག་མཛའ་བཤེས་སྡུག་པ་དང་། །པདྨར་བུང་བ་བཞིན་དུ་
[247b.6]གནས་པ་ལས། །ཅི་ཕྱིར་མཚན་མོས་རྒྱུ་བས་འཇིགས་ཀྱང་ནི། །ཉོན་མོངས་དེང་འདིར་དུར་ཁྲོད་དག་ཏུ་དགའ། །སྔོན་ནི་མཛེས་ཤིང་སྣུམ་ལ་དཀྱུས་རིང་འཇམ་པའི་མིག་གིས་ལྟ་བ་ན། །ཆགས་ཅན་རྣམས་ཀྱིས་མིག་འབྲས་མཐའ་དམར་འགྱུར་ཞིང་མི་རྣམས་ཉམས་བྱེད་པ། །
[247b.7]འདོད་ལྷའི་རི་དྭགས་རྒྱར་གྱུར་བུད་མེད་དེ་ཉིད་དེང་ནི་བྱ་རྣམས་ཀྱིས། །མིག་ཕྱུང་སྡུག་བསྔལ་བྱས་པས་ཆགས་དང་བཅས་རྣམས་ཤིན་ཏུ་འཇིགས་པར་བྱེད། །མི་གཙང་སྣ་ཚོགས་ཁོང་ན་མི་མངོན་སྲོག་ཤིང་གི །ལུས་ལ་བདག་གིར་ཆགས་པས་ལོང་བའི་མིག་བསླུས་ཞེས། །བུད་མེད་
[248a]
[248a.1]མཆོག་འདི་འདོད་ཆགས་ལྡན་པ་རྣམས་ལ་ནི། །བརྐམ་པའི་བྱ་ཡིས་མཆུས་བཏོག་གདོང་གིས་ཉེ་བར་དགོད། །པི་ཝང་གླིང་བུའི་སྒྲ་སྙན་རྣམས་དང་སྙན་པའི་གླུ་གར་དང་བཅས་པས། །མཆོག་ཏུ་སྡུག་པའི་པང་ན་བག་ཕབ་བདེ་བར་གཉིད་ལོག་པའི། །བུད་མེད་དེ་ནི་ཅེ་སྤྱང་སྐད་འབྱིན་མུ་ཅོར་སྒྲ་བཅས་
[248a.2]ཤིང་། །ས་རྡུལ་གྱིས་ཁྱབ་རྩུབ་པའི་དུར་ཁྲོད་འདིར་དེང་ཉལ་བར་གྱུར། །གང་དུ་རྣམ་པར་བརྟགས་ཀྱང་སྐྲ་ཡི་རྩེ་མོ་ཙམ་གྱིས་ནི། །གཙང་བ་མི་གཙང་ཚོགས་ཀྱིས་ཚང་ཚིར་འདིར་མི་སྣད། །ཕུང་ཁྲོལ་ཆོས་ཅན་ནད་མང་འདོད་པ་ཐང་ཆད་ལ། །རང་བཞིན་ངན་རྣམས་ཅི་ཕྱིར་དེ་ནི་ཆགས་པར་གྱུར། །
[248a.3]བུ་མོ་འགྲོ་བ་ཀུན་གྱི་ཚུལ་ཡང་འདི་འདྲ་བས། །རྨི་ལམ་མིག་འཕྲུལ་ཆུ་ཟླ་ལྟ་བུར་རང་བཞིན་གྱིས། །གཡོ་བ་རྟོགས་པ་ཇི་སྲིད་སྲོག་ནི་ལྷག་མ་དང་། །བཅས་ཤིང་ལུས་གཞོན་གྱུར་ཚེ་ཆགས་དང་ཉེར་བྲལ་བྱོས། །གཤིན་རྗེའི་ཆུ་སྲིན་དགའ་བའི་ཁར་ནི་ཆུད་གྱུར་ཅིང་། །སྐྲ་དཀར་ཚོགས་ཀྱིས་སྤྱི་
[248a.4]ནས་བཟུང་ནས་ནི། །སྲོག་མཐར་གྱུར་པའི་གནོད་པའི་ཚེར་མའི་གནད་ཕུག་ལ། །མཆི་མས་མིག་ཁེབས་གྱུར་ཚེ་དགེ་བ་ཇི་ལྟར་བྱ། །འཇིག་རྟེན་ཕ་རོལ་མི་བཟད་མུན་ནག་གཡང་ཆེན་དུ། །ལྟུང་ཞིང་ལུས་བྱེར་གྱུར་ཚེ་དགེ་བ་འདོད་གྱུར་པ། །དུག་ཅན་སྦྲུལ་ཁ་དོག་པའི་ནང་དུ་ཆུད་
[248a.5]གྱུར་པའི། །སྦལ་པ་ང་རོ་འདོན་དང་མཚུངས་ཞེས་མཁས་རྣམས་སྨྲ། །ཅི་ཕྱིར་ཚིག་རྩུབ་ཕྲ་མ་མ་འབྲེལ་སྤྱི་རྟོལ་སྨྲ་བ་དང་། །སྙན་ཚིག་བཅོས་མས་འཇིག་རྟེན་བསླུས་པར་གྱུར་ནས་དི་རིང་ནི། །མི་སྨྲ་གནས་ཞེས་སྤྱོད་པ་ལྟ་བུས་མདུན་སོའི་ཕྲག་ནས་ནི། །བྱ་རྣམས་ཚམ་ཚོམ་མེད་
[248a.6]པར་མཆུ་ཡི་སྐམ་པས་ལྕེ་ཡང་འབྱིན་པར་འགྱུར། །ཆགས་པས་མདོངས་ཤིང་ལོག་པའི་ཡུལ་གོམས་ཡོན་པའི་བསམ་པ་ཅན། །བྱིས་པ་གང་གིས་མིག་གི་ཡུལ་མཐོང་བསྟན་པ་རྣམ་འཇིག་པའི། །མཛེས་པའི་རོ་སྨད་དེ་ནི་དེ་རིང་འཇིགས་དང་བྲལ་བ་ཡི། །མི་བཟད་བྱ་རྒོད་མཆུ་དང་
[248a.7]སྡེར་མོར་འཇོག་ཅིང་ཚུལ་དུ་འདྲི། །གང་དག་རང་གི་ཁང་པ་ས་གཞི་མེ་ཏོག་སེལ་མས་གཏོར་བ་ཡི། །རྩིག་པའི་རི་མོ་ཡོངས་འགྱུར་བཞིན་དང་ཟུར་གྱིས་ལྟ་བྱེད་ཅིང་། །སྡུག་པའི་ལག་པའི་པདྨར་བརྟེན་ཞིང་དལ་གྱིས་འགྲོ་བ་ཡི། །བུད་མེད་དེ་ཡི་རྐང་པ་དེ་ནི་ཝ་དག་ཟ་བར་འགྱུར། །
[248b]
[248b.1]འདི་ལྟར་ལྷན་ཅིག་སྐྱེས་པའི་མི་སྡུག་མི་གཙང་འདམ་རྫབ་དང་། །དྲེགས་པས་མྱོས་ཤིང་སེམས་ལྷུང་གྱུར་པས་སྡུག་བསྔལ་ཉོན་མོངས་པའི། །ལུས་ལ་ཁྱེད་ཀྱིས་འདི་ནི་རང་བཞིན་མ་ཞིར་བལྟས་ནས་ནི། །འཚོ་བའི་འཇིག་རྟེན་གློག་ལྟར་རབ་ཏུ་འཇིག་ལའང་ཡིད་བྱུང་གིས། །
[248b.2]ཡང་དག་ཇི་བཞིན་ཐུགས་ཆུད་ཆོས་ཀྱི་རྒྱལ་པོས་སེམས་ཅན་རྣམས། །ཉོན་མོངས་རྨ་ནང་རྒྱུན་མི་འཆད་པར་འཛག་པས་གདུང་བ་ལ། །རང་བཞིན་བསིལ་བའི་ཆོས་གསུང་ཆུ་ཡི་བུམ་པས་ཚིམ་མཛད་པ། །སྨན་པའི་མཆོག་གྱུར་སྟོན་པ་དེ་ལ་རྟག་ཏུ་ཕྱག་འཚལ་ལོ། །ཤེས་
[248b.3]པར་དཀའ་ཞིང་གཡོན་ཅན་མ་ཞི་ལས་དང་ཉོན་མོངས་ལྡན། །རྣམ་པར་འགྱུར་ལ་མ་ཞི་སྐྱེ་བར་བཤད་པ་གང་ཡིན་པས། །རྨོངས་པ་ཤིང་རྟའི་འཕང་ལོ་བཞིན་དུ་དབང་མེད་འཁོར། །འཇིག་རྟེན་མི་བཟད་ཕོངས་པའི་རྡོ་རྗེས་ལུས་ནི་ངེས་འཇོམས་འགྱུར། །གཞོན་ནུའི་ཚེ་ནམ་ཡིས་
[248b.4]ལན་བུར་ལྡན་བའི་སྐྲ་བྱས་ཤིང་། །གང་ལ་ལང་ཚོ་མཛེས་པའི་ནོར་བུའི་ཕྲེང་བ་མཆོག་བཅིངས་དང་། །བྲམ་ཟེས་མེ་ཏོག་བཅས་པའི་ཞི་བའི་ཆུ་ཐིགས་ཀྱིས་གཏོར་བའི། །བུད་མེད་མགོ་ལ་མི་བཟད་ཁྭ་རྣམས་ཐོགས་པས་ཉོན་མོངས་སོ། །གང་ཞིག་བག་མའི་དུས་སུ་མེ་ཏོག་
[248b.5]བཟང་བསྒོས་ཤིང་། །མ་ཡི་ལག་པས་དགེ་མཚན་བཀྲ་ཤིས་བྱས་གྱུར་པའི། །སྐྲ་དེ་དི་རིང་རབ་དྲག་རླུང་གིས་བསྐྱོད་ནས་ནི། །དུར་ཁྲོད་དག་གི་ཤིང་ལ་རྔ་ཡབ་ཉིད་དུ་གྱུར། །རང་བཞིན་སྒྲིན་བར་ལྟ་དང་ཟུར་གྱིས་ལྟ་གང་སོང་། །སྒེག་པའི་གོམས་སྟབས་དང་ནི་དྲེགས་མྱོས་གང་དུ་
[248b.6]སོང་། །དགའ་བས་སྟེག་ཅིང་གླུ་དང་དགོད་པ་གང་དུ་སོང་། །ཨེ་མ་སྒྱུ་མའི་གསང་བའི་རབ་བཀོད་ངོ་མཚར་ཆེ། དགོད་ཅིང་དལ་གྱིས་རྣམ་གཡོའི་རྣ་རྒྱན་འོད་ཀྱིས་མཁུར་བ་དམར་པོ་དང་། །གང་དུ་སྲོག་དང་མཉམ་པའི་མཛེས་པའི་རི་མོ་འབད་དེ་བྲིས་པ་དང་། །པདྨ་གཞོན་ནུའི་སྙིང་པོ་
[248b.7]ལྟ་བུ་འཇམ་པའི་མཁུར་ཚོས་གང་ཡིན་དེར། །བྱ་རྣམས་དཔྲལ་བར་གནས་ཤིང་ཁྲག་གིས་སྤགས་པའི་མཆུ་ཡིས་འཚོག་པར་བྱེད། །འོད་ཅན་མུ་ཏིག་ཕྲེང་བའི་ལྦུ་བ་དཀར་ཞིང་བ་སྤུའི་ཆུ་བལ་ཅན། །ནུ་མ་རྒྱས་པའི་ངུར་པ་ཟུང་ལྡན་བྲང་གི་རྫིང་མཆོག་ཡངས་པ་དག །གཡོ་བའི་
[249a]
[249a.1]གོས་ལྷུང་བྱས་པས་ཕོངས་པའི་མིག་ནི་གང་དུ་ཆགས་གྱུར་པ། །དེར་ནི་རྣམ་པར་རྣགས་པས་སྦྲང་བུའི་ཚོགས་རྣམས་འཕུངས་པར་གྱུར། །སྔོན་ནི་ཙན་དན་ཆུ་ཐིགས་ཕྲེང་གཏོང་ཏ་ལའི་ལོ་མ་རླུང་ཡབ་དང་། །མངག་གཞུག་རྣམས་དང་བཟང་མོའི་གདུ་བུའི་སྒྲར་ལྡན་པ་
[249a.2]དག་གཡོག་བྱེད་ཅིང་། །ཁང་བཟངས་ཟླ་ཟེར་གྱིས་སྤྲས་དཀར་བས་མཛེས་པའི་སྔས་ནི་རྟེན་གྱུར་པ། །དེ་ནི་དེང་འདིར་ཁྭ་ཡི་སྒྲོ་གཤོག་རྩུབ་བས་བསྐྱོད་པའི་རླུང་གིས་གཡོ་བ་པར་གྱུར། །གང་གིས་སྔོན་ནི་འདི་བསྐྱོད་ཅིང་། །གསེབ་ནང་དག་ཏུ་གནས་བཅས་ནས། །ལུས་ཀྱི་ཤིང་ནི་སྤངས་
[249a.3]ནས་ནི། །སེམས་ཀྱི་སྤྲེའུ་དེ་གང་དུ་སོང་། །གང་གིས་བྱེད་པ་མེད་འདི་ཡང་། །བྱེད་པ་ལྟ་བུར་སྟོན་བྱེད་པ། །བདག་མེད་རོ་འདི་སྤངས་ནས་སུ། །སེམས་ཀྱི་བཞད་གད་མཁན་གང་སོང་། །གང་ཞིག་རྨོངས་ལས་བློ་མདོངས་པས། །ནང་ན་བདག་ཏུ་འདོགས་གྱུར་ཅིང་། །མུ་སྟེགས་
[249a.4]ཅན་རྣམས་རྨོངས་བྱེད་པའི། །རྣམ་ཤེས་སྲིན་པོ་དེ་གང་སོང་། །གང་གིས་ཡུན་རིང་རྣམ་རྨོངས་ཀྱང་། །ཡང་དག་པར་ནི་མི་གནས་པས། །སྣ་ཚོགས་སེམས་ཀྱི་སྒྱུ་མ་མཁན། །འགྲོ་བ་འདི་ལས་གང་དུ་སོང་། །བདག་གི་འགྲོ་བ་སེར་སྐྱ་སོགས། །དཀའ་ཐུབ་པས་ཀྱང་མི་ཤེས་པས། །
[249a.5]ནམ་མཁའི་ཡུལ་གྱི་སྤྱོད་ཡུལ་ཅན། །སེམས་ཀྱི་རིག་འཛིན་དེ་གང་སོང་། །གཡོ་དང་མི་གཡོའི་སྒོ་དགུ་པོ། །མི་གཙང་འདི་ནི་སྤྱོད་སྤྱོད་པ། །དེ་ནས་ལུས་ཀྱི་གཟེབ་འདི་ལས། །སེམས་ཀྱི་བྱ་དེ་གང་དུ་སོང་། །མི་བཟད་སུལ་ལས་སྡུག་བསྔལ་འབབ་པའི་ལན་ཚྭ་ཆེན་པོས་རབ་ཏུ་
[249a.6]ཁེངས་གྱུར་པའི། །སྲིད་པའི་རྒྱ་མཚོ་ཉོན་མོངས་སྦྲུལ་དང་ཉར་འགྲེ་གང་ཡིན་དེར་ཆུད་ཅིང་། །མི་ཤེས་ཆུ་སྲིན་འཁྲུགས་པའི་ཆུ་རླབས་གཡོ་བའི་ཆུ་བོར་ནུབ་གྱུར་པ། །སེམས་ཀྱི་མཚན་མོ་སྤྱོད་པ་ལུས་འདི་སྤངས་ནས་དི་རིང་གང་དུ་སོང་། །ཉེས་བྲལ་བཅོམ་ལྡན་དེ་ནི་གདུལ་
[249a.7]པའི་ཐབས་རྣམས་གང་དག་ཡིན་མཁྱེན་གྱི། །མ་དུལ་གང་གིས་མཐར་ནི་དམྱལ་བར་མེ་འབར་འཕྲོ་བར་གྱུར་པ་ཡི། །གསེར་ལྟར་སེར་བའི་གསེབ་ཏུ་དབང་མེད་པར་ནི་འདོར་བྱེད་པ། །རང་བཞིན་གཡོ་བར་བྱེད་པའི་སེམས་ཀྱི་རྟ་དེ་དི་རིང་གང་དུ་སོང་། །དེ་ནས་རྡོ་རྗེའི་འོད་ཀྱིས་
[249b]
[249b.1]འཁྲིག་མ་རྒྱས་ལྗང་བ། །བརྒྱ་བྱིན་དགའ་བས་མིག་གདངས་དུལ་བཅས་ཉེར་སོང་སྟེ། །བུ་མོ་རྣམས་ལ་རང་བཞིན་སྐལ་བཟང་ཚིག་གིས་ནི། །རྗེས་སུ་མཐུན་ཞིང་དགེ་བས་ལེགས་སོ་ལེགས་ཞེས་སྨྲས། །སྲིང་མོ་ན་ཚོད་གཞོན་ཞིང་འདོད་ལྷའི་གནས་གྱུར་དང་། །རྒྱལ་རིགས་
[249b.2]འབྱོར་པའི་དཔལ་གྱི་བདེ་བ་སྤངས་ནས་ནི། །སྔོན་གྱི་དྲང་སྲོང་རྣམས་ཀྱི་བཀའ་ལ་ཞུགས་གྱུར་པ། །དཀའ་ཐུབ་འདིས་བདག་ཡོངས་དགའ་ཁྱེད་རྣམས་ཅི་འདོད་སྨྲོས། །འདོད་པའི་དབང་ཕྱུག་ལག་མཐིལ་གནས་བཞིན་ཤེས་པར་གྱིས། །སུམ་ཅུ་རྩ་གསུམ་བདག་པོའི་བདེ་བའང་དེས་
[249b.3]རྟོགས་ལ། །ལྷ་རྒྱལ་བརྒྱ་བྱིན་བདག་ཡིན་ཁྱེད་ཉིད་གང་འདོད་དང་། །སྲིང་མོ་བདག་གིས་ངེས་པར་གང་བྱ་མྱུར་དུ་སྨྲོས། །དེ་ནས་གཞོན་ནུ་དེ་རྣམས་ཡུལ་གྱི་བདེ་ལ་འདོད་མེད་ཅིང་། །རང་བཞིན་གཡོ་མེད་སེམས་ཀྱིས་བརྒྱ་བྱིན་ཟུར་མིག་གིས་བལྟས་ནས། །རང་གི་དགེ་བ་ཡོངས་
[249b.4]སྨིན་བརྟན་པའི་རང་བཞིན་གྱིས། །ཁ་ན་མ་ཐོ་མེད་གསལ་སྣ་ཚོགས་དོན་ལྡན་ཚིག་འདི་སྨྲས། །བརྒྱ་བྱིན་བདག་ཅག་སྐྱེ་བའི་སྡུག་བསྔལ་གྱིས་ནི་གདུངས་གྱུར་པའི། །སྲིད་པའི་བདེ་བའི་ཟིལ་པའི་ཁ་ཆུ་འཛག་པའི་རྒྱུ་འདྲའི་ཕྱིར། །བཞིན་རས་མཛེས་པ་མྱ་ངན་མཆི་མས་བྲིས་ཤིང་
[249b.5]རྙོགས་པ་ཡི། །གཉེན་རྣམས་སྤངས་ནས་དཀའ་ཐུབ་འདི་ལ་རྗེས་སུ་ཞུགས་པ་མིན། །གཞན་ཡང་འགྲོ་བ་མ་ལུས་ཚུལ་ངན་གྱིས་བཅིངས་མི་བཟད་པ། །ཕོངས་པ་བརྒྱ་ཕྲག་སྟོང་གིས་བཅོམ་པས་ངེས་པར་སྐྱོ་གྱུར་ཅིང་། །བཀྲེན་པས་ཉམ་ཐག་མཐོང་བས་ཉེས་ཟད་རྣམས་ཀྱིས་རྗེས་
[249b.6]འབྲངས་ཏེ། །རྒ་མེད་མྱ་ངན་མེད་པའི་གོ་འཕང་ཐོབ་ཕྱིར་བརྩོན་པ་ཡིན། །གལ་ཏེ་འགྲོ་ལ་རྗེས་བརྩེ་ལྷག་བསམ་ངང་ཚུལ་ལྡན་གྱུར་ཅིང་། །ཅི་སྟེ་བརྒྱ་བྱིན་ཁྱོད་ཀྱིས་མཆོག་ནི་ཡང་དག་སྟེར་ནུས་ན། །འཆི་མེད་མི་ཕྲོགས་ཚངས་བཞི་ཚངས་པའི་གོ་འཕང་རྣམ་གྲོལ་ཏེ། །སྲིད་པའི་
[249b.7]འཇིགས་པས་ཡོངས་གདུངས་བདག་ཅག་རྣམས་ཀྱིས་ཐོབ་པར་མཛོད། །ལུས་ལས་བྱུང་ཞིང་འཛག་པའི་དྲི་མ་སྐྱོན་གྱིས་བསྒོས་པར་གནས་པ་དང་། །མ་ཡི་མངལ་དུ་མི་གཙང་འདམ་གྱི་ཚོགས་ན་ཡང་མ་སྤངས་སྤྱོད། །བྱུང་ན་རུས་པའི་འཁྲུལ་འཁོར་གྱིས་ནི་མ་གོ་བཙིར་བརྒྱལ་
[250a]
[250a.1]ཞིང་ཉམ་ཐག་པས། །ཉོན་མོངས་སྡུག་བསྔལ་གཅིག་ནས་གཅིག་ཏུ་བརྒྱུད་པའི་སྐྱེ་བ་གཅད་པར་མཛོད། །རྒ་བའི་སྲིན་མོས་སྐྲ་དཀར་མཆེ་བ་དཀར་པོ་མྱུ་གུ་ལྡན་པ་ཡི། །ཁ་གདངས་ནས་ནི་འགྲོ་ལ་གཞུང་ལུགས་མེད་པར་སྤྱི་ནས་འཛིན་བྱེད་ཅིང་། །གང་འདི་མི་ཡི་
[250a.2]བརྩོན་དྲན་བློ་གྲོས་དགའ་བའི་དཔལ་ནི་རབ་འཇོམས་པ། །ལྷ་ཡི་དབང་པོ་ཁྱོད་ཀྱིས་གལ་ཏེ་ནུས་ན་དེ་ལས་བསྐྱབ་པར་མཛོད། །དབུགས་རྒོད་གཡོ་ཞིང་ལྟོ་བ་སྲ་ལ་པགས་པ་སྐྱ་ཞིང་རྩུབ་པ་དང་། །ལོངས་སྤྱོད་འབར་བ་སྣ་ཚོགས་ཐོབ་ཀྱང་སྤྱོད་པར་མི་ནུས་སྟོབས་མེད་པ། །གང་གིས་
[250a.3]ལུས་ཟིན་འཆི་བདག་ཕོ་ཉའི་སྐྱེས་བུ་ནད་ཚོགས་རབ་འཇིགས་པ། །ལྷ་དབང་ཁྱོད་ནི་ཅི་སྟེ་མཆོག་སྦྱིན་འདོད་ན་དེ་ལས་བདག་ཅག་སྐྱོབས། །མིག་ནི་ཕྱིར་ཕྱོགས་གྱུར་ཅིང་མི་གཡོ་གནད་རྣམས་གཅོད་པས་སྡུག་བསྔལ་བ། །ཉོན་མོངས་འཁྲུགས་པས་རབ་ཏུ་ལུས་བཅོམ་འཇིགས་
[250a.4]པས་ཕུང་པོ་འགྱེལ་བ་དང་། །གཉེན་རྣམས་མཐོང་བས་མཆི་མས་མཁུར་བ་དག་དང་མཆུ་ནི་བཀྲུས་གྱུར་པ། །གང་གིས་ཟིན་ན་རབ་ཏུ་འཇིགས་འགྱུར་འཆི་བ་དེ་ལས་བདག་ཅག་སྲུངས། །གང་གིས་ཡིད་ཁྱབ་གྱུར་ན་ཕྱུགས་བཞིན་འགྱུར་ཞིང་མྱ་ངན་གྱིས་ཟིན་ལ། །བྱ་དང་མི་བྱའི་རྣམ་
[250a.5]པ་བློ་ལ་མི་སེམས་སྨད་པའི་གནས་བསྐྱེད་པ། །ཐ་མལ་བསིལ་བའི་འཐོར་བའི་རླུང་གིས་གཡབ་ཀྱང་ལུས་ཚིམ་མི་འགྱུར་བའི། །འདོད་ཆགས་མེ་ཆེན་དེ་ནི་མཆོག་སྦྱིན་ཁྱོད་ཀྱིས་ངེས་པར་ཞི་བར་མཛོད། །གང་གི་ཤུགས་ཀྱིས་མིག་འགྱུར་གཡོ་ཞིང་སོ་ཡིས་སྒྲོས་གནོན་ལ། །སྐད་
[250a.6]ཅིག་གིས་ཀྱང་མི་བཟད་དམྱལ་བའི་འབྲས་བུ་སྟེར་བྱེད་སྡིག་ཅན་ནི། །དེངས་པའི་ལོ་མ་དང་ནི་ཆུ་དག་ཟ་བའི་ཐུབ་རྣམས་ཀྱིས་ཀྱང་མ་བཏོན་པའི། །ཡིད་ཀྱི་སུལ་གནས་ཁྲོ་བའི་སྦྲུལ་དེ་བརྒྱ་བྱིན་ཁྱོད་ཀྱིས་བསལ་བར་མཛོད། །གང་གིས་མིག་ཁེབས་གྱུར་ན་བློ་གྲོས་ངན་རྣམས་ཞི་བའི་ལམ་
[250a.7]སྤོང་ཞིང་། །ལོག་ལྟའི་དུག་གིས་ཉེ་བར་སྦགས་པའི་ཡིད་ཀྱིས་ལམ་གཞན་དག་ལ་བསྟེན། །གང་ཞིག་རབ་རིབ་བསལ་བས་ཟག་པ་ཀུན་གྱི་རྒྱུར་ནི་རབ་གསུངས་པ། །ལོག་ཡིད་ཁྱིམ་ན་སྤྱོད་པ་རྨོངས་པའི་མུན་ནག་བརྒྱ་བྱིན་ཁྱོད་ཀྱིས་སོལ། །བརྒྱ་བྱིན་མཆོག་ནི་དེ་དག་རྣམས། །
[250b]
[250b.1]ཁྱོད་ལ་བདག་ཅག་རྣམས་སློང་གིས། །དམ་བཅས་དོན་ལས་འགལ་བ་ནི། །མཁས་པས་འདོད་པར་མི་བྱེད་དོ། །དེ་ནས་བརྒྱ་བྱིན་གྱིས་དེ་རྣམས་འདོད་པའི་ཡུལ་དག་སློང་བར་མི་བྱེད་ཅིང་ལྟོས་པ་མེད་ལ་གསལ་ཞིང་མཛེས་པའི་ཚིག་གིས་རྣམ་པར་འཁྲུལ་པས་ངོ་མཚར་
[250b.2]དུ་གྱུར་ཅིང་ཡང་དག་པར་དད་པས་ལུས་ཀྱི་སྤུ་ཟིང་ཞེས་བྱེད་དེ། སྨྲས་པ། མི་འབྱོར་དངོས་པོ་སློང་བར་གྱུར་པ་ནི། །འཇིག་རྟེན་དག་ན་བྲ་ཞིང་ཞུམ་གྱུར་པས། །གང་འདི་བདག་གིས་སྦྱིན་བར་ནུས་པ་ཡི། །མཆོག་རྣམས་སྦྱིན་གྱི་བུ་མོ་ཁྱེད་ཀྱིས་སྨྲོས། །དེ་ནས་བུ་མོ་དེ་
[250b.3]རྣམས་ཀྱིས་དེའི་ནང་ན་མི་མངོན་བའི་རྒྱུས་རྣམ་པར་སྨྲས་པའི་ཚིག་དེས་ཡང་དག་པར་སྐྱོ་བས་ཉེ་བར་བསྐྱེད་པའི་ཁྲོ་བས་བརྒྱ་བྱིན་ལ་སྨྲས་པ། ཅི་ཕྱིར་ཉེ་བར་འདྲིད་པའི་ཐབས་དང་ནི། །བརྒྱ་བྱིན་མཛེམ་མེད་དེ་དག་གང་དུ་ལྷགས། །བདེ་བ་ཙམ་དང་མི་མཁས་བློ་ཅན་ནམ། །མི་
[250b.4]བསྲུན་པ་ཡི་བགྲོད་བྱ་བདག་ཅག་མིན། །འདིར་ནི་ཕྱོགས་རྣམས་རྒྱ་ཆེར་གྲགས་པའི་ཚོགས་ལྡན་པའི། །རྒྱལ་པོའི་རིགས་སུ་གྱུར་པར་ཁྱོད་ཀྱིས་མི་ཤེས་སམ། །གང་གིས་ནོར་གྱི་སྙིང་པོ་ངེས་པར་བལྟས་ནས་ནི། །ནོར་བདག་མིང་ཡང་ཇི་བཞིན་དོན་དང་ལྡན་པ་ཡི། །རྒ་བས་
[250b.5]གཟིར་ཞིང་འཆི་བའི་སྡུག་བསྔལ་གྱིས། །དུབ་ཅིང་ཡིད་འབྱུང་ཞུམ་པའི་འཇིགས་སྤང་ཕྱིར། །ལྷ་ཡི་མགོན་པོ་གནས་སྐབས་འདིར་ཞུགས་ཀྱི། །དྲེགས་པས་མ་ཡིན་བྱིས་མིན་མི་བརྟན་མིན། །བསོད་ནམས་བྱེད་པ་རྣམས་ལ་འཚེ་བའི་ཕྱིར། །གང་ཕྱིར་ཁྱེད་ཀོ་བདག་ཅག་
[250b.6]སྡུག་བསྔལ་བྱེད། །གཉེན་དང་མཛའ་བཤེས་འཁོར་གྱི་སྦྱོར་བ་ཡི། །དགའ་བས་བརྒྱ་བྱིན་ཡུན་རིང་འཚོ་བར་གྱིས། །རང་བྱས་མགོ་སྐལ་ལྡན་པའི་འབར་བ་ཡི། །གང་ཕྱིར་ལྷ་ཡི་བདག་པོར་ཁྱོད་གྱུར་དེས། །གཞན་གཙེས་རྒྱུ་ཡིས་ལྷ་ཡི་རྒྱལ་པོ་ཡི། །དམ་པའི་ཕུན་སུམ་
[250b.7]ཚོགས་ཐོབ་མི་འགྱུར་རོ། །དེ་ནས་དབང་པོ་ཆེན་པོ་དེས་དེའི་ཚིག་གསལ་ཞིང་ཚིག་གི་དོན་སྣ་ཚོགས་སྟོན་པའི་ཚིག་རྣམས་ཀྱིས་ལུས་ཚིམ་ཞིང་། མཆོག་ཏུ་ངོ་མཚར་དུ་གྱུར་ལ་དད་པས་བཞིན་རབ་ཏུ་དང་ཞིང་མཛེས་པ་དང་། གཞན་ཡང་དེ་རྣམས་ཀྱིས་བསམ་པ་
[251a]
[251a.1]སད་པའི་ཕྱིར་ཤིན་ཏུ་བསྟི་སྟང་དང་བཅས་པའི་ཚིག་གིས་སྨྲས་པ། ཀྱེ་མ་མ་དང་འདྲ་བའི་སྲིང་མོ་དག །འཇིག་རྟེན་དཀའ་ཐུབ་ཅན་དག་ཀྱང་། །མགོན་དུ་བདག་ནི་ལྟ་འདོད་ན། །ཅི་ཕྱིར་འདི་ལྟར་མཆོག་སྟེར་བ། །ང་ལ་ཁྱེད་རྣམས་
[251a.2]བརྩེ་མེད་འགྱུར། །དེ་ནས་བུ་མོ་དེ་རྣམས་ལྷག་པར་ཡང་འཁྲུགས་ཤིང་ཁྲོ་བ་དང་བཅས་པས་བརྒྱ་བྱིན་ལ་སྨྲས་པ། བདེ་སོགས་ཀྱིས་ནི་བཞིན་རས་ལ། །ཆགས་ཤིང་འཛུམ་དང་ཟུར་མིག་གིས། །རྣམ་ལྟའི་གནས་ནི་གཞན་ཡིན་ཞིང་། །སྦྱིན་བྱའི་
[251a.3]མཆོག་ཀྱང་གཞན་ཡིན་ནོ། །གལ་ཏེ་བརྒྱ་བྱིན་ཁྱོད་ཀྱིས་ནི། །མཆོག་རབ་སྟེར་བར་ནུས་ན་ནི། །ཡུལ་རྣམས་ཀྱི་ནི་ཤ་ཟ་ནི། །མི་སྲུན་དེ་ལས་རྒྱལ་བར་གྱིས། །ཡང་ན་འདོད་པ་སྤང་དཀའ་ཞིང་། །ལོག་པའི་རྟོག་པས་ཆགས་གྱུར་ན། །རྒྱུན་དེ་ཉིད་ལ་རྟག་ཏུ་
[251a.4]གནོས། །གལ་ཏེ་ནུས་ཡོད་འདི་འདྲར་གྱིས། །མིག་སྟོང་ལྡན་ཁྱོད་མི་བརྟན་པའི། །འདོད་ལ་ཡིད་ནི་ཆགས་གྱུར་པ། །ཁྱོད་ནི་སྦྱིན་བྱ་ཐ་དད་ན། །མཆོག་ཅེས་པ་ནི་ཇི་ལྟར་སྨྲ། །ཇི་ལྟར་ཆུ་བོ་འཇིགས་པ་ཡི། །ཤུགས་ཀྱིས་བདས་པར་གྱུར་པའི་མི། །གཞན་
[251a.5]དག་བསྒྲལ་བར་བྱའོ་ཞེས། །ཡོངས་རྟོགས་བྱེད་པའི་རྨོངས་པའི་གནས། །སྐྲ་རྣམས་བྲེགས་པར་གྱུར་ནས་ནི། །ཕྱག་དར་ཁྲོད་ཀྱི་གོས་འཆང་ཞིང་། །དགོན་པ་ཡུལ་དུ་འདོད་པར་ནི། །ནམ་ཞིག་དེ་ལྟར་འགྱུར་ཞིག་གུ། །གཉའ་ཤིང་གང་ཙམ་རྣམ་ལྟ་ཞིང་། །ས་ཡི་
[251a.6]ལྷུང་བཟེད་ལག་ཐོགས་ནས། །དཔྱས་མེད་ཁྱིམ་ནས་ཁྱིམ་དུ་ནི། །ནམ་ཞིག་སློང་མོ་སྤྱོད་པར་འགྱུར། །རྙེད་དང་བཀུར་སྟི་ཆགས་མེད་ཅིང་། །ཉོན་མོངས་ཚེར་མའི་འདམ་རྫབ་དག །སྦྱོར་བ་བྱེད་ཅིང་གྲོང་ཁྱེར་གྱི། །སྦྱིན་པའི་གནས་སུ་ནམ་ཞིག་འགྱུར། །རྩྭ་ཡི་ཚོགས་
[251a.7]ལས་ལངས་ནས་ནི། །བ་མོས་ལྕི་བའི་གོས་དག་དང་། །ཟས་སྐོམ་ངན་ངོན་ཙམ་གང་གིས། །ནམ་ཞིག་ལུས་ལ་ཆགས་མེད་འགྱུར། །ཤིང་དྲུང་ནེ་ཙོ་ལྟར་ལྗང་བའི། །ངུར་པ་འཇམ་པོའི་གོས་ཅན་དུ། །མཐོང་ཆོས་བདེ་བའི་དགའ་སྟོན་དང་། །ནམ་ཞིག་
[251b]
[251b.1]བདག་ནི་ཉལ་བར་འགྱུར། །འདོར་བར་འགྱུར་བའི་ལུས་སྲོག་ལ། །ཆུ་དང་རྩྭ་ཡི་ཟིལ་པ་ལྟར། །ལྟོས་མེད་ཡུན་རིང་གོམས་པ་ཡི། །བདེ་བ་ཆེན་པོ་ནམ་ཞིག་འཐོབ། །ནམ་ཞིག་ཆུ་ངོགས་སྨན་ལྗོངས་སུ། །གནས་ནས་ཆུ་ངོགས་འབྱུང་འཇིག་དང་། །འཚོ་བའི་
[251b.2]འཇིག་རྟེན་གནས་འདྲ་བར། །ཡང་དང་ཡང་དུ་ལྟ་བར་འགྱུར། །ལྟ་བ་ཀུན་གྱི་མར་གྱུར་པའི། །འཇིག་ཚོགས་ལྟ་བ་འབྱིན་པ་དང་། །སྲིད་པའི་ལོངས་སྤྱོད་མི་འདོད་པར། །བདག་ནི་ནམ་ཞིག་འགྱུར་ཞིག་གུ། །རྨི་ལམ་སྨིག་རྒྱུ་སྒྱུ་མ་སྤྲིན། །དྲི་ཟའི་གྲོང་ཁྱེར་མཚུངས་
[251b.3]པར་ནི། །རྒྱུ་དང་མི་རྒྱུའི་འཇིག་རྟེན་དག །ནམ་ཞིག་རྟོགས་པར་བྱེད་པར་འགྱུར། །མིང་པོ་འདི་ལྟར་དགའ་བ་ཡི། །རེ་བའི་ཡིད་ཀྱིས་རྣམ་རོལ་པས། །ཟང་ཟིང་བཅས་ཤིང་གཡོ་བ་ཡི། །མཆོག་དེ་རྣམས་ཀྱིས་ཅི་ཞིག་བགྱི། །ཀྱེ་མ་མཆོག་རབ་སྦྱིན་པར་སེམས་གཞན་
[251b.4]ཡང་། །ལོག་པར་རྟོག་པ་སྐད་ཅིག་ཙམ་འགའ་ཞིག །ལྷ་མགོན་འདོད་པ་ངོ་བོ་ཉིད་ཀྱིས་གཡོ། །གཡང་ས་ཆེན་པོ་མུན་ནག་བཅས་འདྲ་བས། །སེམས་རྒྱ་ཆེ་བའི་དམ་པས་རྣམ་པར་སྤངས། །མི་རིགས་འཚེ་བ་ཀུན་གྱི་རྒྱུར་གྱུར་ཅིང་། །འདོད་པས་མི་རྣམས་འཁྲུལ་
[251b.5]པར་བྱེད་པས་ན། །འདི་ནི་སྨད་བྱ་འཇིགས་པ་ཆེན་པོ་སྟེ། །མི་གཙང་བསྒོས་པའི་སྦྲུལ་ནག་དག་དང་མཚུངས། །གང་འདི་ཐོག་མཐའ་མེད་ནས་འགྲོ་བ་དང་། །འགྲོ་བར་འགྱུར་དང་གནས་པའི་སེམས་ཅན་ལུས། །དེ་ནི་གསོད་འཇོམས་བསྟན་དང་མཚུངས་པས་ན། །
[251b.6]སྡིག་པའི་གཞིར་གྱུར་འདོད་པས་ཅི་ཞིག་བྱ། །ལྷ་དབང་བརྒྱ་བྱིན་འདོད་པའི་ཡུལ་འདི་ནི། །ཕྱག་དར་ཁྲོད་འདྲར་བྱེད་འདྲའི་ངོ་བོ་བས། །བརྫུན་པར་རྟོག་ཅིང་རྣམ་སྨིན་མི་བཟད་པའི། །འདོད་པ་ཡིད་ཀྱིས་ཀྱང་ནི་སུ་ཞིག་བསྟན། །བཻ་ཌཱུཪྻ་སྔོ་ལྗང་སྐྱེས་པ་ཡི་རྩྭ་
[251b.7]དང་ནི། །མེ་ཏོག་རྒྱས་པར་གྱུར་པའི་ཤིང་གི་ནགས་སྤངས་ནས། །ལྕགས་ཀྱུ་རྣོན་པོས་སྤྱི་བོར་འཚོག་ཅིང་འདྲི་བ་དང་། །གླང་ཆེན་དབང་པོས་ཁུར་སྐྱེད་ཡུལ་གྱིས་བསླུས་པ་ཡིན། །མདུང་རྩེ་ལུས་བསྐྱོན་གྲོང་གི་ཁ་ཡི་ཚོགས་རྣམས་ཀྱི། །གཤོག་པའི་
[252a]
[252a.1]རླུང་གིས་རབ་ཏུ་གཡོབ་པར་བྱེད་འགྱུར་ལ། །མཛའ་བོ་རྣམས་ཀྱང་གཡོ་བྱས་མིག་གིས་ལྟ་བྱེད་པར། །སྐྱེས་བུ་འཇིགས་པར་འགྱུར་བའང་ཡུལ་གྱིས་བརླག་པ་ཡིན། །བྱིས་པ་ལོག་རྟོག་རླུང་གིས་རབ་འབར་འདོད་པ་ཡིས། །རང་
[252a.2]ཉིད་ཁང་པ་བདག་ཉིད་ཀྱིས་ནི་སྲེག་བྱེད་ན། །སྨྱིག་མ་ལོ་བརྒྱ་ལོན་པ་ཕན་ཚུན་འདར་བ་ཡིས། །རང་ཉིད་ཀྱིས་ནི་སྲེག་པར་བྱེད་པ་ཇི་བཞིན་ནོ། །བརྒྱ་བྱིན་གཞན་ཡང་རྣམ་རྒྱལ་ཁང་པར་གནས་ནས་ནི། །འོད་འཕྲོ་ནོར་བུའི་དཔལ་གྱིས་དགའ་བ་འདི་ལས་
[252a.3]ནི། །མེ་ཆེན་རང་འབར་འཇིགས་པའི་མནར་མེད་སར་ཕྱིན་པས། །གང་འདི་དུག་ཅན་ཡུལ་གྱི་བདེ་བ་དེ་ནི་བདེ་ལེགས་མིན། །མཐོ་རིས་གནས་ནས་འགྲོ་བ་ངན་པའི་གནས་འཇུག་ཅིང་། །སྐད་ཅིག་གིས་ལྷུང་འཕོ་བའི་སྡུག་བསྔལ་གྱིས་གཟིར་པ། །
[252a.4]གང་དག་མྱོང་འགྱུར་ལྷ་ཡི་འཇིག་རྟེན་མངོན་དགའ་བ། །སྔར་མྱོང་གྱུར་པ་དེ་ནི་བདེ་བ་མྱོང་མ་ཡིན། །གསེར་གྱི་པདྨ་ཁ་ཁྱེར་ངང་པ་ཉལ་བ་དང་། །གང་འདིར་ལྷ་ཡི་ཁང་པ་རྫིང་བུར་གྲུལ་རྒལ་བ་དག །འདོད་པའི་ལས་ཀྱིས་སླར་ཡང་མི་རོ་རུལ་པ་ཡིས། །
[252a.5]གཟིངས་པའི་ཆུ་བོ་རབ་མེད་ནང་དུ་ལྟུང་བར་འགྱུར། །ཡོངས་སུ་གྱུར་ན་དགའ་བྲལ་རྨི་ལམ་ལྟ་བུ་ཡི། །ལྷ་རྣམས་བདེ་ལ་དེ་ནི་བརྒྱ་བྱིན་སུ་ཞིག་འདོད། །འཚོ་བའི་འཇིག་རྟེན་ཁྲོས་པའི་སྦྲུལ་གྱིས་མེ་ལྟར་གཡོ་བར་ནི། །ཐམས་ཅད་རྟོག་པས་བདག་
[252a.6]ཅག་ཐར་ལ་གཞོལ་བ་གནས། །སྲིད་འགྲོ་ཚང་ཚིང་ནང་ན་གནས་པའི་བྱིས་པ་རྣམས། །འདི་བདེ་ཡིན་ཞེས་པ་དེ་ལོག་པར་བརྟགས་ཙམ་སྟེ། །གང་འདི་སྲིད་པ་མ་ལུས་སྡུག་བསྔལ་ཀུན་བསྐྱེད་ཅེས། །ཡང་དག་གསུངས་པའི་སངས་རྒྱས་རྣམས་
[252a.7]ཀྱིས་གསུངས། །འཚོ་བའི་འཇིག་རྟེན་རང་བཞིན་སྡུག་བསྔལ་མང་པོས་གཡེངས་འགྱུར་ཏེ། །གང་ཚེ་འདི་ན་བདེ་བ་མྱོང་བའང་བྱ་རོག་ཏ་ལར་མཚུངས། །དེ་ཡང་ཕྲད་གྱུར་སྡུག་བསྔལ་དུ་མས་ཟིལ་གྱིས་གནོན་འགྱུར་ཏེ། །ཆུ་བོའི་ཆུ་ནི་རྒྱ་མཚོར་
[252b]
[252b.1]ཕྱིན་པ་དག་དང་མཚུངས། །གང་ཕྱིར་བུད་མེད་ལག་པ་གེ་སར་བཅས་པའི་པདྨའི་འདབ་འདྲ་དང་། །གདུ་བུ་ཅུང་ཟད་ཁྲོལ་བ་ཙན་དན་བསིལ་བས་བསྒོས་པར་གྱུར་པ་ཡིས། །རེག་ཅིང་ཟངས་ལྟར་དམར་བཅས་སོར་མོ་ཟླུམ་པས་བརྩེ་བས་འཁྱུད་པར་
[252b.2]བྱས་པ་དང་། །བསིལ་ཡབ་རླུང་གི་རྒྱན་ཕྲེང་གཏོར་བས་ཁྱབ་པར་གཉིད་ལོག་གྱུར་པ་དག །འཇག་མའི་རྩེ་མོར་བཅེར་བའི་ལམ་དུ་ཐལ་བ་དང་འདྲེས་རླུང་དམར་ནི། །དྲག་པོས་གཡོབ་ཅིང་དུབ་ལ་ལྕི་བའི་ལུས་ཀྱི་སླར་ཡང་ཉལ་འགྱུར་ཏེ། །དེ་བས་འཚོ་
[252b.3]བའི་འཇིག་རྟེན་སྐད་ཅིག་ཐང་ཅིག་གཡོ་བར་ཤེས་གྱིས་ལ། །ཕོངས་པའི་འབྲས་འབྱིན་འདོད་པ་སྤོངས་ལ་ཚམས་པའི་ཞི་ལ་བརྟེན་པར་གྱིས། །དེ་ནས་བུ་མོ་རྣམས་ལ་མིག་སྟོང་ལྡན། །དགའ་བས་ལུས་ཀྱི་བ་སྤུ་ལྡང་འགྱུར་ཞིང་། །བརྩོན་ལ་མངོན་དགའི་
[252b.4]སེམས་དང་ལྷན་ཅིག་གིས། །སུམ་ཅུ་རྩ་གསུམ་མངོན་ཕྱོགས་སོང་བར་གྱུར། །དེ་ནས་བུ་མོ་དེ་རྣམས་རབ་བྱུང་ཉེར་སོན་ཅིང་། །དེ་ཉིད་དོན་ལ་རྣམ་བརྟག་བློ་མིག་དགང་གྱུར་པས། །དྲེགས་པའི་ཆུ་རླབས་གཡོ་ཞིང་འཇིགས་པར་བྱེད་པ་
[252b.5]ཡི། །སྡུག་བསྔལ་མཚོ་ཆེན་མཐའ་མེད་འཁོར་བ་བརྒལ་བར་གྱུར། །འགྲོ་བ་མ་རིག་མདོངས་པ་ཀུན་གྱི་མིག་གཅིག་པ། །རང་བཞིན་འགྲོ་དོན་རྣམ་བྱེད་ངེས་པའི་བདག་ཉིད་ཀྱི། །ཐུབ་པས་སེམས་ཅན་རྣམས་ལ་ཚུལ་འདི་གསུངས་པས་ན། །སེམས་
[252b.6]ཅན་རྣམས་ཀྱི་སྲིད་པའི་ཚེར་མ་ཟད་པར་ཤོག །གཞོན་ནུ་མ་བདུན་གྱི་རྟོགས་པ་བརྗོད་པ།སློབ་དཔོན་གསང་བ་བྱིན་གྱིས་མཛད་པ་རྫོགས་སོ།། །།{T4148}༄། །བསླབ་པ་བཅུའི་ཆོ་ག་བཞུགས།# ་།༄༅༅། །སློབ་དཔོན་དགོངས་སུ་གསོལ། །བདག་མིང་འདི་ཞེས་བགྱི་བ་
[252b.7]དུས་འདི་ནས་བཟུང་ནས་བྱང་ཆུབ་སྙིང་པོ་ལ་མཆིས་ཀྱི་བར་དུ། རྐང་གཉིས་ཀྱི་མཆོག་སངས་རྒྱས་བཅོམ་ལྡན་འདས་ཐམས་ཅད་མཁྱེན་ཞིང་ཐམས་ཅད་གཟིགས་པ་ལ་སྐྱབས་སུ་མཆིའོ། །དེ་བཞིན་དུ། འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་
[253a]
[253a.1]མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །དེ་ལྟར་ལན་གཉིས་ལན་གསུམ་དུའོ་ཞེས་པ་སྐྱབས་སུ་འགྲོ་བའི་ཆོ་གའོ། །སློབ་དཔོན་དགོངས་སུ་གསོལ། །བདག་མིང་འདི་ཞེས་བགྱི་བ་དུས་
[253a.2]འདི་ནས་བཟུང་སྟེ་སང་ཉི་མ་ཤར་གྱི་བར་དུ་སྲོག་གཅོད་པ་ཐམས་ཅད་དང་གཞན་གྱི་ནོར་འཕྲོག་པ་ཐམས་ཅད་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་དང་། མྱོས་པར་འགྱུར་བ་བག་མེད་པའི་གནས་
[253a.3]དང་། དུས་མ་ཡིན་པའི་ཁ་ཟས་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་འཆང་པ་#ལས་སླར་ཟློག་པར་བགྱིའོ། །འཕགས་པ་དགྲ་བཅོམ་པ་རྣམས་ཀྱི་
[253a.4]བསླབ་པ་ལ་རྗེས་སུ་སློབ་པོ#། །རྗེས་སུ་སྒྲུབ་པོ#། །སེམས་ཀྱི་རྒྱན་གྱི་ཕྱིར་དང་། སེམས་ཀྱི་ཡོ་བྱད་ཀྱི་ཕྱིར་དང་། དོན་གྱི་མཆོག་སངས་རྒྱས་ཉིད་རབ་ཏུ་འགྲུབ་པའི་སླད་དུ། བདག་གསོ་སྦྱོང་ལ་གནས་པར་སློབ་དཔོན་གྱིས་གཟུང་དུ་གསོལ། དེ་ལྟར་
[253a.5]ལན་གཉིས་ལན་གསུམ་དུའོ། །བསྙེན་གནས་ཡན་ལག་བརྒྱད་པ་དང་། གསོ་སྦྱོང་གི་སྡོམ་པའི་ཆོ་གའོ། །སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་
[253a.6]དུ། སྲོག་གཅོད་པ་སྤངས་ཏེ་སྲོག་གཅོད་པ་ལས་བཟློག་པར་བགྱིའོ། །དེ་བཞིན་དུ། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་མོ་དང་། ངག་འཁྱལ་བ་དང་། བརྣབ་
[253a.7]སེམས་དང་། གནོད་སེམས་དང་། ལོག་པར་ལྟ་བ་ལས་བཟློག་པར་བགྱིའོ། །དེ་ལྟར་ལན་གཉིས་ལན་གསུམ་དུའོ་ཞེས་པ་བསླབ་པ་བཅུའི་ཆོ་ག་ཀླུ་སྒྲུབ་ཀྱི་ཞལ་སྔ་ནས་གསུངས་པ་རྩེ་ཐང་#ལོ་ཙཱ་བ་གཞོན་ནུའི་ཞབས་ཀྱི་འགྱུར།། །།
[253b]
[253b.1]{T4149}༄༅༅། །རྒྱ་གར་སྐད་དུ། ཡེ་དྷརྨཱཥྚཱི་ཀ །བོད་སྐད་དུ། ཡེ་དྷརྨཱའི་འགྲེལ་བ། སངས་རྒྱས་ལ་ཕྱག་འཚལ་ལོ། །ད་ནི་ཡེ་དྷརྨཱ་ཧེ་ཏུ་པྲ་བཱ་ཝ་ཧེ་ཏུཾ། ཞེས་བྱ་བ་ལ་སོགས་པས་རྒྱུད་རབ་ཏུ་གནས་པའི་དོན་དུ་གྲུབ་པའི་མཐའ་གསུངས་པ་ཡིན་ཏེ། འཆད་པ་པོ་
[253b.2]རྣམས་ལ་ཡང་གསུངས་པ་ཡིན་ནོ། །མདོ་སྡེ་དང་ནི་རྣལ་འབྱོར་གྱི། །ཁང་པར་ཡང་ནི་འཇུག་པ་ནང་། །ཡེ་དྷརྨཱ་སོགས་ཚིགས་བཅད་ཀྱིས། །སངས་རྒྱས་གྲུབ་མཐའི་ཕྱག་རྒྱས་བཏབ། །ཅེས་སོ། །དེ་ཡང་ཡེ་དྷརྨཱ་སོགས་ནི་བོད་ཀྱི་སྐད་དུ། ཆོས་རྣམས་
[253b.3]གང་དག་རྒྱུས་འབྱུང་དེ་དག་ནི། །རྒྱུ་དང་དེ་ལ་འགོག་པ་གང་ཡིན་པའང་། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུངས་པའི་ཚུལ་ཅན་དགེ་སྦྱོང་ཆེ། །ཞེས་བྱ་བའོ། །ཆོས་རྣམས་གང་དག་རྒྱུས་བྱུང་ཞེས་པ་ལ་གང་དག་ནི་རབ་ཏུ་
[253b.4]གྲགས་པ་བདུན་པོ་རྣམས་ཏེ། མ་རིག་པ་ལ་སོགས་པའི་ལྕགས་སྒྲོག་གིས་ཀུན་དུ་བསྐོར་བའི་འཁོར་ལོ་ནི་རྒྱུ་དང་འབྲས་བུའི་བདག་ཉིད་ཅན་ནོ། །དེ་དག་ནི་ཞེས་པ་ཉོན་མོངས་པ་དང་། ལས་དང་སྡུག་བསྔལ་གྱི་ཡན་ལག་གསུམ་དང་། གཉིས་དང་
[253b.5]བདུན་གྱིས་ཕྱེ་བས་གསུམ་དུ་ཡང་གྱུར་པ་ཡིན་ཏེ། མ་རིག་པའི་ཐོག་མ་ཡིན་པར་སངས་རྒྱས་ཉིད་ཀྱིས་གསུངས་པ་ཡིན་ནོ། །མ་རིག་པ་དང་། འདུ་བྱེད་དང་། རྣམ་པར་ཤེས་པ་དང་། མིང་དང་། གཟུགས་དང་། སྐྱེ་མཆེད་དྲུག་དང་། རེག་པ་དང་།
[253b.6]ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་ཤི་སྟེ་བཅུ་གཉིས་པོ་རྣམས་སོ། །མ་རིག་པ་ནི་འདོད་ཆགས་དང་། ཞེ་སྡང་དང་། གཏི་མུག་གི་བདག་ཉིད་ཅན་ནོ། །འདུ་བྱེད་ནི་སྔོན་གྱི་ལས་སོ། །རྣམ་པར་ཤེས་པ་ནི་མངལ་
[253b.7]དུ་འཇུག་པའོ། །མིང་དང་གཟུགས་ནི་ནུར་ནུར་པོ་ལ་སོགས་པ་ལྔའོ། །སྐྱེ་མཆེད་དྲུག་ནི་མིག་ལ་སོགས་པ་ལ་འདོད་དོ། །རེག་པ་ནི་ཡུལ་དང་། དབང་པོ་དང་། རྣམ་པར་ཤེས་པ་རྣམས་ཕྲད་པའོ། །ཚོར་བ་ནི་བདེ་བ་ལ་སོགས་པའི་བདག་
[254a]
[254a.1]ཉིད་ཅན་ནོ། །སྲེད་པ་ནི་འཁྲིག་པའི་འདོད་ཆགས་སོ། །ལེན་པ་ནི་འདོད་པའི་ཡུལ་ལེན་པའོ། །སྲིད་པ་ནི་འབྱུང་བར་འགྱུར་བའི་སྲིད་པའི་འབྲས་བུ་ཅན་གྱི་ལས་སོ། །སྐྱེ་བ་ནི་སླར་ཡང་ཕུང་པོ་ཉིད་མཚམས་སྦྱོར་བའོ། །རྒ་ཤི་
[254a.2]ནི་གསལ་ལོ། །དང་པོ་དང་། བརྒྱད་པ་དང་། དགུ་པ་རྣམས་ནི་ཉོན་མོངས་པའོ། །ལས་ནི་གཉིས་པ་དང་། བཅུ་པའོ། །ལྷག་མ་བདུན་ནི་སྡུག་བསྔལ་ལོ། །དེ་གསུམ་གྱིས་བསྡུས་པའི་ཕྱིར་བཅུ་གཉིས་ནི་ཆོས་རྣམས་སོ། །གསུམ་ལས་གསུམ་དང་གཉིས་
[254a.3]ལས་གཉིས་འབྱུང་ལ། །བདུན་ལས་བདུན་ཡིན་པའི་ཕྱིར། དེ་ཁོ་ན་འཁོར་བའི་འཁོར་ལོ་རྒྱུ་དང་འབྲས་བུ་ཡང་སྟེ། འགྲོ་བ་ཐམས་ཅད་དེ། འདིར་སེམས་ཅན་གཞན་ནི་འགའ་ཡང་ཡོད་པ་མ་ཡིན་ཏེ། སྟོང་པ་འོད་ཟེར་ལྟར་ཆོས་རྣམས་ལས་སྟོང་པའི་ཆོས་
[254a.4]རྣམས་འབྱུང་བར་འགྱུར་ཏེ། ཁ་ཏོན་དང་། མར་མེ་ལྟ་བུ་དག་ནི་རྒྱུ་ལས་བྱུང་བའི་དོན་དུའོ། །རྒྱུ་དང་དེ་རྣམས་ཀྱི་ཡང་དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ་ཞེས་པ་ནི། དེ་ཇི་ལྟར་ཐུགས་སུ་ཆུད་པ་དེ་བཞིན་དུ་གསུངས་པའི་ཕྱིར་ཏེ། གཞན་མ་
[254a.5]ཡིན་པར་གསུང་བ་ཉིད་ཀྱི་ཕྱིར་འཁོར་བའི་རྒྱུ་དང་རྐྱེན་གསུངས་པ་ཡིན་ནོ། །དེ་ལ་འགོག་པ་གང་ཡིན་པའང་། །ཞེས་བྱ་བ་ལ། འང་གི་སྒྲ་ལས་དེ་ཁོ་ན་རྒྱུ་དང་བསམས་པར་གསུངས་པ་ཡིན་གྱི། སངས་རྒྱས་རྣམས་ཀྱི་མྱ་ངན་ལས་འདས་པ་ཡན་ལག་བཅུ་གཉིས་
[254a.6]འགོག་པའི་མཚན་ཉིད་ཀྱང་གསུངས་པ་ཡིན་ཏེ། ཟུང་འཇུག་པའི་བདེ་བ་བརྟགས་པ་ནམ་མཁའི་མེ་ཏོག་མ་ཡིན་ཞིང་སེམས་མེད་པ་བེམས་པོ་མ་ཡིན་པའི་རང་བཞིན་ནོ། །དེ་སྐད་གསུངས་པའི་ཚུལ་ཅན་དགེ་སྦྱོང་ཆེ། །ཞེས་བྱ་བ་ནི་ཟུང་དུ་འཇུག་པ་གསུང་
[254a.7]བའི་ཚུལ་ཅན་ཡང་དག་པར་རྫོགས་པའི་སངས་རྒྱས་ཏེ། ཕྱིན་ཅི་མ་ལོག་པར་གསུང་བའི་ཚུལ་ཅན་གྱི་ཚངས་པའི་ཆོ་གའོ། །འདི་ནི་སློབ་དཔོན་རྟག་པའི་རྡོ་རྗེས་གསུངས་པ་གཞོན་ནུས་བསྒྱུར་བའོ།། །།