[1a]
[1b]
[1b.1]{T3306}༄༅༅། །རྒྱ་གར་སྐད་དུ། ཤྲཱི་བཛྲ་ཨཱ་ས་ན་སཱདྷ་ནཾ། བོད་སྐད་དུ། དཔལ་རྡོ་རྗེ་གདན་གྱི་སྒྲུབ་ཐབས། དཔལ་རྡོ་རྗེ་གདན་ལ་ཕྱག་འཚལ་ལོ། །ཡོན་ཏན་ཚོགས་ཀྱི་གཞིར་གྱུར་གཞན་
[1b.2]དོན་བླ་མ་དེ་བཞིན་གཤེགས་པ་ཀུན་ལ་ཕྱག་འཚལ་ལོ། །དཔལ་ལྡན་རྡོ་རྗེ་གདན་ཞེས་ཕུན་སུམ་ཚོགས་མིན་འཇོམས་ཤིང་འཁོར་བའི་སྐྱོན་གྱིས་མ་གོས་པ། །གང་ཞིག་དུལ་ཞིང་ཞི་བ་མཆོག་གི་
[1b.3]སངས་རྒྱས་ཉིད་ཀྱི་དེ་ཉིད་སྒྲུབ་པའི་ཐབས་གྱུར་པ། །སྣ་ཚོགས་ཁ་དོག་གིས་སྤྲས་བརྒྱན་པའི་དེ་བཞིན་གཤེགས་པ་ལ་སོགས་བདག་གིས་བྲི་བར་བྱ། །དེ་ལ་མདུན་དུ་འོག་ནས་འབྱུང་བའི་ཆོ་གས་
[1b.4]བཅོམ་ལྡན་འདས་སྐུ་མདོག་དང་ཕྱག་ལ་སོགས་པ་དང་ལྡན་པ་རྣམ་པར་བསམས་ཏེ། མེ་ཏོག་ལ་སོགས་པ་དབུལ་བར་བྱའོ། །ཨོཾ་ན་མོ་ཨཀྵོ་བྷྱཿཡ་ཧཱུཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། སོ་སོར་ལན་གསུམ་གསུམ་
[1b.5]གསུམ་དུ་དབུལ་བར་བྱའོ། །ཨོཾ་ན་མོ་བཻ་རོ་ཙ་ནཱ་ཡ་ཨོཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་རཏྣ་སམྦྷ་ཝཱ་ཡ་ཏྲཱཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ཨ་མི་ཏཱ་བྷཱ་ཡ་ཧྲཱིཿ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ཨ་
[2a]
[2a.1]མོ་གྷ་སིདྡྷི་ཡེ་ཨཿ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ལོ་ཙ་ནཱ་ཡེ་ལཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་མཱ་མ་ཀཻ་མཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་པཎྚ་རཱ་ཡེ་པཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ཏཱ་རཱ་
[2a.2]ཡེ་ཏཱཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། སླར་ཡང་མི་བསྐྱོད་པའི་གཟུགས་རྡོ་རྗེ་གདན་ལ་མང་ཞིང་ཆེས་རབ་ཏུ་མང་བའི་མེ་ཏོག་དབུལ་བར་བྱའོ། །རིམ་པ་འདི་ཉིད་ཀྱིས་ཏེ། ཨོཾ་བཛྲ་དྷཱུ་པེ་ཧཱུཾ་སྭཱ་ཧཱ། ཨོཾ་བཛྲ་གནྡྷེ་ཧཱུཾ་སྭཱ་ཧཱ། ཨོཾ་བཛྲ་ནཻ་བི་དྱེ་
[2a.3]ཧཱུཾ་སྭཱ་ཧཱ། ཨོཾ་བཛྲ་དཱི་པེ་ཧཱུཾ་སྭཱ་ཧཱ། ཞེས་པ་ལ་སོགས་པས་མཆོད་པའི་ཆོ་ག་བྱས་ནས། བྱམས་པ་ལ་སོགས་པ་བསྒོམ་པ་སྔོན་དུ་འགྲོ་བས་སོ། །དེ་ནས་རང་གི་སྙིང་གར་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་
[2a.4]འཁོར། དེའི་སྟེང་དུ་ཧཱུཾ་ཡིག་གསེར་གྱི་ཁ་དོག་ལྟ་བུ་དེ་ལས་འོད་ཟེར་འཕྲོས་པས་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་བལྟས་ལ། དེ་ནས་ཁྲུས་དང་མེ་ཏོག་ལ་སོགས་པ་མཆོད་པའི་སྤྲིན་རབ་ཏུ་འཕྲོ་
[2a.5]བས་ཡང་དག་པར་མཆོད་དེ། དེ་ནས་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། དགེ་བ་ཡོངས་སུ་བསྔོ་བ་དང་། དཀོན་མཆོག་གསུམ་ལ་སྐྱབས་སུ་འགྲོ་བ་དང་། རྒྱལ་བའི་ལམ་བསྟེན་པ་
[2b]
[2b.1]དང་། བྱང་ཆུབ་མཆོག་ཏུ་སེམས་བསྐྱེད་པ་ཡང་བྱ་སྟེ། དཀོན་མཆོག་གསུམ་ལ་སྐྱབས་སུ་མཆི། །ཞེས་བྱ་བ་ལ་སོགས་པས་སོ། །དེ་ནས་སྟོང་པ་ཉིད་དུ་རྣམ་པར་བསྒོམ་པར་བྱ་སྟེ། ཆོས་ཐམས་ཅད་རང་བཞིན་མེད་པའི་ངོ་བོ་ཉིད་དུ་རྣམ་པར་བསྒོམས་ནས། ཡི་གེའི་གཟུགས་
[2b.2]བྱང་ཆུབ་ཀྱི་སེམས་ཀྱི་རང་བཞིན་འོད་གསལ་བར་བདག་ཉིད་ཀྱིས་བལྟ་བར་བྱའོ། །བརྟན་པར་བྱ་བའི་དོན་དུ་སྔགས་བརྗོད་པར་བྱ་སྟེ། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། དེ་བཞིན་དུ་འོད་ཟེར་གྱི་གཟུགས་དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ལ་དེའི་སྟེང་དུ་ཧཱུཾ་ངོ་། །
[2b.3]ཨ་ལ་སོགས་པ་དབྱངས་ཡིག་བཅུ་དྲུག་གིས་ཡོངས་སུ་བསྐོར་བ། གཞན་ཡང་ཡི་གེ་ཀ་ལ་སོགས་པའི་སྡེ་ཚན་རྣམས་ཀྱིས་ཡོངས་སུ་བསྐོར་བའོ། །མ་ལུས་པ་ཁ་དོག་དཀར་པོའོ། །དེ་ཐམས་ཅད་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་གཟུགས་སུ་བསམ་པར་བྱའོ། །
[2b.4]དེའི་སྟེང་དུ་ཡི་གེ་ཧཱུཾ་གི་རྣམ་པའི་ས་བོན་ནོ། །དེ་ཡོངས་སུ་གྱུར་པ་ལས་རྡོ་རྗེ་མདོག་སེར་པོའོ། །རྡོ་རྗེ་དེའི་ལྟེ་བ་ལ་ཡི་གེ་ཧཱུཾ་ངོ་། །དེ་ཐམས་ཅད་ཡོངས་སུ་གྱུར་པ་ལས་རྡོ་རྗེ་གདན་གྱི་གཟུགས་ཁ་དོག་གསེར་གྱི་མདོག་ལྟ་བུ་དེའི་གདན་བདུད་རྣམ་པར་བཞི་སྟེ། དེ་ཡང་ཕུང་པོ་དང་ཉོན་མོངས་
[2b.5]པ་དང་འཆི་བདག་དང་ལྷའི་བུའི་བདུད་རྣམས་སེར་པོ་དང་། དམར་པོ་དང་། ནག་པོ་དང་། སྔོན་པོའི་མདོག་ཅན་རིམ་པ་ཇི་ལྟ་བ་བཞིན་དུ་གཟུགས་འདི་རྣམས་རྣམ་པར་བསྒོམ་པར་བྱས་ནས། བདུད་འདི་རྣམས་ཀྱིས་ཡོངས་སུ་བྱས་པའི་སེང་གེའི་ཁྲི་དེའི་སྟེང་དུ་སྣ་ཚོགས་པདྨ་
[2b.6]དང་རྡོ་རྗེ་ལ་གནས་པའི་བཅོམ་ལྡན་འདས་ཞལ་གཅིག་ཕྱག་གཉིས་པ་རྡོ་རྗེའི་སྐྱིལ་མོ་ཀྲུང་གིས་བཞུགས་པ་ཕྱག་གཡས་པས་གནོན་གྱི་ཕྱག་རྒྱ་དང་ལྡན་པ། ཕྱག་གཡོན་པ་འཛོང་པར་བཀན་ནས་གནས་པའོ། །ན་བཟའ་དམར་པོ་སྐུ་ལ་བསྣམས་པ་ཞི་བའི་བདག་ཉིད་རྣལ་
[2b.7]འབྱོར་པས་བསྒོམ་པར་བྱའོ། །དེ་ནས་ང་རྒྱལ་བསྐྱེད་པར་བྱ་སྟེ། ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བཅོམ་ལྡན་འདས་ཀྱི་གཡས་སུ་བྱང་ཆུབ་སེམས་དཔའ་བྱམས་པ་སྐུ་མདོག་སེར་པོ་ཕྱག་གཉིས་པ་རལ་པའི་ཅོད་པན་འཕྱང་བ་ཕྱག་གཡས་ན་རིན་པོ་ཆེའི་རྔ་ཡབ་
[3a]
[3a.1]བསྣམས་པ་ཕྱག་གཡོན་ན་ཀླུ་ཤིང་གི་ཡལ་ག་མེ་ཏོག་དང་བཅས་པ་བསྣམས་པའོ། །དེ་བཞིན་དུ་གཡོན་ན་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་མདོག་དཀར་བ་ཕྱག་གཡས་ན་རིན་པོ་ཆེའི་རྔ་ཡབ་བསྣམས་པ། ཕྱག་གཡོན་
[3a.2]ན་པདྨ་བསྣམས་པ། བཅོམ་ལྡན་འདས་ཀྱི་ཞལ་ལ་བལྟ་ཞིང་འདུག་པ་བསྒོམ་པར་བྱའོ། །དེ་ནས་ཡན་ལག་དྲུག་ལ་དགོད་པར་བྱ་སྟེ། བཅོམ་ལྡན་འདས་ཀྱི་སྤྱན་གཉིས་ལ་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་ཀྵིཾ་མདོག་དཀར་པོའོ། །རྣ་བ་གཉིས་ལ་ཟླ་བའི་
[3a.3]དཀྱིལ་འཁོར་གྱི་སྟེང་དུ་ཡི་གེ་ཛཾ་མདོག་སྔོན་པོའོ། །སྣའི་བུ་ག་གཉིས་སུ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཁཾ་མདོག་སེར་པོའོ། །ལྕེ་ལ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་གཾ་མདོག་དམར་པོའོ། །དཔྲལ་བར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་སྐཾ་མདོག་ལྗང་གུ། ནུ་མའི་
[3a.4]དབུས་སུ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་སཾ་མདོག་དཀར་པོའོ་ཞེས་བྱ་བ་ནི་ཡན་ལག་དྲུག་ལ་དགོད་པར་བསྒོམ་པར་བྱའོ། །དེ་ནས་རང་གི་སྙིང་གར་ཟླ་བའི་དཀྱིལ་འཁོར་ལ་ཡི་གེ་ཧཱུཾ་ཡོངས་སུ་གྱུར་པ་ལས་རྡོ་རྗེའོ། །དེའི་ལྟེ་བ་ལ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་ངོ་། །དེ་ནས་
[3a.5]མགོ་ལ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཨོཾ་ཡོངས་སུ་གྱུར་པ་ལས་འཁོར་ལོ་མདོག་དཀར་པོའོ། །དེའི་དབུས་སུ་ཟླ་བའི་དཀྱིལ་འཁོར་ལ་གནས་པའི་ཡི་གེ་ཨོཾ་མོ་ཞེས་བྱ་བ་ནི་བཅོམ་ལྡན་འདས་ཀྱི་སྐུ་རྣམ་པར་དག་པ་བསྒོམ་པའོ། །མགྲིན་པར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་
[3a.6]ཨ་ཡོངས་སུ་གྱུར་པ་ལས་པདྨ་འདབ་མ་བརྒྱད་པ་མདོག་དམར་བའོ། །དེའི་དབུས་སུ་ཟླ་བའི་དཀྱིལ་འཁོར་ལ་གནས་པའི་ཡི་གེ་ཨཱཿའོ་ཞེས་བྱ་བ་ནི་བཅོམ་ལྡན་འདས་ཀྱི་གསུང་རྣམ་པར་དག་པ་བསྒོམ་པའོ། །ལྟེ་བའི་སྟེང་དུ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་ཡོངས་སུ་གྱུར་པ་ལས་
[3a.7]རྡོ་རྗེ་མདོག་སྔོན་པོའོ། །དེའི་དབུས་སུ་ཟླ་བའི་དཀྱིལ་འཁོར་ལ་གནས་པའི་ཡི་གེ་ཧཱུཾ་ངོ་ཞེས་བྱ་བ་ནི། བཅོམ་ལྡན་འདས་ཀྱི་ཐུགས་རྣམ་པར་དག་པ་བསྒོམ་པའོ། །སངས་རྒྱས་བསྒྲུབ་ཅིང་སངས་རྒྱས་ཉིད་ཀྱི་འབྲས་བུ་སྟེར་བ་ཞེས་བྱའོ། །ནམ་མཁའ་ལ་གནས་པའི་བཅོམ་ལྡན་འདས་
[3b]
[3b.1]སྙིང་གའི་འོད་ཟེར་གྱིས་བཀུག་ནས་ཛཿཧཱུཾ་བཾ་ཧོཿཞེས་བྱ་བའི་ཡི་གེ་བཞིས་མདུན་དུ་གཞུག་པར་བྱའོ། །དེ་ལ་མཆོད་ཡོན་དང་། །ཞབས་བསིལ་དང་། གདན་དང་བསང་གཏོར་ཡང་དབུལ་བར་བྱའོ། །ཕྱིས་ནི་འོ་ཐུག་ལ་སོགས་པའི་སྟོན་མོ་ཡང་དབུལ་བར་བྱའོ་ཞེས་བྱ་བ་ནི་བདུད་རྩི་མྱང་བར་
[3b.2]བྱའོ། །དེ་ནས། སངས་རྒྱས་ཀུན་ལ་ཕྱག་འཚལ་ལོ། །ཞེས་བྱ་བའི་བསྟོད་པ་འདིས་བསྟོད་པར་བྱའོ། །དེ་ནས་ཡེ་ཤེས་སེམས་དཔའ་དང་བཅས་པས་དམ་ཚིག་སེམས་དཔའ་དང་གཅིག་ཏུ་བྱས་ནས་ས་མ་ཡ་སྟྭཾ་ས་མ་ཡ་སྟྭཾ་ས་མ་ཡ་སྟྭཾ་ཨ་ཧཾ་ཨོཾ་ཨཱཿཧཱུཾ་ཞེས་བྱ་བའི་སྔགས་ཀྱིས་
[3b.3]གཉིས་སུ་མེད་པར་བྱའོ། །དེ་ནས་བསྒོམས་པས་སྐྱོན་སྔགས་བཟླས་པར་བྱ་སྟེ། ཨོཾ་ཨཱཿབཛྲ་ཧཱུཾ་སྭཱ་ཧཱ་ཞེས་བྱ་བའི་སྔགས་བཟླས་པར་བྱའོ། །དེ་ནས་བསོད་ནམས་ཡང་དག་པར་རྫོགས་པའི་བྱང་ཆུབ་ཏུ་བསྔོས་ནས་གཤེགས་སུ་གསོལ་ཏེ་ཇི་ལྟར་བདེ་བར་གནས་པར་བྱའོ། །བསོད་
[3b.4]ནམས་འདི་ཡིས་སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་མྱུར་དུ་ཐོབ་པར་གྱུར་ཅིག །རྗེ་བཙུན་རྡོ་རྗེ་གདན་གྱི་མན་ངག་གི་སྒྲུབ་ཐབས་ཀྱི་ཆོ་ག་རྫོགས་སོ། །ཁམས་པ་བ་རི་ལོ་ཙཱ་བས་བསྒྱུར་བའོ།། {T3307}༄༅༅། །རྒྱ་གར་སྐད་དུ། སྠི་ར་ཙཀྲ་བྷཱ་བ་ན། བོད་སྐད་དུ།
[3b.5]བརྟན་པའི་འཁོར་ལོའི་ཆོ་ག །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཐུགས་རྗེ་དང་ནི་ཤེས་རབ་གཉིས། །སངས་རྒྱས་ཀུན་ལྟར་དབྱེར་མེད་པའི། །དམ་པའི་ལམ་སྟོན་ལྟ་བུ་ཡི། །སྐུ་ཡི་རྣམ་པ་འཆང་མཛད་པ། །འཇམ་པའི་དབྱངས་ལ་
[3b.6]ཕྱག་འཚལ་ཏེ། །སློབ་མས་ལེགས་པར་རྟོགས་ཕྱིར་དང་། །བདག་ཉིད་ཀྱིས་ཀྱང་དྲན་པའི་ཕྱིར། །དེ་ཡི་སྒྲུབ་ཐབས་བྲི་བར་བྱ། །གསང་སྔགས་རང་ཉིད་ལེན་པ་ཡི། །འགྲོ་བ་དམྱལ་བ་འབའ་ཞིག་ཡིན། །སྔགས་ཀྱང་འགྲུབ་པར་མི་འགྱུར་ཏེ། །ལུས་ཀྱང་ཉོན་མོངས་ཁོ་ནར་ཟད། །
[3b.7]དེ་ལ་བགེགས་ཀྱང་འབྱུང་འགྱུར་ཞིང་། །ལུས་ལའང་གནོད་པར་འགྱུར་བ་ཡིན། །དེ་ལྟར་བརྟགས་ནས་མཁས་པ་ཡིས། །འཇམ་པའི་དབྱངས་ཀྱི་སྒྲུབ་པའི་ཐབས། །མྱུར་དུ་བྱང་ཆུབ་རབ་སྒྲུབ་པ། །སློབ་དཔོན་མེད་པར་བསྒྲུབ་མི་བྱ། །དེ་བས་དད་པས་བླ་མ་ནི། །དམ་པར་བྱས་
[4a]
[4a.1]ཏེ་འདི་གཟུང་ངོ་། །དེ་ལ་རེ་ཞིག་རྣལ་འབྱོར་པས། ས་ཕྱོགས་ཡིད་དུ་འོང་བ་གང་ཡང་རུང་བར་སྟན་བདེ་བ་ལ་འདུག་སྟེ། ཚངས་པའི་གནས་བཞི་བསྒོམ་པར་བྱའོ། །དེ་ལ་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་སྡུག་པར་འཛིན་པ་ནི་བྱམས་པའོ། །
[4a.2]ཀྱེ་མ་སེམས་ཅན་འདི་དག་ནི་འཁོར་བའི་རྒྱ་མཚོར་ནུབ་ཅིང་ཡུན་རིང་དུ་སྡུག་བསྔལ་ཉམས་སུ་མྱོང་བར་འགྱུར་རོ་ཞེས་དེ་ལྟར་བསམས་ལ། བདག་ཉིད་འཇམ་པའི་དབྱངས་ཀྱི་གོ་འཕང་ཐོབ་པར་བྱས་ནས། འདི་དག་མ་ལུས་པར་སྡུག་བསྔལ་དང་སྡུག་བསྔལ་གྱི་རྒྱུ་ལས་ཐོན་ཏེ་འཇམ་པའི་
[4a.3]དབྱངས་ཀྱི་གོ་འཕང་ལ་བདག་གིས་གཞག་པར་བྱའོ། །དེ་ལྟར་ཡང་སྐྱེ་བ་དང་། རྒ་བ་དང་། ན་བ་དང་། ཡིད་མི་བདེ་བ་དང་། བཀྲེས་པ་དང་། སྐོམ་པ་དང་། ནད་དང་འཆི་བ་ལ་སོགས་པའི་སྡུག་བསྔལ་ལས་བདག་དང་བདག་གིར་འཛིན་པ་ལ་མངོན་པར་ཞེན་པ་དང་། འདོད་ཆགས་དང་། ཞེ་
[4a.4]སྡང་ལ་སོགས་པའི་མཚན་ཉིད་ཅན་གྱི་སྡུག་བསྔལ་གྱི་རྒྱུ་ལས་གྲུབ་པ་གཅོད་པར་བྱའོ། །དེ་ཉིད་ནི་སྙིང་རྗེ་བསྒོམ་པའོ། །སེམས་ཅན་ཐམས་ཅད་ཟག་པ་མེད་པའི་བདེ་བ་རྒྱུན་མི་འཆད་པར་འཇོག་པར་འདོད་ཅིང་དགའ་བ་ནི་དགའ་བའོ། །བདེ་བ་དང་། སྡུག་བསྔལ་བ་དང་། གྲགས་པ་དང་།
[4a.5]མ་གྲགས་པ་དང་། རྙེད་པ་དང་། མ་རྙེད་པ་དང་། བསྟོད་པ་དང་། སྨད་པ་སྟེ་འཇིག་རྟེན་གྱི་ཆོས་བརྒྱད་པོ་འདི་དག་ལ་བདེ་བ་ཇི་ལྟ་བར་སྡུག་བསྔལ་ལ་ཡང་དེ་བཞིན་དུ་ལྟ་བ་ལ་སོགས་པ་སེམས་མཉམ་པར་བསྒོམ་པ་ནི་བཏང་སྙོམས་སོ། །དེ་ནས་རང་གི་སྙིང་གར་ཨ་དཀར་པོ་ཐུང་ངུ་ཡོངས་སུ་
[4a.6]གྱུར་པ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་མུཿལི་ཁྲིའི་མདོག་འདྲ་བ་བསམས་ལ་བ་སྤུའི་བུ་གའི་ཚོགས་རེ་རེའི་གསེབ་ནས་བྱུང་བའི་འོད་ཟེར་གྱི་དྲ་བ་དཔག་ཏུ་མེད་པ་ལས་བྱུང་བའི་མཆོད་པ་སྣ་ཚོགས་པ། ཨོཾ་བཛྲ་པུཥྤེ་ཧཱུཾ། ཨོཾ་ན་མོ་མཉྫུ་ཤྲི་ཡེ། ཨོཾ་བཛྲ་དྷཱུ་པེ་ཧཱུཾ། ཨོཾ་ན་མོ་མཉྫུ་
[4a.7]ཤྲི་ཡེ། ཨོཾ་བཛྲ་དཱི་པེ་ཧཱུཾ། ཨོཾ་ན་མོ་མཉྫུ་ཤྲི་ཡེ། ཨོཾ་བཛྲ་གནྡྷེ་ཧཱུཾ། ཨོཾ་ན་མོ་མཉྫུ་ཤྲི་ཡེ། ཨོཾ་བཛྲ་ནཻ་བེ་དྱེ་ཧཱུཾ། ཨོཾ་ན་མོ་མཉྫུ་ཤྲི་ཡེ་ཞེས་བྱ་བའི་སྔགས་ཀྱིས་བྱིན་གྱིས་བརླབས་པས་འཕགས་པ་འཇམ་དཔལ་དང་། བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་ལ་མཆོད་པ་
[4b]
[4b.1]བྱའོ། །དེ་ནས་མདུན་དུ་དཀྱིལ་འཁོར་བྱས་ནས་ཕྱག་བྱས་ལ་པུས་མོ་གཡས་པའི་ལྷ་ང་ས་ལ་བཙུགས་ཏེ། སྙིང་གར་ཐལ་མོ་སྦྱར་ནས་བཤགས་པ་ལ་སོགས་པ་བྱའོ། །གང་ཡང་བདག་རྨོངས་པའི་དབང་གིས་ལུས་དང་ངག་དང་ཡིད་ཀྱིས་སྡིག་པ་མི་དགེ་བའི་ལས་ཅི་བགྱིས་པ་དང་།
[4b.2]བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་དེ་དག་ཐམས་ཅད་མ་ལུས་པར་བཤགས་པར་བགྱིའོ། །སླར་ཡང་སྡིག་པ་མི་བགྱིད་དོ། །སངས་རྒྱས་དང་། བྱང་ཆུབ་སེམས་དཔའ་དང་འཕགས་པ་གཞན་རྣམས་ཀྱིས་དགེ་བ་གང་མཛད་པ་དེ་དག་ཐམས་ཅད་ལ་རྗེས་སུ་ཡི་རང་བར་བགྱིའོ། །
[4b.3]དེང་ནས་བརྩམས་ཏེ་བྱང་ཆུབ་ཀྱི་སྙིང་པོའི་བར་དུ་ཁྱེད་རྣམས་ལ་བདག་ཉིད་ལུས་དབུལ་བར་བགྱིའོ། །དགེ་བའི་རྩ་བ་འདིས་བདག་འཇམ་དཔལ་དབྱངས་སུ་གྱུར་ནས་སྲིད་པའི་རྒྱ་མཚོར་ནུབ་པའི་སེམས་ཅན་རྣམས་གདོན་པར་བགྱིའོ། །བརྟན་པའི་འཁོར་ལོ་བསྒོམ་པའི་རིམ་པ་འདི་ཉིད་ཀྱིས་
[4b.4]ཀྱང་བྱང་ཆུབ་ཆེན་པོར་བསྒྲུབ་པའི་ལམ་ལ་བདག་གནས་པར་བགྱིའོ། །བདག་གི་བསོད་ནམས་འདིས་འཁོར་བའི་སེམས་ཅན་མ་ལུས་པ་འཇམ་པའི་དབྱངས་དང་འདྲ་བར་གྱུར་ཅིག་ཅེས་དགེ་བའི་རྩ་བ་བསྔོ་བར་བྱའོ། །དེ་ནས་འོད་ཟེར་གྱི་ཚོགས་རྣམས་བ་སྤུའི་བུ་ག་རྣམས་ནས་མུཿདེ་ཉིད་
[4b.5]ལ་ཞུགས་པར་བསམས་ལ། ཨོཾ་བཛྲ་མུཿཞེས་བྱ་བའི་སྔགས་ཀྱིས་གཤེགས་སུ་གསོལ་ལོ། །དེ་ནས་ཨོཾ་སྭ་བྷཱ་བ་བི་ཤུདྡྷཿསརྦ་དྷརྨཱཿསྭ་བྷཱ་བ་བི་ཤུད་དྷོ྅ཧཾ་ཞེས་བྱ་བའི་སྔགས་འདི་བརྗོད་ནས་རྒྱུ་བ་དང་མི་རྒྱུ་བའི་དངོས་པོ་རྣམས་དང་བདག་ཉིད་ཀྱང་སྒྱུ་མ་ལྟ་བུར་བསྒོམ་པར་བྱའོ། །དེ་ཡང་སྒྱུ་
[4b.6]མ་མཁན་གྱིས་འཇིམ་པའི་གོང་བུ་ལ་སོགས་དངོས་པོ་གཅིག་ལས་གླང་པོ་ཆེ་དང་། རྟ་ལ་སོགས་པ་སྟོན་ཡང་དེ་རྣམས་དེ་ན་ཡོད་པ་མ་ཡིན་གྱི་འཁྲུལ་བ་འབའ་ཞིག་ཏུ་ཟད་ལ་འཁྲུལ་པ་དེ་ཡང་བརྟགས་ན་དངོས་པོ་མེད་དེ། དེ་བས་ན་སྣང་དུ་ཟིན་ཀྱང་ཡོད་པ་མ་ཡིན་ལ། དངོས་པོའི་
[4b.7]ཚོགས་ཐམས་ཅད་ཀྱང་དེ་དང་འདྲའོ་ཞེས་དེ་ལྟར་རང་བཞིན་གྱིས་དག་པར་ལྷག་པར་མོས་པར་བྱས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བའི་སྔགས་བརྗོད་པར་བྱའོ། །འདི་བརྗོད་པའི་རྗེས་ཐོགས་ཁོ་ན་ལ་རྒྱུ་བ་དང་མི་རྒྱུ་བའི་དངོས་པོ་དང་བདག་ཉིད་ཀྱང་སྟོང་པ་ཉིད་དུ་
[5a]
[5a.1]བསྒོམ་ལ་སེམས་ཙམ་དུ་གནས་པར་བསྒོམས་ནས་སེམས་དེ་ཡང་ཡོད་པར་མི་བརྟག་གོ། །དེ་ནས་སྙིང་རྗེ་ཆེན་པོ་ཅན་གྱི་སྔོན་གྱི་སྨོན་ལམ་གྱི་འཕེན་ཤུགས་ཀྱིས་ལངས་ནས། ཀྱེ་མ་སེམས་ཅན་འདི་དག་རང་བཞིན་གྱིས་རྣམ་པར་དག་པ་ཡིན་ཡང་མ་རྟོགས་པས་ད་དུང་འཁོར་
[5a.2]བའི་རྒྱ་མཚོར་འཁྱམས་པར་གྱུར་གྱི། དེས་ན་དེ་ལས་སྟོང་པ་ཉིད་དུ་གནས་པས་ཕན་མི་ཐོགས་པས་གཉིས་སུ་དམིགས་སུ་མེད་ཀྱང་སྙིང་རྗེ་ཆེན་པོའི་དབང་གིས་རེ་ཞིག་འཇམ་པའི་དབྱངས་སུ་གྱུར་པར་བྱའོ་ཞེས་རྣམ་པར་བསམས་ལ་རང་གི་སེམས་ཡོངས་སུ་གྱུར་པ་ལས་བྱུང་བའི་ཡི་གེ་མུཿ
[5a.3]དམར་པོ་དེ་ལས་ཟླ་བའི་དཀྱིལ་འཁོར་རྒྱ་སྐྱེགས་ཀྱི་མེ་ཏོག་གསར་པའི་མདོག་ཅན་དུ་གྱུར་ལ། དེའི་སྟེང་དུ་དབྱངས་ཀྱི་ཡི་གེ་ཁ་དོག་དམར་པོ་ཉིས་འགྱུར་བྱས་པ་ལས་མགོ་གྱེན་དུ་བལྟས་པ་བསམ་པར་བྱའོ། །དེའི་སྟེང་དུ་ཡི་གེ་མུཿགཉིས་པ་ཁ་དོག་དམར་པོ་ཅན་ལས་བྱུང་བའི་ཟླ་བའི་དཀྱིལ་
[5a.4]འཁོར་བསམ་པར་བྱའོ། །དེའི་སྟེང་དུ་ཀ་ནས་ཀྵའི་མཐར་ཐུག་པ་ལ་ཌ་ཌྷ་ད་དྷ་ཡ་ལ་ཞེས་བྱ་བའི་ཡི་གེས་བསྣན་པ་ཉིས་འགྱུར་དུ་བྱས་པའི་ཡི་གེ་བརྒྱད་ཅུ་མགོ་གྱེན་དུ་བལྟས་པ་མདོག་རྣམ་པར་དམར་བ་བསམ་པར་བྱའོ། །དེའི་སྟེང་དུ་ཡི་གེ་མུཿགསུམ་པ་ཡོངས་སུ་གྱུར་པ་ལས་ཨུཏྤ་ལ་ཤིན་ཏུ་སྔོ་བ་དེའི་ལྟེ་བར་ཡི་གེ་
[5a.5]མུཿབཞི་པ་ཁ་དོག་རྣམ་པར་དམར་བར་བསམ་པར་བྱའོ། །དེ་ནས་དེ་རྣམས་ལས་འོད་ཟེར་བྱུང་བས་ནམ་མཁའི་གཏོས་ཁྱབ་པར་སྤྲོས་ལ། དེ་བཞིན་གཤེགས་པ་མ་ལུས་པ་བ་སྤུའི་བུ་གའི་གསེབ་ནས་ཐུགས་ཀར་ཞུགས་ཏེ། དེ་རྣམས་ཀྱི་བསོད་ནམས་དང་ཡེ་ཤེས་ཀྱི་ཚོགས་དང་། ལྷན་
[5a.6]ཅིག་ཏུ་རོ་གཅིག་པར་གྱུར་ནས་བ་སྤུའི་བུ་ག་ནས་སླར་ལོག་སྟེ་དེ་རྣམས་ཉིད་ལ་ཞུགས་པར་བསམ་པར་བྱའོ། །དེ་ནས་དེ་དག་ཐམས་ཅད་ཡོངས་སུ་གྱུར་པ་ལས་འཕགས་པ་འཇམ་དཔལ་དབྱངས་ཀྱི་སྐུ་བནྡུ་ཀའི་མེ་ཏོག་ལྟར་དམར་བ། ཆོས་ཆེན་པོའི་ཚོན་གྱིས་བསྒྱུར་བ་ལྟ་བུ་པདྨའི་སྟེང་དུ་རྒོལ་བ་མ་
[5a.7]ལུས་པའི་སྙིང་གནོན་པ་ལྟ་བུའི་ཚུལ་གྱིས་ཟླ་བའི་དཀྱིལ་འཁོར་གྱི་སྟེང་དུ་སེམས་དཔའི་སྐྱིལ་མོ་ཀྲུང་གིས་བཞུགས་པ། འདས་པ་དང་མ་འོངས་པ་དང་། ད་ལྟར་བྱུང་བའི་བསྟན་བཅོས་མ་ལུས་པ་འཛིན་པའི་ཚུལ་གྱིས་ཕྱག་གཡོན་པས་ཐུགས་ཀར་གླེགས་བམ་བསྣམས་པ། འགྲོ་བ་
[5b]
[5b.1]མ་ལུས་པའི་མི་ཤེས་པའི་རི་བོ་འཇིག་པར་མཛད་པའི་ཚུལ་གྱིས་ཕྱག་གཡས་པ་ན་རལ་གྲི་བསྣམས་པ། ཟུར་ཕུད་ལྔ་དང་ལྡན་པ་གཞོན་ནུའི་ཆ་ལུགས་འཆང་བ། མི་བསྐྱོད་པ་དབུ་ལ་བཞུགས་པའི་ཅོད་པན་འཆང་བ་སྒེག་པའི་ཉམས་ཀྱིས་གནས་ཤིང་གཅིག་པུར་འགྲོ་བ་ལ་ཞི་བ་ཐུགས་རྗེ་
[5b.2]ལ་གཅིག་ཏུ་གཞོལ་བ། ཤིན་ཏུ་ཡིད་དུ་འོང་བའི་གཞིར་གྱུར་བར་བདག་ཉིད་བསྒོམ་པར་བྱའོ། །དེ་ནས་རང་གི་སྙིང་གར་ཡི་གེ་མུཿདམར་པོ་ཡོངས་སུ་གྱུར་པ་ལས་འཁོར་ལོ་རྩིབས་བརྒྱད་པ་བསྒོམ་པར་བྱའོ། །འཁོར་ལོའི་ཤར་དང་། ལྷོ་དང་ནུབ་དང་། བྱང་གི་རྩིབས་ལ་ཨ་ར་པ་ཙ་ཞེས་བྱ་བའི་
[5b.3]ཡི་གེ་བཞི་གོ་རིམས་ཇི་ལྟ་བ་བཞིན་དུ་བསམས་ལ། དབུས་སུ་ཡི་གེ་ནའོ། །མེ་དང་བདེན་བྲལ་དང་། རླུང་དང་དབང་ལྡན་གྱི་མཚམས་སུ་ནི་པྲ་པན་ཙ་ཞེས་བྱ་བ་སྔ་མ་བཞིན་བསམ་མོ། །རྩིབས་རྣམས་ཀྱི་བར་མཚམས་སུ་དབྱངས་ཀྱི་ཡི་གེ་བཅུ་དྲུག་ལས་གཉིས་གཉིས་སོ། །འཁོར་
[5b.4]ལོའི་མུ་ཁྱུད་ལ་ཀ་ལ་སོགས་པའི་ཡི་གེ་གཡས་ནས་ཀུན་ནས་བསྐོར་བར་བསྒོམ་པར་བྱའོ། །འདི་དག་ཐམས་ཅད་ཀྱང་བཅོམ་ལྡན་འདས་ཀྱི་སྐུ་མདོག་གི་མདངས་དང་འདྲའོ། །དེ་ནས་སྙིང་ག་ན་གནས་པའི་འཁོར་ལོ་ལས་བྱུང་བའི་འོད་ཟེར་རྩེ་མོ་ལྕགས་ཀྱུ་དང་འདྲ་བ་རྣམས་ཀྱིས་གདོད་མ་ནས་
[5b.5]ཡང་དག་པར་གྲུབ་པའི་བརྟན་པའི་འཁོར་ལོ་སྤྱན་དྲངས་ལ་དེ་དང་ལྷན་ཅིག་ཏུ་འདྲེས་པར་བདག་ཉིད་བསྒོམ་པར་བྱའོ། །དེའི་རྗེས་ལ་འཁོར་ལོའི་ཡི་གེའི་ཚོགས་རྣམས་ལས་འོད་ཟེར་དམར་པོའི་རྣམ་པ་བ་སྤུའི་བུ་ག་རྣམས་ནས་བྱུང་སྟེ། བརྟན་པའི་འཁོར་ལོའི་གཟུགས་སུ་གྱུར་པས་ནམ་མཁའི་
[5b.6]གཏོས་ཁྱབ་པར་བསྒོམས་ཏེ། དེས་རེག་པ་ཙམ་གྱིས་སེམས་ཅན་གྱི་ཚོགས་རྣམས་འཇམ་པའི་དབྱངས་ཀྱི་གཟུགས་སུ་བྱས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བ་སྤུའི་བུ་ག་ནས་འོད་ཟེར་གྱི་གཟུགས་ཀྱིས་ཐུགས་ཀར་ཞུགས་ཏེ། དེ་རྣམས་ཀྱི་བསོད་ནམས་དང་ཡེ་
[5b.7]ཤེས་ཀྱི་ཚོགས་དང་ལྷན་ཅིག་ཏུ་རོ་གཅིག་པར་གྱུར་ནས་དེ་ཉིད་ནས་སླར་བྱུང་ནས་འཕགས་པ་འཇམ་པའི་དབྱངས་ཀྱི་སྐུས་ནམ་མཁའི་ངོས་མ་ལུས་པ་ཁྱབ་པར་མཛད་ནས་སླར་བྱོན་ནས་སེམས་ཅན་གྱི་ཚོགས་མ་ལུས་པ་འཇམ་པའི་དབྱངས་ཀྱི་སྐུ་ལྟ་བུར་མཛད་ནས་ཉིད་ཀྱི་སྐུའི་ཐད་དུ་ལྷགས་ཏེ་
[6a]
[6a.1]བ་སྤུའི་བུ་ག་དེ་ཉིད་ནས་འཁོར་ལོ་དང་ཡི་གེའི་ཚོགས་དེ་དག་གི་ནང་འོད་ཟེར་གྱི་གཟུགས་ཀྱིས་བཞུགས་པར་བསམ་པར་བྱའོ། །ཇི་ལྟར་བཤད་པའི་ཚུལ་གྱིས་བཅོམ་ལྡན་འདས་ཀྱི་ང་རྒྱལ་ཤིན་ཏུ་བརྟན་པ་སྔོན་དུ་འགྲོ་བ་དང་། སྤྲོ་བ་དང་བསྡུ་བའི་རིམ་པ་ཇི་སྲིད་སྐྱོ་བར་མ་གྱུར་
[6a.2]གྱི་བར་དུ་དེ་སྲིད་དུ་རྒྱུན་དུ་བསྒོམ་པར་བྱའོ། །གལ་ཏེ་སྐྱོ་བར་གྱུར་ན་འོད་ཟེར་བསྡུས་ནས་སྤྲོ་བར་མི་བྱ་བར་འཁོར་ལོ་དང་ཡི་གེ་རྣམས་བསམ་པ་དང་། རང་གི་ཕྱག་མཚན་དང་དབྱིབས་ཀྱི་ཚུལ་ལ་རྟོག་ཅིང་སྔགས་བཟླས་པར་བྱའོ། །དེ་ལ་བཟླས་པར་བྱ་བའི་སྔགས་ནི། ཨོཾ་ཨ་ར་པ་ཙ་ན་མུཿ
[6a.3]ཞེས་བྱའོ། །ཉིན་དང་མཚན་མོ་བསྒོམ་པའི་རྒྱུ་ཡིས་ནི། །གང་ཚེ་འཁོར་ལོ་གསལ་བར་གྱུར་པ་དང་། །རང་གི་ལྷ་ཡི་གཟུགས་ཀྱི་ང་རྒྱལ་ནི། །གཡོ་བ་མེད་པ་ཉིད་དུ་གྱུར་པ་ནི། །བསྟན་བཅོས་ནུབ་པར་གྱུར་པ་ཇི་སྙེད་དང་། །གང་ཞིག་འཇིག་རྟེན་དུ་ནི་རིང་གནས་འགྱུར། །བསྟན་བཅོས་གང་ཞིག་དེ་
[6a.4]ལྟར་གནས་པ་དང་། །སྲོག་ཆགས་རྣམས་ཀྱི་སྐད་ནི་མ་ལུས་དང་། བཟོ་དང་སྒྱུ་རྩལ་ལ་སོགས་མཁས་གང་དང་། །དེ་ལས་གཞན་པའི་དབང་པོ་ལས་འདས་གང་། །དེ་དག་ཐམས་ཅད་ཚིག་དོན་བཅས་པར་གོ། །སྙིང་ལ་གཟུགས་བརྙན་ཚུལ་དུ་གནས་པར་འགྱུར། །ཕྱོགས་གང་ཚར་བཅད་པ་དང་
[6a.5]སྒྲུབ་འདོད་པ། །འབད་པ་མེད་པ་ཉིད་དུ་འཇུག་འགྱུར་ཏེ། །ཕུར་བུ་ལྷ་ཆེན་བརྒྱ་བྱིན་ཚངས་པས་ཀྱང་། །ཚར་ཆོད་སྒྲུབ་པ་དེ་ནི་རྒོལ་མི་ནུས། །འཁོར་ལོ་འདི་མེད་པར་ནི་ཤེས་རབ་དག །རྣོ་བར་མི་འགྱུར་དེ་མེད་ཕྲ་བ་ཡིས། །ཆོས་རྣམས་འཛིན་པར་མི་ནུས་དེ་མེད་པར། །ནམ་ཡང་འཁོར་བའི་
[6a.6]མཚོ་ལས་སྒྲོལ་མི་ནུས། །དེ་བས་རང་ལ་ཕན་འདོགས་པས། །འཁོར་ལོ་བསྒོམ་པ་མི་སྤང་ཞིང་། །གསང་སྔགས་རྒྱལ་པོ་བཟླས་པ་ཡང་། །མཉམ་པར་བཞག་པས་རྟག་ཏུ་བྱ། །བདག་གི་དགེ་བ་འདི་ཡིས་སྲིད་གསུམ་ལས་བྱུང་འཇིག་རྟེན་རྣམས། །བདེ་གཤེགས་མ་ལུས་ཐུགས་དང་གཅིག་
[6a.7]འགྱུར་འཇམ་དབྱངས་འདྲ་བར་ཤོག །བདག་དང་རྣམ་རྟོག་མང་པོའི་ཚོགས་བྲལ་བདེ་མཆོག་ལྡན་པ་ཡི། །ཕྱག་རྒྱ་ཆེན་པོ་དངོས་གྲུབ་ཚོགས་འདིས་ཚེ་འདིར་མྱུར་ཐོབ་ཤོག །བཅོམ་ལྡན་འདས་འཇམ་པའི་དབྱངས་ཀྱི་སྒྲུབ་ཐབས་བརྟན་པའི་འཁོར་ལོ་སྒོམ་པ་ཞེས་བྱ་བ་རྫོགས་སོ།། །།
[6b]
[6b.1]རྒྱ་གར་གྱི་མཁན་པོ་བཱིརྱ་བྷ་དྲ་དང་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་བའོ། །{T3308}༄༅༅། །རྒྱ་གར་སྐད་དུ། སྠི་ར་ཙཀྲ་སཱ་དྷ་ནཾ། བོད་སྐད་དུ། བརྟན་པའི་འཁོར་ལོའི་སྒྲུབ་པའི་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དཔལ་དང་ལྡན་པའི་དབྱངས་ཅན་
[6b.2]མ་ལུས་འཁྲུལ་པ་སྤངས་ཏེ་རབ་ཏུ་རྒྱས་ཤིང་འབར་བ་ཡི། །འོད་ཟེར་དཀར་པོ་གྱེན་དུ་འཕྲོ་ཞིང་དྲི་མེད་གཟུགས་ནི་རྒན་ཡང་བྱིས་པའི་ཆ་ལུགས་ཅན། །མཛེས་པའི་རལ་གྲི་འཕྱར་ཞིང་ཕྱག་ན་བསྣམས་པའི་ཤེས་རབ་ལ་ཡང་གུས་པས་རབ་ཏུ་འདུད། །རིན་ཆེན་འཁོར་ལོ་འདི་ནི་
[6b.3]བདག་གི་དྲན་པར་བྱ་བའི་ཕྱིར་ནི་བྲི་བར་རབ་ཏུ་བྱ། །ཀུན་མཁྱེན་ཡེ་ཤེས་རྒྱ་མཚོ་ནི། །ཕྱོགས་མཐའ་མེད་པར་རྣམ་པར་བསམ། །རབ་སྐྲག་སེམས་ཅན་ཚོགས་མང་ནི། །ཡང་དག་ཡོངས་སུ་བསྐྱབ་འདོད་པས། །ཡིད་བཞིན་ནོར་བུ་སེམས་འབྱུང་ཞིང་། །སྣ་ཚོགས་དག་གིས་དེ་
[6b.4]རྣམས་མཆོད། །བྱས་ནས་འཇིག་རྟེན་བསྐྱབ་དོན་དུ། །བདག་གི་ལུས་ཡིད་དབུལ་བར་བྱའོ། །དེ་ནས་དགེ་བ་འཕེལ་ཕྱིར་སྔགས་པས་འདི་བྱ་སྟེ། །སྡིག་པ་ཐམས་ཅད་དག་ནི་འཇིགས་པས་བཤགས་པར་བགྱི། །དགའ་བས་འགྲོ་བའི་དགེ་བ་དག་ལ་རྗེས་ཡི་རང་། །དཀོན་མཆོག་
[6b.5]གསུམ་ལ་ཡང་ནི་སྐྱབས་སུ་འགྲོ་བར་བྱ། །ཡང་དག་བྱང་ཆུབ་སེམས་ནི་གཟུང་བར་བགྱི། །དེ་ཡི་རྗེས་ལ་ཡང་ནི་བརྩམ་པར་བྱ། །གཟུང་དང་འཛིན་པ་སྤངས་ཤིང་འགྲོ་བ་འདི་ནི་རྨི་ལམ་དང་ནི་མིག་འཕྲུལ་ལྟ་བུ་སྟེ། །དག་ཅིང་ཡང་ནི་རང་བཞིན་འོད་གསལ་འགྱུར་བ་དེ་ཡང་ནམ་མཁའ་ལྟ་
[6b.6]བུར་མཉམ་པ་སྟེ། །བདག་ཉིད་ཀྱང་ནི་ཡིད་ཀྱི་རོལ་པ་དག་ཏུ་རྟོག་ཅིང་ཡང་དག་བསྡུས་པར་ངེས་བྱས་ལ། །ཡང་ནི་མུཿཡིག་འོད་ཟེར་དྲ་བས་བསྐོར་བ་དེ་ལས་བྱུང་བ་དག་ནི་བསྒོམ་པར་བྱ། །དེ་དག་ཡོངས་སུ་གྱུར་པས་ཡོངས་རྫོགས་དཀྱིལ་འཁོར་ཏེ། །ཁ་བའི་འོད་ཟེར་གུར་གུམ་ལྡེ་གུས་རབ་
[6b.7]བྱུགས་ཏེ། །དབྱངས་ཡིག་འབར་བའི་ཕྲེང་བས་མཉམ་པར་རབ་ཏུ་འཁྲིགས། །ཕྱོགས་སྒོ་གསལ་ཞིང་འབར་བ་རྣམ་པར་བསམ་པར་བྱ། །དེ་ལས་ཡང་ནི་ས་བོན་མུཿལས་ཡང་དག་བྱུང་། །དམར་པོའི་འོད་ཀྱི་དཀྱིལ་འཁོར་རྣམ་པར་བསྒོམ་པར་བྱ། །ཀ་ཁ་ལ་སོགས་མ་ལུས་ཡི་གེས་
[7a]
[7a.1]མཉམ་པར་བསྐོར། །སྟེང་དུ་མར་མེའི་འོད་དང་འདྲ་བ་སྒྲོན་མེ་འོད་གསལ་དམར་པོ་སྟེ། །དེ་ལ་ཡང་ནི་སྔགས་པས་མུཿཡིག་བསམ་པར་བྱ། །དེ་ལས་བྱུང་བའི་ཡིད་འོང་འོད་འབར་འདབ་མ་སྟེ། །འབར་བའི་ཨུཏྤལ་སྔོན་པོའི་འོད་ཀྱི་དྲ་བ་ཅན། །མུཿཡི་རྣམ་པའི་ས་བོན་
[7a.2]དབུས་སུ་རྣམ་པར་བསམ། །དེ་ལས་བྱུང་བའི་འོད་ཟེར་ལས་ནི་སངས་རྒྱས་སྤྲོས་པར་འགྲོ་བ་རབ་ཏུ་འགེངས་པར་བྱེད། །ཟླ་བ་ལ་གནས་བུང་བའི་ཡན་ལག་ལྟ་བུའི་འོད་ཀྱིས་ཤིན་ཏུ་འབར་བའི་ལྕང་ལོ་ཅན། །ཤིན་ཏུ་མཐུག་པའི་མུན་པ་རབ་རིབ་འཇོམས་ཤིང་མེད་པར་ཞལ་གྱི་འོད་ཟེར་དྲ་
[7a.3]བས་འབྱེད། །རྣམ་པ་ཐམས་ཅད་མཆོག་ནི་སྦྱིན་པའི་དཔལ་ལྡན་དབྱངས་ཀྱི་དབང་ཕྱུག་ནི། །འགྱིང་དང་སྒེག་པའི་རོ་ཡིས་མངོན་དུ་ཁྱབ་པར་བྱེད། །གཡོ་ཞིང་གཡང་གི་ཞལ་གྱིས་ཆེར་ནི་བཞད་འགྱུར་བ། །དཔའ་བོ་གཞོན་ནུའི་རྒྱན་ནི་རབ་ཏུ་འཆང་བ་པོ། །དེ་ཡི་གོ་འཕང་ཐོབ་པར་འདོད་པས་
[7a.4]བསམ་པར་བྱ། །དེ་ལྟར་ངག་དབང་རྣམ་བསམས་ནས། །མུཿཡིག་སྙིང་གར་བསྒོམ་པར་བྱ། །འབར་ཞིང་དམར་བའི་མདོག་གི་འོད། །བྱུང་ནས་སྒྲོལ་མའི་དཀྱིལ་འཁོར་ལ། །དེ་ལས་སྐྱེས་པའི་རྩིབས་བརྒྱད་པའི། །འཁོར་ལོས་མི་ཤེས་མུན་པ་འཇོམས། །སྣ་ཚོགས་འོད་ཀྱིས་དག་པར་
[7a.5]བྱ། །ཡེ་ཤེས་རང་བཞིན་དགེ་བར་བལྟ། །སྤྲུལ་པའི་ཉི་མ་འཆར་བའི་འོད། །སྒྲོལ་མ་གསལ་བའི་འོད་ཚོགས་འདྲ། །མེ་ཏོག་དམར་པོའི་རྣམ་པ་ལྟར། །ཡི་གེ་དམར་པོ་ཀུན་དུ་དགྲམ། །དེ་ལ་རེ་ཞིག་འཁོར་ལོའི་རྩིབས་རྣམས་སུ་ཡི་གེ་བསམ་པར་བྱ་སྟེ། ཤར་དང་ལྷོ་དང་ནུབ་དང་བྱང་ཕྱོགས་རྣམས་སུ་
[7a.6]རིམ་བཞིན་དུ་ཨ་ར་པ་ཙའོ། །ཡི་གེ་ན་ནི་ལྟེ་བར་རོ། །མེ་དང་བདེན་བྲལ་དང་རླུང་དང་དབང་ལྡན་རྣམས་སུ་སྔོན་བཞིན་དུ་ཡང་ནི་པྲ་བན་ཙ་ཡིག་གོ། །དེ་བཞིན་དུ་བར་དང་བར་རྣམས་སུ་ཨ་ལ་སོགས་པའི་དབྱངས་ཀྱི་ཚོགས་རྣམས་སོ། །ཕྱི་རོལ་བུ་ཀ་ལཾ་སོགས་པའི་གསལ་བྱེད་རྣམས་སོ། །
[7a.7]འདི་མི་གཡོ་བར་ངེས་པར་བྱས་ལ་ཕྱིས་ནི་འཁོར་ལོའི་ཡི་གེའི་ཚོགས་ཀྱི་འོད་ཟེར་གྱིས་སེམས་ཀྱི་མུན་པའི་དཀྱིལ་འཁོར་འཇོམས་པ། རང་གི་ལུས་པོའི་བ་སྤུའི་ཁུང་བུ་རྣམས་ནས་ཕྱིར་བྱུང་སྟེ། ཕྱོགས་བཅུའི་འཇིག་རྟེན་གྱི་ཁམས་ན་གནས་པའི་དེ་བཞིན་གཤེགས་པའི་བ་སྤུའི་བུ་ག་ནས་
[7b]
[7b.1]ཐུགས་ཀྱི་ཡེ་ཤེས་ཀྱི་བདུད་རྩི་དང་ལྷན་ཅིག་ཏུ་རོ་གཅིག་ཅིང་མཉམ་པར་གྱུར་ནས་དེ་རྣམས་ཕྱིར་བྱུང་སྟེ། བ་སྤུའི་བུ་ག་དེ་ཉིད་དུ་ཞུགས་ནས་རང་གི་ལུས་པོ་གསལ་བར་བྱེད་པ་ཡུན་རིང་དུ་བསམ་པར་བྱའོ། །བརྟན་པའི་སེམས་ཀྱིས་ཕྱིས་ནི་སྤྲོ་བ་དང་བསྡུ་བའི་རིམ་པས་ཇི་སྲིད་མངོན་དུ་གྱུར་པ་དེ་སྲིད་དུ་
[7b.2]བསྒོམ་པར་བྱའོ། །འཇམ་དཔལ་དང་ནི་གཉིས་མེད་གོ་འཕང་འཆང་ཞིང་ཡི་གེ་བཅས་ཉིད་ཡོངས་སུ་ཡིད་ལ་འདོད་བྱེད་པ། །འདི་ནི་འཁོར་ལོ་གསལ་པོས་ཉེ་བར་སོང་ཞིང་ཉིན་དང་མཚན་མོ་བསམ་གཏན་བྱེད་ལ་མངོན་སྦྱོར་བས། །དེ་ཡིས་སྔོན་མ་མཐོང་བའི་ངག་གི་རང་བཞིན་གྲངས་ཀྱི་རིག་
[7b.3]པའི་ཚོགས་ནི་མ་ལུས་དེ་ཡང་ནི། །ཇི་ལྟར་བདེ་བར་ཡིད་ནི་རབ་ཏུ་འཇུག་ཅིང་ནོར་བུའི་སྒྲོན་ལྟར་རབ་གསལ་མཐུག་པའི་མུན་འཇོམས་པ། །འཁོར་ལོ་འདིས་ནི་ཕན་པར་ཤེས་ནས་ཡིད་ལ་བྱེད་པ་ཡི། །ངོ་མཚར་ཆེད་དུ་ཡང་ནི་བརྟག་པར་བྱ། །ཡོངས་སུ་བརྟགས་པས་བདེ་གཤེགས་རང་གི་ངོ་བོ་ཉིད། །
[7b.4]རིང་པོར་མི་ཐོགས་པར་ནི་རབ་ཏུ་རྟོགས་པར་འགྱུར། །གང་ཞིག་འདིར་ནི་འཁོར་ལོ་རྣམ་པར་བཀོད་པའི་བསོད་ནམས་ཅི་སྐྱེས་པ། །བདག་གི་ཡིད་དང་སྐྱེ་འགྲོ་ཡིད་རྣམས་འཁོར་ལོ་དེ་ཡིས་གསལ་བར་ཤོག །འདིར་ནི་གཏི་མུག་མུན་པ་མཐུག་པོ་འཆར་ག་ཉི་མ་ལྟ་བུ་ཡིས། །འགྲོ་ཚོགས་འདི་
[7b.5]ནི་གང་གི་གཙོ་བོ་དཔལ་གྱི་རོལ་པར་འགྲོ་བར་ཤོག །བརྟན་པའི་འཁོར་ལོ་སྒྲུབ་པའི་ཐབས་སློབ་དཔོན་བྷ་བ་སྐན་དྷས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རི་བས་བསྒྱུར་ཅིང་ཞུས་པའོ།། {T3309}༄༅༅། །རྒྱ་གར་སྐད་དུ། མུཀྟ་ཀེ་ན་སྠི་ར་
[7b.6]ཙཀྲ་སཱ་དྷ་ནཾ། བོད་སྐད་དུ། ཚིག་ལྷུག་པའི་བརྟན་པའི་འཁོར་ལོའི་སྒྲུབ་ཐབས། །འཕགས་པ་འཇམ་དཔལ་ལ་ཕྱག་འཚལ་ལོ། །འཇམ་པའི་དཔལ་ལ་རབ་བཏུད་དེ། །མི་ཤེས་མུན་པ་འཇོམས་བྱེད་པ། །དེ་ཡི་འཁོར་ལོ་བསྒོམ་པའི་ཐབས། །ཚིག་འདི་གསལ་པོར་བྲི་བར་བྱ། །རྣལ་
[7b.7]འབྱོར་པ་བདེ་བའི་སྟན་ལ་གནས་ཏེ་བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་ནམ་མཁའ་ལ་གནས་པར་རྣམ་པར་བསམས་ནས་དེ་རྣམས་ལ་ཡིད་ཀྱིས་རང་བཞིན་གྱི་རྣམ་པ་སྣ་ཚོགས་པའི་མཆོད་པ་ཕུལ་ཏེ་སྡིག་པ་བཤགས་པ་ལ་སོགས་པ་བྱའོ། །དེ་ནས་སྣ་ཚོགས་འདི་སེམས་
[8a]
[8a.1]ཙམ་སྟེ་གཟུང་བ་དང་འཛིན་པ་སྤངས་ཏེ་རྨི་ལམ་ལྟ་བུ་དང་། གཟུགས་བརྙན་ལྟ་བུར་བདག་ཉིད་ཀྱིས་ངེས་པར་བྱས་ཏེ། གུར་གུམ་དམར་པོ་ལྟ་བུའི་མུཿལས་བསྐྱེད་པའི་ཟླ་བའི་འོད་ཟེར་དམར་པོ་ཅན་ལ་ཨ་ལ་སོགས་པའི་དབྱངས་ཡིག་འབར་བ་བལྟའོ། །དེའི་སྟེང་དུ་མུཿལས་སྐྱེས་པའི་
[8a.2]འོད་དམར་པོ་ཅན་གྱི་ཟླ་བ་ལ་འབར་བའི་ཀ་ལ་སོགས་པ་བལྟ་བར་བྱའོ། །དེའི་སྟེང་དུ་མུཿལས་སྐྱེས་པའི་འབར་ཞིང་དྲི་མ་མེད་པའི་ཨུཏྤལ་ཟེའུ་འབྲུ་ལ་མུཿས་མཚན་པ་རྣམ་པར་བསམས་ལ། དེ་ཡོངས་སུ་གྱུར་པ་ལས་གུར་གུམ་ལྟ་བུའི་གཞོན་ནུ་ཟུར་ཕུད་ལྔ་པ་རྒྱན་དང་སྒེག་པའི་ཉམས་དང་ལྡན་པ་
[8a.3]རལ་གྲི་དང་པོ་ཏི་བསྣམས་པའི་ངག་གི་དབང་ཕྱུག་ཏུ་བདག་ཉིད་ཟླ་བའི་གདན་ལ་བསྒོམ་པར་བྱའོ། །དེའི་སྙིང་གར་མུཿལས་སྐྱེས་པའི་བརྟན་པའི་འཁོར་ལོ་རྩིབས་བརྒྱད་པ་འོད་ཀྱི་རང་བཞིན་འབར་བའི་ཨ་ལ་སོགས་པའི་ཕྲེང་བས་བརྒྱན་པའི་ཕྱི་རོལ་དུ་འབར་བའི་ཀ་ལ་སོགས་པའི་ཕྲེང་བས་བསྐོར་བ་སྟེ།
[8a.4]དེའི་ལྟེ་བ་ལ་ཨའོ། །ཤར་གྱི་རྩིབས་ལ་རའོ། །ལྷོའི་རྩིབས་ལ་པའོ། །ནུབ་ཀྱི་རྩིབས་ལ་ཙའོ། །བྱང་གི་རྩིབས་ལ་ནའོ། །མེ་ལ་སོགས་པའི་མཚམས་བཞི་རུ་ནི་པྲ་བན་ཙ་ཞེས་བྱ་བའི་ཡི་གེ་རྣམས་གུར་གུམ་ལྟ་བུའི་རྣམ་པར་བསམས་ལ། དེ་ལ་འཁོར་ལོའི་འོད་ཀྱི་ཚོགས་ཀྱིས་ལུས་ཀྱི་ནང་
[8a.5]གསལ་བར་བྱས་ནས་བ་སྤུའི་ཁུང་བུ་སོ་སོ་ནས་ཕྱིར་བྱུང་སྟེ། ཕྱོགས་བཅུའི་འཇིག་རྟེན་གྱི་ཁམས་གསལ་བར་བྱས་ནས་ཡང་བ་སྤུའི་ཁུང་བུ་དེ་ཉིད་དུ་ཕྱིར་ཞུགས་ཏེ། ལུས་ཀྱི་ནང་གསལ་བར་བྱེད་པར་ཡུན་རིང་དུ་བསམ་པར་བྱའོ། །ཨོཾ་ཨ་ར་པ་ཙ་ན་མུཿཞེས་བྱ་བ་ནི་བཟླས་པའི་སྔགས་སོ། །བརྟན་
[8a.6]པའི་འཁོར་ལོ་སྒྲུབ་པའི་ཐབས། །བྱས་པའི་བསོད་ནམས་གང་བསགས་པ། །དེ་ཡིས་འགྲོ་བ་ཐམས་ཅད་ནི། །འཇམ་པའི་རྡོ་རྗེ་མཚུངས་པར་ཤོག །ཚིག་ལྷུག་པའི་བརྟན་པའི་འཁོར་ལོ་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།
[8a.7]{T3310}༄༅༅། །རྒྱ་གར་སྐད་དུ། མུཀྟ་ཀེ་ན་ཨ་ར་པ་ཙ་ན་སཱ་དྷ་ནཾ། བོད་སྐད་དུ། ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དང་པོ་སྔགས་པས་ཡིད་མཐུན་པའི་ཕྱོགས་གཅིག་ཏུ་བདེ་བའི་གདན་ལ་ཉེ་བར་གནས་ལ་རང་གི་སྙིང་གར་ཡི་གེ་ཨ་ལས་བྱུང་
[8b]
[8b.1]བའི་ཟླ་བ་ལས། ལྔ་པའི་བཞི་པ་ས་བོན་ལ་ཡི་གེ་ཨིའི་མཐའ་དང་། ཚེག་དྲག་གཉིས་དང་ལྡན་པར་བསྒོམས་ལ། དེའི་འོད་ཟེར་གྱི་ཚོགས་ཀྱིས་སྙིང་ལ་གནས་པའི་ཉོན་མོངས་པའི་མུན་པ་བསལ་ནས་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཞེས་བྱ་བ་ཚངས་པའི་གནས་བཞི་བསྒོམ་པར་
[8b.2]བྱའོ། །འོག་ནས་འབྱུང་བའི་རིམ་པས་བྱམས་པ་གང་ཞེ་ན། སེམས་ཅན་ཐམས་ཅད་ལ་བུ་གཅིག་པ་ལྟ་བུའི་སེམས་དགའ་བའོ། །སྙིང་རྗེ་གང་ཞེ་ན། སྡུག་བསྔལ་གསུམ་གྱིས་སྡུག་བསྔལ་བའི་སེམས་ཅན་རྣམས་འཁོར་བའི་རྒྱ་མཚོ་ལས་གདོན་པར་འདོད་པའོ། །དགའ་བ་གང་ཞེ་ན། དགེ་བའི་
[8b.3]རྩ་བ་ལ་སོགས་པ་བསྐྱེད་པས་གཞན་གྱིས་ལོངས་སྤྱོད་པའི་དབང་ཕྱུག་ལ་སོགས་པ་ལ་སེམས་དགའ་བའོ། །བཏང་སྙོམས་གང་ཞེ་ན། གང་གི་རྣམ་པ་ཐམས་ཅད་དུ་ཁོང་ཁྲོ་བ་དང་རྗེས་སུ་ཆགས་པར་བྱེད་པ་དང་བྲལ་བའི་ཆོས་ཉིད་རང་གི་ངང་གིས་འཇུག་པའོ་ཞེས་བྱའོ། །ཚངས་པའི་གནས་བཞི་
[8b.4]བསྒོམས་པའི་རྗེས་སུ་རང་གི་སྙིང་གའི་ས་བོན་ཉིད་ལས་བྱུང་བའི་འོད་ཀྱིས་ནམ་མཁའི་ཕྱོགས་མ་ལུས་པ་ཁྱབ་པའི་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་སྤྲོ་བ་དང་སྡུད་པར་བྱེད་པས། འགྲོ་བའི་དོན་གྱི་བྱ་བ་གཅིག་ཏུ་བྱེད་པར་བལྟས་ལ། རང་གི་སྙིང་གའི་ས་བོན་གྱི་འོད་ཀྱིས་
[8b.5]ལྷ་རྫས་ཀྱི་དྲི་དང་མེ་ཏོག་ལ་སོགས་པ་རྣམ་པའི་བྱེ་བྲག་ཕྱུང་སྟེ། མཎྜལ་སྔོན་དུ་འགྲོ་བས་ཐལ་མོ་སྦྱར་ཏེ་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་ཞབས་ཀྱི་པདྨོ་ལ་སྤྱི་བོས་གཏུགས་ཤིང་གུས་པས་ཕྱག་འཚལ་ཏེ་འོད་ཟེར་དེ་ཉིད་ལས་བྱུང་བའི་མེ་ཏོག་དང་། བདུག་པ་
[8b.6]དང་། མར་མེ་དང་། དྲི་དང་། ཕྱེ་མ་དང་། ཆོས་གོས་དང་། རྒྱལ་མཚན་དང་། དྲིལ་བུ་དང་། བ་དན་ལ་སོགས་པས་དེ་རྣམས་ལ་ཕྱི་དང་ནང་གི་མཆོད་པས་ཡང་དག་པར་མཆོད་པ་ནི་མཆོད་པའོ། །དེ་ནས་སྡིག་པ་བཤགས་པ་ལ་སོགས་པ་བྱས་ཏེ། སྐྱེ་བ་ཐམས་ཅད་དུ་སྡིག་པ་བདག་གིས་
[8b.7]ཉེ་བར་བསགས་པ་གང་། འདོད་ཆགས་ལས་སྐྱེས་པའམ། ཞེ་སྡང་ལས་སྐྱེས་པའམ། གཏི་མུག་ལས་སྐྱེས་པའམ། ལུས་སམ་ཡིད་དམ། ངག་གམ། དེ་ཐམས་ཅད་ཀྱིས་བྱས་པ་སོ་སོར་བཤགས་པར་བགྱིའོ་ཞེས་པ་ན་སྡིག་པ་བཤགས་པའོ། །བསོད་ནམས་གང་དེ་བཞིན་གཤེགས་
[9a]
[9a.1]པ་ཐམས་ཅད་ཀྱིས་ཡང་དག་པར་རྫོགས་པའི་བྱང་ཆུབ་ལ་མཉམ་པར་བརྟེན་པ་གང་ཡིན་པ་དང་། རང་སངས་རྒྱས་དང་། བླ་མ་དམ་པ་དང་། དེ་ཐམས་ཅད་ཀྱི་བསོད་ནམས་ཉིད་ལ་རྗེས་སུ་ཡི་རང་ངོ་། །བསོད་ནམས་ལ་རྗེས་སུ་ཡི་རང་བའོ། །དུས་གསུམ་མ་ལུས་པར་གནས་པའི་
[9a.2]སངས་རྒྱས་ཕྱོགས་མཐའ་མེད་པར་ཁྱབ་པའི་སྙིང་རྗེའི་ཡོན་ཏན་གྱི་ཚོགས་ཀྱིས་བརྒྱན་པ་དང་། སྐྱོན་ཐམས་ཅད་སྤངས་པའི་དགེ་འདུན་དང་། དམ་པའི་ཆོས་ཤེས་པར་བྱ་བ་ལ་གུས་པར་སྐྱབས་སུ་མཆིའོ། །གསུམ་ལ་སྐྱབས་སུ་འགྲོ་བའོ། །ཡོངས་སུ་དག་པའི་རྒྱལ་བའི་ལམ་བརྟེན་ཏེ། ཚངས་
[9a.3]པ་དབང་པོ་དྲག་པོ་ལ་སོགས་རྙེད་དཀའ་བ། །གང་འདིར་བསོད་ནམས་ཚོགས་འདི་བདག་གིས་ཉེར་བསགས་པ། །བྱང་ཆུབ་སེམས་འདི་རབ་ཏུ་བསྐྱེད་པར་བགྱི། །རྒྱལ་བའི་ལམ་བརྟེན་པ་དང་བྱང་ཆུབ་ཀྱི་སེམས་བསྐྱེད་པ་གཉིས་སོ། །དེ་ལྟར་བླ་ན་མེད་པའི་མཆོད་པ་རྣམ་པ་བདུན་གྱི་རྗེས་སུ་བླ་མའི་
[9a.4]གསུང་གིས་ཕྱི་དང་ནང་དུ་བཅས་པ་སྟོང་པ་ཉིད་དུ་རྣམ་པར་བསྒོམས་ལ། ཡང་བརྟན་པར་བྱ་བའི་དོན་དུ། ཨོཾ་སྭ་བྷཱ་ཝ་ཤུདྡྷཿསརྦདྷརྨཿསྭབྷཱ་ཝ་ཤུདྡྷོ྅ཧཾ། ཞེས་བྱ་བའི་ཚིག་གིས་བརྗོད་པར་བྱའོ། །དེའི་རྗེས་ལ་རང་གི་སེམས་ཀྱི་རྣམ་པ་ཙམ་དང་ཞིང་ཐོགས་པ་མེད་པའི་ངོ་བོ་ཉིད་དུ་དབྱངས་ཡིག་ལས་
[9a.5]བྱུང་བའི་ཟླ་བའི་དཀྱིལ་འཁོར་གྱི་རྣམ་པར་བསམས་ལ། དེའི་རྗེས་ལ་སྔོན་དུ་བསྟན་པའི་ས་བོན་ནོ། །དེ་ལས་ཟླ་བ་དང་། །ས་བོན་ཡོངས་སུ་གྱུར་པ་ལས་རལ་གྲི་འོད་འཕྲོ་བའི་གཟུགས་སོ། །དེ་ནས་འཆང་བའི་དབུས་སུ་རི་བོང་འཛིན་པ་དང་ལྡན་པ་སྔོན་དུ་བསྟན་པའི་ས་བོན་ཏེ། རལ་གྲི་དང་ས་བོན་
[9a.6]དེ་ཡོངས་སུ་གྱུར་པ་ལས་འཇམ་པའི་དབྱངས་སྟོན་ཀའི་ཟླ་བ་དང་མཚུངས་པའི་འོད་ཕྱོགས་བཅུའི་འཇིག་རྟེན་གསལ་བར་བྱེད་པའི་འོད་ཀྱི་ཚོགས་འཆང་བ། ཕྱག་གཉིས་པ་གཞོན་ནུའི་རྣམ་པ་ཅན་གཡས་པ་ན་མི་ཤེས་པ་མ་ལུས་པ་གཅིག་ཏུ་གཅོད་པར་བྱེད་པའི་ཤེས་རབ་ཀྱི་རལ་གྲི་ཕྱག་ན་
[9a.7]བསྣམས་པའོ། །གཡོན་པ་ན་མ་ལུས་པའི་ཐབས་སུ་གྱུར་པའི་བསྟན་བཅོས་ཀྱི་ཚོགས་ཀྱིས་གང་བའི་པོ་ཏི་གཅིག་ཕྱག་ན་བསྣམས་པའོ། །རྒྱན་ཐམས་ཅད་ཀྱིས་བརྒྱན་པ་ན་བཟའ་དམར་པོ་འཆང་བ། བསམ་གཏན་ལ་རྩེ་གཅིག་ཏུ་གནས་པ། རབ་ཏུ་རྒྱས་པའི་པདྨའི་ཞལ། པདྨའི་འདབ་
[9b]
[9b.1]མའི་སྤྱན་སྐྱེས་བུ་ཆེན་པོའི་མཚན་གྱིས་བསྐྱེད་ཅིང་མཛེས་པ། ཨིནྡྲ་ནཱི་ལའི་ནོར་བུ་ལྟ་བུ་དབུ་སྐྲ་བསྡོམས་པའི་རལ་པའི་ལྕང་ལོ་ལྔ་དང་ལྡན་པའོ། །པདྨ་དཀར་པོ་འདབ་མ་བརྒྱད་པ་དང་། ཟླ་བ་ལ་རྡོ་རྗེ་སྐྱིལ་ཀྲུང་གིས་ཉེ་བར་གནས་པ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ངོ་བོ་ཉིད་
[9b.2]འཇམ་དཔལ་གྱི་གཟུགས་སུ་བདག་ཉིད་བསྒོམས་ལ། དེ་ལྟར་རྣལ་འབྱོར་པ་དམ་ཚིག་སེམས་དཔའི་ང་རྒྱལ་དང་ལྡན་པས་རང་གི་སྙིང་གར་ཨ་ལས་རྫོགས་པའི་འཁོར་ལོ་དཀར་པོ་རྩིབས་བརྒྱད་པ་འོད་ཟེར་གྱི་ཚོགས་སྤྲོས་པས། མ་ལུས་པའི་མི་ཤེས་པ་འཇོམས་པར་བྱེད་པའི་གཡས་སུ་མྱུར་
[9b.3]དུ་འཁོར་བའི་རིམ་པས་བལྟས་ལ། དེའི་སྟེང་དུ་མ་རེག་པར་དབྱངས་ཡིག་དང་པོ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་ལྔ་གོ་རིམས་བཞིན་ཇི་ལྟ་བར་མེ་འབར་བའི་རྣམ་པ་ལྟ་བུར་འོད་ཟེར་དང་བཅས་པས་མ་ལུས་པའི་མི་ཤེས་པ་མེད་པར་བྱེད་པ་བླ་མའི་མན་ངག་གིས་རྣམ་པར་བསྒོམ་
[9b.4]པར་བྱའོ། །ལྷའི་རྣམ་པ་རྫོགས་པ་ལ་སྔགས་པས་སྐྱོ་བ་མེད་པར་སྤྲོ་བ་ལ་སོགས་པ་བྱས་ལ་བཟླས་པ་བྱའོ། །ཡང་ན་སྙིང་གའི་ཟླ་བའི་དབུས་སུ་ཨ་དཀར་པོའི་རྣམ་པ་ལས་རྫོགས་པའི་ཨ་ར་པ་ཙ་ན་ཞེས་བྱ་བ་དཀར་པོ་རྒྱན་ཐམས་ཅད་ཀྱིས་བརྒྱན་པ་དགའ་ཞིང་བསམ་གཏན་ལ་རྩེ་གཅིག་ཏུ་
[9b.5]གནས་ཏེ། རྡོ་རྗེ་སྐྱིལ་ཀྲུང་གིས་ཉེ་བར་བཞུགས་པ། གཡས་པ་དང་གཡོན་པ་གཉིས་ཀྱིས་རལ་གྲི་དང་པོ་ཏི་བསྣམས་པ། ཨིནྡྲ་ནཱི་ལ་ལྟ་བུ་མ་ལུས་པ་བསྡུས་པའི་རལ་པའི་ལྕང་ལོ་ལྔ་དང་ལྡན་པ། འོད་འཕྲོ་བའི་ཟླ་བ་ལྟ་བུའི་ཞལ། སྨྲ་བ་རྣམས་ཀྱི་མཆོག་ཟླ་བ་ལ་རང་གི་ས་བོན་དང་བཅས་
[9b.6]པ་སྙིང་གར་བསྒོམས་ལ། དེའི་མདུན་དུ་ར་དཀར་པོ་ལས་བྱུང་བའི་དྲ་བ་ཅན་མའི་འོད་རྗེ་བཙུན་མ་ཨ་ར་པ་ཙ་ན་ལྟ་བུའི་མདོག་དང་ཕྱག་ལ་སོགས་པ་དང་ལྡན་པའོ། །རང་གི་སྙིང་གར་ཟླ་བ་ལ་རང་གི་ས་བོན་དང་ལྡན་པར་བལྟའོ། །དེའི་རྗེས་སུ་རྒྱབ་ཏུ་པ་དཀར་པོ་ལས་རྫོགས་པའི་ཟླ་བ་ཅན་གྱི་འོད་སྙིང་
[9b.7]གར་ཟླ་བ་ལས་ས་བོན་དང་ལྡན་པར་དམིགས་པར་བྱའོ། །དེ་ནས་གཡས་སུ་ཙ་དཀར་པོ་ལས་རྫོགས་པའི་སྐྲ་ཅན་མ་དཀར་མོ་རྒྱན་ཐམས་ཅད་ཀྱིས་རྣམ་པར་བརྒྱན་པ་ཤ་རྒྱས་ཤིང་ནུ་མ་འཕྱང་བ་རང་གི་སྙིང་གའི་ཟླ་བ་ལ་ས་བོན་དང་ལྡན་པ་རྣམ་པར་བསམ་མོ། །བྱང་དུ་ན་དཀར་པོ་ལས་
[10a]
[10a.1]རྫོགས་པའི་ཉེ་བའི་སྐྲ་ཅན་མ། རང་གི་སྙིང་གར་ཟླ་བ་ལ་ས་བོན་གྱིས་ཡང་དག་པར་ལྡན་པ་བསྒོམས་ཏེ་ཐམས་ཅད་ཨ་ར་པ་ཙ་ན་ལྟ་བུ་རྣམ་པར་བསམ་མོ། །ལྷའི་ཚོགས་འདི་སྙིང་གའི་ས་བོན་ལས་འོད་ཟེར་སྤྲོ་བ་དང་བསྡུས་པས་འགྲོ་བའི་མི་ཤེས་པའི་ཚོགས་གཅོད་ཅིང་ཆོས་
[10a.2]ཀྱི་བདུད་རྩི་མ་ལུས་པའི་བསྟན་བཅོས་དང་བཟོའི་གནས་ལ་སོགས་པས་སེམས་ཅན་ཐམས་ཅད་ཚིམ་པར་ཡང་དང་ཡང་དུ་དང་ཞིང་ཐོགས་པ་མེད་པའི་གཟུགས་ཀྱི་བདག་ཉིད་དུ་བླ་མའི་མན་ངག་གིས་བསྒོམ་པར་བྱའོ། །མཉམ་པར་བཞག་པའི་སྔགས་པས་བཟླས་པ་བྱས། །ཨོཾ་ནི་དང་པོར་
[10a.3]རོ། །ས་བོན་ལྔ་དབུས་སུ་དམ་ཚིག་སེམས་དཔའི་ས་བོན་མཐའ་རུ་སྟེ། གང་ཡང་ལྡང་བའི་སེམས་ཡོད་པར་གྱུར་ན། དེ་ལ་རང་གི་སྔགས་ནི་བླ་མའི་གདམས་ངག་གིས་བརྗོད་ལ་དེའི་རྗེས་སུ་ཡི་གེ་བརྒྱ་པ་བརྗོད་པར་བྱ་སྟེ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲས་ཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ།
[10a.4]སུ་ཏོཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཿཞེས་བྱ་བའི་ཡི་གེ་བརྒྱ་པ་བརྗོད་པའི་རྗེས་ལ་བསྡུ་སྤྲོ་ལ་སོགས་པ་རྫོགས་པར་བྱས་ཏེ། དམ་ཚིག་སེམས་
[10a.5]དཔའི་གཟུགས་ཀྱིས་སྤྱོད་ལམ་ཐམས་ཅད་དུ་རྣལ་འབྱོར་པས་མཉམ་པར་མ་བཞག་པའི་སྐབས་སུ་གནས་པར་བྱས་ནས། ཡང་དག་པའི་ཡེ་ཤེས་རྒྱ་མཚོའི་མཐར་ཕྱིན་པར་གྱུར་ནས་དུས་རིང་དུ་མི་ཐོགས་པར་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །ཚིག་ལྷུག་པ་དག་གསལ་པོར་ནི། །དཀར་
[10a.6]པོ་སྒྲུབ་ཐབས་ཡང་དག་བྲིས། །པདྨའི་འབྱུང་གནས་བསོད་ནམས་གང་། །དེ་ཡིས་སྲིད་ལས་གྲོལ་བར་ཤོག །ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས་སློབ་དཔོན་པདྨ་འབྱུང་གནས་ཀྱིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་བ་རིས་བསྒྱུར་བའོ།། །།
[10a.7]{T3311}༄༅༅། །རྒྱ་གར་སྐད་དུ། ཨ་ར་པ་ཙ་ན་སཱ་དྷ་ནཾ། བོད་སྐད་དུ། ཨ་ར་པ་ཙ་ནའི་སྒྲུབ་ཐབས། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཟླ་བ་ལྟར་དཀར་གླེགས་བམ་རལ་གྲིས་ཕྱག་མཚན་པ། །ཤིན་ཏུ་མཛེས་ཤིང་མཆོག་གི་གཞོན་ནུ་ཟུར་ཕུད་ལྔ། །དགའ་མཆོག་ཐར་པ་
[10b]
[10b.1]རྒྱས་ཤིང་པདྨའི་འདབ་འདྲའི་སྤྱན། །བློ་ངན་སྲེག་མཁས་འཇམ་པའི་དབྱངས་ལ་ཕྱག་འཚལ་ལོ། །གང་གིས་ལོ་ཕྱེད་རྒྱུན་མི་འཆད་པར་མངོན་བསྒོམས་པས། །སྐྱེ་བོ་ཨ་ར་པ་ཙ་ན་ནི་ངེས་འགྲུབ་འགྱུར། །དངོས་པོ་མ་ལུས་རྟོགས་པའི་བྱང་ཆུབ་མཆོག་ཐོབ་པའི། །རིན་ཆེན་འཁོར་ལོའི་མན་ངག་
[10b.2]ཤིན་ཏུ་བསྡུ་བར་བྱ། །མཉམ་གཙང་བསྔགས་པའི་ཡིད་དུ་འོང་བའི་ས་ཡི་ཆར། །དྲི་ཞིམ་མེ་ཏོག་གཅལ་བཀྲམ་སྤོས་ཆུས་ཆག་ཆག་གདབ། །ལ་ལར་འཇམ་ཞིང་ཡིད་འོང་སྟན་ལ་ཉེར་གནས་ཏེ། །བདེ་བ་ཤིན་ཏུ་མཚན་མེད་བྱང་ཆུབ་སེམས་བསྒོམ་བྱ། །གསང་སྔགས་རང་བཞིན་དག་པ་བརྗོད་
[10b.3]ནས་ནི། །མ་ལུས་ཀུན་ནས་སྟོང་པར་རྣམ་བསྒོམས་ཤིང་། །དངོས་དོན་དོན་བཅས་བདག་གི་ལུས་ཉིད་ཀྱང་། །དེ་ནི་འོད་གསལ་མཐའ་རུ་ལན་གཅིག་བསམ། །དེ་ནས་བར་སྣང་རང་ཉིད་ཟླ་དཀྱིལ་ནི། །དབྱངས་ཡིག་དང་པོས་འོད་དང་ལྡན་པ་བསྒོམ། །དེ་བཞིན་འདིར་ནི་ཤིན་ཏུ་དཀར་བའི་དྷཱིཿ། །
[10b.4]དེ་ནི་འཇམ་དབྱངས་དྲི་མ་མེད་པར་བསྒོམ། །ཟླ་བ་བྱེ་བའི་འོད་དང་མཚུངས་པ་ལ། །རྒྱན་རྣམས་ཐམས་ཅད་རབ་ཏུ་འབར་བ་སྟེ། །ཆགས་བཅས་ཅུང་ཟད་བཞད་ཅིང་ཡིད་འོང་བར། །བསམ་གཏན་མཐར་ཕྱིན་པདྨའི་སྟེང་བཞུགས་བསམ། །རང་གི་སྙིང་གའི་ཡི་གེ་ཨ་མཆོག་ནི། །རྣམ་པར་འཕྲོ་
[10b.5]བར་གྱུར་པ་ལེགས་བསམས་ལ། །མཉམ་མེད་འོད་ཟེར་རྣམས་ཀྱི་དྲ་བ་སྟེ། །འཁོར་ལོའི་རྩིབས་ནི་བརྒྱད་པའི་གཟུགས་སུ་བསམ། །དེ་ཡི་སྟེང་དུ་ཟླ་བའི་གཟུགས་ཉིད་ལ། །སྔགས་པ་ཡིས་ནི་དེ་ལ་བསྒོམ་བྱ་སྟེ། །ཟླ་བའི་འོད་ལྟར་ཤིན་ཏུ་དཀར་བ་ཡི། །མགོན་པོ་འཇམ་པའི་དབྱངས་ནི་དེ་
[10b.6]ཉིད་དོ། །གཡས་སུ་ཤིན་ཏུ་མཛེས་པའི་གཟུགས་ལྡན་པ། །རྣམ་པར་འཛུམ་ཞིང་ཟུར་གྱིས་ལྟ་བ་དང་། །ནུ་མ་གཉིས་ནི་ཤིན་ཏུ་རྒྱས་པ་ཡི། །སྐྲ་ཅན་དེ་ལ་བལྟ་བར་བསམ་པར་བྱ། །གཡོན་ལོགས་སུ་ནི་ཉེ་བའི་སྐྲ་ཅན་མ། །ཤིན་ཏུ་མཛེས་ཤིང་སྒེག་པའི་གཟུགས་ཅན་མ། །ཡོན་ཏན་མ་
[10b.7]ལུས་པ་ཡི་གཏེར་གྱུར་པའི། །དེ་གཉིས་ཙ་དང་ན་ལས་བསྒོམ་པར་བྱ། །མདུན་དུ་དྲ་བ་ཅན་འོད་བསམ་པ་ནི། །དྲི་མེད་རབ་དཀར་ར་ལས་བྱུང་བ་ཉིད། །ཟླ་འོད་ཡིད་དུ་འོང་ཞིང་འོད་ལྡན་ཏེ། །པ་ལས་བྱུང་བ་རྒྱབ་ཏུ་གཞག་པར་བྱ། །ཡང་ན་ཡི་གེའི་ར་བ་འབར་བ་ཡི། །རྒྱ་ཆེན་མཐུ་ལྡན་
[11a]
[11a.1]རྣམ་པར་བསྒོམ་བྱ་སྟེ། །དེས་ནི་མི་ཤེས་རི་བོ་འཇོམས་པ་དང་། །ཡེ་ཤེས་དམ་པ་རྙོག་པ་མེད་པར་བྱེད། །འོག་ཏུ་འཁོར་ལོ་མྱུར་དུ་འཁོར་བསམས་ལ། །གཏི་མུག་མུན་ནག་མ་ལུས་རྣམ་པར་སེལ། །རང་ལྷའི་སྐུ་ནི་མི་འགྱུར་ཉིད་བསམ་ཤིང་། །ཟླ་བའི་གཟུགས་འདྲའི་
[11a.2]འོད་ཟེར་དྲ་བ་ཆེ། །ཟླ་འདྲའི་འོད་ཟེར་སྤྲིན་ནི་རྒྱ་ཆེན་པོ། །ཕྱུང་ནས་ཕྱོགས་བཅུར་སོང་ཞིང་འབར་བསམས་ལ། །བདག་ལུས་དེ་བཞིན་སེམས་ཅན་རྣམ་བརྒྱན་ཏེ། །འོངས་ནས་སྙིང་གའི་ཟླ་བའི་གཟུགས་ལ་བཞུགས། །དེ་ནས་སྔགས་མཆོག་ཨ་ར་པ་ཙ་ན། །སྔགས་པའི་མཆོག་གིས་
[11a.3]ལེགས་པར་བཟླས་པར་བྱ། །བློ་གྲོས་བརྟན་པས་མན་ངག་ཇི་བཞིན་དུ། །བསྒོམས་ན་མྱུར་དུ་ས་མཆོག་རྣམས་དང་ནི། །དྲི་མེད་ཡིད་འོང་ཕ་རོལ་ཕྱིན་ཀུན་དང་། །བློ་ངན་ཉེས་བཅོམ་རྒྱལ་བ་ཐོབ་པར་འགྱུར། །བླ་མ་དམ་པ་དགའ་རབ་རྡོ་རྗེ་ནི། །དམ་པའི་ཆོས་རྣམས་མཆོག་གི་མཛོད་གྱུར་པའི། །
[11a.4]བདེ་བར་གཤེགས་པའི་ཚོགས་ཀྱི་སྤྱན་སྔ་རུ། །གང་ཞིག་ཆོ་ག་བཞིན་དུ་དབང་བསྐུར་བ། །བློ་གྲོས་བཟང་པོ་མི་ཕམ་བཤེས་གཉེན་གྱིས། །སྐྱེ་བོ་རྣམས་ཀྱི་བློ་གྲོས་དག་བྱའི་ཕྱིར། །ཨ་ར་པ་ཙ་ན་ཡི་འཁོར་ལོ་མཆོག །དེ་ཡི་གཞུང་དུ་ཡང་དག་སྦྱར་བ་ཡིན། །འཁོར་ལོའི་ཆོ་གའི་མཆོག་ནི་
[11a.5]ལེགས་སྦྱར་བས། །བདག་གིས་བསོད་ནམས་རྒྱ་ཆེན་ཐོབ་འདུས་པས། །གང་དེས་འགྲོ་ཀུན་སྡིག་པ་ལས་རྒྱལ་ཞིང་། །བདེ་མཐའ་གཅིག་ཏུ་འཇམ་དབྱངས་ཉིད་གྱུར་ཅིག །ཨ་ར་པ་ཙ་ནའི་སྒྲུབ་ཐབས་སློབ་དཔོན་ཆེན་པོ་མི་ཕམ་བཤེས་གཉེན་གྱིས་མཛད་པ་རྫོགས་སོ། །རྒྱ་གར་གྱི་མཁན་
[11a.6]པོ་ཀ་མ་ལ་གུཔྟ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །{T3312}༄༅༅ ། །རྒྱ་གར་སྐད་དུ། ཨཱརྱ་མཉྫུ་ཤྲཱི་སཱ་དྷ་ནཾ། བོད་སྐད་དུ། འཕགས་པ་འཇམ་དཔལ་གྱི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །རྣམ་དག་
[11a.7]འཇམ་དཔལ་སྒྲུབ་པའི་ཐབས། །ཤིན་ཏུ་གསལ་ཞིང་མདོར་བསྡུས་པ། །མི་ཤེས་རབ་རིབ་འཇོམས་པར་བྱེད། །དམ་པ་རྣམས་ཕྱིར་ལེགས་བརྗོད་བྱ། །སྟོང་པ་ཉིད་ཀྱི་རྗེས་སུ་དེ་བཞིན་དུ་སྙིང་གར་ཡི་གེ་མུཿསེར་པོ་ཡོངས་སུ་གྱུར་པ་ལས། འཇམ་དཔལ་གཞོན་ནུར་གྱུར་པ་ཞལ་གསུམ་ཕྱག་དྲུག་
[11b]
[11b.1]པ་གུར་གུམ་དམར་པོ་འདྲ་ཞིང་སྔོན་པོ་དང་། དཀར་པོ་ནི་གཡས་དང་ཅིག་ཤོས་ཀྱི་ཞལ་ལོ། །སེམས་དཔའི་སྐྱིལ་མོ་ཀྲུང་དང་ལྡན་པ། རལ་གྲི་དང་མདའ་དང་མཆོག་སྦྱིན་པ་ནི་གཡས་ཀྱི་ཕྱག་གསུམ་ནའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་དང་། ཨུཏྤལ་སྔོན་པོ་དང་། གཞུ་ནི་གཡོན་
[11b.2]པའི་ཕྱག་གསུམ་ནའོ། །སྒེག་པ་དང་བཅས་ཤིང་གཞོན་ནུའི་རྒྱན་གྱིས་བརྒྱན་པ། ཁ་དོག་སྣ་ཚོགས་ཀྱི་གོས་དང་། མེ་ཏོག་ལ་སོགས་པས་བརྒྱན་པར་བྱས་ཤིང་ལྕང་ལོ་གསུམ་གྱིས་མཛེས་པའོ། །དེ་བཞིན་གཤེགས་པའི་རྡུལ་ཕྲ་རབ་ལས་ཡོངས་སུ་རྫོགས་པའི་བདག་ཉིད་བསྒོམ་
[11b.3]པར་བྱའོ། །ཨོཾ་མུཿཞེས་བྱ་བའི་སྔགས་བཟླས་པར་བྱའོ། །འཕགས་པ་འཇམ་དཔལ་གྱི་སྒྲུབ་ཐབས་རྫོགས་སོ། །ཁམས་པ་ལོ་ཙཱ་བ་བ་རིས་བསྒྱུར་བའོ།། {T3313}༄༅༅ ། །རྒྱ་གར་སྐད་དུ། མཉྫུ་ཤྲཱི་བཛྲ་སཱ་དྷ་ནཾ། བོད་སྐད་དུ། འཇམ་དཔལ་རྡོ་རྗེའི་སྒྲུབ་ཐབས། བཅོམ་ལྡན་
[11b.4]འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རིན་ཆེན་པདྨ་རཱ་ག་ལྟར། །ཤེས་རབ་མཆོག་ལྡན་མདངས་གསལ་བ། །འཇམ་པའི་རྡོ་རྗེ་ལ་བཏུད་ནས། །དེ་ཡི་སྒྲུབ་ཐབས་འདི་བརྩམ་བྱ། །དང་པོར་མལ་ནས་ལངས་ཏེ་གདོང་ལ་སོགས་པ་དག་པར་བྱ་སྟེ། རང་གི་སྙིང་གར་ཟླ་བའི་དཀྱིལ་
[11b.5]འཁོར་བསྒོམ་སྟེ། དེ་ལས་བྱུང་བའི་འོད་ཟེར་གྱིས་བགེགས་རྣམས་ཕྱོགས་བཅུར་བསྐྲད་པར་བྱ་སྟེ། གསང་སྔགས་ནི་འདིའོ། །ཨོཾ་ཨ་མྲྀ་ཏ་ཀུཎྜ་ལི་ཧཱུཾ་ཕཊ། དེ་ནས་ནམ་མཁའ་ལ་གནས་པའི་སངས་རྒྱས་དང་། བྱང་ཆུབ་སེམས་དཔའ་རྣམས་གསལ་བར་དམིགས་ཏེ། ཡིད་ཀྱིས་མཆོད་པ་བྱས་
[11b.6]ཏེ། བཅོམ་ལྡན་འདས་འཇམ་པའི་རྡོ་རྗེ་སྤྱན་དྲང་བར་བྱའོ། །ཨོཾ་ཨེ་ཧྱེ་ཧི་བྷ་ག་བཱ་ན་མཉྫུ་བཛྲ་མ་མ་ཤ་རཱི་རེ་མ་ཏིཥྛ་ནཾ་ཀུ་རུ་སྭཱཧཱ། དེ་ནས་སྙིང་གའི་ཟླ་བའི་དཀྱིལ་འཁོར་གྱི་སྟེང་དུ་འཇམ་པའི་རྡོ་རྗེ་སྐུ་མདོག་དམར་པོ་རྒྱན་ཐམས་ཅད་ཀྱིས་བརྒྱན་པ། ཕྱག་གཉིས་ན་རྡོ་རྗེ་དང་དྲིལ་བུ་འཆང་བ། རྨ་བྱའི་
[11b.7]ཁྲི་ལ་རྡོ་རྗེ་སྐྱིལ་མོ་ཀྲུང་དུ་བཞུགས་ཤིང་། མོ་ཧ་ཀུ་མ་རི་དང་། རཱ་ག་ཀུ་མ་རི་དང་། ཨིར་ཤ་ཀུ་མ་རི་དང་། ཀུ་ལ་ཀུ་མ་རི་སྟེ་ལྷ་མོ་བཞིའོ། །དཀྱིལ་འཁོར་གྱིས་ཡོངས་སུ་བསྐོར་བར་བསམ་པར་བྱའོ། །དེ་དག་ཀྱང་ཕྱག་གཉིས་ནི་རྡོ་རྗེ་དང་རལ་གྲི་བསྣམས་པ་རྨ་བྱའི་ཁྲི་ལ་རྡོ་རྗེ་སྐྱིལ་མོ་ཀྲུང་གིས་
[12a]
[12a.1]འཇོ་སྒེག་དང་བཅས་བཞིན་རབ་ཏུ་བཞུགས་པའོ། །སྐུ་མདོག་ནི་བཅོམ་ལྡན་འདས་དང་མཚུངས་པར་བསམ་པར་བྱའོ། །ཨོཾ་ཧྲཱིཿམཾ་ཧོཿམཾ་ཧཱུཾ། དེ་དག་ནི་འཇམ་པའི་རྡོ་རྗེའི་ཡི་གེ་དྲུག་པའི་གསང་སྔགས་སོ། །ཨོཾ་བྲུཾ་ལཾ་ཧཱུཾ། ཨོཾ་ཏྲཾ་ཏྲཾ་ཧཱུཾ། ཨོཾ་ཧྲཱི་མཾ་ཧཱུཾ། ཨོཾ་ཁཾ་ཏཾ་ཧཱུཾ། དེ་དག་
[12a.2]ནི་ལྷ་མོ་བཞིའི་ཡི་གེ་བཞི་པའི་གསང་སྔགས་སོ། །མཆོད་པའི་དུས་སུ་ཕྱི་རོལ་དུ་པདྨ་འདབ་མ་བཞི་བྱས་ཤིང་དམིགས་ཏེ། དབུས་ཀྱི་ལྟེ་བ་ལ་བཅོམ་ལྡན་འདས་འཇམ་དཔལ་རྡོ་རྗེ་ཇི་ལྟ་བ་བཞིན་བསམ་པ་དང་། ཤར་ཕྱོགས་ལ་སོགས་པའི་འདབ་མ་བཞི་ལ་ལྷ་མོ་བཞི་ཇི་ལྟ་བ་བཞིན་བསམས་
[12a.3]ལ་གསང་སྔགས་གོང་མ་རྣམས་ཀྱིས་རིམ་བཞིན་དུ་མཆོད་པར་བྱའོ། །དེ་ནས་གསང་སྔགས་འདིས་འབྱུང་པོ་རྣམས་ལ་གཏོར་མ་སྦྱིན་པར་བྱ་སྟེ། མཆོག་སྦྱིན་གྱི་ཕྱག་རྒྱ་དང་སེ་གོལ་ལན་གསུམ་གཏོག་ཅིང་། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤན་ན་ཏྭཱཏ་ཅེས་བྱ་བའི་སྔགས་འདིས་སྦྱིན་པར་
[12a.4]བྱའོ། །དེ་ནས་སྨོན་ལམ་འདི་ལན་གསུམ་བརྗོད་པར་བྱ་སྟེ། ཕྱོགས་བཅུ་ནམ་མཁའི་མཐར་ཐུག་པའི། །སེམས་ཅན་ཁམས་ནི་རབ་གྲོལ་ཞིང་། །འཇམ་དཔལ་སྤྱོད་པ་ཇི་བཞིན་དུ། །དེ་བཞིན་བདག་ནི་སྤྱོད་གྱུར་ཅིག །བཅོམ་ལྡན་འདས་དཔལ་འཇམ་པའི་རྡོ་རྗེ་སྒྲུབ་པའི་ཐབས་
[12a.5]རྫོགས་སོ།། {T3314}༄༅༅ ། །རྒྱ་གར་སྐད་དུ། བཱ་གཱི་རཱ་ཛ་སཱ་དྷ་ནཾ། བོད་སྐད་དུ། ངག་གི་རྒྱལ་པོ་སྒྲུབ་པའི་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །ཡེ་ཤེས་མགོན་བདག་ཕྱག་འཚལ་ནས། །བྱ་བའི་རྒྱུད་ཀྱི་རྗེས་འབྲངས་ཏེ། །དངོས་གྲུབ་ཐམས་ཅད་སྟེར་བ་
[12a.6]ཡི། །དེ་ཡི་སྒྲུབ་ཐབས་བདག་གིས་བརྗོད། །སྔགས་པས་དང་པོར་རེ་ཞིག་ཡིད་དང་མཐུན་པའི་གནས་སུ་ཇི་ལྟར་བདེ་བར་འདུག་ནས། སྡུག་བསྔལ་གྱི་རྒྱ་མཚོར་ལྷུང་བའི་སེམས་ཅན་རྣམས་བལྟས་ནས་སྨོན་ལམ་གདབ་པར་བྱ་སྟེ། སྡུག་བསྔལ་བའི་སེམས་ཅན་འདི་རྣམས་འཁོར་
[12a.7]བར་འཁོར་ཞིང་འདུག་སྟེ། དེ་རྣམས་བདག་འཇམ་པའི་དབྱངས་སུ་གྱུར་ནས། སེམས་ཅན་ཐམས་ཅད་བླ་ན་མེད་པའི་གོ་འཕང་ལ་རབ་ཏུ་གནས་པར་བྱའོ་ཞེས་བྱའོ། །དེ་ནས་ཐང་སྐུ་ལ་སོགས་པ་དགྲམ་པའི་བཅོམ་ལྡན་འདས་འཇམ་པའི་དབྱངས་དང་། བླ་མ་དང་། སངས་རྒྱས་དང་
[12b]
[12b.1]བྱང་ཆུབ་སེམས་དཔའ་རྣམས་ཀྱང་མདུན་དུ་དམིགས་ནས་མེ་ཏོག་ལ་སོགས་པས་ཡང་དག་པར་མཆོད་ལ་ཕྱག་བྱས་ནས་སྡིག་པ་བཤགས་པ་དང་། སླན་ཆད་གཅོད་ཅིང་སྡོམ་པ་དང་། བསོད་ནམས་ལ་རྗེས་སུ་ཡི་རང་བ་དང་། ཡོངས་སུ་བསྔོ་བ་དང་། བདག་ཉིད་དབུལ་བ་དང་། གསུམ་ལ་
[12b.2]སྐྱབས་སུ་འགྲོ་བ་དང་། བྱང་ཆུབ་མཆོག་ཏུ་སེམས་བསྐྱེད་པ་ཡང་བྱའོ། །ཚིགས་བཅད་འདི་ཉིད་ཀྱིས་བྱ་སྟེ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །བྱང་ཆུབ་
[12b.3]མཆོག་གི་སེམས་ནི་བསྐྱེད་པར་བགྱི། །སེམས་ཅན་ཐམས་ཅད་བདག་གིས་དེ་ལ་གཟུད། །བྱང་ཆུབ་སྤྱོད་མཆོག་ཡིད་འོང་སྤྱད་ནས་སུ། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །དེ་ནས་ལམ་བསྟན་པར་བྱའོ། །དེའི་རྗེས་སུ་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་
[12b.4]ཞེས་པའི་དོན་རྗེས་སུ་རྟོགས་པས་ལན་གསུམ་དུ་བརྗོད་ནས་རང་བཞིན་གྱིས་དག་པར་མོས་པར་བྱ་སྟེ། ཆོས་ཐམས་ཅད་བདག་མེད་པར་བསྒོམ་པར་བྱའོ། །ཁམས་གསུམ་སྟོང་པ་ཉིད་དང་། མཚན་ཉིད་མེད་པར་བལྟས་ནས་རང་གི་སྙིང་གར་ཡི་གེ་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་
[12b.5]ཡི་གེ་མུཿགསེར་བསྲེགས་པ་ལྟ་བུ་དེ་ལས་བྱུང་བའི་འོད་ཟེར་གྱི་ཚོགས་ཀྱིས་འཇིག་རྟེན་གྱི་ཁམས་ཐམས་ཅད་དུ་བཀྱེ་ཞིང་སྣང་བར་བྱས་ནས་ཇི་ལྟར་སྣོད་དང་ལྡན་པའི་སེམས་ཅན་གྱི་དོན་བྱ་སྟེ། དེ་བཞིན་གཤེགས་པ་ཐམས་ཅད་བསྐུལ་ནས་དེའི་ཚེ་འོད་དེ་ས་བོན་ལ་ཞུགས་པ་དང་། དེ་ཐམས་
[12b.6]ཅད་ཡོངས་སུ་རྫོགས་པ་ལས་བདག་ཉིད་འཇམ་པའི་དབྱངས་སུ་བསྒོམ་པར་བྱའོ། །ཞལ་གཅིག་ཕྱག་གཉིས་པ་གསེར་བཞུ་བ་ལྟ་བུའི་སེང་གེའི་སྟེང་ན་པདྨ་དང་། ཟླ་བའི་གདན་ལ་སྐྱིལ་ཀྲུང་ཕྱེད་པས་བཞུགས་པའོ། །ཟུར་ཕུད་གསུམ་དང་ལྡན་པ་རིན་པོ་ཆེའི་དབུ་རྒྱན་ཅན་ཟླ་བའི་
[12b.7]དཀྱིལ་འཁོར་གྱི་འོད་ཅན་གཞོན་ནུའི་རྣམ་པའི་གཟུགས་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། སྒེག་པའི་ཉམས་དང་ལྡན་པ། ཅུང་ཞིག་འཛུམ་པ། ཕྱག་གཉིས་ན་ཆོས་ཀྱི་འཁོར་ལོའི་ཕྱག་རྒྱ་བསྣམས་པ། ཤེས་རབ་ཀྱི་ཕ་རོལ་ཏུ་ཕྱིན་པ་དང་བཅས་པའི་ཨུཏྤ་ལ་སྔོན་པོ་
[13a]
[13a.1]གཡོན་པའི་ཕྱག་ན་བསྣམས་པ་གཡོན་པའི་ངར་གདོང་ལ་བརྟེན་པའི་ཁྲོ་བོ་ཆེན་པོ་གཤིན་རྗེ་མཐར་བྱེད་མདོག་སྔོ་བ། ཞལ་འགྱུར་ཞིང་མཆེ་བ་གཙིགས་པ། སྐྲ་ཁམ་པ་འཁྱིལ་བ་སྤྱན་དམར་ཞིང་ཟླུམ་པ། འཇིགས་པར་བྱེད་པ། ཁྲོ་གཉེར་ཅན། མི་བཟད་པའི་ཞལ་
[13a.2]ཅན། ཐོད་པའི་ཕྲེང་བས་དབུ་ལ་བརྒྱན་པ་ཕྱག་གཡས་ཀྱིས་བཅོམ་ལྡན་འདས་ཀྱི་ངར་གདོང་ལ་རེག་པ། གཡོན་ན་དབྱུག་པ་བསྣམས་པའོ། །དེ་ལྟར་རྣམ་པར་བསྒོམས་ནས་སྐུ་དང་གསུང་དང་ཐུགས་རྣམས་སུ་ཟླ་བའི་དཀྱིལ་འཁོར་ལ་ཨོཾ་ཨཱཿཧཱུཾ་ཞེས་བྱ་བའི་ཡི་གེ་གསུམ་དཀར་པོ་དང་། དམར་པོ་དང་།
[13a.3]སྔོན་པོའི་མདོག་ཅན་རིམ་པ་ཇི་ལྟ་བས་བཀོད་ནས། དེ་ནས་ནུ་མའི་བར་དུ་ཟླ་བའི་དཀྱིལ་འཁོར་ལ་ཡི་གེ་མུཿརྣམ་པར་བསམས་ཏེ། དེ་ནས་མཆོད་པ་དང་མཆོད་པ་པོ་དབྱེར་མེད་པར་དམིགས་ནས། རྣམ་པ་སྣ་ཚོགས་པའི་ལྷ་མོ་རྣམས་ཀྱིས་མཆོད་པ་དང་། ཡང་དག་པའི་བསྟོད་པ་བྱེད་
[13a.4]པར་བདག་ཉིད་བལྟས་ནས་སྤྲོ་བ་དང་སྡུད་པས་ཇི་སྲིད་སྐྱོ་བར་མ་གྱུར་པ་དེ་སྲིད་དུ་བསྒོམ་པར་བྱའོ། །དེ་ལྟར་རྟག་ཏུ་སྒོམ་པར་བྱེད་པ་ནི་སངས་རྒྱས་ཀྱི་བྱང་ཆུབ་འགྲུབ་པར་འགྱུར་ཏེ། ཚེ་འདི་ཉིད་ལ་ཐུགས་རྗེ་ཆེན་པོ་འཇམ་པའི་དབྱངས་ཐོབ་པར་འགྱུར་རོ། །བསྒོམས་པས་སྐྱོ་བར་གྱུར་
[13a.5]ན་བསྟོད་པ་དང་། རང་གི་སྙིང་གར་ཟླ་བའི་དཀྱིལ་འཁོར་ལ་སྔགས་ཀྱི་རྣམ་པར་བཀོད་ལ་ཆགས་པ་མེད་པའི་ཡིད་ཀྱིས་བཟླས་པར་བྱའོ། །དེ་ལ་བཟླས་པའི་སྔགས་ནི་འདི་ཡིན་ཏེ། ཨོཾ་དྷརྨ་དྷཱ་ཏུ་བཱ་གཱི་ཤྭ་རི་མུཿདེ་ལྟར་བཟླས་པ་བྱས་ནས་མི་སྐྱོ་བར་གྱུར་ན་བསྒོམ་པར་བྱའོ། །གལ་ཏེ་ལང་
[13a.6]པར་འདོད་ན་ཡང་དེ་བཞིན་དུ་མཆོད་པ་དང་བསྟོད་པ་དང་། དགེ་བ་ཡོངས་སུ་བསྔོ་བ་བྱས་ནས་ཚིགས་བཅད་འདི་ཡིས་བཟོད་པར་གསོལ་བར་བྱ་སྟེ། བདག་ནི་རྨོངས་པའི་དབང་གིས་ཀྱང་། །ཉེས་པ་ཇི་སྲིད་བགྱིས་པ་གང་། །གང་ཕྱིར་ལུས་ཅན་མགོན་པོ་ཡིས། །དེ་མགོན་ཁྱེད་ཀྱིས་བཟོད་པར་
[13a.7]བཞེས། །འགྲོ་ལ་ཕན་ཕྱིར་སྨོན་ལམ་གདབ་པར་བྱའོ། །བདག་གི་བསོད་ནམས་འདི་ཡིས་ནི། །སངས་རྒྱས་ཉིད་ནི་ཐོབ་ནས་ཀྱང་། །སྲིད་པའི་རྒྱ་མཚོ་ཟབ་མོ་ལས། །འགྲོ་བ་མ་ལུས་སྒྲོལ་བར་ཤོག །དེ་ནས་ཆོས་ཐམས་ཅད་མཉམ་པ་ཉིད་དུ་ལྷག་པར་མོས་ནས་འགྲོ་བ་ཐམས་ཅད་
[13b]
[13b.1]འཇམ་པའི་དབྱངས་སུ་བལྟས་ཏེ། རང་གི་ལྷའི་རྣལ་འབྱོར་གྱི་ང་རྒྱལ་དང་ལྡན་པས་ཇི་ལྟར་བདེ་བར་གནས་པར་བྱའོ། །དེ་ལྟར་ཐུན་མཚམས་བཞིའམ་ཐུན་མཚམས་གསུམ་དུ་བྱའོ། །སྒྲུབ་ཐབས་འདི་ནི་བྱས་པ་ལས། །བདག་གིས་འབྲས་བུ་གང་ཐོབ་པ། །དེ་ཡིས་སྲིད་གསུམ་འཇིག་རྟེན་
[13b.2]འདི། །མ་ལུས་འཇམ་པའི་དབྱངས་གྱུར་ཅིག །ངག་གི་རྒྱལ་པོའི་སྒྲུབ་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་དྷརྨ་ཀཱིརྟིས་བསྒྱུར་བའོ།། {T3315}༄༅༅། །རྒྱ་གར་སྐད་དུ། མ་ཧཱ་རཱ་ཛ་ཨ་ཌི་ཌ་མཉྫུ་ཤྲཱི་སཱ་དྷ་ནཾ། བོད་སྐད་དུ། རྒྱལ་པོ་ཆེན་པོ་འཇམ་དཔལ་རོལ་པའི་སྒྲུབ་
[13b.3]ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །སྔོན་བཞིན་དུ་སྡིག་པ་བཤགས་པའི་རྗེས་སུ་སྟོང་པ་ཉིད་དུ་དམིགས་ནས་ཟླ་བ་ལ་གནས་པའི་ས་བོན་ཡི་གེ་མུཿལས་ཡོངས་སུ་རྫོགས་པའི་འཕགས་པ་འཇམ་དཔལ་དབྱངས་ཞལ་གཅིག་ཕྱག་གཉིས་པ་གཞོན་ནུ་ཟུར་ཕུད་ལྔ་དང་ལྡན་པ།
[13b.4]རྒྱན་ཐམས་ཅད་ཀྱིས་བརྒྱན་པ་ཕྱག་གཡོན་པ་ན་ཨུཏྤལ་བསྣམས་པ། ཕྱག་གཡས་པ་རོལ་པས་གནས་པ་སེང་གེའི་ཁྲི་ལ་གནས་པའི་པདྨ་དང་ཟླ་བའི་གདན་ལ། བདག་ཉིད་སྐད་ཅིག་གིས་བཞུགས་པར་བསམ་པར་བྱའོ། །དེ་ནས་ཐལ་མོ་སྦྱར་ལ་མཛུབ་མོ་གཉིས་སྲིན་ལག་གི་སེན་མོ་ལ་བརྟེན་པར་
[13b.5]བྱས་ནས། ཨུཏྤ་ལ་ཁ་ཕྱེ་བའི་ཕྱག་རྒྱ་སྦྱིན་པར་བྱའོ། །ཨོཾ་བཱ་གཱི་ཤྭ་རི་མུཿཞེས་བྱ་བ་ནི་བཟླས་པའི་སྔགས་སོ། །ཕྱག་རྒྱ་ཆེན་པོའི་རོལ་པའི་འཇམ་དཔལ་གྱི་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་དྷརྨ་ཀཱིརྟིས་བསྒྱུར་བའོ།། །།
[13b.6]{T3316}༄༅༅། །རྒྱ་གར་སྐད་དུ། བི་དྱཱ་དྷ་ར་པི་ཊ་ཀ་སཾ་ཀྵིཔྟ་མཉྫུ་ཤྲཱི་སཱ་དྷ་ནཾ། བོད་སྐད་དུ། རིག་པ་འཛིན་པའི་སྡེ་སྣོད་དུ་གསུངས་པའི་མདོར་བསྡུས་པའི་འཇམ་དཔལ་གྱི་སྒྲུབ་པའི་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་པའི་རྗེས་
[13b.7]སུ་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དཀར་པོ་རྣམ་པར་བསྒོམས་ནས་སྤྲོ་བ་ལ་སོགས་པ་སྔོན་དུ་འགྲོ་བས་དེ་ཡོངས་སུ་གྱུར་པ་ལས་ཡི་གེ་དྷཱིཿདཀར་པོ་དེ་ཡོངས་སུ་གྱུར་པ་ལས་འཇམ་དཔལ་ཨ་ར་པ་ཙ་ན་གཅིག་པུ་འབའ་ཞིག་ཉིད་དོ། །སྙིང་གར་ས་བོན་རྣམ་པར་བསམས་ནས་ཡང་
[14a]
[14a.1]དང་ཡང་དུ་སྤྲོ་བ་ལ་སོགས་པའི་རྣམ་པར་བྱའོ། །ཨོཾ་དྷཱིཿསྭཱཧཱ་ཞེས་བྱ་བའི་སྔགས་ཀྱིས་བཟླས་པ་བྱའོ། །རིག་པ་འཛིན་པའི་སྡེ་སྣོད་དུ་གསུངས་པའི་མདོར་བསྡུས་པའི་འཇམ་དཔལ་གྱི་སྒྲུབ་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་དྷརྨ་ཀཱིརྟིས་བསྒྱུར་བའོ།། །།
[14a.2]{T3317}༄༅༅། །རྒྱ་གར་སྐད་དུ། བིདྱཱ་དྷ་ར་པི་ཊ་ཀ་པྲ་ཏི་བནྡྷ་མཉྫུ་གྷོ་ཥ་སཱ་དྷ་ནཾ། བོད་སྐད་དུ། རིག་པ་འཛིན་པའི་སྡེ་སྣོད་ཀྱིས་བསྡུས་པའི་འཇམ་པའི་དབྱངས་ཀྱི་སྒྲུབ་པའི་ཐབས། བཅོམ་ལྡན་འདས་འཇམ་དཔལ་དབྱངས་ལ་ཕྱག་འཚལ་ལོ། །སྔགས་པས་དང་པོ་བྱ་བ་ནི། །སངས་རྒྱས་ལ་སོགས་
[14a.3]རབ་མཆོད་ནས། །བསོད་ནམས་ཡོངས་སུ་བསྔོ་ལ་སོགས། །དེ་ནས་བྱམས་པ་ལ་སོགས་བསྒོམ། །སྙིང་གར་ཟླ་བའི་གཟུགས་དབུས་གནས། །སྔགས་པས་ཐིག་ལེ་རྣམ་པར་བསམ། །མར་མེའི་རྣམ་པའི་འོད་ཀྱིས་བརྒྱན། །འོད་ཟེར་གྱི་ནི་ཚོགས་འདི་ནི། །ས་བོན་ཁ་བ་ལྟ་བུའི་འོད། །ཐིག་
[14a.4]ལེ་དེ་ལ་འོད་ཟེར་བསམ། །སོ་སོར་བ་སྤུའི་བུ་གར་བྱུང་། །འགྲོ་ཀུན་རྒྱས་མཐོ་གང་སོགས་པའི། །རིམ་པ་རྣམ་པར་གསལ་བར་བྱ། །དྷཱིཿདཀར་རྣམ་པའི་གཟུགས་ཉིད་དུ། །ཐིག་ལེ་ནང་ལྟོས་འོད་ཟེར་བལྟ། །འདི་ཀུན་ཡོངས་སུ་གྱུར་པ་ལས། །ཨ་ར་པ་ཙ་ན་དམིགས་བྱ། །སྙིང་གར་ཟླ་བའི་དཀྱིལ་
[14a.5]འཁོར་རོ། །དབུས་སུ་ཆུད་པའི་དྷཱིཿཡིག་བལྟ། །འོད་ཟེར་དག་གི་ཚོགས་འདི་ནི། །སྣ་ནས་ཚིག་ནི་བྱུང་བར་བལྟ། །སེམས་ཅན་འཇམ་དབྱངས་རྣམ་བྱས་ཏེ། །འབྱུང་བའི་རླུང་གིས་ཁྱབ་པ་དང་། །ཕྱིས་ནི་འཇུག་པ་རླུང་གིས་ནི། །དྷཱིཿཡི་རྣམ་པར་ཡིད་ཀྱིས་བསྡུ། །ཨོཾ་ནི་དང་པོར་སྭཱ་ཧཱ་མཐར། །
[14a.6]སྔགས་ནི་ས་བོན་ཡི་གེ་བཟླ། །སྟོན་ཀའི་ཟླ་བ་ལྟ་བུ་ཡི། །སྙིང་གར་ཟླ་དཀྱིལ་གསལ་བའོ། །རིག་པ་འཛིན་པའི་སྡེ་སྣོད་ཀྱིས་བསྡུས་པའི་འཇམ་པའི་དབྱངས་ཀྱི་སྒྲུབ་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་གིས་བསྒྱུར་བའོ།། {T3318}༄༅༅། །སྐད་ཅིག་གིས་འཇམ་
[14a.7]དཔལ་གྱི་རྣལ་འབྱོར་དུ་དམིགས་ནས་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དཀར་པོ་མར་མེའི་རྩེ་མོའི་རྣམ་པའི་འོད་ཟེར་དང་བཅས་པ་བསམས་ནས་སྤྱི་གཙུག་ཏུ་གཞོམ་དུ་མེད་པའི་ཡི་གེ་ཧཾ་དཀར་པོ་མགོ་བོ་འཕྱང་བཞིན་པའི་འོད་ཟེར་དང་བཅས་པ་བསམ་པར་བྱའོ། །དེ་ནས་ཐིག་ལེའི་འོད་
[14b]
[14b.1]ཟེར་གྱིས་བསྐུལ་ནས་ཡི་གེ་ཧཾ་ཞུ་བར་གྱུར་ཏེ་ཐིག་ལེ་བསིལ་ཞིང་ཚིམ་པར་བྱའོ། །སེམས་བརྟན་པར་གྱུར་པའི་སྔགས་པས་རིང་པོར་མི་ཐོགས་པར་ཤེས་རབ་སྐྱེ་བར་འགྱུར་རོ། །འཇམ་དཔལ་ཤེས་རབ་ཀྱི་སྦྱོར་བ་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་དྷརྨ་ཀཱིརྟིས་བསྒྱུར་བའོ།། །།
[14b.2]{T3319}༄༅༅། །རྒྱ་གར་སྐད་དུ། བཛྲ་ཨཾ་ག་མཉྫུ་གྷོ་ཥ་སཱ་དྷ་ནཾ། བོད་སྐད་དུ། ཡན་ལག་མེད་པའི་རྡོ་རྗེ་འཇམ་པའི་དབྱངས་ཀྱི་སྒྲུབ་ཐབས། འཕགས་པ་འཇམ་དཔལ་དབྱངས་ལ་ཕྱག་འཚལ་ལོ། །སྔོན་དུ་བསྟན་པ་བཞིན་དུ་སྡིག་པ་བཤགས་པ་ལ་སོགས་པ་བྱས་ནས་སྟོང་པར་བསྒོམས་
[14b.3]པའི་རྗེས་སུ་ཡི་གེ་ཧཾ་ལས་སྐྱེས་པའི་ཡི་གེ་ཧཾ་གི་ཆང་གཟུངས་ཀྱི་དབུས་སུ་མནན་པའི་མདའ་དང་ལྡན་པའི་གཞུ་བསྒོམས་ནས། དེ་ཡོངས་སུ་གྱུར་བ་ལས་ཡན་ལག་མེད་པའི་རྡོ་རྗེ་ཞེས་བྱ་བ་འཕགས་པ་འཇམ་དཔལ་མདོག་སེར་པོ་ཕྱག་དྲུག་པའོ། །རྩ་བའི་ཕྱག་གཉིས་ནི་རྣ་ལྟག་གི་བར་དུ་
[14b.4]བཀང་བའི་ཨུཏྤ་ལ་དམར་པོའི་མདེའུ་ཅན་གྱི་མདའ་དང་ལྡན་པའི་མེ་ཏོག་གི་གཞུ་འཛིན་པའོ། །གཡས་པའི་ཕྱག་གཉིས་ན་རལ་གྲི་དང་མེ་ལོང་བསྣམས་པ། གཡོན་པ་གཉིས་ན་ཨུཏྤ་ལ་སྔོན་པོ་དང་ཤིང་མྱ་ངན་མེད་པ་དམར་པོ་ཡལ་ག་མེ་ཏོག་དང་བཅས་པ་བསྣམས་པའོ། །མི་བསྐྱོད་པས་བྱིན་
[14b.5]གྱིས་བརླབས་པའི་རལ་པའི་ཅོད་པན་ཅན་གཡོན་བརྐྱང་པའི་ཞབས་ཅན། ལོ་བཅུ་དྲུག་གི་རྣམ་པར་བྱེད་ཅིང་ཆེར་སྒེག་པའི་སྐུར་བལྟ་བར་བྱའོ། །ཡང་ན་ཕྱག་བཞི་པ་སྟེ་མེ་ལོང་དང་། མྱ་ངན་མེད་པའི་ཡལ་ག་མེ་ཏོག་དང་བཅས་པ་བསྣམས་པའི་ཕྱག་གཉིས་དང་བྲལ་བ་བསྒོམ་པར་བྱའོ། །
[14b.6]དེ་ནས་ཡེ་ཤེས་སེམས་དཔའ་དང་གཅིག་ཏུ་བྱས་ནས། ཨོཾ་མཉྫུ་གྷོ་ཥ་ཧྲཱིཿཛཿཞེས་བྱ་བའི་སྔགས་བཟླས་པ་བྱའོ། །འབུམ་ཕྲག་གཅིག་བཟླས་ལ་འཇིག་རྟེན་གསུམ་པོ་ཡང་ཅི་བགྱི་བར་བྱེད་པར་འགྱུར་རོ། །ཡང་ན་ཁ་ཅིག་དགུག་པར་འདོད་པས་གོང་དུ་གསུངས་པ་བཞིན་དུ་བསྒོམ་པར་བྱས་ནས།
[14b.7]དེ་ང་རྒྱལ་བརྟན་པོ་བྱས་པའི་ཡིད་ཀྱིས་རང་གི་སྙིང་གར་པདྨ་དམར་པོ་འདབ་མ་བཅུ་དྲུག་པ་མངོན་པར་འཕྱང་བའི་སྡོང་བུ་དང་། རྩ་བ་དང་བཅས་པ་དམིགས་ནས་དེའི་སྡོང་བུའི་དབུས་སུ་ཡི་གེ་ཧཱུཾ་དམར་པོ་དགུ་བལྟའོ། །དེའི་འདབ་མ་ལ་གཡས་སྐོར་དུ་དབྱངས་ཡིག་དམར་པོ་བཅུ་དྲུག་བསྒོམ་
[15a]
[15a.1]པར་བྱས་ནས། དེའི་ཟེའུ་འབྲུའི་སྟེང་དུ་ནུབ་མོ་དང་ཉིན་མོ་ཇི་ལྟར་སྲིད་པར་ཉི་མ་དང་། ཟླ་བའི་དཀྱིལ་འཁོར་དམར་པོའོ། །དེའི་དབུས་སུ་ཡང་ཡི་གེ་ཧྲཱིཿདམར་པོ་གཉིས་ཀྱི་བར་དུ་བཅུག་པའི་འོག་ནས་བཤད་པའི་རང་གི་སྔགས་བལྟ་བར་བྱའོ། །དེ་ནས་དབྱངས་ཡིག་
[15a.2]དམར་པོ་དེ་རྣམས་སྦྲང་མ་དགའ་བ་རྒྱས་པར་རྣམ་པར་བསྒོམས་ནས། རང་གི་སྔགས་ཀྱི་འོད་ཟེར་གྱི་ཚོགས་ཀྱིས་ཕྱོགས་བཅུ་བཀང་སྟེ་ཇི་སྙེད་མངོན་པར་འདོད་པའི་བུད་མེད་ཀྱི་གནས་སུ་སོང་ནས་མེ་རླུང་གི་དཀྱིལ་འཁོར་སྟེང་དུ་སྟོབས་ཀྱིས་བཞག་ནས་འོད་ཟེར་གྱི་རང་བཞིན་ཉིད་ཀྱི་ཞགས་
[15a.3]པས་ལེགས་པར་སྐེ་ནས་བཅིངས་ནས། ལྕགས་ཀྱུ་རྣོན་པོས་ཆོས་འབྱུང་ནས་ཕུག་སྟེ་མདུན་དུ་ཡང་དག་པར་བཀུག་ནས་ཐལ་མོ་སྦྱར་ཏེ། མགལ་མེ་འཁོར་བའི་འཁོར་ལོའི་ནང་དུ་བཅུག་ནས་ཡི་གེ་ཧཱུཾ་དམར་པོས་མིག་དང་། སྙིང་ག་དང་། ཡན་ལག་དང་ཉིང་ལག་ཐམས་ཅད་བཀང་བར་བསྒོམ་
[15a.4]པར་བྱའོ། །དེ་ནས་དེའི་སྙིང་གར་དབྱངས་ཡིག་དམར་པོ་བཅུ་དྲུག་དང་ལྡན་པའི་སྡོང་བུའི་སྦུབས་ནས་ཡི་གེ་ཧཱུཾ་དང་བཅས་པའི་པདྨ་འདབ་མ་བཅུ་དྲུག་པ་དམིགས་པར་བྱ་སྟེ། འོན་ཀྱང་དྲི་མ་དང་བཅས་པའི་མདོག་ཅན་ནོ། །དེའི་དབུས་སུ་ཡི་གེ་ཧྲཱིཿདེའི་བར་དུ་བཅུག་པའི་མིང་གི་ཡི་གེ་བསམ་པར་
[15a.5]བྱའོ། །དེ་ནས་རང་གི་སྔགས་ཀྱི་འོད་ཟེར་ལས་བྱུང་བའི་རབ་ཏུ་དམར་ཞིང་ཕྲ་བའི་ལྕགས་ཀྱུ་རབ་ཏུ་རྣོན་པོ་དང་། པདྨའི་སྡོང་བུ་ལ་གནས་པའི་ཡི་གེ་ཧཱུཾ་གི་འོད་ཀྱིས་སྟེང་དུ་འགྲོ་ཞིང་བསྐུལ་བས་སྦྲང་བུའི་ཚོགས་ཀྱི་རྗེས་སུ་འགྲོ་བཞིན་པས། རང་གི་སྣ་བུག་གཡས་ལས་གཞན་པའི་ཅིག་ཤོས་
[15a.6]ཀྱི་སྒོར་བྱུང་སྟེ། བསྒྲུབ་བྱའི་སྣ་བུག་གཡས་པའི་སྒོ་ནས་དེའི་སྙིང་གར་ཞུགས་ཏེ། ལྕགས་ཀྱུ་དེ་ཡིས་དེའི་མིང་གི་ཡི་གེ་འགུགས་པར་གནས་པར་བྱེད་ཅིང་། སྦྲང་བུ་དེ་རྣམས་ཀྱིས་ཀྱང་དགའ་བས་པདྨ་དེ་ཕྱུང་ཞིང་། རང་དགས་དུམ་བུར་བྱེད་ཅིང་དབྱངས་ཡིག་རྣམས་གཞིབ་བར་བྱའོ། །ཞེས་
[15a.7]ཡུན་རིང་དུ་མི་གཡོ་བར་བལྟ་བར་བྱའོ། །དེ་ནས་དེ་ཁོ་ན་བཞིན་དུ་དབུགས་ཀྱིས་བསྐུལ་བའི་ལྕགས་ཀྱུས་དེའི་མིང་སྟོབས་ཀྱིས་བླངས་ཏེ། སྦྲང་བུ་དེ་རྣམས་ཀྱིས་ཀྱང་། རང་གི་དབྱངས་ཡིག་བཀུག་སྟེ། དེའི་སྣ་བུག་གཡོན་པའི་ལམ་དུ་བྱུང་བར་བལྟ་བར་བྱའོ། །ཡང་དེ་བླངས་ནས་འཇུག་པའི་
[15b]
[15b.1]རླུང་གིས་ལྕགས་ཀྱུ་དང་། སྦྲང་བུ་རྣམས་བཀུག་སྟེ། རང་གི་སྣ་བུག་གཡས་པའི་སྒོ་ནས་འཇུག་སྟེ། དེའི་མིང་གི་ཡི་གེ་རང་གི་སྙིང་གའི་སྔགས་ལ་བཅུག་ནས། དེའི་མིང་གི་ཡི་གེ་རང་གི་སྙིང་གའི་སྔགས་ཀྱིས་དྲག་པོར་མནན་ནས། དབྱངས་ཡིག་དེ་རྣམས་འདབ་མ་སོ་སོ་ལ་སྦྲང་བུ་
[15b.2]མཆོག་གིས་དབང་དུ་བྱས་པའི་རྣམ་པར་བསམ་པར་བྱའོ་ཞེས་བྱའོ། །རིམ་པ་འདིས་རང་གི་རྣམ་པར་ཤེས་པ་དང་། དེའི་རྣམ་པར་ཤེས་པ་དེ་གཅིག་ཏུ་བྱས་པ་བལྟ་བར་བྱའོ། །དེ་ནས་དེའི་ནུ་མ་ལ་ཨུཏྤ་ལ་དམར་པོའི་མདེའུ་རྣོན་པོ་དང་ལྡན་པའི་མདས་ཕུག་ནས་འདོད་ཆགས་ཆེན་པོས་བརྒྱལ་
[15b.3]བར་གྱུར་བར་བལྟས་ནས་ལྕགས་སྒྲོག་ལྟ་བུའི་གཞུས་དེའི་རྐང་པ་གཉིས་དམ་པར་བཅིངས་ནས། རང་གིས་བསྣམས་པའི་ཨུཏྤ་ལའི་སྡོང་བུའི་རང་བཞིན་གྱི་ཞགས་པས་སྐེ་ནས་བཅིངས་ཏེ། ཡང་དག་པར་བཀུག་ནས་རྐང་པ་གཉིས་ཀྱི་དྲུང་དུ་ལྷུང་བར་བྱས་ནས། མྱ་ངན་མེད་པས་སྙིང་གར་
[15b.4]བྲབས་པའོ། །མངོན་པའི་ང་རྒྱལ་མེད་པར་བྱས་ལ། རལ་གྲིས་འཇིགས་པར་བྱ་སྟེ། སྐྱབས་གཞན་མེད་པར་བྱས་ནས་ཡང་རང་ཉིད་ཇི་ལྟར་གནས་པས་སྐྲ་གྲོལ་བ་ཤིན་ཏུ་འདོད་ཆགས་ཀྱིས་མྱོས་པ་གཅེར་བུ་གོས་མེད་པ། མི་སྦྱོར་བས་འཇིགས་ཤིང་ཤིན་ཏུ་ཆགས་པར་གྱུར་པ་མེ་ལོང་
[15b.5]ལ་བརྟན་པར་བྱས་ནས་རང་རིག་པས་རྗེས་སུ་ཆགས་པར་བྱའོ། །ཨོཾ་ཧྲཱིཿཨ་མུ་ཀིཾ་ཨཱ་ཀཪྵ་ཡ་མཉྫུ་གྷོ་ཥ་ཧྲཱིཿཛཿཞེས་བྱ་བའི་རང་གི་སྔགས་མིང་དང་བཅས་པ་རྩེ་གཅིག་པའི་ཡིད་ཀྱིས་བཟླས་པར་བྱའོ། །དེ་ལྟར་གོང་དུ་གསུངས་པའི་རིམ་པས་དཀར་པོའི་ཕྱོགས་ཀྱི་ཆོས་གཅིག་ནས་བརྩམས་ཏེ། ཇི་སྲིད་
[15b.6]ཚེས་བཅུ་བཞིའི་བར་དུ་ཁྲི་ཕྲག་གཅིག་ཙམ་བཟླས་པར་བྱའོ། །ཡང་བཅོ་ལྔ་ལ་མཆོད་པ་རྒྱ་ཆེན་པོ་བྱས་ནས་མཚན་ཐོག་ཐག་བཟླས་པ་བྱའོ། །དེ་ནས་ཐོ་རངས་དེ་ངེས་པར་འོང་བར་འགྱུར་རོ། །འོངས་ནས་དེ་ལ་ཡང་ཕྱག་རྒྱ་ཆེན་པོའི་དངོས་གྲུབ་ཀྱི་དོན་དུ་རང་གི་ལྷ་མཆོད་པའི་བསམ་
[15b.7]པས་ཇི་ལྟར་བདེ་བར་ལོངས་སྤྱོད་པར་བྱའོ། །ཡན་ལག་མེད་པའི་རྡོ་རྗེའི་འཇམ་པའི་དབྱངས་ཀྱི་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་དྷརྨ་ཀཱིརྟིས་བསྒྱུར་བའོ།། {T3320}༄༅༅། །རྒྱ་གར་སྐད་དུ། དྷརྨ་དྷཱ་ཏུ་བཱ་གཱི་ཤྭ་ར་སཱ་དྷ་ནཾ། བོད་སྐད་དུ། ཆོས་ཀྱི་དབྱིངས་ངག་
[16a]
[16a.1]གི་དབང་ཕྱུག་གི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དེ་ཁོ་ན་ཉིད་བཞིན་དུ་སྟོང་པ་ཉིད་བསྒོམས་པའི་རྗེས་སུ་སྣ་ཚོགས་པདྨའི་སྟེང་དུ། ཟླ་བ་ལ་ཨ་ཡིག་དཀར་པོ་ལས་སྐྱེས་པ། དཔལ་ཆོས་ཀྱི་དབྱིངས་ངག་གི་དབང་ཕྱུག་ཡན་ལག་ཐམས་ཅད་
[16a.2]དཀར་པོ་ཞལ་བཞི་པ་ཕྱག་བརྒྱད་པ། སངས་རྒྱས་ལྔའི་རིན་པོ་ཆེའི་དབུ་རྒྱན་ཅན་ལྷ་རྫས་ཀྱི་གོས་དང་རྒྱན་དང་སྒེག་པ་ལ་སོགས་པའི་ཉམས་དང་ལྡན་པ། ཕྱག་གཉིས་ནི་ཆོས་ཀྱི་འཁོར་ལོའི་ཕྱག་རྒྱས་མཚན་པའོ། །རལ་གྲི་དང་མདའ་དང་། རྡོ་རྗེ་ནི་གཡས་ཀྱི་ཕྱག་གསུམ་ནའོ། །ཤེས་རབ་ཀྱི་ཕ་རོལ་
[16a.3]ཏུ་ཕྱིན་པའི་པོ་ཏི་དང་གཞུ་དང་དྲིལ་བུ་གཡོན་པའི་ཕྱག་གསུམ་ནའོ། །རྡོ་རྗེ་སྐྱིལ་མོ་ཀྲུང་དང་ལྡན་པའི་བདག་ཉིད་དུ་བསྐྱེད་ནས། སྙིང་གར་ཟླ་བ་ལས་ཧཱུཾ་སྔོན་པོ་ལས་སྐྱེས་པའི་རྡོ་རྗེ་ས་བོན་དང་བཅས་པ་ནི་ཕྱག་རྒྱ་ཆེན་པོའི་རང་བཞིན་ནོ། །སྨིན་མཚམས་སུ་ཏྲཱཾ་ཡིག་སེར་པོ་ལས་སྐྱེས་པ་རིན་པོ་ཆེ་ས་བོན་
[16a.4]དང་བཅས་པ་ནི་ཆོས་ཀྱི་ཕྱག་རྒྱའི་རང་བཞིན་ནོ། །མགྲིན་པར་ཧྲཱིཿཡིག་དམར་པོ་ལས་སྐྱེས་པ་པདྨ་ས་བོན་དང་བཅས་པ་ནི་དམ་ཚིག་གི་ཕྱག་རྒྱའི་རང་བཞིན་ནོ། །སྤྱི་གཙུག་ཏུ་ཨཱཿཡིག་དཀར་པོ་ལས་སྐྱེས་པ་སྣ་ཚོགས་རྡོ་རྗེ་རྒྱ་གྲམ་ས་བོན་དང་བཅས་པ་ནི་ལས་ཀྱི་ཕྱག་རྒྱའི་རང་བཞིན་ནོ། །འདིས་ཕྱག་
[16a.5]རྒྱ་བཞི་དང་ལྡན་པའི་བདག་ཉིད་རྣམ་པར་བསྒོམ་པར་བྱའོ། །ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ན་མཱུརྟི་བཱ་གཱི་ཤྭ་ར་མ་ཧཱ་པཱ་ཙ་སརྦ་དྷརྨཱ་ག་ག་ནཱ་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿ། ཞེས་བྱ་བའི་སྔགས་ཀྱིས་བྱིན་གྱིས་བརླབ་བོ། །དེ་ནས་རྡོ་རྗེའི་ཕྱག་རྒྱ་བཅིངས་ལ་གུང་མོ་གཉིས་ཀྱི་ཚིགས་གསུམ་པ་བཅག་པ་ནི་རལ་
[16a.6]གྲིའི་རྣམ་པར་གཟུང་བར་བྱ། མཛུབ་མོ་གཉིས་མཐེབ་ཆེན་ལངས་པའི་སྟེང་དུ་བསྐུམ་པར་བྱ་སྟེ། གཟུང་བ་དེ་ནི་དམ་ཚིག་གི་ཕྱག་རྒྱའོ། །དེར་རང་གི་ལྕེ་ལ་ཟླ་བ་ལ་གནས་པའི་ཧྲཱིཿཡིག་དམར་པོའི་ས་བོན་གྱིས་བྱིན་གྱིས་བརླབ་པར་བསམ་མོ། །ཁྲོ་བོའི་ངག་གིས་བཟླས་པ་བྱའོ། །དེ་ལ་འདིའི་ངག་གི་
[16a.7]བཟླས་པ་ནི། ཨོཾ་བཛྲ་ཏཱིཀྵྞ་དུཿཁཙྪེ་ད་པྲཛྙཱ་ཛྙཱ་ན་མཱུརྟ་ཡེ་ཛྙཱ་ན་ཀཱ་ཡ་བཱ་གཱི་ཤྭ་ར་ཨ་ར་པ་ཙ་ནཱ་ཡ་ཏེ་ན་མཿ། མཚན་བརྒྱ་རྩ་བརྒྱད་དང་། མཚན་ཡང་དག་པར་བརྗོད་པ་ཇི་ལྟར་དུས་གསུམ་དུ་བཀླག་པར་བྱའོ། །ཆོས་ཀྱི་དབྱིངས་ངག་གི་དབང་ཕྱུག་གི་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་དྷརྨ་ཀཱིརྟིས་བསྒྱུར་བའོ།། །།
[16b]
[16b.1]{T3321}༄༅༅། །རྒྱ་གར་སྐད་དུ། ནཱ་མ་སངྒཱི་ཏི་སཱ་དྷ་ནཾ། བོད་སྐད་དུ། མཚན་ཡང་དག་པར་བརྗོད་པའི་སྒྲུབ་ཐབས། ངག་གི་དབང་ཕྱུག་ལ་ཕྱག་འཚལ་ལོ། །དང་པོ་རེ་ཞིག་སྒྲུབ་པ་པོས་སྔ་བར་ལངས་ཏེ་ཁ་ལ་སོགས་པ་དག་པར་བྱ་སྟེ། བསམ་གཏན་གྱི་ཁང་པར་རབ་ཏུ་ཞུགས་ནས། བདེ་བའི་སྟན་
[16b.2]ལ་སྐྱིལ་མོ་ཀྲུང་གིས་ཉེ་བར་གནས་ལ། སྙིང་གར་པདྨ་དང་ཟླ་བ་ལ་དམར་ཞིང་དཀར་བའི་མུཿཡིག་བསྒོམ་པར་བྱའོ། །དེ་ནས་དེའི་འོད་ཟེར་དེའི་ཚོགས་ལྕགས་ཀྱུའི་རྣམ་པ་ཅན་གྱིས་བཀུག་སྟེ། བཅོམ་ལྡན་འདས་འོག་ནས་འབྱུང་བའི་མདོག་དང་། ཞལ་དང་། ཕྱག་མཚན་དང་། གདན་དང་། ཉེ་
[16b.3]བར་ལྡན་པ་མདུན་དུ་རྣམ་པར་བསྒོམས་ལ། ཡིད་ཀྱིས་རང་བཞིན་གྱི་མེ་ཏོག་དང་། བདུག་པ་ལ་སོགས་པས་ཡང་དག་པར་མཆོད་ལ། དེའི་མདུན་དུ་སྡིག་པ་བཤགས་པ་ལ་སོགས་པ་ཐམས་ཅད་བྱས་ཤིང་བྱམས་པ་ལ་སོགས་པ་ཚངས་པའི་གནས་བཞི་རྣམ་པར་བསྒོམས་ནས། ཆོས་ཐམས་
[16b.4]ཅད་སྟོང་པ་ཉིད་དུ་མངོན་དུ་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བྱ་བའི་སྔགས་ཀྱིས་བྱིན་གྱིས་བརླབ་པར་བྱའོ། །དེ་ནས་ནམ་མཁའ་ལ་ཧཱུཾ་གིས་རྡོ་རྗེ་རྩེ་ལྔ་པ་ས་བོན་དང་བཅས་པ་རྣམ་པར་བསྒོམས་ལ། དེའི་འོད་ཟེར་རྣམས་ཀྱིས་ཇི་ལྟ་བའི་སྦྱོར་བས་རྡོ་རྗེའི་ར་བ་དང་། རྡོ་རྗེའི་གུར་དང་།
[16b.5]ས་འོག་ཀུན་རྡོ་རྗེའི་ས་གཞིར་དམིགས་ལ་རྡོ་རྗེ་ཡང་འོད་ཟེར་དུ་གྱུར་ནས་རྡོ་རྗེའི་ར་བ་ལས་ཕྱི་རོལ་ཏུ་ཕྱོགས་བཅིང་པ་ལ་སོགས་པའི་གཟུགས་ཀྱིས་ཉེ་བར་གནས་པར་བལྟའོ། །དེའི་རྗེས་སུ་རྡོ་རྗེ་ར་བའི་ནང་དུ་ཧྲཱིཿཡོངས་སུ་གྱུར་པ་ལས་པདྨའོ། །པདྨའི་སྟེང་དུ་ཨ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་
[16b.6]དཀར་དམར་གྱི་མུཿཡིག་ལ་སངས་རྒྱས་མང་པོ་སྤྲོ་བ་དང་བསྡུ་བའི་རྣམ་པར་བསྒོམས་ལ། དེ་ཡོངས་སུ་གྱུར་པ་ལས་རྗེ་བཙུན་འཇམ་པའི་དབྱངས་དམར་ཞིང་དཀར་བ་པདྨ་དང་ཟླ་བའི་སྟེང་ན་རྡོ་རྗེ་སྐྱིལ་མོ་ཀྲུང་གིས་བཞུགས་པ། ཞལ་དང་པོ་དམར་པོ་གཡས་སྔོན་པོ་གཡོན་དཀར་པོ་ཞེས་བྱ་བའི་ཞལ་གསུམ་པ་
[16b.7]བསྒོམ་མོ། །ཕྱག་བཞི་ན་ཇི་ལྟ་བའི་སྦྱོར་བས་ཤེས་རབ་ཀྱི་པོ་ཏི་དང་རལ་གྲི་དང་། གཞུ་དང་། མདའ་དང་ལྡན་པས་སོ། །རིན་པོ་ཆེའི་དབུ་རྒྱན་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་རྣམ་པར་མཛེས་པ། གཞོན་ཞིང་གཞོན་ནུའི་རྒྱན་གྱིས་རྣམ་པར་བརྒྱན་པར་བདག་ཉིད་བསྒོམས་ལ།
[17a]
[17a.1]སྙིང་གར་པདྨ་དང་ཟླ་བའི་སྟེང་དུ་རྡོ་རྗེ་སེམས་མ་དཀར་མོ་སེམས་དཔའི་སྐྱིལ་མོ་ཀྲུང་གིས་བཞུགས་པ། གཡོན་ན་དྲིལ་བུ་དཀུར་བརྟེན་ཅིང་འཆང་བའོ། །གཡས་པ་ན་རང་གི་སྙིང་གར་འདེགས་པར་བྱེད་པའི་སྦྱོར་བས་རྡོ་རྗེ་འཆང་བ་སྨིན་མཚམས་སུ་དེ་བཞིན་དུ་རིན་ཆེན་རྡོ་རྗེ་མ་སེར་
[17a.2]མོ་ཕྱག་གཉིས་ཀྱིས་སྤྱི་བོར་མེ་ཏོག་གི་ཕྲེང་བ་འཆིང་ཞིང་ཉེ་བར་གནས་པའོ། །མགྲིན་པར་པདྨ་རྡོ་རྗེ་མ་དམར་ཞིང་དཀར་བ། གཡོན་པས་པདྨའི་སྡོང་བུ་འགྱིང་བག་དང་བཅས་པ་བཟུང་བ། གཡས་པས་དེའི་འདབ་མ་ཁ་འབྱེད་ཅིང་སྔོན་བཞིན་དུ་དེ་ཉིད་ཉེ་བར་གནས་པའོ། །སྤྱི་བོར་ལས་ཀྱི་རྡོ་རྗེ་མ་སྐུ་
[17a.3]མདོག་ལྗང་གུ་རྡོ་རྗེ་རྩེ་གསུམ་པ་དང་ལྡན་པའི་ཕྱག་གཉིས་བདག་ཉིད་ཀྱི་སྤྱི་བོར་འཆང་ཞིང་དེ་ཁོ་ན་བཞིན་དུ་ཉེ་བར་གནས་པར་བསྒོམ་པར་བྱའོ། །ཨོཾ་བཛྲ་ཨངྐུ་ཤ་ཛཿཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ་ཤ་ཧོཿཞེས་པའི་སྔགས་ཀྱིས་པདྨ་དང་ཟླ་བའི་སྟེང་དུ་གོ་རིམས་ཇི་ལྟ་བ་བཞིན་དུ་
[17a.4]ཡེ་ཤེས་ཀྱི་འཁོར་ལོ་དགུག་པ་དང་གཞུག་པ་དང་བཅིང་བ་དང་། དབང་དུ་བྱའོ། །རྡོ་རྗེ་ཁུ་ཚུར་གཉིས་བཅིངས་ཏེ་མཛུབ་མོ་དང་། མཐེའུ་ཆུང་ལྕགས་སྒྲོག་ཏུ་བྱས་ཤིང་སྤྲད་པ་བཀན་ཏེ་རང་གི་ཁ་རུ་ཉེ་བར་བཞག་པ་ནི་རྡོ་རྗེ་འཁོར་ལོའི་ཕྱག་རྒྱ་སྟེ། ཨརྒྷཾ་དང་ཞལ་བསིལ་དང་། མེ་ཏོག་དང་། བདུག་
[17a.5]པ་ལ་སོགས་པས་ཡང་དག་པར་མཆོད་ལ་སྐད་ཅིག་གིས་རང་གི་ལུས་ལ་གཞུག་པར་བྱའོ། །དེའི་རྗེས་སུ་དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་བ་སྔོན་དུ་འགྲོ་བས། མི་བསྐྱོད་པས་བདག་ཉིད་ཀྱི་དབུ་བརྒྱན་པར་རྣམ་པར་བསམས་ལ། ཨོཾ་སརྦ་དྷརྨཱ་ཨ་བྷཱ་བ་སྭ་བྷཱ་ཝ་བི་
[17a.6]ཤུདྡྷ། བཛྲ་ཙཀྵུཿཨ་ཨཱ་ཨཾ་ཨཿཔྲ་ཀྲྀ་ཏི་པ་རི་ཤུདྡྷཿསརྦ་དྷརྨཱ་ཡ་དུ་ཏ། སརྦ་ཏ་ཐཱ་ག་ཏ་ཛྙཱ་ན་ཀཱ་ཡ་མཉྫུ་ཤྲཱི་པ་རི་ཤུདྡྷི་ཏ། མུ་པཱ་དཱ་ཡ་ཏི། ཨ་ཨཱཿ སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་ཝཱན། ཛྙཱ་ན་མཱུརྟི། བཱ་གཱི་ཤྭ་ར། མ་ཧཱ་པཱ་ཙ། སརྦ་དྷརྨཱ། ག་ག་ན་ཨ་མ་ལ་སུ་པ་རི་ཤུདྡྷ། དྷརྨ་དྷཱ་ཏུ་ཛྙཱ་ན་
[17a.7]གརྦྷ་ཨཱཿཞེས་བྱ་བའི་སྔགས་ཀྱིས་དང་པོ་དང་། བར་མ་དང་། མཐར་བྱིན་གྱིས་བརླབ་པ་སྔོན་དུ་འགྲོ་བས། རྗེ་བཙུན་མཚན་ཡང་དག་པར་བརྗོད་པ་ཉི་མ་རེ་རེ་ཞིང་སོ་སོའི་ཐུན་མཚམས་སུ་ལན་གསུམ་མམ་ལན་གཅིག་ཏུ་སྐྱིལ་མོ་ཀྲུང་མ་ཞིག་པར་མཉམ་པར་གཞག་པར་བཀླག་པར་བྱའོ། །དེ་
[17b]
[17b.1]ལྟར་ཇི་སྲིད་གྲུབ་པའི་མཚན་མ་མཐོང་བར་དེ་སྲིད་བཀླག་པར་བྱའོ། །དེའི་རྗེས་སུ་རྒྱུད་ཇི་ལྟ་བ་བཞིན་དངོས་གྲུབ་ཀྱི་ཐབས་ལ་རྗེས་སུ་གནས་པར་བྱའོ། །མཚན་ཡང་དག་པར་བརྗོད་པའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་བ་རི་ལོ་ཙཱ་བས་བསྒྱུར་བའོ།། །།
[17b.2]{T3322}༄༅༅། །རྒྱ་གར་སྐད་དུ། ཨཱཪྻ་མཉྫུ་བཛྲ་སིདྡྷཻ་ཀ་བཱི་ར་སཱ་དྷ་ནཾ། བོད་སྐད་དུ། འཕགས་པ་འཇམ་དཔལ་རྡོ་རྗེ་དཔའ་བོ་གཅིག་པའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །སྟོན་ཀའི་ཟླ་འདྲའི་འོད་གསལ་བའི། །འཇམ་དཔལ་རྡོ་རྗེ་ལ་ཕྱག་འཚལ། །དེ་ཡི་སྒྲུབ་
[17b.3]ཐབས་གསལ་པོ་མཆོག །མདོར་བསྡུས་བདག་གིས་བརྗོད་པར་བགྱི། །དང་པོར་རེ་ཞིག་སྔགས་པས་ཡིད་དང་མཐུན་པའི་གཙང་མའི་ས་ཕྱོགས་སུ་བདེ་བའི་གདན་ལ་བསྡད་ནས། རང་གི་སྙིང་གར་ཨཾ་ཡིག་ལས་བྱུང་བའི་ཟླ་བ་ལ་མཾ་དཀར་པོ་དེ་ཉིད་རྣམ་པར་དགོད་པར་བྱའོ། །དེའི་འོད་ཟེར་གྱིས་ནམ་
[17b.4]མཁའ་གང་བས་བཅོམ་ལྡན་འདས་བླ་མ་རྗེ་བཙུན་ནམ་མཁའ་ལ་བལྟས་ཏེ། དེ་ནས་བཅོམ་ལྡན་འདས་ཀྱི་མདུན་དུ་གནས་ལ་ཡིད་ཀྱིས་རང་བཞིན་གྱི་མཆོད་པས་བཅོམ་ལྡན་འདས་འཇམ་དཔལ་མཆོད་དེ། དགེ་བ་སྤེལ་བའི་དོན་དུ་སྡིག་པ་ཐམས་ཅད་སོ་སོར་བཤགས་པར་བགྱི་བ་དང་། བསོད་
[17b.5]ནམས་ཐམས་ཅད་ལ་རྗེས་སུ་ཡི་རང་བ་དང་། དེ་ཡང་བླ་ན་མེད་པའི་སངས་རྒྱས་ཀྱི་བྱང་ཆུབ་ཏུ་ཡོངས་སུ་བསྔོ་བར་བགྱི་བ་དང་བྱང་ཆུབ་ཀྱི་བར་དུ་སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་མཆི་བ་དང་། ཡང་དག་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །དེ་ནས་བཅོམ་ལྡན་
[17b.6]འདས་རང་གི་ས་བོན་དང་ལྷན་ཅིག་ཏུ་གྱུར་པར་བལྟའོ། །ཁམས་གསུམ་པོ་གཡོ་བ་དང་། མི་གཡོ་བ་ཐམས་ཅད་རྟེན་ཅིང་འབྲེལ་བར་འབྱུང་བ་རྣམ་པར་དཔྱད་མི་བཟོད་པ། རྨི་ལམ་སྒྱུ་མ་གཟུགས་བརྙན་ལྟ་བུར་བསམས་ཏེ། འདི་གཅིག་ཏུ་རང་བཞིན་གྱིས་འོད་གསལ་བ་ཡོངས་སུ་དག་པའི་
[17b.7]བདག་ཉིད་དུ་བསྒོམ་པར་བྱའོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བྱ་བ་འདིས་བརྟན་པར་བྱའོ། །ཡང་ན་སྔོན་གྱི་སྨོན་ལམ་གྱི་སྟོབས་ལས་བྱུང་བའི་ཟླ་བ་ལ་མཾ་རྣམ་པར་བསམས་ཏེ། དེའི་འོད་འཕྲོས་པས་མཾ་འཇམ་པའི་རྡོ་རྗེའི་བདག་ཉིད་བཅུག་སྟེ་བདག་ཉིད་མཾ་ལས་བྱུང་
[18a]
[18a.1]བ་བསམ་པར་བྱའོ། །སྟོན་ཀའི་ཟླ་བའི་རྣམ་པ་ཅན་གཙུག་ཕུད་ལྔ་པ་རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་ན་ཨུཏྤ་ལ་སྔོན་པོ་འཛིན་པ། ཕྱག་གཡས་པ་ན་མཆོག་སྦྱིན་དང་སྣ་ཚོགས་པདྨ་དང་ཟླ་བའི་གདན་ལ་སྐྱིལ་མོ་ཀྲུང་གིས་བཞུགས་པའོ། །རང་གི་སྙིང་
[18a.2]གར་ཟླ་བ་ལ་མཾ་ཟླ་ཤེལ་ནོར་བུའི་འོད་ཅན་འོད་ཟེར་རྣམས་ཀྱིས་ནམ་མཁའི་ཁམས་ན་གནས་པའི་འགྲོ་བའི་དོན་རྣམས་བྱེད་དོ། །གསལ་ཞིང་ཇི་སྲིད་སྐྱོ་བར་མ་གྱུར་པའི་རྣམ་པ་དེ་སྲིད་དུ་བསྒོམ་པར་བྱའོ། །བསྒོམས་པས་སྐྱོ་ན་སྔགས་པས་སྔགས་བཟླ་སྟེ། ཨོཾ་བཱ་ཀྱེ་དཾ་ནམཿསྔགས་སོ། །ཉེ་བའི་
[18a.3]སྙིང་པོ་ཡང་བཟླས་པ་བྱའོ། །ཨོཾ་ཧྲཱིཿཧཱུཾ་དེ་ནས་ཡི་གེ་བརྒྱ་པ་བརྗོད་ལ། འཇམ་པའི་རྡོ་རྗེའི་ང་རྒྱལ་གྱིས་ལངས་ཏེ། ལངས་ལ་ཡང་དེ་བཞིན་དུ་གནས་པར་བྱའོ། །ཟླ་བ་དྲུག་གིས་ངག་གི་དབང་ཕྱུག་འགྲུབ་པར་འགྱུར་རོ། །རྒྱུན་ཏུ་གོམས་པའི་སྦྱོར་བས་སྐྱེ་བ་འདི་ལ་སངས་རྒྱས་ཉིད་ཀྱང་འགྲུབ་
[18a.4]པར་འགྱུར་རོ། །དེ་ལྟར་བསམ་གཏན་ལ་གནས་པས་སྔོན་དུ་བསྙེན་པ་འབུམ་ཕྲག་བདུན་བཟླས་ལ་རལ་གྲི་ལ་སོགས་པའི་དངོས་གྲུབ་བསྒྲུབ་པར་བྱའོ། །དེ་ལ་ཟླ་བ་གཟས་ཟིན་པའམ། ཉི་མ་གཟས་ཟིན་པ་ལ་ཁབ་ལེན་གྱི་ལྕགས་ལས་བརྡུངས་པའི་རལ་གྲི་ལག་གིས་བཟུང་སྟེ། ཟླ་བ་ལ་
[18a.5]བལྟས་ནས་ཇི་སྙེད་གྲོལ་བར་མ་གྱུར་པ་དེ་སྙེད་དུ་བཟླས་པ་བྱའོ། །རལ་གྲིའི་རིག་པ་འཛིན་པར་འགྱུར་རོ། །ཇི་ལྟར་རྡོ་རྗེ་འཁོར་ལོ་རྩེ་གསུམ། ཐོ་བ། ཞགས་པ། ལྕགས་ཀྱུ་ལ་སོགས་པ་དང་། མིག་སྨན། རྐང་མགྱོགས། ཐིག་ལེ་དབང་དུ་བྱེད་པའི་རྫས་བསགས་ལ་བསྒྲུབ་པར་བྱའོ། །རིག་
[18a.6]འཛིན་གྱི་བཅུད་ལེན་བསྡུས་པར་བྱས་ལ་བསྒྲུབ་པར་བྱའོ། །འོ་ཐུག་གི་བཟའ་བ་དང་། ཞོའི་བཟའ་བའམ། མར་དང་བཅས་པས་ཤ་ཁ་ར་ཡིས་ལྷུང་བཟེད་བཀང་སྟེ། ལག་པར་ཉེ་བར་བཞག་ལ་བཟླས་པ་བྱས་ཏེ་བཟའ་བར་བྱའོ། །ལོ་ལྔ་བརྒྱར་འཚོ་བར་འགྱུར་རོ། །མོན་སྲན་དྲེའུ་ཁར་བླུགས་
[18a.7]ལ་བཟླས་པ་བྱ་སྟེ། ཁྲུང་སོ་སྐྱེ་བར་འགྱུར་རོ། །དེ་མིད་ན་ཚིགས་བཅད་ལ་མཁས་པར་འགྱུར་རོ། །ཐོས་པ་འཛིན་པར་འགྱུར་རོ། །ངག་དང་ལྡན་ཞིང་འཛིན་བློ་རྣོ་བར་འགྱུར་རོ། །བིལ་བ་རྣམས་ཀྱིས་འབུམ་ཕྲག་གཅིག་སྦྱིན་སྲེག་བྱས་ན་འཇིག་རྟེན་གསུམ་གྱི་རྒྱལ་པོ་འགྲུབ་པར་འགྱུར་རོ། །
[18b]
[18b.1]ཇི་ལྟར་རྙེད་པའི་མེ་ཏོག་ཡང་འབུམ་ཕྲག་བཞི་སྦྱིན་སྲེག་བྱས་ན། ངག་གི་དབང་ཕྱུག་གི་གྲུབ་པ་ཐོབ་སྟེ། ངག་གི་དབང་ཕྱུག་དང་ཡང་མཉམ་མོ། །མར་དང་འབྲུ་སྣ་ལྔའི་སྦྱིན་སྲེག་བྱས་ན་འབུམ་ཕྲག་བཞི་ཙམ་གྱིས་གནོད་སྦྱིན་མོ་འགུགས་པར་འགྱུར་རོ། །ས་འོག་གི་ལྷ་མོ་ཡང་ངོ་། །བྲམྷིའི་ཕྱེ་མ་སོར་
[18b.2]མོ་བཞི་ཙམ་བརྒྱ་རྩ་བརྒྱད་མངོན་པར་བསྔགས་ལ། ནང་པར་སྔ་བར་དཀྱིལ་འཁོར་བྱས་ལ་ཇི་ལྟར་འབྱོར་པས་བཅོམ་ལྡན་འདས་མཆོད་ལ། མར་རམ་ཀན་ཛི་བཏུང་བར་བྱའོ། །ཤུ་དག་ཞོ་ཕྱེད་ཚད་དེ་བཞིན་དུ་མངོན་པར་བསྔགས་ལ། མར་རམ། འོ་མའམ་མར་ནག་དང་ཟླ་བ་གཅིག་ཏུ་བཏུང་བར་
[18b.3]བྱའོ། །དིག་པ་དང་། ལྐུགས་པ་རྣམ་པར་ཉམས་པར་བྱེད་དོ། །ཟླ་བ་དྲུག་ན་ཐོས་པ་དང་། གཞན་ཡང་བསྟན་བཅོས་མངོན་དུ་འགྱུར་རོ། །མི་ཤེས་པ་རྣམ་པར་ཉམས་པར་འགྱུར་རོ། །ཐོས་པ་འཛིན་པ་དང་། ཁུ་བྱུག་ལྟར་འཇམ་པོའི་དབྱངས་གསལ་བའི་ངག་ཏུ་འགྱུར་རོ། །འཕགས་པ་འཇམ་
[18b.4]དཔལ་རྡོ་རྗེ་དཔའ་བོ་གཅིག་པའི་སྒྲུབ་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་ཆོས་ཀྱི་གྲགས་པས་བསྒྱུར་བའོ།། {T3323}༄༅༅། །རྒྱ་གར་སྐད་དུ། མཉྫུ་ཤྲཱི་པྲ་ཛྙཱ་ཙཀྲ་སཱ་དྷ་ནཾ། བོད་སྐད་དུ། འཇམ་དཔལ་ཤེས་རབ་འཁོར་ལོ་སྒྲུབ་པའི་ཐབས། སངས་རྒྱས་དང་བྱང་ཆུབ་སེམས་
[18b.5]དཔའ་ཐམས་ཅད་ལ་ཕྱག་འཚལ་ལོ། །བླ་མའི་ཞབས་ལ་རྟག་ཕྱག་འཚལ། །རྡོ་རྗེ་སློབ་དཔོན་དེ་བཞིན་དུ། །གང་གིས་དང་པོར་ཕྱག་བཙལ་ནས། །འཇམ་དབྱངས་སྒྲུབ་ཐབས་བྲི་བར་བྱ། །སེམས་དཔའི་སྐྱིལ་ཀྲུང་ལ་གནས་ཏེ། །སྙིང་གར་ཟླ་བ་ཨ་ཡིས་བརྒྱན། །ཀུནྡ་དང་འདྲ་ས་བོན་འབར། །སྣ་ཚོགས་འོད་ཟེར་ཀུན་དུ་ཁྱབ། །
[18b.6]དེ་ཡང་ཡོངས་སུ་རྫོགས་པར་གྱུར་པའི་ཆེ་བར་གྱུར་པ་ཡང་དག་པའི་སངས་རྒྱས་དང་། བླ་མ་དང་། བྱང་ཆུབ་སེམས་དཔའ་དེ་རྣམས་བལྟས་ནས་སྔགས་འདིས་མཆོད་པ་བྱ་སྟེ། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ནཻ་བི་དྱ་ཧཱུཾ། དེ་ནས། དཀོན་མཆོག་
[18b.7]གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་བསོད་ནམས་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་དགེ་འདུན་མཆོག །བྱང་ཆུབ་བར་དུ་སྐྱབས་སུ་མཆི། །བདག་དང་གཞན་དོན་རབ་བསྒྲུབ་ཕྱིར། །བྱང་ཆུབ་སེམས་
[19a]
[19a.1]འདི་བདག་གིས་བྱ། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །སེམས་ཅན་ཐམས་ཅད་བདག་གིས་དེ་ལ་གཟུད། །བྱང་ཆུབ་སྤྱོད་མཆོག་ཡིད་འོང་སྤྱད་ནས་སུ། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་བྱའོ། །སྨོན་ལམ་སྔོན་དུ་འགྲོ་བས་ཆོས་ཐམས་ཅད་
[19a.2]བདག་མེད་པར་སྔགས་འདི་ཡིས་བསྒོམ་པར་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ས་བོན་རྣམ་པ་སྒྱུ་མ་ལྟར། །ཁམས་གསུམ་མ་ལུས་རྣམ་བསམས་ནས། །མཐོང་བ་དང་ནི་རེག་ཉིད་ཀྱང་། །ཇི་ལྟར་ཐམས་ཅད་སྒྱུ་མ་བཞིན། །འགྲོ་བ་ཐམས་ཅད་གནས་པ་ནི། །དེ་ལྟར་མི་དམིགས་
[19a.3]པར་བྱའོ། །ཞེས་བྱ་བས་ལྷག་པར་མོས་པར་བྱའོ། །དེ་ནས་ཐོག་མ་མེད་པའི་དུས་ནས་ཡང་དག་པ་མ་ཡིན་པའི་རྣམ་པར་རྟོག་པའི་ས་བོན་བསལ་ནས། རང་བཞིན་གྱིས་དག་ཅེས་ལྷག་པར་མོས་པར་བྱའོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་བྱའོ། །དེ་ནས་སྔོན་དུ་བསྟན་པའི་ས་བོན་
[19a.4]ལས་ཡོངས་སུ་རྫོགས་པའི་རལ་གྲིའོ། །དེའི་ཆང་གཟུངས་ཀྱི་དབུས་སུ་ཟླ་བའི་དཀྱིལ་འཁོར་རོ། །དེའི་སྟེང་དུ་སྔོན་དུ་བསྟན་པའི་ས་བོན་ཏེ། དེ་ཐམས་ཅད་ཡོངས་སུ་གྱུར་པ་ལས། བདག་ཉིད་འཇམ་དཔལ་གྱི་གཟུགས་སུ་རྣམ་པར་བསམ་པར་བྱ་སྟེ། རང་ཉིད་འགྲོ་བ་ཐམས་ཅད་ཀྱི་གཙོ་
[19a.5]བོ་ཞེས་བྱའོ། །པདྨ་དང་ཟླ་བའི་གདན་ལ་གནས་ཤིང་སེམས་དཔའི་སྐྱིལ་མོ་ཀྲུང་གིས་མཉམ་པར་བཞུགས་པའོ། །ཟླ་བའི་འོད་དུ་མའི་འོད་ཟེར་སྤྲོ་ཞིང་ནམ་མཁའ་ཁྱབ་པར་བྱེད་པ་སྣ་ཚོགས་ཀྱི་ན་བཟའ་མནབས་པ། འགྲོ་བ་དགའ་བར་བྱེད་པ་སྐུ་མདོག་དཀར་ཞིང་ཡིད་དུ་འོང་བར་བྱེད་པའི་དཔའ་བོ་
[19a.6]ཆེན་པོ་གཙུག་ཕུད་ལྔ་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་ཀྱིས་རལ་གྲི་འཕྱར་བ། ཕྱག་གཡོན་པས་སྙིང་གར་པོ་ཏི་བསྣམས་པའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་ཐལ་མོ་སྦྱར་བ་བྱས་ནས། སྡིགས་མཛུབ་གཉིས་ཀྱིས་སྲིན་ལག་གི་སེན་མོ་གཉིས་
[19a.7]བཀབ་ལ་ཨུཏྤ་ལ་ཁ་ཕྱེ་བ་ལྟར་ཡང་དག་པར་གནས་ཏེ། སྙིང་ག་དང་། སྨིན་མའི་བར་དང་། མགྲིན་པ་དང་། སྤྱི་བོ་རྣམས་སུ་རང་གི་སྔགས་ཀྱིས་དགོད་པར་བྱས་ནས། དེ་ནས་ལྟེ་བའི་འོག་ཏུ་ཡི་གེ་བྷྲཱུཾ་ལས་མདོག་དཀར་པོའི་བྱང་ཆུབ་ཀྱི་ཤིང་གི་ལོ་མ་དང་འདྲ་བའི་ཟླ་བའི་དཀྱིལ་འཁོར་བསྒོམ་པར་
[19b]
[19b.1]བྱའོ། །དེའི་སྟེང་དུ་བརྒྱད་པའི་བཞི་པ། དང་པོའི་བཅུ་དྲུག་པ། བདུན་པའི་གཉིས་པ། དང་པོའི་བཞི་པས་བརྒྱན་པའོ། །དེ་ལས་ཡོངས་སུ་རྫོགས་པའི་པདྨ་ཁ་ཟུམ་པ་སྟེ། ལྟེ་བའི་སྟེང་དུ་ཡི་གེ་ཧཱུཾ་གིས་ཁ་ཕྱེ་བ་བསམ་པར་བྱའོ། །དེའི་སྟེང་དུ་ཟླ་བའི་དཀྱིལ་འཁོར་རོ། །དེའི་སྟེང་དུ་སོར་གཅིག་
[19b.2]ཙམ་སྤངས་པ་ལ་འཁོར་ལོ་རྩིབས་དྲུག་པ་འོད་ཟེར་དང་བཅས་པའོ། །དེའི་རྩིབས་ལ་དབྱངས་ཡིག་བཅུ་གཉིས་ཡི་གེ་ཟུང་རེ་རེ་དགོད་པར་བྱའོ། །རྩིབས་སོ་སོའི་སྟེང་དུ་རྩ་བའི་སྔགས་ཀྱི་ཡི་གེ་རེ་རེ་རྣམ་པར་བཀོད་ནས། འཁོར་ལོའི་ནང་གི་ལྟེ་བ་ལ་ཡི་གེ་ཧྲཱིཿའོད་ཟེར་དང་བཅས་པ་མི་གཡོ་བར་བསྒོམ་
[19b.3]པར་བྱའོ། །ཕྱིའི་མུ་ཁྱུད་ལ་ཀཱ་ལིའི་སྦྱོར་བས་ཡང་དག་པར་འབར་བའོ། །ང་ཉ་ཎ་ན་མ་ནིང་གི་ཡི་གེ་རྣམས་སྤངས་པ་བསྒོམ་པར་བྱའོ། །ཡང་དེའི་སྟེང་དུ་སོར་མོ་གཅིག་ཙམ་སྤངས་པ་ལ་ཟླ་བའི་དཀྱིལ་འཁོར་རོ། །དེའི་སྟེང་དུ་ཨ་ར་པ་ཙ་ན་ཞེས་བྱ་བ་བལྟས་ནས་ཤིན་ཏུ་མྱུར་བའི་འཁོར་ལོ་བསྒོམ་པར་
[19b.4]བྱའོ། །ཇི་སྲིད་ཟླ་བ་དྲུག་གི་བར་དུ་སྔགས་འདི་བཟླས་པར་བྱའོ། །ཨོཾ་བཛྲ་ཏཱིཀྵྞ་མུཿ། ཉི་མ་རེ་རེ་ལ་ཁྲི་ཕྲག་རེ་རེ་བཟླས་པར་བྱའོ། །ལྐུགས་པ་ཡང་སྨྲ་མཁས་པའོ། །ངག་གི་བདག་པོར་འགྱུར་རོ། །འཛིན་བློ་རྣོ་ཞིང་གཞུང་སྟོང་ཕྲག་གཅིག་འཛིན་པར་འགྱུར་རོ། །རྒྱུན་ཆད་པ་མེད་པའི་ལེགས་པར་སྦྱར་
[19b.5]བའི་སྐད་དང་། ཚིགས་བཅད་ཆེན་པོ་དང་། བསྟན་བཅོས་ཐམས་ཅད་མཐར་ཕྱིན་པ་དང་། གྲུབ་ན་ནི་རལ་གྲིའི་རིག་པ་འཛིན་པར་འགྱུར་རོ། །རིག་འཛིན་མ་རྣམས་དང་ལྷན་ཅིག་ཏུ་རྩེ་བར་འགྱུར་རོ། །ཤེས་རབ་འཁོར་ལོའི་གཙོ་བོ་འདི། །བྲིས་པས་འབྲས་བུ་སྐྱེས་པ་གང་། །དེ་ཡིས་འཇིག་རྟེན་ཐམས་
[19b.6]ཅད་འདི། །འཇམ་དཔལ་གོ་འཕང་ཐོབ་པར་ཤོག །འཇམ་དཔལ་ཤེས་རབ་ཀྱི་འཁོར་ལོ་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དྷརྨ་ཀཱིརྟིས་བསྒྱུར་བའོ།། {T3324}༄༅༅། །འཕྲལ་དུ་ཉམས་མྱོང་འཇམ་དཔལ་གྱི། །སྒྲུབ་ཐབས་ལེགས་པར་བརྗོད་པ་སྟེ། །ཤེས་
[19b.7]རབ་དོན་གཉེར་སྐྱེ་བོ་ཡི། །ཤེས་རབ་ངན་རྨོངས་དུག་གཞོམ་ཕྱིར། །དང་པོ་རེ་ཞིག་རྣལ་འབྱོར་པས། །ཡིད་དང་མཐུན་པའི་ས་ཕྱོགས་ཁ་ཅིག་ཏུ་དབྱངས་ཡིག་ཨ་ལས་བྱུང་བའི་ཟླ་བ་ལ་གནས་པའི་ཡི་གེ་དྷཱིཿའི་ས་བོན་ལས་བྱུང་བའི་ལྕགས་ཀྱུའི་རྣམ་པའི་འོད་ཟེར་གྱིས་ཨ་ར་པ་ཙ་ན་ལ་སོགས་པ་
[20a]
[20a.1]བཀུག་སྟེ། མཆོད་པ་ལ་སོགས་པ་བྱས་ནས་སྟོང་པ་ཉིད་བསྒོམ་པར་བྱའོ། །དེ་ནས་སེམས་ཀྱི་རྣམ་པ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ལ་གནས་པ་ཡི་གེ་དྷཱིཿམངོན་པར་གྱུར་པ་ལས་རལ་གྲི་རྣོན་པོ་བལྟ་བར་བྱའོ། །དེའི་རྩེ་མོ་ལ་དང་པོའི་དབྱངས་ཡིག་ཡོངས་སུ་གྱུར་པ་ལས་
[20a.2]ཟླ་བ་དེའི་སྟེང་དུ་རལ་གྲི་ལ་ས་བོན་ནོ། །དེ་ཐམས་ཅད་ཡོངས་སུ་གྱུར་པ་ལས་རལ་གྲི་དང་པོ་ཏི་བསྣམས་པ། གཙུག་ཕུད་ལྔ་ཅུང་ཞིག་འཁྱིལ་པ། གོས་དམར་པོ་ཟུང་དང་ལྡན་པ། སྒེག་པའི་ཆ་ལུགས་འཆང་བ། ཅུང་ཞིག་བཞད་པའི་ཞལ་ཅན། ཟླ་བའི་འོད་དང་འདྲ་བར་མཛེས་པ་སྣ་ཚོགས་པདྨ་ལ་གནས་པའི་ཟླ་བ་ལ་སེམས་
[20a.3]དཔའི་སྐྱིལ་མོ་ཀྲུང་གིས་གནས་པ། འཕྲལ་དུ་ཉམས་སུ་མྱོང་བའི་ཨ་ར་པ་ཙ་ནའི་གཟུགས་སུ་བདག་ཉིད་བལྟ་བར་བྱའོ། །དེ་ནས་རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་མ་རེག་པའི་འཁོར་ལོ་རྩིབས་བརྒྱད་པའོ། །འཁོར་ལོ་དེའི་སྟེང་དུ་སོར་གཅིག་ཙམ་ཅིག་མ་རེག་པའི་
[20a.4]དབྱངས་ཡིག་དང་པོ་ལས་ཡང་དག་པར་གྱུར་པའི་ཟླ་བའི་དཀྱིལ་འཁོར་རོ། །དེ་ལ་ཡང་ཟླ་བ་དང་ས་བོན་གྱིས་བསྐྱེད་པའི་རལ་གྲིའི་རྩེ་མོ་ལ་ཟླ་བ་དང་། སྔོན་དུ་བསྟན་པའི་རལ་གྲིའི་ས་བོན་གྱིས་རྣམ་པར་བརྒྱན་པ། རལ་གྲི་ལ་སོགས་པ་ཡོངས་སུ་གྱུར་པ་ལས་དེ་ལྟ་བུ་ཉིད་ཀྱི་འཇམ་པའི་དབྱངས་ཀྱི་རྣམ་པར་
[20a.5]བསྒོམ་པར་བྱའོ། །དེའི་མདུན་དུ་ར་ལས་སྐྱེས་པའི་རལ་གྲིའི་རྩེ་མོ་ལ་དབྱངས་ཡིག་དང་པོ་ལས་སྐྱེས་པའི་ཟླ་བ་ལ་གནས་པ་རའི་རྣམ་པ་བསྒོམ་པར་བྱས་ནས་རལ་གྲི་ལ་སོགས་པ་ཡོངས་སུ་གྱུར་པ་ལས་ཛཱ་ལི་ནཱི་གཞོན་ནུ་བཅོམ་ལྡན་འདས་ལྟ་བུར་བལྟ་བར་བྱའོ། །དེ་བཞིན་དུ་རྒྱབ་ཏུ་དེ་ལྟར་ཡང་ལྔ་པའི་
[20a.6]དང་པོ་ལས་ཙནྡྲ་པྲ་བྷའོ། །དེ་བཞིན་དུ་གཡས་ཕྱོགས་སུ་ཡི་གེ་ཙ་ལས་ཀེ་ཤི་ནཱིའོ། །ནུ་མའི་ཁར་དབུས་རྣམ་པར་མཛེས་པའི་མགོན་པོའི་གཟུགས་སོ། །གཡོན་པར་ཡང་ཨུ་པ་ཀེ་ཤི་ནཱི་ཡི་གེ་ན་ལས་དེ་བཞིན་དུའོ། །དེ་ཐམས་ཅད་ཀྱི་རང་གི་སྙིང་གར་ཟླ་བ་ལ་རང་རང་གི་ས་བོན་དཀར་པོའི་རྣམ་པར་བསམ་
[20a.7]པར་བྱའོ། །དེ་ནས་གཙོ་བོའི་ཐུགས་ཀའི་ས་བོན་ལས་བྱུང་བའི་འོད་ཟེར་གྱིས་བཀུག་པའི་ཡེ་ཤེས་སེམས་དཔའ་དེ་དང་ལྷན་ཅིག་ཏུ་བྱས་ནས། འཁོར་ལོ་ཡང་མྱུར་དུ་འཁོར་ཞིང་ཟླ་བ་ལ་གནས་པའི་ལྷ་མོ་བཞི་པོ་དང་ལྡན་པའི་བདག་བརྟན་པོར་ངག་གི་རང་བཞིན་མ་ལུས་པར་སྤྲོ་བ་དང་སྡུད་པར་
[20b]
[20b.1]བསམ་པར་བྱའོ། །བསམ་གཏན་གྱིས་སྐྱོ་བར་གྱུར་ན་སྔགས་བཟླས་པ་བྱ་སྟེ། དེ་ལ་སྔགས་ཀྱི་རྒྱལ་པོ་འདི་ལྟ་སྟེ། ཨ་ར་པ་ཙ་ན་དྷཱིཿཞེས་བྱའོ། །འཕྲལ་དུ་ཉམས་མྱོང་འཇམ་དཔལ་གྱི། །སྒྲུབ་ཐབས་བརྗོད་པའི་བསོད་ནམས་གང་། །བསགས་འགྱུར་དེ་ཡིས་འཇིག་རྟེན་ཀུན། །རྟག་ཏུ་འཇམ་
[20b.2]དབྱངས་མཚུངས་པར་ཤོག །འཕྲལ་དུ་ཉམས་སུ་མྱོང་བའི་ཨ་ར་པ་ཙ་ནའི་སྒྲུབ་ཐབས་རྫོགས་སོ། །ཁམས་པ་བ་རི་ལོ་ཙཱ་བ་དགེ་སློང་དྷརྨ་ཀཱིརྟིས་བསྒྱུར་བའོ།། {T3325}༄༅༅། །ཧཱུཾ་གི་ས་བོན་ལས་སྐྱེས་ནས། །རྣམ་པར་དག་པར་བྱ་བའི་བར་དུའོ། །དེ་ནས་ཉི་མ་ལ་གནས་པའི་ཡི་གེ་
[20b.3]ཧཱུཾ་ཡོངས་སུ་གྱུར་པའི་གཤིན་རྗེ་མཐར་བྱེད་ཁྲོ་བ་དང་བཅས་པ་སྐྲ་གྱེན་དུ་འགྲེང་བ། ཞལ་དྲུག་པ། ཕྱག་དྲུག་པ། ཞབས་དྲུག་པ་མ་ཧེ་ལ་ཞོན་པ། གཡོན་བརྐྱང་བའི་ཞབས་ཀྱིས་གནས་པ། མིའི་མགོ་བོའི་ཕྲེང་བས་རྣམ་པར་བརྒྱན་པ། ཤིན་ཏུ་འཇིགས་པར་བྱེད་པའི་རྣམ་པ་ཅན། སྟག་གི་པགས་
[20b.4]པའི་ཤམ་ཐབས་ཅན། གཡས་པ་ན་རལ་གྲི་དང་། ཐོ་བ་དང་། རྡོ་རྗེའོ། །གཡོན་པ་ན་དྲིལ་བུ་དང་། རྡོ་རྗེ་ཞགས་པ་དང་། གཏུན་ཤིང་བསྣམས་པ། དབུ་རྒྱན་མི་བསྐྱོད་པའི་རྣམ་པར་བསྒོམ་པར་བྱའོ། །དེ་ནས་དམ་ཚིག་གི་ཕྱག་རྒྱ་བཅིང་བར་བྱའོ། །ཐལ་མོ་སྦྱར་བ་བཅིངས་ཏེ། མཐེབ་ཆེན་
[20b.5]གཉིས་ཁ་ཕྱེ་སྟེ་སྡིགས་མཛུབ་གཉིས་ཀྱང་ཁ་ཕྱེ་ཞིང་གུང་མོ་གཉིས་ཚིགས་གསུམ་པ་བཅག་པར་བྱའོ། །ཨོཾ་ཧྲཱིཿཥྚྲཱྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བྱ་བའི་བཟླས་པ་བྱའོ། །གཤིན་རྗེ་ནག་པོའི་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་དྷརྨ་ཀཱིརྟིས་བསྒྱུར་བའོ།། །།
[20b.6]{T3326}༄༅༅། །དང་པོ་རེ་ཞིག་སྒྲུབ་པ་པོ་བདེ་བའི་སྟན་ལ་ཉེ་བར་འདུག་སྟེ། རང་གི་སྙིང་གར་ཡི་གེ་ཨོཾ་དམར་པོ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་བསྒོམ་པར་བྱའོ། །དེའི་སྟེང་དུ་ཡི་གེ་ཧཱུཾ་སྔོན་པོ་བཀོད་ནས། ཡི་གེ་ཧཱུཾ་ལས་སྐྱེས་པའི་འོད་ཟེར་ལས་བྱུང་བའི་གཤིན་རྗེ་མཐར་བྱེད་ལ་སོགས་པའི་
[20b.7]བླ་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་དམིགས་ནས་མེ་ཏོག་ལ་སོགས་པས་ཡང་དག་པར་མཆོད་དེ་ཕྱག་བྱས་ནས། གསུམ་ལ་སྐྱབས་སུ་འགྲོ་བ་ལ་སོགས་པ་བྱས་ནས་སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བྱའོ། །དེ་ནས་ཡི་གེ་ཨཾ་དམར་པོ་
[21a]
[21a.1]ལས་སྐྱེས་པའི་ཉི་མའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་ངོ་། །དེ་ཡོངས་སུ་གྱུར་པ་ལས་རྡོ་རྗེས་མཚན་པའི་དབྱུག་པ་ཡི་གེ་ཧཱུཾ་གིས་བྱིན་གྱིས་བརླབས་ལ་བསྒོམ་པར་བྱའོ། །ཨོཾ་དང་ཧཱུཾ་གི་འོད་ཟེར་གྱིས་བསྐུལ་བའི་དེ་བཞིན་གཤེགས་པ་ཐམས་ཅད་གཞུག་པ་སྔོན་དུ་འགྲོ་བས།
[21a.2]དེ་ཐམས་ཅད་ཡོངས་སུ་གྱུར་པ་ལས་གཤིན་རྗེ་གཤེད་ཀྱི་རྣམ་པར་བསམ་པར་བྱའོ། །བདག་ཉིད་གཡོན་བརྐྱང་པའི་ཞབས་ཀྱིས་གནས་པ་ཞལ་གཅིག་ཕྱག་གཉིས་པ། མདོག་སྔོ་བ། ཕྱག་གཡས་ན་རྡོ་རྗེས་མཚན་པའི་དབྱུག་པ་སྔོན་པོ་འཕྱར་བ། ཕྱག་གཡོན་པས་ཞགས་པ་དང་བཅས་པའི་
[21a.3]སྡིགས་མཛུབ་སྙིང་གར་རོ། །དེ་ལྟར་གྱུར་པའི་གཤིན་རྗེ་གཤེད་སྤྲོ་བ་དང་། བསྡུ་བའི་གཟུགས་སྣ་ཚོགས་པདྨའི་སྟེང་དུ་ཉི་མ་ལ་གནས་པའི་མ་ཧེ་ལ་ཞོན་པ་བསྒོམ་པར་བྱའོ། །དེ་ནས་བཅོམ་ལྡན་འདས་ཀྱི་ཐུགས་ཀར་ཉི་མའི་དཀྱིལ་འཁོར་ལ་ཡི་གེ་ཧཱུཾ་ཡོངས་སུ་གྱུར་པ་ལས་དབྱུག་པ་སྔོན་པོ་
[21a.4]ཡི་གེ་ཧཱུཾ་གིས་བྱིན་གྱིས་བརླབས་པའོ། །ཡི་གེ་ཧཱུཾ་ལས་བྱུང་བའི་འོད་ཀྱིས་འགྲོ་བ་གསལ་བར་བྱས་ནས་ཡང་དེ་ཉིད་དུ་གཞུག་པར་བྱའོ། །དེ་ལྟ་བུའི་རིམ་པས་ཇི་སྙེད་འདོད་པར་སྤྲོ་བ་དང་བསྡུ་བར་བྱའོ། །དམ་ཚིག་ལ་སོགས་པའི་ཆོ་ག་སྔོན་དུ་འགྲོ་བས་དེ་ལྟར་ཐུན་མཚམས་གཉིས་དང་གསུམ་
[21a.5]དང་བཞིར་བསྒོམ་པར་བྱའོ། །ཨོཾ་ཧྲཱིཿཥྚྲཱྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བྱ་བའི་སྔགས་བཟླས་པར་བྱའོ། །གཤིན་རྗེ་གཤེད་ནག་པོའི་སྒྲུབ་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་ཆོས་ཀྱི་གྲགས་པས་བསྒྱུར་བའོ།། {T3327}༄༅༅། །རྒྱ་གར་སྐད་དུ། ཀྲྀཥྞ་ཡ་མཱ་རི་སཱ་
[21a.6]དྷ་ནཾ། བོད་སྐད་དུ། གཤིན་རྗེ་གཤེད་ནག་པོ་སྒྲུབ་པའི་ཐབས། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །དང་པོ་རེ་ཞིག་སྙིང་རྗེ་དང་ལྡན་པའི་སྔགས་པས་བདེ་བའི་གདན་ལ་འདུག་སྟེ། ཐང་ཀ་ལ་སོགས་པར་གཏོགས་པའི་བཅོམ་ལྡན་འདས་གཤིན་རྗེ་གཤེད་མདུན་དུ་ད
[21a.7]མིགས་ཏེ། བླ་མ་དང་། སངས་རྒྱས་དང་། བྱང་ཆུབ་སེམས་དཔའ་ཡང་བལྟས་ནས། སྣ་ཚོགས་ཀྱི་མཆོད་པ་རྣམས་ཀྱིས་ཡང་དག་པར་མཆོད་དེ། ཕྱག་འཚལ་བ་དང་། སྡིག་པ་བཤགས་པ་ལ་སོགས་པ་བྱའོ། །དེ་ནས་སྭ་བྷཱ་ཝ་ཤུདྡྷོ་ཞེས་བྱ་བ་ལ་སོགས་པའི་སྔགས་ཀྱིས་རང་བཞིན་
[21b]
[21b.1]གྱིས་རྣམ་པར་དག་པར་མོས་ཤིང་ཆོས་ཐམས་ཅད་བདག་མེད་པར་བསྒོམས་ལ་གཉུག་མའི་སྔགས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་པར་བྱའོ། །དེ་ནས་རང་གི་སྙིང་གར་ཨོཾ་ལས་སྐྱེས་པའི་ཟླ་བའི་དཀྱིལ་འཁོར་ལ་ཧཱུཾ་སྔོན་པོ། ཁ་ཅིག་གིས་ནི་ཉི་མ་ལ་གནས་པའི་ཧཱུཾ་བལྟས་ལ། དེའི་
[21b.2]འོད་ཟེར་གྱིས་བགེགས་རྣམས་བསྐྲད་དེ། སེམས་ཅན་གྱི་དོན་བྱེད་པ་ལ་སོགས་པའི་ཁྲོ་བོ་གཤིན་རྗེ་གཤེད་ཀྱི་རྣམ་པ་སྤྲོ་ཞིང་བསྡུ་སྟེ། སྐད་ཅིག་གིས་དེ་ཡོངས་སུ་གྱུར་པ་ལས་བདག་ཉིད་གཤིན་རྗེ་གཤེད་དུ་བསྒོམ་པར་བྱའོ། །སྐུ་མདོག་ནག་པོ་ཞལ་གསུམ་ཕྱག་དྲུག་པའོ། །ཁ་ཅིག་གིས་ནི་ཞལ་
[21b.3]དྲུག་ཞབས་དྲུག་པར་འདོད་དོ། །ཞལ་མཆེ་བ་གཙིགས་པ། སྤྱན་དམར་བའོ། །གཡས་ཀྱི་ཕྱག་གསུམ་ན་འཁོར་ལོ་དང་། རལ་གྲི་དང་། གཏུན་ཤིང་བསྣམས་པའོ། །གཡོན་གྱི་གསུམ་ན་པེ་ཏ་ལི་དང་། དགྲ་སྟ་དང་། ཞགས་པ་བསྣམས་པའོ། །ཁ་ཅིག་གིས་ནི་གཡས་པའི་ཕྱག་ན་རལ་གྲི་
[21b.4]དང་། ཐོ་བ་དང་། རྡོ་རྗེ་བསྣམས་པའོ། །གཡོན་གྱི་ཕྱག་ན་དྲིལ་བུ་རྡོ་རྗེ་ཞགས་པ་དང་། གཏུན་ཤིང་ངོ་། །སྐྲ་ཁམ་པ་གྱེན་དུ་བསྒྲེང་བ། མགོ་བོའི་ཕྲེང་བས་བརྒྱན་པའི་དབུ་རྒྱན་ཅན། ཀླུའི་རྒྱལ་པོ་བརྒྱད་ཀྱིས་སྤྲས་པའི་རྒྱན་དང་། མི་བསྐྱོད་པའི་དབུ་རྒྱན་ཅན་སྣ་ཚོགས་པདྨའི་སྟེང་ན་ཉི་མའི་
[21b.5]དཀྱིལ་འཁོར་ལ་གཡོན་བརྐྱང་བའི་ཞབས་ཀྱིས་གནས་པ་འོད་ཀྱི་དཀྱིལ་འཁོར་དམར་པོའི་རྣམ་པར་བསྒོམས་ནས། ནུ་མའི་བར་དུ་ཟླ་བའི་དཀྱིལ་འཁོར་ལ་ཧཱུཾ་བལྟའོ། །སྐུ་དང་གསུང་དང་ཐུགས་རྣམས་ལ་ཟླ་བའི་དཀྱིལ་འཁོར་ལ་ཨོཾ་ཨཱཿཧཱུཾ། ཞེས་བྱ་བའི་ཡི་གེ་གསུམ། དཀར་པོ་དང་། དམར་
[21b.6]པོ་དང་། ནག་པོ་གོ་རིམས་བཞིན་དུ་བལྟའོ། །དེ་ནས་སྙིང་གའི་ས་བོན་ལས་བྱུང་བའི་ལྷ་མོ་རྣམས་ཀྱིས་བདག་ཉིད་ཡང་དག་པར་མཆོད་ཅིང་བསྟོད་ནས་བཟླས་པ་བྱའོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གཤིན་རྗེ་གཤེད་ནག་པོའི་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་དགེ་
[21b.7]སློང་བ་རིས་བསྒྱུར་བའོ།། །།{T3328}༄༅༅ །རྒྱ་གར་སྐད་དུ། ཤྲཱི་བཛྲ་དྷརྨ་སཱ་དྷ་ནཾ། བོད་སྐད་དུ། དཔལ་རྡོ་རྗེ་ཆོས་ཀྱི་སྒྲུབ་ཐབས། དཔལ་རྡོ་རྗེ་ཆོས་ལ་ཕྱག་འཚལ་ལོ། །ཉེས་པའི་དྲ་བ་བཅོམ་པའི་དཔལ་ལྡན་རྡོ་རྗེ་ཆོས། །ངག་གི་དཀྱིལ་འཁོར་སྤྲོས་པའི་འོད་ཀྱི་དྲ་བ་སྟེ།
[22a]
[22a.1]ཡང་དག་སངས་རྒྱས་མ་ལུས་ངག་གི་རང་བཞིན་ལ། །རབ་ཏུ་བཏུད་ནས་ངག་གི་སྒྲུབ་ཐབས་བརྗོད་པར་བྱ། །སྔགས་ཀྱི་རང་བཞིན་གྱིས་ནི་རྣམ་པར་དག་པའི་གཟུགས། །རབ་བརྗོད་བརྩོན་འགྲུས་རླུང་དང་འདྲ་བས་བསྐྱོད་པ་ཡིས། །སྒྱུ་མ་དང་ནི་སྨིག་རྒྱུ་ཆུ་ཟླ་རྟག་པར་ནི། །
[22a.2]འཇིག་རྟེན་མ་ལུས་པ་འདི་རྣམ་པར་བསྒོམ་པར་བྱའོ། །པཾ་གི་ཡི་གེ་ལས་བྱུང་རྣམ་པར་བསྒོམ་པ་ནི། །མ་ལུས་རྣམ་དག་ངོ་བོ་སྣ་ཚོགས་པདྨ་སྟེ། །ཨ་ཡིག་ལས་སྐྱེས་དཔག་ཏུ་མེད་པའི་འོད་གསལ་བ། །ཆ་ནི་མ་ལུས་རྣམ་པར་དག་པ་ཟླ་བ་སྟེ། །ཡང་ནི་གསང་བ་མཆོག་ནི་སྣ་ཚོགས་པར་
[22a.3]འགྱུར་བའོ། །ས་བོན་ཡི་གེ་ལས་ནི་རབ་ཏུ་བྱུང་བའི་འཇིག་རྟེན་འོད་ཀྱི་ཚོགས། །བནྡུ་ཀ་ཡི་མེ་ཏོག་འོད་ཀྱི་རྣམ་པ་དྲ་བ་ཅན། །གང་གིས་སྤྲོས་པ་རབ་ཏུ་བྱུང་བའི་རྒྱུ་གཅིག་པོ། །དེ་ཡི་ས་བོན་ཡང་དག་གྱུར་པས་སྐྱོན་མེད་སོན། །ཏིང་འཛིན་ཕྱག་རྒྱ་འཆང་བའི་ཕྱག་ན་པདྨ་སྟེ། །རྡོ་རྗེ་གདན་གནས་
[22a.4]སྙིང་རྗེ་མངོན་པར་ཉམས་དགའ་བའི། །དཔལ་ལྡན་རྡོ་རྗེ་འདོད་པས་ཡོངས་སུ་དག་པའི་ཆགས། །བ་སྤུའི་ཁུང་བུར་བྱུང་གྱུར་རྣམ་དག་སངས་རྒྱས་ཀྱི། །སྤྲིན་གྱི་ཚོགས་ཀྱིས་འགྲོ་ལ་ཕན་པའི་དོན་དུ་ནི། །ཤིན་ཏུ་རྣམ་པར་དག་པའི་བློ་ནི་རབ་འབྱེད་པར། །ཐམས་ཅད་འགྲོ་བའི་རང་བཞིན་དུ་ནི་
[22a.5]རྣམ་པར་བསྒོམ། །སྙིང་གར་ཟླ་བའི་གཟུགས་ལ་རྡོ་རྗེ་རབ་བལྟས་ཏེ། །འབར་བ་ཡིས་ནི་འཇིག་རྟེན་ཐམས་ཅད་གསལ་བྱེད་པ། །ཡིག་ཧཱུཾ་མགོན་པོ་ལས་ནི་ཡོངས་སུ་རྫོགས་པའི་གཟུགས། །ལྔ་ཡི་བདག་ཉིད་སངས་རྒྱས་སྤྲིན་གྱི་ཚོགས་བྱུང་བ། །དེ་ཡི་དབུས་མའི་རྭ་ཡི་རྩེ་མོར་གསལ་
[22a.6]གནས་ལ། །དེས་གནས་ལུས་ཀྱིས་འཇིག་རྟེན་གསུམ་པོ་གསལ་བྱེད་པ། །ཡི་གེ་ཆེན་པོས་རྣམ་འཇོམས་མང་ཞིང་མི་འགྱུར་བའི། །རྒྱུད་ལས་སྡུག་བསྔལ་རབ་ཏུ་རྒྱས་པའི་མུན་པ་སྟེ། །དེ་ལས་བྱུང་བའི་མཛེས་པའི་འོད་ཀྱི་ཚོགས་ལྡན་པའི། །ཉི་མའི་གཟུགས་བརྙན་དྲི་མེད་ཉམས་དགའ་དམར་
[22a.7]པོ་སྟེ། །ཤེས་རབ་སྔོན་གྱི་ཕོ་ཉ་དགེ་བའི་ངག་བསྐྱེད་པའི། །རྡོ་རྗེར་གྱུར་པའི་ལྕེ་ནི་རབ་ཏུ་རྫོགས་པར་བྱ། །དེ་ཡི་རྩེ་མོའི་ཆ་ལ་རོལ་པའི་མཆོག་གི་དམར་པོ་སྟེ། །དེ་ཉིད་རྒྱ་ཆེན་འོད་ནི་རྣམ་པར་བསམ་པར་བྱ། །རང་གི་སྟོབས་ཀྱིས་རྒྱུན་དུ་གྱུར་པའི་བརྩོན་འགྲུས་ཀྱིས། །རྩོད་པ་མཆོག་གིས་
[22b]
[22b.1]སྟོབས་ཀུན་འཇོམས་པར་བྱེད་པ་སྟེ། །རྟག་ཏུ་རབ་ཏུ་གོམས་ཤིང་ངེས་པར་བསྒྲུབ་པ་ལས། །ངག་གི་སྒྲུབ་ཐབས་དངོས་གྲུབ་ཉེ་བར་གྲུབ་གྱུར་ན། །ཚིགས་བཅད་ཚིག་ལྷུག་པ་དག་རྩོལ་བ་མེད་པར་བརྗོད། །མཚོན་ཆ་བསྟན་བཅོས་དག་ནི་རྣལ་འབྱོར་པ་ཡིས་རྟོགས། །བསྟན་བཅོས་སྣ་ཚོགས་
[22b.2]དག་ཀྱང་ངེས་པར་འབྱེད་པར་འགྱུར། །འགྲོ་བ་རྣམས་ཀྱི་ཆེད་དུ་བདག་ཉིད་དོན་ཆེན་པོ། །འདི་ཡིས་གཞན་གྱི་སེམས་ཀྱི་རྒྱུད་ཤེས་པར་འགྱུར་ཏེ། །འདོད་ཆགས་ལ་སོགས་ཉེས་པའི་ཉེ་བ་བཅོམ་འགྱུར་ཞིང་། །གང་ཚེ་ཏིང་ངེ་འཛིན་དེ་བརྟན་པར་གྱུར་པའི་ཚེ། །ཤིན་ཏུ་ཕྲ་བ་མྱུར་དུ་གསལ་བ་ངེས་པར་
[22b.3]རྟོགས། །སངས་རྒྱས་མ་ལུས་དང་མཉམ་སྐུ་ནི་འཛིན་པ་སྟེ། །དེ་ལྟར་འགྱུར་ལ་ཐེ་ཚོམ་འདིར་ནི་མི་བྱའོ། །བྱུང་དང་འབྱུང་བར་གྱུར་པ་མདུན་ན་གནས་པ་བཞིན། །གོམས་པའི་སྦྱོར་བ་ཡིས་ནི་སྐྱེས་བུས་རྟོགས་པར་འགྱུར། །འདོད་ཆགས་རིགས་ཅན་བུད་མེད་ལ་ནི་དགའ་བ་བཞིན། །
[22b.4]སེམས་ནི་རྗེས་སུ་ཆགས་པར་བྱེད་ན་རྣལ་འབྱོར་གྲོལ། །ཇི་སྙེད་དགེ་བའི་རྩ་བ་བདག་གིས་བསགས་འདི་ཡིས། །རྒྱལ་བ་མཆོག་གི་དཔལ་ནི་གྲོལ་བ་ཐོབ་པར་ཤོག །འཇིགས་དང་མྱ་ངན་མི་དགའ་ཟུག་རྔུ་རབ་སྤངས་ཏེ། །རི་བོང་འཛིན་པའི་ཡིད་ནི་འོད་དང་ཉེ་བ་སྟེ། །རིང་པོར་མི་ཐོགས་དགེ་བ་
[22b.5]ཆགས་པའི་སེམས་ཀྱིས་ནི། །བླ་མ་མཆོག་ལས་རྙེད་པའི་གདམས་ངག་རོལ་པ་ཡིན། །འདི་ཡིས་པདྨའི་རིགས་སུ་འགྲོ་ཞིང་རྒྱས་གྱུར་ཅིག །དཔལ་གྱི་རྗེས་འགྲོ་ཏིང་ངེ་འཛིན་དབང་དུ་བྱས་པས་དགའ། །བདག་ཉིད་བཟང་པོ་སྐྱེ་འགྲོ་མཐོང་བར་རབ་འགྱུར་བ། །འབར་བའི་མེ་ཡི་ཕྲེང་བའི་
[22b.6]དབུས་སུ་གནས་པའི་སྐུ། །སྙིང་རྗེ་བླ་མར་འཛིན་འགྱུར་ཐོད་པའི་ཕྲེང་བ་འཛིན། །ཆུ་འཛིན་རྒྱས་པའི་མངོན་པར་རབ་ཏུ་སྔོ་བའི་དཔལ། །ངག་གི་སྒྲུབ་ཐབས་མཆོག་གྱུར་བ། །བདེ་བའི་སྐྱེ་བོ་བཟང་པོས་བྱས། །འདི་ཡིས་ངག་ནི་སྒྲུབ་བྱེད་པ། །ངག་གི་དབང་ཕྱུག་དེ་འགྱུར་ཤོག །རྡོ་རྗེ་ཆོས་ཀྱི་
[22b.7]སྒྲུབ་ཐབས་སློབ་དཔོན་སུ་ཛ་ན་བྷ་དྲས་མཛད་པ་རྫོགས་སོ།། {T3329}༄༅༅། །རྒྱ་གར་སྐད་དུ། སིཾ་ཧ་ནཱ་ད་སཱ་དྷ་ནཾ། བོད་སྐད་དུ། སེང་གེ་སྒྲའི་སྒྲུབ་ཐབས། འཕགས་པ་སེང་གེ་སྒྲ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་གདོང་བཀྲུ་བ་ལ་སོགས་པ་བྱས་ནས།
[23a]
[23a.1]བདེ་བའི་གདན་ལ་འདུག་སྟེ། རྣལ་འབྱོར་པས་རང་གི་སྙིང་གར་ཟླ་བའི་དཀྱིལ་འཁོར་ལ་ཡི་གེ་ཧྲཱིཿབལྟས་ལ། མདུན་དུ་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་བསྒོམ་པར་བྱའོ། །དེའི་རྗེས་ལ་མཆོད་པ་དང་། སྡིག་པ་བཤགས་པ་ལ་སོགས་པ་བྱས་
[23a.2]ནས་སྟོང་པ་ཉིད་བསྒོམ་པར་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་པས་བྱིན་གྱིས་བརླབས་ལ། དེ་ནས་སྐད་ཅིག་ཙམ་གྱིས་ཡི་གེ་པཾ་ཡོངས་སུ་གྱུར་པ་ལས། པདྨ་དམར་པོ་དེའི་སྟེང་དུ་ཡི་གེ་སིཾ་ཡོངས་སུ་གྱུར་པ་ལས་སེང་གེ་དཀར་པོ། དེའི་སྟེང་དུ་ཟླ་བ་ལ་ཧྲཱིཿལས་ཡང་
[23a.3]དག་པར་བྱུང་བའི་རྗེ་བཙུན་སེང་གེ་སྒྲའི་སྐུ་གཟུགས་སུ་བསྒོམ་སྟེ། སྐུ་མདོག་དཀར་པོ་རལ་པའི་ཐོར་ཚུགས་ཅན། སྤྱན་གསུམ་པ། ཕྱག་གཉིས་པ། དཀའ་ཐུབ་ཅན་གྱི་ཆ་བྱད་འཛིན་པ། རྒྱལ་པོ་རོལ་པས་གནས་པའོ། །ཕྱག་གཡོན་པས་ནི་པདྨ་བསྒྲེང་བའི་སྟེང་ན་རལ་གྲི་འབར་བས་བརྒྱན་
[23a.4]པའོ། །གཡས་སུ་སྦྲུལ་དཀར་པོས་དཀྲིས་པའི་མདུང་རྩེ་གསུམ་པའོ། །གཡོན་དུ་དྲི་ཞིམ་པོའི་མེ་ཏོག་གི་ཚོགས་ཀྱིས་བཀང་བའི་ཐོད་པ་དཀར་པོའོ། །སྐུ་ལས་དེ་བཞིན་གཤེགས་པ་ལྔ་འཕྲོ་བའི་སྤྲུལ་པའི་གཟུགས་སུ་བསྒོམས་ལ་སྔགས་འདི་བཟླས་པར་བྱའོ། །ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུཾ་ཕཊ། སྔོན་
[23a.5]དུ་བསྙེན་པ་འབུམ་ཕྲག་གཅིག་བཟླས་པར་བྱའོ། །དེ་ནས་ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ་བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊ་བཱིརྱེ་སྭཱཧཱ། འདིའི་ཉེ་བར་སྤྱོད་པ་ནི་བཅོམ་ལྡན་འདས་ཀྱི་མདུན་དུ་
[23a.6]གཟུངས་སྔགས་འདིས་ས་ལ་མ་ལྷུང་བའི་ལྕི་བས་མཎྜལ་བརྒྱད་ཕུལ་ཏེ། མཎྜལ་རེ་རེ་ཞིང་ལན་བཅུ་གསུམ་བཅུ་གསུམ་བརྗོད་པར་བྱའོ། །དེ་ནས་ལྕི་བ་ལྷག་མ་དེ་ཉིད་ལ་མངོན་པར་བསྔགས་ཏེ། ལུས་ལ་ཉེ་བར་བྱུགས་ན་ནད་ཐམས་ཅད་རབ་ཏུ་ཞི་བར་འགྱུར་རོ། །གལ་ཏེ་མཚམས་མེད་པའི་ལས་བྱས་
[23a.7]ཀྱང་ཉི་མ་བདུན་ནམ། བཅུ་བཞིའམ། ཉི་ཤུ་རྩ་གཅིག་གིས་མ་གྲུབ་ན་དེའི་ཚེ་བདག་གིས་མཚམས་མེད་པ་ལྔ་བྱས་པ་ཡིན་ནོ། །སེང་གེ་སྒྲའི་སྒྲུབ་ཐབས་སློབ་དཔོན་ཙནྡྲ་གོ་མིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།
[23b]
[23b.1]{T3330}༄༅༅། །རྒྱ་གར་སྐད་དུ། ཧཱ་ལ་ཧཱ་ལ་སཱ་དྷ་ནཾ། བོད་སྐད་དུ། ཧཱ་ལ་ཧཱ་ལའི་སྒྲུབ་ཐབས། བཅོམ་ལྡན་འདས་ཧཱ་ལ་ཧཱ་ལ་ལ་ཕྱག་འཚལ་ལོ། །བསམ་པ་ཐམས་ཅད་རྫོགས་བྱེད་པའི། །ཧཱ་ལ་ཧཱ་ལར་གུས་ཕྱག་འཚལ། །སྙིང་རྗེའི་བདག་ཉིད་སྒྲུབ་པའི་ཐབས། །མདོར་བསྡུས་
[23b.2]དེ་ནི་བརྗོད་པར་བྱ། །དང་པོར་ཡིད་དང་མཐུན་པའི་གནས་སུ་ཙནྡན་ལ་སོགས་པས་ལེགས་པར་བྱུགས་ལ་ཐང་ཀ་ལ་སོགས་པ་གནས་པར་བཞུགས་སུ་གསོལ་ཏེ་བཅོམ་ལྡན་འདས་ལ་མཆོད་པར་བྱའོ། །མེ་ཏོག་ལ་སོགས་པ་དབུལ་བའི་སྔགས་ནི། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་
[23b.3]དཱི་པེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ནཻ་བི་དྱེ་ཧཱུཾ་ཞེས་བྱ་བ་ལ་སོགས་པས་སོ། །ཨོཾ་སརྦ་ཏ་ཐཱ་ག་ཏ་པཱུ་ཛ་མེ་གྷ་པྲ་ས་ར་ས་མུ་ཏྲ་བྱེ་སྥར་ཧི་མཾ་ག་ག་ན་ཁཾ་ཧཱུཾ་མཆོད་པ་ཐམས་ཅད་དབུལ་བའི་སྔགས་སོ། །རབ་ཏུ་མཆོད་ལ་དེའི་མདུན་དུ། །བདེ་བའི་སྟན་ལ་རབ་གནས་ཏེ། །འགྲོ་ལ་བྱམས་པ་རྣམ་པར་བསྒོམ། །
[23b.4]སྙིང་རྗེ་ཡང་ནི་བརྩེ་ཆེན་པོས། །ཧྲཱིཿཡིག་ཟླ་བའི་སྟེང་དུ་ནི། །སྔགས་པས་སྙིང་གར་དགོད་པར་བྱ། །སངས་རྒྱས་སྲས་བཅས་གསལ་པོར་ནི། །ནམ་མཁའ་གང་བར་བལྟ་བར་བྱ། །ཧྲཱིཿཡིག་འོད་ཟེར་མཆོད་པས་ནི། །དེ་ལ་རབ་ཏུ་བསྐོར་ཞིང་མཆོད། །སྡིག་པ་ལ་སོགས་བཤགས་པར་
[23b.5]བྱ། །བསོད་ནམས་འཕེལ་ཕྱིར་བྱ་བ་ནི། །མཆོག་གསུམ་སྐྱབས་འགྲོ་ལ་སོགས་བྱ། །སྔགས་འདི་དག་ནི་བརྗོད་བྱ་སྟེ། །ཆོས་རྣམས་བདག་ནི་མེད་པའི་མཆོག །སྙིང་རྗེ་ཡིས་ནི་གསལ་བྱེད་པ། །ཨོཾ་སྭ་བྷཱ་ཝ་ཤུདྷཿསརྦ་དྷརྨཱཿསྭབྷཱ་ཝ་ཤུདྡྷོ྅ཧཾ། ཞེས་བྱ་བའི་སྔགས་ཀྱི་དོན་མངོན་དུ་བྱས་པ།
[23b.6]དངོས་པོ་དང་བཅས་བདག་ཉིད་ཀྱང་། །གཟུང་དང་འཛིན་པ་རྣམ་གྲོལ་བའི། །ཡེ་ཤེས་ཙམ་དུ་བསྒོམ་པར་བྱ། །སོ་སོ་རང་གི་རིག་པས་བལྟ། །ཧྲཱིཿཡིག་ཟླ་བའི་སྟེང་གནས་པ། །དེ་སྐྱེས་པདྨ་དཀར་པོ་བསམ། །ཧྲཱིཿཡིག་དང་ལྡན་པད་དཀར་ལས། །དེ་ནས་སངས་རྒྱས་ཚོགས་སྤྲོས་ཏེ། །འགྲོ་
[23b.7]བ་སངས་རྒྱས་བྱས་ནས་སུ། །ཡང་ནི་དེ་རུ་གཞུག་པར་བྱ། །དེ་ཉིད་གྱུར་ལས་ཧཱ་ལ་སྟེ། །ཞལ་གསུམ་ཕྱག་དྲུག་ཞི་བའི་ཆས། །རིན་ཆེན་མི་གཡོའི་རི་ཕུག་བརྟེན། །པདྨ་དམར་དང་ཟླ་གནས་པའི། །རོལ་བས་གནོན་ཅིང་ཡང་དག་གནས། །དཀར་པོ་སེར་པོ་སྔོ་ཆེན་པོ། །རྩ་བ་གཡོན་དང་
[24a]
[24a.1]ཅིག་ཤོས་ཞལ། །སྟག་གི་ཤམ་ཐབས་སྤྱན་གསུམ་པ། །རྒྱན་རྣམས་ཀུན་གྱིས་མཛེས་པ་ཡི། །མཆོག་སྦྱིན་ཕྲེང་དང་མདའ་གཡས་ཕྱག །གཡོན་པས་འདོད་པའི་ནུ་མ་འཛིན། །པདྨ་དཀར་པོ་དབྱུག་པ་ནི། །ཡལ་ག་གསུམ་པའི་དབྱུག་པ་སྟེ། །ཕྱག་གི་ཡལ་ག་དག་གིས་བསྣམས། །སྣ་ཚོགས་
[24a.2]མེ་ཏོག་གིས་བཀང་བའི། །གཡོན་པར་ཐོད་པ་དགོད་པར་བྱ། །སྦྲུལ་གྱིས་དཀྲིས་པའི་རྩེ་གསུམ་ཡང་། །དེ་བཞིན་པདྨའི་སྟེང་གཡས་དགོད། །དཔག་མེད་གཙུག་གི་ནོར་བུ་བྱས། །ཐོད་པའི་ཕྲེང་བས་དབུ་ལ་བརྒྱན། །རལ་པའི་དབུ་རྒྱན་ཆེར་འཛིངས་ལ། །ཟླ་བ་ཕྱེད་པའི་དུམ་བུ་ལྡན། །རྟོག་པའི་
[24a.3]དྲ་བ་རྣམ་བཅོམ་པའི། །སངས་རྒྱས་ཚོགས་ཀྱི་འོད་ཟེར་སྤྲོ། །ཧཱ་ལ་ཧཱ་ལ་འདིར་གྱུར་ནས། །རང་སྙིང་མགྲིན་པ་སྤྱི་བོར་ཡང་། །ཧཱུཾ་ཨཱཿཨོཾ་ནི་བསྒོམ་པར་བྱ། །ཟླ་བ་ལ་གནག་དམར་དཀར་རིམ། །དེ་བཞིན་སྙིང་དང་མགྲིན་པའི་བར། །ཧྲཱིཿཡིག་ཟླ་བ་ལ་གནས་པ། །དེ་ནི་བརྟན་དང་གཡོ་དངོས་ཀུན། །
[24a.4]དེ་ཡི་རྣམ་པར་བསྒོམ་པར་བྱ། །ལོག་པའི་རྣམ་རྟོག་སྤངས་ནས་སུ། །མཉམ་པར་གཞག་པས་སྔགས་བཟླས་བྱ། །ཨོཾ་ཧཱ་ལ་ཧཱ་ལ་ཧྲཱིཿ། ནང་གི་བཟླས་པ་ཤིན་ཏུ་གསལ། །བུལ་བ་མ་ཡིན་མྱུར་བའང་མིན། །ཇི་ལྟར་བདེ་བས་བཟླས་པར་བྱ། །བསྡུས་པས་རབ་ཏུ་མཆོད་པ་བྱ། །ཡང་དག་
[24a.5]བསྟོད་ཅིང་བརྟན་བྱས་ལ། །ཡི་གེ་བརྒྱ་པ་བརྗོད་པར་བྱ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྷིམྨེ་དྷིཔྲ་ཡཙྪ། སརྦ་ཀརྨ་སུ་ཙ་མེ། ཙིཏྟྭཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་བཱན་སརྦ་ཏ་ཐཱ་ག་ཏ་
[24a.6]བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿཞེས་བྱའོ། །ཨོཾ་སེམས་ཅན་ཀུན་གྱི་དོན་མཛད་བདག །རྗེས་སུ་མཐུན་པའི་དངོས་གྲུབ་སྤྱོད། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །དེ་ལྟར་འདི་ཡིས་བསྐུལ་ནས་ནི། །སྔགས་འདི་དག་ནི་བརྗོད་པར་བྱ། །
[24a.7]ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ནཾ་ཨཱདྱནུདྤན་ན་ཏྭཱཏ་མུཿཞེས་བྱའོ། །རྣལ་འབྱོར་བསམ་གཏན་ལངས་ནས་སུ། །རང་གིས་ཅི་ནུས་སྦྱིན་པ་བཏང་། །མ་ལུས་རྣམ་རྟོག་དང་བྲལ་བས། །གཟུགས་སོགས་འདོད་ཡོན་སྤྱོད་བྱེད་པས། །རིང་པོ་མི་ཐོགས་སྒྲུབ་པོ་མཆོག །བླ་མེད་བྱང་ཆུབ་ཐོབ་པར་འགྱུར། །
[24b]
[24b.1]སྒྲུབ་ཐབས་བྲིས་ལས་གང་ཐོབ་པའི། །བདག་གི་དགེ་བ་མཆོག་གིས་ནི། །དེ་ཡིས་འགྲོ་བ་མ་ལུས་པ། །མྱུར་དུ་ཧཱ་ལ་ཧཱ་ལར་ཤོག །ཧཱ་ལ་ཧཱ་ལའི་སྒྲུབ་ཐབས་སློབ་དཔོན་ལྷན་ཅིག་སྐྱེས་པ་རོལ་པས་མཛད་པ་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང་། ལོ་ཙཱ་བ་དགེ་སློང་བ་རིས་བསྒྱུར་བའོ།། །།
[24b.2]{T3331}༄༅༅། །རྒྱ་གར་སྐད་དུ། ཁར་ས་པཱ་ཎི་སཱ་དྷ་ནཾ། བོད་སྐད་དུ། ཁར་ས་པཱ་ཎིའི་སྒྲུབ་པའི་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དང་པོ་རེ་ཞིག་སྔགས་པས་གདན་བདེ་བ་ལ་ཉེ་བར་འདུག་ནས། རང་གི་སྙིང་གར་ཨ་ལས་ཟླ་བའི་དཀྱིལ་འཁོར་རོ། །
[24b.3]དེ་ལ་ཡི་གེ་ཧྲཱིཿམདོག་དཀར་བ་བལྟས་ཏེ། དེ་ལས་བྱུང་བར་གྱུར་པའི་འོད་ཀྱིས་མདུན་དུ་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་བལྟ་བར་བྱའོ། །དེ་ནས་སྙིང་གའི་ས་བོན་གྱི་འོད་ཀྱིས་ཡང་དག་པར་མཆོད་དེ། སྡིག་པ་བཤགས་པ་ལ་སོགས་པ་བྱས་ནས། ཨོཾ་སྭ་བྷཱ་ཝ་ཤུདྷཿསརྦ་
[24b.4]དྷརྨཿསྭ་བྷཱ་ཝ་ཤུདྡྷོ྅ཧཾ་ཞེས་བྱ་བས་བདག་ཉིད་སྟོང་པ་ཉིད་དུ་དམིགས་པར་བྱ་སྟེ། སྔོན་དུ་བསྟན་པའི་ཧྲཱིཿཡིག་ལས་སྤྲོ་བ་དང་བསྡུ་བའི་རིམ་པས་སྤྱན་རས་གཟིགས་ཀྱི་བདག་ཉིད་དུ་བསྒོམ་པར་བྱའོ། །ཡན་ལག་ཐམས་ཅད་ཀྱི་མདོག་དཀར་བ། རལ་པའི་ཅོད་པན་གྱིས་བརྒྱན་པ། འོད་དཔག་
[24b.5]མེད་པ་དབུ་ལ་འཆིང་བ། རྒྱན་ཐམས་ཅད་ཀྱིས་བརྒྱན་པ་སྐྱིལ་ཀྲུང་ཕྱེད་པས་བཞུགས་པ་ཕྱག་གཡས་པས་མཆོག་སྦྱིན་པ་གཡོན་པས་པདྨ་འཛིན་པ། པདྨ་དང་ཟླ་བའི་གདན་ལ་གནས་པའོ། །གཡས་ཀྱི་ལོགས་ན་སྒྲོལ་མ་དང་ནོར་བཟངས་གཉིས་སོ། །གཡོན་པའི་ལོགས་ན་ཁྲོ་གཉེར་ཅན་དང་
[24b.6]རྟ་མགྲིན་གཉིས་སོ། །བཅོམ་ལྡན་འདས་ཀྱི་སྤྱི་བོར་ཟླ་བ་ལ་ཨོཾ། མགྲིན་པར་ཨཱ་སྙིང་གར་ཧཱུཾ། དེ་ལྟར་བསྒོམ་པ་གོ་བར་བྱའོ། །རྣལ་འབྱོར་པ་བསམ་གཏན་ཀྱིས་ངལ་ན་བཟླས་པ་བྱའོ། །སྔགས་འདི་ཡིན་ཏེ། ཨོཾ་ཧྲཱིཿསྭཱ་ཧཱ། ཁར་ས་པཱ་ཎིའི་སྒྲུབ་ཐབས་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང་།
[24b.7]ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།{T3332}༄༅༅། །རྒྱ་གར་སྐད་དུ། ཨཱརྱ་ཨ་བ་ལོ་ཀི་ཏ་ཤྭ་ར་སྱ་ཥ་ཊ་ཨཀྵ་ར་སཱ་དྷ་ནཾ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་གི་ཡི་གེ་དྲུག་པའི་སྒྲུབ་པའི་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །དང་པོ་
[25a]
[25a.1]རེ་ཞིག་སྔགས་པས་བདེ་བའི་གདན་ལ་འདུག་སྟེ། ཁ་དག་པ་ལ་སོགས་པ་བྱས་ནས་སངས་རྒྱས་ལ་སོགས་པ་བལྟས་ཏེ་ཡང་དག་པར་མཆོད་ནས། གསུམ་ལ་སྐྱབས་སུ་འགྲོ་བ་བྱས་ནས། དཀོན་མཆོག་གསུམ་ལ་སྐྱབས་སུ་མཆི། །ཞེས་བྱ་བ་ལ་སོགས་པ་བྱའོ། །
[25a.2]ཇི་སྲིད་སེམས་ཅན་ཐམས་ཅད་ཀྱི་གྲངས་སུ་གཏོགས་པ། སྒོ་ང་ལས་སྐྱེས་པའམ། མངལ་ལས་སྐྱེས་པའམ། རྫུས་ཏེ་སྐྱེས་པའམ། དྲོད་གཤེར་ལས་སྐྱེས་པའམ། གཟུགས་ཅན་ནམ། གཟུགས་མེད་པའམ། འདུ་ཤེས་ཅན་ནམ། འདུ་ཤེས་མེད་པའམ། ཡོད་མིན་མེད་མིན་གྱི་འདུ་
[25a.3]ཤེས་ལ་སོགས་པ་ཇི་སྲིད་སེམས་ཅན་གྱི་ཁམས་སུ་གཏོགས་པ་བརྗོད་པ་དེ་ཐམས་ཅད་བདག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་གཞག་པར་བྱའོ། །དེ་ནས་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བྱ་བ་ལན་གསུམ་བརྗོད་ལ། ཡུད་ཙམ་གྱིས་སྟོང་པ་ཉིད་
[25a.4]དུ་བསྒོམ་པར་བྱའོ། །དེ་ནས་རང་གི་སྙིང་གར་པདྨ་དཀར་པོའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་ཧྲཱིཿདཀར་པོ། དེ་ལས་འོད་ཟེར་བརྒྱ་སྟོང་ཕྲག་མང་པོ་བྱུང་བར་བསམས་ལ། སེམས་ཅན་ཐམས་ཅད་ཀྱིས་ཐོག་མ་མེད་པའི་དུས་ནས་བསགས་པའི་འདོད་ཆགས་ལ་སོགས་པ་ཉོན་མོངས་
[25a.5]པའི་ཚོགས་ཁམས་གསུམ་དུ་གཏོགས་པ་དག་པར་བྱས་ནས། ཡི་གེ་དེ་ཉིད་རང་གི་སྙིང་གར་བཅུག་པས། དེ་ཡོངས་སུ་གྱུར་པ་ལས་བདག་ཉིད་འཇིག་རྟེན་དབང་ཕྱུག་གི་གཟུགས་རྒྱན་ཐམས་ཅད་ཀྱིས་བརྒྱན་པ། སྐུ་མདོག་དཀར་བ། ཕྱག་བཞི་པ། རལ་པའི་ཅོད་པན་འཆང་བ། གཡོན་
[25a.6]པ་པདྨ་བསྣམས་པ། གཡས་ཀྱིས་བགྲང་ཕྲེང་འཛིན་པ། ཕྱི་མའི་ཕྱག་གཉིས་ཀྱིས་སྙིང་གར་ཐལ་མོ་སྦྱར་ཞིང་འཛིན་པ། འོད་དཔག་ཏུ་མེད་པའི་རལ་པའི་དབུ་རྒྱན་ཅན་ནོ། །གཡས་ཕྱོགས་སུ་ནོར་བུ་འཛིན་པ། དེ་དང་འདྲ་བའི་མདོག་དང་ཕྱག་དང་མཚན་མ་ཅན་ཏེ། ཕྱི་མའི་ཕྱག་གིས་ཐལ་མོ་
[25a.7]སྦྱར་བའོ། །གཡོན་ཕྱོགས་སུ་ཡི་གེ་དྲུག་པའི་རིག་པ་འཇིག་རྟེན་དབང་ཕྱུག་དང་འདྲ་བའི་སྐུ་མདོག་དང་ཕྱག་མཚན་བསྒོམ་པར་བྱའོ། །དེ་ནས་ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཨ་ལ་ལ་ལ་ལ་ཧོ། ཨཿཨཿཨཿཨཿཞེས་བྱ་བའི་བྱིན་གྱིས་བརླབ་པའི་སྔགས་བརྗོད་པར་བྱའོ། །
[25b]
[25b.1]དེ་ལྟར་བསྒོམས་ནས་འཇིག་རྟེན་མགོན་པོའི་ཐུགས་ཀར་ཟླ་བའི་དཀྱིལ་འཁོར་ལ་ཕྲེང་བའི་རྣམ་པ་ལྟ་བུའི་དཀར་པོ་ཞལ་ནས་བྱུང་སྟེ། ལྟེ་བར་འཇུག་ཅིང་འཁོར་ལོ་འཁོར་བའི་སྦྱོར་བས་སངས་རྒྱས་ཐམས་ཅད་ཀྱི་སྙིང་པོ་ཡིད་བཞིན་གྱི་ནོར་བུ་རྟོག་པ་སྔགས་ཀྱི་རྒྱལ་པོ་འདི་བཟླས་པར་བྱའོ། །དེ་ནས་
[25b.2]འཁོར་ཞིང་འཇུག་པ་ལ་སོགས་པ་ཐོབ་ནས། དད་པ་དང་སྙིང་རྗེ་དང་ལྡན་པ་བླ་མ་ལ་གུས་པའི་རྣལ་འབྱོར་པས་དུས་མི་རིང་བར་འགྲུབ་པར་འགྱུར་རོ། །ཨོཾ་མ་ཎི་པདྨེ་ཧཱུཾ་ཞེས་བྱ་བའི་སྔགས་བཟླས་པར་བྱའོ། །དེ་ནས་ལྡང་བའི་དུས་སུ་སྔགས་འདི་བརྗོད་དེ་གནས་པར་བྱའོ། །ཨོཾ་བཛྲ་སཏྭ་ས་མ་ཡ།
[25b.3]མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། སུ་པོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷིམྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟྭཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿཞེས་བརྗོད་ལ་ཇི་ལྟར་བདེ་བས་གནས་པར་བྱའོ། །
[25b.4]ཡི་གེ་དྲུག་པའི་སྒྲུབ་ཐབས། དཔལ་ལྷན་ཅིག་སྐྱེས་པའི་རོལ་པས་མཛད་པ་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།{T3333}༄༅༅། །རྒྱ་གར་སྐད་དུ། ཧ་རི་ཧ་རི་ཧ་རི་བཱ་ཧ་ནོད་བྷ་བཾ་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། ཧ་རི་ཧ་རི་ཧ་རི་ལ་
[25b.5]ཞོན་པར་གྱུར་པའི་སྤྱན་རས་གཟིགས་དབང་ཕྱུག་གི་སྒྲུབ་པའི་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དང་པོ་རེ་ཞིག་སྔགས་པས་བདེ་བའི་གདན་ལ་འདུག་སྟེ། འགྲོ་བའི་དོན་བྱ་བའི་བསམ་པས་སྡིག་པ་བཤགས་པ་ལ་སོགས་པ་བདུན་ཡོངས་སུ་དག་པའི་
[25b.6]མཆོད་པ་བྱས་ནས། ཡཾ་ལས་རྫོགས་པའི་རླུང་གི་དཀྱིལ་འཁོར་གཞུའི་རྣམ་པ་ལྟ་བུ་མདོག་སྔོན་པོ་བ་དན་གྱིས་མཚན་པའོ། །དེའི་སྟེང་དུ་རཾ་ལས་བྱུང་བའི་མེའི་དཀྱིལ་འཁོར་གྲུ་གསུམ་དམར་པོ་རཾ་དམར་པོས་མཚན་པའོ། །དེའི་སྟེང་དུ་བཾ་ལས་རྫོགས་པ་ཆུའི་དཀྱིལ་འཁོར་དཀར་པོ། བུམ་པ་
[25b.7]དཀར་པོས་དབུས་སུ་མཚན་པའོ། །དེའི་སྟེང་དུ་ལཾ་ལས་བྱུང་བ་དབང་ཆེན་ཀྱི་དཀྱིལ་འཁོར་གྲུ་བཞི་པ་མདོག་སེར་པོ་རྡོ་རྗེ་རྩེ་གསུམ་པ་སེར་པོས་གྲྭ་བཞིར་གནས་ཤིང་མཛེས་པའོ། །དེའི་སྟེང་དུ་སུཾ་ལས་བྱུང་བའི་རིན་པོ་ཆེ་སྣ་བདུན་གྱི་རང་བཞིན་ལྕོག་བརྒྱད་དང་ལྡན་པའི་རི་རབ་བོ། །དེའི་སྟེང་
[26a]
[26a.1]དུ་པཾ་ཡོངས་སུ་གྱུར་པ་ལས་སྣ་ཚོགས་ཀྱི་པདྨའོ། །དེའི་སྟེང་དུ་བདག་ཉིད་བསམས་ལ། ཨོཾ་ཧྲཱིཿཧཱུཾ། རིམ་པ་བཞིན་དུ་སྤྱི་བོ་དང་། མགྲིན་པ་དང་། སྙིང་གར་རྣམ་པར་བཀོད་ལ། བདག་ཉིད་ཐོག་མ་མེད་པའི་དུས་ནས་བསགས་པའི་ལས་ཀྱི་སྒྲིབ་པ་སྤངས་པའི་ཧ་རི་ཧ་རི་ཧ་རི་
[26a.2]ལ་ཞོན་པར་གྱུར་པའི་སྤྱན་རས་གཟིགས་ཀྱི་སྐུ་གསེར་གྱི་མདོག་ལྟ་བུ་འོད་ཟེར་འབར་ཞིང་འཁྲིགས་པ་གཞོན་ནུའི་གཟུགས་སུ་སྔགས་པས་རྣམ་པར་བསམ་པར་བྱའོ། །ཕྱིས་ནི་རང་གི་སྙིང་གར་བསོད་ནམས་དང་ཡེ་ཤེས་ཀྱི་ཚོགས་རྣམ་པར་དག་པ་ཟླ་བའི་དཀྱིལ་འཁོར་དང་ཉི་མའི་དཀྱིལ་འཁོར་རོ། །དེ་ལ་
[26a.3]ཧྲཱིཿལས་བྱུང་བའི་འོད་ཟེར་གྱི་དྲ་བས་ཡེ་ཤེས་སེམས་དཔའ་བཀུག་སྟེ། འོག་ནས་འབྱུང་བའི་ཟླ་བའི་གཟུགས་ལ་སྔོན་ཀྱི་མཆོད་པས་ཡང་དག་པར་མཆོད་དེ། ཡེ་ཤེས་སེམས་དཔའ་དང་དམ་ཚིག་སེམས་དཔའ་གཅིག་ཏུ་བྱས་ལ། བཅོམ་ལྡན་འདས་ཧ་རི་ཧ་རི་ཧ་རི་ལ་ཞོན་པར་གྱུར་པའི་སྤྱན་རས་
[26a.4]གཟིགས་སེམས་བརྟན་པས་བདག་ཉིད་བསྒོམ་པར་བྱའོ། །ཕྱག་དྲུག་པ་མདོག་དཀར་བ་རལ་པའི་ཅོད་པན་ཅན། ཞི་བའི་ཆ་ལུགས་ཅན་ཕྱག་གཡས་པས་ཡང་དག་པར་རྫོགས་པའི་སངས་རྒྱས་དབང་པོ་བྱེད་པ། གཉིས་པ་ན་ཕྲེང་བ་བསྣམས་པ། གསུམ་པ་ན་ངན་སོང་ན་གནས་པའི་འཇིག་རྟེན་
[26a.5]ལ་དགེ་བ་ཉེ་བར་སྟོན་པའོ། །གཡོན་པའི་དང་པོ་ན་དབྱུག་པ། གཉིས་པ་ན་རི་དྭགས་ནག་པོའི་པགས་པ་འཛིན་པ། གསུམ་པ་ན་རིལ་བ་སྤྱི་བླུགས་བསྣམས་པའི་བཅོམ་ལྡན་འདས་རྣམ་པར་བསྒོམ་པར་བྱའོ། །དེ་ལ་རྣམ་པར་དག་པ་ནི་རླུང་དང་མེའི་དཀྱིལ་འཁོར་གཉིས་ནི་སེང་གེའོ། །ཆུའི་
[26a.6]དཀྱིལ་འཁོར་ནི་བྱ་ཁྱུང་ངོ་། །སའི་དཀྱིལ་འཁོར་དང་རི་རབ་ནི་ཁྱབ་འཇུག་རྣམ་པར་དག་པའོ། །རྒྱུན་དུ་སྒོམ་པར་བྱེད་པའི་རྣལ་འབྱོར་པས་སེམས་ཅན་ཐམས་ཅད་ཀྱི་དོན་བྱེད་པའི་ནུས་པ་དང་ལྡན་པར་འགྱུར་རོ། །སྐྱེ་འགྲོ་ཐམས་ཅད་དགའ་བར་འགྱུར་རོ། །ཤེས་རབ་ཆེན་པོར་འགྱུར་རོ། །ནད་
[26a.7]མེད་པར་འགྱུར་རོ། །ཉེ་བར་འཚེ་བ་མེད་པར་འགྱུར་རོ། །རང་ཉིད་ནོར་ཕྱུག་པར་འགྱུར་རོ། །དབང་དུ་བྱེད་པ་དང་དུག་གི་ལས་ལ་ནུས་པ་ཆེན་པོར་འགྱུར་རོ། །སྔགས་ཀྱི་བཟླས་པ་ནི་གདམས་ངག་ལས་ཤེས་པར་བྱའོ། །ཧ་རི་ཧ་རི་ཧ་རི་ལ་ཞོན་པར་གྱུར་པའི་འཕགས་པ་སྤྱན་རས་གཟིགས་དབང་
[26b]
[26b.1]ཕྱུག་གི་སྒྲུབ་ཐབས་རྫོགས་པའི་སངས་རྒྱས་ཀྱིས་གསུངས་པ་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།{T3334}༄༅༅། །རྒྱ་གར་སྐད་དུ། ཧ་ལ་ཧ་ལ་སཱ་དྷ་ན། བོད་སྐད་དུ། ཧ་ལ་ཧ་ལའི་སྒྲུབ་པའི་ཐབས། བཅོམ་ལྡན་འདས་ཧ་ལ་ཧ་
[26b.2]ལ་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་པའི་རྗེས་སུ་པདྨ་དམར་པོ་དང་། ཟླ་བ་ལས་ཧྲཱིཿཡིག་དཀར་པོ་ཡོངས་སུ་གྱུར་པ་ལས་ཡན་ལག་ཐམས་ཅད་དཀར་བ། ཞལ་གསུམ་པ། ཕྱག་དྲུག་པ། ནག་པོ་དང་དམར་པོ་ནི་གཡས་དང་གཡོན་གྱི་ཞལ་ལོ། །
[26b.3]ཞལ་སོ་སོ་ལ་སྤྱན་གསུམ་གསུམ་མོ། །མདའ་དང་། ཕྲེང་བ་དང་། མཆོག་སྦྱིན་པ་ནི་གཡས་ཀྱི་ཕྱག་གསུམ་ནའོ། །གཞུ་དང་པདྨ་དང་། ནུ་མ་བཟུང་བ་ནི་གཡོན་གྱི་ཕྱག་གསུམ་ནའོ། །འོད་དཔག་ཏུ་མེད་པ་དང་། རིན་པོ་ཆེ་དང་། ཟླ་ཕྱེད་ཀྱི་རལ་པ་བཅིངས་ཤིང་ཐོད་པའི་ཕྲེང་བས་མཚན་པའི་དབུ་རྒྱན་
[26b.4]ཅན། རྒྱན་བཟང་པོས་བརྒྱན་པ། སྟག་གི་པགས་པའི་ཤམ་ཐབས་ཅན། སྒེག་པའི་རོལ་པས་མདོག་བཟང་པོ་ལ་སོགས་པའི་ཡོན་ཏན་ཅན་གྱི་བཅོམ་ལྡན་འདས་སྐྱིལ་ཀྲུང་བཅས་པ་རྣམ་པར་བསམས་ཏེ། དེའི་གཡས་ཕྱོགས་སུ་འཇིགས་པར་བྱེད་པའི་སྦྲུལ་གྱིས་དཀྲིས་པའི་རྩེ་གསུམ་
[26b.5]མོ། །གཡོན་ཕྱོགས་སུ་སྣ་ཚོགས་ཀྱི་མེ་ཏོག་གིས་བཀང་བའི་ཐོད་པའོ། །རོལ་པས་གནོན་ཞིང་ཡང་དག་པར་གནས་པའི་རིན་པོ་ཆེ་མི་གཡོ་བའི་རིའི་ཕུག་གི་ནང་ན་གནས་པའི་ཧ་ལ་ཧ་ལར་བདག་ཉིད་སྐད་ཅིག་གིས་བསམས་ལ། ཨོཾ་བཛྲ་དྷརྨ་ཧྲཱིཿཞེས་བྱ་བའི་སྔགས་བཟླས་པར་བྱའོ། །ཧ་ལ་
[26b.6]ཧ་ལའི་སྒྲུབ་ཐབས། སློབ་དཔོན་ལྷན་ཅིག་སྐྱེས་པའི་རོལ་པས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་ཏེ་གཏན་ལ་ཕབ་པ།། {T3335}༄༅༅། །རྒྱ་གར་སྐད་དུ། པདྨ་ནར་ཏེ་ཤྭ་ར་སཱ་དྷ་ནཾ། བོད་སྐད་དུ། པདྨ་གར་
[26b.7]གྱི་དབང་ཕྱུག་གི་སྒྲུབ་པའི་ཐབས། བཅོམ་ལྡན་འདས་པདྨ་གར་དབང་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་པའི་རྗེས་སུ་སྣ་ཚོགས་པདྨའི་སྟེང་དུ་ཟླ་བ་ལ་ཧྲཱིཿཡོངས་སུ་གྱུར་པ་ལས་པདྨ་གར་གྱི་དབང་ཕྱུག་ཅེས་བྱ་བ། འཕགས་པ་སྤྱན་རས་གཟིགས་
[27a]
[27a.1]དབང་ཕྱུག་སེམས་དཔའི་སྐྱིལ་མོ་ཀྲུང་གིས་གནས་པ། ཕྱག་གཉིས་པ། ཞལ་གཅིག་པ། ཡན་ལག་ཐམས་ཅད་དམར་པོ་ལྷ་རྫས་ཀྱི་ན་བཟའི་རྒྱན་གྱིས་བརྒྱན་པ། འོད་དཔག་ཏུ་མེད་པའི་ཅོད་པན་ཅན། གཡོན་ཕྱོགས་སུ་གོས་དཀར་མོ་ལ་མཉམ་པར་འཁྱུད་
[27a.2]པའི་ཚུལ་གྱིས་གནས་པའོ། །གཡོན་པའི་ཕྱག་ན་པདྨ་དམར་པོ་བསྣམས་པ། གར་གྱི་ཚུལ་གྱིས་ཁབ་ཀྱི་ཕྱག་རྒྱས་པདྨ་ཁ་འབྱེད་པ་ནི་ཕྱག་གཡས་པས་སོ། །བདག་ཉིད་སྐད་ཅིག་གིས་བསྐྱེད་ལ། ཨོཾ་ཀཱ་ཡ་བཱ་ཀ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བའི་སྔགས་བརྗོད་པར་བྱའོ། །དེ་ནས་
[27a.3]ཕྱོགས་མཚམས་བརྒྱད་དང་། ལྷ་མོ་བརྒྱད་བསམ་པར་བྱ་སྟེ། དེ་ལ་འདབ་མ་བརྒྱད་པའི་པདྨའི་ཤར་གྱི་འདབ་མ་ལ་རྣམ་པར་གཟིགས་མ། དཀར་མོ་པདྨ་དམར་པོ་བསྣམས་པའོ། །ལྷོ་ཕྱོགས་ཀྱི་འདབ་མ་ལ་སྒྲོལ་མ་ཨུཏྤ་ལ་ལྗང་གུ་བསྣམས་པའོ། །ནུབ་ཕྱོགས་ཀྱི་འདབ་མ་ལ་དབང་
[27a.4]ཕྱུག་མ་སེར་མོ་ཨུཏྤ་ལ་སྔོན་པོ་བསྣམས་པའོ། །བྱང་གི་འདབ་མ་ལ་ཁྲོ་གཉེར་ཅན་དཀར་མོ་པདྨ་སེར་པོ་བསྣམས་པའོ། །ཤར་གྱི་མཚམས་ཀྱི་པདྨའི་འདབ་མ་ལ་གནས་མ་སེར་མོ་བཙོད་ལྟ་བུའི་པདྨ་བསྣམས་པའོ། །ལྷོ་ཕྱོགས་ཀྱི་མཚམས་ཀྱི་འདབ་མ་ལ་པདྨའི་དབང་ཕྱུག་ནམ་མཁའི་
[27a.5]མདོག་ལྟ་བུ་པདྨ་དཀར་པོ་བསྣམས་པའོ། །ནུབ་ཕྱོགས་ཀྱི་མཚམས་ཀྱི་འདབ་མ་ལ་སྣ་ཚོགས་པདྨ་དཀར་པོ་པདྨ་ནག་པོ་བསྣམས་པའོ། །བྱང་ཕྱོགས་ཀྱི་མཚམས་ཀྱི་འདབ་མ་ལ་སྣ་ཚོགས་རྡོ་རྗེ་མ་སྣ་ཚོགས་ཀྱི་པདྨ་བསྣམས་པའོ། །འདི་ཐམས་ཅད་ནི་སྐྱིལ་མོ་ཀྲུང་ཅན་ཕྱག་གཉིས་པ།
[27a.6]ཞལ་གཅིག་པ་ཉེ་བར་ཞི་བའོ། །ཟེའུ་འབྲུའི་དབུས་སུ་འདོད་ཆགས་ཆེན་པོའི་རང་བཞིན་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གོ། །ཨོཾ་ཧྲཱིཿཔདྨ་ནརྟེ་ཤྭ་ར་ཧཱུཾ། ཞེས་བྱ་བ་བཟླས་པ་བྱའོ། །པདྨ་གར་དབང་གི་སྒྲུབ་པའི་ཐབས་རྫོགས་པའི་སངས་རྒྱས་ཀྱིས་གསུངས་པ་
[27a.7]རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3336}༄༅༅། །རྒྱ་གར་སྐད་དུ། ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །ཏཱཾ་ལས་སྐྱེས་པའི་ཨུཏྤ་ལ་ཏཱཾ་གིས་མཚན་པར་
[27b]
[27b.1]བསམས་ལ། དེ་ཡོངས་སུ་གྱུར་པ་ལས་འཕགས་མ་སྒྲོལ་མ་མདོག་ལྗང་གུ་གཡོན་པ་ན་ཨུཏྤ་ལ་བསྣམས་པ། གཡས་ན་མཆོག་སྦྱིན་པའོ། །ཟླ་བའི་གདན་ལ་གནས་པ། དོན་ཡོད་གྲུབ་པས་དབུ་བརྒྱན་པར་བསམས་ལ། ཡེ་ཤེས་སེམས་དཔའ་དང་གཅིག་ཏུ་བྱས་ཏེ། ཨོཾ་ཏཱ་རེ་ཏུཏྟཱ་རེ་
[27b.2]ཏུ་རེ་ཨ་མུ་ཀཾ་མུ་ཀྲཱིཾ་བཱ་བ་ཤ་མ་ནཱ་ཡ་སྭཱཧཱ། ཞེས་བྱ་བས་བསྒྲུབ་བྱའི་མིང་དང་བཅས་པ་གོང་དུ་བསྟན་པའི་གྲངས་ངེས་པས་བཟླས་པ་བྱའོ། །མདའ་ལ་སོགས་པའི་མཚན་མ་མེད་ཀྱང་། ཨུཏྤ་ལས་བསྒྲུབ་བྱའི་རྐེད་པར་བཅིངས་ཏེ། རང་གི་ལུས་ཀྱི་ཚོགས་ཀྱིས་དེའི་ལུས་བཀང་སྟེ། རང་གི་
[27b.3]གནས་སུ་གཞག་པར་བྱའོ། །སྒྲོལ་མའི་སྒྲུབ་ཐབས་སློབ་དཔོན་རྡོ་རྗེ་མྱུ་གུས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ལོ་ཙཱ་བ་དགེ་སློང་བ་རིས་བསྒྱུར་བའོ།། {T3337}༄༅༅། །རྒྱ་གར་སྐད་དུ། སཱི་ཏ་ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མ་དཀར་མོ་སྒྲུབ་པའི་ཐབས། བཅོམ་
[27b.4]ལྡན་འདས་སྒྲོལ་མ་དཀར་མོ་ལ་ཕྱག་འཚལ་ལོ། །སྔོན་བཞིན་དུ་སྡིག་པ་བཤགས་པ་ལ་སོགས་པ་བྱས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བའི་སྔགས་བརྗོད་པར་བྱའོ། །དེ་ནས་སུཾ་ཡོངས་སུ་གྱུར་པ་ལས་རིན་པོ་ཆེ་སྣ་ཚོགས་ཀྱི་རང་བཞིན་རི་རབ་བོ། །དེའི་སྟེང་
[27b.5]དུ་པཾ་ལས་པདྨ་དཀར་པོ། །དེའི་སྟེང་དུ་ཨ་ལས་ཟླ་བའི་དཀྱིལ་འཁོར་རོ། །དེའི་དབུས་སུ་ཧཱུཾ་དཀར་པོ་ལས་ཡོངས་སུ་རྫོགས་པའི་བཅོམ་ལྡན་འདས་མ་སྒྲོལ་མ་མདོག་དཀར་བ་སྤྱན་གསུམ་མ། ཕྱག་བཞི་པ་དེ་བཞིན་གཤེགས་པ་རྣམ་པ་ལྔའི་དབུ་རྒྱན་ཅན། རྒྱན་སྣ་ཚོགས་ཀྱིས་བརྒྱན་
[27b.6]པ། ཕྱག་དང་པོ་གཉིས་ཀྱིས་ཨུཏྤ་ལའི་ཕྱག་རྒྱ་འཛིན་པ། གཡས་ཀྱི་ཕྱག་ན་ཡིད་བཞིན་གྱི་ནོར་བུ་དང་ལྡན་པའི་མཆོག་སྦྱིན་པས་སེམས་ཅན་རྣམས་ཀྱི་བསམ་པ་ཡོངས་སུ་རྫོགས་པར་བྱེད་པ། གཡོན་པ་ན་ཨུཏྤ་ལའི་སྙེ་མ་བསྣམས་པ་བསམ་པར་བྱའོ། །དེའི་གཡས་ཕྱོགས་ཀྱི་ལོགས་
[27b.7]སུ་ལྷ་མོ་འོད་ཟེར་ཅན་མདོག་སེར་བ་ཟླ་བའི་དཀྱིལ་འཁོར་ལ་གནས་པ་གོས་སྔོན་པོ་ཕྱག་གཉིས་པ། གཡོན་པ་ན་མྱ་ངན་མེད་དམར་པོའི་ཡལ་ག་བསྣམས་པ། གཡས་པ་ན་རྔ་ཡབ་དཀར་པོ་དང་ལྡན་པ། ཤ་འགག་དམར་པོས་བརྒྱན་པ་བསམ་པར་བྱའོ། །གཡོན་པའི་ལོགས་
[28a]
[28a.1]སུ་རྨ་བྱ་ཆེན་མོ་མདོག་ལྗང་སེར་ཕྱག་གཉིས་པ་གཡོན་པ་ན་རྨ་བྱའི་གཞུག་སྒྲོ་བསྣམས་པ། གཡས་པ་ན་རྔ་ཡབ་བསྣམས་པ། དེ་ལྟ་བུའི་རྣམ་པར་བསམས་ལ། ཨོཾ་བྷ་ག་བ་ཏཱི་ཏཱ་རེ་མ་མ་ཧྲྀ་ད་ཡཾ་པྲ་བི་ཤ་སྭཱཧཱ། ཞེས་བྱ་བས་བདག་ཉིད་བྱིན་གྱིས་བརླབ་པར་བྱའོ། །
[28a.2]དེ་ནས་ཨོཾ་ན་མ་ཏཱ་རེ་མ་ནོ་ཧ་རེ་ཧཱུཾ་ཧ་ར་སྭཱཧཱ། ཞེས་བྱ་བའི་སྔགས་བཟླས་པར་བྱའོ། །སྒྲོལ་མ་དཀར་མོའི་སྒྲུབ་ཐབས་སློབ་དཔོན་ཡིད་བཞིན་ནོར་བུ་རྒྱལ་པོས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། །།
[28a.3]{T3338}༄༅༅། །རྒྱ་གར་སྐད་དུ། ཁ་དི་ར་བ་ན་ཏཱ་རཱ་སཱ་དྷ་ནཾ། བོད་སྐད་དུ། སེང་ལྡེང་ནགས་ཀྱི་སྒྲོལ་མ་ཞེས་བྱ་བའི་སྒྲུབ་ཐབས། བཅོམ་ལྡན་འདས་སྒྲོལ་མ་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྡིག་པ་བཤགས་པ་ལ་སོགས་པ་བྱས་པའི་རྗེས་ལ་སྟོང་པ་ཉིད་དུ་བྱས་ལ། དེ་ལ་
[28a.4]སྔོན་གྱི་གནས་སུ་པདྨ་དང་ཟླ་བ་ལ། ཏཱཾ་གི་ས་བོན་ཡོངས་སུ་གྱུར་པ་ལས་ཨུཏྤ་ལ་ལྟེ་བར་ཏཱཾ་གིས་མཚན་པའོ། །དེ་ཡོངས་སུ་གྱུར་པ་ལས་བདག་ཉིད་སྒྲོལ་མ་ལྗང་གུ་དོན་ཡོད་གྲུབ་པའི་དབུ་རྒྱན་ཅན། མཆོག་སྦྱིན་དང་ཨུཏྤ་ལ་གཡས་དང་གཡོན་པའི་ཕྱག་ནའོ། །མྱ་ངན་མེད་པའི་ཤིང་གི་
[28a.5]འོད་ཟེར་ཅན་དང་། རལ་གཅིག་མ་གཉིས་གཡས་དང་གཡོན་གྱི་ཕྱོགས་ཀྱི་ཆ་ན་གནས་པ་སྟེ། མཛེས་པའི་གཞོན་ནུ་མ་རྒྱན་གྱིས་བརྒྱན་མ། སེང་ལྡེང་གི་ནགས་སུ་སྣ་ཚོགས་པའི་སེམས་ཅན་གྱི་དོན་བྱེད་པར་བསམས་ལ། ཡེ་ཤེས་སེམས་མ་དང་གཅིག་ཏུ་བྱས་ཏེ། ཨོཾ་ཏཱ་རེ་
[28a.6]ཏུཏྟཱ་རེ་ཏུ་རེ་སྭཱ་ཧཱ། ཞེས་བྱ་བའི་སྔགས་ཀྱི་བཟླས་པ་བྱས་ལ་དེ་ཉིད་ཀྱི་ཡིད་ཀྱིས་ཇི་ལྟར་བདེ་བས་གནས་པར་བྱའོ། །སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས་རྫོགས་པའི་སངས་རྒྱས་ཀྱིས་གསུངས་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་ལོ་ཙཱ་བ་དགེ་སློང་ཁམས་པ་བ་རིས་བསྒྱུར་བའོ།།
[28a.7]{T3339}༄༅༅། །རྒྱ་གར་སྐད་དུ། སཱི་ཏ་ཏཱ་ར་སཱ་དྷ་ནཾ། བོད་སྐད་དུ། སྒྲོལ་མ་དཀར་མོའི་སྒྲུབ་པའི་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །ཆེད་དུ་ཟླ་བ་དྲུག་གི་བར། །སྒྲོལ་མའི་འཁོར་ལོ་སྒོམ་པ་པོས། །དངོས་གྲུབ་ཐམས་ཅད་འཐོབ་འགྱུར་ཞིང་། །འཆི་བའི་སྐྱོན་གྱིས་མ་གོས་
[28b]
[28b.1]པའི། །ངག་གི་དབང་ཕྱུག་གནང་བྱས་ལ། །འཆི་བདག་སླུ་བ་བསྡུས་པ་ལས། །ཕྱུང་ནས་སྒྲོལ་མ་དཀར་མོ་ནི། །བསྒོམས་ནས་འཇིགས་པ་ཉམས་བྱེད་མ། །བཞི་པའི་སྡེ་ཚན་དང་པོ་ཨ། །བཅས་ལས་ནམ་མཁའ་འོད་ཟེར་སྤྲོས། །པད་དཀར་ཟླ་བའི་གདན་བལྟས་ལ། །གསུམ་
[28b.2]ལ་སྐྱབས་འགྲོ་ཡང་བརྗོད་བྱ། །རང་བཞིན་སྒྲོ་བཏགས་གཞོམ་ཆེད་དུ། །སྐད་ཅིག་སྟོང་པ་ཉིད་དུ་བལྟ། །དེ་ནས་སྔོན་གྱི་སྨོན་ལམ་དབང་། །བྱང་ཆུབ་སེམས་ཀྱི་ཡི་གེ་བསྒོམ། །པདྨ་དཀར་པོའི་དབུས་གནས་པའི། །ཟླ་བའི་གཟུགས་ཀྱི་སྟེང་དུ་ནི། །རྡོ་རྗེ་སྐྱིལ་མོ་ཀྲུང་བཅས་པ། །མཆོག་
[28b.3]སྦྱིན་པ་དང་ཨུཏྤ་ལ་འཛིན། །སྟོན་ཀའི་ཟླ་བའི་འོད་རྣམ་ཅན། །ཟླ་བའི་རྒྱབ་ལ་མཉམ་བརྟེན་པའི། །རྒྱན་རྣམས་ཐམས་ཅད་ཡོངས་སུ་རྫོགས། །བཅུ་དྲུག་ལོ་ལོན་ལུས་ཅན་མ། །སངས་རྒྱས་ཀུན་དང་དེ་སྲས་ཀྱི། །ཡུམ་ནི་འདོད་པའི་གཟུགས་འཛིན་མ། །སྒྲོལ་མ་དེ་ཡི་སྙིང་གར་
[28b.4]བསྒོམ། །འཁོར་ལོ་འོད་ཟེར་དཀར་པོ་ཅན། །རེའུ་མིག་བརྒྱད་ལ་ཡི་གེ་བརྒྱད། །ཡོངས་སུ་བསྐོར་བར་བྱ་བའོ། །ཨོཾ་ཧཱ་གསལ་བྱེད་དབུས་གནས་པའི། །བསྒྲུབ་བྱའི་མིང་ནི་ལྟེ་བར་བྱ། །ཟླ་དྲུག་རྩེ་གཅིག་པའི་ཡིད་ཀྱིས། །ངེས་པར་བརྟན་པོ་དག་ཏུ་བྱ། །ཡི་གེ་བཅུ་པའི་སྔགས་འདི་ནི། །མི་
[28b.5]སྐྱོ་ཡིད་ཀྱིས་བཟླས་བྱ་སྟེ། །ཨོཾ་གྱི་ཡི་གེ་དང་པོར་སྦྱིན། །ཕྱིས་ནི་ཏཱ་རེ་རབ་ཏུ་སྦྱར། །ཏུཏྟཱ་རེ་ལ་ཏུ་རེ་ཕྱིས། །སྭཱ་ཧཱ་མཐའ་རུ་ལས་ཀུན་བྱེད། །ཚངས་དབང་ཁྱབ་འཇུག་ཟླ་ཉི་དང་། །དྲག་པོ་ཕྱོགས་སྐྱོང་འདོད་ལྷས་ཀྱང་། །བ་སྤུའི་རྩེ་མོའང་གཅོད་མི་ནུས། །འཆི་བདག་ལས་རྒྱལ་སྒྲོལ་
[28b.6]མ་བཞིན། །སྐྲ་དཀར་གཉེར་མ་སྐལ་ངན་ནད། །དབུལ་བ་ལ་སོགས་མདོར་བསྡུས་ན། །སེང་སོགས་འཇིགས་པ་ཆེ་བརྒྱད་དང་། །སྡུག་བསྔལ་རབ་ཏུ་འཇོམས་བྱེད་པ། །བསྐུལ་བ་མེད་པར་གུས་བཏུད་པར། །ཁང་བཟངས་རིན་ཆེན་སོགས་ཀྱང་འདུ། །རལ་གྲི་དང་ནི་མིག་སྨན་དང་། །
[28b.7]རྐང་པ་བུམ་པ་བཟང་སོགས་འགྲུབ། །ཚིགས་བཅད་མཁན་དང་སྙན་ངག་དང་། །བློ་རྣོ་ཤེས་རབ་དྲི་མེད་འགྱུར། །གཞན་ཡང་ཅི་འདོད་དངོས་གྲུབ་ནི། །འཁོར་ལོ་དེ་ལས་འབྱུང་བར་འགྱུར། །སྒྲོལ་མ་དཀར་མོའི་སྒྲུབ་པའི་ཐབས། །ནད་དང་འཆི་བ་རྣམ་ཉམས་པ། །གང་ཞིག་ཕྱུང་ནས་
[29a]
[29a.1]དགེ་བསགས་པ། །དེས་ནི་སྐྱེ་འགྲོ་སྒྲོལ་བར་ཤོག །སྒྲོལ་མ་དཀར་མོའི་སྒྲུབ་པའི་ཐབས། །ངག་གི་དབང་ཕྱུག་གྲགས་པ་ཡི། །སློབ་མའི་ཐུ་བོས་མཛད་པ་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།
[29a.2]{T3340}༄༅༅། །རྒྱ་གར་སྐད་དུ། ཨོ་ཌི་ཡཱ་ཎ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨུ་ཌྱན་གྱི་འོད་ཟེར་ཅན་གྱི་སྒྲུབ་པའི་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོ་རེ་ཞིག་རང་གི་སྙིང་གར་ཨཾ་ཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར་རོ། །དེའི་སྟེང་དུ་དང་པོའི་བཅུ་
[29a.3]གསུམ་ཀྱི་ས་བོན་ཟླ་ཕྱེད་ཐིག་ལེས་བརྒྱན་པའོ། །དེ་ཁོ་ན་བཞིན་དུ་སྡིག་པ་བཤགས་པ་ལ་སོགས་པ་བྱས་ནས་དེ་ཉིད་ཀྱིས་ཡོངས་སུ་རྫོགས་པའི་མཾ་ངོ་། །དེ་ཐམས་ཅད་ཡོངས་སུ་གྱུར་པ་ལས་འོད་ཟེར་ཅན་མདོག་དམར་ལ་ཞལ་དྲུག་པ་ཕྱག་བཅུ་གཉིས་མ་ཞལ་དང་པོ་དམར་བ། གཉིས་
[29a.4]པ་ནག་པོ། གསུམ་པ་ལྗང་གུ། བཞི་པ་སེར་པོ། ལྔ་པ་དཀར་པོ། མགོ་བོའི་སྟེང་ན་གནས་པའི་ཕག་གི་ཞལ་ནི་ནག་པོ་སྟེ་དྲུག་པའོ། །མཆོད་རྟེན་དང་མྱ་ངན་མེད་པས་བརྒྱན་པ། རྣམ་པར་སྣང་མཛད་སེར་པོས་དབུ་བརྒྱན་པ། གསུས་པ་འཕྱང་བ། ཐོད་པའི་ཕྲེང་བས་བརྒྱན་
[29a.5]པ། སྐྲ་ཁམ་པ་གྱེན་དུ་འགྲེང་བ། སྦྲུལ་ཀྱིས་བརྒྱན་པ། སྟག་གི་པགས་པའི་ཤམ་ཐབས་ཅན། གཡོན་བརྐྱང་བའི་ཞབས་ཕག་གིས་བགེགས་ཀྱི་ཚོགས་མནན་པའི་སྟེང་ན་གནས་པའོ། །གཡས་པའི་ཕྱག་ན་རལ་གྲི་དང་། རྡོ་རྗེ་དང་། གཏུན་ཤིང་དང་། མདའ་དང་། རྡོ་རྗེ་རྩེ་
[29a.6]གཅིག་པ་དང་དགྲ་སྟའོ། །གཡོན་པའི་ཕྱག་ན་སྡིགས་མཛུབ་དང་བཅས་པའི་ཞགས་པ་དང་། ཐོད་པ་དང་། མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་། རྩེ་གསུམ་མོ། །སྤྱན་གསུམ་ཟླུམ་ཞིང་དམར་བ། ཞལ་མཆེ་བ་གཙིགས་པའོ། །ཤིང་རྟའི་
[29a.7]དབུས་ན་གནས་པའོ། །ལྷ་མོ་གཞན་ནི་ཕྱག་གཉིས་པ་སྡིགས་མཛུབ་དང་བཅས་པའི་ཞགས་པ་མྱ་ངན་མེད་པའི་ཡལ་ག་ཡང་བསྒོམ་པར་བྱའོ། །བདག་ཉིད་བཅོམ་ལྡན་འདས་མ་ཞེས་པའོ། །དེ་ནས་ཕྱག་རྒྱ་བཅིང་བར་བྱ་སྟེ། རྡོ་རྗེ་ཐལ་མོ་སྦྱར་ལ་གུང་མོ་གཉིས་མཉམ་པར་
[29b]
[29b.1]བཀུག་སྟེ། མཐེབ་ཆེན་གཉིས་སྐྱིལ་མོ་ཀྲུང་བཅས་ལ། རྩེ་མོའི་ཚིགས་ནི་ཅུང་ཞིག་བསྐུམ་པའོ། །སྔགས་ནི། ཨོཾ་མཱ་རཱི་ཙྱཻ་ཨཾ་མཱཾ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོ་ཌྱན་གྱི་འོད་ཟེར་ཅན་གྱི་སྒྲུབ་ཐབས་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་གིས་བསྒྱུར་བའོ།།
[29b.2]{T3341}༄༅༅། །རྒྱ་གར་སྐད་དུ། ཀལྤོཀྟཾ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྟོག་པ་ནས་གསུངས་པའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །བླ་མེད་བདེ་བས་ཞེན་པ་ཡི། །ཤེས་རབ་ཕ་རོལ་ཕྱིན། །ཕྱག་འཚལ་རྟོག་པའི་འོད་ཟེར་ཅན། །
[29b.3]སྒྲུབ་ཐབས་ད་ལྟ་བྲི་བར་བྱ། །དེ་ལ་དང་པོ་རེ་ཞིག་རྣལ་འབྱོར་པས་འགྲོ་བ་མ་ལུས་པ་འདོན་པར་འདོད་པའི་བསམ་པ་ཅན་གྱིས། ཨོཾ་ཕཊ་ཅེས་པའི་སྔགས་ཀྱིས་སྙིང་ག་དང་། མགྲིན་པ་དང་། སྤྱི་བོ་རྣམས་སུ་ཁྲོ་བོའི་ཁུ་ཚུར་སྦྱིན་པར་བྱའོ། །ཨོཾ་མཱ་རཱི་ཙྱཻ་བིགྷྣཱཾ་ནུ་ད་ས་ད་ཡ་ཧཱུཾ་ཕཊ་ཅེས་བྱ་བའི་སྔགས་
[29b.4]ཀྱིས་བགེགས་བསྐྲད་ནས་རང་གི་སྙིང་གར་ཨོཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་ལ་མཾ་སེར་པོ་བསམས་ལ། དེ་ལས་བྱུང་བའི་འོད་ཟེར་གྱི་ཚོགས་ཀྱིས་ནམ་མཁའ་ནས་སྤྱན་དྲངས་ཏེ། བཅོམ་ལྡན་འདས་མ་མདུན་དུ་བཞུགས་སུ་གསོལ་ལོ། །དེ་ཡང་མདོག་གསེར་ལྟ་བུ་སེར་པོ་ཞལ་
[29b.5]གསུམ་པ། ཕྱག་བརྒྱད་པ། སྤྱན་གསུམ་པ། སེ་འབྲུའི་མེ་ཏོག་ལྟ་བུ་དམར་བ་ནི་གཡས་ཀྱི་ཞལ་ལོ། །ཨིནྡྲ་ནཱི་ལ་ལྟ་བུའི་ཞལ་འགྱུར་བའི་ཕག་ཞལ་ནི་གཡོན་པའོ། །རྡོ་རྗེ་དང་། ལྕགས་ཀྱུ་དང་། མདའ་དང་། ཁབ་ནི་གཡས་ཀྱི་ཕྱག་བཞི་ན་བསྣམས་པའོ། །མྱ་ངན་མེད་ཀྱི་ཡལ་
[29b.6]ག་དང་། གཞུ་དང་། སྐུད་པ་དང་། སྡིགས་མཛུབ་ནི་གཡོན་གྱི་ཕྱག་ནའོ། །རྣམ་པར་སྣང་མཛད་ཀྱི་དབུ་རྒྱན་ཅན། སྣ་ཚོགས་པའི་རྒྱན་གྱིས་ཡང་དག་པར་བརྒྱན་པ། མཆོད་རྟེན་གྱི་ཁོང་ན་གནས་པ་གོས་དམར་པོའི་ཤ་འགག་དང་། སྟོད་གཡོགས་དང་ལྡན་པ། དྲིལ་བུ་གཡེར་ཁའི་དྲ་བའི་
[29b.7]རྐང་གདུབ་ཅན། རྒྱན་ལ་སོགས་པ་དང་བཟང་པོའི་ཕྲེང་བ་རིན་པོ་ཆེ་ལ་སོགས་པས་དཔུང་པ་རྣམ་པར་བརྒྱན་པ་གཡོན་བརྐྱང་བའི་ཞབས་ཀྱིས་ཕག་བདུན་གྱི་ཤིང་རྟ་མནན་པ། ཡཾ་ལས་སྐྱེས་པའི་རླུང་གི་དཀྱིལ་འཁོར་ལ། ཧཾ་ལས་སྐྱེས་པའི་ཟླ་བ་དང་། ཉི་མ་འཛིན་པའི་གཟའ་ཆེན་པོ་རཱ་
[30a]
[30a.1]ཧུས་བྱིན་གྱིས་བརླབས་པ་ལ་གནས་པའི་ཤིང་རྟའི་དབུས་སུ་ལྷ་མོ་རྣམ་བཞིས་བསྐོར་བ་སྟེ། དེ་ལ་ཤར་གྱི་ཕྱོགས་སུ་བཏྟཱ་ལི་དམར་པོ་ཕག་གི་གདོང་པ་ཅན་ཕྱག་བཞི་པའོ། །ཁབ་དང་ལྕགས་ཀྱུ་ནི་གཡས་ཀྱི་ཕྱག་ནའོ། །ཞགས་པ་དང་མྱ་ངན་མེད་པའི་ཡལ་ག་ནི་
[30a.2]གཡོན་པའི་ཕྱག་ནའོ། །ཤ་འགག་དམར་པོ་ཅན་ནོ། །དེ་བཞིན་དུ་ལྷོ་ཕྱོགས་སུ་བ་ཏཱ་ལི་སེར་མོ། མྱ་ངན་མེད་དང་ཁབ་ནི་གཡས་ཀྱི་ཕྱག་ནའོ། །རྡོ་རྗེ་དང་ཞགས་པ་ནི་གཡོན་པའི་ཕྱག་ནའོ། །ལང་ཚོ་སར་པ་ལ་བབ་པའི་གཞོན་ནུ་མ་རྒྱན་ཐམས་ཅད་དང་ལྡན་པའོ། །དེ་བཞིན་དུ་ནུབ་ཕྱོགས་སུ་བ་རཱ་
[30a.3]ལི་དཀར་མོ་རྡོ་རྗེ་དང་ཁབ་ནི་གཡས་ཀྱི་ཕྱག་ནའོ། །ཞགས་པ་དང་མྱ་ངན་མེད་པ་ནི་གཡོན་གྱི་ཕྱག་ནའོ། །གཡོན་བརྐྱང་བའི་ཞབས་ཅན་ལེགས་པའི་གཟུགས་ཅན་མའོ། །དེ་བཞིན་དུ་བྱང་ཕྱོགས་ཀྱི་ཆ་རུ་བཱ་རཱ་ཧཱ་མུ་ཁི་དམར་པོ་སྤྱན་གསུམ་ཕྱག་བཞི་མ། རྡོ་རྗེ་དང་མདའ་ནི་གཡས་ཀྱི་ཕྱག་ནའོ། །
[30a.4]ཞགས་པ་དང་མྱ་ངན་མེད་པ་ནི་གཡོན་གྱི་ཕྱག་ན་སྟེ། མཛེས་པའི་གཟུགས་ཅན་མའོ། །དེ་ལྟར་བསམས་ནས་མཆོད་པ་དང་། ཕྱག་འཚལ་བ་དང་། བསྟོད་པ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསྔོ་བ་དང་། གསོལ་བ་བཏབ་པ་དང་། སྐྱབས་སུ་
[30a.5]འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་བསྟན་པ་ལ་སོགས་པ་བྱས་ལ། བྱམས་པ་དང་སྙིང་རྗེ་དང་། དགའ་བ་དང་། བཏང་སྙོམས་ཏེ་ཚངས་པའི་གནས་བཞི་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བས་ཏིང་ངེ་འཛིན་དམིགས་པར་བྱའོ། །དེ་ནས་
[30a.6]ཉི་མའི་དཀྱིལ་འཁོར་ལ་ཨོཾ་གྱི་ས་བོན་ཡོངས་སུ་གྱུར་པ་ལས་རྣམ་པར་སྣང་མཛད་སེང་གེའི་ཁྲི་ལ་བཞུགས་པ་དཀར་པོ་རལ་པའི་ཅོད་པན་འཆང་བ། བྱང་ཆུབ་མཆོག་གི་ཕྱག་རྒྱ་ཅན་ཞི་བ་རྒྱན་ཐམས་ཅད་ཀྱིས་བརྒྱན་པའོ། །དེའི་ཐུགས་ཁར་ཟླ་བ་ལ་ཡི་གེ་ཉི་ཤུ་རྩ་ལྔས་བསྐོར་བའི་མཾ་གི་ས་བོན་
[30a.7]ལས་ཡོངས་སུ་རྫོགས་པའི་མྱ་ངན་མེད་པའི་ཡལ་གའོ། །དེའི་སྟེང་དུ་ཟླ་བ་ལ་ཨོཾ་གྱི་ས་བོན་ནོ། །དེ་ཐམས་ཅད་ཡོངས་སུ་གྱུར་པ་ལས་ཇི་སྐད་གསུངས་པའི་མཚན་ཉིད་ཅན་གྱི་འོད་ཟེར་ཅན་ཀྱི་གཟུགས་སུ་བདག་ཉིད་སྐད་ཅིག་གིས་བསམ་མོ། །ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་
[30b]
[30b.1]ཁི་ཨཱ་ཀཪྵ་ཡ་ཛཿསྭཱཧཱ། ཞེས་བྱ་བ་འདིས་བཏྟཱ་ལི་ཤར་ཕྱོགས་སུ་དགོད་དོ། །དེ་བཞིན་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་པྲ་ནཾ་དུཥྚཱ་ནཾ་མུ་ཁཾ་བནྡྷ་བནྡྷ་ཧཱུྃ་སྭཱ་ཧཱ། ཞེས་བྱ་བས་བ་དཱ་ལི་ལྷོ་ཕྱོགས་སུའོ། །དེ་བཞིན་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་ནཾ་མུ་ཁཾ་སྟཾ་བྷ་ཡ་བཾ་
[30b.2]སྭཱ་ཧཱ། ཞེས་བྱ་བས་བ་རཱ་ལི་ནུབ་ཕྱོགས་སུ་དགོད་དོ། །དེ་བཞིན་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་སཏྭཱ་ན་བ་ཤ་མཱ་ན་ཡ་ཧོཿསྭཱ་ཧཱ། ཞེས་བྱ་བས་ནི་བ་རཱ་ཧཱ་མུ་ཁི་བྱང་ཕྱོགས་སུ་དགོད་པར་བྱའོ། །ཨོཾ་མཱ་རཱི་ཙྱཻ་མཱཾ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱ་བ་བསྒོམས་པའི་རྗེས་སུ་བཟླས་པ་བྱའོ། །དེ་
[30b.3]ལྟར་དུས་གསུམ་དུ་བྱིན་གྱིས་བརླབས་ལ་ལྷའི་རྣལ་འབྱོར་དུ་གནས་པར་བྱའོ། །རྟོག་པ་ལས་གསུངས་པའི་འོད་ཟེར་ཅན་གྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་བ་རི་དགེ་སློང་གིས་བསྒྱུར་བའོ།། {T3342}༄༅༅། །རྒྱ་གར་སྐད་དུ། ཀལ་པོཀྟ་བི་དྷི་
[30b.4]ནཱ་སཱི་ཏ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྟོག་པ་ལས་གསུངས་པའི་ཆོ་གས་འོད་ཟེར་ཅན་དཀར་མོའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོ་རེ་ཞིག་རང་གི་སྙིང་གར་ཟླ་བ་ལ་མཾ་ཡིག་དཀར་པོའི་འོད་ཟེར་གྱིས་མཉམ་པར་བཀུག་པའི་བཅོམ་ལྡན་འདས་མ་ལ་སྣ་
[30b.5]ཚོགས་ཀྱི་ཉེ་བར་སྤྱོད་པས་མངོན་དུ་མཆོད་ལ་སྡིག་པ་བཤགས་པ་ལ་སོགས་པ་བྱས་ནས། ཚངས་པའི་གནས་བཞི་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་ལ་པཾ་ལས་སྐྱེས་པའི་སྣ་ཚོགས་པདྨའི་སྟེང་དུ་ཟླ་བ་ལ་ཡང་མཾ་དཀར་པོ་ཡོངས་སུ་གྱུར་པ་ལས། འོད་
[30b.6]ཟེར་ཅན་ཀུནྡ་དང་ཟླ་བའི་འོད་དང་མཚུངས་པ། ཞལ་ལྔ་པ། ཕྱག་བཅུ་པ། ཞབས་བཞི་པ། སྐད་ཅིག་གིས་བསམ་པར་བྱའོ། །དེ་ལ་ཞལ་གྱི་གཙོ་མོ་ནི་སྐུའི་མདོག་གོ། །གཡས་པའི་ཞལ་ནི་ནག་པོའོ། །གཡོན་པའི་ཞལ་ནི་ཕག་གདོང་དམར་བའོ། །ཞལ་ཕྱི་མ་ནི་ལྗང་གུའོ། །མགོ་བོའི་སྟེང་
[30b.7]གི་ཞལ་ནི་སེར་པོའོ། །རིན་པོ་ཆེ་སྣ་ཚོགས་ཀྱིས་སྤྲས་པའི་རྩེ་གསུམ་པ་རལ་པའི་ཅོད་པན་ཅན་ནོ། །ཕྱག་གཡས་པའི་ཕྱག་ལྔ་ན་ཉི་མའི་དཀྱིལ་འཁོར་དང་། རྡོ་རྗེ་སྔོན་པོ་དང་། མདའ་དང་། ལྕགས་ཀྱུ་དང་། ཁབ་རྣམས་ཕྱག་ནའོ། །གཡོན་པའི་ཕྱག་ལྔ་རྣམས་སུ་ཟླ་བའི་དཀྱིལ་འཁོར་
[31a]
[31a.1]དང་། གཞུ་དང་། མྱ་ངན་མེད་པའི་ཡལ་ག་དང་། ཞགས་པ་དང་བཅས་པའི་སྡིགས་མཛུབ་དང་། སྐུད་པ་རྣམས་ཕྱག་ནའོ། །སྣ་ཚོགས་པའི་རིན་པོ་ཆེས་སྤྲས་པའི་རྣ་རྒྱན་དང་། དབུ་རྒྱན་དང་། ལག་གདུབ་དང་། དྲིལ་བུ་གཡེར་ཁ་དང་བཅས་པའི་སྐ་རགས་
[31a.2]ཀྱིས་གོས་ཀྱི་རྣམ་པར་བརྒྱན་པའི་ལུས་སོ། །ལང་ཚོ་དར་ལ་བབ་པ་ཤ་འགག་དང་། སྟོད་གཡོགས་དཀར་པོ་མཆོད་རྟེན་གྱི་ཁོང་དུ་གནས་པའི་ཕག་པ་བདུན་གྱི་ཤིང་རྟ་ལ་ཞོན་པའོ། །ཁྱབ་འཇུག་དང་། དབང་པོ་དང་། བདེ་བྱེད་དང་། ཚངས་པ་ཞབས་བཞིས་མནན་པའོ། །
[31a.3]དེའི་ཤིང་རྟའི་དབུས་སུ་གནས་པའི་ཆུ་སྲིན་མནན་པའི་བཅོམ་ལྡན་འདས་མ་གཞན་ཏེ། དེ་ཡང་སྐུ་མདོག་ནག་མོ་ཕག་གི་གདོང་པ་ཅན། རྡོ་རྗེ་དང་སྡིགས་མཛུབ་ནི་གཡས་པ་དང་གཡོན་པའི་ཕྱག་ནའོ། །གཡས་ཕྱོགས་སུ་ལྷ་མོ་གཞན་ཕག་གི་ཞལ་དམར་མོ་ཕྱག་བཞི་པ་ལྕགས་ཀྱུ་
[31a.4]དང་། ཁབ་ནི་གཡས་ཀྱི་ཕྱག་གཉིས་ནའོ། །སྡིགས་མཛུབ་དང་བཅས་པའི་ཞགས་པ་དང་སྐུད་པ་ནི་གཡོན་གྱི་ཕྱག་གཉིས་ནའོ། །རྒྱན་བཟང་པོས་ཡང་དག་པར་བརྒྱན་པའོ། །གཡོན་ཕྱོགས་སུ་རྗེ་བཙུན་མ་གཞན་ཏེ་དེ་ཡང་ཕག་ཞལ་མདོག་དམར་བ་རྣ་བའི་བར་དུ་བཀང་བའི་གཞུ་
[31a.5]དང་། མདའ་དང་། རྡོ་རྗེ་དང་། མྱ་ངན་མེད་པའི་ཡལ་ག་ནི་གཡས་དང་། གཡོན་པའི་ཕྱག་ནའོ། །སྣ་ཚོགས་པའི་ན་བཟས་བརྒྱན་པ་སྟེ། ཤིང་རྟ་འདྲེན་པའི་ཕག་གི་འོག་ན་ཉི་མ་ལ་སོགས་པའི་གཟའ་ཆེན་པོ་དགུ་དང་། ཉེ་བར་འཚེ་བའི་ནད་ཀྱི་ཚོགས་རྣམས་ལྷུང་ནས། མིའི་
[31a.6]གཟུགས་ཀྱིས་གནས་པའོ། །དེ་ལྟ་བུའི་གཟུགས་ཀྱི་བཅོམ་ལྡན་འདས་མ་བསམས་ལ། སྙིང་གར་ཟླ་བ་ལ་མཾ་ལས་བྱུང་བའི་འོད་ཟེར་གྱིས་དེ་བཞིན་གཤེགས་པ་བཀུག་སྟེ། དབང་བསྐུར་བླངས་ནས་དབུ་ལ་རྣམ་པར་སྣང་མཛད་ཀྱིས་དབུ་བརྒྱན་པར་བསམ་པར་བྱའོ། །དེ་ནས་སྙིང་གའི་
[31a.7]ས་བོན་ཉིད་ལས་ཕྲེང་བའི་རྣམ་པ་ལྟ་བུའི་སྔགས་ཀྱི་ཡི་གེ་ཁ་ནས་བྱུང་ནས་ལྟེ་བར་རོ། །ལྟེ་བ་ནས་ཁ་རུ། ཁ་ནས་ཡང་ལྟེ་བ་ལ་སོགས་པར་འཁོར་ལོ་འཁོར་བའི་རིམ་པས་སྔགས་བཟླས་པར་བྱའོ། །མཐའ་གསུམ་གྱི་དེ་ཉིད་ཡིད་ཀྱིས་བྱའོ། །དེ་ལ་འདི་ནི་སྔགས་ཡིན་ཏེ། ཨོཾ་མཱ་
[31b]
[31b.1]རཱི་ཙྱཻ་མཱཾ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། རང་གི་ས་བོན་གྱི་བྱིན་གྱིས་བརླབས་ལ། ཟས་ལ་སོགས་པ་ཐམས་ཅད་ལ་རྗེས་སུ་གནས་པར་བྱའོ། །སྐྱོ་ན་ཡི་གེ་བརྒྱ་པའི་སྔགས་བརྗོད་ལ། དེ་ལྟར་བདེ་བས་གནས་པར་བྱའོ། །རྟོག་པ་ལས་གསུངས་པའི་ཆོ་གའི་འོད་ཟེར་ཅན་དཀར་མོའི་སྒྲུབ་པའི་ཐབས་
[31b.2]རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3343}༄༅༅། །རྒྱ་གར་སྐད་དུ། ཨ་ཤྭ་ཀ་ཀན་ཏཱ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །སྔོན་
[31b.3]དུ་བསྟན་པའི་ཆོ་ག་སྟོང་པ་ཉིད་དུ་བསྒོམས་པའི་རྗེས་སུ་ཟླ་བ་ལ་མཾ་ཡིག་སེར་པོ་ལས་བྱུང་བའི་མྱ་ངན་མེད་པའི་ཤིང་གི་སྟེང་དུ་མཾ་ཡོངས་སུ་གྱུར་པ་ལས་འོད་ཟེར་ཅན་སེར་མོ་ཞལ་གཅིག་ཕྱག་གཉིས་མ། རྣམ་པར་སྣང་མཛད་མགོན་པོས་དབུ་རྒྱན་དུ་བྱས་པ། གསེར་ལྟ་བུའི་ཕག་པའི་རྒྱབ་ཏུ་སྣ་ཚོགས་
[31b.4]པདྨ་དང་ཟླ་བ་ལ་འགྱིང་བག་དང་བཅས་པས་སྟེང་དུ་བཞུགས་པའོ། །མྱ་ངན་མེད་པའི་སྡོང་པོ་ཡལ་ག་ཕྱག་གཡོན་པས་བཟུང་བའོ། །ཕྱག་གཡས་པས་མཆོག་སྦྱིན་པ། དོ་ཤལ་ལ་སོགས་པས་བརྒྱན་པའི་སྐུ་ལང་ཚོ་དར་ལ་བབ་པ་མཛེས་མ་འདི་ལྟ་བུར་བསམས་ནས། སྙིང་གའི་མཾ་གི་
[31b.5]ས་བོན་ལས་སྤྲོས་པའི་འོད་ཟེར་གྱིས་ཕག་གི་རྣམ་པས་གདུག་པ་ཅན་ཐམས་ཅད་བརླག་སྟེ།། སེམས་ཅན་མང་པོའི་དོན་སྣ་ཚོགས་བྱས་ནས་སོ། །ཨོཾ་མཱ་རཱི་ཙྱཻ་མཱཾ་སྭཱ་ཧཱ། ཞེས་བྱ་བའི་སྔགས་བཟླས་པར་བྱའོ། །མྱ་ངན་མེད་པའི་ཤིང་གི་རྩ་བའི་འོད་ཟེར་ཅན་གྱི་སྒྲུབ་པའི་ཐབས་རྫོགས་སོ། །
[31b.6]པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3344}༄༅༅། །རྒྱ་གར་སྐད་དུ། ཨུ་ཌི་ཡཱ་ཎ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨུཌྱན་གྱི་འོད་ཟེར་ཅན་གྱི་སྒྲུབ་པའི་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་
[31b.7]གས་སྡིག་པ་བཤགས་པའི་རྗེས་སུ་སྟོང་པ་ཉིད་རྣམ་པར་བསྒོམས་ལ། སྣ་ཚོགས་པདྨ་དང་ཉི་མ་ལ་མཾ་གི་ས་བོན་དམར་པོ་ཡོངས་སུ་གྱུར་པ་ལས་ཨུ་ཌྱན་གྱི་འོད་ཟེར་ཅན་མདོག་དམར་བ། ཞལ་དྲུག་པ་ཕྱག་བཅུ་གཉིས་པ་ཞལ་རེ་རེ་ལ་སྤྱན་གསུམ་གསུམ་མོ། །དམར་པོ་དང་།
[32a]
[32a.1]ནག་པོ་དང་། དཀར་པོ་དང་། ལྗང་གུ་དང་། སེར་པོ་ནི་གཡས་སྐོར་དུ་ཞལ་ལྔའོ། །སྟེང་དུ་ནི་ཕག་ཞལ་ནག་པོའོ། །དང་པོ་གཡས་ཀྱི་ཕྱག་དྲུག་ཏུ་གོ་རིམས་བཞིན་དུ་རལ་གྲི་དང་། འཁོར་ལོ་དང་། གཏུན་ཤིང་དང་། མདའ་དང་། དགྲ་སྟ་དང་། རྡོ་རྗེ་རྩེ་གཅིག་པའོ། །གཡོན་གྱི་
[32a.2]ཕྱག་རྣམས་སུ་སྡིགས་མཛུབ་དང་བཅས་པའི་ཞགས་པ་དང་། ཁ་ཊྭཱཾ་ག་དང་། ཐོད་པ་དང་། མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་རྩེ་གསུམ་མོ། །མཆོད་རྟེན་གྱི་ནང་ན་གནས་པ། ཀླུའི་དབང་པོ་བརྒྱད་ཀྱིས་སྐུ་བརྒྱན་པ། སྐྲ་ཁམ་པ་གྱེན་དུ་བསྒྲེང་བ། ཞལ་མཆེ་
[32a.3]བ་གཙིགས་པ། མགོ་བོ་སྐམ་པོ་བརྒྱད་ཀྱིས་དབུ་བརྒྱན་པ། མགོ་བོ་རློན་པའི་ཕྲེང་བ་སྐེ་བ་ནས་འཆང་བ། རིན་པོ་ཆེ་མང་པོས་སྤྲས་པའི་ཤིང་རྟ་སྣ་ཚོགས་པ་ཕག་པ་བདུན་ལ་ཆིབས་པ། ཕྱི་རོལ་དུ་དུར་ཁྲོད་བརྒྱད་ཀྱིས་ཡོངས་སུ་བསྐོར་བ། ཤིང་རྟའི་དབུས་སུ་གནས་པ་ནི་སྐྱིལ་མོ་ཀྲུང་གིས་
[32a.4]བཞུགས་པ། རྡོ་རྗེ་དང་ཁབ་དང་། མྱ་ངན་མེད་དང་། སྡིགས་མཛུབ་བསྣམས་པ། མདོག་བཟང་པོའི་འོད་ཟེར་ཅན་ཤ་འགག་སེར་པོ། སྣ་ཚོགས་ཀྱི་རིན་པོ་ཆེས་བརྒྱན་པ། སྟག་གི་པགས་པའི་ཤམ་ཐབས་ཀྱིས་ཀྱང་བརྒྱན་པའོ། །འོད་དམར་པོ་ལས་དེ་བཞིན་གཤེགས་པ་ལྔ་སྤྲོ་བ་དང་།
[32a.5]སྐད་ཅིག་གིས་བསམས་ལ་སྙིང་གར་ཉི་མ་ལ་མཾ་གི་ས་བོན་ལས་རྣམ་པར་བྱུང་བའི་འོད་ཟེར་བརྒྱད། སངས་རྒྱས་དང་བྱང་ཆུབ་སེམས་དཔའ་ཡང་དག་པར་བཀུག་སྟེ། དབང་བསྐུར་བ་བླངས་ནས་རྣམ་པར་སྣང་མཛད་བདག་ཉིད་ཀྱི་དབུ་རྒྱན་དུ་རྣམ་པར་བསམ་པར་བྱའོ། །དེ་ནས་རྣལ་འབྱོར་པས་འཁོར་ལོ་
[32a.6]འཁོར་བའི་རིམ་པ་འདིས་སྔགས་ཀྱི་བཟླས་པ་བྱའོ། །ཨོཾ་མཱ་རཱི་ཙྱཻ་མཱཾ་ཧཱུྃ་ཧཱུྃ་ཕཊ་ཕཊ་སྭཱཧཱ། བཟླས་པ་བྱས་ནས་ཕྱིས་ཀྱི་དུས་སུ་ཏིང་ངེ་འཛིན་ཉེ་བར་བསྡུས་ལ་དེ་ཉིད་ཀྱི་རྣལ་འབྱོར་གྱིས་ཇི་ལྟར་བདེ་བར་གནས་པར་བྱའོ། །ཨུ་ཌྱན་གྱི་འོད་ཟེར་ཅན་གྱི་སྒྲུབ་ཐབས། སློབ་དཔོན་ལྷན་ཅིག་སྐྱེས་པའི་རོལ་
[32a.7]པས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3345}༄༅༅། །རྒྱ་གར་སྐད་དུ། ཨོ་ཌཱི་ཡཱ་ན་ཀྲ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨུ་ཌྱན་གྱི་རིམ་པའི་འོད་ཟེར་ཅན་གྱི་སྒྲུབ་པའི་ཐབས། འཕགས་མ་འོད་ཟེར་ཅན་ལ་ཕྱག་
[32b]
[32b.1]འཚལ་ལོ། །དང་པོར་སྙིང་གར་ཉི་མའི་གདན་ལ་ཧཱུཾ་ངོ་། །དེའི་འོད་ཟེར་གྱིས་བཅོམ་ལྡན་འདས་མ་བཀུག་སྟེ། སྣ་ཚོགས་པའི་མཆོད་པས་ཡང་དག་པར་མཆོད་ལ། སྡིག་པ་བཤགས་པ་ལ་སོགས་པ་བྱས་ནས། སྟོང་པ་ཉིད་བསྒོམས་པའི་རྗེས་སུ་སྣ་ཚོགས་རྡོ་རྗེའི་རྣམ་པ་སེམས་ཀྱིས་བསམས་
[32b.2]ལ། དེ་ཡོངས་སུ་གྱུར་པ་ལས་རྡོ་རྗེའི་ས་གཞི་དང་། རྡོ་རྗེའི་ར་བ་ལ་སོགས་པ་བསམས་ལ། དེའི་དབུས་སུ་དཔལ་ཨུ་ཌྱན་གྱི་གནས་གྲུ་གསུམ་དཀར་ཞིང་དམར་བའོ། །དེའི་དབུས་སུ་ཉི་མ་ལ་གནས་པའི་རྡོ་རྗེ་རྩེ་ལྔ་པ་ཧཱུཾ་གིས་དེའི་ལྟེ་བ་མཚན་པའོ། །དེ་ཡོངས་སུ་གྱུར་པ་ལས་བྱང་ཆུབ་སེམས་ཀྱི་
[32b.3]ངོ་བོ་ཉིད་འཇིག་པའི་དུས་ཆེན་པོའི་མེ་ལྟ་བུ་གྱེན་དུ་རྣམ་པར་འཕྲོ་བ། ཟིལ་གྱིས་མི་ནོན་པའོ། །ཧ་ཧ་ཞེས་དགོད་ཅིང་བདུད་རྣམ་བཞི་གཡོན་བརྐྱང་བའི་ཞབས་ཀྱིས་མནན་པ། ཕྱག་བཅུ་གཉིས་པ། ཞལ་དྲུག་པ། སྤྱན་གསུམ་པ། མདོག་དམར་པོ། དང་པོ་གཡས་ཀྱི་ཕྱག་དྲུག་རྣམས་སུ་རལ་
[32b.4]གྲི་དང་། སྣ་ཚོགས་རྡོ་རྗེ་དང་། རྡོ་རྗེ་རྩེ་གཅིག་པ་དང་། དགྲ་སྟ་དང་། མདའ་དང་། གཏུན་ཤིང་བསྣམས་པའོ། །གཡོན་གྱི་ཕྱག་རྣམས་སུ་སྡིགས་མཛུབ་དང་བཅས་པའི་ཁབ་དང་། རྩེ་གསུམ་དང་། མྱ་ངན་མེད་པའི་ཡལ་ག་དང་། གཞུ་དང་། ཞགས་པ་དང་། ཚངས་པའི་མགོ་བོ་
[32b.5]རྣམས་སོ། །མི་མགོའི་ཕྲེང་བ་འཕྱང་བ། ལུས་ཀྱི་ཡན་ལག་དང་། ཉིང་ལག་ཐམས་ཅད་མཛེས་པའོ། །སྟག་གི་པགས་པའི་སྟོད་གཡོགས་ཀྱི་གོས་ཅན། རྩ་བའི་ཞལ་ནི་དམར་བའོ། །དཀར་པོ་དང་། ནག་པོ་གཡོན་པའི་ཞལ་གཉིས་སོ། །སེར་པོ་དང་ནག་པོ་ནི་གཡས་ཀྱི་ཞལ་
[32b.6]གཉིས་སོ། །སྟེང་གི་ཕག་གི་ཞལ་ནི་ནག་པོའོ། །ལྗགས་འདྲིལ་བ། སྐྲ་ཁམ་པ་གྱེན་དུ་འབར་བ། རྣམ་པར་སྣང་མཛད་ཀྱི་དབུ་རྒྱན་ཅན། སྦྲུལ་དང་རུས་པའི་རྒྱན་གྱིས་བརྒྱན་པ། གཉུག་མའི་འོད་ཟེར་གྱིས་རྣམ་པ་ཐམས་ཅད་ཀྱི་བདུད་འཇོམས་པར་བྱེད་མ། ཕྱོགས་བཅུར་འབྲོས་
[32b.7]བཞིན་པའི་མཁའ་འགྲོ་མ་དང་། འབྱུང་པོ་དང་། རོ་ལངས་ཕེཾ་ཕེཾ་གྱི་རྣམ་པ་དང་། ཧ་ཧའི་འཇིགས་པའི་སྒྲ་སྒྲོགས་པས་ཡོངས་སུ་བསྐོར་བའི་དུར་ཁྲོད་བརྒྱད་ཀྱིས་བརྒྱན་པ། དཔལ་ཨུ་ཌྱན་གྱི་འོད་ཟེར་ཅན་གྱི་བདག་ཉིད་དུ་སྐད་ཅིག་གིས་བསྐྱེད་ལ། མགོ་བོ་དང་། མགྲིན་པ་དང་། སྙིང་ག་
[33a]
[33a.1]རྣམས་སུ་ཨོཾ་ཨཱཿཧཱུཾ་ངོ་། །ཡན་ལག་ཐམས་ཅད་ལ་ཕཊ་ཀྱི་རྣམ་པ་བསམ་པར་བྱའོ། །དེ་ནས་ལྟེ་བའི་སྟེང་དུ་སྣ་ཚོགས་པའི་པདྨ་ལ་ཟླ་བ་ཉི་མ་ཁ་སྦྱོར་གྱི་དབུས་སུ་ཧཱུཾ་གི་རྣམ་པ་པད་སྣོད་ཀྱི་རང་བཞིན་སྣ་ཚོགས་ཀྱི་མདོག་ཅན་གྱི་ཡི་གེ་བསམ་པར་བྱའོ། །ཨོཾ་བཛྲ་དྷཱ་ཏྭཱི་ཤྭ་རི་སརྦ་
[33a.2]དུཥྚན་ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྙིང་པོའི་སྔགས་སོ། །ཨོཾ་ཨཱཿཧཱུཾ། བསྒོམ་པའི་སྔགས་སོ། །ཨོཾ་བཛྲ་བེ་ཏཱ་ལཱི་ཧཱུཾ་ཕཊ། བཟླས་པའི་སྔགས་སོ། །ཨོཾ་མཱ་རཱི་ཙྱཻ་ཨཾ་མཾ་ཧཱུཾ་ཧཱུཾ་ཕཊ་བཟླས་པའི་སྔགས་གཉིས་པའོ། །དེ་ནས་ཐུན་མཚམས་བཞིར་
[33a.3]གཏོར་མའི་སྔགས་ནི། ཨོཾ་ཨཱརལླི་ཧོ། ཛཿཧཱུཾ་བཾ་ཧོཿཨོཾ་བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་ཧོ། ཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པི་ཤ་ཙོ་ན་མཱ་ད་ཨ་པསྨཱ་ར་ཌཱ་ཀིནྱཱ་ད་ཡཿ ཨི་དཾ་བ་ལིཾ་གྲྀཧྞ་ཐཱ་པི་པ་ཐཱ་མཱ་ཏི་ཀྲཱ་མ་ཐཱ་མ་ཧཱ་སུ་ཁ་བི་བྲྀཏ་དྷ་ཡེ་མ་མ་ས་ཧ་ཡི་ཀ་བྷ་བ་ཐཱ་ཧཱུཾ་ཧཱུཾ་ཕཊ་ཕཊ་སྭཱཧཱ། ཟས་ལ་སོགས་
[33a.4]པ་ཡང་ཧྲཱིཿའི་ཡི་གེའམ། ཧཱུཾ་གི་ཡི་གེ་ལ་སོགས་པས་ཡང་དག་པར་སྦྱངས་ལ་སྤྱད་པར་བྱའོ། །ཨུ་ཌྱན་གྱི་རིམ་པའི་འོད་ཟེར་ཅན་གྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་བ་རི་དགེ་སློང་གིས་བསྒྱུར་བའོ།། {T3346}༄༅༅། །རྒྱ་གར་སྐད་དུ། ཙུནྡ་སཱ་དྷ་ནཾ།
[33a.5]བོད་སྐད་དུ། ཙུནྡའི་སྒྲུབ་པའི་ཐབས། འཕགས་མ་ཙུནྡ་ལ་ཕྱག་འཚལ་ལོ། །ལྷ་མོ་ཙུནྡ་ཕྱོགས་སྐྱོང་ཆེ། །ཡང་དག་རྒྱལ་བ་དེ་བཏུད་ནས། །མདོར་བསྡུས་མྱུར་དུ་སྒྲུབ་པའི་ཐབས། །དེ་ཡི་མཉེས་ཐབས་བརྗོད་པར་བྱ། །དང་པོར་རེ་ཞིག་སྔགས་པས་རང་གི་སྙིང་གར་ཟླ་བའི་དབུས་སུ་ས་བོན་སྡེ་
[33a.6]ཚན་གསུམ་པའི་དང་པོ་དང་པོའི་ལྔ་པས་བརྒྱན་ལ། ཟླ་ཕྱེད་དང་ཐིག་ལེས་བརྒྱན་པ། ཟླ་བ་ལས་འབབ་པའི་འོད་ཟེར་གྱི་ཕྲེང་བ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་མཛེས་པ། དེ་ནས་འོད་ཟེར་ལས་ཡོངས་སུ་རྫོགས་པའི་བཅོམ་ལྡན་འདས་མ་དང་། བླ་མ་དང་། རྫོགས་པའི་
[33a.7]སངས་རྒྱས་ལ་སོགས་པ་བལྟས་ལ། མངོན་དུ་ཕྱག་འཚལ་ལ། སྔགས་འདིས་མཆོད་པར་བྱའོ། །ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ནཻ་བི་དྱེ་ཧཱུཾ། དེ་ནས། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །
[33b]
[33b.1]འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་བྱ་བ་ལ་སོགས་པ་བརྗོད་པར་བྱའོ། །དེ་ནས་སྨོན་ལམ་སྔོན་དུ་སོང་བས་སྔགས་འདིས་ཆོས་ཐམས་ཅད་བདག་མེད་པར་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་ས་བོན་སྒྱུ་མ་ལྟ་བུའི་རྣམ་
[33b.2]པར་བསམས་ལ། ཁམས་གསུམ་མ་ལུས་པ་ཡང་ངོ་། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། དེ་ནས་སྔོན་དུ་བསྟན་པའི་ས་བོན་ལས་ཡོངས་སུ་རྫོགས་པའི་དཔལ་ལྷ་མོ་ཙུནྡའི་བདག་ཉིད་དུ་བསྒོམ་པར་བྱའོ། །སྟོན་ཀའི་ཟླ་བ་ལྟ་བུ་ཕྱག་བཞི་པ་གཡས་ན་མཆོག་སྦྱིན་པ། གཡོན་ན་པོ་
[33b.3]ཏིས་མཚན་པའི་པདྨ་བསྣམས་པ། ཕྱག་གཉིས་ན་ལྷུང་བཟེད་བསྣམས་ཤིང་རྒྱན་ཐམས་ཅད་ཀྱིས་བརྒྱན་པ། པདྨ་དང་ཟླ་བའི་སྟེང་ན་བཞུགས་པ་བསྒོམ་པར་བྱའོ། །ཕྱིས་ནི་ཕྱག་རྒྱ་བཅིང་བར་བྱ་སྟེ། སྙིང་ག་དང་། སྨིན་མཚམས་དང་། མགྲིན་པ་དང་། སྤྱི་བོ་རྣམས་སུ་བསྲུང་བར་
[33b.4]བྱས་ལ་བཟླས་པ་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། ལག་པ་གཉིས་ཐལ་མོ་སྦྱར་བ་བྱས་ནས། སྡིགས་མཛུབ་གཉིས་ཀྱིས་གུང་མོ་དཀྱིལ་དུ་འཁྲིལ་བའི་ཚུལ་དུ་སྦྱར་ཞིང་མཐེབ་ཆེན་གཉིས་ལོགས་སུ་བཅེར་བ་ནི་ཙུནྡའི་ཕྱག་རྒྱའོ། །སྔགས་ནི་འདི་ཡིན་ཏེ། ཨོཾ་ཙ་ལེ་ཙུ་ལེ་ཙུནྡེ་སྭཱ་ཧཱ།
[33b.5]ཙུནྡའི་སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3347}༄༅༅། །རྒྱ་གར་སྐད་དུ། ཤྲཱི་ཛཾ་བྷ་ལ་སྱ་སཾཀྵིཔྟ་སཱ་དྷ་ནཾ། བོད་སྐད་དུ། དཔལ་གནོད་གནས་ཀྱི་མདོར་བསྡུས་པའི་སྒྲུབ་པའི་ཐབས། དཔལ་
[33b.6]གནོད་གནས་ལ་ཕྱག་འཚལ་ལོ། །སྔར་བསྟན་པའི་ཆོ་གས་སྙིང་གར་ཟླ་བའི་དཀྱིལ་འཁོར་གྱི་དབུས་སུ་དཔལ་གནོད་གནས་གསུམ་པའི་ས་བོན་ནི་མདོག་སེར་བ་སྟོང་པའི་ལྷས་མནན་པ་ཟླ་བ་ཕྱེད་པས་རྣམ་པར་བརྒྱན་པ། དེ་ཉིད་ལས་རྫོགས་པའི་དཔལ་གནོད་གནས་ཁ་དོག་སེར་པོ་ཕྱག་གཉིས་
[33b.7]པ། གཡས་པའི་ཕྱག་ན་བཱི་ཛ་པཱུ་ར་ཀ །གཡོན་པའི་ཕྱག་ན་རིན་པོ་ཆེའི་ཆར་རབ་ཏུ་འབེབས་བཞིན་པའི་ནེའུ་ལེ་འཛིན་པ་སངས་རྒྱས་ལྔའི་ཅོད་པན་ཅན་ཞབས་གཉིས་ཀྱིས་དུང་གི་ཚོགས་དང་། པདྨའི་ཚོགས་ཀྱི་གཏེར་ཆེན་པོ་མནན་པ། ཨུཏྤལ་སྔོན་པོའི་ཕྲེང་བ་འཛིན་པ། རྒྱན་
[34a]
[34a.1]ཐམས་ཅད་ཀྱིས་བརྒྱན་པ། ཛཾ་བྷ་ལའི་གཟུགས་སུ་བདག་ཉིད་བསྒོམ་པར་བྱའོ། །རང་གི་ཁྱིམ་དུ་ཡང་རིན་པོ་ཆེ་སྣ་ཚོགས་ལ་སོགས་པའི་ཆར་རབ་ཏུ་འབབ་པར་འགྱུར་བར་བདག་ཉིད་བསམ་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་ཁུ་ཚུར་བཅིངས་
[34a.2]ཏེ་གུང་མོ་དག་ནི་དབུ་མའི་ཚིགས་གསུམ་པ་བཀུག་པ་ནི་ཛཾ་བྷ་ལའི་ཕྱག་རྒྱ་ཞེས་བྱའོ། །ཨོཾ་ཛཾ་བྷ་ལ་ཛ་ལེན་དྲཱ་ཡེ་སྭཱ་ཧཱ། སྔགས་འདི་ཉིད་ཀྱིས་རྗེ་བཙུན་ལ་ཆུ་གཏོར་བ་བརྒྱ་རྩ་བརྒྱད་དབུལ་བར་བྱའོ། །ཕྱི་ནས་མཆོད་པ་བྱ་སྟེ་སྔགས་བཟླ་བར་བྱའོ། །དེ་ནས་དངོས་གྲུབ་ནི་སྦྱིན་པ་ཆེན་པོར་འགྱུར་ཏེ་ཐེ་
[34a.3]ཚོམ་མེད་དོ། །དཔལ་ཛཾ་བྷ་ལའི་སྒྲུབ་པའི་ཐབས་མདོར་བསྡུས་པའོ། །སློབ་དཔོན་བཛྲ་ཙནྡྲ་གོ་མིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3348}༄༅༅། །རྒྱ་གར་སྐད་དུ། ཨུཙྪུ་སྨ་ཛཾ་བྷ་ལ་སཱ་དྷ་ནཾ། བོད་
[34a.4]སྐད་དུ། ཨུཙྪུསྨ་ཛཾ་བྷ་ལའི་སྒྲུབ་པའི་ཐབས། བཅོམ་ལྡན་འདས་ཛཾ་བྷ་ལ་ལ་ཕྱག་འཚལ་ལོ། །ཨོཾ་ཨཱཿཞེས་བྱ་བས་ཕབ་སྟེ། རང་གི་སྙིང་གར་ཨ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་དབུས་སུ་ཧཱུཾ་ལས་རྡོ་རྗེ་རྩེ་དགུ་པའི་དབུས་སུ་དབང་པོ་སྦས་པ་ལྟ་བུའི་ཧཱུཾ་ཡིག་གོ། །སྔོན་དུ་
[34a.5]བསྟན་པ་འབེབས་པའི་སྔགས་ཀྱིས་ཕབ་ལ། ཛཾ་བྷ་ལ་མགོན་པོ་རང་གི་སྙིང་གར་རབ་ཏུ་བཅུག་པས། ཨུཙྪུསྨ་མིའུ་ཐུང་གི་གཟུགས་རྣ་བ་མ་ཕུག་པ་མདོག་ནག་པ། སྐྲ་ཁམ་པ་གྱེན་དུ་བསྒྲེང་བ། ལུས་ཐུང་བར་བྱེད་ཅིང་ཁྲོ་གཉེར་ཅན། མཆེ་བ་དང་ལྡན་པ་རིན་ཆེན་འབྱུང་ལྡན་གྱི་
[34a.6]དབུ་རྒྱན་ཅན། ཀླུ་ཆེན་པོ་བརྒྱད་ཀྱི་རྒྱན་གྱིས་བརྒྱན་པའི་གཡོན་པའི་ཕྱག་ན་རིན་པོ་ཆེ་ལ་སོགས་པ་སྐྱུགས་པའི་སྲེ་མོ་བསྣམས་པ། གཡས་ན་ཁྲག་གིས་བཀང་བའི་ཐོད་པ་བསྣམས་པའོ། །མགོ་གཡས་ཕྱོགས་སུ་བསྟན་པའི་གསེར་གྱི་མདོག་ཅན། རྒྱན་སྣ་ཚོགས་ཀྱིས་བརྒྱན་
[34a.7]པའི་ནོར་སྦྱིན་འགྱེལ་བ་ལ་ཞབས་གཉིས་ཀྱིས་མནན་པས་རིན་པོ་ཆེའི་སྙེ་མ་ལ་སོགས་པ་སྐྱུགས་པར་བྱེད་པའོ། །འོད་འཕྲོ་བའི་ཕྲེང་བ་འཁྲིགས་པའི་བདག་ཉིད་དུ་བསམས་ལ། ཨུཙྪུསྨའི་གཡས་པའི་ཕྱག་ཏུ་ཨཾ་ལས་སྐྱེས་པ་གྲུ་གསུམ་པ་ས་ཀ་ཊ་བསམ་མོ། །བཾ་ལས་སྐྱེས་པའི་བུམ་
[34b]
[34b.1]པ་བཟང་པོ་འབོ་བཞིན་པའོ། །ལག་པའི་དབུས་སུ་ཛཾ་ངོ་། །སྡིགས་མཛུབ་ལ་བྷའོ། །གུང་མོ་ལ་ལའོ། །སྲིན་ལག་ལ་ཛའོ། །མཐེའུ་ཆུང་ལ་ལེན་ནོ། །མཐེབ་ཆེན་ལ་དྲཱའོ། །མཁྲིག་མགུལ་དུ་ཡའོ། །དེ་ནས་སྭཱ་ཧཱ་ཞེས་པ་ནི་ལོགས་གཉིས་ལའོ། །སྔགས་དགོད་པ་བསྒོམ་པའི་རིམ་པའོ།
[34b.2]ཁ་མངོན་པར་བསྔགས་ལ་ཆུ་སྦྱིན་སྦྱིན་པར་བྱའོ། །ཨོཾ་ཛླཱུཾ་སྭཱ་ཧཱ། ཆུ་ཁྱོར་བ་ནས་སྦྱིན་པའི་སྔགས་སོ། །ཨོཾ་ཨིནྡྲ་ཎི་མུ་ཁཾ་བྷྲ་མ་རི་སྭཱ་ཧཱ། ལག་པ་ནས་ཁ། ཁ་ནས་ལག་པ། དེ་ནས་ཞལ་དུ་སྦྱིན་པར་བྱའོ། །དེ་ལྟར་སྙིང་རྗེས་སེམས་ཅན་དབུལ་བའི་སྡུག་བསྔལ་བཅད་པའི་དོན་དུ་ཛཾ་བྷ་
[34b.3]ལ་བསྒོམ་པ་ནི་ཛཾ་བྷ་ལ་ཉིད་དུ་འགྱུར་རོ། །ཨུཙྪུསྨ་ཛཾ་བྷ་ལའི་སྒྲུབ་པའི་ཐབས་རྣལ་འབྱོར་པ་དགའ་བ་སྦྱིན་གྱིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3349}༄༅༅། །རྒྱ་གར་སྐད་དུ། བ་སུནྡྷཱ་རཱ་སཱ་དྷ་ནཾ། བོད་
[34b.4]སྐད་དུ། ལྷ་མོ་ནོར་རྒྱུན་གྱི་སྒྲུབ་ཐབས། ལྷ་མོ་ནོར་གྱི་རྒྱུན་ལ་ཕྱག་འཚལ་ལོ། །གཞན་ཡང་ནོར་རྒྱུན་མ་སྒོམ་པར་འདོད་པས། དེ་ལ་སྔོན་བཞིན་དུ་ཐམས་ཅད་དེ་ལྟར་བྱའོ། །འོན་ཀྱང་དྲུག་པའི་གསུམ་པའི་ས་བོན་ལ་ཟླ་ཕྱེད་དང་ཐིག་ལེས་བརྒྱན་པ་སྟེ། དེ་ཉིད་ལ་རྫོགས་པའི་ནོར་སྦྱིན་མ་
[34b.5]མདོག་སེར་བ་འབྲས་ཀྱི་སྙེ་མ་དང་། རིན་པོ་ཆེ་སྣ་ཚོགས་ཀྱི་ཆར་འབབ་བཞིན་པའི་བུམ་པ་ནི་གཡོན་པའི་ཕྱག་ནའོ། །གཡས་པ་མཆོག་སྦྱིན་པ་རྒྱན་ཐམས་ཅད་ཀྱིས་བརྒྱན་པ། མཛའ་བའི་སྐྱེ་འགྲོ་རྣམས་ཀྱིས་ཡོངས་སུ་བསྐོར་བ་བསྒོམ་པར་བྱའོ། །བདག་ཉིད་ནོར་རྒྱུན་མའོ་ཞེས་བྱའོ། །ལག་
[34b.6]པ་གཉིས་ཀྱི་ཁུ་ཚུར་བཅིངས་ཏེ། གུང་མོ་གཉིས་ཀྱི་ཚིགས་གསུམ་པ་བཅག་པ་ནི་ནོར་རྒྱུན་མའི་ཕྱག་རྒྱའོ། །དེ་ནས་བཟླས་པ་བྱ་སྟེ། ཨོཾ་ཤྲཱི་བ་སུནྡྷཱ་ནཀྵེ་ཏྲེ་སྭཱ་ཧཱ། ནོར་རྒྱུན་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། །།
[34b.7]{T3350}༄༅༅། །རྒྱ་གར་སྐད་དུ། བྷྲྀ་ཀུ་ཊཱི་སཱ་དྷ་ནཾ། བོད་སྐད་དུ། ཁྲོ་གཉེར་ཅན་གྱི་སྒྲུབ་པའི་ཐབས། འཕགས་མ་ཁྲོ་གཉེར་ཅན་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་རང་གི་སྙིང་གར་ཟླ་བའི་དབུས་སུ་ས་བོན་དྲུག་པའི་བཞི་པ་དང་པོའི་བརྒྱད་པས་བཀང་བའོ། །སྟོང་པའི་ལྷས་
[35a]
[35a.1]མནན་ཅིང་ཟླ་ཕྱེད་ཀྱིས་དབུ་བརྒྱན་པའོ། །དེ་ཉིད་ལས་ཡོངས་སུ་རྫོགས་པའི་ཁྲོ་གཉེར་ཅན་མདོག་སེར་མོ་ཕྱག་བཞི་པ། རལ་པའི་ཅོད་པན་འཆང་ཞིང་ཞི་བ། གཡས་པ་ན་མཆོག་སྦྱིན་པ་དང་ཕྲེང་བ་འཆང་བ། གཡོན་པ་ན་དབྱིག་པ་དང་རིལ་བ་སྤྱི་བླུགས་བསྣམས་པའོ། །
[35a.2]པདྨ་དང་ཟླ་བའི་གདན་ལ་བཞུགས་པ་བསྒོམ་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་བརྐྱང་སྟེ་མཐེབ་ཆེན་གྱིས་མཐེའུ་ཆུང་གི་སེན་མོ་མནན་ཏེ། ལྷག་མ་སོ་སོར་བྱས་པ་ནི་རྡོ་རྗེའི་མཚན་ཉིད་དོ། །འདི་ནི་ཁྲོ་གཉེར་ཅན་གྱི་ཕྱག་རྒྱའོ། །ཕྱི་ནས་སྔགས་བཟླས་པར་བྱ་སྟེ། ཨོཾ་བྷྲྀ་
[35a.3]སྭཱ་ཧཱ། ཁྲོ་གཉེར་ཅན་གྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3351}༄༅༅། །རྒྱ་གར་སྐད་དུ། མཻ་ཏྲི་ཡ་སཱ་དྷ་ནཾ། བོད་སྐད་དུ། བྱམས་པའི་སྒྲུབ་ཐབས། རྒྱལ་བ་བྱམས་པ་ལ་ཕྱག་འཚལ་ལོ། །སྔོན་དུ་
[35a.4]བསྟན་པ་ཐམས་ཅད་ཉིད་བྱས་ཏེ། འོན་ཀྱང་མི་གི་ཡི་གེ་ཡོངས་སུ་རྫོགས་པ་ཡི། །ཐུབ་པ་སྐྱེས་མཆོག་བྱམས་པ་ནི། །ཞལ་གསུམ་སྤྱན་གསུམ་གྱིས་བརྒྱན་པ། །དེ་ཡི་འོག་ཏུ་པདྨ་སྟེ། །སེམས་དཔའི་སྐྱིལ་ཀྲུང་གིས་བཞུགས་པ། །ཕྱག་བཞི་དག་གིས་རྣམ་པར་མཛེས། །ཆོས་སྟོན་པ་
[35a.5]ཡི་ཕྱག་རྒྱ་ཡིས། །ཕྱག་གཉིས་དག་ནི་རྣམ་པར་བརྒྱན། །གཡས་པའི་ཕྱག་ནི་གཉིས་པ་ན། །མཆོག་སྦྱིན་སེམས་ཅན་སྐྱོང་བའོ། །གཡོན་ན་ལྷ་རྫས་ཡལ་ག་ནི། །ཀླུ་ཤིང་མེ་ཏོག་བཅས་པའོ། །སངས་རྒྱས་སྤྲིན་ནི་རབ་སྤྲོ་ཞིང་། །བྱང་ཆུབ་སེམས་དཔའ་དེ་བཞིན་འབར། །ཟླ་བའི་གདན་
[35a.6]དང་དཀྱིལ་འཁོར་ཡང་། །དངོས་གྲུབ་མགོན་པོ་བསྒོམ་པར་བྱའོ། །དེ་ནས་ཕྱག་རྒྱ་བཅིང་བྱས་ལ། །མཉམ་པར་བཞག་པས་སྔགས་བཟླས་བྱ། །ལག་གཉིས་སོ་སོ་དག་ཏུ་བྱ། །ཁུ་ཚུར་བཅིངས་ཏེ་སྡིགས་མཛུབ་གཉིས། །མཐེ་བོའི་དབུས་སུ་གཞག་བྱ་སྟེ། །མེ་ཏོག་སྣ་ཚོགས་མཆོད་
[35a.7]པར་བྱ། །ཕྱག་རྒྱའོ། །ཨོཾ་མཻཾ་མཻ་ཏྲི་ཡ་སྭཱཧཱ། བྱམས་པའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3352}༄༅༅། །རྒྱ་གར་སྐད་དུ། པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་
[35b]
[35b.1]ཐབས། ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །གང་གིས་བསྒོམས་པ་ཙམ་གྱིས་ནི། །ཤེས་རབ་ཕ་རོལ་ཕྱིན་བསྐྱེད་ཅིང་། །གཞན་རྩོད་ཀུན་ལས་རྒྱལ་འགྱུར་བ། །དེ་ནི་ཡང་དག་བཤད་པར་བྱ། །ཞལ་གཅིག་ཕྱག་ནི་གཉིས་པ་སྟེ། །མདོག་ནི་དཀར་པོ་ཡིད་དུ་འོང་། །ཕྱེད་
[35b.2]ཕྱེད་འཁྱིལ་པའི་དབུ་སྐྲ་དང་། །པདྨ་དཀར་པོར་ཡང་དག་གནས། །གཡས་ཀྱི་ཕྱག་ན་པདྨ་སྟེ། །གཡོན་ན་ཤེས་རབ་ཕ་རོལ་ཕྱིན། །མདོག་དམར་རྣམ་པར་བསྒོམ་པར་བྱ། །རྡོ་རྗེ་སྐྱིལ་ཀྲུང་ཡང་དག་གནས། །རྒྱན་རྣམས་ཀུན་གྱིས་ཡན་ལག་བརྒྱན། །ལྟེ་བའི་དཀྱིལ་འཁོར་བསྒོམ་པར་བྱ། །
[35b.3]ཨཾ་ཡིག་ཡེ་ཤེས་ལས་བྱུང་བ། །མཆོག་དང་དགའ་བར་བྱེད་པ་མོ། །དམ་ཚིག་སེམས་དཔའ་རྫོགས་བྱས་ལ། །ཡེ་ཤེས་སེམས་དཔའ་བསྒོམ་པར་བྱ། །ཟླ་དྲུག་བསྒོམས་པའི་སྦྱོར་བ་ཡིས། །ཤེས་རབ་ཕ་རོལ་ཕྱིན་མར་འགྱུར། །ནུབ་བདུན་བར་དུ་སྦྱོར་བ་ཡིས། །བསྟན་བཅོས་ཀུན་
[35b.4]ལ་འཇིགས་པ་མེད། །འབུམ་ཕྲག་བཟླས་པ་སྦྱོར་བ་ཡིས། །ཉིན་རེ་ཚིགས་བཅད་བརྒྱ་བརྒྱ་ནི། །འབད་པ་མེད་པར་རབ་ཏུ་བྱེད། །གཞུང་ནི་བརྒྱ་ནི་འཛིན་པར་འགྱུར། །དེ་ལ་སྔགས་ཀྱི་ཚིག་ནི་འདི་ཡིན་ཏེ། ཨོཾ་པི་ཙུ་པི་ཙུ་པྲ་ཛྙཱ་བརྡྷ་ནི་ཛྭ་ལ་ཛྭ་ལ་མེ་དྷཱ་བར་དྷཱ་ནི། དྷི་རི་དྷི་རི་བུདྷི་བར་དྷ་ནི་སྭཱ་ཧཱ།
[35b.5]བྱ་རོག་གི་སྒྲ་མི་གྲག་བར་སྔགས་འདིས་མ་བསླངས་པར་རང་སྐྱུར་ལ། ལན་བདུན་དུ་བསྔགས་ལ། ཇི་སྲིད་ཟླ་བ་དྲུག་གི་བར་དུ་འཐུངས་ན་དེའི་ཤེས་རབ་སྐྱེ་བར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་པའི་ཐབས་སངས་རྒྱས་ཀྱིས་གསུངས་པ་རྫོགས་སོ། །པཎྜི་ཏ་དོན་ཡོད་
[35b.6]རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3353}༄༅༅། །རྒྱ་གར་སྐད་དུ། པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་
[35b.7]བསྟན་པའི་ཆོ་གས་རང་གི་སྙིང་གར་པདྨ་དཀར་པོ་དང་། ཟླ་བའི་དཀྱིལ་འཁོར་ལ་པྲཾ་དཀར་པོ་བཀོད་ནས་སྔོན་དུ་བསྟན་པ་བཞིན་དུ་ཐམས་ཅད་བྱས་ལ། པྲཾ་དང་པདྨ་ཡོངས་སུ་གྱུར་པ་ལས་བཅོམ་ལྡན་འདས་མ་ཞལ་གཅིག་མ། ཕྱག་གཉིས་མ་དཀར་མོ། ལུང་དང་རྟོགས་པའི་བདག་
[36a]
[36a.1]ཉིད་རིན་པོ་ཆེའི་དབུ་རྒྱན་འཆང་བ། ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏིས་མཚན་པའི་པདྨ་གཉིས་གཡོན་དང་གཡས་ཀྱི་ལོགས་ཀྱི་ནང་དུ་ལོངས་ཀྱིན་ཡང་དག་པར་བསྣམས་ཤིང་བཟུང་བའི་ཕྱག་གཉིས་ཀྱིས་ཆོས་བཤད་པའི་ཕྱག་རྒྱ་ཀུན་ནས་བཅིངས་ཏེ། པདྨ་དཀར་
[36a.2]པོ་དང་ཟླ་བ་ལ་རྡོ་རྗེ་སྐྱིལ་ཀྲུང་ཅན་མ། ལང་ཚོ་གསར་ལ་བབ་ཅིང་བདོ་བ། སྣ་ཚོགས་ཀྱི་ན་བཟའ་དང་རྒྱན་གྱིས་བརྒྱན་པའི་རབ་ཏུ་སྣང་བ་ཙམ་མོ། །སྣ་ཚོགས་ཀྱི་འོད་ཟེར་རབ་ཏུ་འཕྲོས་པའི་ཚོགས་ཀྱིས་ནམ་མཁའ་བཀང་སྟེ། མར་མེའི་ཕྲེང་བ་ལྟ་བུ་ཐོགས་པ་མེད་པས། ཤེས་རབ་ཀྱི་ཕ་རོལ་
[36a.3]ཏུ་ཕྱིན་མ་མང་པོ་འཕྲོ་ཞིང་བསྡུ་བའི་སྦྱོར་བས་ཐམས་ཅད་གཅིག་གི་རང་བཞིན་དུ་ལྷག་པར་མོས་པས་ཡང་ཇི་སྲིད་དུ་ཤེས་རབ་ཀྱི་ཕ་རོལ་ཏུ་ཕྱིན་མ་མངོན་དུ་མ་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་གལ་ཏེ་དགོད་པར་བྱུང་བར་གྱུར་ན། དེ་ལ་པདྨ་དཀར་པོ་སྣའི་རྩེ་མོར་སྲན་ཙ་ན་ཀའི་ཚད་ཙམ་
[36a.4]བྲིས་པ་ལྟ་བུ་རྣམ་པར་བསྒོམས་ལ། དེ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་མ་ཤིན་ཏུ་ཕྲ་བ་བརྗོད་པའི་གཟུགས་རྩེ་གཅིག་པའི་ཡིད་ཀྱིས་ཡང་དང་ཡང་དུ་མངོན་དུ་བྱ་ཞིང་བསྒོམ་པར་བྱའོ། །དེ་ནས་བསྐྱེད་པའི་རིམ་པའི་ཕྱོགས་ཀྱི་སྔགས་ནི། ཨོཾ་པྲཾ་སྭཱ་ཧཱ། རྫོགས་པའི་རིམ་པའི་
[36a.5]ཕྱོགས་ཀྱི་སྔགས་མེད་དེ། དོན་དམ་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་པ་གདམས་ངག་ཐོབ་པས་སོ། །དགེ་འདུན་སྦྱིན་གྱི་བུ་ཡིས་ནི། །རིགས་ཀྱི་མིང་གིས་འབད་པ་ཡིས། །སེམས་ཅན་ཀུན་གྱི་དོན་གྱི་རྒྱུར། །སྒྲུབ་ཐབས་གསལ་པོ་འདི་བྲིས་སོ། །ཤེས་རབ་ཀྱི་ཕ་རོལ་ཏུ་
[36a.6]ཕྱིན་མའི་སྒྲུབ་ཐབས། སློབ་དཔོན་དགེ་འདུན་སྦྱིན་གྱི་སྲས་ཀྱིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3354}༄༅༅། །རྒྱ་གར་སྐད་དུ། པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་
[36a.7]མའི་སྒྲུབ་ཐབས། ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །ཡིད་མཐུན་གནས་ནི་ཁ་ཅིག་ཏུ། །བདེ་བའི་གདན་ལ་འདུག་ནས་སུ། །རྣལ་འབྱོར་བྱམས་དང་སྙིང་རྗེར་ལྡན། །སྔགས་འདི་ལན་གསུམ་བརྗོད་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱས་བརྟན་
[36b]
[36b.1]དང་གཡོ་བའི་དངོས། །བདག་ཉིད་ལུས་དང་ཐམས་ཅད་དུ། །སེམས་ཀྱིས་སྟོང་ཉིད་བསྒོམ་པར་བྱ། །རྨི་ལམ་རྨི་ལམ་མཚུངས་པ་རུ། །པཾ་ཡིག་ལས་ནི་ཡོངས་རྫོགས་པའི། །པདྨ་ཟླ་བའི་གདན་གནས་པ། །སེར་པོ་དྷཱིཿནི་དགོད་བྱས་ཏེ། །དེ་ཡི་བདག་ཉིད་བཅོམ་ལྡན་མ། །ཕྱག་གཉིས་
[36b.2]ཤེས་རབ་ཕ་རོལ་ཕྱིན། །སྣ་ཚོགས་གོས་འཆང་སྣ་ཚོགས་བརྒྱན། །ཆོས་འཆད་ཕྱག་རྒྱ་མཉམ་ལྡན་ཕྱག །སྒེག་པ་གཅིག་པུ་ཉམས་ལྡན་ཞིང་། །རྡོ་རྗེ་སྐྱིལ་ཀྲུང་ཡང་དག་གནས། །པོ་ཏིས་མཚན་པའི་པད་སྡོང་ནི། །གཡོན་གྱི་ལོགས་སུ་བསྣམས་པའོ། །སྤྱི་བོ་མགྲིན་པ་སྙིང་
[36b.3]གནས་པའི། །ཟླ་བ་ལ་གནས་དེ་ཉིད་གསུམ། །ཨོཾ་ཨཱཿཧཱུཾ། ཨཾ་ཨཿངག་གི་དབུས་སུ་ནི། །ཟླ་བ་དྷཱིཿནི་འོད་ཟེར་སེར། །དེ་ནས་གཟུགས་སེར་རྣམ་པར་བསྒོམ། །ཀུན་རྫོབ་ཀྱི་ནི་རྣལ་འབྱོར་གྱིས། །ཤེས་རབ་མཆོད་པ་བསྒོམ་པར་བྱ། །དོན་དམ་པར་ནི་རྟོགས་པའི་གཟུགས། །ཤེས་
[36b.4]རབ་བདག་ཉིད་ཆེ་བརྗོད་བྱ། །གང་གིས་བྱང་ཆུབ་ངེས་ཐོབ་པའི། །རིམ་པས་སྦྱོར་བས་འགྲོ་བར་འགྱུར། །སྟོན་ཀའི་ཟླ་བ་ལྟ་བུའི་འོད། །དཀར་པོའི་སེམས་ནི་རྣམ་པར་བསྒོམ། །སྣ་ཚོགས་གཡོ་དང་མི་གཡོ་བ། །དེ་བཞིན་ཕྱིས་ནི་ནམ་མཁའ་མཉམ། །མ་ལུས་རྟོགས་པས་
[36b.5]སྟོང་པ་ཡི། །རང་ཉིད་གཟུགས་མེད་སྟོང་པར་ཡང་། །གཟུགས་སྒྲ་དྲི་དང་རོ་དང་ནི། །རེག་བྱ་ལ་སོགས་གཟུང་དང་འཛིན། །རྟོག་པས་ཡོངས་སུ་མ་གོས་པ། །བསམ་མི་ཁྱབ་པའི་རྐྱེན་བསྐྱེད་པ། །ཡང་དག་རྫོགས་པའི་བྱང་ཆུབ་དོན། །ཀུན་མཁྱེན་སེམས་ཀྱི་གོ་འཕང་ངོ་། །དེ་ལ་འདི་
[36b.6]བཟླས་པའི་སྔགས་ཏེ། ཨོཾ་པྲཛྙཱ་མ་ཧཱ་པྲཛྙཱ་ཤྲུ་ཏི་སྨྲྀ་ཏི་བི་ཛ་ཡེ་དྷཱིཿསྭཱཧཱ། ཤེས་རབ་ཕ་རོལ་ཕྱིན་བསྒོམས་པའི། །བདག་གི་བསོད་ནམས་གང་ཐོབ་དེས། །དེ་ཡིས་འཇིག་རྟེན་མ་ལུས་ཀུན། །ཤེས་རབ་ཕ་རོལ་ཕྱིན་གཞོལ་ཤོག །ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་པའི་ཐབས་རྫོགས་
[36b.7]སོ།། །།པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3355}༄༅༅། །རྒྱ་གར་སྐད་དུ། པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་
[37a]
[37a.1]ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ། ཨ་ལས་སྐྱེས་པའི་ཟླ་བའི་དཀྱིལ་འཁོར་ལ། མདོག་སེར་པོའི་ཡི་གེ་དྷཱིཿཡོངས་སུ་གྱུར་པ་ལས་སྣ་ཚོགས་ཀྱི་པདྨ་ལ་ཧ་སེར་པོ་ཨ་ལ་སོགས་པ་དབྱངས་ཡིག་བཅུ་དྲུག་གིས་ཡོངས་སུ་བསྐོར་བ།
[37a.2]དེ་ནས་ཀ་ལ་སོགས་པའི་ཡི་གེ་སུམ་ཅུ་རྩ་གཉིས་ཀྱིས་ཡོངས་སུ་བསྐོར་བ། དེ་ལས་སྒེག་མོ་དང་། ཕྲེང་བ་མ་དང་། གར་མ་དང་། གླུ་མ་དང་། མེ་ཏོག་མ་དང་། བདུག་སྤོས་མ་དང་། མར་མེ་མ་དང་། དྲི་མ་སྟེ། རྣལ་འབྱོར་མ་བརྒྱད་དོ། །འདི་ཐམས་ཅད་ཡོངས་སུ་གྱུར་པ་ལས་ཡེ་ཤེས་ཟླ་
[37a.3]བ་ལས་བྱུང་བའི་འོད་གསལ་བའོ། །དེའི་སྟེང་དུ་པདྨའོ། །དེའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏིའོ། །དེའི་སྟེང་དུ་ཟླ་བའི་དཀྱིལ་འཁོར་གཉིས་པའོ། །འདི་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་མདོག་སེར་མོ་ཞལ་གཅིག་མ།
[37a.4]ཕྱག་གཉིས་མ་དེ་བཞིན་གཤེགས་པ་ལྔའི་དབུ་རྒྱན་ཅན། ཆོས་འཆད་པའི་ཕྱག་རྒྱ་དང་ལྡན་པ་སྣ་ཚོགས་ཀྱི་པདྨ་དང་ཟླ་བའི་གདན་ལ་བཞུགས་པ། རྒྱན་ཐམས་ཅད་དང་། ན་བཟའ་དང་ལྡན་པ། གཡོན་པ་དང་གཡས་པའི་ལོགས་སུ་ཨུཏྤལ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་
[37a.5]པའི་པོ་ཏི་འཆང་བའོ། །སྔགས་ནི་ཨོཾ་ཨཱཿདྷཱིཿཧཱུཾ་སྭཱ་ཧཱ། ཧཱུཾ་སེར་པོ་ནི་དཔྲལ་བར་རོ། །ཨཱཿདཀར་པོ་ནི་མགྲིན་པའོ། །དྷཱིཿསེར་པོ་ནི་སྙིང་གར་རོ། །ཧཱུཾ་ནག་པོ་ནི་ལྟེ་བར་རོ་ཞེས་བྱའོ། །བཟླས་པའི་དུས་སུ་སྐད་ཅིག་མ་བཞི་རྗེས་སུ་བསམ་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་མའི་
[37a.6]སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3356}༄༅༅། །རྒྱ་གར་སྐད་དུ། སཾ་ཀྵིཔྟ་པྲཛྙཱ་པཱ་ར་མི་ཏ་སཱ་དྷ་ནཾ། བོད་སྐད་དུ། མདོར་བསྡུས་པའི་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། ཤེས་རབ་ཀྱི་
[37a.7]ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་པའི་རྗེས་སུ་པདྨ་དམར་པོ་དང་ཟླ་བ་ལ་གནས་པའི་དྷཱིཿསེར་པོ་ཡོངས་སུ་གྱུར་པ་ལས། ཤེས་རབ་ཀྱི་ཕ་རོལ་ཏུ་ཕྱིན་མ་སེར་མོ། མི་བསྐྱོད་པ་དབུས་སུ་གནས་པའི་རལ་པའི་ཅོད་པན་ཅན་མ། ཆོས་འཆད་
[37b]
[37b.1]པའི་ཕྱག་རྒྱ་འཆང་མ། པོ་ཏི་དང་བཅས་པའི་ཨུཏྤ་ལ་སྔོན་པོ་གཡོན་ལོགས་སུ་འཛིན་མ། གོས་ཀྱི་སྟོད་གཡོགས་དང་། ན་བཟའ་དམར་པོས་བརྒྱན་མ་ཞེས་བྱ་བ། དེ་ལྟར་བསམས་ལ། ཨོཾ་དྷཱིཿཤྲུ་ཏི་སྨྲྀ་ཏི་བི་ཛ་ཡེ་སྭཱ་ཧཱ། ཞེས་བྱ་བའི་སྔགས་བཟླས་པའོ། །མདོར་བསྡུས་པའི་ཤེས་
[37b.2]རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3357}༄༅༅། །རྒྱ་གར་སྐད་དུ། ཨ་ཙ་ལ་སཱ་དྷ་ནཾ། བོད་སྐད་དུ། མི་གཡོ་བའི་སྒྲུབ་ཐབས། འཕགས་པ་མི་གཡོ་བ་ལ་ཕྱག་འཚལ་
[37b.3]ལོ། །པུས་མོའི་ལྷ་ང་སར་བཙུགས་པ། །གཡས་པའི་ཕྱག་ན་རལ་གྲི་བསྣམས། །དེ་ཡི་ཅིག་ཤོས་ཕྱག་ན་ནི། །ཁུ་ཚུར་སྡིགས་མཛུབ་ཞགས་པ་བསྣམས། །སྐུ་ལུས་མཁྲང་ཞིང་གྲིམས་པ་ལ། །གཏུམ་ཞིང་འབར་བ་གཏུམ་པའི་སྤྱན། །བགེགས་འཇོམས་མི་གཡོ་བ་ཡིས་ནི། །
[37b.4]སྲིད་པའི་བགེགས་རྣམས་ཞི་བར་མཛོད། །ཕྱོགས་བཅུར་བཞུགས་པའི་སངས་རྒྱས་དང་། །བྱང་ཆུབ་སེམས་དཔའི་གཙོ་བོ་རྣམས། །དེ་ལ་རྣམ་པ་སྣ་ཚོགས་པའི། །མེ་ཏོག་ལ་སོགས་བློས་མཆོད་བྱ། །སྡུག་བསྔལ་རྣམས་ལས་བསྐྱབ་པའི་ཕྱིར། །བདག་ཉིད་ལུས་ནི་དབུལ་བར་
[37b.5]བགྱི། །སྔགས་པས་དགེ་བ་སྤེལ་བའི་ཕྱིར། །སྡིག་པ་རྣམས་ནི་བཤགས་པར་བགྱི། །རྫོགས་སངས་རྒྱས་དང་བྱང་སེམས་ཚོགས། །སློབ་དང་མི་སློབ་སེམས་ཅན་གྱི། །བསོད་ནམས་རང་བཞིན་མ་ལུས་པ། །དེ་ལ་རྗེས་སུ་ཡི་རང་བྱ། །དཀོན་མཆོག་གསུམ་ལ་སྐྱབས་སུ་འགྲོ། །རྫོགས་
[37b.6]པའི་བྱང་ཆུབ་ངེས་པར་བསྟེན། །ཚངས་པ་ཡི་ནི་གནས་བཞི་པོ། །རིམ་པ་ཇི་བཞིན་བསྒོམ་པར་བྱ། །མཚན་ཉིད་དང་བྲལ་སྟོང་པ་ཉིད། །རྒྱུ་དང་བྲལ་བས་མཚན་མ་མེད། །སྨོན་ལམ་ལས་ཀྱང་རྣམ་གྲོལ་བའི། །རང་བཞིན་ཉིད་དུ་དངོས་པོ་བསྒོམ། །སྣ་ཚོགས་པདྨ་ཉི་དཀྱིལ་དུ། །
[37b.7]ཡི་གེ་ཧཱུཾ་བྱུང་བཞུགས་པར་བལྟ། །དཔའ་བོ་སྤྱན་གསུམ་དམར་བ་སྟེ། །ཕྱག་གཉིས་རིན་ཆེན་ཅོད་པན་ཅན། །མགོན་པོ་སྡིག་པ་མོད་ལ་སྤོང་། །ཇི་ལྟར་འདོད་པ་ཡོངས་སུ་སྐོང་། །ཟར་མའི་མེ་ཏོག་ལྟ་བུའི་མདོག །སངས་རྒྱས་དྲི་མེད་འོད་ཟེར་འགྱེད། །ཡ་སོས་མ་མཆུ་རྣམ་པར་
[38a]
[38a.1]བཙིར། །རྒྱན་རྣམས་ཀུན་གྱིས་རྣམ་པར་བརྒྱན། །དཔལ་ལྡན་ཁྲོ་བོ་གཏུམ་པོ་ཆེ། །ཕྱག་ན་དྲག་ཤུལ་རལ་གྲིས་བྲེལ། །གཡོན་ན་སྡིགས་མཛུབ་ཞགས་པ་སྟེ། །གཡོན་པའི་པུས་མོ་ས་ལ་བཙུགས། །འཇིགས་པ་ཆེན་པོ་ཟུར་མིག་གཟིགས། །འཇིགས་པ་
[38a.2]ཡང་ནི་འཇིགས་པར་མཛད། །ཡེ་ཤེས་སེམས་དཔའ་གཟི་བརྗིད་ཆེ། །དམ་ཚིག་སེམས་དཔའ་འདྲ་བར་ལྟ། །དེ་ཉིད་ཐུགས་ཀར་སྔགས་པ་ཡིས། །ས་བོན་མཚན་མར་ཡང་དག་ལྡན། །ཇི་སྲིད་མི་སྐྱོའི་བར་དུའོ། །བསམ་གཏན་སྐྱོ་ན་ལྷ་ཡི་ནི། །རྣལ་འབྱོར་ལྡན་པས་བཟླས་པ་བྱ། །
[38a.3]དེ་ནས་གསུངས་པའི་དངོས་གྲུབ་ནི། །ཐེ་ཚོམ་མེད་པ་ཁོ་ནར་ཐོབ། །དེ་ལ་སྔགས་ཀྱི་རྒྱལ་པོ་ནི་འདི་ཡིན་ཏེ། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། སྔགས་ཀྱི་རྒྱལ་པོ་ནི་ལན་ཅིག་བཟླས་པས་སྡིག་པ་ཐམས་ཅད་བསྲེག་པར་འགྱུར་ཞིང་ཐམས་ཅད་སྲུང་བར་བྱེད་པར་འགྱུར་རོ། །འབྱུང་པོ་
[38a.4]ལ་སོགས་པའི་གདོན་གྱི་འཇིགས་པ་ལ། ཡུངས་ཀར་གྱིས་བརྡེགས་པས་གདོན་ཐམས་ཅད་འབྱེར་བར་བྱེད་དོ། །ཁམ་ཕོར་ལ་རྡོ་རྒྱུས་ཀྱིས་བྲིས་ནས་སྒོ་ལྟག་ལ་བཏགས་ན། བྱིས་པ་གསར་དུ་བཙས་པ་སྲུང་བར་བྱེད་དོ། །སྤྲ་ཚིལ་གྱིས་གཟུགས་སོར་བཞི་པའི་ཚད་དུ་བྱས་ནས་དེའི་སྙིང་
[38a.5]གར་བསྒྲུབ་བྱའི་མིང་དང་བཅས་པ་གྲོ་ག་ལ་མངོན་པར་བྲིས་ཏེ་བཙུགས་ནས། དེའི་ཁ་ལ་ཚེར་མས་བཙུགས་ན་ཕྱིར་རྒོལ་བའི་ཁ་ཕུར་བུས་བཏབ་པར་འགྱུར་རོ། །རྐང་པ་ལ་བཙུགས་ན་འགྲོ་བ་དང་འོང་བ་རེངས་པར་འགྱུར་རོ། །སྙིང་གར་བཙུགས་ན་ཁྲོས་པ་ཞི་བར་འགྱུར་རོ། །མིའི་རྗེ་ངར་གྱི་
[38a.6]ཕུར་བུའམ་ལྕགས་ཀྱི་ཕུར་བུས་གང་དག་གི་མིང་ནས་སྨོས་ཏེ་དེའི་ལུས་ལ་བཏབ་ན་དེ་འཇིག་པར་འགྱུར་རོ། །དགྲ་བོའི་སྒོ་ཁར་སྦས་ན་བརླག་པར་འགྱུར་རོ། །དུར་ཁྲོད་ཀྱི་ཐལ་བ་ལ་མངོན་པར་བསྔགས་ནས་དགྲ་བོའི་སྒོ་གླེགས་ལ་བཏགས་ན་སྐྲོད་པར་འགྱུར་རོ། །རལ་གྲི་ལ་མངོན་པར་བསྔགས་ནས་གཡུལ་དུ་ཞུགས་ན་
[38a.7]རྒྱལ་བར་འགྱུར། བྱ་བ་གང་ལ་འཇུག་པ་ནི་གཏོར་མ་བཏབ་སྟེ་འགྲུབ་པར་འགྱུར་རོ། །སྔགས་པ་གང་དགེ་བ་དང་མི་དགེ་བའི་ལས་གང་འདོད་པ་བཟླས་པས་འགྲུབ་པར་འགྱུར་རོ། །བདག་གིས་བྲིས་ལས་གང་འཐོབ་པའི། །བསོད་ནམས་བྱང་ཆུབ་སྒྲུབ་བྱེད་པ། །དེ་འདིར་འཇིག་རྟེན་མ་ལུས་པ། །རྫོགས་པའི་བྱང་ཆུབ་སྒྲུབ་བྱེད་ཤོག།
[38b]
[38b.1]མི་གཡོ་བའི་སྒྲུབ་ཐབས་པྲ་བྷ་ཀཱ་ར་ཀཱིརྟིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3358}༄༅༅། །རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎ་སཱ་དྷ་ནཾ། བོད་སྐད་དུ། གཏུམ་པོ་ཆེན་པོའི་སྒྲུབ་པའི་ཐབས། བཅོམ་ལྡན་འདས་
[38b.2]གཏུམ་པོ་ཆེན་པོ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་བསྒོམས་པའི་རྗེས་སུ་པདྨ་དཀར་པོའི་སྟེང་ན་ཉི་མ་ལ་ཧཱུཾ་ཡིག་ནག་པོ་དེ་ཡོངས་སུ་གྱུར་པ་ལས་བཅོམ་ལྡན་འདས་གཏུམ་པོ་ཆེན་པོ་ཁྲོས་པ། ཟར་མའི་མེ་ཏོག་ལྟ་བུ། མིང་གཞན་གྱིས་མི་གཡོ་བ་ཞལ་གཅིག་ཕྱག་
[38b.3]གཉིས་པ། མི་གཡོ་བ་མི་མཉམ་པའི་སྤྱན། མཆེ་བ་གཙིགས་པ། མི་བཟད་པའི་ཞལ་ཆེན་པོ། རིན་པོ་ཆེའི་དབུ་རྒྱན་ཅན་མཆེ་བས་མ་མཆུ་མནན་པ། མགོ་བོའི་ཕྲེང་བའི་དབུ་རྒྱན་ཅན། སྤྱན་གཉིས་དཀར་ཞིང་དམར་བ། གཡས་ན་རལ་གྲི་འཛིན་པ། གཡོན་པའི་ཕྱག་གིས་ཞགས་པ་
[38b.4]དང་སྡིགས་མཛུབ་ཐུགས་ཀར་བསྣམས་པའོ། །སྦྲུལ་དཀར་པོ་མཆོད་ཕྱིར་ཐོགས་པ། སྟག་གི་པགས་པའི་ཤམ་ཐབས་ཅན་རིན་པོ་ཆེ་སྣ་ཚོགས་ཀྱིས་རྣམ་པར་སྤྲས་པ། ཞབས་གཡོན་པས་ལ་མ་རེག་པ། ཞབས་གཡས་པ་ཅུང་ཞིག་བཏེག་པ། ཉི་མའི་འོད་ཀྱི་ཕྲེང་བ་ཅན་གྱི་བདག་ཉིད་
[38b.5]རྣམ་པར་བསམ་པར་བྱའོ། །དམ་ཚིག་སེམས་དཔའ་དང་ཡེ་ཤེས་སེམས་དཔའ་བསྒོམ་པ་སྔོན་དུ་འགྲོ་བས་མི་བསྐྱོད་པས་དབུ་བརྒྱན་པར་བསམ་པར་བྱའོ། །དེ་ནས་བཟླས་པ་ནི་ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། གཏུམ་པོ་ཆེན་པོའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་
[38b.6]ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3359}༄༅༅། །རྒྱ་གར་སྐད་དུ། བཛྲ་ཧཱུཾ་ཀཱ་ར་སཱ་དྷ་ནཾ། བོད་སྐད་དུ། རྡོ་རྗེ་ཧཱུཾ་མཛད་ཀྱི་སྒྲུབ་པའི་ཐབས། རྡོ་རྗེ་ཧཱུཾ་མཛད་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ། ནམ་མཁའི་ཁམས་སུ་
[38b.7]རཾ་ལས་སྐྱེས། །ཉི་མའི་དཀྱིལ་འཁོར་འོད་འབར་བ། །བསྐལ་པའི་མེ་ལྟར་ཤིན་ཏུ་དྲག །མདོག་ནག་འོད་ཆེན་འབར་བ་སྟེ། །དེ་ལས་སྐྱེས་པའི་དྲག་ཆེན་པོ། །རྡོ་རྗེ་ཧཱུཾ་མཛད་ཞེས་བྱ་བ། །དགོད་པ་བརྒྱད་ཀྱིས་དྲག་ཆེན་མོ། །ཁམས་གསུམ་མ་ལུས་གནོན་པའོ། །རྡོ་རྗེ་དྲིལ་བུ་སྦྱོར་བ་
[39a]
[39a.1]ཡིས། །ཕྱག་གཉིས་ཀྱིས་ནི་ཕྱག་རྒྱ་བཅིང་། །གཡོན་བརྐྱང་བ་ཡི་ཞབས་ཀྱིས་ནི། །འཇིགས་བྱེད་མནན་ཅིང་འཇིགས་པར་བྱེད། །ཨོཾ་ཨཱཿཧཱུཾ་གི་ཡི་གེ་གསུམ། །སྙིང་ག་མགྲིན་པ་སྤྱི་བོར་དགོད། །དབང་བསྐུར་བ་ཡི་ཆོ་ག་ཡིས། །ཐུགས་ཀྱི་རྡོ་རྗེ་རྒྱས་བཏབ་བྱ། །སྔགས་ནི་ཨོཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རྡོ་རྗེ་ཧཱུཾ་མཛད་ཀྱི་
[39a.2]སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། {T3360}༄༅༅། །རྒྱ་གར་སྐད་དུ། པརྞ་ཤ་བ་རི་སཱ་དྷ་ནཾ། བོད་སྐད་དུ། རི་ཁྲོད་ལོ་མ་ཅན་གྱི་སྒྲུབ་ཐབས། འཕགས་མ་རི་ཁྲོད་མ་ལོ་མ་ཅན་ལ་ཕྱག་འཚལ་ལོ། །རི་ཁྲོད་མ་ལོ་མ་ཅན་
[39a.3]གྱི་སྒྲུབ་པའི་ཐབས་བརྗོད་པར་བྱ་སྟེ། སྔོན་བཞིན་དུ་ཐམས་ཅད་བྱས་ལ་རང་གི་སྙིང་གར་པདྨ་དཀར་པོ་དང་ཟླ་བའི་དཀྱིལ་འཁོར་ལ་པཾ་སེར་པོ་ལས་སྐྱེས་པའི་རྡོ་རྗེའི་ལྟེ་བ་ལ་པེཾ་ངོ་། །དེ་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་མ་སྐུ་མདོག་སེར་བ་ཞལ་གསུམ་པ། སྤྱན་གསུམ་པ།
[39a.4]ཕྱག་དྲུག་པའོ། །ཞལ་དང་པོ་གསེར་གྱི་མདོག་ལྟ་བུའོ། །གཡས་པ་དཀར་བ། གཡོན་དམར་བ། འགྱིང་ཞིང་དགོད་པ། རྒྱན་ཐམས་ཅད་ཀྱིས་མཛེས་པ། ཤིང་ལོ་རྩེ་མོ་གཤིབས་པའི་ཤམ་ཐབས་ཅན་ལང་ཚོ་གསར་ལ་བདོ་ཞིང་གྲིམས་པའོ། །གཡས་ཀྱི་ཕྱག་རྣམས་ན་རྡོ་རྗེ་དང་དགྲ་སྟ་དང་། མདའ་
[39a.5]རྣམས་སོ། །གཡོན་གྱི་ཕྱག་ཏུ་སྡིགས་མཛུབ་དང་བཅས་པའི་ཞགས་པ་དང་། ཤིང་ལོའི་ཆུན་པོ་དང་། གཞུ་བསྣམས་པའོ། །མེ་ཏོག་གིས་བཅིངས་པའི་རལ་པའི་ཅོད་པན་ལ་མི་བསྐྱོད་པ་འཆང་བའོ། །ཉི་མའི་དཀྱིལ་འཁོར་ཅན་མ། འོག་ཏུ་བགེགས་བསྒྱེལ་བ་ལ་པདྨ་དཀར་པོ་དང་། ཟླ་
[39a.6]བའི་གདན་ལ་གཡོན་བརྐྱང་བའི་ཞབས་ཀྱིས་གནས་པ། གཡོན་པའི་ཁུ་ཚུར་གྱིས་སྡིགས་མཛུབ་བྱས་པ་ནི། འོག་གི་བགེགས་ཀྱི་ཚོགས་སྐྲག་པར་བྱེད་པ། གཡས་པའི་ཁུ་ཚུར་གྱིས་རྡོ་རྗེ་འཕྱར་བའི་ཚུལ་གྱིས་བསྣམས་པ་སྟེ། ཕྱག་རྒྱ་འདི་ཡིས་སྙིང་ག་ལ་སོགས་པར་བསམས་པས་རྒྱས་གདབ་
[39a.7]པའོ། །རང་གི་འོད་ཟེར་གྱིས་ཡེ་ཤེས་སེམས་དཔའ་གཞུག་པ་ལ་སོགས་པ་བསྐྱེད་ལ། ཉེ་བར་འཚེ་བ་ཐམས་ཅད་འཇོམས་པར་བྱེད་མ་བསམ་པར་བྱའོ། །དེ་ནས་སྔགས་བཟླས་པར་བྱའོ། །ཨོཾ་པི་ཤཱ་ཙི་པརྞ་ཤ་བ་རི་སརྦ་མཱ་ར་པྲ་ཤ་མ་ནཱི་སྭཱ་ཧཱ། དེ་ནས་ཇི་ལྟ་བ་བཞིན་དུ་གཤེགས་སུ་
[39b]
[39b.1]གསོལ་ལ། ཇི་ལྟར་བདེ་བས་གནས་པར་བྱའོ། །རི་ཁྲོད་ལོ་མ་ཅན་གྱི་སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ། །{T3361}༄༅༅། །ན་མོ་རཏྣ་ཏྲ་ཡཱ་ཡ། ན་མོ་ཨ་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾ་མྱཀྶཾ་བུདྡྷཱ་ཡ། ན་མོ་ཨཱཪྻཱ་
[39b.2]བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་མཧཱསྠ་མ་པྲཱ་པྟཱ་ཡ། བོ་དྷི་སཏྭཱ་ཡ། མཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། བཱ་མ་ནེ་སྭཱ་ཏྭཱཾ་ན་མི་ཥྱཱ་མི་ཏྭཱཾ་ན་མ་སྱཱ་མི། བཱ་མ་ནེ་བྷ་ག་བ་ཏཱི། པི་ཤཱ་ཙི་པརྞ་ཤ་བ་རི། པི་ཤཱ་ཙི་པཱ་ཤ་པ་ར་ཤུ་དྷ་རི་ཎི། ཨཱ་ནི་ཀིན་ཙིདྦྷ་ཡ་ནྱུཏྤ་དྱནྟེ།
[39b.3]ཡེ་ཀེ་ཙི་ཏ་མཱ་ར་ཡོ། ཡེ་ཀེ་ཙིཏ་མ་ཧཱ་མཱ་ར་ཡོ། ཡེ་ཀེ་ཙིཏ་ཡོ། ཡེ་ཀེ་ཙིཏ་ཨུ་པ་དྲ་བཱཿ། ཡེ་ཀེ་ཙིད་ཨ་དྷྱ་ཨུད་མི་ཀ་བྷ་ཡ། ཡེ་ཀེ་ཙིད་ཨུ་པ་སརྒ། ཨུ་པ་སརྒ་སཾ་བ་དྷ་བཱ། ཨུཏྤ་དྱནྟེ། སརྦ་ནི་ཏཱ་ནི། སརྦ་སྟྭ་སརྦེ་ཏེ་བཱ་ལ་ཏ་ཨེ་བོཏྤ་དྱནྟེ། ན་པཎྜི་ཏ་ཏཿ ཏ་དཱ་ནཻ་ན་ས་ཏྱེ་ནས་ཏྱ་བ་ཙ་ནེ་ན། ས་ཏྱ་བཱཀྐེ་ན།
[39b.4]ཛཿཛཿཛཿཛཿཨེ་བྷཱིཿ པཎྜི་ཏ། ཨ་དྷིཥྛ་ཏཻ་རྨནྡྲ་པ་དཻ་རྨ་མ་སརྦ་སཏྭཱ་ནཱཉྩ། རཀྵཾ་ཀུ་རུ་པ་རི་ཏྲཱ་ཎཱཾ་ཀུ་རུ། པ་རི་གྲ་ཧཾ་ཀུ་རུ། པ་རི་པཱ་ལ་ནཾ་ཀུ་རུ་ཤཱནྟི། སྭ་སྟྱ་ཡ་ནཾ་ཀུ་རུ། དཎྜ་པ་རི་ཧ་རཾ་ཀུ་རུ། ཤསྟྲ་པ་རི་ཧ་རཾ་ཀུ་རུ། ཡཱ་བད་བི་ཤ་དྷུ་ཥ་ཎཾ་ཀུ་རུ། ཨགྣི་པ་རི་ཧ་རཾ་ཀུ་རུ། ཨུ་ད་ཀ་པ་རི་ཧ་རཾ་ཀུ་རུ། ཀཱ་ཁོརྡ་
[39b.5]ཚྪེ་ད་ནཾ་ཀུ་རུ། སཱི་མཱ་བནྡྷཾ་ཀུ་རུ། དྷཱ་རི་ཎི་བན་དྷཾ་ཀུ་རུ། ཏདྱ་ཐཱ། ཨ་མི་ཏེ། ཨ་མི་ཏེ། ཨ་མི་ཏོདྦྷ་ཝེ། ཨ་མི་ཏ་སཾ་བྷ་བེ། ཨཱ་སྭ་སྟེ། ཨཱསྭསྟ་ཨངྒེ། མཱ་མར་མཱ་མ་ར། མ་ས་ར་མ་ས་ར། ཤ་མ་པྲ་ཤ་མ། ཨུ་པ་ས་མ་སརྦ་བྱ་དྷྱ་ནུ་པ་ཤ་མ་སརྦ་ཨ་ཀཱ་ལ་མྲྀ་ཏྱཱ་ནུ་པ་ཤ་མ་སརྦ་ན་ཀྵ་ཏྲ་གྲ་ཧ་ཏོ། ཥཱ་ནུ་པ་ས་མ། སརྦ་
[39b.6]དཾཥྚྲི་ཎཱཾ་ཙོ་པ་ཤ་མ། བྷ་ག་བ་ཏཱི་པརྞ་ཤ་བ་རི་ཧཱུཾ་ན་ཏྱུཾ་ན་ཏྱུ་ན་བི་ཏྱུཾ་བི་ཏྱུ་ན། ཏུ་ཎ་ཏུ་ཎ་ཏུ་མུ་ལེ་སྭཱཧཱ། ཨོཾ་གཽ་རཱི། གནྡྷཱ་རཱི། ཙཎྜ་ལཱི། མ་ཏཾ་གཱི། །པུཀྐ་སཱི་སྭཱ་ཧཱ། ཨོཾ་ཨཾ་ཀུ་རེ་མ་གུ་རེ་ཀུ་ར་རེ་པརྞ་ཤ་བ་རི་སྭཱཧཱ། ནམཿསརྦ་ཤ་བ་ར་ཎཱཾ་མ་ཧཱཾ། མ་ཧཱ་ཤ་བ་རཱ་ཎཱཾ་བྷ་ག་བ་ཏཱི་པི་ཤཱ་ཙི་པརྞ་ཤ་བ་རི་པི་ཤཱ་ཙི་སྭཱཧཱ། ཨོཾ་པི་
[39b.7]ཤཱ་ཅི་པརྞ་ཤ་བ་རི་ཧྲཱི་ཧེཿཧཱུཾ་ཕཊ་པི་ཤཱ་ཙི་སྭཱ་ཧཱ། འཕགས་མ་རི་ཁྲོད་ལོ་མ་ཅན་གྱི་གཟུངས་སྔགས་རྫོགས་སོ།། {T3362}༄༅༅། །རྒྱ་གར་སྐད་དུ། ཨཱརྱ་བཛྲ་སྭ་ར་སྭ་ཏཱི་སཱ་དྷ་ནཾ། བོད་སྐད་དུ། འཕགས་མ་རྡོ་རྗེ་དབྱངས་ཅན་མའི་སྒྲུབ་ཐབས། འཕགས་མ་རྡོ་རྗེ་དབྱངས་ཅན་མ་ལ་ཕྱག་འཚལ་
[40a]
[40a.1]ལོ། །ཡང་དག་རྫོགས་སངས་རྒྱས་ཀྱི་གསུང་གཏེར་ཡོན་ཏན་རང་བཞིན་རྡོ་རྗེ་དབྱངས་ཅན་ལ་བཏུད་ནས། །རང་ལ་མཉེས་བྱེད་ཕན་མཛད་མཛེས་པའི་རོལ་ལྡན་སྤྲོ་ཞིང་རྩོད་པས་ཐུབ་པར་དཀའ་མཛད་མ། །དེ་ནི་ཡང་དག་མཉེས་བྱེད་ཕན་ཕྱིར་སྲིད་པ་བྱེད་ཅིང་མི་བཟད་མི་ཤེས་མུན་
[40a.2]པ་འཇོམས། །བློ་ངན་དག་གི་ཆེད་དུ་སེམས་ཅན་ཕན་ཕྱིར་ལེགས་པར་གསུངས་པའི་ཆོ་ག་བརྗོད་པར་བྱ། །དང་པོར་སྔ་བར་ཁ་ལ་སོགས་པ་དག་པའི་རང་བཞིན་སྙིང་རྗེ་དང་ལྡན་བཟོད་ལྡན་པས། །སྔགས་པས་གཙང་མའི་སྟན་ལ་བྱམས་པའི་དགའ་བས་མྱོས་ཤིང་གང་ཞིག་དགའ་བ་དག་གིས་ནི། །
[40a.3]ཡིད་དང་མཐུན་པའི་དབེན་པའི་གནས་སུ་ཡང་ནི་དགའ་བས་རང་གི་སྙིང་གར་པདྨ་བལྟ། །འདིར་སྤྲུལ་པར་བརྗོད་པའི་རི་བོང་འཛིན་པ་ལ་ནི་ཡང་དག་བསྒོམ་བྱ་དེ་ལ་ཡང་། །དེ་ནས་དོཿཡི་འོད་ཟེར་གྱིས་ནི་འདི་ནས་ཀྱང་ནི་ཕྱོགས་གཞན་ཀུན་ནི་ཡོངས་སུ་བཀང་། །སངས་རྒྱས་ཚོགས་ནི་ཀུན་དུ་བལྟས་
[40a.4]ལ་མཆོད་པ་ལ་སོགས་འདི་ནི་བསྒོམ་པར་རབ་ཏུ་བྱ། །མེ་ཏོག་ལ་སོགས་དེ་ནས་ཕྱག་བྱས་འདིར་ནི་སྡིག་པ་བཤགས་པ་དེ་བཞིན་རབ་ཏུ་བྱ། །སྔགས་རིག་པས་ནི་བསོད་ནམས་རྗེས་སུ་ཡི་རང་སྐྱབས་གསུམ་ཡང་དག་རབ་ཏུ་འགྲོ་བར་བྱ། །ཤེས་བྱ་ལ་སོགས་སྨོན་ལམ་ལེགས་བཏབ་དེ་
[40a.5]ཡིས་བདག་ཉིད་ཀྱིས་ནི་དམིགས་པར་རབ་ཏུ་བྱ། །གཅིག་དང་དུ་མ་དང་བྲལ་ལྟ་བུར་ཡོངས་བརྗོད་བདེན་ཞིང་དག་པར་ཤེས་རྟོགས་པས། །དེ་ནས་སྣ་ཚོགས་ཐམས་ཅད་རྣམ་རྟོག་དྲ་བ་མ་ལུས་སྟོང་པ་ཉིད་དུ་བསྒོམ་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པ་ཉིད་ལས་བྱུང་པདྨ་དང་
[40a.6]ནི་ཟླ་བ་ལ་གནས་ཡང་ནི་དོཿཡིག་དམར་པོ་སྟེ། །སྣ་ཚོགས་དག་གི་འོད་ཟེར་ཚོགས་ནི་ཤིན་ཏུ་མཛེས་པར་གྱུར་པའི་པདྨ་འདབ་བརྒྱད་པ། །དེ་ལས་དམར་ཞིང་འོད་ཟེར་ཆེན་པོ་དང་ལྡན་བཅོམ་ལྡན་འདས་མ་བཟང་པོའི་རྒྱན་གྱིས་བརྒྱན། །གཡོན་བརྐྱང་བ་ཡི་ཞབས་ཀྱིས་ཡང་དག་གནས་ཤིང་
[40a.7]ཞལ་གསུམ་ཕྱག་དྲུག་དག་གིས་རབ་བརྒྱན་པ། །གཡས་པའི་ཞལ་ནི་སྔོ་ཞིང་ཕྱག་ན་པདྨ་རལ་གྲི་གྲི་གུག་རབ་ཏུ་བསྣམས་པ་སྟེ། །ཞལ་གཡོན་དཀར་ཞིང་ལྷུང་བཟེད་དང་བཅས་དེ་བཞིན་རིན་ཆེན་འཁོར་ལོར་རབ་ཏུ་ལྡན་པའི་ཕྱག །སྙིང་གར་པདྨ་ལ་གནས་ཟླ་བའི་དབུས་སུ་གནས་པའི་འབར་
[40b]
[40b.1]བའི་དོཿཡིག་དེ་དང་ནི། །སྣ་ཚོགས་མི་ཤེས་མུན་པ་འཇོམས་པའི་འོད་ཟེར་གྱིས་ནི་འགྲོ་བ་མ་ལུས་རབ་ཏུ་འགེངས། །ཡང་དག་བསྡུས་ལ་རང་གི་སྙིང་གར་ཟླ་བར་གནས་པའི་ས་བོན་ལ་གནས་བལྟས་ལ་ཡང་ནི་སྤྲོ། །དེ་ཉིད་ཡང་དང་ཡང་དུ་རྒྱུན་དུ་སྙོམ་ལས་མེད་པར་ཉིན་རེ་བསམ་པར་རབ་བྱས་
[40b.2]ཏེ། །བསམ་གཏན་སྐྱོ་ན་ས་བོན་མཉམ་སྐྱེས་བསྡུས་ལ་སྔགས་འདི་ཡི་ནི་བཟླས་པ་རབ་ཏུ་བྱ། །དོ་ཤལ་གཡོ་ཞིང་གསལ་བའི་རིམ་པས་འབྱུང་བས་ཡིད་བཞིན་དུ་ནི་སྔགས་ཀྱི་བཟླས་པ་བྱ། །ཨོཾ་པི་ཙུ་པི་ཙུ་པྲཛྙ་ཝརྡྷ་ནི་ཛྭ་ལ་ཛྭ་ལ་མེ་དྷ་ཝརྡྷ་ནི། དྷི་རི་དྷི་རི། བུདྷི་ཝར་དྷ་ནི་སྭཱ་ཧཱ། ཐུན་མཚམས་ཐམས་
[40b.3]ཅད་དུ་ནི་ལྷ་མོའི་གཟུགས་ལ་ཡིད་ཀྱིས་རྟག་པར་ཤིན་ཏུ་རབ་དགའ་བས། །ཡང་དག་གསུངས་པའི་ཆོ་གས་སེམས་ཅན་དོན་གྱི་རྒྱུར་ནི་སྔགས་འདི་ཡོངས་སུ་བཟླས་པ་བྱ། །བསོད་ནམས་བསྔོ་བྱ་དགོས་པས་བྱེད་ན་བསམ་གཏན་རྩེ་གཅིག་ངེས་པར་གནས་པས་བསྐྱང་བྱ་སྟེ། །ཇི་སྲིད་འབུམ་ཕྲག་
[40b.4]ཡོངས་སུ་མ་རྫོགས་པ་ནི་རྫོགས་འགྱུར་ནས་ནི་ལས་ཀྱི་རིམ་བཞིན་བྱ། །རྣམ་པ་ཐམས་ཅད་དུ་ནི་མི་མཐུན་ཕྱོགས་སུ་ཉེ་བར་སོང་ཡང་དེ་ཉིད་བསམ་གཏན་བྱེད། །དཀར་པོའི་ཚེས་གཅིག་ཉིད་ནས་ཤིན་ཏུ་མཛེས་པའི་ཡིད་ཀྱིས་ཇི་སྲིད་ཟླ་བ་གནས་པའི་བར། །དེ་སྙེད་སྦྱར་བའི་སྐད་ཅིག་ནུབ་རེ་བཞིན་
[40b.5]དུ་ཇི་སྙེད་ཟླ་བ་ཉ་བའི་བར་དུ་བྱ། །དེ་ཉིད་ཀྱི་ནི་ནུབ་མོ་ཐུབ་པར་དཀའ་བའི་ཚིགས་བཅད་མཁན་གྱི་དངོས་གྲུབ་ཐོབ་པར་འགྱུར། །གང་ཞིག་དཔལ་ལྡན་ནག་པོའི་རྒྱལ་པོས་དཔལ་ལྡན་གཤིན་རྗེ་གཤེད་ཀྱི་རྒྱུད་དུ་གནས་བྱས་པ། །དཔལ་དང་ལྡན་པའི་རྡོ་རྗེ་དབྱངས་ཅན་བཅོམ་ལྡན་འདས་མ་དེ་ནི་ཡང་
[40b.6]དག་མཉེས་པའི་ཐབས། །སེམས་ཅན་རྣམས་ལ་ཕན་པའི་དོན་དུ་བདག་གིས་བྱས་པའི་བསོད་ནམས་ཡང་དག་གྱུར་པ་དེས། །དེས་ནི་འགྲོ་ཀུན་ནག་པོ་ལྟ་བུར་ཐུབ་པར་དཀའ་བའི་ཚིགས་བཅད་མཁན་ནི་གྲུབ་པར་ཤོག །སངས་རྒྱས་རྣལ་འབྱོར་དཔལ་འཛིན་གྱིས། །དཔལ་ལྡན་རྡོ་རྗེ་དབྱངས་
[40b.7]ཅན་གྱི། །འཇོམས་བྱེད་མཐར་ནི་བྱེད་པ་ཡི། །སྒྲུབ་པའི་ཐབས་ནི་འདི་བྱས་སོ། །རྡོ་རྗེ་དབྱངས་ཅན་མའི་སྒྲུབ་པའི་ཐབས། སློབ་དཔོན་དཔལ་འཛིན་གྱིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། །།
[41a]
[41a.1]{T3363}༄༅༅། །རྒྱ་གར་སྐད་དུ། བིགྷྣཱནྟ་ཀ་སཱ་དྷ་ནཾ། བོད་སྐད་དུ། བགེགས་བསྐྲད་པའི་སྒྲུབ་པའི་ཐབས། བཅོམ་ལྡན་འདས་བགེགས་མཐར་བྱེད་ལ་ཕྱག་འཚལ་ལོ། །དང་པོ་རེ་ཞིག་སྒྲུབ་པ་པོ་བདེ་བའི་གདན་ལ་འདུག་སྟེ། རང་གི་སྙིང་གར་ཨཾ་དམར་པོ་ལས་སྐྱེས་པའི་ཉི་མའི་དཀྱིལ་
[41a.2]འཁོར་བསྒོམས་ལ། དེའི་སྟེང་དུ་ཧཱུཾ་སྔོན་པོ་རྣམ་པར་བསམས་ནས། ཧཱུཾ་གི་འོད་ལས་སྐྱེས་པའི་བགེགས་མཐར་བྱེད་དང་། བླ་མ་དང་། སངས་རྒྱས་དང་། བྱང་ཆུབ་སེམས་དཔའ་དམིགས་ལ། མེ་ཏོག་ལ་སོགས་པས་ཡང་དག་པར་མཆོད་དེ། ཕྱག་འཚལ་བ་དང་གསུམ་ལ་སྐྱབས་སུ་འགྲོ་བ་
[41a.3]ལ་སོགས་པ་བྱས་ནས་སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་ཨཾ་དམར་པོ་ལས་སྐྱེས་པའི་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ངོ་། །དེ་ཡོངས་སུ་གྱུར་པ་ལས། རྡོ་རྗེ་ཧཱུཾ་གིས་མཚན་པ་བསྒོམ་པར་བྱའོ། །ཧཱུཾ་གི་འོད་ཀྱིས་བསྐུལ་བའི་དེ་བཞིན་གཤེགས་
[41a.4]པ་ཐམས་ཅད་བཞུགས་པའི་སྔོན་དུ་འགྲོ་བས་དེ་ཐམས་ཅད་ཡོངས་སུ་གྱུར་པ་ལས་བདག་ཉིད་བགེགས་དགྲ་བསྒོམ་པར་བྱ་སྟེ། ཞལ་གཅིག་ཕྱག་གཉིས་པ། གཡོན་པ་བརྐྱང་བའི་ཞབས་ཀྱིས་གནས་པ། མདོག་སྔོ་བ་ཕྱག་གཡོན་ན་སྡིགས་མཛུབ་དང་ཞགས་པ། གཡས་པ་ན་རྡོ་རྗེ་
[41a.5]འཕྱར་ཞིང་འཇིགས་པར་བྱེད་པ། སྐྲ་ཁམ་པ་གྱེན་དུ་བསྒྲེང་བའོ། །དེ་ནས་བཅོམ་ལྡན་འདས་ཀྱི་ཐུགས་ཀར་ཧཱུཾ་ཡོངས་སུ་གྱུར་པ་ལས་རྡོ་རྗེ་ཧཱུཾ་གིས་མཚན་པའོ། །དེ་ལྟ་བུར་གྱུར་པའི་བགེགས་དགྲ་སྤྲོ་བ་དང་བསྡུ་བའི་གཟུགས་སྣ་ཚོགས་པདྨའི་སྟེང་དུ་ཉི་མ་ལ་གནས་པ་བསྒོམ་པར་བྱའོ། །དམ་
[41a.6]ཚིག་ལ་སོགས་པའི་ཆོ་ག་སྔོན་དུ་འགྲོ་བས་འདི་ལྟར་ཐུན་མཚམས་གཉིས་དང་གསུམ་དང་བཞི་ལ་སོགས་པར་བསྒོམ་པར་བྱའོ། །ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ། བགེགས་དགྲའི་སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་
[41a.7]ཞུས་སོ། {T3364}༄༅༅། །རྒྱ་གར་སྐད་དུ། ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། རལ་གཅིག་མའི་སྒྲུབ་པའི་ཐབས། འཕགས་མ་རལ་གཅིག་མ་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་པའི་རྗེས་སུ་སྣ་ཚོགས་པདྨའི་སྟེང་དུ་ཊཱཾ་ཡོངས་སུ་
[41b]
[41b.1]གྱུར་པ་ལས། ཐོད་པའི་དབུས་སུ་ཧཱུཾ་སྔོན་པོ་སྤྲོ་བ་དང་བསྡུ་བ་སྔོན་དུ་འགྲོ་བས། དེ་ཡོངས་སུ་གྱུར་པ་ལས་བཅོམ་ལྡན་འདས་མ་རལ་གཅིག་མ་ཡན་ལག་ཐམས་ཅད་གནག་པ། ཕྱག་བཞི་མ། ཞལ་གཅིག་མ། སྤྱན་དཀར་ཞིང་དམར་བའོ། །སྤྱན་གསུམ་པ་སྟག་གི་པགས་པའི་ཤམ་ཐབས་
[41b.2]ཅན། ཐོད་པའི་ཕྲེང་བས་དབུ་བརྒྱན་པའོ། །སྐྲ་ཁམ་པ་གྱེན་དུ་བསྒྲེང་བ། མཆེ་བ་གཙིགས་ཤིང་ལྗགས་འདྲིལ་བ། གསུས་པ་འཕྱང་བ། སྔོན་པོའི་སྦྲུལ་གྱིས་སྣ་ཚོགས་བརྒྱན་པའོ། །བརྒྱད་གཉིས་ལོན་པ། འོ་མ་འཛིན་པའི་ནུ་མ་རྒྱས་ཤིང་མཐོ་བར་ལངས་པ། དོ་ཤལ་དང་དབུ་
[41b.3]རྒྱན་དང་། གཡེར་ཁ་དང་། མེ་ཏོག་གི་ཕྲེང་བས་མ་ལུས་པའི་ཡན་ལག་ལ་ཚོམ་བུ་བྱས་པའོ། །གཡས་པའི་ཕྱག་གཉིས་ན་རལ་གྲི་དང་གྲི་གུག་བསྣམས་པ། གཡོན་པའི་ཕྱག་གཉིས་ན་ཨུཏྤ་ལ་དང་ཐོད་པ་བསྣམས་པའི་བདག་ཉིད་དུ་སྐད་ཅིག་གིས་བསྐྱེད་ལ་སྔགས་བཟླས་པར་བྱའོ། །
[41b.4]ཨོཾ་ཧྲཱིཿཏྲཱཾ་ཧཱུཾ་ཕཊ་ཞེས་བྱའོ། །རལ་གཅིག་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3365}༄༅༅། །རྒྱ་གར་སྐད་དུ། ཨཱརྱ་ཛཱངྒ་ལཱི་སཱ་དྷ་ནཾ། བོད་སྐད་དུ། འཕགས་མ་དུག་སེལ་བའི་སྒྲུབ་ཐབས། འཕགས་མ་དུག་སེལ་མ་ལ་ཕྱག་
[41b.5]འཚལ་ལོ། །སྔོན་དུ་བསྟན་པའི་ཆོ་ག་ཉིད། །རང་སྙིང་དམར་པོ་དཀྱིལ་འཁོར་ལ། །ཛཱཾ་གི་ཡེ་ཤེས་ལས་རྫོགས་པའི། །དུག་སེལ་ཞེས་པའི་རིག་མ་ནི། །སེར་པོའི་གདེངས་ཀ་བདུན་གདེངས་ཤིང་། །འབར་ཞིང་གཡོ་བའི་ནོར་བུས་བརྒྱན། །ཞལ་གསུམ་དང་ནི་སྤྱན་གསུམ་སྟེ། །གཞོན་ནུ་མ་ཡི་ཕྱག་
[41b.6]གསུམ་འབར། །ཁྲོས་པ་དང་བཅས་དགོད་པ་ཉིད། །སྦྲུལ་གྱི་རྒྱན་གྱིས་སྐེ་རགས་བྱས། །ཕྱག་དྲུག་རོལ་པས་གནོན་པ་སྟེ། །མི་བསྐྱོད་དབུ་ལ་ཉེ་བར་བཞུགས། །གཡས་ཀྱི་ཕྱག་ན་རྡོ་རྗེ་སྟེ། །གཉིས་པ་དག་ནི་རལ་གྲི་འཕྱར། །གསུམ་པ་གར་ཚུལ་མདའ་བསྣམས་པ། །གཡོན་ན་སྡིགས་
[41b.7]མཛུབ་ཞགས་པ་སྟེ། །གཉིས་པ་དག་ནི་མེ་ཏོག་གོ། །གསུམ་པའི་ཕྱག་ན་གཞུ་བསྣམས་སོ། །མེ་ཏོག་གིས་བརྒྱན་སྐ་རགས་ཏེ། །པདྨའི་གདན་གནས་གསེར་གྱི་མདོག །འོད་ནི་དམར་པོའི་དཀྱིལ་འཁོར་རོ། །དབང་པོའི་གཞུ་ནི་འཕྲོ་ཞིང་སྦྲུལ། །འབར་བས་ཡོངས་བསྐོར་གོས་ཀྱིས་
[42a]
[42a.1]གཡོགས། །སངས་རྒྱས་གཟུགས་ནི་འཕྲོ་བ་སྟེ། །ཟླ་བུམ་རང་གི་ཕྱག་ནའོ། །དུག་གིས་བརྒྱལ་བ་དབང་བསྐུར་ཞིང་། །ཛཱཾ་གིས་ཁ་ནི་བརྒྱན་པར་བསྒོམས། །དུག་ནི་མེད་ན་སྐུ་གསུམ་གྱིས། །དུག་སེལ་རྟག་ཏུ་བསྒོམ་པར་བྱ། །དེ་ལྟར་འདི་ཡིས་བསྒོམས་བཞིན་པ། །
[42a.2]རིང་པོ་མི་ཐོགས་བྱང་ཆུབ་འཐོབ། །ལག་པ་གཉིས་ཀྱིས་སྦྲུལ་གྱི་གདེངས་ཀའི་རྣམ་པ་ཡིས། སྤྱི་བོར་གདེངས་ཀ་གདུགས་ལྟ་བུར་བྱས་པ་ནི་དུག་སེལ་མའི་ཕྱག་རྒྱ་སྟེ། བཟླས་པ་བྱའོ། །ཨོཾ་ན་མཿཤ་བ་ར་ཀུ་མཱ་རཱི་ཡེ་ཙུར་ཙ་ཙཱ་ལ་ཡ་ཙུར་ཙཱ་ལ་ཡ། སཾ་གྷ་ཊ་ནི་མཏྟ་མ་ཏཾ་གི་ཨ་ཧང་བིདྦྷེ་ཨ་ཧེ། ཨཾ་
[42a.3]ཛཿསྭཱ་ཧཱ། འཕགས་པ་དུག་སེལ་མའི་སྒྲུབ་ཐབས་རྫོགས་སོ།། །།{T3366}ཨི་ལི་མིད་ཏེ་ཏི་ལི་མིད་ཏེ་ཨི་ཏི་ལི་མིད་ཏེ། དུམ་བེ་དུམ་བཱ་ལི་མེ། དུསྨེ་དུསྨ་ལེ་ཡེ། ཏར་ཀེ་ཏར་ཀ་ར་ཎེ། མར་མེ་མར་མར་ཎེ། ཀསྨེ་རེ་ཀསྨཱི་ར་མུ་ག་ཏེ། ཨཱ་གྷེ་ཨ་གྷ་ནེ། ཨཱ་གྷ་ན་གྷ་ནེ། ཨི་ལི་ཨི་ལི་ཨེ། མི་ལི་ཨེ་
[42a.4]མི་ལི། མི་ལི་མི་ལི་ཨེ། ཨག་ཁ་ཨི་ཨེ། ཨ་བྱ་ཨི་ཨེ། སྭེ་ཏེ་ཤྭེ་ཏཏྟ་ཎཾ་ཌཾ། ཨ་ན་ནུ་རག་ཏེ་སྭཱ་ཧཱ། དགེ་སློང་བདག་གི་རིག་པ་འདི་ཐམས་ཅད་དུ་དཀར་བ་སྦྱིན་པར་འོས་པ་རིག་པ་འདི་ལན་ཅིག་མཉན་པས་ལོ་བདུན་དུ་སྦྲུལ་གྱིས་འཛིན་པར་མི་འགྱུར་རོ། །དེའི་ལུས་ལ་ཡང་དུག་གིས་འགོ་བར་མི་
[42a.5]འགྱུར་རོ། །གང་ཞིག་རིག་པ་འདི་དགེ་སློང་དག་གིས་འཛིན་པར་གྱུར་ན། ཇི་སྲིད་འཚོའི་བར་དུ་སྦྲུལ་གྱིས་འཛིན་པར་མི་འགྱུར་རོ། །སུ་ལ་ཡང་འདིར་དུག་གིས་འཆི་བར་མི་འགྱུར་རོ། །གལ་ཏེ་ཡང་སྦྲུལ་གྱིས་བཟུང་ན་དེ་རྣམ་པ་བདུན་དུ་མགོ་འགས་པར་འགྱུར་ཏེ། ཨརྫ་ཀའི་དོག་པ་བཞིན་ནོ། །འཕགས་
[42a.6]མ་དུག་སེལ་མའི་གཟུངས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3367}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། ལྷ་མོ་རིགས་བྱེད་མའི་སྒྲུབ་པའི་ཐབས། ལྷ་མོ་རིགས་བྱེད་མ་ལ་ཕྱག་འཚལ་ལོ། །དང་པོར་བདེ་བའི་
[42a.7]གདན་ལ་འདུག་སྟེ། རིགས་བྱེད་མའི་གཟུགས་སུ་བྱས་ནས་སེམས་ཅན་མ་ལུས་པ་དབང་དུ་བྱ་བ་བརྩམ་པར་བྱའོ། །རང་གི་སྙིང་གར་ཉི་མའི་དཀྱིལ་འཁོར་རོ། །དེའི་སྟེང་དུ་ཏྲཱཾ་དམར་པོའོ། །དེ་ནས་འོད་ཟེར་རྣམ་པ་ལྔ་བྱུང་སྟེ། དེ་བཞིན་གཤེགས་པ་རྣམས་ཡང་དག་པར་མཆོད་ལ། དཀོན་
[42b]
[42b.1]མཆོག་གསུམ་ལ་སྐྱབས་སུ་མཆི། །ཞེས་བྱ་བ་ལ་སོགས་པས་སྡིག་པ་བཤགས་པ་ལ་སོགས་པ་བྱས་ལ། སྟོང་པ་ཉིད་ཀྱི་རྣམ་པ་བསྒོམས་ལ། ཕྱིས་ནི་ཨུཏྤ་ལ་དམར་པོ། དེའི་སྟེང་དུ་ཉི་མའི་དཀྱིལ་འཁོར་དེའི་སྟེང་དུ་ཨཾ་དམར་པོ། འདི་ཐམས་ཅད་ཡོངས་སུ་གྱུར་པ་ལས་རིགས་བྱེད་མ་རྗེ་བཙུན་མདོག་
[42b.2]དཀར་ཞིང་དམར་བ་ཕྱག་བཞི་པ། གཡས་པའི་ཕྱག་ན་མདའ་དང་མི་འཇིགས་པ་སྦྱིན་པའི་ཕྱག་གོ། །གཡོན་པ་ན་གཞུ་དང་ཨུཏྤ་ལ་བསྣམས་པའོ། །རྡོ་རྗེ་སྐྱིལ་མོ་ཀྲུང་གིས་གནས་ཤིང་ཤ་འགག་དམར་པོ་དང་། སྟོད་གཡོགས་དམར་པོ་ཅན་གྱི་རྣམ་པར་བསྒོམ་པར་བྱའོ། །འོག་ཏུ་འདོད་
[42b.3]པའི་ལྷ་ཆུང་མ་དང་བཅས་པ་བསམས་ཏེ། ཕྱི་ནས་བསྒོམ་པ་དང་ལྡན་པས་སྔགས་ཀྱི་བཟླས་པ་བྱའོ། །ཨོཾ་ཀུ་རུ་ཀུལླེ་སྭཱ་ཧཱ། རིགས་བྱེད་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3368}# ༄༅༅། །རྒྱ་གར་སྐད་དུ། ཀལ་
[42b.4]པོཀྟམ་ཀུ་རུ་ཀུལླ་#སཱ་དྷ་ནཾ། བོད་སྐད་དུ། རྟོག་#པ་ལས་གསུངས་པའི་ལྷ་མོ་རིགས་བྱེད་མའི་#སྒྲུབ་པའི་ཐབས། འཕགས་མ་རིགས་#བྱེད་མ་ལ་ཕྱག་འཚལ་ལོ། །གང་ཞིག་དྲན་པ་ཙམ་གྱིས་ནི། །ལྷ་དང་ལྷ་མིན་མིར་བཅས་པ། །ངེས་པར་ཅི་བགྱི་#བྱེད་པ་ཡི། །སྒྲོལ་མ་དེ་ལ་ཕྱག་འཚལ་ནས། །དང་པོ་#རེ་ཞིག་སྔགས་
[42b.5]པས་ཡིད་དང་རྗེས་སུ་མཐུན་#པའི་གནས་སུ། བུད་མེད་ཀྱི་སྐྱེ་བོ་དང་ཚོགས་པ་ལ་སོགས་པས་དབེན་པར་ནང་པར་སྟན་བདེ་བ་ལ་འདུག་སྟེ། རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པའི་ཟླ་བའི་དཀྱིལ་འཁོར་གྱི་སྟེང་དུ་འོད་ཟེར་དང་བཅས་པའི་ཡི་གེ་ཧྲཱིཿས་བོན་ལས་བྱུང་བའི་འོད་ཟེར་དམར་པོའི་
[42b.6]ཚོགས་ཀྱིས་འགྲོ་བ་གསལ་བར་བྱས་པའི་སྔོན་#དུ་འགྲོ་བའི་རིགས་#བྱེད་མའི་རི་ལ་#གནས་པའི་རིགས་#བྱེད་མ། བཅོམ་ལྡན་འདས་མ་བསྐུལ་ནས་སྤྱན་དྲངས་ནས་མདུན་གྱི་ནམ་མཁའ་ལ་ཡང་དག་པར་བལྟས་ཏེ། སྙིང་གའི་ས་བོན་#ལས་སྤྲུལ་པའི་མེ་ཏོག་དང་སྤོས་ལ་སོགས་པའི་མཆོད་པ་སྣ་ཚོགས་ཀྱིས་
[42b.7]མཆོད་པར་བྱའོ། །དེའི་རྗེས་ལ་ཕྱག་བཙལ་#བ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསྔོ་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་སྔོན་དུ་འགྲོ་བས། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་#
[43a]
[43a.1]བཤགས། །འགྲོ་བའི་བསོད་ནམས་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་#ལན་གསུམ་གྱི་#བར་དུ་བརྗོད་དོ། །དེ་ནས་ཚངས་པའི་གནས་བཞི་བསྒོམ་པ་སྔོན་དུ་འགྲོ་བས་ཆོས་ཐམས་ཅད་སྟོང་པ་ཉིད་#རྣམ་པར་བསྒོམ་#པར་བྱའོ། །དེ་ནས་བྱིན་གྱིས་#
[43a.2]བརླབ་པའི་སྔགས་བརྗོད་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་#ཞེས་སོ། །དེ་ནས་འགྲོ་བ་སྡུག་བསྔལ་མཐའ་དག་#སྙིང་རྗེ་བསྒོམས་ལ། རང་གི་སེམས་ས་བོན་གྱི་#གཟུགས་སུ་བལྟས་ཏེ། དེ་ཡོངས་སུ་གྱུར་པ་ལས་ཨུཏྤ་ལ་དམར་པོའི་སྟེང་དུ་དབྱངས་ཡིག་དང་པོ་#ཡོངས་སུ་གྱུར་
[43a.3]པའི་ཟླ་བ་ལ་གནས་པའི་ས་བོན་གྱི་#འོད་ཟེར་རྣམས་ཀྱིས་སྔོན་བཞིན་དུ་འགྲོ་བ་སྣང་བར་བྱ་སྟེ། དེ་བཞིན་གཤེགས་པ་བྱེ་བ་དཔག་ཏུ་མེད་པ་རྣམས་བསྐུལ་ཏེ། སྤྱན་དྲངས་ལ་#བསྟིམ་པར་བྱ་སྟེ། དེ་ལ་ཨུཏྤལ་#ལ་སོགས་པ་ཡོངས་སུ་གྱུར་པ་ལས་སྐུ་མདོག་དམར་པོ་པདྨ་དམར་པོ་དང་ཟླ་བའི་དཀྱིལ་
[43a.4]འཁོར་ལ་བཞུགས་#པ། ན་བཟའ་དམར་པོས་སྟོད་གཡོགས་བྱས་པ། འོད་ཟེར་དམར་པོ་དང་ལྡན་པ། རིན་པོ་ཆེའི་རྣ་རྒྱན་#དང་ལྡན་པ། དབུ་རྒྱན་#དང་ལྡན་པ། ཕྱག་བཞི་པ། གཡས་པས་མི་འཇིགས་པ་སྦྱིན་པ། གཉིས་པ་#མདའ་འགེངས་པ། གཡོན་པས་རིན་པོ་ཆེའི་གཞུ་འཛིན་པ།
[43a.5]གཉིས་པས་ཨུཏྤལ་#དམར་པོ་འཛིན་པ། འོད་དཔག་#མེད་པའི་དབུ་རྒྱན་ཅན། རིགས་#བྱེད་མའི་རི་ཕུག་ན་གནས་པའི་སྒྲ་གཅན་གྱི་མགོ་བོ་#ལ་གནས་པའི་ཆུང་མ་དང་བཅས་པའི་འདོད་པའི་ལྷའི་སྟེང་ན་གནས་པ། སྒེག་པ་ལ་སོགས་པའི་ཉམས་འཕེལ་བའི་དབང་#དང་ལྡན་པ། དང་པོའི་ལང་
[43a.6]ཚོ་དང་ལྡན་པའི་རིགས་བྱེད་མར་བསྒོམ་པར་བྱའོ། །དེ་ལྟར་དམ་ཚིག་#སེམས་དཔའ་བསྐྱེད་ནས་སླར་ཡང་སྐད་ཅིག་ཙམ་གྱིས་#ཡེ་ཤེས་སེམས་དཔའ་མདུན་དུ་བཀུག་ལ་ཡང་དག་པར་#མཆོད་དེ། དམ་ཚིག་གི་#ཕྱག་རྒྱས་ཞལ་ནས་གཞུག་#པར་བྱའོ། །དེ་ལ་དམ་ཚིག་གི་ཕྱག་རྒྱ་ནི་འདི་ཡིན་ཏེ། ཐལ་མོ་
[43a.7]སྦྱར་ལ་གུང་མོ་གཉིས་རྩེ་མོར་བྱས་ལ་སྲིན་ལག་གཉིས་ནང་དུ་གཞུག །མཛུབ་#མོ་གཉིས་གུང་མོའི་རྒྱབ་ཏུ་སྦྱར་ལ། མཐེབ་ཆེན་གཉིས་#འོག་ཏུ་བྱས་པ་#དེ་ལྟ་བུའི་རྣམ་པའི་ཨུཏྤ་#ལའི་ཕྱག་རྒྱའོ། །དེའི་རྗེས་སུ། བྱང་ཆུབ་རྡོ་རྗེས་#སངས་རྒྱས་ལ། །མཆོད་ཆེན་ཇི་ལྟར་ཆེར་བྱིན་པ། །བདག་ལ་བསྲུང་#
[43b]
[43b.1]བའི་དོན་གྱི་ཕྱིར། །ནམ་མཁའ་རྡོ་རྗེ་བདག་ལ་སྩོལ#། །ཞེས་གསོལ་བ་བཏབ་ལ། དབང་བསྐུར་#རྡོ་རྗེ་ཆེན་པོ་ནི། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་#གསང་གསུམ་གྱི#། །གནས་ལས་བྱུང་བ་སྦྱིན་པར་བྱ། །འདི་ལྟར་བརྗོད་པ་རྣམས་ཀྱིས་སངས་རྒྱས་ཀྱི་བཀས་སྤྱན་མ་
[43b.2]ལ་སོགས་པས་དབང་བསྐུར་བས། དབུ་རྒྱན་དུ་སྣང་བ་མཐའ་ཡས་བསམ་#པར་བྱའོ། །དེ་ལྟར་བསྒོམས་ལ་བཟླས་པ་བྱས་ཏེ། སྐྱེན་པར་མ་ཡིན། བུལ་བར་མ་ཡིན། མི་གསལ་བར་མ་ཡིན། ཕྱི་མོ་དམན་པར་མ་ཡིན། ཡང་དག་པ་མ་ཡིན་པའི་རྟོག་པ་སྤངས་ཏེ། ཨོཾ་ཀུ་རུ་ཀུལླེ་ཧྲཱིཿཧཱུཾ་སྭཱ་ཧཱ། དེ་
[43b.3]ལྟར་ཐུན་མཚམས་གསུམ་གྱི་རིམ་#པས། ཁུར་བ་དང་། ཤ་ཀ་ར་ལ་སོགས་པའི་གཏོར་མ་སྦྱིན་པ་སྔོན་དུ་འགྲོ་བས། གུས་པས་ཡུན་རིང་པོར་བསམ་པ་#བརྟན་པོས་ཟླ་བ་དྲུག་ཏུ་བསྒོམ་#པར་བྱས་ན་#གྲུབ་པའི་མཚན་མ་འབྱུང་བར་འགྱུར་རོ། །དེ་ནས་ཟླ་བ་དང་པོ་ལ་ནད་ལ་སོགས་པའི་གནོད་པ་བརྒྱ་ཉེ་
[43b.4]བར་འོང་བར་འགྱུར་རོ། །གཉིས་པ་ལ་སྟོན་མོ་ཡིད་དུ་འོང་བ་མ་བསླངས་པར་རྙེད་པར་འགྱུར་རོ། །གསུམ་པ་ལ་གོས་སྣ་ཚོགས་རྙེད་པ་དང་། བཞི་པ་ལ་སྣ་ཚོགས་ཀྱི་སོ་རྩི་རྒྱུན་མི་འཆད་པར་རྙེད་པར་འགྱུར་བ་དང་། ལྔ་པ་ལ་རྣམ་པ་སྣ་ཚོགས་པའི་གཟུགས་ལ་སོགས་པའི་ཡོན་ཏན་གྱིས་བརྒྱན་
[43b.5]པའི་བུད་མེད་ཀྱི་ཚོགས་དང་ཕྲད་པ་རྙེད་པར་འགྱུར་རོ། །#དྲུག་པ་ལ་ལྷ་དང་#ཀླུ་དང་དྲི་ཟ་ལ་སོགས་པ་#བུད་མེད་མཛེས་མ་དང་ཕྲད་པར་འགྱུར་རོ། །ཕལ་ཆེར་བཅོམ་ལྡན་འདས་མ་བསྒོམས་#ན་བུད་མེད་རྣམས་ཀྱིས་འཚོ་#བར་བྱེད་དོ། །དེ་ལ་བདུད་ཀྱི་ལས་འདི་རྣམས་སྤངས་ཏེ། བཅོམ་ལྡན་འདས་མ་སྒོམ་#
[43b.6]པར་བྱེད་པ་ལ་དངོས་སུ་འམ། རྨི་ལམ་དུ་སྟོན་པར་འགྱུར་ཏེ། རལ་གྲི་དང་། མིག་#སྨན་དང་། རྐང་པ་བྱུག་པ་དང་། མི་སྣང་བ་དང་། རིལ་བུ་དང་། དངུལ་ཆུ་དང་། བཅུད་ཀྱིས་ལེན་པ་#དང་། མཁའ་སྤྱོད་དང་། ས་འོག་ལ་སོགས་པའི་དངོས་གྲུབ་ལ་སོགས་པ་#འདོད་པ་རྣམས་གྲུབ་པར་བྱེད་དོ། །གལ་
[43b.7]ཏེ་བསྟན་པར་མ་གྱུར་ན་སྔར་བརྗོད་པའི་ཕྱག་རྒྱ་བཅིང་སྟེ#། མཆོད་པ་དང་། གཏོར་མ་སྔོན་དུ་འགྲོ་བས། ཟླ་བ་དྲུག་གི་#བར་དུ་ཉའི་ནུབ་མོ་ཐོག་ཐག་ཏུ་བཟླས་པ་བྱའོ། །དེ་ནས་ཕྱག་རྒྱ་འབར་ཏེ་#འགྲུབ་པར་འགྱུར་རོ། །ཕྱག་རྒྱ་དེས་ཚངས་པ་དང་། དབང་པོ་དང་། ཉེ་བའི་དབང་པོ་དང་། དྲག་པོ་དང་།
[44a]
[44a.1]སྲེད་མེད་ཀྱི་བུ་ལ་སོགས་པ་བཀུག་ནས་འོངས་ཏེ། ཕོ་ཉར་གྱུར་ནས་སྒྲུབ་#པ་པོའི་འདོད་པ་རྫོགས་པར་བྱེད་དོ། །དེ་ནས་བཟུང་སྟེ་སྐྱེ་བ་དང་། རྒས་པ་དང་། ན་བ་དང་།# འཆི་བ་དང་བྲལ་ཏེ་འཇིག་རྟེན་གྱི་#ཁམས་གཞན་དུ་སོང་#ནས་དེ་བཞིན་གཤེགས་པ་རྣམས་མཐོང་སྟེ། ས་དང་
[44a.2]གཟུངས་#ལ་སོགས་པ་ཐོབ་པར་འགྱུར་རོ། །འཕགས་མ་སྒྲོལ་མའི་རྟོག་པའི་རིམ་པ། ཀུ་རུ་ཀུ་ལླེའི་སྒྲུབ་ཐབས་སློབ་དཔོན་འཕགས་པ་ཀླུ་སྒྲུབ་#ཀྱིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་#བ་དགེ་སློང་བ་རིས་བསྒྱུར་བའོ།། །།
[44a.3]{T3369}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། ལྷ་མོ་རིགས་བྱེད་མའི་སྒྲུབ་པའི་ཐབས། འཕགས་མ་རིགས་བྱེད་མ་ལ་ཕྱག་འཚལ་ལོ། །རང་གི་སྙིང་གར་ཟླ་བའི་དཀྱིལ་འཁོར་ལ་ཧྲཱིཿཡིག་ལས་སྐྱེས་པའི་ཨུཏྤ་ལ་དམར་པོའི་དབུས་སུ་ཧྲཱིཿས་མཚན་པར་བསམས་ལ། དེ་ཡོངས་སུ་
[44a.4]གྱུར་པ་ལས་འཕགས་མ་རིགས་བྱེད་མ་མདོག་དམར་པོ་ཟླ་བའི་གདན་ལ་འོད་ཀྱི་དཀྱིལ་འཁོར་དམར་པོའོ། །སྣ་ཚོགས་དམར་པོའི་ན་བཟའི་སྟོད་གཡོགས་ཅན་མ། འོད་དཔག་མེད་པས་དབུ་བརྒྱན་ཅིང་། ཕྱག་བཞི་པ། རྩ་བའི་ཕྱག་གཉིས་ན་ཨུཏྤ་ལ་དམར་པོའི་མདེའུས་རྣམ་པར་མཛེས་པ་དང་
[44a.5]ལྡན་པའི་མདའ་རྣ་བའི་བར་དུ་བཀང་བའི་མེ་ཏོག་གི་གཞུ་བསྣམས་པའོ། །གཡོན་པ་ན་སྡོང་བུ་དང་བཅས་ཤིང་ཁ་བྱེ་བའི་ཨུཏྤ་ལ་དམར་པོ་བསྣམས་ཤིང་གཡས་པ་ན་མཆོག་སྦྱིན་པའོ། །སྒེག་པའི་རོ་ཆེན་པོ་དང་ལྡན་པར་བལྟས་ལ་ཡེ་ཤེས་སེམས་དཔའ་དང་གཅིག་ཏུ་བྱས་ལ། རང་གི་ལུས་ཀྱི་འོད་
[44a.6]དམར་པོའི་ལྕགས་ཀྱུས་བཀུག་པའི་ལྷ་དང་ལྷ་མ་ཡིན་དང་། བྱ་ཁྱུང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། གནོད་སྦྱིན་དང་། སྐྱེས་པ་དང་། བུད་མེད་བརྒྱ་སྟོང་ལ་སོགས་པའི་ཚོགས་ཤིན་ཏུ་གུས་པས་ལུས་བཏུད་ཅིང་མཆོག་ཏུ་དབང་དུ་འགྱུར་བར་ཕྱོགས་བཅུར་ཡང་དག་པར་བལྟ་བར་བྱའོ། །ཨོཾ་
[44a.7]ཀུ་རུ་ཀུལླེ་ཧྲཱིཿསྭཱ་ཧཱ། ཞེས་བྱ་བའི་སྔགས་ཀྱི་བཟླས་པ་འབུམ་ཕྲག་གཅིག་ནས་བརྩམས་ཏེ། ཇི་སྲིད་བཅོམ་ལྡན་འདས་མ་མངོན་དུ་གྱུར་གྱི་བར་དུ་བྱའོ། །གཞན་ཡང་ཁ་ཅིག་ཏུ་དབང་དུ་བྱེད་པར་འདོད་ན་ཇི་སྐད་གསུངས་པའི་རྣལ་འབྱོར་གྱི་ཆོ་གས་འབུམ་ཕྲག་གཅིག་བྱས་ལ་གུས་ཤིང་བཏུད་པའི་ལྷ་
[44b]
[44b.1]དང་། ལྷ་མ་ཡིན་ལ་སོགས་པའི་དབུས་སུ་གནས་པའི་རང་གི་ལུས་ཀྱི་འོད་ཟེར་ལྕགས་ཀྱུས་བསྒྲུབ་བྱ་བཀུག་ལ་མདུན་དུ་ཡང་དག་པར་བཞག་པ་ལ་རང་གི་སྙིང་གར་ཨུཏྤ་ལ་དམར་པོ་འདབ་མ་བཅུ་དྲུག་པ། དེའི་སྙིང་གར་རྣམ་པར་བསམས་ལ། འཕགས་པ་ཡན་ལག་མེད་པའི་རྡོ་རྗེས་གསུངས་པའི་རིམ་པས་
[44b.2]བུང་བ་ལྕགས་ཀྱུ་ལྟ་བུར་བསྒོམས་ལ། དེའི་མིང་གི་ཡི་གེ་རང་གི་སྙིང་གའི་སྔགས་ཀྱིས་དང་པོར་མནན་ནས་དེ་བཞིན་དུ་མདའ་ཉིད་ཀྱིས་སྙིང་ག་ཕུག་པས་འདོད་ཆགས་ཆེན་པོས་བརྒྱལ་ཞིང་ཡང་སྡོང་བུས་རྐང་པ་གཉིས་བཅིངས། ཨུཏྤ་ལའི་ཞགས་པས་ཀྱང་སྐེ་ནས་བཅིངས་ཏེ། ཡང་དག་པར་བཀུག་ལ་
[44b.3]རང་གི་རྐང་པ་གཉིས་སུ་ལྷུང་བའོ། །གལ་ཏེ་སྐྱེས་པ་ཡིན་ན་ལྕགས་ཀྱུས་སྙིང་ག་འབུགས་པའོ། །བུད་མེད་ཡིན་ན་ཆོས་འབྱུང་ནས་སོ། །ཨོཾ་ཀུ་རུ་ཀུལླེ་ཆེ་གེ་མོའམ། ཆེ་གེ་མོ་ཨཱ་ཀཪྵ་ཡ་ཧྲཱིཿསྭཱ་ཧཱ་ཞེས་བྱ་བའི་སྔགས་བཟླས་པ་བྱའོ། །བསྒྲུབ་བྱ་ཁུགས་ནས་སྔགས་དེ་ཉིད་གཏན་དུ་གནས་
[44b.4]པའི་ཆེད་དུའོ། །བ་ཤ་མ་ན་ཡ་ཞེས་བྱ་བ་དང་། སྤེལ་ཞིང་བཟླས་པ་བྱའོ། །བརྒྱ་བཟླས་པས་ཐུན་མོང་གི་སྐྱེས་པ་དང་བུད་མེད་ཀྱི་ཚོགས་དང་། རྒྱལ་པོ་དང་། བློན་པོ་དབང་དུ་འགྱུར་རོ། །ཁྲི་བཟླས་ན་འཇིག་རྟེན་ཐ་མལ་པ་རྣམས་སོ། །འབུམ་ཕྲག་གིས་རྒྱལ་པོའོ། །འབུམ་ཕྲག་བདུན་གྱིས་
[44b.5]ལྷ་དང་ལྷ་མ་ཡིན་གྱི་བུ་མོའོ། །བྱེ་བས་ནི་བྱ་ཁྱུང་དང་གླང་པོ་ཆེ་ལ་སོགས་པའི་བཟང་པོའི་ཕྱུགས་དང་ཐུན་མོང་གི་ཕྱུགས་རྣམས་ཀྱང་ངོ་། །གུས་པས་རྒྱུན་མ་ཆད་པར་དུས་རིང་པོར་དཔག་ཏུ་མེད་པ་བཟླས་ན་ས་གསུམ་པོ་དབང་དུ་བྱེད་དོ། །ལྷ་མོ་རིགས་བྱེད་མའི་སྒྲུབ་པའི་ཐབས་རྫོགས་སོ། །པཎྜི་ཏ་དོན་
[44b.6]ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3370}༄༅༅། །རྒྱ་གར་སྐད་དུ། ཨོ་ཌི་ཡཱ་ན་བི་ནི་ར་ག་ཏ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཨོ་ཌི་ཡཱ་ན་ནས་བྱུང་བའི་རིགས་བྱེད་མའི་སྒྲུབ་པའི་ཐབས། འཕགས་མ་རིགས་བྱེད་མ་ལ་ཕྱག་འཚལ་ལོ། །དང་པོར་རེ་
[44b.7]ཞིག་བསྒོམ་པའི་དང་པོར་དྲི་ཞིམ་པོ་རྣམ་པ་ལྔས་སའི་ཕྱོགས་ཅིག་བྱུགས་ལ། བརྟུལ་ཞུགས་དང་ལྡན་པས་དགའ་བའི་སེམས་ཀྱིས་མཉམ་པར་བཞག་པས་འཇམ་པའི་གདན་ལ་ཉེ་བར་གནས་ལ། དེ་ནས་ཕྱིས་ནི་རང་གི་སྙིང་གར་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་འོད་འབར་བའི་
[45a]
[45a.1]ཕྲེང་བའི་རྣམ་པ་འཁྲུགས་པའོ། །དེའི་ལྟེ་བར་ཧྲཱིཿདམར་པོ་རྣམ་པར་བསམ་མོ། །དེ་ནས་ཧྲཱིཿལས་ངེས་པར་འབྱུང་བའི་འོད་ཟེར་ཀྱི་དྲ་བས་ཕྱོགས་བཅུ་ན་ཉེ་བར་གནས་པའི་སེམས་ཅན་གྱི་ཁམས་གསལ་བར་བྱ་སྟེ། དཔལ་རིགས་བྱེད་མའི་གཟུགས་སུ་ཉེ་བར་གནས་པར་བྱས་
[45a.2]ལ། ཡང་འོད་ཟེར་དེ་ཉིད་ཕྱིར་འོངས་ཏེ། དེ་ཉིད་ལ་ཞུགས་པས་འོད་ཟེར་གྱི་དྲ་བ་རྣམ་པར་བསྒོམ་པར་བྱའོ། །དེ་ནས་ཕྱིས་ནི་མདུན་གྱི་ནམ་མཁའ་ལ་བརྒྱད་གཉིས་ལོན་པའི་རྣམ་པ་མགོ་སྐྱེས་ཁམ་པ་གྱེན་དུ་འགྲེང་བ། ཐོད་པ་རྣམ་པ་ལྔ་དབུ་ལ་འཆང་བ། རོ་ལ་ཞོན་པ་མགོའི་ཕྲེང་བས་དོ་ཤལ་བྱས་
[45a.3]ཤིང་སྐྱིལ་ཀྲུང་ཕྱེད་པའི་གར་གྱིས་གནས་པ་ཅུང་ཞིག་མཆེ་བ་གཙིགས་པའི་ཞལ། ལྗགས་འདྲིལ་བ། འཁོར་ལོ་དང་། རྣ་ཆ་དང་། མགུལ་རྒྱན་དང་། དཔུང་རྒྱན་དང་། སྐ་རགས་དང་། རྐང་རྒྱན་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། གཡོན་དུ་བྱས་པའི་སྤྱན་གསུམ་
[45a.4]ནི་ཟླུམ་ཞིང་དམར་ལ་གཡོ་བའོ། །འོད་དཔག་མེད་པའི་དབུ་རྒྱན་ཅན། ཕྱག་བཞི་པ། རྣ་བའི་བར་དུ་བཀང་བ། ཨུཏྤ་ལ་དམར་པོ། མདེའུ་ཅན་གྱི་མདའ་དང་། མེ་ཏོག་དམར་པོའི་གཞུ་བཀང་ཞིང་བསྣམས་པའོ། །ཕྱག་ལྷག་མ་གཉིས་ན་མེ་ཏོག་དམར་པོ་ལས་བྱས་པའི་ལྕགས་ཀྱུ་དང་། ཨུཏྤལ་
[45a.5]དམར་པོ་བསྣམས་པའི་རྣམ་པ་བསམ་པར་བྱའོ། །འདི་ཉིད་མཆོད་པའི་དོན་དུ་རང་གི་སྙིང་གའི་ཉི་མའི་དཀྱིལ་འཁོར་ལ་གནས་པ་ཧྲཱིཿལས་བྱུང་བའི་མཆོད་པ་རྣམ་པ་ལྔ། མེ་ཏོག་དང་། བདུག་པ་དང་། མར་མེ་དང་། དྲི་དང་། ལྷ་བཤོས་ལ་སོགས་པ་རྣམས་ཀྱིས་མཆོད་པར་བྱའོ། །མཆོད་ནས་
[45a.6]མཆོག་གི་སྙིང་རྗེ་ཆེན་པོའི་རྣལ་འབྱོར་པས་གུས་པས་བཏུད་ཅིང་ལུས་ལ་སོགས་པས་ཕྱག་བྱའོ། །དེ་ནས་གང་ཞིག་སྡིག་པ་བྱེད་དུ་བཅུག་པ་དང་། བདག་གིས་བགྱིས་པ་དང་། རྗེས་སུ་ཡི་རང་བ་འདི་དག་བཅོམ་ལྡན་འདས་མ་ལ་མངོན་སུམ་དུ་བཤགས་པར་བྱའོ། །དེའི་རྗེས་སུ་འཁོར་བའི་རྒྱ་མཚོར་ལྷུང་བའི་
[45a.7]སེམས་ཅན་གྱི་ཁམས་བསྒྲལ་བའི་ངོ་བོ་ཉིད། བྱང་ཆུབ་ཀྱི་སེམས་རྣམ་པར་གཟུང་ངོ་། །དེ་ནས་ཚངས་པའི་གནས་བཞི་བསྒོམ་པར་བྱའོ། །དེའི་རྗེས་སུ་སྟོང་པ་ཉིད་བསྒོམས་ཏེ། སྔགས་འདིས་སེམས་ཙམ་དུ་ལྷག་པར་གནས་པར་བྱའོ། །ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཞེས་བྱ་
[45b]
[45b.1]བས་སེམས་བྱིན་ཀྱིས་བརླབས་ལ། དེའི་རྗེས་སུ་ནམ་མཁའི་ཕྱོགས་སུ་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་འབར་བ་བརྟན་པའི་རྣམ་པར་བསྒོམ་པར་བྱའོ། །དེའི་སྟེང་དུ་ཧཱུཾ་ནག་པོ་ཡོངས་སུ་གྱུར་པ་ལས་སྣ་ཚོགས་རྡོ་རྗེའོ། །ར་བ་དང་། གུར་བཅིང་བ་དང་། རྡོ་རྗེའི་ས་གཞི་བསྒོམ་
[45b.2]པར་བྱའོ་ཞེས་པ་ནི་སྲུང་བའི་འཁོར་ལོའོ། །དེ་ནས་དབུས་སུ་ཨེའི་རྣམ་པར་བྱེད་པའི་ལྷ་རྫས་ཀྱི་ཆོས་འབྱུང་གི་ཡེ་ཤེས་མདོག་དཀར་བའི་རྣམ་པར་བསྒོམ་པར་བྱའོ། །དེའི་དབུས་སུ་ཧྲཱིཿདམར་པོ་ལས་བྱུང་བའི་པདྨ་དམར་པོ་འདབ་མ་བརྒྱད་པའོ། །དེའི་སྟེང་གི་ཟེའུ་འབྲུ་ལ་རཾ་ཡོངས་སུ་གྱུར་པ་ལས་ཉི་
[45b.3]མའོ། །དེའི་སྟེང་དུ་རོའོ། །ཡང་དེའི་སྟེང་དུ་ཨ་ཡོངས་སུ་རྫོགས་པའི་ཟླ་བ་དཀར་པོ། མཚན་སུམ་ཅུ་རྩ་གཉིས་ཀྱི་བདག་ཉིད་དོ། །དེའི་སྟེང་དུ་ཡང་ཉི་མའི་དཀྱིལ་འཁོར་དཔེ་བྱད་བཟང་པོ་བརྒྱད་ཅུའི་ངོ་བོ་ཉིད་ཁ་དོག་དམར་པོའོ། །དེ་ཉིད་ཀྱི་དབུས་སུ་ཧྲཱིཿདམར་པོ་ཡོངས་སུ་གྱུར་པ་ལས་ཨུཏྤ་ལ་དམར་
[45b.4]པོའི་མདེའུ་ཅན་གྱི་མདའ་ལ་རང་སེམས་ཞུགས་པར་རྣམ་པར་བསྒོམ་པར་བྱའོ། །ཕྱིས་ནི་ཟླ་བ་དང་ཉི་མ་དང་། མདའ་གཅིག་ཏུ་གྱུར་པ་ལས་དེ་ཉིད་དུ་སྔོན་བཞིན་གྱི་བདག་ཉིད་རིགས་བྱེད་མའི་གཟུགས་སུ་རྣམ་པར་བསྒོམ་པར་བྱའོ། །རྣམ་པར་བསྒོམས་ནས་རང་གི་སྙིང་གར་རཾ་ལས་ཉི་མའི་དཀྱིལ་
[45b.5]འཁོར། དེའི་ལྟེ་བ་ལ་ཡང་ཧྲཱིཿཡིག་བསྒོམ་པར་བྱའོ། །དེ་ལས་བྱུང་བའི་འོད་ཟེར་གྱིས་མགོན་པོ་འོད་དཔག་མེད་པ་བཀུག་ཅིང་སྤྱན་དྲངས་ལ། གསང་བ་དང་ཅིག་ཤོས་ཀྱི་མཆོད་པས་ཡང་དག་པར་མཆོད་ལ། དབང་བསྐུར་བར་གསོལ་བ་གདབ་པར་བྱའོ། །དེ་ལ་འདི་ནི་གསོལ་བ་སྟེ།
[45b.6]མགོན་པོ་འོད་དཔག་མེད་པ་ཁྱེད་ཀྱིས་བདག་ལ་དབང་བསྐུར་དུ་གསོལ་ཞེས་པའོ། །དེ་ནས་མགོན་པོ་འོད་དཔག་མེད་པ་དེས་རང་གི་སྙིང་ག་ལས་བདུད་རྩི་རྣམ་པ་ལྔས་གང་བའི་བུམ་པ་ལྔ་སྤྲོས་པའི་རྣམ་པར་བསྒོམ་པར་བྱའོ། །དེ་ནས་བདུད་རྩི་རྣམ་པ་ལྔས་གང་བའི་བུམ་པ་དེས་མངོན་པར་ཁྲུས་བྱའོ། །
[45b.7]ཁྲུས་བྱས་ནས་རང་གི་སྙིང་གར་བུམ་པ་གཞུག་གོ། །དེ་ལ་ཞུགས་ནས་རྣལ་འབྱོར་པའི་མགོ་ལ་མགོན་པོ་འོད་དཔག་མེད་པ་བསྒོམ་པར་བྱའོ། །ཐུན་མཚམས་གསུམ་དུ་བསྒོམ་ཞིང་བཟླས་པ་བྱའོ། །དེ་ནས་སྔགས་ནི་ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ་ཙནྡན་དམར་པོའི་ཆེད་དུ་བཟླས་པར་བྱའོ། །ཨོཾ་ཨཱཿཧཱུཾ་
[46a]
[46a.1]ཞེས་བྱ་བས་ཁ་བྱིན་ཀྱིས་བརླབ་པ་ནི་དགོས་པའོ། །གཞན་ཡང་སྔགས་པས་སྐྱེས་པའམ་བུད་མེད་དབང་དུ་བྱ་བར་འདོད་པས། དཀར་པོའི་ཕྱོགས་ཀྱི་ཚེས་གཅིག་ནས་བརྩམས་ཏེ། ཐུན་མཚམས་གསུམ་དུ་ཁྲི་ཚོ་གཅིག་ཉི་མ་རེ་རེ་ཞིང་བཅོམ་ལྡན་འདས་མའི་གཟུགས་
[46a.2]དམིགས་ལ་གོས་དམར་པོས་རོ་སྨད་དང་། ལུས་ལ་དཀྲིས་ལ་དེའི་རྗེས་སུ་རང་གི་སྙིང་གར་ཉི་མ་ལ་གནས་པའི་ཧྲཱིཿདམར་པོ་ཡོངས་སུ་གྱུར་པ་ལས་པདྨ་དམར་པོ་འདབ་མ་བརྒྱད་པ། སྐྱེ་གནས་ཀྱི་བར་དུ་སོན་པའི་སྡོང་བུའི་རྣམ་པ་བསྒོམ་པར་བྱའོ། །དེའི་འདབ་མ་རྣམས་སུ་བུང་བ་བརྒྱད་བརྒྱད་པའི་
[46a.3]མཐའི་མཐའ་དབྱངས་ཡིག་དེ་ཡོངས་སུ་གྱུར་པ་ལས་བུང་བ་བརྒྱད་དོ། །ཤིན་ཏུ་དགའ་བ་དང་རྒྱས་པ་དང་། ཁྲོས་ཤིང་ཆགས་པ་ནི་གོ་རིམས་བཞིན་དུ་ཡོངས་སུ་བརྗོད་དོ། །རང་གི་སྣའི་རླུང་གིས་བསྐུལ་ཏེ། འཕུར་ནས་གཡས་པ་ལས་གཞན་ཅིག་ཤོས་ཀྱི་སྣའི་ཁུང་བུ་ནས་བྱུང་སྟེ། བསྒྲུབ་བྱའི་
[46a.4]གཡས་པའི་སྣ་བུག་ནས་ཞུགས་ནས། དགའ་བས་དུམ་བུར་གཏུབ་ཅིང་ཉམས་པར་བྱས་དབྱངས་ཡིག་དང་པོ་ལ་སོགས་པ་བརྒྱད་ཅུང་ཞིག་དམར་བ་དང་ལྡན་པའི་འདབ་མ་བཞི་པར་བྱའོ། །འདི་ལྟར་ལྟ་བར་བྱེད་པ་ནི་རྣལ་འབྱོར་པས། ཕྱི་ནས་རྣ་བའི་བར་དུ་བཀང་བའི་ཨུཏྤ་ལའི་མདེའུ་དང་ལྡན་པའི་
[46a.5]མདའ་འཆང་བ་ལ་ལྟ་བ་དང་ལྡན་པའི་སྔགས་པས། ཟེའུ་འབྲུ་སོ་སོར་རྟོག་པར་བྱའོ། །དེ་ནས་བུང་བ་དེ་དབུགས་ཀྱིས་བསྐུལ་ཏེ། གཡོན་པའི་སྣའི་བུ་ག་ནས་བྱུང་ནས་དབྱངས་ཡིག་རེ་བླངས་ཤིང་ཁྱེར་ནས། རྣལ་འབྱོར་པའི་སྣ་བུག་གཡས་པ་ནས་ཞུགས་ཏེ། རང་གི་སྙིང་གར་རང་དང་གཞན་གྱི་
[46a.6]ཡེ་ཤེས་གཅིག་པའི་ངོ་བོ་ཉིད་དུ་བྱའོ། །དེ་ནས་ཨུཏྤ་ལས་སྐེ་བ་ནས་བཅིངས་ཏེ། སྐེ་ནས་ལྕགས་ཀྱུས་ཕུག་ཅིང་མདའི་དྲ་བའི་རྣམ་པར་བསམས་ན་དབང་དུ་འགྱུར་རོ། །མགལ་མེའི་འཁོར་ལོ་ལ་གནས་པའི་བསྒྲུབ་བྱ་བསམ་པར་བྱའོ། །སྒྲུབ་པ་པོ་ནི་སྔགས་གཟུགས་ཀྱིས། །གདམས་ངག་
[46a.7]དག་ནི་ངེས་བྱས་ལ། །རྟག་ཏུ་དགའ་བས་སྔགས་བཟླས་བྱ། །ཨོཾ་ཀུ་རུ་ཀུལླེ་ཧྲཱིཿཨ་མུ་ཀཱིཾ་མེ་བ་ཤ་མ་ནཱ་ཡ་སྭཱ་ཧཱ། མ་ལུས་པར་འདི་ཡང་ཉིན་དང་མཚན་དུ་བྱའོ། །དེ་ནས་མྱོས་པར་གྱུར་ནས་འོང་བར་འགྱུར་རོ། །སྔགས་ཀྱིས་བསྐུལ་ནས་སྐྲ་གྲོལ་བ་གོས་མེད་པ་འདོད་པ་སྤྱོད་འདོད་
[46b]
[46b.1]པས་ནོན་པ། དེ་ཐོབ་ནས་རང་གི་ལྷག་པའི་ལྷའི་རྣལ་འབྱོར་གྱིས་དཀྱིལ་འཁོར་མཆོད་པར་བྱའོ། །དངོས་གྲུབ་རྒྱ་ཆེན་པོ་གང་གིས་གཞོམ་པར་མི་ནུས་པའི་ཨོ་ཌི་ཡཱ་ན་ནས་བྱུང་བའི་ལྷ་མོ་རིགས་བྱེད་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་
[46b.2]བའོ།། {T3371}༄༅༅། །རྒྱ་གར་སྐད་དུ། ཏྲེེ་ལོཀྱ་བ་ཤཾ་ཀ་ར་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། ཁམས་གསུམ་དབང་དུ་བྱེད་པའི་སྤྱན་རས་གཟིགས་དབང་ཕྱུག་གི་སྒྲུབ་པའི་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དང་པོ་རེ་ཞིག་ཡིད་དང་
[46b.3]མཐུན་པའི་གནས་སུ་རྣལ་འབྱོར་པས་ཐང་སྐུ་བཀྲམ་སྟེ། དེའི་མདུན་དུ་དབང་ཆེན་གྱི་དཀྱིལ་འཁོར་ཀྱི་དབུས་སུ་གུར་གུམ་གྱིས་ཟླ་བའི་དཀྱིལ་འཁོར་ཟླུམ་པོ་སྔགས་འདིས་བྱའོ། །ཨོཾ་བཛྲ་རེ་ཁེ་ཧཱུཾཿཛཿཧཱུཾ་བཾ་ཧོཿ། ཞེས་བྱ་བའི་སྔགས་འདིས་ཕབ་ལ་དཀྱིལ་འཁོར་གྱི་དབུས་སུ་ཁམས་གསུམ་དབང་
[46b.4]དུ་བྱེད་པའི་རྗེ་བཙུན་སྤྱན་རས་གཟིགས་སྔགས་འདིས་མཆོད་པར་བྱའོ། །ཨོཾ་ཏྲཻ་ལོཀྱ་བ་ཤཾ་ཀ་ར་ཡ་བཛྲ་པུཥྤེ་ཧཱུཾ་པྲ་ཏཱིཙྪ་སྭཱ་ཧཱ། ཨོཾ་མུ་ནེེ་བཛྲ་མུཿའདི་ནི་བསྡུ་བའི་སྔགས་སོ། །ཕྱིས་ནི་རང་གི་སྙིང་གར་ཨཱཾ་ཡིག་བསམ་པར་བྱ་སྟེ། དེ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་རྫོགས་པར་བྱའོ། །
[46b.5]དེའི་སྟེང་དུ་ནུས་པའི་ས་བོན་ཉི་མ་ཤར་བ་ལྟ་བུའི་འོད་བལྟས་ལ། དེའི་འོད་ཟེར་གྱིས་འོད་དཔག་མེད་པ་མཆོད་ནས། སྡིག་པ་བཤགས་པ་ལ་སོགས་པ་བྱས་ཏེ། ཡང་རང་གི་ལུས་ལ་གཞུག་གོ། །དེ་ཐམས་ཅད་ཡོངས་སུ་གྱུར་པ་ལས་སྐད་ཅིག་གིས་པདྨའི་སྟེང་དུ་རྡོ་རྗེ་སྐྱིལ་མོ་ཀྲུང་གིས་གནས་པ་
[46b.6]ཕྱེ་བའི་སྤྱན་གསུམ་པ་རལ་པའི་དབུ་རྒྱན་འཆང་བ། མདོག་དམར་བ་རྡོ་རྗེས་མཚན་པའི་ཞགས་པ་དང་། ལྕགས་ཀྱུ་ཕྱག་ནའོ། །ས་གསུམ་གྱི་རང་བཞིན་ལུག་གཉིས་ཞགས་པས་བཅིངས་པ། དེའི་སྟེང་དུ་བཞུགས་པ་སྣ་ཚོགས་པའི་སྤྲུལ་པ་འཆང་ཞིང་རྡོ་རྗེ་རྣལ་འབྱོར་མ་རྣམས་ཀྱིས་དབང་བསྐུར་བ་
[46b.7]རབ་ཏུ་སྦྱིན་པ། དེ་བཞིན་དུ་བྱང་ཆུབ་སེམས་དཔའ་རྒྱན་སྣ་ཚོགས་དང་ལྡན་པས་མཆོད་པར་བྱེད་པ། རིག་པ་འཛིན་པ་དང་། ཁྱབ་འཇུག་དང་། བདེ་བྱེད་དང་། ཚངས་པ་དང་། སྣ་ཚོགས་པའི་རྣལ་འབྱོར་མའི་ཚོགས་ཀྱིས་གར་དང་བརྡུང་དཀྲོལ་ལ་སོགས་པ་བྱེད་པ་སྣ་ཚོགས་ཀྱི་འབྱུང་པོའི་
[47a]
[47a.1]ཚོགས་ལ་སོགས་པས། སྣ་ཚོགས་ཀྱི་མི་མགོ་དང་ཀེང་རུས་ལ་སོགས་པས་བརྒྱན་པ་དེ་བཞིན་དུ་སྣ་ཚོགས་ཀྱི་གདུགས་དང་། རྔ་ཡབ་ལ་སོགས་པ་བལྟ་བར་བྱའོ། །དེ་ལྟ་བུའི་དུས་སུ་དེ་བཞིན་གཤེགས་པ་འོད་དཔག་མེད་པ་སྤྱི་བོར་བལྟ་བར་བྱ་སྟེ། འདི་ལྟ་བུའི་
[47a.2]བདག་ཉིད་བསམ་པར་བྱའོ། །ཕྱིས་ནི་ལྟེ་བའི་སྟེང་དུ་ཉི་མའི་དཀྱིལ་འཁོར་གྱི་འོད་ཀྱི་རང་བཞིན་བསམས་ལ། དེའི་སྟེང་དུ་གཡོན་ཕྱོགས་སུ་ནུས་པའི་ས་བོན་སྙིང་གར་ཁྲོ་བོའི་ས་བོན་དབྱངས་ཡིག་ཨས་བརྒྱན་པ་ཞེས་བྱ་བ་ནི་བསྒོམ་པའི་སྔགས་སོ། །འདི་ཐམས་ཅད་བསམས་ནས་རྡོ་རྗེའི་
[47a.3]བདག་ཉིད་ཀྱི་སྔགས་བརྗོད་པར་བྱས་ལ། དེའི་བདག་ཉིད་དུ་བསམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རྡོ་རྗེའི་བདག་ཉིད་ཀྱི་སྔགས་སོ། །འདི་ལ་ཡང་གོམས་པའི་སྦྱོར་བས་འདར་བ་དང་། གཡོ་བས་དབབ་པར་བྱས་ལ། གཉིས་སུ་མེད་པའི་ཡེ་ཤེས་སྐྱེ་བར་འགྱུར་རོ། །
[47a.4]འདི་ལྟ་བུའི་རྣལ་འབྱོར་པ་ནི་གླང་པོ་ཆེ་སྨྱོན་པ་ལྟར་མྱོས་བྱེད་ཀྱི་ཆུ་ཡིས་མྱོས་པ་བཞིན་དུ་རིགས་ལྔ་ལ་ལོངས་སྤྱོད་དོ། །གལ་ཏེ་རིགས་ལྔ་ལ་མི་སྤྱོད་པ་དེའི་ཚེ་དེའི་ལུས་ལ་འདར་བ་དང་གཡོ་བ་ལ་སོགས་པ་འབབ་པ་དང་། གཉིས་སུ་མེད་པའི་ཡེ་ཤེས་མི་གནས་སོ། །དེ་ལྟར་རྟོགས་པར་བྱས་ནས་
[47a.5]རིགས་ལྔ་ལ་ལོངས་སྤྱོད་དེ་དེས་ནི་འགྲུབ་པར་འགྱུར་རོ། །གྲུབ་པར་གྱུར་ནས་གཞན་གྱི་ལུས་ལ་ཡང་གཡོ་བ་དང་འདར་བས་དབབ་པར་བྱས་ལ་འདོད་ཆགས་དང་། ཞེ་སྡང་ལ་སོགས་པ་དགག་པར་མི་བྱའོ། །དེ་ལྟར་གྲུབ་པའི་དངུལ་ཆུས་ཕུག་པའི་ཟངས་མའི་ནག་པོ་སྤངས་པ་བཞིན་དུ་ལུས་པོ་ཉིད་
[47a.6]གཉིས་མེད་ཀྱི་རོ་ཡིས་ཕུག་ན་འདོད་ཆགས་དང་། ཞེ་སྡང་ལ་སོགས་པ་སྤོང་བར་འགྱུར་རོ། །ཧྲཱིཿཧཱུཾ་ཨཿབཟླས་པའི་སྔགས་སོ། །ཨོཾ་ཧྲཱིཿཨཿཧ་རི་ཏི་ཡ་ཀྵེ་ཤྭ་རི་སྭཱ་ཧཱ། འཕྲོག་མའི་སྔགས་སོ། །ཨོཾ་ཨཾ་ཀྲཾ་ཧྲཱིཾ་ས་ཀ་ལ་ག་ཎ་ནཱི་དེ་བཱི་རཱི་ཤྭ་རི་ཎཱིཾ་པ་རི་ཀ་རེ་ཨ་ཨ་ཨ་བ་ཏ་ར་ཨ་བ་ཏ་ར་ཨ་བ་ཏ་རནྟུ་ད་ཤ་
[47a.7]དི་ག་ལོ་ཀ་པཱ་ལ་ཨི་དཾ་བ་ལིཾ་གྲྀཧྞ་གྲྀཧྞ་ཧཱུཾ་ཕཊ་སྭཱ་ཧཱ། གཏོར་མའི་སྔགས་སོ། །ཁམས་གསུམ་དབང་དུ་བྱེད་པའི་སྤྱན་རས་གཟིགས་དབང་ཕྱུག་གི་སྒྲུབ་ཐབས་སློབ་དཔོན་ས་ར་ཧས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།
[47b]
[47b.1]{T3372}༄༅༅། །རྒྱ་གར་སྐད་དུ། ཤྲཱི་ཛཾ་བྷ་ལ་སཱ་དྷ་ནཾ། བོད་སྐད་དུ། དཔལ་གནོད་གནས་ཀྱི་སྒྲུབ་པའི་ཐབས། ཕུན་སུམ་ཚོགས་པ་མ་ལུས་པ་སྟེར་བའི་དཔལ་གནོད་གནས་ལ་ཕྱག་འཚལ་ལོ། །དང་པོར་རེ་ཞིག་ཕྱི་རོལ་གྱི་དོན་ཐམས་ཅད་དང་རང་གི་ལུས་ཀྱང་སྟོང་པ་ཉིད་དུ་རྣམ་པར་
[47b.2]བསམས་ལ། དེའི་རྗེས་སུ་ཅུང་ཞིག་དམར་བའི་ཟླ་བའི་དཀྱིལ་འཁོར་ཐབས་དང་ཤེས་རབ་ཀྱི་བདག་ཉིད་དོ། །དེ་ཉིད་གནོད་སྦྱིན་གྱི་ས་ཀ་ཊཾ་པདྨ་འདབ་མ་བརྒྱད་པའི་རྣམ་པའོ། །དེའི་དབུས་སུ་བཾ་གྱིས་ལྷ་མོ་ནོར་རྒྱུན་མ་མདོག་སེར་བ། འབྲས་ཀྱི་སྙེ་མ་དང་། མཆོག་སྦྱིན་པ་ཕྱག་ན་རྒྱན་ཐམས་ཅད་
[47b.3]ཀྱིས་བརྒྱན་པ། གནོད་སྦྱིན་མོ་བརྒྱད་ཀྱིས་བསྐོར་བ་ནི་འདི་ལྟ་སྟེ། བཟང་མོ་དང་། རབ་ཏུ་བཟང་མོ་དང་། སྦས་མ་དང་། རབ་ཏུ་སྦས་མ་དང་། ལྷ་མོ་དང་། དབྱངས་ཅན་མ་དང་། འཕགས་མ་དང་། ཟླ་ཤེལ་ཅན་ནོ། །འདི་རྣམས་ཀྱིས་ཡོངས་སུ་བསྐོར་བའི་ལྷ་མོ་ཆེན་མོ་དེའི་བྷ་གའི་དབུས་སུ་ཛཾ་
[47b.4]གིས་བདག་ཉིད་སངས་རྒྱས་རྣམ་པ་ལྔའི་དབུ་རྒྱན་ཅན་གཡས་པའི་ཕྱག་ན་ས་བོན་གྱིས་གང་བའི་ཤིང་ཐོག །གཡོན་པ་ན་སྲེ་མོང་བསྣམས་པ། དེ་བཞིན་གཤེགས་པ་ལྔས་ཀྱང་རིན་པོ་ཆེ་ལ་སོགས་པའི་ཆར་རབ་ཏུ་འབེབས་བཞིན་པ། ཞབས་གཉིས་ན་དུང་གི་མགོ་དང་། པདྨའི་མགོའི་གཏེར་ཆེན་
[47b.5]པོ་རིན་པོ་ཆེ་ལ་སོགས་པའི་ཆར་རབ་ཏུ་འབེབས་བཞིན་པ་རང་གི་ཁྱིམ་གྱི་ཕྱོགས་གཅིག་ཏུ་རྣམ་པར་བསམ་པར་བྱའོ། །མདོག་སེར་པོ་ཨུཏྤལ་སྔོན་པོའི་ཕྲེང་བ་འཆང་བ། དཔལ་གནོད་གནས་མགོན་པོ་ནོར་རྒྱུན་མ་ལ་འཁྱུད་པ། བྱང་ཆུབ་ཀྱི་སེམས་ཕྱིར་སྤྲོས་པ་ལས་སྐྱེས་པའི་རིན་པོ་ཆེའི་ཚོགས་
[47b.6]ཀྱིས་ནམ་མཁའ་མ་ལུས་པར་ཁྱབ་པའི་རྣམ་པ་བསྒོམ་པར་བྱའོ། །དབབ་པའི་དུས་སུ་ཤར་ཕྱོགས་སུ་མདོག་སྔོན་པོའི་གང་བ་བཟང་པོའོ། །ལྷོའི་ཕྱོགས་སུ་མདོག་སེར་པོའི་རྣམ་ཐོས་སོ། །ནུབ་ཕྱོགས་སུ་མདོག་དམར་པོའི་གནོད་སྦྱིན་ནོ། །བྱང་གི་ཕྱོགས་སུ་མདོག་སེར་པོའི་ནོར་བུ་བཟང་པོའོ། །མེའི་
[47b.7]ཕྱོགས་སུ་མདོག་དམར་པོའི་ཙི་པི་ཀུཎྜ་ལིའོ། །སྲིན་པོ་རུ་སྔོན་པོ་ཀེ་ལི་མཱ་ལི་ནཾ་ངོ་། །རླུང་དུ་སེར་པོ་ཙ་རེནྡྲའོ། །དབང་ལྡན་དུ་སེར་པོ་མུ་ཁེནྡྲའོ། །དེ་ཐམས་ཅད་ཀྱང་གནོད་སྦྱིན་མོའི་བྷ་གའི་དབུས་སུ་གནས་པའི་རིན་པོ་ཆེའི་ཆར་འབེབས་བཞིན་པ་གནོད་གནས་དང་འདྲ་བ་བསྒོམ་པར་བྱའོ། །ཤར་གྱི་
[48a]
[48a.1]སྒོ་རུ་ནོར་སྦྱིན་དང་། ནོར་སྦྱིན་ཆེན་མོ་གཉིས་གཅེར་བུ་དབང་པོ་འཕྱང་བ་རིན་པོ་ཆེའི་ཆར་རབ་ཏུ་འབེབས་པའོ། །ལྷོའི་སྒོ་རུ་པདྨ་དང་པདྨ་ཆེན་པའོ། །ནུབ་ཀྱི་སྒོ་རུ་ཀི་ལི་དང་ཀི་ལི་ཆེན་པོའོ། །བྱང་གི་སྒོ་རུ་གང་བ་དང་གང་བ་བཟང་པོའོ། །འདི་རྣམས་ཀྱང་གཅེར་བུ་དབང་པོ་
[48a.2]འཕྱང་བའོ། །མགོན་པོ་གནོད་གནས་ལ་གོ་རིམས་བཞིན་དུ་སྔགས་ཀྱི་ཡི་གེ་དགོད་པར་བྱའོ། །ཨོཾ་ནི་སྤྱི་བོར་རོ། །ཛཾ་ནི་ཁ་ལའོ། །བྷ་ལ་ནི་ལག་པ་གཉིས་ལའོ། །ཛ་ནི་སྙིང་གར་རོ། །ལེན་ནི་ལྟེ་བར་རོ། །དྲ་ཡེ་ནི་བརླ་གཉིས་ལའོ། །སྭཱ་ཧཱ་ནི་ངར་གདོང་གཉིས་ལའོ་ཞེས་བྱའོ། །སྤྱི་བོར་ནི་ནོར་བུ་
[48a.3]བཟང་པོ་སྟེ། མིག་གཉིས་ལ་ནི་རྣམ་ཐོས་སོ། །དེ་བཞིན་དུ་མུ་ཁེན་དྲ་ནི་ཁ་ལ་གནས། །གང་བ་བཟང་པོ་ནུ་མའི་བར། ལྟེ་བར་གནོད་སྦྱིན་ནོར་སྦྱིན་ནོ། །བརླ་གཉིས་ཀི་ལི་མི་ལིའོ། །རྐང་གཉིས་ཙི་པི་ཀུཎྜ་ལི། །ཡན་ལག་ཐམས་ཅད་ཛ་ལེནྡྲ། །གནོད་གནས་མགོན་པོའི་བདག་ཉིད་དུ་དེ་ལྟར་བསམས་
[48a.4]ལ། ད་ནི་ཡི་གེ་དགོད་པར་བྱའོ། །ཨོཾ་ནི་སྤྱི་བོར་རོ། །ཛླུཾ་ནི་དཔྲལ་བར་རོ། །བླུཾ་ནི་རྣ་བ་གཉིས་ལའོ། །སཿནི་མགོ་བོའི་རྒྱབ་ཏུ་དགོད་པར་བྱའོ། །ད་ནི་ལག་པ་ལ་དགོད་པ་བརྗོད་པར་བྱ་སྟེ། དངོས་སུ་ལྷ་ནི་ཡི་གེ་སྟེ། ཨོཾ་ནི་མཁྲིག་མགུལ་དུའོ། །ཛླུཾ་ནི་ལག་པའི་དབུས་སུའོ། །བླུཾ་ནི་སེན་
[48a.5]མོ་ཐམས་ཅད་ཀྱི་རྩེ་མོ་ལའོ། །སཿནི་སོར་མོ་ཐམས་ཅད་ཀྱི་རྩ་བར་རོ། །ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཞེས་བྱ་བས་རབ་ཏུ་གནས་པར་བྱའོ། །སྡིགས་མཛུབ་ལ་ནི་ནོར་བུ་བཟང་པོ་སྟེ། གང་བ་བཟང་པོ་གུང་མོའོ། །སྲིན་ལག་ལ་ནི་ནོར་སྦྱིན་དགོད། །དེ་བཞིན་མཐེའུ་ཆུང་རྣམ་ཐོས་སོ། །མུ་ཁེནྡྲ་ནི་
[48a.6]ལག་པའི་ལོགས། །མཁྲིག་མགུལ་ཀེ་ནི་མཱ་ལཱི་ནི། །མཐེབ་ཆེན་ཙི་པི་ཀུཎྜ་ལི། །སྡིགས་མཛུབ་མཐེ་བོ་གཉིས་ཀྱིས་ནི། །བར་དུ་ཛ་ལེནྡྲ་ཀའོ། །ལག་པའི་དབུས་སུ་ཛཾ་བྷ་ལ་ཛ་ལེནྡྲའོ། །རྡོ་རྗེ་ཆུ་ལ་སོགས་པ་བདུད་རྩི་ལྔ་སྦྱིན་ནོ། །དེ་མེད་ན་རྡོ་རྗེའི་ཆུ་ཙམ་ཡང་ཆུ་དང་བསྲེས་ནས། ཁྱོར་བས་
[48a.7]འཐུངས་ཏེ། ཁྱོར་བ་བརྒྱ་རྩ་བརྒྱད་ཐུན་གསུམ་དུ་སྦྱིན་པར་བྱའོ། །རིང་པོར་མི་ཐོགས་པ་ཉིད་དུ་གནོད་གནས་དང་འདྲ་བར་འགྱུར་རོ། །གསེར་དང་ནོར་ལ་སོགས་པ་ཡང་དག་པར་འབེབས་བཞིན་པ་ས་གཞི་རྫས་ཀྱིས་གང་བར་བྱེད་དོ། །ཨོཾ་ཛླུཾ་བླུཾ་སྭཱ་ཧཱ། སཿཞེས་བྱ་བ་བརྗོད་ཅིང་ཁྱོར་བས་སྦྱིན་པར་བྱའོ། །
[48b]
[48b.1]མ་གྲུབ་པར་གྱུར་ན་དཔལ་རྡོ་རྗེ་ཧཱུཾ་མཛད་དུ་བདག་ཉིད་བསྒོམས་ལ་གནོད་གནས་ཀྱི་སྐུ་གཟུགས་ལ་དུག་དང་སྐེ་ཚེ་དང་། ནིམ་པའི་ལོ་མ་དང་། དྷ་དུ་ར་དང་། དུར་ཁྲོད་ཀྱི་སོལ་བས་རབ་ཏུ་བྱུགས་ལ། བསྲོ་ཤིང་སྐེམ་པར་བྱའོ། །ཕྱིས་ནི་དུར་ཁྲོད་ཀྱི་མེ་ལ་ཁྲོས་པས་གདུང་བར་བྱས་ན་ངེས་པར་འགྲུབ་པར་འགྱུར་རོ། །དཔལ་
[48b.2]གནོད་གནས་ཀྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3373}༄༅༅། །རྒྱ་གར་སྐད་དུ། མ་ཧཱ་ཙཱི་ན་ཀྲ་མ་ཏཱ་རཱ་སཱ་དྷ་ནཾ། བོད་སྐད་དུ། རྒྱ་ནག་པོའི་རིམ་པའི་སྒྲོལ་མའི་སྒྲུབ་ཐབས། བཅོམ་ལྡན་འདས་མ་སྒྲོལ་མ་ལ་
[48b.3]ཕྱག་འཚལ་ལོ། །གཡོན་པ་བརྐྱང་བའི་ཞབས་ཀྱིས་རོ་ཡི་སྙིང་ག་མནན་ཅིང་མི་བཟད་ཧ་ཧས་དགོད་པའི་མཆོག །ཕྱག་ན་རལ་གྲི་ཨུཏྤལ་གྲི་གུག་བསྣམས་ཤིང་ཧཱུཾ་གི་ས་བོན་ལས་ནི་རབ་ཏུ་བྱུང་། །མིའུ་ཐུང་སྔོ་ཞིང་ཡངས་ལ་རལ་པ་སེར་པོ་ཅོད་པན་བཅིངས་ཤིང་མཆོག་གི་ཀླུ་དང་ལྡན། །འཇིག་རྟེན་
[48b.4]གསུམ་གྱི་མི་ཤེས་ཐོད་པ་ལ་བཀོད་འཇོམས་ཤིང་དྲག་པོའི་སྒྲོལ་མ་རང་ཉིད་དོ། །སྒྲོལ་མ་འཇིག་རྟེན་གསུམ་སྒྲོལ་མ། །རྒྱ་ནག་རིམ་འོངས་ལ་བཏུད་དེ། །བླ་མའི་མན་ངག་ཇི་ལྟ་བར། །དེ་ཡི་སྒྲུབ་ཐབས་བདག་གིས་བརྗོད། །རྟགས་གཅིག་གམ་ནི་དུར་ཁྲོད་དང་། །ཁྱིམ་སྟོང་དག་ནི་ཐམས་ཅད་དུ། །
[48b.5]སྲིད་གསུམ་མཐར་བྱེད་རིག་པ་ནི། །དེར་གནས་རྣལ་འབྱོར་པས་བསྒྲུབ་བྱ། །འཇམ་པའི་ནང་ཚངས་ཅན་གནས་ཤིང་། །གཞན་ཡང་འཇམ་པ་དག་ལ་ནི། །ཤིང་སྟན་ལ་སོགས་མཉམ་གནས་ལ། །དངོས་གྲུབ་མཆོག་ནི་སྒྲུབ་པར་བྱེད། །སྐད་ཅིག་རྣམ་པའི་སྦྱོར་བ་ཡིས། །ལེགས་མཉམ་བཞག་
[48b.6]པས་རྡོ་རྗེ་གསུམ། །གནས་གསུམ་དུ་ནི་བསམ་པར་བྱ། །དེ་ནས་འོད་ཟེར་རྣམ་པར་སྤྲོས། །སྲིད་གསུམ་སྤྱོད་པའི་སེམས་ཅན་རྣམས། །ཡང་ནི་གསལ་བར་བྱས་ནས་སུ། །བསྡུས་ཏེ་ཡང་ནི་སྣ་ཚོགས་ཀུན། །སྟོང་པ་ཉིད་དུ་བསམ་པར་བྱ། །དེ་ནས་རྒྱལ་བའི་སྔགས་བརྗོད་དོ། །ཨོཾ་ཤཱུ་ནྱ་ལ་
[48b.7]སོགས་རང་བཞིན་ནོ། །དེ་ནས་བར་སྣང་དག་ལ་བསམ། །ཨ་སྐྱེས་པདྨ་དམར་པོའོ། །དེ་ཡི་སྟེང་དུ་བསམ་བྱ་བ། །ཏཱཾ་ལས་པདྨའི་སྟེང་དུ་ནི། །ཡང་ནི་དེ་དབུས་བསམ་བྱ་བ། །ཧཱུཾ་ཡིག་སྔོན་པོ་དྲ་བའི་འོད། །དེ་ནས་ཧཱུཾ་སྐྱེས་བལྟ་བྱ་བ། །གྲི་གུག་ས་བོན་གྱིས་བརྒྱན་པའི། །གྲི་གུག་ཡོངས་གྱུར་
[49a]
[49a.1]བསམ་པ་ནི། །བདག་ཉིད་སྒྲོལ་མ་དང་མཉམ་པ། །མི་བཟད་གཡོན་བརྐྱང་པ་ཡི་ཞབས། །མགོ་བོའི་ཕྲེང་བ་འཕྱང་བ་སྟེ། །ཐུང་ཞིང་གསུས་པ་འཕྱང་ལ་འཇིགས། །པདྨ་སྔོན་པོས་བརྒྱན་པ་སྟེ། །བཟང་མོ་ཞལ་གཅིག་སྤྱན་གསུམ་མ། །མི་བཟད་ཧ་ཧའི་རྣམ་པའི་འོད། །
[49a.2]རབ་ཏུ་དགྱེས་པས་རོ་ལ་ཞོན། །ཀླུ་བརྒྱད་ཀྱིས་ནི་རྣམ་པར་བརྒྱན། །སྤྱན་ནི་དམར་ཞིང་ཟླུམ་པ་སྟེ། །སྟག་གི་པགས་པས་རྐེད་པ་དཀྲིས། །ལང་ཚོ་གསར་པ་ཕུན་སུམ་ཚོགས། །ཕྱག་རྒྱ་ལྔ་ཡིས་རྣམ་པར་བརྒྱན། །ལྗགས་འདྲིལ་མཆེ་གཙིགས་འཇིགས་པར་བྱེད། །ཕྱག་གཡས་རལ་གྲི་གྲི་གུག་
[49a.3]སྟེ། །གཡོན་དུ་ཨུཏྤལ་ཐོད་པ་འཆང་། །ཁམ་པ་གྱེན་འགྲེང་རལ་གཅིག་མ། །དབུ་རྒྱན་མི་བསྐྱོད་བརྒྱན་པ་བསམ། །བསྒོམས་པའི་སྟོབས་ནི་རྫོགས་པ་ན། །རྣལ་འབྱོར་ཚིགས་བཅད་མཁན་ཆེར་འགྱུར། །གལ་ཏེ་བླུན་ཞིང་རྨོངས་པས་ཀྱང་། །བསྒོམས་པའི་རི་ལ་ཆེད་བྱེད་ན། །དེ་ཡིས་འཇམ་
[49a.4]པའི་དབྱངས་ཐོབ་འགྱུར། །འབུམ་ཕྲག་གཅིག་ནི་བཟླས་པ་བྱ། །ཡི་གེ་གསུམ་གྱི་སྔགས་ཆེན་པོ། །ཕཊ་ནི་མཐའ་རུ་སྙིང་གར་གནས། །འོད་ཟེར་ལྔ་དང་མཉམ་པར་ལྡན། །མི་ཤེས་བུད་ཤིང་བསྲེགས་པའོ། །རྣལ་འབྱོར་སྤྱོད་པའི་རྗེས་འབྲངས་ནས། །དེ་ཡི་བསྡུ་བའི་ཆོ་ག་བརྗོད། །དང་པོ་
[49a.5]ས་ཡི་ཕར་ཕྱོགས་སྦྱིན། །དབྱངས་ཡིག་བཞི་པ་རྣམ་པར་བརྒྱན། །རོ་ལ་ཞོན་ཞིང་འཕྲོ་བའི་འོད། །ཐིག་ལེ་ཟླ་ཚེས་ཡང་དག་ལྡན། །དེ་ནས་ཡི་གེ་ཏྲཾ་སྦྱིན་བྱ། །བཞི་པ་ཉིད་ཀྱིས་རྣམ་པར་བརྒྱན། །རིང་པོ་དག་དང་ཡང་དག་ལྡན། །ཧཱུཾ་ཡིག་ཡང་ནི་སྦྱར་བར་བྱ། །ཕཊ་ཀྱི་ཡི་གེ་དེ་ནས་སྦྱིན། །
[49a.6]ཡོངས་རྫོགས་གྲུབ་པའི་སྔགས་ཉིད་དོ། །མཁས་པས་རལ་གྲི་གནས་སུ་ནི། །མི་ཡི་རུས་པའི་ཕྲེང་བ་བསམ། །སྤྲོ་དང་བསྡུ་བའི་སྦྱོར་བ་ཡིས། །སྔགས་མཆོག་ཡང་དག་བཟླས་པར་བྱ། །བརྟན་པའི་སེམས་ཀྱིས་རྟོགས་གྱུར་ན། །ཚིགས་བཅད་མཁན་ནི་སྟོན་པ་རུ། །རྟག་ཏུ་བསྒོམ་པ་
[49a.7]གོམས་པ་ཡིས། །དེ་ཉིད་ཐེ་ཚོམ་མེད་པར་འགྱུར། །སྒྲོལ་མའི་སྒྲུབ་ཐབས་བྱས་པ་ལས། །བདག་གིས་དགེ་བ་གང་བསགས་པ། །རྒྱལ་བའི་བསྟན་པའི་སྟོན་པ་རུ། །དེ་ཡིས་སྲོག་ཆགས་ཐམས་ཅད་ཤོག །དེ་འདིར་བློ་དོན་སྒྲུབ་པའི་ཐབས། །རྟག་པའི་རྡོ་རྗེས་བྱས་པ་ལ། །མཁས་པ་ཟབ་མོ་
[49b]
[49b.1]འདི་ལ་ནི། །སྒྲུབ་ཐབས་ལ་ནི་བཟོད་པར་རིགས། །རྒྱ་ནག་པོའི་རིམ་པའི་སྒྲོལ་མའི་སྒྲུབ་ཐབས་སློབ་དཔོན་རྟག་པའི་རྡོ་རྗེས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། {T3374}༄༅༅། །རྒྱ་གར་སྐད་དུ། བཛྲ་ཏཱ་རཱ་སཱ་དྷ་ནཾ།
[49b.2]བོད་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། བཅོམ་ལྡན་འདས་སྒྲོལ་མ་ལ་ཕྱག་འཚལ་ལོ། །སྦྱིན་སྲེག་ལས་ཀྱི་ཆོ་ག་ཡིས། །འདོད་པའི་དོན་ཀུན་སྒྲུབ་བྱེད་པའི། །རྡོ་རྗེ་སྒྲོལ་མ་སྒྲུབ་པའི་ཐབས། །དེ་ནས་ཡང་དག་བཤད་བྱ་བ། །དེ་ལ་སྔགས་ཀྱི་ཚིག་ནི་འདི་ཡིན་ཏེ། འདི་ལྟ་སྟེ། ན་མ་ཨཱརྱ་ཨ་བ་ལོ་ཀི་
[49b.3]ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཀྲྀ་ཏེ་སརྦ་དུཥྚཱཾ་པྲ་དུཥྚཱཾ་ཛམྦྷ་ཡ། སྟམྦྷ་ཡ། མོ་ཧ་ཡ། བནྡྷ་ཡ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། སརྦ་དུཥྚཱཾ་སྟཾ་བྷ་ནི་ཏཱ་རེ་སྭཱ་ཧཱ། དེ་ལ་དང་པོ་རེ་ཞིག་རང་གི་སྙིང་གར་ཟླ་བ་ལ་ས་བོན་ཏཱཾ་བསམ་སྟེ། དེའི་འོད་ཀྱིས་བླ་མ་དང་། སངས་
[49b.4]རྒྱས་དང་། བྱང་ཆུབ་སེམས་དཔའ་སྤྱན་དྲངས་ཏེ། མཆོད་པ་རྣམ་པ་སྣ་ཚོགས་ཀྱིས་ཡང་དག་པར་མཆོད་ལ། སྡིག་པ་བཤགས་པ་ལ་སོགས་པ་བྱ་ཞིང་། གསུམ་ལ་སྐྱབས་སུ་འགྲོ་བའི་ཚིགས་བཅད་བརྗོད་པར་བྱའོ། །དེ་ནས་ཚངས་པའི་གནས་བཞི་བསྒོམས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་
[49b.5]ཨཱཏྨ་ཀོ྅ཧཾ་ཞེས་བྱ་བའི་སྔགས་བརྗོད་པར་བྱའོ། །དེ་ནས་པཾ་ལས་སྐྱེས་པའི་པདྨ་དང་ཟླ་བའི་སྟེང་དུ་ཡང་ཏཱཾ་གི་ས་བོན་ཡང་བསམས་ཏེ། དེ་ཡོངས་སུ་གྱུར་པ་ལས། མ་མོའི་དཀྱིལ་འཁོར་དབུས་གནས་པའི། །ལྷ་མོ་སྒྲོལ་མ་བསྒོམ་པར་བྱ། །ཞལ་བཞི་མ་ལ་ཕྱག་བརྒྱད་མ། །རྒྱན་རྣམས་ཀྱིས་ནི་བརྒྱན་པ་
[49b.6]ཡི། །གསེར་གྱི་མདོག་ཅན་བསྒོམ་པར་བྱ། །གཞོན་ནུ་མ་ཡི་མཚན་ཉིད་འབར། །སྣ་ཚོགས་པདྨའི་གདན་གནས་པའི། །ཟླ་བའི་གདན་ལ་ཡང་དག་བཞུགས། །སེར་དང་ནག་དང་དཀར་དང་དམར། །གཡས་སྐོར་དུ་ནི་ཞལ་བཞིའོ། །སྤྱན་གསུམ་རྡོ་རྗེ་སྐྱིལ་ཀྲུང་གནས། །འོད་དམར་སངས་རྒྱས་
[49b.7]བཞི་ཡི་དབུ་རྒྱན་ཅན། །རྡོ་རྗེ་མདའ་དང་དུང་དང་མཆོག་སྦྱིན་ནི། །གཡས་ཀྱི་ཕྱག་ན་བསྣམས་པའོ། །ཨུཏྤལ་གཞུ་དང་རྡོ་རྗེ་ལྕགས་ཀྱུ་ཞགས། །སྡིགས་མཛུབ་གཡོན་པའི་ཕྱག་རྣམས་འཆང་བའོ། །རྡོ་རྗེ་སྐྱིལ་ཀྲུང་རྣལ་འབྱོར་གྱིས། །ས་གསུམ་པོ་ཡང་བསྒྲུབ་པར་བྱ། །དེའི་མདུན་མེ་ཏོག་སྒྲོལ་
[50a]
[50a.1]མ་ནི། །མདོག་ནི་དཀར་ཞིང་ཡིད་འོང་མ། །ཨོཾ་ཡིག་ལས་ནི་ཡང་དག་རྫོགས། །མེ་ཏོག་ཕྲེང་བ་ཕྱག་ན་བསྣམས། །ཞལ་གཅིག་ཕྱག་ནི་གཉིས་པ་སྟེ། །རྒྱན་རྣམས་ཀུན་གྱིས་བརྒྱན་པའོ། །ལྷོ་ཕྱོགས་བདུག་སྤོས་སྒྲོལ་མ་ནི། །གཟུགས་མཛེས་མདོག་ནི་ནག་པོ་སྟེ། །
[50a.2]བདུག་སྤོས་སྣོད་ནི་ཕྱག་བསྣམས་ཤིང་། །རྒྱན་རྣམས་ཀུན་གྱིས་རྣམ་པར་བརྒྱན། །ནུབ་ཕྱོགས་མར་མེ་སྒྲོལ་མ་ཡང་། །མདོག་ནི་སེར་ཞིང་ཡིད་འཕྲོག་མ། །བཟང་མོ་མར་མེ་སྣོད་བསྣམས་ཤིང་། །གསེར་གྱི་རྣ་ཆ་རབ་ཏུ་གཡོ། །བྱང་ཕྱོགས་དྲི་ཡི་སྒྲོལ་མ་ནི། །དྲི་ཡི་དུང་ཆོས་ཕྱག་ན་
[50a.3]བསྣམས། །ལྷ་མོ་མདོག་ནི་དམར་འདྲ་བ། །སྙིང་པོ་དཀྱིལ་འཁོར་ལ་བསྒོམ་བྱ། །འདི་ཀུན་ཞལ་གཅིག་ཕྱག་གཉིས་པ། །རྒྱན་རྣམས་ཀྱིས་ནི་རྣམ་པར་བརྒྱན། །རྡོ་རྗེ་སྐྱིལ་མོ་ཀྲུང་གིས་སོ། །ལྷ་མོ་དྲུག་པོ་འདི་ཀུན་ནི། །ཅུང་ཟད་ཞལ་ནི་གཙིགས་པ་སྟེ། །འགྱིང་བག་བཅས་པས་ཡང་དག་
[50a.4]གནས། །འདི་དག་དཀྱིལ་འཁོར་གྱི་འཁོར་ལོ། །བསམས་ལ་ཤར་སྒོར་བསམ་པ་ནི། །རྡོ་རྗེ་ལྕགས་ཀྱུ་འོད་འབར་མ། །ཕྱག་ན་རྡོ་རྗེ་ལྕགས་ཀྱུས་མཚན། །ཡིད་འོང་མ་ཡི་བདག་ཉིད་དོ། །ལྷོ་སྒོར་རྡོ་རྗེ་ཞགས་པ་མ། །ནག་ཅིང་ཤིན་ཏུ་འདོད་ལ་དགའ། །བཟང་པོ་རྒྱན་གྱིས་བརྒྱན་པའི་ལུས། །རྡོ་རྗེ་
[50a.5]ཞགས་པ་འཆང་བའི་མཆོག །རྡོ་རྗེ་ལྕགས་སྒྲོག་མདོག་སེར་མ། །རྡོ་རྗེ་ལྕགས་སྒྲོག་ཕྱག་བསྣམས་ཤིང་། །སྣ་ཚོགས་རྒྱན་གྱིས་བརྒྱན་པ་ནི། །ནུབ་ཀྱི་སྒོ་རུ་བསམ་པར་བྱ། །བྱང་སྒོར་རྡོ་རྗེ་དྲིལ་བུ་མ། །རྡོ་རྗེ་དྲིལ་བུ་རབ་བསྣམས་པའི། །མདོག་དམར་བཟང་པོ་ཡི་ནི་གཟུགས། །དགེ་ཞིང་རྟག་པར་
[50a.6]བལྟ་བར་བྱ། །སྟེང་དུ་གཙུག་ཏོར་རྣམ་རྒྱལ་མ། །གཟུགས་བཟང་མདོག་ནི་སེར་བ་སྟེ། །བྱང་ཆུབ་འབྲས་བུ་སྦྱིན་བྱེད་བསམ། །དེ་ནས་སྔགས་པས་འཁོར་ལོ་འཆང་། །སྙིང་པོ་དཀྱིལ་འཁོར་འོག་ཏུ་ནི། །དགེ་ཞིང་འོད་འབར་བ་ཡི་གཟུགས། །ཀླུ་ཡི་ཞགས་པ་ཕྱག་ན་བསྣམས། །ཞལ་གཅིག་
[50a.7]ཕྱག་ནི་གཉིས་པ་སྟེ། །ཐམས་ཅད་མཁྱེན་པ་ཡིད་འོང་མ། །མདོག་ནག་རྣམ་པར་བསྒོམ་པར་བྱ། །ཡི་གེ་བཅུ་པོ་འདི་ཡིས་ནི། །ལྷ་མོ་བཅུ་ནི་རྣམ་པར་སྤྲུལ། །ཕ་རོལ་ཕྱིན་བཅུ་དག་པ་སྟེ། །ཆོས་ཀུན་རབ་ཏུ་འགྲུབ་པར་བྱེད། །དེ་ལ་ཡི་གེ་བཅུ་པ་ནི། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། རང་གི་སྙིང་གའི་
[50b]
[50b.1]ས་བོན་གྱི་འོད་ཀྱིས་ཡེ་ཤེས་ཀྱི་འཁོར་ལོ་སྤྱན་དྲངས་ཏེ། ཛཿཧཱུཾ་བཾ་ཧོཿཞེས་བྱ་བའི་སྔགས་ཀྱིས་དགུག་པ་ལ་སོགས་པ་བྱའོ། །དེ་བཞིན་དུ་སྐུ་གསུང་ཐུགས་བྱིན་གྱིས་བརླབ་པ་དང་། དབང་བསྐུར་བ་དང་། ཐིག་ལེ་དང་། ཕྲ་མོ་དང་། བཟླས་པ་ལ་སོགས་པ་བསྒོམ་པར་བྱའོ། །སངས་རྒྱས་ཀུན་གྱིས་
[50b.2]ཕྱག་བྱས་པ། །སྔགས་མཆོག་འདི་ནི་གཙོ་བོ་སྟེ། །བཟང་པོ་བརྗོད་པས་གྲུབ་འགྱུར་བ། །རྡོ་རྗེ་གུར་ལས་གསུངས་པའོ། །འདིར་སྔགས་འདི་ཉེ་བར་སྤྱོད་པ་ནི། སྔགས་འདིས་གོས་ཀྱི་ཐུ་བ་ནས་བཟུང་སྟེ་ལན་བདུན་བསྔགས་ལ་མདུད་པ་བྱས་ཏེ། འཇིགས་པ་དང་བཅས་པའི་ས་གང་དུ་འགྲོ་བ་ཡང་
[50b.3]འཇིགས་པར་མི་འགྱུར་རོ། །སྟག་དང་། རྐུན་མ་དང་། ཆུ་སྲིན་དང་། སེང་གེ་དང་། སྦྲུལ་དང་། གླང་པོ་དང་། མ་ཧེ་དང་། དྲེད་དང་། རྟ་ལ་སོགས་པས་ཀྱང་གནོད་པར་མི་བྱེད་དོ། །དེ་བཞིན་དུ་སྔགས་འདིས་ཨུཏྤ་ལ་བརྒྱ་རྩ་བརྒྱད་སྦྱིན་སྲེག་བྱས་ན་གང་འདོད་པ་དེ་དབང་དུ་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་
[50b.4]ཨ་མུ་ཀི་མེ་བ་ཤ་མ་ནཱ་ཡ་སྭཱ་ཧཱ། དེ་བཞིན་དུ་སྔགས་འདིས་ཁྭའི་སྒྲོ་ལ་ལན་སུམ་ཅུ་རྩ་གཉིས་བསྔགས་ལ། དགྲ་བོའི་ཁང་པར་སྦས་ན། ཞག་བདུན་གྱིས་སྐྲོད་པར་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་པྲ་ཙ་ལ་ཤཱི་གྷྲཾ་གཱ་མི་ནི་དེ་བ་དཏྟཾ་ཨུཙྪ་ཊ་ཡ་ཧཱུཾ་ཕཊ་ཅེས་བྱ་བ་ནི་བསྐྲད་པའི་ཆོ་གའོ། །དེ་བཞིན་དུ་སྦྱོར་
[50b.5]བ་གཞན་ཡང་ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་ཨ་བྷཱི་བྷཱ་ནཱཾ། ཀུ་མཱ་རི་མ་ཧྱ་མུད་བཱ་ཧེ་ན། ཏ་སྱཿཔི་ཏ་པྲ་ཡཙྪ་ཏུ་སྭཱ་ཧཱ། མྱོས་བྱེད་གཏུམ་པའི་ས་བོན་དང་། །དེ་བཞིན་སྨྱོ་བྱེད་འབྲས་བུ་དང་། །མྱ་ངན་མེད་པའི་མེ་ཏོག་འདབ། །སྟོང་ཕྲག་ལྔ་ནི་སྦྱིན་སྲེག་བྱ། །མར་དང་སྦྲང་རྩི་བུ་རམ་གྱིས། །སྦྱིན་སྲེག་བུ་མོ་
[50b.6]འགྲུབ་ལ་བསྔགས། །དེ་ནས་ཞག་བདུན་སྦྱོར་བ་ཡིས། །རང་འདོད་བུ་མོ་ཐོབ་པར་འགྱུར། །དེ་ནས་སྦྱོར་བ་གཞན་ལ་ཡང་། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷཱི་དྷཱ་ནཱཾ། སྭཱསྠཱ་ན་ཏ་ཨཱ་ཀཪྵ་ཡ་མ་མཱ་ན་ཏི་ཀེ་ཛཿཞེས་བྱ་བའི་སྔགས་འདིས་རྒྱ་ཤུག་གི་ཚེར་མ་སྟོང་ཕྲག་ལྔ་རང་བྱུང་གི་མེ་ཏོག་ལ་བསྔགས་
[50b.7]ཤིང་སྦྱིན་སྲེག་བྱས་ན་འདིས་ནི་རྒྱལ་པོའི་བུ་མོ་ཡང་འགུགས་པར་བྱེད་དོ། །དེ་ནས་གཞན་ཡང་སྦྱོར་བ་ནི་འདི་ཡིན་ཏེ། རང་བྱུང་གི་མེ་ཏོག་གིས་བསྐུས་པའི་རས་ལ། བཅོམ་ལྡན་འདས་ཞལ་གཅིག་ཕྱག་གཉིས་མ། ལྕགས་ཀྱུ་དང་། ཨུཏྤ་ལའི་ཞགས་པ་ཕྱག་ན་བསྣམས་པ་བྲིས་ལ། དེའི་མདུན་དུ་
[51a]
[51a.1]ལྷ་རྫས་མེ་ཏོག་བཟང་པོ་འདི། །ཞེས་བྱ་བ་ལ་སོགས་པས་མཆོད་པ་བྱས་ལ། བསྒོམ་པ་དང་ལྡན་པས་བཟླས་པ་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་མ་མེ་པ་ཙིཏ་སྭ་པྣཾ་ཀ་ཐཱ་ཡ་ཧཱུཾ་ཕཊ། སྟོང་ཕྲག་ལྔ་བཟླས་པས་འོང་བར་འགྱུར་རོ། །ཞགས་པས་སྐེ་ནས་བཅིངས་ཏེ་
[51a.2]ལྕགས་ཀྱུས་བུ་ག་ལ་རྐང་པ་གཉིས་ནས་ཨུཏྤལ་ཡིས་བཅིངས་ཏེ། བསྒྲུབ་བྱ་མདུན་དུ་བཀུག་སྟེ། རྐང་པའི་འོག་ཏུ་བསམས་ལ་བྲན་མོའི་གཟུགས་ཀྱིས་ལོངས་སྤྱད་པར་བྱ། དེ་ནས་སྦྱོར་བ་གཞན་ཡང་སྒྲོལ་མའི་གཟུངས་ཀྱིས་ལན་བདུན་བསྔགས་པ་སྟེ། བདག་ཉིད་ཀྱི་མིག་གཉིས་བྱུགས་ལ་རྒྱལ་
[51a.3]པོའི་རིགས་ཀྱི་ནང་དུ་ཞུགས་ན། རྒྱལ་པོ་དང་བཅས་པས་བླ་མར་བྱེད་ཅིང་གཅིག་ཏུ་དབང་དུ་བྱེད་པར་འགྱུར་རོ། །དེ་ནས་གཞན་ཡང་སྦྱོར་བ་ནི་སྒྲོལ་མའི་གཟུངས་བརྒྱ་རྩ་བརྒྱད་བརྗོད་ལ། སྦྲུལ་གྱི་རྒྱལ་པོ་མགོ་བོ་གཉིས་པའི་མགོ་ཐལ་བར་བྱ་སྟེ། བ་དམར་མོའི་མར་ལ་ཨརྒའི་སྤྲ་བ་ལ་སྡོང་བུ་བྱས་
[51a.4]ཏེ། མེ་སྤར་ལ་དུད་པ་བསགས་པར་བྱའོ། །དུད་པ་དེ་དང་རྡོ་རྗེ་ཉི་མ་དང་། རྡོ་རྗེ་ཆོས་གཉིས་དང་བསྲེས་ཤིང་མཉེས་ལ་རྟ་མཆོག་གིས་བདུག་པར་བྱའོ། །དེ་ནས་ཐལ་བ་དང་ལྷན་ཅིག་ཏུ་མིག་ལ་བསྐུས་ན་གང་རྡོ་རྗེ་མིག་གིས་བལྟས་པ་དེ། པདྨ་གར་དབང་འཛག་པར་འགྱུར་རོ། །དེ་ལྟར་མ་གྱུར་
[51a.5]ན་བདག་ཉིད་སྒྲོལ་མས་བཅོམ་ལྡན་འདས་ངེས་པར་བགྲོངས་པ་ཡིན་ནོ། །དེ་ནས་སྦྱོར་བ་གཞན་ཡང་ལྟོ་བའི་སྲིན་བུ་ལ་གཟུངས་ཀྱིས་ལན་བདུན་བསྔགས་པ། རྡོ་རྗེ་ཆོས་དང་ལྷན་ཅིག་ཏུ་བྱས་ལ། སོ་རྩི་དང་སྦྱར་ལ་སྦྱིན་ནོ། །དེ་ལོངས་སྤྱོད་ན་སྦྱོར་བའི་མཆོག་འདིས་རང་གི་ཆུང་མ་བཞིན་དུ་གཏོང་
[51a.6]བར་མི་འགྱུར་རོ། །དེ་ནས་སྦྱོར་བ་གཞན་ཡང་འདི་ཡིན་ཏེ། སོ་མ་སྐྱེས་པའི་བུ་ཆུང་གི་ལྕེ་བླངས་ལ་སྒྲོལ་མའི་གཟུངས་ཀྱིས་ལན་བདུན་བསྔགས་ལ་བྷྲྀངྒ་རཱ་ཛ་དང་། གིའུ་ཝང་དང་གཅིག་ཏུ་བྱས་ཏེ་དཔྲལ་བར་ཐིག་ལེ་བྱས་ཏེ་གང་ལ་བལྟས་པ་དེ་དབང་དུ་འགྱུར་རོ། །སྦྱོར་བ་གཞན་ཞག་ཆེན་པོས་
[51a.7]རང་གི་ལུས་ལ་བྱུགས་ཏེ་བསྒོམ་པ་དང་ལྡན་པས་སྒྲོལ་མའི་གཟུངས་ཁྲི་ཚོ་གཅིག་བཟླས་པ་བྱའོ། །བཟླས་པའི་མཐར་འབྲས་སཱ་ལུའི་ཟན་གྱིས་དྲིལ་ཕྱིས་བྱས་ལ་དྲིལ་ཕྱིས་དེ་བསྡུས་ཏེ་གང་ལ་བྱིན་པ་ཇི་སྲིད་འཚོའི་བར་དབང་དུ་འགྱུར་རོ། །སྦྱོར་བ་གཞན་ཡང་ཟླ་བ་གཟས་ཟིན་པའི་དུས་སུ་སྒྲོལ་
[51b]
[51b.1]མའི་གཟུངས་བཟླས་ཤིང་སྔོན་དུ་བསྙེན་པ་བྱས་ན། དེ་ལས་བྱུང་བའི་སྤྱན་རས་གཟིགས་ཀྱི་དབང་ཕྱུག་ཏུ་དུང་གི་ཕྱེ་མ་སྦྱོར་བར་བྱའོ། །དེ་གང་ལ་བྱིན་པ་དེ་ཇི་སྲིད་འཚོའི་བར་དུ་རྗེས་སུ་འཇུག་པར་འགྱུར་རོ། །སྦྱོར་བ་གཞན་ཡང་སྒྲོལ་མའི་གཟུངས་སྨྱོ་བྱེད་ཀྱི་འབྲས་བུ་ལ་ལན་བརྒྱ་རྩ་བརྒྱད་བསྔགས་
[51b.2]ཏེ་འབྲས་བུ་དེ་དང་། རྟ་མགྲིན་དང་ལྷན་ཅིག་ཏུ་གང་ལ་བྱུགས་པ་དེ་དབང་དུ་འགྱུར་རོ། །སྦྱོར་བ་གཞན་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་སྱ་བནྡྷ་ན་མུཀྟིཾ་ཀུ་རུ་སྭཱཧཱ། སྔགས་འདིས་ཨརྐའི་འདབ་མ་ལ་བསྒྲུབ་བྱའི་མིང་བར་དུ་བཅུག་སྟེ་བྲིས་ལ། སྲིན་བུ་ཀ་ཀ་རུའི་ཁུང་བུར་བཅུག་སྟེ་སྦས་ན། བཅིངས་
[51b.3]པ་ལས་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། {T3375}༄༅༅། །རྒྱ་གར་སྐད་དུ། ཨཱརྱ་རཀྟ་ཡ་མཱ་རི་སཱ་དྷ་ནཾ། བོད་སྐད་དུ། འཕགས་པ་གཤིན་རྗེ་གཤེད་དམར་པོའི་སྒྲུབ་པའི་
[51b.4]ཐབས། འཕགས་པ་གཤིན་རྗེ་དམར་པོ་ལ་ཕྱག་འཚལ་ལོ། །དེ་ཁོ་ན་བཞིན་དུ་སྡིག་པ་བཤགས་པ་ལ་སོགས་པ་སྔོན་དུ་འགོ་བས། སྟོང་པ་ཉིད་དུ་རྣམ་པར་བསམས་ལ་ཨཾ་དམར་པོ་ལས་སྐྱེས་པའི་ཉི་མའི་དཀྱིལ་འཁོར་ལ་ཧཱུཾ་དམར་པོ་སྟེ་དེ་ཡོངས་སུ་གྱུར་པ་ལས་མགོ་བོ་ནི་རློན་པ་སེར་པོས་
[51b.5]མཚན་པའི་དབྱུག་པ་དཀར་པོ་ལ་ཧཱུཾ་གིས་བྱིན་གྱིས་བརླབས་པ་བསྒོམ་པར་བྱའོ། །དེ་ཐམས་ཅད་ཡོངས་སུ་གྱུར་པ་ལས་བདག་ཉིད་གཤིན་རྗེ་མཐར་བྱེད་དམར་པོ་ཞལ་གཅིག་པ། ཕྱག་གཉིས་པ། གཡོན་བརྐྱང་བའི་ཞབས་ཅན་ཁྲག་གིས་ཡོངས་སུ་བཀང་བའི་ཐོད་པ་གཡོན་ནའོ། །མགོ་བོ་རློན་པ་
[51b.6]སེར་པོས་མཚན་པའི་དབྱུག་པ་ནི་གཡས་ནའོ། །ཀླུ་ཡིས་བརྒྱན་ཅིང་འཇིགས་པར་བྱེད་པ། སྐྲ་ཁམ་པ་གྱེན་དུ་བསྒྲེང་བ། སྟག་གི་ཤམ་ཐབས་ཅན་མི་བསྐྱོད་པས་དབུ་བརྒྱན་པ་རང་འོད་ཀྱི་ཤེས་རབ་མ་ལ་འཁྱུད་ཅིང་མ་ཧིརྵའི་སྟེང་ན་སྣ་ཚོགས་ཀྱི་པདྨ་དང་ཉི་མ་ལ་གནས་པ་བསམ་པར་བྱའོ། །བཅོམ་
[51b.7]ལྡན་འདས་མ་ཡང་ཞལ་གཅིག་མ། ཕྱག་གཉིས་མ་སྣ་ཚོགས་ཀྱི་རྒྱན་ཅན། གཡས་བརྐྱང་བའི་ཞབས་ཀྱིས་གནས་པ། མྱོས་བྱེད་ཀྱིས་མྱོས་ཤིང་འཛག་པ། སྟག་གི་ཤམ་ཐབས་ཅན། བཅོམ་ལྡན་འདས་མ་དང་ལྷན་ཅིག་ཏུ་ཁ་སྦྱོར་གྱི་སྦྱོར་བས་གཡོན་བརྐྱང་བའི་ཞབས་ཀྱིས་ཉེ་བར་གནས་
[52a]
[52a.1]པའོ། །དེ་ལྟར་རྣམ་པར་བསམས་ནས་སྙིང་གའི་ཉི་མ་ལ་ཧཱུཾ་ཡོངས་སུ་གྱུར་པ་ལས་མགོ་བོས་མཚན་པའི་དབྱུག་པ་དཀར་པོའི་དབུས་སུ་ཉི་མ་ལ་གནས་པའི་ཧཱུཾ་རྣམ་པར་བསྒོམ་པར་བྱའོ། །དེ་ནས་བཅོམ་ལྡན་འདས་ཀྱི་ཧཱུཾ་ཡོངས་སུ་གྱུར་པ་ལས་རྡོ་རྗེའོ། །བཅོམ་ལྡན་འདས་མའི་ཨཿ
[52a.2]ཡོངས་སུ་གྱུར་པ་ལས་པདྨ་རྣམ་པར་བསྒོམས་ལ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨ་ཀོ྅ཧཾ་ཞེས་བྱ་བས་ལྷག་པར་གནས་པར་བྱའོ། །དེའི་རྗེས་སུ་ལྟེ་བའི་འོག་ཏུ་པདྨ་དམར་པོ་འདབ་མ་བརྒྱད་པའི་སྟེང་དུ་ཧྲཱིཿཡིག་དམར་པོ་འབར་བར་བསམ་པར་བྱའོ། །དེ་ནས་ཨོཾ་ཨཱཾ་ཛྲཱི་ཁཾ་ཧཱུཾ་ཞེས་བྱ་བའི་
[52a.3]སྔགས་ཀྱི་ཡི་གེས་དམ་ཚིག་གི་རྫས་བསྟེན་པ་སྔོན་དུ་འགྲོ་བས་ཐུན་གཉིས་དང་གསུམ་དུ་བསྒོམ་པར་བྱའོ། །སྔགས་ཀྱི་བཟླས་པ་ནི་འདི་ལྟ་སྟེ། ཨོཾ་ཧྲཱིཿཥྚྲིཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་ཡ་མཱནྟ་ཀ་ཧཱུཾ་ཞེས་བྱ་བའོ། །འཕགས་པ་གཤིན་རྗེ་གཤེད་དམར་པོའི་སྒྲུབ་པའི་ཐབས་རྫོགས་སོ། །
[52a.4]པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།། {T3376}༄༅༅། །རྒྱ་གར་སྐད་དུ། མ་ཧཱ་པྲ་ཏི་སཱ་ར་སཱ་དྷ་ནཾ། བོད་སྐད་དུ། སོ་སོ་འབྲང་བ་ཆེན་མོའི་སྒྲུབ་ཐབས། བཅོམ་ལྡན་འདས་མ་སོ་སོ་འབྲང་མ་ཆེན་མོ་ལ་ཕྱག་འཚལ་ལོ། །སྔོན་དུ་བསྟན་
[52a.5]པའི་ཆོ་གས་སྟོང་པ་ཉིད་བསྒོམས་པའི་རྗེས་སུ་ཨ་ལས་སྐྱེས་པའི་ཟླ་བའི་དཀྱིལ་འཁོར་ལ་ཕྲཾ་སེར་པོ་སྣ་ཚོགས་ཀྱི་འོད་ཟེར་སྤྲོས་པས་གཞན་གྱི་དོན་བྱས་ནས་ཡོངས་སུ་གྱུར་པ་ལས་བཅོམ་ལྡན་འདས་མ་སོ་སོ་འབྲང་བ་ཆེན་མོ་སྐད་ཅིག་གིས་བསྐྱེད་པར་བྱ་སྟེ། སེར་མོ་ཞལ་བཞི་པ་སྤྱན་གསུམ་པ།
[52a.6]ཕྱག་བརྒྱད་མ་ཞལ་དང་པོ་སེར་པོ། གཡས་ཀྱི་ཞལ་དཀར་བ། ནུབ་ཕྱོགས་ཀྱི་ཞལ་སྔོ་བ། གཡོན་རབ་ཏུ་དམར་བའོ། །གཡས་པའི་ཕྱག་གཡས་རྣམས་ན་རལ་གྲི་དང་། འཁོར་ལོ་དང་། རྩེ་གསུམ་དང་། མདའོ། །གཡོན་ན་དགྲ་སྟ་དང་། གཞུ་དང་། ཞགས་པ་དང་། རྡོ་རྗེ་བསྣམས་པའི་
[52a.7]ཕྱག་གོ། །སྣ་ཚོགས་ཀྱི་པདྨ་དང་ཟླ་བའི་གདན་ལ་འགྱིང་བག་གིས་རྣམ་པར་གནོན་ཅིང་ཡང་དག་པར་གནས་པའོ། །འོད་ཀྱི་དཀྱིལ་འཁོར་དམར་པོ་ཅན། རྒྱན་ཐམས་ཅད་ཀྱིས་བརྒྱན་པའོ། །སྣ་ཚོགས་ཀྱི་ན་བཟའ་མནབས་པ། གོས་ཀྱི་སྟོད་གཡོགས་བྱས་པ། རིན་པོ་ཆེ་སྣ་ཚོགས་ཀྱི་
[52b]
[52b.1]དབུ་རྒྱན་ཅན། དེ་ལྟར་རྣམ་པར་བསམས་ལ། སྐུ་དང་གསུང་དང་ཐུགས་རྣམས་སུ་ཟླ་བ་ལ་གནས་པའི་ཨོཾ་ཨཱཿཧཱུཾ་དཀར་པོ་དང་། སེར་པོ་དང་། སྔོན་པོའི་ཡི་གེ་རྣམ་པར་བསྒོམ་མོ། །དེ་ནས་ནུ་མའི་བར་དུ་ཟླ་བ་ལ་གནས་པའི་པྲཾ་ཡིག་རྣམ་པར་བསམས་ལ། རྣམ་པ་སྣ་ཚོགས་པ་ལྷ་མོ་རྣམས་ཀྱིས་
[52b.2]བདག་ཉིད་ལ་མཆོད་པར་བལྟ་ཞིང་། སྤྲོ་བ་དང་བསྡུ་བས་ཇི་སྲིད་དུ་སྐྱོ་བར་མ་གྱུར་པ་དེ་སྲིད་དུ་བསྒོམ་པར་བྱའོ། །སྐྱོ་བར་གྱུར་ན་རང་གི་སྙིང་གའི་ཟླ་བ་ལ་སྔགས་མུ་ཏིག་གི་ཕྲེང་བའི་རྣམ་པར་བལྟས་ལ་བཟླས་པ་བྱའོ། །ཨོཾ་མ་ཎི་དྷ་རི་བཛྲཱི་ནི་མ་ཧཱ་པྲ་ཏི་སཱ་རེ་སྭཱ་ཧཱ་ཞེས་བྱ་བ་ནི་སྔགས་སོ། །སོ་སོ་འབྲང་མའི་སྒྲུབ་
[52b.3]ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། {T3377}༄༅༅། །རྒྱ་གར་སྐད་དུ། ཨུཥྞཱི་ཥ་བི་ཛ་ཡཱ་སཱ་དྷ་ནཾ། བོད་སྐད་དུ། གཙུག་ཏོར་རྣམ་པར་རྒྱལ་མའི་སྒྲུབ་ཐབས། གཙུག་ཏོར་རྣམ་པར་རྒྱལ་མ་ལ་ཕྱག་འཚལ་ལོ། །སྔོན་དུ་བསྟན་
[52b.4]པའི་ཆོ་གས་ཟླ་བ་ལ་བྷྲཱུཾ་དཀར་པོ་ཡོངས་སུ་གྱུར་པ་ལས་ཞལ་གསུམ་སྤྱན་གསུམ་མ། ལང་ཚོ་གསར་ལ་བབ་པ། ལྷ་རྫས་ཀྱི་རྒྱན་དང་ན་བཟའ་དང་ལྡན་པ། ཕྱག་བརྒྱད་པའི་གཙུག་ཏོར་རྣམ་པར་རྒྱལ་མ་བསམ་པར་བྱའོ། །སེར་པོ་དང་ནག་པོ་ནི་གཡས་པ་དང་ཅིག་ཤོས་ཀྱི་ཞལ་ལོ། །གཡས་ཀྱི་ཕྱག་
[52b.5]བཞི་རྣམས་སུ་སྣ་ཚོགས་ཀྱི་རྡོ་རྗེ་དང་། པདྨ་ལ་གནས་པའི་སངས་རྒྱས་ཀྱི་སྐུ་དང་། མདའ་དང་། མཆོག་སྦྱིན་མའོ། །གཡོན་གྱི་ཕྱག་བཞི་རྣམས་སུ་གཞུ་དང་། སྡིགས་མཛུབ་དང་བཅས་པའི་ཞགས་པ་དང་། མི་འཇིགས་པའི་ཕྱག་རྒྱ་དང་། བུམ་པ་གང་བའོ། །མཆོད་རྟེན་གྱི་ཕུག་གི་ཁོང་
[52b.6]ན་གནས་པར་བསྐྱེད་ལ། པདྨ་ལ་གནས་པའི་ས་བོན་སྙིང་གར་བསམ་པར་བྱའོ། །དེའི་རྗེས་སུ་སྤྱི་བོ་དང་། དཔྲལ་བ་དང་། མགྲིན་པ་དང་། ལྟེ་བ་དང་། རྐང་པ་རྣམས་སུ་གོ་རིམས་བཞིན་དུ་ཧཱུཾ་ཏྲཱཾ་ཧྲཱིཿཨཾ་ཨཿཞེས་བྱ་བའི་ཡི་གེའི་རྣམ་པར་བསམ་པར་བྱའོ། །ཨོཾ་བྷྲཱུཾ་སྭཱ་ཧཱ། བཟླས་པའི་སྔགས་སོ། །
[52b.7]གཙུག་ཏོར་རྣམ་པར་རྒྱལ་མའི་སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། {T3378}༄༅༅། །རྒྱ་གར་སྐད་དུ། ཨཱརྱ་མ་ཧཱ་མཱ་ཡུ་རཱི་སཱ་དྷ་ནཾ། བོད་སྐད་དུ། འཕགས་མ་རྨ་བྱ་ཆེན་མོའི་སྒྲུབ་ཐབས། འཕགས་མ་རྨ་བྱ་
[53a]
[53a.1]ཆེན་མོ་ལ་ཕྱག་འཚལ་ལོ། །སྔོན་གྱི་དེ་ཁོ་ན་བཞིན་དུ་བྱས་ལ། སྟོང་པ་ཉིད་བསྒོམས་པའི་རྗེས་སུ་སྣ་ཚོགས་ཀྱི་པདྨ་དང་ཟླ་བ་ལ་མཾ་ཡིག་ལྗང་གུ་ཡོངས་སུ་གྱུར་པ་ལས་འཕགས་མ་རྨ་བྱ་ཆེན་མོ་མདོག་ལྗང་གུ་ཞལ་གསུམ་མ། ཕྱག་དྲུག་མ། ཞལ་སོ་སོ་ལ་སྤྱན་གསུམ་
[53a.2]གསུམ་མོ། །ནག་པོ་དང་དཀར་པོ་ནི་གཡས་དང་ཅིག་ཤོས་ཀྱི་ཞལ་ལོ། །གཡས་པའི་ཕྱག་གསུམ་རྣམས་སུ་གོ་རིམས་བཞིན་དུ་རྨ་བྱའི་གཞུག་སྒྲོ་དང་། མདའ་དང་། མཆོག་སྦྱིན་པའོ། །དེ་བཞིན་དུ་གཡོན་པའི་ཕྱག་གསུམ་རྣམས་སུ་རིན་པོ་ཆེའི་རྔ་ཡབ་དང་། གཞུ་དང་། འཇོང་བར་
[53a.3]བཀན་ནས་གནས་པ་ལ་བུམ་པའོ། །སྣ་ཚོགས་ཀྱི་རྒྱན་དང་གོས་འཆང་བ། སྒེག་ཅིང་ལང་ཚོ་ལ་བབ་པའི་ཆ་ལུགས་ཅན། ཟླ་བའི་གདན་དང་ཟླ་བའི་རྒྱབ་རྟེན་ཅན། སྐྱིལ་ཀྲུང་ཕྱེད་མ་ཅན། དོན་ཡོད་གྲུབ་པས་དབུ་རྒྱན་བྱས་པ། སྐད་ཅིག་གིས་བདག་ཉིད་ཡོངས་སུ་རྫོགས་པར་བྱས་ལ། དེའི་
[53a.4]སྤྱི་བོ་དང་། མགྲིན་པ་དང་། སྙིང་ག་དང་། ལྟེ་བ་དང་། ཟླ་བ་ལ་གནས་པ་ཇི་ལྟ་བའི་གོ་རིམས་བཞིན་དུ་ཨོཾ་ཨཱཿམཱཾ་ཧཱུཾ་ཞེས་བྱ་བའི་ཡི་གེ་བཞི་བསྒོམས་ལ་སྤྲོ་བར་བྱའོ། །དེ་ནས་སྐྱོན་སྔགས་བཟླས་པར་བྱའོ། །འདི་ལྟ་སྟེ་ཨོཾ་མ་ཧཱ་མཱ་ཡུ་རཱི་བིདྱཱ་རཱ་ཛྙཱི་ཧཱུཾ་ཧཱུཾ་ཕཊ་ཕཊ་ཅེས་བྱའོ། །འཕགས་མ་རྨ་བྱ་ཆེན་
[53a.5]མོའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3379}༄༅༅། །རྒྱ་གར་སྐད་དུ། མ་ཧཱ་སཱ་ཧ་སྲ་པྲ་མརྡ་ནཱི་སཱ་དྷ་ནཾ། བོད་སྐད་དུ། སྟོང་ཆེན་མོ་རབ་ཏུ་འཇོམས་མ་ཞེས་བྱ་བའི་སྒྲུབ་ཐབས། འཕགས་མ་སྟོང་ཆེན་མོ་རབ་ཏུ་འཇོམས་མ་
[53a.6]ལ་ཕྱག་འཚལ་ལོ། །སྔོན་བཞིན་ཁོ་ནར་ཐམས་ཅད་བྱས་ལ། སྟོང་པ་ཉིད་ཀྱི་རྗེས་སུ་སྟོང་ཆེན་མོ་རབ་ཏུ་འཇོམས་མ་དཀར་མོ་ཞལ་གཅིག་མ། ཕྱག་དྲུག་པ། གཡས་པའི་ཕྱག་གསུམ་རྣམས་སུ་གོ་རིམས་ཇི་ལྟ་བར་རལ་གྲི་དང་། མདའ་དང་མཆོག་སྦྱིན་པའོ། །གཡོན་པའི་ཕྱག་གསུམ་རྣམས་སུ་གཞུ་དང་། ཞགས་
[53a.7]པ་དང་དགྲ་སྟའོ། །སྣ་ཚོགས་པའི་ཆ་ལུགས་ཀྱི་ན་བཟའ་དང་། རྒྱན་དང་། དབུ་རྒྱན་དང་། ལང་ཚོ་ལ་བབས་པའི་གཟུགས་སྒེག་པ་ལ་སོགས་པའི་ཡོན་ཏན་ཅན་རྣམ་པར་སྣང་མཛད་ཀྱི་དབུ་རྒྱན་ཅན། བྲུཾ་གྱི་ས་བོན་ལས་བྱུང་བའི་ཟླ་བའི་གདན་དང་ཟླ་བའི་རྒྱབ་རྟེན་ཅན་ནོ། །ཨོཾ་བྲུཾ་ཞེས་པའི་སྔགས་བརྗོད་པར་བྱའོ། །
[53b]
[53b.1]འཕགས་མ་སྟོང་ཆེན་མོ་རབ་ཏུ་འཇོམས་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། {T3380}༄༅༅། །རྒྱ་གར་སྐད་དུ། མ་ཧཱ་མནྟྲ་ཨ་ནུ་དྷཱ་རི་ཎི་སཱ་དྷ་ནཾ། བོད་སྐད་དུ། གསང་སྔགས་རྗེས་སུ་འཛིན་མ་ཆེན་མོའི་སྒྲུབ་ཐབས་
[53b.2]འཕགས་མ་གསང་སྔགས་རྗེས་སུ་འཛིན་མ་ལ་ཕྱག་འཚལ་ལོ། །གསང་སྔགས་རྗེས་སུ་འཛིན་མ་ཞལ་གཅིག་མ། ཕྱག་བཞི་མ། ནག་མོ་གཡས་ཀྱི་ཕྱག་གཉིས་ན་ཇི་ལྟ་བུའི་སྦྱོར་བས། རྡོ་རྗེ་དང་། མཆོག་སྦྱིན་པའི་ཕྱག་གོ། །གཡོན་པའི་ཕྱག་གཉིས་ན་དགྲ་སྟ་དང་ཞགས་པའོ། །ཧཱུཾ་གི་ས་བོན་ཅན་
[53b.3]མི་བསྐྱོད་པའི་དབུ་རྒྱན་དང་ལྡན་པ། ཉི་མའི་གདན་དང་། རྒྱབ་རྟེན་ལ་སོགས་པ་དང་ལྡན་པ་སྔོན་བཞིན་ནོ། །གསང་སྔགས་ཆེན་མོ་རྗེས་སུ་འཛིན་མའི་སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། །།
[53b.4]{T3381}༄༅༅། །རྒྱ་གར་སྐད་དུ། མ་ཧཱ་ཤཱི་ཏ་བ་ཏཱི་སཱ་དྷ་ནཾ། བོད་སྐད་དུ། བསིལ་བའི་ཚལ་ཆེན་མོའི་སྒྲུབ་པའི་ཐབས། འཕགས་མ་བསིལ་བའི་ཚལ་ཆེན་མོ་ལ་ཕྱག་འཚལ་ལོ། །བསིལ་བའི་ཚལ་ཆེན་མོ་ཞལ་གཅིག་མ། ཕྱག་བཞི་པ་མདོག་དམར་བ། གཡས་པའི་ཕྱག་གཉིས་ན་
[53b.5]ཕྲེང་བ་དང་། མཆོག་སྦྱིན་པའི་ཕྱག་རྒྱའོ། །གཡོན་པའི་ཕྱག་གཉིས་ན་རྡོ་རྗེ་ལྕགས་ཀྱུ་དང་། སྙིང་གར་གནས་པའི་པོ་ཏི་ཕྱག་ནའོ། །ཛྲྀཾ་གི་ས་བོན་ནོ། །འོད་དཔག་མེད་པའི་དབུ་རྒྱན་ཅན། སྐྱིལ་ཀྲུང་ཕྱེད་པ། ན་བཟའ་དང་རྒྱན་ལ་སོགས་པ་དང་། ཉི་མའི་རྒྱབ་རྟེན་དང་གདན་དང་ལྡན་པའོ། །བཟླས་
[53b.6]པའི་སྔགས་ནི། ཨོཾ་ཛྲྀཾ་སྭཱ་ཧཱ། བཟླའོ། །འཕགས་མ་བསིལ་བའི་ཚལ་ཆེན་མོའི་སྒྲུབ་པའི་ཐབས་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3382}༄༅༅། །རྒྱ་གར་སྐད་དུ། མ་ཧཱ་པྲ་ཏྱཾ་གཱི་ར་སཱ་དྷ་ནཾ། བོད་སྐད་དུ།
[53b.7]ཕྱིར་བཟློག་མ་ཆེན་མོའི་སྒྲུབ་ཐབས། འཕགས་མ་ཕྱིར་བཟློག་མ་ཆེན་མོ་ལ་ཕྱག་འཚལ་ལོ། །ཕྱིར་བཟློག་མ་ཆེན་མོ་ནག་མོ་ཞལ་གཅིག་ཕྱག་དྲུག་མར་འདོད་དོ། །རལ་གྲི་དང་། ལྕགས་ཀྱུ་དང་། མཆོག་སྦྱིན་པ་ནི་གཡས་ཀྱི་ཕྱག་གོ། །པདྨ་དམར་པོ་དང་། རྩེ་གསུམ་དང་། སྙིང་གར་
[54a]
[54a.1]གནས་པའི་ཞགས་པ་དང་བཅས་པའི་སྡིགས་མཛུབ་དང་ལྡན་པ་ནི་གཡོན་པའི་ཕྱག་གོ། །ས་བོན་ནི་ཧཱུཾ་ངོ་། །མི་བསྐྱོད་པས་དབུ་བརྒྱན་པའོ། །ལྷ་རྫས་ཀྱི་ན་བཟའ་དང་། རྒྱན་དང་ལྡན་པའི་རྣལ་འབྱོར་མ་ཞེས་བྱ་བ་ལ་སོགས་པའོ། །ཨོཾ་ཧཱུཾ་སྭཱ་ཧཱ། བཟླས་པའི་
[54a.2]སྔགས་སོ། །ཕྱིར་བཟློག་པ་ཆེན་མོའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3383}༄༅༅། །རྒྱ་གར་སྐད་དུ། དྷྭ་ཛ་ཨ་གྲ་ཀེ་ཡཱུ་ར་སཱ་དྷ་ནཾ། བོད་སྐད་དུ། རྒྱལ་མཚན་གྱི་རྩེ་མོའི་དཔུང་རྒྱན་གྱི་སྒྲུབ་ཐབས། རྒྱལ་མཚན་གྱི་རྩེ་
[54a.3]མོའི་དཔུང་རྒྱན་ལ་ཕྱག་འཚལ་ལོ། །རྒྱལ་མཚན་གྱི་རྩེ་མོའི་དཔུང་རྒྱན་ནག་མོ་ཞལ་གསུམ་ཕྱག་བཞི་མ། གཡས་ཡི་ཞལ་དམར་བ། གཡོན་གྱི་ཞལ་ལྗང་གུ་རལ་གྲི་དང་ཞགས་པ་ནི་གཡས་ཀྱི་ཕྱག་གཉིས་ནའོ། །རྡོ་རྗེས་མཚན་པའི་ཁ་ཊྭཱཾ་ག་དང་། འཁོར་ལོ་ནི་གཡོན་གྱི་ཕྱག་གཉིས་ནའོ། །སྐྲ་ཁམ་
[54a.4]པ་གྱེན་དུ་འགྲེང་མ། ཐོད་པ་སྐམ་པོ་ལྔའི་ཕྲེང་བས་མགོ་ལ་བརྒྱན་པ། སྟག་གི་པགས་པའི་ཤམ་ཐབས་ཅན་ཞལ་མཆེ་བ་རྣམ་པར་གཙིགས་པ། ལྟོ་བ་འཕྱང་བ། ཉི་མའི་འོད་དང་ཟླ་བའི་གདན་ལ་གཡོན་བརྐྱང་བའི་ཞབས་ཀྱིས་གནས་པ། ན་བཟའ་སེར་པོའི་ཤ་འགག་ཅན། ས་བོན་ནི་ཧཱུཾ་སྟེ་མི་བསྐྱོད་
[54a.5]པའི་དབུ་རྒྱན་ཅན། འགྲོ་བའི་དོན་དུ་བསྒོམ་པར་བྱའོ། །ཨོཾ་ཧཱུཾ་སྭཱ་ཧཱ། བཟླས་པའི་སྔགས་སོ། །རྒྱལ་མཚན་རྩེ་མོའི་དཔུང་རྒྱན་གྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3384}༄༅༅། །རྒྱ་གར་སྐད་དུ། ཨ་པ་རཱ་ཛི་ཏ་སཱ་དྷ་ནཾ། བོད་སྐད་
[54a.6]དུ། རྣམ་པར་རྒྱལ་མའི་སྒྲུབ་པའི་ཐབས། འཕགས་མ་ཁྲོས་མ་རྣམ་པར་རྒྱལ་མ་ལ་ཕྱག་འཚལ་ལོ། །རྣམ་པར་རྒྱལ་མ་སེར་མོ་ཞལ་གཅིག་ཕྱག་གཉིས་མ། ལྷ་རྫས་ཀྱི་རིན་པོ་ཆེ་སྣ་ཚོགས་ཀྱིས་མཛེས་མ། ཚོགས་བདག་རྣམ་པར་མནན་མ། གཡས་པ་ཐལ་མོ་སྦྱར་བའི་ཚུལ་བྱས་པའི་ཕྱག་གོ། །
[54a.7]གཡོན་ན་ཞགས་པ་དང་བཅས་པའི་སྡིགས་མཛུབ་སྙིང་གར་འཆང་བའི་ཕྱག་གོ། །ཤིན་ཏུ་འཇིགས་པར་བྱེད་པའི་མཆེ་བ་གཙིགས་ཤིང་དྲག་པའི་ཞལ་ཅན་མ། མ་ལུས་པའི་བདུད་འཇོམས་པ། ཚངས་པ་ལ་སོགས་པ་གདུག་ཅིང་མི་བཟད་པའི་རྣམ་པའི་ལྷ་རྣམས་ཀྱིས་བསྐོར་ཞིང་། གདུགས་འཕྱར་ཞིང་
[54b]
[54b.1]བསླང་བའོ། །རྣམ་པར་རྒྱལ་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3385}༄༅༅། །རྒྱ་གར་སྐད་དུ། བཛྲ་གནྡྷ་རཱི་སཱ་དྷ་ནཾ། བོད་སྐད་དུ། རྡོ་རྗེ་གནྡྷ་རཱིའི་སྒྲུབ་ཐབས། རྡོ་རྗེ་གནྡྷ་རཱི་ལ་ཕྱག་འཚལ་ལོ། །རྡོ་རྗེ་གནྡྷ་རི་ནི་ནག་
[54b.2]མོ་ཞལ་དྲུག་མ། ཕྱག་བཅུ་གཉིས་མ། དབུ་སྐྲ་ཁམ་པ་གྱེན་དུ་འགྲེང་མ། གཡོན་བརྐྱང་བའི་ཞབས་ཅན། ཞལ་མཆེ་བ་གཙིགས་པ། ཞལ་སོ་སོ་ལ་སྤྱན་གསུམ་གསུམ་མོ་གཡས་པའི་ཕྱག་དྲུག་རྣམས་སུ་གོ་རིམས་ཇི་ལྟ་བས་རྡོ་རྗེ་དང་དྲིལ་བུ་དང་། རལ་གྲི་དང་། རྩེ་གསུམ་དང་། མདའ་དང་།
[54b.3]སྲུང་བའི་འཁོར་ལོ་གཡོན་པའི་ཕྱག་དྲུག་རྣམས་སུ་ཁ་ཊྭཱཾ་ག་དང་། ལྕགས་ཀྱུ་དང་། གཞུ་དང་། དགྲ་སྟ་དང་། ཞགས་པ་དང་། སྙིང་གར་སྡིགས་མཛུབ་བོ། །ཞལ་གཞན་ལྔའི་ཁ་དོག་ལྔ་སྟེ། སྣ་ཚོགས་ཀྱི་པདྨ་དང་ཉི་མའི་གདན་ལའོ། །ཡང་གཟུངས་ནི་འདི་ཡིན་ཏེ། ན་མོ་རཏྣ་ཏྲ་ཡཱ་ཡ། ན་མཿ
[54b.4]ཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བྷ་ག་བ་ཏཱི་མ་ཧཱ་བཛྲ་གནྡྷ་རི་ཨ་ནེ་ཀ་ཤ་ཏ་ས་ཧ་སྲ། པྲ་ཛྭ་ལི་ཏ་དཱི་པ་ཏི་ཧེ་ཛ་ཡཻ། ཨུ་གྲ་བྷཱི་མ་བྷ་ཡ་ན་ཀ་ཡཻ། ཡོ་གཱི་ནཱི་ཡེ་བྷིཥྨ་བྷ་གི་ནི་ཡཻ། དྭ་ད་ཤ་བྷུ་ཛ་ཡཻ། བྷི་ཀཱིརྞ་ཀཻ་ཤེ་ཡཻ། ཨ་ཎེ་ཀ་རཱུ་པ་བི་བི་དྷ་བེ། ས་དྷ་རི་ཎེ་ཡེ། ཨེ་ཧྱེ་ཧི་བྷ་ག་བ་ཏཱི་མ་ཧཱ་
[54b.5]གནྡྷ་རི། ཏྲཱ་ཡ་ནཱ་རཏྣ་ནཱཾ་ས་ཏྱ་ན། ཨ་ཀཌྜྷྱ་ཨ་ཀ་ཌྜྷྱ། བ་ལ་དེ་བཱ་དི་ཀཾ། ཡེ་ཙ་ནྱེ་ས་མ་ཡེ་ན་ཏིཥྛ་ན་ཏི། ཏཱ་ནཱ་བརྟ་ཡི་ཥྱཱ་མི། སཱི་གྷྲཾ། གྲྀཧྞ་གྲྀཧྞ། ཨོཾ་ཨ་ལ་ཨ་ལ། ཧུ་ལུ་ཧུ་ལུ། མུ་ལུ་མུ་ལུ། ཙུ་ལུ་ཙུ་ལུ། དྷ་མ་དྷ་མ། རངྒ་རངྒ། རདྒཱ་པ་ཡ། རངྒཱ་པ་ཡ། པཱུ་ར་ཡ་པཱུ་ར་ཡ། ཨཱ་བི་ཤ་ཨཱ་
[54b.6]བི་ཤ། བྷ་ག་བ་ཏཱི། མ་ཧཱ་བཛྲ་གནྡྷ་རི། སིདྡྷ་ཙཎྜ། བཛྲ་པཱ་ཎི་རཱ་ཛྙཱ་པ་ཡ་ཏི་ཧྲཱིཿཧ་ཧཿཧཱུཾ་ཕཊ་སྭཱ་ཧཱ། འདིའི་ལས་ཀྱི་ཚོགས་ཀྱིས་ནི་སྣ་ཚོགས་རྣམ་པ་མང་པོ་བྱེད་དོ། །རྡོ་རྗེ་གནྡྷ་རཱིའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། །།
[54b.7]{T3386}༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་སཱ་དྷ་ནཾ། བོད་སྐད་དུ། དཔལ་མགོན་པོ་ནག་པོའི་སྒྲུབ་པའི་ཐབས། དཔལ་མགོན་པོ་ནག་པོ་ལ་ཕྱག་འཚལ་ལོ། །དེ་ཁོ་ན་བཞིན་དུ་སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་ལ། དེའི་རྗེས་སུ་སྣ་ཚོགས་པདྨ་དང་ཉི་མ་ལ་ཧཱུཾ་ནག་པོའོ། །
[55a]
[55a.1]དེ་ཉིད་ཡོངས་སུ་གྱུར་པའི་དཔལ་མགོན་པོ་ནག་པོ་རྗེ་བཙུན་ཞལ་གཅིག་ཕྱག་གཉིས་པ་མདོག་ནག་པོ་སྤྱན་གསུམ་པ་འབར་ཞིང་ཆེ་བའི་གྲི་གུག་དང་ཐོད་པ་གཡས་པ་དང་གཡོན་པའི་ཕྱག་ན་བསྣམས་པ། མགོའི་ཕྲེང་བས་བརྒྱན་པ། སྐྲ་ཁམ་པ་གྱེན་དུ་འགྲེང་བ། ཡན་ལག་
[55a.2]ལ་དོ་ཤལ་ཅན་མཆེ་བ་གཙིགས་ཤིང་འཇིགས་པར་བྱེད་པ། སྦྲུལ་གྱིས་ཡན་ལག་ཐམས་ཅད་བརྒྱན་པ། གཟུགས་ཐུང་བ། ཁ་ནས་ཁྲག་འཛག་པའི་བདག་ཉིད་དུ་སྐད་ཅིག་གིས་རྫོགས་པར་བྱས་ལ། སྔགས་བཟླས་པར་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་མ་ཧཱ་ཀཱ་ལ་ཧཱུཾ་ཧཱུཾ་ཕཊ་ཕཊ་སྭཱ་ཧཱ།
[55a.3]དུག་དང་ཁྲག་དང་། སྒོག་པ་དང་། ཡུངས་ཀར་གྱིས་ནག་པོ་ཆེན་པོ་ལ་བདུག་སྤོས་བྱིན་ལ། མོན་སྲན་གྲེའུ་དང་། འབྲས་བསྲེས་པའི་ཟན་དང་ཆང་དང་། མེ་ཏོག་དང་། བདུག་སྤོས་དང་། བྱུག་པ་དང་། ཤ་རྣམ་པ་ལྔ་དང་། བདུད་རྩི་ནག་པོ་ཆེན་པོ་ལ་གཏོར་མ་སྔགས་འདིས་སྦྱིན་པར་བྱའོ། །འདི་ལྟ་སྟེ། ཨོཾ་
[55a.4]མ་ཧཱ་ཀཱ་ལཱ་ཡཱ། ཤཱ་ས་ན་ཨུ་པ་ཧཱ་རི་ཎི། ཨེ་ཥ་ཨ་པཥྩི་མ་ཀཱ་ལོ། ཨ་ཡཾ་ཨི་དཾ་རཏྣ་ཏྲཱ་ཡ། ཨ་པ་ཀཱ་རི་ཎཾ། ཡ་དི་པྲ་ཏཱི་ཛྙཱ་སྨ་ར་སི་ཏ་དཱ། ཨི་དཾ་དུཥྚཾ་ཁ་ཁ་ཁཱ་ཧི་ཁཱ་ཧི། མ་ར་མ་ར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་མཱ་ར་ཡ། ཧཱུཾ་ཧཱུཾ་ཕཊ་ཕཊ། དེ་ལ་འདིའི་ཉེ་བར་སྤྱོད་པ་ནི་
[55a.5]ཚ་བ་གསུམ་གྱིས་བསྒྲུབ་བྱའི་གཟུགས་བརྙན་བྱས་ལ། ལུས་ལ་ཚེར་མས་བཀང་ལ་དུག་དང་། སྐེ་ཚེས་ཆོ་ག་བཞིན་དུ་བྱུགས་ལ། མེ་ལ་གདུང་བར་བྱའོ། །གང་གི་མིང་ནས་གཟུང་བ་དེ་དེའི་དུས་དེ་ཉིད་དུ་མི་སྣང་ཞིང་ཉམས་པར་འགྱུར་རོ། །དེ་བཞིན་དུ། གང་ཡང་རྟག་ཏུ་སློབ་དཔོན་དང་། དཀོན་མཆོག་
[55a.6]གསུམ་ལ་གནོད་པ་དང་། སེམས་ཅན་མང་ལ་འཚེ་བྱེད་པ། །ནག་པོ་ཆེན་པོས་ཟ་བར་འགྱུར། །དེ་ཡི་ཡན་ལག་ཤ་བཅད་ཅིང་། །ཁྲག་ཀྱང་རབ་ཏུ་འཐུང་བར་འགྱུར། །དེ་བཞིན་མགོ་སྟེང་གནས་ནས་ནི། །ཏིལ་འབྲུའི་ཚད་ཙམ་གཅོད་པར་བྱེད། །ཅེས་བྱ་བ་ལ་སོགས་པ་རྟོགས་པར་བྱའོ། །དཔལ་མགོན་པོ་
[55a.7]ནག་པོའི་སྒྲུབ་ཐབས། བྲམ་ཟེ་མཆོག་སྲེད་ཀྱིས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། {T3387}༄༅༅། །རྒྱ་གར་སྐད་དུ། བཛྲ་སྲྀ་ཁ་ལཱ་སཱ་དྷ་ནཾ། བོད་སྐད་དུ། རྡོ་རྗེ་ལྕགས་སྒྲོག་གི་སྒྲུབ་པའི་ཐབས། རྡོ་རྗེ་ལྕགས་
[55b]
[55b.1]སྒྲོག་མ་ལ་ཕྱག་འཚལ་ལོ། སྔོན་དུ་བསྟན་པའི་ཆོ་གས་རང་གི་སྙིང་གར་ཟླ་བའི་དཀྱིལ་འཁོར་ལ་ཧཱུཾ་ལྗང་གུའི་ཡི་གེ་ལས་ངེས་པར་རྫོགས་པའི་རྡོ་རྗེ་ལྕགས་སྒྲོག་མ་ཞལ་གསུམ་ཕྱག་དྲུག་མ། སྔོན་པོ་དང་དཀར་པོ་ནི་གཡས་དང་། ཅིག་ཤོས་ཀྱི་ཞལ་ལོ། །ཞལ་རེ་རེ་ལ་སྤྱན་གསུམ་གསུམ་མོ། །རྡོ་རྗེ་དང་རྡོ་རྗེ་
[55b.2]ལྕགས་སྒྲོག་དང་། མདའ་ནི་གཡས་ཀྱི་ཕྱག་གསུམ་ནའོ། །སྡིགས་མཛུབ་དང་། ཞགས་པ་དང་། གཞུ་ནི་གཡོན་གྱི་ཕྱག་གསུམ་ནའོ། །མདོག་ལྗང་སེར་ཞལ་ཅུང་ཞིག་བཞད་པ། རྒྱན་ཐམས་ཅད་ཀྱིས་བརྒྱན་པ། གདུག་པ་ཅན་གྱི་སེམས་ཅན་འདུལ་བའི་བདག་ཉིད་དུ་བསམས་ལ། ཕྱག་རྒྱ་
[55b.3]བཅིང་བར་བྱ་སྟེ། དེ་ལ་ལག་པ་གཉིས་སོ་སོར་ཁུ་ཚུར་བཅིངས་ནས། མཐེའུ་ཆུང་དང་སྡིགས་མཛུབ་གཉིས་ལྕགས་སྒྲོག་གི་རྣམ་པ་ཅན་དུ་བཅིང་བར་བྱ་བ་ནི་རྡོ་རྗེ་ལྕགས་སྒྲོག་གི་ཕྱག་རྒྱའོ། །དེ་ནས་བཟླས་པ་ནི། ཨོཾ་བཛྲ་སྲྀ་ཁ་ལེ་ཧཱུཾ་ཕཊ་སྭཱ་ཧཱ་ཞེས་བྱའོ། །རྡོ་རྗེ་ལྕགས་སྒྲོག་གི་སྒྲུབ་ཐབས་རྫོགས་སོ། །
[55b.4]པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3388}༄༅༅། །རྒྱ་གར་སྐད་དུ། མ་ཧཱ་བ་ལ་སཱ་དྷ་ནཾ། བོད་སྐད་དུ། སྟོབས་པོ་ཆེའི་སྒྲུབ་ཐབས། །བཅོམ་ལྡན་འདས་སྟོབས་པོ་ཆེ་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་དུ་བསྒོམས་པའི་རྗེས་
[55b.5]སུ་པདྨ་དཀར་པོ་དང་། ཉི་མ་ལ་ཧཱུཾ་ལས་བསྐྱེད་པའི་སྟོབས་པོ་ཆེ་ཞལ་གཅིག་ཕྱག་བཞི་པ། ཡན་ལག་ཐམས་ཅད་དམར་པོ། སྐྲ་ཁམ་པ་གྱེན་དུ་བགྲེང་བ། སྦྲུལ་གྱིས་བཅིངས་པ། ཕྱག་གཡས་ཀྱི་དང་པོ་ན་དབྱུག་པ་དཀར་པོ་བསྣམས་པ། གཡས་ཀྱི་གཉིས་པ་ན་རྔ་ཡབ་དཀར་པོ་བསྣམས་པ། ཕྱག་
[55b.6]གཡོན་གྱི་དང་པོ་ན་ཕྱག་འཚལ་བའི་ཚུལ་དུ་བྱེད་པའི་ཕྱག་གོ། །གཡོན་གྱི་ཕྱག་གཉིས་པ་ན་སྡིགས་མཛུབ་དང་བཅས་པའི་ཞགས་པའོ། །སྟག་གི་པགས་པའི་ཤམ་ཐབས་ཅན། སྦྲུལ་གྱི་རྒྱན་སྣ་ཚོགས་ཀྱིས་བརྒྱན་ཅིང་མཛེས་པ། གཡོན་བརྐྱང་བའི་ཞབས་ཅན། ཞལ་མཆེ་བ་གཙིགས་པ་ཉི་མའི་
[55b.7]དཀྱིལ་འཁོར་འོད་ཀྱི་ཕྲེང་བ་དང་ལྡན་པ། དམ་ཚིག་སེམས་དཔར་བདག་ཉིད་རྫོགས་པར་བྱས་ལ། ཡེ་ཤེས་སེམས་དཔའ་དང་གཅིག་ཏུ་བྱས་ལ། འོད་དཔག་མེད་པས་དབུ་བརྒྱན་པར་བསམ་པར་བྱའོ། །དེ་ནས་སྔགས་བཟླས་པར་བྱའོ། །འདི་ལྟ་སྟེ། ཨོཾ་མ་ཧཱ་བ་ལ་སྭཱ་ཧཱ་ཞེས་བྱའོ། །སྟོབས་པོ་ཆེའི་
[56a]
[56a.1]སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། {T3389}༄༅༅། །རྒྱ་གར་སྐད་དུ། སི་ཏཱ་ཏ་པ་ཏྲཻ་ནཱ་མ་ཨ་པ་རཱ་ཛི་ཏཱ་སཱ་དྷ་ནཾ། བོད་སྐད་དུ། གཞན་གྱིས་མི་ཐུབ་པ་གདུགས་དཀར་མོ་ཞེས་བྱ་བའི་སྒྲུབ་
[56a.2]ཐབས། འཕགས་མ་གདུགས་དཀར་མོ་ཅན་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་རང་གི་སྙིང་གར་ཟླ་བའི་དཀྱིལ་འཁོར་ལ། ཨོཾ་གྱི་ས་བོན་དཀར་པོ་ལས་ཡོངས་སུ་རྫོགས་པའི་གཞན་གྱིས་མི་ཐུབ་པ་གདུགས་དཀར་མོ་ཅན་ཞེས་བྱ་བ་ཞལ་གསུམ་པ། ཕྱག་དྲུག་མ། ཞལ་སོ་སོ་ལ་སྤྱན་
[56a.3]གསུམ་གསུམ་མོ། །ཡན་ལག་ཐམས་ཅད་དང་རྩ་བའི་ཞལ་ནི་དཀར་པོའོ། །སྔོན་པོ་དང་དམར་པོ་ནི་གཡོན་པ་དང་གཡས་ཀྱི་ཞལ་ལོ། །འཁོར་ལོ་དང་ལྕགས་ཀྱུ་དང་གཞུ་ནི་གཡས་ཀྱི་ཕྱག་ནའོ། །རྡོ་རྗེ་དཀར་པོ་དང་མདའ་དང་། ཞགས་པ་དང་བཅས་པའི་སྡིགས་མཛུབ་ནི་གཡོན་གྱི་ཕྱག་ནའོ། །ཁྲོ་
[56a.4]བོའི་ལྟ་སྟངས་དང་བཅས་པས་གཟའ་ཐམས་ཅད་འཇོམས་པར་བྱེད་མ། ལྷ་རྫས་ཀྱི་རྒྱན་དང་ན་བཟས་རྣམ་པར་བརྒྱན་མ། རྣམ་པར་སྣང་མཛད་སྤྱི་བོར་གནས་པར་བསམས་ལ། ཕྱག་རྒྱ་བཅིང་བར་བྱའོ། །དེ་ལ་གཡས་པའི་ལག་པའི་ཁུ་ཚུར་དང་། སྡིགས་མཛུབ་ནི་སྙིང་གར་ཡང་དག་པར་བཞག་ལ།
[56a.5]གཡོན་པའི་ལག་པ་རྡོ་རྗེ་ཁུ་ཚུར་སྟེང་དུ་འཕྱར་བའོ། །བཟླས་པ་ནི། ཨོཾ་སཱི་ཏཱ་ཏ་པ་ཏྲེ། ཨ་པ་རཱ་ཛི་ཏེ། སརྦ་གྲ་ཧ་ཨ་ནུ་ཏྲཱ་ཤ་ཡ་ཏྲཱ་ཤ་ཡ། ཧ་ན་ཧ་ན། དྲུཾ་དྲུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་བྱའོ། །འཕགས་མ་གཞན་གྱིས་མི་ཐུབ་པ་ཞེས་བྱ་བའི་གདུགས་དཀར་མོ་ཅན་གྱི་སྒྲུབ་པའི་ཐབས་རྫོགས་སོ། །པཎྜི་ཏ་དོན་
[56a.6]ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3390}༄༅༅། །རྒྱ་གར་སྐད་དུ། ཧ་ཡ་གྲཱི་བ་སཱ་དྷ་ནཾ། བོད་སྐད་དུ། རྟ་མགྲིན་གྱི་སྒྲུབ་པའི་ཐབས། དཔལ་རྟ་མགྲིན་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྣ་ཚོགས་པདྨ་དང་ཉི་མ་ལ་ཧཱུཾ་དམར་པོའི་ཡེ་ཤེས་ལས་
[56a.7]ཡོངས་སུ་རྫོགས་པའི་འཕགས་པ་རྟ་མགྲིན་མདོག་དམར་བ། ཞལ་གསུམ་པ། ཕྱག་བརྒྱད་པ། ཞལ་སོ་སོ་ནས་སྤྱན་གསུམ་གསུམ་མོ། །སྔོན་པོ་དང་དཀར་པོ་ནི་གཡས་དང་ཅིག་ཤོས་ཀྱི་ཞལ་ལོ། །སྦྲུལ་གྱི་རྒྱན་ཅན་འགྱིང་བག་གིས་གནོན་ཅིང་གནས་པ། ཁྲོ་བོའི་ལྟ་སྟངས་ཀྱིས་གཟིགས་པ།
[56b]
[56b.1]ཞལ་དང་པོ་བཞད་པ། གཡས་པའི་ཞལ་ལྗགས་འདྲིལ་བ། མཆེ་བ་གཉིས་ཀྱིས་མ་མཆུ་བཙིར་བ། གཡོན་པའི་ཞལ་ལོ། །སྟག་གི་པགས་པའི་ཤམ་ཐབས་ཅན་ནོ། །རྡོ་རྗེ་དང་དབྱུག་པ་དང་། བྱེད་པའི་ཕྱག་རྒྱ་དང་། མདའ་འཕྱར་བ་ནི་གཡས་པའི་ཕྱག་བཞི་ནའོ། །སྡིགས་མཛུབ་དང་རང་གི་ནུ་མ་
[56b.2]བཟུང་བ་དང་། པདྨ་དང་གཞུ་འཕྱར་བ་ནི་གཡོན་གྱི་ཕྱག་བཞི་ནའོ། །མི་བསྐྱོད་པས་མནན་པའི་དབུ་རྒྱན་ཅན་བསམ་པར་བྱའོ་ཞེས་བྱ་བ་ནི་རྟ་མཆོག་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །སྔགས་ཀྱི་བཟླས་པ་ནི། ཨོཾ་ཧ་ཡ་གྲཱི་བ་སྭཱ་ཧཱ། རྟ་མགྲིན་གྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་།
[56b.3]ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3391}༄༅༅། །རྒྱ་གར་སྐད་དུ། དཱི་བྷུ་ཛ་ཧི་རུ་ཀ་སཱ་དྷ་ནཾ། བོད་སྐད་དུ། ཞལ་གཅིག་ཕྱག་གཉིས་པའི་ཧེ་རུ་ཀའི་སྒྲུབ་ཐབས། དཔལ་ཧེ་རུ་ཀ་ལ་ཕྱག་འཚལ་ལོ། །གྲོགས་མེད་དགའ་བའི་ཡིད་ཀྱིས་ནི། །དུར་ཁྲོད་བརྒྱད་ཀྱི་དབུས་གནས་པ། །
[56b.4]ཤེས་རབ་ཐབས་ཀྱི་ཆོ་ག་ཡིས། །ཟླ་བ་ཉི་མ་རབ་སྦྱོར་བ། །ཨཱ་ལི་ཀཱ་ལི་མཉམ་སྦྱོར་བས། །ཉི་མའི་དཀྱིལ་འཁོར་བསྒོམ་པར་བྱ། །དེ་ལ་ཧཱུཾ་ཡིག་ཡོངས་སུ་གྱུར། །རྡོ་རྗེ་རྭ་དང་ཡང་དག་ལྡན། །སྐྱིལ་ཀྲུང་ཕྱེད་པས་རོ་ལ་གནས། །མི་ཡི་པགས་པའི་གོས་བསྣམས་པས། །ཐལ་བས་ལུས་ལ་བྱུགས་པ་སྟེ། །
[56b.5]འབར་བའི་རྡོ་རྗེ་གཡས་པ་ན། །གཡོ་བའི་བ་དན་ཁ་ཊྭཱཾ་ག། །ཁྲག་ལྡན་ཐོད་པ་གཡོན་དུའོ། །མགོ་བོ་བརྒྱ་ཕྱེད་ཕྲེང་བ་ཡིས། །ཡིད་དུ་འོང་བའི་དོ་ཤལ་དཔྱངས། །ཅུང་ཞིག་ཞལ་གྱི་མཆེ་བ་གཙིགས། །སྤྱན་གསུམ་དམར་པོ་རོ་ལྡན་པ། །དབུ་སྐྲ་ཁམ་པ་གྱེན་དུ་འཁྱིལ། །མི་བསྐྱོད་པ་ཡི་དབུ་རྒྱན་ཅན། །
[56b.6]རྣ་ཆ་དག་དང་རབ་ཏུ་ལྡན། །རུས་པའི་རྒྱན་གྱིས་མཛེས་པ་སྟེ། །དབུ་ལ་ཐོད་པ་ལྔ་དང་ལྡན། །སངས་རྒྱས་ཉིད་བཞིན་བསམ་བྱ་སྟེ། །རྒས་དང་འཆི་བ་ཟློག་བྱེད་པའོ། །སྭཱ་ཧཱ་ཕཊ་ཧཱུཾ་ཨོཾ་ཞེས་བྱ་བ་ནི་མདོར་བསྡུས་པའོ། །ཞལ་གཅིག་ཕྱག་གཉིས་པའི་ཧེ་རུ་ཀའི་སྒྲུབ་ཐབས་རྫོགས་སོ།། །།པཎྜི་ཏ་དོན་
[56b.7]ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3392}༄༅༅། །རྒྱ་གར་སྐད་དུ། ཀཻ་བ་ལ་ནཻ་རཱཏྨྱ་སཱ་དྷ་ནཾ། བོད་སྐད་དུ། བདག་མེད་མ་གཅིག་པུའི་སྒྲུབ་པའི་ཐབས། བདག་མེད་མ་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་པའི་རྗེས་ཐོགས་
[57a]
[57a.1]སུ་ཟླ་བའི་དཀྱིལ་འཁོར་ལ་ཡི་གེ་ཨཾ་ནག་པོ་ལས་སྐྱེས་པའི་ས་བོན་དང་བཅས་པའི་གྲི་གུག་གོ། །སྤྲོ་བ་ལ་སོགས་པ་སྔོན་དུ་འགྲོ་བས་ཡོངས་སུ་གྱུར་ནས། རོའི་སྙིང་གར་ཟླ་བ་ལ་གནས་པའི་སྐྱིལ་མོ་ཀྲུང་ཕྱེད་པའི་གར་གྱིས་བཞུགས་པ་བདག་མེད་མ་སྔོན་མོ་ཞལ་གཅིག་མ། སྐྲ་
[57a.2]ཁམ་པ་གྱེན་དུ་འཁྱིལ་པ། མི་བསྐྱོད་པས་དབུ་བརྒྱན་པ། མཆེ་བ་གཙིགས་ཤིང་ལྕེ་འདྲིལ་བ། གཡས་ན་གྲི་གུག་བསྣམས་པ། གཡོན་ན་ཐོད་པ་དང་ཁ་ཊྭཱཾ་ག་བསྣམས་པ། དམར་ཞིང་ཟླུམ་པའི་སྤྱན་གསུམ་པ། ཕྱག་རྒྱ་ལྔས་བརྒྱན་པ། དེའི་སྤྱི་བོ་དང་མགྲིན་པ་དང་། ཐུགས་ཀ་རྣམས་ལ་ཨོཾ་ཨཱཿཧཱུཾ་གི་ཡི་གེའོ། །སྙིང་གར་
[57a.3]ཟླ་བ་ལ་གྲི་གུག་གི་ཆང་གཟུངས་ཀྱི་ཟླ་བ་ལ་ཡི་གེ་ཨཾ་ལས་བསྐོར་ནས། སྔགས་འདི་བཟླས་པ་བྱ་སྟེ། ཨོཾ་ཨ་ཨཱ་ཨི་ཨཱི། ཨུ་ཨཱུ། རྀ་རཱི། ལྀ་ལཱྀ། ཨེ་ཨཻ། ཨོ་ཨཽ་ཨཾ་སྭཱ་ཧཱ། ཞེས་བརྗོད་དོ། །བདག་མེད་མ་གཅིག་པུའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།
[57a.4]{T3393}༄༅༅། །རྒྱ་གར་སྐད་དུ། ནཻ་རཱཏྨ་སཱ་དྷ་ནཾ། བོད་སྐད་དུ། བདག་མེད་མའི་སྒྲུབ་པའི་ཐབས། བཅོམ་ལྡན་འདས་བདག་མེད་མ་ལ་ཕྱག་འཚལ་ལོ། །དང་པོའི་སེམས་ཅན་ཐམས་ཅད་བསྒྲལ་བར་བྱེད་པའི་མཚན་ཉིད་ཀྱི་སྙིང་རྗེ་རྣམ་པར་བསྒོམས་ལ། ཕྱི་དང་ནང་དུ་བཅས་པ་སྟོང་པ་ཉིད་དུ་དམིགས་
[57a.5]ལ། བར་སྣང་ལ་ཟླ་བའི་དཀྱིལ་འཁོར་ལ་ཨོཾ་ལས་གྲི་གུག་དེ་ཆང་གཟུངས་ལ་ཟླ་བ་ལ་ཨོཾ་ཡིག་བསམ་པར་བྱའོ། །དེ་ནས་རྣལ་འབྱོར་མའི་འཁོར་ལོ་སྤྲོ་བ་དང་། བསྡུ་བ་བལྟས་ཏེ། དེ་ཐམས་ཅད་ཡོངས་སུ་གྱུར་པ་ལས་རོའི་སྙིང་གར་ཟླ་བ་ལ་བཅོམ་ལྡན་འདས་མ་བདག་མེད་མ་མདོག་ནག་མོ་གྲི་གུག་
[57a.6]དང་ཐོད་པ་དང་ཁ་ཊྭཱཾ་ག་བསྣམས་པའོ། །ཕྱག་གཉིས་མ། ཞལ་གཅིག་མ་བསམ་པར་བྱའོ། །སྤྱན་གསུམ་ཟླུམ་ཞིང་དམར་བ། སྐྲ་ཁམ་པ་གྱེན་དུ་འགྲེང་བའོ། །མགོ་བོ་དང་། མགྲིན་པ་དང་། སྙིང་ག་རྣམས་སུ་ཨོཾ་ཨཱཿཧཱུཾ་གི་ཡི་གེ་སྙིང་གར་ཟླ་བ་ལ་གྲི་གུག་གི་ཆང་གཟུངས་ཀྱི་ཟླ་བ་ལ་ཨོཾ་བལྟས་ཏེ་
[57a.7]སྔགས་བཟླས་པར་བྱའོ། །ཨོཾ་ཨ་ཨཱ་ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་སྭཱ་ཧཱ། ཞེས་བྱ་བ་ནི་བཟླས་པའི་སྔགས་སོ། །བདག་མེད་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།
[57b]
[57b.1]{T3394}༄༅༅། །རྒྱ་གར་སྐད་དུ། ཀ་ན་ཀ་བརྞ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། གསེར་མདོག་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །དང་པོ་རེ་ཞིག་སྒྲུབ་པ་པོས་བདེ་བའི་སྟན་ལ་གནས་ཏེ། རང་གི་སྙིང་གར་དབྱངས་ཡིག་དང་པོ་
[57b.2]ཡོངས་སུ་གྱུར་པ་ལས་ཟླ་བའི་དབུས་སུ་དྷཱིཿསེར་པོ་རྣམ་པར་བསྒོམས་ལ། སྙིང་གའི་ས་བོན་གྱི་འོད་ཀྱིས་བཅོམ་ལྡན་འདས་མ་བཀུག་སྟེ། རང་གི་མདུན་དུ་བཞུགས་སུ་གསོལ་ལ། དེ་ལས་བྱུང་བའི་མེ་ཏོག་ལ་སོགས་པ་བསྒོམ་བཞིན་པས་ཡང་དག་པར་མཆོད་ལ། དེའི་མདུན་དུ་སྡིག་པ་བཤགས་པ་
[57b.3]ལ་སོགས་པ་བྱའོ། །དེའི་རྗེས་སུ་ཚངས་པའི་གནས་བཞི་བསྒོམ་པ་སྔོན་དུ་འགྲོ་བས་ཡུད་ཙམ་གྱིས་སྟོང་པ་ཉིད་བསྒོམ་པར་བྱ་སྟེ། སྔགས་ནི། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་བྱའོ། །ཕྱིས་ནི་ནམ་མཁའི་ཕྱོགས་སུ་དབྱངས་ཡིག་དང་པོ་ཡོངས་སུ་གྱུར་པ་ལས། ཟླ་བའི་དཀྱིལ་འཁོར་
[57b.4]ལ་དྷཱིཿསེར་པོ་ལ་ཨ་ལ་སོགས་པའི་དབྱངས་ཡིག་བཅུ་དྲུག་གིས་བསྐོར་བ། དེ་ནས་ཀ་ལ་སོགས་པ་གསལ་བྱེད་སུམ་ཅུ་རྩ་གཉིས་ཀྱིས་ཡོངས་སུ་བསྐོར་བའི་དྷཱིཿཡོངས་སུ་གྱུར་པ་ལས་ཤེས་རབ་ཀྱི་ཕ་རོལ་ཏུ་ཕྱིན་མའི་པོ་ཏི་ས་བོན་གྱིས་ཉེ་བར་མཚན་པ་བསྒོམས་ལ། ཐམས་ཅད་ཡོངས་སུ་གྱུར་པ་ལས་
[57b.5]བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་མདོག་སེར་མོ་སྣ་ཚོགས་པདྨའི་གདན་ལ་སྐྱིལ་མོ་ཀྲུང་གིས་གནས་པ། ཕྱག་གཉིས་མ་ཞལ་གཅིག་མ། ཆོས་འཆད་པའི་ཕྱག་རྒྱ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། གཡོན་ཕྱོགས་སུ་གནས་པའི་པདྨའི་དབུས་སུ་ཤེས་རབ་ཀྱི་ཕ་རོལ་ཏུ་ཕྱིན་
[57b.6]མ་མདོག་སེར་མོའི་པོ་ཏི་འཆང་བ་བསྒོམ་པར་བྱའོ། །དཔྲལ་བར་ཨོཾ་སེར་པོའོ། །མགྲིན་པར་ཨཱཿདཀར་པོའོ། །སྙིང་གར་དྷཱིཿསེར་པོའོ། །ལྟེ་བར་ཧཱུཾ་ནག་པོའོ། །བཟླས་པའི་སྔགས་ནི་ཨོཾ་ཨཱཿདྷཱིཿཧཱུཾ་སྭཱ་ཧཱ། གསེར་མདོག་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས་རྫོགས་སོ། །པཎྜི་ཏ་དོན་
[57b.7]ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3395}༄༅༅། །རྒྱ་གར་སྐད་དུ། ཀལྤ་ཨ་མ་ན་ཡ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྟོག་པ་ལས་བརྒྱུད་པའི་འོད་ཟེར་ཅན་གྱི་སྒྲུབ་པའི་ཐབས། འོད་ཟེར་ཅན་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཁ་
[58a]
[58a.1]ལ་སོགས་པ་དག་པར་བྱས་ལ། འཇམ་ཞིང་རྒྱ་ཆེ་བའི་གདན་ལ་ཉེ་བར་གནས་ལ། སྡིག་པ་བཤགས་པ་ལ་སོགས་པ་བྱས་ནས། དེའི་རྗེས་སུ་བགེགས་བསྐྲད་པའི་སྔགས་བརྗོད་པར་བྱའོ། །བགེགས་བསྐྲད་པའི་བསྔགས་ནི། ཨོཾ་མཱ་རཱི་ཙྱཻ་ཧཱུཾ་སརྦ་བིགྷྣཱཾ།
[58a.2]ཨུཙྪ་ཊ་ཡ་ཧཱུཾ་ཕཊ། ཕྱག་རྒྱ་དང་བཅས་པས་སྙིང་ག་དང་མགྲིན་པ་སྤྱི་བོར་འདུག་པར་བྱའོ། །དེ་ནས་རང་གི་སྙིང་གར་པཾ་ལས་སྐྱེས་པའི་སྣ་ཚོགས་པདྨའི་དབུས་སུ་ཨཾ་ལས་སྐྱེས་པའི་ཉི་མའི་དཀྱིལ་འཁོར་གྱི་ལྟེ་བར་མཾ་ལས་རྡོ་རྗེ། རྡོ་རྗེ་དེའི་ལྟེ་བ་ལ་མཾ་ངོ་། །རྡོ་རྗེའི་ལྟེ་བའི་མཾ་ལ་ཛཿཧཱུཾ་བཾ་ཧོཿས་རྣམ་པར་
[58a.3]བསྐོར་བ། དེའི་འོད་ཟེར་གསལ་བས་འདི་ཐམས་ཅད་ཡོངས་སུ་གྱུར་པ་ལས་སྒེག་པའི་ཆ་ལུགས་འཆང་བ། ཕྱག་བརྒྱད་པ་ཞལ་གསུམ་པ། སྤྱན་གསུམ་པ། པདྨ་དང་ཟླ་བའི་གདན་ལ་གཡོན་བརྐྱང་བའི་ཞབས་ཀྱིས་གནས་ཤིང་། ཕག་པ་བདུན་གྱིས་འདྲེན་པའི་ཤིང་རྟ་ལ་ཞོན་པ། རྣམ་པར་
[58a.4]སྣང་མཛད་ཡོངས་སུ་གྱུར་པའི་མཆོད་རྟེན་གྱི་ཁོང་ན་བཞུགས་པ། གཡས་པའི་ཕྱག་རྣམས་སུ་རྡོ་རྗེ་དང་། མདའ་དང་། ལྕགས་ཀྱུ་དང་། ཁབ་བོ། །གཡོན་པའི་ཕྱག་རྣམས་སུ་སྡིགས་མཛུབ་དང་བཅས་པའི་ཞགས་པ་དང་། གཞུ་དང་། མྱ་ངན་མེད་པ་དང་། སྐུད་པ་བསྣམས་པ། རྩ་བའི་ཞལ་
[58a.5]གསེར་ལྟ་བུ། གཡས་དམར་བ། གཡོན་པ་ཁྲོ་བ་དང་བཅས་པའི་ཕག་གི་ཞལ་ནག་པོ། ལྗགས་འདྲིལ་བ། རྣམ་པར་སྣང་མཛད་ཀྱི་དབུ་རྒྱན་ཅན། མདོག་སེར་བ། སྟོད་གཡོགས་དང་། ཤ་འགག་དམར་པོ་ཅན་རྣམ་པར་བསྒོམས་ལ། འདིའི་སྙིང་ག་དང་། དམ་ཚིག་དང་། མགྲིན་
[58a.6]པ་དང་། དཔྲལ་བ་རྣམས་སུ་ཧཱུཾ་མཾ་ཨཿཨཾ་བཀོད་དེ། དམ་ཚིག་གི་ས་བོན་ལས་ཤར་དང་། ནུབ་དང་། བྱང་རྣམས་སུ་བཏྟཱ་ལི། བ་དཱ་ལི། བ་རཱ་ལི། བཱ་རཱ་ཧཱ་མུ་ཁི། ཕྱིར་སྤྲོ་བར་བྱའོ། །ཨོཾ་བཏྟཱ་ལི་ཛ་སྭཱ་ཧཱ། ཨོཾ་བ་དཱ་ལི་ཧཱུཾ་སྭཱ་ཧཱ། ཨོཾ་བ་རཱ་ལི་སྭཱ་ཧཱ། ཨོཾ་བཱ་རཱ་ཧཱ་མུ་ཁི་ཧོ་སྭཱ་ཧཱ་ཞེས་བྱའོ། །རྟོག་པ་
[58a.7]ལས་བརྒྱུད་པའི་འོད་ཟེར་ཅན་གྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། {T3396}༄༅༅། །རྒྱ་གར་སྐད་དུ། བཛྲ་བཱ་རཱ་ཧཱི་སཱ་དྷ་ནཾ། བོད་སྐད་དུ། རྡོ་རྗེ་ཕག་མོའི་སྒྲུབ་ཐབས། རྡོ་རྗེ་ཕག་མོ་ལ་ཕྱག་འཚལ་ལོ། །ལྟེ་བའི་
[58b]
[58b.1]དབུས་སུ་གྲུ་གསུམ་མེའི་དཀྱིལ་འཁོར་རོ། །དེའི་དབུས་སུ་པདྨ་དམར་པོ་འདབ་མ་བརྒྱད་པའོ། །དེའི་སྟེང་དུ་ཧྲཱི་ཧཾ་གཉིས་འཇིག་པའི་དུས་ཀྱི་མེ་ལྟ་བུ་གསལ་བཞིན་པའོ། །དེ་ཡོངས་སུ་གྱུར་པ་ལས་བདག་ཉིད་བཅོམ་ལྡན་འདས་མ་རྡོ་རྗེ་ཕག་མོ་ཆེན་མོ་མདོག་དམར་མོ་ཕྱག་གཉིས་པ་གཡས་ན་རྡོ་རྗེ་
[58b.2]གཡོན་ན་ཐོད་པ་དང་ཁ་ཊྭཱཾ་ག །ཡི་དྭགས་ཀྱི་གདན་གྱི་སྟེང་དུ་གཡོན་བརྐྱང་བས་གནས་པ། སྐྲ་ཁམ་པ་གྱེན་དུ་འགྲེང་ཞིང་འབར་བ། ཐོད་པའི་ཕྲེང་བའི་དབུ་རྒྱན་ཅན། སྟག་གི་པགས་པའི་ཤམ་ཐབས་དང་ལྡན་པ། མགོ་བོའི་ཕྲེང་བ་དང་མེ་ཏོག་གི་ཕྲེང་བས་བརྒྱན་པ། ཞལ་གཅིག་པ། སྤྱན་
[58b.3]གསུམ་པའོ། །དེ་ལྟར་རང་གི་སེམས་བརྟན་པར་བྱས་ཤིང་བསྒོམ་པར་བྱའོ། །དེ་ཉིད་ཀྱི་རྣལ་འབྱོར་པས་སྔགས་བཟླས་པར་བྱ་སྟེ། ཨོཾ་བཛྲ་བཱ་རཱ་ཧཱི། ཨཱ་བེ་ཤ་ཡ། ཨཱ་བེ་ཤ་ཡ། སརྦ་ཛྭ་རཱ་ན་ཧྲཱིཿསྭཱ་ཧཱ། ཨོཾ་ཧྲཱིཿཧཱུཾ་ཧཿསྭཱཧཱ། རྟག་ཏུ་བཟླས་པར་བྱའོ། །མདོར་བསྡུས་པའི་ཕག་མོའི་སྒྲུབ་ཐབས་
[58b.4]རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། {T3397}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། རིགས་བྱེད་མའི་སྒྲུབ་ཐབས། འཕགས་མ་རིགས་བྱེད་མ་ལ་ཕྱག་འཚལ་ལོ། །ལྟེ་བའི་དབུས་སུ་གྲུ་གསུམ་མེའི་
[58b.5]དཀྱིལ་འཁོར། དེའི་དབུས་སུ་བནྡུ་ཀའི་མེ་ཏོག་ལྟ་བུ་འདབ་མ་བཞི་པའོ། །དེའི་སྟེང་དུ་ཧྲཱིཿབསྐལ་པའི་མེ་བཞིན་དུ་འབར་བའོ། །དེ་ཡོངས་སུ་གྱུར་པ་ལས་བདག་ཉིད་རིགས་བྱེད་མའི་གཟུགས་སུ་བསམ་པར་བྱ་སྟེ། ཡི་དྭགས་ཀྱི་གདན་ལ་གནས་པ། སྐྲ་ཁམ་པ་གྱེན་དུ་འགྲེང་བ། ཐོད་པའི་
[58b.6]དབུ་རྒྱན་ཅན། སྟག་གི་པགས་པའི་ཤམ་ཐབས་ཅན་མ། མགོ་བོའི་ཕྲེང་བས་རྣམ་པར་བརྒྱན་མ། ཕྱག་བཞི་མ་གཡས་ན་མདའ་དང་ལྕགས་ཀྱུ་འཆང་བ། གཡོན་ན་གཞུ་དང་ཨུཏྤལ་དམར་པོའི་སྟེང་ན་ཐོད་པ་ཁྲག་གིས་ཡོངས་སུ་བཀང་བ་སྤྱན་གསུམ་པ། རྒྱན་ཐམས་ཅད་ཀྱིས་བརྒྱན་པ།
[58b.7]ན་བཟའ་དམར་པོ་བསྣམས་པ་བསྒོམ་པར་བྱའོ། །ཨོཾ་ཀུ་རུ་ཀུལླེ་ཧྲཱིཿསྭཱཧཱ། བཟླས་པའི་སྔགས་འདི་བསམ་གཏན་དང་ལྡན་པས་བཟླས་པར་བྱའོ། །ཨོཾ་ཨཱཿཧྲཱིཿཧཱུཾ་ཧྲཱི་ཧཱུཾ་ཛཾ། རིགས་བྱེད་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ། །
[59a]
[59a.1]{T3398}༄༅༅། །རྒྱ་གར་སྐད་དུ། སུ་ཀླཱ་ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མ་དཀར་མོའི་སྒྲུབ་ཐབས། བཅོམ་ལྡན་འདས་མ་སྒྲོལ་མ་ལ་ཕྱག་འཚལ་ལོ། །དཀར་པོའི་ལས་ནི་ཉེར་སྒྲུབ་པའི། །སྒྲོལ་མ་དཀར་མོ་ལ་བཏུད་ནས། །ཏིང་ངེ་འཛིན་འབྱུང་གདམས་ངག་གིས། །རྙེད་པའི་སྒྲུབ་ཐབས་
[59a.2]དེ་བརྗོད་བྱ། །དང་པོ་རེ་ཞིག་སྔགས་པས་ཡིད་དང་མཐུན་པའི་གནས་སུ། བདེ་བའི་གདན་ལ་རྡོ་རྗེ་སྐྱིལ་མོ་ཀྲུང་བཅས་ཏེ། ཐང་ཀ་ལ་སོགས་པར་གཏོགས་པའི་བཅོམ་ལྡན་འདས་མ་དཀར་མོ་ཉེ་བར་སྟོན་པ་ནི་སྒྲོལ་མ་ལ་མེ་ཏོག་དང་། བདུག་སྤོས་ལ་སོགས་པས་མཆོད་ནས། རང་གི་སྙིང་གར་ཨཾ་ལས་བྱུང་
[59a.3]བའི་ཟླ་བ་ལ་ཧཱུཾ་དཀར་པོའོ། །དེ་ལས་འོད་དཀར་པོ་ཕྱོགས་བཅུར་ཡང་དག་པར་སྤྲོས་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་རབ་ཏུ་བསྐུལ་ནས། རང་གི་སྙིང་གའི་ས་བོན་ལ་གཞུག་པར་བྱའོ། །དེ་ནས་བར་སྣང་ལ་བཅོམ་ལྡན་འདས་མ་སྒྲོལ་མ་དཀར་མོ་ཞལ་གསུམ་ཕྱག་དྲུག་མ་འོག་ནས་
[59a.4]གསུངས་པའི་རང་གི་གཟུགས་སུ་བལྟ་བར་བྱའོ། །དེ་ནས་རང་གི་ས་བོན་ལས་བྱུང་བའི་ལྷ་རྫས་ཀྱི་མེ་ཏོག་ལ་སོགས་པས་མངོན་པར་མཆོད་ལ། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། གསུམ་ལ་སྐྱབས་སུ་འགྲོ་བ་ལ་སོགས་པ་བྱའོ། །བུ་གཅིག་པ་ལ་བརྩེ་བའི་
[59a.5]མཚན་ཉིད་ཕན་པ་དང་། བདེ་བ་ལ་ཉེ་བར་སྟེར་བའི་མཚན་ཉིད་ནི་བྱམས་པའོ། །སྡུག་བསྔལ་དང་སྡུག་བསྔལ་གྱི་རྒྱུ་ལས་ཡང་དག་པར་སྒྲོལ་བའི་རང་བཞིན་ནི་སྙིང་རྗེའོ། །ཉན་ཐོས་ལ་སོགས་པའི་ལྟ་བ་ལས་རྣམ་པར་ལོག་པའི་མཚན་ཉིད་ནི་དགའ་བའོ། །གཟུང་བ་དང་འཛིན་པའི་རྣམ་པར་རྟོག་པ་
[59a.6]བཅོམ་པའི་མཚན་ཉིད་ནི་བཏང་སྙོམས་སོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་ལ་ཆོས་ཐམས་ཅད་རང་བཞིན་མེད་པའི་སྟོང་པ་ཉིད་ཀྱི་ངོ་བོ་ཉིད་ཀྱི་བྱང་ཆུབ་མངོན་དུ་བྱའོ། །དེ་ནས་སྨོན་ལམ་རྗེས་སུ་དྲན་པ་ལས་མདུན་དུ་རཾ་ལས་བྱུང་བའི་ཉི་མ་ལ་ཧཱུཾ་ཡིག་ཡོངས་སུ་གྱུར་པ་ལས་རྡོ་རྗེའི་
[59a.7]གུར་ལ་སོགས་པ་རྣམ་པར་བསྒོམས་ལ། དེའི་དབུས་སུ་པཾ་ཡོངས་སུ་གྱུར་པ་ལས་པདྨ་དེའི་སྟེང་དུ་ཟླ་བ་ལ་ཧཱུཾ་ཡིག་དཀར་པོར་ཡོངས་སུ་བལྟས་ལ། ཧཱུཾ་གི་ས་བོན་ནང་དུ་ཆུད་པའི་ཧཱུཾ་དང་། ཨུཏྤ་ལ་ལ་བལྟའོ། །ཧཱུཾ་དང་ཨུཏྤ་ལ་གཉིས་འདྲེས་ཤིང་གྱུར་པ་ལས་རྫོགས་པའི་བཅོམ་ལྡན་འདས་མ་དུར་
[59b]
[59b.1]ཁྲོད་བརྒྱད་ཀྱིས་ཉེ་བར་བརྒྱན་པ། དཀར་བ་ཞལ་གསུམ་པ་དཀར་བ་དང་། སེར་བ་དང་། ནག་པོ་ནི་རྩ་བ་དང་། གཡས་དང་ཅིག་ཤོས་ཀྱི་ཞལ་ལོ། །ཞལ་སོ་སོ་ལ་སྤྱན་གསུམ་གསུམ་མོ། །དེ་བཞིན་གཤེགས་པ་རྣམ་པ་ལྔ་འཕྲོ་བ། ཕྱག་དྲུག་པ། གཡས་ཀྱིས་མཆོག་སྦྱིན་དང་། ཕྲེང་བ་དང་།
[59b.2]མདའ་བསྣམས་པའོ། །གཡོན་གྱིས་ཨུཏྤ་ལ་དང་། པདྨ་དང་། གཞུ་བསྣམས་པའོ། །ཟླ་བའི་གདན་ལ་སྐྱིལ་ཀྲུང་ཕྱེད་པས་བཞུགས་པ་ཟླ་བའི་རྒྱབ་ཡོལ་ཅན། རལ་པའི་ཅོད་པན་དང་ལྡན་པའི་དབུ་ལ་མགོ་བོ་རྣམ་པ་ལྔས་བརྒྱན་པ། ཟླ་བ་ཕྱེད་པས་དབུ་ཐོད་བྱས་པ། རྒྱན་ཐམས་ཅད་ཀྱིས་བརྒྱན་
[59b.3]པ། སྟག་གི་པགས་པའི་ཤམ་ཐབས་ཅན། བརྒྱད་གཉིས་ལོན་པའི་རྣམ་པ་ཅན། མ་ལུས་པའི་སེམས་ཅན་ལ་དཀར་པོའི་ལས་ཉེ་བར་སྟོན་པའི་སྒྲོལ་མའོ། །མི་གཡོ་བའི་དེ་ཁོ་ན་ཉིད་སྟོན་པས་ཨ་ཙ་ལེའོ། །རྒྱུ་དང་འབྲས་བུ་དབྱེར་མེད་པའི་རིམ་པས་ཨ་ནི་མིཏྟ་པ་རཾ་མོ། །ཤེས་རབ་དང་ཐབས་ཀྱི་རང་བཞིན་
[59b.4]གྱིས་ཧཱུཾ་ངོ་། །སྨོན་པ་མེད་པའི་རང་བཞིན་མ་རིག་པ་ཉེ་བར་ཞི་བས་ཕཊ་དང་སྤེལ་བའོ། །འདོད་ཆགས་ལ་སོགས་པ་ཉོན་མོངས་པ་རབ་ཏུ་ཞི་བས་སྭཱ་ཧཱ་མཐར་བསྒོམ་པར་བྱའོ། །དེ་ནས་བཅོམ་ལྡན་འདས་མའི་སྙིང་གར་གཉུག་མའི་ས་བོན་བལྟས་ལ། དེ་ནས་ཡང་འོད་ཟེར་ཕྱུང་སྟེ། ཁམས་གསུམ་
[59b.5]ཁྱབ་པར་བྱས་ནས། དེ་ཉིད་ལ་རབ་ཏུ་གཞུག་པར་བྱའོ། །དེའི་རྗེས་སུ་བསྒོམས་པས་སྐྱོ་ན་སྔགས་བཟླས་པར་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་ཨ་ཙ་ལེ་ཨ་ནི་མིཏྟ་བ་རཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཡང་ཆོ་ག་ནི་འདི་ཡིན་ཏེ། ཚེས་བརྒྱད་ནས་བཟུང་སྟེ་གསོ་སྦྱོང་དང་ལྡན་པར་བྱས་ལ། ཇི་སྲིད་ཟླ་
[59b.6]བ་ཉའི་བར་དུ་ཐུན་མཚམས་བཞི་རུ་མཆོད་པ་དང་། གཏོར་མའི་ཆོ་ག་སྔོན་དུ་འགྲོ་བས། བཅོམ་ལྡན་འདས་མ་བསྒོམ་ཞིང་དེ་ལྟར་ཆོ་ག་བྱས་ན། ཆར་མེད་ན་ཆར་འབབ་པར་འགྱུར་རོ། །རྟག་ཏུ་སྒོམ་པར་བྱེད་ན་ས་ལ་སོགས་པ་ཡང་འགྲུབ་བོ། །འཕགས་མ་དཀར་བ་ཉེ་བར་སྟོན་པའི་སྒྲོལ་མ་ཞེས་བྱ་བའི་
[59b.7]སྒྲུབ་པའི་ཐབས། བཅོམ་ལྡན་འདས་ཉིད་ཀྱིས་གསུངས་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།། {T3399}༄༅༅། །རྒྱ་གར་སྐད་དུ། མཱ་ཡཱ་ཛཱ་ལ་ཀྲ་མ་ཨ་བ་ལོ་ཀི་ཏེ་ཤྭ་ར་སཱ་དྷ་ནཾ། བོད་སྐད་དུ། སྒྱུ་འཕྲུལ་དྲ་བའི་རིམ་པའི་སྤྱན་
[60a]
[60a.1]རས་གཟིགས་དབང་ཕྱུག་གི་སྒྲུབ་པའི་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམ་པའི་རྗེས་སུ། ནམ་མཁའ་ལ་རཾ་ལས་བྱུང་བའི་ཉི་མའི་དཀྱིལ་འཁོར་ལ་ཧཱུཾ་དེ་ཡོངས་སུ་གྱུར་པ་ལས།
[60a.2]སྣ་ཚོགས་རྡོ་རྗེ་རྒྱ་གྲམ། དེ་ཡོངས་སུ་གྱུར་པ་ལས་རྡོ་རྗེའི་ར་བ་དང་རྡོ་རྗེའི་གུར་ཡང་ངོ་། །དེའི་ནང་དུ་མི་བཟད་པའི་དུར་ཁྲོད་རྣམ་པར་བསྒོམས་ནས། དེའི་དབུས་སུ་པདྨ་དམར་པོ་འདབ་མ་བརྒྱད་པ། དེའི་དབུས་སུ་ཧྲཱིཿལས་བྱུང་བའི་བཅོམ་ལྡན་འདས་འཕགས་པ་སྤྱན་རས་
[60a.3]གཟིགས་དབང་ཕྱུག་མདོག་ནག་པོ། ཉི་མའི་དཀྱིལ་འཁོར་ལ་གཡོན་བརྐྱང་བའི་ཞབས་ཀྱིས་གནས་པ་བསམ་པར་བྱའོ། །ཞལ་ལྔ་པ་སྤྱན་གསུམ་པ། ཕྱག་བཅུ་གཉིས་པའོ། །དཀར་པོ་དང་དམར་པོ་ནི། གཡས་ཀྱི་ཞལ་གཉིས་སོ། །དེ་བཞིན་དུ་སེར་པོ་དང་། ལྗང་གུ་ནི་གཡོན་
[60a.4]གྱི་ཞལ་གཉིས་སོ། །གཡས་ཀྱི་ཕྱག་ན་རྔེའུ་ཆུང་དང་། ཁ་ཊྭཱཾ་ག་དང་། ལྕགས་ཀྱུ་དང་། ཞགས་པ་དང་། རྡོ་རྗེ་དང་མདའ་བསྣམས་པའོ། །གཡོན་ན་སྡིགས་མཛུབ་དང་། ཐོད་པ་དང་། པདྨ་དམར་པོ་དང་། ནོར་བུ་དང་། འཁོར་ལོ་དང་། གཞུ་བསྣམས་པའོ། །ཞལ་ཐམས་
[60a.5]ཅད་མཆེ་བ་གཙིགས་པ། ཕྱག་རྒྱ་དྲུག་དང་ལྡན་པ། སྐུ་ལ་མགོ་བོ་རློན་པའི་ཕྲེང་བས་བརྒྱན་པ། གཅེར་བུ་གཡོན་བརྐྱང་བའི་ཞབས་ཀྱིས་བཞུགས་པ། ཡན་ལག་ཐམས་ཅད་མཛེས་པའི་བདག་ཉིད་དུ་སྐད་ཅིག་གིས་རབ་ཏུ་བརྟགས་ལ། སྙིང་གར་ཟླ་བའི་དབུས་སུ་ཧྲཱིཿཡིག་
[60a.6]གནས་པའོ། །ཨོཾ་ཨཱཿཧཱུཾ་ཨི་ཏི་མུ་ནི་བར་བཛྲེ་ཧྲཱིཿཧཱུཾ་ཛཿ། ཞེས་བྱ་བའི་སྔགས་ཕྲེང་བའི་རྣམ་པ་ཅན་དུ་བཟླ་བར་བྱའོ། །མཚམས་མེད་པ་རྣམ་པ་ལྔ་བྱས་པ་ཡང་འབུམ་ཕྲག་གཅིག་བཟླས་པས་འགྲུབ་པར་འགྱུར་རོ། །སྒྱུ་འཕྲུལ་དྲ་བའི་རིམ་པའི་འཕགས་པ་སྤྱན་རས་གཟིགས་
[60a.7]དབང་ཕྱུག་གི་སྒྲུབ་ཐབས། སློབ་དཔོན་དགྲ་ལས་རྣམ་པར་རྒྱལ་བས་མཛད་པ་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།། །།
[60b]
[60b.1]{T3400}༄༅༅། །རྒྱ་གར་སྐད་དུ། སཱ་དྷ་ན་ས་མུཙྪ་ཡ་ནཱ་མ། བོད་སྐད་དུ། སྒྲུབ་ཐབས་ཀུན་ལས་བཏུས་པ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སྲིད་དང་ངན་འགྲོས་དུབ་རྣམས་ལ། །བདེ་དང་ཕུན་ཚོགས་ཀུན་འབྱུང་ཞིང་། །ཡིད་བཞིན་ནོར་ལྟར་རྨད་བྱུང་བའི། །དཔལ་ལྡན་དམ་ཚིག་གསུམ་ཕྱག་འཚལ། །
[60b.2]སློབ་དཔོན་སྔོན་མའི་སྒྲུབ་པའི་ཐབས། །ཡང་དག་ཡོད་བཞིན་འདིར་སྟོན་པ། །ཅི་སྟེ་མངས་པས་འཇིགས་རྣམས་ལ། །བསྡུས་ནས་ཉེ་བར་བསྟན་པར་བྱ། །འདི་ཉིད་དུ་དཔལ་ལྡན་དམ་ཚིག་གསུམ་གྱི་རྒྱལ་པོའི་རྒྱུད་ཆེན་པོའི་དཀྱིལ་འཁོར་དུ་རྡུལ་ཚོན་གྱི་དཀྱིལ་འཁོར་ལ་སྤྱིར་དབང་བསྐུར་བ་ཐོབ་པ་དེ་ལས་གསུངས་པ་རྣམས་སྔགས་
[60b.3]པ་དམ་ཚིག་དང་སྡོམ་པ་ལ་གནས་པས་སྔོན་དུ་བསྙེན་པ་བྱ་སྟེ། རི་དང་དགོན་པ་ལ་སོགས་པ་རྣམས་སུ་ཕུག་གམ་ཁྱིམ་མམ་སྐྱེད་མོས་ཚལ་ལ་སོགས་པའང་རུང་སྟེ། གཙང་ཞིང་སྐྱེ་བོས་དབེན་པ་ཡིད་དུ་འོང་བ་རྣམས་སུ་གནས་ནས། དང་པོ་རེ་ཞིག་འདིར་རྩ་བའི་སྔགས་ནི་སངས་རྒྱས་ཀྱི་སྐུ་གཟུགས་ཀྱི་དྲུང་
[60b.4]དུ་མཎྜལ་མེ་ཏོག་སིལ་མ་མངོན་པར་བཀྲམ་སྟེ། ཕྱག་འཚལ་ནས་བྱང་ཆུབ་ཏུ་སེམས་བསྐྱེད་བྱ་ཞིང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་ངེས་པར་ཕུལ་ནས་དེ་ལ་ཕྱག་འཚལ་བར་དམིགས་ནས་བཟླས་པ་བརྩམ་པར་བྱ་སྟེ་སྟོང་ཕྲག་གཅིག་བཟླས་པར་བྱའོ། །དེ་ནས་སྔགས་
[60b.5]ཐམས་ཅད་འབུམ་བཟླས་པར་བྱ་བ་ཡིན་ནོ། །སྲུང་བ་ལ་སོགས་པ་ཐམས་ཅད་ཀྱི་སྔགས་ཀྱིས་འདིའི་དངོས་གྲུབ་ཏུ་འགྱུར་རོ། །དེ་ལ་འདིར་རིག་སྔགས་ནི། །ན་མཿསརྦ་བུདྡྷ་བོ་དྷི་ས་ཏྭཱ་ནཱཾ། ཨ་མ་ལཱ་མ་ལ་ཧཱ་ར་ཀ་ཨ་ནནྟཱཿསརྦ་བྷཱུ་ཏཱཿསརྦ་ཛི་ནཱ་ཨ་སཱི་མ་ནིཥྛཱ་བ་ར་དཱ་མ་མ་དེ་ཏུ་ཨ་ཏྱུ་དཱ་རཾ་བ་ར་མ། གྲྱཾ་ས་མ་སརྦ་དཱ་ཨ་ནནྟཾ་ཏ་ཏྲ་མེ་
[60b.6]བཛྲ་པ་དཱ། ཨ་ར་ར་ཨ་ས་མ་ས་མ་ས་མནྟཱ་ནནྟཱ་དྷརྨ་ཏེ། ཁ་ཎ་ཁ་ཎ། མ་ཧཱ་བཱི་རཱ་ཙ་ལེ། ས་མ་ས་མ། ཨ་ས་ཧ་མ་ཧཱ་བ་ལེ། ཀ་ཎ་ཀ་ཎ། མ་ཧཱ་བཱ་རཱ་གྲི་ཀེ་ཧ་ཧ་ཧ་ཧ་བཛྲ་བཛྲ་ཨ་དྷཱ་ཡེ་དྷ་ར་ཧཱུཾ་ཧཱུཾ། མཎྜ་ལཾ་ས་མ་བ་ལཱ་གྲ་བི་ཀྲ་མེ་ཀུ་རུ་ཀུ་རུ། ཏུ་རུ་ཏུ་རུ། སརྦ་ཐཱ་སརྦཾ་ཧི་ཛྭ་ལ་ཛྭ་ལ། ཨ་གྲེ་ཨ་གྲི་ཎི་ཧཱུཾ་ཕཊ་ཕཊ་སྭཱ་ཧཱ། དེ་ནས་ལས་ཀྱི་སྒྲིབ་པ་ཐམས་ཅད་
[60b.7]ཟད་པའི་དོན་དུ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཡི་གེ་བརྒྱ་པའི་ཆོ་གས་སྟོང་ཕྲག་བརྒྱད་བཟླས་པར་བྱའོ། །དམ་པའི་ཆོས་སུན་ཕྱུང་བ་དང་མཚམས་མེད་པ་ལ་སོགས་པའི་ལས་ཀྱི་སྒྲིབ་པ་རབ་ཏུ་འཇོམས་པ་ནི་འདིའོ། །ན་མ་སྟྲཻ་ཡ་དྷྭི་ཀཱ་ནཱཾ་ཏ་ཐཱ་ག་ཏཱ་ནཱ་ན། སརྦ་ཏྲཱ་པྲ་ཏི་ཧ་ཏ་བཱཔྟི་དྷརྨ་ཏ་བ་ལི་ནཱཾ་ཨ་ས་མ་ས་མ་
[61a]
[61a.1]ས་མནྟ་ཏོ། ཨ་ནནྟ་ཏཱ་བཱབྟི་ཤཱ་ས་ན། ཧ་ར་ཧ་ར། སྨ་ར་སྨ་ར་ཎེ་བི་ག་ཏ་རཱ་ག་བུདྡྷ་དྷརྨ་ཏེ། ས་ར་ས་ར། ས་མ་པ་ལཱ། ཧ་ས་ཧ་ས། ཏྲ་ཡ་ཏྲ་ཡ། ག་ག་ན། མ་ཧཱ་བ་ར་ལཀྵ་ཎེ། ཛྭ་ལ་ཛྭ་ལ་ན་སཱ་ག་རེ་སྭཱ་ཧཱ། དེ་ནས་རང་དང་གཞན་གྱི་དགེ་བའི་ཕྱིར། སྒྲུབ་ཐབས་ཀྱི་ཆོ་གའི་ཡན་ལག་བཞིན་སྔོན་དུ་བསྙེན་པའི་
[61a.2]ཆོ་གས་རྗེས་སུ་གནས་པར་བྱའོ། །དེ་ལ་དང་པོ་རབ་ཏུ་སྔ་བར་ལངས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། བདག་པོ་རྣམས་ལ་ལྷག་པའི་བསམ་པས་དེ་བཞིན་དུ་ཕྱག་འཚལ་ནས། མཐའ་ཡས་འཇིག་རྟེན་ཁམས་རྣམས་ན། །ཇི་སྙེད་རྒྱལ་བ་སྲས་བཅས་ལ། །ལུས་
[61a.3]དང་ངག་དང་ཡིད་རྣམས་ཀྱིས། །ཀུན་ནས་བདག་ནི་ཕྱག་འཚལ་ལོ། །དེ་ནས་བྱང་ཆུབ་ཏུ་སེམས་བསྐྱེད་པར་བྱ་སྟེ། ལུས་ཅན་རྣམས་ཀྱི་བྱང་ཆུབ་ཕྱིར། །ཡང་དག་བྱང་ཆུབ་སེམས་བསྐྱེད་ནས། །སེམས་ཅན་ཀུན་ལ་སྨན་གྱུར་ཕྱིར། །བཟང་པོ་སྤྱོད་པ་སྤྱད་པར་བགྱི། །དེ་ནས་བགེགས་ཐམས་ཅད་གཞོམ་
[61a.4]པའི་དོན་དུ་མི་གཡོ་བའི་སྙིང་པོ་དོན་ཡོད་གཏུམ་པོ་རྡོ་རྗེའི་ཕྱག་རྒྱ་བཅིངས་ནས་ལན་གསུམ་བརྗོད་པར་བྱའོ། །དེ་ལ་འདིར་རྡོ་རྗེའི་ཕྱག་རྒྱ་ནི་ལག་པ་གཡས་པ་སྤྱི་བོར་བརྐྱང་ནས་མཐེ་བོ་ཆེའི་མཛུབ་མོའི་རྩེ་མོ་མནན་པར་བྱའོ། །ལྷག་མ་ནི་རྡོ་རྗེའི་མཚན་ཉིད་དོ། །སྔགས་ནི། ནམཿས་མནྟ་བཛྲཱ་ཎཱཾ་ཏྲཱཊ། ཨ་མོ་
[61a.5]གྷ་ཙཎྜ་མ་ཧཱ་རོ་ཥ་ཎ་ཕཊ་ཡ། ཨོཾ་བྷྲ་མ་ཡ་བྷྲ་མ་ཡ། ཨོཾ་ཏྲཱཊ་ཧཾ་མཾ། བཀྲ་ཤིས་བཅིངས་ནས། སོར་མོ་རྣམས་འཁྱུད་ལ་ཁུ་ཚུར་གྱིས་ནང་དུ་བྱས་ནས། གུང་མོའི་རྩེ་མོ་དང་། མཛུབ་མོ་དག་དང་། མཐེ་བོང་དང་གུང་མོའི་རྩེ་དག་ཀྱང་ཅུང་ཟད་མ་རེག་པར་གཟུང་བར་བྱའོ། །སྔགས་ནི། ཨོཾ་ཧ་ར་ཧ་ར་མ་ཧཱ་ནི་
[61a.6]མིནྟ་ཧཱུཾ་ཕཊ་སྭཱ་ཧཱ། དེ་ནས་ཞལ་བསང་བ་ལ་སོགས་པ་བྱས་ནས་སྟན་བདེ་བ་ལ་ཉེ་བར་གནས་ཏེ། རས་རིས་དང་པོ་ཏི་དང་སྐུ་གཟུགས་ལ་སོགས་པ་དང་། གཞན་གྱི་དྲུང་དུའང་རུང་སྟེ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་དམིགས་ཏེ། མེ་ཏོག་སིལ་མ་
[61a.7]གཅལ་དུ་བཀྲམ་ལ་མཎྜལ་བྱས་ནས་སྔོན་མ་བཞིན་དུ་ཚིགས་སུ་བཅད་པ་དང་། ཡན་ལག་ཐམས་ཅད་ཀྱིས་ཕྱག་བཙལ་ནས། དེ་བཞིན་དུ་སངས་རྒྱས་དང་། བྱང་ཆུབ་སེམས་དཔའ་རྣམས་ལ་བདག་ཉིད་ཕུལ་ནས། བྱང་ཆུབ་ཏུ་སེམས་བསྐྱེད་པར་བྱ་བ་ནི། བདག་མིང་འདི་ཞེས་བགྱི་བ་སངས་རྒྱས་དང་།
[61b]
[61b.1]བྱང་ཆུབ་སེམས་དཔའ་རྣམས་ལ་ཐམས་ཅད་དུ་བདག་ཉིད་འབུལ་བས་དུས་ཐམས་ཅད་དུ་གཟུང་དུ་གསོལ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་བྱིན་གྱིས་བརླབ་ཏུ་གསོལ། མགོན་པོ་ཐུགས་རྗེ་ཆེན་པོ་རྣམས་ཀྱིས་བདག་ལ་མཆོག་གི་དངོས་གྲུབ་རྣམས་སྩལ་དུ་གསོལ་
[61b.2]ཞེས་སོ། །དེ་ནས་སྡིག་པ་ཐམས་ཅད་བཤགས་པར་བྱ་སྟེ། འདོད་ཆགས་དང་། ཞེ་སྡང་དང་། གཏི་མུག་ལས་སྐྱེས་པའི་དུས་ཐམས་ཅད་ཀྱི་སྡིག་པ་ཐམས་ཅད་ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་མཁྱེན་བཞིན་དུ་མ་ལུས་པར་བདག་གིས་བཤགས་པར་བགྱིའོ། །དེ་ནས་བསོད་ནམས་
[61b.3]ལ་རྗེས་སུ་ཡི་རང་བ་ནི། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་གང་ཞིག་འཇིག་རྟེན་དང་། འཇིག་རྟེན་ལས་འདས་པ་ཇི་ལྟར་དུས་གསུམ་གྱི་སངས་རྒྱས་བཅོམ་ལྡན་འདས་རྣམས་ཀྱིས་མཁྱེན་པའི་རྗེས་སུ་ཡི་རང་བའི་མཆོག་དེ་རྣམས་ལ་རྗེས་སུ་ཡི་
[61b.4]རང་ངོ་། །དེ་ནས་སྐྱིལ་མོ་ཀྲུང་གིས་གནས་ནས་འདིར་དམ་ཚིག་ཕྱག་རྒྱ་བཅིང་བར་བྱའོ། །ཐལ་མོ་སྦྱར་བ་སྤྱི་བོར་བཞག་པ་ནི་དམ་ཚིག་གི་ཕྱག་རྒྱའོ། །སྔགས་ནི། ནམཿསུ་སིདྡྷི་སཱ་དྷ་ནི་ཨ་གྲེ་ཀཱ་རུ་ཎེ། བ་ར་དེ་ཏ་ཡི་ཏ་ཡི་ཨ་ཏི་པ་ལེ་ན་མ་སྟུ་བ་ར་སིདྡྷི་ད་ཡ་ཀེ་བྷྱོཿམ་ཧཱ་ཀྲི་སེ་བྷྱཿསྭཱ་ཧཱ། འདི་ནི་ཕྱག་རྒྱ་
[61b.5]ཐམས་ཅད་ཀྱི་སྔགས་རྣམས་ཀྱི་དམ་ཚིག་ལ་ཡང་དག་པར་མཐོང་བར་འགྱུར་རོ། །དེ་ནས་སྔོན་བཞིན་དུ་རྡོ་རྗེའི་ཕྱག་རྒྱ་བཅིངས་ནས་མི་གཡོ་བའི་སྙིང་པོ་རྗེས་སུ་དྲན་པར་བྱའོ། །ནམཿས་མནྟ་བཛྲཱ་ཎཱཾ། ཨ་ཙ་ལ་ཀཱ་ཎ་ཙཎྜ་སཱ་དྷ་ཡ་ཧཱུཾ་ཕཊ། དེ་ནས་རྡོ་རྗེ་གཙུག་ཏོར་གྱི་ཕྱག་རྒྱ་སྤྱི་བོར་དགོད་པར་བྱ་སྟེ། ལག་
[61b.6]པ་གཡས་པའི་ཁུ་ཚུར་ལ་མཐེ་བོང་གནས་པར་བྱའོ། །སྔགས་ནི། ན་མཿསརྦ་བུདྡྷ་བོ་དྷི་སཏྭཱ་ནཱཾ་ཏྲི་ཤི་ཁཱ་གྲི་ན་མེ་སྟུ་ཏེ་ས་མནྟ། ད་ཤཱ་མནྟྲཱ་གྲི་གུ་ཎ་ཨ་ཙ་ལོ་གྲ། དྷརྨ་བི་དྷུ་ནཱ་ཧི་ཀླེ་ཤ་དུཿཁ་ཛཱ་ལཱ་ན་ཛ་ག་ཏཿསརྦ་སུ་ཁཱཾ་ད་དཱ་ཧཾ་ཙ་ཤུ་ཏྲ་ཏྲེ་ཡ་མ་ཏྲི་ས་མ་ཡེ་ཀུ་རུ་སྭཱ་ཧཱ། འདིས་ནི་སྔགས་པ་རྣམས་ལ་མི་ཟད་པའི་
[61b.7]སྲུང་བ་ཆེན་པོ་སྟེ། བགེགས་མེད་པའི་དངོས་གྲུབ་ཏུ་འགྱུར་རོ། །སླར་ཡང་མི་ཚུགས་པའི་སྲུང་བ་ཆེན་པོ་གནས་ལྔ་རྣམས་སུ་དགོད་པ་བྱས་པས་སྲུང་བ་ཆེན་པོར་འགྱུར་རོ། །ཐལ་མོ་གན་རྐྱལ་དུ་བྱས་ནས་མཐེའུ་ཆུང་དང་མིང་མེད་ལག་པའི་མཐིལ་དུ་བྱས་ཏེ། མཐེའུ་ཆུང་གི་རྩེ་མོ་ཕྱིར་བྱའོ། །མིང་
[62a]
[62a.1]མེད་ཅུང་ཟད་དམའ་བར་བྱས་ནས། དེའི་སྟེང་དུ་མཐེ་བོང་དགོད་པར་བྱའོ། །གུང་མོ་དག་རྩེ་མོར་བྱས་ཏེ་དེའི་ལོགས་སུ་མཛུབ་མོ་ཅུང་ཟད་བཀུག་ནས་ཚིགས་གསུམ་པར་བཀོད་པ་ནི་མི་ཚུགས་པ་ཞེས་བྱ་བའི་ཕྱག་རྒྱའོ། །སྔགས་ནི། ན་མཿས་མནྟ་བཛྲཱ་ཎཱཾ། ཨོཾ་ཧཾ་ཧཱུཾ་ཕཊ།
[62a.2]ཡ་ས་ཧེ་ཧཱུཾ་ཕཊ། དེ་ནས་གོ་ཆ་ཆེན་པོ་གཞན་གྱིས་མི་ཐུབ་པ་རྡོ་རྗེའི་གོ་ཆར་བྱ་སྟེ། མཐེའུ་ཆུང་དང་མཐེབ་ཆེན་དག་ལྕགས་སྒྲོག་ཏུ་བྱས་ནས་གཞན་རྣམས་རྩ་བ་དང་། དབུས་དང་རྩེ་མོ་ཡང་དག་པར་སྦྱར་བ་ནི་གཞན་གྱིས་མི་ཐུབ་པའི་ཕྱག་རྒྱའོ། །སྔགས་ནི། ན་མཿས་མནྟ་བཛྲཱ་ཎཱཾ། ཨོཾ་ཧཾ་ཧཱུཾ་བཛྲ་
[62a.3]མ་ཡེ། བ་ཀཱ་བ་ཙེ་ཧོ་བཛྲ་བཛྲ་ཧཱུཾ་ཕཊ། དེ་དེ་བཞིན་དུ་བྱས་པས་བདུད་རྣམས་ཀྱིས་ཤིན་ཏུ་མི་ཚུགས་པར་འགྱུར་རོ། །དེ་ལྟར་བདག་ཉིད་སྲུང་བར་བྱས་ནས་གནས་བསྲུང་བར་བྱའོ། །དེ་ལ་རྡོ་རྗེ་གདན་གྱི་ཕྱག་རྒྱས། རྡོ་རྗེ་གདན་གྱི་རང་བཞིན་དུ་བྱིན་གྱིས་བརླབ་པར་བྱ་སྟེ། རྡོ་རྗེ་སྐྱིལ་ཀྲུང་
[62a.4]བཅིངས་ནས་པང་དུ་ལག་པ་གཡོན་པ་གན་རྐྱལ་དུ་བྱས་པའི་སྟེང་དུ་ལག་པ་གཡས་པ་བཞག་པ་ནི་རྡོ་རྗེ་གདན་གྱི་ཕྱག་རྒྱའོ། །སྔགས་ནི། ན་མཿས་མནྟ་བཛྲཱ་ཎཱཾ། ཨོཾ་ཧཾ་ཧཱུཾ་བཛྲཱ་ས་ནེེ་བཾ་ཧཱུཾ་ཕཊ། དེ་ནས་རྡོ་རྗེའི་གཞལ་ཡས་ཁང་གི་ཕྱག་རྒྱས་རང་གི་གནས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱ་སྟེ། ཐལ་
[62a.5]མོ་སྦྱར་ནས་མཛུབ་མོ་གཉིས་དང་མིང་མེད་གཉིས་ཀྱང་ཚིགས་དབུས་མ་བཀུག་ནས་ནང་དུ་བཅུག་སྟེ། ཀ་བ་བཞི་བཞིན་དུ་བྱས་ནས། ལྷག་མ་རྩེ་མོར་བྱས་པ་ནི་རྡོ་རྗེའི་གཞལ་ཡས་ཁང་གི་ཕྱག་རྒྱའོ། །སྔགས་ནི། ན་མཿས་མནྟ་བཛྲཱ་ཎཱཾ། ཨོཾ་ཧཾ་ཧཱུཾ། བཛྲཱ་གྲ་བྷུ་བ་ནི་མཾ་ཧཱུཾ་ཕཊ། དེ་ནས་རྡོ་རྗེའི་ར་བའི་
[62a.6]ཕྱག་རྒྱ་དེ་ལ་དགོད་པར་བྱ་སྟེ། ཐལ་མོ་གན་རྐྱལ་དུ་བྱས་ནས་མིང་མེད་གཉིས་དབུས་སུ་བྱས། གུང་མོ་རྩེ་མོར་བྱས་ཏེ། མཛུབ་མོ་གཉིས་རྡོ་རྗེའི་རྣམ་པས་ཚིགས་གསུམ་པར་དགོད་དོ། །མཐེ་བོ་དག་ལ་ལོགས་སུ་བྱས་པ་ནི། ར་བའི་ཕྱག་རྒྱའོ། །སྔགས་ནི། ན་མཿས་མནྟ་བཛྲཱ་ཎཱཾ། ཨོཾ་ཧཾ་ཧཱུཾ།
[62a.7]བཛྲ་མཎྜ་ལེ། བན་དྷ་བན་དྷ་ཧཱུཾ་ཕཊ། དེ་ནས་དེའི་སྟེང་དུ་རྡོ་རྗེའི་གུར་ཏེ། དེའི་ཕྱག་རྒྱ་དགོད་པར་བྱ་སྟེ། ཐལ་མོ་སྦྱར་ནས་མིང་མེད་གཉིས་དང་། མཛུབ་མོ་གཉིས་ཕྱིར་བཟློག་ནས་རྒྱབ་ཏུ་བཅག་སྟེ། གུང་མོ་རྩེ་མོར་བྱའོ། །དེ་བཞིན་དུ་མཐེའུ་ཆུང་དང་མཐེ་བོ་དགོད་དེ་གུར་གྱི་ཕྱག་རྒྱའོ། །སྔགས་ནི།
[62b]
[62b.1]ན་མཿས་མནྟ་བཛྲཱ་ཎཱཾ། ཨོཾ་ཧཾ་ཧཱུཾ། བཛྲཱ་གྲ་བྷུ་བ་ནེ་ཧཱུཾ་ཧཱུཾ་ཕཊ། དེ་ནས་རྡོ་རྗེ་འབར་བ་ནི་ཕྱི་རོལ་ཏེ་དེའི་ཕྱག་རྒྱ་དགོད་པར་བྱ་སྟེ། ལག་པ་མི་འཇིགས་པར་བྱ་བའི་སྟེང་དུ། ལག་པ་གཡོན་པའི་སོར་མོའི་ཚིགས་གཡས་སུ་བསྐོར་བ་ནི་རྡོ་རྗེ་འབར་བའོ། །སྔགས་ནི། ན་མཿས་མནྟ་བཛྲཱ་ཎཱཾ། ཨོཾ་ཧཾ་ཧཱུཾ།
[62b.2]བཛྲཱ་ཛྭ་ལེ་ཧཱུཾ་ཕཊ། དེ་ནས་མཚམས་བཅིང་བར་བྱ་སྟེ། ལག་པ་གཡས་པ་ཁུ་ཚུར་བཅིངས་ནས། སྡིགས་མཛུབ་བསྒྲེང་སྟེ་གཡས་སུ་བསྐོར་བ་ནི་མཚམས་མེད་པ་སྟེ་མཚམས་བཅིང་བའོ། །དེའི་སྔགས་ནི། ན་མཿས་མནྟ་བཛྲཱ་ཎཱཾ། ཨོཾ་ཧཾ་ཧཱུཾ། མ་ཧཱ་སི་མ་བནྡྷེ། བནྡྷ་བནྡྷ། བཛྲ་བཛྲི་ཎི་ཧཱུཾ་ཕཊ།
[62b.3]དེ་ནས་དེ་བཞིན་དུ་སྲུང་བ་དང་། ཡོ་བྱད་དང་བཅས་པས་རང་གི་གནས་སུ་གནས་ནས། ཇི་ལྟར་སངས་རྒྱས་དང་བྱང་ཆུབ་སེམས་དཔའ་རྣམས་ལ་དེ་བཞིན་གཤེགས་པ་རྣམས་མཆོད་པའི་ཕྱག་རྒྱས་མཆོད་ཡོན་དབུལ་བར་བྱའོ། །དེ་ནས་དངོས་གྲུབ་ཀྱི་མཆོག་སྟེར་བ་པོ་རྣམས་ཀྱིས་དགོངས་པར་འགྱུར་
[62b.4]རོ། །ལག་པ་ཁུ་ཚུར་བཅིངས་ནས་མཐེའུ་ཆུང་ནས་དགྲོལ་བ་ནི་དེ་བཞིན་གཤེགས་པ་རྣམས་མཆོད་པའི་ཕྱག་རྒྱའོ། །སྔགས་ནི། ན་མཿསརྦ་བུདྡྷ་བོ་དྷི་ས་ཏྭཱ་ནཱཾ་ཨཿཨ་མ་ལ་བི་ཀྲནྟ་ཏེ་ཛི་ནི། ཨ་ར་ཛེ་སྭཱ་ཧཱ། དེ་ནས་ཕྱིའི་དྲི་དང་ཉེ་བར་སྤྱད་ཀྱི་ཡོ་བྱད་ལ་རྡོ་རྗེ་མི་གཡོ་བའི་ཕྱག་རྒྱས་ཡོངས་སུ་སྦྱངས་
[62b.5]ཏེ་དྲི་ལ་སོགས་པ་རྣམས་སོ་སོ་ལ་རང་གི་སྔགས་ཀྱིས་ལན་བརྒྱད་དུ་མངོན་པར་བསྔགས་ནས་མཆོད་པར་བྱའོ། །དེ་ལ་དྲིའི་སྔགས་ནི། ན་མ་སྟྲཻ་ཡཾ་དྷྭི་ཀཱ་ནཱཾ་སརྦ་ཏ་ཐཱ་ག་ཏཱ་ནཱཾ། ཨ་ས་མ་གནྡྷོ་ཏ་མེ་བྷ་བཱ་ཏི། སྦ་ར་ཧི་མཾ་ག་ག་ན་ཀཾ་མ་ཧོ་ད་ཡེ། སརྦཱརྠ་སཱ་དྷ་ནི་སྭཱ་ཧཱ། མེ་ཏོག་གི་སྔགས་ནི། ན་མ་སྟྲཻ་ཡ་དྷྭི་ཀཱ་ནཱཾ།
[62b.6]སརྦ་ཏ་ཐཱ་ག་ཏཱ་ནཱཾ། ཨ་བརྟཱ་བརྟ་མ་ཧཱ་སུ་ཁ་བ་ཏི་སྭཱ་ཧཱ། བདུག་སྤོས་ཀྱི་སྔགས་ནི། ན་མསྟྲཻ་ཡཾ་དྷྭི་ཀཱ་མཱཾ་སརྦ་ཏ་ཐཱ་ག་ཏཱ་ནཱཾ། ཨ་གྲེ་ཨ་གྲ་ནི་ཁེ། ཨ་གྲ་ཤི་ཥེ་དྷུ་མ་ཤི་ཥེ་སྭཱ་ཧཱ། མར་མེའི་སྔགས་ནི། ན་མསྟྲཻ་ཡཾ་དྷྭི་ཀཱ་ནཱཾ། སརྦ་ཏ་ཐཱ་ག་ཏཱ་ནཱཾ་ཨ་ལནྟེ་ཛྭཱ་ལནྟེ་དཱི་པ་ཛྱེ་ཏི་ཤི་ཁེ་སྭཱ་ཧཱ། ཞལ་ཟས་ཀྱི་སྔགས་ནི། ན་མསྟྲཻ་ཡཾ་དྷྭི་ཀཱ་ནཱཾ།
[62b.7]སརྦ་ཏ་ཐཱ་ག་ཏཱ་ནཱཾ། ཨ་ར་ར། པ་ར་ར། ཀ་ར་ར། བ་ལི་དེ་བ་ལི་ད་དཱ་ཧི་མ་ཧཱ་བ་ལི་སྭཱ་ཧཱ། དེ་ནས་ཕྱོགས་བཅུའི་འཇིག་རྟེན་གྱི་ཁམས་ན་ཡོད་པའི་སྣ་ཚོགས་པའི་མཆོད་པ་གཞན་ཡང་དབུལ་བར་བྱའོ། །ཕྱག་འཚལ་བའི་ཐལ་མོ་སྦྱར་ནས། བདག་པོས་ཡོངས་སུ་མ་བཟུང་བའི་ཕྱོགས་བཅུའི་འཇིག་རྟེན་གྱི་
[63a]
[63a.1]ཁམས་ཀྱི་མཆོད་པའི་ཡན་ལག་ཁྱད་པར་དུ་འཕགས་པ་ཐང་ལས་སྐྱེས་པའི་རིན་པོ་ཆེའི་རི་བོ་དང་། དཔག་བསམ་གྱི་ཤིང་ལ་སོགས་པ་རྣམས་དང་། ཆུ་ལས་སྐྱེས་པ་རྒྱ་མཚོའི་རིན་པོ་ཆེ་ལ་སོགས་པ་གསེར་དང་། ཆུ་སྐྱེས་ལ་སོགས་པ་རྣམས་དང་། གཞན་ཡང་འཇིག་རྟེན་གྱི་
[63a.2]ཁམས་རྣམས་ན་གང་ཞིག་ལྷ་དང་མི་སྣ་ཚོགས་པའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལ་སོགས་པ་དེ་རྣམས་ཐམས་ཅད་སངས་རྒྱས་དང་། བྱང་ཆུབ་སེམས་དཔའ་རྣམས་ལ་བདག་གིས་དབུལ་བར་བགྱིའོ་ཞེས་བརྗོད་པར་བྱའོ། །ཡིད་ཀྱིས་རང་བཞིན་གྱི་མཆོད་པའི་སྤྲིན་དེ་བཞིན་དུ་རབ་ཏུ་
[63a.3]དབུལ་བར་བྱའོ། །གང་བའི་ཕྱག་རྒྱ་རྩེ་མོ་ཅུང་ཟད་བཀུག་ནས་ཕྱག་འཚལ་བའི་ཐལ་མོ་སྦྱར་བའི་མཚན་ཉིད་བཅིངས་ནས་དེ་བཞིན་དུ་བྱས་ཏེ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་ཀྱི་སྟོབས་དང་། བདག་གི་སྨོན་ལམ་དང་། བསོད་ནམས་ཀྱི་སྟོབས་དང་། རིག་
[63a.4]སྔགས་ཀྱི་སྟོབས་ཀྱིས་སངས་རྒྱས་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྣམས་ལ་མཆོག་ཏུ་རྒྱ་ཆེན་པོ་བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་ལས་མངོན་པར་ཐོབ་པའི་མཆོད་པའི་སྤྲིན་ཆེན་པོ་རབ་ཏུ་འཕྲོ་བར་བསམས་ནས། འདིར་མཆོད་པ་བྱིན་གྱིས་བརླབ་པར་བྱ་སྟེ།
[63a.5]རིག་པ་ཆེན་མོའི་རྒྱལ་མོ་ལན་བརྒྱད་དུ་བརྗོད་པར་བྱའོ། །ན་མཿསརྦ་བུདྡྷ་བོ་དྷི་སཏྭ་ནཱཾ། སརྦ་ཐཱ་ཁཾ། ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་ས་མནྟཿསྭཱ་ཧཱ། དེ་ནས་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་སྣ་ཚོགས་པའི་ཡོན་ཏན་བརྗོད་ཅིང་། གླུ་དབྱངས་ཀྱི་སྤྲིན་གྱི་རྒྱ་མཚོ་དང་། ཆོས་
[63a.6]ཀྱི་གླུ་དབྱངས་ཀྱི་སྤྲིན་གྱི་རྒྱ་མཚོ་རྣམས་ཡོངས་སུ་དག་པའི་འཇིག་རྟེན་གྱི་ཁམས་ཐམས་ཅད་ནས་དབུལ་བར་བསམ་མོ། །འདིར་གླུ་དབྱངས་ཀྱི་བསྟོད་པའི་སྤྲིན་རྣམས་ཀྱིས་མཆོད་པར་བྱས་ནས་རིག་པའི་རྒྱལ་མོ་འདི་ལན་བརྒྱད་དུ་བཟླས་པར་བྱའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ། སརྦ་ས་ཏྲ་སཾ་ཀུ་སུ་
[63a.7]མི་ཏཱ་བི་ཛྙཱ་རཱ་ཤི་ནི་ན་མ་སྟུ་ཏེ་སྭཱ་ཧཱ། དེ་ནས་འཇིག་རྟེན་གྱི་ཁམས་ཀྱི་རྒྱ་མཚོ་ཐམས་ཅད་ཀྱི་སེམས་ཅན་ཐམས་ཅད་ཀྱི་བདག་ཉིད་ཀྱི་རང་བཞིན་དང་། མཉམ་པའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་སྤྲུལ་པའི་སྤྲིན་ཚོགས་རྣམས་ཀྱི་ངེས་པར་སྤྱོད་པའི་མཛད་པ་ཀུན་གྱིས་སེམས་
[63b]
[63b.1]ཅན་ཐམས་ཅད་ཀྱི་སྡུག་བསྔལ་ཐམས་ཅད་རབ་ཏུ་ཞི་བ་དང་། འཇིག་རྟེན་དང་། འཇིག་རྟེན་ལས་འདས་པའི་ཕུན་སུམ་ཚོགས་པ་ཇི་སྙེད་པ། ཀུན་དུ་བཟང་པོ་ལ་སོགས་པ་ཡོངས་སུ་དག་པ་ཐོབ་པར་བསམ་པར་བྱས་ནས་རིག་པའི་རྒྱལ་མོ་ཆེན་མོ་འདི་ལན་བརྒྱད་བཟླས་པར་བྱའོ། །ན་མཿསརྦ་བུདྡྷ་
[63b.2]བོ་དྷི་སཏྭཱ་ནཱཾ། ན་མ་སྟུ་ཏེ་མ་ཧཱ་བཛྲ་སརྦ་སཏྭ་ཧི་ཀ་ར། ཏིཥྛ་སརྦ་ཏྲ་སརྦེ་ཥཱཾ། སརྦ་དྷརྨཱ་ཎཱཾ། ཨ་དྷིཥྛ་ཡ་སྭཱ་ཧཱ། འདི་རྣམས་ཐམས་ཅད་མཆོད་པ་ལ་སོགས་པའི་སྔགས་ཀྱི་སྟོབས་ཀྱིས་བདེན་པའི་རང་བཞིན་དུ་མོས་པ་བྱ་ཞིང་དགེ་བའི་རྩ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་
[63b.3]བསྔོ་བར་བྱའོ། །ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་མངོན་དུ་རྗེས་སུ་མཁྱེན་ནས་ཡོངས་སུ་བསྔོ་བ་དང་ལྡན་པ་བཞིན་དུ་དགེ་བའི་རྩ་བ་འདི་ཡང་དེ་བཞིན་དུ་བདག་གིས་ཡོངས་སུ་བསྔོ་བར་བྱའོ། །བསོད་ནམས་འདིས་བདག་ཀུན་དུ་བཟང་པོའི་སྤྱོད་པས་མངོན་པར་བྱང་ཆུབ་ནས་སེམས་ཅན་
[63b.4]ཐམས་ཅད་ཀྱང་ཀུན་དུ་བཟང་པོའི་སྤྱོད་པ་དག་པ་ལ་རབ་ཏུ་གནས་པར་གྱུར་ཅིག །དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་ཀྱིས་སོ་སོར་ཐོབ་པའི་དོན་དུ་དེའི་ཕྱག་རྒྱ་བཅིངས་ནས་སྔོན་དུ་གསུངས་པའི་ཡི་གེ་བརྒྱ་པ་རྗེས་སུ་དྲན་པར་བྱའོ། །ཡང་ན་ཡི་གེ་ལྔ་པའོ། །ལག་པ་
[63b.5]གཉིས་ཕན་ཚུན་རྒྱབ་སྦྱར་ནས་སོར་མོ་རྣམས་སྟེང་དུ་ཁ་སྦྱར་ཏེ། མཛུབ་མོ་དང་། མཐེའུ་ཆུང་དག་ལྕགས་སྒྲོག་གི་རྣམ་པར་བྱས་ནས་གུང་མོ་དང་མིང་མེད་དབུས་སུ་རྩེ་མོར་བྱས། མཐེབ་ཆེན་གཉིས་མཉམ་དུ་སྟེང་དུ་རྩེ་མོ་བསྟན་པ་ནི་ཡི་གེ་བརྒྱ་པའི་ཕྱག་རྒྱའོ། །ཡི་གེ་ལྔ་པའི་ཕྱག་རྒྱ་ནི་ཐལ་མོ་ཡང་དག་པར་
[63b.6]སྦྱར་ནས་མཛུབ་མོ་གཉིས་ཀྱིས་མཐེབ་ཆེན་གྱི་རྩེ་མོ་བསྡམས་ནས། ལྷག་མ་ནི་དེ་བཞིན་དུ་རྩེ་མོའི་རྣམ་པའོ། །སྔགས་ནི། ན་མཿསརྦ་བུདྡྷ་བོ་དྷི་སཏྭཱ་ནཱཾ། ཨཱཿབཱི་ར་ཧཱུཾ་ཁཾ། དེ་ནས་ཕྱག་རྒྱ་ཐམས་ཅད་ཡང་དག་པར་བསྡུས་པ་ལས་བྱུང་བ་ཀུན་གྱི་གཙུག་ཏོར་སྣང་བ་ཆོས་ཀྱི་ཕྱག་རྒྱ་བཅིང་བར་བྱ་སྟེ།
[63b.7]ལག་པ་གན་རྐྱལ་དུ་མཉམ་དུ་བརྐྱང་ནས། མི་འཇིགས་པའི་ལག་པས་མིང་མེད་ལག་པའི་དཀྱིལ་དང་། མཐེབ་ཆེན་གྱི་རྩེ་མོར་སེན་མོས་སེན་མོ་ཡོངས་སུ་བཟུང་སྟེ་མཐེབ་ཆུང་རྩེ་མོའི་རྣམ་པར་བྱས་ཏེ། ཚིགས་ཀྱི་རྩེ་མོ་དེ་བཞིན་དུ་གུང་མོ་དང་མཉམ་དུ་སེན་མོའི་རྩེ་མོར་བྱས་པ་ནི་གཙུག་ཏོར་ཀུན་དུ་སྣང་
[64a]
[64a.1]བའོ། །དེ་བཞིན་དུ་དེ་རྣམས་ཀྱི་མཛུབ་མོ་དག་བཀུག་ནས་སེན་མོའི་རྩེ་མོ་ལ་སྦྱར་ཏེ། མཎྜལ་གྱི་རྣམ་པ་ནི་ཆོས་ཀྱི་འཁོར་ལོའི་ཕྱག་རྒྱའོ། །སྔགས་འདི་དག་གོ་རིམས་ཇི་ལྟ་བ་བཞིན་དུའོ། །ཨཱཾ་མཾ་ཧཾ་ཨོཾ་དྷུ་ན་ཡ་ཏ་ཡཙྪནྡ་ཙ་ཀྲེ་ན་བཛྲི་ཎི་ཧཱུཾ། འདི་དག་གིས་སྔགས་གཞན་
[64a.2]ཡང་བཅིངས་ནས་ལན་ཅིག་བརྗོད་དེ། གནས་ཤིང་འདུག་ནས་བཟླས་པར་བྱའོ། །བདུད་ལ་སོགས་པ་རྣམས་ཟིལ་གྱིས་གནོན་ཅིང་། དངོས་གྲུབ་རྣམས་མངོན་དུ་བྱེད་པར་འགྱུར་རོ། །དེ་ནས་དངོས་གྲུབ་མྱུར་བའི་དོན་དུ་ཆོས་འབྱུང་གི་ཕྱག་རྒྱས་བཅིངས་ནས་དེའི་སྔགས་རྗེས་སུ་དྲན་པར་བྱའོ། །ལག་
[64a.3]པ་གཡོན་པས་ཁུ་ཚུར་བཅངས་ནས་མཛུབ་མོ་དང་མཐེའུ་ཆུང་སྟེང་དུ་བརྐྱང་བ་ནི་ཆོས་འབྱུང་གི་ཕྱག་རྒྱའོ། །སྔགས་ནི། ན་མཿསརྦ་བུདྡྷ་བོ་དྷི་སཏྭཱ་ནཱཾ་ཨཿསརྦ་ཐཱ་སརྦ་ཏྲཱན་ཀེ་སྭཱ་ཧཱ། རང་གི་ཕྱག་རྒྱས་ཀྱང་སྔགས་ལན་ཅིག་བརྗོད་ནས་དམ་ཚིག་བལྟ་བར་བྱའོ། །རང་གི་ཕྱག་རྒྱས་ཇི་ལྟར་སྦྱར་བར་རིག་
[64a.4]པར་བྱའོ། །དེ་ནས་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་བར་དམིགས་ནས་བཟླས་པ་བརྩམ་པར་བྱ་སྟེ། ཇི་ལྟར་འདོད་པ་བཞིན་ནོ། །སྔགས་མྱུར་བ་དང་། བུལ་བ་དང་། མི་བདེན་པའི་རྟོག་པ་སྤངས་ནས། སྔགས་ཀྱི་ཡི་གེ་ལ་སེམས་ཇི་སྲིད་ངལ་བར་མ་གྱུར་
[64a.5]པ་དེ་སྲིད་དུ་བཟླས་པར་བྱའོ། །དེ་ནས་ལངས་ནས་འཕགས་པ་སྡོང་པོ་བཀོད་པའི་མདོ་ལ་སོགས་པ་དེ་བཞིན་གཤེགས་པའི་སྙིང་པོ་ལན་ཅིག་རྗེས་སུ་དྲན་པར་བྱས་ཏེ་བཀླག་པར་བྱའོ། །མཆོད་པའི་མཐར་ཕྱག་འཚལ་ནས་ཟས་བཟའོ། །ཟས་ཟ་བའི་དུས་སུ་ཡང་སྔགས་འདིས་ཟས་ལ་ལན་བརྒྱད་དུ་
[64a.6]མངོན་པར་བསྔགས་ནས་ཕུད་ཀྱི་ཆང་བུ་བཞག་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཞལ་ཟས་ཕུལ་ནས་བར་མ་ལ་ལོངས་སྤྱོད་པར་བྱའོ། །དེ་ལ་སྔགས་ནི་འདིའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ། ཨོཾ་བ་ལིཾ་ད་དཱ་ཏེ་ཛོ་མ་ལི་ནི་སྭཱ་ཧཱ། ཟས་ཟོས་པའི་ལྷག་མ་འཕགས་པ་མི་
[64a.7]གཡོ་བ་དོན་ཡོད་གཏུམ་པོའི་སྙིང་པོས་ལན་ཅིག་མངོན་པར་བསྔགས་ནས་ལྷག་མའི་ཆང་བུ་སྦྱིན་པར་བྱའོ། །དེ་དང་རྗེས་སུ་འབྲེལ་པས་དངོས་གྲུབ་ཅི་བདེ་བ་སྟེར་བར་འགྱུར་རོ། །ཟོས་པ་དང་ངལ་བསོས་པའི་མཐར་ཡང་སྡིག་པ་བཤགས་པ་ལ་སོགས་པ་བྱས་ནས་དམ་པའི་ཆོས་ཀྱི་གཏམ་ལ་སོགས་
[64b]
[64b.1]པས་གནས་པར་བྱའོ། །གལ་ཏེ་ནུས་པར་འགྱུར་ནའོ། །ཕྱི་དྲོའི་དུས་སུ་ཡང་ཐམས་ཅད་བསྲུང་བ་ལ་སོགས་པ་ཡོངས་སུ་བྱ་བ་དང་། མཆོད་པ་ལ་སོགས་པ་བྱས་ནས་བཟླས་པ་བྱའོ། །ཡང་ན་སྔ་དྲོའི་ཐུན་ལ། དེ་བཞིན་དུ་སྲུང་བ་ལ་སོགས་པ་མ་གཤེགས་པར་གནས་པ་ལ། དེ་བཞིན་དུ་མོས་པ་བརྟན་
[64b.2]པོས་འཕགས་པ་མི་གཡོ་བའི་རྡོ་རྗེའི་ཕྱག་རྒྱས་བགེགས་ཐམས་ཅད་བསྐྲད་ནས། ཡི་གེ་ལྔ་པ་ལ་སོགས་པ་རྣམས་ཀྱི་ཕྱག་རྒྱ་གཞན་དང་བཅས་པས་སྲུང་བ་བྱས་ནས། མཆོད་པ་དང་བསྟོད་པ་ལ་སོགས་པའི་ཆོ་ག་སྔོན་བཞིན་དུ་བྱས་ཏེ། བཟླས་པ་བྱའོ། །ཕྱི་དྲོའི་དུས་སུ་ཡང་ར་བ་དང་གུར་ལ་
[64b.3]སོགས་པ་གཤེགས་ནས་འོད་ཟེར་ཕྲེང་བས་གོ་ཆ་བྱའོ། །ཕན་ཚུན་དུ་སོར་མོ་རྣམས་འཁྱུད་པ་ནང་དུ་ཁུ་ཚུར་བཅངས་ཏེ་གུང་མོ་རྩེ་མོའི་རྣམ་པར་བྱས་ནས་བརྐྱང་པ་ལ་མཛུབ་མོ་གཉིས་དེའི་ཚིགས་གསུམ་པར་བཞག་སྟེ། མཐེ་བོང་དག་ལ་ལོགས་སུ་བྱས་པ་ནི། འོད་ཟེར་གྱི་ཕྲེང་བའི་ཕྱག་རྒྱའོ། །སྔགས་
[64b.4]ནི། ན་མཿསྟྲཻ་ཡ་དྷྭི་ཀཱ་ནཱཾ། ཏ་ཐཱ་ག་ཏཱ་ནཱཾ་མ་ཧཱ་ས་མ་ཡ་ག་ཏེ་ག་ཏེ། ས་མ་ཏེ་ས་མ་ཏེ། ས་མ་སརྦ་ཐཱ་སཏྭཱ་ཏྲ་ཎ་ཀེ། དྷརྨ་དྷཱ་ཏྭརྱ་ན་ཏཱ་སཾ་ག་ཏེ་སྭཱ་ཧཱ། ནམ་གྱི་ཆ་སྟོད་དང་། ཆ་སྨད་ལ་མི་ཉལ་བར་དམ་པའི་ཆོས་ཀྱི་ཁ་ཏོན་ལ་སོགས་པ་བྱའོ། །གུང་ཐུན་ལ་ཁྲི་ལ་སོགས་པ་སྤངས་པའི་ཉལ་ས་ལ་
[64b.5]སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཡན་ལག་ཐམས་ཅད་ཀྱིས་ཕྱག་འཚལ་བ་བཞིན་དུ་ཉལ་བར་བྱའོ། །ཞུ་བ་ཡང་བྱ་སྟེ། སངས་རྒྱས་དང་བྱང་ཆུབ་སེམས་དཔའ་བླ་ན་མེད་པའི་དངོས་གྲུབ་ཀྱི་མཆོག་སྟེར་བ་པོ་ཐམས་ཅད་ཀྱིས་བདག་ལ་བྱིན་གྱིས་བརླབ་ཏུ་གསོལ། བར་དུ་གཅོད་པ་ཐམས་ཅད་
[64b.6]རབ་ཏུ་ཞི་བར་མཛད་དུ་གསོལ་ཞེས་སོ། །དེ་བཞིན་དུ་ཆོ་ག་འདིས་ཉི་མ་སོ་སོ་ལ་ཇི་སྲིད་ཟླ་བ་གང་གང་གི་བར་དུ་འབུམ་བཟླས་པར་བྱའོ། །ཡང་ན་ཇི་སྲིད་དངོས་གྲུབ་ཀྱི་མཚན་མ་མ་བྱུང་གི་བར་དུའོ། །དེ་ནས་ཟླ་བ་ལ་སོགས་པའི་ཚེས་གྲངས་ལ་ཟས་བཅད་ཅིང་སྨྱུང་བར་གནས་ནས་གསོ་སྦྱོང་གི་སྡོམ་པ་གཟུང་
[64b.7]བར་བྱ་བ་ནི། ཤིང་ལོའམ། ཀུ་ཤའི་ཆུན་པོའི་སྟེང་དུ་ཉེ་བར་བསྡད་ནས་མཆོད་རྟེན་དང་། ཐང་སྐུ་དང་པོ་ཏི་དང་། སྐུ་གཟུགས་ལ་སོགས་པ་གཞན་ཇི་ལྟར་རྙེད་པའི་དྲུང་དུ་མེ་ཏོག་སིལ་མ་གཅལ་དུ་བཀྲམ་པའི་མཎྜལ་བྱས་ནས་སྲུང་བ་དང་། མཆོད་པའི་བྱ་བ་བྱས་ནས། སྔོན་བཞིན་ཆོས་འབྱུང་གི་
[65a]
[65a.1]ཕྱག་རྒྱ་བཅིངས་ནས། དེའི་སྔགས་རྗེས་སུ་དྲན་པར་བྱའོ། །དེ་ནས་རང་གི་ལྷའི་ཕྱག་རྒྱ་བཅིངས་ཏེ། དེའི་སྔགས་བདུན་ནམ་བརྒྱད་བཟླས་ནས་དམ་ཚིག་བལྟ་བར་བྱའོ། །དེ་ནས་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ཏེ་འཁོར་ལོ་དང་རྡོ་རྗེ་
[65a.2]ལ་སོགས་པ་འཛིན་པའི་དེ་བཞིན་གཤེགས་པ་ཀུན་དུ་བཟང་པོའི་སྐུ་ལ་སོགས་པ་དག་ཅིང་རང་གིས་མངོན་པར་འདོད་པའི་དངོས་གྲུབ་ཀྱི་སྙིང་པོ་བླང་བའི་ཕྱིར་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་བར་དམིགས་ནས། བཟླས་པ་བརྩམ་ཞིང་། སངས་རྒྱས་དང་།
[65a.3]བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་ལ་རྗེས་སུ་ཡི་རང་བ་ལ་ཡིད་ཀྱིས་གོམས་པར་བྱས་ནས་ཉི་མ་ནུབ་པ་ལ་སོགས་པ་ནས། ཇི་སྲིད་ནམ་ཕྱེད་ཀྱི་བར་རམ། ཉི་མ་ཤར་གྱི་བར་དེ་སྲིད་དུ་བཟླས་པས་འཁོར་ལོ་ལ་སོགས་པ་རབ་ཏུ་འབར་བར་འགྱུར་རོ། །འབར་བ་
[65a.4]དང་ནམ་མཁའ་ལ་སངས་རྒྱས་ལ་སོགས་པ་བྱོན་པ་བཞིན་དུ་རྟགས་ཆེན་པོ་རྣམས་དང་། མེ་ཏོག་གི་ཆར་དང་། རྔའི་སྒྲ་དང་། ལྷའི་དབྱངས་དང་། དེ་བཞིན་གཤེགས་པ་རྣམས་ཀྱིས་ལེགས་སོ་ཞེས་བརྗོད་པ་ལ་སོགས་པ་དང་། སངས་རྒྱས་ཀྱི་ཞིང་གཡོ་བ་ལ་སོགས་པ་ཤིན་ཏུ་ངོ་མཚར་བ་རྣམས་ཀྱང་
[65a.5]འབྱུང་བར་འགྱུར་རོ། །རིག་པ་འཛིན་པའི་རིག་པ་ཐམས་ཅད་ཀྱང་འབྱུང་བར་འགྱུར་རོ། །འཇིག་རྟེན་གྱི་ཁམས་ཐམས་ཅད་ན་བཞུགས་པའི་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱིས་མངོན་པར་དབང་བསྐུར་བར་འགྱུར་ཞིང་། མངོན་པར་ཤེས་པ་ལྔ་ཐོབ་པ་དང་། སངས་རྒྱས་དང་།
[65a.6]བྱང་ཆུབ་སེམས་དཔའ་ཐམས་ཅད་ཀྱིས་མངོན་པར་བསྟོད་པ་དང་། བྱང་ཆུབ་སེམས་དཔའི་སྤྱད་པ་སྤྱོད་ཅིང་། རིག་པ་འཛིན་པའི་རྒྱལ་པོར་འགྱུར་རོ། །རིག་པ་མཐའ་ཡས་པ་འཛིན་པའི་བུད་མེད་ཀྱི་འཁོར་ལུས་མ་ཉམས་པ་རྣམས་ཀྱིས་བདེ་བར་རྗེས་སུ་འཇུག་པར་འགྱུར་རོ། །དེ་བཞིན་དུ་ཡང་ལུས་
[65a.7]ལ་སོགས་པའི་རིམ་པས་ཚོགས་བསགས་པས་བྱང་ཆུབ་སེམས་དཔའི་ས་ཐམས་ཅད་ནོན་པར་འགྱུར་ཞིང་མངོན་པར་བྱང་ཆུབ་པར་འགྱུར་རོ་ཞེས་སོ། །གཞན་ཡང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱིས་གཟིགས་པ་དང་། ཡིད་བཞིན་གྱི་ནོར་བུ་དང་། བུམ་པ་བཟང་པོ་ལ་སོགས་པ་
[65b]
[65b.1]འཇིག་རྟེན་དང་། འཇིག་རྟེན་ལས་འདས་པའི་དངོས་གྲུབ་ཐམས་ཅད་ཐོབ་པར་འགྱུར་རོ། །འདིས་དེ་བཞིན་དུ་ཆོ་ག་སྤྱིར་ཁྱད་པར་དུ་འཕགས་པའི་རིམ་པར་བལྟ་བའམ། ཆོ་ག་རྒྱུད་ལས་བལྟས་ན་ཐེ་ཚོམ་མེད་པར་ངེས་པར་བསྒྲུབས་པས་དངོས་གྲུབ་ཏུ་འགྱུར་རོ་ཞེས་སོ། །འདིར་ཐབས་དང་ལྡན་པ་
[65b.2]རྣམས་ཀྱིས་སྒྲུབ་ཐབས་ཀྱི་ཆོ་གས་ཇི་ལྟར་ནུས་པ་བཞིན་བསྒྲུབ་པར་བྱའོ། །ཇི་ལྟར་གསུངས་པ་བདག་གིས་ནུས་པ་བཞིན་བྱའོ། །མཐར་གཅིག་པུ་ཡང་བདག་ཉིད་སྲུང་བར་བྱས་ནས། མཚམས་བཅད་པ་དང་། མཆོད་པ་ལ་སོགས་པ་ཡིད་ཀྱིས་བྱས་ནས། དེའི་སྔགས་བརྗོད་ཅིང་ཇི་སྲིད་འདོད་
[65b.3]ཀྱི་བར་དུ་བཟླས་ཤིང་བསྒྲུབས་པས། བརྩོན་འགྲུས་དང་མཐུན་པ་གཉིས་ལས་ཀྱི་རྗེས་སུ་མཐུན་པའི་དངོས་གྲུབ་ངེས་པར་འགྱུར་རོ། །གཅིག་གིས་ཀྱང་འཇིག་རྟེན་གསུམ་བསྲུང་ནུས་པར་རྒྱུད་ལས་གསུངས་སོ། །དོན་ཡོད་གྲུབ་པ་འདི་ཡང་དམ་ཚིག་གསུམ་གྱི་རྒྱལ་པོ་ལས་བགེགས་མེད་
[65b.4]པའི་དངོས་གྲུབ་ཏུ་འགྱུར་ཏེ། ཡིད་ལ་འདོད་པའི་རྣམ་པ་ཉིད། །ཅེས་སོ། །སྔོན་དུ་བསྙེན་པ་ལ་སོགས་པའི་ཆོ་ག་དང་བྲལ་ཡང་། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་དམིགས་པ་ཙམ་བྱས་ནས། སེམས་ཀྱིས་སྔགས་བཟླས་པར་བྱའོ། །འདིར་ཡང་གང་དང་གང་
[65b.5]གི་ཆོ་ག་ཡིད་ཀྱིས་འདོད་པས་སྔགས་པ་རྣམས་སྒྲུབ་པ་དང་ལྡན་པས་དངོས་གྲུབ་ཏུ་འགྱུར་རོ། །ཇི་ལྟར་འདིར་གསུངས་པ་དབེན་ཞིང་སྐྱེ་བོ་མེད་པའི་གནས་སུ་སྨྲ་བ་ཡོངས་སུ་སྤངས་ནས་སེམས་ཅན་རྣམས་ལ་གནོད་པ་མ་ཡིན་པས་མཆོད་པ་མེད་པ་དང་། སྟན་མེད་པ་དང་ཁྲུས་མ་བྱས་པ་ལ་སོགས་
[65b.6]པ་ཆོ་གའི་ཚོགས་མ་ཚང་བ་ཡང་ངེས་པར་བསྒྲུབས་པས་དངོས་གྲུབ་ཏུ་འགྱུར་རོ། །ཡང་གསུངས་ཏེ། འདིར་ཡང་ཤིན་ཏུ་ངོ་མཚར་བ་གཉིས་ཏེ། སྔགས་རྣམས་ཀྱིས་ཇི་ལྟ་ཇི་ལྟར་བསྒྲུབས་པའི་མཐའ་ལ་དེ་ལྟ་དེ་ལྟར་རྗེས་སུ་མཐུན་པར་འགྱུར་རོ། །ཡང་གང་དང་གང་གི་ཆོ་ག་སྦྱོར་བའི་
[65b.7]མཐའ་ལ་དེའི་མཐའ་བཞིན་དུ་དངོས་གྲུབ་ཏུ་འགྱུར་རོ། །སླར་ཡང་གསུངས་པ། གང་གིས་བྱང་ཆུབ་སེམས་བརྟན་ཞིང་། །རྟོག་པ་མེད་པའི་བློ་གྲོས་གྱུར། །ཐེ་ཚོམ་མེད་པས་དེ་བཞིན་སྒྲུབ། །དེ་འདིར་དངོས་གྲུབ་ངེས་པར་འགྱུར། །ཞེས་སོ། །དེའི་ཕྱིར་བརྩོན་འགྲུས་བསྐྱེད་ནས་ཐེ་ཚོམ་
[66a]
[66a.1]མེད་པར་བསྒྲུབས་པས་ངེས་པར་དངོས་གྲུབ་ཏུ་འགྱུར་རོ། །འདི་ཡང་དངོས་གྲུབ་ཀྱི་དོན་དུ་དམ་ཚིག་མཆོག་ཏུ་བསྟན་པར་འབད་པས་བསྲུངས་པར་འགྱུར་བས་དེ་དངོས་གྲུབ་ཐམས་ཅད་ཀྱི་རྩ་བར་འགྱུར་རོ། །དམ་ཚིག་དེ་ཡང་དམ་པའི་ཆོས་ཕྱིར་སྤང་བར་མི་བྱ་བ་དང་། བླ་མ་
[66a.2]ལ་སྨད་པར་མི་བྱའོ། །ཆང་བཏུང་བར་མི་བྱའོ། །ཁྲི་ལ་ཉལ་བར་མི་བྱའོ། །རྡོ་རྗེའི་རྣམ་པ་ལྟ་བུ་བཟའ་བར་མི་བྱ་ཞིང་འགོད་པར་མི་བྱའོ་ཞེས་བྱ་བ་ལ་སོགས་པ་ནི་ངེས་པར་རྒྱུད་ལས་ཤེས་པར་བྱ་སྟེ། མངས་པའི་འཇིགས་པས་འདིར་མ་བྲིས་སོ། །ཁྲུས་བྱེད་པར་འདོད་ན་ཡང་དམ་ཚིག་གསུམ་
[66a.3]བཟླས་པའི་འཕགས་པ་མི་གཡོ་བའི་སྙིང་པོ་དོན་ཡོད་གཏུམ་པོས་དེ་བཞིན་དུ་རྡོ་རྗེའི་ཕྱག་རྒྱ་དང་ལྡན་པས་ས་ལ་སོགས་པར་ཁྲུས་བྱས་པའི་རྫས་ཐམས་ཅད་ལ་མངོན་པར་བསྔགས་ཏེ། གདུག་པ་ཅན་ཐམས་ཅད་བསྐྲད་ནས། མཚམས་ལ་སོགས་པ་བཅད་པར་བྱས་པའི་མཐར་བགེགས་
[66a.4]ཐམས་ཅད་རབ་ཏུ་ཞི་བར་འགྱུར་རོ་ཞེས་སོ། །དམ་ཚིག་གསུམ་གྱི་རྒྱལ་པོའི་སྒྲུབ་ཐབས་རྫོགས་སོ། །པཎྜི་ཏ་ཆེན་པོ་ཀུ་མུ་ཏ་འབྱུང་བའི་བློ་གྲོས་ཞབས་ཀྱིས་མཛད་པ་རྫོགས་སོ།། {T3401}༄༅༅། །རྒྱ་གར་སྐད་དུ། ཏཱྀ་ས་མ་ཡ་རཱ་ཛ་སཱ་དྷ་ནཾ། བོད་སྐད་དུ། དམ་ཚིག་
[66a.5]གསུམ་གྱི་རྒྱལ་པོའི་སྒྲུབ་ཐབས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །མི་མཉམ་མི་གཡོ་ཤིན་ཏུ་ཡང་དག་ཆོས་ཀྱི་སྙིང་། །སྙིང་རྗེའི་བདག་ཉིད་འགྲོ་བ་རྣམས་ཀྱི་སྡུག་བསྔལ་འཇོམས། །མཉམ་མེད་ཡོན་ཏན་ཀུན་དང་དངོས་གྲུབ་སྟེར་མཛད་པ། །
[66a.6]དྲི་མེད་མི་གཡོ་མཚུངས་མེད་རབ་མཆོག་ཆོས་རྣམས་ནི། །ནམ་མཁའ་དང་མཚུངས་དེ་རྣམས་དཔེ་མེད་ཡོན་ཏན་གྱི། །ཆ་ཤས་རྡུལ་ཕྲན་ཟེགས་མས་ཀྱང་ནི་མཚམས་མེད་པ། །རྟག་ཏུ་སེམས་ཅན་ཁམས་བྱེད་དངོས་གྲུབ་སྦྱིན་པ་པོ། །དཔེ་དང་བྲལ་ཞིང་མ་ལུས་པ་ཡི་དངོས་གྲུབ་རྣམས། །
[66a.7]རྟག་ཏུ་དྲི་མེད་སྙིང་རྗེའི་ཤུགས་ཀྱིས་ལངས་ནས་ནི། །སྨོན་ལམ་གྲུབ་ཅིང་འགོག་པ་མེད་པའི་ཆོས་ཉིད་དོ། །འགྲོ་བའི་དོན་དུ་སྒྲུབ་ཐབས་གཞན་ཡང་མཐའ་མེད་པ། །བརྩེ་བ་ཆེན་པོའི་བདག་ཉིད་རྟག་ཏུ་རྣམ་པར་མཛེས། །འགག་མེད་སྙིང་རྗེའི་སྤྱོད་པ་གཡོ་བ་མེད་པ་ཡིས། །འཇིག་རྟེན་
[66b]
[66b.1]གསུམ་བགྲོད་མཆོག་གི་དངོས་གྲུབ་སྦྱིན་པ་པོ། །གཞལ་བྱ་གཞལ་བྱེད་དང་བྲལ་ལེགས་པར་ཡོངས་རྫོགས་ཤིང་། །ཀྱེ་མ་ཆོས་ཉིད་དེར་འཇུག་ལེགས་པར་ཁོང་དུ་ཆུད། །དམ་ཚིག་གསུམ་མཆོག་དངོས་གྲུབ་མཆོག་སྦྱིན་སྟེར་མཛད་པ། །སྦྱིན་པའི་མཆོག་དེ་བདག་ལ་རྟག་ཏུ་ལེགས་པར་སྩོལ། །
[66b.2]འཇིག་རྟེན་གསུམ་ཀུན་མཆོག་སྦྱིན་མཆོག་གི་སྒྲུབ་པ་པོ། །མགོན་པོ་དུས་གསུམ་གཤེགས་རྣམས་ཀུན་ནས་སྒྲིབ་མེད་པ། །དམ་ཚིག་གསུམ་རྒྱལ་རྟོག་པར་གསུངས། །རྡོར་འཛིན་གླུ་དང་བསྟོད་པ་བྱ། །དེ་འདིར་སངས་རྒྱས་ཐམས་ཅད་ཀྱི། །ཡོན་ཏན་རྒྱ་ཆེན་ཕུལ་དུ་བྱུང་། །ལན་ཅིག་
[66b.3]ཙམ་དུ་བརྗོད་པས་ཀྱང་། །སྔགས་རྣམས་ཐམས་ཅད་ངེས་པར་འགྲུབ། །བསྟོད་པའི་རྒྱལ་པོ་འདི་ཡིས་ནི། །དེ་བཞིན་གཤེགས་རྣམས་ངེས་པར་མཉེས། །དངོས་གྲུབ་རྒྱ་ཆེན་སྟེར་བར་བྱེད། །རྟོག་པ་ལ་གནས་རྟོག་ལས་གསུངས། །མགོན་པོ་རྣམ་པར་སྣང་མཛད་ཆེ། །མི་བསྐྱོད་རིན་ཆེན་
[66b.4]འབྱུང་ལྡན་དང་། །རྒྱལ་བ་དག་པ་འོད་དཔག་མེད། །དོན་ཡོད་གྲུབ་པ་རྒྱལ་པོ་ཀུན། །རོ་དང་རོ་བཅུད་དེ་ཉིད་དང་། །མཆོག་ཏུ་སྟེར་བར་མཛད་པ་སྟེ། །མ་ལུས་དངོས་གྲུབ་དག་དང་ནི། །དགའ་བ་རྒྱ་ཆེན་ཕུན་ཚོགས་གནས། །བསམ་པ་ཐམས་ཅད་ཡོངས་སུ་གང་། །ཡིད་ཀྱི་འདོད་པ་ཡོངས་
[66b.5]སུ་སྟེར། །ཡེ་ཤེས་ཚེ་དང་སྟོབས་ཀྱི་ཤུགས། །དགེ་བའི་མཆོག་རྣམས་སྟེར་བ་པོ། །ཞེས་སོ། །དེ་བཞིན་དུ་བསྟོད་པ་འདི་རྡོ་རྗེའི་གུར་གྱིས་བརྒྱན་པ། རྣལ་འབྱོར་རྒྱུད་ཆེན་པོའི་རྗེས་སུ་འབྲང་ནས་བརྗོད་པར་བྱའོ་ཞེས་སོ། །སངས་རྒྱས་ཀུན་ལ་ཕྱག་འཚལ་ལོ། །སངས་རྒྱས་སྲས་ཀྱི་རང་
[66b.6]བཞིན་དང་། །དུས་གསུམ་སངས་རྒྱས་ཕྱག་འཚལ་ནས། །འཆད་འགྱུར་དམ་ཚིག་ཅུང་ཟད་རྣམས། །དཔལ་ལྡན་དམ་ཚིག་གསུམ་ལས་གསུངས། །དམ་ཆོས་སྨད་པར་མི་བྱ་ཞིང་། །གང་དུའང་སྤང་བར་མི་བྱའོ། །རྫོགས་སངས་རྒྱས་དང་བྱང་ཆུབ་སེམས། །དེ་རྣམས་མི་གུས་སྤང་བར་
[66b.7]བྱ། །བླ་མའི་བཀའ་ལས་འདའ་མི་བྱ། །ལུས་ཅན་རྣམས་ནི་གསད་མི་བྱ། །རང་གི་སྔགས་དང་ཕྱག་རྒྱ་ཡང་། །དོན་མེད་པ་དང་ཉམས་མི་བྱ། །སེར་སྣ་ཆང་གི་བཏུང་བ་ནི། །ཐམས་ཅད་དུ་ཡང་བྱ་བ་མིན། །རྡོ་རྗེའི་རྣམ་པ་མི་འགོང་ཞིང་། །བཟའ་བར་བྱ་བའང་མ་ཡིན་ནོ། །ཁྲི་ཡི་སྟེང་དུ་མི་
[67a]
[67a.1]ཉལ་ཞིང་། །ཕྱག་རྒྱ་མི་གུས་སྤང་བར་བྱ། །བླ་མ་དང་ནི་ལྷ་རྣམས་དྲུང་། །བྱིས་པའི་ཆོས་ཉིད་མི་བྱའོ། །མངོན་སྤྱོད་བྱ་བ་མ་ཡིན་ཞིང་། །ཚུལ་ཁྲིམས་ལྡན་པ་སྨད་མི་བྱ། །བྱ་མིན་བྱ་བ་མི་བྱ་ཞིང་། །སྡིག་ལ་རྗེས་སུ་ཡི་རང་མིན། །རང་གཞན་རྗེས་སུ་མི་མཐུན་པའི། །
[67a.2]བྱ་བ་རྣམས་ནི་སྤང་བར་བྱ། །རྟོག་པ་ཆེན་པོའི་དམ་ཚིག་འདི། །དཔལ་ལྡན་དམ་ཚིག་གསུམ་ལས་ཤེས། །འཚོ་བ་འགྱོད་བཅས་མི་བྱ་ཞིང་། །ཚོགས་སྨྲ་དགའ་བས་ཆོག་པར་བྱ། །ཐེ་ཚོམ་ཉིད་དུ་གྱུར་པ་དང་། །ཡོ་བྱད་ཡོངས་སུ་འཛིན་པ་དང་། །ལེ་ལོ་དང་ནི་ཞུམ་པའི་སེམས། །དེ་བཞིན་
[67a.3]བདག་ལ་བསྟོད་ལ་སོགས། །བར་དུ་གཅོད་པའི་ཆོས་རྣམས་སུ། །རྟོག་པའི་རྒྱལ་པོ་ཉིད་ལས་གསུངས། །ཉེས་པ་འདི་རྣམས་ལས་ངེས་པར་གྲོལ་ཞིང་སྔོན་དུ་གསུངས་པའི་དམ་ཚིག་ལ་གནས་ནས་ཆགས་པ་ཐམས་ཅད་སྤངས་ཏེ། དད་པ་དང་བརྟན་པའི་ཡང་དག་པའི་བྱང་ཆུབ་ཀྱི་སེམས་
[67a.4]ཀྱིས་འགྲོ་བ་གསུམ་པོ་ལ་ཕན་པ་དང་ལྡན་པའི་ལུས་དང་། ངག་དང་ཡིད་རྣམས་ཀྱིས་བྱེད་པ་དང་། དམ་ཚིག་གསུམ་ལས་གསུངས་པའི་སྒྲུབ་ཐབས་ཀྱི་ཆོ་གས་འདོད་པའི་དངོས་གྲུབ་ཏུ་འགྱུར་རོ། །རིན་ཆེན་འབྱུང་གནས་སྦས་པའི་ཞབས་ཀྱིས་མཛད་པ། དམ་ཚིག་གསུམ་གྱི་རྒྱལ་པོའི་སྒྲུབ་
[67a.5]ཐབས་རྫོགས་སོ།། {T3402}༄༅༅། །རྒྱ་གར་སྐད་དུ། ཤྲཱི་བཛྲ་ཨཱ་ས་ན་སཱ་དྷ་ནཾ། བོད་སྐད་དུ། དཔལ་རྡོ་རྗེ་གདན་གྱི་སྒྲུབ་ཐབས། དཔལ་རྡོ་རྗེ་གདན་ལ་ཕྱག་འཚལ་ལོ། །ཡོན་ཏན་ཚོགས་ཀྱི་གཞིར་གྱུར་གཞན་དོན་བླ་མེད་དེ་བཞིན་གཤེགས་པ་ཀུན་ལ་ཕྱག་འཚལ་ལོ། །
[67a.6]དཔལ་ལྡན་རྡོ་རྗེ་གདན་ཞེས་ཕུན་སུམ་ཚོགས་མིན་འཇོམས་ཤིང་འཁོར་བའི་སྐྱོན་གྱིས་མ་གོས་པ། །གང་ཞིག་དུལ་ཞིང་ཞི་བ་མཆོག་གི་སངས་རྒྱས་ཉིད་ཀྱི་དེ་ཉིད་སྒྲུབ་པའི་ཐབས་གྱུར་པ། །སྣ་ཚོགས་ཁ་དོག་གིས་སྤྲས་བརྒྱན་པའི་དེ་བཞིན་གཤེགས་པ་ལ་སོགས་བདག་གིས་བྲི་བར་བྱ། །དེ་ལ་
[67a.7]མདུན་དུ་འོག་ནས་འབྱུང་བའི་ཆོ་གས་བཅོམ་ལྡན་འདས་སྐུ་མདོག་དང་ཕྱག་མཚན་ལ་སོགས་པ་དང་ལྡན་པ་རྣམ་པར་བསམས་ཏེ། མེ་ཏོག་ལ་སོགས་པ་དབུལ་བར་བྱའོ། །ཨོཾ་ན་མཿཨཀྵོ་བྷྱཱ་ཡ་ཧཱུཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། སོ་སོར་ལན་གསུམ་དུ་དབུལ་བར་བྱའོ། །ཨོཾ་ན་མོ་བཻ་རོ་ཙཱ་ན་ཡ་ཨོཾ་ཨོཾ་བཛྲ་
[67b]
[67b.1]པུཥྤེ་ཧཱུཾ་སྭཱ་ཧཱ། ཨོཾ་ན་མོ་རཏྣ་སཾ་བྷ་བཱ་ཡ་ཏྲཱཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ཨ་མི་ཏཱ་བྷཱ་ཡ་ཧྲཱིཿ ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ཨ་མོ་གྷ་སིདྡྷ་ཡེ་ཨཿ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ལོ་ཙ་ནཱ་ཡཻ་ལཱཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་མཱ་མ་ཀཻ་མཱཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མཿཔཎྜ་རཱ་ཡཻ་པཾ།
[67b.2]ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མཿསྟྲཱ་རཱ་ཡཻ་ཏཱཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། སླར་ཡང་མི་བསྐྱོད་པའི་གཟུགས་ལ་སོགས་པས་རྡོ་རྗེ་གདན་ལ་མང་ཞིང་ཆེས་རབ་ཏུ་མང་བའི་མེ་ཏོག་དབུལ་བར་བྱའོ། །རིམ་པ་འདི་ཉིད་ཀྱིས་ཏེ། ཨོཾ་བཛྲ་དྷཱུ་པེ་ཧཱུཾ་སྭཱ་ཧཱ། ཨོཾ་བཛྲ་གནྡྷེ་ཧཱུཾ་སྭཱ་ཧཱ། ཨོཾ་བཛྲ་ནཻ་བི་དྱེ་ཧཱུཾ་སྭཱ་ཧཱ། ཨོཾ་
[67b.3]བཛྲ་དཱི་པེ་ཧཱུཾ་སྭཱ་ཧཱ། ཞེས་པ་ལ་སོགས་པས་མཆོད་པའི་ཆོ་ག་བྱས་ནས་བྱམས་པ་ལ་སོགས་པ་བསྒོམ་པ་སྔོན་དུ་འགྲོ་བས་སོ། །དེ་ནས་རང་གི་སྙིང་གར་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཧཱུཾ་ཡིག་གསེར་གྱི་ཁ་དོག་ལྟ་བུ། དེ་ལས་འོད་ཟེར་འཕྲོས་པས་བླ་མ་དང་།
[67b.4]སངས་རྒྱས་དང་། བྱང་ཆུབ་སེམས་དཔའ་རྣམས་བལྟས་ལ། དེ་ནས་ཁྲུས་དང་མེ་ཏོག་ལ་སོགས་པ་མཆོད་པའི་སྤྲིན་རབ་ཏུ་འཕྲོས་པས་ཡང་དག་པར་མཆོད་དོ། །དེ་ནས་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། དགེ་བ་ཡོངས་སུ་བསྔོ་བ་དང་། གསུམ་ལ་
[67b.5]སྐྱབས་སུ་འགྲོ་བ་དང་། རྒྱལ་བའི་ལམ་ལ་བརྟེན་པ་དང་། བྱང་ཆུབ་ཏུ་སེམས་བསྐྱེད་པ་ཡང་བྱ་སྟེ། དཀོན་མཆོག་གསུམ་ལ་སྐྱབས་སུ་མཆི། །ཞེས་བྱ་བ་ལུ་སོགས་པས་སོ། །དེ་ནས་སྟོང་པ་ཉིད་བསྒོམ་པར་བྱའོ། །ཆོས་ཐམས་ཅད་རང་བཞིན་མེད་པའི་ངོ་བོ་ཉིད་རྣམ་པར་
[67b.6]བསྒོམས་ནས། ཡི་གེའི་གཟུགས་བྱང་ཆུབ་ཀྱི་སེམས་ཀྱི་རང་བཞིན་འོད་གསལ་བའི་བདག་ཉིད་བལྟ་བར་བྱའོ། །བརྟན་པར་བྱ་བའི་དོན་དུ་སྔགས་བརྗོད་པར་བྱའོ། །ཨོཾ་སྭ་བྷཱ་ཝ་ཤུདྡྷཱཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། དེ་བཞིན་དུ་འོད་ཟེར་གྱི་གཟུགས་ཡོངས་སུ་གྱུར་པ་ལས་ཟླ་བའི་དཀྱིལ་
[67b.7]འཁོར་རོ། །དེའི་སྟེང་དུ་ཧཱུཾ་གི་ཡི་གེ་ལ་ཨ་ལ་སོགས་པའི་དབྱངས་ཡིག་བཅུ་དྲུག་གིས་ཡོངས་སུ་བསྐོར་བའོ། །གཞན་ཡང་ཀ་ཡིག་ལ་སོགས་པའི་སྡེ་ཚན་རྣམས་ཀྱིས་ཡོངས་སུ་བསྐོར་བའོ། །ཐམས་ཅད་ཁ་དོག་དཀར་པོ་སྟེ། མ་ལུས་པ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་
[68a]
[68a.1]གཟུགས་སུ་བསམ་པར་བྱའོ། །དེའི་སྟེང་དུ་ཧཱུཾ་ཡིག་གི་ས་བོན་དེ་ཡོངས་སུ་གྱུར་པ་ལས་རྡོ་རྗེ་ཁ་དོག་སེར་པོའོ། །དེ་ལ་ཡང་རྡོ་རྗེའི་ལྟེ་བ་ལ་ཧཱུཾ་ཡིག་གོ། །དེ་རྣམས་ཐམས་ཅད་ཡོངས་སུ་གྱུར་པ་ལས་རྡོ་རྗེ་གདན་གྱི་སྐུ་གསེར་གྱི་མདོག་ལྟ་བུའོ། །དེའི་གདན་བདུད་རྣམ་
[68a.2]པ་བཞི་སྟེ། དེ་ཡང་ཕུང་པོ་དང་། ཉོན་མོངས་པ་དང་། འཆི་བདག་དང་། ལྷའི་བུའི་བདུད་རྣམས་སེར་པོ་དང་། དམར་པོ་དང་། ནག་པོ་དང་། སྔོན་པོའི་ཁ་དོག་རྣམས་རིམ་པ་ཇི་ལྟ་བ་བཞིན་དུ་གཟུགས་འདི་རྣམས་རྣམ་པར་བསྒོམ་པར་བྱའོ། །བདུད་འདི་རྣམས་ཀྱིས་ཡོངས་སུ་བྱས་པའི་སེང་གེའི་ཁྲི།
[68a.3]དེའི་སྟེང་དུ་སྣ་ཚོགས་པདྨ་དང་རྡོ་རྗེ་ལ་བཞུགས་པའི་བཅོམ་ལྡན་འདས་ཞལ་གཅིག་ཕྱག་གཉིས་པ་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཡས་པ་ས་གནོན་གྱི་ཕྱག་རྒྱ་དང་ལྡན་པ། གཡོན་པ་གན་རྐྱལ་དུ་པང་དུ་བཞག་པའོ། །ན་བཟའ་དམར་པོ་སྐུ་ལ་བསྣམས་པ་ཞི་བའི་བདག་ཉིད་རྣལ་འབྱོར་པས་
[68a.4]བསྒོམ་པར་བྱའོ། །དེ་ནས་ང་རྒྱལ་བསྐྱེད་པར་བྱ་སྟེ། ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བཅོམ་ལྡན་འདས་ཀྱི་གཡས་ཕྱོགས་ན་བྱང་ཆུབ་སེམས་དཔའ་བྱམས་པ་སྐུ་མདོག་སེར་པོ། ཕྱག་གཉིས་པ་རལ་པའི་ཅོད་པན་འཛིན་པ། ཕྱག་གཡས་པ་ན་རིན་པོ་ཆེའི་རྔ་ཡབ་བསྣམས་པ། གཡོན་
[68a.5]ན་ཀླུ་ཤིང་གི་ཡལ་ག་མེ་ཏོག་དང་བཅས་པ་བསྣམས་པའོ། །དེ་བཞིན་དུ་གཡོན་ན་བྱང་ཆུབ་སེམས་དཔའ་འཇིག་རྟེན་དབང་ཕྱུག་སྐུ་མདོག་དཀར་པོ་ཕྱག་གཡས་ན་རིན་པོ་ཆེའི་རྔ་ཡབ་བསྣམས་པ། གཡོན་ན་པདྨ་བསྣམས་པ། བཅོམ་ལྡན་འདས་ཀྱི་ཞལ་ལ་བལྟ་ཞིང་འཁོད་པ་བསྒོམ་པར་བྱའོ། །དེ་ནས་
[68a.6]ཡན་ལག་དྲུག་ཏུ་ཡི་གེ་དྲུག་དགོད་པར་བྱ་སྟེ། བཅོམ་ལྡན་འདས་ཀྱི་སྤྱན་གཉིས་ལ་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ཀྵིཾ་ཁ་དོག་དཀར་པོའོ། །སྙན་གཉིས་ལ་ཟླ་བའི་དཀྱིལ་འཁོར་གྱི་སྟེང་དུ་ཛྲཱིཾ་ཡིག་ཁ་དོག་སྔོན་པོའོ། །ཤངས་གཉིས་ལ་ཟླ་བའི་དཀྱིལ་འཁོར་གྱི་སྟེང་དུ་ཁཾ་ཡིག་ཁ་དོག་སེར་པོའོ། །
[68a.7]ལྗགས་ལ་ཟླ་བའི་དཀྱིལ་འཁོར་གྱི་སྟེང་དུ་གཾ་ཡིག་ཁ་དོག་དམར་པོའོ། །དཔྲལ་བར་ཟླ་བའི་དཀྱིལ་འཁོར་གྱི་སྟེང་དུ་ཀཾ་ཡིག་ཁ་དོག་ལྗང་གུའོ། །ནུ་མའི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་སཾ་ཡིག་ཁ་དོག་དཀར་པོའོ་ཞེས་བྱ་བ་ནི་ཡན་ལག་དྲུག་ལ་དགོད་པ་བསྒོམ་པར་བྱའོ། །དེ་ནས་རང་གི་
[68b]
[68b.1]སྙིང་གར་ཟླ་བའི་དཀྱིལ་འཁོར་ལ་ཧཱུཾ་ཡིག་ཡོངས་སུ་གྱུར་པ་ལས་རྡོ་རྗེ། དེའི་ལྟེ་བ་ལ་ཟླ་བའི་དཀྱིལ་འཁོར་དེའི་སྟེང་དུ་ཧཱུཾ་ཡིག་གོ། །དེ་ཐམས་ཅད་ཡོངས་སུ་གྱུར་པ་ལས་ཡེ་ཤེས་སེམས་དཔའ་བཞིན་དུ་བསམ་པར་བྱའོ། །སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཡིག་ཡོངས་སུ་གྱུར་པ་ལས་འཁོར་
[68b.2]ལོ་ཁ་དོག་དཀར་པོ། དེའི་དབུས་སུ་ཟླ་བ་ལ་གནས་པའི་ཨོཾ་ཡིག་ཅེས་བྱ་བ་ནི་བཅོམ་ལྡན་འདས་ཀྱི་སྐུ་རྣམ་པར་དག་པ་བསྒོམ་པའོ། །མགྲིན་པར་ཟླ་བའི་དཀྱིལ་འཁོར་དེའི་སྟེང་དུ་ཨཱཿཡིག་ཡོངས་སུ་གྱུར་པ་ལས་པདྨ་འདབ་མ་བརྒྱད་པ་ཁ་དོག་དམར་པོ། དེའི་དབུས་སུ་ཟླ་བའི་དཀྱིལ་འཁོར་ལ་
[68b.3]གནས་པའི་ཨཱཿཡིག་ཅེས་བྱ་བ་ནི་བཅོམ་ལྡན་འདས་ཀྱི་གསུང་རྣམ་པར་དག་པ་བསྒོམ་པའོ། །ལྟེ་བའི་དབུས་སུ་ཟླ་བའི་དཀྱིལ་འཁོར་དེའི་སྟེང་དུ་ཧཱུཾ་ཡིག་ཡོངས་སུ་གྱུར་པ་ལས་རྡོ་རྗེ་ཁ་དོག་ནག་པོ། དེའི་དབུས་སུ་ཟླ་བའི་དཀྱིལ་འཁོར་ལ་གནས་པའི་ཧཱུཾ་ཡིག་ཅེས་པ་ནི་བཅོམ་ལྡན་འདས་ཀྱི་ཐུགས་
[68b.4]རྣམ་པར་དག་པར་བསྒོམ་པ་སྟེ། སངས་རྒྱས་སྒྲུབ་ཅིང་སངས་རྒྱས་ཉིད་ཀྱི་འབྲས་བུ་སྟེར་བའོ་ཞེས་སོ། །དེ་ནས་ནམ་མཁའ་ལ་གནས་པའི་བཅོམ་ལྡན་འདས་སྙིང་གའི་ས་བོན་གྱི་འོད་ཟེར་གྱིས་བཀུག་ནས་ཛཿཧཱུཾ་བཾ་ཧོཿཞེས་པའི་ཡི་གེ་བཞིས་མདུན་དུ་དགོད་པར་བྱའོ། །དེ་ནས་མཆོད་ཡོན་དང་
[68b.5]ཞབས་བསིལ་དང་ཞལ་བསིལ་དང་། བསང་གཏོར་རྣམས་དབུལ་བར་བྱའོ། །ཕྱི་ནས་འོ་ཐུག་ལ་སོགས་པའི་སྟོན་མོ་དབུལ་བར་བྱའོ་ཞེས་པ་ནི་བདུད་རྩི་མྱང་བར་བྱའོ། །དེ་ནས། སངས་རྒྱས་ཀུན་ལ་ཕྱག་འཚལ་ལོ། །ཞེས་པའི་བསྟོད་པ་འདིས་བསྟོད་པར་བྱའོ། །དེ་ནས་ཡེ་ཤེས་སེམས་དཔའ་
[68b.6]དང་དམ་ཚིག་སེམས་དཔའ་གཅིག་ཏུ་བྱས་ཏེ། ས་མ་ཡ་སྟྭཾ། ས་མ་ཡ་སྟྭཾ། ས་མ་ཡ་སྟྭཾ་ཨ་ཧཾ་ཨོཾ་ཨཱཿཧཱུཾ་ཞེས་བྱ་བའི་སྔགས་འདིས་གཉིས་སུ་མེད་པར་བྱའོ། །དེ་ནས་བསྒོམས་པས་ངལ་ན་སྔགས་བཟླས་པར་བྱའོ། །ཨོཾ་ཨཱཿབཛྲ་ཧཱུཾ་སྭཱ་ཧཱ་ཞེས་པའི་སྔགས་བཟླས་པར་བྱའོ། །ཕྱི་ནས་བསོད་ནམས་
[68b.7]ཡང་དག་པར་རྫོགས་པའི་བྱང་ཆུབ་ཏུ་བསྔོས་ནས་གཤེགས་སུ་གསོལ་ཏེ་ཇི་ལྟར་འདོད་པར་གནས་པར་བྱའོ། །བསོད་ནམས་འདི་ཡིས་སེམས་ཅན་ཐམས་ཅད་ཀྱིས་དེ་བཞིན་གཤེགས་པའི་ཡེ་ཤེས་མྱུར་དུ་ཐོབ་པར་གྱུར་ཅིག །རྗེ་བཙུན་རྡོ་རྗེ་གདན་གྱི་སྒྲུབ་ཐབས་ཀྱི་མན་ངག་གི་ཆོ་ག་རྫོགས་སོ།། །།
[69a]
[69a.1]{T3403}༄༅༅། །རྒྱ་གར་སྐད་དུ། བཛྲཱ་ས་ན་སཱ་དྷ་ནཾ། བོད་སྐད་དུ། རྡོ་རྗེ་གདན་གྱི་སྒྲུབ་ཐབས། བྱང་ཆུབ་ཆེན་པོ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་སྟོང་པ་ཉིད་དུ་བསྒོམས་ནས་རྒྱུན་མ་ཆད་པར་ཟླ་བའི་དཀྱིལ་འཁོར་ལ་ཧཱུཾ་ཡིག་སྔོན་པོ་ལ། ཨ་ཡིག་ལ་སོགས་
[69a.2]པའི་དབྱངས་དཀར་པོ་བཅུ་དྲུག་གིས་བསྐོར་བའོ། །དེ་ནས་ཀ་ཡིག་ལ་སོགས་པའི་གསལ་བྱེད་དཀར་པོ་སུམ་ཅུ་རྩ་བཞིས་ཡོངས་སུ་བསྐོར་བའོ། །དེ་རྣམས་ཐམས་ཅད་ཡོངས་སུ་གྱུར་པ་ལས། ཟླ་བའི་དཀྱིལ་འཁོར། དེའི་སྟེང་དུ་སླར་ཡང་ལྷའི་ས་བོན་དེ་ཡོངས་སུ་གྱུར་པ་ལས་རྡོ་རྗེ་སེར་པོ་
[69a.3]དེའི་ལྟེ་བ་ལ་ཧཱུཾ་ཡིག་སེར་པོ། དེ་ཐམས་ཅད་ཡོངས་སུ་གྱུར་པ་ལས་རྗེ་བཙུན་སངས་རྒྱས་དཔལ་ལྡན་རྡོ་རྗེ་གདན་གྱི་བདག་ཉིད་མྱུར་དུ་བསྒོམ་པར་བྱ་སྟེ། ཕྱག་གཉིས་པ། ཞལ་གཅིག་པ་སེར་པོའོ། །བདུད་བཞི་ལས་བྱས་པའི་སེང་གེའི་ཁྲི་ཆེན་པོ་མཆོག་ལ། དེའི་སྟེང་དུ་སྣ་ཚོགས་པདྨ་དང་
[69a.4]རྡོ་རྗེ་ལ་སྐྱིལ་མོ་ཀྲུང་གིས་བཞུགས་པ། ཕྱག་གཡོན་པ་པང་དུ་བཞག་པ། གཡས་པ་ས་གནོན་གྱི་ཕྱག་རྒྱ་མཛད་པ། སྐུ་ལ་ན་བཟའ་དམར་པོ་བསྣམས་པ། ཡན་ལག་དང་ཉིང་ལག་ཐམས་ཅད་རྒྱས་པའི་སྐུ་རུ་བསྒོམ་པར་བྱའོ། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་སྔགས་
[69a.5]ཀྱིས་གཉིས་སུ་མེད་པའི་ང་རྒྱལ་བྱའོ། །དེ་ནས་བཅོམ་ལྡན་འདས་ཀྱི་གཡས་ན་བྱང་ཆུབ་སེམས་དཔའ་བྱམས་པ་གསེར་གྱི་མདོག་ལྟ་བུ་སེར་པོ་ཕྱག་གཉིས་པ་རལ་པའི་ཅོད་པན་བཅིངས་པ། ཕྱག་གཡས་ན་རྔ་ཡབ་བསྣམས་པ། ཕྱག་གཡོན་ན་ཀླུ་ཤིང་གི་ཡལ་ག་འབྲས་བུ་དང་བཅས་པ་
[69a.6]བསྣམས་པའོ། །དེ་བཞིན་དུ་གཡོན་ན་བྱང་ཆུབ་སེམས་དཔའ་འཇིག་རྟེན་དབང་ཕྱུག་དཀར་པོ་རལ་པའི་ཅོད་པན་ཅན་ཕྱག་གཡས་པ་རྔ་ཡབ་འཛིན་པ། གཡོན་ན་ཆུ་སྐྱེས་འཛིན་པའོ། །དེ་དག་གཉིས་ཀྱང་བཅོམ་ལྡན་འདས་ལ་ཞལ་མངོན་པར་ཕྱོགས་ཤིང་བལྟ་བའོ། །དེ་ནས་ཡན་ལག་
[69a.7]དྲུག་ཏུ་ཡི་གེ་དྲུག་དགོད་པར་བྱའོ། །བཅོམ་ལྡན་འདས་ཀྱི་སྤྱན་དག་ལ་ཟླ་བ་ལ་གནས་པའི་ཀྵིཾ་ཡིག་དཀར་པོའོ། །སྙན་དག་ལ་ཟླ་བ་ལ་གནས་པའི་ཛྲཱྀཾ་ཡིག་སྔོན་པོའོ། །ཤངས་ཀྱི་བུ་ག་དག་ལ་ཟླ་བ་ལ་གནས་པའི་ཁཾ་ཡིག་སེར་པོའོ། །ལྗགས་ལ་ཟླ་བ་ལ་གནས་པའི་གཾ་ཡིག་དམར་པོའོ། །
[69b]
[69b.1]དཔྲལ་བ་ལ་ཟླ་བ་ལ་གནས་པའི་ཀཾ་ཡིག་སེར་པོའོ། །ནུ་མ་ལ་ཟླ་བ་ལ་གནས་པའི་སཾ་ཡིག་དཀར་པོའོ། །དེ་ནས་ཐུགས་ཀར་ཟླ་བ་ལ་གནས་པའི་ཧཱུཾ་ཡིག་སྔོན་པོ་ལས་སྐྱེས་པའི་རྡོ་རྗེ། དེའི་ལྟེ་བ་ལ་ཡང་ཟླ་བ་ལ་གནས་པའི་ཧཱུཾ་ཡིག་ཅེས་པ་ནི་ཐུགས་རྣམ་པར་དག་པ་བསྒོམ་པའོ། །མགྲིན་པར་ཟླ་
[69b.2]བའི་དཀྱིལ་འཁོར་ལ་ཨཱཿཡིག་དམར་པོ་ལས་སྐྱེས་པའི་པདྨའི་ལྟེ་བ་ལ་གནས་པའི་ཨཱཿཡིག་ཅེས་པ་ནི་གསུང་རྣམ་པར་དག་པ་བསྒོམ་པའོ། །སྤྱི་བོར་ཟླ་བ་ལ་ཨོཾ་ཡིག་དཀར་པོ་ལས་སྐྱེས་པའི་འཁོར་ལོ་རྩིབས་བརྒྱད་པའི་ལྟེ་བ་ལ་གནས་པའི་ཨོཾ་ཡིག་ཅེས་པ་ནི་སྐུ་རྣམ་པར་དག་པ་བསྒོམ་པའོ། །ལྟེ་བའི་
[69b.3]སྟེང་དུ་ཟླ་བ་ལ་གནས་པའི་རྡོ་རྗེ་དང་བཅས་པའི་ཧཱུཾ་ཡིག་ཅེས་པ་ནི་ཐུགས་རྣམ་པར་དག་པ་བསྒོམ་པའོ། །དེ་ནས་སྙིང་གའི་ས་བོན་གྱིས་ཡེ་ཤེས་སེམས་དཔའ་བཀུག་ནས་མཆོད་ཡོན་དང་། ཞབས་བསིལ་དང་རྣམ་པ་སྣ་ཚོགས་པའི་མཆོད་པས་མཉེས་པར་བྱས་ཏེ། བསྟོད་ཅིང་ཕྱག་འཚལ་
[69b.4]བ་སྔོན་དུ་འགྲོ་བས་དམ་ཚིག་སེམས་དཔའ་དང་གཅིག་ཏུ་བྱས་ནས། ས་མ་ཡ་སྟྭཾ། ས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ་ཨོཾ་ཨཱཿཧཱུཾ་ཞེས་པའི་སྔགས་འདིས་གཉིས་སུ་མེད་པའི་ང་རྒྱལ་བསྐྱེད་པར་བྱའོ། །དེ་ནས་བསྒོམས་པས་ངལ་ན་སྔགས་བཟླས་པར་བྱའོ། །ཨོཾ་ཨཱཿབཛྲ་ཧཱུཾ་སྭཱ་ཧཱ། རྡོ་རྗེ་
[69b.5]གདན་གྱི་སྒྲུབ་ཐབས་རྫོགས་སོ།། {T3404}༄༅༅། །རྒྱ་གར་སྐད་དུ། བཛྲཱ་ས་ན་སཱ་དྷ་ནཾ། བོད་སྐད་དུ། རྡོ་རྗེ་གདན་གྱི་སྒྲུབ་ཐབས། དཔལ་རྡོ་རྗེ་གདན་ལ་ཕྱག་འཚལ་ལོ། །དང་པོར་ཁ་ལ་སོགས་པ་བསང་བའི་ཆོ་ག་བྱས་ནས་རང་གི་སྙིང་གར་ཨ་ཡིག་ཡོངས་སུ་གྱུར་པ་ལས་ཟླ་བ་
[69b.6]ལ་ཧཱུཾ་ཡིག་སེར་པོ་བལྟ་བར་བྱའོ། །དེའི་འོད་ཟེར་གྱིས་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་ལ་སོགས་པ་རྣམས་བཀུག་ནས་མཆོད་པར་བྱའོ། །དེ་ནས་ཡང་སྡིག་པ་བཤགས་པ་ལ་སོགས་པའི་ཆོ་ག་བྱས་ནས། སྟོང་པ་ཉིད་མངོན་དུ་བྱས་ཏེ་དེའི་སྔགས་ཀྱིས་བྱིན་གྱིས་བརླབ་
[69b.7]པར་བྱའོ། །དེ་ནས་སྔོན་གྱི་སྨོན་ལམ་གྱིས་ཡང་དག་པར་བསྐུལ་ནས་གཟུགས་ཀྱི་སྐུ་མངོན་པར་སྤྲུལ་ནས་སེམས་ཅན་གྱི་དོན་གྱི་ཕྱིར་ཟླ་བའི་དཀྱིལ་འཁོར་གྱི་དབུས་སུ་ཧཱུཾ་ཡིག་སེར་པོ་བལྟས་ནས། ཨ་ཡིག་ལ་སོགས་པའི་དབྱངས་དཀར་པོ་བཅུ་དྲུག་གིས་བསྐོར་ཏེ། དེ་ནས་ཕྱི་རོལ་དུ་ཀ་ཡིག་
[70a]
[70a.1]ལ་སོགས་པའི་ཡི་གེའི་ཚོགས་དཀར་པོ་རྣམས་ཀྱིས་བསྐོར་བའོ། །དེ་ཐམས་ཅད་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཧཱུཾ་ཡིག་ལས་སྐྱེས་པའི་རྡོ་རྗེའོ། །དེ་ཐམས་ཅད་ཡོངས་སུ་གྱུར་པ་ལས་རྡོ་རྗེ་སེར་པོའི་གདན་གྱི་བདག་ཉིད་བསྒོམ་པར་བྱའོ། །
[70a.2]དེའི་སྟེང་དུ་སངས་རྒྱས་བཅོམ་ལྡན་འདས་ཕྱག་གཡས་པ་ས་གནོན་གྱི་ཕྱག་རྒྱ། གཡོན་པ་པང་དུ་བཞག་པ། སྐུ་ལ་ངུར་སྨྲིག་གི་ན་བཟའ་བསྣམས་པ། སྔོན་པོ་དང་། སེར་པོ་དང་། དམར་པོ་དང་། ལྗང་གུ་སྟེ། བདུད་བཞིའི་སྟེང་དུ་སྣ་ཚོགས་པདྨ་དང་རྡོ་རྗེ་ལ་བཞུགས་པ། ཞི་ཞིང་མཚན་དང་དཔེ་
[70a.3]བྱད་ཀྱིས་སྤྲས་པའི་སྐུའོ། །བཅོམ་ལྡན་འདས་དེའི་གཡས་སུ་བྱང་ཆུབ་སེམས་དཔའ་བྱམས་པ་སེར་པོ་ཕྱག་གཉིས་པ་རལ་པའི་ཅོད་པན་བཅིངས་པ། ཕྱག་གཡས་ན་རིན་པོ་ཆེའི་རྔ་ཡབ་བསྣམས་པ། གཡོན་ན་ཀླུ་ཤིང་གི་ཡལ་ག་མེ་ཏོག་དང་བཅས་པ་བསྣམས་པའོ། །དེ་བཞིན་དུ་གཡོན་ན་འཇིག་
[70a.4]རྟེན་དབང་ཕྱུག་དཀར་པོ་ཕྱག་གཡས་ན་རྔ་ཡབ་བསྣམས་པ། ཕྱག་གཡོན་ན་ཆུ་སྐྱེས་བསྣམས་པ། བཅོམ་ལྡན་འདས་ལ་ཞལ་བལྟ་བ་གཞན་དག་བསྒོམ་པར་བྱའོ། །དེ་ནས་ཡན་ལག་དྲུག་ཏུ་ཡི་གེ་དགོད་པར་བྱ་སྟེ། བཅོམ་ལྡན་འདས་ཀྱི་སྤྱན་དག་ལ་ཟླ་བ་ལ་གནས་པའི་ཀྵིཾ་ཡིག་དཀར་པོའོ། །
[70a.5]སྙན་དག་ལ་རི་བོང་འཛིན་པ་ལ་གནས་པའི་ཛྲཱྀཾ་ཡིག་སྔོན་པོའོ། །ཤངས་ཀྱི་བུ་ག་ལ་ཟླ་བ་ལ་གནས་པའི་ཁཾ་ཡིག་སེར་པོའོ། །ལྗགས་ལ་ཟླ་བ་ལ་གནས་པའི་གཾ་ཡིག་དམར་པོའོ། །དཔྲལ་བ་ལ་ཟླ་བ་ལ་གནས་པའི་ཀཾ་ཡིག་སྔོན་པོའོ། །ནུ་མའི་དབུས་སུ་ཟླ་བ་ལ་གནས་པའི་སཾ་ཡིག་དཀར་པོ་བསམ་
[70a.6]པར་བྱའོ། །དེའི་རྗེས་སུ་ཡེ་ཤེས་སེམས་དཔའ་བསྒོམས་ནས་སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཡིག་ལས་སྐྱེས་པའི་འཁོར་ལོ་རྩིབས་བརྒྱད་པ་དཀར་པོའོ། །དེའི་སྟེང་དུ་ཟླ་བ་ལ་གནས་པའི་ཨོཾ་ཡིག་གོ། །མགྲིན་པར་ཟླ་བའི་སྟེང་དུ་ཨཱཿཡིག་ལས་སྐྱེས་པའི་པདྨ་འདབ་མ་བརྒྱད་པ་དེའི་དབུས་སུ་
[70a.7]ཟླ་བ་ལ་གནས་པའི་ཨཱཿཡིག་གོ། །སྙིང་གར་ཟླ་བ་ལ་གནས་པའི་ཧཱུཾ་ཡིག་ལས་སྐྱེས་པའི་རྡོ་རྗེ་རང་གི་ས་བོན་གྱི་སྙིང་པོ་ཅན་ནོ། །ལུས་དང་ངག་དང་ཡིད་རྣམ་པར་དག་པ་སྟེ་གསུམ་པོ་བསྒོམ་པར་བྱའོ། །ཇི་སྲིད་དུ་བཅོམ་ལྡན་འདས་བསྒོམས་པས་སྐྱོན་སྔགས་བཟླས་པར་བྱའོ། །དེ་ལ་སྔགས་ནི་
[70b]
[70b.1]འདི་ཡིན་ཏེ། ཨོཾ་ཨཱཿབཛྲ་ཧཱུཾ་སྭཱ་ཧཱ། ཞེས་སོ། །རྡོ་རྗེ་གདན་གྱི་སྒྲུབ་པའི་ཐབས་རྫོགས་སོ།། {T3405}༄༅༅། །རྒྱ་གར་སྐད་དུ། ཨཱརྱ་ཥ་ཊ་ཀྵ་རཱི་མ་ཧཱ་བིདྱཱ་སཱ་དྷ་ནཾ། བོད་སྐད་དུ། འཕགས་པ་ཡི་གེ་དྲུག་མ་རིག་པ་ཆེན་པོའི་སྒྲུབ་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །དང་
[70b.2]པོར་རེ་ཞིག་སྔགས་པས་སྟན་བདེ་བ་ལ་འདུག་སྟེ། ཁ་བསང་བ་ལ་སོགས་པ་བྱས་ནས་རང་གི་སྙིང་གར་ཟླ་བ་ལ་གནས་པའི་ཧྲཱིཿཡིག་དཀར་པོ་ལས་འོད་ཟེར་འཕྲོས་ནས་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་མདུན་དུ་བལྟས་ཏེ་ཡང་དག་པར་མཆོད་ནས་གསུམ་ལ་སྐྱབས་སུ་འགྲོ་
[70b.3]བ་ལ་སོགས་པ་བྱ་བ་ནི། དཀོན་མཆོག་གསུམ་ལ་བདག་སྐྱབས་མཆི། །ཞེས་བྱ་བ་ལ་སོགས་པས་ཇི་སྲིད་སེམས་ཅན་རྣམས་དང་། སེམས་ཅན་གྱི་ཁོངས་སུ་གཏོགས་ཤིང་བསྡུས་པ་རྣམས། སྒོ་ང་ལས་སྐྱེས་པ་དང་། མངལ་ལས་སྐྱེས་པ་དང་། དྲོད་གཤེར་ལས་སྐྱེས་པ་དང་། རྫུས་ཏེ་
[70b.4]སྐྱེས་པ་དང་། གཟུགས་ཅན་དང་། གཟུགས་མེད་པ་དང་། འདུ་ཤེས་ཅན་དང་། འདུ་ཤེས་མེད་པ་དང་། འདུ་ཤེས་ཡོད་མིན་མེད་མིན་དང་། གང་ཡང་ཅུང་ཟད་སེམས་ཅན་གྱི་ཁོངས་སུ་གཏོགས་ཤིང་བགྲང་བ་དེ་དག་ཐམས་ཅད་བདག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་
[70b.5]གཞག་པར་བྱའོ། །དེ་ནས་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་ལན་གསུམ་བརྗོད་པར་བྱའོ། །དེའི་རྗེས་སུ་སྐད་ཅིག་གིས་སྟོང་པར་དམིགས་ཤིང་། དེ་ནས་རང་གི་སྙིང་གར་པདྨ་དཀར་པོའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་ཧྲཱིཿཡིག་དཀར་པོ། དེ་ལ་འོད་ཟེར་
[70b.6]བརྒྱ་སྟོང་དཔག་ཏུ་མེད་པ་འབྱུང་བར་བསམས་ལ། སེམས་ཅན་ཐམས་ཅད་ཀྱི་དུས་ཐོག་མ་མེད་པ་ནས་བསགས་པའི་འདོད་ཆགས་ལ་སོགས་པའི་ཉོན་མོངས་པའི་ཚོགས་མ་ལུས་པ་རྣམ་པར་དག་པར་བྱས་ནས། སླར་ཡང་དེ་ཉིད་ལ་དེ་བཞིན་དུ་ཞུགས་ནས་གང་དེ་ཉིད་ཡོངས་སུ་གྱུར་པ་
[70b.7]ལས་བདག་ཉིད་འཇིག་རྟེན་དབང་ཕྱུག་གི་སྐུ། རྒྱན་ཐམས་ཅད་ཀྱིས་བརྒྱན་པ། སྐུ་མདོག་དཀར་པོ་ཕྱག་བཞི་པ་གཡོན་པདྨ་བསྣམས་པ། གཡས་ན་བགྲང་ཕྲེང་བསྣམས་པ། ཕྱག་གཞན་གཉིས་ཐུགས་ཀར་ཐལ་མོ་སྦྱར་བ། འོད་དཔག་མེད་ཀྱི་རལ་པའི་ཅོད་པན་ཅན་བསྒོམ་
[71a]
[71a.1]པར་བྱའོ། །གཡས་ཕྱོགས་སུ་ནོར་བུ་འཛིན་པ་དེ་དང་སྐུ་མདོག་ཕྱག་མཚན་མཚུངས་པ་པདྨའི་ནང་གི་སྟེང་དུ་གནས་པའོ། །དེ་བཞིན་དུ་གཡོན་དུ་པདྨ་གཞན་གྱི་སྟེང་དུ་ཡི་གེ་དྲུག་མའི་རིག་བྱེད་མ་ཆེན་མོ་འཇིག་རྟེན་དབང་ཕྱུག་དང་འདྲ་བའི་སྐུ་མདོག་དང་ཕྱག་མཚན་
[71a.2]བསྒོམ་པར་བྱའོ། །དེ་ནས་ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿསུ་ར་ཏ་སྟྭཾ། ཨ་ལ་ལ་ལ་ལ་ཧོ། ཨཿཨཿཨཿཨཱཿཞེས་བྱ་བས་བྱིན་གྱིས་བརླབས་པའི་སྔགས་ཀྱི་རྒྱལ་པོ་བརྗོད་པར་བྱའོ། །དེ་བཞིན་དུ་བསྒོམས་ནས་དེ་ནས་འཇིག་རྟེན་དབང་ཕྱུག་གི་ཐུགས་ཀར་ཟླ་བའི་དཀྱིལ་འཁོར་གྱི་རྣམ་པ་ལ་
[71a.3]བགྲང་ཕྲེང་གི་རྣམ་པ་ལྟ་བུ་ཁ་དོག་དཀར་པོ་ཞལ་ནས་ཕྱུང་སྟེ། ལྟེ་བར་འཇུག་ཅིང་འཁོར་ལོ་ལྟར་འཁོར་བའི་སྦྱོར་བས། སངས་རྒྱས་ཐམས་ཅད་ཀྱི་སྙིང་པོ་རྟོག་པའི་སྔགས་ཀྱི་རྒྱལ་པོ་ཡིད་བཞིན་གྱི་ནོར་བུ་འདི་མཚན་མ་མེད་པའི་སྦྱོར་བས་བལྟ་ཞིང་དེ་ནས་བཟླས་པ་བྱའོ། །དེ་ནས་འཁོར་ཞིང་འཛག་
[71a.4]པ་ལ་སོགས་པ་ཐོབ་ནས་དད་པ་དང་། སྙིང་རྗེ་དང་ལྡན་ཞིང་བླ་མ་ལ་གུས་པའི་རྣལ་འབྱོར་པས་དུས་མི་རིང་བས་དངོས་གྲུབ་ཏུ་འགྱུར་རོ། །ཨོཾ་མ་ཎི་པདྨེ་ཧཱུཾ་ཞེས་བྱ་བའི་སྔགས་བཟླས་པར་བྱའོ། །དེ་ནས་ལྡང་བའི་དུས་སུ་སྔགས་ཀྱི་རྒྱལ་པོ་འདི་བརྗོད་ནས་ལྡང་བར་བྱའོ། །ཨོཾ་བཛྲ་སཏྭ་ས་མ་ཡ། མ་ནུ་
[71a.5]པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་ཝཱ་ན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿཞེས་བརྗོད་ནས་ཅི་བདེར་གནས་པར་
[71a.6]བྱའོ། །ཡི་གེ་དྲུག་མའི་སྒྲུབ་ཐབས། དཔལ་ལྷན་ཅིག་སྐྱེས་པའི་རོལ་པས་མཛད་པ་རྫོགས་སོ།། {T3406}༄༅༅། །རྒྱ་གར་སྐད་དུ། ཥ་ཊ་ཀྵ་ར་སཱ་དྷ་ནཾ། བོད་སྐད་དུ། ཡི་གེ་དྲུག་པའི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མགོན་པོ་
[71a.7]པདྨའི་རིགས་ལས་བྱུང་། །ཐམས་ཅད་མཁྱེན་པའི་ཅོད་པན་ཅན། །ནད་རྣམས་ཐམས་ཅད་ཞི་བའི་ཕྱིར། །ཕྱག་བཙལ་ནས་ནི་སྒྲུབ་ཐབས་བརྩམ། །དང་པོར་རེ་ཞིག་དངོས་གྲུབ་སློབ་དཔོན་གྱི་རྗེས་སུ་འཇུག་པས། དེའི་ཕྱིར་ཐམས་ཅད་དུ་སྒོམ་པ་དང་། བླ་མའི་མཆོད་པ་ལ་བརྩོན་པར་བྱ་སྟེ།
[71b]
[71b.1]བླ་མ་ཡོངས་སུ་མཉེས་པས་ཐམས་ཅད་དུ་ལས་རྣམས་འགྲུབ་པར་འགྱུར་ཞིང་དཀྱིལ་འཁོར་དུ་རབ་ཏུ་ཞུགས་པས་དངོས་གྲུབ་ཐོབ་པར་ཡང་འགྱུར་ཏེ། རང་གི་དམ་ཚིག་དང་སྡོམ་པ་བསྲུངས་པས་ངེས་པར་དངོས་གྲུབ་ཐོབ་བོ། །སྔོན་དུ་ཁ་བསང་བ་ལ་སོགས་པ་བྱས་ནས་ལྷ་ཁང་དུ་རྗེ་བཙུན་གྱི་ཐང་སྐུ་
[71b.2]ལ་སོགས་པ་བཀྲམ་ནས་རང་གི་ཐུགས་ཀར་དང་པོའི་ཡི་གེ་ལས་ཟླ་བའི་དཀྱིལ་འཁོར། དེའི་སྟེང་དུ་བརྒྱད་པའི་བཞི་པའི་ས་བོན་ལ་བདུན་པའི་གཉིས་པའི་གདན་དང་། དང་པོའི་བཞི་པས་བརྒྱན་ཅིང་། བཅུ་དྲུག་པ་དང་ཡང་དག་པར་ལྡན་པ་ཁ་དོག་དཀར་ཞིང་ཡིད་དུ་འོང་བའོ། །དེ་ལས་སྣ་
[71b.3]ཚོགས་པའི་འོད་ཟེར་འཕྲོས་ཏེ། འོད་ཟེར་དེ་རྣམས་ཀྱི་ཚོགས་ལས་བླ་མ་རྫོགས་པའི་སངས་རྒྱས་ཀྱི་སྐུར་བསྒོམས་ནས་མཆོད་པ་དང་། ཕྱག་དང་བསྟོད་པ་བྱ་སྟེ། སྔགས་འདིས་སོ། །ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ནཻ་བི་དྱེ་ཧཱུཾ། ཞེས་
[71b.4]སོ། །དེ་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་
[71b.5]རབ་སྒྲུབ་ཕྱིར། །བྱང་ཆུབ་སེམས་ནི་བདག་གིས་བསྐྱེད། །བྱང་ཆུབ་མཆོག་ཏུ་སེམས་བསྐྱེད་ནས། །སེམས་ཅན་ཐམས་ཅད་མགྲོན་དུ་གཉེར། །མངོན་འདོད་བྱང་ཆུབ་མཆོག་སྤྱད་པས། །འགྲོ་ལ་ཕན་ཕྱིར་སངས་རྒྱས་ཤོག །སྨོན་པ་སྔོན་དུ་འགྲོ་བས་ཆོས་ཐམས་ཅད་བདག་མེད་པར་
[71b.6]བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་སོ། །ས་བོན་སྒྱུ་མའི་དཔེར་བྱས་ནས། །ཁམས་གསུམ་པ་ནི་མ་ལུས་པ། །བལྟ་ཞིང་རེག་ནས་དེ་བཞིན་དུ། །ཇི་ལྟར་ཐམས་ཅད་སྒྱུ་མ་བཞིན། །ཐམས་ཅད་དེ་བཞིན་དམིགས་མེད་པས། །འགྲོ་བ་གནས་པ་རྟག་ཏུ་གྲོལ། །
[71b.7]དེས་ན་ཐོག་མ་མེད་པའི་དུས་ནས་རྣམ་རྟོག་ངན་པའི་ས་བོན་ལས་བྱུང་བའི་རང་བཞིན་ལས་གྲོལ་བར་བྱས་ཏེ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། དེ་ནས་སྔོན་དུ་གསུངས་པའི་ས་བོན་ཡོངས་སུ་གྱུར་པ་ལས་པདྨའོ། །དེའི་སྟེང་དུ་ཧྲཱིཿཡིག་དེ་ཐམས་ཅད་ཡོངས་སུ་གྱུར་པ་ལས་དཔལ་
[72a]
[72a.1]ལྡན་འཇིག་རྟེན་མགོན་པོ་རྡོ་རྗེ་དང་། པདྨའི་སྙིང་པོ་ལ་ཟླ་བའི་སྟེང་དུ་རྡོ་རྗེ་སྐྱིལ་ཀྲུང་གིས་བཞུགས་པ། རི་བོང་འཛིན་པའི་འོད་ཟེར་ལྟ་བུ། ཀུནྡ་དང་ཟླ་བའི་ཁ་དོག་འབར་བ་ལས། རལ་པའི་ཅོད་པན་ཅན་ཞི་ཞིང་འོད་དཔག་ཏུ་མེད་པས་དབུ་བརྒྱན་པ། སྟག་གི་པགས་
[72a.2]པའི་ཤམ་ཐབས་བསྣམས་པ། ཕྱག་བཞི་པ་སྣ་ཚོགས་པའི་རྒྱན་གྱིས་བརྒྱན་པ། ཕྱག་གཡས་ན་བགྲང་ཕྲེང་བསྣམས་པ། ཕྱག་གཡོན་ན་པདྨ་དང་ནོར་བུས་རྣམ་པར་བརྒྱན་པ། ཕྱག་གཉིས་ཐལ་མོ་སྦྱར་བ། རྒྱལ་བའི་དབང་པོ་ཀུན་གྱི་ཕྱག་རྒྱ་ཐུགས་ཀར་གནས་པའོ། །དེ་ནས་ང་
[72a.3]རྒྱལ་བསྒོམ་པར་བྱ་སྟེ། བདག་ཉིད་འཇིག་རྟེན་དབང་ཕྱུག་གོ། །ཞེས་སོ། །དེ་ནས་ཇི་ལྟར་ཉེ་བར་བསྟན་པས་ཡེ་ཤེས་སེམས་དཔའ་སྤྱན་དྲངས་ཏེ། རང་གི་སྔགས་ཀྱིས་མཆོད་ཡོན་དང་ཞབས་བསིལ་ལ་སོགས་པ་ཕུལ་ཏེ། ཕྱག་རྒྱ་བསྡུས་ནས་གཅིག་ཏུ་བྱས་ཏེ། སྔགས་འདིས་
[72a.4]ལྷན་ཅིག་ཏུ་དགོད་དོ། །ཨོཾ་སུ་ར་ཏ་སྟྭཾ། བཛྲ་ཨ་ལ་ལ་ལ་ལ་ཧོ། ས་མ་ཡ་སྟྭཾ། ས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ་ཞེས་སོ། །ཇི་ལྟར་ཉེ་བར་བསྟན་པས་དབང་བསྐུར་བ་དང་། གོ་ཆ་དང་། དར་དཔྱངས་བཅིངས་པས་ལྷག་པར་གྲོལ་བར་འགྱུར་རོ། །དུས་ཐམས་ཅད་དུ་མཆོད་པ་དང་། བསྟོད་
[72a.5]པ་དང་། བསྒོམ་པ་སྔོན་དུ་འགྲོ་བར་བྱས་ནས་བཟླས་པ་བྱའོ། །རང་གི་སྙིང་གར་ཟླ་བའི་སྟེང་དུ་ཡི་གེ་དྲུག་པ་འོད་ཟེར་གྱི་ཕྲེང་བ་བཞིན་དུ་བྱས་པའི་ཁྱིམ་གྱི་ནང་དུ་བལྟ་བར་བྱའོ། །སྔགས་ནི་ཨོཾ་མ་ཎི་པདྨེ་ཧཱུཾ་ཞེས་པ་ཡི་གེ་འབུམ་དུ་བཟླས་སོ། །དེ་ནས་གཉིས་པ་དང་གསུམ་པས་སྡིག་པ་དག་པར་
[72a.6]འགྱུར་རོ། །མཚམས་མེད་པ་ལྔ་བྱེད་པས་ཀྱང་བྱེ་བ་བཟླས་པས་དངོས་གྲུབ་ཏུ་འགྱུར་རོ། །དེ་ལས་ལྡང་བར་འདོད་ན་མཆོད་ཡོན་ལ་སོགས་པ་ཕུལ་ནས། ཁྱད་པར་འཕགས་པའི་ང་རྒྱལ་གྱིས་གནས་པར་བྱའོ། །ཐུན་མཚམས་བཞིར་བཟླས་ཤིང་དགེ་བའི་རྩ་བ་མངོན་པར་འདོད་པའི་དངོས་གྲུབ་
[72a.7]ཏུ་བསྔོའོ། །ནམ་ཕྱེད་ནས་ཡེ་ཤེས་སེམས་དཔའ་གཤེགས་སུ་གསོལ་ལ་ཡི་གེ་བརྒྱ་པ་བརྗོད་ཅིང་། ལུས་དང་། ངག་དང་། ཡིད་བསྲུང་བར་བྱས་ནས་ཅི་བདེར་གནས་པར་བྱ་སྟེ། གལ་ཏེ་ནད་ལ་སོགས་པ་ཞི་བར་འདོད་ན། དེ་ལ་ཇི་ལྟར་ཉེ་བར་བསྟན་པས་སྐར་མ་རྒྱལ་ལས་ལམ་ལྷུང་བའི་བའི་
[72b]
[72b.1]ལྕི་བས་རྗེ་བཙུན་གྱི་དྲུང་དུ་མཎྜལ་གྲུ་བཞི་བྱ་སྟེ། མངོན་པར་འདོད་པ་ལ་ཡི་གེ་དྲུག་པ་དང་སྦྱར་ནས་ལན་བརྒྱ་རྩ་བརྒྱད་བཟླས་པར་བྱའོ། །ཟླ་བ་དྲུག་གིས་ཐེ་ཚོམ་མེད་པར་འགྲུབ་བོ་ཞེས་སོ། །ཟ་མ་ཏོག་བཀོད་པའི་མན་ངག་གིས་མཛད་པའི་ཡི་གེ་དྲུག་པའི་སྒྲུབ་ཐབས་རྫོགས་སོ།། །།
[72b.2]{T3407}༄༅༅། །རྒྱ་གར་སྐད་དུ། ལོ་ཀ་ནཱ་ཐ་སཱ་དྷ་ནཾ། བོད་སྐད་དུ། འཇིག་རྟེན་མགོན་པོའི་སྒྲུབ་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །འདིར་སྔོན་གྱི་ཆོ་གས་ཟླ་བའི་དཀྱིལ་འཁོར་ལ་བདུན་པའི་གསུམ་པའི་ས་བོན་བཅུ་གསུམ་པས་གནོན་པ། ཟླ་བའི་ཐིག་ལེས་རྣམ་པར་བརྒྱན་པ།
[72b.3]དེ་རྣམས་ཡོངས་སུ་གྱུར་པ་ལས་དཔལ་ལྡན་འཇིག་རྟེན་མགོན་པོ་ཞི་བ་རལ་པའི་ཅོད་པན་འཆང་བ། སྐུ་ཟླ་བ་བཞིན་དུ་དྲི་མ་མེད་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་ན་པདྨ་བསྣམས་པ། གཡས་པ་མཆོག་སྦྱིན་པ། ཕྱག་གཉིས་ཁུ་ཚུར་བཅིངས་ནས་གུང་མོ་པདྨ་ཁ་མ་བྱེ་བ་
[72b.4]ལྟ་བུ། པདྨ་དང་ཟླ་བའི་གདན་ལ་བཞུགས་པར་བསྒོམ་པར་བྱའོ། །འདིའི་ཕྱག་རྒྱས་རྒྱས་གདབ་པར་བྱའོ། །ཨོཾ་མ་ཎི་པདྨེ་ཧཱུཾ་ཞེས་པ་ཡི་གེ་འབུམ་དུ་བཟླས་པས་སྡིག་པ་ཐམས་ཅད་དག་པར་འགྱུར་རོ། །གཉིས་དང་གསུམ་གྱིས་རྨི་ལམ་དུ་མཐོང་བར་འགྱུར་རོ། །བྱེ་བ་བཟླས་ན་མཚམས་མེད་
[72b.5]པ་ལྔ་བྱས་པས་ཀྱང་འགྲུབ་པར་འགྱུར་རོ། །དཔལ་ལྡན་འཇིག་རྟེན་མགོན་པོའི་སྒྲུབ་ཐབས་རྫོགས་སོ།། {T3408}༄༅༅། །རྒྱ་གར་སྐད་དུ། ཥ་ཊ་ཀྵ་ར་སཱ་དྷ་ནཾ། བོད་སྐད་དུ། ཡི་གེ་དྲུག་པའི་སྒྲུབ་ཐབས། འཇིག་རྟེན་དབང་ཕྱུག་ཡི་གེ་དྲུག་པ་ལ་ཕྱག་འཚལ་ལོ། །ལུས་ཅན་
[72b.6]གཞན་ལ་ཡང་དག་པར། །ཡིད་ཀྱིས་ཕན་པར་དམིགས་བྱ་སྟེ། །སྡུག་བསྔལ་མ་ལུས་ཉེར་ཞི་ཞིང་། །དམ་པའི་བདེ་ལ་དགོད་པར་བྱ། །དེ་ནས་ཡིད་ཀྱིས་སྙིང་ག་རུ། །ཟླ་བ་དཀར་པོ་ཡང་དག་བསྒོམ། །དེ་ལས་འོད་ཟེར་འཕྲོས་གྱུར་པས། །རང་ལུས་འོད་ཀྱིས་གང་བར་བསམ། །ངལ་བསོས་
[72b.7]སྔགས་པས་ཆོ་ག་བཞིན། །ངན་པའི་རྣམ་རྟོག་བསྡུས་ནས་ནི། །འོད་ཟེར་དཀར་པོ་འཕྲོ་བ་ཡིས། །སྔགས་ནི་གསལ་པོར་བརྗོད་པར་བྱ། །ལྟེ་བའི་དཀྱིལ་འཁོར་ལ་ཞུགས་ནས། །ཉིད་ཀྱི་སྙིང་གར་ཡང་དག་བསྡུ། །ལུས་ངག་ཡིད་ནི་དག་བྱའི་ཕྱིར། །ལན་གསུམ་དུ་ནི་བསྒོམ་པར་བྱ། །
[73a]
[73a.1]དེ་ནས་རང་གི་ལུས་གནས་ལ། །བདག་གི་ལུས་ལ་སོགས་པ་དག །སྔགས་ནི་ཕྱི་རོལ་འཐོན་གྱུར་ནས། །སྲོག་ཆགས་རྣམས་ལ་ཕོག་པར་བསམ། །བལྟ་ཞིང་བརྗོད་པའི་སྔགས་ལས་བསྐྱེད། །མདུན་དུ་ལྷ་རྣམས་གསུམ་ཡིན་ཏེ། །སྔགས་ནི་བརྗོད་ནས་ཡང་
[73a.2]དག་བསྡུ། །རིམ་པས་སོ་སོར་རེ་རེར་དཔྱད། །སྣ་ཚོགས་མཆོད་པ་སྤྲུལ་ནས་ནི། །དེ་བཞིན་དེ་ལ་ངེས་པར་འབུལ། །ཡོངས་སུ་གང་ཞིང་དེ་ནས་དག །འདོད་པའི་དོན་རྣམས་ཡོངས་སུ་བསྔོ། །སྔགས་ནི་དེ་ལས་བཟླས་པར་བྱ། །ཆོ་གའི་མཐའ་ལ་བཟླས་པ་དང་། །མཆོད་པ་ལ་སོགས་
[73a.3]སྔོན་བཞིན་བྱ། །ལྷ་རྣམས་ཐུགས་ཀར་ཡང་དག་བསྡུ། །ཏིང་འཛིན་སོ་སོར་དམིགས་ལ་སོགས། །ཐུན་མཚམས་དག་ནི་བཞི་རྣམས་སུ། །སྐྱེ་བོས་དབེན་པའི་ཁྱིམ་སོགས་སུ། །སྔགས་པས་འབུམ་ཕྲག་གཅིག་ཏུ་བཟླས། །རླུང་དང་སེམས་ཀྱི་བྱེད་པ་སྤངས། །བཟླས་པ་སྤྲོ་ཞིང་
[73a.4]ཡང་དག་བསྡུ། །སྡིག་པ་ཀུན་ནས་ཟད་སོགས་ལ། །མཎྜལ་གྲུ་བཞིར་བྱས་ནས་ནི། །བྲིས་སྐུ་ལ་སོགས་བཀྲམ་བྱས་ལ། །དེ་ཡི་མདུན་དུ་གཙོ་བོ་བསྒོམ། །དཀྱིལ་འཁོར་མཆོད་པར་བྱ་བ་ནི། །ཆོ་ག་འདི་ཡིས་མཆོད་པར་བྱ། །དེ་ལ་འདིར་ལྷའི་རྣམ་པའི་ཉེ་བར་བསྟན་པ་ནི། དཀར་
[73a.5]ཞིང་སྐྱིལ་ཀྲུང་བགྲང་ཕྲེང་དང་། །ཆུ་སྐྱེས་དང་བཅས་ཐལ་མོ་སྦྱོར། །གཙོ་བོ་བལྟ་ཞིང་དེ་ཡི་སྐུ། །ལྷ་མོ་དཔའ་བོའི་སྟན་ལ་རྟེན། །འཕགས་མ་སེར་མོ་བསམ་པར་བྱ། །གཡོན་ན་རིན་ཆེན་ཕྲེང་བ་བསྣམས། །གཡས་པའི་ཕྱག་ནི་སྟོང་པ་སྟེ། །རིན་པོ་ཆེ་ཡི་ཅོད་པན་ཅན། །དཔའ་བོའི་སྟན་
[73a.6]དང་ལྡན་པའོ། །ཞེས་པ་ནི་འཕགས་པ་ཡི་གེ་དྲུག་མའི་རིག་སྔགས་ཆེན་མོ་རྗེ་བཙུན་འཇིག་རྟེན་དབང་ཕྱུག་གི་མན་ངག་རྒྱ་ཆེར་བརྒྱུད་པའི་སྒྲུབ་ཐབས་ཀྱི་ཆོ་གའོ། །ཡི་གེ་དྲུག་པའི་སྒྲུབ་ཐབས་ཁ་ཅིག་ལས་བཅོམ་ལྡན་འདས་ནོར་བུ་དང་བཅས་པའི་པོ་ཏིས་མཚན་པ་དང་། པདྨ་བསྣམས་པ་དང་། ནོར་
[73a.7]བུ་འཛིན་པ་ནི་པོ་ཏི་དང་བྲལ་ཞིང་ནོར་བུ་དང་པདྨ་འཛིན་པའོ། །ཡི་གེ་དྲུག་མ་ནི་ནོར་བུ་དང་བྲལ་ཞིང་པོ་ཏི་དང་པདྨ་འཛིན་པའོ། །མཆོད་པའི་སྔགས་ནི། ཨོཾ་ལོ་ཀེ་ཤྭ་ར་པུཥྤཾ་པྲ་ཏཱིཙྪ་སྭཱ་ཧཱ། དེ་བཞིན་དུ་དྷཱུ་པཾ། དཱི་པཾ་ཞེས་པ་ལ་སོགས་པ་ཡང་ཤེས་པར་བྱའོ། །ལྷ་གཞན་རྣམས་ལ་ཡང་འདིས་ཤེས་པར་
[73b]
[73b.1]བྱའོ། །ཡེ་ཤེས་ཀྱི་དཀྱིལ་འཁོར་དགུག་པའི་སྔགས་འདིའོ། །ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿསུ་ར་ཏ་སྟྭཾ། ཨ་ལ་ལ་ལ་ལ་ཧོ། ཨཿཨཿཨཿཨཱཿཞེས་སོ། །ཡི་གེ་དྲུག་པའི་སྒྲུབ་ཐབས་རྫོགས་སོ།། {T3409}༄༅༅། །རྒྱ་གར་སྐད་དུ། ཨཱརྱ་ཁརྨ་པཱ་ཎི་ལོ་ཀེ་ཤྭ་ར་སཱ་དྷ་ནཾ། བོད་
[73b.2]སྐད་དུ། འཕགས་པ་ཁརྶ་པཱ་ཎི་འཇིག་རྟེན་དབང་ཕྱུག་གི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དང་པོ་རེ་ཞིག་སྔགས་པས་སྟན་བདེ་བ་ལ་འདུག་སྟེ། ཞལ་བསང་བ་ལ་སོགས་པ་བྱས་ཤིང་། སྦྱངས་ནས་རང་གི་སྙིང་གར་ཨ་ཡིག་ལས་ཟླ་བའི་དཀྱིལ་འཁོར་
[73b.3]བསྒོམ་པར་བྱའོ། །དེའི་སྟེང་དུ་ཧྲཱིཿཡིག་དཀར་པོ། དེའི་འོད་ཟེར་གྱིས་མདུན་གྱི་ནམ་མཁའི་མཐིལ་དུ་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་ལ་སོགས་པ་རྣམས་སྤྱན་དྲངས་ནས། སྙིང་གའི་ས་བོན་གྱི་འོད་ཟེར་ལས་བྱུང་བའི་མཆོད་པའི་སྤྲིན་ཚོགས་རྣམས་ཀྱིས་ཡང་དག་
[73b.4]པར་མཆོད་ནས། སྡིག་པ་བཤགས་པ་ལ་སོགས་པ་བྱས་ནས་ཚངས་པའི་གནས་བཞི་བསྒོམ་པར་བྱའོ། །དེ་ནས་སྟོང་པ་ཉིད་དུ་བསྒོམས་ཏེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པས་བྱིན་གྱིས་བརླབ་པར་བྱའོ། །དེ་ནས་སྔོན་བཞིན་དུ་ཧྲཱིཿཡིག་རྣམ་པར་བསྒོམས་ནས། ནམ་
[73b.5]མཁའི་མཐིལ་དུ་སྤྲོ་བ་དང་བསྡུ་བའི་རིམ་པས་དེ་ལས་བྱུང་བའི་འཇིག་རྟེན་དབང་ཕྱུག་གི་བདག་ཉིད་བསྒོམ་པར་བྱ་སྟེ། འོད་ཟེར་དཀར་པོ་བྱེ་བ་དང་ལྡན་པ་རལ་པའི་ཅོད་པན་ཅན། འོད་དཔག་ཏུ་མེད་པས་དབུ་བརྒྱན་པ། རྒྱན་ཐམས་ཅད་ཀྱིས་བརྒྱན་པ། པདྨ་དང་ཟླ་བའི་གདན་ལ་སྐྱིལ་ཀྲུང་ཕྱེད་
[73b.6]པས་བཞུགས་པ། ཕྱག་གཡས་པ་མཆོག་སྦྱིན། གཡོན་པ་པདྨ་བསྣམས་པའོ། །གཡས་ཕྱོགས་ལོགས་ན་འཕགས་མ་སྒྲོལ་མ་དང་། ནོར་བཟངས་གཞོན་ནུ་གཉིས་སོ། །གཡོན་གྱི་ལོགས་ན་ཁྲོ་གཉེར་ཅན་དང་རྟ་མགྲིན་གཉིས་སོ། །དེ་ནས་བཅོམ་ལྡན་འདས་ཀྱི་སྤྱི་བོར་ཨོཾ་ཡིག །མགྲིན་
[73b.7]པར་ཨཱཿཡིག །སྙིང་གར་ཧཱུཾ་ཡིག་བསྒོམས་ལ་ཇི་སྲིད་མི་སྐྱོ་བའི་བར་དུའོ། །སྐྱོ་ན་སྔགས་བཟླས་པར་བྱ་སྟེ། དེ་ལ་སྔགས་ནི་འདིའོ། །ཨོཾ་ཧྲཱིཿསྭཱ་ཧཱ་ཞེས་པ་ནི་འཕགས་པ་འཇིག་རྟེན་དབང་ཕྱུག་ཁརྶ་པཱ་ཎིའི་སྒྲུབ་ཐབས་སོ། །སློབ་དཔོན་རྙོག་པ་མེད་པས་མཛད་པ་རྫོགས་སོ།། །།
[74a]
[74a.1]{T3410}༄༅༅། །རྒྱ་གར་སྐད་དུ། ཁརྶ་པཱ་ཎི་སཱ་དྷ་ནཾ། བོད་སྐད་དུ། ཁརྶ་པཱ་ཎིའི་སྒྲུབ་ཐབས། ཁརྶ་པཱ་ཎི་ལ་ཕྱག་འཚལ་ལོ། །མངོན་འདོད་འབྲས་སྟེར་འོད་གསལ་དཔལ་གྱི་དཔག་བསམ་ཤིང་། །བདེ་གཤེགས་ཚུལ་གྱི་ལམ་ཆེན་འཇུག་ནས་དེད་དཔོན་མཛད། །སྲིད་ཞིའི་ངོས་
[74a.2]མཉམ་དངོས་པོ་ཀུན་གྱི་ངོ་བོ་ཉིད། །དེ་འདིར་ཆུ་སྐྱེས་ཕྱག་གིས་འགྲོ་རྣམས་སྡིག་པ་ཞི་མཛད་དོ། །སྔ་བར་ཁ་སོགས་དག་བྱས་ནས། །འཇམ་ཞིང་ཡངས་པའི་སྟན་ལ་འདུག །བདག་ཉིད་དབེན་པར་ཆོ་ག་འདིས། །སྙིང་གར་ཟླ་བའི་ས་བོན་འོད། །རང་གི་སྙིང་གར་བསྒོམ་པར་བྱ། །ཟླ་བ་
[74a.3]གང་བའི་འོད་ཟེར་འཕྲོ། །དེ་ཡི་འོད་ཟེར་རྩེ་མོས་བསྐུལ། །ཡང་དག་གདན་དྲངས་མཁའ་ལ་འཕགས། །དཔལ་མགོན་ཁརྶ་པཱ་ཎི་དང་། །བླ་མ་སངས་རྒྱས་དེ་སྲས་ཚོགས། །མཆོད་སྤྲིན་ས་བོན་ལས་བྱུང་བའི། །སྣ་ཚོགས་རྣམས་ཀྱིས་མཆོད་པར་བྱ། །དེ་ནས་མངོན་པར་ཕྱག་འཚལ་
[74a.4]ཞིང་། །སྡིག་པ་བཤགས་པ་ལ་སོགས་བྱ། །གང་ཞིག་ཤིན་ཏུ་ཐོག་མ་མེད་པ་ནས། འཁོར་བར་འཁོར་བའི་ཚེ་བདག་གིས་མི་དགེ་བ་བགྱིས་པ་དང་། བགྱིད་དུ་སྩལ་བ་དང་། བགྱིས་པ་ལ་རྗེས་སུ་ཡི་རང་བ་དེ་ཐམས་ཅད་བཅོམ་ལྡན་འདས་ཀྱི་མདུན་དུ་བདག་གིས་བཤགས་པར་བགྱིའོ། །
[74a.5]རྫོགས་སངས་རྒྱས་དང་སྲས་དང་འཕགས། །གཞན་ཡང་གང་ཞིག་དགེ་མཛད་པ། །དེ་ལ་ངེས་པར་རྗེས་ཡི་རང་། །ཡང་དག་རྫོགས་པའི་བྱང་ཆུབ་བསྔོ། །སྙིང་རྗེའི་རང་བཞིན་མཆོག་གྱུར་པའི། །སངས་རྒྱས་ལ་ནི་སྐྱབས་སུ་མཆི། །ཆོས་ཀུན་རྒྱུན་མི་འཆད་པར་ནི། །གཅིག་ཏུ་དགའ་
[74a.6]གཟུགས་ཆོས་དང་ནི། །རབ་དགའ་ལ་སོགས་ས་ལ་བཞུགས། །བྱང་ཆུབ་སེམས་དཔའི་ཚོགས་དེ་བཞིན། །མྱ་ངན་འདའ་བར་བཞེད་རྣམས་ལ། །སངས་རྒྱས་གཞན་ལ་ཕན་པའི་ཕྱིར། །ཡུན་རིང་རྣམས་སུ་བཞུགས་པར་ཡང་། །བདག་གིས་གསོལ་བ་གདབ་པར་བགྱི། །སྒྲིབ་པ་
[74a.7]ཐམས་ཅད་རྩད་ནས་ཟད་བྱེད་པའི། །རྒྱུར་གྱུར་བྱང་ཆུབ་སེམས་ནི་བདག་གིས་བསྐྱེད། །བདེ་གཤེགས་སྲས་དང་བཅས་པའི་ལམ་ལ་ཡང་། །རྣམ་དག་བསམ་པས་ཡང་དག་བསྟེན་པར་བགྱི། །གཡོ་དང་མི་གཡོའི་འགྲོ་འདི་མ་ལུས་རྣམས། །གཅིག་དང་དུ་བྲལ་སྟོང་པ་ཉིད་ཅེས་བསམ།
[74b]
[74b.1]ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པས་སྟོང་པ་ཉིད་དུ་བྱིན་གྱིས་བརླབ་པར་བྱ། བྱིན་རླབས་རང་བཞིན་རྣམ་པར་དག་པ་འདིས། །ཆོས་ཀུན་དེ་བཞིན་བདག་མེད་བལྟ་བར་བྱ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་བདག་ཉིད་རྣམ་པར་ཤེས་པ་ཙམ་
[74b.2]དུ་བསྒོམས་ནས། སྔོན་གྱི་སྨོན་ལམ་གྱིས་བསྐུལ་ནས་པཾ་ཡིག་ཡོངས་སུ་གྱུར་པ་ལས་སྣ་ཚོགས་ཆུ་སྐྱེས་ལ་ཨཾ་ཡིག་ལས་སྐྱེས་པའི་ཟླ་བ་གང་བའི་དཀྱིལ་འཁོར་དྲི་མ་མེད་པ་དེའི་སྟེང་དུ་ཧྲཱིཿཡིག་ཤིན་ཏུ་འོད་གསལ་ཞིང་འོད་ཟེར་གྱི་ཚོགས་འཕྲོ་བས་ནམ་མཁའི་ཁམས་ཁྱབ་པ་རྣམ་པར་བསྒོམ་པར་
[74b.3]བྱའོ། །དེ་ཡོངས་སུ་གྱུར་པ་ལས་རང་གི་ས་བོན་ཟེའུ་འབྲུ་དང་། སྡོང་བུས་བརྒྱན་པའི་ཆུ་སྐྱེས་ཁ་འབུས་པ་བལྟ་བར་བྱའོ། །འདིར་དེ་རྣམས་ཐམས་ཅད་ཡོངས་སུ་གྱུར་པ་ལས་བདག་ཉིད་བཅོམ་ལྡན་འདས་སུ་བསྒོམ་པར་བྱའོ། །བསིལ་ཟེར་བྱེ་བའི་འོད་ཀྱིས་དཀར་བའི་སྐུའི་དབུ་ལ་
[74b.4]རལ་པའི་ཅོད་པན་དང་། འོད་དཔག་ཏུ་མེད་པས་བརྒྱན་པ། སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་སྐྱིལ་ཀྲུང་ཕྱེད་པས་བཞུགས་པ། སྐུ་ལ་རྒྱན་ཐམས་ཅད་ཀྱིས་བརྒྱན་པ། ཞལ་འཛུམ་ཞིང་ལོ་བརྒྱད་གཉིས་ལོན་པ་ལྟ་བུ་ཕྱག་གཡས་པ་མཆོག་སྦྱིན། ཕྱག་གཡོན་ན་སྡོང་
[74b.5]བུ་དང་བཅས་པའི་ཆུ་སྐྱེས་བསྣམས་པ། ཕྱག་ནས་བདུད་རྩིའི་རྒྱུན་འབབ་པ་ལ་སྲེད་པ་ཅན་རྣམས་པྲེ་ཏ་འོག་ནས་སྟེང་དུ་ཁ་གདངས་ཤིང་། ལྟོ་བ་ཆེ་ཞིང་ཤིན་ཏུ་རིད་པ་ཁ་དོག་གནག་པ་ཁབ་ཀྱི་ཁ་ཅན་རྣམས་ཚིམ་པར་མཛད་པ་དཔལ་ལྡན་གྲུ་འཛིན་གྱི་རི་ལ་བཞུགས་པ། སྙིང་རྗེའི་
[74b.6]སྣུམ་མདངས་དང་ལྡན་ཞིང་སྒེག་པའི་ཉམས་དང་ལྡན་པ། ཤིན་ཏུ་ཞི་བ་རྒྱན་སྣ་ཚོགས་པས་བརྒྱན་པ། དེའི་མདུན་དུ་སྒྲོལ་མ། གཡས་ཕྱོགས་ལོགས་ན་ནོར་བཟངས་གཞོན་ནུའོ། །དེ་ལ་སྒྲོལ་མ་ལྗང་གུ། ཕྱག་གཡོན་པ་ན་སྡོང་བུ་དང་བཅས་པའི་ཨུཏྤ་ལ་བསྣམས་པ། ཕྱག་
[74b.7]གཡས་པ་མཆོག་སྦྱིན་བརྐྱང་པ། སྣ་ཚོགས་པའི་རྒྱན་གྱིས་བརྒྱན་པ། ལང་ཚོ་དར་ལ་ནུ་མ་རྒྱས་པའོ། །ནོར་བཟངས་གཞོན་ནུ་ཐལ་མོ་སྦྱར་ཞིང་གསེར་མདོག་ལྟར་གསལ་བ། གཞོན་ནུའི་ཚུལ་འཛིན་པ། ཕྱག་གཡོན་ན་པོ་ཏི་དང་བཅས་ཤིང་རྒྱན་ཐམས་ཅད་དང་ལྡན་པའོ། །
[75a]
[75a.1]རྒྱབ་ན་ཁྲོ་གཉེར་ཅན་ནོ། །གཡོན་ན་རྟ་མགྲིན་ནོ། །དེ་ལ་ཁྲོ་གཉེར་ཅན་ཕྱག་བཞི་པ་གསེར་མདོག་ལྟ་བུ། རལ་པའི་ཚོགས་དང་ལྡན་པ། ཕྱག་གཡོན་ན་དབྱུ་གུ་རྩེ་གསུམ་དང་སྤྱི་བླུགས་བསྣམས་པ། ཕྱག་གཡས་ཕྱག་འཚལ་བའི་ཚུལ་དང་། བགྲང་
[75a.2]ཕྲེང་བསྣམས་པ། སྤྱན་གསུམ་དང་ལྡན་པའོ། །རྟ་མགྲིན་ནི་སྐུ་མདོག་དམར་པོ་ཐུང་ཞིང་ལྟོ་བ་འཕྱང་བ། སྐྲ་དམར་སེར་གྱེན་དུ་འབར་བ། སྦྲུལ་གྱི་སེ་རལ་ཁར་བྱས་པ། སྨ་ར་སེར་པོས་ཞལ་གྱི་དཀྱིལ་འཁོར་བརྒྱན་པ། སྤྱན་གསུམ་དམར་ཞིང་ཟླུམ་པ། སྨིན་མཚམས་སུ་ཁྲོ་གཉེར་
[75a.3]བསྡུས་པ། སྟག་གི་པགས་པའི་ན་བཟའ་ཅན། དབྱུག་པའི་མཚན་མ་དང་ལྡན་ཞིང་ཕྱག་གཡས་པ་ཕྱག་འཚལ་བའི་ཚུལ་དང་ལྡན་པའོ། །དེ་རྣམས་ཐམས་ཅད་རང་གི་གཙོ་བོའི་ཞལ་ནས་བསྐུལ་ཞིང་བལྟ་བ་ཇི་ལྟར་མཛེས་པ་བཞུགས་པར་བསྒོམ་པར་བྱའོ། །དེ་ནས་རང་གི་སྙིང་གའི་ས་བོན་
[75a.4]ལས་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿཡིག་རྣམ་པར་བསྒོམ་པར་བྱའོ། །དེ་བས་འོད་ཟེར་རྣམ་པ་སྣ་ཚོགས་པ་འཕྲོས་ཏེ། ཁམས་གསུམ་ཁེངས་ནས་སེམས་ཅན་ཐམས་ཅད་འཇིག་རྟེན་དབང་ཕྱུག་གི་གོ་འཕང་ལ་བཀོད་ནས་སླར་ཡང་དེ་བཞིན་དུ་འོད་ཟེར་ས་བོན་གྱི་ཡི་གེ་ལ་གཞུག་པར་བྱའོ། །
[75a.5]ཡང་དེའི་འོད་ཀྱིས་ཡེ་ཤེས་སེམས་དཔའ་སྤྱན་དྲངས་ལ། དམ་ཚིག་སེམས་དཔའ་དང་ལྷན་ཅིག་ཏུ་འོ་མ་དང་ཆུ་འདྲེས་པ་བཞིན་དུ་གཟུགས་གཅིག་ཏུ་བསྒོམ་པར་བྱའོ། །དེ་ནས་ལུས་ངག་ཡིད་གསུམ་རྣམ་པར་དག་པའི་ཕྱིར་རིམ་པ་ཇི་ལྟ་བ་བཞིན་དུ་སྤྱི་བོར་ཨོཾ་ཡིག་དཀར་པོ། །མགྲིན་པར་ཨཱཿ
[75a.6]ཡིག་དམར་པོ། །སྙིང་གར་ཧཱུཾ་ཡིག་ནག་པོ་བསྒོམ་པར་བྱའོ། །འདིར་ཡང་རྒྱུན་མི་འཆད་པར་འོད་ཟེར་གྱི་དྲ་བ་མཐའ་ཡས་པ་བྱུང་སྟེ། སེམས་ཅན་གྱི་ཕུང་པོ་མ་ལུས་པའི་སྡིག་པ་ཡང་དག་པར་འཇོམས་པ་བསྒོམ་པར་བྱ་ཞིང་ཇི་ལྟར་ནུས་པར་སྤྲོ་བར་བྱའོ། །མཁས་ཤིང་འཛིན་པའི་
[75a.7]ཤེས་རབ་དང་། །སྐལ་བཟང་ནད་མེད་ཕུན་སུམ་ཚོགས། །སྒོམ་པའི་སྦྱོར་བས་ཐོབ་འགྱུར་ཏེ། །བརྩོན་འགྲུས་ལྡན་པས་མངོན་སུམ་བྱེད། །བསྒོམས་པས་ངལ་ན་སེམས་རྩེ་གཅིག་པས་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཧྲཱིཿསྭཱ་ཧཱ། འདིའི་ཁ་དོག་སྟོན་
[75b]
[75b.1]ཀའི་སྐར་མའི་ཕྲེང་བ་དྲི་མེད་ལྟར། །རབ་ཏུ་འོད་གསལ་དཔག་ཏུ་མེད་པའི་འོད་ཟེར་འཕྲོ་བ་ཅན། །བཟླས་པས་སྐྱོ་བར་གྱུར་ན་བསོད་ནམས་ཡོངས་སུ་བསྔོས་ནས་ལྡང་། །ལྷ་ཡི་ང་རྒྱལ་དང་བཅས་ཅི་བདེ་བར་ནི་གནས་པར་བྱ། །དཔལ་ལྡན་འཇིག་རྟེན་དབང་ཕྱུག་གི། །སྒྲུབ་ཐབས་ཆོ་ག་འདི་
[75b.2]བྱས་པའི། །བདག་གིས་བསོད་ནམས་གང་བསགས་དེས། །འགྲོ་རྣམས་དེ་ཡི་གནས་ཐོབ་ཤོག །པོ་ཏ་ལའི་ཁརྶ་པཱ་ཎིའི་སྒྲུབ་ཐབས། སློབ་དཔོན་པདྨ་འབྱུང་གནས་བློ་གྲོས་ཞབས་ཀྱིས་མཛད་པ་རྫོགས་སོ། །{T3411}༄༅༅། །རྒྱ་གར་སྐད་དུ། ཤྲཱི་ཁརྶ་པཱ་ཎི་སཱ་དྷ་ནཾ།
[75b.3]བོད་སྐད་དུ། དཔལ་ཁརྶ་པཱ་ཎིའི་སྒྲུབ་ཐབས། དཔལ་ལྡན་ཁརྶ་པཱ་ཎི་ལ་ཕྱག་འཚལ་ལོ། །འདིར་དགེ་བསྙེན་དགེ་བྱེད་ཅེས་བྱ་བ་དགེ་བའི་ལས་ལ་བརྩོན་ཞིང་སྙིང་རྗེ་དང་ལྡན་པ་ཞིག་ཡོད་པར་གྲགས་པ་དེས། པོ་ཏ་ལ་ཀེར་འགྲོ་བར་བརྩམས་ཏེ་ཆས་ནས་ཁ་ཌི་མཎྜ་ལ་ཁརྶ་པཱ་ཎི་ཞེས་གྲགས་
[75b.4]པའི་གྲོང་ཞིག་ཡོད་པར་བསྡད་པ་ན། དེར་བཅོམ་ལྡན་འདས་འཕགས་པ་འཇིག་རྟེན་དབང་ཕྱུག་གིས་གནང་བ་བྱིན་ཏེ། ཁྱོད་རང་མ་འགྲོ་བར་འདིར་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ཀྱི་རྒྱལ་པོའི་རིམ་པས་ངའི་སྐུ་གཅིག་གྱིས་དང་། དེས་སེམས་ཅན་ཐམས་ཅད་ཀྱི་དོན་ཆེན་
[75b.5]པོར་འགྱུར་རོ་ཞེས་གསུངས་ནས། དེ་ནས་དེས་བཅོམ་ལྡན་འདས་ཀྱི་སྐུ་གཅིག་མྱུར་དུ་བཞེངས་སོ་ཞེས་ཐོས་སོ། །དེ་ལ་བཅོམ་ལྡན་འདས་བསྒྲུབ་པའི་ཕྱིར་ལྟ་བ་ཕུན་སུམ་ཚོགས་ན་དགེ་སློང་མཆོག་གི་ཚུལ་ཁྲིམས་ཉམས་ཀྱང་སླའོ། ལྟ་བ་ཉམས་པ་ནི་དེ་ལྟ་མ་ཡིན་ནོ། །འདིར་དེ་ལ་
[75b.6]རེ་ཞིག་ཆོས་ཐམས་ཅད་བདག་མེད་པར་རྣམ་པར་བལྟས་ནས་རྣམ་པར་རྟོག་པ་མཐའ་དག་སྤངས་ཏེ། བརྩེ་བའི་བསམ་པས་ཀྱེ་མ་སེམས་ཅན་འདི་རྣམས་ཉོན་མོངས་པ་ལ་སོགས་པའི་ལས་ཀྱི་བར་དུ་གཅོད་པས་སྡུག་བསྔལ་བ་སྟེ། དེ་ལ་སྐྱེ་བ་དང་། རྒས་པ་དང་། ནད་དང་། འཆི་བའི་
[75b.7]སྡུག་བསྔལ་རྣམས་ཀྱིས་ཤིན་ཏུ་མནར་བ་དང་ལྡན་པའི་སེམས་ཅན་རྣམས་དཔག་ཏུ་མེད་པའི་སྡུག་བསྔལ་བར་གྱུར་པ་རྣམས་ལ། དེའི་ཕྱིར་བདག་ཉིད་འཇིག་རྟེན་དབང་ཕྱུག་བསྒྲུབས་ཏེ། དེ་རྣམས་ཀྱི་སྡུག་བསྔལ་ཐམས་ཅད་བསལ་ཞིང་། ཐམས་ཅད་མཁྱེན་པའི་ཡེ་ཤེས་ལ་
[76a]
[76a.1]དགོད་པར་བྱའོ་ཞེས་དམ་བཅས་ནས། རང་གི་སྙིང་གར་པཾ་ཡིག་ལས་སྐྱེས་པའི་པདྨ་འདབ་མ་སྟོང་གི་ལྟེ་བའི་དབུས་སུ་ཨ་ཡིག་ལས་སྐྱེས་པའི་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཏཱཾ་སུཾ་བྷྲིཾ་ཧཾ་ཞེས་པའི་ས་བོན་ལྔ་བཀོད་ལ། དེ་རྣམས་ཀྱི་འོད་ཟེར་གྱིས་ཡང་དག་པར་
[76a.2]བསྐུལ་ཞིང་བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་གདན་དྲངས་ཏེ། མདུན་གྱི་ནམ་མཁའི་མཐིལ་དུ་བཞུགས་ནས་ཕྱག་དང་། མཆོད་པ་དང་། སྡིག་པ་བཤགས་པ་དང་། གསུམ་ལ་སྐྱབས་སུ་འགྲོ་བ་ལ་སོགས་པ་མཆོད་པ་རྣམ་པ་བདུན་ནམ་བཅུ་གཅིག་བྱས་ཏེ།
[76a.3]བྱམས་པ་དང་སྙིང་རྗེ་དང་། དགའ་བ་དང་། བཏང་སྙོམས་ཏེ་ཚངས་པའི་གནས་བཞི་བསྒོམ་པར་བྱའོ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་པས་སྟོང་པ་ཉིད་ཀྱི་བྱང་ཆུབ་ཏུ་བྱས་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་གི་རྣལ་འབྱོར་དུ་བདག་ཉིད་
[76a.4]བྱས་ཏེ། དེ་ཡང་སྟོན་ཀའི་ཟླ་བ་བཞིན་དུ་དཀར་ཞིང་རལ་པའི་ཅོད་པན་འོད་དཔག་མེད་ཀྱི་དབུ་ལ་བརྒྱན་ཅིང་། རྒྱན་ཐམས་ཅད་ཀྱིས་བརྒྱན་པ། རིན་པོ་ཆེ་དང་། སེང་གེའི་གདན་གྱི་སྟེང་ན་པདྨ་འདབ་མ་སྟོང་ལ་རོལ་པའི་ཚུལ་གྱིས་བཞུགས་པ། ཞལ་གཅིག་ཕྱག་གཉིས་པ། གཡོན་
[76a.5]པདྨ་བསྣམས་པ། གཡས་ན་བདུད་རྩིའི་ཆུ་རྒྱུན་འབབ་པའི་མཆོག་སྦྱིན་པའོ། །མདུན་ན་སྒྲོལ་མ་སེམས་དཔའི་སྐྱིལ་ཀྲུང་གིས་བཞུགས་པ། གསེར་སྔོན་པོའི་མདོག་ལྟ་བུ་དཀར་ཞིང་མཁྲེགས་ལ་མཐོ་བ། རྒྱན་ཐམས་ཅད་ཀྱིས་བརྒྱན་པ། ཕྱག་གཉིས་ན་ཨུཏྤལ་སྡོང་བུ་དང་
[76a.6]བཅས་པ་བསྣམས་ཤིང་སྤྱན་གྱིས་གཟིགས་པའོ། །དེའི་རྗེས་སུ་ནོར་བཟངས་གཞོན་ནུ་གསེར་འབར་བ་ལྟ་བུ་རིན་པོ་ཆེའི་རྒྱན་དང་། རིན་པོ་ཆེའི་ཅོད་པན་ཅན། ཕྱག་གཡོན་ན་ཀ་པཱ་ལི་བསྣམས་ཤིང་ཐལ་མོ་སྦྱར་བའོ། །དེའི་རྗེས་སུ་ཁྲོ་གཉེར་ཅན་རལ་པའི་ཅོད་པན་སྟེང་དུ་བརྫེས་
[76a.7]པས་བརྒྱན་པ། གསེར་འབར་བ་ལྟ་བུ་ན་བཟའ་དམར་པོ་ཡོངས་སུ་བསྣམས་པ། ཕྱག་གཡས་པ་ཕྱག་འཚལ་བའི་ཚུལ་དུ་བྱས་པ། གཞན་ན་བགྲང་ཕྲེང་འཛིན་པ། གཡོན་པ་དག་གིས་དབྱུ་གུ་རྩེ་གསུམ་དང་། རིལ་བ་སྤྱི་བླུགས་བསྣམས་པ། དེའི་རྗེས་སུ་རྟ་མགྲིན་དབུ་སྐྲ་
[76b]
[76b.1]དམར་སེར་གྱེན་དུ་འབར་བ། སྐུ་མདོག་དམར་པོ་ཀླུའི་རྒྱན་དང་ལྡན་པ། ལྟོ་བ་འཕྱང་ཞིང་སྟག་གི་པགས་པའི་ན་བཟའ་བསྣམས་པ། ཕྱག་ན་དབྱུག་པ་བསྣམས་པ། དེ་བཞིན་དུ་ལྔའི་བདག་ཉིད་བཅོམ་ལྡན་འདས་འཁོར་དང་བཅས་པ་བསྒོམ་པར་བྱའོ། །དེ་ནས་མཎྜལ་བྱས་ཏེ་ཆོ་ག་འདིས་
[76b.2]མཆོད་པར་བྱའོ། །དེ་ནས་དང་པོ་མཎྜལ་བྱས་ནས་བསྲུང་བ་བྱ་སྟེ། ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་ས་རེ་རཀྵ་རཀྵ་མཾ་ཧཱུཾ་ཕཊ་སྭཱ་ཧཱ། ཨོཾ་བཛྲ་རེ་ཁེ་ཧཱུཾ། མཎྜལ་གྱི་སྔགས་སོ། །ཨོཾ་ཨཱ་གཙྪ་བྷ་ག་ཝཱན་མཎྜལ་ལ་ཀ་སིཾ་ཧཱ་ས་ནེེ་ཨོཾ་ཨཱཿཞེས་པའི་སྔགས་བརྗོད་ནས་གསོལ་བ་གདབ་པར་བྱ་སྟེ། མཎྜལ་
[76b.3]གྱི་དབུས་སུ་སེང་གེའི་གདན་གྱི་སྟེང་དུ་པདྨ་འདབ་མ་སྟོང་ལ་བཞུགས་པ། ལྔའི་བདག་ཉིད་མཆོད་པར་བྱའོ། །དེ་ལ་མཆོད་པའི་སྔགས་ནི། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ཨཱ་ཧཱ་རེ་ཧཱུཾ། མཆོད་ཅིང་བསྟོད་དེ་སྔགས་བཟླས་པར་བྱའོ། །ཨོཾ་སརྦ་ཏ་ཐཱ་ག་ཏ་པཱུ་
[76b.4]ཛ་མེ་གྷ་པྲ་ས་རཱ་མུ་ཧེ་ཧཱུཾ། མཆོད་པ་བྱིན་གྱིས་བརླབ་པའི་སྔགས་སོ། །ཨོཾ་ཨཱ་ཏཱཾ་བྷྲཱིཾ་ཧཾ་ཕཊ་སྭཱ་ཧཱ། ཨོཾ་སརྦ་ཏ་ཐཱ་ག་ཏ་པཱུ་ཛ་ལ་ལི་ཏ་ན་མི་རཻཏ་ན་མཱ་མི་བྷ་ག་ཝཱན་ཏཾ་ཛཿཧཱུཾ་བཾ་ཧོཿཔྲ་ཧོཿཔྲ་ཏཱིཙྪ་ཀུ་སུ་མ་ཨཉྫ་ལན་ནཱ་ཐ་ཧོ། ཞེས་པ་ནི་ཕྱག་འཚལ་བའི་སྔགས་སོ། །ཨོཾ་མུཿསྭཱ་ཧཱ་ཞེས་པ་ནི་གཤེགས་སུ་
[76b.5]གསོལ་བའི་སྔགས་སོ། །ཨོཾ་ཁ་ཁ་ཁཱ་ཧི་ཁཱ་ཧི། གྲྀཧྞ་གྲྀཧྞ་ཏུ་སརྦ་བྷཱུ་ཏི་ཀཱ་ཨི་མཾ་བ་ལིཾ་སྭཱ་ཧཱ། ཞེས་པ་ནི་གཏོར་མའི་སྔགས་སོ། །དེ་ནས་མཆོད་པ་རྩོམ་པའི་དུས་སུ་དེ་བཞིན་དུ་བརྗོད་ནས་སེམས་སྦྱང་བར་བྱའོ། །གང་ཡང་སྤྱོད་པ་ངན་པ་རྣམས། བདག་གིས་སྤང་ཞིང་སངས་རྒྱས་དང་། བྱང་
[76b.6]ཆུབ་སེམས་དཔའི་བསླབ་པ་རྣམས་ལ་བསླབ་པོ། །བདག་གིས་ཇི་སྲིད་ནུས་པས་མཆོད་པ་བསྒྲུབ་པོ། །གང་ཡང་མི་བྱ་བ་ནི་དེ་ཡང་འདོད་ཆགས་ལས་སྐྱེས་པ་དང་། ཞེ་སྡང་ལས་སྐྱེས་པ་དང་། གཏི་མུག་ལས་སྐྱེས་པའི་མི་དགེ་བའི་རྩ་བ་རྣམས་སོ། །འདིར་ཐམས་ཅད་དེ་བཞིན་དུ་སེམས་
[76b.7]ཅན་འདོད་ཆགས་དང་། ཞེ་སྡང་དང་། གཏི་མུག་གི་བསམ་པ་ཅན་རྣམས་དང་། དེ་བཞིན་དུ་འདོད་ཆགས་ལས་སྐྱེས་པའི་དགེ་བའི་རྩ་བ་ནི་ཀླུའི་རྒྱལ་པོ་དགའ་བོ་དང་ཉེ་དགའ་བོ་དག་གོ། །ཞེ་སྡང་ལས་སྐྱེས་པ་ནི་རཱ་མ་ཎའོ། །གཏི་མུག་ལས་སྐྱེས་པ་ནི་གནོད་སྦྱིན་རྣམ་ཐོས་སྲས་སོ། །དེའི་ཕྱིར་འདོད་ཆགས་
[77a]
[77a.1]དང་། ཞེ་སྡང་དང་། གཏི་མུག་ལ་སོགས་པ་ཡོངས་སུ་སྤངས་ནས་སེམས་སྦྱངས་ཏེ། ཐམས་ཅད་དེ་བཞིན་དུ་སྙིང་རྗེའི་སེམས་ཀྱི་རང་བཞིན་གྱིས་སྦྱིན་པ་ལ་སོགས་པའི་དགེ་བའི་རྩ་བ་རྣམས་བྱའོ། །སློབ་དཔོན་དགེ་བྱེད་ཀྱིས་མཛད་པའི་ཁརྶ་པཱ་ཎིའི་སྒྲུབ་ཐབས་རྫོགས་སོ།།
[77a.2]{T3412}༄༅༅། །རྒྱ་གར་སྐད་དུ། ཨཱརྱ་ཁརྶ་པཱ་ཎི་སཱ་དྷ་ནཾ། བོད་སྐད་དུ། འཕགས་པ་མཁའ་སྤྱོད་ཀྱི་སྒྲུབ་ཐབས། འཕགས་པ་མཁའ་སྤྱོད་ལ་ཕྱག་འཚལ་ལོ། །སྡུག་བསྔལ་ཅན་གྱི་མགོན་གྱུར་པའི། །མགོན་པོ་མཁའ་སྤྱོད་ལ་ཕྱག་འཚལ། །དེ་ཡི་སྒྲུབ་ཐབས་བསྡུས་པ་ལས། །
[77a.3]ཅུང་ཟད་རྒྱས་པར་བྲི་བར་བྱ། །དང་པོ་རེ་ཞིག་སྔགས་པས་རྐང་པ་དང་། ལག་པ་ལ་སོགས་པ་ཆུས་བཀྲུས་ཤིང་མཆོག་ཏུ་གཙང་བར་བྱས་ནས་རི་ཕུག་སྐྱེ་བོས་དབེན་པར་གནས་ཏེ། ཁ་བསང་བར་བྱའོ། །ཁ་ཅིག་ནས་ཡིད་དང་མཐུན་པའི་གནས་སུ་འཇམ་ཞིང་ཡངས་པའི་གདན་ལ་ཉེ་བར་འདུག་
[77a.4]ནས། རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ཡིད་ཀྱིས་བསམ་པར་བྱ་སྟེ། དེའི་དབུས་སུ་སྟོན་ཀའི་ཟླ་བ་བརྒྱའི་འོད་ཟེར་གྱི་ཕྲེང་བ་རབ་ཏུ་འབར་བའི་ཧྲཱིཿཡིག་གི་ས་བོན་བལྟ་བར་བྱའོ། །དེ་ནས་ཡང་ཧྲཱིཿཡིག་གི་ས་བོན་ལས་འཕྲོས་ཏེ། འགྲོ་བ་རྣམས་
[77a.5]ཀྱིས་མ་རིག་པའི་མུན་པ་འཇོམས་པར་བྱེད་ཅིང་འོད་ཟེར་གྱི་ལྕགས་ཀྱུའི་རྣམ་པར་འཕྲོས་ཏེ། ཕྱོགས་བཅུ་མཐའ་ཡས་པའི་འཇིག་རྟེན་གྱི་ཁམས་ན་བཞུགས་པ་རྣམས་ཐམས་ཅད་སྣང་བར་མཛད་ནས། དེ་ན་བཞུགས་པའི་ཡང་གྲངས་མེད་དཔག་ཏུ་མེད་པའི་བླ་མ་དང་། སངས་རྒྱས་དང་། བྱང་
[77a.6]ཆུབ་སེམས་དཔའ་རྣམས་སྤྱན་དྲངས་ནས་མདུན་གྱི་ནམ་མཁའ་ལ་བཞུགས་པར་བྱའོ། །ཕྱི་ནས་དེ་རྣམས་ནམ་མཁའི་ཕྱོགས་སུ་འཁོད་ཅིང་། མཆོག་གི་སྙིང་རྗེ་དང་ལྡན་པའི་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་ལ་མེ་ཏོག་དང་། སྤོས་དང་། མར་མེ་དང་། དྲི་དང་།
[77a.7]ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། དྲིལ་བུ་དང་། བ་དན་ལ་སོགས་པ་ཤིན་ཏུ་ཕུལ་དུ་བྱུང་བའི་མཆོད་པའི་རྣམ་པས་མཆོད་ཅིང་། སྡིག་པ་བཤགས་པར་བྱའོ། །གང་ཞིག་སྐྱེ་བ་འདི་དང་། སྐྱེ་བ་གཞན་རྣམས་སུ་ཐོག་མ་དང་ཐ་མ་
[77b]
[77b.1]མེད་པའི་འཁོར་བ་ནས་འཁོར་བའི་སྐྱེ་གནས་རྣམས་སུ་བདག་གི་ལུས་དང་ངག་དང་ཡིད་ཀྱིས་ཀྱང་སྡིག་པའི་ལས་ཅི་བགྱིས་པ་དང་། བགྱིད་དུ་སྩལ་བ་དང་། རྗེས་སུ་ཡི་རང་བར་བགྱིས་པ་དེ་རྣམས་ཐམས་ཅད་འཇིག་རྟེན་གསུམ་གྱི་མགོན་པོ་བཅོམ་ལྡན་འདས་སྤྲོ་བ་ཆེན་པོ་རྣམས་དང་། བླ་མ་དང་།
[77b.2]སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྤྱན་སྔར་སོ་སོར་བཤགས་པར་བགྱིའོ། །ཆོ་ག་འདིས་སོ་སོར་བཤགས་ཤིང་སླར་ཡང་མི་བྱེད་པའི་སྡོམ་པ་འཛིན་ཅིང་བསོད་ནམས་ལ་རྗེས་སུ་ཡི་རང་བར་བྱ་སྟེ། རྫོགས་པའི་སངས་རྒྱས་དང་། རང་རྒྱལ་དང་། ཉན་ཐོས་རྣམས་དང་། བྱང་ཆུབ་
[77b.3]སེམས་དཔའ་རྣམས་དང་། གང་ཞིག་འཇིག་རྟེན་གསུམ་ན་མཆིས་པའི་དགེ་བ་ཐམས་ཅད་ལ་རྗེས་སུ་ཡི་རང་ངོ་། །དེའི་རྗེས་སུ་དཀོན་མཆོག་གསུམ་ལ་སྐྱབས་སུ་འགྲོ་བར་བྱ་སྟེ། རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་
[77b.4]མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །ཕྱི་ནས་ལམ་ལ་བརྟེན་པ་ནི་རྫོགས་པའི་སངས་རྒྱས་ཀྱིས་གསུངས་པའི་ལམ་ལ་བདག་གིས་བསྟེན་གྱི་གཞན་ནི་མ་ཡིན་ནོ། །དེ་ནས་གསོལ་བ་གདབ་པར་བྱ་སྟེ། སངས་རྒྱས་བཅོམ་ལྡན་འདས་
[77b.5]རྣམས་དང་དེའི་སྲས་བྱང་ཆུབ་སེམས་དཔའ་ཆེན་པོ་རྣམས་ཀྱང་ཡོངས་སུ་མྱ་ངན་ལས་མི་འདའ་ཞིང་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་མཛད་དུ་གསོལ། དེའི་རྗེས་སུ་བསྐུལ་མ་གདབ་པར་བྱ་སྟེ། རྣམ་པ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་རྣམས་ཀྱིས་བླ་ན་མེད་པའི་
[77b.6]ཆོས་གསུང་བཞིན་བསྟན་པས་གང་གིས་མྱུར་དུ་སེམས་ཅན་རྣམས་འཁོར་བའི་རྒྱ་མཚོ་གཏིང་མཐའ་མེད་པ་ལས་བསྒྲལ་དུ་གསོལ། གསོལ་བ་བཏབ་པའི་རྗེས་སུ་དེ་ནས་བསོད་ནམས་ཡོངས་སུ་བསྔོ་བར་བྱའོ། །བླ་ན་མེད་པའི་མཆོད་པ་རྣམ་པ་བདུན་གྱིས་མཆོད་ནས་གང་དེ་བཞིན་དུ་དགེ་བའི་རྩ་བ་
[77b.7]བསྐྱེད་པ་རྣམས་དེ་བཞིན་དུ་བདག་གིས་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཡང་ན་བསྡུས་ནས་བླ་ན་མེད་པའི་མཆོད་པ་རྣམ་པ་བདུན་གསུངས་ཏེ། ཚིགས་སུ་བཅད་པ་འདི་བཀླག་པར་བྱའོ། །ལུས་དང་ངག་དང་ཡིད་ཀྱིས་གང་བགྱིས་པའི། །སྡིག་རྣམས་རྒྱལ་བ་རྣམས་ཀྱི་སྤྱན་སྔར་
[78a]
[78a.1]བཤགས། །འཇིག་རྟེན་གསུམ་གྱི་དགེ་བ་ཐམས་ཅད་ལ། །རབ་ཏུ་དགའ་བས་རྟག་ཏུ་རྗེས་ཡི་རང་། །དཀོན་མཆོག་གསུམ་ལ་རྟག་ཏུ་བདག་སྐྱབས་མཆི། །རྒྱལ་བའི་གསུང་ལ་སྐྱབས་ཤིང་བསྟེན་པར་བགྱི། །ཇི་སྲིད་སྲིད་པ་བརྟན་གྱུར་དེ་སྲིད་དུ། །སྐྱེ་དགུའི་ཡབ་རྣམས་མྱ་
[78a.2]ངན་མི་འདའ་ཞིང་། །འདིར་ཡང་རྟག་ཏུ་སེམས་ཅན་དོན་མཛད་ཅིང་། །སངས་རྒྱས་སྲས་བཅས་དེ་རྣམས་བཞུགས་སུ་གསོལ། །ཐེ་ཚོམ་མཐར་བྱེད་ཇི་ལྟ་བ་ཡི་ཆོས། །ཀྱེ་ཀྱེ་མཐུ་ཆེན་ཁྱོད་ཀྱིས་བསྟན་དུ་གསོལ། །འཁོར་བའི་རྒྱ་མཚོར་འགྲོ་རྣམས་ལྷན་ཅིག་དེར། །གང་གིས་ཕ་རོལ་འགྲོ་ཞིང་བདེ་
[78a.3]བསགས་པ། །བསོད་ནམས་རབ་ཏུ་གང་བསགས་འདི་ཀུན་ཀྱང་། །རྫོགས་པའི་བྱང་ཆུབ་བདག་གིས་བསྔོ་བར་བགྱི། །རྒྱལ་བ་རྣམས་དང་དེ་ཡི་སྲས། །བདག་དང་འགྲོ་བའི་བླ་མ་ལ། །བདག་གིས་དངོས་པོ་ཐམས་ཅད་ནི། །ཐམས་ཅད་དུ་ནི་དབུལ་བར་བགྱི། །ཞེས་པ་འདིས་མཆོད་པ་རྣམ་པ་
[78a.4]བདུན་གྱིས་མཆོད་ནས། ཨོཾ་ཨཱཿཧཱུཾ་མུཿཞེས་པས་གཤེགས་སུ་གསོལ། དེ་ནས་ཚད་མེད་པ་བཞི་ནི་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་མཚན་ཉིད་རྣམས་ནི་འོག་ནས་འཆད་པར་འགྱུར་བའི་རིམ་པས་བསྒོམ་པར་བྱའོ། །དེ་ལ་འདིར་བྱམས་པས་ནི་སེམས་ཅན་ཐམས་
[78a.5]ཅད་ལ་ཤིན་ཏུ་ཕན་པར་བྱེད་ཅིང་། བུ་གཅིག་པ་ལྟར་མཉེས་གཤིན་པའི་མཚན་ཉིད་ཅན་ནོ། །སྙིང་རྗེ་ནི་ཅི་འདྲ་ན། གཏིང་མཐའ་མེད་པའི་འཁོར་བའི་རྒྱ་མཚོའི་ནང་དུ་ལྷུང་བའི་མཐའ་ཡས་པའི་སེམས་ཅན་གྱི་ཁམས་བདག་གིས་ཡང་དག་པར་གདོན་པར་འདོད་པའི་བསམ་པ་ཅན་ནོ། །ཡང་དགའ་
[78a.6]བ་ནི་ཅི་འདྲ་ན། ཁམས་གསུམ་ན་གནས་པའི་སེམས་ཅན་རྣམས་ཀྱང་གང་ཞིག་ལེགས་པར་སྤྱོད་པ་དེ་རྣམས་ལ་དེའི་ལོངས་སྤྱོད་ཀྱི་དབང་ཕྱུག་ལ་སོགས་པ་རྣམས་ལ་སེམས་དགའ་བའོ། །གང་འདིར་བཏང་སྙོམས་ནི་ཁོང་ཁྲོ་བ་དང་། རྗེས་སུ་བརྩེ་བ་དག་ངེས་པར་བཅིངས་ཤིང་ཕན་པ་དང་། གནོད་པར་
[78a.7]བྱེད་པ་སྤངས་ནས་སེམས་ཅན་རྣམས་ལ་མཆོག་ཏུ་ཕན་པར་སྤྱོད་པ་སྟེ། ཚད་མེད་པ་བཞི་སྒོམ་ཞིང་། དེ་ནས་ཆོས་ཐམས་ཅད་ཀྱི་རང་བཞིན་ཡོངས་སུ་དག་པར་བསམ་པར་བྱའོ། །ཆོས་ཐམས་ཅད་འདི་བཞིན་དུ་རང་བཞིན་ངོ་བོ་ཉིད་མེད་ཅིང་ཡོངས་སུ་དག་པའོ་ཞེས་པ་ལ་སོགས་པ་མངོན་དུ་བྱའོ། །
[78b]
[78b.1]འདི་བཞིན་དུ་ཆོས་ཐམས་ཅད་རང་བཞིན་ཡོངས་སུ་དག་ཅིང་། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་པ་འདིས་བརྟན་པར་བྱའོ། །ཆོས་ཐམས་ཅད་རང་བཞིན་ཡོངས་སུ་དག་པ་ལ་གསར་དུ་སྒྲིབ་པར་མི་འགྱུར་རོ་ཞེ་ན། བདེན་ཏེ། གཞན་འདིར་འགྱུར་བ་དང་མི་འགྱུར་བ་དེ་བཞིན་དུ་གང་
[78b.2]ལས་འགྱུར་བ་ནི་འཁོར་བའི་རྒྱུ་འདོད་ཆགས་ལ་སོགས་པའི་དྲི་མ་སྣ་ཚོགས་པའི་ཕྱིར་སླར་ཡང་ཆོས་ཐམས་ཅད་ཀྱིས་ཇི་ལྟར་མེད་པར་འགྱུར་ན། ཁྱད་པར་དུ་འཕགས་པའི་ལམ་བསྒོམ་པ་དེས་འགོག་སྟེ། དེའི་ཕྱིར་བཅོམ་ལྡན་འདས་ཀྱིས་འགོག་པ་མངོན་དུ་བྱ་ཞེས་སོ། །དེའི་ཕྱིར་ན་ཆོས་ཐམས་
[78b.3]ཅད་རང་བཞིན་གྱིས་ཡོངས་སུ་དག་པ་ཞེས་བྱ་བ་ལ་སོགས་པའི་ཚིག་ལས་བསྐྱེད་པ་བཞིན་ནོ། །འདིར་མང་པོ་སྨྲས་པས་ཅི་ཞིག་བྱ། ཆོས་ཐམས་ཅད་ཀྱི་རང་བཞིན་ཡོངས་སུ་དག་པ་མངོན་དུ་བྱ་བའི་ཕྱིར། ཆོས་ཐམས་ཅད་སྟོང་པ་ཉིད་དོ་ཞེས་བསྒོམ་པར་བྱའོ། །དེ་ལ་འདིར་སྟོང་པ་ཉིད་
[78b.4]ནི་ཡིད་ཙམ་གྱིས་དེ་བཞིན་དུ་འདིར་དེ་དང་དེའི་རྣམ་པས་བདག་ཉིད་སྣང་ཞིང་སོ་སོར་གསལ་བར་བྱ་སྟེ། དཔེར་ན་རྨི་ལམ་བཞིན་ནོ། །ཕྱི་རོལ་དུ་ཡིད་ཀྱིས་གཟུང་བ་མེད་དེ་ཡིད་ཀྱིས་སོ། །གཟུང་བའི་དངོས་པོ་མེད་ན་འཛིན་པའི་ཡིད་ཀྱང་མེད་དོ། །དེའི་ཕྱིར་ཆོས་ཐམས་ཅད་ཀྱང་ཡིད་ཀྱི་རང་
[78b.5]བཞིན་ནོ། །དེ་རྣམས་ཀྱི་གཟུང་བ་དང་འཛིན་པ་ལ་སོགས་པའི་རྟོག་པའི་སྤྲོས་པ་མཐའ་དག་ཇི་སྙེད་པ། དོན་དམ་པ་སྟོང་པ་ཉིད་ཀྱི་དེ་ཁོ་ན་ཉིད་དོ། །འདིའི་དོན་གཉིས་སུ་མེད་པའི་སྣང་བ་ཙམ་གྱི་བདག་ཉིད་དུ་གཡོ་བ་དང་། མི་གཡོ་བའི་འགྲོ་བ་ཐམས་ཅད་བསམ་པར་བྱའོ། །འདིར་དེ་བཞིན་དུ་
[78b.6]སྟོང་པ་ཉིད་ནི། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅ཧཾ་ཞེས་པའི་སྔགས་འདིས་བྱིན་གྱིས་བརླབ་པར་བྱའོ། །རི་དྭགས་ཀྱིས་མཚན་པའི་དྲི་མ་དང་བྲལ་བའི་མཚན་མོར་བྱེད་པའི་དཀྱིལ་འཁོར་གྱི་སྟེང་དུ་ཤིན་ཏུ་དཀར་ཞིང་དཀར་བའི་ཧྲཱིཿཡིག་གི་ས་བོན་ལས་བཅོམ་ལྡན་འདས་དཔལ་ལྡན་མཁའ་ལ་
[78b.7]གཤེགས་པའི་འཇིག་རྟེན་དབང་ཕྱུག་སྟོན་ཀའི་ཟླ་བ་དྲི་མ་མེད་པའི་དཀྱིལ་འཁོར་བརྒྱ་ཤར་བ་ལྟར་ཤིན་ཏུ་དཀར་བའི་སྐུ་ཅན། མཆོག་ཏུ་སྒེག་པའི་ཉམས་འབར་ཞིང་ཡིད་དུ་འོང་བ། རིན་པོ་ཆེ་སྣ་ཚོགས་པ་ལ་སོགས་པས་བརྒྱན་ཅིང་རྣམ་པར་སྤྲས་པའི་སྐུ་མངའ་བ། རལ་པའི་ཅོད་པན་འཛིན་པ། པདྨ་
[79a]
[79a.1]དཀར་པོ་རྒྱས་པའི་སྤྱན་མངའ་བ། བཅོམ་ལྡན་འདས་འོད་དཔག་ཏུ་མེད་པ་རྒྱལ་བའི་རིན་པོ་ཆེས་དབུ་རྣམ་པར་མཛེས་པ། གངས་ཀྱི་བྱེ་མའི་ཆུས་བཀྲུས་པ་བཞིན་དཀར་བའི་ན་བཟའ་སྐུ་ལ་བསྣམས་པ། ཤིང་རྟའི་འཁོར་ལོའི་ཚད་ཙམ་པའི་ཤིན་ཏུ་ཡིད་དུ་འོང་བའི་ཆུ་སྐྱེས་
[79a.2]དཀར་པོའི་སྟེང་ན་གནས་པའི་རི་དྭགས་ཀྱི་མཚན་མ་དང་བྲལ་བའི་ཟླ་བའི་དཀྱིལ་འཁོར་གྱི་གདན་ལ་སྐྱིལ་ཀྲུང་ཕྱེད་པས་བཞུགས་པ། ཕྱག་གཡས་པ་མཆོག་སྦྱིན། གཡོན་པ་ཡིད་འཕྲོག་པའི་པདྨ་དཀར་པོ་ཁ་འབུས་པ་བསྣམས་པ། དེ་ལྟ་བུར་གྱུར་པའི་བཅོམ་ལྡན་འདས་ཀྱི་སྐུར་བདག་
[79a.3]ཉིད་བསྐྱེད་ཅིང་བསྒོམ་པར་བྱའོ། །བཅོམ་ལྡན་འདས་ཀྱི་གཡས་ཕྱོགས་ལོགས་སུ་འཕགས་མ་སྒྲོལ་མ་དང་ནོར་བཟངས་སོ། །གཡོན་ཕྱོགས་ལོགས་སུ་ཁྲོ་གཉེར་ཅན་དང་རྟ་མགྲིན་བསྒོམ་པར་བྱའོ་ཞེས་སོ། །མགོ་བོར་དྲི་མ་མེད་པའི་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཡིག་གོ། །དེའི་
[79a.4]རྗེས་སུ་མགྲིན་པར་དྲི་མ་མེད་པའི་ཟླ་བའི་དཀྱིལ་འཁོར་གྱི་སྟེང་དུ་ཨཱཿཡིག་གོ། །སྙིང་གར་དྲི་མ་མེད་པའི་ཀུ་མུ་ཏའི་གཉེན་གྱི་དཀྱིལ་འཁོར་གྱི་སྟེང་དུ་ཧཱུཾ་ཡིག་བལྟ་བར་བྱའོ། །དེའི་རིམ་པ་འདིས་ཇི་སྲིད་འདོད་ཀྱི་བར་དེ་སྲིད་བསྒོམ་པར་བྱའོ། །དེའི་རྗེས་ལ་དེ་བཞིན་དུ་དམ་ཚིག་སེམས་དཔའི་གཟུགས་
[79a.5]ཀྱིས་བཅོམ་ལྡན་འདས་འཇིག་རྟེན་མགོན་པོའི་ཐུགས་ཀར་རི་དྭགས་ཀྱི་མཚན་མ་དང་བྲལ་ཞིང་དྲི་མ་མེད་པའི་རི་བོང་འཛིན་པའི་དཀྱིལ་འཁོར་གྱི་སྟེང་དུ་སྨིན་དྲུག་གི་ཟླ་བའམ། ཀུན་དའི་མདོག་ལྟ་བུའི་ཧྲཱིཿཡིག་གི་ས་བོན་ལས་སྐྱེས་པའི་འོད་ཟེར་ཁོར་ཡུག་གི་མཐར་ཐུག་པར་འཕྲོས་ཏེ། འཇིག་
[79a.6]རྟེན་གསུམ་གྱི་མི་ཤེས་པའི་མུན་པ་བཅོམ་པར་གྱུར་ནས། ཐོག་མ་མེད་པ་ནས་ཡང་དག་པར་བསྒྲུབས་པའི་བཅོམ་ལྡན་འདས་ཡེ་ཤེས་སེམས་དཔའི་སྐུ་ཤིན་ཏུ་རིང་པོ་ནས་ནམ་མཁའི་ཕྱོགས་སུ་གདན་དྲངས་ཤིང་བཀུག་སྟེ། དེ་བཞིན་དུ་བཅོམ་ལྡན་འདས་མདུན་གྱི་ནམ་མཁའི་ཕྱོགས་
[79a.7]སུ་བཞུགས་ནས་རིན་པོ་ཆེ་སྣ་ཚོགས་པས་སྤྲས་པའི་གསེར་གྱི་སྣོད་དུ་དྲི་བཟང་གི་ཆུ་དང་། དྲི་ཞིམ་པོའི་མེ་ཏོག་བཅུག་སྟེ། དེས་དེ་བཞིན་དུ་གདན་དྲངས་པའི་ཡེ་ཤེས་སེམས་དཔའི་སྐུ་བཅོམ་ལྡན་འདས་འཇིག་རྟེན་མགོན་པོའི་ཞབས་ལ་མཆོད་ཡོན་ཕུལ་ནས། དེའི་རྗེས་སུ་ལྷའི་མེ་
[79b]
[79b.1]ཏོག་དང་། སྤོས་དང་། མར་མེ་དང་། ཞལ་ཟས་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། དྲིལ་བུ་དང་། བ་དན་ལ་སོགས་པ་རྣམས་ཀྱིས་ཕྱི་དང་། གསང་བའི་མཆོད་པ་དང་། ཕྱི་རོལ་གྱི་སྣ་ཚོགས་པའི་རིམ་པས་དེ་བཞིན་དུ་
[79b.2]བཅོམ་ལྡན་འདས་ཡེ་ཤེས་སེམས་དཔའི་བདག་ཉིད་ལ་མཆོད་པར་བྱའོ། །སླར་ཡང་མངོན་པར་མཆོད་ཅིང་བསྟོད་ནས་ཛཿཧཱུཾ་བཾ་ཧོཿཞེས་པའི་ཡི་གེ་བཞི་པོ་འདིའི་ཕྱག་རྒྱ་བལྟ་བར་བྱའོ། །ཅུང་ཟད་ཐལ་མོ་གུག་པོར་སྦྱར་ནས་གུང་མོ་རྩེ་མོར་བྱས་ཏེ། སོར་མོའི་ལྷག་མ་རྣམས་ཅུང་ཟད་ཁ་བསྡུས་
[79b.3]ཤིང་ཁ་མངོན་དུ་བྱས་ཏེ། ཅུང་ཟད་མ་རེག་པར་གཟུང་བར་བྱའོ། །མཐེ་བོ་དང་མཛུབ་མོ་དག་ཉེ་བར་གནས་ཤིང་ཆུ་སྐྱེས་ཁ་བྱེ་བའི་ཕྱག་རྒྱའོ། །ཕྱག་རྒྱ་འདིས་དེ་བཞིན་དུ་གདན་དྲངས་ནས་བཅོམ་ལྡན་འདས་ཡེ་ཤེས་སེམས་དཔའི་མཚན་ཉིད་ཡོངས་སུ་མཉེས་པར་བྱས་ནས། ཡང་དམ་ཚིག་
[79b.4]སེམས་དཔའི་གཟུགས་ལ་བཅོམ་ལྡན་འདས་ནང་དུ་བསྒོམ་པར་བྱའོ། །ཨོཾ་ཨཱཿཧཱུཾ་ཞེས་པ་འདིས་གཉིས་སུ་མེད་པ་འདི་དག་ཉིད་ལྷག་པར་མོས་པར་བྱའོ། །དེའི་རྗེས་ལ་རི་དྭགས་ཀྱི་མཚན་མ་དང་བྲལ་བའི་ཟླ་བའི་དཀྱིལ་འཁོར་གྱི་དབུས་སུ་ཐིམ་ཞིང་། དྲི་མ་མེད་པའི་རྩའི་དབང་པོའི་དཀྱིལ་
[79b.5]འཁོར་བརྒྱའི་འོད་ཟེར་གྱི་ཚོགས་འབར་བའི་ཧྲཱིཿཡིག་གི་ས་བོན་ལས་རྣམ་པར་འཕྲོས་ནས་གྲངས་མེད་གཞལ་དུ་མེད་པའི་བཅོམ་ལྡན་འདས་དཔལ་ཁརྶ་པཱ་ཎི་འཇིག་རྟེན་དབང་ཕྱུག་རྗེ་བཙུན་ཕྱོགས་བཅུ་ནས་བྱོན་ཞིང་དཔག་ཏུ་མེད་པའི་འཇིག་རྟེན་གྱི་ཁམས་ཀྱི་ནམ་མཁའ་ལ་བཞུགས་ནས། ཡང་
[79b.6]དེ་ན་གནས་པའི་སེམས་ཅན་རྣམས་ལ་གསེར་དང་། རིན་པོ་ཆེ་དང་། མུ་ཏིག་དང་། མུ་མེན་དང་། བྱི་རུ་དང་། བེེ་ཌཱུརྱ་དང་། ཨིནྡྲ་ནཱི་ལ་ལ་སོགས་པའི་རིན་པོ་ཆེའི་ཆར་ཕབ་ནས། དབུལ་བ་ལ་སོགས་པའི་སྡུག་བསྔལ་བཅོམ་ཞིང་། བླ་ན་མེད་པའི་དཔལ་འབྱོར་ལ་བཀོད་ནས། བདག་མེད་
[79b.7]པ་ལ་སོགས་པའི་ཆོས་གསུངས་པས་བདུད་རྩིའི་རྒྱུན་བབ་པ་དེས་ཡང་དག་པར་ཚིམ་པར་བྱས་ནས་སླར་ཡང་རྒྱུན་མི་འཆད་པར་སྣ་ཚོགས་པའི་རབ་ཏུ་བྱེད་པས། གཞན་གྱི་དོན་མཛད་ནས་འགྲོ་བ་རྣམས་ཀྱང་བཅོམ་ལྡན་འདས་འཇིག་རྟེན་དབང་ཕྱུག་གི་གཟུགས་སུ་བསྐྱེད་ནས། དེ་ལ་ཡང་
[80a]
[80a.1]བསིལ་ཟེར་བྱེད་པའི་དཀྱིལ་འཁོར་གྱི་དབུས་སུ་ཤེལ་དང་། ནོར་བུའི་འོད་ཟེར་ཕྲེང་བ་ལྟ་བུའི་ཧྲཱིཿཡིག་གི་ས་བོན་བཀོད་ནས། དེ་བཞིན་དུ་བཅོམ་ལྡན་འདས་ནང་དུ་ཡང་དག་པར་ཞུགས་པར་གྱུར་ཏེ། དེ་ལྟ་བུ་ལ་སོགས་པ་སྤྲོ་བ་དང་བསྡུ་བའི་རིམ་པས་ཇི་སྲིད་ངལ་བར་མ་
[80a.2]གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་ཡང་བསྒོམས་པས་ངལ་ན་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཧྲཱིཿསྭཱ་ཧཱ་སྔགས་གང་བཅོམ་ལྡན་འདས་འཇིག་རྟེན་མགོན་པོའི་སྙིང་པོ་ཐུན་མོང་མ་ཡིན་པའི་མཐུ་དང་ལྡན་པ་དེ་དག་གིས་དེ་བཞིན་དུ་སྔགས་ཀྱི་རྒྱལ་པོ་སྟེ། ཐམས་ཅད་ཀྱིས་དེ་
[80a.3]བཞིན་དུ་རྒྱལ་བ་མཆོག་རྣམས་ཀྱིས་མངོན་པར་མཆོད་པས་བཀུར་སྟི་དང་ཕྱག་བྱའོ་ཞེས་སོ། །ཏིང་ངེ་འཛིན་ལས་ལངས་ནས་འགྲོ་བ་རྣམས་འཇིག་རྟེན་དབང་ཕྱུག་གི་སྐུར་བལྟ་ཞིང་། དེའི་ང་རྒྱལ་བྱས་ནས་ཇི་ལྟར་འདོད་པ་བཞིན་གནས་པར་བྱའོ་ཞེས་སོ། །ཆོ་ག་འདིས་བཅོམ་ལྡན་འདས་མང་དུ་བསྒོམས་ན།
[80a.4]རལ་གྲི་ལ་སོགས་པའི་དངོས་གྲུབ་མཐའ་དག་མངོན་དུ་བྱེད་ཅིང་ཞབས་ཀྱི་དྲུང་དུ་ཡང་དག་པར་འབྱུང་ཞིང་འཇུག་ན། གཞན་དངོས་གྲུབ་ཕྲ་མོ་སྨོས་ཅི་དགོས་ཏེ། ངེས་པར་འབྱུང་ངོ་། །གང་ཞིག་སྐྱེ་བོས་དབེན་པའི་ནགས་ཚལ་དང་། དུར་ཁྲོད་དང་། རིའི་ཕུག་རྣམས་སུ་གནས་ནས་བཅོམ་ལྡན་འདས་སྒོམ་
[80a.5]པ་དེ་རྣམས་ཀྱིས་ཡུན་མི་རིང་བར་དེ་བཞིན་དུ་འདིར་ངེས་པར་བཅོམ་ལྡན་འདས་མངོན་དུ་བྱེད་དེ། བཅོམ་ལྡན་འདས་རང་ཉིད་ཀྱིས་དེ་རྣམས་ཀྱི་དབུགས་འབྱིན་པ་དང་རབ་ཏུ་དབུགས་འབྱིན་པ་ལ་སོགས་པ་སྟེར་བར་མཛད་དོ། །ངེས་པར་ཞུགས་ན་མང་པོ་སྨྲས་པས་ཅི་ཞིག་བྱ། །མཆོག་ཏུ་ཤིན་ཏུ་རྙེད་པར་དཀའ་
[80a.6]བའི་སངས་རྒྱས་ཉིད་ཀྱང་དེ་རྣམས་ཀྱི་ལག་པའི་མཐིལ་ན། རག་ཆུང་གི་འབྲས་བུ་གཞག་པ་བཞིན་དུ་འགྱུར་རོ་ཞེས་སོ། །དཔལ་ལྡན་མཁའ་སྤྱོད་འཇིག་རྟེན་མགོན། །མཆོག་གི་སྒྲུབ་ཐབས་བྱས་པ་ཡིས། །བསོད་ནམས་གང་བསགས་དེ་ཡིས་ནི། །འཇིག་རྟེན་ཐུབ་པའི་དྲུང་འགྲོ་ཤོག །དཔལ་ལྡན་
[80a.7]མཁའ་སྤྱོད་འཇིག་རྟེན་དབང་ཕྱུག་གི་སྒྲུབ་ཐབས་ཅུང་ཟད་རྒྱས་པར་མཛད་པ། ཨ་ནུ་པ་མ་རཀྵི་ཏས་མཛད་པ་རྫོགས་སོ།། {T3413}༄༅༅། །རྒྱ་གར་སྐད་དུ། ཤྲཱི་ཁརྶ་པཱ་ཎ་སཱ་དྷ་ནཾ། བོད་སྐད་དུ། དཔལ་ལྡན་མཁའ་སྤྱོད་ཀྱི་སྒྲུབ་ཐབས། དཔལ་ལྡན་མཁའ་སྤྱོད་ལ་ཕྱག་འཚལ་ལོ། །
[80b]
[80b.1]དང་པོར་རེ་ཞིག་སྔགས་པས་སྟན་བདེ་བ་ལ་ཉེ་བར་འདུག་སྟེ། རང་གི་སྙིང་གར་པཾ་ཡིག་ཡོངས་སུ་གྱུར་པ་ལས་པདྨ་འདབ་མ་བརྒྱད་པ། དེའི་སྟེང་དུ་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཧྲཱིཿཡིག་ལས་འོད་ཟེར་བལྟས་ཏེ། འོད་ཟེར་དེས་འོག་མིན་གྱི་ས་ལ་ཞུགས་
[80b.2]ཏེ། འཇིག་རྟེན་དབང་ཕྱུག་གདན་དྲངས་ནས་མདུན་གྱི་ནམ་མཁའི་མཐིལ་དུ་བལྟས་ཏེ་སྡིག་པ་བཤགས་པ་ལ་སོགས་པ་བྱའོ། །འདི་ལྟ་སྟེ་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསོད་ནམས་ཡོངས་སུ་བསྔོ་བ་དང་། གསུམ་ལ་སྐྱབས་སུ་འགྲོ་བ་དང་། བདག་ཉིད་དབུལ་བ་
[80b.3]དང་། གསོལ་བ་འདེབས་པ་དང་། བྱང་ཆུབ་ཏུ་སེམས་བསྐྱེད་པར་བྱས་ནས། ཚངས་པའི་གནས་བཞི་བསྒོམ་པར་བྱ་སྟེ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་སོ། །དེ་ནས་སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པས་རང་གི་ལུས་
[80b.4]གཟུགས་བརྙན་དང་འདྲ་བར་བལྟས་ལ། སྙིང་གའི་དབུས་སུ་པཾ་ཡིག་ལས་སྐྱེས་པའི་པདྨ་འདབ་མ་བརྒྱད་པ། དེའི་སྟེང་དུ་ཨ་ཡིག་ལས་ཟླ་བའི་དཀྱིལ་འཁོར་དེའི་སྟེང་དུ་ཧྲཱིཿཡིག་དམར་པོའི་འོད་ཟེར་གྱིས་དེ་བཞིན་གཤེགས་པ་རྣམས་བཀུག་ཅིང་བཅུག་ནས་བདག་ཉིད་འཇིག་རྟེན་དབང་ཕྱུག་གི་
[80b.5]གཟུགས་སུ་བསྒོམ་པར་བྱ་སྟེ། སྐུ་མདོག་དཀར་པོ་རལ་པའི་ཅོད་པན་ཅན། ཕྱག་གཡས་པ་མཆོག་སྦྱིན། ཅིག་ཤོས་ན་པདྨ་དཀར་པོ་བསྣམས་པ། སྐྱིལ་ཀྲུང་ཕྱེད་པས་བཞུགས་ཤིང་རྒྱན་ཐམས་ཅད་ཀྱིས་རྣམ་པར་བརྒྱན་པ། འོད་དཔག་ཏུ་མེད་པའི་ཅོད་པན་ཅན། མཚན་སུམ་ཅུ་རྩ་གཉིས་དང་
[80b.6]ལྡན་པ། དཔེ་བྱད་བཟང་པོ་བརྒྱད་ཅུས་སྤྲས་པ། ཟླ་བའི་གདན་ལ་ཟླ་བའི་འོད་ལྟ་བུའི་བདག་ཉིད་རྣམ་པར་བསྒོམ་པར་བྱའོ། །དེའི་གཡས་སུ་འཕགས་མ་སྒྲོལ་མ་དང་ནོར་བཟངས། གཡོན་དུ་ཁྲོ་གཉེར་ཅན་དང་རྟ་མགྲིན། ཤར་དུ་རྣམ་པར་སྣང་མཛད། ལྷོར་རིན་ཆེན་འབྱུང་ལྡན། ནུབ་ཏུ་འོད་དཔག་
[80b.7]མེད། བྱང་དུ་དོན་ཡོད་གྲུབ་པ་རྣམས་སོ། །མེར་སྤྱན་མ། བདེན་བྲལ་དུ་མཱ་མ་ཀཱི། རླུང་དུ་གོས་དཀར་མོ། །དབང་ལྡན་དུ་རྡོ་རྗེ་དབྱིངས་ཀྱི་དབང་ཕྱུག་མ་རྣམས་སོ། །དེ་ནས་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའ་དགུག་ཅིང་རབ་ཏུ་གཞུག་པར་བྱའོ། །མིག་ལ་སོགས་པ་བྱིན་གྱིས་
[81a]
[81a.1]བརླབས་ཤིང་། ལུས་དང་ངག་དང་ཡིད་བྱིན་གྱིས་བརླབས་ནས་དབང་བསྐུར་བ་ཞུ་བར་བྱའོ། །ཇི་ལྟར་འཁྲུངས་ཙམ་ཉིད་ནས་ནི། །དེ་བཞིན་གཤེགས་རྣམས་ཁྲུས་གསོལ་བ། །ལྷ་ཡི་ཆུ་བོ་དག་པ་ཡིས། །དེ་བཞིན་བདག་ཀྱང་ཁྲུས་མཛད་གསོལ། །ཨོཾ་སརྦ་ཏ་ཐཱ་ག་ཏ་
[81a.2]ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། སྤྱན་མ་ལ་སོགས་པའི་ལྷ་མོ་བཅུ་ཡང་དག་པར་སྤྲོས་ནས་མཆོད་པ་དང་བསྟོད་པ་བྱས་ཏེ། སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཧྲཱིཿསྭཱ་ཧཱ་ཞེས་སོ། །དཔལ་ལྡན་མཁའ་སྤྱོད་ཀྱི་སྒྲུབ་ཐབས་རྫོགས་སོ།། །།
[81a.3]{T3414}༄༅༅། །རྒྱ་གར་སྐད་དུ། སིཾ་ཧ་ནཱ་ད་སཱ་དྷ་ནཾ། བོད་སྐད་དུ། སེང་གེ་སྒྲའི་སྒྲུབ་ཐབས། རྗེ་བཙུན་སེང་གེ་སྒྲ་ལ་ཕྱག་འཚལ་ལོ། །ཞལ་གཅིག་ཕྱག་གཉིས་སྐུ་མདོག་དཀར། །སྤྱན་གསུམ་སེང་གེ་ལ་གནས་ཤིང་། །བླ་མ་ནད་ཀུན་འཇོམས་བྱེད་པའི། །སེང་གེ་སྒྲ་ལ་ཕྱག་འཚལ་ལོ། །དང་པོར་རེ་ཞིག་
[81a.4]སྔགས་པས་ཁ་བསང་བ་ལ་སོགས་པ་བྱས་ཏེ། ཡིད་དང་མཐུན་པའི་གནས་སུ་གདན་བདེ་བ་ལ་ཉེ་བར་འདུག་སྟེ། ཨ་ཡིག་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཧྲཱིཿཡིག་དཀར་པོ་སྙིང་གར་བལྟས་ལ། དེའི་འོད་ཟེར་གྱིས་ཁམས་གསུམ་སྣང་བར་བྱས་ཏེ།
[81a.5]འོག་མིན་གྱི་གནས་སུ་སོང་སྟེ། སེང་གེ་སྒྲ་དང་། བླ་མ་དང་། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་གདན་དྲངས་ཏེ། མདུན་གྱི་ནམ་མཁའ་ལ་བཞུགས་ནས། དེའི་རྗེས་སུ་མཆོད་པ་དང་། སྡིག་པ་བཤགས་པ་ལ་སོགས་པ་བྱའོ། །དེ་ནས་ཚངས་པའི་གནས་བཞི་བསྒོམ་
[81a.6]པར་བྱས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་སྔགས་འདིས་སྟོང་པ་ཉིད་དུ་བྱིན་གྱིས་བརླབ་པར་བྱའོ། །དེ་ནས་སྨོན་ལམ་རྗེས་སུ་དྲན་པར་བྱས་ནས་པཾ་ཡིག་དཀར་པོ་ཡོངས་སུ་གྱུར་པ་ལས་པདྨ། དེའི་སྟེང་དུ་ཨ་ཡིག་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར།
[81a.7]དེའི་སྟེང་དུ་ཨཱཿཡིག་དཀར་པོ་ཡོངས་སུ་གྱུར་པ་ལས་སེང་གེ་དཀར་པོ། དེའི་སྟེང་དུ་ཨཾ་ཡིག་དཀར་པོ་ཡོངས་སུ་གྱུར་པ་ལས་པདྨ་དཀར་པོ། དེའི་ལྟེ་བ་ལ་ཧྲཱིཿཡིག་དཀར་པོ་འོད་ཟེར་འཕྲོ་ཞིང་འགྱེད་པ། དེ་ཐམས་ཅད་ཡོངས་སུ་གྱུར་པ་ལས་སེང་གེ་སྒྲའི་གཟུགས་སུ་བདག་ཉིད་བལྟ་བར་བྱའོ། །ཡན་
[81b]
[81b.1]ལག་ཐམས་ཅད་དཀར་ཞིང་ཞལ་གཅིག་ཕྱག་གཉིས་པ། སྤྱན་གསུམ་པ་རལ་པའི་ཅོད་པན་བཅིངས་པ། འོད་དཔག་ཏུ་མེད་པས་དབུ་བརྒྱན་པ། རྒྱལ་པོ་ཆེན་པོ་རོལ་པའི་སྟབས་ཀྱིས་སེང་གེའི་ཁྲི་ལ་བཞུགས་པ། སྟག་གི་པགས་པའི་ན་བཟའ་བསྣམས་པ། དེ་བཞིན་གཤེགས་པ་ལྔ་འཕྲོ་
[81b.2]ཞིང་རོལ་པའི་དཔའ་བོ་ལྔ་དང་ཟླ་བ་ཕྱེད་པས་བརྒྱན་པ། ཕྱག་གཡོན་ན་པདྨ་དཀར་པོའི་སྟེང་དུ་རལ་གྲི་དཀར་པོ་དང་། དེ་དང་ཉེ་བར་གནས་པའི་པདྨ་དཀར་པོའི་སྟེང་དུ་མེ་ཏོག་དྲི་བཟང་སྣ་ཚོགས་པས་ཡོངས་སུ་གང་བའི་ཐོད་པ་དཀར་པོ། གཡས་ན་པདྨ་དཀར་པོའི་སྟེང་ན་སྦྲུལ་དཀར་པོས་དཀྲིས་
[81b.3]པའི་དབྱུ་གུ་རྩེ་གསུམ་པ་དཀར་པོའོ། །དེ་ལྟ་བུར་གྱུར་པའི་བཅོམ་ལྡན་འདས་བསྒོམ་པར་བྱའོ། །བསྒོམས་པས་ངལ་ན་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུཾ་ཕཊ་སྭཱ་ཧཱ། ཆོ་ག་འདིས་སྐུ་གཟུགས་བྱས་ཏེ། ཡང་ན་རས་རིས་བྱས་ལ། བཅོམ་ལྡན་འདས་ཀྱི་མདུན་དུ་སོ་སོའི་མཎྜལ་བྱས་
[81b.4]ལ་གཟུངས་ལན་གཅིག་བཀླག་པར་བྱའོ། །དེ་ལ་གཟུངས་ནི་འདིའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ་ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊེ་བཱིརྱེ་སྭཱ་ཧཱ། ས་ལ་མ་ལྷུང་བའི་བའི་ལྕི་བ་ལ་མངོན་པར་བསྔགས་ནས་མཎྜལ་བརྒྱད་བྱས་
[81b.5]ལ། མཎྜལ་སོ་སོ་ལ་ལན་བཅུ་གསུམ་གྱི་བར་དུ་གཟུངས་བཀླག་པར་བྱའོ། །མཎྜལ་སོ་སོའི་དྲི་མ་ལྷག་པའི་ལྕི་བ་དེ་ལ་གཟུངས་ལན་བདུན་དུ་མངོན་པར་བསྔགས་ནས་དེས་ནད་པ་ལ་བྱུག་པར་བྱའོ། །ཉི་མ་བདུན་ནམ། ཉི་མ་བཅུ་གསུམ་མམ། ཉི་ཤུ་རྩ་གཅིག་གིས་དེ་བཞིན་དུ་བྱས་པས་མཚམས་མེད་པ་ལྔ་བྱེད་
[81b.6]པས་ཀྱང་འགྲུབ་པར་འགྱུར་རོ། །གལ་ཏེ་མ་འགྲུབ་ན་དེའི་ཚེ་ངས་མཚམས་མེད་པ་ལྔ་བྱས་པར་འགྱུར་རོ། །སེང་གེ་སྒྲའི་སྒྲུབ་ཐབས་རྫོགས་སོ། །བདག་གི་སྒྲུབ་ཐབས་ཆོ་ག་འདིས། །གང་ཞིག་ནོར་དང་དགེ་ཐོབ་ཅིང་། །མགོན་པོ་སེང་གེ་སྒྲ་དང་ནི། །འགྲོ་བ་རྣམས་ནི་ནད་མེད་ཤོག །པཎྜི་ཏ་ཨ་བ་དྷཱུ་ཏཱི་པ་དཔལ་
[81b.7]ལྡན་གཉིས་མེད་རྡོ་རྗེའི་ཞབས་ཀྱིས་མཛད་པའོ། {T3415}༄༅༅། །རྒྱ་གར་སྐད་དུ། ལོ་ཀེ་ནཱ་ཐ་སཱ་དྷ་ནཾ། བོད་སྐད་དུ། འཇིག་རྟེན་མགོན་པོའི་སྒྲུབ་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །རྣལ་འབྱོར་རིམ་པ་སྔོན་མ་བཞིན། །འཇིག་རྟེན་མགོན་པོ་ཟླ་བའི་འོད། །ཧྲཱིཿ
[82a]
[82a.1]ཡི་ཡི་གེ་ལས་བྱུང་བའི། །རལ་པའི་ཅོད་པན་གྱིས་བརྒྱན་པ། །རལ་པའི་མཐར་གནས་རྡོ་རྗེ་ཆོས། །ནད་རྣམས་མ་ལུས་འཇོམས་བྱེད་པ། །ཕྱག་གཡས་མཆོག་སྦྱིན་དེ་བཞིན་དུ། །གཡོན་པ་ན་ནི་པདྨ་བསྣམས། །རོལ་པའི་སྟབས་ཀྱིས་ཡང་དག་བཞུགས། །
[82a.2]ཞི་བ་ཆེན་པོའི་འོད་རབ་འབར། །མཆོག་སྦྱིན་ཨུཏྤལ་ཕྱག་ན་བསྣམས། །ཞི་བའི་སྒྲོལ་མ་གཡས་ཕྱོགས་བཞུགས། །དེ་ནས་རྟ་མགྲིན་གཡོན་ཕྱོགས་ན། །ཕྱག་འཚལ་བ་དང་དབྱུག་པའི་ཕྱག །དྲག་ཆེན་སྐུ་མདོག་དམར་པོ་སྟེ། །སྟག་གི་པགས་པའི་ན་བཟའ་དགྱེས། །དེ་བཞིན་ཆོ་ག་
[82a.3]ཡང་དག་ལྡན། །འཇིག་རྟེན་མགོན་པོ་རབ་བསྒོམས་ན། །ཉོན་མོངས་དྲི་མ་ཀུན་ལས་འདས། །ཡིད་ཀྱི་ཤིང་རྟ་གང་བར་འགྱུར། །འདིར་སྔགས་ནི། ཨོཾ་ཧྲཱིཿཞེས་སོ། །འཇིག་རྟེན་མགོན་པོའི་སྒྲུབ་ཐབས་རྫོགས་སོ།། {T3416}༄༅༅། །རྒྱ་གར་སྐད་དུ། ལོ་ཀི་ཤྭ་
[82a.4]ར་སཱ་དྷ་ནཾ། བོད་སྐད་དུ། འཇིག་རྟེན་དབང་ཕྱུག་གི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ལཱཾ་གི་ས་བོན་ལས་ཡང་དག་པའི་མཐར་ཐུག་པ་ཐམས་ཅད་ཆོ་ག་སྔོན་མ་བཞིན་དུ་བྱའོ། །དེ་ལས་ལཱཾ་ཡོངས་སུ་གྱུར་པ་ལས་འཇིག་རྟེན་མགོན་པོ་ཟླ་བའི་འོད་
[82a.5]ཟེར་ལྟ་བུ་འབར་ཞིང་རྒྱན་ཐམས་ཅད་ཀྱིས་བརྒྱན་པ། རལ་པའི་ཅོད་པན་ཅན། པདྨ་དང་ཟླ་བ་ལ་སྐྱིལ་མོ་ཀྲུང་གིས་བཞུགས་པ། ཕྱག་གཡོན་ན་པདྨ་བསྣམས་ཤིང་། གཡས་མཆོག་སྦྱིན་པ་བསྒོམ་པར་བྱའོ། །དམ་ཚིག་གི་ཕྱག་རྒྱ་ནི་ཁུ་ཚུར་གཉིས་བཅིངས་ནས་གུང་མོ་དག་པདྨ་
[82a.6]ཁ་འབུས་པའི་རྣམ་པར་སྦྱར་བར་བྱའོ། །ཨོཾ་མ་ཎི་པདྨེ་ཧཱུཾ་ཞེས་པ་ནི་བཟླས་པའི་སྔགས་སོ། །འཇིག་རྟེན་དབང་ཕྱུག་གི་སྒྲུབ་ཐབས་རྫོགས་སོ།། {T3417}༄༅༅། །རྒྱ་གར་སྐད་དུ། སིཾ་ཧ་ནཱ་ད་སཱ་དྷ་ནཾ། བོད་སྐད་དུ། སེང་གེ་སྒྲའི་སྒྲུབ་ཐབས། རྗེ་བཙུན་སེང་གེ་སྒྲ་
[82a.7]ལ་ཕྱག་འཚལ་ལོ། །རྣལ་འབྱོར་པས་དང་པོར་ཁ་བསང་བ་ལ་སོགས་པ་བྱས་ནས། སྟན་བདེ་བ་ལ་འདུག་སྟེ། རང་གི་སྙིང་གར་ཉི་མའི་དཀྱིལ་འཁོར་ལ་ཨ་ཡིག་བལྟས་ནས་མདུན་དུ་བླ་མ་དང་། སངས་རྒྱས་ལ་སོགས་པ་གདན་དྲངས་ནས། སྡིག་པ་བཤགས་པ་ལ་སོགས་
[82b]
[82b.1]པ་བྱའོ། །དེ་ནས་སྟོང་པ་ཉིད་མངོན་དུ་བྱས་ཤིང་བྱིན་གྱིས་བརླབས་ནས་སྨོན་ལམ་རྗེས་སུ་དྲན་པར་བྱའོ། །དེ་ནས་ཨཱཿཡིག་ཡོངས་སུ་གྱུར་པ་ལས་ཧཱུཾ་ཡིག །དེ་ཡོངས་སུ་གྱུར་པ་ལས་ཟླ་བའི་སྟེང་དུ། ཨོཾ་ཡིག་ཡོངས་སུ་གྱུར་པ་ལས་པདྨ་དམར་པོ། དེའི་སྟེང་དུ་ཨཱཿཡིག་ཡོངས་
[82b.2]སུ་གྱུར་པ་ལས་སེང་གེ་དཀར་པོ། དེའི་སྟེང་དུ་ཟླ་བ་ལ་ཧྲཱིཿལས་བྱུང་བའི་རྗེ་བཙུན་སེང་གེ་སྒྲ་དཀར་པོ། རལ་པའི་ཅོད་པན་ཅན། སྤྱན་གསུམ་པ། ཕྱག་གཉིས་པ། དཀའ་ཐུབ་ཀྱི་ཆ་ལུགས་འཛིན་པ། རྒྱལ་པོ་ཆེན་པོ་རོལ་པའི་སྟབས་ཀྱིས་བཞུགས་པ། ཕྱག་གཡོན་ན་པདྨ་
[82b.3]ལངས་པའི་སྟེང་ན་འབར་བའི་རལ་གྲི་གྱེན་དུ་འཕྱར་བ། གཡས་ན་སྦྲུལ་དཀར་པོས་དཀྲིས་པའི་རྩེ་གསུམ་དཀར་པོ་བསྣམས་པ། གཡོན་ན་མེ་ཏོག་དྲི་བཟང་པོ་སྣ་ཚོགས་པས་གང་བའི་ཐོད་པ་དཀར་པོ། འོད་དཔག་ཏུ་མེད་པས་དབུ་བརྒྱན་ཅིང་། དེ་བཞིན་གཤེགས་པ་ལྔ་འཕྲོ་བ་སྤྲུལ་
[82b.4]པའི་སྐུ་ཆེན་པོ་བསྒོམ་པར་བྱའོ། །བཟླས་པའི་སྔགས་ནི། ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུཾ་ཕཊ་ཅེས་སོ། །ན་མོ་རཏྣ་ཏྲ་ཡཱ་ཡ། ན་མཿཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊེ། ཀ་རོ་ཊཾ།
[82b.5]བཱིརྱ་སྭཱ་ཧཱ། འདི་རྣམས་འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་སྔར་ས་ལ་མ་ལྷུང་བའི་བའི་ལྕི་བ་བླངས་ནས་མཎྜལ་བརྒྱད་བྱས་ཏེ། མཎྜལ་སོ་སོ་ལ་ལན་བཅུ་གསུམ་བཟླས་པར་བྱའོ། །དེ་ནས་ལན་བདུན་པའི་ལྕི་བ་ལྷག་མ་ལ་མངོན་པར་བསྔགས་ནས། ནད་པ་ལ་ཉེ་བར་
[82b.6]བྱུག་པར་བྱའོ། །ནད་ཐམས་ཅད་ཉེ་བར་ཞི་བར་འགྱུར་རོ། །གལ་ཏེ་ཉི་མ་བདུན་ནམ། བཅུ་གསུམ་མམ། ཉི་ཤུ་རྩ་གཅིག་ཏུ་བྱས་ན་མཚམས་མེད་པ་ལྔ་བྱས་པས་ཀྱང་འགྲུབ་པར་འགྱུར་རོ། །གལ་ཏེ་མ་གྲུབ་ན་དེའི་ཚེ་ངས་མཚམས་མེད་པ་ལྔ་བྱས་པར་འགྱུར་རོ། །སེང་གེ་སྒྲའི་
[82b.7]སྒྲུབ་ཐབས་རྫོགས་སོ། {T3418}༄༅༅། །རྒྱ་གར་སྐད་དུ། ཨཱརྱཱ་སིཾ་ཧ་ནཱ་ད་སཱ་དྷ་ནཾ། བོད་སྐད་དུ། འཕགས་པ་སེང་གེ་སྒྲའི་སྒྲུབ་ཐབས། རྗེ་བཙུན་སེང་གེ་སྒྲ་ལ་ཕྱག་འཚལ་ལོ། །དང་པོ་རེ་ཞིག་སྔགས་པས་ཁ་བསང་བ་ལ་སོགས་པ་བྱས་ནས་སྟན་བདེ་བ་ལ་འདུག་
[83a]
[83a.1]ཏེ། རང་གི་སྙིང་གར་ཟླ་བའི་དཀྱིལ་འཁོར་ལ་ཧྲཱིཿཡིག་དཀར་པོ་བལྟས་ནས། དེའི་འོད་ཟེར་གྱིས་མདུན་དུ་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་གདན་དྲངས་པར་བསྒོམས་ནས། དེ་ནས་མཆོད་པ་དང་། སྡིག་པ་བཤགས་པ་ལ་སོགས་
[83a.2]པ་བྱས་ནས། སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པ་འདིས་བྱིན་གྱིས་བརླབ་པར་བྱའོ། །དེ་ནས་སྐད་ཅིག་གིས་པཾ་ཡིག་ཡོངས་སུ་གྱུར་པ་ལས་པདྨ་དམར་པོ། དེའི་སྟེང་དུ་སིཾ་ཡིག་ཡོངས་སུ་གྱུར་པ་ལས་སེང་གེ་དཀར་པོའོ། །དེའི་སྟེང་དུ་ཟླ་བ་
[83a.3]ལ་ཧྲཱིཿཡིག་ལས་བྱུང་བའི་འཇིག་རྟེན་དབང་ཕྱུག་སེང་གེ་སྒྲའི་སྐུར་བདག་ཉིད་བསྒོམ་པར་བྱའོ། །སྐུ་མདོག་དཀར་པོ་རལ་པའི་ཅོད་པན་ཅན། འོད་དཔག་ཏུ་མེད་པས་དབུ་བརྒྱན་པ། སྤྱན་གསུམ་པ། ཕྱག་གཉིས་པ། དཀའ་ཐུབ་ཀྱི་ཚུལ་འཛིན་པའོ། །རྒྱལ་པོ་ཆེན་པོ་རོལ་པས་
[83a.4]བཞུགས་པ། ཕྱག་གཡོན་པདྨ་ལངས་པའི་སྟེང་དུ་རལ་གྲི་འབར་བ། གཡས་ན་སྦྲུལ་དཀར་པོས་དཀྲིས་པའི་རྩེ་གསུམ་དཀར་པོ། གཡོན་ན་དྲི་ཞིམ་པོའི་མེ་ཏོག་སྣ་ཚོགས་པས་བཀང་བའི་ཐོད་པ་དཀར་པོའོ། །དེ་བཞིན་གཤེགས་པ་ལྔ་འཕྲོ་ཞིང་སྤྲུལ་པ་ཆེན་པོ་སྐུར་བསྒོམ་པར་བྱའོ། །
[83a.5]བཟླས་པའི་སྔགས་ནི། ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུཾ་ཕཊ། དེ་ནས་གཟུངས་བཟླས་ཏེ། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊེ། ཀ་རོ་ཊཾ། བཱི་དྱ་སྭཱ་ཧཱ། སྔགས་
[83a.6]འདི་བརྗོད་ནས་བཅོམ་ལྡན་འདས་ཀྱི་མདུན་དུ་ནམ་ལངས་པ་དང་། ས་ལ་མ་ལྷུང་བའི་བའི་ལྕི་བ་ལ་མཎྜལ་བརྒྱད་བྱས་ནས་མཎྜལ་སོ་སོ་ལ་ལན་བཅུ་གསུམ་བཟླས་པར་བྱའོ། །ལྕི་བ་ལྷག་མ་ལ་ལན་བདུན་མངོན་པར་བསྔགས་ནས་ནད་པ་ལ་བྱུག་པར་བྱའོ། །དེས་ནད་ཐམས་ཅད་ཉེ་བར་ཞི་བར་
[83a.7]འགྱུར་རོ། །ཉི་མ་བདུན་ནམ། ཉི་མ་བཅུ་གསུམ་མམ། ཉི་ཤུ་རྩ་གཅིག་དེ་བཞིན་དུ་བྱས་པས་མཚམས་མེད་པ་ལྔ་བྱེད་པས་ཀྱང་འགྲུབ་པར་འགྱུར་རོ། །གལ་ཏེ་དེའི་ཚེ་མ་གྲུབ་ན་ངས་མཚམས་མེད་པ་ལྔ་བྱས་པར་འགྱུར་རོ། །སེང་གེ་སྒྲའི་སྒྲུབ་ཐབས་རྫོགས་སོ།། །།
[83b]
[83b.1]{T3419}༄༅༅། །རྒྱ་གར་སྐད་དུ། ཤྲཱི་སིཾ་ཧ་ནཱ་ད་སཱ་དྷ་ནཾ། བོད་སྐད་དུ། དཔལ་སེང་གེ་སྒྲའི་སྒྲུབ་ཐབས། དཔལ་ལྡན་སེང་གེ་སྒྲ་ལ་ཕྱག་འཚལ་ལོ། །ནད་ཀུན་འཇོམས་བྱེད་བླ་མ་སྟེ། །སེང་གེ་སྒྲ་ལ་ཕྱག་འཚལ་ལོ། །རྣལ་འབྱོར་བསྒོམས་པ་ཙམ་གྱིས་ནི། །སྡིག་པ་ཀུན་
[83b.2]ལས་གྲོལ་བར་འགྱུར། །དང་པོ་རེ་ཞིག་ཁ་བསང་བ་ལ་སོགས་པ་བྱས་ཏེ། གོས་གཙང་མ་གོན་ནས་ས་གཞི་གཙང་མར་སྟན་བདེ་བ་ལ་ཉེ་བར་འདུག་སྟེ། རང་གི་སྙིང་གར་ཟླ་བ་ལ་ཧྲཱིཿཡིག་བསྒོམ་པར་བྱའོ། །དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་གདན་དྲངས་ཏེ། མཆོད་
[83b.3]པ་བྱས་ནས་སྡིག་པ་བཤགས་པ་ལ་སོགས་པ་བྱའོ། །དེ་ནས་བྱམས་པ་དང་སྙིང་རྗེ་དང་། དགའ་བ་དང་། བཏང་སྙོམས་རྣམས་རྣམ་པར་བསྒོམས་ཏེ། རང་བཞིན་གྱིས་དག་པའི་སྔགས་བརྗོད་པ་སྔོན་དུ་འགྲོ་བས་སྟོང་པ་ཉིད་བསྒོམ་པར་བྱའོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་
[83b.4]ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་སོ། །དེ་ནས་རང་གི་ལུས་སྒྲ་བརྙན་དང་འདྲ་བར་བལྟས་ནས་རཾ་ཡིག་དམར་པོ་ཡོངས་སུ་གྱུར་པ་ལས་པདྨ་དམར་པོ་འདབ་མ་བརྒྱད་པའི་སྟེང་དུ་ཨཱ་ཡིག་ཡོངས་སུ་གྱུར་པ་ལས། སེང་གེ་དཀར་པོ། དེའི་སྟེང་དུ་ཧྲཱིཿཡིག་དེའི་འོད་ཟེར་གྱིས་
[83b.5]དེ་བཞིན་གཤེགས་པ་རྣམས་གདན་དྲངས་ཤིང་། བདག་ཉིད་ལ་བཅུག་ནས་འཇིག་རྟེན་དབང་ཕྱུག་སེང་གེ་སྒྲ་བསྒོམ་པར་བྱའོ། །སྐུ་མདོག་དཀར་པོ་སྤྱན་གསུམ་པ། རལ་པའི་ཅོད་པན་གྱིས་བརྒྱན་པ། སྟག་གི་པགས་པའི་ན་བཟའ་བསྣམས་པ། སེང་གེ་དང་ཟླ་བའི་གདན་ལ་རྒྱལ་པོ་
[83b.6]རོལ་པའི་སྟབས་ཀྱིས་བཞུགས་པ། ཟླ་བའི་འོད་ལྟ་བུ་བསྒོམ་པར་བྱའོ། །ཕྱག་གཡས་ན་སྦྲུལ་དཀར་པོས་དཀྲིས་པའི་རྩེ་གསུམ་དཀར་པོའོ། །ཕྱག་གཡོན་ན་པདྨ་ལངས་པའི་སྟེང་ན་རལ་གྲི་འབར་བའོ། །གཡོན་ན་མེ་ཏོག་དྲི་ཞིམ་པོ་སྣ་ཚོགས་པས་གང་བའི་པདྨའི་སྣོད་དོ། །རང་གི་ལུས་ལས་
[83b.7]དེ་བཞིན་གཤེགས་པ་ལྔ་འཕྲོ་བར་བལྟའོ། །དེ་ནས་རང་གི་སྙིང་གའི་ས་བོན་གྱིས་ཡེ་ཤེས་སེམས་དཔའ་བཀུག་ཅིང་བཅུག་ནས་དེ་བཞིན་གཤེགས་པ་རྣམས་འཕྲོ་ཞིང་བདག་ཉིད་ལ་དབང་བསྐུར་ནས། འོད་དཔག་ཏུ་མེད་པས་དབུ་བརྒྱན་ཅིང་། རྒྱས་བཏབ་པར་བསམ་པར་བྱའོ། །དེ་ནས་སྔགས་
[84a]
[84a.1]བཟླས་པར་བྱའོ། །ལྷ་རྣམས་ཀྱི་གཟུངས་ཀྱིས་སོ། །དེ་ལ་སྔགས་འདིའོ། །ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུཾ་ཕཊ་སྭཱ་ཧཱ། དེ་ནས་མཆོད་པའི་ཕྱིར་དྲི་བཟངས་ལ་སོགས་པའི་མཎྜལ་བྱས་ལ་མེ་ཏོག་ལ་སོགས་པ་དབུལ་ཞིང་མཆོད་པར་བྱའོ། །ཡང་ཕྲེང་བའི་སྔགས་བཟླས་པར་
[84a.2]བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏཱ་ཡ། མ་ཧཱ་སཏྭ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊི། ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊེ། ཀ་རོ་ཊཾ། བཱིདྱ་སྭཱ་ཧཱ། སྔགས་འདིས་མཎྜལ་གྱི་གཟུགས་བཟུང་ནས། ལན་ཉི་ཤུ་རྩ་གཅིག་བཟླས་ནས། ནད་པ་
[84a.3]ལ་བྱུགས་ན་འཚོ་བར་འགྱུར་རོ། །འཇིག་རྟེན་དབང་ཕྱུག་སེང་གེ་སྒྲའི་སྒྲུབ་ཐབས་རྫོགས་སོ། {T3420}༄༅༅། །རྒྱ་གར་སྐད་དུ། ཧཱ་ལ་ཧཱ་ལ་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་དབང་ཕྱུག་ཧཱ་ལ་ཧཱ་ལའི་སྒྲུབ་ཐབས། ཧཱ་ལ་ཧཱ་ལ་ལ་ཕྱག་འཚལ་ལོ། །སྔོན་མ་བཞིན་དུ་སྟོང་
[84a.4]པ་ཉིད་ཀྱི་མཐར་ཐུག་པ་བསྒོམས་ནས། ཧྲཱིཿཡིག་ས་བོན་ལས་སྐྱེས་པའི། །ཧཱ་ལ་ཧཱ་ལ་བརྩེ་ཆེན་པོ། །ཞལ་གསུམ་དེ་བཞིན་སྤྱན་གསུམ་པ། །རལ་པའི་ཅོད་པན་གྱིས་བརྒྱན་ཅིང་། །དང་པོའི་ཞལ་ནི་དཀར་པོ་སྟེ། །གཡས་པ་སྔོན་པོ་གཡོན་པ་དམར། །དབུ་ལ་ཟླ་བ་ཕྱེད་པས་བརྒྱན། །
[84a.5]ཐོད་པ་རྣམས་ཀྱིས་ཟུར་ཕུད་བྱས། །རལ་པའི་ནང་གནས་རྒྱལ་བ་དང་། །རྒྱན་རྣམས་ཀུན་གྱིས་ཡང་དག་བརྒྱན། །ཆུ་སྐྱེས་དཀར་པོའི་མདོག་དང་མཚུངས། །སྒེག་པའི་ཉམས་ཀྱིས་ཤིན་ཏུ་མཛེས། །ཕྱག་དྲུག་ཞལ་ནི་སྨ་ར་ཅན། །སྟག་གི་པགས་པའི་ན་བཟའ་དགྱེས། །ཕྱག་གཡས་
[84a.6]དང་པོ་མཆོག་སྦྱིན་དང་། །གཉིས་པ་ན་ནི་བགྲང་ཕྲེང་བསྣམས། །གསུམ་པ་མདའ་དང་གར་གྱི་སྟབས། །གཡོན་པ་ན་ནི་དེ་བཞིན་གཞུ། །གཉིས་པར་པདྨ་དཀར་པོ་དང་། །གསུམ་པ་དེ་བཞིན་རྒྱུ་མ་འཛིན། །བརླ་གཡོན་པའི་སྟེང་དུ་ལྷ་མོ་སྒེག་མོ་སྟེ། གཡོན་པ་ཆུ་སྐྱེས་བསྣམས་པ་
[84a.7]ཕྱག་གཡས་པས་བཅོམ་ལྡན་འདས་ལ་འཁྱུད་པ། གཞན་ན་མེ་ཏོག་གིས་མཛེས་པར་བྱས་པ། རལ་པའི་ཚོགས་དང་བཅས་པའོ། །གཡས་ལོགས་ན་སྦྲུལ་གྱིས་དཀྲིས་པའི་རྩེ་གསུམ། གཡོན་ལོགས་ན་པདྨ་ལ་གནས་པའི་མེ་ཏོག་དྲི་ཞིམ་པོ་སྣ་ཚོགས་པས་ཡོངས་སུ་གང་བའི་ཐོད་པའོ། །
[84b]
[84b.1]པདྨ་དམར་པོ་དང་ཟླ་བ་ལ་རོལ་པའི་སྟབས་ཀྱིས་བཞུགས་པའི་བཅོམ་ལྡན་འདས་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་བཛྲ་དྷརྨ་ཧྲཱིཿཞེས་སོ། །འཇིག་རྟེན་དབང་ཕྱུག་ཧཱ་ལ་ཧཱ་ལའི་སྒྲུབ་ཐབས་རྫོགས་སོ།། {T3421}༄༅༅། །རྒྱ་གར་སྐད་དུ། ཧཱ་ལ་ཧཱ་ལ་སཱ་དྷ་ནཾ། བོད་
[84b.2]སྐད་དུ། ཧཱ་ལ་ཧཱ་ལའི་སྒྲུབ་ཐབས། བཅོམ་ལྡན་འདས་ཧཱ་ལ་ཧཱ་ལ་ལ་ཕྱག་འཚལ་ལོ། །བསམ་པ་ཐམས་ཅད་ཡོངས་རྫོགས་པའི། །ཧཱ་ལ་ཧཱ་ལར་གུས་ཕྱག་འཚལ། །སྙིང་རྗེ་ཡི་ནི་བདག་ཉིད་ཅན། །དེ་ཡི་སྒྲུབ་ཐབས་མདོར་བསྡུས་བརྗོད། །དང་པོ་ཡིད་དུ་འོང་བའི་གནས་སུ་ཙནྡན་ལ་
[84b.3]སོགས་པས་ལེགས་པར་བྱུགས་ལ། རས་རིས་ལ་སོགས་པ་བཀྲམ་སྟེ། བཅོམ་ལྡན་འདས་ལ་མཆོད་པར་བྱའོ། །མེ་ཏོག་ལ་སོགས་པ་འབུལ་བའི་སྔགས་ནི། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཞེས་པ་ལ་སོགས་པས་སོ། །ཨོཾ་སརྦ་ཏ་ཐཱ་ག་ཏཱ་པཱུ་ཛ་མེ་གྷ་པྲ་ས་ར་
[84b.4]ས་མཱུ་ཧི་སྥ་ར་ཎ་ཧི་མཾ་ག་ག་ན་ཀཾ་ཧཱུཾ། མཆོད་པ་ཐམས་ཅད་དབུལ་བའི་སྔགས་སོ། །རབ་ཏུ་མཆོད་བྱ་དེ་ཡི་མདུན། །བདེ་བའི་སྟན་ལ་འདུག་བྱས་ནས། །འགྲོ་ལ་བྱམས་པ་རྣམ་པར་བསྒོམ། །སྙིང་རྗེ་དང་ནི་བརྩེ་ཆེན་པོ། །སྔགས་པས་སྙིང་གར་ཟླ་བའི་སྟེང་། །ཧྲཱིཿཡི་ཡི་གེ་དགོད་པར་བྱ། །
[84b.5]སངས་རྒྱས་སྲས་བཅས་གསལ་པོར་ནི། །ཀུན་ནས་ནམ་མཁའ་གང་བར་བསྒོམ། །ཧྲཱིཿཡིག་འོད་ཟེར་མཆོད་པས་ནི། །དེ་ལ་བསྐོར་ཞིང་རབ་ཏུ་མཆོད། །སྡིག་པ་བཤགས་པ་ལ་སོགས་བྱ། །བསོད་ནམས་འཕེལ་བར་བྱ་བའི་ཕྱིར། །དཀོན་མཆོག་གསུམ་མཆོག་སྐྱབས་འགྲོ་སོགས། །
[84b.6]སྔགས་འདི་དག་ནི་བརྗོད་པར་བྱ། །ཆོས་ཀུན་བདག་མེད་པ་ཡི་མཆོག །འོད་གསལ་སྙིང་རྗེ་དྲི་མ་མེད། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭབྷཱ་ཝ་ཤུདྡྷོ྅ཧཾ། ཞེས་པའི་སྔགས་དོན་མངོན་དུ་བྱ། །དངོས་པོ་ཀུན་དང་བདག་ཉིད་བཅས། །གཟུང་དང་འཛིན་ལས་ངེས་པར་གྲོལ། །ཡེ་ཤེས་ཆ་
[84b.7]ཙམ་བསྒོམ་པར་བྱ། །སོ་སོ་རང་རིག་དེ་བལྟས་ནས། །ཧྲཱིཿཡིག་ཟླ་བ་ལ་གནས་པ། །དེ་སྐྱེས་པདྨ་དཀར་པོ་བསམ། །ཧྲཱིཿཡིག་དང་བཅས་པ་པདྨ་ལས། །དེ་ལས་སངས་རྒྱས་ཚོགས་སྤྲོས་ཏེ། །འགྲོ་བ་རྣམས་ཀྱང་སངས་རྒྱས་བྱ། །སླར་ཡང་དེ་ལ་བཅུག་གྱུར་པས། །རང་བྱུང་ཧཱ་ལ་ཧཱ་ལ་
[85a]
[85a.1]སྟེ། །ཞལ་གསུམ་ཕྱག་དྲུག་ཞི་བའི་ཚུལ། །རིན་ཆེན་མི་གཡོའི་ཕུག་ན་བསྟེན། །པདྨ་དམར་དང་ཟླ་བ་ལ། །རོལ་པའི་སྟབས་ཀྱིས་ཡང་དག་བཞུགས། །དཀར་པོ་སེར་པོ་སྔོན་པོ་ཆེ། །རྩ་ཞལ་གཡོན་པ་ཅིག་ཤོས་སོ། །སྟག་གི་པགས་པའི་ན་བཟར་ལྡན། །
[85a.2]རྒྱན་རྣམས་ཀུན་གྱིས་ཤིན་ཏུ་མཛེས། །ཕྱག་གཡས་མཆོག་སྦྱིན་ཕྲེང་བ་མདའ། །གཡོན་པས་འདོད་ལྡན་ནུ་མ་འཛིན། །པདྨ་དཀར་དང་གཞུ་དག་ནི། །ཕྱག་གི་ཡལ་ག་དག་གིས་བསྣམས། །སྣ་ཚོགས་མེ་ཏོག་གིས་བཀང་བའི། །ཐོད་པ་གཡོན་པར་དགོད་པར་བྱ། །སྦྲུལ་གྱིས་དཀྲིས་པའི་
[85a.3]རྩེ་གསུམ་གཡས། །ཆུ་སྐྱེས་སྟེང་དུ་དེ་བཞིན་དགོད། །གཙུག་གི་ནོར་བུ་འོད་དཔག་མེད། །ཐོད་པ་རྣམས་ཀྱིས་ཟུར་ཕུད་བྱས། །རལ་པའི་ཚོགས་ཀྱི་ཅོད་པན་ཅན། །དབུ་ལ་ཟླ་བ་ཕྱེད་པས་བརྒྱན། །རྟོག་པའི་དྲ་བ་རྣམ་བཅོམ་པའི། །སངས་རྒྱས་རྣམས་ཀྱི་འོད་ཟེར་འཕྲོ། །འདི་ཡིས་ཧཱ་ལ་ཧཱ་
[85a.4]ལར་གྱུར། །རང་གི་སྙིང་མགྲིན་སྤྱི་བོར་ཡང་། །ཧཱུཾ་ཨཱཿཨོཾ་རྣམས་བསྒོམ་པར་བྱ། །ཟླ་བར་གནག་དམར་དཀར་པོའི་རིམ། །དེ་བཞིན་སྙིང་ག་མགྲིན་པའི་དབུས། །ཧྲཱིཿཡིག་ཟླ་བ་ལ་གནས་པ། །དེ་ནས་བརྟན་གཡོའི་དངོས་པོ་རྣམས། །དེ་ཡི་རྣམ་པར་བསྒོམ་པར་བྱ། །ལོག་པའི་རྣམ་རྟོག་ངེས་
[85a.5]སྤངས་ཤིང་། །སྔགས་བཟླས་ནས་ནི་མཉམ་པར་གཞག །ཨོཾ་ཧཱ་ལ་ཧཱ་ལ་ཧྲཱིཿནང་གི་བཟླས་པ་ཤིན་ཏུ་གསལ། །དལ་བ་མ་ཡིན་མྱུར་བ་མིན། །ཇི་ལྟར་བདེ་བར་གནས་པར་བྱ། །བསྡུས་ནས་སོ་སོའི་མཆོད་པ་དང་། །ཡང་དག་བསྟོད་ཅིང་བརྟན་བྱས་ལ། །ཡི་གེ་བརྒྱ་པ་བརྗོད་པར་བྱ། །ཨོཾ་
[85a.6]བཛྲ་སཏྭ་ས་མ་ཡ་མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། སུ་པོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷིམྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ། ཨོཾ་སེམས་
[85a.7]ཅན་ཀུན་གྱི་དོན་མཛད་ཁྱོད། །ཇི་ལྟར་རྗེས་འཇུག་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་བྱོན་པར་མཛད་དུ་གསོལ། །འདི་ཡིས་ཡང་དག་བསྐུལ་བྱས་ནས། །སྔགས་འདི་དག་ནི་བརྗོད་པར་བྱ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤ་ན་ན་ཏྭཱ་ཏ་མུཿཞེས་སོ། །
[85b]
[85b.1]རྣལ་འབྱོར་བདག་ཉིད་བསམ་གཏན་ལངས། །སྦྱིན་པ་རང་གིས་ཅི་གྲུབ་གཏང་། །མ་ལུས་རྟོག་པ་དང་བྲལ་བས། །གཟུགས་སོགས་འདོད་པ་སྤྱོད་བྱེད་པ། །བླ་མེད་བྱང་ཆུབ་ཐོབ་འགྱུར་ཏེ། །རིང་པོར་མི་ཐོགས་སྒྲུབ་པའི་མཆོག །སྒྲུབ་ཐབས་བྲིས་པས་གང་ཐོབ་པ། །བདག་གི་དགེ་བའི་
[85b.2]མཆོག་དེ་ཡིས། །འགྲོ་བ་རྣམས་ནི་མ་ལུས་པ། །མྱུར་དུ་ཧཱ་ལ་ཧཱ་ལར་ཤོག །ཧཱ་ལ་ཧཱ་ལའི་སྒྲུབ་ཐབས། སློབ་དཔོན་ལྷན་ཅིག་སྐྱེས་པའི་རོལ་པས་མཛད་པ་རྫོགས་སོ།། {T3422}༄༅༅། །རྒྱ་གར་སྐད་དུ། བཛྲ་དྷརྨ་སཱ་དྷ་ནཾ། བོད་སྐད་དུ། རྡོ་རྗེ་ཆོས་ཀྱི་སྒྲུབ་ཐབས། རྡོ་རྗེ་ཆོས་
[85b.3]ལ་ཕྱག་འཚལ་ལོ། །ཧྲཱིཿཡིག་ཡེ་ཤེས་རྫོགས་པ་ལས། །ཧཱ་ལ་ཧཱ་ལའི་སྐུ་ཆེན་པོ། །ཞལ་གསུམ་སྤྱན་ཡང་གསུམ་པ་སྟེ། །རལ་པའི་ཅོད་པན་གྱིས་བརྒྱན་ཅིང་། །ཟླ་བ་ཕྱེད་པ་འཛིན་པའི་ལྷ། །དབུ་ལ་ཐོད་པའི་ཕྲེང་བས་བརྒྱན། །རལ་པའི་ནང་ནས་རྒྱལ་བའི་སྐུ། །རྒྱན་རྣམས་ཀུན་གྱིས་
[85b.4]བརྒྱན་གྱུར་པ། །ཆུ་སྐྱེས་དཀར་པོ་དང་མཚུངས་ཤིང་། །སྒེག་པ་ལ་སོགས་ཉམས་དང་ལྡན། །ཕྱག་དྲུག་ཞལ་ནི་འཛུམ་པ་དང་། །སྟག་གི་པགས་པའི་ན་བཟར་བཅས། །ཕྱག་གཡས་ན་ནི་མཆོག་སྦྱིན་དང་། །གཉིས་པ་ན་ནི་བགྲང་ཕྲེང་དང་། །གསུམ་པ་མདའ་དང་གར་མཛད་དོ། །གཡོན་པ་
[85b.5]ན་ནི་པདྨས་བརྒྱན། །གཉིས་པ་དེ་བཞིན་ནུ་མ་འཛིན། །གསུམ་པ་ལ་ནི་དེ་བཞིན་གཞུ། །སྦྲུལ་གྱིས་ཡོངས་སུ་དཀྲིས་པ་ཡི། །རྩེ་གསུམ་གཡས་ཀྱི་ཕྱོགས་སུའོ། །མེ་ཏོག་དྲི་བཟངས་སྣ་ཚོགས་ཀྱིས། །གང་བའི་ཐོད་པ་གཡོན་ཕྱོགས་སུ། །པདྨ་དམར་པོའི་སྟེང་དུ་ནི། །རོལ་པའི་སྟབས་
[85b.6]ཀྱིས་ཡང་དག་བཞུགས། །རིན་ཆེན་རི་བོའི་ཕུག་མཐར་གནས། །རྣལ་འབྱོར་ཅན་གྱིས་བསྒོམ་པར་བྱ། །ཆོ་འཕྲུལ་རྣམ་པ་སྣ་ཚོགས་ཀྱིས། །སངས་རྒྱས་རང་བཞིན་སྐུ་སྤྲོས་ཏེ། །རྣམ་པར་མི་རྟོག་ཏིང་འཛིན་གྱིས། །ཟས་རྣམས་ཀུན་ལ་ལོངས་སྤྱོད་ཅིང་། །བསྒོམ་པའི་རིམ་པའི་སྦྱོར་བ་ཡིས། །
[85b.7]ནང་གི་གསང་སྔགས་བཟླས་པར་བྱ། །བླ་ན་མེད་པའི་བྱང་ཆུབ་ནི། །མྱུར་དུ་ཐོབ་ཅིང་བདེ་བར་འཇུག །ཧཱ་ལ་ཧཱ་ལ་ཡོངས་མཉེས་པས། །འདོད་པ་ཐམས་ཅད་རབ་ཏུ་འགྲུབ། །རྡོ་རྗེ་ཞེས་བྱའི་ཏིང་ངེ་འཛིན། །སྙིང་གར་ཧྲཱིཿཡིག་ཟླ་སྟེང་དགོད། །ཆོས་རྣམས་བདག་མེད་བསྒོམ་བྱས་ལ། །དེ་
[86a]
[86a.1]ལས་འོད་ཟེར་དམར་པོ་ནི། །ཡང་དག་འཕྲོ་བ་མཁའ་མཉམ་དེ། །འཇིག་རྟེན་དབང་ཕྱུག་རྣམ་པར་བལྟ། །བརྟན་དང་གཡོ་བའི་འགྲོ་བ་རྣམས། །ཡང་དག་བྱང་ཆུབ་སེམས་དཔའི་དོན། །བསྐྱེད་ཅིང་སྙིང་གར་རབ་ཏུ་ཞུགས། །དེ་ལ་ཧྲཱིཿཡིག་གཞན་འཇུག་པས། །སྐད་ཅིག་གིས་ནི་
[86a.2]ཡེ་ཤེས་སྦྱོར། །དེ་ལ་ཁ་དོག་དཀར་དང་དམར། །པདྨ་རཱ་གའི་རང་བཞིན་འོད། །སངས་རྒྱས་ལྔ་ཡི་ཅོད་པན་ཅན། །རབ་ཏུ་དགྱེས་པའི་སྤྱན་རྒྱས་པ། །ཕྱག་གཡོན་པདྨ་སྡོང་བུར་བཅས། །འདབ་མ་བཅུ་དྲུག་པ་དག་བསྣམས། །དེ་ལ་ཕྱག་གཡས་ཀྱིས་ཀྱང་ནི། །པདྨ་རྒྱས་པ་ཐུགས་ཀར་འཛིན། །
[86a.3]རྨ་བྱའི་སྟེང་དུ་ཟླ་བ་ཡི། །དཀྱིལ་འཁོར་དབུས་སུ་ཉེ་བར་བཞུགས། །སེམས་དཔའི་སྐྱིལ་ཀྲུང་ཀུན་ནས་འཁྱིལ། །སྒེག་པའི་ཉམས་དང་བཅས་ཤིང་བསྟེན། །ལས་ཆེན་མཆོད་རྟེན་ནང་གནས་པའི། །གཞལ་ཡས་ཁང་གི་སྤྱོད་ལམ་ཅན། །རྟག་ཏུ་རྡོ་རྗེའི་ཆོས་མཆོག་ནི། །བསྒོམ་བྱས་བྱང་ཆུབ་
[86a.4]ཐོབ་པར་འགྱུར། །བསྒོམས་པས་ངལ་ན་སྙིང་གར་ཟླ་བ་ལ་སྔགས་བཀོད་ལ་ཕྲེང་བའི་རྣམ་པ་བཞིན་དུ་མི་གཡོ་བའི་སེམས་ཀྱིས་བཟླས་པར་བྱའོ། །དེ་ལ་བཟླས་པའི་སྔགས་ནི་འདིའོ། །ཨོཾ་བཛྲ་དྷརྨ་ཧྲཱིཿཞེས་སོ། །རྡོ་རྗེ་ཆོས་ཀྱི་སྒྲུབ་ཐབས་ཆོ་ག་བསྡུས་པ་རྫོགས་སོ།། །།
[86a.5]{T3423}༄༅༅། །རྒྱ་གར་སྐད་དུ། པདྨ་ནརྟེ་ཤྭ་ར་སཱ་དྷ་ནཾ། བོད་སྐད་དུ། པདྨ་གར་གྱི་དབང་ཕྱུག་གི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་ག་འདིས་སྣ་ཚོགས་པདྨ་དང་ཟླ་བ་ལ་ཧྲཱིཿཡིག་དམར་པོ་ཡོངས་སུ་གྱུར་པ་ལས་པདྨ་གར་གྱི་དབང་ཕྱུག་ཏུ་
[86a.6]བདག་ཉིད་བསྒོམ་པར་བྱ་སྟེ། སེམས་དཔའི་སྐྱིལ་ཀྲུང་གིས་བཞུགས་པ། ཕྱག་གཉིས་པ། ཞལ་གཅིག་པ། སྐུ་མདོག་དམར་པོ་རྒྱན་ཐམས་ཅད་ཀྱིས་བརྒྱན་པ། འོད་དཔག་ཏུ་མེད་པའི་ཅོད་པན་ཅན། གཡོན་ཕྱོགས་སུ་གོས་དཀར་མོ་དང་སྙོམས་པར་ཞུགས་ཤིང་འཁྱུད་པའི་ཚུལ་གྱིས་
[86a.7]བཞུགས་པ། ཕྱག་གཡོན་ན་པདྨ་དམར་པོ་བསྣམས་པ། གཞན་ཕྱག་གཡས་པ་ན་གར་གྱི་ཚུལ་གྱིས་ཁབ་ཀྱི་ཕྱག་རྒྱས་པདྨ་ཁ་འབྱེད་པའོ། །དེ་ནས་ཨོཾ་ཀཱ་ཡ་བཱཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་སྔགས་བརྗོད་པར་བྱའོ། །དེའི་རྗེས་སུ་ཕྱོགས་མཚམས་བརྒྱད་དུ་ལྷ་མོ་བརྒྱད་བསམ་པར་བྱའོ། །
[86b]
[86b.1]དེ་ལ་པདྨ་དམར་པོ་འདབ་མ་བརྒྱད་པའི་ཤར་གྱི་འདབ་མ་ལ་རྣམ་པར་གཟིགས་མ་དཀར་མོ་པདྨ་དམར་པོ་བསྣམས་པའོ། །ལྷོའི་འདབ་མ་ལ་སྒྲོལ་མ་ལྗང་གུ་པདྨ་ལྗང་གུ་བསྣམས་པའོ། །ནུབ་ཀྱི་འདབ་མ་ལ་དབང་ཕྱུག་མ་སེར་མོ་འཁོར་ལོ་དང་པདྨ་བསྣམས་པའོ། །བྱང་གི་འདབ་མ་ལ་ཁྲོ་གཉེར་ཅན་
[86b.2]དཀར་མོ་པདྨ་སེར་པོ་བསྣམས་པའོ། །ཤར་གྱི་མཚམས་ཀྱི་འདབ་མ་ལ་པདྨའི་གནས་ཅན་སེར་མོ་བཙོད་ཀྱི་ཁ་དོག་ལྟ་བུའི་པདྨ་བསྣམས་པའོ། །ལྷོའི་མཚམས་ཀྱི་འདབ་མ་ལ་རྡོ་རྗེ་པདྨའི་དབང་ཕྱུག་མ་ནམ་མཁའི་མདོག་ལྟ་བུ་པདྨ་དཀར་པོ་བསྣམས་པའོ། །ནུབ་ཀྱི་མཚམས་ཀྱི་འདབ་མ་ལ་སྣ་
[86b.3]ཚོགས་པདྨ་དཀར་མོ་པདྨ་ནག་པོ་བསྣམས་པའོ། །བྱང་གི་མཚམས་ཀྱི་འདབ་མ་ལ་སྣ་ཚོགས་རྡོ་རྗེ་མ་ཁ་དོག་སྣ་ཚོགས་པདྨ་བསྣམས་པའོ། །དེ་རྣམས་ཐམས་ཅད་སེམས་དཔའི་སྐྱིལ་ཀྲུང་ཅན་ཕྱག་གཉིས་པ། ཞལ་གཅིག་པ་ཞི་བའོ། །ཟེའུ་འབྲུའི་དབུས་སུ་བཅོམ་ལྡན་འདས་ལྟ་བུའོ། །
[86b.4]དེ་ནས་སྔགས་བཟླས་པར་བྱའོ། །ཨོཾ་ཧྲཱིཿཔདྨ་ནརྟེ་ཤྭ་ར་ཧཱུཾ། འཇིག་རྟེན་མགོན་པོ་པདྨ་གར་གྱི་དབང་ཕྱུག་གི་སྒྲུབ་ཐབས་རྫོགས་སོ།། {T3424}༄༅༅། །རྒྱ་གར་སྐད་དུ། པདྨ་ནརྟེ་ཤྭ་ར་སཱ་དྷ་ནཾ། བོད་སྐད་དུ། པདྨ་གར་གྱི་དབང་ཕྱུག་གི་སྒྲུབ་ཐབས། པདྨ་གར་གྱི་དབང་
[86b.5]ཕྱུག་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་བསྒོམས་ཏེ། དེ་ནས་སྣ་ཚོགས་པདྨ་ལ་གནས་པའི་ཟླ་བའི་སྟེང་དུ་ཧྲཱིཿཡིག་དཀར་པོ་རྣམ་པར་བསྒོམས་ཏེ། དེ་ཡོངས་སུ་གྱུར་པ་ལས་པདྨ་གར་གྱི་དབང་ཕྱུག་གི་རིགས་རྗེ་བཙུན་འཕགས་པ་སྤྱན་རས་གཟིགས་དབང་ཕྱུག་གི་
[86b.6]བདག་ཉིད་བསྒོམ་པར་བྱ་སྟེ། ཞལ་གཅིག་ཕྱག་བཅོ་བརྒྱད་པ་སྐྱིལ་ཀྲུང་ཕྱེད་པས་བཞུགས་པ། འོད་དཔག་ཏུ་མེད་པ་དང་རལ་པའི་ཐོར་ཚུགས་ཀྱིས་བརྒྱན་པ། ཕྱག་ཐམས་ཅད་ཀྱིས་སྣ་ཚོགས་པདྨ་བསྣམས་པ་རྣལ་འབྱོར་མའི་ཚོགས་ཀྱིས་ཡོངས་སུ་བསྐོར་བའོ། །ལྷོ་དང་བྱང་ཕྱོགས་ལོགས་ན་
[86b.7]གནས་པའི་སྒྲོལ་མ་དང་། ནོར་བཟངས་དང་། ཁྲོ་གཉེར་ཅན་དང་། རྟ་མགྲིན་རྣམས་ཏེ། ལྷའི་རྒྱན་དང་གོས་ཀྱིས་བརྒྱན་པའོ། །དེ་ནས་སྔགས་བཟླས་པར་བྱ་སྟེ། ཨོཾ་ཧྲཱིཿཔདྨ་ནརྟེ་ཤྭ་ར་ཧཱུཾ། ནད་ལ་སོགས་པ་ཉེ་བར་ཞི་བའི་མཐུ་ཆེན་པོ་ཞེས་པ་ནི་པདྨ་གར་གྱི་དབང་ཕྱུག་གི་སྒྲུབ་ཐབས་རྫོགས་སོ།། །།
[87a]
[87a.1]༄༅༅། །{T3425}རྒྱ་གར་སྐད་དུ། ཧ་རི་ཧ་རི་ཧ་རི་བཱ་ཧ་ནོ་ད་བྷ་བཱ་སཱ་དྷ་ནཾ། བོད་སྐད་དུ། ཧ་རི་ཧ་རི་ཧ་རི་ལ་ཞོན་པར་གྱུར་པའི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་བསྒོམས་ནས། དེ་ནས་ཧྲཱིཿཡིག་དཀར་པོ་ཡོངས་
[87a.2]སུ་གྱུར་པ་ལས། ཧ་རི་ཧ་རི་ཧ་རི་ལ་ཞོན་པར་གྱུར་པའི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ཡན་ལག་ཐམས་ཅད་དཀར་པོ་རལ་པའི་ཅོད་པན་ཅན་ཞི་བའི་ཆ་ལུགས་ཅན། ཕྱག་གཡས་པ་ན་བཅོམ་ལྡན་འདས་དེ་བཞིན་གཤེགས་པ་དབང་པོར་མཛད་པ། གཉིས་པ་བགྲང་
[87a.3]ཕྲེང་བསྣམས་པ། གསུམ་པས་ངན་སོང་ན་གནས་པའི་འཇིག་རྟེན་པ་ལ་དགེ་བ་ཉེ་བར་སྟོན་པའོ། །གཡོན་པ་ན་དབྱུག་པ་བསྣམས་པའོ། །གཉིས་པ་ན་རི་དྭགས་ནག་པོའི་པགས་པ་བསྣམས་པ། གསུམ་པ་ན་རིལ་པ་སྤྱི་བླུགས་བསྣམས་པ། སེང་གེ་དང་། ནམ་མཁའ་ལྡིང་དང་།
[87a.4]ཁྱབ་འཇུག་གི་ཕྲག་པ་ལ་ཡང་དག་པར་བཞུགས་པའི་བདག་ཉིད་བསྒོམ་པར་བྱའོ། །ཨོཾ་ཧྲཱིཿཧཱུཾ་ཞེས་པའི་སྔགས་བཟླས་པར་བྱའོ། །ཧ་རི་ཧ་རི་ཧ་རི་ལ་ཞོན་པར་གྱུར་པའི་སྒྲུབ་ཐབས་རྫོགས་སོ། །{T3426}༄༅༅། །རྒྱ་གར་སྐད་དུ། ཧ་རི་ཧ་རི་ཧ་རི་བཱ་ཧ་ནོདྦྷ་བཱ་སཱ་དྷ་ནཾ། བོད་སྐད་དུ། ཧ་རི་ཧ་རི་
[87a.5]ཧ་རི་ལ་ཞོན་པར་གྱུར་པའི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་སྟན་བདེ་བ་ལ་འདུག་སྟེ། འགྲོ་བ་རྣམས་མངོན་པར་གདོན་པར་འདོད་པའི་བསམ་པས་སྡིག་པ་བཤགས་པ་ལ་སོགས་པ་བླ་ན་མེད་པའི་མཆོད་
[87a.6]པ་རྣམ་པ་བདུན་བྱས་ནས། ཡཾ་ཡིག་རྫོགས་པ་ལས་རླུང་གི་དཀྱིལ་འཁོར་གཞུའི་རྣམ་པ་ལྟ་བུ་ཁ་དོག་སྔོན་པོ་བ་དན་གྱིས་མཚན་པའོ། །དེའི་སྟེང་དུ་རཾ་ཡིག་ལས་གྱུར་པའི་མེའི་དཀྱིལ་འཁོར་ཟུར་གསུམ་པ་ཁ་དོག་དམར་པོ་རཾ་ཡིག་གིས་མཚན་པའོ། །དེའི་སྟེང་དུ་བཾ་ཡིག་རྫོགས་པ་ལས་ཆུའི་དཀྱིལ་
[87a.7]འཁོར་ཟླུམ་པོ་ཁ་དོག་དཀར་པོ་དབུས་སུ་བུམ་པ་དཀར་པོས་མཚན་པའོ། །དེའི་སྟེང་དུ་ལཾ་ཡིག་ལས་བྱུང་བའི་དབང་ཆེན་གྱི་དཀྱིལ་འཁོར་གྲུ་བཞི་པ་ཁ་དོག་སེར་པོ་ཟུར་བཞི་པོར་རྡོ་རྗེ་རྩེ་གསུམ་གྱིས་མཛེས་པར་བྱས་པའོ། །དེའི་སྟེང་དུ་སུཾ་ཡིག་ཡོངས་སུ་གྱུར་པ་ལས་རིན་པོ་ཆེ་སྣ་བདུན་གྱི་རང་བཞིན་
[87b]
[87b.1]ལྕོག་བརྒྱད་དང་ལྡན་པའི་རི་རབ་དང་སྣ་ཚོགས་ཆུ་སྐྱེས་སོ། །དེའི་སྟེང་དུ་བདག་ཉིད་བསམས་ཏེ། ཨོཾ་ཧྲཱིཿཧཱུཾ་རིམ་པ་བཞིན་དུ་སྤྱི་བོ་དང་། མགྲིན་པ་དང་། སྙིང་ག་རྣམས་སུ་རིམ་པར་བཀོད་ནས་བདག་གིས་ཐོག་མ་མེད་པའི་དུས་ནས་བསགས་པའི་ལས་ཀྱི་སྒྲིབ་པ་དང་བྲལ་ནས་ཧ་རི་ཧ་རི་ཧ་རི་
[87b.2]ལ་ཞོན་པར་གྱུར་པའི་འཇིག་རྟེན་དབང་ཕྱུག་གི་སྐུ་གསེར་གྱི་ཁ་དོག་ལྟ་བུ་འོད་ཟེར་འབར་བ་འཁྲིགས་པ་གཞོན་ནུའི་གཟུགས་སུ་སྔགས་པས་བསྒོམ་པར་བྱའོ། །ཕྱི་ནས་རང་གི་སྙིང་གར་བསོད་ནམས་དང་ཡེ་ཤེས་རྣམ་པར་དག་པའི་ཕྱིར་ཟླ་བའི་དཀྱིལ་འཁོར་དང་། ཉི་མའི་དཀྱིལ་འཁོར་
[87b.3]རོ། །དེ་ལ་ཧྲཱིཿཡིག་ལས་བྱུང་བའི་འོད་ཟེར་གྱི་དྲ་བས་ཡེ་ཤེས་སེམས་དཔའ་བཀུག་སྟེ་འཆད་པར་འགྱུར་བའི་སྐུ་ལ་སྔོན་དུ་གསུངས་པའི་མཆོད་པས་མཆོད་པར་བྱའོ། །ཡེ་ཤེས་སེམས་དཔའ་དང་དམ་ཚིག་སེམས་དཔའ་དག་གཅིག་ཏུ་གྱུར་ནས་བཅོམ་ལྡན་འདས་ཧ་རི་ཧ་རི་ཧ་རི་ལ་ཞོན་པར་
[87b.4]གྱུར་པའི་འཇིག་རྟེན་དབང་ཕྱུག་ཏུ་སེམས་བརྟན་པོས་བདག་ཉིད་བསྒོམ་པར་བྱས་ཏེ། ཕྱག་དྲུག་པ་སྐུ་མདོག་དཀར་པོ་རལ་པའི་ཅོད་པན་དང་ཞི་བའི་ཆ་ལུགས་ཅན། ཕྱག་གཡས་པས་རྫོགས་པའི་སངས་རྒྱས་དཔང་པོར་མཛད་པ། གཉིས་པ་ན་ཕྲེང་བ་བསྣམས་པ། གསུམ་པས་ངན་
[87b.5]སོང་ན་གནས་པའི་སེམས་ཅན་ལ་དགེ་བ་སྟོན་པར་མཛད་པ། གཡོན་པས་དབྱུག་པ་བསྣམས་པ། གཉིས་པས་རི་དྭགས་ནག་པོའི་པགས་པ་བསྣམས་པ། གསུམ་པ་ན་རིལ་བ་སྤྱི་བླུགས་བསྣམས་པའི་བཅོམ་ལྡན་འདས་བསྒོམ་པར་བྱའོ། །དེ་ལ་རྣམ་པར་དག་པ་ནི་རླུང་དང་མེའི་
[87b.6]དཀྱིལ་འཁོར་དག་ནི་སེང་གེའོ། །ཆུའི་དཀྱིལ་འཁོར་ནི་ནམ་མཁའ་ལྡིང་ངོ་། །དབང་ཆེན་གྱི་དཀྱིལ་འཁོར་དང་རི་རབ་ནི་འཕྲོག་བྱེད་རྣམ་པར་དག་པའོ། །རྟག་ཏུ་སྒོམ་པར་བྱེད་པའི་རྣལ་འབྱོར་པས་སེམས་ཅན་ཐམས་ཅད་གྱི་དོན་བྱེད་ནུས་པར་འགྱུར་རོ། །སྐྱེ་འགྲོ་ཐམས་ཅད་དགའ་བར་
[87b.7]འགྱུར་རོ། །ཤེས་རབ་ཆེན་པོར་འགྱུར་རོ། །ནད་མེད་པར་འགྱུར་རོ། །ཉེ་བར་འཚེ་བ་མེད་པར་འགྱུར་རོ། །ནོར་ལ་སོགས་པ་དང་ལྡན་པར་འགྱུར་རོ། །དབང་དུ་བྱེད་པ་དང་དུག་གི་ལས་ལ་ནུས་པ་ཆེན་པོ་དང་ལྡན་པར་འགྱུར་རོ། །སྔགས་བཟླས་པ་ནི་བླ་མའི་གདམས་ངག་ལས་ཤེས་པར་བྱའོ། །
[88a]
[88a.1]ཧ་རི་ཧ་རི་ཧ་རི་ལ་ཞོན་པར་གྱུར་པའི་འཇིག་རྟེན་དབང་ཕྱུག་གི་སྒྲུབ་ཐབས་རྫོགས་པའི་སངས་རྒྱས་ཀྱིས་གསུངས་པ་རྫོགས་སོ།། {T3427}༄༅༅། །རྒྱ་གར་སྐད་དུ། ཏྲཻ་ལོ་ཀྱ་བ་ཤཾ་ཀ་ར་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་གསུམ་པོ་དབང་དུ་བྱེད་པའི་འཇིག་རྟེན་དབང་
[88a.2]ཕྱུག་གི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དང་པོ་རེ་ཞིག་ཡིད་དང་མཐུན་པའི་གནས་སུ་རས་རིས་བཀྲམ་སྟེ། དེའི་མདུན་དུ་དབང་ཆེན་གྱི་དཀྱིལ་འཁོར་གྱི་དབུས་སུ་གུར་གུམ་གྱིས་ཟླ་བའི་དཀྱིལ་འཁོར་བྱ་སྟེ། ཨོཾ་བཛྲ་རེ་ཁེ་ཧཱུཾ་ཞེས་པའི་སྔགས་འདིས་
[88a.3]སོ། དེ་ནས་ཛཿཧཱུཾ་བཾ་པདྨ་སྠ་ཧོཿཞེས་པའི་སྔགས་ཀྱིས་མཎྜལ་གྱི་དབུས་སུ་འཇིག་རྟེན་གསུམ་པོ་དབང་དུ་བྱེད་པའི་རྗེ་བཙུན་བཞུགས་ནས་སྔགས་འདིས་མཆོད་པར་བྱའོ། །ཨོཾ་ཏྲཻ་ལོ་ཀྱ་བ་ཤཾ་ཀ་རཱ་ཡ་བཛྲ་པུཥྤེ་ཧཱུཾ་པྲ་ཏཱིཙྪ་སྭཱ་ཧཱ། དེ་ནས་ཨོཾ་མུ་ནི་བཛྲེ་མུཿཞེས་པས་གཤེགས་སུ་གསོལ། །རང་གི་སྙིང་
[88a.4]གར་ཨཾ་ཡིག་དམར་པོ་རྣམ་པར་བསམས་ཏེ། དེ་ཡོངས་སུ་གྱུར་པ་ལས་ཉི་མའི་སྟེང་དུ་ཧྲཱིཿཡིག་དམར་པོ་དེའི་འོད་ཟེར་གྱིས་དེ་བཞིན་གཤེགས་པ་འོད་དཔག་ཏུ་མེད་པ་གདན་དྲངས་ལ་ཡང་དག་པར་མཆོད་ནས་སྡིག་པ་བཤགས་པ་ལ་སོགས་པ་བྱས་ནས། ཡང་འཇིག་རྟེན་གསུམ་པོ་དབང་
[88a.5]དུ་བྱེད་པའི་འོད་ཟེར་གྱི་རྣམ་པས་རང་གི་ས་བོན་ལ་རབ་ཏུ་ཞུགས་ཏེ། དེ་ཡོངས་སུ་གྱུར་པ་ལས་སྐད་ཅིག་གིས་འཇིག་རྟེན་དབང་ཕྱུག་ཡན་ལག་ཐམས་ཅད་ཆགས་པ་ཆེན་པོས་དམར་ཞིང་ཞལ་གཅིག་ཕྱག་གཉིས་པ། སྤྱན་གསུམ་པ། རལ་པའི་ཅོད་པན་གྱིས་བརྒྱན་པ། རྡོ་རྗེས་མཚན་
[88a.6]པའི་ཞགས་པ་དང་། ལྕགས་ཀྱུ་ཕྱག་ན་བསྣམས་པ། པདྨ་དམར་པོ་ལ་རྡོ་རྗེ་སྐྱིལ་ཀྲུང་གིས་བཞུགས་པ། མཛེས་པའི་རྒྱན་དང་གོས་རྣམས་ཀྱིས་བརྒྱན་པའི་བདག་ཉིད་རྣམ་པར་བསམས་ཏེ། ས་གསུམ་པོ་ལུག་གཉིས་ལ་གནས་པ་རྡོ་རྗེ་ཞགས་པའི་སྟེང་ན་བཞུགས་པ། སྣ་ཚོགས་པའི་
[88a.7]སྤྲུལ་པ་འཛིན་ཅིང་སངས་རྒྱས་དང་བྱང་ཆུབ་སེམས་དཔའ་དང་རྡོ་རྗེ་རྣལ་འབྱོར་མ་དང་ལྷ་ལ་སོགས་པ་རྣམས་ཀྱིས་དབང་བསྐུར་བར་བསྒོམ་ཞིང་སྤྱི་བོར་འོད་དཔག་ཏུ་མེད་པ་བསམ་པར་བྱའོ། །དེ་ནས་སྙིང་གར་ཉི་མ་ལ་ཧྲཱིཾ་ཧཱུཾ་ཡཾ་ཞེས་པའི་ཡི་གེ་གསུམ་གྱི་སྔགས་བཟླས་ཤིང་བསྒོམས་ནས། ཨོཾ་ཤཱུ་ནྱ་ཏཱ་
[88b]
[88b.1]ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་བཛྲ་ཨཱཏྨ་ཀོ་ཀཱཿསརྦ་དྷརྨཱ་བཛྲ་ཨཱཏྨ་ཀོ྅ཧཾ་ཞེས་པའི་རྡོ་རྗེའི་བདག་ཉིད་ཀྱི་སྔགས་གཉིས་པོ་བརྗོད་པར་བྱའོ། །དེ་བཞིན་དུ་གོམས་པས་འདར་བ་དང་གཡོ་བ་ལ་སོགས་པའི་ཡོན་ཏན་སྐྱེ་བར་འགྱུར་རོ། །དེ་ནས་ཨོཾ་ཧྲཱིཿཨ་ཧཱུཾ་ཧཱ་རི་ཏི་ཡཀྵེ་ཤྭ་རཱི་སྭཱ་ཧཱ། ཞེས་པས་ཆང་
[88b.2]བུ་སྦྱིན་པར་བྱའོ། །ཨོཾ་ཨཱཾ་ཀྲོཾ་ཧྲཱི་ས་ཀ་ལ་ག་ན་བཱི་རེ་ཤྭ་རཱི་ཎཱཾ་པ་རི་ཀ་རཻ། ཨ་ཨ་ཨ་བ་ཏ་ར། ཨ་བ་ཏ་རན་ཏུ་ད་ཤ་དི་ཀ་ལོ་ཀ་པཱ་ལ་ཨི་མཾ་བ་ལིཾ་གྲྀཧྞ་གྲྀཧྞ་ཧཱུཾ་སྭཱ་ཧཱ། ཞེས་པས་གཏོར་མ་དབུལ་ཞིང་ལྷའི་རྣལ་འབྱོར་གྱིས་གནས་པར་བྱའོ། །ཨོཾ་ཌི་ཡཱ་ན་རིམ་པའི་འཇིག་རྟེན་གསུམ་པོ་དབང་དུ་བྱེད་པའི་འཇིག་
[88b.3]རྟེན་དབང་ཕྱུག་གི་སྒྲུབ་ཐབས་ས་ར་ཧའི་ཞབས་ཀྱིས་མཛད་པ་རྫོགས་སོ།། {T3428}༄༅༅། །རྒྱ་གར་སྐད་དུ། ཏྲཻ་ལོ་ཀྱ་བ་ཤཾ་ཀ་ར་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་གསུམ་པོ་དབང་དུ་བྱེད་པའི་འཇིག་རྟེན་དབང་ཕྱུག་གི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་
[88b.4]ཕྱག་འཚལ་ལོ། །དང་པོ་རེ་ཞིག་རྣལ་འབྱོར་པས་ཡིད་དང་མཐུན་པའི་གནས་སུ་བྲིས་པའི་སྐུ་ལ་སོགས་པ་བཀྲམ་སྟེ། དེའི་མདུན་དུ་དབང་ཆེན་གྱི་དཀྱིལ་འཁོར་གྱི་དབུས་སུ་གུར་གུམ་གྱིས་ཟླ་བའི་དཀྱིལ་འཁོར་བྱ་སྟེ། སྔགས་འདིས་སོ། །ཨོཾ་བཛྲ་རེ་ཁེ་ཧཱུཾ། ཛཿཧཱུཾ་བཾ་པདྨ་སྠ་ཧོཿསྔགས་འདིས་
[88b.5]བཞུགས་སུ་གསོལ་ནས་མཎྜལ་གྱི་དབུས་སུ་འཇིག་རྟེན་གསུམ་པོ་དབང་དུ་བྱེད་པའི་རྗེ་བཙུན་འཇིག་རྟེན་དབང་ཕྱུག་སྔགས་འདིས་མཆོད་པར་བྱའོ། །ཨོཾ་ཏྲཻ་ལོ་ཀྱ་བ་ཤཾ་ཀ་རཱ་ཡ་བཛྲ་པུཥྤེ་ཧཱུཾ་པྲ་ཏཱིཙྪ་སྭཱ་ཧཱ། ཨོཾ་མུ་ནི་བཛྲ་མུཿསྔགས་འདིས་གཤེགས་སུ་གསོལ་ལོ། །ཕྱི་ནས་རང་གི་སྙིང་གར་ཨཱཾ་
[88b.6]ཡིག་བསམ་པར་བྱའོ། །དེ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་བསྐྱེད་ལ། དེའི་སྟེང་དུ་ནུས་པའི་ས་བོན་ཧྲཱིཿདམར་པོ་སྐྱ་རེང་གསར་པའི་མདོག་ལྟ་བུར་བལྟས་ལ། དེའི་འོད་ཟེར་གྱིས་འོད་དཔག་ཏུ་མེད་པ་ནམ་མཁར་སྤྱན་དྲངས་ནས་མཆོད་ནས་སྡིག་པ་བཤགས་པ་ལ་སོགས་པ་བྱས་ཏེ།
[88b.7]ཡང་རང་གི་ལུས་ལ་གཞུག་གོ །དེ་རྣམས་ཐམས་ཅད་ཡོངས་སུ་གྱུར་པ་ལས་སྐད་ཅིག་གིས་པདྨའི་སྟེང་དུ་རྡོ་རྗེ་སྐྱིལ་ཀྲུང་གིས་བཞུགས་པ། སྤྱན་གསུམ་རྒྱས་ཤིང་རལ་པའི་ཅོད་པན་འཆང་བ། སྐུ་མདོག་དམར་པོ་རྡོ་རྗེས་མཚན་པའི་ཞགས་པ་དང་། ལྕགས་ཀྱུ་ཕྱག་ན་བསྣམས་པ། ས་གསུམ་པོ་
[89a]
[89a.1]ལུག་གཉིས་ཞགས་པས་བཅིངས་པའི་སྟེང་ན་བཞུགས་ཤིང་སྣ་ཚོགས་པའི་སྤྲུལ་པ་འཆང་བ། རྣལ་འབྱོར་མའི་ཚོགས་ཀྱིས་དབང་བསྐུར་བར་རབ་ཏུ་སྦྱིན་པ། དེ་བཞིན་དུ་བྱང་ཆུབ་སེམས་དཔའ་རྒྱན་སྣ་ཚོགས་དང་ལྡན་པས་མཆོད་པ་བྱེད་པ་རིག་འཛིན་དང་། ཁྱབ་འཇུག་
[89a.2]དང་། བདེ་བྱེད་དང་། ཚངས་པ་དང་། སྣ་ཚོགས་པའི་རྣལ་འབྱོར་མའི་ཚོགས་ཀྱིས་གར་དང་རོལ་མོ་ལ་སོགས་པ་སྣ་ཚོགས་བྱེད་ཅིང་། འབྱུང་པོ་ལ་སོགས་པ་སྣ་ཚོགས་པས་མི་མགོ་དང་ཐོད་པའི་ཕྲེང་བས་བརྒྱན་པ་དང་། དེ་བཞིན་དུ་སྣ་ཚོགས་པའི་གདུགས་དང་རྔ་ཡབ་ལ་སོགས་པ་བལྟ་
[89a.3]བར་བྱའོ། །དེ་ལྟ་བུའི་དུས་སུ་དེ་བཞིན་གཤེགས་པ་འོད་དཔག་ཏུ་མེད་པ་སྤྱི་བོར་བལྟ་བར་བྱའོ། །དེ་དང་འདྲ་བར་བདག་ཉིད་བསམ་པར་བྱའོ། །ཕྱི་ནས་ལྟེ་བའི་སྟེང་དུ་ཉི་མའི་དཀྱིལ་འཁོར་ལ་འོད་ཟེར་གྱི་རང་བཞིན་བསམས་ལ། དེའི་སྟེང་དུ་གཡོན་ཕྱོགས་སུ་ནུས་པའི་ས་བོན་སྙིང་གར་ཁྲོ་བོའི་ས་བོན་
[89a.4]ཨཱཿཡིག་དབྱངས་ཡིག་གིས་བརྒྱན་པ་ཞེས་པ་ནི་བསྒོམ་པའི་སྔགས་སོ། །དེ་ཐམས་ཅད་བསམས་ལ་རྡོ་རྗེའི་བདག་ཉིད་ཀྱི་སྔགས་བརྗོད་པར་བྱ་ཞིང་རྡོ་རྗེའི་བདག་ཉིད་དུ་བསམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རྡོ་རྗེའི་བདག་ཉིད་ཀྱི་སྔགས་སོ། །འདི་ལ་གོམས་པའི་སྦྱོར་
[89a.5]བས་འདར་བ་དང་གཡོ་བ་དབབ་པར་བྱས་ནས་གཉིས་སུ་མེད་པའི་ཡེ་ཤེས་སྐྱེ་བར་འགྱུར་རོ། །དེ་ལྟ་བུའི་རྣལ་འབྱོར་པ་དེ་གླང་པོ་ཆེ་སྨྱོན་པ་མྱོས་བྱེད་ཀྱི་ཆུས་མྱོས་པ་བཞིན་དུ་རིགས་ལྔ་ལ་ལོངས་སྤྱོད་དོ། །གལ་ཏེ་རིགས་ལྔ་ལ་ལོངས་མི་སྤྱོད་ན་དེའི་ཚེ་དེའི་ལུས་འདར་བ་དང་གཡོ་བ་དང་འབབ་པ་
[89a.6]ལ་སོགས་པས་མི་གནས་སོ། །དེ་ལྟར་ངེས་པས་རིགས་ལྔ་ལ་ལོངས་སྤྱོད་པར་བྱའོ། །དེས་འགྲུབ་པར་འགྱུར་རོ། །གྲུབ་པར་གྱུར་ན་གཞན་གྱི་ལུས་ལ་ཡང་འདར་བ་དང་གཡོ་བ་དབབ་པར་བྱས་པས་འདོད་ཆགས་དང་ཞེ་སྡང་ལ་སོགས་པ་འགག་པར་འགྱུར་རོ། །ཇི་ལྟར་གྲུབ་པའི་དངུལ་
[89a.7]ཆུས་ཕུག་པས་ཟངས་མའི་ནག་པོ་སྤངས་པ་དེ་བཞིན་དུ་ལུས་པོ་ཉིད་ཀྱང་གཉིས་སུ་མེད་པའི་རོས་ཕུག་ནས་འདོད་ཆགས་དང་ཞེ་སྡང་ལ་སོགས་པ་སྤོང་བར་འགྱུར་རོ། །ཧྲཱི་ཧཱུཾ་ཡཱཾ་བཟླས་པའི་སྔགས་སོ། །ཨོཾ་ཧྲཱིཿཨཱཿཧཱ་རཱི་ཏི་ཡཀྵེ་ཤྭ་རི་སྭཱ་ཧཱ། འཕྲོག་མའི་སྔགས་སོ། །ཨོཾ་ཨཱ་ཀྲོཾ་ཧྲཱི་ས་ཀ་ལ་གཱ་ནཱ་བཱི་
[89b]
[89b.1]རཱ་བཱི་རེ་ཤྭ་རཱི་ཎཱཾ་པ་རི་ཀ་རཻཿཨ་ཨ་ཨ་བ་ཏ་ར། ཨ་བ་ཏ་ར་ཨ་བ་ཏ་རན་ཏུ་ད་ཤ་དི་ཀ་ལོ་ཀ་པཱ་ལ་ཨི་དཾ་བ་ལིཾ་གྲྀཧྞ་གྲྀཧྞ་ཧཱུཾ་སྭཱ་ཧཱ། གཏོར་མའི་སྔགས་སོ། །ཨོ་ཌི་ཡཱ་ན་ནས་བྱུང་ཞིང་ས་ར་ཧའི་ཞབས་ཀྱིས་གདན་དྲངས་པ་འཇིག་རྟེན་གསུམ་དབང་དུ་བྱེད་པའི་འཇིག་རྟེན་དབང་ཕྱུག་གི་སྒྲུབ་ཐབས་རྫོགས་སོ།། །།
[89b.2]{T3429}༄༅༅། །རྒྱ་གར་སྐད་དུ། རཀྟ་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་དབང་ཕྱུག་དམར་པོའི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཨོཾ་ཙི་ཊི་ཙི་ན་ཊི། བི་ཀློ་ལི་བི་ཀློ་ལི། ཨ་མུ་ཀཾ་སཱ་དྷ་ན་པཱ་རི་བཱ་རམྨེ་བ་ཤ་མཱ་ན་ཡ་སྭཱ་ཧཱ། སྔོན་དུ་བསྙེན་པ་ཁྲི་
[89b.3]བཟླས་ནས་ཕྱི་ནས་སྒྲུབ་པ་བརྩམ་པར་བྱའོ། །གཡས་ཕྱོགས་དང་གཡོན་ཕྱོགས་ལོགས་སུ་སྒྲོལ་མ་དང་ཁྲོ་གཉེར་ཅན་ཏེ་ལྷ་མོ་གཉིས་བཞད་པའོ། །རྗེ་བཙུན་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་དམར་པོ་ཕྲེང་བ་དང་ན་བཟའ་དམར་པོས་བརྒྱན་ཅིང་ཕྱག་བཞི་ན་ཞགས་པ་དང་།
[89b.4]ལྕགས་ཀྱུ་དང་། གཞུ་དང་། མདའ་བསྣམས་པ་སྒེག་པའི་ཉམས་དང་རོ་གཅིག་པའོ། །མེ་ཏོག་དམར་པོས་བརྒྱན་པའི་མྱ་ངན་མེད་པའི་ཤིང་གི་འོག་ཏུ་འདུག་ནས་བདག་ཉིད་ཐུན་མཚམས་གསུམ་དུ་བསྒོམ་པར་བྱ་ཞིང་ཚྭ་ཡིས་ཡན་ལག་བྱུགས་པའི་སྦྱིན་སྲེག་བརྒྱ་རྩ་བརྒྱད་བྱའོ། །ཉི་མ་
[89b.5]བདུན་གྱིས་བུད་མེད་དམ་སྐྱེས་པ་དབང་དུ་འགྱུར་རོ། །ཉི་མ་བདུན་པ་གསུམ་གྱིས་སྐྱེས་བུ་ཆེན་པོར་འགྱུར་རོ། །ཚྭ་དང་ལྷན་ཅིག་ཆང་གིས་ཐུམ་པོ་བྱས་ནས་བསྒྲུབ་པར་བྱ་སྟེ། གཟུགས་བརྙན་སོར་བཞིའི་ཚད་ཙམ་བྱས་ནས་སེང་ལྡེང་གི་མེ་དུ་བ་མེད་པ་ལ་ཐུན་མཚམས་གསུམ་དུ་བསྲོ་ཞིང་སྔགས་
[89b.6]བཟླས་པས་མིང་གང་ཡིན་པ་དེ་དབང་དུ་འགྱུར་རོ། །རྡོ་རྗེའི་ཆུའི་རང་བཞིན་དང་ཚྭ་ལ་ལན་བརྒྱ་རྩ་བརྒྱད་ཡོངས་སུ་བཟླས་ནས་གང་ལ་བྱིན་པ་དེ་ཟོས་པ་ཙམ་གྱིས་དབང་དུ་འགྱུར་རོ། །འཇིག་རྟེན་དབང་ཕྱུག་དམར་པོའི་སྒྲུབ་ཐབས་རྫོགས་སོ།། {T3430}༄༅༅། །རྒྱ་གར་སྐད་དུ། ལོ་ཀེ་ཤྭ་ར་སྱ་བ་ཤྱཱ་
[89b.7]དྷི་ཀ་ར་བི་དྷིཿ། བོད་སྐད་དུ། འཇིག་རྟེན་དབང་ཕྱུག་གིས་ལྷག་པར་དབང་དུ་བྱ་བའི་ཆོ་ག །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་དེ་བཞིན་དུ་སྟོང་པ་ཉིད་དུ་བྱས་ནས། ཧྲཱིཿཡིག་དམར་པོ་ལས་སྐྱེས་པའི་པདྨ་དམར་པོ་དེའི་དབུས་སུ་ཨཱཿཡིག་
[90a]
[90a.1]ཡོངས་སུ་གྱུར་པ་ལས་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་དམར་པོ་རལ་པའི་ཅོད་པན་ཅན། འོད་དཔག་ཏུ་མེད་པ་རལ་པའི་ནང་དུ་བཞུགས་པ། ཕྱག་གཡོན་ན་པདྨ་དམར་པོ་བསྣམས་པ་ཕྱག་གཡས་པས་གསལ་བར་མཛད་པ། སྣ་ཚོགས་པའི་རྒྱན་དང་གོས་
[90a.2]ཀྱིས་བརྒྱན་པའི་བདག་ཉིད་དུ་བསྐྱེད་ལ། རང་གི་སྙིང་གར་ཧྲཱིཿཡིག་ལས་སྐྱེས་པའི་པདྨ་དམར་པོ་འདབ་མ་ལ་དབྱངས་ཡིག་བཅུ་དྲུག་གིས་ཡོངས་སུ་བསྐོར་བའི་གཟུགས་དཀར་པོ་འཁོར་བར་བསམ་པར་བྱའོ། །དེ་ནས་བསྒྲུབ་བྱའི་སྙིང་གར་ཡང་སྔོན་མ་བཞིན་དུ་པདྨ་བསམ་ཞིང་རང་གི་སྙིང་གར་གནས་
[90a.3]པའི་པདྨ་ལས་རང་གི་རྡོ་རྗེའི་ལམ་ནས་འཁོར་ཞིང་ཞུགས་ཏེ། ཨོཾ་བྷྲ་མ་རཱཿསཱ་ཎྱ་ཧྲི་དི་པདྨ་མྲི་ཏ་མཱ་ཀཱཪྵ་ཛཿཞེས་པས་བསྒྲུབ་བྱའི་རྡོ་རྗེ་ལ་ཞུགས་ཏེ། དེའི་པདྨ་ལ་གནས་པའི་བདུད་རྩི་འཁོར་ཞིང་བཀུག་ནས་དེ་ལ་སླར་ཡང་དེའི་རྡོ་རྗེ་ལས་འཐོན་ཏེ། རང་གི་རྡོ་རྗེའི་ལམ་ལ་དེ་བཞིན་དུ་ཞུགས་ནས་སེམས་ཀྱི་བདུད་
[90a.4]རྩིས་སྦྲང་གི་ཐིག་ལེ་འབྱུང་ཞིང་དེ་ལ་བལྟ་བར་བྱའོ། །སྔགས་ནི་ཨོཾ་ཧཱུཾ། ཇི་སྲིད་རྒྱུན་མ་ཆད་པར་དེ་སྲིད་དུ་ཉི་མ་བདུན་བསྒོམས་པས་བསྒྲུབ་བྱ་རྐང་པ་དག་གི་རྩར་ལྷུང་བར་འགྱུར་རོ། །འཇིག་རྟེན་དབང་ཕྱུག་གིས་ལྷག་པར་དབང་དུ་བྱ་བའི་ཆོ་ག་རྫོགས་སོ།། {T3431}༄༅༅། །རྒྱ་གར་སྐད་དུ། ནི་ལ་ཀཎྛ་
[90a.5]ཨཱརྱཱ་བ་ལོ་ཀི་ཏེ་ཤྭ་ར་སཱ་དྷ་ནཾ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་མགྲིན་པ་སྔོན་པོ་ཅན་གྱི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དང་པོ་རེ་ཞིག་སྒྲུབ་པ་པོས་སྔ་བར་ལངས་ཏེ། སྟན་བདེ་བ་ལ་སེམས་དཔའི་སྐྱིལ་མོ་ཀྲུང་གིས་ཉེ་བར་འདུག་སྟེ།
[90a.6]རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿཡིག་སེར་པོ་རྣམ་པར་བསྒོམ་པར་བྱའོ། །དེའི་འོད་ཟེར་གྱི་ཚོགས་ཀྱིས་བསྒོམ་པར་བྱ་བའི་བཅོམ་ལྡན་འདས་གདན་དྲངས་ཏེ། དེ་ནས་ལྷ་རྣམས་བསྐྱེད་ཅིང་སྤྲོས་ནས། མེ་ཏོག་ལ་སོགས་པ་རྣམས་ཀྱིས་
[90a.7]ཡང་དག་པར་མཆོད་ནས། དེའི་མདུན་དུ་སྡིག་པ་བཤགས་པ་ལ་སོགས་པ་བྱས་ཏེ། བྱམས་པ་ལ་སོགས་པ་ཚངས་པའི་གནས་བཞི་བསྒོམ་པར་བྱའོ། །དེ་ནས་ཕྱི་དང་ནང་དུ་བཅས་པའི་དངོས་པོ་རྣམས་སྟོང་པའི་རང་བཞིན་དུ་རྣམ་པར་བསྒོམས་ནས། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་
[90b]
[90b.1]པའི་སྔགས་བརྗོད་པར་བྱའོ། །དེ་ནས་ནམ་མཁའི་ཕྱོགས་སུ་དབྱངས་ཡིག་དང་པོ་ལས་ཟླ་བའི་དཀྱིལ་འཁོར་དེའི་སྟེང་དུ་ཧྲཱིཿཡིག་སེར་པོའོ། །དེས་དེ་བཞིན་དུ་པདྨ་དམར་པོ་དེ་ལས་སྐྱེས་པར་བྱིན་གྱིས་བརླབས་ནས། དེ་ཡོངས་སུ་གྱུར་པ་ལས་བཅོམ་ལྡན་འདས་སྐུ་མདོག་སེར་པོ་ཟླ་བ་ཕྱེད་པ་དང་རལ་
[90b.2]པའི་ཅོད་པན་གྱིས་དབུ་ལ་བརྒྱན་པ། འོད་དཔག་ཏུ་མེད་པས་སྤྱི་བོའི་ཕྱོགས་སུ་ཉེ་བར་མཚོན་པ། པདྨ་དམར་པོའི་སྟེང་དུ་རི་དྭགས་ནག་པོའི་པགས་པ་ལ་རྡོ་རྗེ་སྐྱིལ་ཀྲུང་གིས་བཞུགས་པ། ཏིང་ངེ་འཛིན་གྱི་ཕྱག་རྒྱའི་སྟེང་དུ་རིན་པོ་ཆེ་སྣ་ཚོགས་པས་ཡོངས་སུ་གང་བའི་ཐོད་པ་བསྣམས་པ། ཨེ་ན་
[90b.3]ཡའི་པགས་པས་མཆོད་ཕྱིར་ཐོགས་བྱས་པ། སྟག་གི་པགས་པའི་ན་བཟའ་བསྣམས་པ། རྒྱན་མེད་པ་མགྲིན་པ་སྔོན་པོ་ཕྲེང་བ་སྔོན་པོས་ཁྱད་དུ་འཕགས་པ། མགུལ་བའི་གཞོགས་གཉིས་སུ་ཕན་ཚུན་དུ་ནོར་བུ་དང་བཅས་པའི་སྦྲུལ་དག་གི་མཇུག་མ་མངོན་པར་བཅིངས་ཤིང་ཁྱད་པར་དུ་འཕགས་
[90b.4]པའི་བཅོམ་ལྡན་འདས་སྤྱན་རས་གཟིགས་ལ་གཞན་སྦྲུལ་ནག་པོ་གཉིས་སྟེང་དུ་ཁ་ཕྱོགས་པས་ཉེ་བར་མཚོན་པའི་བདག་ཉིད་དུ་བསྒོམ་པར་བྱའོ། །དེ་ནས་སྔགས་བཟླས་པར་བྱའོ། །ཨོཾ་སྥ་ལིཾ་གཱཊྚ་ཧཱ་སཀྵཿཞེས་སོ། །འདི་ནི་བསམ་གྱིས་མི་ཁྱབ་པའི་རྗེས་སུ་འབྲངས་པའི་འཕགས་པ་སྤྱན་རས་གཟིགས་
[90b.5]དབང་ཕྱུག་མགྲིན་པ་སྔོན་པོ་ཅན་གྱི་སྒྲུབ་ཐབས་རྫོགས་སོ།། {T3432}༄༅༅། །རྒྱ་གར་སྐད་དུ། མཱ་ཡཱ་ཛཱ་ལ་ཀྲ་མ་ཨཱརྱ་ཨ་བ་ལོ་ཀི་ཏེ་ཤྭ་ར་སཱ་དྷ་ནཾ། བོད་སྐད་དུ། སྒྱུ་འཕྲུལ་དྲ་བའི་རིམ་པའི་འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་
[90b.6]ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་སྟོང་པ་ཉིད་དུ་བསྒོམས་ནས་ནམ་མཁར་རཾ་ཡིག་ལས་བྱུང་བའི་ཉི་མ། དེའི་སྟེང་དུ་ཧཱུཾ་ཡིག་ལས་བྱུང་བའི་སྣ་ཚོགས་རྡོ་རྗེ། དེ་ཡོངས་སུ་གྱུར་པ་ལས་རྡོ་རྗེའི་ར་བ་དང་། རྡོ་རྗེའི་གུར་བསྒོམ་པར་བྱའོ། །དེའི་དབུས་སུ་མི་བཟད་པའི་དུར་
[90b.7]ཁྲོད་དོ། །ཡང་དེའི་དབུས་སུ་པདྨ་དམར་པོ་འདབ་མ་བརྒྱད་པའོ། །ཡང་དེའི་དབུས་སུ་ཧཱུཾ་ཡིག་སྔོན་པོ་ལས་བྱུང་བའི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་ནག་པོ་ཉི་མའི་དཀྱིལ་འཁོར་ལ་གཡོན་བརྐྱང་གིས་བཞུགས་པ། ཞལ་ལྔ་པ། སྤྱན་གསུམ་པ།
[91a]
[91a.1]ཕྱག་བཅུ་གཉིས་པའོ། །དཀར་པོ་དང་དམར་པོ་ནི་གཡས་ཀྱི་ཞལ་གཉིས་སོ། །དེ་བཞིན་དུ་སེར་པོ་དང་ལྗང་གུ་དག་ནི་གཡོན་གྱི་ཞལ་གཉིས་སོ། །གཡས་ཀྱི་ཕྱག་རྣམས་ཀྱིས་ཌ་མ་རུ་དང་། ཁ་ཊྭཱཾ་ག་དང་། ལྕགས་ཀྱུ་དང་། ཞགས་པ་དང་། རྡོ་རྗེ་དང་། མདའ་རྣམས་བསྣམས་
[91a.2]པ། གཡོན་གྱི་ཕྱག་རྣམས་ཀྱིས་སྡིགས་མཛུབ་དང་། ཐོད་པ་དང་། པདྨ་དམར་པོ་དང་། ནོར་བུ་དང་། འཁོར་ལོ་དང་། གཞུ་རྣམས་བསྣམས་པ། ཞལ་ཐམས་ཅད་མཆེ་བ་གཙིགས་པ། ཕྱག་རྒྱ་དྲུག་དང་ལྡན་པ། །མགོ་བོ་རློན་པའི་ཕྲེང་བས་སྐུ་ལ་བརྒྱན་པ། གཅེར་བུ་ཡན་ལག་ཐམས་ཅད་མཛེས་
[91a.3]པའི་བདག་ཉིད་དུ་སྐད་ཅིག་གིས་བརྟགས་ལ། སྙིང་གར་ཟླ་བའི་དབུས་སུ་ཧྲཱིཿཡིག་ལ་བསྐོར་བའི་ཨོཾ་ཨཱཿཧཱུཾ། ཨི་ཏི་མུ་ནི་བ་ར་བཛྲ་ཧྲཱིཿཧཱུཾ་ཛཿཞེས་པའི་སྔགས་ཀྱིས་ཕྲེང་བའི་རྣམ་པར་བཟླས་པར་བྱའོ། །འབུམ་བཟླས་ན་མཚམས་མེད་པ་ལྔ་བྱས་པས་ཀྱང་འགྲུབ་པར་འགྱུར་རོ། །སྒྱུ་འཕྲུལ་དྲ་
[91a.4]བའི་རིམ་པའི་འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་ཐབས་སོ།། །།{T3433}༄༅༅། །ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ་བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཙ་ལ་ཙ་ལ། ཙི་ལི་ཙི་ལི། ཙུ་ལུ་ཙུ་ལུ། ཧུ་ལུ་ཧུ་ལུ། མུ་ལུ་མུ་ལུ། ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ། པདྨ་ཧསྟེ་སྭཱ་ཧཱ།
[91a.5]ཉི་མ་རེ་རེ་ཞིང་ལན་ལྔར་ཐུན་མཚམས་གསུམ་དུ་བཟླས་པར་བྱའོ། །བོང་བུ་ཡིན་ཡང་གཞུང་སུམ་བརྒྱ་འཛིན་པར་འགྱུར་རོ། །པདྨའི་ཕྱག་གི་གཟུངས་སོ། །{T3434}༄༅༅། །ན་མ་ཨཱརྱཱ་ཨ་བ་ལོ་ཀི་ཏེ་ཤྭ་རཱ་ཡ་བ་དྷི་སཏྭཱ་ཡ་མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་དྷ་ར་ཎི་དྷ་རེ་དྷ་ར་དྷ་རེ་བྷ་དྲེ་སུ་བྷ་དྲེ་སྭཱ་ཧཱ། ཟླ་བ་
[91a.6]གཟས་བཟུང་བའི་དུས་སམ་ཡང་ན་ཉི་མ་གཟས་བཟུང་བའི་ཚེ་བའི་རྣམ་ལྔས་ཁྲུས་བྱས་ཏེ་བརྒྱ་རྩ་བརྒྱད་བཟླས་ནས་སྲན་མ་ཥ་ཁར་བཅུག་ནས་ཇི་སྲིད་མ་གྲོལ་གྱི་བར་དེ་སྲིད་དུ་བཟླས་པར་བྱའོ། །འཇིག་རྟེན་མགོན་པོའི་བྲིས་སྐུ་མདུན་དུ་བྱས་ནས་མར་གྱི་མར་མེ་རབ་ཏུ་སྤར་ཏེ། ཙནྡན་དང་ས་ལ་
[91a.7]མ་ལྷུང་བའི་བའི་ལྕི་བས་མཎྜལ་བྱས་ནས་སྤྱོད་ལམ་གཙང་མ་དང་བཅས་པས་སྒྲུབ་པ་པོ་བྱང་ཕྱོགས་ཀྱི་སྒོར་གནས་ནས་རང་གི་ཟླ་བ་དང་ཉི་མ་ལ་བལྟ་བར་མི་བྱའོ། །སྔོན་དུ་བསྙེན་པ་ཁྲི་བཟླས་ནས། །ཚངས་པར་སྤྱོད་པས་བསྒྲུབ་པར་བྱ། །མ་ཐོས་པ་ཡི་བསྟན་བཅོས་ཀྱང་། །རིག་ཅིང་ལོངས་སྤྱོད་ནུས་
[91b]
[91b.1]པར་འགྱུར། །ཐོས་པ་རྣམས་ནི་མི་བརྗེད་ཅིང་། །གཟུངས་འཛིན་སྟོབས་དང་ལྡན་པར་འགྱུར། །གང་གིས་སྤྱི་བོར་ཕྱེ་མ་ཡིས། །རབ་ཏུ་བྱིན་གྱུར་རྐང་པ་དང་། །ཐམས་ཅད་དེ་ཡི་དབང་དུ་འགྱུར། །ཇི་སྲིད་ཉི་མ་ཟླ་བའི་བར། །མཁའ་འགྲོ་མ་དང་གཟའ་དང་ནི། །དགྲ་དང་ནད་རྣམས་སྐྱེ་མི་འགྱུར། །བྱུགས་
[91b.2]པས་ནད་རྣམས་ཐམས་ཅད་ཀྱང་། །རྟག་ཏུ་རབ་ཏུ་ཞི་བར་འགྱུར། །ཧྲཱིཿཡིག་རྐན་ལས་བྱུང་བ་ཡི། །འཇིག་རྟེན་མགོན་པོ་རྣམ་པར་བསྒོམ། །ཕྱག་གཉིས་གཡས་པ་མཆོག་སྦྱིན་དང་། །གཡོན་པ་པད་བསྣམས་སྐུ་མདོག་དཀར། །རལ་པའི་ནང་གནས་འོད་དཔག་མེད། །སྣ་ཚོགས་ཆུ་སྐྱེས་ཟླ་བ་ལ། །
[91b.3]མགོན་པོ་རྡོ་རྗེ་སྐྱིལ་ཀྲུང་བཞུགས། །མཁས་པས་ཆོ་ག་བཞིན་དུ་བསྒོམ། །ཉེ་བར་སྤྱོད་པ་དང་བཅས་པ་སྲན་མ་མ་ཥའི་ཞལ་གྱི་གཟུངས་རྫོགས་སོ།། {T3435}༄༅༅། །རྒྱ་གར་སྐད་དུ། ཨ་མོ་གྷ་པཱ་ཤ་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་དབང་ཕྱུག་དོན་ཡོད་ཞགས་པའི་སྒྲུབ་ཐབས། བཅོམ་
[91b.4]ལྡན་འདས་དོན་ཡོད་ཞགས་པ་ལ་ཕྱག་འཚལ་ལོ། །འཇིག་རྟེན་དབང་ཕྱུག་ཞི་ཞིང་དཀར། །ཡོན་ཏན་རྒྱ་མཚོ་དོན་ཡོད་གྲུབ། །ཕྱག་འཚལ་ནས་ནི་སྒྲུབ་པའི་ཐབས། །བདག་ཉིད་རྟོགས་ཕྱིར་ཅུང་ཟད་བྲི། །དེ་ལ་དང་པོར་རེ་ཞིག་སྔགས་པས་ཞི་ཞིང་སྙིང་རྗེ་གཅིག་པུའི་སེམས་ཀྱིས་སྡུག་བསྔལ་
[91b.5]མཐའ་དག་གི་ཆུ་སྲིན་གྱི་གནས་སུ་ལྟུང་བའི་འགྲོ་བ་རྣམས་ལ་ངེས་པར་བལྟས་ཏེ། དེ་རྣམས་བཏོན་ནས་བདེ་བའི་གནས་ལ་དགོད་ཅིང་བདག་གིས་དོན་ཡོད་པའི་འབྲས་བུས་བསྐྱབ་པར་བྱའོ་ཞེས་ངེས་པ་བརྟན་པོས་རི་བྲག་ལ་སོགས་པ་ཆུ་དང་མེ་ཏོག་དང་འབྲས་བུས་བརྒྱན་པའི་ཕྱོགས་སུ་སྟན་གཙང་མ་
[91b.6]ལ་སོགས་པ་ལ་འདུག་ནས། ཨོཾ་ཙ་ར་ཙ་ར། ཙི་རི་ཙི་རི། ཙུ་རུ་ཙུ་རུ། མ་ར་མ་ར། མི་རི་མི་རི། མུ་རུ་མུ་རུ། མ་ཧཱ་ཀཱ་རུ་ཎི་ཀ་སརྦ་བི་གྷྣཱན་ཧཱུཾ་ཕཊ། ཅེས་པ་འདིས་བསང་གཏོར་བྱའོ། །ཨོཾ་ཛ་ཡ་ཛ་ཡ་སྭཱ་ཧཱ། ཨོཾ་ཛ་ཡ་བི་ཛ་ཡ་སྭཱ་ཧཱ་ཞེས་པས་ལུས་དང་ངག་དང་ཡིད་ཀྱི་གནས་ལ་བགེགས་བསལ་བར་བྱའོ། །
[91b.7]ཨོཾ་ཨ་ཙ་ལ་བཱི་རཱ་ཡ་སྭཱ་ཧཱ་ཞེས་བརྗོད་ནས་ཙནྡན་ལ་སོགས་པའི་དྲི་བཟངས་ཀྱིས་མཎྜལ་བྱས་ནས། རང་གི་སྙིང་གར་ཟླ་བའི་གཟུགས་བརྙན་ལ་ཧྲཱིཿཡིག་དཀར་པོ་བལྟ་བར་བྱའོ། །དེའི་འོད་ཟེར་གྱིས་གདན་དྲང་བར་བྱ་སྟེ། ཨོཾ་བ་ར་པྲ་དྷཱ་ཡ་སྭཱ་ཧཱ། ཞེས་པས་དཔལ་ལྡན་པོ་ཊ་ལ་ཀེའི་རི་བོ་ལས་བསྐུལ་ནས། །
[92a]
[92a.1]ཨོཾ་ས་ར་ས་ར་ཧུ་ལུ་ཧུ་ལུ་བྷ་ག་བཱན་དྷ་ར་དྷ་ར་ས་མ་ཡ་མ་ནུ་སྨ་ར་ཧཱུཾ་ཧཱཿསྭཱ་ཧཱ། ཞེས་པའི་ཚིག་འདིས་ཕྱག་ལ་སོགས་པ་འཆང་བར་འགྱུར་བའི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་ཨོཾ་ཧྲཱིཿཧཱཿཧཱུཾ་སྭཱ་ཧཱ། ཞེས་པས་མཆོད་ཡོན་ཕུལ་ནས་མེ་ཏོག་ལ་སོགས་པ་
[92a.2]ཡིད་ཀྱི་རང་བཞིན་གྱི་མཆོད་པའི་ཁྱད་པར་གྱིས་ཡང་དག་པར་མཆོད་པར་བྱས་ཏེ། ཨོཾ་ཌ་ཌ་ཧཱུཾ་ཧ་པུཥྤཾ་སྭཱ་ཧཱ། ཨོཾ་དྷུ་ན་དྷུ་ན་མ་ཐ་མ་ཐ་ཧ་ཧ་ཧཱུཾ་དྷཱུ་པཾ་སྭཱ་ཧཱ། ཨོཾ་རཾ་དཱིརྒྷ་ཧྲཱིཿདཱིརྒྷ་ཧྲཱི་ཧཱུཾ་དཱི་པཾ་སྭཱ་ཧཱ། ཨོཾ་ཀ་ར་ཀ་ར། ཀུ་རུ་ཀུ་རུ། ཧེ་ཧེ་གན་དྷཾ་སྭཱ་ཧཱ། ཨོཾ་བ་ར་བ་ར་དཱ་ཡ་ཀེ་ཧེ་ཧྲཱི། ཧཱུཾ་ནཻ་བི་དྱཾ་སྭཱ་ཧཱ། ཞེས་པའི་སྔགས་ཀྱིས་ཡང་དག་པར་མཆོད་
[92a.3]ཅིང་ཕྱག་འཚལ་ནས་སྡིག་པ་བཤགས་པ་ལ་སོགས་པ་བྱའོ། །དེ་ནས་བྱམས་པ་ལ་སོགས་པ་བསྒོམས་ནས་བརྟན་པ་དང་གཡོ་བའི་འགྲོ་བ་མཐའ་དག་གི་གནས་ཀྱི་དོན་དང་། སྐྱེ་བ་དང་བདག་གི་ལུས་ཀྱང་རང་གི་ས་བོན་གྱི་འོད་ཟེར་གྱིས་ཁྱབ་པར་བྱས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་བ་ཨཱཏྨ་ཀོ྅ཧཾ་ཞེས་
[92a.4]པས་རང་གི་སེམས་བྱིན་གྱིས་བརླབ་པར་བྱའོ། །ཨོཾ་བི་མ་ལ་ཨུ་ད་ཡ་ཧཱུཾ་མཚོའོ། །ཨོཾ་རཏྣ་ཨ་ཙ་ལ་ཧཱུཾ་བསྐྱེད་པ་སྟེ་རིན་པོ་ཆེའི་རིའི་སྟེང་དུའོ། །ཨོཾ་ཀ་མ་ལ་བེ་སྭཱ་ཧཱ་ཞེས་པས་པདྨ་ལེགས་པར་སྦྱར་ནས་ཨོཾ་ཨ་མི་ཏོཏྦྷ་བཱ་ཡ་སྭཱ་ཧཱ་ཞེས་པ་འདིས་བྱང་ཆུབ་ཀྱི་སེམས་ཞུ་བར་གྱུར་ནས། དེའི་སྙིང་པོ་ལ་ཨཱ་ལི་དང་ཀཱ་
[92a.5]ལི་ལ་སོགས་པའི་རང་བཞིན་ཟླ་བ་དང་ཉི་མ་ཡང་དག་པར་སྦྱར་བ་ལ་ཧྲཱིཿཡིག་དཀར་པོ་ལས་ཡང་དག་པར་བསྐྱེད་པའི་འདམ་སྐྱེས། དེའི་ས་བོན་གྱི་འོད་ཟེར་གྱི་ཚོགས་ཀྱིས་བྱིན་གྱིས་བརླབས་ནས་ཟེའུ་འབྲུའོ། །དེ་ཐམས་ཅད་གཅིག་ཏུ་གྱུར་པ་ལས་ཡེ་ཤེས་ལྔའི་རིམ་པས་བཅོམ་ལྡན་འདས་འཕགས་
[92a.6]པ་སྤྱན་རས་གཟིགས་དབང་ཕྱུག་དོན་ཡོད་ཞགས་པ་སྟོན་ཀའི་སྤྲིན་གྱི་མདོག་ལྟ་བུ་དཀར་པོ་རལ་པའི་ཅོད་པན་དང་འོད་དཔག་ཏུ་མེད་པས་དབུ་བརྒྱན་པ། མཆོད་ཕྱིར་ཐོགས་དཀར་པོས་བརྒྱན་པ་ཞི་བའི་ཚུལ་ཅན་ཞི་བའི་རྒྱན་དང་ལྡན་པ་ཞལ་གཅིག་པ། ཕྱག་བཅུ་གཉིས་པ་འོད་ཟེར་འབར་བ། དེ་ལ་ཕྱག་
[92a.7]གཡས་ཀྱི་དང་པོ་མཆོག་སྦྱིན། གཉིས་པ་སངས་རྒྱས་ལ་ཕྱག་འཚལ་བའི་ཚུལ་དང་མཛོད་འདྲེན་པ། གསུམ་པ་ན་ནོར་བུའི་ཕྲེང་བ་དཀར་པོའོ། །བཞི་པ་ན་མདའ། ལྔ་པ་ན་མེའི་དཀྱིལ་འཁོར། དྲུག་པ་ན་རིན་པོ་ཆེ་སྣ་ཚོགས་པའི་འཁྲི་ཤིང་ངོ་། །ཕྱག་གཡོན་གྱི་དང་པོ་ན་པདྨ་དམར་པོ། གཉིས་པ་ནི་རི་རབ།
[92b]
[92b.1]གསུམ་པ་ན་དབྱུ་གུ་རྩེ་གསུམ། བཞི་པ་ན་གཞུ། ལྔ་པ་ན་གསེར་གྱི་རིལ་བ་སྤྱི་བླུགས། དྲུག་པ་ན་དོན་ཡོད་པའི་འབྲས་བུ་བཅིངས་པའི་ཞགས་པ་བསྣམས་པ། རིན་པོ་ཆེའི་རིའི་ཕུག་ན་སྣ་ཚོགས་པའི་པདྨ་དང་། ཟླ་བ་ལ་མཉམ་པའི་ཞབས་ཀྱིས་བཞུགས་པའི་བདག་ཉིད་མངོན་པར་སྤྲུལ་
[92b.2]པའོ། །ཡང་ན་ཕྱག་བཅུ་པའོ། །དེ་ལ་ཕྱག་གཡས་པ་ན་མཆོག་སྦྱིན་དང་། རྩེ་གསུམ་དང་། ནོར་བུའི་ཕྲེང་བ་དང་། མདའ་དང་། ལྕགས་ཀྱུའོ། །གཡོན་ན་པདྨ་དམར་པོ་དང་། རི་རབ་དང་། གསེར་གྱི་རིལ་བ་སྤྱི་བླུགས་དང་། ཞགས་པ་དང་། གཞུ་རྣམས་བསྣམས་པའོ། །ཡང་ན་ཕྱག་དྲུག་པའོ། །
[92b.3]གཡས་ན་མཆོག་སྦྱིན་དང་རྩེ་གསུམ་དང་། ནོར་བུའི་ཕྲེང་བའོ། །གཡོན་ན་པདྨ་དམར་པོ་དང་། ཞགས་པ་དང་། རིལ་བ་སྤྱི་བླུགས་བསྣམས་པའོ། །ཡང་ན་ཕྱག་བཞི་པ་བསྒོམ་པར་འདོད་ན་གཡས་པ་མཆོག་སྦྱིན་དང་། ཞགས་པའོ། །གཡོན་ན་པདྨ་དམར་པོ་དང་དབྱུ་གུ་རྩེ་གསུམ་བསྣམས་པའི་
[92b.4]བཅོམ་ལྡན་འདས་དོན་ཡོད་པའི་ཞགས་པའོ། །ཇི་ལྟར་ཕྱག་བཅུ་གཉིས་པ་བསྒོམས་པ་དེ་བཞིན་དུ་ཕྱག་བཅུ་པ་དང་། དེ་བཞིན་དུ་དྲུག་པ་དང་། དེ་བཞིན་དུ་ཕྱག་བཞི་པའོ། །བཞི་པོ་རྣམས་ཀྱི་འཁོར་དང་བཅས་པའོ། །དེ་ལ་མདུན་དུ་པདྨ་དང་ཟླ་བ་ལ་ཧ་ཡིག་དམར་པོ་ལས་ལྕགས་ཀྱུ་དེ་ཡོངས་
[92b.5]སུ་གྱུར་པ་ལས་དོན་ཡོད་ལྕགས་ཀྱུ་ཞེས་པ་སྐྱ་རེངས་གསར་པའི་མདོག་ལྟ་བུ་རལ་པའི་ཅོད་པན་དང་ལྡན་པ། རྒྱན་དམར་པོ་ཅན། རྒྱ་ནག་གི་གོས་ཀྱིས་བླ་གོས་སུ་བྱས་པ་ཕྱག་བཞི་པ་སྟེ། གཡས་པ་དག་ན་ལྕགས་ཀྱུ་དང་རྡོ་རྗེའོ། །གཡོན་པ་དག་ན་ཞགས་པ་དང་། པདྨ་བསྣམས་པའོ། །
[92b.6]གཡས་ཕྱོགས་ན་པདྨ་དང་ཉི་མ་ལ་བཙོད་ཀྱི་ཁ་དོག་ལྟ་བུའི་ཧཱུཾ་ཡིག་ལས་སྐྱེས་ཤིང་པདྨས་མཚན་པའི་དབྱུག་པ་དཀར་པོ་ལས་སྐྱེས་པའི་རྟ་མགྲིན་བསྐལ་བའི་མེ་དང་ཉི་མ་འབར་བ་ལྟ་བུའོ། །སྨ་ར་དམར་སེར་འབར་ཞིང་འཁྱིལ་པ། སྨིན་མ་འཁྱོག་ཅིང་ཁྲོ་གཉེར་བསྡུས་ཤིང་འབར་བ་ཞལ་
[92b.7]འཇིགས་ཤིང་ཧཱུཾ་ཞེས་སྒྲོགས་པ་སྤྱན་གསུམ་འབར་བའི་སྐྲ་ཅན། ཧི་ཧིའི་སྒྲ་སྒྲོགས་པ་དབུའི་སྟེང་དུ་རྟ་མགོ་ལྗང་གུའི་ཞལ་བྱས་པ། སྐུ་ལ་སྦྲུལ་གྱི་རྒྱན་གྱིས་བརྒྱན་པ། ཐུང་ཞིང་གསུས་པ་ཆེ་བ། ཕྱག་བཞི་དབྱིག་པས་བརྒྱན་པ། གཡས་པ་དག་ན་དབྱུག་པ་འཕྱར་བ་དང་རྡོ་རྗེ་བསྣམས་པ།
[93a]
[93a.1]གཡོན་པ་དག་ན་སྡིགས་མཛུབ་དང་། པདྨ་བསྣམས་པ། སྟག་གི་པགས་པའི་ཤམ་ཐབས་ཅན་ནོ། །རྒྱབ་ཏུ་ཆུ་སྐྱེས་ལ་ཧ་ཡིག་སྔོན་པོ། །དེ་ལས་རལ་གྲི། དེ་ལས་སྐྱེས་པའི་ལྷ་མོ་རལ་པ་གཅིག་མ། རལ་པ་དམར་སེར་གཅིག་ཏུ་འཁྱིལ་པ། ཁྲོ་
[93a.2]མོའི་རྣམ་པ་ཅན། གླང་པོ་ཆེའི་པགས་པའི་སྟོད་གཡོགས་ཅན། སྟག་གི་པགས་པའི་ཤམ་ཐབས་ཅན། སྦྲུལ་གྱི་རྒྱན་གྱིས་སྐུ་ལ་བརྒྱན་པ། སྤྱན་གསུམ་པ། ཛམྦུ་ནཱ་དའི་དཔལ་འཛིན་ཅིང་ཕྱག་བཞི་པ། གཡས་པ་དག་ན་རལ་གྲི་དང་། གྲི་གུག་དང་། གཡོན་པ་
[93a.3]དག་ན་ཨུཏྤ་ལ་དང་། ཐོད་པ་བསྣམས་པའོ། །གཡོན་ཕྱོགས་ན་ཆུ་སྐྱེས་དང་ཟླ་བའི་སྟེང་དུ་ཊ་ཡིག་སེར་པོ་ལས་ཆུ་སྐྱེས། དེ་ཡོངས་སུ་གྱུར་པ་ལས་ཁྲོ་གཉེར་ཅན་རལ་པའི་ཐོར་ཚུགས་ཅན་གཞོན་ནུ་དར་ལ་བབ་པ་མཛེས་ཤིང་སྐུ་མདོག་སེར་མོ། དར་དཀར་པོའི་ན་བཟའ་སྐུ་ལ་
[93a.4]གསོལ་བ། ལྷའི་རྒྱན་གྱིས་བརྒྱན་པ། ཕྱག་གཡས་པ་དག་ན་པདྨ་དང་ཕྲེང་བ་བསྣམས་པ། གཡོན་པ་དག་ན་དབྱུ་གུ་དང་རིལ་བ་སྤྱི་བླུགས་བསྣམས་པ་བསམ་པར་བྱའོ། །དེ་ནས་སྙིང་གར་ཟླ་བ་དང་། པདྨའི་ས་བོན་ལས་འོད་ཟེར་གྱི་དྲ་བ་འཕྲོས་པས། སངས་རྒྱས་དང་
[93a.5]བྱང་ཆུབ་སེམས་དཔའི་ཚོགས་གདན་དྲངས་ཏེ། མཆོད་པ་ལ་སོགས་པ་སྔོན་དུ་འགྲོ་བས་ཕྱག་རྒྱ་དང་སྔགས་ཀྱིས་གཞུག་པ་དང་བཅིང་བས་ཡང་དག་པར་མཉེས་ཤིང་ལུས་ལ་སོགས་པ་བྱིན་གྱིས་བརླབས་ནས། འོད་དཔག་ཏུ་མེད་པ་ལ་སོགས་པའི་དེ་བཞིན་གཤེགས་པ་རྣམས་
[93a.6]ཀྱིས་དབང་བསྐུར་བར་བལྟ་བར་བྱའོ། །དབང་བསྐུར་བ་ནི་ཞེས་པ་ལ་སོགས་པས་དེས་སྤྲོས་ནས་གོས་དཀར་མོ་ལ་སོགས་པ་རིག་མའི་ཚོགས་རྣམས་ཀྱིས་ཡལ་ག་དང་བཅས་པའི་བུམ་པ་འཛིན་པས་དབང་བསྐུར་བའི་ཚིགས་སུ་བཅད་པ་བརྗོད་ཅིང་དབང་བསྐུར་བར་བསྒོམ་པར་
[93a.7]བྱ་ཞིང་རྒྱལ་བ་འོད་དཔག་ཏུ་མེད་པས་དབུ་བརྒྱན་པར་བསམ་པར་བྱའོ། །བདུད་རྩིས་མཆོད་ཅིང་རོ་མྱང་བར་བྱའོ། །སྙིང་གའི་ཟླ་བའི་འོད་ཟེར་གྱི་སྒོ་ནས་འཐོན་ཏེ་སྣ་ཚོགས་པའི་སྐུ་གཟུགས་འཕྲོས་ནས་འགྲོ་བ་རྣམས་ཀྱི་བསམ་པ་ཇི་ལྟ་བའི་མངོན་པར་འདོད་པའི་འབྲས་བུ་རྫོགས་
[93b]
[93b.1]པར་བྱས་ནས། ཆོ་ག་འདིས་སྔགས་བཟླས་པར་བྱའོ། །སྙིང་གའི་ས་བོན་གྱི་འོད་ཟེར་གྱི་ནོར་བུ་བཞིན་དུ་ཁ་ནས་ཐོན་ནས་ལྟེ་བར་འཇུག་ཅིང་ཡི་གེའི་ཕྲེང་བར་བསམ་པར་བྱའོ། །སྤྱན་རས་གཟིགས་དབང་ཕྱུག་དོན་ཡོད་ཞགས་པའི་སྒྲུབ་ཐབས་རྫོགས་སོ།།
[93b.2]{T3436}༄༅༅། །རྒྱ་གར་སྐད་དུ། ཤྲཱི་ཏྲེེ་ལོཀྱ་བ་ཤཾ་ཀ་ར་ཨཱརྱ་བྷུགྨ་སཱ་དྷ་ནཾ། བོད་སྐད་དུ། དཔལ་འཇིག་རྟེན་གསུམ་པོ་དབང་དུ་བྱེད་པ་འཕགས་པ་བྷུགྨའི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །སངས་རྒྱས་བྱང་ཆུབ་
[93b.3]སྡིག་པ་དང་བྲལ་བ། །བདེ་གཤེགས་སྲས་དང་རྒྱལ་བའི་ཡབ་ཉིད་དང་། །འགྲོ་མགོན་འཇིག་རྟེན་མནན་རྣམས་ཕྱག་འཚལ་ནས། །ངོ་མཚར་ཅན་གྱི་སྒྲུབ་ཐབས་བཤད་པར་བྱ། །སྙིང་གར་ཨ་ཡིག་ལས་སྐྱེས་ཟླ་བ་ཆུ་སྐྱེས་ཟླ་བ་ཡིད་ཀྱི་མུན་འཇོམས་པའི། །ཧྲཱིཿཡིག་འོད་ཟེར་དྲ་བའི་
[93b.4]ཚོགས་འཕྲོ་ཆུ་སྐྱེས་དམར་པོ་སྐྱ་རེངས་མདོག་ལྟ་བུ། །རྣམ་ཐར་གསུམ་པོ་ཡང་དག་བསམ་ཞིང་མཁས་པས་གཟུགས་ནི་དྲི་མེད་ཞལ་སོགས་བསང་། །ཁྲོ་ལས་རྒྱལ་བས་དང་པོར་གནས་དང་བདག་ཉིད་བསྲུང་བའི་སྦྱོར་བ་ཉིད་བྱས་ཏེ། །ཆང་དང་གུར་གུམ་བཟང་པོའི་ལྡེ་གུས་བྱུགས། །
[93b.5]མེ་ཏོག་དྲི་བཟངས་རབ་བྱེད་གཅལ་དུ་བཀྲམ། །བསམ་གཏན་གནས་ནི་རབ་དགར་བདེ་བའི་སྟན། །མཐོན་པོ་ལ་ནི་རབ་ཏུ་འདུག་བྱས་ཏེ། །གུར་གུམ་ཙནྡན་དམར་པོས་དེ་མདུན་དུ། །མཎྜལ་ཤིན་ཏུ་ཟླུམ་བྱས་ལེགས་པར་བྱུགས། །མེ་ཏོག་དམར་པོ་སོ་མ་གཅལ་དུ་བཀྲམ། །
[93b.6]རང་གི་སྔགས་བཟླས་མཆོད་ཡོན་དམ་པའི་སྣོད། །དེ་ནས་ནམ་མཁར་རྒྱལ་སྲས་ཀུན་བལྟས་ནས། །མཁས་པས་གཅིག་ཏུ་འགྲོ་ཀུན་སྐྲག་བཅས་གདོན་པའི་ཕྱིར། །མཆོད་པའི་ཆོ་ག་རྣམ་མང་རང་གི་ས་བོན་བསྐྱེད། །དེ་རྣམས་བློ་གྲོས་ལྡན་པས་མཉམ་གཞག་ཡིད་ཀྱིས་བྱ། །དེ་ནས་
[93b.7]དེ་རྣམས་ཀྱི་མདུན་དུ་པུས་མོ་ས་ལ་བཙུགས་ཤིང་བཏུད་ནས་འདུག་སྟེ། ཐལ་མོ་སྦྱར་ནས་བདག་ཉིད་ལྷག་པར་གྲོལ་བའི་ཕྱིར་སྡིག་པ་བཤགས་པ་ལ་སོགས་པ་བྱ་སྟེ། སྐྲག་པས་སྡིག་པ་མ་ལུས་བཤགས་བགྱིད་ཅིང་། །མ་ལུས་སྡིག་ལ་དགའ་བར་མི་བགྱིད་དོ། །དགེ་བ་
[94a]
[94a.1]ཀུན་ལ་རྗེས་སུ་ཡི་རང་ཞིང་། །བྱང་ཆུབ་མཆོག་ཏུ་བདག་གིས་ཡོངས་སུ་བསྔོ། །དཔུང་གཉེན་དཀོན་མཆོག་གསུམ་ལ་བདག་སྐྱབས་མཆི། །སངས་རྒྱས་རྣམས་ལ་བདག་གིས་ལུས་འདི་འབུལ། །འགྲོ་ལ་ཕན་བགྱིད་བྱང་ཆུབ་སྙིང་པོ་བཟུང་། །སངས་
[94a.2]རྒྱས་ཕུན་ཚོགས་གནས་ལ་ཡང་དག་བསྟེན། །འགྲོ་བ་མཐའ་དག་སྡུག་བསྔལ་ཀྱིས་མནར་ཡང་དག་བལྟ། །སྔགས་པས་དེ་ལ་བརྩེ་ཆེན་འོད་ཟེར་བསྒོམ་བྱ་སྟེ། །བདག་དང་འགྲོ་བ་མ་ལུས་གཉིས་མེད་སྟོང་པར་བསྒོམ། །ཀུན་ལ་ཕན་པར་ཡང་ནི་རབ་ཏུ་བལྟ་བར་བྱ། །དེ་
[94a.3]ནས་ཨོཾ་སྭ་བྷཱ་བ་ཤུདྡྷཿསརྦ་དྷརྨཿསྭ་བྷཱ་བ་ཤུདྡྷོ྅ཧཾ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ་ཞེས་པ་འདིས་བྱིན་གྱིས་བརླབ་པར་བྱའོ། །དེ་ནས་མདུན་དུ་འོད་ཟེར་དྲ་བ་འཕྲོ་བ་ཡི། །པཱ་ལ་ཤ་ཡི་མེ་ཏོག་ལྟ་བུའི་ཧྲཱིཿཡིག་བསམ། །དེས་བྱུང་ཟླ་བ་གང་བའི་གཟུགས་བལྟས་
[94a.4]ལ། །ཧྲཱིཿཡིག་འོད་ཟེར་དྲ་བའི་འོད་ཀྱི་དབུས། །དེ་སྟེང་ཧྲཱིཿཡིག་ལས་བྱུང་ཉི་མ་སྟེ། །འོད་ཀྱིས་ཕྱོགས་རྣམས་ཀུན་ཏུ་སྣང་བྱེད་ཅིང་། །དབུས་ནས་ཧྲཱིཿཡིག་ལས་བྱུང་འོད་ཟེར་འབར། །མུན་པ་མཐའ་དག་འཇོམས་བྱེད་ཡང་དག་བསམ། །དེ་སྟེང་རང་གི་ས་བོན་ལས་སྐྱེས་པའི། །
[94a.5]འདམ་སྐྱེས་རྣམ་རྒྱས་ཉི་མའི་ཁ་དོག་བཞིན། །ཡི་གེ་ཧྲཱིཿཡིས་རབ་མཛེས་དབུས་མའི་ཆ། །མཁས་པས་ཡིད་ཀྱི་མུན་འཇོམས་རྣམ་པར་བསམ་བྱས་ལ། །དེ་ནས་རང་གི་ས་བོན་མ་ལུས་པ་ལས་ནི། །ཐུབ་དབང་སྤྲོ་དང་དེ་ལས་བསྡུ་བྱས་ནས། །ས་བོན་གྱིས་མཚན་ཉི་ཟླའི་ཐིག་
[94a.6]ལེས་བསྐྱེད། །འགྲོ་བའི་མགོན་དུ་བདག་ཉིད་བལྟ་བར་བྱ། །པདྨ་དང་ནི་ཟླ་བའི་སྟེང་ན་རོལ་ཞིང་མཉམ་པའི་ཞབས་ཀྱིས་ཡང་དག་བཞུགས། །འཁྲུལ་པ་རབ་བཅོམ་པདྨ་རྒྱས་པའི་ཞལ་མངའ་གློག་དང་བྱི་རུ་ལྟ་བུར་གསལ། །སྤྱན་གཉིས་ཡངས་པ་ཨུཏྤལ་སྔོན་པོ་འདྲ་ཞིང་
[94a.7]སྨིན་འཁྱུག་མཛེས་པས་བརྒྱན་གྱུར་པ། །རལ་པ་མཛེས་ཤིང་མུ་ཏིག་ཆུན་པོས་རྣམ་བརྒྱན་ལྷ་ཡི་གོས་ཀྱིས་རབ་མཛེས་པ། །འོད་ཟེར་དམར་པོ་འཕྲོ་བའི་ས་བོན་ལས་སྐྱེས་རྒྱལ་བ་ཕུན་ཚོགས་སེམས་ཅན་དོན། །ཕྱག་ནི་གཡོན་པ་པདྨ་དམར་པོ་རྣམ་པར་རྒྱས་པ་རྣམ་པར་བསྣམས་གྱུར་
[94b]
[94b.1]པ། །མཁས་ཤིང་ཕྱག་གཡས་ནས་ནི་རྣམ་པ་ཀུན་གྱི་མཆོག་ནི་རབ་ཏུ་སྩོལ་བར་མཛད། །རིན་ཆེན་རྒྱན་གྱིས་རབ་མཛེས་ཡིད་རབ་དད་པའི་འཇིག་རྟེན་དབང་ཕྱུག་འོད་རབ་གསལ། །དེ་ནས་སྙིང་གར་ཆུ་སྐྱེས་ཟླ་བ་ལ། །ཧྲཱིཿཡིག་འོད་ཀྱིས་ཡོངས་བསྐོར་ཉེ་བར་བསམ། །
[94b.2]སྙིང་མགྲིན་སྤྱི་བོར་ཟླ་བའི་སྟེང་རྣམས་སུ། །ཧཱུཾ་ཨཱཿཨོཾ་ཡིག་འོད་འབར་མྱུར་དུ་བལྟ། །དེ་ནས་ཕྱོགས་མིན་པདྨ་ཡང་དག་བལྟ། །བན་དུའི་ཁ་དོག་ཕྱོགས་བཞིར་རབ་ཏུ་རྒྱས། །དེ་སྟེང་བསིལ་ཟེར་བྱེད་པ་ཡོངས་རྫོགས་པ། །གུར་གུམ་ལྟ་བུར་རབ་གསལ་
[94b.3]བསྒོམ་པར་བྱ། །དེ་ལ་རང་སྙིང་སྔགས་ཀྱི་འོད་ཟེར་ནི། །ཞལ་ནས་ངེས་འཐོན་ཟླ་བ་བཞི་ཡི་བདག །གང་ལ་དེ་ཞུགས་དེ་རྣམས་སྟེང་དུ་ནི། །མུན་པའི་ཚོགས་འཇོམས་ཉི་མ་དེ་བཞིན་དུ། །མེ་སོགས་མཚམས་གྱུར་ཉི་མ་གནས་པ་ལ། །ས་བོན་ཤིན་ཏུ་དཀར་
[94b.4]ནག་དམར་དང་སེར། །ལཱཾ་མཱཾ་དེ་ནས་པཱཾ་དང་ཏཱཾ་བཞི་ལས། །ཟླ་བ་ཉི་མ་ཡང་དག་སྦྱོར་བར་བསམ། །དེ་ནས་ཟླ་བའི་ས་བོན་ལས་སྐྱེས་བལྟ། །ཇི་ལྟར་རང་གི་རྟེན་ནི་གཞིར་གྱུར་པ། །ལྷ་མོ་སྣ་ཚོགས་རྒྱན་དང་ན་བཟའ་མཆོག །རིན་ཆེན་ཐོར་ཚུགས་རབ་བཅིངས་
[94b.5]རྒྱན་གྱིས་མཛེས། །མེ་རུ་པདྨ་ཟླ་ལ་སྤྱན་མ་སྟེ། །ཀུནྡ་ཟླ་འོད་ཡིད་འོང་ཕྱག་གཉིས་མ། །བདེན་བྲལ་པདྨ་ཟླ་ལ་མཱ་མ་ཀཱི། །བརྩེ་ལྡན་སྣུམ་བཅས་ཨིནྡྲ་ནཱི་ལའི་མདོག །རླུང་གི་པདྨ་ཟླ་ལ་གོས་དཀར་མོ། །ཆུ་སྐྱེས་དམར་པོ་ཉི་མ་དང་མཚུངས་བདེ། །དབང་ལྡན་པདྨ་ཟླ་ལ་
[94b.6]སྒྲོལ་མ་སྟེ། །གསེར་མདོག་ཤིན་ཏུ་ཞི་བ་བསྒོམ་པར་བྱ། །དེ་རྣམས་པུས་མོ་ས་ལ་བཙུགས་ཤིང་རིང་ཞིང་ཡངས་པའི་སྤྱན། །ནུ་མ་ཟུང་དག་མཐོ་ཞིང་མཁྲེགས་ལ་རྐེད་པའི་དབུས་ཆ་ཕྲ། །གུས་པ་དང་བཅས་རོལ་པའི་སྐུ་སྨད་རྒྱས་ཤིང་ཡན་ལག་མཆོག །སྐྲ་ཡི་འོད་ཟེར་འཁྱིལ་
[94b.7]ཤིང་འཛུམ་ལྡན་ཐལ་མོ་རབ་ཏུ་སྦྱོར། །དེ་ནས་སྙིང་གའི་སྔགས་ཀྱི་འོད་ཟེར་ཕྲེང་བ་ཡིས། །གདན་དྲངས་མདུན་གྱི་བར་སྣང་ལ་ནི་བཞུགས་པར་བསམ། །དཔལ་ལྡན་ཡེ་ཤེས་འཁོར་ལོའི་ཆོ་ག་བཞིན་དུ་ནི། །རང་གི་འཁོར་ལོས་གདན་དྲངས་གཞུག་པ་ལ་སོགས་བྱ། །དེ་ནས་རང་གི་
[95a]
[95a.1]བདག་ཉིད་རྗེས་འཇུག་བུམ་པ་ཡིས། །དབང་བསྐུར་ཡེ་ཤེས་ཆུ་ཡིས་མངོན་པར་གང་བར་བལྟ། །རྒྱལ་བའི་དབང་བསྐུར་ཆུ་ལས་རབ་ཏུ་སྐྱེ་གྱུར་པའི། །ཀུན་གྱི་སྤྱི་བོར་ངག་གི་དབང་ཕྱུག་ལེགས་པར་བསམ། །དེ་ནས་རང་སྙིང་ས་བོན་འོད་ཟེར་ལས་སྐྱེས་པའི། །
[95a.2]ལྷ་མོའི་ཚོགས་དང་ལྷ་རྣམས་ཀྱིས་ནི་གང་གྱུར་ཏེ། །དཔག་ཏུ་མེད་པའི་མཆོད་པ་སྣ་ཚོགས་འཕྲོ་བ་ཡིས། །རང་གི་འཁོར་ལོ་ཡང་ནི་ཡོངས་སུ་མཆོད་པར་བསྒོམ། །དེ་ནས་སྙིང་གར་ཟླ་བ་དམར་པོ་ཡོངས་རྫོགས་ལ། །འོད་ཟེར་དམར་པོའི་ཆ་ཤས་ཚོགས་ཀྱིས་ཡོངས་སུ་བསྐོར། །ཤིན་ཏུ་
[95a.3]དམར་པོའི་ཨོཾ་ཧཱུཾ་ཡི་གེ་དབུས་སུ་གནས། །བདག་གི་ས་བོན་ལས་ནི་རབ་ཏུ་འབར་བར་བལྟ། །རྣམ་པར་འཕྲོ་བའི་འོད་ཟེར་རྗེས་འཇུག་ཁ་དོག་ཚོགས། །རྒྱ་སྐྱེགས་དམར་པོ་བཞིན་དུ་འཇིག་རྟེན་སྣང་བར་བྱེད། །རྫོགས་པའི་སངས་རྒྱས་རྣམ་པར་དག་པའི་བྱང་ཆུབ་གཟུང་། །སྔགས་
[95a.4]པས་དེ་ལ་དེ་བཞིན་སོ་སོར་བསྡུ་བ་དང་། །ཡང་དག་སྤྲོ་དང་བསྡུ་བའི་ཆོ་ག་ཡང་ཡང་དུ། །རྣམ་པར་སྐྱོ་བ་མེད་པའི་ཡིད་ཀྱིས་དེ་བཞིན་བྱ། །དེ་དག་གིས་ནི་ངལ་བ་ཆེར་གྱུར་གང་གི་ཚེ། །དེ་ཚེ་ཞལ་འཇུག་འཁོར་ལོ་དང་ལྡན་སྔགས་བཟླས་བྱ། །ཉི་མ་སོ་སོའི་ཐུན་མཚམས་ལ། །བསྒོམ་
[95a.5]པ་ལ་འབད་སྔགས་བཟླས་བྱ། །གལ་ཏེ་སྐབས་ནི་ཡོད་གྱུར་ན། །ཇི་སྲིད་མངོན་སུམ་མི་སྣང་བར། །ཐུན་མཚམས་སོ་སོར་ཆོ་ག་བཞིན། །རྣམ་དག་ཡིད་གསུམ་སྔགས་བྱིན་བརླབས། །སྔགས་པས་མངོན་པར་བཟླས་པ་བྱ། །འབྱུང་པོ་ཀུན་ལ་གཏོར་མ་སྦྱིན། །དེ་ནས་ལྡང་བར་འདོད་པ་
[95a.6]ན། །ཚིགས་བཅད་གཅིག་པའི་སྨོན་ལམ་གདབ། །ཡང་ན་དཔལ་ལྡན་ཀླུ་སྒྲུབ་ཞབས། །ལ་སོགས་ཀྱིས་མཛད་མངོན་འཕགས་ཀྱིས། །བདག་གི་བསོད་ནམས་འདི་ཡིས་ནི། །འགྲོ་ཀུན་རྟག་ཏུ་དྲི་མེད་པའི། །དཔལ་ལྡན་ཁམས་གསུམ་དབང་བྱེད་གནས། །དེ་བཞིན་མྱུར་དུ་ཐོབ་
[95a.7]པར་ཤོག །ཨོཾ་ཨཱ་ཧཱུཾ་ཞེས་བརྗོད་སྙིང་གར། །ལྷ་མོ་བཞི་བསྡུ་ས་བོན་ལ། །ལངས་ནས་བྱ་བ་ཐམས་ཅད་བྱ། །སྣ་ཚོགས་པ་ཡི་དོན་རྣམས་དང་། །དེ་བཞིན་ཐུན་མཚམས་བཞི་ཡི་དུས་རྣམས་ཏེ། །འོན་ཀྱང་ཁྱད་པར་ཅུང་ཟད་འདི་ཡོད་དེ། །བློ་ཡིས་ཡེ་ཤེས་སེམས་དཔའ་གཤེགས་ནས་ནི། །
[95b]
[95b.1]རང་གི་འཁོར་ལོར་མ་ལུས་བསྡུ་བྱ་སྟེ། །ཐུན་མཚམས་ལྷག་མ་དོན་དམ་སེམས་ཉིད་ནི། །ཡང་དག་མངོན་དུ་བྱས་ནས་སྔགས་པས་ཉལ། །སྔ་མའི་དུས་སུ་སྨོན་ལམ་ནུས་པ་ཡིས། །རབ་ཏུ་སད་ནས་དེ་བཞིན་ལངས་པར་བྱ། །གང་གིས་ཀུན་ཏུ་འཇིག་རྟེན་མགོན་པོ་བསྒོམ། །དེ་ཡིས་
[95b.2]འཇིགས་པ་ཆེ་རྣམས་རབ་ཏུ་ཞི། །རི་དྭགས་དབང་པོ་ཆུ་དང་ཐོག་སྲིན་པོ། །སྦྲུལ་དང་མེ་དང་དགྲ་དང་འཆིང་བ་རྣམས། །གང་གི་རང་ལུས་འཇིག་རྟེན་དབང་ཕྱུག་བལྟ། །དེ་ལས་ཉེར་འཕྲོས་ནད་དང་བགེགས་ལ་སོགས། །དབུལ་དང་སྐལ་ངན་མི་བདག་གིས་འཛིན་དང་། །དུས་མིན་དུས་
[95b.3]སུ་འཆི་བར་འགྱུར་བ་དང་། །གང་གིས་ཐོག་མེད་སྲིད་པའི་ནང་ཞུགས་ནས། །ལུས་དང་ངག་དང་ཡིད་ཀྱི་སྡིག་པ་རྣམས། །མི་ཤེས་དབང་གིས་བྱས་པ་དེ་རྣམས་ནི། །གང་གིས་འཇིག་རྟེན་མགོན་དྲན་ཉམས་ཤིང་ཞི། །གང་གིས་རྟག་ཏུ་གུས་པས་སྒོམ་བྱེད་ན། །ངག་གི་རང་བཞིན་
[95b.4]ཀུན་ཤེས་སྐྱེ་བོའི་དབང་། །སྔོན་མ་མཐོང་བའི་སྒྱུ་རྩལ་ཚོགས་རྣམས་དང་། །ཆུང་ངུ་ལ་སོགས་ཡོན་ཏན་བརྒྱད་རྣམས་ཐོབ། །གང་གིས་འཇིག་རྟེན་དབང་ཕྱུག་སྒོམ་བྱེད་ན། །ཟླ་བ་དྲུག་གིས་རིག་པ་འཛིན་པར་འགྱུར། །དེ་ཡིས་ཟས་སྐོམ་སྟན་དང་པདྨའི་ས། །རྫས་ལ་སོགས་
[95b.5]པ་མཆོག་རྣམས་ངེས་འབྱུང་འགྱུར། །གང་གིས་སྔགས་ནི་ཡང་དག་བཟླས་བྱས་ན། །ཉེས་པ་དང་བཅས་ཐམས་ཅད་སྤོང་བར་འགྱུར། །ཡོན་ཏན་ཐམས་ཅད་ཡང་དག་སྐྱེ་ཞིང་བརྟན། །དེ་ཕྱིར་ངལ་མེད་སེམས་ཀྱིས་སྔགས་བཟླས་བྱ། །དཔལ་ལྡན་ཁམས་གསུམ་དབང་བྱེད་འཇིག་རྟེན་
[95b.6]དབང་ཕྱུག་གི་ནི་ཡོན་ཏན་གསལ་བྱེད་པའི། །བདག་གིས་སྒྲུབ་ཐབས་ཟླ་བའི་འོད་ཟེར་བགྱིས་པའི་གང་ཞིག་བསོད་ནམས་སྟོབས་ཀྱིས་ནི། །དེ་ཡིས་འགྲོ་བ་མ་ལུས་སྙིང་རྗེའི་གཞན་དབང་ཡིད་ཀྱི་མུན་པ་འཇོམས་གྱུར་པའི། །འགྲོ་བ་ཐམས་ཅད་དབང་དུ་བྱེད་པའི་གོ་འཕང་ཐོབ་ཅིང་རྟག་
[95b.7]ཏུ་ཞི་གྱུར་ཅིག །འཇིག་རྟེན་གསུམ་པོ་དབང་དུ་བྱེད་པའི་འཕགས་པ་བྷུགྨའི་སྒྲུབ་ཐབས་རྫོགས་སོ།། །།སློབ་དཔོན་དཔལ་ལྡན་ཤཱུ་ནྱ་ཏཱ་ས་མཱ་དྷི་བཛྲ་པཱ་དས་མཛད་པའོ།། {T3437}༄༅༅། །རྒྱ་གར་སྐད་དུ། ཤྲཱི་ལོ་ཀ་ནཱ་ཐ་སཱ་དྷ་ནཾ། བོད་སྐད་དུ། དཔལ་འཇིག་རྟེན་མགོན་པོའི་
[96a]
[96a.1]སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །གང་གི་མིང་ཙམ་གྱིས་ཀྱང་ནི། །དཔལ་ལྡན་བསྐལ་པ་བརྒྱར་འཇུག་པའི། །འཇིག་རྟེན་དབང་ཕྱུག་ལ་བཏུད་ནས། །སྒྲུབ་ཐབས་བསྡུས་པ་བཤད་པར་བྱ། །འདིར་དང་པོར་རེ་ཞིག་ལྷག་པར་སྒོམ་
[96a.2]པར་བྱེད་པའི་སྔགས་པས་སྔ་བར་ལངས་ཏེ། ཡིད་དང་མཐུན་པའི་གནས་འགའ་ཞིག་ཏུ་སྟན་བདེ་བ་ལ་ཉེ་བར་འདུག་སྟེ། ཡི་གེ་གསུམ་གྱི་སྔགས་ཀྱིས་གནས་དང་བདག་བསྲུང་བའི་སྦྱོར་བ་བྱའོ། །མདུན་དུ་ཁ་ཆེ་སྐྱེས་དང་ཙནྡན་དམར་པོས་མཎྜལ་ཟླུམ་པོ་ལ་ཉེ་བར་བྱུགས་ཏེ་སྐད་ཅིག་གིས་སྟོང་པ་ཉིད་དུ་
[96a.3]བསྒོམས་ནས། རང་གི་སྙིང་གར་ཨ་ཡིག་ལས་སྐྱེས་པའི་ཟླ་བའི་དཀྱིལ་འཁོར་སྙིང་གི་མུན་པ་འཇོམས་པ་ཡོངས་སུ་སྤྲོས་ནས། ཆུ་སྐྱེས་དམར་པོ་སྐྱ་རེངས་ཤར་བ་ལྟ་བུ་ལ་འོད་ཟེར་གྱི་ཚོགས་འཕྲོ་བའི་ཧྲཱིཿཡིག་བལྟས་ཏེ། དེ་ལས་འོད་འཕྲོས་ཏེ་ཕྱོགས་བཅུ་ཁྱབ་པར་བྱས་ནས་ཡོངས་སུ་འཕྲོ་བའི་ཧྲཱིཿ
[96a.4]ཡིག་གི་ལྕགས་ཀྱུས་མདུན་གྱི་ནམ་མཁའ་ལ་གདན་དྲངས་ཏེ། འཇིག་རྟེན་མཐའ་དག་གཅིག་ཏུ་གདོན་པར་འདོད་པའི་མཁས་པས་བདེ་བར་གཤེགས་པ་སྲས་དང་བཅས་པ་དང་ཆུ་སྐྱེས་ཀྱི་ཕྱག་རྒྱ་ཅན་རྣམས་རྣམ་པར་བལྟས་ཏེ་མེ་ཏོག་ལ་སོགས་པའི་མཆོད་པ་ལྔས་ཡང་དག་པར་མཆོད་ནས། དེ་
[96a.5]རྣམས་ཀྱི་མདུན་དུ་ཐལ་མོ་སྦྱར་ཏེ་ཕྱག་འཚལ་ནས། སྡིག་པ་བཤགས་པ་ལ་སོགས་པ་བཏང་སྙོམས་ཀྱི་བར་དུ་ཇི་སྙེད་པ་རྣམ་པར་བསྒོམས་ནས། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་པས་ལྷག་པར་གྲོལ་བར་བྱས་ལ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་པས་བྱིན་གྱིས་
[96a.6]བརླབ་པར་བྱའོ། །དེ་ནས་སྔ་བར་སྨོན་ལམ་གྱི་རྗེས་སུ་འཇུག་པས་སྙིང་རྗེ་ཆེན་པོས་རབ་ཏུ་སད་ནས་པཾ་ཡིག་ལས་སྐྱེས་པའི་སྣ་ཚོགས་པའི་ཆུ་སྐྱེས་ལ་གནས་པ་དབྱངས་དང་པོ་ལས་སྐྱེས་པའི་ཟླ་བའི་འོད་ཀྱི་དཀྱིལ་འཁོར་ལ། བནྡུ་ཀ་སྐྱེས་པའི་མདོག་ལྟ་བུའི་ཧྲཱིཿཡིག་ལས་སྐྱེས་ཤིང་
[96a.7]ཧྲཱིཿཡིག་གིས་ལྷག་པར་གནས་པའི་དབུས་སུ་ཉི་མའི་འོད་ཟེར་དང་མཚུངས་པའི་ཆུ་སྐྱེས་བསམ་པར་བྱའོ། །དེ་ནས་ས་བོན་གྱི་ཡི་གེ་ལས་ངེས་པར་འཕྲོས་ཏེ། སངས་རྒྱས་ཀྱི་ཞིང་རྣམས་སུ་སངས་རྒྱས་དང་། བྱང་ཆུབ་སེམས་དཔའ་རྣམས་གསལ་བར་མཛད་ནས། དེ་རྣམས་
[96b]
[96b.1]ཀྱི་བསོད་ནམས་དང་ཡེ་ཤེས་ཀྱི་ཚོགས་དང་རོ་མཉམ་པར་གྱུར་ཏེ། དེ་ལ་དེ་བཞིན་དུ་ཞུགས་པར་བསམ་མོ། །ས་བོན་གྱིས་མཚན་པའི་པདྨ་ཡོངས་སུ་གྱུར་པ་ལས་པདྨ་དང་ཟླ་བའི་སྟེང་དུ་མཉམ་པའི་ཞབས་ཀྱིས་བཞུགས་པ། གློག་དང་བྱི་རུའི་ཁ་དོག་ལྟ་བུ། པདྨ་རྒྱས་
[96b.2]པའི་ཞལ་མངའ་བ། ཨུཏྤ་ལ་སྔོན་པོའི་འདབ་མ་ལྟར་ཡངས་པའི་སྤྱན་ཟུང་དང་ལྡན་པ། དབུ་སྐྲ་གནག་ཅིང་རིང་བ་ལྷའི་གོས་དང་རྒྱན་གྱིས་རྣམ་པར་བརྒྱན་པ། ཕྱག་གཡས་པ་དང་། གཡོན་པ་དག་གིས་མཆོག་སྦྱིན་དང་། ཆུ་སྐྱེས་དམར་པོ་བསྣམས་པ།
[96b.3]ལོ་བཅུ་དྲུག་ལོན་པ་ལྟ་བུ་འོད་ཟེར་དམར་པོ་འཕྲོ་ཞིང་ཉི་མའི་དཀྱིལ་འཁོར་དང་། ཟླ་བའི་དཀྱིལ་འཁོར་ལ་གནས་པའི་སྙིང་གར་རང་གི་ས་བོན་ཀྱི་བྱིན་གྱིས་བརླབས་ནས། དཔྲལ་བ་དང་། མགྲིན་པ་དང་། ནུ་མའི་བར་དུ་ཡི་གེ་གསུམ་གྱིས་བརྒྱན་པའི་དཔལ་
[96b.4]ལྡན་འཇིག་རྟེན་དབང་ཕྱུག་གི་སྐུར་བདག་ཉིད་བསྒོམ་པར་བྱའོ། །དེ་ནས་མེ་ལ་སོགས་པའི་མཚམས་རྣམས་སུ་པདྨ་ལ་གནས་པའི་ཀུ་མུ་དའི་གཉེན་གྱི་སྟེང་དུ་དཀར་པོ་དང་། ནག་པོ་དང་། དམར་པོ་དང་། ལྗང་གུའི་ལཱཾ་མཱཾ་པཱཾ་ཏཱཾ་གི་ཡི་གེ་ཡོངས་སུ་གྱུར་པ་
[96b.5]ལས། དེའི་སྐུ་མདོག་ཅན་ཐལ་མོ་སྦྱར་ཞིང་པུས་མོ་ས་ལ་བཙུགས་པ་ལང་ཚོ་གཞོན་ནུ་དང་ལྡན་པ། སྣ་ཚོགས་པའི་རིན་པོ་ཆེ་དང་། གོས་ཀྱིས་བརྒྱན་པ་འགྱིང་ཞིང་ཞལ་འཛུམ་པ་དང་ལྡན་པའི་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་
[96b.6]རྣམས་བསྒོམ་པར་བྱའོ། །དེའི་རྗེས་སུ་རང་གི་སྙིང་གའི་ས་བོན་གྱི་རྒྱལ་པོ་ལས་འོད་ཟེར་འཕྲོས་ཏེ་ཧྲཱིཿའི་འོད་ཟེར་གྱི་ལྕགས་ཀྱུས་མངོན་པར་དགའ་བའི་འཇིག་རྟེན་ཀྱི་ཁམས་ན། དམ་ཚིག་སེམས་དཔའ་དང་འདྲ་བའི་ཡེ་ཤེས་སེམས་དཔའ་གདན་དྲངས་ནས་ནམ་
[96b.7]མཁའི་མཐིལ་དུ་བལྟས་ཏེ། དམ་ཚིག་སེམས་དཔའ་དང་། གཅིག་ཏུ་བྱས་ནས། ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཞེས་པས་མངོན་པར་མཆོད་ནས། ནམ་མཁའི་མཐིལ་དུ་སོང་སྟེ་བདུད་རྩིས་གང་བའི་རིན་པོ་ཆེའི་བུམ་པ་རྣམས་ཀྱིས་ཨོཾ་ཨཱཿསརྦ་ཏ་ཐཱ་ག་ཏཱ་བྷི་ཥེ་ཀ་ཏ་
[97a]
[97a.1]ས་མ་ཡ་ཤྲི་ཡེ་ཧཱུཾ་ཞེས་བརྗོད་ནས་བདག་ལ་དབང་བསྐུར་བར་མཛད་ཅིང་། བདག་ཉིད་ཀྱི་སྤྱི་བོར་ངག་གི་དབང་ཕྱུག་བཞུགས་པར་བསྒོམ་པར་བྱའོ། །དེ་ནས་རང་གི་ས་བོན་ལས་སྐྱེས་པའི་འོད་ཟེར་གྱི་དྲ་བས་ནམ་མཁའི་མཐིལ་མཐའ་དག་ཁྱབ་
[97a.2]ཅིང་ཉེ་བར་སྤྱད་པ་གཅིག་ཏུ་རབ་ཏུ་མང་པོ་སྤྲོས་ནས་བཞི་པོ་དགའ་ཞིང་དགའ་བའི་ཚོགས་རྣམས་ཀྱིས་བདག་ལ་མངོན་པར་མཆོད་པར་བསྒོམ་པར་བྱའོ། །དེ་ནས་ཡོངས་སུ་འཕྲོ་བའི་འོད་ཟེར་དམར་པོ་རབ་ཏུ་བརྐྱང་སྟེ། སྡིག་པའི་གནས་སུ་ལྷུང་བའི་སྲོག་ཆགས་
[97a.3]རྣམས་བཏོན་ནས་བདེ་བར་གཤེགས་པའི་ལམ་ལ་ངེས་པར་སྦྱར་ནས་སྨིན་ཅིང་གྲོལ་བར་བྱའོ། །རང་གི་ཆོ་གས་བསྡུས་ནས་བྱ་སྟེ། སྐད་ཅིག་གིས་བསམ་པར་བྱའོ། །ངལ་བར་གྱུར་ན་སྙིང་གའི་ས་བོན་གྱི་དབུས་སུ་བསྡུས་ནས། དམ་ཚིག་གི་ས་བོན་དང་
[97a.4]རང་བཞིན་གྱི་ས་བོན་ཀྱི་སྔགས་ཀྱི་རྒྱལ་པོ་བཟུང་ནས་བཟླས་པར་བྱའོ། །དེའི་རྗེས་སུ་བདག་ཉིད་མེ་ཏོག་ལ་སོགས་པའི་ཉེར་སྤྱོད་རྣམས་ཀྱིས་མངོན་པར་མཆོད་ནས། འབྱུང་པོ་ཐམས་ཅད་ལ་ཇི་ལྟར་མཐུན་པའི་གཏོར་མ་དབུལ་ཞིང་། སྨོན་ལམ་དང་། རྗེས་
[97a.5]སུ་ཡི་རང་བ་དང་། ཡོངས་སུ་བསྔོ་བ་ཡང་བྱས་ནས། ཡི་གེ་གསུམ་གྱི་སྔགས་བརྗོད་དེ། ལྷ་མོ་བཞི་སྙིང་གའི་ས་བོན་ལ་བསྡུས་ནས་ལངས་ཏེ། ཅི་བདེར་གནས་པར་བྱའོ། །གཉིས་པ་དང་གསུམ་པའི་ཐུན་མཚམས་དག་ལ་སྙིང་གའི་ས་བོན་ལས་ལྷ་
[97a.6]མོ་བཞི་དབུགས་ལ་ཞུགས་ནས་ཆོ་ག་སྔ་མ་བཞིན་དུ་བྱའོ། །ཐུན་མཚམས་བཞི་པ་ལ་སྔ་མ་བཞིན་དུ་བྱས་ནས། ཨོཾ་ཨཱཿབཛྲ་མུཿཞེས་པས་ཡེ་ཤེས་སེམས་དཔའ་གཤེགས་ཏེ་ལྷ་མོ་རང་གི་སྙིང་གའི་ས་བོན་ལ་བཅུག་ནས། ཇི་ལྟར་འདོད་པ་བཞིན་གནས་པར་
[97a.7]བྱའོ། །ཉལ་བའི་དུས་སུ་དོན་དམ་པའི་སེམས་མངོན་དུ་བྱས་ནས་ཉལ་བར་བྱའོ། །སྔགས་པས་སྔ་བར་སྨོན་ལམ་གྱི་དབང་གིས་རབ་ཏུ་སད་ནས་ལངས་ཏེ་ཇི་ལྟ་བ་བཞིན་དུ་བྱའོ། །འཇིག་རྟེན་དབང་ཕྱུག་གི་སྒྲུབ་ཐབས་རྫོགས་སོ།། །།
[97b]
[97b.1]{T3438}༄༅༅། །རྒྱ་གར་སྐད་དུ། སྠི་ར་ཙཀྲ་སཱ་དྷ་ནཾ། བོད་སྐད་དུ། བརྟན་པའི་འཁོར་ལོའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དཔལ་ལྡན་དབྱངས་ཅན་མ་ལུས་པ་ཡི་འཁྲུལ་པ་སྤངས་ཏེ་རབ་ཏུ་རྒྱས་ཤིང་འབར་བ་ཡི། །འོད་ཟེར་དཀར་པོ་གྱེན་དུ་འཕྲོ་ཞིང་དྲི་མེད་གཟུགས་
[97b.2]ཅན་རྒན་ཡང་བྱིས་པའི་ཆ་ལུགས་ཅན། །འབར་བའི་རལ་གྲི་ཕྱག་ན་བསྣམས་ཤིང་འཕྱར་བའི་ཤེས་རབ་ལ་ནི་གུས་པར་རབ་ཏུ་འདུད། །བརྟན་པའི་འཁོར་ལོ་རིན་ཆེན་དེ་ནི་བདག་ཉིད་རྗེས་སུ་དྲན་ཕྱིར་རབ་ཏུ་བྲི་བར་བྱ། །ཀུན་མཁྱེན་ཡེ་ཤེས་རྒྱ་མཚོ་ནི། །ཕྱོགས་མཐའ་མེད་པར་རབ་ཏུ་བསམ། །
[97b.3]རབ་སྐྲག་སེམས་ཅན་ཚོགས་མང་རྣམས། །ཡང་དག་ཡེ་ཤེས་བསྐྱབ་འདོད་པས། །ཡིད་བཞིན་ནོར་བུའི་སེམས་འབྱུང་བའི། །སྣ་ཚོགས་རྣམ་པས་དེ་རྣམས་མཆོད། །འཇིག་རྟེན་པ་རྣམས་བསྐྱབ་པའི་ཕྱིར། །བདག་གི་ལུས་འདི་དབུལ་བར་བགྱི། །དེ་ནས་དགེ་ལ་མངོན་པར་སྤེལ་ཕྱིར་འདིར་
[97b.4]སྔགས་པས། །བདག་ནི་འཇིགས་པས་སྡིག་པ་ཐམས་ཅད་བཤགས་པར་བགྱི། །འགྲོ་བའི་དགེ་བ་རྣམས་ལ་དགའ་བས་རྗེས་ཡི་རང་། །དཀོན་མཆོག་གསུམ་ལ་བདག་ནི་སྐྱབས་སུ་ཉེ་བར་མཆི། །ཡང་དག་སངས་རྒྱས་བྱང་ཆུབ་སེམས་ནི་བདག་གིས་གཟུང་། །སླར་ཡང་འདི་ཡང་བརྩམ་
[97b.5]པར་བྱ་སྟེ། གཟུང་དང་འཛིན་པ་སྤངས་ཤིང་འགྲོ་བ་འདི་ནི་རྨི་ལམ་དང་ནི་མིག་འཕྲུལ་ལྟ་བུ་སྟེ། །རྣམ་པར་དག་ཅིང་རང་བཞིན་འོད་གསལ་གྱུར་པ་དེ་ཡང་ནམ་མཁའ་ལྟ་བུར་རྣམ་པར་བརྟེན། །བདག་ཉིད་ཀྱང་ནི་ཡིད་ཀྱི་རོལ་པ་དག་ཏུ་བརྟགས་ཤིང་ཡང་དག་སྡུད་པར་ངེས་བྱས་ལ། །ཡང་ན་མུཿ
[97b.6]ཡིག་འོད་ཟེར་དྲ་བས་བསྐོར་བ་དེ་ལས་བྱུང་བ་དག་ནི་བསྒོམ་པར་བྱ། །དེ་དག་ཡོངས་སུ་གྱུར་ལས་ཡོངས་རྫོགས་དཀྱིལ་འཁོར་ཏེ། །ཁ་བའི་འོད་ཟེར་གུར་གུམ་འདེ་གུས་རབ་བྱུགས་པ། །དབྱངས་ཡིག་འབར་བའི་ཕྲེང་བ་མཉམ་པར་རབ་ཏུ་འཁྲིགས། །ཕྱོགས་སྒོ་གསལ་ཞིང་འབར་བར་རྣམ་པར་
[97b.7]བསམ་པར་བྱ། །དེ་ནས་སླར་ཡང་མུཿཡིག་ས་བོན་ལས་བྱུང་བ། །འོད་ཀྱི་དཀྱིལ་འཁོར་དམར་པོ་རབ་ཏུ་རྣམ་བསྒོམ་བྱ། །ཀ་ཁ་ལ་སོགས་ཡི་གེ་མ་ལུས་ཡང་དག་བསྐོར། །སྟེང་དུ་ཤིན་ཏུ་འོད་གསལ་གུར་གུམ་ལྟ་བུར་དམར། །དེ་ལ་ཡང་ནི་སྔགས་པས་མུཿཡིག་བལྟ་བར་བྱ། །དེ་ལས་
[98a]
[98a.1]བྱུང་བའི་ཡིད་འོང་འབར་བའི་འདབ་མ་སྟེ། །འབར་བའི་ཨུཏྤལ་སྔོན་པོ་འོད་ཀྱི་དྲ་བ་ཅན། །མུཿཡིག་རྣམ་པའི་ས་བོན་དབུས་སུ་རྣམ་པར་བསམ། །དེ་ལས་བྱུང་བའི་འོད་ཟེར་ལས་ནི་སངས་རྒྱས་སྤྲོས་པས་འགྲོ་རྣམས་རབ་ཏུ་འགེངས་པར་བྱེད། །ཟླ་བ་ལ་གནས་བུང་བའི་ཡན་ལག་
[98a.2]ལྟ་བུའི་འོད་ཟེར་ཤིན་ཏུ་འབར་བའི་ལྕང་ལོ་ཅན། །ཤིན་ཏུ་མཐུག་པའི་མུན་པ་རབ་འཐིབས་ཞལ་གྱི་འོད་ཟེར་དྲ་བས་འཇོམས་ཤིང་མེད་པར་བྱེད། །རྣམ་ཀུན་མཆོག་ནི་རབ་ཏུ་སྦྱིན་བྱེད་ཆེད་དུ་བྱེད་པའི་དཔལ་ལྡན་དབྱངས་ཀྱི་དབང་ཕྱུག་སྟེ། །འགྱིང་དང་སྒེག་པའི་ཉམས་ཀྱིས་མངོན་པར་རོལ་བྱེད་པ། །
[98a.3]ཞལ་གྱི་ཆུ་སྐྱེས་འཛུམ་ཞིང་རབ་ཏུ་བཞད་གྱུར་པ། །དཔའ་བོ་གཞོན་ནུའི་རྒྱན་ནི་རབ་ཏུ་འཆང་བ་པོ། །དེ་ཡི་གོ་འཕང་ཐོབ་པར་འདོད་པས་བསམ་པར་བྱ། །དེ་ལྟར་ངག་དབང་རྣམ་བསམས་ནས། །མུཿཡིག་སྙིང་གར་བསྒོམ་པར་བྱ། །ཁ་དོག་དམར་པོ་འབར་བའི་འོད། །འབྱུང་ཞིང་སྒྲོལ་མའི་དཀྱིལ་
[98a.4]འཁོར་ལ། །དེ་ལས་སྐྱེས་པའི་རྩིབས་བརྒྱད་པའི། །འཁོར་ལོ་མི་ཤེས་མུན་པ་འཇོམས། །སྣ་ཚོགས་འོད་ཀྱིས་དག་པར་བྱ། །ཡེ་ཤེས་རང་བཞིན་ཁྱབ་བདག་བལྟ། །སྤྲུལ་པའི་ཉི་མས་མཚན་པའི་འོད། །སྒྲོན་མ་གསལ་བའི་འོད་ཚོགས་འདྲ། །མེ་ཏོག་དམར་པོའི་རྣམ་པ་ལྟར། །ཡི་གེ་
[98a.5]དམར་པོ་ཀུན་དུ་བཀྲམ། །དེ་ལ་རེ་ཞིག་འཁོར་ལོའི་རྩིབས་རྣམས་སུ་ཡི་གེ་བསམ་པར་བྱ་སྟེ། ཤར་དང་། ལྷོ་དང་། ནུབ་དང་། བྱང་ཕྱོགས་རྣམས་སུ་གོ་རིམས་བཞིན་དུ་ཨ་ར་པ་ཙའོ། །ན་ཡིག་ནི་ལྟེ་བར་རོ། །མེ་དང་བདེན་བྲལ་དང་། །རླུང་དང་དབང་ལྡན་རྣམས་སུ་སྔོན་མ་བཞིན་དུ་ནི་པྲཿཔཉྩཱ་
[98a.6]ཞེས་སོ། །དེ་བཞིན་དུ་བར་བར་རྣམས་སུ་ཨ་ལ་སོགས་པའི་དབྱངས་ཀྱི་ཚོགས་རྣམས་དང་ཕྱི་རོལ་དུ་ནི་ཀ་ཡིག་ལ་སོགས་པའི་གསལ་བྱེད་རྣམས་སོ། །འདི་མི་གཡོ་བར་ངེས་པར་བྱས་ལ་ཕྱིས་འཁོར་ལོའི་ཡི་གེའི་ཚོགས་ཀྱི་འོད་ཟེར་གྱིས་སེམས་ཀྱི་མུན་པའི་དཀྱིལ་འཁོར་འཇོམས་པ་རང་གི་
[98a.7]ལུས་ཀྱི་བ་སྤུའི་ཁུང་བུ་རྣམས་ནས་ཕྱིར་བྱུང་སྟེ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་རྣམས་ཀྱི་ཐུགས་ཀྱི་ཡེ་ཤེས་ཀྱི་བདུད་རྩི་དང་ལྷན་ཅིག་རོ་གཅིག་ཏུ་མཉམ་པར་གྱུར་ནས། དེ་རྣམས་སླར་ལོག་སྟེ་བ་སྤུའི་བུ་ག་དེ་ཉིད་དུ་རབ་ཏུ་ཞུགས་ནས་རང་གི་ལུས་པོ་
[98b]
[98b.1]གསལ་བར་བྱེད་པར་ཡུན་རིང་དུ་བསམ་པར་བྱའོ། །བརྟན་པའི་སེམས་ཀྱིས་ཡང་ཕྱི་ནས་སྤྲོ་བ་དང་བསྡུས་པའི་རིམ་པས་ཇི་སྲིད་མངོན་སུམ་དུ་མ་གྱུར་པ་དེ་སྲིད་དུ་བསྒོམ་པར་བྱའོ། །འཇམ་དཔལ་དང་ནི་གཉིས་མེད་གོ་འཕང་འཆང་ཞིང་ཡི་གེ་དང་བཅས་ཡིད་ལ་འདོད་བྱེད་པ། །འདིར་ནི་འཁོར་ལོ་གསལ་པོར་
[98b.2]ཉེ་བར་བསྐོར་ཞིང་ཉིན་དང་མཚན་མོ་བསམ་གཏན་བྱེད་པར་མངོན་སྦྱོར་བས། །དེ་ཡིས་སྔོན་མ་མཐོང་བའི་ངག་གི་རང་བཞིན་གྲངས་མེད་རིག་པའི་ཚོགས་ནི་མ་ལུས་དེ་ཡང་ནི། །ཇི་ལྟར་འདོད་པས་ཡིད་ནི་རབ་ཏུ་འཇུག་ཕྱིར་ནོར་བུའི་འོད་ལྟར་རབ་གསལ་མུན་པ་སྟུག་པ་འཇོམས། །འཁོར་ལོ་འདི་ནི་ཕན་པར་
[98b.3]ཤེས་ནས་ཡིད་བྱེད་པའི། །ངོ་མཚར་ཆེད་དུ་ཡང་ནི་རབ་ཏུ་བརྟག་པར་གྱིས། །ཡོངས་སུ་བརྟགས་པས་བདེ་གཤེགས་རང་གི་ངོ་བོ་ཉིད། །རིང་པོར་མི་ཐོགས་པར་ནི་རབ་ཏུ་རྟོགས་པར་འགྱུར། །གང་འདིར་འཁོར་ལོ་རྣམ་པར་བཀོད་པའི་བསོད་ནམས་ཅི་སྐྱེས་པ། །བདག་དང་སྐྱེ་འགྲོའི་ཡིད་རྣམས་
[98b.4]འཁོར་ལོ་དེ་ཡིས་གསལ་བར་ཤོག །འཆར་ཀའི་ཉི་མ་ལྟ་བུས་གཏི་མུག་མུན་ཚོགས་འདིར་བཅོམ་ནས། །འགྲོ་ཚོགས་འདི་ནི་ངག་དབང་དཔལ་གྱི་རོལ་བར་འགྲོ་བར་ཤོག །བརྟན་པའི་འཁོར་ལོའི་སྒྲུབ་ཐབས་སློབ་དཔོན་བྷཱ་བ་སྐནྡྷས་མཛད་པ་རྫོགས་སོ།། {T3439}༄༅༅། །རྒྱ་གར་སྐད་དུ། མུཀྟ་
[98b.5]ཀེ་ན་སྠི་ར་ཙཀྲ་སཱ་དྷ་ནཾ། བོད་སྐད་དུ། ཚིག་ལྷུག་པའི་བརྟན་པའི་འཁོར་ལོའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དཔལ་ལྡན་འཇམ་དཔལ་རྡོ་རྗེ་སྟེ། །སྐྱོབ་པ་དེ་ལ་ཕྱག་འཚལ་ནས། །བྱིས་པ་རྣམས་ཀྱིས་རྟོགས་བྱའི་ཕྱིར། །འཁོར་ལོའི་ཚིག་འདི་གསལ་
[98b.6]བར་བྲི། །རྣལ་འབྱོར་པ་སྟན་བདེ་བ་ལ་ཉེ་བར་འདུག་སྟེ། བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་ནམ་མཁའ་ལ་བཞུགས་པར་བསམ་སྟེ། དེ་རྣམས་ལ་ཡིད་ཀྱི་རང་བཞིན་ལས་བྱུང་བའི་རྣམ་པ་སྣ་ཚོགས་པའི་མཆོད་པ་བྱས་ནས་སྡིག་པ་བཤགས་པ་ལ་སོགས་པ་བྱའོ། །
[98b.7]དེ་ནས་སྣ་ཚོགས་པའི་གཟུང་བ་དང་འཛིན་པ་སེམས་ཙམ་ཞེས་སྤང་བར་བྱས་ནས་རྨི་ལམ་དང་གཟུགས་བརྙན་ལྟ་བུར་བདག་ཉིད་ཀྱིས་ངེས་པར་བྱས་ཏེ། གུར་གུམ་ལྟ་བུར་དམར་བའི་མུཿཡིག་ལས་སྐྱེས་པའི་ཟླ་བའི་འོད་ཟེར་དམར་པོ་ལས་ཨ་ལ་སོགས་པའི་དབྱངས་ཡིག་འབར་བ་བལྟ་བར་བྱའོ། །
[99a]
[99a.1]དེའི་སྟེང་དུ་མུཿཡིག་ལས་སྐྱེས་པའི་འོད་ཟེར་དམར་པོ་ཅན་གྱི་ཟླ་བའི་དཀྱིལ་འཁོར་ལ་འབར་བའི་ཀ་ཡིག་ལ་སོགས་པ་བལྟ་བར་བྱའོ། །དེའི་སྟེང་དུ་མུཿཡིག་ལས་སྐྱེས་པ་འཕྲོ་ཞིང་དྲི་མ་མེད་པའི་ཨུཏྤལ་དེའི་ཟེའུ་འབྲུ་ལ་མུཿཡིག་གིས་མཚན་པར་བསམས་ལ། དེ་ཡོངས་སུ་གྱུར་པ་
[99a.2]ལས་གུར་གུམ་ལྟ་བུའི་གཞོན་ནུ་ཟུར་ཕུད་ལྔ་པ་རྒྱན་དང་བཅས་ཤིང་། སྒེག་པའི་ཉམས་དང་ལྡན་པ། རལ་གྲི་དང་པོ་ཏི་བསྣམས་པའི་ངག་གི་དབང་ཕྱུག་ཟླ་བའི་གདན་ལ་བདག་ཉིད་བསྒོམ་པར་བྱའོ། །དེའི་ཐུགས་ཀར་མུཿཡིག་ལས་སྐྱེས་པའི་བརྟན་པའི་འཁོར་ལོ་རྩིབས་བརྒྱད་པ་འོད་ཀྱི་རང་བཞིན་
[99a.3]ཅན་ལ་འབར་བའི་ཨ་ལ་སོགས་པས་བསྐོར་བ། ཕྱི་རོལ་དུ་འབར་བའི་ཀ་ལ་སོགས་པའི་ཕྲེང་བས་བསྐོར་བ་སྟེ། དེའི་ལྟེ་བ་ལ་ཨ་ཡིག་གོ། །ཤར་གྱི་རྩིབས་ལ་ར་ཡིག་གོ། །ལྷོའི་རྩིབས་ལ་པ་ཡིག་གོ། །ནུབ་ཀྱི་རྩིབས་ལ་ཙ་ཡིག་གོ། །བྱང་གི་རྩིབས་ལ་ན་ཡིག་གོ། །མེ་ལ་སོགས་པའི་
[99a.4]མཚམས་རྣམས་ལ་ཡང་ནི། །པྲཿཔཉྩ་ཞེས་པའི་ཡི་གེ་རྣམས་གུར་གུམ་ལྟ་བུའི་རྣམ་པར་བསམས་ལ། འཁོར་ལོ་དེའི་འོད་ཀྱི་ཚོགས་ཀྱིས་ལུས་ཀྱི་ནང་གསལ་བར་བྱས་ནས། བ་སྤུ་སོ་སོའི་ཁུང་ནས་ཕྱིར་བྱུང་སྟེ། ཕྱོགས་བཅུའི་འཇིག་རྟེན་གྱི་ཁམས་གསལ་བར་བྱས་ནས་སླར་ཡང་དེ་
[99a.5]བཞིན་དུ་དེ་རྣམས་བ་སྤུའི་ཁུང་བུར་ཕྱི་ནས་རབ་ཏུ་ཞུགས་ཏེ་ལུས་ཀྱི་ནང་གསལ་བར་བྱེད་པར་ཡུན་རིང་དུ་རྣམ་པར་བསམ་པར་བྱ་སྟེ། ཨོཾ་ཨ་ར་པ་ཙ་ན་མུཿཞེས་པ་ནི་བཟླས་པའི་སྔགས་སོ། །བརྟན་པའི་འཁོར་ལོའི་སྒྲུབ་པའི་ཐབས། །བྱས་པའི་བསོད་ནམས་གང་བསགས་པ། །དེ་ཡིས་འགྲོ་བ་
[99a.6]ཐམས་ཅད་ནི། །འཇམ་དཔལ་རྡོ་རྗེ་མཚུངས་པར་ཤོག །ཚིག་ལྷུག་པའི་བརྟན་པའི་འཁོར་ལོའི་སྒྲུབ་ཐབས་རྫོགས་སོ།། {T3440}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་སཱ་དྷ་ནཾ། བོད་སྐད་དུ། འཕགས་པ་འཇམ་དཔལ་གྱི་སྒྲུབ་ཐབས། འཕགས་པ་འཇམ་དཔལ་གཞོན་ནུར་
[99a.7]གྱུར་པ་ལ་ཕྱག་འཚལ་ལོ། །དང་པོར་རེ་ཞིག་ཞལ་བཀྲུ་བ་ལ་སོགས་པ་བྱས་ནས། སྟན་འཇམ་ཞིང་བདེ་བ་ལ་ཉེ་བར་འདུག་སྟེ། རང་གི་སྙིང་གར་པཾ་ཡིག་ལས་སྐྱེས་པའི་པདྨའི་སྟེང་དུ། ཨ་ཡིག་ལས་སྐྱེས་པའི་ཟླ་བའི་དཀྱིལ་འཁོར་གྱི་སྟེང་དུ་མཾ་ཡིག་གི་འོད་ཟེར་གྱིས་འོག་མིན་གྱི་གནས་སུ་
[99b]
[99b.1]བཞུགས་པ་དེ་གདན་དྲངས་ནས། ཐོག་མ་མེད་པ་ནས་ཡང་དག་པར་གྲུབ་པའི་འཇམ་དཔལ་གཞོན་ནུར་གྱུར་པ་མདུན་དུ་བསྒོམ་པར་བྱའོ། །དེ་ནས་ཕྱིའི་མཆོད་པ་མེ་ཏོག་དང་སྤོས་ལ་སོགས་པ་ཕུལ་ནས། མངོན་པར་ཕྱག་འཚལ་ཏེ། ཡང་ཕྱི་ནས་སྡིག་པ་བཤགས་པ་དང་། བསོད་ནམས་ལ་
[99b.2]རྗེས་སུ་ཡི་རང་བ་དང་། དགེ་བ་ཡོངས་སུ་བསྔོ་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། གསོལ་བ་གདབ་པ་དང་། བདག་ཉིད་ངེས་པར་དབུལ་བ་རྣམས་བྱས་ནས། ཚངས་པའི་གནས་བཞི་བསྒོམ་པར་བྱའོ། །ཡང་དངོས་པོ་མཐའ་དག་གི་དེ་ཁོ་ན་ཉིད་
[99b.3]ཀྱི་སྙིང་པོ་བསྡུས་ནས་སྟོང་པ་ཉིད་དུ་བསྒོམ་པར་བྱའོ། །ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཏྨ་ཀོ྅ཧཾ། ཞེས་བརྗོད་ནས། སླར་ཡང་སྨོན་ལམ་རྗེས་སུ་དྲན་ནས་རང་གི་ལུས་གཟུགས་བརྙན་ཙམ་དུ་རྣམ་པར་བལྟས་ནས་པདྨ་དང་ཟླ་བའི་སྟེང་དུ་མྃ་ཡིག་གི་ས་བོན་གྱི་འོད་ཟེར་གྱིས་རབ་ཏུ་བཅུག་ནས། བདག་ཉིད་
[99b.4]འཇམ་དཔལ་གྱི་སྐུར་བསྒོམ་པར་བྱའོ། །སྐུ་མདོག་སེར་པོ་བཤད་པའི་ཕྱག་རྒྱ་འཛིན་པ་རིན་པོ་ཆེའི་རྒྱན་དང་རིན་པོ་ཆེའི་ཅོད་པན་ཅན། གཡོན་པ་ཨུཏྤལ་བསྣམས་པ། སེང་གེའི་གདན་ལ་བཞུགས་ཤིང་སྤྱི་བོར་མི་བསྐྱོད་པ་བཞུགས་པ། ཟླ་བའི་གདན་ལ་ཟླ་བའི་འོད་ཟེར་ལྟ་བུའི་བདག་ཉིད་
[99b.5]བསྒོམ་པར་བྱའོ། །དེ་ནས་གཡས་ཕྱོགས་ལོགས་སུ་སུྂ་ཡིག་གི་ས་བོན་ལས་བྱུང་བའི་ནོར་བཟངས་གཞོན་ནུ་སྣ་ཚོགས་པའི་རིན་པོ་ཆེའི་རྒྱན་ཀྱིས་མཛེས་ཤིང་། རིན་པོ་ཆེའི་ཅོད་པན་ཅན། ཆོས་ཐམས་ཅད་ཀྱི་པོ་ཏི་ཅིག་མཚན་ན་བཟུང་ནས་ཐལ་མོ་སྦྱར་བ་སྔོན་དུ་འགྲོ་བས་བཞུགས་པའོ། །གཡོན་
[99b.6]ཕྱོགས་ལོགས་ན་གཤིན་རྗེ་གཤེད་སྐུ་མདོག་ནག་པོ་ཧཱུཾ་ཡིག་གི་ས་བོན་ལས་བྱུང་བ་ཞལ་འཇིགས་ཤིང་ཕྱག་ན་ཐོ་བ་བསྣམས་པ། སྐྲ་དམར་སེར་གྱེན་དུ་བརྫེས་པ། སྦྲུལ་གྱི་རྒྱན་གྱིས་བརྒྱན་པའོ། །དེ་ནས་གཡས་དང་གཡོན་ཕྱོགས་ལོགས་སུ་ཟླ་བའི་འོད་དང་ཉི་མའི་འོད་དག་གོ། །ཤར་ལ་
[99b.7]སོགས་པའི་ཕྱོགས་ཀྱི་ཆ་ལ་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། འོད་དཔག་མེད་དང་། དོན་ཡོད་གྲུབ་པ་རྣམས་སོ། །མེ་ལ་སོགས་པའི་མཚམས་རྣམས་སུ་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་རྣམས་ཀྱང་ངོ་། །ཞེས་སོ། །དེ་ནས་ཡེ་ཤེས་
[100a]
[100a.1]སེམས་དཔའ་བཅུག་སྟེ། མིག་ལ་སོགས་པ་བྱིན་བརླབས་དང་། ལུས་དང་ངག་དང་ཡིད་བྱིན་གྱིས་བརླབས་ཤིང་དབང་བསྐུར་ནས། མཆོད་པ་དང་བསྟོད་པ་བྱས་ཏེ། སྤྱི་བོར་མི་བསྐྱོད་པས་རྒྱས་གདབ་པོ། །དེ་ནས་བསམ་གཏན་དང་ལྡན་པས་སྔགས་བཟླས་པར་བྱའོ། །དེ་ལ་
[100a.2]སྔགས་ནི་འདིའོ། །ཨོཾ་དྷརྨ་དྷཱ་ཏུ་ཝཱ་གཱི་ཤྭ་རི་མུཿསྭཱ་ཧཱ་ཞེས་སོ། །འཇམ་དཔལ་སེང་གེ་སྒྲའི་སྒྲུབ་ཐབས་རྫོགས་སོ།། {T3441}༄༅༅། །རྒྱ་གར་སྐད་དུ། ཤྲཱི་མན་ཝཱ་གཱི་རཱ་ཛ་སཱ་དྷ་ནཾ། བོད་སྐད་དུ། དཔལ་ལྡན་ངག་གི་རྒྱལ་པོའི་སྒྲུབ་ཐབས། འཕགས་པ་འཇམ་དཔལ་གཞོན་ནུར་གྱུར་
[100a.3]པ་ལ་ཕྱག་འཚལ་ལོ། །འགྲོ་བ་མ་ལུས་པ་ལ་ཡང་དག་བདེ་བའི་མཆོག་འདོད་རང་གི་བདེ་བ་ནི། །ཆུང་ངུ་ཡང་ནི་འདོད་མིན་རང་བཞིན་ཆེན་པོ་ཡང་དག་བླ་མའི་བཀའ་ཡིས་ནི། བློ་གྲོས་དམན་ཤིང་ཆུང་ལ་ཤེས་རབ་ཆུ་སྐྱེས་རྣམ་པར་རྒྱས་བྱེད་མཁས་པ་ཡིས། །བཅོམ་ལྡན་འཇམ་པའི་
[100a.4]དཔལ་གྱི་སྒྲུབ་ཐབས་བདག་གིས་ཡང་དག་རབ་ཏུ་བྲི་བར་བྱ། །དད་པས་དགེ་བའི་མ་མ་ཡང་དག་ཉེར་སྟོན་ཅིང་། །གང་གིས་མི་དགེའི་བྱ་བ་ཡང་ནི་ཡོངས་སྤངས་ཤིང་། །དེ་བཞིན་ཡིད་ནི་དག་པས་བླ་མ་ལ་ཐོས་ནས། །བཅོམ་ལྡན་རྟག་ཏུ་བསྒོམ་པ་ལ་སོགས་རྣམ་པར་བྱ། །དང་པོ་ཡིད་ལ་མངོན་
[100a.5]འདོད་དྲི་མེད་དབེན་པའི་ཕྱོགས། །དྲི་བཟངས་མེ་ཏོག་ལ་སོགས་རྣམ་པ་མང་པོ་དང་། །ཆོམ་པོ་དགྲ་དང་འཚེ་བ་ལ་སོགས་རྣམ་སྤངས་པར། །བྱ་བ་ཀུན་ཟིན་གཞན་ཡང་བདེ་བར་རབ་ཏུ་འདུག །གཡོ་བའི་སེམས་ནི་འབད་པ་ཡིས། །རྩེ་གཅིག་ཏུ་ནི་ངེས་པར་བྱ། །གཞན་དོན་བྱེད་པའི་བསམ་པ་
[100a.6]ཡིས། །བསྒོམ་བྱ་དེ་ཡིས་རྗེས་སུ་ནི། །བྱམས་པས་སེམས་ཅན་རྣམས་ལ་ལུས་གཅིག་ལ་སྐྱེས་མཚུངས་ཤིང་གཉེན་གྱི་མཚན་ཉིད་ལྡན། །སྙིང་རྗེས་སྡུག་བསྔལ་ལས་ཀྱང་སྡུག་བསྔལ་རྒྱུར་གྱུར་འགྲོ་རྣམས་མངོན་པར་འདོན་པར་སྤྲོ། །དགའ་བའི་སེམས་ཀྱི་ཁྱད་འཕགས་མཚན་ཉིད་ལྡན་
[100a.7]པའི་ཡང་དག་དགའ་བ་མཐའ་ཡས་པ། །བཏང་སྙོམས་ལོག་པར་མངོན་ཞེན་ཟད་པའི་རང་བཞིན་དང་བཅས་མཁས་པས་བསྒོམ་པར་བྱ། །དེ་ཡི་རྗེས་སུ་ཇི་སྲིད་ཡིད་ཀྱིས་འདོད་པ་རབ་བརྐྱང་བྱས། །དྲི་མེད་འོད་འཕྲོ་བསིལ་ཟེར་བྱེད་པའི་དཀྱིལ་འཁོར་དཀར་པོའི་མདོག །དེའི་སྟེང་ཤིན་ཏུ་
[100b]
[100b.1]གཞོན་ཞིང་དྲི་མེད་གསེར་གྱི་ཁ་དོག་ཅན། །ཆུ་སྐྱེས་འདབ་མ་དྲི་མེད་འདབ་མ་བརྒྱད་པ་བསྒོམ་པར་བྱ། །ཟླ་བ་ཆུ་སྐྱེས་དག་གི་འོད་ཟེར་རྣམ་པར་བརྐྱང་ཞིང་རྣམ་པར་གཡོ་བའི་མཆོག །སྟེང་དུ་འཕེན་འགྱུར་འོད་ཟེར་རང་བཞིན་ཕུག་ན་གསེར་མདོག་འདྲ་བའི་མཾ་ཡིག་ལ། །སྔོན་མ་དག་
[100b.2]གིས་གཡོགས་བཞིན་འགྲོ་བ་རྣམས་ལ་ཕན་ཕྱིར་སྔགས་པས་རིང་དུ་བསྒོམ། །ཤིན་ཏུ་མཆོག་གྱུར་འཇམ་པའི་རྡོ་རྗེ་གོ་འཕང་མངོན་འདོད་མི་མཆོག་རྣམས་ཀྱིས་སོ། །ཕྱི་ནས་སྐྱེ་དང་རྒ་དང་མི་མཐུན་སྨོད་དང་ལྐུགས་སོགས་སྡུག་བསྔལ་འཁྲུགས་རྣམས་ལ། །ཟླ་བ་ཆུ་སྐྱེས་ཟུང་ལ་མཾ་
[100b.3]གྱི་ཡི་གེ་ལས་བྱུང་འོད་ཀྱིས་འཁྲིགས་བྱ་སྟེ། །ཁམས་གསུམ་བལྟ་ཞིང་བལྟས་པས་བདེ་བའི་མཆོག་རྣམས་ཀུན་གྱི་སངས་རྒྱས་དང་མཚུངས་པ། །བདག་གིས་ལེགས་བྱས་འདིར་ཡང་ཡིད་ནི་ཡོངས་རྫོགས་བདག་ཉིད་རྣམ་པར་བལྟ་བར་བྱ། །ཕྱི་ནས་ཕྱོགས་བཅུ་རྣམས་སུ་བཞུགས་པའི་བླ་
[100b.4]མ་དང་ནི་དེ་བཞིན་གཤེགས་རྣམས་དང་། །དེ་བཞིན་དཔལ་ལྡན་བྱང་ཆུབ་སེམས་དཔའ་སྐུ་རྣམས་ཐམས་ཅད་འོད་ཀྱིས་གདན་དྲངས་ཏེ། །དེ་རྣམས་མདུན་བྱས་ཡིད་ཀྱི་ཤིང་རྟའི་རང་བཞིན་ལས་སྐྱེས་མཆོད་པའི་ཆོ་ག་ཡིས། །སྣ་ཚོགས་མེ་ཏོག་དྲི་བཟངས་བདུག་སྤོས་སྣ་ཚོགས་རྣམས་ཀྱིས་ཡང་
[100b.5]དག་མཆོད་བྱས་ཏེ། །དེ་རྣམས་མདུན་དུ་དང་པོར་ཡང་ནི་སྡིག་པ་བཤགས་པ་ལ་སོགས་རྣམས་བྱས་ནས། །དེ་ནས་དེ་ལས་དེ་བཞིན་འོད་ཟེར་རྣམས་ཀྱིས་བ་སྤུའི་ཁུང་ཞུགས་གཅིག་ཏུ་སོན། །ཚོགས་པའི་རྣམ་པ་དེ་ཡིས་རབ་ཞུགས་སྙིང་གར་བལྟ་ཞིང་དེ་ནས་དེ་བྱུང་བའི། །རྨོངས་པའི་རི་བོ་ཆེན་
[100b.6]པོ་འཇོམས་མཁས་ཁྱབ་བདག་འཇམ་པའི་རྡོ་རྗེ་བསྒོམ་པར་བྱ། །དྲི་མེད་བཅུ་དྲུག་ལོ་ལོན་ལྟར་མཛེས་སེང་གེ་སྔོན་པོའི་སྟེང་དུ་བཞུགས་མཛད་ཅིང་། །ཕྱག་གི་པདྨ་ཟུང་དག་བཤད་པའི་ཚུལ་དུ་རྣམ་འཁྲིགས་ཞབས་གཡོན་སྐྱིལ་ཀྲུང་ཕྱེད། །ཚོགས་ལ་བརྟེན་ལས་མཚུངས་མེད་ཤིན་ཏུ་མཛེས་ཤིང་
[100b.7]ཤིན་ཏུ་རིང་མིན་ཐུང་ངུའང་མིན། །རིན་ཆེན་གསེར་དང་ནོར་བུའི་རྣམ་པ་སྣ་ཚོགས་རྒྱན་གྱི་ཕྲེང་བས་ཀུན་ནས་བརྒྱན། །བདེན་པ་མ་ཡིན་རྫུན་པའང་མིན་པའི་མེ་ལོང་མཐིལ་དུ་གཟུགས་བརྙན་ལྟ་བུར་གསལ་གྱུར་པ། །འགྲོ་བ་ཀུན་ལ་ཡོངས་སུ་སྐྱབས་སྦྱིན་སྨྲ་བའི་མགོན་པོ་དཔའ་བོ་གཞོན་ནུ་
[101a]
[101a.1]བསྒོམ་པར་བྱ། །ཕྱི་ནས་བདག་ཉིད་དེ་བཞིན་སྡིག་པ་རྣམས་ནི་རྣམ་པར་བྱང་གྱུར་འཇམ་པའི་རྡོ་རྗེའི་སྐུར་གྱུར་པ། །མཁས་པས་ཇི་སྲིད་བཅོམ་ལྡན་སྐུ་དང་མཚུངས་པར་མ་གྱུར་བར་དུ་རིང་དུ་ཡང་ནི་བསྒོམ་པར་བྱ། །བསྒོམས་པས་ངལ་ན་སྔགས་བཟླས་ཏེ། །ཏ་མཐའ་ར་མཐའ་ས་མཐའ་དང་། །
[101a.2]དེ་བཞིན་གསལ་བྱེད་རིམ་པའི་ཚོགས། །ཨི་ཡིག་དང་ནི་སྣ་ལྡན་བཅས། །འདི་ཡི་ཁྱད་པར་གཞན་རྣམས་ནི། །བླ་མ་དམ་པའི་གསུང་བཞིན་དུ། །དྲི་མེད་རྣམ་དག་རབ་ཏུ་གཟུང་བྱ་བློ་ལྡན་མཁས་པ་ཡིས། །རབ་མཆོག་བླ་མའི་བཀའ་ཡིས་བསམ་གཏན་སྔགས་ཀྱི་བྱ་བ་བྱ། །ཁྱད་པར་ཀུན་ནས་གསུངས་
[101a.3]པ་མཐའ་དག་བདག་གིས་ཤེས་མི་ནུས། །གལ་ཏེ་ཡིད་ཀྱིས་ཀྱང་ནི་འཇམ་དཔལ་ཤིན་ཏུ་ངོ་མཚར་ཞིང་། །ཡང་དག་སྒྲུབ་བྱེད་བཅོམ་ལྡན་རྟག་ཏུ་འཛིན་བྱེད་གྱུར་པ་ཡིས། །དངོས་གྲུབ་བླ་མ་དམ་པའི་གསུང་ལས་བློ་གྲོས་དང་ལྡན་ཞིང་། །དེ་བཞིན་དུ་ཡང་མི་ཤེས་མུན་པའི་ཚོགས་རྣམས་ངེས་འཇོམས་
[101a.4]འགྱུར། །ཡང་དག་བླ་མའི་བཀའ་དྲིན་གྱིས་ནི་བློ་གྲོས་དམན་པ་བདག་གིས་འཇམ་པའི་དཔལ། །གཞོན་ནུའི་སྒྲུབ་ཐབས་འདི་བྱས་དཔག་མེད་བསོད་ནམས་ཚོགས་ནི་གང་ཞིག་བསགས་གྱུར་པ། །དེ་ཡིས་འདིར་ནི་མི་དགེ་སྤངས་ཤིང་དཔལ་ལྡན་འཇམ་པའི་རྡོ་རྗེ་དཔེ་མེད་པ། །དཔལ་དང་ཡིད་བཞིན་
[101a.5]ནོར་དང་དཔག་བསམ་ལྗོན་པ་ལྟ་བུར་འགྲོ་ཀུན་ཐོབ་གྱུར་ཅིག །དཔལ་ལྡན་ངག་གི་རྒྱལ་པོའི་སྒྲུབ་ཐབས་པཎྜི་ཏ་དཔལ་ལྡན་ཡིད་བཞིན་ནོར་བུ་སྦྱིན་པས་མཛད་པ་རྫོགས་སོ།། {T3442}༄༅༅། །རྒྱ་གར་སྐད་དུ། ཨཱརྱ་ཝཱ་གཱི་རཱ་ཛ་མཉྫུ་ཤྲཱི་སཱ་དྷ་ནཾ། བོད་སྐད་དུ། འཕགས་པ་འཇམ་དཔལ་
[101a.6]ངག་གི་རྒྱལ་པོའི་སྒྲུབ་ཐབས། འཇམ་དཔལ་མགོན་ལ་ཕྱག་འཚལ་ལོ། །གུར་གུམ་བཟང་པོ་ལྟར་དམར་གཞོན་ནུའི་སྐུ་ལ་དཔལ་གྱིས་མཚན། །རྫོགས་པའི་སངས་རྒྱས་འོད་ཀྱིས་རྨོངས་པའི་དྲ་བ་བཅོམ་པ་བཞིན། །དབང་ཕྱུག་ཡོངས་བཅིངས་ཕྱག་གིས་དམ་ཆོས་འཆད་པའི་ཚུལ་མཛད་པ། །
[101a.7]རོལ་པའི་སྟབས་བཞུགས་འདོད་སྦྱིན་ངག་གི་རྒྱལ་པོ་ལ་ཕྱག་འཚལ། །སྔ་བར་ལངས་ཏེ་དང་པོར་ནི། །པཾ་ལས་སྙིང་གར་སྣ་ཚོགས་པད། །ཨ་ལས་ཟླ་བའི་དཀྱིལ་འཁོར་སྟེང་། །ཧྲཱིཿཡིག་གུར་གུམ་ལྟ་བུར་དམར། །བལྟས་ནས་ཞལ་བསང་ལ་སོགས་བྱ། །བསམ་གཏན་ཁང་པ་གཙང་མ་
[101b]
[101b.1]རུ། །བདེ་བའི་སྟན་ལ་ཡང་དག་གནས། །སྔགས་དང་སངས་རྒྱས་ཡོན་ཏན་གནས། །བྱམས་པས་འགྲོ་ལ་བུ་སྡུག་བཞིན། །དགའ་བས་ཡོན་ཏན་སྟོང་ལྡན་ལྟར། །སྡུག་བསྔལ་རྒྱུར་གྱུར་སྡུག་བསྔལ་ལས། །གདོན་པར་འདོད་པའི་སྙིང་རྗེ་ཡིས། །རྟག་ཏུ་རབ་དགའ་དེ་བཞིན་དུ། །ཡོན་ཏན་
[101b.2]དམ་པ་རབ་སྦྱོར་འདོད། །རང་གི་དོན་ལ་མི་ལྟ་བར། །བཏང་སྙོམས་གཞན་གྱི་དོན་བྱེད་པ། །སྔགས་པས་བསྒོམ་བྱ་འོད་ཟེར་ཚོགས། །སྤྲོས་ནས་རྒྱལ་རྣམས་གདན་དྲངས་ཏེ། །དེ་ཡིས་ནམ་མཁའ་གང་བར་བལྟ། །ཡིད་ཀྱི་རང་བཞིན་ལས་བྱུང་མཆོད། །བྱུག་པ་དྲིལ་ཕྱིས་ཁྲུས་རྣམས་དང་། །སྣ་
[101b.3]ཚོགས་རྒྱན་གྱིས་བརྒྱན་པར་བྱ། །མཆོད་པའི་སྤྲིན་ཚོགས་འཕྲོ་བ་ཡི། །ཁམས་གསུམ་ཡང་དག་ལྷ་རུ་སྤྲོ། །ཡང་ན་སོ་སོ་གྲངས་མེད་པའི། །ལུས་སྤྲུལ་ནས་ནི་ཕྱག་བྱའོ། །འདོད་ཆགས་ཞེ་སྡང་གཏི་མུག་དང་། །རྣམ་གསུམ་ལུས་ངག་ཡིད་དབང་གིས། །བྱས་པའི་སྡིག་དང་བྱེད་པ་
[101b.4]ལ། །རྗེས་སུ་ཡི་རང་དེ་རྣམས་བཤགས། །སེམས་ཅན་དོན་བྱེད་དང་བཅས་པའི། །སྡོམ་པ་ཡང་ནས་ཡང་དུ་གཟུང་། །རྫོགས་པའི་སངས་རྒྱས་འཇམ་དབྱངས་སོགས། །སྦྱིན་པ་ལ་སོགས་དགེ་ལས་སྐྱེས། །ཡང་དག་རྫོགས་ལ་གསོལ་འདེབས་ཤིང་། །ཡུན་རིང་དམ་ཆོས་གསུང་བར་
[101b.5]བསྐུལ། །དཀོན་མཆོག་གསུམ་ལ་སྐྱབས་འགྲོ་ཞིང་། །བྱང་ཆུབ་སེམས་ཀྱི་ལམ་མཆོག་བསྟེན། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། །དེ་ནས་སྣ་ཚོགས་པདྨ་གནས། །ཨོཾ་ཡིག་ལས་སྐྱེས་ཟླ་སྟེང་གནས། །ཡི་གེའི་ཚོགས་འཕྲོ་བལྟ་བྱས་ནས། །འགྲོ་བ་རྣམས་ལ་འཇམ་དབྱངས་
[101b.6]མཆོག །དགུག་གཞུག་བྱས་ནས་སྔགས་པ་ཡིས། །ངག་གི་རྒྱལ་པོ་བསྒོམ་པར་བྱ། །གུར་གུམ་ལྟར་དམར་མཛེས་པའི་སྐུ། །སྒྱུ་མ་འདོད་ལྷ་ལས་རྒྱལ་བ། །ཧ་རི་ཧ་རིའི་གདན་ལ་བཞུགས། །འཁྲུལ་པ་མེད་པ་རོལ་པའི་སྟབས། །ཕྱག་གཡོན་སྡོང་བུ་དང་བཅས་པའི། །ཨུཏྤལ་སྔོན་པོ་ཡོངས་སུ་
[101b.7]བསྣམས། །རྫོགས་པའི་སངས་རྒྱས་ཡོན་ཏན་ཚོགས། །རིན་ཆེན་རྒྱན་གྱིས་རབ་མཛེས་པ། །འོད་ཟེར་འཕྲོ་ཞིང་འཐོན་འགྱུར་ནས། །སངས་རྒྱས་ཚོགས་ཀྱི་ཕྲེང་བ་བལྟ། །ཆོས་ཀྱི་འཁོར་ལོའི་ཕྱག་རྒྱ་ཆེ། །ཕྱག་གི་པདྨ་ངེས་པར་སྦྱར། །དེ་བཞིན་ཨུཏྤལ་དང་འདྲ་བའི། །ཧྲཱིཿཡིག་འོད་ཟེར་སྣ་
[102a]
[102a.1]ཚོགས་ཀྱིས། །གཞན་གྱི་མགོན་བྱེད་གདན་དྲངས་ཏེ། །གཞལ་ཡས་ཁང་པ་དང་མཚུངས་པར། །དེ་དག་མཚུངས་ཉིད་གདན་དྲངས་ཏེ། །དམ་ཚིག་རྣམ་གསུམ་བརྟན་པར་བྱ། །དེ་ནས་ཡང་དག་རྫོགས་སངས་རྒྱས། །དགུག་གཞུག་དབང་དུ་བྱ་བ་རྣམས། །ཨོཾ་བཛྲ་སཏྭ་ས་མ་ཡ། ཏྲཾ་ཤྱ་ཧོ།
[102a.2]ས་མ་ཡ་སྟྭཾ། ས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ་ཛཿཧཱུཾ་བཾ་ཧོཿ ཨོཾ་གྱིས་སྐུ་བྱིན་གྱིས་བརླབ། ཨཱཿཡིས་གསུང་བྱིན་གྱིས་བརླབ། ཧཱུཾ་གིས་ཐུགས་བྱིན་གྱིས་བརླབས་ནས། ཨུཏྤ་ལའི་ཕྱག་རྒྱ་དང་། ཡི་གེའི་ཚོགས་ཀྱིས་ཡེ་ཤེས་བྱིན་གྱིས་བརླབས་ཏེ། འོད་ཟེར་གྱིས་ཡང་དག་པར་བསྐུལ་ནས།
[102a.3]རྫོགས་པའི་སངས་རྒྱས་ཀྱི་སྐུ་ལས་འཐོན་ཏེ་ལྷའི་རྣམ་པར་བཀུག་ནས་བུམ་པའི་ཡེ་ཤེས་ཀྱི་ཆུ་དང་། རྡོ་རྗེ་སྤྱི་བོར་སྦྱིན་པར་བྱའོ། །ཕྱོགས་བཅུའི་སངས་རྒྱས་རྣམས་ཀྱིས་མཆོད། །སངས་རྒྱས་མཆོད་པའི་དཔུང་གཉེན་གྱིས། །སླར་ཡང་སྲིད་པར་འབྱུང་བ་ཡི། །སྲིད་པ་གྲུབ་ཅིང་དག་པར་འགྱུར། །སླར་
[102a.4]ཡང་བསྒོམ་བྱ་ལས་ཐོབ་པ། །ལུས་དང་སེམས་ནི་ཤིན་ཏུ་སྦྱང་། །དོ་ཤལ་ཕྲེང་བའི་རིམ་པ་ཡིས། །དེ་ནས་སྔགས་བཟླས་ཡང་དག་བརྩམ། །ཁམས་གསུམ་མ་ལུས་པ་ཡོན་ཏན་གྱི་རྒྱ་མཚོར་བྱས་ནས་གཞུག་པ་ལ་སོགས་པ་བྱས་ཏེ། རྣམ་པར་བསྒོམས་ལ་ཨོཾ་ཨཱཿཧཱུཾ་ཞེས་པས་བཀུག་ནས་བཟོད་པར་
[102a.5]གསོལ་བར་བྱའོ། །བདག་ཉིད་འཇམ་པའི་མཆོག་ཏུ་འགྱུར། །འགྲོ་རྣམས་དེ་ཡི་རང་བཞིན་བལྟ། །གང་དང་གང་སྦྱོར་ལས་རྣམས་ལ། །སེམས་ཅན་དོན་ལ་དེ་བཞིན་དགོད། །དཀོན་མཆོག་གསུམ་ལ་རབ་དད་པའི། །སློབ་མ་རྣམས་ཀྱིས་ཤེས་བྱ་ལ། །འཇིག་རྟེན་དངོས་གྲུབ་ངེས་པ་ནི། །ངག་གི་རྒྱལ་
[102a.6]པོའི་སྒྲུབ་ཐབས་ཡིན། །བླ་མ་དང་། སངས་རྒྱས་དང་། བྱང་ཆུབ་སེམས་དཔའ་དང་། ཡི་དམ་གྱི་ལྷ་ཐམས་ཅད་ནང་དུ་བསྒོམས་ནས། དེའི་མཎྜལ་མདོར་བསྡུས་པ་བརྩམ་པར་བྱའོ། །ཨོཾ་ཧྲཱིཿསྭཱ་ཧཱ་ཞེས་པ་ནི་ལག་པ་བཀྲུ་བ་དང་། ཞལ་བསིལ་བའི་སྔགས་སོ། །ཨོཾ་ཧཱུཾ་སྟན་བྱིན་གྱིས་བརླབ་པའི་
[102a.7]སྔགས་སོ། །ཨོཾ་བཛྲ་བྷཱུ་མི་ཧཱུཾ། ས་ཡོངས་སུ་གཟུང་བའི་སྔགས་སོ། །ཨོཾ་སརྦ་བིགྷྣཱཾ་ནུད་སཱ་ར་ཡ་ཧཱུཾ་སྭཱ་ཧཱ། བའི་ལྕི་བ་ལ་སོགས་པ་ལེན་པའི་སྔགས་སོ། །དེ་ནས་ལེགས་པར་བྱུགས་ནས། ཨོཾ་བཛྲ་རེ་ཁེ་ཧཱུཾ་ཞེས་པ་ནི་རེ་ཁ་བྱིན་གྱིས་བརླབ་པའི་སྔགས་སོ། །ཡང་མེ་ཏོག་གཅིག་མཎྜལ་དུ་ཕུལ་ནས།
[102b]
[102b.1]ཨོཾ་སུ་རེ་ཁེ་སརྦ་ཏ་ཐཱ་ག་ཏཱ་དྷི་ཏིཥྛནྟུ་སྭཱ་ཧཱ། ཞེས་བརྗོད་ནས་ལག་པ་བཀྲུ་བར་བྱའོ། །དེའི་རྗེས་སུ་མེ་ཏོག་ཅིག་ལ་བཟླས་ནས། ཨོཾ་མ་ཎི་དྷ་རི་བཛྲ་ཎི་མ་ཧཱ་པྲ་ཏི་སཱ་རེ་རཀྵ་རཀྵ་མཱཾ་ཧཱུཾ་ཕཊ་སྭཱ་ཧཱ། ཞེས་པས་རང་གི་སྤྱི་བོར་མེ་ཏོག་ཅིག་བཞག་ནས་བདག་ཉིད་བསྲུང་བར་བྱའོ། །ཡང་ཨོཾ་ཨཱཿཧཱུཾ་ཞེས་པ་ནི་བདག་ཉིད་
[102b.2]བསྲུང་བའི་སྔགས་སོ། །མཎྜལ་དེ་ལ་སྣ་ཚོགས་པདྨའི་གཟུགས་སུ་དམིགས་ནས། དེའི་སྟེང་དུ་ཟླ་བ། དེའི་སྟེང་དུ་གུར་གུམ་ལྟར་དམར་བའི་བཅོམ་ལྡན་འདས་ཀྱི་ས་བོན་གྱི་འོད་ཟེར་གྱིས་ཐོག་མ་མེད་པ་ནས་ཡང་དག་པར་གྲུབ་པའི་བཅོམ་ལྡན་འདས་རབ་ཏུ་འབར་བ་གདན་དྲངས་ཏེ། རིམ་པ་བཞིན་དུ་
[102b.3]བྱོན་ནས་དེ་ལ་དེ་བཞིན་དུ་རབ་ཏུ་ཞུགས་ཤིང་བཅོམ་ལྡན་འདས་བསྐྱེད་ནས། ཨོཾ་མཉྫུ་གྷོ་ཥཱ་ཡ་བཛྲ་པུཥྤེ་ཧཱུཾ་ཨོཾ་ཨཀྵོ་བྷྱ་བཛྲ་པུཥྤེ་ཧཱུཾ། ཨོཾ་བཛྲ་བཻ་རོ་ཙ་ནཱ་ཡ་བཛྲ་པུཥྤེ་ཧཱུཾ། རཏྣ་སཾ་བྷ་བ་དང་། ཨ་མི་ཏཱ་བྷཱ་དང་། ཨ་མོ་གྷ་སིདྡྷི་དང་། ལོ་ཙཱ་ན་དང་། མཱ་མ་ཀཱི་དང་། པཎྜ་རཱ་དང་། ཏཱ་རཱ་རྣམས་སྔོན་མ་
[102b.4]བཞིན་དུ་མེ་ཏོག་དང་། སྤོས་དང་། མར་མེ་དང་། ཞལ་ཟས་དང་། དྲི་བཟངས་དང་། གོས་འཕྱང་བ་ལ་སོགས་པ་བྱིན་གྱིས་བརླབས་ནས་དབུལ་བར་བྱའོ། །ཕྱག་འཚལ་བ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་རྣམས་བྱས་ནས་སྔགས་བཟླས་པར་བྱའོ། །དེ་ནས་
[102b.5]གཤེགས་པ་ནི་ཨོཾ་བཛྲ་མུཿཞེས་སོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱ་ཏ་ཨོཾ་ཨཱཿཧཱུཾ་ཕཊ་སྭཱཧཱ། ཞེས་པ་ནི་འབྱུང་པོ་ཐམས་ཅད་ཀྱི་སྔགས་སོ། །ཨོཾ་ཧ་རཱི་ཏྱཻ་མ་ཧཱ་ཡཀྵི་ཎེ་ཧ་རེ་ཧ་རེ། སརྦ་པཱ་པ་ནི་མ་ཀཱིཾ་སརྦ་ཡ་ཀྵཱིཾ་ཎི་པྲ་བེ་ཤ་ནི་སྭཱ་ཧཱ། འཕྲོག་མའི་སྔགས་སོ། །ཨོཾ་ཨ་གྲ་པིཎ་ཌཱ་ཤིབྷྱཿསྭཱ་ཧཱ།
[102b.6]ཕུད་ཀྱི་ཆང་བུའི་སྔགས་སོ། །ཨོཾ་ཨུ་ཙྪིཥྚ་པིཎྜཱ་ཤ་ནེ་བྷྱཿསྭཱཧཱ། ལྷག་མའི་ཆང་བུའི་སྔགས་སོ། །ཨོཾ་ཨཱཿསརྦ་ཏ་ཐཱ་ག་ཏཱ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཧཱུཾ་ཞེས་པ་ནི་སྐུ་གཟུགས་ལ་སོགས་པ་སྐུ་ཁྲུས་གསོལ་བའི་སྔགས་སོ། །རྡོ་རྗེ་རྣལ་འབྱོར་མས་གསུངས་པའི་འཇམ་དཔལ་ངག་གི་རྒྱལ་པོའི་
[102b.7]སྒྲུབ་ཐབས་རྫོགས་སོ། {T3443}༄༅༅། །རྒྱ་གར་སྐད་དུ། བཱ་དཱི་རཱ་ཛ་སཱ་དྷ་ནཾ། བོད་སྐད་དུ། ངག་གི་རྒྱལ་པོའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་བསྒོམས་ལ། སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་ལ་ཐླྷཱིཾ་གི་
[103a]
[103a.1]ཡི་གེ་དམར་པོ་བལྟས་ནས། དེའི་འོད་ཟེར་གྱིས་དེ་བཞིན་གཤེགས་པའི་ཡེ་ཤེས་ཙམ་ཡང་དག་པར་བཀུག་སྟེ། དེ་བཞིན་དུ་བཅུག་ནས་དེ་ཡོངས་སུ་གྱུར་པ་ལས་ཨུཏྤ་ལ། དེའི་དབུས་སུ་ཟླ་བ་ལ་གནས་པའི་ས་བོན་དེ་ལས་འོད་ཟེར་འཕྲོས་འཇམ་དཔལ་ངག་གི་རྒྱལ་པོའི་སྐུར་
[103a.2]འགྲོ་བ་རྣམས་བསྐྱེད་ནས། རང་གི་ས་བོན་ལ་དེ་བཞིན་དུ་ཞུགས་ཏེ། དེ་ཡོངས་སུ་གྱུར་པ་ལས་བདག་ཉིད་སྐད་ཅིག་གིས་འཕགས་པ་འཇམ་དཔལ་དུ་བསྐྱེད་པར་བྱའོ། །ཕྱག་གཉིས་པ་ཞལ་གཅིག་པ། སྐུ་མདོག་སེར་པོ་རོལ་པའི་ཕྱག་རྒྱས་སེང་གེའི་གདན་ལ་བཞུགས་པ། ཕྱག་གཉིས་བཤད་
[103a.3]པའི་ཕྱག་རྒྱས་འགྱིང་པ། རིན་པོ་ཆེའི་ཅོད་པན་ཅན་མཛེས་པའི་རྒྱན་གྱིས་བརྒྱན་པ། ཕྱག་གཡོན་ན་ཨུཏྤ་ལ་བསྣམས་པ། དབུ་ལ་མི་བསྐྱོད་པའི་དབུ་རྒྱན་ཅན། དེ་བཞིན་དུ་དམ་ཚིག་སེམས་དཔའ་བསྐྱེད་ནས། སྙིང་གའི་ས་བོན་གྱིས་ཡེ་ཤེས་སེམས་དཔའ་མདུན་དུ་གདན་དྲངས་ཏེ་
[103a.4]བལྟས་ནས། ས་མ་ཡ་སྟྭཾ། དྲྀ་ཤྱ་ཧོཿ། ས་མ་ཡ་སྟྭཾ། ས་མ་ཡ་ཧོ། ས་མ་ཡ་སྟྭཾ། ཨ་ཧཾ། ཞེས་པས་དམ་ཚིག་བསྐུལ་བར་བྱ་སྟེ། ཛཿཧཱུཾ་བཾ་ཧོཿ། ཞེས་པའི་ཡི་གེ་བཞིས་དགུག་གཞུག་ལ་སོགས་པ་བྱའོ། །སྔགས་ནི་འདི་བཞིན་དུ། པར་ཎ་སཾ་དོ་ཧཱ་རཱ་ཛཿངག་གི་རྒྱལ་པོའི་སྒྲུབ་ཐབས་
[103a.5]རྫོགས་སོ།། {T3444}༄༅༅། །རྒྱ་གར་སྐད་དུ། མཉྫུ་གྷོ་ཥ་སཱ་དྷ་ནཾ། བོད་སྐད་དུ། འཇམ་པའི་དབྱངས་ཀྱི་སྒྲུབ་ཐབས། འཕགས་པ་འཇམ་པའི་དབྱངས་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་དང་པོ་སྙིང་གར་ཟླ་བའི་དབུས་སུ་ས་བོན་དྲུག་པའི་ལྔ་པ་ལྔ་པའི་དབྱངས་ཀྱིས་
[103a.6]ཡོངས་སུ་གང་བ་སྟོང་པ་ཉིད་གཉིས་ལྷས་མནན་པའོ། །དེའི་ས་བོན་གྱི་འོད་ཟེར་ལས་སྐྱེས་པའི་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་བལྟས་ནས། མཆོད་ཅིང་མངོན་པར་ཕྱག་འཚལ་ནས། སྔགས་འདི་ཡིས། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་
[103a.7]གནྡྷེ་ཧཱུཾ། ཨོཾ་བཛྲ་ནཻ་བི་དྱ་ཧཱུཾ། ཞེས་བརྗོད་ནས། དེ་ནས་དཀོན་མཆོག་གསུམ་ལ་སྐྱབས་སུ་འགྲོ་བ་ལ་སོགས་པ་བརྗོད་ནས། སྨོན་ལམ་སྔོན་དུ་འགྲོ་བས་ཆོས་ཐམས་ཅད་བདག་མེད་པར་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་སོ། །དེ་ནས་ས་བོན་ལ་ཁམས་གསུམ་མ་ལུས་པ་
[103b]
[103b.1]སྒྱུ་མའི་དཔེའི་རྣམ་པར་བསམས་ཏེ། བལྟས་ཤིང་རེག་ནས་ཐམས་ཅད་སྒྱུ་མ་ཇི་ལྟ་བ་བཞིན་དུའོ། །དམིགས་པ་མེད་པས་འགྲོ་བ་གནས་པ་ཐམས་ཅད་དགྲོལ་བར་བྱའོ། །ཨོཾ་སྭ་བྷཱ་བ་ཤུདྡྷཿ་སརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྔོན་དུ་གསུངས་པའི་ས་བོན་ལས་འཁྲུངས་པའི་དཔལ་ལྡན་འཇམ་པའི་རྡོ་རྗེ་ཟུར་ཕུད་
[103b.2]ལྔས་དབུ་ལ་བརྒྱན་པ་གཞོན་ནུ་རྒྱན་ཐམས་ཅད་ཀྱིས་བརྒྱན་པ། གུར་གུམ་གྱི་མདོག་ལྟར་དམར་བ། ཕྱག་གཡོན་ན་ཨུཏྤལ་བསྣམས་པ་གཡས་པ་རོལ་པའི་སྟབས་ཀྱིས་གནས་པ། སེང་གེའི་གདན་ལ་བཞུགས་པའི་བདག་ཉིད་གཞོན་ནུའི་སྐུ་བསམ་པར་བྱའོ། །ཕྱག་རྒྱ་ནི་འདི་ཡིན་ཏེ། ཕྱག་
[103b.3]གཉིས་ཐལ་མོ་སྦྱར་ནས་མཛུབ་མོ་དག་དང་མིང་མེད་དག་གི་སེན་མོས་ཨུཏྤ་ལ་ཁ་འབྱེད་པའི་ཚུལ་གྱིས་གནས་པའོ། །སྙིང་ག་མཛོད་སྤུ་མགྲིན་པའི་སྟེང་རྣམས་སུ་བསྲུང་བར་བྱས་ནས་བཟླས་པར་བྱའོ། །ཨོཾ་ཝཱ་གཱི་ཤྭ་རི་མུཾ། འཕགས་པ་འཇམ་དཔལ་དབྱངས་ཀྱི་སྒྲུབ་ཐབས་རྫོགས་སོ།།
[103b.4]{T3445}༄༅༅། །རྒྱ་གར་སྐད་དུ། ཨཱརྱ་ཤྲཱི་མཱ་ན་བཱ་དཱི་རཱ་ཛ་སཱ་དྷ་ནཾ། བོད་སྐད་དུ། དཔལ་ལྡན་འཕགས་པ་ངག་གི་རྒྱལ་པོའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །ཡེ་ཤེས་རང་བཞིན་མགོན་ཕྱག་འཚལ། །བྱ་བའི་རྒྱུད་ཀྱི་རྗེས་འབྲངས་ནས། །དངོས་གྲུབ་ཐམས་ཅད་
[103b.5]རབ་སྟེར་བ། །དེ་ཡི་སྒྲུབ་ཐབས་བདག་གིས་བརྗོད། །དང་པོར་རེ་ཞིག་སྔགས་པས་ཡིད་དང་མཐུན་པའི་གནས་ཇི་ལྟར་བདེ་བས་ཉེ་བར་འདུག་སྟེ། སྡུག་བསྔལ་གྱི་རྒྱ་མཚོར་ལྷུང་བའི་སེམས་ཅན་གྱི་ཁམས་ལ་བལྟས་ནས། སྨོན་ལམ་གདབ་པར་བྱའོ། །སྡུག་བསྔལ་བའི་སེམས་ཅན་འདི་
[103b.6]རྣམས་འཁོར་བར་འཁོར་ཏེ། དེ་རྣམས་ལ་བདག་གིས་འཇམ་པའི་དབྱངས་སུ་གྱུར་ནས། བླ་ན་མེད་པའི་གོ་འཕང་མཆོག་ལ་རབ་ཏུ་དགོད་པར་བྱའོ་ཞེས་སོ། །དེ་ནས་བྲིས་སྐུ་ལ་སོགས་པ་བཀྲམ་ནས་བཅོམ་ལྡན་འདས་འཇམ་པའི་དབྱངས་དང་། བླ་མ་དང་། སངས་རྒྱས་དང་། བྱང་ཆུབ་སེམས་
[103b.7]དཔའ་རྣམས་མདུན་དུ་དམིགས་ཏེ། མེ་ཏོག་ལ་སོགས་པ་རྣམས་ཀྱིས་མཆོད་ཅིང་ཕྱག་འཚལ་ནས། སྡིག་པ་བཤགས་པ་དང་། སླན་ཆད་མི་བགྱིད་ཅིང་སྡོམ་པ་དང་། བསོད་ནམས་ལ་རྗེས་སུ་ཡི་རང་བ་དང་། བདག་ཉིད་དབུལ་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་
[104a]
[104a.1]སེམས་བསྐྱེད་པ་ཡང་བྱས་ནས་ཚིགས་སུ་བཅད་པ་འདི་གཉིས་ཀྱིས་བྱ་སྟེ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །བྱང་ཆུབ་སེམས་མཆོག་
[104a.2]བདག་གིས་བསྐྱེད། །སེམས་ཅན་ཐམས་ཅད་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད། །འགྲོ་ལ་ཕན་ཕྱིར་སངས་རྒྱས་ཤོག །དེ་ནས་ལམ་བསྟེན་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་པའི་དོན་ཁོང་དུ་ཆུད་པར་བྱས་ནས། ལན་གསུམ་བརྗོད་
[104a.3]ནས་རང་བཞིན་གྱིས་རྣམ་པར་དག་ཅིང་ཆོས་ཐམས་ཅད་བདག་མེད་པར་མོས་པ་བྱའོ། །ཁམས་གསུམ་པོ་ནི་སྟོང་པ་ཉིད་དང་མཚན་ཉིད་མེད་པ་གཟུང་བ་དང་། འཛིན་པ་དང་བྲལ་བར་བལྟས་ནས། རང་གི་སྙིང་གར་ཨ་ཡིག་ལས་ཟླ་བའི་དཀྱིལ་འཁོར། དེའི་སྟེང་དུ་མུཿཡིག་གསེར་བཙོ་མའི་
[104a.4]ཁ་དོག་ལྟ་བུ་དེ་ལས་བྱུང་བའི་འོད་ཟེར་གྱི་ཚོགས་ཀྱིས་འཇིག་རྟེན་གྱི་ཁམས་ཐམས་ཅད་དུ་བཀྱེ་ཞིང་སྣང་བར་མཛད་ནས་ཇི་ལྟར་སྐལ་བ་དང་ལྡན་པའི་སེམས་ཅན་གྱི་དོན་མཛད་དེ། དེ་བཞིན་གཤེགས་པ་ཐམས་ཅད་བསྐུལ་ནས་དེའི་འོད་དེ་ས་བོན་ལ་རབ་ཏུ་ཞུགས་ཏེ། དེ་ཐམས་ཅད་
[104a.5]ཡོངས་སུ་གྱུར་པ་ལས་བདག་ཉིད་འཇམ་པའི་དབྱངས་ཀྱི་སྐུར་བསྒོམ་པར་བྱའོ། །གསེར་ཞུན་མ་ལྟ་བུ་ཞལ་གཅིག་ཕྱག་གཉིས་པ། སེང་གེའི་སྟེང་ན་པདྨ་དང་ཟླ་བའི་གདན་ལ་སྐྱིལ་ཀྲུང་ཕྱེད་པས་བཞུགས་པ། ཟུར་ཕུད་གསུམ་པའི་རིན་པོ་ཆེའི་དབུ་རྒྱན་ཅན། ཟླ་བའི་དཀྱིལ་འཁོར་གྱི་
[104a.6]འོད་ལྟ་བུ་གཞོན་ནུའི་རྣམ་པ་ཅན་གྱི་གཟུགས་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། སྒེག་པའི་ཉམས་དང་ལྡན་པ། ཅུང་ཞིག་འཛུམ་པ། ཕྱག་གཉིས་ཀྱིས་ཆོས་ཀྱི་འཁོར་ལོའི་ཕྱག་རྒྱ་མཛད་པ། ཕྱག་གཡས་པ་ན་མ་རེག་པར་ཤེས་རབ་ཀྱི་ཕ་རོལ་ཏུ་ཕྱིན་པ་དང་བཅས་པའི་ཨུཏྤལ་
[104a.7]བསྣམས་པ། ཞབས་གཡོན་པའི་ངར་གདོང་ལ་བརྟེན་པའི་ཁྲོ་བོ་ཆེན་པོ་གཤིན་རྗེ་གཤེད་སྐུ་མདོག་ནག་པོ་མི་བཟད་པའི་ཞལ་མཆེ་བ་གཙིགས་པ་སྐྲ་དམར་སེར་འཁྱིལ་པ། ཀུན་ནས་དམར་བའི་སྤྱན་ཟླུམ་པ། ཕྱག་གཡས་པས་བཅོམ་ལྡན་འདས་ཀྱི་རྗེ་ངར་ལ་རེག་པ། གཡོན་པ་
[104b]
[104b.1]དབྱུག་པ་བསྣམས་པའོ། །དེ་བཞིན་དུ་བསྒོམས་ནས། སྐུ་དང་། གསུང་དང་། ཐུགས་རྣམས་ལ་ཟླ་བའི་དཀྱིལ་འཁོར་ལ་ཨོཾ་ཨཱཿཧཱུཾ་ཞེས་པའི་ཡི་གེ་དཀར་པོ་དང་། དམར་པོ་དང་། ནག་པོའི་མདོག་ཅན་རྣམས་རིམ་པ་བཞིན་དུ་བཀོད་ལ། དེ་ནས་ནུ་མའི་བར་དུ་ཟླ་བའི་དཀྱིལ་འཁོར་ལ་མུཿཡིག་
[104b.2]བསམ་པར་བྱའོ། །དེ་ནས་མཆོད་བྱ་དང་མཆོད་བྱེད་དབྱེར་མེད་པར་དམིགས་ནས། ལྷ་རྣམས་ཀྱིས་རྣམ་པ་སྣ་ཚོགས་པའི་མཆོད་པ་དང་། བསྟོད་པ་བདག་ཉིད་ལ་བྱེད་པར་བལྟས་ནས། སྤྲོ་བ་དང་བསྡུ་བ་ཇི་སྲིད་སྐྱོ་བར་མ་གྱུར་པ་དེ་སྲིད་དུ་བསྒོམ་པར་བྱའོ། །དེ་ལྟར་རྟག་ཏུ་སྒོམ་
[104b.3]པར་བྱེད་པ་ནི། སངས་རྒྱས་ཀྱི་བྱང་ཆུབ་རབ་ཏུ་འགྲུབ་པར་འགྱུར་ཏེ། ཚེ་འདི་ཉིད་ལ་བརྩེ་བ་ཆེན་པོ་མགོན་པོ་འཇམ་པའི་དབྱངས་ཐོབ་པར་འགྱུར་རོ། །བསྒོམས་པས་ངལ་ན་རང་གི་སྙིང་གར་ཟླ་བའི་དཀྱིལ་འཁོར་ལ་སྔགས་བཀོད་ནས་མ་ཆགས་པའི་ཡིད་ཀྱིས་བཟླས་པར་བྱའོ། །དེ་ནས་
[104b.4]བཟླས་པའི་སྔགས་ནི་འདིའོ། །ཨོཾ་དྷརྨ་དྷཱ་ཏུ་བཱ་གཱི་ཤྭ་རི་མུཿདེ་ལྟར་བཟླས་པ་བྱས་ནས་ཀྱང་མི་ངལ་ན་བསྒོམ་པར་བྱའོ། །གལ་ཏེ་ལྡང་བར་འདོད་ན་སླར་ཡང་དེ་བཞིན་དུ་ཡང་དག་པར་མཆོད་པ་དང་། ལེགས་པར་བསྟོད་པ་དང་། དགེ་བ་ཡོངས་སུ་བསྔོ་བ་དང་། ཚིགས་སུ་བཅད་པ་འདིས་བཟོད་པ་
[104b.5]གསོལ་བར་བྱ་སྟེ། བདག་ནི་མི་ཤེས་བློ་རྨོངས་པས། །ཉེས་པ་ཇི་སྙེད་བགྱིས་པ་གང་། །གང་ཕྱིར་ལུས་ཅན་སྐྱོབ་པ་ཡི། །མགོན་པོ་ཁྱེད་ལ་བཟོད་པར་གསོལ། །འགྲོ་བ་རྣམས་ལ་ཕན་པའི་ཕྱིར། །སྨོན་ལམ་ཡང་དག་གདབ་པར་བྱ། །བདག་གི་དགེ་བ་འདི་ཡིས་ནི། །སངས་རྒྱས་ཉིད་ནི་ཐོབ་
[104b.6]ནས་ཀྱང་། །སྲིད་པའི་རྒྱ་མཚོ་ཟབ་མོ་ལས། །འགྲོ་བ་མ་ལུས་འདོན་པར་ཤོག །དེ་ནས་ཆོས་ཐམས་ཅད་མཉམ་པ་ཉིད་དུ་མོས་པས་འགྲོ་བ་ཐམས་ཅད་འཇམ་པའི་དབྱངས་ཀྱི་རང་བཞིན་དུ་བལྟས་ནས། རང་གི་ལྷའི་ང་རྒྱལ་དང་ལྡན་པས་ཇི་ལྟར་བདེ་བར་གནས་པར་བྱའོ། །དེ་ལྟར་ཐུན་མཚམས་བཞིའམ། ཐུན་
[104b.7]མཚམས་གསུམ་དུ་འདི་བཞིན་དུ་བྱའོ། །བདག་གིས་སྒྲུབ་ཐབས་འདི་བྱས་པས། །འབྲས་བུ་གང་ཐོབ་དེ་ཡིས་ནི། །སྲིད་པ་གསུམ་གྱི་འཇིག་རྟེན་འདི། །མ་ལུས་འཇམ་དཔལ་དབྱངས་གྱུར་ཤོག །འཕགས་པ་འཇམ་དཔལ་ངག་གི་རྒྱལ་པོའི་སྒྲུབ་ཐབས་རྫོགས་སོ།། {T3446}༄༅༅། །རྒྱ་གར་སྐད་དུ།
[105a]
[105a.1]བཱ་དཱི་རཱ་ཛ་སཱ་དྷ་ནཾ། བོད་སྐད་དུ། ངག་གི་རྒྱལ་པོའི་སྒྲུབ་ཐབས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དང་པོ་རེ་ཞིག་སྔགས་པས་དྲི་བཟངས་ལ་སོགས་པས་ཉེ་བར་བྱུགས་པའི་སའི་ཆ་ལ། སྣ་ཚོགས་པའི་མེ་ཏོག་གཅལ་དུ་བཀྲམ་ནས། དེའི་དབུས་སུ་སྟན་བདེ་བ་ལ་ཉེ་
[105a.2]བར་འདུག་སྟེ། གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བརྗོད་ལ། ཕྱི་ནས་རང་གི་སྙིང་གར་ཨ་ཡིག་བལྟས་ཏེ། དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་དབུས་སུ་མུཿཡིག་བསམ་པར་བྱའོ། །དེ་ནས་མུཿཡིག་ལས་ཁ་དོག་ལྔའི་འོད་ཟེར་གྱི་སྤྲིན་གྱི་ཚོགས་བ་སྤུའི་ཁུང་རྣམས་ནས་
[105a.3]འཐོན་ཏེ། དེའི་འོད་ཀྱིས་འཇམ་པའི་དབྱངས་ཀྱི་སྐུས་ནམ་མཁའ་གང་བར་བལྟའོ། །དེ་ནས་དེ་ལ་མེ་ཏོག་ལ་སོགས་པ་རྣམས་ཀྱིས་མཆོད་པར་བྱའོ། །དེ་ནས་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། སྨོན་ལམ་གདབ་པ་ལ་སོགས་པ་བྱའོ། །དེ་ནས་ཚད་མེད་པའི་གནས་བཞི་
[105a.4]བསྒོམ་པར་བྱའོ། །ཕྱི་ནས་སྟོང་པ་ཉིད་དུ་བསྒོམས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པའི་སྔགས་བརྗོད་པར་བྱའོ། །དེ་ནས་སླར་ཡང་རང་གི་སྙིང་གར་ཨ་ཡིག་བལྟ་བར་བྱའོ། །དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་དབུས་སུ་མུཿཡིག་དེ་ཡོངས་སུ་གྱུར་པ་ལས་འཇམ་
[105a.5]དཔལ་དབྱངས་ཀྱི་སྐུར་བདག་ཉིད་བསྒོམ་པར་བྱའོ། །སེང་གེའི་སྟེང་ན་བཞུགས་པ་སྐུ་མདོག་སེར་པོ་གསེར་གྱི་མདོག་ལྟ་བུ། རྒྱན་ཐམས་ཅད་ཀྱིས་བརྒྱན་པ། བཤད་པའི་ཕྱག་རྒྱ་མཛད་ཅིང་ཕྱག་གཡོན་ལོགས་ན་ཨུཏྤ་ལ་བསྣམས་པ། མི་བསྐྱོད་པའི་དབུ་རྒྱན་ཅན། གཡས་ན་ནོར་བཟངས་གཞོན་ནུ་
[105a.6]དང་། གཡོན་དུ་གཤིན་རྗེ་གཤེད་བལྟ་བར་བྱའོ། །བསྒོམས་པས་ངལ་ན་སྔགས་བཟླས་པར་བྱའོ། །ཨོཾ་བཱ་གཱི་ཤྭ་རི་མུཿ། ངག་གི་རྒྱལ་པོའི་སྒྲུབ་ཐབས་རྫོགས་སོ།། {T3447}༄༅༅། །རྒྱ་གར་སྐད་དུ། པྲཛྙཱ་བརྡྷཱ་ནི་དྷི་བཱ་དཱི་རཱ་ཛ་སཱ་དྷ་ནཾ། བོད་སྐད་དུ། ཤེས་རབ་འཕེལ་བའི་གཏེར་གྱི་ངག་གི་རྒྱལ་
[105a.7]པོའི་སྒྲུབ་ཐབས། འཇམ་པའི་དབྱངས་ལ་ཕྱག་འཚལ་ལོ། །རབ་ཏུ་བཤད་པའི་མཆོད་པས་མཆོད་ནས་སྡིག་པ་བཤགས་པ་དང་། དགེ་བ་ལ་རྗེས་སུ་ཡི་རང་བ་ལ་སོགས་པ་དང་། བྱམས་པ་ལ་སོགས་པའི་སྔགས་ཀྱི་ཆོ་གས་ཆོས་ཐམས་ཅད་ཀྱི་དེ་བཞིན་ཉིད་ཟླ་བ་གཉིས་ཀྱི་ནང་དུ་ཞུགས་ནས། ཆུ་
[105b]
[105b.1]སྐྱེས་སེར་པོའི་རྣམ་པར་གྱུར་པ་ལས་སེར་པོ་བི་ལས་མཾ་ཡིག་གི་ས་བོན། དེ་ལས་ཟླ་བ་ལ་སོགས་པ་ཡོངས་སུ་གྱུར་པ་ལས་ཡང་དག་པའི་ངག་གི་རྒྱལ་པོར་རང་ཉིད་དོ། །དེ་ནས་ཤེས་རབ་བསྐྱེད་པས་ཏའི་མཐའ་དང་། རའི་མཐའ་དང་། སའི་མཐའ་རྣམས་ཀྱིས་ཚོགས་པ་ཨཱི་དང་ཟླ་བ་ཕྱེད་པ་དང་ཐིག་ལེ་དང་པོར་
[105b.2]བཅས་པའི་སྔགས་བཟླས་པར་བྱའོ། །ཤེས་རབ་འཕེལ་བའི་གཏེར་ངག་གི་རྒྱལ་པོའི་སྒྲུབ་ཐབས་དཔལ་ལྡན་པཎྜི་ཏ་འཕྲོག་བྱེད་འཇོམས་པས་མཛད་པ་རྫོགས་སོ།། {T3448}༄༅༅། །རྒྱ་གར་སྐད་དུ། བཱ་གཱི་རཱ་ཛ་སཱ་དྷ་ནཾ། བོད་སྐད་དུ། ངག་གི་རྒྱལ་པོའི་སྒྲུབ་ཐབས། འཕགས་པ་འཇམ་དཔལ་ལ་
[105b.3]ཕྱག་འཚལ་ལོ། །གཞོན་ནུའི་རྣམ་པར་མཛད་པ་ཡིས། །འཇིག་རྟེན་རྗེས་སུ་འཛིན་མཛད་པ། །དེ་བཞིན་ཉིད་ཀྱི་ལམ་སྟོན་པའི། །འཇམ་པའི་དབྱངས་ལ་ཕྱག་འཚལ་ལོ། །འཇམ་དཔལ་གྱི་རྟོག་པ་ལས་གསུངས་པའི་ཆོ་གས་ངག་གི་རྒྱལ་པོའི་སྒྲུབ་ཐབས་བཤད་པར་བྱའོ། །དང་པོ་རེ་ཞིག་ཟུར་བཞི་
[105b.4]སྒོ་བཞི་པ། རིན་པོ་ཆེ་སྣ་ཚོགས་པས་བརྒྱན་ཅིང་བླ་བྲེས་ཀྱིས་མཛེས་པར་བྱས་པ། མུ་ཏིག་གི་རང་བཞིན་གྱིས་རྒྱལ་མཚན་དང་བ་དན་ལ་སོགས་པས་བརྒྱན་པའི་གཞལ་ཡས་ཁང་རྣམ་པར་བསམས་ནས། དེ་ལ་དབུས་སུ་དར་གྱི་གདན་ལ་དེའི་སྟེང་དུ་ཉེ་བར་འདུག་སྟེ། དེ་ནས་བྱང་ཆུབ་ཏུ་སེམས་བསྐྱེད་
[105b.5]པར་བྱ་སྟེ། སེམས་ཅན་དང་སེམས་ཅན་གྱི་རྒྱུད་ཀྱིས་བཟུང་བ་ཇི་སྙེད་པ་དེ་རྣམས་ཐམས་ཅད་འཇམ་དཔལ་གྱི་ཡེ་ཤེས་ལ་རབ་ཏུ་དགོད་པར་བྱའོ་ཞེས་སོ། །གང་ཡང་སྐད་ཅིག་གིས་མི་རྟག་པ་དང་། བདག་མེད་པ་དང་། སེམས་ཅན་གྱི་སྡུག་བསྔལ་རྣམས་རྨི་ལམ་དང་། མིག་འཕྲུལ་ལྟ་བུ་དང་། གཟུགས་
[105b.6]བརྙན་ཙམ་སྟེ། གདོད་མ་ནས་ཞི་བ། རང་བཞིན་གྱིས་ཡོངས་སུ་དག་པ། ངོ་བོ་ཉིད་མེད་པ་ལས་སྐྱེས་ཤིང་སྐྱེ་བ་མེད་པ་ཡང་དག་པའི་མཐའི་དེ་བཞིན་ཉིད་དུ་གྱུར་པ་ཆོས་ཐམས་ཅད་སྟོང་པའོ་ཞེས་སྟོང་པ་ཉིད་དུ་ལྷག་པར་གསུངས་ཏེ། སེམས་ཅན་འདི་རྣམས་སྲེད་པའི་དབང་གིས་མ་རིག་པས་མདོངས་
[105b.7]ཤིང་ལས་ཀྱི་རྣམ་པར་སྨིན་པ་མི་མཐོང་བ་དེ་རྣམས་ལ་རྟེན་ཅིང་འབྲེལ་བར་འབྱུང་བ་ཟབ་མོའི་ལས་ཀྱི་བྱ་བ་ལ་ཞུགས་ནས་བདག་གིས་ཆོས་བསྟན་པར་བྱའོ་ཞེས་སྙིང་རྗེའི་ཕྱིར་ཡང་ལྷག་པའི་ཚིག་གོ། །དེའི་ཕྱིར་བཅོམ་ལྡན་འདས་ཀྱིས་འདུས་པ་ལ་སོགས་པ་གསུངས་ཏེ། སྟོང་པ་ཉིད་དང་སྙིང་རྗེ་དབྱེར་མེད་པར་
[106a]
[106a.1]བྱང་ཆུབ་ཀྱི་སེམས་ཤེས་པར་བྱ་སྟེ། འདིར་བྱང་ཆུབ་ཀྱི་སེམས་བསྐྱེད་པར་བྱ་བ་ལས་བསྐྱེད་པ་ནི་བྱང་ཆུབ་སེམས་དཔའ་ཞེས་གསུངས་སོ། །དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཡིད་ཀྱིས་དེ་བཞིན་དུ་མཆོད་པར་བྱའོ། །དེ་ནས་རང་གི་སྙིང་གར་ཧཱུཾ་ཡིག་ཁ་དོག་
[106a.2]དམར་པོ་ཉི་མ་བྱེ་བ་འབུམ་བརྒྱ་སྟོང་གི་འོད་འབར་བའི་བདག་ཉིད་ཡེ་ཤེས་ཀྱི་སྐུར་བལྟ་བར་བྱ་སྟེ། དེས་དེ་བཞིན་དུ་ཉི་མའི་དཀྱིལ་འཁོར་བསྒོམས་ནས་དེའི་སྟེང་དུ་ཟླ་བའི་དཀྱིལ་འཁོར་ལ་གུར་གུམ་གྱི་མདོག་ལྟ་བུ་དེ་ལ་ཡི་གེའི་མཆོག་དཔག་ཏུ་མེད་པའི་བསོད་ནམས་བྱེ་བ་བརྒྱ་སྟོང་ངེས་པར་མཾ་གི་ཡི་གེ་ཁ་དོག་ལྔ་
[106a.3]དང་ཡང་དག་པར་ལྡན་པ་ནམ་མཁའི་ཕྱོགས་ཀྱི་མཐར་ཐུག་པར་བལྟའོ། །དེ་ནས་ཡེ་ཤེས་སྤྲོས་པས་ཡང་དག་པར་བསྐུལ་ཏེ། བཅོམ་ལྡན་འདས་འཇམ་དཔལ་གསེར་བཙོ་མའི་མདོག་ལྟ་བུ། གཞོན་ནུ་ཟུར་ཕུད་ལྔ་པ། ཆོས་ཀྱི་འཁོར་ལོའི་ཕྱག་རྒྱ་དང་ཡང་དག་པར་ལྡན་པ། ཤེས་རབ་ཀྱི་ཕ་རོལ་ཏུ་
[106a.4]ཕྱིན་པས་བརྒྱན་པའི་ཨུཏྤལ་སྔོན་པོ་བསྣམས་པ། སེང་གེའི་སྟེང་ན་རོལ་པའི་སྟབས་ཀྱིས་བཞུགས་པ། རྒྱན་ཐམས་ཅད་ཀྱིས་བརྒྱན་པ། སྒེག་ཅིང་འོད་ཟེར་རྒྱ་མཚོའི་རླབས་ཀྱིས་ཁམས་གསུམ་ཀུན་ནས་འགེངས་པར་མཛད་པ། རྟག་ཏུ་ལེགས་སྦྱར་གྱི་ཚིགས་སུ་བཅད་པ་དང་རྐྱང་པ་དཔག་ཏུ་མེད་པ་
[106a.5]ལེགས་པར་སྦྱོར་ཞིང་གསུང་བའི་སྒྲས་ཆོས་སྟོན་པར་མཛད་པའོ། །སྤྲོ་བ་དང་བསྡུ་བ་སྔོན་དུ་འགྲོ་བས་དགུག་གཞུག་བྱས་ནས། ཨོཾ་མཉྫུ་བཛྲ་ཧཱུཾ་ཞེས་པའི་སྔགས་འདིས་བརྟན་པར་བྱས་ནས་འཇམ་པའི་རྡོ་རྗེའི་ང་རྒྱལ་བསྒོམ་པར་བྱའོ། །དེ་ནས་བསྒོམས་པས་ངལ་ན་སྔགས་བཟླས་པར་བྱའོ། །ཨོཾ་
[106a.6]མཉྫུ་བཛྲ་ཧཱུཾ། བཅོམ་ལྡན་འདས་ཀྱི་ཆོ་ག་འདིས་མཁས་པས་སྤྱོད་ལམ་གཙང་མ་ཕུན་སུམ་ཚོགས་པས་འབུམ་ཕྲག་བདུན་བཟླས་པར་བྱའོ། །ངག་གི་རྒྱལ་པོའི་སྒྲུབ་ཐབས་རྫོགས་སོ།། {T3449}༄༅༅། །རྒྱ་གར་སྐད་དུ། ཨ་ར་པ་ཙ་ན་སཱ་དྷ་ནཾ། བོད་སྐད་དུ། ཨ་ར་པ་ཙ་ནའི་སྒྲུབ་ཐབས།
[106a.7]འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རི་བོང་འཛིན་པ་ལྟར་དཀར་གླེགས་བམ་རལ་གྲིས་ཕྱག་མཚན་པ། །མཆོག་གི་བློ་གྲོས་རབ་མཛེས་ཞི་བའི་གཞོན་ནུ་ཟུར་ཕུད་ལྔ། །ཐར་མཆོག་དགའ་བ་རྒྱ་ཆེན་པདྨའི་འདབ་འདྲའི་སྤྱན་ཡངས་པ། །བློ་གྲོས་ངན་པ་བསྲེག་མཁས་འཇམ་པའི་དབྱངས་
[106b]
[106b.1]ལ་ཕྱག་འཚལ་ལོ། །གང་གིས་བློ་ཕྱེད་རྒྱུན་མི་འཆད་པར་མངོན་བསྒོམས་པས། །སྐྱེ་བོས་ཨ་ར་པ་ཙ་ན་ནི་ངེས་བསྒྲུབ་ཕྱིར། །དངོས་པོ་མ་ལུས་རྟོགས་པའི་བྱང་ཆུབ་ཐོབ་པ་ཡི། །རིན་ཆེན་འཁོར་ལོའི་མན་ངག་ཤིན་ཏུ་བསྡུ་བར་བྱ། །མཉམ་གཙང་སྔགས་པས་ཡིད་དུ་འོང་བའི་ས་ཡི་ཆར། །དྲི་ཞིམ་མེ་ཏོག་
[106b.2]གཅལ་བཀྲམ་སྤོས་ཆུས་བྱུགས་གྱུར་ནས། །གང་ཞིག་འཇམ་ཞིང་ཡིད་འོང་སྟན་ལ་ཉེར་གནས་ཏེ། །བདེ་བ་ཤིན་ཏུ་མཚན་མེད་བྱང་ཆུབ་སེམས་བསྒོམ་བྱ། །རང་བཞིན་དག་པའི་སྔགས་ནི་ཡང་དག་བརྗོད། །ཀུན་ནས་མ་ལུས་སྟོང་པར་རབ་བསྒོམས་ཏེ། །གཞན་དོན་བཅས་པ་བདག་གི་ལུས་འདི་ཡང་། །
[106b.3]འདི་ནི་འོད་གསལ་མཐའ་རུ་ལན་ཅིག་བསམ། །དེ་ནས་བར་སྣང་ཟླ་བའི་དཀྱིལ་འཁོར་ལ། །དབྱངས་ཡིག་དང་པོ་འོད་དང་ལྡན་པ་བསྒོམ། །དེ་ནས་འདིར་ནི་ཤིན་ཏུ་དཀར་བའི་དྷཱིཿ། །དེ་ལས་འཇམ་དབྱངས་དྲི་མ་མེད་པ་བསྒོམ། །རི་བོང་གིས་མཚན་བྱེ་བའི་འོད་མཚུངས་ལ། །རྒྱན་རྣམས་ཀུན་གྱིས་བརྒྱན་
[106b.4]གྱུར་རབ་ཏུ་འབར། །བསམ་གཏན་མཐར་ཕྱིན་ཆུ་སྐྱེས་སྟེང་ན་བཞུགས། །ཆགས་བཅས་ཅུང་ཟད་འཛུམ་ཞིང་ཡིད་དུ་འོང་། །རང་གི་སྙིང་གར་ཨ་ཡིག་མཆོག་ནི་རྣམ་འཕྲོ་ལེགས་བལྟས་ལ། །མཉམ་མེད་འོད་ཟེར་དྲ་བ་དང་ལྡན་འཁོར་ལོ་རྩིབས་བརྒྱད་གཟུགས། །དེ་ཡི་སྟེང་དུ་སྔགས་པས་ཟླ་བའི་
[106b.5]དཀྱིལ་འཁོར་རྣམ་པར་བསྒོམ། །དེ་ཡིས་རི་བོང་འཛིན་ལྟར་འཇམ་དབྱངས་ཉིད་དང་དེ་བཞིན་དུ། །གཡས་ཕྱོགས་ཡིད་འོང་གཟུགས་ཅན་འཛུམ་ཞིང་ཟུར་གྱིས་ལྟ་བྱེད་པ། །ནུ་མ་ཟུང་དག་རབ་རྒྱས་སྐྲ་ལྡན་མ་དེ་ལྟ་བྱེད་པ། །གཡོན་ཕྱོགས་རབ་མཛེས་སྒེག་པའི་གཟུགས་ལྡན་ཉེ་བའི་སྐྲ་ཅན་མ། །
[106b.6]ཡོན་ཏན་མ་ལུས་གཏེར་གྱུར་ཙ་ན་དག་ལས་བསྒོམ་པར་བྱ། །མདུན་དུ་ངེས་དགོད་དྲ་བ་ཅན་གྱི་འོད། །དྲི་མེད་རབ་དཀར་ར་ཡིག་ལས་བྱུང་ཉིད། །པ་ཡིག་ལས་བྱུང་འོད་ཟེར་རང་བཞིན་ཅན། །ཡིད་འོང་ཟླ་འོད་རྒྱབ་ཏུ་དགོད་པར་བྱ། །ཡང་ན་ཡི་གེ་འོད་ཟེར་རབ་འབར་བའི། །མཐུ་ལྡན་རྒྱ་ཆེན་རྣམ་
[106b.7]པར་བསྒོམ་བྱ་སྟེ། །དེ་རྣམས་མི་ཤེས་རི་བོང་རབ་འཇོམས་ཤིང་། །ཡེ་ཤེས་དམ་པ་རྙོག་པ་མེད་པར་མཛད། །འོག་ཏུ་འཁོར་ལོ་མྱུར་དུ་འཁོར་བསམས་ནས། །གཏི་མུག་མུན་པ་མཐའ་དག་འཇོམས་པར་མཛད། །ཡི་དམ་ལྷ་སྐུ་མི་འགྱུར་ཉིད་བལྟས་ནས། །འོད་ཟེར་དྲ་ཆེན་ཟླ་བའི་དཀྱིལ་འཁོར་བཞིན། །
[107a]
[107a.1]ཟླ་ལྟར་འོད་ཟེར་སྤྲིན་ཚོགས་རྒྱ་ཆེན་རྣམས། །ངེས་འཐོན་ཕྱོགས་བཅུ་རྣམས་སུ་འཕྲོ་བར་བལྟ། །བདག་ལུས་དེ་བཞིན་སེམས་ཅན་རྣམས་བརྒྱན་ཏེ། །མཐའ་ནས་སླར་འོངས་ཟླ་བ་ལ་ཞུགས་ཏེ། །མཆོག་གི་སྔགས་པས་བློ་གྲོས་བརྟན་ཞིང་མན་ངག་ཇི་བཞིན་དུ། །ཨ་ར་པ་ཙ་ན་མཆོག་
[107a.2]སྔགས་བཟླས་བསྒོམ་ལ་འབད་བྱས་ན། །མྱུར་དུ་ས་མཆོག་རྣམས་དང་དྲི་མེད་ཡིད་འོང་ཕར་ཕྱིན་རྣམས། །བློ་གྲོས་ངན་པའི་ཉེས་པ་ཀུན་བཅོམ་རྒྱལ་རྣམས་ཐོབ་པར་འགྱུར། །བླ་མ་དམ་པ་དགའ་རབ་རྡོ་རྗེ་དམ་ཆོས་མཛོད་གྱུར་པས། །བདེ་གཤེགས་ཚོགས་ཀྱི་སྤྱན་སྔར་གང་རྣམས་ཆོ་གས་དབང་བསྐུར་བའི། །
[107a.3]བློ་གྲོས་བཟང་པོ་མི་ཕམ་བཤེས་གཉེན་སྐྱེ་བོའི་བློ་གྲོས་རྣམས། །བསྒྲུབ་ཕྱིར་ཨ་ར་པ་ཙ་ན་མཆོག་འཁོར་ལོ་གཞུང་བཞིན་སྦྱར། །འཁོར་ལོའི་ཆོ་གའི་མཆོག་ནི་ལེགས་སྦྱར་བའི། །བདག་གིས་བསོད་ནམས་རྒྱ་ཆེན་ཐོབ་བསྡུས་པ། །གང་དེས་འགྲོ་ཀུན་སྡིག་ལས་རྣམ་རྒྱལ་ཞིང་། །བདེ་བའི་མཐའ་གཅིག་
[107a.4]འཇམ་དབྱངས་མཆོག་གྱུར་ཅིག །ཨ་ར་པ་ཙ་ནའི་སྒྲུབ་ཐབས་སློབ་དཔོན་མི་ཕམ་བཤེས་གཉེན་གྱིས་མཛད་པ་རྫོགས་སོ།། {T3450}༄༅༅། །རྒྱ་གར་སྐད་དུ། མུག་ཏེ་ཀེ་ན་ཨ་ར་པ་ཙ་ན་སཱ་དྷ་ནཾ། བོད་སྐད་དུ། ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །
[107a.5]དང་པོ་རེ་ཞིག་སྔགས་པས་ཡིད་དང་མཐུན་པའི་ཕྱོགས་འགའ་ཞིག་ཏུ་སྟན་བདེ་བ་ལ་ཉེ་བར་འདུག་སྟེ། རང་གི་སྙིང་གར་ཡི་གེ་དང་པོ་ལས་བྱུང་བའི་ཟླ་བ་ལ་ལྔ་པའི་བཞི་པའི་ས་བོན་ལ་ཨཱ་ཡིག་དང་མཐར་ཐིག་ལེ་གཉིས་དང་ལྡན་པ་རྣམ་པར་བསྒོམས་ལ། དེ་ནས་དེའི་འོད་ཟེར་གྱི་ཚོགས་ཀྱིས་སྙིང་ལ་གནས་པའི་ཉོན་
[107a.6]མོངས་པའི་མུན་པ་བསལ་ནས་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཞེས་པ་ཚད་མེད་པའི་གནས་བཞི་བསྒོམ་པར་བྱའོ། །འཆད་པར་འགྱུར་བའི་རིམ་པས་བྱམས་པ་གང་ཞེ་ན། སེམས་ཅན་ཐམས་ཅད་ལ་བུ་གཅིག་པ་ལྟར་རབ་ཏུ་དགའ་བའོ། །སྙིང་རྗེ་གང་ཞེ་ན། སྡུག་བསྔལ་གསུམ་
[107a.7]གྱིས་གདུངས་པའི་སེམས་ཅན་རྣམས་འཁོར་བའི་རྒྱ་མཚོ་ལས་གདོན་པར་འདོད་པའོ། །དགའ་བ་གང་ཞེ་ན། དགེ་བའི་རྩ་བ་བསྐྱེད་པས་གཞན་གྱི་དབང་ཕྱུག་ལ་སོགས་པ་རྣམས་ལ་ལོངས་སྤྱོད་པ་ལ་སེམས་དགའ་བའོ། །བཏང་སྙོམས་གང་ཞེ་ན། རྣམ་པ་ཐམས་ཅད་དུ་ཁོང་ཁྲོ་བ་དང་། རྗེས་སུ་ཆགས་པ་དང་
[107b]
[107b.1]བྲལ་ཞིང་གཞན་ལ་ཕན་པའི་ཆོས་ཉིད་རང་གི་ངང་གིས་འབབ་ཅིང་རབ་ཏུ་འཇུག་པའོ་ཞེས་པའི་ཚད་མེད་པའི་གནས་བཞི་བསྒོམས་ནས། དེའི་རྗེས་སུ་རང་གི་སྙིང་གའི་ས་བོན་ཉིད་ལས་བྱུང་བའི་འོད་ཟེར་གྱིས་ནམ་མཁའི་ཕྱོགས་མཐའ་དག་ཁྱབ་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་སྤྲོ་བ་དང་
[107b.2]བསྡུ་བས་གཞན་འགྲོ་བ་རྣམས་ཀྱི་དོན་གྱི་བྱ་བ་གཅིག་ཏུ་བྱེད་པར་བལྟས་ལ། རང་གི་སྙིང་གའི་ས་བོན་གྱི་འོད་ཟེར་གྱིས་དེ་བཞིན་དུ་ལྷའི་དྲི་བཟངས་དང་མེ་ཏོག་ལ་སོགས་པ་ཁྱད་པར་འཕགས་པ་བྱུང་སྟེ། མཎྜལ་སྔོན་དུ་འགྲོ་བས་ཐལ་མོ་སྦྱར་ཏེ། བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་
[107b.3]ཀྱི་ཞབས་ཀྱི་ཆུ་སྐྱེས་ལ་སྤྱི་བོས་བཏུད་ཅིང་གུས་པས་ཕྱག་འཚལ་ནས། འོད་ཟེར་དེ་ཉིད་ལས་བྱུང་བའི་མེ་ཏོག་དང་། བདུག་པ་དང་། མར་མེ་དང་། ཕྱེ་མ་དང་། དྲི་དང་། ན་བཟའ་དང་། རྒྱལ་མཚན་དང་། དྲིལ་བུ་དང་། བ་དན་ལ་སོགས་པ་རྣམས་ཀྱིས་དེ་རྣམས་ལ་ཕྱི་དང་ནང་གི་མཆོད་པ་རྣམས་ཀྱིས་མཆོད་པ་ནི་
[107b.4]མཆོད་པའོ། །དེ་ནས་སྡིག་པ་བཤགས་པ་ལ་སོགས་པ་བྱའོ། །འདོད་ཆགས་ཞེ་སྡང་གཏི་མུག་ལས་གྱུར་པའི། །ལུས་དང་ངག་དང་གཞན་ཡང་ཡིད་ཀྱིས་ཀྱང་། །སྡིག་པ་བགྱིས་དང་དེ་བཞིན་བགྱིད་སྩལ་རྣམས། །ཐམས་ཅད་རྒྱལ་བ་རྣམས་ཀྱི་མདུན་དུ་བཤགས། །ཞེས་པ་ནི་སྡིག་པ་བཤགས་པའོ། །
[107b.5]གང་ཡང་དེ་བཞིན་གཤེགས་ཀུན་བསོད་ནམས་དང་། །གཞན་ཡང་རྫོགས་པའི་བྱང་ཆུབ་ལམ་བསྟེན་དང་། །རང་སངས་རྒྱས་དང་བླ་མ་མཆོག་རྣམས་ཀྱི། །དགེ་བ་ཀུན་ལ་བདག་ནི་རྗེས་ཡི་རང་། །ཞེས་པ་ནི་བསོད་ནམས་ལ་རྗེས་སུ་ཡི་རང་བའོ། །དུས་གསུམ་ཀུན་དུ་གཤེགས་པའི་སངས་རྒྱས་དང་། །
[107b.6]ནམ་མཁའི་ཕྱོགས་ཁྱབ་བརྩེ་ལྡན་ཡོན་ཏན་ཚོགས། །སྐྱོན་སྤངས་འཕགས་པའི་ཚོགས་དང་དམ་པའི་ཆོས། །གུས་པས་བདག་ནི་སྐྱབས་སུ་ཉེ་བར་མཆི། །ཞེས་པ་ནི་གསུམ་ལ་སྐྱབས་སུ་འགྲོ་བའོ། །ཡོངས་སུ་དག་པ་རྒྱལ་བའི་ལམ་བསྟེན་པ། །ཚངས་དབང་དྲག་པོ་སོགས་པས་རྙེད་དཀའ་
[107b.7]བ། །གང་འདིར་བསོད་ནམས་ཚོགས་ནི་ཉེར་བསགས་པ། །བྱང་ཆུབ་སེམས་འདི་རབ་ཏུ་བསྐྱེད་པར་བགྱི། །ཞེས་པ་ནི་རྒྱལ་བའི་ལམ་ལ་བསྟེན་པ་དང་། བྱང་ཆུབ་ཏུ་སེམས་བསྐྱེད་པའི་ཚིག་གོ། །དེ་བཞིན་དུ་བླ་ན་མེད་པའི་མཆོད་པ་རྣམ་པ་བདུན་གྱིས་མཆོད་ནས། དེའི་རྗེས་སུ་བླ་མའི་གསུང་
[108a]
[108a.1]གིས་ཕྱི་དང་ནང་དུ་བཅས་པ་ཐམས་ཅད་སྟོང་པ་ཉིད་དུ་བསྒོམས་ནས་ཡང་བརྟན་པར་བྱ་བའི་ཕྱིར། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭབྷཱ་བ་ཤུདྡྷོ྅ཧཾ། ཞེས་པའི་ཚིགས་སུ་བཅད་པ་བརྗོད་པར་བྱའོ། །དེའི་རྗེས་སུ་རང་གི་སེམས་ཀྱི་སྣང་བ་ཙམ་དང་ས་ཤིང་ཐོགས་པ་མེད་པའི་གཟུགས་དབྱངས་ཡིག་དང་པོ་
[108a.2]ལས་བྱུང་བའི་ཟླ་བའི་དཀྱིལ་འཁོར་གྱི་རྣམ་པར་བསམས་ལ། དེའི་སྟེང་དུ་སྔོན་དུ་གསུངས་པའི་ས་བོན། དེ་ནས་ཟླ་བ་དང་ས་བོན་ཡོངས་སུ་གྱུར་པ་ལས་རལ་གྲི་འོད་འཕྲོ་བའི་གཟུགས་སོ། །དེ་ནས་ཚངས་པའི་དབུས་སུ་རི་བོང་འཛིན་པའི་སྟེང་དུ་སྔོན་དུ་གསུངས་པའི་ས་བོན་དང་། རལ་གྲི་ཡོངས་སུ་གྱུར་པ་ལས་
[108a.3]འཇམ་དཔལ་དབྱངས་སྟོན་ཀའི་ཟླ་བ་དང་མཚུངས་པའི་འོད་ཕྱོགས་བཅུའི་འཇིག་རྟེན་གསལ་བར་བྱེད་པའི་འོད་ཀྱི་ཚོགས་འཆང་བ། ཕྱག་གཉིས་པ་གཞོན་ནུའི་རྣམ་པ་ཅན། ཕྱག་གཡས་པ་ན་མི་ཤེས་པ་མ་ལུས་པ་གཅིག་ཏུ་གཅོད་པར་བྱེད་པའི་རལ་གྲི་བསྣམས་པ། གཡོན་ན་ཐབས་སུ་གྱུར་པ་མ་ལུས་པའི་
[108a.4]བསྟན་བཅོས་ཀྱི་པོ་ཏི་ཕྱག་ན་བསྣམས་པ། རྒྱན་ཐམས་ཅད་ཀྱིས་བརྒྱན་པ། ན་བཟའ་དམར་པོ་མནབས་པ། བསམ་གཏན་ལ་རྩེ་གཅིག་ཏུ་གནས་པ། པདྨ་རབ་ཏུ་རྒྱས་པའི་ཞལ་མངའ་བ། པདྨའི་སྤྱན་མངའ་བ། སྐྱེས་བུ་ཆེན་པོའི་མཚན་གྱིས་སྤྲས་པ། ཨིནྡྲ་ནཱི་ལའི་ནོར་བུ་ལྟ་བུའི་དབུ་སྐྲའི་ཚོགས་ཟུར་
[108a.5]ཕུད་ལྔ་དང་ལྡན་པ། ཆུ་སྐྱེས་དཀར་པོ་འདབ་མ་བརྒྱད་པ་དང་ཟླ་བ་ལ་རྡོ་རྗེ་སྐྱིལ་ཀྲུང་གིས་ཉེ་བར་བཞུགས་པ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ངོ་བོ་ཉིད་འཇམ་དཔལ་གྱི་སྐུར་བདག་ཉིད་བསྒོམས་ལ། དེ་ལྟར་རྣལ་འབྱོར་པ་དམ་ཚིག་སེམས་དཔའི་ང་རྒྱལ་དང་ལྡན་པས་རང་གི་སྙིང་གར་ཨ་ཡིག་
[108a.6]ལས་སྐྱེས་པའི་འཁོར་ལོ་རྩིབས་བརྒྱད་པ། འོད་ཟེར་གྱི་ཚོགས་འཕྲོ་བས་མི་ཤེས་པ་མ་ལུས་པ་འཇོམས་པར་བྱེད་པ་མྱུར་དུ་གཡས་སུ་འཁོར་བར་བྱེད་པའི་རིམ་པ་བལྟས་ལ། དེའི་སྟེང་དུ་བར་སྣང་ལ་དབྱངས་ཡིག་དང་པོ་ལས་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ལྔ་རིམ་པ་ཇི་ལྟ་བ་བཞིན་དུ་མར་མེ་
[108a.7]འབར་བའི་རྣམ་པ་ལྟ་བུས་འོད་ཟེར་དང་བཅས་པས་མི་ཤེས་པ་མཐའ་དག་གཅོད་པར་བྱེད་པ་བླ་མའི་མན་ངག་གིས་བསྒོམ་པར་བྱའོ། །ལྷའི་རྣམ་པ་རྫོགས་པ་ལས་སྔགས་པས་ལེ་ལོ་མེད་པར་སྤྲོ་བ་ལ་སོགས་པ་བྱས་ནས་བཟླས་པ་བྱའོ། །ཡང་ན་སྙིང་གའི་ཟླ་བའི་དབུས་སུ་ཨ་ཡིག་དཀར་པོའི་རྣམ་པ་
[108b]
[108b.1]རྫོགས་པ་ལས་ཨ་ར་པ་ཙ་ན་ཞེས་པ་དཀར་པོ་རྒྱན་ཐམས་ཅད་ཀྱིས་བརྒྱན་པ། དགའ་བའི་བསམ་གཏན་ལ་རྩེ་གཅིག་ཏུ་གནས་པ། རྡོ་རྗེ་སྐྱིལ་མོ་ཀྲུང་གིས་ཉེ་བར་བཞུགས་པ། ཕྱག་གཡས་པ་དང་གཡོན་པ་དག་གིས་རལ་གྲི་དང་པོ་ཏི་བསྣམས་པ། ཨིནྡྲ་ནཱི་ལ་ལྟ་བུའི་རལ་པའི་ལྕང་ལོ་ལྔ་དང་ལྡན་པ།
[108b.2]འོད་འཕྲོ་བའི་ཟླ་བའི་ཞལ་ཟླ་བ་ལྟ་བུས་སྨྲ་བའི་མཆོག་གོ། །ཟླ་བ་ལ་རང་གི་ས་བོན་དང་བཅས་པ་སྙིང་གར་བསྒོམས་ལ། དེའི་མདུན་དུ་ར་ཡིག་དཀར་པོ་ལས་བྱུང་བའི་དྲ་བ་ཅན་གྱི་འོད་རང་གི་ས་བོན་གནས་པར་བལྟའོ། །དེའི་རྗེས་སུ་རྒྱབ་ཏུ་པ་ཡིག་དཀར་པོ་ལས་བྱུང་བའི་ཟླ་འོད་རང་གི་སྙིང་གའི་ཟླ་བ་ལ་ས་
[108b.3]བོན་དང་ལྡན་པར་བལྟའོ། །དེ་ནས་གཡས་སུ་ཙ་ཡིག་དཀར་པོ་ལས་བྱུང་བའི་སྐྲ་ཅན་མ་དཀར་མོ་རྒྱན་ཐམས་ཅད་ཀྱིས་བརྒྱན་པ། ནུ་མ་རྒྱས་པ་རང་གི་སྙིང་གའི་ས་བོན་དང་ལྡན་པ་བསྒོམ་པར་བྱའོ། །དེ་ནས་གཡོན་དུ་ན་ཡིག་དཀར་པོ་ལས་བྱུང་བའི་ཉེ་བའི་སྐྲ་ཅན་མ་རང་གི་སྙིང་གའི་ཟླ་བ་ལས་ས་བོན་དང་
[108b.4]ལྡན་པར་བསྒོམ་པར་བྱའོ། །ཐམས་ཅད་ཨ་ར་པ་ཙ་ན་དང་འདྲ་བར་རྣམ་པར་བསམ་པར་བྱའོ། །ལྷའི་ཚོགས་འདི་རྣམས་སྙིང་གའི་ས་བོན་གྱི་འོད་ཟེར་ལས་སྤྲོ་བ་དང་བསྡུ་བས་འགྲོ་བ་རྣམས་ཀྱི་མི་ཤེས་པའི་ཚོགས་གཅོད་ཅིང་ཆོས་ཀྱི་བདུད་རྩི་དང་། བསྟན་བཅོས་མཐའ་དག་དང་། བཟོའི་ཚོགས་རྣམས་
[108b.5]ཀྱིས་སེམས་ཅན་ཐམས་ཅད་ཡང་དང་ཡང་དུ་ཡང་དག་པར་ཚིམ་པར་མཛད་པ། དྲི་མ་མེད་ཅིང་ཐོགས་པ་མེད་པའི་རང་བཞིན་དུ་བདག་ཉིད་བསྒོམ་པར་བྱའོ། །བླ་མའི་མན་ངག་གིས་ཏིང་ངེ་འཛིན་དང་སྔགས་བཟླས་པར་བྱ་སྟེ། ཨོཾ་ཡིག་དང་པོར་བྱས་ལ་ས་བོན་གྱི་ཡི་གེ་ལྔ་པོ་དབུས་སུ་བྱས་ནས་དམ་
[108b.6]ཚིག་སེམས་དཔའི་ས་བོན་གྱི་མཐར་སྔགས་སོ། །གང་གི་ཚེ་ལྡང་བར་འདོད་པ་དེའི་ཚེ་རང་གི་སྔགས་བླ་མའི་མན་ངག་གིས་བཟླས་པར་བྱའོ། །དེའི་རྗེས་སུ་ཡི་གེ་བརྒྱ་པའི་ཚིགས་སུ་བཅད་པ་བརྗོད་པར་བྱའོ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ།
[108b.7]སུ་ཏོཥྱོ་མེ་བྷ་བ། སུ་པོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་བཱ་ན་སརྦ་ཏ་ཐཱ་ག་ཏ། བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿཞེས་པའི་ཡི་གེ་བརྒྱ་པ་བཀླགས་ནས་སྤྲོ་བ་དང་བསྡུ་བ་ལ་སོགས་པ་བྱས་ནས། དམ་ཚིག་
[109a]
[109a.1]སེམས་དཔའི་ང་རྒྱལ་གྱིས་ཅི་བདེར་གནས་པར་བྱའོ། །ཏིང་ངེ་འཛིན་དང་ལྡན་པའི་རྣལ་འབྱོར་པས་ཡང་དག་པའི་ཡེ་ཤེས་ཀྱི་རྒྱ་མཚོའི་ཕ་རོལ་དུ་ཕྱིན་པར་གྱུར་ནས་དུས་རིང་པོར་མི་ཐོགས་པར་བླ་ན་མེད་པའི་བྱང་ཆུབ་ཐོབ་པར་འགྱུར་རོ་ཞེས་སོ། །ཚིག་ལྷུག་གསལ་པོ་འདི་ཡིས་ནི། །
[109a.2]དཀར་པོའི་སྒྲུབ་ཐབས་ཡང་དག་བྲིས། །པདྨའི་འབྱུང་གནས་བསོད་ནམས་གང་། །དེ་ཡིས་སྲིད་ལས་གྲོལ་བར་ཤོག །ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས་རྫོགས་སོ།། {T3451}༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་བྷཊྚཱ་ར་ཀ་བྷཱ་བ་ནོ་པ་དེ་ཤ། །བོད་སྐད་དུ། རྗེ་བཙུན་འཕགས་པ་
[109a.3]འཇམ་དཔལ་བསྒོམ་པའི་མན་ངག །འཕགས་པ་འཇམ་དཔལ་ལ་ཕྱག་འཚལ་ལོ། །དབུས་སུ་འཇམ་དཔལ་སྐུ་མདོག་དམར་པོ་དགོད་པར་བྱའོ། །མདུན་དུ་དྲ་བ་ཅན་གྱི་འོད་སྐུ་མདོག་ལྗང་གུ་ར་ཡིག་ལས་སོ། །གཡས་སུ་སྐྲ་ཅན་མ་སྐུ་མདོག་དམར་མོ་པ་ཡིག་ལས་སོ། །རྒྱབ་ཏུ་ཟླ་འོད་སྐུ་མདོག་ཟླ་བ་
[109a.4]ལྟ་བུ་ཙ་ཡིག་ལས་སོ། །གཡོན་དུ་ན་ཡིག་ལས་ཉེ་བའི་སྐྲ་ཅན་མ་སྐུ་མདོག་དམར་མོ་བསྒོམ་པར་བྱའོ། །ཕྱག་ན་མཆོག་སྦྱིན་དང་ཨུཏྤ་ལ་ནི་འཇམ་དཔལ་གྱིའོ། །ཕྱག་གཡོན་ན་པདྨ་བསྣམས་ཤིང་གཡས་མཆོག་སྦྱིན་ནི་དྲ་བ་ཅན་གྱི་འོད་དོ། །ཨུཏྤལ་དང་མཆོག་སྦྱིན་གྱི་ཕྱག་རྒྱ་ནི་ཉེ་བའི་སྐྲ་ཅན་
[109a.5]མའོ། །མཆོག་སྦྱིན་དང་པདྨའི་ཕྱག་ནི་ཟླ་འོད་དོ། །པདྨ་དམར་པོ་བསྣམས་ཤིང་མཆོག་སྦྱིན་གྱི་ཕྱག་ནི་སྐྲ་ཅན་མའོ། །ལྟེ་བའི་སྟེང་དུ་འཁོར་ལོ་རྩིབས་བརྒྱད་པ་འཁོར་བཞིན་པ་མེའི་འོད་དང་མཚུངས་པའོ། །དེའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་འཁོར་ལོ་རྩིབས་བཞི་པའོ། །འཁོར་
[109a.6]ལོའི་བར་དུ་ཡི་གེ་གཞན་རྣམས་བསྒོམ་པར་བྱའོ། །དེ་བཞིན་དུ་སྔགས་ཀྱི་ཡི་གེ་རྣམས་ལྷ་རྣམས་ཀྱི་གཟུགས་སོ། །དེ་རྣམས་ཀྱི་ཐུགས་ཀར་ཡི་གེ་གཞན་རྣམས་དེ་བཞིན་དུའོ། །དེ་ནས་ཡི་གེ་མཐའ་དག་ཡོན་ཏན་ཀུན་གྱི་རོ་དང་ལྡན་པས་ཕྱོགས་བཅུ་ཇི་སྙེད་པ་རྣམས་ཁྱབ་པར་བལྟ་བར་བྱའོ། །རྗེ་བཙུན་
[109a.7]འཕགས་པ་འཇམ་དཔལ་བསྒོམ་པའི་མན་ངག་རྫོགས་སོ།། {T3452}༄༅༅། །རྒྱ་གར་སྐད་དུ། སདྱོ་ནུབྟ་བཱ་ར་པ་ཙ་ན་སཱ་དྷ་ནཾ། བོད་སྐད་དུ། ཨ་ར་པ་ཙ་ན་འཕྲལ་དུ་ཉམས་སུ་མྱོང་བའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །བློ་ངན་མུན་པའི་དུག་འཇོམས་ཤིང་། །སྐྱེ་བོའི་
[109b]
[109b.1]ཤེས་རབ་དོན་སྟེར་བ། །འཕྲལ་དུ་ཉམས་མྱོང་འཇམ་དཔལ་གྱི། །སྒྲུབ་ཐབས་ལེགས་པར་བཤད་པར་བྱ། །དང་པོ་རེ་ཞིག་རྣལ་འབྱོར་པས་ཡིད་དང་མཐུན་པའི་ས་ཕྱོགས་འགའ་ཞིག་ཏུ་དབྱངས་ཡིག་ཨ་ལས་བྱུང་བའི་ཟླ་བའི་སྟེང་དུ་དྷཱིཿཡིག་ས་བོན་ལས་བྱུང་བའི་འོད་ཟེར་ལྕགས་ཀྱུའི་རྣམ་པས་ཨ་ར་པ་ཙ་
[109b.2]ན་ལ་སོགས་པ་གདན་དྲངས་ནས་མཆོད་པ་ལ་སོགས་པ་བྱས་ནས་སྟོང་པ་ཉིད་བསྒོམ་པར་བྱའོ། །དེ་ནས་སེམས་ཀྱི་རྣམ་པ་ཡོངས་སུ་གྱུར་པ་ལས་ཀུ་མུ་དའི་གཉེན་གྱི་སྟེང་དུ་དྷཱིཿཡིག་མངོན་པར་གྱུར་པ་ལས་རལ་གྲི་རྣོན་པོ་བལྟ་བར་བྱའོ། །དེའི་རྩེ་མོ་ལ་དབྱངས་ཡིག་དང་པོ་ཡོངས་སུ་གྱུར་པ་ལས་ཆུ་སྐྱེས་དེའི་
[109b.3]སྟེང་དུ་རལ་གྲི་ལ་ས་བོན་ནོ། །དེ་རྣམས་ཐམས་ཅད་ཡོངས་སུ་གྱུར་པ་ལས་རལ་གྲི་དང་པོ་ཏི་བསྣམས་པ། རལ་པའི་ཐོར་ཚུགས་ལྔ་དང་ལྡན་པ། སྒེག་པའི་ཚུལ་འཛིན་པ་ཞལ་རྒྱས་ཤིང་འཛུམ་པ། རི་བོང་འཛིན་པའི་འོད་དང་མཚུངས་ཤིང་མཛེས་པ་སྣ་ཚོགས་ཆུ་སྐྱེས་ལ་རྡོ་རྗེ་སྐྱིལ་ཀྲུང་གིས་བཞུགས་
[109b.4]པ། འཕྲལ་དུ་ཉམས་སུ་མྱོང་བའི་ཨ་ར་པ་ཙ་ནའི་གཟུགས་སུ་བདག་ཉིད་བསྒོམ་པར་བྱའོ། །རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་མ་རེག་པར་འཁོར་ལོ་རྩིབས་བརྒྱད་པར། དེའི་སྟེང་དུ་དབྱངས་ཡིག་དང་པོ་ལས་བྱུང་བའི་སོར་གཅིག་ཙམ་གྱིས་མ་རེག་པར་ཟླ་བའི་དཀྱིལ་འཁོར།
[109b.5]དེ་ལ་ཟླ་བ་ལ་གནས་པའི་ས་བོན་ལས་སྐྱེས་པའི་རལ་གྲི། དེའི་རྩེ་མོ་ལ་སྔོན་དུ་གསུངས་པའི་རལ་གྲིའི་ས་བོན་གྱིས་རྣམ་པར་བརྒྱན་པའོ། །རལ་གྲི་ལ་སོགས་པ་ཡོངས་སུ་གྱུར་པ་ལས་ཡང་དེ་བཞིན་དུ་འཇམ་པའི་དབྱངས་བསྒོམ་པར་བྱའོ། །དེའི་མདུན་དུ་ཡང་ར་ཡིག་བསྒོམས་ལ། རལ་གྲི་དང་
[109b.6]དབྱངས་དང་པོ་ལས་སྐྱེས་པའི་ཟླ་བ་ལ་གནས་པའི་ར་ཡིག་བསྒོམས་ལ་རལ་གྲི་ལ་སོགས་པ་ཡོངས་སུ་གྱུར་པ་ལས་དྲ་བ་ཅན་གཞོན་ནུ་བཅོམ་ལྡན་འདས་ཀྱི་གཟུགས་ལྟ་བུ་བལྟ་བར་བྱའོ། །དེ་བཞིན་དུ་རྒྱབ་ཏུ་ལྔ་པའི་དང་པོའི་ཡི་གེ་ལས་ཟླ་འོད་དོ། །དེ་བཞིན་དུ་གཡས་སུ་ཙ་ཡིག་ལས་སྐྲ་ཅན་
[109b.7]མ་ནུ་མ་རྒྱས་པས་རྣམ་པར་བརྒྱན་པ་མགོ་བོའི་གཟུགས་སོ། །དེ་བཞིན་དུ་གཡོན་དུ་ཉེ་བའི་སྐྲ་ཅན་མ་ན་ཡིག་ལས་སོ། །དེ་རྣམས་ཐམས་ཅད་རང་གི་སྙིང་གར་ཟླ་བ་ལ་རང་རང་གི་ས་བོན་དཀར་པོ་བསམ་པར་བྱའོ། །དེ་ནས་འདྲེན་པའི་ཐུགས་ཀའི་ས་བོན་ལས་འཐོན་ཏེ་ཡེ་ཤེས་སེམས་དཔའ་
[110a]
[110a.1]དང་ལྷན་ཅིག་བཀུག་ནས་འཁོར་ལོ་མྱུར་དུ་འཁོར་ཞིང་ཟླ་བ་ལ་གནས་པའི་ལྷ་བཞི་པོ་རྣམས་དང་བཅས་པའི་བདག་ཉིད་བརྟན་ཞིང་མ་ལུས་པའི་ངག་གི་རང་བཞིན་སྤྲོ་བ་དང་བསྡུ་བ་བསྒོམ་པར་བྱའོ། །བསྒོམས་པས་ངལ་ན་སྔགས་བཟླས་པར་བྱའོ། །དེ་ལ་སྔགས་ཀྱི་རྒྱལ་
[110a.2]པོ་འདིའོ། །ཨ་ར་པ་ཙ་ན་དྷཱིཿཞེས་སོ། །འཕྲལ་དུ་ཉམས་མྱོང་འཇམ་དཔལ་གྱི། །སྒྲུབ་ཐབས་ལས་བྱུང་བསོད་ནམས་ཚོགས། །གང་བྱས་དེ་ཡིས་འཇིག་རྟེན་རྣམས། །རྟག་ཏུ་འཇམ་དཔལ་མཚུངས་པར་ཤོག །འཕྲལ་དུ་ཉམས་སུ་མྱོང་བའི་ཨ་ར་པ་ཙ་ནའི་སྒྲུབ་ཐབས་རྫོགས་སོ།། །།
[110a.3]འཇམ་པའི་དབྱངས་ལ་ཕྱག་འཚལ་ལོ། །ས་བོན་ལས་སྤྲོས་འོད་ཟེར་ལས། །སྤྲོ་བས་མགོན་པོའི་འོད་ཟེར་གྱིས། །ཡེ་ཤེས་སེམས་དཔའ་གདན་དྲངས་ནས། །ས་བོན་དགུག་གཞུག་ལ་སོགས་བྱ། །ངལ་ན་ཡེ་ཤེས་སེམས་དཔའ་སོགས། །ས་བོན་སྤྲོ་དང་བསྡུ་བྱས་ནས། །རྟག་ཏུ་
[110a.4]དྷཱིཿཡིག་བརྟན་བྱས་ལ། །འགྲོ་དང་འོང་བའི་རིམ་པ་ལས། །རལ་གྲི་ཟླ་བ་མཆོག་གི་ས་བོན་ཟླ་བའི་དཀྱིལ་འཁོར་སྟེང་གནས་པ། །རིམ་པར་གྱུར་པ་ཡོངས་སུ་གྱུར་པ་ལས་ནི་ཉེས་བྱས་ལྷུང་བ་རྣམ་པར་དག །དེ་ཡི་རྗེས་སུ་བློ་གྲོས་དང་བཅས་འཇམ་པའི་དབྱངས་ལ་སོགས་པ་ཡི། །སྐུར་གྱུར་
[110a.5]གཡོ་བའི་འཁོར་ལོས་བློ་གྲོས་ངན་ལས་གྲོལ་བ་རབ་ཏུ་སྟེར། །ཟླ་ལ་ས་བོན་རལ་གྲི་དང་། །དེ་ཚད་ཟླ་བའི་ས་བོན་འོད། །འོད་ཟེར་སྤྲོ་དང་བསྡུ་བྱས་ནས། །ལྷ་རྣམ་ལྔ་ནི་བསྒོམ་པར་བྱ།། {T3453}༄༅༅། །རྒྱ་གར་སྐད་དུ། བཛྲ་ཨ་ནཾ་ག་སཱ་དྷ་ནཾ། བོད་སྐད་དུ། ཡན་ལག་མེད་པའི་རྡོ་རྗེའི་
[110a.6]སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་སྟོང་པ་ཉིད་དུ་བསྒོམས་ནས། སྣ་ཚོགས་པདྨ་དང་ཉི་མ་ལ་པཾ་ཡིག་སེར་པོའི་ས་བོན་ཡོངས་སུ་གྱུར་པ་ལས་སྐད་ཅིག་གིས་རྗེ་བཙུན་འཇམ་དཔལ་ཡན་ལག་མེད་པའི་རྡོ་རྗེར་བདག་ཉིད་བསྐྱེད་དེ།
[110a.7]སྐུ་མདོག་སེར་པོ་ཞལ་གཅིག་པ། སྤྱན་གསུམ་པ། ཕྱག་དྲུག་པ་རལ་པའི་ཅོད་པན་ཅན། ལོ་བརྒྱད་གཉིས་ལོན་པ་ལྟ་བུ་སྒེག་པ་དང་བཅས་པ། ཞབས་གཡོན་བརྐྱང་བ། རལ་གྲི་དང་མདའ་དང་། མེ་ལོང་རྣམས་ནི་གཡས་ཀྱི་ཕྱག་གསུམ་ནའོ། །གཞུ་བཀང་བ་དང་། ཨུཏྤ་ལ་དང་།
[110b]
[110b.1]ལོ་མ་དང་བཅས་པའི་མེ་ཏོག་རྣམས་ནི་གཡོན་གྱི་ཕྱག་གསུམ་ན་བསྣམས་པའོ། །མཛེས་པའི་རྒྱན་དང་ན་བཟས་བརྒྱན་པ། མི་བསྐྱོད་པའི་ཅོད་པན་ཅན་བསྒོམས་ནས། མྱོས་བྱེད་རབ་ཏུ་སྦྱོར་བར་བསྒོམ་པར་བྱའོ། །དེ་བཞིན་དུ་མདའ་ཡིས་ནུ་མ་ཕུག་ནས་མྱ་ངན་མེད་པའི་ཡལ་གས་བརྡུང་ཞིང་ཁྲིད་
[110b.2]ནས་རལ་གྲིས་བསྒྲུབ་བྱ་སྐྲག་ཅིང་མེ་ལོང་དེ་ལ་བསྟན་པར་བྱའོ། །ཨུཏྤལ་གྱིས་རྐང་པ་བཅིངས་ནས་མྱོས་ཤིང་སྐྲ་གྲོལ་ཏེ། དགུག་པར་བྱའོ། །ཨོཾ་ཆེ་གེ་མོ་ཨཱ་ཀཱཪྵ་ཡ་མཉྫུ་གྷོ་ཥ་ཧྲཱིཿཛཿཞེས་པ་ནི་ཡན་ལག་མེད་པའི་རྡོ་རྗེའི་སྒྲུབ་ཐབས་རྫོགས་སོ།། {T3454}༄༅༅། །རྒྱ་གར་སྐད་དུ། བཛྲ་ཨ་
[110b.3]ནཾ་ག་མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་ཡན་ལག་མེད་པའི་རྡོ་རྗེའི་སྒྲུབ་ཐབས། དཔལ་ལྡན་འཇམ་པའི་དབྱངས་ལ་ཕྱག་འཚལ་ལོ། །སྔོན་མ་བཞིན་དུ་སྡིག་པ་བཤགས་པ་ལ་སོགས་པ་བྱས་ནས། སྟོང་པ་ཉིད་བསྒོམས་ཏེ། དེ་ནས་ཧཾ་ཡིག་ལས་སྐྱེས་པའི་ཧཾ་ཡིག་མནན་པའི་ལྟེ་བའི་དབུས་
[110b.4]སུ་མདའ་དང་བཅས་པའི་གཞུ་བསྒོམས་ནས་དེ་ཡོངས་སུ་གྱུར་པ་ལས། འཕགས་པ་འཇམ་དཔལ་ཡན་ལག་མེད་པའི་རྡོ་རྗེ་སྐུ་མདོག་སེར་པོ་ཕྱག་དྲུག་པ། རྩ་བའི་ཕྱག་དག་གིས་ཨུཏྤལ་དམར་པོའི་མདེའུ་དང་བཅས་པའི་མདའ་བཀང་བ་དང་མེ་ཏོག་གི་གཞུ་བསྣམས་པ། གཡས་པ་གཉིས་ཀྱིས་
[110b.5]རལ་གྲི་དང་། མེ་ལོང་བསྣམས་པ། གཡོན་པ་གཉིས་ཀྱིས་ཨུཏྤལ་དམར་པོ་དང་། མྱ་ངན་མེད་ཀྱི་མེ་ཏོག་དང་བཅས་པའི་ཡལ་ག་བསྣམས་པའོ། །མི་བསྐྱོད་པ་དང་རལ་པའི་ཅོད་པན་གྱིས་དབུ་ལ་བརྒྱན་པ། ཞབས་གཡོན་བརྐྱང་བ། ལོ་བཅུ་དྲུག་ལོན་པ་ལྟ་བུ་ཤིན་ཏུ་སྒེག་པའི་གཟུགས་སུ་
[110b.6]བལྟའོ། །ཡང་ན་ཕྱག་བཞི་པ་མེ་ལོང་དང་། མྱ་ངན་མེད་པའི་ཡལ་ག་འཛིན་པའི་ཕྱག་གཉིས་དང་བྲལ་བ་བསྒོམ་པར་བྱའོ། །དེ་ནས་ཡེ་ཤེས་སེམས་དཔའ་དང་ལྷན་ཅིག་ཏུ་བྱས་ཏེ། ཨོཾ་མཉྫུ་གྷོཥ་ཧྲཱིཿཛཿཞེས་པའི་སྔགས་བཟླས་པར་བྱའོ། །འབུམ་བཟླས་ན་འཇིག་རྟེན་གསུམ་པོ་ཡང་མངག་གཞུག་
[110b.7]པ་བྱེད་པར་འགྱུར་རོ། །ཡང་ན་འགའ་ཞིག་དགུག་པར་འདོད་པས་དེའི་ཚེ་དེ་ནས་གསུངས་པ་བཞིན་དུ་བསྒོམ་པར་བྱས་ནས་དེའི་ང་རྒྱལ་བརྟན་པོ་བྱས་ནས་ཡིད་ཀྱིས་རང་གི་སྙིང་གར་པདྨ་དམར་པོ་འདབ་མ་བཅུ་དྲུག་པ་མངོན་པར་འཕྱང་བའི་སྡོང་བུ་དང་བཅས་པ་དམིགས་ནས་དེའི་སྡོང་བུའི་རྩ་བར་ཡི་གེ་ཧཱུཾ་ཡིག་
[111a]
[111a.1]དམར་པོ་དགུ་བལྟའོ། །དེའི་འདབ་མ་རྣམས་ལ་གཡས་སྐོར་དུ་དབྱངས་ཡིག་དམར་པོ་བཅུ་དྲུག་བསྒོམ་པར་བྱས་ནས་དེའི་ཟེའུ་འབྲུའི་སྟེང་དུ་ཉིན་མོ་དང་ནུབ་མོ་ཇི་ལྟར་བྱུང་བའི་ཉི་མ་དང་ཟླ་བ་དག་གི་དཀྱིལ་འཁོར་དམར་པོའོ། །དེའི་དབུས་སུ་ཧྲཱིཿཡིག་དམར་པོ་གཉིས་ཀྱི་བར་དུ་བརྟེན་པའི་
[111a.2]འཆད་པར་འགྱུར་བའི་རང་གི་སྔགས་བལྟ་བར་བྱའོ། །དེ་ནས་དབྱངས་ཡིག་དམར་པོ་དེ་རྣམས་ལ་སྦྲང་མ་དགའ་བ་རྒྱས་པ་དག་བསྒོམས་ནས་རང་གི་སྔགས་ཀྱི་འོད་ཟེར་གྱི་ཚོགས་བཅུག་སྟེ། དེ་སྙེད་མངོན་པར་འདོད་པའི་བུད་མེད་ཀྱི་གནས་སུ་སོང་ནས་རླུང་གི་དཀྱིལ་འཁོར་གྱི་སྟེང་དུ་སྟོབས་ཀྱིས་གཞག་པར་
[111a.3]བྱའོ། །འོད་ཟེར་གྱི་རང་བཞིན་གྱི་ཞགས་པས་མགུལ་ནས་ལེགས་པར་བཅིངས་ཏེ། ལྕགས་ཀྱུ་བརྟན་པོས་ཆོས་འབྱུང་ཕུག་ནས་མདུན་དུ་ཡང་དག་པར་བཀུག་སྟེ་ཐལ་མོ་སྦྱར་ཞིང་མགལ་མེའི་འཁོར་ལོའི་ཚུལ་དུ་འཁོར་བའི་ནང་དུ་བཅུག་ནས་ཧཱུཾ་ཡིག་དམར་པོས་མིག་དང་སྙིང་ག་དང་ཡན་ལག་དང་ཉིང་
[111a.4]ལག་ཐམས་ཅད་གང་བར་བསྒོམ་པར་བྱའོ། །དེ་ནས་དེའི་སྙིང་གར་ཡང་དབྱངས་ཡིག་དམར་པོ་བཅུ་དྲུག་དང་བཅས་ཤིང་སྡོང་བུ་ལ་ཧཱུཾ་ཡིག་དང་བཅས་པའི་ཆུ་སྐྱེས་འདབ་མ་བཅུ་དྲུག་པ་བལྟ་བར་བྱའོ། །འོན་ཀྱང་དྲི་མ་དང་བཅས་པའི་ཁ་དོག་ཅན་ནོ། །དེའི་དབུས་སུ་ཧྲཱིཿཡིག་གིས་བརྟེན་པའི་མིང་གི་
[111a.5]ཡི་གེ་བསམ་པར་བྱའོ། །དེ་ནས་རང་གི་སྔགས་ཀྱི་ཡི་གེའི་འོད་ཟེར་ལས་བྱུང་བའི་ཤིན་ཏུ་དམར་ཞིང་ཕྲ་བའི་ལྕགས་ཀྱུ་རྣོན་པོས་པདྨའི་སྡོང་བུ་ལ་གནས་པའི་ཡི་གེ་ཧཱུཾ་གི་འོད་ཟེར་གྱིས་སྟེང་དུ་འགྲོ་ཞིང་བསྐུལ་ནས་སྦྲང་རྩི་བྱེད་པའི་ཚོགས་ཀྱི་རྗེས་སུ་འགྲོ་བ་དང་ལྡན་པས་རང་གི་སྣ་བུག་གཡས་པ་ནས་ཅིག་ཤོས་སུ་
[111a.6]ཞུགས་ཤིང་འཐོན་ནས་བསྒྲུབ་བྱའི་སྣ་བུག་གཡས་པ་ནས་ཞུགས་ནས་དེའི་སྙིང་གར་ཞུགས་ཏེ། ལྕགས་ཀྱུས་དེའི་མིང་གི་ཡི་གེ་ལ་གནས་པ་འགུགས་པར་བྱེད་ཅིང་སྦྲང་འཐུང་དེ་རྣམས་ཀྱིས་ཀྱང་དགའ་བས་པདྨ་དེ་ལས་བྱུང་ཞིང་རང་དབང་གིས་དེའི་དབྱངས་རྣམས་འཇིབ་ཅིང་རྣམ་པར་རྙིངས་པར་བྱེད་དོ་
[111a.7]ཞེས་ཤིན་ཏུ་ཡུན་རིང་དུ་མི་གཡོ་བར་བལྟ་བར་བྱའོ། །དེ་ནས་དེ་ཁོ་ན་བཞིན་དུ་དབུགས་ཀྱིས་བསྐུལ་བའི་ལྕགས་ཀྱུ་དེའི་མིང་སྟོབས་ཀྱིས་བླངས་ཏེ། སྦྲང་བུ་དེ་རྣམས་ཀྱིས་ཀྱང་རང་གི་དབྱངས་ཡིག་དེའི་སྣ་བུག་གཡོན་པའི་ལམ་དུ་ཞུགས་ཤིང་འཐོན་པར་བལྟ་བར་བྱའོ། །ཡང་བླངས་ཏེ་དབུགས་
[111b]
[111b.1]ཀྱི་རླུང་གིས་ལྕགས་ཀྱུས་སྦྲང་མ་རྣམས་ཡང་དག་པར་བཀུག་སྟེ། རང་གི་སྣ་བུག་གཡས་པའི་སྒོ་ནས་ཞུགས་ཏེ། དེའི་མིང་གི་ཡི་གེ་རང་གི་སྙིང་གའི་སྔགས་ཀྱིས་དྲག་ཏུ་མནན་ནས། དབྱངས་རྣམས་འདབ་མ་སོ་སོ་ལ་སྦྲང་བུ་མཆོག་གིས་དབང་དུ་བྱས་པར་རྣམ་པར་བསམ་པར་བྱའོ་ཞེས་པ་འདིའི་རིམ་པས་
[111b.2]རང་གི་རྣམ་པར་ཤེས་པ་དང་། དེའི་རྣམ་པར་ཤེས་པ་གཅིག་ཏུ་བལྟ་བར་བྱའོ། །དེ་ནས་དེའི་ནུ་མ་ཨུཏྤལ་དམར་པོའི་མདེའུ་རྣོན་པོ་དང་ལྡན་པའི་མདས་ཕུག་ནས་འདོད་ཆགས་ཆེན་པོས་བརྒྱལ་ཏེ། འགྱེལ་བར་བལྟ་ཞིང་ལྕགས་སྒྲོག་ལྟ་བུའི་རྒྱུད་ཀྱིས་དེའི་རྐང་པ་གཉིས་དམ་པོར་བཅིངས་ནས།
[111b.3]རང་གིས་བཟུང་བའི་ཨུཏྤ་ལའི་སྡོང་བུའི་རང་བཞིན་གྱི་ཞགས་པས་མགུལ་ནས་བཅིངས་ཏེ་ཡང་དག་པར་བཀུག་ནས་རང་གི་རྐང་པ་གཉིས་ཀྱི་བར་དུ་ལྷུང་བར་བྱས་ནས་མྱ་ངན་མེད་པས་སྙིང་གར་བསྣུན་ཅིང་མངོན་པའི་ང་རྒྱལ་མེད་པར་བྱས་ནས་རལ་གྲིས་འཇིགས་པར་བྱས་ཤིང་སྐྱབས་གཞན་མེད་པར་བྱས་
[111b.4]ཏེ། ཡང་མེ་ལོང་གི་བདག་ཉིད་ཇི་ལྟར་གནས་པ་སྐྲ་གྲོལ་ཞིང་གཅེར་བུ་ཤིན་ཏུ་ཆགས་པས་མྱོས་ཤིང་བྲལ་བས་འཇིགས་པ་ཤིན་ཏུ་གུས་པས་བརྟན་པར་བྱའོ། །རང་རིག་པས་རྗེས་སུ་ཆགས་པར་བྱའོ། །ཨོཾ་ཆེ་གེ་མོ་ཨཱ་ཀཪྵ་ཡ་མཉྫུ་གྷོ་ཥ་ཧྲཱིཿཛཿཞེས་པའི་རང་གི་སྔགས་མིང་དང་བཅས་པ་རྩེ་
[111b.5]གཅིག་པའི་སེམས་ཀྱིས་བཟླས་པར་བྱའོ། །དེ་ནས་གོང་དུ་གསུངས་པའི་རིམ་པས་དཀར་པོའི་མཆོག་གི་ཚེས་གཅིག་ནས་བརྩམས་ཏེ་ཇི་སྲིད་ཚེས་བཅུ་བཞིའི་བར་དུ་ཁྲི་ཕྲག་གཅིག་ཙམ་བཟླས་པར་བྱའོ། །ཡང་ཚེས་བཅོ་ལྔ་ལ་མཆོད་པ་རྣམ་པ་རྒྱ་ཆེན་པོ་བྱས་ནས་མཚན་ཐོག་ཐག་བཟླས་པར་
[111b.6]བྱའོ། །དེ་ནས་ཐོ་རངས་ངེས་པར་འོང་བར་འགྱུར་རོ། །འོངས་པ་ན་དེ་ལ་ཡང་ཕྱག་རྒྱ་ཆེན་པོའི་དངོས་གྲུབ་ཀྱི་དོན་དུ་རང་གི་ལྷ་རྣམས་མཆོད་པའི་བསམ་པས་ཇི་ལྟར་བདེ་བར་ལོངས་སྤྱད་པར་བྱའོ། །འཇམ་དཔལ་ཡན་ལག་མེད་པའི་རྡོ་རྗེའི་སྒྲུབ་ཐབས་རྫོགས་སོ།། {T3455}༄༅༅། །རྒྱ་གར་སྐད་དུ།
[111b.7]དྷརྨ་དྷཱ་ཏུ་བཱ་གཱི་ཤྭ་ར་སཱ་དྷ་ནཾ། བོད་སྐད་དུ། ཆོས་ཀྱི་དབྱིངས་ངག་གི་དབང་ཕྱུག་གི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དེ་ཁོ་ན་ཉིད་བཞིན་དུ་སྟོང་པ་ཉིད་ལ་སོགས་པ་བསྒོམས་པའི་རྗེས་སུ་སྣ་ཚོགས་པདྨའི་སྟེང་དུ་ཟླ་བ་ལ་ཨཱཿཡིག་དཀར་པོའི་ས་བོན་ལས་དཔལ་ལྡན་ཆོས་
[112a]
[112a.1]ཀྱི་དབྱིངས་ངག་གི་དབང་ཕྱུག་ཡན་ལག་ཐམས་ཅད་དཀར་པོ་ཞལ་བཞི་པ། ཕྱག་བརྒྱད་པ། སངས་རྒྱས་ལྔ་དང་རིན་པོ་ཆེའི་ཅོད་པན་གྱིས་དབུ་བརྒྱན་པ། ལྷའི་རྒྱན་དང་གོས་དང་སྒེག་པ་ལ་སོགས་པའི་ཉམས་དང་ལྡན་པ། ཕྱག་གཉིས་ནི་ཆོས་ཀྱི་འཁོར་ལོའི་ཕྱག་རྒྱས་མཚན་
[112a.2]པ། རལ་གྲི་དང་། མདའ་དང་། རྡོ་རྗེ་ནི་གཡས་ཀྱི་ཕྱག་གསུམ་ནའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་། གཞུ་དང་། དྲིལ་བུ་ནི་གཡོན་གྱི་ཕྱག་གསུམ་ནའོ། །རྡོ་རྗེའི་སྐྱིལ་མོ་ཀྲུང་དང་ལྡན་པར་བདག་ཉིད་བསྐྱེད་ནས། སྙིང་གར་ཟླ་བ་ལ་ཧཱུཾ་སྔོན་པོ་ལས་སྐྱེས་པའི་ས་བོན་དང་བཅས་པའི་རྡོ་རྗེ་
[112a.3]ནི་ཕྱག་རྒྱ་ཆེན་པོའི་རང་བཞིན་ནོ། །སྨིན་མཚམས་སུ་ཏྲཱྃ་ཡིག་སེར་པོ་ལས་ས་བོན་དང་བཅས་པའི་རིན་པོ་ཆེ་ནི་ཆོས་ཀྱི་ཕྱག་རྒྱའི་རང་བཞིན་ནོ། །མགྲིན་པར་ཧྲཱིཿཡིག་དམར་པོ་ལས་སྐྱེས་པའི་ས་བོན་དང་བཅས་པའི་པདྨ་ནི་དམ་ཚིག་གི་ཕྱག་རྒྱའི་རང་བཞིན་ནོ། །སྤྱི་བོར་ཨཱཿཡིག་ལྗང་གུ་ལས་སྐྱེས་པ་
[112a.4]ས་བོན་དང་བཅས་པའི་སྣ་ཚོགས་རྡོ་རྗེ་ནི་ལས་ཀྱི་ཕྱག་རྒྱའི་རང་བཞིན་ནོ། །འདིར་ཕྱག་རྒྱ་བཞི་དང་ལྡན་པར་བདག་ཉིད་བསྒོམ་པར་བྱའོ། །ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ན་མཱུརྟི་བཱ་གཱི་ཤྭ་ར་མ་ཧཱ་ཝཱ་ཙ་སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿཞེས་པའི་སྔགས་ཀྱིས་བྱིན་གྱིས་བརླབ་པར་བྱའོ། །
[112a.5]དེ་ནས་རྡོ་རྗེའི་ཁུ་ཚུར་བཅིངས་ལ་གུང་མོ་གཉིས་ཀྱི་ཚིགས་གསུམ་པ་བཅག་པ་ནི་རལ་གྲིའི་རྣམ་པར་བཟུང་ནས་མཛུབ་མོ་གཉིས་མཐེབ་ཆེན་ལངས་པའི་སྟེང་དུ་བཀུག་ནས་བཟུང་བ་ནི་དམ་ཚིག་གི་ཕྱག་རྒྱའོ། །དེ་ནས་རང་གི་ལྕེ་ལ་ཟླ་བ་ལ་གནས་པའི་ཧྲཱིཿཡིག་དམར་པོའི་ས་བོན་གྱིས་བྱིན་གྱིས་བརླབ་པར་བསམ་
[112a.6]མོ། །ཁྲོ་བོའི་ངག་གིས་སྔགས་བཟླས་པར་བྱའོ། །དེ་ལ་འདིའི་བཟླས་པའི་སྔགས་ནི་ཨོཾ་བཛྲ་ཏཱིཀྵྞ་དུཿཁཙྪེ་ད་པྲཛྙཱ་ཛྙཱ་ན་མཱུརྟ་ཡེ་ཛྙཱ་ན་ཀཱ་ཡ་བཱ་གཱི་ཤྭ་ར་ཨ་ར་པ་ཙ་ནཱ་ཡ་ཏེ་ན་མཿམཚན་བརྒྱ་རྩ་བརྒྱད་པ་དང་། མཚན་ཡང་དག་པར་བརྗོད་པ་འདི་ལྟར་དུས་གསུམ་དུ་བཀླག་པར་བྱའོ་ཞེས་པ་ནི་ཆོས་ཀྱི་དབྱིངས་ངག་གི་དབང་
[112a.7]ཕྱུག་གི་སྒྲུབ་ཐབས་རྫོགས་སོ། {T3456}༄༅༅། །རྒྱ་གར་སྐད་དུ། དྷརྨ་དྷཱ་ཏུ་བཱ་གཱི་ཤྭ་ར་སཱ་དྷ་ནཾ་བ་ཤྱ་བི་དྷིཿ། བོད་སྐད་དུ། ཆོས་ཀྱི་དབྱིངས་ངག་གི་དབང་ཕྱུག་གི་སྒྲུབ་ཐབས་ཀྱིས་དབང་དུ་བྱ་བའི་ཆོ་ག །འཕགས་པ་འཇམ་དཔལ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་སྟོང་
[112b]
[112b.1]པ་ཉིད་དུ་བསྒོམས་པའི་རྗེས་ལ་པདྨ་དང་ཟླ་བ་ལ་གནས་པའི་ཧོཿཡིག་དམར་པོ་ཡོངས་སུ་གྱུར་པ་ལས་ཕྱག་བརྒྱད་པ་ཞལ་བཞི་པ། རྩ་བའི་ཞལ་དཀར་དམར། གཡས་ཀྱི་གུར་གུམ་ལྟར་དམར་བ། རྒྱབ་ཀྱི་པདྨ་རཱ་ག་ལྟར་དམར་བ། གཡོན་གྱི་དམར་སེར་རོ། །རྩ་བའི་ཕྱག་གཉིས་ཀྱིས་གཞུ་དང་། མདའ་
[112b.2]བསྣམས་པ། ཕྱི་མ་དག་གིས་ཞགས་པ་དང་། ལྕགས་ཀྱུ་བསྣམས་པ། ཡང་ཕྱི་མ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་། རལ་གྲི་བསྣམས་པ། དེ་བཞིན་དུ་ཕྱི་མ་དག་གིས་རྡོ་རྗེ་དང་དྲིལ་བུ་བསྣམས་པའོ། །ཆགས་པ་ཆེན་པོས་སྒེག་པའི་ཉམས་འབར་བ། སྣ་ཚོགས་པདྨ་དང་ཟླ་བ་ལ་
[112b.3]རོལ་པའི་སྟབས་ཀྱིས་བཞུགས་པ། ལྷའི་གོས་དང་། རྒྱན་དང་འོད་དཔག་ཏུ་མེད་པ་དང་། རལ་པའི་ཅོད་པན་གྱིས་བརྒྱན་པ། སྙིང་གའི་ས་བོན་གྱི་འོད་ཟེར་གྱིས་སེམས་ཅན་རྣམས་བཀུག་ནས་རང་དབང་མེད་པའི་གནས་ལ་བཀོད་དེ་སྔགས་བཟླས་པར་བྱའོ། །ཨོཾ་མ་ཧཱ་རཱ་ག་བཛྲ་རཱ་ག་ཡ་སརྦ་སཏྭ་ན་ཧོ།
[112b.4]ཞེས་སོ། །ཆོས་ཀྱི་དབྱིངས་ངག་གི་དབང་ཕྱུག་གི་སྒྲུབ་ཐབས་ཀྱིས་དབང་དུ་བྱ་བའི་ཆོ་ག་རྫོགས་སོ།། {T3457}༄༅༅། །རྒྱ་གར་སྐད་དུ། སརྦ་སཏྭ་བ་ཤཱི་ཀ་ར་ཎ་ས་མཱ་དྷི། བོད་སྐད་དུ། སེམས་ཅན་ཐམས་ཅད་དབང་དུ་བྱེད་པའི་ཏིང་ངེ་འཛིན། འཇམ་དཔལ་མགོན་པོ་ལ་ཕྱག་འཚལ་ལོ། །སྟོང་
[112b.5]པ་ཉིད་བསྒོམ་པ་སྔོན་དུ་འགྲོ་བས་ཟླ་བའི་དཀྱིལ་འཁོར་གྱི་སྟེང་དུ་ཧོཿཡིག་ལས་བདག་ཉིད་བསྐྱེད་དེ། ཆགས་པ་ཆེན་པོའི་གཟུགས་དཀར་དམར་སྒེག་པའི་ཉམས་འབར་བ་རོལ་པའི་སྟབས་ཀྱིས་བཞུགས་པ། ཞལ་བཞི་པ། ཕྱག་བརྒྱད་པའོ། །དང་པོའི་ཞལ་དཀར་དམར། གཡས་
[112b.6]གུར་གུམ་ལྟར་དམར་བ། རྒྱབ་པདྨ་རཱ་ག་ལྟར་དམར་བ། གཡོན་དམར་སེར་རོ། །རྩ་བའི་ཕྱག་གཉིས་ཀྱིས་གཞུ་དང་མདའ་བསྣམས་པ། ཕྱི་མ་དག་གིས་ཞགས་པ་དང་ལྕགས་ཀྱུ་བསྣམས་པ། དེ་བཞིན་དུ་ཕྱི་མ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་རལ་གྲི་བསྣམས་པ།
[112b.7]ཡང་དེ་བཞིན་དུ་ཕྱི་མ་དག་གིས་རྡོ་རྗེ་དང་དྲིལ་བུ་བསྣམས་པ། དེ་བཞིན་དུ་ཅོད་པན་དང་ལྡན་པ་བསྒོམ་པར་བྱའོ། །ཅོད་པན་ལས་འོད་ཟེར་བྱུང་སྟེ་སྟེང་དུ་སོང་ནས་སྣང་བར་བྱས་ཏེ་མཆོག་གི་དམར་པོ་ཆེན་པོའི་སྐུར་བལྟའོ། །ཇི་ལྟར་ཤར་དང་། ལྷོ་དང་། ནུབ་དང་། བྱང་དང་། སྟེང་དང་། འོག་
[113a]
[113a.1]གི་ཕྱོགས་རྣམས་སུ་གནས་པ་རྣམས་ལ་དང་པོ་དང་གཉིས་པ་དང་གསུམ་པ་དང་བཞི་པའི་འོད་ཟེར་གྱི་རྐང་པ་རྣམས་ཀྱིས་གང་ནས་རྗེས་སུ་ཆགས་པས་རང་གི་དབང་དུ་གནས་པར་ཡིད་ཀྱིས་བསམས་ནས་དེ་ནས་སྔགས་བཟླས་པར་བྱའོ། །ཨོཾ་མ་ཧཱ་རཱ་ག་བཛྲ་རཱ་ག་ཡ་སརྦ་སཏྭ་
[113a.2]ན་ཧོཿདེ་ནས་སེམས་ཅན་ཐམས་ཅད་ངེས་པར་དབང་དུ་འགྱུར་རོ་ཞེས་པའི་ངེས་པ་ཤིན་ཏུ་བསྒོམས་པས་ཆགས་པ་ཆེན་པོའི་གཟུགས་ཀྱི་སྐུའི་མཆོག་འཇམ་པའི་རྡོ་རྗེའོ། །སེམས་ཅན་ཐམས་ཅད་དབང་དུ་བྱེད་པའི་ཏིང་ངེ་འཛིན་རྫོགས་སོ།། {T3458}༄༅༅། །རྒྱ་གར་སྐད་དུ། དྷརྨ་དྷ་ཏུ་བཱ་གཱི་ཤྭི་
[113a.3]ར་སཱ་དྷ་ནཾ། བོད་སྐད་དུ། ཆོས་ཀྱི་དབྱིངས་ངག་གི་དབང་ཕྱུག་གི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དེ་ཁོ་ན་བཞིན་དུ་སྟོང་པ་ཉིད་བསྒོམས་ནས་ཆུའི་དཀྱིལ་འཁོར་ལ་པདྨ་དཀར་པོ་འདབ་མ་བརྒྱད་པའི་ཟེའུ་འབྲུ་ལ་འཆི་བ་འཇོམས་པ་ཆོས་ཐམས་ཅད་ལྷག་
[113a.4]པར་གྲོལ་བ་ཞེས་བྱའོ། །ཟླ་བ་ལ་གནས་པའི་ཨཾ་ཡིག་དཀར་པོ་ཡོངས་སུ་གྱུར་པ་ལས་ཞལ་གཅིག་ཕྱག་གཉིས་པ་མདོག་དཀར་པོ། རྡོ་རྗེ་སྐྱིལ་ཀྲུང་གི་སྟེང་དུ་ཕྱག་ཏིང་ངེ་འཛིན་གྱི་ཕྱག་རྒྱ་ཅན། གཞོན་ནུ་རྒྱན་ཐམས་ཅད་ཀྱིས་བརྒྱན་པ། ཟུར་ཕུད་ལྔ་དང་ལྡན་པའི་རྗེ་བཙུན་འཇམ་དཔལ་
[113a.5]གྱི་སྐུར་བདག་ཉིད་སྐད་ཅིག་གིས་བསྐྱེད་ནས། རང་གི་སྙིང་གར་ཟླ་བ་དང་པདྨའི་སྟེང་དུ་ཁཾ་ཡིག་ལས་སྐྱེས་པའི་དུང་། དེའི་དབུས་སུ་ཨོཾ་བཛྲ་ཛི་ཧཱ་རཾ་ཞེས་པས་རྡོ་རྗེའི་ལྕེའོ། །ལྕེའི་སྟེང་དུ་རིན་པོ་ཆེ་དང་། པདྨ་དེའི་སྟེང་དུ་སངས་རྒྱས་འོད་དཔག་མེད་བསམ་པར་བྱའོ། །རང་གི་རྐན་གྱི་ཕྱོགས་སུ་
[113a.6]ཁ་ཐུར་དུ་བསྟན་པ་བདུད་རྩི་འབབ་པ་བཞིན་པའི་བཾ་ཡིག་དཀར་པོ་བསྒོམ་པར་བྱའོ། །ཨོཾ་བཱ་ཀྱེ་དཾ་ན་མ་ཞེས་པའི་སྔགས་བཟླས་པར་བྱའོ། །ཆེན་པོའི་རྗེས་སུ་འབྲང་བ་འདི་དུང་ཆོས་ཀྱི་ཏིང་ངེ་འཛིན་མཚོན་པ་ཆོས་ཀྱི་དབྱིངས་ངག་གི་དབང་ཕྱུག་གི་སྒྲུབ་ཐབས་རྫོགས་སོ།། །།
[113a.7]{T3459}༄༅༅། །རྒྱ་གར་སྐད་དུ། ཨ་ར་པ་ཙ་ན་སཱ་དྷ་ནཾ། བོད་སྐད་དུ། ཨ་ར་པ་ཙ་ནའི་སྒྲུབ་ཐབས། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དང་པོར་ས་ཕྱོགས་གཙང་མ་ཡིད་དུ་འོང་བ་སྐྱེ་བོས་དབེན་པའི་ས་ཕྱོགས་འགའ་ཞིག་ཏུ་སྟན་བདེ་བ་ལ་ཉེ་བར་འདུག་
[113b]
[113b.1]སྟེ། སྡུག་བསྔལ་གསུམ་གྱིས་སྡུག་བསྔལ་བའི་སེམས་ཅན་གྱི་ཁམས་མཐའ་ཡས་པ་ལ་བལྟས་ཏེ། སེམས་ཅན་གྱི་རང་བཞིན་དེ་རྣམས་འཇམ་པའི་དབྱངས་ཀྱི་གོ་འཕང་ཐོབ་ཅིང་དེའི་གོ་འཕང་དང་དེ་བཞིན་དུ་ཁྱད་པར་མེད་པར་རབ་ཏུ་དགོད་པར་བྱའོ་ཞེས་པའི་སྙིང་རྗེ་ལ་ཉེ་བར་གནས་པས་བླ་ན་
[113b.2]མེད་པའི་སེམས་ཀྱི་ཁྱད་པར་ཆ་བཞི་དང་བཞིས་ཉེ་བར་མཛེས་པ་ཟླ་བ་དང་རིན་པོ་ཆེ་ལས་བྱས་པའི་དྲི་གཙང་ཁང་གི་མཐིལ་ལ་བ་དན་སྣ་ཚོགས་བརྐྱང་ཞིང་འཕྱང་བ་དང་ལྡན་པ། སྤོས་ཀྱི་ཕྱེ་མའི་ཕུར་མ་དྲིས་ཡོངས་སུ་ཁྱབ་པས་གང་བ། འདོད་པའི་དྲི་བསུང་འབྱུང་ཞིང་སྦྲང་མ་དགའ་བའི་
[113b.3]གཤོག་པ་བསྐྱོད་པས་མེ་ཏོག་ཁ་ཕྱེ་བ་སྤྲུལ་པའི་རིན་པོ་ཆེ་སྣ་ཚོགས་ལས་བསྒྲུབས་པའི་སེང་གེའི་གདན་ལ་བཞུགས་པའི་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་ཡིད་ཀྱིས་དམིགས་ཏེ་ཉེ་བར་སྤྱད་པ་ལྔ་དང་། གར་དང་གླུ་དང་རོལ་མོ་ལ་སོགས་པའི་རང་བཞིན་གྱི་མཆོད་
[113b.4]པས་ཡང་དག་པར་མཆོད་ནས། བདག་ནི་དབུལ་ཏེ་ཅི་ཡང་མ་མཆིས་པས་དེའི་ཕྱིར་བདག་གི་ལུས་དབུལ་ཞིང་སངས་རྒྱས་ལ་སྐྱབས་སུ་འགྲོ་བ་ལ་སོགས་པའི་ཆོག་གིས་དཀོན་མཆོག་གསུམ་ལ་སྐྱབས་སུ་འགྲོ་བ་དང་ལྡན་པས་སྡིག་པ་བཤགས་པར་བྱའོ། །སླར་ཡང་མི་བྱེད་པར་སྡོམ་པ་
[113b.5]དང་། བསོད་ནམས་ལ་རྗེས་སུ་ཡི་རང་བར་བྱས་ནས་སྐད་ཅིག་གིས་ཐམས་ཅད་སྟོང་པར་བལྟའོ། །དེ་ནས་ངེས་པར་དེ་བཞིན་དུ་དེའི་དོན་བལྟ་ཞིང་རང་བཞིན་དག་པའི་སྔགས་ལན་གསུམ་བརྗོད་པར་བྱའོ། །དེའི་རྗེས་སུ་ཡང་དེ་བཞིན་དུ་སྟོང་པ་ཉིད་ཀྱི་ཚིག་གིས་སྔགས་ཡང་ལན་གསུམ་བརྗོད་
[113b.6]པར་བྱའོ། །དེ་ནས་སྐད་ཅིག་གིས་འཇིག་རྟེན་གསུམ་པོ་འོད་ཀྱི་རང་བཞིན་གྱིས་སྣང་བར་བྱས་ནས། དེའི་རྗེས་སུ་རང་གི་སྙིང་གའི་མཆོག་གི་ཡི་གེ་ཡོངས་སུ་གྱུར་པ་ལས་བདུད་རྩི་འོད་ཟེར་གྱི་གཟུགས་དག་ཅིང་གསལ་བའི་དྷཱིཿཡིག་ཡོངས་སུ་གྱུར་པ་ལས་རལ་གྲི་སྔོན་པོ་རྣོན་པོ་གཟུང་བར་བྱའོ། །དེའི་
[113b.7]ཆང་པའི་གནས་སུ་དང་པོའི་ཡི་གེ་ལས་སྐྱེས་པའི་ཡིད་ཀྱི་འོད་ཟེར་གྱི་རལ་གྲིའི་ས་བོན་ལ་བལྟའོ། །བདག་ཉིད་དང་ལྷན་ཅིག་ཁ་དོག་ལྔ་པོ་ཡོངས་སུ་གྱུར་པ་ལས་ཕྱག་གཡོན་ན་པོ་ཏི་བསྣམས་པ། རིན་པོ་ཆེ་ལྔའི་རྒྱན་གྱིས་ཅོད་པན་བྱས་པ། རལ་པའི་ལྕང་ལོ་ལྔ་དང་ལྡན་པ། བནྡྷུ་ཀའི་མདོག་ལྟ་
[114a]
[114a.1]བུའི་ན་བཟའ་ཟུང་དང་ལྡན་པ། ཇི་ལྟ་ཇི་ལྟར་རིག་པའི་གནས་ཀྱི་ཚུལ་འཛིན་པས་མཛེས་ཤིང་སྒེག་པ། རྒྱན་གྱིས་བརྒྱན་པ་འཛུམ་ལ་འཕྲོ་བས་འགྲམ་པའི་གནས་ལ་སྟོན་ཀའི་ཟླ་བ་ཚོགས་པ་ལྟ་བུའོ། །གཅིག་ཏུ་བྱས་པའི་གནས་ལ་མུན་པ་སངས་པ་ལྟ་བུའི་ཚོགས་སུ་བྱས་པ་བལྟ་བར་བྱའོ། །
[114a.2]དེ་ནས་རང་གི་སྙིང་གའི་ཡི་གེའི་ཚོགས་པ་ཐམས་ཅད་ཡོངས་སུ་གྱུར་པ་ལས་འཁོར་ལོ་རྩིབས་བརྒྱད་པ་འཁོར་བཞིན་པ་སོར་གཅིག་ཙམ་གྱིས་མ་རེག་པ་དེ་ལས་བྱུང་བའི་ཟླ་བའི་དཀྱིལ་འཁོར། དེ་ལ་ཡང་དེ་ལས་སྐྱེས་པའི་རལ་གྲིའོ། །དེ་ནས་བརྒྱད་པོ་ཡང་དེ་བཞིན་ཉིད་དུ་གྱུར་པའི་ཚོགས་ལ་རང་གི་ལུས་འོད་ཟེར་རབ་
[114a.3]ཏུ་འབར་བཞིན་པ་ལས་རྐྱལ་པ་བཞིན་དུ་རྒྱུན་མི་འཆད་པར་ཕྱོགས་ཀྱི་མཐར་ཐུག་པ་འོད་ཟེར་དཀར་པོས་སྣང་བར་མཛད་ནས། སྣ་ཚོགས་པདྨའི་འདབ་མའི་སྟེང་དུ་ཟླ་བ་དྲི་མ་མེད་པའི་དཀྱིལ་འཁོར་གྱིས་སྤྲས་ཤིང་བརྟན་པ་ལ་རྡོ་རྗེ་སྐྱིལ་ཀྲུང་གིས་བཞུགས་པའི་འཇམ་དཔལ་དུ་བདག་ཉིད་བལྟ་བར་བྱའོ། །དེ་ནས་རང་
[114a.4]གི་སྙིང་གའི་ཡི་གེའི་ཚོགས་ཡོངས་སུ་གྱུར་པ་ལས་འཁོར་ལོ་རྩིབས་བརྒྱད་པ་འཁོར་བཞིན་པ་སོར་གཅིག་ཙམ་གྱིས་མ་རེག་པ་དེ་ལས་བྱུང་བའི་ཟླ་བའི་དཀྱིལ་འཁོར་དེ་ལ་ཡང་དེ་ལས་སྐྱེས་པའི་རལ་གྲིའོ། །དེའི་ཆང་པ་ལ་ཡང་དེ་བཞིན་ཉིད་དུ་གྱུར་པའི་ཟླ་བའོ། །དེ་ལ་ཡང་དེ་བཞིན་དུ་སྲོག་ཆེན་པོའི་ཡི་གེ་
[114a.5]བལྟའོ། །རལ་གྲི་ལ་སོགས་པ་ཡོངས་སུ་གྱུར་པ་ལས་དང་པོར་གསུངས་པའི་སྐུ་མདོག་དང་མཚན་མ་ལ་སོགས་པ་དང་ལྡན་པའི་འཇམ་པའི་དབྱངས་བསྒོམ་པར་བྱའོ། །དེའི་མདུན་དང་རྒྱབ་ཏུ་རང་གི་ས་བོན་ལས་སྐྱེས་པའི་རལ་གྲི་བསྐྱེད་ནས་ཟླ་བའི་དཀྱིལ་འཁོར་ལ་བདག་ཉིད་ཀྱི་རྒྱུས་ཉི་མའི་འོད་དང་། ཟླ་
[114a.6]བའི་འོད་གཙོ་བོ་བཞིན་དུ་བསམ་པར་བྱའོ། །འདིས་ཆོ་ག་བཞིན་དུ་སྟོད་གཡོགས་དང་སྨད་གཡོགས་དང་བཅས་པ་བདག་ཉིད་ཇི་ལྟ་བའི་རྒྱན་གྱིས་བརྒྱན་པའི་སྐྲ་ཅན་མ་དང་། ཉེ་བའི་སྐྲ་ཅན་མ་དག་གཡས་དང་གཡོན་དག་ཏུ་བསྒོམ་པར་བྱའོ། །ལྔ་པོ་རྣམས་ཀྱི་འཁོར་ལོ་རྩིབས་བརྒྱད་པ་ལྷ་རྣམས་ཀྱི་རྣམ་པ་
[114a.7]དེ་བཞིན་དུ་རང་གི་སྙིང་གར་ཟླ་བ་ལ་རང་རང་གི་ས་བོན་ལས་ན་བུན་བྱེད་པ་དཀར་པོ་རལ་པ་དང་ལྡན་པར་བལྟའོ། །དེ་ནས་གཙོ་བོའི་ཡི་གེའི་མཐར་གནས་པའི་ས་བོན་གྱི་འོད་ཟེར་གྱི་སྦུབས་ལས་རྩེ་མོ་འཁྱོག་པོ་སྤྱི་བོ་ལས་བྱུང་སྟེ། ཁམས་གསུམ་མཐའ་དག་སྣང་བར་བྱས་ནས་པདྨའི་གདན་ལ་གནས་ནས་དམ་ཚིག་
[114b]
[114b.1]སེམས་དཔའ་དང་ཡེ་ཤེས་སེམས་དཔའི་རང་བཞིན་དབྱེར་མེད་པར་བསྒོམ་པར་བྱའོ། །དེ་རྣམས་ཀྱི་མདུན་དུ་གནས་ནས་ཡིད་ཀྱིས་ཕྱིའི་མཆོད་པ་སྣ་ཚོགས་པས་མཆོད་དེ། ཧཱུཾ་བཾ་ཛཿཧོཿཞེས་བརྗོད་ནས་གཅིག་ཏུ་བལྟ་བར་བྱའོ། །དེ་ནས་སྐད་ཅིག་གིས་བརྟན་པ་ལ་གཡས་ཕྱོགས་སུ་མྱུར་དུ་འཁོར་བཞིན་པའི་
[114b.2]འཁོར་ལོ་རྩིབས་བརྒྱད་པའོ། །ཟླ་བའི་དཀྱིལ་འཁོར་ལ་གནས་པའི་ལྷ་ལྔ་པོ་རྣམས་མི་གཡོ་བར་བལྟའོ། །དེ་ནས་བ་སྤུའི་ཁུང་བུ་ནས་ཞུགས་ཤིང་འཐོན་ཏེ་འཇིག་རྟེན་ཐམས་ཅད་སྣང་བར་བྱས་ནས་ཟླ་བའི་གདན་ལ་རབ་ཏུ་བཞུགས་ཏེ། འོད་ཟེར་གྱི་ཚོགས་ཀྱིས་ཇི་སྲིད་མི་ངལ་གྱི་བར་དུ་ཡང་དང་ཡང་དུ་བསམ་
[114b.3]པར་བྱའོ། །བསམ་གཏན་གྱིས་ངལ་ན་ཡང་རིམ་པ་ཡོངས་སུ་གྱུར་པ་ལས་སྟོན་ཀའི་ཟླ་བ་ལྟར་དཀར་བའི་ཞལ་ནས་ཡི་གེ་རྣམས་འཐོན་པར་བསམ་ཞིང་ཡི་གེ་དྲུག་པའི་སྔགས་ཀྱི་རྒྱལ་པོ་བཟླས་པར་བྱའོ། །འདིར་ཡང་ངལ་ཞིང་ལྡང་བར་འདོད་ནས་ཇི་ལྟར་བདེ་བར་ལྷའི་ང་རྒྱལ་གྱིས་གནས་པར་བྱའོ། །
[114b.4]ཕྱག་ན་རལ་གྲི་བསྣམས་ཤིང་གསུང་མཆོག་ཤིན་ཏུ་རྣོ། །ངག་གི་དབང་ཕྱུག་འཇམ་པའི་དབྱངས་ཀྱི་སྒྲུབ་པའི་ཐབས། །ལེགས་བྲིས་བདག་གིས་ཡང་དག་གང་ཐོབ་འདི་ཡིས་ནི། །འགྲོ་ལ་ཕན་ཕྱིར་རྒྱལ་བའི་གོ་འཕང་མྱུར་ཐོབ་ཤོག །ཨ་ར་པ་ཙ་ནའི་སྒྲུབ་ཐབས་རྫོགས་སོ།། {T3460}༄༅༅། །རྒྱ་གར་སྐད་དུ།
[114b.5]བཱ་གཱ་སཱ་དྷ་ནཾ། བོད་སྐད་དུ། ངག་གི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །ཉེས་པའི་དྲི་འཇོམས་དཔལ་ལྡན་རྡོ་རྗེ་ཆོས། །ངག་གི་དཀྱིལ་འཁོར་འོད་ཟེར་དྲ་བ་འཕྲོ། །རྫོགས་སངས་ཀུན་གྱི་གསུང་གི་རང་བཞིན་ལ། །ཕྱག་འཚལ་ནས་ནི་ངག་གི་སྒྲུབ་ཐབས་བཤད། །མཁས་
[114b.6]པས་བརྩོན་འགྲུས་རླུང་གིས་རབ་བསྐྱོད་ནས། །སྔགས་ཀྱི་རང་བཞིན་རྣམ་དག་གཟུགས་བརྗོད་ཅིང་། །འཇིག་རྟེན་ཚོགས་པ་འདི་རྣམས་སྒྱུ་མ་དང་། །སྨིག་རྒྱུ་ཆུ་ཟླའི་རྟོག་པ་བཞིན་དུ་བསྒོམ། །པཾ་ཡིག་ས་བོན་ལས་བྱུང་སྣ་ཚོགས་པད། །བསྒོམ་བྱ་རྣམ་པར་དག་པ་ཀུན་གྱི་གཟུགས། །ཨཾ་ཡིག་
[114b.7]ལས་སྐྱེས་འོད་ཟེར་མཐའ་ཡས་པ། །རྣམ་དག་ཟླ་བ་ཆ་ཤས་ཀུན་རྫོགས་པ། །སླར་ཡང་གསང་བ་མཆོག་གྱུར་དག་པ་ཡི། །ས་བོན་ཡི་གེ་འོད་ཟེར་དྲ་བ་འགྱེད། །བནྡྷུའི་མེ་ཏོག་འོད་ཟེར་དང་མཚུངས་པའི། །ངག་གི་སྤྲོས་པ་བརྐྱང་མཛད་རྒྱུ་གཅིག་པོ། །ས་བོན་ལས་བྱུང་སྐྱོན་དུ་མ་གྱུར་བའི། །
[115a]
[115a.1]ཏིང་འཛིན་ཕྱག་རྒྱ་ཚིམ་མཛད་པདྨའི་ཕྱག །བརྩེ་བས་མངོན་དགའ་རྡོ་རྗེའི་གདན་ལ་བཞུགས། །རྡོ་རྗེའི་ཆགས་པ་དཔལ་ལྡན་ཡོངས་དག་ཆགས། །བ་སྤུའི་ཁུང་བུ་ལས་བྱུང་སངས་རྒྱས་ཀྱི། །སྤྲིན་ཚོགས་དྲ་བ་འགྲོ་ལ་ཕན་པར་མཛད། །འགྲོ་བ་རྣམས་ཀྱི་རང་བཞིན་ཐམས་ཅད་ཀྱང་། །
[115a.2]ཤིན་ཏུ་རྣམ་དག་བློ་ཡིས་བསྒོམ་པར་བྱ། །སྙིང་གར་ཟླ་བའི་དཀྱིལ་དུ་རྡོ་རྗེ་ཡི། །འོད་ཟེར་དྲ་བས་འཇིག་རྟེན་ཀུན་གསལ་བལྟ། །མགོན་པོ་ཧཱུཾ་ཡིག་ལས་ནི་སྐྱེས་གྱུར་པ། །སྐུ་ལྔའི་བདག་ཉིད་ལས་བྱུང་སངས་རྒྱས་སྤྲིན། །དེ་དབུས་རྩེ་མོ་འཕྲོ་བའི་མེ་ཡི་ཁྲོད། །སྐུ་གནས་སྲིད་པ་གསུམ་པོ་སྣང་བར་
[115a.3]མཛད། །འབྱུང་པོའི་རྒྱུད་ཀྱི་སྡུག་བསྔལ་ཀུན་ཁྱབ་རྣམས། །ཡི་གེ་ཆེན་པོས་གང་བ་རྣམ་པར་འཇོམས། །བརྗོད་པ་རབ་མཛེས་འོད་ཟེར་གྱིས་ཁྱབ་པས། །དྲི་མེད་ཉི་མ་འཆར་ཀ་དགའ་བས་ཆགས། །ལྗགས་སྐྱེས་ལེགས་གསུང་ཤེས་རབ་མཆོག་གི་སྤྲིན། །རྡོ་རྗེ་ལས་བྱུང་སྡིག་པ་རྣམ་པར་
[115a.4]འཇོམས། །དེ་ཡི་རྩེ་མོར་གཡོ་ཞིང་རབ་ཆགས་པའི། །འོད་ཟེར་རྒྱ་ཆེན་དེ་ཉིད་བསམ་པར་བྱ། །བདག་གི་བརྩོན་འགྲུས་མཐུ་ཡིས་གཞན་ཟིལ་གནོན། །མཆོག་གི་མཐུ་ལྡན་རྒོལ་བ་ངེས་པར་འཇོམས། །སྐད་ཅིག་ལ་གོམས་སྟོབས་ལས་སྐྱེས་གྱུར་པ། །ངག་འགྲུབ་དངོས་གྲུབ་རྣམས་ནི་ཉེར་
[115a.5]ཐོབ་འགྱུར། །ཚིགས་བཅད་རྐྱང་པས་རྟག་ཏུ་སྨྲ་འགྱུར་ཞིང་། །རྣལ་འབྱོར་བསྟན་བཅོས་སྣ་ཚོགས་རིག་པ་དང་། །བསྟན་བཅོས་སྣ་ཚོགས་ངེས་པར་རྩོམ་འགྱུར་ཞིང་། །རང་ཉིད་འགྲོ་བའི་ཆེད་དུ་དོན་ཆེན་འགྱུར། །གཞན་གྱི་སེམས་ཀྱིས་འཇུག་པའང་འདུ་ཤེས་འགྱུར། །ཆགས་སོགས་སྡིག་པ་
[115a.6]རྣམས་ཀྱང་དེ་ཡིས་འཇོམས། །དེ་ལ་ཏིང་འཛིན་བརྟན་པ་ཐོབ་གྱུར་ནས། །ཤིན་ཏུ་ཕྲ་ཞིང་རྣོ་འཕྲོ་ངེས་པ་ཡིས། །སངས་རྒྱས་གོ་འཕང་ཀུན་ཐོབ་གཟུགས་འཛིན་འགྱུར། །དེ་དག་འདིར་ནི་རྣམ་པར་སྤྱད་བྱ་མིན། །རྣལ་འབྱོར་གོམས་པར་གྱུར་ན་སྐྱེས་བུ་ཡི། །འབྱུང་དང་མ་བྱུང་བ་རྣམས་མདུན་གནས་
[115a.7]འགྱུར། །འདོད་པས་འཁྲུགས་བཞིན་དགའ་ཞིང་ཆགས་པ་ཡིས། །སེམས་ཀྱི་རྗེས་འཇུག་སྦྱོར་བ་དང་ལྡན་གྱུར། །འདི་བྱས་བདག་གིས་དགེ་བ་ཉེར་བསགས་གང་། །འགྲོ་རྣམས་རྒྱལ་བའི་དཔལ་མཆོག་འཛིན་གྱུར་ཅིག །རི་བོང་འཛིན་པའི་འོད་ཟེར་ཉེ་བ་ཡིས། །མྱ་ངན་ཟུག་རྔུ་ཡིད་འཇིགས་དང་
[115b]
[115b.1]འབྲལ་ཤོག །རྒྱུན་མི་འཆད་པས་དགེ་ལ་ཡིད་ཆགས་པས། །བློ་མཆོག་ལས་རྙེད་བདེ་བའི་མན་ངག་གི། །རང་བཞིན་འདི་ཡིས་པདྨའི་རིགས་འཇུག་ཅིང་། །དཔལ་ནི་རྗེས་འཇུག་ཏིང་འཛིན་དགའ་བར་ངེས། །བདག་ཀྱང་ལེགས་པའི་སྐྱེ་བོ་སྲིད་རྩེ་འདིས། །འབར་བའི་ཕྲེང་བའི་དབུས་ཀྱི་སྐུར་
[115b.2]གྱུར་ཅིག །བླ་མ་མཆོག་གི་བརྩེ་བས་ཐོད་ཕྲེང་གི། །ཆུ་འཛིན་གྱིས་གང་མངོན་རོལ་དཔལ་ཚོགས་ཤོག །ངག་གི་སྒྲུབ་ཐབས་མཆོག་གྱུར་པ། །སྐྱེ་བོ་བཟང་པོས་ལེགས་སྦྱར་བ། །འདི་ཡིས་ངག་ནི་བསྒྲུབས་བྱས་ནས། །ངག་གི་དབང་ཕྱུག་ཐོབ་པར་ཤོག། །ངག་གི་སྒྲུབ་ཐབས་རྫོགས་སོ།། །།
[115b.3]{T3461}༄༅༅། །རྒྱ་གར་སྐད་དུ། སིདྡྷེ་ཀ་བཱི་ར་སཱ་དྷ་ནཾ། བོད་སྐད་དུ། དཔའ་བོ་གཅིག་ཏུ་གྲུབ་པའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །འཇམ་པའི་དབྱངས་དཔའ་བོ་གཅིག་ཏུ་གྲུབ་པའི་སྒྲུབ་ཐབས་ཀྱི་དོན་དུ། མཎྜལ་གྲུ་བཞི་བྱས་ནས་དེའི་དབུས་སུ། ཨོཾ་བཛྲ་སཏྭ་སིདྡྷ་
[115b.4]ཧཱུཾ་སྭཱ་ཧཱ་ཞེས་པས་མེ་ཏོག་དབུལ་བར་བྱའོ། །ཤར་ལ་སོགས་པའི་ཕྱོགས་རྣམས་སུ་ཨོཾ་བཱི་ར་སཏྭ་ཨ་དྷིཥྛཱ་ན་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་ལོ། །ཨོཾ་ས་མ་ཡ་སཏྭ་བཱི་ར་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་ལོ། །ཨོཾ་ཨཀྵ་ཡ་སཏྭ་ཛྙཱ་ན་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་ལོ། །ཨོཾ་ཛྙཱ་ན་སཏྭ་བཛྲ་ཧཱུཾ་སྭཱ་ཧཱ།
[115b.5]ཞེས་པས་མེ་ཏོག་དབུལ་ལོ། །དེ་བཞིན་དུ་སྤོས་ལ་སོགས་པ་དབུལ་ལོ། །ཤར་ལ་སོགས་པའི་ཕྱོགས་རྣམས་སུ་ཡང་། །ཨོཾ་ཡ་མཱནྟ་ཀཱ་ཡ་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་ལོ། །ཨོཾ་པྲཛྙཱནྟ་ཀཱ་ཡ་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་ལོ། །ཨོཾ་པདྨཱནྟ་ཀཱ་ཡ་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་ལོ། །ཨོཾ་བིགྷྣཱནྟ་
[115b.6]ཀཱ་ཡ་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་ལོ། །མེ་ལ་སོགས་པའི་ཕྱོགས་མཚམས་རྣམས་སུ་ཨོཾ་ཊཀྐི་རཱ་ཛཱ་ཡ་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་ལོ། །ཨོཾ་ནཱི་ལ་དཎྜཱ་ཡ་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་ལོ། །དེ་བཞིན་དུ་ཨོཾ་མ་ཧཱ་བཱ་ལཱ་ཡ་ཧཱུཾ་སྭཱ་ཧཱ་ཞེས་པ་དང་། ཨོཾ་ཨཱ་ཙ་ལཱ་ཡ་ཧཱུཾ་སྭཱ་ཧཱ་ཞེས་པས་མེ་ཏོག་དབུལ་བར་བྱའོ་ཞེས་པས་མཎྜལ་ཇི་ལྟར་རིགས་པར་
[115b.7]མཆོད་པར་བྱའོ་ནང་གི་མཆོད་པས་ཀྱང་ངོ་། །སྤྱོད་ལམ་གཙང་མར་བྱས་ནས་ཡིད་དང་མཐུན་པའི་ས་ཕྱོགས་སུ་སྟན་བདེ་བ་ལ་ཉེ་བར་འདུག་སྟེ། རང་གི་སྙིང་གར་པཾ་ཡིག་དཀར་པོ་ཡོངས་སུ་གྱུར་པ་ལས་པདྨ་དཀར་པོའི་ཟེའུ་འབྲུ་ལ་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཡིག་དཀར་པོ་ལས་ཁ་
[116a]
[116a.1]དོག་ལྔའི་འོད་ཟེར་བསྒོམ་པར་བྱའོ། །དེ་ལས་བྱུང་བའི་འོད་ཟེར་གྱིས་རྐང་པའི་མཐིལ་ནས་སྐྲའི་རྩེ་མོའི་མཐར་ཐུག་པ་ཁྱབ་པར་བསྒོམས་ཏེ། དེའི་འོད་ཟེར་གྱི་སྣང་བས་ཕུང་པོ་ལྔ་པོ་རྣམ་པར་སྦྱངས་ཏེ། ཐོག་མ་མེད་པའི་དུས་ནས་འདོད་ཆགས་དང་ཞེ་སྡང་དང་གཏི་མུག་ལ་སོགས་པས་
[116a.2]བསགས་པ་དེ་རྣམས་མེད་པར་བྱས་ནས། དེ་ནས་ཕུང་པོ་ལྔ་པོ་དེ་བཞིན་གཤེགས་པ་ལྔའི་རང་བཞིན་དུ་བསྒོམ་པར་བྱའོ། །དེ་ནས་དེ་རྣམས་ཀྱི་འོད་ཟེར་ས་བོན་གྱི་ཡི་གེ་ལ་ཞུགས་པར་བསམ་པར་བྱའོ། །དེ་ནས་སེམས་ཅན་རྣམས་ཀྱི་རྒྱུད་དྲི་མ་མེད་པར་བྱས་ནས་བྱམས་པ་དང་། སྙིང་རྗེ་དང་
[116a.3]དགའ་བ་དང་། བཏང་སྙོམས་བསྒོམ་པར་བྱ་སྟེ། དེ་ནས་འགྲོ་བ་རྣམས་ལ་བུ་གཅིག་པ་བཞིན་དུ་དགའ་བ་ནི་བྱམས་པའི་མཚན་ཉིད་དོ། །སྡུག་བསྔལ་དང་སྡུག་བསྔལ་གྱི་རྒྱུར་གྱུར་པ་ཡང་དག་པར་བསལ་བར་འདོད་པ་ནི་སྙིང་རྗེའོ། །བྱ་བ་ཡང་དག་པར་འགྲུབ་པའི་ཐབས་མཐོང་བ་ལས་རབ་ཏུ་
[116a.4]དགའ་བ་ནི་དགའ་བའོ། །འཇིག་རྟེན་གྱི་ཆོས་བརྒྱད་རྣམས་ལ་བཏང་སྙོམས་སུ་བྱེད་པ་ནི་བཏང་སྙོམས་སོ་ཞེས་ཚད་མེད་པའི་གནས་བཞི་བསྒོམ་པར་བྱའོ། །ས་བོན་གྱི་ཡི་གེ་ལས་འཇམ་དཔལ་དབྱངས་ཀྱི་སྐུར་བདག་བསྐྱེད་ཅིང་གཟུང་བར་བྱའོ། །ཡང་ས་བོན་གྱི་ཡི་གེ་ལས་འོད་ཟེར་འཐོན་ཏེ་
[116a.5]འགྲོ་བ་དྲུག་གི་སེམས་ཅན་གྱི་འདོད་ཆགས་དང་ཞེ་སྡང་དང་གཏི་མུག་དང་ང་རྒྱལ་ལ་སོགས་པའི་ཉེས་པ་ཐམས་ཅད་བཅོམ་སྟེ། སེམས་ཅན་རྣམས་ཀྱི་ཉོན་མོངས་པ་རྣམས་མེད་པར་བྱས་ནས་འོད་ཟེར་རྣམས་སླར་ལོག་སྟེ། ས་བོན་གྱི་ཡི་གེ་ལ་གཞུག་པར་བྱའོ། །ཡང་ས་བོན་གྱི་ཡི་གེ་ལས་
[116a.6]འོད་ཟེར་རྣམས་བྱུང་སྟེ། སེམས་ཅན་གྱི་ཁམས་ཡོངས་སུ་སྦྱངས་ཏེ། རང་གི་འོད་ཀྱིས་སྣང་བའི་འཇམ་པའི་དབྱངས་དཔའ་བོ་གཅིག་ཏུ་གྲུབ་པའི་སྐུས་ནམ་མཁའི་མཐིལ་གང་ནས་འོད་ཟེར་རྣམས་སླར་ལོག་ནས་རང་གི་ས་བོན་ལ་རབ་ཏུ་གཞུག་པར་བྱའོ། །ཡང་ས་བོན་གྱི་ཡི་གེའི་འོད་ཟེར་
[116a.7]ལས་བྱུང་ཞིང་འཕྲོས་པའི་མཆོད་པའི་ལྷ་མོ་རྣམས་ཀྱིས་རྗེ་བཙུན་འཇམ་པའི་དབྱངས་དཔའ་བོ་གཅིག་ཏུ་གྲུབ་པ་ལ་མེ་ཏོག་ལ་སོགས་པའི་མཆོད་པ་རྣམས་ཀྱིས་མཆོད་ནས་མཁས་པས་རབ་ཏུ་དད་པར་བྱའོ། །དེ་ནས་དེ་རྣམས་ཀྱི་མདུན་དུ་སྡིག་པ་བཤགས་པ་དང་། མི་བྱེད་པའི་སྡོམ་པ་དང་
[116b]
[116b.1]བསོད་ནམས་ལ་རྗེས་སུ་ཡི་རང་བ་དང་། བསོད་ནམས་ལ་ཡོངས་སུ་བསྔོ་བ་དང་། བདག་ཉིད་དབུལ་བ་དང་། ལམ་ལ་བརྟེན་པ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་རྣམས་བྱས་ནས། ཕྱི་ནས་མཆོད་པའི་ལྷ་མོ་རྣམས་ས་བོན་གྱི་ཡི་གེ་ལ་གཞུག་པར་བྱའོ། །ཕྱི་ནས། ཁྱོད་
[116b.2]ཀྱིས་སེམས་ཅན་ཐམས་ཅད་ཀྱི། །ཇི་ལྟའི་དོན་མཛད་དངོས་གྲུབ་སྩོལ། །རྗེས་འཇུག་སངས་རྒྱས་ཡུལ་གཤེགས་ཀྱང་། །སླར་ཡང་འདིར་ནི་འབྱོན་པར་ཞུ། །མུཿཞེས་པས་གཤེགས་སུ་གསོལ་ལོ། །འདིའི་བསོད་ནམས་དང་ཡེ་ཤེས་ཀྱི་ཚོགས་ཀྱི་དོན་རྣལ་འབྱོར་པས་འགྲོ་བ་རྣམས་ལ་ཀུན་ནས་
[116b.3]བགྲང་བར་བྱའོ། །གང་ལ་འདིར་བུམ་པ་དང་། སྣམ་བུ་དང་། ཤིང་རྟ་དང་། གནས་དང་། ལྷ་ཁང་དང་། རི་ལ་སོགས་པ་མི་གཡོ་བ་དང་། གཡོ་བ་རྣམས་དེ་ཐམས་ཅད་གཟུགས་བརྙན་ཙམ་སྟེ། རྣམ་པར་བརྟགས་ན་དཔེར་ན་གཟུགས་བརྙན་དང་། སྒྱུ་མ་དང་། རྨི་ལམ་ལྟ་བུའོ། །བདག་
[116b.4]ཀྱང་རང་བཞིན་མེད་པ་རྨི་ལམ་ལྟ་བུ་ཞེས་པས་སྟོང་པ་ཉིད་བསྒོམ་ཞིང་སྟོང་པ་ཉིད་བརྟན་པར་བྱེད་པའི་སྔགས་བརྗོད་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་བསམས་ནས་རང་བཞིན་གྱི་ལུས་ཀྱི་ང་རྒྱལ་སྤངས་ཏེ། ངོ་མཚར་བའི་སྦྱོར་བ་ཙམ་གྱིས་གནས་པར་བྱའོ། །ཕྱི་ནས་
[116b.5]བསམ་པར་བྱ་སྟེ། ཅིའི་ཕྱིར་བདག་ཉིད་སྟོང་པ་ཉིད་ལ་གནས་ན་བདག་གིས་འགྲོ་བ་རྣམས་ཀྱི་དོན་བྱའོ་ཞེས་དེ་བཞིན་དུ་བསམ་པར་བྱའོ། །དེའི་སྙིང་གར་པཾ་ཡིག་དཀར་པོའི་གཟུགས་བལྟའོ། །དེ་ཡོངས་སུ་གྱུར་པ་ལས་པདྨ། དེའི་ཟེའུ་འབྲུ་ལ་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་
[116b.6]འཁོར་ལ་ཨ་ཡིག་ལ་སོགས་པའི་དབྱངས་ཡིག་བཅུ་དྲུག་པོ་ཡོན་ཏན་ཉིས་འགྱུར་དུ་བྱས་པ་ནི་མཚན་སུམ་ཅུ་རྩ་གཉིས་རྣམ་པར་དག་པའོ། །དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་བསྒོམ་པར་བྱའོ། །དེའི་སྟེང་དུ་ཨོཾ་ཡིག་དཀར་པོ་བསྒོམ་པར་བྱའོ། །ཨཱ་དཪྴ་ཛྙཱ་ན་སྭ་བྷཱ་ཝ་ཨཱཏྨ་ཀོ྅ཧཾ་
[116b.7]ཞེས་བརྗོད་པར་བྱའོ། །དེ་ནས་ཀ་ཡིག་ལ་སོགས་པ་ཡི་གེ་སུམ་ཅུ་རྩ་བཞི་ལ་ཡི་གེ་དྲུག་ཞུགས་ཏེ་ཡི་གེ་བཞི་བཅུ་ཡོན་ཏན་ཉིས་འགྱུར་དུ་བྱས་པ་ནི་དཔེ་བྱད་བཟང་པོ་བརྒྱད་ཅུ་རྣམ་པར་དག་པའོ། །དེའི་སྟེང་དུ་ཟླ་བའི་དཀྱིལ་འཁོར་གཉིས་པའོ། །དེ་དག་གི་རང་བཞིན་གཅིག་ཏུ་མཉམ་པ་ཉིད་
[117a]
[117a.1]དེ་ལས་མཉམ་པ་ཉིད་ཀྱི་ཡེ་ཤེས་དང་ལྡན་པ་སྟེ། ས་མནྟ་ཛྙཱ་ན་སྭཱ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པར་བྱའོ། །ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཡིག་བསྒོམ་པར་བྱའོ། །དེ་ཡོངས་སུ་གྱུར་པ་ལས་རྒྱུ་དང་འབྲས་བུར་གྱུར་པའི་ཨུཏྤ་ལ་སྔོན་པོ་བསྒོམ་པར་བྱའོ། །དེའི་ཟེའུ་འབྲུ་ལ་ཟླ་བ་ལ་
[117a.2]གནས་པའི་ཨོཾ་ཡིག་བསྒོམ་པར་བྱའོ། །དེ་ནས་སོ་སོར་རྟོག་པའི་ཡེ་ཤེས་དང་ལྡན་པ་སྟེ། པྲ་ཏྱ་བེཀྵ་ཎ་ཛྙཱ་ན་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པར་བྱའོ། །དེ་ནས་ས་བོན་གྱི་ཡི་གེ་ལས་བྱུང་བའི་འོད་ཟེར་གྱིས་འགྲོ་བ་དྲུག་གི་སེམས་ཅན་རྣམས་བཀུག་ནས་དེ་དག་དཔའ་བོ་གཅིག་ཏུ་གྲུབ་པའི་སྐུར་བསྐྱེད་ནས།
[117a.3]བདག་ལ་བླངས་ཏེ་ལུས་ལ་ཞུགས་ནས་འཇམ་དཔལ་གྱི་བདེ་བ་ཇི་ལྟ་བ་ལ་ལོངས་སྤྱོད་པའོ། །མགྲོན་དུ་གཉེར་བ་དེ་རྣམས་འོད་ཟེར་གྱི་ས་བོན་ལ་གཞུག་པར་བྱའོ། །དེ་ལ་བྱ་བ་གྲུབ་པའི་ཡེ་ཤེས་དང་ལྡན་པ་སྟེ། ཀྲཱི་ཏྱཱ་ནུཥྛཱ་ན་ཛྙཱ་ན་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པར་བྱའོ། །དེ་ནས་ས་བོན་གྱི་ཡི་གེ་
[117a.4]ལས་འོད་ཟེར་འཕྲོས་པས་འགྲོ་བ་དྲུག་པོའི་སེམས་ཅན་རྣམས་བཀུག་ནས་ས་བོན་གྱི་ཡི་གེ་ལ་ཞུགས་ཏེ་རོ་མཉམ་པར་གྱུར་ནས་ས་བོན་གྱི་མཚན་མ་རྣམས་ཕ་རོལ་ལས་འཁོར་ཏེ་དཔའ་བོ་གཅིག་ཏུ་གྲུབ་པའི་བཅོམ་ལྡན་འདས་ཟླ་བའི་དཀྱིལ་འཁོར་ལ་བཞུགས་པ་ཟླ་བ་འཐུང་བ་ལ་བརྟེན་པ། འགྲོ་བ་རྣམས་འོད་
[117a.5]ཀྱིས་སྣང་བར་མཛད་པ། ཕྱག་གཉིས་པ། ཞལ་གཅིག་པ། སྐུ་མདོག་དཀར་པོ། རྡོ་རྗེ་སྐྱིལ་ཀྲུང་གིས་བཞུགས་པ། ལྷའི་རྒྱན་གྱིས་བརྒྱན་པ། ཟུར་ཕུད་ལྔས་དབུ་ལ་བརྒྱན་པ་འོད་ཟེར་སྣ་ཚོགས་པའི་ནང་ན་བཞུགས་པ། ཕྱག་གཡོན་ན་ཨུཏྤ་ལ་བསྣམས་པ། གཡས་པ་མཆོག་སྦྱིན་པ། ཐུགས་
[117a.6]ཀའི་པདྨ་དམར་པོ་ལ་གནས་པའི་ཟླ་བའི་དཀྱིལ་འཁོར་ལ་ཨོཾ་ཡིག་དེ་ཡོངས་སུ་གྱུར་པ་ལས་ཨུཏྤ་ལ་དེའི་ཟེའུ་འབྲུ་ལ་ཟླ་བ་ལ་གནས་པའི་ས་བོན་གྱི་ཡི་གེ་དེ་ལས་བྱུང་བའི་འོད་ཟེར་གྱིས་མཆོད་པའི་ལྷ་རྣམས་སྤྲོ་བར་བྱ་སྟེ། ཕྱག་གཉིས་པ་སྐུ་མདོག་དཀར་པོ་ལྷའི་ཆུས་ཡོངས་སུ་གང་བའི་བུམ་པ་ཕྱག་ན་
[117a.7]བསྣམས་པ། དཔལ་ལྡན་དཔའ་བོ་གཅིག་ཏུ་གྲུབ་པ་རྒྱལ་བར་གྱུར་ཅིག་རྒྱལ་བར་གྱུར་ཅིག་ཅེས་བརྗོད་ཅིང་བཅོམ་ལྡན་འདས་ལ་ཁྲུས་གསོལ་བར་བྱེད་པའོ། །དེ་ནས་བཅོམ་ལྡན་འདས་ཀྱི་དབུ་ལ་མི་བསྐྱོད་པའོ། །ལྷ་རྣམས་ཀྱིས་མཆོད་པ་ཡང་བྱེད་པའོ། །དེ་ནས་ཆོས་ཀྱི་དབྱིངས་རྣམ་པར་དག་
[117b]
[117b.1]པའི་ཡེ་ཤེས་དང་ལྡན་པ་སྟེ། སུ་བི་ཤུདྡྷ་དྷརྨ་དྷཱ་ཏུ་ཛྙཱ་ན་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་པར་བྱའོ། །དེ་ལྟ་བུའི་བཅོམ་ལྡན་འདས་ཇི་སྲིད་འདོད་ཀྱི་བར་དུ་བསྒོམ་པར་བྱའོ། །བསྒོམས་པའི་མཐར་བཟླས་པ་བྱའོ། །ཨོཾ་བཛྲ་ཏཱིཀྵྞ་དུཿཁཙྪེ་ད་པྲཛྙཱ་ཛྙཱ་ན་མཱུརྟ་ཡེ་ཛྙཱ་ན་ཀཱ་ཡ་བཱ་གཱི་ཤྭ་ར་ཨ་ར་པ་ཙ་ནཱ་ཡ་ཏེ་ན་མཿ
[117b.2]འགའ་ཞིག་ཏུ་ཨོཾ་ཝཱ་ཀྱཻ་དཾ་ན་མཿཞེས་བཟླས་ནས་མཐར་བསྟོད་པ་དང་། མཆོད་པ་དང་། སྨོན་ལམ་བཏབ་ནས་ལྡང་བར་བྱའོ། །ལྷ་རྣམས་ཀྱི་ང་རྒྱལ་གྱིས་འཇིག་རྟེན་པ་ཐམས་ཅད་ཀྱི་དོན་བྱའོ། །དཔའ་བོ་གཅིག་ཏུ་གྲུབ་པའི་སྒྲུབ་ཐབས་རྫོགས་སོ།། {T3462}༄༅༅། །རྒྱ་གར་སྐད་དུ། བཱ་ཀ་སཱ་
[117b.3]དྷ་ནཾ། བོད་སྐད་དུ། ངག་གི་སྒྲུབ་ཐབས། ངག་གི་རྡོ་རྗེ་ལ་ཕྱག་འཚལ་ལོ། །སྔོན་མ་བཞིན་དུ་སྟོང་པ་ཉིད་དུ་བསྒོམས་ནས་པཾ་ཡིག་ལས་སྐྱེས་པའི་སྣ་ཚོགས་པདྨ་ལ་ཨ་ཡིག་ལས་སྐྱེས་པའི་ཟླ་བའི་དཀྱིལ་འཁོར། དེའི་སྟེང་དུ་ཧྲཱིཿཡིག་དམར་པོ་ཡོངས་སུ་གྱུར་པ་ལས་བདག་ཉིད་འོད་དཔག་ཏུ་
[117b.4]མེད་པའི་སྐུར་བསྒོམ་པར་བྱའོ། །ཏིང་ངེ་འཛིན་གྱི་ཕྱག་རྒྱ་མཛད་པ་སྐུ་མདོག་དམར་པོ་རྡོ་རྗེ་སྐྱིལ་ཀྲུང་གིས་བཞུགས་པའོ། །དེ་ནས་སྙིང་གར་ཟླ་བ་ལ་ཧཱུཾ་ཡིག་ལས་སྐྱེས་པའི་རྡོ་རྗེ་སྔོན་པོ་རྩེ་ལྔ་པ་ལངས་པ། དེའི་རྭ་དབུས་མའི་རྩེ་མོ་ལ་ཨཱཿཡིག་དམར་པོ་བསྒོམ་པར་བྱའོ། །ལྕེའི་རྩེ་མོ་ལ་ཧྲཱིཿཡིག་
[117b.5]དམར་པོ་ལས་སོ། །ངག་གི་སྒྲུབ་ཐབས་རྫོགས་སོ།། {T3463}༄༅༅། །རྒྱ་གར་སྐད་དུ། མ་ཧཱ་རཱ་ཛ་ལཱི་ལ་མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་རྒྱལ་པོ་ཆེན་པོ་རོལ་པའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །སྔོན་མ་བཞིན་དུ་སྡིག་པ་བཤགས་པ་
[117b.6]ལ་སོགས་པ་བྱས་པའི་རྗེས་སུ་སྟོང་པ་ཉིད་དུ་དམིགས་ནས་ཟླ་བ་ལ་གནས་པའི་མཾ་ཡིག་གི་ས་བོན་ལས་སྐྱེས་པའི་འཕགས་པ་འཇམ་པའི་དབྱངས་སྐུ་མདོག་སེར་པོ་ཞལ་གཅིག་ཕྱག་གཉིས་པ། གཞོན་ནུ་ཟུར་ཕུད་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་ན་ཨུཏྤལ་
[117b.7]བསྣམས་པ། ཕྱག་གཡས་པ་རོལ་པའི་སྟབས་ཀྱིས་སེང་གེའི་གདན་ལ་བཞུགས་པ། པདྨ་དང་ཟླ་བའི་གདན་ལ་བདག་ཉིད་སྐད་ཅིག་གིས་བསྒོམ་པར་བྱའོ། །དེ་ནས་ཐལ་མོ་སྦྱར་ནས་མཛུབ་མོ་དག་དང་མིང་མེད་དག་གིས་སེན་མོ་བརྟེན་པ་ནི་ཨུཏྤ་ལ་ཁ་འབྱེད་པའི་ཕྱག་རྒྱའོ། །ཨོཾ་ཝཱ་གཱི་ཤྭ་རི་མུཾ་
[118a]
[118a.1]ཞེས་པའི་སྔགས་བཟླས་པར་བྱའོ། །འཇམ་དཔལ་རྒྱལ་པོ་ཆེན་པོ་རོལ་པའི་སྒྲུབ་ཐབས་རྫོགས་སོ།། {T3464}༄༅༅། །རྒྱ་གར་སྐད་དུ། མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་གྱི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དྲུག་པའི་ལྔ་པའི་ས་བོན་ལྔ་
[118a.2]པའི་དབྱངས་ཀྱིས་ཉེ་བར་མཛེས་པ་སྟོང་པའི་ལྷས་མནན་པ། དེ་ལས་དེ་བཞིན་དུ་སྐྱེས་པའི་དཔལ་ལྡན་དཀར་པོ་འཇམ་པའི་དབྱངས་གཞོན་ནུ་ཟུར་ཕུད་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཉིས་པ་གཡོན་ན་ཨུཏྤ་ལ་བསྣམས་པ། གཡས་པ་རོལ་པའི་སྟབས་ཀྱིས་སེང་གེའི་གདན་
[118a.3]ལ་བཞུགས་པ། བདག་ཉིད་གཞོན་ནུའི་སྐུར་བསམ་པར་བྱའོ། །འདིའི་ཕྱག་རྒྱ་ནི་ལག་པ་གཉིས་ཐལ་མོ་སྦྱར་ནས་མཛུབ་མོ་དང་མིང་མེད་དག་བཀབ་པའོ། །སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོར་དགོད་པར་བྱའོ། །ཨོཾ་ཝཱ་གཱི་ཤྭ་རི་མུཾ། འཇམ་དཔལ་གྱི་སྒྲུབ་ཐབས་རྫོགས་སོ།། །།
[118a.4]{T3465}༄༅༅། །རྒྱ་གར་སྐད་དུ། ཨཱརྱ་སིདྡྷི་ཀ་བཱི་ར་སཱ་དྷ་ནཾ། བོད་སྐད་དུ། འཕགས་པ་དཔའ་བོ་གཅིག་ཏུ་གྲུབ་པའི་སྒྲུབ་ཐབས། དཔལ་ལྡན་འཇམ་དཔལ་དབྱངས་ལ་ཕྱག་འཚལ་ལོ། །འོད་གསལ་སྟོན་ཀའི་ཟླ་བ་མཚུངས། །འཇམ་དཔལ་རྡོ་རྗེ་ལ་ཕྱག་འཚལ། །དེ་ཡི་སྒྲུབ་ཐབས་གསལ་པོ་
[118a.5]མཆོག །མདོར་བསྡུས་བདག་གིས་བརྗོད་པར་བགྱི། །དང་པོར་རེ་ཞིག་སྔགས་པས་ཡིད་དང་མཐུན་ཞིང་གཙང་བའི་ས་ཕྱོགས་སུ་སྟན་བདེ་བའི་དབུས་སུ་འདུག་སྟེ། རང་གི་སྙིང་གར་ཨ་ཡིག་ལས་བྱུང་བའི་ཟླ་བ་ལ་མཾ་དཀར་པོ་དེ་ཉིད་དགོད་པར་བྱའོ། །དེའི་འོད་ཟེར་གྱིས་ནམ་མཁའ་གང་བས་བཅོམ་
[118a.6]ལྡན་འདས་དང་བླ་མ་རྗེ་བཙུན་ནམ་མཁའ་ལ་བལྟས་ཏེ། དེ་ནས་བཅོམ་ལྡན་འདས་ཀྱི་མདུན་དུ་འདུག་ལ་ཡིད་ཀྱིས་རང་བཞིན་གྱི་མཆོད་པས་འཇམ་དཔལ་དང་བླ་མ་རྗེ་བཙུན་ཡང་མཆོད་ཅིང་ཕྱག་བཙལ་ནས་དགེ་བ་སྤེལ་བའི་དོན་དུ་དེང་ནས་སྡིག་པ་ཐམས་ཅད་བདག་གིས་སོ་སོར་བཤགས་སོ། །བསོད་
[118a.7]ནམས་ཐམས་ཅད་ལ་རྗེས་སུ་ཡི་རང་ངོ་། །དེ་ཡང་བླ་ན་མེད་པའི་སངས་རྒྱས་ཀྱི་བྱང་ཆུབ་ཏུ་བདག་གིས་ཡོངས་སུ་བསྔོ་བར་བགྱིའོ། །བྱང་ཆུབ་མ་ཐོབ་ཀྱི་བར་དུ་སངས་རྒྱས་དང་ཆོས་དང་དགེ་འདུན་རྣམས་ལ་སྐྱབས་སུ་མཆིའོ། །ཡང་དག་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །དེ་ནས་
[118b]
[118b.1]བཅོམ་ལྡན་འདས་ཀྱི་ས་བོན་ལྷན་ཅིག་ཏུ་གྱུར་པར་བལྟའོ། །བརྟན་པ་དང་གཡོ་བའི་ཁམས་གསུམ་པོ་ཐམས་ཅད་རྟེན་ཅིང་འབྲེལ་པར་འབྱུང་བ་རྣམ་པར་དཔྱད་མི་བཟོད་པ་རྨི་ལམ་དང་། སྒྱུ་མ་དང་། གཟུགས་བརྙན་ལྟ་བུར་བལྟ་ཞིང་རང་བཞིན་གྱིས་འོད་གསལ་བ་ཡོངས་སུ་དག་པ་འབའ་ཞིག་གི་བདག་
[118b.2]ཉིད་དུ་བསྒོམ་པར་བྱའོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་པ་འདིས་བརྟན་པར་བྱའོ། །ཡང་ན་སྨོན་ལམ་གྱི་སྟོབས་ལས་བྱུང་བའི་ཟླ་བ་ལ་མཾ་ཡིག་དཀར་པོ་བལྟས་ཏེ། དེའི་འོད་ཟེར་འཕྲོས་པས་འཇམ་དཔལ་རྡོ་རྗེ་བདག་ཉིད་ལ་རབ་ཏུ་ཞུགས་ཏེ། མཾ་ལས་བྱུང་བར་བསྒོམ་
[118b.3]མོ། །སྟོན་ཀའི་ཟླ་བའི་རྣམ་པ་ཅན། ཟུར་ཕུད་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་ན་ཨུཏྤ་ལ་སྔོན་པོ་བསྣམས་པ། ཕྱག་གཡས་པས་མཆོག་སྦྱིན་མཛད་པ། སྣ་ཚོགས་པདྨ་དང་ཟླ་བའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པའོ། །དེ་ནས་རང་གི་སྙིང་
[118b.4]གར་ཟླ་བ་ལ་མཾ་ནོར་བུ་ཆུ་ཤེལ་གྱི་འོད་ལྟ་བུ་འོད་ཟེར་རྣམས་ཀྱིས་ནམ་མཁའི་ཁོང་ན་གནས་པའི་འགྲོ་བ་རྣམས་ཀྱི་དོན་བྱེད་པ་གསལ་བཞིན་པ་ཇི་སྲིད་སྐྱོ་བར་མ་གྱུར་པ་དེ་སྲིད་དུ་བསྒོམ་པར་བྱའོ། །བསྒོམས་པས་སྐྱོ་ན་སྔགས་བཟླས་པར་བྱའོ། །ཨོཾ་བཱ་ཀྱེ་དཾ་ན་མཿཉེ་བའི་སྙིང་པོ་ཡང་བཟླས་
[118b.5]པར་བྱའོ། །ཨོཾ་ཧྲཱིཿཧཱུཾ་དེ་ནས་ཡི་གེ་བརྒྱ་པ་བཟླས་ནས་འཇམ་པའི་རྡོ་རྗེའི་ང་རྒྱལ་བྱས་ཏེ་ལངས་ལ་ཡང་དེ་བཞིན་དུ་གནས་པར་བྱའོ་ཞེས་སོ། །ཟླ་བ་དྲུག་གིས་ངག་གི་དབང་ཕྱུག་འགྲུབ་པར་འགྱུར་རོ། །རྟག་ཏུ་གོམས་པའི་སྦྱོར་བས་སྐྱེ་བ་འདི་ལ་སངས་རྒྱས་ཉིད་ཀྱང་འགྲུབ་པར་འགྱུར་རོ། །དེ་
[118b.6]ལྟར་བསམ་གཏན་ལ་གནས་པས་སྔོན་དུ་བསྙེན་པ་འབུམ་ཕྲག་བརྒྱད་བཟླས་ནས་རལ་གྲི་ལ་སོགས་པའི་དངོས་གྲུབ་བསྒྲུབ་པར་བྱའོ། །དེ་ལ་ཟླ་བ་གཟས་ཟིན་པའམ། ཉི་མ་གཟས་ཟིན་པ་ལ་ཁབ་ལེན་གྱི་ལྕགས་ལས་བརྡུངས་པའི་རལ་གྲི་ལག་པས་བཟུང་སྟེ་ཟླ་བ་ལ་བལྟས་ནས་ཇི་སྲིད་གྲོལ་བར་མ་གྱུར་པ་
[118b.7]དེ་སྲིད་དུ་བཟླས་པ་བྱས་པས་རལ་གྲིའི་རིག་པ་འཛིན་པར་འགྱུར་རོ། །དེ་བཞིན་དུ་རྡོ་རྗེ་དང་། འཁོར་ལོ་དང་། རྩེ་གསུམ་དང་། ཐོ་བ་དང་། ཞགས་པ་དང་། ལྕགས་ཀྱུ་ལ་སོགས་པ་དང་། མིག་སྨན་དང་། རྐང་མགྱོགས་དང་། ཐིག་ལེ་དང་། དབང་དུ་བྱ་བའི་རྫས་ལ་སོགས་པ་བསྒྲུབ་པར་བྱའོ། །
[119a]
[119a.1]རིག་པ་འཛིན་པ་དང་། བཅུད་ལེན་དང་། ལེགས་པར་སྦྱར་བ་རྣམས་བསྒྲུབ་པར་བྱའོ། །འོ་ཐུག་གི་བཟའ་བ་དང་། ཞོའི་བཟའ་བ་དང་། མར་དང་བཅས་པའི་ཤ་ཀ་རས་སྣོད་བཀང་སྟེ། ལག་པས་བཀབ་ལ་བཟླས་པ་བྱས་ལ་བཟའ་བར་བྱའོ། །ལོ་ལྔ་བརྒྱ་རུ་འཚོ་བར་འགྱུར་རོ། །
[119a.2]སྲན་མ་ཥ་ཁར་བཅུག་ལ་བཟླས་པར་བྱའོ། །མྱུ་གུ་འབྱུང་བར་འགྱུར་རོ། །དེ་མིད་ན་ཚིགས་བཅད་ལ་མཁས་པར་འགྱུར་རོ། །ཐོས་པ་འཛིན་པར་འགྱུར་བ་དང་། ངག་དང་ལྡན་ཞིང་བློ་རྣོ་བར་འགྱུར་རོ། །བིལ་བ་རྣམས་ཀྱི་སྦྱིན་སྲེག་འབུམ་ཕྲག་གཅིག་བྱས་ན་འཇིག་རྟེན་གསུམ་གྱི་རྒྱལ་པོ་འགྲུབ་
[119a.3]པར་འགྱུར་རོ། །ཇི་ལྟར་རྙེད་པའི་མེ་ཏོག་དཀར་པོས་སྦྱིན་སྲེག་འབུམ་ཕྲག་བཞི་བྱས་ན་ངག་གི་གྲུབ་པ་ཐོབ་སྟེ། ངག་གི་དབང་ཕྱུག་དང་མཚུངས་པར་འགྱུར་རོ། །མར་དང་འབྲུ་དམར་པོ་ལྔའི་སྦྱིན་སྲེག་བྱས་ན་འབུམ་ཕྲག་བཞི་ཙམ་གྱིས་གནོད་སྦྱིན་མོ་འགུགས་པར་འགྱུར་རོ། །ས་འོག་གི
[119a.4]གཞོན་ནུ་མ་ཡང་ངོ་། །བྲཧྨའི་ཕྱེ་མ་སོར་བཞི་ཙམ་ལ་བརྒྱ་རྩ་བརྒྱད་མངོན་པར་བསྔགས་ལ་ནང་པར་སྔ་བར་དཀྱིལ་འཁོར་བྱས་ལ་ཇི་ལྟར་འབྱོར་པས་བཅོམ་ལྡན་འདས་ལ་མཆོད་ལ་མར་རམ་ཀཉྫི་བཏུང་བར་བྱའོ། །ཤུ་དག་ཞོ་ཕྱེད་ཀྱི་ཚད་ལ་དེ་བཞིན་དུ་མངོན་པར་བསྔགས་ལ་མར་རམ་འོ་མའམ་
[119a.5]མར་ཁུ་དང་། ཟླ་བ་གཅིག་ཏུ་བཏུང་བར་བྱའོ། །དིག་པ་དང་། ལྐུགས་པ་དང་། ལྡིབ་པ་རྣམས་རྣམ་པར་ཉམས་པར་བྱེད་དོ། །ཟླ་བ་དྲུག་ན་གཞན་ཡང་མ་ཐོས་པའི་བསྟན་བཅོས་རྣམས་ཀྱང་མངོན་དུ་འགྱུར་རོ། །རྨོངས་པ་རྣམ་པར་ཉམས་པར་འགྱུར་ཞིང་ཐོས་པ་འཛིན་པར་འགྱུར་རོ། །
[119a.6]ཁུ་བྱུག་ལྟར་དབྱངས་སྙན་པར་འགྱུར་བ་དང་། ངག་གསལ་པོར་འགྱུར་རོ། །འཕགས་པ་འཇམ་དཔལ་རྡོ་རྗེ་དཔའ་བོ་གཅིག་ཏུ་གྲུབ་པའི་སྒྲུབ་ཐབས་རྫོགས་སོ།། {T3466}༄༅༅། །རྒྱ་གར་སྐད་དུ། སིདྡྷེ་ཀ་བཱི་ར་སཱ་དྷ་ནཾ། བོད་སྐད་དུ། དཔའ་བོ་གཅིག་ཏུ་གྲུབ་པའི་སྒྲུབ་ཐབས།
[119a.7]འཕགས་པ་འཇམ་དཔལ་ལ་ཕྱག་འཚལ་ལོ། དེ་ལ་འདིར་ཡི་གེ་བརྒྱ་པའི་སྔགས་བརྗོད་པར་བྱ་སྟེ། ཨོཾ་བཛྲ་སཏྭ་ས་མ་ཡ མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། སུ་པོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟྭཾ་ཤྲེ་
[119b]
[119b.1]ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿསྔོན་དུ་གསུངས་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ་པདྨ་དཀར་པོའི་སྟེང་དུ་ཨ་ཡིག་དཀར་པོ་ལས་སྐྱེས་པའི་ཟླ་བ་ལ་དྷཱིཿཡིག་དཀར་པོ་ཡོངས་སུ་གྱུར་པ་ལས་བདག་ཉིད་རྗེ་བཙུན་འཇམ་དཔལ་དཔའ་
[119b.2]བོ་གཅིག་ཏུ་གྲུབ་པའི་བདག་ཉིད་ཡན་ལག་ཐམས་ཅད་དཀར་པོ་སྐྱིལ་ཀྲུང་གིས་བཞུགས་པ། ཞལ་གཅིག་ཕྱག་གཉིས་པ་གཡས་པ་མཆོག་སྦྱིན། གཡོན་པས་ཨུཏྤ་ལ་བསྣམས་པ། ལྷའི་རྒྱན་གྱིས་མཛེས་ཤིང་གོས་སྣ་ཚོགས་བསྣམས་པར་སྐད་ཅིག་གིས་བསྐྱེད་ནས། མགོ་དང་མགྲིན་
[119b.3]པ་དང་། སྙིང་གར་ཟླ་བ་ལ་གནས་པའི་ཨོཾ་ཨཱཿཧཱུཾ་ཞེས་པའི་ཡི་གེ་བལྟ་བར་བྱའོ། །ཨཱཿཡིག་དང་ཧཱུཾ་ཡིག་དག་གི་དབུས་སུ་ཡང་དྷཱིཿཡིག་གི་འོད་ཟེར་གྱིས་འགྲོ་བའི་དོན་མཛད་ཅིང་སྔགས་བཟླས་པར་བྱའོ། །ཨོཾ་བཛྲ་ཏཱིཀྵྞ་དུཿཁཙྪེ་ད་པྲཛྙཱ་ཛྙཱ་ན་མཱུརྟ་ཡེ་ཛྙཱ་ན་ཀཱ་ཡ་ཝཱ་གཱི་ཤྭ་ར་ཨ་ར་པ་ཙ་ནཱ་ཡ་ཏེ་ན་མཿདཔའ་
[119b.4]བོ་གཅིག་ཏུ་གྲུབ་པའི་སྒྲུབ་ཐབས་རྫོགས་སོ།། {T3467}༄༅༅། །རྒྱ་གར་སྐད་དུ། ཨ་ལི་མན་མ་ཐ་སཱ་དྷ་ནཾ། བོད་སྐད་དུ། བུང་བ་མྱོས་པའི་སྒྲུབ་ཐབས། བུང་བ་མྱོས་པ་ལ་ཕྱག་འཚལ་ལོ། །ཤིན་ཏུ་ཡིད་འོང་བདེ་མི་འགྱུར། །བསྟན་བཅོས་ལོངས་སྤྱོད་སྐུར་གྱུར་ལ། །ཕྱག་འཚལ་
[119b.5]བུང་བ་ལུས་མེད་ཀྱི། །སྒྲུབ་ཐབས་བསྡུས་པ་བདག་གིས་བཤད། །དང་པོར་རེ་ཞིག་ཆུ་སྐྱེས་དམར་པོའི་ཟེའུ་འབྲུའི་གཟུགས་བརྙན་ལ་དཔལ་ཧེ་རུ་ཀའི་སྐུར་བདག་ཉིད་བསྐྱེད་ནས་རྣམ་པར་རྟོག་པ་ཙམ་གྱིས་ཁམས་གསུམ་པོ་ཀུན་ནས་བརྟག་པར་བྱའོ། །རང་གི་སྙིང་གར་ཤིན་ཏུ་དམར་བའི་
[119b.6]ཨུཏྤ་ལ་ཆེན་པོ་འདབ་མ་བརྒྱད་པའི་ཟེའུ་འབྲུ་ལ་ཨཱ་ལི་དང་ཀཱ་ལི་བསྡུས་པའི་གཟུགས་ལ་སངས་རྒྱས་ཐམས་ཅད་ཀྱི་ཡོན་ཏན་རྗེས་སུ་ཆགས་པའི་ཨཱཿཡིག་དང་ཧཱུཾ་ཡིག་ཡིད་ཀྱིས་མངོན་པར་བྲི་བར་བྱའོ། །དེ་ནས་ཨཱཿཡིག་དང་ཧཱུཾ་ཡིག་དེ་དག་ལས་ཤིན་ཏུ་དམར་ཞིང་མཛེས་པའི་འོད་ཟེར་གྱི་
[119b.7]ཚོགས་འཕྲོས་ཏེ་དེ་བཞིན་དུ་ཡང་གུར་གུམ་རློན་པ་ལས་སྐྱེས་པའི་འོད་ཟེར་གྱི་གཟུགས་ཀྱི་ཚོགས་ཀྱིས་སྣོད་ཀྱི་འཇིག་རྟེན་རྣམ་པར་སྦྱངས་ཏེ། དེ་རྣམས་ཀྱི་ཡང་ལུས་ངག་ཡིད་རྣམས་ལྷན་ཅིག་ཏུ་བྱས་ནས་བཀུག་སྟེ། དེ་དག་ལ་དེ་བཞིན་དུ་ཨཱཿཡིག་དང་ཧཱུཾ་ཡིག་དག་ཐིག་ལེ་ལ་ཞུགས་ཏེ་དེ་ནས་
[120a]
[120a.1]ཨཱཿཡིག་དང་ཧཱུཾ་ཡིག་ཡོངས་སུ་གྱུར་པ་ལས་བྱུང་བ་འཁྲིགས་པའི་ཚོགས་རིན་པོ་ཆེ་ཀུ་རུ་བིནྡྷ་ལྟ་བུ་མཆོག་གི་སྙིང་རྗེས་སྦྲང་འཐུངས་པས་མྱོས་ཤིང་རྒྱུན་མི་འཆད་པར་གྲོལ་བ་ཧཱུཾ་ཞེས་རིང་དུ་སྒྲོགས་ཤིང་མཛེས་པའི་སྐུ་བདག་མེད་མ་དང་ཧེ་རུ་ཀའི་རང་བཞིན་དུ་བསམ་པར་བྱའོ། །
[120a.2]དེ་ནས་དེ་བཞིན་དུ་སྙིང་གར་ལེ་བརྒན་དམར་པོས་ཁ་བསྒྱུར་བའི་ཆུའི་ཐིགས་པ་ལྟ་བུ་ཡུངས་ཀར་ཙམ་ཤིན་ཏུ་ཕྲ་བའི་ཨཱཿཡིག་དང་ཧཱུཾ་ཡིག་བལྟ་བར་བྱའོ། །དེའི་རྗེས་སུ་དེ་འཁྲིགས་པས་དབུགས་རླུང་གི་ལམ་ལ་ཞོན་ཏེ། སྣའི་བུ་ག་ནས་འཐོན་ནས་ཁམས་གསུམ་ན་གནས་པའི་སེམས་ཅན་གྱི་ལུས་
[120a.3]དང་ངག་དང་ཡིད་རྣམ་པར་སྦྱངས་ཏེ་བཟུང་ནས་སླར་ཡང་དབུགས་རླུང་ལ་ཞོན་ཏེ། ཇི་ལྟ་བ་དེ་བཞིན་དུ་རང་གི་སྙིང་གའི་ཆུ་སྐྱེས་ཀྱི་ཟེའུ་འབྲུ་ལ་གཞུག་པར་བྱའོ། །གཞུག་པར་བྱ་བ་ལས་ཡང་བླངས་ནས་ལུས་དང་ངག་དང་། ཡིད་རྣམས་ཀྱི་རང་གི་ལུས་ངག་དང་ཡིད་ཀྱིས་མཉམ་པ་ཉིད་དུ་གྲོལ་
[120a.4]བར་བྱའོ། །དེ་བཞིན་དུ་ཡང་དང་ཡང་བསྒོམ་པར་བྱའོ། །ཇི་སྲིད་སྐད་ཅིག་གིས་རབ་ཏུ་གསལ་བའི་ངེས་པ་སྐྱེ་བར་འགྱུར་རོ། །ཕྱི་ནས་བསྒྲུབ་བྱའམ། བསྒྲུབ་བྱ་མོའི་སྙིང་གར་སྐད་ཅིག་གིས་ཆུ་སྐྱེས་འདབ་མ་བརྒྱད་པ་བསྒོམ་པར་བྱའོ། །བདག་ཉིད་ཀྱི་སྙིང་གའི་ཆུ་སྐྱེས་ཀྱི་ཟེའུ་འབྲུ་
[120a.5]ལས་དེར་བུང་བ་འཁྲིགས་ཤིང་དབུགས་རླུང་ལ་ཞོན་ཏེ། སྣའི་བུ་ག་ནས་འཐོན་ནས་བསྒྲུབ་བྱའི་སྣ་བུག་གང་ནས་རང་གི་ལུས་དང་ངག་དང་ཡིད་ཀྱི་རང་བཞིན་སྙིང་གའི་ཆུ་སྐྱེས་ཀྱི་ཟེའུ་འབྲུ་ལ་ཞུགས་ཏེ། གཞུག་པར་བྱ་བ་དེའི་སྙིང་གའི་པདྨའི་སྐུའི་རང་བཞིན་ཟེའུ་འབྲུའི་བདག་ཉིད་གེ་སར་འཕྲོ་
[120a.6]བར་བྱེད་པ། གསུང་གི་རང་བཞིན་སྦྲང་རྩི་འཐུང་བར་བྱེད་པ། ཐུགས་ཀྱི་རང་བཞིན་ཆུ་སྐྱེས་ཟ་བར་བྱེད་པའོ། །དེའི་རྗེས་སུ་སྒྲུབ་པ་པོའི་རང་གི་རླུང་གིས་བཀུག་ནས་བསྒྲུབ་བྱའི་སྣ་བུག་གཡས་ནས་འཐོན་ཏེ་བདག་གི་སྣ་བུག་ནས། སྙིང་གའི་ཨུཏྤ་ལ་ཆེན་པོའི་ཟེའུ་འབྲུ་ལ་ཞུགས་ནས་འདར་
[120a.7]ཞིང་ལྷུང་ནས་སྐུའི་རང་བཞིན་གྱི་ཟེའུ་འབྲུ་སྤངས་ཏེ། གསུང་གི་རང་བཞིན་གྱི་སྦྲང་རྩི་ཐུགས་ཀྱི་རང་བཞིན་གྱི་པདྨ་ནས་སྐྱུགས་པར་བསམ་པར་བྱའོ། །སླར་ཡང་དེ་བཞིན་དུ་གྱུར་ཅིང་དེ་བཞིན་དུ་ཞུགས་ནས་དེ་བཞིན་ཉིད་དུ་བླངས་ཤིང་དེ་ཉིད་དུ་འོངས་ནས་ཤིན་ཏུ་སྐྱུགས་པར་བསམ་པར་བྱའོ། །
[120b]
[120b.1]དེ་བཞིན་དུ་ཡང་དང་ཡང་དུ་ཇི་སྲིད་རྗེས་སུ་ཆགས་པར་མ་གྱུར་གྱི་བར་དུ་བལྟ་བར་བྱའོ། །རྗེས་སུ་ཆགས་པར་མཐོང་ནས་བརྗོད་པར་བྱ་བ་ཁོང་དུ་ཆུད་པར་བྱའོ། །ཁོང་དུ་ཆུད་པ་ལས་ཡང་ཇི་ལྟར་མངོན་པར་འདོད་པའི་དོན་འགྲུབ་པར་འགྱུར་རོ། །འདིར་ཡང་འདི་བསྒོམས་ནས་བུད་མེད་རྩེ་ཞིང་དགའ་བས་
[120b.2]ཡིད་མྱོས་ཤིང་ལུས་གཡོ་བ་ཅན་སྒྲུབ་པ་པོའི་མིང་གིས་མཚན་པའི་ཚིག་རབ་ཏུ་སྦྱར་བས་དགའ་ཞིང་སྤྲོ་བར་བྱེད་པར་འགྱུར་རོ། །གལ་ཏེ་སྐྱོན་མཐོང་བ་ལས་མི་དགའ་ཞིང་དེའི་ཚེ་སྡུག་བསྔལ་ཆེན་པོ་ཉིད་དུ་ལྟུང་བར་འགྱུར་བས་དེའི་ཕྱིར་དང་པོར་དེ་བཞིན་དུ་དམ་པ་མ་ཡིན་པ་དང་། ཕྱིན་ཅི་ལོག་གི་
[120b.3]ཡུལ་སྤང་བར་བྱའོ། །སྤངས་ནས་ཡང་བསྒོམ་པ་ཞེས་བརྗོད་དོ། །བུང་བ་མྱོས་པའི་སྒྲུབ་ཐབས་ཀྱི། །ཆོ་ག་བསྒྲུབས་པའི་བསོད་ནམས་ནི། །གང་བསགས་དེ་ཡིས་སྐྱེ་བོ་རྣམས། །དཔལ་ལྡན་སྙིང་རྗེའི་སྟོབས་ལྡན་ཤོག །གང་ཞིག་བུད་མེད་སྒེག་མའི་སྙིང་ག་ཡི། །ཆང་གི་དགའ་བས་
[120b.4]མྱོས་པར་བྱེད་པ་ལྟར། །རིན་ཆེན་མྱུ་གུས་ལེགས་པར་སྦྱར་བ་ཡིས། །བུང་བ་མྱོས་བྱེད་སྒྲུབ་ཐབས་དེ་ཡིས་སོ། །བུང་བ་མྱོས་པའི་སྒྲུབ་ཐབས་རྫོགས་སོ།། {T3468}༄༅༅། །རྒྱ་གར་སྐད་དུ། བ་ཤྱ་དྷི་ཀཱ་ར་མཉྫུ་ཤྲཱི་སཱ་དྷ་ནཾ། བོད་སྐད་དུ། ལྷག་པར་དབང་དུ་བྱེད་པའི་འཇམ་དཔལ་
[120b.5]གྱི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དཔལ་ལྡན་འཇམ་དཔལ་རྡོ་རྗེའི་སྐུར་བསྒྲུབས་ཏེ། །སྐུ་མདོག་དམར་པོ་འོད་ཟེར་འབར་བའི་ཚོགས། །དབྱངས་ཡིག་བཅུ་དྲུག་ཡང་དག་འཁོར་བ་ཡི། །སྙིང་གའི་པད་དབུས་རྡོ་རྗེ་བསམ་པར་བྱ། །བནྡྷུའི་མེ་ཏོག་རྣམ་པ་དང་མཚུངས་
[120b.6]སྐུར། །དམིགས་ནས་ངེས་པར་རྐང་དྲུག་བཤད་པ་ཡིས། །དབུགས་ནི་རླུང་གིས་མ་ལུས་དལ་བུ་ཡིས། །ངེས་པར་དྲངས་ནས་སྐྱེ་བའི་བསམ་པ་ཡང་། །བསྒྲུབ་བྱ་མདུན་དུ་གནས་ཤིང་ཐལ་མོ་སྦྱོར། །མིག་ཟུང་གཉིད་ནི་ཡུར་བར་ཡང་དག་བསམ། །སྣ་བུག་ནས་ནི་དེ་བཞིན་བུང་བ་ཡིས། །
[120b.7]དེ་རྣམས་བསྒྲུབ་བྱ་ཉིད་ཀྱི་སྙིང་གར་ཞུགས། །སྙིང་གའི་པདྨ་ཀུན་ནས་བལྡག་ཅིང་རྙིངས། །དེ་ཡི་ཡིད་ཀྱི་སྦྲང་རྩི་འཐུངས་པ་ཡིས། །ངེས་ཕྱུང་དེ་ལས་སླར་ཡང་ཞུགས་གྱུར་ནས། །དེ་ལ་དེ་བཞིན་ངེས་པར་ཡིད་ཐིམ་བསམ། །རྣམ་པ་དེ་བཞིན་བརྟན་པ་དང་ལྡན་སེམས། །ཐུན་མཚམས་བཞི་
[121a]
[121a.1]རུ་བསྒྲུབས་པར་གྱུར་པ་ཡིས། །དབང་པོའང་དེ་རྣམས་དབང་དང་ལྡན་འགྱུར་ཏེ། །བཅུ་བཞིའི་ཉི་མ་རྣམས་ཀྱིས་ངེས་པར་འགྲུབ། །དཔལ་ལྡན་འཇམ་དབྱངས་སྒྲུབ་ཐབས་གཅིག་ཏུ་འདི། །བླ་མ་དམ་པ་ལས་རྙེད་བདག་གསལ་བྱས། །འདི་ལ་ཅི་སྟེའང་མེད་པར་འགྱུར་སྙམ་པའི། །
[121a.2]འདིར་ནི་ཅུང་ཟད་ཐེ་ཚོམ་མི་བྱའོ། །འདི་རྣམས་བཀུག་ནས་ངེས་པར་སེམས་ཉིད་ཞི། །དགེ་བྱེད་ཅེས་བྱས་ཇི་ལྟར་ཉེར་བསྟན་མཛད། །དམ་པ་རྣམས་ཀྱིས་བྱ་བ་ཡོངས་སྤངས་ནས། །བདག་གི་བླ་མ་དག་ནི་འདི་ཡིས་སོ། །རྐང་དྲུག་བརྒྱད་པ་དག་གིས་མཆོག་བྲིས་པའི། །གང་འདིར་དགེ་བ་དྲི་མེད་ཅུང་ཟད་
[121a.3]ཐོབ། །དེ་ཡིས་སེམས་ཅན་མ་ལུས་དེ་བཞིན་དུ། །དཔལ་ལྡན་འཇམ་མགོན་ལྷན་ཅིག་ལྡན་པར་ཤོག །སློབ་དཔོན་དགེ་བ་བྱེད་པའི་ཞབས་ཀྱིས་མཛད་དོ། །བདག་གིས་སྒྲུབ་ཐབས་མཆོག་ཏུ་གྱུར་པ་འདི་བྲིས་པའི། །དགེ་བ་མ་ལུས་གང་ཐོབ་ཤིན་ཏུ་རྣམ་དག་པ། །དེ་ཡིས་འཇིག་རྟེན་འདི་རྣམས་རྒྱལ་
[121a.4]བ་ཉིད་ཐོབ་ནས། །སྲིད་པའི་འཇིགས་པ་མ་ལུས་ཤིན་ཏུ་རབ་ཞི་ཤོག །ལྷག་པར་དབང་དུ་བྱེད་པའི་འཇམ་དཔལ་གྱི་སྒྲུབ་ཐབས་རྫོགས་སོ།། {T3469}༄༅༅། །རྒྱ་གར་སྐད་དུ། མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་གྱི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །འཇམ་
[121a.5]དཔལ་སྒྲུབ་ཐབས་རྣམ་དག་པ། །བསྡུས་ཤིང་ཤིན་ཏུ་གསལ་བ་ཡིས། །མི་ཤེས་རབ་རིབ་འཇོམས་མཛད་པ། །ཡིད་འོང་ལེགས་པར་བརྗོད་པར་བྱ། །སྔོན་དུ་གསུངས་པའི་ཆོ་གས་འདིར་རང་གི་སྙིང་གར་ཟླ་བ་ལ་མཱུཿཡིག་སེར་པོ་ཡོངས་སུ་གྱུར་པ་ལས་འཇམ་དཔལ་གཞོན་ནུ་ཞལ་གསུམ་ཕྱག་དྲུག་པ།
[121a.6]སྐུ་མདོག་གུར་གུམ་ལྟར་དམར་བ་དང་། སྔོན་པོ་དང་དཀར་པོ་ནི་གཡས་དང་ཅིག་ཤོས་ཀྱི་ཞལ་ལོ། །སེམས་དཔའི་སྐྱིལ་ཀྲུང་གིས་བཞུགས་པ། རལ་གྲི་དང་། མདའ་དང་། མཆོག་སྦྱིན་དང་ལྡན་པ་ནི་གཡས་ཀྱི་ཕྱག་གསུམ་ནའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་། ཨུཏྤལ་དང་། གཞུ་དང་
[121a.7]ལྡན་པ་ནི་ཕྱག་གཡོན་པ་གསུམ་ནའོ། །གཞོན་ནུ་སྒེག་པ་དང་བཅས་ཤིང་རྒྱན་དང་ན་བཟའ་ལ་སོགས་པས་བརྒྱན་པ། མེ་ཏོག་སྣ་ཚོགས་པས་ཆེར་མཛེས་པ། ཟུར་ཕུད་གསུམ་གྱིས་བརྒྱན་པ། དེ་བཞིན་གཤེགས་པའི་རྡུལ་ཕྲ་རབ་ལས་ཡོངས་སུ་གྲུབ་པའི་བདག་ཉིད་དུ་བསྒོམ་པར་བྱའོ། །ཨོཾ་མཱུཾཿཞེས་
[121b]
[121b.1]པའི་སྔགས་བཟླས་པར་བྱའོ། །འཇམ་དཔལ་གྱི་སྒྲུབ་ཐབས་རྫོགས་སོ།། {T3470}༄༅༅། །རྒྱ་གར་སྐད་དུ། བིདྱཱ་དྷ་ར་པི་ཊ་ཀ་ཡ་སཾ་ཀྵིཔྟ་མཉྫུ་ཤྲཱི་སཱ་དྷ་ནཾ། བོད་སྐད་དུ། རིག་པ་འཛིན་པའི་སྡེ་སྣོད་ལས་བྱུང་བ་བསྡུས་པའི་འཇམ་དཔལ་གྱི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །སྔོན་
[121b.2]དུ་གསུངས་པའི་ཆོ་གས་འདིར་སྟོང་པ་ཉིད་དུ་བསྒོམས་པའི་རྗེས་ལ་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དཀར་པོ་བསྒོམ་པར་བྱས་ནས། སྤྲོ་བ་ལ་སོགས་པ་སྔོན་དུ་འགྲོ་བས་དེ་ཡོངས་སུ་གྱུར་པ་ལས་དྷཱིཿཡིག་དཀར་པོ་ལས་སྐྱེས་པ་གཅིག་པུ་འབའ་ཞིག་པ་ཉིད་དུ་དཀར་བའི་འཇམ་དཔལ་ཨ་ར་པ་ཙ་ནའི་
[121b.3]རང་གི་ས་བོན་སྙིང་གར་བསམ་པར་བྱའོ། །ཨོཾ་དྷཱིཿསྭཱ་ཧཱ་ཞེས་པའི་སྔགས་བརྗོད་པར་བྱའོ། །རིག་པ་འཛིན་པའི་སྡེ་སྣོད་ལས་བྱུང་བ་བསྡུས་པའི་འཇམ་དཔལ་གྱི་སྒྲུབ་ཐབས་རྫོགས་སོ།། {T3471}༄༅༅། །རྒྱ་གར་སྐད་དུ། བིདྱཱ་དྷཱ་རཱ་པི་ཊ་ཀ་པྲ་ཏི་བ་ན་དྷཾ་མཉྫུ་གྷོ་ཥ་སཱ་དྷ་ནཾ། བོད་སྐད་དུ། རིག་པ་འཛིན་
[121b.4]པའི་སྡེ་སྣོད་སོ་སོ་ནས་བསྡུས་པའི་འཇམ་དཔལ་དབྱངས་ཀྱི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །སྔགས་པས་དང་པོར་བྱ་བ་ནི། །སངས་རྒྱས་ལ་སོགས་མཆོག་རྣམས་མཆོད། །བསོད་ནམས་ཡོངས་སུ་བསྔོ་ལ་སོགས། །དེ་ནས་བྱམས་པ་ལ་སོགས་བསྒོམ། །སྙིང་
[121b.5]གར་ཟླ་བའི་དབུས་གནས་པའི། །ཐིག་ལེ་སྔགས་པས་བསྒོམ་པར་བྱ། །ཉིན་མོར་བྱེད་པའི་འོད་འཕྲོ་བའི། །ཐིག་ལེ་ཁ་བ་དང་མཚུངས་འོད། །ཐིག་ལེ་དེ་ལས་འོད་ཟེར་བསམ། །བ་སྤུ་སོ་སོའི་ཁུང་ནས་འཐོན། །འགྲོ་ཀུན་མཐོ་གང་ལ་སོགས་པའི། །རིམ་པས་རྣམ་པར་གསལ་བར་བྱ། །དྷཱིཿ
[121b.6]ཡིག་དཀར་པོའི་གཟུགས་ཉིད་དུ། །ཐིག་ལེའི་ནང་གཏོགས་འོད་ཟེར་བལྟ། །དེ་ཀུན་ཡོངས་སུ་གྱུར་པ་ལས། །ཨ་ར་པ་ཙ་ན་རུ་བལྟ། །སྙིང་གར་ཟླ་བའི་དཀྱིལ་འཁོར་ལ། །དབུས་སུ་ཆུད་པའི་དྷཱིཿཡིག་བལྟ། །འོད་ཟེར་དག་གི་ཚོགས་འདི་ནི། །སྣ་ནས་ཕྱིར་ནི་འབྱུང་བར་བལྟ། །སེམས་ཅན་
[121b.7]རྣམས་ནི་འཇམ་དབྱངས་དང་། །མཚུངས་པར་འབྱུང་འཇུག་རླུང་གི་བལྟ། །ཕྱི་ནས་དྷཱིཿཡི་ཡི་གེ་ལ། །འདིར་ནི་ཡིད་ཀྱིས་བསྡུ་བར་བྱ། །ཨོཾ་ཡིག་དང་པོ་སྭཱ་ཧཱ་མཐའ། །སྔགས་ནི་ས་བོན་ཡི་གེ་བཟླས། །སྙིང་གའི་ཟླ་བ་ལ་གནས་པ། །སྟོན་ཀའི་ཟླ་བ་ལྟ་བུ་འོད། །རིག་པ་འཛིན་པའི་སྡེ་སྣོད་
[122a]
[122a.1]སོ་སོ་ནས་བསྡུས་པའི་འཇམ་དབྱངས་ཀྱི་སྒྲུབ་ཐབས་རྫོགས་སོ།། {T3472}༄༅༅། །རྒྱ་གར་སྐད་དུ། པྲཛྙཱ་ཝརྡྷ་ན་བི་དྷིཿ། བོད་སྐད་དུ། ཤེས་རབ་འཕེལ་བའི་ཆོ་ག །འཕགས་པ་འཇམ་དཔལ་ལ་ཕྱག་འཚལ་ལོ། །སྒྲོན་མ་ཚོགས་པའི་རྣམ་པ་ཡིས། །སྤྲུལ་པའི་ཆུ་སྐྱེས་
[122a.2]ཟླ་དབུས་སོན། །ཧཾ་གི་ཡི་གེ་ཞུ་བ་ཡིས། །དཔའ་བོ་ཉི་མ་སྦས་པས་བསྟན། ཧཱུཾ་ཨོཾ། ཤེས་རབ་ལྷག་པར་འཕེལ་བར་བྱེད་པའོ། །སྐད་ཅིག་གིས་འཇམ་དབྱངས་ཀྱི་རྣལ་འབྱོར་དུ་དམིགས་ཏེ། ལྟེ་བ་ལ་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དཀར་པོ་ལ་སྒྲོན་མ་ཚོགས་པའི་རྣམ་པའི་འོད་ཟེར་རྣམ་པར་
[122a.3]བསམ་པར་བྱའོ། །སྤྱི་བོར་ཧཾ་ཡིག་དཀར་པོ་ཡིད་གཞོམ་དུ་མེད་པ་མགོ་ཐུར་དུ་འཕྱང་བའི་འོད་ཟེར་བསྒོམ་པར་བྱའོ། །དེའི་རྗེས་སུ་ཐིག་ལེའི་འོད་ཟེར་གྱིས་ཡང་དག་པར་བསྐུལ་ནས་ཧཾ་ཡིག་ཞུ་བར་གྱུར་ཏེ། དེ་ལ་ཐིག་ལེ་འབབ་ཅིང་ཚིམ་པར་བྱའོ། །སེམས་བརྟན་པའི་རྣལ་འབྱོར་པས་ཡུན་རིང་དུ་མི་
[122a.4]ཐོགས་པར་ཤེས་རབ་མངོན་པར་འཕེལ་བར་འགྱུར་རོ་ཞེས་སོ། །ལྟེ་བའི་སྟེང་གི་ཕྱོགས་སུ་ནི། །དམར་ཞིང་གསལ་བའི་ཆོས་འབྱུང་ནི། །རྡོ་རྗེ་སྔོན་པོ་རྩེ་ལྔ་པ། །ལྟེ་བ་ལ་ནི་འོད་ཟེར་འབར། །ཧཱུཾ་ཡིག་དཀར་པོ་ལས་སྐྱེས་པའི། །མགོ་བོའི་མཚམས་ནས་ངེས་འབྱུང་བའི། །ཧཱུཾ་ཡིག་དུད་ཁ་ལས་བྱུང་
[122a.5]བའི། །སྒྲ་ཡིས་ནམ་མཁའ་ཁྱབ་པར་བལྟ། །སྒྲ་ཡི་འོད་ཀྱི་རེ་ཁཱའོ། །ཞེས་པ་ནི་ཤེས་རབ་འཕེལ་བའི་ཆོ་ག་རྫོགས་སོ།། {T3473}༄༅༅། །རྒྱ་གར་སྐད་དུ། ནཱ་མ་སཾ་གི་ཏྱཱ་མ་ན་ཡེ་ན་སིདྡྷི་པྲཛྙཱ་ཙཀྲ་བ་ལ་བ་དྷཾ་སཱ་དྷ་ནཾ། བོད་སྐད་དུ། མཚན་ཡང་དག་པར་བརྗོད་པའི་མན་ངག་ཤེས་རབ་འཁོར་ལོའི་དངོས་
[122a.6]གྲུབ་མཆོག་ཐོབ་པའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །བླ་མའི་ཞབས་ལ་བདག་ཕྱག་འཚལ། །རྡོ་རྗེ་སློབ་དཔོན་དེ་བཞིན་དུ། །ངག་གི་དབང་པོ་ཕྱག་འཚལ་ནས། །འཇམ་དཔལ་སྒྲུབ་ཐབས་བདག་གིས་བྲི། །སེམས་དཔའི་སྐྱིལ་ཀྲུང་གིས་བཞུགས་ཏེ། །སྙིང་གར་
[122a.7]ཟླ་བ་ཨ་ཡིས་བརྒྱན། །ཀུནྡ་དུང་འདྲ་ས་བོན་འབར། །སྣ་ཚོགས་འོད་ཟེར་ཀུན་དུ་འཁྲིགས། །དེ་སྐྱེས་རྫོགས་པའི་སངས་རྒྱས་དང་། །བླ་མ་བྱང་ཆུབ་སེམས་དཔའ་དང་། །ཆེན་པོ་དེ་རྣམས་བལྟས་ནས་ནི། །སྔགས་འདི་ཡིས་ནི་མཆོད་པར་བྱ། །ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ།
[122b]
[122b.1]ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ནཻ་བི་དྱེ་ཧཱུཾ། དེ་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །
[122b.2]རང་གཞན་དོན་ནི་རབ་སྒྲུབ་ཕྱིར། །བྱང་ཆུབ་སེམས་ནི་བདག་གིས་བསྐྱེད། །བྱང་ཆུབ་མཆོག་ཏུ་བདག་གིས་སེམས་བསྐྱེད་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པའི་སྨོན་
[122b.3]ལམ་སྔོན་དུ་འགྲོ་བ་ཡིས། །ཆོས་ཀུན་བདག་མེད་སྔགས་འདི་བརྗོད་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ས་བོན་སྒྱུ་མ་ལྟ་བུ་བསམ། །ཁམས་གསུམ་རྣམས་ནི་མ་ལུས་པ། །མཐོང་བ་དང་ནི་རེག་པ་ཉིད། །དཔེར་ན་ཐམས་ཅད་སྒྱུ་མ་བཞིན། །དེ་བཞིན་དམིགས་པའང་མེད་པ་སྟེ། །ཀུན་
[122b.4]ཀྱང་སྒྱུ་མ་ཇི་བཞིན་ནོ། །འགྲོ་བ་ཐམས་ཅད་གནས་པ་ནི། །དེ་ཡང་དམིགས་པ་མེད་པར་བྱ། །ཞེས་པས་ལྷག་པར་མོས་པར་བྱ། །དེ་ནས་ཐོག་མ་མེད་པའི་དུས་ཀྱི་ཡང་དག་པ་མ་ཡིན་པའི་རྣམ་པར་རྟོག་པའི་ས་བོན་སྤངས་ནས་རང་བཞིན་གྱིས་དག་པ་ཞེས་བྱ་བ་ལྷག་པར་མོས་པར་བྱའོ། །ཨོཾ་སྭ་བྷཱ་ཝ་ཤུདྡྷཿསརྦ་
[122b.5]དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་སོ། །དེ་ནས་སྔོན་དུ་གསུངས་པའི་ས་བོན་ཡོངས་སུ་གྱུར་པ་ལས་རལ་གྲིའོ། །དེའི་ཆང་པའི་དབུས་སུ་ཟླ་བའི་དཀྱིལ་འཁོར། དེའི་སྟེང་དུ་སྔོན་དུ་གསུངས་པའི་ས་བོན། དེ་ཐམས་ཅད་ཡོངས་སུ་གྱུར་པ་ལས་འཇམ་དཔལ་གྱི་སྐུར་བདག་ཉིད་བསམ་པར་བྱའོ། །བདག་ཉིད་
[122b.6]འགྲོ་བ་ཐམས་ཅད་ཀྱི་གཙོ་བོ་ཞེས་བྱའོ། །པདྨ་དང་ཟླ་བའི་གདན་ལ་སེམས་དཔའི་སྐྱིལ་ཀྲུང་གིས་མཉམ་པར་བཞུགས་པའོ། །ཟླ་བ་དུ་མའི་འོད་ཟེར་འཕྲོ་ཞིང་ནམ་མཁའི་མཐིལ་ཁྱབ་པར་མཛད་པ་སྣ་ཚོགས་པའི་ན་བཟའ་བསྣམས་ཤིང་། འགྲོ་བ་རྣམས་དགའ་བར་མཛད་པ། གཟུགས་མཛེས་ཤིང་སྐུ་
[122b.7]མདོག་དཀར་པོ་ཡིད་དུ་འོང་བའི་ཟུར་ཕུད་ལྔས་སྤྲས་པའི་དཔའ་བོ་ཆེན་པོ་རྒྱན་ཐམས་ཅད་ཀྱིས་བརྒྱན་པ། ཕྱག་གཡས་པ་ན་རལ་གྲི་འཕྱར་བ། ཕྱག་གཡོན་གྱི་ཐུགས་ཀར་པོ་ཏི་བསྣམས་པའོ། །དེ་ནས་ཕྱག་རྒྱ་བཅིང་བར་བྱའོ། །ལག་པ་གཉིས་ཐལ་མོ་སྦྱར་ཏེ། མཛུབ་མོ་དག་དང་མིང་མེད་དག་གིས་སེན་
[123a]
[123a.1]མོ་དག་བཀབ་ནས་ཨུཏྤལ་ཁ་བྱེ་བ་ལྟར་གནས་པའོ། །སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་རྣམས་སུ་རང་གི་སྔགས་ཀྱིས་དགོད་པར་བྱའོ། །ཕྱི་ནས་ལྟེ་བའི་འོག་ཏུ་བྷྲཱུཾ་ཡིག་དཀར་པོ་ཨ་ཤྭདྠཱའི་ལོ་མ་ལྟ་བུ་བསམ་པར་བྱའོ། །ཟླ་བའི་དཀྱིལ་འཁོར་ལ་དེའི་སྟེང་དུ་བརྒྱད་
[123a.2]པའི་བཞི་པ་དང་པོའི་བཅུ་དྲུག་པ་བདུན་པའི་གཉིས་པ་དང་པོའི་བཞི་པས་བརྒྱན་པའོ། །དེ་ཡོངས་སུ་གྱུར་པ་ལས་པདྨ་ཁ་ཟུམ་པ་སྟེ། ལྟེ་བའི་སྟེང་དུ་ཧཱུཾ་ཡིག་ཁ་འབྱེད་པ་བསམ་པར་བྱའོ། །དེའི་སྟེང་དུ་ཟླ་བའི་དཀྱིལ་འཁོར་རོ། །དེའི་སྟེང་དུ་སོར་གཅིག་ཙམ་སྤངས་ནས་འཁོར་ལོ་རྩིབས་དྲུག་པ་འོད་
[123a.3]ཟེར་དང་བཅས་པའོ། །དེའི་རྩིབས་རྣམས་ལ་དབྱངས་ཡིག་བཅུ་གཉིས་ཡི་གེ་ཟུང་རེ་རེ་དགོད་པར་བྱའོ། །རྩིབས་སོ་སོའི་སྟེང་དུ་རྩ་བའི་སྔགས་ཀྱི་ཡི་གེ་རེ་རེ་རྣམ་པར་བཀོད་ནས་འཁོར་ལོའི་ནང་གི་ལྟེ་བ་ལ་དྷཱིཿཡིག་འོད་ཟེར་དང་བཅས་པ་མི་གཡོ་བར་བསྒོམ་པར་བྱའོ། །ཕྱིའི་མུ་ཁྱུད་ལ་ཀཱ་ལི་སྦྱོར་
[123a.4]བ་ཡང་དག་པར་འབར་བའི་ང་ཉ་ཎ་ན་མའི་ཡི་གེ་རྣམས་སྤངས་པར་བསྒོམ་པར་བྱའོ། །ཡང་དེའི་སྟེང་དུ་སོར་གཅིག་ཙམ་སྤངས་ནས་ཟླ་བའི་དཀྱིལ་འཁོར་ལ་དེའི་སྟེང་དུ་ཨ་ར་པ་ཙ་ན་ཞེས་པ་བལྟས་ནས་ཤིན་ཏུ་མྱུར་དུ་འཁོར་བའི་འཁོར་ལོ་བསྒོམ་པར་བྱའོ། །ཇི་སྲིད་ཟླ་བ་དྲུག་གི་བར་དུ་སྔགས་འདི་
[123a.5]བཟླས་པར་བྱའོ། །ཨོཾ་བཛྲཏཱིཀྵྞ་མུཿཞེས་ཉི་མ་རེ་རེ་ལ་ཁྲི་ཕྲག་རེ་བཟླས་པར་བྱའོ། །དེ་ནས་ལྐུགས་པ་ཡིན་ཡང་ངག་གི་དབང་པོར་འགྱུར་ཞིང་བློ་དང་ལྡན་པར་འགྱུར་རོ། །གཞུང་སྟོང་ཕྲག་རེ་འཛིན་ནུས་སོ། །རྒྱུན་ཆད་མེད་པར་ལེགས་པར་སྦྱར་བའི་སྐད་དང་ལྡན་ཞིང་སྙན་ངག་མཁན་ཆེན་པོར་
[123a.6]གྱུར་ནས་བསྟན་བཅོས་ཐམས་ཅད་ཀྱི་མཐར་ཕྱིན་པར་འགྱུར་རོ། །གྲུབ་པར་གྱུར་ནས་རལ་གྲིའི་རིག་པ་འཛིན་པའི་བདག་པོར་འགྱུར་ཞིང་རིག་འཛིན་མ་རྣམས་དང་ལྷན་ཅིག་ཏུ་རྩེ་བར་བྱེད་དོ། །འཁོར་ལོ་མཆོག་འདིར་མི་གསལ་བ་རྣམས་སློབ་དཔོན་གྱི་མན་ངག་ལས་ཁོང་དུ་ཆུད་པར་བྱའོ། །ཤེས་
[123a.7]རབ་འཁོར་ལོའི་མཆོག་གྱུར་འདི། །བྲིས་པའི་འབྲས་བུ་གང་ཐོབ་པ། །དེ་ཡིས་འཇིག་རྟེན་ཐམས་ཅད་འདིར། །འཇམ་དཔལ་གོ་འཕང་ཐོབ་པར་ཤོག །མཚན་ཡང་དག་པར་བརྗོད་པའི་མན་ངག་ཤེས་རབ་འཁོར་ལོའི་དངོས་གྲུབ་མཆོག་གི་སྒྲུབ་ཐབས་རྫོགས་སོ།། །།
[123b]
[123b.1]{T3474}༄༅༅། །རྒྱ་གར་སྐད་དུ། དྷརྨཱ་ཤཾ་ཁ་ས་མཱ་དྷི་མཉྫུ་ཤྲཱི་སཱ་དྷ་ནཾ། བོད་སྐད་དུ། ཆོས་ཀྱི་དུང་གི་ཏིང་ངེ་འཛིན་འཇམ་དཔལ་གྱི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དེ་ལ་འདིར་ཆོས་ཀྱི་དུང་གི་ཏིང་ངེ་འཛིན་ནི་ཆུའི་དཀྱིལ་འཁོར་ཟླུམ་པོ་དཀར་པོའི་སྟེང་དུ་གེ་སར་དང་བཅས་པའི་
[123b.2]པདྨ་འདབ་མ་བརྒྱད་པའི་ཟེའུ་འབྲུ་ལ་འཆི་བ་འཇོམས་ཤིང་ཆོས་ཐམས་ཅད་གསལ་བར་མཛད་པའི་ཕྱིར་མཾ་ཡིག་གི་ས་བོན་ལས་སྐྱེས་པའི་སྐུ་མདོག་དཀར་པོ་ཕྱག་གཉིས་པ་རྡོ་རྗེ་སྐྱིལ་མོ་ཀྲུང་གི་སྟེང་ན་ཏིང་ངེ་འཛིན་གྱི་ཕྱག་རྒྱ་དང་ལྡན་པ། གཞོན་ནུ་རྒྱན་དང་ལྡན་པ། ཟུར་ཕུད་ལྔ་དང་ལྡན་པ་གསལ་
[123b.3]ཞིང་དྲི་མ་མེད་པའི་ཡེ་ཤེས་ཀྱི་རང་བཞིན་འཇམ་དཔལ་གྱི་སྐུར་བདག་ཉིད་བསྒོམ་པར་བྱའོ། །རང་གི་སྙིང་གར་ཟླ་བའི་སྟེང་དུ་པདྨ་ལ་བཾ་ཡིག་ལས་སྐྱེས་པའི་དུང་། དེའི་དབུས་སུ་ཨོཾ་བཛྲ་ཛི་ཧྭ་རཾ་ཞེས་པས་ལྕེ་རྡོ་རྗེའི་ལྕེའི་སྟེང་དུ་རིན་པོ་ཆེ་དང་པདྨ་ལ་ཏིང་ངེ་འཛིན་དང་ཡང་དག་པར་ལྡན་པའི་སངས་རྒྱས་འོད་
[123b.4]དཔག་མེད། དེའི་སྟེང་དུ་རྐན་ལ་བཾ་ཡིག་མགོ་ཐུར་དུ་བསྟན་པ་བདུད་རྩིའི་ཐིག་ལེ་འབབ་བཞིན་པའོ། །དེ་བཞིན་དུ་གོ་རིམས་བཞིན་དུ་ཟླ་བ་ཕྱེད་དང་། ཟླ་བ་དང་ཟླ་བ་དྲུག་གིས་མཐར་ཐུག་པ་བསྒོམ་པར་བྱའོ། །དངོས་གྲུབ་ཀྱི་མཚན་མ་མཐོང་ནས་དཀྱིལ་འཁོར་བྲི་བར་བྱའོ། །དེ་ལ་ཕྱི་རུ་ཟུར་
[123b.5]བཞི་པ་སྒོ་བཞི་པ་སྒོ་རྐྱང་དང་ལྡན་པའོ། །སྒེག་མོ་མ་དང་། ཕྲེང་བ་མ་དང་། གླུ་མ་དང་། གར་མ་དང་། མེ་ཏོག་མ་དང་། བདུག་སྤོས་མ་དང་། མར་མེ་མ་དང་། དྲི་ཆབ་མ་རྣམས་དཀྱིལ་འཁོར་གྱི་ཕྱིར་དགོད་པར་བྱའོ། །དེའི་ནང་དུ་སྒོ་མེད་པའི་རེ་ཁཱ་དཀར་པོ་ཟླུམ་པོ་ཅིག་བྲི་བར་བྱའོ། །དེའི་དབུས་སུ་
[123b.6]པདྨ་དཀར་པོ་དེ་བཞིན་དུ་བྲིས་ནས་སྨིན་དྲུག་དང་། དབོ་དང་ས་ག་ལ་སོགས་པའི་ཟླ་བ་གང་བ་ལ་ཞལ་ཟས་ལ་སོགས་པའི་མཆོད་པ་སྔོན་དུ་འགྲོ་བས་གཏོར་མ་ཕུལ་ནས། ཏིང་ངེ་འཛིན་དང་ལྡན་པས་དཀྱིལ་འཁོར་གྱི་དབུས་སུ་རྡོ་རྗེ་སྐྱིལ་ཀྲུང་གིས་ཉེ་བར་བཞུགས་པའི་འཇམ་དཔལ་གྱི་སྐུ་ལ་ཡོངས་སུ་བསྐོར་
[123b.7]བའི་འོད་དཔག་མེད་ཀྱི་སྐུའི་བདག་ཉིད་ཆོས་ཀྱི་དབྱིངས་དང་མཚུངས་པའི་འོད་གསལ་བ་བསྒོམ་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་ཕྱག་རྒྱས་ཕྱོགས་ཐམས་ཅད་ནས་བྱོན་ཏེ་རང་གི་ལུས་ངག་ཡིད་རྣམས་ལ་རབ་ཏུ་ཞུགས་ཏེ་བརྟན་པར་གྱུར་ནས་སེམས་བརྟན་པར་བྱའོ། །
[124a]
[124a.1]རང་གི་སྙིང་གར་ཟླ་བ་དང་པདྨ་ལ་གནས་པའི་དུང་གསལ་པོ་བལྟ་བར་བྱའོ། །དེ་ལ་ཡི་གེའི་རང་བཞིན་ཐམས་ཅད་ཀྱིས་ཡོངས་སུ་བསྐོར་ཞིང་གནས་པའི་གེ་སར་གྱི་ཐིག་ལེ་ལས་ངག་གི་རྡུལ་ཕྲ་རབ་མགྲིན་པའི་ཕྱོགས་ནས་ཐོབ་པའི་དབྱངས་ཀྱི་གཟུགས་སུ་འགྱུར་རོ། །དབྱངས་ལ་
[124a.2]སྒྲ་ལས་ཡི་གེའི་གཟུགས་ཉིད་ལྕེ་ལས་བྱུང་ཞིང་རྡོ་རྗེའི་རྣམ་པས་རིམ་པ་བཞིན་དུ་ནམ་མཁའ་མ་ལུས་པ་གསལ་བར་མཛད་པས་ནམ་མཁའ་ཐམས་ཅད་དུ་འཕྲོས་པའི་སྒྲིབ་པ་དང་བྲལ་བའི་དབྱངས་བཅུ་དྲུག་གི་རྣམ་པར་བལྟ་བར་བྱ་ཞིང་། དབྱངས་ཀྱིས་ནམ་མཁའ་གང་བའོ། །ཨོཾ་ཝཱ་ཀྱཻ་དཾ་ན་མཿཞེས་
[124a.3]པའི་སྔགས་བཟླས་པར་བྱའོ། །སྐྱིལ་མོ་ཀྲུང་མ་བཤིག་པར་མཚན་མོ་རིལ་པོ་བཟླས་པས་དངོས་གྲུབ་ཀྱི་མཚན་མར་འགྱུར་ཏེ། ལྕེ་ལ་འོད་ཟེར་འཕྲོ་བར་འགྱུར་རོ། །གྲུབ་པ་བརྒྱད་ཅུའི་སྒྲ་ཡང་ཐོས་པར་འགྱུར་རོ། །མཆུ་དང་སོ་རྣམས་ལས་ཀྱང་སྣ་ཚོགས་པའི་འོད་ཟེར་འཕྲོ་བར་འགྱུར་རོ། །དེ་ནས་དེ་
[124a.4]ལྟ་བུ་ལ་སོགས་པའི་ཇི་ལྟར་སེམས་པའི་ཚིག་དང་ཚིགས་སུ་བཅད་པའི་ཚིག་དང་། ཚིགས་བཅད་དང་། སྔགས་དང་། རིག་པ་དང་། སྙིང་པོ་རྣམས་དུང་ལས་འབད་པ་མེད་པར་དེ་བཞིན་དུ་འབྱུང་བར་འགྱུར་རོ། །ཁོང་དུ་མ་ཆུད་པའི་བསྟན་བཅོས་རྣམས་ཀྱང་ཁོང་དུ་ཆུད་པར་འགྱུར་རོ། །ཐམས་ཅད་
[124a.5]མཁྱེན་པ་ཉིད་དང་ཡུན་མི་རིང་བར་ལྷ་ཉིད་དུ་འགྱུར་རོ་ཞེས་སོ། །ཆོས་ཀྱི་དུང་གི་ཏིང་ངེ་འཛིན་འཇམ་དཔལ་གྱི་སྒྲུབ་ཐབས་རྫོགས་སོ།། {T3475}༄༅༅། །རྒྱ་གར་སྐད་དུ། ཨཱརྱ་ནཱ་མ་སཾ་གཱི་ཏི་སཱ་དྷ་ནཾ། བོད་སྐད་དུ། འཕགས་པ་མཚན་ཡང་དག་པར་བརྗོད་པའི་སྒྲུབ་ཐབས། འཕགས་པ་འཇམ་
[124a.6]དཔལ་ལ་ཕྱག་འཚལ་ལོ། །དང་པོར་རེ་ཞིག་སྒྲུབ་པ་པོས་སྔ་བར་ལངས་ཏེ་ཁ་བསང་བ་ལ་སོགས་པ་བྱས་ཏེ་བསམ་གཏན་གྱི་ཁང་པར་རབ་ཏུ་ཞུགས་ནས་སྟན་བདེ་བ་ལ་སྐྱིལ་མོ་ཀྲུང་གིས་ཉེ་བར་འདུག་སྟེ། སྙིང་གར་པདྨ་དང་ཟླ་བ་ལ་དམར་ཞིང་དཀར་བའི་མུཿཡིག་བསྒོམ་པར་བྱའོ། །དེ་ནས་དེའི་འོད་ཟེར་གྱི་
[124a.7]ཚོགས་ལྕགས་ཀྱུའི་རྣམ་པ་ཅན་གྱིས་བཀུག་སྟེ་འཆད་པར་འགྱུར་བའི་བཅོམ་ལྡན་འདས་སྐུ་མདོག་དང་ཞལ་དང་ཕྱག་མཚན་དང་སྟན་དང་ལྡན་པ་མདུན་དུ་རྣམ་པར་བསྒོམས་ནས། ཡིད་ཀྱིས་རང་བཞིན་གྱི་མེ་ཏོག་དང་། བདུག་སྤོས་ལ་སོགས་པས་ཡང་དག་པར་མཆོད་ལ་དེའི་མདུན་དུ་སྡིག་པ་བཤགས་པ་ལ་
[124b]
[124b.1]སོགས་པ་ཐམས་ཅད་བྱས་ནས་བྱམས་པ་ལ་སོགས་པ་ཚད་མེད་པའི་གནས་བཞི་བསྒོམ་པར་བྱའོ། །ཆོས་ཐམས་ཅད་སྟོང་པ་ཉིད་མངོན་དུ་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་སྔགས་ཀྱིས་བྱིན་གྱིས་བརླབ་པར་བྱའོ། །དེ་ནས་ནམ་མཁའ་ལ་ཧཱུཾ་གི་ཡི་གེ་རྡོ་རྗེ་རྩེ་ལྔ་པའི་ས་བོན་དང་བཅས་
[124b.2]པ་བསྒོམས་ལ། དེའི་འོད་ཟེར་རྣམས་ཀྱིས་ཇི་ལྟར་སྤྱོད་པའི་རྡོ་རྗེའི་ར་བ་དང་། རྡོ་རྗེའི་གུར་དང་། རྡོ་རྗེའི་རང་བཞིན་གྱི་ས་གཞིར་དམིགས་ནས། རྡོ་རྗེའི་རང་བཞིན་ལས་འོད་ཟེར་བྱུང་བས་རྡོ་རྗེའི་ར་བའི་ཕྱི་རོལ་དུ་ཕྱོགས་བཅིངས་པ་ལ་སོགས་པའི་གཟུགས་ཀྱིས་ཉེ་བར་གནས་པར་བལྟའོ། །དེའི་
[124b.3]རྗེས་སུ་རྡོ་རྗེ་ར་བའི་ནང་དུ་ཧྲཱིཿཡོངས་སུ་གྱུར་པ་ལས་པདྨའོ། །པདྨའི་སྟེང་དུ་ཨ་ཡིག་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་དཀར་དམར་གྱི་མུཿཡིག་ལས་སངས་རྒྱས་དཔག་ཏུ་མེད་པ་སྤྲོ་བ་དང་བསྡུ་བའི་རྣམ་པར་བསྒོམས་ལ། དེ་ཡོངས་སུ་གྱུར་པ་ལས་རྗེ་བཙུན་འཇམ་དཔལ་དམར་ཞིང་
[124b.4]དཀར་བ་པདྨ་དང་ཟླ་བའི་སྟེང་དུ་རྡོ་རྗེ་སྐྱིལ་མོ་ཀྲུང་གིས་བཞུགས་པ། དང་པོའི་ཞལ་དམར་པོ། གཡས་པ་སྔོན་པོ། གཡོན་པ་དཀར་པོ་ཞེས་པའི་ཞལ་གསུམ་མོ། །ཕྱག་བཞིས་ཇི་ལྟ་བའི་སྦྱོར་བས་ཤེས་རབ་ཀྱི་པོ་ཏི་དང་། རལ་གྲི་དང་། གཞུ་དང་། མདའ་བསྣམས་པའོ། །རིན་པོ་ཆེའི་དབུ་
[124b.5]རྒྱན་ཅན། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བརྒྱད་ཅུས་རྣམ་པར་མཛེས་པ། གཞོན་ཞིང་གཞོན་ནུའི་རྒྱན་གྱིས་བརྒྱན་པའི་བདག་ཉིད་དུ་བསྒོམ་པར་བྱའོ། །སྙིང་གར་པདྨ་དང་ཟླ་བའི་སྟེང་དུ་སེམས་དཔའི་སྐྱིལ་ཀྲུང་གིས་བཞུགས་པའི་སེམས་མ་དཀར་མོ་གཡོན་པ་དྲིལ་བུ་དཀུར་བརྟེན་པ།
[124b.6]གཡས་པ་རང་གི་སྙིང་གར་འདེགས་པར་བྱེད་པའི་སྦྱོར་བས་རྡོ་རྗེ་འཆང་བ། སྨིན་མཚམས་སུ་དེ་བཞིན་དུ་བཞུགས་པའི་རིན་ཆེན་རྡོ་རྗེ་མ་སེར་མོ་ཕྱག་གཉིས་ཀྱིས་སྤྱི་བོར་མེ་ཏོག་གི་ཕྲེང་བ་འཆིང་བར་མཛད་པའོ། །མགྲིན་པར་པདྨ་རྡོ་རྗེ་མ་དཀར་དམར་གཡོན་པས་སྙིང་པོ་དང་བཅས་པའི་པདྨའི་སྡོང་བུ་འཛིན་
[124b.7]པ་གཡས་པས་དེའི་འདབ་མ་རྣམ་པར་འབྱེད་པར་མཛད་པ་སྔོན་མ་ཇི་ལྟ་བ་བཞིན་དུ་བཞུགས་པའོ། །སྤྱི་བོར་ལས་ཀྱི་རྡོ་རྗེ་མ་སྐུ་མདོག་ལྗང་གུ་རྡོ་རྗེ་རྩེ་གསུམ་དང་ལྡན་པའི་ཕྱག་གཉིས་བདག་ཉིད་ཀྱི་སྤྱི་བོར་འཆང་བར་མཛད་ཅིང་དེ་ཁོ་ན་བཞིན་དུ་གནས་པར་བསྒོམ་པར་བྱའོ། །ཨོཾ་བཛྲ་ཨཾ་ཀུ་ཤ་ཛཿ། ཨོཾ་བཛྲ་
[125a]
[125a.1]པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ་ཤ་ཧོཿཞེས་པའི་སྔགས་ཀྱིས་པདྨ་དང་ཟླ་བའི་སྟེང་དུ་གོ་རིམས་ཇི་ལྟ་བ་བཞིན་དུ་ཡེ་ཤེས་ཀྱི་འཁོར་ལོ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱའོ། །རྡོ་རྗེ་ཁུ་ཚུར་གཉིས་བཅིངས་ཏེ། མཛུབ་མོ་དང་མཐེའུ་ཆུང་
[125a.2]རྣམས་ལྕགས་སྒྲོག་ཏུ་བྱས་ཏེ་སྤྲད་པ་གན་རྐྱལ་དུ་རང་གི་ཁར་གཞག་པ་ནི་རྡོ་རྗེ་འཁོར་ལོའི་ཕྱག་རྒྱའོ། །མཆོད་ཡོན་དང་། ཞབས་བསིལ་དང་། མེ་ཏོག་དང་། བདུག་སྤོས་ལ་སོགས་པ་རྣམས་ཀྱིས་ཡང་དག་པར་མཆོད་ནས་སྐད་ཅིག་གིས་རང་གི་ལུས་ལ་གཞུག་པར་བྱའོ། །དེའི་རྗེས་སུ་
[125a.3]དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་སྔོན་དུ་འགྲོ་བས་མི་བསྐྱོད་པས་དབུ་བརྒྱན་པའི་བདག་ཉིད་དུ་རྣམ་པར་བསམ་པར་བྱའོ། །ཨོཾ་སརྦ་དྷརྨཱཿསྭ་བྷཱ་བ་བི་ཤུདྡྷ་བཛྲ་ཙཀྵུཿཨ་ཨཱ་ཨཾ་ཨཿཔྲ་ཀྲྀ་ཏི་པ་རི་ཤུདྡྷཿསརྦ་དྷརྨཱ་ཡ་དུ་ཏ་སརྦ་ཏ་ཐཱ་ག་ཏ་ཛྙཱ་ན་ཀཱ་ཡ་མཉྫུ་ཤྲཱི་པ་རི་ཤུདྡྷི་ཏཱ་མུ་པཱ་དཱ་ཡ་ཏི་ཨ་ཨཱཿསརྦ་ཏ་ཐཱ་
[125a.4]ག་ཏ་ཧྲྀ་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་ཝཱན་ཛྙཱ་ན་མཱུརྟི་ཝཱ་གཱི་ཤྭ་ར་མ་ཧཱ་ཝཱ་ཙ་སརྦ་དྷརྨ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿཞེས་བྱ་བའི་སྔགས་ཀྱིས་དང་པོ་དང་བར་དང་མཐར་བྱིན་གྱིས་བརླབ་པ་སྔོན་དུ་འགྲོ་བའི་རྗེ་བཙུན་མཚན་ཡང་དག་པར་བརྗོད་པ་ཉི་མ་སོ་སོ་ལ་སོ་སོའི་ཐུན་མཚམས་ལ་ལན་
[125a.5]གསུམ་མམ་ལན་གྲངས་དུ་མར་སྐྱིལ་མོ་ཀྲུང་མ་བཤིག་པར་ཏིང་ངེ་འཛིན་དང་ལྡན་པའི་མཁས་པས་བཀླག་པར་བྱའོ། །དེ་བཞིན་དུ་ཇི་སྲིད་དངོས་གྲུབ་ཀྱི་མཚན་མ་མ་མཐོང་གི་བར་དེ་སྲིད་དུ་བསྒོམ་ཞིང་བཀླག་པར་བྱའོ། །དེའི་རྗེས་སུ་རྒྱུད་ཇི་ལྟ་བ་བཞིན་དུ་དངོས་གྲུབ་ཀྱི་ཐབས་ལ་རྗེས་སུ་
[125a.6]གནས་པར་བྱའོ་ཞེས་སོ། །འཕགས་པ་མཚན་ཡང་དག་པར་བརྗོད་པའི་སྒྲུབ་ཐབས་རྫོགས་སོ།། {T3476}༄༅༅། །རྒྱ་གར་སྐད་དུ། མཉྫུ་ཤྲཱི་བཛྲ་སཱ་དྷ་ནཾ། བོད་སྐད་དུ། འཇམ་པའི་རྡོ་རྗེའི་སྒྲུབ་ཐབས། དཔལ་འཇམ་དཔལ་རྡོ་རྗེ་ལ་ཕྱག་འཚལ་ལོ། །དོན་རྣམས་ཕུན་
[125a.7]སུམ་ཚོགས་གྱུར་པ། །བདག་ཉིད་འཇམ་དཔལ་རྡོ་རྗེར་བྱ། །སེམས་ཅན་རྣམས་ཀྱི་འཁྲུལ་བལྟས་ནས། །དང་པོར་ཡོངས་སུ་བསྒོམ་པར་བྱ། །སྙིང་གར་མཾ་ཡིག་དེ་ཉིད་དགོད། །མཆོད་ཅིང་མངོན་པར་ཕྱག་འཚལ་ནས། །བླ་མ་རྫོགས་པའི་སངས་རྒྱས་ཀྱི། །སྐུར་གྱུར་གསུམ་
[125b]
[125b.1]ལ་སྐྱབས་འགྲོ་སོགས། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །དངོས་མེད་ངོ་བོ་ཉིད་ཀྱིས་སྟོང་། །མཚན་མེད་རྒྱུ་དང་བྲལ་བ་སྟེ། །སྨོན་པ་དང་བྲལ་དངོས་ཀུན་
[125b.2]གྱི། །རྟོག་པ་སྤངས་པ་ཉིད་དུ་འདོད། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། གྲུ་གསུམ་དཀར་པོ་མཐོ་བའི་དབྱིབས། །སྣ་ཚོགས་ཆུ་སྐྱེས་རྡོ་རྗེའི་དབུས། །མཆོད་རྟེན་ནང་དུ་རྫོགས་སངས་རྒྱས། །རྡོ་རྗེ་སེམས་དཔའ་རིག་བཅས་བསྒོམ། །དེ་ཡི་ཞལ་བཞུགས་དེ་བཞིན་དུ། །རང་སེམས་
[125b.3]རྡོ་རྗེ་ལས་འཐོན་ནས། །ཡི་གེ་གསུམ་བྱུང་ཆུ་སྐྱེས་ལ། །ཧོ་ཡིག་གཉིས་ཀྱིས་རྣམ་པར་བརྒྱན། །དེ་ལས་བྱུང་བའི་འོད་ཟེར་གྱིས། །དེ་ནས་ལུས་ནི་ཞུ་བར་བལྟ། །ཟླ་བ་ཁུ་བའི་འོད་ཟེར་ཞུ། །མེར་མེར་ལ་སོགས་ཡང་དག་འཛིན། །ཕྱོགས་ཀུན་ན་གནས་ལྷ་མོ་རྣམས། །གླུས་བསྐུལ་དེ་ཡི་ཕྱི་ནས་
[125b.4]ནི། །འགྲོ་རྣམས་བདེ་བར་རབ་བསྒྲུབ་པའི། །བདག་ཉིད་བཞེངས་པ་བསམ་པར་བྱ། །རྡོ་རྗེའི་ཐུགས་ཁྱོད་གནས་ཀྱི་དབང་ཕྱུག་སེམས་ཅན་ཁམས། །སྐྱོབ་པ་དག་ནི་དགའ་བ་ཡིད་འོང་དོན་ཆེན་འདོད། །གཉེན་ཆེན་སེམས་ཅན་ཡབ་ཉིད་བདག་ལ་འདོད་པ་ཡིས། །གལ་ཏེ་མགོན་པོས་བདག་ལ་འདོད་
[125b.5]མཛད་འཚོ་བར་འགྱུར། །རྡོ་རྗེའི་སྐུ་ཁྱོད་སེམས་ཅན་མངའ་བརྙེས་བཀའི་འཁོར་ལོ། །སངས་རྒྱས་ཆེད་དུ་དོན་དམ་བྱང་ཆུབ་ཕན་རྗེས་སྟོན། །ཆགས་པས་འདོད་ཆགས་དམ་ཚིག་མཱ་མ་ཀཱི་བདག་ལ། །གལ་ཏེ་མགོན་པོས་བདག་ལ་འདོད་མཛད་འཚོ་བར་འགྱུར། །རྡོ་རྗེ་གསུང་ཁྱོད་ཀུན་ལ་ཕན་མཛད་
[125b.6]བརྩེ་བ་ཅན། །འཇིག་རྟེན་དོན་གྱི་བྱ་མཛད་རྟག་ཏུ་ཡང་དག་འཇུག །འདོད་པས་བདག་ལ་ཤིན་ཏུ་སྤྱོད་མཛད་ཀུན་དུ་བཟང་། །གལ་ཏེ་མགོན་པོས་བདག་ལ་འདོད་མཛད་འཚོ་བར་འགྱུར། །རྡོ་རྗེའི་སྐུ་ཁྱོད་དམ་ཚིག་མཆོག་གི་ཕན་ཆེན་དོན། །རྫོགས་བྱང་རྒྱུད་ལ་འདོད་བཞིན་མཉམ་ཉིད་བརྩེ་བ་ཅན། །
[125b.7]འདོད་པས་བདག་ལ་ཡོན་ཏན་རིན་ཆེན་གཏེར་མང་འབྱུང་། །གལ་ཏེ་མགོན་པོས་བདག་ལ་འདོད་མཛད་འཚོ་བར་འགྱུར། །བཅོམ་ལྡན་དེ་ཉིད་ལ་གཤེགས་ཀྱང་། །ལྷ་མོ་རྣམས་ཀྱིས་གླུ་ཡིས་བསྐུལ། །དངོས་རྣམས་སྒྱུ་མ་ལྟར་རིག་ནས། །རང་གི་སྔགས་དོན་བསྒོམ་པར་བྱ། །སངས་རྒྱས་སྤྲུལ་
[126a]
[126a.1]ཚོགས་འཕྲོ་བ་ཡིས། །འགྲོ་བ་གསུམ་པོ་རབ་ཏུ་བསྒྲུབ། །མཾ་ཡིག་ལས་བྱུང་རྟག་ལས་ནི། །འཇམ་པའི་རྡོ་རྗེ་རང་བྱོན་ཉིད། །སྐུ་མདོག་དམར་པོ་གུར་གུམ་འདྲ། །སྔོ་དང་དཀར་པོ་ཞལ་གསུམ་སྟེ། །ཕྱག་གཉིས་རང་འོད་རིག་མ་ལ། །མཉམ་འཁྱུད་མཆུ་ནི་ཞལ་གྱིས་འཛིན། །
[126a.2]ཕྱག་ན་རལ་གྲི་མདའ་དང་ནི། །གཞུ་དང་ཨུཏྤལ་སྔོན་པོ་བསྣམས། །སྣ་ཚོགས་ཆུ་སྐྱེས་ཟླ་བའི་གདན། །རྡོ་རྗེ་སྐྱིལ་ཀྲུང་ཟླ་འོད་བཞིན། །སྲིད་པར་ཆགས་ཤིང་འཁོར་བ་ལས། །ཡང་དག་ཆགས་ཤིང་ཆགས་བྲལ་མཛད། །དཔལ་འཇམ་རྡོ་རྗེར་ཀུན་བདག་ཉིད། །ཐམས་ཅད་སྒྱུ་མ་ལྟ་བུར་བསམ། །
[126a.3]ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། མིག་སོགས་རྣམས་ལ་འོད་ཟེར་གྱིས། །དེ་ནས་ས་བོན་ལ་གཞུག་བྱ། །ཀྵཱིཾ་ཛྲིཾ་ཁཾ་གཾ་སྐཾ་སཾ་ཞེས། །ས་བོན་རྣམས་ཀྱིས་ཉེར་བསྒྲུབ་བོ། །ས་དབང་རྡོ་རྗེ་ནམ་མཁའ་དང་། །འཇིགས་དབང་སྒྲིབ་སེལ་ཀུན་དུ་བཟང་། །དེ་བཞིན་རྡོ་རྗེ་སྐྱེ་མཆེད་རྣམས། །ཉི་མའི་དཀྱིལ་
[126a.4]འཁོར་ལ་ཞུགས་སོ། །རང་གི་མགོ་བོ་མགྲིན་སྙིང་ཟླ། །ཨོཾ་ཨཱཿ ཧཱུཾ་གི་སྔགས་འོད་ཀྱིས། །སྐུ་གསུང་ཐུགས་ཀྱི་རྡོ་རྗེ་ཡི། །སྔགས་ཀྱི་བདག་པོ་བསྒོམ་པར་བྱ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་
[126a.5]བྷཱ་ཝ་ཨཱཏྨ་ཀོ྅ཧཾ། རྡོ་རྗེ་གསུམ་གྱི་མཚན་ཉིད་བལྟས། །སྙིང་གར་ཡེ་ཤེས་ས་བོན་ལས། །ཕྱོགས་རྣམས་ཀུན་བྱོན་རྫོགས་སངས་རྒྱས། །རིག་མ་མཆོད་ཅིང་རིག་དབང་འཛིན། །སྤྱན་དང་སྐུ་སོགས་བྱིན་གྱིས་བརླབ། །རང་སྔགས་ལས་བྱུང་འོད་གསལ་མ། །མགོ་བོ་སྙིང་ག་ལྟེ་གསང་
[126a.6]ཞབས། །སྐུ་སོགས་རྡོ་རྗེ་རྣམ་བལྟ་ཞིང་། །ཨོཾ་ཧཱུཾ་སྭཱ་ཨཱཿཧཱ་ཞེས་པའི། །ཡན་ལག་ལྔ་འོད་རབ་ཏུ་གསལ། །སྐུ་དབང་མི་གཡོ་རིན་ཆེན་དབང་། །འོད་དཔག་མེད་དང་དོན་ཡོད་གྲུབ། །ཨོཾ་སརྦ་ཏ་ཐཱ་ག་ཏཱ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རྡོ་རྗེ་ཆུ་སྐྱེས་སྦྱོར་ལས་བྱུང་། །ཕྱོགས་ཀུན་དུས་
[126a.7]གསུམ་བཞུགས་པ་ཡི། །རྫོགས་སངས་བསྒོམ་བྱ་རྣལ་འབྱོར་པས། །དེ་ཚེ་གཟུགས་རྡོར་མ་སོགས་ཀྱིས། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཆོས་ཀུན་ལྷ་ལ་བསྟོད་པ་ནི། །སྒྲ་སྙན་སྒྲ་ནི་བཟང་པོ་ཡིས། །རང་གི་ང་རྒྱལ་མཆོག་ཞུགས་ཤིང་། །རང་ཡིད་ལྷག་པའི་ཚིག་
[126b]
[126b.1]འདི་སྟེ། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཡང་དག་མཐར་གྱུར་ཁྱོད་ལ་འདུད། །སྟོང་ཉིད་སྙིང་པོ་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །
[126b.2]སངས་རྒྱས་རོལ་ལ་ཕྱག་འཚལ་འདུད། །སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་ལ་ཕྱག་འཚལ་འདུད། །སངས་རྒྱས་གསུང་ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །མེད་པ་ལས་བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་འདུད། །
[126b.3]ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །ཤུ་མུ་མ་ར་བི་སོགས་དང་། །ལྔ་ནི་ད་ཧ་ན་གོ་ཀུ། །ཡིད་གསུམ་
[126b.4]བདུད་རྩིའི་ཟས་ཀྱིས་ནི། །ལུས་ངག་ཡིད་ནི་དག་པར་བྱ། །རྒྱུ་ཡི་ནུས་པ་མི་བསམ་སྟེ། །འདོད་ཆགས་ལ་སོགས་འཁྲུལ་པ་བྲལ། །འདི་ཉིད་ཀྱིས་ཀྱང་ཕ་རོལ་གྱི། །བྱང་ཆུབ་ཐོབ་པར་ཐུབ་པས་གསུངས། །ཡི་གེ་གསུམ་གྱི་ནང་ཞུགས་སྔགས། །སྤྲོས་ནས་སྐུ་སོགས་རྡོ་རྗེ་ཡིས། །
[126b.5]མཁའ་ཁྱབ་སྔགས་མཐར་བསྡུ་བ་དང་། །མཁས་པས་དེ་ཡི་བཟླས་པ་བྱ། །དེ་བཞིན་བཟླས་པས་སྐྱོ་གྱུར་ན། །སྤྱི་བོར་ཟླ་བ་ཨོཾ་གཤེར་ལས། །ཚིམ་པ་ཉིད་དུ་འགྱུར་བའི་ཕྱིར། །བྱང་ཆུབ་སེམས་བཟླས་སླར་ཡང་ནི། །ཀུན་ལ་རྨི་ལམ་སྒྱུ་སོགས་བཞིན། །བྱ་བ་ཐམས་ཅད་འགྲོ་ཕན་ཕྱིར། །
[126b.6]འཇམ་པའི་རྡོ་རྗེ་ཉིད་བསྐྱེད་ནས། །རྒྱུན་མི་འཆད་པར་གཙོ་བོ་བསྒོམ། །སྔགས་པས་མཆོད་པ་ལ་སོགས་བྱ། །དམ་པའི་སྐྱེ་བོ་ལས་སྐྱེས་འདོད། །ཡི་གེ་གསུམ་ཕན་རྫོགས་སངས་བསྒོམ། །སྐུ་ལ་སོགས་པ་བརྟག་པར་བྱ། །ཐབས་དང་ཤེས་རབ་བདག་ཉིད་ཀྱིས། །དེ་ཉིད་འགྲོ་ལ་
[126b.7]འདིར་འདོད་ཅིང་། །འགྲོ་བའི་དེ་ཉིད་ལས་སྐྱེས་པའི། །སྨོན་ལམ་དག་ནི་སྤེལ་བར་བྱ། །དཔལ་ལྡན་འཇམ་དཔལ་རྡོ་རྗེ་ནི། །བསྒོམས་པ་ལས་ཐོབ་དགེ་བ་འདིས། །འཇམ་དཔལ་ཡེ་ཤེས་སྐུར་གྱུར་ནས། །འགྲོ་བ་ཀུན་ལ་མཆོག་སྦྱིན་ཤོག །གང་ཚེ་བལྟ་བར་འདོད་པ་དང་། །འགའ་
[127a]
[127a.1]ཞིག་འདྲི་བར་འདོད་པ་ལ། །དེ་ལ་དེ་བཞིན་མགོན་འདི་བསྟན། །འཇམ་དཔལ་མགོན་པོ་བགེགས་མེད་ཅིང་། །ཕྱོགས་བཅུ་ནམ་མཁའི་མཐར་ཐུག་པའི། །སེམས་ཅན་དོན་རྣམས་མ་ལུས་བསྒྲུབ། །ཇི་ལྟར་འཇམ་པའི་སྤྱོད་པ་བཞིན། །བདག་ཀྱང་སྤྱོད་ཅིང་བསྟེན་
[127a.2]པར་ཤོག །ཇི་སྲིད་དང་པོ་མཐར་ཐུག་པའི། །འཁོར་བའི་མཐའ་ཡང་སྤངས་གྱུར་པ། །དེ་སྲིད་སེམས་ཅན་ཕན་མཛད་ཉིད། །སྤྱོད་པ་ཚད་མེད་བདག་གིས་སྤྱད། །ཇི་སྲིད་སངས་རྒྱས་མ་ལུས་རྣམས། །ངེས་པར་མྱང་འདས་འཇིག་རྟེན་གཉེན། །དེ་རྣམས་ཀྱི་ཡང་བསྟན་པའི་ཕྱིར། །
[127a.3]དུས་རེ་དུས་རེར་བདག་གིས་སྤྱད། །བྱིས་པ་གཞོན་ནུའི་གཟུགས་ཀྱིས་ནི། །ཐམས་ཅད་དུ་ནི་བདག་གིས་སྤྱད། །སྔགས་ཀྱི་གཟུགས་ཀྱིས་སེམས་ཅན་རྣམས། །དེ་དང་དེ་ཚེ་བདག་གིས་འདུལ། །ལངས་ནས་འཇམ་དཔལ་མགོན་པོ་ཡི། །སྤྱོད་པའི་ང་རྒྱལ་མཉམ་གཞག་ལས། །ཐམས་
[127a.4]ཅད་ལྷ་ཡི་གཟུགས་ཀྱིས་ནི། །ཡུལ་གྱི་རྗེས་འབྲང་བཟླས་པར་བྱ། །དབང་པོ་གཉིས་ནི་རབ་སྦྱོར་བས། །ཞལ་གསུམ་ཕྱག་དྲུག་དེ་བཞིན་དུ། །འཁོར་ལོ་རྡོ་རྗེ་རིན་པོ་ཆེ། །པདྨ་རལ་གྲི་ཕྱག་ན་བསྣམས། །གཟུགས་དང་སྒྲ་དང་དྲི་དང་ནི། །རོ་དང་རེག་བྱ་ཆོས་རྣམས་དང་། །སྐུ་དང་རྡོ་རྗེ་རིན་དབང་
[127a.5]དང་། །འོད་དཔག་དོན་ཡོད་ངོ་བོས་བསྐྱེད། །ཡུལ་ལྔའི་གཟུགས་སུ་གྱུར་པ་ལས། །སངས་རྒྱས་ཐམས་ཅད་ཁོང་དུ་ཆུད། །རང་གི་ལྷག་པའི་ལྷར་སྦྱོར་བས། །རང་གཞན་དེ་བཞིན་མཆོད་པར་བྱ། །ཟ་དང་ཉལ་དང་ཁྲུས་དང་ནི། །དེ་བཞིན་སྟན་ལ་འདུག་པ་ཡང་། །རང་གི་ལྷག་པའི་ལྷར་སྦྱོར་
[127a.6]བས། །ཀུན་ཀྱང་རང་བཞིན་བརྟག་པར་བྱ། །མདོར་བསྡུས་ཡན་ལག་བཞི་པ་ཡི། །དོན་བྲིས་ལེགས་པར་བཤད་པ་ཡིས། །འཇམ་པའི་རྡོ་རྗེ་འདིར་གྱུར་ནས། །འཇིག་རྟེན་བདེ་འབྲས་རབ་སྦྱིན་ཤོག །འཇམ་པའི་རྡོ་རྗེའི་སྒྲུབ་ཐབས་རྫོགས་སོ།། {T3477}༄༅༅། །རྒྱ་གར་སྐད་དུ།
[127a.7]ཨེ་ཀཱ་ཀྵ་ར་ཀ་ཏི་པ་ཡ་པྲ་ཡོ་གི། བོད་སྐད་དུ། ཡི་གེ་གཅིག་པའི་རབ་ཏུ་སྦྱོར་བ་ཅུང་ཟད་པ། འཕགས་པ་འཇམ་པའི་མགོན་ལ་ཕྱག་འཚལ་ལོ། །ཐླྷིཾ་ཞེས་པ་ནི་བྱ་བ་ཀུན་གྲུབ་ནུས། །རབ་མཆོག་ཤིན་ཏུ་གསང་བ་ལས་ཀུན་པ། །ཡི་གེ་གཅིག་པ་ཞེས་བྱ་རིག་སྔགས་རྒྱལ། །སེམས་ཅན་
[127b]
[127b.1]ཀུན་གྱི་རིམ་ལས་འདའ་མི་བྱེད། །སེམས་ཅན་ཀུན་གྱི་མཐུ་དང་ནི། །སེམས་ཅན་ཀུན་གྱི་བཀྲ་ཤིས་ཏེ། །སྒྲུབ་པ་པོ་ཡི་གསང་སྔགས་ཀུན། །འཇིག་རྟེན་ཀུན་གྱི་གཙོ་བོ་སྟེ། །ནོར་རྣམས་ཀུན་གྱི་དབང་ཕྱུག་གོ། །སྡང་བ་ཀུན་གྱི་བྱམས་བདག་ཉིད། །སྐྱེ་བོ་ཀུན་གྱི་བརྩེ་བ་ཅན། །བགེགས་རྣམས་
[127b.2]ཐམས་ཅད་འཇོམས་པར་བྱེད། །མདོར་བསྡུས་ནས་ཇི་ལྟ་ཇི་ལྟར་རབ་ཏུ་སྦྱོར་བ་དེ་ལྟ་དེ་ལྟར་བྱེད་པར་འགྱུར་རོ། །མ་བསྒྲུབས་པར་ཡང་ལས་ཐམས་ཅད་བྱེད་དོ། །སྔགས་བཟླས་ནས་གང་ལ་རིག་པ་དེ་དབང་དུ་འགྱུར་རོ། །གོས་ལ་མངོན་པར་བསྔགས་ནས་གོན་ན་སྐལ་བ་དང་ལྡན་པར་འགྱུར་རོ། །
[127b.3]སོ་ཤིང་ལ་མངོན་པར་བསྔགས་ནས་ཟོས་ན་སོའི་ཟུག་རྔུ་འཇོམས་པར་འགྱུར་རོ། །ཀ་ར་བཱི་ར་དཀར་པོའི་ཤིང་ལ་ལན་བདུན་མངོན་པར་བསྔགས་ནས་ཟོས་ན་མ་བསླངས་པར་ཡང་ཟས་རྙེད་པར་འགྱུར་རོ། །མིག་གི་ཟུག་རྔུ་ལ་རྒྱམ་ཚ་ཕྱེ་མར་བྱས་ནས་ལན་བདུན་མངོན་པར་བསྔགས་ཏེ་མིག་ཏུ་བླུགས་ན་
[127b.4]མིག་གི་ཟུག་རྔུ་འཇོམས་པར་འགྱུར་རོ། །གླང་པོ་ཆེའི་ལྕི་བ་ལ་སྤྲིན་ལས་བྱུང་བའི་ཤ་མོ་པ་ལཱཀྵའི་ལོ་མ་ལ་དྲིལ་ནས་མེ་ཆུང་ངུ་ལ་བསྲེགས་ནས་ལེགས་པར་བླངས་ཏེ་དྲོད་བདེ་བ་ཙམ་བྱས་ནས་རྒྱ་ཚའི་ཕྱེ་མ་དང་སྦྱར་ཏེ། ལན་བདུན་མངོན་པར་བསྔགས་ནས་རྣ་བར་བླུགས་ན་དེའི་སྐད་ཅིག་ལ་ཟུག་རྔུ་
[127b.5]ཞི་བར་འགྱུར་རོ། །བུད་མེད་བུ་སྐྱེ་བའི་དུས་སུ་མངལ་དམ་ཞིང་ཟུག་རྔུར་གྱུར་པ་ལ་བ་ཤ་ཀའི་རྩ་བ་སྲོག་ཆགས་མེད་པའི་ཆུ་ལ་བཏབ་ནས་ལྟེ་བའི་ཕྱོགས་སུ་བྱུག་པ་བྱས་ན་བདེ་བར་སྐྱེ་བར་འགྱུར་རོ། །རྨ་རེད་ཅན་གྱི་སྐྱེས་བུ་ལ་མར་རྙིང་པ་ལ་ལན་བརྒྱ་རྩ་བརྒྱད་བཟླས་ནས་འཐུངས་ཤིང་དེའི་ཕྱོགས་སུ་བྱུགས་
[127b.6]ན་དེའི་སྐད་ཅིག་དེ་ལ་དེ་བཞིན་དུ་རྨ་རེད་པ་མེད་པར་འགྱུར་རོ། །མ་ཞུ་བ་དང་། ཟུག་པ་དང་། གཅོང་ཅན་ལ་ཡང་རྭ་ཚའམ་ཚྭ་ལ་ལན་བདུན་མངོན་པར་བསྔགས་ཏེ་བཟའ་བར་བྱས་ན་དེ་ནས་ནད་ལས་གྲོལ་ཞིང་དེའི་ཉིན་མོ་ནས་བདེ་བར་འགྱུར་རོ། །བུ་ཚ་སྐྱེ་བའི་ཆོས་ལྡན་མ་བུ་སྐྱེ་བར་འདོད་ན་རྟ་དྲིའི་རྩ་བ་དང་བའི་
[127b.7]འོ་མ་མཉེས་ཤིང་བསྲེས་ཏེ། ལན་ཉི་ཤུ་རྩ་ལྔ་བཟླས་ནས་རྡུལ་དང་ལྡན་པའི་དུས་སུ་བཏུང་བར་བྱའོ། །ཕ་རོལ་གྱི་བུད་མེད་སྤངས་ཏེ་རང་གི་ཆུང་མ་ལ་མངོན་པར་འགྲོ་བར་བྱས་ན་བུ་སྐྱེ་བར་འགྱུར་རོ། །རིམས་ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་།
[128a]
[128a.1]རྟག་པའི་རིམས་རྣམས་ལ་མར་དང་བཅས་པའི་ཐུག་པ་ལ་བརྒྱ་རྩ་བརྒྱད་མངོན་པར་བསྔགས་ནས་ཟོས་ན་བདེ་བར་འགྱུར་རོ། །མཁའ་འགྲོ་མ་དང་གདོན་གྱིས་ཟིན་པ་རྣམས་ལ་བདག་ཉིད་ཀྱི་ཁར་བརྒྱ་རྩ་བརྒྱད་མངོན་པར་བསྔགས་ནས་བལྟས་ན་བདེ་བར་འགྱུར་རོ། །བྱིས་
[128a.2]པའི་མ་མོ་དང་། ལུས་སྲུལ་པོ་དང་། རོ་ལངས་དང་། གཞོན་ནུའི་གདོན་ལ་སོགས་པ་རྣམས་དང་། མི་ཐམས་ཅད་ལ་གདུག་པ་མི་བཟད་པས་ཟིན་པ་རྣམས་བདག་ཉིད་ཀྱི་ལག་པ་ལ་བརྒྱ་རྩ་བརྒྱད་མངོན་པར་བསྔགས་ནས་བཟུང་ཞིང་མགོ་བོ་ལ་རེག་ན་བདེ་བར་འགྱུར་རོ། །ལན་གཅིག་
[128a.3]བཟླས་ན་བདག་ཉིད་སྲུང་བར་འགྱུར་རོ། །གཉིས་བཟླས་ན་སྲུང་བ་ཆེན་པོར་འགྱུར་རོ། །གསུམ་བཟླས་ན་ཁྱིམ་སྲུང་བར་འགྱུར་རོ། །བཞི་བཟླས་ན་གྲོང་སྲུང་བར་འགྱུར་རོ། །ལྔ་བཟླས་ན་གྲོང་ཁྱེར་སྲུང་བར་འགྱུར་རོ། །དེ་བཞིན་དུ་ཇི་སྲིད་དྲུག་བཟླས་ན་དམག་ཚོགས་སྲུང་བར་
[128a.4]འགྱུར་རོ། །འདི་རྣམས་དང་གཞན་ལས་ཕྲ་མོ་མ་གསུངས་པ་ཡང་བྱེད་དོ། །སྔགས་འདིས་དེ་བཞིན་དུ་བུད་མེད་ཀྱི་མོ་ནད་ལ་སོགས་པ་རྣམས་ལ་ཨ་ལཾ་མུ་ཤའི་རྩ་བ་ལོ་མ་དང་མཉེས་ཤིང་བརྒྱ་རྩ་བརྒྱད་མངོན་པར་བསྔགས་ནས་འོ་མ་དང་བསྲེས་ཏེ་བཏུང་བར་བྱས་ན་བདེ་བར་འགྱུར་རོ། །ཏ་མཐའ་
[128a.5]ར་མཐའ་ཡང་དག་སྦྱོར། །ས་མཐའ་ཨི་ཡི་དབྱངས་ཀྱིས་མཛེས། །ཟླ་ཕྱེད་ཐིག་ལེས་མནན་པར་བྲི། །བླ་མའི་མན་ངག་བལྟ་ཞིང་བཟླས། །ཡི་གེ་གཅིག་པའི་རབ་ཏུ་སྦྱོར་བ་ཅུང་ཟད་པ་རྫོགས་སོ།། {T3478}༄༅༅། །རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎ་སཱ་དྷ་ན་ཀལྤ། བོད་སྐད་
[128a.6]དུ། གཏུམ་པོ་ཆེན་པོའི་སྒྲུབ་ཐབས་ཆོ་ག་དང་བཅས་པ། འཕགས་པ་མི་གཡོ་བ་ལ་ཕྱག་འཚལ་ལོ། །པུས་མོའི་ལྷ་ང་སར་བཙུགས་ཕྱག་གཡས་རལ་གྲི་བསྣམས། །ཅིག་ཤོས་ཕྱག་ནི་ཁུ་ཚུར་སྡིགས་མཛུབ་ཞགས་པ་བསྣམས། །སྐུ་ལུས་སྲ་མཁྲེགས་གཏུམ་ཞིང་འབར་བ་ཁྲོ་
[128a.7]བའི་སྤྱན། །བགེགས་འཇོམས་མི་གཡོ་སྲིད་པའི་བགེགས་རྣམས་ཞི་བར་མཛད། །ཕྱོགས་བཅུར་བཞུགས་པའི་སངས་རྒྱས་དང་། །བྱང་ཆུབ་སེམས་དཔའ་འདྲེན་པ་རྣམས། །དེ་རྣམས་རྣམ་པ་སྣ་ཚོགས་པའི། །མེ་ཏོག་ལ་སོགས་བློ་ཡིས་མཆོད། །སྡུག་བསྔལ་རྣམས་བལྟས་
[128b]
[128b.1]བསྐྱབ་པའི་ཕྱིར། །བདག་གི་ལུས་ཉིད་དབུལ་བར་བགྱི། །སྔགས་པས་དགེ་བ་སྤེལ་བའི་ཕྱིར། །སྡིག་པ་རྣམས་ནི་བཤགས་པར་བགྱི། །རྫོགས་སངས་རྒྱས་དང་བྱང་སེམས་ཚོགས། །སློབ་དང་མི་སློབ་སེམས་ཅན་གྱི། །བསོད་ནམས་རང་བཞིན་མ་ལུས་པ། །དེ་ལ་རྗེས་སུ་ཡི་རང་ངོ་། །
[128b.2]དཀོན་མཆོག་གསུམ་ལ་སྐྱབས་སུ་འགྲོ། །རྫོགས་པའི་བྱང་ཆུབ་ངེས་པར་བསྟེན། །ཚད་མེད་པ་ཡི་གནས་བཞི་པོ། །རིམ་པ་ཇི་བཞིན་བསྒོམ་པར་བྱ། །མཚན་ཉིད་དང་བྲལ་སྟོང་པ་ཉིད། །རྒྱུ་དང་བྲལ་བས་མཚན་མ་མེད། །སྨོན་ལམ་ལས་ཀྱང་རྣམ་གྲོལ་བའི། །ངོ་བོ་ཉིད་ཀྱི་རང་
[128b.3]བཞིན་བསྒོམ། །སྣ་ཚོགས་པདྨ་ཉི་མའི་དབུས། །ཧཱུཾ་ཡིག་ལས་བྱུང་བཞུགས་པར་བསྒོམ། །དཔའ་བོ་སྤྱན་གཉིས་དམར་པོ་སྟེ། །ཕྱག་གཉིས་རིན་ཆེན་ཅོད་པན་ཅན། །མགོན་པོ་སྡིག་པ་འཕྲལ་དུ་སྤང་། །ཇི་ལྟར་འདོད་པ་ཡོངས་སུ་སྐོང་། །ཟར་མའི་མེ་ཏོག་ལྟ་བུའི་མདོག །སངས་རྒྱས་
[128b.4]དྲི་མེད་འོད་ཟེར་འགྱེད། །མཆེ་བས་མཆུ་ནི་ངེས་པར་མནན། །རྒྱན་རྣམས་ཀུན་གྱིས་རྣམ་པར་བརྒྱན། །གཡོན་པ་སྡིགས་མཛུབ་ཞགས་པ་སྟེ། །པུས་མོ་གཡོན་པ་ས་ལ་བཙུགས། །ཕྱག་ན་རལ་གྲི་བསྣམས་པ་ཡི། །དཔལ་ལྡན་ཁྲོ་བོ་གཏུམ་པོ་ཆེ། །འཇིགས་བྱེད་ཆེན་པོ་ཟུར་གྱིས་
[128b.5]གཟིགས། །མི་བཟད་འཇིགས་པར་བྱེད་པ་པོ། །ཡེ་ཤེས་སེམས་དཔའ་གཟི་བརྗིད་ཆེ། །དམ་ཚིག་སེམས་དཔའ་མཚུངས་པར་བལྟ། །སྔགས་པས་དེ་ཡི་ཐུགས་ཀ་རུ། །ས་བོན་མཚན་མ་ཡང་དག་ལྡན། །ལྷ་ཡི་རྣམ་པར་སྦྱོར་བ་ཡིས། །བསམ་གཏན་སྐྱོ་ན་སྔགས་བཟླས་བྱ། །དེ་ལས་
[128b.6]གསུངས་པའི་དངོས་གྲུབ་ནི། །ཐེ་ཚོམ་མེད་པ་ཉིད་དུ་འཐོབ། །དེ་ལ་སྔགས་ཀྱི་རྒྱལ་པོ་ནི་འདི་ཡིན་ཏེ། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། །སྔགས་ཀྱི་རྒྱལ་པོ་འདི་ལན་ཅིག་བརྗོད་པས། སྡིག་པ་ཐམས་ཅད་ངེས་པར་སྲེག་ཅིང་ཐམས་ཅད་དུ་ངེས་པར་སྲུང་བ་དང་། སྦེད་པར་བྱེད་དོ། །སྲན་མ་
[128b.7]ལ་སོགས་པ་རྣམས་ཀྱིས་བྲབས་ན་འབྱུང་པོ་ལ་སོགས་པའི་འཇིགས་པ་འཇོམས་པར་བྱེད་དོ། །ཁམ་ཕོར་སོ་མ་བཏང་བ་ལ་ཐོད་ལེ་ཀོར་གྱིས་མངོན་པར་བྲིས་ནས་སྒོ་ལྟག་ལ་དཔྱངས་ན་བྱིས་པ་གསར་དུ་སྐྱེས་པ་རྣམས་སྲུང་བར་བྱེད་དོ། །སྤྲ་ཚིལ་གྱིས་གཟུགས་སོར་བཞིའི་ཚད་དུ་བྱས་ནས་
[129a]
[129a.1]དེའི་སྙིང་གར་བསྒྲུབ་བྱའི་མིང་དང་བཅས་པའི་སྔགས་གྲོ་ག་ལ་མངོན་པར་བྲིས་ཏེ་བཅུག་ནས་དེའི་ཁར་ཚེར་མ་བཅུག་ན་ཕྱིར་རྒོལ་བ་ཕུར་བུས་འདེབས་པར་འགྱུར་རོ། །རྐང་པ་ལ་བཙུགས་ན་འགྲོ་འཕྲོ་ལ་རེངས་པར་འགྱུར་རོ། །སྙིང་གར་བཙུགས་ན་ཁྲོས་པ་ཞི་བར་འགྱུར་
[129a.2]རོ། །མིའི་རྗེ་ངར་གྱི་ཕུར་བུའམ། ལྕགས་ཀྱི་ཕུར་བུ་གང་དང་གང་གིས་མིང་བཟུང་སྟེ་ལུས་ལ་བཏབ་ན་དེ་དང་དེ་རྣམ་པར་འཇིག་པར་འགྱུར་རོ། །དགྲའི་སྒོ་ཁར་སྦས་ན་བརླག་པར་འགྱུར་རོ། །ཁྱི་ནག་པོའི་ཐོད་པ་ལ་མིང་དང་བཅས་པ་བྲིས་ནས་ཀླུའི་གནས་སུ་སྦས་ན་མཛེས་ཟིན་པར་འགྱུར་
[129a.3]རོ། །རབས་ཆད་ཀྱི་ཐོད་པ་ལ་སྔགས་དང་བཅས་ཏེ་བྲིས་ནས་རབས་ཆད་ཀྱི་དུར་ཁྲོད་དུ་སྦས་ན་རབས་ཆད་པར་འགྱུར་རོ། །རོ་མཚོ་ལྐུགས་པར་སྦས་ན་ཐམས་ཅད་རེངས་པར་འགྱུར་རོ། །མེ་ཐབ་ཏུ་སྦས་ན་རིམས་ཀྱིས་འཆིའོ། །དུར་ཁྲོད་ཀྱི་ཐལ་བ་ལ་མངོན་པར་བསྔགས་ནས་དགྲ་བོའི་སྒོ་གླེགས་
[129a.4]ལ་བཏགས་ན་དེ་སྐྲོད་པར་འགྱུར་རོ། །རལ་གྲི་ལ་མངོན་པར་བསྔགས་ནས་གཡུལ་དུ་ཞུགས་ན་རྒྱལ་བར་འགྱུར་རོ། །བྱ་བ་གང་ལ་འཇུག་པ་ན་གཏོར་མ་བཏང་ན་དེ་འགྲུབ་པར་འགྱུར་རོ། །སྔགས་པས་དགེ་བ་དང་མི་དགེ་བའི་ལས་གང་དང་གང་འདོད་པ་བཟླས་པ་ཙམ་གྱིས་འགྲུབ་པར་འགྱུར་རོ། །
[129a.5]བདག་གིས་བྲིས་ལས་གང་ཐོབ་པའི། །དགེ་བས་སེམས་ཅན་དོན་གྲུབ་ཅིང་། །དེས་འདིར་འཇིག་རྟེན་མ་ལུས་པ། །རྫོགས་པའི་བྱང་ཆུབ་སྣོད་ལྡན་ཤོག །གཏུམ་པོ་ཆེན་པོའི་སྒྲུབ་ཐབས་ཆོ་ག་དང་བཅས་པ་རྫོགས་སོ།། །།སློབ་དཔོན་འོད་ཟེར་འབྱུང་གནས་གྲགས་པས་མཛད་པའོ།།
[129a.6]{T3479}༄༅༅། །རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎ་སཱ་དྷ་ནཾ། བོད་སྐད་དུ། གཏུམ་པོ་ཆེན་པོའི་སྒྲུབ་ཐབས། གཏུམ་པོ་ཆེན་པོ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་སྟོང་པ་ཉིད་དུ་བསྒོམས་ནས། དེ་ནས་པདྨ་དཀར་པོའི་སྟེང་དུ་ཉི་མ་ལ་ཧཱུཾ་ཡིག་ནག་པོ་ཡོངས་སུ་གྱུར་པ་
[129a.7]ལས་བཅོམ་ལྡན་འདས་གཏུམ་པོ་ཆེན་པོ་ཟར་མའི་མེ་ཏོག་ལྟ་བུ་གཞན་གྱིས་མི་གཡོ་བ་ཞལ་གཅིག་པ་ཕྱག་གཉིས་པ། ཟུར་གྱིས་གཟིགས་པ། མཆེ་བ་གཙིགས་པ། མི་བཟད་པའི་ཞལ་ཆེན་པོ། རིན་པོ་ཆེའི་དབུ་རྒྱན་ཅན། མཆེ་བས་མ་མཆུ་མནན་པ། མགོ་བོའི་ཕྲེང་བས་དབུ་བརྒྱན་
[129b]
[129b.1]པ། སྤྱན་གཉིས་དམར་བ། ཕྱག་གཡས་ན་རལ་གྲི་བསྣམས་ཤིང་ཕྱག་གཡོན་པ་ཞགས་པ་དང་སྡིགས་མཛུབ་ཐུགས་ཀར་གནས་པའོ། །སྦྲུལ་དཀར་པོས་སེ་རལ་ཁ་མཛད་པ། སྟག་གི་པགས་པའི་ཤམ་ཐབས་ཅན། རིན་པོ་ཆེ་སྣ་ཚོགས་ཀྱི་རྒྱན་གྱིས་བརྒྱན་པ། ཞབས་གཡོན་པ་ས་ལ་
[129b.2]རེག་པ། ཞབས་གཡས་པ་ཅུང་ཞིག་བཏེག་པ། ཉི་མའི་འོད་ཟེར་གྱི་ཕྲེང་བ་ཅན་གྱི་བདག་ཉིད་དུ་རྣམ་པར་བསམ་པར་བྱའོ། །དམ་ཚིག་སེམས་དཔའ་དང་ཡེ་ཤེས་སེམས་དཔའ་བསྒོམ་པ་སྔོན་དུ་འགྲོ་བས་མི་བསྐྱོད་པས་དབུ་བརྒྱན་པར་བསམ་པར་བྱའོ། །དེ་ནས་བཟླས་པའི་སྔགས་ནི་
[129b.3]ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། གཏུམ་པོ་ཆེན་པོའི་སྒྲུབ་ཐབས་རྫོགས་སོ།། {T3480}༄༅༅། །རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎ་སཱ་དྷ་ནཾ། བོད་སྐད་དུ། གཏུམ་པོ་ཆེན་པོའི་སྒྲུབ་ཐབས། ཁྲོ་བོའི་རྒྱལ་པོ་མི་གཡོ་བ་ལ་ཕྱག་འཚལ་ལོ། །རྣལ་འབྱོར་པས་ཡིད་དང་མཐུན་པའི་
[129b.4]གནས་འགའ་ཞིག་ཏུ་སྟན་བདེ་བ་ལ་ཉེ་བར་འདུག་སྟེ། རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་ནག་པོ་བལྟ་བར་བྱའོ། །དེའི་འོད་ཟེར་གྱིས་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་གདན་དྲངས་ཏེ་ནམ་མཁའ་ལ་རྣམ་པར་བལྟ་བར་བྱའོ། །དེ་ནས་ཧཱུཾ་
[129b.5]ཡིག་ལས་འོད་ཟེར་བྱུང་སྟེ་མེ་ཏོག་ལ་སོགས་པ་ཉེར་སྤྱོད་ལྔས་དེ་རྣམས་ལ་ཡང་དག་པར་མཆོད་པར་བྱའོ། །དེ་རྣམས་ཀྱི་མདུན་དུ་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསོད་ནམས་ཡོངས་སུ་བསྔོ་བ་ལ་སོགས་པ་རྣམས་བྱའོ། །དེ་ནས་བྱམས་པ་ནི་
[129b.6]སེམས་ཅན་ཐམས་ཅད་ལ་བུ་གཅིག་པ་བཞིན་དུ་དགའ་བའི་མཚན་ཉིད་དོ། །སྙིང་རྗེ་ནི་སྡུག་བསྔལ་དང་སྡུག་བསྔལ་གྱི་རྒྱུར་གྱུར་པ་རྣམས་ཡང་དག་པར་གདོན་པར་འདོད་པའོ། །དེ་ལ་རབ་ཏུ་དགའ་བའི་གཟུགས་ནི་དགའ་བའོ། །བཏང་སྙོམས་ནི་དམ་པ་མ་ཡིན་པའི་ཉེས་པ་ཡོངས་སུ་ཞི་བའི་
[129b.7]རང་བཞིན་དུ་བསྒོམ་པར་བྱའོ། །དེ་ནས་ཁམས་གསུམ་པོ་སྟོང་པ་ཉིད་དུ་རྣམ་པར་བལྟས་ནས་སྔགས་འདིས་བྱིན་གྱིས་བརླབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བར་སྣང་ལ་པདྨའི་སྟེང་དུ་ཉི་མའི་དཀྱིལ་འཁོར་ལ་གནས་པའི་ཧཱུཾ་ཡིག་ལས་བྱུང་བའི་རལ་གྲིའི་
[130a]
[130a.1]ཆང་པར་ཧཱུཾ་ཡིག་གནས་པའི་བདག་ཉིད་ཡོངས་སུ་གྱུར་པ་ལས་མི་གཡོ་བ་གཏུམ་པོའི་སྐུར་བལྟ་བར་བྱའོ། །ཟླུམ་ཞིང་དམར་ལ་འབར་བའི་ཁྲོ་བོའི་སྤྱན་བགྲད་པ། དཔྲལ་བར་ཁྲོ་གཉེར་བསྡུས་པ། ཡ་སོས་མ་མཆུ་བསྡམས་པ། པུས་མོ་གཡོན་
[130a.2]པ་ས་ལ་བཙུགས་པ། ཞབས་གཡས་པས་བདུད་གདུག་པ་ཅན་གནོན་པ། ཕྱག་གཡས་པས་རལ་གྲི་བསྣམས་པ། གཡོན་པ་ཁུ་ཚུར་སྡིགས་མཛུབ་དང་བཅས་པའི་ཞགས་པས་སྲིད་པ་གསུམ་གྱི་འཇིགས་པ་འཇོམས་པ། ཨིནྡྲ་ནཱི་ལ་དང་མཚུངས་པའི་འོད་ཟེར་ཅན། མེ་འབར་
[130a.3]བའི་གཏུམ་པོ་ཆེན་པོའོ། །དེ་ནས་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའ་བཀུག་ནས་དམ་ཚིག་སེམས་དཔའ་ལ་རབ་ཏུ་བཅུག་སྟེ། དབང་བསྐུར་བླང་བར་བྱའོ། །དབང་བསྐུར་བའི་མཐར་སྤྱི་བོར་མི་བསྐྱོད་པར་བལྟ་བར་བྱའོ། །དེ་ནས་བསྒོམས་པས་ངལ་ན་
[130a.4]སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། གཏུམ་པོ་ཆེན་པོའི་སྒྲུབ་ཐབས་རྫོགས་སོ།། {T3481}༄༅༅། །རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎ་སཱ་དྷ་ནཾ། བོད་སྐད་དུ། གཏུམ་པོ་ཆེན་པོའི་སྒྲུབ་ཐབས། བཅོམ་ལྡན་འདས་མི་
[130a.5]གཡོ་བ་ལ་ཕྱག་འཚལ་ལོ། །ཡིད་དང་མཐུན་པའི་ས་ཕྱོགས་འགའ་ཞིག་ཏུ་སྟན་བདེ་བ་ལ་འདུག་སྟེ། རང་གི་སྙིང་གར་པདྨ་འདབ་མ་བརྒྱད་པའི་སྟེང་དུ་ཉི་མའི་དཀྱིལ་འཁོར་ལ་ཧཱུཾ་ཡིག་ནག་པོ་བསམ་པར་བྱའོ། །དེའི་འོད་ཟེར་གྱིས་ནམ་མཁའི་ཕྱོགས་བླ་མ་དང་། སངས་རྒྱས་
[130a.6]དང་། བྱང་ཆུབ་སེམས་དཔའ་དང་། འཆད་པར་འགྱུར་བའི་གཏུམ་པོ་ཆེན་པོ་གདན་དྲངས་ནས་ཡང་དག་པར་མཆོད་ནས། སྡིག་པ་བཤགས་པ་དང་། མི་བྱེད་པར་སྡོམ་པ་དང་། དཀོན་མཆོག་གསུམ་ལ་སྐྱབས་སུ་འགྲོ་བ་དང་། བསོད་ནམས་ལ་རྗེས་སུ་ཡི་རང་བ་
[130a.7]དང་། བདག་ཉིད་དབུལ་བ་དང་། བྱང་ཆུབ་ཏུ་སེམས་བསྐྱེད་པ་ལ་སོགས་པ་བྱས་ནས། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཏེ་ཚད་མེད་པའི་གནས་བཞི་བསྒོམ་པར་བྱས་ནས། འགྲོ་བ་འདི་རྣམས་རང་བཞིན་མེད་པའི་ངོ་བོ་ཉིད་གཟུང་བ་
[130b]
[130b.1]དང་འཛིན་པ་ལས་ངེས་པར་གྲོལ་བ་རྨི་ལམ་དང་སྒྱུ་མ་དང་ཆུ་བུར་ལྟར་སྟོང་པ་ཉིད་དུ་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེའི་རྗེས་སུ་དྲི་མ་མེད་པའི་ནམ་མཁའི་ཕྱོགས་སུ་པདྨ་འདབ་མ་བརྒྱད་པའི་སྟེང་དུ་ཉི་མའི་དཀྱིལ་འཁོར་ལ་ཧཱུཾ་ཡིག་ནག་པོ་ལས་སྐྱེས་པའི་
[130b.2]རལ་གྲིའི་ཆང་པར་ཧཱུཾ་ཡིག་གོ། །དེའི་འོད་ཟེར་རྣམས་ཀྱིས་སངས་རྒྱས་ཀྱི་ཚོགས་ཐམས་ཅད་གདན་དྲངས་ནས་ཧཱུཾ་གི་ཡི་གེ་ལ་རབ་ཏུ་གཞུག་པར་བྱའོ། །དེ་ནས་ཧཱུཾ་ཡིག་ལས་བྱུང་བའི་མེ་བསྐལ་བའི་མེ་ལྟ་བུར་འབར་བའི་ཕྲེང་བ་འཁྲིགས་པས་གདུག་པ་ཅན་གྱི་བདུད་འཇོམས་པ།
[130b.3]སྤྲིན་ནག་ཆེན་པོ་ལྟ་བུའི་སྐུ་མདོག་ཅན། སྣ་ཚོགས་པའི་རྒྱན་དང་རིན་པོ་ཆེས་བརྒྱན་པ། རིན་པོ་ཆེའི་ཅོད་པན་ཅན། གཞོན་ནུ་ཟུར་ཕུད་ལྔ་འཕྲོ་བ། ཀུནྡ་བཞིན་དུ་ཞལ་གཙིགས་ཤིང་ཡ་སོས་མ་མཆུ་བསྡམས་པ། གདུག་པ་ཅན་སྐྲག་པར་འཇིགས་སུ་རུང་བའི་སྐུ་ལ་བརྟེན་པ། ཁྲོ་
[130b.4]གཉེར་བསྡུས་པས་རབ་ཏུ་འཇིགས་ཤིང་སྤྱན་གཉིས་ཟུར་མིག་ཏུ་བལྟ་བ། ཞབས་ཀྱི་པུས་མོ་གཡས་པ་ཉི་མའི་དཀྱིལ་འཁོར་ལ་བཙུགས་པ། ཆུ་སྐྱེས་ལ་གནས་པའི་ཉི་མའི་སྟེང་དུ་ཞབས་གཡོན་པ་འདེགས་པར་འདོད་པ། ཕྱག་གཡས་ན་ཧཱུཾ་ཡིག་གི་ཆང་པ་ནས་འབར་བཞིན་པའི་རལ་གྲི་
[130b.5]ནག་པོ། གཡོན་པའི་ཁུ་ཚུར་སྡིགས་མཛུབ་ཀྱིས་དཔག་ཏུ་མེད་པར་འཁྲུགས་པའི་ཁྱབ་འཇུག་དང་། དབང་ཕྱུག་དང་། ཚངས་པ་ལ་སོགས་པ་རྣམས་ལ་བསྡིགས་ཤིང་ཉོན་མོངས་པའི་དགྲའི་ཚོགས་འཆིང་བའི་རྡོ་རྗེས་མཚན་པའི་གསེར་གྱི་ཞགས་པ་བསྣམས་པའོ། །འགྲོ་བ་རྣམས་
[130b.6]ཀྱི་མངོན་པར་འདོད་པ་ཕུན་སུམ་ཚོགས་པའི་དགའ་བ་སྟེར་བས་གཅིག་ཏུ་འབར་བའི་དཔལ་ལྡན་གཏུམ་པོ་ཆེན་པོ་བསྒོམ་པར་བྱའོ། །བཅོམ་ལྡན་འདས་ཁྲོ་བོའི་རྒྱལ་པོ་ཆེན་པོ་མི་གཡོ་བའི་ཐུགས་ཀར་པདྨ་དང་ཉི་མ་ལ་གནས་པའི་ཧཱུཾ་ཡིག་ལས་བྱུང་བའི་ཆང་པ་ཧཱུཾ་གིས་མཚན་པའི་རལ་གྲི་
[130b.7]ཡོངས་སུ་གྱུར་པ་ལས་ཧཱུཾ་ཡིག་ལས་སྐྱེས་པའི་གཏུམ་པོ་ཆེན་པོ་གཉིས་པ་ཐུགས་ཀར་བཞུགས་པའི་བཅོམ་ལྡན་འདས་བསམ་པར་བྱའོ། །དེའི་ཡང་ཐུགས་ཀའི་པདྨ་དང་ཉི་མ་ལ་གནས་པའི་ཧཱུཾ་ཡིག་ནག་པོ་ལས་དྲང་པོར་སྐྱེས་པ། དེའི་རལ་གྲིའི་ཡུ་བ་ཧཱུཾ་ཡིག་གིས་མཚན་པ། དེའི་
[131a]
[131a.1]འོད་ཟེར་གྱིས་བཀུག་པའི་ཡེ་ཤེས་སེམས་དཔའ་དམ་ཚིག་སེམས་དཔའ་དང་འདྲ་བར་བལྟས་ནས་ཛཿཡིག་གིས་དགུག་ཅིང་། ཞལ་བསིལ་དང་བསང་གཏོར་ལ་སོགས་པས་ཕྱོགས་སུ་བྱོན་ནས་ཧཱུཾ་ཡིག་གིས་དེ་ལ་དེ་བཞིན་དུ་གཞུག་པར་བྱའོ། །བཾ་ཡིག་གིས་བཅིང་
[131a.2]བར་བྱའོ། །ཧོཿཡིག་གིས་མཉེས་པར་བྱ་སྟེ། འོ་མ་དང་འོ་མ་འདྲེས་པ་བཞིན་དུ་རོ་གཅིག་ཏུ་གྱུར་པའི་གཙོ་བོ་བསྒོམ་པར་བྱའོ། །བཅོམ་ལྡན་འདས་ཀྱི་སྤྱན་དག་དང་། སྙན་དག་དང་། ཤངས་ཀྱི་བུ་ག་དག་དང་། ཞལ་དང་། དབུ་དང་། ཐུགས་རྣམས་སུ་ཇི་ལྟར་སྦྱོར་པའི་རིམ་པས་རྣམ་པར་
[131a.3]སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་དང་། བདག་མེད་མ་རྣམས་ཏེ། ཡན་ལག་དྲུག་རྣམས་ལ་དགོད་པར་བྱའོ། །ཐུགས་ཀར་གནས་པའི་ཧཱུཾ་ཡིག་ལས་བྱུང་བའི་འོད་ཟེར་གྱིས་དེ་བཞིན་གཤེགས་པ་ལྔ་དང་ལྷ་མོའི་
[131a.4]ཚོགས་རྣམས་བཀུག་ནས་བདུད་རྩི་ལྔས་གང་བའི་བུམ་པས་ཁྲུས་བྱ་ཞིང་མི་བསྐྱོད་པས་དབུ་བརྒྱན་པའོ། །ལྷ་མོ་རྣམས་ཀྱིས་རྣམ་པ་སྣ་ཚོགས་པའི་གར་དང་། རོལ་མོ་ལ་སོགས་པ་སྣ་ཚོགས་པའི་མཆོད་པ་ལ་སོགས་པས་མཉེས་པར་བྱའོ། །དེ་ནས་བཅོམ་ལྡན་འདས་གཞན་དོན་ལ་བརྩོན་
[131a.5]པས་སེམས་ཅན་ཐམས་ཅད་ལ་འདོད་ཆགས་དང་། ཞེ་སྡང་དང་། གཏི་མུག་ལ་སོགས་པ་ཁྱབ་འཇུག་དང་། དབང་ཕྱུག་དང་། ཚངས་པ་དང་། འདོད་ལྷ་ལ་སོགས་པ་རྣམས་ཀྱི་གཏི་མུག་ཆེན་པོའི་དྲ་བ་དང་། ཞེ་སྡང་ཆེན་པོའི་དྲ་བ་དང་། འདོད་ཆགས་ཆེན་པོའི་དྲ་བ་རྣམས་ཀྱི་མ་རིག་པའི་
[131a.6]མུན་པས་སྲིད་པའི་འཁོར་ལོར་འཁྱམས་པ་དེ་རྣམས་བལྟ་བར་བྱའོ། །དེ་ནས་སྙིང་གའི་སྔགས་ལས་འཕྲོས་པའི་ཁྲོ་བོའི་རྒྱལ་པོ་ཆེན་པོ་དཔག་ཏུ་མེད་པས་བདུད་ཀྱི་དཔུང་གི་ཚོགས་རྣམས་གཅེར་བུ་སྐྲ་གྲོལ་བ་ངུ་བཞིན་པ་སྐྱབས་མེད་པ་རྣམས་ལ་རྡོ་རྗེའི་ཞགས་པས་བཅིངས་ཤིང་རལ་གྲི་རྣོན་པོས་དུམ་
[131a.7]བུར་གཏུབས་ཤིང་བཅད་ནས་སླར་ཡང་བྱམས་པའི་སེམས་ཀྱིས་དྲི་མ་མེད་པའི་ཆོས་ལ་བཅུག་ནས་རང་གི་གོ་འཕང་ལ་དགོད་པར་བྱའོ། །བསམ་གཏན་གྱིས་སྐྱོ་ན་སྔགས་བཟླས་པར་བྱའོ། །ཐུགས་ཀ་དང་སྨིན་མའི་བར་དུ་མཉམ་དུ་གནས་པས་སྣ་ཚོགས་དེ་བཞིན་ཉིད་གཅིག་ཏུ་གྱུར་པའི་སྐུ་མགོན་
[131b]
[131b.1]པོ་གཏུམ་པོ་ཆེན་པོའི་སྔགས་བཟླས་པ་ཙམ་གྱིས་གདུལ་དཀའ་བ་རྣམས་འདུལ་བ་དང་། དུལ་བ་རྣམས་དབང་དུ་བྱ་བ་དང་། ཞི་བ་དང་། སྲུང་བ་དང་། སྦེད་པ་དང་། མཉེས་པ་དང་། རྒྱས་པ་དང་། དེ་བཞིན་དུ་བསྐྲད་པ་དང་། དགུག་པ་དང་། གསད་པ་དང་། སྐྲག་པའི་ལས་ཐམས་ཅད་འགྲུབ་
[131b.2]པར་འགྱུར་རོ། །ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། གཏུམ་པོ་ཆེན་པོའི་སྒྲུབ་ཐབས་རྫོགས་སོ།། {T3482}༄༅༅། །རྒྱ་གར་སྐད་དུ། ཨཱརྱ་ཁ་དི་ར་བ་ནི་ཏཱ་རཱ་སཱ་དྷ་ནཾ། བོད་སྐད་དུ། འཕགས་མ་སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྔོན་
[131b.3]མ་བཞིན་དུ་སྟོང་པ་ཉིད་མཐར་ཐུག་པ་བསྒོམས་ནས་ཏཱཾ་གི་ས་བོན་ཡོངས་སུ་གྱུར་པ་ལས། ཨུཏྤ་ལའི་ལྟེ་བར་ཏཱཾ་གིས་མཚན་པའོ། །དེ་ཡོངས་སུ་གྱུར་པ་ལས་སྐུ་མདོག་ལྗང་གུ་དོན་ཡོད་གྲུབ་པས་དབུ་བརྒྱན་པ། མཆོག་སྦྱིན་དང་ཨུཏྤ་ལ་ནི་གཡས་དང་གཡོན་གྱི་ཕྱག་ན་བསྣམས་པའོ། །མྱ་ངན་མེད་པའི་
[131b.4]ཤིང་གི་འོད་ཟེར་ཅན་དང་། རལ་པ་གཅིག་མ་དག་གཡས་དང་། གཡོན་གྱི་ཕྱོགས་ཆར་གནས་པ། གཞོན་ནུ་མཛེས་ཤིང་རྒྱན་དང་ལྡན་མ། སེང་ལྡེང་གི་ནགས་སུ་སྣ་ཚོགས་པའི་སེམས་ཅན་གྱི་དོན་བྱེད་པར་བསམས་ལ་ཡེ་ཤེས་སེམས་དཔའ་དང་ལྷན་ཅིག་ཏུ་བྱས་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ།
[131b.5]ཞེས་པའི་སྔགས་བཟླས་ལ། དེ་ཉིད་ཀྱི་ཡིད་ཀྱིས་ཇི་ལྟར་བདེ་བར་གནས་པར་བྱའོ། །སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས་རྫོགས་སོ།། །།རྫོགས་པའི་སངས་རྒྱས་ཀྱིས་གསུངས་པའོ།། {T3483}༄༅༅། །རྒྱ་གར་སྐད་དུ། མ་ཧཱ་ཏཱ་རཱེ་སཱ་དྷ་ནཾ། བོད་སྐད་དུ། སྒྲོལ་མ་ཆེན་མོའི་
[131b.6]སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །དང་པོ་རང་གི་སྙིང་གར་ཟླ་བའི་དབུས་སུ་གནས་པའི་ཏཱཾ་གི་ས་བོན་ལས་བྱུང་བའི་འོད་ཟེར་རྫོགས་པ་ལས་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་བསམས་ཏེ། དེ་རྣམས་ལ་ཡང་ཕྱི་དང་ནང་གི་མཆོད་པ་རྣམས་ཀྱིས་ཡང་དག་
[131b.7]པར་མཆོད་ནས། དེའི་མདུན་དུ་བླ་ན་མེད་པའི་མཆོད་པ་བདུན་བྱའོ། །དེ་ནས་སྟོང་པ་ཉིད་དུ་བསྒོམས་ཏེ། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་ཟླ་བ་ལ་ཏཱཾ་ལས་ཡང་དག་པར་བྱུང་བའི་ཨུཏྤ་ལ་དཀར་པོ་ལ་གནས་པའི་ཏཱཾ་ཡིག་ལས་བྱུང་བའི་སྒྲོལ་མ་སྔོན་མོ་ཕྱག་གཉིས་
[132a]
[132a.1]པའི་གཡས་པ་མཆོག་སྦྱིན་པ། གཡོན་པ་སྡོང་བུ་དང་བཅས་པའི་ཨུཏྤ་ལ་བསྣམས་པ། རྒྱན་ཐམས་ཅད་ཀྱིས་བརྒྱན་པ། པདྨ་དང་ཟླ་བའི་གདན་ལ་སྐྱིལ་མོ་ཀྲུང་གིས་བཞུགས་པ་བསྒོམ་པར་བྱའོ། །ཐལ་མོ་སྦྱར་ནས་མཛུབ་མོ་གཉིས་ཀྱིས་གུང་མོ་དག་མནན་ཏེ། མཐེབ་
[132a.2]ཆེན་དག་ཆུ་སྐྱེས་ལ་རེག་པ་ནི་ཨུཏྤ་ལ་ཁ་བྱེ་བའི་ཕྱག་རྒྱའོ། །དེ་ནས་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཞེས་པའི་སྔགས་བརྗོད་པར་བྱའོ། །སྒྲོལ་མ་ཆེན་མོའི་སྒྲུབ་ཐབས་རྫོགས་སོ།། {T3484}༄༅༅། །རྒྱ་གར་སྐད་དུ། བ་ར་ད་ཏཱ་རཱ་སཱ་དྷ་ནཾ། བོད་སྐད་དུ། མཆོག་སྦྱིན་སྒྲོལ་མའི་སྒྲུབ་ཐབས། འཕགས་
[132a.3]མ་སྒྲོལ་མ་ལ་ཕྱག་འཚལ་ལོ། །སྔོན་མ་བཞིན་དུ་སྟོང་པ་ཉིད་ཀྱི་མཐར་ཐུག་པ་བསྒོམས་ནས་པཾ་ཡིག་ལས་སྐྱེས་པའི་སྣ་ཚོགས་ཆུ་སྐྱེས་ཀྱི་དབུས་སུ་ཨཾ་ཡིག་ལས་སྐྱེས་པའི་ཟླ་བ་ལ་ཏཱཾ་ཡིག་ལྗང་གུ་ལས་སྐྱེས་པའི་སྒྲོལ་མ་སྐུ་མདོག་ལྗང་གུ་རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་ན་
[132a.4]ཨུཏྤ་ལ་བསྣམས་ཤིང་གཡས་པ་མཆོག་སྦྱིན་དང་ལྡན་པ། སྐྱིལ་ཀྲུང་ཕྱེད་པས་བཞུགས་པའོ། །གཡས་ཕྱོགས་ལོགས་ན་མྱ་ངན་མེད་པའི་འོད་ཟེར་ཅན་སེར་མོ་རིན་པོ་ཆེ་སྣ་ཚོགས་པའི་ཅོད་པན་ཅན། གཡོན་དང་གཡས་ཀྱི་ཕྱག་དག་གིས་མྱ་ངན་མེད་པའི་ཤིང་གི་ཡལ་ག་དང་བ་ཀུ་ལི་
[132a.5]བསྣམས་པའོ། །དེ་བཞིན་དུ་རྨ་བྱ་ཆེན་མོ་གཡོན་པ་དང་ཅིག་ཤོས་ཀྱི་ཕྱག་དག་གིས་རྨ་བྱའི་སྒྲོ་དང་རྔ་ཡབ་བསྣམས་པའོ། །གཡོན་ཕྱོགས་ལོགས་སུ་རལ་གཅིག་མ་ཐུང་ཞིང་གནག་པ། སྟག་གི་པགས་པའི་ན་བཟའ་བསྣམས་པ། སྤྱན་གསུམ་པ། ཞལ་མཆེ་བ་གཙིགས་པ། སྐྲ་ཁམ་
[132a.6]པ་གྱེན་དུ་འབར་བ། གྲི་གུག་དང་ཐོད་པ་བསྣམས་པའོ། །དེ་བཞིན་དུ་འཕགས་མ་དུག་སེལ་མ་ལྗང་གུ་གཡོན་པ་དང་གཡས་པའི་ཕྱག་དག་གིས་སྦྲུལ་ནག་པོ་དང་རྔ་ཡབ་བསྣམས་པ་བསྒོམ་པར་བྱའོ། །དེ་བཞིན་དུ་བསྒོམས་པས་ངལ་ན་སྔགས་བཟླས་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཞེས་སོ། །
[132a.7]མཆོག་སྦྱིན་སྒྲོལ་མའི་སྒྲུབ་ཐབས་རྫོགས་སོ།། {T3485}༄༅༅། །རྒྱ་གར་སྐད་དུ། བ་ཤྱ་ཏཱ་རཱ་སཱ་དྷ་ནཾ། བོད་སྐད་དུ། དབང་དུ་བྱེད་པའི་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །ཏཱཾ་ལས་སྐྱེས་པའི་ཨུཏྤ་ལ་ཏཱཾ་གིས་མཚན་པར་བསམས་ལ། དེ་
[132b]
[132b.1]ཡོངས་སུ་གྱུར་པ་ལས་འཕགས་མ་སྒྲོལ་མ་སྐུ་མདོག་ལྗང་གུ་ཕྱག་གཡོན་པ་ན་ཨུཏྤ་ལ་བསྣམས་ཤིང་གཡས་པ་མཆོག་སྦྱིན་མཛད་པ་བཟང་པོའི་སྟན་ལ་བཞུགས་པ། དོན་ཡོད་གྲུབ་པས་དབུ་བརྒྱན་པར་བསམས་ནས་ཡེ་ཤེས་སེམས་དཔའ་དང་རོ་གཅིག་ཏུ་བྱས་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོའི་
[132b.2]དབང་དུ་གྱིས་ཤིག་སྭཱ་ཧཱ། ཞེས་པས་བསྒྲུབ་བྱའི་མིང་དང་བཅས་པས་གོང་དུ་བསྟན་པའི་གྲངས་ངེས་པའི་བཟླས་པ་བྱའོ། །མདའ་ལ་སོགས་པའི་མཚན་མ་མེད་ཀྱང་ཨུཏྤ་ལས་བསྒྲུབ་བྱའི་སྐེ་བཅིངས་ཏེ། རང་གི་ལུས་ཀྱི་འོད་ཀྱི་ཚོགས་ཀྱིས་དེའི་ལུས་ལ་བཀང་སྟེ་རང་གི་དབང་དུ་བྱ་བའི་གནས་སུ་
[132b.3]གཞག་པར་བྱའོ་ཞེས་སོ། །དབང་དུ་བྱེད་པའི་སྒྲོལ་མའི་སྒྲུབ་ཐབས་སློབ་དཔོན་རྡོ་རྗེ་མྱུ་གུས་མཛད་པ་རྫོགས་སོ།། {T3486}༄༅༅། །རྒྱ་གར་སྐད་དུ། བཛྲ་ཏཱ་རཱ་སཱ་དྷ་ནཾ། བོད་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། རྡོ་རྗེ་སྒྲོལ་མ་ལ་ཕྱག་འཚལ་ལོ། །སྦྱིན་སྲེག་ལས་ཀྱི་ཆོ་ག་ཡིས། །འདོད་
[132b.4]པའི་དོན་ཀུན་སྒྲུབ་བྱེད་པའི། །རྡོ་རྗེ་སྒྲོལ་མ་སྒྲུབ་པའི་ཐབས། །དེ་ནས་ཡང་དག་བཤད་པར་བྱ། །དེ་ལ་སྔགས་ཀྱི་ཚིག་ནི་འདི་རྣམས་སུ་འགྱུར་ཏེ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཱཾ་པྲ་དུཥྚཱཾ་མ་མ་ཀྲ་
[132b.5]ཏེ་ཛམྦྷ་ཡ་སྟཾ་བྷ་ཡ། མོ་ཧ་ཡ། བནྡྷ་ཡ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། སརྦ་དུཥྚཱཾ་སྟཾ་བྷ་ནི་ཏཱ་རེ་སྭཱ་ཧཱ། མ་མོའི་དཀྱིལ་འཁོར་དབུས་གནས་པའི། །ལྷ་མོ་སྒྲོལ་མ་བསྒོམ་པར་བྱ། །ཕྱག་བརྒྱད་ཞལ་བཞི་དང་ལྡན་པ། རྒྱན་རྣམས་ཀུན་གྱིས་བརྒྱན་པ་ཡི། །གསེར་གྱི་མདོག་ཅན་བསྒོམ་བྱ་སྟེ། །
[132b.6]གཞོན་ནུ་མ་ཡི་མཚན་ལྡན་བརྗོད། །རྡོ་རྗེ་ཉི་མས་དབང་བསྐུར་སྐྱེས། །སངས་རྒྱས་ལྔ་ཡི་ཅོད་པན་ཆེ། །ལང་ཚོ་གཞོན་ཞིང་ཡིད་དུ་འོང་། །གསེར་གྱི་རྣ་རྒྱན་གཡོ་བ་ཅན། །འོད་ཟེར་དམར་པོས་རྣམ་བརྒྱན་ཅིང་། །སྣ་ཚོགས་པདྨའི་གདན་ལ་བཞུགས། །རྡོ་རྗེ་ཞགས་པ་དེ་བཞིན་
[132b.7]དུང་། །མདའ་རྣམས་བསྣམས་པ་གཡས་ཀྱི་ཕྱག །རྡོ་རྗེ་ལྕགས་ཀྱུ་ཨུཏྤལ་གཞུ། །སྡིགས་མཛུབ་རྣམས་ནི་གཡོན་གྱི་ཕྱག །རྡོ་རྗེ་སྐྱིལ་ཀྲུང་རྣལ་འབྱོར་གྱིས། །ས་གསུམ་པོ་ནི་བསྒྲུབ་པར་བྱ། །མདུན་དུ་མེ་ཏོག་སྒྲོལ་མ་ནི། །དཀར་མོ་ཤིན་ཏུ་ཡིད་འོང་མ། །ཨོཾ་ཡིག་རྣམ་པ་
[133a]
[133a.1]ཉིད་ལས་སྐྱེས། །མེ་ཏོག་ཕྲེང་བ་ཕྱག་ན་བསྣམས། །ཞལ་གཅིག་ཕྱག་ནི་གཉིས་མ་སྟེ། །རྒྱན་རྣམས་ཀུན་གྱིས་རྣམ་པར་བརྒྱན། །ལྷོ་ཕྱོགས་བདུག་སྤོས་སྒྲོལ་མ་ནི། །གཟུགས་མཛེས་སྐུ་མདོག་ནག་མོ་སྟེ། །བདུག་སྤོས་སྣོད་ནི་ཕྱག་ན་བསྣམས། །རྒྱན་རྣམས་ཀུན་གྱིས་རྣམ་
[133a.2]པར་བརྒྱན། །ནུབ་ཕྱོགས་མར་མེའི་སྒྲོལ་མ་ནི། །རྒྱལ་ཆེན་སྐུ་མདོག་སེར་མོ་སྟེ། །གསེར་གྱི་རྣ་ཆ་གཡོ་བ་ཅན། །ཕྱག་ན་མར་མེའི་སྡོང་བུ་བསྣམས། །བྱང་ཕྱོགས་དྲི་ཡི་སྒྲོལ་མ་ནི། །དྲི་ཡི་དུང་ཆོས་ཕྱག་ན་བསྣམས། །ལྷ་མོ་སྐུ་མདོག་དམར་འབར་མ། །སྙིང་པོའི་དཀྱིལ་འཁོར་གསལ་བསྒོམ་བྱ། །ལྕགས་
[133a.3]ཀྱུ་ལ་སོགས་དབྱེ་བ་ཡིས། །དེ་ནས་སྒོ་སྐྱོང་བསྒོམ་པར་བྱ། །ཤར་སྒོར་རྡོ་རྗེ་ལྕགས་ཀྱུ་མ། །ཞལ་གཅིག་ཕྱག་ནི་གཉིས་པ་སྟེ། །སྐུ་མདོག་ནག་མོ་བཞིན་མཛེས་མ། །རྡོ་རྗེ་ལྕགས་ཀྱུ་ཨུཏྤལ་ཕྱག །ལྷོ་སྒོར་རྡོ་རྗེ་ཞགས་པ་མ། །སྐུ་མདོག་སེར་མོ་བཞིན་འཇིགས་མ། །ཞལ་གཅིག་ཕྱག་ནི་གཉིས་པ་སྟེ། །ཕྱག་
[133a.4]ན་རྡོ་རྗེ་ཞགས་པ་བསྣམས། །ནུབ་སྒོར་རྡོ་རྗེ་ལྕགས་སྒྲོག་མ། །ཞལ་གཅིག་ཕྱག་ནི་གཉིས་པ་སྟེ། །སྐུ་མདོག་དམར་མོ་བཞིན་འཇིགས་མ། །རྡོ་རྗེ་ལྕགས་སྒྲོག་ཕྱག་ན་བསྣམས། །བྱང་སྒོར་རྡོ་རྗེ་དྲིལ་བུ་མ། །ཞལ་གཅིག་ཕྱག་ནི་གཉིས་པ་སྟེ། །སྐུ་མདོག་དཀར་མོ་བཞིན་འཇིགས་མ། །ཕྱག་ན་རྡོ་རྗེ་དྲིལ་བུ་བསྣམས། །
[133a.5]འདི་རྣམས་གཡས་བརྐྱང་ཞབས་ཀྱིས་བཞུགས། །ཉི་མའི་གདན་ལ་ཉི་འོད་བཞིན། །འབར་བའི་ཕྲེང་བས་ཀུན་ནས་འཁྲིགས། །སྦྲུལ་གྱི་རྒྱན་གྱིས་བརྒྱན་པར་བལྟ། །སྟེང་དུ་གཙུག་ཏོར་རྣམ་རྒྱལ་མ། །འོག་ཏུ་གནོད་མཛེས་མ་ཉིད་བསྒོམ། །འཁོར་ལོ་སྦྲུལ་གྱི་ཞགས་བསྒོམས་ནས། །སྔགས་ནི་འཕྲོ་ཞིང་བཟླས་པར་
[133a.6]བྱ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཡི་གེ་བཅུ་ཡིས་ལྷ་མོ་བཅུ། །ཕ་རོལ་ཕྱིན་པ་བཅུ་ལ་བརྟེན། །བསྒོམ་པ་རབ་ཏུ་སྦྱོར་བ་ཡིས། །དོན་རྣམས་ཐམས་ཅད་རབ་ཏུ་འགྲུབ། །སངས་རྒྱས་ཀུན་གྱིས་ཕྱག་མཛད་པའི། །སྔགས་མཆོག་འདི་ནི་གཙོ་བོ་སྟེ། །བཀླགས་པ་ཡིས་ནི་དོན་འགྲུབ་འགྱུར། །མྱུར་དུ་རྡོ་རྗེའི་གུར་བསྒོམས་ནས། །
[133a.7]སྔགས་འདིས་གོས་ཀྱི་སྣ་ལ་ལན་བདུན་མངོན་པར་བསྔགས་བྱས་ནས། །མདུད་པ་བྱས་ན་འཇིགས་བཅས་གང་དུ་འགྲོ་ཡང་འཇིགས་མི་འགྱུར། །སྟག་དང་ཆོམ་པོ་ཆུ་སྲིན་སེང་གེ་གླང་ཆེན་མ་ཧེ་སྦྲུལ། །དོམ་དང་དྲེད་སོགས་རྣམས་ལ་མིང་དྲན་ཙམ་གྱིས་འཇིགས་མེད་འགྱུར། །སྔགས་འདིས་ཨུཏྤལ་ལ་བརྒྱ་རྩ་བརྒྱད་
[133b]
[133b.1]སྦྱིན་སྲེག་བྱས་ན་གང་འདོད་པ་དེ་དབང་དུ་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀི་མེ་བ་ཤ་མ་ནཱ་ཡ་སྭཱ་ཧཱ་ཞེས་སོ། །དེ་བཞིན་དུ་སྔགས་འདིས་བྱ་རོག་གི་སྒྲོ་ལ་ལན་སུམ་ཅུ་རྩ་གཉིས་བཟླས་ཏེ་ཁང་པར་སྦས་ན་ཞག་བདུན་གྱིས་སྐྲོད་པར་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་པྲ་ཙ་ལ་ཤཱི་གྷྲཾ་གཱ་མི་ནི་དེ་བ་དཏྟཾ་ཨུཙྪ་ཊ་ཡ་ཧཱུཾ་ཧཱུཾ་ཕཊ། དེ་ནས་
[133b.2]གཞན་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་ཨ་བྷི་དྷཱ་ནཱཾ་ཀུ་མཱ་རཱི་མ་ཧྱཾ་བྱི་བཱ་ཧེ་ན་ཏྱཱཿཔི་ཏཱ་པྲ་ཡཙྪ་ཏུ་སྭཱ་ཧཱ། མྱོས་བྱེད་གཏུམ་པོའི་ས་བོན་དང་། །དེ་བཞིན་མྱོས་བྱེད་འབྲས་བུ་དང་། །མྱ་ངན་མེད་པའི་མེ་ཏོག་བཅས། །སྦྱིན་སྲེག་སྟོང་ཕྲག་ལྔ་བྱས་ཏེ། །མར་དང་སྦྲང་རྩི་བུ་རམ་གྱི། །སྦྱིན་སྲེག་བུ་མོ་བསྒྲུབ་ལ་
[133b.3]བསྔགས། །དེ་ནི་ཞག་བདུན་སྦྱོར་བ་ཡིས། །རང་འདོད་བུ་མོ་ཐོབ་པར་འགྱུར། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་ཨ་བྷི་དྷཱ་ནཱཾ་སྭསྠཱ་ན་ཏེ་ཨཱ་ཀཪྵ་ཡ་མ་མཱནྟི་ཀེ་ཛཿསྔགས་འདི་རྒྱ་ཤུག་གི་ཚེར་མ་ལ་སྟོང་ཕྲག་ལྔ་ལྔ་བཟླས་ཤིང་རང་བྱུང་གི་མེ་ཏོག་ལ་བསྙུགས་ཤིང་སྦྱིན་སྲེག་བྱས་ན་
[133b.4]འདིས་རྒྱལ་པོའི་བུ་མོ་ཡང་འགུགས་པར་བྱེད་དོ། །དེ་ནས་གཞན་ཡང་རབ་ཏུ་སྦྱོར་བར་འགྱུར་ཏེ། རང་བྱུང་གི་མེ་ཏོག་གིས་བསྐུས་པའི་རས་ལ་བཅོམ་ལྡན་འདས་མ་ཞལ་གཅིག་ཕྱག་གཉིས་པ་ལྕགས་ཀྱུ་དང་ཨུཏྤ་ལའི་ཞགས་པ་བསྣམས་པ་བྲིས་ལ། དེའི་མདུན་དུ། ལྷ་རྫས་མེ་ཏོག་དམ་པ་འདི། །ཞེས་པ་
[133b.5]ལ་སོགས་པས་མཆོད་པ་བྱས་ལ་ཕྱི་ནས་བསྒོམ་པ་དང་ལྡན་པས་བཟླས་པ་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀི་མ་མ་ཨེ་པ་ཙི་ཏཾ་སྭཾཔྣ་ཀ་ཐཱ་ཡ་ཧཱུཾ་ཕཊ། སྟོང་ཕྲག་ལྔས་འོང་བར་འགྱུར་རོ། །ཞགས་པས་སྐེ་བཅིངས་ཏེ་ལྕགས་ཀྱུས་ཕུག་ནས་བསྒྲུབ་བྱ་རྐང་པའི་མཐིལ་དུ་བསམས་ཏེ་བྲན་མོའི་གཟུགས་ཀྱིས་སྤྱད་པར་
[133b.6]བྱའོ། །དེ་ནས་གཞན་ཡང་རབ་ཏུ་སྦྱོར་བར་འགྱུར་ཏེ། སྒྲོལ་མའི་གཟུངས་ལན་བདུན་མངོན་པར་བསྔགས་ཏེ་བདག་ཉིད་ཀྱི་མིག་གཉིས་ལ་བྱུགས་ནས་རྒྱལ་པོའི་རིགས་ཀྱི་ནང་དུ་ཞུགས་ན་དེ་ནས་རྒྱལ་པོ་དང་བཅས་པ་སློབ་མར་གྱུར་པས་གུས་པར་བྱེད་པར་འགྱུར་རོ། །འགལ་བར་སྨྲ་བར་མི་འགྱུར་རོ། །དད་པས་
[133b.7]འབུལ་བར་འགྱུར་རོ། །དགའ་བའི་གཏམ་བྱེད་པར་འགྱུར་རོ། །དེའི་གཡོག་བྱེད་པར་འགྱུར་རོ། །ཁྲོ་བ་ཡང་དབང་དུ་འགྱུར་རོ། །མཐོང་བའི་རྐྱེན་དུ་ཡང་དག་པར་འགྱུར་རོ། །དེ་ནས་གཞན་ལ་ཡང་སྦྱོར་བར་འགྱུར་ཏེ། སྒྲོལ་མའི་གཟུངས་ལན་བརྒྱ་བཟླས་ནས་སྦྲུལ་གདོང་གཉིས་པའི་མགོ་ཐལ་བར་
[134a]
[134a.1]བྱས་ཏེ། བ་དམར་མོའི་མར་ལ་ཨརྐའི་བལ་ལ་སྡོང་བུ་བྱས་ཏེ་རབ་ཏུ་སྦར་ནས་མིག་སྨན་བྱས་ཏེ། དེའི་མིག་སྨན་དང་རྡོ་རྗེ་ཉི་མ་དང་རྡོ་རྗེ་ཆོས་དག་མཉེས་ཤིང་རྟ་མཆོག་གིས་བདུག་པར་བྱའོ། །ཐལ་བ་དང་ལྷན་ཅིག་མིག་སྨན་བྱས་ནས་གང་ལ་རྡོ་རྗེའི་མིག་གིས་བལྟས་པ་དེའི་གལ་
[134a.2]ཏེ་པདྨ་གར་དབང་འཛག་པར་མ་གྱུར་ན་དེའི་ཚེ་སྒྲོལ་མ་བདག་གིས་བཅོམ་ལྡན་འདས་ངེས་པར་བསླུས་པ་ཡིན་ནོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། སོ་མ་སྐྱེས་པའི་བུ་ཆུང་གི་ཁ་ཆུ་བླངས་ནས་སྒྲོལ་མའི་གཟུངས་ལན་བདུན་མངོན་པར་བསྔགས་ཏེ། བྷྲིང་ག་རཱ་ཛའི་རྩ་བ་དང་། གི་ཝང་དང་
[134a.3]ལྷན་ཅིག་ཏུ་བྱས་ནས་དཔྲལ་བར་ཐིག་ལེ་བྱས་ན་གང་དང་གང་ལ་བལྟས་པ་དེ་དང་དེ་དབང་དུ་འགྱུར་ཏེ་གཞན་ལ་དགའ་བར་མི་འགྱུར་རོ། །གཞན་ལ་མི་འགྲོ་ཞིང་རང་སྤོང་བར་མི་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ལྟོ་བའི་སྲིན་བུ་ལ་སྒྲོལ་མའི་གཟུངས་ལན་བདུན་མངོན་པར་
[134a.4]བསྔགས་ཏེ་རྡོ་རྗེ་ཆོས་དང་བཅས་ཏེ་སོ་རྩི་གཞོན་ནུ་མ་ལ་བྱིན་ནས་དེས་ལོངས་སྤྱད་ན་སྦྱོར་བའི་མཆོག་འདི་མི་སྤོང་ཞིང་གཞན་ལ་དགའ་བར་མི་འགྱུར་ལ། གཞན་ལ་མི་འགྲོ་བར་རང་གི་བདག་པོ་ཡང་སྤོང་བར་མི་བྱེད་དོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཞག་ཆེན་པོ་རང་གི་ལུས་ལ་
[134a.5]བྱུགས་ཏེ། སྒྲོལ་མའི་གཟུངས་ཁྲི་ཕྲག་གཅིག་བཟླས་ཏེ་བསྒོམ་པ་དང་ལྡན་པས་བཟླས་པའི་མཐར་འབྲས་སཱ་ལུའི་ཟན་གྱི་དྲིལ་ཕྱིས་བྱས་པའི་དྲི་མ་བསྡུས་ཏེ་གང་ལ་བྱིན་པ་དེ་ཇི་སྲིད་འཚོའི་བར་དུ་གཏོང་བར་མི་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཟླ་བ་གཟས་ཟིན་པའི་དུས་སུ་སྒྲོལ་
[134a.6]མའི་གཟུངས་བཟླས་ཤིང་བསྙེན་པ་བྱས་ལ། དེ་ལས་བྱུང་བའི་འཇིག་རྟེན་དབང་ཕྱུག་བླངས་ལ་དུང་གི་ཕྱེ་མར་སྦྱར་བར་བྱའོ། །དེ་གང་ལ་བྱིན་པ་དེ་ཇི་སྲིད་འཚོའི་བར་དུ་རྗེས་སུ་འཇུག་པར་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། སྒྲོལ་མའི་གཟུངས་མྱོས་བྱེད་ཀྱི་འབྲས་བུ་ལ་ལན་
[134a.7]བརྒྱ་རྩ་བརྒྱད་ཡོངས་སུ་བཟླས་ཏེ་འབྲས་བུ་དེ་རྟ་མགྲིན་དང་ལྷན་ཅིག་ཏུ་བྱས་ནས་བྱུགས་ན་དེ་དབང་དུ་འགྱུར་རོ། །དེ་ནས་གཞན་དུ་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོའི་བནྡྷ་ན་མུཀྟིཾ་ཀུ་རུཿསྭཱ་ཧཱ། སྔགས་འདིས་ཨརྐའི་ལོ་མ་ལ་བསྒྲུབ་བྱའི་མིང་བར་དུ་བཅུག་སྟེ་ཡང་དག་པར་
[134b]
[134b.1]བྲིས་ནས་སྲིན་བུ་སྡིག་པའི་ཚད་དུ་སྦས་ན་བཅིངས་པ་ལས་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་ཐབས་རྫོགས་སོ།། {T3487}༄༅༅། །རྒྱ་གར་སྐད་དུ། བཛྲ་ཏཱ་ར་སཱ་དྷ་ནཾ། བོད་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྦྱིན་སྲེག་ལས་ཀྱི་ཆོ་ག་ཡིས། །
[134b.2]འདོད་པའི་དོན་ཀུན་སྒྲུབ་བྱེད་པའི། །རྡོ་རྗེ་སྒྲོལ་མའི་སྒྲུབ་ཐབས་འདི། །དེ་ནས་ཡང་དག་བཤད་པར་བྱ། །དེ་ལ་སྔགས་ཀྱི་ཚིག་ནི་འདི་རྣམས་སུ་འགྱུར་ཏེ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ་བོ་དྷི་སཏྭཱ་ཡ་མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཱཾཔྲ་དུཥྚཱཾ་མ་མ་ཀྲྀ་ཏེ་ཛམྦྷ་ཡ་
[134b.3]སྟཾ་བྷ་ཡ་མོ་ཧ་ཡ་བནྡྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སརྦ་དུཥྚཱཾ་སྟཾ་བྷ་ནི་ཏཱ་རེ་སྭཱ་ཧཱ། དེ་ལ་དང་པོ་རེ་ཞིག་རང་གི་སྙིང་གར་ཟླ་བའི་དཀྱིལ་འཁོར་ལ་ཏཱཾ་ཡིག་གི་ས་བོན་བསྒོམ་པར་བྱས་ནས། དེའི་འོད་ཟེར་གྱིས་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་སྤྱན་དྲངས་ཏེ། སྣ་ཚོགས་པའི་མཆོད་
[134b.4]པ་རྣམས་ཀྱིས་ཡང་དག་པར་མཆོད་ནས་སྡིག་པ་བཤགས་པ་ལ་སོགས་པ་བྱས་ཏེ། གསུམ་ལ་སྐྱབས་སུ་འགྲོ་བའི་ཚིགས་བཅད་བརྗོད་པར་བྱའོ། །དེ་ནས་ཚད་མེད་པའི་གནས་བཞི་བསྒོམ་པར་བྱས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པར་བྱའོ། །དེ་ནས་པཾ་ཡིག་ལས་
[134b.5]སྐྱེས་པའི། །པདྨ་ཟླ་བའི་དཀྱིལ་འཁོར་ཏེ། སླར་ཡང་ས་བོན་ཏཱཾ་ཡིག་བསྒོམ། །དེ་ཉིད་ཡོངས་སུ་གྱུར་པ་ལས། །མ་མོའི་དབུས་སུ་བཞུགས་པ་ཡི། །ཡུམ་གྱུར་ལྷ་མོ་སྒྲོལ་མ་བསྒོམ། །ཞལ་བཞི་ཕྱག་ནི་བརྒྱད་པ་སྟེ། རྒྱན་རྣམས་ཀུན་གྱིས་བརྒྱན་གྱུར་པ། །སྐུ་མདོག་གསེར་གྱི་འོད་འབར་
[134b.6]བའི། །གཞོན་ནུ་མ་ཡི་མཚན་ཉིད་ཅན། །སྣ་ཚོགས་པདྨ་ལ་གནས་པའི། །ཟླ་བའི་གདན་ལ་ཡང་དག་བཞུགས། །སེར་དང་གནག་དང་དཀར་དང་དམར། །གཡས་སྐོར་གྱི་ནི་ཞལ་བཞིའོ། །ཞལ་ནི་སོ་སོར་སྤྱན་གསུམ་སྟེ། །རྡོ་རྗེ་སྐྱིལ་མོ་ཀྲུང་གིས་བཞུགས། །དབུ་རྒྱན་འོད་དམར་སངས་རྒྱས་བཞི། །
[134b.7]རྡོ་རྗེ་མདའ་དུང་མཆོག་སྦྱིན་རྣམས། །གཡས་ཀྱི་ཕྱག་ན་བསྣམས་པའོ། །ཨུཏྤལ་གཞུ་དང་རྡོ་རྗེ་ཡི། །ལྕགས་ཀྱུ་རྡོ་རྗེ་ཞགས་པ་དང་། །སྡིགས་མཛུབ་གཡོན་གྱི་ཕྱག་ན་བསྣམས། །རྡོ་རྗེ་སྐྱིལ་ཀྲུང་རྣལ་འབྱོར་གྱིས། །ས་གསུམ་པོ་ནི་བསྒྲུབ་པར་བྱ། །དེ་མདུན་མེ་ཏོག་སྒྲོལ་མ་ནི། །སྐུ་མདོག་དཀར་ཞིང་
[135a]
[135a.1]ཡིད་འོང་མ། །ཨོཾ་ཡིག་རྣམ་པ་ལས་སྐྱེས་པའི། །མེ་ཏོག་ཕྲེང་བ་ཕྱག་ན་བསྣམས། །ཞལ་གཅིག་ཕྱག་ནི་གཉིས་མ་སྟེ། །རྒྱན་རྣམས་ཀུན་གྱིས་རྣམ་པར་བརྒྱན། །ལྷོ་རུ་བདུག་སྤོས་སྒྲོལ་མ་ནི། །སྐུ་མདོག་ནག་མོ་གཟུགས་མཛེས་མ། །རྒྱན་རྣམས་ཀུན་གྱིས་མཛེས་པ་ཡི། །ཕྱག་ན་
[135a.2]སྤོས་ཀྱི་སྣོད་བསྣམས་པའོ། །ནུབ་ཏུ་མར་མེའི་སྒྲོལ་མ་ནི། །སྐུ་མདོག་སེར་མོ་ཡིད་འོང་མ། །གསེར་གྱི་རྣ་རྒྱན་གཡོ་བས་མཛེས། །ཕྱག་ན་མར་མེའི་སྡོང་བུ་བསྣམས། །བྱང་དུ་དྲི་ཡི་སྒྲོལ་མ་ནི། །ཕྱག་ན་དྲི་ཡི་དུང་ཆོས་བསྣམས། །ལྷ་མོ་སྐུ་མདོག་དམར་ཞིང་འབར། །སྙིང་པོའི་དཀྱིལ་འཁོར་ལ་བསྒོམ་བྱ། །
[135a.3]འདི་རྣམས་ཞལ་གཅིག་ཕྱག་གཉིས་མ། །རྒྱན་རྣམས་ཀུན་གྱིས་རྣམ་པར་བརྒྱན། །རྡོ་རྗེ་སྐྱིལ་ཀྲུང་གིས་བཞུགས་མ། །ལྷ་མོ་ལྔ་པོ་འདི་རྣམས་ནི། །ཅུང་ཟད་ཞལ་ནི་གཙིགས་པ་སྟེ། །རོལ་པའི་སྟབས་ཀྱིས་ཡང་དག་བཞུགས། །དེ་ལྟར་དཀྱིལ་འཁོར་གྱི་འཁོར་ལོ་ཐམས་ཅད་བསམས་ལ། རང་གི་
[135a.4]སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་འཁོར་ལོ་གདན་དྲངས་ལ། ཛཿཧཱུཾ་བཾ་ཧོཿཞེས་པས་འདིར་དགུག་པ་ལ་སོགས་པ་བྱའོ། །དེ་ནས་ཤར་སྒོར་བསྒོམ་བྱ་སྟེ། །རྡོ་རྗེ་ལྕགས་ཀྱུ་འོད་དཀར་མོ། །རྡོ་རྗེ་ལྕགས་ཀྱུའི་ཕྱག་མཚན་མ། །ཤིན་ཏུ་ཡིད་འོང་བདག་ཉིད་དོ། །ལྷོ་སྒོར་རྡོ་རྗེ་ཞགས་པ་མ། །
[135a.5]ཤིན་ཏུ་འདོད་དགའ་སྐུ་མདོག་གནག །གཟུགས་མཛེས་རྒྱན་གྱིས་བརྒྱན་པ་སྟེ། །རྡོ་རྗེ་ཞགས་པ་འཆང་བའི་མཆོག །ནུབ་སྒོར་རྡོ་རྗེ་ལྕགས་སྒྲོག་མ། །ཕྱག་ན་རྡོ་རྗེ་ལྕགས་སྒྲོག་བསྣམས། །སྣ་ཚོགས་རྒྱན་གྱིས་བརྒྱན་པ་སྟེ། །སྐུ་མདོག་སེར་མོ་བསམ་པར་བྱ། །བྱང་སྒོར་རྡོ་རྗེ་དྲིལ་བུ་མ། །ཕྱག་
[135a.6]ན་རྡོ་རྗེ་དྲིལ་བུ་མཆོག །ཤིན་ཏུ་གཟུགས་མཛེས་ཁ་དོག་དམར། །བཟང་མོའི་གཟུགས་ནི་བལྟ་བར་བྱ། །སྟེང་དུ་གཙུག་ཏོར་རྣམ་རྒྱལ་མ། །གཟུགས་མཛེས་སྐུ་མདོག་སེར་མོ་སྟེ། །བྱང་ཆུབ་འབྲས་བུ་སྦྱིན་མཛད་མ། །སྔགས་པས་འཁོར་ལོ་འཛིན་མ་བསྒོམ། །དེ་ནས་སྙིང་པོའི་དཀྱིལ་འཁོར་འོག། །
[135a.7]དགེ་ཞིང་འོད་ཟེར་འབར་བའི་གཟུགས། །སྦྲུལ་གྱི་ཞགས་པ་ཕྱག་ན་བསྣམས། །སྐུ་མདོག་ནག་མོ་བསྒོམ་པར་བྱ། །ཞལ་གཅིག་ཕྱག་ནི་གཉིས་པ་སྟེ། །ཤེས་བྱ་ཀུན་མཁྱེན་ཡིད་འོང་མ། །ཡི་གེ་བཅུ་པོ་འདི་རྣམས་ཀྱིས། །ལྷ་མོ་བཅུ་ནི་རྣམ་པར་སྤྲུལ། །ཕ་རོལ་ཕྱིན་བཅུ་དག་པ་སྟེ། །ལས་ཀུན་རབ་ཏུ་
[135b]
[135b.1]འགྲུབ་པར་བྱེད། །དེ་ལ་ཡི་གེ་བཅུ་རྣམས་ནི། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། དེ་བཞིན་དུ་སྐུ་དང་གསུང་དང་ཐུགས་བྱིན་གྱིས་བརླབ་པ་དང་། །དབང་བསྐུར་བ་དང་། །ཐིག་ལེ་དང་། ཕྲ་མོའི་རྣལ་འབྱོར་དང་། བཟླས་པ་ལ་སོགས་པ་དང་། བསྒོམ་པར་ཡང་བྱའོ་ཞེས་སོ། །སྔགས་མཆོག་འདི་ནི་གཙོ་བོ་སྟེ། །སངས་
[135b.2]རྒྱས་ཀུན་གྱིས་ཕྱག་བྱས་པ། །བཀླགས་པ་ཡིས་ནི་དངོས་གྲུབ་བྱེད། །གསལ་པོར་རྡོ་རྗེ་གུར་ལས་གསུངས། །ཞེས་སོ། །དེ་ལ་འདིར་ཉེ་བར་སྤྱོད་པ་ནི་སྔགས་འདིས་གོས་ཀྱི་སྣ་ལ་བཟུང་ནས་ལན་བདུན་དུ་བསྔགས་ཤིང་མདུད་པ་བྱས་ན་འཇིགས་པ་དང་བཅས་པའི་ས་གང་དུ་འགྲོ་ཡང་འཇིགས་པར་མི་
[135b.3]འགྱུར་རོ། །སྟག་དང་། ཆོམ་པོ་དང་། ཆུ་སྲིན་དང་། སེང་གེ་དང་། སྦྲུལ་དང་། གླང་པོ་ཆེ་དང་། མ་ཧེ་དང་། དོམ་དང་། བ་ལང་དང་། རྟ་ལ་སོགས་པས་གནོད་པར་མི་བྱེད་དོ། །དེ་བཞིན་དུ་སྔགས་འདིས་ཨུཏྤལ་ལ་བརྒྱ་རྩ་བརྒྱད་བཟླས་ནས་སྦྱིན་སྲེག་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀི་མེ་བ་ཤ་
[135b.4]མ་ནཱ་ཡ་སྭཱ་ཧཱ། ཞེས་པས་གང་འདོད་པ་དེ་དབང་དུ་བྱེད་པར་འགྱུར་རོ། །དེ་བཞིན་དུ་སྔགས་འདིས་བྱ་རོག་གི་སྒྲོ་ལ་ལན་སུམ་ཅུ་རྩ་གཉིས་བཟླས་ཏེ་དགྲ་བོའི་ཁང་པར་སྦས་ན་ཉི་མ་བདུན་གྱིས་སྐྲོད་པར་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་པྲ་ཙ་ལ་ཤཱི་གྷྲཾ་གཱ་མི་ནི་དེ་བ་དཏྟ་ཨུཙྪཱ་ཊ་ཡ་ཧཱུཾ་ཕཊ་ཅེས་པ་ནི་བསྐྲད་པའི་ཆོ་
[135b.5]གའོ། །དེ་ནས་གཞན་ལ་སྦྱོར་བ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷཱ་ནཱཾ་ཀུ་མཱ་རཱི་མ་ཧྱ་མུད་བཱ་ཧེ་ན་ཏ་སྱཱཿབི་ཏཱ་པྲ་ཡཙྪནྟུ་སྭཱ་ཧཱ། མྱོས་བྱེད་གཏུམ་པོའི་ས་བོན་དང་། །མྱོས་བྱེད་འབྲས་བུ་དེ་བཞིན་དུ། །མྱ་ངན་མེད་ཤིང་མེ་ཏོག་བཅས། །སྦྱིན་སྲེག་སྟོང་ཕྲག་ལྔ་བྱ་སྟེ། །མར་སྦྲང་བུ་རམ་སྦྱིན་
[135b.6]སྲེག་ནི། །བུ་མོ་སྒྲུབ་ལ་མཆོག་ཏུ་བསྔགས། །དེ་ནས་ཞག་བདུན་སྦྱོར་བ་ཡིས། །རང་འདོད་བུ་མོ་ཐོབ་པར་འགྱུར། །དེ་ནས་གཞན་ལ་རབ་ཏུ་སྦྱོར་བ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷཱ་ནཱཾ་སྭསྠཱ་ན་ཏ་ཨཱ་ཀཪྵ་ཡ་མ་མཱནྟི་ཀེ་ཛཿཞེས་པའི་སྔགས་འདིས་རྒྱ་ཤུག་གི་ཚེར་མ་ལ་སྟོང་ཕྲག་ལྔ་རང་བྱུང་གི་མེ་ཏོག་ལ་
[135b.7]བསྙུགས་ནས་སྦྱིན་སྲེག་བྱས་ནས་འདིས་རྒྱལ་པོའི་བུ་མོ་ཡང་འགུགས་པར་བྱེད་དོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། རང་བྱུང་གི་མེ་ཏོག་གིས་བསྐུས་པའི་རས་ལ་བཅོམ་ལྡན་འདས་མ་ཞལ་གཅིག་ཕྱག་གཉིས་མ་ལྕགས་ཀྱུ་དང་ཨུཏྤ་ལའི་ཞགས་པ་ཕྱག་གཉིས་ན་བསྣམས་པ་བྲིས་ལ། ལྷ་རྫས་མེ་
[136a]
[136a.1]ཏོག་དམ་པ་འདི། །ཞེས་པ་ལ་སོགས་པས་དེའི་མདུན་དུ་མཆོད་པ་བྱས་ཏེ། བསྒོམ་པ་དང་ལྡན་པས་སྔགས་བཟླས་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱི་མ་མེ་པ་ཙི་ཏཾ་སྭཔྣཾ་ཀ་ཐཱ་ཡ་ཧཱུཾ་ཕཊ། སྟོང་ཕྲག་ལྔས་འོང་བར་འགྱུར་ཏེ། ཞགས་པས་མགུལ་པ་བཅིངས་ཤིང་ལྕགས་ཀྱུས་ཕུག་ལ་
[136a.2]ཨུཏྤལ་གྱིས་རྐང་པ་བཅིངས་ཏེ། བསྒྲུབ་བྱ་བཀུག་ནས་རྐང་པའི་འོག་ཏུ་བསམས་ནས་བྲན་མོའི་གཟུགས་ཀྱིས་ལོངས་སྤྱོད་པར་བྱའོ། །དེ་ནས་གཞན་ལ་རབ་ཏུ་སྦྱོར་བ་ནི། སྒྲོལ་མའི་གཟུངས་ལན་བདུན་དུ་མངོན་པར་བསྔགས་ནས་བདག་ཉིད་ཀྱི་མིག་གཉིས་ལ་བྱུགས་ནས་རྒྱལ་པོའི་རིགས་ཀྱི་ནང་དུ་ཞུགས་ན་རྒྱལ་པོ་
[136a.3]དང་བཅས་པས་བླ་མ་ལ་སོགས་པར་བྱེད་ཅིང་གཅིག་ཏུ་དབང་དུ་བྱེད་པར་འགྱུར་རོ། །དེ་ནས་གཞན་ལ་རབ་ཏུ་སྦྱོར་བ་ནི་སྒྲོལ་མའི་གཟུངས་ལན་བརྒྱ་རྩ་བརྒྱད་བཟླས་ལ་སྦྲུལ་གདོང་གཉིས་པའི་མགོ་ཐལ་བར་བྱས་ཏེ་བ་དམར་མོའི་མར་ལ་ཨརྐའི་བལ་ལ་སྡོང་བུ་བྱས་ཏེ་རབ་ཏུ་སྦར་ཏེ་མིག་སྨན་བསག་པར་བྱའོ། །དེའི་
[136a.4]མིག་སྨན་དང་། རྡོ་རྗེ་ཉི་མ་དང་། རྡོ་རྗེ་ཆོས་དག་ཡང་དག་པར་མཉེས་ལ་རྟ་མཆོག་གིས་བདུག་པར་བྱའོ། །དེའི་ཐལ་བ་དང་ལྷན་ཅིག་ཏུ་མིག་སྨན་མིག་ལ་བསྐུས་ན་གང་ལ་རྡོ་རྗེའི་མིག་གིས་བལྟས་པ་དེའི་པདྨ་གར་གྱི་དབང་ཕྱུག་འཛག་པར་འགྱུར་རོ། །དེ་ལྟར་མ་གྱུར་ན་སྒྲོལ་མ་བདག་གིས་སངས་རྒྱས་
[136a.5]བཅོམ་ལྡན་འདས་ངེས་པར་བསླུས་པ་ཡིན་ནོ། །དེ་ནས་གཞན་ལ་སྦྱོར་བ་ནི་ལྟོ་བའི་སྲིན་བུ་ལ་སྒྲོལ་མའི་གཟུངས་ཀྱིས་ལན་བདུན་དུ་མངོན་པར་བསྔགས་ནས་རྡོ་རྗེ་ཆོས་དང་ལྷན་ཅིག་ཏུ་བྱས་ཏེ། དེ་སོ་རྩི་དང་སྦྱར་ལ་སྦྱིན་ནོ། །བྱ་བ་བྱེད་ཅིང་སྦྱོར་བའི་མཆོག་འདིས་མི་གཏོང་སྟེ། རང་གི་ཆུང་མ་བཞིན་དུ་སྤྱོད་
[136a.6]པར་འགྱུར་རོ། །དེ་ལས་གཞན་ལ་རབ་ཏུ་སྦྱོར་བར་འགྱུར་ཏེ། སོ་མ་སྐྱེས་པའི་བུ་ཆུང་གི་ལྕེ་བླངས་ཏེ་སྒྲོལ་མའི་གཟུངས་ལན་བདུན་དུ་མངོན་པར་བསྔགས་ཏེ་བྷྲྀངྒ་རཱ་ཛ་དང་། གི་ཝང་དང་ལྷན་ཅིག་ཏུ་བྱས་ཏེ་དཔྲལ་བར་ཐིག་ལེ་བྱས་ན་གང་ལ་བལྟས་པ་དེ་དབང་དུ་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བ་ནི་
[136a.7]ཞག་ཆེན་པོ་རང་གི་ལུས་ལ་བྱུགས་ཏེ་བསྒོམས་པ་དང་ལྷན་ཅིག་པས་སྒྲོལ་མའི་གཟུངས་ཁྲི་ཚོ་གཅིག་བཟླས་པར་བྱ་སྟེ། བཟླས་པའི་མཐར་འབྲས་སཱ་ལུའི་ཟན་གྱིས་དྲིལ་ཕྱིས་བྱས་ལ་དྲིལ་ཕྱིས་དེ་བསྡུས་ཏེ་གང་ལ་བྱིན་པ་དེ་ཇི་སྲིད་འཚོའི་བར་དུ་དབང་དུ་འགྱུར་རོ། །དེ་ནས་གཞན་ལ་རབ་ཏུ་སྦྱོར་
[136b]
[136b.1]བ་ནི་ཟླ་བ་གཟས་ཟིན་པའི་དུས་སུ་སྒྲོལ་མའི་གཟུངས་བཟླས་ཤིང་བསྙེན་པ་བྱས་ལ། དེ་ལས་བྱུང་བའི་འཇིག་རྟེན་དབང་ཕྱུག་གིས་དུང་གི་ཕྱེ་མ་སྦང་བར་བྱའོ། །དེ་གང་ལ་བྱིན་པ་དེ་ཇི་སྲིད་འཚོའི་བར་དུ་རྗེས་སུ་འཇུག་པར་འགྱུར་རོ། །གཞན་ཡང་རབ་ཏུ་སྦྱོར་བ་ནི་སྒྲོལ་མའི་གཟུངས་
[136b.2]མྱོས་བྱེད་ཀྱི་འབྲས་བུ་ལ་ལན་བརྒྱ་རྩ་བརྒྱད་ཡོངས་སུ་བཟླས་ཏེ། འབྲས་བུ་རྡོ་རྗེ་རྟ་མགྲིན་དང་ལྷན་ཅིག་ཏུ་བྱས་ཏེ་བྱུགས་ན་དེ་དབང་དུ་འགྱུར་རོ། །གཞན་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་སྱ་བནྡྷཱ་ན་མུཀྟིཾ་ཀུ་རུ་སྭཱ་ཧཱ། སྔགས་འདིས་ཨརྐའི་
[136b.3]ལོ་མ་ལ་བསྒྲུབ་བྱའི་མིང་བར་དུ་བཅུག་སྟེ་བྲིས་ནས་སྡིག་པའི་ཚང་དུ་སྦས་ན། བཅིངས་པ་ལས་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་ཐབས་རྫོགས་སོ།། {T3488}༄༅༅། །རྒྱ་གར་སྐད་དུ། བཛྲ་ཏཱ་རཱ་#སཱ་དྷ་ནཾ། བོད་སྐད་དུ། རྡོ་རྗེ་སྒྲོལ་མའི་སྒྲུབ་
[136b.4]ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྐུ་མདོག་དཀར་མོ་ཡིད་འོང་མ། །རྡོ་རྗེ་སྒྲོལ་མ་ལ་ཕྱག་འཚལ། །སེམས་ཅན་ཀུན་གྱི་དོན་རྒྱུའི་ཕྱིར། །དེ་ཡི་སྒྲུབ་ཐབས་བཤད་པར་བྱ། །འདིར་ལྷག་པར་བསྒོམ་#པའི་རྣལ་འབྱོར་པས། རང་གི་སྙིང་གར་ཟླ་བའི་དཀྱིལ་
[136b.5]འཁོར་ལ་ཏཱཾ་ཡིག་བསམས་ལ་ཞལ་བསང་བ་ལ་སོགས་པ་བྱའོ། །ཤིན་ཏུ་བདེ་བའི་སྟན་ལ་ཉེ་བར་འདུག་སྟེ། རང་གི་སྙིང་གའི་ས་བོན་ལས་འོད་ཟེར་འཕྲོས་ཏེ། འོད་ཟེར་དེས་རྗེ་བཙུན་སྒྲོལ་མ་གདན་དྲངས་ཏེ། མདུན་གྱི་ནམ་མཁའ་ལ་བཞུགས་པའི་བླ་མ་དང་། སངས་རྒྱས་དང་། བྱང་ཆུབ་
[136b.6]སེམས་དཔའ་རྣམས་ཀྱི་ཡང་མདུན་དུ་སྡིག་པ་བཤགས་པ་ལ་སོགས་པ་བྱས་ཏེ། སྡིག་པ་བཤགས་ཤིང་མི་བྱེད་པར་སྡོམ་པ་དང་། རྗེས་སུ་ཡི་རང་བ་དང་། ཡོངས་སུ་བསྔོ་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་ལ་བརྟེན་#པ་དང་། ཚད་མེད་པའི་
[136b.7]གནས་བཞི་བསྒོམས་ནས་ཨོཾ་ཤཱ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅#ཧཾ་ཞེས་པས་སྟོང་པ་ཉིད་དུ་བསྒོམ་པར་བྱས་ནས་གཟུགས་རྫོགས་པར་བསྒོམ་པར་#བྱ་བ་ཡང་བསྒོམ་པར་བྱའོ། །དེ་ནས་པཾ་ཡིག་ཡོངས་སུ་གྱུར་པ་ལས་པདྨ་དཀར་པོ་འདབ་མ་བརྒྱད་པ། དེའི་སྟེང་དུ་ཨ་ཡིག་ཡོངས་སུ་གྱུར་པ་ལས་ཟླ་བ་
[137a]
[137a.1]ཟླ་བའི་སྟེང་དུ་ཏཱཾ་ཡིག་ཡོངས་སུ་གྱུར་པ་ལས་ཨུཏྤ་ལ་དཀར་པོའོ། །ཨུཏྤ་ལའི་དབུས་སུ་ཟླ་བ། ཟླ་བའི་དབུས་སུ་ཏཱཾ་ཡིག་ཏཱཾ་ཡིག་ལས་ནམ་མཁའི་མཐིལ་དུ་ཁམས་གསུམ་ཡང་སྒྲོལ་མའི་སྐུར་སྤྲོས་ཏེ། སྒྲོལ་མའི་སྐུས་ས་གསུམ་ན་གནས་པའི་སེམས་ཅན་རྣམས་དང་གནས་
[137a.2]རྣམས་ཀྱང་སླར་ཡང་ཏཱཾ་ཡིག་དེ་ལ་དེ་བཞིན་དུ་བསྡུ་བར་བྱའོ། །ཨུཏྤལ་དང་ཟླ་བ་དང་ཏཱཾ་ཡིག་ཡོངས་སུ་གྱུར་པ་ལས་རྗེ་བཙུན་མ་སྒྲོལ་མའི་སྐུར་བདག་ཉིད་བལྟ་བར་བྱ་སྟེ། སྐུ་མདོག་དཀར་མོ་ཆུ་སྐྱེས་དཀར་པོའི་སྟེང་དུ་ཟླ་བའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ། ཟླ་བ་དཀར་པོ་ལ་བརྟེན་པ། ལོ་
[137a.3]བཅུ་དྲུག་གི་ན་ཚོད་མ་སྣ་ཚོགས་པའི་རྒྱན་#གྱིས་བརྒྱན་པ། ཕྱག་གཡས་པ་མཆོག་སྦྱིན། །གཡོན་པ་ཨུཏྤལ་བསྣམས་པ། བདུད་མ་ལུས་པ་འཇོམས་པར་མཛད་པ་ཉིད་ཀྱི་སྐུའི་བ་སྤུའི་ཁུང་བུ་#ནས་སངས་རྒྱས་དང་བྱང་ཆུབ་སེམས་དཔའ་རྣམས་འཕྲོ་བ་བསྒོམ་པར་བྱའོ། །འདི་ལྟ་བུའི་བསྒོམ་པ་ལ་#
[137a.4]བརྟན་པར་མཛད་ནས་སྔགས་བཟླས་པར་བྱའོ། །རང་གི་སྙིང་གར་འཁོར་ལོ་རྩིབས་བརྒྱད་པ་དཀར་པོ་རྣམ་པར་བསམས་ལ། །རྩིབས་སོ་སོ་ལ་ཡི་གེ་བརྒྱད་རྣམ་པར་བསམས་ནས#། །དབུས་སུ་སྭཱ་ཧཱའི་#ཡི་གེ་བྱིན་ནས་བཟླས་པར་བྱའོ། །ཡི་དམ་དག་གི་སྔགས་འདིའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། འདིས་#
[137a.5]བསམས་པ་ཙམ་གྱིས་བདུད་ཐམས་ཅད་འཇོམས་པར་འགྱུར་རོ། །ཤེས་རབ་ཤིན་ཏུ་དྲི་མ་མེད། །སྙན་ངག་དང་ནི་སྨྲ་བར་ལྡན། །རྡོ་རྗེ་འཛིན་པ་རང་ཉིད་ཀྱིས། །བསྐལ་པའི་མཐར་ཡང་འཚོ་ཐབས་གསུངས། །རྒྱལ་པོའི་བཙུན་མོ་ནང་འཁོར་བཅས། །དེ་ཡི་དབང་དུ་འདུ་བར་འགྱུར། །དགྲ་རྣམས་ཀུན་
[137a.6]གྱིས་ཐམས་ཅད་དུ། །བ་སྤུའི་བདག་ཉིད་ཀྱང་མི་གཅོད། །རྡོ་རྗེ་སྒྲོལ་མ་གཟི་ཆེན་འཕགས། །དངོས་གྲུབ་ཐམས་ཅད་རབ་སྟེར་མ། །མཁས་ཤིང་བདག་ཉིད་ཆེན་མོ་ལ། །གསེར་རམ་ཡང་ན་དངུལ་ལ་སོགས། །ཡོན་ནི་དབུལ་བར་བྱས་ནས་ནི། །མཆོག་ཏུ་གུས་པས་མཉན་པར་བྱ། །མཆོག་གཉིས་མ་
[137a.7]ལུས་ཐོབ་པ་ནི། །བླ་མ་ལ་གུས་བདག་ཉིད་མཆོག །དེ་ཐོས་གྱུར་ལས་འདི་ཉིད་དུ། །རྒྱལ་བའི་ཚོགས་ཀྱིས་#རྟག་ཏུ་གསུངས། །གལ་ཏེ་གཞན་དུ་དངོས་གྲུབ་མིན། །རྒྱལ་བ་ཉིད་ཀྱིས་མངོན་དུ་#མཛད། །རྡོ་རྗེ་སྒྲོལ་མའི་སྒྲུབ་ཐབས་སློབ་དཔོན་འཕགས་པ་ཀླུ་#སྒྲུབ་ཞབས་ཀྱིས་མཛད་པ་རྫོགས་སོ།། །།
[137b]
[137b.1]{T3489}༄༅༅། །རྒྱ་གར་སྐད་དུ། བཛྲ་ཏཱ་རཱ་སཱ་དྷ་ནཾ། བོས་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྔགས་པས་དང་པོ་རེ་ཞིག་རང་གི་སྙིང་གར་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེ་ལ་གནས་པའི་ཏཱཾ་ཡིག་ཁ་དོག་སེར་པོའོ། །དེ་ཡོངས་
[137b.2]སུ་གྱུར་པ་ལས་རྡོ་རྗེ་རྩེ་མོ་དགུ་པ། དེའི་ལྟེ་བ་ལ་ཏཱཾ་ཡིག་བསྒོམ་པར་བྱའོ། །དེའི་འོད་ཟེར་གྱིས་ཡེ་ཤེས་སེམས་དཔའི་རང་བཞིན་གདན་དྲང་པར་བྱ་སྟེ། བཅོམ་ལྡན་འདས་མ་འཆད་པར་འགྱུར་བའི་ཕྱག་མཚན་ལ་སོགས་པས་བརྒྱན་པ། ཞལ་བཞི་ཕྱག་བརྒྱད་མ། རྡོ་རྗེ་སྐྱིལ་ཀྲུང་གིས་བཞུགས་
[137b.3]པ། ལྷ་མོ་བཅུའི་འཁོར་གྱིས་བསྐོར་བ། ནམ་མཁའ་ལ་བལྟས་ཏེ། རང་གི་སྙིང་གའི་ས་བོན་ལས་འཐོན་ནས་མེ་ཏོག་ལ་སོགས་པའི་ཉེར་སྤྱོད་ལྔའི་མཆོད་པས་ཡང་དག་པར་མཆོད་ནས་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། གསུམ་ལ་སྐྱབས་སུ་འགྲོ་བ་དང་།
[137b.4]བྱང་ཆུབ་ཏུ་སེམས་བསྐྱེད་པ་དང་། བྱམས་པ་དང་སྙིང་རྗེ་དང་དགའ་བ་དང་། བཏང་སྙོམས་རྣམས་བསྒོམ་པར་བྱའོ། །དེ་ནས་ཆོས་ཐམས་ཅད་ཀྱི་བདག་ཉིད་ཀྱང་དཔེར་ན་རྨི་ལམ་ལྟ་བུ་རང་བཞིན་མེད་པ་གདོད་མ་ནས་མ་སྐྱེས་ཤིང་ལྷག་པར་གྲོལ་བའི་སྔགས་བརྗོད་པར་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་
[137b.5]བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་བྱང་ཆུབ་ཀྱི་སེམས་རྗེས་སུ་དྲན་པར་བྱ་སྟེ། ནམ་མཁའ་ལ་རཾ་ཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར། དེ་ལ་ཧཱུཾ་ཡིག་ཡོངས་སུ་གྱུར་པ་ལས་རྡོ་རྗེ་རྩེ་གསུམ་པའོ། །དེའི་འོད་ཟེར་ལས་ཡང་དག་པར་བྱུང་བ་ཇི་སྲིད་དུ་འདོད་པ་རྒྱ་ཆེ་བའི་འོད་ཟེར་གྱི་དྲ་བ་འཕྲོ་
[137b.6]བའི་རྡོ་རྗེའི་ར་བའོ། །དེའི་འོད་ཟེར་ལས་བྱུང་བའི་རྡོ་རྗེའི་གུར། རྡོ་རྗེའི་ས་གཞི་དང་། ཕྱི་རོལ་དུ་མཚམས་བཅིང་བ་ཡང་བསྒོམ་པར་བྱའོ། །དེའི་འོད་ཟེར་གྱིས་བགེགས་རྣམས་བསྐྲད་ནས་གུར་གྱི་དབུས་སུ་ནམ་མཁའི་རང་བཞིན་ཆོས་འབྱུང་ཨེ་ཡིག་གི་རྣམ་པ་སྨད་ཕྲ་བ་སྟེང་ཡངས་པ་དཀར་པོ་
[137b.7]བསྒོམ་པར་བྱའོ། །དེའི་དབུས་སུ་ནམ་མཁའི་རང་བཞིན་ལ་སྣ་ཚོགས་ཆུ་སྐྱེས་ཀྱི་ཟེའུ་འབྲུ་ལ་གནས་པ་རྡོ་རྗེ་རྩེ་གསུམ་པ། དེའི་འཁྲིས་ཁྱབ་པའི་འབྱུང་བ་ཆེན་པོ་བཞིའི་དཀྱིལ་འཁོར་རྣམས་ནི་ཡཾ་ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་ནག་པོ་ཟླ་བ་ཕྱེད་པའི་རྣམ་པ་རྩེ་མོ་གཉིས་ལ་གཡོ་
[138a]
[138a.1]བའི་བ་དན་གྱིས་མཚན་པའོ། །དེའི་སྟེང་དུ་རཾ་ཡིག་ལས་སྐྱེས་པའི་མེའི་དཀྱིལ་འཁོར་དམར་པོ་ཟུར་གསུམ་པ་ཟུར་རྣམས་སུ་རཾ་ཡིག་གིས་མཚན་པའོ། །དེའི་སྟེང་དུ་བཾ་ཡིག་ལས་སྐྱེས་པའི་ཆུའི་དཀྱིལ་འཁོར་དཀར་པོ་ཟླུམ་པོ་དྲིལ་བུས་མཚན་པའོ། །དེའི་སྟེང་དུ་ལཾ་ཡིག་ལས་སྐྱེས་པའི་དབང་
[138a.2]ཆེན་གྱི་དཀྱིལ་འཁོར་སེར་པོ་གྲུ་བཞི་པའི་ཟུར་རྣམས་སུ་རྡོ་རྗེ་རྩེ་གསུམ་པས་མཚན་པའོ། །དེའི་རང་བཞིན་རྨི་ལམ་ལྟ་བུར་རྣམ་པར་ཤེས་པར་བྱས་ནས་ཁམས་གསུམ་ཁྱབ་པའི་སྟེགས་བུ་ལ་འབྱུང་བ་ཆེན་པོ་བཞི་ཡོངས་སུ་གྱུར་པ་ལས་སྐྱེས་པའི་ཡོངས་སུ་དག་པའི་སངས་རྒྱས་ཀྱི་ཞིང་མདོར་བསྡུས་
[138a.3]པའི་གཟུགས་ཐར་པའི་གྲོང་ཁྱེར་ཆེན་པོ་རྣམ་པར་སྣང་མཛད་ཀྱི་རང་བཞིན་སྣ་ཚོགས་རྡོ་རྗེའི་སྟེགས་བུའི་དབུས་སུ་རིན་པོ་ཆེ་སྣ་ཚོགས་པའི་རང་བཞིན་གྱི་གཞལ་ཡས་ཁང་གྲུ་བཞི་པ། སྒོ་བཞི་པ། ཀ་བ་བརྒྱད་ཀྱིས་ཉེ་བར་མཛེས་པ། སྟེགས་བུ་བཞིས་ཡོངས་སུ་བསྐོར་བ། རྟ་བབས་བཞིས་བརྒྱན་
[138a.4]པ། དྲ་བ་དང་དྲ་བ་ཕྱེད་པ་དང་དྲིལ་བུ་དང་། མེ་ལོང་དང་། རྔ་ཡབ་དང་། བ་དན་སྣ་ཚོགས་པ་དང་། དྲིལ་བུས་རྣམ་པར་བརྒྱན་པ། དེའི་སྙིང་པོའི་དབུས་སུ་པདྨ་འདབ་མ་བརྒྱད་པ། གེ་སར་དང་བཅས་པའི་ཟེའུ་འབྲུའི་སྟེང་དུ་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ནི་མེ་ལོང་ལྟ་བུའི་ཡེ་ཤེས་ཀྱི་རང་
[138a.5]བཞིན་ནོ། །དེའི་སྟེང་དུ་ཏཱཾ་ཡིག་སེར་པོ་ཉི་མའི་དཀྱིལ་འཁོར་ལ་བཞུགས་པ་ནི་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ནོ། །དེ་ནས་ཏཱཾ་ཡིག་ཡོངས་སུ་གྱུར་པ་ལས་རྡོ་རྗེ་རྩེ་དགུ་པ་གསེར་གྱི་མདོག་ལྟ་བུ་ས་བོན་གྱི་སྙིང་པོ་ཅན་ནི་སོ་སོར་རྟོག་པའི་རང་བཞིན་ནོ། །དེ་ལས་བྱུང་བའི་འོད་ཟེར་འཕྲོ་བས་ཕྱོགས་བཅུར་
[138a.6]བཅོམ་ལྡན་འདས་མའི་རྣམ་པས་སེམས་ཅན་ཐམས་ཅད་ཀྱི་དོན་མཛད་ནས་སླར་ཡང་དེ་ལ་དེ་བཞིན་དུ་རྡོ་རྗེའི་རྟགས་ལ་སྡུད་པ་ནི་བྱ་བ་གྲུབ་པའི་རང་བཞིན་ཉིད་དོ། །དེ་ནས་ས་བོན་གྱི་རྟགས་དང་ཟླ་བ་དང་ཉི་མ་ཡོངས་སུ་གྱུར་པ་ལས་བཅོམ་ལྡན་འདས་མ་ནི་ཆོས་ཀྱི་དབྱིངས་རྣམ་པར་དག་པའི་རང་བཞིན་རྡོ་རྗེ་
[138a.7]སྒྲོལ་མ་སྟེ། ཞལ་བཞི་པ། རྒྱན་ཐམས་ཅད་ཀྱིས་བརྒྱན་པ། ཕྱག་བརྒྱད་པ། གསེར་གྱི་མདོག་ལྟ་བུ། གཞོན་ནུ་མའི་མཚན་ཉིད་ཅན། གཟི་བརྗིད་དང་ལྡན་པ། ན་ཚོད་གཞོན་ནུ་འོད་དང་ལྡན་པ། གསེར་གྱི་རྣ་ཆ་གཡོ་བ་ཅན། སངས་རྒྱས་བཞིའི་ཅོད་པན་ཅན་ཆེན་པོ་པདྨ་རཱ་གའི་འོད་དང་ལྡན་པ། ཕྱག་
[138b]
[138b.1]གཡས་ན་རྡོ་རྗེ་དང་ཞགས་པ་དང་། མདའ་དང་། དུང་བསྣམས་པ། དེ་བཞིན་དུ་གཡོན་ན་ཨུཏྤལ་སེར་པོ་དང་། གཞུ་དང་། ལྕགས་ཀྱུ་དང་། ཞགས་པ་དང་བཅས་པའི་སྡིགས་མཛུབ་བོ། །ཞལ་དང་པོ་གསེར་གྱི་མདོག་ལྟ་བུ་གཡས་དཀར་པོ། གཡོན་དམར་པོ། རྒྱབ་སྔོན་པོ། རྡོ་རྗེ་སྐྱིལ་
[138b.2]ཀྲུང་གིས་བཞུགས་པའོ། །སྔགས་པས་རང་གི་སྙིང་གའི་ས་བོན་ལས་ཡང་དག་པར་བྱུང་བའི་དཀྱིལ་འཁོར་བདག་པོའི་ཞལ་ནས་ཕྱུང་སྟེ། ལྷ་མོ་བཅུ་པོ་རྣམས་ཀྱི་དབྱེ་བ་ཏཱཾ་གི་ས་བོན་ལས་བྱུང་བ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཤར་ལ་སོགས་པ་ཕྱོགས་ཀྱི་འདབ་མ་རྣམས་ལ་ཟླ་བའི་དཀྱིལ་འཁོར་ལ་གནས་པའི་
[138b.3]ཨོཾ་ཏཱ་རེ་ཏུ་རེའི་ཡི་གེ་རྣམས་སོ། །ཤར་ལ་སོགས་པའི་ཕྱོགས་ཀྱི་སྒོ་རྣམས་ལ་ཉི་མ་ལ་གནས་པའི་ཏཱ་རེ་ཏུ་རེའི་ཡི་གེ་རྣམས་སོ། །སྟེང་དུ་ཉི་མའི་དཀྱིལ་འཁོར་ལ་གནས་པའི་སྭཱ་ཡིག་གོ། །འོག་ཏུ་ཉི་མའི་དཀྱིལ་འཁོར་ལ་གནས་པའི་ཧཱ་ཡིག་གོ། །དེའི་ས་བོན་གྱི་ཡི་གེ་རྣམས་ཡོངས་སུ་གྱུར་པ་ལས་མཚན་མ་ས་
[138b.4]བོན་གྱི་སྙིང་པོ་ཅན་བསྒོམས་ནས། །དེའི་འོད་ཟེར་གྱིས་སྤྲོ་བ་དང་། བསྡུ་བ་བྱས་ནས་དེའི་ས་བོན་དང་མཚན་མ་ཡོངས་སུ་གྱུར་པ་ལས་ལྷ་མོ་རྣམས་ཏེ། ལྷ་མོ་བཅུ་ནི་ས་བཅུ་ཡི། །རང་བཞིན་ཉིད་དུ་ཤེས་པར་བྱ། །རྡོ་རྗེ་སྐྱིལ་ཀྲུང་རྣལ་འབྱོར་མ། །ཞལ་གཅིག་པ་ལ་ཕྱག་གཉིས་པ། །ཤར་སྒོར་སྒྲོལ་མ་སྐུ་
[138b.5]མདོག་དཀར། །ཟླ་བ་ལ་གནས་རྒྱན་གྱིས་བརྒྱན། །ཕྱག་ན་མེ་ཏོག་ཕྲེང་བ་བསྣམས། །ཨོཾ་ཡིག་ལས་བྱུང་བསྒོམ་པར་བྱ། །ལྷོ་ཕྱོགས་བདུག་སྤོས་སྒྲོལ་མ་ནི། །ཟླ་ལ་ཏཱཾ་ཡིག་ལས་བྱུང་གནག །ཕྱག་ན་སྤོས་ཀྱི་སྡོང་བུ་བསྣམས། །རྒྱན་རྣམས་ཀྱིས་ནི་རྣམ་པར་བརྒྱན། །ནུབ་ཏུ་མར་མེའི་སྒྲོལ་མ་ནི། །སྐུ་
[138b.6]མདོག་སེར་མོ་ལེགས་པར་བརྒྱན། །མར་མེའི་སྡོང་བུ་ཕྱག་ན་བསྣམས། །ཟླ་བ་རེ་ཡིག་ལས་བྱུང་མ། །བྱང་དུ་དེ་བཞིན་དྲིའི་སྒྲོལ་མ། །ཟླ་བ་ཏུ་ཡིག་ལས་བྱུང་མ། །ཕྱག་ན་དྲི་ཡི་དུང་ཆོས་བསྣམས། །སྐུ་མདོག་དམར་མོ་ལེགས་པར་བརྒྱན། །མི་བསྐྱོད་ལ་སོགས་དབྱེ་བ་ཡི། །རྡོ་རྗེ་འཁོར་ལོ་དེ་བཞིན་དུ། །
[138b.7]པང་དུ་དེ་ཡི་ཁ་དོག་དབྱེ། །དེ་ནས་སྒོ་སྐྱོང་མ་རྣམས་བསྒོམ། །ཉི་མ་ལ་གནས་རྒྱན་ཀུན་ལྡན། །ཤར་གྱི་སྒོ་རུ་ལྕགས་ཀྱུ་མ། །ཏྟཱ་ཡིག་ས་བོན་ལས་བྱུང་དཀར། །ཕྱག་གཡས་ན་ནི་ལྕགས་ཀྱུ་བསྣམས། །གཡོན་པ་བདུད་ལ་སྡིགས་མཛུབ་མཛད། །ལྷོ་ན་ཞགས་པ་སེར་མོ་སྟེ། །རེ་ཡིག་ས་བོན་ལས་བྱུང་མ། །
[139a]
[139a.1]ཞགས་པ་དང་བཅས་སྡིགས་མཛུབ་ཕྱག །དཀྱིལ་འཁོར་དམར་པོ་ལ་བརྟེན་མ། །ནུབ་ཏུ་ལྕགས་སྒྲོག་དམར་མོ་སྟེ། །ཏུ་ཡིག་ས་བོན་ལས་བྱུང་མ། །རྡོ་རྗེ་ཕྲེང་བ་སྡིགས་མཛུབ་ཕྱག། །རྡོ་རྗེ་དཀྱིལ་འཁོར་ལ་གནས་མ། །བྱང་དུ་ལྗང་གུ་དྲིལ་བུ་མ། །རེ་ཡིག་ས་བོན་ལས་བྱུང་མ། །ཕྱག་
[139a.2]ན་རྡོ་རྗེ་དྲིལ་བུ་བསྣམས། །གཡོན་པ་སྡིགས་མཛུབ་འོད་ལ་གནས། །མཚམས་ཀྱི་ཆ་ལ་མཚན་མ་རྣམས། །མཱ་མ་ཀཱི་སོགས་རྣམ་དག་པའི། །བྱང་ཆུབ་སེམས་ཀྱི་བུམ་པ་དང་། །རི་རབ་མེ་ཐབ་རྒྱལ་མཚན་ཆེ། །སྟེང་དུ་གཙུག་ཏོར་རྣམ་རྒྱལ་མ། །ཉི་མ་སྭཱ་ཡིག་ལས་བྱུང་མ། །དཀར་མོ་རྡོ་རྗེ་དཀར་པོ་
[139a.3]བསྣམས། །གཡོན་པ་དགྲ་ལ་སྡིགས་མཛུབ་ཅན། །ཉི་མ་ཧཱ་ཡིག་ལས་བྱུང་བའི། །སྔོན་མོ་སྦྲུལ་གྱི་ཞགས་པ་བསྣམས། །ཕྱག་གཡོན་སྡིགས་མཛུབ་མི་བཟད་མ། །འོག་ཏུ་གནོད་མཛེས་མ་བསྒོམ་བྱ། །མིག་སོགས་ཐམས་ཅད་བྱིན་བརླབས་ནས། །གཏི་མུག་རྡོ་རྗེ་སྤྱན་ལ་དགོད། །ཞེ་སྡང་རྡོ་རྗེ་
[139a.4]སྙན་དག་ལ། །ཤངས་ལ་དེ་བཞིན་སེར་སྣ་སྟེ། །ཞལ་ལ་འདོད་ཆགས་རྡོ་རྗེ་མ། །སྐུ་ལ་ཕྲག་དོག་རྡོ་རྗེ་མ། །ཡིད་ལ་རྣལ་འབྱོར་བདག་མེད་མ། །ཞེས་པས་མིག་ལ་སོགས་པ་བྱིན་གྱིས་བརླབ་པར་བྱས་ནས། སྐུ་གསུང་ཐུགས་བྱིན་གྱིས་བརླབ་པ་ནི། ཨོཾ་ཡིག་གིས་སྐུ་བྱིན་གྱིས་བརླབ་པར་བྱའོ། །ཨཱཿ
[139a.5]ཡིག་གིས་གསུང་བྱིན་གྱིས་བརླབ་པར་བྱའོ། །ཧཱུཾ་ཡིག་གིས་ཐུགས་བྱིན་གྱིས་བརླབ་པར་བྱའོ། །དེ་ནས་ལྷ་མོ་ཐམས་ཅད་ཀྱི་ཐུགས་ཀར་ཟླ་བའི་དཀྱིལ་འཁོར་ལ་གནས་པའི་རང་རང་གི་ས་བོན་བལྟ་བར་བྱའོ། །དེའི་འོད་ཟེར་གྱིས་ཡེ་ཤེས་སེམས་དཔའི་དཀྱིལ་འཁོར་གདན་དྲངས་ཏེ། མེ་ཏོག་སྒྲོལ་མ་
[139a.6]ལ་སོགས་པའི་ལྷ་མོ་རྣམས་སྤྲོས་ནས་མཆོད་པ་ཐམས་ཅད་ཀྱིས་མཆོད་པར་བྱའོ། །དེ་ནས་ཡེ་ཤེས་སེམས་དཔའི་དཀྱིལ་འཁོར་ལ་སྒོ་སྐྱོང་མ་རྣམས་ཀྱིས་རབ་ཏུ་སྦྱོར་བས་དམ་ཚིག་སེམས་དཔའི་དཀྱིལ་འཁོར་ལ་རབ་ཏུ་གཞུག་པར་བྱའོ། །ཨོཾ་བཛྲ་ཨཾ་ཀུ་ཤ་ཨཱ་ཀཪྵ་ཡ་ཛཿ ཨོཾ་བཛྲ་པཱ་ཤ་པྲ་བེེ་ཤ་ཡ་ཧཱུཾ།
[139a.7]ཨོཾ་བཛྲ་སྥོ་ཊ་བནྡྷ་ཡ་བཾ། ཨོཾ་བཛྲཱ་བེ་ཤ་བ་ཤིཾ་ཀུ་རུ་ཧོཿདེ་ནས་རང་གི་སྙིང་གའི་ས་བོན་ལས་བྱུང་བའི་འོད་ཟེར་གྱིས་ཁམས་གསུམ་ན་བཞུགས་པའི་སངས་རྒྱས་རྣམས་གདན་དྲངས་ནས་ཡུམ་རྣམས་ཀྱིས་ཡང་དག་པར་མཆོད་ནས་རྗེས་སུ་མགོན་བྱེད་པ་སྟེ། ཨ་བྷི་ཥྀཉྩནྟུ་མཱཾ་སརྦ་ཏ་ཐཱ་ག་ཏ་བུདྡྷ་ཛྙཱ་ནེེ་ན་ཞེས་སོ། །
[139b]
[139b.1]དེ་ནས་སངས་རྒྱས་ཧེ་རུ་ཀའི་གཟུགས་ཀྱིས་བདུད་རྩི་ལྔ་ལས་བྱུང་བའི་དེ་བཞིན་གཤེགས་པ་ལྔའི་བདག་ཉིད་ཀྱི་བུམ་པ་ལྔས་དབང་བསྐུར་ནས། དབང་བསྐུར་བའི་དུས་སུ་མེ་ཏོག་དང་གུར་གུམ་གྱི་ཆར་འབབ་ཅིང་རྔ་བོ་ཆེའི་སྒྲ་ལ་སོགས་པ་འབྱུང་བ་དང་། ལྷ་རྣམས་ཀྱིས་མཆོད་ཅིང་བསྟོད་པར་ཡང་འགྱུར་རོ། །དབང་
[139b.2]བསྐུར་བས་རིན་ཆེན་འབྱུང་ལྡན་གྱིས་དབུ་བརྒྱན་པའོ། །སྙིང་པོའི་དབུས་སུ་ལྷ་མོ་རྣམས་ཀྱི་རིམ་པ་ཇི་ལྟ་བ་བཞིན་དུ་དེ་བཞིན་གཤེགས་པ་རྣམ་པར་སྣང་མཛད་དང་། མི་བསྐྱོད་པ་དང་། འོད་དཔག་མེད་དང་། དོན་ཡོད་གྲུབ་པ་རྣམས་སྒོ་སྐྱོང་མ་རྣམས་ལ་དབུ་རྒྱན་དུ་འགྱུར་རོ། །གཙུག་ཏོར་མ་ལ་རིན་ཆེན་དབང་
[139b.3]པོའོ། །གནོད་མཛེས་ལ་མི་བསྐྱོད་པས་དབུ་བརྒྱན་པའོ། །དེ་ནས་བཅོམ་ལྡན་འདས་མའི་སྤྲུལ་པའི་སྐུས་ཕྱོགས་ཐམས་ཅད་དུ་སེམས་ཅན་ཐམས་ཅད་ཀྱི་དོན་མཛད་པར་བལྟ་ཞིང་སྔགས་བཟླས་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། སྔགས་མཆོག་འདི་ནི་རབ་མཆོག་སྟེ། །སངས་རྒྱས་ཀུན་གྱིས་ཕྱག་བྱས་
[139b.4]པ། །བཀླགས་པ་ཡིས་ནི་དངོས་གྲུབ་བྱེད། །གསལ་པོར་རྡོ་རྗེ་གུར་ལས་གསུངས། །དེ་ནས་གཟུངས་སྔགས་གཞན་ཡང་། ན་མོ་ཨཱརྱཱ་བ་ལོ་ཀི་ཏེ་ཤྭ་ར་ཡ་བོ་དྷི་སཏྭཱ་ཡ་མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏ་དྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཱན་པྲ་དུཥྚཱན་མ་མ་ཀྲྀ་ཏེ་ཛཾ་བྷ་ཡ་སྟཾ་བྷ་ཡ་མོ་ཧ་ཡ་བནྡྷ་ཡ་ཧཱུཾ་ཧཱུཾ་ཧཱུཾ་ཕཊ་
[139b.5]ཕཊ་ཕཊ་སརྦ་དུཥྚཱན་སྟཾ་བྷ་ནི་ཏཱ་རེ་སྭཱ་ཧཱ། རྡོ་རྗེ་སྒྲོལ་མའི་སྒྲུབ་ཐབས་རྫོགས་སོ།། །།པཎྜི་ཏ་ཆེན་པོ་ཆོས་འབྱུང་བློ་གྲོས་ཞབས་ཀྱིས་མཛད་པའོ།། །།{T3490}༄༅༅། །རྒྱ་གར་སྐད་དུ། བཛྲ་ཏཱ་རཱ་སཱ་དྷ་ནཾ། བོད་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །ཕུན་
[139b.6]སུམ་ཚོགས་པ་ཀུན་འཕེལ་བའི། །སྒྲོལ་མ་ལ་ནི་གུས་ཕྱག་འཚལ། །མན་ངག་ཇི་བཞིན་བསྡུས་ནས་ནི། །དེ་ཡི་སྒྲུབ་ཐབས་བྲི་བར་བྱ། །དང་པོར་རེ་ཞིག་རྣལ་འབྱོར་པས། མེ་ཏོག་ཤིན་ཏུ་དྲི་ཞིམ་པོ་ལ་སོགས་པ་ཡིད་དུ་འོང་བའི་བསམ་གཏན་གྱི་ཁང་པ་ལ་སོགས་པར་ཞུགས་ནས་སྟན་བདེ་བ་ལ་རྡོ་རྗེ་སྐྱིལ་
[139b.7]ཀྲུང་བཅིངས་ཏེ། རང་གི་སྙིང་གར་ཏཱཾ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཏཱཾ་ཡིག་སེར་པོ་ལས་རྡོ་རྗེའོ། །དེའི་འོད་ཟེར་གྱིས་ནམ་མཁའི་ཕྱོགས་སུ་བཅོམ་ལྡན་འདས་མའི་འཁོར་ལོ་བལྟ་ཞིང་གདན་དྲངས་ནས་མངོན་དུ་བྱས་ཏེ། རང་གི་སྙིང་གའི་ས་བོན་ལས་བྱུང་བའི་མེ་ཏོག་མ་
[140a]
[140a.1]ལ་སོགས་པའི་ལྷ་མོ་རྣམས་སྤྲོས་ཏེ། མེ་ཏོག་ལ་སོགས་པ་རྣམས་ཀྱིས་མཆོད་པར་བྱའོ། །དེ་ནས་བཅོམ་ལྡན་འདས་མའི་འཁོར་ལོ་དེའི་མདུན་དུ་སྡིག་པ་བཤགས་པ་ལ་སོགས་པ་བྱའོ། །སྡིག་པ་ཐམས་ཅད་བདག་གིས་སོ་སོར་བཤགས་སོ། །སངས་རྒྱས་དང་བྱང་ཆུབ་སེམས་དཔའ་དང་
[140a.2]འཕགས་པ་སོ་སོའི་སྐྱེ་བོ་ཐམས་ཅད་ཀྱི་དགེ་བ་ཐམས་ཅད་ལ་རྗེས་སུ་ཡི་རང་ངོ་། །བདག་གིས་དགེ་བ་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་སུ་ཡོངས་སུ་བསྔོ་བར་བགྱིའོ། །འདིར་བདག་བྱང་ཆུབ་མ་ཐོབ་ཀྱི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །ཡང་
[140a.3]དག་པའི་ཆོས་རྣམས་ཀྱི་མཆོག་ཐེག་པ་ཆེན་པོའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་བྱང་ཆུབ་སེམས་དཔའ་ཕྱིར་མི་ལྡོག་པའི་ཚོགས་ལ་སྐྱབས་སུ་མཆིའོ། །ཀྱེ་མ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་སེམས་ཅན་གྱི་དོན་དང་
[140a.4]ཕན་པ་དང་། བདེ་བའི་ཕྱིར་ཇི་སྲིད་ཤིན་ཏུ་མི་གནས་པའི་མྱ་ངན་ལས་འདས་པའི་དབྱིངས་རྫོགས་པའི་བྱང་ཆུབ་ལ་རབ་ཏུ་དགོད་ཅིང་དྲང་བའི་ཕྱིར་འདིར་བདག་བླ་ན་མེད་པ་ཡང་དག་རྫོགས་པའི་བྱང་ཆུབ་ཀྱི་ལམ་ལ་བརྟེན་པར་བགྱིད་དེ། འདི་ལྟར་རྡོ་རྗེའི་ཐེག་པའོ། །དེ་ནས་གསུམ་ལ་སྐྱབས་སུ་འགྲོ་
[140a.5]བའི་ཚིགས་བཅད་བརྗོད་པར་བྱའོ། །དེ་ནས་སེམས་ཅན་ཐམས་ཅད་ལ་བདེ་བ་ཉེ་བར་སྡུད་པར་བྱེད་པ་ནི་བྱམས་པའོ། །སྡུག་བསྔལ་ཐམས་ཅད་སེལ་བར་བྱེད་པ་ནི་སྙིང་རྗེའོ། །མཐོ་རིས་ཀྱི་བདེ་བ་རྣམ་པར་སྦྱོར་བ་ངེས་པར་བྱེད་པ་ནི་དགའ་བའོ། །ཉོན་མོངས་པའི་གཉེན་པོའི་ཕྱོགས་ཀྱི་ལམ་ཉེ་བར་སྡུད་
[140a.6]པའི་བཏང་སྙོམས་རྣམས་བསྒོམ་པར་བྱའོ། །དེ་ནས་ཆོས་ཐམས་ཅད་ལ་ཡིད་ཀྱིས་དམིགས་ཏེ་རྣམ་པར་སྤྱད་པར་བྱའོ། །བསམ་པ་དེ་བཞིན་དུ་འདིར་དེ་དང་དེའི་རྣམ་པས་འཁྲུལ་པ་རྣམས་སོ་སོར་བསལ་ཏེ་དཔེར་ན་རྨི་ལམ་གྱི་སེམས་ལས་ཕྱི་རུ་ཡོད་པ་ལྟ་བུའོ། །སེམས་ཀྱི་ཕྱི་རོལ་དུ་གཟུང་བ་རང་
[140a.7]བཞིན་མེད་པས་འཛིན་པའི་སེམས་ཀྱང་རང་བཞིན་མེད་པར་འགྱུར་རོ། །དེ་ལ་སེམས་དང་ལུས་ཀྱི་ཆོས་ཐམས་ཅད་དེ་རྣམས་ཀྱིས་གཟུང་བ་དང་འཛིན་པ་སྟོང་པ་ཉིད་ཀྱི་དོན་དམ་པ་ཞེས་བྱའོ། །དེ་བཞིན་དུ་གཅིག་གི་མཐའ་ཡང་ངེས་པ་དང་འཁྲུལ་པ་ཡང་དག་པར་སྐྱེ་བ་འཁྲུལ་པའི་རྟགས་ཆོས་ཐམས་ཅད་
[140b]
[140b.1]ཀྱི་རྣམ་པར་སྤོང་བ་དེ་རྣམས་ཀྱི་རང་བཞིན་དེ་བཞིན་ཉིད་འབའ་ཞིག་པ་གཉིས་སུ་མེད་པ་དག་ཅིང་མཚན་ཉིད་ཤེལ་དག་པ་ལྟ་བུ་སྟོན་ཀའི་དྲི་མ་མེད་པའི་ཉིན་གུང་གི་ནམ་མཁའ་ལྟ་བུ་མཐའ་ཡས་པ་བལྟ་བར་བྱའོ། །འདིར་འཇིག་རྟེན་ལས་འདས་པའི་སྟོང་པ་ཉིད་ཀྱི་ཡེ་ཤེས་སྤྲོས་པ་དང་བྲལ་བ་རྣམ་པར་མི་རྟོག་
[140b.2]པར་གསུངས་སོ། །དེ་ནས་དེའི་སྔགས་ཀྱིས་བྱིན་གྱིས་བརླབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། བསྙེན་པ་ནི་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་བསྙེན་པའི་ཆོ་ག་བསྲུང་བར་བྱའོ། །དེ་ནས་དེའི་མི་འཇིགས་པར་འགྱུར་བའི་རྣམ་པ་དང་ལྡན་པ་བསྲུང་ཤིང་དག་པ་འཇིག་རྟེན་
[140b.3]པའི་ཡེ་ཤེས་ཀྱི་རང་བཞིན་བསྒོམ་པར་བྱའོ། །དེ་ནས་ར་ཡིག་ལས་ནི་ཉི་མ་བདུན་དུ་བསྒོམ། །ཉི་མར་ཧཱུཾ་ཡིག་ལས་བྱུང་སྣ་ཚོགས་རྡོར། །དེ་ཡིས་དེ་བཞིན་རྡོ་རྗེ་རྣམ་བསྒོམས་ནས། །ར་བ་དང་ནི་གུར་ཡང་བཅིང་བར་བྱ། །སྣ་ཚོགས་རྡོ་རྗེའི་འོད་ཀྱིས་བསྐལ་པའི་མེ་ལྟར་བཟོད་པར་དཀའ་བས་ཐམས་ཅད་དུ་
[140b.4]འཕྲོ་ཞིང་མཁྲེགས་པར་འགྱུར་བས་སྤྲས་པའོ། །འཕྲེད་དུ་གྲུ་བཞི་པ་འབར་བཞིན་པའི་རྡོ་རྗེའི་ར་བའོ། །སྟེང་དུ་རྡོ་རྗེའི་གུར་རོ། །འོག་ཏུ་རྡོ་རྗེའི་རང་བཞིན་གྱི་ས་གཞིས་རོ་གདན་གྱི་འོག་ཀུན་དུ་རྣམ་པར་སྤྲས་པར་བལྟ་བར་བྱའོ། །དེ་ནས་ཉི་མ་དང་སྣ་ཚོགས་རྡོ་རྗེ་དག་ལས་འོད་ཟེར་བྱུང་ནས་ཕྱོགས་སུ་འཕྲོ་
[140b.5]ཞིང་མཁྲེགས་པར་གྱུར་པས་ཕྱི་རུ་སྒོའི་མཚམས་བཅིང་བར་བྱའོ་ཞེས་པ་ནི་ཚིགས་སུ་བཅད་པའི་དོན་ཏོ། །དེའི་དབུས་སུ་ནམ་མཁར་འབྱུང་བ་ཆེན་པོའི་རང་བཞིན་ཆོས་འབྱུང་ཞེས་བཤད་པ་རྡོ་རྗེ་ཆེན་པོ་འཛིན་པའི་རང་བཞིན་སྟོན་ཀའི་ཟླ་བ་ལྟར་དཀར་བ་སྨད་ཕྲ་ཞིང་སྟེང་ཡངས་པ་ཟུར་གསུམ་པ་ནམ་མཁའི་
[140b.6]རང་བཞིན་ནོ། །དེའི་དབུས་སུ་སྣ་ཚོགས་ཆུ་སྐྱེས་ཀྱི་ཟེའུ་འབྲུ་ལ་གནས་པའི་སྣ་ཚོགས་རྡོ་རྗེ་ཆེན་པོའོ། །དེའི་སྟེགས་བུ་ལ་འབྱུང་བ་ཆེན་པོ་བཞི་ལས་གྲུབ་པའི་དཀྱིལ་འཁོར་གྱི་རྣམ་པ་བཞི་པོ་ལྷ་མོ་བཞིའི་རང་བཞིན་རྣམས་ནི་སྟེང་དུ་ཡོངས་སུ་བལྟ་བར་བྱའོ། །དེ་ལ་དང་པོ་ཡཾ་ཡིག་ལས་རླུང་གཞུའི་རྣམ་པ་
[140b.7]ནག་པོ་དུ་བའི་མདོག་ལྟ་བུ་རྩེ་མོ་གཉིས་ལ་གཡོ་བའི་བ་དན་གྱིས་བརྒྱན་པའོ། །དེ་ནས་རཾ་ཡིག་ལས་མེ་གྲུ་གསུམ་དམར་པོ་ཟུར་རྣམས་རཾ་ཡིག་གིས་མཚན་པའོ། །དེ་ནས་བཾ་ཡིག་ལས་ཆུ་དཀར་པོ་ཟླུམ་པོ་བུམ་པས་མཚན་པའོ། །དེ་ནས་ལཾ་ཡིག་ལས་དབང་ཆེན་གྱི་དཀྱིལ་འཁོར་གྲུ་བཞི་སེར་པོ་ཟུར་རྣམས་སུ་རྡོ་རྗེ་
[141a]
[141a.1]རྩེ་གསུམ་པས་མཚན་པའོ། །དེའི་སྟེང་དུ་བྷཱུཾ་ཡིག་ལས་སྐྱེས་པའི་འཁོར་ལོའོ། །དང་པོ་ནི་དེ་ལས་ངོ་བོ་ཉིད་ཀྱི་ལྷ་འཇིག་རྟེན་ལས་འདས་པའི་ཡེ་ཤེས་ཉིད་ཀྱིས་ཁྱབ་ཅིང་གནས་པ། དེ་ནས་སྣ་ཚོགས་རྡོ་རྗེའོ། །སྟེགས་བུའི་དབུས་སུ་འབྱུང་བ་ཆེན་པོ་བཞི་ཡོངས་སུ་གྱུར་པ་ལས་སྐྱེས་པ་
[141a.2]ཡོངས་སུ་དག་པའི་སངས་རྒྱས་ཀྱི་ཞིང་བསྡུས་པའི་གཟུགས་ཐར་པའི་གྲོང་ཁྱེར་ཆེན་པོ་རྣམ་པར་སྣང་མཛད་ཀྱི་རང་བཞིན་རིན་པོ་ཆེ་སྣ་ཚོགས་པའི་རང་བཞིན་གྱི་གཞལ་ཡས་ཁང་གྲུ་བཞི་སྒོ་བཞི་པ། ཀ་བ་བརྒྱད་ཀྱིས་ཉེ་བར་མཛེས་པའི། སྟེགས་བུ་བཞིས་ཡོངས་སུ་བསྐོར་བ། རྟ་བབས་བཞིས་བརྒྱན་པ།
[141a.3]དྲ་བ་དང་། དྲ་བ་ཕྱེད་པ་དང་། དར་དཔྱངས་དང་། མེ་ཏོག་གི་ཕྲེང་བ་དང་། བླ་རེ་དང་། མེ་ལོང་དང་། རྔ་ཡབ་ཀྱིས་མཛེས་པ། རྡོ་རྗེའི་སྲད་བུ་ལས་འཕྲོས་པའི་སངས་རྒྱས་ཀྱི་ཚོགས་ཀྱི་འོད་ཟེར་གྱིས་སེམས་གཡོ་བའི་བ་དན་གྱི་རྩེ་མོ་ལ་དྲིལ་བུའི་སྒྲ་སྣ་ཚོགས་ཕྱོགས་ཀུན་ཏུ་འཁྲོལ་བ། ལྷ་མོ་མཆོག་གིས་འདོད་
[141a.4]པ་ལྔ་པོ་ཉེ་བར་འབུལ་བས་མཉེས་པར་མཛད་པའོ། །འཁོར་ལོ་གཉིས་ཏེ། གེ་སར་དང་བཅས་པ་བསྒོམ་པར་བྱ་བ་གཅིག་པ་དང་། གཞན་ནི་ཟུར་གསུམ་པ་དྲན་པར་བྱའོ། །དེའི་དབུས་སུ་ཡོན་ཏན་ཉིས་འགྱུར་ཨཱ་ལི་ཡོངས་སུ་གྱུར་པ་ལས་ཟླ་བའོ། །དེའི་སྟེང་དུ་ཏཱཾ་ཡིག་ཡོངས་སུ་གྱུར་པ་ལས་རྡོ་རྗེའོ། །དེའི་
[141a.5]ལྟེ་བ་ལ་ཏཱཾ་ཡིག་གོ། །དེ་ནས་ཡང་ཡོན་ཏན་ཉིས་འགྱུར་ཌ་ཌྷ་ད་དྷ་ཡ་ལ་དང་ལྡན་པའི་ཡོན་ཏན་ཉིས་འགྱུར་ཀཱ་ལི་ཡོངས་སུ་གྱུར་པ་ལས་ཉི་མའོ། །གཉིས་པོ་སྦྱོར་བ་ནི་བདེ་བ་ཆེན་པོའི་མཆོག་ཏུ་དགའ་བ་མེ་ལོང་ལྟ་བུའི་ཡེ་ཤེས་དང་ལྡན་པ་ནི་ཟླ་བའོ། །མཉམ་པ་ཉིད་དང་ལྡན་པའི་ཉི་མ་དང་། ས་བོན་གྱི་རྟགས་
[141a.6]ལས་རང་གི་ལྷ་ནི་སོ་སོར་རྟོག་པ་ཞེས་བརྗོད་དོ། །བྱ་བ་ཐམས་ཅད་གཅིག་ཏུ་གྲུབ་ཅིང་རྫོགས་པ་དང་། དག་པའི་ཆོས་ཉིད་དོ་ཞེས་པ་ནི་རྣམ་པ་ལྔས་མངོན་པར་བྱང་ཆུབ་པའོ། །དེའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའ་རྣམས་བཀུག་ནས་རང་གི་འདོད་ལྷའི་འཁོར་ལོ་ལ་དེ་བཞིན་དུ་གཞུག་ཅིང་།
[141a.7]ཡང་རྣལ་འབྱོར་པས་མཚན་མ་དང་ས་བོན་ཡོངས་སུ་གྱུར་པ་ལས་ལྷ་མོ་སྒྲོལ་མ་རྣམ་པར་བསྒོམ་པར་བྱ་སྟེ། ཕྱག་བརྒྱད་པ་དང་ཞལ་བཞི་མ། །རྒྱན་ཐམས་ཅད་ཀྱིས་ཀུན་ནས་བརྒྱན། །གསེར་གྱི་མདོག་ཅན་གཞོན་ནུ་མའི། །མཚན་ཉིད་དང་ལྡན་གཟི་བརྗིད་འབར། །སངས་རྒྱས་བཞི་ཡི་ཅོད་པན་ཅན། །རྡོ་རྗེ་
[141b]
[141b.1]ཉི་མས་དབང་བསྐུར་སྐྱེས། །ན་ཚོད་གཞོན་ཞིང་མཛེས་ལྡན་མ། །གསེར་གྱི་རྣ་ཆ་གཡོ་བ་ཅན། །སྣ་ཚོགས་པདྨའི་གདན་ལ་བཞུགས། །འོད་ཟེར་དམར་པོས་རྣམ་པར་བརྒྱན། །རྡོ་རྗེ་ཞགས་པ་དེ་བཞིན་དུང་། །མདའ་བསྟོད་པ་ནི་གཡས་ཀྱི་ཕྱག །རྡོ་རྗེ་ལྕགས་ཀྱུ་ཨུཏྤལ་དང་། །གཞུ་དང་སྡིགས་མཛུབ་དེ་བཞིན་
[141b.2]གཡོན། །རྡོ་རྗེ་སྒྲོལ་བདག་རྣལ་འབྱོར་པས། །སེམས་ཅན་ཀུན་དོན་ཕ་རོལ་ཕྱིན། །རྡོ་རྗེ་སྐྱིལ་ཀྲུང་སྦྱོར་བ་ཡིས། །ས་གསུམ་པོ་ནི་བསྒྲུབ་པར་བྱ། །ཤར་དུ་མེ་ཏོག་སྒྲོལ་མ་སྟེ། །སྐུ་མདོག་དཀར་མོ་ཡིད་འོང་མ། །ཨོཾ་ཡིག་ཡེ་ཤེས་རྫོགས་པ་ཡི། །མེ་ཏོག་ཕྲེང་བ་ཕྱག་ན་བསྣམས། །ཞལ་གཅིག་པ་དང་ཕྱག་
[141b.3]གཉིས་མ། །རྒྱན་རྣམས་ཀུན་གྱིས་རྣམ་པར་བརྒྱན། །ལྷོ་རུ་བདུག་སྤོས་སྒྲོལ་མ་ནི། །སྐུ་མདོག་ནག་མོ་གཟུགས་མཛེས་མ། །རྒྱན་རྣམས་ཀུན་གྱིས་རྣམ་པར་བརྒྱན། །ཕྱག་ན་སྤོས་ཀྱི་སྡོང་པོ་བསྣམས། །ནུབ་ཏུ་མར་མེའི་སྒྲོལ་མ་ནི། །མར་མེའི་སྡོང་བུ་ཕྱག་ན་བསྣམས། །སྐུ་མདོག་སེར་མོ་རྒྱན་
[141b.4]ཆེན་མ། །གསེར་གྱི་རྣ་ཆ་གཡོ་བ་ཅན། །བྱང་དུ་དྲི་ཡི་སྒྲོལ་མ་ནི། །དྲི་ཡི་དུང་ཆོས་ཕྱག་ན་བསྣམས། །ལྷ་མོ་སྐུ་མདོག་དམར་མོ་བརྗིད། །དཀྱིལ་འཁོར་པ་ཀུན་བསྒོམ་པར་བྱ། །ལྕགས་ཀྱུ་ལ་སོགས་དབྱེ་བ་ཡིས། །དེ་ནས་སྒོ་སྐྱོང་མ་རྣམས་བསྒོམ། །ཕྱག་གཡས་ན་ནི་ལྕགས་ཀྱུ་དང་། །གཡོན་པ་
[141b.5]བདུད་ལ་སྡིགས་མཛུབ་མཛད། །ཉི་མའི་དཀྱིལ་འཁོར་དབུས་གནས་པའི། །སྐུ་མདོག་དཀར་མོ་ཡིད་འོང་མ། །ལྕགས་ཀྱུ་མའོ། །ཕྱག་གཡས་ན་ནི་ཞགས་པ་དང་། །གཡོན་པ་གདུག་ལ་སྡིག་མཛུབ་མཛད། །དཀྱིལ་འཁོར་དམར་པོའི་དབུས་གནས་པའི། །སྐུ་མདོག་དཀར་མོ་ཡིད་འོང་མ། །ཞགས་
[141b.6]པ་མའོ། །ཕྱག་གཡས་ན་ནི་ལྕགས་སྒྲོག་བསྣམས། །གཡོན་གྱི་ཕྱག་ནི་སྡིགས་མཛུབ་མཛད། །རྡོ་རྗེ་སྐྱིལ་ཀྲུང་དབུས་གནས་པའི། །སྐུ་མདོག་དམར་མོ་བསྒོམ་པར་བྱ། །རྡོ་རྗེ་ལྕགས་སྒྲོག་མའོ། །རྡོ་རྗེ་དྲིལ་བུ་ཕྱག་ན་བསྣམས། །གཡོན་པ་གདུག་ལ་སྡིགས་མཛུབ་མཛད། །འོད་ཟེར་དཀྱིལ་འཁོར་
[141b.7]དབུས་གནས་པའི། །མར་གད་དང་མཚུངས་ཨུཏྤལ་བསྣམས། །རྡོ་རྗེ་དྲིལ་བུ་མའོ། །ཟུར་ཆ་རྣམས་ཀྱི་མཚན་མ་ནི། །བྱང་སེམས་བུམ་པ་རི་རབ་དང་། །མེ་ཐབ་དང་ནི་རྒྱལ་མཚན་ཆེ། །སྟེང་དུ་གཙུག་ཏོར་རྣམ་རྒྱལ་མ། །སྐུ་མདོག་དཀར་མོ་གཟུགས་མཛེས་མ། །ཕྱག་གཡས་ན་ནི་འཁོར་ལོ་དང་། །
[142a]
[142a.1]གཡོན་པ་གདུག་ལ་སྡིགས་མཛུབ་མཛད། །ཕྱག་གཡས་སྦྲུལ་གྱི་ཞགས་པ་དང་། །གཡོན་པ་གདུག་ལ་སྡིགས་མཛུབ་མཛད། །སྐུ་མདོག་ནག་མོ་འཇིགས་ཆེན་མོ། །འོག་ཏུ་གནོད་མཛེས་མ་བསྒོམ་བྱ། །དེ་ལྟར་བསྒོམ་ཞིང་སྔགས་སྤྲོས་ནས་བཟླས་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་
[142a.2]སྭཱ་ཧཱ། །ཡི་གེ་བཅུ་ཡིས་ལྷ་མོ་བཅུ། །ཕ་རོལ་ཕྱིན་པ་བཅུ་ལ་བརྟེན། །བསྒོམ་པ་རབ་ཏུ་སྦྱོར་བ་ཡིས། །ལས་ཀུན་རབ་ཏུ་གྲུབ་པར་བྱེད། །གཏི་མུག་རྡོ་རྗེ་མིག་ལ་དགོད། །ཞེ་སྡང་རྡོ་རྗེ་རྣ་བ་དག །སེར་སྣ་རྡོ་རྗེ་དེ་བཞིན་སྣ། །ཞལ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ཉོན་མོངས་མུན་པ་ཀུན་
[142a.3]འཇོམས་པའི། །སྐྱེ་མཆེད་རྣམས་སུ་ཤེས་པར་བྱ། །སྙིང་གར་བདག་མེད་རྣལ་འབྱོར་མ། །ཞེས་པ་ནི་མིག་ལ་སོགས་པ་བྱིན་གྱིས་བརླབ་པའོ། །ཞལ་གཅིག་མ་དང་ཕྱག་གཉིས་མ། །སྣ་ཚོགས་གཟུགས་རྣམས་གཡོ་བ་ཡིས། །གྲི་གུག་ཐོད་པ་ཕྱག་ན་བསྣམས། །སྲོག་ནི་སྟེང་དུ་ཡང་དག་གནས།
[142a.4]དེ་ནས་ལུས་ངག་ཡིད་གསུམ་བྱིན་གྱིས་བརླབ་པ་ནི། ཨོཾ་ཡིག་སྐུ་ཡི་རྡོ་རྗེ་ཡིས། །རྒྱལ་པོ་ཆེན་པོ་རྣམ་པར་བརྒྱན། །ཧཱུཾ་ཡིག་ཐུགས་ཀྱི་རྡོ་རྗེ་ཡིས། །རྒྱལ་ཆེན་རྡོར་སེམས་གོ་འཕང་གནས། །ཨཱཿཡིག་མཆོག་གི་དེ་ཉིད་དག །ཇི་ལྟར་རྣམ་སྣང་མཛད་པར་འདོད། །ཀུན་ལ་དེ་བཞིན་ཡུམ་གྱུར་པའི། །
[142a.5]ཡེ་ཤེས་རང་བཞིན་ཐུགས་ཀར་དགོད། །སེམས་དཔའ་ཡེ་ཤེས་སྦྱོར་བ་ཡིས། །སངས་རྒྱས་བྱང་ཆུབ་ཐོབ་པར་འགྱུར། །རང་སྔགས་ཡི་གེ་ལས་བྱུང་བའི། །ཕྱག་རྒྱའི་འཁོར་ལོ་བརྟག་པ་ཡིས། །དཀྱིལ་འཁོར་པ་ཀུན་འབྱུང་བ་ཡི། །སྤྲོ་དང་བསྡུ་བ་བྱས་ནས་ནི། །ནམ་མཁའི་ཁམས་ཀྱི་དབུས་
[142a.6]གནས་པའི། །ཡེ་ཤེས་དཀྱིལ་འཁོར་བསྒོམ་པར་བྱ། །ཡེ་ཤེས་ལྔ་ཡི་ཡོན་ཏན་གྲགས། །སྣ་ཚོགས་གཟུགས་དང་ལྡན་པ་ཡི། །མཆོད་པ་ཀུན་གྱིས་མཆོད་པ་དང་། །མངོན་པར་བསྟོད་པས་མཆོད་པར་བྱ། །སྒོ་སྐྱོང་མ་རྣམས་རབ་སྦྱོར་བས། །ཡེ་ཤེས་ཆུ་བོ་རབ་ཏུ་བསྒྲུབས། །དམ་ཚིག་འཁོར་
[142a.7]ལོར་ཡང་དག་ཞུགས། །ཡེ་ཤེས་འཁོར་ལོ་ཤིན་ཏུ་འབར། །སངས་རྒྱས་ཀུན་མཚུངས་རྣལ་འབྱོར་པས། །གཉིས་མེད་གྱུར་པར་སྐད་ཅིག་ལ། །ཨོཾ་བཛྲཱཾ་ཀུ་ཤི་ཨཱ་ཀཪྵ་ཡ་ཛཿ ཨོཾ་བཛྲ་པཱ་ཤི་པྲ་བེེ་ཤ་ཡ་ཧཱུཾ། ཨོཾ་བཛྲ་སྥོ་ཊི་བནྡྷ་ཡ་བཾ། ཨོཾ་བཛྲཱ་བེ་ཤ་བ་ཤཱི་ཀུ་རུ་ཧོཿརང་གི་སྙིང་གའི་ས་བོན་ལས་བྱུང་བའི་འོད་ཟེར་ལྕགས་
[142b]
[142b.1]ཀྱུའི་རྣམ་པས་ཁམས་གསུམ་ན་བཞུགས་པའི་སངས་རྒྱས་རྣམས་གདན་དྲངས་པ་ཙམ་གྱིས་ཡང་དག་པར་མཆོད་ནས་རྗེས་སུ་མགོན་དུ་བྱེད་པས། ཨོཾ་ཨ་བྷི་ཥིཉྩནྟུ་མཱཾ་སརྦ་ཏ་ཐཱ་ག་ཏ། བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཆེན་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་
[142b.2]དེང་བདག་སྩོལ། །ཞེས་པས་དབང་བསྐུར་བ་ཞུའོ། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་པ་ཡིས་ཕྱག་བྱས་པ། །སངས་རྒྱས་ཀུན་གྱི་གསང་བ་གསུམ། །གནས་གྱུར་བདག་ལ་སྩལ་དུ་གསོལ། །ཞེས་བརྗོད་ནས་སངས་རྒྱས་ཧེ་རུ་ཀའི་གཟུགས་ཀྱིས་བདུད་རྩི་ལྔས་གང་བའི་དེ་བཞིན་གཤེགས་པ་ལྔའི་
[142b.3]བདག་ཉིད་ཀྱི་བུམ་པ་ལྔས་དབང་བསྐུར་ཏེ། དབང་བསྐུར་བའི་དུས་སུ་མེ་ཏོག་གི་ཆར་འབབ་པར་འགྱུར་རོ། །རྔ་བོ་ཆེའི་སྒྲ་འབྱུང་བར་འགྱུར་རོ། །གུར་གུམ་གྱི་ཆར་འབབ་པར་འགྱུར་རོ། །གཟུགས་རྡོ་རྗེ་མ་ལ་སོགས་པ་རྣམས་ཀྱིས་མཆོད་པ་བྱེད་པར་འགྱུར་རོ། །སྤྱན་མ་ལ་སོགས་པ་རྣམས་
[142b.4]ཀྱིས་རྡོ་རྗེའི་གླུ་དང་བསྟོད་པ་བྱེད་པར་འགྱུར་རོ། །དབང་བསྐུར་བ་དང་ལྡན་པའི་སྤྱི་བོར་རྡོ་རྗེ་ཉི་མས་དབུ་བརྒྱན་ཏེ། ཅོད་པན་གྱི་ཕྱོགས་རྣམས་སུ་དེ་བཞིན་གཤེགས་པ་རྣམ་པར་སྣང་མཛད་དང་། མི་བསྐྱོད་པ་དང་། འོད་དཔག་མེད་དང་། དོན་ཡོད་གྲུབ་པ་རྣམས་སོ། །དབུས་ཀྱི་འཁོར་ལོའི་
[142b.5]རིམ་པ་ཇི་ལྟ་བ་བཞིན་དུ་ལྷ་མོ་བཞི་པོ་རྣམས་ཀྱི་ཅོད་པན་ཅན་ནོ། །སྒོ་སྐྱོང་མ་རྣམས་ཀྱི་ཡང་སྟེ། གཙུག་ཏོར་དུ་རིན་ཆེན་དབང་པོ་དང་། གནོད་མཛེས་མ་ལ་མི་བསྐྱོད་པའི་ཅོད་པན་ནོ། །ཞེ་སྡང་རྡོ་རྗེ་ཁྱོད་ལ་འདུད། །གཏི་མུག་རྡོ་རྗེ་ཕྱག་འཚལ་འདུད། །སེར་སྣ་རྡོ་རྗེ་བདག་སྐྲག་པས། །འདོད་
[142b.6]ཆགས་རྡོ་རྗེ་བདག་ལ་སྩོལ། །ང་རྒྱལ་ཆེན་པོ་ཕྲག་དོག་ཆེ། །རྡོ་རྗེ་ཐམས་ཅད་བདག་ལ་སྩོལ། །རྡོ་རྗེ་ཐམས་ཅད་དམ་ཚིག་མགོན། །ལས་རྣམས་ཐམས་ཅད་རབ་ཏུ་སྒྲུབ། །བསྟོད་པའོ། །ལྷ་ཡི་མེ་ཏོག་དམ་པ་འདི། །གཙང་ཞིང་དག་པའི་སྐྱེ་གནས་ཏེ། །བདག་གིས་གུས་པས་ངེས་པར་འབུལ། །
[142b.7]སོ་སོར་བཞེས་ནས་བདག་ལ་སྐྱོབས། །མེ་ཏོག་གོ། །ནགས་ཀྱི་རོ་སོགས་ཡིད་འོང་བ། །དྲི་ལ་སོགས་པའི་བདུག་སྤོས་མཆོག །བདག་གིས་གུས་པས་ངེས་པར་འབུལ། །སོ་སོར་བཞེས་ནས་བདག་ལ་སྐྱོབས། །བདུག་སྤོས་སོ། །བསྲུང་བའི་ཚོགས་དང་དག་པ་དང་། །ཡིད་ཀྱི་མུན་འཇོམས་
[143a]
[143a.1]དགེ་བ་འདི། །བདག་གིས་གུས་པས་ངེས་པར་འབུལ། །སོ་སོར་བཞེས་ནས་བདག་ལ་སྐྱོབས། །མར་མེའོ། །ལྷ་ཡི་དྲི་མཆོག་དམ་པ་འདི། །གཙང་ཞིང་དག་པའི་སྐྱེ་གནས་ཏེ། །བདག་གིས་གུས་པས་ངེས་པར་འབུལ། །སོ་སོར་བཞེས་ནས་བདག་ལ་སྐྱོབས། །དྲིའོ། །དེའི་རྗེས་
[143a.2]སུ་ཡཾ་ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུའི་རྣམ་པ་རྒྱལ་མཚན་གྱིས་མཚན་པའོ། །རཾ་ཡིག་དམར་པོའི་ས་བོན་ལས་བྱུང་བའི་མེའི་དཀྱིལ་འཁོར་ཟུར་གསུམ་གྱི་སྟེང་དུ་ཨ་ཡིག་དམར་པོ་ལས་བྱུང་བའི་པདྨའི་སྣོད་བྷྲཱུཾ་ཨཱཾ་ཛྲཱིཾ་ཁཾ་ཧཱུཾ་གི་ས་བོན་ཡོངས་སུ་གྱུར་པ་ལས་དེའི་ས་བོན་བྱིན་གྱིས་བརླབས་
[143a.3]ནས་དྲི་དང་། ཉི་མ་དང་ཟླ་བ་དང་། སྨན་དང་། ཆུའི་མཚན་ཉིད་གྲངས་ཇི་ལྟར་དེ་བཞིན་གཤེགས་པ་ལྔའི་རང་བཞིན་བདུད་རྩི་ལྔ་གོ་ཀུ་ད་ཧ་ན་ཞེས་པའི་ས་བོན་ལྔ་བསམས་ནས། དེའི་སྟེང་དུ་མཐོ་གང་ཙམ་འཕགས་པའི་ཟླ་བ་ལ་གནས་པའི་ཧཱུཾ་ཡིག་ལས་བྱུང་བའི་རྡོ་རྗེ་ཆེན་པོ་རྩེ་ལྔ་པ་བསྒོམས་ནས།
[143a.4]དེའི་འོག་ཏུ་ཨོཾ་ཡིག་བསམས་ནས་རླུང་གིས་བསྐྱོད་པའི་མེའི་དཀྱིལ་འཁོར། མེའི་སྟེང་དུ་རྡོ་རྗེའི་མེ། དེ་ཐམས་ཅད་སྡུད་པར་བལྟས་ནས་དེའི་རེག་བྱས་ཨོཾ་ཡིག་དང་རྡོ་རྗེ་ཞུ་ནས་དེ་ལ་དེ་བཞིན་དུ་བདུད་རྩི་དང་མར་ཞུ་བ་བཞིན་དུ་རོ་གཅིག་ཏུ་གྱུར་པར་བསམས་ནས། དེའི་སྟེང་དུ་ཏཱཾ་ཡིག་དཀར་
[143a.5]པོའི་འོད་ཟེར་གྱིས་ཁམས་གསུམ་གྱི་ནང་དུ་ཞུགས་ནས་བདུད་རྩི་ཐམས་ཅད་བཀུག་སྟེ། དེའི་ནང་དུ་བྱས་པས་ཆོས་ཀྱི་དབྱིངས་དང་མཚུངས་པ་དེས་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་ཞུགས་ཤིང་ཡེ་ཤེས་ཀྱི་བདུད་རྩི་བཀུག་ནས་དེ་བཞིན་དུ་ལྷན་ཅིག་ཏུ་བྱས་ཏེ། དེའི་སྟེང་དུ་དེ་ཉིད་
[143a.6]གསུམ་བསམས་ནས་དེས་དེ་བཞིན་དུ་མངོན་པར་བསྔགས་ཏེ། དཀྱིལ་འཁོར་པ་ཐམས་ཅད་ཀྱི་ཐུགས་ཀར་དཀྱིལ་འཁོར་གྱི་འཁོར་ལོ་བསམས་ནས་ལྗགས་རྣམས་ལ་ཧཱུཾ་ཡིག་དཀར་པོ་ལས་སྐྱེས་པའི་རྡོ་རྗེ་དཀར་པོ་ནས་འབྲུའི་ཚད་ཙམ་བསམས་ནས་དེའི་བདུད་རྩིས་དཀྱིལ་འཁོར་པའི་བདག་ཉིད་
[143a.7]ཀྱང་མཉེས་པར་བྱའོ། །འདིས་དཀྱིལ་འཁོར་རྫོགས་ནས་ཐུན་མཚམས་གསུམ་དུ་བསྒོམས་ནས་ལྡང་བར་བྱའོ། །རྟག་ཏུ་ལྷའི་གཟུགས་ཀྱིས་གནས་པར་བྱའོ། །དེ་ལ་བཟླས་པའི་སྔགས་ནི་འདིའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། །སྔགས་མཆོག་འདི་ནི་གཙོ་བོ་སྟེ། །སངས་རྒྱས་ཀུན་གྱིས་ཕྱག་བྱས་
[143b]
[143b.1]པ། བཀླགས་པས་དངོས་གྲུབ་མྱུར་དུ་བྱེད། །རྡོ་རྗེ་གུར་ལས་གསལ་པོར་གསུངས། །དེ་ནས་གཞན་ཡང་གཟུངས་ཀྱི་སྔགས་ནི། ན་མོ་རཏྣ་ཏྲ་ཡཱ་ཡ། ནམ་ཨཱརྱཱ་ཝ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ་ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཱན་མ་མ་ཀྲྀ་ཏེ་ཛཾ་བྷ་ཡ། སྟམྦྷ་ཡ། མོ་ཧ་ཡ། བནྡྷ་
[143b.2]ཡ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སརྦ་དུཥྚཱན་སྟམྦྷ་ནི་ཏཱ་རེ་སྭཱ་ཧཱ། ཡི་གེ་བཅུའི་ཆོ་གའི་སྔགས་འདི་གོས་ཀྱི་སྣ་ལ་ལན་བདུན་དུ་མངོན་པར་བསྔགས་ནས་མདུད་པ་བྱས་ན། །འཇིགས་པ་དང་བཅས་པའི་ས་གང་དུ་འགྲོ་ཡང་འཇིགས་པར་མི་འགྱུར་རོ། །སྟག་དང་། ཆོམ་པོ་དང་། ཆུ་སྲིན་དང་། སེང་གེ་དང་། སྦྲུལ་
[143b.3]དང་། མ་ཧེ་དང་། དོམ་དང་། དྲེད་ལ་སོགས་པ་མིང་དྲན་པ་ཙམ་གྱིས་ཞི་ཞིང་འཇིགས་པར་མི་འགྱུར་རོ། །སྔགས་འདིས་ཨུཏྤལ་ལའི་སྦྱིན་སྲེག་བརྒྱ་རྩ་བརྒྱད་བྱས་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཾ་མེ་བ་ས་མ་ནཱ་ཡ་སྭཱ་ཧཱ། ཡང་སྔགས་དེས་དེ་བཞིན་དུ་བྱ་རོག་གི་སྒྲོ་ལ་ལན་སུམ་ཅུ་རྩ་གཉིས་ཡོངས་སུ་
[143b.4]བཟླས་ཏེ་དགྲའི་ཁྱིམ་དུ་སྦས་ན་ཞག་བདུན་ན་སྐྲོད་པར་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་པྲ་ཙ་ལ་ཤཱི་གྷྲཾ་གཱ་མི་ནི་དེ་བ་དཏྟ་ཨུཙྪ་ཊ་ཡ་ཧཱུཾ་ཕཊ། དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷཱ་ནཱཾ་ཀུ་མཱ་རཱི་མ་ཧྱཱ་མུད་བཱ་ཧེ་ན་ཏ་སྱཱཿཔི་ཏཱ་པྲ་ཡཙྪནྟུ་སྭཱ་ཧཱ། མྱོས་བྱེད་གཏུམ་
[143b.5]པོའི་ས་བོན་དང་། །མྱོས་བྱེད་འབྲས་བུ་དེ་བཞིན་དུ། །མྱ་ངན་མེད་ཤིང་མེ་ཏོག་བཅས། །སྦྱིན་སྲེག་སྟོང་ཕྲག་ལྔ་བྱས་ཏེ། །མར་སྦྲང་བུ་རམ་སྦྱིན་སྲེག་ནི། །བུ་མོ་སྒྲུབ་ལ་མཆོག་ཏུ་བསྔགས། །དེ་ནས་ཞག་བདུན་སྦྱོར་བ་ཡིས། །རང་འདོད་བུ་མོ་ཐོབ་པར་འགྱུར། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་
[143b.6]ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷཱི་དྷ་ནཱཾ་སྭསྠཱ་ན་ཏ་ཨཱ་ཀཪྵ་ཡ་མ་མཱནྟི་ཀེ་ཛཿསྔགས་འདིས་རག་ཆུང་གི་ཚེར་མ་རང་བྱུང་གི་མེ་ཏོག་ལ་བསྙུགས་ཏེ་སྦྱིན་སྲེག་སྟོང་ཕྲག་ལྔ་བྱས་ན་འདིས་རྒྱལ་པོའི་བུ་མོ་ཡང་འགུགས་པར་བྱེད་དོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། རང་བྱུང་གི་མེ་ཏོག་གིས་བསྐུས་པའི་
[143b.7]རས་ལ་བཅོམ་ལྡན་འདས་མ་ཞལ་གཅིག་ཕྱག་གཉིས་མ་ལྕགས་ཀྱུ་དང་ཨུཏྤལ་ལའི་ཞགས་པ་ཕྱག་ན་བསྣམས་པ་བྲིས་ལ་དེའི་མདུན་དུ་མཆོད་པ་བྱས་ནས། ལྷ་ཡི་མེ་ཏོག་དམ་པ་འདི། །ཞེས་པ་ལ་སོགས་པས་མཆོད་པར་བྱའོ། །ཕྱིས་བསྒོམ་པ་དང་ལྡན་པས་སྔགས་བཟླས་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་
[144a]
[144a.1]རེ་ཨ་མུ་ཀི་མ་མེ་བ་སི་ཏཾ་སྭ་ཏྣཾ་ཀ་ཐཱ་ཡ་ཧཱུཾ་ཕཊ། སྟོང་ཕྲག་ལྔས་འོང་བར་འགྱུར་ཏེ། ཞགས་པས་མགུལ་པ་བཅིངས་ཤིང་ལྕགས་ཀྱུས་སྙིང་གར་ཕུག་ལ་བཀུག་ནས་བསྒྲུབ་བྱ་རྐང་པའི་འོག་ཏུ་བསམས་ལ་བྲན་མོའི་ཚུལ་གྱིས་སྤྱད་པར་བྱའོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་
[144a.2]ཏེ། སྒྲོལ་མའི་གཟུངས་ལན་བདུན་དུ་མངོན་པར་བསྔགས་ནས་བདག་གི་མིག་གཉིས་ལ་བྱུགས་ནས་རྒྱལ་རིགས་ཀྱི་ནང་དུ་ཞུགས་ན་རྒྱལ་པོ་དང་བཅས་པ་སློབ་མར་འགྱུར་ཞིང་གུས་པར་བྱེད་དོ། །འགལ་བ་སྨྲ་བར་མི་འགྱུར་རོ། །དད་པས་འབུལ་བར་འགྱུར་རོ། །དགའ་བའི་གཏམ་བྱེད་པར་འགྱུར་རོ། །
[144a.3]དེའི་གཡོག་བྱེད་པར་འགྱུར་རོ། །ཁྲོ་བ་ཡང་དབང་དུ་འགྱུར་རོ། །མཐོང་བའི་རྐྱེན་གྱིས་ངོ་མཚར་དུ་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། སྒྲོལ་མའི་གཟུངས་ལན་བརྒྱ་བཟླས་ནས་སྦྲུལ་མགོ་གཉིས་པའི་མགོ་ཐལ་བར་བྱས་ཏེ་བ་དམར་མོའི་མར་ལ་ཨརྐའི་བལ་ལ་སྡོང་བུ་
[144a.4]བྱས་ཏེ་རབ་ཏུ་སྦར་ནས་མིག་སྨན་བྱས་ཏེ། དེའི་མིག་སྨན་དང་། རྡོ་རྗེ་ཉི་མ་དང་རྡོ་རྗེ་ཆོས་དག་ལ་མཉེས་ཤིང་རྟ་མཆོག་གིས་བདུག་པར་བྱའོ། །ཐལ་བ་དང་ལྷན་ཅིག་མིག་སྨན་བྱས་ནས་གང་ལ་རྡོ་རྗེའི་མིག་གིས་བལྟས་པ་དེའི་གལ་ཏེ་པདྨ་གར་དབང་འཛག་པར་མ་གྱུར་ན། དེའི་ཚེ་སྒྲོལ་མ་བདག་
[144a.5]གིས་སངས་རྒྱས་བཅོམ་ལྡན་འདས་བསླུས་པར་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། བྱིས་པ་སོ་མ་སྐྱེས་པའི་ཁ་ཆུ་བླངས་ནས་སྒྲོལ་མའི་གཟུངས་ལན་བདུན་དུ་མངོན་པར་བསྔགས་ཏེ། བྷྲྀངྒ་རཱ་ཛའི་རྩ་བ་དང་གིའུ་ཝང་དང་ལྷན་ཅིག་ཏུ་བྱས་ཏེ་དཔྲལ་བར་ཐིག་ལེ་བྱས་ནས་
[144a.6]གང་དང་གང་ལ་བལྟས་པ་དེ་དང་དེ་དབང་དུ་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ལྟོ་བའི་སྲིན་བུ་ལ་སྒྲོལ་མའི་གཟུངས་ལན་བདུན་དུ་མངོན་པར་བསྔགས་ནས་རྡོ་རྗེ་ཆོས་དང་བཅས་ཏེ་སོ་རྩི་གཞོན་ནུ་མ་ལ་བྱིན་ན་ལོངས་སྤྱད་པ་ཙམ་གྱིས་སྦྱོར་བའི་མཆོག་ཏུ་འགྱུར་རོ། །འདི་མི་
[144a.7]སྤོང་ཞིང་གཞན་ལ་དགའ་བར་མི་འགྱུར་རོ། །གཞན་དུ་མི་འགྲོ་ལ་སྐྱེས་བུ་གཞན་མི་འདོད་དོ། །རང་གི་བདག་པོ་ཡང་སྤོང་བར་མི་བྱེད་དོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཞག་ཆེན་པོ་བདག་ཉིད་ཀྱི་ལུས་ལ་བྱུགས་ཏེ། སྒྲོལ་མའི་གཟུངས་ཁྲི་ཕྲག་གཅིག་བཟླས་ཤིང་བསྒོམས་ཏེ།
[144b]
[144b.1]བཟླས་པའི་མཐའ་ལ་འབྲས་སཱ་ལུའི་ཕྱེ་མས་དྲིལ་ཕྱིས་བྱས་པའི་དྲི་མ་བསྡུས་ཏེ་གང་ལ་བྱིན་པ་དེ་ཇི་སྲིད་འཚོའི་བར་དུ་གཏོང་བར་མི་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཟླ་བ་གཟས་ཟིན་པའི་དུས་སུ་སྒྲོལ་མའི་གཟུངས་བཟླས་ཤིང་བསྙེན་པ་བྱས་ནས་དེ་ལས་ཡང་དག་པར་བྱུང་
[144b.2]བའི་འཇིག་རྟེན་དབང་ཕྱུག་བླངས་ཏེ་དུང་གི་ཕྱེ་མ་དང་བསྲེ་བར་བྱའོ། །དེ་ནས་སྒེག་མོ་ལ་བྱིན་ན་དེ་ཇི་སྲིད་འཚོའི་བར་དུ་རྗེས་སུ་འཇུག་པར་འགྱུར་རོ། །དེ་ལ་དེ་བཞིན་དུ་བདག་པོར་འདོད་ཅིང་གཞན་དུ་མི་འགྲོའོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། སྒྲོལ་མའི་གཟུངས་སྔགས་ཀྱིས་མྱོས་བྱེད་
[144b.3]ཀྱི་འབྲས་བུ་ལ་ལན་བརྒྱ་རྩ་བརྒྱད་ཡོངས་སུ་བཟླས་ཏེ་མྱོས་བྱེད་ཀྱི་འབྲས་བུ་དང་རྟ་མགྲིན་ལྷན་ཅིག་ཏུ་མཉེས་ལ་བྱུགས་ན་དེ་དབང་དུ་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་སྱ་བནྡྷ་ན་མུཀྟི་ཀུཾ་རུ་སྭཱཧཱ། ཞེས་པའི་སྔགས་འདིས་ཨརྐའི་ལོ་མ་ལ་
[144b.4]བསྒྲུབ་བྱའི་མིང་བར་དུ་བཅུག་སྟེ་བྲིས་ནས་སྡིག་པའི་ཚང་དུ་སྦས་ན་དེ་བཅིངས་པ་ལས་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་པའི་ཐབས། །ཡང་དག་བྲིས་ལས་ཉེར་བསགས་པའི། །བསོད་ནམས་གང་དེས་འཇིག་རྟེན་འདི། །བདེ་གཤེགས་གནས་སུ་འཇུག་པར་ཤོག །རྡོ་རྗེ་སྒྲོལ་མའི་སྒྲུབ་
[144b.5]ཐབས་རྫོགས་སོ།། །།པཎྜི་ཏ་ཆེན་པོ་རིན་ཆེན་འབྱུང་གནས་ཞི་བའི་ཞབས་ཀྱིས་མཛད་པའོ། །ལྷ་མཆོད་ཀ་ར་བཱི་རའི་མེ་ཏོག་ལ། །ཐུན་མཚམས་གསུམ་དུ་བརྒྱ་རྩ་བརྒྱད་བཟླས་ནས། །འདོད་པའི་མཆོག་ཉིད་བླང་བྱ་ཟླ་གཅིག་གིས། །འཕགས་མ་སྒྲོལ་མས་ངེས་པར་སྩོལ་བར་མཛད། །ཨོཾ་ཛཾ་
[144b.6]བྷེ་མོ་ཧེ་སྭཱཧཱ།། །།{T3491}༄༅༅། །རྒྱ་གར་སྐད་དུ། ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །ཡོན་ཏན་ཆེན་མོ་ཉེས་པ་མ་ལུས་དང་བྲལ་བ། །རྒྱལ་བའི་ཡུམ་ཆེན་སྒྲོལ་མ་ལ་ནི་ཕྱག་འཚལ་ནས། །དེ་ཡི་སྒྲུབ་ཐབས་གསལ་ཞིང་ཚིག་
[144b.7]བཟང་གུས་པ་ཡིས། །འདིར་ཡང་རང་གི་ཡིད་ཕྱིར་དེ་ཚིག་ཡང་དག་བྲི། །སྔོན་མེད་ཅུང་ཟད་བྲི་མིན་ཏེ། །འོན་ཀྱང་བླ་མའི་གསུང་ལས་ནི། །གང་ཐོས་དེ་ཡང་དྲན་བྱའི་ཕྱིར། །ཡང་དག་བསྡུས་ནས་རབ་ཏུ་བྲི། །དང་པོར་རེ་ཞིག་སྔགས་པས་སྔ་བར་ལངས་ནས་ཞལ་དང་གོས་ལ་སོགས་པ་བཀྲུ་ཞིང་།
[145a]
[145a.1]གཙང་བར་བྱས་ནས་སྐྱེ་བོས་དབེན་ཞིང་ཡིད་དུ་འོང་བའི་ས་ཕྱོགས་སུ་དྲི་བཟངས་ཀྱིས་ཉེ་བར་བྱུགས་ནས་མེ་ཏོག་དྲི་བཟང་པོ་གཅལ་དུ་བཀྲམ་ཏེ། སྟན་བདེ་བ་ལ་ཉེ་བར་འདུག་ནས་རང་གི་སྙིང་གར་དབྱངས་དང་པོ་ཡོངས་སུ་གྱུར་པ་ལས་བསིལ་ཟེར་བྱེད་པའི་དཀྱིལ་འཁོར་རྣམ་
[145a.2]པར་བསམས་ལ། དེའི་དབུས་སུ་ཡིད་དུ་འོང་བའི་ཨུཏྤལ་སྔོན་པོ་དེའི་ཟེའུ་འབྲུ་ལ་རི་བོང་གི་མཚན་མ་དང་བྲལ་བའི་ཟླ་བའི་དཀྱིལ་འཁོར། དེའི་སྟེང་དུ་ཏཱཾ་ཡིག་སེར་པོའི་ས་བོན་བལྟ་བར་བྱའོ། །དེ་ནས་ཡང་ཏཱཾ་ཡིག་སེར་པོའི་ས་བོན་ལས་བྱུང་བའི་འོད་ཟེར་གྱི་ཚོགས་ཀྱིས་འགྲོ་བའི་མ་རིག་པའི་
[145a.3]མུན་པ་འཇོམས་པས་ཕྱོགས་བཅུའི་འཇིག་རྟེན་གྱི་ཁམས་ཀྱི་མཐར་ཐུག་པར་གྱུར་ལ། དེ་ཐམས་ཅད་སྣང་བར་མཛད་ནས་དེ་ལ་བཞུགས་པའི་གྲངས་མེད་ཅིང་དཔག་ཏུ་མེད་པའི་སངས་རྒྱས་དང་བྱང་ཆུབ་སེམས་དཔའ་རྣམས་གདན་དྲངས་ཏེ་ནམ་མཁའི་ཕྱོགས་སུ་བཀོད་ནས། དེའི་རྗེས་ལ་ནམ་
[145a.4]མཁའ་ལ་བཞུགས་པའི་སངས་རྒྱས་དང་བྱང་ཆུབ་སེམས་དཔའ་བརྩེ་བ་ཆེན་པོ་རྣམས་ལ་ལྷའི་མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། དྲིལ་བུ་དང་། བ་དན་ལ་སོགས་པའི་མཆོད་པ་ཆེན་པོ་རྣམས་ཀྱིས་མཆོད་
[145a.5]ནས་སྡིག་པ་བཤགས་པ་ལ་སོགས་པ་བྱའོ། །གང་ཞིག་འཁོར་བ་ཐོག་མ་མེད་པ་ནས་འཁོར་བར་བདག་གི་སྡིག་པའི་ལས་ལུས་དང་ངག་དང་ཡིད་ཀྱིས་བགྱིས་པ་དང་། བགྱིད་དུ་སྩལ་བ་དང་། རྗེས་སུ་ཡི་རང་བར་བགྱིས་པ་དེ་དག་ཐམས་ཅད་བདག་གིས་སོ་སོར་བཤགས་སོ། །ཆོ་ག་འདིས་སོ་སོར་
[145a.6]བཤགས་ནས་སླར་མི་བྱེད་པའི་སྡོམ་པ་སོ་སོར་འཛིན་ཅིང་བསོད་ནམས་ལ་རྗེས་སུ་ཡི་རང་བར་བགྱི་སྟེ། བདེ་བར་གཤེགས་པ་དང་། རང་རྒྱལ་དང་། ཉན་ཐོས་དང་། བྱང་ཆུབ་སེམས་དཔའ་དང་། ལྷ་དང་བཅས་པ་དང་། ཚངས་པ་དང་བཅས་པ་དང་། འཇིག་རྟེན་པ་རྣམས་ཀྱི་དགེ་བ་གང་ལགས་པ་དེ་
[145a.7]ཐམས་ཅད་ལ་རྗེས་སུ་ཡི་རང་ངོ་། །དེའི་རྗེས་ལ་གསུམ་ལ་སྐྱབས་སུ་འགྲོ་བ་ནི། །ཇི་སྲིད་སྙིང་པོ་བྱང་ཆུབ་བར། །སངས་རྒྱས་ལ་ནི་བདག་སྐྱབས་མཆི། །ཇི་སྲིད་སྙིང་པོ་བྱང་ཆུབ་བར། །དམ་པའི་ཆོས་ལ་བདག་སྐྱབས་མཆི། །ཇི་སྲིད་སྙིང་པོ་བྱང་ཆུབ་བར། །དགེ་འདུན་ལ་ནི་བདག་སྐྱབས་མཆི། །ཞེས་སོ། །
[145b]
[145b.1]ཕྱི་ནས་ལམ་ལ་བརྟེན་པ་ནི་དེ་ཡང་བདག་གིས་དེ་བཞིན་གཤེགས་པས་གསུངས་པའི་ལམ་ལ་བརྟེན་པར་བྱའི། གཞན་ལ་ནི་མ་ཡིན་ནོ་ཞེས་སོ། །དེའི་རྗེས་སུ་གསོལ་བ་གདབ་པར་བྱ་སྟེ། འཁོར་བ་ཇི་སྲིད་ཀྱི་བར་དུ་བཅོམ་ལྡན་འདས་དེ་བཞིན་གཤེགས་པ་རྣམས་དང་། དེའི་སྲས་རྣམས་འགྲོ་བའི་དོན་དུ་མྱ་
[145b.2]ངན་ལས་མི་འདའ་བར་བཞུགས་སུ་གསོལ་ལོ། །དེའི་རྗེས་སུ་བསྐུལ་མ་གདབ་པར་བྱ་སྟེ། བཅོམ་ལྡན་འདས་དེ་བཞིན་གཤེགས་པས་གསུངས་པའི་སྐད་ཅིག་གང་ལ་དེ་བཞིན་དུ་འཁོར་བའི་སེམས་ཅན་སྲིད་པར་བཅིངས་པ་རྣམས་གྲོལ་བར་འགྱུར་བ་དེ་ལྟ་བུའི་བླ་ན་མེད་པའི་ཆོས་བསྟན་དུ་གསོལ།
[145b.3]དེའི་རྗེས་སུ་བསོད་ནམས་ཡོངས་སུ་བསྔོ་བར་བྱ་སྟེ། བླ་ན་མེད་པའི་མཆོད་པ་རྣམ་པ་བདུན་གྱི་དགེ་བའི་རྩ་བ་གང་ལ་དེ་བཞིན་དུ་ཉེ་བར་བསགས་པ་དེ་ཐམས་ཅད་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཡང་ན་བསྡུས་ནས་བླ་ན་མེད་པའི་མཆོད་པ་བདུན་མཚོན་པའི་ཚིགས་སུ་བཅད་
[145b.4]པ་འདི་བརྗོད་པར་བྱའོ། །སྡིག་པ་ཐམས་ཅད་བདག་གིས་བཤགས་པར་བགྱི། །དགེ་ལ་མཆོག་ཏུ་དགའ་བས་རྗེས་ཡི་རང་། །བཅོམ་ལྡན་དམ་ཆོས་རིན་ཆེན་རྣམས་ཀྱང་ནི། །སྐྱེ་བོའི་དོན་ཕྱིར་བཞུགས་པར་གསོལ་བ་འདེབས། །དཀོན་མཆོག་རིན་ཆེན་གསུམ་ལ་མངོན་ཉེ་བར། །བྱང་ཆུབ་མ་ཐོབ་
[145b.5]བར་དུ་སྐྱབས་སུ་མཆི། །དམ་པའི་ལམ་ལ་ཡང་དག་བསྟེན་པར་བགྱི། །དགེ་བ་བསྒྲུབས་པ་རྫོགས་པའི་བྱང་ཆུབ་བསྔོ། །ཞེས་པ་འདི་བླ་ན་མེད་པའི་མཆོད་པ་རྣམ་པ་བདུན་གྱིས་མཆོད་པར་བྱའོ། །ཨོཾ་ཨཱཿཧཱུཾ་མུཿཞེས་པས་གཤེགས་སུ་གསོལ་ལོ། །ཡང་ན་རང་བཞིན་གྱི་ཙནྡན་གྱིས་ལུས་བྱུགས་ལ་
[145b.6]བསམ་གཏན་གྱི་གོས་བགོ་བར་བྱའོ། །བྱང་ཆུབ་ཀྱི་ཡན་ལག་གི་མེ་ཏོག་བཀྲམ་ནས་འདིར་ཇི་ལྟར་བདེ་བར་གནས་པར་བྱའོ། །དེའི་རྗེས་ལ་འཆད་པར་འགྱུར་བའི་རིམ་པས་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཞེས་པ་ཚད་མེད་པའི་གནས་བཞི་བསྒོམ་པར་བྱའོ། །དེ་ལ་འདིར་
[145b.7]བྱམས་པ་གང་ཞེ་ན། སེམས་ཅན་ཐམས་ཅད་ལ་བུ་གཅིག་པ་ལྟར་དགའ་བའི་མཚན་ཉིད་དོ། །ཡང་ན་ཕན་པ་དང་བདེ་བས་ཉེ་བར་སྡུད་པར་བྱེད་པའོ། །ཡང་སྙིང་རྗེ་ནི་ཇི་ལྟ་བུ་ཞེ་ན། སྡུག་བསྔལ་དང་སྡུག་བསྔལ་བའི་རྒྱུ་ལས་འདོན་པར་འདོད་པ་སྟེ། བཟོད་པར་མི་ནུས་པའི་སྡུག་བསྔལ་གསུམ་གྱི་མེ་
[146a]
[146a.1]རབ་ཏུ་འབར་བའི་འཁོར་བ་ལྕགས་ཀྱི་བཙོན་རར་ཞུགས་པའི་སྐྱེ་བོ་རྣམས་དེ་ལས་གདོན་པར་འདོད་པའི་ལྷག་པའི་བསམ་པ་ནི་སྙིང་རྗེའོ། །ཡང་ན་སྡུག་བསྔལ་གསུམ་གྱིས་སྡུག་བསྔལ་བའི་སེམས་ཅན་རྣམས་འཁོར་བའི་རྒྱ་མཚོ་ལས་ཡང་དག་པར་གདོན་པར་འདོད་པའོ། །དགའ་བ་ནི་འདི་
[146a.2]ལྟ་བུ་སྟེ། རབ་ཏུ་ཡི་རང་བ་ནི་དགའ་བ་སྟེ། ཡང་ན་མཚུངས་པ་མེད་པའི་སངས་རྒྱས་ཉིད་དང་། དེའི་ཐབས་ལ་དེ་བཞིན་དུ་འཁོར་བའི་སེམས་ཅན་ཐམས་ཅད་བདག་གིས་རབ་ཏུ་དགོད་པར་བྱའོ་ཞེས་པའི་ལྷག་པའི་བསམ་པ་ནི་དགའ་བའོ། །ཡང་ན་ཁམས་གསུམ་པོ་འདི་རྣམས་ཀྱི་དགེ་བའི་རྩ་བ་གང་གིས་དབང་
[146a.3]ཕྱུག་ལ་སོགས་པ་ལ་ལོངས་སྤྱོད་པ་ལ་སེམས་དགའ་བའོ། །བཏང་སྙོམས་གང་ཞེ་ན། ཁོང་ཁྲོ་དང་རྗེས་སུ་བརྩེ་བ་དང་འབྲེལ་པ་སྤངས་ཤིང་ཕན་པ་དང་མི་ཕན་པའི་སྐྱེ་བོ་རྣམས་ལ་མཆོག་ཏུ་ཕན་པའི་སྤྱོད་པ་ནི། བཏང་སྙོམས་སོ། །ཡང་ན་གང་ཞིག་ཐམས་ཅད་ལ་དགའ་བ་དང་རྣམ་པར་འཚེ་བ་དང་བྲལ་
[146a.4]ཞིང་གཞན་ལ་ཕན་པའི་ཆོས་ཉིད་རང་གི་ངང་གིས་འབབ་ཅིང་རབ་ཏུ་འཇུག་པ་ནི་བཏང་སྙོམས་སོ། །ཡང་ན་རྙེད་པ་དང་། མ་རྙེད་པ་དང་། གྲགས་པ་དང་། མ་གྲགས་པ་དང་། བསྟོད་པ་དང་། སྨད་པ་དང་། བདེ་བ་དང་། སྡུག་བསྔལ་བ་ལ་སོགས་པ་འཇིག་རྟེན་གྱི་ཆོས་བརྒྱད་པོ་རབ་ཏུ་སྨོད་པ་ལ་སོགས་
[146a.5]པའི་བྱ་བ་ཐམས་ཅད་ལ་མི་བལྟ་བ་ནི་བཏང་སྙོམས་བསྒོམ་པའོ། །ཚད་མེད་པའི་གནས་བཞི་བསྒོམས་པའི་མཐར་ཆོས་ཐམས་ཅད་ཀྱི་རང་བཞིན་ཡོངས་སུ་དག་པ་བསྒོམ་པར་བྱའོ། །ཆོས་ཐམས་ཅད་ཀྱི་ཆོས་ཉིད་རང་བཞིན་གྱིས་ངོ་བོ་ཉིད་མེད་ཅིང་ཡོངས་སུ་དག་པའོ། །བདག་ཀྱང་རང་བཞིན་གྱིས་
[146a.6]ཡོངས་སུ་དག་པ་ཞེས་པ་ལ་སོགས་པ་མངོན་དུ་བྱས་ནས། འདིར་ཡང་ཆོས་ཐམས་ཅད་རང་བཞིན་གྱིས་ཡོངས་སུ་དག་པའི་སྔགས་འདིས་བྱིན་གྱིས་བརླབ་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུད་དྷོ྅ཧཾ་ཞེས་སོ། །གལ་ཏེ་ཆོས་ཐམས་ཅད་རང་བཞིན་གྱིས་ཡོངས་སུ་དག་པ་ལ་གང་
[146a.7]ལས་འདིར་འཁོར་བའི་སྒྲིབ་པར་གྱུར་ན་གཟུང་བ་དང་འཛིན་པ་ལ་སོགས་པའི་དྲི་མས་བསྒྲིབས་པའི་ཕྱིར་དེ་དང་བྲལ་བའི་ཐབས་ཀྱིས་ལམ་གྱི་བདག་ཉིད་ལ་མཁས་པས་བསྒོམས་པས་དེས་དེ་འགོག་པར་འགྱུར་རོ། །འདི་ལ་ཆོས་ཐམས་ཅད་རང་བཞིན་གྱིས་ཡོངས་སུ་དག་པ་ཞེས་པ་འདི་
[146b]
[146b.1]བསྒྲུབ་བོ། །ཆོས་ཐམས་ཅད་ཀྱི་རང་བཞིན་ཡོངས་སུ་དག་པ་དེ་བསྒོམ་པ་ནི་ཆོས་ཐམས་ཅད་སྟོང་པ་ཉིད་རྣམ་པར་བསྒོམ་པའོ། །དེ་ལ་འདིར་སྟོང་པ་ཉིད་ནི་གཟུང་བ་དང་འཛིན་པ་ལ་སོགས་པའི་རྣམ་པར་རྟོག་པའི་སྤྲོས་པ་མཐའ་དག་བཅོམ་ནས་ངོ་མཚར་བ་གཉིས་སུ་མེད་པའི་སྣང་བ་ཙམ་གྱི་བདག་ཉིད་གཡོ་
[146b.2]བ་དང་མི་གཡོ་བའི་ཁམས་གསུམ་མོ་ཞེས་བསམ་པར་བྱའོ། །འདིར་དེ་བཞིན་དུ་སྟོང་པ་ཉིད་ཀྱི་སྔགས་འདིས་ཀྱང་བྱིན་གྱིས་བརླབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་སོ། །དེའི་རྗེས་སུ་སྔོན་དུ་རང་གི་སྙིང་གར་གནས་པའི་ཟླ་བའི་དཀྱིལ་འཁོར་གྱི་དབུས་སུ་ཡིད་དུ་འོང་བའི་ཨུཏྤལ་
[146b.3]སྔོན་པོའི་ཟེའུ་འབྲུའི་ནང་དུ་གནས་པའི་རི་དྭགས་ཀྱི་མཚན་མ་དང་བྲལ་བའི་ཟླ་བའི་དཀྱིལ་འཁོར་གྱི་སྟེང་དུ་གནས་པའི་ཏཱཾ་ཡིག་སེར་པོའི་ས་བོན་ལས་བཅོམ་ལྡན་འདས་འཕགས་མ་སྒྲོལ་མ་སྟེ། སྐུ་མདོག་མཆོག་གི་ལྗང་གུའོ། །ཕྱག་གཉིས་པ། ཞལ་ཅུང་ཟད་འཛུམ་པ། བླ་ན་མེད་པའི་ཡོན་ཏན་མ་
[146b.4]ལུས་པའི་འབྱུང་གནས་སྐྱོན་ཐམས་ཅད་དང་བྲལ་བའོ། །མཛེས་པའི་གསེར་དང་། ནོར་བུ་དང་། མུ་ཏིག་དང་། རིན་པོ་ཆེ་ལ་སོགས་པའི་རྒྱན་གྱིས་བརྒྱན་པ། ཡིད་དུ་འོང་བའི་དོ་ཤལ་གྱི་ཕྲེང་བ་བརྒྱས་ནུ་མ་ཟུང་ལ་བརྒྱན་པ་མཛེས་པའི་ལག་གདུབ་དང་། དཔུང་རྒྱན་གྱིས་ཕྱག་གཉིས་བརྒྱན་པ།
[146b.5]སྨད་རྒྱན་དྲི་མ་མེད་པའི་ནོར་བུའི་ཚོགས་ཀྱི་འོད་ཟེར་འཕྲོ་བའི་ཕྲེང་བས་སྨད་ཀྱི་ཆ་ཤིན་ཏུ་མཛེས་པ། རིན་པོ་ཆེ་སྣ་ཚོགས་པས་སྤྲས་པའི་ཞབས་གདུབ་ཟུང་ལ་རྣམ་པར་མཛེས་པ། ཡོངས་འདུས་བརྟོལ་ལ་སོགས་པའི་མེ་ཏོག་གི་སྙེ་མའི་ཕྲེང་བའི་ཚོགས་ཀྱིས་སྐྲ་ལ་མཛེས་པར་བཅིངས་པ། བཅོམ་
[146b.6]ལྡན་འདས་དེ་བཞིན་གཤེགས་པ་དོན་ཡོད་གྲུབ་པས་རིན་པོ་ཆེའི་དབུའི་ཕྱོགས་རྣམ་པར་བརྒྱན་པ། ཕུལ་དུ་བྱུང་བའི་བློ་གྲོས་མ། སྐུ་ལ་མཆོག་ཏུ་སྒེག་པའི་འོད་འབར་མ། ན་ཚོད་གཞོན་ནུ་དང་ལྡན་མ། ཤིན་ཏུ་དྲི་མ་མེད་པའི་ཨུཏྤ་ལ་སྔོན་པོའི་སྤྱན་དང་ལྡན་མ། མཛེས་པའི་དར་གོས་ཐམས་ཅད་
[146b.7]ཀྱིས་སྐུ་ལ་བརྒྱན་མ། ཤིང་རྟའི་འཁོར་ལོའི་ཚད་ཙམ་པའི་ཆུ་སྐྱེས་དཀར་པོའི་སྟེང་དུ་བསིལ་ཟེར་བྱེད་པའི་དཀྱིལ་འཁོར་གྱི་སྟེང་དུ་སྐྱིལ་ཀྲུང་ཕྱེད་པས་ཉེ་བར་བཞུགས་པ། ཕྱག་གཡས་པ་མཆོག་སྦྱིན། གཡོན་པ་ཨུཏྤལ་ཁ་བྱེ་བ་བསྣམས་པ། ཡོངས་སུ་རྫོགས་པ་བསམ་པར་བྱའོ། །དེ་ལྟ་བུའི་
[147a]
[147a.1]བཅོམ་ལྡན་འདས་མའི་སྐུ་ཇི་སྲིད་འདོད་པ་དེ་སྲིད་དུ་བསྒོམ་པར་བྱའོ། །དེའི་རྗེས་སུ་འདིར་དེ་ལྟ་བུའི་བཅོམ་ལྡན་འདས་མའི་ཐུགས་ཀར་གནས་པའི་བསིལ་ཟེར་བྱེད་པའི་དཀྱིལ་འཁོར་གྱི་དབུས་སུ་གནས་པའི་ཡིད་དུ་འོང་བའི་ཆུ་སྐྱེས་སྔོན་པོའི་ཟེའུ་འབྲུའི་ནང་དུ་རི་དྭགས་ཀྱི་མཚན་མ་
[147a.2]དང་བྲལ་བའི་ཀུ་མུ་དའི་གཉེན་གྱི་དཀྱིལ་འཁོར་གྱི་དབུས་སུ་ཐིམ་པའི་ཏཱཾ་ཡིག་སེར་པོའི་ས་བོན་ལས་བྱུང་བའི་འོད་ཟེར་གྱི་ཕྲེང་བ་དཔག་ཏུ་མེད་པས་འཇིག་རྟེན་གསུམ་པོ་སྣང་བར་མཛད་ནས་ཐོག་མ་མེད་པ་ནས་ཡང་དག་པར་གྲུབ་པའི་བཅོམ་ལྡན་འདས་མ་ཡེ་ཤེས་སེམས་མའི་སྐུ་ནམ་མཁའ་ལ་གདན་དྲངས་ཤིང་
[147a.3]བཀུག་ནས་ནམ་མཁའི་ཕྱོགས་སུ་བཞུགས་པ་ལ། རིན་པོ་ཆེའི་སྣོད་དུ་གནས་པའི་དྲི་བཟང་པོའི་ཆུ་དང་དྲི་བཟང་པོའི་མེ་ཏོག་གིས་དེ་བཞིན་དུ་བཅོམ་ལྡན་འདས་མ་དེའི་ཞབས་ལ་མཆོད་ཡོན་དབུལ་བར་བྱའོ། །ལྷའི་མེ་ཏོག་དང་། བདུག་པ་དང་། མར་མེ་དང་། ཞལ་ཟས་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་།
[147a.4]ན་བཟའ་དང་། གདུགས་དང་། རྒྱལ་མཚན་དང་། བ་དན་དང་། དྲིལ་བུ་ལ་སོགས་པའི་ཕྱི་དང་ནང་དང་བཅས་པའི་མཆོད་པ་རྣམ་པ་མང་པོས་དེ་བཞིན་དུ་བཅོམ་ལྡན་འདས་མ་ལ་མཆོད་པར་བྱའོ། །ཡང་ནས་ཡང་དུ་ཡང་དག་པར་མཆོད་ནས་བསྟོད་ཅིང་ཕྱག་རྒྱ་བལྟ་བར་བྱ་སྟེ། ཐལ་མོ་སྦྱར་ནས་གུང་མོ་རྩེ་མོར་
[147a.5]བྱས་ཏེ་དེའི་ཚིགས་གསུམ་པའི་སྟེང་དུ་མཛུབ་མོ་གཉིས་ཅུང་ཟད་བཀུག་ནས་གཟུང་བར་བྱའོ། །མཐེ་བོང་གཉིས་མཉམ་དུ་བྱས་ནས་དེའི་ཚིགས་གསུམ་པར་ཉེ་བར་དགོད་པར་བྱའོ། །མིང་མེད་ནང་དུ་བཀུག་ནས་མཐེའུ་ཆུང་བརྐྱང་ནས་སྦྱར་ཏེ་བལྟ་བར་བྱའོ་ཞེས་པ་ནི་ཨུཏྤ་ལ་ཁ་བྱེ་བའི་ཕྱག་རྒྱའོ། །ཕྱག་རྒྱ་འདིས་
[147a.6]དེ་བཞིན་དུ་བཅོམ་ལྡན་འདས་མ་ཡེ་ཤེས་སེམས་དཔའི་སྐུ་མཉེས་པར་བྱའོ། །འདིར་དེ་བཞིན་དུ་དམ་ཚིག་སེམས་དཔའི་གཟུགས་ལ་བཅོམ་ལྡན་འདས་མ་ནང་དུ་བསྒོམ་པར་བྱའོ། །ཞེས་པ་འདིས་གཉིས་སུ་མེད་པར་ལྷག་པར་གྲོལ་བར་བྱའོ། །དེའི་རྗེས་སུ་ཟླ་བའི་དཀྱིལ་འཁོར་གྱི་དབུས་སུ་ཡིད་དུ་འོང་
[147a.7]བའི་ཆུ་སྐྱེས་སྔོན་པོ་ཁ་བྱེ་བའི་ཟེའུ་འབྲུའི་ནང་དུ་ཐིམ་པའི་ཟླ་བ་དྲི་མ་མེད་པའི་དཀྱིལ་འཁོར་གྱི་སྟེང་དུ་གནས་པའི་ཏཱཾ་ཡིག་སེར་པོའི་ས་བོན་ལས་ལྷ་མོ་སྒྲོལ་མ་བྱུང་སྟེ། ནམ་མཁའི་མཐར་ཐུག་པའི་འཇིག་རྟེན་གྱི་ཁམས་སྣང་བར་མཛད་ནས་དེ་ལ་གནས་པའི་སེམས་ཅན་རྣམས་ལ་རིན་པོ་ཆེ་སྣ་ཚོགས་པའི་
[147b]
[147b.1]ཆར་གྱིས་དབུལ་བ་ལ་སོགས་པའི་སྡུག་བསྔལ་སེལ་ཞིང་སྐད་ཅིག་གིས་བདག་མེད་པ་ལ་སོགས་པའི་ཆོས་བསྟན་པའི་བདུད་རྩིས་དེ་རྣམས་ཚིམ་པར་མཛད་ནས། ཡང་ནས་ཡང་དུ་རབ་ཏུ་བྱེད་པ་སྣ་ཚོགས་པས་འགྲོ་བའི་དོན་མཛད་དེ། ཁམས་གསུམ་ཡང་སྒྲོལ་མའི་སྐུར་བསྐྱེད་ནས་དེ་ལ་ཡང་ཏཱཾ་ཡིག་སེར་
[147b.2]པོའི་ས་བོན་དེ་ལས་ནང་དུ་གྱུར་པ་ཞེས་པ་ལ་སོགས་པའི་སྤྲོ་བ་དང་བསྡུ་བའི་རིམ་པས་ཇི་སྲིད་ངལ་བར་མ་གྱུར་པ་དེ་སྲིད་དུ་བསྒོམ་པར་བྱའོ། །བསྒོམས་པས་ངལ་ན་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། དེ་ལྟ་བུའི་སྔགས་ཀྱི་རྒྱལ་པོ་འདི་མཐུ་ཆེ་སྟེ། དེ་བཞིན་དུ་དེ་
[147b.3]བཞིན་གཤེགས་པ་ཐམས་ཅད་ཀྱིས་ཕྱག་དང་མཆོད་པ་དང་བཀུར་སྟི་མཛད་པའོ་ཞེས་སོ། །བསམ་གཏན་ལས་ལངས་ནས་འགྲོ་བ་རྣམས་སྒྲོལ་མའི་སྐུར་བལྟ་ཞིང་ང་རྒྱལ་བྱས་ནས་ཇི་ལྟར་བདེ་བས་གནས་པར་བྱའོ། །ཕལ་ཆེར་འདིའི་རིམ་པས་བཅོམ་ལྡན་འདས་མས་འདོད་པ་འབྱུང་ཞིང་དངོས་གྲུབ་ཆེན་
[147b.4]པོ་བརྒྱད་ཞབས་སུ་ངེས་པར་ལྟུང་བར་འགྱུར་ན་དངོས་གྲུབ་གཞན་ལྟ་སྨོས་ཅི་དགོས། དེ་ཡང་དེ་བཞིན་དུ་དགོན་པའམ། གང་ཡང་སྐྱེ་བོས་དབེན་པའི་རིའི་ཕུག་ཏུ་གནས་ནས་མཁས་པས་བཅོམ་ལྡན་འདས་མ་བསྒོམ་པར་བྱའོ། །འདིས་ངེས་པར་མངོན་སུམ་དུ་མཐོང་བར་བྱེད་དོ། །བཅོམ་ལྡན་འདས་མ་
[147b.5]བདག་ཉིད་ཀྱིས་དེའི་དབུགས་འབྱིན་པ་དང་། རབ་ཏུ་དབུགས་པ་ལ་སོགས་པ་སྟེར་བར་བྱེད་དོ། །མང་པོ་སྨྲས་པས་ཅི་ཞིག་བྱ། མཆོག་ཏུ་རྙེད་པར་དཀའ་བའི་སངས་རྒྱས་ཀྱང་དེའི་ལག་པའི་མཐིལ་ན་གནས་སོ། །འདིར་སྒྲོལ་མའི་སྒྲུབ་ཐབས་ཅུང་ཟད་རྒྱས་པར་བྱས་པ་རྫོགས་སོ།། །།
[147b.6]འཇིག་རྟེན་གསུམ་རིག་སྒྲོལ་མའི་སྒྲུབ་ཐབས་མཆོག་བརྩམས་འདིས། །བདག་གིས་བསོད་ནམས་བཅོམ་ལྡན་བསྟན་ལ་ངེས་པར་ནི། །རྒྱ་ཆེན་མཆོག་ཏུ་དྲི་མེད་གང་ཐོབ་དེ་ཡིས་ནི། །འགྲོ་རྣམས་རྒྱལ་བའི་གྲོང་དུ་མྱུར་དུ་འཇུག་པར་ཤོག །སྒྲོལ་མ་ཡི་ནི་སྒྲུབ་པའི་ཐབས། །ཅུང་ཟད་རྒྱ་ཆེན་གང་བརྩམས་ལས། །
[147b.7]དགེ་བ་གང་ཐོབ་དེ་ཡིས་ནི། །འཇིག་རྟེན་ཞི་བའི་གནས་ཐོབ་ཤོག། །པཎྜི་ཏ་གནས་བརྟན་ཆེན་པོ་དཔེ་མེད་བསྲུང་པས་མཛད་དོ།། །།{T3492}༄༅༅། །རྒྱ་གར་སྐད་དུ། ཨཱརྱ་ཨཥྚ་མ་ཧཱ་བྷ་ཡ་ཏྲ་ཡ་ཏཱ་རཱ་ཡ་སཱ་དྷ་ནཾ། བོད་སྐད་དུ། འཕགས་པ་འཇིགས་པ་ཆེན་པོ་བརྒྱད་ལས་སྐྱོབ་པའི་སྒྲོལ་མའི་སྒྲུབ་ཐབས། །
[148a]
[148a.1]འཕགས་མ་འཇིགས་པ་ཆེན་པོ་བརྒྱད་སྐྱོབ་མ་ལ་ཕྱག་འཚལ་ལོ། །གང་ཞིག་དྲན་པ་ཙམ་གྱིས་ནི། །འཇིགས་ཆེན་བརྒྱད་ནི་རབ་འཇོམས་མ། །དེ་ལ་ཕྱག་འཚལ་སྒྲུབ་པའི་ཐབས། །རབ་ཏུ་བཤད་བྱ་བྱས་རྣམས་ཉོན། །སྒྲོལ་མ་འཇིགས་པ་བརྒྱད་སྐྱོབ་མ། །ནམ་མཁའི་དབུས་སུ་
[148a.2]བསྒོམ་པར་བྱ། །ཡིད་ཀྱིས་རང་གིས་མཆོད་བྱས་ནས། །སྡིག་པ་རྣམས་ནི་བཤགས་པར་བྱ། །བསོད་ནམས་ལ་ནི་རྗེས་ཡིད་རང་། །ཕྱི་ནས་བདག་གི་བསོད་ནམས་བསག །དེ་ཕྱིར་བདག་ཉིད་དབུལ་བ་དང་། །གསུམ་ལ་ཡང་ནི་སྐྱབས་སུ་འགྲོ། །བྱ་བ་བྱས་པའི་ཕྱི་ནས་ནི། །གང་ལས་སྟོང་ཉིད་མཐའ་རུ་ནི། །
[148a.3]རང་གི་སྙིང་གར་ཟླ་དེའི་གནས། །པདྨ་འདབ་བརྒྱད་རྣམ་པར་རྒྱས། །དེ་ཡི་དབུས་སུ་ཏཱཾ་ཡིག་བསམ། །དེ་བཞིན་ཨུཏྤལ་སྔོན་པོ་ལ། །དེ་ཡི་དབུས་སུའང་ས་བོན་ལས། །མེ་ཡི་འོད་ཟེར་རབ་ཏུ་གསལ། །དེ་ཡིས་ལྷ་མོ་ཡང་དག་བསྐྱེད། །རྒྱན་རྣམས་ཀུན་གྱིས་རྣམ་པར་བརྒྱན། །ལྷ་མོའི་ཕྱག་གཡས་མཆོག་
[148a.4]སྦྱིན་དང་། །གཡོན་ན་དེ་བཞིན་ཨུཏྤལ་བསྣམས། །གཟུགས་མཛེས་ཞལ་ནི་གཅིག་མ་སྟེ། །ན་ཚོད་གཞོན་ནུས་ཡང་དག་གནས། །མེ་ཏོག་དྲི་བཟངས་དབུ་སྐྲ་བརྒྱན། །པདྨ་དང་ནི་ཟླ་བའི་སྟེང་། །སྐྱིལ་ཀྲུང་ཕྱེད་པའི་ཚུལ་གྱིས་བཞུགས། །ས་གསུམ་འཇིགས་པ་བརྒྱད་སྐྱོབ་པའི། །ལྷ་མོ་བརྒྱད་པོའི་
[148a.5]བར་དུ་ནི། །སྒྲོལ་མའི་སྐུ་རུ་བསྒོམ་པར་བྱ། །རྣལ་འབྱོར་པ་ནི་དེ་སྔགས་སྤྲོ། །ཡིད་ལ་ཞུ་བར་བསམ་པར་བྱ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། །ཨོཾ་ཨོཾ་སྭཱ་ཧཱ་ཤར་དུའོ། །ཨོཾ་ཏཱ་སྭཱ་ཧཱ་ལྷོ་རུའོ། །ཨོཾ་རེ་སྭཱ་ཧཱ་ནུབ་ཏུའོ། །ཨོཾ་ཏུ་སྭཱ་ཧཱ་བྱང་དུའོ། །ཨོཾ་ཏྟཱ་སྭཱ་ཧཱ་མེའི་མཚམས་སུའོ། །ཨོཾ་རེ་སྭཱ་ཧཱ་བདེན་བྲལ་དུའོ། །ཨོཾ་ཏུ་སྭཱ་ཧཱ་རླུང་
[148a.6]དུའོ། །ཨོཾ་རེ་སྭཱ་ཧཱ་དབང་ལྡན་དུའོ། །དེ་ཐམས་ཅད་ཀྱང་འོད་ཟེར་འཕྲོ་བའི་གཟུགས་ཅན་ལྷ་མོ་ཇི་ལྟ་བ་དེ་བཞིན་དུ་གཞན་རྣམས་སོ། །ཨོཾ་ཏཱ་རེ་ནྱཻ་བཛྲ་པུཥྤ་པྲ་ཏཱིཙྪ་སྭཱ་ཧཱ། ཞེས་པས་མེ་ཏོག་དབུལ་ཞིང་། དེ་བཞིན་དུ་དྲི་ལ་སོགས་པ་ཨུཏྤ་ལའི་ཕྱག་རྒྱས་དབུལ་བར་བྱའོ་ཞེས་སོ། །ལྷ་མོ་དགུ་དང་ལྡན་པ་ཡི། །དེ་བཞིན་
[148a.7]སྒྲུབ་ཐབས་འདི་བྱས་པས། །འཇིགས་པ་བརྒྱད་པོ་བཅོམ་གྱུར་ནས། །འགྲོ་ཀུན་བླ་མེད་བྱེད་པར་ཤོག །འཕགས་པ་འཇིགས་པ་ཆེན་པོ་བརྒྱད་ལས་སྐྱོབ་པའི་སྒྲོལ་མའི་སྒྲུབ་ཐབས་རྫོགས་སོ།། །།{T3493}༄༅༅། །རྒྱ་གར་སྐད་དུ། ཅཱི་ན་ཀྲ་མ་ཨཱརྱ་ཏཱ་རཱ་སཱ་དྷ་ནཾ། བོད་སྐད་དུ། རྒྱ་ནག་རིམ་པའི་འཕགས་མ་སྒྲོལ་མའི་
[148b]
[148b.1]སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་སྟོང་པ་ཉིད་དུ་བསྒོམས་ནས་ཨཱཿཡིག་དམར་པོ་ལས་སྐྱེས་པའི་པདྨ་དམར་པོའི་སྟེང་དུ་ཏཱཾ་ཡིག་དཀར་པོ་ལས་སྐྱེས་པའི་པདྨའི་སྣོད་ཅེས་པ་ཐོད་པའི་སྣོད་དུ་ཉི་མ་ལ་གནས་པའི་ཧཱུཾ་ཡིག་ནག་པོ་ལས་སྐྱེས་པའི་ས་བོན་དང་
[148b.2]བཅས་པའི་གྲི་གུག་བསམ། གྲི་གུག་ཡོངས་སུ་གྱུར་པ་ལས་རྗེ་བཙུན་མ་འཕགས་མ་སྒྲོལ་མ་སྐུ་མདོག་ནག་མོ་ཞལ་གཅིག་པ་ཕྱག་བཞི་པ། སྤྱན་གསུམ་པ། ཐུང་ཞིང་ལྟོ་བ་འཕྱང་བ། ཞལ་མཆེ་བ་གཙིགས་པ། ཞབས་གཡོན་བརྐྱང་གིས་རོའི་གདན་ལ་བཞུགས་པའོ། །ཀླུ་བརྒྱད་ཀྱི་རྒྱན་གྱིས་བརྒྱན་པ།
[148b.3]སྟག་གི་པགས་པའི་ན་བཟའ་ཅན། མགོའི་ཕྲེང་བ་འཕྱང་བ་དང་ལྡན་པ། ཕྱག་རྒྱ་ལྔས་རྣམ་པར་བརྒྱན་པ། རལ་གྲི་དང་གྲི་གུག་གཡས་ཀྱི་ཕྱག་ན་བསྣམས་པ། ཨུཏྤ་ལ་དང་ཐོད་པ་གཡོན་གྱི་ཕྱག་ན་བསྣམས་པ། མི་བསྐྱོད་པས་དབུ་བརྒྱན་ཅིང་རལ་པ་ཁམ་པའི་ཐོར་ཚུགས་ཅན། མི་བཟད་པའི་
[148b.4]གད་རྒྱངས་ཅན་ཤིན་ཏུ་འཇིགས་པའི་སྐུར་བསྐྱེད་ནས། ཨོཾ་ཧྲཱིཿ ཧཱུཾ་ཕཊ་ཅེས་པའི་སྔགས་ཤེས་རབ་ལྷག་པར་གསལ་བར་བྱེད་པས་བཟླས་པར་བྱའོ། །མཁས་པས་རལ་གྲིའི་གནས་སུ་ནི། །མི་ཡི་རུས་པའི་ཕྲེང་བ་བསམ། །སྤྲོ་དང་བསྡུ་བའི་སྦྱོར་བ་ཡིས། །སྔགས་མཆོག་ཡང་དག་བཟླས་པར་
[148b.5]བྱ། ཞེས་སོ། །རྒྱ་ནག་རིམ་པའི་འཕགས་མ་སྒྲོལ་མའི་སྒྲུབ་ཐབས་རྫོགས་སོ།། །།{T3494}༄༅༅། །རྒྱ་གར་སྐད་དུ། མ་ཧཱ་ཙཱི་ན་ཀྲ་མ་ཏཱ་རཱ་སཱ་དྷ་ནཾ། བོད་སྐད་དུ། རྒྱ་ནག་ཆེན་པོའི་རིམ་པའི་སྒྲོལ་མའི་སྒྲུབ་ཐབས། བཅོམ་ལྡན་འདས་མ་སྒྲོལ་མ་ལ་ཕྱག་འཚལ་ལོ། །གཡོན་བརྐྱང་ཞབས་ཀྱིས་རོ་ཡི་
[148b.6]སྙིང་གར་མནན་ཅིང་མི་བཟད་མཆོག་གི་གད་རྒྱངས་དགོད། །རལ་གྲི་ཨུཏྤལ་གྲི་གུག་ཐོད་པ་ཕྱག་བསྣམས་ཧཱུཾ་ཡིག་ས་བོན་ལས་བྱུང་མ། །ཐུང་ཞིང་སྔོ་ལ་སྦོམ་པ་རལ་པའི་ཐོར་ཚུགས་སེར་པོ་མཆོག་གི་ཀླུ་དང་ལྡན། །འགྲོ་བ་རྣམས་ཀྱི་མི་ཤེས་ཐོད་པ་ལ་བཀོད་འཇོམས་ཤིང་དྲག་པོའི་སྒྲོལ་མ་ཉིད། །སྒྲོལ་མ་སྲིད་
[148b.7]པ་གསུམ་སྒྲོལ་མ། །རྒྱ་ནག་རིམ་འོངས་ལ་བཏུད་དེ། །བླ་མའི་མན་ངག་ཇི་ལྟ་བར། །དེ་ཡི་སྒྲུབ་ཐབས་བདག་གིས་བརྗོད། །ལིངྒ་གཅིག་དང་དུར་ཁྲོད་དང་། །ཡང་ན་ཁྱིམ་ནི་སྟོང་པ་རུ། །ཐམས་ཅད་དུ་ནི་དེར་གནས་ནས། །སྲིད་པ་གསུམ་ལས་སྒྲོལ་བ་ཡི། །རིག་པ་རྣལ་འབྱོར་བ་ཡིས་བསྒྲུབ། །སྟན་འཇམ་
[149a]
[149a.1]ནང་ཚངས་ཅན་ལ་གནས། །གཞན་ཡང་འཇམ་པོར་གྱུར་པ་ཡི། །ཤིང་སྟན་ལ་སོགས་མཉམ་གནས་ལ། །དངོས་གྲུབ་མཆོག་ནི་བསྒྲུབ་པར་བྱ། །སྐད་ཅིག་རྣམ་པའི་སྦྱོར་བ་ཡིས། །རྡོ་རྗེ་གསུམ་ལས་ལེགས་མཉམ་གཞག །གནས་གསུམ་དུ་ནི་དེ་བསམ་བྱ། །དེ་ལས་འོད་
[149a.2]ཟེར་རྣམ་འཕྲོས་ནས། །སྲིད་གསུམ་སྤྱོད་པའི་སེམས་ཅན་རྣམས། །གསལ་བར་མཛད་ནས་སླར་ཡང་ནི། །བསྡུས་ནས་ཁམས་གསུམ་མཐའ་དག་ཀྱང་། །སྟོང་པ་ཉིད་དུ་བསམ་པར་བྱ། །དེ་ནས་རྒྱལ་བའི་གསང་སྔགས་བརྗོད། །ཨོཾ་ཤཱུ་ནྱ་ཏཱ་སོགས་རང་བཞིན་ནོ། །དེ་ནས་ནམ་མཁའ་ཨཱཿཡིག་
[149a.3]ལས། །ཆུ་སྐྱེས་དམར་པོ་བསམ་པར་བྱ། །སླར་ཡང་དེ་སྟེང་བསམ་བྱ་བ། །ཏཱཾ་ཡིག་ལས་ནི་པདྨའི་སྣོད། །སླར་ཡང་དེ་དབུས་བསམ་པར་བྱ། །ཧཱུཾ་ཡིག་མཐོན་མཐིང་དང་མཚུངས་པ། །དེ་ལས་ཧཱུཾ་ཡིག་ལས་སྐྱེས་པའི། །གྲི་གུག་ས་བོན་གྱིས་བརྒྱན་བལྟ། །གྲི་གུག་ཡོངས་སུ་གྱུར་པ་ལས། །
[149a.4]བདག་ཉིད་སྒྲོལ་མ་དང་མཚུངས་བསྒོམ། །ཞབས་ནི་གཡོན་བརྐྱང་མི་བཟད་མ། །མགོ་བོའི་ཕྲེང་བ་རབ་ཏུ་འཕྱང་། །ཐུང་ཞིང་ལྟོ་འཕྱང་འཇིགས་བྱེད་མ། །ཆུ་སྐྱེས་སྔོན་པོས་རྣམ་པར་བརྒྱན། །བཟང་མོ་ཞལ་གཅིག་སྤྱན་གསུམ་མ། །མི་བཟད་གད་རྒྱངས་འོད་དང་ལྡན། །རབ་ཏུ་དགྱེས་ཤིང་རོ་ལ་
[149a.5]ཞོན། །ཀླུ་བརྒྱད་ཀྱིས་ནི་རྣམ་པར་བརྒྱན། །སྤྱན་ནི་དམར་ཞིང་ཟླུམ་པ་སྟེ། །སྟག་གི་པགས་པ་རྐེད་ལ་མནབས། །ལང་ཚོ་གཞོན་ཞིང་ཕུན་སུམ་ཚོགས། །ཕྱག་རྒྱ་ལྔ་ཡིས་རྣམ་པར་བརྒྱན། །ལྗགས་ནི་བསྒྲིལ་ཞིང་མཆེ་བ་གཙིགས། །འཇིགས་ཆེན་འཇིགས་པར་བྱེད་པ་མོ། །ཕྱག་གཡས་
[149a.6]རལ་གྲི་གྲི་གུག་སྟེ། །གཡོན་ན་ཨུཏྤལ་ཐོད་པ་བསྣམས། །དམར་སེར་རལ་གཅིག་གྱེན་དུ་བརྫེས། །མི་བསྐྱོད་དབུ་བརྒྱན་བསམ་པར་བྱ། །བསྒོམས་པའི་སྟོབས་ནི་རྫོགས་པ་ཡིས། །རྣལ་འབྱོར་སྙན་ངག་ཆེན་པོར་འགྱུར། །གལ་ཏེ་བླུན་ཞིང་རྨོངས་གྱུར་ཀྱང་། །བསྒོམ་པའི་རོ་ལ་བརྩོན་བྱེད་ན། །
[149a.7]འཇམ་པའི་དབྱངས་ཉིད་ཐོབ་པར་འགྱུར། །འབུམ་ཕྲག་གཅིག་ནི་བཟླས་པར་བྱ། །ཡི་གེ་གསུམ་གྱི་སྔགས་ཆེན་པོ། །ཕཊ་ཡིག་མཐའ་རུ་སྙིང་གར་དགོད། །འོད་ཟེར་ལྔ་དང་ཡང་དག་ལྡན། །མ་ཤེས་བུད་ཤིང་བསྲེག་པ་པོ། །རྣལ་འབྱོར་སྤྱོད་པའི་རྗེས་འབྲངས་ནས། །དེ་ཡིས་བཏུ་བའི་ཆོ་ག་
[149b]
[149b.1]བརྗོད། །དང་པོ་ས་ཡི་ཕ་རོལ་ཕྱིན། །དབྱངས་ཡིག་བཞི་པས་རྣམ་པར་བརྒྱན། །ར་ཡིག་ལ་ཞོན་འོད་ཟེར་འཕྲོ། །ཟླ་བ་ཐིག་ལེ་ཡང་དག་ལྡན། །དེ་ནི་ཏ་ཡིག་ལ་ཡང་སྦྱིན། །དེ་བཞིན་བཞི་པས་རྣམ་པར་བརྒྱན། །སླར་ཡང་ཧ་ཡིག་ལ་སྦྱོར་ཏེ། །ཨུ་ཡིག་རིང་པོ་ཡང་དག་ལྡན། །ཕཊ་ཀྱི་ཡི་གེའང་
[149b.2]དེ་ནས་སྦྱིན། །ཡོངས་རྫོགས་གྲུབ་པའི་སྔགས་ཉིད་དོ། །མཁས་པས་རལ་གྲིའི་གནས་སུ་ནི། །མི་ཡི་རུས་པའི་ཕྲེང་བ་བསམ། །སྤྲོ་དང་བསྡུ་བའི་སྦྱོར་བ་ཡིས། །སྔགས་མཆོག་ཡང་དག་བཟླས་པར་བྱ། །བརྟན་པའི་སེམས་ཀྱིས་བརྟག་བྱས་ན། །བདག་ཉིད་མཁས་ཤིང་སྙན་ངག་ཆེ། །རྟག་
[149b.3]ཏུ་བསྒོམ་པ་གོམས་པ་ཡིས། །དེ་ཉིད་ཐེ་ཚོམ་མེད་པར་འགྱུར། །སྒྲོལ་མའི་སྒྲུབ་ཐབས་བརྩམས་པ་ལས། །བདག་གིས་དགེ་བ་གང་བསགས་པ། །དེ་ཡིས་སྲོག་ཆགས་ཐམས་ཅད་ནི། །རྒྱལ་བའི་བསྟན་ལ་མཁས་པར་ཤོག །དེ་འདིར་རྟག་པའི་རྡོ་རྗེ་ཡིས། །བློ་འཕེལ་སྒྲུབ་ཐབས་བྱས་པ་
[149b.4]ཡིས། །ཟབ་མོ་ལ་ནི་མཁས་པ་རྣམས། །འདི་ལ་བཟོད་པ་མཛད་པར་རིགས། །རྒྱ་ནག་ཆེན་པོའི་རིམ་པའི་སྒྲོལ་མའི་སྒྲུབ་ཐབས་སློབ་དཔོན་རྟག་པའི་རྡོ་རྗེས་མཛད་པ་རྫོགས་སོ།། །།{T3495}༄༅༅། །རྒྱ་གར་སྐད་དུ། མྲྀ་ཏྱུ་བཉྩ་ན་ཏཱ་རཱ་སཱ་དྷ་ནཾ། བོད་སྐད་དུ། འཆི་བ་སླུ་བའི་སྒྲོལ་མའི་
[149b.5]སྒྲུབ་ཐབས། སྒྲོལ་མ་དཀར་མོ་ལ་ཕྱག་འཚལ་ལོ། །སྔོན་མ་བཞིན་དུ་སྟོང་པ་ཉིད་ཀྱི་མཐར་ཐུག་པར་བསྒོམས་ནས། ཆུ་སྐྱེས་དཀར་པོའི་དབུས་གནས་པའི། །ཏཱཾ་ཡིག་ལས་བྱུང་ཟླ་བའི་གདན། །རྡོ་རྗེ་སྐྱིལ་མོ་ཀྲུང་གིས་བཞུགས། །མཆོག་སྦྱིན་དང་ནི་ཨུཏྤལ་བསྣམས། །སྟོན་ཀའི་ཟླ་བ་ལྟ་
[149b.6]བུའི་འོད། །ཟླ་བའི་སྟེང་ན་ཡང་དག་བཞུགས། །རྒྱན་རྣམས་ཐམས་ཅད་ཡོངས་སུ་རྫོགས། །བཅུ་དྲུག་ལོ་ཡི་སྐུ་ལྡན་རིམ། །སྙིང་གར་འཕགས་མ་སྒྲོལ་མ་བསྒོམ། །དེ་ཡི་འཁོར་ལོ་ཟླ་འོད་བཞིན། །རེའུ་མིག་བརྒྱད་ལ་ཡི་གེ་བརྒྱད། །མངོན་པར་ཡོངས་སུ་བསྐོར་གྱུར་ཏེ། །ཨོཾ་ཧཱ་གསལ་བྱེད་
[149b.7]དབུས་གནས་པ། །བསྒྲུབ་བྱའི་མིང་ནི་ལྟེ་བར་བྱ། །མཁས་པས་རྩེ་གཅིག་ཡིད་ཀྱིས་ནི། །ངེས་པར་བརྟན་པོས་ཟླ་དྲུག་བསྒོམ། །ཡི་གེ་བཅུ་ཡི་སྔགས་འདི་ནི། །མི་སྐྱོའི་ཡིད་ཀྱིས་བཟླས་པར་བྱ། །དེ་ལ་སྔགས་ནི་འདིའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། །སྒྲོལ་མའི་འཁོར་ལོ་སྐོམ་པ་པོས། །ཟླ་བ་དྲུག་གིས་
[150a]
[150a.1]ངེས་པར་ནི། །དངོས་གྲུབ་ཐམས་ཅད་ཐོབ་འགྱུར་ཞིང་། །འཆི་བའི་སྐྱོན་གྱིས་མི་གོས་སོ། །འཆི་བ་སླུ་བའི་སྒྲོལ་མའི་སྒྲུབ་ཐབས་རྫོགས་སོ།། །།{T3496}༄༅༅། །རྒྱ་གར་སྐད་དུ། མྲྀ་ཏྱུ་པཉྩ་ན་སཱི་ཏ་ཏཱ་རཱ་སཱ་དྷ་ནཾ། བོད་སྐད་དུ། འཆི་བ་སླུ་བ་སྒྲོལ་མ་དཀར་མོའི་
[150a.2]སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྒྲོལ་མའི་ཐུགས་ཀྱི་འཁོར་ལོ་བསྒོམ། །ཆེད་དུ་ཟླ་བ་དྲུག་གིས་ནི། །དངོས་གྲུབ་ཐམས་ཅད་ཐོབ་འགྱུར་ཞིང་། །འཆི་བའི་སྐྱོན་གྱིས་མི་གོས་སོ། །ངག་དབང་ཕྱུག་གིས་བསྟན་མཛད་པའི། །འཆི་བ་སླུ་བ་བསྡུས་པ་ལས། །ཕྱུང་ནས་སྒྲོལ་མ་དཀར་མོ་
[150a.3]ཡི། །བསྒོམས་པས་འཇིགས་པ་འཇོམས་བྱེད་པ། །སྡེ་བཞིའི་དང་པོ་ཨཾ་ཡིག་བཅས། །ནམ་མཁའ་ལ་ནི་འོད་ཟེར་འཕྲོ། །པད་དཀར་ཟླ་བའི་གདན་བལྟས་ནས། །མདུན་དུ་གསུམ་ལ་སྐྱབས་འགྲོ་བརྗོད། །རང་བཞིན་སྒྲོ་བཏགས་གཞོམ་ཕྱིར་དུ། །སྐད་ཅིག་སྟོང་ཉིད་བལྟ་བར་བྱ། །དེ་ནས་སྨོན་ལམ་མཐུ་
[150a.4]ཡིས་ནི། །བྱང་ཆུབ་སེམས་ཀྱི་ཡི་གེར་གྱུར། །ཆུ་སྐྱེས་དཀར་པོའི་དབུས་གནས་པའི། །ཟླ་བའི་གདན་གྱི་སྟེང་དུ་ནི། །རྡོ་རྗེ་སྐྱིལ་མོ་ཀྲུང་གིས་བཞུགས། །མཆོག་སྦྱིན་དང་ནི་ཨུཏྤ་ལ་བསྣམས། །སྟོན་ཀའི་ཟླ་བ་ལྟ་བུའི་འོད། །ཟླ་བའི་སྟེང་དུ་ཡང་དག་བཞུགས། །རྒྱན་རྣམས་ཐམས་ཅད་ཡོངས་སུ་རྫོགས། །
[150a.5]བཅུ་དྲུག་ལོ་ལོན་ལུས་ཅན་མ། །སངས་རྒྱས་ཀུན་དང་དེ་ཡི་སྲས། །ཡུམ་ནི་འདོད་པའི་གཟུགས་འཛིན་མ། །འཕགས་མ་སྒྲོལ་མ་སྙིང་གར་བསྒོམ། །དེ་ཡི་འཁོར་ལོའི་འོད་ཟེར་དཀར། །རེའུ་མིག་བརྒྱད་ལ་ཡི་གེ་བརྒྱད། །མངོན་པར་ཡོངས་སུ་བསྐོར་གྱུར་ཏེ། །ཨོཾ་ཧཱ་གསལ་བྱེད་དབུས་གནས་པ། །
[150a.6]བསྒྲུབ་བྱའི་མིང་ནི་ལྟེ་བར་བྱ། །མཁས་པས་རྩེ་གཅིག་ཡིད་ཀྱིས་ནི། །ངེས་པར་བརྟན་པོས་ཟླ་དྲུག་བསྒོམ། །ཡི་གེ་བཅུ་ཡི་སྔགས་འདི་ནི། །མི་སྐྱོའི་ཡིད་ཀྱིས་བཟླས་པར་བྱ། །ཨོཾ་གྱི་ཡི་གེ་དང་པོར་སྦྱིན། །ཕྱི་ནས་ཏཱ་རེ་རབ་ཏུ་སྦྱར། །ཏུཏྟཱ་རེ་ལས་ཏུ་རེ་ཕྱིས། །སྭཱ་ཧཱ་མཐའ་རུ་ལས་ཀུན་བྱེད། །ཚངས་
[150a.7]དབང་ཁྱབ་འཇུག་ཉི་ཟླ་དང་། །དྲག་པོ་ཕྱོགས་སྐྱོང་འདོད་ལྷས་ཀྱང་། །བ་སྤུའི་རྩེ་མོའང་གཅོད་མི་ནུས། །འཆི་བདག་ལས་རྒྱལ་གྲོལ་བ་བཞིན། །སྐྲ་དཀར་གཉེར་མ་སྐལ་ངན་དང་། །ནད་དང་དབུལ་སོགས་མདོར་བསྡུས་ན། །སེང་གེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་
[150b]
[150b.1]རྣམས་རབ་ཏུ་འཇོམས། །བསྐུལ་བ་མེད་པར་གོས་དང་ནི། །ཁང་བཟངས་རིན་ཆེན་ལ་སོགས་འཐོབ། །རལ་གྲི་མིག་སྨན་རྐང་མགྱོགས་དང་། །བུམ་པ་བཟང་པོ་ལ་སོགས་འགྲུབ། །སྙན་ངག་དང་ནི་སྨྲ་བ་མཁས། །བློ་རྣོ་ཤེས་རབ་དྲི་མ་མེད། །གཞན་ཡང་འདོད་པའི་དངོས་གྲུབ་རྣམས། །
[150b.2]འཁོར་ལོ་འདི་ལས་རབ་ཏུ་འབྱུང་། །ནད་དང་འཆི་བདག་འཇོམས་བྱེད་པ། །སྒྲོལ་མ་དཀར་མོ་སྒྲུབ་པའི་ཐབས། །བྱས་པའི་དགེ་བ་གང་དེ་ཡིས། །འགྲོ་རྣམས་རང་བྱུང་སྒྲོལ་མར་ཤོག །འཆི་བ་སླུ་བའི་སྒྲོལ་མ་དཀར་མོའི་སྒྲུབ་ཐབས་རྫོགས་སོ།། །།སློབ་དཔོན་ངག་གི་དབང་ཕྱུག་གྲགས་
[150b.3]པའི་སློབ་མ་ཐུ་བོས་མཛད་དོ།། །།{T3497}༄༅༅། །རྒྱ་གར་སྐད་དུ། སཱི་ཏ་ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མ་དཀར་མོའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྔོན་མ་བཞིན་དུ་སྟོང་པ་ཉིད་ལ་སོགས་པའོ། །དེ་ནས་སུཾ་ཡིག་ཡོངས་སུ་གྱུར་པ་ལས་རིན་པོ་ཆེ་སྣ་ཚོགས་ཀྱི་རང་
[150b.4]བཞིན་གྱི་རི་རབ་བོ། །དེའི་སྟེང་དུ་པཾ་ཡིག་ལས་པདྨ་དཀར་པོའོ། །དེའི་སྟེང་དུ་ཨ་ཡིག་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་ཧཱུཾ་ཡིག་དཀར་པོ་ཡོངས་སུ་གྱུར་པ་ལས་བཅོམ་ལྡན་འདས་མ་སྒྲོལ་མ་དཀར་མོ་སྤྱན་གསུམ་པ། ཕྱག་བཞི་པ། དེ་བཞིན་གཤེགས་པ་ལྔའི་དབུ་རྒྱན་ཅན། སྣ་
[150b.5]ཚོགས་པའི་རྒྱན་གྱིས་བརྒྱན་པ། ཕྱག་གཉིས་ཀྱིས་ཨུཏྤ་ལའི་ཕྱག་རྒྱ་མཛད་པ། ཕྱག་གཡས་ན་ཡིད་བཞིན་གྱི་ནོར་བུ་རིན་པོ་ཆེ་དང་ཡང་དག་པར་ལྡན་པའི་མཆོག་སྦྱིན་གྱིས་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་པ། གཡོན་ན་ཨུཏྤ་ལའི་སྙེ་མ་བསྣམས་པ་བསམ་
[150b.6]པར་བྱའོ། །དེའི་གཡས་ཕྱོགས་སུ་འོད་ཟེར་ཅན་སྐུ་མདོག་སེར་མོ་ཟླ་བའི་དཀྱིལ་འཁོར་ལ་བཞུགས་པ་ན་བཟའ་སྔོན་པོ་ཅན། ཕྱག་གཉིས་པ། ཕྱག་གཡོན་ན་མྱ་ངན་མེད་པའི་ཤིང་དམར་པོའི་ཡལ་ག་བསྣམས་པ། གཡས་ན་རྔ་ཡབ་དཀར་པོ་བསྣམས་པ། སྟོད་གོས་དམར་པོས་བརྒྱན་པའོ། །
[150b.7]གཡོན་ཕྱོགས་ལོགས་སུ་རྨ་བྱ་ཆེན་མོ་པྲི་ཡཾ་ཀུའི་མེ་ཏོག་ལྟ་བུ་ལྗང་གུ་ཕྱག་གཉིས་པ། གཡོན་ན་རྨ་བྱའི་མཇུག་སྒྲོ་བསྣམས་པ། གཡས་ན་རྔ་ཡབ་བསྣམས་པ་དེ་ལྟ་བུའི་རྣམ་པ་གསལ་བ་ལ། ཨོཾ་བྷ་ག་བ་ཏི་ཏཱ་རེ་མ་མ་ཧྲྀ་ད་ཡཾ་པྲ་བི་ཤ་སྭཱ་ཧཱ། ཞེས་པས་བདག་ཉིད་བྱིན་གྱིས་བརླབ་པར་བྱའོ། །དེ་
[151a]
[151a.1]ནས་སྔགས་བཟླས་པར་བྱའོ། །ཨོཾ་ན་མོ་ཏཱ་རེ་མ་ནོ་ཧ་ར་ཧཱུཾ་ཧ་ར་སྭཱ་ཧཱ། སྒྲོལ་མ་དཀར་མོའི་སྒྲུབ་ཐབས་སློབ་དཔོན་ཡིད་བཞིན་ནོར་བུའི་རྒྱལ་པོས་མཛད་པ་རྫོགས་སོ།། །།{T3498}༄༅༅། །རྒྱ་གར་སྐད་དུ། ཥཊ་བྷུ་ཛ་ཤུ་ཀླཱ་ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མ་དཀར་མོ་ཕྱག་
[151a.2]དྲུག་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །དེ་བཞིན་དུ་སྟོང་པ་ཉིད་བསྒོམས་ཏེ། དེ་ནས་རཾ་ཡིག་ཡོངས་སུ་གྱུར་པ་ལས་ཉི་མ་ལ་གནས་པའི་ཧཱུཾ་ཡིག་ལས་སྣ་ཚོགས་རྡོ་རྗེ་ཡོངས་སུ་གྱུར་པ་ལས་རྡོ་རྗེའི་ར་བ་ལ་སོགས་པ་བསམ་པར་བྱའོ། །དེའི་དབུས་སུ་པཾ་ཡིག་ལས་སྐྱེས་
[151a.3]པའི་པདྨའི་སྟེང་དུ་ཨཾ་ཡིག་ལས་སྐྱེས་པའི་ཟླ་བ་ལ་ཧཱུཾ་ཡིག་དཀར་པོ་ལས་སྐྱེས་པའི་ས་བོན་དང་བཅས་པའི་ཨུཏྤ་ལ་བལྟ་བར་བྱའོ། །དེ་ལ་སྤྲོ་བ་ལ་སོགས་པ་སྔོན་དུ་འགྲོ་བས་དེ་ཡོངས་སུ་གྱུར་པ་ལས་བཅོམ་ལྡན་འདས་མ་སྒྲོལ་མ་དཀར་མོ་ཞལ་གསུམ་ཕྱག་དྲུག་པ་སེར་པོ་དང་སྔོན་པོ་ནི་གཡས་
[151a.4]དང་ཅིག་ཤོས་ཀྱི་ཞལ་ལོ། །ཞལ་སོ་སོ་ལ་སྤྱན་གསུམ་གསུམ་མོ། །མཆོག་སྦྱིན་དང་། བགྲང་ཕྲེང་དང་། མདའ་བསྣམས་པ་ནི་གཡས་ཀྱི་ཕྱག་གསུམ་མོ། །ཨུཏྤལ་དང་། པདྨ་དང་། གཞུ་བསྣམས་པ་ནི་གཡོན་གྱི་ཕྱག་གསུམ་མོ། །སྐྱིལ་ཀྲུང་ཕྱེད་པས་ཟླ་བའི་གདན་ལ་བཞུགས་
[151a.5]པ་ཟླ་བའི་འོད་ལྟ་བུ། རལ་པའི་ཐོར་ཚུགས་ལ་བཞུགས་པའི་དོན་ཡོད་གྲུབ་པའི་དབུ་རྒྱན་ཅན། དབུ་ལ་ཐོད་པ་ལྔས་རྣམ་པར་བརྒྱན་པ། ཟླ་བ་ཕྱེད་པས་དབུ་བརྒྱན་པ། རྒྱན་སྣ་ཚོགས་འཆང་བ། ལོ་བརྒྱད་གཉིས་ལོན་པ་ལྟ་བུ། དུར་ཁྲོད་བརྒྱད་ཀྱི་དབུས་ན་བཞུགས་པ། སྙིང་
[151a.6]གའི་ཟླ་བ་ལ་གནས་པའི་ས་བོན་ལས་བདག་ཉིད་བསམས་ཏེ། སྔགས་བཟླས་པར་བྱའོ། །ཨོཾ་ཨ་ཙ་ལེ་ཨ་ནི་མིཏྟ་བ་རེ་ཧཱུཾ་ཧཱུཾ་ཕཊ་ཕཊ་སྭཱཧཱ། སྨྱུང་གནས་དང་མཆོད་པ་སྔོན་དུ་འགྲོ་བས་ཐུན་མཚམས་བཞིར་ཟླ་བ་གཅིག་ཏུ་བཟླས་པས་ཞི་བ་ལ་སོགས་པར་འགྱུར་རོ། །སྒྲོལ་མ་དཀར་མོ་ཕྱག་
[151a.7]དྲུག་མའི་སྒྲུབ་ཐབས་རྫོགས་སོ།། །།{T3499}༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་ཏཱ་རཱ་སཱ་དྷ་ནཾ། བོད་སྐད་དུ། འཕགས་མ་སྒྲོལ་མ་དུག་སེལ་མའི་སྒྲུབ་ཐབས། སྒྲོལ་མ་དུག་སེལ་མ་ལ་ཕྱག་འཚལ་ལོ། །ཛཱཾ་གུ་ལཱི་ཡི་གཟུགས་འཛིན་པའི། །བཅོམ་ལྡན་སྒྲོལ་མ་ལ་ཕྱག་འཚལ། །
[151b]
[151b.1]སེམས་ཅན་ཀུན་ལ་བརྩེ་བའི་ཕྱིར། །དེ་ཡི་སྒྲུབ་ཐབས་མཆོག་གྱུར་བྲི། །དང་པོར་རེ་ཞིག་སྔགས་པས་གཙང་ཞིང་ཁྲུས་བྱས་ནས་ཕྲེང་བ་དང་གོས་དཀར་པོ་བགོས་ཏེ། སྐྱེ་བོས་དབེན་པའི་ས་ཕྱོགས་སུ་བྱུག་པ་བྱས་ལ་དྲི་བཟངས་དཀར་པོས་ཆག་ཆག་བཏབ་ནས་མེ་ཏོག་དཀར་པོ་གཅལ་དུ་བཀྲམ་
[151b.2]སྟེ། སྟན་བདེ་བ་ལ་འདུག་ནས་འགྲོ་བ་རྣམས་ལ་བྱམས་པ་དང་སྙིང་རྗེ་བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་སྟོང་པ་ཉིད་མངོན་དུ་བྱ་ཞིང་བསམས་ནས་པཾ་ཡིག་དཀར་པོ་ལས་སྐྱེས་པའི་པདྨ་དཀར་པོ་འདབ་མ་བརྒྱད་པའོ། །དེའི་སྟེང་
[151b.3]དུ་ཨཾ་ཡིག་ལས་སྐྱེས་པའི་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿ་ཡིག་དཀར་པོ་འོད་ཟེར་གྱི་ཚོགས་དཔག་ཏུ་མེད་པ་འཕྲོ་བའོ། །དེ་ལས་བྱུང་བའི་བཅོམ་ལྡན་འདས་མ་དུག་སེལ་མ་བསྒོམ་པར་བྱ་སྟེ། སྐུ་མདོག་དཀར་མོ་ཕྱག་བཞི་པ། རལ་པའི་ཅོད་པན་ཅན། ན་བཟའ་དཀར་པོའི་སྟོད་
[151b.4]གཡོགས་ཅན། རིན་པོ་ཆེ་དཀར་པོའི་རྒྱན་དང་ལྡན་མ་སྦྲུལ་དཀར་པོས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་པ། རྩ་བའི་ཕྱག་གཉིས་ཀྱིས་པི་ཝང་བསྒྲེང་བ། གཉིས་པའི་གཡས་དང་གཡོན་པས་སྦྲུལ་དཀར་པོ་དང་། མི་འཇིགས་པའི་ཕྱག་རྒྱ་མཛད་པ། ཟླ་བའི་
[151b.5]འོད་ཟེར་གྱི་ཕྲེང་བ་ཅན་བསྒོམ་པར་བྱའོ། །སྤྱི་བོ་དང་མགྲིན་པ་དང་ནུ་མའི་བར་དུ་ཟླ་བའི་དཀྱིལ་འཁོར་ལ་གནས་པའི་ཨཱཿཧྲཱིཿཧཱུཾ་གི་ཡི་གེ་ལ་སོགས་པ་ཇི་སྲིད་མི་ངལ་གྱི་བར་དུ་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཧྲཱིཿཡིག་འབུམ་ཕྲག་བདུན་བཟླས་ནས་མེ་ཏོག་དཀར་པོས་
[151b.6]སྦྱིན་སྲེག་ཁྲི་ཕྲག་བདུན་བྱའོ། །མཁས་པས་རྒྱན་ཐམས་ཅད་དཀར་པོ་གདགས་པར་བྱའོ། །དེ་ནས་བྱ་ཁྱུང་གི་དབང་ཕྱུག་གི་མཐུས་བསྟན་བཅོས་ཐམས་ཅད་ལ་མི་འཇིགས་པའི་མཁས་པར་འགྱུར་རོ་ཞེས་སོ། །འཕགས་མ་སྒྲོལ་མ་དུག་སེལ་མའི་སྒྲུབ་ཐབས་རྫོགས་སོ།། །།
[151b.7]{T3500}༄༅༅། །རྒྱ་གར་སྐད་དུ། དྷ་ན་དཱ་ན་ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མ་ནོར་སྦྱིན་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྒྲོལ་མ་ལྗང་གུ་ཞལ་གཅིག་མ། །ཕྱག་བཞི་སྤྱན་གཉིས་ཁྱོད་མཉེས་ཕྱིར། །གང་གི་དཀྱིལ་འཁོར་འཁོར་ལོ་ཡི། །ལྷ་མོ་བཅུ་གཉིས་སྤྱན་
[152a]
[152a.1]གཉིས་མ། །བཅོམ་ལྡན་འཕགས་མ་སྒྲོལ་མ་ཡི། །ཁྱད་འཕགས་ཤིན་ཏུ་རྙེད་དཀའ་བའི། །ནོར་སྦྱིན་རིམ་པའི་སྒྲུབ་པའི་ཐབས། །བསྡུས་ནས་བདག་གིས་བཤད་པར་བྱ། །རྣལ་འབྱོར་པས་སྔ་བར་བྱང་ཆུབ་ཏུ་སེམས་བསྐྱེད་ནས་རང་གི་སྙིང་གར་ཟླ་བ་ལ་ཏཱཾ་ཡིག་ལྗང་གུ་
[152a.2]བལྟས་ལ་ཁ་བསང་བ་ལ་སོགས་པ་བྱའོ། །ཨོཾ་སྭཱ་བྷཱ་བ་ཤུདྡྷཿསརྦ་དྷརྨཱཿ སྭཱ་བྷཱ་བ་ཤུདྡྷོ྅ཧཾ་ཞེས་བརྗོད་ནས་ཨོཾ་ཨ་མྲྀ་ཏེ་ཧཱུཾ་ཕཊ། ཅེས་པ་འདིས་སེ་གོལ་གྱིས་ཕྱོགས་བཅུར་བགེགས་བསྐྲད་ནས། རང་གི་སྙིང་གར་པཾ་ཡིག་ལས་སྐྱེས་པའི་ཆུ་སྐྱེས་དམར་པོའི་སྟེང་དུ་ཨ་ཡིག་ལས་སྐྱེས་པའི་ཟླ་
[152a.3]བ་ལ་གནས་པའི་རང་གི་ས་བོན་བསྒོམས་ནས། དེའི་འོད་ཟེར་གྱིས་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་གདན་དྲངས་ནས་མདུན་གྱི་ནམ་མཁའ་ལ་བཞུགས་ཏེ་ཡང་དག་པར་མཆོད་ནས། སྡིག་པ་བཤགས་པ་ལ་སོགས་པ་བྱ་ཞིང་སྟོང་པ་ཉིད་དུ་བསྒོམས་ནས་བྱིན་གྱིས་
[152a.4]བརླབས་ཏེ། རཾ་ཡིག་དམར་པོ་ཡོངས་སུ་གྱུར་པ་ལས། ཉི་མ་ལ་གནས་པའི་ཧཱུཾ་ཡིག་ནག་པོ་ལས་སྐྱེས་པའི་སྣ་ཚོགས་རྡོ་རྗེ་རྣམ་པར་བལྟས་ནས། དེའི་འོད་ཟེར་གྱིས་རྡོ་རྗེའི་ར་བ་དང་། རྡོ་རྗེའི་གུར་དང་། རྡོ་རྗེའི་ས་གཞི་ཡང་བསམ་པར་བྱའོ། །དེ་ནས་སྣ་ཚོགས་རྡོ་རྗེའི་སྟེགས་བུ་ལ་བཾ་ཡིག་
[152a.5]དམར་པོ་ལས་སྐྱེས་པའི་ཆུ་སྐྱེས་ཀྱི་སྟེང་དུ་ཨ་ཡིག་ལས་ཟླ་བ་ལ་གནས་པའི་བྷྲཱུཾ་ཡིག་དཀར་པོ་ཡོངས་སུ་གྱུར་པ་ལས་འཁོར་ལོ་དཀར་པོའོ། །བྷྲཱུཾ་ཡིག་དབུས་སུ་བལྟས་ལ་པདྨ་དང་ཟླ་བ་དང་། ཉི་མའི་ས་བོན་ཡོངས་སུ་གྱུར་པ་ལས་སྐྱེས་པའི་རིན་པོ་ཆེ་ཐམས་ཅད་ཀྱི་རང་བཞིན་གྲུ་བཞི་ལ་སོགས་
[152a.6]པའི་ཡོན་ཏན་དང་ལྡན་པའི་འཁོར་ལོ་གཉིས་སོ། །སྙིང་པོའི་འཁོར་ལོ་ལ་གནས་པའི་ཆུ་སྐྱེས་འདབ་མ་བརྒྱད་པའི་ཟེའུ་འབྲུ་ལ་ཟླ་བ་དགུས་ཉེ་བར་མཛེས་པ་སྒོ་བཞི་ལ་གནས་པའི་ཉི་མའི་འོད་ཟེར་འབར་བའི་གཞལ་ཡས་ཁང་བལྟ་བར་བྱའོ། །དེ་ནས་དབུས་སུ་ཟླ་བའི་སྟེང་དུ་དེ་
[152a.7]བཞིན་དུ་ཏཱཾ་ཡིག་གོ། །དེ་ལ་སྤྲོ་བ་དང་བསྡུ་བ་བྱའོ། །དེ་ནས་དེའི་ས་བོན་ལས་བཅོམ་ལྡན་འདས་མ་སྒྲོལ་མར་བདག་ཉིད་བསྒོམ་པར་བྱ་སྟེ། ཟླ་བའི་གདན་ལ་ཞི་བའི་འོད་དང་ལྡན་ཞིང་སེམས་དཔའི་སྐྱིལ་ཀྲུང་གིས་བཞུགས་པ་སྐུ་མདོག་ལྗང་སྔོན། ཞལ་གཅིག་པ། སྤྱན་གཉིས་པ།
[152b]
[152b.1]ཕྱག་བཞི་པ། བགྲང་ཕྲེང་དང་། མཆོག་སྦྱིན་དང་། ཨུཏྤ་ལ་དང་། པོ་ཏི་བསྣམས་པ། གོས་དང་རྒྱན་སྣ་ཚོགས་པ་དང་ལྡན་པའོ། །དེ་ནས་ཨོཾ་ནི་སྤྱི་བོ་རུའོ། །ཏཱ་ནི་དཔྲལ་བ་ལའོ། །རེ་ནི་སྤྱན་ལའོ། །ཏུ་ནི་མགྲིན་པ་ལའོ། །ཏྟཱ་ནི་དཔུང་པ་ལའོ། །རེ་ནི་སྙིང་གར་རོ། །ཏུ་ནི་ལྟེ་བ་ལའོ། །རེ་ནི་
[152b.2]གསང་བ་ལའོ། །སྭཱ་ནི་པུས་མོ་ལའོ། །ཧཱ་ནི་རྐང་པ་དག་ལ་དགོད་པར་བྱའོ། །དེ་ནས་སྙིང་གར་པདྨ་དང་ཟླ་བ་ལ་གནས་པའི་རང་གི་ས་བོན་གྱི་འོད་ཟེར་གྱིས་བསྐུལ་ནས་སྤྱན་མ་ལ་སོགས་པའི་ལྷ་མོ་རྣམས་ཀྱིས་བདག་ལ་དབང་བསྐུར་ཞིང་དོན་ཡོད་གྲུབ་པས་དབུ་བརྒྱན་པར་བསམ་པར་
[152b.3]བྱའོ། །ཡང་ན་སྙིང་པོ་ལ་གནས་པའི་ཟླ་བ་ལ་རྡོ་རྗེ་སྒྲོལ་མ་ལ་སོགས་པའི་ལྷ་མོ་རྣམས་སྐད་ཅིག་གིས་བལྟས་ཏེ། ཕྱི་ནས་བསྒོམ་པར་བྱ་སྟེ། ཤར་དུ་རྡོ་རྗེ་སྒྲོལ་མ་སྟེ། །ནག་མོ་ཕྱག་ན་རྡོ་རྗེ་བསྣམས། །ལྷོ་རུ་རིན་ཆེན་སྒྲོལ་མ་སྟེ། །སེར་མོ་ཕྱག་ན་རིན་ཆེན་བསྣམས། །ནུབ་ཏུ་པདྨའི་སྒྲོལ་མ་
[152b.4]སྟེ། །དམར་མོ་ཕྱག་ན་ཆུ་སྐྱེས་བསྣམས། །བྱང་དུ་སངས་རྒྱས་སྒྲོལ་མ་སྟེ། །དཀར་མོ་ཕྱག་ན་འཁོར་ལོ་བསྣམས། །མེ་མཚམས་མེ་ཏོག་སྒྲོལ་མ་སྟེ། །དཀར་མོ་མེ་ཏོག་ཕྲེང་བ་བསྣམས། །བདུག་སྤོས་སྒྲོལ་མ་བདེན་བྲལ་དུ། །ནག་མོ་སྤོས་ཕོར་ཕྱག་ན་བསྣམས། །རླུང་མཚམས་མར་
[152b.5]མེའི་སྒྲོལ་མ་སྟེ། །སེར་མོ་མར་མེའི་སྡོང་བུ་བསྣམས། །དྲི་ཡི་སྒྲོལ་མ་དབང་ལྡན་མཚམས། །དམར་མོ་དྲི་ཡི་དུང་ཆོས་བསྣམས། །འདི་རྣམས་སྣ་ཚོགས་པད་འདབ་ལ། །ཟླ་བརྒྱད་ལ་གནས་ཟླ་བའི་འོད། །སེམས་དཔའི་སྐྱིལ་ཀྲུང་གིས་བཞུགས་ཤིང་། །ཕྱག་གཡོན་ན་ནི་ཨུཏྤལ་
[152b.6]བསྣམས། །ཞལ་ནི་འཛུམ་ཞིང་སྣ་ཚོགས་པའི། །རྒྱན་དང་གོས་རྣམས་འཆང་བ་པོ། །ཤར་སྒོར་རྡོ་རྗེ་ལྕགས་ཀྱུ་མ། །ནག་མོ་རྡོ་རྗེ་ལྕགས་ཀྱུའི་ཕྱག། །ལྷོ་རུ་རྡོ་རྗེ་ཞགས་པ་མ། །སེར་མོ་རྡོ་རྗེ་ཞགས་པའི་ཕྱག །ནུབ་ཏུ་རྡོ་རྗེ་ལྕགས་སྒྲོག་མ། །དམར་མོ་རྡོ་རྗེ་ལྕགས་སྒྲོག་བསྣམས། །བྱང་
[152b.7]དུ་རྡོ་རྗེ་དྲིལ་བུ་མ། །དཀར་མོ་རྡོ་རྗེ་དྲིལ་བུའི་ཕྱག །འདི་རྣམས་སྒོ་བཞི་ལ་ཉི་མ་ལ་བལྟ་ཞིང་ཉི་མའི་འོད་དང་ལྡན་པ་རལ་པ་དམར་སེར་གྱེན་དུ་བརྫེས་པ། ཞབས་གཡས་བརྐྱང་གིས་བཞུགས་པ། སྦྲུལ་གྱི་རྒྱན་གྱིས་བརྒྱན་པ། ཞལ་འཇིགས་པ་སྟག་གི་པགས་པའི་ན་བཟའ་བསྣམས་
[153a]
[153a.1]པ། ཕྱག་གཡོན་པས་ཨུཏྤལ་བསྣམས་པའོ། །དེ་ནས་ཡེ་ཤེས་སེམས་དཔའ་དང་ལྷན་ཅིག་ཏུ་བྱས་ཏེ་ཡིད་མི་གཡོ་བའི་རང་གི་ས་བོན་ཤིན་ཏུ་ཕྲ་མོ་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་ཏཱ་ར་ཏུཏྟཱ་རེ་ཏུ་རེ་དྷཱ་ནཾ་མེ་ད་ད་སྭཱ་ཧཱ། དེ་ནས་ལངས་ཏེ་དམ་ཚིག་ལ་ཨོཾ་
[153a.2]ཨ་ཀཱ་རོ་མུ་ཁཾ་ཞེས་པ་ལ་སོགས་པའི་སྔགས་ཀྱིས་ཨུཏྤ་ལའི་ཕྱག་རྒྱས་གཏོར་མ་ཕུལ་ནས་སྨོན་ལམ་གདབ་པར་བྱའོ། །ལྷ་རྣམས་ཀྱི་འཁོར་ལོ་རང་གི་ས་བོན་གྱི་ནང་དུ་བསྒོམས་ནས་རང་ལྷའི་ང་རྒྱལ་བྱས་ནས་ཅི་བདེར་གནས་པར་བྱའོ། །ཉི་མའི་གུང་དང་ཕྱི་དྲོའི་ཐུན་མཚམས་དག་ལ་རང་
[153a.3]གི་སྙིང་གའི་ས་བོན་ལས་སྐད་ཅིག་གིས་ལྷ་རྣམས་ཀྱི་འཁོར་ལོ་སྔོན་མ་བཞིན་དུ་སྤྲོས་ཏེ་བསྒོམས་ནས་བཟླས་པ་ལ་སོགས་པ་བྱའོ། །ཕྱི་དྲོ་དང་ཉི་མ་གུང་ཐུན་ལ་ཡང་ཁྱད་པར་འདིའོ། །མེ་ཏོག་ལ་སོགས་པས་ཡེ་ཤེས་པའི་དཀྱིལ་འཁོར་ཡང་དག་པར་མཆོད་ནས་ཨོཾ་ཏཱ་རེ་ཏུཏྟཱ་རེ་ཏུ་རེ་མུཿ
[153a.4]ཞེས་པ་འདིས་གཤེགས་སུ་གསོལ་ལོ། །སྒྲོལ་མ་ནོར་སྦྱིན་མའི་སྒྲུབ་ཐབས་རྫོགས་སོ།། །།{T3501}༄༅༅། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མཿཏཱ་ར་ཡཻ། ཏདྱ་ཐཱ། ཨོཾ་ཏཱ་རེ་ཏཱ་རཱ་ཡ་ཧཱུཾ་ཧཱུཾ་ཧཱུཾ་ས་མ་ཡ་སྠི་ཏེ་བྷ་ར་བྷ་ར། སརྦ་
[153a.5]བྷ་ར་ཎ་བྷུ་ཥི་ཏེ་པདྨེ་པདྨེ་པདྨ་བྷུ་ཛེ་པ་དམཱ་ས་ན་སྠེ་ཧ་ས་ཧ་ས། ཏྲཻ་ལོ་ཀྱ་བ་རི་དེ་སརྦ་དེ་བ་དཱ་ན་བ་སཱུ་ཛི་ཏེ་སྨཱ་རཱ་ཧི་བྷ་ག་བ་ཏ་སུ་ར་ཏཿས་མ་ཡཿདྷ་ན་དྷ་ན་མ་ཧཱ་སཏྭཱ་བ་ལོ་ཀི་ཏེ་མ་ཎི་ཀ་ན་ཀ་བི་ཙིཏྲཱ་བྷ་ར་ཎེ། ཨོཾ་བི་ལོ་ཀི་ཡ་བྷ་ག་བ་ཏི་ཏཱ་རེ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། རྩ་བའི་སྔགས་སོ། །སྐུ་གདུང་དང་བཅས་པའི་
[153a.6]མཆོད་རྟེན་གྱི་དྲུང་དུ་བརྒྱད་ལྷག་པའི་སྟོང་བཟླས་པར་བྱའོ། །དེ་ནས་རྫོགས་པར་གྱུར་ནས་བཅོམ་ལྡན་འདས་འཕགས་མ་སྒྲོལ་མ་ལ་བལྟས་པས་གང་འདོད་པ་དེའི་མཆོག་ཐོབ་པར་འགྱུར་རོ། །ཨོཾ་མ་ཎི་ཏཱ་རེ་ཧཱུཾ་འབུམ་བཟླས་ནས་འཕགས་མའི་དྲུང་དུ་ཉེ་བར་གནས་ན་གང་འདོད་པ་དེ་
[153a.7]ཐམས་ཅད་སྟེར་བར་བྱེད་དོ། །དཀྱིལ་འཁོར་མེད་ཀྱང་ཁྲུས་བྱས་ཏེ་ཉེ་བར་གནས་ནས་བཟླས་པ་འབའ་ཞིག་ཙམ་གྱིས་འགྲུབ་སྟེ། བྱ་བ་ཐམས་ཅད་འགྲུབ་པར་བྱེད་དོ། །འོད་དཔག་མེད་ཀྱི་སྙིང་པོའི་རྒྱུད་ལས་བཅོམ་ལྡན་འདས་མ་འཕགས་མ་སྒྲོལ་མའི་རྟོག་པ་གསུངས་པ་རྫོགས་སོ།། །།
[153b]
[153b.1]{T3502}༄༅༅། །རྒྱ་གར་སྐད་དུ། དུརྒ་ཏི་ཨུཏྟཱ་རིཾ་ཎཱ་སཱ་དྷ་ནཾ། བོད་སྐད་དུ། ངན་སོང་ལས་སྒྲོལ་མའི་སྒྲུབ་ཐབས། །འཕགས་མ་སྒྲོལ་མ་ལ་ཕྱག་འཚལ་ལོ། །ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་བྷ་ག་བ་ཏཻ་ཨཱརྱཱ་ཏཱ་ར་ཡཻ། ཨོཾ་ཏཱ་རེ་
[153b.2]ཏུཏྟཱ་རེ་ཏུ་རེ་བཱི་རེ་དུརྒ་ཏི་ཨུཏྟཱ་ར་ཡ། ཧྲཱིཾ་ཧྲཱིཾ་ཧྲཱིཾ་སརྦ་དུཿཁཱཏ་མོ་ཙ་ནི་བྷ་ག་བ་ཏི་དུརྒཱ་ཏྭཱ་ར་ཎོ་མ་ཧཱ་ཡོ་གེཤྩ་རི་ཧྲཱིཾ་ན་མོ་ཏུ་རེ་སྭཱ་ཧཱ། འདིར་བཅོམ་ལྡན་འདས་མ་ངན་སོང་ལས་སྒྲོལ་བའི་སྒྲོལ་མ་ལྗང་སྔོན་ཕྱག་བཞི་པ། གཡོན་པས་ཞགས་པ་བསྣམས་པ། གཡས་པས་ལྕགས་ཀྱུ་བསྣམས་ཤིང་
[153b.3]གུས་པས་དབུགས་འབྱིན་པ། གཡས་པས་མཆོག་སྦྱིན་པ། མཛེས་པའི་ཕྲེང་བ་དང་ན་བཟའ་མནབས་པ། ཕྱག་གཡོན་པས་ཨུཏྤ་ལ་སྔོན་པོ་བསྣམས་ཤིང་ན་བཟའ་དཀར་པོ་སྐུ་ལ་མནབས་པ་པདྨའི་གདན་ལ་བཞུགས་པ་དུས་གསུམ་དུ་བསྒོམ་པར་བྱའོ། །སྡུག་བསྔལ་ཐམས་
[153b.4]ཅད་ལས་སྒྲོལ་ཞིང་བཅིངས་པ་རྣམས་གྲོལ་བར་བྱེད་དེ། ལྕགས་སྒྲོག་གིས་བསྡམས་པ་དང་། ཞགས་པས་བཅིངས་པ་དང་། གདོན་གྱིས་རེངས་པ་ལས་སྒྲོལ་བར་བྱེད་དོ། །བཅིངས་པའི་གནས་སུ་བཟླས་པར་བྱའོ། །སྟོང་ངམ་བརྒྱད་བརྒྱ་ཉི་མ་རེ་རེ་ལ་བཟླས་པས་གྲོལ་བར་
[153b.5]འགྱུར་རོ། །གལ་ཏེ་མི་གྲོལ་ན་དེའི་ཚེ་མགོ་འགས་ཤིང་བཅད་པར་འགྱུར་བས་བདེ་བར་འགྱུར་རོ། །ཆེ་གེ་མོ་གྲོལ་བར་གྱིས་ཤིག །གལ་ཏེ་མ་གྲོལ་ན་དེའི་ཚེ་མགོ་འགས་པར་འགྱུར་རོ། །རིམས་ཆེན་པོར་འགྱུར་རོ། །མི་བཟད་པའི་ཟུག་རྔུ་ཆེན་པོར་འགྱུར་རོ། །སྒྲུབ་པ་པོ་
[153b.6]མཐོང་བས་སྟེར་བར་འགྱུར་རོ། །ཉི་མ་བདུན་གྱིས་ངེས་པར་གྲོལ་བར་འགྱུར་རོ། །འདི་ནི་བཅོམ་ལྡན་འདས་ངན་སོང་ལས་སྒྲོལ་བའི་སྒྲོལ་མས་གསུངས་སོ། །ཧཱུཾ་ཧྲཱིཾ་ཛཿལན་བདུན་དུ་མེ་ཏོག་ལ་མངོན་པར་བསྔགས་ནས་སྦྱིན་པར་བྱའོ། །མཆོད་པའི་དབུས་སུ་ཁཾ་ཏཱཾ། གཡོན་སྐོར་
[153b.7]གྱིས་བྷྲཱུཾ་ཨཱཾ་ཛྲཱིཾ་ཧཱུཾ། གཡས་སྐོར་གྱིས་ལཱཾ་མཱཾ་པཱཾ་པཱཾ་ཏཱཾ་ཞེས་སོ། །ངན་སོང་ལས་སྒྲོལ་མའི་སྒྲུབ་ཐབས་རྫོགས་སོ།། །།{T3503}༄༅༅། །རྒྱ་གར་སྐད་དུ། ཨཱརྱ་ཏཱ་རེ་དེ་བཱི་སཱ་དྷ་ནཾ། བོད་སྐད་དུ། ལྷ་མོ་སྒྲོལ་མའི་སྒྲུབ་ཐབས། ལྷ་མོ་སྒྲོལ་མ་ལ་ཕྱག་འཚལ་ལོ། །སྔར་བཤད་པའི་ཆོ་
[154a]
[154a.1]གས་བདུད་རྩིའི་དཀྱིལ་འཁོར་དེའི་དབུས་སུ་ཡི་གེ་སྡེ་ཚན་ལྔ་པའི་དང་པོའི་ས་བོན་ལ་གཉིས་པས་རྫོགས་པར་བྱས་ལ་ཟླ་བ་ཕྱེད་པ་དང་ཐིག་ལེས་བརྒྱན་པ་དེ་ཉིད་ལས་བྱུང་བའི་ལྷ་མོ་སྒྲོལ་མ་བསྒོམ་པར་བྱའོ། །སྐུ་མདོག་ལྗང་གུ་ཕྱག་གཉིས་པ། གཡས་ཀྱིས་མཆོག་
[154a.2]སྦྱིན་པ། གཡོན་པས་ཨུཏྤ་ལ་བསྣམས་པ། པདྨ་དང་ཟླ་བ་ལ་བཞུགས་པ། རྒྱན་ཐམས་ཅད་ཀྱིས་བརྒྱན་པ་བསམ་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་ཐལ་མོ་སྦྱར་ལ་མཛུབ་མོ་གཉིས་ཀྱིས་གུང་མོ་བཅིངས་ལ། བཅང་བ་ནི་ལྷ་མོ་སྒྲོལ་མའི་ཨུཏྤ་ལ་ཁ་
[154a.3]བྱེ་བའི་ཕྱག་རྒྱའོ། །དེའི་འོག་ཏུ་སྔགས་བཟླས་པར་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ལྷ་མོ་སྒྲོལ་མའི་སྒྲུབ་ཐབས་རྫོགས་སོ།། {T3504}༄༅༅། །རྒྱ་གར་སྐད་དུ། མྲྀ་ཏྱུ་བཉྩ་ནོ་པ་དེ་ཤ་ཏཱ་རཱ་སཱ་དྷ་ནཾ། བོད་སྐད་དུ། འཆི་བ་སླུ་བའི་མན་ངག་གི་སྒྲོལ་མའི་སྒྲུབ་ཐབས། །
[154a.4]འཕགས་མ་སྒྲོལ་མ་ལ་ཕྱག་འཚལ་ལོ། །ཡིད་དུ་འོང་བའི་ས་ཕྱོགས་སུ། །ལངས་ནས་སྔ་དྲོའི་ཐུན་ལའོ། །བདེ་བའི་སྟན་ལ་རབ་འདུག་སྟེ། །རང་གི་སྙིང་གར་ཟླ་བ་ལ། །ལྔ་པ་ཡི་ནི་དང་པོ་ལ། །དབྱངས་ཡིག་གཉིས་པ་རབ་ཏུ་སྦྱར། །ཟླ་ཕྱེད་ཐིག་ལེ་ཡང་དག་ལྡན། །འོད་ཟེར་
[154a.5]དཀར་པོས་རྣམ་པར་བརྒྱན། །དེ་ཡི་འོད་ཟེར་དཀར་པོ་ཡིས། །མཁའ་ལ་སྒྲོལ་མ་གདན་དྲངས་ཏེ། །ཕྱག་གཉིས་སྐུ་མདོག་དཀར་མོ་ལ། །མཆོག་སྦྱིན་དང་ནི་ཨུཏྤལ་བསྣམས། །ཉེར་སྤྱོད་ལྔ་ཡི་མཆོད་པ་ཡི། །གུས་པ་ཡིས་ནི་མཆོད་བྱས་ནས། །སྡིག་པ་བཤགས་ཤིང་
[154a.6]ཕྱི་ནས་ནི། །དེ་ནས་བསོད་ནམས་རྗེས་ཡི་རང་། །དེ་ནི་ཡོངས་སུ་བསྔོ་བ་དང་། །དེ་བཞིན་གསུམ་ལ་སྐྱབས་སུ་འགྲོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པའི་སྔགས་ཀྱིས་སྟོང་པར་བསྒོམ། །རྣལ་འབྱོར་པ་ཡི་ཆོ་ག་ཡིས། །ཆུ་སྐྱེས་དཀར་
[154a.7]པོའི་དབུས་གནས་པའི། །ཟླ་བའི་དཀྱིལ་འཁོར་སྟེང་དུ་ནི། །སྔོན་གསུངས་ས་བོན་ལས་སྐྱེས་པའི། །ལྷ་མོ་སྒྲོལ་མ་ཡིད་འོང་མ། །རྡོ་རྗེ་སྐྱིལ་མོ་ཀྲུང་བཅས་ནས། །མཆོག་སྦྱིན་མ་ནི་ཨུཏྤལ་བསྣམས། །སྟོན་ཀའི་ཟླ་བ་ལྟ་བུ་ནི། །ཟླ་བའི་སྟེང་དུ་ཡང་དག་བཞུགས། །རྒྱན་རྣམས་ཐམས་
[154b]
[154b.1]ཅད་ཡོངས་སུ་རྫོགས། །བཅུ་དྲུག་ལོ་ཡི་གཟུགས་ཅན་མ། །སངས་རྒྱས་ཐམས་ཅད་དེ་ཡི་སྲས། །ཡུམ་གྱུར་འདོད་པའི་གཟུགས་འཛིན་མ། །འཕགས་མ་སྒྲོལ་མ་སྙིང་གར་བསྒོམ། །དེ་ཡི་འཁོར་ལོ་འོད་དཀར་ལྡན། །རེའུ་མིག་བརྒྱད་པོ་རྣམས་ལ་ནི། །ཡི་གེ་བརྒྱད་ཀྱིས་
[154b.2]ཡོངས་སུ་བསྐོར། །ཨོཾ་ཧཱ་གསལ་བྱེད་དབུས་གནས་པ། །བསྒྲུབ་བྱའི་མིང་སོགས་ལྟེ་བ་ལ། །མཁས་པས་རྩེ་གཅིག་ཡིད་ཀྱིས་ནི། །ངེས་པ་བརྟན་པོས་ཟླ་དྲུག་བསྒོམ། །ཡི་གེ་བཅུ་ཡི་གསང་སྔགས་འདི། །མཁས་པས་མི་སྐྱོའི་ཡིད་ཀྱིས་བཟླས། །ཨོཾ་ཡིག་དང་པོ་སྦྱིན་པར་བྱ། །
[154b.3]ཕྱི་ནས་ཏཱ་རེ་རབ་ཏུ་སྦྱར། །ཏུཏྟཱ་རེ་ཡི་ཏུ་རེ་ཕྱིས། །སྭཱ་ཧཱའི་མཐའ་ཅན་ལས་ཀུན་བྱེད། །ཚངས་དབང་ཁྱབ་འཇུག་ཉི་ཟླ་དང་། །དྲག་པོ་ཕྱོགས་སྐྱོང་འདོད་ལྷས་ཀྱང་། །བ་སྤུའི་རྩེ་མོའང་གཅོད་མི་ནུས། །འཆི་བདག་ལས་རྒྱལ་གྲོལ་བ་བཞིན། །སྐྲ་དཀར་གཉེར་མ་སྐལ་ངན་དང་། །ནད་
[154b.4]དང་དབུལ་སོགས་མདོར་བསྡུས་ན། །སེང་གེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་རྣམས་རབ་ཏུ་འཇོམས། །བསྐུལ་པ་མེད་པར་ཟས་ལ་སོགས། །ཁང་བཟངས་གོས་ལ་སོགས་པ་ཐོབ། །རལ་གྲི་མིག་སྨན་རྐང་མགྱོགས་དང་། །བུམ་པ་བཟང་པོ་ལ་སོགས་
[154b.5]འགྲུབ། །སྙན་ངག་དང་ནི་སྨྲ་བ་མཁས། །བློ་རྣོ་ཤེས་རབ་དྲི་མ་མེད། །གཞན་ཡང་འདོད་པའི་དངོས་གྲུབ་རྣམས། །འཁོར་ལོ་འདི་ལས་རབ་ཏུ་འབྱུང་། །ཞེས་པ་ནི། འཆི་བ་སླུ་བའི་མན་ངག་གིས་སྒྲོལ་མའི་སྒྲུབ་ཐབས་རྫོགས་སོ། །{T3505}༄༅༅། །རྒྱ་གར་སྐད་དུ། བི་ཤྭ་མཱ་ཏཱ་
[154b.6]སཱ་དྷ་ནཾ། བོད་སྐད་དུ། སྣ་ཚོགས་ཡུམ་གྱི་སྒྲུབ་ཐབས། སྣ་ཚོགས་ཡུམ་ལ་ཕྱག་འཚལ་ལོ། །ཉི་མ་ཟླ་བའི་དབུས་སུ་ཨཱ་ལི་ཀཱ་ལི་དང་བཅས་ཆུ་ཡི་ས་བོན་ཉིད་ལས་ཆུ་སྐྱེས་བསྒོམ། །དེ་ཡིས་བསྐྱེད་པའི་ལྷ་མོ་ཞལ་གཅིག་ཕྱག་གི་ཆུ་སྐྱེས་གཉིས་པ་སྐུ་མདོག་ཟླ་བ་ལྟ་བུ་སྟེ། །
[154b.7]གདེངས་ཀ་དཀར་པོ་ལ་གནས་ཆུ་སྐྱེས་དཀར་པོའི་ཕྱག་དང་མི་འཇིགས་པ་དང་ན་བཟའ་དཀར་པོ་མནབས། །རྒྱན་རྣམས་དཀར་པོ་དང་ལྡན་ཞལ་ནི་ཤིན་ཏུ་འཛུམ་ཞིང་བསྒྲུབ་བྱའི་ཁྱིམ་དུ་རབ་ཏུ་བསྲིངས་ནས་ནི། །དེ་ནས་བསྒྲུབ་བྱ་བླངས་ནས་སླར་ཡང་གཙོ་བོའི་དཀྱིལ་
[155a]
[155a.1]འཁོར་ལོ་ནི་ཡང་དག་རབ་ཏུ་ཞུགས་གྱུར་ནས། །གཙོ་བོའི་བཀའ་ཡིས་རབ་ཏུ་ཐོབ་པའི་སླར་ཡང་བདུད་རྩི་བུམ་པས་སྤྱན་མ་ལ་སོགས་རབ་དགྱེས་པས། །བསྒྲུབ་བྱ་དེ་ལ་ཁྲུས་མཛད་རབ་མཆོག་ནུས་མ་རྣམ་པ་བཅུ་པོ་རྣམས་ཀྱིས་ཡང་དག་མཆོད་པར་བྱེད། གཟུགས་
[155a.2]ལ་སོགས་པའི་ལྷ་མོ་རྣམས་ཀྱིས་རྒྱས་བྱེད་རབ་མཆོག་སྟོབས་བཅུ་ལ་སོགས་རྣམས་ཀྱིས་མཉེས་པར་བྱེད། །འབྱུང་པོར་བཤད་པས་མི་འཇིགས་བྱེད་ཅིང་རབ་མཆོག་རྣམ་པ་བཅུ་ཡི་ཁྲོ་བོ་ལས་སྐྱེས་རྣམས་ཀྱིས་སྐྱོང་། །ཀྲུ་མོ་རྣམས་ཀྱིས་འོ་ནི་ཡང་དག་བྱེད་ཅིང་མི་ཡི་བུ་མོ་ལོ་ནི་བཅུ་གཉིས་
[155a.3]མ་པང་འཁྱུད། །གཏུམ་པོ་རྣམས་ཀྱིས་སྲུང་བར་བྱེད་ཅིང་ས་སྟེང་མཐའ་དག་རྣམས་སུ་རྒྱས་པར་བྱ་བའི་དོན་གྱི་ཕྱིར། །དེ་བཞིན་བསྒྲུབ་བྱའི་མ་ལུས་མཆོག་གི་བདེ་བ་བྱ་ཕྱིར་འདི་ནི་རྣལ་འབྱོར་པ་ཡིས་བསྒོམ་པར་བྱ། །སྣ་ཚོགས་ཡུམ་གྱི་སྒྲུབ་ཐབས་རྫོགས་སོ།། །།
[155a.4]{T3506}༄༅༅། །རྒྱ་གར་སྐད་དུ། སརྦ་ཨརྠ་སཱ་དྷཱ་ནྱ་ཨཱརྱཱ་པྲ་སནྣ་ཏཱ་རཱ་སཱ་དྷ་ནཾ། བོད་སྐད་དུ། དོན་ཐམས་ཅད་གྲུབ་པ་རབ་ཏུ་སྦྱིན་པའི་འཕགས་མ་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྔོན་མའི་རིམ་པ་རབ་ཏུ་སྦྱོར་བས་བྷ་གའི་དབུས་སུ་ཟླ་བའི་དཀྱིལ་འཁོར་
[155a.5]ལ་ལྷ་མོ་སྒྲོལ་མ་ཆེན་མོ་གསེར་གྱི་མདོག་ལྟ་བུ་འཇིགས་པ་ཆེན་མོ་ཞལ་བརྒྱད་པ། སྤྱན་གསུམ་པ། ཕྱག་བཅུ་དྲུག་གིས་རྣམ་པར་བརྒྱན་པ། དབུ་སྐྲ་ཁམ་པ་གྱེན་དུ་བརྫེས་པ། མགོ་བོ་རློན་པའི་ཕྲེང་བ་བརྒྱ་ཕྱེད་ཀྱིས་དོ་ཤལ་བྱས་པ། འགྲོ་བ་རྣམས་སྐྱོབ་པའི་སྟོབས་ཆེན་མོ་ཞབས་གཡས་
[155a.6]བརྐྱང་བ་དང་ལྡན་པ། བཞད་ཅིང་ལང་ཚོ་གཞོན་ནུ་ལ་སྣ་ཚོགས་པའི་གོས་ཀྱིས་བརྒྱན་པ། རྩ་བའི་ཞལ་སེར་པོ། གཡས་ཀྱི་གཉིས་པ་ནི་ནག་པོ། གསུམ་པ་ནི་ལྗང་གུ། བཞི་པ་ནི་ནམ་མཁའ་ལྟ་བུ་སྔོན་པོའོ། །གཡོན་པ་ནི་ཀུནྡ་ལྟ་བུ། གཉིས་པ་ནི་དམར་པོ། གསུམ་པ་ནི་ནམ་མཁའ་
[155a.7]ལྟ་བུ་སྔོན་པོ། སྟེང་ནི་དུ་བའི་མདོག་ལྟ་བུ་འཇིགས་པ་ཆེན་མོའོ། །ཞལ་དབུས་མ་རྣམ་པར་གཙིགས་པའོ། །ཕྱག་གཡས་པ་རྣམས་ན་རལ་གྲི་དང་། ཨུཏྤ་ལ་དང་མདའ་དང་། རྡོ་རྗེ་དང་ལྕགས་ཀྱུ་དང་། དབྱུག་པ་དང་། གྲི་གུག་བསྣམས་པ་དང་། མི་འཇིགས་པ་རྣམས་སོ། །གཡོན་གྱི་
[155b]
[155b.1]ཕྱག་རྣམས་ན་ཞགས་པ་དང་བཅས་པའི་སྡིགས་མཛུབ་དང་། ཐོད་པ་དང་། གཞུ་དང་། ཁ་ཊྭཱཾ་ག་དང་། རྡོ་རྗེ་དང་བཅས་པའི་ཞགས་པ་དང་། ཚངས་པའི་མགོ་བོ་དང་། རིན་པོ་ཆེ་དང་། བུམ་པ་རྣམས་བསྣམས་པའོ། །སྣ་ཚོགས་པདྨ་དང་ཟླ་བ་ལ་བཞུགས་པ། ཉི་མའི་འོད་ཀྱིས་རྣམ་པར་
[155b.2]བརྒྱན་པ། ཞབས་གཡོན་པས་དབང་པོ་དང་། ཞབས་གཉིས་ཀྱི་དབུས་སུ་དྲག་པོ་དང་། ཚངས་པ་དང་། འཁོར་ལོ་ཅན་ལ་གནས་པའོ། །སྒྲིབ་པ་ཐམས་ཅད་རྣམ་པར་འཇོམས་པ། རྣལ་འབྱོར་པས་བསྒོམས་པས་མྱུར་དུ་དངོས་གྲུབ་རྣམས་ཐོབ་པར་འགྱུར་རོ། །བཟླས་པའི་སྔགས་ནི་ཨོཾ་པྲ་
[155b.3]སནྣ་ཏཱ་རཻ་ཨ་མྲྀ་ཏེ། ཨ་མྲྀ་ཏ་མུ་ཁེ་ཨ་མྲྀ་ཏ་ལོ་ཙ་ནེ་སརྦཱརྠ་སཱ་དྷ་ནི་སརྦ་སཏྭ་བ་ཤཾ་ཀ་རི་ཧཱུཾ་ཧཱུཾ་ཕཊ་སྭཱཧཱ། ཞེས་པ་ནི་དོན་ཐམས་ཅད་རབ་ཏུ་གྲུབ་པ་སྦྱིན་པའི་འཕགས་མ་སྒྲོལ་མའི་སྒྲུབ་ཐབས་རྫོགས་སོ།། {T3507}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་བྷཊྚཱ་རི་ཀཱ་ཡཱ་ཀལྤཿ། བོད་སྐད་དུ། རྗེ་བཙུན་
[155b.4]མ་འཕགས་མ་སྒྲོལ་མའི་ཆོ་ག །འཕགས་མ་སྒྲོལ་མ་ལ་ཕྱག་འཚལ་ལོ། །ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། ཨོཾ་ཀུ་རུ་ཀུལླེ་སྭཱ་ཧཱ། རྩ་བའི་སྔགས་སོ། །ལུས་ལ་དགོད་པར་བྱའོ། །སྙིང་པོའི་སྔགས་ཀྱི་བཟླས་པར་བྱའོ། །ཨོཾ་ཡིག་ནི་སྤྱི་བོར་དགོད་པར་བྱའོ། །ཀུ་ཡིག་ནི་དཔྲལ་བར་དགོད་པར་
[155b.5]བྱའོ། །རུ་ཡིག་ནི་མིག་ལ་དགོད་པར་བྱའོ། །ཀུ་ཡིག་ནི་གོ་ཆ་རུ་བྱའོ། །ལ་ཡིག་ནི་མགོ་བོར་བལྟ་བར་བྱའོ། །ལེ་ཡིག་ནི་སྙིང་གར་དགོད་པར་བྱའོ། །སྭཱ་ཡིག་ནི་ལྟེ་བའི་ཕྱོགས་སུའོ། །ཧཱ་ཡིག་ནི་རྐང་པ་དག་ལ་དགོད་པར་བྱའོ། །ཡི་གེ་འདི་རྣམས་སྒྲུབ་པ་པོས་བདག་ཉིད་ཀྱི་ལུས་ལ་དགོད་
[155b.6]པར་བྱའོ། །ཨོཾ་ཡིག་ཁ་དོག་དཀར་པོ་སྟེ། །ཀུ་ཡིག་སྔོན་པོ་དེ་བཞིན་དུ། །རུ་ཡིག་ཁ་དོག་དམར་པོར་གསུངས། །ཀུ་ཡིག་དཀར་པོ་དེ་བཞིན་དུ། །ལ་ཡིག་སེར་པོར་བལྟ་བར་བྱ། །དེ་བཞིན་ལེ་ཡིག་སྔོན་པོ་སྟེ། །སྭཱ་ཡིག་དམར་པོ་ཉིད་དུ་གསུངས། །ཧཱ་ཡིག་ནག་པོར་དེ་བཞིན་བཤད། །དེ་
[155b.7]བཞིན་དུ་ཡི་གེ་འདི་རྣམས་ཀྱི་ཁ་དོག་གསུངས་སོ། །སྒྲོལ་མའི་སྔགས་ཀྱང་འདི་ཉིད་དོ། །འདིར་བཅོམ་ལྡན་འདས་མ་མཆོད་པ་འདི་ཉེ་བར་བཞེས་ལ་བདག་ལ་མཆོག་སྩལ་དུ་གསོལ། །ཀུན་ནས་འབབ་པའི་སྔགས་སོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཧཱུཾ་ཕཊ་སྭཱཧཱ། མཆོད་ཡོན་གྱི་སྔགས་ཀྱིས་པདྨའི་
[156a]
[156a.1]ཕྱག་རྒྱ་བཅིངས་ནས་མེ་ཏོག་དྲི་ཞིམ་པོས་མཆོད་ཡོན་དབུལ་བར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ལས་ཐམས་ཅད་ལ་ལེགས་པར་སྦྱར་བར་བྱའོ། །ཏཱཾ་ཡིག་གི་རྣམ་པ་དེ་བཞིན་དུ་ཨོཾ་ཏཱཾ་ཏཱཾ་ཏཱཾ་ཏཱཾ་ཏཱཾ་ཞེས་པ་འདིས་དགྲ་ཐམས་ཅད་རེངས་པར་འགྱུར་རོ། །སོར་མོ་རྣམས་ལ་བཀོད་ནས་
[156a.2]སྔགས་ཐམས་ཅད་ཀྱི་ལག་པ་བསྟན་པས་དེ་རེངས་པར་འགྱུར་རོ། །ཨོཾ་ཏྲཱཾ་ཏྲཱཾ་ཏྲཱཾ་ཏྲཱཾ་ཏྲཱཾ། ཡང་གང་གི་ཡང་དག་པའི་རྐྱེན་དུ་འགྱུར་རོ། །ཏཱཾ་གི་ཡི་གེ་འབུམ་བཟླས་པས་གྲོང་བརྒྱ་ཐོབ་པར་འགྱུར་རོ། །ཨོཾ་ཏྲུཾ་ཏྲུཾ་ཏྲུཾ་ཏྲུཾ་ཏྲུཾ། འདིས་ལས་ཐམས་ཅད་སྲུང་བར་བྱེད་པར་འགྱུར་རོ། །རྒྱལ་རིགས་ཀྱི་ནང་དུ་
[156a.3]ཞུགས་ནས་སྤྱོད་ཡུལ་དུ་བརྒྱད་བརྒྱ་མངོན་པར་བསྔགས་ཏེ་ཐིག་ལེ་བྱས་ནས་གནས་བདུན་དུ་སྦྱར་བར་བྱ་སྟེ། སྤྱི་བོ་དང་། དཔྲལ་བ་དང་། མགྲིན་པ་དང་། སྙིང་ག་དང་། ལྟེ་བ་དང་། པུས་མོ་དང་། རྐང་པ་དག་ལ་དེ་བཞིན་དུ་དགོད་པར་བྱའོ། །དེ་བཞིན་དུ་འདིས་གི་ཝང་གི་མིག་སྨན་བྱའོ། །
[156a.4]དེ་ནས་རྒྱལ་རིགས་ཀྱི་ནང་དུ་ཞུགས་ནས་རྒྱལ་པོ་དང་བཅས་པ་མངོན་དུ་ཕྱོགས་ནས་བལྟ་བར་འགྱུར་རོ། །སྟོང་ཕྲག་བརྒྱད་བཟླས་ན་སེམས་ཅན་ཐམས་ཅད་དབང་དུ་བྱེད་པར་འགྱུར་རོ། །ཏྲཱུཾ་ཏྲཱུཾ་ཏྲཱུཾ་ཏྲཱུཾ་ཏྲཱུཾ་ཨོཾ་འདི་སྔགས་འབུམ་བཟླས་ན། གྲོང་སྟོང་ཕྲག་གཅིག་ཐོབ་པར་འགྱུར་རོ། །བཅོམ་
[156a.5]ལྡན་འདས་སྒྲོལ་མ་ཡང་མཐོང་བར་འགྱུར་རོ། །མར་མེའི་སྔགས་ནི་ཨོཾ་རུཾ་རུཾ་རུཾ་ཧཿཧཿཧཱུཾ་ཕཊ་སྭཱཧཱ། གཙུག་ཕུད་འཆིང་བའི་སྔགས་ནི་ཨོཾ་ཏཱཾ་ཏཱཾ་ཏཱཾ་ཏཱཾ་ཏཱཾ་བནྡྷ་ཏཱ་ཧོ་ཧཱཿསྭཱཧཱ། སྟེང་འོག་གི་སྔགས་ནི་འདིར་སྒྲོལ་མའི་བཟླས་པའི་ཆོ་གའི་རིམ་པ། ཨོཾ་ཏྲུཾ་ཏྲུཾ་ཏྲུཾ་ཏྲུཾ་ཏྲུཾ། སྙིང་པོའི་སྔགས་སོ། །ཉེ་བའི་སྙིང་
[156a.6]པོ་ནི་ཏཱཾ་ཏཱཾ་ཏི་ཏེ། འདིས་དབང་དུ་བྱ་བའི་ལས་ལ་རབ་ཏུ་སྦྱར་བར་བྱའོ། །དབང་དུ་བྱ་བ་ལ་དཀྱིལ་འཁོར་ཀུན་ནས་བྲིས་ཏེ་དུར་ཁྲོད་ཀྱི་སོལ་བ་ལ་གཟུགས་བརྙན་བྱས་ཏེ་མགོ་བོ་ལ་ཏཱཾ་ཏཱཾའོ། །གསང་བ་ལ་ཏིའོ། །རྐང་པ་དག་ལ་ཏེ་བཀོད་ནས་ཀ་ར་བཱི་རའི་མེ་ཏོག་གིས་བྷ་ག་ལ་བསྣུན་པར་བྱའོ། །
[156a.7]སྔགས་འདིས་དབང་དུ་འགྱུར་རོ། །དགུག་པ་ལ་གི་ཝང་གིས་གྲོ་ག་ལ་བུད་མེད་དམ་སྐྱེས་པའི་གཟུགས་བརྙན་བྱས་ཏེ། ཏཱི་ནི་སྤྱི་བོ་རུའོ། །ཏི་ནི་སྙིང་གར་རོ། །ཏེ་ནི་རྐང་པ་དག་ལའོ། །ཏཱཾ་ནི་དཔྲལ་བ་ལའོ། །ཡི་གེ་འདི་རྣམས་དགོད་པར་བྱའོ། །དེ་ནས་བྲིས་སྐུའི་ཆོ་གས་བཅོམ་ལྡན་འདས་སྒྲོལ་མའི་
[156b]
[156b.1]སྐུ་བྲི་བར་བྱ་སྟེ། ཕྱག་བཞི་པ། དམར་པོ་དང་། ལྗང་གུ་དང་། ནག་པོ་དང་། དཀར་པོ་དང་། ཁ་དོག་སྣ་ཚོགས་པའི་གཟུགས་ཅན་མའོ། །ཕྱག་དང་པོ་ན་ཞགས་པ། གཉིས་པ་ན་དུང་། དེ་བཞིན་དུ་ཨུཏྤ་ལ་དང་ལྕགས་ཀྱུ་ཕྱག་ན་བསྣམས་པའོ། །ལྕགས་ཀྱུས་དགུག་པར་བསམ་པར་བྱའོ། །
[156b.2]དཔག་ཚད་སྟོང་ལས་ཀྱང་དགུག་པར་འགྱུར་རོ། །འབུམ་བཟླས་པས་གང་འདོད་པ་དེ་སྟེར་ཞིང་དབང་དང་ལྡན་པར་འགྱུར་རོ། །ཡང་ན་ལྕགས་ཀྱུ་དགོད་པར་བྱའོ། །དགྲའི་མིང་བྲིས་ཏེ་ལག་པས་མནན་ནས་ཇི་སྲིད་དྲུང་དུ་མ་བཟུང་བར་དུ་དེ་སྲིད་བཟླས་པར་བྱའོ། །ཁ་དོག་ནག་པོར་བསམ་པར་བྱའོ། །
[156b.3]ཨོཾ་ཏྲུཾ་ཏྲུཾ་ཏྲུཾ་ཏྲུཾ་ཏྲུཾ་ཨོཾ། འདི་འབུམ་བཟླས་པས་ན་དབང་བསྐུར་བ་བརྟན་པར་འགྱུར་རོ། །དེ་ནས་ཨུཏྤ་ལ་སྔོན་པོའི་མེ་ཏོག་གིས་བཅོམ་ལྡན་འདས་སྒྲོལ་མ་ལ་སྟོང་ཕྲག་བཅུར་མཆོད་ནས་འདི་བཟླས་པས་སྟེར་རོ། །རེ་རེ་མཆོད་ནས་བཟླས་པ་བྱའོ། །སྐྱེ་བོ་ཐམས་ཅད་དེའི་རྗེས་སུ་འབྲང་ཞིང་དགའ་
[156b.4]བར་འགྱུར་རོ། །དུས་གསུམ་དུ་བརྒྱད་བརྒྱ་བཟླས་པར་བྱའོ། །དེ་བཞིན་དུ་རྒྱལ་རིགས་ལ་བརྟེན་པ་དང་། བྱ་བ་བྱེད་པ་དང་། ལྷ་ཁང་དང་། འབྲོག་དགོན་པ་ཐམས་ཅད་དུ་བཅོམ་ལྡན་འདས་སྒྲོལ་མས་བསྲུང་བར་འགྱུར་རོ། །རྗེ་བཙུན་མ་འཕགས་མ་སྒྲོལ་མའི་ཆོ་ག་རྫོགས་སོ།། །།
[156b.5]{T3508}༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་སཱ་དྷ་ནཾ། བོད་སྐད་དུ། འཕགས་མ་དུག་སེལ་མའི་སྒྲུབ་ཐབས། འཕགས་མ་ཛཱཾ་གུ་ལཱི་ལ་ཕྱག་འཚལ་ལོ། །སྔོན་གསུངས་ཆོ་གས་རང་ཉིད་ཀྱི། །སྙིང་གར་དཀྱིལ་འཁོར་དམར་པོ་ལ། །ཛཱཾ་ཡིག་ལས་ནི་ཡེ་ཤེས་རྫོགས། །རིག་མ་དུག་སེལ་མ་
[156b.6]ཞེས་བྱ། །སེར་མོ་སྦྲུལ་ཀྱི་གདེངས་ཀ་བདུན། །འབར་ཞིང་གཡོ་བའི་ནོར་བུས་བརྒྱན། །ཞལ་གསུམ་དང་ནི་སྤྱན་གསུམ་མ། །གཞོན་ནུ་མ་ཡི་མཚན་ཉིད་འབར། །ཁྲོ་བ་དང་བཅས་དེ་བཞིན་དུ། །སྦྲུལ་གྱི་སྐེ་རགས་ཀྱིས་བརྒྱན་མ། །ཕྱག་དྲུག་རོལ་པའི་སྟབས་ཀྱིས་བཞུགས། །མི་
[156b.7]བསྐྱོད་པ་ནི་དབུ་ལ་བཞུགས། །ཕྱག་གཡས་ན་ནི་རྡོ་རྗེ་སྟེ། །གཉིས་པ་དག་ན་རལ་གྲི་འཕྱར། །གསུམ་པ་གར་གྱི་ཚུལ་དང་ནི། །བདུད་རྣམས་སྐྲག་མཛད་མདའ་བསྣམས་སོ། །གཡོན་ན་སྡིགས་མཛུབ་ཞགས་པ་དང་། །གཉིས་པ་དུག་གི་མེ་ཏོག་བསྣམས། །གསུམ་པའི་ཕྱག་ན་གཞུ་
[157a]
[157a.1]བསྣམས་ཤིང་། །མེ་ཏོག་གིས་བརྒྱན་སྐེ་རགས་ཏེ། །པདྨའི་གདན་གནས་གསེར་གྱི་མདོག །འོད་ཟེར་དམར་པོའི་དཀྱིལ་འཁོར་ལ། །དབང་པོའི་མཚོན་ཆ་སྤྲོ་ཞིང་སྦྲུལ། །འབར་བས་ཡོངས་བསྐོར་འོད་ཀྱིས་གཡོགས། །སངས་རྒྱས་སྐུ་ཚོགས་འཕྲོ་བ་ཡི། །ཟླ་བུམ་ཉིད་
[157a.2]ཀྱི་ཕྱག་རྒྱ་བསྣམས། །དུག་གི་རྒྱལ་ལ་དབང་བསྐུར་ཞིང་། །ཛཱཾ་ཡིག་གིས་ནི་ཁ་བརྒྱན་པ། །དུག་གིས་འགྱེལ་ལ་སྐུ་གསུམ་གྱི། །དུག་སེལ་མ་ནི་རྟག་ཏུ་བསྒོམ། །དེ་བཞིན་འདི་ནི་སྒོམ་བྱེད་ན། །རིང་པོར་མི་ཐོགས་བྱང་ཆུབ་འཐོབ། །ལག་པ་གཉིས་སྦྲུལ་གྱི་གདེངས་ཀའི་རྣམ་པ་ལྟར་བྱས་
[157a.3]ནས། སྤྱི་བོར་གདེངས་ཀ་གདུགས་ལྟ་བུ་རབ་ཏུ་སྦྱིན་པ་ནི་དུག་སེལ་མའི་ཕྱག་རྒྱའོ། །སྔགས་བཟླས་པར་བྱའོ། །ཨོཾ་ན་མཿཤ་བ་ར་ཀུ་མཱ་རི་ཡེ་ཙུཙྪཾ་ཙོ་ཌ་ཙཱི་ལ་ཙུཙྪ་ལ་ཡ་སཾ་གྷ་ཌྷ་ནི་མིཏྟ་མཱ་ཏྟྭཾ་གི་ཨ་ཌ་བིད་དྷེ་ཨ་ཧེ་ཨོཾ་ཛཱཿསྭཱ་ཧཱ། འཕགས་མ་དུག་སེལ་མའི་སྒྲུབ་ཐབས་རྫོགས་སོ།། །།
[157a.4]{T3509}༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་དྷཱ་ར་ཎི། བོད་སྐད་དུ། འཕགས་མ་དུག་སེལ་མའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཨོཾ་ཨི་ལི་མིཏྟེ་ཏི་ལི་མིཏྟེ་ཨི་ལི་ཏི་ལི་མིཏྟ་དུམྦེ་དུམྦཱ་ལ་ཡེ་དུ་སེ་དུ་སཱ་ལཱི་ཡེ་ཏ་རྐ་ར་ཎེ་མརྨྨེ་མརྨཱ་རོ་ཎ་ཀསྨཱི་
[157a.5]རེ་ཀསྨཱི་ར་མུགྷེ་ཨགྷེ་ཨ་གྷ་ཎེ་ཨགྷ་ཎེ་ཨཱི་ལི་ཨཱི་ལི་ཨེ་མི་ལཱི་ཨེ་མི་ལཱི་མི་ལེ་ཨེ་ཨཀྵཱ་ཨེ་ཨཀྵཱ་ཨི་ཨེ་ཤྭེ་ཏེ་ཤྭེ་ཏ་ཏུཎྜེ་ཨ་ནུཏྟ་རཀྵེ་སྭཱ་ཧཱ། འདིར་བདག་གིས་རིག་སྔགས་ཀུན་ཏུ་དཀར་བ་དགེ་སློང་རྣམས་ལ་ལེགས་པར་ཕུལ་བའི་རིག་པ་འདི་ལན་ཅིག་མཉན་པས་དེ་ལ་ལོ་བདུན་དུ་སྦྲུལ་
[157a.6]གྱིས་འཛིན་པར་མི་འགྱུར་རོ། །དེའི་ལུས་ལ་དུག་གིས་གོས་པར་མི་འགྱུར་རོ། །དགེ་སློང་རྣམས་ཀྱིས་རིག་པ་འདི་བཟུང་བར་གྱུར་ན། དེ་ཇི་སྲིད་འཚོའི་བར་དུ་སྦྲུལ་གྱིས་འཛིན་པར་མི་འགྱུར་རོ། །དེའི་ལུས་ལ་ཡང་དུག་གིས་གོས་པར་མི་འགྱུར་རོ། །གལ་ཏེ་སྦྲུལ་གྱིས་བཟུང་ན་དེའི་མགོ་ཨ་
[157a.7]རྫ་ཀའི་དོག་པ་བཞིན་དུ་ཚལ་པ་བདུན་དུ་འགས་པར་འགྱུར་རོ། །འཕགས་མ་དུག་སེལ་མའི་གཟུངས་རྫོགས་སོ།། {T3510}༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་སཱ་དྷ་ནཾ། བོད་སྐད་དུ། འཕགས་མ་དུག་སེལ་མའི་སྒྲུབ་ཐབས། འཕགས་མ་དུག་སེལ་མ་ལ་ཕྱག་འཚལ་ལོ། །
[157b]
[157b.1]སྔོན་དུ་གསུངས་པའི་ཆོ་གས་སྟོང་པ་ཉིད་དུ་བསྒོམས་པའི་རྗེས་ལ་ཆུ་སྐྱེས་དམར་པོ་དང་། ཟླ་བ་ལ་ཛཱཾ་ཡིག་སེར་པོ་ཡོངས་སུ་གྱུར་པ་ལས་འཕགས་མ་དུག་སེལ་མའི་བདག་ཉིད་དུ་སྐད་ཅིག་གིས་བསྐྱེད་པར་བྱ་སྟེ། སྐུ་མདོག་སེར་མོ་ཞལ་གསུམ་མ། ཕྱག་དྲུག་པ། སྔོན་པོ་དང་།
[157b.2]དཀར་པོ་ནི་གཡས་པ་དང་ཅིག་ཤོས་ཀྱི་ཞལ་ལོ། །རལ་གྲི་དང་། རྡོ་རྗེ་དང་། མདའ་རྣམས་ནི་གཡས་ཀྱི་ཕྱག་གསུམ་ནའོ། །སྡིགས་མཛུབ་དང་བཅས་པའི་ཞགས་པ་དང་། དུག་གི་མེ་ཏོག་དང་། གཞུ་བཀང་བ་ཕྱག་གཡོན་པ་གསུམ་ནའོ། །གདེངས་ཀ་རྒྱས་པའི་དཀྱིལ་འཁོར་
[157b.3]གྱི་དབུས་ལ་གནས་པ། སྦྲུལ་དང་མཛེས་པའི་གོས་དང་། རྒྱན་གྱིས་བརྒྱན་པ། གཞོན་ནུ་མའི་མཚན་ཉིད་འབར་བ། མི་བསྐྱོད་པས་དབུ་བརྒྱན་པར་བསྒོམས་ནས་སྔགས་བཟླས་པར་བྱའོ། ཨོཾ་ཛཱཾ་གུ་ལཱི་སརྦ་བི་ཥ་ཤ་མ་ནི་པུཿསྭཧཱ། འཕགས་མ་དུག་སེལ་མའི་སྒྲུབ་ཐབས་རྫོགས་སོ། །
[157b.4]{T3511}༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་མ་ཧཱ་བིདྱཱ། བོད་སྐད་དུ། འཕགས་མ་དུག་སེལ་མའི་རིག་སྔགས་ཆེན་མོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་
[157b.5]ན་བཞུགས་ཏེ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་། ཡང་དཔག་ཏུ་མེད་པའི་ལྷ་དང་། ཀླུ་དང་།
[157b.6]གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་དང་ཐབས་ཅིག་གོ། །དེ་ཉིད་དུ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་སྔོན་བྱུང་པ་ན་ང་བྱང་ཆུབ་སེམས་
[157b.7]དཔར་གྱུར་ཏེ་སྤྱད་པ་སྤྱོད་པ་ན། རི་བོ་གངས་ལྡན་བྱང་ཕྱོགས་ལོགས། །སྤོས་ངད་ལྡང་བའི་རི་བོ་སྟེ། །རི་རྒྱལ་དེ་ཡི་ཤར་ཕྱོགས་ན། །གཞོན་ནུ་བསོད་ནམས་བརྒྱ་ཡིས་མཚན། །ཨེ་ན་ཡ་ཡི་པགས་པའི་གོས། །སྦྲུལ་གྱིས་བརྒྱན་ཅིང་སྐེ་རགས་བྱས། །སྦྲུལ་དུག་རེག་པའི་དུག་ཅན་
[158a]
[158a.1]དང་། །མཐོང་དུག་ཅན་གྱིས་རྣ་རྒྱན་བྱས། །དུག་གི་མེ་ཏོག་ཟས་སུ་ཟ། །དུག་གི་ཁྲག་ནི་འཐུང་བར་བྱེད། །དེ་ཡི་བདག་ལ་བོས་བྱས་ཏེ། །བུ་ཁྱོད་ཚུར་ཤོག་བདག་ལ་ཉོན། །དུག་སེལ་མ་ཞེས་བྱ་བ་ཡི། །རིག་སྔགས་མཆོག་གིས་དུག་འཇོམས་མ། །གང་ཞིག་བདག་
[158a.2]མིང་ཙམ་གྱིས་ཀྱང་། །དེ་ཡི་དུག་རྣམས་ཐམས་ཅད་འཇོམས། །ཏདྱ་ཐཱ། ཨོཾ་ཨི་ལི་མིཏྟེ་ཏི་ལི་མིཏྟེ་ཨི་ལི་ཏི་ལི་མིཏྟེ་དུམྦེ་ལི་དུམྦཱ་ལི་ཨ་གྲ་དུསྶེ་དུསྶ་ལཱི་ཨི་ཏརྐེ་ཏརྐ་ར་ཎ་མེརྨེ་མརྨྨ་ར་ཎེ་ཀཤྨཱི་རེ་ཀཤྨཱི་ར་མུ་ཀྟེ་ཨགྷེ་ཨགྷ་ནེ་ཨགྷ་ན་གྷ་ནེ་ཨ་གྷ་ན་གྷ་ནེ་ཨི་ལཱི་ཨི་ལཱི། ཨེ་མ་ལི་ཨེ་ཨི་ལི་མི་ལཱི་ཨེ་ཨཀྵཱ་
[158a.3]ཨེ་ཨཀྵ། ཨི་ཨེ་ཤྭེ་ཏེ་ཤྭེ་ཏེ་ཏུཎྜེ་ཨ་ནུ་རཀྵེ་སྭཱཧཱ། འདིར་བདག་གིས་རིག་སྔགས་ཐམས་ཅད་དུ་དཀར་བ་དགེ་སློང་རྣམས་ལ་ལེགས་པར་ཕུལ་བའི་རིག་པ་འདི་ལན་ཅིག་ཐོས་པས་དེ་ལ་ལོ་བདུན་དུ་སྦྲུལ་གྱིས་འཛིན་པར་མི་འགྱུར་རོ། །དེའི་ལུས་ལ་དུག་གིས་གོས་པར་མི་འགྱུར་རོ། །དགེ་
[158a.4]སློང་གང་ཞིག་རྣམས་ཀྱིས་རིག་སྔགས་འདི་བཟུང་བར་གྱུར་ན་ཇི་སྲིད་འཚོའི་བར་དུ་སྦྲུལ་གྱིས་འཛིན་པར་མི་འགྱུར་རོ། །གལ་ཏེ་ཡང་སྦྲུལ་གྱིས་བཟུང་ན་དེའི་མགོ་ཨརྫ་ཀའི་དོག་པ་བཞིན་དུ་ཚལ་པ་བདུན་དུ་འགས་པར་འགྱུར་རོ། །ཡང་སྔགས་ཀྱི་ཚིག་འདི་སྦྲུལ་གྱི་མདུན་དུ་བཟླས་པར་མི་བྱའོ། །
[158a.5]གང་ཞིག་གིས་བཟླས་ན་སྦྲུལ་འཆི་བར་འགྱུར་རོ། །འདི་ལྟ་སྟེ། ཨི་ལ་ལཱ་ཙི་ལ་ལཱ་ཙཀྐོ་བཀྐོ་ཀོ་ཌ་ཏི་མོ་ཧོ་མོ་ཧི་ཏི་ཀུ་རུ་ཌཱ་ཀུ་རུ་ཌེ་ཏི་ནི་ཀུ་རུ་ཌེ་ཏི། པུ་རུ་ཌཱ་པུ་རུ་ཌེ་ཏི་ནི་པུ་རུ་ཌཱ་ནི་པུ་རུ་ཌེ་ཏི། ཕུཊྚ་ཕུཊྚ་ར་ཧེ་ཕུཊྚ་ཕུཊྚ། ཊྚེཎྚ་ར་ཧེ། ནཱ་གེ་ནཱ་གཾ་ར་ཧེ། ནཱ་གཌྚ་ཌྚཎྚ་ར་ཧེ། སར་པེ་སར་པ་ར་ཧེ་སར་པཌྚ་ཌྚཎྚ་ར་ཧེ།
[158a.6]ཨཙྪེ་ཨཙྪ་ལེ་ཨི་ཨི་ལ་བི་ཥེ། ཤཱི་ཏེ་ཤཱི་ཏཱ་བན་ཏ་ལེ། ཕ་ལེ་ཕ་ལ་ལེ། ཏུཎྜེ་ཏུ་ཏུཎྜེ། ཏཎྜི་ཏཎྜི་ཏེ་ཌ་ཏ་སྥུ་ཊ་སྥུ་ཊ་སྥུ་ཊ་ཏུ་བི་ཥཾ་སྭཱ་ཧཱ། དགེ་སློང་རྣམས་ཀྱིས་དུག་སེལ་མ་ཞེས་བྱ་བའི་རིག་སྔགས་ཆེན་པོ་ལྷ་དང་། ལྷ་མ་ཡིན་དང་། ཀླུ་དང་གནོད་སྦྱིན་དང་། འབྱུང་པོ་འདུས་པ་ཐམས་ཅད་ལ་
[158a.7]གསུངས་པ་དང་། གཏམ་བྱས་པ་དང་། ཉེ་བར་བསྟན་པ་དང་། རབ་ཏུ་ལུང་བསྟན་པ་དེ་ཐམས་ཅད་དེ་བཞིན་དུ་མི་བདེན་པ་མ་ལགས་ཏེ་གཞན་དུ་མ་ཡིན་ནོ། །དེ་བདེན་པར་འགྱུར་ཏེ་ཇི་ལྟ་བ་དེ་བཞིན་དུ་ཕྱིན་ཅི་མ་ལོག་པའོ། །ཕྱིན་ཅི་མ་ལོག་པས་སངས་རྒྱས་ཀྱི་བདེན་པ་རྗེས་སུ་དྲན་པ་
[158b]
[158b.1]དང་། ཆོས་ཀྱི་བདེན་པ་རྗེས་སུ་དྲན་པ་དང་དགེ་འདུན་གྱི་བདེན་པ་རྗེས་སུ་དྲན་པ་དང་། བདེན་པའི་ཚིག་གི་བདེན་པ་རྗེས་སུ་དྲན་པ་དང་། བདེན་པ་འདི་དང་བདེན་པའི་ཚིག་འདིས་དུག་རྣམས་དུག་མེད་པར་གྱུར་ཅིག །དཱ་ཏཱ་རཾ་གཙྪ་ཏུ། ད་ཥ་ཌཱ་རཾ་གཙྪ་ཏུ། ཨགྣི་གཙྪ་ཏུ། ཀུ་ཊྱཾ་གཙྪ་ཏུ། ཛ་ལ་གཙྪ་ཏུ།
[158b.2]སྟཾ་བྷ་གཙྪ་ཏུ། ཤཱནྟཾ་གཙྪ་ཏུ། སྭསྟྱ་ཡ་ནཾ་གཙྪ་ཏུ། བྷཱུ་མྱཾ་ནཾ་པ་ཏ་ཏུ་བི་ཥཾ་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཀུན་དགའ་བོ་དང་། དགེ་སློང་དང་བཅས་པའི་འཁོར་རྣམས་དང་། ལྷ་དང་མི་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། མིའམ་
[158b.3]ཅི་དང་། ལྟོ་འཕྱེ་ཆེན་པོ་དང་། གནོད་སྦྱིན་དང་། ཀླུ་དང་བཅས་པའི་འཁོར་དེ་དག་ཐམས་ཅད་ཡི་རངས་ཏེ་མངོན་པར་དགའོ། །འཕགས་མ་དུག་སེལ་མའི་རིག་སྔགས་ཆེན་མོ་རྫོགས་སོ།། {T3512}༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལྱཱ་བྷ་ག་བ་ཏྱཱཿཀལྤ། བོད་སྐད་དུ། བཅོམ་
[158b.4]ལྡན་འདས་འཕགས་མ་དུག་སེལ་བའི་རྟོག་པ། འཕགས་མ་དུག་སེལ་མ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་མའི་ཐུགས་ཀྱི་རྟོག་པ་བདག་གིས་བཤད་པར་བགྱིའོ། །ཨོཾ་ཨ་སི་ཤུ་ལ་ཛི་ཧྭེ་ཛི་ཧྭེ་བཛྲ་ཀཱ་ཡཻ་གྲ་ས་གྲ་ས་ཛྭ་ལ་ཛྭ་ལ་མ་ཧཱ་ཛྭ་ལེ་མ་ཧཱ་ཡོ་ག་ཤྭ་རི་ཧཱུཾ་ཧཱུཾ་ཕཊ་ཕཊ་
[158b.5]སྭཱ་ཧཱ། སྟོང་ཕྲག་བཅུ་བཟླས་པས་དུག་གི་ལས་ཐམས་ཅད་ཞི་བར་ནུས་པར་འགྱུར་རོ། །བཟླས་པ་ཡང་ཆོ་ག་འདིས་བྱའོ། །དུས་གསུམ་དུ་ཁྲུས་བྱས་ནས་ཆང་དང་། ཉ་དང་། སྒོག་པ་དང་། བཙོང་དང་། མར་ནག་དང་། ཚྭ་རྣམས་རྣམ་པར་སྤངས་ཏེ་དུས་གསུམ་དུ་བཟླས་པར་བྱའོ། །
[158b.6]ཇི་སྲིད་སྟོང་ཕྲག་བཅུའི་བར་དུའོ། །དེ་ནས་དངོས་གྲུབ་ཏུ་འགྱུར་རོ། །ཕྱི་ནས་འདི་རྣམ་པར་བཀོད་ནས་ལས་རྣམས་བྱའོ། །དང་པོ་རེ་ཞིག་སྔགས་པས་བདག་ཉིད་འདི་ལྟར་བསམ་པར་བྱ་སྟེ། གཞོན་ནུ་མའི་རྣམ་པ་སྐུ་མདོག་ལྗང་གུ། གདེངས་ཀ་བདུན་གྱིས་དབུ་ལ་རྣམ་པར་བརྒྱན་
[158b.7]པ། ཕྱག་བཞི་པ། ཞལ་གཅིག་པ། ཕྱག་དང་པོ་ན་རྩེ་གསུམ། གཉིས་པ་ན་རྨ་བྱའི་མཇུག་སྒྲོ། གསུམ་པ་ན་སྦྲུལ། བཞི་པ་ན་མི་འཇིགས་པ་རབ་ཏུ་བརྐྱང་པ། ཡན་ལག་ཐམས་ཅད་ལ་ཞབས་གདུབ་དང་། སྐ་རགས་དང་། དོ་ཤལ་དང་། རྣ་རྒྱན་ལ་སོགས་པ་སྦྲུལ་གྱི་རྣམ་
[159a]
[159a.1]པར་བསམ་པར་བྱའོ། །བ་སྤུའི་ཁུང་བུ་རེ་རེ་ནས་མེ་འབར་ཞིང་ཀུན་ནས་འབྱུང་བ་དང་ལྡན་པ་རྣམ་པར་བསམ་པར་བྱའོ། །དེ་བཞིན་དུ་བདག་ཉིད་བརྟག་པར་བྱའོ། །བདག་གིས་རེ་ཞིག་ལྷ་རྣམས་ལ་དེ་ནས་སྦྲུལ་གྱིས་བཟུང་བ་དེའི་མདུན་དུ་བཀོད་ནས་ཟངས་མ་ལ་སོགས་
[159a.2]པའི་སྣོད་དུ་ཆུ་ལ་བཞག་ན་རིག་སྔགས་ལན་བདུན་དུ་མངོན་པར་བསྔགས་ནས་དེ་ལ་ལན་བདུན་དུ་མགོ་བོ་ལ་སོགས་པ་ལ་དུག་རྣམས་བྱབས་ནས་ཆུ་དེ་ལ་དེ་བཞིན་དུ་ཡང་ནས་ཡང་དུ་འཕང་བར་བྱའོ། །འདིས་དུག་མེད་པར་འགྱུར་རོ། །གཡོ་བའི་དུག་ལ་གང་དང་གང་ལ་དེ་བཞིན་དུ་གཏོང་བ་དེ་
[159a.3]དང་དེའི་གནས་ལ་ལན་བདུན་བཟླས་ཏེ། གང་ལ་གཟུངས་ཀྱིས་བཅིངས་ཤིང་། སྦྲུལ་གྱི་རྣམ་པར་འཁྱིལ་བར་སྦྱོར་བར་བྱའོ། །འདིའི་ཕྱག་རྒྱ་ནི་སྦྲུལ་གྱི་རྣམ་པའོ། །ཕུཿཞེས་པས་གཏོང་ཞིང་མཆེ་བའི་རྨའི་ཡན་ལག་ལས་དུག་འཐུངས་པ་བཞིན་དུ་བསམ་པར་བྱའོ། །དེ་ལྟ་བུས་ལས་གྲུབ་
[159a.4]པར་འགྱུར་ཞིང་གཞན་དུ་ནི་མ་ཡིན་ནོ། །བཅོམ་ལྡན་འདས་འཕགས་མ་དུག་སེལ་མའི་རྟོག་པ་རྫོགས་སོ།། {T3513}༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་སཱ་དྷ་ནཾ། བོད་སྐད་དུ། འཕགས་མ་ཛཱཾ་གུ་ལཱིའི་སྒྲུབ་ཐབས། འཕགས་མ་དུག་སེལ་མ་ལ་ཕྱག་འཚལ་ལོ། །
[159a.5]སེམས་ཅན་རྣམས་ལ་བརྩེ་བ་ཅན། །འཕགས་མ་དུག་སེལ་གཟུགས་ཅན་མ། །བཅོམ་ལྡན་སྒྲོལ་མ་ལ་བཏུད་ནས། །དེ་ཡི་སྒྲུབ་ཐབས་བྲི་བར་བྱ། །དང་པོ་རེ་ཞིག་སྔགས་པས་གཙང་ཞིང་ཁྲུས་བྱས་ནས། ཕྲེང་བ་དང་གོས་དཀར་པོ་བཟུང་སྟེ། སྐྱེ་བོས་དབེན་པའི་ས་ཕྱོགས་
[159a.6]ལེགས་པར་བྱུགས་ཤིང་དྲི་བཟངས་དཀར་པོའི་ཆུས་ཆག་ཆག་བཏབ་ནས་མེ་ཏོག་དཀར་པོ་གཅལ་དུ་བཀྲམ་སྟེ། སྟན་བདེ་བ་ལ་ཉེ་བར་འདུག་ནས་འགྲོ་བ་རྣམས་ལ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་རྣམས་རྣམ་པར་བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་
[159a.7]དྷརྨཱཿསྭབྷཱ་ཝ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་གཟུང་བ་དང་འཛིན་པ་དང་བྲལ་བར་བལྟའོ། །དེ་ནས་པཾ་ཡིག་ཡོངས་སུ་གྱུར་པ་ལས་པདྨ་དཀར་པོ་འདབ་མ་བརྒྱད་པ་རྣམ་པར་བསམ་པར་བྱའོ། །དེའི་ཟེའུ་འབྲུ་ལ་ཨ་ཡིག་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་
[159b]
[159b.1]བལྟས་ནས། དེའི་སྟེང་དུ་ཧྲཱིཿཡིག་ཁ་དོག་དཀར་པོ་ལས་སྐྱེས་པའི་བདག་ཉིད་འཕགས་མ་དུག་སེལ་མ་སྐུ་མདོག་ཐམས་ཅད་དཀར་མོ་ཕྱག་བཞི་པ། ཞལ་གཅིག་པ། རལ་པའི་ཅོད་པན་ཅན། དཀར་མོ་གོས་དཀར་པོས་སྟོད་གཡོགས་བྱས་པ། རིན་པོ་ཆེའི་རྒྱན་དཀར་པོས་བརྒྱན་པ།
[159b.2]སྦྲུལ་དཀར་པོས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་པ། རྩ་བའི་ཕྱག་དག་གིས་པི་ཝང་བསྒྲེང་བར་མཛད་པ། གཡོན་གྱི་གཉིས་པས་སྦྲུལ་དཀར་པོ་བསྣམས་པ། གཡས་ཀྱི་གཉིས་པས་མི་འཇིགས་པ་རབ་ཏུ་སྦྱིན་པ། ཟླ་བའི་འོད་ཀྱི་ཕྲེང་བ་བསྣམས་པ་བསམ་པར་
[159b.3]བྱའོ། །མགོ་བོ་དང་མགྲིན་པ་དང་ནུ་མའི་བར་དུ་ཟླ་བའི་དཀྱིལ་འཁོར་ལ་ཨཱཿཧྲཱིཿཧཱུཾ་གི་ཡི་གེ་རྣམ་པར་བསྒོམ་པར་བྱའོ། །དེའི་རྗེས་སུ་ཧྲཱིཿཡིག་གི་འོད་ཟེར་གྱིས་ནམ་མཁའ་ལ་གནས་པའི་ཡེ་ཤེས་སེམས་དཔའ་གདན་དྲངས་ཏེ་དམ་ཚིག་སེམས་དཔའ་དང་གཅིག་ཏུ་བྱས་ཏེ་རྣམ་པར་བསྒོམ་
[159b.4]པར་བྱའོ། །ཛཿཧཱུཾ་བཾ་ཧོཿརབ་ཏུ་སྦྱོར་བས་སོ། །སླར་ཡང་ཧྲཱིཿཡིག་གི་འོད་ཟེར་གྱིས་ནམ་མཁའ་ལ་བཞུགས་པའི་དེ་བཞིན་གཤེགས་པ་ཐམས་ཅད་གདན་དྲངས་ཏེ་སེམས་ཅན་གྱི་དོན་ལ་བརྩོན་པས་ཀུན་ནས་དབང་བསྐུར་ཞིང་ལུས་ཀྱི་ནང་དུ་ཞུགས་པར་བསམ་པར་བྱའོ། །དེ་བཞིན་དུ་
[159b.5]བསམས་ནས་སྔགས་བཟླས་པར་བྱའོ། །ཧྲཱིཿཞེས་པའི་སྔགས་འབུམ་ཕྲག་བདུན་བཟླས་ནས་མེ་ཏོག་དཀར་པོའི་སྦྱིན་སྲེག་ཁྲི་ཕྲག་བདུན་བྱའོ། །རྒྱན་དཀར་པོས་རྣམ་པར་བརྒྱན་པར་བྱའོ། །འདིའི་རིམ་པས་ནམ་མཁའ་ལྡིང་གི་དབང་ཕྱུག་ཉིད་ཀྱི་མཁས་པར་གྱུར་ནས་བསྟན་བཅོས་
[159b.6]ཐམས་ཅད་ལ་འཇིགས་པ་མེད་ཅིང་དུག་ཐམས་ཅད་འཇོམས་པ་ཉིད་དུ་འགྱུར་ཏེ་ཐེ་ཚོམ་མེད་དོ། །འཕགས་མ་ཛཱཾ་གུ་ལཱིའི་སྒྲུབ་ཐབས་རྫོགས་སོ།། {T3514}༄༅༅། །རྒྱ་གར་སྐད་དུ། ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། རལ་པ་གཅིག་མའི་སྒྲུབ་ཐབས། རལ་པ་གཅིག་མ་ལ་
[159b.7]ཕྱག་འཚལ་ལོ། །དེ་ནས་གཞན་ཡང་རབ་བཤད་བྱ། །རྟོག་པའི་མན་ངག་ཇི་བཞིན་དུ། །སྒྲོལ་མ་རལ་གཅིག་ལ་བཏུད་ནས། །དེ་ཡི་སྒྲུབ་ཐབས་བཤད་པར་བྱ། །ཨོཾ་ཧཱུཾ་བཛྲཱི་གི་མ་མ་མ་རཀྵ་རཀྵ་ཕཊ་ཕཊ་སྭཱ་ཧཱ། ཞེས་པ་འདིས་བདག་ཉིད་བྱིན་གྱིས་བརླབ་པར་བྱས་ནས་དང་པོར་རེ་
[160a]
[160a.1]ཞིག་རྣལ་འབྱོར་པས་ཁ་བསང་བ་ལ་སོགས་པ་བྱས་ནས་སྐྱེ་བོས་དབེན་པའི་དུར་ཁྲོད་སྟུག་པོ་དང་བཞི་མདོ་ལ་སོགས་པ་འགྲོ་བ་ཐམས་ཅད་མངོན་པར་སྤྲོ་ཞིང་མཉེས་གཤིན་པས་མཆོག་ཏུ་བདེ་བའི་སྟན་ལ་འདུག་ནས། རང་གི་སྙིང་གར་པདྨ་དམར་པོའི་སྟེང་དུ་ཟླ་བའི་དཀྱིལ་འཁོར་
[160a.2]ལ་ཧཱུཾ་ཡིག་ནག་པོ་འོད་ཟེར་དང་བཅས་པ་བསམ་པར་བྱའོ། །དེའི་འོད་ཟེར་གྱིས་ནམ་མཁར་བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་བལྟས་ནས་མཆོད་པར་བྱའོ། །སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། གསུམ་ལ་སྐྱབས་སུ་འགྲོ་བ་དང་། བྱང་
[160a.3]ཆུབ་ཏུ་སེམས་བསྐྱེད་པ་ལ་སོགས་པ་བྱས་ནས་བདག་ཉིད་ངེས་པར་དབུལ་བ་དང་། ལམ་ལ་བརྟེན་པ་དང་། ལྷག་པའི་བསམ་པ་རྣམ་པར་དག་པས་ང་རྒྱལ་དང་བདག་གིར་བྱེད་པ་ཡོངས་སུ་སྤངས་ཏེ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་རྣམ་པར་བསྒོམ་པར་བྱའོ། །དེ་ནས་
[160a.4]སེམས་ཙམ་ལ་གནས་པར་བྱའོ། །བྱང་ཆུབ་ཀྱི་ཚོགས་བསྒོམས་པས་སོ་སོར་སྣང་བ་ཙམ་གྱི་ཡེ་ཤེས་ཏེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། རང་དང་གཞན་སྟོང་པ་རྣམ་པར་བསྒོམས་ནས་སྔོན་གྱི་སྨོན་ལམ་རྗེས་སུ་དྲན་པར་བྱའོ། །རཾ་ཡིག་ལས་མདུན་དུ་ཉི་མ་རྣམ་པར་བསྒོམས་ནས། ཉི་མ་
[160a.5]དེ་ལས་ཧཱུཾ་ཡིག་ལས་བྱུང་བའི་སྣ་ཚོགས་རྡོ་རྗེའོ། །སྣ་ཚོགས་རྡོ་རྗེའི་ནང་དུ་ཉི་མའི་དཀྱིལ་འཁོར་རོ། །ཉི་མའི་དཀྱིལ་འཁོར་གྱི་སྟེང་དུ་ཟླ་བའི་དཀྱིལ་འཁོར་ལ་རིན་པོ་ཆེ་སྒྲོན་མ་འཕྲོ་བ་ལྟ་བུའི་ཧཱུཾ་ཡིག་མི་གཡོ་བར་བསམ་པར་བྱའོ། །དེ་ནས་དེ་ལས་བྱུང་བའི་འོད་ཟེར་ཁ་དོག་སྣ་ཚོགས་པ་སྔོན་པོ་དང་།
[160a.6]སེར་པོ་དང་། དམར་པོ་དང་ལྗང་གུའི་ཚོགས་བ་སྤུའི་ཁུང་ནས་རྣམ་པར་འཐོན་ནས་པཾ་ཡིག་དམར་པོ་ལས་སྐྱེས་པའི་པདྨ་དམར་པོ་ལ་སྐུ་མདོག་དམར་པོའི་རྣམ་པར་སྣང་མཛད་ལ་སོགས་པའི་རྡུལ་ཕྲ་རབ་ཀྱི་རང་བཞིན་གྱིས་ཤར་ལ་སོགས་པའི་ཕྱོགས་རྣམས་སུ་རིམ་པས་གཤིན་རྗེ་མཐར་བྱེད་ལ་སོགས་
[160a.7]པ་རྣམས་དེ་ལ་བཀུག་ནས་དེ་ཉིད་ཀྱི་མཆོད་པ་ལ་སོགས་པས་ཡང་དག་པར་མཆོད་ནས་ཡང་གསུམ་ལ་སྐྱབས་སུ་འགྲོ་བ་ལ་སོགས་པ་བསམ་པར་བྱའོ། །དེ་རྣམས་དེ་བཞིན་དུ་རབ་ཏུ་གཞུག་པར་བྱའོ་ཞེས་པ་ནི་སངས་རྒྱས་ཉེ་བར་སྡུད་པ་ཞེས་བྱ་བའི་ཏིང་ངེ་འཛིན་ཏོ། །དེ་ནས་སྙིང་རྗེའི་རླན་གྱིས་སྙིང་
[160b]
[160b.1]གར་རིམ་པ་ཇི་ལྟ་བ་བཞིན་དུ་དམྱལ་བ་དང་དུད་འགྲོ་དང་ཡི་དྭགས་དང་མི་དང་ལྷ་མ་ཡིན་དང་། ལྷ་རྣམས་བལྟས་ནས་དེ་ནས་དེ་ལས་བྱུང་བའི་འོད་ཟེར་སྣ་ཚོགས་པས་ཡང་དག་པར་རེག་ནས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་སྐུར་བསྐྱེད་ཅིང་དེ་ལ་དེ་བཞིན་དུ་རབ་ཏུ་གཞུག་
[160b.2]པར་བྱའོ་ཞེས་པའི་དོན་ནི་དམ་ཚིག་སེམས་དཔའ་ཉེ་བར་སྒྲུབ་པ་ཞེས་པའི་ཏིང་ངེ་འཛིན་ཏོ། །དེ་ནས་ནམ་མཁའི་ཕྱོགས་སུ་པཾ་ཡིག་དམར་པོ་ལས་སྐྱེས་པའི་ཆུ་སྐྱེས་དམར་པོ་སྣ་ཚོགས་པའི་འདབ་མ་དང་གེ་སར་གྱིས་བརྒྱན་པ་ལ་དེའི་དབུས་སུ་རཾ་ཡིག་དམར་པོ་ཡོངས་སུ་གྱུར་བ་ལས་ཉི་མའི་དཀྱིལ་འཁོར་
[160b.3]དེའི་སྟེང་དུ་ཧཱུཾ་ཡིག་ནག་པོ་ཧཱུཾ་ཡིག་ལས་སྐྱེས་པའི་ཉི་མ་ལ་གནས་པའི་ཧཱུཾ་ཡིག་ལས་བྱུང་བའི་སྣ་ཚོགས་རྡོ་རྗེ་རྒྱས་པ་ནས་ཀྱི་ཚད་ཙམ་རྡོ་རྗེའི་རང་བཞིན་འོད་ཟེར་རྣམས་བརྐྱང་བས་བདུད་ཀྱི་དཔུང་ཐམས་ཅད་འཇོམས་པ་དང་ལྡན་པར་རྣམ་པར་བསམ་པར་བྱའོ། །དེ་ནས་དེའི་སྟེང་དུ་སོང་སྟེ་དེས་རྡོ་རྗེའི་
[160b.4]གུར་དང་། ལོགས་སུ་སོང་སྟེ་དེས་རྡོ་རྗེའི་ར་བ་དང་། རྡོ་རྗེའི་བླ་བྲེའོ། །འོག་ཏུ་སོང་སྟེ་དེས་རྡོ་རྗེའི་རང་བཞིན་གྱིས་གཞི་རུ་བྱའོ། །དེ་ནས་དེའི་དབུས་སུ་སྟོན་ཀའི་ཟླ་བ་དཀར་པོའི་བུ་གའི་ནང་དུ་སྤྱི་བོར་གནས་པ་ཟུར་གསུམ་པ་ཨེ་ཡིག་ལས་སྐྱེས་པའི་ཆོས་འབྱུང་བསྒོམ་པར་བྱའོ། །དེ་ལ་ནམ་མཁའི་
[160b.5]མཐིལ་དུ་སོན་པའི་ཡཾ་ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་ནག་པོ་གཞུའི་རྣམ་པ་ལྟ་བུ་བ་དན་གྱིས་མཚན་པའོ། །དེའི་སྟེང་དུ་ར་ཡིག་ལས་སྐྱེས་པའི་ཟུར་གསུམ་སེར་པོ་ར་ཡིག་གིས་མཚན་པའི་མེའི་དཀྱིལ་འཁོར་རོ། །དེའི་སྟེང་དུ་བཾ་ཡིག་ཡོངས་སུ་གྱུར་པ་ལས་ཆུའི་དཀྱིལ་འཁོར་ཁ་དོག་
[160b.6]དཀར་པོ་འཁོར་ལོའི་རྣམ་པ་བུམ་པས་མཚན་པའོ། །དེའི་སྟེང་དུ་ལཾ་ཡིག་ལས་སྐྱེས་པའི་སའི་དཀྱིལ་འཁོར་ཁ་དོག་ལྗང་གུ་གྲུ་བཞི་སྣ་ཚོགས་རྡོ་རྗེས་མཚན་པའོ། །དེའི་སྟེང་དུ་སུཾ་ཡིག་ཡོངས་སུ་གྱུར་པ་ལས་རིའི་རྒྱལ་པོ་རི་རབ་ཆེན་པོ་རིན་པོ་ཆེ་བཞིའི་རང་བཞིན་རྩེ་མོ་བརྒྱད་ཀྱིས་ཉེ་བར་མཛེས་
[160b.7]པའོ། །དེའི་སྟེང་དུ་སྐད་ཅིག་གིས་ཆུ་སྐྱེས་དམར་པོ་འདབ་མ་སྣ་ཚོགས་པ་ཇི་སྲིད་འདོད་པའི་རྒྱ་ལ། དེའི་ཟེའུ་འབྲུ་ལ་ཉི་མ་དང་ཟླ་བ་ཡང་དག་པར་སྦྱོར་བའི་དབུས་སུ་ཧཱུཾ་ཡིག་གོ། །ཧཱུཾ་ལས་བདག་ཉིད་བསྒོམ་པར་བྱའོ། །སྐུ་གསུང་ཐུགས་ཀྱི་བདག་ཉིད་ཧཱུཾ་ཡིག་ནག་པོའོ། །ཡང་ཧཱུཾ་ཡིག་ནག་པོ་
[161a]
[161a.1]ལས་སྣ་ཚོགས་རྡོ་རྗེ་ཡོངས་སུ་གྱུར་པ་ལས་སྐྱེས་པའི་གཞལ་ཡས་ཁང་གྲུ་བཞི་སྒོ་བཞི་པ་ཀ་བ་བརྒྱད་ཀྱིས་ཉེ་བར་མཛེས་པའོ། །དེའི་དཀྱིལ་འཁོར་གྱི་འཁོར་ལོའི་ནང་དུ་ཉི་མ་དང་ཟླ་བ་ཡང་དག་པར་སྦྱོར་བའི་དབུས་སུ་ཆོས་འབྱུང་ནམ་མཁའི་ནང་དུ་སོང་བའི་ཧཱུཾ་ཡིག་ནག་
[161a.2]པོ་བསམ་པར་བྱའོ། །དེ་ལ་ཨཱཿཡིག་ལས་ཉི་མའི་དཀྱིལ་འཁོར་བསྒོམ་པར་བྱའོ། །དེའི་སྟེང་དུ་ཧཱུཾ་ཡིག་ནག་པོ་ཡོངས་སུ་གྱུར་པ་ལས་རྡོ་རྗེ་འཛིན་པ་ཆེན་པོ་སྐུ་མདོག་དཀར་པོ་བསམ་པར་བྱ་སྟེ། ཞལ་གཅིག་པ། ཕྱག་གཉིས་པ། སྤྱན་གསུམ་པ། རྡོ་རྗེ་དང་དྲིལ་བུ་བསྣམས་པ། བསམ་
[161a.3]གཏན་ལ་གནས་པའི་བདག་ཉིད་དོ། །དེའི་ཐུགས་ཀར་ཧཱུཾ་ཡིག་ནག་པོ་འོད་ཟེར་སྣ་ཚོགས་འཕྲོ་བས་ཕྱོགས་བཅུའི་མཐར་ཐུག་པ་ན་བཞུགས་པའི་དེ་བཞིན་གཤེགས་པ་དང་། སངས་རྒྱས་དང་བྱང་ཆུབ་སེམས་དཔའ་དང་། རིག་པའི་ལྷ་མོ་རྣམས་དང་། ཁྲོ་བོ་ལ་སོགས་པ་རྣམས་ཡང་དག་པར་
[161a.4]བསྐུལ་ནས་སླར་འོང་སྟེ། དེ་ལ་དེ་བཞིན་དུ་ཉི་མ་ལ་རབ་ཏུ་ཞུགས་པར་བསམ་པར་བྱའོ། །དེ་ལ་དེ་བཞིན་དུ་རྡོ་རྗེ་འཛིན་པ་ཆེན་པོ་གང་ལ་དཔག་ཏུ་མེད་པའི་དེ་བཞིན་གཤེགས་པ་ལ་སོགས་པ་དང་རོ་གཅིག་ཏུ་གྱུར་ནས་ཉི་མ་ལ་རབ་ཏུ་ཞུགས་པར་བལྟ་བར་བྱའོ། །འོད་ཟེར་འབར་བས་དཔག་
[161a.5]ཚད་སྟོང་དུ་ཁྱབ་པའོ། །དེའི་སྟེང་དུ་ཧཱུཾ་ཡིག་ནག་པོ་འོད་ཟེར་སྣ་ཚོགས་དང་ཡང་དག་པར་ལྡན་པའོ། །དེ་ནས་ཧཱུཾ་ཡིག་ལས་འོད་ཟེར་འཕྲོ་བར་བལྟ་ཞིང་སླར་ཡང་དེ་ལ་དེ་བཞིན་དུ་ཞུགས་ཏེ། དེ་བཞིན་དུ་ཡི་གེའི་རྣམ་པར་གྱུར་པ་ལས་རྡོ་རྗེ་ནག་པོ་ཆེན་པོ་ཐོད་པ་དཀར་པོ་ལ་གནས་པ་འོད་ཟེར་སྣ་
[161a.6]ཚོགས་འཕྲོ་བར་བསམས་ནས་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་། རིག་པའི་ལྷ་མོ་རྣམས་ཀྱིས་ནམ་མཁའི་མཐིལ་ཏིལ་གྱི་གང་བུ་བཞིན་དུ་ཉི་མ་ལ་བཞུགས་པར་བལྟ་བར་བྱའོ། །སངས་རྒྱས་ལ་སོགས་པ་དེ་རྣམས་ཀྱིས་སེམས་ཅན་རྣམས་ཡོངས་སུ་སྨིན་པར་མཛད་ནས་སླར་
[161a.7]འོངས་ཏེ་རྡོ་རྗེའི་གཟུགས་ལ་རབ་ཏུ་ཞུགས་པར་བལྟ་བར་བྱའོ། །རྡོ་རྗེའི་གཟུགས་དེ་ལ་དེ་བཞིན་དུ་ཞལ་བཅུ་གཉིས་པ། སྐུ་མདོག་ནག་མོ་ཕྱག་ཉི་ཤུ་རྩ་བཞི་པ། བདུད་བཞི་མནན་པ། ཐོད་པ་དཀར་པོའི་སྟེང་ན་ཞབས་གཡོན་བརྐྱང་གིས་བཞུགས་པ། བསྐལ་པ་ཆེན་པོའི་མེ་དང་མཚུངས་པ། བཞིན་
[161b]
[161b.1]འཇིགས་སུ་རུང་བ་ཞལ་གདངས་ཤིང་ལྗགས་བརྐྱང་བ། ཁྲོ་ཞིང་མི་སྡུག་པ་ཤིན་ཏུ་འཇིགས་པ། ཁྲོ་གཉེར་བསྡུས་པ། མིག་ཟླུམ་ཞིང་གཡོ་བ། འཇིགས་ཤིང་འཇིགས་པར་བྱེད་པ། ཐོད་པའི་ཕྲེང་བས་དབུ་བརྒྱན་པ་སྦྲུལ་གྱིས་བརྒྱན་པ། ཕྱག་རྒྱ་དྲུག་དང་ལྡན་པ། ཞལ་དང་པོ་ནི་ནག་པོ་ཆེན་
[161b.2]པོའོ། །དེ་བཞིན་དུ་གཡས་ཀྱི་ལྔ་ནི་དཀར་པོ་དང་། སེར་པོ་དང་། ལྗང་གུ་དང་། དམར་པོ་དང་། དུ་བའི་མདོག་ལྟ་བུའོ། །གཡོན་གྱི་ཞལ་ནི་དམར་པོ་དང་། དཀར་པོ་དང་། སེར་པོ་དང་། ལྗང་གུ་དང་། དཀར་དམར་རྣམས་སོ། །སྟེང་གི་ཞལ་ནི་དུ་བ་ཆེན་པོའི་མདོག་ལྟ་བུ་མི་སྡུག་པ། ཞལ་ཐམས་ཅད་
[161b.3]ཁྲོ་ཞིང་མཆེ་བ་གཙིགས་པ། ཞལ་རྣམས་ནི་སྤྱན་གསུམ་པའོ། །སྐྲ་དམར་སེར་གྱེན་དུ་བརྫེས་པ། ཁྲོ་བ་དང་བཅས་ཤིང་ཐུང་ལ་ལྟོ་བ་འཕྱང་བ། ནུ་མ་རྒྱས་ཤིང་སྟེང་དུ་མཐོ་བ། སྟག་གི་པགས་པའི་ཤམ་ཐབས་ཅན། གཡས་ཀྱི་ཕྱག་བཅུ་གཉིས་རྣམས་ན་རལ་གྲི་དང་། རྡོ་རྗེ་དང་། འཁོར་ལོ་དང་།
[161b.4]རིན་པོ་ཆེའི་འཁྲི་ཤིང་དང་། ལྕགས་ཀྱུ་དང་། མདའ་དང་། མདུང་དང་། ཐོ་བ་དང་། གཏུན་ཤིང་དང་། གྲི་གུག་དང་། ཌ་མ་རུ་དང་། བགྲང་ཕྲེང་རྣམས་བསྣམས་པའོ། །གཡོན་གྱི་ཕྱག་བཅུ་གཉིས་རྣམས་ན། གཞུ་དང་ཞགས་པ་དང་། སྡིགས་མཛུབ་དང་། བ་དན་དང་དབྱུག་པ་དང་། རྩེ་གསུམ་
[161b.5]དང་། ཆང་སྣོད་དང་། ཨུཏྤ་ལ་དང་། དྲིལ་བུ་དང་། སྟ་གྲི་དང་། ཚངས་པའི་མགོ་བོ་དང་། ཐོད་པ་བསྣམས་པའོ། །ཤིན་ཏུ་དགྱེས་ཤིང་རོའི་གདན་ལ་བཞུགས་པ། ཀླུ་བརྒྱད་ཀྱིས་རྣམ་པར་བརྒྱན་པ། ལང་ཚོ་གཞོན་ཞིང་ཕུན་སུམ་ཚོགས་པ། ཧཱ་ཧཱ་ཊཱའི་གད་རྒྱངས་སྒྲོགས་པ། རལ་པ་གཅིག་མའི་
[161b.6]སྐྲ་ཁམ་པ་གྱེན་དུ་བརྫེས་པ་བསམ་པར་བྱའོ། །སྤྱི་བོར་མི་བསྐྱོད་པས་དབུ་བརྒྱན་པའོ། །ཨོཾ་ཨཱཿཧཱུཾ་ཞེས་པས་སྐུ་གསུང་ཐུགས་བྱིན་གྱིས་བརླབ་པར་བྱའོ། །ཨོཾ་ཧྲཱིཿཏྲུཾ་ཧཱུཾ་རླུང་དང་ཆུ་དང་། དབང་ཆེན་དང་། མེའི་དཀྱིལ་འཁོར་རྣམས་ལ་ཇི་ལྟར་ཉེ་བར་བསྟན་པ་བཞིན་དུ་དེ་ལྟ་བུར་གྱུར་པ་ལ་སྔགས་པས་
[161b.7]སླར་ཡང་ནམ་མཁའི་མཐིལ་དུ་ཡེ་ཤེས་ཀྱི་འཁོར་ལོ་གདན་དྲངས་ཤིང་མདུན་དུ་སྤྲོས་ནས་ཕྲེང་བ་བཞིན་དུ་རང་གི་དམ་ཚིག་སེམས་དཔའི་འཁོར་ལོ་ལ་རབ་ཏུ་གཞུག་པར་བྱའོ། །བཅུག་ནས་གཅིག་ཏུ་བྱས་ཏེ་ལྷ་རྣམས་ཀྱི་ང་རྒྱལ་བསྐྱེད་ནས་རང་གི་ཡུལ་ལ་འོད་ཟེར་གྱི་ཚོགས་བྱུང་སྟེ། དེ་བཞིན་
[162a]
[162a.1]གཤེགས་པ་དང་བྱང་ཆུབ་སེམས་དཔའ་དང་། རིག་པའི་ལྷ་མོ་རྣམས་དང་། ཁྲོ་བོ་ལ་སོགས་པ་རྣམས་ཀྱིས་བདུད་རྩི་ལྔས་ཡོངས་སུ་གང་བའི་བུམ་པ་རྣམས་ཀྱིས་དབང་བསྐུར་ཞིང་། སྣ་ཚོགས་པའི་མཆོད་པ་ཁྱད་པར་ཅན་རྣམས་ཀྱིས་ཡང་དག་པར་མཆོད་པ་བྱེད་པར་བདག་ཉིད་
[162a.2]བསྒོམ་པར་བྱའོ། །གཙུག་ཏོར་དུ་ཧཱུཾ། དཔྲལ་བར་ཨོཾ་མགྲིན་པར་ཨཱཿསྙིང་གར་ཧྲཱིཿལྟེ་བར་ཏྲཱཾ་ལྟེ་བའི་འོག་ཏུ་ཧཱུཾ། གསང་བར་ཏྲཱཾ། རྐང་པ་དག་ལ་ཨོཾ་ཨཱཿཕཊ་སྭཱཧཱ། ཞེས་པ་རྣམས་ཡན་ལག་རྣམས་ལ་དགོད་པར་བྱའོ། །དེ་ལྟ་བུར་གྱུར་པའི་དམ་ཚིག་གི་ཆོ་ག་འདིས་སྔགས་ཀྱི་ཡི་གེ་རྣམས་ཀྱང་ཉེ་
[162a.3]བར་བརྗོད་ཅིང་དེ་རྣམས་ལྷ་མོ་རྣམས་ཀྱི་ཞལ་ལས་བྱུང་བའི་འོད་ཟེར་རྣམས་རང་གི་སྙིང་གར་རབ་ཏུ་ཞུགས་ཏེ། རྡོ་རྗེའི་ལམ་ནས་འཐོན་ཏེ་ལྷ་མོའི་པདྨའི་ནང་དུ་རབ་ཏུ་ཞུགས་ནས། སླར་ཡང་ལྷ་མོའི་ཞལ་ནས་རང་གི་ཁར་ཞུགས་ཤིང་རིམ་པ་འདིས་རྒྱུན་མ་ཆད་པར་སྔགས་རྣམས་འཁོར་བར་བྱའོ། །དེ་
[162a.4]བཞིན་དུ་ཇི་སྲིད་མི་ངལ་གྱི་བར་དུ་བཟླས་པར་བྱའོ། །དེ་ནས་རང་གི་སྙིང་གའི་འོད་ཟེར་གྱི་ཚོགས་ཀྱི་རྣམ་པའི་རིམ་པས་ཇི་སྲིད་མར་མེའི་རྩེ་མོ་བཞིན་དུ་དམིགས་པ་མེད་པར་བྱའོ། །ཇི་ལྟར་གསུངས་པའི་ཨུཏྤ་ལའི་ཕྱག་རྒྱ་བཅིངས་ནས་སྤྱི་བོ་དང་། དཔྲལ་བ་དང་། མགྲིན་པ་དང་། སྙིང་ག་དང་། ལྟེ་བའི་འོག་
[162a.5]དང་། གསང་བ་དང་། རྐང་པ་གཉིས་རྣམས་ལ་རྣམ་པར་བཀོད་པའི་སྔགས་མཚན་མ་མེད་པའི་སྦྱོར་བས་བཟླས་པར་བྱའོ། །དེ་ལ་སྔགས་འདིའོ། །ཧྲཱིཾ་ཏྲཱིཾ་ཧཱུཾ་ཕཊ། རྩ་བའི་སྔགས་སོ། །ཨོཾ་ཧྲཱིཾ་ཏྲཱིཾ་ཧཱུཾ་ཧཱུཾ་ཕཊ་སྭཱཧཱ། ཧྲཱིཾ་ཏྲཱིཾ་ཧཱུཾ་སྙིང་པོ་དང་ཉེ་བའི་སྙིང་པོའི་སྔགས་སོ། །དེ་བཞིན་དུ་རྣམ་པར་བསམས་ནས་བརྟན་པར་
[162a.6]བྱས་ཏེ་བདག་ཉིད་བསྒོམ་པར་བྱའོ། །ཡང་ན་རི་མོ་བཀྲམ་ནས་བཅོམ་ལྡན་འདས་མ་བསྒོམ་པར་བྱའོ། །སྔོན་དུ་བསྙེན་པ་འབུམ་ཕྲག་གཅིག་བཟླས་ནས་བཅུ་ཆའི་སྦྱིན་སྲེག་བྱའོ། །དཔལ་གྱི་འབྲས་བུ་དང་། ལོ་མའམ། ཨརྐ་དཀར་པོའི་མེ་ཏོག་དང་ཀ་ར་བཱི་ར་དཀར་པོའི་མེ་ཏོག་ཀྱང་རུང་སྟེ་བའི་མར་
[162a.7]དང་སྦྱིན་སྲེག་བྱའོ། །ཇི་ལྟར་རས་རིས་ཀྱི་ཆོ་གས་རི་མོ་བྲིས་ནས་མཆོད་པ་དང་། བསམ་གཏན་དང་། བཟླས་པ་བྱའོ། །མཚམས་མེད་པ་ལྔ་བྱེད་པས་ཀྱང་བྱེ་བ་བཟླས་པས་འགྲུབ་པར་འགྱུར་རོ། །དངོས་པོ་ཐམས་ཅད་རང་བཞིན་མེད་པར་བྱས་ནས་སྐད་ཅིག་གིས་སྙིང་གར་ཆུ་སྐྱེས་ཀྱི་སྟེང་དུ་ཉི་མ་དང་ཟླ་བའི་
[162b]
[162b.1]དབུས་སུ་ཧཱུཾ་ཡིག་དམར་པོ་ཤིན་ཏུ་ཕྲ་བའི་གཟུགས་ཅན་སྐྲའི་རྩེ་མོ་བརྒྱར་གཤགས་པའི་ཆ་ཙམ་ཐིག་ལེའི་གཟུགས་ཅན་ཧཱུཾ་ཡིག་གིས་བརྒྱན་པ། རྡོ་རྗེ་དང་མིའི་སྣ་ལ་བསམ་པར་བྱའོ། །ཧཱུཾ་ཡིག་ལས་བྱུང་བའི་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་མ། སྤྱན་གསུམ་པ། གཅེར་
[162b.2]བུ་སྐྲ་གྲོལ་བ་རོལ་ཞིང་ཁྲོ་བ། ཕྱག་རྒྱ་དྲུག་དང་ལྡན་པ་ཆོས་འབྱུང་གི་ནང་དུ་སོན་པ་དང་། རོ་ལ་གནས་པ། ཞབས་སྟེང་དང་འོག་ཏུ་གནས་པ། གྲི་གུག་དང་། ཐོད་པ་བསྣམས་པ། ཁྲོ་བ་དང་བཅས་པ་ཉིན་དང་མཚན་དུ་བསྒོམ་པར་བྱའོ། །འོད་ཟེར་འབར་ཞིང་མཆེ་བ་གཙིགས་པ་རལ་པ་གཅིག་མ་ཞེས་བྱ་
[162b.3]བའི་སྒྲུབ་ཐབས་རྫོགས་སོ།། {T3515}༄༅༅། །རྒྱ་གར་སྐད་དུ། ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། རལ་པ་གཅིག་མའི་སྒྲུབ་ཐབས། རལ་པ་གཅིག་མ་ལ་ཕྱག་འཚལ་ལོ། །སྒྲོལ་མ་བདུད་རྣམས་སྐྲག་མཛད་ལྷ་མཆོག་རྣམས་ཀྱིས་ཀུན་ཏུ་ཡང་དག་མཆོད། །འཇིག་རྟེན་རྣམས་ཀྱི་ཕན་མཛད་
[162b.4]སྙིང་རྗེ་མཚུངས་ལྡན་རྣམ་པ་མང་པོ་ཡིས། །སྐྱེ་བོ་འཁོར་བའི་འཇིགས་ལས་སྐྱོབ་མཛད་གུས་བཏུད་འགྲོ་རྣམས་སྣང་མཛད་མ། །རྟག་ཏུ་འཇིགས་པ་སེལ་མཛད་གང་རྣམས་སྲུང་མཛད་ཡུམ་དེ་རྒྱལ་གྱུར་ཅིག །རལ་པ་གཅིག་མ་ལས་བྱུང་མ། །དེ་མ་ཐག་ཏུ་འགྲུབ་འགྱུར་ཏེ། །དེ་ཤེས་པས་ཀྱང་ད་ལྟར་དུ། །དེ་
[162b.5]ཡིས་ལས་ཀུན་རབ་སྒྲུབ་བྱེད། །ཨོཾ་ཞེས་ཡི་གེ་བརྗོད་པ་ཡིས། །རྟག་ཏུ་སྟོང་པ་ཉིད་དུ་བྱ། །དེ་བཞིན་ཡི་གེ་བརྗོད་པ་ཡིས། །སྣ་ཚོགས་པདྨ་བསྒོམ་པར་བྱ། །སྣ་ཚོགས་པདྨའི་དབུས་སུ་ནི། །ཏཱཾ་ཡིག་ཅེས་པ་བསྒོམ་པར་བྱ། །བསྒོམ་བྱ་ཐོད་པ་དཀར་པོ་ལ། །ཧཱུཾ་ཡིག་དེ་ཡི་དབུས་སུ་སྟེ། །དེ་ནི་གྲོལ་ཞིང་
[162b.6]སྔོན་པོ་ལ། །འོད་ཟེར་སྔོན་པོར་མཚུངས་པར་ལྡན། །དེ་ཡི་ཡོངས་གྱུར་སྦྱོར་བ་ཡིས། །བདག་གི་སེམས་ཀྱི་རང་བཞིན་ཏེ། །བསྒོམ་བྱ་དེ་ཡི་སྐད་ཅིག་ལས། །ལྷ་མོ་མིག་སྨན་འོད་མཚུངས་གནག །ཕྱག་བཞི་སྤྱན་ནི་གསུམ་པ་སྟེ། དམར་ཞིང་ཤིན་ཏུ་འཇིགས་པའི་སྤྱན། །སྟག་གི་པགས་པ་ཡོངས་སུ་
[162b.7]བགོས། །ཐོད་པའི་རྒྱན་ནི་ཤིན་ཏུ་འབར། །མུ་ཏིག་དོ་ཤལ་དེ་བཞིན་དུ། །མཛེས་པ་ཡིས་ནི་རྣམ་པར་བརྒྱན། །བརྒྱད་གཉིས་ལོ་ཡི་རྣམ་པ་ཅན། །དཀར་འཛིན་མཁྲེགས་ཤིང་མཐོ་བ་ཅན། །རལ་པ་གཅིག་ཏུ་ཁམ་བརྫེས་ཤིག །ལྷ་མོ་ལྟོ་འཕྱང་ཤིན་ཏུ་མཛེས། །ཞལ་ནི་ཅུང་ཟད་མཆེ་བ་གཙིགས། །
[163a]
[163a.1]ལྗགས་ནི་བསྐྱོད་ཅིང་འཇིགས་པར་བྱེད། །སྦྲུལ་ནག་རྣམས་ཀྱིས་རབ་ཏུ་བརྒྱན། །ཤིན་ཏུ་མི་བཟད་འོད་ཟེར་དྲག །དཔུང་རྒྱན་རྐང་གདུབ་ལ་སོགས་དང་། །གཡེར་ཀ་རྣམས་ཀྱིས་རབ་ཏུ་བརྒྱན། །གཡོན་གྱི་ཕྱག་ན་ཐོད་པ་དང་། །གཡས་པ་གྲི་གུག་གིས་མཛེས་མ། །ཨུཏྤ་ལ་སྡོང་བུ་དང་
[163a.2]བཅས་པ། །ཕྱག་གཡོན་ན་ནི་ཡང་དག་ལྡན། །སླར་ཡང་གཡས་པའི་ཕྱག་ན་ནི། །རལ་གྲི་འབར་བ་རྣམ་པར་བསྒོམ། །རལ་གྲི་ཡོངས་སུ་སྦྱོར་བ་ཡིས། །བགྲང་ཕྲེང་ཡང་ནི་བལྟ་བར་བྱ། །གཡས་བརྐྱང་གིས་གནས་ཁྲག་དང་ནི། །ཐོད་པའི་དབུས་སུ་བསྟན་པ་ལས། །བསྐལ་པའི་མེ་ཚོགས་ལྟ་བུ་ཡི། །
[163a.3]འོད་ཟེར་འབར་བ་དང་ལྡན་པའི། །ལྷ་མོ་ལ་ནི་གུས་ལྡན་པས། །གང་གིས་རྟག་ཏུ་སྒོམ་བྱེད་ཅིང་། །གང་གིས་བཟླས་པར་བྱ་བ་ནི། །ཐམས་ཅད་ཡི་གེ་བཞི་ཡིས་ནི། །འགྲོ་ཀུན་དེ་ཡི་དབང་བྱེད་པར། །ཇི་ལྟར་སངས་རྒྱས་ཉིད་ཀྱིས་གསུངས། །སླར་ཡང་ཐོད་པའི་དབུས་སུ་ནི། །བསྒྲུབ་བྱ་རབ་ཏུ་ལྟུང་བར་
[163a.4]འབད། །དེ་ཡི་མགོ་བོ་རྐང་པ་དག །ཞབས་ཀྱིས་མནན་ཅིང་ཡང་དག་འཚིར། །ངེས་པར་ཆད་པས་གཅོད་བྱེད་ཅིང་། །གལ་ཏེ་བསམ་གཏན་ཡིད་རང་བཞིན། །སྔགས་ཀྱི་བརྗོད་བྱ་ཡང་དག་པ། །ཇི་ལྟར་ལྷ་མོ་རབ་རྟོགས་བཞིན། །ས་མཐའ་བྱིན་ཟའི་གནས་ལ་ནི། །དབྱངས་ཡིག་བཞི་པ་དང་ལྡན་
[163a.5]པ། །དབུ་ལ་ཐིག་ལེས་ཡང་དག་བརྒྱན། །སླར་ཡང་ཟླ་ཕྱེད་དང་བཅས་པ། །འདི་ནི་ས་བོན་ཆེན་པོ་སྟེ། །ས་བོན་གཉིས་པ་ལེགས་པར་ཉོན། །ཎ་མཐའི་མེ་དང་ཡང་དག་ལྡན། །དེ་ཡིས་དེ་བཞིན་སླར་དབྱེ་བ། །སྒྲ་ཡི་ཐིག་ལེ་ཡང་དག་ལྡན། །གཉིས་པར་འགྱུར་བ་བསྟན་པ་སྟེ། །སླར་ཡང་ས་བོན་
[163a.6]གསུམ་པ་ནི། །འབད་པས་རབ་ཏུ་བཤད་པར་བྱ། །ས་མཐའ་དབྱངས་ཡིག་དྲུག་པས་མནན། །སྒྲ་ཡི་ཐིག་ལེ་ཡང་དག་ལྡན། །འདི་ནི་ས་བོན་རབ་མཆོག་སྟེ། །འཇིག་རྟེན་གསུམ་པོ་སྲེག་བྱེད་བདག །བཞི་པ་ཡང་ནི་བཤད་བྱ་བ། །ཇི་ལྟར་སངས་རྒྱས་ཀྱིས་གསུངས་པ། །ཉོན་ཅིག་ཕྱེད་བཅས་
[163a.7]ཡི་གེ་ཡི། །ཡང་དག་སྔགས་ཀྱིས་འགྲུབ་པར་བྱེད། །ཉ་ཡི་མཐའ་ཅན་ཅུང་ཟད་ཙམ། །རྫོགས་པ་ཡི་ནི་མཚན་ཉིད་ཅན། །ལྷ་མོ་རལ་པ་གཅིག་མ་ཡི། །སྔགས་ཀྱི་རྒྱལ་པོ་སྟོབས་དང་ལྡན། །འདི་ནི་ཐོས་པ་ཙམ་གྱིས་ནི། །མི་རྣམས་བགེགས་ལས་རྒྱལ་བར་འགྱུར། །སྐལ་བ་དང་ལྡན་རྒྱལ་བ་དང་། །
[163b]
[163b.1]རྟག་ཏུ་དགྲ་རྣམས་ཉམས་པར་འགྱུར། །རྟག་ཏུ་ཆོས་ཀྱི་ཕུང་པོ་དང་། །སངས་རྒྱས་དང་མཚུངས་ཐེ་ཚོམ་མེད། །རལ་གཅིག་མའི་སྒྲུབ་ཐབས་རྫོགས་སོ།། {T3516}༄༅༅། །རྒྱ་གར་སྐད་དུ། ཨཱརྱ་ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། འཕགས་མ་རལ་གཅིག་མའི་སྒྲུབ་ཐབས། འཕགས་མ་རལ་གཅིག་མ་
[163b.2]ལ་ཕྱག་འཚལ་ལོ། །དང་པོ་རེ་ཞིག་སྔགས་པས་ཡིད་དང་མཐུན་པའི་བསམ་གཏན་གྱི་ཁང་པར་སྟན་བདེ་བ་ལ་ཉེ་བར་འདུག་སྟེ། བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་ལ་ཕྱི་དང་ནང་གི་མཆོད་པ་རྣམས་ཀྱིས་ཡང་དག་པར་མཆོད་ནས་གསུམ་ལ་སྐྱབས་སུ་འགྲོ་བ་དང་། སྡིག་པ་བཤགས་པ་
[163b.3]ལ་སོགས་པ་བྱས་ནས། ཤིན་ཏུ་བརྟན་པའི་བྱང་ཆུབ་ཀྱི་སེམས་བསྐྱེད་དེ། ཨོཾ་ཞེས་པའི་ཡི་གེ་བརྗོད་ནས། ཆོས་ཐམས་ཅད་སྟོང་པ་ཉིད་མངོན་དུ་བྱས་ཏེ། སླར་ཡང་ཨེ་ཡིག་བརྗོད་པ་དེ་ཡོངས་སུ་གྱུར་པ་ལས་སྣ་ཚོགས་པདྨ་བསྒོམ་པར་བྱའོ། །དེའི་དབུས་སུ་ཊྭཱཾ་ཡིག་ལས་སྐྱེས་པའི་པདྨའི་སྣོད་དུ་ཆུ་ཤེལ་
[163b.4]གྱི་འོད་དང་མཚུངས་པ། དེའི་དབུས་སུ་འོད་ཟེར་འཕྲོ་བས་འཇིག་རྟེན་གྱི་ཁམས་མཐའ་ཡས་པ་སྣང་བར་མཛད་པ་ཨིནྡྲ་ནཱི་ལའི་འོད་དང་ལྡན་པའི་ཧཱུཾ་ཡིག་རྣམ་པར་བསམ་པར་བྱའོ། །དེ་ཡོངས་སུ་གྱུར་པ་ལས། རིན་ཆེན་ཨིནྡྲ་ནཱི་ལ་ཡི། །འོད་ལྡན་འགྲོ་བ་གསུམ་པོ་ཁྱབ། །ཕྱག་བཞི་འཇིགས་པ་ཆེན་མོ་
[163b.5]སྟེ། །དམར་ཞིང་འཇིགས་པའི་སྤྱན་གསུམ་མ། །སྟག་གི་པགས་པའི་ན་བཟའ་མནབས། །པདྨའི་སྣོད་ཀྱིས་རབ་བརྒྱན་མ། །རུས་པའི་དོ་ཤལ་ཀྱིས་བརྒྱན་ཅིང་། །གཏུམ་མོ་ཡི་ནི་གཟུགས་ཅན་མ། །ལོ་བརྒྱད་གཉིས་ཀྱི་རྣམ་པ་ཅན། །དཀར་འཛིན་མཐོ་ཞིང་མཁྲེགས་པ་སྟེ། །ཀུན་ནས་ཁམ་པའི་རལ་
[163b.6]པ་ཅན། །སྦྲུལ་ནག་རྒྱན་གྱིས་རྣམ་པར་བརྒྱན། །ཞལ་ནི་ཅུང་ཟད་མཆེ་བ་གཙིགས། །ལྗགས་བསྒྲིལ་འཇིགས་པར་བྱེད་པ་སྟེ། །ལྟོ་ནི་འཕྱང་ཞིང་བྱམས་ཆེན་མ། །སྙིང་རྗེས་ཀུན་ཏུ་ཡིད་ཁྱབ་མ། །དོ་ཤལ་རྐང་གདུབ་དཔུང་རྒྱན་དང་། །གཡེར་ཀ་སྐ་རགས་ལ་སོགས་པས། །བརྒྱན་ཅིང་གཏུམ་མོ་ཧཱུཾ་
[163b.7]མཛད་མ། །བདུད་ཀྱི་དཔུང་ཆེན་ལས་རྒྱལ་མ། །ཕྱག་གཡོན་ཆུ་སྐྱེས་སྣོད་བསྣམས་མ། །གཡས་ཀྱི་ཕྱག་ན་གསོར་བཞིན་པས། །བདུད་རྣམས་སྐྲག་པར་མཛད་པ་ཡི། །རྡོ་རྗེ་དང་བཅས་གྲི་གུག་བསྣམས། །སླར་ཡང་གཡོན་པའི་ཕྱག་ན་ནི། །སྡོང་བུ་དང་བཅས་ཨུཏྤལ་བསྣམས། །ཕྱག་གཡས་ན་ནི་
[164a]
[164a.1]རལ་གྲི་བལྟ། །དེ་ནི་ཡོངས་སུ་གྱུར་པ་ལས། །སྐར་མའི་ཕྲེང་བའི་འོད་འཕྲོ་བའི། །བགྲང་ཕྲེང་རྣམ་པར་བསྒོམ་པར་བྱ། །ཐོད་པ་ཁྲག་གིས་གང་བའི་དབུས། །གཡས་བརྐྱང་གིས་ནི་ཡང་དག་གནས། །བསྐལ་པའི་མེ་དང་མཚུངས་པ་ཡི། །འོད་ཟེར་འབར་བས་འཁོར་བའི་སྐུ། །ལྷ་
[164a.2]མོ་རལ་པ་གཅིག་མ་བསམ། །འཕྲོ་བའི་སྔགས་བཟླས་དེ་ནས་ནི། །བསམ་མེད་སྔགས་ཀྱི་ནུས་པ་ནི། །ཕྱེད་བཅས་ཡི་གེ་བཞི་པ་ཡིས། །འགྲོ་བ་གཡོ་ཞིང་དབང་བྱེད་དང་། །འབེེབས་ཤིང་སྐྲག་མཛད་སངས་རྒྱས་གསུང་། །བསྒྲུབ་བྱའི་སྤྱི་བོར་རྐང་པ་དག །གཡས་བརྐྱང་ཞབས་ཀྱིས་ཀུན་ནས་
[164a.3]མནན། །དེ་བཞིན་པདྨའི་སྣོད་ལ་བསྒོམ། །རྣལ་འབྱོར་སྔགས་ནི་སྤྲོ་ཞིང་བཟླ། །སྔགས་གསུངས་པ་ལས་དངོས་གྲུབ་ནི། །ཡང་དག་ལྷ་མོས་རབ་ཏུ་རྟོགས། །དང་པོ་མེ་ཡི་ཤིང་རྟ་ཞོན། །ས་མཐའ་ཨཱི་ཡི་དབྱངས་ཀྱིས་བརྒྱན། །ཕྱི་ནས་ཟླ་ཕྱེད་ཐིག་ལེ་ཡིས། །དབུ་ཡི་སྟེང་དུ་ཡང་དག་བརྒྱན། །
[164a.4]གཉིས་པ་ཡང་ནི་དེ་བཞིན་ཏེ། །འོན་ཀྱང་ཎ་མཐའི་གཟུགས་ཀྱིས་དབྱེ། །ས་མཐའ་དེ་བཞིན་གསུམ་པ་ཡང་། །དྲུག་པའི་དབྱངས་དང་ཡང་དག་ལྡན། །སྔོན་མ་བཞིན་དུ་དབུ་ལ་མཛེས། །བཞི་པ་ཕཊ་ཀྱི་མཐའ་ཅན་ཏེ། །སྔགས་པས་སྔགས་འདི་བཟླས་པར་བྱ། །ཧྲཱིཾ་ཏྲཱིཾ་ཧཱུཾ་ཕཊ་འདི་བཞིན་ཞེས། །འཕགས་
[164a.5]མ་རལ་གཅིག་མའི་སྒྲུབ་ཐབས་རྫོགས་སོ།། {T3517}༄༅༅། །རྒྱ་གར་སྐད་དུ། ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། རལ་པ་གཅིག་མའི་སྒྲུབ་ཐབས། རལ་པ་གཅིག་མ་ལ་ཕྱག་འཚལ་ལོ། །སྔོན་དུ་གསུངས་པའོ་ཆོ་གས་སྟོང་པ་ཉིད་དུ་བསྒོམས་པའི་རྗེས་ལ་སྣ་ཚོགས་པདྨའི་སྟེང་དུ་ཊཱཾ་ཡིག་
[164a.6]ཡོངས་སུ་གྱུར་པ་ལས་ཐོད་པའི་དབུས་སུ་ཧཱུཾ་ཡིག་ནག་པོ་ལས་སྤྲོ་ཞིང་བསྡུ་བ་སྔོན་དུ་འགྲོ་ཞིང་དེ་ཡོངས་སུ་གྱུར་པ་ལས་བཅོམ་ལྡན་འདས་རལ་པ་གཅིག་མ་ཡན་ལག་ཐམས་ཅད་གནག་པ། ཞལ་གཅིག་པ། ཕྱག་བཞི་པ། ཀུན་ནས་དམར་པའི་སྤྱན་གསུམ་པ། སྟག་གི་པགས་པའི་ན་བཟའ་
[164a.7]ཅན། དབུ་ལ་ཐོད་པའི་ཕྲེང་བ་ཅན། སྐྲ་ཁམ་པ་གྱེན་དུ་བརྫེས་ཤིང་མཆེ་བ་གཙིགས་པ། ལྗགས་བསྒྲིལ་བ། ལྟེ་བ་འཕྱང་ཞིང་ལག་འགྲོ་ནག་པོའི་རྒྱན་སྣ་ཚོགས་པ། ལོ་བརྒྱད་གཉིས་ལོན་བ་ལྟ་བུ། དཀར་འཛིན་མཐོ་ཞིང་མཁྲིགས་པ། དོ་ཤལ་དང་། དཔུང་རྒྱན་དང་། གཡེར་ཀ་དང་། མེ་ཏོག་གི་
[164b]
[164b.1]ཕྲེང་བས་ཡན་ལག་མ་ལུས་པ་བརྒྱན་པ། ཕྱག་གཡས་པ་དག་གིས་རལ་གྲི་དང་གྲི་གུགས་པ་རྣམས་པ། གསོན་པ་དག་གིས་ཨུཏྤལ་དང་། ཐོད་པ་བསྣམས་པའི་བདག་ཉིད་དུ་སྐད་ཅིག་གིས་བསྐྱེད་ལ་སྡུག་བསྔལ་བཟླས་པར་བྱའོ། །ཨོཾ་ཧྲཱིཾ་ཏྲཱིཾ་ཧཱུཾ་ཕཊ་ཅེས་སོ། །རལ་བ་གཅིག་མའི་སྒྲུབ་ཐབས་རྫོགས་སོ།། །།
[164b.2]{T3518}༄༅༅། །རྒྱ་གར་སྐད་དུ། ཨེཀ་ཛཱ་ཊཱི་སཱ་དྷ་ནཾ། བོད་སྐད་དུ། རལ་པ་གཅིག་མའི་སྒྲུབ་ཐབས། འཕགས་མ་ཨེ་ཀ་ཛཱ་ཊཱི་ལ་ཕྱག་འཚལ་ལོ། །ཨོཾ་ཨཱཿཧཱུཾ་ཨོཾ་བཛྲ་ཡོ་གི་ནཱི་པྲ་ཏཱིཙྪ་མཾ་བ་ལིཾ་ཧྲཱིཾ་ཧཱུཾ་ཧ་ཧ་ཧ་ཧ་ཧེ་ཧེ་ཧཾ་ཧཿཕཊ་མ་མ་ཤཱནྟིཾ་ཀུ་རུ་སྭཱཧཱ། ཨོཾ་ཨཱཿརལཱི་ཧཾ་ཞེས་པ་ལ་སོགས་པ་བརྗོད་པར་བྱའོ། །དེ་ནས་རབ་
[164b.3]ཏུ་བཤད་བྱ་བ། །ཕྱག་གཉིས་རལ་གཅིག་སྒྲུབ་པའི་ཐབས། །རལ་གཅིག་ཁམ་པ་གྱེན་བརྫེས་པའི། །ལྷ་མོ་གྲི་གུག་ཐོད་པ་བསྣམས། །དེ་བཞིན་ལྷ་མོ་ཕྱག་བཞི་མ། །རྟོག་པར་ཡང་ནི་བདག་གིས་བཤད། །མདའ་དང་རལ་གྲི་གཡས་ན་བསྣམས། །གཡོན་ན་གཞུ་དང་ཐོད་པ་སྟེ། །དེ་བཞིན་དུ་ནི་
[164b.4]ཕྱག་བརྒྱད་ཀྱང་། །རིམ་གྱུར་བདག་གིས་བཤད་པར་བྱ། །གཡས་ན་རལ་གྲི་མདའ་དང་ནི། །རྡོ་རྗེ་གྲི་གུག་དེ་བཞིན་དུ། །གཡོན་ན་ཨུཏྤལ་གཞུ་དང་ནི། །སྟ་གྲི་དང་ནི་ཐོད་པ་བསྣམས། །སྐུ་མདོག་ནག་མོ་དང་ལྡན་མ། །སྟག་ལྤགས་ཤམ་ཐབས་ཀུན་ནས་མནབས། །ཞལ་གཅིག་སྤྱན་ནི་གསུམ་པ་
[164b.5]སྟེ། །རལ་པ་ཁམ་པ་གྱེན་དུ་བརྫེས། །དྲག་མོ་ཀུན་ནས་ལྟོ་བ་འཕྱང་། །གཡོན་བརྐྱང་ཞབས་ཀྱིས་ཡང་དག་གནས། །ཁྲོ་བ་དང་བཅས་ཞལ་གཙིགས་ཤིང་། །མགོ་བོའི་ཕྲེང་བ་འཕྱང་བ་ཅན། །རོ་ལ་གནས་ཤིང་འཇིགས་ཆེན་མོ། །མི་བསྐྱོད་པ་ཡིས་དབུ་ལ་བརྒྱན། །ལང་ཚོ་གཞོན་ཞིང་ཕུན་སུམ་ཚོགས། །
[164b.6]མི་བཟད་གད་རྒྱངས་འཕྲོ་བ་ཅན། །ཊཱཾ་ཡིག་ས་བོན་ལས་བྱུང་བ། །དེ་མ་ཐག་རྐྱེན་བྱེད་པ་ཅན། །སྣ་ཚོགས་པདྨའི་སྟེང་དུ་ནི། །རབ་ཏུ་འབད་པས་ཉི་མ་བསམ། །ཧྲཱིཾ་ཏྲཱིཾ་ཧཱུཾ་ཕཊ། མཁས་པས་རལ་གྲིའི་གནས་སུ་ནི། །རུས་པའི་ཕྲེང་བ་བསམ་པར་བྱ། །ཇི་ལྟར་སྔོན་གསུངས་རིམ་པ་ཡིས། །སྔགས་མཆོག་
[164b.7]ཡང་དག་བཟླས་པར་བྱ། །བསྒོམ་པའི་སྟོབས་ནི་རྫོགས་པ་ན། །རྣལ་འབྱོར་སྙན་ངག་ཆེན་པོར་འགྱུར། །འབུམ་ཕྲག་གཅིག་གི་བཟླས་པ་ཡིས། །འཇམ་དབྱངས་དང་མཚུངས་ཐོབ་པར་འགྱུར། །སྒྲོལ་མའི་སྒྲུབ་ཐབས་བརྩམས་པ་ཡིས། །བདག་གིས་བསོད་ནམས་གང་བསྒྲུབས་དེས། །སྲོག་ཆགས་སྐྱེ་
[165a]
[165a.1]བོ་མ་ལུས་པ། །སྒྲོལ་མ་དང་ནི་མཚུངས་པར་ཤོག །རལ་པ་གཅིག་མའི་སྒྲུབ་ཐབས་རྫོགས་སོ།། {T3519}༄༅༅། །རྒྱ་གར་སྐད་དུ། ཙུནྡ་སཱ་དྷ་ནཾ། བོད་སྐད་དུ། ཙུནྡེའི་སྒྲུབ་ཐབས། འཕགས་མ་ཙུནྡེ་ལ་ཕྱག་འཚལ་ལོ། །ལྷ་མོ་ཙུནྡེ་ལྷག་པར་ཆེ། །ཡང་དག་རྒྱལ་བ་དེ་བཏུད་
[165a.2]ནས། །དངོས་གྲུབ་མྱུར་དུ་རབ་འགྲུབ་པ། །དེ་ཡི་སྒྲུབ་ཐབས་མདོར་བསྡུས་བརྗོད། །དང་པོར་རེ་ཞིག་སྔགས་པས་རང་གི་སྙིང་གར་ཟླ་བའི་དབུས་སུ་ས་བོན་སྡེ་ཚན་གསུམ་པའི་དང་པོ་ལ་དང་པོའི་ལྔ་པས་བརྒྱན་པ། ཟླ་ཕྱེད་དང་ཐིག་ལེས་སྤྲས་པ་སྟོན་ཀའི་ཟླ་བའི་འོད་ཟེར་གྱི་ཕྲེང་བ་ཅན། སངས་རྒྱས་དང་བྱང་
[165a.3]ཆུབ་སེམས་དཔའ་ཐམས་ཅད་ཀྱིས་བྱིན་གྱི་རླབས་ཀྱིས་མཛེས་པ། དེའི་འོད་ཟེར་ལས་སྐྱེས་པའི་བཅོམ་ལྡན་འདས་མ་དང་། བླ་མ་དང་སངས་རྒྱས་ལ་སོགས་པ་རྣམས་བལྟས་ནས། མངོན་པར་ཕྱག་བྱས་ཏེ་སྔགས་ཀྱིས་མཆོད་པར་བྱའོ། །ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་
[165a.4]གནྡྷེ་ཧཱུཾ། ཨོཾ་བཛྲ་ནཻ་བི་དྱེ་ཧཱུཾ། དེ་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་བརྗོད་པར་བྱའོ། །དེ་ནས་སྨོན་ལམ་སྔོན་དུ་འགྲོ་བས། སྔགས་འདིས་ཆོས་ཐམས་ཅད་
[165a.5]སྟོང་པ་ཉིད་བདག་མེད་པར་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་ཁམས་གསུམ་པ་མ་ལུས་པ་ས་བོན་སྒྱུ་མའི་རྣམ་པར་བསམས་ཏེ། ཨོཾ་སྭ་བྷཱ་བ་ཤུདྡྷཿ སརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། དེ་ནས་སྔོན་དུ་གསུངས་པའི་ས་བོན་ལས་སྐྱེས་པའི་དཔལ་གྱི་ལྷ་མོ་ཙུནྡེའི་བདག་
[165a.6]ཉིད་དུ་བསྒོམ་པར་བྱ་སྟེ། སྟོན་ཀའི་ཟླ་བ་ལྟ་བུ་ཕྱག་བཞི་པ། གཡས་པས་མཆོག་སྦྱིན་པ། གཡོན་པ་པུསྟིས་མཚན་པའི་པདྨ་བསྣམས་པ། ཕྱག་གཉིས་ཀྱིས་ལྷུང་བཟེད་བསྣམས་ཤིང་། རྒྱན་ཐམས་ཅད་ཀྱིས་བརྒྱན་པ། པདྨ་དང་ཟླ་བ་ལ་གནས་པ་བསྒོམ་པར་བྱའོ། །ཕྱི་ནས་ཕྱག་རྒྱ་བཅིང་
[165a.7]པར་བྱ་སྟེ། སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་རྣམས་སུ་སྲུང་བ་བྱས་ནས་བཟླས་པར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། ལག་པ་གཉིས་ཐལ་མོ་སྦྱར་ནས་སྡིགས་མཛུབ་གཉིས་གུང་མོའི་དཀྱིལ་དུ་འཁྱིལ་པའི་རྣམ་པར་སྦྱར་ཞིང་མཐེབ་ཆེན་གཉིས་ལོགས་སུ་སྦྱར་བར་བྱ་སྟེ། འདི་ནི་ཙུན་
[165b]
[165b.1]དེའི་ཕྱག་རྒྱའོ། །སྔགས་ནི་འདི་ཡིན་ཏེ། ཨོཾ་ཙ་ལེ་ཙུ་ལེ་ཙུནྡེ་སྭཱཧཱ། ཙུནྡེའི་སྒྲུབ་ཐབས་རྫོགས་སོ།། {T3520}༄༅༅། །རྒྱ་གར་སྐད་དུ། ཙུནྡ་སཱ་དྷ་ནཾ། བོད་སྐད་དུ། ཙུནྡེའི་སྒྲུབ་ཐབས། འཕགས་མ་ཙུནྡེ་ལ་ཕྱག་འཚལ་ལོ། །དང་པོ་སྙིང་གར་ཟླ་བ་ལ་ཙུཾ་ཡིག་དཀར་པོའི་ས་བོན་བལྟས་ལ། དེའི་
[165b.2]འོད་ཟེར་གྱིས་སངས་རྒྱས་ལ་སོགས་པ་རྣམས་ལ་མཆོད་པ་དང་། ཕྱག་འཚལ་བ་དང་། ཡང་དག་པར་བསྟོད་པ་དང་། སྡིག་པ་བཤགས་པ་ལ་སོགས་པ་བླ་ན་མེད་པའི་མཆོད་པ་རྣམ་པ་བདུན་གྱིས་མཆོད་པའི་རྗེས་ལ་གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བརྗོད་ནས་བཟོད་པར་གསོལ་ཏེ། ཚད་
[165b.3]མེད་པའི་གནས་བཞི་རྣམ་པར་བསྒོམ་ཞིང་སྟོང་པ་ཉིད་བསམ་པར་བྱའོ། །དེ་ནས་སྣ་ཚོགས་པདྨ་དང་ཟླ་བ་ལ་ཡང་རང་གི་ས་བོན་བསམ་ཞིང་དེ་ཡོངས་སུ་གྱུར་པ་ལས་འཕགས་མ་ཙུནྡེ་སྟོན་ཀའི་ཟླ་བ་ལྟ་བུ་ཞལ་གཅིག་ཕྱག་བཞི་པ། ཕྱག་གཡས་པ་མཆོག་སྦྱིན། ཕྱག་གཡོན་པ་པུ་སྟིས་མཚན་པའི་
[165b.4]པདྨ། ཕྱག་ལྷག་མ་དག་གིས་ལྷུང་བཟེད་བསྣམས་པ། རྒྱན་དང་ན་བཟའ་སྣ་ཚོགས་པས་རྣམ་པར་བརྒྱན་པ་རྡོ་རྗེ་སེམས་དཔའི་ཅོད་པན་ཅན། སེམས་ཅན་དཔག་ཏུ་མེད་པའི་དོན་མཛད་པའི་སྐུའི་བདག་ཉིད་སྤྲོ་ཞིང་སྐད་ཅིག་གིས་བསྐྱེད་ནས་རང་གི་ས་བོན་སྙིང་གར་བསམས་ཏེ་ཕྱག་རྒྱ་གནས་
[165b.5]གསུམ་དུ་དགོད་པར་བྱའོ། །ལག་པ་གཉིས་ཐལ་མོ་སྦྱར་ནས་མཛུབ་མོ་གཉིས་གུང་མོའི་དཀྱིལ་དུ་འཁྱིལ་པའི་རྣམ་པར་སྦྱར་ཏེ། མཐེབ་ཆེན་གཉིས་ལོགས་སུ་སྦྱར་བའོ། །སྔགས་ནི། ཨོཾ་ཙ་ལེ་ཙུ་ལེ་ཙུནྡེ་སྭཱ་ཧཱ། ཞེས་སོ། །ཙུནྡེའི་སྒྲུབ་ཐབས་རྫོགས་སོ།། {T3521}༄༅༅། །རྒྱ་གར་སྐད་དུ། ཙུནྡེ་
[165b.6]སཱ་དྷ་ནཾ། བོད་སྐད་དུ། ཙུནྡེའི་སྒྲུབ་ཐབས། ཙུནྡེ་ལ་ཕྱག་འཚལ་ལོ། །དང་པོར་སྙིང་གར་ཟླ་བའི་དཀྱིལ་དུ་གནས་པའི་ཙུཾ་ཡིག་གི་ས་བོན་ལས་བྱུང་བའི་འོད་ཟེར་སྣ་ཚོགས་པ། ཡོངས་སུ་རྫོགས་པ་ལས་མདུན་དུ་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་བལྟས་ལ་མཆོད་པ་ལ་
[165b.7]སོགས་པ་བྱའོ། །ཨོཾ་བཛྲ་པུཥྤེ་ཧཱུཾ་ཞེས་པ་ལ་སོགས་པའི་སྔགས་ཀྱིས་སོ། །དེ་ནས་གསུམ་ལ་སྐྱབས་སུ་འགྲོ་བ་ལ་སོགས་པའི་ཚིགས་བཅད་བརྗོད་པར་བྱའོ། །དེ་ནས་སྟོང་པ་ཉིད་བསྒོམས་ཏེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་པར་བྱའོ། །དེ་ནས་ཨོཾ་ཙུཾ་ལས་སྐྱེས་པའི་ཙུནྡེ་སྟོན་
[166a]
[166a.1]ཀའི་ཟླ་བ་ལྟ་བུ་ཕྱག་བཞི་པ། རྒྱན་ཐམས་ཅད་ཀྱིས་བརྒྱན་པ། གཡས་པ་མཆོག་སྦྱིན། གཡོན་པ་པུསྟིས་མཚན་པའི་པདྨ་བསྣམས་པ། ཕྱག་ལྷག་མ་དག་གིས་ལྷུང་བཟེད་བསྣམས་པ། པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པ་བསྒོམ་པར་བྱའོ། །ཕྱི་ནས་ཕྱག་
[166a.2]རྒྱས་སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་རྣམས་སུ་ཡང་དག་པར་རེག་ཅིང་སྲུང་བ་བྱས་ནས་བཟླས་པར་བྱའོ། །ཨོཾ་ཙ་ལེ་ཙུ་ལེ་ཙུནྡེ་སྭཱཧཱ། དེ་ལ་ཕྱག་རྒྱ་ནི་འདི་ཡིན་ཏེ། ལག་པ་གཉིས་ཐལ་མོ་སྦྱར་ཏེ། མཛུབ་མོ་དག་གུང་མོ་དག་གི་དཀྱིལ་དུ་བསྐྱིལ་བའི་རྣམ་པར་སྦྱར་ཏེ་མཐེ་བོང་
[166a.3]དག་ལོགས་སུ་གནས་པའོ་ཞེས་སོ། །ཙུནྡེའི་སྒྲུབ་ཐབས་རྫོགས་སོ།། {T3522}༄༅༅། །རྒྱ་གར་སྐད་དུ། ཀལ་པོཀྟ་ད་ཤ་བྷུ་ཛ་སཱི་ཏ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྟོག་པ་ལས་གསུངས་པའི་འོད་ཟེར་ཅན་དཀར་མོ་ཕྱག་བཅུ་པའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །སྔོན་དུ་གསུངས་པའི་
[166a.4]ཆོ་གས་པཾ་ཡིག་ལས་སྐྱེས་པའི་སྣ་ཚོགས་པདྨའི་སྟེང་དུ་ཟླ་བ་ལ་མཾ་ཡིག་དཀར་པོ་ལས་སྐྱེས་པའི་འོད་ཟེར་ཅན་དཀར་མོ་ཞལ་ལྔ་པ། ཕྱག་བཅུ་པ། ཞབས་བཞི་པའི་བདག་ཉིད་དུ་སྐད་ཅིག་གིས་བསམ་པར་བྱའོ། །དེ་ལ་རྩ་བའི་ཞལ་དཀར་པོ། གཡས་ནག་པོ། གཡོན་ཕག་ཞལ་དམར་མོ། རྒྱབ་ཞལ་ལྗང་གུ།
[166a.5]དབུའི་སྟེང་དུ་ཞལ་སེར་མོ། རིན་པོ་ཆེ་སྣ་ཚོགས་པའི་ཟུར་ཕུད་གསུམ་གྱིས་བརྒྱན་ཅིང་རལ་པའི་ཅོད་པན་ཅན། ཕྱག་གཡས་པ་ལྔ་རྣམས་ན་ཉི་མའི་དཀྱིལ་འཁོར་དང་། རྡོ་རྗེ་སྔོན་པོ་དང་། མདའ་དང་། ལྕགས་ཀྱུ་དང་ཁབ་ཕྱག་ན་བསྣམས་པའོ། །གཡོན་པ་ལྔ་རྣམས་ན་ཟླ་བའི་དཀྱིལ་འཁོར་དང་།
[166a.6]གཞུ་དང་། མྱ་ངན་མེད་པའི་ལོ་མ་དང་། ཞགས་པ་དང་བཅས་པའི་སྡིགས་མཛུབ་དང་། སྐུད་པ་བསྣམས་པའོ། །ལང་ཚོ་གཞོན་ཞིང་ཕུ་དུང་སྟོད་གཡོགས་དཀར་པོ་ཅན། མཆོད་རྟེན་གྱི་ནང་ན་གནས་པ། ཕག་བདུན་གྱི་ཤིང་རྟ་ལ་ཞོན་པ། ཁྱབ་འཇུག་དང་། དབང་པོ་དང་། བདེ་བྱེད་དང་། ཚངས་པ་རྣམས་ཞབས་བཞིས་མནན་པ། དེའི་
[166a.7]ཤིང་རྟའི་དབུས་སུ་གནས་པའི་ཆུ་སྲིན་མནན་པའི་བཅོམ་ལྡན་འདས་མ་གཞན་ཏེ། སྐུ་མདོག་ནག་མོ་ཕག་གི་གདོང་པ་ཅན། རྡོ་རྗེ་དང་སྡིགས་མཛུབ་ནི་གཡས་དང་གཡོན་གྱི་ཕྱག་ནའོ། །གཡས་ཕྱོགས་སུ་གཞན་བཅོམ་ལྡན་འདས་མ་ནི་ཕག་ཞལ་དམར་མོ་ཕྱག་བཞི་པ་གཡས་པ་གཉིས་ཀྱིས་ལྕགས་ཀྱུ་དང་ཁབ་བསྣམས་པའོ། །ཕྱག་
[166b]
[166b.1]གཡོན་པ་གཉིས་ཀྱིས་ཞགས་པ་དང་བཅས་པའི་སྡིགས་མཛུབ་དང་སྐུད་པ་བསྣམས་པའོ། །མཛེས་པའི་རྒྱན་གྱིས་བརྒྱན་པའོ། །གཡོན་གྱི་ཕྱོགས་སུ་རྗེ་བཙུན་མ་གཞན་རྣམས་ནི་ཕག་ཞལ་དམར་མོའོ། །རྣ་བའི་བར་དུ་བཀང་བའི་གཞུ་དང་མདའ་དང་། རྡོ་རྗེ་དང་། མྱ་ངན་མེད་པའི་ཤིང་གི་ཡལ་ག་ནི་གཡས་དང་གཡོན་གྱི་ཕྱག་ན་
[166b.2]བསྣམས་པའོ། །སྣ་ཚོགས་པའི་རྒྱན་གྱིས་བརྒྱན་པ་སྟེ། ཤིང་རྟ་འདྲེན་པའི་ཕག་གི་འོག་ནས་ཉི་མ་ལ་སོགས་པའི་གཟུགས་གཟའ་དགུ་སྟེ། ཉི་མས་ཉེ་བར་འཚེ་བའི་ནད་ཀྱི་ཚོགས་ཀྱང་མིའི་གཟུགས་ཀྱི་འོག་ཏུ་ལྟུང་བར་བསམ་པར་བྱའོ། །དེ་ནས་སྙིང་གའི་ཟླ་བ་ལ་གནས་པའི་མཾ་གི་ས་བོན་གྱི་འོད་ཟེར་གྱིས་དེ་བཞིན་
[166b.3]གཤེགས་པ་རྣམས་གདན་དྲངས་ཏེ། དབང་བསྐུར་བ་བླངས་ནས་དབུ་ལ་རྣམ་པར་སྣང་མཛད་ཀྱིས་རྒྱས་གདབ་པའོ། །དེ་ནས་སྙིང་གའི་ས་བོན་ལས་དེ་བཞིན་དུ་ཕྲེང་བའི་རྣམ་པ་ལྟ་བུའི་སྔགས་ཀྱི་ཡི་གེ་རྣམས་ཁ་ནས་འཐོན་ནས་ལྟེ་བ། ལྟེ་བ་ནས་ཁ་རུ། ཁ་ནས་སླར་ཡང་ལྟེ་བ་ལ་སོགས་པར་འཁོར་ལོ་འཁོར་བའི་
[166b.4]རིམ་པ་བཞིན་དུ་སྔགས་བཟླས་པར་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རང་གི་ས་བོན་གྱི་བྱིན་གྱིས་བརླབས་ལ་ཟས་ལ་སོགས་པ་ཐམས་ཅད་ལ་རྗེས་སུ་གནས་པར་བྱའོ། །ངལ་ན་ཡི་གེ་བརྒྱ་པའི་སྔགས་བརྗོད་ལ་ཅི་བདེར་གནས་པར་བྱའོ། །རྟོག་པ་ལས་གསུངས་པའི་འོད་ཟེར་
[166b.5]ཅན་དཀར་མོ་ཕྱག་བཅུ་པའི་སྒྲུབ་ཐབས་རྫོགས་སོ།། {T3523}༄༅༅། །རྒྱ་གར་སྐད་དུ། ཨ་ཤོ་ཀ་ཀཱནྟ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དེ་ནས་སྟོང་པ་ཉིད་བསྒོམས་པའི་རྗེས་ལ་ཟླ་བ་ལ་མཾ་ཡིག་སེར་པོ་ལས་བྱུང་བའི་མྱ་
[166b.6]ངན་མེད་པའི་ཤིང་དེའི་སྟེང་དུ་མཾ། དེ་ཡོངས་སུ་གྱུར་པ་ལས་སྐུ་མདོག་སེར་མོ་ཞལ་གཅིག་ཕྱག་གཉིས་པ། མགོན་པོ་རྣམ་པར་སྣང་མཛད་ཀྱི་རིན་པོ་ཆེའི་དབུ་རྒྱན་ཅན། གསེར་ལྟ་བུའི་ཕག་པའི་རྒྱབ་ཏུ་སྣ་ཚོགས་པདྨ་དང་། ཟླ་བ་ལ་འགྱིང་བག་དང་བཅས་པའི་སྟེང་དུ་བཞུགས་པ། མྱ་ངན་མེད་པའི་ཤིང་གི་ཡལ་ག་
[166b.7]འཕྱར་བ་ཕྱག་གཡོན་ན་བསྣམས་པ། ཕྱག་གཡས་པས་མཆོག་སྦྱིན་པ། དོ་ཤལ་ལ་སོགས་པ་སྐུ་ལ་བརྒྱན་པ། ལང་ཚོ་གཞོན་ཞིང་མཛེས་པ་འདི་བཞིན་བསམ་པར་བྱའོ། །སྙིང་གའི་མཾ་ཡིག་གི་ས་བོན་ལས་འོད་ཟེར་འཕྲོས་པས་མགོ་དང་བཅས་པའི་ཕག་གི་ཚོགས་ཀྱིས་གདུག་པ་ཅན་བརླག་སྟེ།
[167a]
[167a.1]སེམས་ཅན་དཔག་ཏུ་མེད་པའི་དོན་སྣ་ཚོགས་བྱེད་པའོ། །ཨོཾ་མཱ་རཱི་ཙྱཻ་མཱཾ་སྭཱ་ཧཱ། ཞེས་པ་ནི་བཟླས་པའི་སྔགས་སོ། །མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས་རྫོགས་སོ།། {T3524}༄༅༅། །རྒྱ་གར་སྐད་དུ། ཀལྤོཀྟ་མཱ་རཱི་ཙྱཻ་སཱ་དྷ་ནཾ། བོད་སྐད་
[167a.2]དུ། རྟོག་པ་ལས་གསུངས་པའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །བླ་མེད་བདེ་ལ་མ་ཆགས་པ། །བླ་མ་ཤེས་རབ་ཕ་རོལ་ཕྱིན། །ཕྱག་འཚལ་རྟོག་པའི་འོད་ཟེར་ཅན། །སྒྲུབ་ཐབས་དེ་ལྟར་བྲི་བར་བྱ། །དེ་ལ་དང་པོར་རེ་ཞིག་རྣལ་འབྱོར་པས་འགྲོ་བ་མ་
[167a.3]ལུས་པ་འདོན་པའི་ལྷག་པའི་བསམ་པས་ཨོཾ་ཕཊ་ཅེས་པའི་སྔགས་ཀྱིས་སྙིང་ག་དང་། མགྲིན་པ་དང་། མཛོད་སྤུ་དང་། སྤྱི་བོ་རྣམས་སུ་ཁྲོ་བོའི་ཁུ་ཚུར་བྱིན་ནས། ཨོཾ་མཱ་རཱི་ཙྱཻ་བིགྷྣཱཾ་ནུཏྶཱ་ར་ཡ་ཧཱུཾ་ཕཊ་ཅེས་པས་བགེགས་བསྐྲད་ནས། རང་གི་སྙིང་གར་ཨོཾ་ཡིག་ཡོངས་སུ་གྱུར་པ་ལས་ཉི་མ་ལ་
[167a.4]མཾ་ཡིག་བསམས་ནས་དེ་ལས་བྱུང་བའི་འོད་ཟེར་གྱི་ཚོགས་ཀྱིས་བཅོམ་ལྡན་འདས་མ་གདན་དྲངས་ཏེ་མདུན་གྱི་ནམ་མཁའ་ལ་བཞུགས་སུ་གསོལ་ཏེ། གསེར་ལྟ་བུ་ཞལ་གསུམ་པ། སྤྱན་གསུམ་པ། ཕྱག་བརྒྱད་པ། དམར་པོ་ནི་གཡས་ཀྱི་ཞལ་ལོ། །སྔོན་པོ་མི་སྡུག་པ་ཕག་གི་ཞལ་ནི་
[167a.5]གཡོན་དུའོ། །རྡོ་རྗེ་དང་། ལྕགས་ཀྱུ་དང་། མདའ་དང་། ཁབ་རྣམས་ནི་གཡས་ཀྱི་ཕྱག་བཞི་ན་བསྣམས་པའོ། །མྱ་ངན་མེད་པའི་ཤིང་གི་ཡལ་ག་དང་། གཞུ་དང་། སྐུད་པ་དང་། སྡིགས་མཛུབ་ནི་གཡོན་གྱི་ཕྱག་བཞི་ན་བསྣམས་པའོ། །རྣམ་པར་སྣང་མཛད་ཀྱི་དབུ་རྒྱན་ཅན། རྒྱན་
[167a.6]སྣ་ཚོགས་པས་བརྒྱན་པ། མཆོད་རྟེན་གྱི་ནང་ན་གནས་པ། གོས་དམར་པོའི་ཕུ་དུང་གི་སྟོད་གཡོགས་ཅན་ཕྱག་བདུན་གྱི་ཤིང་རྟའི་སྟེང་ན་ཞབས་གཡོན་བརྐྱང་གིས་བཞུགས་པ། པཾ་ཡིག་ལས་སྐྱེས་པའི་རླུང་གི་དཀྱིལ་འཁོར་ལ་ཧཾ་ཡིག་ལས་སྐྱེས་པའི་ཟླ་བ་དང་ཉི་མ་འཛིན་པའི་གཟའ་ཆེན་པོ་སྒྲ་
[167a.7]གཅན་ཡང་དག་པར་གནས་པའི་ཤིང་རྟའི་དབུས་སུ་ལྷ་མོ་བཞིས་ཡོངས་སུ་བསྐོར་ཏེ། དེ་ལ་ཤར་ཕྱོགས་སུ་བཏྟཱ་ལི་དམར་མོ་ཕག་གི་གདོང་པ་ཅན་ཕྱག་བཞི་པ་ཁབ་དང་། ལྕགས་ཀྱུ་ཕྱག་གཡས་ན་བསྣམས་པ། ཞགས་པ་དང་། མྱ་ངན་མེད་པའི་ཤིང་ཕྱག་གཡོན་ན་བསྣམས་པ། ཤ་འགག་
[167b]
[167b.1]དམར་པོ་ཅན་ནོ། །དེ་བཞིན་དུ་ལྷོ་ཕྱོགས་སུ་བ་དཱ་ལི་སེར་མོ་མྱ་ངན་མེད་པའི་ཤིང་དང་། ཁབ་ནི་གཡོན་དང་གཡས་ཀྱི་ཕྱག་དག་ནའོ། །རྡོ་རྗེ་དང་ཞགས་པ་ནི་གཡས་ཀྱི་དང་གཡོན་གྱི་ཕྱག་ནའོ། །གཞོན་ནུའི་གཟུགས་ཅན་ལང་ཚོ་དང་ལྡན་ཞིང་རྒྱན་གྱིས་བརྒྱན་པའོ། །དེ་བཞིན་དུ་ནུབ་ཏུ་བ་རཱ་ལི་
[167b.2]དཀར་མོ་རྡོ་རྗེ་དང་། ཁབ་ནི་ཕྱག་གཡས་པ་དག་ནའོ། །ཞགས་པ་དང་། མྱ་ངན་མེད་པའི་ཤིང་ནི་ཕྱག་གཡོན་པ་དག་ན་བསྣམས་པའོ། །ཞབས་གཡོན་བརྐྱང་གིས་བཞུགས་ཤིང་ལེགས་པའི་གཟུགས་ཅན་མའོ། །དེ་བཞིན་དུ་བྱང་ཕྱོགས་ཀྱི་ཆར་ཕག་ཞལ་མ་དམར་མོ་སྤྱན་གསུམ་པ། ཕྱག་
[167b.3]བཞི་པ། རྡོ་རྗེ་དང་། མདའ་ནི་ཕྱག་གཡས་ན་བསྣམས་ཤིང་། གཞུ་དང་། མྱ་ངན་མེད་པའི་ཤིང་ནི་ཕྱག་གཡོན་ན་བསྣམས་པ་སྟེ། གཟུགས་མཛེས་མ་བསམས་ནས་མཆོད་པ་དང་། ཕྱག་འཚལ་བ་དང་། བསྟོད་པ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་།
[167b.4]ཡོངས་སུ་བསྔོ་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་ལ་བརྟེན་པ་ལ་སོགས་པ་བྱས་ཏེ། ཚད་མེད་པའི་གནས་བཞི་བསྒོམས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པས་སྟོང་པ་ཉིད་ཀྱི་ཏིང་ངེ་འཛིན་ལ་དམིགས་ནས། དེ་
[167b.5]ནས་ཉི་མའི་དཀྱིལ་འཁོར་ལ་ཨོཾ་ཡིག་ལས་སྐྱེས་པའི་རྣམ་པར་སྣང་མཛད་སེང་གེའི་གདན་ལ་བཞུགས་པ་སྐུ་མདོག་དཀར་པོ་རལ་པའི་ཅོད་པན་བཅིངས་པ་བྱང་ཆུབ་མཆོག་གི་ཕྱག་རྒྱ་མཛད་པ་ཞི་བ་རྒྱན་ཐམས་ཅད་ཀྱིས་བརྒྱན་པའོ། །དེའི་ཐུགས་ཀར་ཟླ་བ་ལ་ཡི་གེ་ཉི་ཤུ་རྩ་ལྔས་ཡོངས་སུ་བསྐོར་
[167b.6]བའི་མཾ་ཡིག་གི་ས་བོན་ཡོངས་སུ་གྱུར་པ་ལས་སྐྱེས་པའི་མྱ་ངན་མེད་པའི་ཡལ་ག །དེའི་སྟེང་དུ་ཟླ་བ་ལ་མཾ་ཡིག་གི་ས་བོན་དེ་ཐམས་ཅད་ཡོངས་སུ་གྱུར་པ་ལས་ཇི་ལྟར་གསུངས་པའི་སྐུ་མདོག་དང་ཕྱག་ལ་སོགས་པའི་མཚན་ཉིད་ཅན་འོད་ཟེར་ཅན་གྱི་སྐུའི་བདག་ཉིད་དུ་སྐད་ཅིག་གིས་བསམས་
[167b.7]ནས། ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་ཨཱ་ཀཪྵ་ཡ་ཛཿསྭཱཧཱ། ཞེས་པ་འདིས་བཏྟཱ་ལི་ཤར་གྱི་ཕྱོགས་སུ་དགོད་པར་བྱའོ། །དེ་བཞིན་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་པྲ་དུཥྚཱ་ནཾ་མུ་ཁཾ་བནྡྷ་བནྡྷ་ཧཱུཾ་སྭཱ་ཧཱ། ཞེས་པས་ལྷོ་ཕྱོགས་སུ་བ་དཱ་ལིའོ། །དེ་
[168a]
[168a.1]བཞིན་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་ནཾ་མུ་ཁཾ་སྟཾ་བྷ་ཡ་བཾ་སྭཱ་ཧཱ་ཞེས་པས་ནུབ་ཏུ་བ་རཱ་ལིའོ། །དེ་བཞིན་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་སཏྭཱ་བ་ཤ་མ་ནཱ་ཡ་ཧོཿསྭཱ་ཧཱ་ཞེས་པ་འདིས་བྱང་དུ་བཱ་རཱ་ཧཱ་མུ་ཁིའོ་ཞེས་སོ། །ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་
[168a.2]ཕཊ་སྭཱ་ཧཱ་ཞེས་པ་ནི་བསྒོམས་པའི་རྗེས་ལ་བཟླས་པར་བྱའོ། །དེ་བཞིན་དུ་ཐུན་མཚམས་གསུམ་དུ་བྱིན་གྱིས་བརླབས་ནས་ལྷའི་རྣལ་འབྱོར་གྱིས་གནས་པར་བྱའོ། །རྟོག་པ་ལས་གསུངས་པའི་འོད་ཟེར་ཅན་གྱི་སྒྲུབ་ཐབས་རྫོགས་སོ།། {T3525}༄༅༅། །རྒྱ་གར་སྐད་དུ། །ཀལྤོ་ཀྟ་བིདྷི་ནཱ་སཱི་ཏ་མཱ་རཱི་ཙྱཻ་སཱ་དྷ་ནཾ། བོད་སྐད་
[168a.3]དུ། རྟོག་པ་ལས་གསུངས་པའི་ཆོ་ག་འོད་ཟེར་ཅན་དཀར་མོའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོ་རེ་ཞིག་རང་གི་སྙིང་གར་ཟླ་བ་ལ་མཾ་ཡིག་དཀར་པོའི་འོད་ཟེར་གྱིས་བཅོམ་ལྡན་འདས་མ་གདན་དྲངས་ཏེ་ཉེ་བར་སྤྱོད་པ་སྣ་ཚོགས་པས་མཆོད་ནས་སྡིག་པ་བཤགས་པ་ལ་
[168a.4]སོགས་པ་བྱས་ནས་ཚད་མེད་པའི་གནས་བཞི་བསྒོམས་ཏེ་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་ནས་བཾ་ཡིག་ལས་སྐྱེས་པའི་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་ལ་སླར་ཡང་མཾ་ཡིག་དཀར་པོ་ཡོངས་སུ་གྱུར་པ་ལས་འོད་ཟེར་ཅན་ཀུན་དང་ཟླ་བའི་འོད་ལྟ་བུ་ཞལ་ལྔ་པ། ཕྱག་
[168a.5]བཅུ་པ། ཞབས་བཞི་པའི་བདག་ཉིད་དུ་སྐད་ཅིག་གིས་བསམ་པར་བྱའོ། །དེ་ལ་ཞལ་གྱི་གཙོ་བོ་སྐུའི་མདོག་ལྟ་བུ། ཞལ་གཡས་པ་ནག་པོ། ཞལ་གཡོན་པ་ཕག་ཞལ་དམར་པོ། རྒྱབ་ཞལ་ལྗང་གུ། དབུའི་སྟེང་དུ་ཞལ་སེར་པོ་རིན་པོ་ཆེ་སྣ་ཚོགས་པས་བརྒྱན་པའི་ཟུར་ཕུད་གསུམ་པ་
[168a.6]རལ་པའི་ཅོད་པན་ཅན། ཕྱག་གཡས་པ་ལྔ་རྣམས་ན་ཉི་མའི་དཀྱིལ་འཁོར་དང་། རྡོ་རྗེ་སྔོན་པོ་དང་། མདའ་དང་། ལྕགས་ཀྱུ་དང་། ཁབ་རྣམས་ཕྱག་ན་བསྣམས་པའོ། །ཕྱག་གཡོན་པ་ལྔ་རྣམས་ན། ཟླ་བའི་དཀྱིལ་འཁོར་དང་གཞུ་དང་། མྱ་ངན་མེད་པའི་ཤིང་གི་ཡལ་ག་དང་། ཞགས་པ་
[168a.7]དང་བཅས་པའི་སྡིགས་མཛུབ་དང་། སྐུད་པ་རྣམས་ཕྱག་ན་བསྣམས་པའོ། །རིན་པོ་ཆེ་སྣ་ཚོགས་པས་བརྒྱན་པའི་རྣ་རྒྱན་དང་། དཔུང་རྒྱན་དང་། གཙུག་ཕུད་དང་། དྲིལ་བུ་གཡེར་ཀའི་དྲ་བའི་སྐ་རགས་དང་། གོས་ཀྱིས་སྐུ་ལ་བརྒྱན་པ། ལང་ཚོ་གཞོན་ཞིང་ཤ་འགག་གི་སྟོད་གཡོགས་དཀར་པོ་ཅན།
[168b]
[168b.1]མཆོད་རྟེན་གྱི་ནང་དུ་བཞུགས་ཤིང་ཕག་བདུན་གྱི་ཤིང་རྟ་ལ་བཞུགས་པ། ཁྱབ་འཇུག་དང་། དབང་པོ་དང་། བདེ་བྱེད་དང་། ཚངས་པ་རྣམས་ཞབས་བཞིས་མནན་པ། དེའི་ཡང་ཤིང་རྟའི་དབུས་སུ་གནས་པའི་ཆུ་སྲིན་མནན་པའི་བཅོམ་ལྡན་འདས་མ་དེ་ཡང་སྐུ་མདོག་ནག་མོ་ཕག་གི་ཞལ་ཅན་མ། རྡོ་རྗེ་
[168b.2]དང་། སྡིགས་མཛུབ་དག་གིས་གཡས་དང་། གཡོན་པའི་ཕྱག་དག་ནའོ། །གཡས་ཕྱོགས་ན་བཅོམ་ལྡན་འདས་མ་གཞན་ཏེ། དེ་ཡང་ཕག་ཞལ་དམར་མོ་ཕྱག་བཞི་པ་ལྕགས་ཀྱུ་དང་། ཁབ་དག་ཕྱག་གཡས་པ་གཉིས་ནའོ། །ཞགས་པ་དང་བཅས་པའི་སྡིགས་མཛུབ་དང་། སྐུད་པ་དག་ཕྱག་གཡོན་པ་
[168b.3]གཉིས་ནའོ། །མཛེས་པའི་རྒྱན་གྱིས་བརྒྱན་པའོ་ཞེས་སོ། །གཡོན་ཕྱོགས་ན་རྗེ་བཙུན་མ་གཞན་ཏེ། དེ་ཡང་སྐུ་མདོག་དམར་མོ་ཕག་པའི་ཞལ་ཅན་ནོ། །རྣ་བའི་རྩར་བཀང་བའི་གཞུ་དང་། མདའ་དང་། རྡོ་རྗེ་དང་། མྱ་ངན་མེད་པའི་ཤིང་གི་ཡལ་ག་རྣམས་གཡས་དང་གཡོན་གྱི་ཕྱག་ན་བསྣམས་པའོ། །སྣ་
[168b.4]ཚོགས་པའི་ན་བཟས་བརྒྱན་པའོ་ཞེས་ཏེ། ཤིང་རྟ་འདྲེན་པའི་ཕག་གི་འོག་ན་ཉི་མ་ལ་སོགས་པའི་གཟའ་དགུ་དང་ཉེ་བར་འཚེ་བའི་ནད་ཀྱི་ཚོགས་ལྷུང་ནས་མི་གཟུགས་ཀྱི་ཞི་ཞིང་དེ་ལྟ་བུའི་བཅོམ་ལྡན་འདས་མ་བསམས་ནས། སྙིང་གར་ཟླ་བ་ལ་མཾ་ཡིག་ལས་བྱུང་བའི་འོད་ཟེར་རྣམས་ཀྱིས་དེ་བཞིན་གཤེགས་
[168b.5]པ་རྣམས་གདན་དྲངས་ཏེ། དབང་བསྐུར་བླངས་ཤིང་། རྣམ་པར་སྣང་མཛད་ཀྱིས་དབུ་བརྒྱན་པའོ། །དེ་ནས་སྙིང་གའི་ས་བོན་ལས་ཕྲེང་བའི་རྣམ་པ་ལྟ་བུའི་སྔགས་ཀྱི་ཡི་གེ་རྣམས་ཁ་ནས་འཐོན་ནས་ལྟེ་བ། ལྟེ་བ་ནས་ཁ། ཁ་ནས་སླར་ཡང་ལྟེ་བ་ལ་སོགས་པར་འཁོར་ལོ་
[168b.6]འཁོར་བའི་རིམ་པ་བཞིན་དུ་སྔགས་བཟླས་པར་བྱའོ། །མཐར་གསུམ་གྱི་དེ་བཞིན་ཉིད་ཀྱང་ཡིད་ཀྱིས་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་མཱ་རཱི་ཙྱཻ་མཱཾ་ཧཱུཾ་ཕཊ་སྭཱ་ཧཱ། རང་གི་ས་བོན་གྱིས་བྱིན་གྱིས་བརླབས་ལ་ཟས་ལ་སོགས་པ་ཐམས་ཅད་ལ་རྗེས་སུ་གནས་པར་བྱའོ། །སྐྱོ་ན་ཡི་གེ་བརྒྱ་པའི་
[168b.7]སྔགས་བརྗོད་ལ་ཅི་བདེར་གནས་པར་བྱའོ། །ཞེས་སོ། །རྟོག་པ་ལས་གསུངས་པའི་ཆོ་ག་འོད་ཟེར་ཅན་དཀར་མོའི་སྒྲུབ་ཐབས་རྫོགས་སོ།། {T3526}༄༅༅། །རྒྱ་གར་སྐད་དུ། བཛྲ་དྷཱ་ཏྭཱི་ཤྭ་རཱི་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྡོ་རྗེ་དབྱིངས་ཀྱི་དབང་ཕྱུག་མ་འོད་ཟེར་ཅན་གྱི་སྒྲུབ་ཐབས། འཕགས་
[169a]
[169a.1]མ་འོད་ཟེར་ཅན་ལ་ཕྱག་འཚལ་ལོ། །ཨོཾ་ཨཱཿཧཱུཾ་སྭཱ་ཧཱ་ཞེས་པས་སྤྱི་བོ་དང་དཔྲལ་བ་དང་། མགྲིན་པ་དང་། སྙིང་ག་དང་པུས་མོ་གཉིས་རྣམས་སུ་བདག་ཉིད་རྣམ་པར་བསྒོམས་ནས་ཨོཾ་ཡིག་གིས་ཐམས་ཅད་སྔོན་མ་བཞིན་དུ་རྣམ་པར་དག་པར་བརྗོད་པའོ། །མཐར་ཐུག་པའི་ཆོ་ག་
[169a.2]བྱས་ནས་ཨོཾ་ཡིག་ལས་སྐྱེས་པའི་རྡོ་རྗེ་དབྱིངས་ཀྱི་དབང་ཕྱུག་མ་འོད་ཟེར་ཅན་ཕྱག་བཅུ་གཉིས་པ། ཞལ་དམར་པོ་ལྟོ་བ་འཕྱང་བ། དབུ་སྐྲ་ཁམ་པ་གྱེན་དུ་འབར་ཞིང་བརྫེས་པ་ཐོད་པའི་ཕྲེང་བ་ཅན་སྦྲུལ་གྱི་སྐེ་རགས་བྱས་པ། སྟག་གི་པགས་པའི་ན་བཟའ་མནབས་པ། ཞབས་ཟུང་གིས་བགེགས་
[169a.3]དཔག་ཏུ་མེད་པ་མནན་པ། མཆོད་རྟེན་གྱི་ནང་ན་ཉི་མའི་དཀྱིལ་འཁོར་ལ་ཞབས་གཡོན་བརྐྱང་གིས་བཞུགས་པ། རྣམ་པར་སྣང་མཛད་ཀྱིས་མགོན་དང་བཅས་པ། སྣ་ཚོགས་པའི་ཕག་གཉིས་ཀྱིས་བཀུག་པའི་ཡིད་ཀྱིས་ཤིང་རྟ་ལ་ཞོན་པ། དམར་པོ་དང་། ནག་པོ་དང་། ལྗང་གུ་དང་། སེར་པོ་དང་། དཀར་པོ་
[169a.4]རྣམས་དང་པོ་ལ་སོགས་པའི་ཞལ་ལྔའོ། །སྟེང་དུ་ཕག་ཞལ་ནག་པོ་གཅིག་གོ །ཕྱག་གཡས་པ་རྣམས་ན་རལ་གྲི་དང་གཏུན་ཤིང་དང་། མདའ་དང་། ལྕགས་ཀྱུ་དང་། རྡོ་རྗེ་རྩེ་གཅིག་པ་དང་། དགྲ་སྟ་རྣམས་སོ། །ཕྱག་གཡོན་པ་རྣམས་ན་ཞགས་པ་དང་བཅས་པའི་སྡིགས་མཛུབ་དང་། ཐོད་པ་དང་།
[169a.5]མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་། རྩེ་གསུམ་རྣམས་བསྣམས་པའོ། །སྤྱན་གསུམ་པ། ལྗགས་བསྐྱོད་ཅིང་ཞལ་གཙིགས་པ། ཤིན་ཏུ་འཇིགས་པར་བྱེད་པ་བསམ་པར་བྱའོ། །ཤིང་རྟའི་དབུས་སུ་ཕྱག་གཉིས་པ་སྡིགས་མཛུབ་དང་མྱ་ངན་མེད་པའི་ཡལ་ག་ཕྱག་ན་
[169a.6]བསྣམས་པའོ། །ཤིང་རྟ་འདྲེན་པ་གཡོན་བརྐྱང་གིས་གནས་པ་འཇིགས་པར་བྱེད་པ་བསམ་པར་བྱའོ། །སྤྲོ་བ་ལ་སོགས་པ་སྔོན་དུ་འགྲོ་བས་སེམས་ཅན་གདུག་པ་ཅན་རྣམས་རེངས་པ་དང་། འཇོམས་པར་བྱེད་པའོ། །ཨོཾ་བཛྲ་དྷཱ་ཏྭཱི་ཤྭ་རཱི་སརྦ་དུཥྚཱ་སཏྭཱན་ཧ་ན་ཧ་ན། ད་ཧ་ད་ཧ། པ་ཙ་པ་ཙ་ཨོཾ་མཱ་རཱི་ཙྱཻ་ཨོཾ་
[169a.7]ཧཱུཾ་སྭཱ་ཧཱ་ཞེས་པའི་སྔགས་བཟླས་པར་བྱའོ། །རྡོ་རྗེ་དབྱིངས་ཀྱི་དབང་ཕྱུག་མ་འོད་ཟེར་ཅན་གྱི་སྒྲུབ་ཐབས་རྫོགས་སོ།། {T3527}༄༅༅། །རྒྱ་གར་སྐད་དུ། ཨཥྚ་བྷུ་ཛ་སི་ཏཱ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་ཕྱག་བརྒྱད་མ་སེར་མོའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་
[169b]
[169b.1]ལོ། དང་པོར་རེ་ཞིག་སྔགས་པས་སྟན་བདེ་བ་ལ་ཉེ་བར་འདུག་སྟེ། གཡོན་པ་ཁྲོ་བོའི་ཁུ་ཚུར་གྱིས་སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་རྣམས་སུ་ཨོཾ་ཕཊ་ཅེས་པའི་སྔགས་ཀྱིས་ཡང་དག་པར་རེག་ནས་གཡས་པ་ཁྲོ་བོའི་ཁུ་ཚུར་བསྟོད་པས་བགེགས་མེད་པར་བསམ་པར་བྱའོ། །
[169b.2]དེ་ནས་ཁ་བསང་བ་ལ་སོགས་པ་བྱས་ནས་སླར་ཡང་ཉེ་བར་གནས་ཏེ། རང་གི་སྙིང་གར་མཚན་མོ་དང་ཉིན་མོའི་དབྱེ་བས་ཨ་ཡིག་དང་ཨ་ཡིག་རྫོགས་པ་ལས་ཟླ་བ་དང་ཉི་མར་བལྟས་ལ། དེའི་སྟེང་དུ་ཨོཾ་ཡིག་སེར་པོའི་རྣམ་པར་བསྒོམས་ལ་དེའི་འོད་ཟེར་ལས་སྐྱེས་པའི་བཅོམ་ལྡན་འདས་མ་
[169b.3]མདུན་དུ་བལྟས་ཏེ། ཇི་ལྟར་རྙེད་པའི་མེ་ཏོག་ལ་སོགས་པ་རྣམས་ཀྱིས་ཡང་དག་པར་མཆོད་ནས་དེའི་མདུན་དུ་སྡིག་པ་བཤགས་པ་ལ་སོགས་པ་བྱས་ནས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །དེ་ནས་ཨོཾ་སྭ་བྷཱ་བ་ཤུདྡྷཱསྶརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་ཨོཾ་
[169b.4]ཡིག་ཡོངས་སུ་གྱུར་པ་ལས་འཁོར་ལོ་རྩིབས་བརྒྱད་པའོ། །དེའི་དབུས་སུ་གནས་པའི་ཨོཾ་ཡིག་ཡོངས་སུ་གྱུར་པ་ལས་བདག་ཉིད་རྣམ་པར་སྣང་མཛད་སྐུ་མདོག་སེར་པོ་རལ་པའི་ཅོད་པན་བསྣམས་པ། ཞི་བ་པདྨའི་སྙིང་པོའི་སེང་གེའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ་རྒྱན་ཐམས་ཅད་
[169b.5]ཀྱིས་བརྒྱན་པ། བྱང་ཆུབ་མཆོག་གི་ཕྱག་རྒྱ་མཛད་པར་བསམ་པར་བྱའོ། །དེའི་ཐུགས་ཀའི་ཟླ་བ་ལ་གནས་པའི་མཾ་ཡིག་ཡོངས་སུ་གྱུར་པ་ལས་མྱ་ངན་མེད་པའི་མེ་ཏོག །དེའི་སྟེང་དུ་མཾ་ཡིག །དེ་ལས་འོད་ཟེར་བྱུང་ནས་སེམས་ཅན་མ་ལུས་པའི་དོན་མཛད་ནས་དེ་ལ་དེ་བཞིན་དུ་དགུག་པ་དང་
[169b.6]གཞུག་པར་བྱའོ། །དེའི་མདུན་དུ་ཨོཾ་ཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར་ལ་མཾ་ཡིག་ལས་སྐྱེས་པའི་བཅོམ་ལྡན་འདས་མ་ཕྱག་བརྒྱད་མ་འོད་ཟེར་གྱི་རང་བཞིན་ཅན་དུ་མན་ངག་གིས་བསྒོམ་པར་བྱའོ། །དེའི་རྗེས་ལ་ཨོཾ་མཾ་ཞེས་པའི་སྔགས་བརྗོད་ནས་བདག་ཉིད་མཆོད་རྟེན་གྱི་ནང་
[169b.7]དུ་གནས་པ་ཕག་བདུན་གྱི་ཤིང་རྟ་ལ་བཞུགས་པའི་འོད་ཟེར་ཅན་དུ་རྣམ་པར་བསྒོམ་པར་བྱའོ། །ཤིང་རྟའི་འོག་ཏུ་ཡཾ་ཡིག་ལས་སྐྱེས་པའི་རླུང་གི་དཀྱིལ་འཁོར་ལ་ཧཾ་ཡིག་ལས་སྤྲུལ་པའི་སྒྲ་གཅན་ནོ། །དེ་ལ་བཅོམ་ལྡན་འདས་མ་རིན་པོ་ཆེའི་ཅོད་པན་ཅན། ཕྱག་བརྒྱད་པ། ཞལ་གསུམ་པ། སྤྱན་
[170a]
[170a.1]གསུམ་པ། སྐུ་མདོག་སེར་མོ་རྩ་བའི་ཞལ་ཤིན་ཏུ་སེར་མོ། །བནྡུ་ཛི་བ་ཀའི་མེ་ཏོག་ལྟ་བུ་གཡས་དམར་ཞིང་ཟླུམ་པ། གཡོན་པ་ཕག་ཞལ་ཁྲོ་བ་དང་བཅས་པའི་ནག་པོ་ལྗགས་བསྐྱོད་པ། ཞལ་མི་སྡུག་ཅིང་འཇིགས་པ། ཁྲོ་གཉེར་དང་མཆེ་བ་གཙིགས་པ། ཕྱག་གཡོན་པ་
[170a.2]རྣམས་ན་སྡིགས་མཛུབ་དང་བཅས་པའི་ཞགས་པ་དང་། གཞུ་དང་མྱ་ངན་མེད་པའི་མེ་ཏོག་དང་བཅས་པའི་ཡལ་ག་དང་། སྐུད་པ་རྣམས་སོ། གཡས་པ་རྣམས་ན་ཁབ་དང་། ལྕགས་ཀྱུ་དང་། མདའ་དང་། རྡོ་རྗེ་བསྣམས་པའོ། །སྣ་ཚོགས་པའི་ཁོར་ཡུག་ལ་སོགས་པ་དང་། རྒྱན་ཐམས་ཅད་
[170a.3]ཀྱིས་བརྒྱན་པ་སྣ་ཚོགས་པའི་ཤ་འགག་དམར་པོའི་སྟོད་གཡོགས་ཅན། གཡོན་བརྐྱང་གིས་བཞུགས་པ་ལྷ་མོ་བཞིའི་འཁོར་གྱིས་ཡོངས་སུ་བསྐོར་བ་བསམ་པར་བྱའོ། །མདུན་དུ་བཏྟཱ་ལི་གཡས་བརྐྱང་གིས་བཞུགས་པ། ཕྱག་བཞི་པ། ཕག་ཞལ་དམར་པོ་གཅིག་པ། ཕྱག་གཡས་ན་
[170a.4]ཁབ་དང་། ལྕགས་ཀྱུ་བསྣམས་པ། གཡོན་ན་ཞགས་པ་དང་། མྱ་ངན་མེད་པའི་མེ་ཏོག་དང་བཅས་པའི་ཡལ་ག་བསྣམས་པའོ། །གཡས་སུ་བ་དཱ་ལི་གཡོན་བརྐྱང་གིས་བཞུགས་པ། ཕྱག་བཞི་པ། ཕག་ཞལ་ཁ་དོག་སེར་པོ་གཅིག་པ། ཕྱག་གཡས་ན་མྱ་ངན་མེད་པའི་ཡལ་ག་དང་།
[170a.5]ཁབ་སྐུད་བསྣམས་པ། གཡོན་ན་ཞགས་པ་དང་། རྡོ་རྗེ་བསྣམས་པའོ། །རྒྱབ་ཏུ་བ་རཱ་ལི་གཡས་བརྐྱང་གིས་བཞུགས་པ། ཕྱག་བཞི་པ་སྐུ་མདོག་སེར་མོ། ཕག་ཞལ་གཅིག་པ། གཡས་ན་རྡོ་རྗེ་དང་ཁབ་བསྣམས་པ། གཡོན་ན་ཞགས་པ་དང་། མྱ་ངན་མེད་པའི་ཡལ་ག་བསྣམས་པའོ། །དེ་
[170a.6]བཞིན་དུ་གཡོན་དུ་བཱ་རཱ་ཧཱ་མུ་ཁི་ཞལ་དམར་པོ། ཉི་མ་ཤར་བའི་འོད་ཟེར་འབར་བ་ལྟ་བུ་གཡོན་བརྐྱང་གིས་བཞུགས་པ། ཕྱག་བཞི་པ། གཡས་ན་མདའ་དང་། རྡོ་རྗེ་བསྣམས་པའོ། །གཡོན་ན་གཞུ་དང་མྱ་ངན་མེད་པའི་ཡལ་ག་བསྣམས་པའོ། །འདི་རྣམས་ཐམས་ཅད་མཆོད་རྟེན་གྱི་གཞལ་
[170a.7]ཡས་ཁང་ན་བཞུགས་པ། སྣ་ཚོགས་པའི་རྒྱན་དང་། རིན་པོ་ཆེའི་ཅོད་པན་ཅན། ཤ་འགག་དམར་པོའི་སྟོད་གཡོགས་ཅན། སྤྱན་གསུམ་པ། སྣ་ཚོགས་པའི་རྒྱན་ཅན་བསམ་པར་བྱའོ། །དེ་ནས་ཛཿཧཱུཾ་བཾ་ཧོཿཞེས་པས་ཡེ་ཤེས་སེམས་དཔའ་གཞུག་ཅིང་ཕྱག་རྒྱ་བཅིང་བར་བྱའོ། །ལག་པ་གཉིས་
[170b]
[170b.1]པོ་མཉམ་བྱས་ནས། །ཐལ་མོ་ཡང་དག་སྦྱར་བྱས་ཏེ། །མཛུབ་མོ་གཉིས་ཀྱི་རྩེ་དག་དང་། །མཐེ་བོ་ཆེ་ནི་གཉིས་པོ་དག །གུང་མོའི་རྩེ་མོ་ཡང་དག་སྦྱར། །འཁྱིལ་པའི་རྣམ་པའི་རྟགས་ཀྱིས་ནི། །སྐྱིལ་ཀྲུང་སྟེང་དུ་བཞག་ནས་ནི། །ལྟེ་བའི་ཕྱོགས་སུ་དགོད་པར་བྱ། །དེ་ནས་བསྒོམ་པ་སྔོན་དུ་འགྲོ་བས་སྔགས་
[170b.2]བཟླས་པར་བྱའོ། །ཨོཾ་མཱ་རཱི་ཙྱཻ་སྭཱ་ཧཱ། ཆད་ལྷག་ཡི་གེ་བརྒྱ་པའི་ཆོ་གས་བསྐང་བར་བྱའོ། །ཨོཾ་བཛྲ་སཏྭ་ཞེས་པ་ལ་སོགས་པའོ། །དེ་ནས་གཤེགས་སུ་གསོལ་བའི་དུས་སུ་ཨོཾ་མཱ་རཱི་ཙྱཻ་མུཿཞེས་པས་རང་གི་ཕྱག་རྒྱ་དགྲོལ་བར་བྱའོ་ཞེས་སོ། །འོད་ཟེར་ཅན་སེར་མོ་ཕྱག་བརྒྱད་པའི་སྒྲུབ་ཐབས་རྫོགས་སོ།། །།
[170b.3]{T3528}༄༅༅། །རྒྱ་གར་སྐད་དུ། ཨོཾ་ཌི་ཡཱ་ན་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་ཐབས་སུ་གྱུར་པ་ནི། དང་པོར་རེ་ཞིག་རང་གི་སྙིང་གར་ཨོཾ་ཡིག་ཡོངས་སུ་གྱུར་པ་ལས་ཉི་མའི་དཀྱིལ་
[170b.4]འཁོར། དེའི་སྟེང་དུ་དང་པོའི་བཅུ་གསུམ་པའི་ས་བོན་ལས་ཟླ་ཕྱེད་དང་ཐིག་ལེས་བརྒྱན་པའོ། །དེ་བཞིན་དུ་ཡང་སྡིག་པ་ཐམས་ཅད་སོ་སོར་བཤགས་པ་ལ་སོགས་པ་བྱས་ནས། དེས་དེ་བཞིན་དུ་བསྐྱེད་པའི་མཾ་ཡིག །དེ་ཡོངས་སུ་གྱུར་པ་ལས་འོད་ཟེར་ཅན་སྐུ་མདོག་དམར་མོ་ཞལ་དྲུག་པ་ཕྱག་བཅུ་
[170b.5]གཉིས་པ་སྟེ། ཞལ་དང་པོ་ནི་དམར་པོ། གཉིས་པ་ནི་ནག་པོ། གསུམ་པ་ནི་ལྗང་གུ། བཞི་པ་ནི་སེར་པོ། ལྔ་པ་ནི་དཀར་པོ། དབུའི་སྟེང་དུ་གནས་པ་ནི་ཕག་ཞལ་ནག་པོ་སྟེ། ཞལ་དྲུག་པའོ། །མྱ་ངན་མེད་པ་དང་། མཆོད་རྟེན་གྱིས་བརྒྱན་པའོ། །རྣམ་པར་སྣང་མཛད་སེར་པོས་མགོན་དུ་བྱས་པ། ལྟོ་བ་འཕྱང་
[170b.6]ཞིང་ཐོད་པའི་ཕྲེང་བས་བརྒྱན་པ། སྐྲ་ཁམ་པ་གྱེན་དུ་བརྫེས་པ། སྦྲུལ་གྱི་རྒྱན་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། གཡོན་བརྐྱང་གིས་ཕག་དང་བགེགས་མནན་པ། ཕྱག་གཡས་པ་རྣམས་ཀྱིས་རལ་གྲི་དང་། རྡོ་རྗེ་དང་། ཆང་སྣོད་དང་། མདའ་དང་། རྡོ་རྗེ་རྩེ་གཅིག་པ་དང་སྟ་གྲི་བསྣམས་
[170b.7]པའོ། །གཡོན་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་། གཏུན་ཤིང་དང་། མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་། རྩེ་གསུམ་བསྣམས་པའོ། །སྤྱན་གསུམ་པ་དམར་ལ་ཟླུམ་པ། ཞལ་མཆེ་བ་གཙིགས་པ་ཤིང་རྟའི་དབུས་སུ་བཞུགས་པའོ། །ལྷ་མོ་གཞན་རྣམས་ནི་
[171a]
[171a.1]ཕྱག་གཉིས་པ། སྡིགས་མཛུབ་དང་བཅས་པའི་ཞགས་པ་དང་། མྱ་ངན་མེད་པའི་ཡལ་ག་བསྣམས་པ་བསྒོམ་པར་བྱའོ། །བདག་ཉིད་བཅོམ་ལྡན་འདས་མའི་ཕྱག་རྒྱ་བཅིང་བར་བྱ་སྟེ། རྡོ་རྗེའི་ཐལ་མོ་སྦྱར་ནས་ཏིང་ངེ་འཛིན་གྱིས་གུང་མོ་དག་བཀུག་ནས་མཐེ་བོང་གཉིས་སྐྱིལ་ཀྲུང་རྩེ་མོ་
[171a.2]བཀུག་ནས་བཟུང་བའོ། །སྔགས་ནི་ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྐུ་མདོག་དམར་མོ་ཕྱག་བཅུ་གཉིས་པ་ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་ཐབས་རྫོགས་སོ།། {T3529}༄༅༅། །རྒྱ་གར་སྐད་དུ། ཨོ་ཌི་ཡཱ་ན་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་
[171a.3]ཟེར་ཅན་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྡིག་པ་བཤགས་པ་ལ་སོགས་པ་བྱས་ནས་སྟོང་པ་ཉིད་བསྒོམས་ཏེ། སྣ་ཚོགས་པདྨ་དང་ཉི་མ་ལ་མཾ་ཡིག་དམར་པོའི་ས་བོན་ཡོངས་སུ་གྱུར་བ་ལས། ཨོ་ཌི་ཡཱ་ནའི་འོད་ཟེར་ཅན་སྐུ་མདོག་དམར་མོ་ཞལ་དྲུག་པ། ཕྱག་བཅུ་གཉིས་པ། ཞལ་སོ་
[171a.4]སོ་ལ་སྤྱན་གསུམ་གསུམ་པ་དམར་པོ་དང་། ནག་པོ་དང་། དཀར་པོ་དང་། ལྗང་གུ་དང་། སེར་པོ་རྣམས་གཡས་སྐོར་གྱིས་ཞལ་ལྔའོ། །སྟེང་དུ་ཕག་པའི་ཞལ་ནག་པོའོ། །གཡས་ཀྱི་ཕྱག་དྲུག་རྣམས་ན་རིམ་པ་བཞིན་དུ་རལ་གྲི་དང་། འཁོར་ལོ་དང་། གཏུན་ཤིང་དང་། མདའ་དང་། དགྲ་སྟ་དང་། རྡོ་རྗེ་
[171a.5]རྩེ་གཅིག་པ་རྣམས་སོ། །ཕྱག་གཡོན་པ་རྣམས་ན་སྡིགས་མཛུབ་དང་བཅས་པའི་ཞགས་པ་དང་། ཁ་ཊྭཱཾ་ག་དང་ཐོད་པ་དང་། མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་། རྩེ་གསུམ་རྣམས་སོ། །མཆོད་རྟེན་གྱི་ནང་ན་གནས་པ། ཀླུའི་དབང་པོ་བརྒྱད་ཀྱིས་སྐུ་ལ་བརྒྱན་པ། དབུ་སྐྲ་
[171a.6]ཁམ་པ་གྱེན་དུ་བརྫེས་ཤིང་ཞལ་མཆེ་བ་གཙིགས་པ། མགོ་བོ་སྐམ་པོ་བརྒྱད་ཀྱིས་དབུ་བརྒྱན་པ། མགོ་བོ་རློན་པའི་ཕྲེང་བ་ཕྲག་པ་ལ་འཕྱང་བ་རིན་པོ་ཆེ་སྣ་ཚོགས་པས་སྤྲས་པའི་ཤིང་རྟའི་འོག་ཏུ་སྣ་ཚོགས་པའི་ཕག་བདུན་གྱི་ཤིང་རྟ་ལ་བཞུགས་པའོ། །ཕྱི་རོལ་དུ་དུར་ཁྲོད་བརྒྱད་ཀྱིས་ཡོངས་སུ་
[171a.7]བསྐོར་བ། ཤིང་རྟའི་དབུས་སུ་རྡོ་རྗེ་སྐྱིལ་ཀྲུང་གིས་བཞུགས་པ། རྡོ་རྗེ་དང་། ཁབ་དང་། མྱ་ངན་མེད་པའི་ཤིང་དང་། སྡིགས་མཛུབ་མཛད་པ། འོད་ཟེར་ཅན་སྐུ་མདོག་དམར་མོ་ཤ་འགག་སེར་པོ་ཅན། རིན་པོ་ཆེ་སྣ་ཚོགས་པའི་རྒྱན་གྱིས་བརྒྱན་པ། སྟག་གི་པགས་པའི་ན་བཟའ་ཅན། དེ་བཞིན་གཤེགས་པ་
[171b]
[171b.1]ལྔའི་འོད་ཟེར་དམར་པོ་འཕྲོ་བ་བསྒོམ་པར་བྱའོ། །དེའི་ཐུགས་ཀར་ཉི་མ་ལ་མཾ་ཡིག་གི་ས་བོན་ལས་རྣམ་པར་བྱུང་བའི་འོད་ཟེར་བརྒྱ་ཡིས་སངས་རྒྱས་དང་བྱང་ཆུབ་སེམས་དཔའ་རྣམས་ཡང་དག་པར་གདན་དྲངས་ཏེ་དབང་བསྐུར་བ་བླང་བ་ནས་རྣམ་པར་སྣང་མཛད་ཀྱིས་དབུ་བརྒྱན་པའི་བདག་ཉིད་རྣམ་པར་
[171b.2]བསམ་པར་བྱའོ། །དེ་ནས་རང་གི་ས་བོན་ལས་རབ་ཏུ་བསྒྲུབས་པའི་ཇི་ལྟར་རྙེད་པའི་དམ་ཚིག་གི་རྫས་དང་བསྙེན་པ་སྔོན་དུ་འགྲོ་བའི་སྔགས་པས་དེའི་ས་བོན་ལས་རྣམ་པར་བྱུང་ནས་ཡི་གེ་རྣམས་ཕྲེང་སྐུད་ཀྱི་རྣམ་པས་སྙིང་ག་ནས་འཐོན་ཏེ་ལྟེ་བ། ལྟེ་བ་ནས་སླར་ཡང་སྙིང་ག་ལ་སོགས་པར་འཁོར་
[171b.3]ལོ་འཁོར་བ་ལྟར་སྦྱོར་བས་སྔགས་བཟླས་པར་བྱའོ། །ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། བཟླས་པ་བྱས་ནས་ཕྱིས་ཀྱི་དུས་སུ་ཏིང་ངེ་འཛིན་ལ་ཉེ་བར་བསྡུས་ལ་དེ་ཉིད་ཀྱི་རྣལ་འབྱོར་གྱིས་ཇི་ལྟར་བདེ་བར་གནས་པར་བྱའོ། །སྐུ་མདོག་དམར་མོ་ཕྱག་བཅུ་གཉིས་པ་ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་
[171b.4]ཐབས་རྫོགས་སོ།། །།སློབ་དཔོན་ལྷན་ཅིག་སྐྱེས་པའི་རོལ་པས་མཛད་དོ།། {T3530}༄༅༅། །རྒྱ་གར་སྐད་དུ། སྭཱ་དྷཱིཥྛཱ་ན་ཀྲ་མ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རང་བྱིན་གྱིས་བརླབ་པའི་རིམ་པའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོར་རེ་ཞིག་རང་གི་སྙིང་གར་
[171b.5]ཉི་མའི་གདན་ལ་ཧཱུཾ་ཡིག་གི་འོད་ཟེར་གྱིས་བཅོམ་ལྡན་འདས་མ་གདན་དྲངས་ཏེ། དཔག་ཏུ་མེད་པའི་མཆོད་པ་རྣམས་ཀྱིས་ཡང་དག་པར་མཆོད་ནས་སྡིག་པ་བཤགས་པ་ལ་སོགས་པ་བྱས་ཏེ། སྟོང་པ་ཉིད་བསྒོམས་པའི་རྗེས་ལ་སྣ་ཚོགས་རྡོ་རྗེའི་རྣམ་པ་སེམས་ཀྱིས་བསམས་ཏེ། དེ་ཡོངས་སུ་
[171b.6]གྱུར་པ་ལས་རྡོ་རྗེའི་ས་གཞི་དང་རྡོ་རྗེའི་ར་བ་ལ་སོགས་པ་བསམས་ལ། དེའི་དབུས་སུ་དཔལ་ཨོ་ཌི་ཡཱ་ནའི་གནས་གྲུ་གསུམ་དམར་པོ་དེའི་དབུས་སུ་ཉི་མ་ལ་གནས་པའི་རྡོ་རྗེ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ་རྣམ་པར་གནས་པ། དེ་ཡོངས་སུ་གྱུར་པ་ལས་བྱང་ཆུབ་སེམས་ཀྱི་གཟུགས་བསྐལ་པ་ཆེན་པོའི་མེ་ལྟ་བུ་
[171b.7]མེ་སྟག་གྱེན་དུ་འབར་བ་ཟིལ་གྱིས་མི་ནོན་པའི་གད་རྒྱངས་ཅན། ཞབས་གཡོན་བརྐྱང་གིས་བདུད་བཞི་ཟིལ་གྱིས་ཡང་དག་པར་མནན་པ། ཕྱག་བཅུ་གཉིས་པ། ཞལ་དྲུག་པ། སྤྱན་གསུམ་པ། སྐུ་མདོག་དམར་མོའོ། །གཡས་ཀྱི་ཕྱག་དྲུག་རྣམས་སུ་རལ་གྲི་དང་། སྣ་ཚོགས་རྡོ་རྗེ་དང་། རྡོ་རྗེ་རྩེ་གཅིག་དང་།
[172a]
[172a.1]དགྲ་སྟ་དང་། མདའ་དང་། གཏུན་ཤིང་རྣམས་བསྣམས་པའོ། །ཕྱག་གཡོན་པ་རྣམས་སུ་སྡིགས་མཛུབ་དང་བཅས་པའི་ཁབ་དང་། རྩེ་གསུམ་དང་། མྱ་ངན་མེད་པའི་ཡལ་ག་དང་། གཞུ་དང་། ཞགས་པ་དང་། ཚངས་པའི་མགོ་བོ་རྣམས་བསྣམས་པའོ། །མི་མགོའི་ཕྲེང་བ་འཕྱང་བས་ཡན་ལག་
[172a.2]དང་ཉིང་ལག་ཐམས་ཅད་བརྒྱན་པ། སྟག་གི་པགས་པའི་སྟོད་གཡོགས་ཅན། རྩ་བའི་ཞལ་དམར་པོ། དཀར་པོ་དང་། ནག་པོ་ནི་གཡོན་པའི་ཞལ་གཉིས་སོ། །སེར་པོ་དང་། ནག་པོ་ནི་གཡས་པའི་ཞལ་གཉིས་སོ། །སྟེང་དུ་ནི་ཕག་ཞལ་ནག་པོའོ། །ལྗགས་འདྲིལ་ཞིང་སྐྲ་ཁམ་པ་གྱེན་དུ་འབར་བ། རྣམ་
[172a.3]པར་སྣང་མཛད་ཀྱིས་དབུ་བརྒྱན་པ། ལག་འགྲོ་དང་རུས་པའི་རྒྱན་གྱིས་བརྒྱན་པ། རང་གི་འོད་ཟེར་གྱིས་བདུད་ཐམས་ཅད་རྣམ་པར་འཇོམས་པ། ཕྱོགས་བཅུར་གནས་པའི་མཁའ་འགྲོ་མ་དང་། འབྱུང་པོ་དང་། རོ་ལངས་དང་། ཕཻཾ་ཀཱ་ར་དང་། ཧ་ཧ་ཞེས་འཇིགས་པའི་སྒྲ་སྒྲོགས་པས་ཡོངས་སུ་བསྐོར་བའི་དུར་
[172a.4]ཁྲོད་བརྒྱད་ཀྱིས་བརྒྱན་པ། དཔལ་ལྡན་ཨོ་ཌི་ཡཱ་ནའི་འོད་ཟེར་ཅན་གྱི་བདག་ཉིད་དུ་སྐད་ཅིག་གིས་བསྐྱེད་ལ་མགོ་བོ་དང་། མགྲིན་པ་དང་། སྙིང་ག་རྣམས་སུ། ཨོཾ་ཨཱཿཧཱུཾ་ངོ་། །ཡན་ལག་ཐམས་ཅད་ལ་ཕཊ་ཀྱི་ཡི་གེ་བསམ་པར་བྱའོ། །དེ་ནས་ལྟེ་བའི་སྟེང་དུ་སྣ་ཚོགས་ཆུ་སྐྱེས་ལ་ཟླ་བ་དང་ཉི་མ་ཡང་དག་པར་སྦྱོར་
[172a.5]བའི་དབུས་སུ་ཧཱུཾ་ཡིག་ལས་པདྨའི་རྩ་བའི་རང་བཞིན་སྣ་ཚོགས་ཀྱི་ཡི་གེ་བསམ་པར་བྱའོ། །ཨོཾ་བཛྲ་སཏྭེ་ཤྭ་རི་སརྦ་དུཥྚཱན་ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྙིང་པོའི་སྔགས་སོ། །ཨོཾ་ཨཱཿཧཱུཾ་བསྒོམ་པའི་སྔགས་སོ། །ཨོཾ་བཛྲ་བེེ་ཏཱ་ལཱི་ཧཱུཾ་ཕཊ་བཟླས་པའི་སྔགས་སོ། །ཨོཾ་མཱ་རཱི་ཙྱཻ་ཨོཾ་
[172a.6]མཱཾ་ཧཱུཾ་ཧཱུཾ་ཕཊ་ཕཊ་གཉིས་པའི་བཟླས་པའི་སྔགས་སོ། །དེའི་རྗེས་སུ་ཐུན་མཚམས་བཞིར་གཏོར་མའི་སྔགས་ནི་ཨོཾ་ཨཱ་རལླི་ཧོ་ཛཿཧཱུཾ་བཾ་ཧོཿཨོཾ་བཛྲ་ཌཱ་ཀཱི་ནཱི་ས་མ་ཡ་སྟྭཾ་དྲྀ་ཤྱ་ཧོཿཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པི་ཤཱ་ཙ་ཨུནྨ་ད་ཨ་པསྨཱ་རོ་ཌཱ་ཀི་ནྱཱ་ད་ཡ་ཨི་དཾ་བ་ལིཾ་གྲིཧྞ་ཐཱ་པི་པ་ཐཱ་མཱ་ཏི་ཀྲ་མ་ཐཱ་མ་ཧཱ་སུ་ཁ་བི་བྲྀདྡྷ་ཡེ་མ་མ་ས་ཧཱ་
[172a.7]ཡི་ཀ་བྷ་བ་ཐ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཟས་ལ་སོགས་པ་ལ་ཡང་ཧྲཱིཿཡིག་གམ་ཧཱུཾ་ཡིག་ལ་སོགས་པས་ཡང་དག་པར་སྦྱངས་ལ་སྤྱད་པར་བྱའོ། །སྐུ་མདོག་དམར་མོ་ཕྱག་བཅུ་གཉིས་པའི་ཨོ་ཌི་ཡཱ་ནའི་རང་བྱིན་གྱིས་བརླབ་པའི་རིམ་པའི་འོད་ཟེར་ཅན་གྱི་སྒྲུབ་ཐབས་རྫོགས་སོ།། །།
[172b]
[172b.1]{T3531}༄༅༅། །རྒྱ་གར་སྐད་དུ། ཨ་ཤྭ་ཀཱ་ཀནྟ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །རང་གི་སྙིང་གར་སྣ་ཚོགས་པདྨ་ལ་ཟླ་བའི་སྟེང་དུ་མཾ་ཡིག་སེར་པོ་རྣམ་པར་བཀོད་ལ། དེ་བཞིན་དུ་ཐམས་
[172b.2]ཅད་སོ་སོར་སྣང་བ་ཙམ་གྱི་བདག་ཉིད་དུ་བརྟགས་ནས་ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡོ྅ཧཾ་ཞེས་བརྗོད་པར་བྱའོ། །དེ་ནས་དེའི་མཾ་ཡིག་ཡོངས་སུ་གྱུར་པ་ལས་མྱ་ངན་མེད་པའི་ཤིང་སླར་ཡང་མཾ་ཡིག་དེ་ཡོངས་སུ་གྱུར་པ་ལས་བཅོམ་ལྡན་འདས་མ་སྐུ་མདོག་སེར་མོ་ཞལ་གཅིག་པ་ཕྱག་
[172b.3]གཉིས་པ། དབུའི་ཆ་ལ་རྣམ་པར་སྣང་མཛད་ཀྱིས་ཉེ་བར་མཛེས་པ། རིན་པོ་ཆེའི་ཅོད་པན་ཅན། འགྱིང་བག་དང་བཅས་པ། གསེར་གྱི་མདོག་ལྟ་བུ། ཕག་གི་སྟེང་ན་སྣ་ཚོགས་པདྨ་དང་ཟླ་བ་ལ་རོལ་པའི་སྟབས་ཀྱིས་བཞུགས་པ། ལང་ཚོ་གཞོན་པ། མཐོ་ཞིང་སྟེང་དུ་གནས་པ། ཕྱག་གཡོན་པས་མྱ་
[172b.4]ངན་མེད་པའི་ཤིང་གི་ཡལ་ག་བསྣམས་པ། གཡས་པས་མཆོག་སྦྱིན་པ། སྐུ་ལ་དོ་ཤལ་ལ་སོགས་པས་རྣམ་པར་བརྒྱན་པ། ན་བཟའ་དཀར་པོ་མནབས་པ། རང་གི་སྙིང་གར་མཾ་ཡིག་ལས་དཔག་ཏུ་མེད་པའི་ཕག་གི་རྣམ་པ་འོད་ཟེར་འཕྲོ་བས་གདུག་པ་ཅན་རྣམས་འདུལ་བར་བསམ་པར་བྱའོ། །ཨོཾ་མཱ་རཱི་
[172b.5]ཙྱཻ་མཱཾ་སྭཱ་ཧཱ། དེ་ནས་ཇི་ལྟ་བ་བཞིན་དུ་གཤེགས་ནས་ཅི་བདེར་གནས་པར་བྱའོ། །ཡུལ་གཞན་དུ་འཇུག་པར་འདོད་ན་སྔགས་འདིས་བདག་ཉིད་ཀྱི་སྟོད་གཡོགས་ཀྱི་སྣ་བཟུང་ནས་ལན་བདུན་ཡོངས་སུ་བཟླས་ཏེ་ལྷན་ཅིག་ཏུ་གོས་ཀྱི་མཐའ་བཟུང་ནས་ཇི་ལྟ་བ་བཞིན་དུ་མདུད་པ་བྱས་ཏེ་འགྲོ་བར་བྱའོ། །
[172b.6]ཆོམ་པོ་ལ་སོགས་པའི་འཇིགས་པ་ལས་མ་གྲོལ་གྱི་བར་དུའོ། །མངོན་པར་འདོད་པའི་ཡུལ་ཐོབ་ནས་མདུད་པ་དགྲོལ་བར་བྱའོ་ཞེས་པ་ནི་མན་ངག་གོ། །ཇི་ལྟ་བ་བཞིན་དུ་མདུད་པ་བྱས་ཏེ་ཞེས་པ་ནི་ལན་བདུན་མངོན་པར་བསྔགས་ནས་དེ་ལ་སྟོད་གཡོགས་ཀྱི་སྣ་ནས་བཟུང་ནས་ཕྱོགས་བཅུར་རྣམ་
[172b.7]པར་བལྟས་ཏེ་གདུག་པ་ཅན་རྣམས་ཀྱི་མིག་བཅིང་བར་བྱའོ་ཞེས་བསམས་ཏེ། དབུགས་གཅིག་ལ་གཏམ་གྱིས་བར་མ་ཆོད་པར་བཟླས་པར་བྱས་ཏེ་ལམ་བཅིང་བར་བྱའོ་ཞེས་སོ། །མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས་རྫོགས་སོ།། །།
[173a]
[173a.1]{T3532}༄༅༅། །རྒྱ་གར་སྐད་དུ། ཀལྤོཀྟ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྟོག་པ་ལས་གསུངས་པའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །རྣམ་པར་སྣང་མཛད་རིགས་བྱུང་བའི། །འོད་ཟེར་ཅན་ལ་ཡང་དག་འདུད། །རྟོག་པ་ལས་གསུངས་ཆོ་ག་ཡིས། །
[173a.2]དེ་ཡི་སྒྲུབ་ཐབས་རིམ་པ་བཤད། །དེ་ལ་རེ་ཞིག་དཔལ་འོད་ཟེར་ཅན་གྱི་དཀྱིལ་འཁོར་དུ་དབང་བསྐུར་བའི་སྔགས་པས་རང་གི་དམ་ཚིག་དང་སྡོམ་པ་ཡོངས་སུ་བསྐྱང་ཞིང་དག་པའི་སེམས་ཀྱིས་སེམས་ཅན་ཐམས་ཅད་གདོན་པའི་བསམ་པས། ཨོཾ་ཕཊ་ཅེས་བརྗོད་པས་ཁྲོ་བོའི་ཁུ་ཚུར་གྱིས་སྙིང་ག་དང་།
[173a.3]མཛོད་སྤུ་དང་། མགོ་བོ་རྣམས་སུ་བཀོད་ནས་ཞལ་བསང་བ་ལ་སོགས་པ་བྱས་ནས། ལྷའི་ཁང་པར་རབ་ཏུ་ཞུགས་ཏེ། བྲིས་སྐུ་ལ་སོགས་པའི་བཅོམ་ལྡན་འདས་མའི་སྐུ་བཀྲམ་ནས་འོད་ཟེར་ཅན་གྱི་སྔགས་ཡོངས་སུ་བཟླས་པའི་དྲིའི་ཆུས་བགེགས་བསྐྲད་ནས་དེ་བཞིན་དུ་ཉེར་སྤྱོད་ལྔ་ལ་
[173a.4]སོགས་པ་རབ་ཏུ་སྦྱར་ཏེ། དེ་ལ་བགེགས་སྐྲོད་པའི་སྔགས་ནི་འདིའོ། །ཨོཾ་མཱ་རཱི་ཙྱཻ་ཧཱུཾ་སརྦ་བིགྷྣ་ནུད་སཱ་རཱ་ཡ་ཧཱུཾ་ཕཊ། དེ་ནས་རང་གི་སྙིང་གའི་དང་པོའི་ཡི་གེས་མཚན་པའི་ཟླ་བའི་དཀྱིལ་འཁོར་དང་ཉི་མའི་དཀྱིལ་འཁོར་ལ་ཨཾ་བསམས་ནས། དེའི་སྟེང་དུ་དང་པོའི་བཅུ་གསུམ་པའི་ས་བོན་ལ་ཟླ་ཕྱེད་
[173a.5]དང་ཐིག་ལེས་བརྒྱན་པ་ལ་ཚ་ཞིང་འོད་ཟེར་ཅན་གྱི་འོད་དང་ལྡན་པ། དེ་ལས་འོད་ཟེར་སྣ་ཚོགས་འཕྲོས་ཏེ་འོད་ཟེར་རྣམས་རྫོགས་པ་ལས་བཅོམ་ལྡན་འདས་མའི་སྐུ་དང་བླ་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་དམིགས་ནས་མཆོད་ཅིང་ཕྱག་བཙལ་ནས་སྔགས་འདིའོ། །
[173a.6]ཨོཾ་མཱ་རཱི་ཙྱཻ་པྲ་ཏཱིཙྪ་སྭཱ་ཧཱ། ཨོཾ་མཱ་རཱི་ཙྱཻ་དྷཱུ་པཾ་པྲ་ཏཱིཙྪ་སྭཱ་ཧཱ། ཨོཾ་མཱ་རཱི་ཙྱཻ་སྭཱ་ཧེ་ཏྱར་གྷཾ་པ་རི་ཛ་སྱ། ཨོཾ་མཱ་རཱི་ཙྱཻ་ཨརྒྷཾ་པྲ་ཏཱིཙྪ་སྭཱ་ཧཱ། དངོས་པོ་མེད་ན་བསམ་གཏན་གྱིས་ཀྱང་ངོ་། །དེ་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་
[173a.7]ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བདག་གིས་བསྐྱེད། །བྱང་ཆུབ་མཆོག་ཏུ་སེམས་བསྐྱེད་ནས། །སེམས་ཅན་ཐམས་
[173b]
[173b.1]ཅད་མགྲོན་དུ་གཉེར། །བྱང་ཆུབ་སྤྱོད་མཆོག་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་ཤོག །ཅེས་པ་ལན་གསུམ་བརྗོད་ནས་སྨོན་ལམ་སྔོན་དུ་འགྲོ་བས་བདག་མེད་པ་བསྒོམ་པར་བྱ་སྟེ། སྔགས་འདིས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་ནས་ས་བོན་སྒྱུ་མའི་དཔེ་རྣམས་
[173b.2]བསམས་ཏེ། ཁམས་གསུམ་མ་ལུས་པ་ཡང་བལྟས་པ་དང་། རེག་པ་ཐམས་ཅད་དཔེར་ན་སྒྱུ་མ་ལྟ་བུའོ། །དམིགས་པ་མེད་པས་དེ་བཞིན་དུ་འགྲོ་བ་གནས་པ་ཐམས་ཅད་ཀྱང་སོ་སོར་སྣང་བ་ཙམ་དུ་རྟོགས་པས། དེ་ནས་ཐོག་མ་མེད་པའི་དུས་ཀྱི་རྣམ་པ་མ་ཡིན་པའི་རྣམ་པར་རྟོག་པའི་ས་
[173b.3]བོན་སྤངས་ནས་རང་བཞིན་དག་པ་ཞེས་ལྷག་པར་གྲོལ་བར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་ལན་གསུམ་བརྗོད་པར་བྱའོ། །དེ་ནས་སྔོན་དུ་གསུངས་པའི་ས་བོན་རྫོགས་པ་ལས་ཟླ་བའི་སྟེང་དུ་ཨོཾ་ཡིག་དེ་ཐམས་ཅད་ཡོངས་སུ་གྱུར་པ་ལས་དཔལ་ལྡན་མགོན་པོ་རྣམ་པར་
[173b.4]སྣང་མཛད་པདྨའི་སྙིང་པོ་དང་སེང་གེའི་གདན་གྱི་སྟེང་ན་རྡོ་རྗེ་སྐྱིལ་ཀྲུང་གིས་བཞུགས་པ་གསེར་གྱི་མདོག་ལྟ་བུ་བྱང་ཆུབ་མཆོག་གི་ཕྱག་རྒྱ་ཅན་ཏིང་ངེ་འཛིན་ལ་སྙོམས་པར་ཞུགས་པ་རལ་པའི་ཅོད་པན་ཅན་ཞི་ཞིང་རྒྱན་ཐམས་ཅད་ཀྱིས་བརྒྱན་པ་བསམ་པར་བྱའོ། །དེ་ནས་རང་གི་སྙིང་གར་ཟླ་བའི་
[173b.5]དཀྱིལ་འཁོར་གྱི་སྟེང་དུ་ཡི་གེ་ཉི་ཤུ་རྩ་ལྔ་མཆོག་གི་སྙིང་པོ་དང་པོའི་གཉིས་པ་དང་ཡང་དག་པར་ལྡན་པ་ཟླ་བ་ཕྱེད་པ་དང་ཐིག་ལེས་བརྒྱན་པ་བསྒོམ་པར་བྱའོ། །དེ་ལས་སྐྱེས་པའི་མྱ་ངན་མེད་པའི་ཤིང་། དེའི་སྟེང་དུ་ཟླ་བ་ལ་གནས་པའི་མཾ་ཡིག་བསམས་ནས། དེ་ཐམས་ཅད་ཡོངས་སུ་གྱུར་པ་
[173b.6]ལས་བདག་ཉིད་འོད་ཟེར་ཅན་གྱི་སྐུར་བསྒོམ་པར་བྱའོ། །བདག་ཉིད་བཅོམ་ལྡན་འདས་མ་འོད་ཟེར་ཅན་ཞེས་པ་སྐུ་མདོག་ཤིན་ཏུ་སེར་བ་འཛམ་བུ་ནཱ་དའི་འོད་ལྟ་བུ་འབར་བ་མཆོད་རྟེན་གྱི་ནང་ན་གནས་པ། ན་བཟའ་དམར་པོ་མནབས་པ། ཕུ་དུང་དམར་པོའི་སྟོད་གཡོགས་ཅན། ཕྲེང་བ་
[173b.7]སྣ་ཚོགས་པ་དང་རྒྱན་ཐམས་ཅད་ཀྱིས་བརྒྱན་པ། རྣ་རྒྱན་གྱི་ཚོགས་དང་། རྐེད་པ་ལ་དྲིལ་བུ་གཡེར་ཀའི་དྲ་བ་དང་། རྐང་གདུབ་དང་ལྡན་པ། ཕྱག་བརྒྱད་པ། ཞལ་གསུམ་པ་སྤྱན་གསུམ་པ་འབར་ཞིང་འོད་ཟེར་གྱི་ཕྲེང་བ་འཕྲོ་བ། བནྡུ་ཛ་བའི་མེ་ཏོག་དང་མཚུངས་པ། རྣམ་པར་
[174a]
[174a.1]སྣང་མཛད་ཀྱིས་དབུ་བརྒྱན་པ། མྱ་ངན་མེད་པའི་ཕྲེང་བས་བརྒྱན་པ། ཕྱག་གཡོན་པ་རྣམས་ཀྱིས་ཞགས་པ་དང་། སྐུད་པ་དང་། མྱ་ངན་མེད་པའི་ཤིང་དང་། གཞུ་བསྣམས་པ། གཡས་པ་རྣམས་ཀྱིས་རྡོ་རྗེ་རྒྱས་པ་དང་། ཁབ་དང་། ལྕགས་ཀྱུ་དང་། མདའ་
[174a.2]བསྣམས་པ། ཞལ་དང་པོ་ཞི་ཞིང་འཛུམ་པའི་ཞལ་ཤིན་ཏུ་སེར་བ་གསེར་གྱི་མདོག་ལྟ་བུ། སྤྱན་རྒྱས་པ་སིནྡུ་རས་བརྒྱན་པ། སྒེག་པའི་ཉམས་ཀྱིས་འགྱིང་བའོ། །ཞལ་གཡོན་པ་ནི་ཕག་ཞལ་ཁྲོ་བ་དང་བཅས་ཤིང་མི་སྡུག་པ་གཙིགས་ཤིང་འཇིགས་པ་ཨིནྡྲ་ནཱི་ལའི་འོད་ལྟ་བུ་ཉི་མ་
[174a.3]བཅུ་གཉིས་ཀྱི་འོད་དང་མཚུངས་པ། ཤིན་ཏུ་ཁྲོ་གཉེར་གཙིགས་ཤིང་ལྗགས་འདྲིལ་བ་འཇིགས་ཤིང་འཇིགས་པར་བྱེད་པ། ཞལ་གཉིས་པ་ཤིན་དུ་དམར་བ་མཛེས་ཤིང་འོད་ཟེར་འབར་བ། མྱ་ངན་མེད་པའི་ཤིང་གི་འོག་ན་གནས་པ། མེ་ཏོག་གི་ཕྲེང་བ་གཅལ་དུ་བཀྲམ་པ་དེའི་སྤྱི་བོར་རྣམ་པར་
[174a.4]སྣང་མཛད་ཀྱིས་མགོན་དུ་གྱུར་པ་སྔོན་དུ་གསུངས་པའི་སྐུ་མདོག་དང་ཕྱག་རྒྱ་དང་ལྡན་པ། འོག་ཏུ་ཕག་བདུན་གྱི་ཤིང་རྟའི་སྟེང་དུ་གཡོན་བརྐྱང་གིས་བཞུགས་པ། ལང་ཚོ་གཞོན་ནུར་གནས་པ་ཤིང་རྟ་འདྲེན་པའི་ཕག་གི་འོག་ཏུ་ཡཾ་ལས་བྱུང་བའི་རླུང་གི་དཀྱིལ་འཁོར་ལ་ཧཾ་ཡིག་ཡོངས་སུ་
[174a.5]གྱུར་པ་ལས་སྒྲ་གཅན་ལག་པ་དག་གིས་ཟླ་བ་དང་ཉི་མ་དག་འཛིན་པ། ཉིན་མོ་སྣང་བར་བྱེད་ཅིང་མཚན་མོ་ཟླ་བ་དང་མཚུངས་པ་ལྷ་མོ་བཞིས་ཡོངས་སུ་བསྐོར་བར་བསམ་པར་བྱའོ། །དེ་ལ་ཤར་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བཱ་ར་ལི་བཱ་རཱ་ཧཱ་མུ་ཁི་སིདྡྷི་མཱ་ཀཪྵ་ཡ་ཛཿསྭཱ་ཧཱ་ཞེས་སོ། །དེ་ལྟར་ལྷ་
[174a.6]མོ་སྐུ་མདོག་དམར་མོ་ཕག་ཞལ་གཅིག་པ། ཕྱག་བཞི་པ་ཕུ་དུང་དམར་པོའི་སྟོད་གཡོགས་ཅན། ཕྱག་གཡོན་པ་ཞགས་པ་དང་། མྱ་ངན་མེད་པའི་ཤིང་བསྣམས་པ། གཡས་པ་རྡོ་རྗེའི་ལྕགས་ཀྱུ་དང་། ཁབ་བསྣམས་པ། རྒྱན་ཐམས་ཅད་ཀྱིས་བརྒྱན་པའོ། །རྟོག་པ་ལས་གསུངས་པའི་ཆོ་
[174a.7]གས་མངོན་པར་འདོད་པའི་དངོས་གྲུབ་འགུགས་པར་བྱེད་པར་བསམ་པར་བྱའོ། །ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་པྲ་དུཥྚཱ་ནཾ་མུ་ཁཾ་བནྡྷ་བནྡྷ་ཧཱུཾ་སྭཱ་ཧཱ། ལྷ་མོ་བ་དཱ་ལི་སྔོན་དུ་གསུངས་པའི་གོས་དང་། རྒྱན་དང་སྐུ་མདོག་ལྟ་བུ་ཕྱག་གཡོན་པ་ཞགས་པ་དང་། རྡོ་རྗེ་བསྣམས་
[174b]
[174b.1]པ། གཡས་ན་ཡལ་ག་དང་ཁབ་བསྣམས་པས་གདུག་པ་ཅན་རྣམས་ཀྱི་ཁ་མིག་འཚེམ་པར་བྱེད་པ་ལྷོ་རུ་བསམ་པར་བྱའོ། །ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་ནཾ་སྟཾ་བྷ་ཡ་བཾ་སྭཱ་ཧཱ། ཞེས་པས་ལྷ་མོ་བ་རཱ་ལི་དེ་བཞིན་དུ་གོས་དང་རྒྱན་དང་ཁ་དོག་ལ། འོན་ཀྱང་ཕྱག་གཡས་ན་
[174b.2]རྡོ་རྗེ་དང་ཁབ་བསྣམས་པ། གཡོན་ན་ཞགས་པ་དང་། མྱ་ངན་མེད་པའི་ཤིང་བསྣམས་པ། གདུག་པ་ཅན་རྣམས་རེངས་པར་བྱེད་པ་ནུབ་ཏུ་དགོད་པར་བྱའོ། །ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་སཏྭཱ་ན་མེ་བ་ཤ་མ་ནཱ་ཡ་ཧོཿསྭཱ་ཧཱ། ཞེས་པའི་སྔགས་ཀྱིས་ལྷ་མོ་ཕག་ཞལ་
[174b.3]མ་སྐུ་མདོག་དམར་མོ་དེ་བཞིན་དུ་གོས་དང་རྒྱན་དང་། ཡང་ཕྱག་གཡས་ན་རྡོ་རྗེ་དང་། མདའ་བསྣམས་པ། གཡོན་ན་མྱ་ངན་མེད་པའི་ཤིང་དང་གཞུ་བསྣམས་པ་སེམས་ཅན་ཐམས་ཅད་རྗེས་སུ་ཆགས་པར་བྱེད་པ་ཅན་བྱང་ཕྱོགས་སུ་བལྟ་བར་བྱའོ། །དེ་ནས་ལྕགས་ཀྱུ་ལ་སོགས་པའི་
[174b.4]ཕྱག་རྒྱ་རྣམས་དང་། དེའི་སྔགས་ཀྱིས་ཀྱང་དགུག་པ་ལ་སོགས་པ་བྱའོ། །ཡེ་ཤེས་སེམས་དཔའ་དགུག་པ་དང་། རབ་ཏུ་གཞུག་པ་དང་། བཅིང་བ་དང་། དབང་དུ་བྱ་བས་བསྒྲུབ་པར་བྱའོ། །མཛུབ་མོ་ལྕགས་ཀྱུ་བཅིངས་ལ། མཐེའུ་ཆུང་ལྕགས་ཀྱུ་ཆེན་པོ་སྟེ། ཚིགས་མང་པོའི་
[174b.5]རྩེ་མོ་དག་ལྕགས་སྒྲོག་རྒྱབ་ཏུ་བཙིར་བ་ལ་སོགས་པས། ཨོཾ་བཛྲ་ཨཾ་ཀུ་ཤ་ཛཿཞེས་པ་འདིས་ཡེ་ཤེས་སེམས་དཔའ་མདུན་དུ་གདན་དྲངས་ནས་མཆོད་པ་ལ་སོགས་པ་དབུལ་བར་བྱའོ། །འོད་ཟེར་ཅན་གྱི་ཕྱག་རྒྱས་དེ་ནས་ཨོཾ་བཛྲ་པཱ་ཤ་ཧཱུཾ་འདིས་གཞུག་པར་བྱའོ། །ཨོཾ་བཛྲ་སྥོ་ཊ་
[174b.6]བཾ་འདིས་བཅིང་བར་བྱའོ། །ཨོཾ་བཛྲ་ཨཱ་བེ་ཤ་ཧོཿའདིས་མཉེས་པར་བྱའོ། །དེ་ནས་དམ་ཚིག་གི་ལྷ་རྣམས་ཀྱིས་ལྷན་ཅིག་ཏུ་གཉིས་སུ་མེད་པར་བྱའོ། །དེ་ལ་འདིའི་ཕྱག་རྒྱ་ནི། ལག་པ་གཉིས་པོ་མཉམ་བྱས་ནས། །ཐལ་མོའི་རྣམ་པར་བསྲེས་བྱ་སྟེ། །མཐེབ་ཆེན་དང་ནི་
[174b.7]མིང་མེད་ཀྱི། །རྩེ་མོ་གཉིས་པོ་བྱེ་བ་ཡིས། །གུང་མོའི་སོར་མོ་ཡང་དག་འཁྱུད། །འཁྱིལ་པའི་རྣམ་པར་བཅིངས་པ་དག །སྐྱིལ་ཀྲུང་སྟེང་དུ་ཉེར་བཞག་ནས། །ལྟེ་བའི་ཕྱོགས་སུ་དགོད་པར་བྱ། །རབ་མཆོག་ཕྱག་རྒྱ་འདི་ཡིས་ནི། །ལས་རྣམས་ཀུན་ལ་ལེགས་པར་སྦྱོར། །
[175a]
[175a.1]དེ་ནས་དབང་བསྐུར་བ་བླང་བར་བྱ་སྟེ། ཕྱག་རྒྱ་ཆེན་པོ་ནི་མཐེབ་ཆེན་སེམས་དཔའི་སྐྱིལ་ཀྲུང་བཀུག་ནས་མཛུབ་མོའི་རྩེ་མོ་བཟུང་སྟེ། འདིའི་གུང་མོ་ཨོཾ་ཡིག་ལྷག་མ་རྡོ་རྗེ་ཐལ་མོ་སྦྱར་བ་སྤྱི་བོར་བཀོད་ནས་ཨོཾ་བྷུཿཁཾ་མཾ་ཞེས་པ་དབང་བསྐུར་བའི་སྔགས་ཀྱིས་རྣམ་པར་སྣང་མཛད་གསེར་
[175a.2]གྱི་མདོག་ལྟ་བུ་བྱང་ཆུབ་མཆོག་གི་ཕྱག་རྒྱས་བཞུགས་པ། སྤྱི་བོར་ཨོཾ་བསམས་ནས་བསྒོམས་པས་ངལ་ན་སྔགས་བཟླས་པར་བྱའོ། །རང་གི་སྙིང་གར་ཟླ་བ་ལ་གནས་པའི་སྔགས་འབར་ཞིང་འབར་བ་དང་ལྡན་པའོ། །ཨོཾ་མཱ་རཱི་ཙྱཻ་མཱཾ་སྭཱ་ཧཱ། ཞེས་བལྟས་ལ་བཟླས་པ་བྱའོ། །ཇི་ལྟར་ནུས་པའི་བསྒོམ་པ་
[175a.3]སྔོན་དུ་འགྲོ་བས་ལྷ་མོ་ཐམས་ཅད་ཡང་དག་པར་རྒྱལ་བར་བལྟ་ཞིང་སྔགས་བཟླས་པར་བྱའོ། །ཕྱི་ནས་ཆད་ལྷག་བསྐང་བའི་ཆོ་ག་ཡི་གེ་བརྒྱ་པས་ཁ་བསྐང་བར་བྱའོ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲོ་ཌྷོ་མེ་བྷ་བ། སུ་ཏོཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་
[175a.4]རཀྟོ་མེ་བྷ་བ། སརྦ་སིདྡྷིཾ་མེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱ་ན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿའདིས་དུས་ཐམས་ཅད་དུ་གཤེགས་སུ་གསོལ་ཞིང་དགེ་བ་ཡོངས་སུ་བསྔོ་ཞིང་མངོན་པར་འདོད་པའི་དངོས་གྲུབ་ཞུས་ཏེ་རང་གི་ཕྱག་རྒྱ་
[175a.5]སྤྱི་བོར་བཀྲོལ་ནས་ཨོཾ་མཱ་རཱི་ཙྱཻ་མུཿཞེས་སོ། །རང་གི་ལྷག་པའི་ལྷའི་རྣལ་འབྱོར་གྱིས་ཟས་དང་ཁྲུས་དང་། ཉལ་བ་ལ་སོགས་པ་ཐམས་ཅད་དུ་རབ་ཏུ་བརྟག་པར་བྱའོ། །དེའི་ཕྱིར་རིམ་པ་འདིས་ལུས་ངག་ཡིད་གསུམ་བསྲུང་བར་བྱས་ནས་ཅི་བདེར་གནས་པར་བྱའོ། །འཕགས་མའི་སྒྲུབ་ཐབས་
[175a.6]བྱས་པ་ཡིས། །དགེ་བ་ཉེར་བསགས་གང་དེ་ཡིས། །ཡེ་ཤེས་དྲི་མེད་འོད་ཟེར་ཅན། །སྐྱེ་བོས་གོ་འཕང་ཐོབ་པར་ཤོག །ཨོཾ་ཁ་ཁ་ཁཱ་ཧི་ཁཱ་ཧི་གྲྀཧྞ་གྲྀཧྞ་ཏུ་སརྦ་བྷཱུ་ཏ་ཀཱི་བ་ལི་མ་མ་ཤཱནྟིཾ་ཀུ་རུ་བནྡྷ་སྭཱ་ཧཱ། ཞེས་པའི་སྔགས་ཀྱིས་གཏོར་མ་འབུལ་ལོ། །རྟོག་པ་ལས་གསུངས་པའི་འོད་ཟེར་ཅན་
[175a.7]གྱི་སྒྲུབ་ཐབས་རྫོགས་སོ།། །།པཎྜི་ཏ་སློབ་དཔོན་སྙིང་པོའི་ཞབས་ཀྱིས་མཛད་པའོ།། {T3533}༄༅༅། །རྒྱ་གར་སྐད་དུ། མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོ་ཉི་མའི་དཀྱིལ་འཁོར་གྱི་སྟེང་
[175b]
[175b.1]དུ་དང་པོའི་བཅུ་གསུམ་པའི་ས་བོན་ཟླ་ཕྱེད་དང་ཐིག་ལེས་ཉེ་བར་བརྒྱན་པ་དེ་ལས་སྐྱེས་པའི་འོད་ཟེར་ཅན་སྐུ་མདོག་དམར་མོ་ཞལ་དྲུག་པ་དང་པོ་དམར་པོ། གཉིས་པ་ནག་པོ། གསུམ་པ་ལྗང་གུ་བཞི་པ་སེར་པོ། ལྔ་པ་དཀར་པོ་དྲུག་པ་ནི་སྟེང་གི་ཕག་ཞལ་ཏེ་ནག་པོའོ། །མྱ་ངན་མེད་པའི་
[175b.2]ཤིང་དང་མཆོད་རྟེན་གྱིས་བརྒྱན་པ། ལྟོ་འཕྱང་བ་ཐོད་པའི་ཕྲེང་བས་མཛེས་ཤིང་དབུ་སྐྲ་བརྫེས་པ་སྦྲུལ་གྱིས་རྣམ་པར་བརྒྱན་པ། སྟག་གི་པགས་པའི་ཤམ་ཐབས་ཅན། བགེགས་འཇོམས་པར་མཛད་པ། ཁ་དོག་སྣ་ཚོགས་པའི་ཕག་གི་ཤིང་རྟ་ལ་བཞུགས་པ། ཕྱག་གཡས་ན་
[175b.3]རལ་གྲི་དང་། རྡོ་རྗེ་དང་། གཏུན་ཤིང་དང་། མདའ་དང་། རྡོ་རྗེ་རྩེ་གཅིག་པ་དང་། དགྲ་སྟ་བསྣམས་པ། གཡོན་པ་སྡིགས་མཛུབ་དང་བཅས་པའི་ཞགས་པ་དང་། ཐོད་པ་དང་། མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་། རྩེ་གསུམ་བསྣམས་པ་སྟེ། འདི་ཕྱག་
[175b.4]བཅུ་གཉིས་པ། སྤྱན་གསུམ་པ། ཁ་དོག་དམར་ཞིང་ཟླུམ་པ། ཞལ་གཙིགས་པའོ། །ཤིང་རྟའི་དབུས་སུ་ཕྱག་གཉིས་པ་སྡིགས་མཛུབ་དང་ཡལ་ག་བསྣམས་པ། མདུན་དུ་གཉིས་པ་བསྒོམ་པར་བྱའོ། །དེ་ནས་བདག་ཉིད་བཅོམ་ལྡན་འདས་མ་འོད་ཟེར་ཅན་གྱི་ཕྱག་རྒྱ་བཅིང་བར་བྱའོ། །
[175b.5]རྡོ་རྗེ་ཐལ་མོ་སྦྱར་ནས་ཏིང་ངེ་འཛིན་གྱིས་གུང་མོ་བརྐྱང་ནས་མཉམ་དུ་མྱུ་གུར་བྱས་ཏེ། མཐེབ་ཆེན་སྐྱིལ་ཀྲུང་བཅིངས་ནས་མཛུབ་མོའི་རྩེ་མོ་རྣམ་པར་གཟུང་བར་བྱའོ། །ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འོད་ཟེར་ཅན་གྱི་སྒྲུབ་ཐབས་རྫོགས་སོ།། {T3534}༄༅༅། །རྒྱ་གར་སྐད་དུ། ཤྲཱི་མཱ་
[175b.6]རཱི་ཙྱཻ་པི་ཙུ་པཱ་སཱ་དྷ་ནཾ། བོད་སྐད་དུ། དཔལ་འོད་ཟེར་ཅན་པི་ཙུ་བའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །རང་གི་རྟོག་ངན་ཆ་ཡིས་བསྐྱེད། །བར་དུ་གཅོད་པ་ཀུན་ཞི་དང་། །ཀུན་མཁྱེན་ཤེས་རབ་ཐོབ་བྱའི་ཕྱིར། །འོད་ཟེར་ཅན་ཉིད་བསྒོམ་པར་བྱ། །ཕྱོགས་ཀུན་དུས་
[175b.7]གསུམ་ནང་བཞུགས་པའི། །རྫོགས་སངས་རྒྱས་དང་བླ་མའི་མདུན། །བདག་ཉིད་ལྟ་ལས་ཡང་དག་མཆོད། །ཆོ་ག་བཞིན་དུ་བཤགས་ལ་སོགས། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་
[176a]
[176a.1]རྒྱས་བྱང་ཆུབ་ཡིད་ཀྱིས་གཟུང་། །བདག་མེད་པ་ཡི་ངོ་བོ་ནི། །སྟོང་ཉིད་མཚན་མེད་རྒྱུ་དང་བྲལ། །དེ་ཕྱིར་སྨོན་པ་མེད་པ་དང་། །འགྲོ་རྣམས་རང་ཉིད་རྣམ་ཐར་གསུམ། །སྐུ་གདུང་མཆོད་རྟེན་ཆོས་དབྱིངས་གནས། །སྙིང་ག་སངས་རྒྱས་ལམ་ནས་ནི། །མཁའ་ཁྱབ་
[176a.2]སངས་རྒྱས་ཚོགས་འཕྲོ་བས། །གྲུ་བཞི་ལ་སོགས་ཡང་དག་ལྡན། །ཕྱི་དང་ནང་དུ་ཟུར་བཞི་ལ། །རྩེ་གསུམ་གྱིས་མཚན་ཟླ་བའི་དཀྱིལ། །གདུག་པའི་སེམས་ཅན་མཐིལ་དུ་མནན། །རི་ཡི་རྒྱལ་པོ་རབ་ཏུ་གནས། །དེ་ལ་མཾ་ཡིག་བསྒོམ་པར་བྱ། །མྱ་ངན་མེད་ཤིང་ལས་བྱུང་བའི། །སྒེག་
[176a.3]ཅིང་དཔའ་དང་བདེན་པའི་ཆར། །འཛམ་བུ་ནཱ་དའི་འོད་དང་མཚུངས། །གཡས་ཞལ་ཨིནྡྲ་ནཱི་ལའི་མདོག །མི་སྡུག་འཇིགས་ཤིང་དྲག་པོ་སྟེ། །ཅིག་ཤོས་ཞལ་ནི་ཟླ་འོད་འཕྲོ། །སྙིང་རྗེ་ལས་བྱུང་ཞི་བ་སྟེ། །ཞལ་གསུམ་རྣམ་པར་ཐར་པ་གསུམ། །ཆོས་དང་ལོངས་སྤྱོད་སྤྲུལ་པར་གསུངས། །
[176a.4]ཡི་གེ་སེར་པོ་གོས་བཟང་དང་། །འོད་ཟེར་གྱིས་ནི་ཞལ་གནས་མ། །ཁ་མིག་ཁབ་ཀྱིས་འཚེམ་བྱེད་ཅིང་། །ཁ་དང་མིག་དག་འཆིང་བར་བྱེད། །སྙིང་མགྲིན་ལྕགས་ཀྱུ་ཞགས་པ་དང་། །མདའ་དང་གཞུ་ཡིས་འབིགས་པར་བྱེད། །རྡོ་རྗེས་གདུག་པའི་སྙིང་འབུགས་ཤིང་། །མྱ་ངན་མེད་པས་
[176a.5]འབྲབ་པར་བྱེད། །རྣམ་ཐར་བརྒྱད་བརྒྱད་རྣམས་ཀྱིས་ནི། །གདུག་པ་འཇོམས་པར་རབ་ཏུ་བསྒོམ། །ཞབས་ནི་བརྐྱང་བསྐུམ་དག་གིས་ནི། །དབང་ཕྱུག་དང་ནི་གཽ་རཱི་དག །ཐབས་དང་ཤེས་རབ་ཞབས་ཀྱིས་མནན། །འོད་ཟེར་ཅན་བསྒོམ་བརྟུལ་ཞུགས་ཅན། །ཕྱོགས་ཀུན་དང་ནི་དུས་
[176a.6]གསུམ་དང་། །བདག་ཉིད་སྤྲོ་བསྡུ་བྱས་ནས་ནི། །ཛཿཧཱུཾ་བཾ་ཧོཿབརྗོད་ནས་ནི། །དེ་ལ་སངས་རྒྱས་ཀུན་གཞུག་བྱ། །སངས་རྒྱས་སྐུ་བསྐྱེད་རིམ་པ་ཡིས། །བདུད་རྩིའི་བུམ་པ་རྣམས་བཟུང་ནས། །རིན་ཆེན་དབུ་རྒྱན་ཅོད་པན་ཅན། །རྟག་ཏུ་དབང་བསྐུར་བལྟ་བར་བྱ། །ཕྱག་ན་མཆོད་པ་
[176a.7]ཀུན་ཐོགས་ནས། །མེ་ཏོག་ལ་སོགས་རྡོ་རྗེ་མས། །མཆོད་ཅིང་བསྟོད་པ་བྱས་ནས་ནི། །ཤིན་ཏུ་བཟའ་དང་ཆང་སོགས་ཀྱིས། །ལུས་ངག་ཡིད་ནི་རེངས་བྱེད་པ། །པི་ཙུའི་སྔགས་ནི་བཟླས་པར་བྱ། །སརྦ་དུཥྚཱ་པྲ་དུཥྚཱ་ནཾ། །རང་མིང་བཞི་པའི་མཐའ་ཅན་གྱིས། །ཐུན་མཚམས་བཞིའམ་
[176b]
[176b.1]ཐུན་མཚམས་གསུམ། །སྔ་བར་བརྒྱ་དང་རྩ་བརྒྱད་བཟླས། །རིག་པ་ཆེན་མོ་བསྒོམ་པ་ཡིས། །དོན་ཆེན་ལ་ནི་སྟོང་ཕྲག་གཅིག །བཟླས་ནས་མཆོད་ཅིང་བསྟོད་པར་བྱ། །དགེ་བའི་དོན་དུ་ཞུ་བར་བྱ། །བདག་ཉིད་གནས་ནས་རྫོགས་སངས་རྒྱས། །གང་ལའང་ཆགས་པ་སྤང་བར་བྱ། །
[176b.2]གཤེགས་གསོལ་དང་ནི་ལྷ་གནས་ལ། །སྤྱིར་ནི་ཡི་གེ་གསུམ་དྲན་བྱ། །རབ་གནས་དུས་སུ་རྒྱུད་ལ་ནི། །ལུས་ངག་ཡིད་ནི་བསྒྲུབ་པར་བྱ། །ཐུན་མཚམས་བར་ཡང་ཆོད་པ་སོགས། །སྔོན་དུ་འགྲོ་བས་བཟླས་པར་བྱ། །དང་པོ་ཆོ་གས་སླར་ཡང་ནི། །སྔ་བར་ལྷ་མོ་གླུ་ཡིས་བསྐུལ། །རིག་པ་
[176b.3]འདི་དང་དེ་བཞིན་བདག །བསྒོམ་ཞིང་ཡང་དག་བཟླས་པར་བྱ། །རྒྱུད་ཀྱི་མན་ངག་ཉིད་ལས་ནི། །སྔགས་པས་མངོན་འདོད་རྟག་ཏུ་བསྒྲུབ། །པི་ཙུ་ཅུང་ཟད་ཡང་དག་བྲིས། །བསོད་ནམས་ཡང་དག་ཉེར་བསགས་པ། །དེ་ཡིས་འཇིག་རྟེན་ཐམས་ཅད་ནི། །འཇམ་པའི་རྒྱལ་པོ་ཉིད་
[176b.4]དུ་ཤོག །དཔལ་འོད་ཟེར་ཅན་པི་ཙུ་བའི་སྒྲུབ་ཐབས་རྫོགས་སོ།། {T3535}༄༅༅། །རྒྱ་གར་སྐད་དུ། མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །གདུག་པ་ཐམས་ཅད་འདུལ་མཛད་པའི། །ལྷ་མོ་འོད་ཟེར་
[176b.5]ཅན་བཏུད་ནས། །ལས་རྣམས་ཐམས་ཅད་སྒྲུབ་པ་ཡི། །དེ་ཡི་སྒྲུབ་ཐབས་བཤད་པར་བྱ། །སེམས་དཔའི་སྐྱིལ་ཀྲུང་གིས་བཞུགས་ནས། །སྙིང་གའི་ཟླ་བ་ཨོཾ་ཡིག་བརྒྱན། །འབར་ཞིང་དམར་བའི་ས་བོན་ལས། །སྣ་ཚོགས་འོད་ཟེར་ཡང་དག་འཁྲིགས། །དེས་བསྐྱེད་རྫོགས་པའི་
[176b.6]སངས་རྒྱས་དང་། །བླ་མ་བྱང་ཆུབ་སེམས་ཆེན་རྣམས། །ཕྱག་འཚལ་མངོན་པར་བསྔགས་ནས་མཆོད། །ཞལ་ཟས་ལ་སོགས་དབུལ་བར་བྱ། །བཛྲ་པུཥྤེ། བཛྲ་དྷཱུ་པེ། བཛྲ་དཱི་པེ། བཛྲ་གནྡྷེ། བཛྲ་ནཻ་ཝི་དྱེ་ཧཱུཾ། ཞེས་པའི་སྔགས་ཀྱིས་ཐམས་ཅད་དུའོ། །དེ་ནས། དཀོན་མཆོག་གསུམ་
[176b.7]ལ་བདག་སྐྱབས་མཆི། །བྱང་ཆུབ་སེམས་ཀྱང་བསྐྱེད་པར་བགྱི། །སྨོན་ལམ་སྔོན་དུ་འགྲོ་བ་ཡིས། །ཆོས་ཀུན་བདག་མེད་བསྒོམ་པར་བྱ། །འདིས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་བརྟན་གཡོའི་དངོས་པོ་ཀུན། །ས་བོན་རང་བཞིན་ཉིད་བསམས་ནས། །དེའི་རྗེས་སུ་
[177a]
[177a.1]ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། དེའི་ས་བོན་ལས་སྐྱེས་པའི་འཁོར་ལོ། དེའི་ལྟེ་བ་ལ་ཉི་མའི་དཀྱིལ་འཁོར་རོ། །དེའི་སྟེང་དུ་དྲུག་པའི་ལྔ་པའི་ས་བོན་ལ་ཨཾ་ཡིག་དང་ཟླ་བ་ཕྱེད་པ་དང་ཐིག་ལེས་བརྒྱན་པའོ། །དེ་ཐམས་ཅད་ཡོངས་སུ་རྫོགས་པ་ལས་འོད་
[177a.2]ཟེར་ཅན་གྱི་སྐུར་བདག་ཉིད་བསམ་པར་བྱའོ། །གོས་དང་སྐུ་མདོག་དམར་མོ་ཡོན་ཏན་ཉིས་འགྱུར་གྱི་ཕྱག་རོལ་ཞིང་སྟག་གི་པགས་པའི་ཤམ་ཐབས་ཅན། རལ་པ་གྱེན་དུ་བརྫེས་པ། ཅོད་པན་དམར་པོ་ཞལ་གསུམ་པ། ཞལ་གཉིས་ནི་ཕག་ཞལ་ལོ། །དང་པོའི་ཞལ་ནི་ཞི་ཞིང་ཅུང་ཟད་འཛུམ་
[177a.3]པའི་ཞལ་སྒེག་ཅིང་འགྱིང་བའི་ཉམས་དང་བཅས་པའོ། །ཐམས་ཅད་ལ་སྤྱན་གསུམ་པའོ། །གཡོན་པ་ནི་ཕག་ཞལ་དམར་པོ་སྟེ། རྡོ་རྗེ་ཐོ་བ་བསྣམས་པ་ལུས་མེད་ཀྱིས་ཕྱག་མཛད་པའོ། །གཡས་པ་ན་ཕག་ཞལ་དམར་སྐྱའོ། །རྡོ་རྗེའི་ཞགས་པ་བསྣམས་པའི་དབང་པོས་ཕྱག་མཛད་པ། །
[177a.4]མཆོད་རྟེན་གྱི་ནང་ན་ཁྲོ་བོ་ནག་པོ་གཡས་བརྐྱང་གིས་བཞུགས་པའོ། །འོག་ཏུ་ཁྱབ་འཇུག་དང་དབང་ཕྱུག་དང་ཚངས་པ་ལ་སོགས་པས་ཕྱག་མཛད་པ། ནོར་ལྷ་དང་འཇིག་རྟེན་སྐྱོང་བ་ཐམས་ཅད་འཇིགས་པས་འདུད་པ་དང་། རྗེ་བཙུན་མ་ལ་ཕྱག་འཚལ་ཞིང་བཀའ་སྒྲུབ་པར་མཛད་པས་གནས་
[177a.5]པའོ། །དེ་ནས་རྣ་བར་བཀང་བའི་གཞུ་དང་། མྱ་ངན་མེད་པའི་ཡལ་ག་དང་མདས་བསྒྲུབ་བྱའི་སྙིང་གར་འབུགས་པར་བསམ་པར་བྱའོ། །ཕུ་དུང་དམར་པོའི་སྟོད་གཡོགས་ཅན། རྒྱན་ཐམས་ཅད་ཀྱིས་བརྒྱན་པ་བསམ་པར་བྱའོ། །མྱ་ངན་མེད་པའི་དབུ་རྒྱན་བཅིངས་པའོ། །ཕྱག་
[177a.6]གཡོན་ན་མྱ་ངན་མེད་པའི་མེ་ཏོག་བསྣམས་པ། སྙིང་གར་སྡིགས་མཛུབ་ཀྱིས་གནས་པའི་རྡོ་རྗེ་ཞགས་པ་དང་། ཐོད་པ་ཆེན་པོ་དང་། སྐུད་པ་དང་། མགོ་བོ་དང་། བུམ་པ་བཟང་པོ་རྣམས་ཕྱག་ན་བསྣམས་པའོ། །གཡས་པ་རྣམས་ཀྱིས་སྐུད་པ་དང་། ལྕགས་ཀྱུ་དང་། བྷིཎྜི་པཱ་ལ་དང་། རལ་
[177a.7]གྲི་འཕྱར་བ་དང་། རྡོ་རྗེའི་དབྱུག་པ་དང་། རྡོ་རྗེ་བསྣམས་པའོ། །དཔལ་ལྡན་རྣམ་པར་སྣང་མཛད་སྐུ་མདོག་དཀར་པོ་རྡོ་རྗེའི་སྐྱིལ་ཀྲུང་གིས་བཞུགས་པ། བྱང་ཆུབ་མཆོག་གི་ཕྱག་རྒྱ་ཅན་ཏིང་ངེ་འཛིན་ལ་སྙོམས་པར་ཞུགས་པ་རལ་པའི་ཅོད་པན་ཅན་ཞི་བ་ཡེ་ཤེས་ཀྱི་སྤྱན་ཟིམ་བུར་མཛད་པ་སྤྱི་བོར་
[177b]
[177b.1]རྣམ་པར་བསམས་ནས་ལས་ཐམས་ཅད་བརྩམ་པར་བྱའོ། །མན་ངག་ཇི་ལྟ་བ་བཞིན་དུ་ཡེ་ཤེས་སེམས་དཔའ་དགུག་པ་དང་། རབ་ཏུ་གཞུག་པ་དང་། བཅིང་བ་དང་། དབང་དུ་བྱ་བས་བསྒྲུབ་པར་བྱའོ། །དབང་བསྐུར་བ་དང་། གོ་ཆ་དང་། ཅོད་པན་བཅིང་བ་དང་། མཆོད་པ་དང་། བསྟོད་
[177b.2]པ་ཡང་བྱས་ནས་ཕྱི་ནས་བཟླས་པ་བརྩམ་པར་བྱའོ། །ཇི་ལྟར་ཉི་མ་འབར་ཞིང་རབ་ཏུ་གསལ་བ་ནི་མི་གཡོ་བ་དང་ལྡན་པའི་མེ་དང་ལྡན་པའོ། །དེ་བཞིན་དུ་ཆོས་འབར་བའི་སྐུ་ལ་རྩེ་གཅིག་པའི་སེམས་ཀྱིས་བཟླས་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། མཐེབ་ཆེན་སེམས་དཔའི་སྐྱིལ་ཀྲུང་
[177b.3]བཅིངས་ནས་མཛུབ་མོའི་རྩེ་མོ་བཀུག་སྟེ་བཟུང་ལ། མཉམ་དུ་གུང་མོ་ཡན་ལག་མཆོག་ལ་ལྷག་མ་རྡོ་རྗེའི་ཐལ་མོ་སྦྱར་བ་སྙིང་ག་དང་མཛོད་སྤུ་དང་མགྲིན་པ་དང་སྤྱི་བོ་རྣམས་སུ་བཞག་ནས་འདིས། ཨོཾ་མཱ་རཱི་ཙྱཻ་ཧཱུཾ་སརྦ་དུཥྚཱཾ་མརྡཱ་ཡ་ཧཱུཾ་ཕཊ། བརྒྱད་པའི་གསུམ་པ་དང་བཞི་པ་དག་གི་གསུམ་པ་ལས་
[177b.4]བདུན་པའི་བཞི་པས་གང་བ་དང་པོའི་གཉིས་པས་བརྒྱན་པ། བཞི་པ་ལའང་དང་པོའི་གཉིས་པས་བརྒྱན་པའོ། །དཀར་པོ་དབང་པོའི་ཞལ་གྱིས་དགོངས་མོའི་ཐུན་ནས་གུང་ཐུན་བར་དུ་ཞེས་པའི་སྔགས་རབ་ཏུ་གསལ་བར་བྱ་སྟེ། ཨོཾ་མཱ་རཱི་ཙྱཻ་དེ་བ་དཏྟ་སྱ་ཤཱནྟིཾ་ཀུ་རུ་སྭཱ་ཧཱ། དང་པོའི་བཅུ་གསུམ་
[177b.5]པའི་ས་བོན་ཟླ་ཕྱེད་ཐིག་ལེས་བརྒྱན་པ་སྔོན་དུ་འགྲོ་བས་གུང་ཐུན་བར་དུ་སེར་པོ་ལུས་ངན་པོའི་ཞལ་གྱིས་རྒྱས་པའི་སྔགས་བཟླས་པར་བྱ་སྟེ། ཨོཾ་མཱ་རཱི་ཙྱཻ་དེ་བ་དཏྟ་སྱ་པུཥྚིཾ་ཀུ་རུ་ཨོཾ། །བརྒྱད་པའི་བཞི་པ་དང་པོའི་བཅུ་གསུམ་པ་བཅུ་དྲུག་པ་དང་ཡང་དག་པར་ལྡན་པས་ནམ་ཕྱེད་ལ་ཆུ་བདག་གི་ཞལ་
[177b.6]དམར་པོས་མིང་མེད་ཀྱིས་དབང་དུ་བྱ་བའི་ལས་ཀྱི་རབ་ཏུ་དབྱེ་བའོ། །ཨོཾ་མཱ་རཱི་ཙྱཻ་དེ་བ་དཏྟ་སྱ་བ་ཤ་མ་ན་ཡ་ཧོཿདྲུག་པའི་གཉིས་པ་དང་བཞི་པའི་དང་པོར་ཕྱེད་ནག་པོའི་གཤིན་རྗེའི་ཞལ་གྱིས་ཉི་མའི་གུང་ལ་མངོན་སྤྱོད་འདིའི་སྔགས་སྡིགས་མཛུབ་ཀྱིས་རབ་ཏུ་བསྐུལ་ལོ། །ཨོཾ་མཱ་རཱི་ཙྱཻ་དེ་བ་དཏྟཾ་མཱ་
[177b.7]ར་ཡ་ཧཱུཾ་ཕཊ། གསུམ་པའི་གསུམ་པའི་ས་བོན་ལས་བཅུ་དྲུག་པ་ཡང་དག་པར་ལྡན་པས་ཐམས་ཅད་འགུགས་པའི་མཆོག་གོ། །ཨོཾ་མཱ་རཱི་ཙྱཻ་ཨ་མུ་ཀ་སྱ་སིདྡྷི་མཱ་ཀཪྵ་ཡ་ཛཿའོད་ཟེར་ཅན་གྱི་དཀྱིལ་འཁོར་དུ་དབང་བསྐུར་ནས་བླ་མ་ལ་གུས་ཤིང་བདེན་པའི་ངག་གིས་འགྲུབ་སྟེ། དེའི་ལྷ་རྣམས་
[178a]
[178a.1]ཀྱི་བཟླས་པས་ཐེ་ཚོམ་མེད་པར་རིག་གོ། །སྔགས་བྱེ་བ་བཟླས་པར་འགྱུར་རོ། །རས་བྲིས་ཀྱི་མདུན་དུ་ལེགས་པར་བཟླས་པ་དང་ལྡན་པས་ལས་ཐམས་ཅད་འགྲུབ་ཅིང་ཡིད་ལ་གང་འདོད་པ་འབྱུང་ངོ་། །འོད་ཟེར་ཅན་འབྱུང་རྒྱུད་ལས་ནི། མཆོག་གི་སྒྲུབ་ཐབས་བྲིས་པ་
[178a.2]ཡིས། །དགེ་བའི་རྩ་བ་འདི་ཡིས་ནི། །སེམས་ཅན་བདེ་གཤེགས་འགྱུར་བར་ཤོག །འོད་ཟེར་ཅན་གྱི་སྒྲུབ་ཐབས་རྫོགས་སོ།། {T3536}༄༅༅། །རྒྱ་གར་སྐད་དུ། སཾ་ཀྵིཔྟ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས་མདོར་བསྡུས་པ། འཕགས་མ་འོད་
[178a.3]ཟེར་ཅན་ལ་ཕྱག་འཚལ་ལོ། །རང་གི་སྙིང་གར་ཟླ་བ་ལ་མཾ་ཡིག་བསམས་ནས། དེའི་འོད་ཟེར་རྣམས་ཀྱིས་བསྐྱེད་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་བལྟས་ནས་ཕྱག་འཚལ་བ་དང་མངོན་པར་མཆོད་ནས་སྡིག་པ་བཤགས་པ་ལ་སོགས་པ་བྱའོ། །དེ་ནས་
[178a.4]ཆོས་ཐམས་ཅད་ཀྱི་བདག་ཉིད་ཀྱང་སྒྱུ་མའི་དཔེ་ལ་སོགས་པས་སོ་སོར་སྣང་བ་ཙམ་ས་བོན་ལས་བསམས་ནས་རང་བཞིན་རྣམ་པར་དག་པ་བརྗོད་པར་བྱ་སྟེ། དེ་ནས་སྟོང་པ་ཉིད་ཀྱིས་ལྷག་པར་གྲོལ་བ་ལ་སོགས་པ་བརྗོད་པར་བྱའོ། །དེ་ནས་དེའི་ས་བོན་ཡོངས་སུ་གྱུར་པ་ལས་མྱ་ངན་མེད་པའི་
[178a.5]ཤིང་། དེའི་སྟེང་དུ་ཟླ་བ་ལ་གནས་པའི་མཾ་ཡིག །དེ་ཐམས་ཅད་ཡོངས་སུ་གྱུར་པ་ལས་བདག་ཉིད་འོད་ཟེར་ཅན་གྱི་སྐུར་བལྟའོ། །དེ་ཡང་སྐུ་མདོག་སེར་མོ་ཞལ་གསུམ་པ། སོ་སོར་སྤྱན་གསུམ་པ། ཕྱག་བརྒྱད་པ། ན་བཟའ་དམར་པོ་མནབས་པ། ཕུ་དུང་དམར་པོའི་སྟོད་གཡོགས་
[178a.6]ཅན། རྒྱན་ཐམས་ཅད་ཀྱིས་བརྒྱན་པ། རྣམ་པར་སྣང་མཛད་ཀྱིས་དབུ་བརྒྱན་ཅིང་འོད་འཕྲོ་བའི་ཕྲེང་བ་འཁྲིགས་པ་བནྡྷུ་ཛི་བ་ཀའི་མེ་ཏོག་ལྟ་བུ་དང་ལྡན་པའི་ཕྱག་གཡོན་པ་རྣམས་ཀྱིས་སྡིགས་མཛུབ་ཀྱི་ཞགས་པ་དང་། གཞུ་དང་། མྱ་ངན་མེད་པའི་ཡལ་ག་དང་། སྐུད་པ་བསྣམས་པ།
[178a.7]གཡས་ན་རྡོ་རྗེ་དང་། མདའ་དང་། ལྕགས་ཀྱུ་དང་། ཁབ་བསྣམས་པ། མཆོད་རྟེན་གྱི་ནང་ན་གནས་ཤིང་ཕག་བདུན་གྱི་ཤིང་རྟ་ལ་ཞབས་གཡོན་བརྐྱང་གིས་བཞུགས་པ། ལང་ཚོ་གཞོན་ནུས་གནས་ཤིང་སྤྱན་རྒྱས་པ། དེའི་རྩ་བའི་ཞལ་ཞི་ཞིང་སྒེག་པ། གཡོན་ན་ཕག་ཞལ་
[178b]
[178b.1]ནག་པོ་ཁྲོ་བ་དང་བཅས་པ་ཁྲོ་གཉེར་གཙིགས་ཤིང་འཇིགས་པར་བྱེད་པ་ལྗགས་བསྐྱོད་པའོ། །ཞལ་གཡས་པ་དམར་ཞིང་ཟླུམ་པ་པདྨ་རཱ་ག་དང་མཚུངས་པ་གཙང་ཁང་ནང་ན་བཞེངས་ཤིང་མྱ་ངན་མེད་པའི་ཤིང་གི་མེ་ཏོག་གཅལ་དུ་བཀྲམ་པ། འོག་ཏུ་རླུང་གི་དཀྱིལ་འཁོར་ལ་ཧཾ་ཡིག་ལས་བྱུང་
[178b.2]བའི་སྒྲ་གཅན་ཟླ་བ་དང་ཉི་མ་འཛིན་པ་ལྷ་མོ་བཞིས་ཡོངས་སུ་བསྐོར་བའི་བཅོམ་ལྡན་འདས་མ་བསམ་པར་བྱའོ། །དེ་ལ་ཤར་དུ་ལྷ་མོ་བཏྟ་ལི་སྐུ་མདོག་དམར་མོ་ཕྱག་བཞི་པ་ཕྱག་གཡོན་པ་དག་གིས་ཞགས་པ་དང་མྱ་ངན་མེད་པའི་ཤིང་བསྣམས་པ། གཡས་པ་དག་གིས་རྡོ་རྗེ་དང་ལྕགས་ཀྱུ་དང་།
[178b.3]ཁབ་བསྣམས་པའོ། །ལྷོ་རུ་ལྷ་མོ་བ་དཱ་ལི་སྐུ་མདོག་སེར་མོ་ཕྱག་བཞི་པ་གཡོན་པ་དག་གིས་ཞགས་པ་དང་རྡོ་རྗེ་གཡས་པ་དག་ན་མྱ་ངན་མེད་པའི་ཤིང་དང་། ཁབ་བསྣམས་པའོ། །ནུབ་ཏུ་ལྷ་མོ་བ་རཱ་ལི་དེའི་གཟུགས་འཆང་བ་ཕྱག་གཡོན་པ་དག་གིས་ཞགས་པ་དང་། མྱ་ངན་མེད་པའི་ཤིང་།
[178b.4]གཡས་པ་དག་གིས་རྡོ་རྗེ་དང་། ཁབ་བསྣམས་པའོ། །བྱང་དུ་ལྷ་མོ་བཱ་རཱ་ཧཱ་མུ་ཁི་སྐུ་མདོག་དམར་མོ་ཕྱག་བཞི་པ་ཕྱག་གཡོན་པ་དག་གིས་མྱ་ངན་མེད་པའི་ཤིང་དང་གཞུ། གཡས་པ་དག་གིས་མདའ་དང་རྡོ་རྗེ་བསྣམས་པ་བསམ་པར་བྱའོ། །ཡང་ན་ཐམས་ཅད་དཀར་མོ་རིན་པོ་ཆེའི་ཅོད་
[178b.5]པན་ཅན། ཕག་ཞལ་གཅིག་པ་སྤྱན་གསུམ་པ། རྒྱན་སྣ་ཚོགས་པས་བརྒྱན་པ་ཕུ་དུང་དམར་པོའི་སྟོད་གཡོགས་ཅན་བསམ་པར་བྱའོ། །དེ་ནས་རྡོ་རྗེ་ལྕགས་ཀྱུ་མ་ལ་སོགས་པ་རྣམས་ཀྱི་ཕྱག་རྒྱ་དང་སྔགས་ཀྱིས་ཡེ་ཤེས་སེམས་དཔའ་དགུག་པ་ལ་སོགས་པ་བྱའོ། །ཛཿཧཱུཾ་བཾ་ཧོཿ ཞེས་
[178b.6]པ་འདིས་ཡེ་ཤེས་སེམས་དཔའ་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བས་མཉེས་པར་བྱའོ། །དེ་ནས་འོད་ཟེར་ཅན་གྱི་ཕྱག་རྒྱས་གཉིས་སུ་མེད་པར་བྱ་ཞིང་བསྒོམ་པ་སྔོན་དུ་འགྲོ་བས་བཟླས་པར་བྱའོ། །ཨོཾ་མཱ་རཱི་ཙྱཻ་སྭཱ་ཧཱ། དགེ་བ་ཐམས་ཅད་ཡོངས་སུ་བསྔོ་ནས་གཤེགས་
[178b.7]སུ་གསོལ་ལོ། །ཨོཾ་མཱ་རཱི་ཙྱཻ་མུཿཞེས་པས་གཤེགས་སུ་གསོལ་ཞེས་སོ། །འོད་ཟེར་ཅན་གྱི་སྒྲུབ་ཐབས་མདོར་བསྡུས་པ་རྫོགས་སོ། {T3537}༄༅༅། །རྒྱ་གར་སྐད་དུ། ཨཱརྱ་མཱ་རཱི་ཙྱཻ་དྷཱ་ར་ཎི་པ་ཐོ་པ་དེ་ཤཿ། བོད་སྐད་དུ། འཕགས་མ་འོད་ཟེར་ཅན་གྱི་གཟུངས་གདོན་པའི་
[179a]
[179a.1]མན་ངག །བཅོམ་ལྡན་འདས་འཕགས་མ་འོད་ཟེར་ཅན་ལ་ཕྱག་འཚལ་ལོ། །བློ་ལྡན་སེམས་དཔའི་སྐྱིལ་ཀྲུང་སྟེ། །དམིགས་པ་བརྩེ་བ་ཆེན་པོ་ཡིས། །སྔ་ཐུན་སྙིང་གར་ཟླ་བ་ལ། །ཨོཾ་ཡིག་དཀར་པོ་བསྒོམ་པར་བྱ། །རྣམ་སྣང་གསུངས་པའི་བདག་ཉིད་ཅན། །ཀུན་
[179a.2]ནས་དཀར་ཞིང་དེ་འོད་ཀྱིས། །ར་བ་ཟླུམ་ཞིང་མཆོད་རྟེན་བརྒྱན། །སྟེང་དུ་འོད་ཟེར་འབར་བ་སྟེ། །བསྲུང་བའི་དོན་དུ་མདུན་རྒྱབ་དང་། །གཡས་གཡོན་འོག་དང་སྟེང་རྣམས་སུ། །རིམ་པས་མ་སོགས་གཡོག་ལ་སོགས། །ཞང་པོ་ལ་སོགས་བུ་ལ་སོགས། །བྲིས་སྐུ་དགེ་བའི་བཤེས་
[179a.3]གཉེན་དང་། །པོ་ཏི་ལ་སོགས་ལས་བྱུང་བ། །དེ་ནས་ཟླ་བ་མཾ་ཡིག་སེར། །མྱ་ངན་མེད་པའི་ཡལ་གས་བྱུང་། །འཕགས་མ་འོད་ཟེར་ཅན་བསམ་བྱ། །ཁྲོ་ཞིང་ཁབ་དང་སྐུད་པ་བསྣམས། །གང་ཞིག་ལྟེ་བ་ནས་ལངས་ཏེ། །སྣ་བུག་གཡས་པ་དེ་མདུན་དུ། །གཞན་ནས་སྐུད་པས་
[179a.4]ཁ་མིག་བཙེམས། །གདུག་ཅན་ར་བའི་ཕྱི་རོལ་བྱ། །ལན་ཅིག་མ་ཡིན་བྱས་ནས་ནི། །བྱང་ཆུབ་མཆོག་གི་གཟུངས་བཀླག་གོ། །དེ་ནས་ཨོཾ་དང་མཱ་རཱི་ཙྱཻ་སྭཱ་ཧཱ། །སྔགས་ནི་ཇི་བཞིན་སྟོབས་ཀྱིས་བཟླས། །དེ་ནས་སྔགས་རིག་གཡོན་པ་ཡི། །སྣ་བུག་ནས་ནི་དེའི་སྙིང་གར། །གཞུག་
[179a.5]ཅིང་མྱ་ངན་མེད་ཤིང་གི། །འོད་ཟེར་གྱིས་བསྐྱེད་ཕག་སེར་གྱིས། །ཕྱི་རུ་གདུག་ཅན་ཡང་དག་འཇོམས། །སྣ་ཡིས་མཚམས་ནི་འཆིང་བར་བྱེད། །གསེར་གྱི་མདོག་ཅན་ཕག་ལ་བཞུགས། །གཙོ་མོ་གསེར་གྱི་མདོག་དང་ལྡན། །མི་འཇིགས་རབ་སྦྱིན་འོད་ཟེར་ཅན། །གོས་དཀར་ཅན་ལ་
[179a.6]བདག་ཕྱག་འཚལ། །འཕགས་མ་འོད་ཟེར་ཅན་གྱི་གཟུངས་བཀླག་པའི་མན་ངག་རྫོགས་སོ།། {T3538}༄༅༅། །རྒྱ་གར་སྐད་དུ། པརྞ་ཤ་བ་རི་སཱ་དྷ་ནཾ། བོད་སྐད་དུ། རི་ཁྲོད་ལོ་མ་ཅན་གྱི་སྒྲུབ་ཐབས། འཕགས་མ་རི་ཁྲོད་ལོ་མ་ཅན་ལ་ཕྱག་འཚལ་ལོ། །སྔོན་མ་བཞིན་དུ་ཐམས་ཅད་
[179a.7]བསྒྲུབས་ནས་རང་གི་སྙིང་གར་པདྨ་དཀར་པོ་དང་ཟླ་བའི་དཀྱིལ་འཁོར་ལ་པཾ་ཡིག་སེར་པོ་ལས་སྐྱེས་པའི་རྡོ་རྗེའོ། །དེའི་ལྟེ་བ་ལ་པཾ་ཡིག་གོ། །དེ་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་མ་སྐུ་མདོག་སེར་མོ་ཞལ་གསུམ་པ། སྤྱན་གསུམ་པ། ཕྱག་དྲུག་པ། དང་པོའི་ཞལ་སེར་
[179b]
[179b.1]པོ། གཡས་དཀར་པོ། གཡོན་དམར་པོ་འགྱིང་ཞིང་བཞད་པ་རྒྱན་ཐམས་ཅད་ཀྱིས་བརྒྱན་པ། ལོ་མ་དང་རྨ་བྱའི་མདོངས་ཀྱི་ཤམ་ཐབས་ཅན། ལང་ཚོ་གཞོན་ཞིང་རྒྱས་པ། ཕྱག་གཡས་པ་རྣམས་ཀྱིས་རྡོ་རྗེ་དང་། དགྲ་སྟ་དང་། མདའ་རྣམས་བསྣམས་པ། ཕྱག་གཡོན་པ་
[179b.2]རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་། ཡལ་ག་དང་བཅས་པའི་རྨ་བྱའི་མདོངས་དང་། གཞུ་རྣམས་བསྣམས་པ། མེ་ཏོག་བཅིངས་པའི་རལ་པའི་ཅོད་པན་ལ་གནས་པའི་མི་བསྐྱོད་པ་འཆང་བ། ཉི་མའི་འོད་ཀྱི་དཀྱིལ་འཁོར་ཅན། འོག་ཏུ་བགེགས་རྣམས་མནན་པའི་པདྨ་
[179b.3]དཀར་པོ་དང་ཟླ་བའི་གདན་ལ་གཡོན་བརྐྱང་གིས་བཞུགས་པ། ཐུགས་ཀར་གཡོན་པའི་སྡིགས་མཛུབ་ཀྱིས་འོག་གི་བགེགས་ཀྱི་ཚོགས་སྐྲག་པར་མཛད་པའོ། །གཡས་རྡོ་རྗེའི་ཁུ་ཚུར་གྱིས་མཚོན་ཆ་འཕྱར་བའི་ཚུལ། དེ་བཞིན་དུ་ཕྱག་བཞིའི་གཡོན་པ་དག་གིས་སྡིགས་མཛུབ་དང་བཅས་
[179b.4]པའི་ཞགས་པ་དང་། ལོ་མ་དང་བཅས་པའི་རྨ་བྱའི་མདོངས་བསྣམས་པ། ཕྱག་གཡས་པ་དག་གིས་རྡོ་རྗེ་དང་། དགྲ་སྟ་བསྣམས་པ། ཤིན་ཏུ་འཇིགས་པ་སྟེར་བར་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་པི་ཤཱི་ཙི་པརྞ་ཤ་བ་རི་སརྦ་མ་རཱི་པྲ་ཤ་མ་ཎི་སྭཱ་ཧཱ། དེ་ནས་ཇི་ལྟ་བ་བཞིན་
[179b.5]དུ་གཤེགས་ནས་ཅི་བདེར་གནས་པར་བྱའོ། །རི་ཁྲོད་ལོ་མ་ཅན་གྱི་སྒྲུབ་ཐབས་རྫོགས་སོ།། {T3539}༄༅༅། །རྒྱ་གར་སྐད་དུ། པརྞ་ཤ་བ་རི་སཱ་དྷ་ནཾ། བོད་སྐད་དུ། རི་ཁྲོད་ལོ་མ་ཅན་གྱི་སྒྲུབ་ཐབས། འཕགས་མ་རི་ཁྲོད་མ་ལོ་མ་ཅན་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་
[179b.6]པ་ཉིད་བསྒོམས་པའི་རྗེས་ལ་སྣ་ཚོགས་པདྨ་དང་ཟླ་བ་ལ་གནས་པའི་པཾ་ཡིག་ལྗང་གུ་ལས་སྐྱེས་པའི་རི་ཁྲོད་མ་ལོ་མ་ཅན་སྐུ་མདོག་ལྗང་གུ་ཞལ་གསུམ་པ། སྤྱན་གསུམ་པ། ཕྱག་དྲུག་པ། ནག་པོ་དང་། དཀར་པོ་དག་གཡས་དང་གཡོན་གྱི་ཞལ་ལོ། །ཕྱག་གཡས་པ་གསུམ་ན་རྡོ་རྗེ་དང་། དགྲ་
[179b.7]སྟ་དང་། མདའ་བསྣམས་པ། ཕྱག་གཡོན་པ་གསུམ་ན་གཞུ་བཀང་བ་དང་། ཡལ་ག་དང་། སྡིགས་མཛུབ་དང་བཅས་པའི་ཞགས་པ་བསྣམས་པ། ཞལ་ཁྲོ་བ་དང་བཅས་ཤིང་བཞད་པ། ལང་ཚོ་གཞོན་པ། ཕྲེང་བ་བཅིངས་ཤིང་སྟག་གི་པགས་པའི་ཤམ་ཐབས་ཅན་ཅུང་ཟད་ལྟོ་བ་འཕྱང་བ།
[180a]
[180a.1]སྐྲ་སྟེང་དུ་བརྫེས་པ། འོག་ཏུ་མ་ལུས་པའི་ནད་དང་། བདུད་ཞབས་ཀྱིས་མནན་པ། དོན་ཡོད་གྲུབ་པས་དབུ་བརྒྱན་པའི་བདག་ཉིད་དུ་སྐད་ཅིག་གིས་བསྐྱེད་ནས་སྔགས་བཟླས་པར་བྱའོ། །ཨོཾ་པི་ཤཱ་ཙི་པརྞ་ཤ་བ་རི་སརྦ་མཱ་རི་པྲ་ཤ་མ་ཎི་ཧཱུཾ་ཕཊ། རི་ཁྲོད་ལོ་མ་ཅན་གྱི་སྒྲུབ་ཐབས་རྫོགས་
[180a.2]སོ།། {T3540}༄༅༅། །རྒྱ་གར་སྐད་དུ། ཨཱརྱ་པརྞ་ཤ་བ་རི་དྷཱ་ར་ཎི། བོད་སྐད་དུ། འཕགས་མ་རི་ཁྲོད་མ་ལོ་མ་ཅན་གྱི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ན་མོ་ཨ་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾ་མྱཀྶཾ་བུདྡྷཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ།
[180a.3]བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་མ་ཧཱསྠ་མ་པྲཱཔྟཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། བཱ་མ་ནེ་ཏྭཱཾ་ན་མ་ཥྱཱ་མི་བཱ་མ་ནེ། བྷ་ག་བ་ཏཱི་པི་ཤཱ་ཙི་པརྞ་ཤ་བ་རི་པི་ཤཱ་ཙི་པཱ་ཤ་པ་ར་ཤུདྡྷ་རི་ཎི། ཡཱ་ནི་ཀཱ་ནི་ཙིཏ་བཱ་མཱ་ནི་ཨུཏྤ་ཏྱནྟེ་ཡཱཿཀཱཤྩི་ཏ་མཱ་ཡོ་ཡཱཿཀཱཤྩི་དཱི་ཏ་ཡོ་ཡེ་
[180a.4]ཀེ་ཙིཏ་ཨུ་པ་དྲ་བ་ཡེ་ཀེ་ཙིཏ་ཨུ་པཱ་ཡཱ་པཱ་ཡེ་ཀེ་ཙིཏ་དྷྱཱཏྨི་ཀཱ་བྷ་ཡ། ཡེ་ཀེ་ཙི་དུ་པ་སརྒ་ཨུ་པ་སརྒ་སཾ་བྷ་དྷྭ་པ་ཨུ་པ་ཏྱནྟེ། སརྦ་ནི་ཏཱ་ནི་སརྦཱ་སྟཱ། སརྦ་དེ་བཱ་ལ་ཏ་ཨེ་བོཏྤ་ཏྱནྟོ་ན་པཎྜི་ཏ་ཏ་ཏ་ད་ནེ་ནི་ས་ཏྱེན་པ་ཏྱ་ན་པོ་ཏྱ་བ་ཙ་ནེ་ན་ན་སཏྱ་བ་ཀྱེ་ན། ཛཿཛཿཛཿཛཿ ཨེ་བྷིཿཔཎྜི་ཏ་མནྟྲ་པ་དཻར་མ་མ་སརྦ་སཏྭཱ་ནཱཾ་ཙ་རཀྵཾ་
[180a.5]ཀུ་རུ་པ་རི་ཏྲ་ཎཾ་ཀུ་རུ་པ་རི་གྲ་ཧཾ། ཀུ་རུ་པ་རི་པཱ་ལཱ་ནི་ཀུ་རུ་ཤཱནྟིཾ་ཀུ་རུ་སཏྱ་ཡ་ནཾ་ཀུ་རུ་དཎྜ་པ་རི་ཧཱ་རཾ་ཀུ་རུ་ཤཱསྟྲ་པ་རི་ཧཱ་ར་ཀུ་རུ་ཡཱ་བ་ཏཱ་བི་ཥ་ནཾ་ཀུ་རུ་ཨགྣི་པ་རི་ཧཱ་རཾ་ཀུ་རུ་ཨུ་ད་ཀ་པ་རི་ཧཱ་རཾ་ཀུ་རུ་ཀཱ་ཁོརྡ་ད་ནཾ་ཀུ་རུ་སཱི་མ་བནྡྷཾ་ཀུ་རུ་དྷ་རི་ཎཱི་བནྡྷཾ་ཀུ་རུ། ཏདྱ་ཐཱ། ཨ་མི་ཏེ་ཨ་མི་ཏེ་ཨ་མ་ཏོདྦྷ་བེ་ཨ་མི་ཏེ་སཾ་བྷ་བེ་ཨཱསྭ་
[180a.6]སྟེ་ཨཱ་སྭ་སྟཱཾ་གེ་མཱ་མ་རཱ་མཱ་ས་རཱ་མཱ་ས་ར་མ་པྲ་ཤ་མ་ཨུ་པ་ཤ་མ། སརྦ་བྱཱ་དྷཱ་ནི་ཨུ་པ་ཤ་མ་སརྦཱ་ཀཱ་ལ་མྲྀ་ཏྱུ་ནུ་པ་ཤ་མ་སརྦ་ནཀྵ་ཏྲ་གྲ་ཧ་ཏོ་ཥཱ་ནུ་པ་ཤ་མ་སརྦ་དཾཥྚྲི་ནཾ་ཙོ་པ་ཤ་མ་བྷ་ག་བ་ཏི་པརྞ་ཤ་བ་རི་ཏུནྣ་ཏུནྣ་བི་ཏུནྣ་ཏུ་ཎ་ཏུ་ཎ་ཏུ་མུ་ལེ་སྭཱ་ཧཱ། ཨོཾ་གཽ་རཱི་གནྡྷ་རཱི་ཙཎྜཱ་ལཱི་མཱ་ཏཾ་གཱི་པུཀྐ་སཱི་སྭཱ་ཧཱ། ཨོཾ་ཨཾ་གཱ་
[180a.7]རེ་མཾ་གཱ་རེ་ཀུ་ར་རི་པརྞ་ཤ་བ་རི་སྭཱ་ཧཱ། ན་མཿསརྦ་ཤ་བ་ར་ཎཱཾ་མ་ཧཱ་པ་ཤ་བ་རཱ་ཎཱཾ་བྷ་ག་བ་ཏི་པི་ཤཱ་ཙི་པརྞ་ཤ་བ་རི་པཱ་ཤཱ་རཱི་སྭཱ་ཧཱ། ཨོཾ་པི་ཤཱ་ཙི་པརྞ་ཤ་བ་རི་ཧྲཱིཿཛཿཧཱུཾ་ཕཊ་པི་ཤཱ་ཙི་སྭཱ་ཧཱ། འཕགས་མ་རི་ཁྲོད་ལོ་མ་ཅན་གྱི་གཟུངས་རྫོགས་སོ།། །།
[180b]
[180b.1]{T3541}༄༅༅། །རྒྱ་གར་སྐད་དུ། ཤྲཱི་མ་ན་མ་ཧཱ་ཀཱ་ལ་སཱ་དྷ་ནཾ། བོད་སྐད་དུ། དཔལ་ལྡན་ནག་པོ་ཆེན་པོའི་སྒྲུབ་ཐབས། དཔལ་ལྡན་མགོན་པོ་ཆེན་པོ་ལ་ཕྱག་འཚལ་ལོ། །དེ་བཞིན་དུ་སྔོན་དུ་གསུངས་པའི་རིམ་པས་སྟོང་པ་ཉིད་བསྒོམས་པའི་རྗེས་ལ་སྣ་ཚོགས་པདྨ་དང་ཉི་མ་ལ་ཧཱུཾ་
[180b.2]ཡིག་ནག་པོ། དེ་ཡོངས་སུ་གྱུར་པ་ལས་དཔལ་ལྡན་རྗེ་བཙུན་ནག་པོ་ཆེན་པོ་ཕྱག་གཉིས་པ། ཞལ་གཅིག་པ། སྐུ་མདོག་ནག་པོ། སྤྱན་གསུམ་པ་འབར་བ་ཆེན་པོ། ཕྱག་གཡས་པ་དང་གཡོན་པ་དག་གིས་གྲི་གུག་དང་ཐོད་པ་བསྣམས་པ། མགོ་བོའི་ཕྲེང་བའི་དོ་ཤལ་གྱིས་
[180b.3]སྐུ་བརྒྱན་པ། དབུ་སྐྲ་དམར་སེར་གྱེན་དུ་བརྫེས་པ། མཆེ་བ་གཙིགས་པས་འཇིགས་པར་བྱེད་པ། སྐུ་ཐམས་ཅད་ལ་སྦྲུལ་གྱིས་བརྒྱན་པ། སྐུ་ཐུང་བ། ཞལ་ནས་ཁྲག་འཛག་པའི་བདག་ཉིད་དུ་སྐད་ཅིག་གིས་བསྐྱེད་ནས་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་མ་ཧཱ་ཀཱ་ལ་ཧཱུཾ་
[180b.4]ཕཊ་སྭཱ་ཧཱ། དུག་དང་ཁྲག་དང་། སྒོག་པ་དང་། ཡུངས་ཀར་རྣམས་ཀྱིས་ནག་པོ་ཆེན་པོའི་སྤོས་ཕུལ་ནས་སྲན་མ་ཤ་དང་འཛམ་བུ་ཏི་ཀ་དང་ཆང་དང་མེ་ཏོག་དང་བྱུག་པ་ལྔའི་ལྕགས་ཀྱུའི་བདུད་རྩིས་ནག་པོ་ཆེན་པོ་མཆོད་པ་བྱ་སྟེ། གཏོར་མའི་སྔགས་འདིས་སོ། །ཨོཾ་མ་ཧཱ་ཀཱ་ལཱ་ཡ་ཤཱ་ས་ནོ་པ་
[180b.5]ཀཱ་རི་ཎཾ་ཨེ་ཥཱ་པཤྩི་མ་ཀ་ལོ་ཨ་ཡཾ་ཨིདཾ་རཏྣ་ཏྲ་ཡཱ་པ་ཀཱ་རི་ཎཾ་ཡ་དི་པྲ་ཏི་ཛྙཱཾ་སྨ་ར་སི་ཏ་དཱ་ཨི་དཾ་དུཥྚ་ཁ་ཁ་ཁཱ་ཧི་ཁཱ་ཧི་མ་ར་མ་ར་གྲྀཧྞ་གྲྀཧྞ་བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དཱི་ན་མེ་ཀེ་ན་མཱ་ར་ཡ་ཧཱུཾ་ཧཱུཾ་ཕཊ་ཕཊ་ཚ་བ་གསུམ་གྱིས་བསྒྲུབ་བྱའི་གཟུགས་བྱས་ཏེ་ལུས་ལ་ཚེར་མས་དགང་ཞིང་དུག་དང་
[180b.6]སྐེ་ཚེ་རྣམས་ཀྱིས་ཆོ་ག་བཞིན་དུ་བྱུགས་ནས་མེ་ལ་བསྲོ་བར་བྱའོ། །གང་གི་མིང་དང་བཅས་པ་དེ། །དེ་བཞིན་སྐད་ཅིག་མཐོང་བར་འགྱུར། །སློབ་དཔོན་ཞེ་སྡང་རྟག་ཁྲོ་གང་། །གང་ཞིག་དཀོན་མཆོག་གསུམ་པོ་དང་། །དཔག་མེད་སེམས་ཅན་རྣམས་འཚེ་རྣམས། །ནག་པོ་
[180b.7]ཆེན་པོས་ཟ་བར་བྱེད། །དེ་ཡི་ལུས་ལ་ཤ་གཅོད་ཅིང་། །དེ་བཞིན་ཁྲག་ནི་འཐུང་བར་བྱེད། །སྤྱི་བོར་ཐིག་ལེ་བྱས་ནས་གུས་པ་རྒྱ་ཆེན་པོ་བྱས་ནས་བཟླས་པར་བྱའོ། །དཔལ་ལྡན་ནག་པོ་ཆེན་པོའི་སྒྲུབ་ཐབས་རྫོགས་སོ།། །།
[181a]
[181a.1]{T3542}༄༅༅། །རྒྱ་གར་སྐད་དུ། ཤུ་ཀླཱ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །གང་ཞིག་བསྒོམས་པ་ཙམ་གྱིས་ནི། །ཤེས་རབ་ཕ་རོལ་ཕྱིན་འབྱུང་ཞིང་། །ཀུན་
[181a.2]གྱི་བྱང་ཆུབ་རྣམ་འཛིན་པ། །དེ་ནས་ཡང་དག་བཤད་པར་བྱ། །ཞལ་གཅིག་ཕྱག་ནི་གཉིས་པ་སྟེ། །སྐུ་མདོག་དཀར་མོ་ཡིད་འོང་མ། །དབུ་སྐྲ་ཕྱེད་ཕྱེད་འཁྱིལ་པ་ཅན། །ཆུ་སྐྱེས་དཀར་ལ་ཡང་དག་གནས། །ཕྱག་གཡས་ན་ནི་པདྨ་དང་། །གཡོན་ན་ཤེས་རབ་ཕ་རོལ་ཕྱིན། །མདོག་
[181a.3]དཀར་རྣམ་པར་བསྒོམ་པར་བྱ། །རྡོ་རྗེ་སྐྱིལ་ཀྲུང་གིས་བཞུགས་པའི། །རྒྱན་རྣམས་ཐམས་ཅད་ཡོངས་སུ་རྫོགས། །ལྟེ་བའི་དཀྱིལ་འཁོར་ལ་བསྒོམ་བྱ། །ཨོཾ་ཡིག་ཡེ་ཤེས་ལས་བྱུང་བ། །མཆོག་ཏུ་དགའ་བར་བྱེད་པ་མོ། །དམ་ཚིག་སེམས་དཔའ་རྫོགས་བྱས་ལ། །ཡེ་ཤེས་
[181a.4]སེམས་དཔའ་བསྒོམ་པར་བྱ། །རྣལ་འབྱོར་ཟླ་དྲུག་གོམས་པ་ཡིས། །ཤེས་རབ་ཕ་རོལ་ཕྱིན་མར་འགྱུར། །མཚན་མོ་བདུན་གྱི་རྣལ་འབྱོར་གྱིས། །བསྟན་བཅོས་ཀུན་ལ་འཇིགས་པ་མེད། །བཟླས་པ་འབུམ་དུ་སྦྱོར་བ་ཡིས། །ཉིན་རེ་ཉིན་རེ་ཚིགས་བཅད་བརྒྱ། །འབད་པ་མེད་པར་
[181a.5]རབ་ཏུ་རྩོམ། །གཞུང་ཡང་བརྒྱ་ནི་འཛིན་པར་བྱེད། །འདི་རྣམས་སྔགས་ཀྱི་ཚིག་ཏུ་འགྱུར། །ཨོཾ་པི་ཙུ་པི་ཙུ་པྲཛྙཱ་ཝརྡྷ་ནི་ཛྭ་ལ་ཛྭ་ལ་མེ་དྷ་ཝརྡྷ་ནི་དྷི་རི་དྷི་རི་བུ་དྷི་ཝརྡྷ་ནི་སྭཱ་ཧཱ། བྱ་རོག་གི་སྒྲ་མི་གྲག་པར་སྔགས་འདིས་ལན་བདུན་རང་སྒྱུར་ལ་མངོན་པར་བསྔགས་ནས་ཇི་སྲིད་ཟླ་བ་དྲུག་གི་བར་དུ་
[181a.6]འཐུངས་ན་ཤེས་རབ་ཆེན་པོར་འགྱུར་རོ། །ཨོཾ་པྲཾ་སྭཱ་ཧཱ། སྔགས་འདིས་ཀྱང་ངོ་། །འདི་ལ་མི་བསྐྱོད་པའི་རྒྱས་གདབ་པོ་ཞེས་སོ། །ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས་རྫོགས་སོ།། {T3543}༄༅༅། །རྒྱ་གར་སྐད་དུ། པཱི་ཏ་བརྞ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ།
[181a.7]ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་ཨ་ཡིག་ལས་སྐྱེས་པའི་ཟླ་བ་ལ་དྷཱིཿཡིག་སེར་པོ་ལས་སྐྱེས་པའི་སྣ་ཚོགས་པདྨ་ལ་ཧཾ་ཡིག་སེར་པོ་ལ་ཨ་ཡིག་ལ་སོགས་པའི་
[181b]
[181b.1]དབྱངས་བཅུ་དྲུག་གིས་ཡོངས་སུ་བསྐོར་ཞིང་གནས་པའི་ཕྱི་རོལ་དུ་ཀ་ཡིག་ལ་སོགས་པའི་ཡི་གེ་སུམ་ཅུ་རྩ་གཉིས་ཀྱིས་ཡོངས་སུ་བསྐོར་བ་བསྒོམ་པར་བྱའོ། །དེ་ནས་སྒེག་མོ་དང་། ཕྲེང་བ་མ་དང་། གར་མ་དང་། གླུ་མ་དང་། མེ་ཏོག་མ་དང་། བདུག་སྤོས་མ་དང་། མར་མེ་མ་དང་། དྲི་མ་ཞེས་པའི་
[181b.2]རྣལ་འབྱོར་མ་བརྒྱད་དོ། །དེ་ཐམས་ཅད་ཡོངས་སུ་གྱུར་པ་ལས་ཡེ་ཤེས་ཀྱི་ཟླ་བ་ཤར་བ་འོད་རབ་ཏུ་གསལ་བའོ། །དེའི་སྟེང་དུ་པདྨ། དེའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟེ། དེའི་སྟེང་དུ་ཟླ་བའི་དཀྱིལ་འཁོར་གཉིས་པ་ལ་དེའི་སྟེང་དུ་པུསྟི་གཉིས་པའོ། །དེ་ཐམས་ཅད་
[181b.3]ཡོངས་སུ་གྱུར་པ་ལས་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོ་ཞལ་གཅིག་ཕྱག་གཉིས་མ་དེ་བཞིན་གཤེགས་པ་ལྔའི་དབུ་རྒྱན་ཅན། ཆོས་འཆད་པའི་ཕྱག་རྒྱ་དང་ལྡན་པ། སྣ་ཚོགས་པདྨ་དང་ཟླ་བ་ལ་བཞུགས་པ་ན་བཟའ་དང་རྒྱན་ཐམས་ཅད་ཀྱིས་བརྒྱན་པ།
[181b.4]གཡས་གཡོན་གྱི་ལོགས་དག་ན་ཨུཏླལ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་བསྣམས་པའོ། །སྔགས་ནི། ཨོཾ་ཨཱཿདྷཱིཿཧཱུཾ་སྭཱ་ཧཱ། དཔྲལ་བར་ཨོཾ་ཡིག་སེར་པོ། མགྲིན་པར་ཨཱཿཡིག་དཀར་པོ། སྙིང་གར་དྷཱིཿཡིག་སེར་པོ། ལྟེ་བར་ཧཱུཾ་ཡིག་ནག་པོ་ཞེས་བཟླས་པའི་དུས་སུ་
[181b.5]ཡི་གེ་བཞི་པོ་རྣམས་ཀྱི་རྗེས་སུ་བསམ་པར་བྱའོ་ཞེས་སོ། །ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་ཐབས་རྫོགས་སོ།། {T3544}༄༅༅། །རྒྱ་གར་སྐད་དུ། པཱི་ཏ་བརྞ་སཾ་ཀྵིཔྟ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་
[181b.6]ཐབས་མདོར་བསྡུས་པ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ་པདྨ་དམར་པོ་དང་ཟླ་བ་ལ་གནས་པའི་དྷཱིཿསེར་པོ་ཡོངས་སུ་གྱུར་པ་ལས་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོ་མི་བསྐྱོད་པ་བཞུགས་
[181b.7]པའི་རལ་པའི་ཅོད་པན་ཅན། ཆོས་འཆད་ཀྱི་ཕྱག་རྒྱ་མཛད་ནས། གཡོན་ལོགས་སུ་པུསྟི་དང་བཅས་པའི་ཨུཏྤ་ལ་སྔོན་པོ་བསྣམས་པ། ན་བཟའ་དཀར་པོའི་སྟོད་གཡོགས་ཅན། མཛེས་ཤིང་གོས་དང་རྒྱན་ཐམས་ཅད་ཀྱིས་བརྒྱན་པའོ། །ཞེས་དེ་བཞིན་དུ་བསམས་ནས། ཨོཾ་དྷཱིཿཤུ་ཏ་སྨྲྀ་ཏི་
[182a]
[182a.1]བི་ཛཱ་ཡ་སྭཱ་ཧཱ། ཞེས་པའི་སྔགས་བཟླས་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་ཐབས་མདོར་བསྡུས་པ་རྫོགས་སོ།། {T3545}༄༅༅། །རྒྱ་གར་སྐད་དུ། ཤུཀླུ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་དཀར་
[182a.2]མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་རང་གི་སྙིང་གར་ཆུ་སྐྱེས་དཀར་པོ་དང་ཟླ་བའི་དཀྱིལ་འཁོར་ལ་པྲི་ཡིག་དཀར་པོ་རྣམ་པར་བཀོད་ལ་དེ་བཞིན་དུ་སྔོན་མ་བཞིན་དུ་ཐམས་ཅད་བྱའོ། །པྲཾ་ཡིག་དང་པདྨ་ཡོངས་
[182a.3]སུ་གྱུར་པ་ལས་བཅོམ་ལྡན་འདས་མ་སྐུ་མདོག་དཀར་མོ་ཞལ་གཅིག་ཕྱག་གཉིས་པ་ལུང་དང་རྟོགས་པའི་གཟུགས་ཅན་མ། རིན་པོ་ཆེའི་ཅོད་པན་བསྣམས་པ། ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟིས་མཚན་པའི་ཆུ་སྐྱེས་གཉིས་གཡོན་དང་གཡས་ཀྱི་ལོགས་དག་གི་ནང་དུ་ལངས་པ་བསྣམས་
[182a.4]པའི་ཕྱག་དག་གིས་ཆོས་འཆད་པའི་ཕྱག་རྒྱ་མཛད་པ། པདྨ་དཀར་པོ་དང་ཟླ་བ་ལ་རྡོ་རྗེ་སྐྱིལ་ཀྲུང་གིས་བཞུགས་པ། ལང་ཚོ་གཞོན་ཞིང་དར་ལ་བབ་པ། ན་བཟའ་དང་རྒྱན་རྣམ་པ་སྣ་ཚོགས་པས་བརྒྱན་པ། སོ་སོར་སྣང་བ་ཙམ་རབ་ཏུ་འཕྲོ་བའི་སྣ་ཚོགས་པའི་འོད་ཟེར་ཀྱི་ཚོགས་ཀྱིས་ནམ་མཁའ་
[182a.5]གང་བ། མར་མེའི་ཕྲེང་བ་ལྟ་བུ་ཐོགས་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དཔག་ཏུ་མེད་པ་སྤྲོ་ཞིང་བསྡུ་བའི་སྦྱོར་བས་ཐམས་ཅད་རང་བཞིན་གཅིག་ཏུ་ལྷག་པར་མོས་པས་ཇི་སྲིད་ཤེས་རབ་ཀྱི་ཕ་རོལ་ཏུ་ཕྱིན་མ་མངོན་དུ་མ་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་གང་གི་ཚེ་དགོད་པར་
[182a.6]གྱུར་ན་པདྨ་དཀར་པོ་སྣའི་རྩེ་མོར་ཙ་ན་ཀའི་ཚད་ཙམ་ཀུན་ནས་བྲིས་པ་བཞིན་དུ་རྣམ་པར་བསྒོམས་ལ། དེ་ལ་བཞུགས་པའི་ཤེས་རབ་ཀྱི་ཕ་རོལ་ཏུ་ཕྱིན་མ་ཤིན་ཏུ་ཕྲ་བར་གསུངས་པའི་གཟུངས་ལ་རྩེ་གཅིག་པའི་ཡིད་ཀྱིས་ཡང་དང་ཡང་དུ་མངོན་དུ་བྱ་ཞིང་བསྒོམ་པར་བྱའོ། །དེ་ནས་བསྐྱེད་པའི་
[182a.7]རིམ་པའི་ཕྱོགས་ཀྱི་སྔགས་ནི་ཨོཾ་པྲཾ་སྭཱ་ཧཱ། རྫོགས་པའི་རིམ་པའི་ཕྱོགས་ལ་ནི། །སྔགས་མེད་དོན་དམ་རིམ་པའོ། །ཤེས་རབ་ཕ་རོལ་ཕྱིན་མ་ཡི། །མན་ངག་ཐོབ་པའི་རྣལ་འབྱོར་པ། །དགེ་འདུན་བྱིན་ཀྱི་བུ་ཡིས་ནི། །རིགས་ཀྱི་མིང་གིས་ཀྱང་འབད་ནས། །སེམས་ཅན་ཀུན་ཀྱི་དོན་
[182b]
[182b.1]ཕྱིར་དུ། །སྒྲུབ་ཐབས་གསལ་པོ་འདི་བྲིས་སོ། །ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས་སློབ་དཔོན་དགེ་འདུན་བྱིན་གྱི་བུས་མཛད་པ་རྫོགས་སོ།། {T3546}༄༅༅། །རྒྱ་གར་སྐད་དུ། ཤུཀླུ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་དཀར་
[182b.2]མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །ཤེས་རབ་ཕ་རོལ་ཕྱིན་མ་ཡི། །ལྷ་མོ་སྒྲོལ་མའི་གཟི་བརྗིད་ཅན། །ཟླ་བ་གང་ཞིག་ཤར་བ་ཡིས། །རྒོལ་བའི་ཞལ་པད་གཉིད་ལོག་གོ། །བརྩེ་བ་དང་ལྡན་པའི་རྣལ་འབྱོར་པས་སྟན་བདེ་བ་ལ་འདུག་
[182b.3]ནས་རང་གི་སྙིང་གར་པཾ་ཡིག་དཀར་པོ་ཡོངས་སུ་གྱུར་པ་ལས་པདྨ། དེ་ལ་ཡང་ཨཾ་ལས་བྱུང་བའི་ཟླ་བའི་དཀྱིལ་འཁོར་དེ་ལ་ཨོཾ་དཀར་པོའོ། །དེ་ལས་བྱུང་བའི་འོད་ཟེར་གྱིས་ནམ་མཁའ་ལ་བླ་མ་དང་། ཤེས་རབ་ཀྱི་ཕ་རོལ་ཏུ་ཕྱིན་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་བལྟས་
[182b.4]ནས། ས་བོན་དེ་ལས་གྱུར་པའི་མཆོད་པའི་ཉེར་སྤྱོད་རྣམས་ཀྱིས་མཆོད་པས་མཆོད་ནས། དེ་བཞིན་དུ་ཕྱག་འཚལ་བ་དང་། གསུམ་ལ་སྐྱབས་སུ་འགྲོ་བ་དང་། སྡིག་པ་བཤགས་པ་དང་མི་བྱེད་པའི་སྡོམ་པ་དང་། བསོད་ནམས་ལ་རྗེས་སུ་ཡི་རང་བ་དང་། བདག་ཉིད་དབུལ་བ་དང་། བསོད་
[182b.5]ནམས་ཡོངས་སུ་བསྔོ་བ་དང་། བྱང་ཆུབ་ཏུ་སེམས་བསྐྱེད་པ་དང་། རྒྱལ་བའི་ལམ་ལ་བརྟེན་པ་དང་། གཞན་ལ་བདེ་བ་ཕུན་སུམ་ཚོགས་པར་འདོད་པའི་བྱམས་པ་དང་། གཞན་སྡུག་བསྔལ་དང་བྲལ་བར་འདོད་པའི་སྙིང་རྗེའི་བདག་ཉིད་དང་། སེམས་ཅན་རྣམས་ལ་དགའ་བའི་རྣམ་པ་སྦྱིན་
[182b.6]པར་འདོད་པ་དང་། བཤེས་དང་བྲན་མོ་དང་དགྲ་རྣམས་ལ་མཐུན་པ་དང་། ཁྲོ་བ་རྣམ་པར་སྤང་ཞིང་མཚུངས་པར་བྱེད་པ་ནི་བཏང་སྙོམས་ཞེས་པ་རྣམས་བསམ་པར་བྱའོ། །དེ་ནས་སྟོང་པ་ཉིད་ཀྱི་བྱང་ཆུབ་ཀྱི་སྔགས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་སོ། །དེ་ནས་པདྨ་དེ་ལ་
[182b.7]ཟླ་བ་རྣམ་པར་བསྒོམས་ལ། དེའི་དབུས་སུ་ས་བོན་ལས་བཅོམ་ལྡན་འདས་མ་ཤེལ་དག་པ་ལས་བྱས་པ་ལྟ་བུ་ཞལ་གཅིག་པ། དབུ་སྐྲ་ནག་པོ་ཕྱེད་ཕྱེད་དུ་འཁྱིལ་བའི་ཞགས་པ་ཅན། ཕྱག་གཉིས་པ། སྐྱིལ་ཀྲུང་གིས་བཞུགས་པ། མཆུ་དང་ཕྱག་དང་ཞབས་ཀྱི་མཐིལ་དམར་བ་རྒྱན་ཐམས་
[183a]
[183a.1]ཅད་ཀྱིས་བརྒྱན་པ། ན་བཟའ་དཀར་པོ་བསྣམས་པ། ཕྱག་གཡས་ན་སྡོང་བུ་དང་བཅས་པའི་ཆུ་སྐྱེས་བསྣམས་པ། ཕྱག་གཞན་ན་ཐུགས་ཀར་པུ་སྟི་བསྣམས་པའི་བདག་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོར་བསྐྱེད་ནས། ལྟེ་བའི་དཀྱིལ་འཁོར་དུ་
[183a.2]དེ་བཞིན་དུ་གཞན་ཡང་བཅོམ་ལྡན་འདས་མ་རྒྱན་ཐམས་ཅད་བསྣམས་པར་བསྒོམ་པར་བྱའོ། །འདིའི་ཐུགས་ཀར་ཡང་པདྨ་དང་ཟླ་བའི་ས་བོན་ལ། དེ་ལས་འཕྲོས་པའི་འོད་ཟེར་ལྕགས་ཀྱུའི་རྣམ་པས་མ་འོངས་པ་ན་གྲུབ་པའི་བཅོམ་ལྡན་འདས་མ་ཛཿ། ཞེས་པའི་སྔགས་ཀྱིས་གདན་
[183a.3]དྲངས་ནས། ཡང་དག་པར་མཆོད་ཅིང་ཧཱུཾ་ཞེས་པས་རབ་ཏུ་བཅུག་ནས་བཾ་ཞེས་པས་བཅིངས་ཏེ་ཧོཿཞེས་པས་མཉེས་པར་བྱའོ། །དེའི་རྗེས་ལ་ས་བོན་ལས་འཕྲོ་ཞིང་བྱུང་བའི་འོད་ཟེར་གྱིས་དཔག་ཏུ་མེད་པའི་འཇིག་རྟེན་གྱི་ཁམས་ན་གནས་པའི་སེམས་ཅན་རྣམས་ཀྱི་དོན་མཛད་པ་མཐའ་
[183a.4]ཡས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྲུལ་པའི་སྐུ་སླར་ཡང་དེ་ལས་སྡུད་པ་བསྒོམ་པར་བྱའོ། །སྤྲོ་ཞིང་བསྡུ་བས་ངལ་ན་བཅོམ་ལྡན་འདས་མའི་ང་རྒྱལ་གྱིས་གནས་པར་བྱའོ། །དེ་བཞིན་དུ་གུང་ཐུན་དང་ཐུན་ཕྱི་མའང་སྤྲོ་ཞིང་རྣམ་པར་བསྒོམས་ཏེ། བསྡུས་ནས་དེའི་ང་རྒྱལ་གྱིས་གནས་
[183a.5]པར་བྱའོ་ཞེས་སོ། །ཡང་སྔ་དྲོའི་ཐུན་ལ་མུཿཡིག་གིས་གཤེགས་ནས་དེ་བཞིན་བསྒོམ་པར་བྱའོ། །དེ་ལ་འདིར་བཟླས་པའི་ཆོ་ག་ནི་སྙིང་གའི་ས་བོན་གྱི་ཡི་གེ་ནང་དང་ཕྱི་རུ་ལྷ་མོའི་ཞལ་གྱི་སྒོ་ནས་ཐོན་ནས་ལྟེ་བའི་དཀྱིལ་འཁོར་དུ་དེ་ལ་དེ་བཞིན་དུ་རབ་ཏུ་ཞུགས་ཏེ་སྔགས་ཀྱི་ཡི་གེ་རྣམས་
[183a.6]ཤེལ་གྱི་ཕྲེང་བའི་རྣམ་པ་དཀར་པོ་སྤྲོ་ཞིང་ཉེ་བར་བསྡུས་ནས་ལྷ་རྣམས་ཀྱི་ང་རྒྱལ་གྱིས་བཟླས་པར་བྱའོ། །དེ་ལ་བཟླས་པའི་སྔགས་འདིའོ། །ཨོཾ་པི་ཙུ་པི་ཙུ་པྲཛྙཱ་བརྡྷ་ནི་ཛྭ་ལ་ཛྭ་ལ་མེ་དྷ་བརྡྷ་ནི་དྷི་རི་དྷི་རི་བུ་དྷི་བརྡྷ་ནི་སྭཱ་ཧཱ། དེ་བཞིན་དུ་བསྒོམ་པའི་རྣལ་འབྱོར་པས་དུས་མི་རིང་བར་བསྟན་བཅོས་
[183a.7]ཐམས་ཅད་ལ་མཁས་པར་འགྱུར་རོ་ཞེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པའི་རིམ་པའོ། །ཤེས་རབ་ཕ་རོལ་ཕྱིན་གྱུར་པའི། །སྒྲུབ་ཐབས་གང་བྱས་བསོད་ནམས་དེས། །ཤེས་རབ་ཕ་རོལ་ཕྱིན་གྱུར་པར། །འགྲོ་བ་འདི་རྣམས་འགྱུར་བར་ཤོག །ཤེས་རབ་ཀྱི་ཕ་རོལ་ཏུ་ཕྱིན་མ་
[183b]
[183b.1]དཀར་མོའི་སྒྲུབ་ཐབས་རྫོགས་སོ།། །།པཎྜི་ཏ་དཔལ་ལྡན་པདྨ་འཕེལ་གྱི་ཞབས་ཀྱིས་མཛད་པའོ།། {T3547}༄༅༅། །རྒྱ་གར་སྐད་དུ། ཀ་ན་ཀ་ཝརྞ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་གསེར་མདོག་ཅན་གྱི་སྒྲུབ་ཐབས། འཕགས་མ་
[183b.2]ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །རང་གི་སྙིང་གར་ཨོཾ་ཡིག་ལས་བྱུང་བའི་ཟླ་བའི་དཀྱིལ་འཁོར་ལ་དྷཱིཿཡིག་རྣམ་པར་བཀོད་པ་ལས་འོད་དཔག་ཏུ་མེད་པ། དེ་ལས་བྱུང་བའི་འོད་ཟེར་གྱིས་བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་བསྐུལ་ཞིང་གང་ན་དྲངས་ནས་
[183b.3]མདུན་དུ་སྟན་སྣ་ཚོགས་པ་ལ་བཞུགས་པར་བལྟས་ནས། ཡིད་ཀྱིས་ཕྱག་དང་། མཆོད་པ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། བསོད་ནམས་ཡོངས་སུ་བསྔོ་བ་དང་། བཟོད་པར་
[183b.4]གསོལ་བ་རྣམས་བྱས་ཏེ། དེ་ནས་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་རྣམས་བསྒོམས་ཏེ། དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་ནས་སྟོང་པ་ཉིད་བསྒོམ་པར་བྱའོ། །དེ་ནས་དེ་བཞིན་དུ་སྐད་ཅིག་གིས་ཟླ་བ་ལ་གནས་པའི་དྷཱིཿཡིག་བལྟས་ལ།
[183b.5]དེ་ཡོངས་སུ་གྱུར་པ་ལས་ཤེས་རབ་ཀྱི་ཕ་རོལ་ཏུ་ཕྱིན་མ་རལ་པའི་ཅོད་པན་ཅན། ཞལ་གཅིག་པ་ཕྱག་བཞི་པ། ཕྱག་གཉིས་ཆོས་འཆད་ཀྱི་ཕྱག་རྒྱ་མཛད་པ། རིན་པོ་ཆེ་སྣ་ཚོགས་པས་བརྒྱན་པ། གསེར་མདོག་འབར་བ། ཕྱག་གཡོན་པས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཨུཏྤ་
[183b.6]ལ་སྔོན་པོ་བསྣམས་པ། ན་བཟའ་སྣ་ཚོགས་པའི་སྟོད་གཡོགས་ཅན། ཕྱག་གཡས་པ་མི་འཇིགས་པ་སྦྱིན་པ། པདྨ་དམར་པོ་དང་ཟླ་བ་ལ་རྡོ་རྗེ་སྐྱིལ་ཀྲུང་གིས་བཞུགས་པའི་བཅོམ་ལྡན་འདས་མ་རྣམ་པར་བསྒོམས་ཏེ། དེ་ནས་བརྟན་པའི་ང་རྒྱལ་བྱའོ། །གང་བཅོམ་ལྡན་འདས་མ་
[183b.7]ཤེས་རབ་ཀྱི་ཕ་རོལ་ཏུ་ཕྱིན་མའི་ང་རྒྱལ་དང་བཅས་པའི་ང་རྒྱལ་ཅན་གང་ཡིན་པ་དེ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མའོ། །དེ་ནས་སྔགས་དགོད་པར་བྱ་སྟེ། མགྲིན་པར་ཨོཾ་དྷཱིཿལྕེ་ལ་ཨོཾ་གྷིཿརྣ་བ་དག་ལ་ཛིཿདེ་ནས་རང་གི་སྙིང་གར་ཨཱཿཡིག་དམར་པོ་ལས་བྱུང་བའི་པདྨ་
[184a]
[184a.1]འདབ་མ་བརྒྱད་པ་ཟེའུ་འབྲུ་གེ་སར་དང་བཅས་པ་བསམས་ལ་ཡི་གེ་རྣམས་དགོད་པར་བྱའོ། །ཡིད་ཀྱིས་པདྨའི་འདབ་མ་དང་ཟེའུ་འབྲུ་སེར་པོ་རྣམས་ལ་ཤར་གྱི་འདབ་མ་ལ་ན་མོ། མེའི་འདབ་མ་ལ་བྷ་ག་ཝ་ཏྱཻ། ལྷོའི་འདབ་མ་ལ་པྲཛྙཱ་པ་ར་མི་ཏཱ་ཡཻ། བདེན་བྲལ་
[184a.2]དུ་ཨ་མི་ཏ་གུ་ཎཱ་ཡེ། ཆུ་བདག་གི་འདབ་མ་ལ་བྷ་ག་ཝ་ཏི་བཙྪ་ལཱ་ཡེ། རླུང་གི་འདབ་མ་ལ་སརྦ་ཏ་ཐཱ་ག་ཏཱ་ཛྙཱ་ན་པ་རི་པཱུ་རཱ་ཡེ། ལུས་ངན་གྱི་འདབ་མ་ལ་སྭ་ཏྭ་བཙྪ་ལཱ་ཡེ། དབང་ལྡན་གྱི་འདབ་མ་ལ་ཏདྱ་ཐཱ་ཨོཾ་དྷཱིཿཀརྞི་ཀཱ་ཡཾ། ཤར་དུ་ཤྲུ། མེ་རུ་ཏི། ལྷོ་རུ་སྨྲྀ། བདེན་བྲལ་དུ་ཏེ། ཆུ་བདག་
[184a.3]ཏུའི། རླུང་དུ་ཛཱ། ལུས་ངན་དུ་ཡེ། དབང་ལྡན་དུ་སྭཱ་ཧཱ། དེ་བཞིན་དུ་སྔགས་ཀྱི་ཡི་གེ་རྣམས་བཀོད་ནས་བཟླས་སོ། །ཡི་གེ་འདི་རྣམས་དེ་བཞིན་དུ་བསམ་པར་བྱའོ། །ཐུན་མཚམས་གསུམ་དུ་སྟོང་ཕྲག་བརྒྱད་ཇི་སྲིད་ཟླ་བ་དྲུག་གི་བར་རམ་ཡང་ན་ལོས་དེ་ཐོས་པ་འཛིན་པར་འགྱུར་རོ། །
[184a.4]གསེར་མདོག་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས་རྫོགས་སོ།། {T3548}༄༅༅། །རྒྱ་གར་སྐད་དུ། པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །ཡིད་འོང་གནས་
[184a.5]ནི་འགའ་ཞིག་ཏུ། །བདེ་བའི་སྟན་ལ་འདུག་བྱས་ནས། །རྣལ་འབྱོར་བྱམས་དང་སྙིང་རྗེར་ལྡན། །སྔགས་ནི་ལན་གསུམ་བརྗོད་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པས་བརྟན་དང་གཡོ་བའི་དངོས། །བདག་གི་ལུས་ཀྱང་ཐམས་ཅད་དུ། །སེམས་ཀྱིས་
[184a.6]སྟོང་ཉིད་བསྒོམ་པར་བྱ། །རྨི་ལམ་རྨི་ལམ་མཚུངས་པ་རུ། །པཾ་ཡིག་རྣམ་པ་ལས་སྐྱེས་པའི། །པདྨ་ཟླ་བའི་གདན་གནས་པའི། །དྷཱིཿཡིག་སེར་པོ་དགོད་བྱ་སྟེ། །དེ་ཡིས་བདག་ཉིད་བཅོམ་ལྡན་མ། །ཕྱག་གཉིས་ཤེས་རབ་ཕ་རོལ་ཕྱིན། །སྣ་ཚོགས་གོས་འཆང་སྣ་ཚོགས་རྒྱན། །
[184a.7]ཆོས་འཆད་ཕྱག་རྒྱ་ཡང་དག་ལྡན། །སྒེག་པ་གཅིག་པུའི་ཉམས་ལྡན་ཞིང་། །རྡོ་རྗེ་སྐྱིལ་ཀྲུང་ཡང་དག་གནས། །པུསྟི་དང་བཅས་ཆུ་སྐྱེས་ནི། །གཡོན་གྱི་ལོགས་སུ་བསྣམས་པའོ། །སྤྱི་བོ་མགྲིན་པ་སྙིང་གནས་སུ། །ཟླ་བ་ལ་གནས་དེ་ཉིད་གསུམ། །ཨོཾ་ཨཱཿཧཱུཾ། ཨཱཿཡིག་
[184b]
[184b.1]ཧཱུཾ་ཡིག་དག་གི་དབུས། །ཟླ་བ་དྷིཿཡིག་སེར་པོ་ཡི། །འོད་ཟེར་རྣམ་པར་བསྒོམས་ནས་ནི། །དེ་ནས་སྐུ་མདོག་སེར་མོ་བསྒོམ། །ཀུན་རྫོབ་ཀྱི་ནི་རྣལ་འབྱོར་པས། །ཤེས་རབ་ཤེས་རབ་བསྒོམ་པར་བྱ། །དོན་དམ་པ་ནི་རྟོགས་པའི་སྐུ། །ཤེས་རབ་བདག་ཉིད་ཆེན་པོར་གསུངས། །གང་
[184b.2]གིས་བྱང་ཆུབ་ངེས་ཐོབ་པའི། །རིམ་པ་སྦྱོར་བས་རྒྱལ་བར་འགྱུར། །སྟོན་ཀའི་ཟླ་བ་ལྟ་བུ་ཡི། །དཀར་བའི་སེམས་ནི་རྣམ་པར་བསྒོམ། །སྣ་ཚོགས་གཡོ་དང་མི་གཡོ་བ། །ཕྱི་ནས་ནམ་མཁའི་དཔེ་དང་འདྲ། །རྣམ་རྟོག་མ་ལུས་སྟོང་པ་སྟེ། །རང་བྱུང་སྟོང་པ་གཟུགས་ཀྱང་མེད། །
[184b.3]གཟུགས་སྒྲ་དྲི་དང་རོ་དང་ནི། །རེག་བྱ་ལ་སོགས་གཟུང་དང་འཛིན། །རྟོག་པས་ཡོངས་སུ་མ་གོས་པ། །བསམ་མི་ཁྱབ་པའི་རྐྱེན་ལས་བྱུང་། །ཡང་དག་རྫོགས་པའི་བྱང་ཆུབ་གནས། །ཀུན་མཁྱེན་སེམས་ཀྱི་གོ་འཕང་ངོ་། །དེ་ལ་བཟླས་པའི་སྔགས་ནི་འདིའོ། །ཨོཾ་པྲཛྙེ་མ་ཧཱ་པྲཛྙེ་ཤྲུ་
[184b.4]ཏི་སྨྲྀ་ཏི་བི་ཛཱ་ཡེ་དྷཱིཿསྭཱ་ཧཱ། ཤེས་རབ་ཕ་རོལ་ཕྱིན་བསྒོམ་པའི། །བདག་བྱས་བསོད་ནམས་གང་ཐོབ་པ། །དེ་ཡིས་འཇིག་རྟེན་མ་ལུས་ཀུན། །ཤེས་རབ་ཕ་རོལ་ཕྱིན་ཡུམ་ཤོག །ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས་རྫོགས་སོ།། {T3549}༄༅༅། །རྒྱ་གར་སྐད་དུ། ཀ་ན་ཀ་ཝརྞ་པྲཛྙཱ་
[184b.5]པཱ་ར་མི་ཏཱ་སཱ་དྷ་ནཾ། བོད་སྐད་དུ། གསེར་མདོག་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །དང་པོ་རེ་ཞིག་སྒྲུབ་པ་པོས་སྟན་བདེ་བ་ལ་འདུག་ནས། རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་
[184b.6]ཟླ་བའི་དབུས་སུ་དྷཱིཿསེར་པོ་བསྒོམས་ཏེ། དེ་ལས་བྱུང་བའི་མེ་ཏོག་ལ་སོགས་པ་རྣམས་ཀྱིས་བསྒོམ་པར་བྱ་བ་དང་ལྡན་པའི་བཅོམ་ལྡན་འདས་མ་རང་གི་སྙིང་གའི་ས་བོན་གྱི་ཆས་གདན་དྲངས་ནས་རང་གི་མདུན་དུ་བཞུགས་ཏེ། ཡང་དག་པར་མཆོད་ནས་དེའི་མདུན་དུ་སྡིག་པ་བཤགས་
[184b.7]པ་ལ་སོགས་པ་བྱའོ། །དེའི་རྗེས་ལ་ཚད་མེད་པའི་གནས་བཞི་བསྒོམས་པ་སྔོན་དུ་འགྲོ་བས་སྐད་ཅིག་གིས་སྟོང་པ་ཉིད་བསྒོམ་པར་བྱ་སྟེ། སྔགས་འདིའོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་སོ། །ཕྱི་ནས་ནམ་མཁའི་ཕྱོགས་སུ་དབྱངས་ཡིག་དང་པོ་ཡོངས་སུ་གྱུར་
[185a]
[185a.1]པ་ལས། ཟླ་བའི་དཀྱིལ་འཁོར་ལ་དྷཱིཿཡིག་སེར་པོ་ལ། ཨ་ཡིག་ལ་སོགས་པའི་དབྱངས་བཅུ་དྲུག་གིས་ཡོངས་སུ་བསྐོར་བའོ། །དེ་ནས་ཀ་ལ་སོགས་པ་གསལ་བྱེད་སུམ་ཅུ་རྩ་གཉིས་ཀྱི་ཕྲེང་བས་ཡོངས་སུ་བསྐོར་བའོ། །དྷཱིཿཡིག་ཡོངས་སུ་གྱུར་པ་ལས་ཤེས་རབ་ཀྱི་ཕ་
[185a.2]རོལ་ཏུ་ཕྱིན་པའི་པོ་ཏིས་ཉེ་བར་མཚན་པ་བསྒོམ་པར་བྱའོ། །ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོ་སྣ་ཚོགས་པདྨ་ལ་རྡོ་རྗེ་སྐྱིལ་ཀྲུང་གིས་བཞུགས་པ་ཞལ་གཅིག་པ། ཕྱག་གཉིས་ཆོས་འཆད་པའི་ཕྱག་རྒྱ་མཛད་པ།
[185a.3]རྒྱན་ཐམས་ཅད་ཀྱིས་བརྒྱན་པ། རིན་པོ་ཆེའི་ཅོད་པན་ཅན། གཡོན་ལོགས་སུ་པདྨའི་དབུས་སུ་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་བསྣམས་པ་བསྒོམ་པར་བྱའོ། །དཔྲལ་བར་ཨོཾ་ཡིག་སེར་པོ། མགྲིན་པར་ཨཱཿདཀར་པོ་སྙིང་གར་དྷཱིཿཡིག་སེར་པོ། ལྟེ་བར་ཧཱུཾ་ཡིག་ནག་པོའི་
[185a.4]སྔགས་བཟླས་པར་བྱའོ། །ཨོཾ་ཨཱཿདྷཱིཿཧཱུཾ་སྭཱཧཱ། གསེར་མདོག་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས་རྫོགས་སོ།། #{T3550}༄༅༅། །རྒྱ་གར་སྐད་དུ། པྲཛྙཱ་པཱ་#ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས། བཅོམ་ལྡན་འདས་
[185a.5]མ་ཤེས་རབ་ཀྱི་ཕ་རོལ་ཏུ་ཕྱིན་མ་#ལ་ཕྱག་འཚལ་ལོ། །ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱའི་དོན་དེ་སྦྱར་བ་ཡིས། །གཞུང་ལམ་དག་ལ་དེ་ཡི་སྒྲ། །བྱང་ཆུབ་ས་བོན་བླ་ན་མེད། །ཤེས་རབ་ཕ་རོལ་ཕྱིན་བཏུད་ནས། །གཉིས་མེད་ཡེ་
[185a.6](ཤས་,ཤེས)བསྒྲུབ་པའི་ཕྱིར། །དེ་ཡི་སྒྲུབ་ཐབས་བྲི་བར་བྱ། །དང་པོ་#རེ་ཞིག་སྔགས་པས་མཉམ་པར་གཞག་#པར་གྱུར་པས། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་པ་ཡིད་ལ་བྱས་ཏེ། (ཅནྡན་,ཙནྡན)་གྱི་མཎྜལ་བྱས་ནས་དེའི་ཡན་ལག་ངོ་བོ་ཉིད་མེད་པའི་རང་བཞིན་གྱིས་དེ་ལ་དབུས་སུ་མི་བསྐྱོད་པ་བལྟས་
[185a.7]ནས་མེ་ཏོག་དབུལ་བར་བྱའོ། །སྔགས་འདིས་སོ། །ཨོཾ་ན་མོ་ཨཀྵོ་བྷྱ་#ཧཱུཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། དེ་བཞིན་དུ་ཨ་ཀྵོ་བྷྱ་#དྷཱུཾ་ཧཱུཾ་ཞེས་པའི་ས་བོན་གྱི་ཡི་གེ་བརྗོད་པར་བྱའོ། །གཞན་རྣམས་ཀྱང་ངོ་། །ཨོཾ་བཛྲ་དྷཱུ་པེ་ཧཱུཾ་སྭཱ་ཧཱ། ཨོཾ་བཛྲ་གནྡྷེ་ཧཱུཾ་སྭཱ་ཧཱ། ཨོཾ་བཛྲ་དཱི་#པེ་ཧཱུཾ་སྭཱ་ཧཱ། ཨོཾ་བཛྲ་ནེ་བི་དྷྱེ་ཧཱུཾ་སྭཱ་ཧཱ། ཞེས་པས་
[185b]
[185b.1]ཐམས་ཅད་དབུལ་བར་བྱའོ། །དེའི་མདུན་དུ་ཨོཾ་ན་མོ་བཻ་རོ་ཙ་ནཱ་#ཡ་ཨོཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཞེས་སོ། །དེ་བཞིན་དུ་གཡས་ཕྱོགས་#སུ་ཨོཾ་ན་མོ་རཏྣ་སམྦྷ་བཱ་ཡ་ཏྲཱཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། དེ་བཞིན་དུ་རྒྱབ་ཏུ། ཨོཾ་ན་མོ་ཨ་མི་ཏཱ་བྷཱ་ཡ་ཧྲཱིཿ#ཨོཾ་བཛྲ་པུཥྤེ་#ཧཱུཾ་སྭཱ་ཧཱ། དེ་བཞིན་དུ་གཡོན་དུ་
[185b.2]ཨོཾ་ན་མོ་ཨ་མོ་གྷ་སིདྡྷི་ཡེ་ཨཿ#ཨོཾ་བཛྲ་པུཥྤེ་ཧཱུཾ་སྭཱ་ཧཱ། འདིས་དེ་རྣམས་མཆོད་ནས། རྣམ་པར་སྣང་མཛད་དང་རིན་ཆེན་འབྱུང་ལྡན་དག་གི་དབུས་སུ་ལྷ་མོ་སྤྱན་མ་ལ་མཆོད་པར་བྱའོ། །ཨོཾ་ན་མོ་ལོ་ཙ་ནཱ་ཡེ་ལཱཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། དེ་བཞིན་དུ་རིན་ཆེན་འབྱུང་ལྡན་དང་། འོད་དཔག་མེད་དག་
[185b.3]གི་དབུས་སུ། ཨོཾ་ན་མོ་མཱ་#མ་ཀྱཻ་མཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཡང་འོད་དཔག་མེད་དང་དོན་ཡོད་གྲུབ་པ་དག་གི་དབུས་སུ་ཨོཾ་ན་མོ་ན་མོ་#པཱ་ཎྜ་རཱ་ཡེ་#པཱ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཡང་དོན་ཡོད་གྲུབ་པ་དང་རྣམ་པར་སྣང་#མཛད་དག་གི་དབུས་སུ་ཨོཾ་ན་མོ་སྟཱ་ར་#ཡེ་ཏཱཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། དེ་ནས་མི་བསྐྱོད་པའི་གནས་
[185b.4]སུ། ཨོཾ་ན་མོ་པྲཛྙཱ་པཱ་#ར་མི་ཏཱ་ཡེ་དྷཱིཿཨོཾ་བཛྲ་པུ་ཥྤེ་ཧཱུཾ་སྭཱ་ཧཱ། ཞེས་པས་ཐམས་ཅད་ལ་མེ་ཏོག་ལ་སོགས་པ་ལན་གསུམ་དབུལ་བར་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅#ཧཾ། ཞེས་པས་ལྷ་མོ་#མཆོད་པ་རྣམ་པ་སྣ་ཚོགས་པས་མཆོད་པར་བྱའོ་ཞེས་པ་ནི་མཎྜལ་གྱི་ལས་སོ། །
[185b.5]ད་ནི་དེ་ཉིད་བསམ་པར་བྱ་སྟེ། འདིར་སེམས་ཅན་རྣམས་སྲིད་པའི་སྡུག་བསྔལ་གྱི་ཚོགས་ཀྱིས་མནར་ཞིང་ཡང་དང་ཡང་དུ་འཁོར་བར་#འཁོར་ཏེ། ཀྱེ་མ་འདི་རྣམས་སྡུག་བསྔལ་ལོ་ཞེས་སྙིང་རྗེའི་སེམས་བསྐྱེད་ཅིང་དེ་ཉིད་བསམ་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་#པས་
[185b.6]བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ནས་དེ་རྣམས་ཀྱང་བདག་གིས་དེ་ལ་དགོད་ཅིང་ཇི་ལྟར་དེ་རྣམས་ཀྱང་སླར་ཡང་སྡུག་བསྔལ་མེད་ཅིང་འཁོར་བ་ལས་གྲོལ་ཞིང་བདེ་བར་ཡང་བྱའོ་ཞེས་པ་ནི་སྨོན་པ་སེམས་བསྐྱེད་པའི་མཚན་ཉིད་དོ། །དེ་ནས་རང་གི་སྙིང་གར་ན་བུན་གྱི་དོ་ཤལ་ཅན་
[185b.7]དབང་ཕྱུག་དགོད་པ་ལྟ་བུར་དཀར་ཞིང་བདུད་རྩིའི་ཚོགས་ལྟ་བུའི་ཟླ་བའི་དཀྱིལ་འཁོར་བལྟས་ལ། དེ་ལ་དྷཱིཿཡིག་གསེར་གྱི་ཁ་དོག་ལྟ་བུ་ལས་འོད་ཟེར་དཔག་ཏུ་མེད་པ་བརྒྱ་སྟོང་གི་སྒྲོན་མས་སྟོང་གསུམ་གྱི་འཇིག་རྟེན་གྱི་ཁམས་ན་སངས་རྒྱས་དཔག་ཏུ་མེད་པ་#བྱེ་པ་ཁྲག་ཁྲིག་བརྒྱ་སྟོང་དཔག་ཏུ་མེད་
[186a]
[186a.1]པ་འཕྲོས་པ་བལྟས་ནས། འདིར་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་མ་དང་། སྤྱན་མ་ལ་སོགས་པའི་ལྷ་མོ་རྣམས་དང་། དགེ་བའི་བཤེས་གཉེན་རྣམས་ཀྱང་དཔག་ཏུ་མེད་པའི་མེ་ཏོག་དང་། སྤོས་དང་། མར་མེ་དང་། དྲི་དང་། ཞལ་ཟས་དང་། འཁོར་ལོ་རིན་པོ་#ཆེ་
[186a.2]དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། བུད་མེད་རིན་པོ་ཆེ་དང་། སྐྱེས་བུ་རིན་པོ་ཆེ་ལ་སོགས་པ་རྣམས་ཀྱིས་ཀྱང་སྟེ#། འདི་རྣམས་ཀྱིས་#སངས་རྒྱས་བཅོམ་ལྡན་འདས་ཐམས་ཅད་དང་། ལྷ་མོ་རྣམས་དང་། དགེ་བའི་བཤེས་གཉེན་རྣམས་ཀྱང་ནམ་མཁའ་ལ་ཡིད་ལས་སྐྱེས་པའི་མེ་ཏོག་
[186a.3]ལ་སོགས་པ་རྣམས་ཀྱིས་མཆོད་པར་བྱའོ། །བདག་ཉིད་དབུལ་བ་དང་། གསུམ་ལ་སྐྱབས་སུ་འགྲོ་བ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་རྣམས་བྱའོ། །དེ་ནས་སངས་རྒྱས་བཅོམ་ལྡན་འདས་དང་། སྤྱན་མ་ལ་སོགས་པ་རྣམས་ཀྱང་ནམ་མཁའ་ལ་
[186a.4]སྤྲོ་ཞིང་བསྡུ་བ་ཐུན་མཚམས་མེད་པར་བྱའོ། །དེ་བཞིན་དུ་བསྒོམ་པ་ནི་འཇུག་པའི་སེམས་བསྐྱེད་པའི་མཚན་ཉིད་དོ། །དེ་ནས་ཨོཾ་སྭ་བྷཱ་ཝ་ཤུདྡྷ་སྶརྦ་དྷརྨཱ་སྭཱ་ཧཱ་ཝ་ཤུདྡྷོ྅ཧཾ#། ཞེས་པའི་ཚིགས་སུ་བཅད་པ་བཀླག་པར་བྱའོ། །དེ་ལ་བདག་ཉིད་གཅིག་པུ་བཞིན་དུ་བལྟ་ཞིང་བར་སྣང་ལ་འཕྲོ་བཞིན་
[186a.5]པའི་བདུད་རྩིའི་ཚོགས་པ་བཞིན་དུ་དྲི་མ་མེད་ཅིང་ཟླ་བ་ཡོངས་སུ་གང་བ་ལྟ་བུ་ཆ་ཤས་ཀྱི་ཚོགས་པ་ཐམས་ཅད་ཡོངས་སུ་གང་བ་འབར་ཞིང་འབར་བ་བལྟས་ནས་དེ་ནས་ཨོཾ་ཤཱུ་ནྱ་ཏཱ་ཛྙཱ་ན་#བཛྲ་སྭ་བྷཱ་ཝ་ཨཱཏྨ་ཀོ྅#ཧཾ། ཞེས་བརྗོད་པར་བྱའོ། །བདག་ཉིད་བལྟས་ནས་གཟུགས་མེད་ཅིང་འདུ་ཤེས་ཀྱི་
[186a.6]རང་བཞིན་མེད་པ་སྟེ། འོན་ཀྱང་འོད་ཟེར་གྱི་ཚོགས་པ་ལྟ་བུ་འབའ་ཞིག་འཕྲོ་བ་ཞེས་དེ་བཞིན་དུ་བསམས་ནས་ཡང་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ལ་དེ་ནས་དྷཱིཿཡིག་དེ་དང་འདྲ་བ་#བསམས་ནས། དེ་ཡོངས་སུ་གྱུར་པ་ལས་སྣ་ཚོགས་པདྨ#། དེའི་དབུས་སུ་ཧ་#
[186a.7]ཡིག་བལྟས་ལ་ཨ་ཡིག་ལ་སོགས་པ་དབྱངས་ཡིག་བཅུ་དྲུག་གིས་བསྐོར་བ་ལ་དེ་བཞིན་དུ་ཀ་ཡིག་ལ་སོགས་པའི་ཡི་གེ་སུམ་ཅུ་རྩ་གཉིས་ཧ་ཡིག་ལ་སོགས་པ་ཐམས་ཅད་ཀྱང་དཀར་པོའོ། །དེ་བཞིན་དུ་དེའི་འདབ་མ་ལ་སྒེག་མོ་ངང་། ཕྲེང་བ་མ་དང་། གླུ་མ་དང་། གར་མ་དང་། མེ་
[186b]
[186b.1]ཏོག་མ་དང་། བདུག་སྤོས་མ་དང་། མར་མེ་མ་དང་། དྲི་ཆབ་#མ་སྟེ་རྣལ་འབྱོར་མ་བརྒྱད་ཀྱིས་ཡོངས་སུ་བསྐོར་བའོ། །དེ་ཐམས་ཅད་ཀྱང་ཡོངས་སུ་གྱུར་པ་ལས་ཡེ་ཤེས་ཀྱི་ཟླ་བ་བསྐྱེད་དེ། དེ་ལས་སྐྱེས་པའི་པདྨ་ལ། དེའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟིའོ#། །སླར་ཡང་དེའི་སྟེང་དུ་
[186b.2]ཟླ་བའི་དཀྱིལ་འཁོར་ལ། དེའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་#གཉིས་པའོ། །སླར་ཡང་དེ་ཐམས་ཅད་ཡོངས་སུ་གྱུར་པ་ལས་སྣ་ཚོགས་པདྨ་ལ་བཞུགས་པ་ཆོས་འཆད་ཀྱི་ཕྱག་རྒྱ་ཅན་གསེར་གྱི་མདོག་ལྟ་བུ་ཡན་ལག་ཐམས་ཅད་ལ་དེ་བཞིན་གཤེགས་པ་ཐམས་ཅད་ཀྱིས་#རྒྱན་
[186b.3]དུ་མཛད་པ། ཡང་གཡོན་དང་གཡས་ན་ཨུཏྤ་ལ་དང་བཅས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་གཉིས་པ་#བསྣམས་པ། དེ་བཞིན་གཤེགས་པ་ལྔའི་དབུ་རྒྱན་ཅན། སངས་རྒྱས་དང་བྱང་ཆུབ་སེམས་དཔའི་སྲས་ཀྱིས་ཡོངས་སུ་བསྐོར་བ། ཤེས་རབ་ཀྱི་ཕ་རོལ་ཏུ་ཕྱིན་པ་ལས་#ཉེ་བར་
[186b.4]འཁྲུངས་པ་སྟེ། དེ་ལྟ་བུའི་ཤེས་རབ་ཀྱི་ཕ་རོལ་ཏུ་ཕྱིན་མ་#བསྒོམ་པར་བྱའོ། །གང་གི་ཚེ་བསམ་གཏན་མི་ནུས་ན་དེའི་ཚེ་སྔགས་བཟླས་པར་བྱའོ། །ཨོཾ་ཨཱཿ#དྷཱིཿཧཱུཾ་སྭཱཾ་སྭཱ་ཧཱ། ཞེས་སོ། །བཟླས་པའི་དུས་སུ་ཡང་དཔྲལ་བར་ཨོཾ་ཡིག་སེར་པོར་#བལྟ་བར་བྱའོ། །དེ་བཞིན་དུ་མགྲིན་པར་ཨཱཿཡིག་
[186b.5]དཀར་པོའོ། །ཡང་ཐུགས་ཀར་དྷཱིཿཡིག་སེར་པོའོ། །ཡང་ལྟེ་བར་ཧཱུཾ་ཡིག་སྔོན་#པོའོ། །ཞེས་སོ། །ཤེས་རབ་ཕ་རོལ་ཕྱིན་མ་#ཡི། །ལྷ་མོ་འདི་བཞིན་སྒོམ་བྱེད་པ། །བློ་ལྡན་གང་ཞིག་ཀུན་མཁྱེན་གྱི། །གོ་འཕང་ཐོབ་#འགྱུར་ཐེ་ཚོམ་མེད། །ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས་
[186b.6]སློབ་དཔོན་འཕགས་པ་ཐོགས་མེད་ཀྱིས་མཛད་པ་རྫོགས་སོ།།{T3551}༄༅༅ །རྒྱ་གར་སྐད་དུ། ཨཱརྱ་བཛྲ་སྭ་ར་སྭ་ཏཱི་སཱ་དྷ་ནཾ། བོད་སྐད་དུ། འཕགས་མ་རྡོ་རྗེ་དབྱངས་ཅན་མའི་སྒྲུབ་ཐབས། འཕགས་མ་རྡོ་རྗེ་དབྱངས་ཅན་མ་ལ་ཕྱག་འཚལ་ལོ། །ཡང་དག་རྫོགས་སངས་
[186b.7]རྒྱས་གསུངས་གསལ་སྦྱིན་ཡོན་ཏན་རང་བཞིན་རྡོ་རྗེ་དབྱངས་ཅན་མར་བཏུད་ནས། །རང་ལ་ཕན་པ་ཡང་དག་སྒྲུབ་མཛད་མཛེས་པའི་ཉམས་ལྡན་རྩོད་པས་ཐུབ་པར་དཀའ་མཛད་མ། །དེ་ཡི་སྒྲུབ་ཐབས་འདི་ནི་ཀུན་ནས་ཡང་དག་མི་བཟད་མི་ཤེས་མུན་པ་འཇོམས་མཛད་པ། །བློ་ངན་རྣམས་ཀྱིས་
[187a]
[187a.1]རྟོགས་ཕྱིར་སེམས་ཅན་ཕན་ཕྱིར་ལེགས་པར་གསུངས་པའི་ཆོ་གས་བཤད་པར་བྱ། །དང་པོར་སྔ་བར་ཁ་ལ་སོགས་པ་དག་པའི་རང་བཞིན་སྙིང་རྗེ་དང་ལྡན་བཟོད་ལྡན་པས། །སྔགས་པས་གཙང་བའི་སྟན་ལ་བྱམས་པའི་དགའ་བས་མྱོས་ཤིང་གང་ཞིག་དགའ་བ་དང་
[187a.2]ལྡན་པས། །གནས་ཀྱང་ཡིད་དུ་འོང་ཞིང་དབེེན་པར་ཡང་ནི་རང་གི་སྙིང་གར་ཆུ་སྐྱེས་བལྟ་བར་བྱ། །དེ་ལས་སྤྲུལ་པ་ལས་བྱུང་རི་བོང་འཛིན་པ་ཡང་དག་བསྒོམ་པར་བྱའོ་དེ་ལ་ཡང་། །དོཿཡིག་འོད་ཟེར་རྣམས་ཀྱིས་ཕྱོགས་དང་བར་རྣམས་ཀྱང་ནི་འདི་ཡིས་ཡོངས་སུ་གང་བར་གྱུར། །དེ་
[187a.3]ནས་སངས་རྒྱས་ཚོགས་རྣམས་མདུན་དུ་བལྟས་ནས་འདིར་ནི་མཆོད་པ་ལ་སོགས་བསྒོམ་པར་བྱ། །མེ་ཏོག་ལ་སོགས་དེ་ནས་ཕྱག་འཚལ་སླར་ཡང་འདིར་ནི་སྡིག་པ་རབ་ཏུ་བཤགས་པར་བྱ། །དེ་བཞིན་བསོད་ནམས་རྗེས་སུ་ཡི་རང་སྔགས་རིག་པ་ཡིས་གསུམ་ལ་སྐྱབས་སུ་ཡང་དག་
[187a.4]འགྲོ། །ཞེས་པ་ལ་སོགས་སྨོན་ལམ་ལེགས་བཏབ་དེ་ཡིས་བདག་ཉིད་ཀྱང་ནི་དམིགས་པ་རབ་ཏུ་བྱ། །གཅིག་དང་དུ་མ་དང་བྲལ་རང་བཞིན་ཡོངས་སུ་བརྗོད་པ་དྲི་མེད་ཡང་དག་ཤེས་རྟོགས་པ། །དེ་ནས་སྣ་ཚོགས་རྣམ་རྟོག་དྲ་བ་མ་ལུས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །ཨོཾ་ཤཱུ་ནྱ་
[187a.5]ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པ་ཉིད་ལས་བྱུང་བ་ཆུ་སྐྱེས་དང་ནི་ཟླ་བ་ལ་གནས་དོཿཡིག་དམར་པོ་སྟེ། སླར་ཡང་སྣ་ཚོགས་འོད་ཟེར་ཚོགས་རྣམས་ཤིན་ཏུ་མཛེས་པར་གྱུར་པའི་པདྨ་འདབ་བརྒྱད་པ། །དེ་ལ་དམར་ཞིང་འོད་ཟེར་ཆེན་པོ་དང་ལྡན་བཅོམ་ལྡན་འདས་མ་མཛེས་པའི་རྒྱན་
[187a.6]གྱིས་བརྒྱན། །གཡོན་བརྐྱང་བ་ཡི་ཞབས་ཀྱིས་ཡང་དག་གནས་ཤིང་ཞལ་གསུམ་ཕྱག་དྲུག་གིས་ནི་རབ་བརྒྱན་པ། །གཡས་པའི་ཞལ་ནི་སྔོ་ཞིང་ཕྱག་ན་པདྨ་རལ་གྲི་གྲི་གུག་རབ་ཏུ་བསྣམས་པ་སྟེ། །གཡོན་ཞལ་དཀར་ཞིང་ཕྱག་ན་ལྷུང་བཟེད་དང་བཅས་རིན་ཆེན་བཟང་དང་འཁོར་ལོ་
[187a.7]དེ་བཞིན་ནོ། །སྙིང་གར་པདྨ་ལ་གནས་ཟླ་བའི་དབུས་སུ་གནས་པའི་དེར་ཡང་དོཿཡིག་འོད་གསལ་བས། །སྣ་ཚོགས་མི་ཤེས་མུན་པ་འཇོམས་པའི་འོད་ཟེར་གྱིས་ནི་འགྲོ་བ་མ་ལུས་འགེངས་མཛད་པ། །ཡང་དག་བསྡུས་ལ་རང་གི་སྙིང་གར་ཟླ་བ་ལ་གནས་ས་བོན་བལྟས་ལ་སླར་ཡང་སྤྲོ། །
[187b]
[187b.1]དེ་ཉིད་ཡང་དང་ཡང་དུ་རྟག་ཏུ་སྙོམ་ལས་མེད་པར་ཉི་མ་སོ་སོར་བསམ་པར་བྱ། །བསམ་གཏན་ངལ་ན་ས་བོན་མཉམ་སྐྱེས་བསྡུས་ལ་སྔགས་འདི་ཡིས་ནི་བཟླས་པ་རབ་ཏུ་བྱ། །དོ་ཤལ་གཡོ་ཞིང་ཉིན་བྱེད་རིམ་པས་འབྱུང་བའི་ཡིད་བཞིན་དུ་ནི་སྔགས་ཀྱིས་བཟླས་པར་བྱའོ། །ཨོཾ་པི་ཙུ་པི་ཙུ་
[187b.2]པྲཛྙ་ཝརྡྷ་ནི། ཛྭ་ལ་ཛྭ་ལ། མེ་དྷ་ཝརྡྷ་ནི། དྷི་རི་དྷི་རི་བུདྷི་ཝརྡྷ་ནི་སྭཱ་ཧཱ། ཐུན་མཚམས་ཐམས་ཅད་དུ་ནི་ལྷ་མོའི་སྐུ་ལ་ཡིད་ནི་རྟག་ཏུ་རབ་ཏུ་དགའ་བ་ཡིས། །ཡང་དག་གསུངས་པའི་ཆོ་གས་སེམས་ཅན་རྣམས་གྱི་དོན་གྱུར་སྔགས་འདི་ཡོངས་སུ་བཟླས་པར་བྱ། །བསོད་ནམས་ཀྱང་ནི་ཡོངས་སུ་བསྔོ་
[187b.3]བྱ་དགོས་པ་བྱེད་ན་བསམ་གཏན་རྩེ་གཅིག་གནས་པར་སྤྱོད། །ཇི་སྲིད་འབུམ་ཕྲག་ཡོངས་སུ་མ་རྫོགས་པའམ་རྫོགས་ནས་ཀྱང་ནི་ལས་ཀྱི་རིམ་བཞིན་བྱ། །རྣམ་པ་ཐམས་ཅད་དུ་ནི་མི་མཐུན་ཕྱོགས་སུ་ཉེ་བར་ཡང་ཡང་དེ་ཉིད་བསམ་གཏན་བྱེད། །དཀར་པོའི་ཚེས་གཅིག་ནས་ནི་ཤིན་ཏུ་
[187b.4]དགེ་བའི་ཡིད་ཀྱིས་ཇི་སྲིད་ཟླ་བ་གནས་ཀྱི་བར། །དེ་སྲིད་ལེགས་སྦྱར་དེ་བཞིན་ནུབ་རེ་བཞིན་དུ་ཇི་སྲིད་ཟླ་བ་གང་བ་བཞིན་དུ་བྱ། །དེ་ཉིད་ཀྱི་ནི་མཚན་མོ་ཐུབ་པར་དཀའ་བའི་སྙན་ངག་མཁན་གྱི་དངོས་གྲུབ་ཐོབ་པར་འགྱུར། །གང་ཞིག་དཔལ་ལྡན་གཤིན་རྗེ་གཤེད་ཀྱི་རྒྱུད་ལ་གནས་ཤིང་དཔལ་
[187b.5]ལྡན་ནག་པོའི་གཟི་བརྗིད་ཀྱིས། །དཔལ་ལྡན་རྡོ་རྗེ་དབྱངས་ཅན་བཅོམ་ལྡན་འདས་མ་དེ་ཡི་ཡང་དག་སྒྲུབ་པའི་ཐབས་གྱུར་པ། །སེམས་ཅན་རྣམས་ལ་ཕན་པའི་དོན་དུ་བདག་གིས་བརྩམས་པའི་བསོད་ནམས་ཡང་དག་ཐོབ་གྱུར་པ། །དེ་ཡིས་འགྲོ་རྣམས་ནག་པོ་ལྟ་བུར་ཐུབ་པར་དཀའ་
[187b.6]བའི་སྙན་ངག་མཁན་དུ་གྲུབ་པར་ཤོག །སངས་རྒྱས་རྣལ་འབྱོར་དཔལ་འཛིན་གྱིས། །དཔལ་ལྡན་རྡོ་རྗེ་དབྱངས་ཅན་གྱི། །འཇོམས་བྱེད་མཐར་ནི་བྱེད་པ་ཡི། །སྒྲུབ་པའི་ཐབས་ནི་ལེགས་བྱས་སོ། །འཕགས་མ་རྡོ་རྗེ་དབྱངས་ཅན་མའི་སྒྲུབ་ཐབས་སློབ་དཔོན་དཔལ་འཛིན་གྱིས་མཛད་པ་
[187b.7]རྫོགས་སོ།། {T3552}༄༅༅། །རྒྱ་གར་སྐད་དུ། མ་ཧཱ་སྭ་ར་སྭ་ཏཱི་སཱ་དྷ་ནཾ། བོད་སྐད་དུ། དབྱངས་ཅན་མ་ཆེན་མོའི་སྒྲུབ་ཐབས། འཕགས་མ་དབྱངས་ཅན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་སྟོང་པ་ཉིད་ཇི་སྲིད་མངོན་དུ་བྱས་ཤིང་གནས་ནས་ཆུ་
[188a]
[188a.1]སྐྱེས་དཀར་པོ་ཁྲུ་བདུན་གྱི་ཚད་ཙམ། དེའི་སྟེང་དུ་ཟླ་བའི་དཀྱིལ་འཁོར། དེའི་དབུས་སུ་དྷྲཱིཿཡིག་དཀར་པོ། དེ་ལས་ཆུ་སྐྱེས་དཀར་པོ་ལ་རང་གི་ས་བོན་གྱི་སྙིང་པོ་ཅན་བསྒོམ་པར་བྱའོ། །དེ་ལས་ཡང་བཅོམ་ལྡན་འདས་མ་དབྱངས་ཅན་མ་ཆེན་མོ་རྗེས་སུ་བསམ་
[188a.2]པར་བྱའོ། །སྟོན་ཀའི་ཟླ་བའི་འོད་ཀྱི་རྣམ་པ་ཅན། ཆུ་སྐྱེས་དཀར་པོ་ལ་ཟླ་བའི་དཀྱིལ་འཁོར་ལ་བཞུགས་པ། ཕྱག་གཡས་པ་མཆོག་སྦྱིན་པ། གཡོན་པ་སྡོང་བུ་དང་བཅས་པའི་ཆུ་སྐྱེས་དཀར་པོ་བསྣམས་པ། ཞལ་འཛུམ་ཞིང་ཤིན་ཏུ་བརྩེ་བའི་བདག་ཉིད་ཅན། ཙནྡན་དཀར་པོ་དང་
[188a.3]མེ་ཏོག་གི་ན་བཟའ་མནབས་པ། མུ་ཏིག་གི་དོ་ཤལ་གྱིས་ཐུགས་ཀ་ཉེ་བར་མཛེས་པ་རིན་པོ་ཆེ་སྣ་ཚོགས་ཀྱི་རྒྱན་དང་ལྡན་པ་ལོ་བཅུ་གཉིས་ཀྱི་རྣམ་པ་ཅན། ནུ་མ་འབུར་ཞིང་ནང་རྒྱས་པ། རྐེད་པ་བྱིན་གྱིས་ཕྲ་བ། ནང་ནས་འོད་ཟེར་གྱི་ཚོགས་འཕྲོ་བས་འཇིག་རྟེན་གསུམ་པོ་སྣང་བར་མཛད་
[188a.4]པའོ། །དེ་ནས་དེའི་མདུན་དུ་བཅོམ་ལྡན་འདས་མ་ཤེས་རབ་མའོ། །གཡས་སུ་བློ་ཅན་མའོ། །རྒྱབ་ཏུ་བློ་གྲོས་མའོ། །གཡོན་དུ་དྲན་པ་མའོ། །འདི་རྣམས་རང་གི་གཙོ་མོ་དང་སྐུ་མདོག་ལ་སོགས་པ་མཚུངས་ཤིང་། ཞལ་མངོན་པར་ཕྱོགས་པས་བཞུགས་པར་བསམ་པར་བྱའོ། །
[188a.5]དེ་ནས་རང་གི་ལྟེ་བའི་ཕྱོགས་སུ་ཟླ་བའི་དཀྱིལ་འཁོར་ལ་ཨོཾ་ཡིག་དཀར་པོ་བསྒོམས་ནས་དེ་ལས་བྱུང་བའི་ངག་གི་རང་བཞིན་མ་ལུས་པའི་ཕྲེང་བ་བར་མ་ཆད་པ་རབ་ཏུ་འབབ་བཞིན་པ་བསམས་ནས་སྔགས་ཀུན་ནས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཧྲཱིཿམཧཱ་མཱ་ཡཾ་གེ་མ་ཧཱ་སྭ་ར་
[188a.6]སྭ་ཏྱེ་ན་མཿདེ་བཞིན་དུ་གསོ་སྦྱོང་བླངས་ནས་མི་སྨྲ་བར་གནས་ནས་རྒྱུན་དུ་ལྷའི་ང་རྒྱལ་དང་བཅས་པས་སྔགས་བཟླས་ཤིང་ལས་གཞན་མི་བྱེད་པས་ཟླ་བ་གཅིག་གིས་དབྱངས་ཅན་མའི་ངག་ཐོབ་པར་འགྱུར་རོ། །ཟླ་བ་གསུམ་གྱིས་ཚངས་པར་སྤྱོད་པ་ཉམས་པས་ཀྱང་འགྲུབ་པོ། །ཟླ་བ་
[188a.7]དྲུག་གིས་དབྱངས་ཅན་མ་དང་མཚུངས་པར་འགྱུར་རོ་ཞེས་སོ། །དེ་ནས་སྨན་བརྗོད་པར་བྱ་སྟེ། རའི་འོ་མ་དང་། ཨ་རུ་ར་དང་། ཚ་བ་གསུམ་དང་། མ་ནུ་པ་ཏྲ་དང་། ཤུ་དག་དང་། སེ་འབྲུ་དང་། རྒྱམ་ཚ་རྣམས་མར་ལ་ལན་བདུན་མངོན་པར་བསྔགས་ནས་འཐུངས་ན། དབྱངས་ཅན་
[188b]
[188b.1]མའི་དངོས་གྲུབ་ཏུ་འགྱུར་རོ། །ཡོན་ཏན་བཞི་འགྱུར་ར་འོ་མ། །མར་བཅུག་ནས་ནི་བཙོ་བར་བྱ། །བློ་ལྡན་མི་ནི་དལ་འཇམ་གྱིས། །སྨན་ནི་ཚོས་པ་ཙམ་གྱིས་སོ། །ཟླ་བ་གཅིག་ཙམ་རབ་སྦྱོར་བས། །བླ་མེད་དག་ནི་ཐོབ་པར་འགྱུར། །ཟླ་བ་དྲུག་ཏུ་ལས་སྦྱོར་བས། །ངག་གི་དབང་
[188b.2]ཕྱུག་མངོན་གསུམ་འགྱུར། །ཁུ་བྱུག་མྱོས་པའི་དབྱངས་དང་ལྡན། །སྙན་པའི་དབྱངས་ནི་སྐྱེ་འགྱུར་ཏེ། །སེམས་ཉིད་བསྒོམས་པའི་ནུས་པ་ཡིས། །འདིར་ནི་ཐེ་ཚོམ་མི་བྱའོ། །དབྱངས་ཅན་མ་ཆེན་མོའི་སྒྲུབ་ཐབས་རྫོགས་སོ།། {T3553}༄༅༅། །རྒྱ་གར་སྐད་དུ། བཛྲ་སྭ་ར་སྭ་
[188b.3]སྟཱི་སཱ་དྷ་ནཾ། བོད་སྐད་དུ། རྡོ་རྗེ་དབྱངས་ཅན་མའི་སྒྲུབ་ཐབས། འཕགས་མ་དབྱངས་ཅན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྙིང་གར་ཆུ་སྐྱེས་དམར་པོ་ཟླ་བ་ལ་དོཿཡིག་དམར་པོའི་ས་བོན་ཡོངས་སུ་གྱུར་པ་ལས་ཆུ་སྐྱེས་དམར་པོ་འདབ་མ་བརྒྱད་པ་ལ་རང་གི་ས་བོན་གྱི་
[188b.4]སྙིང་པོ་ཅན། དེ་ཡོངས་སུ་གྱུར་པ་ལས། བཅོམ་ལྡན་འདས་མ་རྡོ་རྗེ་དབྱངས་ཅན་མ་ཞལ་གསུམ་པ། ཕྱག་དྲུག་པ། སྐུ་མདོག་དམར་མོ་སྤྱན་གསུམ་མ། སྔོན་པོ་དང་དཀར་པོ་ནི་གཡས་དང་གཡོན་གྱི་ཞལ་ལོ། །པདྨ་དང་། རལ་གྲི་དང་། གྲི་གུག་རྣམས་ཕྱག་གཡས་པ་རྣམས་ན་
[188b.5]བསྣམས་པ། ཐོད་པ་དང་། རིན་པོ་ཆེ་དང་། འཁོར་ལོ་རྣམས་ཕྱག་གཡོན་པ་རྣམས་ན་བསྣམས་པ། ཞབས་གཡོན་བརྐྱང་བའི་གཞོན་ནུ་མའི་ལང་ཚོ་དང་ལྡན་པ། རྒྱན་སྣ་ཚོགས་པ་འཆང་བ། ཐུགས་ཀར་གནས་པའི་ས་བོན་གྱི་མཚན་མས་གཞན་གྱི་དོན་མཛད་པར་སྤྲོ་བའི་བདག་ཉིད་
[188b.6]བསྒོམས་ནས། ཨོཾ་པི་ཙུ་པི་ཙུ་པྲཛྙཱ་བརྡྷ་ནི། ཛྭ་ལ་ཛྭ་ལ་མེ་དྷ་བརྡྷ་ནི། དྷི་རི་དྷི་རི་བུ་དྷི་བརྡྷ་ནི་སྭཱ་ཧཱ། ཞེས་པའི་སྔགས་བཟླས་པར་བྱའོ། །རྡོ་རྗེ་དབྱངས་ཅན་མའི་སྒྲུབ་ཐབས་རྫོགས་སོ།། {T3554}༄༅༅། །རྒྱ་གར་སྐད་དུ། བཛྲ་སྭ་ར་སྭ་ཏཱི་སཱ་དྷ་ནཾ། བོད་སྐད་དུ། རྡོ་རྗེ་དབྱངས་ཅན་མའི་
[188b.7]སྒྲུབ་ཐབས། རྡོ་རྗེ་དབྱངས་ཅན་མ་ལ་ཕྱག་འཚལ་ལོ། །དཔལ་སྟུག་སྟོན་ཀའི་བདུད་རྩིའི་འོད། །ཀུ་མུ་ད་བཞིན་བླ་མེད་གང་། །འགྲོ་བའི་མི་ཤེས་མུན་ཞི་མཛད། །རྒྱལ་གྱུར་རྡོ་རྗེ་དབྱངས་ཅན་མ། །དེ་ཡི་མན་ངག་ཉེར་བསྡུས་ནས། །དེ་ཡི་སྒྲུབ་ཐབས་བརྗོད་པར་བྱ། །མཁའ་འགྲོ་མ་ཡི་རྡོ་རྗེ་
[189a]
[189a.1]གུར། །ཀུན་ནས་བསྟན་པ་བརྗོད་པར་བྱ། །གཙང་ཞིང་ཡིད་འོང་གནས་སུ་ནི། །བདེ་བའི་སྟན་ལ་འདུག་ནས་ནི། །དད་ཅིང་ལས་གཞན་མེད་པ་ཡིས། །རྗེས་འཇུག་ཐུན་མཚམས་གསུམ་དུ་བསྒོམ། །བརྩེ་བའི་མཐུ་ཡིས་རྫོགས་བྱང་ཆུབ། །སྨོན་ལམ་ཡོངས་སུ་
[189a.2]འདྲེན་པ་ཡིས། །རྨི་ལམ་སྒྱུ་མའི་དཔེ་བཞིན་དུ། །ཁམས་གསུམ་མ་ལུས་བརྟག་པར་བྱ། །ཉི་ཟླ་ས་བོན་འོད་ཟེར་གྱིས། །དེ་བཞིན་གཤེགས་རྣམས་གདན་དྲངས་ནས། །ཀུན་ལ་ཕན་འདོད་བསམ་པ་ཡིས། །མཆོད་ཅིང་སྡིག་པ་མ་ལུས་བཤགས། །དེ་ནས་སླར་ཡང་མི་བྱེད་པའི། །དམ་
[189a.3]བཅའ་ཡང་ནི་བརྩམ་པར་བྱ། །བསོད་ནམས་ལ་ནི་རྗེས་ཡི་རང་། །རྫོགས་པའི་བྱང་ཆུབ་བསྔོ་བར་བྱ། །དཀོན་མཆོག་གསུམ་ལ་སྐྱབས་སུ་མཆི། །བྱང་ཆུབ་ཏུ་ནི་སེམས་བསྐྱེད་བྱ། །ཀུན་མཁྱེན་རྣམས་ཀྱི་བྲན་ཉིད་དུ། །བདག་ཉིད་ངེས་པར་དབུལ་བར་བྱ། །བྱམས་པ་ལ་སོགས་བསྒོམ་བྱ་
[189a.4]ཞིང་། །ཞེ་སྡང་ལ་སོགས་ཞི་བར་བྱ། །དེ་ནས་འོད་ཟེར་གྱིས་གང་བའི། །ས་བོན་སྙིང་པོ་ལས་བྱུང་བའི། །ཕྱོགས་ཀྱི་སྒོ་རྣམས་སྣང་བྱ་ཞིང་། །འོད་ཟེར་དཀར་པོ་རབ་གསལ་འབར། །པདྨ་ཟླ་བའི་གདན་ལ་ནི། །རྡོ་རྗེ་སྐྱིལ་མོ་ཀྲུང་གིས་བཞུགས། །ཕྱེད་གཡོ་བུང་བའི་ཡན་ལག་ཅན། །
[189a.5]དཔལ་གྱི་སྐྲ་ཡིས་ལེགས་པར་བརྒྱན། །པདྨ་དམར་པོ་རབ་རྒྱས་བཞིན། །དཔལ་གྱི་ཕྱག་གཡས་རབ་མཛེས་པ། །མཛེས་པའི་ན་བཟའ་སྣ་ཚོགས་དང་། །དཔལ་གྱི་སྐུ་ནི་ཕུན་སུམ་ཚོགས། །ཤེས་རབ་ཕ་རོལ་ཕྱིན་འོད་གསལ། །ཕྱག་གཡོན་གྱིས་ནི་ཆུ་སྐྱེས་ཅན། །བརྒྱད་གཉིས་
[189a.6]ལོ་ལོན་རྣམ་པ་ཅན། །ན་བཟའ་ཁ་དོག་དཀར་པོ་བསྣམས། །ཟླ་བའི་ས་བོན་སོགས་སྐྱེས་པའི། །འཕགས་མ་དབྱངས་ཅན་མ་ཉིད་བལྟ། །སྙིང་གར་ཤེལ་གྱི་རྣམ་པ་ཅན། །ཟླ་བའི་དཀྱིལ་འཁོར་དབུས་སུ་སོན། །ཟླ་ཕྱེད་སྐར་མ་དང་བཅས་བཞིན། །ཐིག་ལེ་ནཱ་དས་ཡོངས་སུ་བརྒྱན། །
[189a.7]འོད་ཟེར་ཀུན་ནས་འཕྲོ་བ་ཅན། །དཔལ་གྱི་སྒྲ་ཡིས་རྣམ་པར་བརྒྱན། །ངག་གི་རྣམ་པ་ཀུན་ཚོགས་པའི། །ཨཾ་ཡིག་ས་བོན་རྣམ་པར་འཛིན། །ཛཿཡིག་ལ་སོགས་སྔགས་རྣམས་ཀྱིས། །དགུག་པ་ལ་སོགས་རབ་སྒྲུབ་ཐབས། །རང་ལུས་རང་གི་ལྷག་ལྷའི་སྐུ། །དབྱེར་མེད་རབ་
[189b]
[189b.1]སྒྲུབ་དེ་རྗེས་སུ། །འདི་ནི་གཞུག་པར་ངེས་པ་ཡི། །རྒྱལ་བ་རྣམས་ཀྱི་སྐུ་ནི་འཇུག །སྔགས་པས་ས་བོན་ལས་བྱུང་བའི། །དེ་ཉིད་སྦྱོར་བས་ཉིན་མཚན་དུ། །ཟླ་བ་དྲུག་ཏུ་གོམས་པ་ཡིས། །ལྷག་པའི་ཤེས་རབ་ཐོབ་པར་འགྱུར། །མཚན་མོ་བདུན་དུ་མངོན་སྦྱོར་བས། །བསྟན་བཅོས་
[189b.2]ཀུན་ལ་མཁས་པར་འགྱུར། །བསམ་གཏན་ལྡན་པས་ངལ་གྱུར་ན། །བློ་གཞན་མིན་པས་བཟླས་པ་བྱ། །ལྟེ་བར་ཟླ་བའི་ས་བོན་ནས། །ཡི་གེ་རྣམས་ཀྱི་འཕྲོ་འདུ་ལས། །ཁ་ནས་གོང་དང་དེ་ནས་འོག །དེ་ནས་སྟེང་དུ་རིམ་པ་ཡིས། །མུ་ཏིག་རིན་ཆེན་བགྲང་ཕྲེང་གིས། །མཚུངས་པར་
[189b.3]ཀུན་ནས་སྣང་བ་ལས། །གོང་ནས་གོང་དུ་འཇུག་རྣམས་ཀྱིས། །དབྱངས་དང་ནང་དང་ཕྱི་རྣམས་སུ། །འཁོར་ཞིང་སྔགས་ཀྱི་ཕྲེང་བ་རྣམས། །དུས་མཚུངས་ཉིད་ལ་དམིགས་པར་བྱ། །བཾ་ཡིག་ལས་སྐྱེས་མཚན་ཉིད་འདི། །ས་བོན་དང་པོ་ལ་གཞུག་བྱ། །ལྟེ་བའི་དབུས་ཀྱི་ས་བོན་
[189b.4]གྱི། །གྲུབ་པ་དེ་བཞིན་ཉེ་བར་དབུལ། །དེ་བཞིན་ཏིང་འཛིན་ལ་དམིགས་ནས། །མཚན་ཉིད་རྒྱུན་མ་ཆད་པར་བཟླ། །ཀུན་ནས་འཁོར་ཞིང་སླར་ཡང་ནི། །བརྟུལ་ཞུགས་མ་ཉམས་མཚན་ཉིད་གསལ། །བཀླགས་པ་ཙམ་གྱིས་དེ་འབྲས་བུ། །གཞུང་ནི་བརྒྱ་རྣམས་འཛིན་པར་འགྱུར། །
[189b.5]གང་ཞིག་འདོད་ན་ཉིན་རེ་བཞིན། །ཤློ་ཀ་ནི་བརྒྱ་རྣམས་རྩོམ། །ཚངས་པར་སྤྱོད་ཅིང་ཤ་དག་དང་། །ཆང་ལ་སོགས་པ་རྣམ་པར་སྤང་། །ཉིན་རེ་བཞིན་དུ་ཁྲུས་བྱ་ཞིང་། །ཆོ་ག་འདི་བཞིན་ཉེར་བསྟེན་པས། །གོས་ནི་ལན་གསུམ་བགོ་བྱ་ཞིང་། །དུས་མིན་ཁ་ཟས་སྤང་བར་བྱ། །ཆུ་རྣམས་
[189b.6]ཀྱང་ནི་སོ་སོར་བརྟག །ཆོ་ག་འདི་ཡང་འདོད་པ་སྟེ། །ཚངས་པར་སྤྱོད་པ་སྲུང་བྱེད་ན། །གཞན་པ་རྣམས་ནི་མ་བསྲུངས་ཀྱང་། །འབྲས་བུ་ལ་དམིགས་མྱུར་མིན་ལས། །འོན་ཀྱང་གཏན་མེད་མ་ཡིན་ནོ། །ཚངས་པར་སྤྱོད་པ་བསྐྱང་བྱ་ཞིང་། །མྱོས་བྱེད་སྤྱོད་པ་སྤང་བར་བྱ། །རྗེས་སུ་
[189b.7]འགྲོ་དང་ལྡོག་པ་དག །མཚུངས་པར་འབྲས་བུ་བརྟན་པར་བྱ། །དེ་ལས་འབྲས་བུ་བརྒྱད་མིན་པའི། །ཡོངས་རྫོགས་ཆོ་ག་བརྩམ་པར་བྱ། །ཁམས་གསུམ་ངོ་མཚར་ནུས་པ་ཡི། །འདི་ལ་རབ་ཏུ་རྒྱས་པར་འགྱུར། །ཆུ་སྐྱེས་སྟན་ནི་མཐོ་བ་ལ། །ཁ་དོག་རྣམས་ནི་དཀར་བར་འདོད། །
[190a]
[190a.1]བྱ་རོག་མི་གྲག་ཤེས་པ་ཡིས། །མཁས་པས་རྗེས་སུ་གནང་བ་འཐོབ། །རྗེས་སུ་འགྲོ་དང་ལྡོག་པ་འམ། །ཇི་ལྟ་ཇི་ལྟར་དངོས་གྲུབ་རིག །མར་མེ་མཐོང་བས་རྨི་ལམ་དུ། །ལྡན་པའམ་ནི་མི་ལྡན་ཡང་། །བྱ་རོག་སྒྲ་ནི་མི་གྲག་པར། །རྩབ་མོ་ཁྱོར་བ་གང་ལ་ནི། །རང་
[190a.2]གི་སྔགས་ཀྱིས་མངོན་པར་བསྔགས། །ཁམ་ཕོར་ཕྱེད་ཕྱེད་བཏུང་བར་བྱ། །རང་གིས་བླངས་དང་རང་ཉིད་ཀྱིས། །བརྡ་བྱས་མིན་པ་གཞན་སྟོབས་པ། །མཁས་པས་མི་བླངས་ཆོ་ག་ཡིས། །བསླངས་པ་ཉིད་ན་མ་ཡིན་ངེས། །འདི་ནི་དང་པོར་ཤེས་རབ་གྲུབ་པར་བདེ་བར་གཤེགས་རྣམས་
[190a.3]ཀྱིས། །མན་ངག་ཉེར་བསྟན་གང་ལས་རྒྱ་ཆེན་ཤིན་ཏུ་མཁས་པ་སྟེ། །དེ་ཡིས་མྱུར་དུ་ངོ་མཚར་ཤིན་ཏུ་བླ་ན་མེད་དུ་བྱེད། །སྐྱེ་བོ་འདིས་ནི་ཐམས་ཅད་མཁྱེན་པ་ལ་སོགས་གོ་འཕང་ཐོབ། །འཕགས་པ་སྤྱན་རས་གཟིགས་དབང་ཞབས་ཀྱི་ཆུ་སྐྱེས་ལས། །འདུད་པས་སྡིག་པ་དག་འགྱུར་
[190a.4]མཁས་པའི་བློ་གྲོས་ཀྱི། །ཚུལ་ལུགས་རྒྱ་ཆེར་རབ་ཏུ་གྲགས་པ་ཐོབ་གྱུར་པའི། །དགེ་སློང་ཡིད་ཀྱི་ཤིང་རྟ་བསྐྱོད་པས་འདི་བརྩམས་སོ། །དང་པོ་འཁོར་ལོ་འཛིན་པ་དེ་ནས་པི་ཙུ་ཟུང་ལྡན་པྲཛྙཱ་དང་ལྡན་ཝརྡྷ་ནི། །དེ་ནས་འབར་བ་ཟུང་ལྡན་དེ་ཡི་ཕ་རོལ་མེ་དྷ་ཕྱི་ནས་ཝརྡྷ་ནི་དང་ཕྱིས། །དྷི་རི་གཉིས་
[190a.5]ལྡན་དེ་བཞིན་བུ་དྷི་ཝརྡྷ་ནི་དང་སྭཱ་ཧཱ་ཞེས་པའི་མཐའ་ཅན་རྣམས། །མཁས་སོགས་གྱུར་པ་རྣམས་ཀྱིས་བདེ་བར་གཤེགས་པ་རྣམས་ཀྱིས་གསང་སྔགས་དེ་འདིར་ལེགས་པར་གསུངས། །རྡོ་རྗེ་དབྱངས་ཅན་མའི་སྒྲུབ་ཐབས་རྫོགས་སོ།། {T3555}༄༅༅། །རྒྱ་གར་སྐད་དུ། བཛྲ་བཱི་
[190a.6]ཎ་སྭ་ར་སྭ་ཏཱི་སཱ་དྷ་ནཾ། བོད་སྐད་དུ། རྡོ་རྗེ་པི་ཝང་དབྱངས་ཅན་མའི་སྒྲུབ་ཐབས། རྡོ་རྗེ་དབྱངས་ཅན་མ་ལ་ཕྱག་འཚལ་ལོ། །དང་པོར་ཆོས་ཞབས་ལ་བཏུད་ནས། །ཤེས་རབ་དེ་ཉིད་ཉེར་སྟོན་པའི། །འཁོར་ལོ་འཇིག་རྟེན་ཕན་འབྱུང་བའི། །དབྱངས་ཅན་མ་འདིར་བཤད་པར་བྱ། །གང་
[190a.7]ཞིག་བདེ་བའི་སྟན་ལ་གནས། །སྟོང་ཉིད་རྣལ་འབྱོར་བསྒོམ་པར་བྱ། །ས་བོན་ཆུ་སྐྱེས་དེ་བཞིན་དུ། །བདུན་པའི་གཉིས་པ་ལ་གནས་པའི། །བརྒྱད་པ་ཡི་ནི་བཞི་པ་ལས། །དང་པོ་ཡི་ནི་བཞི་པས་བརྒྱན། །དེ་ལ་ཐིག་ལེ་དང་བཅས་པ། །དེ་ལས་བྱུང་བའི་དབྱངས་ཅན་མ། །པི་ཝང་སྒྲོགས་
[190b]
[190b.1]ཤིང་དེ་བཞིན་དུ། །ཟླ་བ་དཀར་པོའི་འོད་གསལ་ལ། །རྒྱན་རྣམས་ཀུན་གྱིས་རྣམ་པར་བརྒྱན། །དེས་བཞུགས་ལྷ་མོ་ཆེན་མོ་ནི། །འཕེལ་བྱེད་ཀྱི་གནས་བསམ་པར་བྱ། །དང་པོའི་ཡི་གེ་ལས་སྐྱེས་པའི། །འཁོར་ལོ་རྩིབས་བརྒྱད་ཀྱིས་བརྒྱན་པ། །དེ་དབུས་ཟླ་བ་ལ་གནས་པ། །དེ་
[190b.2]ཡི་ས་བོན་བརྟན་པར་བསམ། །དེ་ལས་དེ་ཡི་འོད་ཟེར་གྱིས། །བདག་གི་ལུས་འདི་སྣང་བར་མཛད། །དེ་ནས་བ་སྤུའི་ཁུང་ནས་ནི། །འཐོན་གྱུར་སྲིད་པ་མ་ལུས་པའི། །མི་ཤེས་རབ་རིབ་བཅོམ་ནས་ནི། །སླར་ཡང་རང་ཉིད་ལ་ཞུགས་ཏེ། །ལྔ་པའི་འོག་ནས་དྲུག་པ་ཡི། །དབྱངས་ལ་
[190b.3]ཐིག་ལེ་གཉིས་ཀྱིས་བརྒྱན། །ཨ་ཨཱི་སྔོན་བཞིན་ཨུ་དང་ཨཻ། །ཨོཾ་དང་ཨཿཡིས་ཉེ་བར་མཚོན། །སྙིང་ག་སྤྱི་བོའི་གཙུག་དང་ནི། །མགྲིན་པ་མིག་དང་ཕྲག་པ་ལ། །ཆོ་ག་འདི་ཡིས་བཀོད་ནས་ནི། །འདི་ཡིས་ཚངས་པར་སྤྱད་པར་བྱ། །དེ་རྗེས་འཁོར་ལོ་འཁོར་བ་ཡིས། །མུན་ཆེན་སྙིང་ལ་
[190b.4]གནས་པ་ལ། །མི་གཡོ་རང་གི་ས་བོན་ལ། །བློ་དང་ལྡན་པས་བརྟན་པར་བསྒོམ། །དེ་ནས་འབུམ་དུ་བཟླས་པར་བྱ། །བདུན་གྱི་གྲངས་དང་ལྡན་པ་ཡིས། །རྣམ་སྤྱོད་རབ་ཏུ་དངས་པ་ཡིས། །ཐུགས་ཀར་ལྷ་མོ་དབྱངས་ཅན་མ། །ཚིགས་བཅད་རྐྱང་པ་མ་ལུས་པའི། །རང་བཞིན་གཉིས་
[190b.5]པ་ངག་དབང་བཞིན། །སྔོན་མ་མཐོང་བ་ཤེས་པར་འགྱུར། །སྔགས་སོགས་ཀུན་གྱི་ངག་རང་བཞིན། །སྙན་ངག་རྒྱལ་པོ་འཁོར་ལོ་འདི། །དེ་དོན་ལོ་ཕྱེད་བསྟེན་པས་འཕེལ། །སྟེན་བྱེད་རྟ་དབྱངས་དང་མཚུངས་པ། །ཡུན་མི་རིང་བས་སྟེར་བར་བྱེད། །རྡོ་རྗེ་པི་ཝང་དབྱངས་ཅན་མའི་
[190b.6]སྒྲུབ་ཐབས་རྫོགས་སོ།། {T3556}༄༅༅། །རྒྱ་གར་སྐད་དུ། བཛྲ་སྭ་ར་སྭ་ཏཱི་སཱ་དྷ་ནཾ། བོད་སྐད་དུ། །རྡོ་རྗེ་དབྱངས་ཅན་མའི་སྒྲུབ་ཐབས། རྡོ་རྗེ་དབྱངས་ཅན་མ་ལ་ཕྱག་འཚལ་ལོ། །སྙིང་གར་ཨ་ཡིག་བལྟ་ཞིང་ཡོངས་སུ་གྱུར་ལས་ཟླ་བའི་དཀྱིལ་འཁོར་བསམ། །དེ་
[190b.7]ལས་པདྨ་དེ་སྟེང་མཛེས་པའི་ཧྲཱིཿཡིག་དེ་དང་དེ་ལས་ནི། །ཕྱི་ནས་བ་སྤུའི་ཁུང་ནས་རིམ་པས་ངག་གི་འོད་ཟེར་ལྷ་མོ་སྟེ། །དེ་ལས་བྱུང་བའི་བློ་གྲོས་ཆེན་པོ་དཔལ་གྱི་ས་བོན་ལྕགས་ཀྱུ་ཡིས། །ཆུ་སྐྱེས་དཀར་པོའི་སྟེང་ན་སྐུ་ནི་མཛེས་བཞུགས་པ། །སྤྱན་གསུམ་དབུ་རྒྱན་ཟླ་བ་ཕྱེད་པས་ཡང་
[191a]
[191a.1]དག་བརྒྱན། །ཕྱག་གཡོན་པུསྟི་བསྣམས་ཤིང་ཕྱག་གཞན་ཆུ་སྐྱེས་ཏེ། །ཕྱི་ནས་རང་ལུས་དང་མཚུངས་ཡིད་ཀྱིས་རབ་ཏུ་འབད། །དེ་ནས་བསམ་གཏན་ངལ་གྱུར་ན། །མཉམ་གཞག་ནས་ནི་བཟླས་པ་བྱ། །བླ་མའི་བཀའ་ཡིས་དབང་ཐོབ་ནས། །ལུས་དང་སྤྱོད་
[191a.2]པ་གཙང་ལྡན་པས། །ཏ་མཐའ་ར་མཐའ་ཡང་དག་ལྡན། །ས་མཐའ་ཨི་ཡི་དབྱངས་ཀྱིས་མཛེས། །ཟླ་ཕྱེད་ཐིག་ལེས་མནན་གྱུར་པ། །བླ་མ་ལས་བལྟ་ཕྲི་ཞིང་བཟླས། །རྡོ་རྗེ་དབྱངས་ཅན་མའི་སྒྲུབ་ཐབས་རྫོགས་སོ།། {T3557}༄༅༅། །རྒྱ་གར་སྐད་དུ། བཛྲ་སྭ་ར་སྭ་
[191a.3]ཏཱི་སཱ་དྷ་ནཾ། བོད་སྐད་དུ། རྡོ་རྗེ་དབྱངས་ཅན་མའི་སྒྲུབ་ཐབས། རྡོ་རྗེ་དབྱངས་ཅན་མ་ལ་ཕྱག་འཚལ་ལོ། །བྱི་རུ་ནོར་བུའི་འོད་ཅན་ཤིན་ཏུ་མཛེས། །དང་པོར་རྡོ་རྗེ་དབྱངས་ཅན་མ་ནི་ཞལ་གསུམ་མ། །པདྨ་རལ་གྲི་གྲི་གུག་འཁོར་ལོ་དཀར་པོ་དང་། །པི་ཝང་རིན་ཆེན་ཚངས་པ་བསྣམས་ལ་མགོས་
[191a.4]ཕྱག་འཚལ། །ཡིད་དང་མཐུན་པའི་དབེན་པའི་ས་ཕྱོགས་སུ་སྟན་བདེ་བའི་སྟེང་དུ་ཉེ་བར་འདུག་སྟེ། རང་གི་སྙིང་གར་ཟླ་བའི་དཀྱིལ་འཁོར་ལ་དབྱངས་ཡིག་དང་པོ་ལས་བྱུང་བ་བསྒོམ་པར་བྱའོ། །དེའི་སྟེང་དུ་དོཿཡིག་གི་ས་བོན་ལས་ནོར་བུ་པདྨ་རཱ་གའི་འོད་དང་མཚུངས་པའོ། །དེ་ལས་
[191a.5]བྱུང་བའི་འོད་ཟེར་གྱིས་བླ་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཡང་དག་པར་བསྐུལ་ཏེ་མདུན་དུ་གདན་དྲངས་ནས། དེ་ནས་རྡོ་རྗེ་མེ་ཏོག་མ་ལ་སོགས་པ་རྣམས་ཀྱི་སྔགས་ཀྱིས་ཡིད་ཀྱི་རང་བཞིན་ལས་བྱུང་བའི་མཆོད་པ་རྣམས་ཀྱིས་མཆོད་པར་བྱའོ། །དེ་ནས་སྡིག་པ་
[191a.6]བཤགས་པ་ལ་སོགས་པ་བྱ་སྟེ། དེ་ནས་ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་ལན་བདུན་བརྗོད་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པས་ཆོས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །དེ་ནས་མདུན་དུ་པདྨ་དམར་པོ་ཁྲུ་བདུན་གྱི་ཚད་རྣམ་པར་བསྒོམ་
[191a.7]པར་བྱའོ། །དེའི་སྟེང་དུ་ཟླ་བའི་དཀྱིལ་འཁོར་ཅུང་ཟད་དམར་བ་ཨཾ་ཡིག་ལས་བྱུང་བའོ། །དེའི་སྟེང་དུ་དོཿཡིག་ལས་བྱུང་བའི་ཆུ་སྐྱེས། སླར་ཡང་པདྨའི་སྟེང་དུ་ཟླ་བའི་དཀྱིལ་འཁོར་ལ་དེའི་སྟེང་དུ་དོཿཡིག་གོ། །ཡང་དེ་ལས་བྱུང་བའི་འོད་ཟེར་གྱི་སྤྲིན་གྱིས་འགྲོ་བ་དྲུག་པོ་ཡང་དག་པར་བསྡུས་
[191b]
[191b.1]ནས། སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་བཀོད་ནས་རྡོ་རྗེ་དབྱངས་ཅན་མའི་རྣམ་པས་དོཿཡིག་ལ་རབ་ཏུ་གཞུག་པར་བྱ་སྟེ། དེ་ནས་རང་ལ་གཞུག་པར་བྱའོ། །རང་ལ་ཞུགས་པ་ཙམ་གྱིས་ཐམས་ཅད་ཡོངས་སུ་གྱུར་པ་ལས་ཞལ་གསུམ་
[191b.2]ཕྱག་དྲུག་པའི་ལྷ་མོ་སྣ་ཚོགས་པའི་རྒྱན་གྱིས་བརྒྱན་པ། སྐྲ་དམར་སེར་གྱེན་དུ་བརྫེས་པ། ཟླ་བ་དམར་པོའི་སྟེང་ན་ཞབས་གཡོན་བརྐྱང་གིས་བཞུགས་པ་རྣམ་པར་བསྒོམ་པར་བྱའོ། །དེའི་ཞལ་དང་པོ་ནི་དམར་པོ། གཡས་པ་ནི་དཀར་པོ། གཡོན་པ་ནག་པོའོ། །ཕྱག་གཡས་
[191b.3]ཀྱི་དང་པོར་ཆུ་སྐྱེས་ཀྱི་སྟེང་ན་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏིས་མཚན་པའོ། །གཉིས་པ་ན་རལ་གྲི། གསུམ་པ་ན་གྲི་གུག །གཡོན་གྱི་ཕྱག་དང་པོ་ན་འཁོར་ལོ་དཀར་པོ་རྩིབས་བརྒྱད་པ། གཉིས་པ་ན་པི་ཝང་རིན་པོ་ཆེ། གསུམ་པ་ན་ཚངས་པའི་མགོའོ། །ཇི་ལྟར་སྟོང་པ་ཉིད་ཀྱི་ཏིང་
[191b.4]ངེ་འཛིན་གྱི་མཐར་ལྷ་མོ་བསྐྱེད་ནས། ས་བོན་ལས་དེ་བཞིན་དུ་ཡང་བཅོམ་ལྡན་འདས་མ་སྙིང་གར་བསྒོམ་པར་བྱའོ། །དེ་ནས་ས་བོན་ལས་བྱུང་བའི་འོད་ཟེར་གྱིས་ཡེ་ཤེས་སེམས་དཔའ་གདན་དྲངས་ཏེ། མཆོད་པར་བྱའོ། །འཇུག་པར་འདོད་ན་དེ་ནས་སྔགས་བཟླས་པར་བྱའོ། །སྔགས་པས་
[191b.5]ཡིད་ཀྱི་ཏིང་ངེ་འཛིན་ལ་མཉམ་པར་གཞག་ནས། འབུམ་ཕྲག་གཉིས་བཟླས་ནས་དེ་ནས་བྱ་བ་རྩོམ་མོ། །དེ་ལ་སྔགས་ནི་འདིའོ། །ཨོཾ་པི་ཙུ་པི་ཙུ་པྲཛྙཱ་བརྡྷ་ནི་ཛྭ་ལ་ཛྭ་ལ། མེ་དྷ་བརྡྷ་ནི། དྷི་རི་དྷི་རི་བུ་དྷི་བརྡྷ་ནི་སྭཱ་ཧཱ། དཀར་པོའི་ཚེས་གཅིག་ནས་བརྩམས་ནས་ཟླ་བའི་སྣང་བ་ལ་ལེགས་པར་
[191b.6]སྦྱར་བ་བརྩམ་པར་བྱའོ། །ཇི་སྲིད་ཟླ་བ་མ་ནུབ་ཀྱི་བར་དུ་སྟེ། ཇི་སྲིད་ཟླ་བ་ཡོངས་སུ་རྫོགས་པའི་ཉིན་པར་ཉ་ལ་ཟླ་བ་གང་བ་ཇི་སྲིད་པ་དེ་སྲིད་དུ་བཟླས་ཤིང་བསྒོམ་པར་བྱའོ། །དེ་ནས་སྔར་མ་ཐོས་པའི་བསྟན་བཅོས་ཀྱང་མངོན་དུ་བྱེད་པར་འགྱུར་རོ། །ཉི་མ་རེ་རེ་ཞིང་གཞུང་སྟོང་ཕྲག་རེ་འཛིན་པར་
[191b.7]འགྱུར་རོ། །རྒོལ་བ་ཐམས་ཅད་འཇོམས་པར་བྱེད་དོ། །ལྷ་དང་མི་རྣམས་དགའ་བར་འགྱུར་རོ། །གཤིན་རྗེ་གཤེད་ནག་པོའི་རྒྱུད་ལས་ཕྱུང་བ་རྡོ་རྗེ་དབྱངས་ཅན་མའི་སྒྲུབ་ཐབས་རྫོགས་སོ།། {T3558}༄༅༅། །རྒྱ་གར་སྐད་དུ། བཛྲ་སྭ་ར་སྭ་ཏཱི་སཱ་དྷ་ནཾ། བོད་སྐད་དུ། རྡོ་རྗེ་དབྱངས་
[192a]
[192a.1]ཅན་མའི་སྒྲུབ་ཐབས། རྡོ་རྗེ་དབྱངས་ཅན་མ་ལ་ཕྱག་འཚལ་ལོ། །རྡོ་རྗེ་བཞིའི་རིམ་པས་སྒྲུབ་ཐབས་བྲི་བར་བྱའོ། །སྔོན་མ་བཞིན་དུ་སྙིང་གར་ཨཾ་ཡིག་ལས་ཟླ་བ་བསྒོམས་ཏེ་སྡིག་པ་བཤགས་ནས་དང་པོར་སྟོང་པའི་བྱང་ཆུབ་ཀྱི་མཐར་ཐུག་པ། པཾ་ཡིག་ལས་
[192a.2]སྐྱེས་པའི་ཆུ་སྐྱེས་ལ་ཟླ་བ། ཨཾ་ཡིག་གི་ས་བོན་ལས་སྤྲོ་བ་ལ་སོགས་པ་ལས་ཡང་དག་པར་བྱུང་བའི་སྐུ་མདོག་དཀར་མོ་ཡིད་དུ་འོང་བ། ཕྱག་གཡས་ན་ཆུ་སྐྱེས་དམར་པོ་བསྣམས་པ། གཡོན་ན་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་བསྣམས་པ། རྡོ་རྗེ་བསྡུ་བའི་ཕྱག་རྒྱས་ཨོཾ་བཛྲ་ས་མཱ་ཛཿ
[192a.3]ཛཱཿཛཱཿཛཱཿཞེས་པས་ཡེ་ཤེས་སེམས་དཔའ་གཞུག་པ་ལ་སོགས་པ་སྔོན་དུ་འགྲོ་བས་ཤེས་རབ་ཀྱི་ཕ་རོལ་ཏུ་ཕྱིན་མ་རྡོ་རྗེ་སྐྱིལ་མོ་ཀྲུང་གིས་བཞུགས་པ་བསྒོམ་པར་བྱའོ། །དེའི་ཐུགས་ཀར་ཟླ་བ་ལ་གནས་པའི་ཨཾ་ཡིག་བསྒོམས་ནས་སྤྲོ་བ་དང་བསྡུ་བ་ལ་སོགས་པའི་རིམ་པས་སྔགས་
[192a.4]བཟླས་པར་བྱའོ། །ཨོཾ་པི་ཙུ་པི་ཙུ་པྲཛྙཱ་བརྡྷ་ནི། ཛྭ་ལ་ཛྭ་ལ་མེ་དྷ་བརྡྷ་ནི། དྷི་རི་དྷི་རི་བུདྷི་བརྡྷ་ནི་སྭཱཧཱ། མར་མེའི་ཕྲེང་བ་བཞིན་དུ་འབར་བཞིན་པ་ཞལ་ནས་འཐོན་ཏེ་ལྟེ་བའི་དཀྱིལ་འཁོར་ལ་རབ་ཏུ་ཞུགས་པར་བསམ་པར་བྱའོ། །དེ་བཞིན་དུ་གཞན་ཡང་འདིས་བལྟ་བར་བྱའོ། །དེ་བཞིན་དུ་ཡང་
[192a.5]གསུངས་ཏེ། དང་པོ་སྟོང་པའི་བྱང་ཆུབ་སྟེ། །གཉིས་པ་ས་བོན་བསྡུ་བ་ཡིན། །གསུམ་པ་གཟུགས་ནི་རྫོགས་པ་བཞིན། །བཞི་པ་ཡི་གེ་དགོད་པའོ། །རྡོ་རྗེ་དབྱངས་ཅན་མའི་སྒྲུབ་ཐབས་རྫོགས་སོ།། {T3559}༄༅༅། །རྒྱ་གར་སྐད་དུ། བྷྲྀ་ཀུ་ཊཱི་སཱ་དྷ་ནཾ། བོད་སྐད་དུ། ཁྲོ་གཉེར་
[192a.6]ཅན་གྱི་སྒྲུབ་ཐབས། འཕགས་མ་ཁྲོ་གཉེར་ཅན་ལ་ཕྱག་འཚལ་ལོ། །འདིར་སྔོན་དུ་གསུངས་པའི་ཆོ་གས་བྷྲྀ་ཡིག་སེར་པོ་ལས་སྐྱེས་པའི་སྐུ་མདོག་སེར་མོ་ཞལ་གཅིག་པ། སྤྱན་གསུམ་པ། ཕྱག་བཞི་པ། ལང་ཚོ་གཞོན་པ། ཕྱག་གཡས་པ་དག་ན་མཆོག་སྦྱིན་དང་། བགྲང་ཕྲེང་
[192a.7]བསྣམས་པ། ཕྱག་གཡོན་པ་དག་ན་དབྱུ་གུ་རྩེ་གསུམ་དང་། སྤྱི་བླུགས་བསྣམས་པ། འོད་དཔག་མེད་ཀྱིས་རྒྱས་བཏབ་པ། པདྨ་དང་ཟླ་བའི་གདན་ལ་བཞུགས་པའི་བཅོམ་ལྡན་འདས་མ་བསམས་ནས་ཕྱག་རྒྱ་བཅིང་བར་བྱའོ། །ལག་པ་གཉིས་བརྐྱང་སྟེ་མཐེབ་ཆེན་དག་གིས་
[192b]
[192b.1]མཐེབ་ཆུང་དག་གི་སེན་མོ་མནན་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་བྷྲྀ་ཀུ་ཏཱི་སྭཱ་ཧཱ། ཁྲོ་གཉེར་ཅན་གྱི་སྒྲུབ་ཐབས་རྫོགས་སོ།། {T3560}༄༅༅། །རྒྱ་གར་སྐད་དུ། བྷྲྀ་ཀུ་ཊཱི་སཱ་དྷ་ནཾ། བོད་སྐད་དུ། ཁྲོ་གཉེར་ཅན་གྱི་སྒྲུབ་ཐབས། འཕགས་མ་ཁྲོ་གཉེར་ཅན་ལ་
[192b.2]ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་རང་གི་སྙིང་གར་ཟླ་བའི་དབུས་སུ་ས་བོན་དྲུག་པའི་བཞི་པ་དང་པོའི་བརྒྱད་པས་གང་བའི་སྟོང་པའི་བརྡས་མནན་ཅིང་ཟླ་བ་ཕྱེད་པས་དབུ་བརྒྱན་པའོ། །དེ་ལས་སྐྱེས་པའི་ཁྲོ་གཉེར་ཅན་སྐུ་མདོག་སེར་མོ་ཕྱག་བཞི་པ། ཞི་ཞིང་རལ་པའི་
[192b.3]ཅོད་པན་ཅན། ཕྱག་གཡས་པ་དག་ན་མཆོག་སྦྱིན་དང་། བགྲང་ཕྲེང་བསྣམས་པ། གཡོན་པ་དག་ན་དབྱུ་གུ་དང་། སྤྱི་བླུགས་བསྣམས་པ། པདྨ་དང་ཟླ་བའི་གདན་ལ་བཞུགས་པ་བསྒོམ་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་བརྐྱང་ནས་མཐེབ་ཆེན་དག་
[192b.4]གིས་མཐེའུ་ཆུང་དག་སོ་སོར་མནན་པར་བྱའོ། །ལྷག་མ་རྣམས་ནི་རྡོ་རྗེའི་མཚན་ཉིད་དོ། །འདི་ནི་ཁྲོ་གཉེར་ཅན་གྱི་ཕྱག་རྒྱའོ། །ཕྱི་ནས་སྔགས་བཟླས་པར་བྱའོ། །ཨོཾ་བྷྲྀཾ་སྭཱ་ཧཱ། ཁྲོ་གཉེར་ཅན་གྱི་སྒྲུབ་ཐབས་རྫོགས་སོ།། {T3561}༄༅༅། །རྒྱ་གར་སྐད་དུ། ཀལྤོ་ཀྟཾ་ཏཱ་
[192b.5]རོདྦྷ་བ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། སྒྲོལ་མའི་རྟོག་པ་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཡིད་དང་མཐུན་པའི་གནས་འགའ་ཞིག་ཏུ་སྟན་བདེ་བ་ལ་ཉེ་བར་འདུག་སྟེ། བཅོམ་ལྡན་འདས་མའི་བྲིས་སྐུ་ལ་སོགས་
[192b.6]པ་བཀྲམ་སྟེ། ཕྱིའི་མཆོད་པ་རྣམས་བྱས་ནས་རང་གི་སྙིང་གར་དྲི་མ་མེད་པའི་ཟླ་བ་ཡོངས་སུ་གང་བའི་རྣམ་པ་ལ་དབྱངས་ཡིག་དང་པོ་ལས་བྱུང་བའི་ཟླ་བ་ཡིད་ཀྱིས་རྣམ་པར་བསམས་ནས་དེའི་སྟེང་དུ་ས་བོན་དགོད་པར་བྱའོ། །དྲོ་བ་རྣམས་ཀྱི་བཞི་པ་ནི། །མེ་ཡིག་སྟེང་དུ་ཉེ་བར་གནས། །
[192b.7]ཨཱི་ཡིག་དང་ནི་ཡང་དག་ལྡན། །མཁའ་གཉིས་ཀྱིས་ནི་རྣམ་པར་བརྒྱན། །དེ་ཡི་འོད་ཟེར་སྣ་ཚོགས་ཀྱིས། །འགྲོ་བ་རྣམས་ཀྱི་དྲི་མེད་བྱས། །ཆེན་པོ་ལ་སོགས་ཁམས་དག་པའི། །ཀུ་རུ་ཀུལླེའི་རིར་བཞུགས་ནས། །དེ་ཡི་འོད་ཀྱིས་ཡང་དག་བསྐུལ། །སྒྲོལ་མ་ཡིད་ཀྱིས་མདུན་དུ་བྱ། །
[193a]
[193a.1]མཁས་པས་དེ་ཡི་ས་བོན་ལས། །མཆོད་པའི་སྤྲིན་ཆེན་སྤྲོ་བྱ་སྟེ། །མེ་ཏོག་བདུག་སྤོས་མར་མེ་དང་། །དེ་བཞིན་དྲི་དང་ཞལ་ཟས་ཚོགས། །སྒེག་མོ་ཕྲེང་མ་གར་མ་གླུ། །སིལ་སྙན་ལ་སོགས་རྣམས་ཀྱིས་མཆོད། །དཀོན་མཆོག་གསུམ་ལ་བདག་སྐྱབས་མཆི། །
[193a.2]སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་པའི་སྔགས་ནི་ལན་གསུམ་བརྗོད། །དེ་ནས་བཟོད་པར་གསོལ་བྱ་སྟེ། །དེ་ལ་ཚིགས་བཅད་འདི་ཡིས་སོ། །བདག་ནི་སླར་ཡང་བློ་རྨོངས་པས། །ཉེས་པ་
[193a.3]འགའ་ཞིག་ཅི་བགྱིས་པ། །ལུས་ཅན་ཀུན་གྱི་སྐྱབས་གྱུར་པའི། །ལྷ་མོ་ཁྱེད་ལ་བཟོད་པར་གསོལ། །བྱམས་པའི་སེམས་ནི་གནས་པ་ཡིས། །དེ་ཚེ་སླར་ཡང་སྡུག་པར་བལྟ། །སྙིང་རྗེའི་སེམས་ནི་ཡང་དག་བསྐྱེད། །དགའ་བའི་སེམས་ནི་འཇུག་པར་བྱ། །ཕྱི་ནས་ཀུན་ལ་བཏང་
[193a.4]སྙོམས་པའི། །སེམས་ཙམ་དུ་ནི་རྣམ་པར་གཞག །དེ་ནས་རང་བཞིན་རྣམ་བྲལ་བའི། །སྟོང་པ་ཉིད་ནི་གསལ་བར་བྱ། །སྟོང་ཉིད་མེ་ཡིས་བསྲེགས་པ་ཡི། །ཕུང་པོ་ལྔ་པོ་སླར་མི་འབྱུང་། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྐད་ཅིག་སྟོང་ཉིད་སྦྱོར་བ་ཡིས། །སེམས་
[193a.5]ཉིད་ཀྱི་ནི་ངལ་གསོ་བྱ། །སྔོན་གྱི་དམ་བཅའ་དྲན་བྱས་ལ། །ས་བོན་ཙམ་ནི་སླར་ཡང་བསམ། །བདག་ཉིད་གཅིག་པུ་མྱང་འདས་ན། །བདག་གིས་སེམས་ཅན་ཡོངས་སུ་བསླུས། །སྲིད་པའི་རྒྱ་མཚོ་གཏིང་མེད་ལས། །དེ་ལ་ཇི་ལྟར་གདོན་པར་བྱ། །སེམས་ཅན་རྣམས་ལ་བརྩེར་
[193a.6]བཞུགས་པའི། །སེམས་བྲལ་སྟོང་ཉིད་སྤང་བར་བྱ། །ཆོས་ཀྱི་དབྱིངས་ཀྱི་རང་བཞིན་དུ། །སེམས་ཉིད་ཀྱིས་ནི་སེམས་བསྐྱེད་བྱ། །སངས་རྒྱས་བྱིན་རླབས་ས་བོན་ལས། །དེ་ལས་ཨུཏྤ་ལར་བཤད་དོ། །ཨ་ཡི་དབྱངས་ལས་བྱུང་བ་ཡི། །ཨུཏྤལ་ཟླ་བའི་དཀྱིལ་འཁོར་ལ། །ཟླ་བ་
[193a.7]དེ་ལ་སླར་ཡང་ནི། །ས་བོན་ལས་བྱུང་དེ་ལ་སྦྱོར། །འཇིག་རྟེན་ཁམས་རྣམས་མ་ལུས་པ། །འདི་ཡིས་རྣམ་པར་སྦྱང་བར་བསམ། །སྦྱངས་ཤིང་རྟོགས་པ་དེ་ཡིས་ནི། །འོད་ཀྱིས་སངས་རྒྱས་བྱང་ཆུབ་རྣམས། །བསྐུལ་ཞིང་དེ་ལས་ཨུཏྤལ་ཏེ། །དེ་ཡིས་སྒྲོལ་མ་བསྐྱེད་པར་བསམ། །སྐུ་
[193b]
[193b.1]མདོག་དམར་མོ་ཕྱག་བཞི་པ། །པདྨ་དམར་པོའི་སྟེང་བཞུགས་ཞིང་། །གོས་ཟུང་དམར་པོ་དང་ལྡན་པ། །རྣ་རྒྱན་དམར་པོ་དང་བཅས་ཤིང་། །ཕྱག་གཡས་མི་འཇིགས་པ་དང་ནི། །མདའ་ནི་བསྣམས་ཞིང་སླར་ཡང་འགེངས། །གཡོན་པ་གཞུ་འཛིན་གཉིས་པ་ནི། །ཤིན་ཏུ་དམར་
[193b.2]བའི་ཨུཏྤལ་བསྣམས། །ཀུ་རུ་ཀུལླེའི་ཕུག་གནས་ཤིང་། །འོད་དཔག་མེད་ཀྱི་དབུ་རྒྱན་ཅན། །པདྨ་དམར་པོའི་སྟན་གྱི་འོག །སྒྲ་གཅན་གྱི་ནི་སྟེང་གནས་པའི། །འདོད་ལྷའི་ཆུང་མའི་སྟེང་དུ་ནི། །མྱོས་པར་བྱེད་པ་བསྒོམ་པར་བྱ། །རྡོ་རྗེ་སྐྱིལ་ཀྲུང་གིས་གནས་ཤིང་། །སྒྱུ་རྩལ་སྣ་
[193b.3]ཚོགས་ཀུན་ལྡན་པ། །རྒྱན་རྣམས་ཀུན་གྱིས་ཡང་དག་བརྒྱན། །བཅོམ་ལྡན་འདས་མ་བསམ་པར་བྱ། །དམ་ཚིག་སྐུ་རུ་བསྡུ་སོགས་ཀྱིས། །ཡེ་ཤེས་འཁོར་ལོ་མཚོན་པར་བྱ། །སྐད་ཅིག་རྣམ་པར་ཡོངས་རྫོགས་པས། །ཡེ་ཤེས་འཁོར་ལོ་མདུན་དུ་གནས། །ཛཿཧཱུཾ་བཾ་ཧོཿཞེས་པ་འདིས། །
[193b.4]དགུག་གཞུག་བཅིང་དང་མཉེས་པར་བྱ། །དམ་ཚིག་ཕྱག་རྒྱ་རབ་སྦྱོར་བས། །ཞལ་གྱི་ལམ་དུ་གཞུག་པར་བྱ། །ལག་པ་དག་ནི་ཐལ་སྦྱར་ནས། །གང་ཚེ་གུང་མོ་མིང་མེད་དག །རིང་དུ་རྩེ་མོར་བྱས་པ་ཡི། །རྩེ་མོའི་ནང་དུ་མིང་མེད་དེ། །མཛུབ་མོ་དག་ནི་གུང་མོར་འཁྱུད། །མཐེབ་ཆེན་
[193b.5]དག་ནི་འོག་ཏུ་སོན། །འདི་བཞིན་བཅིངས་ནས་དམ་ཚིག་གི། །འཁོར་ལོ་ལ་ནི་གཞུག་པར་བྱ། །དེ་ནས་དབང་བསྐུར་བ་ཞུ་བར་བྱ་སྟེ། སངས་རྒྱས་ལ་ཞེས་པའི་ཚིགས་སུ་བཅད་པ་བཀླག་པར་བྱའོ། །བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་བྱིན་པ་ལྟར། །བདག་
[193b.6]ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །དེ་བྱིན་ཆེན་པོར་གྱུར་པ་ཡིས། །རྒྱལ་སྲིད་མིང་གི་དབང་བསྐུར་བ། །མེ་ཏོག་དབང་བསྐུར་དེ་བཞིན་རྒྱལ། །སྤྱན་མ་ལ་སོགས་ལྷ་རྣམས་ཀྱིས། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་ཕྱག་
[193b.7]བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །སངས་རྒྱས་དབང་བསྐུར་སྒྲོལ་མ་ཡི། །ཆོས་ནི་གཙུག་ཏོར་ནོར་བུར་བྱ། །འོད་ཟེར་དམར་པོ་སྣ་ཚོགས་པ། །འགྲོ་བ་གསུམ་པོ་གསལ་བར་མཛད། །རིན་ཆེན་དབང་བསྐུར་ཐོབ་གྱུར་ནས། །
[194a]
[194a.1]དངོས་གྲུབ་ཐམས་ཅད་བསྒྲུབ་པར་བྱ། །ཆོ་ག་ཇི་ལྟར་སྔོན་གསུངས་པ། །ལོ་ཕྱེད་བརྟན་པར་འཇུག་པ་ཡིས། །ཐུན་མཚམས་གསུམ་དུ་གཏོར་མ་འབུལ། །བསྒོམ་པ་སྔོན་དུ་འགྲོ་བ་ཡིས། །སྒྲོལ་མ་ཡི་ནི་སྙིང་པོ་འདི། །མཉམ་པར་གཞག་ནས་སྔགས་བཟླས་སོ། །
[194a.2]ཨོཾ་ཀུ་རུ་ཀུལླེ་ཧྲཱིཿཧཱུཾ་སྭཱ་ཧཱ། དེ་ནས་སྔོན་དུ་བསྙེན་པའི་ཡི་གེ་འབུམ་བཟླས་ནས། ཕྱིས་ལས་ཡང་དག་པར་བརྩམ་པར་བྱའོ། །ཆ་ཤས་ཀྱིས་ནི་ཤེས་རབ་འཕེལ། །ཡན་ལག་གཞན་གྱིས་དབང་དུ་བྱེད། །ཡན་ལག་གསུམ་པས་དེ་བཞིན་དུ། །མི་ཡིས་དུག་རྣམས་འགུགས་པར་
[194a.3]བྱེད། །འཇིག་རྟེན་པ་ནི་ཐམས་ཅད་ཀྱི། །ཤིན་ཏུ་སྨྱོས་ཤིང་སྒེག་པ་ཡི། །བུད་མེད་རྣམས་ཀྱིས་མཆོད་པར་བྱེད། །ཇི་ལྟར་འདོད་བཞིན་སྔགས་བཟུང་ནས། །ལྷ་ཡི་བུ་མོ་ཡིད་འོང་རྣམས། །ཟས་དང་སྟོན་མོ་སྦྱོར་བར་བྱེད། །མཁས་པས་རིམ་པར་གོམས་པ་ཡིས། །དངོས་གྲུབ་ཕྲ་
[194a.4]མོ་འགྲུབ་པར་འགྱུར། །འདིར་ནི་དངོས་གྲུབ་ཆེན་པོ་ཡང་། །འགྲུབ་པར་འགྱུར་བར་ཐེ་ཚོམ་མེད། །སྒྲོལ་མའི་རྟོག་པ་ལས་འབྱུང་བ་ཀུ་རུ་ཀུལླེའི་སྒྲུབ་ཐབས་རྫོགས་སོ།། #{T3562}༄༅༅། །རྒྱ་གར་སྐད་དུ། མུཀྟེ་ཀེ་ན་ཏཱ་རོདྦྷ་བ་ཀུ་རུ་ཀུལླེ་#སཱ་དྷ་ནཾ། བོད་སྐད་དུ། སྒྲོལ་མའི་རྟོག་པ་
[194a.5]ལས་བྱུང་#བའི་ཚིག་ལྷུག་པའི་རིགས་#བྱེད་མའི་སྒྲུབ་ཐབས། འཕགས་མ་རིགས་#བྱེད་མ་ལ་ཕྱག་འཚལ་ལོ། །གང་གིས་དྲན་པ་ཙམ་གྱིས་ནི། །ལྷ་དང་ལྷ་མིན་མིར་བཅས་རྣམས། །ངེས་པར་མངག་གཞུག་#བྱེད་འགྱུར་བའི། །སྒྲོལ་མ་དེ་ལ་ཕྱག་འཚལ་ལོ། །དང་པོ་#རེ་ཞིག་སྔགས་པས་
[194a.6]ཡིད་དང་མཐུན་#པའི་གནས་སུ་བུད་མེད་ཀྱི་#ཚོགས་ལ་སོགས་པ་དང་བྲལ་བར་སྟན་བདེ་བ་ལ་འདུག་སྟེ། རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་སྟེང་དུ་འོད་ཟེར་དང་བཅས་པའི་ཧྲཱིཿཡིག་གི་#ས་བོན་ལས་བྱུང་བའི་འོད་ཟེར་དམར་པོའི་ཚོགས་ཀྱིས་འགྲོ་བ་རྣམས་
[194a.7]གསལ་བར་མཛད་པ་སྔོན་དུ་འགྲོ་བས་ཀུ་རུ་ཀུལླེའི་རི་ལ་གནས་པའི་བཅོམ་ལྡན་འདས་མ་རིགས་བྱེད་མ་ཡང་དག་པར་བསྐུལ་ནས་སྤྱན་དྲངས་ཤིང་མདུན་གྱི་ནམ་མཁའ་ལ་ཡང་དག་པར་བསམས་#ཏེ། སྙིང་གའི་ས་བོན་གྱི་འོད་ཟེར་ལས་སྤྲུལ་པའི་མེ་ཏོག་དང་བདུག་སྤོས་ལ་སོགས་པ་སྣ་ཚོགས་པའི་
[194b]
[194b.1]མཆོད་པས་#མཆོད་པར་བྱའོ། །དེའི་རྗེས་ལ་ཕྱག་འཚལ་བ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། ཡོངས་སུ་བསྔོ་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་སྔོན་དུ་འགྲོ་བས། དཀོན་མཆོག་གསུམ་ལ་བདག་
[194b.2]སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་#རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་ལན་གསུམ་བརྗོད་པར་བྱའོ། །དེ་ནས་ཚད་མེད་པའི་གནས་བཞི་བསྒོམ་པ་སྔོན་དུ་འགྲོ་བས། ཆོས་ཐམས་ཅད་སྟོང་པ་ཉིད་དུ་#བསྒོམ་ཞིང་།
[194b.3]སྔགས་འདིས་བྱིན་གྱིས་བརླབ་#པ་བརྗོད་པར་བྱའོ#། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ#། དེའི་རྗེས་ལ་འགྲོ་བ་སྡུག་བསྔལ་བ་མཐའ་དག་ལ་སྙིང་རྗེ་བས། རང་གི་སེམས་ཀྱི་ས་བོན་གྱི་གཟུགས་ལ་བལྟ་སྟེ། དེ་ཡོངས་སུ་གྱུར་པ་ལ་ཨུཏྤ་ལ་#དམར་པོའི་སྟེང་
[194b.4]ན་#དབྱངས་ཡིག་#དང་པོ་ཡོངས་སུ་གྱུར་པ་ལས་ཟླ་བ་ལ་གནས་པའི་ས་བོན་གྱི་#འོད་ཟེར་རྣམས་ཀྱིས་#སྔོན་བཞིན་དུ་འགྲོ་བ་རྣམས་གསལ་བར་མཛད་ནས། དེ་བཞིན་གཤེགས་པ་བྱེ་བ་མཐའ་ཡས་པ་ཡང་དག་པར་བསྐུལ་ཞིང་སྤྱན་དྲངས་ནས་མདུན་#དུ་བསྒོམ་པར་བྱའོ། །དེ་ནས་ཨུཏྤ་ལ་#ལ་སོགས་
[194b.5]པ་ཡོངས་སུ་གྱུར་པ་ལས་སྐུ་མདོག་དམར་མོ། པདྨ་དམར་པོ་དང་ཟླ་བའི་གདན་ལ་བཞུགས་པ། དར་དམར་པོའི་སྟོད་གཡོགས་བྱས་པས་#འོད་ཟེར་དམར་པོ་དང་ལྡན་པ། རིན་པོ་ཆེ་དམར་པོའི་རྣ་རྒྱན་#ཅན། ཕྱག་བཞི་པ། གཡས་པས་མི་འཇིགས་པ་རབ་ཏུ་སྦྱིན་པ། གཉིས་པས་མདའ་
[194b.6]ཡང་དག་པར་འགེངས་པ། གཡོན་ན་རིན་པོ་ཆེའི་གཞུ་བསྣམས་#པ། གཉིས་པས་ཨུཏྤལ་#དམར་པོ་བསྣམས་པ། དེ་བཞིན་གཤེགས་པ་འོད་དཔག་མེད་ཀྱི་དབུ་རྒྱན་#ཅན། ཀུ་རུ་ཀུལླེའི་རིའི་ཕུག་ན་བཞུགས་པ། སྒྲ་གཅན་ཟིན་#གྱི་མགོ་ལ་གནས་པའི་འདོད་ལྷ་ཆུང་མ་དང་བཅས་པའི་སྟེང་
[194b.7]དུ་བཞུགས་པ། སྒེག་པའི་ཉམས་ཀྱིས་རོལ་ཞིང་དང་པོའི་ལང་ཚོ་དང་ལྡན་པའི་རིགས་#བྱེད་མ་བསྒོམ་པར་བྱའོ། །དེ་ལྟར་ན་#དམ་ཚིག་སེམས་དཔའ་#བསྐྱེད་ནས་སྐད་ཅིག་གིས་ཡེ་ཤེས་སེམས་དཔའ་མདུན་དུ་སྤྱན་དྲངས་ཏེ་ཡང་དག་པར་མཆོད་ནས་དམ་ཚིག་གི་ཕྱག་རྒྱས་ཞལ་གྱི་ནང་ནས་#ནང་དུ་
[195a]
[195a.1]གཞུག་#པར་བྱའོ། །དེ་ལ་དམ་ཚིག་གི་ཕྱག་རྒྱ་ནི་འདི་ཡིན་ཏེ། ཐལ་མོ་ཡང་དག་པར་སྦྱར་ནས་གུང་#མོ་དག་རྩེ་མོར་བྱས་པའི་དབུས་སུ་མིང་མེད་དག་བཅུག་སྟེ། གུང་མོའི་རྒྱབ་ཏུ་མཛུབ་#མོ་གཉིས་གནས་ཤིང་མཐེབ་ཆེན་གཉིས་འོག་ཏུ་གཞུག་#པ་དེ་ལྟ་བུའི་རྣམ་
[195a.2]པ་ནི་ཨུཏྤ་#ལའི་ཕྱག་རྒྱའོ། །དེའི་རྗེས་སུ། བྱང་ཆུབ་རྡོ་རྗེས་#སངས་རྒྱས་ལ། །ཇི་ལྟར་མཆོད་ཆེན་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ#། །ཞེས་གསོལ་བ་བཏབ་ལ། དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་
[195a.3]གྱིས་ཕྱག་བྱས་པ། །སངས་རྒྱས་ཀུན་གྱི་#གསང་གསུམ་གྱི། །གནས་ལས་བྱུང་བ་བདག་གིས་སྦྱིན། །ཞེས་བརྗོད་པ་རྣམས་ཀྱི་#སངས་རྒྱས་ཀྱི་བཀས་#སྤྱན་མ་ལ་སོགས་པ་རྣམས་ཀྱིས་དབང་བསྐུར་བ་སྟེར་#བར་བསམ་པར་བྱ་ཞིང་འོད་དཔག་མེད་དབུ་རྒྱན་དུ་བཞུགས་པའོ། །དེ་ལྟར་
[195a.4]བསྒོམས་ནས་བཟླས་པ་#བྱ་སྟེ། ཧ་ཅང་སྐྱེན་མིན་བུལ་བའང་མིན#། །མི་གསལ་མ་ཡིན་ཆ་མཉམ་མིན། །ཡང་དག་མ་ཡིན་#རྟོག་པ་སྤངས། ཨོཾ་ཀུ་རུ་ཀུལླེ་#ཧྲཱིཿཧཱུཾ་སྭཱ་ཧཱ། དེ་ལྟར་ཐུན་#མཚམས་གསུམ་གྱི་རིམ་པས་ཁུར་#བ་དང་ཀ་ར་#ལ་སོགས་པའི་གཏོར་མ་དབུལ་བ་སྔོན་དུ་འགྲོ་#བས་རྟག་ཏུ་རྒྱུན་
[195a.5]མ་ཆད་པར་བརྟན་པར་འཇུག་པས་ཟླ་བ་དྲུག་ཏུ་བསྒོམ་#པར་བྱའོ། །གྲུབ་པའི་མཚན་མ་རྣམས་ནི་འབྱུང་བར་འགྱུར་རོ། །དེའི་རྗེས་ལ་ཟླ་བ་དང་པོ་#ལ་ནད་ལ་སོགས་པ་བར་དུ་གཅོད་པ་བརྒྱ་འབྱུང་བར་འགྱུར་རོ། །ཟླ་བ་གཉིས་པ་ལ་སྟོན་མོ་གྱ་#ནོམ་པ་མ་བསླངས་པར་རྙེད་པར་འགྱུར་རོ#། །
[195a.6]གསུམ་པ་ལ་གོས་སྣ་ཚོགས་པ་རྙེད་པར་འགྱུར་རོ། །བཞི་པ་ལ་སྣ་ཚོགས་པའི་སོ་རྩི་རྒྱུན་མི་འཆད་པར་རྙེད་པར་འགྱུར་རོ། །ལྔ་པ་ལ་རྣམ་པ་སྣ་ཚོགས་པའི་གཟུགས་ལ་སོགས་པའི་ཡོན་ཏན་གྱིས་བརྒྱན་པའི་བུད་མེད་རྣམས་ཀྱིས་#གྲོགས་རྙེད་པར་འགྱུར་རོ། །ཟླ་བ་དྲུག་པ་ལ་ལྷ་
[195a.7]དང་ཀླུ་དང་། གནོད་སྦྱིན་དང་། དྲི་ཟ་དང་། མིའམ་ཅི་ལ་སོགས་པའི་བུད་མེད་ཡིད་དུ་འོང་བ་དང་ཕྲད་པར་འགྱུར་རོ། །བཅོམ་ལྡན་འདས་མ་བསྒོམས་ན་ཕལ་ཆེར་བུད་མེད་རྣམས་ཀྱིས་འཚོ་བར་འགྱུར་རོ། །དེ་ལ་བདུད་ཀྱི་ལས་འདི་རྣམས་སྤངས་ཏེ། བཅོམ་ལྡན་འདས་མ་སྒོམ་པར་
[195b]
[195b.1]བྱེད་པ་ལ་རྨི་ལམ་མམ་དངོས་སུ་སྟོན་པར་འགྱུར་རོ། །རལ་གྲི་དང་། མིག་སྨན་དང་། རྐང་པའི་བྱུག་#པ་དང་། མི་སྣང་བ་དང་། བཅུད་ལེན་དང་། མཁའ་ལ་སྤྱོད་པ་དང་། ས་ལ་སྤྱོད་པ་དང་། ས་འོག་གི་དངོས་གྲུབ་ལ་སོགས་པའི་དངོས་གྲུབ་རྣམས་བསྒྲུབ་པར་བྱའོ། །གལ་ཏེ་སོ་སོར་
[195b.2]བཀས་སྟོན་པར་མ་གྱུར་#ན། དེའི་ཚེ་སྔར་གསུངས་པའི་ཕྱག་རྒྱ་བཅིངས་ནས་མཆོད་པ་དང་། གཏོར་མ་དབུལ་བ་སྔོན་དུ་འགྲོ་བས་ཟླ་བ་དྲུག་གི་མཐར་ཟླ་བ་ཡོངས་སུ་གང་བའི་མཚན་མོ་རིལ་པོར་#བཟླས་པར་བྱའོ། །དེ་ནས་ཕྱག་རྒྱ་འབར་#ཏེ་འགྲུབ་པར་འགྱུར་རོ། །ཕྱག་རྒྱ་དེས་ཚངས་པ་དང་།
[195b.3]དབང་པོ་དང་། ཉེ་བའི་དབང་པོ་དང་། དྲག་པོ་དང་། སྲེད་#མེད་ཀྱི་བུ་ལ་སོགས་པ་ཡང་དག་པར་བཀུག་སྟེ། ཡང་དག་པར་འོངས་ནས་མངོན་པར་འདོད་པ་རྣམས་རྫོགས་པར་སྒྲུབ་པར་བྱེད་པར་འགྱུར་རོ། །དེ་ནས་བཟུང་སྟེ་སྐྱེ་བ་དང་། རྒས་པ་དང་།# འཆི་བ་དང་བྲལ་ཞིང་གྲུབ་པའི་འཇིག་
[195b.4]རྟེན་གྱི་ཁམས་རྣམས་#སུ་སོང་ནས་དེ་བཞིན་གཤེགས་པ་རྣམས་བལྟ་ཞིང་ས་དང་གཟུངས་ལ་སོགས་པ་རྣམས་ཐོབ་པར་འགྱུར་རོ། །སྒྲོལ་མའི་རྟོག་པ་ལས་བྱུང་བའི་ཚིག་ལྷུག་པའི་ཀུ་#རུ་ཀུལླེའི་སྒྲུབ་ཐབས་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།། །།
[195b.5]{T3563}༄༅༅། །ཀུ་རུ་ཀུལླེ་ལ་ཕྱག་འཚལ་ལོ། །རང་ཉིད་ཀུ་རུ་ཀུལླེར་བསྒོམ། །སྒྲོལ་མ་ལས་བྱུང་མཚོ་སྐྱེས་མ། །བསྒྲུབ་བྱ་ནང་དུ་གཞུག་བྱས་ནས། །འདོད་པས་མྱོས་པར་བསྒོམ་པར་བྱ། །ཡེ་ཤེས་སེམས་དཔའི་ཆུ་སྐྱེས་ལས། །དམར་འཛིན་དེ་ཡི་སྤྱི་བོར་བསམ། །ཞག་བདུན་
[195b.6]ཐུན་མཚམས་གསུམ་བསྒོམས་ན། །དེ་ནི་ལྟུང་བར་བྱེད་པར་འགྱུར། །ཀུ་རུ་ཀུལླེའི་དབང་དུ་བྱེད་པའི་མན་ངག་གོ།། {T3564}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། རིགས་བྱེད་མའི་སྒྲུབ་ཐབས། རིགས་བྱེད་མ་ལ་ཕྱག་འཚལ་ལོ། །དང་པོར་སྟན་
[195b.7]བདེ་བ་ལ་ཉེ་བར་འདུག་སྟེ། རིགས་བྱེད་མའི་སྐུར་བསྒོམས་ནས་སེམས་ཅན་ཐམས་ཅད་དབང་དུ་བྱ་བ་བརྩམ་པར་བྱའོ། །རང་གི་སྙིང་གར་ཉི་མའི་དཀྱིལ་འཁོར། དེའི་སྟེང་དུ་ཏཱཾ་ཡིག་དམར་པོ། དེ་ལས་འོད་ཟེར་ལྔ་བྱུང་སྟེ་དེ་བཞིན་གཤེགས་པ་རྣམས་ཡང་དག་པར་མཆོད་ནས། དཀོན་
[196a]
[196a.1]མཆོག་གསུམ་ལ་སྐྱབས་སུ་མཆི། །ཞེས་པ་ལ་སོགས་པའི་ཚིག་གིས་སྡིག་པ་བཤགས་པ་ལ་སོགས་པ་བྱས་ནས། སྟོང་པ་ཉིད་དུ་རྣམ་པར་བསྒོམས་ནས་ཕྱི་ནས་ཨུཏྤ་ལ་དམར་པོ། དེའི་སྟེང་དུ་ཉི་མའི་དཀྱིལ་འཁོར། དེའི་སྟེང་དུ་ཏཱཾ་ཡིག་དམར་པོ་དེ་ཐམས་
[196a.2]ཅད་ཡོངས་སུ་གྱུར་པ་ལས། རྗེ་བཙུན་མ་ཀུ་རུ་ཀུལླེ་སྐུ་མདོག་དམར་མོ་ཕྱག་བཞི་མ། ཕྱག་གཡས་པ་མདའ་དང་། མི་འཇིགས་པའི་ཕྱག །གཡོན་ན་གཞུ་དང་ཨུཏྤ་ལ་བསྣམས་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། ཤ་འགག་དམར་པོའི་སྟོད་གཡོགས་ཅན་གྱི་བདག་ཉིད་
[196a.3]དུ་བསྒོམ་པར་བྱའོ། །དེའི་འོག་ཏུ་འདོད་ལྷ་ཆུང་མ་དང་བཅས་པ་བསམ་པར་བྱའོ། །ཕྱི་ནས་བསྒོམ་པ་དང་ལྡན་པས་བཟླས་པར་བྱའོ། །ཨོཾ་ཀུ་རུ་ཀུལླེ་སཱ་ཧཱ། རིགས་བྱེད་མའི་སྒྲུབ་ཐབས་རྫོགས་སོ།། {T3565}༄༅༅། །རྒྱ་གར་སྐད་དུ། ཨཱརྱ་ཤྲཱི་མ་ཏཱི་ཀུ་རུ་ཀུལླེ་སཱ་དྷ་
[196a.4]ནཾ། བོད་སྐད་དུ། དཔལ་ལྡན་འཕགས་མ་རིགས་བྱེད་མའི་སྒྲུབ་ཐབས། འཕགས་མ་ཀུ་རུ་ཀུ་ལླེ་ལ་ཕྱག་འཚལ་ལོ། །རང་གི་སྙིང་གར་ཟླ་བའི་དཀྱིལ་འཁོར་ལ་ཧྲཱིཿཡིག་ལས་སྐྱེས་པའི་ཨུཏྤ་ལ་དམར་པོའི་དབུས་སུ་ཧྲཱིཿཡིག་གིས་མནན་པ་བསམས་ལ་དེ་ཡོངས་སུ་གྱུར་པ་ལས་
[196a.5]འཕགས་མ་རིགས་བྱེད་མ་སྐུ་མདོག་དམར་མོ་པདྨ་དམར་པོ་དང་ཟླ་བའི་གདན་ལ་བཞུགས་པ། འོད་ཟེར་དམར་པོའི་དཀྱིལ་འཁོར་ཅན། ན་བཟའ་དམར་པོ་སྣ་ཚོགས་པའི་སྟོད་གཡོགས་ཅན། འོད་དཔག་ཏུ་མེད་པས་དབུ་བརྒྱན་པ། ཕྱག་བཞི་པ། རྩ་བའི་ཕྱག་དག་གིས་ཨུཏྤ་ལ་དམར་
[196a.6]པོའི་མདེའུས་རྣམ་པར་མཛེས་པའི་མདའ་དང་བཅས་པའི་མེ་ཏོག་གི་གཞུ་རྣ་བའི་རྩར་འགེངས་པ། གཡོན་སྡོང་བུ་དང་བཅས་པའི་ཨུཏྤ་ལ་དམར་པོ་ཁ་བྱེ་བ་བསྣམས་པ། གཡས་པ་མཆོག་སྦྱིན་མཛད་པའོ། །སྒེག་པའི་ཉམས་ཆེན་པོས་རོལ་པར་བལྟས་ཏེ། ཡེ་ཤེས་སེམས་དཔའ་དང་
[196a.7]ལྷན་ཅིག་ཏུ་བྱས་ནས་རང་གི་ལུས་ཀྱི་འོད་ཟེར་དམར་པོའི་ལྕགས་ཀྱུས་བཀུག་པའི་ལྷ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། གནོད་སྦྱིན་དང་། སྐྱེས་པ་དང་། བུད་མེད་བརྒྱ་སྟོང་ལ་སོགས་པའི་ཚོགས་ཤིན་ཏུ་གུས་པར་ལུས་འདུད་
[196b]
[196b.1]ཅིང་མཆོག་ཏུ་དབང་དུ་གྱུར་པར་ཕྱོགས་བཅུ་རྣམས་སུ་ཡང་དག་པར་བལྟའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཞེས་པའི་སྔགས་བཟླས་པ་འབུམ་ནས་བརྩམས་ནས། ཇི་སྲིད་བཅོམ་ལྡན་འདས་མ་མངོན་སུམ་དུ་མ་གྱུར་གྱི་བར་དུ་བཟླས་པར་བྱའོ། །དེ་ནས་འགའ་ཞིག་དབང་དུ་བྱ་བར་འདོད་ན་
[196b.2]ཇི་ལྟར་གསུངས་པའི་ཆོ་གས་བཟླས་པ་འབུམ་བྱས་ནས་གུས་ཤིང་འདུད་པའི་ལྷ་དང་ལྷ་མ་ཡིན་ལ་སོགས་པའི་དབུས་སུ་འཇུག་ཅིང་རང་གི་ལུས་ཀྱི་འོད་ཟེར་གྱི་ལྕགས་ཀྱུས་བསྒྲུབ་བྱ་བཀུག་ལ་མདུན་དུ་བཀོད་ནས། རང་གི་སྙིང་གར་ཨུཏྤ་ལ་དམར་པོ་འདབ་མ་བཅུ་དྲུག་པ། དེའི་སྙིང་གར་
[196b.3]ཡཾ་བསམས་ནས་འཕགས་པ་ཡན་ལག་མེད་པའི་རྡོ་རྗེས་གསུངས་པའི་རིམ་པས་བུང་བའི་ལྕགས་ཀྱུ་བསྒོམས་ལ། དེའི་མིང་གི་ཡི་གེ་རང་གི་སྙིང་གའི་སྔགས་ཀྱིས་ཤིན་ཏུ་མནན་ནས་དེ་བཞིན་དུ་མདས་སྙིང་གར་ཕུག་སྟེ་ཆགས་པ་ཆེན་པོས་བརྒྱལ་ཞིང་གཞུ་རྒྱུད་ཀྱིས་རྐང་པ་བཅིངས་ཤིང་སྐེ་
[196b.4]ཨུཏྤ་ལའི་ཞགས་པས་བཅིངས་ནས་ཡང་དག་པར་བཀུག་སྟེ་རང་གི་རྐང་པ་དག་གི་དྲུང་དུ་བསྒྱེལ་ལ། སྐྱེས་པ་ཡིན་ན་ལྕགས་ཀྱུས་སྙིང་གར་དབུག་པར་བྱའོ། །བུད་མེད་ཀྱི་ཆོས་འབྱུང་ལའོ། །ཨོཾ་ཀུ་རུ་ཀུལླེ་ཆེ་གེའམ་ཆེ་གེ་མོ་ཨཱ་ཀཪྵ་ཡ་ཧྲཱིཿསྭཱ་ཧཱ། ཞེས་བྱ་བའི་སྔགས་བཟླས་
[196b.5]པར་བྱའོ། །བསྒྲུབ་བྱ་ཁུག་ནས། དེ་ལ་དེ་བཞིན་དུ་སྔགས་ལ་དབང་དུ་བྱ་བ་ནང་དུ་སྤེལ་ལ་བཟླས་པར་བྱའོ། །བརྒྱ་བཟླས་པས་སྐྱེས་པ་དང་། མི་མོ་དང་། རྒྱལ་པོ་དང་། བློན་པོའི་ཚོགས་ཕལ་པ་དབང་དུ་འགྱུར་རོ། །ཁྲི་བཟླས་པས་མངའ་རིས་ཀྱི་འཇིག་རྟེན་ནོ། །འབུམ་
[196b.6]བཟླས་པས་རྒྱལ་པོའོ། །འབུམ་ཕྲག་བདུན་གྱིས་ལྷ་དང་ལྷ་མ་ཡིན་གྱི་བུ་མོའོ། །བྱེ་བས་ནམ་མཁའ་ལྡིང་དང་། གླང་པོ་ཆེ་ས་སྲུང་གི་བུ་ལ་སོགས་པའི་ལྷའི་དུད་འགྲོ་རྣམས་དང་། དུད་འགྲོ་ཕལ་པ་རྣམས་ཀྱང་ངོ་། །གུས་པས་རྒྱུན་མི་ཆད་པར་དུས་རིང་པོ་དཔག་ཏུ་མེད་པར་བཟླས་ན་ས་
[196b.7]གསུམ་ཡང་དབང་དུ་བྱེད་པར་འགྱུར་རོ། །དཔལ་ལྡན་འཕགས་མ་རིགས་བྱེད་མའི་སྒྲུབ་ཐབས་རྫོགས་སོ།། {T3566}༄༅༅། །རྒྱ་གར་སྐད་དུ། ཨོ་ཌི་ཡཱ་ན་བི་ནི་རཱ་ག་ཏཀུ་རུ་ཀུལླེ་སཱ་དྷ་ནཾ། བོད་སྐད་དུ། ཨོ་ཌི་ཡཱ་ན་ལས་བྱུང་བའི་རིགས་བྱེད་མའི་སྒྲུབ་ཐབས། འཕགས་
[197a]
[197a.1]མ་རིགས་བྱེད་མ་ལ་ཕྱག་འཚལ་ལོ། །དང་པོར་རེ་ཞིག་བསྒོམ་པའི་སྔོན་དུ་དྲི་བཟངས་ལྔས་སའི་ཕྱོགས་གཅིག་ཏུ་ཉེ་བར་བྱུགས་ཏེ། བརྟུལ་ཞུགས་དང་ལྡན་པས་དགའ་བའི་སེམས་ཀྱིས་སྟན་བདེ་བ་ལ་ཉེ་བར་འདུག་སྟེ། མཉམ་པར་གཞག་ནས། དེ་ནས་ཕྱིས་རང་གི་
[197a.2]སྙིང་གར་ར་ཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར་འབར་བའི་ཕྲེང་བའི་རྣམ་པར་འཁྲུགས་པའོ། །དེའི་ལྟེ་བར་ཧྲཱིཿཡིག་དམར་པོ་རྣམ་པར་བསམ་པར་བྱའོ། །དེ་ནས་ཧྲཱིཿཡིག་ལས་བྱུང་བའི་འོད་ཟེར་གྱི་དྲ་བས་ཕྱོགས་བཅུ་ན་གནས་པའི་སེམས་ཅན་གྱི་ཁམས་སྣང་བར་བྱས་ནས་
[197a.3]དཔལ་ལྡན་རིགས་བྱེད་མའི་གཟུགས་སུ་དགོད་པར་བྱའོ། །སླར་ལོག་སྟེ་དེ་ཉིད་ལ་ཞུགས་ནས་དེ་བཞིན་དུ་འོད་ཟེར་གྱི་དྲ་བ་བསྒོམ་པར་བྱའོ། །དེ་ནས་ཕྱིས་མདུན་གྱི་ནམ་མཁའ་ལ་ལོ་བརྒྱད་གཉིས་ལོན་པའི་རྣམ་པ་ཅན་དབུ་སྐྲ་འབར་བ་གྱེན་དུ་བརྫེས་པ་ཐོད་པ་ལྔས་དབུ་བརྒྱན་ཅིང་རོའི་སྟེང་ན་
[197a.4]བཞུགས་པ། མགོ་བོའི་ཕྲེང་བས་དོ་ཤལ་བྱས་ཤིང་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། ཞལ་ཅུང་ཟད་མཆེ་བ་གཙིགས་ཤིང་ལྗགས་བསྐྱོད་པ། འཁོར་ལོ་དང་། རྣ་རྒྱན་དང་། མགུལ་རྒྱན་དང་། དཔུང་རྒྱན་དང་། སྐ་རགས་དང་། རྐང་གདུབ་ཀྱིས་བརྒྱན་པ། སྟག་གི་
[197a.5]པགས་པའི་ཤམ་ཐབས་ཅན། གཡོ་ཞིང་དམར་ལ་ཟླུམ་པའི་སྤྱན་གསུམ་གཡོན་དུ་བལྟ་བ། མགོན་པོ་འོད་དཔག་ཏུ་མེད་པའི་དབུ་རྒྱན་ཅན། ཕྱག་བཞི་པ་རྩ་བའི་ཕྱག་གཉིས་ཀྱིས་མེ་ཏོག་དམར་པོའི་གཞུ་འཛིན་ཅིང་ཨུཏྤ་ལ་དམར་པོའི་མདེའུ་ཅན་གྱི་མདའ་རྣ་བའི་རྩར་འགྲེངས་པ། ཕྱག་
[197a.6]ལྷག་མ་གཉིས་ཀྱིས་མེ་ཏོག་དམར་པོས་བྱས་པའི་ལྕགས་ཀྱུ་དང་ཨུཏྤ་ལ་དམར་པོ་བསྣམས་པ་རྣམ་པར་བསམ་པར་བྱའོ། །འདི་ཉིད་མཆོད་པའི་ཕྱིར་རང་གི་སྙིང་གར་ཉི་མའི་དཀྱིལ་འཁོར་ལ་གནས་པ་ཧྲཱིཿཡིག་ལས་བྱུང་བའི་ཉེ་བར་སྤྱད་པའི་མཆོད་པ་ལྔ་རྣམས་ཏེ་མེ་ཏོག་དང་།
[197a.7]སྤོས་དང་། མར་མེ་དང་། དྲི་དང་། ཞལ་ཟས་ལ་སོགས་པ་རྣམས་ཀྱིས་མཆོད་པར་བྱའོ། །མཆོད་ནས་མཆོག་གི་སྙིང་རྗེ་དང་ལྡན་པའི་རྣལ་འབྱོར་པས་གུས་པས་འདུད་ཅིང་ལུས་ལ་སོགས་པས་ཕྱག་འཚལ་ཏེ། དེ་ནས་བདག་གི་སྡིག་པ་བགྱིས་པ་དང་། གང་བགྱིད་དུ་སྩལ་བ་དང་།
[197b]
[197b.1]གང་གིས་བགྱིས་པ་ལ་རྗེས་སུ་ཡི་རང་བ་བགྱིས་པ་དེ་རྣམས་བཅོམ་ལྡན་འདས་མའི་མདུན་དུ་བཤགས་པར་བགྱིའོ། །དེའི་རྗེས་སུ་འཁོར་བའི་རྒྱ་མཚོར་ལྷུང་བའི་སེམས་ཅན་གྱི་ཁམས་རྣམས་བསྒྲལ་བའི་རང་བཞིན་བྱང་ཆུབ་ཀྱི་སེམས་གཟུང་བར་བྱའོ། །དེ་ནས་ཚད་མེད་པའི་གནས་
[197b.2]བཞི་བསྒོམ་པར་བྱའོ། །དེའི་རྗེས་ལ་སྟོང་པ་ཉིད་བསྒོམས་ཏེ། དེ་ལ་སྔགས་འདིས་བྱིན་གྱིས་བརླབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་སེམས་བྱིན་གྱིས་བརླབས་ལ། དེའི་རྗེས་སུ་ནམ་མཁའི་ཕྱོགས་སུ་རཾ་ཡིག་ཡོངས་སུ་གྱུར་པ་ལས་ཉི་མའི་དཀྱིལ་
[197b.3]འཁོར་འབར་ཞིང་འཕྲོ་བའི་རྣམ་པར་བསྒོམ་པར་བྱའོ། །དེའི་སྟེང་དུ་ཧཱུཾ་ཡིག་ནག་པོ་ཡོངས་སུ་གྱུར་པ་ལས་སྣ་ཚོགས་རྡོ་རྗེའོ། །ར་བ་དང་གུར་བཅིང་བ་དང་། རྡོ་རྗེའི་རང་བཞིན་གྱི་ས་གཞི་རྣམས་བསྒོམ་པར་བྱའོ་ཞེས་པ་ནི་སྲུང་བའི་འཁོར་ལོའོ། །དེའི་དབུས་སུ་ཨེ་ཡིག་གི་རྣམ་པའི་ཆོས་འབྱུང་
[197b.4]མཛེས་ཤིང་ཡེ་ཤེས་ཀྱི་རྣམ་པ་སྐུ་མདོག་དཀར་པོ་བསྒོམ་པར་བྱའོ། །དེའི་དབུས་སུ་ཧྲཱིཿཡིག་དམར་པོ་ལས་བྱུང་བའི་ཆུ་སྐྱེས་དམར་པོ་འདབ་མ་བརྒྱད་པའོ། །དེའི་སྟེང་དུ་ཟེའུ་འབྲུ་ལ་རཾ་ཡིག་ཡོངས་སུ་གྱུར་པ་ལས་ཉི་མའོ། །དེའི་སྟེང་དུ་རོའོ། །སླར་ཡང་དེའི་སྟེང་དུ་ཟླ་བ་ཡོངས་སུ་
[197b.5]གང་བ་དཀར་པོ་མཚན་སུམ་ཅུ་རྩ་གཉིས་ཀྱི་བདག་ཉིད་དོ། །དེའི་སྟེང་དུ་སླར་ཡང་ཉི་མའི་དཀྱིལ་འཁོར་ལ་དཔེ་བྱད་བཟང་པོ་བརྒྱད་ཅུའི་བདག་ཉིད་སྐུ་མདོག་དམར་པོའོ། །དེའི་དབུས་སུ་ཧྲཱིཿཡིག་དམར་པོ་ཡོངས་སུ་གྱུར་པ་ལས་ཨུཏྤ་ལ་དམར་པོའི་མདེའུ་ཅན་གྱི་མདའ་ལ་རང་གི་སེམས་
[197b.6]ཉིད་རབ་ཏུ་ཞུགས་པར་བསྒོམ་པར་བྱའོ། །ཕྱི་ནས་ཉི་མ་དང་ཟླ་བ་རོ་གཅིག་ཏུ་གྱུར་པ་ལས་བདག་ཉིད་སྔོན་མ་བཞིན་དུ་ཀུ་རུ་ཀུལླེའི་སྐུར་བསྒོམ་པར་བྱའོ། །རང་གི་སྙིང་གར་རཾ་ཡིག་ལས་ཉི་མའི་དཀྱིལ་འཁོར་བསྒོམས་ལ་དེའི་ལྟེ་བ་ལ་སླར་ཡང་ཧྲཱིཿབསྒོམ་པར་བྱའོ། །དེ་ལས་བྱུང་བའི་འོད་
[197b.7]ཟེར་གྱིས། མགོན་པོ་འོད་དཔག་ཏུ་མེད་པ་གདན་དྲངས་ལ་གསང་བ་དང་བཅས་པའི་མཆོད་པ་རྣམས་ཀྱིས་ཡང་དག་པར་མཆོད་ནས་དབང་བསྐུར་བར་གསོལ་བ་གདབ་པར་བྱ་སྟེ། དེ་ལ་འདིས་གསོལ་བ་གདབ་པོ། །མགོན་པོ་འོད་དཔག་ཏུ་མེད་པས་བདག་ལ་དབང་བསྐུར་དུ་གསོལ་ཞེས་སོ། །
[198a]
[198a.1]དེ་ནས་མགོན་པོ་འོད་དཔག་ཏུ་མེད་པས་ཉིད་ཀྱི་ཐུགས་ཀ་ནས་བདུད་རྩི་ལྔས་གང་བའི་བུམ་པ་ལྔ་འཕྲོ་བར་རྣམ་པར་བསྒོམ་པར་བྱའོ། །དེ་ནས་བདུད་རྩི་རྣམ་པ་ལྔས་ཡོངས་སུ་གང་བའི་བུམ་པ་ལྔ་པོ་དེ་རྣམས་ཀྱིས་ཁྲུས་མཛད་ཅིང་བཀྲུས་ནས་རང་གི་སྙིང་གའི་བུམ་པ་
[198a.2]རྣམས་ལ་རབ་ཏུ་གཞུག་པར་བྱའོ། །དེ་ལ་རབ་ཏུ་ཞུགས་ནས་རྣལ་འབྱོར་པའི་སྤྱི་བོར་མགོན་པོ་འོད་དཔག་ཏུ་མེད་པ་བསྒོམ་པར་བྱའོ། །ཐུན་མཚམས་གསུམ་དུ་རྣམ་པར་བསྒོམ་ཞིང་སྔགས་བཟླས་པར་བྱའོ། །དེ་ནས་སྔགས་ནི་ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཙནྡན་དམར་པོས་ཁྱད་པར་དུ་བཟླས་
[198a.3]པར་བྱའོ། །ཨོཾ་ཨཱཿཧཱུཾ་ཞེས་པས་སྐུ་གསུང་ཐུགས་བྱིན་གྱིས་བརླབ་པར་བྱའོ། །དེ་ནས་སྔགས་པས་སྐྱེས་པའམ་བུད་མེད་དབང་དུ་བྱ་བར་འདོད་ན་དཀར་པོའི་ཕྱོགས་ཀྱི་ཚེས་གཅིག་ནས་བརྩམས་ཏེ་ཐུན་མཚམས་གསུམ་དུ་ཁྲི་ཕྲག་རེ་ཉི་མ་སོ་སོ་ལ་བཅོམ་ལྡན་འདས་མའི་སྐུ་ལ་དམིགས་
[198a.4]ལ་གོས་དམར་པོའི་སྟོད་གཡོགས་བྱའོ། །དེའི་རྗེས་སུ་རང་གི་སྙིང་གར་ཉི་མ་ལ་གནས་པའི་ཧྲཱིཿཡིག་དམར་པོ་ཡོངས་སུ་གྱུར་པ་ལས་ཆུ་སྐྱེས་དམར་པོ་འདབ་མ་བརྒྱད་པ་སྐྱེ་གནས་ཀྱི་བར་དུ་སོན་པའི་སྡོང་བུའི་རྣམ་པ་བསྒོམ་པར་བྱའོ། །དེའི་འདབ་མ་བརྒྱད་ལ་བུང་བ་བརྒྱད་དོ། །བར་བར་
[198a.5]དུ་དབྱངས་ཡིག་ཡོངས་སུ་གྱུར་པ་ལས་ཤིན་ཏུ་དགའ་ཞིང་དགྱེས་པ་དང་ཁྲོ་ཞིང་ཆགས་པའི་གོ་རིམས་བཞིན་དུ་རང་གི་སྣའི་རླུང་གིས་བསྐུལ་ཏེ་འཕུར་ནས། སྣ་བུག་གཡོན་པའི་བུ་ག་ནས་འཐོན་ཏེ་བསྒྲུབ་བྱའི་སྣ་བུག་གཡས་པའི་བུ་གར་རབ་ཏུ་ཞུགས་ཏེ་དགའ་བས་དུམ་བུར་གཏུབ་ཅིང་ཉམས་
[198a.6]པར་བྱས་ཏེ། དབྱངས་ཡིག་དང་པོ་ལ་སོགས་པ་བརྒྱད་ཅུང་ཞིག་དམར་བ་དང་ལྡན་པའི་འདབ་མ་བཞི་བསྒོམ་པར་བྱའོ། །དེ་ལྟར་ལྟ་བར་བྱེད་པའི་རྣལ་འབྱོར་པས་ཕྱི་ནས་རྣ་བའི་བར་དུ་བཀང་བའི་ཨུཏྤ་ལའི་མདེའུ་ཅན་གྱི་མདའ་དང་གཞུའི་ཆང་པ་ལ་བལྟ་ཞིང་སྔགས་ཟེའུ་འབྲུ་ལ་སོ་སོར་རྟོག་
[198a.7]པར་བྱའོ། །དེ་ནས་བུང་བ་དེ་རྣམས་རང་གི་དམ་ཚིག་གིས་བསྐུལ་ནས་སྣ་བུག་གཡོན་པའི་བུ་ག་ནས་བྱུང་སྟེ། དབྱངས་རེ་རེ་བླངས་ཤིང་དོན་ནས་རྣལ་འབྱོར་པའི་སྣ་བུག་གཡས་པའི་བུ་ག་ནས་ཞུགས་ཏེ་རང་གི་སྙིང་གར་རང་དང་གཞན་གྱི་ཤེས་པ་ངོ་བོ་གཅིག་ཏུ་བྱའོ། །ཕྱི་ནས་ཨུཏྤ་ལས་
[198b]
[198b.1]སྐེ་བ་བཅིངས་ཏེ། སྐྱེ་གནས་ལྕགས་ཀྱུས་ཕུག་ཅིང་མདའི་དྲ་བས་བསྣུན་ཅིང་དབང་དུ་བྱེད་པར་རྣམ་པར་བསམ་པར་བྱའོ། །མགལ་མེའི་འཁོར་ལོ་ལ་བསྒྲུབ་བྱ་གནས་པར་བསམ་པར་བྱའོ། །སྒྲུབ་པ་པོ་ནི་སྔགས་ཀྱི་གཟུགས་ཀྱིས་ཉེ་བར་བསྟན་པར་ངེས་དགའ་བས་རྟག་ཏུ་སྔགས་བཟླས་
[198b.2]པར་བྱའོ། །ཨོཾ་ཀུ་རུ་ཀུལླེ་ཧྲཱིཿཆེ་གེ་མོ་བདག་གི་དབང་དུ་གྱིས་ཤིག་སྭཱ་ཧཱ། ཉིན་མཚན་ཐམས་ཅད་དུ་ཡང་འདི་བྱའོ། །དེ་ནས་མྱོས་པར་གྱུར་ཏེ་འོང་བར་འགྱུར་རོ། །སྔགས་ཀྱིས་བསྐུལ་ནས་སྐྲ་གྲོལ་བ་གོས་མེད་པ་འདོད་པ་མྱོས་པས་ནོན་པ་དེ་ཐོབ་ནས་རང་གི་ཡི་དམ་གྱི་རྣལ་འབྱོར་ཀྱིས་
[198b.3]སངས་རྒྱས་ཀྱི་དཀྱིལ་འཁོར་མཆོད་པར་བྱའོ། །གཞོམ་པར་མི་ནུས་པའི་དངོས་གྲུབ་རྒྱ་ཆེན་པོ་ཐོབ་པར་འགྱུར་རོ། །ཨུ་ཌྱནནས་བྱུང་བའི་རིགས་བྱེད་མའི་སྒྲུབ་ཐབས་རྫོགས་སོ།། {T3567}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། རིགས་བྱེད་མའི་
[198b.4]སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །ཀྱེ་ཡི་རྡོ་རྗེའི་རྒྱུད་རིམ་ལས། །འཇིག་རྟེན་གསུམ་པོ་དབང་བྱེད་པའི། །རིགས་བྱེད་ཆེན་པོ་ལ་བཏུད་ནས། །དེ་ཡི་སྒྲུབ་ཐབས་གསལ་བར་བརྗོད། །འདིར་རྒྱུད་ལས་ལྷག་པར་བསྒོམ་པར་བྱ་སྟེ། སྔགས་པས་སྔ་བར་ཉལ་བ་ལས་ལངས་
[198b.5]ཏེ། སྙིང་གར་རཾ་ཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར་ལ་ཧྲཱིཿཡིག་དམར་པོ་བལྟས་ཏེ། དེའི་འོད་ཟེར་གྱིས་འཆད་པར་འགྱུར་བའི་བཅོམ་ལྡན་འདས་མ་རིགས་བྱེད་མ་མདུན་དུ་བལྟས་ནས་ཉེར་སྤྱོད་ལྔའི་སྤྲིན་ཚོགས་ཀྱིས་ཡང་དག་པར་མཆོད་ནས། དེའི་མདུན་དུ། དཀོན་མཆོག་
[198b.6]གསུམ་ལ་བདག་སྐྱབས་མཆི། །ཞེས་པ་ལ་སོགས་པའི་ཚིགས་སུ་བཅད་པ་ལན་གསུམ་དུ་བརྗོད་པར་བྱའོ། །དེ་ནས་སྡུག་བསྔལ་གྱིས་སྡུག་བསྔལ་བའི་སེམས་ཅན་རྣམས་ལ་དམིགས་ཏེ། དེ་རྣམས་སྡུག་བསྔལ་བ་ལས་འདོན་པའི་མཚན་ཉིད་ཀྱི་སྙིང་རྗེ་ཆེན་པོ་བསྒོམ་པར་བྱའོ། །དེ་ནས་ཆོས་དང་གང་
[198b.7]ཟག་གི་གཟུང་བ་དང་འཛིན་པའི་རང་བཞིན་དག་གི་དངོས་པོ་མེད་པའི་ངོ་བོ་ཉིད་གཉིས་སུ་མེད་པར་བརྗོད་པའི་མཚན་ཉིད་ཀྱི་སྟོང་པ་ཉིད་བསྒོམས་ལ་དེའི་སྔགས་བྱིན་གྱིས་བརླབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་སོ། །དེ་ནས་དེ་རྣམས་ལྷ་དང་ནམ་མཁའ་གཉིས་སུ་
[199a]
[199a.1]མེད་པར་བསམ་པར་བྱའོ། །ཉི་མའི་དཀྱིལ་འཁོར་བལྟས་ལ། དེའི་དབུས་སུ་ཧྲཱིཿདམར་པོ་ཡོངས་སུ་གྱུར་པ་ལས་ཨུཏྤ་ལ་དམར་པོའི་ཟེའུ་འབྲུ་ལ་ཉི་མ་ལ་ལྷའི་ས་བོན་ནོ། །དེ་ལ་སྤྲོ་བ་དང་བསྡུ་བ་བྱས་ནས་དེ་ལ་དེ་བཞིན་དུ་རབ་ཏུ་ཞུགས་ནས་དེ་ཐམས་ཅད་ཡོངས་སུ་གྱུར་པ་
[199a.2]ལས་དཔལ་ཀུ་རུ་ཀུལླེའི་སྐུར་བདག་ཉིད་བལྟ་བར་བྱའོ། །ཆུ་སྐྱེས་དམར་པོ་འདབ་མ་བརྒྱད་པའི་དབུས་སུ་རོའི་སྙིང་གར་ཉི་མའི་སྟེང་དུ་དཀྱིལ་འཁོར་ཕྱེད་པའི་གར་སྟབས་ཀྱིས་བཞུགས་པ། ཉི་མའི་དཀྱིལ་འཁོར་གྱི་འོད་ལ་ཕྱོགས་དང་ཕྱོགས་མཚམས་བརྒྱད་དུ་དུར་ཁྲོད་བརྒྱད་ཀྱིས་ཡོངས་སུ་
[199a.3]བསྐོར་བ། སྐུ་མདོག་དམར་མོ་ལོ་བརྒྱད་གཉིས་ལོན་པ་ལྟ་བུ། དབུ་སྐྲ་དམར་སེར་གྱེན་དུ་བརྫེས་པ། དབུ་ལ་སངས་རྒྱས་ལྔའི་རང་བཞིན་ཐོད་པ་ལྔས་བརྒྱན་པ། མགོ་བོ་རློན་པའི་དོ་ཤལ་གྱིས་བརྒྱན་པ། ཞལ་མཆེ་བ་གཙིགས་པ། ལྗགས་འདྲིལ་བ། སྤྱན་གསུམ་དམར་ཞིང་ཟླུམ་པ་
[199a.4]གཡོན་དུ་ལྟ་བ། ཁྲོ་ཞིང་སྒེག་པའི་ཉམས་ཅན། རུས་པའི་རང་བཞིན་གྱི་འཁོར་ལོ་དང་། རྣ་རྒྱན་དང་། མགུལ་རྒྱན་དང་། ལག་གདུབ་དང་། སྐ་རགས་དང་། དཔུང་རྒྱན་དང་། རྐང་གདུབ་རྣམས་ཀྱིས་བརྒྱན་པ། རྩ་བའི་ཕྱག་གཉིས་ཀྱིས་མེ་ཏོག་དམར་པོའི་གཞུ་དང་ཨུཏྤ་ལའི་
[199a.5]མདེའུ་ཅན་གྱི་མདའ་རྣ་བའི་རྩར་འགེངས་པ། ཕྱག་ལྷག་མ་གཉིས་ཀྱིས་ཨུཏྤ་ལའི་ཞགས་པ་དང་། ལྕགས་ཀྱུ་བསྣམས་པ་བསམ་པར་བྱའོ། །དེའི་སྤྱི་བོ་དང་མགྲིན་པ་དང་སྙིང་ག་རྣམས་སུ་ཨོཾ་ཨཱཿཧཱུཾ་ཞེས་པའི་ཡི་གེ་རྣམས་བལྟ་བར་བྱའོ། །དེ་ནས་རང་གི་སྙིང་གར་ཉི་མ་ལ་གནས་པའི་
[199a.6]ཨུཏྤ་ལ་དམར་པོའི་ཟེའུ་འབྲུ་ལ་ཉི་མ་ལ་ཧྲཱིཿཡིག་དམར་པོ་བལྟས་ལ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་བསྐུལ་ཞིང་གདན་དྲངས་ནས་དབང་བསྐུར་བར་གསོལ་བ་གདབ་པར་བྱ་སྟེ། བདུད་རྩི་ལྔས་གང་བའི་བུམ་པ་རྣམས་ཀྱིས་དབང་བསྐུར་ཞིང་བཅོམ་ལྡན་འདས་འོད་
[199a.7]དཔག་མེད་ཀྱིས་དབུ་བརྒྱན་པའོ། །དེ་ནས་རང་གི་སྙིང་གར་ས་བོན་བརྒྱད་ལས་ལྷ་མོ་བྱུང་སྟེ། རང་རང་གི་བྱང་ཆུབ་ཀྱི་སེམས་ཀྱི་ཁུ་བས་ཡང་དག་པར་མཆོད་ནས་དེ་ལ་དེ་བཞིན་དུ་ས་བོན་སྤྲོ་བར་བྱའོ། །སྔགས་དང་ཡི་གེ་རྣམ་པར་སྤངས། །ཐིག་ལེ་མ་ཡིན་སེམས་མ་ཡིན། །འདི་ནི་མཆོག་
[199b]
[199b.1]གི་བདེ་ཆེན་ཏེ། །དོར་བ་མེད་ཅིང་བླང་དུ་མེད། །ཅེས་པའི་འདིས་བསྟོད་ནས། དེ་ནས་བདུད་རྩི་མྱང་བའི་ཆོ་གས་བདུད་རྩི་རྣམ་པ་ལྔ་རབ་ཏུ་འབར་ཞིང་རྫོགས་པས་ཧཱུཾ་ཡིག་དཀར་པོ་ལས་ལྕེ་རྡོ་རྗེའི་རང་བཞིན་དུ་བྱས་ལ་ཡི་གེ་གསུམ་གྱིས་བརླབས་ནས་བདག་ཉིད་ཀུ་རུ་ཀུལླེའི་སྐུར་བསྒོམ་མོ། །བསྒོམས་པས་
[199b.2]སྐྱོ་ན་སྔགས་པས་སྔགས་བཟླས་པར་བྱའོ། །དེ་བཞིན་དུ་ཧྲཱིཿཡིག་ལ་ཡང་དག་པར་བསྐོར་ཞིང་གནས་པའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཞེས་པའི་ཡི་གེ་བརྒྱད་པོའི་སྔགས་ནི་སྔགས་ཀྱི་ཕྲེང་བ་འབར་བ་བཞིན་དུ་ཡིད་ཀྱིས་བསྐོར་ནས། མྱུར་བ་དང་བུལ་བ་ལ་སོགས་པའི་སྐྱོན་རྣམས་དང་བྲལ་ཞིང་ཙནྡན་
[199b.3]དམར་པོའི་ཕྲེང་བས་བཟླས་པར་བྱའོ། །བྱེ་བ་དྲུག་བཟླས་ན་འགྲོ་བ་དྲུག་ལ་འཁོར་ལོས་སྒྱུར་ཞིང་སེམས་ཅན་རྣམས་དབང་དུ་བྱེད་དོ། །ཐུན་མཚམས་ཀྱི་ནང་དུ་སྐད་ཅིག་གིས་བདག་ཉིད་ཀུ་རུ་ཀུལླེའི་སྐུར་བསྐྱེད་པར་བསམས་ནས་མཆོད་པ་དང་བསྟོད་པ་ལ་སོགས་པ་བྱའོ། །ཉན་བཤད་ལ་སོགས་པ་བྱ་
[199b.4]བ་ཐམས་ཅད་བཅོམ་ལྡན་འདས་མའི་ང་རྒྱལ་གྱིས་དེ་བཞིན་དུ་བྱའོ། །དེ་ནས་སྨོན་ལམ་གདབ་པ་ལ་སོགས་པ་བྱས་ནས་ཅི་བདེར་ཉལ་བར་བྱའོ། །མན་ངག་འདི་ཡང་བླ་མ་བརྒྱུད་པའི་རིམ་པས་ཤེས་ཤིང་རང་གི་སྙིང་གའི་ས་བོན་ལས་བདུད་རྩིའི་ཁུ་བ་འཛག་བཞིན་པ་སྙིང་ག་ལས་ལངས་ནས་
[199b.5]མགོ་བོ་ནས་གཡོན་དུ་འཁོར་ཞིང་དཀྲིས་ནས་རྣ་བ་གཡས་ཀྱི་བུ་གར་ཞུགས་ཤིང་ལག་པ་གཡས་པས་གཞུའི་རྒྱུད་ལ་གནས་པའི། མདའི་ལྟང་གི་བུ་ག་ནས་མདེའུའི་རྩེ་མོར་ཞུགས་ཤིང་དེའི་འོད་ཟེར་འཕྲོ་ཞིང་གསལ་བས་སྲིད་པ་གསུམ་དུ་སོང་ནས་སེམས་ཅན་རྣམས་ཀྱི་སྙིང་ལ་ཞུགས་ཏེ།
[199b.6]དེའི་སྟེང་དུ་ཆུ་སྐྱེས་རྣམས་ཡང་དག་པར་བསྐུལ་ནས་བཀུག་སྟེ། སླར་ཡང་དེ་ལ་དེ་བཞིན་དུ་ཞུགས་ནས་མདའི་མདེའུ་ལས་རྣ་བའི་བུ་ག་ནས་མགོ་ལ་གཡས་སུ་བསྐོར་བས་སྨིན་མའི་དབུས་སུ་གནས་ནས་ཨ་བ་དྷཱུ་ཏཱིའི་ལམ་ནས་མགྲིན་པ་དང་སྙིང་ག་དང་ལྟེ་བའི་མཐར་ཐུག་པ་བདེ་བ་ཆེན་པོའི་སྣང་
[199b.7]བའི་གནས་ལ་མན་ངག་ཇི་ལྟ་བ་བཞིན་དུ་རབ་ཏུ་གཞུག་པར་བྱའོ། །དེ་ནས་ཐབས་དང་ཤེས་རབ་དྲི་མ་མེད་པའི་ཏིང་ངེ་འཛིན་ལས་ཡང་དག་པར་བྱུང་བ་དེའི་བདེ་བ་ཆེན་པོས་གང་བ་བཞིན་དུ་རང་གི་ལུས་དང་ཁམས་གསུམ་ཡང་བལྟ་བར་བྱའོ། །དེའི་སྐད་ཅིག་ལ་ཚིགས་སུ་བཅད་པ་འདིའི་དོན་དྲན་
[200a]
[200a.1]པར་བྱ་སྟེ། །ཐོག་མ་དབུས་མཐའ་མེད་པ་སྟེ། །འཁོར་བ་དང་ནི་མྱང་འདས་མིན། །དེ་ནི་བདེ་བ་ཆེན་པོ་སྟེ། །བདག་མིན་གཞན་ཡང་མིན་པའོ། །དེ་བཞིན་དུ་སླར་ཡང་ཇི་སྙེད་པའི་སེམས་ཅན་རྣམས་དབང་དུ་བྱས་ནས་དེ་ལ་བྱང་ཆུབ་ཆེན་པོ་མངོན་སུམ་
[200a.2]དུ་བྱས་ཏེ། དེ་བཞིན་དུ་སྦྱོར་བས་བཟོད་པར་བྱའོ། །དེ་བཞིན་དུ་བསྒྲུབ་བྱ་དང་བསྒྲུབ་བྱ་མོ་ཀུ་རུ་ཀུལླེའི་སྐུར་བསྒོམས་ནས་གང་དུ་དེའི་ས་བོན་ལ་དེ་བཞིན་དུ་སྒྲུབ་པ་པོའི་མདའ་ལས་བསྒྲུབ་བྱའི་ལག་ན་གནས་པའི་མདའི་མདེའུ་ལ་དེའི་འོད་ཟེར་གྱི་རྣམ་པར་སོང་ནས། དེ་བཞིན་དུ་རྣ་བ་གཡས་
[200a.3]ནས་ཞུགས་ཏེ་དེ་བཞིན་དུ་སོང་ཞིང་དེ་བཞིན་དུ་གནས་ནས་དེ་བཞིན་དུ་ཞུགས་ཤིང་དེའི་གནས་ལ་སོན་ནས་དེ་བཞིན་དུ་གནས་པར་བྱའོ། །དཔལ་ཀུ་རུ་ཀུལླེའི་རྟོག་པ་ལས་ཧྲཱིཿཡིག་མྱོས་བྱེད་ཀྱི་གདུག་ལ་དགོད་པར་གསུངས་ཏེ། དེ་ནས་ངེས་པར་བསྒྲུབ་བྱ་སྒྲུབ་པ་པོའི་གཞན་དབང་དུ་གྱུར་ནས་
[200a.4]ཡིད་སྤྲོ་བས་བྱ་བ་ཐམས་ཅད་བྱེད་པར་འགྱུར་རོ། །ཀུ་རུ་ཀུལླེའི་སྒྲུབ་ཐབས་བཤད། །ཆོ་ག་འདི་བསྒྲུབས་བསོད་ནམས་གང་། །དེ་ཡིས་སྐྱེ་བོ་མ་ལུས་ཀུན། །དབང་གྱུར་བྱང་ཆུབ་སྦྱོར་བར་ཤོག །དཔལ་ཀྱེའི་རྡོ་རྗེའི་རྒྱུད་ལས་རང་བྱིན་གྱིས་བརླབ་པའི་རིམ་པའོ། །རིགས་བྱེད་
[200a.5]མའི་སྒྲུབ་ཐབས་དཔལ་ལྷན་ཅིག་སྐྱེས་པའི་རོལ་པས་མཛད་པ་རྫོགས་སོ།། {T3568}༄༅༅། །རྒྱ་གར་སྐད་དུ། ཧེ་བཛྲ་ཀྲ་མ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཀྱེ་རྡོ་རྗེའི་རིམ་པའི་རིགས་བྱེད་མའི་སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །དང་པོ་རང་གི་སྙིང་གར་ཁ་
[200a.6]དོག་དམར་པོའི་ཟླ་བའི་དཀྱིལ་འཁོར་བསྒོམས་ལ། དེ་ལ་ཧྲཱིཿཡིག་དམར་པོ་བལྟ་བར་བྱའོ། །དེ་ནས་སྡིག་པ་བཤགས་པ་ལ་སོགས་པ་བྱའོ། །ཕྱི་ནས་སྟོང་པ་ཉིད་བསྒོམ་པར་བྱའོ། །འདིར་རྣལ་འབྱོར་པས་སྟོང་པ་ཉིད་ལ་གནས་ནས་རཾ་ཡིག་ལས་མདུན་དུ་ཉི་མ་རྣམ་པར་བསྒོམས་
[200a.7]ལ། དེའི་སྟེང་དུ་ཧཱུཾ་ཡིག་ཁ་དོག་ནག་པོ་འོད་ཟེར་དང་ལྡན་པ་བསྒོམ་པར་བྱའོ། །དེ་ཡོངས་སུ་གྱུར་པ་ལས་སྣ་ཚོགས་རྡོ་རྗེའོ། །དེ་ཡོངས་སུ་གྱུར་པ་ལས་རྡོ་རྗེའི་རང་བཞིན་གྱི་ས་གཞི་དང་། རྡོ་རྗེའི་ར་བ་དང་། རྡོ་རྗེའི་གུར་བཅིངས་ནས་ཨོཾ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཕྱི་ནས་
[200b]
[200b.1]རྣལ་འབྱོར་པས་པདྨ་དམར་པོའོ། །དེའི་སྟེང་དུ་ཟླ་བའི་དཀྱིལ་འཁོར་རོ། །དེའི་སྟེང་དུ་ཧྲཱིཿཡིག་དམར་པོ་ཡོངས་སུ་གྱུར་པ་ལས་ཨུཏྤ་ལ་དམར་པོའོ། །དེའི་སྟེང་དུ་སླར་ཡང་ཟླ་བའི་དཀྱིལ་འཁོར་རོ། །དེ་ཡོངས་སུ་གྱུར་པ་ལས་ཀུ་རུ་ཀུལླེར་བདག་ཉིད་བསམ་པར་བྱ་སྟེ། སྐྱིལ་ཀྲུང་ཕྱེད་པའི་
[200b.2]གར་སྟབས་ཀྱིས་བཞུགས་པ་གཞོན་ཞིང་རྐེད་པ་ལ་སྟག་གི་པགས་པའི་ཤམ་ཐབས་མནབས་པ། ཕྱག་རྒྱ་ལྔས་རྣམ་པར་བརྒྱན་པ། སྐྲ་དམར་སེར་གྱེན་དུ་བརྫེས་པ་མགོན་པོ་འོད་དཔག་ཏུ་མེད་པས་དབུ་བརྒྱན་པ། ཕྱག་ན་མདའ་གཞུ་དང་དེ་བཞིན་དུ་ཨུཏྤ་ལ་བསྣམས་པའོ། །འདིར་གནས་
[200b.3]ངེས་པ་མེད་ཅིང་ཟས་ཀྱང་ངེས་པ་མེད་ལ། འདིར་སྔགས་བཟླས་ཤིང་བྱ་བ་དང་ལྡན་པས་སོ། །ཇི་ལྟ་བ་བཞིན་དུ་འགའ་ཞིག་གིས་ཀྱང་མི་ཤེས་ཏེ་དེ་བཞིན་དུ་བསྒྲུབ་པར་བྱའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཟླ་བ་ཕྱེད་དུ་ཁྲི་ཕྲག་གཅིག་གིས་རྒྱལ་པོ་དང་། སྐྱེ་དགུའི་འཇིག་རྟེན་དབང་དུ་འགྱུར་རོ། །
[200b.4]བྱེ་བས་དུད་འགྲོ་དང་གནོད་སྦྱིན་ལ་སོགས་པ་དང་། འབུམ་ཕྲག་བདུན་གྱིས་ལྷ་མ་ཡིན་རྣམས་ཀྱང་ངོ་། །ཀྱེའི་རྡོ་རྗེའི་རིམ་པའི་ཀུ་རུ་ཀུལླེའི་སྒྲུབ་ཐབས་རྫོགས་སོ།། {T3569}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ་ཤྲཱི་ཧེ་བཛྲ་ཏནྟྲོད་ཌི་ཏཾ། བོད་སྐད་དུ། རིགས་བྱེད་མའི་
[200b.5]སྒྲུབ་ཐབས་ཀྱེའི་རྡོ་རྗེའི་རྒྱུད་ལས་བཏོན་པ། ཀུ་རུ་ཀུལླེ་ལ་ཕྱག་འཚལ་ལོ། །དང་པོར་རབ་སད་སྣུམ་ཞིང་ཉི་མའི་འོད་ཟེར་མི་བཟད་དཔལ་གྱི་སྣང་བ་ཡང་དག་འཕྲོ་བ་ཅན། །འདོད་ཆགས་རྡོ་རྗེའི་འོད་ཟེར་ཆེན་པོ་འཕྲོ་ཞིང་ཀུན་ནས་ཆགས་པའི་དབུ་སྐྲ་དམར་སེར་གྱེན་བརྫེས་པ། །གང་གིས་རྩེ་
[200b.6]གཅིག་རྣམ་པར་བསམས་ནས་སུམ་ཅུའི་གྲོང་ཁྱེར་ལྷ་མོའི་ལག་པས་ཡང་དག་འཁྱུད་ཐོབ་པ། །འགྲོ་བ་རྣམས་ནི་མཚུངས་པ་མེད་པར་དབང་དུ་མཛད་པ་སྨན་རྣམས་གྲུབ་པ་དེ་ལ་ཕྱག་འཚལ་ནས། །དུར་ཁྲོད་དང་ནི་ཁྱིམ་དང་རི་བྲག་ས་ཕུག་རི་ལྗོངས་ཤིང་དྲུང་དང་ནི་ཡང་ན་རང་ཁྱིམ་མམ། །ས་
[200b.7]ཕྱོགས་བར་དུ་གཅོད་པ་བྲལ་བའི་གནས་ནི་འགའ་ཞིག་ཏུ་ཡང་བདེ་བའི་སྟན་ལ་ཉེ་བར་འདུག །དཔལ་ལྡན་ཀྱེ་ཡི་རྡོ་རྗེའི་རིམ་པས་སྲིད་པ་གསུམ་པོ་ཡོངས་གྱུར་པ་ལས་ཟག་མེད་ཡེ་ཤེས་སྐུ། །བསྒོམ་བྱ་ཨུཏྤལ་དམར་པོའི་འོད་ཀྱིས་སྣང་མཛད་འགྲོ་རྣམས་སྲིད་དང་མྱང་འདས་སྒྱུ་མ་བཞིན་
[201a]
[201a.1]དུ་བསམ། །དང་པོར་སེམས་ཅན་རྣམས་ལ་བྱམས་ཤིང་ཕན་པ་བུ་བཞིན་ཤིན་ཏུ་མཉེས་གཤིན་གཟུགས་ནི་རྣམ་པར་བསམ། །སེམས་ཅན་ཐམས་ཅད་བུ་གཅིག་ན་བ་བཞིན་དུ་རྟོགས་པའི་རྗེས་སུ་བརྩེ་བ་གང་ཞིག་བསྒོམ་པར་བྱ། །དེ་རྣམས་ཐར་པར་མཐོང་ཞིང་
[201a.2]ཕུན་ཚོགས་ཀྱིས་གང་ཤིན་ཏུ་དགའ་བར་གྱུར་པ་གཞན་དོན་གཅིག་པུའི་གཟུགས། །ཕན་དང་མི་ཕན་བློ་གྲོས་དྲི་མ་སེམས་ཅན་ཀུན་ལ་སྟོང་པ་ཉིད་དུ་བཏང་སྙོམས་བསྒོམ་པར་བྱ། །དེ་ནས་ཐམས་ཅད་རྫོགས་ནས་རང་སྙིང་སྒྲ་ནི་བརྟག་ཅིང་ཉི་མ་ལ་གནས་ཧྲཱིཿཡིག་དམར་པོ་ཡི། །འོད་ཟེར་
[201a.3]རབ་ཏུ་འཕྲོ་བས་བླ་མ་དང་ནི་བདེ་གཤེགས་སྲས་བཅས་སངས་རྒྱས་རྣམས་ནི་སྤྱན་དྲངས་ནས། །འཁོར་བའི་སྐྱེ་གནས་གང་རྣམས་སུ་ནི་ལས་ཀྱི་སྒྲིབ་པ་གང་ཞིག་བགྱིས་དང་བགྱིད་དུ་སྩལ་པ་དང་། །རྗེས་སུ་ཡི་རང་རྣམས་ནི་རབ་ཏུ་བཤགས་བགྱི་གཞན་ཡང་དགེ་བ་རྣམས་ལ་དེ་བཞིན་རྗེས་ཡི་
[201a.4]རང་། །དེ་རྗེས་རྣམ་པ་ཀུན་བྲལ་བཅོམ་ལྡན་འདས་མ་བླ་མ་དམ་པའི་བཀའ་ཡིས་དེ་བཞིན་ཤེས་གྱུར་ནས། །བསྒོམ་པར་བྱ་བ་དེ་ཡི་མདུན་དུ་དཔེ་མེད་ལྷན་ཅིག་སྐྱེས་པ་རྒྱལ་བ་རྣམས་ཀྱི་ཆོས་ཀྱི་སྐུ། །དེ་ནི་ཐམས་ཅད་མཁྱེན་པ་དེ་བཞིན་སྲིད་པ་གསུམ་པོ་རྣམས་ནི་མ་ལུས་སྣང་བར་མཛད་
[201a.5]པའི་སྐུ། །ཕྱོགས་རྣམས་ཐམས་ཅད་ཕ་རོལ་ཕྱིན་པ་མཆོག་རྣམས་ཡོངས་གྱུར་མི་ཤེས་དེ་ཉིད་དེ་ལ་དེ་བཞིན་དུ། །ནུབ་པར་གྱུར་ཅིང་དེ་ལ་རྣལ་འབྱོར་པས་ནི་སྨོན་ལམ་ལས་འཁྲུངས་ཆོས་ཀྱི་སྐུ་ཉིད་གྱུར་པ་སྟེ། །ངོ་བོ་ཉིད་ལས་སྐྱེས་ཤིང་ལོངས་སྤྱོད་རྫོགས་སྐུ་རང་གི་འོད་ཟེར་གཅིག་
[201a.6]འཕྲོ་ཉི་མའི་དཀྱིལ་འཁོར་ལ། །དེ་ལ་ཧཱུཾ་ཡིག་སྔོན་པོའི་འོད་ཟེར་དེ་ནས་ཤེས་ཤིང་སྣ་ཚོགས་རྡོ་རྗེ་དེ་ཡི་བདག་ཉིད་ལ། །རབ་གུར་རྣམས་མཆོག་གི་སྟོབས་ཅན་བདུད་ཀྱི་དཔའ་བོ་ཆེན་པོ་རྣམས་ཀྱིས་དབྱེ་བར་མི་ནུས་པ། །ཕྱི་ནས་ཆུ་སྐྱེས་དམར་པོའི་སྟེང་དུ་ཉི་མའི་འོད་ཟེར་དང་ནི་མཚུངས་པའི་སྒྲ་ཡི་
[201a.7]ཐིག་ལེ་དང་། །ཧྲཱིཿཡིག་ལས་ནི་བྱུང་བའི་ཨུཏྤ་ལ་དམར་པོའི་སྟེང་དུ་རྣམ་པར་འཕྲོ་བའི་ཉི་མའི་དཀྱིལ་འཁོར་ལ། །དེ་ལ་མདུན་དུ་ཁམས་གསུམ་འཁོར་བ་ཡི། །ཉི་མ་དམར་ཆེན་འབར་བ་ལ་ནི་ཧྲཱིཿ། །ལྷ་མོའི་མདུན་དུ་ཤིན་ཏུ་འབར་བ་ཡི། །དཔལ་ཀྱི་མེ་ཡིས་བདུད་ཚོགས་བསྲེག་
[201b]
[201b.1]མཛད་པ། །དང་པོའི་ཇི་བཞིན་ཤིན་ཏུ་གསལ་བ་ཡི། །པདྨ་དམར་པོ་རབ་གསལ་སྙིང་པོ་འབར། །དམར་སེར་སྐྲ་བརྫེས་ནུ་མ་སྐུ་སྨད་དག །རྒྱས་ཤིང་ཕྱག་རྒྱས་རབ་སྒེག་ཉམས་ཅན་མ། །སྤྱན་གསུམ་དམར་ཞིང་གཡོན་དུ་གཟིགས་ལ་ཆགས། །ཞལ་ནི་མཆེ་བ་གཙིགས་ཤིང་འོད་ཀྱིས་
[201b.2]རེག །ཞལ་ནི་རབ་སྒྲོགས་ལྗགས་ཀྱི་རྩེ་མོ་ནི། །གྱེན་དུ་བསྐྱོད་ཅིང་འོད་ཟེར་འབར་བ་ཅན། །སྣ་ཚོགས་མེ་ནི་འཕྲོ་ཞིང་འོད་ཟེར་འབར་བའི་རོ་ནི་འགྲོ་བཞིན་པ་ལ་ཞབས་ནི་རྩེ་མོ་ཆགས། །ཅིག་ཤོས་ཞབས་ནི་སྟེང་དུ་རྣམ་པར་བཀོད་ཅིང་འཕྲོ་བཞིན་པ་དང་གཡོན་པར་ཤེས་པའི་
[201b.3]གཟུགས་ཅན་མ། །རྣམ་པར་འཕྲོ་བའི་རྒྱ་ཆེན་འོད་ཟེར་ལུས་ཀྱིས་ཁྱབ་ཅིང་སྐུ་སྨད་ལྕི་ཞིང་རྒྱས་པས་ངེས་པར་ཆགས། །ཆུ་སྐྱེས་དམར་པོ་རྣམ་པར་བསྣམས་ཤིང་མགུལ་དུ་མི་མགོའི་དོ་ཤལ་ཕྲེང་བ་རབ་ཏུ་འཆང་བ་ཅན། །སྡོང་བུ་དང་བཅས་ཨུཏྤལ་དམར་པོ་རྒྱ་ཆེར་རབ་ཏུ་རྒྱས་ཤིང་
[201b.4]འཕྲོ་བ་གཉིས་འཕངས་རྩེ་བར་བྱེད། །གཞུ་དང་མདའ་ནི་རབ་ཏུ་རྒྱས་པ་གསལ་བར་རྣ་བའི་རྩ་བར་རྒྱུད་ནི་རབ་ཏུ་གང་བར་བཀང་། །ཡུམ་ཉིད་ས་གསུམ་མ་ལུས་རྣམས་ནི་མདུན་དུ་ལྕགས་ཀྱུས་འགུགས་ཤིང་ས་ལ་འགྱེལ་བ་བཞིན་དུ་བྱེད། །ཆུ་སྐྱེས་དམར་པོ་ཕྱག་གཡོན་བསྣམས་ཤིང་བླ་
[201b.5]མེད་ལྷན་ཅིག་སྐྱེས་པའི་དགའ་བས་རྒྱལ་སྲིད་དེ་བཞིན་དུ། །རང་གི་འདོད་པས་ཟླ་བ་རབ་ཏུ་གསལ་ཞིང་དཔལ་ནི་ཉེ་བར་དགོད་བཞིན་མི་མགོའི་ཐོད་པ་ལྔ། །ཡན་ལག་ལྔ་ལ་ཕྱག་རྒྱ་ལྔ་ཡིས་བརྒྱན་ཅིང་ཡོངས་སུ་གྱུར་ལས་སངས་རྒྱས་ལྔ་ནི་རིམ་པ་བཞིན། །འདོད་ཆགས་རྡོ་རྗེས་
[201b.6]བཅོམ་ལྡན་འདས་མའི་དབུ་ལ་རྣམ་བརྒྱན་དེ་ཡི་རང་བཞིན་སྒྲུབ་བྱེད་དབང་པོ་ཡིས། །དེ་ནི་མ་ནིང་བཟླས་པས་རྒྱལ་བྱེད་ཇི་ལྟར་ལྷ་རྣམས་དེ་ཡི་ཞབས་ལ་ཕྱག་ནི་འཚལ་བར་བྱེད། །བཅོམ་ལྡན་འདས་མའི་སྒྲུབ་ཐབས་མཆོག་གྱུར་འདི་ནི་གང་ཞིག་རོལ་པས་བཞུགས་པའི་བཀའ་ཡིས་ནི། །
[201b.7]སྙན་དངགས་མཁན་པོ་བརྩེ་བས་མངོན་བརྗོད་ཅན་གྱི་སྒྲུབ་ཐབས་བསོད་ནམས་གང་ཞིག་བསགས་གྱུར་པ། །དེ་ཡིས་བློ་གྲོས་མུན་པའི་མཚན་མ་དང་བྲལ་དྲི་མེད་ཤེས་རབ་རྒྱས་ཤིང་འཕྲོ་བ་ཅན། །རང་གི་འདོད་པ་རབ་བརྐྱང་འོད་གསལ་བདེ་བ་ཆེན་པོས་འགྲོ་རྣམས་རབ་ཏུ་གནས་གྱུར་ཅིག །
[202a]
[202a.1]ཀུ་རུ་ཀུལླེའི་སྒྲུབ་ཐབས་དཔལ་ཀྱེའི་རྡོ་རྗེའི་རྒྱུད་ལས་ཕྱུང་བ་རྫོགས་སོ།། །།སྙན་ངག་མཁན་ཆེན་པོ་བརྩེ་བ་ཅན་ཞེས་པས་འདི་ཚིགས་སུ་བཅད་པར་བསྡེབས་པའོ།། {T3570}༄༅༅། །རྒྱ་གར་སྐད་དུ། ཥ་ཊ་བྷུ་ཛ་ཀུ་རུ་ཀུལླེ་བྷ་ཊྚཱ་རི་ཀཱ་ཡཱཿསཱ་དྷ་ནཾ། བོད་སྐད་
[202a.2]དུ། རྗེ་བཙུན་མ་ཀུ་རུ་ཀུལླེ་ཕྱག་དྲུག་པའི་སྒྲུབ་ཐབས། ལྷ་མོ་རིགས་བྱེད་མ་ལ་ཕྱག་འཚལ་ལོ། །དེ་ནས་བཅོམ་ལྡན་རིགས་བྱེད་མའི། །སྒྲུབ་པའི་ཐབས་ནི་བཤད་པར་བྱ། །དང་པོ་རེ་ཞིག་སྔགས་པས་བདེ་བའི་སྟན་ལ་ཉེ་བར་འདུག་སྟེ། རིགས་བྱེད་མའི་བྲིས་སྐུ་ལ་སོགས་པ་བཀྲམ་ནས་
[202a.3]སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་དམིགས་ནས་ཡིད་ཀྱི་རང་བཞིན་གྱི་མཆོད་པའི་རྣམ་པས་མཆོད་ཅིང་ཕྱག་འཚལ་ནས་གསུམ་ལ་སྐྱབས་སུ་འགྲོ་བ་ལ་སོགས་པ་བྱའོ། །འདི་ལྟ་སྟེ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་
[202a.4]དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །བྱང་ཆུབ་མཆོག་ཏུ་སེམས་ནི་བསྐྱེད་པར་བགྱི། །སེམས་ཅན་ཐམས་ཅད་མགྲོན་དུ་བདག་གིས་གཉེར། །བྱང་ཆུབ་མཆོག་ཏུ་མངོན་འདོད་སྤྱོད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཨོཾ་
[202a.5]སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་པ་ལན་གསུམ་བརྗོད་ནས་རང་བཞིན་གྱིས་རྣམ་པར་དག་པར་མོས་པར་བྱ་ཞིང་སྟོང་པ་ཉིད་དུ་བསྒོམ་པར་བྱའོ། །རང་གི་སྙིང་གར་དབྱངས་ཡིག་དང་པོ་ལས་བྱུང་བའི་ཟླ་བའི་དཀྱིལ་འཁོར་ལ་ཧཱུཾ་ཡིག་ལས་འོད་ཟེར་གྱི་ཕྲེང་བ་རྣམ་པར་བསམ་
[202a.6]པར་བྱའོ། །དེ་ལས་བྱུང་བའི་འོད་ཟེར་གྱི་ཚོགས་ཀྱིས་ཕྱོགས་བཅུའི་འཇིག་རྟེན་གྱི་ཁམས་རྣམས་སྣང་བར་མཛད་ནས་སེམས་ཅན་ཐམས་ཅད་དབང་དུ་བྱས་ནས། དེའི་ས་བོན་མཐའ་དག་ལས་ཀུ་རུ་ཀུལླེ་བདག་ཉིད་ཀྱི་ལུས་ལ་རབ་ཏུ་ཞུགས་ཤིང་བདག་ཉིད་ཀྱང་ཀུ་རུ་ཀུལླེའི་སྐུར་བལྟ་བར་བྱའོ། །
[202a.7]པདྨ་ཁ་དོག་དམར་པོ་དང་ཉི་མའི་སྟན་ལ་རྡོ་རྗེའི་སྐྱིལ་ཀྲུང་གིས་བཞུགས་པ། རབ་ཏུ་གསལ་བའི་དཀྱིལ་འཁོར་ལ་ཕྱག་དྲུག་པ་གཡས་དང་གཡོན་གྱི་དང་པོ་དག་གིས་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་འཛིན་པའོ། །གཉིས་པའི་གཡས་པ་དང་གཡོན་པ་དག་གིས་ལྕགས་
[202b]
[202b.1]ཀྱུ་དང་ཨུཏྤ་ལ་དམར་པོ་བསྣམས་པ། ཕྱག་ལྷག་མ་གཉིས་ཀྱིས་མདའ་དང་གཞུ་རྣ་བའི་རྩར་འགེངས་པའོ། །སྒེག་པའི་ཉམས་དང་ལྡན་པ། ཕྱག་གསེར་གྱིས་བརྒྱན་པ། ལང་ཚོ་གཞོན་ཞིང་ན་བཟའ་དམར་པོས་བརྒྱན་པ། ཤ་འགག་དམར་པོ་མནབས་ཤིང་རྒྱན་ཐམས་ཅད་ཀྱིས་བརྒྱན་
[202b.2]པ། དེ་བཞིན་གཤེགས་པ་ལྔས་དབུ་བརྒྱན་པ། ཐུགས་ཀར་ཨུཏྤལ་དམར་པོའི་ཟེའུ་འབྲུ་ལ་ཟླ་བའི་དཀྱིལ་འཁོར་ལ་བནྡུ་ཛི་བ་ཀའི་མེ་ཏོག་ལྟ་བུའི་རཾ་ཡིག་བཀོད་ལ་དེ་བཞིན་དུ་བསྒོམས་ལ་ང་རྒྱལ་བྱ་སྟེ་བདག་ནི་རྗེ་བཙུན་མ་རིགས་བྱེད་མའོ། །དེ་ནས་ལྷ་རྣམས་ནི་མཆོད་པའི་རྣམ་པ་སྣ་ཚོགས་
[202b.3]པ་ལག་ན་འཆང་བ་བརྐྱང་བ་ལ་སོགས་པ་རྣམས་ཀྱིས་མཆོད་ཅིང་བསྟོད་དེ། རླུང་གི་འཁོར་ལོ་ལ་གནས་པར་བལྟས་ལ། སྙིང་གར་ལྕགས་ཀྱུས་ཕུག་ལ་བསྒྲུབ་བྱའི་སྙིང་གར་ཉེ་བར་འདུག་ལ་ལྕག་གིས་བྲབ་པར་བྱའོ། །ཨུཏྤལ་དམར་པོའི་མདེའུ་ཅན་གྱི་མདས་བསྒྲུབ་བྱ་འགུགས་ཤིང་
[202b.4]ཡང་ནས་ཡང་དུ་རྣམ་པར་བཅིང་བར་བྱའོ། །དེ་ལ་སྔགས་ནི་འདིའོ། །ཨོཾ་ཀུ་རུ་ཀུལླེ་ཧྲཱིཿཆེ་གེ་མོ་སྭ་བ་མ་ནཱ་ཡ་ཧོཿསྭཱ་ཧཱ། དེ་ནས་བསྒྲུབ་བྱ་མྱོས་ཤིང་རྐང་པ་གཉིས་ནས་འགྱེལ་བར་བལྟ་ཞིང་བསྐུལ་བར་བྱའོ། །དེ་ལྟར་ཐུན་མཚམས་གསུམ་དུ་རྟག་ཏུ་བསྒོམས་ནས་བརྒྱ་བྱིན་ཡང་དབང་དུ་བྱེད་པར་འགྱུར་
[202b.5]རོ། །སྔོན་དུ་བསྙེན་པ་བྱས་ནས་རི་མོ་མཁན་སྐྲ་ལ་སོགས་པ་ཁྲུས་བྱས་ཏེ་གསོ་སྦྱོང་བླངས་ནས་རི་མོ་སར་པ་གཙང་ཞིང་དབེན་པའི་ཕྱོགས་སུ་བྲི་བར་བྱའོ། །དེ་བཞིན་དུ་རྫོགས་པ་དང་སྦྱར་ལ་དགེ་བའི་ཉི་མ་ལ་རབ་ཏུ་གནས་པར་བྱ་ཞིང་། དེའི་མདུན་དུ་ཙནྡན་དཀར་པོས་མཎྜལ་མངོན་པར་བྱུགས་ལ་
[202b.6]མར་གྱི་མར་མེ་རབ་ཏུ་སྦར་ཏེ། ཉེར་སྤྱོད་ལྔས་བཅོམ་ལྡན་འདས་མ་ཡང་དག་པར་མཆོད་པར་བྱས་ནས་འདིའི་སྔགས་ཁྲི་བཟླས་སོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། དེ་ནས་ལས་ཐམས་ཅད་ནུས་པར་འགྱུར་རོ། །རྗེ་བཙུན་མ་ཀུ་རུ་ཀུལླེ་ཕྱག་དྲུག་མའི་སྒྲུབ་ཐབས་རྫོགས་སོ།། །།
[202b.7]{T3571}༄༅༅། །རྒྱ་གར་སྐད་དུ། ཥ་ཊ་བྷུ་ཛ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། རིགས་བྱེད་མ་ཕྱག་དྲུག་མའི་སྒྲུབ་ཐབས། །ཀུ་རུ་ཀུལླེ་ལ་ཕྱག་འཚལ་ལོ། །དང་པོར་སྔགས་པས་སྟན་བདེ་བ་ལ་འདུག་སྟེ། རང་གི་སྙིང་གའི་ས་བོན་གྱི་འོད་ཟེར་གྱིས་བཅོམ་ལྡན་འདས་མ་དང་སངས་རྒྱས་
[203a]
[203a.1]དང་བྱང་ཆུབ་སེམས་དཔའ་རྣམས་གདན་དྲངས་ནས་མཆོད་པ་དང་། སྐྱབས་སུ་འགྲོ་བ་ལ་སོགས་པ་བྱའོ། །དེ་ནས་སྟོང་པ་ཉིད་དུ་མོས་པ་བྱ་ཞིང་། སྔགས་ཀྱིས་བྱིན་གྱིས་བརླབས་ལ། ཨོཾ་ཡིག་ལས་བྱུང་བའི་ཟླ་བའི་དཀྱིལ་འཁོར་ལ་རཾ་ཡིག་འོད་ཟེར་གྱི་ཕྲེང་བ་དང་
[203a.2]བཅས་པ་རྣམ་པར་བསམ་ཞིང་དེ་ཡོངས་སུ་གྱུར་པ་ལས་བཅོམ་ལྡན་འདས་མ་རིགས་བྱེད་མ་བལྟ་བར་བྱའོ། །པདྨ་དམར་པོ་འདབ་མ་བརྒྱད་པ་དང་ཉི་མའི་གདན་ལ་རྡོ་རྗེ་སྐྱིལ་ཀྲུང་གིས་ཉེ་བར་བཞུགས་པ། ཕྱག་དྲུག་པ། གཡས་དང་གཡོན་གྱི་ཕྱག་དང་པོ་གཉིས་ཀྱིས་འཇིག་རྟེན་གསུམ་ལས་རྣམ་པར་
[203a.3]རྒྱལ་བའི་ཕྱག་རྒྱ་འཛིན་པ། གཉིས་པའི་གཡས་པ་དང་། གཡོན་པ་དག་གིས་ལྕགས་ཀྱུ་དང་། ཨུཏྤལ་ལ་དམར་པོ་བསྣམས་པའོ། །ཕྱག་ལྷག་མ་གཉིས་ཀྱིས་མདའ་དང་གཞུ་རྣ་བའི་རྩར་འགེངས་པ། ན་བཟའ་དམར་པོ་མནབས་པ། དེ་བཞིན་གཤེགས་པ་ལྔས་དབུ་བརྒྱན་པ།
[203a.4]བསྒྲུབ་བྱའི་སྙིང་གར་ཨུཏྤལ་དམར་པོའི་ཟེའུ་འབྲུ་ལ་ཟླ་བའི་དཀྱིལ་འཁོར་ལ་རཾ་ཡིག་ཁ་དོག་དམར་པོ་རྣམ་པར་བསྒོམས་ཏེ། རླུང་གི་དཀྱིལ་འཁོར་ལ་གནས་ཤིང་དེའི་སྙིང་གར་ལྕགས་ཀྱུས་ཕུག་སྟེ་བཀུག་ནས་སྙིང་གར་ཞུགས་ཤིང་ཨུཏྤལ་དམར་པོའི་མདེའུ་ཅན་གྱི་མདས་བསྒྲུབ་བྱ་ཡང་
[203a.5]ནས་ཡང་དུ་འགུགས་ཤིང་སྔགས་བཟླས་པར་བྱའོ། །དེ་ལ་ཡང་སྔགས་འདིའོ། །ཨོཾ་ཀུ་རུ་ཀུལླེ་ཧྲཱིཿཆེ་གེ་མོ་བདག་གི་དབང་དུ་གྱིས་ཤིག་ཧོཿསྭཱ་ཧཱ། དེ་ནས་དེ་ལ་བསྒྲུབ་བྱ་མོས་པའི་དབང་དུ་བྱས་ནས་རྐང་པའི་དྲུང་དུ་ལྷུང་བར་བལྟ་ཞིང་བསྐུལ་བར་བྱའོ། །དེ་ལྟ་བུས་བརྒྱ་བྱིན་ཡང་
[203a.6]དབང་དུ་བྱེད་དོ། །རིགས་བྱེད་མ་ཕྱག་དྲུག་མའི་སྒྲུབ་ཐབས་རྫོགས་སོ།། {T3572}༄༅༅། །རྒྱ་གར་སྐད་དུ། ཨཥྚ་བྷུ་ཛ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། རིགས་བྱེད་མ་ཕྱག་བརྒྱད་མའི་སྒྲུབ་ཐབས། རིགས་བྱེད་མ་ལ་ཕྱག་འཚལ་ལོ། །སྔོན་དུ་སྟོང་པ་ཉིད་ཀྱི་མཐར་ཐུག་
[203a.7]པ་བསྒོམས་ནས་རཾ་ཡིག་ཡོངས་སུ་གྱུར་པ་ལས་ཉི་མ་ལ་ཧྲཱིཿཡིག་སྤྲོ་བ་དང་བསྡུ་བའི་སྐུར་བསྒོམས་ནས། དེ་ཡོངས་སུ་གྱུར་པ་ལས་སྐད་ཅིག་གིས་བཅོམ་ལྡན་འདས་མ་ཀུ་རུ་ཀུལླེ་ཕྱག་བརྒྱད་མ། སྐུ་མདོག་དམར་མོ་པདྨ་དམར་པོ་འདབ་མ་བརྒྱད་པ་དང་། ཉི་མ་ལ་རྡོ་རྗེ་སྐྱིལ་
[203b]
[203b.1]ཀྲུང་གིས་བཞུགས་པ་གཞལ་ཡས་ཁང་གི་དབུས་སུ་གནས་ཤིང་ཕྱག་དང་པོ་གཉིས་ཀྱིས་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་མཛད་པའོ། །གཡས་ཀྱི་ཕྱག་ལྷག་མ་རྣམས་ཀྱིས་ལྕགས་ཀྱུ་དང་རྣ་བའི་རྩར་མདའ་འགེངས་པ་དང་། མཆོག་སྦྱིན་གྱི་ཕྱག་རྒྱ་བསྣམས་པའོ། །
[203b.2]གཡོན་གྱི་ཕྱག་ལྷག་མ་རྣམས་ཀྱིས་ཞགས་པ་དང་། གཞུ་དང་། ཨུཏྤལ་བསྣམས་པ། རྒྱན་ཐམས་ཅད་ཀྱིས་བརྒྱན་པ་བསྒོམ་པར་བྱའོ། །ཤར་གྱི་འདབ་མར་རབ་ཏུ་དང་བའི་སྒྲོལ་མའོ། །ལྷོའི་འདབ་མར་རྫོགས་པའི་སྒྲོལ་མའོ། །ནུབ་ཀྱི་འདབ་མར་རྒྱལ་བའི་སྒྲོལ་མའོ། །
[203b.3]བྱང་གི་འདབ་མར་རྣ་བའི་སྒྲོལ་མའོ། །དབང་ལྡན་གྱི་འདབ་མ་ལ་ཙུནྡའོ། །མེའི་འདབ་མ་ལ་གཞན་གྱིས་མི་ཐུབ་མའོ། །བདེན་བྲལ་གྱི་འདབ་མ་ལ་མར་མེའི་སྒྲོལ་མའོ། །རླུང་གི་འདབ་མ་ལ་གཽ་རཱིའི་སྒྲོལ་མ་རྣམས་བསྒོམ་པར་བྱའོ། །དེ་རྣམས་ཐམས་ཅད་ཀྱང་སྐུ་མདོག་སེར་
[203b.4]མོ་དེ་བཞིན་གཤེགས་པ་ལྔའི་དབུ་རྒྱན་ཅན་རྡོ་རྗེ་སྐྱིལ་ཀྲུང་གིས་བཞུགས་པའོ། །ཕྱག་གཡས་པ་དག་གིས་མཆོག་སྦྱིན་གྱི་ཕྱག་རྒྱ་དང་། མདའ་སྙན་གྱི་རྩར་འགེངས་པའོ། །ཕྱག་གཡོན་པ་དག་གི་ས་ཨུཏྤལ་དང་། གཞུ་བསྣམས་པའོ། །ཤར་གྱི་སྒོར་རྡོ་རྗེ་རོ་ལངས་མ་འཇིགས་
[203b.5]ཤིང་ལྟོ་བ་འཕྱང་བ་སྐུ་མདོག་དམར་མོ་མི་བསྐྱོད་པས་དབུ་བརྒྱན་པ། ཕྱག་གཡས་པ་དག་གིས་སྡིགས་མཛུབ་དང་། ལྕགས་ཀྱུ་བསྣམས་པ། ཕྱག་གཡོན་པ་དག་གིས་དྲིལ་བུ་དང་ཞགས་པ་བསྣམས་པའོ། །ལྷོའི་སྒོར་གཞན་གྱིས་མི་ཐུབ་མ་སྐུ་མདོག་སེར་མོ་རིན་ཆེན་
[203b.6]འབྱུང་ལྡན་གྱིས་དབུ་བརྒྱན་པ། ཕྱག་གཡས་པ་དག་གིས་དབྱུག་པ་དང་། ལྕགས་ཀྱུ་བསྣམས་པ། ཕྱག་གཡོན་པ་དག་གིས་དྲིལ་བུ་དང་ཞགས་པ་བསྣམས་པའོ། །ནུབ་ཀྱི་སྒོར་རལ་པ་གཅིག་མ་མདོག་ནག་མོ་སྐྲ་གྱེན་དུ་བརྫེས་ཤིང་ལྟོ་བ་འཕྱང་བ། །མཆེ་བ་གཙིགས་
[203b.7]ཤིང་མཆུ་བསྡམས་པ། འོད་དཔག་ཏུ་མེད་པས་དབུ་བརྒྱན་པ། ཕྱག་གཡས་པ་དག་གིས་རྡོ་རྗེ་དང་ལྕགས་ཀྱུ་བསྣམས་པ། ཕྱག་གཡོན་པ་དག་གིས་དྲིལ་བུ་དང་ཞགས་པ་བསྣམས་པའོ། །བྱང་སྒོར་རྡོ་རྗེ་གནྡྷ་རཱི་སྐུ་མདོག་གསེར་ལྗང་གུ་ལྟ་བུ་དོན་ཡོད་གྲུབ་པས་དབུ་བརྒྱན་པ་ཞལ་
[204a]
[204a.1]འཇིགས་ཤིང་ལྟོ་བ་འཕྱང་བའོ། །ཕྱག་གཡས་པ་དག་གིས་ཁ་ཊྭཱཾ་ག་དང་། ལྕགས་ཀྱུ་བསྣམས་པ། ཕྱག་གཡོན་པ་དག་གིས་དྲིལ་བུ་དང་ཞགས་པ་བསྣམས་པ་བསམ་པར་བྱའོ། །བཞི་པོ་འདི་རྣམས་ཞབས་གཡོན་བརྐྱང་གིས་གནས་པའོ། །དེ་ལ་འདིར་
[204a.2]འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་ནི་ལག་པ་གཉིས་རྒྱབ་སྦྱར་ནས་མིང་མེད་གཉིས་མདུད་པ་བྱས་པ་སྟེ། མཐེའུ་ཆུང་དང་གུང་མོ་མཐེབ་ཆེན་གྱིས་བསྡམས་ནས་མཛུབ་མོ་ལྕགས་ཀྱུའི་རྣམ་པས་འགྱིང་ཞིང་དཔྲལ་བའི་ཕྱོགས་སུ་གཟུང་བར་བྱའོ། །བསྒོམས་པས་
[204a.3]ངལ་ན་སྔགས་བཟླས་པར་བྱའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཁྲི་བཟླས་པས་སྐྱེ་བོ་ཐམས་ཅད་དབང་དུ་འགྱུར་རོ། །ས་ཡས་བློན་པོའོ། །འབུམ་གྱིས་རྒྱལ་པོའོ། །ཨུཏྤ་ལ་མར་དང་སྦྲང་བསྲེས་ཤིང་ཨ་ཤྭདྠའི་ཡམ་ཤིང་གིས་སྦྱིན་སྲེག་བྱས་པས་འདོད་པའི་གནས་ཐོབ་པར་
[204a.4]འགྱུར་རོ། །དཔལ་གྱི་འབྲས་བུའི་ཤིང་གིས་མེ་རབ་ཏུ་སྦར་ཏེ། མར་དང་སྦྲང་ལ་བསྒྲེས་ཤིང་དཔལ་གྱི་འབྲས་བུའི་སྦྱིན་སྲེག་འབུམ་བྱས་པས་རྒྱལ་པོ་དང་བློན་པོ་རྣམས་དབང་དུ་འགྱུར་རོ། །ཨུཏྤ་ལའི་སྦྱིན་སྲེག་སྟོང་བྱས་ཏེ་མར་གྱི་མར་མེ་སྟོང་ཕྲག་གཅིག་ལྷ་མོའི་མདུན་དུ་དབུལ་བར་
[204a.5]བྱས་ན་རྒྱལ་པོ་ཐམས་ཅད་དབང་དུ་འདུ་བར་འགྱུར་རོ། །ཀུ་རུ་ཀུལླེ་ཕྱག་བརྒྱད་པའི་སྒྲུབ་ཐབས་རྒྱལ་པོ་ཨིནྡྲ་བྷཱུ་ཏིའི་ཞབས་ཀྱིས་མཛད་པ་རྫོགས་སོ།། {T3573}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། འཕགས་མ་
[204a.6]རིགས་བྱེད་མ་ལ་ཕྱག་འཚལ་ལོ། །དེ་ནས་སྔགས་པས་སྐྱེས་པ་དང་བུད་མེད་དབང་དུ་བྱ་བར་འདོད་པས། དཀར་པོའི་ཚེས་གཅིག་ནས་བརྩམས་ནས། ཐུན་མཚམས་གསུམ་དུ་ཉི་མ་སོ་སོ་ལ་ཁྲི་ཕྲག་རེ་བཟླས་པར་བྱའོ། །བཅོམ་ལྡན་འདས་མའི་སྐུ་ལ་ན་བཟའ་དམར་པོ་རྣམས་དབུལ་
[204a.7]བར་ཡང་བྱའོ། །དེ་ལ་རིམ་པ་འདིས་རང་གི་སྙིང་གར་ཉི་མ་ལ་གནས་པའི་ཧྲཱིཿདམར་པོ་ལས་སྐྱེས་པའི་ཆུ་སྐྱེས་དམར་པོ་འདབ་མ་བརྒྱད་པ་སྡོང་པོ་ལས་སྐྱེ་གནས་ཀྱི་མཐར་ཐུག་པར་སོན་པ་རྣམ་པར་བསམས་ལ། དེའི་འདབ་མ་བརྒྱད་པ་རྣམས་སུ་བུང་བ་བརྒྱད་དེ། ཨཱ་ཨཱི་ཨཱུ་རཱྀ་ལཱྀ་ཨཻ་
[204b]
[204b.1]ཨཽ་ཨཿ། ཞེས་པའི་དབྱངས་བརྒྱད་ཡོངས་སུ་གྱུར་པ་ལས་ཤིན་ཏུ་དགའ་བ་རྒྱས་ཤིང་ཁྲོ་བ་ཁ་དོག་དམར་པོ་རིམ་པ་བཞིན་དུ་གནས་པ་རང་གི་སྣ་བུག་གི་རླུང་གིས་བསྐུལ་བར་བལྟས་ལ། རང་གི་སྣ་བུག་གཡོན་ནས་འཐོན་ཏེ། བསྒྲུབ་བྱའི་སྣ་གཡས་ཀྱི་བུ་ག་ནས་རབ་ཏུ་ཞུགས་ཏེ།
[204b.2]དེས་པདྨའི་སྡོང་བུ་གསར་པ་རྣམས་རྙིངས་ནས། ཨ་ཨི་ཨུ་རྀ་ལི་ཨེ་ཨོ་ཨཾ་ཞེས་པའི་དབྱངས་ཡིག་ཐུང་ངུ་བརྒྱད་བསམས་ལ། དེ་ཡོངས་སུ་གྱུར་པ་ལས་རྣ་བའི་རྩར་བཀང་བའི་ཨུཏྤལ་དམར་པོའི་མདེའུ་ཅན་གྱི་མདའི་ཚོགས་ཀྱིས་བསྒྲུབ་བྱའི་པདྨའི་ཟེའུ་འབྲུ་ཕུག་ནས། དེ་འགྱེལ་ཞིང་མདའི་
[204b.3]སྒྲས་སྣ་བུག་གཡོན་པའི་བུ་ག་ནས་འཐོན་ཏེ་རྣལ་འབྱོར་པའི་སྣ་བུག་གཡས་ནས་རང་གི་སྙིང་ག་ནས་ཞུགས་པར་རྣམ་པར་བསམ་པར་བྱའོ། །ཕྱི་ནས་ཨུཏྤལཱི་དར་པས་སྐེ་བཅིངས་ནས་ལྕགས་ཀྱུས་སྐྱེ་གནས་ཕུག་ཅིང་བཙིར་ནས་འོད་ཟེར་རབ་ཏུ་འབར་བས་གཞན་གང་ཞིག་དབང་དུ་
[204b.4]བྱས་ཏེ། དེ་ལ་ཞོན་ནས་དེའི་དགའ་བའི་སྔགས་བཟླས་པར་བྱའོ། །ཨོཾ་ཀུ་རུ་ཀུལླེ་ཧྲཱིཿཆེ་གེ་མོ་བདག་གི་དབང་དུ་གྱིས་ཤིག་སྭཱ་ཧཱ་ཞེས་སོ། །བུང་བའི་སྦྱོར་བས་ཉི་མ་བདུན་གྱིས་འགྲུབ་པར་འགྱུར་རོ། །ཀུ་རུ་ཀུལླེའི་སྒྲུབ་ཐབས་རྫོགས་སོ།། {T3574}༄༅༅། །རྒྱ་གར་སྐད་དུ།
[204b.5]ཀུ་རུ་ཀུལླེ་ཨུ་པ་དེ་ཤ་ཀྲ་མ། བོད་སྐད་དུ། རིགས་བྱེད་མའི་མན་ངག་གི་རིམ་པ། །འཕགས་མ་རིགས་བྱེད་མ་ལ་ཕྱག་འཚལ་ལོ། །ཡུམ་གྱུར་དངོས་གྲུབ་སྩོལ་མཛད་མ། །རིགས་བྱེད་མ་ལ་ཕྱག་འཚལ་ནས། །དངོས་གྲུབ་ཐམས་ཅད་རབ་སྟེར་བ། །དེ་ཡི་མན་ངག་བྲི་བར་བྱ། །རིགས་བྱེད་མ་
[204b.6]ཡི་རྣལ་འབྱོར་ལྡན། །ཉེ་བར་བསྟན་པས་བསྒོམ་པར་བྱ། །སྙིང་གར་ཉི་མ་ལ་ཨུཏྤལ་དམར་པོའི་ཟེའུ་འབྲུ་ལ་གནས་པའི་ཧྲཱིཿཡིག་ལས་བྱུང་བའི་ཞགས་པ་དང་ལྕགས་ཀྱུ་ཨུཏྤ་ལའི་གཟུགས་ཀྱི་འོད་ཟེར་གྱིས་སྣ་གཡོན་པའི་བུ་ག་ནས་འཐོན་ནས། བསྒྲུབ་བྱའི་སྣ་བུག་གཡས་སུ་རབ་ཏུ་
[204b.7]ཞུགས་ཏེ་བསྒྲུབ་བྱ་ལ་ཡེ་ཤེས་ཀྱི་ལུས་སྐུ་མདོག་དམར་པོ་ཞགས་པས་སྐེ་བཅིངས་ཤིང་ལྕགས་ཀྱུས་སྙིང་གར་ཕུག་ནས་སྣ་བུག་གཡོན་ནས་འཐོན་ཏེ་ཡཾ་ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་ལ་གནས་པ་ལ་ཨུཏྤ་ལས་སྙིང་ག་དང་བྷ་ག་ལ་བསྣུན་ཅིང་བཀུག་ནས་གཞོགས་
[205a]
[205a.1]གཡོན་དུ་གན་རྐྱལ་དུ་བཞག་ལ་འོད་ཟེར་གྱིས་རང་གི་སྙིང་གའི་ཧྲཱིཿཡིག་ལ་སྣ་བུག་གཡས་པ་ནས་རབ་ཏུ་གཞུག་པར་བྱའོ། །ཕྱི་ནས་ཡང་སྙིང་གའི་ས་བོན་ལས་བྱུང་བའི་ཨུཏྤལ་དམར་པོའི་རྣམ་པ་ཅན་གྱི་འོད་ཟེར་དེ་ཁའི་ནང་དུ་དེ་བཞིན་དུ་སྨིན་མཚམས་ཀྱི་བུ་ག་ནས་
[205a.2]བྱུང་སྟེ། རྣ་བ་གཡོན་པར་ཞུགས་ཤིང་མགོ་ལ་དཀྲིས་ནས། རྣ་བ་གཡས་པའི་བུ་ག་ནས་འཐོན་ཏེ། དེའི་མདེའུའི་འོད་ཟེར་གྱི་རེ་ཁཱ་ཨུཏྤ་ལའི་མདེའུ་ཅན་གྱི་སྡོང་བུའི་མདའ་རྣ་བའི་རྩར་རྐང་པའི་བུ་ག་ནས་རབ་ཏུ་ཞུགས་ཏེ། ཅུང་ཟད་མདེའུའི་ཁ་རྣམ་པར་རྒྱས་ཤིང་བསྒྲུབ་བྱའི་རྟགས་དང་
[205a.3]བྷ་ག་ཟ་ཞིང་ཡང་ནས་ཡང་དུ་དབུག་པར་བྱའོ། །དེ་ནས་ཁ་ཅིག་ནི་ས་བོན་གྱིས་ཞེས་སོ། །མདས་ཕུག་ཅིང་ཞུགས་པའི་འོད་ཟེར་གྱིས་ལུས་ཐམས་ཅད་ཁྱབ་ཅིང་འཛག་པས་རྣམ་པར་མྱོས་ཏེ་སྐྱབས་མེད་པར་བལྟའོ། །གལ་ཏེ་ལངས་ན་བསྣུན་པར་བྱའོ། །དེའི་ཚེ་རང་གི་རྐང་པའི་མཐིལ་དུ་བསྒྲུབ་བྱ། །
[205a.4]འགྱེལ་བར་རྣམ་པར་བསམས་ནས་སླར་ཡང་དེ་བཞིན་དུ་དབུག་ཅིང་དགུག་པར་བྱའོ། །གང་གི་ཚེ་ཕུག་པས་ནུས་པ་དང་ལྡན་པར་འགྱུར་རོ། །དེའི་ཚེ་སྙིང་གའི་ས་བོན་གྱི་འོད་ཟེར་གྱིས་ཞུགས་པའི་མཐར་བསྒྲུབ་བྱ་ལངས་ནས་ལྟེ་བའི་ཆུ་སྐྱེས་ཀྱི་སྟེང་དུ་གན་རྐྱལ་དུ་བྱས་ནས་རྩིབ་ལོགས་གཡོན་
[205a.5]དུ་མགོ་བོ་ཡང་དག་པར་བཀོད་ལ་ས་བོན་གྱི་འོད་ཟེར་ཁ་བའི་ཟེར་མ་ཚོགས་པ་ལྟ་བུས་ལུས་ཐམས་ཅད་ཁྱབ་ནས་རྣམ་པར་མྱོས་པར་བསམ་ཞིང་སྔགས་བཟླས་པར་བྱའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། གཞན་ཡང་འདི་ནི་རང་བྱིན་གྱིས་བརླབ་པའི་མན་ངག་གི་རིམ་པའོ། །རིགས་བྱེད་མའི་མན་ངག་གི་
[205a.6]རིམ་པ་རྫོགས་སོ།། {T3575}༄༅༅། །རྒྱ་གར་སྐད་དུ། ཤུཀླཱ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། རིགས་བྱེད་མ་དཀར་མོའི་སྒྲུབ་ཐབས། །རིགས་བྱེད་མ་ལ་ཕྱག་འཚལ་ནས། །བྱིས་པ་རྣམས་ཀྱི་བློ་འཕེལ་ཕྱིར། །བླ་མའི་ཞལ་གྱི་སྐུ་དྲིན་གྱིས། །བསྒོམ་པའི་རིམ་པ་
[205a.7]བརྗོད་པར་བྱ། །དང་པོར་སྔགས་པས་བདག་དང་སེམས་ཅན་ཐམས་ཅད་སྡུག་བསྔལ་བ་རྣམས་རྣམ་པར་གྲོལ་བར་འདོད་པས་སྔ་དྲོའི་ཐུན་ལ་ལངས་ནས་གདོང་བཀྲུ་བ་ལ་སོགས་པ་བྱས་ནས། ཡིད་དང་མཐུན་པའི་གནས་སུ་སྟན་བདེ་བ་ལ་འདུག་སྟེ། བསམ་པ་ཐམས་ཅད་སྔ་བར་
[205b]
[205b.1]བྱས་ནས་བདག་ཉིད་རྣལ་འབྱོར་ལ་གནས་ནས་ཞལ་བསིལ་གྱིས་དེ་ཉིད་གསུམ་གྱི་སྔགས་ཀྱིས་སྲུང་བ་བྱས་ནས། རང་གི་སྙིང་གར་རི་བོང་འཛིན་པའི་དཀྱིལ་འཁོར་དཀར་པོ་བསྒོམ་པར་བྱའོ། །དེའི་སྟེང་དུ་རང་གི་ས་བོན་ལས་འོད་ཟེར་འཕྲོས་ཏེ། འོད་ཟེར་དེ་རྣམས་ཀྱིས་ཆོས་ཀྱི་དབྱིངས་
[205b.2]ནས་བཅོམ་ལྡན་འདས་མ་སྤྱན་དྲངས་ཏེ། མདུན་དུ་བཞུགས་ནས་མཆོད་པ་རྣམ་པ་སྣ་ཚོགས་པའི་མཆོད་པས་བདེ་བར་གཤེགས་པ་རྣམས་མཆོད་ཅིང་ཙནྡན་ལ་སོགས་པའི་ཆོ་གས་བཟོད་པར་གསོལ་ཞིང་བསོད་ནམས་ཡོངས་སུ་བསྔོ་བ་དང་སྨོན་ལམ་བཏབ་སྟེ། ཕྱི་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་
[205b.3]སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་སྔགས་འདིས་སྟོང་པ་ཉིད་དུ་བསྒོམས་ལ་དེ་ཉིད་གསུམ་གྱིས་བྱིན་གྱིས་བརླབ་བོ། །སླར་ཡང་བདག་ཉིད་ནམ་མཁའི་རི་མོ་བཞིན་དུ་འོད་གསལ་གྱི་སྐུར་བསམ་པར་བྱའོ། །དེའི་རྗེས་ལ་ཟླ་བའི་དཀྱིལ་འཁོར་དཀར་པོ། དེའི་སྟེང་དུ་ཧྲཱིཿཡིག་གི་ས་བོན་ལས་
[205b.4]སྐྱེས་པའི་ཨུཏྤལ། །དེའི་སྟེང་དུ་ཟླ་བའི་དཀྱིལ་འཁོར་གྱི་སྟེང་དུ་གནས་པའི་ས་བོན་བྱིན་གྱིས་བརླབས་ལ། སྤྲོ་བ་དང་བསྡུ་བ་བྱས་ནས་དེ་ཉིད་གསུམ་གྱི་སྔགས་ཀྱིས་བདག་ཉིད་བཅོམ་ལྡན་འདས་མ་ཕྱག་གཡས་པ་དང་། གཡོན་པ་དག་གིས་ཨུཏྤལ་ལའི་བགྲང་ཕྲེང་དང་། བདུད་རྩིའི་བུམ་པ་
[205b.5]བསྣམས་པ། སྤྱན་གསུམ་པ། པདྨ་འཛིན་པ་ལ་སོགས་པའི་དེ་བཞིན་གཤེགས་པ་ཐམས་ཅད་དང་། །པི་ཝང་མ་ལ་སོགས་པའི་ལྷ་མོ་བཅུ་དྲུག་གིས་དབང་བསྐུར་ཞིང་འོད་དཔག་ཏུ་མེད་པས་དབུ་བརྒྱན་པ། མེ་ཏོག་སྣ་ཚོགས་པས་ཉེ་བར་མཛེས་ཤིང་རལ་པའི་ཐོར་ཚུགས་ཅན། སྒེག་པ་
[205b.6]ལ་སོགས་པའི་ཉམས་དང་ལྡན་པ། ཕྱག་གཡས་པའི་ཡལ་ག་ཅུང་ཟད་བགྲང་ཕྲེང་གི་འོད་ཀྱིས་སྣང་བར་མཛད་པ་འོ་མའི་རྒྱ་མཚོར་ཆུ་སྐྱེས་འདབ་མ་དཀར་པོ་ལ་གནས་པའི་ཟླ་བའི་སྟེང་དུ་སེམས་དཔའི་སྐྱིལ་ཀྲུང་གིས་བཞུགས་པ། ལག་གདུབ་དང་། དཔུང་རྒྱན་དང་། རྣ་རྒྱན་དང་། རྐང་
[205b.7]གདུབ་དང་། མུ་ཏིག་གི་དོ་ཤལ་དང་། ལྷའི་ན་བཟའ་ལ་སོགས་པ་རྣམས་ཀྱིས་བརྒྱན་པ། ཀླུའི་རྒྱལ་པོ་མཐའ་ཡས་ནག་པོས་དབུ་སྐྲ་བཅིངས་པ། ནོར་རྒྱས་བདུད་རྩིའི་ཁ་དོག་ལྟ་བུས་དོ་ཤལ་བྱས་པ། འཇོག་པོ་དམར་པོས་རྣ་རྒྱན་བྱས་པ། སྟོབས་ཀྱི་རྒྱུ་ལྗང་གུས་མཆོད་
[206a]
[206a.1]ཕྱིར་ཐོགས་བྱས་པ། ཀླུའི་དབང་པོ་པདྨ་དཀར་པོས་དོ་ཤལ་ཕྱེད་པ་བྱས་པ། པདྨ་ཆེན་པོ་པདྨའི་སྡོང་བུའི་ཁ་དོག་གིས་རྐང་གདུབ་བྱས་པ་དུང་སྐྱོང་སེར་པོས་ལག་གདུབ་བྱས་པ། རིགས་ལྡན་དུ་བའི་ཁ་དོག་ལྟ་བུས་དཔུང་རྒྱན་བྱས་པ། སྐུ་མདོག་དཀར་མོ་སྐུ་ལས་བདུད་རྩི་
[206a.2]འཛག་བཞིན་དུ་ཐུགས་སྙིང་རྗེས་བརླན་པ་བསྒོམ་པར་བྱའོ། །དེའི་རྗེས་ལ་རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་སྔོན་གྱི་ས་བོན་ལས་འོད་འཕྲོས་པར་བསྒོམ་ཞིང་དེའི་འོད་ཟེར་རྣམས་ཀྱིས་སེམས་ཅན་ཐམས་ཅད་བཅོམ་ལྡན་འདས་མའི་སྐུར་བསྐྱེད་ནས་བཀུག་སྟེ། ཨོཾ་ཛཿཧཱུཾ་བཾ་ཧོཿ
[206a.3]ཞེས་པའི་སྔགས་འདིས་ཆུ་དང་འོ་མ་འདྲེས་པ་བཞིན་དུ་རོ་གཅིག་ཏུ་བྱས་ནས་རང་གི་ལུས་ལ་ཞུགས་ཏེ། མཆོད་པ་སྔོན་དུ་འགྲོ་བས་བཅོམ་ལྡན་འདས་མ་ཡང་དེ་ཉིད་གསུམ་གྱིས་དཀར་པོ་དང་། དམར་པོ་དང་ནག་པོས་མཉེས་ཤིང་བརྟན་པར་བྱས་ནས་སྤྱི་བོ་དང་མགྲིན་པ་དང་སྙིང་ག་
[206a.4]རྣམས་སུ་རྒྱས་གདབ་པར་བྱའོ། །དེའི་རྗེས་སུ་སྙིང་གའི་ས་བོན་ལས་འོད་ཟེར་འཕྲོས་ནས་བདེ་བ་ཅན་ལ་སོགས་པའི་འཇིག་རྟེན་གྱི་ཁམས་ན་བཞུགས་པའི་མགོན་པོ་འོད་དཔག་ཏུ་མེད་པ་ལ་སོགས་པའི་དེ་བཞིན་གཤེགས་པ་ཐམས་ཅད་སྤྱན་དྲངས་ནས་པི་ཝང་མ་ལ་སོགས་པའི་
[206a.5]ལྷ་མོ་བཅུ་དྲུག་དང་ལྡན་པས་དེ་བཞིན་གཤེགས་པ་ལྔའི་བདག་ཉིད་བདུད་རྩི་ལྔ་དང་ག་བུར་དང་གུར་གུམ་དང་། གླ་རྩི་དང་། དྲི་བཟང་པོས་ཡོངས་སུ་གང་བའི་བུམ་པ་རྣམས་བཟུང་ནས་ཚིགས་སུ་བཅད་པ་སྔོན་དུ་འགྲོ་བས་དབང་བསྐུར་བར་བྱ་སྟེ། དེ་ལ་ཚིགས་སུ་བཅད་པ་འདིའོ། །བྱང་ཆུབ་
[206a.6]རྡོ་རྗེས་སངས་རྒྱས་ལ། །མཆོད་ཆེན་ཕུལ་བ་ཇི་བཞིན་དུ། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །དབང་བསྐུར་རྣམ་གསུམ་དབྱེར་མེད་ལ། །ཁམས་གསུམ་རྣམས་ཀྱིས་ཕྱག་བྱས་པ། །སངས་རྒྱས་ཀུན་གྱི་གསང་ངག་གསུམ་གྱི། །གནས་
[206a.7]ལས་བྱུང་བ་བདག་གིས་གཟུང་། །ཇི་ལྟར་དེ་བཞིན་གཤེགས་པ་ཀུན། །འཁྲུངས་པ་ཙམ་གྱིས་ཁྲུས་གསོལ་བ། །དེ་བཞིན་བདག་ཀྱང་ཁྲུས་བགྱི་སྟེ། །ལྷ་ཡི་ཆུ་བོ་དག་པ་ཡིས། །མགོན་པོ་འོད་དཔག་ཏུ་མེད་པ་ལ་སོགས་པའི་དེ་བཞིན་གཤེགས་པ་རྣམས་དང་།
[206b]
[206b.1]པི་ཝང་མ་ལ་སོགས་པའི་ལྷ་མོ་བཅུ་དྲུག་དང་ལྡན་པས་དབང་བསྐུར་ཞིང་། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཨཱཿཧཱུཾ་ཞེས་པ་འདིས་དབང་བསྐུར་ཞིང་དབུ་རྒྱན་རབ་ཏུ་སྦྱིན་ནོ། །འོད་དཔག་མེད་ཀྱང་སྤྱི་བོར་བཞུགས་ཤིང་དྲན་པས་སོ། །དབང་བསྐུར་བླངས་ནས་དེའི་རྗེས་སུ་རང་གི་ལྟེ་
[206b.2]བའི་ཆུ་སྐྱེས་ལ་གནས་པའི་ཟླ་བའི་སྟེང་དུ་གནས་པ་མེའི་ས་བོན་ལ་ཞོན་པའི་སའི་མཐའ་དང་ཟླ་བ་དང་ཐིག་ལེ་ནཱ་ད་དང་བཅས་ཤིང་བཞི་པའི་དབྱངས་ཀྱིས་བརྒྱན་པ་ཨཱ་ལི་དང་ཀཱ་ལི་འཕྲོ་བ་ཅན། བདུད་རྩིའི་རང་བཞིན་གྱི་འོད་དཀར་པོ་ལས་སྒྲོན་མེ་བཞིན་དུ་འབར་བ་ཞལ་གྱི་སྒོ་ནས་འཐོན་ཏེ། ནོར་བུ་
[206b.3]དང་སྔགས་དང་། སྨན་ཐམས་ཅད་སྐད་ཅིག་གིས་བླངས་ནས་ལྟེ་བའི་སྒོ་ནས་རབ་ཏུ་གཞུག་པར་བྱའོ། །ཡང་ནས་ཡང་དུ་རྣལ་འབྱོར་གྱི་རང་བཞིན་དྲན་པ་དང་ལྡན་པས་སོ། །གཞོན་ནུ་མས་བཀལ་བའི་སྐུད་པ་དགུ་སྒྲིལ་དུ་བྱས་ནས་ཤེལ་གྱི་བགྲང་ཕྲེང་རྡོག་པོ་ལྔ་བཅུ་རྩ་གཅིག་བརྒྱུས་
[206b.4]ཏེ་ཡང་ན་བོ་དྷེ་ཙེའོ། །གུང་མོ་དང་མཐེ་བོས་བཟུང་ནས་ཞི་བ་ལའོ། །གཅིག་གིས་ལྷག་པའི་བརྒྱ་ཡིས་མཛུབ་མོ་དང་མཐེ་བོ་དག་གིས་ཐུན་མཚམས་གསུམ་བཞིར་ཡུན་མི་རིང་བར་བསྒོམས་ཏེ་ཡེ་ཤེས་པ་སྤྱན་དྲངས་ནས་རྣལ་འབྱོར་པས་དེ་བཞིན་དུ་སྔགས་ཀྱི་ཡི་གེ་བཟླས་པ་བྱ་སྟེ་
[206b.5]སེམས་བརྟན་ཞིང་ཡིད་ཆགས་པས་སོ། །སྔོན་དུ་བསྙེན་པ་འབུམ་བྱས་ནས་ཉི་མ་སོ་སོ་ལ་ཟླ་བ་ཕྱེད་དང་གསུམ་དུ་ཁྲི་ཕྲག་རེ་བཟླས་ན་སྙན་ངག་མཁན་དུ་འགྱུར་རོ། །དུག་ཞི་བར་བྱེད་དོ། །འབུམ་ཕྲག་ཉི་ཤུ་རྩ་གཅིག་བཟླས་ནས་ཉི་ཤུ་རྩ་གཅིག་གིས་ས་དཀར་ལ་མངོན་པར་
[206b.6]བསྔགས་ནས་ལག་པས་དྲིལ་ཏེ་ལན་ཉི་ཤུ་རྩ་གཅིག་ཏུ་མངོན་པར་བསྔགས་ནས་གང་གི་མགོ་བོར་ལག་པས་བྱིན་པ་དེ་རྨོངས་པ་ཡིན་ཡང་སྙན་ངག་མཁན་དུ་འགྱུར་རོ། །འཁོར་རྣམས་ཀྱང་རྒོལ་བས་ཟིལ་གྱིས་ནོན་པར་མི་འགྱུར་ཏེ་འཇམ་དཔལ་དང་མཚུངས་པར་འགྱུར་རོ། །གཞན་
[206b.7]ཡང་མ་ཐོས་པའི་བསྟན་བཅོས་ཐམས་ཅད་ཀྱང་ཤེས་པར་འགྱུར་རོ། །སྔགས་འདིའམ། ཡང་ན་བླ་མའི་མན་ངག་གིས་བཟླས་པ་བྱས་ན་ཤེས་རབ་འཕེལ་བར་འགྱུར་རོ། །ཨོཾ་ཀུ་རུ་ཀུལླེ་ཧྲཱིཿབ་ད་བ་ད་བཱ་ཁཱ་དི་ནི་སྭཱ་ཧཱ། ཡི་གེ་བདུན་པའི་སྔགས་ཀྱི་ཡི་གེ་འབུམ་བཟླས་ནས་
[207a]
[207a.1]སྦྱིན་སྲེག་གསུངས་པའི་ཆོ་ག་དང་ལྡན་པས་མེ་ཏོག་དཀར་པོས་མངར་གསུམ་ལ་བསྒྲེས་ནས་སྟོང་ཕྲག་བརྒྱད་ཅུས་སྦྱིན་སྲེག་བྱས་ན་ཀླུའི་བུ་མོ་རྣམས་ཀྱང་འགུགས་པར་འགྱུར་རོ། །མ་བསླངས་པར་ཡང་མིའི་བུ་མོ་མཛེས་མ་རྣམས་རྙེད་དོ། །འདི་ནི་ངོ་མཚར་མ་ཡིན་
[207a.2]པར་འགྲུབ་སྟེ། སངས་རྒྱས་བཅོམ་ལྡན་བསམ་མི་ཁྱབ། །སངས་རྒྱས་ཆོས་ཀྱང་བསམ་མི་ཁྱབ། །སངས་རྒྱས་རྫུ་འཕྲུལ་བསམ་མི་ཁྱབ། །ནོར་བུ་སྨན་དང་སྔགས་རྣམས་ཀྱི། །མཐུ་ཡང་བསམ་གྱིས་མི་ཁྱབ་པོ། །སྔོན་མ་བཞིན་དུ་གཞོན་ནུ་མས་བཀལ་བའི་སྐུད་པ་
[207a.3]འཐག་མཁན་གསོ་སྦྱོང་བྱས་ནས་བཏགས་ཤིང་། རི་མོ་མཁན་པོ་ཡང་སྟེ་བྲིས་སྐུའི་ཆོ་གས་དུས་གསུམ་དུ་བྱས་ཏེ་དྲི་བཟང་པོའི་མེ་ཏོག་གིས་མཆོད་ནས་ང་རྒྱལ་དང་བཅས་པའི་སྔགས་བཟླས་པར་བྱའོ། །བྱམས་པའི་སེམས་ཀྱིས་རྨུགས་པ་དང་གཉིད་དང་རྒོད་པ་དང་། ཐེ་ཚོམ་དང་།
[207a.4]ཞུམ་པ་དང་། ཡིད་གཉིས་དང་ལྡན་པ་གཞན་དང་། སེམས་དམན་པ་དང་། དོན་མེད་པའི་སེམས་རྣམས་ཐམས་ཅད་མཁྱེན་པའི་གསུང་ལ་རྨུགས་པ་ལ་སོགས་པའི་སེམས་བཟུང་བ་རྣམས་འབད་པས་དེ་རྣམས་མྱུར་དུ་སྤངས་པར་གསུངས་སོ། །སྒྲོལ་མའི་ཡི་གེ་བཅུའི་སྔགས་བཟླས་
[207a.5]པར་བྱ་ཞིང་འདིས་ཀུ་རུ་ཀུལླེའི་སྦྱོར་བས་བགེགས་ཐམས་ཅད་ཉེ་བར་ཞི་ཞིང་སེམས་ཅན་རྣམས་ཀྱི་དབང་དུ་བྱེད་པ་ཡང་སྒྲོལ་མ་དང་ཀུ་རུ་ཀུལླེ་དབྱེར་མེད་པ་ལས་སོ། །ཤེས་རབ་ཀྱི་ཆོ་ག་ནི་ཁྱིམ་མིང་ཅན་གྱི་ལོ་མ་དང་། ཤ་ཐི་དང་། ཤིང་མངར་དང་། དེ་བཞིན་དུ་ཚངས་པ་དང་། པི་པི་ལིང་དང་།
[207a.6]སྦྲང་རྩི་རྣམས་བཟའ་བར་བྱའོ་ཞེས་པ་འདི་མན་ངག་གིས་བྱས་ཏེ། ཡི་གེ་བདུན་པའི་སྔགས་ཀྱིས་ལན་མང་དུ་མངོན་པར་བསྔགས་ཏེ། སྨན་རྣམས་བདུད་རྩིའི་རང་བཞིན་དུ་བསྐྱེད་ནས། བདག་ཉིད་བཅོམ་ལྡན་འདས་མའི་སྐུར་དམིགས་ལ། བཅོམ་ལྡན་འདས་མའི་བྲིས་སྐུ་ལ་སོགས་པ་
[207a.7]བཀྲམ་ནས་ནམ་ལངས་པ་དང་མཆོད་པ་བྱས་ནས་བཟའ་བར་བྱའོ། །ཉལ་བའི་དུས་སུ་ཐུམ་བུ་བྱས་ཏེ་ཁར་བཅུག་ནས་ཉལ་བར་བྱའོ། །འདིས་ཤེས་རབ་ཆེན་པོར་འགྱུར་རོ། །ཨོཾ་ཀུ་རུ་ཀུལླེ་སྭཱ་ཧཱ། ཞེས་སོ། །ཤེས་རབ་རྒྱུད་ཀྱི་ཆོ་གའོ། །མར་དང་ཏ་ཀ་རའི་རྩ་དང་། །འཁོར་ལོས་མཚན་པ་དེ་བཞིན་དུ། །
[207b]
[207b.1]མཆེ་བའི་རྨ་ལ་བྱུགས་པའམ། །འཐུངས་པས་དུག་ནི་འཇོམས་པར་བྱེད། །དུག་གི་རྒྱུད་ནི། སྔོན་དུ་གསུངས་པའི་མཚན་མའི་ས་བོན་ཁ་དོག་དམར་པོ་ཡོངས་སུ་གྱུར་པ་ལས་བཅོམ་ལྡན་འདས་མ་བརྩེ་བས་བརླན་པའི་སེམས་ཀྱིས་མཐར་ཐུག་པ་རྣམ་པར་བསྒོམས་ནས་རང་གི་སྙིང་གར་ཟླ་བ་
[207b.2]དམར་པོའི་སྟེང་དུ་འཁོར་ལོ་རྩིབས་དྲུག་ལ་གནས་པའི་ཨོཾ་ཀུ་རུ་ཀུལླེ་སྭཱ་ཧཱ། ཞེས་པའི་ས་བོན་བདུན་གྱི་འོད་ཟེར་གྱིས་བཅོམ་ལྡན་འདས་མ་ཡེ་ཤེས་སེམས་མའི་སྐུ་གདན་དྲངས་ནས་ཞལ་གྱི་སྒོ་ནས་སྔོན་དུ་གསུངས་པའི་སྔགས་ཀྱིས་སྔོན་མ་བཞིན་དུ་རབ་ཏུ་ཞུགས་ཏེ། དེ་ཉིད་གསུམ་ལ་
[207b.3]སོགས་པས་ཐམས་ཅད་རོ་གཅིག་ཏུ་བྱས་ནས་རང་གི་སྙིང་གའི་ས་བོན་གྱི་འོད་ཟེར་གྱིས་བསྒྲུབ་བྱ་བཀུག་ནས་བགྲང་ཕྲེང་གི་ཞགས་པས་བཅིང་ཤིང་བཀུག་ནས་རྐང་པའི་མཐིལ་དུ་འགྱེལ་ཏེ། སྐྲ་གྲོལ་ཞིང་མྱོས་པ་རོ་བཞིན་དུ་བལྟས་ནས་བགྲང་ཕྲེང་གི་ཞགས་པའམ། ལྕགས་ཀྱུས་བདེ་བ་ཆེན་པོའི་
[207b.4]སྒོ་ནས་ཨ་བ་དྷཱུ་ཏཱིའི་ཟླ་བས་བསྒྲུབ་བྱའི་བཤད་བའི་སྒོ་ནས་རྣམ་པར་ཤེས་པ་བཀུག་སྟེ། ཙནྡན་དམར་པོའམ་བྱི་རུའི་བགྲང་ཕྲེང་ཉི་ཤུ་རྩ་དྲུག་མིང་མེད་དང་མཐེབ་ཆེན་གྱིས་བཟུང་ནས་ཤིན་ཏུ་ཆགས་པའི་སེམས་ཀྱིས་ཡི་གེ་བདུན་གྱི་སྔགས་བཟླས་པར་བྱའོ། །སྔོན་མ་བཞིན་དུ་ཧྲཱིཿཡིག་དམར་པོ་
[207b.5]ཆུ་སྐྱེས་ཀྱི་ཟེའུ་འབྲུ་ལ་བལྟ་བར་བྱའོ། །དབང་དུ་བྱ་བའི་ཆོ་གའོ། །སླར་ཡང་རབ་ཏུ་མྱོས་ཤིང་དབང་དུ་བྱེད་པར་འདོད་པས་དབོ་ཟླའི་ཚེས་བརྒྱད་ལ་མྱ་ངན་མེད་པའི་ཤིང་གི་འོག་ཏུ་སོང་སྟེ། གོས་དམར་པོ་གྱོན་ནས་སེམས་རྩེ་གཅིག་ཏུ་གནས་པས་ཤིན་ཏུ་དགའ་བའི་བསམ་པས་ཀུ་རུ་ཀུལླེ་སྦྱོར་བའི་ཆོ་གས་
[207b.6]མྱོས་བྱེད་ཀྱི་འབྲས་བུ་བཟའ་ཞིང་ཀཱ་མ་ཙི་ཀའི་ཁུ་བས་ཐིག་ལེ་བྱས་ནས་ཆགས་པའི་སེམས་ཀྱིས་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཧྲཱིཿཆེ་གེ་མོ་བདག་གི་དབང་དུ་གྱིས་ཤིག་སྭཱ་ཧཱ། ཡང་ན་ཡི་གེ་བདུན་པའི་སྔགས་ལ་མིང་ནང་དུ་བྱས་ཏེ་སྭཱ་ཧཱས་མཐའ་བརྟེན་ནས་སྔགས་བཟླས་
[207b.7]པས་ལྷ་རྣམས་ཀྱང་དབང་དུ་བྱེད་ན་ཕྲ་མོའི་མི་རྣམས་སྨོས་ཀྱང་ཅི་དགོས། ཀུ་རུ་ཀུལླེའི་སྔགས་འདིས་ནག་པོ་ཆེན་པོ་དང་། འཕྲོག་མ་དང་། གནོད་སྦྱིན་ཆེན་མོ་རྣམས་ཀྱང་དབང་དུ་བྱེད་དོ། །དབང་དུ་བྱ་བའི་ཆོ་གའོ། །ཛཱ་རཱི་གཏུམ་མོ་ཇི་བཞིན་དུ། །སྣེ་ཧེ་མ་ལི་རང་གི་ཁུ། །རོ་ཡི་ལྟེ་བའི་སྲིན་བུ་ཡང་། །
[208a]
[208a.1]དབང་དུ་བྱེད་པས་བཟའ་བར་བྱའོ། །རོ་ཡི་མིག་དང་སྙིང་དང་མཆིན་པ་དང་། །དཔྲལ་བའི་ཤ་དང་དེ་བཞིན་དུ་ནི་སྣ། །བླངས་ཤིང་མནུར་ནས་འབྲུ་མར་དག་གིས་བཙོ། །རྒྱུ་སྐར་རྒྱལ་ལ་དྲག་པོའང་དབང་དུ་བྱེད། །དབང་དུ་བྱ་བའི་རྒྱུད་དོ། །ཨོཾ་ཀུ་རུ་ཀུལླེ་སརྦ་དུཥྚཱན་ནཱ་ཤ་ཡ་
[208a.2]ནཱ་ཤ་ཡ་ཀཱི་ལ་ཡ་ཀཱི་ལ་ཡ། བྷཉྫ་ཡ་བྷཉྫ་ཡ། མར་ད་ཡ་མར་ད་ཡ། དྷཱཾ་ས་ཡདྷཱཾ་ས་ཡ། ཨ་པ་སཱ་ར་ཡ། ཨ་པ་སཱ་ར་ཡ། ཨ་བི་མི་ཏཾ་མེ་ཀུ་རུ་ཤཱནྟིཾ་མེ་ཀུ་རུ་པུཥྚིཾ་མེ་ཀུ་རུ་སརྦ་སཏཱཾ་པ་ཤྱཾ་མེ་སྭཱ་ཧཱ། ཨོཾ་ཧྲཱིཾ་ཤྲཱིཾ་ཧཱུཾ་ཧཾ་ཧོཿཧཿསྔགས་འདིས་ཡང་མེའི་དཀྱིལ་འཁོར་གྱི་སྟེང་དུ་མགོ་བོ་གསུམ་ལ་གནས་པའི་པདྨའི་
[208a.3]སྣོད་དུ་ཟན་ལ་སོགས་པ་རྣམས་བདུད་རྩིའི་རང་བཞིན་དངུལ་ཆུ་བཞིན་དུ་བལྟས་ལ་ཡི་གེ་གསུམ་གྱི་སྔགས་ཀྱིས་བྱིན་གྱིས་བརླབས་ལ་བཅོམ་ལྡན་འདས་མ་དང་འབྱུང་པོ་ཐམས་ཅད་ལ་འབུལ་བར་བྱའོ། །ཨོཾ་མུཿཞེས་པ་འདིས་མཆོད་པ་ལ་སོགས་པ་ཐམས་ཅད་གཤེགས་པར་བྱའོ། །འདིས་ནི་བགེགས་ཆེན་པོ་
[208a.4]རྣམས་ཞི་བར་འགྱུར་རོ། །གཏོར་མའི་ཆོ་གའོ། །ཞི་ལ་ཞི་བའི་སེམས་ཀྱིས་ཏེ། །རྒྱས་ལ་རྒྱས་པའི་སེམས་ཀྱིས་སོ། །ཤིན་ཏུ་ཆགས་པས་དབང་དུ་དགུག །ཁྲོ་བའི་སེམས་ཀྱིས་གསད་པའོ། །ཞི་ལ་མཎྜལ་རྣམ་པ་སྟེ། །རྒྱས་ལ་རྫིང་གི་རྣམ་པའོ། །དབང་ལ་ཟླ་བ་ཕྱེད་པ་སྟེ། །ནམ་མཁའི་ཁམས་
[208a.5]འདྲ་གསད་པ་ལ། །ཞི་བ་ཁྲུ་གང་ཚད་ཀྱིས་ཏེ། །རྒྱས་པ་ལ་ནི་ཁྲུ་དོའོ། །རྒྱས་པ་ཇི་ལྟ་དེ་བཞིན་དབང་། །གསད་པ་སོར་མོ་ཉི་ཤུའོ། །ཞི་ལ་ཁྲུ་ཕྱེད་གཏིང་དུའོ། །ཁྲུ་ཡི་ཚད་ཀྱིས་རྒྱས་པ་ལ། །མཐེ་བོ་ལྔ་ཡིས་གསད་པ་ལ། །རྒྱས་པ་ཇི་ལྟ་དེ་བཞིན་དབང་། །ཞི་བའི་སྦྱིན་སྲེག་ཚེས་གཅིག་ལ། །རྒྱས་པ་ཟླ་བ་
[208a.6]གང་བ་ལ། །བཅུ་བཞི་ལ་ནི་མངོན་སྤྱོད་དོ། །བརྒྱད་ལ་དབང་གི་ལས་ཡིན་ནོ། །ཞེས་པ་ནི་གཞན་ནོ། །དེ་ནས་ཡང་ན་སྔགས་ཀྱིས་བྲི། །སྦྱིན་སྲེག་ཐབ་ཁུང་ཚད་ལྡན་པ། །ཞི་བ་ལ་ནི་ཟླུམ་པོར་བྱ། །ཁྲུ་གང་གི་ནི་ཚད་ཀྱི་ཐིག །ཁྲུ་ཕྱེད་གཏིང་དུ་ས་བརྐོས་ནས། །ཚོན་རྩི་དཀར་པོས་བྱུག་པར་བྱ། །སྦྱིན་སྲེག་ཐབ་ཁུང་ཚད་
[208a.7]ལྡན་པ། །ལོགས་དག་ཡང་དག་བྲི་བྱས་ཏེ། །ཀུན་ནས་འཁོར་ལོའི་རྣམ་པ་ཅན། །རྒྱས་པ་ལ་ནི་ཁྲུ་དོ་སྟེ། །ཁྲུ་གང་དེ་ནས་བརྐོ་བར་བྱ། །ཁ་དོག་སེར་སྐྱ་དག་གིས་ནི། །ཀུན་ནས་གྲུ་བཞི་བྲི་བར་བྱ། །མངོན་སྤྱོད་ལ་ནི་ཟུར་གསུམ་སྟེ། །རྒྱ་ལ་སོར་མོ་ཉི་ཤུའོ། །ཉི་ཤུའི་ཕྱེད་ནི་བརྐོ་བར་བྱ། །འབར་བའི་ཕྲེང་བ་འཁྲིགས་
[208b]
[208b.1]པ་བྲི། །དེ་བཞིན་དབང་དང་དགུག་པ་ལ། །ཟླ་བ་ཕྱེད་པ་ཡང་དག་བྲི། །སྦྱིན་སྲེག་ཐབ་ཁུང་ཡང་དག་བལྟས། །ཕྱོགས་དང་ཕྱོགས་མཚམས་སྣང་བར་བྱས། །སྔགས་པས་བྱང་ཕྱོགས་ཁ་ཕྱོགས་ནས། །དབང་དུ་བྱ་བ་བརྩམ་པར་བྱ། །རྒྱས་པ་རྟག་ཏུ་ཤར་ཕྱོགས་ལ། །མངོན་སྤྱོད་ལ་ནི་ལྷོ་
[208b.2]ཕྱོགས་སུ། །ནུབ་ཕྱོགས་སུ་ནི་རྟག་གསུངས་པ། །དབང་དུ་དགུག་དང་བསྐྲད་ལ་སོགས། །མངོན་སྤྱོད་རྟག་ཏུ་ཁ་དོག་གནག །ཁ་དོག་ལྔ་ཡི་དབང་དུ་བྱ། །ཏིལ་དང་འབྲས་དང་འོ་མ་དང་། །མར་དང་སྦྲང་རྩི་དང་བཅས་པ། །བདུད་རྩི་ལྔ་དང་ལྡན་པ་ཡིས། །ཞི་བ་དང་ནི་རྒྱས་པར་འདོད། །ཡམ་ཤིང་
[208b.3]དག་ནི་ཐམས་ཅད་ཀྱང་། །འོ་མ་དང་བཅས་དྲི་བཟངས་ཤིང་། །བཟའ་བ་རྣམ་པ་སྣ་ཚོགས་པ། །འབྱུང་པོ་ཀུན་ལ་གཏོར་མ་སྦྱིན། །ཞི་བ་སྟོན་ཀའི་དུས་སུ་ནི། །དེ་བཞིན་རྒྱས་པ་དགུན་གྱི་དུས། །དབང་དང་དགུག་ནི་དཔྱིད་དུ་གསུངས། །སོས་ཀའི་དུས་སུ་མངོན་སྤྱོད་དང་། །ལས་རྣམས་
[208b.4]ཐམས་ཅད་བསྒྲུབ་པར་བྱ། །ཐོ་རངས་དུས་སུ་ཞི་བ་སྟེ། །ནམ་ལངས་དེ་བཞིན་རྒྱས་པ་དང་། །ཉི་མ་ཕྱེད་དང་ནམ་ཕྱེད་ལ། །དེ་བཞིན་མངོན་སྤྱོད་ལས་རྣམས་བྱ། །ང་མེད་སྦྱིན་སྲེག་ལས་ལ་མཁས། །དེ་ཉིད་གང་ཞིག་སྨྲ་བྱེད་པའི། །སློབ་དཔོན་ཞི་བ་ཆེན་པོ་དེས། །སངས་རྒྱས་བསྟན་ལ་མོས་པས་སོ། །འདོད་ཆགས་
[208b.5]སེམས་གྱུར་གཞན་རྣམས་ལ། །ཞེ་སྡང་ཕ་རོལ་སུན་འབྱིན་པ། །ཁེངས་ཤིང་རྨོངས་པ་དང་ལྡན་པ། །དེ་རྣམས་སངས་རྒྱས་བསྟན་ལ་སྤོང་། །སྦྱིན་སྲེག་གི་ཆོ་གའོ། །གཞན་ཡང་མཆེ་བའི་དུག་ལངས་པའི་དུས་སུ་ཞི་བར་འདོད་པས་བླ་མའི་མན་ངག་གིས་དུག་ཤེས་ནས་བདག་ཉིད་ཀླུ་མ་ལུས་པའི་གཟུགས་སུ་
[208b.6]བསྒོམས་ཏེ། ཁ་དོག་དཀར་པོ་རང་གི་སྙིང་གར་ཆུ་སྐྱེས་འདབ་མ་བརྒྱད་པའི་སྟེང་དུ་ཤེས་རབ་ཀྱི་དཀྱིལ་འཁོར་ལ་གནས་པའི་ཤེས་རབ་ཀྱི་ས་བོན་ལ་བདེ་བ་ཆེན་པོའི་བདུད་རྩི་འཐུང་ཞིང་མིག་དག་ནས་འཐོན་ཏེ། བསྒྲུབ་བྱའི་མགོ་བོ་དང་། མིག་དང་ཁ་དང་། སྙིང་ག་དང་། གསང་བ་དང་། རྐང་པའི་མཐར་
[208b.7]ཐུག་པར་གཡོ་ཞིང་འགྲོ་བ་རྩེ་གཅིག་པའི་སེམས་བརྟན་པོས་བསམ་པར་བྱའོ། །ཡང་ན་བི་ཥའི་སྨན་དང་ལྡན་པ་མིང་མེད་ཀྱིས་སྔོན་དུ་གསུངས་པའི་དཀྱིལ་འཁོར་གྱི་ས་བོན་གྱི་གནས་སུ་བསྒྲུབ་བྱ་ལེགས་པར་བྱ་སྟེ། ས་བོན་དང་ལྡན་པས་དྲིལ་བུའི་འོག་ཏུ་རེག་པར་བྱའོ། །དབྱུག་པ་བྱིན་ནས་མཛུབ་མོས་
[209a]
[209a.1]ས་བོན་གྱི་གནས་ལ་གོས་ཀྱིས་གཡོགས་པར་བྱའོ། །ཡང་ན་མ་བསྣུན་པར་སྔོན་དུ་གསུངས་པའི་གནས་སུ་རེག་པར་བྱ་ཞིང་སྔོན་མའི་སྨན་སྦྱིན་པར་བྱའོ། །ཡང་ན་ཟླ་བའི་དཀྱིལ་འཁོར་གྱི་གནས་ལ་གཡོ་བཞིན་པ་བསྒོམ་པར་བྱའོ། །ཆང་དང་བི་ཥ་དང་ཚ་ལ་དང་སྦྲང་གི་
[209a.2]བཏུང་བ་སྦྱིན་པར་བྱའོ། །ཡན་ལག་དགོད་པ་ལག་པས་རྟག་ཏུ་བྱའོ། །དེ་ཉིད་གསུམ་གྱིས་མཆེ་བ་གྲོལ་བར་བྱའོ། །འདིས་ནི་ལངས་པར་ཐེ་ཚོམ་མེད་དོ། །སླར་ཡང་གདེངས་ཀའི་དབང་པོའི་མགྲིན་པ་བཅིངས་ཏེ་མཆེ་བས་མཆུ་གཟུང་བར་བྱའོ། །ནམ་མཁའ་ལྡིང་དབང་པོས་ནམ་མཁའ་ལ་ཁྱེར་ཏེ།
[209a.3]ནམ་མཁར་རབ་ཏུ་ཞུགས་པས་དུག་མེད་པར་འགྱུར་རོ། །གཞན་ཡང་གཡོ་བའི་སྐར་མ་དང་བཅས་པའི་ཟླ་བ་ལས་འོག་ཏུ་བསྒོམས་པས་ཆུས་ཁྱབ་ཅིང་ཐོད་པ་ཅན་བཞིན་དུ་གར་བྱེད་ཅིང་དུག་མེད་པར་འགྱུར་ཏེ་གཞན་དུ་མ་ཡིན་ནོ། །ཁྱབ་འཇུག་བཞིན་དུ་མཐོང་ཞིང་མཆེ་བ་ཉལ་བ་མཐའ་ཡས་པ་
[209a.4]གདེངས་ཀ་ཡོངས་སུ་བལྟ་བ་ཆུ་འཛིན་གྱི་ཆུས་ཁྲུས་བྱས་པས་དུག་མེད་པར་འགྱུར་ཏེ་གཞན་དུ་མ་ཡིན་ནོ། །མ་ཏཱ་ཤིན་ཏུ་ཞི་བྱེད་ཅིང་། །རྨོངས་པར་བྱེད་པ་གཞན་ཡིན་ནོ། །དཀར་པོས་དུག་ནི་འཇོམས་བྱེད་ཤེས། །སླར་ཡང་སེར་པོས་རེངས་པར་བྱེད། །ནག་པོ་ཡིས་ནི་གཡོ་བྱེད་འདོད། །ཇི་ལྟར་འབྱུང་བཞི་སྦྱོར་བ་ཡིས། །ས་
[209a.5]བོན་བཞི་དང་ལྡན་པས་ནི། །རེངས་པ་དང་ནི་སྐྲོད་པ་དག། །ལེགས་པར་བཀོད་པས་ངེས་པར་འགྲུབ། །གཞན་དུ་རེངས་པ་རི་རབ་སྦྱོར། །ཅི་སྟེ་རེངས་དང་གཡོ་བ་ལ། །སོ་སོའི་བསམ་གཏན་སྦྱར་བར་བྱ། །གང་འགོག་རང་གི་ལག་གཉིས་ཀྱིས། །ཁ་མིག་རྣ་བ་སྣ་རྣམས་སོ། །བླ་མའི་མན་ངག་ཧཾ་ས་ཡིས། །བརྗོད་པས་ངེས་
[209a.6]པར་དུག་ནི་འཇོམས། །ལག་པས་དུག་ནི་འགུགས་པ་ཡིས། །རིམ་པ་ཡི་ནི་ཐེ་ཚོམ་མེད། །རང་ཉིད་སྟོང་པའི་སྦྱོར་བ་ལས། །དེ་ཉིད་བི་ཥ་བཟའ་བ་ལས། །དུག་འཇོམས་རྒྱ་མཚོ་ལས་སྐྱེས་པ། །རྒྱ་མཚོའི་བཏུང་བ་སྦྱོར་བས་ཀྱང་། །འཁོར་ལོ་དཀར་པོས་མཚན་པ་ཡི། །གདེངས་ཀ་ཡན་ལག་སླར་ཡང་
[209a.7]གཞོན། །ངེས་པར་འཛིན་པར་ཐེ་ཚོམ་མེད། །གུ་ཧོ་སི་ཧོ་ཟླ་ཉི་དག །གནམ་སྟོང་ལ་ནི་སྦྱོར་བ་ཡི། །དུས་ནི་ཁྲོས་པར་འགྱུར་བ་ཡིས། །ཁྲི་རྣམས་ཀྱིས་ཀྱང་ཅི་ཞིག་བྱ། །ཀུ་རུ་ཀུལླེ་དཀར་མོའི་སྒྲུབ་ཐབས་རྫོགས་སོ།། {T3576}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་
[209b]
[209b.1]སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །ཆུ་སྐྱེས་རྣམ་པར་རྒྱས་པར་བུང་བ་འཁོར་འདྲའི་སྤྱན། །མངོན་གསར་མཆོག་གི་དཔལ་མོ་འཕྲོག་པའི་ལུས་ཀུན་མཛེས། །ཨུཏྤལ་རྒྱས་པའི་གཞུ་རྒྱས་མདའ་དང་ལྕགས་ཀྱུས་མཚན། །འདོད་པའི་སྦྲུལ་འཇོམས་ཀུ་རུ་ཀུལླེ་ལ་ཕྱག་འཚལ། །དང་པོར་
[209b.2]རེ་ཞིག་བསྒོམས་པའི་ཐོག་མར་སྐྱེ་བོས་དབེན་པའི་ས་ཕྱོགས་སུ་དྲི་ལྔས་བྱུགས་ཏེ། བརྟུལ་ཞུགས་དང་ལྡན་པ་སེམས་དགའ་བས་སྟན་བདེ་བ་ལ་ཉེ་བར་འདུག་སྟེ། དེའི་ཕྱི་ནས་སྙིང་གར་ར་ཡིག་དམར་པོ་ལས་ཉི་མའི་དཀྱིལ་འཁོར་འབར་ཞིང་འཁྲིགས་པ་ལ། དེ་ནས་རང་གི་སྙིང་གར་དབྱངས་ཡིག་
[209b.3]དང་པོ་ལས་ཟླ་བའི་དཀྱིལ་འཁོར། དེ་ནས་སའི་ཕ་རོལ་གྱི་ས་བོན་གྱི་འོག་ཏུ་མེས་རྣམ་པར་བརྒྱན་པ་བཞི་པའི་དབྱངས་ཀྱིས་བརྒྱན་པའོ། །དེ་ནས་ས་བོན་ལས་སྨིག་རྒྱུ་འབར་བས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སྣང་བར་མཛད་ནས་དཔལ་ལྡན་ཀུ་རུ་ཀུལླེའི་གཟུགས་སུ་བཀོད་
[209b.4]ནས་སླར་ལོག་སྟེ། དེ་ཉིད་དུ་ས་བོན་ལ་རབ་ཏུ་ཞུགས་ཏེ་སྨིག་རྒྱུའི་དྲ་བར་བསྒོམ་པར་བྱའོ། །དེའི་ཕྱི་ནས་ནམ་མཁའི་ཕྱོགས་སུ་མདུན་དུ་ལོ་བརྒྱད་གཉིས་ལོན་པའི་རྣམ་པ་འབར་ཞིང་དབུ་སྐྲ་དམར་སེར་གྱེན་དུ་བརྫེས་པ་ལ་ཐོད་པ་ལྔས་དབུ་བརྒྱན་པ། བྱ་ཁྱུང་གི་གདན་ལ་རྡོ་རྗེ་སྐྱིལ་ཀྲུང་གིས་
[209b.5]བཞུགས་པ། འོད་ཟེར་དཀར་པོའི་དཀྱིལ་འཁོར་དང་ལྡན་པ། ཕྱག་དྲུག་པ། གཡས་དང་གཡོན་གྱི་དང་པོ་གཉིས་ཀྱིས་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་མཛད་པ། གཉིས་པའི་གཡོན་པ་དང་། གཡས་པ་དག་གིས་མི་འཇིགས་པ་དང་། ཀུནྡ་དཀར་པོའི་དོག་པ་བསྣམས་
[209b.6]པ། ཕྱག་ལྷག་མ་གཉིས་ཀྱིས་བགྲང་ཕྲེང་དང་། སྤྱི་བླུགས་བསྣམས་པ། སྒེག་པའི་ཉམས་དང་ལྡན་པ། གསེར་གྱི་གདུ་བུས་ལག་པ་བརྒྱན་པ། ལང་ཚོ་གཞོན་ཞིང་རྒྱས་པ། ན་བཟའ་དཀར་པོ་བསྣམས་པ། སྟོད་ཀོར་དཀར་པོ་ཅན། རྒྱན་ཐམས་ཅད་ཀྱིས་བརྒྱན་པ། དེ་བཞིན་
[209b.7]གཤེགས་པ་ལྔའི་དབུ་རྒྱན་ཅན། ཐུགས་ཀར་ཨུཏྤ་ལ་དཀར་པོའི་ཟེའུ་འབྲུ་ལ་ཟླ་བའི་དཀྱིལ་འཁོར་ལ་དེའི་ས་བོན་བཀོད་ནས་ང་རྒྱལ་རྣམ་པར་བསྒོམ་པར་བྱ་སྟེ། བདག་ཉིད་རྗེ་བཙུན་མ་ཀུ་རུ་ཀུལླེ་ཞེས་སོ། །དེ་ནས་རང་གི་སྙིང་གར་དབྱངས་ཡིག་དང་པོ་ལས་ཡང་དག་པར་བྱུང་བའི་ཟླ་བའི་
[210a]
[210a.1]དཀྱིལ་འཁོར་ལ་གནས་པ། བརྒྱད་པའི་ས་བོན། དེ་ལས་བྱུང་བའི་ཉེར་སྤྱོད་ལྔའི་མཆོད་པ་དང་ལྡན་པ་རྣམ་པ་སྣ་ཚོགས་པའི་ལྷ་མོ་རྣམས་ཀྱིས་མཆོད་པའི་འོད་ཟེར་གྱི་དྲ་བ་སྤྲོས་པས་མཆོད་པར་བྱ་བ་ནི་མཆོད་པའོ། །མཆོད་ནས་མཆོག་གི་སྙིང་རྗེ་ཅན་གི་རྣལ་འབྱོར་པ་གུས་པས་
[210a.2]འདུད་ཅིང་ལུས་དང་ངག་དང་ཡིད་ཀྱིས་ཕྱག་འཚལ་བ་ནི་འཚལ་བའོ། །ཕྱག་འཚལ་ནས་ཡང་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་ལ་སོགས་པ་བྱ་སྟེ། བདག་གིས་སྡིག་པ་མི་དགེ་བའི་ལས་ཅི་བགྱིས་པ་དང་། བགྱིས་པ་ལ་རྗེས་སུ་ཡི་རང་བ་དེ་ཐམས་ཅད་བཅོམ་ལྡན་འདས་
[210a.3]མའི་སྤྱན་སྔར་མངོན་སུམ་དུ་བཤགས་སོ། །དེའི་རྗེས་སུ་བྱང་ཆུབ་ཏུ་སེམས་བསྐྱེད་པར་བྱ་བ་ནི་སྲིད་པའི་རྒྱ་མཚོར་ལྷུང་བ་དེ་རྣམས་གདོན་པར་བྱ་བའི་ཕྱིར་སེམས་ཀྱི་རྡོ་རྗེ་མཆོག་ཏུ་བྱའོ་ཞེས་བདག་ཉིད་བྱང་ཆུབ་ཏུ་སེམས་བསྐྱེད་པར་བྱའོ། །དེའི་ཕྱི་ནས་ཚད་མེད་པའི་གནས་བཞི་བསྒོམ་པར་བྱའོ། །དེའི་རྗེས་
[210a.4]སུ་བསྒོམ་པ་ཐམས་ཅད་རྣམ་པར་དཔྱད་ནས། རང་བཞིན་གྱིས་ལུས་ཡོངས་སུ་གཏོང་བའི་ངོ་བོ་ཉིད་རྣམ་པར་དག་པའི་སྔགས་ཀྱི་དོན་མངོན་དུ་བྱ་ཞིང་འཇིག་རྟེན་གསུམ་གྱི་བདག་ཉིད་སྟོང་པ་ཉིད་དུ་རྣམ་པར་བསྒོམས་ཏེ་སྔགས་འདིས་རང་གི་སེམས་བྱིན་གྱིས་བརླབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་
[210a.5]ཝ་ཨཱཏྨ་ཀོ྅ཧཾ། ཕྱི་ནས་སྔོན་དུ་གསུངས་པའི་སྨོན་ལམ་གྱི་སྟོབས་ལས་སེམས་ཅན་གྱི་དོན་ལ་མངོན་པར་བལྟ་བཞིན་པའི་སྔགས་པའི་ལུས་ལྷའི་སྐུར་བསྐྱེད་པར་བྱའོ། །སྔགས་དགོད་པའི་རིམ་པས་ལྷའི་སྐུར་མཚོན་པའོ། །དེའི་རྗེས་སུ་ནམ་མཁའི་ཕྱོགས་སུ་དྲུག་པའི་ས་བོན་ལས་སྐྱེས་
[210a.6]པའི་པདྨ་དཀར་པོ་རྣམ་པར་རྒྱས་པའོ། །དེའི་སྟེང་དུ་བརྒྱད་པའི་ས་བོན་ཐིག་ལེ་དང་བཅས་པས་བརྒྱན་པའི་འོག་ཏུ་དྲུག་པའི་དབྱངས་དང་བཅས་པའོ། །དེའི་སྟེང་དུ་སྣ་ཚོགས་རྡོ་རྗེ། དེས་ས་གཞི་རྡོ་རྗེའི་རང་བཞིན་དང་། །རྡོ་རྗེའི་བླ་རེ་དང་། རྡོ་རྗེའི་ར་བ་ཡང་བསམ་པར་བྱའོ། །དེའི་དབུས་སུ་ཨེ་
[210a.7]ཡིག་གི་རྣམ་པ་རབ་ཏུ་གསལ་བའི་ཆོས་འབྱུང་ཡེ་ཤེས་དཀར་པོ་རྣམ་པར་བསྒོམ་པར་བྱའོ། །དེའི་དབུས་སུ་བརྒྱད་པའི་ས་བོན་དཀར་པོའི་འོག་ཏུ་མེས་རྣམ་པར་བརྒྱན་པ། །སྟེང་དུ་བཞི་པའི་དབྱངས་ཀྱིས་བརྒྱན་པ་ཚེག་དྲག་དང་བཅས་པ། དེ་ལས་བྱུང་བའི་ཆུ་སྐྱེས་དཀར་པོ་འདབ་མ་བརྒྱད་པ། དེའི་
[210b]
[210b.1]སྟེང་དུ་ཟེའུ་འབྲུ་ལ་ས་བོན་དང་མཚུངས་པ། དེ་ལས་བྱུང་བའི་ཉི་མ་དེའི་སྟེང་དུ་དབྱངས་ཡིག་དང་པོ་ལས་བྱུང་བའི་ཟླ་བ་དང་ཉི་མ་ལ་དཔེ་བྱད་བཟང་པོ་བརྒྱད་ཅུས་སྤྲས་པ་དང་ཟླ་བ་མཐོང་བའི་བདག་ཉིད་མཚན་སུམ་ཅུ་རྩ་གཉིས་ཀྱིས་རྣམ་པར་བརྒྱན་པ། འདི་དག་གི་དབུས་སུ་ས་བོན་དཀར་པོ། དེ་ཡོངས་སུ་གྱུར་
[210b.2]པ་ལས་ཨུཏྤ་ལ་དཀར་པོ་ལ་ཀཱ་ལི་དང་ཨཱ་ལི་ལ་རང་གི་སེམས་རབ་ཏུ་ཞུགས་པར་བལྟའོ། །ཕྱི་ནས་ཟླ་བའི་གདན་དང་པདྨ་ལ་སེམས་གཅིག་ཏུ་གྱུར་པ་ཁུ་བ་བཞིན་དུ་བདག་ཉིད་རྣམ་པར་བསྒོམས་ནས། དེ་ནས་སྔོན་དུ་གསུངས་པའི་ཀུ་རུ་ཀུལླེའི་སྐུར་བདག་ཉིད་བསྒོམ་པར་བྱའོ། །དེ་ནས་བསྒོམ་པར་
[210b.3]བྱ་བ་རང་གི་སྙིང་གར་ར་ཡིག་ལས་ཉི་མ་རྣམ་པར་བསྒོམས་ཏེ། དེའི་ལྟེ་བ་ལ་ས་བོན་སླར་ཡང་བསྒོམ་པར་བྱའོ། །དེ་ལས་བྱུང་བའི་འོད་ཟེར་གྱིས་མགོན་པོ་འོད་དཔག་ཏུ་མེད་པ་གདན་དྲངས་ནས་གསང་བ་དང་གཞན་གྱི་མཆོད་པས་དེ་ཡང་དག་པར་མཆོད། ཡང་དབང་བསྐུར་བ་ཞུ་བར་བྱའོ། །དེ་ལ་
[210b.4]འདིས་ཞུ་བ་སྟེ། ཨ་བྷི་ཥིཉྩནྟུ་མཱཾ། ཨ་མི་ཏཱ་བྷཱ་ན། ཞེས་པས་སོ། །དེ་ནས་མགོན་པོ་འོད་དཔག་ཏུ་མེད་པ་དེས་བདུད་རྩི་ལྔས་ཡོངས་སུ་གང་བའི་བུམ་པ་རང་གི་ཐུགས་ཀ་ནས་འཕྲོ་བར་བསྒོམ་པར་བྱའོ། །དེ་ནས་བདུད་རྩི་ལྔས་གང་བའི་བུམ་པ་དེ་རྣམས་ཀྱིས་བཅོམ་ལྡན་འདས་མ་ལ་ཁྲུས་གསོལ་བར་
[210b.5]བྱའོ་ཞེས་སོ། །དེ་ནས་རང་གི་ཐུགས་ཀར་རབ་ཏུ་ཞུགས་པར་བསམ་པར་བྱའོ། །དེ་ནས་རྣམ་པར་བཀོད་པས་སྤྱི་བོར་མགོན་པོ་འོད་དཔག་ཏུ་མེད་པ་བསམ་པར་བྱའོ། །དེ་ནས་ཐུན་མཚམས་གསུམ་དུ་བསྒོམ་ཞིང་བསྒོམ་པར་བྱ་བ་བཀོད་ནས་སྔགས་བཟླས་པར་བྱའོ། །སྔགས་དགོད་པ་བསྡུས་
[210b.6]པ་ནི་དྲུག་པའི་གསུམ་པའི་ས་བོན་ལ་ཟླ་བ་ཕྱེད་པས་ཐིག་ལེའི་འོག་ཏུ་བརྒྱན་པ་ལྔ་པའི་དབྱངས་ཀྱི་དབྱེ་བ་ལས་སྟེང་དུ་གཙུག་ཏོར་གྱི་ཆའི་མཐར་ཐུག་པར་དགོད་པར་བྱའོ། །དང་པོའི་དབྱངས་ཡིག་དཀར་པོ་ལས་བྱུང་བ་ཟླ་བ་ཕྱེད་པས་རྣམ་པར་བརྒྱན་པ་བཀོད་ནས་མགྲིན་པ་དམར་པོ་ལ་གསུམ་པ་
[210b.7]གསུམ་པའི་ས་བོན་ཟླ་བ་ཕྱེད་པས་རྣམ་པར་བརྒྱན་པ། འོག་ཏུ་མེ་ཡིས་རྣམ་པར་བརྒྱན་པ་བཞི་པའི་དབྱངས་དང་ལྡན་པས་ལྟེ་བའི་འོག་གསང་གནས་ཀྱི་མཐར་ཐུག་པ་སེར་པོའོ། །དང་པོའི་གཉིས་པའི་ས་བོན་ལ་ཟླ་བ་ཕྱེད་པས་རྣམ་པར་བརྒྱན་པ་བཀོད་ནས་རྐང་པའི་མཐར་ཐུག་
[211a]
[211a.1]པ་ལྗང་གུའོ། །ས་དང་ཆུ་དང་། མེ་དང་། རླུང་དང་། ནམ་མཁའ་དང་ལྔའོ། །ཀྵཾ་ཛཾ་ཁཾ་གཾ་སྐཾ་སཾ། ཛཿཧཱུཾ་བཾ་ཧོཿཁཾ་རཾ། མགོ་བོ་དང་། སྙིང་ག་དང་། སྤྱི་བོ་དང་། ལྟེ་བ་དང་། མགྲིན་པར་བྱ་སྟེ། དུག་ནག་པོའི་ཕུང་པོ་ལ་སོགས་པ་ལས་བྱུང་བ་ཡང་དག་
[211a.2]པར་འཇོམས་པར་བྱེད་དོ། །དེ་ནས་རྩ་བའི་སྔགས་བཏུ་བ་ནི་དང་པོ་ལ་ཡི་གེའི་དབང་པོ་སྦྱིན་པར་བྱའོ། །དེ་ནས་ལྔ་པའི་ལྔ་པ་དང་བདུན་པའི་ལྔ་པའི་མཐའ་ལ་ཐིག་ལེ་གཉིས་ཀྱིས་བརྒྱན་པའོ། །དེ་ནས་དང་པོའི་དང་པོའི་ས་བོན་ལ་ལྔ་པའི་དབྱངས་ཀྱིས་བརྒྱན་པའོ། །དྲུག་པའི་གཉིས་པའི་
[211a.3]ས་བོན་ལ་ལྔ་པའི་དབྱངས་དང་ལྡན་པའོ། །ཡང་དང་པོའི་དང་པོའི་ས་བོན་ལ་ལྔ་པའི་དབྱངས་དང་ལྡན་པའོ། །དྲུག་པའི་གསུམ་པའི་ས་བོན་ལ་དེ་ནས་དང་པོའི་བཅུ་གཅིག་པས་རྣམ་པར་བརྒྱན་པའོ། །བདུན་པའི་བཞི་པའི་ས་བོན་ལ་འོག་ཏུ་མེས་རྣམ་པར་བརྒྱན་པའོ། །མགོ་ལ་བཞི་པའི་
[211a.4]དབྱངས་དང་ལྡན་པར་བྱས་ནས་མཐའ་ལ་ཚེག་དྲག་དང་བཅས་པ་མཐའ་ལ་ན་མོ་སླར་ཡང་བཽ་ཥ་ཊ་དེའི་མཐའ་ལ་བཟླས་པར་བྱའོ། །སྭཱ་ཧཱའི་མཐའ་ཅན་སླར་ཡང་ཐམས་ཅད་ལ་བྱའོ། །བཅོ་ལྔ་པོའི་ས་བོན་འདི་རྣམས་ཀྱི་སྔགས་ཀྱི་ཡི་གེའི་གྲངས་ཀྱི་འབུམ་དུ་བཟླས་ལ་བཅུ་ཆས་
[211a.5]མེ་ཏོག་དཀར་པོས་སྦྱིན་སྲེག་བྱའོ། །གཡས་སུ་སྲོག་རབ་ཏུ་འཇུག་པས་ཉི་མ་དང་ཟླ་བར་གྱུར་པར་བཅིང་བ་དང་། གཡས་གཡོན་གྱི་སྲོག་བཅིང་བར་བྱས་ནས་སྔགས་པས་རྟག་ཏུ་བཟླས་པར་བྱའོ། །ཤེལ་དང་མུ་ཏིག་གི་འབྲས་བུའི་བགྲང་ཕྲེང་གིས་བརྒྱ་རྩ་བརྒྱད་ཀྱི་རྡོག་
[211a.6]པོ་སྲད་བུས་བརྒྱུ་བར་བྱའོ། །སྲོག་འབྱུང་བའི་དུས་སུ་རྡོག་པོ་བསྐྱོད་པར་བྱའོ། །བདག་ཉིད་གང་ཞིག་དངོས་གྲུབ་འདོད་པས་སྲོག་འཛུག་པ་ན་སྔགས་བཟླས་པར་བྱའོ། །ཨོཾ་མཿཀྵཿཀུ་རུ་ཀུལླེ་ཧྲཱིཿན་མོ་བཽ་ཥ་ཊ་སྭཱ་ཧཱ། ལྷ་མོའི་སྙིང་གའི་སྔགས་སོ། །ཨོཾ་ཤྭེ་ཏེ་ཧཱུཾ་ཕཊ་
[211a.7]མགོ་ལའོ། །ཨོཾ་ཤྭེ་ཏེ་ཛཱ་ཊ་ནི་སྭཱཧཱ་སྐྲ་ལའོ། །ཨོཾ་རཏྣཱ་མི་ཏཱ་བྷཱ་པདྨ་ཙཱ་བེ་ཏི་གོ་ཆའོ། །ཨོཾ་ཙ་ཀྵུཿས་མནྟ་ཙཀྵུར་བི་ཤོ་དྷ་ནེ་སྭཱ་ཧཱ་མིག་ལའོ། །ཨོཾ་བྷཱ་ཡ་ནཱ་ས་ནི་ཏཱ་ས་ནི་ཏྲཱ་སེ་ཏྲཱ་སེ་ཏྲཱ་ས་ཡ་ཏྲཱ་ས་ཡ་སརྦ་ནཱ་ག་ཡ་ཀྵ་བྷཱུ་ཏན་བྷྲྀ་ཊི་ཏྲ་བཻ་ར་ཏྲ་ཤྭེ་ཏ་ཛཱ་ཊི་ནི་ཧཱུཾ་ཧཱུཾ་ཕཊ་ཕཊ་སྭཱཧཱ། མཚོན་ཆའོ། །
[211b]
[211b.1]མུ་ཏིག་གི་བགྲང་ཕྲེང་གིས་བཟླས་པར་བྱའོ། །བདུད་རྩི་ལྔའི་བཟའ་བ་སྔགས་འདིས་སྦྱང་བར་བྱའོ། །ཨོཾ་ཨཱཿཧཱུཾ་ཞེས་པའི་ཡི་གེ་གསུམ་གྱི་དེ་ཉིད་གསུམ་གྱིས་དེ་བྱིན་གྱིས་བརླབས་པས་སྔགས་འགྲུབ་བོ་ཞེས་སོ། །རང་གི་སྙིང་གར་དབྱངས་ཡིག་དང་པོ་ལས་ཐོད་པ་
[211b.2]གསུམ་བསམ་ཞིང་སྟེང་དུ་པདྨའི་སྣོད་དོ། །དེའི་དབུས་སུ་ས་བོན་ལྔའོ། །དེ་ནས་ས་བོན་ལས་བྱུང་བས་པཱུ་ལི་ར་མ་ལ་ཡར་སོང་ནས་སླར་ཡང་ཇི་སྲིད་ཛཱ་ལནྡྷ་རའི་བར་དུའོ། །དེ་ནས་ཛཱ་ལནྡྷ་རར་སོང་ནས་དེ་བཞིན་གཤེགས་པ་རྣམས་རྟོགས་པར་བྱའོ། །དེ་ལ་ཐམས་ཅད་
[211b.3]གཅིག་ཏུ་གྱུར་པས་མྱུར་དུ་ཟླ་བའི་དཀྱིལ་འཁོར་གྱི་གཟུགས་སུ་བལྟ་བ་ནི་བདུད་རྩིའོ། །དྲིལ་བུའི་བུ་གའི་ལམ་ནས་འཛག་པར་བྱེད་པའི་བདུད་རྩི་དེས་ཕུང་པོ་དང་ཁམས་དང་སྐྱེ་མཆེད་རྣམས་ཚིམ་པར་བྱའོ། །ཚིམ་པ་དང་དེའི་སྣོད་ལ་ཡང་གནས་པར་བྱའོ། །དེ་ལ་དྲིལ་བུའི་སྟེང་
[211b.4]དུ་ཧཱུཾ་ཡིག་མགོ་ཐུར་དུ་འཕྱང་བའོ། །དེ་ལ་སྟེང་དུ་ཨོཾ་ཡིག་བལྟ་བར་བྱའོ། །དེ་ནས་རང་གི་སྙིང་གའི་ས་བོན་ལ་པདྨའི་སྣོད་ལ་ཡེ་ཤེས་ཀྱི་བདུད་རྩི་དྲི་མ་མེད་པའོ། །དེ་ནས་ཡཾ་ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་བ་དན་གྱིས་མཚན་པ་གཞུའི་རྣམ་པ་ནག་
[211b.5]པོའོ། །དེའི་སྟེང་དུ་རཾ་ཡིག་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་རཾ་ཡིག་འབར་བས་མཚན་པ་མེའི་འོད་དུ་ལྡན་པའི་མདངས་ཅན་ནོ། །དེའི་སྟེང་དུ་ལྟེ་བར་འདབ་མ་དཀར་པོ་བརྒྱད་དང་ལྡན་པའི་ཟེའུ་འབྲུ་དང་བཅས་པ་གསང་བའི་སྦུབས་ཀྱི་མཐར་ཐུག་པར་སོན་
[211b.6]པར་བསམ་པར་བྱའོ། །དེའི་དབུས་སུ་ཧྲཱིཿཡིག་འབར་བའི་ཕྲེང་བ་འཁྲིགས་པས་ཤིན་ཏུ་གསལ་བ་དེ་ཡོངས་སུ་གྱུར་པ་ལས་བཅོམ་ལྡན་འདས་མ་ཀུ་རུ་ཀུལླེ་ཡེ་ཤེས་ཀྱི་བདུད་རྩིས་ཚིམ་པར་བྱ་ཞིང་། དེ་བཞིན་གཤེགས་པ་ལྔ་ཞུགས་པ་བསྒོམ་པར་བྱའོ། །འདིས་ཡེ་ཤེས་
[211b.7]ཀྱི་བདུད་རྩིའི་ཆར་འབབ་པར་བསམ་ཞིང་དུག་གཡོ་བ་ཐམས་ཅད་ཟིལ་གྱིས་གནོན་པར་སྦྱོར་བར་བསམ་པའི་སྔགས་རིག་པས་རྟག་ཏུའོ། །དེ་ནས་སྔགས་པས་དུག་ཞི་བར་འདོད་པས་དཀར་པོའི་ཚེས་གཅིག་ནས་བརྩམས་ཏེ་ཐུན་མཚམས་གསུམ་དུ་ཁྲི་ཕྲག་རེ་རེ་ལ་དེ་བཞིན་དུ་ཉི་མ་སོ་སོ་
[212a]
[212a.1]ལ་བཅོམ་ལྡན་འདས་མའི་སྐུ་ལ་དམིགས་ཏེ་གོས་དཀར་པོ་བཟུང་ནས་ལུས་ལ་བགོ་བར་བྱའོ། །དེའི་རྗེས་སུ་རང་གི་སྙིང་གའི་ཟླ་བ་ལ་གནས་པའི་ཧྲཱིཿཡིག་དཀར་པོ་ཡོངས་སུ་གྱུར་པ་ལས་ཆུ་སྐྱེས་འདབ་མ་བརྒྱད་པའི་སྡོང་བུ་སྐྱེ་གནས་ཀྱི་མཐར་ཐུག་པར་སོན་པ་
[212a.2]བསྒོམ་པར་བྱའོ། །དེའི་འདབ་མ་བརྒྱད་ལ་དབྱངས་ཡིག་བརྒྱད་ཡོངས་སུ་གྱུར་པ་ལས་བུང་བ་བརྒྱད་དགའ་བ་དང་མགུ་བ་དང་རྒྱས་པའོ། །ནག་པོ་དང་དམར་པོ་གོ་རིམས་བཞིན་དུ་བཟློག་པས་རང་གི་སྣ་ནས་ནགས་སུ་ཨུ་ཌི་ཡར་འདོང་ཞིང་རང་གི་སྣ་བུག་གཡས་གཡོན་གྱི་བུ་ག་ནས་
[212a.3]འཐོན་ཏེ། བསྒྲུབ་བྱ་དུག་གིས་མནར་བའི་སྣ་གཡས་ཀྱི་བུ་ག་ནས་རབ་ཏུ་ཞུགས་ཏེ་སྟོབས་དང་ལྡན་པས་གཅོད་ཅིང་དུག་རྣམས་རྙིང་བར་བྱའོ། །བརྒྱད་པའི་དང་པོ་དབྱངས་ཡིག་དང་པོ་ལས་ཅུང་ཟད་དཀར་བའི་འདབ་མ་དང་ལྡན་པས་རྣམ་པར་བརྒྱན་པ་ཞེས་རྣམ་པར་བསམ་ཞིང་དུག་གིས་མནར་
[212a.4]བའི་སྣ་བུག་གཡས་ནས་འཐོན་པར་བསམ་པར་བྱའོ། །ཕྱི་ནས་རྣལ་འབྱོར་པས་བགྲང་ཕྲེང་གིས་མངོན་པར་བསྣུན་ཅིང་སྤྱི་བླུགས་ཀྱི་ཆུས་དབང་བསྐུར་བྱས་པས་དུག་གིས་མནར་བ་ལངས་པར་བྱེད་དོ། །དུས་གསུམ་དུ་རྣམ་པར་བསྒོམས་པར་གྱུར་པས་རང་ཉིད་ཁྱུང་གི་གཙུག་གི་ནོར་
[212a.5]བུའོ། །སྒྲུབ་པ་པོ་མགལ་མེའི་འཁོར་ལོ་བཞིན་དུ་སྔགས་ཀྱི་གཟུགས་ཀྱིས་རྟག་ཏུ་མངོན་པར་དགའ་བ་དང་ལྡན་པར་གྱུར་པས་རྒྱུན་མི་འཆད་པར་གོམས་པའི་ཡིད་ཀྱིས་གདམས་ངག་ངེས་པས་སོ། །མཐའ་ཡས་ལ་སོགས་པ་རིགས་ལྡན་རྣམས་ཏེ། དེ་ལ་ཀླུ་རྣམས་དགོད་པར་བྱ་
[212a.6]སྟེ། གནས་རྣམས་ཐམས་ཅད་དུའོ། །སྔོན་དུ་ཡི་གེ་རྣམས་དགོད་པར་བྱ་སྟེ། དབྱངས་རྣམས་ཀྱི་ཁྱད་པར་ལས་སོ། །དེའི་ཕྱི་ནས་མཐའ་ཡས་དང་རིགས་ལྡན་དག་གིས་དབུ་སྐྲ་བཅིངས་པའི་གནས་དག་གསེར་གྱི་མདོག་ལྟ་བུའོ། །འཇོག་པོས་རྣ་རྒྱན་དུ་བྱས་ཤིང་གདེངས་པའོ། །
[212a.7]ལག་གདུབ་པདྨ་ཆེན་པོ་གསེར་བཙོ་མའི་འོད་ལྟ་བུ། སྟོབས་ཀྱི་རྒྱུ་དཀར་པོས་མཆོད་ཕྱིར་ཐོགས་བྱས་པའོ། །ནོར་རྒྱས་པདྨ་དམར་པོའི་འོད་ལྟ་བུས་སྐ་རགས་བྱས་པ། ཀུནྡ་དང་བནྡུ་ཀ་འདྲེས་པ་ལྟ་བུའི་པདྨ་དང་དུང་སྐྱོང་དག་གིས་རྐང་པ་དག་ལའོ། །འདི་ལྟ་བུའི་རྒྱན་དྲག་པོས་བརྒྱན་
[212b]
[212b.1]ནས་སྔགས་རིག་པས་རྟག་ཏུ་ཀུ་རུ་ཀུལླེའི་གཟུགས་དང་དབྱིབས་ཀྱི་བྱ་ཁྱུང་གི་གདན་གྱི་སྟེང་དུ་གནས་པས་གཡོ་བ་དང་མི་གཡོ་བ་ཐམས་ཅད་བསྒྲུབ་པར་བྱའོ། །འདི་ཉིད་ཀྱི་རིམ་པས་སྒྲུབ་པ་པོ་བདག་ཉིད་བསྒོམས་པར་གྱུར་པས་རང་ཉིད་བྱ་ཁྱུང་གི་གཙུག་གི་ནོར་བུའོ། །དེ་ལ་གནས་པས་བཟླས་པ་བྱ་ཞིང་
[212b.2]སྔགས་པས་ཐུན་མཚམས་གསུམ་དུ་ཏིང་ངེ་འཛིན་གྱིས་སོ། །སྔགས་འདི་ཉིད་ཀྱིས་ཞོའི་ཟས་ཨརྐའི་སྣོད་དུ་བྱས་ནས་བཟའ་བར་བྱས་པའི་སྔགས་པས་རྒྱ་མཚོའི་དུག་འཇོམས་པར་བྱེད་དོ། །བུམ་པ་གང་བའམ། དུང་གཡས་སུ་འཁྱིལ་བར་ལན་ཉི་ཤུ་རྩ་གཅིག་བཟླས་པས་ཆུ་དུག་
[212b.3]གིས་ན་བས་བཏུང་བར་བྱའོ། །དཀར་པོའི་བསམ་གཏན་གྱི་དཔྲལ་བར་ཐིག་ལེའི་གཟུགས་ཀྱིས་དུག་མེད་པར་བྱེད་དོ། །བསམ་གཏན་སེར་པོས་རེངས་པར་བྱེད་དོ། །བསམ་གཏན་དམར་པོས་ཀླུའི་དུག་གི་གཟུགས་རྨོངས་པར་བྱེད་དོ། །བསམ་གཏན་ནག་པོས་དུག་ཡང་དག་པར་འཕོ་བར་བྱེད་དོ། །
[212b.4]ལྗང་གུའི་བསམ་གཏན་གྱིས་སླར་ཡང་འཚོ་བར་བྱེད་དོ་ཞེས་པ་ནི་བསམ་གཏན་གྱི་ཁྱད་པར་དུ་གསུངས་སོ། །དཔལ་ལྡན་སྒྱུ་འཕྲུལ་དྲ་བ་རྣལ་འབྱོར་གྱི་རྒྱུད་ཆེན་པོ་སྟོང་ཕྲག་བཅུ་དྲུག་པ་ལས་བྱུང་བའི་ཀུ་རུ་ཀུལླེའི་སྒྲུབ་ཐབས་མཆོག་ཏུ་གྱུར་པ་སློབ་དཔོན་དཔལ་ནག་པོ་སྤྱོད་པའི་ཞབས་
[212b.5]ཀྱིས་མཛད་པ་རྫོགས་སོ།། {T3577}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། འཕགས་མ་ཀུ་རུ་ཀུལླེ་ལ་ཕྱག་འཚལ་ལོ། །མདོར་བསྡུས་པའི་སྒྲོལ་མ་ལས་བྱུང་བའི་ཀུ་རུ་ཀུལླེར་བདག་ཉིད་བསམ་པར་བྱའོ། །རང་གི་ཆོས་
[212b.6]འབྱུང་དུ་བསྒྲུབ་བྱ་བལྟས་ལ་རང་གི་སྙིང་གར་གནས་པའི་ཡེ་ཤེས་ཀྱི་འོད་ཟེར་གྱིས་དེ་ལ་དབང་བསྐུར་བས་ཡོངས་སུ་དག་ཅིང་ཐལ་མོ་ཡང་དག་པར་སྦྱོར་བས་དབང་དུ་གྱུར་ཏེ། ཀུན་ནས་དམར་བའི་སྐུ་མདོག་ཏུ་བསྒོམ་པར་བྱའོ་ཞེས་པ་ནི་དབང་དུ་བྱ་བའོ། །གང་ཞིག་དྲན་པ་ཙམ་གྱིས་ནི། །ལྷ་དང་
[212b.7]ལྷ་མིན་མིར་བཅས་པ། །མྱུར་དུ་མངག་གཞུག་བྱེད་འགྱུར་བ། །ཀུ་རུ་ཀུལླེར་ཕྱག་འཚལ་ལོ། །དང་པོར་སྔགས་པས་ཞལ་བསང་བ་ལ་སོགས་པ་བྱས་ཏེ། སྟན་བདེ་བ་ལ་འདུག་ནས། རང་གི་སྙིང་གར་ཨ་ཡིག་ལས་སྐྱེས་པའི་ཟླ་བ་ལ་གནས་པའི་ཧྲཱིཿཡིག་གི་འོད་ཟེར་གྱིས་བཀུག་
[213a]
[213a.1]པའི་ལྷ་མོ་ཀུ་རུ་ཀུལླེའི་སྙིང་གར་ས་བོན་ལས་བྱུང་བའི་མཆོད་པའི་ཁྱད་པར་རྣམས་ཀྱིས་ཡང་དག་པར་མཆོད་པར་བྱ་སྟེ། ཕྱག་འཚལ་བ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། དེའི་དགེ་བ་ཡོངས་སུ་བསྔོ་བ་དང་། གསུམ་ལ་
[213a.2]སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། ཚད་མེད་པའི་གནས་བཞི་བསྒོམ་པར་ཡང་བྱས་ནས་སྟོང་པ་ཉིད་བསྒོམ་པ་དང་བྱིན་གྱིས་བརླབ་པ་ཡང་བྱའོ། །སྙིང་གའི་ས་བོན་ལས་སྐྱེས་པའི་ཨུཏྤ་ལ་དམར་པོ་ཨ་ཡིག་ལས་སྐྱེས་པའི་ཟླ་བའི་དཀྱིལ་འཁོར་ལ་རྣམ་པར་བསྒོམ་
[213a.3]པར་བྱའོ། །དེ་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་མ་སྐུ་མདོག་དམར་མོ་པདྨ་དམར་པོ་དང་ཟླ་བའི་གདན་ལ་བཞུགས་པ། རྒྱན་དམར་པོ་དང་ལྡན་པ། ཕྱག་བཞི་པ་གཡས་པས་མི་འཇིགས་པ་སྦྱིན་པ། གཞན་གྱིས་མདའ་བཀང་བ་འཛིན་པ། གཡོན་གྱི་གཅིག་གིས་རིན་
[213a.4]པོ་ཆེ་དང་གཞུ་འཛིན་པའོ། །འོད་དཔག་ཏུ་མེད་པས་དབུ་བརྒྱན་པ་ཀུ་རུ་ཀུལླེའི་རིའི་ཕུག་ན་བཞུགས་པ། སྒེག་པའི་ཉམས་འབར་བ། ལང་ཚོ་གཞོན་པའི་ཀུ་རུ་ཀུལླེ་བསྒོམ་པར་བྱའོ། །ཇི་སྲིད་མི་ངལ་གྱི་བར་དུའོ། །ངལ་བར་གྱུར་ན་སྔགས་བཟླས་པར་བྱའོ། །དེ་ལ་སྔགས་ནི་འདི་ལྟ་སྟེ།
[213a.5]ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། བསྒྲུབ་བྱ་དབང་དུ་བྱ་བར་འདོད་པས་མྱ་ངན་མེད་པའི་ཤིང་དམར་པོའི་འོག་ཏུ་སིནྡྷུ་རའི་མཎྜལ་བྱས་ནས། དེ་ལ་མེ་ཏོག་དམར་པོས་ལྷ་མོ་ཡང་དག་པར་མཆོད་ཅིང་བདག་ཉིད་གོས་དམར་པོ་གྱོན་ཏེ། བསྒྲུབ་བྱ་རྐང་པས་གནོན་ཅིང་གོས་མེད་པ། མྱོས་ཤིང་སྐྲ་གྲོལ་བ་
[213a.6]སྙིང་གར་ཨུཏྤ་ལ་དམར་པོའི་ཚོགས་ཀྱིས་འབུགས་པ་བཞིན་དུ་སྔགས་བཟླས་པར་བྱའོ། །དེ་ལ་ཉེ་བའི་སྔགས་ནི་ཨོཾ་ཀུ་རུ་ཀུལླེ་ཧྲཱིཿཨཱ་མུ་ཀ་མེ་བ་ཤི་ཀུ་རུ་སྭཱ་ཧཱ་ཞེས་པའོ། །ཀུ་རུ་ཀུལླེའི་སྒྲུབ་ཐབས་རྫོགས་སོ།། {T3578}༄༅༅། །རྒྱ་གར་སྐད་དུ། ཀལྤོཀྟ་ཀུ་རུ་ཀུལླེ་སཱ་དྷ་ནཾ། བོད་སྐད་དུ།
[213a.7]རྟོག་པ་ལས་གསུངས་པའི་ཀུ་རུ་ཀུལླེའི་སྒྲུབ་ཐབས། འཕགས་མ་ཀུ་རུ་ཀུལླེ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཡིད་དང་མཐུན་པའི་གནས་འགའ་ཞིག་ཏུ་སྟན་བདེ་བ་ལ་ཉེ་བར་འདུག་སྟེ། བཅོམ་ལྡན་འདས་མའི་རས་བྲིས་ལ་སོགས་པ་བཀྲམ་སྟེ་ཕྱིའི་མཆོད་པས་མཆོད་ནས་རང་གི་སྙིང་གར་
[213b]
[213b.1]དྲི་མ་མེད་པའི་ཟླ་བ་ཡོངས་སུ་གང་བའི་འོད་ལ་དབྱངས་ཡིག་དང་པོ་ལས་བྱུང་བའི་སེམས་ཀྱི་ཟླ་བ་རྣམ་པར་བསྒོམས་ནས། དེའི་ས་བོན་དགོད་པར་བྱ་སྟེ། དྲོ་བ་རྣམས་ཀྱི་བཞི་པ་ནི། །མེ་ཡི་ཡི་གེའི་སྟེང་དུ་གནས། །ཨཱི་ཡིག་དང་ནི་ཡང་དག་ལྡན། །ནམ་མཁའ་གཉིས་ཀྱིས་རྣམ་པར་བརྒྱན། །དེ་ཡི་
[213b.2]སེམས་ཀྱི་འོད་ཟེར་གྱིས། །འགྲོ་བ་རྣམས་ནི་དྲི་མེད་བྱས། །ལྷན་ཅིག་ལ་སོགས་ཁམས་རྣམས་སྦྱངས། །ཀུ་རུ་ཀུལླེའི་རི་བོར་སོང་། །ཡང་དག་བསྐུལ་བ་དེ་ཡིས་ནི། །སྒྲོལ་མ་འགུགས་ཤིང་མདུན་དུ་འཕྲོ། །དེ་ལ་ས་བོན་མཆོད་ཆེན་གྱི། །མཁས་པས་སྤྲིན་ཚོགས་སྤྲོ་བར་བྱ། །
[213b.3]མེ་ཏོག་བདུག་པ་དེ་བཞིན་དུ། །མར་མེ་དྲི་དང་ཞལ་ཟས་ཚོགས། །སྒེག་མོ་ཕྲེང་མ་གླུ་མ་གར། །དེ་བཞིན་རོལ་མོ་སོགས་ཀྱིས་མཆོད། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་
[213b.4]ཆུབ་ཡིད་ཀྱིས་གཟུང་། །འདི་ཡི་སྔགས་ནི་རྣམ་གསུམ་བརྗོད། །དེ་ནས་བཟོད་པར་གསོལ་བར་བྱ། །དེ་ལ་ཚིགས་སུ་བཅད་པ་འདིས། །གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །ལུས་ཅན་ཀུན་གྱི་སྐྱབས་ཡིན་ཕྱིར། །ལྷ་མོ་ཁྱོད་ཀྱིས་བཟོད་པར་མཛོད། །བྱམས་
[213b.5]པའི་སེམས་ལ་གནས་པ་ནི། །སླར་ཡང་དེ་ལ་ངེས་པར་བཅིང་། །སྙིང་རྗེའི་སེམས་ནི་ཡང་དག་བསྐྱེད། །རབ་ཏུ་དགའ་བའི་སེམས་འབབ་བྱ། །ཕྱི་ནས་བཏང་སྙོམས་བྱ་བ་སྟེ། །ཀུན་ནས་སེམས་ཙམ་རྣམ་པར་བཞག །སེམས་ནི་སྟོང་པ་ཉིད་བྱ་སྟེ། །རང་གཞན་རྣམ་པར་སྤང་བར་བྱ། །
[213b.6]སྟོང་ཉིད་མེ་ཡིས་བསྲེགས་བྱས་ནས། །ཕུང་ལྔ་སླར་ཡང་སྲིད་མི་འབྱུང་། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭབྷཱ་ཝ་ཨཱཏྨ་ཀོ྅ཧཾ། སྐད་ཅིག་སྟོང་ཉིད་སྦྱར་བྱས་ནས། །སེམས་ཉིད་ཀྱི་ནི་ངལ་གསོ་བྱ། །སྔོན་གྱི་དམ་བཅས་དྲན་བྱས་ལ། །ས་བོན་ཙམ་ཞིག་སླར་ཡང་བསམ། །གཅིག་པུ་ཡོངས་སུ་
[213b.7]མྱང་འདས་ན། །བདག་གིས་སེམས་ཅན་བསླུས་འགྱུར་ལ། །སྲིད་པའི་རྒྱ་མཚོ་གཏིང་མེད་ལས། །དེ་ལ་ཇི་ལྟར་བདག་གིས་གདོན། །ཞེས་པའི་འདོད་པས་སྙིང་རྗེར་བྱ། །སེམས་ཉིད་སྟོང་ཉིད་སྤང་བྱས་ལ། །ཀུན་གྱི་ཁམས་ཀྱི་རང་བཞིན་དུ། །སེམས་བསྐྱེད་པ་ཡི་སེམས་
[214a]
[214a.1]ཀྱིས་ནི། །སངས་རྒྱས་བྱིན་རླབས་ནམ་མཁར་ནི། །ས་བོན་ཨུཏྦལ་དེ་གྱུར་ལས། །ཨུཏྤ་ལ་ནི་ཟླ་བའི་གཟུགས། །ཨ་ཡིག་དབྱངས་ལས་ཡང་དག་བྱུང་། །ཟླ་བ་དེ་ལས་སྔར་ས་བོན། །དེ་ལས་འོད་ཟེར་བྱུང་གྱུར་པ། །དེ་ཡི་རྣམ་པར་སྦྱངས་གྱུར་པར། །
[214a.2]འཇིག་རྟེན་ཁམས་རྣམས་མ་ལུས་བསམ། །ཀུན་ནས་སྦྱངས་པར་རྟོགས་དེ་ཡི། །འོད་ཀྱིས་སངས་རྒྱས་བྱེ་བ་རྣམས། །ཞུགས་གྱུར་དེ་ལས་ཨུཏྤ་ལ་བསམ། །དེ་ཡིས་སྒྲོལ་མར་གྱུར་བྱས་ཏེ། །སྐུ་མདོག་དམར་པོ་ཕྱག་བཞི་མ། །པདྨ་དམར་པོའི་གདན་ལ་བཞུགས། །སྐལ་བཟང་
[214a.3]གོས་ཟུང་དམར་པོས་བརྒྱན། །རྣ་རྒྱན་དམར་པོ་དབུ་རྒྱན་བཅས། །ཕྱག་གཡས་མི་འཇིགས་པ་དང་ནི། །གཞན་ཡང་མདའ་ནི་བསྣམས་པའོ། །གཡོན་ན་གཞུ་དང་གཉིས་པ་ན། །ཨུཏྤལ་དམར་པོ་བསྣམས་པ་ནི། །ཀུ་རུ་ཀུལླེའི་ཕུག་སོན་པ། །ཨཱ་རོ་ལི་ཀའི་དབུ་རྒྱན་ཅན། །སྒྲ་གཅན་སྟེང་དུ་འདོད་ལྷ་
[214a.4]ཡི། །ཆུང་མར་བཅས་པའི་གདན་ལ་བཞུགས། །སྒྱུ་རྩལ་ཀུན་དང་ལྡན་པ་ཡི། །དེ་ལ་རྡོ་རྗེའི་སྐྱིལ་ཀྲུང་བཅས། །ཡང་དག་རྒྱན་རྣམས་ཀུན་ལྡན་པའི། །བཅོམ་ལྡན་འདས་མ་བསྒོམ་པར་བྱ། །དམ་ཚིག་སེམས་དཔའ་རྫོགས་པ་ལ། །ཡེ་ཤེས་འཁོར་ལོ་སྤྱན་དྲང་བྱ། །སྐད་ཅིག་རྣམ་པས་ཡོངས་
[214a.5]རྫོགས་པའི། །ཡེ་ཤེས་འཁོར་ལོ་མདུན་བཞུགས་ལ། །ཛཿཧཱུཾ་བཾ་ཧོཿཞེས་བྱ་འདིས། །དགུག་གཞུག་བཅིང་དང་མཉེས་པར་བྱ། །དམ་ཚིག་ཕྱག་རྒྱ་རབ་སྦྱོར་བས། །ཞལ་གྱི་ལམ་ནས་གཞུག་བྱ་སྟེ། །ལག་གཉིས་ཐལ་མོ་རབ་སྦྱར་ཏེ། །གང་ཚེ་ལེགས་སྦྱར་སྨད་བྱ་སྟེ། །འདི་དག་རྩེ་མོར་བྱ་བ་སྟེ། །དབུས་སུ་
[214a.6]མིང་མེད་བྱ་བ་ལ། །འཁྲི་ཤིང་གུང་མོ་འཁྱུད་པའོ། །མཐེབ་ཆེན་གཉིས་པོ་འོག་ཏུ་སོན། །དམ་ཚིག་འདི་ནི་བཅིང་བྱས་ནས། །འདིས་ནི་འཁོར་ལོ་རབ་གཞུག་བྱ། །དེ་ནས་དབང་བསྐུར་ཞུ་བྱ་སྟེ། །སངས་རྒྱས་ཞེས་བྱའི་ཚིགས་བཅད་བརྗོད། །བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་སྩལ་བ་
[214a.7]ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཆེར་གྱུར་དེ་རྣམས་ཀྱིས་སྦྱིན་བྱེད། །རྒྱལ་སྲིད་དབང་བསྐུར་མིང་ལས་ནི། །མེ་ཏོག་དབང་དང་རྡོ་རྗེས་གནང་། །སྤྱན་མ་ལ་སོགས་ལྔ་རྣམས་ཀྱིས། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་
[214b]
[214b.1]ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱེད། །སངས་རྒྱས་དབང་བསྐུར་སྒྲོལ་མ་ཡི། །ཆོས་ཀྱི་གཙུག་གི་ནོར་བུར་གྱུར། །འོད་ཟེར་དམར་པོ་རྣམས་ཀྱིས་ནི། །འགྲོ་བ་གསུམ་པོ་སྣང་བྱེད་ཅིང་། །རིན་ཆེན་དབང་བསྐུར་ཐོབ་གྱུར་ནས། །དངོས་གྲུབ་
[214b.2]ཐམས་ཅད་བསྒྲུབ་པར་བྱ། །དེ་རིང་སྔོན་གསུངས་ཆོ་ག་ཡིས། །ལོ་ཕྱེད་བརྟན་པར་ཞུགས་པ་ཡི། །བསྒོམ་པའི་རིམ་པ་སྔོན་འགྲོ་བས། །ཐུན་མཚམས་གསུམ་དུ་གཏོར་མ་དབུལ། །སྒྲོལ་མའི་སྙིང་པོ་འདི་ཡིས་ནི། །ཏིང་ངེ་འཛིན་གྱི་སྔགས་བཟླས་བྱ། །ཨོཾ་ཀུ་རུ་ཀུལླེ། ཧྲཱིཿཧཱུཾ་སྭཱ་ཧཱ། དེ་ནས་སྔོན་བསྙེན་
[214b.3]ཡི་གེ་འབུམ། །བཟླས་ནས་ལས་ནི་བརྩམ་པར་བྱ། །ཆ་ཤས་ཀྱིས་ནི་ཤེས་རབ་འཕེལ། །ཆ་ཤས་གཞན་གྱིས་དབང་དུ་བྱེད། །དེ་བཞིན་ཆ་ཤས་གསུམ་པ་ཡིས། །མི་ཡི་དུག་ནི་འགུགས་པར་བྱེད། །འཇིག་རྟེན་གྱིས་ནི་མཆོད་བྱེད་འགྱུར། །བུད་མེད་སྒེག་མ་མྱོས་པས་ཀྱང་། །གོམས་སྦྱོར་ལྷ་ཡི་བུ་མོ་མཛེས། །ཇི་
[214b.4]ལྟར་འདོད་བཞིན་སྔགས་འཛིན་སྤྱོད། །ཧྲཱིཿཡིག་མྱོས་བྱེད་འདབ་མ་ལ་བཀོད་བུད་མེད་རྣམས་ཀྱི་ལྕེ་འཛག་བྱེད། །དེ་དག་ཉིད་ཀྱང་བློ་ཡིས་སྐྱེ་བོའི་སྙིང་གི་དབུས་སུ་འགའ་ཞིག་ཏུ། །མཆེ་བ་རྣམས་ཀྱི་སྔོན་བསྒོམས་དུག་འཇོམས་ཆོས་ཀྱི་ཡི་གེ་རང་ཉིད་འབབ། །སྒྲོལ་མའི་སྙིང་པོ་འཇིག་རྟེན་གསུམ་ལས་
[214b.5]རྣམ་རྒྱལ་ཤེས་བྱ་བརྩེ་བའི་གནས། །རང་ཉིད་སྒྲོལ་མ་ལས་སྐྱེས་པའི། །ཀུ་རུ་ཀུལླེར་བསྒོམ་པར་བྱ། །བསྒྲུབ་བྱ་དེ་ཡི་ཁ་ནང་སོན། །འདོད་པས་མྱོས་པར་བསམ་པར་བྱ། །ཡེ་ཤེས་སེམས་དཔའི་ཆུ་སྐྱེས་ལས། །སྤྱི་བོར་བདུད་རྩིའི་རྒྱུན་འབབ་བསམ། །བརྟུལ་ཞུགས་ཅན་གྱིས་ཐུན་གསུམ་བསྒོམས། །
[214b.6]ཉི་མ་བདུན་གྱིས་ལྟུང་བར་འགྱུར། །རིམ་པ་གོམས་པས་དངོས་གྲུབ་ཕྲན། །མཁས་པ་ཡིས་ནི་བསྒྲུབ་པར་བྱ། །འདིར་ནི་དཔལ་དང་བཅས་གྱུར་པའི། །དངོས་གྲུབ་ཆེན་པོ་ཉིད་ཀྱང་འགྲུབ། །རྟོག་པ་ལས་གསུངས་པའི་ཀུ་རུ་ཀུལླེའི་སྒྲུབ་ཐབས་རྫོགས་སོ།། {T3579}༄༅༅། །རྒྱ་གར་སྐད་དུ། ཀུ་རུ་ཀུལླེ་ཀརྨ་པྲ་ས་
[214b.7]ར་པྲ་ཡོ་ག །བོད་སྐད་དུ། ཀུ་རུ་ཀུལླེའི་ལས་རབ་ཏུ་བརྐྱང་བ་སྦྱོར་བ། འཕགས་མ་ཀུ་རུ་ཀུལླེ་ལ་ཕྱག་འཚལ་ལོ། །ཨོཾ་ཀུ་རུ་ཀུལླེ་སྭཱཧཱ། འཕགས་མ་སྒྲོལ་མའི་སྙིང་པོའོ། །ས་གསུམ་ནུས་པ་གཞོམ་མེད་པའི། །དབང་གི་ལས་ནི་རབ་ཏུ་བརྐྱང་། །སྔོན་གསུངས་ཏིང་འཛིན་ལ་གནས་ནས། །ཡི་གེ་འབུམ་དུ་བཟླས་པ་བྱ། །
[215a]
[215a.1]ཕྱི་ནས་མེ་ཏོག་བདུག་པས་བྱུག །དྲི་དང་ཕྱེ་མ་གོས་ལ་སོགས། །སྔགས་འདིས་མངོན་པར་བསྔགས་གྱུར་ཏེ། །གང་ལ་བྱིན་དེ་དབང་དུ་འགྱུར། །དྲི་བཟང་བདུག་པས་བདག་བདུགས་ནས། །སྐྱེ་བོ་ཐམས་ཅད་དགའ་བར་འགྱུར། །གང་མིང་མེ་ཏོག་དམར་པོ་ཡི། །སྦྱིན་སྲེག་བྱས་ཏེ་དབང་དུ་འགྱུར། །བཟའ་བཏུང་
[215a.2]ལ་ཡང་མངོན་པར་བསྔགས། །གང་ལ་བྱིན་དེ་དབང་འགྱུར་རོ། །སྐྱེས་བུ་ཆེན་པོ་དབང་བྱེད་ན། །ཡུངས་ཀར་དཀར་པོས་སྦྱིན་སྲེག་བྱ། །ཕྱི་ནས་ཚེས་གྲངས་རྒྱུ་སྐར་རྣམས། །བཟང་པོའི་ཉིན་ལ་བཅོམ་ལྡན་མ། །མཆོད་པ་ལ་སོགས་བྱས་ནས་ནི། །གུར་གུམ་གི་ཝང་ག་པུར་སོགས། །གྲོ་གའམ་ནི་ཡང་ན་གོས། །འཁོར་ལོ་རྩིབས་
[215a.3]ནི་བཅུ་དྲུག་པ། །ཨུཏྤལ་འདབ་མའི་རྣམ་པ་ལ། །འཁོར་ལོ་མངོན་པར་བྲི་བྱ་སྟེ། །འཁོར་ལོའི་དབུས་སུ་སྔགས་བཅས་ལ། །བསྒྲུབ་བྱ་ཡི་ནི་མིང་རྣམས་བྲི། །འཁྲུལ་འཁོར་ཀུ་རུ་ཀུལླེ་ཡི། །ཡི་གེ་བཞི་ཡི་འཁྲུལ་འཁོར་ཏེ། །བསྒྲུབ་བྱའི་མིང་ནི་ངེས་པར་བྲི། །ཕྱི་རོལ་ཨོ་ཡི་སུམ་འགྱུར་བྱ། །སྲད་བུ་དམར་པོས་ཡང་དག་བྲི། །
[215a.4]མྱོས་བྱེད་རང་བཞིན་ཐུམ་བུ་ནི། །ལུས་ཀྱི་སྙིང་གའི་དབུས་སུ་གཞུག །སེང་ལྡེང་མེ་ལ་བསྲོ་བར་བྱ། །རྐང་པ་ནས་ནི་དགུག་པར་བྱ། །སྐྱེས་པའམ་ནི་ཡང་ན་བུད་མེད་དབང་བྱེད་ན། །ཟངས་མའི་ཁབ་ཀྱིས་སྐྱེ་གནས་རྐང་པ་དག་དབུག་བྱ། །འདི་ཉིད་དབང་དུ་འགྱུར་བར་ཐེ་ཚོམ་མེད་པ་སྟེ། །སྔགས་ཀྱི་རྒྱལ་པོ་འདི་ཉིད་དད་པ་
[215a.5]ཆེན་པོ་ཡིས། །བཅོམ་ལྡན་འདས་མ་མཆོད་པར་བྱས་ནས་བཟླས་པར་བྱ། །རིམ་པ་འདི་ཉིད་ཀྱིས་ནི་ཀུན་གྱི་དངོས་གྲུབ་འགྱུར། །ཞེས་པ་ནི་ཀུ་རུ་ཀུལླེའི་ལས་རབ་ཏུ་བརྐྱང་བ་སྦྱོར་བ་རྫོགས་སོ།། {T3580}༄༅༅། །རྒྱ་གར་སྐད་དུ། ཨུཥྞཱི་ཥ་བི་ཛ་ཡ་སཱ་དྷ་ནཾ། བོད་སྐད་དུ། གཙུག་ཏོར་རྣམ་པར་རྒྱལ་མའི་སྒྲུབ་ཐབས། །གཙུག་ཏོར་
[215a.6]རྣམ་པར་རྒྱལ་མ་ལ་ཕྱག་འཚལ་ལོ། །འདིར་སྔོན་དུ་གསུངས་པའི་ཆོ་གས་ཟླ་བ་ལ་བྷྲཱུཾ་ཡིག་དཀར་པོ་ལས་སྐྱེས་པའི་སྐུ་མདོག་དཀར་མོ། ཞལ་གསུམ་པ། སྤྱན་གསུམ་པ། ལང་ཚོ་གཞོན་པ། རྒྱན་ཐམས་ཅད་ཀྱིས་བརྒྱན་པ། ཕྱག་བརྒྱད་དང་ལྡན་པའི་བཅོམ་ལྡན་འདས་མ་བསམ་པར་བྱའོ། །སེར་པོ་དང་ནག་པོ་ནི་གཡས་དང་
[215a.7]ཅིག་ཤོས་ཀྱི་ཞལ་ལོ། །གཡས་ཀྱི་ཕྱག་བཞི་རྣམས་སུ་སྣ་ཚོགས་རྡོ་རྗེ་དང་། པདྨ་ལ་གནས་པའི་སངས་རྒྱས་དང་། མདའ་དང་མཆོག་སྦྱིན་གྱི་ཕྱག་རྒྱ་རྣམས་སོ། །གཡོན་གྱི་ཕྱག་བཞི་རྣམས་སུ་གཞུ་དང་སྡིགས་མཛུབ་དང་བཅས་པའི་ཞགས་པ་དང་། མི་འཇིགས་པའི་ཕྱག་རྒྱ་དང་། བུམ་པ་གང་བའོ། །མཆོད་རྟེན་གྱི་
[215b]
[215b.1]ཕུག་གི་ནང་དུ་བཞུགས་པ། །རྣམ་པར་སྣང་མཛད་ཀྱིས་དབུ་བརྒྱན་པར་བསྐྱེད་ནས་རང་གི་ས་བོན་པདྨ་ལ་གནས་པ་སྙིང་གར་བསམ་པར་བྱའོ། །དེའི་རྗེས་སུ་སྤྱི་བོ་དང་། དཔྲལ་བ་དང་། མགྲིན་པ་དང་། ལྟེ་བ་དང་། རྐང་པ་རྣམས་སུ་གོ་རིམས་ཇི་ལྟ་བ་བཞིན་དུ་ཨོཾ་ཧཱུཾ་ཏྲཱཾ་ཧྲཱིཿཨཾ་ཨཿཞེས་པའི་ཡི་གེ་རྣམས་བལྟ་བར་བྱའོ། །དེ་ནས་
[215b.2]སྔགས་བཟླས་པར་བྱའོ། །ཨོཾ་བྷྲཱུཾ་སྭཱ་ཧཱ། གཙུག་ཏོར་རྣམ་པར་རྒྱལ་མའི་སྒྲུབ་ཐབས་རྫོགས་སོ།། {T3581}༄༅༅། །རྒྱ་གར་སྐད་དུ། ཨཱརྱ་སཱི་ཏ་ཏ་པཏྲཱ་པ་རཱ་ཛི་ཏཱ་སཱ་དྷ་ནཾ། བོད་སྐད་དུ། འཕགས་མ་གཞན་གྱིས་མི་ཐུབ་མ་གདུགས་དཀར་མོ་ཅན་གྱི་སྒྲུབ་ཐབས། འཕགས་མ་གཞན་གྱིས་མི་ཐུབ་མ་ལ་ཕྱག་འཚལ་ལོ། །
[215b.3]འདིར་སྔོན་དུ་གསུངས་པའི་ཆོ་གས་སྙིང་གར་ཟླ་བའི་དཀྱིལ་འཁོར་ལ་ཨོཾ་ཡིག་དཀར་པོ་ལས་སྐྱེས་པའི་བཅོམ་ལྡན་འདས་མ་གདུགས་དཀར་མོ་ཅན་གཞན་གྱིས་མི་ཐུབ་མ་ཞལ་གསུམ་པ། ཕྱག་དྲུག་པ། ཞལ་སོ་སོ་ལ་སྤྱན་གསུམ་པའོ། །སྐུ་མདོག་དཀར་མོ། །སྔོན་པོ་དང་། དམར་པོ་ནི་གཡས་དང་གཡོན་གྱི་
[215b.4]ཞལ་ལོ། །འཁོར་ལོ་དང་། ལྕགས་ཀྱུ་དང་། གཞུ་རྣམས་གཡས་ཀྱི་ཕྱག་ན་བསྣམས་པའོ། །རྡོ་རྗེ་དཀར་པོ་དང་། མདའ་དང་། ཞགས་པ་དང་བཅས་པའི་སྡིགས་མཛུབ་ནི་གཡོན་གྱི་ཕྱག་ནའོ། །ཁྲོ་བོའི་ལྟ་སྟངས་དང་བཅས་པས་གདོན་ཐམས་ཅད་རྣམ་པར་འཇོམས་པར་བྱེད་པ། ལྷའི་རྒྱན་དང་ན་བཟས་
[215b.5]བརྒྱན་པ། འདྲེན་པ་རྣམ་པར་སྣང་མཛད་སྤྱི་བོར་བསྒོམས་ནས་ཕྱག་རྒྱ་བཅིང་བར་བྱའོ། །ལག་པ་གཡས་པའི་ཁུ་ཚུར་དང་སྡིགས་མཛུབ་སྙིང་གར་ཡང་དག་པར་བཀོད་ལ་ལག་པ་གཡོན་པ་རྡོ་རྗེ་ཁུ་ཚུར་འཕྱར་བའོ། །བཟླས་པ་ནི་ཨོཾ་སི་ཏཱ་ཏ་པ་ཏྲེ་ཨ་པ་རཱ་ཛི་ཏེ་སརྦ་གྲ་ཧཱ་ནུ་ཏྲཱ་ས་ཡ་ཏྲཱ་ས་ཡ་ཧ་ན་ཧ་ན་དྲུཾ་དྲུཾ་ཧཱུཾ་ཧཱུཾ་ཕཊ་
[215b.6]ཕཊ་སྭཱ་ཧཱ། འཕགས་མ་གཞན་གྱིས་མི་ཐུབ་མ་གདུགས་དཀར་མོ་ཅན་གྱི་སྒྲུབ་ཐབས་རྫོགས་སོ།། {T3582}༄༅༅། །རྒྱ་གར་སྐད་དུ། བཛྲ་ཙརྩི་ཀ་སཱ་དྷ་ནཾ། བོད་སྐད་དུ། རྡོ་རྗེ་ཙརྩི་ཀའི་སྒྲུབ་ཐབས། རྡོ་རྗེ་ཙརྩི་ཀ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་ག་འདིས་སྟོང་པ་ཉིད་དུ་བསྒོམས་པའི་རྗེས་ལ་ཆུ་སྐྱེས་འདབ་མ་བརྒྱད་
[215b.7]པའི་སྟེང་དུ་ཉི་མ་ལ་གནས་པའི་ཧཱུཾ་ཡིག་ལས་སྐྱེས་པའི་རྡོ་རྗེའི་ལྟེ་བ་ལས་ཙཾ་ཡིག་གནས་པར་བསམས་ནས་དེ་ཡོངས་སུ་གྱུར་པ་ལས་རྡོ་རྗེ་ཙརྩི་ཀ་ཞལ་གཅིག་པ་སྤྱན་གསུམ་པ། སྐྱིལ་ཀྲུང་ཕྱེད་པའི་གར་སྟབས་ཀྱིས་རོའི་གདན་ལ་བཞུགས་པ། སྐུ་ལུས་རིད་ཅིང་མཆེ་བ་གཙིགས་པ་འཇིགས་པ་མི་མགོའི་ཕྲེང་
[216a]
[216a.1]བའི་རྒྱན་གྱིས་མགུལ་བའི་ཕྱོགས་རྣམ་པར་བརྒྱན་པ། ཕྱག་རྒྱ་ལྔའི་རྒྱན་གྱིས་བརྒྱན་ཅིང་མི་བསྐྱོད་པའི་ཅོད་པན་ཅན། སྟག་གི་པགས་པའི་ཤམ་ཐབས་མནབས་པ། སྐྲ་གྲོལ་བ། ཕྱག་དྲུག་པ། གཡས་ན་རྡོ་རྗེ་དང་། རལ་གྲི་དང་། འཁོར་ལོ་བསྣམས་པ། གཡོན་ན་ཐོད་པ་དང་། ནོར་བུ་དང་།
[216a.2]ཆུ་སྐྱེས་བསྣམས་པ། སྐུ་མདོག་དཀར་མོའོ། །ལས་ཀྱི་རྗེས་སུ་འབྲང་བའི་གཟུགས་ཁ་དོག་དཀར་པོ་ལ་སོགས་པ་དང་ལྡན་པར་བསྒོམས་ནས། རང་གི་སྙིང་གའི་ཙཾ་ཡིག་གི་ཡེ་ཤེས་ཀྱི་འཁོར་ལོ་སྤྱན་དྲངས་ཤིང་མདུན་དུ་ཡང་དག་པར་བཞུགས་ནས། མཆོད་པ་ལ་སོགས་པ་བྱས་ཏེ་རབ་ཏུ་བཅུག་ནས། དེ་ནས་
[216a.3]སྔགས་བཟླས་པར་བྱ་སྟེ། ཨོཾ་བཛྲ་ཙརྩི་ཀེ་ཧཱུཾ་སྭཱ་ཧཱ་ཞེས་སོ། །རྡོ་རྗེ་ཙརྩི་ཀུའི་སྒྲུབ་ཐབས་རྫོགས་སོ།། {T3583}༄༅༅། །རྒྱ་གར་སྐད་དུ། མ་ཧཱ་པྲ་ཏི་སཱ་ར་སཱ་དྷ་ནཾ། བོད་སྐད་དུ། སོ་སོ་འབྲང་བ་ཆེན་མོའི་སྒྲུབ་ཐབས། འཕགས་མ་སོ་སོ་འབྲང་བ་ཆེན་མོ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་ག་
[216a.4]འདིས་སྟོང་པ་ཉིད་དུ་བསྒོམས་པའི་རྗེས་ལ་ཨ་ཡིག་ལས་ཟླ་བའི་དཀྱིལ་འཁོར་ལ་པྲཾ་ཡིག་སེར་པོ་སྣ་ཚོགས་པའི་འོད་ཟེར་འཕྲོ་བས་གཞན་གྱི་དོན་བྱས་ཤིང་དེ་ཡོངས་སུ་གྱུར་པ་ལས་བཅོམ་ལྡན་འདས་མ་སོ་སོ་འབྲང་མ་ཆེན་མོར་བདག་ཉིད་སྐད་ཅིག་གིས་བསྐྱེད་པར་བྱའོ། །སྐུ་མདོག་སེར་མོ་ཞལ་བཞི་
[216a.5]པ། སྤྱན་གསུམ་པ། ཕྱག་བརྒྱད་པའོ། །ཞལ་དང་པོ་སེར་པོ། གཡས་དཀར་པོ། རྒྱབ་ཀྱི་ཞལ་སྔོན་པོ། གཡོན་དམར་པོའོ། །ཕྱག་གཡས་པ་རྣམས་ཀྱིས་རལ་གྲི་དང་། འཁོར་ལོ་དང་། རྩེ་གསུམ་པ་དང་། མདའ་བསྣམས་པ། ཕྱག་གཡོན་པ་རྣམས་ཀྱིས་དགྲ་སྟ་དང་། གཞུ་དང་། ཞགས་པ་དང་། རྡོ་རྗེ་བསྣམས་
[216a.6]པའོ། །སྣ་ཚོགས་པདྨ་དང་། ཟླ་བའི་གདན་ལ་རོལ་པའི་སྟབས་ཀྱིས་ཡང་དག་པར་བཞུགས་པ་འོད་ཀྱི་དཀྱིལ་འཁོར་དམར་པོ་ཅན། རྒྱན་ཐམས་ཅད་ཀྱིས་བརྒྱན་པ། སྣ་ཚོགས་པའི་ན་བཟའ་བསྣམས་པ། དར་གྱི་སྟོད་གཡོགས་ཅན། དེ་བཞིན་དུ་རིན་པོ་ཆེ་སྣ་ཚོགས་པའི་དབུ་རྒྱན་ཅན་དུ་བསམ་པར་བྱའོ། །
[216a.7]དེ་ནས་སྐུ་གསུང་ཐུགས་རྣམས་སུ་ཟླ་བ་ལ་གནས་པའི་ཨོཾ་ཨཱཿཧཱུཾ་དཀར་པོ་དང་དམར་པོ་དང་། སྔོན་པོའི་ཡི་གེ་གསུམ་བསམ་པར་བྱའོ། །དེ་ནས་ནུ་མའི་བར་དུ་ཟླ་བ་ལ་གནས་པའི་པྲཾ་ཡིག་རྣམ་པར་བསམས་ལ་བདག་ཉིད་ལ་ལྷ་མོ་རྣམས་ཀྱིས་རྣམ་པ་སྣ་ཚོགས་པའི་མཆོད་པ་བྱེད་པར་བལྟ་ཞིང་ཇི་སྲིད་མི་ངལ་བར་དེ་སྲིད་དུ་བསྒོམ་
[216b]
[216b.1]པར་བྱའོ། །ངལ་བར་གྱུར་ན་རང་གི་སྙིང་གར་ཟླ་བ་ལ་སྔགས་རྣམས་མུ་ཏིག་གི་དོ་ཤལ་བཞིན་དུ་བལྟས་ལ་བཟླས་པར་བྱའོ། །ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སོ་སོ་འབྲང་བ་ཆེན་མོའི་སྒྲུབ་ཐབས་རྫོགས་སོ།། {T3584}༄༅༅། །རྒྱ་གར་སྐད་དུ། མ་ཧཱ་པྲ་ཏི་སཱ་ར་སཱ་དྷ་ནཾ། བོད་སྐད་དུ། སོ་སོ་
[216b.2]འབྲང་བ་ཆེན་མོའི་སྒྲུབ་ཐབས། འཕགས་མ་སོ་སོ་འབྲང་བ་ཆེན་མོ་ལ་ཕྱག་འཚལ་ལོ། །དང་པོར་རྣལ་འབྱོར་པས། སེམས་མཉམ་པར་གཞག་པར་གྱུར་པས་སྙིང་གར་པཾ་ཡིག་ཡོངས་སུ་གྱུར་པ་ལས་སྣ་ཚོགས་པདྨ། དེའི་སྟེང་དུ་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དེ་ལ་པྲཾ་ཡིག་སེར་
[216b.3]པོ་རྣམ་པར་བཀོད་པ་ལ་དེ་ལས་བྱུང་བའི་འོད་ཟེར་གྱིས་བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་ཡང་དག་པར་བསྐུལ་ཞིང་གདན་དྲངས་ནས་མདུན་དུ་སྟན་སྣ་ཚོགས་པ་ལ་ཉེ་བར་བཞུགས་ཏེ། ཕྱག་འཚལ་བ་དང་། མཆོད་པ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་
[216b.4]རང་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། བསོད་ནམས་ཡོངས་སུ་བསྔོ་བ་དང་། བཟོད་པར་གསོལ་བ་རྣམས་བྱའོ། །དེ་ནས་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་རྣམས་བསྒོམ་པར་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་
[216b.5]བརྗོད་ནས་སྟོང་པ་ཉིད་དུ་རྣམ་པར་བསྒོམ་མོ། །དེ་ནས་སྐད་ཅིག་གིས་རང་གི་སེམས་ཟླ་བ་ལ་གནས་པའི་པྲཾ་ཡིག་སེར་པོ་རྣམ་པར་བསྒོམས་ལ། དེ་ཡོངས་སུ་གྱུར་པ་ལས་སོ་སོ་འབྲང་མ་སྐུ་མདོག་ཤིན་ཏུ་སེར་བ་རིན་པོ་ཆེའི་ཅོད་པན་ཅན། སེར་པོ་དང་། དཀར་པོ་དང་། སྔོན་པོ་དང་། དམར་པོའི་ཞལ་བཞི་དང་ལྡན་
[216b.6]པ། སྤྱན་གསུམ་པ། ཕྱག་བརྒྱད་པ། ཕྱག་གཡས་པ་རྣམས་ཀྱིས་རལ་གྲི་དང་། འཁོར་ལོ་དང་། རྩེ་གསུམ་པ་དང་། མདའ་བསྣམས་པ། ཕྱག་གཡོན་པ་རྣམས་ཀྱིས་ཞགས་པ་དང་། དགྲ་སྟ་དང་། གཞུ་དང་། རྡོ་རྗེ་རྣམས་བསྣམས་པའོ། །པདྨ་དང་ཟླ་བའི་གདན་ལ་རོལ་པའི་སྟབས་ཀྱིས་བཞུགས་པ། རིན་པོ་
[216b.7]ཆེའི་རྒྱན་སྣ་ཚོགས་པས་བརྒྱན་པ་རྣམ་པར་བསྒོམ་མོ། །དེའི་སྤྱི་བོ་དང་། མགྲིན་པ་དང་། སྙིང་ག་དང་། ཉེ་བའི་སྙིང་ག་རྣམས་སུ་ཟླ་བ་ལ་གནས་པའི་དཀར་པོ་དང་། དམར་པོ་དང་སེར་པོ་དང་ནག་པོ་རྣམས་ཏེ། ཨོཾ་ཨཱཿཔྲཾ་ཧཱུཾ་ཞེས་པའི་ཡི་གེ་རྣམས་རྣམ་པར་བཀོད་ལ་སྔགས་འདི་བརྗོད་ནས་བདག་ཉིད་ལྷ་
[217a]
[217a.1]མོའི་སྐུར་བྱིན་གྱིས་བརླབ་པར་བྱའོ། །དེ་ནས་རང་གི་སྙིང་གའི་འོད་ཟེར་རྣམས་ཀྱིས་མི་བསྐྱོད་པ་ལ་སོགས་པ་རྣམས་ཡང་དག་པར་བསྐུལ་ནས་གདན་དྲངས་ཏེ་དབང་བསྐུར་བ་བླངས་ནས་ཅོད་པན་གྱི་བདག་པོ་མི་བསྐྱོད་པར་བསམ་པར་བྱའོ། །དེ་ནས་རང་གི་སྙིང་ག་ལས་མཆོད་པའི་
[217a.2]ལྷ་མོ་རྣམས་ཡང་དག་པར་སྤྲོས་ནས་མཆོད་པ་དང་བསྟོད་པ་རྣམས་བྱས་ནས་ཡི་གེ་བརྒྱ་པའི་སྔགས་བཟླས་པར་བྱའོ། །ཇི་སྲིད་དུ་ངལ་བར་མ་གྱུར་པ་དེ་སྲིད་དུ་བསྒོམ་པར་བྱའོ། །སེམས་ངལ་བར་གྱུར་ན་སྔགས་བཟླས་པར་བྱའོ། །ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་སོ། །ཧཱུཾ་ཧཱུཾ་
[217a.3]ཕཊ་ཕཊ་ཅེས་པའི་སྔགས་བྲལ་བར་ཡང་ངོ་། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷིཾ་མེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿབྷ་ག་ཝཱ་ན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་
[217a.4]བྷ་ཝ་མ་ཧཱ་ས་མ་ཡ་སཏྭ་ཨཱཿ། ཡི་གེ་བརྒྱ་པའོ། །ལངས་པའི་དུས་སུ་དམ་ཚིག་ལ་མཆོད་པ་ལ་སོགས་པ་བྱས་ནས་བཟོད་པར་གསོལ་བར་བྱའོ། །སོ་སོ་འབྲང་མ་ཆེན་མོའི་སྒྲུབ་ཐབས་རྫོགས་སོ།། {T3585}༄༅༅། །རྒྱ་གར་སྐད་དུ། པྲ་ཏི་སཱ་རེ་སཱ་དྷ་ནཾ། བོད་སྐད་དུ། སོ་སོ་འབྲང་མའི་སྒྲུབ་ཐབས། འཕགས་
[217a.5]མ་སོ་སོ་འབྲང་མ་ལ་ཕྱག་འཚལ་ལོ། །སྐྱེ་བོ་ཐམས་ཅད་ལ་ཡང་བྱམས་པ་སྟེ་སྐྱེ་བ་དང་རྒ་བ་དང་ན་བ་དང་འཆི་བའི་ཟུག་རྔུས་མནར་ཞིང་མྱོས་པ་རྣམས་ལ་སྙིང་རྗེ་དང་དགའ་བ་དང་བཏང་སྙོམས་ཀྱི་བློར་བྱས་ནས་མན་ངག་འདི་ལས་སྒྱུ་མ་དང་རྨི་ལམ་དང་མཚུངས་པས་ཤིན་ཏུ་མཆོག་ཏུ་མ་ལུས་པ་རྣམས་སྟོང་པ་ཉིད་
[217a.6]དུ་རྣམ་པར་བལྟས་ནས་འགྲོ་བ་རྣམས་ཀྱི་རྣམ་པར་ཤེས་པ་དང་ལུས་གཅིག་ཏུ་སྔགས་པས་མདུན་དུ་རྣམ་པར་བསྒོམས་ཏེ། དེ་ནས་དེ་རྣམས་ཀྱི་ཡང་ཨ་ཡིག་དཀར་པོ་ལ་རི་བོང་འཛིན་པའི་གཟུགས་སུ་གྱུར་ནས། སེར་པོའི་རྣམ་པའི་པྲཾ་ཡིག་ཏུ་བྱས་ཏེ། རང་གི་ས་བོན་གྱི་འོད་ཟེར་གྱིས་ཕྱོགས་སོ་སོ་ནས་
[217a.7]ཁམས་གསུམ་ཡང་སྣང་བར་མཛད་པར་བསམས་ནས་སྣ་ཚོགས་ཆུ་སྐྱེས་ཀྱི་ཟེའུ་འབྲུ་ལ་རྣམ་པར་དངས་པའི་ཟླ་བའི་གདན་ལ་བཞུགས་པ། ཀུན་ནས་སེར་ཞིང་སེར་བ་དང་། ཀུན་ནས་དཀར་ཞིང་དཀར་བ་དང་། དམར་བའི་ཞལ་གསུམ་ལ་སྤྱན་གསུམ་གསུམ་གྱིས་སྤྲས་པ། རིན་པོ་ཆེའི་རང་བཞིན་གྱི་ཅོད་
[217b]
[217b.1]པན་ཅན། ན་བཟའ་སྣ་ཚོགས་པ་མནབས་པ། འོད་ཀྱི་དཀྱིལ་འཁོར་དམར་པོ་ཅན་ཞབས་རོལ་པའི་སྟབས་ཀྱིས་བཞུགས་པ། དཀར་འཛིན་ཟུང་ལྡན་པ་ལ་གོས་ཀྱིས་སྟོད་གཡོགས་སུ་བྱས་པ། རལ་གྲི་དང་། འཁོར་ལོ་དང་། མདའ་དང་། རྩེ་གསུམ་པ་དང་། དགྲ་སྟ་དང་། དཔལ་གྱི་ཞགས་པ་དང་།
[217b.2]རྡོ་རྗེ་དང་། གཞུ་རྣམས་ཕྱག་གི་འདབ་མ་རྣམས་ཀྱིས་བསྣམས་པའི་སོ་སོ་འབྲང་མར་སྒྲུབ་པོ་རང་ཉིད་དུ་གྱུར་ནས་ཨོཾ་ཨཱཿཧཱུཾ་ཞེས་པའི་ཡི་གེ་རྣམས་གསལ་ཞིང་བློ་དང་ལྡན་པ་ལུས་ཀྱི་རི་བོང་དང་རང་གི་མཐར་བལྟས་ཏེ་ཟླ་བ་ལ་སོན་པ་དཀར་པོ་དང་། སེར་པོ་དང་། སྔོན་པོའི་བདག་ཉིད་རྣམས་སོ། །
[217b.3]ཟླ་བ་ལ་མཛེས་པའི་ནུ་མ་ཟུང་གི་དབུས་སུ་གཅིག་ཏུ་གྱུར་པའི་པྲཾ་ཡིག་ལས་སྐྱེས་པའི་འོད་ཟེར་རྫོགས་པས་རང་གི་ལུས་ཡོངས་སུ་གང་བར་བསམས་ནས་རང་གི་ལྷ་མོའི་ཚོགས་དེ་བཞིན་དུ་ཡང་སྤྲོ་བ་དང་བསྡུ་བའི་ཚོགས་ཡང་དག་པར་བསྐྱེད་ནས། གང་གི་ཚེ་ངལ་ན་དེའི་ཚེ་མུ་ཏིག་གི་ཕྲེང་བ་བཞིན་དུ་
[217b.4]བརྟན་ཞིང་འོད་ཟེར་ཤིན་ཏུ་རྒྱ་ཆེན་པོ་རབ་ཏུ་འབར་བས་རང་གི་སྙིང་གར་ཟླ་བའི་སྟེང་དུ་མཚུངས་པ་མེད་པར་བསམས་ནས་བཟླས་པར་བྱའོ། །འདི་བཞིན་དུ་རྟག་ཏུ་གུས་པ་དང་བཅས་ཤིང་འཇམ་པ་དུས་མང་པོ་དང་བཅས་པ་མ་ཡིན་པར་བསམ་པ་རྣམ་པར་དག་པས་སོ། །དེ་ལ་སྔགས་ཀྱི་རྒྱལ་པོ་འདིའོ། །
[217b.5]ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སོ་སོ་འབྲང་མའི་སྒྲུབ་ཐབས་རྫོགས་སོ།། {T3586}༄༅༅། །རྒྱ་གར་སྐད་དུ། ཨཱརྱ་མ་ཧཱ་མཱ་ཡུ་རཱི་སཱ་དྷ་ནཾ། བོད་སྐད་དུ། འཕགས་མ་རྨ་བྱ་ཆེན་མོའི་སྒྲུབ་ཐབས། འཕགས་མ་རྨ་བྱ་ཆེན་མོ་ལ་ཕྱག་འཚལ་ལོ། །སྔོན་
[217b.6]དུ་གསུངས་པའི་ཆོ་ག་འདིས་སྣ་ཚོགས་པདྨ་དང་ཟླ་བ་ལ་མཾ་ཡིག་ལྗང་གུ་ལས་སྐྱེས་པའི་རྨ་བྱ་ཆེན་མོ་སྐུ་མདོག་ལྗང་གུ་ཞལ་གསུམ་པ། ཕྱག་དྲུག་པ། ཞལ་སོ་སོ་ལ་སྤྱན་གསུམ་པ། ནག་པོ་དང་། དཀར་པོ་དག་ནི་གཡས་དང་། གཡོན་གྱི་ཞལ་ལོ། །ཕྱག་གཡས་པ་གསུམ་
[217b.7]གྱིས་གོ་རིམས་ཇི་ལྟ་བ་བཞིན་དུ་རྨ་བྱའི་མཇུག་སྒྲོ་དང་། མདའ་དང་། མཆོག་སྦྱིན་གྱི་ཕྱག་རྒྱའོ། །དེ་བཞིན་དུ་ཕྱག་གཡོན་པ་གསུམ་ན་རིན་པོ་ཆེའི་ཆུན་པོ་དང་། གཞུ་དང་པང་ན་གནས་པའི་བུམ་པའོ། །རྒྱན་སྣ་ཚོགས་ཀྱིས་བརྒྱན་པ། ལང་ཚོ་གཞོན་ཞིང་སྒེག་པའི་ཉམས་དང་
[218a]
[218a.1]ལྡན་པ། ཟླ་བའི་གདན་ལ་ཟླ་བའི་འོད་ཟེར་དང་ལྡན་ཞིང་སྐྱིལ་ཀྲུང་ཕྱེད་པས་བཞུགས་པ་དོན་ཡོད་གྲུབ་པའི་དབུ་རྒྱན་ཅན་དུ་བདག་ཉིད་བསྒོམ་པར་བྱའོ། །དེ་ནས་དེའི་སྤྱི་བོ་དང་། མགྲིན་པ་དང་། སྙིང་ག་དང་ལྟེ་བ་ལ་གནས་པའི་ཟླ་བ་རྣམས་ལ་གོ་རིམས་བཞིན་དུ་
[218a.2]ཨོཾ་ཨཱཿམཱཾ་ཧཱུཾ་ཞེས་པའི་ཡི་གེ་བཞི་པོ་རྣམ་པར་བསྒོམས་ནས་སྤྲོ་བ་དང་བསྡུ་བ་བྱས་ཏེ། དེ་ནས་སྔགས་བཟླས་པར་བྱའོ། །ཨོཾ་མ་ཧཱ་མཱ་ཡུ་རཱི་བིདྱ་རཱ་ཛྙཱི་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རྨ་བྱ་ཆེན་མོའི་སྒྲུབ་ཐབས་རྫོགས་སོ།། {T3587}༄༅༅། །རྒྱ་གར་སྐད་དུ། ཨཱརྱ་མ་ཧཱ་ས་ཧ་སྲ་པྲ་མ་རྡ་ནཱི་སཱ་དྷ་ནཾ། བོད་སྐད་དུ།
[218a.3]འཕགས་མ་སྟོང་ཆེན་མོ་རབ་ཏུ་འཇོམས་མའི་སྒྲུབ་ཐབས། འཕགས་མ་སྟོང་ཆེན་མོ་རབ་ཏུ་འཇོམས་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྣ་ཚོགས་པདྨ་དང་ཟླ་བ་ལ་བྷཱུཾ་ཡིག་ལས་བྱུང་བའི་སྟོང་ཆེན་མོ་རབ་ཏུ་འཇོམས་པར་བདག་ཉིད་བསྒོམ་པར་བྱ་སྟེ། སྐུ་མདོག་དཀར་མོ་ཞལ་གཅིག་
[218a.4]པ། ཕྱག་དྲུག་པ། གཡས་ཀྱི་ཕྱག་གསུམ་ན་རལ་གྲི་དང་། མདའ་དང་། མཆོག་སྦྱིན་གྱི་ཕྱག་རྒྱ་སྟེ། གཡོན་གྱི་ཕྱག་གསུམ་ན་གཞུ་དང་ཞགས་པ་དང་། དགྲ་སྟའོ། །རྒྱན་སྣ་ཚོགས་པས་བརྒྱན་པ་ལང་ཚོ་གཞོན་ཞིང་སྒེག་པའི་སྐུ་ཉམས་དང་ལྡན་པ། རྣམ་པར་སྣང་མཛད་ཀྱི་དབུ་རྒྱན་ཅན་པདྨ་དང་ཟླ་བའི་
[218a.5]གདན་ལ་བཞུགས་ཤིང་འོད་དང་ལྡན་པའོ། །འཕགས་མ་སྟོང་ཆེན་མོ་རབ་ཏུ་འཇོམས་མའི་སྒྲུབ་ཐབས་རྫོགས་སོ།། {T3588}༄༅༅། །རྒྱ་གར་སྐད་དུ། ཨཱརྱ་མ་ཧཱ་མནྟྲ་ཨ་ནུ་དྷཱ་རི་ཎཱི་སཱ་དྷ་ནཾ། བོད་སྐད་དུ། འཕགས་པ་གསང་སྔགས་ཆེན་མོ་རྗེས་སུ་འཛིན་མའི་སྒྲུབ་ཐབས།
[218a.6]འཕགས་མ་གསང་སྔགས་རྗེས་སུ་འཛིན་མ་ལ་ཕྱག་འཚལ་ལོ། །གསང་སྔགས་ཆེན་མོ་རྗེས་སུ་འཛིན་མ་ཞལ་གཅིག་པ། ཕྱག་བཞི་པ། སྐུ་མདོག་ནག་མོ། ཕྱག་གཡས་པ་གཉིས་ན་རྡོ་རྗེ་དང་། མཆོག་སྦྱིན་གྱི་ཕྱག་རྒྱ་དང་། ཕྱག་གཡོན་པ་གཉིས་ན་དགྲ་སྟ་དང་། ཞགས་པ་བསྣམས་པ།
[218a.7]ཧཱུཾ་གི་ས་བོན་ཅན་མི་བསྐྱོད་པས་དབུ་བརྒྱན་པ། ཉི་མའི་གདན་ལ་འོད་ཟེར་དང་ལྡན་པའོ་ཞེས་སོ། །འཕགས་མ་གསང་སྔགས་ཆེན་མོ་རྗེས་སུ་འཛིན་མའི་སྒྲུབ་ཐབས་རྫོགས་སོ།། {T3589}༄༅༅། །རྒྱ་གར་སྐད་དུ། མ་ཧཱ་ཤཱི་ཏ་ཝ་ཏཱི་སཱ་དྷ་ནཾ། བོད་སྐད་དུ། བསིལ་བའི་ཚལ་ཆེན་མོའི་སྒྲུབ་ཐབས། འཕགས་མ་
[218b]
[218b.1]བསིལ་བའི་ཚལ་ཆེན་མོ་ལ་ཕྱག་འཚལ་ལོ། །བསིལ་བའི་ཚལ་ཆེན་མོ་ཞལ་གཅིག་པ། ཕྱག་བཞི་པ། སྐུ་མདོག་དམར་མོ་ཕྱག་གཡས་པ་གཉིས་ཀྱིས་བགྲང་ཕྲེང་དང་། མཆོག་སྦྱིན་གྱི་ཕྱག་རྒྱ། གཡོན་པ་གཉིས་ཀྱིས་རྡོ་རྗེའི་ལྕགས་ཀྱུ་དང་། ཐུགས་ཀར་པོ་ཏི་བསྣམས་པ། ཛཾ་ཡིག་གི་ས་བོན་ལས་
[218b.2]འཁྲུངས་ཤིང་འོད་དཔག་ཏུ་མེད་པས་དབུ་བརྒྱན་པ། སྐྱིལ་ཀྲུང་ཕྱེད་པས་བཞུགས་ཤིང་སྣ་ཚོགས་པའི་རྒྱན་གྱིས་བརྒྱན་པ། ཉི་མའི་གདན་ལ་འོད་ཟེར་དང་ལྡན་པའོ། །འཕགས་མ་བསིལ་བའི་ཚལ་ཞེས་བྱ་བའི་སྒྲུབ་ཐབས་རྫོགས་སོ། {T3590}༄༅༅། །རྒྱ་གར་སྐད་དུ། པཉྩ་དེ་ཝ་ཏཱི་སཱ་དྷ་ནཾ་ཨུཏྡེ་ཤ།།
[218b.3]བོད་སྐད་དུ། ལྷ་མོ་ལྔའི་སྒྲུབ་ཐབས་མདོར་བསྟན་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་ཁྲུས་བྱས་པའི་མཐར་ལྷ་མོ་ལྔ་མདོར་བསྟན་པ་ནི། དེ་ལ་སོ་སོ་འབྲང་བ་ཆེན་མོ་ནི་སྐུ་མདོག་སེར་མོ་ཞལ་གསུམ་པ། ཞལ་སོ་སོ་ལ་སྤྱན་གསུམ་གསུམ་པ། ཕྱག་
[218b.4]བཅུ་པའོ། །ནག་པོ་དང་། དཀར་པོ་དག་ནི་གཡས་དང་། ཅིག་ཤོས་ཀྱི་ཞལ་ལོ། །གཡས་ཀྱི་ཕྱག་ལྔ་རྣམས་ནི་གོ་རིམས་བཞིན་དུ་རལ་གྲི་དང་། རྡོ་རྗེ་དང་། མདའ་དང་། མཆོག་སྦྱིན་དང་། ཕྱག་ཐུགས་ཀར་གནས་པ་ལ་གདུགས་རྣམས་སོ། །དེ་བཞིན་དུ་གཡོན་གྱི་ཕྱག་ལྔ་རྣམས་ན་གཞུ་དང་། རྒྱལ་
[218b.5]མཚན་དང་། རིན་པོ་ཆེའི་ཆུན་པོ་དང་། དགྲ་སྟ་དང་། དུང་རྣམས་སོ། །རིན་ཆེན་འབྱུང་ལྡན་ཀྱི་དབུ་རྒྱན་ཅན། ཤ་འགག་ནག་པོ་ཅན། སྟོད་གཡོགས་དམར་པོས་བརྒྱན་པ། སྐྱིལ་ཀྲུང་ཕྱེད་པས་འགྱིང་ཞིང་བཞུགས་པ། ལྷའི་རྒྱན་དང་། གོས་ཐམས་ཅད་ཀྱིས་བརྒྱན་པའོ། །རྨ་བྱ་ཆེན་མོ་ནི་སྐུ་མདོག་ལྗང་
[218b.6]གུ་ཞལ་གཅིག་པ། ཕྱག་གཉིས་པ། མཛེས་ཤིང་རྨ་བྱའི་མདོངས་དང་ལྡན་པ་མཆོག་སྦྱིན་གྱི་ཕྱག་རྒྱ་ཕྱག་གཡས་པ་དང་གཡོན་པ་དག་གིས་སོ་ཞེས་སོ། །སྟོང་ཆེན་མོ་རབ་ཏུ་འཇོམས་མ་ནི་སྔོན་མ་ཇི་ལྟ་བ་དེ་བཞིན་ནོ། །གསང་སྔགས་ཆེན་མོ་རྗེས་སུ་འཛིན་མ་ནི་ཞལ་གཅིག་པ། ཕྱག་བཞི་པ། སྐུ་
[218b.7]མདོག་ནག་མོ་ཕྱག་གཡས་པ་དག་གིས་རལ་གྲི་དང་། མཆོག་སྦྱིན་གྱི་ཕྱག་རྒྱའོ། །ཕྱག་གཡོན་པ་དག་གིས་དགྲ་སྟ་དང་། ཞགས་པ་བསྣམས་པའོ་ཞེས་སོ། །བསིལ་བའི་ཚལ་ཆེན་མོ་ནི་སྐུ་མདོག་དམར་མོ་ཞལ་གཅིག་པ་ཕྱག་བཞི་པ་ཕྱག་གཡས་པ་དག་གིས་རལ་གྲི་དང་། མཆོག་སྦྱིན།
[219a]
[219a.1]གཡོན་པ་དག་གིས་དགྲ་སྟ་དང་ཞགས་པའོ་ཞེས་སོ། །ཡི་གེ་གསུམ་གྱིས་མཚན་ཅིང་རང་གི་ས་བོན་གྱི་དབུས་སུ་རང་གི་མིང་དང་བཅས་པ་ནི་འདི་རྣམས་ཀྱི་སྔགས་སོ། །ལྷ་མོ་ལྔའི་སྒྲུབ་ཐབས་མདོར་བསྟན་པ་རྫོགས་སོ།། {T3591}༄༅༅། །རྒྱ་གར་སྐད་དུ། མ་ཧཱ་པྲ་ཏྱཾ་གཱི་ར་སཱ་དྷ་ནཾ།
[219a.2]བོད་སྐད་དུ། ཕྱིར་བཟློག་པ་ཆེན་མོའི་སྒྲུབ་ཐབས། འཕགས་མ་ཕྱིར་བཟློག་པ་ཆེན་མོ་ལ་ཕྱག་འཚལ་ལོ། །ཕྱིར་བཟློག་པ་ཆེན་མོ་སྐུ་མདོག་ནག་མོ་ཞལ་གཅིག་པ། ཕྱག་དྲུག་པ། རལ་གྲི་དང་། ལྕགས་ཀྱུ་དང་། མཆོག་སྦྱིན་རྣམས་ཕྱག་གཡས་པ་རྣམས་ནའོ། །པདྨ་དམར་པོ་དང་། རྩེ་གསུམ་
[219a.3]དང་། ཞགས་པ་དང་བཅས་པའི་སྡིགས་མཛུབ་ཐུགས་ཀར་གནས་པ་ནི་ཕྱག་གཡོན་པ་རྣམས་ནའོ། །ས་བོན་ནི་ཧཱུཾ་ཡིག་གོ། །མི་བསྐྱོད་པས་དབུ་བརྒྱན་པ། ལང་ཚོ་གཞོན་ཞིང་རྒྱན་ཐམས་ཅད་ཀྱིས་བརྒྱན་པའོ། །ཕྱིར་བཟློག་པ་ཆེན་མོའི་སྒྲུབ་ཐབས་རྫོགས་སོ།། {T3592}༄༅༅། །རྒྱ་གར་སྐད་
[219a.4]དུ། དྷྭ་ཛཱ་གྲ་ཀེ་ཡཱུ་རཱ་སཱ་དྷ་ནཾ། བོད་སྐད་དུ། རྒྱལ་མཚན་རྩེ་མོའི་དཔུང་རྒྱན་གྱི་སྒྲུབ་ཐབས། རྒྱལ་མཚན་རྩེ་མོའི་དཔུང་རྒྱན་ལ་ཕྱག་འཚལ་ལོ། །རྒྱལ་མཚན་རྩེ་མོའི་དཔུང་རྒྱན་སྐུ་མདོག་ནག་མོ། ཞལ་གསུམ་པ། ཕྱག་བཞི་པ། དམར་པོ་དང་ལྗང་གུ་ནི་གཡས་དང་གཡོན་གྱི་ཞལ་ལོ། །ཕྱག་གཡས་
[219a.5]པ་གཉིས་ན་རལ་གྲི་དང་། ཞགས་པའོ། །རྡོ་རྗེས་མཚན་པའི་ཁ་ཊཱཾ་ག་དང་། འཁོར་ལོ་དག་ཕྱག་གཡོན་པ་དག་ན་བསྣམས་པའོ། །དབུ་སྐྲ་ཁམ་པ་གྱེན་དུ་བརྫེས་པ། ཐོད་པ་སྐམ་པོ་ལྔས་དབུ་བརྒྱན་པ། སྟག་གི་པགས་པའི་ཤམ་ཐབས་ཅན། ཞལ་མཆེ་བ་གཙིགས་ཤིང་ལྟོ་འཕྱང་བ། ཉི་མའི་
[219a.6]གདན་ལ་ཞབས་གཡོན་བརྐྱང་གིས་བཞུགས་པ། འོད་ཟེར་དང་ལྡན་པའོ། །གོས་སེར་པོའི་ཤ་འགག་ཅན། ས་བོན་ནི་ཧཱུཾ་ཡིག་གོ། །མི་བསྐྱོད་པས་དབུ་བརྒྱན་པ་ཅན་ནོ། །རྒྱལ་མཚན་རྩེ་མོའི་དཔུང་རྒྱན་གྱི་སྒྲུབ་ཐབས་རྫོགས་སོ།། {T3593}༄༅༅། །རྒྱ་གར་སྐད་དུ། ཨ་པ་རཱ་ཛི་ཏཱ་སཱ་དྷ་ནཾ།
[219a.7]བོད་སྐད་དུ། གཞན་གྱིས་མི་ཐུབ་མའི་སྒྲུབ་ཐབས། འཕགས་མ་གཞན་གྱིས་མི་ཐུབ་མ་ལ་ཕྱག་འཚལ་ལོ། །གཞན་གྱིས་མི་ཐུབ་མ་སྐུ་མདོག་སེར་མོ་ཞལ་གཅིག་པ་ཕྱག་གཉིས་པ། རིན་པོ་ཆེ་སྣ་ཚོགས་པའི་རྒྱན་གྱིས་ཉེ་བར་མཛེས་པ། ཚོགས་བདག་ཡང་དག་པར་གནོན་པ། ཕྱག་གཡས་པ་ཐལ་ལྕག་བརྡེག་
[219b]
[219b.1]པའི་ཚུལ་དུ་བྱས་པ། ཕྱག་གཡོན་པ་ཞགས་པ་དང་བཅས་པའི་སྡིགས་མཛུབ་ཐུགས་ཀར་གནས་པ། ཞལ་མཆེ་བ་གཙིགས་ཤིང་ཤིན་ཏུ་འཇིགས་པར་བྱེད་པ་མ་ལུས་པའི་བདུད་འཇོམས་པ། ཚངས་པ་ལ་སོགས་པའི་གདུག་པ་ཅན་གྱི་དྲག་པོའི་ལྷ་རྣམས་ཀྱིས་བསྐོར་ཞིང་གདུགས་བསྒྲེང་བའོ་ཞེས་སོ། །གཞན་
[219b.2]གྱིས་མི་ཐུབ་མའི་སྒྲུབ་ཐབས་རྫོགས་སོ།། {T3594}༄༅༅། །རྒྱ་གར་སྐད་དུ། བཛྲ་གནྡྷ་རཱི་སཱ་དྷ་ནཾ། བོད་སྐད་དུ། རྡོ་རྗེ་གནྡྷ་རིའི་སྒྲུབ་ཐབས། འཕགས་མ་རྡོ་རྗེ་གཱནྡྷཱ་རཱི་ལ་ཕྱག་འཚལ་ལོ། །རྡོ་རྗེ་གནྡྷ་རཱི་ནག་མོ་ཞལ་དྲུག་པ། ཕྱག་བཅུ་གཉིས་པ། དབུ་སྐྲ་ཁམ་པ་གྱེན་དུ་བརྫེས་ཤིང་ཞབས་གཡོན་བརྐྱང་པའོ། །ཞལ་མཆེ་བ་
[219b.3]གཙིགས་པ། ཞལ་སོ་སོ་ལ་སྤྱན་གསུམ་གསུམ་པ། ཕྱག་གཡས་པ་དྲུག་ན་གོ་རིམས་བཞིན་དུ་རྡོ་རྗེ་དང་། དྲིལ་བུ་དང་། རལ་གྲི་དང་། ཏྲི་ཤཱུལ་དང་། མདའ་དང་འཁོར་ལོ་རྣམས་བསྣམས་པ། ཕྱག་གཡོན་པ་དྲུག་ན་ཁ་ཊྭཱཾ་ག་དང་། ལྕགས་ཀྱུ་དང་། གཞུ་དང་། དགྲ་སྟ་དང་། ཞགས་པ་དང་། སྙིང་གར་སྡིགས་མཛུབ་འཕྱར་
[219b.4]བའོ། །ཞལ་དང་པོ་ནི་ནག་པོའོ། །ཞལ་གཞན་རྣམས་ནི་ཁ་དོག་ལྔ་སྟེ། དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། སྔོན་པོའོ། །སྣ་ཚོགས་པདྨ་དང་ཉི་མའི་གདན་ལ་བཞུགས་པའོ། །བཟླ་བའི་སྔགས་ནི། ཨོཾ་ཧཱུཾ་ཧཱུཾ་ཧཱུཾ་སྭཱ་ཧཱ། ཞེས་སོ། །རྡོ་རྗེ་གནྡྷ་རཱིའི་སྒྲུབ་ཐབས་རྫོགས་སོ།། {T3595}༄༅༅། །རྒྱ་གར་སྐད་དུ། བཛྲ་གནྡྷ་རཱི་སཱ་དྷ་ནཾ།
[219b.5]བོད་སྐད་དུ། རྡོ་རྗེ་གནྡྷ་རཱིའི་སྒྲུབ་ཐབས། རྡོ་རྗེ་གནྡྷ་རཱི་ལ་ཕྱག་འཚལ་ལོ། །རྡོ་རྗེ་གཱནྡྷ་རཱི་ནག་མོ་ཞལ་དྲུག་པ། ཕྱག་བཅུ་གཉིས་པ། དབུ་སྐྲ་ཁམ་པ་གྱེན་དུ་བརྫེས་ཤིང་ཞབས་གཡོན་བརྐྱང་བ། ཞལ་མཆེ་བ་གཙིགས་པ། ཞལ་སོ་སོ་ལ་སྤྱན་གསུམ་གསུམ་པ། གཡས་ཀྱི་ཕྱག་དྲུག་རྣམས་སུ་གོ་རིམས་བཞིན་དུ་རྡོ་རྗེ་
[219b.6]དང་། རྡོ་རྗེ་དྲིལ་བུ་དང་། རལ་གྲི་དང་། རྩེ་གསུམ་དང་། མདའ་དང་། འཁོར་ལོ་རྣམས་སོ། །གཡོན་གྱི་ཕྱག་དྲུག་རྣམས་སུ་ཁ་ཊྭཱཾ་ག་དང་། ལྕགས་ཀྱུ་དང་གཞུ་དང་། དགྲ་སྟ་དང་། ཞགས་པ་དང་། སྙིང་གར་སྡིགས་མཛུབ་འཕྱར་བའོ། །ཞལ་དང་པོ་ནི་ནག་པོའོ། །ཞལ་གཞན་ལྔ་ནི་ཁ་དོག་ལྔ་སྟེ། དཀར་པོ་དང་། སེར་པོ་དང་།
[219b.7]དམར་པོ་དང་། ལྗང་གུ་དང་། སྔོན་པོའོ། །སྣ་ཚོགས་པདྨ་དང་ཉི་མའི་གདན་ལ་བཞུགས་པའོ། །འདི་ལ་ཡང་གཟུངས་འདིའོ། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བྷ་ག་ཝ་ཏི་མ་ཧཱ་བཛྲ་གནྡྷ་རཱི་ཨ་ནེ་ཀ་ཤ་ཏ་སཱ་ཧ་སྲ་པྲ་ཛྭ་ལི་ཏ་དི་པྟེ་ཛྲ་ལི་ཏ་དཱི་པྟེ་ཛཱ་ཡཻ་ཨུ་གྲ་བྷཱི་མ་བྷ་ཡཱ་ན་ཀཱ་ཡཻ་
[220a]
[220a.1]ཡོ་གཱི་ནཱི་ཡཻ་བྷི་ཥ་མ་བྷ་གི་ནཱི་ཡཻ་དྭ་ད་ཤ་བྷུ་ཛ་ཡཻ་བི་ཀཱི་རྞ་ཀེ་ཤཱི་ཡེ་ཨ་ནེེ་ཀ་རཱུ་པ་བི་བི་དྷ་བེ་ཤ་དྷ་ར་ཎཱི་ཡཻ་ཨེ་ཧྱེ་དྦྷག་ཝ་ཏཱི་མ་ཧཱ་བཛྲ་གནྡྷ་རཱི་ཏྲ་ཡ་ནཱཾ་རཏྣ་ནཱཾ་ས་ཏྱེ་ན་ཨཱ་ཀདྷྱ་ཨ་ཀདྡྷྱ་བ་ལ་དེ་ཝཱ་དེ་ཀཾ་ཡེ་ཙཱ་ནྱེ་ས་མ་ཡེ་ན་ཏིཥྛ་ན་ཏི་ཏཱ་ནཱ་བརྟ་ཡི་ཥྱཱ་མི། ཤཱི་གྷྲཾ་གྲྀཧྞ་གྲྀཧྞ་ཨོཾ་ཨ་ལི་ཨ་ལི་ཧུ་ལུ་ཧུ་ལུ་མུ་ལུ་མུ་ལུ་
[220a.2]ཙུ་ལུ་ཙུ་ལུ་དྷ་མ་དྷ་མ་རཾ་ག་རཾ་ག་རཾ་གཱ་པ་ཡ་རཾ་གཱ་པ་ཡ་པཱུ་ར་ཡ་པཱུ་ར་ཡ། ཨཱ་བི་ཤ་ཨཱ་བི་ཤ་བྷ་ག་བ་ཏཱི་མ་ཧཱ་བཛྲ་གནྡྷ་རཱི་སིདྡྷ་ཙཎྜ་བཛྲ་པཱ་ཎི་རཱ་ཛྙཱ་པ་ཡ་ཏི་ཧྲཱིཿཧ་ཧ་ཧཱུཾ་ཕཊ་སྭཱཧཱ། འདིའི་ལས་རབ་ཏུ་བརྐྱང་པ་ནི་ཆོ་ག་འདི་ལས་སོ། །རྡོ་རྗེ་གནྡྷ་རཱིའི་སྒྲུབ་ཐབས་རྫོགས་སོ།། {T3596}༄༅༅། །རྒྱ་གར་སྐད་དུ། པཉྩ་
[220a.3]རཀྵ་བི་དྷིཿ། བོད་སྐད་དུ། བསྲུང་བ་ལྔའི་ཆོ་ག །འཕགས་མ་སོ་སོ་འབྲང་མ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཞལ་བསང་བ་ལ་སོགས་པ་བྱས་ནས་ཡིད་དང་མཐུན་པའི་གནས་སུ་སྟན་བདེ་བ་ལ་ཉེ་བར་འདུག་སྟེ། ཨོཾ་ཨཱཿརཀྵཿརཀྵ་ཧཱུཾ་ཕཊ་སྭཱ་ཧཱ། ཞེས་པས་རྣལ་འབྱོར་པའི་གནས་
[220a.4]དང་བདག་ཉིད་བསྲུང་ཞིང་ལྷག་པར་གནས་པར་བྱའོ། །དེ་ནས་རང་གི་ཐུགས་ཀར་ཨ་ཡིག་ལས་སྐྱེས་པའི་ཟླ་བའི་དཀྱིལ་འཁོར་ལ། དེའི་སྟེང་དུ་པྲཾ་ཡིག་ལས་འོད་ཟེར་འཕྲོས་པས་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་སྣང་བར་མཛད་ནས་མདུན་དུ་བལྟས་ཏེ་སོ་སོ་འབྲང་མ་ཆེན་མོ་ལ་
[220a.5]སོགས་པའི་འཁོར་དང་བཅས་པ་མཆོད་པར་བྱའོ། །མེ་ཏོག་དང་། བདུག་སྤོས་དང་། མར་མེ་དང་། དྲི་བཟངས་དང་། གཏོར་མ་དང་། ཞལ་ཟས་ལ་སོགས་པ་རྣམས་ཕུལ་ནས་སྡིག་པ་སོ་སོར་བཤགས་པ་དང་། དཀོན་མཆོག་གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། དགེ་བའི་
[220a.6]རྩ་བ་ཡོངས་སུ་བསྔོ་བ་དང་། བཟོད་པ་གསོལ་བ་རྣམས་བྱའོ། །དེ་ནས་ཚད་མེད་པའི་གནས་བཞི་བསྒོམ་པར་བྱ་སྟེ། དེ་ལ་སྡུག་བསྔལ་བ་རྣམས་འདོན་པར་འདོད་པའི་སྙིང་རྗེ་དང་། བདེ་བ་ལ་རབ་ཏུ་དགོད་པའི་བྱམས་པ་དང་། བདེ་བ་ལ་གནས་པ་ཉིད་ཀྱིས་དགའ་བ་དང་། དེ་བཞིན་ཉིད་ཀྱི་ངོ་བོ་ཉིད་ཀྱིས་བཏང་
[220a.7]སྙོམས་སུ་བྱའོ། །དེ་ནས་ཆོས་ཐམས་ཅད་ལ་ཡིད་ཀྱིས་དམིགས་ནས་རྣམ་པར་མི་རྟོག་པ་རྣམ་པར་བསྒོམས་ཏེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་སོ། །དེ་ནས་ཧཱུཾ་ཡིག་གིས་ས་གཞི་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །དེ་ནས་དེ་བཞིན་དུ་རྡོ་རྗེའི་གུར་དང་། རྡོ་རྗེའི་ར་བ་དང་།
[220b]
[220b.1]རྡོ་རྗེའི་བླ་བྲེ་ཡང་རྣམ་པར་བསམ་པར་བྱའོ། །དེའི་དབུས་སུ་སུཾ་ཡིག་ཡོངས་སུ་གྱུར་པ་ལས་རི་བོ་མཆོག་རབ་ཐར་པ་ཆེན་པོའི་གྲོང་ཁྱེར་དུ་གྱུར་པ་མེ་ཏོག་སྣ་ཚོགས་མངོན་པར་བཀྲམ་པས་སོ། །དེའི་སྟེང་དུ་ཧཱུཾ་ཡིག་ཡོངས་སུ་གྱུར་པ་ལས། སྣ་ཚོགས་རྡོ་རྗེ་ལ་པཾ་ཡིག་ཡོངས་སུ་གྱུར་པ་ལས། སྣ་ཚོགས་
[220b.2]པདྨ་གེ་སར་དང་བཅས་པའི་ཟེའུ་འབྲུ་ལ། དེའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་པྲཾ་ཡིག་ལས་འོད་ཟེར་ཡང་དག་པར་འཕྲོ་བ། དེས་ཡེ་ཤེས་ལྔའི་བདག་ཉིད་སྤྱན་དྲངས་ནས་དེ་བཞིན་གཤེགས་པ་ཐམས་ཅད་དང་ལྷན་ཅིག་ཏུ་བྱས་ནས་ས་བོན་ཡོངས་སུ་གྱུར་པ་ལས་འཆད་པར་འགྱུར་
[220b.3]བའི་སྐུ་མདོག་གི་རྣམ་པ་ཅན་དང་རོ་གཅིག་ཏུ་གྱུར་ནས་སོ་སོ་འབྲང་བ་ཆེན་མོ་སྐུ་མདོག་དཀར་མོ་ལོ་བརྒྱད་གཉིས་ལོན་པའི་རྣམ་པ་ཅན་སྤྱི་བོར་ཟླ་བའི་གདན་ལ་མཆོད་རྟེན་གྱིས་བརྒྱན་པ། ཉི་མའི་དཀྱིལ་འཁོར་ལ་ཞབས་གཡས་བརྐྱང་སྐྱིལ་ཀྲུང་ཕྱེད་པས་བཞུགས་པ། ཞལ་
[220b.4]བཞི་པ། སྤྱན་གསུམ་པ། ཕྱག་བརྒྱད་པ། རྣ་རྒྱན་གཡོ་བས་མཛེས་ཤིང་དོ་ཤལ་དང་རྐང་གདུབ་ཀྱིས་བརྒྱན་པ། ཕྱག་གདུབ་དང་། དཔུང་རྒྱན་དང་། སྐ་རགས་ཀྱིས་མཛེས་ཤིང་རྒྱན་ཐམས་ཅད་ཀྱིས་བརྒྱན་པ། བཅོམ་ལྡན་འདས་མ་དེའི་ཞལ་དང་པོ་ནི་སྐུ་
[220b.5]མདོག་ལྟར་དཀར་པོ། གཡས་ནག་པོ། རྒྱབ་སེར་པོ། གཡོན་དམར་པོའོ། གཡས་ཀྱི་ཕྱག་དང་པོ་ན་འཁོར་ལོ། གཉིས་པ་ན་རྡོ་རྗེ། གསུམ་པ་ན་མདའ་དང་། བཞི་པ་ན་རལ་གྲི། གཡོན་གྱི་ཕྱག་དང་པོ་ན་རྡོ་རྗེའི་ཞགས་པ། གཉིས་པ་ན་རྩེ་གསུམ། གསུམ་
[220b.6]པ་ན་གཞུ། བཞི་པ་ན་དགྲ་སྟའོ། །བྱང་ཆུབ་ཀྱི་ཤིང་གིས་ཉེ་བར་མཛེས་པ། སྣ་ཚོགས་པའི་རིན་པོ་ཆེའི་མེ་ཏོག་དང་འབྲས་བུ་ལ་སོགས་པས་བརྒྱན་པ། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། དགའ་བྱེད་དབང་ཕྱུག་ལ་སོགས་པ་རྣམས་ཀྱིས་ཡང་
[220b.7]དག་པར་བསྟོད་པ་དང་ལྷ་དང་ཀླུ་དང་། གནོད་སྦྱིན་དང་། དྲི་ཟ་རྣམས་ཀྱིས་གཡས་ཕྱོགས་ནས་ཡང་དག་པར་བསྙེན་བཀུར་བར་བྱེད་པ། དབང་པོ་དང་། གཤིན་རྗེ་དང་། ཆུ་བདག་དང་། རྣམ་ཐོས་སྲས་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་
[221a]
[221a.1]པོ་ལ་སོགས་པ་རྣམས་དང་། ལྷ་རྣམས་ཀྱིས་བསྟོད་པ། འདོད་ཆགས་དང་ཞེ་སྡང་དང་གཏི་མུག་གི་བག་ཆགས་ལས་སྐྱེས་པའི་རྣམ་པར་སྨིན་པ་རྣམས་གཅོད་པར་མཛད་པ། གསང་སྔགས་མཆོག་གི་ཕྱག་རྒྱས་དུག་དང་བྱད་སྟེམས་རྣམས་འཇོམས་ཤིང་ཕྱེ་མར་
[221a.2]མཛད་པ། ཞེ་སྡང་རབ་ཏུ་སྦྱོར་བའི་མངོན་སྤྱོད་ཀྱིས་ཀྱང་གདུག་པའི་སེམས་དང་ལྡན་པ་རྣམས་རྣམ་པར་འཇོམས་པར་མཛད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་འཕགས་པའི་ཚོགས་རྣམས་ཡང་དག་པའི་མཆོད་པ་རྣམས་ཀྱིས་མངོན་པར་དགའ་བ་རྣམས་ཡོངས་སུ་སྐྱོང་
[221a.3]བར་མཛད་པ། ཐེག་པ་ཆེན་པོ་ལེན་པ་དང་། ཡི་གེ་འདྲི་བ་དང་། ཀློག་པ་དང་། འཆང་བ་དང་། ཁ་ཏོན་བྱེད་པ་དང་། ཉན་པ་དང་། འཛིན་པ་དང་མངོན་པར་ལྡན་པ་རྣམས་ལ་ཡོངས་སུ་སྐྱོང་བར་མཛད་པ་དེ་ལྟ་བུར་གྱུར་པའི་བཅོམ་ལྡན་འདས་མ་སྤྲོ་བ་དང་བསྡུ་བའི་སྦྱོར་བས་དུས་རྟག་ཏུ་རྒྱུན་མི་འཆད་
[221a.4]པར་གོམས་ཤིང་བལྟ་བར་བྱའོ། །དེའི་བཟླས་པའི་སྔགས་ནི། ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སོ་སོ་འབྲང་མ་ཆེན་མོ་དེའི་ཤར་ཕྱོགས་སུ་ཇི་ལྟ་བ་དེ་བཞིན་དུ་སྔོན་མའི་སྦྱོར་བས་ལྷག་པར་བྱས་ཏེ། སྣ་ཚོགས་པདྨའི་དབུས་སུ་ཧཱུཾ་ཡིག་གི་ས་བོན་དང་
[221a.5]མཚན་མ་ཡོངས་སུ་གྱུར་པ་ལས་སྟོང་ཆེན་མོ་རབ་ཏུ་འཇོམས་མ་སྐུ་མདོག་ནག་མོ་དབུ་སྐྲ་ཁམ་པ་གྱེན་དུ་བརྫེས་པ་མིའི་ཐོད་པས་བརྒྱན་པ་སྨིན་མཚམས་སུ་ཁྲོ་གཉེར་བསྡུས་ཤིང་ཞལ་མཆེ་བ་གཙིགས་པ། འོད་ཟེར་འཕྲོ་བ་ཉི་མའི་དཀྱིལ་འཁོར་གྱི་གདན་ལ་
[221a.6]རོལ་པའི་སྟབས་ཀྱིས་འབྱུང་པོ་ཆེན་པོ་དང་། གནོད་སྦྱིན་ཆེན་པོ་ཀུན་ནས་གནོན་པ། ཕྱག་གདུབ་དང་། དཔུང་རྒྱན་གྱིས་བརྒྱན་པ། དོ་ཤལ་དང་། ཞབས་གདུབ་ཀྱིས་མཛེས་པ། དེའི་ཕྱག་གཡས་ཀྱི་དང་པོ་ན་མཆོག་སྦྱིན་དང་རྡོ་རྗེ། གཉིས་པ་ན་ལྕགས་
[221a.7]ཀྱུ། གསུམ་པ་ན་མདའ། བཞི་པ་ན་རལ་གྲི། ཕྱག་གཡོན་གྱི་དང་པོ་ན་སྡིགས་མཛུབ་དང་ཞགས་པ། གཉིས་པ་ན་དགྲ་སྟ། གསུམ་པ་ནི་གཞུ། བཞི་པ་ན་པདྨའི་སྟེང་དུ་རིན་པོ་ཆེ་ཆ་དྲུག་པའོ། །དེའི་རྩ་བའི་ཞལ་ནག་པོ། གཡས་དཀར་པོ། །རྒྱབ་སེར་པོ། །
[221b]
[221b.1]གཡོན་ལྗང་གུ། ཐམས་ཅད་སྤྱན་གསུམ་གསུམ་པ། སྐུ་ལ་རིན་པོ་ཆེ་ལ་སོགས་པ་སྣ་ཚོགས་པས་བརྒྱན་པ། ཕ་རོལ་གྱི་སྟོབས་ཆེན་པོ་གནོན་པ། དྲག་མོའི་ཆ་ལུགས་ཅན། ནྱ་གྲོ་དྷའི་ཤིང་ལྗོན་པས་ཉེ་བར་མཛེས་པ་མ་མོ་བདུན་ལ་སོགས་པའི་ལྷ་མོ་རྣམས་སྐྲག་པར་མཛད་པ། ནམ་གྲུ་ལ་སོགས་
[221b.2]པའི་མི་རྣམས་འཇོམས་པར་མཛད་པ། ནོར་རྒྱས་ལ་སོགས་པའི་ཀླུ་རྣམས་ཡང་དག་པར་སྐྲག་པར་མཛད་པ། རླུང་དང་མཁྲིས་པ་དང་བད་ཀན་ལ་སོགས་པ་རྣམས་སྦྱོང་བར་མཛད་པ། དྲག་པོའི་མུན་པ་སྟུག་པོའི་སྤྲིན་རྣམས་སེལ་བར་མཛད་པ། འཆི་བདག་ཐམས་ཅད་ཟད་པར་བྱེད་པའོ། །དེའི་བཟླས་པའི་སྔགས་ནི་ཨོཾ་ཨ་
[221b.3]མྲྀ་ཏ་བ་རཻ་བ་ར་པྲ་བ་ར་བི་ཤུདྡེ་ཧཱུཾ་ཧཱུཾ་ཕཊ་སྭཱ་ཧཱ། དེ་ནས་སོ་སོ་འབྲང་མ་ཆེན་མོའི་ལྷོ་ཕྱོགས་སུ་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་མཾ་ཡིག་གི་ས་བོན་ཡོངས་སུ་གྱུར་པ་ལས་སྐད་ཅིག་གིས་རྨ་བྱ་ཆེན་མོ་སྐུ་མདོག་སེར་མོ་ཉི་མའི་དཀྱིལ་འཁོར་ལ་ཞབས་གཡས་བརྐྱང་བའི་སེམས་
[221b.4]དཔའི་སྐྱིལ་ཀྲུང་གིས་བཞུགས་པ། ཞལ་གསུམ་པ་སྤྱན་གསུམ་པ། ཕྱག་བརྒྱད་པ། རིན་པོ་ཆེའི་ཅོད་པན་ཅན་རྒྱན་ཐམས་ཅད་ཀྱིས་བརྒྱན་པ། དེའི་གཡས་ཀྱི་ཕྱག་དང་པོ་ན་མཆོག་སྦྱིན། གཉིས་པ་ན་རིན་པོ་ཆེའི་བུམ་པ་བསྣམས་པ། གསུམ་པ་ན་འཁོར་ལོ། བཞི་པ་ན་རལ་གྲིའོ། །གཡོན་གྱི་
[221b.5]ཕྱག་དང་པོ་ན་ལྷུང་བཟེད་ཀྱི་སྟེང་ན་དགེ་སློང་། གཉིས་པ་ན་རྨ་བྱའི་མདོངས། གསུམ་པ་ན་བུམ་པའི་སྟེང་ན་སྣ་ཚོགས་རྡོ་རྗེ། བཞི་པ་ན་རིན་པོ་ཆེའི་རྒྱལ་མཚན་ནོ། །དེ་ནས་རྩ་བའི་ཞལ་ནི་སེར་པོ། གཡས་ནག་པོ། གཡོན་དམར་པོའོ། །མྱ་ངན་མེད་པའི་ཤིང་ལྗོན་པས་ཉེ་བར་མཛེས་པའོ། །
[221b.6]དེའི་ལོགས་ན་གནས་པའི་བི་ཤེཿབདུན་གྱིས་གཡོགས་པ། དྲག་པོ་དང་བཅས་པའི་སེར་སྐྱ་ལ་སོགས་པའི་སྲིན་པོ་རྣམས་འཇོམས་པར་མཛད་པ་ཀླུ་ལ་སོགས་པ་ཐམས་ཅད་སྐྲག་པར་མཛད་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་རྣམས་ཀྱིས་ཕྱག་བྱ་བའི་འོས་སུ་གྱུར་པ། རྒྱུ་སྐར་
[221b.7]ཉི་ཤུ་རྩ་བདུན་དང་བཅས་པའི་གཟའ་དགུ་ལ་སོགས་པ་རྣམས་ཀྱིས་བསྙེན་བཀུར་བྱ་བའི་འོས་སུ་གྱུར་པ། བརྟན་པ་དང་གཡོ་བའི་དུག་ཐམས་ཅད་རྣམ་པར་གྲོལ་བ། ལྷ་དང་བཅས་པའི་ལྷ་མ་ཡིན་རྣམས་ཡང་དག་པར་རྨོངས་པར་མཛད་པའོ། །བཅོམ་ལྡན་འདས་མ་དེའི་བཟླས་པའི་སྔགས་ནི། ཨོཾ་ཨ་
[222a]
[222a.1]མྲྀ་ཏ་བི་ལོ་ཀི་ནི་གརྦྷ་སཾ་རཀྵ་ཨཱ་ཀཪྵ་ནི་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་སོ། །སོ་སོ་འབྲང་མ་དེའི་ནུབ་ཕྱོགས་སུ་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་མཾ་ཡིག་གི་ས་བོན་ཡོངས་སུ་གྱུར་པ་ལས་སྐྱེས་པའི་གསང་སྔགས་རྗེས་སུ་འཛིན་མ་བསྒོམ་པར་བྱ་སྟེ། སྐུ་
[222a.2]མདོག་དཀར་མོ་ཞལ་གསུམ་པ། སྤྱན་གསུམ་པ། ཕྱག་བཅུ་གཉིས་པ་ཉི་མའི་དཀྱིལ་འཁོར་འོད་འཕྲོ་བ་ལ་གཡས་བརྐྱང་གིས་བཞུགས་པ། རིན་པོ་ཆེའི་ཅོད་པན་ཅན། རྒྱན་ཐམས་ཅད་ཀྱིས་མཛེས་ཤིང་ལང་ཚོ་གཞོན་ནུ་དང་ལྡན་པ། དོ་ཤལ་དང་། རྐང་གདུབ་དང་། རྣ་རྒྱན་
[222a.3]གྱིས་བརྒྱན་པ། ཤི་རི་ཤཱའི་ཤིང་ལྗོན་པས་ཉེ་བར་མཛེས་པ། དེའི་ཕྱག་དང་པོ་ཆོས་ཀྱི་འཁོར་ལོའི་ཕྱག་རྒྱ། གཉིས་པ་ཏིང་ངེ་འཛིན་གྱི་ཕྱག་རྒྱ། གསུམ་པ་མཆོག་སྦྱིན། བཞི་པ་མི་འཇིགས་པ། ལྔ་པ་རྡོ་རྗེ། དྲུག་པ་ན་མདའོ། །གཡོན་གྱི་གསུམ་པ་སྡིགས་མཛུབ་
[222a.4]དང་བཅས་པའི་ཞགས་པ། བཞི་པ་ན་གཞུ། ལྔ་པ་ན་རིན་པོ་ཆེའི་དོག་པ། དྲུག་པ་ན་པདྨས་མཚན་པའི་ཆུ་སྐྱེས་སོ། །རྩ་བའི་ཞལ་དཀར་པོ། གཡས་ནག་པོ། གཡོན་དམར་པོའོ། །མེ་ཏོག་སྣ་ཚོགས་པ་མངོན་པར་བཀྲམ་པ། འཇིག་རྟེན་སྐྱོང་བ་བརྒྱད་ལ་སོགས་པ་དང་
[222a.5]བཅས་པའི་ལྷ་རྣམས་ཀྱིས་ཡང་དག་པར་མཆོད་པའི་འོས་སུ་གྱུར་པ། རྒྱལ་པོ་ཆེན་པོ་བཞི་དང་བཅས་པའི་ལྷའི་ཚོགས་རྣམས་ཀྱིས་ཡང་དག་པར་བསྟོད་པ། མེ་ཏོག་མོ་དང་བཅས་པའི་རིག་འཛིན་མ་རྣམས་ཀྱིས་མཆོད་པའོ། །དེའི་བཟླས་པའི་སྔགས་ནི་ཨོཾ་བི་མ་ལེ་བི་པུ་ལེ་ཛ་ཡ་བ་
[222a.6]རེ་ཨ་མྲྀ་ཏེ་བི་ར་ཛེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་སོ། །དེ་ནས་སོ་སོ་འབྲང་མ་དེའི་བྱང་ཕྱོགས་སུ་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་ཏྲཾ་ཡིག་གི་ས་བོན་ཡོངས་སུ་གྱུར་པ་ལས་སྐྱེས་པའི་བསིལ་བའི་ཚལ་ཆེན་མོ་སྐུ་མདོག་ལྗང་གུ་ཉི་མའི་དཀྱིལ་འཁོར་ལ་གཡས་བརྐྱང་
[222a.7]གིས་བཞུགས་པ། ཞལ་གསུམ་མ། སྤྱན་གསུམ་མ། ཕྱག་དྲུག་པ། དེ་བཞིན་གཤེགས་པའི་དབུ་རྒྱན་ཅན། རྒྱན་ཐམས་ཅད་ཀྱིས་བརྒྱན་ཅིང་ལྷའི་ན་བཟས་ཉེ་བར་སྤྲས་པའོ། །དེའི་ཕྱག་དང་པོ་མི་འཇིགས་པའི་ཕྱག་རྒྱ། གཉིས་པ་ན་རྡོ་རྗེ། གསུམ་པ་ན་མདའོ། །གཡོན་
[222b]
[222b.1]གྱི་དང་པོ་ཞགས་པ་དང་བཅས་པའི་སྡིགས་མཛུབ། གཉིས་པ་ན་གཞུ། གསུམ་པ་ན་རིན་པོ་ཆེའི་རྒྱལ་མཚན་ནོ། །རྩ་བའི་ཞལ་ལྗང་གུ། གཡས་པ་དཀར་པོ། གཡོན་པ་དམར་པོའོ། །ཙམ་པ་ཀའི་ཤིང་ལྗོན་པས་ཉེ་བར་མཛེས་པ། འདོད་ལྷ་དང་བཅས་པའི་ལྷ་རྣམས་
[222b.2]ཀྱིས་མཆོད་ཅིང་བསྟོད་པ། འཕྲོག་མ་དང་བཅས་པའི་གནོད་སྦྱིན་དང་གནོད་སྦྱིན་མོ་རྣམས་རྣམ་པར་འཇོམས་པར་མཛད་པ། བྱ་རོག་དང་། འུག་པ་དང་། བྱ་རྒོད་དང་། ཁྲ་དང་། ཀ་པོ་ར་ལ་སོགས་པ་རྣམས་འཇོམས་ཤིང་འདེད་པར་མཛད་པ། འབྱུང་པོ་དང་། ཡི་དྭགས་དང་།
[222b.3]ཤ་ཟ་དང་། རོ་ལངས་དང་། སྲིན་པོ་ལ་སོགས་པ་དང་བཅས་པ་རྣམས་ཡང་དག་པར་རྨོངས་པར་མཛད་པའོ། །དེའི་བཟླས་པའི་སྔགས་ནི་ཨོཾ་བྷ་ར་བྷ་ར། སཾ་བྷ་ར་སཾ་བྷ་ར། ཨིནྡྲི་ཡ་བ་ལ་བི་ཤོ་དྷ་ནི་ཧཱུཾ་ཧཱུཾ་ཕཊ། དེ་བཞིན་དུ་ཇི་ལྟར་གསུངས་པའི་མཎྜལ་རྣམ་པར་བསྒོམས་ནས། དེའི་
[222b.4]འོད་ཟེར་གྱི་ཚོགས་ཀྱིས་ཁྱབ་པ་ལས་རང་རང་གི་ས་བོན་ལས་བྱུང་བའི་འོད་ཟེར་གྱིས་ཁམས་གསུམ་མ་ལུས་པ་མངོན་པར་ཁྱབ་ནས་དེ་ལ་དེ་བཞིན་དུ་ཡི་གེ་ལ་རབ་ཏུ་གཞུག་པར་བྱའོ། །སླར་ཡང་ནམ་མཁའི་མཐོངས་སུ་སྤྲོས་ནས་ཡེ་ཤེས་ཀྱི་འཁོར་ལོ་སྤྱན་དྲངས་ནས་ཡང་དག་པར་བསྟོད་
[222b.5]ཅིང་གདན་དྲངས་པ་རང་གི་དམ་ཚིག་གི་འཁོར་ལོ་ལ་རབ་ཏུ་གཞུག་པར་བྱའོ། །དེ་ནས་གཉིས་སུ་མེད་ཅིང་རོ་གཅིག་ཏུ་གྱུར་པར་རྣམ་པར་བསྒོམས་ལ། དེའི་འོད་ཟེར་རྣམས་ཀྱིས་དེ་བཞིན་གཤེགས་པ་ཐམས་ཅད་གདན་དྲངས་ཏེ་ཡང་དག་པར་མཆོད་ནས་དབང་བསྐུར་བར་གསོལ་བ་བཏབ་
[222b.6]ནས་བདག་ཉིད་ལ་དབང་བསྐུར་བར་བལྟ་བར་བྱའོ། །མཆོད་པ་དང་། བསྟོད་པ་དང་། བདུད་རྩི་མྱང་བ་སྔོན་དུ་འགྲོ་བས་མཁས་པས་བསྒོམ་པར་བྱའོ། །མིག་ལ་གཏི་མུག་རྡོ་རྗེ་སོ་སོ་འབྲང་མ་ཆེན་མོའོ། །རྣ་བ་ལ་ཞེ་སྡང་རྡོ་རྗེ་སྟོང་ཆེན་མོ་རབ་ཏུ་འཇོམས་པ་ཆེན་མོའོ། །སྣ་ལ་
[222b.7]སེར་སྣ་རྡོ་རྗེ་རྨ་བྱ་ཆེན་མོའོ། །ཞལ་ལ་འདོད་ཆགས་རྡོ་རྗེ་གསང་སྔགས་རྗེས་སུ་འཛིན་མ་ཆེན་མོའོ། །རེག་བྱ་ལ་ཕྲག་དོག་རྡོ་རྗེ་བསིལ་བའི་ཚལ་ཆེན་མོའོ། །དེ་བཞིན་དུ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་
[223a]
[223a.1]རྣམས་ཏེ། ཕུང་པོ་དང་། ཁམས་དང་། སྐྱེ་མཆེད་ཀྱི་རང་བཞིན་རྣམས་ལ་དེ་བཞིན་དུ་ལྷ་རྣམས་ཀྱི་རྣམ་པར་དག་པའི་ཁྱད་པར་ཤེས་པར་བྱའོ། །དེ་ལ་དེ་ལྟ་བུའི་དམ་ཚིག་ཏུ་གྱུར་པས་ཆོ་ག་འདིས་སྔགས་བཟླས་པར་བྱའོ། །གོང་གི་སྔགས་
[223a.2]ཀྱི་ཡི་གེ་བརྗོད་པར་བྱ་བ་དེའི་ལྷའི་སྦྱོར་བས་བསྒྲུབ་བྱའི་མིང་སྤེལ་ནས་ཞི་བའི་སེམས་ཀྱིས་རྒྱུན་མི་འཆད་པར་བཟླས་པར་བྱའོ། །རིམས་དང་། དུག་དང་། དེ་བཞིན་དུ་ནད་དང་། གཡུལ་ལ་ཡང་དེ་བཞིན་དུ་བྱའོ། །མཁའ་འགྲོ་མ་དང་། འབྱུང་པོ་དང་། རྨུགས་བྱེད་དང་།
[223a.3]གཙང་པོ་དང་། དགྲས་རབ་ཏུ་འཚེ་བ་དང་། ཐོག་དང་། སྐར་མདའ་ལྟུང་བའི་འཇིགས་པ་རྣམས་ལ་རི་དང་། ནགས་དང་། ལམ་དག་ཏུ་དེའི་སྔགས་དྲན་པས་རྟག་ཏུ་བག་ཚ་བ་ཐམས་ཅད་སེལ་བར་བྱེད་དོ། །དེ་ལ་རིམ་པ་འདི་བཞིན་དུ། །སེམས་ཅན་ཀུན་ལ་ཕན་
[223a.4]དོན་ཕྱིར། །སེམས་ཅན་ཀུན་ལ་ཕན་འབྱུང་བ། །གང་དང་གང་གིས་གསོལ་འདེབས་པ། །དེ་ཡི་ཚེ་ནི་འཕེལ་བའི་རྒྱུ། །བསྲུང་བ་ལྔ་ཡི་ཆོ་ག་འདིས། །བདེ་ལེགས་འབྱུང་བ་བདག་གིས་བྲི། །སེམས་ཅན་ཀུན་ལ་ཕན་དོན་ཕྱིར། །དགེ་བའི་མཎྜལ་ཟླུམ་པོ་བྲི། །
[223a.5]ས་ཕྱོགས་གཙང་ཞིང་ཉམས་དགའ་བར། །བ་ཡི་ལྕི་བས་ཉེ་བར་བྱུགས། །བླ་རེ་ཡིས་ནི་སྟོད་གཡོགས་ཤིང་། །རྣམ་པ་སྣ་ཚོགས་གོས་རྣམས་བཅད། །ཙནྡན་ཁྱད་པར་ཅན་དག་དང་། །དྲི་བཟངས་དག་གིས་ཀུན་ནས་བྱུགས། །སོར་མོ་ཉི་ཤུ་རྩ་བརྒྱད་ཀྱི། །མཎྜལ་
[223a.6]ཟླུམ་པོར་བྲི་བར་བྱ། །དེ་ནས་རྡུལ་ཚོན་དཀར་པོ་ཡིས། །ཞི་བའི་ལས་ལ་རབ་ཏུ་བསྔགས། །ཟེའུ་འབྲུ་གེ་སར་དང་བཅས་པའི། །པདྨ་འདབ་མ་བརྒྱད་པར་བྱ། །བུམ་པ་ལྔ་ནི་ཡང་དག་དགོད། །མེ་ཏོག་ཕྲེང་བ་གོས་ཀྱིས་མཛེས། །ལོ་མ་དག་གིས་ཁ་བརྒྱན་ཅིང་། །
[223a.7]གདུགས་དང་བ་དན་ཡང་དག་ལྡན། །པུ་སྟི་དང་ནི་ཆོས་དབྱིངས་དང་། །བྲིས་སྐུ་མདུན་དུ་ཡང་དག་བཀྲམ། །མེ་ཏོག་སྤོས་དང་དྲི་དང་ནི། །གཏོར་མ་ཞལ་ཟས་དབུལ་བར་བྱ། །དཱུར་བ་ཀུན་དང་ཡང་དག་སྦྱོར། །མེ་ཏོག་དཀར་པོ་ཁྱད་འཕགས་རྣམས། །ཕྱོགས་
[223b]
[223b.1]དང་ཕྱོགས་མཚམས་ལྷ་རྣམས་ཀྱི། །ཆོ་ག་ཇི་བཞིན་མཆོད་པར་བྱ། །ཟན་དང་བུ་རམ་མེ་ཏོག་དཀར། །འོ་མ་ཡི་ནི་བྱེ་བྲག་རྣམས། །ཤར་ཕྱོགས་གནས་སུ་དགོད་བྱས་ནས། །དྲི་ཟ་རྣམས་ལ་གཏོར་མ་དབུལ། །ཏིལ་ནག་དང་ནི་ཆང་གིས་བཀང་། །ཤ་དང་ཉ་ཤ་སྒོག་
[223b.2]པ་རྣམས། །ལྷོ་ཕྱོགས་སུ་ནི་ཡང་དག་དགོད། །གྲུལ་བུམ་རྣམས་ལ་གཏོར་མ་དབུལ། །འོ་མ་ཞོ་དང་འོ་ཐུག་དང་། །མཉྫ་ན་ཡི་བྱེ་བྲག་རྣམས། །ནུབ་ཀྱི་ཕྱོགས་སུ་ཡང་དག་དགོད། །གཏོར་མ་ཆེན་པོ་ཀླུ་ལ་འབུལ། །མོན་གྲེའུ་མུད་ག་རྒྱ་སྲན་དང་། །ཛམྦུ་ཊི་དང་བུར་ཆང་
[223b.3]རྣམས། །བྱང་གི་ཕྱོགས་སུ་ཡང་དག་དགོད། །གནོད་སྦྱིན་རྣམས་ལ་གཏོར་མ་དབུལ། །དབང་ལྡན་ནས་ནི་བརྩམས་ནས་ནི། །ཇི་སྲིད་རླུང་གི་སྤྱོད་ཡུལ་བར། །ནག་པོ་དམར་པོ་སེར་པོ་དང་། །ལྗང་གུའི་མེ་ཏོག་ཕྲེང་བ་དཔྱང་། །དབུས་སུ་མེ་ཏོག་ཕྲེང་བ་དཀར། །མེ་ཏོག་
[223b.4]སྣ་ཚོགས་ཁྱད་འཕགས་རྣམས། །འོ་མ་ཁྲག་གི་ཁམ་ཕོར་རྣམས། །ཞོ་ཟན་དྲི་རྣམས་དེ་བཞིན་དུ། །དེ་བཞིན་དངོས་པོ་མ་ལུས་རྣམས། །ཇི་ལྟར་རིགས་པས་མཆོད་ཡོན་དབུལ། །འབྲས་བུ་རྩ་བ་ཇི་སྙེད་དང་། །ལ་དུ་མོ་ད་ཀ་ཆང་བུ། །ཇི་སྐད་གསུངས་བཞིན་
[223b.5]ཆང་བུ་སོགས། །ཀ་ར་འོ་མའི་བྱེ་བྲག་གི། །གཏོར་མ་ལྷོ་ཡི་ཕྱོགས་སུ་བཞག །མཚན་མ་བརྒྱད་ཀྱིས་རབ་མཛེས་པ། །དེ་བཞིན་དུ་ཡང་། ཆོས་འཆད་པ་ཡི་སློབ་དཔོན་དང་། །ལས་ཀྱི་རྡོ་རྗེ་དེ་བཞིན་དུ། །ཁྲུས་བྱས་གཙང་མའི་གོས་བགོ་ཞིང་། །དེ་བཞིན་
[223b.6]སྟན་ཡང་གཙང་མར་འདོད། །ཞལ་ནི་ཤར་དུ་མངོན་ཕྱོགས་ནས། །སྨྲ་བཅད་ནས་ནི་རྟག་ཏུ་བཀླག །དགེ་སློང་ཚུལ་ཁྲིམས་གཙང་མ་ཡི། །བསོད་སྙོམས་པ་རྣམས་མཆོག་ཏུ་བསྔགས། །སྦྱིན་བདག་སློབ་དཔོན་གང་ཞིག་གིས། །ཡོངས་སུ་དག་པར་བཀླག་པར་བྱ། །
[223b.7]ལན་གཅིག་ལ་སོགས་བརྩམས་ནས་ནི། །ཉི་ཤུ་རྩ་གཅིག་ལ་སོགས་བཀླག །ཆོ་ག་ཆད་པ་ལ་སོགས་པས། །བཀླགས་པས་ཡང་དག་འགྲུབ་མི་འགྱུར། །བློ་དང་བརྩོན་འགྲུས་ཕུན་ཚོགས་པ། །བརྩེ་བས་སེམས་ཅན་དོན་བརྩོན་པས། །དེ་ཡི་བདེ་ལེགས་སྒྲུབ་པར་ནི། །སྔོན་གྱི་སངས་
[224a]
[224a.1]རྒྱས་རྣམས་ཀྱིས་གསུངས། །ཁ་ཟས་དཀར་པོས་སྟོན་མོ་བྱས། །ཤ་ཡི་བཟའ་བ་རྣམ་པར་སྤངས། །བསྟན་བཅོས་ཀུན་ལས་མཐུན་པར་ནི། །ཀུན་ལ་ཤ་ནི་མེད་བྱས་ལ། །སློབ་དཔོན་བྱང་དུ་ཞལ་ཕྱོགས་པས། །དེ་ལ་ལས་ནི་ཡང་དག་བརྩམ། །བསྒོམ་
[224a.2]པ་སྔོན་དུ་གསུངས་པ་བཞིན། །ལྷ་རྣམས་སོ་སོ་ལ་དམིགས་ནས། །མཆོད་ཅིང་བསྟོད་པ་དང་ལྡན་པས། །དྲིལ་བུ་དཀྲོལ་ཞིང་དེ་བཞིན་ལ། །མཐའ་ཡས་སྤྱོད་ཡུལ་སངས་རྒྱས་ལ་ནི་ཕྱག་འཚལ་འདུད། །བདེན་པ་གསུང་མཛད་སངས་རྒྱས་ལ་ནི་ཕྱག་འཚལ་འདུད། །བདེན་
[224a.3]པ་ལ་ནི་རབ་གནས་རབ་ཏུ་རྒྱལ་གྱུར་ཅིག །འདོད་པ་ཀུན་ལས་གྲོལ་ཞིང་འབྲས་བུ་དང་བཅས་ཤོག །སྐྱེས་བུ་དཔའ་བོ་ཕྱག་འཚལ་འདུད། །དེ་བཞིན་གཤེགས་ལ་ཕྱག་འཚལ་འདུད། །ལྷ་རྣམས་ཀུན་ལ་ཕྱག་འཚལ་འདུད། །ཆོས་ཀྱི་དབྱིངས་ལ་ཕྱག་འཚལ་འདུད། །དཱུར་བ་ཀུན་དང་ཡང་
[224a.4]དག་སྦྱར། །བསྒྲུབ་བྱའི་མིང་ནི་སྔགས་ཀྱིས་སྤེལ། །ལྷ་རྣམས་ཀུན་ནི་མཆོད་བྱ་ཞིང་། །ཆོས་ཀྱི་དབྱིངས་ཀྱི་རང་བཞིན་དུ། །སྔགས་ནི་ལན་ཅིག་བརྗོད་ནས་ནི། །ལན་ཅིག་སྦྱོར་བས་མཆོད་པར་བྱ། །ཁྲི་ཕྲག་གཅིག་གི་ལས་ཀྱིས་ནི། །ཚེ་ནི་ཀུན་དུ་འཕེལ་བར་རིགས། །གང་དང་གང་གིས་
[224a.5]གསོལ་འདེབས་ན། །དེར་ནི་མཎྜལ་བྲི་བར་བྱ། །རྒྱལ་སྲིད་ཡུལ་དང་དེ་བཞིན་གྲོང་། །ལྷས་དང་སྐྱེད་མོས་ཚལ་དེ་བཞིན། །མི་མ་ཡིན་པ་ཞུགས་གྱུར་པའི། །འཆི་ནད་དང་ནི་མུ་གེ་རྣམས། །དེ་ཡི་ལས་ཀྱིས་བསྲུང་བར་བྱ། །ཤིང་སྐམ་ལ་ཡང་ལོ་འབྲས་འབྱུང་། །ལས་ཀྱི་སྡུག་
[224a.6]བསྔལ་བསམ་མི་ཁྱབ། །བྱ་བ་གང་ཞིག་བསྒྲུབ་འདོད་ན། །དེ་ནས་བསྲུང་བའི་ཆོ་ག་ཡིས། །ངེས་པར་སྲུང་བར་བྱེད་པར་འགྱུར། །རླུང་དང་མཁྲིས་པ་ལས་སྐྱེས་ནད། །བད་ཀན་འདུས་པ་ལས་གྱུར་པའི། །མ་ལུས་པ་ཡི་ནད་རྣམས་ཀུན། །རྟག་ཏུ་བདེ་ལེགས་ཉིད་དུ་འགྱུར། །
[224a.7]ཀློག་དང་ཁ་ཏོན་སྦྱོར་བ་ཡིས། །ངེས་པར་བགེགས་རྣམས་མེད་པར་འགྱུར། །བསྲུང་བ་ལྔའི་ཆོ་ག་རྫོགས་སོ།། {T3597}༄༅༅། །རྒྱ་གར་སྐད་དུ། བཛྲ་ཤྲྀ་ཁཾ་ལཱ་སཱ་དྷ་ནཾ། བོད་སྐད་དུ། རྡོ་རྗེ་ལྕགས་སྒྲོག་གི་སྒྲུབ་ཐབས། རྡོ་རྗེ་ལྕགས་སྒྲོག་མ་ལ་ཕྱག་འཚལ་ལོ། །
[224b]
[224b.1]སྔོན་དུ་གསུངས་པའི་ཆོ་གས། སྙིང་གར་ཟླ་བའི་དཀྱིལ་འཁོར་ལ་ཧཱུཾ་ཡིག་ལྗང་གུའི་ཡི་གེ་ལས་སྐྱེས་པའི་རྡོ་རྗེ་ལྕགས་སྒྲོག་མ་ཞལ་གསུམ་པ་ཕྱག་དྲུག་པ། སྔོན་པོ་དང་དཀར་པོ་ནི་གཡས་དང་ཅིག་ཤོས་ཀྱི་ཞལ་ལོ། །ཞལ་རེ་རེ་ལ་སྤྱན་གསུམ་གསུམ་པ་རྡོ་རྗེ་དང་། རྡོ་རྗེ་ལྕགས་སྒྲོག་དང་
[224b.2]མདའ་རྣམས་གཡས་ཀྱི་ཕྱག་གསུམ་ནའོ། །སྡིགས་མཛུབ་དང་། ཞགས་པ་དང་། གཞུ་རྣམས་ནི་གཡོན་གྱི་ཕྱག་གསུམ་ནའོ། །སྐུ་མདོག་ལྗང་སེར་ཞལ་ཅུང་ཟད་བཞད་པ། རྒྱན་ཐམས་ཅད་ཀྱིས་བརྒྱན་པ། གདུག་པ་ཅན་གྱི་སེམས་ཅན་རྣམས་འདུལ་བའི་བདག་ཉིད་དུ་བསམས་
[224b.3]ལ་ཕྱག་རྒྱ་བཅིང་བར་བྱའོ། །དེ་ལ་ལག་པ་གཉིས་སོ་སོར་ཁུ་ཚུར་བཅིངས་ཏེ་མཐེབ་ཆུང་དང་སྡིགས་མཛུབ་གཉིས་ལྕགས་སྒྲོག་གི་རྣམ་པ་ཅན་དུ་བཅིང་བར་བྱ་བ་ནི་རྡོ་རྗེ་ལྕགས་སྒྲོག་གི་ཕྱག་རྒྱའོ། །ཨོཾ་བཛྲ་ཤྲཱྀ་ཁཾ་ལེ་ཧཱུཾ་ཕཊ་སྭཱ་ཧཱ་ཞེས་པ་ནི་བཟླས་པའོ། །རྡོ་རྗེ་ལྕགས་སྒྲོག་གི་སྒྲུབ་
[224b.4]ཐབས་རྫོགས་སོ།། {T3598}༄༅༅། །རྒྱ་གར་སྐད་དུ། བཛྲ་ཤྲྀཾ་ཁཾ་ལཱ་སཱ་དྷ་ནཾ། བོད་སྐད་དུ། རྡོ་རྗེ་ལྕགས་སྒྲོག་གི་སྒྲུབ་ཐབས། རྡོ་རྗེ་ལྕགས་སྒྲོག་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་དུ་བསྒོམས་པའི་རྗེས་ལ། སྣ་ཚོགས་ཆུ་སྐྱེས་དང་ཉི་མ་ལ་
[224b.5]གནས་པའི་ཧཱུཾ་ཡིག་ལྗང་གུ་ལས་སྐྱེས་པའི་སྐུ་མདོག་ལྗང་གུ་ཞལ་གསུམ་པ་ཕྱག་བརྒྱད་པ། ཞལ་དང་པོ་ཅུང་ཟད་བཞད་པ། གཡས་སེར་སྐྱ་ལ་སྤྱན་སེར་སྐྱ་དང་ལྡན་པ། གཡོན་པ་དམར་ཞིང་ཁྲོ་གཉེར་ཅན་མཆེ་བ་གཙིགས་པ། གཡས་ཀྱི་ཕྱག་བཞི་རྣམས་སུ་མི་འཇིགས་པ་དང་།
[224b.6]རྡོ་རྗེ་དང་། རྡོ་རྗེ་ལྕགས་སྒྲོག་དང་མདའ་བསྣམས་པ། གཡོན་གྱི་ཕྱག་བཞི་རྣམས་སུ་ཁྲག་གིས་གང་བའི་ཐོད་པ་དང་། སྡིགས་མཛུབ་དང་། ཞགས་པ་དང་། གཞུ་བསྣམས་པའོ། །རོལ་པའི་སྟབས་ཀྱིས་བཞུགས་པ། བྱི་ལའི་པགས་པས་སྟོད་གཡོགས་བྱས་པ། དོན་
[224b.7]ཡོད་གྲུབ་པས་དབུ་བརྒྱན་པ། དབུ་སྐྲ་སེར་སྐྱ་གྱེན་དུ་འཁྱིལ་པར་བསམས་ལ། ཨོཾ་བཛྲ་ཤྲྀ་ཁཾ་ལེ་ཧཱུཾ་ཕཊ་སྭཱ་ཧཱ། ཞེས་པའི་སྔགས་བཟླས་པར་བྱའོ། །འདི་ནི་མན་ངག་གི་རིམ་པའི་ནང་ནས་འབྱུང་བའི་རྡོ་རྗེ་ལྕགས་སྒྲོག་གི་སྒྲུབ་ཐབས་རྫོགས་སོ།། {T3599}༄༅༅། །རྒྱ་གར་སྐད་དུ།
[225a]
[225a.1]བཛྲ་ཤྲྀ་ཁཾ་ལཱ་སཱ་དྷ་ན་ཨུ་པ་ཡི་ཀ། །བོད་སྐད་དུ། རྡོ་རྗེ་ལྕགས་སྒྲོག་གི་སྒྲུབ་ཐབས་ཀྱི་ཆོ་ག །འཕགས་མ་རྡོ་རྗེ་ལྕགས་སྒྲོག་མ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་སྟན་བདེ་བ་ལ་ཉེ་བར་འདུག་སྟེ། ཆོས་ཐམས་ཅད་སྟོང་པ་ཉིད་དོ་ཞེས་དེ་བཞིན་དུ་བརྗོད་ནས།
[225a.2]གཞན་གང་ཞིག་རྣམས་ཀྱང་འདིས་ཆོས་རྣམས་སྟོང་པ་ཉིད་ཀྱི་མཐར་བལྟ་ཞིང་ཕུན་སུམ་ཚོགས་པར་བསྐྱེད་ནས། དཀོན་མཆོག་གསུམ་ལ་སྐྱབས་སུ་འགྲོ་བ་ལ་སོགས་པ་བྱའོ། །དེ་ནས་ཇི་སྲིད་སེམས་ཅན་དང་སེམས་ཅན་གྱིས་བསྡུས་པ་རྣམས་ཡང་དག་པར་བླངས་ནས་
[225a.3]བདག་གིས་ཐམས་ཅད་མཁྱེན་པའི་ཡེ་ཤེས་ལ་དགོད་པར་བྱའོ་ཞེས་སོ། །དེ་ནས་སྙིང་གར་སྣ་ཚོགས་ཆུ་སྐྱེས། དེའི་སྟེང་དུ་ཉི་མའི་དཀྱིལ་འཁོར། དེ་ནས་ཧཱུཾ་ཡིག་ལས་སྐྱེས་པའི་རྡོ་རྗེ་ལྕགས་སྒྲོག་མའི་བདག་ཉིད་འཆིང་བ་ཐམས་ཅད་གཅོད་པ། གདུག་པའི་སེམས་ཅན་
[225a.4]རྣམས་འདུལ་བ། སྐུ་མདོག་ལྗང་གུ་ཞལ་གསུམ་པ། སྤྱན་གསུམ་གསུམ་པ་གཡས་པའི་ཞལ་སེར་སྐྱ་ལ་སྤྱན་སེར་སྐྱ། ཞལ་གཡོན་པ་ཁྲོ་གཉེར་ཅན། དམར་པོ་མཆེ་བ་གཙིགས་པའོ། །ཞལ་དང་པོ་ཅུང་ཟད་བཞད་པའོ། །ཕྱག་བརྒྱད་པ་གཡས་ཀྱི་དང་པོས་མི་འཇིགས་པ་སྦྱིན་པ།
[225a.5]གཉིས་པ་ན་རྡོ་རྗེ། གསུམ་པ་ན་རྡོ་རྗེ་ལྕགས་སྒྲོག །བཞི་པ་ན་མདའ། གཡོན་གྱི་ཕྱག་དང་པོ་ན་ཐོད་པ་ཁྲག་གིས་ཡོངས་སུ་གང་བ། གཉིས་པ་ན་སྡིགས་མཛུབ། གསུམ་པ་ན་ཞགས་པ། བཞི་པ་ན་གཞུའོ། །སངས་རྒྱས་ཀྱི་སྤྲིན་ཚོགས་འཕྲོ་བ་ཤིན་ཏུ་རོལ་པའི་སྟབས་
[225a.6]ཀྱིས་བཞུགས་པ། བྱི་ལའི་པགས་པའི་སྟོད་གཡོགས་བྱས་པའི་རྡོ་རྗེ་ལྕགས་སྒྲོག་མ་བསྒོམ་པར་བྱའོ། །སྐད་ཅིག་གིས་བྱང་ཆུབ་ཀྱང་ཐོབ་ན་དངོས་གྲུབ་གཞན་སྨོས་ཅི་དགོས། ཨོཾ་བཛྲ་ཤྲྀ་ཁཾ་ལེ་ཧཱུཾ་ཕཊ་སྭཱ་ཧཱ་ཞེས་སོ། །རྡོ་རྗེ་ལྕགས་སྒྲོག་གི་སྒྲུབ་ཐབས་ཀྱི་ཆོ་ག་རྫོགས་སོ།། །།
[225a.7]{T3600}༄༅༅། །རྒྱ་གར་སྐད་དུ། དྷྭ་ཛཱ་གྲ་ཀཻ་ཡུ་རཱ་སཱ་དྷ་ནཾ། བོད་སྐད་དུ། རྒྱལ་མཚན་གྱི་རྩེ་མོའི་དཔུང་རྒྱན་གྱི་སྒྲུབ་ཐབས། རྒྱལ་མཚན་རྩེ་མོའི་དཔུང་རྒྱན་ལ་ཕྱག་འཚལ་ལོ། །ངན་སོང་འཇིགས་པ་ཀུན་འཇོམས་པའི། །རྒྱལ་མཚན་རྩེ་མོའི་དཔུང་རྒྱན་འདུད། །དེ་ཡི་སྒྲུབ་
[225b]
[225b.1]ཐབས་དངོས་གྲུབ་ཕྱིར། །བདག་གིས་དད་པས་བྲི་བར་བྱ། །དང་པོར་རེ་ཞིག་སྔགས་པས་ཞལ་བསང་བ་ལ་སོགས་པ་བྱས་ནས་ཡིད་དང་མཐུན་པའི་གནས་སུ་སྟན་བདེ་བ་ལ་ཉེ་བར་འདུག་སྟེ། མཁས་པས་བྱམས་པ་ལ་སོགས་པའི་ཡིད་དག་པས་སྦྱིན་པའི་ཕ་རོལ་ཏུ་ཕྱིན་
[225b.2]པའི་མཆོག་བདུད་རྣམས་འཇོམས་ཤིང་གཡུལ་ལས་སྒྲོལ་བར་བྱེད་པ་བསྒོམ་པར་བྱའོ། །ཨོཾ་ཙནྡྲཱརྐ་བི་མཱ་ལེ་སྭཱ་ཧཱ་ཞེས་པའི་སྔགས་བརྗོད་ནས་རང་གི་སྙིང་གར་ཨ་ཡིག་ཡོངས་སུ་གྱུར་པ་ལས་ཟླ་བ་དང་ཉི་མ་ཡང་དག་པར་སྦྱོར་བའི་སྟེང་དུ་དྷཾ་ཡིག་སེར་པོའི་འོད་ཟེར་གྱིས་ནམ་མཁའི་
[225b.3]ཕྱོགས་སུ་སངས་རྒྱས་དང་བྱང་ཆུབ་སེམས་དཔའ་རྣམས་བལྟས་ནས། ཡིད་ཀྱིས་རང་བཞིན་གྱི་མེ་ཏོག་ལ་སོགས་པས་ཡང་དག་པར་མཆོད་ནས་གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བརྗོད་པར་བྱའོ། །དེའི་རྗེས་ལ་ཨོཾ་སྭ་བྷ་ཝ་ཤུདྡྷཱཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་
[225b.4]ཞེས་པའི་སྔགས་བརྗོད་ནས་སྐད་ཅིག་གིས་སྟོང་པ་ཉིད་དུ་བསྒོམ་པར་བྱའོ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པས་ང་རྒྱལ་བསྐྱེད་ནས་སེམས་ཅན་རྣམས་གདོན་པའི་བསམ་པས་གཟུགས་བརྙན་བཞིན་དུ་ཟླ་བ་དང་ཉི་མ་ཡང་དག་པར་སྦྱོར་བའི་སྟེང་དུ་དྷྭཾ་ཡིག་སེར་པོའི་
[225b.5]འོད་ཟེར་གྱིས་མཐའ་ཡས་པའི་སེམས་ཅན་རྣམས་ལ། སངས་རྒྱས་དང་བྱང་ཆུབ་སེམས་དཔའི་སྐུས་བརྒྱན་ཅིང་། དེའི་སྙིང་གར་རབ་ཏུ་ཞུགས་ནས་སླར་ལོག་སྟེ། འོད་ཟེར་གྱི་ཚོགས་པས་ས་བོན་ལ་རབ་ཏུ་ཞུགས་པར་བསྒོམ་པར་བྱའོ། །དེ་ཐམས་ཅད་ཡོངས་སུ་གྱུར་པ་
[225b.6]ལས་གཡུལ་ལས་སྒྲོལ་བར་བྱེད་པའི་ལྷ་མོ་སྐུ་མདོག་སེར་མོ་ཡིད་དུ་འོང་བ་ཞལ་པ་ཕྱག་བཞི་པ་ཁྲོ་ཞིང་ཞབས་གཡོན་བརྐྱང་བ་ལྟོ་བ་འཕྱང་བ། སྤྱན་གསུམ་པ། དམར་ལ་ཟླུམ་ཞིང་མཛེས་པ། ན་བཟའ་སྔོན་པོ་མནབས་པ། རལ་གྲི་དང་། འཁོར་ལོ་ཕྱག་གཡས་ན་བསྣམས་པ། གཡོན་པ་
[225b.7]དག་གིས་སྡིགས་མཛུབ་དང་བཅས་པའི་ཞགས་པ་ནག་པོ་དང་། རྡོ་རྗེས་མཚན་པའི་གཏུན་ཤིང་དཀར་པོ་བསྣམས་པ། སྐུའི་ཕྱོགས་གཡོན་དུ་རྩེ་གསུམ་ལ་འཁྱུད་པའོ། །ཞལ་དང་པོ་ནི་སེར་པོའོ། །གཡོན་པ་ནི་དམར་པོའོ། །ཅིག་ཤོས་ནི་དཀར་པོའོ། །སྟེང་དུ་འཇིགས་ཤིང་དུ་བའི་
[226a]
[226a.1]མདོག་ལྟ་བུའོ། །རལ་པ་དམར་སེར་གྱེན་དུ་བརྫེས་ཤིང་བཅིངས་པ། ཐོད་པ་ལྔས་བརྒྱན་པ། པདྨ་དང་ཉི་མའི་དབུས་སུ་བཞུགས་ཤིང་བརྟན་པ་བསྒོམ་པར་བྱའོ། །དེ་བཞིན་དུ་དམ་ཚིག་སེམས་དཔའ་བསྐྱེད་ནས་ཉི་མ་ལ་གནས་པའི་སྙིང་གའི་ས་བོན་གྱི་འོད་
[226a.2]ཟེར་གྱིས་ཡེ་ཤེས་སེམས་དཔའ་གདན་དྲངས་ཏེ་ཡང་དག་པར་མཆོད་པར་བྱའོ། །ཛཿཧཱུཾ་བཾ་ཧོཿཞེས་པ་འདི་རྣམས་ཀྱི་ཡི་གེས་དགུག་པ་དང་། གཞུག་པ་དང་། བཅིང་བ་དང་དབང་དུ་བྱའོ། །དེ་ནས་དེ་བཞིན་གཤེགས་པ་རྣམས་ལ་གསོལ་བ་གདབ་པར་བྱ་སྟེ། དེ་བཞིན་གཤེགས་པ་ཐམས་
[226a.3]ཅད་ཀྱིས་བདག་ལ་དབང་བསྐུར་དུ་གསོལ་ཞེས་སོ། །དེ་ནས་མི་བསྐྱོད་པ་ལ་སོགས་པའི་དེ་བཞིན་གཤེགས་པ་རྣམས་ཀྱིས་རང་གི་ཐུགས་ཀ་ནས་རྣམ་པར་འཕྲོས་པའི་བདུད་རྩི་ལྔས་ཡོངས་སུ་གང་བའི་གསེར་གྱི་བུམ་པས་ཕྱག་ནས་དབང་བསྐུར་བཞིན་པའི་བདག་ཉིད་དུ་བསྒོམ་པར་
[226a.4]བྱའོ། །དེ་ལ་དབང་བསྐུར་བའི་ཚིགས་སུ་བཅད་པ་འདིའོ། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཨཱཿཧཱུཾ་སྭཱ་ཧཱ།
[226a.5]དེ་ནས་རབ་ཏུ་གང་ཞིང་ཡོངས་སུ་གྱུར་པ་ལས་མི་བསྐྱོད་པས་དབུ་བརྒྱན་པར་བསྐྱེད་ལ། སྔགས་བཟླས་ནས་རྟག་ཏུ་བདེ་བའི་ཚིག་གིས་མཆོག་སྟེར་བར་འགྱུར་རོ། །ཨོཾ་བྷ་ག་བ་ཏཱི་དྷྭ་ཛཱ་གྲ་ཀཻ་ཡཱུ་རེ་པ་ར་སཻ་ནྱ་བི་དྷྭཾ་ས་ན་ཀ་རི་སྭ་སཻ་ནྱ་པ་རི་པ་ལ་ནི། ཨུ་པ་ཀཱ་མུ་ཁི་ཁ་ཁ་ཁཱ་ཧི་ཁཱ་ཧི་པར་སཻ་ནྱ་ཨ་
[226a.6]ནནྡ་མུ་ཁེ་ན་ཨ་ནནྡ་བྷུ་ཛེ་ན་པྲ་ཧ་ར་པྲ་ཧ་ར་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྙིང་པོའི་སྔགས་སོ། །ཨོཾ་སརྦ་གྲ་ཧ་ན་ཀྵེ་ཏྲ་དྷྱ་མི་ཀ་ར་ཎི་སྭཱ་ཧཱ་ཉེ་བའི་སྙིང་པོའོ། །ཕྲེང་སྔགས་ནི་གཟུངས་ལས་བལྟ་བར་བྱའོ། །ལངས་པའི་དུས་སུ། ཁྱོད་ཀྱིས་སེམས་ཅན་དོན་ཀུན་མཛད། །ཇི་ལྟར་རྗེས་འཇུག་དངོས་
[226a.7]གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འདིར་ནི་བྱོན་པར་ཞུ། །ཞེས་པའི་སྔགས་འདིས་གཤེགས་ནས་གནས་པར་བྱའོ་ཞེས་སོ།། །།རྒྱལ་མཚན་རྩེ་མོའི་དཔུང་རྒྱན་གྱི་སྒྲུབ་ཐབས་རྫོགས་སོ།། །།པཎྜི་ཏ་ཆོས་ཀྱི་འབྱུང་གནས་བློ་གྲོས་ཞབས་ཀྱིས་མཛད་
[226b]
[226b.1]པའོ།། {T3601}༄༅༅། །རྒྱ་གར་སྐད་དུ། ཨཱརྱ་ཨུཥྞཱི་ཥ་བི་ཛ་ཡཱ་སཱ་དྷ་ནཾ། བོད་སྐད་དུ། འཕགས་མ་གཙུག་ཏོར་རྣམ་པར་རྒྱལ་མའི་སྒྲུབ་ཐབས། འཕགས་མ་གཙུག་ཏོར་རྣམ་པར་རྒྱལ་མ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཁ་བསང་བ་ལ་སོགས་པ་
[226b.2]བྱས་ནས་སྟན་བདེ་བ་ལ་ཉེ་བར་འདུག་སྟེ། ཚད་མེད་པའི་གནས་བཞི་བསྒོམ་པར་བྱའོ། །དེའི་རྗེས་ལ་རང་གི་སྙིང་གར་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་བསམས་ནས། དེའི་སྟེང་དུ་བྷྲཱུཾ་ཡིག་དཀར་པོ་བལྟས་ལ་དེ་ལས་བྱུང་བའི་འོད་ཟེར་གྱི་ཚོགས་ཀྱིས་འགྲོ་བ་
[226b.3]རྣམས་གསལ་བར་མཛད་ནས། མདུན་དུ་སངས་རྒྱས་དང་བྱང་ཆུབ་སེམས་དཔའ་རྣམས་བསམས་ནས་མཆོད་པ་དང་སྡིག་པ་བཤགས་པ་ལ་སོགས་པ་རྣམས་བྱའོ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་སོ། །དེ་ནས་སླར་ཡང་རང་གི་སྙིང་གར་ཟླ་བ་ལ་པཾ་ཡིག་ལས་
[226b.4]སྐྱེས་པའི་སྣ་ཚོགས་ཆུ་སྐྱེས་བསམས་ནས། དེའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་གནས་པའི་བྷྲཱུཾ་ཡིག་དཀར་པོ་བལྟས་ལ། དེ་ཡོངས་སུ་གྱུར་པ་ལས་གཙུག་ཏོར་རྣམ་པར་རྒྱལ་མ་མཆོད་རྟེན་གྱི་དྲུང་དུ་བཞུགས་པ་སྐུ་མདོག་དཀར་མོ་ཞལ་གསུམ་པ་སྤྱན་གསུམ་པ། ཕྱག་
[226b.5]བརྒྱད་པ། རྒྱན་ཐམས་ཅད་ཀྱིས་བརྒྱན་པ། སྣ་ཚོགས་ཆུ་སྐྱེས་དང་ཟླ་བ་ལ་རྡོ་རྗེ་སྐྱིལ་ཀྲུང་བཅིངས་ནས་བཞུགས་པ། ཞལ་དང་པོ་དཀར་པོ། ཞལ་གཡས་པ་སེར་པོ། ཞལ་གཡོན་པ་སྔོན་པོ། མཆེ་བས་མ་མཆུ་མནན་པ། གཡས་ཀྱི་ཕྱག་བཞི་རྣམས་སུ་སྣ་ཚོགས་
[226b.6]རྡོ་རྗེ་དང་། ཆུ་སྐྱེས་དམར་པོའི་སྟེང་ན་བཞུགས་པའི་རྒྱལ་བ་འོད་དཔག་མེད་པ་དང་། མདའ་དང་མཆོག་སྦྱིན་གྱི་ཕྱག་རྒྱ་རྣམས་སོ། །གཡོན་གྱི་ཕྱག་བཞི་རྣམས་སུ་གཞུ་དང་། སྡིགས་མཛུབ་དང་བཅས་པའི་ཞགས་པ་དང་། མི་འཇིགས་པ་སྦྱིན་པའི་ཕྱག་རྒྱ་དང་། བུམ་པ་བཟང་
[226b.7]པོ་རྣམས་སོ། །རྣམ་པར་སྣང་མཛད་ཀྱིས་དབུ་བརྒྱན་ཅིང་ལྷའི་ན་བཟའི་སྟོད་གཡོགས་མནབས་པ། སྣ་ཚོགས་པའི་རྒྱན་གྱིས་བརྒྱན་པ། འོད་ཟེར་དཀར་པོའི་ཕྲེང་བ་ཅན་དུ་བལྟ་བར་བྱའོ། །དེའི་གཡས་ཕྱོགས་སུ་འཇིག་རྟེན་དབང་ཕྱུག་སྐུ་མདོག་དཀར་པོ་གཡོན་ན་
[227a]
[227a.1]པདྨ་བསྣམས་པ། ཕྱག་གཡས་ན་རྔ་ཡབ་བསྣམས་པའོ། །གཡོན་ཕྱོགས་སུ་ཕྱག་ན་རྡོ་རྗེ་སྐུ་མདོག་ཨུཏྤ་ལ་སྔོན་པོའི་འདབ་མ་ལྟ་བུ་ཕྱག་གཡོན་ན་ཨུཏྤ་ལ་ལ་གནས་པའི་རྡོ་རྗེ་བསྣམས་པ། ཕྱག་གཡས་ན་རྔ་ཡབ་བསྣམས་པ་དེ་དག་བཞུགས་པར་བསམ་
[227a.2]པར་བྱའོ། །དེ་ནས་ཤར་དང་། ལྷོ་དང་། ནུབ་དང་། བྱང་ཕྱོགས་རྣམས་སུ་མི་གཡོ་བ་དང་འདོད་པའི་རྒྱལ་པོ་དང་། དབྱུག་སྔོན་ཅན་དང་། སྟོབས་པོ་ཆེ་རྣམས་ཐམས་ཅད་སྐུ་མདོག་སྔོན་པོ་ཕྱག་གཉིས་པ། ཞལ་གཅིག་པ། སྤྱན་གསུམ་པ། ཞབས་གཡོན་བརྐྱང་
[227a.3]བའི་སྟག་གི་པགས་པའི་ན་བཟའ་མནབས་པ། དབུ་སྐྲ་གྱེན་དུ་བརྫེས་པ། ཀླུ་བརྒྱད་ཀྱིས་བརྒྱན་པ། སྣ་ཚོགས་ཆུ་སྐྱེས་དང་ཉི་མ་ལ་བཞུགས་པ། ཕྱག་གཡོན་པ་སྡིགས་མཛུབ་དང་བཅས་པའི་ཞགས་པ་བསྣམས་པ། ཕྱག་གཡས་པ་རྣམས་སུ་རལ་གྲི་དང་། ལྕགས་ཀྱུ་
[227a.4]དང་། དབྱུག་པ་དང་། རྡོ་རྗེ་བསྣམས་པ་བསྒོམ་པར་བྱའོ། །སྟེང་གི་ཕྱོགས་སུ་གནས་གཙང་མའི་རིས་ཀྱི་ལྷའི་བུ་བདུད་རྩིས་བཀང་བའི་བུམ་པ་བསྣམས་ཤིང་བདུད་རྩིའི་རྒྱུན་འབབ་བཞིན་པ་བསམ་པར་བྱའོ། །དེ་ལྟ་བུའི་བཅོམ་ལྡན་འདས་མ་འཁོར་དང་བཅས་པ་བསམ་ཞིང་
[227a.5]དགོད་པར་བྱའོ། །ཨོཾ་ཡིག་ནི་སྤྱི་བོར་རོ། །ཨཱཿཡིག་ནི་མགྲིན་པ་ལའོ། །ཧཱུཾ་ཡིག་ནི་སྙིང་གར་རོ། །ཏྲཱཾ་ཡིག་ནི་དཔྲལ་བ་ལའོ། །ཧྲཱིཿཡིག་ནི་ལྟེ་བ་ལའོ། །ཨཾ་ཨཱཿརྐང་པ་དག་ལའོ། །དེ་ནས་ཕྱག་རྒྱ་བཅིང་བར་བྱའོ། །ཐལ་མོ་ཡང་དག་པར་སྦྱར་ནས་མཛུབ་མོ་བཀུག་ནས་མཐེབ་
[227a.6]ཆེན་དག་དང་སྦྱར་བ་ལེགས་པར་སྦྱིན་པར་མཛད་ནས། ཨོཾ་ཡིག་གསུམ་དང་བཅས་པའི་གཟུངས་ལན་ཅིག་བཟླས་ནས་ཕྱི་ནས་འདུལ་བའི་ཕྱག་རྒྱས་སྔགས་བཟླས་པར་བྱའོ། །ཨོཾ་བྷྲཱུཾ་སྭཱ་ཧཱ་སྙིང་པོའི་སྔགས་སོ། །ཨོཾ་ཨ་མི་ཏ་ཨཱ་ཡུརྡ་དེ་སྭཱ་ཧཱ། ཉེ་བའི་སྙིང་པོའི་སྔགས་སོ། །ཨོཾ་ཨ་
[227a.7]མི་ཏེ་ཨ་མི་ཏོད་བྷ་བེ་ཨ་མེ་ཏ་བི་ཀྲཱན་ཏེ་ཨ་མི་ཏ་ག་ཏེ་ཨ་མི་ཏེ་གཱ་མི་ནི་ཨ་མི་ཏཱ་ཡུརྡ་དེ་ག་ག་ན་ཀཱིརྟི་ཀ་རེ་སརྦ་ཀླེ་ཤ་ཀྵ་ཡཾ་ཀ་རི་ཡཻ་སྭཱ་ཧཱ། ཞེས་པ་ནི་ཕྲེང་བའི་སྔགས་སོ། །འཕགས་མ་གཙུག་ཏོར་རྣམ་པར་རྒྱལ་མའི་སྒྲུབ་ཐབས་རྫོགས་སོ།། །།
[227b]
[227b.1]{T3602}༄༅༅། །རྒྱ་གར་སྐད་དུ། ཨུཥྞཱི་ཥ་བི་ཛ་ཡཱ་སཱ་དྷ་ནཾ། བོད་སྐད་དུ། གཙུག་ཏོར་རྣམ་པར་རྒྱལ་མའི་སྒྲུབ་ཐབས། །འཕགས་མ་གཙུག་ཏོར་རྣམ་པར་རྒྱལ་མ་ལ་ཕྱག་འཚལ་ལོ། །བསམ་གཏན་མ་ཆགས་འགྲོ་ལ་མཉེས། །འགྲོ་མགོན་པདྨ་ལ་བཏུད་
[227b.2]ནས། །རང་ཉིད་སྒྲུབ་ཐབས་དྲན་བྱའི་ཕྱིར། །རྣམ་པར་རྒྱལ་མའི་སྒྲུབ་ཐབས་བཤད། །ས་འཛིན་ལ་སོགས་ཡིད་འོང་བའི། །ཕྱོགས་འགའ་ཞིག་ཏུ་གནས་ནས་ནི། །ཤིན་ཏུ་འཇམ་པའི་སྟན་ལ་འདུག །རྣལ་འབྱོར་བསམ་བྱ་བསམ་པར་བྱ། །སེམས་
[227b.3]ཅན་རྣམས་ཀྱི་བདེ་འབྱུང་བ། །དེ་ལ་ཧཱུཾ་བཅས་འོད་ཟེར་འཕྲོས། །སངས་རྒྱས་རྣམས་ནི་གསལ་བྱས་ནས། །དུས་གསུམ་གཤེགས་རྣམས་མཆོད་པར་བྱ། །མཆོད་ཅིང་དེ་རྣམས་མདུན་དུ་ནི། །ལུས་སོགས་ལས་སྐྱེས་སྡིག་པ་རྣམས། །བགྱིད་སྩལ་དབྱེ་
[227b.4]བས་ཡང་དག་སྐྱེས། །མན་ངག་རིག་པས་ཐམས་ཅད་བཤགས། །དེ་ལས་བྱུང་བ་རྣམ་པར་སྦྱང་། །དགེ་བ་ཀུན་ལ་རྗེས་ཡི་རང་། །དཀོན་མཆོག་གསུམ་ལ་སྐྱབས་སོང་ནས། །སྤྲོས་པ་དང་བཅས་རིམ་པ་བཞིན། །མན་ངག་གིས་ནི་བརྟན་བྱས་ནས། །
[227b.5]ཇི་སྲིད་བྱང་ཆུབ་བར་དུ་བསྒྲུབ། །བརྩེ་བས་སེམས་ཅན་རྣམས་ལ་དམིགས། །བྱང་ཆུབ་སེམས་ཉིད་བསྒོམ་པར་བྱ། །མཚན་མེད་དམིགས་པ་མེད་པ་ཡི། །རང་བཞིན་མེད་པ་མཁའ་དབྱིངས་བཞིན། །དེ་ལ་ཨ་ཡིག་ལས་བྱུང་བའི། །ཆུ་སྐྱེས་ལ་གནས་ཟླ་དཀྱིལ་
[227b.6]ལ། །ས་བོན་ལས་བྱུང་ལྷ་མོ་ནི། །ཞལ་གསུམ་སོ་སོར་སྤྱན་གསུམ་པ། །ལང་ཚོ་གཞོན་ཞིང་ཕུན་སུམ་ཚོགས། །སྒེག་པ་ལ་སོགས་ཉམས་དང་ལྡན། །སངས་རྒྱས་ཀུན་གྱི་ཡོན་ཏན་གང་། །རྒྱན་རྣམས་ཀུན་གྱིས་རྣམ་པར་བརྒྱན། །འོད་ཟེར་
[227b.7]དང་ལྡན་ན་བཟའ་ནི། །སྟོན་ཀའི་ཟླ་བ་དང་མཚུངས་པ། །ཛེེ་བུ་ནཱ་དའི་གསེར་མདོག་ཅན། །གཡས་པའི་ཞལ་ནི་ཞི་བའོ། །དུས་མཐའི་མེ་འབར་སྤྲིན་བཞིན་འཕྲོ། །འཇིགས་ཤིང་མི་བཟད་གཡོན་པའི་ཞལ། །ཕྱག་གཡས་ཉིད་ཀྱི་ཐུགས་ཀར་ནི། །སྣ་ཚོགས་རྡོ་རྗེ་
[228a]
[228a.1]ཡང་དག་བསྣམས། །གཉིས་པ་ཆུ་སྐྱེས་སྟེང་གནས་པའི། །སངས་རྒྱས་དང་ནི་གསུམ་པར་མདའ། །མཆོག་སྦྱིན་ཕྱག་རྒྱ་བཞི་པའོ། །གཡོན་ན་གོ་རིམས་ཇི་བཞིན་དུ། །སྡིགས་མཛུབ་དང་བཅས་ཞགས་པ་དང་། །གཞུ་དང་དེ་བཞིན་མི་འཇིགས་པ། །བུམ་པ་
[228a.2]གང་བ་བསྣམས་པ་ནི། །མཆོད་རྟེན་ནང་བཞུགས་བསྒོམ་པར་བྱ། །སྙིང་གར་ས་བོན་དང་བཅས་པའི། །པདྨ་བསམ་བྱ་དེ་སྟེང་དུ། །འོད་ཟེར་དཀར་པོའི་དྲ་བ་ཡིས། །བསྐུལ་ཞིང་གདན་དྲངས་ནམ་མཁའ་ལ། །སངས་རྒྱས་སྤྲིན་ཚོགས་ཆེན་པོ་དང་། །བྱང་ཆུབ་སེམས་དཔའ་མཐའ་དག་
[228a.3]འཁོད། །བརྩེ་ཆེན་བདག་ཉིད་དེ་རྣམས་ཀྱང་། །རང་རྒྱུད་དུས་གསུམ་འཁོར་བར་བསམ། །དབང་བསྐུར་རབ་ཏུ་སྦྱིན་པར་མཛད། །འབད་པས་རྟག་ཏུ་བསམ་པར་བྱ། །མཆོད་རྟེན་ནང་བཞུགས་ཨོཾ་དང་ཏྲཱཾ། །ཨཱཿཡིག་འོད་ཟེར་རབ་ཏུ་འཕྲོ། །ཧཱུཾ་ཧྲཱིཿཨཾ་ཨཱཿཞེས་པ་ཡི། །ས་བོན་ལས་
[228a.4]སྐྱེས་གོ་རིམས་བཞིན། །སྤྱི་བོ་དཔྲལ་བ་མགྲིན་པའི་གནས། །སྙིང་ག་ལྟེ་བ་རྐང་པའི་གནས། །ཟླ་བའི་དཀྱིལ་འཁོར་དབུས་གནས་པའི། །འཇིག་རྟེན་དབང་ཕྱུག་རྣལ་འབྱོར་བསམ། །སྟོན་ཀའི་ཟླ་འོད་དང་མཚུངས་པ། །འོད་ཟེར་དག་གི་ཕྲེང་བ་འཕྲོ། །ཆུ་སྐྱེས་རྡོ་རྗེ་དག་ལས་
[228a.5]བྱུང་། །གཡས་པ་དག་གིས་རྔ་ཡབ་བསྣམས། །པདྨ་རྡོ་རྗེ་འཛིན་པ་དག །དེ་ཡི་གཡས་གཡོན་ལོགས་སུའོ། །མདུན་དུ་མི་གཡོ་བ་དང་ནི། །འདོད་པའི་རྒྱལ་པོ་གཡས་ཕྱོགས་སུ། །རྒྱབ་ཀྱི་ཕྱོགས་སུ་དབྱུག་སྔོན་ཅན། །གཡོན་དུ་སྟོབས་ཆེན་དགོད་པར་བྱ། །རལ་གྲི་ལྕགས་ཀྱུ་དབྱུག་
[228a.6]པ་དང་། །རྡོ་རྗེ་རྣམས་ནི་ཕྱག་ན་བསྣམས། །གློག་བཅས་རྡོ་རྗེ་ལྟུང་བཞིན་པའི། །དུས་མཐའི་ཆུ་འཛིན་དང་མཚུངས་པ། །སྤྱན་ནི་སོས་ཀའི་ཉི་འོད་བཞིན། །གདུག་པ་རྣམས་ཀྱི་སྲོག་འཕྲོག་བྱེད། །ཀུན་ཀྱི་ཕྱག་གཡོན་རྣམས་ན་ནི། །སྡིགས་མཛུབ་དང་བཅས་ཞགས་པ་
[228a.7]བསྣམས། །འོད་ཟེར་འབར་བའི་ཕྲེང་བས་འཁྲིགས། །སྣ་ཚོགས་པདྨ་ཉི་དཀྱིལ་བཞུགས། །སྔགས་པས་ཉིན་དང་མཚན་མོ་རུ། །རྣལ་འབྱོར་ལྡན་པ་འདི་ཡིས་བསྒོམ། །རྡོ་རྗེའི་ཐེག་པར་རབ་ཞུགས་ནས། །དེ་ཡིས་མྱུར་དུ་བྱང་ཆུབ་འཐོབ། །ཅེས་པ་ནི་གཙུག་ཏོར་རྣམ་པར་རྒྱལ་མའི་སྒྲུབ་ཐབས་རྫོགས་སོ། །
[228b]
[228b.1]{T3603}༄༅༅། །རྒྱ་གར་སྐད་དུ། དེ་ཝཱི་བ་སུ་དྷཱ་རཱ་སཱ་དྷཱ་ནཾ། བོད་སྐད་དུ། ལྷ་མོ་ནོར་རྒྱུན་མའི་སྒྲུབ་ཐབས། ལྷ་མོ་ནོར་རྒྱུན་མ་ལ་ཕྱག་འཚལ་ལོ། །སྔོན་མ་བཞིན་དུ་སྟོང་པ་ཉིད་ཀྱི་མཐར་ཐུག་པར་རྣམ་པར་བསྒོམས་ནས་སྐད་ཅིག་གིས་བདག་ཉིད་ཛཾ་བྷ་ལའི་སྐུར་བསམས་
[228b.2]ནས། རང་གི་སྙིང་གར་ཟླ་བའི་དཀྱིལ་འཁོར་གྱི་དབུས་སུ་བཾ་ཡིག་གི་ས་བོན་ལས་བྱུང་བའི་བཅོམ་ལྡན་འདས་མ་ནོར་རྒྱུན་མ་བསམ་པར་བྱ་སྟེ། སྐུ་མདོག་གསེར་ལྟ་བུ་རྒྱན་ཐམས་ཅད་ཀྱིས་བརྒྱན་པ་ལོ་བརྒྱད་གཉིས་ལོན་པ་ལྟ་བུ། ཕྱག་གཡས་པ་མཆོག་སྦྱིན། གཡོན་པ་རིན་པོ་ཆེའི་
[228b.3]ཕྲེང་བ་བསྣམས་པ། མི་བསྐྱོད་པས་དབུ་བརྒྱན་པའོ། །བཅོམ་ལྡན་འདས་མའི་མདུན་དུ་དཔལ་གྱི་ནོར། གཡས་ཕྱོགས་སུ་ནོར་སྟེར་མ། རྒྱབ་ཀྱི་ཕྱོགས་སུ་དཔལ་གྱི་ནོར་ཞལ་མ། གཡོན་ཕྱོགས་སུ་ནོར་གྱི་བློ་གྲོས་བརྟེན་མའོ། །དེ་རྣམས་ཀྱང་དང་པོའི་ས་བོན་གྱི་ཡི་གེ་ལས་རང་གི་གཙོ་
[228b.4]མོ་དང་མཚུངས་པའི་སྐུར་བསམ་པར་བྱའོ། །དེ་བཞིན་དུ་བསྒོམས་ནས་སྔགས་བཟླས་པར་བྱའོ། །ཨོཾ་བ་སུ་དྷཱ་རཱི་ཎི་སྭཱ་ཧཱ། ཨོཾ་ཤྲཱི་བ་སུ་སྭཱ་ཧཱ། ཨོཾ་བ་སུ་ཤྲཱི་ཡེ་སྭཱ་ཧཱ། ཨོཾ་ཤྲཱི་བ་སུ་མུ་ཁི་སྭཱ་ཧཱ། ཨོཾ་བ་སུ་ཤྲཱི་ཡེ་སྭཱ་ཧཱ། སོ་སོའི་བདག་ཉིད་ལ་བའི་ལྕི་བའི་མཎྜལ་གྲུ་བཞི་པ་ཁྲུ་གཉིས་པའི་
[228b.5]ཚད་དུ་བྱས་ནས་ཐུན་མཚམས་གསུམ་དུ་མེ་ཏོག་དྲི་བཟང་པོས་སྟོང་ཕྲག་བཞིར་མཆོད་པར་བྱའོ། །ཟླ་བ་དྲུག་ཏུ་བཟླས་པས་ཡིད་ཀྱི་ཤིང་རྟ་ཡོངས་སུ་གང་བར་འགྱུར་རོ། །ཇི་ལྟར་རྙེད་པའི་མེ་ཏོག་གི་སྦྱིན་སྲེག་འབུམ་ཕྲག་བཞི་བྱས་པས་དཔལ་ཆེན་མོར་འགྱུར་བའོ། །ནོར་རྒྱུན་མའི་སྒྲུབ་
[228b.6]ཐབས་རྫོགས་སོ།། {T3604}༄༅༅། །རྒྱ་གར་སྐད་དུ། བ་སུ་དྷཱ་རཱ་སཱ་དྷ་ནཾ། བོད་སྐད་དུ། ནོར་རྒྱུན་མའི་སྒྲུབ་ཐབས། ལྷ་མོ་ནོར་རྒྱུན་མ་ལ་ཕྱག་འཚལ་ལོ། །དེ་ནས་ནོར་རྒྱུན་མ་བསྒོམ་པར་འདོད་པས་དེའི་ཚེ་སྔོན་མ་བཞིན་དུ་ཐམས་ཅད་བྱས་ནས། འོན་ཀྱང་དྲུག་པའི་ས་བོན་
[228b.7]ལ་ཟླ་བ་ཕྱེད་པ་དང་ཐིག་ལེས་བརྒྱན་པའོ། །དེ་དེ་བཞིན་དུ་ཡོངས་སུ་རྫོགས་པ་ལས་ནོར་རྒྱུན་མ་སྐུ་མདོག་སེར་མོ་ཕྱག་གཡོན་ན་འབྲུའི་སྙེ་མ་དང་རིན་པོ་ཆེ་སྣ་ཚོགས་པའི་ཆར་འབབ་བཞིན་པའི་བུམ་པ་བསྣམས་པ། ཕྱག་གཡས་པ་མཆོག་སྦྱིན་མཛད་པ། རྒྱན་ཐམས་ཅད་ཀྱིས་བརྒྱན་པ། གྲོགས་
[229a]
[229a.1]མོའི་འཁོར་གྱིས་བསྐོར་བར་བསྒོམ་པར་བྱའོ། །བདག་ཉིད་དེ་བཞིན་དུ་ནོར་རྒྱུན་མ་ཞེས་སོ། །ལག་པ་གཉིས་ཁུ་ཚུར་བཅིངས་ནས་གུང་མོའི་ཚིགས་གསུམ་པ་བཅག་པ་ནོར་རྒྱུན་མའི་ཕྱག་རྒྱའོ། །དེ་ནས་སྔགས་བཟླས་པར་བྱའོ། །ཨོཾ་བ་སུ་ནི་དྷ་ན་ཀྵེ་ཏྲེ་
[229a.2]སྭཱ་ཧཱ། བཅོམ་ལྡན་འདས་མའི་བྲིས་སྐུ་བཀྲམ་ནས་མཆོད་པ་ཆེན་པོ་བྱས་ཏེ་བསྒོམས་ནས་ཉལ་བར་བྱའོ། །དེ་ནས་བཅོམ་ལྡན་འདས་མའི་དངོས་གྲུབ་ཏུ་འགྱུར་རོ། །ནོར་རྒྱུན་མའི་སྒྲུབ་ཐབས་རྫོགས་སོ།། {T3605}༄༅༅། །རྒྱ་གར་སྐད་དུ། བ་སུ་དྷཱ་རཱ་སཱ་དྷ་ནཾ། བོད་སྐད་དུ།
[229a.3]ནོར་རྒྱུན་མའི་སྒྲུབ་ཐབས། ནོར་རྒྱུན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་བཾ་ཡིག་སེར་པོ་ཡོངས་སུ་གྱུར་པ་ལས་སྐུ་མདོག་སེར་མོ་ཞལ་གཅིག་ཕྱག་གཉིས་པ་ལང་ཚོ་གཞོན་ཞིང་རྒྱན་དང་ན་བཟས་རྣམ་པར་བརྒྱན་པ་འབྲས་ཀྱི་སྙེ་མ་དང་རིན་པོ་ཆེའི་ཆར་
[229a.4]འབབ་བཞིན་པའི་བུམ་པ་ཕྱག་གཡོན་ན་བསྣམས་ན། ཕྱག་གཡས་པ་མཆོག་སྦྱིན་མཛད་པ། དཔག་ཏུ་མེད་པའི་གྲོགས་མོའི་འཁོར་གྱིས་བསྐོར་བ། སྣ་ཚོགས་པདྨ་དང་ཟླ་བའི་གདན་ལ་བཞུགས་པ། རིན་ཆེན་འབྱུང་ལྡན་གྱིས་དབུ་བརྒྱན་པ། རང་གི་སྙིང་གའི་ས་བོན་ལས་སྐད་
[229a.5]ཅིག་གིས་བསྐྱེད་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་ཁུ་ཚུར་བྱས་ནས། གུང་མོའི་ཚིགས་གསུམ་པ་བཅག་པ་ནི་ནོར་རྒྱུན་མའི་ཕྱག་རྒྱའོ། །དེ་ནས་ཨོཾ་བ་སུ་དྷཱ་རཱ་རཏྣ་ནི་དྷཱ་ན་ཀྵེ་ཏྲེ་སྭཱ་ཧཱ། ཞེས་པའི་སྔགས་བཟླས་པར་བྱའོ། །ནོར་རྒྱུན་མའི་སྒྲུབ་ཐབས་རྫོགས་སོ།། །།
[229a.6]{T3606}༄༅༅། །རྒྱ་གར་སྐད་དུ། བ་སུ་དྷཱ་རཱི་ཎི་ཨུ་པ་དེ་ཤཿ། བོད་སྐད་དུ། ནོར་རྒྱུན་མའི་གཟུངས་ཀྱི་མན་ངག །འཕགས་མ་ནོར་རྒྱུན་མ་ལ་ཕྱག་འཚལ་ལོ། །ནོར་རྒྱུན་མའི་བྲིས་སྐུའམ། སྐུ་གཟུགས་བཀྲམ་ནས་མདུན་དུ་ཙནྡན་གྱི་མཎྜལ་གྲུ་བཞི་པ་བྱས་ནས། དེ་ནས་བཅོམ་
[229a.7]ལྡན་འདས་མ་བསྐྱེད་ནས་མཆོད་ཅིང་ལག་པ་ཙནྡན་གྱིས་བྱུགས་ཏེ། ནོར་རྒྱུན་མའི་གཟུངས་ཀྱི་པོ་ཏི་སྐུད་པས་བཅིངས་ནས་མེ་ཏོག་ཕྲེང་བ་དཔྱངས་ཏེ་མདུན་དུ་ཆུའི་སྣོད་བཞག་ནས་ནང་དུ་བཅུག་སྟེ། སེམས་ཅན་ཐམས་ཅད་ལ་བྱམས་པའི་སེམས་ཀྱིས་དམིགས་ནས། དངོས་གྲུབ་མངོན་པར་
[229b]
[229b.1]འདོད་པས་སྙིང་གར་བཟུང་སྟེ། ནོར་རྒྱུན་མའི་གཟུངས་བཀླག་པར་བྱའོ། །ཀློག་པ་ཡང་སྭཱ་ཧཱ་དང་ལྡན་པས་སྔགས་རྣམས་ཀྱི་སྭཱ་ཧཱ་ཞེས་པའི་སྒྲ་བརྗོད་པ་ན་མེ་ཏོག་དཀར་པོ་དཱུར་བ་དང་བཅས་ཏེ་ཀ་ར་དང་འབྲས་དང་ཆུའི་སྣོད་དུ་དབུལ་བར་བྱའོ། །གོས་དང་ས་ཕྱོགས་གཙང་མར་ཇི་སྲིད་ཟླ་བ་
[229b.2]དྲུག་བཀླག་ཅིང་ཆུའི་ནང་དུ་གཤེགས་པར་བྱའོ། །ནོར་རྒྱུན་མའི་གཟུངས་ཀྱི་མན་ངག་རྫོགས་སོ།། {T3607}༄༅༅། །རྒྱ་གར་སྐད་དུ། བཛྲ་བཱ་རཱ་ཧཱི་སཱ་དྷ་ནཾ། བོད་སྐད་དུ། རྡོ་རྗེ་ཕག་མོའི་སྒྲུབ་ཐབས། རྡོ་རྗེ་ཕག་མོ་ལ་ཕྱག་འཚལ་ལོ། །རྣལ་འབྱོར་པས་སྔ་བར་ལངས་ནས་
[229b.3]ཞལ་བསང་བ་ལ་སོགས་པ་བྱས་ནས་དམ་ཚིག་གི་རི་ལུ་ཞལ་དུ་བཅུག་སྟེ། རིའི་ཕུག་ལ་སོགས་པ་ཡིད་དུ་འོང་བའི་གནས་སུ་སྣ་ཚོགས་རྡོ་རྗེའི་སྟན་ལ་འདུག་ནས་ཨཱ་ལི་དང་ཀཱ་ལི་དབྱངས་ལན་གསུམ་བརྗོད་པས་བདག་ཉིད་རྡོ་རྗེ་ཕག་མོར་གྱུར་ནས་དེའི་རྣམ་པ་ཅན་དུ་འགྲོ་བ་ཐམས་ཅད་
[229b.4]ངེས་པར་བྱས་ཏེ། རང་གི་སྙིང་གར་ཆུ་སྐྱེས་དང་ཉི་མ་ལ་བཾ་ཡིག་དམར་པོ་བལྟས་ནས་དེ་ལས་བྱུང་བའི་འོད་ཟེར་དམར་པོ་བསྐལ་པའི་མེ་ལྟ་བུའི་ཤིན་ཏུ་མི་བཟད་པ་འོག་མིན་གྱི་གནས་སུ་སོང་ནས་རྡོ་རྗེ་ཕག་མོ་འཆད་པར་འགྱུར་བའི་སྐུ་མདོག་དང་ཕྱག་མཚན་དང་ལྡན་པ་དང་། བླ་མ་དང་སངས་
[229b.5]རྒྱས་དང་བྱང་ཆུབ་སེམས་དཔའ་རྣམས་མདུན་གྱི་ནམ་མཁའ་ལ་སྤྱན་དྲངས་ནས་བཞུགས་ཏེ། སྙིང་ག་ནས་ཕྱུང་བའི་འོད་ཟེར་གྱི་མཆོད་པ་རྣམས་ཀྱིས་ཡང་དག་པར་མཆོད་ནས། དེའི་མདུན་དུ་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། དགེ་བ་ཡོངས་སུ་བསྔོ་བ་དང་།
[229b.6]གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་ལ་སོགས་པ་བྱས་ནས་ཚད་མེད་པའི་གནས་བཞི་རྣམ་པར་བསྒོམས་ཏེ། དེ་ནས་ཆོས་ཐམས་ཅད་རྡོ་རྗེའི་རང་བཞིན་གྱི་སྟོང་པ་ཉིད་དུ་བྱས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭབྷཱ་ཝ་ཨཱཏྨ་ཀོ྅ཧཾ། ཞེས་པའི་སྔགས་ཀྱི་དོན་མངོན་དུ་
[229b.7]བྱས་ནས་སྐད་ཅིག་གིས་མི་གནས་པའི་སྐུར་བསམ་པར་བྱའོ། །སྔོན་གྱི་སྨོན་ལམ་གྱི་དབང་གིས་ཏིང་ངེ་འཛིན་ལས་རྣམ་པར་བཞེངས་ནས་ནམ་མཁའ་ལ་ཡཾ་རཾ་བཾ་ལཾ་ཡོངས་སུ་གྱུར་པ་ལས་གཞུའི་དབྱིབས་དང་ཟུར་གསུམ་དང་ཟླུམ་པོ་དང་གྲུ་བཞི་རྣམས་ནག་པོ་དང་དམར་པོ་དང་དཀར་པོ་དང་སེར་
[230a]
[230a.1]པོ་རྣམས་ཏེ་འབྱུང་བ་ཆེན་པོ་བཞིའི་དཀྱིལ་འཁོར་རྣམས་སྟེང་ནས་སྟེང་དུ་བལྟ་བར་བྱའོ། །དེའི་སྟེང་དུ་སུཾ་ཡིག་ལས་བྱུང་བའི་རི་རབ་གྲུ་བཞི་པ་རིན་པོ་ཆེ་བཞིའི་རང་བཞིན་ཅན་ལྕོག་བརྒྱད་ཀྱིས་ཉེ་བར་མཛེས་པ་རྣམ་པར་བསམས་ནས། དེའི་སྟེང་དུ་ཨོཾ་མེ་དི་ནཱི་བཛྲཱི་
[230a.2]བྷ་བ་བཛྲ་བནྡྷ་ཧཱུཾ། ཨོཾ་བཛྲ་པྲཱ་ཀཱ་རཱ་ཧཱུཾ་བཾ་ཧཱུཾ། ཨོཾ་བཛྲ་པཾ་ཛ་ར་ཧཱུཾ་ཡཾ་ཧཱུཾ། ཨོཾ་བཛྲ་བི་ཏཱ་ན་ཧཱུཾ་ཁཾ་ཧཱུཾ། ཨོཾ་ཤ་ར་ཛཱ་ལ་ཏྲཱཾ་ཤཾ་ཏྲཱཾ། ཨོཾ་བཛྲ་ཛྭ་ལཱ་ན་ལཱརྐ་ཧཱུཾ་ཧཱུཾ་ཧཱུཾ། སྔགས་འདི་རྣམས་ཀྱིས་རྡོ་རྗེའི་ས་གཞི་ལ་སོགས་པའི་རིམ་པ་དྲུག་གོ། །བསྒྲུབས་ནས་དེའི་ནང་དུ་གྲུ་བཞི་ལ་སོགས་པའི་མཚན་
[230a.3]ཉིད་ཐམས་ཅད་དང་ལྡན་པའི་གཞལ་ཡས་ཁང་རྣམ་པར་བསམས་ནས་དེའི་དབུས་སུ་པཾ་ཡིག་དམར་པོ་ལས་སྐྱེས་པའི་པདྨ་འདབ་མ་བརྒྱད་པའོ། །དེའི་ཟེའུ་འབྲུ་ལ་ཨཱ་ལི་ཀཱ་ལི་ཡོངས་སུ་གྱུར་པ་ལས་ཟླ་བ་དང་ཉི་མ་ཡང་དག་པར་སྦྱོར་བ་འོད་དམར་པོ་རྡོ་རྗེའི་ནང་དུ་སོང་བ་ལས་བཾ་ཡིག་
[230a.4]དམར་པོའི་རང་བཞིན་འོད་རབ་ཏུ་གསལ་བར་བལྟ་བར་བྱའོ། །དེ་ཐམས་ཅད་ཡོངས་སུ་གྱུར་པ་ལས་བདག་ཉིད་བཅོམ་ལྡན་འདས་མ་རྡོ་རྗེ་ཕག་མོ་སེ་འབྲུའི་མེ་ཏོག་ལྟ་བུ་ཕྱག་གཉིས་པ། ཕྱག་གཡས་པ་རྡོ་རྗེའི་སྡིགས་མཛུབ་མཛད་པ། གཡོན་ན་ཐོད་པ་དང་ཁ་ཊྭཱཾ་ག་བསྣམས་པ་ཞལ་
[230a.5]གཅིག་པ། སྤྱན་གསུམ་པ། སྐྲ་གྲོལ་བ། ཕྱག་རྒྱ་དྲུག་གིས་བརྒྱན་པ། ཕྱོགས་ཀྱི་གོས་ཅན་ཡེ་ཤེས་ལྔའི་བདག་ཉིད་ལྷན་ཅིག་སྐྱེས་པའི་དགའ་བའི་རང་བཞིན་ཅན། ཞབས་གཡས་བརྐྱང་བས་འཇིགས་བྱེད་དང་དུས་མཚན་མནན་པ། མགོ་བོ་རློན་པའི་ཕྲེང་བས་སྐུ་ལ་བརྒྱན་
[230a.6]པ། ཁྲག་འཛག་བཞིན་པ་འཐུང་བ་བསྒོམ་པར་བྱའོ། །དེ་ནས་ཤར་ལ་སོགས་པའི་འདབ་མ་བཞི་རྣམས་ལ་གོ་རིམས་ཇི་ལྟ་བ་བཞིན་དུ་གཡོན་སྐོར་དུ་མཁའ་འགྲོ་མ་དང་། ལཱ་མ་དང་། དུམ་སྐྱེས་མ་དང་། གཟུགས་ཅན་མ་རྣམས་ནག་མོ་དང་། ལྗང་གུ་དང་། དམར་མོ་དང་། དཀར་མོ་
[230a.7]རྣམས་ཏེ་དེ་རྣམས་ཞལ་གཅིག་པ། ཕྱག་བཞི་པའོ། །ཕྱག་གཡོན་ན་ཁ་ཊྭཱཾ་ག་དང་ཐོད་པ་བསྣམས་པ། གཡས་ན་ཌ་མ་རུ་དང་གྲི་གུག་བསྣམས་པ། སྤྱན་གསུམ་པ། དབུ་སྐྲ་གྲོལ་བ། གཅེར་བུ་ཞབས་གཡས་བརྐྱང་གིས་བཞུགས་པ། ཕྱག་རྒྱ་ལྔས་
[230b]
[230b.1]རྣམ་པར་བརྒྱན་པར་བསྒོམ་པར་བྱའོ། །མཚམས་ཀྱི་འདབ་མ་བཞི་རྣམས་ལ་བྱང་ཆུབ་ཀྱི་སེམས་ལ་སོགས་པས་གང་བའི་ཐོད་པ་རྣམས་བསྒོམ་པར་བྱའོ། །དེའི་རྗེས་ལ་སྙིང་གའི་ས་བོན་ལས་འོད་ཟེར་འཕྲོས་ནས་བཅོམ་ལྡན་འདས་མའི་ཡེ་ཤེས་ཀྱི་འཁོར་ལོ་ཛཿཡིག་གིས་
[230b.2]སྤྱན་དྲངས་ནས། ཧཱུཾ་ཡིག་གིས་རང་དམ་ཚིག་གི་འཁོར་ལོ་ཆུ་ལ་ཆུ་བཞིན་དུ་གཞུག་པར་བྱའོ། །བཾ་ཡིག་གིས་བཅིངས་ནས་ཧོཿཡིག་གིས་མཉེས་པར་བྱའོ། །དེ་ནས་ཨོཾ་བཾ་བྷྲཱུཾ་ཧཱུཾ་ཁཾ་ཨཱཿཧཱཾ་ཧ། ཞེས་པའི་ཡི་གེ་རྣམས་ཀྱིས་སྐྱེ་མཆེད་རྣམས་སྦྱང་བར་བྱའོ། །ལྷ་མོ་དྲུག་གི་དག་པ་
[230b.3]དང་། །སྔགས་ཀྱི་རྐང་པ་རྣམས་ཀྱིས་བཅོམ་ལྡན་འདས་མའི་གོ་ཆར་བྱའོ། །ཨོཾ་བཾ་ལྟེ་བ་ལའོ། །ཧཾ་ཡཾ་ཐུགས་ཀའོ། །ཧྲཱིཾ་མཾ་ཞལ་ལོ། །ཧྲཱེཾ་ཧྲཱིཾ་དབུ་ལའོ། །ཧཱུཾ་ཧཱུཾ་སྤྱི་བོ་ལའོ། །ཕཊ་ཕཊ་སྐུ་ཐམས་ཅད་ལ་ན་བཟར་བྱའོ། །དེ་ནས་བཅོམ་ལྡན་འདས་མའི་སྐུ་གསུང་ཐུགས་
[230b.4]རྣམས་ལ་གོ་རིམས་ཇི་ལྟ་བ་བཞིན་དུ་ཨོཾ་ཨཱཿཧཱུཾ་ཞེས་པ་རྣམ་པར་དགོད་དོ། །བསྒོམས་པས་ངལ་ན་སྔགས་བཟླས་པར་བྱའོ། །དེ་ལ་སྔགས་ནི་ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ་ཞེས་སོ། །ཐུན་མཚམས་གསུམ་དུ་གཏོར་མ་སྔོན་དུ་འགྲོ་བས་བཅོམ་ལྡན་འདས་མ་བསྒོམ་པར་བྱའོ། །
[230b.5]སྤྱོད་ལམ་ཐམས་ཅད་ལ་གོ་རིམས་ཇི་ལྟ་བ་བཞིན་དུ་བཅོམ་ལྡན་འདས་མའི་སྐུ་གཟུགས་ཀྱིས་གནས་པར་བྱའོ་ཞེས་སོ། །རྡོ་རྗེ་ཕག་མོའི་སྒྲུབ་ཐབས་རྫོགས་སོ།། །།པཎྜི་ཏ་ཆེན་པོ་ཨ་བ་དྷཱུ་ཏཱི་པ་དཔལ་ལྡན་གཉིས་མེད་རྡོ་རྗེའི་ཞབས་ཀྱིས་མཛད་པའོ།། །།
[230b.6]{T3608}༄༅༅། །རྒྱ་གར་སྐད་དུ། པྲཛྙཱ་ལོ་ཀ་སཱ་དྷ་ནཾ་བི་དྷིཿ། བོད་སྐད་དུ། ཤེས་རབ་ཀྱི་སྣང་བ་སྒྲུབ་པའི་ཆོ་ག །རྡོ་རྗེ་ཕག་མོ་ལ་ཕྱག་འཚལ་ལོ། །བློ་ངན་བསྲེག་མཁས་སྨྲ་བ་ངན་པའི་ཕྱོགས་འཇིག་ཅིང་། །དུག་འཇོམས་སྐྱེ་བོའི་ཚོགས་རྣམས་ཐར་ལ་བདེ་བར་སྐྱོང་། །རབ་ཞི་བདེ་
[230b.7]བ་འཕེལ་མཛད་རྡོ་རྗེ་ཕག་མོ་ལ། །ཀཾ་ཀས་བྱིན་ནི་ཕྱག་འཚལ་ལྷ་མོའི་ཚོགས་པ་བྲི། །དེ་ལ་མཚན་མོ་ནམ་ཕྱེད་ཀྱི་ཐུན་གྱི་ལྷག་མ་ལ་ཆོ་ག་བཞིན་དུ་ལངས་ནས་དུར་ཁྲོད་ལ་སོགས་པ་ཡིད་དང་མཐུན་པའི་གནས་འགའ་ཞིག་ཏུ་ཙནྡན་བཟང་པོ་ལ་སོགས་པས་བྱུགས་ཏེ་མེ་ཏོག་སྣ་
[231a]
[231a.1]ཚོགས་པས་གཅལ་དུ་བཀྲམ་པས་ཉེ་བར་མཛེས་པ་ལ། མངོན་སུམ་དུ་རོའི་གདན་ནམ། ཡང་ན་ཇི་ལྟ་བའི་སྟན་བདེ་བ་ལ་ཉེ་བར་འདུག་སྟེ། བྱམས་པ་ལ་སོགས་པ་བསྒོམ་པ་སྔོན་དུ་འགྲོ་བས་རང་གི་སྙིང་གར་ཨ་ཡིག་ལས་སྐྱེས་པའི་ཉི་མའི་དཀྱིལ་འཁོར་ལ་ཧྲཱིཿཡིག་
[231a.2]དཀར་པོ་ལས་སྐྱེས་པའི་འོད་ཟེར་གྱི་དྲ་བས་རབ་ཏུ་གསལ་བར་མཛད་ནས། རྡོ་རྗེ་ཕག་མོ་ལ་སོགས་པའི་བླ་མ་དང་རྣལ་འབྱོར་མ་རྣམས་དང་། བྱང་ཆུབ་སེམས་དཔའ་དང་དེ་བཞིན་གཤེགས་པ་རྣམས་ཇི་ལྟ་བ་བཞིན་དུ་མདུན་དུ་མངོན་སུམ་དུ་ཡང་དག་པར་བལྟས་ནས་སྙིང་གའི་ས་
[231a.3]བོན་ལས་བྱུང་བའི་རབ་ཏུ་གཏུམ་མོ་དང་། དྲག་མིག་མ་དང་། འོད་ལྡན་མ་དང་། སྣ་ཆེན་མ་དང་། དཔའ་བོའི་བློ་གྲོས་མ་དང་། མིའུ་ཐུང་མ་དང་། ལངྐའི་དབང་ཕྱུག་མ་དང་། ཤིང་གྲིབ་མ་སྟེ། ཐུགས་ཀྱི་འཁོར་ལོའི་ལྷ་མོ་བརྒྱད་པོ་རྣམས་དང་། ས་སྲུང་མ་དང་། འཇིགས་བྱེད་
[231a.4]ཆེན་མོ་དང་། རླུང་ཤུགས་མ་དང་། ཆང་འཐུང་མ་དང་། ལྷ་མོ་སྔོ་བསངས་མ་དང་། ཤིན་ཏུ་བཟང་མོ་དང་། རྟ་རྣ་མ་དང་། བྱ་གདོང་མ་སྟེ་གསུང་གི་འཁོར་ལོའི་ལྷ་མོ་བརྒྱད་པོ་རྣམས་དང་། འཁོར་ལོའི་ཤུགས་ཅན་མ་དང་། དུམ་སྐྱེས་མ་དང་། ཆང་འཚོང་མ་དང་། འཁོར་ལོའི་གོ་
[231a.5]ཆ་མ་དང་། ཤིན་ཏུ་དཔའ་མོ་དང་། སྟོབས་ཆེན་མ་དང་། འཁོར་ལོས་སྒྱུར་མ་དང་། བརྩོན་འགྲུས་ཆེན་མོ་སྟེ། སྐུའི་འཁོར་ལོའི་ལྷ་མོ་བརྒྱད་པོ་རྣམས་ཏེ། ནག་པོ་དང་དམར་པོ་དང་དཀར་པོའི་ཁ་དོག་རྣམས་སོ། །མི་བསྐྱོད་པ་དང་། འོད་དཔག་མེད་དང་རྣམ་པར་སྣང་མཛད་རྣམས་ཀྱིས་
[231a.6]དབུ་བརྒྱན་པ་ཟླ་བའི་གདན་ལ་བཞུགས་པ། སྤྱན་གསུམ་པ། ཕྱག་རྒྱ་ལྔས་བརྒྱན་པ། རྡོ་རྗེ་དང་། པདྨ་དང་། འཁོར་ལོ་དང་ཐོད་པའི་ཕྲེང་བ་དང་། ཟུར་ཕུད་གསུམ་གྱིས་དབུ་བརྒྱན་པ། གྲི་གུག་དང་ཐོད་པ་དང་ཁ་ཊྭཱཾ་ག་དང་། ལག་པའི་འདབ་མས་མཆོད་པ་ཐོགས་པ་རྣམས་ཀྱིས་
[231a.7]མཆོད་ཡོན་ལ་སོགས་པ་སྔོན་དུ་འགྲོ་བས་མཆོད་ནས་ཕྱག་འཚལ་བ་དང་། སྡིག་པ་བཤགས་པ་དང་། ཕྱིན་ཆད་མི་བྱེད་པའི་སྡོམ་པ་དང་། བསོད་ནམས་ལ་རྗེས་སུ་ཡི་རང་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་ལ་བརྟེན་པ་དང་། བདག་
[231b]
[231b.1]ཉིད་དབུལ་བ་དང་། བསྐུལ་མ་འདེབས་པ་དང་། གསོལ་བ་འདེབས་པ་རྣམས་ཆོ་ག་བཞིན་དུ་བསྒྲུབས་ནས་བསོད་ནམས་ཡོངས་སུ་བསྔོ་བར་བྱའོ། །སྟོང་པ་ཉིད་ཀྱི་ཡེ་ཤེས་བསྒྲུབས་ལ་སྤྱི་བོར་ཐལ་མོ་ཡང་དག་པར་སྦྱར་ནས་ཚིགས་སུ་བཅད་པ་བརྗོད་པ་སྔོན་དུ་འགྲོ་བས་དེ་བཞིན་
[231b.2]གཤེགས་པ་རྣམས་ལ་བསྐུལ་མ་གདབ་པར་བྱའོ། །དེ་ལ་ཚིགས་སུ་བཅད་པ་འདིའོ། །ཨོཾ་དེ་བཞིན་གཤེགས་པ་ཀུན་གྱིས་སྔགས། །སེམས་ཅན་ཀུན་གྱི་དངོས་གྲུབ་ཀུན། །ཕུན་སུམ་ཚོགས་པ་ཀུན་འབྱུང་བར། །དེ་བཞིན་གཤེགས་རྣམས་བཞུགས་སུ་གསོལ། །ཨོཾ་སྭ་
[231b.3]བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་སོ། །དེའི་རྗེས་ལ་མཆོད་པར་བྱ་བ་དང་། མཆོད་པ་དང་མཆོད་པར་བྱེད་པ་པོའི་ཆོས་ཐམས་ཅད་ཀྱང་སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པའི་རྣམ་པས་རྨི་ལམ་གྱི་རྐྱེན་བཞིན་དུ་བདག་ཉིད་སོ་སོར་རིག་པས་ལྷག་པར་
[231b.4]གྲོལ་བར་བྱའོ། །སྙིང་གའི་སྔགས་ཀྱི་འོད་ཟེར་གྱི་དྲ་བས་རང་བཞིན་མེད་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་ང་རྒྱལ་བྱའོ། །དེ་ནས་རང་གི་སེམས་པཾ་ཡིག་དམར་པོའི་ཚུལ་གྱིས་ཡོངས་སུ་གྱུར་པ་ལས་པདྨ་དམར་པོའི་སྟེང་དུ་ཨཾ་ཡིག་ལས་སྐྱེས་པའི་ཉི་
[231b.5]མའི་དཀྱིལ་འཁོར་ལ་ཧཱུཾ་ཡིག་དཀར་པོ་ལས་ཉི་མ་དང་། ཟླ་བ་ལ་གནས་པའི་ཧྲཱིཿདཀར་པོས་བྱིན་གྱིས་བརླབས་པའི་རྡོ་རྗེ་རྩེ་ལྔ་པ་དམར་པོ་བསྒོམ་པར་བྱའོ། །སྤྲོ་བ་དང་བསྡུ་བ་སྔོན་དུ་འགྲོ་ཞིང་དེ་ཡོངས་སུ་གྱུར་པ་ལས་བདག་ཉིད་རྡོ་རྗེ་ཕག་མོ་བཅུ་དྲུག་གི་རྣམ་པ་སྟོན་ཀའི་ཟླ་
[231b.6]བ་ལྟར་དཀར་བ་ལ་སྤྱན་གསུམ་དམར་ཞིང་ཟླུམ་པ། ཅུང་ཟད་མཆེ་བ་གཙིགས་པའི་ཞལ་མངའ་བ། སྣ་ཚོགས་པའི་མེ་ཏོག་གིས་རྣམ་པར་མཛེས་པ། དབུ་སྐྲ་གྲོལ་བ་ཕྱེད་བཅིངས་བས་རྣམ་པར་མཛེས་པ། རྡོ་རྗེ་ནག་པོའི་ཕྲེང་བ་གཉིས་ཀྱི་དབུས་སུ་ཐོད་པའི་ཕྲེང་བ་དང་ཟུར་ཕུད་གསུམ་བཅིངས་
[231b.7]པ། འཁོར་ལོ་དང་རྣ་རྒྱན་དང་མགུལ་རྒྱན་དང་ལག་གདུབ་དང་སྐ་རགས་ཀྱིས་བརྒྱན་པ། འགྱིང་བཞིན་པའི་བ་དན་གསུམ་འབར་བ། ཕྱག་གཡས་ཀྱི་འདབ་མ་ན་གནས་པ། སྔོན་དུ་གསུངས་པའི་རྡོ་རྗེས་སྐྱེས་བུའི་མི་ཤེས་པའི་འཇིགས་པ་རྣམ་པར་འཇོམས་པ། ཕྱག་གཡོན་པ་ན་དབྱུག་
[232a]
[232a.1]པ་དཀར་པོ་སྟེང་གི་རྩེ་མོ་ན་རྡོ་རྗེ་རྩེ་མོ་ལྔ་པ། འོག་ཏུ་མི་མགོ་སྐམ་པོ་དང་མགོ་བོ་རློན་པ་དང་སྣ་ཚོགས་རྡོ་རྗེ་གསེར་གྱི་བུམ་པའི་རྩ་བ་ལས་བྱུང་བ་སྒྲ་དང་བཅས་པའི་དྲིལ་བུ་གཡེར་ཀ་ཕྲ་མོས་བརྒྱན་པ་བ་དན་སྣ་ཚོགས་པས་རྣམ་པར་མཛེས་པའི་དབྱུག་པ་དཔུང་པ་ལ་རེག་པའི་
[232a.2]ཁ་ཊྭཱཾ་ག་དང་བདུད་བཞིའི་ཁྲག་གིས་གང་བའི་པདྨའི་སྣོད་བསྣམས་པ། ཁྲག་འཛག་བཞིན་པའི་མགོ་བོ་རློན་པ་ལྔ་བཅུའི་ཕྲེང་བ་མགུལ་དུ་འཕྱང་བ། པདྨ་དམར་པོའི་སྟེང་དུ་ཉི་མ་ལ་གནས་པའི་ཤེས་པ་མེད་པའི་སྐྱེས་བུ་ཞབས་གཡས་བརྐྱང་གིས་བཞུགས་པ། གཅེར་བུ་རབ་ཏུ་
[232a.3]གཏུམ་པ་ཉི་མའི་འོད་ལྟ་བུ་རབ་ཏུ་འཕྲོ་བའི་བ་སྤུའི་ཕྲེང་བ་ཅན། གཟུགས་བརྙན་དང་མཚུངས་པ། སྒེག་པ་ལ་སོགས་པའི་ཉམས་དགུ་དང་ལྡན་པ། སྤྲུལ་པ་སྣ་ཚོགས་པས་ཕྱོགས་བཅུར་འགྲོ་བའི་དོན་མཛད་པ། གཞན་ཉི་མ་ལ་གནས་པའི་ཧྲཱིཿཡིག་གིས་བྱིན་གྱིས་བརླབས་པ། ཉི་མ་ལ་
[232a.4]གནས་པའི་རྡོ་རྗེ་སྙིང་པོ་ལ་བདག་ཉིད་རྡོ་རྗེ་ཕག་མོར་བསྒོམ་པར་བྱའོ། །དེ་ལས་སྙིང་གའི་ས་བོན་གྱི་འོད་ཀྱི་དྲ་བས་སེམས་ཅན་ཐམས་ཅད་དེའི་གཟུགས་སུ་གྱུར་པར་བསྐྱེད་ནས་བདག་ལ་རབ་ཏུ་ཞུགས་ཏེ། བདག་ཉིད་བཅོམ་ལྡན་འདས་མ་རྡོ་རྗེ་ཕག་མོའོ་ཞེས་པའི་ང་རྒྱལ་བསྐྱེད་
[232a.5]པར་བྱའོ། །དེའི་རྗེས་ལ་རང་གི་ལྟེ་བར་སྣ་ཚོགས་པདྨ་ལ་ཉི་མ་དཀར་དམར་ལ་ཧྲཱིཿཡིག་དཀར་པོར་བལྟས་ལ། དེ་ལ་སྔགས་ནི་ཕྲེང་བའི་རྣམ་པ་དཀར་པོ་འཁོར་ལོ་འཁོར་བཞིན་པ་བཞིན་དུ་སྦྱོར་བས་ཞལ་གྱི་སྒོ་ནས་འཐོན་ཏེ། སངས་རྒྱས་ཀྱི་ཡོན་ཏན་གྱི་ཚོགས་དང་། ནོར་བུ་དང་། སྔགས་
[232a.6]དང་། སྨན་དང་། ཟླ་བ་དང་། སྐར་མ་དང་། རི་མོ་དང་། བསྟན་བཅོས་དང་། སྒྱུ་རྩལ་ལ་སོགས་པའི་མཐུ་རྣམས་བཀུག་ནས་ལྟེ་བའི་བུ་ག་ནས་རབ་ཏུ་ཞུགས་ཏེ། རང་དང་གཞན་གྱི་མི་ཤེས་པ་ཐམས་ཅད་བསྲེག་པར་བདག་ཉིད་བསྒོམ་པར་བྱའོ། །དེ་ནས་སྙིང་གའི་ས་བོན་གྱི་འོད་ཟེར་གྱིས་ཡང་
[232a.7]དག་པར་བསྐུལ་ནས་ནམ་མཁའ་ལ་བཞུགས་པའི་ཡེ་ཤེས་པའི་ལྷ་མོ་མདུན་དུ་བལྟས་ནས། སྔོན་དུ་གསུངས་པའི་ལྷ་མོའི་ཚོགས་རྣམས་ཀྱིས་མཆོད་ཡོན་ལ་སོགས་པ་སྔོན་དུ་འགྲོ་བས་མཆོད་ནས་ཕཻཾ་ཡིག་གི་སྔགས་བརྗོད་པ་སྔོན་དུ་འགྲོ་བས་འབར་བའི་ཕྱག་རྒྱ་དཔྲལ་བར་བཅིངས་ཏེ།
[232b]
[232b.1]གཡོན་དུ་འཁོར་བཞིན་པས་སྤྱན་དྲང་བར་བྱའོ། །དེ་དག་གཅིག་ཏུ་གྱུར་པས་བསྒོམ་ཞིང་སྔགས་ཀྱིས་ང་རྒྱལ་བྱའོ། །དེ་ལ་སྔགས་ནི་འདིའོ། །ཨོཾ་ཡོག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅ཧཾ། དེ་ལ་དེའི་ས་བོན་གྱིས་ཡང་དག་པར་བསྐུལ་ནས་ནམ་མཁའ་ལ་བཞུགས་པའི་མི་བསྐྱོད་པ་ལ་སོགས་པའི་དེ་བཞིན་
[232b.2]གཤེགས་པ་རྣམས་གདན་དྲངས་ཏེ། དེ་རྣམས་ཀྱིས་བདུད་རྩི་ལྔར་གྱུར་པའི་དེ་བཞིན་གཤེགས་པ་ལྔའི་བདག་ཉིད་ཀྱི་བུམ་པ་རྣམས་དང་། དེར་སྤྲུལ་པ་སྣ་ཚོགས་པའི་རོལ་མོ་དང་རྔ་དང་དུང་དང་རྫ་རྔ་དང་འཁར་རྔ་དང་པི་ཝང་དང་གླིང་བུ་དང་གླུ་དབྱངས་རྣམས་དང་། ལྷ་དང་ལྷ་མ་ཡིན་རྣམས་
[232b.3]ཀྱང་ཅ་ཅོའི་དཔུང་གཉེན་རྣམས་དང་། གུར་གུམ་དང་ག་བུར་དང་གླ་རྩི་དང་དྲི་བཟངས་མེ་ཏོག་གི་ཆར་འབབ་པ་དང་། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་རྣམས་ཁྲུས་གསོལ་བ། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་ཀྱང་ཁྲུས་བྱའོ། །ཞེས་པའི་ཚིགས་སུ་བཅད་པ་བརྗོད་
[232b.4]པས་བདག་ཉིད་ལ་དབང་བསྐུར་བར་བྱའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་ཞེས་པ་འདིས་བྱིན་གྱིས་བརླབ་ཅིང་སྣ་ཚོགས་པདྨ་དང་ཉི་མ་ལ་བཞུགས་པའི་མི་བསྐྱོད་པ་དབུ་ལ་བཞུགས་པར་བསམ་པར་བྱའོ། །དེ་ནས་དེའི་སྤྲུལ་པ་རབ་ཏུ་གཏུམ་མོ་ལ་སོགས་པའི་ལྷ་མོ་རྣམས་ཀྱིས་དེ་
[232b.5]ལ་སྤྲུལ་པ་རྣམ་པ་སྣ་ཚོགས་པའི་མཆོད་པ་རྣམས་ཀྱིས་མངོན་པར་མཆོད་ནས་འཆད་པར་འགྱུར་བའི་རིམ་པས་བདུད་རྩི་མྱང་བ་ལ་སོགས་པ་བྱས་ནས་ཇི་སྲིད་འདོད་ཀྱི་བར་དུ་བསམ་གཏན་བྱས་ནས་སྤྲོ་བ་དང་བསྡུ་བ་ལ་སོགས་པ་སྔོན་དུ་འགྲོ་བས་མྱུར་བ་ལ་སོགས་པའི་ཉེས་པ་དང་བྲལ་བས་སྔགས་
[232b.6]བཟླས་པར་བྱའོ། །དེ་ལ་སྔགས་ནི་འདིའོ། །ཧྲིའིཿགང་གི་ཚེ་ལྡང་བར་འདོད་ན་དེའི་སྔགས་ཀྱི་ཕྲེང་བ་ལྟེ་བ་ལ་གནས་པའི་ཧྲཱིཿཡིག་ལ་བསྒོམ་པར་བྱའོ། །མཆོད་པ་ལ་སོགས་པ་སྔོན་དུ་འགྲོ་བས་སྨོན་ལམ་བཏབ་སྟེ་ཡོངས་སུ་བསྔོ་བ་བྱས་ནས་ཡི་གེ་བརྒྱ་པ་ལན་གསུམ་བརྗོད་དེ་ལྷ་མོའི་ང་
[232b.7]རྒྱལ་གྱིས་བྱ་བ་བྱའོ། །ཆོས་ཐམས་ཅད་ཀྱང་དེ་ལ་གཉིས་སུ་མེད་པར་བལྟ་ཞིང་སྤྱོད་ལམ་ཅི་བདེ་བར་བྱའོ། །དེ་ལ་ཡི་གེ་བརྒྱ་པའི་སྔགས་ནི་འདི་ལྟ་སྟེ། ཨོཾ་ཨཱཿ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ་བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ་སུ་ཏོ་ཥྱོ་མེ་བྷ་བ་སུ་པོ་ཥྱོ་མེ་བྷ་བ་ཨ་ནུ་རཀྟོ་མེ་བྷ་བ། སརྦ་སིདྡྷིཾ་མེ་
[233a]
[233a.1]པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿ། བྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿཧཱུཾ་ཞེས་སོ། །ཐུན་མཚམས་རྣམས་སུ་ཡང་སྐད་ཅིག་གིས་ལྷ་མོའི་རྣམ་པ་མངོན་དུ་བྱས་ཏེ་མཆོད་པ་ལ་སོགས་པ་སྔོན་དུ་འགྲོ་བས་ཇི་སྲིད་འདོད་ཀྱི་
[233a.2]བར་དུ་བསྒོམས་ཏེ་སྔོན་བཞིན་དུ་སྔགས་བཟླས་ནས་སྔོན་མ་བཞིན་དུ་ཐམས་ཅད་བྱའོ། །མཚན་ཕྱེད་ཀྱི་ཐུན་མཚམས་སུ་ཡང་ཐམས་ཅད་བྱས་ནས་ཉལ་བའི་དུས་སུ་སྤྱི་བོར་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་བཞུགས་པར་བལྟས་ནས་ཡང་དག་པར་མཆོད་པར་
[233a.3]བྱའོ། །ཡན་ལག་བརྒྱད་ཀྱིས་ཕྱག་བྱས་ཏེ་ཉལ་བ་ན་སེང་གེའི་ཉལ་སྟབས་ཀྱིས་ཉལ་བར་བྱའོ། །དེ་ནས་སྔ་དྲོའི་ཐུན་ལ་ལྷ་མོས་གཉིད་རབ་ཏུ་བསླང་ནས་སྔོན་བཞིན་དུ་ཐམས་ཅད་བྱའོ་ཞེས་སོ། །ཡང་ན་གང་ཞིག་རིམ་པ་འདིས་ས་ཕྱོགས་འགའ་ཞིག་ཏུ་རོའི་གདན་ལ་སྐྱིལ་ཀྲུང་གིས་
[233a.4]སྟན་བདེ་བ་ལ་ཉེ་བར་འདུག་སྟེ། སེམས་ཅན་ཐམས་ཅད་ལ་སྙིང་རྗེས་དམིགས་ནས། སྡིག་པ་བཤགས་པ་ནས་བརྩམས་ཏེ་ཇི་སྲིད་བྱང་ཆུབ་ཏུ་སེམས་བསྐྱེད་པའི་བར་དུ་སྔོན་དུ་འགྲོ་བས་ཨཱཿཡིག་ཡོངས་སུ་གྱུར་པ་ལས་རང་གི་ལྕེ་པདྨའི་རྣམ་པ་ལ་ཧྲཱིཿཡིག་འབར་ཞིང་འོད་གསལ་བ་ཇི་
[233a.5]སྲིད་འདོད་པར་བསྒོམས་ཤིང་བརྟན་པར་བྱས་ནས་བརྒྱ་ཕྱེད་ཀྱི་ཕྲེང་བའི་རྡོག་པོ་སྲད་བུ་ལ་བརྒྱུས་ནས་ཐུན་གསུམ་མམ་ཐུན་བཞིར་རྣལ་འབྱོར་པས་བཟླས་པར་བྱའོ། །གཉིད་ལོག་པ་ན་སྔོན་གྱི་ཆོ་ག་བཞིན་དུ་ཉལ་བར་བྱའོ། །དེ་བཞིན་དུ་བཟླས་པ་དང་བསྒོམ་པ་ཆོ་ག་བཞིན་དུ་རྗེས་སུ་གནང་བས་འཇིག་རྟེན་
[233a.6]པའི་ཆོས་བརྒྱད་ལས་ངེས་པར་གྲོལ་ནས་དད་པ་དང་དམ་ཚིག་དང་སྡོམ་པ་ལ་གནས་ཤིང་བརྩེ་བ་དང་ལྡན་པས་དགེ་བའི་བཤེས་གཉེན་ལ་གུས་པར་བྱས་ནས། དེའི་ཕྱི་ནས་རྣལ་འབྱོར་པས་འབུམ་ཕྲག་བདུན་བཟླས་པས་བསྟན་བཅོས་དང་སྒྱུ་རྩལ་གྱི་ཆོས་ཐམས་ཅད་ལ་རང་གིས་མངོན་པར་ཤེས་པར་
[233a.7]འགྱུར་རོ། །ཤེས་རབ་དང་ལྡན་པ་དང་དཔའ་བ་དང་། འཇིགས་པ་མེད་པ་དང་། འཁོར་གྱིས་ཟིལ་གྱིས་མི་ནོན་པར་འགྱུར་རོ། །རྒོལ་བ་པོར་ཡང་འགྱུར་རོ། །རིམས་དང་ངན་ཐབས་དང་། དུག་དང་མཁའ་འགྲོ་མ་ལ་སོགས་པ་རྣམས་ཀྱིས་བར་དུ་གཅོད་པར་མི་འགྱུར་རོ། །གང་ཟོས་པ་དེ་ཐམས་
[233b]
[233b.1]ཅད་ཀྱང་བདུད་རྩིར་འགྱུར་རོ། །འདིའི་སྔགས་བཟླས་པས་དངོས་གྲུབ་ཏུ་འགྱུར་རོ། །འདིའི་སྔགས་ཀྱིས་ཐོད་ལེ་ཀོར་ལ་མངོན་པར་བསྔགས་ནས་གང་གི་ལག་ཏུ་བྱིན་ན་བླུན་པོ་ཡང་སྙན་ངག་མཁན་དུ་འགྱུར་རོ། །དེའི་དྲི་ཙམ་གྱིས་ཀྱང་སྦྲུལ་ལ་སོགས་པ་རྣམས་ཉེ་ནུས་པ་མ་ཡིན་ནོ། །འདི་རྣམས་
[233b.2]ཀྱི་བར་དུ་གཅོད་པས་བར་ཆད་བྱེད་པ་རྣམས་དང་གཞན་རྣམས་ཀྱི་ཡང་ཐམས་ཅད་ལ་ཕན་པར་བྱེད་ནུས་པར་འགྱུར་རོ། །བདག་གིས་མང་པོ་སྨོས་པས་ཅི་ཞིག་བྱ་སྟེ། བེམས་པོའི་བློ་ཡང་བསྟན་བཅོས་ལ་ཉོན་མོངས་པར་བྱ་མི་དགོས་ཏེ། མི་གཡོ་བའི་སེམས་ཀྱིས་སོ། །སྔགས་འདི་
[233b.3]འབུམ་ཕྲག་གཉིས་བཟླས་ན་འདིས་ཤེས་རབ་ཀྱི་སྣང་བ་སྒྲུབ་པར་བྱེད་དོ། །འདིར་ཡང་གང་ཞིག་རྣམས་ཀྱིས་སེམས་བརྟན་པར་གྱུར་པས་ཡོན་ཏན་མཐའ་ཡས་པ་གསུངས་པ་དང་ལྡན་པར་འགྱུར་རོ། །དེ་རྣམས་ཀྱིས་ཤིན་ཏུ་མཆོག་གི་དངོས་གྲུབ་ཏུ་འགྱུར་རོ་ཞེས་སོ། །ཤེས་རབ་ཀྱི་སྣང་བ་སྒྲུབ་
[233b.4]པའི་ཆོ་ག་རྫོགས་སོ།། {T3609}༄༅༅། །རྒྱ་གར་སྐད་དུ། བཛྲ་བཱ་རཱ་ཧྱཱ་བ་ཤྱ་བི་དྷིཿ། བོད་སྐད་དུ། རྡོ་རྗེ་ཕག་མོའི་དབང་དུ་བྱ་བའི་ཆོ་ག །རྡོ་རྗེ་ཕག་མོ་ལ་ཕྱག་འཚལ་ལོ། །སེམས་ཅན་རྣམས་དབང་དུ་བྱ་བ་འཕགས་པའི་བདེན་པ་བཞི་ལ་གཞུག་ནས་དབང་གི་ཆོ་ག་བརྗོད་པར་བྱ་སྟེ། དེ་ནས་
[233b.5]སྔོན་དུ་གསུངས་པའི་རིམ་པས་བཅོམ་ལྡན་འདས་མ་མཆོག་ཏུ་དམར་བ་རྫོགས་པར་བསྐྱེད་ནས་ས་བོན་དང་མཚན་མ་ཡོངས་སུ་གྱུར་པ་ལས་སྐུ་མདོག་དམར་མོ་རྣམ་པར་བསྒོམས་ནས་ཡང་དག་པར་མཆོད་པ་དང་བསྟོད་པ་བྱའོ། །མི་བསྐྱོད་རྡོ་རྗེ་ཞེས་བྱ་བ་ལ་སོགས་པ་ཚིགས་སུ་བཅད་པ་རྣམས་ཀྱིས་དེ་
[233b.6]ཉིད་གསུམ་དབུལ་བར་བྱའོ། །ཁ་ཐུར་དུ་བསྟན་པའི་ཐོད་པ་གསུམ་གྱི་སྟེང་དུ་ཨ་ཡིག་དམར་པོ་ལས་བྱུང་བའི་པདྨའི་སྣོད་དུ་དམ་ཚིག་བཅུ་དང་དབྱངས་ཡིག་བཅུ་དྲུག་ལ་སོགས་པ་གསལ་བྱེད་སུམ་ཅུ་རྩ་བཞིས་བྱིན་གྱིས་བརླབས་པར་བལྟས་ལ། འོག་ཏུ་ཡཾ་དང་རཾ་ཡིག་ཡོངས་སུ་གྱུར་པ་
[233b.7]ལས་རླུང་དང་མེའི་དཀྱིལ་འཁོར་དག་གིས་འབར་བ་དང་བསྲེག་པ་དག་བྱས་ནས་ཉེ་བར་ཡང་དག་པར་བཀོད་པའི་ས་བོན་གྱི་འོད་ཟེར་གྱིས་བསྐུལ་ནས་དེ་བཞིན་གཤེགས་པའི་ཚོགས་རྣམས་གདན་དྲངས་ནས་དེ་ལ་ནང་དུ་བྱས་ཏེ། དབྱངས་ཡིག་དང་པོ་ལས་སྐྱེས་པའི་ཟླ་བའི་དཀྱིལ་འཁོར་གྱི་སྟེང་
[234a]
[234a.1]དུ་ཧཱུཾ་ཡིག་ལས་སྐྱེས་པ་ཟླ་བ་ལ་གནས་པ་དེས་བྱིན་གྱིས་བརླབས་པའི་རྡོ་རྗེ་དཀར་པོ་རྩེ་ལྔ་པ་འཕྲོ་བཞིན་པའི་འོད་ཟེར་གྱི་དྲ་བས་རྡོ་རྗེ་འཛིན་པ་ཉིད་ཀྱང་ཟླ་བའི་རྡོ་རྗེ་ལ་གཞུག་པར་བྱའོ། །ཉེ་བར་སྨིན་པ་དང་ཐེ་ཚོམ་ལ་སོགས་པའི་སྐྱོན་དུ་གྱུར་ན་དེའི་སྟེང་དུ་ཨོཾ་ཡིག་
[234a.2]བསམས་ནས་དེའི་འོད་ཟེར་གྱིས་དེ་བཞིན་གཤེགས་པ་རྣམས་བདུད་རྩིའི་གཟུགས་སུ་གྱུར་ནས་འཇིག་རྟེན་གྱི་ཁམས་སྣ་ཚོགས་པ་ན་གནས་པའི་བདུད་རྩི་རྣམས་ཀྱང་དེ་ལ་རབ་ཏུ་ཞུགས་ཤིང་ཨོཾ་ཡིག་ཀྱང་ཞུགས་ཏེ། ཇི་ལྟ་བ་བཞིན་ཡོངས་སུ་གྲུབ་པའི་བདུད་རྩིར་བལྟས་ནས་ལན་གསུམ་དེ་ཉིད་
[234a.3]གསུམ་གྱིས་བརླབས་ནས་ཆོ་ག་བཞིན་དུ་བདུད་རྩི་མྱང་བ་ལ་སོགས་པ་བྱའོ། །ཇི་སྲིད་འདོད་ཀྱི་བར་བསྒོམས་ནས་རང་གི་མིང་གི་ཡི་གེ་ཡོངས་སུ་གྱུར་པ་ལས་བསྒྲུབ་བྱ་མདུན་དུ་འཁོར་བར་བལྟས་ཤིང་དེ་ལ་སྔགས་ཀྱི་ཕྲེང་བ་ལས་བྱུང་བའི་འོད་ཟེར་རྣམས་ཀྱིས་དེ་ལ་བཀུག་ནས་དེ་ལ་མང་དུ་
[234a.4]བསྒོམ་པར་བྱ་སྟེ། དེའི་སེམས་ཀྱི་རྣམ་པ་ཡོངས་སུ་གྱུར་པ་ལས་ཀུན་ནས་དམར་བའི་ཟླ་བའི་དཀྱིལ་འཁོར་གྱི་རྣམ་པར་བསམ་པར་བྱའོ། །སྔགས་ཀྱི་ཕྲེང་བ་ལས་ལྷ་མོ་སྐུ་མདོག་དམར་མོ་ཕྱག་གཡོན་པས་ཧྲཱིཿཡིག་གི་ཞགས་པ་བསྣམས་པ། ཕྱག་གཡས་པས་ཨུཏྤ་ལ་
[234a.5]དམར་པོ་ཁ་བྱེ་བ་རྡོ་རྗེའི་ལྕགས་ཀྱུ་ལྟ་བུ་བསྣམས་པ་བསྒྲུབ་བྱའི་མདུན་དུ་འགྲོ་བར་བལྟས་ཏེ། ཨོཾ་ཨཱཿཧྲཱིཿ། ཨ་མུ་ཀ་སྱ་ཙིཏྟ་མཱ་ཀཪྵ་ཡ་ཧཱུཾ་ཛཿཞེས་པས་དེ་ལ་རྣལ་འབྱོར་པས་བཀའ་བསྒོ་བར་བྱའོ། །དེ་ནས་ལྷ་མོ་དེ་ཆོ་ག་བཞིན་དུ་རབ་ཏུ་གཞུག་པར་བྱ་བས་ཞགས་པས་ཡང་དག་
[234a.6]པར་བཅིངས་ཤིང་ལྕགས་ཀྱུས་བསྐུལ་ཞིང་ཇི་ལྟ་བ་བཞིན་དུ་བཀུག་ནས་རང་གི་སེམས་ལ་རབ་ཏུ་གཞུག་པར་བྱའོ། །ལྷ་མོ་ནི་སྔགས་ཀྱི་ནང་དུ་བལྟ་བར་བྱའོ། །དེ་ནས་དེ་སྐྲ་གྲོལ་ཞིང་རྣམ་པར་མྱོས་ཤིང་འདོད་པས་མྱོས་པར་འདོད་པས་གཅིག་པུ་དབང་དུ་གྱུར་ཏེ་ལག་པ་ཐལ་མོ་སྦྱར་ནས་སྒྲུབ་པ་པོ་ལ་གདོང་
[234a.7]མངོན་པར་ཕྱོགས་ཏེ་མངག་གཞུག་བྱེད་པར་འགྱུར་རོ། །རྡོ་རྗེ་ཕག་མོའི་སྒྲུབ་ཐབས་རྫོགས་སོ།། །།ཕྱོགས་ཀྱི་གོས་ཅན་སྐྲ་གྲོལ་བའི་རྡོ་རྗེ་ཕག་མོ་ལྟེ་བའི་ཕྱོགས་སུ་གྲི་གུག་དང་ཐོད་པ་བསྣམས་ཤིང་གར་མཛད་པ་བསྒོམས་ན་དབང་དུ་བྱེད་པར་འགྱུར་རོ་ཞེས་སོ། །རྡོ་རྗེ་ཕག་མོའི་
[234b]
[234b.1]དབང་དུ་བྱ་བའི་ཆོ་གའོ།། {T3610}༄༅༅། །རྒྱ་གར་སྐད་དུ། །ཤྲཱི་བཛྲ་བཱ་རཱ་ཧཱི་ཀཱལྤ་སརྦ་ཨརྠ་སཱ་དྷ་ནཾ། བོད་སྐད་དུ། དཔལ་རྡོ་རྗེ་ཕག་མོའི་རྟོག་པ་དོན་ཐམས་ཅད་སྒྲུབ་པ། བཅོམ་ལྡན་འདས་མ་འཕགས་མ་རྡོ་རྗེ་ཕག་མོ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་མ་
[234b.2]གསང་བའི་དབང་ཕྱུག་མ་ལྷ་མོ་རྣམས་དང་བཅས་པ་རྣམས་ཀྱི་བདག་མོ་ཆེན་མོ་ཆེར་གསང་བ་ཆེན་མོ་སྒྱུ་མ་ཆེན་མོ་དབང་ཕྱུག་ཆེན་མོ་འཇིག་རྟེན་གསུམ་པོ་བསྡུ་བ་དང་སླར་ཡང་འཇིག་རྟེན་གསུམ་དུ་སྤྲོ་བར་བྱ་བ་ནི། འདི་ནི་གསང་བ་པ་རྣམས་ཡུམ། །སྒྱུ་མ་ཆེན་མོར་རྣམ་པར་གྲགས། །འཇིག་
[234b.3]རྟེན་གསུམ་པོ་སྐྲག་མཛད་པའི། །རིག་སྔགས་འདི་ཐོབ་དབང་ཕྱུག་ཆེ། །གང་གིས་རྣམ་པར་ཤེས་ཙམ་གྱིས། །སྒྲུབ་བྱེད་དབང་ཕྱུག་རིག་སྔགས་ཀྱིས། །ལྷ་ཡི་ཚོགས་རྣམས་ཀུན་བཅས་དང་། །གནོད་སྦྱིན་ལྷ་མིན་མི་དང་ནི། །རིག་འཛིན་ཤ་ཟ་སྲིན་པོ་དང་། །ལྟོས་འགྲོ་མི་འམ་ཅིར་
[234b.4]བཅས་རྣམས། །དབང་དུ་འགུགས་བྱེད་འབྱུང་རྣམས་ནི། །ཆུ་སྐྱེས་ཐང་ལས་སྐྱེས་རྣམས་ཀྱང་། །ངོ་མཚར་ཆེར་བྱེད་རིག་སྔགས་ལ། །མིག་འཕྲུལ་ལྟར་བྱེད་དེ་བཞིན་དུ། །རྨོངས་དང་རེངས་བྱེད་དེ་བཞིན་དུ། །རྣམ་པར་ཞེ་སྡང་སྐྲོད་སོགས་དང་། །དབང་དུ་འགུགས་བྱེད་རྨུགས་པ་དང་། །
[234b.5]དཔག་མེད་ངོ་མཚར་རྣམ་པ་རྣམས། །རིག་སྔགས་བཀླགས་པས་འགྲུབ་འགྱུར་ཏེ། །སྒྲུབ་པ་པོ་ཡི་ངག་ཀྱང་འགྲུབ། །དེ་ལ་བཟླས་མེད་བརྟུལ་ཞུགས་མེད། །སྨྱུང་གནས་ཆོ་གས་བསྒྲུབ་མི་དགོས། །ལྷ་མོས་བདེན་པ་དག་ལ་གསུངས། །ཉོན་མོངས་མེད་པར་དངོས་གྲུབ་འགྱུར། །
[234b.6]ཁྱོད་ཀྱི་སྔགས་ནི་སྒྱུ་མ་ཆེ། །འཇིག་རྟེན་གསུམ་པོ་ཐམས་ཅད་སྒྲུབ། །རྣལ་འབྱོར་ཆེན་པོར་རབ་བཤད་བྱ། །ལྷ་མོ་ཡི་གེའི་ཕྲེང་བ་ཡིས། །ཨོཾ་ན་མོ་བྷ་ག་བ་ཏི་བཛྲ་བཱ་རཱ་ཧཱི་བཾ། ཨཱརྱ་པ་རཱ་ཛི་ཏེ། ཏྲཻ་ལོཀྱ་མཱ་ཏེ་མ་ཧཱ་བི་དྱེ་ཤྭ་རི། སརྦ་བྷཱུ་ཏ་བྷ་ཡཱ་བ་ཧེ་མ་ཧཱ་བཛྲེ། བཛྲེས་ནེ། ཨ་ཛི་ཏེ། ཨ་པ་རཱ་
[234b.7]ཛི་ཏེ། བ་ཤྱཾ་ཀ་རི་ནེ་ཏྲ་བྷྲ་མ་ཎི། བི་ཥ་ཎི། ཤོ་ཥ་ཎི། རོ་ཥ་ཎི། ཀྲོ་དྷེ་ཀ་རཱ་ལི་ནི། ཏྲཱ་ས་ནི། མཱ་ར་ཎི། པྲཱ་བྷེ་ད་ནི། ཨ་པ་ར་ཛ་ཡེ། བི་ཛ་ཡེ། ཛཾ་བྷ་ནི་སྟྭཾ་བྷ་ནི། མོ་ཧ་ནི། བཛྲ་བཱ་རཱ་ཧཱི། མ་ཧཱ་ཡོ་གི་ནཱི་ཀཱ་མེ་ཤྭ་རཱི་ཁ་གེ། ཏདྱ་ཐཱ་པྲོ་ཏཾ་གེ་པྲོ་ཏཾ་གེ །ཧ་ན་ཧ་ན། པྲཱ་ཎཱ་ན་ཀིཾ་ཀི་ནི། ཁིཾ་ཁི་ནི། དྷུ་ན་དྷུ་ན་བཛྲ་ཧསྟེ། ཤོ་ཥ་ཡ་
[235a]
[235a.1]ཤོ་ཥ་ཡ་ཁ་ཊྭཱཾ་ག་ཀ་པཱ་ལ་དྷཱ་རི་ཎི། མ་ཧཱ་བི་སི་ཏ་མཱཾ་སཱ་ཤ་ནི། མཱ་ནུ་ཥ་ཨནྟ་པྲཱ་བྲི་ཏེ། སཱནྣི་དྷྱཾན་ར་སི་ར་མཱ་ལཱ་གྲེ་ཐི་ཏ་དྷཱ་རི་ཎི། སུཾ་བྷ་ནི་སུཾ་བྷེ། ཧ་ན་ཧ་ན། པྲཎཱི། སརྦ་པཱ་ཤཱུ་བ་ནཱ། མ་ཧཱ་མཱཾ་ས་ཙྪེ་ད་ནི། ཀྲོ་དྷ་མཱུརྟྟེ། དཾ་ཥྚྲཱ་ཀ་རཱ་ལི་ནི་མ་ཧཱ་མུ་དྲེ། ཤྲིའི་ཧེ་རུ་ཀ་དེ་བ་སྱཱ་གྲ་མ་ཧི་ཥི། ས་ཧ་སྲ་ཤི་རེ།
[235a.2]ས་ཧ་སྲ་བ་ཧ་བེ། ཤ་ཏ་ས་ཧ་སྲ་ཨ་ན་ནེ། ཛྭ་ལི་ཏ་ཏེ་ཛཾ་སེ། ཛྭ་ལ་མུ་ཁི་པིཾ་ག་ལ་ལོ་ཙ་ནེ། བཛྲ་ཤཱ་རཱི་རེ། བཛྲ་ཨཱ་ས་ནི། མི་ལི་ཏེ། ཧེ་ཧེ། ཧ་ཧ། ཧཱུཾ་ཧཱུཾ། ཁ་ཁ། དྷུ་དྷུ། དྷུ་རུ་དྷུ་རུ། མུ་རུ་མུ་རུ། མུཉྩ་མུཉྩ་ཨ་དྭཻ་ཏེ་མ་ཧཱ་ཡོ་གི་ནི། པ་ཋི་ཏ་སིདྡྷེ། དྲེཾ་དྷཾ་དྲེཾ་དྷཾ། གྲཾ་གྲཾ། ཧེ་ཧེ། ཧཱ་ཧཱ། བྷཱི་མེ། ཧ་ས་ཧ་ས།
[235a.3]བི་རེ། ཧཱ་ཧཱ། ཧོ་ཧོ། ཧཱུཾ་ཧཱུཾ། ཏྲཻ་ལོ་ཀྱ་བི་ནཱ་ཤ་ནི། ཤ་ཏ་ས་ཧ་སྲ་ཀོ་ཊི་ཏ་ཐཱ་ག་ཏ་པ་རི་བཱ་རེ་ཧཱུཾ་ཧཱུཾ་ཕཊ་སིཾ་ཧ་རཱུ་པེ། ཁ་ག་ཛཾ་རཱུ་པེ་གཿ། ཏྲཻ་ལོཀྱ་ཨུ་ད་རེ། ས་མུ་དྲ་མེ་ཁ་ལེ། གྲ་ས་གྲ་ས་ཧཱུཾ་ཧཱུཾ་ཕཊ། བཱི་ར་ཨ་དྭཻ་ཏེ་ཧཱུཾ་ཧཱུཾ། ཧཱཿཧཱཿ། མ་ཧཱ་བི་ཤུ་མོ་ཧ་ནི། མ་ཧཱ་ཡོ་གེ་ཤྭ་རི་ཏྭཾ། ཌཱ་ཀི་ནཱི་ལོ་ཀཱ་ནཱཾ་བནྡྷ་ནི་སཏྱཿ། པྲ་ཏྱ་ཡ་ཀཱ་རི་
[235a.4]ཎི་ཧཱུཾ་ཧཱུཾ་ཕཊ། བྷཱུ་ཏ་ཏྲཱ་ས་ནི། མ་ཧཱ་བཱི་རེ། པ་ར་མ་སིདྡྷེ། ཡོ་གི་ཤྭ་རི་ཕཊ། ཧཱུཾ་ཧཱུཾ་ཕཊ། ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། འདི་ནི་བཅོམ་ལྡན་འདས་མ་སྒྱུ་མ་ཆེན་མོ་བཀླགས་པས་འགྲུབ་པའི་སྒྲུབ་ཐབས་སོ། །ཟླ་བ་གཟས་བཟུང་བའམ། ཉི་མ་གཟས་བཟུང་བ་མཐོང་ནས་ལན་ཉི་ཤུ་རྩ་གཅིག་བཀླག་
[235a.5]པར་བྱའོ། །དེ་ནས་དངོས་གྲུབ་ཏུ་འགྱུར་རོ། །ཇི་སྲིད་བཀླགས་པ་དེ་སྲིད་དུ་བུད་མེད་སྟོང་ཕྲག་གཅིག་གི་རྗེས་སུ་འཇུག་པར་འགྱུར་རོ། །ལྷན་ཅིག་བརྗོད་པས་དབང་དུ་འགྱུར་རོ། །ཁྲོ་བའི་སེམས་ཀྱིས་སྙིང་པོར་བྱེད་པས་སྐྲོད་པ་དང་རྣམ་པར་ཞེ་སྡང་བ་དང་རེངས་པར་ཡང་བྱེད་དོ། །དབང་དུ་བྱ་བར་
[235a.6]འདོད་པས་མེ་ཏོག་ལ་ཡོངས་སུ་བཟླས་ནས་ནམ་མཁའ་ལ་འཕངས་ན། ཚངས་པ་ལ་སོགས་པ་མཐོང་བར་བྱེད་དོ། །དུར་ཁྲོད་ཀྱི་སོལ་བ་ལ་ལན་ཅིག་བཟླས་ནས་ཁྱིམ་དང་གྲོང་དང་གྲོང་ཁྱེར་དུ་འཕངས་ན་སྲེག་པར་མཐོང་བར་བྱེད་དོ། །རྨ་བྱའི་སྒྲོ་ལ་ལན་ཅིག་བཟླས་ནས་ནམ་མཁའ་ལ་བསྐོར་ན་སླར་
[235a.7]ཡང་ཞི་བར་བྱེད་དོ། །ཀ་ར་ལ་ལན་ཅིག་བཟླས་ནས་ཕྱོགས་བཞིར་གཏོར་ན་དཔུང་ཚོགས་ཡན་ལག་བཞིར་མཐོང་བར་བྱེད་དོ། །རྨ་བྱའི་སྒྲོས་ཕྱིར་བཟློག་ནས་བསྐོར་ན་སླར་ཡང་མེད་པར་བྱེད་པར་འགྱུར་རོ། །ད་ནི་སྒྱུ་མ་ཆེན་མོའི་དུར་ཁྲོད་བརྗོད་པར་བྱ་སྟེ། ཤར་ཕྱོགས་ཀྱི་ཆ་ལ་དཀྱིལ་འཁོར་
[235b]
[235b.1]གྱི་སྒྲུབ་པ་པོ་རྗེས་སུ་འཛིན་པ་ཞེས་བྱ་བའི་དུར་ཁྲོད་དོ། །བྱང་དུ་གཉིས་སུ་མེད་པར་བྱེད་པའོ། །ནུབ་ཏུ་ཁྲོ་བོའི་གདོང་ངོ་། །ལྷོ་རུ་མུན་པ་མི་བཟད་པའོ། །མེ་རུ་འཇིགས་པ་ཆེན་པོའོ། །བདེན་བྲལ་དུ་རྣལ་འབྱོར་མང་པོའི་འདུས་པ་ཆེན་པོའོ། །རླུང་དུ་སེང་གེའི་སྒྲ་ཕཊ་ཆེན་པོ་
[235b.2]སྒྲོགས་པའོ། །དབང་ལྡན་དུ་ཆུ་སྐྱེས་ས་བོན་ཞེས་བྱ་བའི་དུར་ཁྲོད་རྣམས་སོ། །འདི་རྣམས་སུ་ཇི་ལྟ་བ་བཞིན་དུ་སྦྱོར་བས་ལུས་དང་ཡན་ལག་སྲེག་པ་དང་། ཕྱེད་སྲེག་པ་དང་ལུས་ཉམས་པ་དང་། ལུས་ཕྱེད་ཉམས་པ་འཇིགས་པའི་རྣམ་པ་འཇིགས་པར་བྱེད་པ་དང་། །མདུང་གིས་ཕུག་པའི་རོ་
[235b.3]བཅིངས་པ་དང་། སྐྱ་སྣར་དང་། ཀཾ་ཀོ་ལ་ལི་དང་། ཨ་མྲ་དང་། ཤི་རི་ཥ་དང་། ཨུ་དུམྺཱ་ར་དང་། ཨ་ཤྭདྠཱ་དང་། ནཱ་ག་གེ་སར་གྱི་ཤིང་རྣམས་སོ། །གོ་རིམས་བཞིན་དུ་མ་ཧེ་དང་བྱི་ལ་དང་། དོམ་དང་སྟག་དང་། བྱ་རྒོད་དང་ཕག་དང་། ཤ་ཟའི་གདོང་པ་ཅན་རྫུ་འཕྲུལ་ཆེན་པོའི་གནོད་སྦྱིན་
[235b.4]རྣམས་སོ། །ཀུན་ནས་དུར་ཁྲོད་བརྒྱད་དུ་ཅེ་སྤྱང་དང་བྱ་རྒོད་དང་འུག་པ་དང་བྱ་རོག་དང་རོ་ལངས་ལ་སོགས་པ་ཞེས་སོ་ལྷ་མོ་སྒྱུ་མ་ཆེན་མོའི་དུར་ཁྲོད་དོ།། །།རྡོ་རྗེ་ཕག་མོ་ལ་ཕྱག་འཚལ་ལོ། །ཨོཾ་ཧྲཱིཿགྷ་ཊ་ཡ་གྷ་ཊ་ཡ་སརྦ་དུཥྚཱཾ་ཧཱུཾ་ཕཊ་སྭཱ་ཧཱ། གཏོར་མ་ཕུལ་ནས་བསམ་གཏན་བྱའོ། །
[235b.5]ལྟེ་བའི་དབུས་སུ་རཾ་ཡིག་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ། དེའི་དབུས་སུ་པདྨ་དམར་པོ་འདབ་མ་བཞི་པ། དེའི་སྟེང་དུ་ཧྲཱིཿཡིག་བསྐལ་པའི་མེ་བཞིན་དུ་རབ་ཏུ་འབར་བཞིན་པ། དེ་ཡོངས་སུ་གྱུར་པ་ལས་བདག་ཉིད་རྡོ་རྗེ་ཕག་མོ་སྐུ་མདོག་དམར་མོའོ། །འདབ་མ་བཞི་ལ་
[235b.6]བདུད་རྩི་ལྔས་གང་བའི་པདྨའི་སྣོད་བསམ་པར་བྱའོ། །ཡི་དྭགས་ཀྱི་གདན་ལ་གཡས་བརྐྱང་གི་སྟབས་ཀྱིས་བཞུགས་པ། གཅེར་བུ་སྐྲ་གྱེན་དུ་བརྫེས་པ་ཐོད་པའི་དབུ་རྒྱན་ཅན། ཕྱག་རྒྱ་ལྔ་དང་ལྡན་པ། ཕྱག་བཞི་པའི་གཡས་ན་རྡོ་རྗེ་དང་ལྕགས་ཀྱུ་བ་བསྣམས་པ། གཡོན་ན་ཁ་ཊྭཱཾ་
[235b.7]ག་དང་ཐོད་པ་དང་སྡིགས་མཛུབ་ཀྱི་ཞགས་པ་བསྣམས་པ། ཞལ་གཅིག་པ་སྤྱན་གསུམ་པ། ཁྲོ་གཉེར་བསྡུས་ཤིང་ཞལ་གཙིགས་པའོ། །རྡོ་རྗེ་རྟ་རྣ་མ་དང་ཤིན་ཏུ་འཇིགས་བྱེད་མ་དང་། ལྟོ་ཆེན་མ་དང་། ལྗགས་བསྐྱོད་མ་རྣམས་བསྒོམ་པར་བྱའོ། །ཨོཾ་བཛྲ་བཱ་རཱ་ཧཱི་ཨཱ་བེ་ཤ་ཡ་
[236a]
[236a.1]སརྦ་དུཥྚཱཾ་ཧྲིཾ་སྭཱ་ཧཱ། ཉེ་བའི་སྙིང་པོའོ། །ཨོཾ་ཧྲཱི་ཧཱུཾ་ཧྲཱིཾ་ཧྲཱིཾ་སྙིང་པོའོ། །འབུམ་བཟླས་པར་བྱའོ། །འདིར་ཏིང་ངེ་འཛིན་དུ་གྱུར་པས་འགྲུབ་པར་ཐེ་ཚོམ་མེད་དོ། །ཨོཾ་ཨ་ཧྲཱིཿཧཱུཾ་ཧཾ་ཧཿསྔགས་འདིས་ཤ་ཆེན་ཕྱེ་མར་བྱས་ནས་རི་མོའི་མདུན་དུ་སྤོས་དབུལ་བར་བྱའོ། །ཉིན་རེ་
[236a.2]བཞིན་ཇི་སྲིད་དུ་ལན་ཉི་ཤུ་རྩ་གཅིག་གིས་འགྲུབ་སྟེ་གཞན་དུ་མ་ཡིན་ནོ། །ཨོཾ་ཧཱུཾ་ཧཱུཾ་ཧཾ་ཧཿཧཿཧྲིཾ་ཧྲིཾ་ཕེཾ་ཕེཾ་ཕེཾ་ཕཊ་ཀ་རཾ་ཞེས་མཚན་མོ་གཏོར་མ་དབུལ་ནས་བདུད་ཐམས་ཅད་ཞི་བར་བྱ་བའི་ཕྱིར་མཚན་མོ་གཏོར་མ་དང་ཡོ་བྱད་ལྔ་སྦྱིན་པར་བྱའོ། །གང་འགའ་ཞིག་ཏུ་སྨྲ་བར་ཡང་མི་བྱ་སྟེ། རྡོ་རྗེ་རྣལ་འབྱོར་
[236a.3]མས་འདིར་བྱིན་གྱིས་རློབ་པར་ཐེ་ཚོམ་མེད་དོ། །དཔལ་རྡོ་རྗེ་ཕག་མོ་རྟོག་པ་ལས་གསུངས་པའི་དོན་ཐམས་ཅད་སྒྲུབ་པའི་ཐབས་རྫོགས་སོ།། {T3611}༄༅༅། །རྒྱ་གར་སྐད་དུ། མཻ་ཏྲེ་ཡ་སཱ་དྷ་ནཱཾ། བོད་སྐད་དུ། བྱམས་པའི་སྒྲུབ་ཐབས། མགོན་པོ་བྱམས་པ་ལ་
[236a.4]ཕྱག་འཚལ་ལོ། །སྔོན་དུ་གསུངས་པའི་ཆོ་ག་འདིས་ཟླ་བའི་དཀྱིལ་འཁོར་གྱི་སྟེང་དུ་མཻཾ་ཡིག་སེར་པོ་ཡོངས་སུ་གྱུར་པ་ལས་སྣ་ཚོགས་ཆུ་སྐྱེས་ལ་བཞུགས་པའི་ཞལ་གསུམ་སྤྱན་གསུམ། ཕྱག་བཞི་པ་ནག་པོ་དང་དཀར་པོ་ནི་གཡས་དང་གཡོན་གྱི་ཞལ་ལོ། །སྐུ་མདོག་གསེར་ལྟ་བུའོ། །
[236a.5]སེམས་དཔའི་སྐྱིལ་ཀྲུང་གིས་བཞུགས་པ་ཆོས་འཆད་ཀྱི་ཕྱག་རྒྱ་མཛད་པའོ། །གཞན་གཡས་པ་དང་། གཡོན་པའི་ཕྱག་དག་གིས་མཆོག་སྦྱིན་དང་ནཱ་ག་གེ་སར་གྱི་མེ་ཏོག་གི་སྙེ་མ་བསྣམས་པ། སྣ་ཚོགས་པའི་རྒྱན་གྱིས་བརྒྱན་པའི་བྱམས་པའི་སྐུར་བདག་ཉིད་དམིགས་ནས་ཕྱག་རྒྱ་
[236a.6]བཅིང་བར་བྱའོ། །ལག་པ་གཉིས་སོ་སོར་ཁུ་ཚུར་བཅིངས་ནས་སྡིགས་མཛུབ་དག་མཐེ་བོའི་དབུས་སུ་བཞག་ནས་མེ་ཏོག་གི་རྣམ་པར་སྦྱར་བར་བྱའོ། །དེ་ནས་བཟླས་པ་བྱ་སྟེ། ཨོཾ་མཻ་ཏྲེ་ཡ་སྭཱ་ཧཱ། བྱམས་པའི་སྒྲུབ་ཐབས་རྫོགས་སོ།། {T3612}༄༅༅། །རྒྱ་གར་སྐད་དུ། མཻ་ཏྲེ་ཡ་སཱ་དྷ་ནཾ།
[236a.7]བོད་སྐད་དུ། བྱམས་པའི་སྒྲུབ་ཐབས། འཕགས་པ་བྱམས་པ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་ཟླ་བའི་དཀྱིལ་འཁོར་གྱི་སྟེང་དུ་མཻཾ་ཡིག་སེར་པོ་ཡོངས་སུ་གྱུར་པ་ལས། སྣ་ཚོགས་པདྨའི་སྟེང་དུ་བཞུགས་པའི་འཕགས་པ་མགོན་པོ་བྱམས་པ་ཞལ་གསུམ་པ་ཕྱག་བཞི་
[236b]
[236b.1]པ་ནག་པོ་དང་དཀར་པོ་ནི་གཡས་དང་གཡོན་གྱི་ཞལ་ལོ། །སྐུ་མདོག་གསེར་ལྟ་བུ་ཕྱག་གཉིས་ཀྱིས་ཆོས་འཆད་ཀྱི་ཕྱག་རྒྱ་མཛད་པ། གཉིས་པའི་ཕྱག་གཡས་པས་མཆོག་སྦྱིན་པ། གཉིས་པའི་ཕྱག་གཡོན་པས་ནཱ་ག་གེ་སར་གྱི་མེ་ཏོག་གི་སྙེ་མ་བསྣམས་པའོ། །ལྷའི་རྒྱན་དང་ན་བཟས་སྐུ་ལ་རྣམ་
[236b.2]པར་མཛེས་པའི་བདག་ཉིད་མངོན་དུ་བྱ་སྟེ། ཕྱག་རྒྱ་བཅིང་བར་བྱའོ། །ལག་པ་གཉིས་པོ་སོ་སོར་བཅིངས་ཏེ་སྡིགས་མཛུབ་དག་མཐེབ་ཆེན་གྱི་དབུས་སུ་བཞག་ནས་མེ་ཏོག་གི་རྣམ་པར་སྦྱར་བར་བྱའོ། །དེ་ནས་བཟླས་པ་བྱའོ། །ཨ་མཻ་ཏྲེ་ཡ་སྭཱ་ཧཱ། བྱམས་པའི་སྒྲུབ་ཐབས་རྫོགས་སོ།། །།
[236b.3]{T3613}༄༅༅། །རྒྱ་གར་སྐད་དུ། ཨུཙྪསྨ་ཛཾ་བྷ་ལ་སཱ་དྷ་ནཾ། བོད་སྐད་དུ། ཁྲོ་ཞིང་དགྱེས་པ་ཛཾབྷ་ལའི་སྒྲུབ་ཐབས། དཔལ་ལྡན་ཛཾ་བྷ་ལ་ལ་ཕྱག་འཚལ་ལོ། །ཐུབ་པའི་གཞོན་ནུ་ཐུབ་དབང་དགེ་བ་ཡིས། །ཕུན་ཚོགས་མཆོག་གིས་དཔག་མེད་རྣམ་པར་བརྒྱན། །གང་ཞིག་ཞབས་ལ་སྤྱན་གསུམ་
[236b.4]དྲག་པོ་ཡི། །གཙུག་གི་ནོར་བུའི་རྒྱན་གྱིས་བཏུད་གྱུར་པ། །བླ་མེད་ཡོན་ཏན་གཉིས་མེད་པའི། །རིན་ཆེན་ཚོང་འདུས་འདྲེན་པ་སྟེ། །རང་གི་ཕུན་ཚོགས་འགྲོ་རྣམས་ཀྱི། །རྒྱ་ཆེན་ཐོབ་ཕྱིར་བརྟེན་པར་བགྱི། །དེ་ལ་དང་པོར་རེ་ཞིག་བདག་གིས་དཔལ་ཛཾ་བྷ་ལ་སྒྲུབ་ལ་ས་ལ་སོགས་པའི་རིམ་པ་ཐོབ་
[236b.5]ནས། དེའི་ཚེ་བདག་གིས་ཡང་འགྲོ་བ་རྣམས་འདི་དང་ཕྱི་མའི་ཕུན་སུམ་ཚོགས་པའི་གནས་ལ་དགོད་པར་བྱའོ་ཞེས་པའི་བསམ་པ་དང་ལྡན་པས་སྙིང་གི་ནང་དུ་བུ་ག་ནས་རྗེས་དབྱངས་དང་བྲལ་བའི་ཨ་ཡིག་འོད་ཟེར་དཀར་པོ་འཕྲོ་ཞིང་དེ་ལས་སྐྱེས་པའི་ཟླ་བའི་དཀྱིལ་འཁོར་ལ་དེ་ལ་ཧཱུཾ་ཡིག་དབུས་ནག་
[236b.6]པོ་ཕྱིའི་ཁོར་ཡུག་ཅུང་ཟད་སེར་པོའི་འོད་ཟེར་གྱི་ཚོགས་མགོའི་སྟེང་དུ་འཕྲོ་བའོ། །དེ་ལས་སྐྱེས་པའི་རྡོ་རྗེ་འོག་ཏུ་རྩེ་མོ་བཞི་པ་སྟེང་དུ་རྩེ་ལྔ་པ་སྦྱར་བ་ལས་རྩེ་མོ་དགུ་སྟེ། གསུང་རབ་ཡན་ལག་དགུའི་རྣམ་པར་དག་པའོ། །གཞན་ནས་སྟེང་དང་འོག་ཏུ་རྩེ་མོ་གཅིག་ཏུ་བྱས་ནས་དབུས་ཀྱི་རྩེ་མོ་དང་དགུ་
[236b.7]ཞེས་སོ། །ཧཱུཾ་ཡིག་བཞིན་དུ་ཁ་དོག་དང་བྱ་བ་དང་ཚངས་པའི་ནང་དུ་ཟླ་བ་ལ་གནས་པའི་དེ་དང་འདྲ་བའི་ཧཱུཾ་དང་ལྡན་པ་བསྒོམ་པར་བྱའོ། །དེ་ནས་ཧཱུཾ་ཡིག་དང་རྡོ་རྗེ་དག་ལས་འོད་ཟེར་འཕྲོས་ནས། ཨོཾ་ཨ་ཞེས་པའི་སྔགས་བརྗོད་པ་སྔོན་དུ་འགྲོ་བས་ཕྱོགས་བཅུའི་སེམས་ཅན་རྣམས་ཀྱི་དོན་མཛད་པའི་ཛཾ་བྷ་ལའི་
[237a]
[237a.1]སྐུ་དཔག་ཏུ་མེད་པ་མར་མེ་ལས་མར་མེ་གཞན་འབྱུང་བ་བཞིན་དུ་འོད་ཟེར་གྱིས་མདུན་དུ་བཀུག་ནས་དེའི་སྐུ་གཅིག་ཏུ་བསྒོམས་ཏེ། ཉེར་སྤྱོད་ལྔས་མཆོད་ནས། སྡིག་པ་བཤགས་པ་ལ་སོགས་པ་ནས། ཚད་མེད་པའི་བར་བསྒོམ་སྟེ། དེའི་རྗེས་སུ་ཡང་ཧཱུཾ་དང་རྡོ་རྗེའི་འོད་ཟེར་རྣམས་མ་
[237a.2]ལུས་པ་ལུས་ཀྱི་ནང་དུ་བསྒོམས་ཏེ། སྤྲོས་པ་ཐམས་ཅད་དང་བྲལ་བ་སྟོང་པ་ཉིད་ཀྱི་རང་བཞིན་ལ། ཟླ་བ་དང་རྡོ་རྗེའི་ས་བོན་གྱི་འོད་ཟེར་རྣམས་ལ། ཨོཾ་ཨ་ཞེས་པ་འདིས་སྤྲོས་ཏེ། བཀུག་ནས་བཅོམ་ལྡན་འདས་རབ་ཏུ་གཞུག་པར་བྱའོ། །རབ་ཏུ་བཅུག་པའི་མཐར་སྐད་ཅིག་གིས་ཟླ་བ་ལ་སོགས་པ་རྫོགས་
[237a.3]པ་ལས་བདག་ཉིད་བཅོམ་ལྡན་འདས་ཛཾ་བྷ་ལ་གཞོན་ནུ་ལོ་ལྔ་ལོན་པ་ལྟ་བུ་སྣ་ཚོགས་པདྨ་དང་ཟླ་བའི་སྟེང་དུ་ཐུང་ཞིང་རྒྱན་ཐམས་ཅད་ཀྱིས་བརྒྱན་པ་རིན་པོ་ཆེའི་ཅོད་པན་ཅན་ནོ། །ཁ་ནས་རིན་པོ་ཆེ་སྐྱུག་བཞིན་པ། ནོར་སྦྱིན་སེར་པོ་གན་རྐྱལ་དུ་ཉལ་བའི་དཔྲལ་བར་ཞབས་གཡས་པས་མནན་པ། རྐང་
[237a.4]པ་གཉིས་ཀྱི་སྟེང་དུ་ཞབས་གཡོན་པས་མནན་ཅིང་། གཡོན་བརྐྱང་གི་ཞབས་སུ་མཛད་པ། གཅེར་བུ་རྟགས་སྟེང་དུ་ལངས་པ། ལྟོ་བ་འཕྱང་བ། ཐུགས་ཀར་ཕྱག་གཡས་པས་ཐོད་པ་ཁྲག་གིས་བཀང་བ་ལ་ཞལ་མངོན་པར་གཟིགས་པ། བརླ་གཡོན་པའི་སྟེང་དུ་ཕྱག་གཡོན་པས་རིན་པོ་ཆེའི་
[237a.5]སྙེ་མ་སྐྱུག་བཞིན་པའི་ན་གུ་ལི་ཁ་ཐུར་དུ་བསྟན་པ་བསྣམས་པ། མིའུ་ཐུང་རྣ་བ་མ་ཕུག་པ། ཞལ་ཟླ་བ་ཕྱེད་པ་ལྟ་བུ། མཆེ་བ་གཙིགས་པ། སྤྱན་གཉིས་ཟླུམ་ཞིང་དམར་བ། དཔྲལ་བར་ཁྲོ་གཉེར་བསྡུས་པ། དབུ་སྐྲ་ཁམ་པ་གྱེན་དུ་བརྫེས་པ། ས་གནོན་གྱི་ཕྱག་རྒྱ་མཛད་པའི་ཐུབ་པ་མི་བསྐྱོད་
[237a.6]པ་སྔོན་པོས་དབུ་བརྒྱན་པ། དགའ་བོ་སྔོན་པོ་ཏ་མ་ལ་ལྟ་བུས་དབུ་སྐྲ་བཅིང་པ། འཇོག་པོ་དམར་པོས་སྙན་དཀྲིས་པ། པདྨ་ཆེན་པོ་པདྨའི་རྩ་བ་ལྟ་བུ་དཀར་པོས་དོ་ཤལ་བྱས་པ། དུ་བའི་མདོག་ལྟ་བུ་མཐའ་ཡས་ཀྱིས་མཆོད་ཕྱིར་ཐོགས་མཛད་པ། ནོར་རྒྱས་དཀར་པོས་སྐ་རགས་མཛད་པ། པདྨ་
[237a.7]ཀུན་ད་ལྟར་ཤིན་ཏུ་མཛེས་པས་ཞབས་གདུབ་བྱས་པ། དུང་སྐྱོང་སེར་པོས་ལག་གདུབ་མཛད་པ། རིགས་ལྡན་དུ་བ་ལྟ་བུ་ཁྲ་བོས་དབུ་རྒྱན་བྱས་པ། མདོག་ནག་ཅིང་ཕྱིའི་ཁོར་ཡུག་ཅུང་ཟད་སེར་བ་འོད་ཟེར་གྱི་ཚོགས་འཕྲོ་བ་བསམས་ནས། དཔྲལ་བ་དང་ཞལ་དང་དཔུང་པ་གཡས་གཡོན་དང་སྙིང་
[237b]
[237b.1]ག་དང་རྡོ་རྗེའི་སྟེང་དང་བརླ་གཡས་གཡོན་དང་ཞབས་གཡས་གཡོན་དག་གི་ནང་དུ་བུ་གར་གནས་པའི་ཟླ་བའི་དཀྱིལ་འཁོར་བཅུ་རྣམས་ལ། ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཞེས་པའི་ཡི་གེ་རྣམས་སེར་ཞིང་འོད་ཟེར་སེར་པོར་བལྟ་བར་བྱའོ། །དེའི་དུས་སུ་སྣ་ནས་རླུང་འབྱུང་བའི་དུས་སུ་ཧཱུཾ་
[237b.2]ཡིག་ལ་སོགས་པའི་འོད་ཟེར་རྣམས་ཀྱིས་སྙིང་གའི་ཧཱུཾ་དང་རྡོ་རྗེའི་འོད་ཟེར་རྣམས་ཀྱིས་ཡང་ཕྱོགས་རྣམས་སུ་འཕྲོ་ཞིང་རེག་པ་ཙམ་གྱིས་སེམས་ཅན་རྣམས་བཅོམ་ལྡན་འདས་ཀྱི་སྐུར་བསམས་ཏེ། ཡང་རླུང་རྔུབ་པའི་དུས་སུ་ཧཱུཾ་ཡིག་གིས་རབ་ཏུ་འཇུག་པར་བསམས་ནས་སེམས་བརྟན་པར་བྱ་
[237b.3]སྟེ་སྔགས་བཟླས་པར་བྱའོ། །འཇིག་རྟེན་གསུམ་ན་གནས་པའི་རིན་པོ་ཆེ་སྣ་ཚོགས་པ་ཐམས་ཅད་ཀླུ་དང་སྲེ་མོ་དང་ནོར་སྦྱིན་རྣམས་ཀྱི་ཁ་རུ་རབ་ཏུ་གཞུག་པར་བྱའོ། །སླར་ཡང་རླུང་འབྱུང་བ་ན་ཀླུ་ལ་སོགས་པས་མིད་པའི་རིན་པོ་ཆེ་རྣམས་མདུན་དུ་སྐྱུག་པར་བསམ་པར་བྱའོ། །དེ་བཞིན་དུ་ཡང་
[237b.4]དང་ཡང་དུ་སྤྲོ་ཞིང་བསྡུ་བ་ལ་སོགས་པ་བྱས་ནས། དེའི་རྗེས་སུ་ངལ་ན། ན་མོ་རཏྣ་ཏྲ་ཡཱ་ཡ། ན་མོ་མ་ཎི་བྷ་དྲཱ་ཡ། མ་ཧཱ་ཡཀྵ་སེ་ན་པ་ཏ་ཡེ། ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཞེས་པའི་སྔགས་བཟླས་པར་བྱའོ། །ཡང་ན་ཡི་གེ་བཅུ་བཀོད་པའི་སྔགས་སོ། །ཆུ་འབུལ་བའི་དུས་སུ་ལག་
[237b.5]པ་གཡས་པ་གན་རྐྱལ་དུ་བྱས་པའི་དབུས་སུ་བཾ་ཡིག་གི་འོད་ཟེར་གྱིས་ལག་པ་བུམ་པ་བཟང་པོ་བཞིན་དུ་བྱའོ། །ལག་པའི་རྩ་བར་ཨོཾ་ཡིག་གི་འོད་ཟེར་གྱིས་ལག་གདུབ་ཀྱི་རྣམ་པ་དང་ལྡན་པའི་བཾ་མོ། །དབུས་སུ་ཛཾ་ངོ་། །མཛུབ་མོ་དང་གུང་མོ་དང་མིང་མེད་དང་མཐེའུ་ཆུང་དང་།
[237b.6]མཐེབ་ཆེན་གྱི་རྩེ་མོ་རྣམས་ལ། བྷ་ལ་ཛ་ལེནྡྲཱའི་ཡི་གེ་རྣམས་རིམ་པ་ཇི་ལྟ་བ་བཞིན་ནོ། །ཨོཾ་དང་བཾ་ཡིག་ནི་དབུས་སུའོ། །གང་ཡཾ་ཡིག་གི་གཡས་དང་གཡོན་དུ་སྭཱ་ཧཱའི་ཡི་གེའོ། །འདི་རྣམས་ནི་ཨོཾ་ཡིག་ལ་སོགས་པ་རང་རང་གི་གནས་ལ་བུ་ག་རྣམས་སུ་ཟླ་བ་ལ་གནས་པའི་ཁ་དོག་
[237b.7]སེར་ཞིང་འོད་ཟེར་སེར་པོར་བསམས་ནས། ལག་པ་ཆུ་དང་མེ་ཏོག་དང་བཅས་པས་ཁ་མངོན་པར་ཕྱོགས་ཏེ། ཨོཾ་ཨིནྡྲ་ཎི་མུ་ཁཾ་བྷྲ་མ་རི་སྭཱ་ཧཱ། ཞེས་པའི་སྔགས་ལན་བདུན་མངོན་པར་བསྔགས་ནས། དེའི་རྗེས་སུ་ལག་པ་བརྐྱང་སྟེ་སྦྱིན་པར་བྱ་བའི་ཆུ་རང་གི་ཞལ་དུ་ཞུགས་ཤིང་ཛཾ་ཡིག་
[238a]
[238a.1]གི་འོད་ཟེར་གྱིས་སྙིང་གའི་གནས་ནས་རྡོ་རྗེ་ཧཱུཾ་ཡིག་གི་འོད་ཟེར་གྱིས་ཡང་ཁ་དོག་སེར་པོར་བྱས་ཏེ། རྡོ་རྗེའི་སྒོ་ནས་ཐོན་ཏེ་ལག་མཐིལ་དུའོ། །མདུན་དུ་སྐད་ཅིག་གིས་བསྒོམས་ནས་དེའི་ཞལ་མངོན་པར་ཕྱོགས་པས་སྐུ་གཟུགས་ཀྱི་ཞལ་གྱི་ནང་དུ། ཨོཾ་ཛླུཾ་སྭཱ་ཧཱ།
[238a.2]ཞེས་པའི་སྔགས་ཀྱིས་བརྒྱ་རྩ་བརྒྱད་དོ། །རཏྣ་ཏྲ་ཡཱ་ཞེས་པ་ལ་སོགས་པས་ཀྱང་ལན་བདུན་དབུལ་བར་བྱའོ། །ན་མོ་རཏྣ་ཏྲ་ཡཱ་ཞེས་པ་ལ་སོགས་པ་ཡང་ལན་ཅིག་བརྗོད་ནས། བུ་རམ་དང་བསྲེས་ཤིང་འབྲས་ཀྱི་ཁུར་བ་ལ་སོགས་པས་གཏོར་མ་དབུལ་བར་བྱའོ། །ཇི་ལྟར་གསུངས་པ་
[238a.3]བཞིན་དུ་ཐུན་མཚམས་གསུམ་དང་ཡང་ན་ཐུན་གཅིག་ཏུ་གནས་ནས་བསྟོད་པ་དང་སྨོན་ལམ་ཡང་གདབ་པར་བྱའོ། །དེ་བསྒོམས་པའི་རྗེས་ལ་བཅོམ་ལྡན་འདས་ཨོཾ་བཛྲ་མུཿཞེས་པས་གཤེགས་པར་བྱའོ། །འོན་ཀྱང་སྨིན་དྲུག་དང་དབོ་དང་ས་ག་དང་ཆུ་སྟོད་དང་། གཞན་ཡང་བཟང་ཞིང་
[238a.4]བཟང་བའི་ཉི་མ་དགེ་བ་ལ། རྡོ་རྗེའི་དུམ་བུ་ལ་སྐད་ཅིག་གིས། བཅོམ་ལྡན་འདས་ཀྱི་སྐུར་བསྐྱེད་ནས་ཡང་དག་པར་མཆོད་དེ། གསོ་སྦྱོང་བླངས་ནས། བཟོ་བོ་གཅིག་གིས་ཉི་མ་གཅིག་ལ་དཔའ་བོའི་རིམ་པས་སྐུ་གཟུགས་བྱའོ། །བྱས་ནས་ཀྱང་བདག་ཉིད་ཀྱི་རིམ་པ་ཇི་ལྟ་བ་བཞིན་དུ་
[238a.5]བཅོམ་ལྡན་འདས་ཀྱི་སྐུ་ལ་ཡི་གེ་རྣམས་དགོད་པ་དང་བསྒོམ་པ་དང་ཆུ་དབུལ་བ་ལ་སོགས་པས་བསྒྲུབ་པར་བྱའོ་ཞེས་པ་ནི་མན་ངག་གོ། །དེ་ནས་གཤེགས་སུ་གསོལ་བར་བྱའོ། །བཅོམ་ལྡན་འདས་ཀྱི་སྐུ་གཟུགས་ནི་རྟག་ཏུ་གནས་ཏེ་བཀུར་སྟི་ལ་སོགས་པ་བྱའོ་ཞེས་སོ། །པཎྜི་ཏ་ཆེན་པོ་
[238a.6]འཇིགས་མེད་འབྱུང་གནས་སྦས་པས་མཛད་པའི་ཨུཙྪུསྨ་ཛཾ་བྷ་ལའི་སྒྲུབ་ཐབས་རྫོགས་སོ།། {T3614}༄༅༅། །རྒྱ་གར་སྐད་དུ། ཛཾ་བྷ་ལ་སཱ་དྷ་ནཾ། བོད་སྐད་དུ། ཛཾ་བྷ་ལའི་སྒྲུབ་ཐབས། དཔལ་ལྡན་ཛཾ་བྷ་ལ་ལ་ཕྱག་འཚལ་ལོ། །སྔོན་མ་བཞིན་དུ་སྟོང་པ་ཉིད་ཀྱི་
[238a.7]མཐར་ཐུག་པ་རྣམ་པར་བསམས་ནས། སྣ་ཚོགས་པདྨ་འདབ་མ་བརྒྱད་པའི་སྟེང་དུ་ཟླ་བ་ལ་ཛཾ་ཡིག་ལས་སྐྱེས་པའི་བཅོམ་ལྡན་འདས་ཛཾ་བྷ་ལ་བསྒོམ་པར་བྱ་སྟེ། གསེར་གྱི་མདོག་ཅན་ལྟ་བུ་ཐུང་ཞིང་ལྟོ་བ་འཕྱང་བ། རྒྱན་ཐམས་ཅད་ཀྱིས་བརྒྱན་པ། གཡོན་པ་དང་གཡས་པའི་ཕྱག་
[238b]
[238b.1]དག་གིས། སྲེ་མོ་དང་བཱི་ཛ་པཱུར་ཀ་བསྣམས་པ། རིན་ཆེན་འབྱུང་ལྡན་གྱིས་དབུ་བརྒྱན་པ། ཨུཏྤ་ལའི་ཕྲེང་བ་བསྣམས་པའོ། །ཤར་ལ་སོགས་པའི་འདབ་མ་རྣམས་སུ་ནོར་བུ་བཟང་པོ་དང་གང་བ་བཟང་པོ་དང་། ནོར་སྦྱིན་དང་རྣམ་ཐོས་སྲས་རྣམས་སོ། །མེ་ལ་སོགས་པའི་འདབ་མ་ལ་ཀི་ལི་མི་
[238b.2]ལི་དང་། ཙི་པི་ཀུཎྜ་ལི་དང་། མུ་ཁེནྡྲ་དང་། ཙ་རེནྡྲ་རྣམས་སོ། །དེ་བཞིན་དུ་ཇི་ལྟར་གསུངས་པའི་རིམ་པས་ནོར་རྒྱུན་མ་དང་། ཆུ་ཤེལ་མ་དང་། སོ་ལེགས་མ་དང་། འཕགས་མ་དང་། ཤིན་ཏུ་བཟང་མོ་དང་། སྦས་མ་དང་། ལྷ་མོ་དང་། དབྱངས་ཅན་མ་ཞེས་ཏེ། གནོད་སྦྱིན་མོ་འདི་རྣམས་
[238b.3]བསམ་པར་བྱའོ། །ནོར་རྒྱུན་མ་ནི་ཛཾ་བྷ་ལ་དང་ལྷན་ཅིག་ཏུའོ། །གནོད་སྦྱིན་མོ་རྣམས་ནི་ནོར་རྒྱུན་མ་ཇི་ལྟ་བ་བཞིན་ནོ། །གནོད་སྦྱིན་རྣམས་ཛཾ་བྷ་ལ་བཞིན་ཏེ། དེ་བཞིན་དུ་བསམས་ནས་སྔགས་བཟླས་པར་བྱའོ། །དེ་ལ་གནོད་སྦྱིན་རྣམས་ཀྱི་སྔགས་ནི། ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཨོཾ་མ་
[238b.4]ཎི་བྷ་དྲ་ཡེ་སྭཱ་ཧཱ། ཨོཾ་པུརྞ་བྷ་དྲ་ཡེ་སྭཱ་ཧཱ། ཨོཾ་དྷ་ན་དཱ་ཡེ་སྭཱ་ཧཱ། ཨོཾ་བཻ་ཤྲ་མ་ཎཱ་ཡཻ་སྭཱ་ཧཱ། ཨོཾ་ཀི་ལི་མི་ལི་ཡེ་སྭཱ་ཧཱ། ཨོཾ་ཙི་པི་ཀུཎྜ་ལི་ཡཻ་སྭཱ་ཧཱ། ཨོཾ་མུ་ཁེནྡྲ་ཡེ་སྭཱ་ཧཱ། ཨོཾ་ཙ་རེནྡྲ་ཡེ་སྭཱ་ཧཱ། དེ་ནས་གནོད་སྦྱིན་མོ་རྣམས་ཀྱི་སྔགས་ནི། ཨོཾ་བ་སུ་དྷ་རཱ་ཡེ་སྭཱ་ཧཱ། ཨོཾ་ཙནྡྲ་ཀནྟ་ཡཻ་སྭཱ་ཧཱ།
[238b.5]ཨོཾ་དྷ་ན་དཱ་ཡཻ་སྭཱ་ཧཱ། སོ་སུ་དནྟ་ཡི་སྭཱ་ཧཱ། ཨོཾ་ཨཱརྱ་ཡཻ་སྭཱ་ཧཱ། ཨོཾ་སུ་བྷ་དྲཱ་ཡཻ་སྭཱ་ཧཱ། ཨོཾ་གུ་པ་ཏ་ཡཻ་སྭཱ་ཧཱ། ཨོཾ་དེ་བཱི་ཡཻ་སྭཱ་ཧཱ། ཨོཾ་སྭ་ར་སྭ་ཏཱི་ཡཻ་སྭཱ་ཧཱ། དེ་བཞིན་དུ་ཐུན་མཚམས་གསུམ་དུ་བསྒོམས་ནས། ཆུ་ཁྱོར་བ་བརྒྱ་རྩ་བརྒྱད་རབ་ཏུ་ཕུལ་བས། འཇིག་རྟེན་གསུམ་
[238b.6]གྱི་མངའ་རིས་སྟེར་བར་འགྱུར་རོ། །སྔ་བར་བྱ་རོག་མི་གྲག་པ་ཙམ་ན་ཆུའི་ནང་དུ་བཟླས་ན་ནོར་མི་ཉམས་ཤིང་འཕེལ་བར་འགྱུར་རོ། །དེ་ནས་གསེར་ལ་སོགས་པའི་སྣོད་དུ་ནོར་རྒྱུན་མ་དང་གནོད་སྦྱིན་ལྷན་ཅིག་ཏུའོ། །སྣོད་གཉིས་པར་བཅོམ་ལྡན་འདས་ཛམྦྷ་ལ་གནོད་སྦྱིན་གྱིས་
[238b.7]ཡོངས་སུ་བསྐོར་བ་བྲིས་ཏེ་ཡང་དག་པར་སྦྱར་ནས་བསྒྲུབ་པར་བྱའོ། །དངོས་གྲུབ་ཆེན་པོ་བརྒྱད་ལ་སོགས་པ་ཡང་སྟེར་བར་འགྱུར་རོ། །ཛམྦྷ་ལའི་སྒྲུབ་ཐབས་རྫོགས་སོ།། {T3615}༄༅༅། །རྒྱ་གར་སྐད་དུ། ཛཾ་བྷ་ལ་སཱ་དྷ་ནཾ། བོད་སྐད་དུ། ཛཾ་བྷ་ལའི་སྒྲུབ་ཐབས།
[239a]
[239a.1]ཛཾ་བྷ་ལ་ལ་ཕྱག་འཚལ་ལོ། །སྟོང་པ་ཉིད་བསྒོམས་པའི་རྗེས་ལ། ཉི་མ་ལ་ཛཾ་ཡིག་ལས་སྐྱེས་པའི་ཛཾ་བྷ་ལ་སེར་པོ་ཞལ་གསུམ་པ་ཕྱག་དྲུག་པ་མི་བསྐྱོད་པས་རལ་པའི་ཅོད་པན་ཅན། ཕྱག་གཡས་པ་གསུམ་ན་མ་ཏུ་ལུང་ག་དག་དང་ལྕགས་ཀྱུ་དང་མདའ་བསྣམས་
[239a.2]པ། གཡོན་གྱི་ཕྱག་དང་པོས་རྩིབས་ལོགས་གཡོན་དུ་གནས་པའི་ཤེས་རབ་མ་ལ་འཁྱུད་པ། གཞན་དག་གིས་ཞགས་པ་དང་བཅས་པའི་སྲེ་མོང་དང་། གཞུ་བཀང་བའི་བདག་ཉིད་དུ་བསྐྱེད་ནས། མདུན་དུ་དེའི་སྐུ་བསམས་ཤིང་ལྷག་པར་གནས་ནས་དེའི་སྤྱི་བོར་
[239a.3]རྡོ་རྗེ་འཛིན་པ་ཆེན་པོ་བསྒོམས་ལ། དེ་ལ་རབ་ཏུ་བཅུག་ཅིང་དབང་བསྐུར་ནས། རྡོ་རྗེའི་ཆུ་ཁྱོར་བ་བརྒྱ་རྩ་བརྒྱད་བླུད་པར་བྱའོ། །ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཞེས་པ་ནི་སྔགས་སོ། །བར་གྱི་མན་ངག་ཛཾ་བྷ་ལའི་སྒྲུབ་ཐབས་རྫོགས་སོ།། {T3616}༄༅༅། །རྒྱ་གར་སྐད་དུ། སཾ་ཀྵིཔྟ་ཤྲཱི་
[239a.4]ཛཾ་བྷ་ལ་སཱ་དྷ་ནཾ། བོད་སྐད་དུ། དཔལ་ཛཾ་བྷ་ལའི་སྒྲུབ་ཐབས་མདོར་བསྡུས་པ། དཔལ་ལྡན་ཛཾ་བྷ་ལ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྙིང་གར་ཟླ་བའི་དབུས་སུ་ཛཾ་ཡིག་སེར་པོ་ལས་དཔལ་ཛཾ་བྷ་ལ་སྐུ་མདོག་སེར་པོ་ཕྱག་གཉིས་པ། ཕྱག་གཡས་ན་བཱི་ཛ་པཱུ་ར་ཀ་དང་།
[239a.5]གཡོན་ན་ནེེའུ་ལེ་རིན་པོ་ཆེའི་ཆར་འབེབས་བཞིན་པ་བསྣམས་པ། སངས་རྒྱས་ལྔའི་ཅོད་པན་ཅན། ཞབས་གཉིས་ཀྱིས་དུང་གི་མགོ་དང་པདྨའི་མགོའི་གཏེར་ཆེན་པོ་དག་མནན་པ། ཨུཏྤ་ལ་སྔོན་པོའི་ཕྲེང་བ་ཅན་རྒྱན་ཐམས་ཅད་ཀྱིས་བརྒྱན་པའི་ཛམྦྷ་ལའི་སྐུར་རང་ཉིད་བསྒོམ་པར་བྱའོ། །རང་གི་ཁྱིམ་དུ་
[239a.6]ཡང་རིན་པོ་ཆེ་སྣ་ཚོགས་པའི་ཆར་འབབ་བཞིན་པ་རབ་ཏུ་འཇུག་པའི་བདག་ཉིད་བསམ་པར་བྱའོ། །དེ་ནས་ལག་པ་གཉིས་ཁུ་ཚུར་བཅིངས་ཏེ། གུང་མོ་དག་གི་དབུས་མའི་ཚིགས་གསུམ་པ་བཀུག་པ་ནི་ཛཾ་བྷ་ལའི་ཕྱག་རྒྱའོ། །ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། སྔགས་འདིས་རྗེ་བཙུན་ལ་ཆུ་ཁྱོར་བ་
[239a.7]བརྒྱ་རྩ་བརྒྱད་དབུལ་བར་བྱའོ། །ཕྱི་ནས་མཆོད་ནས་སྔགས་བཟླས་པར་བྱའོ། །དངོས་གྲུབ་ནི་སྦྱིན་བདག་ཆེན་པོར་འགྱུར་ཏེ་ཐེ་ཚོམ་མེད་དོ། །དཔལ་ཛཾ་བྷ་ལའི་སྒྲུབ་ཐབས་མདོར་བསྡུས་པ་རྫོགས་སོ།། །།སློབ་དཔོན་ཆེན་པོ་ཙནྡྲ་གོ་མིས་མཛད་པའོ།། །།
[239b]
[239b.1]{T3617}༄༅༅། །རྒྱ་གར་སྐད་དུ། སཾ་ཀྵིཔྟ་ཛཾ་བྷ་ལ་སཱ་དྷ་ནཾ། བོད་སྐད་དུ། ཛཾ་བྷ་ལའི་སྒྲུབ་ཐབས་མདོར་བསྡུས་པ། བཅོམ་ལྡན་འདས་ཛཾ་བྷ་ལ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྙིང་གར་པདྨ་དང་། ཟླ་བ་ལ་ཛཾ་ཡིག་ལས་བྱུང་བའི་འོད་ཟེར་གྱིས་སངས་
[239b.2]རྒྱས་ལ་སོགས་པ་ཡང་དག་པར་མཆོད་ནས། སྡིག་པ་བཤགས་པ་ལ་སོགས་པ་བྱའོ། །དེ་ནས་སྟོང་པ་ཉིད་སྔོན་དུ་བྱ་སྟེ། དེ་ལ་དེ་བཞིན་དུ་གནས་པའི་སྣ་ཚོགས་པདྨ་དང་ཟླ་བ་ལ་ཛཾ་ལས་བྱུང་བའི་ས་བོན་གྱི་འོད་ཟེར་གྱིས་སེམས་ཅན་གྱི་དོན་མཛད་ནས། དེ་ཡོངས་སུ་གྱུར་པ་ལས་ཛཾ་བྷ་ལ་
[239b.3]གསེར་གྱི་མདོག་ལྟ་བུ་སངས་རྒྱས་ལྔའི་ཅོད་པན་ཅན། མཛེས་པའི་གོས་དང་། རྒྱན་གྱིས་སྤྲས་པ། ཞལ་གཅིག་ཕྱག་གཉིས་པ། ཕྱག་གཡས་ན་བཱི་ཛ་པཱུ་ར་ཀ་དང་། གཡོན་ན་ཁ་ནས་རིན་པོ་ཆེ་སྣ་ཚོགས་སྐྱུག་པའི་ནེའུ་ལེ་བསྣམས་པ། ཨུཏྤ་ལ་སྔོན་པོའི་ཕྲེང་བ་ཅན། ལོགས་
[239b.4]གཉིས་ན་རིན་པོ་ཆེའི་སྙེ་མའི་ཆར་འབེབས་པའི་གནོད་སྦྱིན་གཉིས་གནས་པ། ཞབས་ཀྱི་འོག་ན་གནས་པའི་རིན་པོ་ཆེའི་སྙེ་མའི་བུམ་པ་དཔག་ཏུ་མེད་པའི་འོད་ཟེར་གྱི་ཕྲེང་བ་འཁྲིགས་པའི་བདག་ཉིད་དུ་བསམ་པར་བྱའོ། །ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཞེས་པའི་སྔགས་བཟླས་སོ། །ལག་པ་གཉིས་ཁུ་
[239b.5]ཚུར་བཅིངས་ཏེ་གུང་མོའི་དབུས་སུ་ཚིགས་གསུམ་པ་བཅག་པའི་ཕྱག་རྒྱས་སྙིང་ག་དང་། མགྲིན་པ་དང་། སྤྱི་བོ་དང་མཛོད་སྤུ་རྣམས་སུ་སྦྱིན་པར་བྱའོ། །སྔ་བར་ཡང་དེ་བཞིན་དུ་སྐད་ཅིག་གིས་བསྒོམས་ནས། འདིས་ཆུ་སྙིམ་པ་བརྒྱ་རྩ་བརྒྱད་དབུལ་བར་བྱའོ། །ཨོཾ་ཛཾ་བྷ་ལ་ཛ་ལེནྡྲ་ཡེ་དྷ་ན་མེ་
[239b.6]དེ་ཧི་ད་ད་པཱ་ཡ་སྭཱ་ཧཱ། ཛཾ་བྷ་ལའི་སྒྲུབ་ཐབས་མདོར་བསྡུས་པ་རྫོགས་སོ།། {T3618}༄༅༅། རྒྱ་གར་སྐད་དུ། བིསྟ་ར་ཛཾ་བྷ་ལ་སཱ་དྷ་ནཾ། བོད་སྐད་དུ། ཛཾ་བྷ་ལའི་སྒྲུབ་ཐབས་རྒྱས་པ། དཔལ་ལྡན་ཛཾ་བྷ་ལ་ལ་ཕྱག་འཚལ་ལོ། །སྟོང་པ་ཉིད་བསྒོམས་པའི་རྗེས་སུ་ཅུང་
[239b.7]ཟད་དམར་བའི་ཟླ་བའི་དཀྱིལ་འཁོར་ལ་གནོད་སྦྱིན་གྱི་ཤིང་རྟ་ཟུར་གསུམ་པདྨ་འདབ་མ་བརྒྱད་པའི་རྣམ་པའོ། །དེའི་དབུས་སུ་བཾ་ཡིག་ལས་ནོར་རྒྱུན་མ་སྐུ་མདོག་སེར་མོ་ཕྱག་ན་འབྲས་ཀྱི་སྙེ་མ་དང་མཆོག་སྦྱིན་མཛད་པ། རྒྱན་ཐམས་ཅད་ཀྱིས་བརྒྱན་པ། གནོད་སྦྱིན་མོ་བརྒྱད་ཀྱིས་ཡོངས་སུ་བསྐོར་བ་
[240a]
[240a.1]འདི་ལྟ་སྟེ། བཟང་མོ་དང་། རབ་ཏུ་བཟང་མོ་དང་། སྦས་མ་དང་། རབ་ཏུ་སྦས་མ་དང་། ལྷ་མོ་དང་། དབྱངས་ཅན་མ་དང་། འཕགས་མ་དང་། ཆུ་ཤེལ་མ་རྣམས་ཀྱིས་ཡོངས་སུ་བསྐོར་བ། ལྷ་མོ་ཆེན་མོ་དེའི་བྷ་གའི་དབུས་སུ་ཛཾ་ཡིག་ལས་སྐྱེས་པའི་ཛཾ་བྷ་ལ་
[240a.2]ནོར་རྒྱུན་མ་ལ་འཁྱུད་པ། བྱང་ཆུབ་ཀྱི་སེམས་ངེས་པར་སྦྱོར་བས་རིན་པོ་ཆེ་ཕྱག་ན་ཡང་དག་པར་བསྟོད་པ་གསལ་བར་བསྒོམ་པར་བྱའོ། །འབབ་པའི་དུས་སུ་བཅོམ་ལྡན་འདས་ཀྱི་ཤར་ཕྱོགས་སུ་ནོར་བུ་བཟང་པོ་སྐུ་མདོག་སྔོན་པོའོ། །ལྷོ་ཕྱོགས་སུ་གང་བ་བཟང་པོ་སེར་པོའོ། །ནུབ་
[240a.3]ཕྱོགས་སུ་རྣམ་ཐོས་སྲས་དམར་པོའོ། །བྱང་ཕྱོགས་སུ་གནོད་སྦྱིན་དམར་པོའོ། །མེ་དང་བདེན་བྲལ་དང་རླུང་དང་། དབང་ལྡན་གྱི་མཚམས་སུ་མུ་ཁེནྡྲ་སྔོན་པོ་དང་ཀི་ལི་མི་ལི་དང་། ཀི་ལི་མི་ལི་ཆེན་པོ་དང་། ཞལ་གྱི་དབང་པོ་སྐུ་མདོག་དམར་པོ་དང་། སྤྱོད་པའི་དབང་པོ་སྐུ་མདོག་ལྗང་
[240a.4]གུ་སྟེ། གསེར་གྱི་ཟུར་ཕུད་ལྔ་པ། ཕྱག་གཡས་ན་བཱི་ཛ་པཱུ་ར་ཀ་དང་། གཡོན་ན་རིན་པོ་ཆེ་འབར་བ་འབོ་བཞིན་པའི་སྲེ་མོང་བསྣམས་པ། དེ་བཞིན་གཤེགས་པ་ལྔ་འཕྲོ་བ། པདྨ་ཅན་དང་དུང་ཅན་གྱི་གཏེར་ཆེན་པོའི་མགོ་བོར་རིན་པོ་ཆེའི་ཆར་འབེབས་བཞིན་པ་རང་གི་ཁང་པའི་
[240a.5]གནས་ཀྱི་ཕྱོགས་གཅིག་ཏུ་བསམ་པར་བྱའོ། །མགོན་པོ་ཛཾ་བྷ་ལ་སྐུ་མདོག་སེར་པོ་ཨུཏྤ་ལ་སྔོན་པོའི་ཕྲེང་བ་བསྣམས་པ། དེ་ཐམས་ཅད་ཀྱང་གནོད་སྦྱིན་མོ་བརྒྱད་ཀྱི་བྷ་གའི་དབུས་སུ་གནས་པ། རིན་པོ་ཆེའི་ཆར་འབེབས་བཞིན་པ། ཛཾ་བྷ་ལ་དང་འདྲ་བ་བསྒོམ་པར་བྱའོ། །
[240a.6]ཤར་སྒོར་ནོར་སྦྱིན་དང་ནོར་སྦྱིན་ཆེན་པོ། ལྷོ་སྒོར་གནོད་སྦྱིན་དང་གནོད་སྦྱིན་ཆེན་པོ་དང་། ནུབ་སྒོར་ཀི་ལི་མི་ལི་དང་། ཀི་ལི་མི་ལི་ཆེན་པོའོ། །བྱང་སྒོར་གང་བ་དང་གང་བ་བཟང་པོ་ཆེན་པོ་སྟེ། དེ་ཐམས་ཅད་ཀྱང་གཅེར་བུ་འབྲས་བུ་འཕྱང་བ། ལྟོ་བ་འཕྱང་ཞིང་རིན་པོ་ཆེའི་
[240a.7]ཆར་འབེབས་པའོ། །དེ་ནས་སྤྱི་བོར་ནོར་བུ་བཟང་པོ། མིག་གཉིས་ལ་རྣམ་ཐོས་སྲས། ཁ་ལ་མུ་ཁེནྡྲའོ། །ནུ་མའི་བར་དུ་གང་བ་བཟང་པོ། ལྟེ་བ་ལ་ནོར་སྦྱིན། བརླ་དག་ལ་ཀི་ལི་མི་ལི་དང་། ཀི་ལི་མི་ལི་ཆེན་མོ། རྐང་པ་དག་ལ་ཙི་པི་ཀུཎྜྲ་ལིའོ་ཞེས་པའི་ལྷ་རྣམས་
[240b]
[240b.1]བཀོད་ལ། ཡི་གེ་རྣམས་དགོད་པར་བྱའོ། །ཨོཾ་ནི་སྤྱི་བོར་རོ། །ཛླུཾ་ནི་དཔྲལ་བར་རོ། །ཙླུཾ་ནི་རྣ་བ་དག་ལའོ། །མགོ་བོའི་རྒྱབ་ཏུ་སྭཱ་ཧཱའོ། །མཁྲིག་མགུལ་དུ་ཙླུཾ་མོ། །ལག་པའི་དབུས་སུ་སླུཾ་མོ། །སོར་མོ་ཐམས་ཅད་ལ་ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཨོཾ་ཛླུཾ་ཙླུཾ་སྭཱ་ཧཱ་ཞེས་པའི་
[240b.2]སྔགས་སོ། །དེ་བཞིན་དུ་མཛུབ་མོ་ལ་ནོར་བུ་བཟང་པོའོ། །གུང་མོ་ལ་གང་བ་བཟང་པོའོ། །མིང་མེད་ལ་ནོར་སྦྱིན་ནོ། །མཐེའུ་ཆུང་ལ་རྣམ་ཐོས་སྲས་སོ། །ཙི་པི་ཀུཎྜ་ལི་ནི་མཐེབ་ཆེན་ལའོ། །མཁྲིག་མཚམས་སུ་ཀི་ལི་མི་ལི་ནའོ། །ཡི་གེ་རྣམས་ལག་པ་ལ་བཀོད་ནས།
[240b.3]སྔ་བར་རྡོ་རྗེའི་ཆུ་ལ་སོགས་པའི་བདུད་རྩི་ལྔ་སྟེ། དེའི་ངོ་བོ་མ་ཡིན་པ་ཡང་རྡོ་རྗེའི་ཆུ་ཙམ་ཡང་བསྲེས་ཏེ་ཁྱོར་བས་འཐུང་ནས། ལག་པས་ཁྱོར་བ་བརྒྱ་རྩ་བརྒྱད་དབུལ་བར་བྱའོ། །ཐུན་མཚམས་གསུམ་གྱིས་ཡུན་མི་རིང་བར་འགྲུབ་པར་འགྱུར་རོ། །ཨོཾ་ཛླུཾ་ཙླུཾ་སླུཾ་སཾ་ཞེས་བརྗོད་
[240b.4]ནས་ཆུ་ཁྱོར་བས་སྦྱིན་པར་བྱའོ། །གལ་ཏེ་དེ་བཞིན་བྱས་པས་མ་གྲུབ་ན། དཔལ་རྡོ་རྗེ་ཧཱུཾ་མཛད་ཀྱི་སྐུར་བདག་ཉིད་བསྒོམས་ནས། ཛཾ་བྷ་ལའི་སྐུ་གཟུགས་ལ་དུག་དང་སྐེ་ཚེ་དང་ཚྭ་དང་མྱོས་བྱེད་ཀྱི་ལོ་མའི་ཁུ་བ་དང་དུར་ཁྲོད་ཀྱི་སོལ་བས་བྱུགས་ཏེ། དུར་ཁྲོད་ཀྱི་མེ་ལ་ཁྲོས་པས་
[240b.5]བདུགས་ན། ངེས་པར་འགྲུབ་པར་འགྱུར་ཞེས་སོ། །ཛཾ་བྷ་ལའི་སྒྲུབ་ཐབས་རྒྱས་པ་རྫོགས་སོ།། {T3619}༄༅༅། །རྒྱ་གར་སྐད་དུ། ཤྲཱི་ཛཾ་བྷ་ལ་སཱ་དྷ་ནཾ། བོད་སྐད་དུ། དཔལ་ཛཾ་བྷ་ལའི་སྒྲུབ་ཐབས། ཛཾ་བྷ་ལ་ལ་ཕྱག་འཚལ་ལོ། །དང་པོ་རེ་ཞིག་གནས་ཀྱི་དོན་
[240b.6]ཐམས་ཅད་དང་རང་གི་ལུས་ཀྱང་སྟོང་པར་བསྒོམ་པའོ། །དེའི་རྗེས་ལ་ཅུང་ཟད་དམར་བའི་ཟླ་བའི་དཀྱིལ་འཁོར་ལ་ཐབས་དང་ཤེས་རབ་ཀྱི་རང་བཞིན་ཉིད་གནོད་སྦྱིན་གྱི་ཤིང་རྟ་གྲུ་གསུམ་པདྨ་འདབ་མ་བརྒྱད་པའི་རྣམ་པའོ། །དེའི་དབུས་སུ་བཾ་ཡིག་ལས་ནོར་རྒྱུན་མ་སྐུ་མདོག་སེར་
[240b.7]མོ་ཕྱག་ན་འབྲས་ཀྱི་སྙེ་མ་དང་མཆོག་སྦྱིན་མཛད་པ། རྒྱན་ཐམས་ཅད་ཀྱིས་བརྒྱན་པ། གནོད་སྦྱིན་མོ་བརྒྱད་ཀྱིས་ཡོངས་སུ་བསྐོར་བ་འདི་ལྟ་སྟེ། བཟང་མོ་དང་། རབ་ཏུ་བཟང་མོ་དང་། སྦས་མ་དང་། རབ་ཏུ་སྦས་མ་དང་། ལྷ་མོ་དང་། དབྱངས་ཅན་མ་དང་། འཕགས་མ་དང་།
[241a]
[241a.1]ཆུ་ཤེལ་མ་རྣམས་ཀྱིས་ཡོངས་སུ་བསྐོར་བའོ། །ལྷ་མོ་ཆེན་མོ་དེའི་བྷ་གའི་དབུས་སུ། ཛཾ་ཡིག་གི་བདག་ཉིད་སངས་རྒྱས་ལྔའི་ཅོད་པན་ཅན། ཕྱག་གཡས་ན་བཱི་ཛ་པཱུ་ར་ཀ །གཡོན་ན་ནེའུ་ལེ་བསྣམས་པའོ། །དེ་བཞིན་གཤེགས་པ་ལྔས་རིན་པོ་
[241a.2]ཆེ་སྣ་ཚོགས་པའི་ཆར་འབེབས་བཞིན་པ་དུང་ཅན་གྱི་མགོ་དང་། པདྨ་ཅན་གྱི་མགོའི་གཏེར་ཆེན་པོ་ལ་ཞབས་གཉིས་བཞུགས་པ་རང་གི་ཁང་པའི་ཕྱོགས་གཅིག་ཏུ་བསམ་པར་བྱའོ། །སྐུ་མདོག་སེར་པོ་ཨུཏྤ་ལ་སྔོན་པོའི་ཕྲེང་བ་བསྣམས་པའི་དཔལ་ལྡན་མགོན་པོ་ཛཾ་བྷ་ལ་ནོར་རྒྱུན་མ་
[241a.3]ལ་ཡང་དག་པར་འཁྱུད་པ། བྱང་ཆུབ་སེམས་ཀྱི་ཐིག་ལེ་ལས་སྐྱེས་པའི་རིན་པོ་ཆེའི་ཚོགས་ཀྱིས་ནམ་མཁའ་མ་ལུས་པར་ཁྱབ་པར་བསྒོམ་པར་བྱ་སྟེ། འབབ་པའི་དུས་སུ་ཤར་ཕྱོགས་སུ་གང་བ་བཟང་པོ་སྔོན་པོ། ལྷོ་ཕྱོགས་སུ་རྣམ་ཐོས་སྲས་སེར་པོ། ནུབ་ཕྱོགས་སུ་ནོར་སྦྱིན་
[241a.4]དམར་པོའོ། །བྱང་ཕྱོགས་སུ་ནོར་བུ་བཟང་པོ་སེར་པོའོ། །མེའི་མཚམས་སུ་ཙི་པི་ཀུཎྜ་ལི་དམར་པོ། བདེན་བྲལ་དུ་ཀི་ལི་མི་ལི་སྔོན་པོ། རླུང་དུ་སྤྱོད་པའི་དབང་པོ་སེར་པོ། དབང་ལྡན་དུ་ཁའི་དབང་པོ་སེར་པོའོ། །དེ་ཐམས་ཅད་ཀྱང་ནོར་སྦྱིན་མོའི་བྷ་གའི་དབུས་ན་གནས་
[241a.5]པའི་རིན་པོ་ཆེའི་ཆར་འབེབས་བཞིན་པའི་ཛཾ་བྷ་ལ་བཞིན་དུ་བསྒོམ་པར་བྱའོ། །ཤར་སྒོར་གནོད་སྦྱིན་ཆེན་པོ་གཅེར་བུ་འབྲས་བུ་འཆང་བ་རིན་པོ་ཆེའི་ཆར་འབེབས་པའོ། །ལྷོ་སྒོར་པདྨ་དང་པདྨ་ཆེན་པོ་དག་གོ། །ནུབ་སྒོར་ཀི་ལི་དང་མ་ཧཱ་ཀི་ལི་དག་གོ། །བྱང་སྒོར་གང་བ་དང་གང་
[241a.6]བ་བཟང་པོ་དག་གོ། །དེ་དག་རྣམས་ཀྱང་གཅེར་བུ་འབྲས་བུ་འཆང་བའོ། །མགོན་པོ་ཛཾ་བྷ་ལ་ལ་གོ་རིམས་བཞིན་དུ་སྔགས་ཀྱི་ཡི་གེ་རྣམས་དགོད་པར་བྱའོ། །ཨོཾ་ནི་སྤྱི་བོར་རོ། །ཛཾ་ནི་ཞལ་ལའོ། །བྷ་ལ་ནི་ཕྱག་གཉིས་ལའོ། །ཛ་ཐུགས་ཀར་རོ། །ལེན་ལྟེ་བ་ལའོ། །དྲཱ་ཡ་ནི་བརླ་
[241a.7]གཉིས་ལའོ། །སྭཱ་ཧཱ་ནི་པུས་མོ་གཉིས་ལའོ། །སྤྱི་བོར་ནོར་བུ་བཟང་པོའོ། །སྤྱན་གཉིས་ལ་རྣམ་ཐོས་སྲས་སོ། །ཁ་ལ་མུ་ཁེནྡྲའོ། །ནུ་མའི་བར་དུ་གང་བ་བཟང་པོའོ། །ལྟེ་བར་ནོར་སྦྱིན་ནོ། །བརླ་གཉིས་ལ་ཀི་ལི་མི་ལིའོ། །རྐང་པ་དག་ལ་ཙི་པི་ཀུཎྜ་ལིའོ། །ཡན་ལག་
[241b]
[241b.1]ཐམས་ཅད་ལ་ཙ་རེནྡྲའོ། །ད་ནི་ཡི་གེ་དགོད་པར་བྱའོ། །ཨོཾ་སྤྱི་བོར་རོ། །ཛླུཾ་དཔྲལ་བར་རོ། །ཙླུཾ་རྣ་བ་དག་ལའོ། །སཾ་མགོ་བོའི་རྒྱབ་ཏུ་དགོད་པར་བྱའོ། །ད་ནི་ལག་པ་ལ་དགོད་པར་བྱ་བ་སྟེ། ལྷ་རྣམས་ཀྱི་ཡི་གེ་ཨོཾ་མཁྲིག་མགུལ་དུ། ཛླུཾ་ལག་པའི་དབུས་སུ། ཙླུཾ་སོར་མོ་ཐམས་
[241b.2]ཅད་ཀྱི་རྩེ་མོ་ལ། སཾ་སོར་མོ་ཐམས་ཅད་ཀྱི་རྩ་བ་ལའོ། །ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཞེས་པས་རབ་ཏུ་གནས་པར་བྱའོ། །མཛུབ་མོ་ལ་ནོར་བུ་བཟང་པོ། གུང་མོ་ལ་གང་བ་བཟང་པོ། མིང་མེད་ལ་ནོར་སྦྱིན། མཐེའུ་ཆུང་ལ་རྣམ་སྲས། དེ་བཞིན་དུ་ཁའི་དབང་པོ་ལག་པའི་མཐིལ་
[241b.3]དུ། མཁྲིག་མགུལ་དུ་ཀི་ལི་མི་ལི། མཐེབ་ཆེན་ལ་ཙི་པི་ཀུཎྜ་ལི། མཛུབ་མོ་དང་བཅས་པའི་མཐེབ་ཆེན་གྱི་བར་དུ་ཙ་རེནྡྲའོ། །ལག་པའི་དབུས་སུ་ཛཾ་བྷ་ལ་ཛ་ལེནྡྲཱའོ། །རྡོ་རྗེའི་ཆུ་ལ་སོགས་པའི་བདུད་རྩི་ལྔ་དེའི་ངོ་བོ་མ་ཡིན་ཀྱང་། རྡོ་རྗེ་ཆུ་དང་ཆུ་བསྲེས་ནས་ཁྱོར་བས་བཏུང་སྟེ། ཁྱོར་
[241b.4]བ་བརྒྱ་རྩ་བརྒྱད་ཐུན་མཚམས་གསུམ་དུ་དབུལ་བར་བྱའོ། །རིང་པོར་མི་ཐོགས་པར་ཛཾ་བྷ་ལ་དང་འདྲ་བར་འགྱུར་རོ། །ནོར་དང་གསེར་འཕེལ་ཞིང་ས་གཞི་རྫས་ཀྱིས་ཡོངས་སུ་གང་བར་འགྱུར་རོ། །ཨོཾ་ཛླུཾ་ཙླུཾ་སཾ་ཞེས་བརྗོད་ཅིང་ཆུ་ཁྱོར་བས་དབུལ་བར་བྱའོ། །གྲུབ་པར་མ་གྱུར་ན་དཔལ་རྡོ་རྗེ་
[241b.5]ཧཱུཾ་མཛད་དུ་བདག་ཉིད་བསྒོམས་ལ་ཛཾ་བྷ་ལའི་སྐུ་གཟུགས་ལ་དུག་དང་སྐེ་ཚེ་དང་ནིམ་པའི་ལོ་མ་དང་། དྷ་དུ་ར་དང་། དུར་ཁྲོད་ཀྱི་སོལ་བས་བྱུགས་ལ་བསྲོ་ཞིང་སྐམ་པར་བྱའོ། །ཕྱི་ནས་དུར་ཁྲོད་ཀྱི་མེ་ལ་ཁྲོས་པས་བདུགས་ན་ངེས་པར་འགྲུབ་པར་འགྱུར་རོ། །དཔལ་ལྡན་ཛཾ་བྷ་
[241b.6]ལའི་སྒྲུབ་ཐབས་རྫོགས་སོ།། {T3620}༄༅༅། །རྒྱ་གར་སྐད་དུ། དྷཱ་ར་དཱ་ན་ཛཾ་བྷ་ལོ་པ་དེ་ཤ །བོད་སྐད་དུ། ཛཾ་བྷ་ལ་ལ་ཆུ་དབུལ་བའི་མན་ངག །དཔལ་ལྡན་ཛཾ་བྷ་ལ་ལ་ཕྱག་འཚལ་ལོ། །མིང་མེད་ཀྱི་རྩེ་མོ་ལ་ཛཾ་ཡིག་སེར་པོ་བསམས་ལ། ཕྱག་རྒྱ་ལ་སོགས་
[241b.7]པས་སྣོད་ལ་ཛཾ་བྷ་ལ་བསྒོམས་ནས། མིང་མེད་ཀྱི་རྩ་བ་ལ་ཆུ་རྒྱུན་ལག་པའི་བར་དུ་ལྷུང་བས། དེའི་དབུ་ལ་དེ་བཞིན་དུ་འབབ་ཅིང་ཛཾ་ཡིག་བརྒྱ་རྩ་བརྒྱད་བཟླས་ལ་བསྒོམ་པར་བྱའོ། །ཛཾ་བྷ་ལ་ལ་ཆུ་དབུལ་བའི་མན་ངག་གོ། །ལག་པ་གཡས་པ་ལ་བྲུཾ་དང་པོའི་ལྔ་པའི་ས་
[242a]
[242a.1]བོན་ཡོངས་སུ་གྱུར་པ་ལས་དེ་བཞིན་གཤེགས་པ་ལྔ་བསམས་ནས། དེ་ལ་ཡང་ཟླ་བ་དང་ལྷན་ཅིག་ཁུ་བར་བྱས་ཏེ། མདུན་དུ་ཛཾ་ལས་བྱུང་བའི་ཛཾ་བྷ་ལ་རབ་ཏུ་གྲགས་པ་བསྐྱེད་ནས། སྔོན་དུ་གསུངས་པའི་ཁུ་བས་དེའི་སྤྱི་བོར་ཆུ་དང་ལྷན་ཅིག་བརྒྱ་རྩ་བརྒྱད་མཛུབ་
[242a.2]མོ་བརྐྱང་བའི་བར་དུའོ། །ཁུ་ཚུར་ཕྱེད་བཅིངས་པའི་ལག་པས་ཆུ་ཁྱོར་བ་ནས་ལྟུང་བས་མ་ལུས་པའི་ཕུན་སུམ་ཚོགས་པར་འགྱུར་རོ། །ཛཾ་བྷ་ལའི་མན་ངག་གོ། །རྒྱལ་བ་རྣམ་པར་སྣང་མཛད་ཞེས་གྲགས་རིན་ཆེན་འབྱུང་ལྡན་དང་། །དེ་བཞིན་འོད་དཔག་མེད་དང་དོན་ཡོད་གྲུབ་པ་མི་བསྐྱོད་གྲགས། །
[242a.3]འདི་རྣམས་སྐུ་མདོག་དཀར་སེར་དམར་དང་ལྗང་གུ་སྔོན་པོ་རྣམས། །བྱང་ཆུབ་མཆོག་དང་མཆོག་སྦྱིན་བསམ་གཏན་མི་འཇིགས་ས་གནོན་ཕྱག །དེ་བཞིན་གཤེགས་པ་རྣམས་ཀྱི་ས་བོན་ནི། །བྷྲཱུཾ་ཨཱཾ་ཛྲཱིཾ་ཁཾ་ཧཱུཾ་ཞེས་སོ། །ཟླ་བ་ལག་པ་གཡས་གནས་པའི། །ཡི་གེ་ལྔ་ལས་བྱུང་བ་ཡི། །
[242a.4]དེ་བཞིན་གཤེགས་པ་ལྔ་བསམས་ནས། །ཁུ་བའི་གཟུགས་སུ་རྣམ་པར་བསྒོམ། །ཛཾ་ལས་བྱུང་བའི་ཛཾ་བྷ་ལ། །བསམས་ནས་ཆུ་ཁྱོར་གུས་པས་དབུལ། །དེ་ཡི་སྔགས་ནི་བཟླས་པ་ཡི། །བརྒྱ་རྩ་བརྒྱད་ནི་དབུལ་བར་བྱ། །ཛཾ་བྷ་ལ་ལ་ཆུ་དབུལ་བའི་མན་ངག་རྫོགས་སོ།། །།
[242a.5]{T3621}༄༅༅། །རྒྱ་གར་སྐད་དུ། ཧ་ཡ་གྲཱྀ་བ་སཱ་དྷ་ནཾ། བོད་སྐད་དུ། རྟ་མགྲིན་གྱི་སྒྲུབ་ཐབས། དཔལ་རྟ་མགྲིན་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྣ་ཚོགས་ཆུ་སྐྱེས་དང་ཉི་མ་ལ་ཧཾ་ཡིག་དམར་པོའི་ཡེ་ཤེས་རྫོགས་པ་ལས་རྟ་མགྲིན་སྐུ་མདོག་དམར་པོ་ཞལ་
[242a.6]གསུམ་པ་ཕྱག་བརྒྱད་པ། ཞལ་སོ་སོ་བ་ལ་སྤྱན་གསུམ་པ་སྔོན་པོ་དང་དཀར་པོ་ནི་གཡས་དང་གཡོན་གྱི་ཞལ་ལོ། །སྦྲུལ་གྱིས་བརྒྱན་པ་ཞབས་རོལ་པའི་སྟབས་ཀྱིས་བཞུགས་ཤིང་། ཁྲོ་བོའི་ལྟ་སྟངས་ཀྱིས་གཟིགས་པ། ཞལ་དང་པོ་བཞད་པ་ཞལ་གཡས་པས་ལྗགས་
[242a.7]བསྒྲིལ་བ། ཞལ་གཡོན་པའི་མཆེ་བ་དག་གིས་མ་མཆུ་བསྡམས་པའོ། །སྟག་གི་པགས་པའི་ཤམ་ཐབས་ཅན་ནོ། །རྡོ་རྗེ་དང་དབྱུག་པ་དང་མཆོག་སྦྱིན་གྱི་ཕྱག་རྒྱ་དང་། མདའ་འཕྱར་བ་ནི་གཡས་ཀྱི་ཕྱག་བཞི་ནའོ། །སྡིགས་མཛུབ་དང་རང་གི་ནུ་མ་བཟུང་བ་དང་། པདྨ་དང་།
[242b]
[242b.1]གཞུ་འཕྱར་བ་ནི་གཡོན་གྱི་ཕྱག་བཞི་ནའོ། །མི་བསྐྱོད་པས་དབུ་བརྒྱན་པར་བསམ་པར་བྱའོ་ཞེས་པ་ནི་རྟ་མཆོག་གི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ནོ། །བཟླས་པའི་སྔགས་ནི། ཨོཾ་ཧཾ་ཧ་ཡ་གྲཱི་བ་སྭཱ་ཧཱ། རྟ་མགྲིན་གྱི་སྒྲུབ་ཐབས། སློབ་དཔོན་ཙནྡྲ་གོ་མིས་མཛད་པ་རྫོགས་སོ།། །།
[242b.2]{T3622}༄༅༅། །རྒྱ་གར་སྐད་དུ། སཔྟ་ཤ་ཏི་ཀ་ཀལྤོཀྟ་ཧ་ཡ་གྲཱྀ་བ་སཱ་དྷ་ནཾ། བོད་སྐད་དུ། རྟོག་པ་བདུན་བརྒྱ་པ་ལས་གསུངས་པའི་རྟ་མགྲིན་གྱི་སྒྲུབ་ཐབས། དཔལ་རྟ་མགྲིན་ལ་ཕྱག་འཚལ་ལོ། །དངོས་པོ་ཐམས་ཅད་རང་བཞིན་གྱིས་མི་གནས་པ་ཞེས་པ་ནི་བདེ་བར་གཤེགས་
[242b.3]པ་རྣམས་ཀྱི་དགོངས་པར་རིག་པར་བྱས་ནས། དེ་ནས་རི་རབ་ཡན་ལག་བརྒྱད་པ་རིན་པོ་ཆེ་སྣ་བདུན་གྱི་རང་བཞིན་ལ་དེའི་དབུས་སུ་དཔག་ཚད་སྟོང་གི་ཚད་ཀྱི་གདན་ལ་ཉེ་བར་འདུག་སྟེ། དཀོན་མཆོག་གསུམ་ལ་སྐྱབས་སུ་འགྲོ་བ་ལ་སོགས་པ་སྔོན་དུ་འགྲོ་བས་ལུས་དང་ངག་དང་
[242b.4]ཡིད་བྱིན་གྱིས་བརླབས་ལ། དེ་ཡིས་དེ་བཞིན་དུ་ནམ་མཁའ་ཁྱབ་པའི་ཉི་མའི་དཀྱིལ་འཁོར་ལ་མངོན་པར་ཁྱབ་པར་སྤྲུལ་ནས། དེ་ལ་དེ་བཞིན་དུ་ཧཱུཾ་ཡིག་འབར་བ་ལས་འོད་ཟེར་གྱི་རྣམ་པར་བསམ་ཞིང་། དེ་ནས་ལུས་ངག་ཡིད་ཐམས་ཅད་རྡོ་རྗེ་རྣམས་ཀྱིས་ཕྱག་འཚལ་བས་ཨོཾ་ཨཱཿ
[242b.5]ཧཱུཾ་ཞེས་པ་འདིས་ཕྱོགས་བཅུའི་མཐར་ཐུག་པའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་གདན་དྲངས་ནས་ཡེ་ཤེས་ཀྱི་རྣམ་པས་རབ་ཏུ་ཞུགས་ཏེ། སླར་ཡང་ཧཱུཾ་ཡིག་གཉིས་པས་རྟ་མགྲིན་ཡང་དག་པར་བསྐུལ་ཞིང་གདན་དྲངས་ནས་རབ་ཏུ་
[242b.6]ཞུགས་ཏེ་ཧཱུཾ་ཡིག་གསུམ་པས་བདག་ཉིད་དེ་བཞིན་དུ་རྟ་མགྲིན་བཞིན་དུ་རྡོ་རྗེའི་རང་བཞིན་གྱི་བདག་ཉིད་ཅན་སྐུ་མདོག་དམར་པོ་འཇིགས་སུ་རུང་བ་སྤྱན་གསུམ་པ། དྲག་པོ་སྨ་ར་དམར་སེར་ཅན། གསུས་པ་ཆེ་བ། ཞལ་མཆེ་བ་གཙིགས་པ། ཐོད་པའི་ཕྲེང་བ་ཅན། རལ་པའི་ཅོད་པན་ཅན།
[242b.7]འོད་དཔག་ཏུ་མེད་པས་དབུ་བརྒྱན་པ། ཞལ་གཉིས་པ་སྔོ་ཞིང་འཇིགས་སུ་རུང་བའི་ཧཱི་ཧཱིའི་སྒྲ་སྒྲོགས་ཤིང་ཚངས་པའི་སྒོ་ངའི་རྩེ་མོ་ནས་རྣམ་པར་གནོན་པ། གཉིས་པས་སྲིད་པ་ལ་སོགས་པའི་མཐར་ཐུག་པ་ལའོ། །ཀླུ་བརྒྱད་ཀྱིས་བརྒྱན་པ། མིའུ་ཐུང་གི་རྣམ་པ་ཅན། སྟག་གི་པགས་
[243a]
[243a.1]པའི་ཤམ་ཐབས་ཅན། སྦྲུལ་གྱི་རྒྱན་གྱིས་བརྒྱན་པ། ལྷ་དང་ལྷ་མ་ཡིན་མཐའ་དག་ལ་བསྡིགས་པར་མཛད་པ། རྡོ་རྗེ་དང་དབྱུག་པ་བསྣམས་པ། རྟ་མགྲིན་ལས་ཁ་དོག་སྣ་ཚོགས་པའི་འོད་ཟེར་སྤྲོ་བ་དང་བསྡུ་བ་བསམ་པར་བྱའོ། །སྔགས་ནི་ཨོཾ་ཧ་ཡ་གྲཱྀ་བ་
[243a.2]ཧྲཱིཿཧཱུཾ་ཕཊ་སྭཱ་ཧཱ་ཞེས་ཏེ། བཅོམ་ལྡན་འདས་འདིའི་མཐུས་ཡིད་བཞིན་གྱི་ནོར་བུ་དང་། བུམ་པ་བཟང་པོ་དང་། དཔག་བསམ་གྱི་ཤིང་དང་། བཅུད་དང་། བཅུད་ཀྱིས་ལེན་ལ་སོགས་པའི་དངོས་གྲུབ་རྣམས་བསྒྲུབས་པས་མངོན་དུ་འགྱུར་རོ་ཞེས་རྟོག་པ་བདུན་བརྒྱ་པ་ལས་གསུངས་
[243a.3]སོ། །ཅིས་ཀྱང་བཅོམ་ལྡན་འདས་ཀྱི་བཟླས་པ་འབུམ་ཕྲག་གསུམ་བྱས་པས་འཁོར་ལོས་སྒྱུར་བ་དང་རྒྱལ་སྲིད་གཉིས་མངོན་དུ་འགྱུར་རོ། །ལྷའི་བུ་མོ་དཔག་ཏུ་མེད་པའི་འཁོར་གྱིས་བསྐོར་ཞིང་རིག་འཛིན་མ་མདུན་དུ་བྱས་ཏེ། དེ་ལ་བདེ་བའི་འབྲས་བུ་ཉམས་སུ་མྱོང་ཞིང་གནས་
[243a.4]སོ། །ལྷའི་དབང་པོས་གདུགས་འཛིན་པར་འགྱུར་རོ། །ཚངས་པའི་སྔགས་པ་དང་། ཐག་བཟངས་རིས་ཀྱི་དམག་དཔོན་དང་། འཕྲོག་བྱེད་དང་། སོ་སོར་འཕྲོག་བྱེད་དང་། ལྷ་རྣམས་མཐའ་དག་སྟོབས་མེད་པར་འགྱུར་རོ། །གཅེར་བུ་པའི་སློབ་དཔོན་བདེ་བྱེད་དང་མཐའ་
[243a.5]དག་གི་ཡོན་ཏན་རྣམས་ཉེ་བར་སྟོན་པར་བྱེད་དོ། །ཇི་སྲིད་བཅོམ་ལྡན་འདས་ཀྱིས་བྱམས་པ་མངོན་པར་མ་རྟོགས་པ་དེ་སྲིད་དུ་གནས་སོ། །མངོན་པར་རྟོགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་རོ། །རྟོག་པ་བདུན་བརྒྱ་པ་ལས་གསུངས་པའི་རྟ་མགྲིན་གྱི་སྒྲུབ་
[243a.6]ཐབས་རྫོགས་སོ།། {T3623}༄༅༅། །རྒྱ་གར་སྐད་དུ། སརྦ་ཏནྟྲ་ཧྲྀ་ད་ཡ་ཨུཏྟ་ར་ཧ་ཡ་གྲཱྀ་བ་སཱ་དྷ་ནཾ། བོད་སྐད་དུ། རྒྱུད་ཐམས་ཅད་ཀྱི་སྙིང་པོ་ཕྱི་མའི་རྟ་མགྲིན་གྱི་སྒྲུབ་ཐབས། དཔལ་རྟ་མགྲིན་ལ་ཕྱག་འཚལ་ལོ། །དེ་ནས་རྟ་མགྲིན་གྱི་སྒྲུབ་ཐབས་ཡང་དག་པར་རབ་ཏུ་
[243a.7]བཤད་པར་བྱའོ། །དང་པོར་རེ་ཞིག་སྔགས་པས་ཡིད་དང་མཐུན་པའི་གནས་སུ་བདུད་རྩི་ལྔས་བྱུགས་ཏེ། ཇི་ལྟར་རྙེད་པའི་སྟན་ལ་ཉེ་བར་འདུག་ནས་རང་གི་སྙིང་ག་ནས་ཧཱུཾ་ཡིག་གི་འོད་ཟེར་གྱིས་ཡང་དག་པར་བསྐུལ་ནས་བླ་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཉེ་བར་སྤྱད་པ་
[243b]
[243b.1]ཐམས་ཅད་ཀྱིས་ཡང་དག་པར་མཆོད་ཅིང་ཕྱག་འཚལ་བ་དང་། སྡིག་པ་བཤགས་པ་ལ་སོགས་པ་བྱས་ནས། ཡང་དག་པར་བརྗོད་པར་བྱ་སྟེ། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྔགས་འདིས་རང་བཞིན་སྟོང་པར་བསྒོམ་པར་
[243b.2]བྱའོ། །ཕྱི་ནས་ནམ་མཁའི་དཀྱིལ་འཁོར་གྱི་དབུས་སུ་པདྨ་འདབ་མ་བཞི་པའི་ཟེའུ་འབྲུའི་སྟེང་དུ་ཟླ་བའི་དཀྱིལ་འཁོར་གྱི་གདན་ལ་བདུད་རྩི་དང་བཅས་པའི་ཐོད་པ་བསམ་པར་བྱའོ། །དེ་ལ་ཧཱུཾ་ཡིག་ཡོངས་སུ་གྱུར་པ་ལས་སངས་རྒྱས་ཀྱི་ཐུགས་དྲག་པོ་རྣམ་པར་བསམ་པར་བྱ་སྟེ། ཞལ་
[243b.3]བཞི་པ། ཞབས་བཞི་པ། གཡས་བསྐུམ་པ་དག་དང་། གཡོན་བརྐྱང་བ་དག་གོ། །ཕྱག་བརྒྱད་པ། དཔའ་བོ་ཆེན་པོ་ལྷ་མོ་བཞིས་ཡོངས་སུ་བསྐོར་བའོ། །བདག་ཉིད་གང་ཞིག་གྲུབ་འདོད་པས། །ཁྱབ་བདག་ཆེན་པོ་རྟ་མགྲིན་ནི། །སྐུ་མདོག་དམར་པོ་མཆེ་བ་རྣོ། །སྤྱན་ནི་གསུམ་
[243b.4]པ་དམར་པོ་དང་། །ནག་པོ་དཀར་པོ་རྩ་བ་དང་། །གཡས་དང་གཡོན་པའི་ཞལ་ཉིད་དོ། །སྟེང་ཞལ་རྟ་ཡི་རྣམ་པ་ལ། །པཱ་ལ་ཤ་ཡི་ཁ་དོག་བཞིན། །ཐོད་པ་ཁྲག་གིས་གང་བ་དང་། །ཤ་ཆེན་ཆང་ཉིད་དག་ཀྱང་ངོ་། །རྟ་ཡི་ཞལ་སོགས་དབུ་ལ་ནི། །དབང་བསྐུར་རབ་ཏུ་སྦྱིན་པར་བྱ། །
[243b.5]རྒྱན་རྣམས་ཐམས་ཅད་ཡོངས་རྫོགས་ཤིང་། །ཐོད་པའི་ཕྲེང་བས་རྣམ་པར་བརྒྱན། །ལྕགས་ཀྱུ་མདའ་དང་ཐོད་པ་དང་། །རྡོ་རྗེ་རྣམས་ནི་ཕྱག་གཡས་ན། །ཞགས་པ་གཞུ་དང་ཁ་ཊྭཱཾ་ག། །དྲིལ་བུ་རྣམས་ནི་ཕྱག་གཡོན་ན། །བྷ་གའི་དབུས་སུ་སྒྲུབ་པ་པོས། །འདི་ལྟ་བུ་ཉིད་འདིར་
[243b.6]བསྒོམ་བྱ། །བདུད་རྩི་ལྔ་ཡིས་ཡང་དག་མཆོད། །མཆོད་པའི་བདག་ཉིད་བསྒོམ་པར་བྱ། །ཤར་དུ་ལྷ་མོ་བྲི་བར་བྱ། །རྟ་ཡི་རྡོ་རྗེ་འཇིགས་ཆེན་མོ། །ཧྲཱིཿཡིག་ལས་ནི་ཡང་དག་བྱུང་། །ཞལ་གཅིག་པ་ལ་ཕྱག་ནི་བཞི། །གཡོན་ན་གཞུ་དང་ཐོད་པ་ལ། །བདུད་རྩི་དང་བཅས་
[243b.7]གཡས་པ་ནི། །མདའ་ཉིད་དང་ནི་ཀེང་རུས་ཏེ། །སྣ་ཚོགས་གཟུགས་ཅན་འབར་བ་སྟེ། །ལྷོ་རུ་ཕྱག་རྒྱ་བྲི་བྱ་བ། །ཞལ་གཅིག་ཕྱག་ནི་བཞི་པ་སྟེ། །ཧཾ་ཡིག་ལས་ནི་ཡང་དག་བསྐྱེད། །ཕྱག་གཡོན་ཁ་ཊྭཱཾ་ག་དང་ནི། །ཁྲག་གིས་གང་བའི་ཐོད་པ་བསྣམས། །གཡས་ན་ཞགས་པ་ཆེན་པོ་
[244a]
[244a.1]དང་། །ཀེང་རུས་བརྟུལ་ཞུགས་བསྣམས་པའོ། །ཐོད་པའི་གདན་གྱི་དབུས་གནས་པའི། །སྐུ་མདོག་ནག་མོ་འབར་བ་ཆེ། །ཕག་མོ་ཞེས་པ་བྲི་བར་བྱ། །ནུབ་ཏུ་ཅེ་སྤྱང་རྡོ་རྗེ་མ། །ཐོད་པའི་གདན་ལ་ཡང་དག་བཞུགས། །ཧྲཱིཿཡིག་ལས་བྱུང་ལྷ་མོ་ནི། །སྐུ་མདོག་སེར་
[244a.2]མོ་ཞལ་གཅིག་མ། །ཕྱག་བཞི་གཡོན་གྱི་ཐོད་པ་ན། །དྲི་ཆེན་གྱིས་གང་རྒྱལ་མཚན་ཞགས། །གཡས་ཀྱིས་ཌ་མ་རུ་དང་ནི། །ཀེང་རུས་བརྟུལ་ཞུགས་བསྣམས་པའོ། །བྱང་དུ་ཕྱག་རྒྱ་བྲི་བར་བྱ། །སྐུ་མདོག་དཀར་མོ་རྡོ་རྗེའི་ལག །འདབ་མ་བཞི་ལ་བྲི་བར་བྱ། །ཆ་བསགས་རྟ་མགྲིན་མཆོད་
[244a.3]པར་བྱ། །དྲི་ཆེན་དྲི་ཆུ་དང་བཅས་པས། །ལྷ་མོ་ཐམས་ཅད་གཡས་བརྐྱང་གི། །ཞབས་གནས་འབར་བའི་ཕྲེང་བ་འཁྲིགས། །ཐོད་པའི་ཕྲེང་བས་རྣམ་པར་བརྒྱན། །སྤྱན་གསུམ་མཆེ་བ་རྣོ་ཞིང་འཇིགས། །བདག་ཉིད་དངོས་གྲུབ་འདོད་གང་གིས། །སྔགས་ཀྱི་རྒྱལ་པོ་དྲན་པར་བྱ། །དེ་ལ་
[244a.4]སྔགས་ནི་འདིའོ། །ཨོཾ་ཧ་ཡ་གྲཱི་བ་ཧྲཱིཿཨ་ཧཾ་ཨ་ཧཾ། ཨཱཾ་ཨཱཾ། ཧཱུཾ་ཧཱུཾ་སྭཱ་ཧཱ། སྔགས་འདི་བསམ་གཏན་བྱས་ནས་ནི། །རྟག་ཏུ་བཟླས་ཤིང་དྲན་པར་བྱ། །འབུམ་ཕྲག་གཉིས་དང་བྱེ་བ་དང་། །སྟོང་ཕྲག་གཅིག་གིས་ནད་མེད་འགྱུར། །སྔོན་དུ་ངེས་པར་བསགས་པ་ཡི། །སྡིག་པའང་ཅུང་
[244a.5]ཟད་མེད་པར་འགྱུར། །རྣལ་འབྱོར་དབང་ཕྱུག་དུས་ཀུན་དུ། །སྲུང་བར་བྱེད་ཅིང་བགེགས་མེད་འགྱུར། །དེ་ཡི་སེམས་ཀྱིས་རྟ་ཡི་ཞལ། །ལྷ་མོ་ས་ཁམས་བརྟན་པར་བསྒོམ། །བྱམས་པ་འཕྲོག་པའི་སེམས་ཀྱིས་ནི། །མེ་ལོང་ལྟ་བུའི་ཡེ་ཤེས་སྦྱོར། །ལྷ་མོ་ཅེ་སྤྱང་གདོང་དེ་ཡིས། །
[244a.6]ཆུ་ཡི་ཁམས་ཀྱི་དབང་བསྐུར་ནས། །སྙིང་རྗེར་གྱུར་པའི་སེམས་ཀྱིས་ནི། །མཉམ་པ་ཉིད་ཀྱི་ཡེ་ཤེས་གཟུགས། །ཕག་མོ་ཞལ་གྱི་སྦྱོར་བ་ཡིས། །མེ་ཡིས་མི་ཤེས་བསྲེགས་གྱུར་ནས། །དགའ་བས་རྣམ་པར་དགྱེས་པ་ཡིས། །སོ་སོར་རྟོག་པའི་ཡེ་ཤེས་སོ། །ལྷ་མོ་གླང་པོ་
[244a.7]གདོང་དེ་ཡིས། །རླུང་ཞེས་མངོན་པར་བརྗོད་པར་བྱ། །བཏང་སྙོམས་དྲན་པའི་སེམས་ཀྱིས་ནི། །བྱ་བ་གྲུབ་པའི་སྦྱོར་བ་ལས། །སེམས་ནི་དཀར་པོའི་གཟུགས་ཀྱིས་ནི། །སྣ་ཚོགས་གཟུགས་སུ་མངོན་པར་བརྗོད། །སྙིང་རྗེས་བརླན་པའི་ཆོས་རྣམས་ནི། །ནག་པོའི་སྒྲ་ཡི་སྒྲ་ཉིད་
[244b]
[244b.1]ལ། །དཀར་པོ་སྡིག་པ་འཇོམས་པ་སྟེ། །སེར་པོ་དྲི་མ་མེད་པའི་ཆ། །དམར་པོ་བྱེད་པའི་ཆོས་རྣམས་ཀྱི། །ཆགས་པའི་སེམས་ཀྱིས་དེ་བཞིན་གཤེགས། །ཞབས་བཞི་རྣམ་པར་དག་པ་ནི། །དེ་ཡི་རྫུ་འཕྲུལ་རྐང་པ་བཞི། །རྣམ་པ་བཞི་པོ་འདི་ཡིས་ནི། །ཞལ་ཉིད་ཀྱང་ནི་འདིར་
[244b.2]གསུངས་སོ། །སེམས་ཀྱི་རང་བཞིན་ནམ་མཁའ་མཚུངས། །ཆོས་དབྱིངས་རྣམ་པར་དག་པ་ལས། །ལམ་ནི་རྣམ་པར་དག་པ་ཡིས། །གསང་བ་ཐོབ་པར་མངོན་པར་བརྗོད། །གང་ཚེ་རྒྱུ་ཡི་དེ་ཉིད་མཐོང་། །འབྲས་དེ་ཉིད་ཀྱིས་རྒྱས་བཏབ་བོ། །སངས་རྒྱས་བཅོམ་ལྡན་འདས་
[244b.3]ཉིད་ཀྱི། །ཐར་པ་སྤྱན་གྱིས་གཟིགས་པ་ཉིད། །ཤེས་རབ་མེད་ཅིང་སེམས་མེད་པའི། །དུད་འགྲོའི་གདོང་ཅན་རྣམས་ཀྱིས་མཐོང་། །བླ་མ་དམ་པའི་གསུང་ལས་ནི། །ལྷ་ཡི་རྣལ་འབྱོར་གྱིས་སྦྱངས་པ། །རྒྱུད་ཐམས་ཅད་ཀྱི་སྙིང་པོ་ཕྱི་མའི་རྟ་མགྲིན་གྱི་སྒྲུབ་ཐབས་རྫོགས་སོ།། །།
[244b.4]པཎྜི་ཏ་པྲ་བྷཱ་ཀ་རས་མཛད་པའོ། །{T3624}༄༅༅། །རྒྱ་གར་སྐད་དུ། ཏྲཻ་ལོ་ཀྱ་བི་ཛ་ཡ་སཱ་དྷ་ནཾ། བོད་སྐད་དུ། འཇིག་རྟེན་གསུམ་ལས་རྣམ་པར་རྒྱལ་བའི་སྒྲུབ་ཐབས། །དཔལ་ལྡན་རྗེ་བཙུན་འཇིག་རྟེན་གསུམ་ལས་རྣམ་པར་རྒྱལ་བ་ལ་ཕྱག་འཚལ་ལོ། །འདིར་དང་
[244b.5]པོ་མ་སྐྱེས་པ་རྣམས་ལ་སྔོན་དུ་གསུངས་པའི་ཆོ་གས་ཉི་མ་ལ་ཧཱུཾ་ཡིག་ནག་པོ་ལས་སྐྱེས་པའི་རྗེ་བཙུན་འཇིག་རྟེན་གསུམ་ལས་རྣམ་པར་རྒྱལ་བ་སྐུ་མདོག་མཐིང་ནག་ཞལ་བཞི་བ། ཕྱག་བརྒྱད་པ། ཞལ་དང་པོ་ཁྲོ་ཞིང་སྒེག་པ། གཡས་པ་དྲག་པོ། གཡོན་པ་རྣམ་པར་འཇིགས་པ། རྒྱབ་
[244b.6]ཞལ་དཔའ་བོའི་ཉམས་ཅན། ཕྱག་གཉིས་ཀྱིས་རྡོ་རྗེ་དྲིལ་བུ་དང་བཅས་ཤིང་། ཐུགས་ཀར་ཧཱུཾ་མཛད་ཀྱི་ཕྱག་རྒྱ་བསྣམས་པ། གཡས་ཀྱི་ཕྱག་རྣམས་ཀྱིས་རལ་གྲི་དང་། ལྕགས་ཀྱུ་དང་། མདའ་བསྣམས་པ། གཡོན་གྱི་ཕྱག་གསུམ་གྱིས་གཞུ་དང་། ཞགས་པ་དང་། རྡོ་རྗེ་བསྣམས་པ།
[244b.7]ཞབས་གཡོན་བརྐྱང་བས་དབང་ཕྱུག་ཆེན་པོའི་མགོ་མནན་པ། ཞབས་གཡས་ཀྱིས་གཽ་རཱིའི་ནུ་མ་ཟུང་མནན་པ། སངས་རྒྱས་མེ་ཏོག་ཕྲེང་བ་ལ་སོགས་པ་སྣ་ཚོགས་པའི་རྒྱན་དང་། ན་བཟའ་བསྣམས་པར་བདག་ཉིད་བསྒོམས་ནས། ཕྱག་རྒྱ་བཅིང་བར་བྱ་སྟེ། དེ་ལ་ཁུ་ཚུར་གཉིས་རྒྱབ་སྦྱར་ནས་མཐེའུ་ཆུང་
[245a]
[245a.1]ལྕགས་སྒྲོག་གི་རྣམ་པར་སྦྱར་བར་བྱའོ། །སྔགས་ནི། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོ། བྷ་ག་བཱན་བིདྱཱ་རཱ་ཛ་ཧཱུཾ་ཕཊ། འཇིག་རྟེན་གསུམ་ལས་རྣམ་པར་རྒྱལ་བའི་སྒྲུབ་ཐབས་རྫོགས་སོ།། {T3625}༄༅༅། །རྒྱ་གར་སྐད་དུ། བཛྲ་
[245a.2]ཛྭ་ལ་ཨ་ན་ལཱརྐ་སཱ་དྷ་ནཾ། བོད་སྐད་དུ། རྡོ་རྗེ་མེ་དང་ཉི་མ་འབར་བའི་སྒྲུབ་ཐབས། རྡོ་རྗེ་མེ་དང་ཉི་མ་འབར་བ་ལ་ཕྱག་འཚལ་ལོ། །དེ་ཉིད་བཞིན་དུ་སྟོང་པ་ཉིད་ཀྱི་རྗེས་ལ་ཉི་མ་ལ་ཧཱུཾ་ཡིག་མཐིང་ག་ཡོངས་སུ་གྱུར་པ་ལས། རྡོ་རྗེ་མེ་དང་ཉི་མ་འབར་བ་སྐུ་མདོག་མཐིང་ག་འབར་བའི་ཕྲེང་བ་འཁྲིགས་
[245a.3]པའི་འོད་ཅན། ཞལ་བཞི་པ། ཕྱག་བརྒྱད་པ། སྒེག་པ་དང་། དཔའ་བ་དང་། འཇིགས་པ་དང་། སྙིང་རྗེའི་ཉམས་དང་ལྡན་པའི་ཞབས་བཞི་པ། གཡས་ཀྱི་ཕྱག་བཞིས་རྡོ་རྗེ་དང་། རལ་གྲི་དང་། འཁོར་ལོ་དང་། མདའ་བསྣམས་པ། གཡོན་གྱི་ཕྱག་བཞིས་དྲིལ་བུ་དང་། གཞུ་དང་། ཞགས་
[245a.4]པ་དང་། ཁ་ཊྭཱཾ་ག་བ་དན་སྣ་ཚོགས་པ་དང་བཅས་པ་བསྣམས་པ། དབུ་སྐྲ་སྐྱ་བོའི་ཚོགས་མེ་འབར་བ་ཅན། ཤིན་ཏུ་འཇིགས་པ་སྦྲུལ་ཆེན་པོ་འཁྱིལ་བས་ལག་གདུབ་དང་། རྐེད་རྒྱན་དང་། རྐང་གདུབ་དང་། མགུལ་རྒྱན་དང་། རྣ་རྒྱན་དང་། ཅོད་པན་དུ་བརྒྱན་པ། སྒྱུ་མ་ཆེན་པོའི་འཁོར་
[245a.5]ལོར་བྱས་པ་བཞི་ལ་ཆུང་མ་དང་བཅས་པའི་ཁྱབ་འཇུག་གཡས་བརྐྱང་བའི་ཞབས་ཀྱིས་མནན་པ་དབང་དུ་བྱེད་པ་བསྒོམ་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་མཐིལ་རྡོ་རྗེ་བཅིངས་པའི་སོར་མོ་འབར་བའི་སྙིང་པོའི་དབུས་སུ་མཐེ་བོང་གཉིས་བླང་བར་བྱའོ། །དེ་ནས་སྔགས་
[245a.6]བཟླས་པར་བྱ་སྟེ། ཨོཾ་བཛྲ་ཛྭ་ལཱ་ན་ལཱརྐ་ཧཱུཾ་ཞེས་སོ། །རྡོ་རྗེ་མེ་དང་ཉི་མ་འབར་བའི་སྒྲུབ་ཐབས་རྫོགས་སོ།། {T3626}༄༅༅། །རྒྱ་གར་སྐད་དུ། པ་ར་མ་ཨ་ཤྭ་སཱ་དྷ་ནཾ། བོད་སྐད་དུ། རྟ་མཆོག་གི་སྒྲུབ་ཐབས། རྟ་མཆོག་ལ་ཕྱག་འཚལ་ལོ། །དེ་བཞིན་དུ་ཉི་མ་ལ་ཧཱུཾ་ཡིག་
[245a.7]མཐིང་ག་ལས་སྐྱེས་པའི་རྟ་མཆོག་དམར་པོ་ཞལ་བཞི་པ། ཕྱག་བརྒྱད་པ། ཞབས་བཞི་པ། ཞལ་དང་པོ་ཁྲོ་ཞིང་སྒེག་པ། སྤྱན་གསུམ་པ། གཡས་ཞལ་དྲག་པོ། གཡོན་ཞལ་འཇིགས་སུ་རུང་བ། སྟེང་ཞལ་མཆུ་རོལ་ཞིང་རྟའི་ཞལ་ལྗང་གུ། ཕྱག་གཡས་ཀྱི་གཅིག་གིས་སྣ་
[245b]
[245b.1]ཚོགས་རྡོ་རྗེ་དང་བཅས་ཤིང་བཞེངས་པའི་ཚུལ་དུ་བྱས་པ། ཕྱག་གཡོན་གྱི་གཅིག་གིས་རལ་གྲི་དང་བཅས་པའི་སྣ་ཚོགས་པདྨ་བསྣམས་པའོ། །སླར་ཡང་གཡས་ཀྱི་བ་དན་གསུམ་ཕྱག་གིས་བླང་བའི་ཚུལ་མཛད་པ། སླར་ཡང་ཕྱག་གཡོན་གྱིས་མདུང་བསྣམས་པ། སླར་ཡང་གཡས་
[245b.2]ཀྱི་ཕྱག་གིས་རལ་གྲི་དང་། མདའ་བསྣམས་པ། གཡོན་གྱི་ཕྱག་ལྷག་མས་དབྱུག་པ་དང་། གཞུ་བསྣམས་པ། ཞབས་གཡོན་བརྐྱང་དང་། གཡས་ཀྱི་གཅིག་གིས་དབང་མོ་དང་། དཔལ་མོ་མནན་པ། གཡས་ཀྱི་ཞབས་གཉིས་པས་འདོད་ལྷ་དང་། འདོད་ལྷའི་ཆུང་མ་མནན་པ། གཡོན་
[245b.3]པའི་ཞབས་གཅིག་གིས་དབང་མོ་དང་། སྦྲང་རྩིར་བྱེད་པ་མནན་པ། གཡོན་གྱི་ཞབས་གཉིས་པས་རྒྱལ་བར་བྱེད་པ་དང་། དཔྱིད་ཀྱི་ལྷ་མནན་པ། བདག་ཉིད་དེ་ལྟ་བུར་བསྒོམ་པར་བྱའོ། །སྣ་ཚོགས་རྡོ་རྗེ་དང་བ་དན་གསུམ་པ་བསྒྲེང་བ་ནི། རྟ་མཆོག་གི་ཕྱག་རྒྱའོ། །སྔགས་ནི། ཨོཾ་སུམྦྷ་
[245b.4]ནི་སུམྦྷ་ཧཱུཾ་ཞེས་སོ། །རྟ་མཆོག་གི་སྒྲུབ་ཐབས་རྫོགས་སོ།། {T3627}༄༅༅། །རྒྱ་གར་སྐད་དུ། ཨཱརྱ་རཀྟ་ཡ་མཱ་རི་སཱ་དྷ་ནཾ། བོད་སྐད་དུ། འཕགས་པ་གཤིན་རྗེ་གཤེད་དམར་པོའི་སྒྲུབ་ཐབས། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །དང་པོར་རེ་
[245b.5]ཞིག་སྒྲུབ་པ་པོས་སྟན་བདེ་བ་ལ་ཉེ་བར་འདུག་ནས། ཨཱཿཡིག་དམར་པོ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་རང་གི་སྙིང་གར་བསྒོམས་ཏེ། དེའི་སྟེང་དུ་ཧཱུཾ་ཡིག་དམར་པོ་རྣམ་པར་བཀོད་ནས། མདུན་དུ་གཤིན་རྗེ་གཤེད་དམར་པོ་དང་། བླ་མ་དང་། སངས་རྒྱས་དང་། བྱང་ཆུབ་
[245b.6]སེམས་དཔའ་རྣམས་དམིགས་ཏེ། མེ་ཏོག་ལ་སོགས་པ་རྣམས་ཀྱིས་ཡང་དག་པར་མཆོད་ཅིང་ཕྱག་འཚལ་ནས་གསུམ་ལ་སྐྱབས་སུ་འགྲོ་བ་ལ་སོགས་པ་བྱས་ཏེ། སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་སོ། །དེའི་རྗེས་ལ་ཨཱཿཡིག་དམར་པོ་ལས་
[245b.7]སྐྱེས་པའི་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་དེ་ཡོངས་སུ་གྱུར་པ་ལས་མགོ་བོ་རློན་པས་མཚན་པའི་དབྱུག་པ་དཀར་པོ་ཧཱུཾ་ཡིག་གིས་བྱིན་གྱིས་བརླབས་པ་བསྒོམ་པར་བྱའོ། །དེ་ཐམས་ཅད་ཡོངས་སུ་གྱུར་པ་ལས་གཤིན་རྗེ་མཐར་བྱེད་བསམ་པར་བྱ་སྟེ། བདག་ཉིད་སྐུ་མདོག་དམར་པོ་
[246a]
[246a.1]ཞབས་གཡོན་བརྐྱང་གིས་བཞུགས་པ། ཞལ་གཅིག་པ། ཕྱག་གཉིས་པ། ཕྱག་གཡོན་ན་ཁྲག་གིས་གང་བའི་ཐོད་པ་བསྣམས་པ། ཕྱག་གཡས་ན་མགོ་བོས་མཚན་པའི་དབྱུག་པ་དཀར་པོ་བསྣམས་པ། སྦྲུལ་གྱི་རྒྱན་གྱིས་བརྒྱན་པ། འཇིགས་སུ་རུང་བ།
[246a.2]དབུ་སྐྲ་སེར་པོ་གྱེན་དུ་བརྫེས་པ། སྟག་གི་པགས་པའི་ཤམ་ཐབས་བསྣམས་པ། རང་འོད་ཀྱི་ཤེས་རབ་མ་རྒྱན་སྣ་ཚོགས་པ་ཅན། ཞབས་གཡས་བརྐྱང་གིས་བཞུགས་པ་ལ་འཁྱུད་པའི་བདག་ཉིད་བསྒོམ་པར་བྱའོ། །ཕྱི་ནས་བཅོམ་ལྡན་འདས་ཀྱི་ཐུགས་ཀར་ཉི་མའི་དཀྱིལ་འཁོར་ལ་ཧཱུཾ་
[246a.3]ཡིག་གིས་བྱིན་གྱིས་བརླབས་པ་དེ་ཡོངས་སུ་གྱུར་པ་ལས། མགོ་བོ་རློན་པས་མཚན་མའི་དབྱུག་པ་དཀར་པོ་མི་གཡོ་བ་བསྒོམ་པར་བྱའོ། །དེའི་དབུས་སུ་ཉི་མ་དམར་པོ་ལ་གནས་པའི་ཧཱུཾ་ཡིག་ཁ་དོག་དམར་པོ་བསྒོམ་པར་བྱའོ། །དེ་ནས་གསང་བའི་རྡོ་རྗེར་ཧཱུཾ་ཡིག་ཡོངས་སུ་གྱུར་པ་ལས།
[246a.4]བཅོམ་ལྡན་འདས་མའི་གསང་བར་ཆུ་སྐྱེས་འདབ་མ་བརྒྱད་པ་ལ་ཨཱཿཡིག་དམར་པོ། དེའི་རྗེས་སུ་སྔགས་བརྗོད་པར་བྱའོ། །ཨོཾ་སརྦ་ཏ་ཐཱ་ག་ཏཱ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེའི་རྗེས་ལ་ལྟེ་བའི་འོག་ཏུ་ཆུ་སྐྱེས་འདབ་མ་བརྒྱད་དང་བཅས་པ། དམར་པོའི་སྟེང་དུ་ཧྲཱིཿདམར་པོ་འབར་བཞིན་པ་དེ་
[246a.5]ལ་བསམ་པར་བྱའོ། །ཤེས་རབ་མ་དགའ་བས་མྱོས་པ་གོས་ཕུད་པ། ཕྱག་གཉིས་པ། ཞལ་གཅིག་མའི་བཅོམ་ལྡན་འདས་མ་དང་ལྷན་ཅིག་ཡང་དག་པར་སྦྱོར་བས་བཞུགས་པ། དེ་ལྟ་བུར་གྱུར་པའི་གཤིན་རྗེ་གཤེད་དམར་པོ་མ་ཧེའི་སྟེང་དུ་སྣ་ཚོགས་ཆུ་སྐྱེས་ལ་བཞུགས་པ་བསྒོམ་པར་
[246a.6]བྱའོ་ཞེས་སོ། །དམ་ཚིག་ལ་སོགས་པའི་ཆོ་ག་སྔོན་དུ་འགྲོ་བས་དེ་ནས་གཉིས་གསུམ་བཞིའི་ཐུན་མཚམས་སུ་བསྒོམ་པར་བྱའོ། །ཨོཾ་ཨ་ཛྲིཾ་ཁཾ་ཧཱུཾ་ས་མ་ཡ་ཞེས་པ་ནི་དམ་ཚིག་བྱིན་གྱིས་བརླབ་པའི་སྔགས་སོ། །ཨོཾ་ཧྲཱིཿཥྚྲཱྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ་རྩ་བའི་སྔགས་སོ། །ཨོཾ་ཡ་མཱནྟ་ཀ་ཧཱུཾ་སྙིང་
[246a.7]པོའི་སྔགས་སོ། །འཕགས་པ་གཤིན་རྗེ་གཤེད་དམར་པོའི་སྒྲུབ་ཐབས་རྫོགས་སོ།། {T3628}༄༅༅། །རྒྱ་གར་སྐད་དུ། །ཀྲྀཥྞ་ཡ་མཱ་རི་སཱ་དྷ་ནཾ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་ཐབས། བཅོམ་ལྡན་འདས་གཤིན་རྗེའི་དགྲ་ལ་ཕྱག་འཚལ་ལོ། །དང་པོར་རེ་
[246b]
[246b.1]ཞིག་སྒྲུབ་པ་པས་སྟན་བདེ་བ་ལ་ཉེ་བར་འདུག་སྟེ། ཨཾ་ཡིག་དམར་པོ་ལས་སྐྱེས་པའི་ཉི་མའི་དཀྱིལ་འཁོར་རང་གི་སྙིང་གར་བསྒོམ་པར་བྱའོ། །དེའི་སྟེང་དུ་ཧཱུཾ་ཡིག་མཐིང་ནག་བཀོད་ལ་ཧཱུཾ་ཡིག་མཐིང་ནག་གི་འོད་ཟེར་གྱིས་གཤིན་རྗེ་མཐར་བྱེད་ལ་སོགས་པའི་བླ་མ་དང་། སངས་རྒྱས་དང་།
[246b.2]བྱང་ཆུབ་སེམས་དཔའ་རྣམས་དམིགས་ལ་མེ་ཏོག་ལ་སོགས་པ་རྣམས་ཀྱིས་ཡང་དག་པར་མཆོད་ཅིང་ཕྱག་འཚལ་ནས་གསུམ་ལ་སྐྱབས་སུ་འགྲོ་བ་ལ་སོགས་པ་བྱས་ཏེ། སྟོང་པ་ཉིད་དུ་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེའི་རྗེས་ལ་ཨཾ་ཡིག་དམར་པོ་ལས་སྐྱེས་པའི་ཉི་མའི་
[246b.3]དཀྱིལ་འཁོར་ལ་ཧཱུཾ་ཡིག་དེ་ཡོངས་སུ་གྱུར་པ་ལས་རྡོ་རྗེས་མཚན་པའི་དབྱུག་པ་ནག་པོ་ཧཱུཾ་ཡིག་གིས་བྱིན་གྱིས་བརླབས་པ་བསྒོམ་པར་བྱའོ། །ཧཱུཾ་ཡིག་གི་འོད་ཟེར་གྱིས་བསྐུལ་ནས་དེ་བཞིན་གཤེགས་པ་ཐམས་ཅད་རབ་ཏུ་གཞུག་པ་སྔོན་དུ་འགྲོ་བས་སོ། །དེ་ཐམས་ཅད་ཡོངས་སུ་གྱུར་པ་ལས་
[246b.4]གཤིན་རྗེ་མཐར་བྱེད་བསམ་པར་བྱའོ། །ཞབས་གཡོན་བརྐྱང་གིས་བཞུགས་པ། ཞལ་གཅིག་པ། ཕྱག་གཉིས་པ། སྐུ་མདོག་མཐིང་ནག །ཕྱག་གཡས་ཀྱིས་རྡོ་རྗེས་མཚན་པའི་དབྱུག་པ་མཐིང་ནག་བསྣམས་པ། ཕྱག་གཡོན་པ་སྡིགས་མཛུབ་མཛད་པ། དེ་ལྟ་བུར་གྱུར་པའི་གཤིན་རྗེ་
[246b.5]གཤེད་སྤྲོ་བ་དང་བསྡུ་བའི་ཚུལ་གྱིས་སྣ་ཚོགས་ཆུ་སྐྱེས་ཀྱི་སྟེང་དུ་ཉི་མ་ལ་བཞུགས་པ་མ་ཧེའི་སྟེང་དུ་བསྒོམ་པར་བྱའོ། །དེ་ནས་བཅོམ་ལྡན་འདས་ཀྱི་ཐུགས་ཀར་ཉི་མའི་དཀྱིལ་འཁོར་ལ་ཧཱུཾ་ཡིག་ཡོངས་སུ་གྱུར་པ་ལས། ཧཱུཾ་ཡིག་གིས་བྱིན་གྱིས་བརླབས་པའི་དབྱུག་པ་མཐིང་ནག་ལས་ཧཱུཾ་ཡིག་གི་
[246b.6]འོད་ཟེར་གྱིས་འགྲོ་བ་རྣམས་སྣང་བར་བྱས་ཏེ། སླར་ཡང་དེ་ལ་དེ་བཞིན་དུ་རབ་ཏུ་གཞུག་པར་བྱའོ། །རིམ་པ་འདི་ཉིད་ཇི་སྲིད་འདོད་ཀྱི་བར་དུ་སྤྲོ་བ་དང་བསྡུ་བར་བྱའོ། །དམ་ཚིག་ལ་སོགས་པའི་ཆོ་ག་སྔོན་དུ་འགྲོ་བས་སོ། །དེ་བཞིན་དུ་གཉིས་གསུམ་བཞིའི་ཐུན་མཚམས་སུ་བསྒོམ་པར་བྱའོ། །
[246b.7]ཨོཾ་ཧྲཱིཿཥྚཱྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པའི་སྔགས་བཟླས་པར་བྱའོ། །གཤིན་རྗེ་གཤེད་ནག་པོའི་སྒྲུབ་ཐབས་རྫོགས་སོ།། {T3629}༄༅༅། །རྒྱ་གར་སྐད་དུ། ཀྲྀཥྞ་ཡ་མཱ་རི་སཱ་དྷ་ནཾ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་ཐབས། བཅོམ་ལྡན་འདས་
[247a]
[247a.1]གཤིན་རྗེའི་དགྲ་ལ་ཕྱག་འཚལ་ལོ། །གང་གིས་བརྩེ་བའི་དབང་གིས་དམན་དང་མཆོག་རྣམས་ཀྱང་། །སྟོབས་ཀྱིས་གདུལ་བྱའི་སྐྱེ་རྣམས་དྲག་པོར་སྟོན་མཛད་ཅིང་། །ཕན་པ་སྣ་ཚོགས་སྒྲུབ་མཛད་སྒྱུ་མའི་གར་གྱི་སྐུར། །གཤིན་རྗེ་མཐར་བྱེད་དེ་ལ་བདག་ནི་
[247a.2]ཕྱག་འཚལ་ལོ། །དང་པོར་བསྒྲུབ་བཅས་མཆོག་ཏུ་བདེ་སྟེར་སྟན་ལ་འདུག །བསམ་གཏན་ཁང་པ་དྲི་བཟངས་ཀྱིས་བྱུགས་ཡིད་མངོན་དགའ། །བསམ་གཏན་ཏིང་འཛིན་ཡིད་ཀྱིས་སྙིང་གར་ཨཾ་ཡིག་ལས། །དམར་པོའི་རྣམ་པར་རབ་བྱུང་གཏུམ་པོ་སྨིག་རྒྱུའི་གཟུགས། །དེ་ཡི་སྟེང་
[247a.3]གནས་འོད་ཟེར་དང་བཅས་ཁ་དོག་མཐིང་། །ཧཱུཾ་ཡིག་འོད་ཟེར་བརྒྱ་འགྱེད་གཤིན་རྗེ་གཤེད་ལ་སོགས། །ཡང་དག་མཆོད་བྱ་ཡིད་ཀྱིས་རྣམ་འཕྲུལ་མེ་ཏོག་སྤོས། །མར་མེ་ལ་སོགས་རྣམ་མང་གིས་མཆོད་གུས་ཕྱག་འཚལ། །སྔོན་དུ་བྱས་པའི་སྡིག་རྣམས་བཤགས་པ་ལ་སོགས་བྱ། །
[247a.4]འགྲོ་རྣམས་མ་ལུས་སྟོང་ཉིད་མངོན་བྱ་དེ་ནས་ཀྱང་། །ཨོཾ་ཤཱུ་ནྱ་ཏཱ་ལ་སོགས་སྔགས་མཆོག་ཚིག་ཏུ་བྱ། །བདག་ཉིད་རང་གི་ངོ་བོ་གུས་པས་ཡོངས་བསྒོམས་པ། །ཨཾ་ཡིག་དམར་པོ་ལས་བྱུང་ཉི་མ་ལ་གནས་མཐིང་། །ཧཱུཾ་ཡིག་གཟུགས་ལ་རྡོ་རྗེས་མཚན་པའི་དབྱུག་པ་མཐིང་། །དབྱུག་པ་
[247a.5]ལ་གནས་ཧཱུཾ་ཡིག་རབ་འཕྲོ་དྲ་བ་ཅན། །རྒྱལ་བ་མ་ལུས་བསྐུལ་ཞིང་གདན་དྲངས་རབ་ཏུ་གཞུག །དེ་ཉིད་བལྟ་ཞིང་མ་ལུས་ཡོངས་བསྔོ་ཕྱི་ནས་ནི། །བདག་ཉིད་མྱུར་དུ་གཤིན་རྗེ་མཐར་བྱེད་རྣམ་བསྒོམ་བྱ། །སྐུ་མདོག་མཐིང་ནག་ཞལ་གཅིག་ཕྱག་གཉིས་ཁྲོ་བཅས་པ། །ཕྱག་གཡས་
[247a.6]ན་ནི་རྡོ་རྗེས་མཚན་པའི་དབྱུག་མཐིང་བསྣམས། །ཕྱག་གཡོན་ཐུགས་ཀར་སྡིགས་མཛུབ་ཞགས་པ་དང་བཅས་པ། །ཞལ་གྱི་པདྨ་སྨིན་མ་སྨ་ར་དམར་སེར་འབར། །སྟག་གི་པགས་པའི་ན་བཟའ་གསང་ཕྱོགས་ཡང་དག་ལྡན། །ཞལ་ནས་ལྗགས་ནི་ལྟོས་འགྲོ་བཞིན་དུ་རྣམ་པར་བསྐྱོད། །
[247a.7]སྣ་ཚོགས་ཆུ་སྐྱེས་འདབ་བཅས་སྟེང་དུ་ཉི་མ་ལ། །ཡང་དག་བཞུགས་ཤིང་དྲག་པོ་མ་ཧེ་ལ་ཞོན་སྒྲོགས། །ཞལ་ནི་མཆེ་གཙིགས་མིའུ་ཐུང་ལྟོ་བ་རབ་ཏུ་འཕྱང་། །སྤྱན་ནི་གཉིས་པ་ཉི་མའི་དཀྱིལ་འཁོར་དང་མཚུངས་པ། །ཀླུ་བརྒྱད་ཁྲོས་པའི་རྒྱན་གྱིས་བརྒྱན་ཅིང་ཐོད་པ་ཡི། །ཕྲེང་བ་དཀར་པོ་མཉམ་
[247b]
[247b.1]གཤིབས་བཅིངས་ཤིང་ཞལ་འཕྲོ་བ། །མི་མགོ་རློན་པའི་དོ་ཤལ་མགུལ་དུ་རབ་བཅིངས་ཤིང་། །ཨཥྚ་ཧ་ཡི་གད་རྒྱངས་བདུད་ཀྱི་དཔུང་ལས་རྒྱལ། །ཕྱི་ནས་བཅོམ་ལྡན་འདས་ཀྱི་ཐུགས་ཀར་ཉི་མ་ལ། །རབ་ཞུགས་ཧཱུཾ་ཡིག་དང་ལྡན་དབྱུག་པ་སྔོན་པོ་བསམ། །དེར་གནས་ཧཱུཾ་ཡིག་འོད་ཀྱིས་
[247b.2]ཁམས་གསུམ་སྣང་བྱས་ཤིང་། །དེར་ཞུགས་ཡུན་མི་རིང་བར་སླར་ཡང་ནང་དུ་བྱ། །རིམ་པ་འདིས་ནི་སྤྲོ་བསྡུ་ཇི་ལྟར་འདོད་པར་བྱ། །སླར་ཡང་དམ་ཚིག་སྔོན་མ་བཞིན་དུ་ཀུན་བྱས་ཏེ། །ཐུན་མཚམས་བཞི་རུ་འདི་ནི་མ་ལུས་བསྒོམ་བྱ་ཞིང་། །ངལ་བར་གྱུར་ན་ཇི་བཞིན་བསྒྲུབས་ལ་སྔགས་བཟླས་བྱ། །
[247b.3]བཅོམ་ལྡན་གཤིན་རྗེ་མཐར་བྱེད་སྒྲུབ་ཐབས་བསྡུས་བྱས་པའི། །བྱམས་པ་དཔལ་བདག་དཔག་མེད་བསོད་ནམས་གང་འདི་ཡིས། །འགྲོ་བ་མ་ལུས་བཅོམ་ལྡན་གཤིན་རྗེ་མཐར་བྱེད་གྱུར། །བདག་ཀྱང་མྱུར་དུ་འདིར་ནི་གཤིན་རྗེ་མཐར་བྱེད་ཤོག །དེ་ལ་སྔགས་ཀྱི་རྒྱལ་པོ་འདིའོ། །ཨོཾ་ཧྲཱིཿཥྚྲཱིཿ
[247b.4]བི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གཤིན་རྗེ་གཤེད་ནག་པོའི་སྒྲུབ་ཐབས་རྫོགས་སོ།། {T3630}༄༅༅། །རྒྱ་གར་སྐད་དུ། ཀྲིཥྞ་ཡ་མཱ་རི་སཱ་དྷ་ནཾ། བོད་སྐད་དུ། གཤིན་རྗེ་དགྲ་ནག་པོའི་སྒྲུབ་ཐབས། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །དཔའ་བོ་ཐོད་
[247b.5]པའི་ཕྲེང་བ་ཅན། །སྦྲུལ་སོགས་རྒྱན་གྱིས་རྔམ་བྱས་པའི། །གཤིན་རྗེ་གཤེད་མགོན་ཕྱག་འཚལ་ནས། །དེ་ཡི་སྒྲུབ་ཐབས་བྲི་བར་བྱ། །བདེ་བའི་སྟན་ལ་ཡང་དག་འདུག །སྙིང་གར་ཉི་མ་ཧཱུཾ་ཡིག་དགོད། །དེར་སྐྱེས་མཆོད་པའི་ཁྱད་པར་གྱིས། །གུས་པས་ཁྱབ་བདག་ཡང་དག་མཆོད། །
[247b.6]དེ་ཡི་མདུན་དུ་ཕྱོགས་བྱས་ཏེ། །སྡིག་པ་བཤགས་པ་ལ་སོགས་བྱ། །འགྲོ་ཀུན་རང་བཞིན་མེད་པར་ནི། །སྐད་ཅིག་གིས་བལྟས་དེ་ཉིད་ལས། །སྙིང་གའི་ས་བོན་རྟགས་ལས་བྱུང་། །ཞབས་ཀྱི་ཆུ་སྐྱེས་གཡོན་བརྐྱང་བ། །ཁྲོ་གཉེར་བསྡུས་ཤིང་ཞལ་འཇིགས་ལ། །སྨ་ར་སྨིན་མ་དབུ་སྐྲ་སེར། །
[247b.7]ཞལ་གསུམ་ལྗགས་ནི་བསྐྱོད་པ་ཡིས། །འཇིགས་བྱེད་མཆེ་བ་གཙིགས་པ་ཅན། །སྤྱན་ནི་དམར་ཞིང་གསུས་ཆེན་ལ། །སྤྲིན་ནག་གསར་པའི་འོད་ཟེར་ཅན། །ཉི་མའི་དཀྱིལ་འཁོར་ལ་གནས་ཤིང་། །མ་ཧེ་ཡི་ནི་མཚན་ལ་བཞུགས། །སྟག་གི་ཤམ་ཐབས་མིའུ་ཐུང་། །ང་རྒྱལ་
[248a]
[248a.1]ཐམས་ཅད་འཇོམས་མཛད་པ། །ཉི་མའི་འོད་ཟེར་གཟི་མདངས་ཆེ། །ས་སྟེང་མ་ལུས་ཀུན་དུ་མཆོད། །འབར་ཞིང་འབར་བའི་ཕྲེང་བ་རྣོ། །དུས་མཐའ་ཡི་ནི་མེ་དང་མཚུངས། །རྡོ་རྗེ་རལ་གྲི་གཏུན་ཤིང་དྲག །རོ་ལངས་སྟ་རེ་ཞགས་པ་བསྣམས། །ཕྱག་གཡས་དང་ནི་
[248a.2]གཡོན་པ་ཡི། །དྲུག་པོ་རྣམས་སུ་མཛེས་པར་བསྣམས། །ཁྲོ་བཅས་འཇིགས་བྱེད་ཤིན་ཏུ་དྲག །གཤིན་རྗེ་མཐར་བྱེད་བདུད་འཇོམས་པ། །ཧཱུཾ་ཡིག་གིས་གང་མགྲིན་བསམས་ནས། །འདིར་ནི་དེ་ཡི་ང་རྒྱལ་བྱ། །སྙིང་གར་ཉི་རྡོར་སྙིང་འོད་ཀྱིས། །གཤིན་རྗེ་སྡང་བ་བཟའ་བར་བྱ། །མདུན་ཕྱོགས་
[248a.3]དེ་ནས་མཆོད་ནས་ནི། །རང་དང་རྣམ་པ་གཅིག་བྱས་ཏེ། །ཛཿཧཱུཾ་བཾ་ཧོཿས་བོན་བཞིས། །ཡང་དག་དགུག་དང་གཞུག་པ་དང་། །བཅིང་དང་མཉེས་པས་བདག་མཆོད་ཅིང་། །བསམ་གཏན་གྱིས་ནི་མཆོད་བྱས་ནས། །ཡང་དག་བསྟོད་ནས་སྔགས་བཟླས་བྱ། །དགེ་བ་ཡོངས་སུ་བསྔོ་བྱ་ཞིང་། །
[248a.4]ལངས་ནས་ལྷ་ཡི་རྣལ་འབྱོར་གྱིས། །བརྩེ་བ་གཅིག་པུའི་ཡིད་ཀྱིས་སྤྱད། །དེ་བཞིན་ཉི་མ་སོ་སོར་བྱ། །དངོས་གྲུབ་ཐོབ་པའི་མཚན་མ་འབྱུང་། །འདོད་པའི་དངོས་གྲུབ་བསྒྲུབ་བྱ་བ། །ལས་མཆོག་རབ་ཏུ་བརྐྱང་ན་ཡང་། །ལས་ཀྱི་རྗེས་སུ་འབྲངས་བའི་ཚུལ། །མངས་པས་ཁོ་བོས་མ་བཤད་དོ། །བླ་
[248a.5]མའི་མན་ངག་དེ་ཡང་ནི། །རྒྱུད་ལས་མངོན་འདོད་བསྒྲུབ་པར་བྱ། །མཁས་པས་འཁོར་ལོ་གཞན་རྣམས་ཀྱང་། །ཀུན་ནས་འབད་པས་ཤེས་པར་བྱ། །གཏོར་མ་ཉེར་སྤྱོད་རྣལ་འབྱོར་གྱིས། །ཐུན་མཚམས་བཞི་རུ་ཆོ་ག་བྱ། །བཟླས་པའི་སྔགས་ནི། ཨོཾ་ཧྲཱིཿཥྚྲཱྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ།
[248a.6]བདག་གི་བླ་མའི་མན་ངག་ལས་རྟོགས་ནས། །སྒྲུབ་ཐབས་ཆོ་ག་བྱས་པའི་བསོད་ནམས་ཀྱིས། །འཇིག་རྟེན་པ་རྣམས་ཐམས་ཅད་གྱུར་པ་འདིས། །མངོན་པར་འདོད་པའི་འབྲས་བུ་མྱུར་ཐོབ་ཤོག །གཤིན་རྗེའི་དགྲ་ནག་པོའི་སྒྲུབ་ཐབས་རྫོགས་སོ།། {T3631}༄༅༅། །རྒྱ་གར་སྐད་དུ། ཡ་མཱནྟ་ཀ་
[248a.7]སཱ་དྷ་ནཾ། བོད་སྐད་དུ། གཤིན་རྗེ་མཐར་བྱེད་ཀྱི་སྒྲུབ་ཐབས། གཤིན་རྗེ་མཐར་བྱེད་ལ་ཕྱག་འཚལ་ལོ། །དཔའ་བོ་ཐོད་པའི་ཕྲེང་བ་ཅན། །ཀླུ་སོགས་རྒྱན་གྱིས་གསལ་མཛད་པ། །གཤིན་རྗེ་གཤེད་མགོན་ཕྱག་འཚལ་ནས། །དེ་ཡི་སྒྲུབ་ཐབས་བྲི་བར་བྱ། །བདེ་བའི་སྟན་ལ་ཡང་དག་འདུག།།
[248b]
[248b.1]སྙིང་གར་ཧཱུཾ་ཡིག་མཐིང་ནག་དགོད། །དེ་སྐྱེས་མཆོད་པའི་ཁྱད་པར་གྱིས། །ཁྱབ་བདག་མཆོག་ཏུ་རབ་མཆོད་བྱ། །དེ་ཡི་མདུན་དུ་ཕྱོགས་བྱས་ཏེ། །སྡིག་པ་བཤགས་པ་ལ་སོགས་བྱ། །འགྲོ་ཀུན་རང་བཞིན་མེད་པར་ནི། །སྐད་ཅིག་གིས་ནི་ཐམས་ཅད་བལྟ། །སྙིང་གའི་ས་བོན་རྟགས་
[248b.2]ལས་བྱུང་། །ཞབས་ཀྱི་ཆུ་སྐྱེས་གཡོན་བརྐྱང་བ། །ཁྲོ་གཉེར་བསྡུས་ཤིང་ཞལ་འཇིགས་ལ། །སྨ་ར་དམར་སེར་སྔོན་མ་བཞིན། །ཞལ་གསུམ་ལྗགས་ནི་བསྐྱོད་པ་ཡི། །འཇིགས་བྱེད་མཆེ་བ་གཙིགས་པ་ཅན། །སྤྱན་ནི་དམར་ཞིང་གསུས་ཆེན་ལ། །སྤྲིན་ནག་སར་པའི་འོད་
[248b.3]ཟེར་ཅན། །ཉི་མའི་དཀྱིལ་འཁོར་ལ་གནས་ཤིང་། །མ་ཧེ་ཡི་ནི་མཚན་ལ་བཞུགས། །མིའུ་ཐུང་སྟག་གི་ཤམ་ཐབས་ཅན། །ཁེངས་པ་ཐམས་ཅད་འཇོམས་མཛད་པ། །ཉི་མའི་འོད་ཟེར་གཟི་མདངས་ཅན། །མ་ལུས་ཕྱོགས་རྣམས་འགེངས་བྱེད་པ། །འབར་ཞིང་འབར་བའི་ཕྲེང་བ་ཅན། །
[248b.4]བསྐལ་པ་ཐ་མའི་མེ་དང་མཚུངས། །འཁོར་ལོ་རལ་གྲི་གཏུན་ཤིང་འབར། །རོ་ལངས་དགྲ་སྟ་ཞགས་པ་བསྣམས། །ཕྱག་དྲུག་རྣམས་ན་མཛེས་པ་སྟེ། །གཡས་དང་གཡོན་པའི་ཕྱག་རྣམས་སུ། །ཁྲོ་བཅས་འཇིགས་བྱེད་ཤིན་ཏུ་དྲག །གཤིན་རྗེ་མཐར་བྱེད་བདུད་འདུལ་བ། །ཧཱུཾ་ཡིག་གིས་གང་
[248b.5]མགྲིན་པར་བསྒོམ། །སྐྲག་པ་རྣམས་ནི་རྣམ་པར་སྤང་། །ཉི་ཤུ་ཕྱེད་ཀྱི་སྟོང་ཕྲག་གིས། །སྔགས་རྣམས་སྔགས་ནི་རྟག་ཏུ་རིག། །སེམས་ནི་གཟེངས་བསྟོད་བཟླས་པར་བྱ། །འདིས་ནི་འདོད་པའི་དངོས་གྲུབ་བོ། །སྔོན་དུ་བསྙེན་པའི་ཆོ་ག་ཡིས། །འདི་ཡིས་སྔགས་པའི་སྔགས་རྣམས་འགྲུབ། །
[248b.6]ལས་ཀྱི་རྗེས་འབྲང་ཁ་དོག་རྣམས། །མངས་པས་བདག་གིས་མ་བཤད་དོ། །བླ་མའི་མན་ངག་བསམས་ནས་ནི། །དེ་ལས་འདོད་པའི་དངོས་གྲུབ་བོ། །འབད་པ་ཡིས་ནི་ཤེས་བྱས་ལ། །དཔའ་བོ་རྣམས་ཀྱི་བསྙེན་པའང་བྱ། །གཏོར་མ་ཉེར་སྤྱོད་རྣལ་འབྱོར་གྱིས། །ཐུན་མཚམས་བཞི་རུ་བསྒྲུབ་
[248b.7]པར་བྱ། །བཟླས་པའི་སྔགས་ནི། ཨོཾ་ཧྲཱིཿཥྚྲཱྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གཤིན་རྗེ་མཐར་བྱེད་ཀྱི་སྒྲུབ་ཐབས་རྫོགས་སོ།། {T3632}༄༅༅། །རྒྱ་གར་སྐད་དུ། ཡ་མཱནྟ་ཀ་སཱ་དྷ་ནཾ། བོད་སྐད་དུ། གཤིན་རྗེ་མཐར་བྱེད་ཀྱི་སྒྲུབ་ཐབས། དཔལ་གཤིན་རྗེ་མཐར་བྱེད་ལ་ཕྱག་འཚལ་
[249a]
[249a.1]ལོ། །སྒོམ་པ་པོས་དང་པོར་ཞལ་བསང་བ་ལ་སོགས་པ་བྱ་སྟེ། རང་གི་སྙིང་གར་ཨ་ཡིག་ལས་སྐྱེས་པའི་ཟླ་བ་ལ་ཡཾ་ཡིག་ནག་པོ་བསྒོམ་པར་བྱའོ། །དེའི་འོད་ཟེར་གྱིས་བླ་མ་དང་། སངས་རྒྱས་རྣམས་གདན་དྲངས་ནས་ཡང་དག་པར་མཆོད་ཅིང་སྡིག་པ་བཤགས་
[249a.2]པ་ལ་སོགས་པ་བྱའོ། །དེ་ནས་ཡཾ་ཡིག་ཙམ་ལས་རྣལ་འབྱོར་པས་བདག་ཉིད་སྟོང་པ་ཉིད་མངོན་དུ་བྱ་ཞིང་བྱིན་གྱིས་བརླབ་པར་ཡང་བྱ་སྟེ། སྨོན་ལམ་རྗེས་སུ་དྲན་པར་བྱའོ། །དེའི་རྗེས་སུ་རཾ་ཡིག་ལས་བྱུང་བའི་ཉི་མ་ལ་ཧཱུཾ་ཡིག་ལས་བྱུང་བའི་རྡོ་རྗེ་ཐོ་བ། རང་གི་ས་བོན་གྱིས་མཚན་པ་རྣམ་པར་བསྒོམ་
[249a.3]པར་བྱའོ། །དེ་ལས་སྐྱེས་པའི་རྡོ་རྗེའི་ས་གཞི་དང་། རྡོ་རྗེའི་ར་བ་དང་། རྡོ་རྗེའི་གུར་བསྒོམ་པར་བྱའོ། །དེའི་དབུས་སུ་ཟླ་བའི་དཀྱིལ་འཁོར་ལ་དབྱངས་ཡིག་ཉིས་འགྱུར་གྱི་རང་བཞིན་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་མཚན་པ། ཤེས་རབ་ཀྱི་རང་བཞིན་ཡང་དག་པར་བལྟའོ། །དེའི་
[249a.4]སྟེང་དུ་དཔེ་བྱད་བཟང་པོ་བརྒྱད་ཅུའི་རྣམ་པར་དག་པ་དེ་ལ། ཌ་ཌྷ་ཡ་ར་ལ་ཝ་བཞི་ཉིས་འགྱུར་དང་བཅས་པ་དང་། ཀ་ལ་སོགས་པའི་གསལ་བྱེད་ཉིས་འགྱུར་ཡོངས་སུ་རྫོགས་པ་ལས། གཞན་ཡང་ཟླ་བའི་དཀྱིལ་འཁོར་ལ་ཐབས་ཀྱི་ངོ་བོ་མཐའ་ཡས་པ་འབར་བ་འཕྲོ་ཞིང་བསམ་པར་བྱའོ། །དེ་ནས་
[249a.5]དེ་གཉིས་ཡོངས་སུ་རྫོགས་པ་ལས་ཉི་མའི་དཀྱིལ་འཁོར་ལ་ཧཱུཾ་མཐིང་ག་དང་། ཡཾ་ལས་ཡང་དག་པར་བྱུང་བའི་ཆར་སྤྲིན་ནག་པོ་གསར་པའི་ཁ་དོག་ཅན་གསུས་པ་ཆེ་བ། སྨིན་མ་དང་སྨ་ར་དམར་སེར་གྱེན་དུ་བརྫེས་པ། མཆེ་བ་གཙིགས་པ། ཐུང་ཞིང་རྒྱས་ལ་མ་ཧེ་ལ་བཞུགས་པ།
[249a.6]སྟག་གི་པགས་པའི་ཤམ་ཐབས་བསྣམས་པ། རི་དྭགས་བདག་པོའི་པགས་པས་སྟོད་གཡོགས་བྱས་པ། ཤིན་ཏུ་འཇིགས་པར་བྱེད་པ། རང་གི་སྐུའི་འོད་ཟེར་གྱིས་ཁྲོ་བོ་ལྔ་འཕྲོ་བཞིན་པ་སྤྲུལ་ནས། གདེངས་ཀའི་རྒྱལ་པོས་བརྒྱན་པ། ཁྲག་འཛག་པའི་མགོ་བོ་བརྒྱའི་ཕྱེད་ཀྱི་ཕྲེང་བ་
[249a.7]བསྣམས་པ། ཕྱག་དྲུག་པ་གཡས་ཀྱི་ཕྱག་རྣམས་ཀྱིས་ཐོ་བ་དང་། རལ་གྲི་དང་། རྡོ་རྗེ་བསྣམས་པ། གཡོན་གྱི་ཕྱག་གསུམ་གྱིས་སྡིགས་མཛུབ་དང་བཅས་པའི་ཞགས་པ་བསྣམས་པའོ། །ཞལ་དྲུག་པ་དང་པོ་ཁྲོ་ཞལ་དང་། མཐིང་ག་དང་། དཀར་པོ་དང་། སེར་པོ་དང་། དམར་པོ་དང་།
[249b]
[249b.1]ནག་པོ་རྣམས་གཞན་རྣམས་སུ་ཞལ་གྱི་རིམ་པས་སོ། །ཞལ་ཐམས་ཅད་ནི་ཟླུམ་ཞིང་དམར་བའི་སྤྱན་གསུམ་པའོ། །ཞབས་དྲུག་པ། ཞབས་གཉིས་གཡོན་བརྐྱང་མཛད་ཅིང་ཡང་ཞབས་གཉིས་གར་སྟབས་མཛད་པ། ཞབས་གཞན་གཉིས་སེམས་དཔའི་སྐྱིལ་ཀྲུང་མཛད་པ། ཉི་མ་འབར་བའི་
[249b.2]དབུས་སུ་བཞུགས་ཤིང་བགེགས་རྣམས་འཇོམས་པར་མཛད་པ། ཐོད་པ་བརྒྱད་ཀྱིས་ལེགས་པར་བརྒྱན་ཅིང་ཤིན་ཏུ་འཇིགས་པའི་མགོ་བོའི་ཕྲེང་བ་ཅན་ནོ། །དེའི་རྗེས་ལ་ཀྵིཾ་ཛཾ་ཁཾ། ལཾ་སྐཾ་སཾ་གི་ས་བོན་རྣམས་ལས་བྱུང་བའི་སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། འཇིག་རྟེན་
[249b.3]དབང་ཕྱུག་དང་། སྒྲིབ་པ་རྣམ་པར་སེལ་བ་དང་། ཀུན་དུ་བཟང་པོ་ཞེས་པ་རྣམས་མིག་དང་། རྣ་བ་དང་། སྣ་དང་། ལྕེ་དང་། ནུ་མ་དག་དང་། ལྟེ་བ་ཞེས་པ་རྣམས་ཀྱི་འཁོར་ལོ་དང་། རྡོ་རྗེ་དང་། རིན་པོ་ཆེ་དང་། ཆུ་སྐྱེས་དང་། མདའ་དང་། རྡོ་རྗེ་རྣམས་ཕྱག་གཡས་པ་རྣམས་ཀྱིས་བསྣམས་པ།
[249b.4]ཕྱག་གཡོན་པ་རྣམས་ཀྱིས་སྡིགས་མཛུབ་ཀྱི་ཕྱག་རྒྱ་མཛད་པ། དཀར་པོ་དང་། ནག་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོ་རྣམས་སུ་བཞུགས་པ། དེའི་རྗེས་སུ་མགོ་བོ་དང་། མགྲིན་པ་དང་། སྙིང་ག་སྟེ། སྐུ་དང་གསུང་དང་། ཐུགས་རྣམས་སུ་གནས་པའི་ཟླ་བའི་དཀྱིལ་འཁོར་
[249b.5]ལ་བཞུགས་པ། ཨོཾ་ཨཱཿཧཱུཾ་ཞེས་པ་ལས་བྱུང་བ་ཁ་དོག་དཀར་པོ་དང་། དམར་པོ་དང་། ནག་པོ་དང་། རྡོ་རྗེ་དང་། ཆུ་སྐྱེས་དང་། རྡོ་རྗེ་རྣམས་ཕྱག་གཡས་པ་རྣམས་ཀྱིས་སྡིགས་མཛུབ་ཀྱི་ཕྱག་རྒྱ་མཛད་པའོ། །དེ་ནས་སྙིང་གའི་ས་བོན་གྱི་འོད་ཟེར་རྣམས་ཀྱིས་ཡེ་ཤེས་སེམས་དཔའ་གདན་
[249b.6]དྲངས་ནས་རོ་གཅིག་ཏུ་བསྒོམས་ཏེ། མི་བསྐྱོད་པས་དབུ་བརྒྱན་པའི་བདག་ཉིད་ཡུན་རིང་དུ་བསྒོམ་པར་བྱའོ། །དེ་ལ་སྔགས་ནི་འདིའོ། །ཨོཾ་ཧྲཱིཿཥྚྲཱྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་ནས་གཤེགས་སུ་གསོལ་ནས་ལྡང་བར་བྱའོ་ཞེས་པ་ནི་གཤིན་རྗེ་མཐར་བྱེད་ཀྱི་སྒྲུབ་ཐབས་རྫོགས་སོ།། །།
[249b.7]{T3633}༄༅༅། །རྒྱ་གར་སྐད་དུ། བིགྷྣཱནྟ་ཀ་སཱ་དྷ་ནཾ། བོད་སྐད་དུ། བགེགས་མཐར་བྱེད་ཀྱི་སྒྲུབ་ཐབས། བཅོམ་ལྡན་འདས་བགེགས་མཐར་བྱེད་ལ་ཕྱག་འཚལ་ལོ། །དང་པོར་རེ་ཞིག་སྒྲུབ་པ་པོས་སྟན་བདེ་བ་ལ་ཉེ་བར་འདུག་སྟེ། ཨཾ་ཡིག་དམར་པོ་ལས་སྐྱེས་པའི་ཉི་མའི་
[250a]
[250a.1]དཀྱིལ་འཁོར་རང་གི་སྙིང་གར་བསྒོམ་པར་བྱའོ། །དེའི་སྟེང་དུ་ཧཱུཾ་ཡིག་ནག་པོ་བཀོད་ནས། ཧཱུཾ་ཡིག་ལས་སྐྱེས་པའི་འོད་ཟེར་གྱིས་བགེགས་མཐར་བྱེད་དང་། བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་དམིགས་ནས་མེ་ཏོག་ལ་སོགས་པ་རྣམས་ཀྱིས་ཡང་
[250a.2]དག་པར་མཆོད་ནས་ཕྱག་འཚལ་ཏེ། གསུམ་ལ་སྐྱབས་སུ་འགྲོ་བ་ལ་སོགས་པ་བྱས་ནས། སྟོང་པ་ཉིད་དུ་བསྒོམ་པར་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པས་སོ། །དེའི་རྗེས་ལ་ཨཾ་ཡིག་དམར་པོ་ལས་སྐྱེས་པའི་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག །དེ་ཡོངས་སུ་གྱུར་པ་ལས་རྡོ་རྗེ་ཧཱུཾ་
[250a.3]ཡིག་གིས་བྱིན་གྱིས་བརླབ་པར་བསྒོམ་པར་བྱའོ། །ཧཱུཾ་ཡིག་གི་འོད་ཟེར་གྱིས་བསྐུལ་ནས་དེ་བཞིན་གཤེགས་པ་ཐམས་ཅད་རབ་ཏུ་གཞུག་པ་སྔོན་དུ་འགྲོ་བས། དེ་ཐམས་ཅད་ཡོངས་སུ་གྱུར་པ་ལས། བགེགས་མཐར་བྱེད་བསྒོམ་པར་བྱའོ། །ཞབས་གཡོན་བརྐྱང་གིས་བཞུགས་པའི་བདག་ཉིད་ཞལ་
[250a.4]གཅིག་པ། ཕྱག་གཉིས་པ། སྐུ་མདོག་མཐིང་ག །ཕྱག་གཡོན་པས་སྡིགས་མཛུབ་དང་། ཞགས་པ། ཕྱག་གཡས་པ་རྡོ་རྗེ་འཕྱར་བ། འཇིགས་པར་བྱེད་པ། དབུ་སྐྲ་དམར་སེར་གྱེན་དུ་བརྫེས་པའོ། །དེ་ནས་བཅོམ་ལྡན་འདས་ཀྱི་ཐུགས་ཀར་ཉི་མའི་དཀྱིལ་འཁོར་ལ་ཧཱུཾ་ཡིག་གིས་བྱིན་
[250a.5]གྱིས་བརླབས་པའི་རྡོ་རྗེའོ། །དེ་ལས་བྱུང་བའི་བགེགས་མཐར་བྱེད་སྤྲོ་བ་དང་བསྡུ་བའི་ཚུལ་གྱིས་ཆུ་སྐྱེས་འདབ་མ་སྣ་ཚོགས་ཀྱི་སྟེང་དུ་ཉི་མ་ལ་གནས་པ་བསྒོམ་པར་བྱའོ། །དམ་ཚིག་ལ་སོགས་པའི་ཆོ་ག་སྔོན་དུ་འགྲོ་བས་སོ། །འདི་གཉིས་དང་གསུམ་དང་བཞིའི་ཐུན་མཚམས་སུ་བསྒོམ་པར་
[250a.6]བྱའོ། །ཨོཾ་ཨཱཿབི་གྷྣཱནྟ་ཀྲྀ་ཏ་ཧཱུཾ། བགེགས་མཐརབྱེད་ཀྱི་སྒྲུབ་ཐབས་རྫོགས་སོ།། །།ཨོཾ་ཨིནྡྲ་ཡ་ཧྲཱིཿ། ཨ་མཱ་ཡ་ཥྚྲཱྀཿ ཝ་རུ་ཎཱ་ཡ་བི། ཀུ་བེེ་རཱ་ཡ་ཀྲྀ། ཨཱི་ཤྭ་རཱ་ཡ་ཏ། ཨགྣ་ཡེ་ཨཱ། ནཻརྲྀ་ཏ་ཡེ་ན། ཝཱ་ཡ་ཝེ་ན། ཙནྡྲཱ་ཡ་ཧཱུཾ། ཨརྐྐཱ་ཡ་ཧཱུཾ། བྲཧྨ་ཎཱ་ཡ་ཕཊ། བ་སུ་དྷཱ་རཱ་ཡ་ཕཊ། བེེ་མ་
[250a.7]ཙི་ཏྲ་ཡེ་སྭཱ། སརྦ་བྷཱུ་ཏེ་བྷྱོ་ཧཱ། ཧཱི་ཧཱི། ཧཱུཾ་ཧཱུཾ་ཕེཾ་ཕེཾ་སྭཱ་ཧཱ། ཞེས་པ་ནི་གཏོར་མའི་སྔགས་སོ། །གང་ཞིག་བཟའ་བ་ཐམས་ཅད་ཀྱི་དང་པོ་གཤིན་རྗེ་གཤེད་ལ་དབུལ་ལོ།། {T3634}༄༅༅། །རྒྱ་གར་སྐད་དུ། བཛྲ་ཧཱུཾ་ཀཱ་ར་སཱ་དྷ་ནཾ། བོད་སྐད་དུ། རྡོ་རྗེ་ཧཱུཾ་མཛད་ཀྱི་སྒྲུབ་ཐབས། བཅོམ་
[250b]
[250b.1]ལྡན་འདས་རྡོ་རྗེ་ཧཱུཾ་མཛད་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་ནམ་མཁའི་ཁམས་སུ་རཾ་ཡིག་ལས་སྐྱེས་པའི་ཉི་མ་ལ་ཧཱུཾ་ཡིག་འབར་ཞིང་འབར་བ་ལ་བསྐལ་པ་ཐ་མའི་མེ་ལྟ་བུ་ཤིན་ཏུ་འབར་བའི་མཆོག་ཏུ་ཁ་དོག་གནག་པ་འོད་ཟེར་ཆེན་པོའོ། །དེ་ལས་སྐྱེས་པའི་དྲག་པོ་ཆེན་པོ་ཁམས་གསུམ་ཟ་
[250b.2]བར་མཛད་པ། ཕྱག་གཉིས་རྡོ་རྗེ་དང་དྲིལ་བུ་རབ་ཏུ་སྦྱོར་བའི་ཕྱག་རྒྱ་བཅིང་བར་བྱའོ། །གཡོན་བརྐྱང་གི་ཞབས་ཀྱིས་དེ་བཞིན་དུ་འཇིགས་བྱེད་མནན་ཅིང་འཇིགས་པར་བྱེད་པ། སྙིང་ག་དང་། མགྲིན་པ་དང་། མགོ་བོ་རྣམས་སུ་ཨོཾ་ཨཱཿཧཱུཾ་ཞེས་པའི་ཡི་གེ་གསུམ་དབང་བསྐུར་བའི་ཆོ་གས་ཐུགས་རྡོ་
[250b.3]རྗེའི་ཕྱག་རྒྱ་བཅིང་བར་བྱའོ། །སྔགས་ནི་ཨོཾ་ཧཱུཾ་ཧཱུཾ་ཕཊ་སྭཱ་ཧཱ། རྡོ་རྗེ་ཧཱུཾ་མཛད་ཀྱི་སྒྲུབ་ཐབས་རྫོགས་སོ།། {T3635}༄༅༅། །རྒྱ་གར་སྐད་དུ། མ་ཧཱ་བ་ལ་སཱ་དྷ་ནཾ། བོད་སྐད་དུ། སྟོབས་པོ་ཆེའི་སྒྲུབ་ཐབས། ཁྲོ་བོའི་རྒྱལ་པོ་སྟོབས་པོ་ཆེ་ལ་ཕྱག་འཚལ་ལོ། །སྔོན་དུ་གསུངས་
[250b.4]པའི་ཆོ་གས་སྟོང་པ་ཉིད་ཀྱི་མཐར་པདྨ་དཀར་པོ་དང་ཉི་མ་ལ་ཧཱུཾ་ཡིག་ལས་བྱུང་བའི་སྟོབས་པོ་ཆེ་ཞལ་གཅིག་པ་ཕྱག་བཞི་པ་སྐུ་མདོག་ཐམས་ཅད་དམར་པོ། དབུ་སྐྲ་དམར་སེར་གྱེན་དུ་འཁྱིལ་པ། སྦྲུལ་གྱིས་བཅིངས་པ། ཕྱག་གཡས་པ་གཉིས་ཀྱིས་དབྱུག་པ་དཀར་པོ་དང་། རྔ་ཡབ་བསྣམས་པ། ཕྱག་
[250b.5]གཡོན་པ་གཉིས་ཀྱིས་ཕྱག་འཚལ་བའི་ཚུལ་དང་། ཞགས་པ་དང་བཅས་པའི་སྡིགས་མཛུབ་མཛད་པ། སྟག་གི་པགས་པའི་ཤམ་ཐབས་ཅན། ཞབས་གཡོན་བརྐྱང་བ། ཞལ་མཆེ་བ་གཙིགས་པ། ཉི་མའི་དཀྱིལ་འཁོར་གྱི་འོད་ཀྱི་ཕྲེང་བ་ཅན། འོད་དཔག་ཏུ་མེད་པས་དབུ་བརྒྱན་པ་བསྒོམ་
[250b.6]པར་བྱའོ། །སྔགས་བཟླས་པར་བྱ་སྟེ། ཨོཾ་མ་ཧཱ་བ་ལ་སྭཱ་ཧཱ། ཞེས་པའོ། །སྟོབས་པོ་ཆེའི་སྒྲུབ་ཐབས་རྫོགས་སོ།། {T3636}༄༅༅། །རྒྱ་གར་སྐད་དུ། ཨཱརྱ་ཀྲོ་དྷ་མ་ཧཱ་བ་ལ་སཱ་དྷ་ནཾ། བོད་སྐད་དུ། འཕགས་པ་ཁྲོ་བོ་སྟོབས་པོ་ཆེའི་སྒྲུབ་ཐབས། བཅོམ་ལྡན་འདས་ཁྲོ་བོ་སྟོབས་པོ་ཆེ་
[250b.7]ལ་ཕྱག་འཚལ་ལོ། །སྟོང་པ་བདག་མེད་པ་ལས་པཾ་ལས་པདྨ། མཾ་ལས་ཉི་མ་ཨ་ལས་ཟླ་བའི་སྟེང་དུ་ཧཱུཾ་སྨུག་ནག་ལས་རྡོ་རྗེ་རྩེ་ལྔ་པ་ཡོངས་སུ་གྱུར་པ་ལས་ཁྲོ་བོ་སྟོབས་པོ་ཆེ་ཞལ་གསུམ་སྨུག་ནག་གི་སྐུ་མདོག་ཅན། རྡོ་རྗེ་དང་ཞགས་པ་དང་ཐོ་བ་གཡས་ན་བསྣམས་པ། དུང་དམར་དང་གཤོལ་མདའ་དང་
[251a]
[251a.1]གཏུན་ཤིང་གཡོན་ན་བསྣམས་པ། ཐུགས་ཀ་ནས་འོད་ཟེར་གྱིས་ཡེ་ཤེས་པ་དགུག་གཞུག་བྱས་ནས་ཡང་འོད་ཟེར་གྱིས་ཇི་ལྟར་འདོད་པ་ཉེ་བར་བསྒྲུབ་པོ། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བིདྷྭཱནྶ་ཡ། ཛཱཊི་ལཾ་བོ་དྷ་ར་ཨུཙྪུཥྨ་ཀྲོ་དྷ་ཧཱུཾ་ཕཊ་སྭཱ་ཧཱ། ཕྱོགས་ངན་པ་བསྲུངས་ན་སརྦ་དུར་དི་ཀ་
[251a.2]རཀྵ་རཀྵཿསྭཱ་ཧཱ། མི་གཙང་བ་སོལ་ན་སརྦ་ཨ་སྣ་ཏ་ཀྲོ་ཤུདྡྷེ་ཤུདྡྷ་སྭཱ་ཧཱ། འཆི་བ་བཟློག་ན་སརྦ་ཨ་ཀཱ་ལ་མྲྀ་ཏྱུ་བརྟ་ཡ་བརྟ་ཡ་སྭཱ་ཧཱ། འཕགས་པ་ཁྲོ་བོ་སྟོབས་པོ་ཆེའི་སྒྲུབ་ཐབས། དགེ་སློང་ཤཱཀྱ་བཤེས་གཉེན་གྱིས་མཛད་པ་རྫོགས་སོ།། །།ཨཱ་ཙརྱ་ནནྡས་རང་འགྱུར་དུ་མཛད་པའོ། །སྒྲ་
[251a.3]བག་ཙམ་བཅོས་སོ།། {T3637}༄༅༅། །རྒྱ་གར་སྐད་དུ། ཧེ་རུ་ཀ་སཱ་དྷ་ནཾ། བོད་སྐད་དུ། ཧེ་རུ་ཀའི་སྒྲུབ་ཐབས། ཧེ་རུ་ཀ་ལ་ཕྱག་འཚལ་ལོ། །དུར་ཁྲོད་བརྒྱད་ཀྱི་དབུས་གནས་ནས། །ཟླ་མེད་ཡིད་ཀྱི་དགའ་བ་ཡི། །ཐབས་དང་ཤེས་རབ་རྣམ་པ་ཡིས། །ཟླ་བ་ཉི་མ་རབ་སྦྱོར་
[251a.4]བས། །ཨཱ་ལི་ཀཱ་ལི་མཉམ་སྦྱོར་བ། །ཉི་མའི་དཀྱིལ་འཁོར་ལ་བསྒོམ་བྱ། །དེ་ལ་ཧཱུཾ་ཡིག་ལས་བྱུང་བའི། །རྡོ་རྗེ་རྩེ་གཅིག་དང་ལྡན་པ། །མི་ཡི་པགས་པ་རོ་ཡི་གདན། །རོ་ལངས་སྐྱིལ་ཀྲུང་ཕྱེད་པས་བཞུགས། །ཐལ་བའི་རྡུལ་གྱིས་ལུས་ལ་བྱུགས། །རྡོ་རྗེ་འཕྲོ་བ་ཕྱག་གཡས་
[251a.5]ན། །བ་དན་གཡོ་བཅས་ཁ་ཊྭཱཾ་གཡོན། །ཐོད་པ་དམར་པོ་དང་བཅས་པ། །བརྒྱ་ཕྱེད་མགོ་བོའི་ཕྲེང་བ་ཡི། །དོ་ཤལ་ཡིས་ནི་འཕྲོག་པར་བྱེད། །ཅུང་ཟད་མཆེ་བ་གཙིགས་པའི་ཞལ། །སྤྱན་གསུམ་པ་ནི་སྒེག་བཅས་ཤིང་། །དབུ་སྐྲ་དམར་སེར་གྱེན་དུ་བརྫེས། །མི་བསྐྱོད་དབུ་རྒྱན་རྣ་
[251a.6]རྒྱན་དང་། །རུས་པའི་རྒྱན་གྱིས་མཛེས་བྱས་ཤིང་། །ཐོད་པ་ལྔ་ཡིས་དབུ་ལ་བརྒྱན། །སངས་རྒྱས་ཉིད་དེར་བསྒོམ་པར་བྱ། །འགྲོ་བའི་བདུད་རྣམས་འཇོམས་བྱེད་པ། །ཨོཾ་ཧཱུཾ་ཕཊ་སྭཱ་ཧཱ་ཞེས་པ་འདི་མདོར་བསྡུས་པའི་ཕྱག་གཉིས་པའི་ཧེ་རུ་ཀའི་སྒྲུབ་ཐབས་རྫོགས་སོ།། {T3638}༄༅༅། །རྒྱ་གར་སྐད་དུ།
[251a.7]དཱི་བྷུ་ཛ་ཧེ་བཛྲ་སཱ་དྷ་ནཾ། བོད་སྐད་དུ། དགྱེས་པའི་རྡོ་རྗེ་ཕྱག་གཉིས་པའི་སྒྲུབ་ཐབས། བཅོམ་ལྡན་འདས་དགྱེས་པའི་རྡོ་རྗེ་ལ་ཕྱག་འཚལ་ལོ། །འཇིག་རྟེན་གསུམ་བདག་ཧེ་རུ་ཀ །དཔལ་མགོན་བླ་མ་ལ་ཕྱག་འཚལ། །དེ་ཡི་སྒྲུབ་ཐབས་ཆོ་ག་ནི། །ཤཱནྟི་པས་གསུངས་རྣམ་གསལ་ལས། །དཔའ་བོ་
[251b]
[251b.1]ཞལ་གཅིག་ཕྱག་གཉིས་པ། །བདག་མེད་མ་ཡིས་མགུལ་ནས་འཁྱུད། །འཁོར་ལོ་ལ་སོགས་རྒྱན་དང་ལྡན། །སྤྱན་གསུམ་ཞབས་ནི་གཉིས་པས་མཛེས། །འདིར་རྒྱུད་ལས་བསྒོམ་པ་ཁོང་དུ་ཆུད་པར་བྱ་སྟེ། རྣལ་འབྱོར་པ་སྔ་བར་མལ་ནས་ལངས་ཏེ་རང་གི་སྙིང་གར་ཉི་མ་ལ་གནས་པའི་ཧཱུཾ་ཡིག་བལྟས་ལ།
[251b.2]དེའི་འོད་ཟེར་གྱིས་ཧེ་རུ་ཀ་གསལ་ཞིང་གདན་དྲངས་ནས་མེ་ཏོག་ལ་སོགས་པ་ཉེ་བར་སྤྱོད་པ་རྣམ་པ་ལྔས་ཡང་དག་པར་མཆོད་ནས་མདུན་དུ་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཆེན་པོར་སེམས་བསྐྱེད་པ་དང་། སེམས་ཅན་རྣམས་
[251b.3]ལྷའི་བདེ་བ་ལ་ཉེ་བར་ལོངས་སྤྱོད་པ་ལ་རྣམ་པར་བསྡུ་བའི་བྱམས་པ་དང་། ཐམས་ཅད་སྡུག་བསྔལ་གྱིས་འཇོམས་པའི་རྣམ་པའི་སྙིང་རྗེ་དང་། དེ་ལ་བདེ་བ་རྒྱུན་མི་འཆད་པར་ངེས་པའི་རྣམ་པའི་དགའ་བ་དང་། ཉོན་མོངས་པ་དང་ཉེ་བའི་ཉོན་མོངས་པ་གཟུང་བ་དང་འཛིན་པ་ལ་སོགས་པའི་ཡིད་མེད་པར་བྱེད་
[251b.4]པའི་མཚན་ཉིད་བཏང་སྙོམས་རྣམས་ཀྱང་བསྒོམ་པར་བྱའོ། །དེ་ནས་ཆོས་ཀྱི་བདག་ལ་སོགས་པའི་རྣམ་པར་རྟོག་པའི་དྲི་མ་སྤངས་ཏེ། གཟུགས་ནི་སྟོན་ཀའི་དྲི་མ་མེད་པའི་ཉི་མ་གུང་གི་ནམ་མཁའ་ལྟ་བུ་གཉིས་སུ་མེད་པའི་ཡེ་ཤེས་དང་རོ་གཅིག་པའི་སྐུ་སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་
[251b.5]ཛྙཱ་ན་བཛྲ་སཱ་བྷཱ་ཝ་ཨཱཏྨ་ཀོ྅ཧཾ། ཞེས་པས་བྱིན་གྱིས་བརླབ་པར་བྱའོ། །དེ་ནས་རྣམ་པར་སད་ནས་ནམ་མཁའི་ཕྱོགས་སུ་ཉི་མ་ལ་གནས་པའི་ཧཱུཾ་ཡིག་བལྟས་ལ་དེ་ཡོངས་སུ་གྱུར་པ་ལས་རྡོ་རྗེའི་ལྟེ་བ་ལྟ་གནས་པའི་ཧཱུཾ་ཡིག་བལྟ་བར་བྱའོ། །དེ་ལས་བྱུང་བའི་འོད་ཟེར་རྣམས་ཀྱིས་དཔལ་ཧེ་རུ་ཀའི་སྐུས་
[251b.6]འགྲོ་བ་ཐམས་ཅད་ཀྱི་དོན་མཛད་ཅིང་། དེ་ལ་དེ་བཞིན་དུ་རབ་ཏུ་ཞུགས་ཏེ། དེ་ཡོངས་སུ་གྱུར་པ་ལས་དཔལ་ཧེ་རུ་ཀ་སྣ་ཚོགས་པདྨ་དང་རོའི་སྟེང་ན་ཉི་མའི་དཀྱིལ་འཁོར་ལ་བཞུགས་པ། ཕྱག་གཉིས་པ། སྤྱན་གསུམ་པ། ཕྱག་གཡས་ཀྱིས་རྡོ་རྗེ། གཡོན་པས་རྡོ་རྗེས་མཚན་པའི་ཐོད་པ་བསྣམས་པ།
[251b.7]གར་གྱི་ཉམས་དང་བཅས་པ། སྟག་གི་པགས་པའི་ཤམ་ཐབས་ཅན། །དབུ་ལ་མི་བསྐྱོད་བདག་ཉིད་ནི། །མི་མགོ་ལས་བྱས་འཁོར་ལོ་བསྣམས། །འོད་དཔག་མེད་པའི་བདག་ཉིད་སྙན། །མི་ཡི་རུས་པའི་རྣ་རྒྱན་ནོ། །རིན་ཆེན་འབྱུང་ལྡན་བདག་ཉིད་མགུལ། །མགུལ་རྒྱན་དང་ནི་ཡང་དག་
[252a]
[252a.1]ལྡན། །ལག་གདུབ་རྣམ་པར་སྣང་མཛད་དག །དོན་ཡོད་གྲུབ་པའི་བདག་ཉིད་ཀྱིས། །རྐེད་པ་ལ་ནི་རྒྱན་དུ་མཛད། །སྐྲ་ཡི་མཆོད་ཕྱིར་ཐོགས་དང་ནི། །རྐང་གདུབ་ཀྱིས་ཀྱང་ཡང་དག་བརྒྱན། །དབུ་སྐྲ་དམར་སེར་གྱེན་དུ་བརྫེས་པ། ཞལ་གཅིག་པ། ཕྱག་གཉིས་པ།
[252a.2]གྲི་གུག་དང་། ཐོད་པ་བསྣམས་པའི་བདག་མེད་མས་ཡང་དག་པར་འཁྱུད་པ་དེ་ལྟ་བུར་གྱུར་པའི་བདག་ཉིད་བསྒོམ་པར་བྱའོ། །དེ་ནས་འདིའི་རྣ་བ་ལ་བདག་མེད་མ། མིག་ལ་གཏི་མུག་རྡོ་རྗེ་ཅན། །སྣ་ལ་སྦས་པའི་གཽ་རཱི། །ལྕེ་ལ་ཆུ་ཡི་རྣལ་འབྱོར་མ། །ལུས་ཀྱི་དབང་པོ་ལ་རྡོ་རྗེ་མཁའ་འགྲོ་
[252a.3]མ། ཡིད་ལ་བདག་མེད་མ་རྣམས་ལྷག་པར་མོས་པར་བྱའོ། །དེ་ལ་མགོ་བོར་ཆུ་སྐྱེས་འདབ་མ་སུམ་ཅུ་སོ་གཉིས་ཀྱི་སྟེང་དུ་ཧཾ་ཡིག་མགོ་ཐུར་དུ་བསྟན་པའི་རྣམ་པ། མགྲིན་པར་ཆུ་སྐྱེས་འདབ་མ་བཅུ་དྲུག་པའི་སྟེང་དུ་ཨོཾ་ཡིག་མགོ་སྟེང་དུ་བསྟན་པ། སྙིང་གར་ཆུ་སྐྱེས་འདབ་མ་བརྒྱད་པའི་སྟེང་དུ་ཧཱུཾ་
[252a.4]ཡིག་མགོ་ཐུར་དུ་བསྟན་པ། ལྟེ་བར་ཆུ་སྐྱེས་འདབ་མ་དྲུག་ཅུ་རྩ་བཞིའི་སྟེང་དུ་ཨ་ཡིག་མགོ་སྟེང་དུ་བསྟན་པ་བསམ་པར་བྱའོ། །དེ་ནས་དམ་ཚིག་སེམས་དཔའ་དང་འདྲ་བའི་ཡེ་ཤེས་སེམས་དཔའ་གདན་དྲང་བར་བྱ་སྟེ། ཛཿཧཱུཾ་བཾ་ཧོཿཞེས་པའི་སྔགས་འདིས་དགུག་པ་དང་། གཞུག་པ་དང་བཅིང་པ་དང་།
[252a.5]དབང་དུ་བྱས་ཏེ་ཆུ་དང་འོ་མ་བཞིན་དུ་རོ་གཅིག་པར་བྱའོ། །དེའི་རྗེས་ལ་རང་གི་སྙིང་གར་ཉི་མ་དང་རྡོ་རྗེའི་ལྟེ་བ་ལ་གནས་པའི་ཧཱུཾ་ཡིག་ལས་འོད་ཟེར་བྱུང་སྟེ། འོད་དེས་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཧེ་རུ་ཀ་གདན་དྲངས་ཏེ་མཆོད་ནས། ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཞེས་པས་དབང་ཞུ་བར་
[252a.6]བྱའོ། །དེ་རྣམས་ཀྱིས་བདུད་རྩི་ལྔས་གང་བའི་རིན་པོ་ཆེའི་བུམ་པ་རྣམས་ཀྱིས་བདག་ཉིད་དབང་བསྐུར་ཏེ་མགོན་པོ་མི་བསྐྱོད་པས་དབུ་བརྒྱན་པ་བསམ་པར་བྱའོ། །རྣལ་འབྱོར་པའི་ཚོགས་དེ་ཐམས་ཅད་རང་རང་གི་བྱང་ཆུབ་ཀྱི་སེམས་ལ་སོགས་པའི་ཁུ་བས་མཆོད་པར་བྱའོ། །ཞལ་ནི་མཆེ་གཙིགས་
[252a.7]འཇིགས་ཆེན་པོ། །སྔགས་ཀྱི་མེ་ཏོག་ཕྲེང་བས་བརྒྱན། །ཤ་ཆེན་རྣམས་ནི་རོལ་མཛད་པའི། །ཧེ་རུ་ཀ་དཔལ་བདག་ཕྱག་འཚལ། །ཞེས་པ་འདིས་བསྟོད་པར་བྱའོ། །དེ་ནས་ནམ་མཁའི་ཧཱུཾ་ཡིག་ཡོངས་སུ་གྱུར་པ་ལས་རྡོ་རྗེ་དེའི་འོག་ཏུ་ཨཱཿཡིག་ཡོངས་སུ་གྱུར་པ་ལས་པདྨའི་སྣོད། དེའི་
[252b]
[252b.1]དབུས་སུ་ཨོཾ་ཡིག་གིས་མཚན་པའི་གོ་ཀུ་ད་ཧ་ན་དང་། མ་མུ་ཤུ་བི་ར་ལ་སོགས་པའི་དམ་ཚིག་གི་རྫས་རྣམས་ནི་རྡོ་རྗེ་དང་པདྨ་ཡང་དག་པར་སྦྱོར་བས་བསྲེགས་ཤིང་འབར་བས་དེའི་ཁུ་བར་བྱས་ཏེ། དེ་བཞིན་གཤེགས་པ་ཐམས་ཅད་ཀྱི་ཚུལ་ཇི་ལྟ་བའི་ཡེ་ཤེས་ཉི་མའི་འོད་དང་ཡེ་ཤེས་ཀྱི་
[252b.2]ས་བོན་གྱི་འོད་ཟེར་རྣམས་ཀྱིས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདུད་རྩི་བཀུག་ནས་དངོས་པོ་དེ་རྣམས་ཀྱིས་ལྷན་ཅིག་བྱས་ཏེ། ཨོཾ་ཨཱཿཧཱུཾ་ཞེས་པའི་ཡི་གེ་གསུམ་གྱིས་བྱིན་གྱིས་བརླབས་ལ་ཧཱུཾ་ཡིག་དཀར་པོ་ལས་སྐྱེས་པའི་རྡོ་རྗེའི་རང་བཞིན་གྱི་ལྗགས་སུ་བྱས་ཏེ་བདག་ཉིད་དེས་
[252b.3]ཚིམ་པར་བྱའོ། །དེ་ནས་སྙིང་གར་ཉི་མ་དང་རྡོ་རྗེའི་ལྟེ་བ་ལ་གནས་པའི་ཧཱུཾ་ཡིག་གིས་ཡང་དག་པར་བསྐོར་བར་བཞུགས་པའོ། །ཨོཾ་ཏྲཻ་ལོ་ཀྱཱ་ཀྵེ་པ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་པའི་ཡི་གེ་བཅུ་གཉིས་ཀྱི་སྔགས་ཀྱི་ཕྲེང་བ་རབ་ཏུ་གསལ་ཞིང་འབར་བཞིན་པ་ཡིད་ཀྱིས་མངོན་པར་བྲིས་ཏེ། གོ་རིམས་
[252b.4]བཞིན་དུ་བརྗོད་པར་གྱུར་པས་དབེན་པར་བཟླས་པར་བྱའོ། །ཉི་མའི་གུང་ཐུན་ལ་སྐད་ཅིག་གིས་དཔལ་ཧེ་རུ་ཀའི་སྐུར་བདག་ཉིད་བསམས་ཏེ། དེ་ནས་མིག་ལ་སོགས་པའི་རྣམ་པར་དག་པས་འཁོར་ལོ་བཞི་བསྒོམས་ནས་མཆོད་པ་དང་བསྟོད་པ་དང་བདུད་རྩི་མྱང་བ་དང་། བཟླས་པ་ལ་སོགས་
[252b.5]པ་བྱའོ། །འཇིག་རྟེན་གསུམ་བསྐྱོད་དཔའ་བོ་ཡི། །སྒྲུབ་ཐབས་མཆོག་ནི་བྱས་པ་ཡིས། །བསོད་ནམས་གང་བསགས་དེ་ཡིས་ནི། །འགྲོ་ཀུན་རྡོ་རྗེ་འཛིན་པར་ཤོག །དགྱེས་པའི་རྡོ་རྗེ་ཕྱག་གཉིས་པའི་སྒྲུབ་ཐབས་རྫོགས་སོ།། །།ཏཱ་ར་ཤྲཱིས་མཛད་ཟེར།། །།
[252b.6]{T3639}༄༅༅། །རྒྱ་གར་སྐད་དུ། ཀཻ་བ་ལ་ནཻ་རཱཏྨྱ་སཱ་དྷ་ནཾ། བོད་སྐད་དུ། བདག་མེད་མ་རྐྱང་པའི་སྒྲུབ་ཐབས། བདག་མེད་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་དུ་བསྒོམས་པའི་རྗེས་ལ་ཟླ་བའི་དཀྱིལ་འཁོར་ལ་ཨཾ་ཡིག་སྔོན་པོའི་ས་བོན་དང་གྲི་གུག་སྤྲོ་བ་ལ་སོགས་
[252b.7]པ་སྔོན་དུ་འགྲོ་ཞིང་ཡོངས་སུ་གྱུར་པ་ལས་རོའི་སྟེང་དུ་རང་གི་སྙིང་གར་ཟླ་བ་ལ་གནས་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པའི་བདག་མེད་མ་སྐུ་མདོག་ནག་མོ་ཞལ་གཅིག་མ། དབུ་སྐྲ་དམར་སེར་གྱེན་དུ་བརྫེས་པ། མི་བསྐྱོད་པས་དབུ་བརྒྱན་པ། ཞལ་མཆེ་བ་གཙིགས་ཤིང་ལྗགས་བསྐྱོད་པ་
[253a]
[253a.1]ཕྱག་གཡས་ན་གྲི་གུག །གཡོན་ན་ཐོད་པ་བསྣམས་པ། སྤྱན་གསུམ་དམར་ཞིང་ཟླུམ་པ། ཕྱག་རྒྱ་ལྔས་རྣམ་པར་བརྒྱན་པ། དེའི་མགོ་དང་མགྲིན་པ་དང་སྙིང་ག་རྣམས་སུ་ཨོཾ་ཨཱཿཧཱུཾ་ཞེས་པའི་ཡི་གེ་རྣམས་སོ། །སྙིང་གར་ཟླ་བ་ལ་གྲི་གུག་གི་ཡུ་བར་ཟླ་བ་ལ་ཨཾ་ཡིག་བལྟས་ཏེ་
[253a.2]སྔགས་འདི་བཟླས་པར་བྱའོ། །ཨོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་སྭཱ་ཧཱ། ཞེས་སོ། །བདག་མེད་མ་རྐྱང་པའི་སྒྲུབ་ཐབས་རྫོགས་སོ།། {T3640}༄༅༅། །རྒྱ་གར་སྐད་དུ། ནཻ་རཱཏྨྱ་སཱ་དྷ་ནཾ། བོད་སྐད་དུ། བདག་མེད་མའི་སྒྲུབ་ཐབས། བཅོམ་ལྡན་འདས་མ་བདག་
[253a.3]མེད་མ་ལ་ཕྱག་འཚལ་ལོ། །དང་པོར་སེམས་ཅན་ཐམས་ཅད་གདོན་པར་འདོད་པའི་ཚུལ་གྱིས་སྙིང་རྗེ་བསྒོམས་ནས་ཕྱི་དང་ནང་དུ་བཅས་པ་སྟོང་པ་ཉིད་དུ་དམིགས་ཏེ། བར་སྣང་ལ་ཨཾ་ཡིག་ལས་གྲི་གུག་དེའི་ཡུ་བར་ཟླ་བ་ལ་ཨཾ་ཡིག་རྣམ་པར་བསམས་ཏེ། དེ་ནས་རྣལ་འབྱོར་པས་འཁོར་ལོ་སྤྲོ་བ་དང་བསྡུ་བ་
[253a.4]བསྒོམས་ནས་དེ་ཐམས་ཅད་ཡོངས་སུ་གྱུར་པ་ལས་རོའི་སྙིང་གར་ཟླ་བའི་དཀྱིལ་འཁོར་ལ་བཅོམ་ལྡན་འདས་བདག་མེད་མ་སྐུ་མདོག་ནག་མོ་གྲི་གུག་དང་ཐོད་པ་དང་ཁ་ཊྭཱཾ་ག་འཛིན་པ། ཕྱག་གཉིས་པ་ཞལ་གཅིག་པ་བསམ་པར་བྱའོ། །དམར་ཞིང་ཟླུམ་པའི་སྤྱན་གསུམ་པ། དབུ་སྐྲ་དམར་སེར་གྱེན་
[253a.5]དུ་བརྫེས་པ། མགོ་བོ་དང་མགྲིན་པ་དང་སྙིང་ག་རྣམས་སུ་ཨོཾ་ཨཱཿཧཱུཾ་གི་ཡི་གེ་རྣམས་སོ། །སྙིང་གར་ཟླ་བ་ལ་གྲི་གུག་གི་ཡུ་བར་ཟླ་བ་ལ་ཨཾ་ཡིག་བསམས་ནས་སྔགས་བཟླས་པར་བྱའོ། །ཨོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་སྭཱ་ཧཱ། ཞེས་སྔགས་བཟླས་པར་བྱའོ། །བདག་མེད་མའི་
[253a.6]སྒྲུབ་ཐབས་རྫོགས་སོ།། {T3641}༄༅༅། །རྒྱ་གར་སྐད་དུ། ཤྲཱི་བྷཱུ་ཏ་ཌཱ་མ་ར་སཾ་ཀྵིཔྟ་སཱ་དྷ་ནཾ། བོད་སྐད་དུ། དཔལ་འབྱུང་པོ་འདུལ་བྱེད་ཀྱི་སྒྲུབ་ཐབས་མདོར་བསྡུས་པ། དཔལ་འབྱུང་པོ་འདུལ་བྱེད་ལ་ཕྱག་འཚལ་ལོ། །ཚངས་པ་བརྒྱ་བྱིན་ལུས་ངན་སོགས། །མྱོས་རྣམས་འཇོམས་པར་
[253a.7]མཁས་པ་ཡི། །དཔལ་ལྡན་འབྱུང་འདུལ་ཕྱག་འཚལ་ནས། །དེ་ཡི་སྒྲུབ་ཐབས་བྲི་བར་བྱ། །མདོར་བསྡུས་མན་ངག་རྣམ་དག་པས། །མདོར་བསྡུས་འདོད་ཕྱིར་སྦྱར་བར་བྱ། །གནོད་སྦྱིན་གནོད་སྦྱིན་མོ་སོགས་འགྲུབ། །བདག་སྙིང་ཡ་མཚན་སྐྱེས་ནས་བྲིས། །དང་པོར་རེ་ཞིག་སྔགས་པས་
[253b]
[253b.1]ཐུགས་ཀར་ཟླ་བ་ལ་ཁམས་གསུམ་རྣམ་པར་གསལ་བའི་འོད་ཟེར་ཡང་དག་པར་འཁྲིགས་པ། ལུས་ལ་རཾ་ཡིག་དམར་པོའི་ས་བོན་རྣམ་པར་བསམ་པར་བྱའོ། །དེ་ནས་དག་པའི་ལྕགས་ཀྱུའི་རྣམ་པས་མདུན་དུ་འབྱུང་པོ་འདུལ་བྱེད་གདན་དྲངས་ནས་བླ་ན་མེད་པའི་མཆོད་པ་རྣམ་པ་བདུན་གྱིས་མངོན་པར་
[253b.2]མཆོད་ནས་སྟོང་པ་ཉིད་བསྒོམ་པར་བྱའོ། །དེ་ནས་ཀུནྡ་དང་མཚུངས་དྲི་མེད་རྣམ་རྒྱས་མཚན་མོར་བྱེད་པ་ཡི། །སྟེང་དུ་དུང་འདྲ་ཧཱུཾ་ཡིག་བཀོད་པའི་གནས་དབུས་ཟླ་བའི་དཀྱིལ། །ཤིན་ཏུ་འབར་བྱེད་མ་ལུས་ཡོངས་གྱུར་ཡང་དག་ལས། །སྣ་ཚོགས་པ་ཡི་ཆུ་སྐྱེས་འདབ་མ་འཇམ་པོ་བལྟ་བར་བྱ། །དེ་ནས་
[253b.3]དེ་ཡི་དབུས་སུ་ཨཾ་ཡིག་ཡོངས་གྱུར་སྨན་གྱི་དབང་པོ་སྟེ། །ཧཱུཾ་ཡིག་སྙིང་པོ་ཧཱུཾ་ཡིག་ཡོངས་གྱུར་ལས། །མཐིང་ནག་འབར་བའི་རྡོ་རྗེ་རྣམ་པར་བསྒོམ། །དེ་དག་ཡོངས་གྱུར་སྐད་ཅིག་གིས་བལྟ་ཞིང་། །མཆེ་གཙིགས་སྐུ་མདོག་མཐིང་ནག་འབྱུང་པོ་རྣམས། །སྐྲག་མཛད་རང་བཞིན་འགྲོ་ལ་ཉེར་ཕན་
[253b.4]མཛད། །ཁྱབ་བྱ་གཅིག་ཆགས་རྒྱུ་ཡིས་འཕྲོག་བྱེད་དང་། །དབང་ཕྱུག་གཞོན་སོགས་བདུད་དྲག་ལས་གཅིག་པ། །ཞལ་ནི་ཅུང་ཟད་མཆེ་གཙིགས་ཤིང་། །ཁྲོ་བོ་འབར་ཞིང་རྣམ་པར་འཕྲོ། །དབུ་སྐྲ་དམར་སེར་གྱེན་བརྫེས་མཐིང་། །ན་བཟའ་སྔོན་པོས་སྐུ་ལ་བརྒྱན། །ཕྱག་གཡས་ན་རྡོ་རྗེ་
[253b.5]བསྣམས་པ། གཡོན་ན་ཞགས་པ་དང་བཅས་པའི་སྡིགས་མཛུབ་མཛད་པ། ཐོད་པ་ལྔའི་དབུ་རྒྱན་ཅན། ཕྱག་གཡོན་ན་ཐོད་པ་དང་རྩེ་གསུམ་བསྣམས་པ། གཡས་ན་ཌ་མ་རུ་བསྣམས་པ། རལ་པ་དམར་སེར་གྱིས་དབུ་བརྒྱན་པ། སྤྱན་གསུམ་པ། སྟག་གི་པགས་པའི་ན་བཟའ་བསྣམས་པ།
[253b.6]འབྱུང་པོའི་དབང་པོ་གཞན་ལས་རྒྱལ་བ། ཞབས་གཡོན་བརྐྱང་གིས་བཞུགས་པ། ཕྱག་གཉིས་དཔལ་འབྱུང་པོ་འདུལ་བྱེད་ཀྱི་ཕྱག་རྒྱ་བཅིངས་པ་བསྒོམ་པར་བྱའོ། །དེ་ལ་ཕྱག་རྒྱ་འདིའོ། །མིང་མེད་གཉིས་པོ་བཅིང་བྱ་སྟེ། །མཛུབ་མོ་གཉིས་པོ་བསྐུམ་པར་བྱ། །མཐེའུ་ཆུང་གུང་མོ་དེ་
[253b.7]བཞིན་དུ། །མཐེབ་ཆེན་གྱིས་ནི་མནན་པར་བྱ། །ཀླུ་བརྒྱད་ཀྱིས་ཉེ་བར་མཛེས་པ་སྟེ། དེ་ལ་སྟོབས་ཀྱི་རྒྱུ་སྔོན་པོས་དབུ་སྐྲ་བཅིངས་པ། འཇོག་པོ་དམར་པོས་མགུལ་རྒྱན་བྱས་པ། དགའ་བོ་དང་ཉེ་དགའ་བོས་རྣ་རྒྱན་བྱས་པ། འདི་དག་ནི་སེར་པོར་གཅིག་པའོ། །མཐའ་ཡས་དཀར་པོས་ཚངས་སྐུད་
[254a]
[254a.1]བྱས་པ། ནོར་རྒྱས་དཀར་པོས་རྐེད་རྒྱན་བྱས་པ། ཕྱག་རྒྱའི་ཕྱག་དག་ལ་རིགས་ལྡན་དངུལ་ཆུའི་ཁ་དོག་ལྟ་བུའོ། །ཕྱག་གཞན་དག་ལ་དེ་བཞིན་དུ་དུང་སྐྱོང་དཀར་པོའོ། །ཞབས་གདུབ་ལ་པདྨ་དང་པདྨ་ཆེན་པོ་དག་གོ། །འདི་དག་ནི་དམར་པོར་གཅིག་པའོ། །དེ་བཞིན་དུ་
[254a.2]སྤྱན་གཉིས་དམར་པོར་གྱུར་པའི་དཔལ་འབྱུང་པོ་འདུལ་བྱེད་བསྒོམ་པར་བྱའོ་ཞེས་སོ། །ཁྲོ་བ་དང་བཅས་ཤིང་གཅིག་ཏུ་འགྲོ་བའི་དོན་མཛད་པ། སྙིང་ག་དང་། མགྲིན་པ་དང་། མཛོད་སྤུ་དང་། མགོ་རྣམས་སུ་བསྲུང་བའི་དོན་དུ་ཕྱག་རྒྱས་རེག་པར་བྱའོ། །བསམ་གཏན་གྱིས་ངལ་ན་སྔགས་
[254a.3]བཟླས་པར་བྱའོ། །རྡོ་རྗེའི་བཟླས་པ་དང་། ཁྲོ་བོའི་བཟླས་པས་སོ། །སྔགས་ནི། ཧཱུཾ་བཛྲ་ཕཊ་ཅེས་སོ། །སྐྱེས་བུ་དམ་པ་ངེས་པར་ཡོན་ཏན་དོན་གཉེར་རྣམས་ཀྱི་ཕྱིར། །གང་ཞིག་གིས་ཀྱང་དེ་བྲིས་ཅིས་ཀྱང་བདག་གིས་གསལ་བྱས་པ། །དགེ་བ་གང་དེས་རྣམ་པར་སྣང་མཛད་ཐོབ་གྱུར་
[254a.4]ནས། །འཇིག་རྟེན་གསུམ་པོའི་སྡིག་པ་མཐའ་དག་འཇོམས་པར་ཤོག །དཔལ་འབྱུང་པོ་འདུལ་བྱེད་ཀྱི་སྒྲུབ་ཐབས་མདོར་བསྡུས་པ་རྫོགས་སོ།། {T3642}༄༅༅། །རྒྱ་གར་སྐད་དུ། བྷཱུ་ཏ་ཌཱ་མ་ར་སཱ་དྷ་ནོ་པ་ཡི་ཀ ། བོད་སྐད་དུ། འབྱུང་པོ་འདུལ་བྱེད་ཀྱི་སྒྲུབ་ཐབས་ཀྱི་ཆོ་ག་
[254a.5]དཔལ་འབྱུང་པོ་འདུལ་བྱེད་ལ་ཕྱག་འཚལ་ལོ། །འབྱུང་པོའི་སྙེམས་པ་རྣམ་འཇོམས་པའི། །ཁྲོ་བོ་འདུལ་བྱེད་ཕྱག་འཚལ་ནས། །ཇི་ལྟར་རྙེད་པའི་མན་ངག་གིས། །དེ་ཡི་སྒྲུབ་ཐབས་བཤད་པར་བྱ། །དང་པོར་རེ་ཞིག་ལག་པ་གཉིས་ལ་ཟླ་བའི་དཀྱིལ་འཁོར་རྣམ་པར་བསྒོམས་
[254a.6]ཏེ། དེའི་དབུས་སུ་ཧཱུཾ་ཡིག་འབར་བར་བསམས་ནས། སྔགས་འདི་བཟླས་པར་བྱའོ། །ཨོཾ་སིདྡྷི་བཛྲ་ཧཱུཾ། དེ་ནས་ཕྱག་རྒྱ་བཅིང་བར་བྱའོ། །སོར་མོ་རྣམས་ཕན་ཚུན་དུ་འཁྱུད་ནས་སྡིགས་མཛུབ་གཉིས་པོ་རྩེ་མོ་བཞིན་དུ་རབ་ཏུ་བརྐྱང་བར་བྱའོ། །སྙིང་གར་ཟླ་བའི་དཀྱིལ་འཁོར་རྣམ་
[254a.7]པར་བསམ་པར་བྱའོ། །དེ་ལ་ར་ཡིག་དམར་པོ་ཐིག་ལེ་དང་བཅས་པ་འབར་ཞིང་འབར་བའི་ཕྲེང་བ་འཁྲིགས་པ་བསམ་པར་བྱའོ། །འདིར་སྡིག་པ་ཐམས་ཅད་ཞི་བ་བརྗོད་པར་བྱ་སྟེ། ཨོཾ་ཧ་ན་བི་དྷྭཾ་ས་ཡ་ནཱ་ཤ་ཡ་པཱ་པཾ་ཧཱུཾ་ཕཊ། དེའི་རྗེས་ལ་སྟོང་པ་ཉིད་དུ་བསྒོམ་པར་བྱའོ། །མདུན་དུ་ཀུནྡ་དང་།
[254b]
[254b.1]ཤེལ་བཞིན་དུ་བལྟ་བར་བྱའོ། །དེའི་དབུས་སུ་ཧཱུཾ་ཡིག་དང་ཧྲཱིཿཡིག་ཡོངས་སུ་གྱུར་པ་ལས་པདྨ་འདབ་མ་བརྒྱད་པ་རྣམ་པར་བསམ་པར་བྱའོ། །དེའི་སྟེང་དུ་ཨཾ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རོ། །དེ་ལ་དེ་བཞིན་དུ་ཧཱུཾ་ཡིག་འབར་ཞིང་འཁྲིགས་པ་རྣམ་པར་བསྒོམས་ནས། ཁྲོ་
[254b.2]བོ་འབེབས་པའི་ཕྱག་རྒྱ་དང་སྔགས་ཀྱིས་གདབ་པར་བྱའོ། །ཕན་ཚུན་དུ་ཁུ་ཚུར་བཅིངས་ཏེ། སྡིགས་མཛུབ་གཉིས་འཁྱུད་པར་བྱའོ། །ཨོཾ་ཨཱཿཀྲོ་དྷ་བེ་ཤ་ཧཱུཾ་ཧཱུཾ་ཧཱུཾ་ཨཿ། དེའི་འོད་ཀྱིས་ཡང་དག་པར་བསྐུལ་ཞིང་གཞུག་པར་བྱའོ། །དེ་ལ་དེ་བཞིན་དུ་དཔག་ཏུ་མེད་པའི་ཁྲོ་བོའི་སྐུ་རབ་ཏུ་བཞུགས་
[254b.3]པར་བསམ་པར་བྱའོ། །དེ་ལ་བསོད་ནམས་དང་ཡེ་ཤེས་ལས་མངོན་པར་གྲུབ་པའི་རྡོ་རྗེ་རྩེ་ལྔ་པ་འབར་བཞིན་པའི་རྡོ་རྗེ་ནག་པོ་ལས་འོད་ཟེར་འཕྲོ་ཞིང་འབར་བའི་ཕྲེང་བ་འཁྲིགས་པ་བསྒོམ་པར་བྱའོ། །རྡོ་རྗེ་དེ་ལས་དཔག་ཏུ་མེད་པའི་ཁྲོ་བོ་ལ་སོགས་པ་ཕྱོགས་བཅུར་འཕྲོས་ཏེ། སེམས་ཅན་ཐམས་ཅད་
[254b.4]ཀྱི་དོན་དུ་རྫུ་འཕྲུལ་ལ་སོགས་པ་མཛད་པར་བལྟ་བར་བྱའོ། །དེ་ལ་ཕྱག་རྒྱ་དེ་བཞིན་དུ། མངོན་དུ་ཕྱོགས་པས་དགུག་པར་བྱ། །སྔགས་ནི་བརྗོད་པས་དེ་ཉིད་ལ། །རྡོ་རྗེ་དང་ནི་ཞགས་པ་བསམ། །ཨོཾ་བཛྲ་བེ་ཤ་པ་ཏ་ཡེ་ཧཱུཾ། དེ་ནས་ཁྲོ་བོ་ཆེན་པོའི་སྐུར་བདག་ཉིད་བསྒོམ་པར་བྱ་སྟེ། དྲག་པོ་
[254b.5]འབར་བའི་ཕྲེང་བ་འཁྲིགས་པའི་འོད་ཅན། ཕྱག་བཞི་པ། ཁྲོ་བོ་ཆེན་པོ་མིག་སྨན་ཕྱིས་པའི་འོད་ལྟ་བུ། ཕྱག་གཡས་པས་རྡོ་རྗེ་གསོར་བ། གཡོན་པས་སྡིགས་མཛུབ་མཛད་པ། ཞལ་མཆེ་བ་གཙིགས་པ། ཀླུ་བརྒྱད་ཀྱིས་བརྒྱན་པ། མཐའ་ཡས་ཀྱིས་ཚངས་སྐུད་བྱས་པ། ནོར་རྒྱས་ཀྱིས་སྐ་
[254b.6]རགས་བྱས་པ། དུང་སྐྱོང་གིས་ལག་གདུབ་བྱས་པ། གཞན་ཡང་འདི་རྣམས་དཀར་པོའོ། །ཕྱག་གཡོན་པ་ལ་རིགས་ལྡན་གྱིས་ལག་གདུབ་བྱས་པ་སྟེ། དངུལ་ཆུའི་ཁ་དོག་ལྟ་བུའོ། །དགའ་བོ་དང་ཉེ་དགའ་བོས་རྣ་རྒྱན་བྱས་པ། འཇོག་པོས་མགུལ་རྒྱན་བྱས་པ། དཔུང་རྒྱན་ནི་གཞན་ཏེ་འདི་
[254b.7]རྣམས་ནི་སེར་པོའོ། །པདྨ་དང་པདྨ་ཆེན་པོ་དམར་པོས་རྐང་གདུབ་བྱས་པ། སྟོབས་ཀྱི་རྒྱུ་ནག་པོས་དབུ་སྐྲ་བཅིངས་པའོ། །ཐོད་པའི་ཕྲེང་བས་དབུ་བརྒྱན་ཅིང་། །འཇིག་རྟེན་གསུམ་ཡང་འཇོམས་བྱེད་པའི། །ཨཥྚ་ཧ་ཡི་གད་ཆེན་སྒྲོགས། །ཁྱབ་བདག་འཇིག་རྟེན་གསུམ་ན་གནས། །གཡོན་
[255a]
[255a.1]བརྐྱང་ཞབས་ཀྱིས་ལེགས་བཞུགས་པའི། །ཉི་མ་བྱེ་བའི་འོད་དང་མཚུངས། །གཞན་གྱིས་མི་ཐུབ་ཞབས་ཀྱིས་གནོན། །ཕྱག་རྒྱ་སྔགས་ཀྱིས་རབ་ཏུ་གནས། །མིང་མེད་གཉིས་པོ་འཁྱུད་བྱ་ཞིང་། །མཛུབ་མོ་གཉིས་པོ་བསྐུམ་པར་བྱ། །མཐེའུ་ཆུང་གུང་མོའང་དེ་བཞིན་
[255a.2]དུ། །མཐེབ་ཆེན་གྱིས་ནི་མནན་པར་བྱ། །མཆོག་གི་ཕྱག་རྒྱ་འདི་ཡིས་ནི། །དཔལ་ལྡན་འཇིག་རྟེན་གསུམ་རྒྱལ་བསྒྲུབ། །དེ་ནས་ཁྲོ་བོའི་བདག་པོ་ཁྲོ་བོ་ཕྱག་རྒྱ་དང་། སྔགས་ཀྱིས་ཡན་ལག་དྲུག་ལ་དགོད་པར་བྱའོ། །ཕན་ཚུན་དུ་ཁུ་ཚུར་བཅིངས་ནས་གུང་མོ་དག་རབ་ཏུ་བརྐྱང་བར་བྱའོ། །
[255a.3]སྤྱི་བོར་ཕྱག་རྒྱའི་སྔགས་ནི། ཨོཾ་ཧ་ན་བཛྲ་ཧཱུཾ། ཕྱག་རྒྱ་འདིས་དེ་བཞིན་དུ་གུང་མོ་དག་ནང་དུ་བཅུག་སྟེ། མཛུབ་མོ་དག་རྩེ་མོར་བྱས་པ་ནི་ཐོར་ཚུགས་ཀྱི་ཕྱག་རྒྱའོ། །སྔགས་ནི། ཨོཾ་ད་ཧ་བཛྲ་ཧཱུཾ། དེ་བཞིན་དུ་ཕྱག་རྒྱ་འདིས་མཐེབ་ཆེན་དག་ལོགས་སུ་བྱས་ཏེ། མཐེབ་ཆེན་གཡས་པ་ནི་མིག་གཡས་
[255a.4]པ་ལ་མཐེབ་ཆེན། གཡོན་པ་ནི་མིག་གཡོན་པ་ལ། ཨོཾ་དཱིཔྟ་བཛྲ་ཧཱུཾ། ཕན་ཚུན་ཁུ་ཚུར་བཅིངས་ནས་མཐེའུ་ཆུང་གཉིས་འཁྱུད་པར་བྱའོ། །མཛུབ་མོ་དག་རབ་ཏུ་བརྐྱང་བར་བྱའོ། །སྙིང་གའི་ཕྱག་རྒྱའོ། །སྔགས་ནི། ཨོཾ་བཛྲ་རོ་ཥ་ཧཱུཾ། དེ་བཞིན་དུ་ཕྱག་རྒྱ་འདིས་མཛུབ་མོ་དག་རྣ་རྒྱན་དུ་བྱའོ། །
[255a.5]གོ་ཆའི་ཕྱག་རྒྱའི་སྔགས་ནི། ཨོཾ་ཌི་ཌྷ་བཛྲ་ཧཱུཾ། མཛུབ་མོ་གཉིས་རབ་ཏུ་བརྐྱང་བ་ནི་མཚོན་ཆའི་ཕྱག་རྒྱའོ། །སྔགས་ནི། ཨོཾ་ཧ་ན་ད་ཧ་པ་ཙ་ཀྲོ་དྷ་བཛྲ་སརྦ་དུཥྚཱ་ན་མཱ་ར་ཡ་ཧཱུཾ། དེ་ནས་རྡོ་རྗེ་ཁྲོ་བོ་དབབ་པར་བྱའོ། །ཕན་ཚུན་དུ་བྱས་ནས་མཛུབ་མོ་གཉིས་བསྐུམ་པར་བྱའོ། །ཨོཾ་བཛྲ་ཀྲོ་དྷ་ས་མ་ཡ་མ་ནུ་པཱ་ལ་
[255a.6]ཡ་ཤཱི་གྷྲཾ་གཙྪ་ཧཱིཿཛཿཧཱུཾ་ཕཊ་སྭཱཧཱ། དེ་ནས་མཆོད་ཡོན་ཐལ་མོ་གན་རྐྱལ་དུ་བྱས་ནས་མཐེབ་ཆེན་གཉིས་ལོགས་སུ་སྦྱར་བར་བྱའོ། །ཨོཾ་སརྦ་དེ་བ་དཱིཔྟ་སཱི་ད་བྷ་ག་བཱན་མ་ཧཱ་ཀྲོ་དྷ་ཨརྒྷཾ་པྲ་ཏཱིཙྪ་ཧཱུཾ་ཨཿདེ་ནས་གདན་དབུལ་བར་བྱའོ། །ལག་པ་གཡོན་པ་གན་རྐྱལ་དུ་བྱས་ནས་མཐེབ་ཆེན་བསྒྲེང་སྟེ། ལག་
[255a.7]པ་གཡས་པའི་ཁུ་ཚུར་གྱིས་གཡོན་པའི་མཐེབ་ཆེན་གཟུང་བར་བྱའོ། །གཡས་པའི་མཐེབ་ཆེན་བསྒྲེང་བར་བྱའོ། །ཨོཾ་ཛ་ཡ་ཛ་ཡ་མ་ཧཱ་ཀྲོ་ཏི་ཀྲོ་དྷ་རཱ་ཛ་ཨི་དཾ་བྷཱུ་ཏ་སེ་ནཾ་དར་ཤཱ་ཡ་རཀྵ་རཀྵ་པྲ་ཏི་གྲིཧྞ་སྭཱཧཱ། ཐལ་མོ་སྦྱར་བར་བྱས་ནས་སོར་མོ་ཐམས་ཅད་མ་སྦྱར་བར་བྱས་པ་ནི་པདྨའི་ཕྱག་རྒྱ་ཞེས་བརྗོད་
[255b]
[255b.1]པར་བྱའོ། །གདན་གྱི་ཕྱག་རྒྱའི་སྔགས་ནི། ཨོཾ་པདྨོད་བྷ་བ་ནི་ཥ་ན་ཎཱ་ཡ་སརྦ་དེ་བཏྟ་སྭཱཧཱ། དེ་ནས་འཕང་བར་བྱ་སྟེ། ཕན་ཚུན་དུ་ཁུ་ཚུར་བཅིངས་ནས་མཐེབ་ཆེན་རབ་ཏུ་བརྐྱང་སྟེ། ཁུ་ཚུར་གཡོན་པ་སྙིང་གར་བཞག་སྟེ། ཁུ་ཚུར་གཡས་པ་མཚོན་ཆ་འཕེན་པའི་ཚུལ་དུ་བྱའོ། །ཨོཾ་ནཱ་ཤ་ཡ་
[255b.2]སརྦ་དུཥྚཱ་ན་ད་ཧ་པ་ཙ་དུཥྚཱ་ན་བྷསྨཱི་ཀུ་རུ་ཧཱུཾ་ཕཊ། དེ་ནས་སྔགས་འདིས་ཕྱོགས་བཅིང་བར་བྱ་སྟེ། ཕན་ཚུན་དུ་ཁུ་ཚུར་སོ་སོར་བཅིངས་ཏེ། ལག་པ་གཡོན་པའི་སྡིགས་མཛུབ་རབ་ཏུ་བརྐྱང་སྟེ་གཡས་པའི་དཔུང་པའི་རྩ་བར་གཞག་པར་བྱའོ། །གཡས་པའི་མཐེབ་ཆེན་གྱིས་མཐེའུ་ཆུང་གི་སེན་མོ་
[255b.3]མནན་ཏེ་སོར་མོ་ལྷག་མ་རྣམས་རབ་ཏུ་བརྐྱང་ནས་ཕྱོགས་བཅུར་བསྐོར་བར་བྱའོ། །ཨོཾ་བཛྲ་ཀྲོ་དྷ་མ་ཧཱ་ཙཎྜ། བནྡྷ་བནྡྷ། ཤ་དི་ཤཱཾ་ཧཱུཾ་ཧཱུཾ་ཕཊ་ཕཊ། དེ་ནས་འདི་བརྗོད་ནས་རྡོ་རྗེ་གསོར་བར་བྱ་སྟེ། ཁྲོ་བོའི་དངོས་གྲུབ་དངོས་གྲུབ་ཆེ། །དངོས་གྲུབ་རྒྱ་ཆེན་དམ་ཚིག་བསྟན། །ལྷ་རྣམས་ཀུན་
[255b.4]གྱི་དངོས་གྲུབ་དང་། །བླ་མེད་དངོས་གྲུབ་བདག་མྱུར་མཛོད། །ཁྲོ་བོའི་རྒྱལ་པོ་རྩ་བའི་ཕྱག་རྒྱ་བཅིངས་ནས་ཧཱུཾ་བཛྲ་ཕཊ། བལྟ་ཞིང་དམ་ཚིག་སྦྱིན་པར་བྱའོ། །དེ་ནས་བཅོམ་ལྡན་འདས་ལ་མཆོད་པར་བྱས་ནས་ཁྲོ་བོ་དབབ་པའི་ཕྱག་རྒྱ་བཅིངས་ནས་རྡོ་རྗེ་ཁྲོ་བོ་རང་གི་ལུས་ལ་རབ་ཏུ་
[255b.5]གཞུག་པར་བྱའོ། །ཨོཾ་པྲ་བི་ཤ་ཀྲོ་དྷ་ཧཱུཾ་ཧཱུཾ་ཧཱུཾ་ཨཱཿཛྭ་ལཱ་མཱ་ལཱ་ཀུ་ལ་བྷི་ཤ་ཎ་བཛྲ་ཨཱཿརང་གི་ལུས་ཀྱི་ནང་དུ་བསྒོམས་ཏེ་གོ་ཆ་ལ་སོགས་པ་བྱས་ནས་ཐམས་ཅད་འདིར་རྫོགས་པར་བྱ་བའི་དོན་དུ་སྙིམ་པས་ཐལ་མོ་སྦྱར་ནས་རྫོགས་པར་བྱ་བའི་སྔགས་བརྗོད་པར་བྱའོ། །ཨོཾ་སིདྡྷ་བཛྲ་ཨ་པཱུ་ར་ཡ་
[255b.6]ཨ་པཱུ་ར་ཡ་ཧཱུཾ་ཕཊ། འདིས་ལྷག་ཆད་ཐམས་ཅད་ཡོངས་སུ་ཁ་སྐོང་བར་འགྱུར་རོ། །དེ་ནས་ཁྲོ་བོའི་ང་རྒྱལ་བསྐྱེད་པས་དངོས་གྲུབ་ཐམས་ཅད་འགུགས་པར་བྱེད་དོ། །སྔགས་འདིས་ཕན་ཚུན་དུ་ཁུ་ཚུར་བཅིངས་ཏེ་མཐེའུ་ཆུང་གཉིས་པོ་འཁྱུད་པར་བྱའོ། །མཛུབ་མོ་རབ་ཏུ་བརྐྱང་སྟེ་བཀུག་
[255b.7]ནས་ཅུང་ཟད་བསྐྱོད་པར་བྱའོ། །ཨོཾ་བཛྲ་རོ་ཥ་མ་ཧཱ་ཀྲོ་དྷ་སིདྷྱཱ་ཀ་ར་ཧཱུཾ་ཛཿདེ་ནས་རང་གི་སྙིང་གར་ཟླ་བའི་དཀྱིལ་འཁོར་ལ་ཡི་གེ་རྣམས་བུང་བ་ནག་པོའི་ཕྲེང་བ་མེ་འབར་བ་བཞིན་དུ་བསམ་པར་བྱའོ། །ཧཱུཾ་བཛྲ་ཕཊ། རང་གི་བ་སྤུའི་བུ་ག་ནས་ཁྲོ་བོའི་སྐུ་སྤྲོ་བ་དང་བསྡུ་བར་བྱེད་པར་བསམ་པར་བྱའོ། །དེའི་ཡི་
[256a]
[256a.1]གེ་དང་སེམས་རྩེ་གཅིག་ཏུ་གྱུར་པས་སོ། །བཟླས་པས་ངལ་ན་ཁྲོ་བོའི་སྐུ་རང་གི་སྙིང་གའི་ནང་དུ་བསྒོམས་ཏེ། ཐལ་མོ་སྦྱར་ནས་དངོས་གྲུབ་ཐམས་ཅད་ཞུ་བར་བྱའོ། །སིདྡྷི་བཛྲ་ཨ་པཱུ་ར་ཡ་སརྦ་སཏྭཱ་ནཱཾ། ཨཱ་པཾ་སརྦ་སིདྡྷི་མྨེ་པྲ་ཡཙྪ་ཧཱུཾ་ཛཿ། དེ་ནས་པདྨའི་ཕྱག་རྒྱས་མཐེབ་ཆེན་
[256a.2]གཉིས་པོ་བསྐྱོད་པར་བྱ་ཞིང་། ལྷ་ཐམས་ཅད་གཤེགས་སུ་གསོལ་བའི་ཕྱག་རྒྱ་དང་། སྔགས་ནི་ཨོཾ་སཱ་ར་སཱ་ར། བི་ས་ར་བི་ས་ར། གཙྪ་གཙྪ། སརྦ་དེ་བ་ཏཱ་ན་ཤྲཱི་བཛྲ་དྷ་ར་ས་མཱ་ཛྙཱ་པ་ཡ་ཏི་སྭཱ་ཧཱ། དེ་ནས་རང་གི་ལུས་ལ་གོ་ཆ་བྱས་ཏེ། ཁྲོ་བོའི་ང་རྒྱལ་གྱི་ཡིད་ཀྱིས་སྤྱོད་ལམ་ཅི་བདེ་བར་བྱའོ། །རིམ་
[256a.3]པ་འདིས་སྔགས་འབུམ་ཕྲག་གཅིག་བཟླས་པས་མྱུར་དུ་འགྲུབ་བོ། །དེ་ནས་སྔགས་པས་དབང་བསྐུར་བ་རྗེས་སུ་གནང་བ་བྱས་ཏེ། སྔོན་དུ་བསྙེན་པས་རྡོ་རྗེ་འཛིན་པ་བསྒྲུབ་པར་འདོད་པས་ཟླ་བ་གཅིག་ཏུ་ཐུན་མཚམས་གསུམ་དུ་སྟོང་ཕྲག་རེ་བཟླས་པར་བྱའོ། །དེ་ནས་བཅོ་ལྔ་ལ་ཇི་ལྟར་འབྱོར་པའི་
[256a.4]མཆོད་པ་བྱས་ནས། ཏིང་ངེ་འཛིན་ལ་ལེགས་པར་གནས་ཏེ། ཁྲོ་བོའི་ཕྱག་རྒྱ་བཅིངས་ནས་མཚན་མོ་རིལ་པོ་བཟླས་པ་བྱའོ། །དེ་ནས་ནང་པར་སྔ་བར་ས་གཡོ་བའི་ཕྱག་རྒྱ་འབར་ཏེ། འབར་བ་ཙམ་གྱིས་རྡོ་རྗེ་འཛིན་པ་དང་མཚུངས་པར་འགྱུར་ཏེ། རྒས་པ་དང་། འཆི་བ་མེད་པར་ལྷའི་ལུས་སུ་འགྱུར་བར་
[256a.5]བཅོམ་ལྡན་འདས་རྡོ་རྗེ་འཛིན་པས་གསུངས་སོ། །མདོར་བསྡུས་པ་ཡོངས་སུ་རྫོགས་ཤིང་རྒྱས་པའི་རིམ་པར་གྱུར་པ་འབྱུང་པོ་འདུལ་བྱེད་ཀྱི་སྒྲུབ་ཐབས་ཀྱི་ཆོ་ག་དམ་པ་ཐམས་ཅད་འདྲེན་པའི་འཇིག་རྟེན་གསུམ་གྱི་རྡོ་རྗེས་མཛད་པ་རྫོགས་སོ།། {T3643}༄༅༅། །རྒྱ་གར་སྐད་དུ། ཤྲཱི་མནྨ་ཧཱ་ཀཱ་ལ་སཱ་དྷ་ནཾ།
[256a.6]བོད་སྐད་དུ། དཔལ་ལྡན་ནག་པོ་ཆེན་པོའི་སྒྲུབ་ཐབས། དཔལ་ལྡན་མགོན་པོ་ནག་པོ་ལ་ཕྱག་འཚལ་ལོ། །དེ་བཞིན་དུ་སྔོན་དུ་གསུངས་པའི་རིམ་པས་སྟོང་པ་ཉིད་བསྒོམས་པའི་རྗེས་ལ་སྣ་ཚོགས་པདྨ་དང་ཉི་མ་ལ་ཧཱུཾ་ཡིག་ནག་པོ་དེ་ཡོངས་སུ་གྱུར་པ་ལས་དཔལ་ལྡན་རྗེ་བཙུན་ནག་པོ་ཆེན་པོ་ཞལ་གཅིག་ཕྱག་
[256a.7]གཉིས་པ། སྐུ་མདོག་ནག་པོ། སྤྱན་གསུམ་པ་འབར་བ་ཆེན་པོ། ཕྱག་གཡས་པ་དང་གཡོན་པ་དག་གིས་གྲི་གུག་དང་ཐོད་པ་བསྣམས་པ། མགོ་བོའི་ཕྲེང་བའི་དོ་ཤལ་གྱིས་སྐུ་ལ་བརྒྱན་པ། དབུ་སྐྲ་དམར་སེར་གྱེན་དུ་བརྫེས་པ། མཆེ་བ་གཙིགས་པ། འཇིགས་པར་བྱེད་པ། སྐུ་ཐམས་ཅད་ལ་
[256b]
[256b.1]སྦྲུལ་གྱིས་བརྒྱན་པ། སྐུ་བོང་ཐུང་བ། ཞལ་ནས་ཁྲག་འཛག་པའི་བདག་ཉིད་དུ་སྐད་ཅིག་གིས་བསྐྱེད་ནས་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་མ་ཧཱ་ཀཱ་ལ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དུག་དང་། ཁྲག་དང་སྒོག་པ་དང་། ཡུངས་ཀར་རྣམས་ཀྱིས་ནག་པོ་ཆེན་པོ་ལ་སྤོས་ཕུལ་ནས་སྲན་མ་
[256b.2]མ་ཤ་དང་། ཛམྦུ་ཏི་ག་དང་། ཆང་དང་། མེ་ཏོག་དང་། བྱུག་པ་ལྔའི་ལྕགས་ཀྱུའི་བདུད་རྩིས་ནག་པོ་ཆེན་པོ་མཆོད་པར་བྱ་སྟེ། གཏོར་མའི་སྔགས་འདིས་སོ། །ཨོཾ་མ་ཧཱ་ཀཱ་ལཱ་ཡ། ཤཱ་ས་ནོ་པ་ཧཱ་རི་ཎི། ཨེ་ཥ་པཥྩི་མ་ཀཱ་ལོ། ཨ་ཡཾ་ཨི་དཾ་རཏྣ་ཏྲ་ཡ། ཨ་པ་ཀཱ་རི་ཎཾ། ཡ་དི་པྲ་ཏཱིཛྙཱ་སྨ་ར་སི་ཏ་དཱ། ཨི་དཾ་དུཥྚ་
[256b.3]ཁ་ཁ། ཁཱ་ཧི་ཁཱ་ཧི་མ་ར་མ་ར་གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན། མཱ་ར་ཡ་ཧཱུཾ་ཧཱུཾ་ཕཊ་ཕཊ། ཚ་བ་གསུམ་གྱིས་བསྒྲུབ་བྱའི་གཟུགས་བྱས་ཏེ་ལུས་ལ་ཚེར་མས་དགང་ཞིང་དུག་དང་སྐེ་ཚེ་རྣམས་ཀྱིས་ཆོ་ག་བཞིན་དུ་བྱུགས་ནས་མེ་ལ་བསྲོ་བར་བྱའོ། །གང་གི་མིང་དང་
[256b.4]བཅས་པ་དེ། །དེ་བཞིན་སྐད་ཅིག་མཐོང་མི་འགྱུར། །སློབ་དཔོན་ཞེ་སྡང་རྟག་ཁྲོ་གང་། །གང་ཞིག་དཀོན་མཆོག་གསུམ་པོ་དང་། །དཔག་མེད་སེམས་ཅན་རྣམས་འཚེ་རྣམས། །ནག་པོ་ཆེན་པོས་ཟ་བར་བྱེད། །དེ་ཡི་ལུས་ཀྱི་ཤ་གཅོད་ཅིང་། །དེ་བཞིན་ཁྲག་ནི་འཐུང་བར་བྱེད། །སྤྱི་བོར་ཐིག་ལེ་
[256b.5]བྱས་ནས་གུས་པ་ཆེན་པོ་བྱས་ཏེ་བཟླས་པའོ། །དཔལ་ལྡན་ནག་པོ་ཆེན་པོའི་སྒྲུབ་ཐབས་རྫོགས་སོ།། {T3644}༄༅༅། །རྒྱ་གར་སྐད་དུ། མ་ཧཱ་ཀཱ་ལ་སཱ་དྷ་ནཾ། བོད་སྐད་དུ། ནག་པོ་ཆེན་པོའི་སྒྲུབ་ཐབས། དཔལ་ལྡན་ནག་པོ་ཆེན་པོ་ལ་ཕྱག་འཚལ་ལོ། །དང་པོར་
[256b.6]རེ་ཞིག་སྔགས་པས་རང་གི་ཡི་དམ་གྱི་ལྷའི་རྣལ་འབྱོར་གྱི་བདག་ཉིད་བསྐྱེད་ནས་ཡི་གེས་བྱིན་གྱིས་བརླབ་པར་བྱའོ། །དེ་ལ་རིམ་པ་འདིས་སོ། །ནམ་མཁའི་ཕྱོགས་སུ་པཾ་ཡིག་ཡོངས་སུ་གྱུར་པ་ལས་པདྨ་དེའི་སྟེང་དུ་ཨཱཿཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར་དེའི་དབུས་སུ་ཧཱུཾ་ཡིག་གི་ས་བོན་
[256b.7]ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ། དེའི་ལྟེ་བ་ལ་ཉི་མ་ལ་གནས་པའི་ཧཱུཾ་ཡིག་བལྟས་ནས་དེའི་འོད་ཟེར་གྱིས་སྔོན་མ་བཞིན་དུ་བསྒྲུབ་ཅིང་སྐུ་མདོག་ལ་སོགས་པ་འཆད་པར་འགྱུར་བའི་ནག་པོ་ཆེན་པོ་གདན་དྲངས་ནས། ཧཱུཾ་ཡིག་ལས་བྱུང་བའི་མཆོད་པའི་ལྷ་མོ་རྣམས་ཀྱིས་ཡང་དག་པར་མཆོད་ནས། ཨོཾ་ཨཱཿཧཱུཾ་མུཿ
[257a]
[257a.1]ཞེས་པས་གཤེགས་སུ་གསོལ་ལོ། དེ་ནས་ཐམས་ཅད་སྟོང་པ་ཉིད་དུ་བསྒོམས་པའི་སྔགས་བརྗོད་པར་བྱའོ། ཨ་ཤཱུ་ནྱ་ཏཱ་ཛྙཱ་ན་བཛྲ་སྲ་བྷཱ་ལྦ་ཨཱ་ཏྨ་ཀོ྅ཧཾ། ཕྱི་ནས་པདྨ་ལ་ཨ་ཡིག་ཡོངས་སུ་གྱུར་པ་ལས་ཟླ་བ། དེ་ལ་ཟླ་བ་ལ་ཧཱུཾ་ཡིག་དཀར་པོ་བལྟས་ནས་དེ་ཡོངས་སུ་གྱུར་པ་
[257a.2]ལས་རལ་གྲི། དེའི་སྟེང་དུ་ཟླ་བའི་དཀྱིལ་འཁོར་ལ་ཧཱུཾ་ཡིག་གི་ས་བོན་གྱིས་བྱིན་གྱིས་བརླབས་ལ་དེ་ཐམས་ཅད་ཡོངས་སུ་གྱུར་པ་ལས། ནག་པོ་ཆེན་པོ་སྐུ་མདོག་ནག་པོ་དབུ་སྐྲ་དམར་སེར་གྱེན་དུ་བརྫེས་པ། ཀླུ་བརྒྱད་ཀྱིས་བརྒྱན་པ། སྟག་གི་པགས་པའི་ཤམ་ཐབས་ཅན། ཕྱག་བཞི་པ། ཕྱག་གཡས་ན་
[257a.3]རལ་གྲི་དང་། མཆོག་སྦྱིན་མཛད་པ། ཕྱག་གཡོན་ན་རྩེ་གསུམ་དང་ཐོད་པ་བསྣམས་པ། སེམས་དཔའི་སྐྱིལ་ཀྲུང་གིས་བཞུགས་པ། དྲག་པོའི་འོད་ཟེར་ཅན། ལྗགས་བསྐྱོད་པ། ཞལ་མཆེ་བ་གཙིགས་པ། རྡོ་རྗེ་སེམས་དཔའི་དབུ་རྒྱན་ཅན། ཉི་མ་ལ་བཞུགས་པ། དེ་ལྟ་བུའི་ནག་པོ་ཆེན་པོར་བསྐྱེད་
[257a.4]ནས། སྙིང་གར་ཉི་མ་ལ་གནས་པའི་ཧཱུཾ་ཡིག་གི་འོད་ཟེར་གྱིས་སྔོན་བཞིན་དུ་ནག་པོ་ཆེན་པོ་རབ་ཏུ་གཞུག་པར་བྱའོ། །སླར་ཡང་དེ་བཞིན་གཤེགས་པ་རྣམས་གདན་དྲངས་ཏེ། དེ་རྣམས་དང་མཱ་མ་ཀཱི་ལ་སོགས་པ་རྣམས་ཀྱི་སྐུས་དབང་བསྐུར་བར་བསམ་པར་བྱའོ། །དེའི་རྗེས་སུ་ཡེ་ཤེས་སེམས་དཔའི་ས་
[257a.5]བོན་གྱི་འོད་ཟེར་ལས་བྱུང་བའི་སྤྱན་མ་ལ་སོགས་པའི་ལྷ་མོ་རྣམས་ཀྱིས་མཆོད་ཅིང་བསྟོད་པར་ཡང་བྱའོ། །བདུད་རྩི་ལྔ་ལས་གྲུབ་པའི་རིམ་པའི་ཉེར་སྤྱོད་ཀྱིས་དེ་ལ་གཏོར་མ་དབུལ་བར་བྱའོ། །དེ་ལ་དབུལ་བའི་སྔགས་ནི། ན་མཿས་མདྷ་ཀཱ་ཡ་བཱཀྩིཏྟ་བཛྲ་ཎཱཾ། ན་མོ་བཛྲ་ཀྲོ་དྷ་ཡ་མ་ཧཱ་དཾ་ཤྡྷོཏྐ་ཊྐ་ཊ་བྷ་
[257a.6]ར་བཱ་ཡ། ཨ་སི་མུ་ས་ལ་པ་ར་ཤུ་པཱ་ཤ་ཧསྟཱ་ཡ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫྫ་གརྫྫ། བི་སྥོ་ཊ་ཡ་བི་སྥོ་ཊ་ཡ། མ་ཧཱ་ག་ཎ་པ་ཏི་ཛཱི་བི་ཏཱནྟ་ཀ་རཱ་ཡ་ཧཱུཾ། ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲ་ཎཱཾ། ཨོཾ་ཨཱཿཧཱུཾ། ཨོཾ་མཾ་མཾ། ཧཾ་ཧཾ། ཀཾ་ཀཾ། རཾ་རཾ། མ་ཧཱ་ཀཱ་ཡ་པིཾ་
[257a.7]གོཌྜྷ་ཀེ་ཤ་བརྟ་དྷེ། ཨི་མཾ་བི་ལཾ། གྲྀཧྞ་གྲྀཧྞ། གྲྀཧྞ་པ་ཡ་གྲྀཧྞ་པ་ཡ། ཨི་དཾ་ཀརྨ་ཀུ་རུ་ཀུ་རུ། ཨ་ཨཱ་ཧཱུཾ་ཧཱུཾ། སརྦ་བིགྷྣཱཾ་བི་ཙཱ་ཡ་ཀཱན། ཨོཾ་ཨ་ཀཱ་རོ་མུ་ཁཾ་ཞེས་པ་ལ་སོགས་པ་ནི་གཏོར་མའི་སྔགས་སོ། །ཨོཾ་ཨཱཿམཾ་ཧཾ་རཾ་ཧཱུཾ་ཕཊ་སྭཱ་ཧཱ། ཞེས་པ་ནི་བཟླས་པའི་སྔགས་སོ། །དཔལ་ལྡན་ནག་པོ་ཆེན་
[257b]
[257b.1]པོའི་སྒྲུབ་ཐབས་རྫོགས་སོ།། །།ལྷ་སོ་སོའི་སྒྲུབ་པའི་ཐབས་རྒྱ་མཚོ་ཞེས་བྱ་བ་འདི་རྣམས་ནི་དཔལ་ལྡན་ས་སྐྱའི་གཙུག་ལག་ཁང་ཆེན་པོར་པཎྜི་ཏ་ཆེན་པོ་གཽ་ཏམ་ཤྲཱི་ལས་བརྒྱུད་ཅིང་། པཎྜི་ཏ་ཆེན་པོ་ཀཱིརྟི་ཙནྡྲའི་ཞལ་སྔ་ནས་ཞུས་ནས། སློབ་དཔོན་ཆེན་པོ་དྷརྨ་པ་ལ་རཀྵི་ཏའི་སྐུ་སྐྱབས་དང་། དཔོན་
[257b.2]ཆེན་པོ་ཀུན་དགའ་གཞོན་ནུ་དང་། མ་གཅིག་པས་སྦྱིན་བདག་མཛད་པ་ལ་བརྟེན་ནས། དེ་ཤཱནྟ་རི་ཡོ་གི་གྲགས་པ་རྒྱལ་མཚན་གྱིས། བྱ་ལོ་ཟླ་བ་བཅུ་གཉིས་པའི་དཀར་པོའི་ཚེས་གསུམ་ལ་དབེན་གནས་དམ་པ་ཆུ་མིག་རྫིང་ཁར་ཡོངས་སུ་རྫོགས་པར་བསྒྱུར་རོ། །གྲུབ་པའི་བླ་མ་མཁྱེན་དང་བརྩེ་བའི་མངའ་
[257b.3]བདག་རྣམས་དང་ནི། །བློ་གྲོས་རྩལ་འབྱང་མཁས་མཆོག་ཀུན་ཀྱིས་འབད་པས་རབ་བསྒྲུབས་པའི། །རིན་ཆེན་ཀུན་གྱི་འབྱུང་གནས་སྒྲུབ་ཐབས་རྒྱ་མཚོ་ཆེན་པོ་འདིས། །འགྲོ་བ་ཀུན་གྱི་དགོས་འདོད་རེ་བ་ཡིད་བཞིན་ལེགས་པར་འགྲུབ་པར་ཤོག། {T3645}༄༅༅། །རྒྱ་གར་སྐད་དུ།
[257b.4]ནཱ་#གེ་ཤྭ་རཱ་#རཱ་ཛ་སཱ་དྷ་ནཾ། བོད་སྐད་དུ། ཀླུའི་དབང་ཕྱུག་རྒྱལ་པོའི་སྒྲུབ་ཐབས། རྗེ་བཙུན་སྒྲོལ་མ་ལ་ཕྱག་འཚལ་ལོ། །ཐོག་མར་གནས་ཁང་ཉམས་དགའ་བར་ཁ་གདོང་དག་པར་བྱས་ནས་སྟན་བདེ་བ་ལ་འདུག་སྟེ། འབྱུང་པོ་ཐམས་ཅད་ཚིམ་པར་བྱེད་པའི་སྔགས། ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཱཾ་
[257b.5]ཨཱདྱ་ནུཏྤནྣ་ཏྭཱཏ་#ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་བརྗོད་ལ་ཨོཾ་ཨཱཿབིགྷྣཱནྟ་ཀྲིཏ་#ཧཱུཾ་ཕཊ་ཅེས་བརྗོད་པས་#ཕྱོགས་བཅུའི་བགེགས་ཐམས་ཅད་བསལ་བར་བྱའོ། །དེ་ནས་#བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་སྔོན་དུ་སོང་བས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་
[257b.6]དོན་དུ་སངས་རྒྱས་ཐོབ་པར་འདོད་པའི་བློས་རང་གི་སྙིང་གར་ཧཱུཾ་བཻ་ཌཱུརྱའི་མདོག་ལྟ་བུ་ལས་འཕྲོས་པའི་འོད་ཀྱིས་ལུས་ཁྱབ་ནས་རང་ཉིད་དེ་བཞིན་གཤེགས་པ་ཀླུ་དབང་རྒྱལ་པོར་གྱུར་པར་བསམས། དེ་ནས་སྙིང་གའི་ཧཱུཾ་ལས་འོད་འཕྲོས་པས་མདུན་གྱི་ནམ་མཁའ་ལ་བླ་མ་དང་སངས་རྒྱས་དང་བྱང་ཆུབ་
[257b.7]སེམས་དཔའ་དཔག་ཏུ་མེད་པ་དང་། དེ་བཞིན་གཤེགས་པ་ཀླུ་དབང་རྒྱལ་པོ་གཙོ་འཁོར་ལྔ་པ་མདུན་གྱི་ནམ་མཁའ་ལ་སྤྱན་དྲངས་ལ། ཕྱག་འཚལ་བ་སྔོན་དུ་སོང་བས་དངོས་སུ་བཤམས་པའི་མཆོད་པ་རྣམས་ཀྱིས་མཆོད་ལ། ཡིད་ལས་བྱུང་བའམ། མཆོད་པའི་རིམ་པ་ནི་འདི་ཡིན་ཏེ། ཨོཾ་
[258a]
[258a.1]བཛྲ་ཕུཥྤེ་ཨཱཿཧཱུཾ་ཞེས་བརྗོད་པས་མེ་ཏོག་ཐོགས་པའི་ལྷ་མོ་སྔོན་མོས་ནམ་མཁའ་ཁེངས་པ་དང་། ཨོཾ་བཛྲ་དྷཱུ་པེ་ཨཱཿཧཱུཾ་ཞེས་བརྗོད་པས་བདུག་སྤོས་ཐོགས་པའི་ལྷ་མོ་སེར་མོ་དཔག་ཏུ་མེད་པ་དང་། ཨོཾ་བཛྲ་དཱི་པེ་ཨཱཿ#ཧཱུཾ་ཞེས་བརྗོད་པས་མར་མེ་ཐོགས་པའི་ལྷ་མོ་དམར་མོས་ནམ་
[258a.2]མཁའ་ཁེངས་པ་དང་། ཨོཾ་བཛྲ་གནྡྷེ་ཨཱཿ#ཧཱུཾ་ཞེས་བརྗོད་པས་དྲི་མཆོག་ཐོགས་པའི་ལྷ་མོ་སེར་མོ་#དཔག་ཏུ་མེད་པ་དང་། ཨོཾ་བཛྲ་ན་བི་དྱེ་ཨཱཿ#ཧཱུཾ་ཞེས་བརྗོད་པས་ཞལ་ཟས་ཐོགས་པའི་ལྷ་མོ་སེར་སྐྱ་མ་དཔག་ཏུ་མེད་པས་མཆོད་ལ། ཨོཾ་སརྦ་བི་ཤོ་#དྷ་པཱུ་ཛ་མེ་གྷ་#སྥ་ར་ཎ་#ས་མུ་དྲེ་ཨཱཿ#ཧཱུཾ་ཞེས་པའི་
[258a.3]སྔགས་བརྗོད་ལ། དེ་ཉིད་ལ་རིན་པོ་ཆེ་སྣ་ཚོགས་དང་། གདུགས་དང་། རྒྱལ་མཚན་དང་། དྲིལ་བུ་དང་། བ་དན་དང་། བླ་རེ་ལ་སོགས་པ་དང་། འཁོར་ལོས་སྒྱུར་#བའི་རིན་པོ་ཆེ་སྣ་བདུན་གྱིས་མཆོད་པར་བྱའོ། །དེ་ནས་སྡིག་པ་བཤགས་པ་དང་། རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་
[258a.4]བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་དང་། དགེ་བ་རྫོགས་པའི་བྱང་ཆུབ་ཏུ་བསྔོ་བ་དང་། བྱང་ཆུབ་མཆོག་ཏུ་སེམས་བསྐྱེད་པ་དང་། ལམ་བསྟན་#པ་རྣམས་བྱའོ། །དེ་ནས་ཡེ་ཤེས་ཀྱི་ཚོགས་བསྐྱེད་པར་བྱ་བའི་ཕྱིར་སྔགས་འདི་བརྗོད་པར་བྱའོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿ#སྭ་བྷཱ་ཝ་
[258a.5]ཤུདྡྷོ྅#ཧཾ་ཞེས་བརྗོད་པས། ཆོས་ཐམས་ཅད་སྤྲོས་པ་#དང་བྲལ་བར་བསམས#། དེ་ནས་སྟོང་པ་ཉིད་ལ་གནས་པས་སེམས་ཅན་གྱི་དོན་མི་འགྲུབ་པས་སྙིང་རྗེ་ཆེན་པོའི་རང་བཞིན་གྱི་#པཾ་ལས་པདྨ་འདབ་མ་སྟོང་དང་ལྡན་པ་ཡངས་ཤིང་རྒྱ་ཆེ་བར་བསམ། དེའི་སྟེང་དུ་ཆོས་ཐམས་ཅད་མཐའ་དང་དབུས་མེད་པར་
[258a.6]སྟོན་པར་བྱེད་པའི་ཡི་གེ་ཨ་དཀར་པོ་འོད་དུ་ཞུ་བ་ལས་ཟླ་བའི་དཀྱིལ་འཁོར་ཡངས་ཤིང་རྒྱ་ཆེ་བར་བསམ#། དེའི་སྟེང་དུ་ཡི་གེ་ཧཱུཾ་མི་དཔོགས་རིན་པོ་ཆེའི་མདོག་ལྟ་བུ་ལས་འོད་ཟེར་འཕྲོས་པས་ཀླུ་རྣམས་དང་སེམས་ཅན་གྱི་ལས་དང་ཉོན་མོངས་པའི་སྡིག་པ་དང་#སྒྲིབ་པ་ཐམས་ཅད་དག་ནས་ཧཱུཾ་སྐད་ཅིག་མ་གཅིག་
[258a.7]ལ་ཀླུའི་དབང་ཕྱུག་རྒྱལ་པོའི་སྐུར་གྱུར་པར་བསམ། དེ་ཡང་སྐུ་མདོག་མི་དཔོག་#རིན་པོ་ཆེའི་མདོག་ལྟ་བུ་སྦྲུལ་མགོ་བདུན་གདེངས་པའི་རྒྱབ་ཡོལ་ཅན། ཆོས་གོས་ངུར་སྨྲིག་#གསོལ་པ་དབུ་གཙུག་ཏོར་དང་ལྡན་པ། ཀླུ་ཐམས་ཅད་ཀླུའི་སྐྱེ་གནས་ལས་ཐར་བར་བྱེད་པ་དང་། སེམས་ཅན་ཐམས་ཅད་
[258b]
[258b.1]ངན་འགྲོའི་སྐྱེ་གནས་ལས་ཐར་བར་བྱེད་པའི་ཕྱག་རྒྱ་དང་ལྡན་པ། བཞིན་འཛུམ་པ་དང་ལྡན་པར་བསམ། དེའི་མདུན་དུ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་སྐུ་མདོག་དཀར་པོ། རིན་པོ་ཆེའི་མྱུ་གུ་ཕྱག་གཡས་ན་བསྣམས་པ། གཡོན་ན་བུམ་པ་བསྣམས་པ། པདྨ་དང་ཟླ་བའི་གདན་
[258b.2]ལ་བཞུགས་པ། བཅོམ་ལྡན་འདས་ལ་བལྟ་བའོ། །གཡས་སུ་བྱང་ཆུབ་སེམས་དཔའ་བྱམས་པ་སྐུ་མདོག་དམར་པོ་ཀླུ་ཤིང་གི་གོ་ལྕོག་#མེ་ཏོག་དང་བཅས་པ་དང་རིལ་བ་སྤྱི་བླུགས་བསྣམས་པའོ། །རྒྱབ་ཏུ་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་སྐུ་མདོག་གསེར་བཙོ་མའི་ཁ་
[258b.3]དོག་#ལྟ་བུ་ཨུཏྤལ་བསྣམས་པའོ། །#གཡོན་དུ་#སྤྱན་རས་གཟིགས་དབང་ཕྱུག་སྐུ་མདོག་དཀར་པོ་པདྨ་བསྣམས་པ། བཅོམ་ལྡན་འདས་ལ་བལྟ་#བའོ། །གཡས་ཕྱོགས་སུ་བྱང་ཆུབ་སེམས་དཔའ་དཔག་ཏུ་མེད་པ་དང་། གཡོན་ཕྱོགས་སུ་དགྲ་བཅོམ་པ་དཔག་ཏུ་མེད་པ་བསམ་མོ། །འོག་གི་
[258b.4]ཕྱོགས་སུ་ཀླུའི་ཚོགས་དཔག་ཏུ་མེད་པ་རིན་པོ་ཆེ་ཐོགས་པ་ཐལ་མོ་སྦྱར་བ་གྱེན་དུ་ལྟ་བ་བསམ་མོ། །དེ་ནས་ཡེ་ཤེས་སེམས་དཔའ་མདུན་གྱི་ནམ་མཁར་སྤྱན་དྲངས་ལ་མཆོད་པ་དང་། གསོལ་བ་ལེགས་པར་བཏབ་ལ། ཛཿཧཱུཾ་བཾ་ཧོཿཞེས་པའི་ཡི་གེ་བཞིས་སྤྱན་དྲངས་ལ། དགུག་པ་དང་། གཞུག་པ་དང་
[258b.5]བཅིང་བ་དང་། དགྱེས་པར་བྱས་ལ་སྙིང་པོ་འདི་བརྗོད་པར་བྱའོ། །ཏདྱ་ཐཱ། ཨོཾ་ཏ་ཐཱ་ག་ཏོ་བྷ་ག་བཱན་ནཱ་ག་རཱ་ཛེ་ཤྭ་ར་ཨ་དྷཥྛཱ་#ན་ཨ་དྷིཥྛི་ཏེ་སྭཱ་ཧཱ། འབུམ་ཕྲག་བཅུ་གཅིག་བཟླས་པས་མཛེ་ནད་ཐམས་ཅད་དང་། མྱོང་བར་ངེས་པའི་ལས་ཐམས་ཅད་ཟད་པར་འགྱུར་རོ། །བུམ་པ་གཉིས་ལས་གཅིག་ཏུ་བཅོམ་
[258b.6]ལྡན་འདས་འཁོར་དང་བཅས་པའི་སྐུ་གཟུགས་དང་། རིན་པོ་ཆེ་དང་། འབྲུ་སྣ་ཚོགས་ཀྱིས་དགང་བར་བྱའོ། །གཅིག་ཏུ་ཀླུ་ནོར་རྒྱས་ཀྱི་བུ་ལ་ཀླུ་ཆེན་པོ་བརྒྱད་ཀྱིས་བསྐོར་བའི་གཟུགས་བཅུག་ལ་རིན་པོ་ཆེ་སྣ་ཚོགས་དང་། ཀླུ་སྨན་སྣ་ཚོགས་དང་། འབྲུ་སྣ་ཚོགས་ཀྱིས་ལེགས་པར་བཀང་ལ། པདྨ་འདབ་
[258b.7]མ་བརྒྱད་པའི་དཀྱིལ་འཁོར་གཉིས་ཀྱི་ཁར་བུམ་པ་གཉིས་པོ་བཞག་ལ་བ་དམར་མོ་གཉིས་ཀྱི་འོ་མས་དགང་བ་#དང་། གདུགས་བརྒྱ་རྩ་བརྒྱད་དང་། ཚོན་སྣ་ལྔ་པའི་བ་དན་བརྒྱ་རྩ་བརྒྱད་དང་། ཨ་ཀ་རུ་ནག་པོའི་བདུག་སྤོས་དང་། སྤོས་དཀར་པོ་དང་། བདུག་པ་སྣ་ཚོགས་དང་། མེ་ཏོག་དང་། མར་མེ་
[259a]
[259a.1]དང་། ལྷ་བཤོས་དང་། རོལ་མོ་སྣ་ཚོགས་པས་མཆོད་པར་བྱའོ། །ཐུན་མོང་གི་ནོར་རྫས་#ལ་ལོངས་སྤྱོད་པར་འགྱུར་རོ། །ཞག་བདུན་དུ་སྙིང་པོ་རྒྱུན་མ་ཆད་པར་བཟླས་ན་དབུལ་བ་ཐམས་ཅད་དང་བྲལ་བར་འགྱུར་རོ། །སད་དང་། སེར་བ་དང་། ལྕེ་འབབ་པའི་འཇིགས་པ་
[259a.2]འབྱུང་བར་མི་འགྱུར་རོ། །བུམ་པ་གཉིས་པོ་ཡང་འོག་ཏུ་ཀླུའི་བུམ་པ་བཞག །སྟེང་དུ་བཅོམ་ལྡན་འདས་ཀྱི་བུམ་པ་བཞག་ནས་གནས་ཁང་གི་ཤར་ཕྱོགས་སུ་གཏེར་དུ་སྦས་ན་ཕོངས་པའི་སྡུག་བསྔལ་དང་བྲལ་བར་འགྱུར་རོ། །ཀླུའི་གནོད་པ་ཐམས་ཅད་དང་བྲལ་བར་འགྱུར་རོ། །ཁྱིམ་དེའི་
[259a.3]སྐྱེས་པ་དང་། བུད་མེད་ཐམས་ཅད་དར་བར་འགྱུར་རོ། །ཆར་དབབ་པ་ནི་བླ་གབ་མེད་པའི་ས་ཕྱོགས་སུ་བྱའོ། །ཆར་བཅད་པ་ནི་བཅོམ་ལྡན་འདས་ལ་ཕུལ་བའི་མེ་ཏོག་ལ་སྦྱིན་སྲེག་བྱའོ། །སའི་གཏེར་འབྱིན་པར་འདོད་ན་བཅོམ་ལྡན་འདས་ཀྱི་སྐུ་གཟུགས་ཀྱི་སྤྱན་སྔར་རྨི་ལམ་ཞུ་བར་བྱའོ། །གཏོར་མ་གསུམ་
[259a.4]བྱས་ལ་གཅིག་ནི་བཅོམ་ལྡན་འདས་ལ་དབུལ་བར་བྱའོ#། །གཉིས་པ་ནི་འཇིག་རྟེན་སྐྱོང་བ་རྣམས་ལའོ། །གསུམ་པ་ནི་ཀླུ་རྣམས་ལ་སྦྱིན་པར་བྱའོ། །དེ་ནས་རྫོགས་པའི་རིམ་པ་ནི་བླ་མའི་ཞལ་ལས་ཤེས་པར་བྱའོ། །དེ་ནས་གཤེགས་སུ་གསོལ་ལ། ཐུན་མཚམས་སུ་དེ་བཞིན་གཤེགས་པ་དགྲ་བཅོམ་པ་ཡང་
[259a.5]དག་པར་རྫོགས་པའི་སངས་རྒྱས་ཀླུའི་དབང་ཕྱུག་རྒྱལ་པོའི་མཚན་ཉི་ཤུ་རྩ་རེ་རེ་བརྗོད་པར་བྱའོ། །དེ་བཞིན་གཤེགས་པ་ཀླུའི་དབང་ཕྱུག་རྒྱལ་པོའི་སྒྲུབ་ཐབས། སློབ་དཔོན་བདག་ཉིད་ཆེན་པོ་ཀླུ་སྒྲུབ་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀཱ་#ར་ཤྲཱི་ཛྙཱ་ན་དང་། བོད་ཀྱི་ལོ་ཙཱ་#བ་
[259a.6]དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། {T3646}༄༅༅། །ཡིག་བརྒྱའི་ཆོ་ག་བཞུགས།། །།ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ་བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་
[259a.7]སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། །ཧ་ཧ་ཧ་ཧ་ཧོཿ བྷ་ག་བཱན་སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་བ། མ་ཧཱ་ས་མ་ཡ་སཏྭ་ཨཱཿསྭཱ་ཧཱ། ཨོཾ་ཧ་ཕཊ། སྟོང་དང་ལྷ་བསྐྱེད་སྤྱན་དྲང་དང་། །གདན་བཞིར་བྱིན་བརླབས་དབང་བསྐུར་བའོ། །ཞེས་གཞན་ནས་བཤད་དོ། །གསང་སྔགས་དང་རིག་སྔགས་ཐམས་ཅད་
[259b]
[259b.1]ཀྱི་བདག་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །རིག་སྔགས་བརྒྱ་པའི་ཆོ་ག་མདོར་བསྡུས་པ་བཤད་པར་བྱའོ། །གང་ཞིག་སེམས་ཅན་དོན་མཛད་དང་། །སངས་རྒྱས་སྲས་རྣམས་ཐོབ་བྱའི་ཕྱིར། །བྱང་ཆུབ་ཏུ་ནི་སེམས་བསྐྱེད་ནས། །བདག་གིས་རིག་སྔགས་བསྒྲུབ་པར་བྱའོ། །སྡོམ་པ་གསུམ་ལ་
[259b.2]གནས་པ་དང་། །ཤེས་བཞིན་དྲན་པར་ལྡན་པ་དང་། །འཕགས་པའི་ནོར་བདུན་ལྡན་པ་དང་། །སྔགས་ཀྱི་རྒྱུད་སྡེ་བཞི་ཤེས་པས། །ཕྱག་རྒྱ་བཞི་ལྡན་སྙིང་རྗེ་ཅན། །ཐབས་ཤེས་ཡོ་བྱད་ཚོགས་པས་བསྒྲུབ། །ཤེས་རབ་ཆེ་བ། སྟོང་པ་ཉིད་ཀྱི་དོན་ཤེས་པ། གཅམ་ཕྱར་ཅན་མ་ཡིན་པ།
[259b.3]རིག་སྔགས་བཟླས་པའི་ཚེ་སྨྲ་བ་མ་ཡིན་པ། མེའི་ལས་ལ་མཁས་པ། དེ་ལྟ་བུས་བསྒྲུབ་པར་བྱའོ། །དེ་ལྟ་བུ་ལ་སྦྱིན་པར་བྱའོ། །གཞན་ལ་ནི་མ་ཡིན་ནོ། །དེ་ལ་ཆོ་ག་འདིའི་ཐབས་ནི། དེ་ལ་བུམ་པ་ཤིན་ཏུ་དཀར་བ། གཙང་བ། ཆོ་ག་ཐམས་ཅད་ཚོགས་པ་བའི་རྣམ་ལྔའི་དཀྱིལ་འཁོར་
[259b.4]ཤིན་ཏུ་གཙང་བ་དྲིའི་ཐིག་ལེ་ཉེར་གཅིག་ག་པུར་གྱིས་བྱུག་པ་བྱས་ལ། རིག་སྔགས་འདི་བརྒྱ་རྩ་བརྒྱད་ཡིད་ལ་མ་ཡེངས་པར་བརྗོད་ནས་ཁྲུས་བྱས་སམ་བརྗོད་ན་ཚེ་ཟད་པ་དང་ཚེ་ཉམས་པ་དང་། ཕུན་སུམ་ཚོགས་པ་ཐམས་ཅད་ཉམས་པ་དང་། བདག་ལ་མི་དང་མི་མ་ཡིན་པ་ཐམས་ཅད་བསམ་པ་ཞིག་པར་
[259b.5]འགྱུར་རོ། །སྔོན་གྱི་ལས་ཀྱི་སྒྲིབ་པ་ཡང་མ་ལུས་པར་ཟད་པར་འགྱུར་རོ། །བུམ་པའི་ཐབས་སོ། །ཞི་བ་ལ་ནི་མངར་གསུམ་དང་འོ་མའོ། །རྒྱས་པ་ལ་ནི་ཟས་མཆོག་གི་གོང་བུ་དང་ཡུངས་ཀར་རོ། །དབང་ལ་ནི་ཡུངས་མར་དང་འབྲས་རྣམ་པ་སྣ་ཚོགས་དང་ནིམ་པའི་ལོ་མའོ། །དྲག་པོ་ལ་ནི་ཤ་དང་ཁྲག་དང་
[259b.6]དུག་དང་། སྐེ་ཚེ་དང་ཏིལ་མར་རམ་ཚིལ་གཞག་གོ། །རིག་སྔགས་བརྒྱ་རྩ་བརྒྱད་པ་གསུམ་མམ། བདུན་པ་གསུམ་བརྗོད་པར་བྱའོ། །རིག་སྔགས་རེ་རེ་ཞིང་རྫས་རེ་རེ་དབུལ་བར་བྱའོ། །ཞི་བ་ལ་ནི་མཐར་སྭཱ་ཧཱ་བརྗོད་པར་བྱའོ། །རྒྱས་པ་ལ་ཨོཾ། དབང་ལ་ཧོཿ། དྲག་པོ་ལ་ཕཊ། རིག་སྔགས་
[259b.7]འདི་ཡིས་སྭཱ་ཧཱ་ལ་སོགས་པ་མི་བརྗོད་པ་ནི་ཕྲིན་ལས་རྣམ་བཞིའི་སྤྱི་ལས་པའོ། །ཏིལ་གྱི་སྦྱིན་སྲེག་བྱས་པས་མཚམས་མེད་པ་ལྔ་ནས་ཉེས་པ་ཕྲ་མོ་ཡན་ཆད་འབྱང་བར་འགྱུར་རོ། །དེ་ལ་རིག་སྔགས་ལན་རེ་ཞིང་རྫས་ལན་རེ་དབུལ་བར་བྱའོ། །དེ་ལ་གྲངས་ནི་བརྒྱ་རྩ་བརྒྱད་པ་གསུམ་དབུལ་བར་བྱའོ། །
[260a]
[260a.1]ཐ་ན་རིག་སྔགས་གཅིག་ཙམ་ཏིལ་གཅིག་ཙམ་ཐབ་ཏུ་དོར་ན་ཡང་སྡིག་པ་འབྱང་བར་འགྱུར་ན་མང་བ་རྣམས་ལྟ་ཅི་སྨོས། སྡིག་པ་འབྱང་བའི་དབང་དུ་བྱས་པའོ། །དེ་ལ་རོ་བསྲེག་པ་ནི་དོང་གི་ནང་དུ་ཆོས་ཀྱི་འཁོར་ལོ་བྲི་བར་བྱའོ། །ཆོས་ཀྱི་ཡི་གེ་རྣམས་ཀྱང་བྲི་བར་བྱའོ། །ཤིང་བརྩིགས་
[260a.2]པ་ཐོགས་གསུམ་དང་ལྡན་པར་བྱས་ལ། སྟེང་ཁང་ལ་སྐར་ཁུང་བྱས། རོ་ཁ་ནུབ་ཕྱོགས་སུ་བསྟན་ལ་བཞག་གོ། །རོའི་སྙིང་གར་འཁོར་ལོ་རྩིབས་བཅུ་དྲུག་པ། རས་སམ་གྲོ་གའམ་ཤིང་ཤུན་ལ་བྲིས་ཏེ། དགབ་པར་བྱའོ། །འཁོར་ལོ་ལ་ཆོས་ཀྱི་ཡི་གེ་དགོད་པ་ནི་ཆོས་ཀྱི་འཁོར་ལོའོ། །དེའི་དབུས་ཀྱི་
[260a.3]ལྟེ་བ་ནས་གཟུངས་ཐག་བསྒྲིལ་བ་དྲངས་ལ་བསྔོ་བ་མཁན་གྱིས་གཟུང་སྟེ། ཆོས་ཀྱི་ཕྱག་རྒྱ་རིག་སྔགས་འདི་བརྗོད་པར་བྱའོ། །འདིའི་བསམ་པ་ནི་རིག་སྔགས་འདི་བརྗོད་པས་ཆོས་ཀྱི་ཡི་གེ་རྣམས་གསལ་བར་འགྱུར་རོ། །ཆོས་ཀྱི་ཡི་གེ་གསལ་བས་དབུས་ཀྱི་ཡི་གེ་ཨོཾ་གསལ་བར་འགྱུར་རོ། །ཨོཾ་ཡེ་
[260a.4]ཤེས་ཀྱི་མེ་བྱུང་བས་ཕུང་པོ་ཚིག་པས་ཡེ་ཤེས་ལྔའི་འོད་ཟེར་འཕྲོས་པས། དེ་བཞིན་གཤེགས་པ་ཐམས་ཅད་ལ་མཆོད་པ་ནི། རྒྱུད་ལས་ཇི་སྐད་གསུངས་པ་བཞིན་མཆོད་པར་བྱའོ། །སེམས་ཅན་རྣམས་ལ་བསྔོ་བ་ནི། དབང་པོ་ལྔའི་ལོངས་སྤྱོད་དུ་འདོད་པ་ལྔའི་ལོངས་སྤྱོད་ཆར་བཞིན་འབབ་པར་
[260a.5]དམིགས་ཏེ། དེ་ནས་སྔགས་མཁན་གྱིས་རྫས་རེ་རེ་ལ་རིག་སྔགས་ལན་རེ་རེ་བརྗོད་པས་བརྒྱ་རྩ་བརྒྱད་པ་གསུམ་དབུལ་བར་བྱའོ། །སྲེག་རྫས་ནི་ཡམ་ཤིང་འོ་མ་ཅན་དང་། མར་དང་ཏིལ་ལ་སོགས་པ་དབུལ་བར་བྱའོ། །མཚན་བརྒྱ་རྩ་བརྒྱད་པའི་བསྟོད་པ་བྱའོ། །བཀྲ་ཤིས་པར་བྱ་བའི་ཕྱིར་གོང་དུ་
[260a.6]བསྟན་པའི་ཕྲིན་ལས་རྣམ་པ་བཞི་ཆར་བྱའོ། །དེ་ནས་བསྔོ་བ་མཁན་གྱིས་ཚེ་ཐལ་བ་དང་། སེམས་ཅན་གྱི་ལས་གསུམ་པ་བླ་ན་མེད་པའི་བྱང་ཆུབ་ཏུ་བསྔོ་བར་བྱའོ། །དེ་ལ་ཆོས་ཀྱི་འཁོར་ལོ་བསྐོར་བ་ནི། བསྔོ་བ་མཁན་གྱིས་བསྐོར་བ་དང་། སྔགས་མཁན་གྱིས་རོའི་དབུས་སུ་བསྐོར་བ་ཕྲིན་ལས་རྣམ་བཞིའི་དོན་
[260a.7]དུ་བསྐོར་བ་ནི། ཆོས་ཀྱི་འཁོར་ལོ་རྣམ་པ་གསུམ་དུ་བསྐོར་བའོ། །ལན་བཅུ་གཉིས་སུ་བསྐོར་བ་ནི། རྡོ་རྗེ་སེམས་དཔའ་ནས་རྡོ་རྗེ་ཁུ་ཚུར་དུ་བསྐོར་བ་ནི་ཞི་བའོ། །རྡོ་རྗེ་རིན་ཆེན་ནས་རྡོ་རྗེ་ལེགས་པར་བསྐོར་བ་ནི་རྒྱས་པའོ། །རྡོ་རྗེ་ཆོས་ནས་རྡོ་རྗེ་བཞད་པ་ལ་བསྐོར་བ་ནི་དབང་ངོ་། །རྡོ་རྗེ་ལས་ནས་རྡོ་རྗེ་སྨྲ་བ་ལ་
[260b]
[260b.1]ཐུག་པ་ནི་དྲག་པའོ། །དེ་རྣམ་པ་བཅུ་གཉིས་སུ་བསྐོར་བའོ། །གོང་དུ་བསྐོར་བ་ཐམས་ཅད་དེ་ལྟར་བསྐོར་བར་བྱའོ། །ཡི་གེ་བརྒྱ་པའི་ཆོ་ག་སློབ་དཔོན་པདྨས་མཛད་པ་རྫོགས་སོ།། {T3647}༄༅༅། །རྒྱ་གར་སྐད་དུ། ཨཱརྱ་མི་ཏྲི་ཡ་སཱ་དྷ་ནཾ། བོད་སྐད་དུ། འཕགས་པ་བྱམས་པའི་སྒྲུབ་ཐབས།
[260b.2]རྗེ་བཙུན་བྱམས་པ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ། སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་དུ་བཞུགས་པ། ཞལ་གསུམ་པ། སྤྱན་གསུམ་གསུམ་པ། ཕྱག་བཞི་པ། ནག་པོ་དང་། དཀར་པོའི་ཞལ་ནི་གཡས་དང་
[260b.3]གཡོན་ནོ། །དབུས་ཀྱི་ཞལ་གསེར་གྱི་མདོག་ཅན་རབ་ཏུ་སེར་བ། ཕྱག་དང་པོ་གཉིས་ཆོས་འཆད་ཀྱི་ཕྱག་རྒྱ་འཛིན་པ། གཡས་དང་གཡོན་གྱི་ཕྱག་གཉིས་ཀྱིས་མཆོག་སྦྱིན་དང་། ཀླུ་ཤིང་གི་མེ་ཏོག་རྒྱས་པའི་སྙེ་མ་བསྣམས་པ། རྒྱན་སྣ་ཚོགས་པས་བརྒྱན་པའི་གཟུགས་ཅན་གྱི་བྱམས་པ་མགོན་པོར་
[260b.4]བདག་ཉིད་བསྒོམ་པར་བྱའོ། །ཁུ་ཚུར་སོ་སོར་བཅིངས་ལ། མཛུབ་མོ་མཐེ་བོང་གི་དབུས་སུ་བཞག་པ་མེ་ཏོག་གི་རྣམ་པར་བྱས་ལ་དེ་ནས་སྔགས་བཟླས་པར་བྱ་སྟེ། ཨོཾ་མཻ་མཻ་ཏྲི་མཻ་ཏྲི་ཡེ་སྭཱ་ཧཱ། འཕགས་པ་བྱམས་པའི་སྒྲུབ་ཐབས་རྫོགས་སོ།། །།ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བཟང་པོས་མཛད་
[260b.5]པའོ། །ལོ་ཙཱ་བ་བྱམས་པ་དཔལ་གྱིས་བསྒྱུར་བའོ།། {T3648}༄༅༅། །རྒྱ་གར་སྐད་དུ། ཨཱརྱ་མི་ཏྲི་#ཡ་སཱ་དྷ་ནཾ། བོད་སྐད་དུ། འཕགས་པ་བྱམས་པའི་སྒྲུབ་ཐབས། རྒྱལ་བ་བྱམས་པ་ལ་ཕྱག་འཚལ་ལོ། །ཐོག་མར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་མཻཾ་གསེར་གྱི་མདོག་
[260b.6]ཅན་ལས་འོད་ཟེར་འཕྲོས་པས། བླ་མ་དང་། སངས་རྒྱས་དང་བྱང་ཆུབ་སེམས་དཔའི་ཚོགས་དང་། རྒྱལ་བ་བྱམས་པ་ཉིད་གཙོ་བྱས་པས་ཡང་དག་པར་བཀུག་སྟེ། ཨོཾ་སརྦ་ཏ་ཐཱ་ག་ཏ་#ཀཱ་ཡ་བཱ་ཀ་ཙིཏྟ་པྲ་ན་མེ་ན་བཛྲ་བནྡྷ་#ན་ཀ་རོ་མི་ཞེས་བྱ་བས་ཕྱག་འཚལ་བ་སྔོན་དུ་སོང་བས། ཨོཾ་བཛྲ་བུཥྤཾ་#ཨཱཿཧཱུཾ་སྭཱ་ཧཱ།
[260b.7]ཨོཾ་བཛྲ་དྷཱུ་པཾ་#ཨཱཿཧཱུཾ་སྭཱ་ཧཱ། ཨོཾ་བཛྲ་#དཱི་པཾ་ཨཱཿཧཱུཾ་སྭཱ་ཧཱ། ཨོཾ་བཛྲ་གནྡྷཾ་ཨཱཿཧཱུཾ་སྭཱ་ཧཱ#། ཨོཾ་བཛྲ་ནཻ་བི་དྱཾ་#ཨཱཿཧཱུཾ་སྭཱ་ཧཱ། ཞེས་པས་བྱིན་གྱིས་བརླབས་པས་མཆོད་པའི་ཚོགས་ཕུལ་ལ། དེ་དག་གི་སྤྱན་སྔར་སྡིག་པ་བཤགས་པ་དང་། རྗེས་སུ་ཡི་རང་བ་དང་།# བསྐུལ་བ་དང་། གསོལ་བ་གདབ་པ་
[261a]
[261a.1]དང་། བསྔོ་བ་དང་། སེམས་བསྐྱེད་པ་བྱས་ནས། བྱམས་པ་དང་། སྙིང་རྗེ་དང་དགའ་བ་དང་། བཏང་སྙོམས་ལས་ཚངས་པའི་གནས་པ་ལ་སོགས་#པར་ཡིད་ལ་བྱའོ། །དེ་ནས་ཨོཾ་ཤཱུ་ནྱ་#ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅#ཧཾ། ཞེས་བྱ་བའི་སྔགས་ལན་གསུམ་གྱི་བར་དུ་བརྗོད་དེ།
[261a.2]བརྫུན་པའི་རྣམ་པར་རྟོག་པ་གོམས་པར་བྱས་པའི་བག་ཆགས་ཀྱི་དབང་དུ་གྱུར་པ། རང་གི་སེམས་དང་#མིག་འཕྲུལ་མཁན་གྱིས་#ཉེ་བར་སྤྲུལ་པའི་སེམས་ཅན་དང་། སྣོད་ཀྱི་འཇིག་རྟེན་གྱི་#རྣམ་པར་འཁྲུལ་པའི་དྲི་མ་སྦྱང་བར་བྱ་#བའི་ཕྱིར། རྡུལ་དང་། ཁུག་རྣ་#དང་དུ་བ་དང་། ཁ་བ་དང་སྤྲིན་དང་། སྤྲིན་གྱི་
[261a.3]གྲིབ་མ་དང་བྲལ་བ། སྟོན་ཀའི་ཉི་མ་ཕྱེད་ཀྱི་ནམ་མཁའ་ལྟ་བུར་ཆོས་ཀྱི་དབྱིངས་མཐའ་དང་དབུས་མེད་པའི་རང་བཞིན་དུ་ཕྱི་ནང་དང་བཅས་པའི་འཇིག་རྟེན་གསུམ་པོ་མ་ལུས་པ་རྣམ་པར་བལྟ་བར་བྱའོ། །དེ་ལྟར་ཡུད་ཙམ་ཞིག་རྣམ་པར་དག་པའི་རང་བཞིན་རབ་ཏུ་རྟོག་པ་#ནམ་མཁའ་རྡོ་རྗེའི་ཏིང་ངེ་འཛིན་ཏེ། དེ་
[261a.4]ལ་གནས་པ་པཾ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཡི་གེ་མཻ་#ཞེས་བྱ་བའི་འོད་ཀྱིས་ཕྱི་ནང་དང་སྣོད་བཅུད་མཐའ་དག་སྦྱངས་ཏེ། ཐུབ་པ་སྐྱེས་མཆོག་བྱམས་པ་ནི། །ཞལ་གསུམ་སྤྱན་གསུམ་གྱིས་རྣམ་བརྒྱན། །དེ་ཡི་གདན་ནི་པདྨ་སྟེ། །སེམས་དཔའི་སྐྱིལ་ཀྲུང་གིས་བཞུགས་
[261a.5]པ། །ཕྱག་བཞི་ཡིས་ནི་རྣམ་པར་མཛེས། །བླ་མེད་ཆོས་སྟོན་ཕྱག་རྒྱ་ཡིས། །ཕྱག་གཉིས་དང་པོ་རྣམ་པར་བརྒྱན། །ཕྱག་གཡས་གཉིས་པ་ཉེར་བསྐྱོད་པས། །མཆོག་ཏུ་སེམས་ཅན་སྐྱོང་བ་པོ། །གཡོན་ཕྱག་ལྷ་རྫས་ཡལ་ག་འདུད། །ཀླུ་ཤིང་མེ་ཏོག་བཅས་པའོ། །སངས་རྒྱས་སྤྲིན་ནི་རབ་འཕྲོས་
[261a.6]ཤིང་#། །བྱང་ཆུབ་སེམས་ཀྱི་རང་བཞིན་འབར། །དངོས་གྲུབ་ཆེན་པོ་མཆོག་བསྒོམ་བྱ། །དེ་ནས་སྔ་མ་བཞིན་དུ་མཆོད་དེ། ཛཿཧཱུཾ་བཾ་ཧོཿཞེས་པའི་ཡི་གེ་བཞིས་དྲངས་ནས། དམ་ཚིག་སེམས་དཔའ་རང་ཉིད་ལ་དགུག་པ་དང་། གཞུག་པ་དང་། བཅིང་བ་དང་། དགེས་པར་བྱས་ལ། དབང་བསྐུར་བར་གསོལ་བ་
[261a.7]གདབ་པར་བྱའོ། །དེའི་རྗེས་ལ་སྐུ་གསུང་ཐུགས་ཀྱིས་བྱིན་གྱིས་བརླབས་ནས། རང་བཞིན་གྱིས་འོད་གསལ་བ་ཉིད་ཀྱིས་རྫོགས་པའི་རིམ་པ་བསྒོམ་པར་བྱའོ། །དེ་འོག་ཕྱག་རྒྱ་བཅིངས་#བྱས་ལ། །མཉམ་པར་གཞག་པར་གསང་སྔགས་བཟླས། །ལག་གཉིས་སོ་སོར་དག་ཏུ་བྱ། །ཁུ་ཚུར་བཅིངས་ཏེ་
[261b]
[261b.1]སྡིགས་མཛུབ་གཉིས། །མཐེ་བོའི་དབུས་སུ་གཞུག་བྱ་སྟེ། །མེ་ཏོག་རྣམ་པའི་མཆོད་པས་སོ། །ཨོཾ་མཻཾ་མཻ་#ཏྲི་མཻ་ཏྲི་ཡེ་#སྭཱ་ཧཱ། འཕགས་པ་བྱམས་པའི་སྒྲུབ་ཐབས་སློབ་དཔོན་ཐོགས་མེད་ཀྱིས་མཛད་པ་རྫོགས་སོ།། །།ཇོ་བོ་ཆེན་པོ་དང་། དགེ་བཤེས་#སྟོན་པས་བསྒྱུར་བ་ལས་དུས་ཕྱིས་པཎྜི་ཏ་ཆེན་པོ་བུདྡྷ་ཤྲཱི་
[261b.2]དང་། གནུབས་ལོ་ཙཱ་#བས་དག་པར་བཅོས་སོ། །ཨོཾ་མུ་ནི་མུ་ནི་སྨ་ར་#སྭཱ་ཧཱ།# །{T3649}༄༅༅། །རྒྱ་གར་སྐད་དུ། ཤྲཱི་ཨ་ཛི་ཏཱ་ནཱ་ཐ་སཱ་དྷ་ནཾ། བོད་སྐད་དུ། དཔལ་མི་ཕམ་མགོན་པོའི་སྒྲུབ་ཐབས་ཞེས་བྱ་བ། འཕགས་པ་བྱམས་པ་ལ་ཕྱག་འཚལ་ལོ། །ས་བཅུའི་དབང་ཕྱུག་
[261b.3]འཇིག་རྟེན་མགོན། །བྱམས་ཆེན་མི་ཕམ་མགོན་པོ་ལ། །ཕྱག་འཚལ་ནས་ནི་རང་དྲན་ཕྱིར། །དེ་ཡི་སྒྲུབ་ཐབས་མདོར་བསྡུས་བྱ། །དང་པོར་རེ་ཞིག་སྔགས་པས་ཡིད་དང་རྗེས་སུ་མཐུན་པའི་གནས་སུ་འདུག་སྟེ། ཚངས་པར་སྤྱོད་པ་དང་། ཚངས་པའི་གནས་པས་ལེགས་པར་གནས་པར་བྱས་ལ།
[261b.4]ཆོས་ཐམས་ཅད་སྟོང་པ་ཉིད་དུ་བསྒོམ་མོ། །དེའི་ངང་ལ་པདྨ་དང་ཟླ་བའི་སྟེང་དུ་བདག་ཉིད་ཡི་གེ་མཻཾ་གསེར་གྱི་མདོག་ཅན་བལྟས་ལ། འོད་ཟེར་སྤྲོ་བ་དང་བསྡུ་བ་སྔོན་དུ་སོང་བས་བྱང་ཆུབ་ཀྱི་ཀླུ་ཤིང་གི་བུམ་པས་མཚན་པར་བསམ་མོ། །དེ་ཡང་སྔ་མ་ལྟར་སྦྱར་ཏེ་སངས་རྒྱས་ཀྱི་ཞིང་ཡོངས་སུ་སྦྱངས་པས་
[261b.5]འཕགས་པ་བྱམས་པའི་སྐུར་ཉེ་བར་བལྟའོ། །དེ་ལ་འཕགས་པ་བྱམས་པ་གསེར་བཙོ་མའི་མདོག་ཅན། ཁྲུ་བརྒྱད་ཅུའི་ཚད་མངའ་བ་མཚན་བཟང་པོ་ཡོངས་སུ་དག་པས་བརྒྱན་པ། བརྩོན་པའི་ཆ་བྱད་འགྱིང་བག་ཕུན་སུམ་ཚོགས་པ་དང་ལྡན་པ། ཕྱག་གཡས་ཆོས་འཆད་དང་། གཡོན་ཀླུ་ཤིང་
[261b.6]རྒྱས་པའི་སྡོང་བུ་རིལ་བས་མཚན་པ་འཛིན་པ། སྐུ་བལྟ་བས་ཆོག་མི་ཤེས་ཤིང་རང་བཞིན་གྱི་འོད་ཀྱི་དཀྱིལ་འཁོར་རྣམ་པར་འཕྲོ་བ་རལ་པའི་ཅོད་པན་ཅན་མཛེས་པ་ལ། མཆོད་རྟེན་གྱིས་ནི་གཙུག་ཏོར་སྤྲས། །ཚངས་སྐུད་དང་ནི་ཕྲེང་བས་བརྒྱན། །སྙིང་གར་པགས་པ་བསྣམས་པའོ། །དེ་
[261b.7]རྗེས་མགོན་པོ་ཉིད་བསྐུལ་བ། །དགའ་ལྡན་ནས་ནི་ཡེ་ཤེས་དགུག །ཛཿཧཱུཾ་བཾ་ཧོཿའི་རིག་པ་ཡིས། །དམ་ཚིག་ལ་ནི་བསྟིམ་པར་བྱ། །དེ་ནས་མཆོད་སོགས་ཆོ་ག་བཞིན། །བྱམས་ལ་སྙིང་རྗེ་ཆེན་པོ་ཅན། །གྲུབ་པའི་གསང་སྔགས་བཟླས་པར་བྱ། །འབུམ་ཕྲག་བཅུས་ནི་བསྙེན་པ་
[262a]
[262a.1]འགྲུབ། །དངོས་དང་རྨི་ལམ་དག་མཐོང་ལ། །དགའ་ལྡན་གཞལ་མེད་བགྲོད་པ་དང་། །དེ་ཡི་ཕྱག་མཚན་གཉིས་མཐོང་ངམ། །མི་ཕམ་རྒྱལ་ཚབ་མཐོང་གྱུར་པ། །དེ་ཚེ་དེ་ཡི་དྲི་མ་དག །ཆུ་བོས་བྲོས་ནས་ཟོས་པ་ཡི། །ལྗོན་ཤིང་བཞིན་དུ་འབད་མེད་པར། །ཚེ་འདི་
[262a.2]ཉིད་ལ་ཟད་པར་བྱེད། །ཨོཾ་མཻཾ་མཻ་ཏྲི་མཻ་ཏྲི་ཡཻ་སྭཱ་ཧཱ། །སྒྲུབ་པོ་གང་ཞིག་འཕགས་པ་ལ། །དད་པ་མང་དང་འགྲོ་ལ་བརྩེ། །རྟག་ཏུ་སྨོན་ལམ་ཡང་སྟོན་པ། །དེ་དག་རྗེ་བཙུན་མདུན་དུ་སྐྱེ། །དཔལ་མི་ཕམ་མགོན་པོའི་སྒྲུབ་ཐབས། སློབ་དཔོན་ནི་རི་ཏི་པས་མཛད་པ། གནུབས་ལོ་ཙཱ་བ་
[262a.3]བྱམས་པའི་དཔལ་གྱིས་བསྒྱུར་བའོ།། {T3650}༄༅༅། །རྒྱ་གར་སྐད་དུ། སི་ཧ་ནཱ་ད་སཱ་དྷ་ནཾ། བོད་སྐད་དུ། སེང་གེའི་སྒྲའི་སྒྲུབ་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །གང་ཞིག་སྔགས་ཤེས་པའི་སྔགས་པ་དེས། བརྫུན་རྣམ་པ་ཐམས་ཅད་དུ་སྤང་བར་
[262a.4]བྱའོ། །དང་པོར་དུས་བཞི་ཁ་དག་པར་བཀྲུས་ཏེ། ཤིན་ཏུ་གནས་དབེེན་པར་བྲིས་སྐུ་ལ་སོགས་པའི་ཐད་དུ་དཀྱིལ་འཁོར་བྱས་ཏེ། མཆོད་པ་མང་པོ་ཕུལ་ལ་སྟན་བདེ་བ་ལ་འདུག་སྟེ། ཚད་མེད་པ་བཞི་བསྒོམ་མོ། །དེ་ནས་བདག་གི་སྙིང་གར་ཙཾ་ལས་ཟླ་བར་གྱུར་པའི་ཧྲཱིཿདཀར་པོ་བསམས་
[262a.5]པའི་འོད་ཀྱིས་ནམ་མཁར་བླ་མ་དང་སངས་རྒྱས་དང་བྱང་ཆུབ་སེམས་དཔའ་གསལ་བར་སྣང་བར་བྱས་ལ། ཡང་དེའི་འོད་འཕྲོས་པ་ལས་བྱུང་བའི་མཆོད་པའི་སྤྲིན་གྱིས་མཆོད་ལ་ཕྱག་བྱས་ཏེ། སྡིག་པ་བཤགས་ཤིང་རྗེས་སུ་ཡི་རང་ནས། དཀོན་མཆོག་གསུམ་ལ་སྐྱབས་སུ་གསོལ་ཏེ། རྒྱལ་
[262a.6]བའི་ལམ་ལ་གནས་པས་བྱང་ཆུབ་ཏུ་སེམས་བསྐྱེད་དེ། འོད་སླར་འདུས་པས་ཐམས་ཅད་སྟོང་པ་ཉིད་དུ་བསྒོམས་ཏེ། ཨོཾ་སྭ་བྷཱ་ཝ་ཤུདྷཱཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དོ། །དེ་ནས་མྱུར་དུ་པཾ་ལས་པདྨ་དམར་པོར་ཨ་ལས་གྱུར་པའི་སེང་གེའི་གདན་གྱི་
[262a.7]སྟེང་དུ་ཙཾ་ལས་བྱུང་བའི་ཟླ་བའི་དཀྱིལ་འཁོར་དུ་ཧྲཱིཿལས་སེང་གེའི་སྒྲ་ཞལ་གཅིག་ཕྱག་གཉིས་སྐུ་མདོག་དཀར་པོ་དབུ་སྐྲའི་ཅོད་པན་ཅན་དང་། སྣང་བ་མཐའ་ཡས་ཀྱི་དབུ་རྒྱན་ཅན། སྤྱན་གསུམ་པ། ཕྱེད་སྐྱིལ་དུ་རྒྱལ་པོ་ཆེན་པོའི་བཞུགས་ཐབས་སུ་བཞུགས་པ། ཕྱག་གཡོན་གྱི་ཕྱག་མཐིལ་ས་ལ་སྦྱར་
[262b]
[262b.1]བའི་མཐེབ་མཛུབ་ཀྱིས་རལ་གྲིས་མཚན་པའི་པདྨ་བཟང་པོའི་ཡུ་བ་འཛིན་པ། དེའི་ངོས་སུ་གཞན་ཡང་བྷརྙ་དཀར་པོ་དྲི་ཞིམ་པའི་མེ་ཏོག་སྣ་ཚོགས་ཀྱིས་བཀང་བའི་པདྨའི་ཡུ་བ་ཅན་ཡོད་པ་དང་། ཕྱག་གཡས་པ་པུས་མོ་ལ་བརྟེན་ཏེ་བརྐྱང་བ་ལ་བརྟེན་པར་ཏྲི་ཤཱུ་ལ་སྦྲུལ་དཀར་པོས་དཀྲིས་པ་ཡོད་ཅིང་།
[262b.2]བསམ་གཏན་མཛད་པའི་ཚུལ་ཅན་དབུའི་ཐད་ཀ་ནས་རིགས་ལྔའི་སངས་རྒྱས་འཕྲོ་བ་བསྒོམས་ལ། སྙིང་གའི་ཟླ་བར་ཏྭེཿབསམས་པ་ཛཿཧཱུཾ་གིས་ཡེ་ཤེས་སེམས་དཔའ་བཀུག་སྟེ། བཾ་གྱིས་དབང་དུ་བྱས་ནས་ཧོཿས་དགྱེས་པ་བསྐྱེད་པར་བསམ་མོ། །དེ་ནས་འཛབ་ནི་ཨོཾ་ཨཱཿ་ཧྲཱིཿསིཾ་ཧ་ནཱ་ད་ཧཱུཾ་ཕཊ། སེང་གེ་སྒྲའི་སྒྲུབ་
[262b.3]ཐབས་རྫོགས་སོ།། {T3651}༄༅༅། །རྒྱ་གར་སྐད་དུ། ཨཱརྱ་ཁརྶ་པཱ་ཎི་ལོ་ཀ་ནཱ་ཐ་སཱ་དྷ་རྒནཾ། བོད་སྐད་དུ། འཕགས་པ་ཁརྶ་པཱ་ཎི་འཇིག་རྟེན་མགོན་པོའི་སྒྲུབ་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །གནས་དབེན་པར་བདེ་བའི་སྟན་ལ་སྔགས་པ་འདུག་སྟེ། དང་པོར་ཚངས་
[262b.4]པའི་གནས་བཞི་བསྒོམ་མོ། །དེ་ནས་སྙིང་གར་ཨ་ལས་ཟླ་བར་ཧྲཱིཿདཀར་པོ་བསམས་པའི་འོད་འཕྲོས་པས། མདུན་གྱི་ནམ་མཁའ་ལ་བླ་མ་དང་། སངས་རྒྱས་དང་བྱང་ཆུབ་སེམས་དཔའ་གསལ་བར་དམིགས་པར་བྱའོ། །ཡང་དེའི་འོད་ལས་བྱུང་བའི་མཆོད་པའི་སྤྲིན་གྱིས་མཆོད་པ་ལ་སོགས་པ་སྔ་
[262b.5]མ་བཞིན་དུ་བྱའོ། །དེའི་འོག་ཏུ་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་བརྗོད་པས་བདག་ཉིད་སྟོང་པར་བསྒོམ་མོ། །དེ་ནས་སྣ་ཚོགས་པདྨ་ཟླ་བའི་དཀྱིལ་འཁོར་དུ་ཧྲཱིཿགསལ་བའི་འོད་འཕྲོས་པས། འགྲོ་བ་རིགས་ལྔའི་སྡུག་བསྔལ་ཐམས་ཅད་སྦྱངས་ནས། སླར་དེ་ཉིད་དུ་འདུས་པ་ལས་
[262b.6]བདག་ཉིད་འཇིག་རྟེན་དབང་ཕྱུག་ཏུ་གྱུར་པར་བསམ་མོ། །དེ་ཡང་ཞལ་གཅིག་ཕྱག་གཉིས་པ་སྐུ་མདོག་དཀར་པོ་སྐྱེད་སྐྱིལ་གྱིས་བཞུགས་པ། དབུ་སྐྲའི་ཅོད་པན་ཅན་དང་། སྣང་བ་མཐའ་ཡས་ཀྱི་དབུ་རྒྱན་ཅན། རྒྱན་ཐམས་ཅད་ཀྱིས་བརྒྱན་པ། མཛེས་པའི་ན་བཟའ་གསོལ་པ། ཕྱག་གཡས་
[262b.7]པུས་མོ་ལ་བརྟེན་ཏེ་བརྐྱང་པ། གཡོན་པ་པདྨ་བསྣམས་པར་བསྒོམས་ལ་དཔྲལ་བར་ཟླ་བ། མགྲིན་པར་ཨོཾ། སྙིང་གར་ཨཱཿཧཱུཾ་རྣམས་གསལ་བར་བྱའོ། །དེའི་གཡས་ངོས་སུ་ལྷ་མོ་སྒྲོལ་མ་གཞོན་ནུའི་ཚུལ་ཅན་དང་། གཡོན་ན་ཁྲོ་གཉེར་ཅན་དང་ཁྲོ་བོ་བདུད་རྩི་འཁྱིལ་པ་བསམ་མོ། །དེ་ལྟར་
[263a]
[263a.1]བསམ་གཏན་བྱས་པའི་འོག་ཏུ་བཟླས་པ་ནི་ཨོཾ་ཧྲཱིཿསྭཱ་ཧཱ། འཕགས་པ་ཁརྶ་པཱ་ཎི་འཇིག་རྟེན་མགོན་པོའི་སྒྲུབ་ཐབས་རྫོགས་སོ།། {T3652}༄༅༅། །རྒྱ་གར་སྐད་དུ། ཏཱ་རཱ་དེ་བཱི་སཱ་དྷ་ནཾ། བོད་སྐད་དུ། ལྷ་མོ་སྒྲོལ་མའི་སྒྲུབ་ཐབས། ལྷ་མོ་སྒྲོལ་མ་ལ་ཕྱག་འཚལ་ལོ། །
[263a.2]སྔར་བཤད་པའི་ཆོ་གས་བདུད་རྩིའི་དཀྱིལ་འཁོར་དེའི་དབུས་སུ་ཡི་གེའི་སྡེ་ཚན་ལྔའི་དང་པོའི་ས་བོན་ལ། དང་པོའི་གཉིས་པས་རྫོགས་པར་བྱས་པ་ལ་ཟླ་བ་ཕྱེད་པ་དང་། ཐིག་ལེས་བརྒྱན་པ། དེ་ཉིད་ལས་བྱུང་བའི་ལྷ་མོ་སྒྲོལ་མ་བསྒོམ་པར་བྱའོ། །སྐུ་མདོག་ལྗང་གུ་ཕྱག་གཉིས་པ། གཡས་ཀྱིས་
[263a.3]མཆོག་སྦྱིན་པ། གཡོན་ན་ཨུཏྤ་ལ་བསྣམས་པ། པདྨ་དང་ཟླ་བ་ལ་བཞུགས་པ། རྒྱན་ཐམས་ཅད་ཀྱིས་བརྒྱན་པར་བསམ་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་ཐལ་མོ་སྦྱར་ལ། མཛུབ་མོ་གཉིས་གུང་མོ་བཅིངས་ལ་བཅར་བ་ནི་ལྷ་མོ་སྒྲོལ་མའི་ཨུཏྤ་ལ་ཁ་བྱེ་བའི་
[263a.4]ཕྱག་རྒྱའོ། །དེའི་འོག་ཏུ་སྔགས་བཟླས་པར་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ལྷ་མོ་སྒྲོལ་མའི་སྒྲུབ་ཐབས་རྫོགས་སོ།། {T3653}༄༅༅། །རྒྱ་གར་སྐད་དུ། བྷ་ག་བ་ཏཱི་པྲཛྙཱ་པ་རཱ་མི་ཏཱ་སཱ་དྷ་ནཾ། བོད་སྐད་དུ། བཅོམ་ལྡན་འདས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། བཅོམ་
[263a.5]ལྡན་འདས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔར་བཤད་པ་ལྟར་གདོང་པ་བཀྲུ་བ་ལ་སོགས་པ་བྱས་ནས། དེའི་རྗེས་ལ་བདག་ཉིད་ཀྱི་སྙིང་གར་པདྨ་འདབ་མ་བརྒྱད་པའི་དབུས་སུ་ཨ་ལས་བྱུང་བའི་ཟླ་བའི་དཀྱིལ་འཁོར་གྱི་དབུས་སུ་ཡི་གེ་དྷཱིཿ། དེ་ལས་བྱུང་བའི་པདྨ་ཤེས་རབ་
[263a.6]ཀྱི་ཕ་རོལ་ཏུ་ཕྱིན་པའི་གླེགས་བམ་གྱིས་མཚན་པ། འདི་དག་ཡོངས་སུ་གྱུར་པ་ལས། ཤེས་རབ་ཀྱི་ཕ་རོལ་ཏུ་ཕྱིན་མ་པདྨ་དང་། ཟླ་བའི་གདན་ལ་རྡོ་རྗེ་སྐྱིལ་མོ་ཀྲུང་གིས་བཞུགས་པ། སྐུ་མདོག་དཀར་བ་གཡས་ཀྱིས་མཆོག་སྦྱིན་པ། གཡོན་པ་ན་པདྨ་བསྣམས་པ། རྒྱན་ཐམས་ཅད་ཀྱིས་
[263a.7]བརྒྱན་པ། བསམ་གཏན་ལ་གཅིག་ཏུ་གཞོལ་བ། མེ་ཏོག་དྲི་ཞིམ་པོས་བརྒྱན་པའི་རལ་པ་དང་ཅོད་པན་ཏེ། རེ་ཞིག་དེ་ལྟ་བུར་བསམས་ལ། མཆོད་པའི་དུས་ཀྱི་ཚེ་དཀྱིལ་འཁོར་གྱི་གནས་སུ་ལྷ་བརྒྱད་པོ་བདག་ཉིད་དང་འདྲ་བ་དང་ལྷན་ཅིག་ཏུ་སྔགས་འདིས་མཆོད་པར་བྱའོ། །ཨོཾ་པྲ་ཛྙེ་མ་ཧཱ་པྲ་ཛྙེ་
[263b]
[263b.1]ཧཱུཾ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས་རྫོགས་སོ། །{T3654}༄༅༅། །རྒྱ་གར་སྐད་དུ། མཉྫུ་གྷོ་ཥ་མ་ཧཱ་རཱ་ཛ་ལཱི་ལ་སཱ་དྷ་ནཾ། བོད་སྐད་དུ། རྒྱལ་པོ་ཆེན་པོ་རོལ་པའི་འཇམ་པའི་དབྱངས་ཀྱི་སྒྲུབ་ཐབས། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བཅོམ་
[263b.2]ལྡན་འདས་འཇམ་པའི་དབྱངས་ཀྱི་སྒྲུབ་ཐབས་བརྗོད་པར་བྱ་སྟེ། ས་བོན་དྲུག་པའི་ལྔ་པ་ལ་དབྱངས་ཀྱི་ཡི་གེ་ལྔ་པས་བརྒྱན་པ། སྟོང་པའི་ལྷས་མནན་པ། ས་བོན་དེ་ཉིད་ལས་བྱུང་བའི་མགོན་པོ་འཇམ་པའི་དབྱངས་གཞོན་ནུའི་ཆ་ལུགས་ཅན། རྒྱན་ཐམས་ཅད་ཀྱིས་བརྒྱན་པ། ཟུར་ཕུད་ལྔ་
[263b.3]པ། ཕྱག་གཡོན་ན་ཨུཏྤ་ལ་སྔོན་པོ་བསྣམས་པ། ཕྱག་གཡས་པ་རོལ་པས་སེང་གེའི་གདན་ལ་བཞུགས་པ། རྒྱན་ཐམས་ཅད་ཀྱིས་བརྒྱན་པར་བདག་ཉིད་བསམས་ལ། ལག་པ་གཉིས་ཐལ་མོ་ཁོང་སྟོང་དུ་བྱས་ལ། མཛུབ་མོ་གཉིས་ཀྱིས་སྲིན་ལག་གཉིས་ཀྱི་སེན་མོ་མནན་ཏེ་
[263b.4]བཞག་པ་ནི་ཨུཏྤ་ལ་ཁ་བྱེ་བའི་ཕྱག་རྒྱ་སྟེ། འདིས་སྙིང་ག་དང་། དཔྲལ་བ་དང་། ལྐོག་མ་དང་སྤྱི་བོར་གཏུགས་པར་བྱའོ། །ཨོཾ་ཝཱ་གཱི་ཤྭ་རི་མུཾ། མགོན་པོ་འཇམ་པའི་དབྱངས་ཀྱི་རྒྱལ་པོ་ཆེན་པོ་སྒེག་པའི་སྒྲུབ་ཐབས་རྫོགས་སོ།། {T3655}༄༅༅། །རྒྱ་གར་སྐད་དུ། ཨཱརྱ་ཡ་
[263b.5]མཱནྟ་ཀ་སཱ་དྷ་ནཾ། བོད་སྐད་དུ། འཕགས་པ་གཤིན་རྗེ་གཤེད་ཀྱི་སྒྲུབ་པའི་ཐབས། འཕགས་པ་ཁྲོ་བོ་གཤིན་རྗེ་གཤེད་ལ་ཕྱག་འཚལ་ལོ། །དེ་བཞིན་དུ་ཨོཾ་ཧཱུཾ་ཞེས་བྱ་བའི་ས་བོན་ལས་བསྐྱེད་ལ། ཁྲོ་བོའི་སྐྱིལ་ཀྲུང་གིས་ཉི་མ་ལ་གནས་པའི་ཡི་གེ་ཧཱུཾ་ལས་བྱུང་བའི་གཤིན་རྗེ་གཤེད་རབ་
[263b.6]ཏུ་ཁྲོས་པ། ཞལ་དྲུག་པ་ཕྱག་དྲུག་པ། དབུ་སྐྲ་གྱེན་དུ་བརྫེས་པ། མ་ཧེ་ལ་ཆིབས་པ་གཡོན་བརྐྱང་བས་བཞུགས་པ། མིའི་ཐོད་པ་དང་རྒྱུ་མས་བརྒྱན་པ། ཤིན་ཏུ་འཇིགས་པའི་ཆ་ལུགས་ཅན། སྟག་གི་པགས་པའི་སྨད་གཡོགས་ཅན། ཕྱག་གཡས་ན་རལ་གྲི་དང་རྡོ་རྗེ་བསྣམས་པ། གཡོན་
[263b.7]ན་དྲིལ་བུ་དང་། རྡོ་རྗེ་གཏུན་ཤིང་བསྣམས་པ། ཅོད་པན་མི་བསྐྱོད་པས་མཚན་པ་བསྒོམ་པར་བྱའོ། །དེ་ནས་དམ་ཚིག་གི་ཕྱག་རྒྱ་བཅིང་བར་བྱ་སྟེ། ཐལ་མོ་ཁོང་སྟོང་དུ་སྦྱར་ལ་མཐེ་བོང་གཉིས་དང་མཛུབ་མོ་གཉིས་སོ་སོར་ཕྱེ་ལ་གུང་མོ་གཉིས་ཀྱི་ཚིགས་གསུམ་པ་བཅག་པར་བྱའོ། །ཨོཾ་ཧྲཱིཿཥྚྲཱྀཿབིཀྲྀ་
[264a]
[264a.1]ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འཕགས་པ་གཤིན་རྗེ་གཤེད་ཀྱི་སྒྲུབ་ཐབས་རྫོགས་སོ།། {T3656}༄༅༅། །རྒྱ་གར་སྐད་དུ། བ་སུ་དྷཱ་ར་སཱ་དྷ་ནཾ། བོད་སྐད་དུ། ལྷ་མོ་ནོར་གྱི་རྒྱུན་གྱི་སྒྲུབ་པའི་ཐབས། ལྷ་མོ་ནོར་གྱི་རྒྱུན་ལ་ཕྱག་འཚལ་ལོ། །དེ་ནས་ལྷ་མོ་ནོར་
[264a.2]གྱི་རྒྱུན་བསྒོམ་པར་འདོད་ན་ཐམས་ཅད་སྔ་མ་བཞིན་དུ་བྱས་ལ། གཞན་དུ་ན་ས་བོན་དྲུག་པའི་གསུམ་པ་ལ་ཟླ་བ་ཕྱེད་པ་དང་། ཐིག་ལེས་བརྒྱན་པ་དེ་ཉིད་ལས་བྱུང་བའི་ལྷ་མོ་ནོར་གྱི་རྒྱུན་སྐུ་མདོག་སེར་པོ། ཕྱག་གཡས་མཆོག་སྦྱིན་པ། གཡོན་འབྲས་སཱ་ལུའི་སྙེ་མ་དང་། རིན་པོ་ཆེ་སྣ་
[264a.3]ཚོགས་པའི་ཆར་འབེེབས་པའི་བུམ་པ་བསྣམས་པ། རྒྱན་ཐམས་ཅད་ཀྱིས་བརྒྱན་པ་སྟེ། གྲོགས་ཀྱི་ལྷ་མོས་བསྐོར་བའི་ལྷ་མོ་ནོར་གྱི་རྒྱུན་ནི་བདག་ཉིད་ཡིན་ནོ་ཞེས་བསྒོམ་པར་བྱའོ། །ལག་པ་གཉིས་ཀྱི་ཁུ་ཚུར་བཅིངས་ལ་གུང་མོའི་ཚིགས་གསུམ་པ་བཅག་པ་འདི་ནི་ལྷ་མོ་ནོར་གྱི་རྒྱུན་གྱི་
[264a.4]ཕྱག་རྒྱའོ། །དེ་ནས་བཟླས་བརྗོད་བྱས་ཏེ། ཨོཾ་ཤྲཱི་བ་སུ་ནི་དྷ་ནཀྵེ་ཏྲེ་སྭཱ་ཧཱ། རས་བྲིས་ལ་སོགས་པར་བཅོམ་ལྡན་འདས་ལྷ་མོ་ནོར་གྱི་རྒྱུན་སྤྱན་དྲངས་ལ་མཆོད་པ་ཡང་བྱ་སྟེ། བསྒོམ་པར་བྱའོ། །དེས་ནི་འགྲུབ་པར་འགྱུར་བར་ཐེ་ཚོམ་མེད་དོ། །ལྷ་མོ་ནོར་གྱི་རྒྱུན་སྒྲུབ་པའི་ཐབས་རྫོགས་སོ།། །།
[264a.5]{T3657}༄༅༅། །རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། ལྷ་མོ་ཀུ་རུ་ཀུལླེ་ལ་ཕྱག་འཚལ་ལོ། །ཆོ་ག་སྔར་བཤད་པ་དང་མཐུན་པ་ལས་གཞན་དུ་ན་ས་བོན་ཏཾ་དམར་པོ་ལས་བྱུང་བ། སྐུ་མདོག་དམར་པོ། པདྨ་དམར་པོ་དང་། ཟླ་བའི་གདན་ལ་བཞུགས་པ། རྒྱན་ཐམས་ཅད་ཀྱིས་
[264a.6]བརྒྱན་པ། ཕྱག་བཞི་པ་གཡས་མི་འཇིགས་པ། གཡོན་ཨུཏྤ་ལ་དམར་པོ་བསྣམས་པ། ཡང་ཕྱག་གཉིས་ཀྱིས་ཨུཏྤ་ལ་དམར་པོ་ཁ་བྱེ་བ་ལྟ་བུའི་མདའ་དང་། གཞུ་རྣ་བའི་མཐར་ཐུག་པར་བཀང་སྟེ། བསྒྲུབ་པར་བྱ་བ་མདུན་དུ་བསམས་ལ་སྙིང་གར་བསྣུན་ཏེ། སྔར་བཤད་པའི་ཨུཏྤ་ལའི་
[264a.7]ཕྱག་རྒྱས་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོར་གཏུགས་པར་བྱའོ། །དེ་ནས་བཟླས་བརྗོད་བྱ་སྟེ། ཨོཾ་ཀུ་རུ་ཀུལླེ་ཆེ་གེ་མོ་བ་ཤ་མཱ་ན་ཡ་སྭཱ་ཧཱ། དབང་དུ་བྱ་བའི་ཆོ་ག་རྫོགས་སོ།། །།བཟླས་པའི་དུས་སུ་ཁྱད་པར་དུ་འོད་ཟེར་གྱིས་སྡིག་སྒྲིབ་སྦྱངས་ཤིང་གཞན་དབང་དུ་བྱས་པར་ཡང་མོས་
[264b]
[264b.1]པས་སོ། །དོན་ཡོད་གྲུབ་པས་རྒྱས་གདབ་བོ།། {T3658}༄༅༅། །རྒྱ་གར་སྐད་དུ། ཛཾ་བྷ་ལ་སཱ་དྷ་ནཾ། བོད་སྐད་དུ། གནོད་གནས་ཀྱི་སྒྲུབ་པའི་ཐབས། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་གནོད་གནས་ལ་ཕྱག་འཚལ་
[264b.2]ལོ། །ནོར་འདོད་པ་དག་གིས་བསྒོམ་པར་འདོད་ན། ཆོ་ག་སྔར་བཤད་པ་བཞིན་དུ་བྱས་ལ། གཞན་དུ་ན་ས་བོན་གསུམ་པའི་གསུམ་པ་མདོག་སེར་པོ། ཐིག་ལེས་མནན་པ་ཟླ་བ་ཕྱེད་པས་བརྒྱན་པ། དེ་ཉིད་ལས་བྱུང་བའི་མགོན་པོ་གནོད་གནས་ཞལ་གཅིག་པ་ཕྱག་གཉིས་པ། གཡས་ན་བཱི་ཛ་པཱུ་རི་
[264b.3]བསྣམས་པ། གཡོན་ན་ནེའུ་ལེའི་རྐྱལ་པ་རིན་པོ་ཆེའི་ཆར་འབེབས་པ་བསྣམས་པ། སངས་རྒྱས་ལྔའི་ཅོད་པན་ཅན། ཞབས་གཉིས་ཀྱིས་དུང་གི་མགོ་ཅན་དང་པདྨའི་མགོ་ཅན་གྱི་གཏེར་ཆེན་པོ་མནན་པ། རིན་པོ་ཆེ་ལ་སོགས་པའི་ཆར་འབེབས་པ། རང་གི་ཁྱིམ་གྱི་ཕྱོགས་གཅིག་ཏུ་བསམ་
[264b.4]པར་བྱའོ། །ཨུཏྤ་ལ་སྔོན་པོའི་ཕྲེང་བ་ཁ་ཐུར་དུ་བལྟས་པ་རྒྱན་ཐམས་ཅད་ཀྱིས་བརྒྱན་པའི་གནོད་གནས་སུ་བདག་ཉིད་བསྒོམ་པར་བྱའོ། །དེ་ནས་ཕྱག་རྒྱ་ནི་ལག་པ་ཐལ་མོ་ཁོང་སྟོང་དུ་བྱས་ལ། གུང་མོ་གཉིས་ཀྱི་ཚིགས་གསུམ་པ་བཅག་པའི་ཕྱག་རྒྱས་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་
[264b.5]བོར་གཏུགས་ཏེ་བཟླས་བརྗོད་བྱའོ། །ཨོཾ་ཛཾ་བྷ་ལ་ཛ་ལེནྡྲཱ་ཡ་སྭཱ་ཧཱ། འདི་ཉིད་ཀྱི་ཆུ་སྦྱིན་བླུགས་བརྒྱ་རྩ་བརྒྱད་དབུལ་ལོ། །མཆོད་པ་ཡང་བྱས་ལ་བཟླས་པ་བརྩམ་པར་བྱའོ། །དེ་ནས་ནོར་གྱི་བདག་པོ་ཆེན་པོར་འགྱུར་བར་ཐེ་ཚོམ་མེད་དོ། །མགོན་པོ་གནོད་གནས་ཀྱི་སྒྲུབ་ཐབས་རྫོགས་སོ།། །།
[264b.6]{T3659}༄༅༅། །རྒྱ་གར་སྐད་དུ། བྷྲྀ་ཀུ་ཊི་སཱ་དྷ་ནཾ། བོད་སྐད་དུ། ཁྲོ་གཉེར་ཅན་གྱི་སྒྲུབ་པའི་ཐབས། བཅོམ་ལྡན་འདས་ཡུམ་ཁྲོ་གཉེར་ཅན་མ་ལ་ཕྱག་འཚལ་ལོ། །སྔར་བཤད་པའི་ཆོ་ག་ལས་ས་བོན་ལྔ་པའི་གསུམ་པ། དང་པོའི་བརྒྱད་པས་རྫོགས་པར་བྱས་པ་སྟོང་པས་མནན་པར་བསམས་ལ། དེ་
[264b.7]ཉིད་ལས་བྱུང་བའི་ལྷ་མོ་ཁྲོ་གཉེར་ཅན་མ། རལ་པ་དང་ཐོར་ཚུགས་འཆང་བ། ཞི་བ། ཕྱག་བཞི་པ་ཕྱག་གཡས་ན་མཆོག་སྦྱིན་དང་བགྲང་ཕྲེང་། གཡོན་ན་དབྱིག་པ་དང་སྤྱི་བླུགས་བསྣམས་པ། པདྨའི་གདན་ལ་བཞུགས་པར་བསྒོམ་པར་བྱའོ། །དེ་ནས་ལག་པ་གཉིས་ཀྱི་ཐལ་མོ་བརྐྱང་བ་སྦྱར་ལ།
[265a]
[265a.1]མཐེ་བོས་མཐེའུ་ཆུང་གི་སེན་མོ་མནན་ཏེ། སོ་སོར་ཕྱེ་ལ་ལྷག་མ་རྣམས་རྡོ་རྗེར་བྱ་བ་འདི་ནི་ལྷ་མོ་ཁྲོ་གཉེར་ཅན་མའི་ཕྱག་རྒྱའོ། །སྔགས་ལ་ཨོཾ་བྷྲཱྀ་སྭཱ་ཧཱ། ཁྲོ་གཉེར་ཅན་གྱི་སྒྲུབ་ཐབས་རྫོགས་སོ།། {T3660}༄༅༅། །རྒྱ་གར་སྐད་དུ། མཱ་རཱི་ཙྱཻ་དེ་ཝཱི་སཱ་དྷ་ནཾ། བོད་སྐད་དུ། ལྷ་མོ་འོད་
[265a.2]ཟེར་ཅན་གྱི་སྒྲུབ་ཐབས། ལྷ་མོ་འོད་ཟེར་ཅན་ལ་ཕྱག་འཚལ་ལོ། །དེ་ལ་དང་པོར་རེ་ཞིག་ཉི་མའི་དཀྱིལ་འཁོར་བསམས་ལ། དེའི་སྟེང་དུ་ས་བོན་ལྔ་པའི་ལྔ་པ་ལ། དང་པོའི་གཉིས་པ་རྫོགས་པར་བྱས་ལ། ཟླ་བ་ཕྱེད་པ་དང་ཐིག་ལེས་བརྒྱན་པ་བསམས་ལ། དེ་ལས་བྱུང་བའི་ལྷ་མོ་འོད་ཟེར་
[265a.3]ཅན་སྐུ་མདོག་དམར་བ། ཞལ་དྲུག་པ་ཞལ་དང་པོ་དམར་པོ། གཉིས་པ་ནག་པོ། གསུམ་པ་ལྗང་གུ། བཞི་པ་སེར་པོ། ལྔ་པ་དཀར་པོ། སྟེང་གི་དབུ་ཕག་གདོང་ནག་པོ། ཨ་ཤྭ་ཀ་དང་མཆོད་རྟེན་གྱིས་བརྒྱན་པ། གསུས་ཁྱིམ་ཆེ་བ་ཐོད་པའི་ཕྲེང་བ་ཅན་དབུ་སྐྲ་དམར་སེར་གྱེན་དུ་བརྫེས་པ། སྦྲུལ་
[265a.4]གྱི་ཞགས་པ་སྟག་ལྤགས་ཀྱི་ཤམ་ཐབས་བསྣམས་པ། བགེགས་རྣམས་ལྟུང་བར་མཛད་པ། ཁ་དོག་སྣ་ཚོགས་པའི་ཕག་གི་ཤིང་རྟ་ལ་གཡོན་བརྐྱང་བས་བཞུགས་པ། ཕྱག་གཡས་ན་རལ་གྲི་དང་། རྡོ་རྗེ་དང་གཏུན་ཤིང་དང་མདའ་དང་རྡོ་རྗེ་རྩེ་གཅིག་པ་དང་དགྲ་སྟ་བསྣམས་པ། གཡོན་ན་སྡིགས་
[265a.5]མཛུབ་ཞགས་པ་དང་བཅས་པ་དང་། ཐོད་པ་དང་ཨ་ཤྭ་ཀའི་ཞགས་པ་དང་། ཚངས་པའི་མགོ་བོ་དང་། གཞུ་དང་ཏྲི་ཤཱུ་ལ་བསྣམས་པ། སྤྱན་གསུམ་པར་བསམ་མོ། །མདུན་དུ་ཤིང་ཟླུམ་པོའི་དབུས་སུ་ལག་པ་གཉིས་པ་སྡིགས་མཛུབ་བསྒྲེང་བར་བསམས་ལ། བདག་ཉིད་བཅོམ་ལྡན་འདས་ཡུམ་
[265a.6]འོད་ཟེར་ཅན་ཡིན་ནོ་ཞེས་ང་རྒྱལ་བསྐྱེད་པར་བྱའོ། །དེ་ནས་ཕྱག་རྒྱ་བཅིང་བར་བྱའོ། །རྡོ་རྗེ་ཐལ་མོ་ཁ་སྦྱར་ལ་གུང་མོ་གཉིས་གཤིབས་ལ་མྱུ་གུར་བྱ་སྟེ་མཐེ་བོ་གཉིས་སྐྱིལ་ཀྲུང་དུ་བསྣོལ་ལ། མཛུབ་མོ་གཉིས་རྩེ་མོ་དགུག་པར་བྱའོ། །དེ་ནས་བཟླས་པའི་སྔགས་ནི་ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་
[265a.7]སྭཱ་ཧཱ། ལྷ་མོ་འོད་ཟེར་ཅན་གྱི་སྒྲུབ་པའི་ཐབས་རྫོགས་སོ། །སློབ་དཔོན་ཆེན་པོ་ཕྱག་རྒྱ་ཆེན་པོའི་དངོས་གྲུབ་བརྙེས་པ་དྲི་མ་མེད་པའི་ལྷས་མཛད་པའི་སྒྲུབ་ཐབས་བཅུ་གཅིག་རྫོགས་སོ།། {T3661}༄༅༅། །རྒྱ་གར་སྐད་དུ། མཱ་རཱི་ཙྱཻ་དེ་བཱི་སཱ་དྷ་ནཾ། བོད་སྐད་དུ། ལྷ་མོ་འོད་ཟེར་ཅན་གྱི་སྒྲུབ་ཐབས།
[265b]
[265b.1]ལྷ་མོ་འོད་ཟེར་ཅན་ལ་ཕྱག་འཚལ་ལོ། །དེ་ལ་དང་པོར་ཉི་མའི་དཀྱིལ་འཁོར་བསམས་ལ། དེའི་སྟེང་དུ་ས་བོན་ལྔ་པའི་ལྔ་པ་ལ། དང་པོའི་གཉིས་པ་རྫོགས་པར་བྱས་ལ། ཟླ་བ་ཕྱེད་པ་དང་ཐིག་ལེས་བརྒྱན་པར་བསམ། དེ་ལས་བྱུང་བའི་ལྷ་མོ་འོད་ཟེར་ཅན་སྐུ་མདོག་དམར་བ། ཞལ་དྲུག་པ། ཞལ་
[265b.2]དང་པོ་དམར་བ། གཉིས་པ་ནག་པ། གསུམ་པ་ལྗང་གུ། བཞི་པ་སེར་བ། ལྔ་པ་དཀར་བ། སྟེང་གི་དབུ་ཕག་གདོང་ནག་པོ། ཨ་ཤྭ་ཀ་དང་། མཆོད་རྟེན་གྱིས་བརྒྱན་པ། གསུས་ཁྱིམ་ཆེ་བ། ཐོད་པའི་ཕྲེང་བ་ཅན། དབུ་སྐྲ་དམར་སེར་གྱེན་དུ་བརྫེས་པ། སྦྲུལ་གྱི་ཞགས་པ་དང་སྟག་ལྤགས་ཀྱི་
[265b.3]ཤམ་ཐབས་ཅན། བགེགས་རྣམས་ལྟུང་བར་མཛད་པ། ཁ་དོག་སྣ་ཚོགས་པའི་ཤིང་རྟ་ལ་གཡོན་བརྐྱང་བས་བཞུགས་པ། ཕྱག་གཡས་པ་ན་རལ་གྲི་དང་། རྡོ་རྗེ་དང་། གཏུན་ཤིང་དང་། མདའ་དང་རྡོ་རྗེ་རྩེ་གཅིག་པ་དང་། དགྲ་སྟ་བསྣམས་པ། གཡོན་པ་སྡིགས་མཛུབ་ཞགས་པ་དང་
[265b.4]བཅས་པ་དང་། ཐོད་པ་དང་ཨ་ཤྭ་ཀའི་ཡལ་ག་དང་། ཚངས་པའི་མགོ་བོ་དང་། གཞུ་དང་། ཏྲི་ཤཱུ་ལ་བསྣམས་པའོ། །སྤྱན་གསུམ་པར་བསམ་ཞིང་། མདུན་དུ་ཤིང་ཟླུམ་པོའི་དབུས་སུ་ལག་པ་གཉིས་སྡིགས་མཛུབ་བསྒྲེང་བར་བསམས་ལ། བདག་ཉིད་བཅོམ་ལྡན་འདས་མ་ཡུམ་འོད་
[265b.5]ཟེར་ཅན་ཡིན་ནོ་ཞེས་པའི་ང་རྒྱལ་བསྐྱེད་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། རྡོ་རྗེ་ཐལ་མོ་ཁ་སྦྱར་ལ། གུང་མོ་གཉིས་གཤིབས་ལ་མྱུ་གུར་བྱས་ཏེ། མཐེ་བོང་གཉིས་སྐྱིལ་མོ་ཀྲུང་དུ་བསྣོལ་མཛུབ་མོ་གཉིས་རྩེ་མོར་དགུག་པར་བྱའོ། །དེ་ནས་བཟླས་པའི་སྔགས་ནི། ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་
[265b.6]ཕཊ་སྭཱ་ཧཱ། ལྷ་མོ་འོད་ཟེར་ཅན་གྱི་སྒྲུབ་ཐབས་རྫོགས་སོ།། །།ཡང་ན་སྒྲུབ་ཐབས་རས་རིས་ཀྱི་ཆོ་ག་ལས་བསྒོམ་པར་འདོད་ན། སྔར་བཤད་པའི་ཆོ་ག་དང་། དེ་བཞིན་དུ་རང་གི་སྙིང་གར་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་མཾ་ཞེས་བྱ་བ། ཡི་གེ་ཨ་དང་ཐིག་ལེ་དང་ལྡན་པའི་སྙིང་པོའི་མཆོག་བསམས་
[265b.7]ལ། དེ་ནས་འོད་ཟེར་སྣ་ཚོགས་པ་སྤྲོས་པ་ལས་བྱུང་བ་དེས། བླ་མ་དང་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔར་བསམས་ལ། མཆོད་པ་ལྔ་ལ་སོགས་པ་བྱས་ནས། ཆོས་བདག་མེད་པར་བསྒོམ་པར་བྱ་སྟེ། ཨོཾ་སྭ་བྷ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བྱ་བའི་སྔགས་ཀྱིས་དེ་ལྟར་
[266a]
[266a.1]ལྷག་པར་མོས་པར་བྱས་པས། ཁམས་གསུམ་པ་འདི་དག་མིག་ཡོར་ཙམ་དུ་ཤེས་པར་བྱས་ལ། དེའི་ས་བོན་ལས་བྱུང་བའི་ཨ་ཤྭ་ཀའི་ཡལ་ག །དེའི་སྟེང་དུ་ཡི་གེ་མཾ་དེ་ཐམས་ཅད་ཡོངས་སུ་གྱུར་པ་ལས་རྗེ་བཙུན་ལྷ་མོ་དེའི་སྐུར་བདག་ཉིད་བསམ་པ་ནི། ཡུམ་ལྷ་མོ་འོད་ཟེར་ཅན་སྐུ་
[266a.2]མདོག་འཛམ་བུ་ཆུ་བོའི་གསེར་ལྟར་ཤིན་ཏུ་སེར་བ། སྐུའི་འོད་ཟེར་ཉི་མ་ལྟར་འབར་བ། སྤྱི་བོར་མཆོད་རྟེན་གྱིས་བརྒྱན་པ། ན་བཟའ་དམར་པོ་དང་། སྐུ་སྟོད་ཚི་གུ་ཅན་གྱི་ཞིང་ཆུང་དུ་བསྣམས་པ། གདུ་བུ་སྣ་ཚོགས་དང་། རྒྱན་ཐམས་ཅད་ཀྱིས་བརྒྱན་པ། སོར་གདུབ་དང་། རྣ་རྒྱན་དང་། འོག་པག་དང་།
[266a.3]གཡེར་ཁ་དང་། ཞབས་གདུབ་ཀྱི་སྒྲ་འཁྲོལ་བ། ཞལ་གསུམ་པ། སྤྱན་གསུམ་པ། ཕྱག་བརྒྱད་པ། འོད་ཟེར་གྱི་ཕྲེང་བ་འབར་བ། མེ་ཏོག་བནྡྷུ་ཀ་དང་། རྒྱ་སྐྱེགས་ཀྱི་མདོག་འདྲ་བ་འཕྲོ་བ། སྤྱི་བོར་རྣམ་པར་སྣང་མཛད་ཀྱིས་མནན་པ། ཨ་ཤྭ་ཀའི་ཕྲེང་བས་དབུ་ལ་བརྒྱན་པ། ཕྱག་གཡས་ན་རྡོ་རྗེ་འོད་འཕྲོ་བ་
[266a.4]དང་། ཁབ་དང་། ལྕགས་ཀྱུ་དང་། མདའ་གསོར་བ་ལ་དགྱེས་པ། ཕྱག་གཡོན་ཞགས་པ་དང་། གཞུ་དང་ཨ་ཤྭ་ཀའི་ཡལ་ག་དང་། སྐུད་པ་བསྣམས་པ། ཞལ་དང་པོ་ཞི་བ། ཞལ་རས་རྒྱས་པ། གསེར་སྦྱངས་པ་ལྟར་ཤིན་ཏུ་སེར་བ། སྤྱན་ཤིན་ཏུ་རྒྱས་པ། ཞལ་གྱི་སྒྲོས་ལི་ཁྲིའི་རྡུལ་གྱིས་བཙོས་པ་
[266a.5]འདྲ་བ། སྒེག་པའི་ཉམས་ཀྱིས་གནས་པར་གྱུར་པ། ཞལ་གཡས་པ་པདྨ་རཱ་ག་ལྟར་ཤིན་ཏུ་དམར་བ། འོད་ཟེར་བཟང་པོ་འབར་བ་འཕྲོ་བ། ཞལ་གཡོན་པ་ཕག་གི་གདོང་འཕྲོ་བ་དང་བཅས་ཤིང་མི་སྡུག་པ། མཆེ་བ་རྣམ་པར་གཙིགས་ཤིང་འཇིགས་སུ་རུང་བ། ཨིནྡྲ་ནཱི་ལའི་མདོག་འདྲ་བ། ཉི་མ་བཅུ་གཉིས་དང་
[266a.6]འོད་མཉམ་པ། སྨིན་མ་བསྡུས་ཤིང་ཁྲོ་གཉེར་དང་ལྡན་པ། མཆེ་བ་གཙིགས་པ་འཇིགས་པ་རྣམས་ཀྱང་འཇིགས་པར་མཛད་པའོ། །དབུ་ལ་བཅོམ་ལྡན་འདས་རྣམ་པར་སྣང་མཛད་སྐུ་མདོག་གསེར་སྦྱངས་པ་ལྟར་ཤིན་ཏུ་དག་པ། བྱང་ཆུབ་མཆོག་གི་ཕྱག་རྒྱ་ཅན། རལ་པ་དང་ཐོར་ཚུགས་མངའ་བར་
[266a.7]བཞུགས་པ། གཞལ་ཡས་ཁང་མཆོད་རྟེན་གྱི་དབྱིབས་ལ་ཤིང་ཨ་ཤྭ་ཀའི་མེ་ཏོག་གིས་ཁྱབ་པའི་ནང་ན། ཕག་གི་སྟེང་ན་གཡོན་བརྐྱང་བའི་གནས་པས་བཞུགས་པ། གཞོན་ནུ་མ་དར་ལ་བབ་པའི་ཚུལ་ཅན། ཤིང་རྟའི་འོག་ན་ཧ་ལས་བྱུང་བའི་རླུང་གི་དཀྱིལ་འཁོར་གྱི་སྟེང་ན། གཟའ་ཆེན་པོ་སྒྲ་
[266b]
[266b.1]གཅན་འཛིན་ཉིན་མོ་ཉི་མ་འཛིན་པ་མཚན་མོ་ཟླ་བ་འཛིན་གནས་པ། ལྷ་མོ་བཞིས་ཡོངས་སུ་བསྐོར་བར་བདག་ཉིད་བསྒོམ་པར་བྱའོ། །དེའི་མདུན་དུ། ཨོཾ་མཱ་རཱི་ཙྱཻ་བཏྟཱ་ལི། བ་དཱ་ལི། བ་རཱ་ལི། བཱ་རཱ་ཧཱ་མུ་ཁི། ཨཱ་ཀཪྵ་ཡ་ཛཿསྭཱ་ཧཱ། ཞེས་བྱ་བས་ལྷ་མོ་སྐུ་མདོག་དམར་བ་ཞལ་གཅིག་པ། ཕག་
[266b.2]གི་གདོང་པ་ཅན་སྤྱན་གསུམ་པ། ཕྱག་བཞི་པ་གཡས་ན་ཁབ་དང་རྡོ་རྗེ་བསྣམས་པ། གཡོན་ན་གཞུ་དང་ཨ་ཤྭ་ཀའི་ཡལ་ག་བསྣམས་པ། ཞིང་ཆུང་དུ་སྟོད་གཡོགས་དམར་པོ་བསྣམས་པ། རྟོག་པ་ལས་གསུངས་པའི་ཆོ་ག་ཡིད་ལ་གང་ཞིག་སྒྲུབ་པར་འདོད་པའི་བུད་མེད་འགུགས་པར་
[266b.3]མཛད་པའོ། །དེ་བཞིན་དུ་གཡས་སུ། ཨོཾ་མཱ་རཱི་ཙྱཻ་བཏྟཱ་ལི། བ་དཱ་ལི། བ་རཱ་ལི། བཱ་རཱ་ཧཱ་མུ་ཁི། སརྦ་དུཥྚཱ་ནཾ། པྲ་དུཥྚཱ་ནཾ། མུ་ཁཾ་བནྡྷ་བནྡྷ་ཧཱུཾ་སྭཱ་ཧཱ། ལྷ་མོ་སྔར་བཤད་པའི་ན་བཟའ་དང་རྒྱན་དང་གཟུགས་དང་ལྡན་མོད་ཀྱི། འོན་ཀྱང་འདི་ནི་སྐུ་མདོག་སེར་བ། གཡས་ན་ཨ་ཤྭ་ཀའི་ཡལ་ག་དང་ཁབ་
[266b.4]བསྣམས་པ། གཡོན་ན་ཞགས་པ་དང་རྡོ་རྗེ་བསྣམས་པ། གདུག་པ་རྣམས་ཀྱི་ཁ་དང་མིག་འཚེམ་པར་མཛད་པའོ། །དེ་བཞིན་དུ་རྒྱབ་ཏུ། ཨོཾ་མཱ་རཱི་ཙྱཻ་བཏྟཱ་ལི། བ་དཱ་ལི། བ་རཱ་ལི། བཱ་རཱ་ཧཱ་མུ་ཁི། སརྦ་དུཥྚ་ནཾ། སྟཾ་བྷ་ཡ་བཾ་སྭཱ་ཧཱ། ཞེས་བྱ་བས་ལྷ་མོ་འདི་ཡང་ན་བཟའ་དང་རྒྱན་ལ་སོགས་པ་
[266b.5]སྔར་དང་འདྲ་མོད་ཀྱི། འོན་ཀྱང་ཕྱག་གཡས་ན་རྡོ་རྗེ་དང་ཁབ་གཡོན་ན་གཞུ་དང་ཨ་ཤྭ་ཀའི་ཡལ་ག་བསྣམས་པ། སྐུ་མདོག་ཨིནྡྲ་ནཱི་ལ་ལྟ་བུ་གདུག་པ་ཅན་ཐམས་ཅད་རེངས་པར་མཛད་པ་བསྒོམ་པར་བྱའོ། །གཡོན་དུ། ཨོཾ་མཱ་རཱི་ཙྱཻ། བཏྟཱ་ལི། བ་དཱ་ལི། བ་རཱ་ལི། བཱ་རཱ་ཧཱ་མུ་ཁི། སརྦ་
[266b.6]སཏྭ་ན་མེ་པ་ཤ་མ་ནཱ་ཡ་ཧོཿསྭཱ་ཧཱ། ཞེས་བྱ་བས་ལྷ་མོ་འདི་ཡང་ན་བཟའ་དང་རྒྱན་ལ་སོགས་པ་སྔ་མ་དང་མཐུན་མོད་ཀྱི་འོན་ཀྱང་སྐུ་མདོག་ཉི་མ་འཆར་ཀ་འདྲ་བ། ཕྱག་གཡས་ན་མདའ་དང་རྡོ་རྗེ་བསྣམས་པ། གཡོན་ན་གཞུ་དང་ཨ་ཤྭ་ཀའི་ཡལ་ག་བསྣམས་པ། སེམས་ཅན་ཐམས་ཅད་ལ་རྗེས་སུ་
[266b.7]ཆགས་པར་མཛད་པ་བསྒོམ་པར་བྱའོ། །དེ་ནས་རྡོ་རྗེ་ལྕགས་ཀྱུ་མ་ལ་སོགས་པའི་སྔགས་དང་ཕྱག་རྒྱས་དགུག་པ་ལ་སོགས་པ་བྱས་ལ། ཡེ་ཤེས་སེམས་དཔའ་དང་དམ་ཚིག་གི་ལྷ་གཅིག་ཏུ་བྱའོ། །དེ་ནས་བཟླས་བརྗོད་བྱ་བའི་སྔགས་ནི་འདིའོ། །ཨོཾ་མཱ་རཱི་ཙྱཻ་ཨོཾ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ཅི་ནུས་
[267a]
[267a.1]བཟླས་ལ་སྔར་བཤད་པའི་ཆོ་གས་གནས་པར་བྱའོ། །འོད་ཟེར་ཅན་གྱི་སྒྲུབ་ཐབས་བྱས་པ་ལས། །བདག་གིས་དགེ་བའི་རྩ་བ་གང་བསགས་དེས། །སེམས་ཅན་ཐམས་ཅད་འོད་ཟེར་ཅན་གྱི་ནི། །ཡེ་ཤེས་དྲི་མེད་གནས་ཐོབ་ཤོག །ལྷ་མོ་འོད་ཟེར་ཅན་གྱི་སྒྲུབ་ཐབས་སློབ་
[267a.2]དཔོན་ཀུན་དགའ་སྙིང་པོས་མཛད་པ་རྫོགས་སོ། །ལོ་ཙཱ་བ་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། {T3662}༄༅༅། །རྒྱ་གར་སྐད་དུ། ཨཱརྱ་མཱ་རཱི་ཙྱཻ་སཱ་དྷ་ནཾ་ནཱ་མ། བོད་སྐད་དུ། འཕགས་མ་འོད་ཟེར་ཅན་གྱི་སྒྲུབ་པའི་ཐབས་ཞེས་བྱ་བ། འཕགས་མ་
[267a.3]འོད་ཟེར་ཅན་ཉིད་ལ་ཕྱག་འཚལ་ལོ། །བློ་ལྡན་སེམས་དཔའི་སྐྱིལ་ཀྲུང་གིས། །སྙིང་རྗེ་ཆེན་པོ་རབ་དམིགས་ལ། །སྔ་བར་སྙིང་གར་ཟླ་བ་ལ། །ཨོཾ་ཡིག་དཀར་པོ་བསྒོམ་པར་བྱ། །རྣམ་སྣང་ཞེས་པའི་བདག་ཉིད་ཅན། །ཏི་ཡི་འོད་ཟེར་ཀུན་དུ་དཀར། །ར་བ་ཟླུམ་པོ་མཆོད་རྟེན་ཏེ། །
[267a.4]འབར་བའི་འོད་ཀྱིས་ཀུན་དུ་བརྒྱན། །བསྲུང་བའི་དོན་དུ་མདུན་དང་རྒྱབ། །གཡས་དང་གཡོན་དང་གཞན་ཡང་སྟེང་། །རིམ་བཞིན་མ་སོགས་བྲན་ལ་སོགས། །བུ་མོ་ལ་སོགས་བུམ་སོགས་དང་། །ལུགས་མ་ཐང་སྐུ་བཤེས་གཉེན་དང་། །པོ་ཏི་ལ་སོགས་ཇི་སྙེད་པའོ། །ཏི་ནས་སྙིང་གའི་ཟླ་
[267a.5]བར་མཾ། །མྱ་ངན་མེད་ཀྱི་ཡལ་གར་སྐྱེས། །འཕགས་མ་འོད་ཟེར་ཅན་མ་བསམ། །སྐུད་པ་ཁབ་རྣམས་བསྣམས་པ་མོ། །ལྡང་བའི་ཚུལ་གྱིས་གཡས་པ་ཡི། །སྣ་བུག་ནས་བྱུང་བདུན་ཉེར་གནས། །གདུག་ཅན་ཁ་དང་མིག་དྲུབས་ནས། །ར་བའི་ཕྱི་རོལ་དག་ཏུ་བྱས། །གཞན་ཡང་རིག་སྔགས་
[267a.6]བཟླས་པ་བྱ། །སྣ་བུག་གཡོན་འོངས་སྙིང་ག་རུ། །བཞུགས་ནས་མྱ་ངན་མེད་པར་འགྱུར། །མཚམས་བཅིང་བ་ནི་རབ་ཏུ་བྱ། །འོད་ཟེར་ཅན་གྱི་སྒྲུབ་ཐབས་སློབ་དཔོན་མྱ་ངན་མེད་པའི་དཔལ་གྱིས་མཛད་པ་རྫོགས་སོ།། {T3663}༄༅༅། །རྒྱ་གར་སྐད་དུ། བཛྲ་ཤྲཱྀ་ཁཾ་ལེ་སཱ་དྷ་ནཾ། བོད་སྐད་དུ། རྡོ་རྗེ་ལུ་
[267a.7]གུ་རྒྱུད་ཀྱི་སྒྲུབ་ཐབས། བཅོམ་ལྡན་འདས་མ་རྡོ་རྗེ་ལུ་གུ་རྒྱུད་ལ་ཕྱག་འཚལ་ལོ། །སྔར་བསྟན་པའི་ཆོ་གས་སྙིང་གར་ཟླ་བའི་དཀྱིལ་འཁོར་ལ་ཧཱུཾ་གི་ཡི་གེ་ལྗང་གུ་ལས་གྲུབ་པའི་རྡོ་རྗེ་ལུ་གུ་རྒྱུད་ཞལ་གསུམ་ཕྱག་དྲུག་མ། ཞལ་གཡས་པ་དང་ཅིག་ཤོས་སྔོ་བ་དང་དཀར་བ། ཞལ་སོ་སོ་ལ་སྤྱན་གསུམ་གསུམ་
[267b]
[267b.1]མངའ་བ། ཕྱག་གཡས་གསུམ་ན་རྡོ་རྗེ་དང་ལྕགས་སྒྲོག་དང་མདའ། ཕྱག་གཡོན་གསུམ་ན་སྡིགས་མཛུབ་དང་ཞགས་པ་དང་། གཞུའོ། །སྐུ་མདོག་སྔོ་བསངས་སུ་ལྗང་བ། ཞལ་ཅུང་ཟད་བཞད་པ། རྒྱན་ཐམས་ཅད་ཀྱིས་བརྒྱན་པ་སེམས་ཅན་སྡང་བ་རྣམས་འཇོམས་པར་བྱེད་པར་བདག་ཉིད་བསྒོམས་ལ་ཕྱག་རྒྱ་
[267b.2]བཅིང་བར་བྱའོ། །དེ་ལ་ལག་པ་གཉིས་ཁུ་ཚུར་སོ་སོར་བཅིངས་ལ་མཐེའུ་ཆུང་དང་མཛུབ་མོ་ལྕགས་སྒྲོག་གི་རྣམ་པར་བཅིང་བར་བྱའོ། །དེ་ནས་བཟླས་པ་ནི། ཨོཾ་བཛྲ་ཤྲཱྀ་ཁམ་ལེ་ཧཱུཾ་ཕཊ་སྭཱ་ཧཱ། ཞེས་པའོ། །འདི་ནི་རྡོ་རྗེ་ལུ་གུ་རྒྱུད་ཀྱི་སྒྲུབ་ཐབས། སློབ་དཔོན་ཆེན་པོ་ཛཻ་ཏ་རི་དགྲ་ལས་རྣམ་པར་རྒྱལ་བས་མཛད་
[267b.3]པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་སུ་མ་ཏི་ཀཱིརྟི་དང་། བོད་ཀྱི་ལོ་ཙཱ་བ་མཁས་པ་མར་པ་ཆོས་ཀྱི་དབང་ཕྱུག་གིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། {T3664}༄༅༅། །རྒྱ་གར་སྐད་དུ། ཁ་དི་#ར་བ་ན་ཏཱ་རཱ་#སཱ་དྷ་ནཾ། བོད་སྐད་དུ། སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས། སེང་
[267b.4]ལྡེང་ནགས་ཀྱི་སྒྲོལ་མ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་#ས་གཞི་ལེགས་ཤིང་མཉམ་ལ་གཙང་ཞིང་ཡིད་དགའ་བའི་མེ་ཏོག་སྣ་ཚོགས་པས་བརྒྱན་#པ། དབེན་པའི་ས་ཕྱོགས་སུ་སྟན་བདེ་བ་ལ་འདུག་སྟེ། རང་གི་སྙིང་གར་ཟླ་བ་ལ་ཏཱཾ་ཡིག་དཱུར་#བའི་མདོག་ལྟ་བུར་འོད་ཟེར་རྣམ་པ་ལྔ་འཕྲོ་བར་
[267b.5]བསམ་མོ། །དེ་ལས་འོད་ཟེར་རྣམ་པ་ལྔ་འཕྲོས་པས་འགྲོ་བ་ཐམས་ཅད་ཀྱི་སྡིག་སྒྲིབ་སྦྱངས་ཏེ་སླར་དེ་ཉིད་ལ་བསྡུའོ། །དེ་ནས་ཡང་རང་གི་སྙིང་གའི་ཏཱཾ་#ལས་འོད་སྤྲོས་པས། འོག་མིན་གྱི་གནས་ནས་ཇོ་མོ་སྒྲོལ་མ་མདུན་གྱི་ནམ་མཁའ་ལ་སྤྱན་དྲངས་ལ་གསལ་བར་བལྟས་ཏེ། བླ་ན་མེད་པའི་མཆོད་པ་#
[267b.6]བྱའོ། །དེ་ནས་སྡིག་པ་བཤགས་པ་ལ་སོགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསོད་ནམས་ཡོངས་སུ་བསྔོ་#བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་བསྟེན་#པ་དང་། བདག་ཉིད་ཀྱི་ལུས་དབུལ་བ་ལ་སོགས་པ་བྱས་ལ། བྱམས་པ་
[267b.7]དང་། སྙིང་རྗེ་དང་། དགའ་བ་དང་། བཏང་སྙོམས་རིམ་པ་བཞིན་དུ་བསྒོམ་པར་བྱའོ། །དེ་ནས་རང་བཞིན་གྱིས་དག་པའི་ཚིགས་སུ་བཅད་པ་འདི་ལན་གསུམ་བརྗོད་པར་བྱ་སྟེ། ཨོཾ་སྭ་བྷཱ་#ཝ་ཤུདྡྷཿསརྦ་དྷརྨཱཿ#སྭ་བྷཱ་#ཝ་ཤུདྡྷོ྅#ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་#ཝ་ཨཱཏྨ་ཀོ྅#ཧཾ། ཞེས་བརྗོད་པས་བདག་དང་གཞན་
[268a]
[268a.1]གྱི་དངོས་པོ་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །དེ་ནས་སྔོན་གྱི་སྨོན་ལམ་རྗེས་སུ་དྲན་པས་ནམ་མཁའི་ཁམས་སུ་པཾ་#ཡོངས་སུ་གྱུར་པ་ལ་#སྣ་ཚོགས་པདྨའི་ལྟེ་བར་ཨོཾ་ལས་ཟླ་བའི་དཀྱིལ་འཁོར་གྱི་སྟེང་དུ་དཱུར་#བའི་མདོག་ལྟ་བུའི་ཏཱཾ་#ཡིག་འོད་ཟེར་སྣ་ཚོགས་པ་ཅན་
[268a.2]བསྒོམས་ལ། དེ་ལ་འོད་ཟེར་འཕྲོས་པས་ཕྱོགས་བཅུའི་སངས་རྒྱས་རྣམས་བཀུག་ནས་དེ་ཉིད་ལ་ཞུགས་པར་བསྒོམ་སྟེ། དེ་རྣམས་ཡོངས་སུ་གྱུར་པ་ལས་#ལྷ་མོ་སྒྲོལ་མར་བསྒོམ་པར་བྱ་སྟེ། སྐུ་མདོག་ལྗང་གུ་ཞལ་གཅིག་ཕྱག་གཉིས་མ། ཡིད་དགའ་བའི་རྒྱན་ཐམས་ཅད་ཀྱིས་བརྒྱན་པ།
[268a.3]ཕྱག་གཡོན་པས་ཨུཏྤལ་བསྣམས་པ། གཡས་པས་བདུད་རྩི་འཛག་པའི་མཆོག་སྦྱིན་པ། སྣ་ཚོགས་པདྨའི་སྟེང་གི་ཟླ་བ་ལ་ཞབས་གཡས་བརྐྱང་བའི་སྐྱིལ་ཀྲུང་ཕྱེད་པས་བཞུགས་པའོ། །དེའི་གཡས་ཕྱོགས་སུ་མྱ་ངན་མེད་པའི་འོད་ཟེར་ཅན་#སྐུ་མདོག་སེར་མོ་རིན་པོ་ཆེ་སྣ་ཚོགས་པའི་དབུ་རྒྱན་ཅན།
[268a.4]རྒྱན་ཐམས་ཅད་ཀྱིས་བརྒྱན་པ། ཕྱག་གཡས་རྡོ་རྗེ་བསྣམས་པ། གཡོན་པས་མྱ་ངན་མེད་པའི་ཤིང་གི་ཡལ་ག་བསྣམས་པ་ཉེ་བར་བཞུགས་པའོ། །གཡོན་ཕྱོགས་སུ་རལ་གཅིག་མ་མིའུ་ཐུང་གི་གཟུགས་ཅན་སྐུ་མདོག་ནག་མོ། སྟག་གི་པགས་པའི་ན་བཟའ་བསྣམས་པ། སྤྱན་གསུམ་པ་
[268a.5]མཆེ་བ་གཙིགས་པའི་ཞལ་སྐྲ་སེར་པོ་འབར་ཞིང་གྱེན་དུ་བརྫེས་པ། ཕྱག་གཉིས་ཀྱིས་#རྡོ་རྗེ་དང་#གྲི་གུག་#བསྣམས་པ་ཉེ་བར་བཞུགས་པའོ། །ཡང་གཡས་ཕྱོགས་སུ་རྨ་བྱ་ཆེན་མོ། སྐུ་མདོག་སེར་མོ་རྒྱན་ཐམས་ཅད་ཀྱིས་བརྒྱན་པ། ཕྱག་གཡས་པས་#རྔ་ཡབ་བསྣམས་པ། གཡོན་པས་རྨ་བྱའི་མདོངས་
[268a.6]བསྣམས་པ། ཉེ་བར་བཞུགས་པའོ། །ཡང་གཡོན་ཕྱོགས་སུ་དུག་སེལ་མ་སྐུ་མདོག་ལྗང་གུ། ཕྱག་གཡས་པས་མཆོག་སྦྱིན་མཛད་པ། གཡོན་པས་སྦྲུལ་བསྣམས་པ། རྒྱན་ཐམས་ཅད་ཀྱིས་བརྒྱན་པ་ཉེ་བར་བཞུགས་པའོ། །གཞན་ཡང་ལྷ་དང་ལྷ་མ་ཡིན་གྱིས་བསྐོར་བར་བསྒོམ་པར་བྱའོ། །དོན་
[268a.7]ཡོད་གྲུབ་པས་དབུ་ལ་རྒྱས་#གདབ་བོ། །དེ་ནས་རང་གི་སྙིང་ག་ལས་སངས་རྒྱས་ཀྱི་ཚོགས་ཀྱི་སྤྲིན་སྤྲོ་བར་བསམ་མོ། །དེ་ལྟར་བསྒོམས་#པས་རྣལ་འབྱོར་པ་སྐྱོན། རང་གི་སྙིང་གར་ཨུཏྤལའིསྟེང་དུ་ཟླ་བའི་དཀྱིལ་འཁོར་ལ་སྔགས་མུ་ཏིག་གི་ཕྲེང་བ་ལྟར་དཀར་བ་བལྟས་ལ། ཨོཾ་ཏཱ་རེ་ཏུཏྟཱ་རེ་སྭཱ་ཧཱ། ཞེས་
[268b]
[268b.1]སོ། །དེ་ནས་ལྡང་བར་འདོད་ན་སྔོན་བཞིན་དུ་མཆོད་པ་དང་བསྟོད་པ་བྱས་ཏེ། དགེ་བའི་རྩ་བ་བསྔོས་#ལ། ཨོཾ་ཨ་མི་ཏཱ་#བྷ་ཞེས་བརྗོད་པས་སེམས་ཅན་ཐམས་ཅད་ཀྱི་དོན་དང་དངོས་གྲུབ་ཐོབ་པར་#བསམས་ལ། མུཿཞེས་བརྗོད་པས་སངས་རྒྱས་ཀྱི་ཞིང་དུ་གཤེགས་པར་བསམ་ཞིང་སླར་ཡང་སེམས་
[268b.2]ཅན་གྱི་དོན་དུ་བྱོན་པར་གསོལ་བ་བཏབ་ལ་དེ་ནས་ཇོ་མོ་སྒྲོལ་མའི་གཟུགས་ཀྱིས་ཅི་བདེ་བར་སྤྱོད་ལམ་བྱའོ། །མཆོད་པའི་སྔགས་ནི། ཨོཾ་ཨཱཿཧཱུཾ་ཏཱཾ་ཏཱ་#རེ་ཡེ། ཨོཾ་ཨཱཿ#བཛྲ་པུཥྤེ་ཧཱུཾ་སྭཱ་ཧཱ། དེ་བཞིན་དུ་བདུག་སྤོས་དང་། མར་མེ་དང་། དྲི་དང་། བྱུག་པ་དང་། ཞལ་ཟས་དབུལ་བར་བྱའོ། །
[268b.3]སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས། སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཔལ་རྣམ་པར་སྣང་མཛད་རྡོ་རྗེས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།{T3665}༄༅༅། །རྒྱ་གར་སྐད་དུ། ཤ་ཏཾ་ཨཥྚ་སཱ་དྷ་ནཾ། བོད་སྐད་དུ། སྒྲུབ་ཐབས་
[268b.4]བརྒྱ་དང་བརྒྱད་པ། བཅོམ་ལྡན་འདས་འོད་དཔག་ཏུ་མེད་པ་ལ་ཕྱག་འཚལ་ལོ། །བླ་མའི་དྲིན་ཐོབ་བརྟུལ་ཞུགས་ལྡན། །བླ་མེད་ཡེ་ཤེས་སྒྲུབ་པ་པོས། །རི་བོ་དབེན་ཞིང་ཡིད་འོང་བར། །རིན་ཆེན་སྣ་ཚོགས་ཀྱིས་མཛེས་ཤིང་། །ལྗོན་ཤིང་མང་པོས་རབ་ཏུ་གང་། །སྐད་སྙན་བྱ་རྣམས་སྒྲ་འབྱིན་ཅིང་། །ཆུ་གཙང་
[268b.5]ཡན་ལག་བརྒྱད་ལྡན་འབབ། །རི་དྭགས་འཚེ་བ་མེད་པའི་གནས། །དྲི་ཞིམ་མེ་ཏོག་གིས་བཀྲམ་པའི། །ཤིང་ཏོག་ལ་སོགས་འབྲས་བུ་མང་། །ལྷ་ཀླུ་ལ་སོགས་གླུ་ལེན་ཅིང་། །གྲུབ་འཛིན་ཀུན་གྱིས་གནས་བཅས་པ། །ཕུན་སུམ་ཚོགས་པའི་གནས་དེར་ནི། །སྔགས་པས་ཀུན་ལ་ཕན་བརྩོན་པས། །
[268b.6]བདེ་བའི་སྟན་ལ་བསྡད་ནས་ནི། །རང་སྙིང་ས་བོན་འོད་ཟེར་གྱིས། །འཕགས་མ་སྒྲོལ་སོགས་སྤྱན་དྲངས་ཏེ། །མཆོད་པ་ཀུན་གྱིས་རབ་མཆོད་ནས། །བདུན་པོ་རྣམ་པར་དག་པར་བྱ། །དེ་ནས་ཚད་མེད་བཞི་བསྒོམས་པས། །བྱང་ཆུབ་ཏུ་ནི་སེམས་བསྐྱེད་དོ། །འགྱུར་མེད་ཕྱིན་ཅི་མ་ལོག་པས། །དེ་དག་
[268b.7]འཕགས་པའི་སྤྱོད་ཡུལ་ནི། །སྟོང་པ་ཉིད་དུ་རྣམ་པར་བསྒོམ། །ཨོཾ་སྭ་བྷཱ་ཝ་བི་ཤུདྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ། པདྨ་ཟླ་བར་ཡི་གེ་ཏཱཾ། །དེ་ལ་འཇིག་རྟེན་གསུམ་གཡོ་བའི། །སྒྲོལ་མ་ཞལ་བཞི་ཕྱག་བརྒྱད་པ། །དམར་སེར་བཟང་པོའི་ཞབས་ཀྱིས་བཞུགས། །སེར་དང་ལྗང་གུ་དམར་དང་དཀར། །
[269a]
[269a.1]རྩ་ཞལ་གཡས་གཡོན་རྒྱབ་རིམ་བཞིན། །མཆོག་སྦྱིན་ཉི་མ་གདུགས་དང་དུང་། །གཡས་པའི་ཕྱག་ན་རིམ་བཞིན་བསྣམས། །ཨུཏྤལ་ཞགས་པ་ཕྲེང་བ་དང་། །གོ་ཁྲབ་རྣམས་ནི་གཡོན་ན་བསྣམས། །རྒྱན་རྣམས་ཀུན་གྱིས་ཡང་དག་རྫོགས། །ཡེ་ཤེས་དྲངས་ཏེ་གཞུག་པར་བྱ། །
[269a.2]ཨོཾ་ཨཱཿཧཱུཾ། ཞེས་པས་སྐུ་གསུང་ཐུགས་བྱིན་བརླབ། །དབང་བསྐུར་རིམ་གྱིས་དབུ་བརྒྱན་བྱ། །ཡེ་ཤེས་ཟླ་བའི་ཏིང་འཛིན་སེམས། །སྐྱོ་བར་གྱུར་ན་བཟླས་པ་བྱ། །གཤེགས་དང་བསྡུ་བ་ལ་སོགས་བྱ། །འཇིག་རྟེན་གསུམ་པོ་གཡོ་བར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་ཟླ་བའི་གདན་
[269a.3]ལ་ནི་ཨོཾ་ལས་བྱུང་བའི་སྒྲོལ་མ་ཉི་མའི་མདོག་ཅན། ཞལ་གཅིག་ཕྱག་གཉིས་པ། ཕྱག་གཡས་སྐྱབས་སྦྱིན་པ། གཡོན་ཨུཏྤལ་ཉི་མས་མཚན་པ་རོལ་པའི་སྟབས་ཀྱིས་བཞུགས་པ། རྒྱན་ཐམས་ཅད་དང་ཡང་དག་པར་ལྡན་པའོ། །དགེ་བ་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་
[269a.4]ཟླ་བའི་གདན་ལ་ཧཱུཾ་ལས་བྱུང་བའི་སྒྲོལ་མ། པདྨ་དང་ཀུན་ད་ལྟར་དཀར་བ། ཟླ་བའི་འོད་མངའ་བ། ཞལ་གཅིག་ཕྱག་བཞི་པ། ཟླ་བ་དང་སྣ་ཚོགས་རྡོ་རྗེ་གཡས་གཉིས་ན་འཛིན་པ། ཨུཏྤལ་དང་མེའི་འཁོར་ལོ་གཡོན་ན་བསྣམས་པ། རྒྱན་ཐམས་ཅད་དང་ལྡན་པ། རྣམ་པར་སྣང་མཛད་ཀྱི་དབུ་རྒྱན་དང་
[269a.5]ལྡན་པ། སྐྱིལ་མོ་ཀྲུང་གིས་བཞུགས་པ། སྐུ་ཐམས་ཅད་ལས་བདུད་རྩི་འཛག་པའོ། །འཇིག་རྟེན་ཐམས་ཅད་གཡོ་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧྲཱིཿལས་བྱུང་བའི་སྒྲོལ་མ་སེར་མོ་ཞལ་གཅིག་ཕྱག་གཉིས་མ། གཡས་གཡོན་གཉིས་ཀྱིས་
[269a.6]ཕྲེང་བ་དང་། ཨུཏྤ་ལའི་སྟེང་ན་པོ་ཏི་འཛིན་པའོ། །རྒྱན་ཐམས་ཅད་ཀྱིས་བརྒྱན་པ་རོལ་པས་བཞུགས་པའོ། །སྙན་པ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་སྒྲོལ་མ་དཀར་མོ་ཞལ་གཅིག་ཕྱག་གཉིས་པ། གཡས་ན་པདྨ་དམར་པོ། །གཡོན་ན་
[269a.7]ཨུཏྤ་ལ་སྔོན་པོས་བརྒྱན་པ། །སྤྱན་གསུམ་པ་རྒྱན་ཐམས་ཅད་ཀྱིས་བརྒྱན་པ། སྐྱིལ་མོ་ཀྲུང་གིས་བཞུགས་པའོ། །དབྱངས་ཅན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་མ་ལས་བྱུང་བའི་ལྷ་མོ་སྐུ་མདོག་སེར་མོ་ཞལ་གཅིག་ཕྱག་གཉིས་མ་རྡོ་རྗེ་དང་ཨུཏྤལ་བསྣམས་
[269b]
[269b.1]པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། སྣང་བ་མཐའ་ཡས་ཀྱི་དབུ་རྒྱན་དང་ལྡན་པར་བསམ་མོ། །ཤེས་རབ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་གདན་ལ་བྷཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། གཡས་ན་རིན་པོ་ཆེ་དང་མེ་ཏོག །གཡོན་ན་མཆོག་སྦྱིན་
[269b.2]པ། ཞབས་རོལ་པས་བཞུགས་པའོ། །དཔལ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཱཾ་ལས་བྱུང་བའི་ལྷ་མོ་སྔོན་མོ་ཞལ་གཅིག་ཕྱག་བཞི་མ། དང་པོ་གཉིས་ན་མདའ་གཞུ། འོག་མ་གཉིས་ན་ཨུཏྤལ་དང་རལ་གྲི་བསྣམས་པ། རོལ་པའི་ཞབས་ཀྱིས་བཞུགས་
[269b.3]པའོ། །བློ་འཕེལ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བ་དང་ཉི་མའི་སྟེང་དུ་ཧཱུཾ་ལས་བྱུང་བའི་སྒྲོལ་མ་ཞལ་གཅིག་ཕྱག་གཉིས་མ། ནག་མོ་ཁྲོས་མ་སྤྱན་གསུམ་མ། ཞལ་གདངས་པ་ཁྲོ་གཉེར་བསྙེར་བ་ལྗགས་འདྲིལ་བ། སྟག་གི་པགས་པའི་གོས་འཆང་བ། གྲི་
[269b.4]གུག་དང་ཐོད་ཁྲག་བསྣམས་པ། མི་མགོ་ལྔ་བཅུའི་དོ་ཤལ་འཆང་བའོ། །གསོད་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བ་དང་ཉི་མའི་གདན་སྟེངས་སུ་ཛུཾ་ལས་ཡང་དག་པར་བྱུང་བའི་ལྷ་མོ་སྐུ་མདོག་སེར་མོ། ཞལ་གཅིག་ཕྱག་གཉིས་ཀྱིས་ཤིང་ཐོག་དང་མྱ་ངན་མེད་པའི་ཤིང་ལོ་
[269b.5]བཟུང་བའོ། །རྒྱན་སྣ་ཚོགས་ཀྱིས་བརྒྱན་པ། རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །རྒྱས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨོཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། མདོག་ལྗང་སེར་དུ་བ་ལྟར་འདུག་པ། རྡོ་རྗེ་དང་དྲིལ་བུ་འཛིན་པ། རྒྱན་ཐམས་
[269b.6]ཅད་དང་ལྡན་པ། མཆེ་བ་ཅུང་ཟད་གཙིགས་པའོ། །འདོད་གཟུགས་ཅན་གྱི་སྒྲོལ་མ་ཞེས་བྱ་བའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ། དཀར་དམར་མདོག་ཅན་ཞལ་གཅིག་ཕྱག་བཞི་མ་གཡས་ཀྱི་དང་པོ་ན་སྐྱབས་སྦྱིན་པ། གཡོན་མཆོག་སྦྱིན་པ་ཐ་མ་གཉིས་ཀྱིས་
[269b.7]ཨུཏྤལ་དང་ཕྲེང་བ་འཛིན་པ། ཞབས་རོལ་པས་བཞུགས་པའོ། །ཕན་པར་བརྩོན་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཨི་ལས་བྱུང་བའི་ལྷ་མོ་མདོག་མཐིང་སྔོན། ཞལ་གསུམ་ཕྱག་དྲུག་མ་གཡས་དམར་བ་གཡོན་སྔོ་བ། ཕྱག་དང་པོ་གཉིས་མདའ་གཞུ་འགེངས་པ། བར་
[270a]
[270a.1]མ་ན་གླང་པོ་ཆེ་དང་། རྒྱལ་མཚན། ཐ་མ་ན་རལ་གྲི་དང་ཞགས་པ་བསྣམས་ཤིང་རོལ་པས་ཤིང་རྟའི་སྟེང་ན་བཞུགས་པའོ། །གཡུལ་ལས་སྒྲོལ་བར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་ལྷ་མོ་དཀར་མོ་ཞལ་གཅིག་ཕྱག་གཉིས་མ། རྒྱན་
[270a.2]ཐམས་ཅད་ཀྱིས་བརྒྱན་པ། གཡས་ན་འཁོར་ལོ་རྩིབས་བརྒྱད་པ། གཡོན་ན་བ་དན་ལྕེ་བརྒྱད་པ་བསྣམས་ཤིང་། འགྱིང་བའི་ཚུལ་གྱིས་བཞུགས་པའོ། །རྒྱལ་བ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ། །པདྨ་དང་ཉི་མའི་གདན་ལ་ཨ་ལས་བྱུང་བའི་ལྷ་མོ་གསེར་གྱི་མདོག་ཅན་ཞལ་
[270a.3]གཅིག་ཕྱག་བཞི་མ་གཡས་དང་པོས་སྐྱབས་སྦྱིན་པ་འོག་མས་རྡོ་རྗེ། གཡོན་དང་པོས་མཆོག་སྦྱིན་པ་འོག་མས་ཨུཏྤལ་དང་པོ་ཏིའོ། །ཞབས་རོལ་པས་བཞུགས་པའོ། །རྒྱན་ཐམས་ཅད་དང་ཡང་དག་པར་ལྡན་པའོ། །ཤེས་རབ་ཕ་རོལ་ཕྱིན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ། །པདྨ་དང་
[270a.4]ཉི་མའི་གདན་ལ་ཏཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། གཡས་མཆོག་སྦྱིན་པ་གཡོན་ཨུཏྤལ་དང་བཅས་པའི་སྐྱབས་སྦྱིན་པ། མདོག་ལྗང་གུའོ། །འཕགས་མ་སྒྲོལ་མའི་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་གདན་སྟེང་ན་ཏྲཾ་ལས་བྱུང་བའི་ལྷ་མོ་
[270a.5]ཞལ་གཅིག་ཕྱག་གཉིས་མ། མདོག་དཀར་མོ་གཡས་ཀླུ་ཤིང་གི་མེ་ཏོག་བསྣམས་པ། གཡོན་བ་དན་རིན་པོ་ཆེས་མཚན་པ་འབར་བ། ན་བཟའ་དང་རྒྱན་སྣ་ཚོགས་མངའ་བ། རྒྱལ་པོའི་རོལ་པས་བཞུགས་པའོ། །ཡིད་འོང་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་
[270a.6]བའི་གདན་ལ་ཨ་ལས་བྱུང་བའི་ལྷ་མོ་ཞལ་གཅིག་ཕྱག་བཞི་མ། མདོག་སེར་མོ། རྒྱན་ཐམས་ཅད་ཀྱིས་བརྒྱན་པ། ཕྱག་དང་པོ་གཉིས་ཀྱིས་རིན་པོ་ཆེ་དང་རལ་གྲི། འོག་མ་གཉིས་ན་རྫ་རྔ་བརྡུང་བ་ལ་བརྩོན་པའོ། །ཞབས་རྡོ་རྗེའི་སྐྱིལ་ཀྲུང་གིས་བཞུགས་པའོ། །རྫ་རྔ་ཅན་གྱི་སྒྲོལ་མའི་སྒྲུབ་
[270a.7]ཐབས་སོ།། །།པདྨ་དང་ཟླ་བའི་གདན་ལ་བཾ་ལས་བྱུང་བའི་ལྷ་མོ་མདོག་སྔོ་ལྗང་ཞལ་གཅིག་ཕྱག་བཞི་མ། དང་པོ་གཉིས་ན་དུང་དང་རྒྱལ་མཚན། ཐ་མ་གཉིས་ན་རལ་གྲི་དང་ཨུཏྤལ་སྔོན་པོ་བསྣམས་པའོ། །ཞབས་རོལ་པས་བཞུགས་པའོ། །དུང་ཅན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་
[270b]
[270b.1]ཟླ་བའི་གདན་ལ་ཧྲཱིཿལས་བྱུང་བའི་ལྷ་མོ་མདོག་སེར་མོ་ཞལ་བཞི་པ་གཡས་སྔོ་བ་རྒྱབ་དཀར་བ་གཡོན་དམར་བ། ཕྱག་གཡས་དང་པོ་ན་བུམ་པ། གཉིས་པ་ན་བགྲང་ཕྲེང་། གསུམ་པ་ན་གདུགས། བཞི་པ་ན་གཎྜཱི། གཡོན་དང་པོ་ན་ཨ་མྲའི་འབྲས་བུ། གཉིས་པ་ན་ཨུཏྤལ། གསུམ་པ་ན་ལྷུང་བཟེད།
[270b.2]བཞི་པ་ན་སྡིགས་མཛུབ། རྒྱན་སྣ་ཚོགས་ཀྱིས་བརྒྱན་པ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། རྒྱས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། རལ་གྲི་དང་འཁོར་ལོ་འཛིན་པ། རྒྱན་ཐམས་ཅད་ཀྱིས་བརྒྱན་པ།
[270b.3]ཕྱག་རྒྱ་ཆེན་པོ་རབ་ཏུ་འགྲུབ་པར་བྱེད་པའི་བདག་ཉིད་ཅན་ཞལ་ནས་མི་འཇིགས་པ་སྦྱིན་པར་མཛད་པའོ། །ཚིག་སྙན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨོཾ་ལས་བྱུང་བའི་ལྷ་མོ་ཞལ་ལྔ་མ། སྐུ་ཟླ་བ་ལྟར་དཀར་བ། ཞལ་ལྔ་ཀུ་མུ་ད་དཀར་པོ་ལྟར་འབར་བ། ཕྱག་བཅུ་དང་ལྡན་པ། ཕྱག་
[270b.4]དང་པོ་གཉིས་ཀྱིས་མེ་ལོང་དང་དུང་འཛིན་པ། གཡས་གཉིས་པ་ན་རྡོ་རྗེ་དང་། གསུམ་པ་ན་ཨུཏྤལ་དཀར་པོ། བཞི་པ་ན་མཆོག་སྦྱིན་པ། ལྔ་པ་ན་མདའོ། །གཡོན་གྱི་གཉིས་པ་ན་མདུང་ཐུང་དང་། གསུམ་པ་ན་འཁོར་ལོ། བཞི་པ་ན་དྲིལ་བུ། ལྔ་པ་ན་གཞུའོ། །རྒྱན་ཐམས་ཅད་ཀྱིས་བརྒྱན་
[270b.5]པ། ཞབས་གཉིས་རོལ་པས་བཞུགས་པའོ། །ཟླ་བའི་མདོག་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། སྐུ་མདོག་དཀར་མོ་ཕྱག་གཉིས་ཀྱིས་བུམ་པ་དང་། མཆོག་སྩོལ་བའོ། །རྒྱན་དང་ན་བཟའ་སྣ་ཚོགས་པ་བསྣམས་
[270b.6]པ། ཞབས་གཉིས་སྐྱིལ་ཀྲུང་དུ་བཞུགས་པའོ། །དཀར་མོ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་གྱི་སྟེང་ན་སོ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ་སེར་མོ་གླང་པོ་ཆེ་དང་སེང་གེའི་སྟེང་དུ་རོལ་པས་བཞུགས་པའོ། །ཕྱག་གཉིས་ན་རྡོ་རྗེས་མཚན་པའི་ཨུཏྤ
[270b.7]ལ་སེར་པོ་བསྣམས་ནས་སྐྱབས་སྦྱིན་དང་། མཆོག་སྦྱིན་སྩོལ་བར་མཛད་པ། རྒྱན་ཐམས་ཅད་ཀྱིས་བརྒྱན་པའོ། །མི་ཕམ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་གཾ་ལས་བྱུང་བའི་ལྷ་མོ་མདོག་དམར་ཞིང་འོད་འཕྲོ་བ། ཞལ་བཞི་ཕྱག་བརྒྱད་མ། གཡས་དཀར་བ་གཡོན་སེར་བ་
[271a]
[271a.1]རྒྱབ་ཞལ་ནག་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་དང་པོ་ན་སེང་གེ་གཉིས་པ་ན་རྔ་ཟླུམ་གསུམ་པ་ན་དབྱུ་གུ། བཞི་པ་ན་ལྕགས་ཀྱུ། གཡོན་དང་པོ་ན་ཨུཏྤལ། གཉིས་པ་ན་རྩེ་གསུམ། གསུམ་པ་ན་རྒྱལ་མཚན། བཞི་པ་ན་ཅེ་སྤྱང་བསྣམས་པ། ཞབས་རོལ་
[271a.2]པས་བཞུགས་པའོ། །སྒྱུ་མ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨཿལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། མདོག་སྔོན་མོ་སྤྱན་གསུམ་པ། ཅུང་ཟད་ཁྲོས་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་པ་ན་པི་ཝང་བསྒྲེང་བ། གཡོན་དུ་
[271a.3]ཨུཏྤལ་སྔོན་པོའི་ནང་དུ་ཁང་པ་བརྩེགས་པ་འཛིན་པ། ཞབས་རོལ་པས་བཞུགས་པའོ། །སྟོབས་ཆེན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་ཡང་དག་པར་བརྒྱན་པ། ཕྱག་གཡས་
[271a.4]རལ་གྲི་གཡོན་སྡིགས་མཛུབ་བསྣམས་པ། ཞབས་ཕྱེད་ཀྲུང་དང་བཅས་པའོ། །གཏུམ་མོ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཡཾ་ལས་བྱུང་བའི་ལྷ་མོ་མདོག་དུད་ཁ་ཞལ་གཅིག་ཕྱག་གཉིས་མ་རྒྱན་རྣམས་ཀྱིས་བརྒྱན་པ། གཡས་ན་ཏྲི་ཤཱུ་ལ་དང་། གཡོན་ན་སྤུ་གྲི་
[271a.5]བསྣམས་པ། ཞབས་སྐྱིལ་ཀྲུང་གིས་བཞུགས་པའོ། །སྡང་བ་ཐམས་ཅད་རླག་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་སྐུ་མདོག་དཀར་མོ་ཞལ་གཅིག་ཕྱག་བཞི་མ། ཞབས་རོལ་པས་བཞུགས་པ། རྒྱན་ཀུན་དང་ལྡན་ཞིང་མཛེས་པ། ཕྱག་
[271a.6]གཡས་དང་པོ་སྐྱབས་སྦྱིན། གཡོན་དང་པོ་མེ་དཔུང་འཛིན་པ། འོག་མ་གཉིས་ཀྱིས་དབྱུག་པ་དང་ལྕགས་ཀྱུ་བསྣམས་པ་ཞབས་སྐྱིལ་ཀྲུང་དུ་བཞུགས་པ། རྨ་བྱའི་ཁྲི་ལ་མཛེས་པས་རོལ་པར་མཛད་པའོ། །རབ་ཏུ་ཞི་བ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ། བྷྲཱུཾ་ལས་བྱུང་
[271a.7]བའི་ལྷ་མོ་ཞལ་གཅིག་ཕྱག་གཉིས་མ། མདོག་སེར་མོ་རྒྱན་ཐམས་ཅད་ཀྱིས་ཡང་དག་པར་བརྒྱན་མ། ཕྱག་གཡས་ན་ཉི་མ་དང་དབང་པོ། གཡོན་ན་ཟླ་བ་དང་ཐག་བཟངས་རིས་བསྣམས་པའོ། །ཞབས་རོལ་པས་བཞུགས་པའོ། །རྣམ་པར་རྒྱལ་བ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་
[271b]
[271b.1]མའི་སྟེང་དུ་ཧཱུཾ་ལས་བྱུང་བའི་ལྷ་མོ་ཞལ་གསུམ་ཕྱག་བཞི་མ་མདོག་དམར་སེར་གཡས་དམར་བ་གཡོན་ལྗང་གུ། ཕྱག་དང་པོ་གཉིས་ཀྱིས་མཆོག་སྦྱིན་དང་ཨུཏྤལ་བུམ་པས་མཚན་པ་བསྣམས་པ། ཞབས་རོལ་པས་བཞུགས་པ། སྐུ་ལ་འོད་འཕྲོ་བ། འོག་མ་གཉིས་ན་རྔ་ཡབ་དང་ཏིང་ཤགས་བསྣམས་པ།
[271b.2]འབར་བའི་འོད་མངའ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་ན་མུ་ཏིག་གི་ཕྲེང་བ་ཐུགས་ཀར་འཛིན་པ། གཡོན་ན་ཨུཏྤ་ལའི་སྡོང་བུ་མཆོག་སྦྱིན་དང་བཅས་
[271b.3]པ་རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །གློག་ཕྲེང་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་དམར་སེར་ཞལ་གཅིག་ཕྱག་གཉིས་མ། གཡས་མཆོག་སྦྱིན་ཞིང་གཡོན་པས་རྒྱལ་མཚན་རྡོ་རྗེ་ཕྱེད་པས་མཚན་
[271b.4]པ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །རྒྱལ་མཚན་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། གཡས་རལ་གྲི་གཡོན་འཁོར་ལོ། །རྒྱན་ཐམས་ཅད་ཀྱིས་
[271b.5]བརྒྱན་པ། ཞབས་རོལ་པས་བཞུགས་པའོ། །ཡེ་ཤེས་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཏཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་བཞི་མ་རྒྱན་ཐམས་ཅད་ཀྱིས་ཡང་དག་པར་བརྒྱན་པ། གཡས་དང་པོ་མཆོག་སྦྱིན། གཡོན་དང་པོ་ཨུཏྤལ་འོག་མ་གཉིས་
[271b.6]ན་མདའ་གཞུ་བསྣམས་པ། ཞབས་སྐྱིལ་ཀྲུང་གིས་བཞུགས་པའོ། །ཤེས་རབ་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཡཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་ཡང་དག་པར་བརྒྱན་པ། གཡས་མཆོག་སྦྱིན་ཞིང་
[271b.7]གཡོན་ཆང་གིས་གང་བའི་བུམ་པའོ། །ཞབས་རོལ་པས་བཞུགས་པའོ། །མྱོས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་རཾ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་པ་ཕྱག་གཉིས་མ། ཁྲོ་མོའི་ཆ་ལུགས་སྦྲུལ་གྱི་རྒྱན་ཅན། གཡས་རྡོ་རྗེ་གཡོན་སྡིགས་མཛུབ་
[272a]
[272a.1]ཀྱིས་བསྡིགས་པ། ཞབས་རོལ་པས་རྒྱ་མཚོའི་དབུས་ན་བཞུགས་པའོ། །རེངས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་ནག་མོ་ཞལ་གཅིག་ཕྱག་གཉིས་མ། གཡས་རྡོ་རྗེ་གྲི་གུག་གཡོན་ཐོད་པ་ཁྲག་གིས་གང་བ། གླང་ཆེན་གྱི་
[272a.2]པགས་པའོ། །ཕག་གི་ཞལ་མངའ་བ། སྤྱན་གསུམ་ཁྲོ་གཉེར་ཅན་སྦྲུལ་གྱིས་བརྒྱན་པ། ཞབས་རོལ་པས་བཞུགས་པའོ། །ནག་མོ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་གདན་ལ་ཧཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་བཞི་མ་རྒྱན་ཐམས་ཅད་ཀྱིས་བརྒྱན་པ། གཡས་
[272a.3]བསྐུམ་གཡོན་བརྐྱང་བས་བཞུགས་པ། ན་བཟའ་ནག་པོ་གསོལ་བ། མདོག་དམར་མོ། དབུ་སྐྲ་གྱེན་དུ་བརྫེས་པ། ཕྱག་གཡས་དང་པོ་ན་འཁོར་ལོ། གཉིས་པ་ན་རལ་གྲི། གཡོན་གྱི་དང་པོ་ན་སྲིད་པའི་འཁོར་ལོ། གཉིས་པ་ན་སྡིགས་མཛུབ་བོ། །མཚན་མོ་ནག་མོ་ཞེས་བྱ་བའི་སྒྲུབ་
[272a.4]ཐབས་སོ།། །།པདྨ་དང་ཉི་མའི་སྟེང་དུ་ཨོཾ་ལས་བྱུང་བའི་ལྷ་མོ་སྒྲོལ་མ་མདོག་ལྗང་གུ་ཞལ་གཅིག་ཕྱག་གཉིས་མ། ཕྱག་གཡས་ན་འཁོར་ལོ་གཡོན་ཁུ་ཚུར་སྡིགས་མཛུབ་དང་བཅས་པ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །སྲུང་བར་བྱེད་པའི་སྒྲོལ་
[272a.5]མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་སྐུ་མདོག་སྔོ་སྐྱ་ཞལ་གསུམ་ཕྱག་དྲུག་པ། གཡས་པ་རླུང་གི་བ་དན་དང་། རི་དང་རྒྱ་མཚོའི་གླིང་བརྒྱ་དང་། གཡོན་ན་མྱོས་བྱེད་ཀྱིས་གང་བའི་སྣོད་དང་ཞགས་པ་དང་། རྔ་བོ་ཆེ་རྣམས་རིམ་བཞིན་དུ་བསྣམས་པ། ཞལ་གཡས་དམར་བ་
[272a.6]གཡོན་དཀར་པོ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །རྨོངས་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཏྲཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། གཡས་རིན་པོ་ཆེས་མཚན་པའི་ཨུཏྤལ་སེར་པོ། གཡོན་སྐྱབས་སྦྱིན་
[272a.7]པར་མཛད་པའི་ཕྱག་གིས་ཨུཏྤལ་སྔོན་པོ་པོ་ཏིས་མཚན་པ། མདོག་སེར་མོ་རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །ཞི་བ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་སྔོ་ལྗང་ཞལ་གཅིག་ཕྱག་གཉིས་མ། གཡས་ཨུཏྤལ་
[272b]
[272b.1]རྡོ་རྗེས་མཚན་པ། གཡོན་ཆོས་འཆད་པའི་ཕྱག་རྒྱ་ཅན་རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །མཛེས་མ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཨོཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ་ཨུཏྤལ་སྔོན་པོ་ཉི་མ་དང་ཟླ་
[272b.2]བས་མཚན་པ་བསྣམས་ཤིང་། གཡས་མཆོག་སྦྱིན་སྩོལ་བའི་ཕྱག་གིས་རིན་པོ་ཆེ་བསྣམས་པ། གཡོན་ཐུགས་ཀར་སྐྱབས་སྦྱིན་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་ངང་མོའི་ཁྲི་ལ་བཞུགས་པའོ། །ཚངས་པའི་བུ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་
[272b.3]སྟེང་དུ་ཨོཾ་ལས་བྱུང་བའི་ལྷ་མོ་ཞལ་བཞི་ཕྱག་བརྒྱད་མ། མདོག་སྔོན་མོ་ཞལ་གཡས་དཀར་བ། རྒྱབ་གནག་པ་གཡོན་དམར་བ་རྒྱན་ཐམས་ཅད་ཀྱིས་བརྒྱན་པ། ཕྱག་དང་པོ་གཉིས་ཨུཏྤལ་པོ་ཏིས་མཚན་པ་བསྣམས་པ། གཡས་གཉིས་པ་ན་གདུགས། གསུམ་པ་ན་མདའ། བཞི་པ་ན་དུང་། གཡོན་
[272b.4]གཉིས་པ་རྒྱལ་མཚན། གསུམ་པ་ན་གཞུ། བཞི་པ་ན་རིལ་བ་སྤྱི་བླུགས་བསྣམས་པ། རྒྱན་དང་ན་བཟའ་སྣ་ཚོགས་ཅན། ཞབས་རོལ་པས་ཁྲི་སྙན་ས་ལའི་པགས་པའི་གདན་ལ་བཞུགས་པའོ། །རིག་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཏཾ་ལས་བྱུང་བའི་ལྷ་མོ་སྐུ་
[272b.5]མདོག་ལྗང་གུ་ཞལ་གཅིག་ཕྱག་གཉིས་མ་རུས་པའི་རྒྱན་དང་ལྡན་པ། ཕྱག་གཡས་མཆོག་སྦྱིན་གཡོན་པདྨ་དམར་པོ་ཐུགས་ཀར་བསྣམས་པའོ། །སྨད་གཡོགས་རི་དྭགས་ཀྱི་པགས་པས་བྱས་པ། ཞབས་རོལ་པ་དང་བྲག་ཕུག་ཏུ་བཞུགས་ཤིང་གསང་བའི་དྲང་སྲོང་དང་བཅས་པའོ། །གསང་བ་མོ་ཞེས་
[272b.6]བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་ན་མཾ་ལས་བྱུང་བའི་ལྷ་མོ་གསེར་གྱི་མདོག་ཅན་ཞལ་བཞི་པ། གཡས་དཀར་བ་རྒྱབ་སྔོ་བ། གཡོན་དམར་བ། ཞབས་རོལ་པས་བཞུགས་པའོ། །ཕྱག་གཡས་དང་པོས་ནོར་བུས་མཚན་པའི་རྒྱལ་མཚན་བསྣམས་པ། གཉིས་པ་ན་འཁོར་ལོ།
[272b.7]གསུམ་པ་ན་པདྨ་དམར་པོ་འདབ་མ་བརྒྱད་པ་ཡུ་བ་དང་བཅས་པ། བཞི་པ་ན་དུང་ངོ་། །གཡོན་དང་པོ་ན་བུམ་པ། གཉིས་པ་ན་དཔལ་གྱི་བེའུ། གསུམ་པ་ན་ཉ། བཞི་པ་ན་གདུགས་བསྣམས་ཤིང་བཀྲ་ཤིས་པར་མཛད་པའོ། །རྒྱན་དང་ན་བཟའ་སྣ་ཚོགས་པས་བཀླུབས་པའོ། །བཀྲ་ཤིས་དོན་གྲུབ་པར་
[273a]
[273a.1]བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་མདོག་དཀར་མོ། ཞལ་གཅིག་ཕྱག་གཉིས་མ། ཕྱག་གཡས་ཐུགས་ཀར་ཕྲེང་བ་བསྣམས་པ། གཡོན་མཆོག་སྦྱིན་ཞིང་པདྨ་དཀར་པོ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་སྐྱིལ་
[273a.2]ཀྲུང་དུ་བཞུགས་པའོ། །ཞི་བ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་སྭ་ལས་བྱུང་བའི་ལྷ་མོ་མདོག་དམར་སེར། ཞལ་བཞི་ཕྱག་བཅུ་ཡིས་གཡས་ན་མདུང་རྩེ་གསུམ་པ། རྔ་ཡབ་དང་། དགྲ་སྟ་དང་། མེ་ལོང་དང་། རྡོ་རྗེའོ། །གཡོན་གྱི་རིམ་པ་བཞིན་དུ་དྲིལ་བུ་དང་།
[273a.3]ཨུཏྤ་ལ་དང་། གཏུན་ཤིང་དང་། བུམ་པ་དང་། འཁོར་ལོའོ། །རྒྱན་ཐམས་ཅད་ཀྱིས་བརྒྱན་པའོ། །རོལ་པས་བཞུགས་པའོ། །རིག་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། ཕྱག་གཡས་
[273a.4]གཡོན་ཐུགས་ཀར་བཀན་ཏེ། བྱང་ཆུབ་མཆོག་དང་ལྡན་པ་ལ་རྡོ་རྗེས་མཚན་པའོ། །རྒྱན་ཐམས་ཅད་ཀྱིས་བརྒྱན་ཅིང་། ཞབས་སྐྱིལ་ཀྲུང་གིས་བུམ་པའི་ཁྲི་ལ་བཞུགས་པའོ། །ཡིད་མགྱོགས་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་དམར་
[273a.5]མོ་ཞལ་གཅིག་ཕྱག་གཉིས་མ། གཡས་གྲི་གུག །གཡོན་བནྡྷ་བསྣམས་པས་ཞག་དང་ཁྲག་ལ་དགྱེས་པ། སྟག་གི་གཡང་གཞི་གསོལ་བ། ཞལ་འཛུམ་པ་མཛད་ཅིང་རྐན་སྒྲ་འབྱིན་པ། འཇིག་རྟེན་གསུམ་གཡོ་བར་མཛད་པ། ཞབས་གཡས་བརྐྱང་བར་མཛད་པའོ། །ཐོད་པ་ཅན་ཞེས་བྱ་བའི་
[273a.6]སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཏཱཾ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ་ཕྱག་གཡས་ན་བུམ་པ། གཡོན་ན་ཅེ་སྤྱང་བསྣམས་པའོ། །ན་བཟའ་དཀར་པོ་གསོལ་བ། ཞབས་སེམས་དཔའི་སྐྱིལ་ཀྲུང་གིས་བཞུགས་པ། རིན་པོ་ཆེའི་རྒྱན་གྱིས་
[273a.7]བརྒྱན་པའོ། །ཤུགས་ཅན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་དཀར་མོ་ཞལ་བཞི་ཕྱག་བརྒྱད་མ། ཕྱག་གཡས་དང་པོས་ཕྲེང་བ་བསྣམས་པ། གཉིས་པ་ན་བདུད་རྩིས་གང་བའི་བུམ་པ། གསུམ་པ་ན་སྲིད་པའི་ཕྱག་ཤིང་། བཞི་པ་ན་བུམ་པ་
[273b]
[273b.1]དང་བཅས་པའི་མྱ་ངན་མེད་པའི་ཤིང་། གཡོན་དང་པོས་ཉི་ཟླ། གཉིས་པས་རི་རབ། གསུམ་པས་པདྨའི་ནང་ནས་བྱུང་བའི་སྐྱེས་བུ། བཞི་པ་ན་ཆོས་འཆད་པའི་ཕྱག་རྒྱའོ། །རྒྱན་ཐམས་ཅད་ཀྱིས་བརྒྱན་པའོ། །ཞབས་སྐྱིལ་ཀྲུང་གིས་བཞུགས་པའོ། །ཚངས་པ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།
[273b.2]པདྨ་དང་ཉི་མའི་གདན་ལ་ཨ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། ན་བཟའ་རི་དྭགས་ཀྱི་པགས་པའི་སྨད་གཡོགས་མངའ་བ། ཕྱག་གཡས་པ་བརྐྱང་ནས་པུས་མོ་ལ་རེག་པ། གཡོན་པའང་དེ་བཞིན་དུ་མཛད་པ། ཨུཏྤལ་ལ་དང་ཨུཏྤལ་རལ་གྲིས་
[273b.3]མཚན་པའོ། །ཞབས་རོལ་བས་སེང་གེའི་གདན་ལ་བཞུགས་པའོ། །བདེན་པར་སྨྲ་བ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་གྱི་སྟེང་དུ་ཨོཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ་རྒྱན་ཐམས་ཅད་ཀྱིས་བརྒྱན་པ། གཡས་ན་རྩེ་གསུམ་བ་དན་དང་བཅས་པ་
[273b.4]བསྣམས་པ། གཡོན་ན་ཨུཏྤལ་བུམ་པས་མཚན་པའོ། །ཞབས་རོལ་པས་བཞུགས་པའོ། །ཕ་རོལ་ལས་རྒྱལ་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཾ་ལས་བྱུང་བའི་སྒྲོལ་མ་མདོག་དཀར་དམར་ཞལ་གཅིག་ཕྱག་གཉིས་མ་རྒྱན་ཐམས་ཅད་ཀྱིས་རབ་ཏུ་བརྒྱན་པ་
[273b.5]ཕྱག་གཡས་ཨུཏྤལ་དང་སེང་གེ་གཡོན་ལྕགས་ཀྱུ་བསྣམས་པ། ཞབས་རོལ་པས་བཞུགས་པའོ། །དེད་དཔོན་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་མཾ་ལས་སྐྱེས་པའི་ལྷ་མོ་མདོག་དམར་མོ་ཞལ་གཅིག་ཕྱག་བཞི་མ། གཡས་པས་ལྕགས་ཀྱུ་དང་ཞགས་པ། གཡོན་
[273b.6]པས་ལྕགས་སྒྲོག་དང་དྲིལ་བུའོ། །རྒྱན་ཐམས་ཅད་ཀྱིས་བརྒྱན་པ། ཕྱག་རྒྱ་ཆེན་པོ་ཨུཏྤལ་ལ་གནས་པའོ། །ཞབས་རོལ་པས་བཞུགས་པའོ། །སྙིང་རྗེ་གནས་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཨ་ལས་བྱུང་བའི་ལྷ་མོ་མདོག་ལྗང་གུ། ཞལ་གཅིག་ཕྱག་
[273b.7]གཉིས་པ་གཡས་ཨུཏྤལ་ལ་རྟ་མཆོག་གིས་མཚན་པའོ། །གཡོན་པ་ན་ནོར་བུའི་ཟ་མ་ཏོག་བསྣམས་པ། སྐྱིལ་ཀྲུང་དུ་བཞུགས་པ། རྒྱན་ཐམས་ཅད་ཀྱིས་བརྒྱན་པའོ། །ཆུད་མི་ཟ་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་པཾ་ལས་བྱུང་བའི་ལྷ་མོ་མདོག་དཀར་དམར་ཞལ་
[274a]
[274a.1]གཅིག་ཕྱག་གཉིས་པ། གཡས་ན་རལ་གྲི་བསྣམས་པ། གཡོན་ན་ཨུཏྤ་ལ་མར་མེས་མཚན་པ་བསྣམས་པ། ཞབས་རོལ་པས་བཞུགས་པའོ། །ལམ་རབ་ཏུ་སྟོན་པར་བྱེད་པའི་སྒྲོལ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་བྲུཾ་ལས་བྱུང་བའི་ལྷ་མོ་
[274a.2]མདོག་སེར་མོ་ཞལ་གསུམ་ཕྱག་བཞི་གཡས་སྔོ་བ་གཡོན་དམར་བ། གཡས་རིན་པོ་ཆེ་དང་བཅས་པའི་མཆོག་སྦྱིན་པ། གཡོན་བུམ་པ་ཐུགས་ཀར་འཛིན་པ། ཐ་མ་གཉིས་ན་མདའ་གཞུའོ། །རྒྱན་ཐམས་ཅད་ཀྱིས་བརྒྱན་ཅིང་རོལ་པས་བཞུགས་པའོ། །མཆོག་སྟེར་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་
[274a.3]ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། ཕྱག་གཡས་པ་ན་བུམ་པ། གཡོན་པ་ན་ལྡེ་མིག་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །དངོས་གྲུབ་སྟེར་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་
[274a.4]སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། གཡས་བུམ་པ་ལ་སྙིང་པོས་མཚན་པ། གཡོན་རིན་པོ་ཆེས་མཚན་པའི་ཁང་པ་བསྣམས་པ་ཞབས་རོལ་པས་བཞུགས་པའོ། །དངོས་གྲུབ་སྟོན་པར་བྱེད་པ་ཞེས་བྱ་བའི་སྒྲོལ་
[274a.5]མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏྲཱཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ་མདོག་དམར་སེར་ཕྱག་གཡས་རྡོ་རྗེ་གཡོན་མྱ་ངན་མེད་པའི་ཤིང་ལོ་བསྣམས་པའོ། །རྒྱན་དང་ན་བཟའ་བཅས་པ་ཞབས་སྐྱིལ་ཀྲུང་དུ་བཞུགས་པ། ལང་ཚོ་དང་ལྡན་པའོ། །བུད་མེད་གཟུགས་ཅན་སོ་སོ་འབྲང་
[274a.6]མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་བཾ་ལས་བྱུང་བའི་ལྷ་མོ་དམར་སེར་ཞལ་གཅིག་ཕྱག་གཉིས་མ། གཡས་མྱ་ངན་མེད་པའི་ཤིང་ལ་ཕྱག་གིས་འཁྱུད་པར་བརྟེན་པའོ། །གཡོན་ཨུཏྤལ་དམར་པོ་ཁ་བྱེ་བའི་ནང་དུ་གླང་པོ་ཆེ་འཛིན་པ། རྒྱན་དང་ན་བཟའ་དང་བཅས་པ། ཞབས་
[274a.7]ཤིང་རྟའི་སྟེང་དུ་བཞུགས་པའོ། །དཔག་མེད་གནོན་པར་བྱེད་པའི་འོད་ཟེར་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ་མདོག་སེར་མོ། གཡས་དགྲ་སྟ་དང་གཡོན་ཞགས་པ་བསྣམས་པ། རྒྱན་ཐམས་ཅད་དང་ཤིང་ལོའི་ན་བཟའ་
[274b]
[274b.1]གྱོན་པ། ཞབས་རོལ་པས་བཞུགས་པའོ། །རི་ཁྲོད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧྲཱིཿལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། གཡས་པ་གྲི་གུག །གཡོན་པ་ཁ་ཊྭཱཾ་ག་དང་ཐོད་པའོ། །རྒྱན་ཐམས་ཅད་ཀྱིས་བརྒྱན་པ་ན་བཟའ་དང་བཅས་པ་ཞབས་
[274b.2]རོལ་པས་བཞུགས་པའོ། །རྣལ་འབྱོར་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧྲཱིཿལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། གཡས་ན་ཞགས་པ། གཡོན་ན་ལྕགས་ཀྱུ་དང་བུམ་པའོ། །རྒྱན་དང་ན་བཟའ་སེར་མོ་བསྣམས་ཤིང་རོལ་པས་བཞུགས་
[274b.3]པའོ། །གྲུབ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། གཡས་རལ་གྲི་དང་གཡོན་སྡིག་མཛུབ། ཞགས་པ་དང་བཅས་པའོ། །རྒྱན་དང་ན་བཟའ་དང་བཅས་པ། ཞབས་ཕྱེད་ཀྲུང་དུ་བཞུགས་པའོ། །
[274b.4]གཏུམ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧྲཱིཿལས་བྱུང་བའི་ལྷ་མོ་མདོག་དཀར་མོ། ཞལ་གཅིག་ཕྱག་གཉིས་པ་གཡས་དཔག་བསམ་གྱི་ཤིང་དང་། གཡོན་བདུད་རྩིས་གང་བའི་བུམ་པ་བསྣམས་པ། ཞབས་རོལ་པས་བཞུགས་པ། རྒྱན་དང་ན་བཟའ་དང་བཅས་
[274b.5]པའོ། །བདུད་རྩི་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་མུཾ་ལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། གཡས་ན་སངས་རྒྱས་ཀྱིས་སྤྲུལ་པའི་གཞལ་ཡས་ཁང་བསྣམས་པ། གཡོན་ན་ཨུཏྤལ་སྔོན་པོ་བསྣམས་པ། རྒྱན་དང་ན་བཟའ་དང་ལྡན་པ་ཞབས་
[274b.6]རོལ་པས་བཞུགས་པའོ། །སྐལ་བ་སྦྱིན་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨོཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། ཕྱག་གཡས་ན་རིན་པོ་ཆེ། གཡོན་ན་ཨུཏྤལ་སྔོན་པོ་བསྣམས་པ། རྒྱན་དང་ན་བཟའ་དང་བཅས་པ་ཞབས་རོལ་པ་དང་བཅས་པས་བཞུགས་
[274b.7]པའོ། །སྐལ་བཟང་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མ་ལ་སྭ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། ཕྱག་གཡས་ན་རི་དྭགས་རུ་རུའི་རི་མོ་ཅན་བསྣམས་པ། གཡོན་ན་ཨུཏྤ་ལ་སྔོན་པོ་བསྣམས་པ། རྒྱན་དང་ན་བཟའ་དང་བཅས་པ་ཞབས་རོལ་པ་དང་
[275a]
[275a.1]བཅས་པས་རྨ་བྱ་དང་། ཅང་ཤེས་གྱི་ཁྲི་ལ་བཞུགས་པའོ། །མཛེས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ་གཡས་མཆོག་སྦྱིན། གཡོན་ན་ཨུཏྤལ་བསྣམས་པ། རྒྱན་དང་ན་བཟའ་དང་བཅས་
[275a.2]པ། ཞབས་ཕྱེད་ཀྲུང་དུ་བཞུགས་པའོ། །འདོད་པ་གྲུབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཨ་ལས་བྱུང་བའི་ལྷ་མོ་མདོག་དམར་སེར་ཞལ་གཅིག་ཕྱག་གཉིས་མ། གཡས་རིན་པོ་ཆེའི་མཛོད་ནས། གཡོན་ལྕགས་ཀྱུས་འདྲེན་པར་མཛད་མ། ཞལ་རྣམ་པར་རྒྱས་པ།
[275a.3]རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པར་བསྒོམ་པར་བྱའོ། །དངོས་གྲུབ་ཐམས་ཅད་སྟེར་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ་དུད་ཀ་ཞལ་གཅིག་ཕྱག་གཉིས་མ་ཕྱག་གཡས་ན་བྱ་ཁྭ་ཏ་བསྣམས་ཤིང་། གཡོན་ན་དབྱུག་
[275a.4]ཐོ་བསྣམས་པ། རྒྱན་རྣམས་ཀུན་རྫོགས་པ། ཞབས་ཀྱིས་རི་མ་དྷ་ར་བརྫི་ཞིང་ཞབས་རོལ་པས་བཞུགས་པའོ། །མཐར་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་ནག་མོ། ཞལ་གཅིག་ཕྱག་གཉིས་མ། གཡས་གཡོན་གཉིས་བེེ་ཅོན་དང་སྡིགས་མཛུབ་
[275a.5]འཛིན་པར་མཛད་མ། རྒྱན་ཐམས་ཅད་ཀྱིས་བརྒྱན་ཅིང་ཞབས་རོལ་པས་གླང་པོ་ཆེ་ལ་བཞུགས་པའོ། །དྲག་ཅིང་ཁྲོ་བའི་དབང་དུ་གྱུར་པས་ཞལ་གདངས་པ་འཇིགས་སུ་རུང་བར་བལྟའོ། །སྐྲག་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཏཾ་ལས་བྱུང་བའི་ལྷ་མོ་མདོག་ལྗང་གུ་
[275a.6]ཞལ་གཅིག་ཕྱག་བཞི་མ་གཡས་གཉིས་ན་མཆོག་སྦྱིན་དང་བགྲང་ཕྲེང་། གཡོན་གཉིས་ན་གླེགས་བམ་དང་། ཨུཏྤལ་བསྣམས་པ་རྒྱན་ཐམས་ཅད་ཀྱིས་བརྒྱན་པ། སེམས་དཔའི་སྐྱིལ་ཀྲུང་དུ་བཞུགས་པའོ། །རབ་ཏུ་སྡུད་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་
[275a.7]བའི་ལྷ་མོ་མདོག་ནག་མོ། ཞལ་གཅིག་ཕྱག་གཉིས་མ་གཡས་གྲི་གུག་གཡོན་ཞགས་པ་བསྣམས་པ་འཇིགས་པར་བྱེད་པ་སྐྲ་དང་སྨིན་མ་དམར་སེར་མཆེ་བ་ཅུང་ཟད་གཙིགས་པ་ཞལ་འཛུམ་པ་དང་བཅས་ཤིང་ཁྲོ་མོའི་ལུས་ཅན་ཞབས་རོལ་པས་བཞུགས་པའོ། །འཇིགས་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་
[275b]
[275b.1]ཐབས་སོ།། །།པདྨ་དང་ཟླ་བའི་སྟེང་དུ་ཧྲཱིཿལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་བཞི་མ། གཡས་གཡོན་གྱི་དང་པོ་གཉིས་ཀྱིས་ཉི་མ་དང་ཨུཏྤལ་དམར་པོ་ཁ་བྱེ་བ། ཐ་མ་གཉིས་ན་མདའ་གཞུ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །དྲན་བྱེད་མ་
[275b.2]ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་ན་རྩེ་གསུམ་གཡོན་ན་རིལ་བ་བསྣམས་པ། རྒྱན་ཐམས་ཅད་ཀྱིས་བརྒྱན་ཅིང་། མྱ་ངན་མེད་པའི་ཤིང་ལ་བརྟེན་པ། རོལ་པའི་ཞབས་ཀྱིས་བཞུགས་པའོ། །
[275b.3]བརྟུལ་ཞུགས་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨོཾ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། གཡས་ན་ནོར་བུ་རིན་པོ་ཆེ། གཡོན་ན་བུམ་པ་བསྣམས་པ། བྱང་ཆུབ་ཀྱི་ཤིང་ལ་རྒྱབ་བརྟེན་པ། ཞབས་རོལ་
[275b.4]པས་བཞུགས་པའོ། །ཕན་པར་བརྩོན་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་མཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་བཞི་མ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་ཀྱི་དང་པོས་སྐྱབས་སྦྱིན་པ། འོག་མ་མདའ། གཡོན་དང་པོ་ཨུཏྤལ། འོག་མས་གཞུ་
[275b.5]བསྣམས་པ། ཞབས་རོལ་པས་བཞུགས་པའོ། །སྐྱོབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ། གཡས་ན་པོ་ཏི་དང་། ཨུཏྤལ་དང་བཅས་པ། གཡོན་སྐྱབས་སྦྱིན་དང་ཨུཏྤལ་དང་བཅས་པའོ། །
[275b.6]རྒྱན་ཐམས་ཅད་ཀྱིས་བརྒྱན་ཅིང་ཞབས་སྐྱིལ་ཀྲུང་དང་བཅས་པའོ། །གུས་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་གྷཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་ཀྱིས་སྐྱབས་སྦྱིན་ཞིང་། གཡོན་ན་ཨུཏྤལའི་སྟེང་ན་སྙན་པར་སྨྲ་བའི་སྒྲ་དང་
[275b.7]བཅས་པ་བསྣམས་པ། ཀྲྀཥྞ་ས་རའི་པགས་པ་ཕྲག་པ་ལ་བཀལ་བའོ། །བདེ་བ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་གདན་ལ་ཧྲཱིཿལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་ན་རལ་གྲི །གཡོན་ན་
[276a]
[276a.1]སེང་གེ་ཁ་ནང་དུ་བལྟ་བའོ། །ཞབས་རོལ་པས་བཞུགས་པའོ། །ངག་གི་དབང་ཕྱུག་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། ཕྱག་གཡས་ཨ་ཤྭ་ཀའི་སྡོང་པོ་ལ་འཁྱུད་པ། གཡོན་ན་བུམ་པ་བསྣམས་
[276a.2]པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །ཞི་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ་སྔོ་ལྗང་ཞལ་གསུམ་ཕྱག་དྲུག་མ་གཡས་དཀར་གཡོན་དམར་བ། གཡས་གཡོན་གྱི་དང་པོ་གཉིས་ཀྱིས་རལ་གྲི་དང་པོ་ཏི། བར་མ་
[276a.3]གཉིས་ཏིང་ངེ་འཛིན་དུ་བསྣོལ་བ། ཐ་མ་གཉིས་ན་མདའ་གཞུའོ། །རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །ཞི་ཞིང་ཕྲ་བ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། གཡས་འཁོར་ལོ་གཡོན་ཏིང་ངེ་འཛིན་དུ་བཞུགས་པའོ། །
[276a.4]རྒྱན་ཐམས་ཅད་ཀྱིས་བརྒྱན་པ། ཞབས་རྡོ་རྗེ་སྐྱིལ་ཀྲུང་དུ་བཞུགས་པའོ། །རྟག་པ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་སཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་རྡོ་རྗེ་རྒྱ་གྲམ། གཡོན་ནེའུ་ལེའི་རྐྱལ་བུ་བསྣམས་པ། རྒྱན་ཐམས་ཅད་ཀྱིས་བརྒྱན་པ།
[276a.5]ཞབས་རོལ་པས་བཞུགས་པའོ། །ཀུན་འགྲོ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧྲཱིཿལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། གཡས་རིན་པོ་ཆེ་གཡོན་དར་འཕན་ལྕེ་གཉིས་པ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་གཡོན་བརྐྱང་
[276a.6]བས་བཞུགས་པའོ། །རྗེས་འགྲོ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཏཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་ན་གསིལ་བྱེད་བསྣམས་པ། གཡོན་ན་པདྨ་ལ་གནས་པའི་རྒྱ་གྲམ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་
[276a.7]བས་བཞུགས་པའོ། །དོན་ཀུན་གྲུབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། གཡས་བུམ་པ་གཡོན་ལྕགས་ཀྱུ་བསྣམས་པའོ། །རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་
[276b]
[276b.1]བཞུགས་པའོ། །བཟང་པོ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨ་ལས་བྱུང་བའི་ལྷ་མོ་རྒྱན་ཐམས་ཅད་དང་ལྡན་མ་ཞལ་གཅིག་ཕྱག་གཉིས་མ་གཡས་ན་མྱ་ངན་མེད་པའི་ཤིང་། གཡོན་མཆོག་སྦྱིན་ནོ། །མདོག་སེར་མོ་ཞབས་སྐྱིལ་ཀྲུང་དུ་བཞུགས་པའོ། །གསང་བྱེད་
[276b.2]མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་སྭ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ་གཡས་ན་རིན་པོ་ཆེ་བརྩིགས་པ་བསྣམས་པ། གཡོན་ཨུཏྤལ་མཆོག་སྦྱིན་དང་བཅས་པའོ། །རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་
[276b.3]པའོ། །གསོ་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཙུཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་རིན་པོ་ཆེ་དང་བཅས་པའི་མཆོག་སྦྱིན། གཡོན་རིན་པོ་ཆེས་གང་བའི་ནོར་བུའི་རྐྱལ་པ་བསྣམས་པ། ཞབས་རོལ་པས་བཞུགས་པའོ། །
[276b.4]ནོར་སྟེར་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ་རྒྱན་ཐམས་ཅད་ཀྱིས་བརྒྱན་པ། གཡས་དང་པོ་སྐྱབས་སྦྱིན་པ། གཡོན་ཆོས་འཆད་པའི་ཕྱག་རྒྱ་ཅན་ཞབས་རོལ་པས་བཞུགས་པའོ། །མི་འཇིགས་པ་ཞེས་བྱ་
[276b.5]བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་བཾ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ། གཡས་ན་ཨུཏྤལ་སྔོན་པོ། གཡོན་ཤེལ་གྱི་ཕྲེང་བ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །བསོད་ནམས་ཅན་ཞེས་བྱ་བའི་
[276b.6]སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་བཞི་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་གཡོན་དང་པོ་གཉིས་ཀྱིས་སྤྱི་བོར་རབ་ཏུ་དགའ་བའི་ཕྱག་རྒྱ་བཅིངས་པ། གཡས་ཀྱི་འོག་མ་ན་རལ་གྲི །གཡོན་གྱི་འོག་མ་ན་ཤིང་མྱ་
[276b.7]ངན་མེད་པའི་ཡལ་ག་བཟུང་བའོ། །གཻ་ཏ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧྲི་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། གཡས་རིལ་བ་སྤྱི་བླུགས་དང་བཅས་པའི་མཆོག་སྦྱིན་པ། གཡོན་ཨུཏྤལ་སྔོན་པོ་དང་བཅས་པའི་སྐྱབས་སྦྱིན་པ། རྒྱན་
[277a]
[277a.1]ཐམས་ཅད་དང་ལྡན་པའི་ན་བཟའ་བསྣམས་པའོ། །ཞབས་རོལ་པས་བཞུགས་པའོ། །སྤྱན་རས་གཟིགས་དབང་ཕྱུག་ལས་སྐྱེས་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ་མདོག་དཀར་མོ། གཡས་ན་ཕྲེང་བ་དང་དཔལ་
[277a.2]བེའུ། གཡོན་པདྨ་དང་བུམ་པ་བསྣམས་པ། ཞལ་གཅིག་ཕྱག་གཉིས་པ་རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བུམ་པའི་སྟེང་ན་བཞུགས་པའོ། །མི་འཇིགས་པ་སྲེད་ལེན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་
[277a.3]ཕྱག་གཉིས་མ། གཡས་ན་འབྲས་ཀྱི་སྙེ་མ། གཡོན་ན་མེ་ལོང་ཕྲེང་བ་དང་བཅས་པ་བསྣམས་པའོ། །རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །དཀའ་ཐུབ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་མདོག་ལྗང་གུ་
[277a.4]ཞལ་གཅིག་ཕྱག་གཉིས་མ་གཡས་སྐྱབས་སྦྱིན་གཡོན་ཨུཏྤལ་བསྣམས་པ། རྒྱན་ཐམས་ཅད་ཀྱིས་བརྒྱན་ཅིང་ཞབས་རོལ་པས་བཞུགས་པ། རྐུན་པོ་དང་ཆོམ་རྐུན་ལས་རྒྱལ་བ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཛཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་
[277a.5]གཉིས་པ། གཡས་ན་རྨ་བྱའི་སྒྲོ་བསྣམས་པ། གཡོན་སྐྱབས་སྦྱིན་པའི་ཕྱག་གིས་ཨུཏྤལ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །སྦྲུལ་ལས་སྐྱོབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་
[277a.6]མདོག་ལྗང་གུ་ཞལ་གཅིག་ཕྱག་གཉིས་མ་གཡས་སྐྱབས་སྦྱིན་པ། གཡོན་ཨུཏྤལ་དང་བཅས་པའི་སྐྱབས་སྦྱིན་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །སེང་གེའི་འཇིགས་པ་ལས་སྐྱོབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་
[277a.7]ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ། རྒྱན་ཐམས་ཅད་དང་ལྡན་པ་ཕྱག་གཡས་ན་ཟླ་བ་བསྣམས་ཤིང་སྐྱབས་སྦྱིན་པར་མཛད་པ། གཡོན་ཨུཏྤལ་བསྣམས་ཤིང་སྐྱབས་སྦྱིན་པར་མཛད་པ། ཞབས་རོལ་པས་མེའི་ས་བོན་ལས་གཞལ་བར་མཛད་པའོ། །མེ་ལས་སྐྱོབ་པར་
[277b]
[277b.1]བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ། རྒྱན་ཐམས་ཅད་དང་ལྡན་པ། ཕྱག་གཡས་སྐྱབས་སྦྱིན་པ། གཡོན་ཨུཏྤལ་དང་བཅས་པའི་སྐྱབས་སྦྱིན་པ། ཞབས་རོལ་བ་དང་བཅས་པས་གླང་པོ་ཆེ་
[277b.2]མནན་པའོ། །གླང་པོ་ཆེ་ལས་སྐྱོབ་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་དཀར་ལྗང་ཞལ་གཅིག་ཕྱག་གཉིས་པ། གཡས་སྐྱབས་སྦྱིན་པའི་ཕྱག་རྒྱས་སྲིན་ལག་མཐེ་བོང་གིས་མནན་པའོ། །གཡོན་ཨུཏྤལ་དང་བཅས་པའི་སྐྱབས་སྦྱིན་པའོ། །
[277b.3]རྒྱན་ཐམས་ཅད་ཀྱིས་བརྒྱན་ཅིང་ཞབས་རོལ་བས་སྟག་ལ་བཅིབས་པའོ། །སྟག་ལས་སྐྱོབ་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ལཾ་ལས་བྱུང་བའི་ལྷ་མོ་མདོག་སྔོ་ལྗང་། ཞལ་གཅིག་ཕྱག་གཉིས་པ་གཡས་སྐྱབས་སྦྱིན་ཞིང་། གཡོན་ཨུཏྤལ་ཐུགས་ཀར་སྐྱབས་སྦྱིན་དང་བཅས་པས་
[277b.4]བཟུང་བའོ། །རྒྱན་ཐམས་ཅད་ཀྱིས་བརྒྱན་ཅིང་ཞབས་རོལ་བས་ཆུའི་སྟེང་དུ་བཞུགས་པའོ། །ཆུ་ལས་སྐྱོབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བ་དང་ཉི་མའི་སྟེང་དུ་ཧྲིཿལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་དང་ལྡན་པ། གཡས་
[277b.5]སྐྱབས་སྦྱིན་པ། གཡོན་ཨུཏྤལ་ལའི་སྟེང་དུ་ལྕགས་ཀྱུས་མཚན་པ་བསྣམས་པའོ། །ཞབས་རོལ་པས་མིའི་དབང་པོ་མནན་པའོ། །རང་གི་ལུས་ཀྱི་འོད་ཟེར་དམར་པོས་དེའི་ལུས་བཀང་ལ་རང་གི་གནས་སུ་བཞག་གོ། །ཞི་མཛད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།དེ་ནས་ཐུབ་པའི་ལྷ་མོ་ཞེས་བྱ་
[277b.6]བའི་སྒྲོལ་མ་ནི། སྔར་བསྟན་པའི་ཆོ་ག་ལས་བདུད་རྩིའི་དཀྱིལ་འཁོར་དུ་ས་བོན་ལྔ་པའི་སྡེ་ཚན་གྱི་དང་པོ་ལ་དང་པོ་གཉིས་པས་མནན་ལ་ཟླ་ཚེས་ཕྱེད་པའི་ཐིག་ལེས་བརྒྱན་པའོ། །དེ་ལས་གྲུབ་པའི་སྒྲོལ་མ་བསྒོམ་པར་བྱའོ། །མཆོག་ཏུ་རྣམ་པར་མཛེས་མ། ཞལ་གཅིག་པ་ཡིད་དུ་འོང་བ་མོ་ལྗང་གུ་ཕྱག་
[277b.7]གཉིས་མ། གཡས་མཆོག་སྦྱིན་པ་གཡོན་ཨུཏྤལ་འཛིན་པའོ། །པདྨ་དང་ཟླ་བ་ལ་གནས་པ་རྒྱན་ཐམས་ཅད་ཀྱིས་བརྒྱན་པར་བསམ་མོ། །ལག་པ་གཉིས་ཐལ་མོ་སྦྱར་ལ་མཛུབ་མོ་གཉིས་ཀྱིས་གུང་མོའི་སེན་མོ་བཀབ་ལ་སྲིན་ལག་ནང་དུ་བཅུག་སྟེ་མཐེ་བོང་མནན་པ་ནི་ཨུཏྤལ་ཁ་བྱེ་བའི་ཕྱག་རྒྱའོ། །ཨོཾ་ཏཱ་རེ་
[278a]
[278a.1]ཏུཏྟཱ་རེ་ཏུ་རེ་སྭཱ་ཧཱ། དེ་ནས་སྙིང་གའི་ས་བོན་ལས་འོད་ཟེར་འཕྲོས་པས་ཛཿདང་ཧཱུཾ་ལ་སོགས་པས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་གཞུག་ཅིང་དབང་དུ་བྱའོ། །གནས་གསུམ་ལ་ནི་རྡོ་རྗེ་གསུམ། །བྱིན་གྱིས་བརླབས་ལ་སྐུ་ལ་སོགས། །འཁོར་ལོ་པདྨ་རྡོ་རྗེ་དང་། །ཨོཾ་ཨཱཿཧཱུཾ་ལས་རྟག་པ་
[278a.2]དང་། །འོད་དཔག་མེད་དང་མི་བསྐྱོད་པ། །དེ་ནས་ཐུགས་ཀའི་ས་བོན་ལས། །འོད་འཕྲོས་ཡེ་ཤེས་སེམས་དཔའ་ནི། །སྔ་མའི་ཚུལ་ཅན་སྤྱན་དྲངས་ཏེ། །དབང་བསྐུར་རིགས་ཀྱི་བདག་པོ་ནི། འོད་དཔག་མེད་ཀྱིས་སྤྱི་བོར་བརྒྱན། །དེ་ནས་ས་བོན་ལས་བྱུང་བའི། །འོད་ཀྱི་ལྷ་ཡི་སྤྲོ་བསྡུ་ལས། །སྐྱོ་ན་
[278a.3]ཐུགས་ཀའི་ས་བོན་ལས། །འོད་འཕྲོས་སྣོད་བཅུད་མ་ལུས་ཞུ། །བདག་ཀྱང་ས་བོན་དེ་དག་ལས། །ཤིན་ཏུ་ཕྲ་བར་བསམ་མི་ཁྱབ། །རྣམ་པར་མི་རྟོག་དེ་དམིགས་ཤིང་། །ནམ་མཁའི་དཀྱིལ་ལྟར་རབ་དབེན་པ། །བདེ་བར་གཤེགས་པ་ཀུན་གྱི་གནས། །དེ་ནས་སྐྱོ་ན་བཟླས་པ་ནི། །འབུམ་ཕྲག་
[278a.4]བཞིའམ་འོན་ཏེ་དྲུག །འབུམ་ཕྲག་བཅུ་ཡིས་ལས་རྣམས་འགྲུབ། །རྣལ་འབྱོར་པ་ནི་གང་ཞིག་གིས། །འདི་དོན་ཉམས་སུ་གང་ལེན་པ། །ཐོག་མ་ཐ་མ་མེད་ཞི་བའི། སྒྲོལ་མ་ཡུམ་མཆོག་ཉིད་གྱུར་ནས། །དངོས་གྲུབ་གཉིས་སོགས་འཐོབ་འགྱུར་ཏེ། །ཡོན་ཏན་དཔག་མེད་འབྱུང་བར་
[278a.5]གསུངས། །དེ་ལྟར་སྟོང་དང་སྙིང་རྗེའི་བདག་ཉིད་སྲིད་པ་གསུམ་སྐྱེས་ཟད་ངེས་ཤེས་དང་ནི། །ཤེས་བྱ་གཉིས་སུ་མེད་སྐུ་ཀུན་དུ་བཟང་པོའི་སྤྱོད་པའི་བདག་ཉིད་སྣ་ཚོགས་ཡུམ། །བཅོམ་ལྡན་འདས་མའི་སྒྲུབ་ཐབས་རྒྱུད་འཛིན་ལེགས་བཀོད་པ་ལས་བསོད་ནམས་དྲི་མ་མེད། །བདག་གིས་གང་
[278a.6]ཐོབ་དེས་ནི་འགྲོ་བ་མ་ལུས་རྟག་བདེ་མྱ་ངན་འདས་ཐོབ་ཤོག །ལྷ་མོ་སྒྲོལ་མའི་སྒྲུབ་ཐབས་བརྒྱ་རྩ་བརྒྱད་པ་ཞེས་བྱ་བ། སློབ་དཔོན་ཆེན་པོ་ཙནྡྲ་གོ་མིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀཱ་ར་ཤྲཱི་ཛྙཱ་ན་དང་། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་བའོ། །སླད་ཀྱིས་རྒྱ་
[278a.7]གར་གྱི་པཎྜི་ཏ་དཱ་ན་ཤཱི་ལ་དང་། བོད་ཀྱི་ལོ་ཙཱ་བ་བློ་གྲོས་གྲགས་པས་བཅོས་ཏེ་གཏན་ལ་ཕབ་པའོ།། {T3666}༄༅༅། །རྒྱ་གར་སྐད་དུ། ཨཱ་ཡུཪྺརྡྷ་ནི་བིདྷིཿ། བོད་སྐད་དུ། ཚེ་འཕེལ་བའི་ཆོ་ག །རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །སྔོན་དུ་གསུངས་པའི་རིམ་པས་
[278b]
[278b.1]སྒྲོལ་མ་དཀར་མོ་ཞལ་གཅིག་པ་ཕྱག་གཉིས་པ། སྐྱིལ་མོ་ཀྲུང་དུ་བཞུགས་པར་བསྒོམས་ཏེ། ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ས་བོན་གྱི་ཡི་གེ་བལྟའོ། །དེ་ལ་འོད་འཕྲོས་པས་མདུན་གྱི་ནམ་མཁའ་ལ་མགོན་པོ་ཚེ་དཔག་ཏུ་མེད་པ་སྐུ་མདོག་དཀར་པོ་མཉམ་གཞག་གི་ཕྱག་རྒྱ་ཅན་ཡུམ་དང་
[278b.2]བཅས་པ། ཕྱག་གི་སྟེང་ན་རིན་པོ་ཆེའི་བུམ་པ་ཅན་གྱི་མདུན་དུ་མི་བསྐྱོད་པ་སྔོན་པོ་གཡས་པ་ས་གནོན། གཡོན་རིན་པོ་ཆེའི་བུམ་པ་ཅན་གྱིས་ཡུམ་ལ་འཁྱུད་པ། གཡས་སུ་རིན་འབྱུང་གསེར་བཙོ་མའི་མདོག་ཅན་ཕྱག་གཡས་མཆོག་སྦྱིན། གཡོན་ནི་སྔ་མའི་ཚུལ་དང་མཚུངས་སོ། །རྒྱབ་ཏུ་རྣམ་སྣང་
[278b.3]དམར་པོ། གཡས་བྱང་ཆུབ་མཆོག་གི་ཕྱག་རྒྱ་ཅན། གཡོན་དུ་དོན་ཡོད་གྲུབ་པ་ལྗང་གུ་སྐྱབས་སྦྱིན་གྱི་ཕྱག་རྒྱ་ཅན་ཏེ་རིགས་ལྔ་དང་། ཡུམ་ཐམས་ཅད་ནི་རང་སྣང་གི་ཡུམ་མོ། །དེ་དག་ལ་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བར་དམིགས་ཏེ། སྐྱབས་འགྲོ་ལ་སོགས་པ་ཚུལ་
[278b.4]བཞིན་དུ་བྱའོ། །ཚེ་འཕེལ་བར་གསོལ་བ་གདབ་པ་ནི། ཨོཾ་ན་མོ་བྷ་ག་ཝ་ཏེ་ཨ་མི་ཏཱ་བྷཱ་ཝ་ཏི་ཏ་ཐཱ་ག་ཏ། སརྦ་བུདྡྷ་བོ་དྷི་ས་ཏྭ་སྱ་ཨ་ཧཾ་ཨཱ་ཡུཪྺརྡྷ་ནི། པྲཱ་ཎ་ཝརྡྷ་ནི། ཛཱི་བ་ཝརྡྷ་ནི། ཨ་དྷིཥྛཱ་ན་ཨ་དྷིཥྛི་ཏེ་སྭཱ་ཧཱ། ཞེས་པ་དང་། སྣང་བ་མཐའ་ཡས་ལ་སོགས་པ་ཡབ་རྣམས་ཀྱིས་སོ་སོའི་ཡུམ་ལ་བསྐུལ་
[278b.5]ཏེ་ཚེའི་དངོས་གྲུབ་བརྟན་པར་བྱས་ནས། བདག་ཉིད་ལ་དབང་བསྐུར་བའི་སྦྱོར་བ་ལ་ཞུགས་ཏེ་འདུག་པར་བསམ། བདག་ཉིད་ཀྱང་སྤྱི་བོ་ཚངས་པའི་བུ་ག་ཁ་ཕྱེ་སྟེ་སྙིང་གའི་ཆུ་སྐྱེས་ལ་གནས་པའི་འབྱུང་བ་བཞིའི་རྩ་ཁ་ཕྱེ་སྟེ། རྩ་ཐམས་ཅད་སོ་སོར་ཁ་ཕྱེ་བར་བསམ། དེ་ནས་དེ་བཞིན་གཤེགས་པ་
[278b.6]ཐམས་ཅད་ཀྱིས་བདག་ལ་འཆི་མེད་ཀྱི་དབང་བསྐུར་ཏེ། ཡེ་ཤེས་ཀྱི་བདུད་རྩིའི་རྒྱུན་ཚངས་པའི་བུ་ག་ནས་བླུགས་པས་རྩ་ཐམས་ཅད་ཁེངས་པ་དང་། ཁྱད་པར་དུ་ཆུ་སྐྱེས་ཀྱི་རྩ་ལྔ་གང་བས་སྲོག་འཛིན་པ་རྣལ་དུ་ཚུད་དེ་འཆི་བ་མེད་པར་བསམ་ཞིང་སྔགས་འདི་ཉེར་གཅིག་བཟླས་སོ། །ཨོཾ་ཏཱ་
[278b.7]རེ་ཏུཏྟཱ་རེ་ཏུ་རེ་ཨཱ་ཡུཪྺརྡྷ་ཀ་དྷ་བྷྱཿསྭཱ་ཧཱ། ཞེས་པས་དེ་བཞིན་གཤེགས་པ་རྣམས་སྣང་བ་མཐའ་ཡས་ལ་འདུས་ཏེ། དེ་དབུ་རྒྱན་གྱི་ཚུལ་དུ་བདག་གི་སྤྱི་བོར་བྱོན་པས་ཚེ་བརྟན་པར་འགྱུར་རོ། །གཞན་རྣམས་གཤེགས་སུ་གསོལ། དེས་སྐྱོ་ནས་ལྡང་བར་འདོད་ན་མི་དམིགས་པས་ཟིན་པའི་དགེ་བ་བསྔོའོ། །
[279a]
[279a.1]སྔ་མ་ལྟར་ཐུན་བཞི་ལ་སོགས་པ་བསྒོམས་ན་ཟླ་བ་དྲུག་གིས་འཆི་བ་མེད་པའི་དངོས་གྲུབ་ཏུ་འགྱུར་རོ། །གཞན་ཡང་ཅི་རིགས་པས་ཀྱང་འཕེལ་ལོ། །སྒྲོལ་མ་ཚེ་སྤེལ་བ་ཞེས་བྱ་བའི་རིག་པ། སློབ་དཔོན་ཙནྡྲ་གོ་མིས་མཛད་པ་རྫོགས་སོ།། །།མ་ཧཱ་པཎྜི་ཏ་རཏྣ་རཀྵི་ཏའི་ཞལ་
[279a.2]སྔ་ནས། ལོ་ཙཱ་བ་ཞང་གྲུབ་པ་དཔལ་བཟང་པོས་བསྒྱུར་བའོ།། {T3667}༄༅༅། །རྒྱ་གར་སྐད་དུ། ཤྲཱི་མ་ཧཱ་ཏཱ་རཱ་སྟོ་ཏྲ་ན་མ། བོད་སྐད་དུ། དཔལ་ཆེན་མོ་སྒྲོལ་མའི་བསྟོད་པ་ཞེས་བྱ་བ། དཔལ་ཆེན་མོ་སྒྲོལ་མ་ལ་ཕྱག་འཚལ་ལོ། །ཞི་བའི་གྲོང་ཁྱེར་འཇུག་ལ་གྲོང་སྒོའི་མི་མོ་བཟོད་
[279a.3]བྱས་འདྲ་བ་དང་། །རྒྱལ་བའི་ལམ་དུ་འཇུག་ལ་དབྱིབས་ཅན་མདུན་ན་གནས་པའི་གཞུང་ལམ་ལྟ་བུ་དང་། །ཤིན་ཏུ་བཟློག་པར་དཀའི་བའི་བདུད་ཀྱི་རྒྱུ་ལས་ཐར་མཛད་ཡང་ན་གསང་སྔགས་ལྷ། །ཁོ་བོ་བློ་གྲོས་བླུན་པོ་འདིས་ནི་དཔལ་ཆེན་མོ་བསྟོད་བགྱི་བ་ཇི་ལྟ་ལགས། །གང་ཡང་རྒྱལ་སྲས་བདེ་བར་
[279a.4]གཤེགས་པའི་རིགས་འཛིན་ས་བཅུའི་ཕ་རོལ་ཕྱིན་རྣམས་ཀྱི། །ཁྱོད་ཀྱི་ཡོན་ཏན་རིན་ཆེན་ཚོགས་ནི་གསལ་མཛད་ལྷ་རྣམས་ཀྱིས་ཀྱང་གླུ་ལེན་ཏེ། །དེ་ལྟ་ན་ཡང་གུས་པ་འབའ་ཞིག་གིས་བསྟོད་ལྷ་མོ་བདག་ལ་བཟོད་མཛོད་ཀྱེ། །མི་ཤེས་བྱིས་པ་ཡིས་ནི་རང་གི་མ་ལ་ཐལ་གྱིས་འཐོར་བ་མིན་ནམ་ཅི། །མཐའ་
[279a.5]དག་མི་དབང་འདུས་པའི་གཙུག་གི་ནོར་བུ་རྣམས་ཀྱིས་བཏུད་བྱས་འདམ་སྐྱེས་ཞབས། །གདུགས་དཀར་ཐིག་ལེ་གྱེན་དུ་འབར་ཞིང་ས་བདག་ཁྱེད་ཀྱི་འདོད་པ་ཡིས་ནི་འགྱུར། །རྣམ་རྒྱས་རྫིང་བུར་སྐྱེས་པའི་འོད་འཕྲོག་སྤྱན་གྱིས་གང་ལ་གཟིགས་གྱུར་དེ་ལ་ནི། །བཅོམ་ལྡན་གླང་ཆེན་སེང་གེའི་གདན་རྟ་ཤིང་རྟ་རྐང་
[279a.6]ཐང་མཆོག་རྣམས་རྗེས་སུ་འགྲོ། །རང་གི་ཕྱག་གི་སྟོབས་ཀྱིས་ཉེར་སྐྱེས་རྣམ་གྲངས་ཕ་རོལ་གནོན་པས་དགྲ་རྣམས་ཐུལ། །འབར་བ་ཆེན་པོ་དཀྱིལ་འཁོར་མཆོག་གི་ཕུན་སུམ་ཚོགས་གྱུར་མི་བདག་རྣམས་ལ་ནི། །སྟེར་བར་བསྔགས་ཤིང་ངེས་འབྱེད་སྔགས་ཀྱི་ཡུལ་ལ་མི་དབང་བློན་པོའི་བློར་གྱུར་ལ། །
[279a.7]རི་སྐྱིབས་ཟབ་མོར་ས་ཕུག་ཟབ་མོའི་གཞི་ལ་རྣལ་འབྱོར་རྣམས་ཀྱིས་འཛིན་པར་འགྱུར། །རབ་ཏུ་མྱོས་པ་པདྨའི་ཚལ་ལ་མ་ལ་ཡར་རླུང་དལ་བུས་གཡོ་ཞིང་བསྐྱོད། །འདབ་མ་རྣམས་ལ་ཕུལ་བྱུང་བུང་བའི་ཚོགས་ཀྱིས་ཉེ་བར་གླུ་ལེན་མེ་ཏོག་གི། །འབྱུང་གནས་ཡ་མཚན་མཛེས་མ་ཁྱོད་ཡིན་ལྷ་མོ་ཁྱོད་ཀྱི་
[279b]
[279b.1]བསྔགས་པ་རྣམས་ཀྱིས་ནི། །རྒྱལ་སྲིད་འབྲས་བུ་འགྲུབ་མཛད་འགྲམ་རྒྱས་རྩི་ལོགས་མྱོས་ཆུའི་མཚན་ལ་འགྲོ།། ཁྱེད་ཞབས་བཀའ་དྲིན་གྱིས་ནི་རང་དབང་ཁང་པའི་སྐྱེད་མོས་ཚལ་ལ་ཡུན་རིང་དུ། །རྩེད་མོས་སྤྲོ་ལ་སྤྱན་མིག་དྲག་ཏུ་གཡོ་ཞིང་དགའ་མཆོག་རྣམས་ཀྱིས་ནི། །ཞལ་གྱི་པདྨའི་དབུགས་རླུང་
[279b.2]གིས་བསྐྱོད་བུད་མེད་རྣམས་དང་ཉེ་བར་ལོངས་སྤྱད་ནས། །དེ་ནི་ཨ་མྲ་སར་པས་བྲན་ལས་དྲི་ཞིམ་སྦྲང་རྩི་རྣམས་ལ་འཐུང་བར་འགྱུར། །རབ་དགའི་ནགས་ལ་མེ་ཏོག་ཁུར་འཕྱང་མྱོས་པའི་སྐད་སྙན་ཁུ་བྱུག་གིས་ཁྱབ་ཅིང་། །སྦྲང་རྩིས་མྱོས་པའི་བུང་བ་ཚོགས་པའི་དར་དིར་ལྡན་ལ་སོ་གའི་དཔལ་ཡིན་
[279b.3]ཏེ། །འོ་མའི་རྒྱ་མཚོ་རླབས་ཕྲེང་གཡོ་བར་བཞད་གད་ཀུ་མུ་ད་ཡི་འབྱུང་གནས་དང་། །ཤེལ་གྱི་ས་གཞི་བླ་གབ་མེད་པར་ཕུལ་བྱུང་ཟླ་བའི་ཆ་ཤས་ཉིད་ལགས། །བཟོ་བོས་བྱས་པའི་རྩེད་མོའི་རི་རྩེར་བཀོད་པ་ཟླ་བ་ནོར་བུའི་ཆུ་རྒྱུན་ནི། །བསྲུབས་པ་འཁྲུལ་འཁོར་ཆུ་སྲིན་ཁ་ནས་འཐོན་ཅིང་རྙོག་
[279b.4]བྲལ་ལྷུང་ལྷུང་སྒྲོགས་པའི་ཆུ། །དཔྱིད་དུས་ཆང་གིས་མྱོས་ཞིང་ཚིམ་པའི་ཁུ་བྱུག་སྐད་སྙན་སྒྲོགས་པའི་ནམ་མཁའ་ལ། །ས་སྐྱོང་གིས་སྤྲུལ་ཁང་པ་དཔེ་མེད་པ་ལ་རབ་ཏུ་གནས་མཛད་ཁྱེད་ཉིད་ལགས། །གླང་ཆེན་མཆེ་བ་མཉེན་ལ་བཟོ་བོས་སྐར་ཁུང་དྲ་མིག་ལས་འཐོན་བྱ་འདབ་ལ། །གནས་
[279b.5]ཤིང་རྣམ་པར་སྒེག་བཅས་མྱོས་པའི་ཕུག་རོན་སྒྲ་སྙན་མགྲིན་པ་ནས་གྲག་སྟེ། །ནོར་བུའི་རྐང་གདུབ་མཆོག་ཏུ་འཇམ་ཞིང་སིལ་ཁྲོལ་བསྐྱོད་པ་བཙུན་མོའི་དཀྱིལ་འཁོར་དུ། །ས་སྐྱོང་དག་གི་ཁྱིམ་ལ་ཏི་སེའི་གངས་མཚུངས་ཕུན་སུམ་ཚོགས་པ་ཁྱེད་ཉིད་ལས། །ནུ་མར་ཉེར་བཞག་ལག་པ་
[279b.6]གཅིག་གིས་སྨད་གོས་གཤེར་བ་གཡོ་བའི་མཐའ་བཟུང་སྟེ། །རྐྱལ་ཞིང་རྩེད་མོའི་བདེ་བ་ཡུན་རིང་མྱོས་ནས་ཁང་པའི་རྫིང་བུ་ནས་འཐོན་ཅིང་། །སྐྱེ་བོ་འདྲིས་པས་སྐྲ་རྩེ་ཟླུམ་ཤིང་ཅུང་ཟད་ཟུར་མིག་ལྟ་བ་ཚ་བའི་དུས། །རི་མོ་བྲིས་འདྲའི་ཡན་ལག་མཆོག་མ་རྣམས་དང་ཉམས་དགའ་ཁྱེད་ཀྱི་མཐུ་ཡིས་སུ། །
[279b.7]ཟླ་བའི་ཆོས་ལས་བརྡུངས་ཤིང་འཁྲུལ་འཁོར་ཁང་ཁྱིམ་རྩེད་མོའི་རི་ལས་བབ། །རབ་ཏུ་མྱོས་པའི་ནགས་ཀྱི་ཉེ་ལོགས་པདྨའི་ལྗོན་ཤིང་ཁང་པར་ས་བདག་རྣམས། །རྒྱུན་ཆད་མེད་པར་རླུང་ཡབ་དལ་བུས་གཡབས་པ་ཡིས་ནི་དབུ་སྐྲ་གཡོ་ཞིང་བསྐྱོད། །ཉི་མ་ཚ་བའི་དུས་ལ་ཁྱེད་ཀྱི་བཀའ་དྲིན་ལས་ནི་
[280a]
[280a.1]ཉིན་ཞག་འདའ་བར་འགྱུར། །ཆུ་འབབ་སྤྲིན་ཚོགས་འབྲུག་སྒྲ་སྒྲོགས་ཤིང་རྨ་བྱའི་དཀྱིལ་འཁོར་ཀུན་ནས་སྐད་སྙན་འདོན། །འདམ་སྐྱེས་མེ་ཐོན་ལ་ནི་འཇམ་རླུང་རབ་ཏུ་གཡོ་ཞིང་གླུ་དབྱངས་ཆུ་གཏེར་དུས། །སྙན་དངགས་མཁས་པའི་དྲི་ཟས་བསྐོར་ཞིང་འཇམ་པོས་བསྣུན་པའི་
[280a.2]གཏིང་རིང་རྔ་སྐད་ཀྱིས། །ཁང་པའི་ནང་རྣམས་ཡོངས་སུ་གང་བ་ཁྱེད་འདོད་པས་ནི་རྒྱུན་དུ་ཐོས་པར་འགྱུར། །སྦྲང་རྩིའི་ཆང་གིས་མྱོས་ཤིང་རིག་འཛིན་གྲུབ་པའི་ཆུང་མའི་ཆུ་སྐྱེས་ཞལ་ལ་བཏུད་བྱས་ལས། །ལྷུང་བའི་མནྡྷ་ར་ཡི་རྡུལ་གྱི་ཀུན་ནས་མདོག་སེར་མ་པད་མཚོ་ལས་རྒྱལ། །ལྷ་ཡི་གྲོང་
[280a.3]ཁྱེར་གཞལ་མེད་ཁང་གི་ལྷ་མོའི་སྐྱེ་བོ་དམ་འཁྱུད་སྤྲོ་བ་ལ། །ཁྱེད་ཀྱི་མཆོག་ལ་སྒྲུབ་པ་པོ་རྣམས་བདེ་ཉིད་ཉིན་རེར་རྗེས་སུ་མྱོང་བར་འགྱུར། །སྣ་ཚོགས་འགུགས་སྔགས་ཕྱག་རྒྱའི་ཚོགས་སྤྲུལ་རྡོ་རྗེའི་གུར་གྱིས་མེ་སྟག་འབར་བ་ལ། །བགེགས་ཀྱི་གཙོ་བོ་རྣམས་ནི་སྐྲག་ཅིང་འཇིགས་
[280a.4]པས་རྒྱ་མཚོ་དག་ཏུ་འབྲོས་འགྱུར་ཏེ། །མྱུར་བར་བསྐྱོད་པ་གཏུམ་པོའི་ཧཱུཾ་ཡིག་སྒྲ་ཡིས་བསྣུན་པས་སྒྲ་ལྡན་ལྕགས་སྒྲོག་གཏོར། །ལྷ་མོ་ཁྱེད་ཀྱི་གསང་སྔགས་ཟློས་པའི་ཁང་པར་རང་ཉིད་འདུ་ཞིང་འོང་བར་འགྱུར། །གར་གནས་ཁང་སའི་སྐྱོར་ལ་གླུ་དབྱངས་འདུ་སར་རབ་བརྡུངས་གཏིང་རིང་རྔ་
[280a.5]སྐད་ཀྱིས། །འདྲིས་ཤིང་ཡིད་འོང་གླིང་བུའི་རྗེས་འགྲོའི་སྒྲ་དབྱངས་ཉེ་བར་ལོངས་སྤྱོད་མཛད་ནས་ནི། །དེ་རྗེས་གྱ་ཚོམ་བུང་བ་མེ་ཏོག་སྙིམ་པར་གར་གྱི་ཆོ་ག་ཡིད་འཕྲོག་ལ། །རབ་ཏུ་མྱོས་མ་རྣམས་ཀྱིས་ཁྱེད་ཉིད་གར་གྱི་དཔོན་པོར་ངེས་པར་གར་གྱི་ལྷ། །རྒྱུན་ཆད་མེད་པར་ལག་པའི་རྩོལ་བའི་
[280a.6]བྱ་བས་བསྣུན་པའི་ཡིད་འོང་རྫ་རྔའི་བཞིན། །གཡེར་ཀའི་སྒྲ་ཡིས་མྱུར་བར་རྣམ་རོལ་འདེགས་ཤིང་རྨ་བྱའི་མཇུག་སྒྲོ་རྣ་བར་བཙུགས། །རྣམ་པ་སྣ་ཚོགས་མཁས་ཤིང་ཡིད་འོང་སྣོད་ལྡན་སྐྱེ་བོས་ཡོངས་གང་ཁང་ཁྱིམ་ལ། །ཁྱེད་ལ་བརྟེན་པས་བདེ་ལྡན་གླུ་དབྱངས་བདེ་བ་ཉིན་རེར་བདེ་ལ་ལོངས་སྤྱོད་
[280a.7]འགྱུར། །རྒྱལ་མཚན་དང་ནི་གདུགས་དཀར་སེང་གེའི་གདན་དང་གསེར་གྱི་བུམ་པ་རྔ་ཡབ་དང་། །ཟླ་ཟེར་དཀར་བའི་བསིལ་ཁང་མགྱོགས་འགྲོའི་ཕྲེང་བ་དྲི་ཞིམ་ཆང་ལྡན་གླང་ཆེན་རྣམས། །ཁྱེད་ཀྱི་གཟུགས་བརྙན་རྟག་ཏུ་དྲན་བྱེད་བུད་མེད་དེ་ཡི་རྣ་ལུང་རིན་ཆེན་འོད། །ལྷ་མོ་ཅུང་ཟད་བཞད་པའི་
[280b]
[280b.1]རྣམ་པས་རྣམ་པར་རྒྱལ་བ་དེ་མ་ཐག་ཏུ་འགྱུར། །སྐད་སྙན་ངང་པའི་དབྱངས་ནི་མཆོག་ཏུ་འགྱིང་འགྲོ་ནོར་བུའི་རྐང་གདུབ་སྒྲ་ཡིས་ཕམ། །འགྲམ་ལོགས་དཀྱིལ་འཁོར་འཇམ་རླུང་གིས་བདར་གཡོ་ཞིང་འཁྱིལ་པའི་སྒྲ་ཡིས་མདུད་པ་འབྱེད། །རྐེད་སྨད་མདོམས་ཀྱི་ཆ་ནི་འོད་འཕྲོའི་དོ་
[280b.2]ཤལ་ནུ་མའི་ཁུང་བུའི་ལྗིད་ཀྱིས་དུད། །ལྷ་མོས་གང་ལ་གཟིགས་པ་དེ་ལ་རྔ་ཡབ་དཀར་འཛིན་བུད་མེད་འདུ་བར་འགྱུར། །རྒྱུན་མི་འཆད་པར་ལྷ་མོ་ཁྱོད་ཀྱི་ཡོན་ཏན་རྗེས་དྲན་མི་སྐྱོ་གང་ཡིན་དེ། །ནོར་བུའི་རང་བཞིན་ཞལ་བའི་གཞི་མར་ཟླ་ཟེར་ལོ་འདབ་རྣམས་ལ་འགྱིང་བ་ཡིས། །ནུ་མར་ལག་གཅིག་
[280b.3]ཉེར་གཞག་བུད་མེད་སྐྱེ་བོ་དག་གིས་བཟུང་བའི་ག་བུར་ཆུ། །ཁ་འབུས་ཨུཏྤལ་སྔོན་པོ་དྲི་ལྡན་སྦྲང་རྩི་འཐུངས་འགྱུར་མི་འཇིགས་སྦྱིན་པ་ཀྱེ། །མོ་བཙུན་རྣམས་ཀྱི་འགྲམ་པའི་ལོགས་ལ་རྣ་རྒྱན་མཆོག་ཏུ་འགྱིང་ཞིང་རྒོད། །སྤྱན་མིག་ལ་ཡང་ཁྲོ་བ་སོ་མས་བསྐྱེད་པའི་མཆི་མའི་ཆུ་ཡིས་དབའ་
[280b.4]རླབས་གཡོ། །མཁྲེགས་ཤིང་འབུར་བ་ནུ་མ་སོ་མའི་ཚོགས་ལ་གུར་གུམ་འདམ་གྱིས་ཁ་དོག་སེར། །རབ་རིབ་སྔོན་པོ་དབུ་སྐྲ་མེ་ཏོག་ཁ་འབུས་ཚོགས་ལའང་མཆོག་ཏུ་དགའ་བར་འགྱུར། །སྤྲུལ་བྱས་པདྨ་རཱ་གའི་སྟེགས་ལ་འགྲེ་ལྡོག་འགྱུར་བ་ལྷ་མོའི་སྐྱེ་བོ་ལས། །སྤྲུལ་ཏེ་གཅལ་བཀྲམ་
[280b.5]མུ་ཏིག་དོ་ཤལ་གྱིས་ཁྱབ་རིན་ཆེན་ལྗོན་ཤིང་ཁང་པའི་ནང་། །དེས་ལྷུང་མེ་ཏོག་རྡུལ་གྱིས་ཀུན་ནས་ཡོངས་བསྒོས་དགའ་བའི་ས་ཡི་དཀྱིལ་འཁོར་ལ། །བཅོམ་ལྡན་འདས་མ་ཁྱེད་ཀྱི་ཞབས་ཟུང་མཆོད་བྱེད་གང་དེ་ཡུན་རིང་གནས་པར་འགྱུར། །སྐད་ཅིག་རེ་རེར་རྔ་རིང་རྫ་རྔ་མཐའ་དག་བརྡུངས་པའི་
[280b.6]སྒྲ་ཡིས་རྐང་པ་འགྱིང་། །གླང་པོ་མཛངས་པའི་སྤྱི་ལ་ལག་པའི་རྣ་ལྕག་རབ་འགོད་ཕྱེད་བཙུགས་མིག །ཨ་མྲ་སར་བྲན་དྲི་ཞིམ་འབབ་ཅིང་འགྲམ་པའི་དཀྱིལ་འཁོར་དྲི་ལྡན་གླང་ཆེན་རྣམས། །བཅོམ་ལྡན་འདས་མ་མི་གང་ཡུད་ཙམ་དྲན་བྱེད་དེ་ལ་འདུ་བར་འགྱུར། །སྤྱི་བོ་ཕུག་པས་སྟེང་དུ་འབུར་
[280b.7]ཏེ་རྣ་བའི་རྔ་ཡབ་དང་ནི་ལྕགས་ཀྱུ་གཡོ། །རྐང་པ་སྲུང་བྱེད་རྣམས་ཀྱི་རྣམ་མང་ཅ་ཅོའི་བདེ་བས་ཆུ་ཐིགས་ཟེར་མ་འཐོར། །རབ་ཏུ་རྒོལ་བའི་གླང་ཆེན་ཆང་གིས་ཁོང་འཁྲུགས་ཁྱེད་མཚན་གྲགས་པ་ལས། །གླང་པོ་མི་རྣམས་གཡུལ་འགྱེད་པ་ན་དགྲ་བོའི་སྒྲིབ་པ་རྣམས་ཀྱིས་སྒྲིབ་པར་འགྱུར། །གསེར་
[281a]
[281a.1]གྱི་རང་བཞིན་རི་ཡི་སྐྱིབས་དང་ལྷ་ཡི་སྐྱེད་མོས་ཚལ་གྱི་ཁང་པ་དང་། །མཇུག་སྒྲོ་རྣམ་པར་རྒྱས་པའི་རྨ་བྱ་རྩེད་མོར་གནས་པ་ས་བདག་ཁང་པ་དང་། །ནམ་མཁའ་ཆུ་བོའི་རླབས་ཀྱིས་བྱས་པ་དྲི་མེད་རིན་ཆེན་ལྗོན་ཤིང་ཁང་པ་དང་། །བུད་མེད་སྐྱེ་བོའི་ཞལ་གྱི་པདྨའི་འབྱུང་གནས་ལ་ཡང་གནས་
[281a.2]མཛད་ཁྱེད་ཉིད་དོ། །པདྨའི་སྐྱོ་མ་སྦྲང་རྩིའི་ཁུ་བའི་ཆང་གི་བཏུང་བས་སྲེད་ཅིང་བསྐོར། །སྦྲང་བུའི་ཚོགས་པས་དར་དིར་མང་ལྡན་མེ་ཏོག་ཚོགས་པའི་དྲི་ཞིམ་ལྡན། །ངང་པའི་རྒྱལ་པོ་རབ་དགའི་ཚོགས་ཀྱིས་ཟོས་ཏེ་པདྨའི་གཞོན་ནུས་མཆེ་བ་གཙིགས། །པདྨའི་ལྷ་མོའི་ཟེ་འབྲུའི་རྡུལ་གྱི་
[281a.3]མདོག་སེར་རླབས་ལྡན་ཡུན་རིང་གནས་པར་འགྱུར། །བཅོམ་ལྡན་འདས་མ་རྒྱལ་བ་དཀོན་མཆོག་ཅོད་པན་སྤྱི་བོར་ལྡན་པ་པདྨའི་རིགས། །ཁྱོད་ཉིད་ཀུན་དོན་མཛད་པར་ལྷ་རྣམས་ཀྱིས་ཀྱང་བསྟོད་དེ་མང་པོ་སྨྲ་མོད་ཀྱི། །དེ་སླད་ལྷ་མོ་ཁྱོད་ཀྱིས་བསྟོད་པ་འདི་ཡིས་མཆོག་ཏུ་དགེ་བ་བདག་གིས་
[281a.4]ཀྱང་། །གང་ཐོབ་དེ་ཡིས་འགྲོ་བ་ཁྱད་གསོད་དབུལ་བའི་འཇིགས་པ་ཞི་བར་ཤོག །པཎྜི་ཏ་ཆེན་པོ་ཙནྟྲ་གོ་མིས་མཛད་པའི་དཔལ་ཆེན་མོ་སྒྲོལ་མའི་བསྟོད་པ་རྫོགས་སོ།། །།པཎྜི་ཏ་ཆེན་པོ་རྒྱལ་བའི་སྙན་གྱི་ཞལ་སྔ་ནས། ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་གྱིས་ལོ་ཙཱ་བ་བློ་གྲོས་རྒྱལ་
[281a.5]པོས་བསྒྱུར་བ་ལས་ཅུང་ཟད་དག་པར་བྱས་སོ།། {T3668}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་སྟོ་ཏྲ་ད་ཤ་དྭཱི་གཱ་ཐཱ། བོད་སྐད་དུ། འཕགས་མ་སྒྲོལ་མ་ལ་བསྟོད་པ་ཚིགས་སུ་བཅད་པ་བཅུ་གཉིས་པ། རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །བཟློག་དཀའི་སྲིད་
[281a.6]པའི་མུན་པ་ནི། །འཇོམས་བྱེད་ཉི་མའི་འོད་དང་མཚུངས། །ཐུགས་རྗེས་བརླན་པའི་ཐུགས་མངའ་བའི། །སྒྲོལ་མ་ལ་ནི་རྟག་ཏུ་འདུད། །ཤིན་ཏུ་རྨོངས་པའི་སེམས་ཅན་གྱིས། །གླང་པོ་ཆེ་རྣམས་གསོད་བྱེད་མ། །ལྷ་མོ་སེང་གེ་ཁྲོས་པ་ཡང་། །ཁྱོད་འདུད་པ་ལས་འཇིགས་ཤིང་བྲོས། །མཆེ་
[281a.7]བའི་མདུང་རྩེ་རྩེ་མོ་ཡིས། །བྲག་འཇོམས་ཤིང་དྲུང་རྩ་བ་འདོན། །ཁྱོད་ཀྱི་སྔགས་ཀྱིས་བཟླས་པ་ལས། །འཇིགས་ཤིང་གླང་པོ་འབྲོས་པར་འགྱུར། །ཕྱོགས་དང་ནམ་མཁའ་མ་ལུས་པའི། །དུ་བས་ཁྱབ་ཅིང་བཟོད་པར་དཀའ། །འབར་བ་ཡིས་ནི་ཁྲོ་ཚིག་པ། །ཁྱོད་བསྟོད་ཆར་པ་མེ་ཞིར་
[281b]
[281b.1]འགྱུར། །མ་རུངས་གདེངས་ཀ་ལས་བྱུང་བའི། །ཕུཊ་སྒྲ་སྒྲོགས་ཤིང་དུག་མིག་ཅན། །སྦྲུལ་ནི་ལྷ་མོ་ཁྱོད་བསྟོད་པས། །ནམ་མཁའ་ལྡིང་ནི་བཞིན་དུ་འཇོམས། །རལ་གྲིས་གཅོད་པའི་འགྲོ་བ་རྣམས། །ཁྲག་གིས་ཡན་ལག་བསྐུས་པ་སྟེ། །ཁྱོད་ཀྱི་མིང་ཙམ་དྲན་པ་ཡིས། །ཆོམ་
[281b.2]རྐུན་ནུས་པ་མེད་པར་འགྱུར། །རྒྱལ་པོ་ཁྲོས་པའི་བྲན་རྣམས་ཀྱིས། །སྐྲ་ནས་བཟུང་ནས་ཞགས་པས་བཅིངས། །བཙོན་ར་སྤངས་ནས་ལྷ་མོ་ཀྱེ། །ཁྱོད་ལ་བསྟོད་བྱེད་འཇིགས་མེད་འགྱུར། །དབའ་རླབས་ཚོགས་ནི་ནམ་མཁའ་དང་། །ཕྱོགས་བཅུར་ཡང་ནི་ཁྱབ་བྱེད་པ། །གྲུ་ལོག་
[281b.3]ན་ཡང་རྒྱ་མཚོ་ལས། །ཁྱོད་ཀྱིས་འཕངས་ནས་ཕ་རོལ་ཕྱིན། །ཁྲག་དང་གླད་པའི་འདམ་གྱིས་བྱུགས། །དེ་དག་བཟའ་བ་ལ་ཆགས་པ། །ལྷ་མོ་ཁྱོད་ཀྱི་སྔགས་བཟླས་པས། །ཤ་ཟ་དེ་དག་འཇིགས་པར་འགྱུར། །ཡན་ལག་ཆད་ཅིང་དྲི་ངན་པའི། །ཁྲག་དང་ཞག་ནི་སྣ་ལ་འཛག། །
[281b.4]ཁྱོད་ནི་དྲན་པ་ཙམ་གྱིས་ནི། །མཛེ་ཅན་འདོད་པའི་ལྷ་འདྲར་འགྱུར། །བཀྲེས་སྐོམ་གྱིས་གདུངས་གཅེར་བུ་དང་། །སློང་བའི་ཡི་དྭགས་འགྲོ་བ་ལ། །ཁྱོད་ལ་འདུད་པ་ཙམ་གྱིས་ནི། །འཁོར་ལོས་སྒྱུར་བའི་རྒྱལ་པོར་འགྱུར། །འཇིགས་པ་ཆེན་པོ་འཇིགས་མེད་པ། །དེ་ལྟར་དད་པས་
[281b.5]ཁྱོད་བསྟོད་པས། །དགེ་བ་གང་བསགས་དེ་ཡིས་ནི། །འཇིག་རྟེན་བདེ་བ་ཅན་ཐོབ་ཤོག །རྗེ་བཙུན་མ་འཕགས་མ་སྒྲོལ་མ་ལ་བསྟོད་པ་སློབ་དཔོན་ཙནྡྲ་གོ་མིས་མཛད་པ། ཚིགས་སུ་བཅད་པ་བཅུ་གཉིས་པ་རྫོགས་སོ།། {T3669}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་སྟོ་ཏྲཾ་བྷི་ས་ཀརྨཱ་
[281b.6]སཱ་དྷ་ནཱ་མ། བོད་སྐད་དུ། འཕགས་མ་སྒྲོལ་མའི་བསྟོད་པ་ཕྲིན་ལས་སྒྲུབ་པ་ཞེས་བྱ་བ། བཅོམ་ལྡན་འདས་མ་སྒྲོལ་མ་ལ་ཕྱག་འཚལ་ལོ། །ཏཱཾ་ཡིག་ལྗང་གུ་ཨུཏྤལ་ལས་བྱུང་བའི། །སྒྲོལ་མ་སྐུ་མདོག་ལྗང་གུ་ཞལ་གཅིག་ཕྱག་གཉིས་མ། །ཕྱག་གཉིས་སྐུ་ལ་རིན་ཆེན་སྣ་ཚོགས་སྤྲས། །ཡི་དམ་
[281b.7]སྒྲོལ་མ་ལྷ་ལ་ཕྱག་འཚལ་བསྟོད། །དོན་གྲུབ་ལ་སོགས་རིགས་ལྔས་དབུ་བརྒྱན་ཅིང་། །བཅུ་དྲུག་ལོ་ལོན་འཛུམ་པའི་བཞིན་དང་ལྡན། །གཟི་བརྗིད་བཟོད་དཀའ་སྣ་ཚོགས་ལྷག་པར་འདུད། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །ཕྱག་གཡས་མཆོག་སྦྱིན་ཕྱག་གཡོན་ཨུཏྤལ་འཛིན། །སྣ་
[282a]
[282a.1]ཚོགས་པདྨ་ཟླ་བའི་དཀྱིལ་འཁོར་ལ། །གཡས་བརྐྱང་གཡོན་བསྐུམ་ཚུལ་གྱིས་རབ་ཏུ་བཞུགས། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །ཐུགས་རྗེའི་སྤྱན་གྱིས་འགྲོ་ལ་རྟག་ཏུ་གཟིགས། །སྐུ་ལ་འཇིགས་པ་བརྒྱད་སྐྱོབ་སྒྲོལ་མ་འཕྲོ། །འཁོར་བའི་སྡུག་བསྔལ་
[282a.2]ཀུན་ལས་སྒྲོལ་བྱེད་པའི། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །ཞི་དང་རྒྱས་དང་དབང་དང་དྲག་པོ་དང་། །ལས་ཚོགས་ཐམས་ཅད་མྱུར་དུ་གྲུབ་མཛད་མ། །ཕྲིན་ལས་ཐམས་ཅད་ཡོངས་སུ་གྲུབ་བྱེད་པའི། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །སེང་གེ་གླང་ཆེན་མེ་སྦྲུལ་ཆོམ་
[282a.3]རྐུན་དང་། །ལྕགས་སྒྲོག་ཆུ་དང་བགེགས་དང་འཇིགས་པ་བརྒྱད། །འཇིགས་པ་ཀུན་ལས་ཡོངས་སུ་སྒྲོལ་བྱེད་པའི། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །གདོན་དང་རིམས་དང་སྨྱོ་འབོག་ལ་སོགས་དང་། །གནོད་བྱེད་ལ་སོགས་དུས་མིན་འཆི་བས་སྐྲག །སྡུག་བསྔལ་ཐམས་ཅད་རབ་
[282a.4]ཏུ་ཞི་བྱེད་པའི། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །སྐྱེ་བོ་སྔོན་བསགས་ལས་དང་ཉོན་མོངས་ཀྱི། །མཚམས་མེད་ལྔ་དང་མི་དགེ་བཅུ་སོགས་སྡིག །སྡིག་པའི་ལས་རྣམས་བདག་གིས་ཅི་བསགས་པ། །དེ་དག་ཐམས་ཅད་མ་ལུས་བྱང་བར་ཤོག །བདག་ནི་ད་ལྟར་སྐྱེ་བ་འདི་ལ་ཡང་། །
[282a.5]རྨི་ངན་མཚན་ངན་འཆི་ལྟས་དུས་མིན་སྐྲག །བཀྲ་མི་ཤིས་པ་ཐམས་ཅད་དག་གྱུར་ནས། །ཚེ་དང་བསོད་ནམས་ལོངས་སྤྱོད་རྒྱས་པར་ཤོག །བདག་ནི་མ་འོངས་སྐྱེ་བ་ཐམས་ཅད་དུ། །ཡི་དམ་སྒྲོལ་མ་རྗེས་སུ་དྲན་གྱུར་ནས། །མཆོག་དང་ཐུན་མོང་དངོས་གྲུབ་ལ་སོགས་པ། །ལས་ཚོགས་
[282a.6]ཐམས་ཅད་ཡིད་བཞིན་གྲུབ་པར་ཤོག །ཡི་དམ་སྒྲོལ་མ་ཐུགས་རྗེ་ཆེ་ལྡན་པ། །བདག་གིས་རབ་ཏུ་བརྩེ་བའི་གདུང་སེམས་ཀྱིས། །བསྟོད་པ་བགྱིས་པའི་བསོད་ནམས་གང་བསགས་དེས། །ཡི་དམ་སྒྲོལ་མ་ལྷ་དང་མི་འབྲལ་ཤོག །འཕགས་མ་སྒྲོལ་མའི་བསྟོད་པ་ཕྲིན་ལས་ཐམས་ཅད་
[282a.7]སྒྲུབ་པ་ཞེས་བྱ་བ། སློབ་དཔོན་ཙནྡྲ་གོ་མིས་མཛད་པ་རྫོགས་སོ།། {T3670}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་དེ་བཱི་སྟོ་ཏྲ་པུཥྤ་མཱ་ལི་ནཱ་མ། བོད་སྐད་དུ། འཕགས་མ་ལྷ་མོ་སྒྲོལ་མ་ལ་བསྟོད་པ་མེ་ཏོག་ཕྲེང་བ་ཞེས་བྱ་བ། མགོན་པོ་ཐུགས་རྗེ་ཆེན་པོ་དང་ལྡན་པ་འཕགས་པ་སྤྱན་
[282b]
[282b.1]རས་གཟིགས་དབང་ཕྱུག་ལ་ཕྱག་འཚལ་ལོ། །ཐུགས་རྗེའི་སྤྱན་གྱིས་འགྲོ་ལ་གཟིགས་པའི། །ཞབས་ཀྱི་པདྨོ་ལ་ནི་བཏུད་དེ། །ཚོགས་གཉིས་རྫོགས་པར་བྱ་བའི་ཕྱིར་དུ། །ལྷག་པའི་ལྷ་ལ་བསྟོད་པར་བྱའོ། །ཕྱག་འཚལ་སྒྲོལ་མ་ལྷ་ཡི་ལྷ་ཁྱོད། །དངོས་གྲུབ་མ་ལུས་ཀུན་
[282b.2]གྱི་འབྱུང་གནས། །ཡིད་བཞིན་ནོར་བུ་རིན་པོ་ཆེ་ལྟར། །འདོད་པའི་འབྲས་བུ་སྟེར་བར་མཛད་མ། །ཕྱག་འཚལ་ངོ་མཚར་ཁྱད་དུ་འཕགས་པའི། །ཡོན་ཏན་ཐམས་ཅད་རྫོགས་པའི་སྐུ་ལ། །ཡེ་ཤེས་ལྔ་ཡི་རང་མདངས་རྒྱས་པས། །ཐུགས་རྗེའི་འོད་ཟེར་ཕྱོགས་བཅུར་འཕྲོ་མ། །ཕྱག་འཚལ་
[282b.3]ཆུ་བཞིའི་ཕ་རོལ་ལེགས་གནས། །ལས་དང་ཉོན་མོངས་སྲིད་ལས་རྣམ་གྲོལ། །སངས་རྒྱས་ཡོན་ཏན་ཕྱིར་མི་ལྡོག་པའི། །ས་ལམ་མ་ལུས་མཐའ་རུ་ཕྱིན་མ། །ཕྱག་འཚལ་སྲིད་པའི་དྲ་བ་འཇོམས་མཛད། །ཐུགས་ཀྱི་སྙིང་པོ་ཡི་གེ་བཅུ་པས། །ཞི་དང་རྒྱས་དང་དབང་དང་
[282b.4]མངོན་སྤྱོད། །ཕྲིན་ལས་འོད་ཀྱིས་ནམ་མཁའ་གང་མ། །ཕྱག་འཚལ་འགྲོ་བའི་སྐྱབས་མཆོག་སྒྲོལ་མ། །བུད་མེད་གཟུགས་ཀྱིས་འགྲོ་བ་འདུལ་མཛད། །དཔལ་ལྡན་འཇིག་རྟེན་དབང་ཕྱུག་སྲས་མོ། །འཕགས་པའི་སྤྱན་ཆབ་ལས་ནི་འཁྲུངས་མ། །ཕྱག་འཚལ་འགྲན་ཟླ་མེད་
[282b.5]པའི་སྐུ་མཆོག །ཟག་མེད་བདེ་རྒྱས་ཟླ་བའི་གདན་ལ། །བཞུགས་པའི་ཞབས་ཀྱི་པདྨོ་ལ་ནི། །ལྷ་དང་ལྷ་མིན་ཅོད་པན་གཏུགས་མ། །ཕྱག་འཚལ་ཆེ་བའི་ནང་ན་ཆེ་མཆོག །འབྱུང་པོ་རོ་ལངས་མ་རུངས་ཚོགས་འཇོམས། །གཞན་གྱིས་མི་ཐུབ་དྲག་རྩལ་ཆེན་མོ། །སྟོབས་ཆེན་
[282b.6]ཕ་རོལ་གནོན་པར་མཛད་མ། །ཕྱག་འཚལ་སྒྲོལ་མ་འཁོར་བ་སྒྲོལ་མཛད། །བཅོམ་ལྡན་འདས་མ་ཁྱོད་ཀྱི་ཞབས་ལ། །སྐྱབས་པའི་མི་དེ་མྱ་ངན་འདས་ཐོབ། །མཆོག་གི་དོན་ཆེན་འགྲུབ་པར་མཛད་མ། །ཕྱག་འཚལ་སེང་ལྡེང་ནགས་ཀྱི་སྒྲོལ་མ། །རིགས་དྲུག་བུར་འཛིན་བརྩེ་བའི་ཐུགས་ཀྱི། །
[282b.7]སྙིང་རྗེ་ཆེན་པོའི་གྲུ་གཟིངས་ཀྱིས་ནི། །སྲིད་གསུམ་འཁོར་བའི་མཚོ་ལས་སྒྲོལ་མ། །ཕྱག་འཚལ་ཕོངས་པ་ཀུན་ལས་སྐྱོབ་མཛད། །འཚོ་བས་མནར་ཏེ་མཆུ་མགུལ་སྐམས་ནས། །བཀྲེས་པས་ཁྱོད་ལ་གསོལ་བ་བཏབ་པས། །ལོངས་སྤྱོད་མི་ཟད་ཆར་རྒྱུན་འབེེབས་མ། །ཕྱག་འཚལ་
[283a]
[283a.1]དཔའ་མོ་རྡོ་རྗེ་སྒྲོལ་མ། །འཛམ་བུ་ཆུ་བོའི་གསེར་གྱི་མདོག་ཅན། །རྡོ་རྗེ་ལ་སོགས་ཕྱག་མཚན་བརྒྱད་ཀྱིས། །ཕྲིན་ལས་རྣམས་ཀྱི་འགྲོ་དོན་མཛད་མ། །ཕྱག་འཚལ་སྐྱེ་འགྲོ་རྣམས་ལ་དབང་སྒྱུར། །འཇིག་རྟེན་གསུམ་ན་མཐུ་རྩལ་ལྡན་པའི། །དྲེགས་པས་མྱོས་པ་རྣམས་ཀྱི་
[283a.2]ཅོད་པན། །ཁྱོད་ཀྱི་ཞབས་ཀྱི་མཐིལ་གྱིས་བརྫིས་མ། །ཕྱག་འཚལ་ཐུབ་དབང་སྟོབས་བཅུའི་རྩལ་ལྡན། །སྐུ་ལྔའི་རང་བཞིན་ཁྱབ་བདག་ཆེན་མོ། །བསྲུང་མེད་གསུམ་དང་མ་འདྲེས་དྲན་གསུམ། །ཡོངས་སུ་དག་པ་བཞི་པ་མངའ་མ། །ཕྱག་འཚལ་སྲིད་པའི་འཆིང་བ་ལས་གྲོལ། །ཡེ་ཤེས་
[283a.3]སྐུ་ལ་རྫུ་འཕྲུལ་ཐོགས་མེད། །ཐབས་དང་ཤེས་རབ་མཆོག་ལ་མངའ་བརྙེས། །སྡུག་བསྔལ་འཁོར་བའི་དྲི་མ་དག་མ། །ཕྱག་འཚལ་མཐུ་སྟོབས་བདག་མོའི་སྙིང་པོ། །ཡི་གེ་བཅུ་པ་སྤྱི་བོར་བཏགས་ནས། །དཔུང་ཚོགས་སྡེ་བཞིའི་ནང་དུ་ཕྱིན་པས། །ཕ་རོལ་དམག་གི་གཡུལ་ངོ་བཟློག་མ། །
[283a.4]ཕྱག་འཚལ་མཁྱེན་དང་བརྩེ་བའི་བདག་ཉིད། །བསམ་གཏན་ཏིང་འཛིན་རྣམ་ཐར་མང་པོས། །བརྒྱན་པའི་གཏེར་མཛད་དཔལ་གྱི་བེའུར། །ཤེས་བྱའི་དཀྱིལ་མཐའ་རྟག་ཏུ་ཆུད་མ། །ཕྱག་འཚལ་ཉི་མ་འབུམ་གྱི་མདངས་ཅན། །ཤེས་རབ་ཆེན་པོའི་འོད་ཟེར་འབར་བས། །ཁམས་གསུམ་སེམས་
[283a.5]ཅན་རྣམས་ཀྱི་རྒྱུད་ལ། །མ་རིག་སྒོ་ངའི་མུན་རུམ་སེལ་མ། །ཕྱག་འཚལ་ཡེ་ཤེས་ལྔ་ཡི་བདག་ཉིད། །དཔལ་ལྡན་དྲི་མ་མེད་པའི་སྐུ་ལ། །མཚན་མཆོག་སུམ་ཅུ་རྩ་གཉིས་ཀྱིས་བརྒྱན། །དཔེ་བྱད་བཟང་པོ་བརྒྱད་ཅུས་སྤྲས་མ། །ཕྱག་འཚལ་ཁམས་གསུམ་དབང་དུ་སྡུད་མ། །ཚངས་པ་ཁྱབ་
[283a.6]འཇུག་མ་ཧཱ་དེ་བ། །ལྷ་ཆེན་རྣམས་ཀྱི་དབུ་ཡི་ཅོད་པན། །ཁྱོད་ཀྱི་ཞབས་ལ་རབ་ཏུ་བཏུད་མ། །ཕྱག་འཚལ་འཇིགས་པ་ཀུན་ལས་སྐྱོབ་མཛད། །མེ་དང་ཆུ་དང་རྒྱལ་པོའི་ཆད་པ། །སྟག་དང་སེང་གེ་སྦྲུལ་དང་སྲིན་པོ། །གླང་པོ་ཆེ་ཡི་བྲེད་དངངས་སེལ་མ། །ཕྱག་འཚལ་བྱིན་རླབས་རྨད་དུ་གྱུར་
[283a.7]མ། །འབྱུང་བ་འཁྲུགས་དང་གདོན་གྱིས་བསྐྱེད་པའི། །སྲོག་འཕྲོག་ནད་ཀྱི་བྱེ་བྲག་མ་ལུས། །ཁྱོད་ལ་གསོལ་བཏབ་གདུང་བ་སེལ་མ། །ཕྱག་འཚལ་བཙུན་མོ་རིན་ཆེན་ཆ་བྱད། །སྨིན་མའི་བར་ནས་མཛོད་སྤུ་འོད་འབར། །སྤྱན་དཀྱུས་ཨུཏྤལ་འདབ་འདྲའི་འཛུམ་མདངས། །ཐུགས་རྗེ་ཆགས་པས་
[283b]
[283b.1]འགྲོ་ལ་གཟིགས་མ། །ཕྱག་འཚལ་སྟོང་ཉིད་སྙིང་རྗེའི་ལྕགས་ཀྱུས། །འཁོར་བའི་འདམ་ནས་འགྲོ་བ་འདྲེན་མཛད། །ཤུལ་ནོར་འཕྲང་ལ་ཐུགས་རྗེས་བཟུང་ནས། །ཐར་པའི་ལམ་ལ་ཁྲིད་པར་མཛད་པ། །ཕྱག་འཚལ་བདུད་བཞི་འཇོམས་པར་མཛད་མ། །སངས་རྒྱས་ཀུན་དངོས་རྗེ་བཙུན་མ་ཁྱོད། །
[283b.2]ཕུང་པོ་ལྔ་སྤངས་ལྔ་ཡི་བདག་ཉིད། །ཡེ་ཤེས་ལྔ་རྫོགས་ཉོན་མོངས་སྤངས་མ། །ཕྱག་འཚལ་དགེ་ལེགས་གཟི་བརྗིད་ཆེན་མོ། །ཞལ་བཟངས་བཅུ་དྲུག་ཟླ་བ་རྒྱས་འདྲའི། །འོད་ཀྱིས་སྐྱེ་འགྲོ་རྣམས་ཀྱི་རྒྱུད་ལ། །ཤེས་རབ་དཔལ་དང་བློ་གྲོས་སྤེལ་མ། །ཕྱག་འཚལ་བུད་མེད་སྒྱུ་
[283b.3]འཕྲུལ་ཁྱོད་ལ། །མཱ་མ་ཀཱི་དང་སྤྱན་མ་གོས་དཀར། །ལྷ་དང་ཀླུ་དང་གནོད་སྦྱིན་རྣམས་ཀྱིས། །ཆེ་བའི་ཆེ་མཆོག་རྣམས་ཀྱིས་བསྟོད་མ། །ཕྱག་འཚལ་ཧཱུཾ་གི་སྦྱོར་བ་དང་ལྡན། །གནས་གསུམ་དུ་ནི་དེ་ཉིད་བཀོད་པས། །ནུས་པའི་རྫུ་འཕྲུལ་མཐའ་ལ་རྒྱས་ནས། །ཕྲིན་ལས་བཞི་ཡི་རྩལ་དང་
[283b.4]ལྡན་མ། །ཕྱག་འཚལ་དགེ་བ་རྒྱས་པར་མཛད་མ། །ཇི་ལྟར་ཉི་མའི་དཀྱིལ་འཁོར་ཤར་བས། །མུན་པ་རང་སར་དག་པ་བཞིན་དུ། །ཁྱོད་བསྒོམས་སྒྲིབ་པ་སྤོང་བར་བྱེད་མ། །ཕྱག་འཚལ་ཕྲིན་ལས་དུ་མའི་བདག་མོ། །ཁྱོད་སྐུ་སྣ་ཚོགས་ངོ་བོ་ཤེལ་བཞིན། །སྐུ་མདོག་ཕྱག་མཚན་གཅིག་ཏུ་
[283b.5]མ་ངེས། །གང་ལ་ཉེ་བར་ཐ་དད་འཆར་མ། །ཕྱག་འཚལ་དོན་དམ་རྒྱལ་བའི་ཡུམ་ལས། །མ་གཡོས་ཀུན་རྫོབ་ལྷ་མོའི་གཟུགས་ཅན། །སྐུ་མདོག་སྔོ་ལྗང་གར་གྱི་ཉམས་དགུས། །བདེ་གསལ་མི་རྟོག་པ་ཡིས་འགྱིང་མ། །ཕྱག་འཚལ་འཁོར་བའི་གཡུལ་ངོ་བཟློག་མ། །ང་བདག་
[283b.6]དངོས་པོར་ཞེན་པའི་སྙིང་ལ། །སྤྲོས་བྲལ་ཡེ་ཤེས་རལ་གྲི་བསྣུན་ནས། །གཟུང་འཛིན་འཁྲུལ་པའི་དཔའ་བོ་གསོད་མ། །ཕྱག་འཚལ་ཚོགས་གཉིས་རྫོགས་པའི་དབུ་སྐྲ། །མཐོན་མཐིང་ལྕང་ལོ་འཁྱིལ་པའི་དབུས་ན། །རྫོགས་པའི་སངས་རྒྱས་འོད་དཔག་མེད་ལས། །ཐུགས་རྗེའི་
[283b.7]འོད་ཟེར་ཕྱོགས་བཅུར་འཕྲོ་མཛད། །གང་གིས་མེ་ཏོག་ཕྲེང་བའི་བསྟོད་པ། །ཀློག་གམ་ཁ་དོན་འདོན་པར་བྱེད་པ། །དེ་ཡིས་བསོད་ནམས་དཔག་མེད་འཐོབ་ཅིང་། །སྡིག་སྒྲིབ་སྟོབས་ཆེན་མ་ལུས་དག་འགྱུར། །གང་ཞིག་སྐྱེ་བོ་ཐ་མལ་རྣམས་ཀྱིས། །འདི་འདོན་པ་དེ་དགེ་སྦྱོང་དུ་འགྱུར། །
[284a]
[284a.1]གང་གཱའི་ཀླུང་གི་བྱེ་མ་སྙེད་ཀྱི། །སངས་རྒྱས་རྣམས་ཀྱིས་བྱིན་གྱིས་རློབ་འགྱུར། །སུ་ཡིས་བློ་ལ་བསྟོད་པ་འདི་འཛིན། །འདུལ་ཁྲིམས་སྡོམ་པ་དམ་ཚིག་རྣམས་ཀྱི། །ཉེས་བྱས་སྦོམ་པ་རྩ་ལྟུང་དྲི་མ། །མ་ལུས་དག་ནས་དངོས་གྲུབ་ཐོབ་འགྱུར། །འདི་འདོན་བློ་ཡི་པདྨ་
[284a.2]ཁ་འབྱེད། །རྒོལ་བ་ངན་པའི་ལུང་རིགས་ཚར་གཅོད། །རིག་པའི་གནས་ལ་ཤེས་རབ་ཆེན་པོ། །ཟླ་བ་ཡར་ངོ་བཞིན་དུ་འཕེལ་འགྱུར། །ཨེ་མ་བསྟོད་པའི་རྒྱལ་པོ་འདི་ནི། །ལན་ཅིག་ཡིད་ལ་དྲན་པ་ཙམ་གྱིས། །ཞིང་མཆོག་དམ་པ་བདེ་བ་ཅན་དེར། །ཐེ་ཚོམ་མེད་པར་ངེས་པར་སྐྱེ་འགྱུར། །འགྲོ་
[284a.3]བའི་སྐྱབས་མཆོག་རྗེ་བཙུན་མ་ལ། །བདག་གིས་མེ་ཏོག་ཕྲེང་བས་བསྟོད་པའི། །དགེ་བ་གྲུ་གཟིངས་ལྟ་བུ་དེས་ནི། །སྲིད་གསུམ་འཁོར་བའི་མཚོ་ལས་སྒྲོལ་འགྱུར། །མེ་ཏོག་ཕྲེང་བའི་བསྟོད་པ་འདི་ནི། །རྗེ་བཙུན་མ་ལ་ལྔ་བརྒྱ་པ་རྣམས་ཀྱི་ཐམས་ཅད་མཁྱེན་པའི་ཁུར་ཆེ་བའི་ཡོན་
[284a.4]ཏན་དུ་མ་དང་ལྡན་པ། །སློབ་དཔོན་ཙནྡྲ་གོ་མི་ཞེས་བྱ་བས་བསྟོད་པ་རྫོགས་སོ།། {T3671}༄༅༅། །རྒྱ་གར་སྐད་དུ། ཨཱརྱ་ཏཱ་རེ་དེ་བཱི་སྟོ་ཏྲ་ནཱ་མ། བོད་སྐད་དུ། འཕགས་མ་ལྷ་མོ་སྒྲོལ་མ་ལ་བསྟོད་པ་ཞེས་བྱ་བ། རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །
[284a.5]བཟློག་དཀའ་སྲིད་པའི་མུན་པ་ནི། །འཇོམས་བྱེད་ཉི་མའི་འོད་དང་མཚུངས། །ཐུགས་རྗེས་བརླན་པའི་ཐུགས་མངའ་བ། །སྒྲོལ་མ་ལ་ནི་རྟག་ཏུ་འདུད། །ཤིན་ཏུ་རྣོ་བའི་སེམས་རྣམས་ཀྱིས། །གླང་པོ་ཆེ་རྣམས་གསོལ་བྱེད་པ། །ལྷ་མོ་སེང་གེ་ཁྲོས་པ་ཡང་། །ཁྱོད་བསྟོད་པ་ལས་
[284a.6]འཇིགས་ཤིང་འབྲོས། །མཆེ་བའི་མདུང་རྩེ་རྣོན་པོ་ཡིས། །བྲག་འཇོམས་ཤིང་གི་རྩ་བ་འདོན། །ཁྱོད་ཀྱི་སྔགས་ནི་བཟླས་པ་ལས། །འཇིགས་ཤིང་གླང་ཆེན་འབྲོས་པར་འགྱུར། །ཕྱོགས་དང་ནམ་འཁའ་མ་ལུས་པ། །དུ་བས་ཁྱབ་ཅིང་བཟོད་པར་དཀའ། །འབར་བ་ཡིས་ནི་ཁྲོ་ཚིག་པ། །ཁྱོད་
[284a.7]བསྟོད་ཆར་པས་མེ་ཞིར་འགྱུར། །མ་རུངས་གདེངས་ཀ་ལས་བྱུང་བའི། །ཕུཊ་སྒྲ་སྒྲོགས་ཤིང་དུག་མང་ཅན། །སྦྲུལ་ནི་ལྷ་མོ་ཁྱོད་བསྟོད་པས། །ནམ་མཁའ་ལྡིང་ནི་བཞིན་དུ་འཇིགས། །རལ་གྲིས་གཅོད་ཅིང་འདྲལ་བ་རྣམས། །ཁྲག་གིས་ཡན་ལག་བསྐུས་པ་སྟེ། །ཁྱོད་ཀྱི་མིང་ཙམ་དྲན་པ་
[284b]
[284b.1]ཡིས། །ཆོམ་རྐུན་ནུས་པ་མེད་པར་འགྱུར། །རྒྱལ་པོ་ཁྲོས་པས་བྲན་རྣམས་ཀྱི། །སྐྲ་ནས་བཟུང་ཞིང་ཞགས་པས་བཅིངས། །བཙོན་ར་སྤངས་ཏེ་ལྷ་མོ་ཀྱེ། །ཁྱོད་ལ་བསྟོད་བྱེད་འཇིགས་མེད་འགྱུར། །དབའ་རླབས་ཚོགས་ཀྱིས་ཕྱོགས་བཅུ་དང་། །ནམ་མཁའ་ཡང་དག་ཁྱབ་བྱེད་པ། །གྲུ་
[284b.2]ལོག་ན་ཡང་རྒྱ་མཚོ་ལས། །ཁྱོད་ཀྱི་འཕངས་ནི་ཕ་རོལ་ཕྱིན། །ཁྲག་དང་ཀླད་པའི་འདམ་གྱིས་བྱུགས། །དེ་དག་བཟའ་བ་ལ་ཆགས་པ། །ཁྱོད་ལ་བསྟོད་པ་ཙམ་གྱིས་ནི། །ཤ་ཟ་དེ་ལྟར་འཇིགས་པར་འགྱུར། །ཡན་ལག་ཆད་ཅིང་དྲི་ང་བ། །ཁྲག་དང་རྣག་ནི་སྣ་ནས་འཛག །ཁྱོད་ལ་བསྟོད་པ་
[284b.3]ཙམ་གྱིས་ནི། །མཛེ་ཅན་འདོད་པའི་ལྷ་འདྲར་འགྱུར། །བཀྲེས་སྐོམ་ཀྱིས་གདུངས་གཅེར་བུ་དང་། །སློང་བ་ཡི་དྭགས་དང་འདྲ་བ། །ཁྱོད་ལ་བསྟོད་པ་ཙམ་ཀྱིས་ནི། །འཁོར་ལོས་སྒྱུར་བའི་རྒྱལ་པོར་འགྱུར། །འཇིགས་པ་ཆེན་པོ་འཇིགས་བྱེད་པ། །དེ་ལྟར་སེམས་ནས་ཁྱོད་བསྟོད་པས། །དགེ་བ་གང་
[284b.4]བསགས་དེ་ཡིས་ནི། །འཇིག་རྟེན་བདེ་བ་ཅན་ཐོབ་ཤོག །འཕགས་མ་སྒྲོལ་མའི་བསྟོད་པ་སློབ་དཔོན་ཆེན་པོ་ཙནྡྲ་གོ་མིས་མཛད་པ་རྫོགས་སོ།། །།སེང་གེ་གླང་ཆེན་མེ་སྦྲུལ་ཆོམ་རྐུན་དང་། །ལྕགས་སྒྲོག་ཆུ་དང་ཤ་ཟའི་འཇིགས་པ་ནི། །འཇོམས་མཛད་ཟླ་འོད་ཕུང་པོ་ལྟར་འཛིན་མ། །སྒྲོལ་
[284b.5]མ་བཅོམ་ལྡན་འདས་ལ་ཕྱག་འཚལ་འདུད།། {T3672}༄༅༅། །རྒྱ་གར་སྐད་དུ། ཨཱརྱ་ཏཱ་རཱཥྚ་བྷ་ཡ་ཏྲ་ཏ་ནཱ་མ་སཱ་དྷ་ནཾ། བོད་སྐད་དུ། འཕགས་མ་སྒྲོལ་མ་འཇིགས་པ་བརྒྱད་ལས་སྐྱོབ་པ་ཞེས་བྱ་བའི་སྒྲུབ་པའི་ཐབས། རྗེ་བཙུན་མ་སྒྲོལ་མ་ལ་ཕྱག་འཚལ་ལོ། །ཀུན་མཁྱེན་རྒྱལ་བའི་བདག་
[284b.6]པོ་ལྷན་ཅིག་སྐྱེས་པའི་ཆོས་སྐུ་དེ་བཞིན་དུ། །ལོངས་སྤྱོད་རྫོགས་དང་སྤྲུལ་པའི་སྐུ་སྟེ་པདྨའི་འདབ་མ་བཞིན་དུ་ཡངས་པའི་སྤྱན། །རྣལ་འབྱོར་དག་པར་རྣམ་པར་ཐར་གྱུར་སྲིད་དང་སྲིད་ལས་བྲལ་བའི་སྐུ་གསུང་ཐུགས་ཆགས་པ། །ཐབས་དང་ཤེས་རབ་གཉིས་མེད་ལྷ་དང་ལྷ་མིན་མིས་མཆོད་དེ་
[284b.7]ལ་ཕྱག་འཚལ་ཏེ། །སྐྱེ་འཇིག་རྣམ་པར་སྤངས་ཕྱིར་ཆོས་ཉིད་མི་འགྱུར་ཡང་དག་ཉིད་དུ་དབྱེར་མེད་ཀྱང་། །འཁྲུལ་བཅས་འགྲོ་བའི་དོན་ཕྱིར་སྐུ་གསུང་ཐུགས་ཀྱི་ཕྲིན་ལས་ཁྱད་པར་གསང་སྔགས་ལམ། །སྒྲིབ་པ་མྱུར་འཇོམས་སྣ་ཚོགས་ཕྱག་རྒྱའི་གཟུགས་འཕྲོས་སངས་རྒྱས་ཐམས་ཅད་སྐྱེད་བྱེད་ཡུམ། །
[285a]
[285a.1]འཇིགས་པ་བརྒྱད་ལས་སྒྲོལ་བ་འདི་དེང་སྒྲུབ་ལ་དགའ་ཕྱིར་དད་པས་བརྩམ་པར་བྱ། །དད་ལྡན་རབ་བརྩོན་དམ་ཚིག་ལྡན། །རྗེ་བཙུན་སྒྲུབ་ལ་དགའ་བ་ཡིས། །རྣམ་པར་འཚེ་མེད་དབེན་པའི་གནས། །ཉམས་དགའ་དངོས་གྲུབ་འབྱུང་གནས་སུ། །རྟེན་དང་མཆོད་རྫས་སྣ་
[285a.2]ཚོགས་པ། །བཤམས་ནས་བདེ་བའི་སྟན་ཉིད་ལ། །རྫོགས་སངས་རྒྱས་ཀྱི་བཞུགས་ཚུལ་གྱིས། །ཕྱི་ནང་ཁྲུས་ཀྱིས་དག་བྱས་ཏེ། །དེ་ནས་རང་གི་སྙིང་ག་རུ། །ང་རོ་དང་པོ་ལས་བྱུང་བའི། །ཆུ་ཤེལ་དབུས་སུ་ཡི་གེ་ནི། །སྡེ་ཚན་བཞི་པའི་དང་པོ་ལ། །ལྔ་པའི་ཐ་མའི་ཐིག་ལེས་བརྒྱན། །དེ་ཡི་འོད་
[285a.3]ཀྱིས་རྗེ་བཙུན་དང་། །འཕགས་པའི་ཚོགས་རྣམས་སྤྱན་དྲངས་ཏེ། །སངས་རྒྱས་ཀུན་གྱི་ཡེ་ཤེས་སྐུ། །གཏི་མུག་ལྡོངས་པའི་སེམས་ཅན་གྱི། །མ་རིག་མུན་པ་སེལ་མཛད་མ། །བདེ་གཤེགས་སྒྲོལ་མ་ཕྱག་འཚལ་ལོ། །དྲི་ཞིམ་མེ་ཏོག་ཐམས་ཅད་དང་། །ཨ་ག་རུ་སོགས་བདུག་སྤོས་
[285a.4]དང་། །རབ་ཏུ་མུན་སེལ་སྒྲོན་མེ་དང་། །ག་པུར་ལ་སོགས་དྲི་ཡི་མཆོག །གཙང་སྦྱར་བཤོས་དང་གཞན་ཡང་ནི། །སྒྲ་སྙན་ལ་སོགས་མཆོད་པའི་ཚོགས། །ཐམས་ཅད་དབུལ་ཏེ་སྔགས་དང་ནི། །ཕྱག་རྒྱའི་རྒྱས་ཀྱང་གདབ་པར་བྱ། །འཁོར་བ་ཐོག་མ་མེད་བར་དུ། །སྡིག་བགྱིས་
[285a.5]གང་ལགས་མ་ལུས་པ། །ད་ལྟ་ཉིད་དུ་བཤགས་བགྱིས་ནས། །སླན་ཆད་ནམ་ཡང་མི་བགྱིད་དོ། །རྫོགས་སངས་རྒྱས་སོགས་འཕགས་རྣམས་དང་། །འགྲོ་བ་ཀུན་གྱི་དགེ་བ་ནི། །ཟག་མེད་ཟག་དང་བཅས་པ་ལ། །བསམ་པས་རྗེས་སུ་ཡི་རང་ངོ་། །འགྲོ་མགོན་སྤྲིན་བྲལ་ཉི་མ་ཡི། །
[285a.6]དཀྱིལ་འཁོར་རྒྱས་པར་གྱུར་རྣམས་ལ། །འགྲོ་བ་རྣམས་ལ་ཕན་པའི་ཕྱིར། །ཆོས་ཀྱི་འཁོར་ལོ་བསྐོར་བར་བསྐུལ། །རྒྱལ་བ་ཟག་མེད་དབྱིངས་ཉིད་དུ། །མྱ་ངན་འདས་གཟིགས་བཞེད་རྣམས་ལ། །ཇི་སྲིད་འཁོར་བ་གནས་ཀྱི་བར། །མྱ་ངན་མི་འདའ་བཞུགས་པར་གསོལ། །དོན་
[285a.7]དམ་རང་བཞིན་མཚན་མ་མེད། །རྣམ་པར་མི་རྟོག་ཆོས་སྐུ་ལས། །གཟུགས་སྐུ་ལྟ་བུའི་ཚུལ་འཆང་བའི། །འགྲོ་མགོན་ཁྱེད་ལ་སྐྱབས་སུ་མཆི། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་མཆོག་ཏུ་ཐུགས་བསྐྱེད་ལྟར། །བདག་ཀྱང་འགྲོ་རྣམས་བསྒྲལ་བའི་ཕྱིར། །བྱང་ཆུབ་
[285b]
[285b.1]མཆོག་ཏུ་སེམས་བསྐྱེད་དོ། །ཕྱག་འཚལ་ལ་སོགས་བགྱིས་པ་ལས། །བདག་གིས་བསོད་ནམས་གང་ཐོབ་དེས། །སེམས་ཅན་མ་ལུས་སངས་རྒྱས་ཀྱི། །ས་ནི་མྱུར་དུ་ཐོབ་པར་ཤོག །འགྲོ་བ་བདེ་དང་ཕྲད་ལ་སོགས། །ཚད་མེད་བཞི་ཡང་བསྒོམ་པར་བྱ། །དེ་ནས་འཕགས་རྣམས་
[285b.2]གཤེགས་བྱས་ལ། །བརྟན་གཡོའི་ཆོས་ཀུན་སྟོང་པར་བསྒོམ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་ཆུ་སྐྱེས་སྟེང་དུ་ནི། །ཆུ་ཤེལ་དེ་སྟེང་ས་བོན་ནོ། །དེ་ཡོངས་གྱུར་ལས་ཨུཏྤལ། །ས་བོན་ཉིད་ཀྱིས་མཚན་པའོ། །དེ་ཡི་འོད་ཀྱིས་སྐྱེ་དགུ་རྣམས། །སྦྱངས་ནས་ཡོངས་གྱུར་
[285b.3]བཅོམ་ལྡན་མ། །ཞལ་གཅིག་ཕྱག་གཉིས་དཱུར་བའི་མདོག །བཅུ་དྲུག་ན་ཚོད་རྒྱན་རྣམས་རྫོགས། །མཆོག་སྦྱིན་པ་དང་ཨུཏྤལ། །གཡས་དང་གཡོན་དུ་ཤེས་བྱ་སྟེ། །ཕྱེད་ཀྲུང་གིས་བཞུགས་འཛུམ་པའི་བཞིན། །མཚོ་སྟེང་རིན་ཆེན་བྲག་ཕུག་ནང་། །ལྟོས་འགྲོས་ཞབས་བརྟེན་བསྒོམ་
[285b.4]པར་བྱ། །གཡས་དང་གཡོན་གྱི་དང་པོ་ནི། །མཾ་དང་པྲཾ་ལས་ལྷ་མོ་ནི། །འོད་ཟེར་ཅན་དང་སོ་སོ་འབྲང་། །གསེར་མདོག་ཞལ་གཅིག་ཕྱག་གཉིས་མ། །རྒྱན་མཛེས་གཡོན་ན་ཤིང་ལོ་ནི། །མྱ་ངན་མེད་དང་རྡོ་རྗེ་བསྣམས། །གཡས་པ་འདུད་པའི་ཚུལ་དུའོ། །གཡས་ཀྱི་འོག་མར་ཕག་གདོང་
[285b.5]མ། །པཱ་ལ་ཤ་མདོག་རྒྱན་གྱིས་མཛེས། །ཆོས་འཆད་པ་ཡི་ཕྱག་རྒྱ་ཅན། །གཡོན་གྱི་འོག་མར་ཁྲོ་གཉེར་མ། །མིག་སྨན་མདོག་ཅན་ཁྲོ་མོའི་ཚུལ། །གྲི་གུག་ཐོད་ཁྲག་བསྣམས་པའོ། །དེ་དག་རྣམས་ཀྱི་ཕྱོགས་མཚམས་ནི། །བརྒྱད་ན་འཇིགས་པ་རྣམ་པ་བརྒྱད། །བགེགས་དང་དགྲ་དང་
[285b.6]གླང་ཆེན་དང་། །མེ་དང་སྦྲུལ་དང་མི་རྒོད་དང་། །ལྕགས་སྒྲོག་གིས་བཅིངས་ཆུ་རྣམས་ལས། །སྐྱོབ་བྱེད་སྒྲོལ་མ་བརྒྱད་འཕྲོ་བ། །རྣལ་འབྱོར་པ་ཡིས་བསྒོམ་པར་བྱ། །དེ་ནས་སྙིང་གའི་ས་བོན་ལས། །འོད་འཕྲོས་ཡེ་ཤེས་སེམས་དཔའ་ནི། །སྔ་མའི་ཚུལ་ཅན་སྤྱན་དྲངས་ལ། །མཆོད་
[285b.7]ནས་ཡི་གེ་བཞི་པོ་ཡིས། །གཉིས་སུ་མེད་པར་བསྟིམ་པར་བྱ། །ཡི་གེ་གསུམ་གྱིས་གནས་གསུམ་དུ། །བྱིན་གྱིས་བརླབ་བྱ་དེ་ཡི་རྗེས། །དབང་བསྐུར་རིགས་ཀྱི་བདག་པོ་ནི། །དོན་ཡོད་གྲུབ་པས་སྤྱི་གཙུག་བརྒྱན། །དེ་ནས་ས་བོན་ལས་བྱུང་བའི། །འོད་ཀྱི་སྤྲོ་བསྡུ་ཅུང་ཟད་བྱ། །སྐྱོ་ན་གསང་
[286a]
[286a.1]སྔགས་བཟླས་པ་ནི། །ཡི་གེ་བཅུ་པ་བགྲང་བར་བྱ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། འབུམ་ཕྲག་གསུམ་མམ་ཡང་ན་དྲུག །འབུམ་ཕྲག་བཅུ་ཡིས་ལས་རྣམས་འགྲུབ། །གལ་ཏེ་འབྱུང་པོ་རྣམས་ལ་ནི། །གཏོར་མ་སྦྱིན་ན་སྣོད་གཙང་དུ། །ཟན་བླུགས་ཆོ་གས་
[286a.2]བྱིན་བརླབས་ཏེ། །ལག་གཉིས་ཐལ་མོ་སྦྱར་བ་ལས། །མཛུབ་གཉིས་གུང་མོ་གཉིས་པོ་ལ། །ལེགས་བཅང་བ་ནི་ཨུཏྤལ། །ཁ་འབྱེད་པའི་ནི་ཕྱག་རྒྱ་སྟེ། །གནས་གསུམ་དག་ཏུ་གཏུགས་བྱས་ནས། །འབྱུང་པོ་རྣམས་ལ་གཏོར་མ་སྦྱིན། །ཨོཾ་ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨཱདྱ་
[286a.3]ནུཏྤནྣ་ཏྭཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ལས་ཀྱི་ཡན་ལག་ཐམས་ཅད་ནི། །རྒྱས་པར་རྒྱུད་ལས་གསུངས་པའི་ཕྱིར། །འདི་རུ་མ་བཀོད་དེ་རུ་བལྟ། །རྣལ་འབྱོར་པ་ནི་གང་ཞིག་གིས། །འདི་དོན་ཉམས་སུ་ལེན་བྱེད་ན། །དངོས་དང་དངོས་མེད་ཟད་གཙོ་བོ། །ཐོག་མ་ཐ་མ་མེད་ཞི་བ། །སྐྱེ་དང་ཟག་
[286a.4]པ་རྣམ་སྤངས་པ། །དཔལ་ལྡན་ཡུམ་ཉིད་ཐོབ་འགྱུར་ཏེ། །བུམ་པ་བཟང་སོགས་དངོས་གྲུབ་དང་། །གཞན་ཡང་གསད་དང་བསྐྲད་དང་དབྱེ། །དགུག་དང་ཞི་དང་རྒྱས་པ་ཡི། །ལས་འགྲུབ་འགྱུར་བ་སྨོས་ཅི་དགོས། །དེ་ལྟར་སྟོང་དང་སྙིང་རྗེའི་བདག་ཉིད་སྲིད་པ་གསུམ་སྐྱེས་ཟད་
[286a.5]དངོས་ཤེས་དང་ནི། །ཤེས་བྱ་གཉིས་སུ་མེད་སྐུ་ཀུན་དུ་བཟང་པོ་སྤྱོད་པའི་བདག་ཉིད་སྣ་ཚོགས་ཡུམ། །བཅོམ་ལྡན་འདས་མའི་སྒྲུབ་ཐབས་རྒྱུད་བཞིན་ལེགས་བཀོད་པ་ལས་བསོད་ནམས་དྲི་མ་མེད། །བདག་གིས་གང་ཐོབ་དེས་ནི་འགྲོ་བ་མ་ལུས་རྟག་བདེ་མྱ་ངན་འདས་ཐོབ་ཤོག །འཕགས་པ་
[286a.6]འཇིགས་པ་བརྒྱད་ལས་སྐྱོབ་པ་ཞེས་བྱ་བའི་སྒྲོལ་མའི་སྒྲུབ་ཐབས་སློབ་དཔོན་ཆེན་པོ་ཙནྡྲ་གོ་མིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང་། བོད་ཀྱི་ལོ་ཙཱ་བ་ཚུལ་ཁྲིམས་རྒྱལ་བས་བསྒྱུར་བ་ལས། སླད་ཀྱི་རྒྱ་གར་གྱི་མཁན་པོ་བྱང་ཆུབ་སེམས་དཔའ་དཱ་ན་ཤཱི་ལ་དང་།
[286a.7]བོད་ཀྱི་ལོ་ཙཱ་བ་མལ་གྱོ་བློ་གྲོས་གྲགས་པས་བཅོས་ཏེ་གཏན་ལ་ཕབ་པའོ།། {T3673}༄༅༅། །རྒྱ་གར་སྐད་དུ། སཱི་ཏ་ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མ་དཀར་མོའི་སྒྲུབ་ཐབས། འཕགས་མ་སྒྲོལ་མ་དཀར་མོ་ལ་ཕྱག་འཚལ་ལོ། །ཆེད་དུ་ཟླ་བ་དྲུག་གི་བར། །སྒྲོལ་མའི་
[286b]
[286b.1]འཁོར་ལོ་བསྒོམ་པའོ། །དངོས་གྲུབ་ཐམས་ཅད་འཐོབ་འགྱུར་ཞིང་། །འཆི་བའི་སྐྱོན་གྱིས་མི་གོས་པའི། །ངག་གི་དབང་ཕྱུག་གནང་བྱས་པ། །འཆི་བདག་སླུ་བ་བསྡུས་པ་ལས། །ཕྱུང་ནས་སྒྲོལ་མ་དཀར་མོ་ནི། །བསྒོམས་ན་འཇིགས་པ་ཉམས་བྱེད་པ། །བཞི་པའི་སྡེ་ཚན་དང་པོ་ཨ། །བཅས་ལས་
[286b.2]ནམ་མཁར་འོད་ཟེར་འཕྲོ། །པད་དཀར་ཟླ་བའི་གདན་བལྟས་ལ། །གསུམ་ལ་སྐྱབས་འགྲོ་ཡང་བརྗོད་ལ། །རང་བཞིན་སྒྲོ་བཏགས་གཞོམ་ཕྱིར་དུ། །སྐད་ཅིག་སྟོང་པ་ཉིད་དུ་བལྟ། །དེ་ནས་སྔོན་གྱི་སྨོན་ལམ་དབང་། །བྱང་ཆུབ་སེམས་ཀྱི་ཡི་གེ་བསྒོམ། །པདྨ་དཀར་པོའི་དབུས་གནས་པའི། །
[286b.3]ཟླ་བའི་གདན་གྱི་སྟེང་དུ་ནི། །རྡོ་རྗེ་སྐྱིལ་མོ་ཀྲུང་བཅས་མ །མཆོག་སྦྱིན་པ་དང་ཨུཏྤལ་བསྣམས། །སྟོན་ཀའི་ཟླ་བའི་འོད་གནས་ཅན། །ཟླ་བ་ལ་ནི་རྒྱབ་བརྟེན་ཅིང་། །རྒྱན་རྣམས་ཐམས་ཅད་རབ་ཏུ་རྫོགས། །བཅུ་དྲུག་ལོ་ལོན་ལུས་ཅན་མ། །སངས་རྒྱས་ཀུན་དང་དེ་སྲས་ཀྱི། །ཡུམ་ནི་
[286b.4]འདོད་པའི་གཟུགས་ཅན་མ། །སྒྲོལ་མ་དེ་ཡི་ཐུགས་ཀར་བསྒོམ། །འཁོར་ལོ་དཀར་པོ་འོད་ཟེར་ཅན། །རེའུ་མིག་བརྒྱད་ལ་ཡི་གེ་བརྒྱད། །ཡོངས་སུ་བསྐོར་བར་བྱ་བའོ། །ཨོཾ་ཧཱ་གསལ་བྱེད་དབུས་གནས་པའི། །བསྒྲུབ་བྱའི་མིང་ནི་ལྟེ་བར་བྱ། །ཟླ་དྲུག་རྩེ་གཅིག་པ་ཡི་ཡིད། །ངེས་པར་
[286b.5]བརྟན་པ་རྟག་ཏུ་བྱ། །ཡི་གེ་བཅུ་པའི་སྔགས་འདི་ནི། །མི་སྐྱོའི་ཡིད་ཀྱིས་བཟླས་བྱ་སྟེ། །ཨོཾ་གྱི་ཡི་གེ་དང་པོར་སྦྱིན། །ཕྱིས་ནི་ཏཱ་རེ་རབ་ཏུ་སྦྱར། །ཏུཏྟཱ་རེ་ལ་ཏུ་རེ་ཕྱིས། །སྭཱ་ཧཱ་མཐའ་རུ་ལས་ཀུན་བྱེད། །ཚངས་དབང་ཁྱབ་འཇུག་ཉི་ཟླ་དང་། །དྲག་པོ་ཕྱོགས་སྐྱོང་འདོད་ལྷས་ཀྱང་། །བ་སྤུའི་
[286b.6]རྩེ་མོའང་གཅོད་མི་ནུས། །འཆི་བདག་ལས་རྒྱལ་སྒྲོལ་མ་བཞིན། །སྐྲ་དཀར་གཉེར་མ་སྐལ་ངན་ནད། །དབུལ་པ་ལ་སོགས་མདོར་བསྡུ་ན། །སེང་སོགས་འཇིགས་པ་ཆེན་པོ་བརྒྱད། །སྡུག་བསྔལ་རབ་ཏུ་འཇོམས་བྱེད་ཅིང་། །བསྐུལ་བ་མེད་པར་གོས་བཏུང་བ། །ཁང་བཟངས་རིན་ཆེན་ཚོགས་ཀྱང་
[286b.7]འདུ། །རལ་གྲི་དང་ནི་མིག་སྨན་དང་། །རྐང་པ་བུམ་པ་བཟང་སོགས་འགྲུབ། །ཚིགས་བཅད་མཁན་དང་ངག་སྙན་དང་། །བློ་རྣོ་ཤེས་རབ་དྲི་མེད་འགྱུར། །གཞན་ཡང་ཅི་འདོད་དངོས་གྲུབ་ནི། །འཁོར་ལོ་དེ་ལས་འབྱུང་བར་འགྱུར། །སྒྲོལ་མ་དཀར་མོའི་སྒྲུབ་པའི་ཐབས། །ནད་དང་འཇིགས་པ་རྣམས་ཉམས་
[287a]
[287a.1]པ། །གང་ཞིག་ཕྱུང་ནས་དགེ་བསགས་པ། །དེས་ནི་སྐྱེ་འགྲོ་སྒྲོལ་མར་ཤོག །སྒྲོལ་མ་དཀར་མོའི་སྒྲུབ་པའི་ཐབས། སློབ་དཔོན་ངག་གི་དབང་ཕྱུག་གྲགས་པའི་སློབ་མ་ཐུ་བོས་མཛད་པ་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང་། ཁམས་པ་ལོ་ཙཱ་བ་དགེ་སློང་བ་རིས་
[287a.2]བསྒྱུར་བའོ།། {T3674}༄༅༅། །སྒྲོལ་མའི་དཀྱིལ་འཁོར་དུ་འཇུག་པའི་ཆོ་ག་མདོར་བསྡུས་བཞུགས།། ༄༅༅། །བཅོམ་ལྡན་འདས་མ་ལ་ཕྱག་འཚལ་ལོ། །མདོར་བསྡུས་པ་ལ་དགའ་རྣམས་ཕྱིར། །སྡོམ་ཚིག་ལེའུར་བྱས་པ་ཡིན། །ཕྱོགས་རྣམས་གཙང་མཉེན་བདེ་བ་དང་། །ཀུན་དུ་
[287a.3]དྲི་ངད་ལྡང་གྱུར་པ། །བདེ་བ་ཅན་གྱི་ཞིང་ཁམས་ལྟར། །ས་གཞི་བྱིན་གྱིས་བརླབ་པར་བགྱི། །ཕྱི་ནང་མ་བསྒྲིབས་གསལ་བ་དང་། །རིན་ཆེན་རྣམས་ལས་གྲུབ་པ་ཡི། །ཐུབ་པའི་དབང་པོ་སྲས་བཅས་ཀྱི། །གཞལ་ཡས་ཁང་དུ་བྱིན་བརླབ་བོ། །བླ་མ་དཀྱིལ་འཁོར་ལྷ་ཚོགས་དང་། །ཕྱོགས་
[287a.4]བཅུར་བཞུགས་པའི་སངས་རྒྱས་སྲས། །བཀའ་སྡོད་ཕྱོགས་སྐྱོང་མ་ལུས་པ། །དེ་རིང་སྤྱན་འདྲེན་གཤེགས་སུ་གསོལ། །གཙང་ཞིང་དྲི་ཞིམ་བསིལ་བ་ཡི། །དྲི་ཆབ་བདུད་རྩིའི་རྒྱུན་ལྟ་བུས། །རྒྱལ་བ་སྲས་བཅས་མ་ལུས་ལ། །ཆུ་གསུམ་གྱིས་ནི་མཉེས་པར་བགྱིའོ། །དུས་གསུམ་
[287a.5]བཞུགས་པའི་བླ་མ་ལྷ། །རིན་ཆེན་གསུམ་ནི་ནམ་མཁའ་ལ། །ཏིལ་གྱི་གང་བུ་ལྟར་དམིགས་ནས། །སྒོ་གསུམ་གུས་པས་ཕྱག་འཚལ་ལོ། །མེ་ཏོག་ལ་སོགས་ཉེར་སྤྱོད་དང་། །རྒྱལ་སྲིད་བདུན་དང་གྲུབ་པའི་རྫས། །མཆོད་སྤྲིན་ནམ་མཁའ་གང་དམིགས་ཏེ། །འགྲོ་བ་བསྒྲལ་
[287a.6]ཕྱིར་དབུལ་བར་བགྱིའོ། །བདག་དང་སེམས་ཅན་མཁའ་མཉམ་གྱིས། །ཐོག་མེད་དུས་ནས་ད་ལྟའི་བར། །མ་ལུས་སྡིག་པ་ཅི་བགྱིས་པ། །ཤིན་ཏུ་འགྱོད་པས་བཤགས་པར་བགྱིའོ། །མངོན་མཐོ་ངེས་ལེགས་རྒྱུར་གྱུར་བའི། །སྐྱེ་བོའི་དགེ་བ་གང་བགྱིས་དང་། །འཕགས་པའི་
[287a.7]ཚོགས་ཀྱིས་གང་བགྱིས་ལ། །ལྷག་པར་སྤྲོ་བས་ཡི་རང་ངོ་། །སྒོ་གསུམ་ཉམས་ལེན་མི་དགེ་བཅོམ། །ཆེད་དུ་བྱ་བ་གཞན་དོན་བརྩོན། །ལམ་བདེ་ཚེགས་ཆུང་འཇུག་པ་ཟབ། །སྡོམ་པ་གསུམ་ལ་གནས་པར་བགྱིའོ། །བཏང་བར་དཀའ་བའི་ལུས་འདི་ནི། །མགོན་དང་བདེ་
[287b]
[287b.1]གཤེགས་སྲས་བཅས་ལ། །བྲན་གཡོག་ཉིད་དུ་དབུལ་ལགས་ཀྱིས། །དེང་ནས་ཁྱེད་ཀྱི་འབངས་སུ་མཆིའོ། །རྒྱལ་སྲིད་བུ་དང་ཆུང་མ་དང་། །འབྲུ་དང་རྟ་གླང་བྲན་དུ་བཅས། །ས་གཞི་གསེར་སོགས་རིན་པོ་ཆེ། །གུས་པས་ཐུབ་མཆོག་རྣམས་ལ་མཆོད། །སྦྱིན་དང་ཚུལ་ཁྲིམས་སྒོམ་པ་
[287b.2]དང་། །ཐོས་བསམ་ཚོགས་གཉིས་ཅི་བསགས་པ། །དུས་གསུམ་བསྡུས་པའི་དགེ་བ་གང་། །ཐུབ་པ་ཆོས་ཀྱི་སྤྱན་ལ་དབུལ། །སྒེག་འཛུམ་ལྡེམ་ཞིང་བརྗིད་པ་དང་། །རྔམ་ཞིང་ཁྲོས་པ་ཁྲོ་བོའི་གཟུགས། །སྲས་བཅས་སྐུ་ཡི་དཀྱིལ་འཁོར་ལ། །དད་པས་མིག་མི་འཛུམས་
[287b.3]པས་བལྟའོ། །སངས་རྒྱས་བྱང་ཆུབ་མ་ལུས་པའི། །ཚེ་དང་ཡོན་ཏན་མཐུ་སྟོབས་དང་། །སྐུ་གསུམ་མཛད་པ་མ་ལུས་ལ། །རྟག་ཏུ་གུས་པས་སྐྱབས་སུ་མཆི། །བླ་མ་རྡོ་རྗེ་སློབ་དཔོན་དང་། །ཡི་དམ་དཀྱིལ་འཁོར་ལྷ་ཚོགས་ཏེ། །སངས་རྒྱས་ཆོས་དང་དགེ་འདུན་ལ། །རྟག་ཏུ་
[287b.4]གུས་པས་སྐྱབས་སུ་མཆིའོ། །རྒྱལ་བ་བྱང་ཆུབ་མཆོག་བརྙེས་ནས། །ཅུང་ཟད་སྙོམས་པར་བཞུགས་པ་ལ། །ཚངས་པ་ལྟ་བུར་གུས་པ་ཡིས། །ཆོས་ཀྱི་འཁོར་ལོ་བསྐོར་བར་བསྐུལ། །བྱང་ཆུབ་མཛད་པ་མཐར་ཕྱིན་ནས། །བདེ་གཤེགས་མྱ་ངན་འདའ་བཞེད་ལ། །ཇི་སྲིད་
[287b.5]འཁོར་བ་མཐའ་ཡོད་པར། །སེམས་ཅན་དོན་དུ་བཞུགས་སུ་གསོལ། །ཇི་ལྟར་སྔོན་གྱི་སྐྱོབ་པ་ཡིས། །བྱང་ཆུབ་སེམས་ནི་བསྐྱེད་པ་ལྟར། །དེ་བཞིན་བདག་ཀྱང་སེམས་ཅན་ཕྱིར། །བྱང་ཆུབ་ཆེན་པོར་སེམས་བསྐྱེད་དོ། །རྒྱལ་སྲས་འཇིག་རྟེན་སྐྱོང་རྣམས་ལ། །སྐུ་གསུམ་གྲུབ་
[287b.6]དང་རིག་པ་འཛིན། །ལས་ཚོགས་ཕྲིན་ལས་རྣམ་དབྱེ་སོགས། །ལས་བཅོལ་དེ་ནི་གྲུབ་པར་མཛོད། །འདིར་ནི་ཉེས་པ་གང་བགྱིས་པ། །གང་ཡང་ལུས་ཅན་སྐྱབས་གྱུར་ལ། །མ་འཚལ་བ་རྣམས་བཤགས་པར་བགྱི། །གཙོ་བོས་ཅིས་ཀྱང་བཀའ་གནང་འཚལ། །འབྲས་བུ་མཆོག་དང་ཐུན་མོང་སྟེ། །མ་
[287b.7]ནོར་ཚིག་དོན་ཤེས་རབ་དང་། །སྤོབས་པ་མཐུ་རྩལ་ཕུན་ཚོགས་པའི། །དངོས་གྲུབ་དེ་དག་གནང་བར་རིགས། །དུས་གསུམ་བསགས་པའི་དགེ་བ་ནི། །ཚོགས་གཉིས་བདུད་རྩི་ལྟ་བུ་འདིས། །སྐུ་གསུམ་འབྲས་བུ་གྲུབ་གྱུར་ནས། །གཞན་དོན་འབད་མེད་འབྱུང་བར་ཤོག །དཀྱིལ་འཁོར་དུ་འཇུག་པའི་
[288a]
[288a.1]ཆོ་ག་མདོར་བསྡུས་པ། སློབ་དཔོན་བྷ་བ་བྷ་ཊས་མཛད་པ་རྫོགས་སོ།། {T3675}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་མཎྜལ་ཨ་བ་ཏཱ་ར་ཀྲིཏཱ་ནཱ་མ། བོད་སྐད་དུ། འཕགས་པ་སྒྲོལ་མའི་དཀྱིལ་འཁོར་ལ་འཇུག་པ་ཞེས་བྱ་བ། མགོན་པོ་ཐུགས་རྗེ་ཆེན་
[288a.2]པོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ལྷ་མོ་ཤེས་རབ་ཕ་རོལ་ཕྱིན། །གོས་པ་མེད་པའི་ཡེ་ཤེས་ནི། །སྣ་ཚོགས་གཟུགས་ཅན་ནོར་བུ་ལྟར། །མ་ལུས་མཛད་ལ་ཕྱག་འཚལ་ལོ། །དུས་གསུམ་བདེ་གཤེགས་ཐམས་ཅད་དང་། །སྣ་ཚོགས་
[288a.3]འགྲོ་བའི་མ་ཁྱོད་ལ། །གུས་པའི་བློ་ཡིས་སྒྲོལ་མ་ཡི། །ཆོ་གའི་རིམ་པ་བརྗོད་པར་བྱ། །དེ་ལ་འདིར་ལྷ་མོ་སྒྲོལ་མ་ལ་ལྷག་པར་གུས་པའི་གང་ཟག་གང་ཡང་རུང་བས། གནས་ཁང་བརྒྱན་ཅིང་བྱི་དོར་ལེགས་པར་བྱས་པ་ལ་སྐུ་གསུང་ཐུགས་ཀྱི་རྟེན་དགྲམ། ཁྱད་པར་དུ་སྒྲོལ་མའམ། ཐུགས་
[288a.4]རྗེ་ཆེན་པོའི་རྟེན་བཞུགས་སུ་གསོལ། ཚུལ་ཇི་ལྟ་བ་བཞིན་དུ་དཀྱིལ་འཁོར་བཞེངས་ནས། དེར་ཚོགས་པ་རྣམས་ཤ་ཆང་སྒོག་བཙོང་སྤངས་ནས་ཁྲུས་ལེགས་པར་བྱས་ལ་ལུས་ལ་དྲི་བཟང་པོས་བྱུགས་ཏེ། གོས་གཙང་མ་གྱོན་ལ། མཆོད་པའི་ཡོ་བྱད་རྣམས་དང་། བའི་ལྕི་བ་ས་ལ་མ་ལྷུང་བ་ཡང་སྟ་
[288a.5]གོན་བྱ། གཞན་ཡང་ཉེ་བར་མཁོ་བ་རྣམས་ཀྱང་ཚོགས་པ་དང་ལྡན་པར་བྱའོ། །དེ་ནས་ཐམས་ཅད་ཀྱིས་རང་རང་གི་མདུན་དུ་ས་ལ་བའི་ལྕི་བས་བྱུགས་ལ་མཎྜལ་གྱི་ཆོ་ག་ལས་བྱུང་བ་ལྟར་མེ་ཏོག་སིལ་མའི་ཚོམ་བུ་བཅུ་དགུ་བའི་དབུས་ཀྱི་རི་རབ་ཀྱི་སྟེང་དུ་པོ་ཏ་ལ་ནས་སྤྱན་དྲངས་པའི་སྒྲོལ་མ་འཁོར་
[288a.6]དང་བཅས་པ་བཞུགས་པར་བསམས་པ་ལ་ཐོག་མར་ཕྱག་བྱ། ཉེ་བར་སྤྱོད་པ་ལྔས་མཆོད་ལ་མཚན་གྱི་དངོས་གཞི་བསྟོད་པ་ལན་གསུམ་བརྗོད། སྙིང་པོ་བརྒྱ་རྩ་བརྒྱད་བཟླས་ལ་ཙོག་ཙོག་པོར་འདུག་པས་གསོ་སྦྱོང་བླང་བར་བྱའོ། །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་
[288a.7]ཐམས་ཅད་དང་མགོན་པོ་ཐུགས་རྗེ་ཆེན་པོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་བདག་ལ་དགོངས་སུ་གསོལ། བཅོམ་ལྡན་འདས་སྒྲོལ་མ་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། ས་ཆེན་པོ་ལ་
[288b]
[288b.1]རབ་ཏུ་བཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དང་བདེ་བར་བྱ་བའི་ཕྱིར་དང་། ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་
[288b.2]ཤེས་གཟིགས་པའི་ཕུང་པོ་ཡོངས་སུ་རྫོགས་པར་བྱ་བའི་ཕྱིར། གསོ་སྦྱོང་ངེས་པར་བྱས་ཏེ་ཡང་དག་པར་བླངས་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་ནས་སང་གདུགས་རྩེ་ཤར་གྱི་བར་དུ་སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དང་། བདེ་བར་བྱ་བའི་ཕྱིར་དང་།
[288b.3]ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་ཡོངས་སུ་རྫོགས་པར་བྱ་བའི་ཕྱིར་གསོ་སྦྱོང་ངེས་པར་བྱས་ཏེ། ཡང་དག་པར་བླང་བར་བགྱིའོ། །དེང་ནས་སྲོག་གཅོད་
[288b.4]མི་བྱ་ཞིང་། །གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཅིང་། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་མཉམ་བསྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་མཐོན་པོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་དང་ནི་རྒྱན། །གར་
[288b.5]དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་པ། །དེ་ལྟར་སྲོག་གཅོད་ལ་སོགས་སྤང་། །བླ་མེད་བྱང་ཆུབ་ཐོབ་པར་ཤོག །སྡུག་བསྔལ་མང་དཀྲུགས་སེམས་ཅན་ཀུན། །སྲིད་པའི་མཚོ་ལས་སྒྲོལ་བར་ཤོག །ཅེས་པ་ལན་གསུམ་དུ་བྱའོ། །དེ་
[288b.6]ལྟར་གསོ་སྦྱོང་བླངས་ནས་དུས་ཀྱི་ཁྱད་པར་ལ་ཉིན་གཅིག་གམ། མཚན་གཅིག་གམ་ཐུན་གཅིག་ལ་སོགས་པ་ཡང་བྱའོ། །དེ་ལ་སྨྱུང་བར་གནས་པའམ་དཀར་གསུམ་ལ་བརྟེན་པ་ཡང་རུང་བས་འཕགས་མ་སྒྲོལ་མ་ལ་ལྷག་པར་གུས་པའི་བློ་རྩེ་གཅིག་པར་བྱའོ། །དེ་ནས་སློབ་དཔོན་གྱིས་
[288b.7]དེར་གནས་པ་ཐམས་ཅད་ཀྱི་བསམ་པ་བཅོས་ལ་བྱང་ཆུབ་ཀྱི་སེམས་དང་མི་འབྲལ་བར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་གདུང་བདག་གིས་གཟུང་སྙམ་པ་དང་། བྱང་ཆུབ་སེམས་དཔའི་སྤྱོད་པ་ལ་བདག་གིས་སྤྱད་སྙམ་པ་དང་། མཐའ་ཡས་པའི་སེམས་ཅན་ཐམས་ཅད་བདག་གིས་
[289a]
[289a.1]བསྒྲལ་སྙམ་པའི་བསམ་པ་རྒྱུན་མི་ཆད་པར་ཆོ་ག་ཐམས་ཅད་བྱའོ། །དེ་ནས་ས་གཞི་བྱིན་གྱིས་བརླབ་པར་བྱ་སྟེ། དེ་བཞིན་གཤེགས་པ་སྲས་དང་བཅས་པ་ཐམས་ཅད་ཀྱི་བྱིན་གྱིས་བརླབས་པའི་ས་ཕྱོགས་འདི་རྣམས་ཐམས་ཅད་གསེར་གྱི་ས་གཞི་བརྡལ་བ་ལ་རིན་པོ་ཆེ་
[289a.2]སྣ་བདུན་དང་བེེ་ཌཱུརྱས་མིག་མངས་རིས་སུ་བྲིས་པའམ་ཤེལ་བཞིན་བསྟར་བ་ལ་རིན་པོ་ཆེ་སྣ་ཚོགས་པའི་འཕྲ་བཀོད་པའི་ཚུལ་ཁྱད་པར་འཕགས་པ། ཀུན་ནས་རབ་ཏུ་དང་བ་དང་ལྡན་པ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དང་ཚད་རབ་ཏུ་མཉམ་པར་གྲུབ་པ་སྟེ། རེག་ན་བདེ་ཞིང་འཇམ་
[289a.3]ལ་མཉེན་པ་ཕྱོགས་མཚམས་རྣམས་ཀྱང་རིན་པོ་ཆེ་སྣ་ཚོགས་ཀྱི་རྒྱུ་ལས་བྱས་པའི་ས་གཞི་བསྟར་བ་ཁོ་ན་ལ་རབ་ཏུ་མཛེས་པ་དུ་མས་བརྒྱན་པ། ནམ་མཁའ་འམ་ལག་མཐིལ་ལྟར་མཉམ་པ། ཡངས་ཤིང་བདེ་བ་འབྱོར་པ་དང་ལྡན་པ་མནན་ན་ནེམ་ཞིང་བཏེག་ན་འཕར་བ། ངམ་གྲོག་དང་གཡང་ས་
[289a.4]དང་གཅོང་རོང་དང་བྱ་སྐྱིབས་དང་བྲལ་བ། གསེག་མ་དང་གྱོ་དུམ་དང་ཚེར་མ་ལ་སོགས་པ་དང་བྲལ་བ་སྟེ། རྣམ་པར་འཕྲུལ་པ་དང་བཀོད་པ་བསམ་གྱིས་མི་ཁྱབ་པས་བརྒྱན་ཅིང་མཛེས་པར་སྤྲས་པའི་ས་གཞི་ལ་ཉེ་བར་འཚེ་བ་མེད་པའི་ཆུ་ཡན་ལག་བརྒྱད་དང་ལྡན་པ་སྒྲ་སྙན་པ་འབབ་པ། མཚོ་དང་
[289a.5]རྫིང་བུ་དང་ལྟེང་ཀ་ལ་སོགས་པ་ལ་མེ་ཏོག་རྣམ་པ་སྣ་ཚོགས་པས་ཁེབས་པ། མྱ་ངན་མེད་པ་དང་ཨུ་དུམྺཱ་ར་དང་ནྱ་གྲོ་དྷ་ལ་སོགས་པའི་ཤིང་ལྗོན་པ་རྣམས་ལ་ཡིད་དུ་འོང་བའི་མེ་ཏོག་དང་འབྲས་བུ་གཡུར་ཟ་བ་དང་ལྡན་པ་དུ་མས་བརྒྱན་པ། རྨ་བྱ་དང་ཁྲུང་ཁྲུང་དང་བཞད་དང་ས་ར་ས་ལ་སོགས་པ་
[289a.6]གཡོར་ཞིང་ལྡེམ་པ་དང་བཅས་པའི་བྱ་རྣམ་པ་སྣ་ཚོགས་པས་བདག་མེད་པའི་སྒྲ་སྒྲོགས་པ་དང་ལྡན་པ། སེང་གེ་དང་གླང་པོ་ཆེ་རོལ་པ་དང་། ཀྲི་ཎ་ཛ་ཊི་དང་ལྟོ་འཕྱེ་ལ་སོགས་པའི་རི་དྭགས་རྣམས་ཀྱང་འཁྲུལ་པ་མེད་པའི་སེམས་ཀྱིས་དགའ་ཞིང་རྩེ་བར་སྤྱོད་པས་བྱམས་པ་ལ་གནས་པ་དང་། པདྨ་
[289a.7]དང་ཀུ་མུ་ད་དང་པུཎྜ་རཱི་ཀ་དང་ཨུཏྤལ་དང་པདྨ་གེ་སར་ལ་སོགས་པ་ཁ་དོག་དང་དྲི་ལ་སོགས་པ་ཕུན་སུམ་ཚོགས་པ་སྣ་ཚོགས་པས་ཉེ་བར་མཛེས་པར་བྱེད་པའི་ས་གཞི་དམ་པ་དང་། ཕྱོགས་མཚམས་ཐམས་ཅད་ཀྱང་ག་བུར་དང་གླ་རྩི་དང་ཨ་ག་རུ་དང་ཙནྡན་སྦྲུལ་གྱི་སྙིང་པོ་ལ་སོགས་པས་སའི་ཕྱོགས་ཀུན་
[289b]
[289b.1]དྲི་བསུང་ཆེན་པོས་ཡོངས་སུ་ཁྱབ་པས་སེམས་ཅན་ཐམས་ཅད་ཀྱི་ཡིད་ཚིམ་པར་བྱེད་པ། རིག་པ་འཛིན་པ་ལ་སོགས་པ་དང་མིའམ་ཅི་ལ་སོགས་པའི་ཚོགས་རབ་ཏུ་ཡང་དག་པར་རྒྱུ་ཞིང་ལྷའི་བུ་དང་བུ་མོ་དང་དྲི་ཟའི་བུ་མོ་ལ་སོགས་པའི་ཚོགས་རྣམས་ཀྱང་དམ་པའི་ཆོས་ཀྱི་སྒྲ་དང་ལྡན་པའི་ཡིད་དུ་འོང་
[289b.2]བའི་གླུ་དབྱངས་དུ་མ་སྒྲོགས་པ། ཆོས་ཀྱི་རོའི་དགའ་བ་ཕུན་སུམ་ཚོགས་པ་དང་ལྡན་པས་རང་དང་གཞན་གྱི་རྒྱུད་ཡོངས་སུ་དང་བ་ཆེན་པོ་བསྐྱེད་པ་ཐོབ་པར་འགྱུར་བ་ཞི་གནས་དང་ལྷག་མཐོང་གི་ཏིང་ངེ་འཛིན་གྱི་སྒོ་དུ་མ་དང་ལྡན་པའི་ཆོས་ཀྱི་དབྱིངས་རང་བཞིན་ལས་གྲུབ་པས་ཉེ་བར་འཚེ་བའི་གནོད་
[289b.3]པ་དང་བྲལ་བའི་ས་ཕྱོགས་དམ་པ་སྟེ། མདོར་ན་བདེ་བ་ཅན་གྱི་འཇིག་རྟེན་གྱི་ཁམས་ཀྱི་རྣམ་པར་བཀོད་པ་དང་མཚུངས་པར་འབྱོར་ཞིང་དར་བ། བདེ་ཞིང་སྐྱིད་པ་ཉམས་དགའ་བ་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་གང་བའི་ས་ཕྱོགས་དམ་པར་བྱིན་གྱིས་བརླབ་པར་བྱ་སྟེ། དེ་ཡང་ཆོས་
[289b.4]ཀྱི་དབྱིངས་ཀྱི་བྱིན་གྱི་རླབས་དང་། དཀོན་མཆོག་གསུམ་གྱི་བདེན་པའི་བྱིན་རླབས་དང་། ཚོགས་གཉིས་ཡོངས་སུ་རྫོགས་པའི་མཐུ་དང་། རིག་སྔགས་ཀྱི་རྒྱལ་པོ་འདིའི་བྱིན་གྱི་རླབས་ཀྱིས་དེ་བཞིན་དུ་གྱུར་ཅིག །ཨོཾ་ན་མོ་བྷ་ག་བ་ཏེ་བཻ་རོ་ཙ་ན་པྲ་བྷ་རཱ་ཛཱ་ཡ་ཏཱ་ཐཱ་ག་ཏ་ཡ་ཨརྷ་ཏེ་སམྱཀྶཾ་བུདྡྷཱ་ཡ།
[289b.5]ཏདྱ་ཐཱ། ཨོཾ་སུ་ཀྵྨེ་སུཀྵྨེ། ས་མེ་ས་མ་ཡེ་ཤཱནྟེ་དཱནྟེ་ཨ་ས་མ་རོ་བེ། ཨ་ན་ལམྦྷེ་ཏ་རམྦྷེ། ཡ་ཤོ་བ་ཏི་མ་ཧཱ་ཏེ་ཛོ་ནི་ར་ཀུ་ལེ་ནི་ར་བ་ཎེ་སརྦ་བུདྡྷ་ཨདྷིཥྛཱ་ན་ཨདྷིཥྛི་ཏེ་སྭཱ་ཧཱ་ཞེས་སྔགས་དང་བཅས་པ་འདི་ལན་གསུམ་བརྗོད་དོ། །དེ་ནས་ས་ཕྱོགས་དམ་པ་རྒྱ་ཡོངས་སུ་མ་ཆད་པ་དེ་དག་གི་དབུས་སུ་སྔོན་གྱི་དེ་བཞིན་
[289b.6]གཤེགས་པ་རྣམས་དང་། བྱང་ཆུབ་སེམས་དཔའ་དེ་དག་གི་སྔོན་གྱི་སྨོན་ལམ་གྱི་མཐུ་ཁྱད་པར་ཅན་ལས་གྲུབ་པའི་ཞིང་གི་བཀོད་པ་ཕུན་སུམ་ཚོགས་པ་དང་ལྡན་ཞིང་སྣ་ཚོགས་པའི་རིན་པོ་ཆེ་ལས་གྲུབ་པའི་གཞལ་ཡས་ཁང་དམ་པ་ལ་ཁོར་ཡུག་ཆེན་པོའི་རྒྱན་གྱིས་ཉེ་བར་མཛེས་པར་སྤྲས་པ། དེ་བཞིན་གཤེགས་
[289b.7]པའི་འོད་ཟེར་གྱིས་ཕྱི་དང་ནང་ཀུན་དུ་གང་བས་དྲི་མ་མེད་ཅིང་འོད་གསལ་བ་ལས་བྱུང་བའི་བདེ་བར་གཤེགས་པའི་གཞལ་ཡས་ཁང་ཆེན་པོར་ཡོངས་སུ་གྲུབ་པ་ནི་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུས་མ་བྱས་པ་ཉིད་ཀྱི་ཕྱིར་སྒོ་བཞི་དང་ལྡན་
[290a]
[290a.1]པ་དང་། དྲན་པ་ཉེ་བར་གཞག་པ་བཞི་དང་ལྡན་པའི་ཕྱིར་གྲུ་བཞི་དང་། ཡང་དག་པར་སྤོང་བ་བཞི་དང་ལྡན་པའི་ཕྱིར་བསིལ་ཁང་བཞི་དང་། རྫུ་འཕྲུལ་གྱི་རྐང་པ་བཞི་དང་ལྡན་པས་ཁྲུས་ཁང་གི་རྫིང་བུ་བཞིས་སྤྲས་པ་དང་། འཕགས་པའི་ལམ་ཡན་ལག་བརྒྱད་དང་ལྡན་
[290a.2]པ་ཉིད་ཀྱི་ཕྱིར་ཀ་བ་བརྒྱད་དང་ལྡན་པ་སྟེ། རིན་པོ་ཆེའི་སྟེགས་གྲུ་བཞི་ལ་གནས་ཤིང་བུམ་པ་ལས་བྱུང་བའི་རིན་པོ་ཆེའི་ཀ་བ་ལས་ནོར་བུ་དུ་མས་མཛེས་པར་བཅིངས་པ། རབ་ཏུ་དགའ་བ་ལ་སོགས་པའི་ས་བཅུ་གཉིས་དང་ལྡན་ཞིང་གསུང་རབ་ཡན་ལག་བཅུ་གཉིས་རྣམ་པར་དག་པས་བང་རིམ་བཅུ་
[290a.3]གཉིས་དང་ལྡན་པའི་རྟ་བབས་ཀྱིས་མཛེས་པ། སེམས་ཅན་ཐམས་ཅད་ཀྱི་རྒྱུད་ཚིམ་པར་བྱེད་པའི་ཆོས་ཀྱི་འཁོར་ལོ་ལ་བརྩེ་བ་ཆེན་པོ་དང་ལྡན་པས་གསེར་གྱི་དྲིལ་བུ་གཡེར་ཁ་དང་། མུ་ཏིག་ལ་སོགས་པས་སྤྲས་པའི་རི་དྭགས་ཕོ་མོ་གཉིས་ཀྱིས་བརྒྱན་པ་དང་། རྟ་བབས་ཀྱི་ལོགས་དེ་
[290a.4]དག་ལ་ཡང་ལྷའི་ན་བཟའ་རྣམ་པ་སྣ་ཚོགས་པའི་བླ་རེ་དང་བ་དན་དང་རྒྱལ་མཚན་དང་ཁ་དོག་སྣ་ཚོགས་པའི་མེ་ཏོག་གི་ཕྲེང་བ་དང་གསེར་དང་ནོར་བུ་སྣ་ཚོགས་པས་བརྒྱན་ཅིང་མཛེས་པར་གྱུར་པ་དང་། གཟུངས་དང་སོ་སོ་ཡང་དག་པར་རིག་པ་ལ་སོགས་པའི་རང་བཞིན་དུ་དག་པས་རིན་པོ་ཆེའི་ཁ་དོག་
[290a.5]སྣ་ཚོགས་པ་ལས་རིན་པོ་ཆེ་གཞན་གྱི་ཁ་དོག་གིས་ལེགས་པར་སྤྲས་པའི་འདོད་ཡོན་གྱི་སྣམ་བུ་ཤེལ་བཞིན་དུ་བསྟར་བ་དང་། བྱང་ཆུབ་ཀྱི་ཡན་ལག་རྣམས་དང་ལྡན་པས་རིན་པོ་ཆེའི་སྣམ་བུ་ལ་ཁ་དོག་ལྔའི་རིན་པོ་ཆེའི་ཕྲེང་བ་བརྒྱུས་པས་མིག་མངས་རིས་སུ་བྲིས་པས་མཛེས་པའི་ལོགས་རྣམས་དང་།
[290a.6]མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་རྣམ་པར་དག་པས་དངུལ་དང་། གསེར་དང་། པདྨ་རཱ་ག་དང་། ཨིནྡྲ་ནཱི་ལ་དང་། བཻ་ཌཱུརྱ་ལས་གྲུབ་པའི་རྩིག་པ་ལྔ་ཡང་རྒྱ་དང་དཔངས་སུ་འཚམ་པ་ལས། སྒྱུ་མ་ལྟ་བུ་དང་། ཏིང་ངེ་འཛིན་དང་། རྣམ་པར་སྤྲུལ་པ་དང་། ཆོས་ཡང་དག་པར་གྲུབ་པའི་ཕྱིར་
[290a.7]དྲ་བ་དང་། དྲ་བ་ཕྱེད་པ་འཕྱང་བ་དང་། མེ་ཏོག་རྣམ་པ་སྣ་ཚོགས་པའི་དོ་ཤལ་ཀྱང་བར་བར་དུ་སྤྲས་པ་ལ་དྲ་བའི་ནང་དུ་པདྨ་དང་ཟླ་བ་དང་། རྡོ་རྗེ་དང་། ཉི་མ་དང་། ནོར་བུ་ལ་སོགས་པ་དུ་མས་བརྒྱན་པའི་སྟེང་དུ་སྐུ་གསུང་ཐུགས་ཀྱི་བཀོད་པའི་འོད་ཟེར་བསམ་གྱིས་མི་ཁྱབ་པས་བརྒྱན་པས་ན་རིན་པོ་ཆེ་སྣ་བདུན་
[290b]
[290b.1]ལས་གྲུབ་པའི་ཟར་ཚགས་དང་ལྡན་པ་དང་། སྟོབས་དང་། མི་འཇིགས་པ་དང་། སངས་རྒྱས་ཀྱི་ཡོན་ཏན་དུ་མ་དང་ལྡན་པས་དངུལ་ལས་གྲུབ་པའི་རིན་པོ་ཆེའི་རང་བཞིན་གྱི་མདའ་ཡབ་ལ་རྒྱལ་མཚན་དང་བ་དན་རྣམས་ཀྱིས་སྤྲས་པ་དང་། སངས་རྒྱས་ཀྱི་ཆོས་མ་འདྲེས་པའི་སོ་སོར་ངེས་པའི་ཕྱིར་རིན་པོ་
[290b.2]ཆེའི་དབྱུག་པ་རྩེ་གསུམ་པ་དང་རྣམ་པར་རོལ་པའི་མིའམ་ཅིའི་རྒྱལ་མཚན་ལ་གསེར་གྱི་དྲིལ་བུ་གཡེར་ཁ་ངེས་པར་བཅིངས་པ་ལ་ཁ་དོག་སྣ་ཚོགས་པའི་རས་ཀྱིས་དཀྲིས་པ་རླུང་གིས་བསྐྱོད་པའི་འཁྱོག་པ་དང་བཅས་པ་དཔྱངས་པ་དང་། དབང་པོ་དང་། སྟོབས་དང་། བདེན་པ་དང་། བྱིན་གྱིས་
[290b.3]བརླབས་པའི་རང་བཞིན་གྱིས་གདུགས་བཞི་དང་། རྔ་ཡབ་དང་། དུང་དང་མེ་ཏོག་གི་ཆུན་འཕྱང་གིས་བརྒྱན་པའོ། །ཕྱི་ནང་གི་དངོས་པོ་ཡང་མ་བསྒྲིབས་པར་གསལ་ཞིང་རིག་པ་དང་ལྡན་པས་རང་བཞིན་ལས་གྲུབ་པའི་ཀ་བ་དང་གདུང་མ་ལ་སོགས་པ་ཡང་སོ་སོར་མངའ་ཐང་དང་འཚམ་པར་
[290b.4]གྲུབ་པ་དང་། པདྨའི་ཟེའུ་འབྲུ་ལ་སྣ་ཚོགས་རྡོ་རྗེའི་དབུས་སུ་ཆོས་ཉིད་མི་འཁྲུགས་པའི་དེ་ཁོ་ན་ཉིད་ལ་ངེས་པར་གནས་པའི་ཕྱིར་བརྟན་པར་བྱས་པ་པདྨའི་འདབ་མ་རྣམས་སུ་ཁོར་ཡུག་ལ་བུམ་པ་བཟང་པོ་ལས་འཐོན་པས་དགོངས་པ་ངེས་པར་བསྒྲུབ་པའི་ཕྱིར་བྱང་ཆུབ་ཀྱི་ཤིང་རྣམས་ལ་འཁོར་ལོ་ལ་སོགས་
[290b.5]པའི་རིན་པོ་ཆེ་སྣ་བདུན་དང་ཚལ་དང་ལྤགས་པ་ལ་སོགས་པའི་ཉེ་བའི་རིན་པོ་ཆེ་རྣམས་དང་། གཞན་ཡང་བདག་མེད་པའི་སྒྲ་དང་ལྡན་ཞིང་ཡིད་དུ་འོང་བས་སེམས་ཡོངས་སུ་ཚིམ་པར་བྱེད་པའི་དབྱངས་དུ་མ་དང་ལྡན་པའི་རི་དྭགས་ཀྱི་རྒྱལ་པོ་རྣམས་དང་། ངང་པའི་རྒྱལ་པོ་དང་རྨ་བྱ་དང་ཤིན་ཏུ་མཛེས་པའི་
[290b.6]མིའམ་ཅི་ཕོ་མོ་དང་སྤྲིན་དང་ཁྲུས་ཀྱི་རྫིང་བུ་ལས་ལུས་ཕྱེད་འཐོན་པའི་རིག་པ་འཛིན་པ་རྣམས་ཀྱིས་བརྒྱན་པ་དང་། མདོར་ན་སངས་རྒྱས་དང་བྱང་ཆུབ་སེམས་དཔའི་ཚོགས་རྣམས་ཀྱིས་སོ་སོར་བསོད་ནམས་དང་ཡེ་ཤེས་ལས་གྲུབ་པ་གང་ཡང་མ་ཚང་བ་མེད་པ་གཞལ་ཡས་ཁང་དམ་པར་བྱིན་གྱིས་བརླབ་པར་
[290b.7]བྱའོ། །དཀོན་མཆོག་གསུམ་གྱི་བདེན་པའི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མཐུ་དང་། ཆོས་ཀྱི་དབྱིངས་ལས་གྲུབ་པའི་བྱིན་རླབས་དང་། རིག་སྔགས་ཀྱི་རྒྱལ་པོའི་མཐུས་དེ་བཞིན་དུ་གྱུར་ཅིག །ན་མོ་བྷ་ག་བ་ཏེ་བཻ་རོ་ཙ་ན་པྲ་བྷ་རཱ་ཛཱ་ཡ་ཏ་ཐཱ་ག་ཏཱ་ཡ་ཨརྷ་ཏེ་སཾ་མྱཀྶཾ་བུདྡྷཱ་ཡ།
[291a]
[291a.1]ཏ་དྱ་ཐཱ། ཨོཾ་བི་མ་ལ་སརྦ་སཾ་སྐཱ་ར་སིདྡྷཱི་སྠ་ན་སརྦ་བུདྡྷ་བོ་དྷི་སཏྭ་སྱ་ཀུ་ཊ་ག་རཾ་ཨ་དྷིཥྛཱ་ན་ཨ་དྷི་ཥྛྀ་ཏེ་སྭཱ་ཧཱ་ཞེས་ལན་གསུམ་དུ་བརྗོད་པ་དང་བསམ་པར་བྱའོ། །དེ་ནས་དེ་ལྟར་བྱིན་གྱིས་བརླབས་པའི་གཞལ་ཡས་ཁང་དེ་དག་གི་དབུས་སུ་སེང་གེའི་ཁྲི་པདྨའི་སྙིང་པོ་ཟླ་བ་རབ་ཏུ་རྒྱས་པའི་གདན་
[291a.2]ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་ཚེ་དཔག་ཏུ་མེད་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མགོན་པོ་ཐུགས་རྗེ་ཆེན་པོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་དང་། བདེ་བར་གཤེགས་པ་རྣམས་དང་
[291a.3]བྱང་ཆུབ་སེམས་དཔའ་ཐམས་ཅད་ཀྱི་ཡུམ་དུ་གྱུར་པ་དང་། དེ་དག་གི་ཕྲིན་ལས་མ་ལུས་པ་གྲུབ་པར་བྱེད་པའི་རིག་པའི་རྒྱལ་མོ་འཕགས་མ་སྒྲོལ་མ་ལ་སོགས་པ་རྣམས་ཀྱང་སོ་སོའི་ཞིང་ཁམས་དང་། གནས་ནས་རང་གི་གདན་འཛོམ་པ་ལ་དེ་རིང་མགོན་སྐྱབས་དཔུང་གཉེན་དུ་སྤྱན་འདྲེན་ཅིང་མཆིས་ན།
[291a.4]ཆེ་གེ་མོ་ལ་སོགས་པ་མཐའ་ཡས་པའི་འགྲོ་བ་མ་ལུས་པ་བླ་ན་མེད་པའི་གོ་འཕང་ལ་དགོད་པའི་ཕྱིར། ཐུགས་ཀྱིས་དགོངས། སྙན་གྱིས་གསན། སྤྱན་གྱིས་གཟིགས་ནས་སྔོན་གྱི་ཐུགས་དམ་ཁྱད་པར་ཅན་ལས་བཞེངས་ཏེ། དེང་གནས་འདིར་བྱོན་པར་ཅི་གནང་། །ཞེས་ལན་གསུམ་དུ་བྱའོ། །དེ་ནས་
[291a.5]བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་བསྐྱོད་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འབྱུང་ལྡན་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
[291a.6]པར་རྫོགས་པའི་སངས་རྒྱས་རྣམ་པར་སྣང་མཛད་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཡོད་གྲུབ་པ་དང་། དེ་བཞིན་གཤེགས་པ་རྣམས་དང་བྱང་ཆུབ་སེམས་དཔའ་ཐམས་ཅད་ཀྱི་ཡུམ་དུ་གྱུར་པ་རྡོ་རྗེ་སྒྲོལ་མ་དང་། རིན་ཆེན་སྒྲོལ་མ་
[291a.7]དང་། པདྨའི་སྒྲོལ་མ་དང་། ལས་ཀྱི་སྒྲོལ་མ་དང་། བདུག་སྤོས་སྒྲོལ་མ་དང་། མེ་ཏོག་སྒྲོལ་མ་དང་། མར་མེ་སྒྲོལ་མ་དང་། དྲི་མཆོག་སྒྲོལ་མ་ལ་སོགས་པ་རྣམས་ཀྱང་། ཆེ་གེ་མོ་ལ་སོགས་པ་མཐའ་ཡས་པའི་འགྲོ་བ་མ་ལུས་པ་བླ་ན་མེད་པའི་གོ་འཕང་ལ་དགོད་པའི་ཕྱིར། དེ་རིང་
[291b]
[291b.1]མགོན་དང་སྐྱབས་དང་དཔུང་གཉེན་དུ་སྤྱན་འདྲེན་ཞིང་མཆིས་ན། ཐུགས་ཀྱིས་དགོངས། སྙན་གྱིས་གསན། སྤྱན་གྱིས་གཟིགས་ནས་སོ་སོའི་ཞིང་ཁམས་དང་གནས་ནས་སྔོན་གྱི་ཐུགས་དམ་ཁྱད་པར་ཅན་ལས་བཞེངས་ནས་ཡིད་དུ་འོང་བའི་ཕོ་བྲང་དམ་པར་གདན་འཛོམ་པ་ལ་བྱོན་
[291b.2]པར་གནང་བར་མཛོད་ཅིག་ཅེས་ལན་གསུམ་མོ། །དེང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡུམ་དུ་གྱུར་པ་རིག་པའི་རྒྱལ་མོ་ཆོས་ཀྱི་སྤྲིན་གསེར་དུ་སྣང་བའི་སྒྲོལ་མ་དང་། ཡང་དག་པའི་མཐའ་རབ་ཏུ་མི་གཡོ་བའི་སྒྲོལ་མ་དང་། ཆོས་ཀྱི་དོན་ཡང་དག་པར་མངོན་དུ་གྱུར་
[291b.3]པའི་སྒྲོལ་མ་དང་། དེ་བཞིན་གཤེགས་པ་ཐམས་ཅད་ཀྱི་བློ་གྲོས་སྒྲོལ་མ་དང་། ཀུན་ནས་འོད་ཟེར་རབ་ཏུ་འཕྲོ་བའི་སྒྲོལ་མ་དང་། ཉོན་མོངས་པ་ཐམས་ཅད་རིང་དུ་གྱུར་པའི་སྒྲོལ་མ་དང་། དེ་བཞིན་གཤེགས་པ་ཐམས་ཅད་ཡོན་ཏན་གྱི་འོད་བྱེད་པའི་སྒྲོལ་མ་དང་། བྱང་ཆུབ་སེམས་དཔའ་
[291b.4]ཐམས་ཅད་ཀྱིས་རབ་ཏུ་སྦྱངས་པར་གྱུར་པའི་སྒྲོལ་མ་དང་། དྲི་མ་མེད་པར་རབ་ཏུ་སྣང་བའི་སྒྲོལ་མ་དང་། ཡོན་ཏན་གྱི་ཚོགས་མ་ལུས་པ་ལ་རབ་ཏུ་དགའ་བའི་སྒྲོལ་མ་དང་། རྣམ་པར་གྲོལ་བར་གྱུར་པ་ཤེས་རབ་ཀྱི་སྒྲོལ་མ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡེ་
[291b.5]ཤེས་ཀྱི་སྒྲོལ་མ་དང་། སངས་རྒྱས་ཐམས་ཅད་ཀྱི་ཐུགས་མཉམ་པར་བཞག་པའི་སྒྲོལ་མ་དང་། དེ་བཞིན་གཤེགས་པ་ཐམས་ཅད་ཀྱི་ཐུགས་རྗེའི་སྟོབས་ཀྱི་སྒྲོལ་མ་དང་། སངས་རྒྱས་ཐམས་ཅད་ཀྱི་ཕྲིན་ལས་ལ་བརྩོན་པའི་སྒྲོལ་མ་དང་། སྨོན་ལམ་གྱི་རྒྱ་མཚོའི་ཕ་རོལ་ཏུ་ཕྱིན་པའི་སྒྲོལ་
[291b.6]མ་དང་། བརྟུལ་ཞུགས་མཆོག་ཏུ་གྱུར་པའི་རབ་ཏུ་བཟོད་པའི་སྒྲོལ་མ་དང་། རྣམ་པ་ཐམས་ཅད་ཀྱི་མཆོག་དང་ལྡན་པའི་སྒྲོལ་མ་དང་། སངས་རྒྱས་ཐམས་ཅད་ཀྱི་ཡོན་ཏན་མ་ལུས་པར་འགྱེད་པའི་སྒྲོལ་མ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྒྲོལ་མ་དང་། ཆོས་ཐམས་ཅད་ཀྱི་སྲོག་
[291b.7]རྣམ་པར་འཛིན་པའི་སྒྲོལ་མ་དང་། སེམས་དང་ལས་རབ་ཏུ་མཁྱེན་པའི་སྒྲོལ་མ་དང་། ཡོ་བྱད་ཀྱི་དབང་ཕྱུག་ཟ་མ་ཏོག་གི་སྒྲོལ་མ་དང་། ལས་དང་སྐྱེ་བ་ཡང་དག་པར་མཁྱེན་ཅིང་གྲུབ་པའི་སྒྲོལ་མ་དང་། ཐབས་ངེས་པར་རྣམ་པར་རོལ་བའི་སྒྲོལ་མ་དང་། ཆོས་ཡང་དག་པར་གྲུབ་པ་རྒྱ་མཚོའི་
[292a]
[292a.1]སྒྲོལ་མ་དང་། སྨོན་ལམ་གྱི་མཆོག་ལེགས་པའི་དབྱངས་ཀྱི་སྒྲོལ་མ་དང་། མོས་པའི་རྩ་བ་རབ་ཏུ་བརྟན་པ་ཆོས་ཀྱི་སྒྲོལ་མ་དང་། རྫུ་འཕྲུལ་ཀུན་ནས་ངེས་པར་འགྲོ་བའི་སྒྲོལ་མ་དང་། མཁྱེན་པས་རྣམ་པར་མཛེས་པའི་དཔལ་གྱི་སྒྲོལ་མ་དང་། རིན་པོ་ཆེའི་བློ་
[292a.2]ཡིད་བཞིན་གྱི་ནོར་བུའི་སྒྲོལ་མ་དང་། གཙུག་ཏོར་རྣམ་པར་རྒྱལ་བའི་སྒྲོལ་མ་དང་། ཀུན་ནས་འོད་ཟེར་རྣམ་པར་འགྱེད་པའི་སྒྲོལ་མ་དང་། དེ་བཞིན་གཤེགས་པའི་གསང་འཛིན་རི་ཁྲོད་ལོ་མའི་སྒྲོལ་མ་དང་། ཤེས་རབ་ཀྱི་སྒོ་ཡང་དག་པར་འཕེལ་བའི་སྒྲོལ་མ་དང་། སངས་རྒྱས་ཐམས་
[292a.3]ཅད་ཀྱི་མི་ཟད་པའི་ཡེ་ཤེས་ཟ་མ་ཏོག་གི་སྒྲོལ་མ་དང་། ལས་ཐམས་ཅད་ཡང་དག་པར་སྦྱོར་ཞིང་འདྲེན་པའི་སྒྲོལ་མ་དང་། སྤོབས་པ་མ་ལུས་པར་བསྐྱེད་ཅིང་དུག་སེལ་བའི་སྒྲོལ་མ་དང་། རྣམ་པར་བཀོད་པ་ཀུན་ནས་མཛེས་པ་ཙུནྡའི་སྒྲོལ་མ་དང་། སངས་རྒྱས་ཐམས་ཅད་ཀྱི་ཞལ་
[292a.4]རྣམ་པར་མཐའ་ཡས་པའི་སྒྲོལ་མ་ལ་སོགས་པ་ཡང་། ཆེ་གེ་མོ་ལ་སོགས་པ་མཐའ་ཡས་པའི་འགྲོ་བ་མ་ལུས་པ་བླ་ན་མེད་པའི་བྱང་ཆུབ་ལ་འགོད་པའི་ཕྱིར་དེ་རིང་དཔུང་གཉེན་དང་མགོན་སྐྱབས་སུ་སྤྱན་འདྲེན་ཅིང་མཆིས་ན། སོ་སོའི་ཞིང་ཁམས་རྣམ་པར་དག་པ་ནས་སྔོན་གྱི་ཐུགས་དམ་ཁྱད་
[292a.5]པར་ཅན་ལས་བཞེངས་ཏེ། ཐུགས་ཀྱིས་དགོངས། སྙན་གྱིས་གསན། སྤྱན་གྱིས་གཟིགས་ནས་ཡིད་དུ་འོང་བའི་ཕོ་བྲང་དམ་པར་མཆོད་པའི་ཚོགས་འབྱོར་བའི་དབུས་སུ་གདན་འཛོམ་པ་ཆེན་པོ་ལ་བྱོན་པར་མཛོད་ཅིག་ཅེས་ལན་གསུམ་དུའོ། །དེང་འདིར་བྱང་ཆུབ་སེམས་དཔའ་སེམས་དཔའ་
[292a.6]ཆེན་པོ་ཀུན་དུ་བཟང་པོ་དང་། བྱང་ཆུབ་སེམས་དཔའ་ཆེ་པོ་བྱམས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་
[292a.7]པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཏོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་མཛོད་དང་། བྱང་
[292b]
[292b.1]ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དཔའ་བར་འགྲོ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་རྒྱ་མཚོ་དང་། བྱང་ཆུབ་སེམས་དཔའ་སེམས་དཔའ་
[292b.2]ཆེན་པོ་རྡོ་རྗེ་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གནས་ཆེན་ཐོབ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ངན་སོང་ཀུན་སྦྱོང་དང་།
[292b.3]བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བའི་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་བརྩེགས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འོད་མཐའ་ཡས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ཀུན་སེལ་དང་། བྱང་ཆུབ་སེམས་དཔའ་
[292b.4]སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་དང་མུན་པ་ཐམས་ཅད་རྣམ་པར་སེལ་བ་ལ་སོགས་པ་རྣམས་ཀྱང་། ཆེ་གེ་མོ་ལ་སོགས་པ་མཐའ་ཡས་པའི་འགྲོ་བ་མ་ལུས་པ་བླ་ན་མེད་པའི་གོ་འཕང་ལ་དགོད་པར་བྱ་
[292b.5]བའི་ཕྱིར་དེ་རིང་མགོན་སྐྱབས་དང་དཔུང་གཉེན་དུ་སྤྱན་འདྲེན་ཞིང་མཆིས་ན། སོ་སོའི་ཞིང་ཁམས་རྣམ་པར་དག་པ་ནས་སྔོན་གྱི་ཐུགས་དམ་ཁྱད་པར་ཅན་ལས་བཞེངས་ཏེ། ཐུགས་ཀྱིས་དགོངས། སྙན་གྱིས་གསན། སྤྱན་གྱིས་གཟིགས་ནས་ཡིད་དུ་འོང་བའི་ཕོ་བྲང་དམ་པར་མཆོད་པའི་ཚོགས་
[292b.6]འབྱོར་བའི་དབུས་སུ་གདན་འཛོམ་པ་ཆེན་པོར་བྱོན་པར་མཛོད་ཅིག་ཅེས་ལན་གསུམ་དུའོ། །དེང་དཀོན་མཆོག་གསུམ་གྱི་བདེན་པའི་བྱིན་གྱི་རླབས་ཀྱིས་ངེས་པའི་ཚིག་ཡང་དག་པར་རིག་པ་ལྕགས་ཀྱུ་སྒྲོལ་མ་དང་། ཆོས་ཡང་དག་པར་རིག་པ་ཞགས་པ་སྒྲོལ་མ་དང་། སྤོབས་པ་ཡང་དག་
[292b.7]པར་རིག་པ་ལྕགས་སྒྲོག་སྒྲོལ་མ་དང་། དོན་ཡང་དག་པར་རིག་པ་དྲིལ་བུ་སྒྲོལ་མ་ལ་སོགས་པ་དཀྱིལ་འཁོར་ཆེན་པོའི་སྒོ་སྐྱོང་བ་རྣམས་ཀྱང་། ཆེ་གེ་མོ་ལ་སོགས་པ་མཐའ་ཡས་པའི་འགྲོ་བ་མ་ལུས་པ་བླ་ན་མེད་པའི་བྱང་ཆུབ་ལ་དགོད་པའི་ཕྱིར། དེ་རིང་མགོན་སྐྱབས་དང་དཔུང་
[293a]
[293a.1]གཉེན་དུ་སྤྱན་འདྲེན་ཞིང་མཆིས་ན། སོ་སོའི་ཞིང་ཁམས་རྣམ་པར་དག་པ་ནས་སྔོན་གྱི་ཐུགས་དམ་ཁྱད་པར་ཅན་ལས་བཞེངས་ནས། ཐུགས་ཀྱིས་དགོངས། སྙན་གྱིས་གསན། སྤྱན་གྱིས་གཟིགས་ཏེ། ཡིད་དུ་འོང་བའི་ཕོ་བྲང་དམ་པར་མཆོད་པའི་ཚོགས་འབྱོར་བའི་
[293a.2]དབུས་སུ་གདན་འཛོམ་པ་ཆེན་པོ་ལ་བྱོན་པར་མཛོད་ཅིག་དང་། ཆོས་ཀྱི་དབྱིངས་ཀྱིས་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མཐུ་དང་། རིག་སྔགས་ཀྱི་རྒྱལ་མོ་འདིའི་སྟོབས་ཀྱིས་དེ་བཞིན་དུ་གྲུབ་པར་གྱུར་ཅིག །ན་མོ་རཏྣ་ཏྲ་ཡཱ་ཡ། ཨ་མི་ཏཱ་བྷཱ་ཡ་ཏ་ཐཱ་ག་ཏཱ་ཡ། ཨརྷ་ཏེ་
[293a.3]སཾམྱཀྶཾ་བུདྡྷ་ཡ། ན་མ་ཨཱརྱ་བ་ལོ་ཀི་ཏེ་ཤྭ་རཱ་ཡ་བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏཱ་རེ་ཏཱུཏྟཱ་རེ་ཏུཏྟཱ་རེ་ཏུ་རེ་ཏུ་རེ་ཀུ་མ་རི་ཀུ་མ་རི་པདྨ་པདྨ་གརྦྷེ་སིདྡྷེ་བྷ་ག་བཱན། ཨ་ཀྵོ་བྷྱཿརཏྣ་སཾ་བྷ་བ་བཻ་རོ་ཙ་ན་ཨ་མོ་གྷ་སིདྡྷི་བཛྲ་ཏཱ་ར་རཏྣ་ཏཱ་ར་པདྨ་ཏཱ་ར་ཀརྨ་ཏཱ་ར་དྷཱུ་པ་ཏཱ་ར་པུཥྤ་ཏཱ་ར་དཱི་པ་ཏཱ་
[293a.4]ར་གནྡྷ་ཏཱ་ར་སརྦ་བུདྡྷ་བོ་དྷི་སཏྭ་ད་ཤ་དིཀ་བྱ་བ་ལོ་ཀསྠི་ཏ་ཨཱ་གཙྪ་ཨཱ་གཙྪ་སྭཱ་ཧཱ། ཞེས་ལན་གསུམ་དུ་བྱའོ། །དེང་རྒྱལ་བ་སྲས་དང་བཅས་པ་ཐམས་ཅད་ཀྱི་སྤྱན་སྔར་དབང་པོ་དང་། མེ་ལྷ་དང་། གཤིན་རྗེ་དང་། སྲིན་པོ་དང་། ཆུ་བདག་དང་། རླུང་བདག་དང་། ནོར་འཛིན་དང་། དབང་ལྡན་དང་།
[293a.5]ཚངས་པ་དང་། ཐག་བཟངས་རིས་དང་། སའི་ལྷ་མོ་དང་། དབང་ཕྱུག་ཆེན་པོ་དང་། ཀླུའི་རྒྱལ་པོ་དང་། ནག་པོ་ཆེན་པོ་དང་། དགའ་བའི་དབང་ཕྱུག་ཆེན་པོ་དང་། ཚོགས་ཀྱི་བདག་པོ་དང་། གཟའ་དང་། རྒྱུ་སྐར་ལ་སོགས་པ་དམ་པ་ཆོས་སྐྱོང་བའི་སྲུང་མ། མཐུ་དང་གཟི་བརྗིད་ཕུན་སུམ་
[293a.6]ཚོགས་པ་མ་ལུས་པ་རྣམས་ཀྱང་སོ་སོའི་ཞིང་ཁམས་རྣམ་པར་དག་པ་ནས། ཆེ་གེ་མོ་ལ་སོགས་པ་མཐའ་ཡས་པའི་འགྲོ་བ་མ་ལུས་པའི་ཚེ་དང་བསོད་ནམས་ལ་སོགས་པ་སྤེལ་བ་དང་། སངས་རྒྱས་ཀྱི་བསྟན་པ་དར་ཞིང་རྒྱས་པའི་སླད་དུ་དི་རིང་མགོན་སྐྱབས་དང་དཔུང་གཉེན་དུ་སྤྱན་འདྲེན་ཞིང་
[293a.7]མཆིས་ན། སྔོན་གྱི་ཐུགས་དམ་ཁྱད་པར་ཅན་ལས་བཞེངས་ཏེ། ཐུགས་ཀྱིས་དགོངས། སྙན་གྱིས་གསན། སྤྱན་གྱིས་གཟིགས་ནས་ཡིད་དུ་འོང་བའི་ཕོ་བྲང་དམ་པར་གདན་འཛོམ་པ་ཆེན་པོ་ལ་བྱོན་པར་ཅི་གནང་ཞེས་ལན་གསུམ་དུའོ། །དཀོན་མཆོག་གསུམ་གྱི་བདེན་པའི་
[293b]
[293b.1]བྱིན་གྱི་རླབས་དང་། ཆེ་གེ་མོ་ལ་སོགས་པའི་བསམ་པ་རྣམ་པར་དག་པའི་སྟོབས་ཀྱིས་དེང་རྒྱལ་བ་སྲས་དང་བཅས་པ་མ་ལུས་པར་མངོན་སུམ་དུ་བྱོན་པར་གྱུར་པ་རྣམས་ལ། སྨན་གྱི་རྒྱལ་པོ་རྣམས་དང་མཆོག་ཏུ་གྱུར་པའི་དྲི་ཕུན་སུམ་ཚོགས་པ་ལེགས་པར་སྦྱར་བ་རྣམས་ཀྱི་ཆུ་ཤེལ་གྱི་བུམ་པ་
[293b.2]ལ་རིན་པོ་ཆེ་དུ་མའི་ཕྲ་བཀོད་པའི་ཚུལ་ལ་ངེས་པར་འཐོན་པའི་རྒྱུན་གྱིས་རྒྱལ་བ་སྲས་དང་བཅས་པའི་ཞབས་ལ་བཀྲུ་བར་བྱའོ། །དེ་ཡང་ཕྱོགས་མཚམས་རྣམས་སུ་དྲི་ཞིམ་པོའི་ངད་དང་ལྡན་པའི་ཙནྡན་དང་ཨ་ཀ་རུ་དང་དུ་རུ་ཀ་ལ་སོགས་པ་མི་ལས་ཁྱད་པར་དུ་འཕགས་པའི་དཔལ་དང་གཟི་བརྗིད་འབར་བར་བྱེད་
[293b.3]པའི་ལྷ་རྫས་མཆོག་ཏུ་གྱུར་པས་བླ་མ་དང་དེ་བཞིན་གཤེགས་པ་སྲས་དང་བཅས་པ་དཀྱིལ་འཁོར་དུ་ངེས་པར་གྲུབ་པ་རྣམས་ཀྱི་སྐུ་ལ་བྱུག་པར་བྱའོ། །དེ་ཡང་དྲི་མ་མེད་ཅིང་ཡན་ལག་བརྒྱད་དང་ལྡན་པའི་བདུད་རྩིའི་འོ་མའི་རྒྱུན་ལྟ་བུ་དཀར་ཞིང་བསིལ་བ་ལེགས་འཛིན་གྱི་དབང་པོ་ཚིམ་པར་བྱེད་པ་ཕྱི་དང་
[293b.4]ནང་རྣམས་ཀྱང་རྣམ་པར་དག་པར་སྦྱར་བའི་ཆུས་བླ་མ་དམ་པ་རྣམས་དང་རྒྱལ་བ་སྲས་དང་བཅས་པ་རྣམས་ཀྱི་ཞལ་བསིལ་ཞིང་མཉེས་པར་བྱའོ། །ན་མཿསརྦ་ཏ་ཐཱ་ག་ཏེ་བྷྱོཿབོ་དྷི་སཏྭེ་བྷྱཿས་ཏ་ཙ་ར་ནཾ་པྲ་ཝ་ར་སཏྐཱ་ར་ཨརྒྷཾ་པྲ་ཏཱིཙྪ་ཨཉྫ་མ་ཡེ་སྭཱ་ཧཱ། དེ་ལྟར་ཆུ་གསུམ་གྱིས་མཉེས་པར་བྱས་པ་ལས་དཀོན་མཆོག་
[293b.5]གསུམ་གྱི་བདེན་པའི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་དང་། རིག་སྔགས་ཀྱི་མཐུས་དེ་བཞིན་དུ་གྱུར་ཅིག །དེ་ལྟར་དེའི་བྱིན་གྱིས་རླབས་ཀྱིས་སངས་རྒྱས་གང་གཱའི་ཀླུང་གི་བྱེ་མ་སྙེད་དང་མཉམ་པའི་ཞབས་འབྲིང་དུ་གྱུར་ཅིག །འཇིག་རྟེན་གྱི་ཁམས་ཀྱི་རྡུལ་
[293b.6]ཕྲ་རབ་ཐམས་ཅད་དང་མཉམ་པའི་གྲངས་ཀྱི་བྱང་ཆུབ་སེམས་དཔའ་རྣམས་ཀྱང་མཉེས་པར་བྱེད་པར་གྱུར་ཅིག །སངས་རྒྱས་ཀྱི་ཞིང་མ་ལུས་པ་དག་པར་སྦྱོང་བ་དང་། རྒྱལ་བ་སྲས་དང་བཅས་པའི་ཕྲིན་ལས་མ་ལུས་པ་ལ་འཇུག་པར་གྱུར་ཅིག །གནས་སྐབས་ཐམས་ཅད་དུ་ལྷའི་དྲང་སྲོང་སུམ་ཅུ་
[293b.7]རྩ་གཉིས་ལ་སོགས་པས་བསྲུང་བར་གྱུར་ཅིག །ཀླུའི་རྒྱལ་པོ་འཇོག་པོ་དང་ཀླུའི་རྒྱལ་པོ་རྒྱ་མཚོའི་འཆིང་ལ་སོགས་པ་རྣམས་ཀྱིས་བསྲུང་བ་དང་། དུས་དང་ལྡན་པར་ཆར་འབེབས་པར་གྱུར་ཅིག །རྒྱལ་པོ་ཆེན་པོ་བཞི་ལ་སོགས་པས་ཀྱང་བསྲུང་བ་དང་བསྐྱབ་པ་དང་སྦེད་པར་གྱུར་ཅིག །མཐའ་ཡས་
[294a]
[294a.1]པའི་འགྲོ་བ་མ་ལུས་པ་རྣམས་ཀྱང་མི་ཁོམ་པ་བརྒྱད་ལས་ཐར་བ་དང་དལ་བ་དང་འབྱོར་པའི་ལུས་སུ་གྱུར་ཅིག །སེམས་ཅན་ཐམས་ཅད་བྱང་ཆུབ་ཏུ་སེམས་མ་བསྐྱེད་པ་བསྐྱེད་པ་དང་། བསྐྱེད་པ་རྣམས་འཕེལ་བ་དང་རྒྱས་པར་གྱུར་ཅིག །སངས་རྒྱས་ཐམས་ཅད་ཀྱིས་བསྟོད་
[294a.2]ཅིང་དགོངས་པ་དང་། དེ་བཞིན་གཤེགས་པ་རྣམས་ཀྱི་ཐུགས་རབ་ཏུ་རངས་པར་ཡང་གྱུར་ཅིག །སངས་རྒྱས་ཐམས་ཅད་ཀྱི་གསང་བ་འཛིན་པ་དང་། མི་འཕྲོགས་པའི་ཡེ་ཤེས་ཆེན་པོ་ལ་གནས་པར་གྱུར་ཅིག །དེ་བཞིན་གཤེགས་པ་རྣམས་ཀྱི་སྐུ་གདུང་རྣམས་ཀྱང་རྒྱས་ཤིང་འཕེལ་ནས་
[294a.3]སེམས་ཅན་ཐམས་ཅད་ཀྱི་གནོད་པ་ཞི་བར་གྱུར་ཅིག། །དེ་ནས་སྔར་སྤྱན་དྲངས་པའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་མཚན་ནས་བརྗོད་ཅིང་ཞབས་ལ་གཏུགས་པའི་ཕྱག་གསུམ་བྱའོ། །གདན་འཛོམ་པ་ཆེན་པོ་ལ་བཞུགས་པའི་རྒྱལ་བ་སྲས་དང་བཅས་པའི་ཚོགས་
[294a.4]རྣམས་ལ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མིའི་མེ་ཏོག་གི་བྱེ་བྲག་རང་རང་གི་བསོད་ནམས་ཀྱི་སྟོབས་ཀྱིས་ཡིད་ལས་བྱུང་བ་དང་། ཆུ་དང་ཐང་དང་སྤང་རི་དང་ལྗོན་ཤིང་ལས་འཁྲུངས་པའི་ཁ་དོག་དང་དབྱིབས་ཕུན་སུམ་ཚོགས་པ་དྲི་བསུང་ཆེན་པོ་དང་ལྡན་པ་རྣམས་ཀྱང་ཕྲེང་བ་དང་
[294a.5]མེ་ཏོག་སིལ་མ་སྤེལ་ལེགས་ཀྱི་མེ་ཏོག་གི་ཆར་གྱི་རྒྱུན་ལྟ་བུར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་དབུ་ལ་དབུལ་བར་བགྱིའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ་ཨོཾ་ཨཱཿཔུཥྤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་
[294a.6]བདུག་པའི་བྱེ་བྲག་རང་བཞིན་དང་ཏིང་ངེ་འཛིན་ལས་བྱུང་བ་དང་། ལྷན་ཅིག་སྐྱེས་པ་དང་། རབ་ཏུ་སྦྱར་བ་ལ་སོགས་པའི་ཕྱོགས་ཐམས་ཅད་དུ་དྲི་ངད་ཆེན་པོ་དང་ལྡན་པ་སྤྲིན་གྱི་ཕུང་པོ་འཁྲིགས་པར་གྱུར་པ་ལྟ་བུ་ཡང་གདན་འཛོམ་པ་ཆེན་པོ་ལ་བཞུགས་པའི་རྒྱལ་བ་སྲས་དང་བཅས་པ་
[294a.7]རྣམས་ཀྱི་ཤངས་ལ་དབུལ་བར་བགྱིའོ། །ན་མཿསརྦ་བུདྡྷ་བོདྷི་སཏྭཱ་ནཱཾ་ཨོཾ་ཨཱཿདྷཱུ་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་སྣང་བའི་བྱེ་བྲག་ཡིད་ལས་བྱུང་བའམ། རིན་པོ་ཆེ་ལས་སྐྱེས་པའམ་འབྲུ་མར་ལ་སོགས་པ་ལ་སྦྱར་བ་དང་། །
[294b]
[294b.1]ཉི་མ་དང་ཟླ་བ་དང་རབ་ཏུ་སྣང་བར་གྱུར་པས་ཕྱོགས་མཚམས་གོ་འབྱེད་པ་ལེགས་པར་འཁྲུངས་ཤིང་འབར་བས་ལུས་ཅན་རྣམས་ཀྱི་མིག་གི་དབང་པོ་གསལ་བར་བྱེད་པའི་མར་མེའི་ཕྲེང་བ་ལ་སོགས་པ་ཡང་གདན་འཛོམ་པ་ཆེན་པོ་ལ་བཞུགས་པའི་རྒྱལ་བ་སྲས་དང་བཅས་པ་རྣམས་ཀྱི་སྤྱན་ལ་
[294b.2]དབུལ་བར་བགྱིའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ་ཨོཾ་ཨཱཿཨཱ་ལོ་ཀ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་དྲི་དང་བྱུག་པའི་ཁྱད་པར་ཁམས་ལས་སྐྱེས་པ་དང་། འབྲུ་དང་སྨན་ལས་བྱུང་བ་དང་། མེ་ཏོག་དང་འབྲས་བུ་
[294b.3]ལས་སྦྱར་བའི་དྲི་མཆོག་དཀར་ཞིང་བསིལ་བ་དང་། རེག་ན་བདེ་བའི་རྐྱེན་རྩིར་གྱུར་པ་དྲི་ཆབ་བདུད་རྩི་རྒྱུན་ལྟ་བུས་གདན་འཛོམ་པ་ཆེན་པོ་ལ་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་ཀྱི་ཐུགས་ཀར་དབུལ་བར་བགྱིའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ་ཨོཾ་ཨཱཿགནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་
[294b.4]ཧཱུཾ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་ཞལ་ཟས་ཀྱི་བྱེ་བྲག་རྣམ་པར་དག་པའི་ཁ་དོག་དང་དྲི་ཕུན་སུམ་ཚོགས་པ་དགའ་བའི་སྟོབས་འཕེལ་ཞིང་དོན་ཡོད་པའི་རོ་བརྒྱ་དང་ལྡན་པ་ལ་བཟའ་བ་དང་། བཅའ་བ་དང་། ལྡག་པ་དང་། མྱང་བ་དང་། འཇིབ་པ་
[294b.5]དང་། ཁྱད་པར་འཕགས་པའི་བཏུང་བའི་རྣམ་པ་རྣམས་ཀྱང་གདན་འཛོམ་པ་ཆེན་པོ་ལ་བཞུགས་པའི་རྒྱལ་བ་སྲས་དང་བཅས་པའི་ཞལ་དང་ཕྱག་ཏུ་དབུལ་བར་བགྱིའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ་ཨོཾ་ཨཱཿནེ་བི་དྱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཕྱོགས་བཅུའི་འཇིག་རྟེན་གྱི་ཁམས་ཐམས་
[294b.6]ཅད་ན་ལྷ་དང་མི་རྣམས་ཀྱི་རོལ་མོའི་བྱེ་བྲག་མངོན་པར་འདུས་མ་བྱས་པའི་སྒྲ་དབྱངས་དང་། རྔ་དང་། རྔ་ཆེན་དང་། པི་ཝང་དང་། གླིང་བུ་དང་། འཁར་རྔ་དང་། དུང་དང་། དུང་དཀར་དང་། ཕེག་རྡོབ་ལ་སོགས་པ་ཚངས་པའི་དབྱངས་ལྟར་སྙན་ཅིང་ཡིད་འཕྲོག་པའི་རོལ་མོའི་རྣམ་པ་ཡང་གདན་
[294b.7]འཛོམ་པ་ཆེན་པོ་ལ་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་ཀྱི་སྙན་གྱི་དབང་པོ་ལ་དབུལ་བར་བགྱིའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ་ཨོཾ་ཨཱཿཤབྡ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་རབ་ཏུ་མཁོ་བའི་རྐྱེན་དུ་གྱུར་པ་ལ་དབུ་རྒྱན་
[295a]
[295a.1]དང་རྐེད་རྒྱན་ལ་སོགས་པ་རབ་ཏུ་མཛེས་པའི་རྒྱན་དུ་གྱུར་པ་དང་། སེང་གེ་དང་། གླང་པོ་དང་། ཉི་ཟླ་དང་། གསེར་དངུལ་དང་། མུ་ཏིག་ལ་སོགས་པས་སྤྲས་པའི་གཟི་བརྗིད་འབར་བ་དང་མཐོ་ཞིང་མཛེས་པའི་ཁྲི་ལ་སོགས་པ་དང་། གདུགས་དང་། རྒྱལ་མཚན་དང་།
[295a.2]བ་དན་དང་། བླ་རེ་དང་། རྔ་ཡབ་དང་། ལྡ་ལྡི་དང་། ཕྲེང་རྒྱུད་དང་། ནོར་བུ་ལ་སོགས་པ་དགོས་པའི་ཡོ་བྱད་དང་། གློ་རྟེན་དང་། སྐུ་ཡོལ་དང་། ན་བཟའ་དང་། མཐོ་བའི་སྟན་དང་། མལ་ཆ་དང་། ངོ་མཚར་བའི་རབ་ཏུ་བདེ་བའི་རྐྱེན་རྩི་ལ་སོགས་པ་ཡང་གདན་འཛོམ་པ་ཆེན་པོ་ལ་བཞུགས་
[295a.3]པའི་རྒྱལ་བ་སྲས་དང་བཅས་པ་རྣམས་ཀྱི་སྐུ་ལ་དབུལ་བར་བགྱིའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ། ཨོཾ་ཨཱཿཨུ་པ་ཀ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ན་ལྷ་དང་མི་རྣམས་ཀྱི་ཕུན་སུམ་ཚོགས་པའི་རྐྱེན་དུ་གྱུར་པ་ལ་ཁྲུས་ཀྱི་རྫིང་བུ་དང་། བདུད་
[295a.4]རྩིའི་སྨན་དང་། མ་རྨོས་པའི་ལོ་ཏོག་དང་། དཔག་བསམ་གྱི་ཤིང་ཆེན་པོ་དང་། བུམ་པ་བཟང་པོ་དང་། གཏེར་ཆེན་པོ་དང་། རལ་གྲི་དང་མིག་རྩི་དང་འདོད་འཇོའི་བ་དང་། རྡོ་རྗེ་དང་། རིན་པོ་ཆེ་དང་། རྐང་དབྱུག་ལ་སོགས་པ་གྲུབ་པའི་རྫས་དང་། སྐྱེས་བུ་ཆེན་པོའི་སྔོན་དུ་འགྲོ་
[295a.5]བའི་རྩིབས་སྟོང་དང་ལྡན་པའི་འཁོར་ལོ་དང་། དགོས་འདོད་འབྱུང་བའི་ནོར་བུ་རིན་པོ་ཆེ་དང་། ཡིད་འཕྲོག་པའི་བཙུན་མོ་དང་། མཛོད་ཁེངས་པའི་བློན་པོ་དང་། ཤུགས་འགྲོའི་རྟ་དང་། དཔའ་བརྟན་གླང་པོ་དང་། རྟུལ་ཕོད་དམག་མི་ལ་སོགས་པའི་རིན་པོ་ཆེ་རྣམ་པ་བདུན་དང་།
[295a.6]གདུགས་བཟངས་གསེར་ཡུ་ཅན་དང་། དུང་དཀར་དང་། ཆུ་སྐྱེས་དང་། གསེར་ཉ་དང་། བུམ་མཆོག་དང་། རྒྱལ་མཚན་དང་། དཔལ་བེའུ་དང་། རབ་ཏུ་འབར་བའི་འཁོར་ལོ་ལ་སོགས་པ་སྐྱེས་བུ་མཆོག་རྣམས་ལ་བཀྲ་ཤིས་པའི་རྫས་སུ་གྱུར་པ་རྣམས་ཀྱང་གདན་འཛོམ་པ་ཆེན་པོ་ལ་
[295a.7]བཞུགས་པའི་སངས་རྒྱས་དང་བྱང་ཆུབ་སེམས་དཔའ་མ་ལུས་པ་ལ་ཉེར་སྤྱོད་དུ་དབུལ་བར་བགྱིའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ་སིདྡྷྱ་སབྟ་རཏྣ་ཨཥྚ་མཾ་ག་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་ཁྱད་པར་
[295b]
[295b.1]འཕགས་པའི་བྱེ་བྲག་ལ་མཆོད་པའི་རྫས་རིམ་པར་བཤམས་པའམ་བདག་པོས་བཟུང་བའམ། བདག་པོས་ཡོངས་སུ་མ་བཟུང་བའི་ཁྱད་པར་དང་བློས་སྤྲུལ་པའི་ཏིང་ངེ་འཛིན་གྱི་མཆོད་པ་དང་ཀུན་དུ་བཟང་པོའི་མཆོད་སྤྲིན་གྱི་རྒྱ་མཚོ་བསམ་གྱིས་མི་ཁྱབ་པ་དུས་དང་དུས་མིན་དུ་བྱུང་བ་དང་། མདོར་ན་
[295b.2]སངས་རྒྱས་དང་བྱང་ཆུབ་སེམས་དཔའ་རྒྱལ་བ་སྲས་དང་བཅས་པའི་སོ་སོའི་མངའ་ཐང་ལས་གྲུབ་པ་མ་ལུས་པ་རྣམས་ཀྱང་དད་པའི་བློ་ཡིས་ཞིང་གི་རྡུལ་སྙེད་དུ་སྤྲུལ་ནས་དབུལ་བར་བགྱིའོ། །དེ་ཡང་དཀོན་མཆོག་གསུམ་གྱི་བདེན་པའི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མཐུ་དང་
[295b.3]རིག་པའི་རྒྱལ་པོ་འདི་ལན་བརྒྱ་རྩ་བརྒྱད་བརྗོད་པའི་སྟོབས་ཀྱིས་དེ་བཞིན་དུ་གྱུར་ཅིག །ན་མཿསརྦ་བུདྡྷ་བོ་དྷི་སཏྭཱ་ནཱཾ་སརྦ་ཏ་ཐཱ་ག་ཏེ་སྥ་ར་ནི་ཧི་མཾ་ག་ག་ན་ཁཾ་ས་མནྟ་ཏེ་སྭཱ་ཧཱ། འདིས་མཆོད་པའི་སྤྲིན་ཆེན་པོ་གཏིབས་པར་འགྱུར་བའོ། །དེ་ལྟར་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཚན་ཡིད་ལ་
[295b.4]བྱས་ནས་མཆོད་པ་ཕུལ་བས་སངས་རྒྱས་ཀྱི་ཞིང་ཁམས་མ་ལུས་པ་རྣམས་སུ་མཆོད་སྤྲིན་གྱི་ཕུང་པོ་རྒྱུན་མི་འཆད་པར་གྱུར་ཅིག །སངས་རྒྱས་ཐམས་ཅད་ཀྱི་ཕྲིན་ལས་མ་ལུས་པ་རྣམས་ལྷུན་གྱིས་གྲུབ་པར་གྱུར་ཅིག །བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་སྤྱོད་པ་རླབས་པོ་ཆེ་ཐམས་
[295b.5]ཅད་མཐར་ཕྱིན་པར་གྱུར་ཅིག །ཏིང་ངེ་འཛིན་དང་གཟུངས་ཀྱི་སྒོ་དུ་མ་རྣམས་ལ་གཟུངས་དང་རིག་པའི་སྒོ་ནས་འཇུག་པར་གྱུར་ཅིག །དེ་ལྟར་མཆོད་ཅིང་གུས་པས་བདག་དང་མཐའ་ཡས་པའི་སེམས་ཅན་མ་ལུས་པ་རྣམས་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་
[295b.6]ཡང་དག་པར་རྫོགས་པའི་སངས་རྒྱས་སུ་གྱུར་ཅིག །བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་ཆོས་གང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སངས་རྒྱས་ལ་ཐོས་པའི་ཆོས་དེ་དག་མ་ལུས་པ་ཡང་ཐོབ་པར་གྱུར་ཅིག །བྱང་ཆུབ་སེམས་དཔའ་རྣམས་ཀྱིས་
[295b.7]ཆོས་ལ་བཀུར་སྟི་བྱེད་པ་ལྟར་ཆེ་གེ་མོ་ལ་སོགས་པའི་འགྲོ་བ་མ་ལུས་པ་ཡང་ཆོས་རྣམས་ལ་བཀུར་སྟི་བྱེད་པར་གྱུར་ཅིག །ཇི་ལྟར་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་འགྲོ་བ་མ་ལུས་པ་ལ་ཆོས་སྟོན་པ་ལྟར་བདག་ཅག་ལ་སོགས་པ་ཡང་འགྲོ་བ་མ་ལུས་པ་ལ་ཆོས་སྟོན་པར་གྱུར་
[296a]
[296a.1]ཅིག །སངས་རྒྱས་ཀྱི་ཆོས་མ་ལུས་པ་ལ་བྱང་ཆུབ་སེམས་དཔའ་རྣམས་ཀྱིས་མཁས་ཤིང་རྫོགས་པ་ལྟར་བདག་ཅག་ཀྱང་དེ་བཞིན་དུ་གྱུར་ཅིག །དེ་ལྟར་སངས་རྒྱས་དང་བྱང་ཆུབ་སེམས་དཔའ་རྣམས་ལ་མཆོད་པ་བྱས་པས་སེམས་ཅན་ཐམས་ཅད་ལ་ཕན་པ་དང་།
[296a.2]བདེ་བ་རྒྱ་ཆེན་པོ་དང་ལྡན་པར་གྱུར་ཅིག །བྲོ་ནད་ཐམས་ཅད་རབ་ཏུ་ཞི་བ་དང་། སྡིག་པ་ཐམས་ཅད་ཉམས་པ་དང་། བཀྲ་མི་ཤིས་པ་ཐམས་ཅད་མི་འབྱུང་བ་དང་། རྨི་ལམ་ངན་པ་ཐམས་ཅད་བཟློག་པ་དང་། དུས་མ་ཡིན་པར་འགུམ་པ་ཐམས་ཅད་རབ་ཏུ་ཞི་བར་གྱུར་ཅིག །
[296a.3]སངས་རྒྱས་ཀྱི་བསྟན་པ་ལ་མ་ཞུགས་པ་དང་། ཞུགས་པ་རྣམས་ཀྱི་དགེ་བའི་རྩ་བ་རྒྱ་ཆེན་པོ་འཕེལ་བ་དང་། དགེ་བའི་རྩ་བ་སྒྲུབ་པ་ལ་བགེགས་དང་ལོག་འདྲེན་ལ་སོགས་པ་ཐམས་ཅད་ཞི་ནས་མི་འབྱུང་བར་གྱུར་ཅིག །འཇིག་རྟེན་སྐྱོང་བ་རྣམས་ཀྱིས་ཀྱང་ཆེ་གེ་མོ་ལ་སོགས་པའི་འགྲོ་བ་
[296a.4]མ་ལུས་པ་རྣམས་ལ་བསྲུང་བ་དང་། བསྐྱབ་པ་དང་། སྦེད་པ་དང་། ཡོངས་སུ་གཟུང་བ་དང་། ཞི་བ་དང་། བདེ་ལེགས་སུ་གྱུར་པ་དང་། ཆད་པ་སྤང་བ་དང་། མཚོན་ཆ་སྤང་བ་དང་། དུག་ཞི་བ་ལ་སོགས་པ་བྱེད་པར་གྱུར་ཅིག །དགེ་བའི་རྩ་བ་འདིས་ཕྱོགས་བཅུ་དུས་གསུམ་གྱི་
[296a.5]སངས་རྒྱས་ཐམས་ཅད་མངོན་སུམ་དུ་གྱུར་ནས་དེ་དག་གི་མཐུས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཅིག །རིགས་ཀྱི་བུ་དང་རིགས་ཀྱི་བུ་མོ་གང་ལ་ལ་ཞིག་དད་པ་དང་ལྡན་ཞིང་གུས་པས་སངས་རྒྱས་དང་བྱང་ཆུབ་སེམས་དཔའ་རྣམས་བལྟ་བར་འདོད་པ་དང་དེ་དག་ལ་ཆོས་ཉན་པར་འདོད་
[296a.6]པས་ཀྱང་དེ་བཞིན་དུ་གྲུབ་པར་གྱུར་ཅིག །གཞན་ཡང་ལེགས་པར་སྦྱར་ཤིང་བཤམས་ནས་ཕུལ་བའི་མཆོད་པ་འདིས་ཆེ་གེ་མོ་ལ་སོགས་པ་འགྲོ་བ་མ་ལུས་པ་རྣམས་དེང་ནས་དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་བཟུང་བར་གྱུར་ཅིག །དེང་ནས་ངལ་བ་དང་དུབ་པ་མེད་པར་ནོར་
[296a.7]དང་འབྲུ་དང་དབྱིག་ལ་སོགས་པ་རྣམས་ཚེགས་མེད་པར་རྙེད་པར་གྱུར་ཅིག །དགྲ་བོ་ཐམས་ཅད་ལས་རབ་ཏུ་རྒྱལ་བར་གྱུར་ཅིག །རྒྱལ་པོ་ཐམས་ཅད་ཞི་བ་དང་། གསོང་པོར་སྨྲ་བ་དང་ཡུལ་ཁམས་ཐམས་ཅད་ལ་ཕན་པར་གྱུར་ཅིག །ལུས་ལ་དུག་གིས་མི་ཚུགས་པ་དང་།
[296b]
[296b.1]དབྱིག་དུག་གིས་མི་ཚུགས་པ་དང་། རིམས་ཀྱིས་མི་ཚུགས་པ་དང་། མཚོན་གྱིས་མི་ཚུགས་པ་དང་། ཆུས་མི་ཚུགས་པ་དང་། མེས་མི་ཚུགས་པ་དང་། མཁའ་འགྲོ་མའི་གནོད་པས་མི་ཚུགས་པར་གྱུར་ཅིག །ནམ་འཆི་བའི་ཚེ་དེ་བཞིན་གཤེགས་པ་རྣམས་མཐོང་བར་གྱུར་ཅིག །ཤི་
[296b.2]འཕོས་ནས་བདེ་བ་ཅན་གྱི་ཞིང་ཁམས་སུ་པདྨའི་སྡོང་པོ་ལ་རྫུས་ནས་སྐྱེ་བར་གྱུར་ཅིག །མཆོད་ཅིང་བསྙེན་བཀུར་བའི་དགེ་བའི་རྩ་བ་འདིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྣམ་པར་ཐར་པ་བརྒྱད་པ་ཐམས་ཅད་ཀྱི་འཇུག་པ་ཡེ་ཤེས་ཀྱི་སྙིང་པོ་ཞེས་བྱ་བ་ཐོབ་པར་གྱུར་
[296b.3]ཅིག །སེམས་ཅན་གང་དག་འཆིང་བས་བཅིངས་པ་དང་། སྡུག་བསྔལ་བ་དང་། ཡིད་མི་བདེ་བ་དང་། ནད་དང་། གནོད་པ་དང་། སྡུག་བསྔལ་སྣ་ཚོགས་པས་གཙེར་བ་རྣམས་ཀྱི་ནི་གནས་དང་སྐྱབས་དང་དཔུང་གཉེན་དུ་ཡང་གྱུར་ཅིག །གནོད་སྦྱིན་དང་སྲིན་པོ་ལ་སོགས་པ་མ་
[296b.4]རུངས་པའི་སེམས་དང་ལྡན་པ་རྣམས་ཀྱང་བྱམས་པའི་སེམས་དང་། སྙིང་རྗེའི་སེམས་དང་། དགའ་བའི་སེམས་དང་། བག་ཡོད་པའི་སེམས་དང་ལྡན་པར་གྱུར་ཅིག །བྱང་ཆུབ་པའི་སེམས་དང་ལྡན་པར་གྱུར་ཅིག །སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་
[296b.5]ཆུབ་ལ་མ་བཀོད་པར་ཆེ་གེ་མོ་ལ་སོགས་པའི་བདག་ཅག་རྣམས་ལེ་ལོ་དང་སྙོམ་ལས་དང་བྱ་བ་མ་ཡིན་པར་དུས་འདས་པར་མ་གྱུར་ཅིག །སངས་རྒྱས་བྱེ་བ་ཁྲག་ཁྲིག་བརྒྱ་སྟོང་འབུམ་ཕྲག་དུ་མའི་ཕྲིན་ལས་མ་ལུས་པ་སྒྲུབ་པར་གྱུར་ཅིག །སེམས་ཅན་ཐམས་ཅད་ཀྱི་བསམ་པ་ཡིད་
[296b.6]བཞིན་དུ་ཡོངས་སུ་རྫོགས་པར་གྱུར་ཅིག །ངན་སོང་རྣམ་པ་གསུམ་ཡང་རྒྱུན་ཆད་པ་དང་། མི་ཁོམ་པ་གཞན་ཡང་སྤང་བར་གྱུར་ཅིག །སངས་རྒྱས་དང་བྱང་ཆུབ་སེམས་དཔའ་དེ་རྣམས་ཀྱི་མཚན་འཛིན་ཅིང་མཆོད་པ་དེའི་སྒྲིབ་པ་ཐམས་ཅད་དང་ལུས་དང་ངག་དང་ཡིད་ཀྱིས་ཉེས་པར་
[296b.7]སྤྱོད་པ་ཐམས་ཅད་ལས་ཡོངས་སུ་གྲོལ་བར་གྱུར་ཅིག །གང་ལ་ལ་ཞིག་ཆོ་ག་བཞིན་དུ་སྦྱོར་བ་བྱེད་པ་དེ་ཕྱིར་མི་ལྡོག་པའི་ས་ལ་གནས་པར་གྱུར་ཅིག །དེ་དག་གི་ལག་ཏུ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་ཀྱི་སྙིང་པོ་གནས་པར་གྱུར་ཅིག །སྙིང་རྗེ་ཆེན་
[297a]
[297a.1]པོ་དང་ལྡན་པའི་རིགས་ཀྱི་བུ་དང་རིགས་ཀྱི་བུ་མོའི་ཐབས་འདིས་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ལ་དགོད་པར་གྱུར་ཅིག །དཀོན་མཆོག་གསུམ་གྱི་བདེན་པའི་བྱིན་གྱི་རླབས་ཀྱིས་དེ་བཞིན་དུ་གྱུར་ཅིག །དེ་ལྟར་སངས་རྒྱས་
[297a.2]དང་བྱང་ཆུབ་སེམས་དཔའ་ཐམས་ཅད་ཀྱི་མཚན་ཡིད་ལ་དྲན་ནས་ཕྱག་བྱས་མཆོད་པ་ཕུལ་ནས། སྔར་བྱས་པའི་ཉེས་པ་ལས་དུག་འཐུངས་པ་ལྟ་བུའི་བསམ་པ་དང་། ཕྱིས་ལུས་དང་སྲོག་ལ་བབ་ཀྱང་མི་བྱེད་པས་སྡིག་པ་ཐམས་ཅད་མཐོལ་ལོ་བཤགས་སོ། །ཆེ་གེ་མོ་ལ་སོགས་པའི་འགྲོ་བ་
[297a.3]མ་ལུས་པ་རྣམས་ཀྱིས་སྔོན་འཁོར་བ་ཐོག་མཐའ་མེད་པ་ནས་ད་ལྟ་ལ་ཐུག་པའི་བར་དུ་ཡང་འདོད་ཆགས་དང་། ཞེ་སྡང་དང་། གཏི་མུག་གིས་ཀུན་ནས་བསླངས་ནས་ལུས་དང་ངག་དང་། ཡིད་ཀྱི་སྒོ་ནས་སྡིག་པ་མི་དགེ་བའི་ལས་བྱས་པ་དང་། བྱེད་དུ་བཅུག་པ་དང་། བྱེད་པ་ལ་རྗེས་སུ་ཡི་རང་བ་
[297a.4]དང་། མ་དང་ཕ་ལ་མ་གུས་པ་དང་། གྲོགས་ཚངས་པར་མཚུངས་པ་ལ་མ་གུས་པ་དང་། མཁན་པོ་དང་སློབ་དཔོན་ལ་མ་གུས་པ་དང་། རྒྱུད་སྡོམ་པ་གསུམ་དང་འགལ་བ་དང་། དམ་པའི་ཆོས་སྤངས་པ་ལ་སོགས་པའི་སྡིག་པ་དང་སྒྲིབ་པ་ཅི་མཆིས་པ་དེ་དག་ཐམས་ཅད་ཤིན་ཏུ་
[297a.5]གནོང་ཞིང་འགྱོད་པའི་སེམས་ཀྱིས་རྒྱལ་བ་སྲས་དང་བཅས་པ་རྣམས་ཀྱི་སྤྱན་སྔར་མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །སླན་ཆད་ཀྱང་ལེགས་པར་བསྡོམ་མོ་ཞེས་ལན་གསུམ་དུ་བྱའོ། །དེང་རྒྱལ་བ་སྲས་དང་བཅས་པའི་སྤྱན་སྔར་བདག་ཅག་གིས་མ་
[297a.6]འཚལ་བའི་ཉེས་པའི་ཚོགས་ཅི་མཆིས་པ་རྣམས་སྟོབས་བཞིའི་སྒོ་ནས་ཡང་དག་པར་བཤགས་པས། སྡིག་པ་དང་སྒྲིབ་པ་མ་ལུས་པ་ཐམས་ཅད་བྱང་བར་གྱུར་ཅིག །ལུས་ངག་ཡིད་གསུམ་གྱི་ཉེས་པ་མ་ལུས་པ་དག་པར་གྱུར་ཅིག །ཉོན་མོངས་པའི་སྒྲིབ་པ་དང་། བག་
[297a.7]ཆགས་ཀྱི་སྒྲིབ་པ་དང་། ཤེས་བྱའི་སྒྲིབ་པ་དང་། སྙོམས་པར་འཇུག་པའི་སྒྲིབ་པ་ལ་སོགས་པ་སྒྲིབ་པའི་ཚོགས་མ་ལུས་པ་རྣམ་པར་དག་པ་དང་བྱང་བར་གྱུར་ཅིག །མཐའ་ཡས་པའི་འགྲོ་བ་མ་ལུས་པ་རྣམས་ཀྱི་ཉེས་སྐྱོན་དུ་གྱུར་པ་ཐམས་ཅད་དག་ནས་བླ་ན་མེད་པའི་བྱང་ཆུབ་ཀྱི་ས་ལ་ཕྱིན་པར་
[297b]
[297b.1]གྱུར་ཅིག །འཁོར་བའི་མཐའ་ཇི་སྲིད་ཡོད་པ་དེ་སྲིད་དུ་ཕ་དང་མ་ལ་སོགས་པ་དག་པ་དང་མ་དག་པའི་སེམས་ཅན་ཐམས་ཅད་ལ་རང་དང་གཞན་གྱི་སྨོན་ལམ་གྱི་མཐུ་ཆེན་པོ་དང་། བསོད་ནམས་ཀྱི་ལས་ཀྱི་སྟོབས་མ་ལུས་པ་རྗེས་སུ་འཛིན་པར་གྱུར་ཅིག །ཚ་བ་དང་གྲང་བའི་སེམས་ཅན་དམྱལ་
[297b.2]བ་རྣམས་ཀྱི་སྡུག་བསྔལ་མ་ལུས་པ་སྐེམས་པར་གྱུར་ཅིག །ཕྱི་དང་ནང་གི་སྒྲིབ་པ་ཐམས་ཅད་དང་ལྡན་པའི་ཡི་དྭགས་ཀྱི་ཚོགས་མ་ལུས་པ་རྣམས་ཀྱི་སྡུག་བསྔལ་འདྲེན་པར་གྱུར་ཅིག །བྱིངས་དང་ཁ་འཐོར་ལ་གནས་པའི་དུད་འགྲོ་གླེན་ཞིང་གཏི་མུག་པ་རྣམས་ཀྱང་རང་རང་གི་སྡུག་བསྔལ་དང་བྲལ་ནས་
[297b.3]ལྷ་ལ་སོགས་པའི་ལུས་སུ་གྱུར་ཅིག །ལྟུང་བ་ལ་སོགས་པས་ལུས་དང་སེམས་གཟིར་བའི་ལྷའི་སྡུག་བསྔལ་དང་། འཐབ་པ་དང་། རྩོད་པ་དང་འགྱེད་པ་ལ་སོགས་པའི་ལྷ་མ་ཡིན་གྱི་སྡུག་བསྔལ་མ་ལུས་པ་ཡང་བྱང་ནས་འདོད་པའི་ཡོན་ཏན་ལྔ་ལ་ལོངས་སྤྱོད་པར་གྱུར་ཅིག །སྐྱེ་རྒ་ན་
[297b.4]འཆི་ལ་སོགས་པ་སྡུག་བསྔལ་བཅུ་གཅིག་གིས་རབ་ཏུ་མནར་བའི་འགྲོ་བ་མི་རྣམས་ཀྱང་རྟག་ཏུ་བདེ་ལེགས་ལ་སྤྱོད་པར་གྱུར་ཅིག །དཀོན་མཆོག་གསུམ་གྱི་བདེན་པའི་བྱིན་གྱི་རླབས་ཀྱིས་དེ་བཞིན་དུ་གྱུར་ཅིག །དེང་རྒྱལ་བ་སྲས་དང་བཅས་པ་རྣམས་ལ་ཕྱག་བྱས་ནས་
[297b.5]མཆོད་དེ་ཆེ་གེ་མོ་ལ་སོགས་པའི་མཐའ་ཡས་པའི་སེམས་ཅན་མ་ལུས་པ་རྣམས་ཀྱིས་ཆོས་ཀྱི་དབྱིངས་ཀྱི་མཐའ་ཀླས་པ་ནས་སངས་རྒྱས་དང་བྱང་ཆུབ་སེམས་དཔའ་རྣམས་དང་། ཉན་ཐོས་དང་། རང་སངས་རྒྱས་ལ་སོགས་པ་འཕགས་པ་རྣམས་ཀྱི་དགེ་བ་དང་། སྐྱེ་བོ་ལ་སོགས་པ་
[297b.6]གཞན་དག་གིས་མངོན་པར་མཐོ་བ་དང་ངེས་པར་ལེགས་པའི་རྒྱུར་གྱུར་པའི་དགེ་བའི་རྩ་བ་མཐའ་དག་ལ་དགའ་ཞིང་སྤྲོ་བ་ཆེན་པོ་དང་ལྡན་པས་སྙིང་གི་དཀྱིལ་ནས་ཡི་རང་ངོ་། །གཞན་དག་གི་དགེ་བའི་རྩ་བ་ཐམས་ཅད་འཕེལ་ཞིང་རྒྱས་པར་གྱུར་ཅིག །སངས་རྒྱས་ཐམས་
[297b.7]ཅད་ཀྱི་ཕྲིན་ལས་མཐར་ཕྱིན་པར་གྱུར་ཅིག །བྱང་ཆུབ་སེམས་དཔའ་རྣམས་ཀྱི་མཛད་པ་ཡོངས་སུ་རྫོགས་པར་གྱུར་ཅིག །ཉན་ཐོས་དང་རང་རྒྱལ་བ་རྣམས་ཀྱི་ཐུགས་ཞི་བ་ལས་བཞེངས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བསླབ་པ་ལ་སློབ་པར་གྱུར་ཅིག །སྐྱེ་བོ་
[298a]
[298a.1]རྣམས་ཀྱང་མངོན་པར་མཐོ་བ་དང་ངེས་པར་ལེགས་པའི་ལམ་མངོན་དུ་གྱུར་ནས་སངས་རྒྱས་ཀྱི་བསྟན་པ་ལ་བྱ་བ་བྱེད་པར་གྱུར་ཅིག །ནམ་འཆི་བའི་དུས་ན་ཡང་སེམས་ལ་གདུང་བ་མེད་པར་དགའ་བ་དང་བཅས་པས་མི་ལུས་དོན་ཡོད་པར་རང་དགར་འགྲོ་བར་
[298a.2]གྱུར་ཅིག །དེ་ལྟར་ཆོས་སྒོ་ཀུན་ལ་ཡི་རང་བས་ཚེ་རབས་རྣམས་སུ་ཐུབ་པའི་གསུང་རབ་རབ་འབྱམས་ལ་མ་རྨོངས་པ་དང་། སྤོབས་པ་ཕུན་སུམ་ཚོགས་པ་དང་ལྡན་པར་གྱུར་ཅིག །སྟོང་པ་དང་སྙིང་རྗེ་གཉིས་སུ་མེད་པར་རྙེད་པ་དང་། གྲགས་པ་ལ་མ་ལྟོས་པར་ལུས་ཅན་མ་ལུས་པ་རྣམས་ཀྱི་
[298a.3]འཁོར་བའི་བར་དུ་དོན་བྱེད་པར་གྱུར་ཅིག །ཇི་སྲིད་སེམས་ཅན་ཐམས་ཅད་བླ་ན་མེད་ཀྱི་གོ་འཕང་ལ་མ་བཀོད་པ་དེ་སྲིད་དུ་ལུས་ངག་ཡིད་ཀྱིས་བསོད་ནམས་དང་ཡེ་ཤེས་ཀྱི་ཚོགས་རྒྱུན་མ་ཆད་པར་མཉམ་པ་མེད་པའི་ཕུན་སུམ་ཚོགས་པ་དུ་མས་བརྒྱན་པར་གྱུར་ཅིག །དཀོན་མཆོག་གསུམ་
[298a.4]གྱི་བདེན་པའི་བྱིན་གྱི་རླབས་ཀྱིས་དེ་བཞིན་དུ་གྱུར་ཅིག །དེང་རྒྱལ་བ་སྲས་དང་བཅས་པ་རྣམས་ཀྱི་སྤྱན་སྔར་ཆེ་གེ་མོ་ལ་སོགས་པའི་འགྲོ་བ་མ་ལུས་པ་ཡང་ངེས་པར་འབྱུང་བ་དྲི་མ་མེད་པའི་ཚུལ་ཁྲིམས་རྒྱ་ཆེན་པོ་ཞི་བ་གྱ་ནོམ་པ་ལུས་ལ་སོགས་པ་ལེགས་པར་བསྡམས་པའི་སྤྱོད་པ་
[298a.5]སངས་རྒྱས་ཀྱི་བསྟན་པའི་ཁང་བཟངས་དམ་པར་གྱུར་པ་སྤོང་བའི་སེམས་ལ་འདུན་པ་དང་བཅས་པ་སོ་སོར་ཐར་པའི་སྡོམ་པ་ལ་གནས་པར་བགྱིའོ། །ཕན་པ་རྒྱ་ཆེན་པོ་ལ་རབ་ཏུ་འཇུག་པའི་རང་བས་གཞན་མཆོག་ཏུ་གཅེས་པར་མཛད་པའི་རྒྱལ་བ་སྲས་དང་བཅས་པའི་ངོ་མཚར་བའི་
[298a.6]སྤྱོད་པ་ལ་ཆེ་གེ་མོ་ལ་སོགས་པ་མཐའ་ཡས་པའི་འགྲོ་བ་མ་ལུས་པས་ཀྱང་བསླབ་པར་བྱའོ། །རྒྱུ་དང་ལམ་དང་འབྲས་བུའི་དུས་སུ་བདེ་བས་བརྒྱན་ཅིང་དྲི་མ་མེད་པས་རྣམ་པར་དག་པའི་ཐེག་པ་ལམ་མྱུར་ཞིང་ཐབས་མང་བ་དང་དཀའ་བ་མེད་པས་འཇུག་པ་རབ་ཏུ་བདེ་བ་བླ་ན་མེད་པའི་
[298a.7]མཆོག་འབྱུང་བའི་འབྲས་བུ་རྡོ་རྗེ་ཐེག་པའི་དམ་ཚིག་ལ་ཆེ་གེ་མོ་ལ་སོགས་པའི་མཐའ་ཡས་པའི་འགྲོ་བ་མ་ལུས་པ་ཡང་དག་པར་གནས་པར་བགྱིའོ། །སངས་རྒྱས་དང་བྱང་ཆུབ་སེམས་དཔའ་མ་ལུས་པ་རྣམས་ལ་རབ་ཏུ་གཅེས་པའི་ལུས་སྡོམ་པ་གསུམ་གྱིས་བརྒྱན་ཅིང་མཛེས་པ་འདི་
[298b]
[298b.1]དང་། མཁོ་ཞིང་ཉེ་བར་ལོངས་སྤྱོད་པའི་ནོར་རྫས་དང་། དུས་གསུམ་དུ་བསགས་པའི་དགེ་བའི་རྩ་བ་རྣམས་ཀྱང་ཡོངས་སུ་དབུལ་བས་དུས་ཐམས་ཅད་དུ་ཐུགས་རྗེ་ཆེན་པོ་དང་ལྡན་པ་ཁྱེད་རྣམས་ཀྱིས་བཞེས་སུ་གསོལ་ལོ། །དེ་ལྟར་མཆོད་པ་བཞེས་པའི་རྒྱལ་བ་སྲས་དང་
[298b.2]བཅས་པ་ཡེ་ཤེས་ཀྱི་སྐུ་ཅན་གྱི་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྤྲས་པའི་ཞི་བ་ཆེན་པོ་རྣམས་དང་། ཐུགས་ཞི་བ་ཆེན་པོ་ལས་མ་གཡོས་ཀྱང་སྐུ་རབ་ཏུ་ཁྲོས་པས་རྔམ་ཞིང་འཇིགས་པའི་ཚུལ་གྱི་ཉམས་དགུ་དང་ལྡན་པའི་ཁྲོ་བོ་ཆེན་པོའི་ཚོགས་
[298b.3]རྣམས་ལ་རབ་ཏུ་དང་བའི་དད་པ་རྩེ་གཅིག་དང་ལྡན་པ་མིག་མི་འཛུམས་པས་བལྟ་བར་བགྱིའོ་ཞེས་ལན་གསུམ་དུའོ། །ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཚན་ཡིད་ལ་དྲན་ནས་ཕྱག་བྱས་མཆོད་པ་ཕུལ་བས་ཆེ་གེ་མོ་ལ་སོགས་པ་མཐའ་ཡས་པའི་
[298b.4]འགྲོ་བ་མ་ལུས་པ་མངའ་རིས་ཀྱི་འབངས་སུ་མཆིས་པ་རྣམས་ལ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡོན་ཏན་གྱི་ཕུང་པོ་དང་། ཡེ་ཤེས་ཀྱི་ཕུང་པོ་དཔག་ཏུ་མ་མཆིས་པ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་ཡང་བརྗོད་ཀྱིས་མི་ལང་བ་བསམས་པ་ཙམ་གྱིས་ཐོབ་པར་གྱུར་ཅིག །
[298b.5]དེ་ལྟར་མཆོད་ཅིང་གུས་པའི་མཐུས་སངས་རྒྱས་བཅོམ་ལྡན་འདས་རྣམས་ཀྱིས་བླ་ན་མེད་པའི་ཚུལ་ཁྲིམས་བསྲུང་ཞིང་དེའི་དྲི་བསུང་གིས་ཕྱོགས་བཅུར་ཡོངས་སུ་དག་པར་གྱུར་ཅིག །སེམས་ཅན་ཐམས་ཅད་ལ་ཤིན་ཏུ་བརྟན་པའི་ཚུལ་ཁྲིམས་དང་། འགྱོད་པ་མེད་པའི་ཚུལ་ཁྲིམས་དང་། ཐམས་
[298b.6]ཅད་མཁྱེན་པའི་ཡེ་ཤེས་ཀྱི་ཚུལ་ཁྲིམས་དང་། ཚུལ་ཁྲིམས་ངན་པ་ཡོངས་སུ་སྤོང་བའི་ཚུལ་ཁྲིམས་དང་། ཐམས་ཅད་དུ་ཡང་དག་པར་མེད་པའི་ཚུལ་ཁྲིམས་དང་། སྔོན་མ་བྱུང་བའི་ཚུལ་ཁྲིམས་དང་། མཁན་པོ་མེད་པའི་ཚུལ་ཁྲིམས་དང་། བྱ་བ་མེད་པའི་ཚུལ་ཁྲིམས་དང་། གདུང་བ་མེད་པའི་
[298b.7]ཚུལ་ཁྲིམས་དང་། ཉོན་མོངས་པ་མེད་པའི་ཚུལ་ཁྲིམས་དང་། མཐར་ཕྱིན་པའི་ཚུལ་ཁྲིམས་དང་ལྡན་པར་གྱུར་ཅིག །ཡོངས་སུ་མཉམ་པའི་ཚུལ་ཁྲིམས་དང་ལྡན་པས་སྤོས་ཀྱི་འདེ་གུས་ལུས་ལ་བྱུགས་པ་དང་མཚོན་གྱིས་འཇིགས་ཤིང་འདེབས་པ་ལས་མཉམ་པར་ཆགས་སྡང་མེད་པར་གྱུར་
[299a]
[299a.1]ཅིག །སེམས་ཅན་ཐམས་ཅད་ཀྱི་བླ་ན་མེད་པའི་ཚུལ་ཁྲིམས་ཐོབ་པ་དང་། ཐེག་པ་ཆུང་ངུའི་ཚུལ་ཁྲིམས་མ་ཡིན་པ་དང་། ཐེག་པ་ཆེན་པོའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པར་གྱུར་ཅིག། །སེམས་ཅན་ཐམས་ཅད་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་ཏེ་
[299a.2]སངས་རྒྱས་བཅོམ་ལྡན་འདས་ཀྱི་ལྷུན་གྱིས་གྲུབ་པའི་ཚུལ་ཁྲིམས་དང་ལྡན་པར་གྱུར་ཅིག །སེམས་ཅན་ཐམས་ཅད་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ལ་གོམས་པར་གྱུར་ཅིག །སེམས་ཅན་ཐམས་ཅད་ཀྱང་
[299a.3]འཕགས་མ་སྒྲོལ་མའི་ཞབས་ཀྱི་པདྨོ་དང་ལྡན་ཞིང་། པདྨ་དེའི་དྲི་བསུང་གིས་ཕྱོགས་བཅུར་ཡོངས་སུ་ཁྱབ་པར་གྱུར་ཅིག །སེམས་ཅན་ཐམས་ཅད་ཀྱང་ཐེག་པ་ཆེན་པོའི་ཏིང་ངེ་འཛིན་གྱི་ཟས་ཀྱིས་འཚོ་ཞིང་། བླ་ན་མེད་པའི་ཟས་ཀྱི་དད་པས་ཕྱོགས་བཅུར་ཁྱབ་ཅིང་ཇི་ལྟར་བུང་བ་དག་ནགས་ཀྱི་མེ་
[299a.4]ཏོག་ལ་མི་གནོད་པ་ལྟར་སེམས་ཅན་ཐམས་ཅད་ལ་གཅིག་ལ་གཅིག་མི་གནོད་པས་འཚོ་བར་གྱུར་ཅིག །སེམས་ཅན་ཐམས་ཅད་ཡོན་ཏན་ཚད་མེད་པ་ལས་གྲུབ་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་རྟག་ཏུ་བྱམས་པའི་སེམས་ཀྱིས་ཡིད་ལ་དམིགས་པ་མེད་པར་སྦྱིན་པ་
[299a.5]ལ་སོགས་པའི་ཕ་རོལ་ཏུ་ཕྱིན་པ་ལ་ཞུགས་ནས་དེ་དག་གི་དགེ་བ་ཡང་སེམས་ཅན་ཐམས་ཅད་ཐུན་མོང་དུ་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རང་དབང་ཅན་གྱི་ཏིང་ངེ་འཛིན་གྱི་རྒྱལ་པོ་ལ་ཞུགས་ནས་དབང་དུ་གྱུར་བའི་ས་ལ་གནས་པར་
[299a.6]གྱུར་ཅིག །ཏིང་ངེ་འཛིན་དེའི་མཐུས་གང་དང་གང་དུ་སྐྱེ་བར་འདོད་པ་དེ་དང་དེར་ཡིད་བདེ་བཞིན་དུ་སྐྱེ་བར་གྱུར་ཅིག །རིགས་ཀྱི་བུ་དེ་བྱང་ཆུབ་སེམས་དཔའ་སྤྱད་པ་སྤྱོད་པ་ན། སེམས་ཅན་དམྱལ་བའི་འཇིག་རྟེན་རྣམས་དགེ་བའི་རྩ་བ་ལ་འཇོག་པར་གྱུར་ནས། དམྱལ་བར་རང་དབང་ཅན་དུ་སྐྱེས་ནས།
[299a.7]དམྱལ་བའི་སེམས་ཅན་འགྲོ་བ་རྣམས་ཐར་པ་ལ་འགོད་པར་གྱུར་ཅིག །དམྱལ་བའི་སེམས་ཅན་རྣམས་ལ་ཆོས་རྣམ་པ་སྣ་ཚོགས་པ་རྣམས་བཤད་ནས་དམྱལ་བ་རྣམས་བླ་ན་མེད་པའི་བྱང་ཆུབ་ཏུ་སེམས་བསྐྱེད་པར་གྱུར་ཅིག །ཡི་དྭགས་རྣམས་སུ་རང་དབང་དུ་སྐྱེས་ནས་བཀྲེས་པ་དང་སྐོམ་པ་རྣམས་རྒྱུན་ཆད་
[299b]
[299b.1]པར་གྱུར་ཅིག །བཟའ་བ་དང་། བཏུང་བ་དང་། གོས་དང་། ནོར་གྱི་ཆར་ཆེན་པོས་ཡི་དྭགས་རྣམས་བདེ་བ་ལ་བཀོད་ནས་སེམས་ཅན་དེ་རྣམས་ཀྱང་བླ་ན་མེད་པའི་བྱང་ཆུབ་ཏུ་སེམས་བསྐྱེད་པར་གྱུར་ཅིག །དུད་འགྲོའི་འགྲོ་བ་རྣམས་སུ་རང་དབང་དུ་སྐྱེས་ནས་གཅིག་ལ་གཅིག་ཟ་བ་
[299b.2]རྣམས་རྒྱུད་ཆད་དེ་ཕན་ཚུན་བྱམས་པ་ལ་འགོད་པར་གྱུར་ཅིག །སེམས་ཅན་ཐམས་ཅད་དགེ་བའི་བཤེས་གཉེན་ཚོལ་བ་དང་། ཆོས་ཉན་པ་དང་། དོན་སེམས་པ་དང་། སྨྲས་པ་ལྟར་སྤྱོད་པར་གྱུར་ཅིག །དཀོན་མཆོག་གསུམ་གྱི་བདེན་པའི་བྱིན་གྱི་རླབས་ཀྱིས་དེ་བཞིན་དུ་གྱུར་ཅིག །དེ་
[299b.3]ནས་རྒྱལ་བའི་ཡུམ་འཕགས་མ་སྒྲོལ་མ་ལ་སོགས་པ་ལ་མདོག་དང་། ཡོན་ཏན་དང་སྟོབས་དང་གཟི་བརྗིད་མཛད་པ་ཕྲིན་ལས་ཀྱི་སྒོ་ནས་སྣ་ཚོགས་པའི་བསྟོད་པ་བྱའོ། །གཟུངས་སྔགས་མཐུ་ཆེན་པོ་དང་ལྡན་པ་འདི་ཡང་བརྗོད་པར་བྱའོ། །ན་མོ་རཏྣ་ཏྲ་ཡཱ་ཡ། ན་མ་
[299b.4]ཨཱརྱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མཧཱ་སཏྭཱ་ཡ། མཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཀྲྀ་ཏེ་སརྦ་དུཥྚཱཾ་པྲ་དུཥྚཱཾ་ཛམྦྷ་ཡ་སྟམྦྷ་ཡ་མོ་ཧཱ་ཡ། བནྡྷ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སརྦ་དུཥྚཾ་སྟམྦྷ་ནི་ཏཱ་རེ་སྭཱ་ཧཱ། དེ་ལྟར་བསྟོད་པ་རྣམས་དང་། རིག་སྔགས་འདི་བཟླས་པ་ལས།
[299b.5]འདི་འདྲ་བའི་ཡིད་བཞིན་གྱི་ནོར་བུ་རིན་པོ་ཆེ་ལ་ལོངས་སྤྱོད་པར་གྱུར་ཅིག །སེམས་ཅན་ཐམས་ཅད་ལ་ཆོས་ཀྱི་དོན་ཡང་དག་པར་འབྱོར་ཞིང་ཕུན་སུམ་ཚོགས་པ་ཐམས་ཅད་རང་གི་ཡིད་ལ་འདོད་པ་ཙམ་གྱི་མོད་ལ་གཞན་ལ་རག་མ་ལུས་པར་ཐོབ་པར་གྱུར་ཅིག །སེམས་ཅན་ཐམས་ཅད་མི་དགེ་
[299b.6]བའི་ལུས་དང་ངག་དང་ཡིད་ཀྱི་མཐའ་ཐམས་ཅད་དང་བྲལ་ནས། དུས་ཐམས་ཅད་དུ་དགེ་བའི་ལུས་དང་ངག་དང་ཡིད་ཀྱི་ལས་ཐམས་ཅད་དང་ལྡན་པར་གྱུར་ཅིག །སེམས་ཅན་ཐམས་ཅད་ཀྱང་རང་རང་གི་ལུས་ལ་མཚན་དང་། དཔེ་བྱད་ཀྱིས་ཡོངས་སུ་བརྒྱན་པ་དང་། རྟག་ཏུ་ཕན་ཚུན་གཅིག་
[299b.7]ལ་གཅིག་འཇིགས་པ་མེད་པ་དང་། ཞེ་འགྲས་པ་མེད་པ་དང་། དགའ་བའི་ཡིད་དང་། བྱམས་པའི་མིག་གིས་མངོན་པར་བལྟ་ཞིང་ཟབ་མོའི་ཆོས་ལ་མངོན་པར་བཟོད་པ་དང་ལྡན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ལ་མངོན་པར་བརྩོན་པ་དང་།
[300a]
[300a.1]འཁོར་བ་ཡོངས་སུ་མི་སྤོང་བའི་བརྩོན་འགྲུས་ཆེན་པོ་དང་ལྡན་པ་དང་། སངས་རྒྱས་ཀྱི་ས་ལ་ཡང་དག་པར་གཞོལ་བར་གྱུར་ཅིག །ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་རིང་དུ་སྤངས་ནས། བསམ་གཏན་དང་། རྣམ་པར་ཐར་པ་དང་། སྙོམས་
[300a.2]པར་འཇུག་པ་དང་། ཏིང་ངེ་འཛིན་དང་། མངོན་པར་ཤེས་པ་རྣམས་དང་། རིག་པ་རྣམས་ཀྱང་ཕུན་སུམ་ཚོགས་པར་གྱུར་ཅིག །སེམས་ཅན་ཐམས་ཅད་འཇིག་རྟེན་དང་། འཇིག་རྟེན་ལས་འདས་པའི་ཤེས་རབ་དང་། ཡེ་ཤེས་ཕུན་སུམ་ཚོགས་པ་དང་ཡང་དག་པར་ལྡན་པར་གྱུར་
[300a.3]ཅིག །སོ་སོ་ཡང་དག་པར་རིག་པའི་ཡེ་ཤེས་བཞི་ཐོབ་ནས་བཟོ་དང་། བསྟན་བཅོས་དང་། སྒྱུ་རྩལ་དང་། སྤོབས་པ་དང་། མཐུ་དང་། གསང་བའི་ཆོ་ག་ཤེས་པ་དང་། དེ་ཁོ་ན་ཉིད་མཐོང་སྟེ། ཉོན་མོངས་པ་དང་། ཤེས་བྱའི་སྒྲིབ་པ་མ་ལུས་པར་སྤངས་པའི་ཡེ་ཤེས་ཆེན་པོ་
[300a.4]ཐོབ་པར་གྱུར་ཅིག །ཆེ་གེ་མོ་ལ་སོགས་པའི་མཐའ་ཡས་པའི་འགྲོ་བ་མ་ལུས་པ་རྣམས་ཕྱོགས་བཅུའི་འཇིག་རྟེན་གྱི་ཁམས་མ་ལུས་པའི་སངས་རྒྱས་ཐམས་ཅད་ཀྱི་ཞིང་ཁམས་སུ་བསྒྲོད་པ་དང་། དེ་དག་གི་ཕྲིན་ལས་མ་ལུས་པ་ལ་འཇུག་པར་གྱུར་ཅིག །སྐྱོབ་པ་ཤཱཀྱ་སེང་གེའི་བསྟན་
[300a.5]པ་ལ་རབ་ཏུ་གསལ་བ་དང་། བདུད་ཀྱི་སྡེ་ཐམས་ཅད་བཅོམ་པ་དང་བདེ་ལེགས་ཐམས་ཅད་ཀྱི་གཞིར་གྱུར་པར་ཡང་ཤོག་ཅིག །སྙིགས་མའི་དུས་སུ་ཉོན་མོངས་པ་ལ་བབ་པ་ན། བདག་གིས་ལྷག་པའི་བསམ་པ་རྣམ་པར་དག་པས་འཇིག་རྟེན་དུ་འདུལ་བའི་མཐུ་ཐོབ་སྟེ། འགྲོ་བ་མ་
[300a.6]ལུས་པ་བདེ་བ་ལ་འགོད་པར་གྱུར་ཅིག །གདུལ་བྱའི་དབང་གིས་གང་ནས་གང་དུ་སྐྱེ་བར་བྱེད་ན་ཡང་སྙིང་གི་པདྨོ་ལ་རྗེ་བཙུན་མ་སྒྲོལ་མ་བཞུགས་ནས་ཐོས་པ་དང་། བསམ་པ་དང་། སྒོམ་པ་ལྷུར་བྱས་ཏེ། གཞན་གྱི་དོན་རྒྱ་ཆེན་པོ་ལ་འཇུག་པར་གྱུར་ཅིག །བདེ་བ་དང་ལེགས་པ་ཐམས་
[300a.7]ཅད་ཀྱི་བསོད་ནམས་དང་། ཡེ་ཤེས་ཀྱི་ཚོགས་རྒྱ་ཆེན་པོ་བསྐྱེད་པའི་གཞིར་གྱུར་པའི་བདག་གི་ལུས་དང་ངག་དང་། ཡིད་ཀྱི་བྱ་བ་མ་ལུས་པ་ཀུན་ཡང་ཆོས་བཞིན་དུ་དགེ་བ་དང་། ཞི་བ་དང་ངེས་པར་གྱུར་ཅིག །ནམ་དུ་ཡང་ཆགས་སྡང་དང་འཁྲུལ་པ་དང་ཡིད་མི་བདེ་བ་མི་འབྱུང་ཞིང་དཀར་
[300b]
[300b.1]པོའི་ཡོན་ཏན་ཐམས་ཅད་ཀྱང་འཕེལ་ཞིང་རྒྱས་པར་གྱུར་ཅིག །རྟག་ཏུ་ཡང་དག་པའི་ཡེ་ཤེས་ལ་གནས་ཏེ། རྩོམ་པ་དང་། བཤད་པ་དང་། རྩོད་པ་དང་། མཐུ་རྩལ་དང་། སྤོབས་པ་དང་། རིག་པ་དང་། ཡོན་ཏན་དང་། ལོངས་སྤྱོད་དང་། དོན་དང་། ཚིག་དང་། ཤེས་རབ་ལ་སོགས་པ་
[300b.2]གཞན་དོན་ལ་འཇུག་ཅིང་ཞུགས་པའི་ཕྲིན་ལས་རྒྱ་ཆེན་པོ་ཐོབ་པར་གྱུར་ཅིག །དེང་ནས་བརྩམས་ཏེ་དུས་ཐམས་ཅད་དུ་ནོར་བདུན་གྱི་ཡོན་ཏན་དང་ལྡན་པའི་མིའི་ལུས་སུ་སྟོབས་ཆེན་པོས་འགྲོ་བ་མ་ལུས་པ་དགེ་བ་ལ་དགོད་པར་བྱས་ནས། སེམས་ཅན་ཐམས་ཅད་ཕྱིར་མི་ལྡོག་པའི་ས་ལ་
[300b.3]འགོད་པར་གྱུར་ཅིག །མདོར་ན་དེ་བཞིན་གཤེགས་པ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཀྱི་ཡོན་ཏན་གྱི་རྒྱ་མཚོ་ཟབ་ཅིང་རྒྱ་ཆེ་བ་དང་། ཚད་མེད་པའི་ཕྲིན་ལས་ངོ་མཚར་དུ་གྱུར་པ་དང་། སྐུ་གསུམ་གྱི་རྣམ་པར་འཕྲུལ་པ་ལ་སེམས་དགའ་ཞིང་སྤྲོ་བས་ཉིན་མཚན་དུ་ལུས་ཀྱི་བ་སྤུ་
[300b.4]ལངས་ཏེ་དབུགས་ཕྱུང་ནས་བསྟོད་པར་གྱུར་ཅིག །མཆོག་གི་རིགས་སྐྱེས་ནས་བྱམས་པ་དང་ལྡན་པ་དང་། ལུས་བཟང་བ་དང་། ཤེས་རབ་རྣོ་བ་དང་། བྱང་ཆུབ་སེམས་དཔའི་གྲོགས་དང་འགྲོགས་པ་དང་། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་ལ་གོམས་ཤིང་དེ་ལ་འབྲས་བུ་མི་
[300b.5]འདོད་པ་དང་། གསོང་པོར་བྱེད་ཅིང་སངས་རྒྱས་ལ་གུས་པས་སྙན་པའི་དབྱངས་ཀྱིས་བསྟོད་པར་ཤོག་ཅིག །རིག་སྔགས་འདི་ལན་བརྒྱད་བཟླས་པས་དེ་བཞིན་གཤེགས་པ་ལ་སྙན་པའི་དབྱངས་ཀྱིས་མ་ལུས་པ་ལ་བསྟོད་པར་འགྱུར་རོ། །ན་མཿསརྦ་བུདྡྷ་བོ་དྷི་ལ་སཏྭཱ་ནཱཾ་སརྦ་ཏྲ་ཀུ་སུ་མི་ཏཱ་བྷི་ཛྙཱ་ར་ཤི་ནི་ན་མོ་
[300b.6]སྟུ་དེ་སྭཱ་ཧཱ། དེ་ལྟར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བསྟོད་ཅིང་གུས་པས་དབང་དུ་གསོལ་ནས་དཔུང་གཉེན་ཐོབ་པར་བྱ་བའི་ཕྱིར་སྐྱབས་གསུམ་སྐྱོབ་པ་དང་བཅས་པ་ལ་རབ་ཏུ་གུས་པས་སྐྱབས་སུ་མཆིའོ། །དེ་ཡང་རྣམ་པར་དག་པའི་ཡེ་ཤེས་ཟུང་དུ་འཇུག་པའི་
[300b.7]ཏིང་ངེ་འཛིན་སྐུ་གསུམ་ལྷུན་གྱིས་གྲུབ་པའི་ཕྱག་རྒྱ་མཚོན་པའི་ལྷ་ཚོགས་གྲགས་པ་འཇིག་རྟེན་གསུམ་གྱི་མགོན་པོ་སངས་རྒྱས་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །སྨྲ་བསམ་བརྗོད་དུ་མེད་པ་གསུང་གི་རང་བཞིན་དུས་གསུམ་གྱི་རྒྱལ་བ་ཐམས་ཅད་སྐྱེད་པར་བྱེད་པའི་ཡུམ་
[301a]
[301a.1]མཚན་ཉིད་སོ་སོའི་ཡེ་ཤེས་མ་ལུས་པར་སྟོན་པ་དམ་ཆོས་མདོ་སྡེ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །འཁོར་བའི་རྒྱ་མཚོར་མིག་ཟུམ་ནས་སྟོང་པའི་འགྲོ་བའི་སྐྱབས་མེད་པ་རྣམས་ཀྱི་སྐྱབས་དང་དཔུང་གཉེན་མཛད་ཅིང་ཕྲིན་ལས་བཞི་ཡིས་ཐུགས་རྩེ་
[301a.2]གཅིག་པར་དོན་མཛད་པའི་གཙོ་བོ་ཐེག་པ་ཆེན་པོའི་དགེ་འདུན་ལ་ཕྱག་འཚལ་ཞིང་སྐྱབས་སུ་མཆིའོ་ཞེས་ལན་གསུམ་དུའོ། །དེ་ལྟར་སྐྱབས་གསུམ་བླ་མ་དང་བཅས་པ་ལ་དཔང་པོར་གཞག །རྟེན་དུ་གཟུང་སྐྱབས་སུ་གསོལ་ནས་སྟོངས་དང་གྲོགས་ཞུས་པ། དེ་བཞིན་དུ་གཟིགས་
[301a.3]ཏེ་ཆེ་གེ་མོ་ལ་སོགས་པ་མཐའ་ཡས་པའི་འགྲོ་བ་མ་ལུས་པ་རྣམས་སྲིད་པའི་རྒྱ་མཚོའི་དབའ་རླབས་དྲག་པོས་རང་དབང་མེད་པར་གཡེངས་ཏེ། མགོན་མེད་པར་བྱིང་བ་རྣམས་ལ་དེང་ནས་བཟུང་ནས་བྱང་ཆུབ་ལ་ཐུག་གི་བར་དུ་བླ་ན་མེད་པ་གསུམ་ལ་སྐྱབས་སུ་མཆི་བས་སེམས་ཅན་གླིང་མེད་པ་
[301a.4]རྣམས་ཀྱི་གླིང་དུ་གྱུར་ཅིག །གནས་མེད་པ་རྣམས་ཀྱི་གནས་སུ་གྱུར་ཅིག །སྐྱབས་མེད་པ་རྣམས་ཀྱི་སྐྱབས་སུ་གྱུར་ཅིག །སྐྱོབ་པ་མེད་པ་རྣམས་ཀྱི་སྐྱོབ་པར་གྱུར་ཅིག །མགོན་མེད་པ་རྣམས་ཀྱི་མགོན་དུ་གྱུར་ཅིག །དཔུང་གཉེན་མེད་པ་རྣམས་ཀྱི་དཔུང་གཉེན་དུ་གྱུར་ཅིག །ཇི་
[301a.5]སྲིད་སེམས་ཅན་ཐམས་ཅད་ཡོངས་སུ་མྱ་ངན་ལས་མ་འདས་ཀྱི་བར་དེ་སྲིད་དུ་བདག་ཀྱང་ཡོངས་སུ་མྱ་ངན་ལས་མི་འདའ་ཞིང་སེམས་ཅན་ཐམས་ཅད་ལ་ལམ་བདེ་བ་དང་། འཇུག་པ་རབ་ཏུ་བདེ་བའི་སྒོ་ནས་ཕན་པ་དང་བདེ་བ་རྒྱ་ཆེན་པོ་ནམ་མཁའི་མཐའ་ཀླས་པ་ཙམ་གྱིས་གང་ཞིང་
[301a.6]ཡོངས་སུ་རྒྱས་པར་གྱུར་ཅིག །སྐྱབས་སུ་འགྲོ་བའི་དགེ་བའི་རྩ་བ་འདི་ལ་བརྟེན་ནས་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་དགོད་པར་གྱུར་ཅིག །གཞན་ཡང་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་
[301a.7]སངས་རྒྱས་ཀྱི་གོ་འཕང་ལ་མ་བཀོད་ཀྱི་བར་དུ་ཡང་ལྷ་དང་མིའི་རྟེན་ཕུན་སུམ་ཚོགས་པ་ལ་བརྟེན་ནས། རང་རང་གི་དགེ་བའི་བཤེས་གཉེན་དེ་ཉིད་ཀུན་དུ་སྤྱོད་པ་སྣ་ཚོགས་པའི་སྒོ་ནས། བྱང་ཆུབ་སེམས་དཔའི་སྤྱོད་པ་ངོ་མཚར་བས་ཡང་དག་པར་མཉེས་པར་བྱེད་པར་གྱུར་ཅིག །བྱང་
[301b]
[301b.1]ཆུབ་ཏུ་སེམས་བསྐྱེད་པ་དང་ཡང་མི་འབྲལ་བར་གྱུར་ཅིག །ཐེག་པ་ཆེན་པོའི་ཆོས་མཐའ་དག་ལ་དགའ་བདེ་ཁ་ན་མ་ཐོ་བ་མེད་པས་ལོངས་སྤྱོད་པར་གྱུར་ཅིག །བསོད་ནམས་དང་ཡེ་ཤེས་ཀྱི་ཚོགས་ཀྱི་བདག་ཉིད་ཕ་རོལ་ཏུ་ཕྱིན་པ་དྲུག་གི་སྒྲུབ་པ་ལ་ཡང་དག་པར་གནས་པར་
[301b.2]གྱུར་ཅིག །དེ་ལྟར་གུས་ཤིང་སྐྱབས་སུ་མཆི་བས་བདག་ཉིད་བསླབ་པ་གསུམ་གྱིས་ལུས་ཡོངས་སུ་རྫོགས་པར་བྱས་ནས། གཟུངས་དང་ཏིང་ངེ་འཛིན་ལ་སོགས་པ་སངས་རྒྱས་ཀྱི་ཆོས་གྲངས་མེད་པ་རྣམས་ལ་ལོངས་སྤྱོད་ཅིང་སྤྱན་དང་། མངོན་པར་ཤེས་པ་ལ་སོགས་པ་ཡོན་ཏན་
[301b.3]ཐམས་ཅད་ལ་དབང་ཐོབ་ཅིང་རང་རྒྱུད་ཕྱུག་ཅིང་རྒྱས་པར་གྱུར་ཅིག །བདུད་ཀྱི་གནོད་པ་དང་། བར་དུ་གཅོད་པ་ཐམས་ཅད་ཀྱིས་མི་བརྫི་བར་གྱུར་ཅིག །དགེ་བའི་རྩ་བ་བསམ་གྱིས་མི་ཁྱབ་པའི་མཐུས་ཡོངས་སུ་རྫོགས་ཤིང་སྨིན་ནས་བྱང་ཆུབ་ཏུ་ལུང་བསྟན་པ་ཐོབ་ཅིང་ཐབས་མཁས་
[301b.4]པས་སངས་རྒྱས་ཀྱི་ཞིང་སྦྱོང་བ་དང་། སེམས་ཅན་ཡོངས་སུ་སྨིན་པར་བྱེད་པར་གྱུར་ཅིག །མཐར་མི་གནས་པའི་མྱ་ངན་ལས་འདས་པ་ཐོབ་ནས་སེམས་ཅན་ཐམས་ཅད་འཁོར་བའི་རྒྱ་མཚོ་ལས་ཡོངས་སུ་སྒྲོལ་བར་གྱུར་ཅིག །དཀོན་མཆོག་གསུམ་གྱི་བདེན་པའི་བྱིན་གྱི་རླབས་ཀྱིས་དེ་བཞིན་དུ་
[301b.5]གྱུར་ཅིག །དེང་དེ་བཞིན་གཤེགས་པ་སྲས་དང་བཅས་པ་རྣམས་ཀྱི་མཚན་ནས་བརྗོད་ཕྱག་འཚལ་སྐྱབས་སུ་གསོལ་ནས། ཆེ་གེ་མོ་ལ་སོགས་པ་མཐའ་ཡས་པའི་འགྲོ་བ་མ་ལུས་པའི་མུན་པ་བསལ་ནས་ལམ་མཆོག་ཏུ་གྱུར་པ་བསྐྱེད་པའི་ཕྱིར་དང་། གློ་བུར་གྱི་ཉོན་མོངས་པས་གདུངས་
[301b.6]པའི་སྐྱེ་བོ་མཐའ་དག་བསྒྲལ་བར་བྱ་བའི་དོན་དུ་གསོལ་བ་ནི། མགོན་པོ་གང་ཞིག་གིས་གང་ཟག་པ་མེད་པའི་བདུད་རྩིའི་མཆོག་བརྙེས་ཀྱང་སེམས་ཅན་གྱི་ལས་དང་སྐལ་བའི་དབང་གིས་ཐུགས་ཅུང་ཟད་སྙོམས་པར་ཞུགས་པ་རྣམས་ལ་དམ་པའི་ཆོས་ཀྱི་བདུད་རྩི་དྲི་མ་མེད་ཅིང་འོད་གསལ་བ་
[301b.7]གསུང་བར་གསོལ་ཆོས་ཀྱི་འཁོར་ལོ་བསྐོར་བར་བསྐུལ་ལོ་ཞེས་ལན་གསུམ་མོ། །གང་ཡང་འཇིག་རྟེན་གྱི་སྒྲོན་མ་དམ་པ་དེ་དག་རིང་དུ་མི་གནས་པར་ཞི་བར་གཤེགས་པར་བཞེད་པ་དེ་དག་ལ་ཡང་ཇི་སྲིད་སེམས་ཅན་གྱི་ཁམས་ཡོད་པ་དེ་སྲིད་དུ་ཉི་མ་དང་ཟླ་བ་ལྟ་བུའི་ཚུལ་གྱིས་སེམས་ཅན་གྱི་ཁམས་ལ་
[302a]
[302a.1]རབ་ཏུ་གསལ་བར་བཞུགས་སུ་གསོལ་བ་སྟེ། བདུད་བཞི་བཅོམ་པའི་སྨན་པའི་མཆོག་ཆེན་པོ་ཁྱོད་ལ་གུས་པས་རབ་ཏུ་བཞུགས་སུ་གསོལ་བར་གསོལ་བ་འདེབས་སོ་ལན་གསུམ་དུའོ། །འཇིག་རྟེན་མ་རིག་པ་ལ་སོགས་པས་རབ་ཏུ་ལྡོངས་པ་རྣམས་ལ་དྲི་མ་མེད་ཅིང་འོད་
[302a.2]གསལ་བའི་རང་བཞིན་ཡོངས་སུ་གསལ་བར་གྱུར་ཅིག །རྒྱལ་བ་སྲས་དང་བཅས་པ་རྣམས་ལ་མཆོད་ཅིང་གུས་པས་ཆོས་ཀྱི་སྒྲོན་མེ་སྦར་བ་ཞུས་པ་ལས་ཆེ་གེ་མོ་ལ་སོགས་པ་མངའ་རིས་ཀྱི་འབངས་སུ་མཆིས་པ་རྣམས་དང་། གཞན་ཡང་འགྲོ་བ་མ་ལུས་པ་རྣམས་ཀྱིས་ཐེག་པ་གསུམ་གྱི་ཆོས་མ་ལུས་
[302a.3]པ་ལ་རང་དབང་ཐོབ་པར་གྱུར་ཅིག །འཇིག་རྟེན་གྱི་ཁམས་གཞན་དང་གཞན་དག་ཏུ་ཆོས་ཀྱི་འཁོར་ལོ་དྲི་མ་མེད་པས་གཞན་ཡོངས་སུ་སྨིན་པར་བྱེད་པར་གྱུར་ཅིག །ཁམས་གསུམ་གྱི་འགྲོ་བ་མ་ལུས་པ་རྣམས་ལ་རང་རང་དང་འཚམ་པའི་ཐེག་པ་ཆེན་པོའི་དགེ་བའི་བཤེས་གཉེན་དམ་པས་
[302a.4]བསམ་པ་དང་མཐུན་པའི་ཆོས་སྟོན་པར་གྱུར་ཅིག །སེམས་ཅན་ཐམས་ཅད་ཀྱང་ཐོས་པ་དང་བསམ་པ་ལྷུར་བྱས་ནས། ཏིང་ངེ་འཛིན་གྱི་སྒོ་རྣམས་ལ་སྙོམས་པར་འཇུག་པར་གྱུར་ཅིག །སེམས་ཅན་ཐམས་ཅད་ལ་དགེ་བ་བཅུའི་ལས་ཀྱི་ལམ་རབ་ཏུ་སྟོན་པ་དང་། བྱང་ཆུབ་ཀྱི་ཕྱོགས་
[302a.5]ཀྱི་ཆོས་ཀྱི་དགེ་བ་ཇི་སྙེད་པ་ཚུལ་ཁྲིམས་ཀྱི་ཕུང་པོ་དང་ལྡན་པའམ། ཏིང་ངེ་འཛིན་གྱི་ཕུང་པོ་དང་ལྡན་པའམ། ཤེས་རབ་ཀྱི་ཕུང་པོ་དང་ལྡན་པའམ། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པའམ། འཕགས་པའི་བདེན་པ་དང་ལྡན་པ་དེ་དག་ཀྱང་ངེས་པར་འབྱུང་བའི་
[302a.6]དོན་དུ་སྟོན་པར་གྱུར་ཅིག །གང་ཡང་དག་པར་བསྒྲུབ་པ་ལ་ཆོས་གང་དུ་བྲི་བའམ། བླང་བའམ། དོར་བ་དང་། གཟུང་བ་དང་། སྤང་བ་མེད་པར་གཞན་ལ་འཆད་པར་གྱུར་ཅིག །ཡང་དག་པར་སྒྲུབ་པ་ལ་ཞུགས་པ་ནི་གཉིས་ལ་བློ་མི་འཇུག་སྟེ། ཆོས་ཐམས་ཅད་གཉིས་སུ་མེད་པར་
[302a.7]ཡང་དག་པ་ཇི་ལྟ་བ་བཞིན་དུ་རབ་ཏུ་མཐོང་ནས། དེ་བཞིན་གཤེགས་པ་ཐམས་ཅད་སེམས་ཅན་ཐམས་ཅད་ལ་ངེས་པར་འབྱུང་བའི་ལམ་ཡང་དག་པར་སྟོན་པར་གྱུར་ཅིག །རྒྱལ་བ་སྲས་དང་བཅས་པ་ལ་བསྐུལ་ཞིང་གསོལ་བས་ཆེ་གེ་མོ་ལ་སོགས་པ་བཀའི་འབངས་འཁོར་བཅས་ཐམས་
[302b]
[302b.1]ཅད་ཀྱི་བསམ་པ་ཡོངས་སུ་ཤེས་པས་འཁོར་ཐམས་ཅད་མགུ་བར་བྱེད་པ་དང་། འཁོར་ཐམས་ཅད་ཀྱི་ལུས་སེམས་ཚིམ་པར་བྱེད་པ་དང་། འཁོར་ཐམས་ཅད་དགའ་བ་དང་། རབ་ཏུ་དགའ་བ་དང་། དད་པ་བསྐྱེད་པ་དང་། སྙིང་རྗེ་ཆེན་པོ་བསྐྱེད་པ་དང་། དེ་ཁོ་ན་ཉིད་མཉམ་པ་ཉིད་
[302b.2]དུ་རྟོགས་པ་དང་། གཞན་མ་ཡིན་པ་ཉིད་དང་། མི་འགྱུར་བ་ཉིད་དང་། མི་འཁྲུགས་པ་ཉིད་དང་། འབྱུང་བ་མེད་པ་ཉིད་དང་། འཇིགས་པ་མེད་པ་ཉིད་དང་། རྩོད་པ་མེད་པ་ཉིད་དུ་སྟོན་པར་གྱུར་ཅིག །རྒྱལ་བ་སྲས་དང་བཅས་པའི་ཆོས་ཀྱི་གསུང་དྲི་མ་མེད་པ་དེ་བཞིན་ཉིད་དང་མཉམ་ཞིང་།
[302b.3]ཆོས་ཀྱི་དབྱིངས་ཀྱི་ངོས་མཉམ་པ་དེས་འཇིག་རྟེན་གྱི་ཁམས་རབ་འབྱམས་མ་ལུས་པ་རྣམས་ལ་ཐོགས་པ་མེད་ཅིང་ཁྱབ་པར་གྱུར་ཅིག །དེ་བཞིན་གཤེགས་པ་ཚད་མེད་གྲངས་མེད་བསམ་གྱིས་མི་ཁྱབ་གཞལ་དུ་མེད་པ་བརྗོད་དུ་མེད་པའི་ཆོས་དང་ལྡན་ཞིང་། སྙིང་རྗེ་ཆེན་པོས་ཟིན་པའི་
[302b.4]སེམས་ཅན་རྣམས་ལ་ངེས་པར་འབྱུང་བའི་ལམ་ཡང་དག་པར་སྟོན་པར་གྱུར་ཅིག །ནམ་མཁའི་ཁམས་མཐའ་ཡས་མུ་མེད་པ་བཞིན་དུ་རྒྱལ་བ་སྲས་དང་བཅས་པའི་མཁྱེན་པ་དང་། བརྩེ་བ་མུ་མེད་པས་ཆེ་གེ་མོ་ལ་སོགས་པ་འགྲོ་བ་མཐའ་ཡས་མུ་མེད་པ་ལ་བརྩེ་བས་བུ་ལྟ་བུར་དགོངས་ནས་
[302b.5]འགྲོ་བ་མ་ལུས་པ་རྣམས་ཀྱང་དེ་བཞིན་གཤེགས་པའི་གསུང་རབ་དྲི་མ་མེད་པ་ཐོས་ནས། མངོན་པར་ཡིད་ཆེས་ནས། རབ་ཏུ་རྟོགས་པ་དྲི་མ་མེད་པ་ཐེ་ཚོམ་མི་ཟ་བ་དང་། རྒྱ་ཆེར་དགའ་མགུ་སྟེ་རངས་པ་རྙེད་ནས། ནམ་མཁའ་ལྟ་བུར་བསམ་གྱིས་མི་ཁྱབ་པའི་དོན་ལ་ངོ་མཚར་བ་དང་། རྨད་དུ་
[302b.6]བྱུང་བའི་འདུ་ཤེས་སྐྱེ་བར་གྱུར་ཅིག །རྒྱལ་བ་སྲས་དང་བཅས་པས་ཆེ་གེ་མོ་ལ་སོགས་པའི་སེམས་ཅན་ཐམས་ཅད་སྙིང་རྗེས་མི་གཏོང་ཞིང་ཐམས་ཅད་ཀྱང་ངོ་མཚར་བའི་འཇུག་པ་ལ་གནས་པར་གྱུར་ཅིག །དཀོན་མཆོག་གསུམ་གྱི་བདེན་པའི་བྱིན་གྱི་རླབས་ཀྱིས་དེ་བཞིན་དུ་གྲུབ་
[302b.7]པར་གྱུར་ཅིག །དེང་ཕྱོགས་བཅུ་དུས་གསུམ་དུ་བཞུགས་པའི་དེ་བཞིན་གཤེགས་པ་སྲས་དང་བཅས་པ་རྣམས་ཀྱི་སྤྱན་སྔར་མཐའ་ཡས་པའི་འགྲོ་བ་མ་ལུས་པའི་ཆེད་དུ་དུས་འདི་ནས་བཟུང་ནས། བླ་ན་མེད་པའི་བྱང་ཆུབ་ལ་མཆིས་ཀྱི་བར་དུ་འཁོར་བའི་རྒྱ་མཚོར་བྱིང་བའི་མཐའ་ཡས་པའི་
[303a]
[303a.1]འགྲོ་བ་མ་ལུས་པ་གདོན་པར་བྱ་བའི་ཕྱིར། ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བསླབས་པ་དང་། སློབ་པ་དང་། སློབ་པར་འགྱུར་བའི་སངས་རྒྱས་ཐམས་ཅད་ཀྱི་སྒྲིབ་པ་མེད་པར་རང་
[303a.2]བཞིན་ཐམས་ཅད་མཁྱེན་པ་ཉིད་ཡེ་ཤེས་ཀྱི་ཆོས་ཉིད་རྗེས་སུ་གཟིགས་ནས་བྱང་ཆུབ་ཏུ་ཐུགས་བསྐྱེད་པ་ལྟར། ཆེ་གེ་མོ་ལ་སོགས་པ་ཡང་དག་པར་རྫོགས་པའི་བྱང་ཆུབ་ཆེན་པོར་སེམས་བསྐྱེད་པར་བགྱིས་ཏེ། འཁོར་བའི་རྒྱ་མཚོ་ལས་སེམས་ཅན་མ་བསྒྲལ་བ་རྣམས་བསྒྲལ་
[303a.3]བ་དང་། མ་གྲོལ་བ་རྣམས་གྲོལ་བར་བྱ་བ་དང་། དབུགས་མ་ཕྱིན་པ་རྣམས་དབུགས་དབྱུང་བར་བྱ་བ་དང་། ཡོངས་སུ་མྱ་ངན་ལས་མ་འདས་པ་རྣམས་ཆོས་ཀྱི་དབྱིངས་སུ་ཡོངས་སུ་མྱ་ངན་ལས་འདའ་བར་བགྱིའོ། །སྡོམ་པའི་ཚུལ་ཁྲིམས་དང་། དགེ་བ་ཆོས་སྡུད་ཀྱི་ཚུལ་
[303a.4]ཁྲིམས་དང་། སེམས་ཅན་དོན་བྱེད་ཀྱི་ཚུལ་ཁྲིམས་ལ་ཡང་དག་པར་བསླབ་པར་བགྱིའོ་ཞེས་ལན་གསུམ་དུའོ། །དེ་ལྟར་རྒྱལ་བ་སྲས་དང་བཅས་པ་ཐམས་ཅད་ཀྱི་སྤྱན་སྔར་སེམས་བསྐྱེད་པ་མ་ལུས་པའི་འགྲོ་བ་རྣམས་བླ་ན་མེད་པའི་བྱང་ཆུབ་ལ་འགོད་པར་གྱུར་ཅིག །ཉོན་མོངས་
[303a.5]པའི་རྒྱ་མཚོ་ལས་སེམས་ཅན་མ་སྒྲོལ་བ་རྣམས་བདག་གིས་ཡོངས་སུ་སྒྲོལ་བར་གྱུར་ཅིག །སེམས་ཅན་ཐམས་ཅད་ལས་ཀྱི་ལུ་གུ་རྒྱུད་ལས་མ་སྒྲོལ་བ་རྣམས་བདག་གིས་སྒྲོལ་བར་བྱེད་པར་གྱུར་ཅིག །འཁོར་བའི་རྒྱ་མཚོ་དབའ་ཀློང་རབ་ཏུ་འཁྲུགས་པ་ལས་སེམས་ཅན་ཐམས་ཅད་དབུགས་
[303a.6]དབྱུང་བའི་གོ་སྐབས་མེད་པ་ལ་བདག་གིས་ཡོངས་སུ་དབུགས་འབྱིན་པར་གྱུར་ཅིག །སེམས་ཅན་ཐམས་ཅད་སྡུག་བསྔལ་རྒྱུ་དང་བཅས་པ་ལས་ཡོངས་སུ་མྱ་ངན་ལས་མ་འདས་པ་རྣམས་བདག་གིས་ཡོངས་སུ་མྱ་ངན་ལས་འདའ་བར་གྱུར་ཅིག །གཞན་ཡང་སེམས་ཅན་ཐམས་ཅད་བླ་ན་
[303a.7]མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་ཅིག །བྱང་ཆུབ་མ་ཐོབ་ཀྱི་བར་དུ་ཡང་ལྷ་དང་མིའི་རྟེན་ཕུན་སུམ་ཚོགས་པ་ཐོབ་པར་གྱུར་ཅིག །བྱང་ཆུབ་ཏུ་སེམས་བསྐྱེད་པ་དང་མི་འབྲལ་བར་གྱུར་ཅིག །བསོད་ནམས་དང་ཡེ་ཤེས་ཀྱི་ཚོགས་ཆེན་པོ་ཡོངས་སུ་འཕེལ་བའི་ཕ་རོལ་ཏུ་ཕྱིན་པ་
[303b]
[303b.1]དྲུག་སྒྲུབ་པ་ལ་ཡང་དག་པར་གནས་པར་གྱུར་ཅིག །དགེ་བའི་བཤེས་གཉེན་དམ་པ་དག་དང་འགྲོགས་པ་དང་མི་འབྲལ་བར་གྱུར་ཅིག །དེའི་གདམས་པ་དང་། རྗེས་སུ་གནང་བ་དང་བཅས་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱུང་བའི་སེམས་བསྐྱེད་ཉི་ཤུ་རྩ་གཉིས་ལམ་རྣམ་པ་ལྔའི་བདག་
[303b.2]ཉིད་རིམ་གྱིས་བགྲོད་པར་གྱུར་ཅིག །དེ་ལ་དང་པོ་ཚོགས་ཀྱི་ལམ་ལ་གནས་ཏེ་འདུན་པ་དང་བཅས་པའི་སེམས་བསྐྱེད་པ་ས་ལྟ་བུ་དང་། བསམ་པ་དང་ལྡན་པའི་སེམས་བསྐྱེད་པ་གསེར་ལྟ་བུ་དང་། ལྷག་པའི་བསམ་པ་དང་ལྡན་པའི་སེམས་བསྐྱེད་པ་ཟླ་བ་ཚེས་པ་ལྟ་བུ་ལ་སྤྱོད་ཅིང་གནས་པར་
[303b.3]གྱུར་ཅིག །དེས་ཞི་གནས་དང་། ལྷག་མཐོང་དང་། བསོད་ནམས་དང་ཡེ་ཤེས་ཀྱི་ཚོགས་འཕེལ་བས་འཇིག་རྟེན་ཕལ་པོ་ཆེ་ལས་ཁྱད་པར་དུ་འཕགས་པར་གྱུར་ཅིག །སེམས་བསྐྱེད་པ་མེ་ལྟ་བུས་ཉོན་མོངས་པའི་བུད་ཤིང་ཐམས་ཅད་བསྲེགས་ནས་ཐམས་ཅད་མྱ་ངན་ལས་འདས་པའི་རྒྱུར་
[303b.4]གྱུར་ནས། སྤོས་ཀྱི་གླང་པོ་ཆེ་ལ་དྲིལ་བུ་གཡེར་ཁས་བརྒྱན་པ་ལྟར་རྣལ་འབྱོར་པའི་སེམས་ལ་བརྒྱན་ཅིང་ཕྱུག་པར་གྱུར་ཅིག །མཐོང་ལམ་དུ་ས་དང་པོ་རབ་ཏུ་དགའ་བ་ལ་གནས་ཏེ། སྦྱིན་པའི་ཕ་རོལ་ཏུ་ཕྱིན་པ་དང་ལྡན་པའི་སེམས་བསྐྱེད་པ་གཏེར་ལྟ་བུ་ལ་སྤྱོད་ཅིང་གནས་པར་གྱུར་
[303b.5]ཅིག །ཚོགས་གཉིས་ཡོངས་སུ་རྫོགས་པའི་མཐུས་དེ་ཁོ་ན་ཉིད་མངོན་སུམ་དུ་རྟོགས་པར་བྱས་ཏེ་ཡང་དག་པའི་ལྟ་བ་ལ་སོགས་པས་རྣལ་འབྱོར་པའི་སེམས་ཡོངས་སུ་ཕྱུང་བར་ཡང་གྱུར་ཅིག །དེ་ནས་སྒོམ་པའི་ལམ་ལ་གནས་ཏེ། ས་གཉིས་པ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་
[303b.6]དང་ལྡན་པའི་སེམས་བསྐྱེད་པ་རིན་པོ་ཆེའི་འབྱུང་ཁུངས་ལྟ་བུ་ལ་གནས་པར་གྱུར་ཅིག །ས་གསུམ་པ་ལ་བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་སེམས་བསྐྱེད་པ་རྒྱ་མཚོ་ལྟ་བུ་ལ་སྤྱོད་ཅིང་གནས་པར་གྱུར་ཅིག །ས་བཞི་པ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་སེམས་བསྐྱེད་
[303b.7]པ་རྡོ་རྗེ་ལྟ་བུ་ལ་གནས་པར་གྱུར་ཅིག །ས་ལྔ་པ་ལ་བསམ་གཏན་གྱི་ཕ་རོལ་ཏུ་ཕྱིན་པ་དང་ལྡན་པའི་སེམས་བསྐྱེད་པ་རིའི་རྒྱལ་པོ་རི་རབ་ལྟ་བུ་ལ་གནས་པར་གྱུར་ཅིག །ས་དྲུག་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་སེམས་བསྐྱེད་པ་སྨན་པ་ལྟ་བུ་ལ་གནས་པར་གྱུར་ཅིག །ས་བདུན་
[304a]
[304a.1]པ་ལ་ཐབས་མཁས་པའི་ཕ་རོལ་ཏུ་ཕྱིན་པ་དང་ལྡན་པའི་སེམས་བསྐྱེད་པ་དགེ་བའི་བཤེས་གཉེན་ལྟ་བུ་ལ་གནས་པར་གྱུར་ཅིག །ས་བརྒྱད་པ་ལ་སྨོན་ལམ་གྱི་ཕ་རོལ་ཏུ་ཕྱིན་པ་དང་ལྡན་པའི་སེམས་བསྐྱེད་པ་ཡིད་བཞིན་གྱི་ནོར་བུ་རིན་པོ་ཆེ་ལྟ་བུ་ལ་གནས་པར་གྱུར་
[304a.2]ཅིག །ས་དགུ་པ་ལ་སྟོབས་ཀྱི་ཕ་རོལ་ཏུ་ཕྱིན་པ་དང་ལྡན་པའི་སེམས་བསྐྱེད་པ་ཉི་མའི་དཀྱིལ་འཁོར་ལྟ་བུ་ལ་གནས་པར་གྱུར་ཅིག །ས་བཅུ་པ་ལ་ཡེ་ཤེས་ཀྱི་ཕ་རོལ་ཏུ་ཕྱིན་པ་དང་ལྡན་པའི་སེམས་བསྐྱེད་པ་དབྱངས་སྙན་པ་དགེ་བའི་བཤེས་གཉེན་ལྟ་བུ་ལ་གནས་པར་གྱུར་ཅིག །དེ་ནས་
[304a.3]ཁྱད་པར་གྱི་ལས་ལ་གནས་ཏེ། མངོན་པར་ཤེས་པའི་མཐུ་ཐོགས་པ་མེད་པ་དང་ལྡན་པའི་སེམས་བསྐྱེད་པ་རྒྱལ་པོ་ལྟ་བུ་ལ་གནས་པར་གྱུར་ཅིག །བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་དང་ལྡན་པའི་སེམས་བསྐྱེད་པ་བང་མཛོད་ལྟ་བུ་ལ་གནས་པར་གྱུར་ཅིག །བྱང་
[304a.4]ཆུབ་ཀྱི་ཕྱོགས་དང་མཐུན་པའི་སེམས་བསྐྱེད་པ་ལམ་པོ་ཆེ་ལྟ་བུ་ལ་གནས་པར་གྱུར་ཅིག །སྙིང་རྗེ་དང་ལྷག་མཐོང་གི་སེམས་བསྐྱེད་པ་བཞོན་པ་བརྟན་པོ་ལྟ་བུ་ལ་གནས་པར་གྱུར་ཅིག །གཟུངས་དང་སྤོབས་པ་ཕུན་སུམ་ཚོགས་པ་དང་ལྡན་པའི་སེམས་བསྐྱེད་པ་བཀོད་མའི་ཆུ་
[304a.5]མིག་ལྟ་བུ་ལ་གནས་པར་གྱུར་ཅིག །དེ་ནས་མཐར་ཕྱིན་པའི་ལམ་ལ་གནས་ཏེ། ཆོས་ཀྱི་སྐྱེད་མོས་ཚལ་དང་ལྡན་པའི་སེམས་བསྐྱེད་པ་སྒྲ་དབྱངས་སྙན་པ་ལྟ་བུ་ལ་སྤྱོད་ཅིང་གནས་པར་གྱུར་ཅིག །བགྲོད་པ་གཅིག་པའི་ལམ་དང་ལྡན་པའི་སེམས་བསྐྱེད་པ་ཆུ་བོའི་རྒྱུན་ལྟ་བུ་ལ་སྤྱོད་ཅིང་
[304a.6]གནས་པར་གྱུར་ཅིག །ཆོས་ཀྱི་སྐུ་དང་ལྡན་པའི་སེམས་བསྐྱེད་པ་སྤྲིན་ལྟ་བུ་ལ་སྤྱོད་ཅིང་གནས་པར་གྱུར་ཅིག །གཞན་ཡང་བདག་གིས་སེམས་བསྐྱེད་པའི་དགེ་བའི་རྩ་བ་འདི་ལ་བརྟེན་ནས། འཇིག་རྟེན་གྱི་ཁམས་ཐམས་ཅད་ན་སེམས་ཅན་དམྱལ་བ་ཐམས་ཅད་རྒྱུན་ཆད་པར་གྱུར་
[304a.7]ཅིག །ཡི་དྭགས་ཀྱི་འགྲོ་བ་ཐམས་ཅད་རྒྱུན་ཆད་པར་གྱུར་ཅིག །དུད་འགྲོའི་སྐྱེ་གནས་ཐམས་ཅད་ཀྱང་རྒྱུན་ཆད་པར་གྱུར་ཅིག །མི་ཁོམ་པ་ཐམས་ཅད་རྒྱུན་ཆད་པར་གྱུར་ཅིག །ལྷ་དབུལ་པོ་དང་མི་དབུལ་པོ་ལ་སོགས་པ་མཐོ་རིས་ཀྱི་གནོད་པ་ཐམས་ཅད་རྒྱུན་ཆད་པར་གྱུར་
[304b]
[304b.1]ཅིག །སེར་སྣ་དང་འཆལ་བའི་ཚུལ་ཁྲིམས་དང་། གནོད་སེམས་དང་། ལེ་ལོ་དང་། རྣམ་པར་གཡེང་བ་དང་། འཆལ་བའི་ཤེས་རབ་རྒྱུན་ཆད་པར་གྱུར་ཅིག །འདོད་པ་ལ་འདུན་པ་ལ་སོགས་པའི་སྒྲིབ་པ་ལྔ་དང་བྲལ་བར་གྱུར་ཅིག །ཉོན་མོངས་པ་དང་། ལས་དང་། རྣམ་
[304b.2]པར་སྨིན་པའི་སྒྲིབ་པ་གསུམ་དང་བྲལ་བར་གྱུར་ཅིག །ཉོན་མོངས་པ་དང་། ཤེས་བྱའི་སྒྲིབ་པ་དང་བྲལ་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་ནས་འཇིག་རྟེན་གྱི་ཁམས་ན་སེམས་ཅན་ཞེས་བྱ་བའི་སྒྲ་མི་གྲག་པར་ཐམས་ཅད་ཀྱང་སངས་རྒྱས་འབའ་ཞིག་
[304b.3]གི་རང་བཞིན་དུ་གྱུར་ཅིག །འཇིག་རྟེན་འདིར་ཡང་ལོ་ཕྱུགས་རྟག་ཏུ་ལེགས་པ་དང་། མི་ནད་དང་ཕྱུགས་ནད་ཐམས་ཅད་རྒྱུན་ཆད་པར་གྱུར་ཅིག །འཐབ་པ་དང་། རྩོད་པ་ལ་སོགས་པ་ཐམས་ཅད་ཉེ་བར་ཞི་བར་གྱུར་ཅིག །ནད་དང་། གནོད་པ་དང་། དགྲ་དང་། བགེགས་
[304b.4]དང་། སྡིག་པ་དང་། གནོད་པ་ལ་སོགས་པ་ཐམས་ཅད་མི་འབྱུང་ཞིང་རྒྱུན་ཆད་པར་གྱུར་ཅིག །དཔལ་དང་། བཀྲ་ཤིས་དང་། བསོད་ནམས་དང་། དབང་ཐང་དང་། ཚེ་དང་། དངོས་གྲུབ་དང་། བདེ་ལེགས་ལ་སོགས་པ་ཡོན་ཏན་ཕུན་སུམ་ཚོགས་པ་ཐམས་ཅད་འཕེལ་ཞིང་
[304b.5]རྒྱས་པར་གྱུར་ཅིག །ནམ་འཆི་བའི་དུས་སུ་རང་གིས་ལེགས་པར་སྤྱད་པའི་ལས་ལ་གོམས་པ་ལྷུར་བྱས་ནས་རྣམ་པར་དཀར་བའི་ཆོས་དགའ་བདེ་ཐུན་མོང་མ་ཡིན་པ་ཐོབ་པར་གྱུར་ཅིག །དགའ་བདེ་དེས་རང་རྒྱུད་རྙོག་པ་དང་བྲལ་ནས། རང་གི་ཡི་དམ་གྱི་ལྷ་རྗེ་བཙུན་མ་སྒྲོལ་མ་
[304b.6]མངོན་སུམ་དུ་མཐོང་བར་གྱུར་ཅིག །མཐོང་ནས་ཀྱང་དེའི་གདམས་པ་དྲི་མ་མེད་པ་བདུད་རྩིའི་མཆོག་ལ་སྤྱོད་པ་དང་། ལུས་སེམས་ཚིམ་པར་གྱུར་ཅིག །ཤི་མ་ཐག་ཏུ་སྐྱེ་བ་གཞན་གྱིས་བར་མ་ཆོད་པ་གཡུ་ལོ་བརྒྱན་པའི་ཞིང་ཁམས་སུ་པདྨའི་སྡོང་པོ་ལ་རྫུས་ཏེ་སྐྱེས་ནས་སེམས་ཅན་གྱི་
[304b.7]ཁམས་དཔག་ཏུ་མེད་པ་སྒྲོལ་ནས་དཔལ་མགོན་དུ་གྱུར་ཅིག །དཀོན་མཆོག་གསུམ་གྱི་བདེན་པའི་བྱིན་གྱི་རླབས་ཀྱིས་དེ་བཞིན་དུ་གྱུར་ཅིག །དེ་ནས་རིན་པོ་ཆེ་ལ་སོགས་པའི་སྣོད་ཤིན་ཏུ་མཛེས་པའི་ནང་དུ་འབྲས་ལ་སོགས་པའི་ཁ་ཟས་སྣ་ཚོགས་པ་ལ་མེ་ཏོག་དང་འབྲས་བུ་ལ་སོགས་པས་བརྒྱན་
[305a]
[305a.1]པ་ལ་ཆ་གཉིས་པར་བྱས། སྐུ་གསུང་ཐུགས་ཀྱི་སྙིང་པོ་ལན་བདུན་བསྔགས་ནས། བྱིན་གྱིས་བརླབས་པ་ལ་པདྨ་ཁ་ཕྱེ་བའི་ཕྱག་རྒྱ་བྱས་ལ། སངས་རྒྱས་དང་བྱང་ཆུབ་སེམས་དཔའི་ཚོགས་མ་ལུས་པ་ལ་དབུལ་བའི་སྔགས་འདི་ལན་བདུན་བཟླས་ཏེ། ཁ་དོག་དང་། དྲི་
[305a.2]རོ་ཕུན་སུམ་ཚོགས་པ་ལ་དམིགས་ལ་དབུལ་བར་བྱའོ། །ཨོཾ་ན་མོ་བུདྡྷ་བོ་དྷི་ས་ཏྭཱ་ནཱཾ་ཨ་པྲ་ཏི་ཧ་ཏ་ཤཱ་ས་ནཱཾ་ཧེ་ཧེ་བྷ་ག་བ་ཏི་མ་ཧཱ་སཏཱ་བུདྷ་ཨ་བ་ལོ་ཀི་ཏེ་ཨི་དཾ་བ་ལིཾ་གྲྀཧྞ་གྲྀཧྞ། ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི་ཏིཥྛ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་ནས་འབྱུང་པོ་ཐམས་ཅད་ལ་དབུལ་བ་ནི། ཨོཾ་ཨ་ཀཱ་རོ་མུ་ཁཾ་
[305a.3]སརྦ་དྷརྨཱ་ཎཱཾ་ཨཱདྱ་ནུཏ་པནྣ་ཏྭཱཏ་ཨོཾ་ཨཱཿཧཱུཾ་སྭཱ་ཧཱ། ཨོཾ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། གརྫྫ་ཡ་གརྫྫ་ཡ། བི་སྥོ་ཊ་ཡ་བི་སྥོ་ཊ་ཡ་སརྦ་བིགྷྣཱན་བི་ན་ཡ་ཀ་མ་ཧཱ་ག་ན་པ་ཏི། ཛི་བི་ཏཱནྟ་ཀ་རཱ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། །དང་པོ་ནི་དེ་བཞིན་གཤེགས་པ་
[305a.4]སྲས་དང་བཅས་པ་རྣམས་ལ་དབུལ་བར་བྱ། གཉིས་པ་ནི་ཕྱོགས་སྐྱོང་བ་ལ་སོགས་པ་རྣམས་ལ་ཕུལ་ལ་ཕྲིན་ལས་སུ་གསོལ་བ་ནི། དེང་རྒྱལ་བ་སྲས་དང་བཅས་པ་རྣམས་ལ་སྐུ་གསུང་ཐུགས་ཀྱི་འཁྲུལ་པ་མི་མངའ་བ་ལྟར་ཆེ་གེ་མོ་ལ་སོགས་པ་མངའ་རིས་ཀྱི་འབངས་སུ་མཆིས་པ་
[305a.5]རྣམས་ལ་ལུས་ངག་ཡིད་གསུམ་གྱི་འཁྲུལ་པ་སྤང་བའི་ཕྱིར་བརྩེ་བས་གཟིགས་པར་མཛོད་ཅིག །རྒྱལ་བ་སྲས་དང་བཅས་པ་ལ་རྗེས་སུ་ཆགས་པ་དང་ཁོང་ཁྲོ་བ་མེད་པ་ལྟར་ཆེ་གེ་མོ་ལ་སོགས་པའི་འགྲོ་བ་མ་ལུས་པ་ལ་ཅ་ཅོ་མེད་པའི་ཆོས་སྟོན་པར་གྱུར་ཅིག །རྒྱལ་བ་སྲས་དང་བཅས་
[305a.6]པ་ལ་རྨོངས་པ་དང་བསྙེལ་བ་མེད་པས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་ལ་ཐོགས་པ་མེད་པ་ལྟར་ཆེ་གེ་མོ་ལ་སོགས་པའི་འགྲོ་བ་མ་ལུས་པ་ལ་བརྗེད་ངས་པར་མི་འགྱུར་བར་བྱ་བའི་ཕྱིར། རྗེས་སུ་གཟུང་དུ་གསོལ་ལོ། །རྒྱལ་བ་སྲས་དང་
[305a.7]བཅས་པ་རྣམས་ལ་ཆགས་པའམ། བཞེངས་པའམ། བཞུགས་པའམ། ཆོས་གསུངས་པ་ལ་སོགས་པ་གང་ལ་ཡང་བསམ་གཏན་དང་ལྡན་པ་ལྟར། ཆེ་གེ་མོ་ལ་སོགས་པའི་སེམས་ཅན་ཐམས་ཅད་ལ་ཏིང་ངེ་འཛིན་གྱི་སྒོ་དུ་མ་ལ་འཇུག་པའི་བྱིན་གྱི་རླབས་སུ་གཟིགས་པར་མཛོད་ཅིག །
[305b]
[305b.1]དེ་བཞིན་གཤེགས་པ་སྲས་དང་བཅས་པ་ལ་ཐ་དད་མེད་པའི་ཐུགས་ཆོས་ཀྱི་དབྱིངས་དབྱེར་མེད་ཅིང་མཉམ་པ་ཉིད་ཀྱི་ཡེ་ཤེས་ཀྱིས་འདོད་ཆགས་ལ་སོགས་པ་དང་བྲལ་བའི་ཕྱིར། ཆེ་གེ་མོ་ལ་སོགས་པའི་འགྲོ་བ་རྣམས་ལ་ཁོང་ཁྲོ་བ་མེད་པ་དང་། ལོག་པར་ངེས་པའི་སེམས་མེད་པ་
[305b.2]དང་། ཐ་དད་པའི་འདུ་ཤེས་སྤངས་པའི་ཕྱིར་རྗེས་སུ་འདུལ་བར་མཛོད་ཅིག །སངས་རྒྱས་དང་བྱང་ཆུབ་སེམས་དཔའ་རྣམས་ལ་གཏི་མུག་མེད་པའི་ཕྱིར་ཡེ་ཤེས་དང་ལྡན་པ་དང་། རྣམ་པར་ལྟུང་བ་མེད་པའི་ཕྱིར། འཇིག་རྟེན་ལས་འདས་པ་དང་། འཕགས་པ་མ་ཡིན་
[305b.3]པས་ངེས་པར་མི་འབྱུང་བའི་ཕྱིར། དེ་བཞིན་གཤེགས་པའི་བཏང་སྙོམས་འཕགས་པའི་ངེས་པར་འབྱུང་བ་དང་། རང་གི་ངང་གིས་གྲུབ་པས་གཉེན་པོའི་རྗེས་སུ་མ་སོང་བ་དང་། མ་བརྟགས་པ་དང་། མ་བསྒོམས་པ་མེད་པའི་ཕྱིར། ཆེ་གེ་མོ་ལ་སོགས་པ་འགྲོ་བ་མ་ལུས་པ་
[305b.4]རྣམས་ལ་མཐོན་དམན་མེད་པ་དང་། བཟང་བ་དང་། ངན་པ་མེད་པའི་བཏང་སྙོམས་ཕུན་སུམ་ཚོགས་པ་ཡང་ཡོངས་སུ་རྫོགས་པར་ཡང་མཛོད་ཅིག །རྒྱལ་བ་སྲས་དང་བཅས་པ་རྣམས་དགེ་བའི་ཆོས་ལ་འདུན་པ་སྟེ། དེ་ཡང་བྱམས་པ་ལ་འདུན་པ་དང་། སྙིང་རྗེ་དང་། ཆོས་དང་
[305b.5]སེམས་ཅན་ལ་འདུན་པ་དང་། བྱང་ཆུབ་སེམས་དཔའ་ཡང་དག་པར་འཛུད་པ་ལ་ཉམས་པ་མེད་པ་དང་། བརྩོན་འགྲུས་ཆེན་པོ་དང་ལྡན་པ་ལྟར་ཆེ་གེ་མོ་ལ་སོགས་པའི་མཐའ་ཡས་པའི་སེམས་ཅན་འགྲོ་བ་མ་ལུས་པ་རྣམས་ཀྱང་དཀོན་མཆོག་གསུམ་གྱི་གདུང་འཛིན་པ་དང་། དེ་བཞིན་
[305b.6]གཤེགས་པའི་ཡེ་ཤེས་སྔོན་དུ་འགྲོ་བའི་རང་བཞིན་གྱིས་སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཐམས་ཅད་མཁྱེན་པར་ཡོངས་སུ་རྫོགས་པར་བྱ་བའི་ཕྱིར་ཡེ་ཤེས་ཀྱི་སྤྱན་གྱིས་གཟིགས་སུ་གསོལ་ལོ། །དེ་བཞིན་གཤེགས་པ་སྲས་དང་བཅས་པ་རྣམས་ནི་སེམས་ཅན་ཐམས་ཅད་
[305b.7]ཡལ་བར་མི་འདོར་བ་དང་། ཆོས་ཐམས་ཅད་མཉམ་པ་ཉིད་དུ་གཟིགས་པས་གང་ལ་ཡང་ཉམས་པ་མེད་པ་དང་། ལུས་དང་སེམས་ཡང་དག་པར་སྦྱངས་པ་དང་། བརྩོན་འགྲུས་བརྩམས་པ་སྟེ། དེ་ལྟར་མངའ་རིས་ཀྱི་གདུལ་བྱ་རྣམས་ཀྱང་བརྩོན་འགྲུས་ལ་ཡང་དག་པར་རབ་ཏུ་སྦྱོར་བས་སེམས་
[306a]
[306a.1]ཅན་ཐམས་ཅད་འཕགས་པའི་རྣམ་པར་གྲོལ་བ་ཐོབ་པར་འགྱུར་བའི་ཕྱིར། སྣ་ཚོགས་པས་བརྩོན་འགྲུས་ཉམས་པ་མེད་པར་འབྱུང་བར་ཅི་གནང་། ཐུབ་པ་ཆེན་པོ་རྣམས་ལ་མངོན་པར་རྫོགས་པར་སངས་རྒྱས་མ་ཐག་ཏུ་འདས་པ་དང་། མ་འོངས་པ་དང་། ད་ལྟར་བྱུང་
[306a.2]བའི་སེམས་ཅན་གྱི་རྒྱུད་ལ་རྣམ་པར་བལྟས་ཀྱང་ཕྱིས་བརྗེད་པ་དང་། སེམས་ཅན་གྱི་ཕུང་པོ་ལ་འཇུག་པ་དང་། ཕུང་པོ་གསུམ་དུ་རྣམ་པར་གཞག་པ་དང་། སེམས་ཅན་གྱི་བསམ་པ་ལ་འཇུག་པ་དང་། སྤྱོད་པ་ལ་རྣམ་པར་ལྟ་བས་དྲན་པ་ཉམས་པ་མེད་པ་ལྟར། ཆེ་གེ་མོ་ལ་སོགས་པའི་
[306a.3]འགྲོ་བ་རྣམས་ལ་ཡང་དྲན་པར་བྱ་བ་དང་། བསམ་པར་བྱ་བ་དང་། བརྟག་པར་བྱ་བ་དང་། མི་བརྗེད་པའི་གཟུངས་ཀྱི་མཐུ་ཐོབ་པའི་ཕྲིན་ལས་གྲུབ་པར་མཛོད་ཅིག །དེང་རྒྱལ་བ་སྲས་དང་བཅས་པ་དེ་བཞིན་ཉིད་གང་དང་མཉམ་པ་ཉིད་དང་། ཏིང་འཛིན་ལ་ཞུགས་པས་མཐའ་དང་དབུས་
[306a.4]མི་དམིགས་པ་ལྟར་སེམས་ཅན་ཐམས་ཅད་ཀྱང་དེ་ལྟ་བུའི་ཏིང་ངེ་འཛིན་རྙེད་པར་མཁྱེན་པས་གཟིགས་ཤིག །གཞན་གྱི་དྲིང་མི་འཇོག་པ་དང་། སེམས་ཅན་གཞན་དང་། གང་ཟག་གཞན་ལ་ཆོས་གོ་བར་བྱེད་པ་དང་། སོ་སོ་ཡང་དག་པར་རིག་པ་མི་ཟད་པ་ལ་མཁས་པ་དང་།
[306a.5]ཚིག་ཐམས་ཅད་རབ་ཏུ་དབྱེ་བ་དང་། ཚིག་གཅིག་ལ་བསྐལ་པ་བརྒྱ་སྟོང་གི་བར་དུ་སྟོན་ཤེས་པ་དང་། དྲི་བ་ཇི་ལྟ་བ་བཞིན་དུ་ཐེ་ཚོམ་གཅོད་པ་དང་། ཐམས་ཅད་དུ་ཐོགས་པ་མེད་པ་དང་། སེམས་ཅན་ཐམས་ཅད་ཀྱི་ཁམས་དང་སྤྱོད་པ་ཤེས་པ་དང་། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཅི་
[306a.6]རིགས་པ་ལ་ཡང་དག་པར་སྟོན་པར་གྱུར་ཅིག །དེ་བཞིན་གཤེགས་པ་སྲས་དང་བཅས་པ་རྣམས་ཀྱི་ཐུགས་ཀྱིས་དགོངས་ནས། ཆེ་གེ་མོ་ལ་སོགས་པའི་འགྲོ་བ་མ་ལུས་པ་རྣམས་ལ་ཆགས་པ་དང་། གཉིས་སུ་འཛིན་པ་ཐམས་ཅད་དང་བྲལ་བའི་རྣམ་པར་གྲོལ་བ་བླ་ན་མེད་པ་ཡང་དག་པར་
[306a.7]རྫོགས་པའི་བྱང་ཆུབ་ཐོབ་པར་མཛོད་ཅིག །གཞན་ཡང་བདག་ཅག་ལ་སོགས་པའི་མངའ་རིས་རྣམས་ཀྱང་། མིང་དང་གཟུགས་དང་ལོངས་སྤྱོད་དང་། སྤྱོད་ལམ་དང་རིགས་ལ་སོགས་པ་གང་གིས་སེམས་ཅན་མ་ལུས་པ་འདུལ་བར་བྱེད་པའི་ཡེ་ཤེས་ཀྱི་རང་བཞིན་དུ་བརྩེ་བས་ཡོངས་སུ་ཁྱབ་
[306b]
[306b.1]པར་མཛོད་ཅིག །ཆེ་གེ་མོ་ལ་སོགས་པའི་འགྲོ་བ་མ་ལུས་པ་རྣམས་ཀྱང་ཤིན་ཏུ་ངེས་པའི་ཚིག་དང་ལྡན་ཏེ། འབྲས་བུ་རྒྱ་ཆེན་པོ་སྟོན་པའི་ཆོས་འཆད་པ་དང་ལྡན་པར་གྱུར་ཅིག །ངག་རྣམ་པར་དག་པས་ཀུན་ནས་ཤེས་པར་བྱེད་པ། གྱ་གྱུ་མེད་པ། མི་རྩུབ་པ། མཉེན་ཞིང་ཡིད་དུ་འོང་བ། མི་འཆབ་
[306b.2]པ། མི་འཚེ་བ། ཤིན་ཏུ་སྙན་པའི་དབྱངས་རབ་ཏུ་གསལ་བ། ངེས་པ། འཇམ་པ། ཕན་པ། དགའ་བ། བསྐྱེད་པ། མཛེས་པ། ཐོགས་པ་མེད་པ། ལུས་སེམས་ཚིམ་པར་བྱེད་པ་འདོད་ཆགས་ལ་སོགས་པ་ཞི་བར་བྱེད་པའི་རང་བཞིན་དུ་གྱུར་ཅིག །རྒྱལ་བ་སྲས་དང་བཅས་
[306b.3]པའི་བྱིན་གྱི་རླབས་ཀྱིས་ཆེ་གེ་མོ་ལ་སོགས་པའི་འགྲོ་བ་མ་ལུས་པ་རྣམས་ཀྱི་སེམས་ཀྱི་རྒྱུད་ཡོངས་སུ་དག་པས་དམིགས་པ་ལས་འདས་པ་ནམ་མཁའ་དང་མཚུངས་ཤིང་ཆོས་ཀྱི་དབྱིངས་དང་དབྱེར་མེད་པ་སྟེ། ཡེ་ཤེས་ཀྱི་རང་བཞིན་དུ་གྱུར་པར་མཛོད་ཅིག །དབང་པོ་ལ་སོགས་པའི་
[306b.4]ཕྱོགས་སྐྱོང་བ་རྣམས་ཀྱིས་ཆེ་གེ་མོ་ལ་སོགས་པའི་འགྲོ་བ་མ་ལུས་པ་རྣམས་ཀྱི་བར་དུ་གཅོད་པ་ཐམས་ཅད་ཞི་བར་བྱ་བའི་ཕྱིར། བསམ་པ་ཐམས་ཅད་ཡོངས་སུ་གྲུབ་པ་དང་། སངས་རྒྱས་ཀྱི་བསྟན་པ་དར་ཞིང་རྒྱས་པར་གྱུར་ཅིག །དམ་པའི་ཆོས་མི་ནུབ་པའི་རྒྱལ་མཚན་
[306b.5]ཕྱོགས་བཅུར་ཚུགས་ཤིག །དཀྱིལ་འཁོར་ཆེན་པོ་ལ་འཇུག་པ་རྣམས་ཀྱི་ཕྱི་དང་ནང་གི་བར་དུ་གཅོད་པ་ཐམས་ཅད་སོལ་ཞིག །ལམ་དང་སྒྲུབ་པའི་མི་མཐུན་པའི་རྐྱེན་ཐམས་ཅད་ཕྱིར་ཕྱོགས་པར་མཛོད་ཅིག །འཇིག་རྟེན་པ་ལ་བདེ་བ་དང་། ལོ་ལེགས་པ་དང་། ནོར་དང་།
[306b.6]ཕྱུགས་དང་། བང་མཛོད་འཕེལ་བར་མཛོད་ཅིག །གནས་དང་བདག་དང་རྣལ་འབྱོར་བསྲུང་བ་ལ་བརྩོན་པར་མཛོད་ཅིག །སངས་རྒྱས་རྣམས་ཀྱི་བཀའ་དྲིན་དྲན་པ་དང་། བྱང་ཆུབ་སེམས་དཔའ་རྣམས་ཀྱི་གསུང་ཉན་པ་དང་། སྒྲུབ་པ་པོའི་དམ་ལ་གནས་པར་མཛོད་ཅིག །དཀོན་མཆོག་
[306b.7]གསུམ་གྱི་བདེན་པའི་བྱིན་གྱི་རླབས་ཀྱིས་དེ་བཞིན་དུ་ཕྲིན་ལས་རྒྱས་པར་མཛོད་ཅིག །དེ་ནས་དེ་བཞིན་གཤེགས་པ་རྣམས་དང་། འཇིག་རྟེན་སྐྱོང་བ་ལ་སོགས་པ་རྣམས་ལ་རྫས་མ་ཚོགས་པ་དང་། ཆོ་ག་ལྷག་ཆད་ལ་སོགས་པའི་ཉེས་པ་ཐམས་ཅད་བཤགས་པར་བྱའོ། །ཅི་འདོད་
[307a]
[307a.1]པའི་དངོས་གྲུབ་ཞུས་ལ་འཁོར་ལོའི་དབང་ཕྱུག་ལ་མེ་ཏོག་གི་ཕྲེང་བ་དབུལ་ལོ། །ཆོ་ག་འདི་ནི་རབ་གནས་དང་། སྦྱིན་སྲེག་དང་། དབང་བསྐུར་བ་ལ་སོགས་པའི་བྱ་བ་ལ་སློབ་དཔོན་དང་སློབ་མར་བཅས་པའི་རྒྱུད་ཡོངས་སུ་དག་པར་བྱེད་པའོ། །དགོས་པའི་
[307a.2]དབང་གིས་མཆོད་པ་དང་། དཀྱིལ་འཁོར་མངོན་པར་འབྱུང་བའམ་བྱ་བ་ལ་ནི་སྔོན་དུ་མཚན་གྱིས་བསྟོད་པའི་དངོས་གཞི་སྟོང་ཕྲག་བརྒྱད་སྒྲོགས་པར་བྱའོ། །ཆོ་ག་དངོས་ལ་ཞུགས་པ་ན་ཡན་ལག་གི་ཁྱད་པར་རེ་རེ་ལ་ཡང་ཅི་ནུས་པའི་ཕྱག་བྱའོ། །ཤིན་ཏུ་རྒྱས་པ་བསྟན་ཟིན་ཏོ། །
[307a.3]མདོར་བསྡུས་པ་ལ་དགའ་བ་རྣམས་ལ་ཕྱག་ལ་སོགས་པ་བྱ་བ་དང་། སྔོན་གྱི་ཚིག་ལེའུར་བྱས་པ། ཕྱོགས་རྣམས་གཙང་ཞིང་མཉེན་པ་དང་། །ཀུན་དུ་དྲི་དང་ལྡན་གྱུར་པ། །བདེ་བ་ཅན་གྱི་ཞིང་ཁམས་ལྟར། །ས་གཞི་བྱིན་གྱིས་བརླབ་པར་བགྱིའོ། །ཕྱི་ནང་མ་བསྒྲིབས་གསལ་བ་དང་། །
[307a.4]རིན་ཆེན་རྣམས་ལས་གྲུབ་པ་ཡི། །ཐུབ་པའི་དབང་པོ་སྲས་བཅས་ཀྱི། །གཞལ་ཡས་ཁང་དུ་བྱིན་བརླབ་བོ། །བླ་མ་དཀྱིལ་འཁོར་ལྷ་ཚོགས་དང་། །ཕྱོགས་བཅུར་བཞུགས་པའི་སངས་རྒྱས་སྲས། །བཀའ་སྡོད་ཕྱོགས་སྐྱོང་མ་ལུས་པ། །དེ་རིང་སྤྱན་འདྲེན་གཤེགས་སུ་གསོལ། །
[307a.5]གཙང་ཞིང་དྲི་ཞིམ་བསིལ་བ་ཡི། །དྲི་ཆབ་བདུད་རྩིའི་རྒྱུན་ལྟ་བུས། །རྒྱལ་བ་སྲས་བཅས་མ་ལུས་པ། །ཆུ་གསུམ་གྱིས་ནི་མཉེས་པར་བགྱིའོ། །དུས་གསུམ་བཞུགས་པའི་བླ་མ་དང་། །རིན་ཆེན་གསུམ་ནི་ནམ་མཁའ་ལ། །ཏིལ་གྱི་གོང་བུ་ལྟར་དམིགས་ནས། །སྒོ་གསུམ་
[307a.6]གུས་པས་ཕྱག་འཚལ་ལོ། །མེ་ཏོག་ལ་སོགས་ཉེར་སྤྱོད་དང་། །རྒྱལ་སྲིད་བདུན་དང་གྲུབ་པའི་རྫས། །མཆོད་སྤྲིན་ནམ་མཁའ་གང་དམིགས་ཏེ། །འགྲོ་བ་བསྒྲལ་ཕྱིར་དབུལ་བར་བགྱིའོ། །བདག་དང་སེམས་ཅན་མཁའ་མཉམ་གྱིས། །ཐོག་མེད་དུས་ནས་ད་ལྟའི་བར། །
[307a.7]མ་ལུས་སྡིག་པ་ཅི་བགྱིས་པ། །ཤིན་ཏུ་འགྱོད་པས་བཤགས་པར་བགྱིའོ། །མངོན་མཐོ་ངེས་ལེགས་རྒྱུར་གྱུར་པའི། །སྐྱེ་བོས་དགེ་བ་གང་བགྱིས་དང་། །འཕགས་པའི་ཚོགས་ཀྱིས་གང་བགྱིས་ལ། །ལྷག་པར་སྤྲོ་བས་ཡི་རང་ངོ་། །སྒོ་གསུམ་བསྡམས་ཤིང་མི་དགེ་བཅོམ། །
[307b]
[307b.1]ཆེད་དུ་བྱ་བས་གཞན་དུ་བརྩོན། །ལམ་བདེ་ཚོགས་ཆུང་འཇུག་པ་ཟབ། །སྡོམ་པ་གསུམ་ལ་གནས་པར་བགྱི། །གཏང་བར་དཀའ་བའི་ལུས་འདི་ནི། །མགོན་དང་བདེ་གཤེགས་སྲས་བཅས་ལ། །བྲན་གཡོག་ཉིད་དུ་འབུལ་ལགས་ཀྱི། །དེང་ནས་ཁྱེད་ཀྱི་འབངས་སུ་མཆིས། །
[307b.2]རྒྱལ་སྲིད་བུ་དང་ཆུང་མ་དང་། །འབྲུ་དང་རྟ་གླང་བྲན་དུ་བཅས། །ས་གཞི་གསེར་སོགས་རིན་པོ་ཆེ། །གུས་པས་ཐུབ་མཆོག་རྣམས་ལ་མཆོད། །སྦྱིན་དང་ཚུལ་ཁྲིམས་སྡོམ་པ་དང་། །ཐོས་བསམ་ཚོགས་གཉིས་ཅི་བསགས་པ། །དུས་གསུམ་བསྡུས་པའི་དགེ་བ་གང་། །ཐུབ་པ་
[307b.3]ཆོས་ཀྱི་སྤྱན་ལ་དབུལ། །སྒེག་འཛུམ་ལྡེམ་ཞིང་བརྗིད་པ་དང་། །རྔམ་ཞིང་ཁྲོས་པ་ཁྲོ་བོའི་གཟུགས། །སྲས་བཅས་སྐུ་ཡི་དཀྱིལ་འཁོར་ལ། །དད་པས་མིག་མི་འཛུམས་པར་བལྟའོ། །སངས་རྒྱས་བྱང་ཆུབ་མ་ལུས་པའི། །ཚེ་དང་ཡོན་ཏན་མཐུ་སྟོབས་དང་། །སྐུ་གསུམ་
[307b.4]མཛད་པ་མ་ལུས་ལ། །དབྱངས་སྙན་ངག་གིས་བསྟོད་པར་བགྱིའོ། །བླ་མ་རྡོ་རྗེ་སློབ་དཔོན་དང་། །ཡི་དམ་དཀྱིལ་འཁོར་ལྷ་ཚོགས་ཏེ། །སངས་རྒྱས་ཆོས་དང་དགེ་འདུན་ལ། །རྟག་ཏུ་གུས་པས་སྐྱབས་སུ་མཆི། །རྒྱལ་བ་བྱང་ཆུབ་མཆོག་བརྙེས་ནས། །ཅུང་ཟད་སྙོམས་པར་བཞུགས་
[307b.5]པ་ལ། །ཚངས་པ་ལྟ་བུས་གུས་པ་ཡིས། །ཆོས་ཀྱི་འཁོར་ལོ་བསྐོར་བར་བསྐུལ། །བྱང་ཆུབ་མཛད་པ་མཐར་ཕྱིན་ནས། །བདེ་གཤེགས་མྱ་ངན་འདའ་བཞེད་པ། །ཇི་སྲིད་འཁོར་བ་མཐའ་ཡོད་པ། །སེམས་ཅན་དོན་དུ་བཞུགས་པར་གསོལ། །ཇི་ལྟར་སྔོན་གྱི་སྐྱོབ་པ་ཡིས། །བྱང་ཆུབ་
[307b.6]སེམས་ནི་བསྐྱེད་པ་ལྟར། །དེ་བཞིན་བདག་ཀྱང་སེམས་ཅན་ཕྱིར། །བྱང་ཆུབ་ཆེན་པོར་སེམས་བསྐྱེད་དོ། །རྒྱལ་སྲས་འཇིག་རྟེན་སྐྱོང་རྣམས་ལ། །སྐུ་གསུམ་གྲུབ་དང་རིག་པ་འཛིན། །ལས་ཚོགས་ཕྲིན་ལས་རྣམ་དབྱེ་སོགས། །ལས་བཅོལ་དེ་ནི་གྲུབ་པར་མཛོད། །འདིར་ནི་ཉེས་པ་གང་བྱས་
[307b.7]པ། །གང་ཡང་ལུས་ཅན་སྐྱབས་གྱུར་པ། །མ་འཚལ་བ་རྣམས་བཤགས་པར་བགྱི། །གཙོ་བོས་ཅི་ནས་བཀའ་གནང་འཚལ། །འབྲས་བུ་མཆོག་དང་ཐུན་མོང་སྟེ། །མ་ནོར་ཚིག་དོན་ཤེས་རབ་དང་། །སྤོབས་པ་མཐུ་རྩལ་ཕུན་ཚོགས་པའི། །དངོས་གྲུབ་དེ་དག་གནང་བར་རིགས། །དུས་
[308a]
[308a.1]གསུམ་བསགས་པའི་དགེ་བ་ནི། །ཚོགས་གཉིས་བདུད་རྩི་ལྟ་བུ་འདིས། །སྐུ་གསུམ་འབྲས་བུ་གྲུབ་གྱུར་ནས། །གཞན་དོན་འབད་མེད་འབྱུང་བར་ཤོག །དེ་ལྟར་བྱ་བ་མ་ལུས་མཐར་ཕྱིན་ནས་དཀྱིལ་འཁོར་ལ་འཇུག་པའམ། དཀྱིལ་འཁོར་གཤེགས་སུ་གསོལ་བར་
[308a.2]བྱའོ། །ཡི་གེ་བརྒྱ་པ་ཅི་ནུས་པ་བཟླས་པར་བྱའོ། །ཕོངས་པ་རྣམས་མགུ་བ་དང་། གཞི་བདག་ལ་གཏོར་མ་སྦྱིན་པར་བྱའོ། །ལྷ་ཐམས་ཅད་ལ་མཆོད་པ་ལྷ་གྲངས་དང་མཉམ་པར་བྱས་པས་མཆོད་པའོ། །དཀྱིལ་འཁོར་ལ་འཇུག་དྲི་མེད་ཆོ་ག་འདིས། །འགྲོ་རྣམས་མུན་པ་
[308a.3]བསལ་ནས་དཀྱིལ་འཁོར་དུ། །མ་ལུས་ཞུགས་ནས་བདེ་ཆེན་དོན་རྟོགས་ཏེ། །བདེ་བ་ཅན་གྱི་ཞིང་དུ་མྱུར་བགྲོད་ཤོག། །རྗེ་བཙུན་མ་འཕགས་མ་སྒྲོལ་མའི་དཀྱིལ་འཁོར་དུ་འཇུག་པའི་ཆོ་ག་ཞེས་བྱ་བ། དངོས་གྲུབ་བརྙེས་པའི་སློབ་དཔོན་ཆེན་པོ་བྷ་བ་བྷ་ཊས་མཛད་པ་རྫོགས་སོ།། །།
[308a.4]མ་ཧཱ་པཎྜི་ཏ་ཤྲཱི་བི་མ་ལ་ཀཱིརྟིའི་ཞལ་སྔ་ནས་དང་། ལོ་ཙཱ་བ་ཤཱཀྱའི་དགེ་སློང་རྡོ་རྗེ་འཛིན་པ་ཞང་གྲུབ་པ་དཔལ་བཟང་པོས་བལ་པོའི་གྲོང་ཁྱེར་ཡམ་བུའི་ནུབ་ཕྱོགས་ཉི་མའི་གཙུག་ལག་ཁང་དུ་བསྒྱུར་ཅིང་ཞུས་ནས་གཏན་ལ་ཕབ་པའོ།། {T3676}༄༅༅། །རྒྱ་གར་སྐད་དུ། ཙིནྟ་མ་ཎི་ཏཱ་རཱ་
[308a.5]སཱ་དྷ་ན་ནཱ་མ། བོད་སྐད་དུ། སྒྲོལ་མ་ཡིད་བཞིན་ནོར་བུ་ཞེས་བྱ་བའི་སྒྲུབ་ཐབས། རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཡིད་བཞིན་ནོར་བུ་ཞེས་བྱ་བས། །ཚེ་དང་ལོངས་སྤྱོད་འཕེལ་བ་དང་། །གཞན་ཡང་འདོད་པ་སྒྲུབ་བྱེད་པ། །སྒྲོལ་མ་ལ་བཏུད་སྒྲུབ་ཐབས་བྲི། །
[308a.6]སྔོན་དུ་གསུངས་པའི་རིམ་པས་རང་གི་སེམས་ཉིད་ཏཱཾ་གསེར་བཙོ་མའི་ཁ་དོག་ལྟ་བུར་བལྟ་སྟེ། འོད་ཟེར་སྤྲོས་བསྡུས་ནས་ཡོངས་སུ་གྱུར་པ་ལས་རིན་པོ་ཆེ་ཏཱཾ་གིས་མཚན་པ་བསམ། དེ་ལ་ཡང་སྤྲོ་བསྡུ་བྱས་ཏེ་གྱུར་པ་ལས་བདག་ཉིད་སྒྲོལ་མ་གསེར་བཙོ་མའི་མདོག་ལྟ་བུ་ལ་ཞལ་གཅིག་མ།
[308a.7]ཕྱག་གཉིས་མ་པདྨ་དང་ཉི་མ་ལ་ཞབས་སྒེག་པའི་གར་སྟབས་ཀྱིས་བཞུགས་པ། རིན་པོ་ཆེ་སྣ་ཚོགས་ཀྱི་རྒྱན་ཅན་ཕྱག་གཡས་ཀྱིས་རིན་པོ་ཆེ་བརླའི་ཐད་ཀར་བཟུང་བ། དཔག་བསམ་གྱི་ཤིང་ལ་རྒྱབ་བརྟེན་པའི་ཡལ་ག་ཕྱག་གཡོན་གྱིས་བཟུང་བ། དེའི་ཐུགས་ཀར་རིན་པོ་ཆེ་ཧཱུཾ་གིས་མཚན་པར་
[308b]
[308b.1]བསམས། ཕྱག་མཚན་དང་ས་བོན་ལས་འོད་འཕྲོས་པས་སེམས་ཅན་ཐམས་ཅད་ཀྱི་དབུལ་བའི་སྡུག་བསྔལ་བསལ་ཏེ་ཚུར་འདུས་པས་རང་གི་སྐུ་གསལ་བཏབ་ཅིང་སླར་ཐུགས་ཀ་ནས་འོད་འཕྲོས་པས་ཡེ་ཤེས་པ་གཞུག་པ་དང་། དབང་བསྐུར་བ་བྱ་སྟེ། རིན་ཆེན་འབྱུང་ལྡན་གྱིས་རྒྱས་
[308b.2]གདབ་པོ། །སྔ་མ་ལྟར་འོད་སྤྲོ་ཞིང་བསྡུ་བས་སྐུ་གསལ་བཏབ་ཅིང་མི་བསྐྱོད་པའི་བར་དུ་བསྒོམ་མོ། །སྐྱོ་བར་གྱུར་ན་བཟླས་པ་བྱ་སྟེ་རང་གི་ས་བོན་དང་སྔགས་ལས་འཕྲོས་པའི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་རྒྱུད་བསྐུལ་ཏེ། འབྲུ་དང་རིན་པོ་ཆེ་ལ་སོགས་པ་འདོད་
[308b.3]པའི་ཡོན་ཏན་ཐམས་ཅད་ཀྱི་ཆར་འབབ་པར་བསམ་ཞིང་ངག་ཏུ་ཨོཾ་ཏཱ་རེ་ཏུཏྟཱ་རེ་ཏུ་རེ་ཙིནྟ་མ་ཎི་དྷརྦྷྱ་བིརྦྷྱ་སྭཱ་ཧཱ། དེ་ལས་སྐྱོ་ན་ཡེ་ཤེས་པ་གཤེགས་ཏེ་དམ་ཚིག་པ་མི་དམིགས་པར་བྱའོ། །དགེ་བ་བསྔོའོ། །སྒྲོལ་མ་ཡིད་བཞིན་ནོར་བུའི་སྒྲུབ་ཐབས། དངོས་གྲུབ་བརྙེས་པའི་སློབ་དཔོན་བྷ་བ་
[308b.4]བྷ་ཊས་མཛད་པ་རྫོགས་སོ།། {T3677}༄༅༅། །རྒྱ་གར་སྐད་དུ། ཏཱ་རཱ་ཊོ་བ་བི་དྷིཿ། བོད་སྐད་དུ། སྒྲོལ་མའི་ཁྲུས་ཀྱི་ཆོ་ག །རྗེ་བཙུན་མ་སྒྲོལ་མ་ལ་ཕྱག་འཚལ་ལོ། །ཁྲུས་ཀྱི་ཆོ་ག་ལ་གསུམ་སྟེ། སྦྱོར་བ་དང་། དངོས་གཞི་དང་། རྗེས་སོ། །དང་པོ་ནི་གནས་ཡིད་དང་
[308b.5]མཐུན་པར་ཕྱག་དར་ལ་སོགས་པ་བྱས་ཏེ། བུམ་པ་མཚན་ཉིད་དང་ལྡན་པར་རྫས་གཞན་དང་མཐུན་པར་བསགས་ཏེ། ཤེལ་མེད་དུ་མི་རུང་མཆོད་པ་རྣམས་སྟ་གོན་བྱའོ། །དངོས་གཞི་ནི་སྔོན་དུ་གསུངས་པའི་རིམ་པ་སྟོང་པའི་ངང་ལས་སེམས་ཉིད་ཏཱཾ་དཀར་པོར་བལྟའོ། །དེ་ལས་འོད་
[308b.6]འཕྲོས་བསྡུས་ནས་བདག་ཉིད་སྒྲོལ་མ་མདོག་དཀར་མོ་པདྨ་དང་ཟླ་བ་ལ་རྡོ་རྗེ་སྐྱིལ་ཀྲུང་གིས་བཞུགས་པ། ཞལ་གཅིག་ཕྱག་གཉིས་མཉམ་གཞག་གི་སྟེང་ན་བདུད་རྩིའི་བུམ་པ་བསྣམས་པ། རིན་པོ་ཆེ་སྣ་ཚོགས་ཀྱི་རྒྱན་དང་ལྡན་པ་འོད་འཕྲོ་བ་དང་བཅས་པའི་སངས་རྒྱས་ལྔའི་དབུ་རྒྱན་ཅན་དུ་
[308b.7]བསྐྱེད་པར་བྱའོ། །བུམ་པ་ཡང་མི་དམིགས་པ་ལས་ཕྱི་བུམ་པ་ལ་ནང་རིན་པོ་ཆེའི་གཞལ་ཡས་ཁང་བཅུད་བདུད་རྩིའི་རྒྱ་མཚོའི་དབུས་སུ་པདྨའི་པ་དྲའི་སྡོང་པོ་ལ་རང་འདྲ་བའི་དམ་ཚིག་སེམས་དཔའ་བསྐྱེད། དེའི་མདུན་ན་ལས་ཀྱི་ཁྲོ་བོ་བདུད་རྩི་འཁྱིལ་པ་དམར་སེར་བཞེངས་པ།
[309a]
[309a.1]ཞལ་གཅིག་ཕྱག་གཉིས་པའི་ཐལ་མོ་སྦྱར་བའི་དབུས་ན་རིན་པོ་ཆེའི་བུམ་པ་བདུད་རྩི་འབབ་པ་བསྣམས་པ། ཞི་མ་ཁྲོ་གཙོ་མོ་ལ་བལྟ་བ་བསམ་མོ། དེ་དག་ལ་ཡེ་ཤེས་པ་གཞུག་དབང་བསྐུར་རྒྱས་གདབ། དེ་ནས་རྡོ་རྗེ་གཟུངས་ཐག་དང་བཅས་པ་བུམ་པའི་སྟེང་དུ་
[309a.2]བཞག་རང་དང་བུམ་པའི་ལྷ་གཉིས་ཀའི་ཐུགས་ཀར་ཟླ་བ་ལ་ས་བོན་དང་བཟླས་པའི་སྔགས་བསམས་ཏེ། རང་གིས་གཟུངས་ཐག་བཟུང་ནས་ངག་ཏུ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མྲྀ་ཏ་ཀུཎྜ་ལི་ཧ་ན་ཧ་ན། ད་ཧ་ད་ཧ། པ་ཙ་པ་ཙ། སརྦ་པཱ་པཾ་ཧཱུཾ་ཕཊ་སྭཱ་ཧཱ། ཞེས་བརྗོད་པས་སྔགས་གཟུངས་ཐག་ལ་འཁྲིལ་
[309a.3]ནས་བུམ་པའི་ལྷ་གཉིས་པོའི་ཐུགས་ཀར་ཕོག་དེ་ལས་འོད་འཕྲོས་དེ་བཞིན་གཤེགས་པའི་ཐུགས་བསྐུལ། ཡེ་ཤེས་ཀྱི་བདུད་རྩི་སྤྱན་དྲངས་ལྷ་གཉིས་པོའི་བུམ་པ་ལ་ཕོག་བདུད་རྩི་ལུད་འོག་གི་བདུད་རྩི་དང་དབྱེར་མེད་དུ་བསམ་མོ། །དེ་ལྟར་གསོ་སྦྱོང་ལ་གནས་པ་དུས་ནི་ཚེས་
[309a.4]བརྒྱད་ནས་ཕ་རོལ་གྱི་ཚེས་བརྒྱད་ཀྱི་བར་རམ། གྲངས་ནི་སུམ་འབུམ་མོ། །རྟགས་ནི་ཆུ་ཁོལ་བ་ལ་སོགས་པ་དང་ལྷའི་ཞལ་མཐོང་བའོ། །རྗེས་ལ་ཡེ་ཤེས་པ་གཤེགས་ཏེ་དམ་ཚིག་པ་རང་ལ་བསྡུས་ནས་རང་ལྷའི་ང་རྒྱལ་གྱིས་རང་གཞན་ཆུ་དེས་བཀྲུས་ནས་སྡིག་པ་ལ་སོགས་
[309a.5]ཏེ་མི་མཐུན་པ་ཐམས་ཅད་ཞི་བར་འགྱུར་རོ། །ས་ཕྱོགས་ཀུན་དུ་གཏོར་ན་ཡང་ནད་ཞི་བར་འགྱུར་རོ། །ཕྱུགས་ལ་གཏོར་ན་ཕྱུགས་ནད་ཞི་བར་འགྱུར་རོ། །མེ་ལ་སོགས་པའི་འཇིགས་པ་ལ་གཏོར་ན་འཇིགས་པ་ཐམས་ཅད་སྤོང་ངོ་། །སྒྲོལ་མའི་ཁྲུས་ཀྱི་ཆོ་ག་སློབ་དཔོན་ཆེན་པོ་བྷ་ཝ་བྷ་
[309a.6]ཊས་མཛད་པ་རྫོགས་སོ།། {T3678}༄༅༅། །རྒྱ་གར་སྐད་དུ། པཽ་ཤ་ཏ་བི་དྷིཿ། བོད་སྐད་དུ། གསོ་སྦྱོང་གི་ཆོ་ག །རྗེ་བཙུན་མ་ལ་ཕྱག་འཚལ་ལོ། །བཅོམ་ལྡན་འདས་མའི་སྐུ་གཟུགས་མདུན་དུ་བཞུགས་ལ་སེམས་བསྐྱེད་བྱ། པོ་ཏ་ལ་ནས་སྤྱན་དྲངས་པའི་བཅོམ་ལྡན་འདས་མ་
[309a.7]དང་སྐུ་གཟུགས་གཉིས་སུ་མེད་པར་བསམ། ཡན་ལག་སྨད་ལྔ་ཁྲུས་བྱས་ལ་བཅོམ་ལྡན་འདས་མ་འཁོར་དང་བཅས་པའི་ཞབས་ལ་གཏུགས་པའི་ཕྱག་བྱ། དངོས་སམ་ཡིད་ཀྱིས་མཆོད་པ་འབུལ། བསྟོད་པ་གང་ཡང་རུང་བ་ཚར་གསུམ་བསྒྲགས། །སྐུ་གསུང་ཐུགས་མཉེས་པར་བྱ་བའི་
[309b]
[309b.1]ཕྱིར། རྩ་བའི་སྙིང་པོ་བརྒྱ་རྩ་བརྒྱད་བགྲང་། སྡིག་པ་ལ་སོགས་བཤགས་པའི་ཡན་ལག་གཞན་ཡང་བྱས་ལ། ལུས་ཙོག་ཙོག་པོར་འདུག་ལ་མེ་ཏོག་དང་བཅས་པའི་ཐལ་མོ་སྦྱར་ཏེ། ཆོ་ག་འདི་ལན་གསུམ་བརྗོད་པས་གསོ་སྦྱོང་རང་གིས་བླངས་པར་འགྱུར་ཏེ། ཕྱོགས་བཅུ་ན་བཞུགས་
[309b.2]པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། མགོན་པོ་ཐུགས་རྗེ་ཆེན་པོ་དང་ལྡན་པ་འཕགས་པ་སྤྱན་རས་གཟིགས་བདག་ལ་དགོངས་སུ་གསོལ། བཅོམ་ལྡན་འདས་མ་སྒྲོལ་མ་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་
[309b.3]རྫོགས་པའི་སངས་རྒྱས་རྣམས་དང་། ས་ཆེན་པོ་དང་ལམ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དང་། བདེ་བར་བྱ་བའི་ཕྱིར་དང་། ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་
[309b.4]པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་ཡོངས་སུ་རྫོགས་པར་བྱ་བའི་ཕྱིར་གསོ་སྦྱོང་ངེས་པར་བྱ་སྟེ། ཡང་དག་པར་བླངས་པ་དེ་བཞིན་དུ། བདག་མིང་འདི་ཞེས་བྱ་བས་ཀྱང་། དུས་ད་ནས་བཟུང་ནས་གདུགས་རྩེ་ཤར་གྱི་བར་དུ།
[309b.5]སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དང་། བདེ་བར་བྱ་བའི་ཕྱིར་དང་། ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་ཡོངས་སུ་རྫོགས་པར་བྱ་བའི་ཕྱིར་གསོ་
[309b.6]སྦྱོང་ངེས་པར་བྱ་སྟེ། ཡང་དག་པར་བླང་བར་བགྱིའོ། །དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་སྤྱད་དེ། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་མཉམ་བསྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་མཐོན་པོ་
[309b.7]མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་དང་ནི་རྒྱན། །གར་དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་པ། །དེ་ལྟར་སྲོག་གཅོད་ལ་སོགས་སྤོང་། །བླ་མེད་བྱང་ཆུབ་ཐོབ་པར་ཤོག། །སྡུག་བསྔལ་མང་དཀྲུགས་སེམས་
[310a]
[310a.1]ཅན་རྣམས། །སྲིད་པའི་མཚོ་ལས་སྒྲོལ་བར་ཤོག །ཅེས་བརྗོད་དོ། །བའི་ལྕི་བའི་དཀྱིལ་འཁོར་དབུས་སུ་བཅོམ་ལྡན་འདས་མ་ལ་མཆོད་ཅིང་སྨྱུང་བར་གནས་པས་བསྒྲུབ་པ་དང་བསྟོད་པ་ལ་སོགས་པ་བྱས་ན་མཚམས་མེད་པ་ལྔའི་ལས་བྱས་པ་ཡང་ངེས་པར་བྱང་བར་
[310a.2]འགྱུར་རོ། །སྐུ་དངོས་སུ་མཐོང་བ་ལ་སོགས་པའི་ཡོན་ཏན་མཐའ་མེད་པ་ལ་སོགས་པ་འཛིན་པར་འགྱུར་རོ། །དུས་ནི་ཡར་ངོའི་ཚེས་བརྒྱད་ཡིན་ནོ། །དཀར་གསུམ་དང་དུས་ཅུང་ཟད་ཐུང་བ་ལ་སོགས་པ་ཅི་རིགས་པས་ཀྱང་བཏུབ་བོ། །གསོ་སྦྱོང་རང་གིས་བླང་བའི་ཆོ་ག་རྫོགས་སོ།། །།
[310a.3]སྒྲོལ་མའི་དངོས་གྲུབ་བརྙེས་པའི་སློབ་དཔོན་བྷ་ཝ་བྷ་ཊས་མཛད་པའོ། །མ་ཧཱ་པཎྜི་ཏ་ཤྲཱི་རཏྣ་རཀྵི་ཏ་དང་། ལོ་ཙཱ་བ་ཞང་གྲུབ་པ་དཔལ་བཟང་པོས་བསྒྱུར་བའོ།། {T3679}༄༅༅། །རྒྱ་གར་སྐད་དུ། ཏཱ་ར་མཎྜལ་བིདྷིཿ། བོད་སྐད་དུ། སྒྲོལ་མའི་མཎྜལ་གྱི་ཆོ་ག །རྗེ་བཙུན་མ་སྒྲོལ་
[310a.4]མ་ལ་ཕྱག་འཚལ་ལོ། །སྔགས་ཡོངས་སུ་དག་པ་དང་། སྒྲིབ་པ་ཟད་པར་འགྱུར་བ་དང་། དངོས་གྲུབ་མྱུར་དུ་ཐོབ་པར་འདོད་པས་མཎྜལ་གྱི་ཆོ་ག་ལ་བརྩོན་པར་བྱའོ། །སྔགས་པས་ཡན་ལག་ལྔ་བཀྲུས་ཏེ་ཁྱོར་བར་ཆུ་ཅུང་ཟད་བླུགས་ལ་ངག་ཏུ་ཨོཾ་ཨཱཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་
[310a.5]ཡེ་ཧཱུཾ་ཞེས་བརྗོད་ནས་རང་གི་སྤྱི་བོར་བླུགས་པས་རང་ལྷ་དང་སྤྱི་གཙུག་གི་དབང་རྟགས་དྲན་པར་བྱའོ། །དེ་ནས་མེ་ཏོག་ལ་ལག་པ་བཀབ་སྟེ་ངག་ཏུ། ཨོཾ་ན་མོ་བྷ་ག་བ་ཏེ་པུཥྤེ་ཀེ་ཏུ་རཱ་ཛཱ་ཡ་ཏ་ཐཱ་ག་ཏཱ་ཡ་ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་པུཥྤེ་པུཥྤེ་མ་ཧཱ་པུཥྤེ། སུ་པུཥྤེ་པུཥྤོཏྦྷ་བེ། པུཥྤེ་བཱ་ཀཱིརྞྞ་
[310a.6]སྭཱ་ཧཱ། ཞེས་བརྗོད་པས་མེ་ཏོག་བྱིན་གྱིས་བརླབ་པོ། །དེ་ནས་ཆུ་ཅུང་ཟད་བླངས་ཏེ་ངག་ཏུ་ཨོཾ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་ཅེས་པས་གནས་དང་བདག་བསྲུང་བར་བྱའོ། །དེ་ནས་ཨོཾ་ཨཱཿབཛྲ་བྷཱུ་མེ་ཧཱུཾ་འདིས་མཎྜལ་བསྲུང་བར་བྱའོ། །ཨོཾ་ཨཱཿབཛྲ་རེ་ཁེ་ཧཱུཾ་འདིས་མཎྜལ་བྱུག་པར་བྱའོ། །ལག་པ་དེའི་རྒྱབ་ཏུ་
[310a.7]མེ་ཏོག་བཟུང་སྟེ་མཎྜལ་གྱི་དབུས་སུ་བཞག་པས་བསྲུང་བར་བྱའོ། །དེ་ནས་ཨོཾ་ཨཱཿཧཱུཾ་གིས་མེ་ཏོག་དང་བཅས་པའི་ལག་པས་རང་གི་གནས་གསུམ་བྱིན་གྱིས་བརླབ་བོ། །དེ་ནས་མེ་ཏོག་གཅིག་བཟུང་སྟེ་ཨོཾ་སརྦ་བིགྷྣཱཾ་སོ་ར་ཡ་ཧཱུཾ་སྭཱ་ཧཱ། ཞེས་པ་མཎྜལ་ལ་བསྐོར་ཞིང་བོར་བས་བགེགས་དང་བྲལ་བར་
[310b]
[310b.1]བྱའོ། །དེ་ནས་སྐད་ཅིག་ལ་མཎྜལ་མི་དམིགས་པ་ལས་རིན་པོ་ཆེའི་གཞལ་ཡས་ཁང་དུ་བསམ་པའི་ནང་དུ་མེ་ཏོག་བཟུང་སྟེ། ཨོཾ་ཙནྡྲ་ཨརྐ་བི་མ་ཎི་བྷྱ་སྭཱ་ཧཱ། ཞེས་མེ་ཏོག་མཎྜལ་གྱི་དབུས་སུ་བཞག་པས་སྐད་ཅིག་ལ་སྒྲོལ་མ་ལྷ་བཅུ་གསུམ་མམ་བཅོ་ལྔ་ལ་སོགས་པ་བསྐྱེད་པར་བྱའོ། །དེ་
[310b.2]རྣམས་ལ་ཨོཾ་ཨཱཿཧཱུཾ་ཞེས་མེ་ཏོག་བླངས་ཏེ་གཏོར་བས་ཡེ་ཤེས་པ་དབང་དུ་བྱས་པར་བསྒོམ། དེ་ནས་ཞབས་བསིལ་དང་། བསང་ཆུ་གསུམ་ནི་ཨོཾ་པྲ་བ་ར་སཏྐཱ་ར་པྲ་ཏཱིཙྪ་ཡེ་དང་། ཨོཾ་ཨཉྩ་མཱ་ནཾ་དང་། ཨོཾ་བྲོ་ཀྵ་ཎཾ་སྭཱ་ཧཱ། ཞེས་པས་རིམ་པ་ལྟར་དབུལ་དེ་ནས་ཕྱག་བྱའོ། །དེ་ནས་ལག་པ་གཉིས་
[310b.3]ཀྱིས་མེ་ཏོག་བཟུང་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་པུཥྤེ་སྭཱ་ཧཱ། ཞེས་པས་གཙོ་མོའི་དབུ་ལ་དབུལ་ལོ། །ཨོཾ་བཛྲ་ཏཱ་རེ་པུཥྤེ་སྭཱ་ཧཱ། ཤར་དུའོ། །ཨོཾ་རཏྣ་ཏཱ་རེ་པུཥྤེ་སྭཱ་ཧཱ། ལྷོ་རུའོ། །ཨོཾ་པདྨ་ཏཱ་རེ་པུཥྤེ་སྭཱ་ཧཱ། ནུབ་ཏུའོ། །ཨོཾ་ཀརྨ་ཏཱ་རེ་པུཥྤེ་སྭཱ་ཧཱ། བྱང་དུའོ། །ཨོཾ་པུཥྤེ་ཏཱ་རེ་པུཥྤེ་སྭཱ་ཧཱ། ཤར་ལྷོར་རོ། །ཨོཾ་
[310b.4]དྷཱུ་པ་ཏཱ་རེ་པུཥྤེ་སྭཱ་ཧཱ། ལྷོ་ནུབ་ཏུའོ། །ཨོཾ་དཱི་པ་ཏཱ་རེ་པུཥྤེ་སྭཱ་ཧཱ། ནུབ་བྱང་དུའོ། །ཨོཾ་གནྡྷ་ཏཱ་རེ་པུཥྤེ་སྭཱ་ཧཱ། བྱང་ཤར་དུའོ། །ཨོཾ་ཨཾ་ཀུ་ཤ་ཏཱ་རེ་པུཥྤེ་སྭཱ་ཧཱ། ཤར་སྒོར་རོ། །ཨོཾ་པཱ་ཤ་ཏཱ་རེ་པུཥྤེ་སྭཱ་ཧཱ། ལྷོའི་སྒོར་རོ། །ཨོཾ་སྥོ་ཊ་ཏཱ་རེ་པུཥྤེ་སྭཱ་ཧཱ། ནུབ་སྒོར་རོ། །ཨོཾ་གྷཎྜ་ཏཱ་རེ་པུཥྤེ་སྭཱ་ཧཱ། བྱང་སྒོར་རོ། །ལྷ་
[310b.5]མོ་བཅོ་ལྔར་བྱེད་ན། ཨོཾ་ཨུཥྞཱི་ཥ་ཏཱ་རེ་པུཥྤེ་སྭཱ་ཧཱ། ཤར་སྒོའི་དེའི་རྒྱབ་ཏུའོ། །ཨོཾ་སུམྦྷ་ཏཱ་རེ་པུཥྤེ་སྭཱ་ཧཱ། ནུབ་སྒོའི་དེའི་རྒྱབ་ཏུའོ། །དེ་བཞིན་དུ་ལྷའི་རིགས་གཞན་ཡང་ཤེས་པར་བྱའོ། །དེ་ནས་གོང་མ་ལྟར་རང་རང་གི་སྔགས་ཀྱིས་བདུག་སྤོས་ཤངས་ལ། དྲི་ཐུགས་ཀར་མར་མེ་སྤྱན་ལ། ལྷ་བཤོས་
[310b.6]ལྗགས་ལ། རོལ་མོ་སྙན་ལ་དབུལ་ལོ། །གཞན་ཡང་ཉེ་བར་མཁོ་བ་དང་སྤྱད་པའི་དགོས་པ་དབུལ་བར་བྱ་སྟེ། བཀུར་སྟིས་མཆོད་པ་ལ་བསྟོད་པ་ཅི་རིགས་པར་བསྒྲགས་པར་བྱའོ། །དེ་ནས་སྡིག་པ་བཤགས་པ་ལ་སོགས་པའི་ཡན་ལག་གཞན་རྣམས་ཀྱང་བྱས་ལ་འདོད་པའི་དོན་ལ་གསོལ་བ་
[310b.7]གདབ་སྟེ། ལྷག་ཆད་བསྐང་བ་ལ་ཡི་གེ་བརྒྱ་པ་ཅི་རིགས་པར་བརྗོད་དོ། །དེ་ནས་ལྷ་དེ་རྣམས་ཀྱི་ཡེ་ཤེས་པ་གཤེགས་ཏེ། དམ་ཚིག་པ་རང་ལ་བསྡུས་ནས་དགེ་བ་བསྔོ་བར་བྱའོ། །འདི་ནི་བྱ་བ་གཞན་ཐམས་ཅད་དང་འབྲེལ་པར་ཤེས་པར་བྱའོ། །སྒྲོལ་མའི་མཎྜལ་གྱི་ཆོ་ག་སྙན་དངགས་མཁན་
[311a]
[311a.1]པོ་སྙིང་རྗེ་ཆེན་པོས་མཛད་པ་རྫོགས་སོ།། {T3680}༄༅༅། །རྒྱ་གར་སྐད་དུ། ཏཱ་རཱ་ཨ་གྲཱ་པྲཱཔྟི་ནཱ་མ། བོད་སྐད་དུ། སྒྲོལ་མ་མཆོག་ཐོབ་པ་ཞེས་བྱ་བ། རྗེ་བཙུན་སྒྲོལ་མ་ལ་ཕྱག་འཚལ་ལོ། །སྔོན་དུ་གསུངས་པའི་རིམ་པས་སྟོང་པ་ཉིད་ཀྱི་བར་
[311a.2]བསྒོམས་ཏེ། སྐད་ཅིག་ལ་རང་སྒྲོལ་མར་བསྒོམས་པའི་ཐུགས་ཀར་ཏཱཾ་ཨིནྡྲ་ནཱི་ལའི་མདོག་ལྟ་བུ་བལྟ་བར་བྱའོ། །ལུས་སྐྱིལ་ཀྲུང་ལ་ཚིགས་དྲང་པོར་བསྲང་སྟེ་མཉམ་གཞག་གི་ཕྱག་རྒྱ་ལ་སོགས་ཏེ་ལུས་གནད་ལྔ་དང་ལྡན་པས་རླུང་རྒྱུ་བ་སྤངས་ཏེ་ལྟེ་བ་ལས་མེ་རབ་ཏུ་སྦར་ནས།
[311a.3]སྤྱི་གཙུག་ནས་ཐིག་ལེ་ཕབ་སྟེ་ཏཱཾ་ལ་ཕོག །ཏཱཾ་ལས་བྱང་ཆུབ་ཀྱི་སེམས་ཞུན་ཚུལ་དུ་ལུས་ཐམས་ཅད་ལ་ཁྱབ་པས་བདེ་བ་ཆེན་པོའི་ཏིང་ངེ་འཛིན་སྐྱེས་པར་བསམ་ཞིང་སྲོག་རྩོལ་ལ་འབད་ན་ཞག་བདུན་གྱིས་དངོས་སུ་སྐྱེ་བར་འགྱུར་ཏེ། བྱང་སེམས་འཛག་ན་གདམས་
[311a.4]ངག་དྲན་པར་བྱ། དེ་ནས་ཏཱཾ་ལས་འོད་འཕྲོས་ཏེ་སྣོད་བཅུད་ཐམས་ཅད་རང་ལ་བསྡུས་རང་ཡང་ཏཱཾ་ལས་བསྡུས་ཏེ་ཏཱཾ་ཡང་རིམ་གྱིས་མི་དམིགས་པར་བྱས་ལ་ཡོད་པ་དང་མེད་པའི་རྟོག་པ་སྤངས་ལ། སྟོང་པ་ཉིད་ཀྱི་བདེ་བ་ལ་རྒྱས་གདབ་པོ། །རྟོག་པ་ལ་ཤེས་པ་
[311a.5]འཕྲོ་ན་སྔ་མ་ལྟར་བདེ་བ་བསྒོམ། བདེ་བ་ཤས་ཆེ་ན་ཕྱི་མ་ལྟར་སྟོང་པ་བསྒོམ། རྟོག་པ་གཞན་འབྲེལ་པ་སྤང་སྟེ་ཟླ་བ་དྲུག་ཏུ་བསྒོམས་ན་མཆོག་ཐོབ་པར་འགྱུར་རོ། །སྒྲོལ་མ་མཆོག་སྒྲུབ་པ་ཞེས་བྱ་བ་དངོས་གྲུབ་བརྙེས་པའི་སློབ་དཔོན་བསོད་སྙོམས་པས་མཛད་པ་རྫོགས་སོ།། །།
[311a.6]{T3681}༄༅༅། །རྒྱ་གར་སྐད་དུ། ཨཥྚ་བྷ་ཡ་ཏྲ་ཎཱསྟཱ་རཱ་སཱ་དྷ་ནཾ། བོད་སྐད་དུ། འཇིགས་པ་བརྒྱད་ལས་སྐྱོབ་པའི་སྒྲོལ་མའི་སྒྲུབ་ཐབས། བཅོམ་ལྡན་འདས་སྒྲོལ་མ་ལ་ཕྱག་འཚལ་ལོ། །དང་པོ་ཁོ་ནར་ཚངས་པའི་གནས་བཞི་བསྒོམས་ནས། སྐྱབས་སུ་འགྲོ་བ་དང་། བྱང་
[311a.7]ཆུབ་ཀྱི་སེམས་བསྐྱེད་པ་དང་། ལམ་ལ་གནས་པར་ཁས་འཆེ་བ་དང་། ཡོངས་སུ་བསྔོ་བ་སྟེ་བསོད་ནམས་ཀྱི་ཚོགས་བསག་གོ། །དེ་ནས་ཆོས་ཐམས་ཅད་བདག་མེད་པར་ལྷག་པར་མོས་ལ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་དང་། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་
[311b]
[311b.1]ཝ་ཨཱཏྨ་ཀོ྅ཧཾ་ཞེས་བརྗོད་པས་སྟོང་པ་ཉིད་དུ་བསྒོམས་པས་ཡེ་ཤེས་ཀྱི་ཚོགས་བསག་གོ། །སྟོང་པ་ཉིད་ཀྱི་ངང་ལས་ནམ་མཁའི་དབྱིངས་དེ་ཉིད་དུ་པདྨ་དང་ཟླ་བའི་དཀྱིལ་འཁོར་གྱི་དབུས་སུ་རང་གི་སེམས་ཉིད་ཏཱཾ་གི་རྣམ་པ་ཡོངས་སུ་གྱུར་པ་ལས་བྱུང་བའི་སྒྲོལ་མ་སྐུ་
[311b.2]མདོག་ལྗང་གུ་ཞལ་གཅིག་མ་ཕྱག་བརྒྱད་མ། ཕྱག་གཡས་པ་རྣམས་ཀྱིས་བགྲང་ཕྲེང་དང་མཆོག་སྦྱིན་དང་། མི་འཇིགས་པ་སྦྱིན་པ་དང་། རིན་པོ་ཆེ་འཛིན་པ། གཡོན་པ་རྣམས་ཀྱིས་ཨུཏྤ་ལ་དང་། བུམ་པ་དང་། སྐྱབས་སྦྱིན་པའི་ཕྱག་རྒྱ་དང་། པོ་ཏི་འཛིན་པ་
[311b.3]རབ་ཏུ་ཞི་ཞིང་ལང་ཚོ་རྒྱས་པའི་ལུས་ཤིན་ཏུ་མཛེས་པ། རིན་པོ་ཆེའི་རྒྱན་ཐམས་ཅད་ཀྱིས་མངོན་པར་སྤྲས་ཤིང་སྨད་གཡོགས་ཁ་དོག་སྣ་ཚོགས་ཅན་དུ་བསྒོམ་པར་བྱའོ། །དེ་ནས་ཨོཾ་ཨེ་ཧྱེ་ཧི་བྷ་ག་བ་ཏཱི་པྲཱ་སཱ་དྷཾ་ཀུ་རུ་པཱུ་ཛ་གྲྀཧྞ་ཨ་ཏྲ་སནྣི་ཧི་ཏོ་བྷ་ཝ་ཞེས་པའི་སྔགས་ཀྱིས་
[311b.4]བཅོམ་ལྡན་འདས་མ་སྤྱན་དྲངས་པ་མདུན་ན་གནས་པ་ལ་མངོན་པར་མཆོད་དེ། ཨོཾ་བྷ་ག་ཝ་ཏཱི་ས་མ་ཡེ་ཤྭ་རི་སརྦཱ་ནུདྡྷརྨཱ་ཏེ་ཏཱ་རེ་ཨ་དྷིཥྛཱ་ནཾ་མེ་ཀུ་རུ་སྭཱ་ཧཱ། ཞེས་བྱ་བའི་སྔགས་ཀྱིས་གསོལ་བ་བཏབ་པས་བདག་ཉིད་ལ་ཉེ་བར་ཞུགས་པས་སྙིང་གར་བདག་ཅི་འདྲ་བའི་ཡེ་ཤེས་
[311b.5]སེམས་དཔའ་དང་། དེའི་ཡང་ཐུགས་ཀར་ཏཱཾ་གི་རྣམ་པའི་ཏིང་ངེ་འཛིན་སེམས་དཔའ་གནས་པར་བལྟ་ཞིང་དེ་ཉིད་ཀྱི་ཚེ་འཇིགས་པ་བརྒྱད་ལས་སྐྱོབ་པར་བྱེད་པའི་སྒྲོལ་མ་རྣམས་མངོན་པར་འཕྲོས་པ་ནི་གཡས་ཕྱོགས་སུ་སེང་གེའི་འཇིགས་པ་ལས་སྐྱོབ་པའི་སྒྲོལ་མ་སེང་གེའི་
[311b.6]གདོང་པ་ཅན་མཆེ་བ་རྣམ་པར་གཙིགས་ཤིང་། ལྕེ་གློག་ལྟར་འཁྱུག་པ། སྤྱན་སེར་མོ། ཕྱག་གཉིས་པ། མདོག་དམར་མོ། སྐྲ་སེར་པོ། ཐུགས་ཀར་མི་འཇིགས་པ་སྦྱིན་པའི་ཕྱག་རྒྱ་མཛད་པ། རྒྱན་ཐམས་ཅད་ཀྱིས་བརྒྱན་པ། སེམས་ཅན་རྣམས་སེང་གེའི་འཇིགས་པ་ལས་
[311b.7]སྒྲོལ་བར་བསྒོམ་པར་བྱའོ། །བཅོམ་ལྡན་འདས་མའི་གཡོན་ཕྱོགས་སུ་གླང་ཆེན་འཇིགས་པ་ལས་སྐྱོབ་པའི་སྒྲོལ་མ་གླང་པོ་ཆེའི་གདོང་པ་ཅན་ཞལ་གཅིག་ཕྱག་གཉིས་མ། ཤངས་མཐོ་ཞིང་མཆེ་བ་གཙིགས་པ་གསུས་པ་འཕྱང་བ་དུ་བའི་མདོག་ཅན། མཐེ་བོང་མངོན་
[312a]
[312a.1]པར་བརྐྱང་བའི་ཕྱག་གཉིས་ཀྱིས་བསྡིགས་པར་མཛད་པའི་ཕྱག་རྒྱ་ཅན། སེམས་ཅན་རྣམས་གླང་པོ་ཆེའི་འཇིགས་པ་ལས་སྒྲོལ་བར་མཛད་པར་བསྒོམ་པར་བྱའོ། །གཡས་ཕྱོགས་ཀྱི་འོག་ཏུ་མེའི་འཇིགས་པ་ལས་སྐྱོབ་པའི་སྒྲོལ་མ་དམར་མོ་
[312a.2]འབར་བའི་གདོང་པ་ཅན། ཞལ་བདུན་མ། ལྗགས་བདུན་མ། སྐྲ་གྱེན་དུ་འབར་བ་ཕྱག་གཉིས་མ། ཕྱག་གཉིས་ཀྱིས་པདྨའི་ཕྱག་རྒྱ་མཛད་ཅིང་། རྒྱན་ཐམས་ཅད་ཀྱིས་བརྒྱན་པ། སེམས་ཅན་རྣམས་མེའི་འཇིགས་པ་ལས་སྒྲོལ་བར་བསྒོམ་པར་བྱའོ། །
[312a.3]གཡོན་ཕྱོགས་ཀྱི་འོག་གི་ཆར། སྦྲུལ་གྱི་འཇིགས་པ་ལས་སྐྱོབ་པའི་སྒྲོལ་མ་ཞལ་གཅིག་ཕྱག་གཉིས་མ། ཁ་དོག་ནག་མོ། སྦྲུལ་མགོའི་གདེངས་ཀ་བཅུ་དང་ལྡན་ཞིང་སྐྲ་གྲོལ་བ་རྒྱན་ཐམས་ཅད་ཀྱིས་བརྒྱན་པའི་ལུས། ཕྱག་གཉིས་ཀྱིས་མི་འཇིགས་པ་སྦྱིན་པའི་ཕྱག་རྒྱ་མཛད་
[312a.4]ཅིང་། སེམས་ཅན་རྣམས་སྦྲུལ་གྱི་འཇིགས་པ་ལས་སྒྲོལ་བ་བསྒོམ་པར་བྱའོ། །གཡས་ཕྱོགས་ཀྱི་འོག་གི་ཆར་ཆོམ་རྐུན་གྱི་འཇིགས་པ་ལས་སྐྱོབ་པའི་སྒྲོལ་མ་ཞལ་གཅིག་ཕྱག་གཉིས་མ། སྐུ་མདོག་ལྗང་གུ། ཞལ་ཁྲོ་གཉེར་བསྡུས་པ། སྐྲ་གྱེན་དུ་མཛེས་པ།
[312a.5]ཕྱག་གཡས་པས་རལ་གྲི་འཕྱར་ཞིང་གཡོན་པས་སྡིགས་མཛུབ་མཛད་པ། རྒྱན་ཐམས་ཅད་ཀྱིས་བརྒྱན་པའི་ལུས་བཞེངས་པ་སེམས་ཅན་རྣམས་ཆོམ་རྐུན་གྱི་འཇིགས་པ་ལས་སྒྲོལ་བ་བསྒོམ་པར་བྱའོ། །གཡོན་ཕྱོགས་ཀྱི་འོག་གི་ཆར་ལྕགས་སྒྲོག་གི་འཇིགས་པ་ལས་
[312a.6]སྐྱོབ་པའི་སྒྲོལ་མ་ཞལ་གཅིག་ཕྱག་གཉིས་མ་སྐུ་མདོག་དམར་མོ། གཡས་པ་དང་གཡོན་པས་ལྕགས་ཀྱུ་དང་ཞགས་པ་འཛིན་པ། རྒྱན་ཐམས་ཅད་ཀྱིས་བརྒྱན་པའི་ལུས་བཞེངས་པ། སེམས་ཅན་རྣམས་ལྕགས་སྒྲོག་གི་འཇིགས་པ་ལས་སྒྲོལ་བ་བསྒོམ་པར་བྱའོ། །
[312a.7]གཡས་ཕྱོགས་ཀྱི་འོག་གི་ཆར་ཆུའི་འཇིགས་པ་ལས་སྐྱོབ་པའི་སྒྲོལ་མ་ཞལ་གཅིག་ཕྱག་གཉིས་མ་སྐུ་མདོག་དཀར་མོ་གཡས་ལྕགས་ཀྱུ་དང་གཡོན་པས་སྡིགས་མཛུབ་མཛད་པ་ཞི་བའི་སྐུ་བཞེངས་པ། སེམས་ཅན་རྣམས་ཆུའི་འཇིགས་པ་ལས་སྒྲོལ་བ་བསྒོམ་པར་བྱའོ། །
[312b]
[312b.1]གཡོན་ཕྱོགས་ཀྱི་འོག་གི་ཆར། ཤ་ཟའི་འཇིགས་པ་ལས་སྐྱོབ་པའི་སྒྲོལ་མ་ཞལ་གཅིག་ཕྱག་གཉིས་མ། སེམས་དཔའི་སྐྱིལ་མོ་ཀྲུང་གིས་བཞུགས་པ། ཀུནྡ་དང་ཟླ་བའི་མདོག་ཅན་རྒྱན་ཐམས་ཅད་ཀྱིས་བརྒྱན་པའི་ལུས་ཕྱག་གཡས་པ་དང་གཡོན་པས་མཆོག་
[312b.2]སྦྱིན་དང་། མི་འཇིགས་པ་སྦྱིན་པའི་ཕྱག་རྒྱ་མཛད་ཅིང་སེམས་ཅན་རྣམས་ཤ་ཟའི་འཇིགས་པ་ལས་སྒྲོལ་བ་བསྒོམ་པར་བྱའོ། །ཡང་སྙིང་གའི་ཏཱཾ་གི་འོད་ཟེར་གྱིས་དེ་བཞིན་གཤེགས་པ་རིགས་ལྔ་སྤྱན་དྲངས་པ་ལ་མངོན་པར་མཆོད་པ་ནས་གསོལ་བ་བཏབ་པས་སངས་
[312b.3]རྒྱས་རྣམས་ཀྱིས་དབང་བསྐུར་ནས་ཐམས་ཅད་ལ་དོན་ཡོད་གྲུབ་པས་དབུ་བརྒྱན་པར་བསྒོམ་པར་བྱའོ། །སྔགས་ཀྱི་ཚིག་འདི་དག་ཡིན་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་བྷ་ཡ་ཤ་མ་ནི་སརྦ་དུརྒ་ཏི་ཏཱ་རེ་ཎི་ཏུ་རེ་སྭཱ་ཧཱ། གཙོ་མོའི་སྔགས་སོ། །ཨོཾ་སིཾ་ཧ་པ་དཱ་ནི་མ་ཧ་དཾ་ཥྚྲཱིཾ། བི་
[312b.4]དྱུད་ཛི་ཧཱི་པཱིཾ་གལ། ནེ་ཏྲ། གརྫ་གརྫ་ཡ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། སེང་གེའི་འཇིགས་པ་ལས་སྐྱོབ་པའི་སྒྲོལ་མའི་སྔགས་སོ། །ཨོཾ་དྭི་ར་དཾ་བ་དཱ་ནི། ཨེ་ཀ་དཾ་ཥྚྲཱིཾ་མ་ཧཱ་ན་སེ་ལམྦོ་དྷ་རི་ཀརྡྷ་ཀརྡྷ་ཏྲཱ་ས་ཡ་ཏྲཱ་ས་ཡ་ཤོ་ཥ་ཡ་ཤོ་ཥ་ཡ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། གླང་པོ་ཆེའི་
[312b.5]འཇིགས་པ་ལས་སྐྱོབ་པའི་སྒྲོལ་མའི་སྔགས་སོ། །ཨོཾ་ཤི་ཁི་བ་དཱ་ནེ་མ་ཧཱ་ཨུསྐཱ་མུ་ཁི་ཛྭ་ལཱ་མཱ་ལཱ་ནི་སཔྟ་ཛིཾ་ཧི། སཔྟ་མུ་ཁིཾ་ཝི་ཤྭཱ་ན་རེ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། མེའི་འཇིགས་པ་ལས་སྐྱོབ་པའི་སྒྲོལ་མའི་སྔགས་སོ། །ཨོཾ་ཕ་ཎི་མ་ཧཱ་ཕ་ཎི་ཀྲྀཎྜ་བ་དཱ་ནེ་ཀྲྀཥྞ་བ་དཱ་ནེེ་ཏྲེ་ཨེ་ཀཱ་ད་ཤ་ཛི་ཧེ།
[312b.6]ཀཱ་རེ་ཎ་ཙ་ལཱ་ཡ། ཙ་ལཱ་ཡ། མ་ཧཱ་བྷི་ཥ་བྷཀྵ་ཎི། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། སྦྲུལ་གྱི་འཇིགས་པ་ལས་སྐྱོབ་པའི་སྒྲོལ་མའི་སྔགས་སོ། །ཨོཾ་ཁརྒ་ཧསྟི་བྷི་ཀུ་ཊི་མུ་ཁི་ཨུརྡྷ་ཀེ་ཥ་མ་ཧཱ་ན་དཱི་ཀྲྀཥྞ་ཨཉྫ་ན་ཝརྞེ་ཙྪིནྡ་ཙྪིནྡ། བྷིནྡ་བྷིནྡ། ཨུཏྟཱ་ར་ཡ་ཨུཏྟཱ་ར་ཡ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ།
[312b.7]ཆོམ་རྐུན་གྱི་འཇིགས་པ་ལས་སྐྱོབ་པའི་སྒྲོལ་མའི་སྔགས་སོ། །ཨོཾ་རཀྵ་ཝརྞེ་པཱ་ཤ་ཨཱཾ་ཀུ་ཤ་ཧ་སྟི་མ་ཧཱ་ར་ཝི་མ་ཧཱ་བ་ལ་ས་ར་ས་ར། བི་ས་ར་བི་ས་ར། གྲྀཧྞ་གྲྀཧྞ། ཀདྡྷ་ཀདྡྷ་མ་ཧཱ་དུརྒ་ན། མཱུ་ཙ་ཡ། ཏཱ་རེ་ཏུཏྟཱ་རེ་ཏུ་རེ་སྭཱཧཱ། ལྕགས་སྒྲོག་གི་འཇིགས་པ་ལས་སྐྱོབ་པའི་སྒྲོལ་
[313a]
[313a.1]མའི་སྔགས་སོ། །ཨོཾ་ཛ་ལེ་ཛ་ལེ་མ་ཧཱ་ཛ་ལེ། ཏཱ་ར་ཡ་ཏཱ་ར་ཡ། ཨུཏྟཱ་ར་ཡ། ཤྲིཾ་ཁ་ལ་ཧ་སྟི། མ་ཧཱ་ཛ་ཝེ་ཨེ་ཀཱ་བཱི་རི་མ་ཧཱ་ཀཱ་རུ་ཎེ་ཀེ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཆུའི་འཇིགས་པ་ལས་སྐྱོབ་པའི་སྒྲོལ་མའི་སྔགས་སོ། །ཨོཾ་མ་ཧཱ་གམྦྷཱི་རྱེ་མ་ཧཱ་ཀཱ་རུ་
[313a.2]ཎེ་ཀེ་བྷ་ག་ཝཏྶ་ལེ། བ་ར་དྷ་ཨ་བྷ་ཡ་ཧསྟི། མ་ཧཱ་ཀུ་ན་ཨིནྡུ་ད་ཝ་ལི་པྲ་ཧཱ་སི་ཏ་བ་དཱ་ནེ། མ་ཧཱ་ཝསྟྲ་པྲ་བྲྀཏྟ་ཤ་རཱི་རེ་དྷྱ་ནཱ། ཝ་སྠི་ཏི་ཏཱ་ར་ཡ་ཏཱ་ར་ཡ་མ་ཧཱ་བྷ་ཡ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཤ་ཟའི་འཇིགས་པ་ལས་སྐྱོབ་པའི་སྒྲོལ་མའི་སྔགས་སོ། །གང་གི་ཚེ་
[313a.3]བཟླས་པས་ཡིད་སྐྱོ་བར་གྱུར་པ་དེའི་ཚེ་ཡེ་ཤེས་པ་མདུན་དུ་ཕྱུང་བ་ལ་མཆོད་ནས་གཤེགས་སུ་གསོལ་ལ། རང་ཉིད་དམ་ཚིག་པའི་ང་རྒྱལ་གྱིས་གནས་པར་བྱའོ། །འཇིགས་པ་བརྒྱད་ལས་སྐྱོབ་པའི་སྒྲོལ་མའི་སྒྲུབ་ཐབས། སློབ་དཔོན་ཐམས་ཅད་མཁྱེན་པའི་བཤེས་གཉེན་གྱིས་
[313a.4]མཛད་པ་རྫོགས་སོ།། །།ཁ་ཆེའི་པཎྜི་ཏ་ཏ་ཐཱ་ག་ཏ་བྷ་དྲ་དང་། དགེ་སློང་འཕགས་པས་རྒྱའི་ཡུལ་ཅོད་ཏོའི་མཁར་དུ་བསྒྱུར་བའོ།། {T3682}༄༅༅། །རྒྱ་གར་སྐད་དུ། ཤྲཱི་སཱི་ཏ་ཏཱ་ར་སཱ་དྷ་ནཾ། བོད་སྐད་དུ། དཔལ་སྒྲོལ་མ་དཀར་མོའི་སྒྲུབ་
[313a.5]ཐབས། དཔལ་སྒྲོལ་མ་དཀར་མོ་ལ་ཕྱག་འཚལ་ལོ། །འཆི་བའི་སྐྱོན་གྱིས་གོས་མིན་ལ། །ཟླ་བ་དྲུག་གི་མཐར་ཐུག་པར། །སྒྲོལ་མའི་ཐུགས་ཀྱི་འཁོར་ལོ་ནི། །བསྒྲིམས་བསྒོམས་དངོས་གྲུབ་ཐམས་ཅད་རྙེད། །ངག་གི་དབང་ཕྱུག་གིས་བྱས་པའི། །འཆི་བ་སླུ་
[313a.6]བ་ཀུན་བསྡུས་ལས། །སྒྲོལ་མ་དཀར་མོ་ཕྱུང་འདི་ནི། །བསྒོམས་པས་འཇིགས་པ་སྤོང་བར་བྱེད། །བཞི་པའི་སྡེ་ཚན་གཉིས་པ་ཨཱ། །འོད་ཟེར་རྣམ་འཕྲོས་ནམ་མཁའ་ནི། །པདྨ་དཀར་དང་ཟླ་གདན་ལ། །མདུན་བལྟས་གསུམ་ལ་སྐྱབས་འགྲོ་བརྗོད། །ཡུད་
[313a.7]ཙམ་སྟོང་པ་ཉིད་བསྒོམས་ནས། །སོ་སོ་སྐྱེ་བོའི་འཁྲུལ་བཅོམ་སྟེ། །རྡོ་རྗེས་སྨོན་ལམ་མཐུ་ཉིད་ཀྱིས། །བྱང་ཆུབ་སེམས་ཀྱི་ཡི་གེ་བསྒོམ། །པདྨ་དཀར་པོའི་དབུས་གནས་པ། །ཟླ་བའི་གཟུགས་ཀྱི་གདན་སྟེང་དུ། །རྡོ་རྗེ་སྐྱིལ་ཀྲུང་རབ་བཅིངས་ཤིང་། །
[313b]
[313b.1]མཆོག་སྦྱིན་ཨུཏྤལ་འཛིན་པ་མོ། །སྟོན་ཀའི་འོད་ལྟར་དཀར་བའི་མདོག། །རྒྱབ་ཏུ་ཟླ་བ་ཡང་དག་བརྟེན། །རྒྱན་རྣམས་ཐམས་ཅད་ཡོངས་སུ་རྫོགས། །བཅུ་དྲུག་ལོ་ལོན་སྐུ་མངའ་བའོ། །རྫོགས་སངས་རྒྱས་རྣམས་དེ་ཡི་སྲས། །ཡུམ་གྱུར་འདོད་པའི་གཟུགས་
[313b.2]འཛིན་མ། །དེ་ཡི་སྙིང་དབུས་འཁོར་ལོའི་འོད། །དཀར་མདངས་འཕགས་མ་སྒྲོལ་མ་བསྒོམ། །བརྒྱད་ཀྱི་རྩིབས་ཅན་བརྒྱད་རྣམས་ཀྱིས། །ཡི་གེས་ཡོངས་སུ་གང་བ་ཉིད། །ཨོཾ་ཧཱ་ཡི་གེའི་དབུས་གནས་པ། །བསྒྲུབ་བྱའི་མིང་ལྡན་ལྟེ་བར་རོ། །ཟླ་བ་དྲུག་ཏུ་ངེས་
[313b.3]བརྟེན་པར། །མི་བདེ་མེད་པའི་སེམས་ཡིན་པས། །རྩེ་གཅིག་སེམས་ཀྱིས་བསྒོམ་བྱ་ཞིང་། །ཡི་གེ་བཅུ་པའི་སྔགས་འདི་བཟླས། །ཨོཾ་ཡིག་ཐོག་མར་བྱིན་བྱས་ནས། །ཕྱིས་ནི་ཏཱ་རེ་རབ་ཏུ་སྦྱར། །ཏུཏྟཱ་རེ་འདིས་ཏུ་རེ་ཕྱིས། །སྭཱ་ཧཱ་མཐའ་ཡིན་ལས་ཀུན་
[313b.4]ལའོ། །ཚངས་དབང་ཁྱབ་འཇུག་ཟླ་ཉི་དང་། །དྲག་པོ་ཕྱོགས་སྐྱོང་འདོད་པའི་ལྷས། །སྤུ་ཡི་རྩེ་ཡང་བསྐྱོད་མི་ནུས། །འཆི་བ་ལས་རྒྱལ་སྒྲོལ་མ་བཞིན། །གཉེར་མ་སྐྲ་དཀར་སྐལ་ངན་དང་། །ནད་དང་དབུལ་པོ་ཉམས་པར་བྱེད། །སེང་གེ་ལ་སོགས་འཇིགས་
[313b.5]ཆེན་བརྒྱད། །སྡུག་བསྔལ་ཚོགས་རྣམས་སེལ་བར་བྱེད། །བཟའ་དང་བཏུང་བ་གོས་དང་ནི། །ཁང་བཟངས་རིན་ཆེན་ལྡན་མི་སློང་། །རལ་གྲི་མིག་སྨན་རྐང་བྱུག་དང་། །བུམ་པ་བཟང་སོགས་དངོས་གྲུབ་འགྱུར། །སྙན་དངགས་རྩོད་དང་མི་བརྗེད་དང་། །
[313b.6]ཤེས་རབ་གཅིག་ཏུ་དྲི་མ་མེད། །འདོད་པ་གཞན་ཡང་གྲུབ་བྱེད་པ། །འཁོར་ལོ་འདི་ལས་རབ་ཏུ་འབྱུང་། །སྒྲོལ་མ་དཀར་མོ་སྒྲུབ་པའི་ཐབས། །འཆི་དང་ནད་རྣམས་འཇོམས་བྱེད་པ། །ཕྱུང་བའི་དགེ་བ་གང་ཐོབ་དེས། །འགྲོ་ཀུན་སྒྲོལ་མའི་བདག་ཉིད་ཤོག། །
[313b.7]སྒྲོལ་མ་དཀར་མོ་འཆི་བ་སླུ་བའི་སྒྲུབ་ཐབས། སློབ་དཔོན་ངག་གི་དབང་ཕྱུག་གྲགས་པས་མཛད་པ་རྫོགས་སོ།། །།དཔལ་ཆོས་ཀྱི་རྗེ་སའི་སྟེང་ན་འགྲན་ཟླ་དང་བྲལ་བའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲ་དང་། སྒྲ་བསྒྱུར་གྱི་ལོ་ཙཱ་བ་གནུབས་བྱམས་པའི་དཔལ་གྱིས་བསྒྱུར་པའོ།། །།
[314a]
[314a.1]{T3683}༄༅༅། །སྒྲོལ་མའི་སྒྲུབ་ཐབས་བཞུགས། ༄༅༅། །ལྷ་མོ་སྒྲོལ་མ་ལ་ཕྱག་འཚལ་ལོ། །སྔར་བསྟན་པའི་ཆོ་གས་བདུད་རྩིའི་དཀྱིལ་འཁོར་དུ་ས་བོན་ལྔ་པའི་སྡེ་ཚན་གྱི་དང་པོ་ལ། དང་པོའི་གཉིས་པས་མནན་པ། ཟླ་ཚེས་ཕྱེད་པའི་ཐིག་ལེས་བརྒྱན་པའོ། །དེ་ལས་གྲུབ་པའི་
[314a.2]སྒྲོལ་མ་བསྒོམ་པར་བྱའོ། །ལྗང་གུ་ཕྱག་གཉིས་པ། གཡས་མཆོག་སྦྱིན། གཡོན་ཨུཏྤ་ལ་འཛིན་པའོ། །པདྨ་དང་ཟླ་བ་ལ་གནས་པ། རྒྱན་ཐམས་ཅད་ཀྱིས་བརྒྱན་པར་བསམ་མོ། །ལག་པ་གཉིས་ཐལ་མོ་སྦྱར་ལ། མཛུབ་མོ་གཉིས་ཀྱིས་གུང་མོའི་སེན་མོ་བཀབ་ལ། སྲིན་
[314a.3]ལག་ནང་དུ་བཅུག་སྟེ་མཐེབ་མོས་མནན་པ་ནི། ཨུཏྤ་ལ་ཁ་ཕྱེ་བའི་ཕྱག་རྒྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། འཕགས་མ་སྒྲོལ་མའི་སྒྲུབ་ཐབས་རྫོགས་སོ།། {T3684}༄༅༅། །རྒྱ་གར་སྐད་དུ། ཏཱ་ར་སཱ་དྷ་ནཾ་ནཱ་མ། བོད་སྐད་དུ། སྒྲོལ་མའི་སྒྲུབ་ཐབས་ཞེས་བྱ་བ། རྗེ་བཙུན་མ་
[314a.4]སྒྲོལ་མ་ལ་ཕྱག་འཚལ་ལོ། །དེ་ལ་དང་པོར་འདི་བསྒྲུབ་པར་འདོད་པའི་རྣལ་འབྱོར་པས། དབེན་པའི་གནས་སུ་སྟན་བདེ་བ་ལ་འདུག་སྟེ། མཆོད་པའི་རྣམ་པ་ཚད་མེད་པ་བཤམ་ཞིང་། གཏོར་མ་གཅིག་ཀྱང་བཤམས་ལ། ཨོཾ་ཨཱཿཧཱུཾ་ཞེས་བྱིན་གྱིས་བརླབས། ཨོཾ་ཨ་ཀཱ་
[314a.5]རོ་མུ་ཁཾ་སརྦྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཨོཾ་ཨཱཿཧཱུཾ་ཕཊ་སྭཱཧཱ། ཞེས་བརྗོད་ལ་བཏང་ངོ་། །དེ་ནས་རང་ཉིད་སྒྲོལ་མར་མོས་པར་བྱས་ལ། དེའི་སྙིང་གར་པདྨ་སྣ་ཚོགས་སུ་ཡོད་པ། དབུས་ཀྱི་ལྟེ་བ་ལ་ཨ་ལས་ཟླ་བ་ལ་ཏཱཾ་ལྗང་གུ། དེའི་འོད་ཀྱིས་རང་བཞིན་གྱི་གནས་ནས་རྡོ་རྗེའི་སྒྲོལ་མ་
[314a.6]མདུན་གྱི་ནམ་མཁར་སྤྱན་དྲངས་ལ། ཕྱག་འཚལ། ཡོན་ཆབ་དབུལ། དེ་ནས་མེ་ཏོག་ལ་སོགས་པ་ལྔ་དབུལ། སྡིག་པ་བཤགས། རྗེས་སུ་ཡི་རང་བ་དང་བསྔོ་བ་བྱ་གསུམ་ལ་སྐྱབས་སུ་འགྲོ། དེ་ནས་བདག་རྗེ་བཙུན་མ་སྒྲོལ་མ་དང་མི་འབྲལ་བར་གྱུར་ཅིག་
[314a.7]པར་བསམ། དེ་ནས་སླར་གཤེགས་སུ་གསོལ། སེམས་ཅན་གྱི་དོན་བྱ་སྙམ་པའི་བྱམས་པ། འཁོར་བ་ནས་སེམས་ཅན་རང་རང་གི་སྡུག་བསྔལ་ཡོད་པ་ལ་སྙིང་རྗེ་བསྒོམ། དེ་རྣམས་སྡུག་བསྔལ་ལས་ཐར་ནས་སངས་རྒྱས་ཀྱི་བར་ལ་དགའ་བ་བསྒོམ། དེ་ཡང་སེམས་ཅན་དེ་དག་ཀུན་
[314b]
[314b.1]སྟོང་པ་དང་རང་བཞིན་མེད་པར་བཏང་སྙོམས་བསྒོམ། དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་མི་རྟོག་པ་ཅིག་བསྒོམ། དེ་ནས་རྟོག་པ་འཕྲོ་བའམ་བྱིང་ན་སྟོང་པ་མི་རྟོག་པའི་ངང་ལས། པཾ་ལས་སྣ་ཚོགས་པདྨ་དེའི་ལྟེ་བ་ལ་ཨ་ལས་ཟླ་བ་དེའི་སྟེང་དུ་ཏཱཾ་ལྗང་
[314b.2]གུ་དེ་ལས་ཨུཏྤལ། དེ་ལྟར་ཨུཏྤལ་ཏཱཾ་གིས་མཚན་པ་ཡོངས་སུ་གྱུར་པ་ལས་བདག་ཉིད་སྒྲོལ་མ་སྐུ་མདོག་ལྗང་གུ་པདྨ་དང་ཟླ་བའི་གདན་ལ་ཕྱེད་ཀྲུང་གིས་སྐྱིལ་མོ་ཀྲུང་དུ་བཞུགས་པ། ཞབས་གཡས་བརྐྱང་བ། ཕྱག་གཡས་མཆོག་སྦྱིན་གྱི་ཕྱག་རྒྱ། གཡོན་ཨུཏྤལ་སྙན་གྱི་
[314b.3]ཐད་ཀར་བཟུང་བ། དབུ་རྒྱན་དང་སྙན་ཆ་དང་མགུལ་རྒྱན་དང་། ཕྱག་གདུབ་དང་། དཔུང་རྒྱན་དང་། ཞབས་གདུབ་དང་། རིན་པོ་ཆེས་བརྒྱན་པ། བག་ཙམ་གཡས་སུ་འགྱིང་བ་འོད་ཟེར་སྔོ་ལྗང་དང་བཅས་པར་བསྒོམས་ལ། ཐུགས་ཀའི་ཏཱཾ་ལས་འོད་ཟེར་འཕྲོས་ཏེ་ཡེ་
[314b.4]ཤེས་ཀྱི་སྒྲོལ་མ་སྤྱན་དྲངས་ལམ་དུ་བཞུགས་པ་ལ་སྔར་བསྟན་པའི་མཆོད་པ་རྣམས་ཡིད་ཀྱིས་ཕུལ། དེ་ནས་བདག་ལ་གཞུག །ཡང་ཏཱཾ་གི་འོད་ཀྱིས་ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་སྤྱན་དྲངས། མདུན་གྱི་ནམ་མཁའ་ལ་བཞུགས་སུ་གསོལ་
[314b.5]ལ། སྔར་གྱི་མཆོད་པ་ཡིད་ཀྱིས་ཕུལ་ལ། དེ་རྣམས་བདག་ལ་དབང་སྩོལ་ཅིག་པར་བསྒོམ། དེ་ཡང་བུམ་པ་ལྔ་བཅུད་དང་བཅས་པ་ལྷ་མོ་ལྔས་དབང་བསྐུར་ནས། བུམ་པའི་ཆུ་དེ་མར་བླུགས་པས་སྒྲིབ་པ་བྱང་། ཡར་འཁྱིལ་བས་སྤྱི་བོར་དོན་ཡོད་གྲུབ་པ་བཞུགས་པར་བསམ།
[314b.6]དེ་ནས་མི་རྟོག་པ་ཅུང་ཟད་བསྒོམ། ཤེས་པ་འཕྲོ་བའམ་བྱིང་བ་ན་ལྷའི་སྐུ་རིམ་གྱིས་བསམ། དེ་ནས་སྙིང་པདྨ་འདབ་མ་བརྒྱད་ལ། དབུས་ཀྱི་ཟླ་བ་ལ་ཨོཾ། ཤར་གྱི་འདབ་མ་ལ་ཏཱ། ལྷོའི་འདབ་མ་ལ་རེ། ནུབ་ཀྱི་འདབ་མ་ལ་ཏུཏ། བྱང་གི་འདབ་མ་ལ་ཏཱ། བྱང་ཤར་དུ་
[314b.7]རེ། ཤར་ལྷོར་ཏུ། ལྷོ་ནུབ་ཏུ་རེ། ནུབ་བྱང་དུ་སྭཱ་ཧཱ་བཀོད་ལ་རིམ་པས་བཟླས་སོ། །ལག་པ་ཨུཏྤལའི་ཕྲེང་བ་བགྲང་ངོ་། །བརྒྱའམ་སྟོང་བཟླས་ལ་འཕྲོ་གཅོད་ཙམ་ན། ཡེ་ཤེས་པ་ནམ་མཁའ་ལ་བཏོན་ལ། བདག་ཐལ་མོ་སྦྱར་ལ། བདག་གི་དགེ་བའི་རྩ་བ་
[315a]
[315a.1]འདིས་བདག་མངོན་པར་རྫོགས་པར་སངས་རྒྱས་ནས། སེམས་ཅན་ཐམས་ཅད་ཀྱི་དོན་བྱེད་པར་གྱུར་ཅིག །བདག་སངས་རྒྱས་མ་ཐོབ་བར་ལ་ཐེག་པ་ཆེན་པོའི་ཆོས་སྤྱོད་ཅིང་། སེམས་ཅན་གྱི་དོན་བྱེད་པར་གྱུར་ཅིག་ཅེས་བརྗོད་ལ། གཤེགས་སུ་གསལ་ལོ། །
[315a.2]སྒྲོལ་མའི་སྒྲུབ་ཐབས་དྷ་བྱང་ཆུབ་སེམས་དཔའི་ཞལ་སྔ་ནས་མཛད་པ་རྫོགས་སོ།། །།པཎྜི་ཏ་ཏ་ཐཱ་ག་ཏ་རཀྵི་ཏ་དང་། བོད་ཀྱི་ལོ་ཙཱ་བ་རིན་ཆེན་གྲགས་པས་བསྒྱུར་བའོ།། {T3685}༄༅༅། །རྗེ་བཙུན་མ་#སྒྲོལ་མ་ལ་
[315a.3]ཕྱག་འཚལ་ལོ། །དེ་ལ་དང་པོར་སྔགས་པས་གདོང་བཀྲུ་བ་ལ་སོགས་པ་བྱས་ཏེ། ཡིད་དང་མཐུན་པར་བསམ་གཏན་གྱི་གནས་གཙང་ཞིང་དྲི་ཞིམ་པོ་གཅལ་དུ་བཀྲམ་པར་སྟན་གཙང་མ་ལ་#བདེ་བར་སྐྱིལ་མོ་ཀྲུང་གིས་འདུག་སྟེ་འབྱུང་པོ་ཐམས་ཅད་པའི་གཏོར་མའི་སྔགས་ཀྱིས་
[315a.4]གཏོར་མ་བྱིན་གྱིས་བརླབས་ལ། ཨོཾ་ཨཱ་བི་གྷྣཱནྟ་#ཀྲྀཏ་ཧཱུཾ་ཕཊ། ཅེས་བྱ་བའི་སྔགས་ལན་བཅུའི་བར་དུ་བརྗོད་དེ། ཕྱོགས་བཅུ་ན་གནས་པའི་བགེགས་ཐམས་ཅད་བསྐྲད་པར་བྱའོ། །དེ་ནས་རང་གི་སྙིང་གར་ཆོས་ཐམས་ཅད་ཆོས་#དབྱིངས་ཀྱི་རང་བཞིན་སྐྱེ་བ་མེད་པར་སྟོན་པར་བྱེད་པ་སྟོན་
[315a.5]ཀའི་ཟླ་བ་ལྟར་དཀར་བ་འོད་ཟེར་དཀར་པོ་འཕྲོ་བས་རང་གི་ལུས་གསལ་བར་བྱེད་པ་ཤིན་ཏུ་འཕྲོ་བ་བསམས་ལ། དེ་ཡོངས་སུ་གྱུར་པའི་འོད་ཟེར་དཀར་པོའི་ཐིག་ལེ་ཤེལ་སྒོང་#དག་པ་ལྟ་བུ་དེ་རིམ་གྱིས་འཕེལ་བར་གྱུར་པའི་ཟླ་བའི་དཀྱིལ་འཁོར་གྱི་གཟུགས་སུ་བསམ་ཞིང་། དེའི་
[315a.6]སྟེང་དུ་ཡི་གེ་ཏཱཾ་འོད་ཟེར་གྱི་ཚོགས་འཕྲོ་བའི་རིན་པོ་ཆེའི་སྒྲོན་#མ་ལྟར་དཀར་བ་རྣམ་པར་བསམ་མོ། །དེ་ནས་ཡི་གེ་ཏཱཾ་དེ་འོད་ཟེར་ཤིན་ཏུ་དཀར་བའི་ཚོགས་ཀྱིས་འཇིག་རྟེན་གྱི་ཁམས་ཐམས་ཅད་གསལ་བར་བྱས་པ་སྔོན་དུ་འགྲོ་བས་ལྷ་མོ་སྒྲོལ་མ་ལ་སོགས་པ་སངས་རྒྱས་དང་བྱང་
[315a.7]ཆུབ་སེམས་དཔའ་དང་བླ་མ་རྣམས་བསྐུལ་ཏེ། སྤྱན་དྲངས་པ་མདུན་#གྱི་ནམ་མཁའི་ཕྱོགས་ལ་རྣམ་པར་བསམ་པར་བྱའོ། །དེའི་སྟེང་དུ་ཡིད་ཀྱིས་#རང་བཞིན་གྱི་མཆོད་པར་བྱ་བ་ཡིན་ལ། དེ་ལ་མཆོད་པའི་ཆོ་གའི་རིམ་པ་ནི་འདི་ཡིན་ཏེ། ཨོཾ་བཛྲ་པུཥྤེ་ཧཱུཾ་ཞེས་བྱ་བའི་སྔགས་བརྗོད་
[315b]
[315b.1]ལ་ཡི་གེ་ཏཱཾ་ལས་བྱུང་བའི་མེ་ཏོག་གི་མཆོད་པའི་ཚོགས་ཀྱིས་མཆོད་པར་བྱའོ། །དེ་ནས་ཨོཾ་བཛྲ་དྷཱུ་#པེ་ཧཱུཾ་ཞེས་བྱ་བའི་སྔགས་བརྗོད་ལ་ཡི་གེ་ཏཱཾ་དེ་ཉིད་ལས་ཡང་དག་པར་སྤྲོས་པའི་བདུག་པའི་#མཆོད་པའི་ཚོགས་ཀྱིས་མཆོད་པར་བྱའོ། །དེའི་འོག་ཏུ་ཨོཾ་བཛྲ་དཱི་པེ་ཧཱུཾ་ཞེས་བྱ་བའི་
[315b.2]སྔགས་བརྗོད་ལ་ཡི་གེ་ཏཱཾ་དེ་ཉིད་ལས་རིན་པོ་ཆེའི་སྒྲོན་མ་སྤྲོས་ལ་མཆོད་པར་བྱའོ། །དེ་ནས་ཨོཾ་བཛྲ་གནྡྷེ་ཧཱུཾ་ཞེས་བྱ་བའི་སྔགས་བརྗོད་ལ་ཡི་གེ་ཏཱཾ་དེ་ཉིད་ལས་#བྱུང་བའི་དྲིའི་#མཆོད་པའི་སྤྲིན་ཡང་དག་པར་སྤྲོས་པས་མཆོད་པར་བྱའོ། །དེ་ནས་ཨོཾ་བཛྲ་ནི་བི་དྱེ་ཧཱུཾ་ཞེས་བྱ་
[315b.3]བའི་སྔགས་བརྗོད་ལ་ཡི་གེ་ཏཱཾ་དེ་ཉིད་ལས་རིན་པོ་ཆེ་སྣ་ཚོགས་#བཅུག་པའི་ལྷའི་ཞལ་ཟས་རོ་མཆོག་དང་ལྡན་པའི་མཆོད་པའི་སྤྲིན་རྣམ་པ་སྣ་ཚོགས་ཡང་དག་པར་སྤྲོས་པས་མཆོད་པར་བྱའོ། །དེ་ནས་ཨོཾ་སརྦྦ་#བི་ཤིཥྚ་པཱུ་ཛ་མེ་གྷ་པྲ་ས་ར་ས་མུ་#དྲ་ཨཱཿཧཱུཾ།
[315b.4]ཞེས་བྱ་བའི་སྔགས་བརྗོད་ལ་ཡི་གེ་ཏཱཾ་#དེ་ཉིད་ལས་རིན་པོ་ཆེ་སྣ་བདུན་གྱི་གདུགས་དང་། རྒྱལ་མཚན་དང་། དྲིལ་བུ་དང་། བ་དན་དང་། བླ་རེ་ལ་སོགས་པ་དང་། འཁོར་ལོས་སྒྱུར་བའི་རིན་པོ་ཆེ་སྣ་བདུན་གྱིས་མཆོད་པར་བྱའོ། །དེ་ལྟར་མཆོད་པ་#བྱས་ནས།
[315b.5]དེ་དག་གི་སྤྱན་སྔར་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་བསྐུལ་བ་དང་། གསོལ་བ་གདབ་པ་དང་། བསོད་ནམས་ཡོངས་སུ་བསྔོ་བ་དང་། གསུམ་ལ་སྐྱབས་སུ་འགྲོ་བ་བྱས་ལ། བྱམས་པ་དང་སྙིང་རྗེ་དང་དགའ་བ་དང་བཏང་
[315b.6]སྙོམས་ཏེ་ཚངས་པའི་གནས་བཞི་བསྒོམས་ནས་བྱང་ཆུབ་ཀྱི་སེམས་བརྟན་པོར་བྱའོ། །དེ་ནས་ཨོཾ་སྭ་བྷཱ་བ་ཤུདྡྷཿསརྦྦ་#དྷརྨཱཿསྭ་བྷཱ་#བ་ཤུདྡྷོ྅#ཧཾ། ཞེས་བྱ་བའི་སྔགས་ལན་གསུམ་བརྗོད་ལ། འགྲོ་བ་ཐམས་ཅད་རྨི་ལམ་དང་སྒྱུ་མ་དང་སྨིག་རྒྱུ་ལྟ་བུར་སྟོང་པ་ཉིད་ཀྱི་རང་བཞིན་
[315b.7]དུ་དམིགས་པར་བྱའོ། །དེ་ནས་ཡི་གེ་ཨ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དུ་བསམ། དེའི་སྟེང་དུ་ཡི་གེ་ཏཱཾ་དཀར་པོ་ལས་#འོད་ཟེར་དཀར་པོ་འཁྲིགས་པར་བསམ། དེ་ཡོངས་སུ་གྱུར་པ་ལས་ཨུཏྤ་ལ་སྔོན་པོ། དེའི་དབུས་སུ་ཟླ་བའི་དཀྱིལ་
[316a]
[316a.1]འཁོར་གྱི་སྟེང་ན་ཡི་གེ་ཏཱཾ་དཀར་པོ་བསམ། དེ་ལས་འོད་ཟེར་དཀར་པོ་ཕྱོགས་བཅུར་འཕྲོས་པ་#དེས་སེམས་ཅན་ཐམས་ཅད་སྦྱངས་ནས་ལྷ་མོ་སྒྲོལ་མའི་སྐུར་གྱུར་པ་འོད་ཟེར་དེ་ཉིད་ཀྱིས་བཀུག །ཨུཏྤལ་དང་ཡི་གེ་ཏཱཾ་ལ་བསྟིམས་#
[316a.2]པས། པདྨ་དཀར་པོའི་#དབུས་གནས་པའི། །ཟླ་བའི་གཟུགས་ཀྱི་གདན་སྟེང་དུ། །རྡོ་རྗེ་སྐྱིལ་ཀྲུང་བཅས་ནས་ནི། །མཆོག་སྦྱིན་མ་#དང་ཨུཏྤལ་བསྣམས། །སྟོན་ཀའི་ཟླ་བའི་མདངས་འདྲ་བའི། །ཟླ་བ་ལ་ནི་རྒྱབ་བརྟེན་པ། །རྒྱན་རྣམས་ཐམས་ཅད་ཡོངས་སུ་རྫོགས། །བཅུ་དྲུག་
[316a.3]ལོ་ལོན་ལུས་དང་ལྡན། །རྫོགས་སངས་རྒྱས་དང་དེ་འདྲའི་སྲས། །ཀུན་གྱི་ཡུམ་གྱུར་འདོད་དགུ་#འཆང་། །འཕགས་མ་སྒྲོལ་མ་དེའི་སྙིང་གར་ཟླ་བའི་སྟེང་གི་ཏཱཾ་དཀར་པོ་ཡོངས་སུ་གྱུར་པ་ལས། འཁོར་ལོ་འོད་ཟེར་དཀར་པོ་བསྒོམ། །རྩིབས་བརྒྱད་པ་ལ་ཡི་གེ་ནི། །བརྒྱད་ཀྱིས་
[316a.4]ཡོངས་སུ་བསྐོར་བ་ལ། །ལྟེ་བར་ཨོཾ་ཏཱའི་ཡི་གེ་ཡི#། །དབུས་གནས་བསྒྲུབ་བྱའི་མིང་དང་ལྡན། །ཟླ་དྲུག་བསྟེན་#ཞིང་ངེས་པ་ནི། །རྩེ་གཅིག་པ་ཡི་སེམས་ཀྱིས་བསྒོམ། །ཡི་གེ་བཅུ་པོའི་སྔགས་འདི་ནི། །སྐྱོ་བར་མ་གྱུར་སེམས་ཀྱིས་བཟླས། །དང་པོར་ཨོཾ་ནི་བཞག་#ནས་སུ། །
[316a.5]དེ་འོག་ཏཱ་རེ་རབ་ཏུ་སྦྱར། །དེ་འོག་ཏཱ་རེ་ཏུཏྟཱ་རེ། །སྭཱ་ཧཱའི་#མཐའ་ཅན་ལས་ཀུན་བྱེད། །ཐུགས་ཀའི་འཁོར་ལོ་དེ་ལས་འོད་ཟེར་དཀར་པོ་འཕྲོས་པས་དམ་ཚིག་སེམས་དཔའ་འདྲ་བའི་ཡེ་ཤེས་སེམས་དཔའ་རང་བཞིན་གྱིས་གྲུབ་པ་ཀུན་#ནས་སྤྱན་དྲངས་པ་མདུན་གྱི་ནམ་མཁའ་ལ་
[316a.6]རྣམ་པར་བསམས་ནས#། སྔ་མ་བཞིན་དུ་ཡང་དག་པར་མཆོད་དེ། དེ་ནས་དམ་ཚིག་གི་ཕྱག་རྒྱ་བཅིང་བར་བྱ་སྟེ། ཐལ་མོ་ཁོང་སྟོང་དུ་སྦྱར་ནས་མཛུབ་མོ་གཉིས་གུང་མོ་གཉིས་ཀྱི་རྒྱབ་ཏུ་སྦྱར་ལ་མཐེ་བོང་གཉིས་ནང་དུ་བཀུག་པ་ནི། ཨུཏྤ་ལའི[་ཨུཏྤལའི]ཕྱག་རྒྱའོ། །དེའི་དབུས་སུ་ཡི་གེ་ཏཱཾ་
[316a.7]དཀར་པོ་བསམས་ཏེ། དེ་ལས་འོད་ཟེར་དཀར་པོ་འཕྲོས་པ་དེས་ཡེ་ཤེས་སེམས་དཔའ་ལ་བསྐོར་བར་བྱས་ལ། དེ་ནས་ཛཿཧཱུཾ་བཾ་ཧོཿཞེས་བྱ་བའི་ཡི་གེ་བཞིས་སྤྱན་དྲངས་ནས་དམ་ཚིག་སེམས་དཔའ་བདག་ཉིད་ལ་གཞུག་པ་དང་བཅིང་བ་དང་། དགྱེས་པ་བྱས་ལ། ཨོཾ་དྷརྨ་དྷཱ་
[316b]
[316b.1]ཏུ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅#ཧཾ། ཞེས་ང་རྒྱལ་བྱའོ། །དེའི་རྗེས་ལ་འཁོར་ལོ་ཡི་གེར་བཅས་པ་ལས་འོད་ཟེར་སྤྲོ་བ་བྱས་ལ། དེ་བཞིན་གཤེགས་པ་ལྔ་མདུན་གྱི་ནམ་མཁའ་ལ་རྣམ་པར་བསམས་ལ། དབང་བསྐུར་བའི་ཚིགས་སུ་བཅད་པ་འདིས་དོན་དུ་གཉེར་བར་བྱ་བ་#སྟེ།
[316b.2]བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོག་ཆེན་སྩོལ་#མཛད་པ། །བདག་ལ་བསྲུང་#བའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །དེ་ནས་དེ་བཞིན་གཤེགས་པ་དེ་དག་གི་སྐུ་ལས་བྱུང་བའི་ལོ་ཙཱ་#ན་དང་། མཱ་མ་ཀཱི་དང་། གོས་དཀར་མོ་དང་། ཏཱ་ར་རིན་པོ་ཆེའི་
[316b.3]བུམ་པ་ཡེ་ཤེས་ཀྱི་བདུད་རྩིས་བཀང་#བ་ཕྱག་ན་བསྣམས་པས། རྡོ་རྗེ་ཆེན་པོའི་དབང་བསྐུར་བ། །ཁམས་གསུམ་པོ་ཡིས་ཕྱག་བྱས་པ། །གསང་བ་གསུམ་གྱི་གནས་ལས་བྱུང་། །སངས་རྒྱས་ཀུན་གྱིས་སྦྱིན་པར་བྱ། །ཞེས་བྱ་བ་འདོན་ཅིང་དབང་བསྐུར་བར་བསམ་མོ། །དབང་
[316b.4]བསྐུར་བ་རྫོགས་མ་ཐག་ཏུ་#རིན་པོ་ཆེའི་ཅོད་པན་གྱི་སྟེང་དུ་དེ་བཞིན་གཤེགས་པ་འོད་དཔག་ཏུ་མེད་པ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། ཏིང་ངེ་འཛིན་གྱི་ཕྱག་རྒྱ་ཅན་བསམ་མོ། །ལུས་དང་ངག་དང་ཡིད་གསུམ་བྱིན་གྱིས་བརླབ་#པར་བྱ་བའི་ཕྱིར། སྤྱི་བོར་ཡི་གེ་ཨོཾ་དཀར་
[316b.5]པོ་ཟླ་བའི་དཀྱིལ་འཁོར་ལ་གནས་པ་དང་། ལྐོག་མར་ཡི་གེ་ཨཱཿདམར་པོ་ཟླ་བའི་དཀྱིལ་འཁོར་ལ་གནས་པ་དང་། སྙིང་གར་ཡི་གེ་ཧཱུཾ་ནག་པོ་ཟླ་བའི་དཀྱིལ་འཁོར་ལ་གནས་པ་རྣམ་པར་བཀོད་དོ། །ཡི་གེ་བཅུ་པོ་ལས་འོད་ཟེར་དཀར་པོ་སྤྲོས་པས་འགྲོ་བ་ཀུན་སྦྱངས་ནས་
[316b.6]སངས་རྒྱས་སུ་བསྒྲུབས་ནས་སླར་བཀུག་སྟེ། འཁོར་ལོ་དང་ཡི་གེ་ལ་བསྟིམས་ཏེ་#གསལ་བར་བསྒོམ་ཞིང་བཟླས་བརྗོད་བྱའོ། །ཇི་སྲིད་མི་སྐྱོ་བའི་བར་དུ་བསྒོམ་པ་དང་བཟླས་པར་བྱས་ནས་དེ་ལས་ལྡང་བར་འདོད་ན་ཆོ་ག་ཉམས་པ་བསྐང་བར་བྱ་བའི་ཕྱིར་རྡོ་རྗེ་སེམས་དཔའི་
[316b.7]སྙིང་པོ། ཡི་གེ་བརྒྱ་པ་ཞེས་བྱ་བ་བཟླས་ནས་ཡེ་ཤེས་སེམས་དཔའ་ཡང་དག་པར་མཆོད་#བསོད་ནམས་ཡོངས་སུ་བསྔོས་ལ་གཤེགས་སུ་གསོལ་ལོ། །དེ་ལ་ཡེ་ཤེས་སེམས་དཔའ་གཤེགས་སུ་གསོལ་བའི་ཚིགས་སུ་བཅད་པ་ནི། ཨོཾ་ཁྱེད་ཀྱིས་སེམས་ཅན་
[317a]
[317a.1]དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ནི། །སླར་ཡང་འབྱོན་པར་མཛད་དུ་གསོལ། །མུཿཞེས་བྱ་བ་འདི་ཡིན་ནོ། །དེ་ལ་བཟླས་པའི་སྔགས་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། དེ་ལ་རྡོ་རྗེ་སེམས་དཔའི་
[317a.2]སྙིང་པོ་ཡི་གེ་བརྒྱ་པའི་སྔགས་ནི། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦྦ་སིདྡྷིམྨེ་#པྲ་ཡཙྪ། སརྦ་ཀརྨ་#སུ་ཙ་མེ། ཙིཏྟཾ་ཤྲེ་ཡཿ#ཀུ་རུ་ཧཱུཾ། ཧ་ཧ་ཧ་ཧ་ཧོཿ#།
[317a.3]བྷ་ག་ཝཱན་སརྦྦ་ཏ་#ཐཱ་ག་ཏ། བཛྲ་མཱ་མི་མུཉྩ། བཛྲི་#བྷ་བ་མ་ཧཱ་ས་མ་ཡ་སཏྭ་ཨཱཿ། ཞེས་བྱ་བ་#འདི་ཡིན་ནོ། །བསོད་ནམས་འདི་ཡིས་འགྲོ་བ་ཀུན། །རྗེ་བཙུན་སྒྲོལ་མ་འདྲ་བར་ཤོག །བདག་ཀྱང་ཏིང་འཛིན་འདི་བསྒྲུབས་ནས། །འགྲོ་བའི་དོན་དུ་སངས་རྒྱས་ཤོག །
[317a.4]རྗེ་བཙུན་སྒྲོལ་མའི་སྒྲུབ་ཐབས་སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང་། བོད་ཀྱི་ལོ་ཙཱ་#བ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།
[317a.5]༄༅། །འཕགས་མ་ལྷ་མོ་སྒྲོལ་མ་བསྒོམ་པའི་ཆོ་ག་རྒྱས་པ།# {T3686}༄༅༅། །རྒྱ་གར་སྐད་དུ། ཨཱརྱ་ཏཱ་ར་དེ་ཝཱི་#བྷ་བ་ན་བི་དྷིསྟ་ར། བོད་སྐད་དུ། འཕགས་མ་ལྷ་མོ་སྒྲོལ་མ་བསྒོམ་པའི་ཆོ་ག་རྒྱས་པ། ལྷ་མོ་སྒྲོལ་མ་ལ་ཕྱག་འཚལ་ལོ། །དོན་མེད་བདག་ལ་གནོད་པ་#སྲིད་པའི་བྱ་བ་རྣམས་སྤངས་ཏེ། །རང་བཞིན་བརྟན་པས་རྣམ་པར་
[317a.6]དབེན་པའི་ས་ཕྱོགས་སོང་ནས་ནི། །གནས་དེར་བདག་གི་བསམ་གཏན་ཁང་པ་ཤིན་ཏུ་ཡིད་འཐད་པ། །ཤར་དུ་སྒོ་བཏོད་#ཡང་ན་ནུབ་ཏུ་བཀྲ་ཤིས་སྒོ་ལྡན་པ། །ལེགས་བརྩིགས་དེ་ཡང་དུམ་བུ་བཞི་པས་མཛེས་པར་བྱས་པ་སྟེ། །ཤིན་ཏུ་མཉམ་ཞིང་ལོགས་དང་སྟེང་འོག་ཐམས་ཅད་
[317a.7]ལེགས་བྱུགས་ཤིང་། །རབ་འཇམ་གཟུགས་བརྙན་འཆར་བ་ལྟ་བུར་འཚེར་བའི་རྫས་རྣམས་བྱུགས། །དེ་རྗེས་དྲི་ཞིམ་ལྡན་པའི་ཚོན་རྣམས་ལྗང་གུས་ཁྱབ་པར་བྱུགས། །འདི་ནི་སྟེང་ལོགས་ས་གཞིའི་#བྱི་དོར་རྒྱུད་རྣམས་ལས་བསྔགས་པའོ། །འོག་གི་ཕྱོགས་#ནི་རབ་ཏུ་འཐས་
[317b]
[317b.1]པར་བརྡུངས་པ་ཁོ་ན་ལ། །ས་ལ་མ་ལྷུང་བ་ཡི་ལྕི་བ་དྲི་བཟངས་རྣམས་དང་ནི། །བསྲེས་པ་#ཡང་ཡང་བྱུགས་པས་གཟུགས་བརྙན་འཆར་བ་ལྟ་བུར་འགྱུར། །དེ་ལ་དྲི་ཞིམ་མེ་ཏོག་རྣམས་ཀྱིས་ཀུན་དུ་གཏོར་ནས་ནི། །ཇི་ལྟར་འབྱོར་པའི་བླ་རེ་ལ་སོགས་རྒྱན་རྣམས་བྲི་བར་བྱ། །དེ་འདྲའི་
[317b.2]དབུས་སམ་ཤར་གྱི་རྩིག་ངོས་ཆ་ལ་སྲད་བུ་ཡིས། །བྲིས་སྐུ་ཡིད་འོང་མཐོང་བས་དགའ་བར་འགྱུར་བ་སྦྱར་བར་བྱ། །དེ་མདུན་མེ་ཏོག་ལ་སོགས་མཆོད་པ་འབྱོར་ཚད་དགོད་པར་བྱའོ#། །དེ་བཞིན་དེ་དབུས་སྟན་བཟང་རབ་ཏུ་འཇམ་ཞིང་བདེ་བ་ནི། །བྲིས་སྐུ་ལ་བལྟས་ལེགས་པར་
[317b.3]བཏིང་བས་ཡིད་དང་མཐུན་པར་བཞག །དེ་ཡི་སྒོ་གླེགས་རབ་ཏུ་སྦྱར་#བས་རླུང་དང་སྲོག་ཆགས་ནི། །ཤིན་ཏུ་ཕྲ་བའང་འཇུག་པར་མི་ནུས་འདི་འདྲར་རབ་འགྲིག་བྱ། །དེ་ལ་#ལོགས་ཀྱི་སྐར་ཁུང་སྒོ་དང་བཅས་པ་བཏོད་#པ་སྟེ། །ཆེ་བ་མིན་ཞིང་སྟེང་ནས་གདོད་#དང་དམའ་བ་རབ་ཏུ་
[317b.4]སྨད། །འདི་ནི་བསམ་གཏན་ཁང་པ་མཆོད་རྟེན་ལྟ་བུར་འགྲོ་རྣམས་ཀྱིས། །མཆོད་པར་བྱ་བ་ལྷ་མོའི་བཞུགས་གནས་ལྷ་ཚོགས་འདུ་བའི་སའོ། །དེ་བཞིན་དེ་ལ་སྒོ་བལྟས་པ་ཡི་ཁང་པ་གཉིས་པ་ནི། །སྲིད་དུ་ཁྲུ་རྣམས་བཅུ་བདུན་ཞེང་དུ་དེའི་ཕྱེད་ཡོད་པ་ཞིག །སྔགས་པའི་འཆག་
[317b.5]ས་སྔོན་དུ་#ཁོ་ནར་བརྟག་ཅིང་བྱི་དོར་སྔ་མ་བཞིན། །དེར་ནི་འཇུ་སའི་ཐག་གུ་ཆང་པར་གཟུང་བ་འཚམ་པ་ལ། །རེག་ན་བདེ་བའི་སྦུ་གུ་རྣམས་དང་ལྡན་པར་གདགས་པར་བྱ། །འོག་ཏུ་འབྱོར་པས་སྟན་ནམ་རྩ་རྣམས་སྙོམས་པར་དགྲམ་པར་བྱ། །འདི་ནི་ཁང་པ་དུམ་བུ་གཉིས་པ་འཆག་
[317b.6]ས་#བཀྲ་ཤིས་པའོ། །#དེ་གཉིས་དབུས་#སུ་སྒོ་བཏོད་ཁང་པ་ཕྱོགས་སྙོམས་ཡིད་འོང་བ། །སྔ་མ་ལྟ་བུར་བྱི་དོར་བྱས་ཤིང་དོན་དང་ལྡན་པ་ཡི། །ཁྲུས་ཀྱི་ཁང་པ་སྒོ་དང་བཅས་པ་དུམ་བུ་གསུམ་པའོ། །དེར་ཡང་དེ་ལ་སྒོ་བལྟས་པ་ཡི་ཁང་པ་དུམ་བུ་ནི། །བཞི་པ་བརྩིགས་ཏེ་དེར་ཡང་
[317b.7]བཀྲ་ཤིས་སྒོ་མཆོག་གདོད་པར་བྱ། །ཁང་པ་དེར་ནི་བདག་གི་ཡོ་བྱད་རྣམས་དང་མཚོན་ཆའི་ཚོགས། །མི་ཟད་པ་དང་སྔགས་གཡོག་བློ་གྲོས་ལྡན་པ་མཁས་པས་གཞག །ཟས་ཀྱི་བྱ་བ་རྣམས་ནི་ཁང་པ་དེར་ཡང་ནི། །བྱི་དོར་ལྡན་པར་བརྟག་ཅིང་རྟག་ཏུ་ཉི་ཟླ་ལྡན་པར་བཅང་། །དེ་#
[318a]
[318a.1]ལྟར་དུམ་བུ་བཞི་པའི་ཁང་པ་ཀུན་ནས་གྲུ་བཞི་པར། །བསྒྲུབས་ནས་རིམ་པ་མང་པོར་བརྩེགས་པས་ཤིན་ཏུ་མཐོ་བ་ལ། །རྡོ་ལེབ་ལྷག་པར་སྣང་བ་ཡིས་དང་ཕྱིར་མཐོ་སོགས་ཀྱིས། །རྒྱལ་པོ་ཆོམ་#རྐུན་ལ་སོགས་འཚེ་བ་ཕྱིར་ཕྱོགས་འགྱུར་བར་བྱ། །སྐྱེ་བོ་རྣམས་དང་#
[318a.2]བརྟེན་པས་སྡུག་བསྔལ་ཁོ་ན་འབྱུང་འགྱུར་གྱི། །བདེ་བ་འབྱུང་བར་ཐུབ་པས་མ་གསུངས་དེ་ཕྱིར་མཁས་མཆོག་གིས། །སྔགས་གཡོག་དང་ནི་སྒྲུབ་པའི་གྲོགས་མཆོག་གཉིས་ལས་མ་གཏོགས་པ། །སྐྱེ་བོ་འགའ་ཡང་འཇུག་དང་ཕྲད་དང་སྦྱིན་པ་འདུ་འཛི་སྤངས#། །སྙིང་རྗེས་
[318a.3]མཚོན་ཆའི་ཚོགས་རྣམས་ལེགས་པར་བཤམས་ཤིང་གཞག་པར་བྱ། །དེ་བཞིན་སྒོ་ནི་#ཤིན་ཏུ་གཏན་བཅད་རྒྱ་#དང་བཅས་པར་གཞག# །འདི་ནི་གནས་ཀྱི་རབ་ཏུ་དབྱེ་བའོ།། །།གནས་དེར་སྔགས་པས་མཆོད་པའི་དོན་ཕྱིར་མེ་ཏོག་དག་དང་ནི། །སྤོས་དང་ཏིལ་མར་དྲི་
[318a.4]ཞིམ་རྣམས་#དང་དེ་བཞིན་རོལ་མོ་ཡི། །ཉེར་སྤྱོད་རྣམས་དང་བགྲང་ཕྲེང་ཡིད་དུ་འོང་བའི་རྔ་ཡབ་དང་། །མེ་ལོང་སེན་མོའི་བཟོ་དང་སྤུ་གྲི་ཐ་མལ་དྲི་དང་ནི#། །མཆོད་དང་གཏོར་མའི་དོན་དུ་ཤ་དང་ཉ་ཤ་འབྲུ་རྣམས་དང་། །བཟའ་བ་རྣམས་དང་སྨན་རྣམས་ཐམས་ཅད་ལེགས་པར་
[318a.5]གཞག་པར་བྱ། །མདོར་ན་གནས་དེར་གཞན་གྱི་ངོར་བལྟ་#མི་འགྱུར་ལོངས་སྤྱོད་རྣམས། །མཐུན་པར་གཞག་བྱ་འོན་ཀྱང་ཆང་གི་སྦྱོར་བ་རིང་དུ་སྤང་། །འབྱུང་པོའི་གདོན་དང་སྔགས་གྲུབ་འདོད་པས་གཞན་ནས་བླང་བར་བྱ། །དངོས་གྲུབ་དོན་དུ་བཀུག་པ་མ་ཡིན་བུད་མེད་རྣམས་
[318a.6]དང་ནི། །དཀྱིལ་འཁོར་མ་མཐོང་མི་རྣམས་མཐུ་ཡིས་རྒྱང་གྲགས་ཉིད་ནས་བཟློག །སྔགས་གཡོག་དང་ནི་སྒྲུབ་པའི་གྲོགས་མཆོག་དཀྱིལ་འཁོར་ཆེ་མཆོག་ཏུ། །དབང་བསྐུར་ཐོབ་ཅིང་སྙིང་རྗེ་ཆེ་#དང་ལྡན་པ་#བརྩོན་འགྲུས་ཅན། །ཤེས་རབ་དང་ལྡན་དཔའ་ཞིང་འཇིགས་བྲལ་
[318a.7]ཁྲོ་མེད་ང་རྒྱལ་བྲལ། །བློ་བརྟན་དད་པར་#གནས་ཤིང་བདག་ལ་དགའ་འཛིན་གུས་པར་བཅས། །བསྒོམ་དང་དགེ་ལ་བརྩོན་པ་འདི་འདྲ་གཉིས་ནི་རྟག་པར་གཞག# །འདི་ནི་རྫས་དང་གཡོག་གི་རབ་ཏུ་དབྱེ་བའོ།། །།བློ་ལྡན་གྱིས་ནི་སྔར་བཤད་སྟན་ལ་#རྡོ་རྗེ་སྐྱིལ་ཀྲུང་
[318b]
[318b.1]གིས། །ལེགས་པར་གནས་#ཏེ་བདག་ལ་མྱུར་དུ་བསྐུལ་བའི་བསམ་པ་བསྐྱེད། །བདག་ནི་ཤིན་ཏུ་རིང་ནས་རང་གིས་#རྣམ་པར་བསླུས་པ་སྟེ། །སྔོན་ཆད་དོན་མེད་སྤངས་ནས་ཏིང་འཛིན་བསྒྲུབས་ན་འདི་འདྲ་བའི། །སྲིད་མཚོར་འཁྱམས་པར་#མི་འགྱུར་བདེ་མཐའ་གཅིག་པུ་ཉིད་
[318b.2]གང་ཡིན། །འགྲོ་བའི་སྐྱབས་སུ་བདག་འགྱུར་འདི་ལ་འཁྲུལ་པ་ཡོད་མ་ཡིན། །ད་ནི་བདག་གིས་རང་ལ་བསླུས་པ་སྤངས་ཏེ་བརྩོན་པ་ཡིས། །དམ་པའི་གནས་འདིར་ངེས་པར་ལྷ་མོའི་མཆོག་གྱུར་སྒྲོལ་མ་གང་། །ཕོངས་པ་ལ་བྱམས་མ་འདྲ་དེ་ཉིད་ངེས་པར་མཐོང་བར་བྱ། །
[318b.3]བདག་ནི་བསྟོད་པས་དགའ་བར་#མི་བྱ་སྨོད་པ་གཞན་མང་གནས། །སྨད་པས་མི་དགའ་མི་བྱར་#བསྟོད་པའང་གཞན་མང་གནས་པའི་ཕྱིར། །དེ་བཞིན་འཇིག་རྟེན་ཆོས་བརྒྱད་མ་ལུས་བདག་གིས་#མནན་པར་བྱ། །ལུས་ཀྱིས་ཇི་ལྟར་བཟོད་པས་སྐད་ཅིག་ཙམ་ཡང་དམན་པ་ཡི། །
[318b.4]བྱ་བ་རྣམས་ལ་གནས་པར་མི་བྱ་ཇི་སྲིད་བདག་གིས་ནི། །ལྷ་མོ་མཐོང་གྱུར་དེ་སྲིད་མཉམ་དང་བསམ་དང་འདུས་པར་འགྲོ། །དེ་བཞིན་ཚོང་དང་དམག་དང་ལས་ཀྱི་མཐའ་རྣམས་སྤང་བར་བྱ། །ཡང་དག་གདམས་#ངག་བདག་གིས་ལྷ་མོ་མཆོག་ལས་བླང་བར་བྱ། །གཞན་གྱིས་ཉེར་
[318b.5]བསྟན་མུན་པའི་འདབ་#འདྲས་བདག་ལ་ཅི་ཞིག་དགོས། །ཇི་སྲིད་ལྷ་མོ་མཐོང་བར་མ་གྱུར་དེ་#སྲིད་གནས་འདི་ནས། །འགྲོ་བར་མི་བྱ་དེ་ཕྱིར་འདི་ལ་ལྷ་རྣམས་མཁྱེན་པར་མཛོད། །དེ་ནས་སྔགས་གཡོག་དང་ནི་སྒྲུབ་པའི་གྲོགས་མཆོག་བློ་ཅན་གཉིས། །སྔགས་པས་བོས་ཏེ་
[318b.6]འདི་འདྲའི་བསྒོ་བ་གསལ་བར་བརྗོད་པར་བྱ། །བདག་གི་#འདོད་པ་ཡོངས་སུ་མ་རྫོགས་པར་དུ་གནས་འདི་ལས། །འགྲོ་བར་མི་བྱ་ལྷ་རྣམས་དཔང་བཙུགས་ཁྱོད་ཀྱིས་འདི་ཤེས་བྱོས། །དེ་སྲིད་བདག་གི་ཡིད་དང་མཐུན་པའི་བྱ་བ་ཁྱེད་ཀྱིས་བྱོས། །དངོས་གྲུབ་ཆ་ལས་ཁྱེད་ལ་
[318b.7]འགོད་འགྱུར་འདི་ལ་ཐེ་ཚོམ་མེད། །དེ་ཉིད་#ཀྱིས་ནི་ཐལ་མོ་སྦྱར་བས་ལེགས་པར་སྨྲས་པ་གཟུང་། །ལྷ་རྣམས་དཔང་དུ་གནས་པས་བདག་ཅག་ཁྱོད་ཀྱིས་འདོད་བཞིན་བགྱིད། །དངོས་གྲུབ་ཆ་ལ་བདག་ཅག་དྲན་པར་མཛོད་ལ་སྤང་མི་བྱ། །དེ་སྐད་བརྗོད་དེ་ཇི་ལྟར་འདོད་
[319a]
[319a.1]པས་རང་གི་བྱ་བ་བརྩམ། །འདི་ནི་སྒྲུབ་པ་པོ་དང་གཡོག་དང་གྲོགས་དང་#དམ་བཅའ་བའི་རབ་ཏུ་དབྱེ་བའོ།། །།དེ་ནས་སྔགས་པས་སྟན་བདེ་ཉིད་ལ་འདུག་བཞིན་རབ་རྒྱས་པའི། །གཏོར་མ་མདུན་དུ་བཞག་སྟེ་#དེ་བཞིན་མཆོད་པ་རྣམས་ཀྱང་ངོ་། །དེ་ནས་
[319a.2]རང་སྙིང་པཾ་བསྐྱེད་པདྨའི་དབུས་སུ་ཟླ་འདྲ་བའི། །ཡི་གེ་ཨོཾ་ལས་བྱུང་བའི་ཟླ་བ་རྣམ་བསམ་དེ་སྟེང་དུ། །གསལ་བྱའི་བཅུ་དྲུག་པ་ཉིད་དབྱངས་ཀྱི་ཡི་གེ་གཉིས་པས་བརྒྱན། །ཟླ་བའི་དུམ་བུའི་སྟེང་ན་ནམ་མཁས་#མནན་ཅིང་མདོག་ལྗང་གུ། །སྟོང་ཕྲག་དུ་མའི་སྣང་བ་ལྡན་བསམ་
[319a.3]དེ་ལས་བྱུང་བའི་འོད། །མཚོན་ཆའི་དབྱིབས་ཅན་འཕྲོས་པས་བླ་མ་དང་ནི་རྒྱལ་སྲས་བཅས། །སྒྲོལ་མ་བཀུག་སྟེ་མདུན་བཞུགས་དེ་དག་མཆོད་པ་གཉིས་ཀྱིས་མཆོད། །ཡན་ལག་བདུན་ལྡན་བྱ་བ་#བསྒྲུབས་ནས་སླར་ཡང་གཤེགས་པར་བྱ། །དེ་མཐར་ཆོས་ཀུན་སྟོང་ཞིང་
[319a.4]བདག་མེད་ལྟ་བས་གསང་སྔགས་ནི། །ཐེག་ཆེན་མངོན་པར་རྟོགས་བྱེད་ལན་གསུམ་པར་དུ་བཟླ་བར་བྱ། །སླར་ཡང་མཁས་པས་#ས་བོན་མཆོག་བསམ་དེ་ལས་བྱུང་བའི་འོད། །སྒྲོལ་མར་གྱུར་པས་འགྲོ་རྣམས་དག་བྱས་སླར་འདུས་ཞུགས་པ་ཡི། །ཡི་གེ་ཡོངས་གྱུར་ཨུཏྤལ་
[319a.5]ལྗང་གུ་སྙིང་པོ་#ས་བོན་ལྡན། །སྐད་ཅིག་ཉིད་གྱུར་#ས་བོན་ལས་བྱུང་ལྷ་མོ་མ་ལུས་བསྡུས། །རང་གི་གནས་སུ་ཐིམ་གྱུར་དེ་ལས་ལེགས་བྱུང་ལྷ་མོ་ནི། །ཞལ་གཅིག་ཕྱག་གཉིས་སྐུ་མདོག་ལྗང་གུ་སྤྱན་ཡངས་རྒྱན་ཀུན་འཛིན། །ཕྱག་གཡས་མཆོག་སྦྱིན་གཡོན་པས་ཡུ་བ་དང་བཅས་
[319a.6]ཨུཏྤལ་འཛིན། །བཅུ་དྲུག་ལོ་ལོན་རབ་སྒེག་གཟི་ལྡན་པདྨ་ཟླ་བའི་གདན། །ཅུང་ཟད་འཛུམ་བཅས་སྒྲུབ་པ་པོ་ལ་མངོན་དགྱེས་ཐུགས་རྗེ་ཅན། །མ་ལུས་བུད་མེད་རྒྱན་དང་ཆ་ལུགས་འཛིན་པ་འདི་འདྲ་བསམ། །སླར་ཡང་ས་བོན་ལས་བྱུང་ཡེ་ཤེས་ལྷ་མོ་སྤྱན་དྲངས་ཏེ། །
[319a.7]འཆད་འགྱུར་ཕྱག་རྒྱའི་སྟེང་གནས་ཟླ་བའི་ས་བོན་ལས་བྱུང་བའི། །མཆོད་པས་ལེགས་མཆོད་མན་ངག་ཇི་བཞིན་རང་ལ་བསྟིམ་པར་བྱ། །སྐུ་གསུང་ཐུགས་ལ་གནས་པའི་ལྷ་རྣམས་ལེགས་#པར་བྱིན་གྱིས་བརླབས#། །དེ་བཞིན་བློ་ལྡན་བུ་ཡིས་གུས་#པས་དབང་བསྐུར་དོན་
[319b]
[319b.1]གཉེར་བྱ། །རྩོད་#པ་མི་མངའ་བའམ་#དམ་ཚིག་རྡོ་རྗེ་སྤྱི་བོར་བྱུང་། །དེ་ལྟར་ཆོ་གས་ལེགས་བསྒྲུབས་རང་ཉིད་#པདྨ་ཟླ་བ་ལ། །རྣམ་བཞུགས་ལྷ་མོའི་ཐུགས་ཀར་སེན་ཟླུམ་མཉམ་པའི་ཟླ་བ་ནི། །རྗེས་མཐུན་པདྨ་ལ་གནས་ལྷ་ཉིད་མཐེ་བོང་ཚོན་#དང་མཚུངས། །ཟླ་སྟེང་བཅུ་ཡི་#ཡི་གེས་
[319b.2]ཡོངས་བསྐོར་དབུས་ན་སྔར་བཤད་ཉིད། །ལྗང་གུའི་འོད་ཟེར་དང་བཅས་མགོ་རྣམས་གྱེན་ཕྱོགས་གསལ་བསམས་ཏེ། །དབུས་མ་དང་ནི་བཅུ་པའི་བདག་ཉིད་འོད་ཟེར་དང་བཅས་བྱུང་། །སྙིང་ག་ནས་སོང་#ཕྱི་རོལ་ལྷ་མོ་ཉིད་གྱུར་འགྲོ་རྣམས་ཀྱི། །སྡུག་བསྔལ་ཞི་བྱས་
[319b.3]མཐུན་གྱུར་སྒོ་དེ་ཉིད་ནས་སླར་བསྡུ་#བྱ། །འདི་ནི་སྤྲོ་བསྡུའི་ཏིང་འཛིན་ཉོན་མོངས་གཡུལ་ལས་རྒྱལ་བྱེད་པའོ། །དེ་འདྲ་ཏིང་ངེ་འཛིན་མང་དུ་བྱས་པས་སྔགས་པའི་ཡིད་སྐྱོ་ན། །སྙིང་ཟླའི་རྣམ་འཕྲུལ་ལ་དམིགས་གཞན་སེམས་རབ་ཏུ་སྤངས་ནས་ནི། །དང་པོར་རྣམ་པར་སྣང་
[319b.4]མཛད་དེ་རྗེས་གསལ་བྱའི་བཅུ་དྲུག་པ། །འོག་ཏུ་དབྱངས་#ཡིག་གཉིས་པས་ལེགས་#བསྟེན་པ་སྟེ་དེ་རྗེས་སུ#། །ཉི་མའི་བུ་ལ་#སྟེང་དུ་ཨེ་ཡིས་མཚན་ཅིང་གནས་པའོ། །དེ་ནས་གསལ་བྱའི་བཅུ་དྲུག་པ་ཉིད་ཨུ་ཡིས་བཅིངས་པ་ལ། །ཕྱེད་ཆའི་ཏ་ཡིས་མཐའ་#མ་བསྟེན་
[319b.5]པའོ་དེ་རྗེས་སྔར་བཞིན་ལས། །སླར་ཡང་བཅུ་དྲུག་པ་ནི་ཨུས་བཅིངས་མེ་བུ་ཨེ་དང་ལྡན། །སླར་ཡང་ཨུཥྨའི་གསུམ་པ་#མཐར་གནས་པ་ཡི་གཉིས་པར་ལྡན། །དེ་ཉིད་དབྱངས་ཡིག་གཉིས་པས་བརྒྱན་བྱས་རྗེས་སུ་ཨུཥྨ་ཡི། །བཞི་པ་ང་རོ་གཉིས་པས་སྤྲས་བྱས་འདི་
[319b.6]འདྲའི་གསང་སྔགས་ནི། །ཤིན་ཏུ་གསལ་མིན་དེ་བཞིན་མི་གསལ་མ་ཡིན་སྒྲ་ཆེ་དང་། །ཤིན་ཏུ་ཆུང་མིན་སེམས་གཞན་རྣམ་པར་གཡེངས་བ་སྤངས་པ་ཡིས། །བརྒྱ་རྩ་བརྒྱད་ལས་ལྷག་པའམ་དེ་བཞིན་ནོར་བུར་བཟུང་#སྟེ་བཟླས། །གང་ཚེ་དེ་ཡི་ཡིད་ནི་#བཟླས་པས་སྐྱོ་ན་
[319b.7]ས་བོན་ལས་བྱུང་བའི། །འོད་ཟེར་ཚོགས་ཀྱིས་འགྲོ་རྣམས་བཀུག་སྟེ་#མན་ངག་ཇི་ལྟ་བར། །སྔགས་འདིས་འབྱུང་པོ་རྣམས་ལ་གཏོར་མ་སྦྱིན་བྱ་ཕྱག་རྒྱ་ནི། །ལག་#གཉིས་ཐལ་སྦྱར་མཛུབ་མོ་དག་གིས་#གུང་མོ་འཁྱུད་བྱས་ཏེ། །མཐེ་བོང་གཉིས་ཀྱིས་སྙིང་པོར་བྱས་པ་འདི་ཡི་#
[320a]
[320a.1]གསང་སྔགས་མཆོག །བཟླས་དང་གཏོར་མ་སྦྱིན་དང་བསྟིམ་སོགས་ཕལ་ཆེར་སྦྱར་བར་བྱ། །ཨོཾ་ཨ་ཀཱ་རོ་མུ་ཁཾ་སརྦྦ་དྷརྨ་ཎཱཾ་ཨཱདྱ་ནུཏྤནྣ་ཏྭཱཏ་#ཨོཾ་ཨཱཿཧཱུཾ་ཕཊ་སྭཱ་ཧཱ། གཏོར་མ་ཕུལ་ནས་ཡི་གེ་བརྒྱ་པ་ལན་གསུམ་བརྗོད་ནས་ནི། །བཟོད་པར་གསོལ་ཞིང་
[320a.2]ཡོངས་བསྔོ་མངོན་འདོད་དངོས་གྲུབ་གསོལ་བཏབ་ནས། །དེ་ཉིད་གསུམ་མཐར་མུཿཡིས་བསྐུལ་བས་ལྷ་རྣམས་བཞུད་པར་བྱ། །དེ་ནས་ཡེ་ཤེས་སེམས་དཔའ་མདུན་དུ་རབ་གསལ་ལེགས་མཆོད་ནས། །ཡི་གེ་བརྒྱ་པ་རང་གི་ཕྱག་རྒྱ་འཛིན་པས་ལེགས་བཟླས་ཏེ། །བཟོད་
[320a.3]མཛོད་བདག་བློ་འཁྲུལ་བས་ཏིང་འཛིན་མཆོག་ལས་ཉམས་པ་དང་། །མཆོད་དང་གཏོར་མ་དམན་ཞིང་སྔགས་དང་ཕྱག་རྒྱ་འཁྲུགས་#པ་དང་། །བརྩོན་པ་དམན་ཞིང་སེམས་ནི་དམ་པ་མ་ལགས་གང་སྐྱེས་པ། །ཐམས་ཅད་ཁྱེད་ཀྱིས་བཟོད་མཛོད་གྲུབ་པར་བྱིན་གྱིས་བརླབ་ཏུ་#
[320a.4]གསོལ། །དེ་བཞིན་ཁྱོད་འདྲར་བདག་གྱུར་འགྲོ་རྣམས་སྲིད་མཚོ་ལས་སྒྲོལ་ཤོག །མྱུར་དུ་ཁྱོད་ཀྱིས་བདག་ལ་བྱམས་པའི་ཞལ་བཟང་བསྟན་དུ་གསོལ། །བདག་ལ་མྱུར་དུ་ཐུགས་མཆོག་རབ་ཏུ་བརྩེ་བར་མཛད་པའི་རིགས། །ཐུགས་རྗེའི་ལྷ་མོ་ཁྱོད་ཀྱིས་བདག་ལ་མྱུར་དུ་དབང་
[320a.5]བསྐུར་དང་། །དམ་པའི་གདམས་ངག་བསྟན་པས་ཡང་དག་ལམ་བསྟན་རིགས་པ་ཉིད། །དེ་རྗེས་མཆོད་དང་བསྟོད་པའི་དམ་པ་རབ་ཏུ་གུས་པས་གདོན། །དེ་ནས་རང་སྔགས་སྭཱ་ཧཱའི་#གནས་སུ་མུཿསྦྱར་བ་ཡིས་གཤེགས། །བདག་ཉིད་ལྷ་མོའི་ང་རྒྱལ་ལྡན་པས་ཅི་བདེར་གནས་པར་
[320a.6]བྱ། །འདི་འདྲ་ཐུན་མཚམས་བཞིར་ནི་རབ་མཉམ་གཞག་པའི་སྔགས་པ་ཡིས། །ཉིན་གཅིག་བཞིན་དུ་འབད་པས་བསམས་ན་དེ་ཡིས་ངེས་པར་ནི། །ཟླ་དྲུག་དེ་བཞིན་ལོ་གཅིག་ཉིད་དང་གསུམ་གྱི་ནང་དུ་ནི། །ལྷ་མོ་མཐོང་འགྱུར་འདི་ལ་ཐེ་ཚོམ་མི་བྱ་གཞན་དུ་ན། །ཆོ་ག་
[320a.7]ཉམས་པས་བསྐལ་པ་སྐར་མ་མཉམ་པར་#མཐོང་མི་འགྱུར། །འདི་ནི་སྒྲུབ་པའི་ཐབས་ཀྱི་#རྣམ་པར་དབྱེ་བའོ།། །།ཤིན་ཏུ་ཁྲོ་བར་འདོད་ཅིང་འདོད་ཆགས་ཆེ་དང་ལྷག་པར་ནི། །གཉིད་འབྱུང་བ་དང་དེ་བཞིན་རབ་ཏུ་མི་དགའ་ངུ་བར་འདོད། །བསམ་གཏན་ཁང་པ་སྤངས་
[320b]
[320b.1]ཏེ་གཞན་དུ་འགྲོ་བར་འདོད་པ་དང་། །བསམ་གཏན་གནས་སུ་མི་བཟད་སྒྲ་འབྱུང་དེ་བཞིན་སྒོ་དག་ལས། །འཇིགས་པའི་སྒྲ་འབྱུང་ཆོ་ངེས་འདེབས་པའི་སྒྲ་དག་ཐོས་པ་དང་། །ནང་ན་གནས་པའི་མིང་ནས་ཕྱི་#ཕྱིར་འབོད་པ་དང་ནི་དགོད#། །སྐྱུགས་པ་དང་ནི་གླུ་ལེན་སྒྲ་དང་སོ་
[320b.2]གོལ་རྡེབ་ཅིང་མཁུན#། །ཤིན་ཏུ་མི་བཟད་དྲི་མི་#ཞིམ་པའི་ངད་ལྡང་སྐྱི་བུང་ཞེས། །འཇིགས་དང་གཟུགས་མི་སྡུག་པ་མཐོང་དང་བརྡེག་དང་འཕུལ་བར་བྱེད། །རྟག་ཏུ་རྨི་ལམ་སྡུག་བསྔལ་མཐོང་དང་འདྲེ་ཡིས་གནོན་པ་དང་། །ཤིན་ཏུ་དགའ་ཞིང་མཁའ་ལ་འཕུར་སྙམ་
[320b.3]བྱེད་དང་རྒྱུ་མེད་དགོད#། །གློ་བུར་དུ་ནི་གཞན་གྱི་སེམས་ཤེས་འདྲེ་སྨྲ་རྣ་བས་ཐོས། །འཇིགས་པར་བྱེད་པའི་འོད་ཟེར་ཁང་པར་རབ་ཏུ་འབྱུང་བ་དང་། །དམན་པའི་མན་ངག་སྟོན་པའི་རང་ལྷའི་གཟུགས་ནི་མཐོང་བ་དང་། །མངོན་དུ་སྟེང་ནས་ཤིན་ཏུ་གནོན་ཅིང་མཐོང་བར་བྱེད་པ་
[320b.4]སྟེ། །མདོར་ན་གང་གིས་བཟླས་དང་བསམ་གཏན་དག་གི་#བར་ཆད་བྱེད། །དེ་བཞིན་བློ་ནི་སྔ་ལས་ཉམས་པར་བྱེད་པ་དེ་ནི་བགེགས། །ཡིན་ཕྱིར་བླ་མའི་མན་ངག་ཁོ་ནས་བཟློག་པར་བྱ་བ་སྟེ། །བླ་མའི་མན་ངག་མེད་པར་སྒྲུབ་ལ་#བརྩོན་པ་དེ་ནི་འདིར། །སྲོག་དང་དངོས་གྲུབ་
[320b.5]གཉིས་ཀ་#གདོན་ཆེན་རྣམས་ཀྱིས་#འཕྲོག་པར་འགྱུར། །བླ་མའི་མན་ངག་ཅན་ལ་བགེགས་རྣམས་འབྱུང་བར་མི་འགྱུར་ཞིང་། །འབྱུང་ཡང་བློ་ཅན་དེ་ནི་བཟློག་པར་བྱ་བ་ཚོགས་དང་བྲལ། །འདི་ནི་བགེགས་ཀྱི་མཚན་མ་དང་དེ་རབ་ཏུ་བཟློག་པའི་རབ་ཏུ་དབྱེ་བའོ།། །།
[320b.6]ཤིན་ཏུ་དྲི་ཞིམ་ངད་ལྡང་ཡིད་ནི་དགེ་ལ་མངོན་དགའ་དང་། །ལུས་ནི་རབ་ཡང་གཉིད་ནི་མི་འབྱུང་ཁམས་རྣམས་སྙོམས་པ་དང་། །ཤིན་ཏུ་སྒྲ་སྙན་པ་དང་རོལ་མོའི་སྒྲ་རྣམས་གྲག་པ་དང་། །མེ་ཏོག་ཆར་འབབ་ཏིལ་མར་བྲལ་བར་མར་མེ་འབར་བ་དང་། །རྨི་ལམ་ན་ནི་འཕགས་
[320b.7]རྣམས་མཐོང་དང་དགེ་སློང་བྲམ་ཟེ་མཐོང་། །རྟག་ཏུ་དགེ་བའི་རྨི་ལམ་མཐོང་དང་ཆགས་དང་ཁྲོ་དང་བྲལ། །ཡིད་ནི་དགའ་བར་བྱེད་པའི་འོད་ཆེན་ཁང་པར་འབྱུང་བ་སྟེ། །མདོར་ན་ཡིད་ནི་གང་གིས་སྔ་#ལས་དགའ་གྱུར་བཟླས་པ་དང་། །སྒོམ་པ་དག་ལ་བར་དུ་མི་གཅོད་#
[321a]
[321a.1]འདིར་ནི་མཚན་མ་བཟང་། །འདིར་#ནི་བཟླས་དང་བསྒོམ་པ་ཇི་ཙམ་གསལ་བ་དེ་ཉིད་མཆོག །འདི་ནི་མཚན་མ་བཟང་པོའི་རབ་ཏུ་དབྱེ་བའོ།། །།སྨན་མཆོག་བཟའ་བ་#མ་ལེགས་#ངེས་པར་དུག་ཏུ་འགྱུར་བ་ལྟར། །དངོས་གྲུབ་ལེན་མི་མཁས་པ་རྣམས་ཀྱི་#དངོས་
[321a.2]གྲུབ་ཕྱིར་ཕྱོགས་པའམ། །ཡང་ན་སྲོག་གི་བར་ཆད་དག་ཏུའང་འགྱུར་བས་དེ་ཡི་ཕྱིར། །མཁས་པས་དངོས་གྲུབ་བླང་བ་འཁྲུལ་བ་མེད་པར་ཤེས་པར་བྱ། །རྒྱ་མཚོར་རིན་ཆེན་ལེན་པ་རྣམས་ལ་འཚེ་བ་རྣམ་མང་#འབྱུང་། །དེ་བཞིན་དངོས་གྲུབ་རིན་ཆེན་ལེན་པ་རྣམས་ལ་འཕྲོག་
[321a.3]པ་མང་། །འདི་ནི་གདོན་ཆེན་དངོས་གྲུབ་འཕྲོག་བརྩོན་རབ་ཏུ་མང་བ་སྟེ། །དངོས་གྲུབ་རྣམས་ནི་སྒྲུབ་པ་པོས་ཀྱང་བསྲུང་བར་#རབ་ཏུ་དཀའ། །དེ་བས་བློ་ལྡན་འཇིགས་པ་མ་ལུས་རིང་དུ་སྤངས་པ་ཡིས། །མི་བཟང་མཚན་མ་ངན་པ་ཐམས་ཅད་རབ་ཏུ་གཞིག་པར་བྱ། །འཇིགས་པར་མི་བྱ་ཁྲོད་དང་ཆགས་པ་རྣམ་པར་སྤང་བར་
[321a.4]བྱ། །མཚན་བཟངས་#རྣམས་ཀྱང་སྒྱུ་མ་འདྲ་བར་བལྟ་བྱ་རི་རབ་#བཞིན། །མཚན་མའི་རླུང་གིས་ངེས་པར་མི་གཡོ་མཉམ་པར་གཞག་#པར་བྱ། །དེ་ཚེ་དེ་#ལ་ལྷ་མོས་#ཡང་དག་ཞལ་སྟོན་འགྱུར་བ་སྟེ། །ཐུན་མོང་མ་ཡིན་བདེ་བ་འབྱུང་འགྱུར་གུས་པས་མཆོད་ཅིང་བསྟོད། །འདོད་
[321a.5]པའི་དངོས་གྲུབ་གསོལ་གདབ་ཡང་དག་གདམས་ངག་དོན་དུ་འགྱུར། །ཇི་སྲིད་གསུང་བ་མི་མངའ་འབད་པས་རབ་ཏུ་བསྒྲུབ་པར་བྱ། །#གང་ཚེ་གསུང་པ་མངའ་བ་དེ་ཚེ་གཞན་ལ་ལྟོས་དང་བྲལ། །དེ་ནི་ལྷ་མོའི་སྲས་ཡིན་བསམ་གྱིས་མི་ཁྱབ་དབང་དང་ལྡན། །རྒྱལ་བའི་སྲས་པོ་
[321a.6]སྒྲིབ་པ་ཀུན་དང་བྲལ་བ་དཔལ་ལྡན་ཡིན། །དེ་ཡིས་དངོས་གྲུབ་དང་ནི་མཚན་མ་གཉིས་ཀ་ཇི་སྲིད་དུ། །གནང་བར་མ་གྱུར་དེ་སྲིད་གཞན་ལ་ཟུར་ཙམ་སྨྲ་མི་བྱ། །སྐད་ཅིག་དེ་ཉིད་ལ་ནི་དངོས་གྲུབ་རིང་འགྱུར་དྲན་པར་བྱ། །གྲུབ་པར་གྱུར་ནས་སྔགས་གཡོག་དང་ནི་སྒྲུབ་པའི་
[321a.7]གྲོགས་མཆོག་#ལ། །དངོས་གྲུབ་ཆ་ལ་སེར་སྣ་བྲལ་བས་སྦྱིན་པས་ཕན་གདགས་བྱ། །ཕ་མ་དང་ནི་བླ་མ་ལ་ཡང་དངོས་གྲུབ་རྫས་དག་ལས། །ཆོས་མཆོག་སྐལ་བ་བགོ་བར་རྒྱུད་རྣམས་ལས་ནི་རྣམ་པར་བཤད། །མདོར་ན་དངོས་གྲུབ་དག་ནི་ཇི་ལྟར་བགོ་བ་བློ་ལྡན་གྱིས། །རྒྱུད་
[321b]
[321b.1]རྣམས་ཉིད་ལས་ཇི་ལྟར་བཤད་པའི་རྗེས་འབྲངས་ཤེས་པར་བྱ། །འདི་ནི་དངོས་གྲུབ་བླང་བ་དང་བགོ་བའི་རབ་ཏུ་དབྱེ་བའོ།། །།གང་དག་དཀྱིལ་འཁོར་མཆོག་ཏུ་དབང་བསྐུར་མ་ཐོབ་སྐྱེ་བོ་དང་། །སྡོམ་དང་དམ་ཚིག་མི་སྲུང་བླ་མའི་བཀའ་ལས་འདས་པ་དང་། །བླ་མ་ལ་ནི་མི་
[321b.2]གུས་ཡིད་ཀྱིས་བླ་མ་ལ་ནི་འཕྱ། །དེ་བཞིན་སྔོན་དུ་བླ་མ་དག་ལ་གུས་ཤིང་ལྐོག་ན་སྨོད། །བློ་ནི་ཐེ་ཚོམ་དྲ་བས་ཁྱབ་ཅིང་བརྩོན་འགྲུས་ཞན་པ་དང་། །བློ་གྲོས་མི་བརྟན་ཉིན་གཅིག་བཞིན་དུ་ལྷ་རྣམས་གཞན་འཛིན་དང་། །སྡང་ཞིང་བུད་མེད་#བསྙེན་བཀུར་བདག་གིར་བྱེད་དང་
[321b.3]དེ་བཞིན་དུ། །བྱང་ཆུབ་མཆོག་ཏུ་སེམས་བསྐྱེད་མ་བྱས་གཉིད་ལ་དགའ་བ་དང་། །ཤིན་ཏུ་བླུན་ཞིང་ཆགས་དང་སྡང་བ་དྲེགས་#ལྡན་དེ་བཞིན་དུ། །སྡུག་བསྔལ་དག་ལ་བཟོད་པ་བསྐྱེད་པར་མི་ནུས་སེམས་སྟོབས་ཆུང་། །ཅུང་ཟད་སྨོད་ཚིག་ཐོས་ན་རབ་ཏུ་མི་དགའ་དེ་བཞིན་དུ། །
[321b.4]ཅུང་ཟད་བསྟོད་པས་རབ་དགའ་རྙེད་པ་ལ་ནི་བརྐམ་པ་དང་། །ཅུང་ཟད་སྔགས་ཀྱི་མཐུ་སྙེམས་རྨི་ལམ་ཙམ་གྱིས་དྲེགས་པ་དང་། །གླེགས་བམ་འཛིན་ཅིང་མན་ངག་ཡོད་ཅེས་མི་རྣམས་ལ་སྨྲ་དང་། །ཕྲག་དོག་དྲི་མས་སྦགས་ཤིང་མན་ངག་མེད་ལ་སེར་སྣས་བཅིངས། །སྟོང་
[321b.5]ཉིད་སྟོན་པའི་ཆོས་ལ་སྡང་ཞིང་དངོས་པོར་འཛིན་ལ་དམ། །ཉན་ཐོས་སྤྱོད་པ་ལ་ནི་མངོན་ཞེན་སྔགས་ཚུལ་སུན་པར་བྱེད། །བདག་གི་ཕྱོགས་ལ་མངོན་ཞེན་གཞན་ཕྱོགས་ངག་ལ་རྣམ་པར་སྡང་། །རྟ་ལ་སོགས་པ་ཞོན་ཞིང་ལྕག་གིས་གཞུ་དང་གློ་རྡེབས་བྱེད། །ཆང་འཐུང་བ་དང་འཇིག་
[321b.6]རྟེན་གཏམ་ལ་དགའ་ཞིང་ཟས་ལ་བརྐམ། །འདུས་པར་འགྲོ་དང་དམག་དང་འཐབ་མོའི་བྱ་བ་རྣམས་ལ་དགའ། །རྒྱལ་པོའི་ཕོ་བྲང་འཁོར་དུ་ཁ་འཛིན་ཕྲ་མས་འཚེ་བར་བྱེད། །རང་གིས་དཔྱད་པས་སྔགས་ཚུལ་ཟབ་མོ་རྣམས་ལ་སྡེབ་#སྦྱོར་བྱེད། །བླ་མའི་ལུང་ཐོབ་མེད་པར་སྔགས་རྣམས་
[321b.7]འཆད་པར་ཀུན་དུ་རྩོམ། །བསྙེན་བཀུར་དམན་ཞིང་བླ་མ་རྣམས་ལ་མྱུར་དུ་མན་ངག་འདོད། །འདི་འདྲའི་མི་ཡིས་གངྒཱའི་བྱེ་མ་མཉམ་པར་རབ་བསྒྲུབས་ཀྱང་། །དངོས་གྲུབ་མི་འབྱུང་དེ་དག་ཕུང་པོ་རྣམ་པར་ཉམས་པར་འགྱུར། །འདི་ནི་སྒྲུབ་པ་པོའི་སྐྱོན་གྱི་རབ་ཏུ་དབྱེ་བའོ།། །།#
[322a]
[322a.1]གང་གིས་སྔར་བཤད་སྐྱོན་སྤངས་དེ་ནི་དངོས་གྲུབ་སྣོད་ཡིན་ཏེ། །དེ་ལ་བླ་མས་མན་ངག་མ་ལུས་སྦྱིན་པས་ཕན་གདགས་བྱ། །དེས་ནི་དངོས་གྲུབ་མ་ལུས་མྱུར་དུ་འགྲུབ་པར་འགྱུར་བའོ། །དེ་ནི་བློ་ལྡན་རྒྱལ་བའི་མྱུ་གུ་རིག་འཛིན་རྣམས་ཀྱི་གྲོགས། །འཁོར་བར་
[322a.2]གནས་ཀྱང་པདྨ་བཞིན་དུ་དྲི་མས་ཉམས་མི་འགྱུར། །འདི་ནི་དངོས་གྲུབ་སྣོད་ཀྱི་རབ་ཏུ་དབྱེ་བའོ།། །།གང་ཚེ་སྒྲོལ་མའི་རྣལ་འབྱོར་པ་ནི་ན་བར་གྱུར་པ་ན། །ཕྱི་ནང་འཆི་བའི་མཚན་མ་དག་ནི་ལེགས་པར་བརྟག་པར་བྱ། །འཆི་བའི་མཚན་མ་བྱུང་གྱུར་སྒྲོལ་མ་འབྱུང་བ་#
[322a.3]ལས་གསུངས་པའི། །ཕྱི་ནང་སླུ་བས་འཆི་བདག་བསྲུང་#ཕྱིར་རབ་ཏུ་བརྩོན་པར་བྱ། །འཆི་བའི་མཚན་མ་སྣང་མིན་#དེ་ཚེ་སྨན་མཆོག་དག་ལ་ནི། །རྩ་བའི་གསང་སྔགས་ནད་ཞི་བ་དང་སྤེལ་བ་བཏབ་ནས་ནི། །བཟའ་དང་ལུས་བྱུག་བྱ་ཞིང་ལྷ་མོ་སྐུ་མདོག་རྣམ་དཀར་བས། །བདུད་རྩིས་
[322a.4]ཡོངས་བཀང་རིན་ཆེན་བུམ་པས་སྤྱི་བོར་དབང་བསྐུར་བས། །ཤིན་ཏུ་བདེ་བས་ལུས་ཁྱབ་ནད་རྣམས་རབ་ཏུ་ཞི་བར་བསམ། །སྨན་པའི་དཔྱད་རྣམས་སྤང་བར་མི་བྱ་འོན་ཀྱང་སྔགས་མཆོག་དང་། །དབང་བསྐུར་བ་ནི་ནད་རྣམས་རབ་ཏུ་ཞི་བར་བྱེད་པའི་མཆོག །འདི་ནི་འཆི་བའི་དུས་
[322a.5]ལས་སླུ་བ་དང་ནད་གསོ་བའི་རྣམ་པར་དབྱེ་བའོ།། །།དེ་ནས་སྦྱིན་སྲེག་ཆོ་གས་ཞི་དང་རྒྱས་དང་དབང་དང་ནི། །གསང་#དང་དགུག་པར་འདོད་དང་#རྩ་བའི་རྒྱུད་ལ་#གསུངས་པ་ཡི། །ཆོ་གས་སྦྱིན་སྲེག་#རབ་ཏུ་བརྩམ་བྱ་འདི་ནི་རྟོགས་#པར་སླ། །ཚར་བཅད་པ་དང་དབབ་དང་
[322a.6]དེ་བཞིན་འཚེ་བ་ཐམས་ཅད་ནི། །ཞི་བར་བྱ་བ་རྩ་བའི་རྒྱུད་ལས་གསུངས་པ་སྔགས་པས་དཔྱད། །འདི་ནི་ལས་ཐམས་ཅད་རབ་ཏུ་དབྱེ་བའི་རྣམ་པར་དབྱེ་བའོ།། །།དེ་ལྟར་སྒྲོལ་མ་ལ་གུས་རྣལ་འབྱོར་པའི། །བསྒོམ་པའི་ཆོ་ག་རྣམ་པར་རྒྱས་བཤད་པས། །འགྲོ་རྣམས་སྲིད་མཚོ་ལས་
[322a.7]བརྒལ་སྒྲོལ་མ་ཡི། །གོ་འཕང་ལ་ནི་མྱུར་དུ་གནས་པར་ཤོག །འཕགས་མ་ལྷ་མོ་སྒྲོལ་མ་བསྒོམ་པའི་ཆོ་ག་རྒྱས་པ་སློབ་དཔོན་ཆེན་པོ་མར་མེ་མཛད་བཟང་པོའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཆེན་པོ་#དུལ་བའི་ལྷ་དང་། བོད་ཀྱི་ལོ་ཙཱ་#བ་དགེ་སློང་
[322b]
[322b.1]ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། {T3687}༄༅༅།།འཇིགས་པ་བརྒྱད་ལས་སྐྱོབ་པ་བཞུགས།།# ༄༅༅། །བཅོམ་ལྡན་འདས་མ་སྒྲོལ་མ་ལ་ཕྱག་འཚལ་ལོ། །རྣལ་འབྱོར་པའི་དབང་ཕྱུག་བསམ་གཏན་གྱི་ཁང་པར་ཞུགས་ཏེ། སྟན་བདེ་བ་ལ་འདུག་ཅིང་།
[322b.2]སྙིང་རྗེ་ཆེན་པོས་འགྲོ་བ་ཐམས་ཅད་གདོན་པར་བྱའོ་ཞེས་དམ་བཅས་ནས། ལྷ་མོ་སྒྲོལ་མ་བསྒོམ་པར་བྱའོ། །དེ་ཡང་རིམ་པ་འདི་ལྟར་བྱ་སྟེ། རྣལ་འབྱོར་པ་རང་གི་སྙིང་གར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཏཱཾ་བསམས་ལ#། དེ་ལས་འོད་ཟེར་ལྕགས་ཀྱུ་འདྲ་བ་སྤྲོས་པས།
[322b.3]ལྷ་མོ་དང་རང་གི་བླ་མ་དང་ཡང་དག་པར་རྫོགས་པའི་སངས་རྒྱས་རྣམས་མདུན་གྱི་ནམ་མཁའ་ལ་གསལ་བར་བལྟས་ཏེ། དེ་ལ་ཕྱག་འཚལ་བ་དང་། སྡིག་པ་བཤགས་པ་དང་། གསུམ་ལ་སྐྱབས་སུ་འགྲོ་བ་དང་། དགེ་བའི་རྩ་བ་བསྔོ་བ་དང་། ལུས་དབུལ་བ་དང་། སྨོན་
[322b.4]ལམ་གདབ་པ་རྣམས་བྱས་ལ། དེ་ནས་དོན་དམ་པར་བདག་དང་ལྷ་ལ་སོགས་པ་རང་བཞིན་མེད་ཅིང་གདོད་མ་ནས་མ་སྐྱེས་པར་བསམ་ཞིང་། དེ་བརྟན་པར་བྱ་བའི་ཕྱིར་ཨོཾ་ཤཱུ་ནྱ་ཏཱ་ཛྙཱ་#ན་བཛྲ་སྭ་བྷཱ་བ་ཨཱཏྨ་ཀོ྅#ཧཾ་ཞེས་པས་སྟོང་པ་ཉིད་དུ་བསྒོམ་མོ། །དེ་ནས་པཾ་ལས་པདྨ་འདབ་མ་བརྒྱད་པའི་
[322b.5]དབུས་སུ། རང་གི་སེམས་ཉིད་སྔོན་གྱི་སྨོན་ལམ་གྱི་དབང་གིས་ཡི་གེ་ཏཱཾ་ལས་ལྷ་མོ་སྒྲོལ་མ་བསྐྱེད་པར་བྱ་སྟེ། དེ་ཡང་སྐུ་མདོག་ལྗང་གུ་ཞལ་གཅིག་ཕྱག་གཉིས་མ། ཕྱག་གཡས་པ་མཆོག་སྦྱིན་གྱི་ཕྱག་རྒྱས་གནས་པ། གཡོན་པ་#ཨུཏྤལ་བསྣམས་པ། དོན་ཡོད་གྲུབ་པའི་དབུ་རྒྱན་
[322b.6]ཅན། སྐྱིལ་ཀྲུང་ཕྱེད་པས་བཞུགས་པ། ཇི་སྲིད་མི་སྐྱོ་བའི་བར་དུ་བསྒོམས་ལ། སྐྱོན་བཟླས་པ་ལ་འཇུག་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བྱ་བའི་སྔགས་ཀྱི་ཕྲེང་བ་རང་གི་སྙིང་ག་ནས་ཕྱུང་སྟེ། ཡང་རང་གི་ཞལ་དུ་ཞུགས་ཡང་རང་གི་#ཁ་ནས་འབྱུང་བའི་རིམ་པ་
[322b.7]སྔགས་ཀྱི་ཁ་དོག་དཀར་པོ་དལ་བུས་འཁོར་བར་བསམ་ཞིང་བཟླས་པར་བྱའོ། །བཟླས་པས་ཀྱང་སྐྱོན་མཆོད་པ་དང་གཏོར་མ་བཏང་སྟེ་སྨོན་ལམ་བཏབ་པ#། ལྷ་མོའི་ང་རྒྱལ་གྱིས་སྤྱོད་ལམ་ཐམས་ཅད་ལ་གནས་པར་བྱའོ། །ཉལ་བའི་ཚེ་སྟོང་པ་ཉིད་དུ་ཞུགས་ཏེ་ཉལ་བར་བྱའོ། །
[323a]
[323a.1]ཡང་ལངས་པའི་ཚེ་སྐད་ཅིག་ཙམ་གྱིས་ལྷ་མོའི་ང་རྒྱལ་གྱིས་#ལྡང་བར་བྱའོ། །འཇིགས་པ་བརྒྱད་ལས་སྐྱོབ་པ་སློབ་དཔོན་མཁས་པ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། ༄༅།།འཕགས་མ་སྒྲོལ་མ་ལ་བསྟོད་པ།# {T3688}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་#སྟོ་ཏྲ། བོད་སྐད་དུ།
[323a.2]འཕགས་མ་སྒྲོལ་མ་ལ་བསྟོད་པ། རྗེ་བཙུན་མ་འཕགས་མ་#སྒྲོལ་མ་ལ་ཕྱག་འཚལ་ལོ། །ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་#ལ་བཏུད་དེ། །ཕོངས་པ་ཀུན་ལས་སྒྲོལ་མཛད་ཅིང་། །སྒྲོལ་མ་ལ་ནི་ཕྱག་འཚལ་ལོ། །རབ་འབར་དྲ་བས་ཁྱབ་པ་ཡི། །མནར་
[323a.3]མེད་མེ་ཡིས་གདུངས་པ་ལ། །ཐུགས་རྗེས་བདུད་རྩིའི་ཆར་འབེབས་མ། །སྒྲོལ་མ་ལ་ཡང་ཕྱག་འཚལ་ལོ། །འགྲོ་དྲུག་གནས་སུ་ཡུན་རིང་དུ#། །ཡང་དང་ཡང་དུ་འཁོར་བ་ཡིས#། །དུབ་པ་དག་ལ་བདེ་ཆེན་གྱི། །བདེ་བ་མཆོག་གི་ངལ་སོ་མཛད། །གཞན་དོན་མཛད་པའི་ལྷ་
[323a.4]མོ་ཁྱོད། །དྲན་པ་ཙམ་གྱིས་ཕོངས་སེལ་མ། །ཐུགས་རྗེ་བརྩེ་ལྡན་ཁྱོད་ཀྱིས་ནི། །སྲིད་པའི་འཆིང་བ་ལས་གྲོལ་མཛོད། །དུས་རྣམས་རྟག་ཏུ་སེམས་ཅན་ལ། །བུ་བཞིན་སྙོམས་པའི་ལྷ་མོ་ཁྱོད། །འགྲོ་བའི་ལོ་ཏོག་ཐམས་ཅད་ལ། །ཆར་རྒྱུན་འབེབས་ལ་ཕྱག་འཚལ་ལོ། །
[323a.5]ཉི་མ་ཟླ་བ་ཇི་བཞིན་དུ། །འགྲོ་བ་སེམས་ཅན་ཐམས་ཅད་ཀྱི། །མུན་པའི་གདུང་བ་སེལ་མཛད་མ། །ལྷ་མོ་མཆོག་ལ་ཕྱག་འཚལ་ལོ། །པདྨ་ཟླ་བ་ཨུཏྤ་ལ། །དེ་བཞིན་དྲི་མེད་གདན་སྟེངས་སུ། །སྐུ་མདོག་སྔོ་ལྗང་འགྱིང་བག་ཅན། །ཨུཏྤལ་བསྣམས་ལ་ཕྱག་འཚལ་ལོ། །
[323a.6]བསྐལ་པ་གྲངས་མེད་གསུམ་དུ་ཚོགས་བསགས་ཤིང་། །བར་དུ་གཅོད་པའི་སྒྲིབ་པ་ཀུན་སྤངས་ནས། །བསྡུ་#དངོས་བཞི་ཡིས་#འགྲོ་རྣམས་སྡུད་མཛད་མ། །ཐུགས་རྗེ་དང་ལྡན་#མ་ལ་ཕྱག་འཚལ་ལོ། །སྐུ་ཡི་སྐྱོན་སྤངས་མཚན་དང་དཔེ་བྱད་ལྡན། །གསུང་གི་སྐྱོན་སྤངས་ཀ་ལ་(བིང་,པིང)
[323a.7]ཀའི་དབྱངས། །ཐུགས་ཀྱི་སྐྱོན་སྤངས་ཤེས་བྱ་མཐའ་དག་མཁྱེན། །བཀྲ་ཤིས་དཔལ་འབར་མ་ལ་ཕྱག་འཚལ་ལོ། །ཇི་ལྟར་ནོར་བུ་ཆུ་འདང་#ལྟར། །ལྷ་མོ་ཁྱོད་ཀྱིས་#རྟག་པར་ནི། །འགྲོ་བའི་སེམས་རྙོག་སེལ་མཛད་ཅིང་། །འགྲོ་དོན་བརྩོན་ལ་ཕྱག་འཚལ་ལོ། །གང་
[323b]
[323b.1]གིས་ཁྱོད་ཀྱི་མཚན་བཟུང་#ཅིང་། །བསྟོད་དང་བསྒྲུབ་པ་བྱས་པ་རྣམས། །རྟག་ཏུ་འབྲས་བུ་ཡོད་པར་མཛད། །མི་བསྙེལ་ཁྱོད་ལ་ཕྱག་འཚལ་ལོ། །རྗེ་བཙུན་མ་སྒྲོལ་#མ་ལ་བསྟོད་པ་དཱི་པཾ་ཀཱ་#ར་ཤྲཱི་ཛྙཱ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་ཉིད་དང་། བོད་ཀྱི་ལོ་ཙཱ་བ་#
[323b.2]ཚུལ་ཁྲིམས་རྒྱལ་བས་བསྒྱུར་བའོ།། །།འཕགས་མ་སྒྲོལ་མའི་སྒྲུབ་ཐབས།#{T3689}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་#སཱ་དྷ་ནཾ། བོད་སྐད་དུ། འཕགས་མ་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །འཇིག་རྟེན་གསུམ་མགོན་ཡུམ་གྱུར་སྤྱན་ཡངས་མ། །སྒྲོལ་མའི་ཞབས་ཀྱི་
[323b.3]པདྨོར་#རབ་བཏུད་ནས། །ཡུན་རིངས་བླ་མ་བསྟེན་ལས་གང་འོངས་པའི། །སྒྲུབ་ཐབས་ཆོ་ག་བསྡུས་པ་བཤད་པར་བྱ། །ཡིད་འོང་གནས་ནི་གང་ཡང་རུང་#། །མེ་ཏོག་དྲི་ཞིམ་གཅལ་བཀྲམ་སྟེ#། །སྤོས་ཀྱིས་#ཉམས་དགར་བྱས་ནས་ནི། །དེ་དབུས་སྟན་བཟང་བདེ་བ་ལ། །སྲིད་
[323b.4]པའི་བདེ་བ་ཡོངས་སྤངས་པའི། །རྣལ་འབྱོར་ཅན་གྱིས་#ཉེར་འདུག་ནས། །སྙིང་གའི་ས་བོན་ལས་བྱུང་བའི། །འོད་ཟེར་ཚོགས་ཀྱིས་#བླ་མ་དང་། །སངས་རྒྱས་བྱང་ཆུབ་སེམས་དཔའ་རྣམས། །སྤྱན་དྲངས་དེ་བདག་#མདུན་ཉིད་དུ། །མཆོད་པས་ཡང་དག་རབ་མཆོད་ནས། །དཀོན་
[323b.5]མཆོག་གསུམ་སོགས་རྗེས་དྲན་བྱ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ#། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅#ཧཾ། དེ་ནས་བརྟན་པ་དང་གཡོ་བ་ཐམས་ཅད་སྟོང་པ་ཉིད་དུ་རྣམ་པར་བསམ་མོ། །དེ་ནས་པཾ་ལས་བྱུང་བའི་པདྨ་ཚད་#ཆེན་པོའི་དབུས་སུ་རབ་ཏུ་རྫོགས་
[323b.6]པའི་ཟླ་བའི་དཀྱིལ་འཁོར་ལ་ཡི་གེ་ཏཱཾ་ལྗང་གུ་བསམས་ཏེ། དེ་ཡོངས་སུ་གྱུར་པ་ལས་བདག་ཉིད་ཡི་དམ་སྒྲོལ་མ་#སྐུ་མདོག་ལྗང་གུ་ཞལ་གཅིག་ཕྱག་གཉིས་པ། གཡས་པ་མཆོག་སྦྱིན་པ། གཡོན་པ་ཨུཏྤལ་འཛིན་པ། རྒྱན་ཐམས་ཅད་ཀྱིས་བརྒྱན་པ། ལོ་བཅུ་དྲུག་ལོན་པ་ལྟ་བུ། གཟི་བརྗིད་
[323b.7]བཟོད་པར་དཀའ་བ་དང་ལྡན་པ། ཞལ་ཅུང་ཟད་འཛུམ་པ་དང་ལྡན་པ། སྐྲའི་ཚོགས་ལྷག་པར་བཅིངས་ཤིང་ཟླ་བའི་འོད་ཅན། རྡོ་རྗེ་སྐྱིལ་མོ་ཀྲུང་གིས་ཟླ་བའི་དཀྱིལ་འཁོར་མནན་པ། སྤྱན་པདྨ་གཞོན་ནུའི་འདབ་མ་ལྟ་བུ། ཅུང་ཟད་འཛུམ་པ་མདུན་ཉིད་དུ་གཟིགས་པའི་འཕགས་
[324a]
[324a.1]མ་སྒྲོལ་མ་ནུ་མའི་དཀྱིལ་འཁོར་མཁྲེགས་པ་#དང་ལྡན་པ་རྣམ་པར་བསམ་མོ། །དེ་ནས་རང་གི་སྙིང་གའི་ཏཱཾ་ལས་འོད་ཟེར་བྱུང་བ་རྣམས་ཀྱིས་རྗེ་བཙུན་མ་ཡང་དག་པར་བསྐུལ་ལ། ས་བོན་ལས་བྱུང་བའི་མཆོད་པ་རྣམས་ཀྱིས་#ཡང་དག་པར་མཆོད་ནས་ཨུཏྤ་ལའི་
[324a.2]ཕྱག་རྒྱས་རང་གི་ལུས་ལ་བསྟིམ་པར་བྱའོ། །དེ་ནས་གནས་ཇི་ལྟ་བ་རྣམས་སུ་རྣམ་པར་སྣང་མཛད་ལ་སོགས་པ་རྣམས་བསམ་ཞིང་། དེ་བཞིན་གཤེགས་པ་རྣམས་དབང་བསྐུར་བ་དོན་དུ་གཉེར་ཏེ། བདག་གི་དབུ་རྒྱན་ལ་གསུང་རྡོ་རྗེས་རྒྱས་གདབ་པར་བྱའོ། །དེའི་འོག་
[324a.3]ཏུ་རང་གི་སྙིང་གར་ཟླ་བའི་དཀྱིལ་འཁོར་ལ་ཡི་གེ་ཏཱཾ་ལ་སོགས་པ་རྣམ་པར་བཀོད་པར་བྱ#། སྤྲོ་བ་དང་བསྡུ་པའི་རིམ་པས་བསྒོམ་པར་བྱའོ། །གང་གི་ཚེ་སྐྱོ་བ་ན། ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། ཞེས་བྱ་བའི་སྔགས་བཟླས་སོ། །དེ་ནས་གང་གི་ཚེ་ལྡང་བར་འདོད་པ་ན་རང་གི་
[324a.4]སྙིང་གར་གནས་པའི་ས་བོན་ལས་འོད་ཟེར་འཕྲོས་ཏེ། དེས་སེམས་ཅན་ཐམས་ཅད་ལ་ཕོག་#སླར་ཡང་འོད་ཟེར་སྤྲོས་པས་དེ་དག་གི་#སྙིང་གར་ཞུགས་པར་བལྟ་#ཞིང་། དེ་ཉིད་ཀྱིས་དེ་དག་ཐམས་ཅད་ལྷ་མོའི་སྐུར་གྱུར་པར་ལྷག་པར་མོས་པར་བྱའོ། །དེ་ནས་སླར་ཡང་ས་བོན་ལས་བྱུང་བའི་
[324a.5]འོད་ཟེར་བདུད་རྩིའི་རང་བཞིན་རྣམས་ཀྱི་#གཏོར་མའི་སྣོད་ཡོངས་སུ་བཀང་ལ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་#ནུཏྤནྣ་ཏྭཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་བྱ་བས་བྱིན་གྱིས་བརླབས་ལ་ཕུལ་ལ། དེ་ནས་ཡེ་ཤེས་སེམས་དཔའ་མདུན་དུ་བཞུགས་པ་ལ་དམིགས་པས་ཡི་གེ་བརྒྱ་པ་
[324a.6]ཡོངས་སུ་བཟླས་ནས། ལེགས་པར་མཆོད་དེ། མངོན་པར་འདོད་པའི་དངོས་གྲུབ་གསོལ་བ་#བཏབ་ལ། ཨོཾ་ཏཱ་#རེ་ཏུཏྟཱ་རེ་ཏུ་རེ་མུཿཞེས་པས་གཤེགས་སུ་གསོལ་ལོ#། །རིམ་པ་འདིས་ཐུན་མཚམས་བཞིར་བསྒོམས་ན་#མྱུར་བར་དངོས་གྲུབ་ཐོབ་#པར་འགྱུར་རོ། །ད་ནི་བསྲུང་#བའི་
[324a.7]སྦྱོར་བ་ཅུང་ཟད་བཤད་པར་བྱ་སྟེ། སྔར་བཤད་པའི་ཚུལ་གྱིས་རྩ་བའི་སྔགས་འབུམ་ཕྲག་བཅུ་བཟླས་ཤིང་སྒྲོལ་མའི་ཏིང་ངེ་འཛིན་ལ་གནས་པའི་རྣལ་འབྱོར་པས་བཟླས་པའི་ཆོ་ག་སྔ་མ་ལྟ་བུ་ཉིད་ལས་ཁྱད་པར་དུ་བསྒྲུབ་བྱའི་མིང་སྔགས་ཀྱི་དབུས་ན་གནས་པར་བསམ་
[324b]
[324b.1]ལ་བཟླས་#པ་ཇི་སྲིད་འདོད་ཀྱི་བར་དུ་བྱའོ། །དེ་ནས་ས་བོན་གྱི་ཡི་གེ་ལས་འོད་ཟེར་བྱུང་བས་བསྒྲུབ་བྱའི་ལུས་ཐམས་ཅད་ཁྱབ་པར་བལྟས་ཏེ། དེས་ལུས་རབ་ཏུ་ཚིམ་པར་གྱུར་ཅིང་ཉེ་བར་འཚེ་བ་ཐམས་ཅད་དང་བྲལ་བར་མོས་པར་བྱའོ། །འདི་ནི་ཞི་བའི་སྲུང་#བའོ། །
[324b.2]དེ་ནས་ཕྱིར་བཟློག་པའི་སྲུང་#བ་བཤད་པ། ཆོ་ག་སྔ་མ་དང་ལྡན་པའི་རྣལ་འབྱོར་པས་རང་གི་སྙིང་གར་ཏཱཾ་ལྗང་གུ་འོད་ཟེར་གྱི་ཕྲེང་བ་འཁྲུགས་པར་བསམས་ལ། དེ་ལས་བྱུང་བའི་འོད་ཟེར་གྱི་ཚོགས་འབར་བས་གདུག་པའི་ལུས་གཅེར་བུ་སྐྲ་གྲོལ་བ་#འདར་ཞིང་སྐྱབས་
[324b.3]དང་བྲལ་བའི་སྙིང་གར་ཞུགས་པས་དེ་རེངས་པ་དང་མནན་པ་དང་། རྨོངས་པ་དང་། བཅིངས་པར་རྣམ་པར་བསམ་མོ། །གང་གི་ཚེ་དེ་ལྟ་བུའི་ཏིང་ངེ་འཛིན་གྱིས་སྐྱོ་བ་#ན་ས་བོན་གྱི་ཡི་གེ་ལ་དམིགས་པས་གསང་སྔགས་བཟླས་པ་བྱ་སྟེ། ན་མཿ#ཨཱརྱཱ་བ་ལོ་ཀི་ཏེ་ཤྭ་རཱ་
[324b.4]ཡ། བོདྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཱན#། པྲདུཥྚཱ་ན#། མ་མ་[ཀྲྀ་]ཏེ་ཛཾ་བྷ་ཡ། སྟྭཾ་བྷ་ཡ། མོ་ཧ་#ཡ། བནྡྷ་ཡ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། སརྦྦ་དུཥྚཱན་#སྟཾ་བྷ་ནི་ཏཱ་རེ་སྭཱ་ཧཱ། སྲུང་བ་འདི་དག་ཀྱང་ཐུན་མཚམས་བཞིར་བསྒོམ་
[324b.5]པར་བྱའོ། །དེ་བཞིན་དུ་ལམ་དུ་འགྲོ་བས་ཏིང་ངེ་འཛིན་དང་བཅས་པས་མདུད་པ་དོར་#ནས་སྔགས་དྲན་པ་དང་#ལྡན་པར་ཕྱིན་ན་ཆོམ་རྐུན་#དང་། སྟག་དང་། དོམ་དང་། དྲེད་དང་། སྦྲུལ་དང་། ནགས་ཀྱི་བ་#མེན་དང་། ཆུ་ལ་སྤྱོད་པ་རྣམས་ཀྱིས་བརྫི་བར་མི་ནུས་ཏེ། གང་གི་ཚེ་འཇིགས་
[324b.6]པ་དང་བྲལ་བ་ན་མདུད་པ་སླར་དགྲོལ་བར་བྱའོ། །དེ་ལྟར་ཡུན་རིང་#བླ་མ་བསྟེན་ལས་གང་ཐོབ་པའི། །སྒྲུབ་ཐབས་ཆོ་ག་འདི་ནི་ལེགས་བཀོད་པས། །སྒྲོལ་མ་ཞེས་གྲགས་སྲས་བཅས་བཞུགས་པའི་གནས། །གྲུ་འཛིན་དཔལ་དུ་འགྲོ་རྣམས་མྱུར་འགྲོ་ཤོག །འཕགས་
[324b.7]མ་སྒྲོལ་མའི་སྒྲུབ་ཐབས་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ#།། །།རྒྱ་གར་གྱི་མཁན་པོ་བུདྡྷ་ཀཱ་ར་བརྨ་དང་། བོད་ཀྱི་ལོ་ཙཱ་#བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།༄༅། །ཆོམ་རྐུན་བཅིང་བ།#{T3690}༄༅༅། །རྒྱ་གར་སྐད་དུ། ཙཽ་རཱ་#
[325a]
[325a.1]བནྡྷ། བོད་སྐད་དུ། ཆོམ་རྐུན་བཅིང་བ། རྗེ་བཙུན་སྒྲོལ་མ་ལ་ཕྱག་འཚལ་ལོ། །ལམ་དུ་འགྲོ་བ་ལ་#ཆོམ་རྐུན་མི་འོང་བར་བྱ་བའི་ཕྱིར་ཐེམ་པ་ནས་གོམ་པ་བདུན་གཞལ་བའི་ས་ནས་ལག་པ་གཡས་པས་ས་སྦར་བ་གང་བླངས་ལ། དེ་ནས་རང་སྐད་ཅིག་
[325a.2]གིས་རྗེ་བཙུན་མར་བསྐྱེད་ལ། སྐྱབས་འགྲོ་དང་སེམས་བསྐྱེད་ཚུལ་བཞིན་#དུ་བྱས་ལ། ལག་པ་གཡས་པའི་ས་དེ་ལཾ་ལས་རི་རབ་#ཙམ་དུ་བསྐྱེད་དེ། ལག་པ་གཡོན་དུ་བཾ་ལས་རྒྱ་མཚོ་ཆེན་པོར་བསྐྱེད་ལ། དམིགས་པ་#དེ་རིང་བདག་ལ་གནོད་པར་#བྱེད་པའི་ཆོམ་རྐུན་ཐམས་ཅད་མདུན་
[325a.3]དུ་བཀུག་སྟེ། མིའི་ཚིག་གིས་བར་མ་ཆོད་པར་སྔགས་འདི་བརྒྱ་རྩ་བརྒྱད་བཟླས་ཏེ། ཨོཾ་ཏཱ་རེ་ཏུ་ཏྟཱ་རེ་ཏུ་རེ་ཨསྨ་ཨ་པ་ཀ་ར་སརྦ་ཙཽ་རཱ་བནྡྷ་བནྡྷ་#སྭཱ་ཧཱ། ཞེས་བྱའོ། །མདུན་གྱི་ཆོམ་རྐུན་པ་ཐམས་ཅད་རྒྱ་མཚོ་ཆེན་པོར་བླུགས་ལ། གཡས་ཀྱི་ས་དེ་གཡོན་དུ་སྤོས་ལ་རི་རབ་ཀྱིས་མནན་པར་
[325a.4]བསམ་མོ། །དེ་ནས་ས་དེ་ཐུ་བ་གཡོན་པར་བཅིངས་ཏེ་འཇིགས་པ་དང་བྲལ་བའི་གནས་སུ་#དགྲོལ་བར་བྱའོ། །འགྲོ་བའི་དུས་སུ་སྒྲོལ་མའི་#བསྟོད་པ་ལ་སོགས་པ་སྒྲོགས་ཤིང་འགྲོའོ། །ཆོམ་རྐུན་བཅིང་བ་ཞེས་བྱ་བའི་རིམ་#པ་རྫོགས་སོ།། །།མ་ཧཱ་པཎྜི་ཏ་ཤྲཱི་རཏྣ་རཀྵི་ཏ་དང་།
[325a.5]ལོ་ཙཱ་#བ་ཞང་གྲུབ་པ་དཔལ་བཟང་པོས་བསྒྱུར་བའོ།། {T3691}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་ནུ་ཙརྱ་ཡཀྵི་ཎི་མ་དྲཱ་སཱ་དྷ་ནཾ། བོད་སྐད་དུ། འཕགས་མ་སྒྲོལ་མའི་རྗེས་སུ་སྤྱོད་པའི་གནོད་སྦྱིན་མོའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །ཨོཾ་ཛོ་ཡཀྵི་ཎཱི་
[325a.6]བི་ར་ཛེ་སྭཱ་ཧཱ་མེ་ལྷའི་བུ་མོ་གནོད་སྦྱིན་མོའི་ཆོ་ག་ནི་འདི་ཡིན་ཏེ། དུར་ཁྲོད་ཀྱི་སྤང་ལེབ་ལ་བྲིས་ཏེ། རྒྱན་ཐམས་ཅད་ཀྱིས་བརྒྱན་པ། གཅེར་བུ་རས་ཀྱི་གོས་བསྣམས་པ། མགོ་སྐྱེས་ལི་བ། གཞོན་ནུ་མ། རྒྱན་གྱིས་མཛེས་པ། ཤིང་མྱ་ངན་མེད་པ་དང་བཅས་པ་ལག་པ་གཡོན་པས་བཟུང་
[325a.7]བ། ལག་པ་གཡས་པས་རས་བསྣམས་པ། སྤྱན་ས་བོན་གྱི་གྲོང་ཁྱེར་གྱི་འབྲས་བུ་ལ་གཟིགས་པ། ཞལ་ཅུང་ཟད་དཔངས་མཐོ་བ། བཞད་པ། འཁྲིག་པ་ལ་སྲེད་པ། འདི་འདྲ་བ་སྤང་ལེབ་ལ་བྲིས་ལ། དབེན་པའི་གནས་སུ་རང་གཅིག་པུར་ཁྲུས་བྱས་ཤིང་བཀུག་པས་ཐུན་མཚམས་སུ་
[325b]
[325b.1]མཆོད་དོ། །བའི་ལྕི་བས་མཎྜལ་བྱས་ལ། གཙང་སྦྲ་ཐོབ་པས་དབེན་པར་ཟས་གཙང་མ་ཟ་ཞིང་ཐུན་མཚམས་གསུམ་དུ་བྷ་གར་སོར་མོ་བཅུག་ལ་དེའི་མདུན་དུ་སྟོང་ཕྲག་བརྒྱད་བཟླས་ན་ཉི་མ་བདུན་ན་འབྱོན་ནོ། །བྱོན་ནས་ཙནྡན་དཀར་པོ་དང་། མེ་ཏོག་དྲི་ཞིམ་པོས་སྤྲས་པའི་མཆོད་ཡོན་དབུལ་
[325b.2]ལོ། །ཁོ་མོས་ཅི་བགྱི་ཞེས་སྨྲ་བར་འགྱུར་རོ། །དེ་ནས་སྒྲུབ་པ་པོས་སྨྲས་པ། ཁོ་བོའི་སྲིང་མོའམ་མར་མཛོད་ཅིག །དེ་ནས་སྲིང་མོའམ་མར་འགྱུར་རོ། །བདག་ཉིད་དང་བཅས་པའི་སྐྱེ་བོ་བཅུ་དྲུག་གི་ཟས་གོས་སྦྱོར་བར་འགྱུར་རོ། །ལུས་ཀྱི་ཁུར་གྱིས་དཔལ་གྱི་རི་པོ་ཏ་ལར་ཁྲིད་
[325b.3]པར་བྱེད་དོ། །དེར་འཕགས་པ་སྤྱན་རས་གཟིགས་དབང་ཕྱུག་གི་ཞལ་མཐོང་ནས་ཆོས་ཉན་ཅིང་བྱང་ཆུབ་ཀྱི་སེམས་མ་རྨོངས་པ་ཞེས་བྱ་བའི་ཏིང་ངེ་འཛིན་ཐོབ་བོ། །གལ་ཏེ་འདོད་ན་སླར་འཛམ་བུ་གླིང་ནས་འོངས་ཤིང་དེ་དང་རོལ་པར་འགྱུར་རོ། །གལ་ཏེ་དང་པོ་ཉི་མ་བདུན་གྱིས་མ་གྲུབ་
[325b.4]ན་དེའི་ཚེ་བདུན་ཕྲག་གཉིས་པ་ལ་ཚངས་པ་བསད་ཀྱང་འགྲུབ་པོ། །དེ་ནས་སླར་མ་གྲུབ་ན་ཁྲོ་བོའི་རྒྱལ་པོའི་སྔགས་བཟླས་ཏེ། ཨོཾ་བཛྲ་ཀྲོ་དྷ་ཡ་མཱནྟ་ཀ་ཧཱུཾ་ཕཊ། ཨོཾ་ཛོ་ཡཀྵི་ཎཱི་བི་ར་ཛེ་སྭཱ་ཧཱ། །གནོད་སྦྱིན་མོའི་སྔགས་ནང་དུ་བཅུག་ནས་བཟླས་ན་འགྲུབ་བོ། །དེ་ནས་གལ་ཏེ་དེས་ཀྱང་མ་གྲུབ་
[325b.5]ན་སྐམས་པའམ་འཆི་བར་འགྱུར་རོ། །སྔོན་གྱི་བསྙེན་པ་གོང་དང་དེ་རུ་གནས་པའམ་འབུམ་ཕྲག་གསུམ་བཟླས་སོ། །འཕགས་མ་སྒྲོལ་མའི་རྗེས་སུ་སྤྱོད་པའི་གནོད་སྦྱིན་མོའི་སྒྲུབ་ཐབས་རྫོགས་སོ།། །།རྒྱ་གར་གྱི་མཁན་པོ་བཻ་རོ་ཙ་ནའི་ཞལ་སྔ་ནས་
[325b.6]ཀྱི་དང་། བོད་ཀྱི་ལོ་ཙཱ་བ་དར་མ་བློ་གྲོས་ཀྱིས་བསྒྱུར་བའོ།། {T3692}༄༅༅། །རྒྱ་གར་སྐད་དུ། སྲ་ག་དྷཱ་ར་སཱ་དྷ་ནཾ་སསྟུ་ཏི། བོད་སྐད་དུ། མེ་ཏོག་ཕྲེང་འཛིན་གྱི་སྒྲུབ་པ་བསྟོད་པ་དང་བཅས་པ། བཅོམ་ལྡན་འདས་མ་སྒྲོལ་མ་ལ་
[325b.7]ཕྱག་འཚལ་ལོ། །མི་ཤེས་པ་རྣམས་འཇོམས་པའི་ཕྱིར། །བཅོམ་ལྡན་སྒྲོལ་མ་ཕྲེང་འཛིན་གྱི། །སྒྲུབ་པའི་ཐབས་ཀྱི་རིམ་པ་འདི། །དེ་ཉིད་འདོད་པས་རྒྱུན་དུ་བྱ། །ཡིད་འཕྲོག་གཙང་མའི་གནས་སུ་འདུག །དངོས་སམ་སྔགས་ཀྱིས་རྣལ་འབྱོར་བཀྲུ། །མཐུན་
[326a]
[326a.1]རྐྱེན་མཆོད་པའི་རྫས་རྣམས་ནི། །དངོས་སམ་ཡིད་ཀྱིས་བརྟེན་པར་བྱ། །ཤར་དུ་ཁ་བལྟས་རྣལ་འབྱོར་པས། །གཞན་ཕན་སེམས་ཀྱིས་ལྷ་མོ་བསྒོམ། །མདངས་དཀར་ཟླ་གནས་བཞེངས་པ་ཡི། །དཔག་མེད་ཡོན་ཏན་རྒྱན་གྱིས་སྤྲས། །སྟོན་ཀའི་དབང་
[326a.2]པོ་ལྟ་བུར་དཀར། །རང་བཞིན་གསར་དུ་ཤར་བས་བརྒྱན། །ཨུཏྤལ་འདབ་ལྟར་སྤྱན་མཛེས་ཤིང་། །དཔྲལ་བར་སིནྡྷུ་ར་ཡིས་བསྐུས། །རྣ་བ་མགུལ་རྒྱན་ཕྱག་གདུབ་དང་། །དོ་ཤལ་རྐེད་པ་རྐང་པ་ལ། །གཡེར་ཁ་སིལ་སིལ་རབ་ཏུ་མཛེས། །དགྱེས་པའི་སྐུ་ཅན་སྒེག་
[326a.3]པར་མཛད། །ནུ་མར་མུ་ཏིག་དོ་ཤལ་ལྡན། །ཤམ་ཐབས་ཟ་འོག་རྒྱན་གྱིས་བརྒྱན། །སྨིན་མས་ཨུཏྤལ་མདངས་འཕྲོག་པ། །རིན་ཆེན་གྱིས་སྤྲས་ཅོད་པན་ནི། །འཛམ་བུའི་གསེར་གྱི་སྟེང་ན་བཅིངས། །རལ་པར་འོད་དཔག་མེད་པས་བརྒྱན། །འདི་ཉིད་
[326a.4]ཡིད་འོང་མཛེས་པ་སྟེ། །མཐོང་དང་བརྗོད་དང་དྲན་པ་ཡིས། །ཁམས་གསུམ་སེམས་ཅན་ཐམས་ཅད་ཀྱི། །སྙིང་གི་སྡིག་པ་ཐམས་ཅད་འཇོམས། །གང་ཞིག་བཅོམ་ལྡན་འདས་མ་རུ། །སྐད་ཅིག་མ་ཡིས་རྣལ་འབྱོར་གྱིས། །བཅོམ་ལྡན་འདས་མའི་ང་རྒྱལ་
[326a.5]དུ། །རྒྱུན་དུ་བསྐྱེད་པར་བྱ་བའོ། །མཆོད་པའི་ཆོ་ག་ཐམས་ཅད་ལ། །སྔགས་ཀྱི་བྱིན་གྱིས་བརླབ་པར་བྱ། །ལས་ཀུན་བྱེད་པའི་སྔགས་ཀྱིས་ནི། །རྣལ་འབྱོར་པས་ནི་བྱ་བའོ། །རྟག་ཏུའམ་ནི་ཐུན་གསུམ་དུ། །འདིར་ནི་གཙང་མའི་ཁྲུས་བྱའོ། །ཚངས་པར་སྤྱོད་
[326a.6]པ་གཟུང་བར་བྱ། །གོས་ནི་ཐུན་གྱི་དུས་སུ་སྤོ། །མི་དགེ་བཅུ་པོ་འཇོམས་པར་བྱ། །མི་དགེའི་ལས་ནི་ཐམས་ཅད་ལ། །ཡིད་ནི་སྦྱར་བར་མི་བྱའོ། །དེ་བཞིན་སྒྲུབ་པ་པོ་ཡིས་ནི། །བཅོམ་ལྡན་འདས་མར་རང་ཉིད་ནི། །མངོན་སུམ་མ་བྱས་བར་དུ་བསྒོམ། །དེ་ལ་
[326a.7]སྔོན་དུ་བྱེད་པ་ཡིས། །མན་ངག་དམ་པ་བཤད་པར་བྱ། །སྲོག་འཛིན་མ་རིག་ལིང་ཏོག་ནི། །འཇོམས་པར་བྱེད་པ་ཁོ་ནའོ། །འདི་ལྟར་ཨཱ་ལིའི་སྦྱོར་བ་ཡིས། །གཉིས་མེད་ཆུ་ཡི་དཀྱིལ་འཁོར་ལ། །སྒྱུ་མའི་ས་བོན་འཛག་པ་ཡི། །རྒྱུན་དང་བཅས་པ་བལྟ་བར་
[326b]
[326b.1]བྱ། །དག་པར་མི་བྱེད་དེ་འོག་ཏུ། །དཀྱིལ་འཁོར་སྤྲུལ་པའི་རང་བཞིན་ལ། །ཁོ་ན་ཉིད་ཀྱི་ས་བོན་ནི། །ཉི་མ་ཕྱེད་པའི་འོད་དང་མཚུངས། །སྒྲོལ་མའི་རྣམ་པ་ཐམས་ཅད་ཀྱིས། །མི་ཤེས་སྲེག་པར་མཛད་པ་སྟེ། །ཕྱོགས་བཅུ་པོ་ཡང་སྦྱོང་བར་མཛད། །སྟེང་གི་ས་བོན་
[326b.2]འཛག་པ་ཅན། །བདུད་རྩིའི་རྒྱུན་དུ་ཡིད་ཀྱིས་ནི། །ཡུན་རིང་དུས་སུ་བསྒོམས་པའོ། །དེ་ལས་སྐྱོ་བར་གྱུར་པ་ན། །ལྕེ་ནི་ཆུ་སྐྱེས་འདབ་མ་ལ། །བླ་མའི་མན་ངག་བསམ་པར་བྱ། །དེ་ནས་སྔགས་ཀྱི་ཕྲེང་བ་ནི། །རྫ་མཁན་འཁོར་ལོ་ལྟ་བུར་བསྐོར། །ནོར་བུ་སྔགས་ཀྱི་སྟོབས་ཀྱིས་ནི། །
[326b.3]དེ་བཞིན་གཤེགས་པའི་ཡེ་ཤེས་དང་། །བདུད་རྩི་གཞན་ཡང་ཡོན་ཏན་སྟོབས། །རྫ་བ་ཁྲོན་པར་གཞུག་པར་བྱ། །རྒྱུན་མི་འཆད་པའི་བསམ་གཏན་དུ། །རྣལ་འབྱོར་པས་ནི་བཟླས་པ་ཉིད། །གང་ཞིག་དེ་ལྟར་ཡིད་ཀྱིས་ནི། །བྱ་བ་འདི་ནི་གོམས་པ་ན། །བདེ་བ་ཆེན་པོའི་ཏིང་ངེ་
[326b.4]འཛིན། །རྒྱུན་མི་འཆད་པར་སྐྱེ་བར་འགྱུར། །འདིར་ནི་འདི་ཡི་བསམ་གཏན་གྱིས། །ཉི་མ་བདུན་དུ་བྱས་པ་ན། །ཤེས་རབ་ཆེ་དང་ངག་དབང་རྣོ། །རྐང་དྲུག་ཚོགས་ཀྱི་བདག་པོར་འགྱུར། །ཚིགས་སུ་བཅད་དང་ལྷུག་པ་དང་། །འདྲེས་པ་དང་ནི་ལྷ་ཡི་སྐད། །ཚེགས་མེད་
[326b.5]ངག་གི་དབང་ཕྱུག་ནི། །འབད་པ་མེད་པར་འགྲུབ་པ་སྟེ། །འདི་ལ་ཐེ་ཚོམ་མ་བྱེད་ཅིག །དེ་ནས་བསྟོད་པ་བརྗོད་པ་ཡང་། །མེ་ཏོག་ཕྲེང་བ་ཉིད་ཡིན་ནོ། །དེ་དང་དེ་ནི་ཞལ་ལས་ཤེས། །ཤེས་རབ་ཕ་རོལ་ཕྱིན་མ་ནི། །དངོས་སུ་གྲུབ་པར་འདོད་པ་ཡིས། །རྣལ་འབྱོར་པས་ནི་རིག་པ་
[326b.6]འདི། །རི་བོང་ཕྱེད་ལ་དུས་གསུམ་དུ། །གོང་དུ་བཤད་པའི་ཆོ་ག་ཡིས། །སྔོན་གྱི་བརྟུལ་ཞུགས་སྤྱད་ནས་ནི། །དབེན་པའི་གནས་སུ་སེམས་གཅིག་ཏུ། །བཅོམ་ལྡན་འདས་མའི་བསྟོད་པ་ནི། །རྒྱུན་ཆད་མེད་པར་བརྗོད་པར་བྱ། །དེ་ནས་ཀློག་པའི་མན་ངག་ནི། །བརྗོད་མ་ཐག་ཏུ་
[326b.7]ཡིད་ལ་ནི། །རྩ་བ་ནས་ནི་རྩེ་མོའི་བར། །ཇི་ལྟར་རིམ་པས་རྗེས་སུ་ནི། །ཁོ་ན་ཉིད་ཀྱི་ས་བོན་དང་། །ནུས་པའི་ས་བོན་བྱེད་པར་ལྡན། །སྒྱུ་མའི་ས་བོན་བརྗོད་པ་ཉིད། །རིམ་པས་བཅོམ་ལྡན་འདས་མ་ཡི། །ཡོན་ཏན་བརྗོད་པའི་འོད་ཟེར་གྱིས། །གཡེང་བ་མེད་པར་བདག་
[327a]
[327a.1]ཉིད་ནི། །ཡིད་ནི་བརྟན་པར་ཀློག་པ་ཉིད། །དེ་ཉིད་ཤར་ཁའི་ཉི་མ་སྟེ། །དེ་ཡི་གདན་ལ་བསམ་པར་བྱ། །སྒྱུ་མ་ཕྱེད་པའི་ཉི་མ་སྟེ། །ཟླ་བའི་དཀྱིལ་འཁོར་ཉིད་དུ་གནས། །ནུས་པ་སྟོན་ཀའི་ཟླ་བ་སྟེ། །པདྨའི་རྩེ་ལ་བསམ་པ་ཉིད། །བཟླས་པའི་དུས་སུ་འཁོར་
[327a.2]བ་སྟེ། །ཀློག་པའི་དུས་སུ་མཆོད་པ་ཉིད། །རྨོངས་དང་འཇིགས་དང་དུག་མེད་དང་། །མི་མཐུན་ཕྱོགས་ལས་རྒྱལ་བར་འགྱུར། །འདོད་པ་གཞན་ཡང་སྒྲུབ་བྱེད་པ། །འཁོར་ལོ་འདི་ལ་རབ་ཏུ་འབྱུང་། །ནོར་བུས་དགོས་འདོད་འབྱུང་བ་ལྟར། །འདིར་ནི་འབད་པ་བསྒྲུབ་པར་བྱ། །སྒྲོལ་མ་
[327a.3]མེ་ཏོག་ཕྲེང་འཛིན་གྱི། །མངོན་པར་རབ་བརྟན་ཆོ་ག་བྱ། །དགེ་བས་མཉམ་པར་འགྲོ་བ་ཀུན། །མྱུར་དུ་སྒྲོལ་མ་ཉིད་མཚུངས་ཤོག །མེ་ཏོག་ཕྲེང་འཛིན་སྒྲོལ་མའི་བསྟོད་པ་དང་བཅས་པའི་སྒྲུབ་པ་རྫོགས་སོ།། །།མ་ཧཱ་པཎྜི་ཏ་རཏྣ་རཀྵི་ཏ་པཱ་དའི་ཞལ་སྔ་ནས། ཞང་ལོ་
[327a.4]ཙཱ་བ་གྲུབ་པ་དཔལ་བཟང་པོས་བསྒྱུར་བའོ།། {T3693}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་སྟོ་ཏྲ། བོད་སྐད་དུ། འཕགས་མ་སྒྲོལ་མ་ལ་བསྟོད་པ། བཅོམ་ལྡན་འདས་ངག་གི་དབང་པོ་ལ་ཕྱག་འཚལ་ལོ། །དད་པའི་ལྟེང་ཀ་རབ་ཏུ་རྒྱས་པ་ལ། །འདུན་པ་པདྨའི་
[327a.5]རྩ་བ་རབ་ཏུ་བརྟན། །རྩོལ་བ་དྲག་པོ་པདྨའི་གདན་ལ་བཞུགས། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །འགྲོ་བ་ཉོན་མོངས་ཚད་པས་གདུངས་པ་ལ། །ཐུགས་རྗེས་བསིལ་མཛད་ཟླ་བའི་གདན་ལ་བཞུགས། །འགྲོ་བ་ཉམ་ཐག་སྒྲོལ་བའི་ལྷ་མོ་སྟེ། །རྗེ་བཙུན་སྒྲོལ་
[327a.6]མ་ཁྱོད་ལ་ཕྱག་འཚལ་ལོ། །ཚོགས་གཉིས་ཤིང་རྟའི་འཁོར་ལོ་ལྟ་བུ་ཡིས། །སྒྲིབ་གཉིས་བཅོམ་ནས་ས་བཅུར་རབ་གནས་ཏེ། །ལྷ་མོའི་ཚུལ་དུ་འཁོར་བ་མ་སྟོངས་བཞུགས། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །ཉོན་མོངས་མི་གཡོ་རི་ལྟར་བརྟན་པའི་སྐུ། །
[327a.7]ཡོན་ཏན་རབ་རྫོགས་ཤ་ལུས་ཤིན་ཏུ་རྒྱས། །བྱམས་པས་ཐུགས་གཡོས་ནུ་འབུར་རྒྱས་པ་ཅན། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །འཁོར་བས་མ་གོས་སྐུ་མདོག་འགྱིང་བག་ཅན། །སྒེག་པའི་ཆ་ལུགས་རིན་ཆེན་རྒྱན་ཆ་ཅན། །དབུ་སྐྲ་སྔོ་ལྗང་རིགས་ལྔའི་
[327b]
[327b.1]ཅོད་པན་ཅན། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །ཟག་མེད་བདེ་རྒྱས་ཞལ་རས་འཛུམ་བག་ཅན། །རྣམ་སྣང་ལས་བྱུང་ཕྲིན་ལས་ཐུགས་རྗེ་ཅན། །བདུད་འཇོམས་མདའ་གཞུ་ཐབས་དང་ཤེས་རབ་ཅན། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །འཇིགས་པ་སྐྱོབ་
[327b.2]མཛད་ཕྱག་གཡས་སྐྱབས་སྦྱིན་ཚུལ། །འགྲོ་བའི་ཡིད་འཕྲོག་ན་ཚོད་བཅུ་དྲུག་ཚུལ། །ལས་ཀྱི་རིགས་ཚོགས་ཨུཏྤལ་སྔོན་པོའི་ཚུལ། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །སྐྱེ་རྒས་ན་འཆིའི་ཆུ་བོ་བཞི་པོ་ལས། །སྒྲོལ་བའི་གཉེན་པོ་མཁས་པ་ཁྱོད་ལགས་
[327b.3]ཏེ། །བྱམས་པའི་གྲུ་འཛིན་སྙིང་རྗེའི་སྐྱ་བ་ཅན། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །དེ་ལྟར་ཚིགས་སུ་བཅད་པ་བརྒྱད་ཀྱིས་ནི། །ལྷ་མོ་ཉིད་ལ་དད་པས་བསྟོད་པ་ལས། །དེས་ནི་འགྲོ་བ་སེམས་ཅན་ཐམས་ཅད་ཀྱིས། །མྱུར་དུ་སངས་རྒྱས་གོ་འཕང་ཐོབ་པར་
[327b.4]ཤོག །རྗེ་བཙུན་མ་སྒྲོལ་མ་ལ་བསྟོད་པ། སློབ་དཔོན་མ་ཏི་ཙི་ཏྲས་མཛད་པ་རྫོགས་སོ།། {T3694}༄༅༅། །རྒྱ་གར་སྐད་དུ། ཨཱརྱ་ཏཱ་རེ་སྟོ་ཏྲ། བོད་སྐད་དུ། འཕགས་མ་སྒྲོལ་མ་ལ་བསྟོད་པ། རྗེ་བཙུན་ཐུགས་རྗེ་ཆེན་པོ་ལ་ཕྱག་འཚལ་ལོ། །འོད་དཔག་
[327b.5]མེད་ཀྱི་སྨོན་ལམ་མ། །མེ་ཏོག་ཟླ་མཛེས་སེམས་བསྐྱེད་མ། །འཇིག་རྟེན་མགོན་གྱི་ཆུ་སྐྱེས་མ། །ཕྱག་གི་མཐིལ་ན་བཞིན་བཟངས་མ། །སྟོད་རྒྱས་མེ་ཏོག་ཕྲེང་འཛིན་མ། །བགྲེས་མོ་བགྱིང་བག་དྲང་པོ་མ། །གཤེགས་ཤིང་བཞུགས་པ་ལྡེམ་ལྡེམ་མ། །ཕྲག་རྒྱས་སྐུ་
[327b.6]ནི་ཡིད་འོང་མ། །གསུང་གི་དབང་ཕྱུག་དབྱངས་སྙན་མ། །དྲན་པ་ཙམ་གྱིས་བྱིན་རློབ་མ། །ཡུམ་ནི་འདོད་པའི་སྐུ་མངའ་མ། །བདེ་གཤེགས་དབུ་ཡི་གཙུག་ཏོར་མ། །རྒྱལ་བས་དབང་བསྐུར་ཅོད་པན་མ། །ཕོ་ཉས་དུས་མིན་འཆི་སླུ་མ། །སྤྱན་ནས་ཐུགས་རྗེའི་ཆུ་
[327b.7]འཛག་མ། །དགེ་སློང་སྡོམ་བརྩོན་དམ་ཚིག་མ། །བདག་མེད་བརྩེ་བས་མཐར་ཕྱིན་མ། །ས་དགུ་འདས་པའི་ཕ་རོལ་མ། །མ་བྱོན་སྔ་དྲོ་གཞོན་ནུ་མ། །ད་ལྟ་ཉིན་གུང་དར་བབ་མ། །འདས་སོ་བགྲེས་མོ་དགོངས་ཀ་མ། །དུས་གསུམ་འགྱུར་བའི་མི་རྟག་མ། །འཇིགས་
[328a]
[328a.1]ཆེན་བརྒྱད་ལས་སྐྱོབ་མཛད་མ། །ཕྲ་མོ་ཆེན་མོ་སྒྲུབ་སྩོལ་མ། །མཆོག་འདོད་མ་ལ་མཆོད་སྦྱིན་མ། །སེམས་ཅན་གསོ་བའི་འོ་རྒྱུན་མ། །དུག་སེལ་སྨན་མཆོག་མ་གི་མ། །སྡིག་སྤོང་དགེ་བའི་བདུད་རྩི་མ། །སངས་རྒྱས་བསྐྱེད་པའི་རྒྱལ་ཡུམ་མ། །
[328a.2]བདག་ལ་ཐུགས་རྗེས་ཞལ་སྟོན་མ། །རྗེ་བཙུན་མ་འཕགས་མ་སྒྲོལ་མ་ལ་བསྟོད་པ་ཆོས་ཀྱི་རྗེ་པཎྜི་ཏ་འབུམ་ཕྲག་གསུམ་པས་མཛད་པ་རྫོགས་སོ།། {T3695}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་དེ་བཱི་སྟོ་ཏྲ། བོད་སྐད་དུ། འཕགས་མ་ལྷ་མོ་སྒྲོལ་མ་ལ་
[328a.3]བསྟོད་པ། རྗེ་བཙུན་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ལྷ་མོ་སྒྲོལ་མ་ལྷ་ཡི་ལྷ། །འཇིག་རྟེན་གསུམ་ན་མཆོག་གྱུར་པ། །ཐུགས་རྗེ་ཆེན་པོའི་དབང་གྱུར་པས། །ཁམས་གསུམ་འགྲོ་བ་སྒྲོལ་ལ་མཁས། །ཚོར་བ་བཏང་སྙོམས་ངོ་བོ་
[328a.4]ཉིད། །མི་མཐུན་ཚོར་བ་བདེ་སྡུག་ལྡན། །ཕྲག་དོག་འཇོམས་པའི་ཕྲིན་ལས་ཅན། །མཁའ་ལྟར་དངས་པ་བླ་ན་མེད། །གཟུང་བ་དང་ནི་འཛིན་པ་ཡི། །རྣམ་རྟོག་སྤངས་པའི་བདེ་བ་ཅན། །པདྨ་ཆུས་མི་ཆགས་པ་བཞིན། །འཁོར་བའི་སྐྱོན་གྱིས་མ་གོས་པ། །རང་བཞིན་གྱིས་
[328a.5]དག་བླ་ན་མེད། །རྒོལ་བ་དག་ནི་ཚར་གཅོད་པ། །འགྲོ་བ་ཡིད་འོང་ཕུན་ཚོགས་པ། །སྐུ་མདོག་མཚན་དང་དཔེ་བྱད་ལྡན། །སྒྲོལ་མ་སྣ་ཚོགས་མདོག་ཅན་ནི། །འབྱུང་པོ་ལས་བྱུང་གདོན་ཆེན་དང་། །འདུ་བ་ལས་བྱུང་ནད་རྣམས་དང་། །བཀྲ་མི་ཤིས་ནི་སྣ་ཚོགས་དང་། །མཚོན་དང་
[328a.6]དུག་དང་རིག་སྔགས་དང་། །ཕྲ་མེན་ལས་བྱུང་སྦྱོར་བ་ཡིས། །ཤིན་ཏུ་མི་བཟད་ཐབས་ལྡན་པའི། །སྟོབས་ནི་སྣ་ཚོགས་འཇོམས་པ་དང་། །སེང་གེ་གླང་པོ་སྟག་དང་སྤྲུལ། །ཆོམ་རྐུན་མེ་ཆུ་ཤ་ཟ་ཡི། །འཇིགས་པ་ཆེན་པོ་དེ་རྣམས་ལས། །སྐྱོབ་མཛད་དེ་ལ་བསྟོད་ཕྱག་འཚལ། །
[328a.7]འཕགས་མ་ལྷ་མོ་སྒྲོལ་མ་ལ་བསྟོད་པ་རྫོགས་སོ།། {T3696}༄༅༅། །རྒྱ་གར་སྐད་དུ། ཨཱརྱ་ཏཱ་རཱ་སཱ་དྷ་ནཾ། བོད་སྐད་དུ། འཕགས་མ་སྒྲོལ་མ་སྒྲུབ་པའི་ཐབས། དང་པོ་རེ་ཞིག་སྔགས་པས་ཁ་ལ་སོགས་པ་དག་པར་བྱས་ནས། ས་ཕྱོགས་དབེན་པར་འདུག་སྟེ། བྱང་ཆུབ་མཆོག་
[328b]
[328b.1]ཏུ་སེམས་བསྐྱེད་ལ། རང་གི་སྙིང་གར་ཨ་ལས་བྱུང་བའི་ཟླ་བའི་སྟེང་དུ་ཡི་གེ་ཏཱཾ་ལྗང་གུ་འོད་ཟེར་དང་ལྡན་པར་བསམས་ནས། དེའི་འོད་ཟེར་གྱིས་མ་རིག་པའི་མུན་པ་བསལ་ནས་ཁམས་གསུམ་དུ་སྤྲོས་ཏེ། འགྲོ་བའི་དོན་བྱས་ནས་ཕྱོགས་བཅུ་ན་བཞུགས་པའི་སྒྲོལ་མ་སྤྱན་དྲངས་
[328b.2]ཏེ། མདུན་དུ་བལྟས་ལ། ཕྱག་དང་། མཆོད་པ་དང་། སྡིག་པ་བཤགས་པ་དང་། གསུམ་ལ་སྐྱབས་སུ་འགྲོ་བ་དང་། བསོད་ནམས་ལ་རྗེས་སུ་ཡི་རང་བ་དང་། བསྐུལ་མ་གདབ་པ་དང་། མྱ་ངན་ལས་མི་འདའ་བར་གསོལ་བ་གདབ་པ་ཞེས་བྱ་བ་བླ་ན་མེད་པའི་ཡན་ལག་བདུན་
[328b.3]པའི་མཆོད་པ་བྱས་ནས་བྱམས་པ་ལ་སོགས་པ་ཚངས་པའི་གནས་བཞི་བསྒོམ་པར་བྱའོ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བའི་བྱིན་གྱིས་བརླབ་པའི་སྔགས་བརྗོད་ཅིང་ཐམས་ཅད་སྟོང་པ་ཉིད་བསྒོམ་པར་བྱའོ། །དེ་ནས་པདྨ་དང་ཟླ་བའི་སྟེང་དུ་ཏཱྃ་ཡོངས་སུ་
[328b.4]གྱུར་པ་ལས། ཨུཏྤལ་སྔོན་པོ་ཏཱཾ་གིས་མཚན་པ་བསམ་དེ་རྣམས་ཡོངས་སུ་གྱུར་པ་ལས། བཅོམ་ལྡན་འདས་མ་སྒྲོལ་མ་ཞལ་གཅིག་ཕྱག་གཉིས་མ། སྐུ་མདོག་ལྗང་གུ་ལང་ཚོ་དང་ལྡན་པ། སྟོད་གཡོགས་དང་སྨད་གཡོགས་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། གཡས་
[328b.5]མཆོག་སྦྱིན་དང་། གཡོན་གྱིས་ཨུཏྤལ་བསྣམས་པ་པདྨ་དང་ཟླ་བའི་སྟེང་དུ་གཡོན་བསྐུམ་པའི་ཕྱེད་སྐྱིལ་གྱིས་བཞུགས་པར་བདག་ཉིད་བསྒོམས་ལ། དེའི་ཐུགས་ཀའི་ཟླ་བ་ལ་དམ་ཚིག་སེམས་མ་ཇི་ལྟ་བའི་ཡེ་ཤེས་སེམས་མ་དང་། དེའི་ཐུགས་ཀའི་ཟླ་བ་ལ་ཡི་གེ་ཏཱཾ་ཏིང་ངེ་འཛིན་
[328b.6]སེམས་མའི་ཚུལ་དུ་བསམ། དེའི་འོད་ཟེར་གྱིས་ཡེ་ཤེས་སེམས་མ་སྤྱན་དྲངས་པ་ལ་སོགས་པ་དང་། དབང་བསྐུར་བ་དང་། བདུད་རྩི་ལྷག་མས་དོན་ཡོད་གྲུབ་པས་སྤྱི་གཙུག་ཏུ་རྒྱས་བཏབ་སྟེ། འོད་ཟེར་འཕྲོས་འདུས་འགྲོ་བའི་དོན་མཛད་པར་མི་སྐྱོའི་བར་དུ་བསྒོམ་པར་བྱའོ། སྐྱོ་ན་སྔགས་
[328b.7]བཟླས་པར་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཞེས་བྱ་བ་འབུམ་ཕྲག་བཅུ་བཟླས་ནས་སྟོང་ཕྲག་བཅུས་སྦྱིན་སྲེག་བྱའོ། །འགྱུར་བ་མེད་པར་ཕ་རོལ་ལ། །མི་ཟད་དགའ་བས་བདུད་རྩིའི་རོས། །སྲིད་པའི་སྡུག་བསྔལ་འཇོམས་མཛད་མ། །སྒྲོལ་མ་ཁྱོད་ལ་ཕྱག་འཚལ་ལོ། །ཞེས་བྱ་
[329a]
[329a.1]བས་བཟླས་པའི་རྗེས་ལ་བསྟོད་ནས། ཡི་གེ་བརྒྱ་པ་བརྗོད་དེ་བསོད་ནམས་བསྔོས་ལ། ཨོཾ་བཛྲ་མུཿཞེས་པས་གཤེགས་སུ་གསོལ། ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཱཾ་ཨཱདྱ་ནུཏྤནྣཏྭོཏ། ཨོཾ་ཨཱཿཧཱུཾ་ཕཊ་སྭཱཧཱ་ཞེས་བྱ་བས་གཏོར་མའི་སྔགས་སོ། །ཟླ་བ་དྲུག་གི་བར་དུ་ཞག་རེ་རེ་ཞིང་ཐུན་གསུམ་དུ་འདི་དག་
[329a.2]བྱའོ། །བླ་མ་ཆེན་པོ་ཤཱཀྱ་ཤྲཱི་བྷ་དྲས་མཛད་པ་རྗེ་བཙུན་སྒྲོལ་མའི་སྒྲུབ་ཐབས་རྫོགས་སོ།། །།རྒྱ་གར་ཤར་ཕྱོགས་ཛཱ་ག་ཏ་ལའི་པཎྜི་ཏ་ཆེན་པོ་བི་བྷཱུ་ཏི་ཙནྡྲས་རང་འགྱུར་དུ་མཛད་པའོ།། {T3697}༄༅༅། །རྒྱ་གར་སྐད་དུ། སྭ་ར་སྭ་ཏཱི་སཱ་དྷ་ནཾ། བོད་སྐད་དུ། དབྱངས་
[329a.3]ཅན་མའི་སྒྲུབ་ཐབས། ལྷ་མོ་དབྱངས་ཅན་མ་ལ་ཕྱག་འཚལ་ལོ། །རང་གི་སྙིང་གའི་སྲོག་གི་འོད་ཟེར་གྱིས། །དབྱངས་ཅན་མ་ཡི་འཁོར་ལོ་མདུན་དུ་དགུག །མེ་ཏོག་བདུག་པ་མར་མེ་བྱུག་པས་མཆོད། །འཇུག་པའི་རླུང་གིས་སྙིང་གི་སྲོག་རྩར་གཞུག །དབུས་སུ་ཧྲཱིཾ་གིས་
[329a.4]རྣམ་བརྒྱན་ཟླ་བས་ལྟེ་བར་རྣམ་པར་མཛེས། །མཆོག་ཏུ་དཀར་ཞིང་འོད་གསལ་སྒྲོན་མེ་ལྟ་བུའི་ཆས། །ཉི་མའི་ཟེར་གྱིས་ཟེའུ་འབྲུའི་མཚམས་ནས་ཤིན་ཏུ་རྒྱས་པ་ཡི། །དྲི་མེད་འཇམ་ཞིང་དཀར་བའི་འདབ་མ་རེ་རེར་གཉིས་གཉིས་གནས། །འོད་ཟེར་དཀར་པོ་འཕྲོ་བས་སྙིང་གི་མུན་པ་
[329a.5]རྣམ་པར་སེལ་བའོ། །སྔོན་དུ་རིག་པ་འབུམ་ཕྲག་གཅིག །ཉི་ཁྲི་ལྔ་སྟོང་བསྙེན་པ་བྱས། །དེ་ནས་རྩོད་པ་སྨྲ་བ་ན། །འཁོར་ལོ་ལྕེ་ལ་རྣམ་པར་དགོད། །བསྒྲུབ་བྱའི་དཔྲལ་བར་འཁོར་ལོ་མཆོག །བཀོད་ནས་དབང་དུ་བྱེད་པར་བཤད། །དབྱངས་ཅན་མའི་སྒྲུབ་ཐབས་
[329a.6]བྲམ་ཟེ་ཕུར་བུས་མཛད་པ་རྫོགས་སོ།། {T3698}༄༅༅། །རྒྱ་གར་སྐད་དུ། པྲཧྨ་བུ་ཏི་སྭ་ར་ས་ཏྱཻ་སྟོ་ཏྲེ་ཎ་སིདྡྷཾ་ཝཱཀ་པྲ་བྷ་ནཱ་མ། བོད་སྐད་དུ། ཚངས་པའི་བུ་མོ་དབྱངས་ཅན་མ་ལ་བསྟོད་པས་གྲུབ་པ་དག་གི་འོད་ཟེར་ཞེས་བྱ་བ། འཇམ་པའི་དབྱངས་ལ་ཕྱག་འཚལ་ལོ། །སྤྱན་
[329a.7]རས་གཟིགས་དབང་ཞལ་གྱི་མཆེ་བའི་རྩེ་ལས་མངོན་སྤྲུལ་ཞིང་། །ཐུགས་རྗེའི་རྣམ་འཕྲུལ་མཐའ་ཡས་ཕ་རོལ་རྗེས་སུ་གཟུང་བའི་ཕྱིར། །ཚངས་པའི་བུ་མོ་མཛེས་མ་ཁྱོད་སྐུ་གསལ་བའི་རྣམ་འགྱུར་ཅན། །བིཥྞུའི་གཟུགས་ཅན་ཏམྦུ་ར་ལ་དགའ་བསྐྱེད་ཚུལ་འཛིན་མ། །
[329b]
[329b.1]རྗེས་སུ་ཆགས་བཅས་རོལ་པའི་ལོ་ནི་བཅུ་དྲུག་ལོན་པའི་ཉམས། །ཆུ་གཏེར་འགྲམ་ངོགས་ལྦུ་བའི་ཕྲེང་བས་རྩེ་བར་དགའ་བ་ཅན། །དྲི་ཟའི་བུ་མོ་མངོན་བསྟོད་ཉིད་ཀྱི་རྣམ་ཐར་ཕུལ་བྱུང་རྣམས། །གང་གིས་ཡིད་ལ་དྲན་བྱེད་དེ་ལ་ངག་གི་དབང་ཕྱུག་སྩོལ། །ཁོ་
[329b.2]བོས་ཁྱོད་དྲན་བ་སྤུ་ཤས་ཆེར་གཡོ་བའི་ལག་པ་གཉིས། །ཐལ་སྦྱར་མེ་ཏོག་གཞོན་ནུ་ཁ་འབུས་ལྟ་བུ་སྤྱི་བོའི་སྟེང་། །རབ་བཞག་སྙིང་ནས་རབ་ཏུ་གུས་པ་ལྷུར་བྱེད་ཁྱོད་ཀྱི་ཡོན་ཏན་ནི། །མཐའ་དག་རྟོགས་མིན་ཅུང་ཟད་རྙེད་འདི་སྡེབ་ལེགས་ཕྲེང་བས་མཆོད། །ཁྱོད་སྐུ་འོ་མའི་
[329b.3]མཚོ་འདྲ་ཀུནྡ་ཀུ་མུད་ཟླ་ཟེར་མཚུངས། །རབ་དཀར་འོད་ཀྱི་ཕྲེང་བས་ཀུན་ནས་བསྐོར་བའི་གཟི་བརྗིད་ཀྱིས། །ལྷ་དབང་ཡིད་འཕྲོག་དགའ་བའི་ང་རོས་ཁྱོད་ལ་རྟག་ཏུ་བསྟོད་བྱེད་ན། །བློ་གྲོས་དོན་གསལ་དོན་གཉེར་ལྷ་ལ་གུས་པ་སྨོས་ཅི་དགོས། །ཆུ་སྐྱེས་དཀར་པོ་དྲི་མེད་སྟེང་
[329b.4]གནས་གེ་སར་གཡོ་བའི་རྩེར། །རི་བོང་འཛིན་པའི་གདན་སྟེང་ཙོག་པུའི་ཚུལ་བཞུགས་བགྱིང་བག་ཅན། །ཞལ་གཅིག་ཕྱག་གཉིས་དྲི་ཟའི་པི་ཝང་བསྒྲེངས་པའི་སྒྲ་དབྱངས་དང་། །རྗེས་མཐུན་གསུང་གིས་ས་གསུམ་སྐྱེ་དགུའི་བསམ་པ་ཚིམ་མཛད་མ། །འཇམ་མཉེན་འཁྲིལ་ཞིང་རིང་བ་བུང་བ་
[329b.5]ལྟ་བུར་གནག་པའི་སྐྲ། །གཡས་གཡོན་རྒྱབ་ཏུ་འཕྱང་ཞིང་ཅུང་ཟད་ལི་བའི་ཐོར་ཅོག་ལ། །མེ་ཏོག་དཀར་པོའི་ཕྲེང་བས་ཐོད་བཅིངས་སྤྱི་གཙུག་ཟླ་བས་སྤུད། །གསེར་གྱི་རྣ་ཆ་འཕྱང་ཞིང་མཁུར་ཚོས་མཛེས་པ་འཛུམ་པའི་ཞལ། །ཀ་ཙ་ལིནྡའི་སྨད་གཡོགས་ཚོམ་བུའི་སྤྲས་པས་སྒེག་
[329b.6]པའི་ཉམས། །པུཎྜ་རཱི་ཀའི་ཕྲེང་བ་ཆུན་འཕྱང་མགུལ་རྒྱན་དོ་ཤལ་ཅན། །ཕྱག་ཞབས་རིན་ཆེན་ཕྲེང་བ་སིལ་སིལ་སྒྲ་ལྡན་བརྒྱུས་པ་ཡིས། །ཁྱེད་སྐུ་ལྷ་དང་རིག་འཛིན་བུ་མོའི་ཚོགས་ཀུན་ངོ་མཚར་གྱུར། །ལྷ་མོ་གཞོན་སྒེག་ལང་ཚོར་ལྡན་པ་སྐྱེ་དགུའི་ཡིད་འཕྲོག་མ། །ཡིད་
[329b.7]འོང་འཛུམ་པའི་བཞིན་ཅན་མིག་དཀྱུས་རིང་པོའི་ཟུར་གྱིས་ནི། །སྨིན་མ་གཡོ་བའི་གར་ཅན་ཁྱོད་སྐུ་རྟག་ཏུ་དྲན་བྱེད་ལ། །རབ་ཏུ་དགྱེས་པའི་ཉམས་ཀྱིས་གཟིགས་ཤིང་ཁོ་བོ་རྗེས་སུ་བཟུང་། །མཛད་སྤྱོད་བགས་ཀྱིས་དལ་ཞིང་གསོང་པོར་སྨྲ་བའི་ངང་ཚུལ་ཅན། །མཱ་ལི་སར་
[330a]
[330a.1]པའི་དྲི་ལྡན་ནུ་ཞོ་ནུ་བར་འདོད་པ་ལ། །རེག་པས་དགའ་བའི་ནུ་ཞོ་སྟོབ་བྱེད་ཁྱེད་ལ་རྟག་ཏུ་བསྟོད་པའི་བུ། །སྙིང་ནས་ཡུས་ཆེ་ཤས་ཆེར་དུ་བའི་གདུང་བ་ཚིམ་མཛད་མ། །དེ་ཡི་ཡིད་ལ་བསྟོད་པའི་ཟོལ་ཚིག་ཅ་ཅོར་མ་ངེས་པ་ཡི་སྒྲ། །སྨྲ་བའི་ག་ཞས་འདིར་
[330a.2]སྤེལ་ཉིད་ཀྱི་ཐུགས་ལ་བས་གྱུར་མོད། །འོན་ཀྱང་ཁོ་བོའི་བློ་ནི་འདིར་ཟད་བུ་ཡི་ཉེས་པ་རྣམས། །མ་ཡིས་བཟོད་མཛོད་བརྩེ་བས་སླར་ཡང་བུ་ནི་རབ་ཏུ་སྐྱོངས། །སྙིང་གི་ཆུ་སྐྱེས་འདབ་བརྒྱད་དཀར་པོ་ཟེའུ་འབྲུའི་ཕྲེང་བ་ཅན། །དམར་སེར་མཛེས་པའི་མཚམས་ནས་འོད་ཀྱི་དྲ་བ་
[330a.3]རབ་ཏུ་དགྱེ། །གེ་སར་འཇམ་པའི་རྩེ་མོར་བསིལ་ཟེར་ཅན་ནི་རབ་གནས་པའི། །དབུས་སུ་ཆུ་ཤེལ་མདོག་འཛིན་ཧྲཱིཾ་གི་ཕྲེང་བས་སྒྲིབ་གཉིས་འཇོམས། །འདབ་མ་རེ་རེར་གཉིས་གཉིས་བཞུགས་པའི་ཨ་ཨཱ་ལ་སོགས་དབྱངས་ཡིག་རྣམས། །གཡས་སུ་བསྐོར་བའི་རིམ་པས་མར་
[330a.4]མེའི་ཕྲེང་བ་འབར་བ་ལྟར། །ཀུན་ནས་འོད་ཟེར་འཕྲོ་བའི་རྒྱན་ལྡན་རྩེ་མོའི་རང་བཞིན་གྱིས། །ཡིད་ཀྱི་དྲི་མ་མུན་ནག་རྣམ་བསལ་བློ་གྲོས་མཆོག་སྩོལ་མཛོད། །སྲོག་གི་འོད་ཟེར་སྐྲ་ཡི་ཁྱོད་ཙམ་ཕྲ་བའི་ཆ་ཤས་ཀྱིས། །རྩོལ་བའི་སྒོ་ནས་མྱུར་བར་ལྷ་མོའི་ཐུགས་ལ་རེག་གྱུར་པས། །
[330a.5]འཁོར་ལོ་གཉིས་པ་བསྐོར་བས་རྣམ་པ་བདུན་པའི་མཆོད་སྤྲིན་ཅན། །འཇུག་པའི་རླུང་ཞོན་རང་སེམས་ཡེ་ཤེས་རྒྱས་མཛད་དེ་ལ་འདུད། །དེ་རྗེས་ཧྲཱིཾ་གི་ཕྲེང་བ་མུ་ཏིག་དོ་ཤལ་མགལ་མེ་ཡི། །འཁོར་བའི་ཚུལ་དུ་འཁོར་བ་ཞལ་གྱི་སྒོ་ནས་འཐོན་གྱུར་ཅིང་། །ལྟེ་བའི་དཀྱིལ་
[330a.6]འཁོར་ནས་ཞུགས་སླར་ཡང་ས་བོན་ཚ་ཟེར་རྩེར། །འབར་བའི་མོད་ལ་དབྱངས་ཅན་ངག་སྟེར་ཁྱོད་ཞབས་སྤྱི་བོས་བླང་། །ལྷ་མོ་གཙང་སྦྲ་ལ་དགའ་བརྫུན་སྤངས་འབྱུང་པོའི་ཟས་དོར་ཞིང་། །ཚངས་སྤྱོད་བརྟུལ་ཞུགས་ཅན་གྱིས་ཉིན་རེ་དྲན་བྱས་ཡུམ་བོས་ན། །སླར་ཡང་ངག་
[330a.7]གི་དབང་ཕྱུག་ཅི་བཞེད་གསུངས་པའི་གད་མོ་ཡིས། །དཀར་གསུམ་ཟས་ཀྱི་དགའ་སྟོན་ཚུལ་གྱིས་དངོས་གྲུབ་སྩོལ་ལ་འདུད། །དེ་ལྟར་ཁྱོད་བསྟོད་ལྷུར་ལེན་གང་ཡིན་དེ་ནི་ཡོན་ཏན་གྱིས། །དབུལ་གྱུར་སྣ་ཚོགས་རིགས་པའི་གཞུང་ལུགས་རྣམས་ལས་ངེས་པའི་དོན། །མྱུར་
[330b]
[330b.1]རྟོགས་ས་གསུམ་སྐྱེ་བོའི་གཞུང་སྒྲོན་གཏི་མུག་མུན་པ་རྣམས། །རབ་བསལ་རྒྱལ་བའི་དབང་པོ་འོད་དཔག་མེད་འདྲ་ཐོབ་པར་ཤོག །འདིར་ནི་འཕགས་དང་མཁས་པའི་སྐྱེ་བོ་ཕུལ་བྱུང་ཚོགས་རྣམས་སྟོན། །བདག་འདྲ་ཁུམས་ཤིང་མུ་ཅོར་སྒྲོགས་པ་དང་ཚུལ་མི་ཤེས་མོད། །
[330b.2]ཁྱོད་ཀྱི་རྗེས་ཞུགས་ལན་ཅིག་མ་ཡིན་ཚིག་དོན་གོམས་བྱའི་ཕྱིར། །སྡེབ་སྦྱོར་གཙོར་བྱས་བྲག་ཅའི་སྒྲ་མཚུངས་འདི་ནི་བསྟོད་པར་རིགས། །ཚིག་འདི་གང་གིས་མཐོང་ངམ་ཐོས་སམ་རྟག་ཏུ་དྲན་བྱེད་དམ། །ཀློག་དང་ཁ་དོན་བྱེད་དང་བསམ་དོན་ཆུབ་བྱེད་པ། །ཡི་གེར་བྲིའམ་
[330b.3]གཞན་ལ་རྒྱ་ཆེར་རབ་ཏུ་སྟོན་ཀྱང་རུང་། །དེ་ཡི་སེམས་དང་ངག་ལ་དཔལ་ལྡན་ལྷ་མོ་དབྱངས་ཅན་མྱུར་འཇུག་ཤོག །ཚངས་པའི་བུ་མོ་དབྱངས་ཅན་མ་ལ་བསྟོད་པས་གྲུབ་པ་ངག་གི་འོད་ཟེར་ཞེས་བྱ་བ། །ལྷ་མོ་ཉིད་ཀྱིས་དངོས་སུ་བྱིན་གྱིས་བརླབས་པའི་བྲམ་ཟེ་ཕུར་བུས་
[330b.4]མཛད་པ་རྫོགས་སོ།། །།སུམ་པ་ལོ་ཙཱ་བ་དར་མ་ཡོན་ཏན་གྱིས་བསྒྱུར་བའོ།། {T3699}༄༅༅། །རྒྱ་གར་སྐད་དུ། ཤྲཱི་བཛྲ་སྭ་ར་སྭ་ཏཱི་དེ་ཝཱི་ནོ་པི་ཀཾ། བོད་སྐད་དུ། དཔལ་ལྷ་མོ་རྡོ་རྗེ་དབྱངས་ཅན་མའི་སྒྲུབ་ཐབས། རྡོ་རྗེ་དབྱངས་སྙན་མ་ལ་ཕྱག་འཚལ་ལོ། །གངས་
[330b.5]རི་ལྟར་དཀར་ཟླ་རྒྱས་ཞལ་མངའ་དྲི་མེད་བསིལ་ཞིང་གསལ་བའི་འོད་ཟེར་ཕྲེང་བ་ཅན། །སྒེག་ཆགས་འགྱིང་དུལ་འཛུམ་པའི་མདངས་དཀར་ལྷ་ཡི་ལྷ་མོ་ཀུན་ནས་མཛེས་པའི་གཟི་ལྡན་མ། །སྟོང་ཕྲག་དྲུག་ཅུའི་ཡན་ལག་དབྱངས་སྙན་རྒྱུད་མངས་རོལ་མོ་ཨུཏྤལ་རལ་གྲིས་ཕྱག་མཚན་
[330b.6]ཅིང་། །འཇིག་རྟེན་གསུམ་སྐྱབས་མཁའ་དང་རྒྱ་མཚོའི་རྒྱན་གྱུར་བློ་གྲོས་ལྷ་མོ་རྒྱལ་གྱུར་ཅིག །ཕ་རོལ་རྒོལ་བ་ཚར་གཅད་དང་། །མཐའ་ཡས་སྤོབས་པ་ཀུན་བསྐྱེད་དང་། །སྣ་ཚོགས་ཕྲིན་ལས་བདེ་བསྒྲུབ་ཕྱིར། །དབྱངས་ཅན་ལྷ་མོ་བསྒྲུབ་པར་བྱ། །འཕགས་མ་དེ་རྟག་
[330b.7]མགོན་བཟུང་ནས། །འགྲོ་སྐྱབས་དོན་ཀུན་མྱུར་བརྩོན་པས། །སྨན་ལྗོངས་རབ་དགར་བྲག་རིར་ནི། །རྣམ་གཡེང་སྤངས་ཏེ་ཚོགས་བསག་དང་། །དུས་སྙིགས་བར་ཆད་ཀུན་བསལ་ཕྱིར། །སྔོན་དུ་སྔགས་པས་རྡོ་རྗེ་འཛིན། །མཉེས་བྱས་དེ་རྗེས་སྙིང་རྗེའི་ཡིད། །རབ་སྦྱངས་རྡོ་རྗེ་ལྷ་
[331a]
[331a.1]མོ་བསྒོམ། །སྔགས་བདག་ང་རྒྱལ་ལ་བརྟན་སྲོག །རྩ་བའི་ཡི་གེ་སྒྲོན་འདྲ་ཡི། །ཟེར་སྤྲོས་ནས་ནི་རྒྱ་མཚོ་ནས། །དབྱངས་ཅན་འཁོར་ལོ་མདུན་དུ་དགུག །ཨོཾ་ཨེ་ཧྱེ་ཧི་བཛྲ་དེ་ཝཱི་མ་ཧཱ་ཙཀྲ་ས་མ་ཡ་སྟྭཾ་ས་མ་ཡ་ཛཿ། གཞལ་མེད་སྲོག་གི་འོད་ཟེར་གྱིས། །འཁོར་ལོ་སྐུ་
[331a.2]དང་ཐུགས་འཁོར་ལོ། །སྣ་ཚོགས་འོད་འབར་དྲི་མེད་མཛེས། །མཁའ་ལྟར་ཟླ་རྒྱས་ལྟར་དྲངས་ཏེ། །རབ་དང་ཀུན་དགས་ཁྲུས་སོགས་དབུལ། །མེ་ཏོག་བདུག་པ་མར་མེ་དྲི། །ཞལ་ཟས་རོལ་མོ་རྒྱན་ཕྲེང་དག །པི་ཝང་ལྷན་ཅིག་སྔགས་བཅས་མཆོད། །འབྲུ་གསུམ་གླུ་
[331a.3]གར་ལྡན་བྱས་བསྟོད། །ཕྱག་མཆོད་ལ་སོགས་རྒྱུད་ཀུན་གྱིས། །མཉེས་བྱ་གསོལ་བྱ་བསྟིམ་པར་བྱ། །གནས་ལ་གནས་དང་ལུས་ལ་སྐུ། །སྙིང་དཀྱིལ་འཁོར་ལོ་ཕྱག་རྒྱས་གདབ། །ཤེལ་དང་བཻཌཱུར་རཱ་ག་དང་། །གསེར་བཟང་ལས་གྲུབ་གཞལ་ཡས་ཁང་། །གྲུ་བཞི་སྒོ་
[331a.4]བཞི་རྟ་བབས་མཛེས། །སྣ་ཚོགས་རྒྱན་རྣམས་ཀུན་གྱིས་སྤྲས། །དེ་དབུས་རྡོ་རྗེ་ལྷ་མོ་ནི། །པད་ཟླ་རྡོ་རྗེ་སྐྱིལ་ཀྲུང་མནན། །བརྒྱད་གཉིས་ན་ཚོད་ཡིད་འོང་མ། །འཇིག་རྟེན་གསུམ་ན་མཚུངས་མེད་པའོ། །དེ་སྐུ་ལྡེམ་སྒེག་ཞལ་འཛུམ་ཕྱག །བཞི་ལྡན་རལ་གྲི་ཨུཏྤལ་དང་། །རྒྱུད་
[331a.5]མངས་པི་ཝང་སྦྲེང་མཛད་བརྩོན། །ཉི་ཤར་གངས་རི་ལྟར་དཀར་བལྟ། །ཐུགས་ཀར་རབ་དཀར་ཤེས་རབ་ཀྱི། །སྙིང་པོ་དཀར་མཛེས་ཧྲཱིཾ་ཡིག་གི། །འོད་ཚོགས་རབ་འཇམ་དཀར་སྐྱེ་བས། །བུམ་ནང་སྒྲོན་མ་འབར་བ་བཞིན། །སྤྲིན་མེད་མཁའ་དཀྱིལ་ཟླ་སྐར་ལྟར། །རྣམ་དག་འཁོར་ལོ་
[331a.6]འོད་མཛད་གཟི། །རིམ་པས་དབུས་ནས་མཐར་སྣང་བྱ། །ཉི་ཟེར་ཁ་ཕྱེ་པད་འདབ་ཚུལ། །རྩ་བའི་འབྲུ་འདི་སྙིང་འདབ་ཀྱི། །དབུས་བཞུགས་བཞི་གཉིས་ཁ་ཕྱེ་ནས། །གཉིས་གཉིས་ང་རོ་བཅུ་དྲུག་རྒྱས། །དེ་སྤྲོས་གེ་སར་ཟེའུ་འབྲུ་ཕྱེ། །འདབ་བཅས་ཡི་གེ་འོད་འབར་བས། །སླར་ཡང་
[331a.7]བདུད་རྩིའི་ཟིལ་མངར་བླང་། །དཀར་འཇམ་སྣུམ་མཉེན་མཁྲེགས་དང་སྲབ། །ཡིད་འོང་དྲི་མས་མ་གོས་པའོ། །ཟིལ་མངར་སྙིང་གི་མུན་སེལ་ལ། །སྙིང་འདབ་སྙིང་པོས་སླར་ཡང་དེའི། །ཟིལ་མངར་རྒྱས་བྱེད་ཡང་ཚུར་འོད། །རབ་སྤྲོས་ཕྱི་ནང་ཀུན་དག་བྱེད། །ཇི་སྲིད་མ་ཡེངས་མི་
[331b]
[331b.1]སྐྱོ་བར། །བདག་གཞན་མཁའ་ཁྱབ་ཀུན་བཀང་ལ། །སྡིག་སྡུག་ཡིད་ཀྱི་མུན་པ་རྣམས། །ཉི་མས་མུན་བསལ་ཇི་བཞིན་ནོ། །རྩ་བའི་ཡི་གེ་མཆོག་གཅིག་ལ། །གཡེང་མེད་འབུམ་ཕྲག་བཅོ་ལྔ་བཟླས། །དངོས་དང་རྨི་ལམ་བརྡ་གཟུགས་ཀྱི། །ལྟས་གསུམ་ཕྱི་རོལ་
[331b.2]མཐོང་བར་འགྱུར། །དེ་འོག་པདྨ་འཁོར་ལོ་སྒྱུར། །དབྱངས་ཡིག་རལ་གྲི་ཕྱེད་མཚན་པར། །སྐད་ཅིག་རྣམ་པས་བསྒྱུར་ཞིང་བསྐོར། །གསང་སྔགས་འབུམ་ཕྲག་བཟླས་པར་བྱ། །ཨོཾ་བཛྲ་དེ་ཝཱི་པི་ཙུ་པི་ཙུ་པྲ་ཛྙཱ་བཌྜྷ་ཧྲཱིཾ་ཧཱུཾ། རང་སྙིང་མུན་སེལ་བརྟན་པ་དང་། །གཞན་
[331b.3]ཡིད་མུན་སེལ་གཡོ་བ་ཡིས། །འབུམ་ཕྲག་གསུམ་ནི་རྩེ་གཅིག་བཟླས། །ལྐུགས་པའང་ངག་གི་དབང་ཕྱུག་འགྱུར། །ནང་སྐྱེ་ཟླ་རྒྱས་པ་ཝ་སངས། །གསུང་བ་སྒྲོན་མ་འབར་བ་མཐོང་། །བརྡ་གསུམ་གཟུགས་སྒྲ་ཡིད་ཤེས་ཏེ། མཚོན་ཆའི་འཁོར་ལོ་རྟགས་
[331b.4]གཞན་ཡིན། །དེ་ལ་སྦྱིན་སྲེག་སྔོན་སོང་བས། །བརྒྱ་རྩ་བརྒྱད་མཆོད་བློ་གྲོས་སྤེལ། །དེ་ཡིས་ཚར་གཅད་རྗེས་གཟུང་ལས། །ལྔ་ཕྲག་གཉིས་འགྲུབ་ཐེ་ཚོམ་མེད། །རྩོད་དང་དགྲ་འདུལ་དུག་གཞིལ་དང་། །འཆི་བདག་བཟློག་པ་དང་པོ་སྟེ། །བློ་གྲོས་སྔགས་རིག་སྙན་དངགས་
[331b.5]དང་། །ཀློག་དང་སྔགས་འགྲུབ་གཉིས་པ་ཡིན། །ཡང་ན་ཐོག་མ་གཉིས་རྩེ་མོས། །ལྷག་མ་བཞི་བཞི་ལྷ་མོ་གཞན། །འཁོར་ཡིན་ལྔ་གཉིས་དཀྱིལ་འཁོར་མཛེས། །དེ་བཞིན་གཉིས་གཙོ་གཞན་བརྒྱད་འཁོར། །རྡོ་རྗེ་ལྷ་མོ་ལ་གནས་ལྕེ། །འཁོར་ལ་དབྱངས་ལྡན་རལ་
[331b.6]གྲི་བསྐོར། །ཕ་རོལ་སྲོག་དང་ལྕེ་བསྐུམ་ནས། །གསལ་བྱེད་མགྲིན་བཀང་རྩོད་ལས་རྒྱལ། །མཚན་ངན་ཐོད་པ་དགྲ་བོའི་གཟུགས། །མཱ་ར་ཡ་ནན་ལ་འབུམ་བཟླས། །གྲི་མཚོན་གྱིས་གཏུབས་རོ་རས་དཀྲིས། །འདྲེ་གནས་སར་མནན་ངེས་པར་འཆི། །ལྷག་པའི་
[331b.7]ལྷས་བརྒྱན་ལྷ་མོ་ཉིད། །ཁྲོ་མོ་ཞལ་བརྒྱ་ཕྲག་སྟོང་ཅན། །ལྕགས་ཀྱུ་ཞགས་པ་རལ་གྲི་ཡིས། །བཀུག་ཅིང་བསྣུན་ན་ཤིན་ཏུ་འཇོམས། །དམ་ཚིག་ལྷ་མོས་ཡེ་ཤེས་ཀྱི། །ལྷ་དྲངས་བུམ་པར་བདུད་རྩི་བསྒྲུབ། །སྨིན་མཚམས་པདྨོའི་ཧྲཱིཾ་ཐིག་ལེ། །རྒྱུན་འཛག་
[332a]
[332a.1]དུག་གཞིལ་འབྱུང་བར་བྱ། །སྙིང་དཀྱིལ་སྲོག་ཡིག་རིན་ཆེན་སྒྲོན། །རྡོ་རྗེ་འབར་བའི་མེ་འོད་གསལ། །ཨ་ཕྲེང་ཀ་ཕྲེང་སྤེལ་བསྐོར་གཟིགས། །གུར་ཕུབ་རྒྱུན་འབེབས་འཆི་མེད་འགྱུར། །ཇི་སྐད་སྔར་བཤད་ལྷ་མོ་ཉིད། །དེ་བཞིན་ལྷ་མོ་ལྔ་ལྔ་དགུ། །སྣ་གསུམ་
[332a.2]བདག་གི་སྙིང་ལ་བསྒོམ། །བློ་གྲོས་རབ་འཕེལ་གདོན་མི་ཟ། །དཔལ་མོའི་མགྲིན་པར་ཆུ་སྐྱེས་དབུས། །དུང་དཀར་གཡས་འཁྱིལ་སྦུབས་ལྟར་བ། །ང་རོ་བཅུ་དྲུག་གསང་བསྟོད་སྒྲོགས། །དེ་མྱུར་ཚངས་དབྱངས་ངག་ཐོབ་འགྱུར། །གཙང་ཞིང་རབ་གཙང་པད་སྙིང་དབུས། །གཞའ་རིས་དཔལ་བེའུ་འོད་ཟེར་
[332a.3]གསལ། །གློག་ཕྲེང་རྒྱུན་འདྲ་རྡོ་རྗེའི་ལྕེ། །རྣམ་བསྐྱོད་སྙན་དངགས་མཁན་འདྲར་འགྱུར། །འདམ་སྐྱེས་རི་བོང་རྡོ་རྗེ་ཡིས། །སྦྱོར་བས་ལྕེ་རྩེར་ཚངས་ཡིད་བསྐྱེད། །ལྷ་མོའི་ལྗགས་སྐྱེས་རྡོ་རྗེ་ལྟུང་། །དེ་བླངས་ཀ་ལ་པིང་ག་མཚུངས། །རྗེ་བཙུན་ལྗགས་པད་ཟླ་སྟེང་དུ། །དབྱངས་གསལ་རྡོ་རྗེ་རལ་གྲིས་མཚན། །བྲོ་
[332a.4]གར་འགྱུ་བཀླགས་ཡེ་ཤེས་བཀུག །དེ་རྒྱུན་སུས་འཐུངས་འགྲུབ་པར་འགྱུར། །ཐུན་མཚམས་གཙང་ཞིང་རབ་དཀར་ཟས། །མངར་བསིལ་སྣ་ཚོགས་བཏུང་བར་བྱས། །འབྲུ་གསུམ་རང་སྔགས་བྱིན་བརླབས་ལ། །བདུད་རྩིའི་སྦྱོར་བས་གཏོར་མ་སྦྱིན། །ཨོཾ་ཨཱཿབཛྲྀ་ཤྲཱི་དེ་ཝཱི་ས་པ་རི་ཝཱ་ར་ཨ་མྲྀ་ཏེ་བ་
[332a.5]ལིཾ་ཏ་ཁཱ་ཧི་ཁཱ་ཧི། མ་མ་སརྦ་སིདྡྷི་ཧཱུཾ་ཕཊ་སྭཱ་ཧཱ། འཇམ་དབྱངས་ལྷ་མོ་དབྱངས་སྙན་མ། །རབ་མཛེས་ཚངས་དབྱངས་བློ་བཟངས་མ། །མཚུངས་མེད་སྙིང་དབུས་མགྲིན་སྐྱོང་མ། །འདོད་དགུར་བསྒྱུར་ལ་ཕྱག་འཚལ་ལོ། །བདེ་ལྡན་ངག་གི་དབང་ཕྱུག་མ། །མི་འཚེ་མི་སླུ་ཚེ་འཛིན་མ། །བག་ཡོད་ཡིད་འོང་
[332a.6]ནོར་སྟེར་མ། །ཚངས་སྤྱོད་ཚངས་རིགས་མ་ཁྱོད་འདུད། །དཔལ་ལྡན་དབྱངས་ཅན་བརྟག་པའི་དེ་ཉིད་རྒྱ་མཚོ་མཁའ་དང་གཏེར་ལྟར་ཟབ་ཅིང་རྒྱ་ཆེ་སྦས་པ་ལས། །རྡོ་རྗེ་ལྷ་མོ་རི་དབང་ཕུང་པོ་སངས་རྒྱས་ཁང་བཟངས་ལྔ་ཕྲག་གཉིས་སྒྲུབ་ཉེས་ཚོགས་དྲི་མ་ཀུན་བསལ་འདི། །ཟླ་ཟེར་བསིལ་བས་ཀུ་
[332a.7]མུད་ལྟར་ཕྱེ་དེ་ཡི་ལམ་ནས་དགེ་འོད་རིན་ཆེན་འབར་བའི་སྒྲོན་མཐུས་གང་ཐོབ་དེས། །མ་ལུས་ལུས་ཅན་རྡོ་རྗེ་ལྷ་མོའི་དབྱངས་སྙན་མྱུར་ཐོབ་ཚངས་ཆེན་ང་རོས་ས་གསུམ་རྣམ་པར་རོལ་བར་ཤོག །དཔལ་རྡོ་རྗེ་དབྱངས་སྙན་མའི་སྒྲུབ་ཐབས་སྙན་ངག་མཁན་ཆེན་པོ་སློབ་དཔོན་ཟླ་བ་གཞོན་ནུས་མཛད་པ་
[332b]
[332b.1]རྫོགས་སོ།། །།རྣམ་པར་བཤད་པའི་པཎྜི་ཏ་མཁས་པ་ཆེན་པོ་བུདྡྷ་ཤྲཱི་ཛྙཱ་ན་དང་། ལོ་ཙཱ་བ་དགེ་སློང་བྱམས་པའི་དཔལ་གྱིས་བསྒྱུར་བའོ།། {T3700}༄༅༅། །རྒྱ་གར་སྐད་དུ། ཤྲཱི་བ་སུ་དྷ་རཱ་སཱ་དྷ་ནཾ། བོད་སྐད་དུ། དཔལ་ནོར་རྒྱུན་
[332b.2]མའི་སྒྲུབ་ཐབས། དཀོན་མཆོག་གསུམ་ལ་ཕྱག་འཚལ་ལོ། །ཕྱོགས་བཅུ་ཀུན་ན་བཞུགས་པ་ཡི། །སངས་རྒྱས་བདག་ལ་དགོངས་སུ་གསོལ། །དབུལ་བ་ཀུན་ལས་སྒྲོལ་མཛད་ཅིང་། །ཆོས་མིན་སེལ་བར་མཛད་པ་མོ། །ཕུན་ཚོགས་ཡང་དག་སྩོལ་མཛད་མ། །
[332b.3]ནོར་རྒྱུན་མ་ལ་རྟག་ཕྱག་འཚལ། །སྦྱིན་བྱ་དང་སྦྱིན་པ་པོ་སྟེ་གསུམ་པོ་མི་དམིགས་པ་སྟོང་པ་ཉིད་ཀྱི་རང་བཞིན་དུ་དག་པ་ཆོས་རྣམས་ཐམས་ཅད་རང་བཞིན་གྱིས་དག་པ་དེ་ཉིད་དོ། །སྟོང་ཉིད་ཡེ་ཤེས་རྡོ་རྗེའི་རང་བཞིན་ངའོ། །དེ་ལས་ལངས་ནས་རང་གི་སྙིང་ཁར་པཾ་ཡིག་
[332b.4]གིས་པདྨ་དང་དེའི་སྟེང་དུ་ཨ་ཡིག་གིས་ཟླ་བའི་དཀྱིལ་འཁོར་ཏེ། དེའི་སྟེང་དུ་ཙླུཾ་གི་ཡི་གེས་བདག་ཉིད་བཅོམ་ལྡན་འདས་མ་ནོར་རྒྱུན་མར་བསྒོམ་པར་བྱ་སྟེ། ཕྱག་གཉིས་མ་རིན་པོ་ཆེའི་ཅོད་པན་ཅན། སྐུ་མདོག་སེར་མོ་ཞལ་གཅིག་མ། །རོལ་པའི་སྟབས་ཀྱིས་བཞུགས་པ། །
[332b.5]ཕྱག་མཆོག་སྦྱིན་དང་། བུམ་པ་བཟང་པོ་ཅན་ནོ། །ཨོཾ་ཤྲཱི་བ་སུ་དྷ་རོ྅ཧཾ། ཨ་ཡིག་གིས་ཟླ་བའི་དཀྱིལ་འཁོར་ཏེ། ཨཱ་ཡིག་གིས་ཉི་མའི་དཀྱིལ་འཁོར་རོ། །ཨོཾ་བཛྲ་པདྨ་ཧ་སྟྭཾ་ཧཾ། ཨོཾ་ཨཱཿཧཱུཾ་སྭཱ་ཧཱ། གསུམ་མོ། །ཨོཾ་བཛྲོ་པ་མེ་ཊ་ཋ་ཀེ་ཧཱུཾ་སྭཱ་ཧཱ། གསུམ་མོ།
[332b.6]ཨོཾ་བཛྲ་ཡཀྵེ་ཧཱུཾ། གསུམ་མོ། །ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། བཛྲ་དཱི་པེ་ཧཱུཾ། བཛྲ་གནྡྷེ་ཧཱུཾ། བཛྲ་ནེེ་བི་དྱེ་ཧཱུཾ། ཏིཥྛ་བཛྲ་ཧཱུཾ། བཛྲ་བྷཱུ་མེ་ཧཱུཾ། བཛྲ་ཡཀྵེ་ཧཱུཾ། བ་སུ་དྷ་རེ་སྭཱ་ཧཱ། དེ་ནས་རང་གི་སྙིང་གར་གནས་པའི་ཙླུཾ་གི་ཡི་གེའི་འོད་ཟེར་སྟེང་ཕྱོགས་ཡང་དག་པར་བཀོད་ནས་འོག་མིན་གྱི་སྲིད་པར་གནས་
[332b.7]པའི་ཐོག་མ་མེད་པ་ནས་གྲུབ་པའི་བཅོམ་ལྡན་འདས་མ་ནོར་རྒྱུན་མ་སྤྱན་དྲང་བར་བྱ་སྟེ། ཨོཾ་ཤྲཱི་ཀ་རི་དྷཱ་ནྱ་ཀ་རི་ཨཱ་གཙྪ་ཨཱ་གཙྪ་བྲཱི་སྭཱ་ཧཱ། གསུམ་མོ། །ཨུ་ཀེ་བྷུ་ཀེ་ཝཪྵ་ཎི་པྲ་ཝཪྵ་ཎི། ནིཥྤ་ད་ནི་བ་སུ་དྷ་རཱ་བྷཱཊྚཱ་ར་ཀཱ་ཡེ་པཱ་དྱཾ་པྲ་ཏཱིཙྪ་སྭཱ་ཧཱ། པྲོཀྵ་ཎཾ་པྲ་ཏཱིཙྪ་སྭཱ་ཧཱ། ཨཉྩ་
[333a]
[333a.1]མཱ་ཎཾ་པྲ་ཏཱིཙྪ་སྭཱ་ཧཱ། ཨརྒྷཾ་པྲ་ཏཱིཙྪ་སྭཱ་ཧཱ། ཛཿཧཱུཾ་བཾ་ཧོཿ། རང་རང་གི་གདན་ལ་བཞུགས་པར་བསམས་ནས་མེ་ཏོག་བཀོད་པར་བྱའོ། །ཨོཾ་ཨཱཿཧཱུཾ་སྭཱ་ཧཱ། ཨོཾ་ཤྲཱི་བ་སུ་དྷ་རེ་སྭཱ་ཧཱ། ཨོཾ་བ་སུ་དྷ་རེ་བ་སུ་བིཥྚི་པཱ་ཏ་ཡ་བ་སུ་དྷ་རེ་སྭཱ་ཧཱ།
[333a.2]ཛླུཾ་ཙླུཾ་བ་སུ་དྷ་རེ་སྭཱ་ཧཱ། ལཀྵི་བྷཱུ་ཏ་ལ་ནི་བཱ་ས་ནཱི་ཡེ་སྭཱ་ཧཱ། བཛྲ་དྷ་ར་སཱ་ག་ར་ཎི་གྷོ་ཥ་ཏཱ་ཡ་སྭཱ་ཧཱ། ཨཱརྱཱ་བ་ལོ་ཀི་ཏེ་ཤྭ་རཱ་ཡ་སྭཱ་ཧཱ། བཛྲ་པཱ་ཎི་ཡཀྵ་སེ་ནཱ་དྷི་པ་ཏ་ཡེ་སྭཱ་ཧཱ། ཨི་ལ་དེ་ཝཱི་ཡེ་སྭཱ་ཧཱ། ཛཾ་བྷ་ལ་ཛ་ལེནྡྲ་ཡ་སྭཱ་ཧཱ། པི་ཙི་ཀུཎྜ་ལཱི་ནེེ་སྭཱ་ཧཱ། ཀི་ལི་མཱ་ལཱི་ན་སྭཱ་ཧཱ།
[333a.3]མུ་ཁནྡྲཱེ་ཡ་སྭཱ་ཧཱ། ཙ་རེནྡྲ་ཡ་སྭཱ་ཧཱ། གུཔྟ་དེ་ཝཱི་ཡེ་སྭཱ་ཧཱ། སུ་གུཔྟ་དེ་ཝཱི་ཡེ་སྭཱ་ཧཱ། ཤ་ར་སྭསྟྲི་དེ་ཝཱི་ཡེ་སྭཱ་ཧཱ། ཙནྡྲ་ཀནྡྲ་དེ་ཝཱི་ཡེ་སྭཱ་ཧཱ། མ་ཎི་བྷ་དྲྭ་ཡ་སྭཱ་ཧཱ། པཱུརྞ་བྷ་དྲུ་ཡ་སྭཱ་ཧཱ། དྷ་ན་དཱ་ཡ་སྭཱ་ཧཱ། བེེ་ཤྲ་བ་ཎཱ་ཡ་སྭཱ་ཧཱ། བ་རུ་ཎ་ནཱ་ག་རཱ་ཛཱ་
[333a.4]ཡེ་སྭཱ་ཧཱ། ཨིནྡྲ་ཡ་སྭཱ་ཧཱ། ཡ་མཱ་ཡ་སྭཱ་ཧཱ། བ་རུ་ཎ་ཡ་སྭཱ་ཧཱ། ཀུ་བེེ་རཱ་ཡེ་སྭ་ཧཱ། ཨགྣ་ཡེ་སྭཱ་ཧཱ། ནཻ་རྲྀ་ཏྱེ་སྭཱ་ཧཱ། བཱ་ཡ་བེེ་སྭཱ་ཧཱ། ཨཱི་ཤ་ནཱ་དྷི་པ་ཏ་ཡེ་སྭཱ་ཧཱ། ཨེ་ཏེ་ཌཱཾ་མ་མ་སརྦ་སཏཱ་ནཱཾ་སརྦ་སཱ་དྷ་ནཱཾ་ཧི་ར་ཎྱ་སུ་བརྞྞ་ནི་དྷ་ནཱ་ནཱཾ་དེ་ཧི་མཾ་ད་དཱ་བ་ཡེ་སྭཱ་ཧཱ། བ་སུ་
[333a.5]དྷ་རཱི་ཡེ་སྭཱ་ཧཱ། པུཥྤེ་བ་སུནྡྷ་རཱི་ཡེ་སྭཱ་ཧཱ། དྷཱུ་པ་བ་སུ་དྷ་རཱི་ཡེ་སྭཱ་ཧཱ། དཱི་པ་བ་སུ་མ་ཏི་པྲི་ཡཱ་ཡེ་སྭཱ་ཧཱ། གནྡྷ་བ་སུ་དྷཱ་ར་དྷཱ་ར་བྷཱ་ཡེ་སྭཱ་ཧཱ། ནེེ་བི་དྱེ་བཛྲ་པུཥྤེ་སྭཱ་ཧཱ། བཛྲ་བཱ་ཡེ་སྭཱ་ཧཱ། བཛྲ་དཪྴ་ན་ཕ་ལཱ་ཡ་སྭཱ་ཧཱ། བཛྲ་ཏཾ་བུ་ཡཻ་སྭཱ་ཧཱ། ཨོཾ་ཨཱཿཧཱུཾ་སྭཱ་ཧཱ། བཛྲ་སཏཱ་སཾ་
[333a.6]གྲ་ཧ། བཛྲ་རཏྣ་མ་ནུཏྟར། བཛྲ་ཀརྨ་ཀ་རཏྦྷ་པ། བཛྲ་དྷརྨ་གཱ་ཡ་སྭཱ་ཧཱ། བཛྲ་ལཱ་སྱེ་ཧཱུཾ། བཛྲ་མཱ་ལེ་ཏྲཱཾ། བཛྲ་གཱི་ཏི་ཧྲཱིཿབཛྲ་ནྲྀ་ཏྱེ་ཨཿ བཛྲ་པུཥྤེ་ཧཱུཾ། བཛྲ་དྷཱུ་པེ་ཏྲཱཾ། བཛྲ་ཨཱ་ལོ་ཀེ་ཧྲཱིཿ། བཛྲ་གནྡྷེ་ཨཱཿ། ན་མ་སྟེ་ཧཱུཾ། ན་མཿམི་ཧཱུཾ། ན་མོ་ན་མ་ཧཱུཾ་སྭཱ་ཧཱ། རྟོག་
[333a.7]པར་གསུངས་པ་ཞེས་བྱ་བ་ལ་སོགས་པས་བསྟོད་དེ། དབང་མེད་བདག་གིས་མི་དགེ་བགྱིས་པ་དང་། །ཡང་ན་བགྱིད་སྩལ་རྗེས་སུ་ཡི་རང་གང་། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་ད་ལྟ་སོ་སོར་བཤགས་པར་བགྱི། །བདེ་གཤེགས་སྲས་
[333b]
[333b.1]ཀྱི་ཚོགས་གཉིས་ཟབ་པ་དང་། །རྒྱ་ཆེན་འགྲོ་བ་མ་ལུས་པ་ཡི་དོན། །སྒྲུབ་པར་བྱེད་དང་དེ་ལས་གཞན་པ་ལ། །རྟག་ཏུ་བདག་ནི་རྗེས་སུ་ཡི་རང་ངོ་། །བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཏེ་བྱམས་པ་ནི་བུ་གཅིག་པ་ལྟར་མཉེས་གཤིན་པའི་རྣམ་པ་
[333b.2]ཅན་གྱི་མཚན་ཉིད་དོ། །སྙིང་རྗེ་ནི་སྡུག་བསྔལ་ལམ་སྡུག་བསྔལ་ཀྱི་རྒྱུ་ལས་ཡང་དག་པར་འདོན་པར་འདོད་པ་ཉིད་དོ། །དགའ་བ་ནི་སྣ་ཚོགས་རྣམས་ཀྱི་དགེ་བ་དང་དེ་རྣམས་ཀྱི་ལོངས་སྤྱོད་དང་དབང་ཕྱུག་རྣམས་ལ་སེམས་མགུ་བ་ཉིད་དོ། །བཏང་སྙོམས་ནི་རྙེད་པ་
[333b.3]དང་མ་རྙེད་པ་དང་གྲགས་པ་དང་མ་གྲགས་པ་དང་། བསྟོད་པ་དང་སྨད་པ་དང་བདེ་བ་དང་སྡུག་བསྔལ་ཞེས་པ་འཇིག་རྟེན་གྱི་ཆོས་བརྒྱད་ལ་སོགས་པ་ལས་ཕྱིར་ཕྱོགས་པ་ཉིད་དོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཿསྭཱ་བྷཱ་བ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་
[333b.4]ཀོ྅ཧཾ། དེ་ནས་སྔོན་གྱི་སྨོན་ལམ་གྱི་ནུས་པས་ཡཾ་གིས་རླུང་གི་དཀྱིལ་འཁོར་ཁ་དོག་སྔོན་པོ་གཞུ་དང་འདྲ་བ་གཡོ་བའི་བ་དན་གྱིས་མཚན་པར་བྱས་པ་ཡཾ་ཡིག་བྱིན་གྱིས་བརླབ་པའོ། །དེའི་སྟེང་དུ་རཾ་ཡིག་གིས་མེའི་དཀྱིལ་འཁོར་ཟུར་གསུམ་པ་འབར་བས་མཚན་
[333b.5]པར་བྱས་པ་རཾ་ཡིག་གིས་བྱིན་གྱིས་བརླབ་པའོ། །བཾ་ཡིག་གིས་ཆུའི་དཀྱིལ་འཁོར་ཟླུམ་པོ་ཁ་དོག་དཀར་པོ་བུམ་པས་མཚན་པས་བཾ་ཡིག་གིས་བྱིན་གྱིས་བརླབ་པའོ། །ལཾ་ཡིག་གིས་སའི་དཀྱིལ་འཁོར་གྲུ་བཞི་པ་ཁ་དོག་སེར་པོ་རྡོ་རྗེས་མཚན་པ་ལཾ་
[333b.6]ཡིག་གིས་བྱིན་གྱིས་བརླབ་པའོ། །སུཾ་ཡིག་གིས་རི་རབ་གྲུ་བཞི་པ་རིན་པོ་ཆེ་བཞིའི་རང་བཞིན་རྩེ་མོ་བརྒྱད་ཀྱིས་ཉེ་བར་མཛེས་པའོ། །ཧཱུཾ་ཡིག་གིས་སྣ་ཚོགས་རྡོ་རྗེའི་ལྟེ་བ་ལ་གནས་པའི་ཧཱུཾ་ཡིག་གིས་ཁང་པ་བརྩེགས་པ་བསྒོམ་པར་བྱ་སྟེ། གྲུ་བཞི་
[333b.7]པ་སྒོ་བཞི་པ་རྟ་བབས་བཞིས་མཛེས་པ་དྲ་བ་དང་དྲ་བ་ཕྱེད་པས་སྤྲས་པ། ནོར་བུ་དང་རྡོ་རྗེ་ཕྱེད་པ་དང་ཟླ་ཚེས་དང་། རྡོ་རྗེ་རིན་པོ་ཆེ་རྣམས་ཀྱིས་སྒོ་དང་སྒོ་ཁྱུད་ཀྱི་མཚམས་རྣམས་སུ་སྤྲས་པ། བུམ་པ་དང་ཀ་བ་དང་རྡོ་རྗེ་ཆེན་པོ་དང་། ཕྱོགས་ཅན་གྱི་
[334a]
[334a.1]མདའ་ཡབ་ཅན། དྲིལ་བུ་དང་བ་དན་གྱིས་མཛེས་པ། རྔ་ཡབ་ལ་སོགས་པས་རྣམ་པར་བརྒྱན་པའོ། །དེའི་ནང་དུ་པཾ་ཡིག་འདབ་མ་སྣ་ཚོགས་པའི་པདྨ་འདབ་མ་བརྒྱད་དང་། ཟེའུ་འབྲུ་དང་གེ་སར་དང་ལྡན་པའོ། །དེའི་
[334a.2]སྟེང་དུ་ཨ་ཡིག་གིས་ཟླ་བའི་དཀྱིལ་འཁོར་ཏེ། དེའི་དབུས་སུ་ཙླུཾགི་ཡི་གེས་བུམ་པ་བཟང་པོའོ། །བུམ་པ་བཟང་པོ་ཡོངས་སུ་གྱུར་པས་བཅོམ་ལྡན་འདས་མ་ནོར་རྒྱུན་མ་སྐུ་མདོག་སེར་མོ་ཞལ་གཅིག་མ། ཕྱག་དྲུག་མ། རིན་པོ་ཆེའི་ཅོད་པན་
[334a.3]ཅན། རོལ་སྟབས་ཀྱིས་བཞུགས་པ། གཡས་པའི་ཕྱག་དང་པོ་གཏེར་སྟོན་པ། ཕྱག་གཉིས་པས་རིན་པོ་ཆེའི་ཆར་འབེེབས་པ། ཕྱག་གསུམ་པས་དེ་བཞིན་གཤེགས་པ་རྡོ་རྗེ་འཆང་རྒྱ་མཚོའི་དབྱངས་ལ་ཕྱག་མཛད་པ། གཡོན་པའི་ཕྱག་
[334a.4]དང་པོས་བུམ་པ་བཟང་པོ། ཕྱག་གཉིས་པས་འབྲས་ཀྱི་སྙེ་མ། ཕྱག་གསུམ་པས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་འཛིན་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དེ་བཞིན་གཤེགས་པ་རྡོ་རྗེ་འཆང་རྒྱ་མཚོའི་དབྱངས་ནི་སྐུ་མདོག་
[334a.5]སེར་པོ་ཆོས་གོས་ཀྱི་གྲྭ་འཛིན་པའོ། །འཕགས་པ་སྤྱན་རས་གཟིགས་དབང་ཕྱུག་ནི་སྐུ་མདོག་དམར་པོ་ཕྱག་ན་རྔ་ཡབ་ཅན་ནོ། །གནོད་སྦྱིན་གྱི་སྡེའི་བདག་པོ་ཕྱག་ན་རྡོ་རྗེ་སྐུ་མདོག་ལྗང་གུ་ཕྱག་ན་རྔ་ཡབ་ཅན་ནོ། །ལྷ་མོ་ཨི་དྲ་ལི་མདོག་
[334a.6]སེར་མོ་རིན་པོ་ཆེའི་སྙེ་མ་འཛིན་པའོ། །ཆུའི་དབང་པོ་ཛཾ་བྷ་ལ་སྐུ་མདོག་སྔོན་པོ་ནེེའུ་ལེ་དང་། ཤིང་ཐོག་པཱི་ཛ་པཱུ་ར་ཀ་འཛིན་པའོ། །ཙི་པི་ཀུཎྜ་ལི་མདོག་དམར་པོ་ལག་ན་མེ་ཏོག་ཅན་ནོ། །ཀེ་ལི་མཱ་ལི་མདོག་དམར་པོ་ལག་ན་བདུག་སྤོས་
[334a.7]ཅན་ནོ། །སྒོའི་དབང་པོ་མདོག་སེར་པོ་ལག་ན་མར་མེ་ཅན་ནོ། །སྤྱོད་པའི་དབང་པོ་མདོག་དམར་པོ་ལག་ན་དྲི་ཆབ་ཅན་ནོ། །སྦས་མ་མདོག་སྔོ་བསངས་ལག་ན་རྔ་ཡབ་ཅན་ནོ། །ལེགས་སྦས་མ་མདོག་དམར་མོ་ལག་ན་གདུགས་ཅན་ནོ། །དབྱངས་
[334b]
[334b.1]ཅན་མ་མདོག་སེར་མོ་ལག་ན་རྒྱལ་མཚན་ཅན་ནོ། །ཟླ་ཚེས་མ་མདོག་དཀར་མོ་ལག་ན་བ་དན་ཅན་ནོ། །ནོར་བུ་བཟང་པོ་མདོག་དཀར་པོ་ནེེའུ་ལེ་དང་ཤིང་ཐོག་གི་བཱི་ཛ་པཱུ་ར་ཀ་འཛིན་པའོ། །གང་བ་བཟང་པོ་མདོག་སྔོན་པོ་རིན་པོ་ཆེའི་སྙེ་མ་དང་། བཱི་ཛ་
[334b.2]པཱུ་ར་ཀ་འཛིན་པའོ། །ནོར་སྦྱིན་མདོག་དམར་མོ་བུམ་པ་བཟང་པོ་དང་བཱི་ཛ་པཱུ་ར་ཀ་འཛིན་པའོ། །རྣམ་ཐོས་སྲས་མདོག་སེར་པོ་རིན་པོ་ཆེའི་མྱུ་གུ་དང་བཱི་ཛ་པཱུ་ར་ཀ་འཛིན་པའོ། །ཀླུའི་རྒྱལ་པོ་ཆུ་ལྷ་མདོག་དཀར་པོ་སྦྲུལ་ཞགས་འཛིན་པའོ། །ཨོཾ་ཨཱཿ
[334b.3]ཧཱུཾ་རང་གི་སྙིང་གར་གནས་པའི་ཙླུཾ་གི་ཡི་གེའི་འོད་ཟེར་གྱིས་སྟེང་ཡང་དག་པར་བཀང་ནས་འོག་མིན་གྱི་སྲིད་པ་ན་བཞུགས་པའི་ཡེ་ཤེས་སེམས་དཔའ་སྤྱན་དྲང་བར་བྱ་ཞིང་། ས་མ་ཡ་ས་མྱ་ས་མ་ཡཾ་ཀ་རི་མ་ཧཱ་ས་མ་ཡེ་སྭཱ་ཧཱ། ལན་གསུམ། ཞབས་བསིལ་
[334b.4]ལ་སོགས་པས་མཆོད་ཅིང་། ཛཿཧཱུཾ་བཾ་ཧོཿ། དམ་ཚིག་སེམས་དཔའ་དང་ཡེ་ཤེས་སེམས་དཔའ་དག་རོ་གཅིག་ཏུ་གྱུར་པར་བསམ་པར་བྱའོ། །ཨོཾ་ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡིས་ཕྱག་བྱས་
[334b.5]པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །འདི་དེ་སངས་རྒྱས་ཐམས་ཅད་ཉིད། །མཆོད་པའི་འདྲེན་པའི་ཅོད་པན་ཏེ། །རིགས་ལྔ་ལས་ནི་བྱུང་བའོ། །སངས་རྒྱས་ཀུན་གྱི་ཅོད་པན་ཆེ། །མ་ཧཱ་མུ་ཀུ་ཊ་པྲ་
[334b.6]ཏཱིཙྪ་སྭཱ་ཧཱ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡི། །དེ་བཞིན་བདག་གིས་ཁྲུས་བགྱིའོ། །ཨོཾ་ཨཱཿཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་སྭཱ་ཧཱ། སླར་ཡང་ཞབས་བསིལ་ལ་སོགས་པས་མཆོད་
[334b.7]དོ། །སླར་ཡང་མེ་ཏོག་དགོད་ཅིང་སྒེག་མོ་བརྒྱད་ཀྱིས་སོ། །བཅོམ་ལྡན་འདས་མ་ནོར་རྒྱུན་མ་ཡེ་ཤེས་ཀྱི་སྐུ་ཅན་ལ་བདག་ཕྱག་འཚལ་ལོ། །ནམ་མཁའ་དང་མཉམ་པའི་ཡོན་ཏན་ཡིད་ཀྱི་ཤིང་རྟ་གསང་བ་མོ་སྔགས་སྒྲོགས་པ་དང་ལྡན་པ་ལའོ། །འདིའི་
[335a]
[335a.1]ཡོན་ཏན་གྱི་གཏེར་དང་གསེར་རིན་པོ་ཆེའི་ཆར་པ་དང་སྐྱེ་བོ་མང་པོའི་ནོར་འཕེལ་བ་དང་རྒྱ་མཚོའི་རིན་པོ་ཆེའི་ཕུང་པོ་དཀྱིལ་འཁོར་དང་བཅས་པ་རང་གི་ལུས་ལ་རབ་ཏུ་གཞུག་པར་བྱའོ། །ཨོཾ་ཛླུཾ་ཙླུཾསྭཱ་ཧཱ། སྣ་ལ་ནོར་བུ་བཟང་པོའོ། །དཔྲལ་
[335a.2]བ་ལ་གང་བ་བཟང་པོའོ། །ཁ་ལ་ནོར་སྦྱིན་ནོ། །བརླ་ཟུང་དག་ལ་རྣམ་ཐོས་སྲས་སོ། །རྐང་པ་གཉིས་ལ་ཙི་པི་ཀུཎྜ་ལིའོ། །གསང་བ་ལ་ཀེ་ལི་མཱ་ལི་ནིའོ། །སྙིང་གར་ཞལ་གྱི་དབང་པོའོ། །ཡན་ལག་ཐམས་ཅད་ལ་སྤྱོད་པའི་དབང་པོའོ། །ཞབས་
[335a.3]བསིལ་ལ་སོགས་པས་མཆོད་པ་དང་། མེ་ཏོག་དགོད་པ་དང་སྒེག་མོ་བརྒྱད་དོ། །བསམ་གྱིས་མི་ཁྱབ་རྫས་ནི་འཕེལ་ཆེད་དང་། །རིན་ཆེན་དུ་མ་གསེར་ནི་འཕེལ་ཆེད་དུ། །ཁང་པ་འདིར་ནི་དཀྱིལ་འཁོར་ཡོངས་རྫོགས་ལ། །དཔལ་ལྡན་ནོར་རྒྱུན་མ་ལ་རྟག་ཕྱག་
[335a.4]འཚལ། །བཟླས་པ་དང་གཏོར་མའོ། །ཨོཾ་བ་སུ་དྷ་རེ་སརྦ་བྷ་ཡ་ཧ་རེ་བིགྷཱན་ཤཱནྟི་ཀ་རེ་པྲ་ཀྲྀ་ཏི་པྲ་བྷཱ་སྭཱ་རེ་ཨི་མཾ་བ་ལིཾ་གྲྀཧྣ་གྲྀཧྣ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཾ་ཨཱདྱ་ནུཏྤནྣ་ཏཱཏ་ཨོཾ་ཨཱཿཧཱུཾ། ཨཉྩ་མ་ཎཾ་པྲ་ཏཱིཙྪ་སྭཱ་ཧཱ། མེ་ཏོག་ལ་སོགས་པ་མཆོད་པར་བྱའོ། །
[335a.5]རྫོགས་སོ།། ༄། །ནོར་རྒྱུན་མའི་མཚན་བརྒྱ་རྩ་བརྒྱད་བཞུགས།། {T3701}༄༅༅། །འཕགས་མ་ནོར་རྒྱུན་མ་ལ་ཕྱག་འཚལ་ལོ། །གཟུགས་བཟང་གཟུགས་མཛེས་མཆོག་སྟེར་མ། །ནོར་འཛིན་བྱེད་མ་ནོར་རྒྱུན་མ། །ནོར་དཔལ་དཔལ་
[335a.6]མཛད་མཆོག་གྱུར་མ། །འཛིན་མ་འཛིན་བྱེད་སྐྱོང་བྱེད་མ། །སྐྱབས་གྱུར་གུས་ལ་མཉེས་གཤིན་པ། །ལྷ་མོ་ཤེས་རབ་ཕ་རོལ་ཕྱིན། །ཤེས་རབ་དཔལ་དང་བློ་འཕེལ་མ། །རིག་འཛིན་ཞི་བ་ཕྲ་མོ་སྟེ། །ཞི་བ་ཀུན་འགྲོ་རྗེས་འགྲོ་མ། །སྒྲོལ་མ་སྒྲོལ་འཇུག་
[335a.7]ལྷ་མོ་སྟེ། །རིགས་སྦྱིན་དབང་ཕྱུག་དབང་ཕྱུག་མ། །རྒྱན་མ་འབྱུང་པོའི་ཡུམ་གྱུར་མ། །རྒྱན་རྣམས་ཀུན་གྱིས་བརྒྱན་བྱེད་མ། །གདུལ་དཀའ་སྒྲུབ་མཛད་འཇིགས་བྱེད་མ། །དྲག་མོ་དྲག་པོ་མཆོག་ཏུ་གནོན། །ལྷ་མོ་སྦྱིན་པའི་ཕ་རོལ་ཕྱིན། །ཆར་འབེབས་
[335b]
[335b.1]བཟང་པོའི་གཟུགས་ཅན་མ། །གཏེར་དང་བཀྲ་ཤིས་ཐམས་ཅད་དང་། །གྲགས་དང་དཔལ་དང་སྙན་མཛད་དགེ། །སྲེག་མ་གསོད་མ་གཏུམ་མོ་སྟེ། །འཚེ་བྱེད་མ་མོ་ཐམས་ཅད་མ། །གཤིན་རྗེ་སྐྲག་མཛད་དྲག་ཉིད་མ། །གཞོན་ནུ་མ་དང་སྣ་ཚོགས་གཟུགས། །
[335b.2]ལྷ་མོ་བརྩོན་འགྲུས་ཕ་རོལ་ཕྱིན། །འགྲོ་བ་དགའ་མཛད་ཅན་མ་སྟེ། །དཀའ་ཐུབ་མ་དང་དྲག་གཟུགས་མ། །རྫུ་འཕྲུལ་གྲུབ་པ་མཆོག་སྟེར་མ། །སྐལ་བཟང་བསོད་ནམས་སྐལ་བ་ཆེ། །མི་ཐུབ་ཐུབ་པ་ཕ་རོལ་གནོན། །འགྲོ་ལ་གཅིག་ཏུ་ཕན་བརྩོན་
[335b.3]མ། །གཡུལ་ལས་སྒྲོལ་བྱེད་དགེ་བ་མོ། །ལྷ་མོ་བཟོད་པའི་ཕ་རོལ་ཕྱིན། །ཚུལ་ཁྲིམས་བསམ་གཏན་སྒོམ་མཛད་མ། །པདྨ་ཅན་དང་པདྨ་འཛིན། །པདྨའི་གདན་ལ་བཞུགས་པ་མོ། །དག་པའི་གཟུགས་ཅན་གཟི་བརྗིད་ཆེ། །གསེར་གྱི་མདོག་
[335b.4]ཅན་འོད་མཛད་མ། །ཡིད་བཞིན་ནོར་བུ་འཛིན་ལྷ་མོ། །ཤེས་རབ་གླེགས་བམ་འཛིན་པ་མོ། །གཏེར་གྱི་ཕུང་པོར་བཞུགས་མཛད་མ། །ནོར་དང་ལྡན་མཛད་ནོར་དགའ་མ། །ཁམས་གསུམ་དབང་ཕྱུག་ཆེན་མོ་སྟེ། །ལྷ་ཡི་རྒྱན་གྱིས་བརྒྱན་པ་མོ། །སངས་རྒྱས་
[335b.5]ཀུན་གྱི་ཡུམ་གྱུར་མ། །རིན་ཆེན་ཁམས་ཀྱི་དབང་ཕྱུག་མ། །དངོས་པོ་སྟོང་ཉིད་བསྒོམ་ལྷ་མོ། །དངོས་དང་དངོས་མེད་རྣམ་སྤང་མོ། །གདུལ་བར་བྱ་བ་འདུལ་མཛད་མ། །སྒྲོལ་མ་ཉོན་མོངས་སྤྱོད་པ་མོ། །བདུད་རྣམས་ཐམས་ཅད་འཇོམས་པ་མོ། །ས་འོག་
[335b.6]བདུན་པོ་སྐྱོང་མཛད་མ། །བྲམ་ཟེ་མ་དང་རིགས་བྱེད་ཡུམ། །སྦས་མ་ཕུག་ཏུ་གནས་པ་མོ། །དབྱངས་ཅན་མ་དང་སྤྱན་ཡངས་མ། །ཚངས་པའི་གནས་བཞི་ལྡན་པ་མོ། །དེ་བཞིན་གཤེགས་པ་དགྱེས་ཆེན་མ། །རྡོ་རྗེ་ཅན་མ་རྡོ་རྗེ་འཆང་། །ལས་འཛིན་འཇུག་ཅིང་ལས་
[335b.7]འཛིན་མ། །སྣ་ཚོགས་དབང་ཕྱུག་སྣ་ཚོགས་འབར། །སྤྲིན་གྱི་དཀྱིལ་འཁོར་ལྡན་པ་མོ། །སེམས་ཅན་ཀུན་གྱིས་རྟོགས་མཛད་མ། །བྱང་ཆུབ་ཡང་དག་ཐོབ་མཛད་མ། །བསམ་གཏན་མོས་པ་ཕུན་ཚོགས་མ། །གཉིས་མེད་གཉིས་མེད་སྒོམ་མཛད་མ། །དོན་ཀུན་
[336a]
[336a.1]སྒྲུབ་མཛད་བཟང་མོ་སྟེ། །བུད་མེད་གཟུགས་ཅན་དཀར་མོ་གནོན། །སངས་རྒྱས་ལས་རྣམས་སྟོན་མཛད་མ། །ངག་གི་དབང་མོ་སྟོན་མ་ཆེ། །སྲུང་མཛད་འཛིན་མཛོད་ནོར་སྟེར་མ། །བུད་མེད་གཟུགས་འཛིན་གྲུབ་པ་མོ། །རྣལ་འབྱོར་དབང་ཕྱུག་རྣལ་འབྱོར་མ། །ཡིད་
[336a.2]འཕྲོག་མ་དང་གཟུགས་མཛེས་མ། །སྐལ་བཟང་དགའ་བ་སྟོན་པ་མོ། །དེད་དཔོན་མ་དང་བརྩེ་ལྡན་མ། །དེ་བཞིན་གཤེགས་ཀུན་བདག་ཉིད་མ། །ནོར་རྒྱུན་ལྷ་མོ་ཁྱོད་ལ་འདུད། །སེམས་ཅན་ཀུན་གྱི་དོན་སྟེར་མ། །བཟང་པོའི་གཟུགས་ཅན་ཁྱོད་ལ་འདུད། །ནོར་རྒྱུན་མ་ཁྱོད་ལ་
[336a.3]ཕྱག་འཚལ། །མཚན་ནི་བརྒྱད་ལྷག་བརྒྱ་པ་ནི། །གང་ཞིག་དུས་གསུམ་ཀློག་བྱེད་པ། །ཡིད་ཀྱི་ཤིང་རྟས་འདོད་བྱེད་པ། །ཐམས་ཅད་ངེས་པར་ཐོབ་པར་འགྱུར། །མཚམས་མེད་པ་དང་ཆ་མཐུན་གང་། །ཤིན་ཏུ་མི་བཟད་ལས་རྣམས་ནི། །དེ་རྣམས་ཐམས་ཅད་མཚན་བཟང་པོ། །རྗེས་སུ་དྲན་
[336a.4]ལས་ཟད་པར་འགྱུར། །ཡང་ན་ཚུལ་ཁྲིམས་ཕུན་སུམ་ཚོགས། །སྐྱེ་བ་བདུན་ནི་དྲན་པ་དང་། །དགའ་དང་ཚིག་བཙུན་གཟུགས་བཟང་ལྡན། །མཐོང་དགའ་བྲམ་ཟེ་རྒྱལ་རིགས་ཀྱི། །རིགས་ནི་ཕྱུག་པོར་སྐྱེ་བར་འགྱུར། །མཐར་ནི་ས་ཡི་དབང་ཐོབ་ནས། །བདེ་བ་ཅན་དུ་འགྲོ་བར་འགྱུར། །མིང་བརྒྱ་རྩ་བརྒྱད་
[336a.5]བཀླགས་པ་ཡིས། །ལྷ་མོ་མྱུར་དུ་འགུགས་པར་འགྱུར། །འཕགས་མ་ནོར་རྒྱུན་མའི་མཚན་བརྒྱ་རྩ་བརྒྱད་པ་རྫོགས་སོ།། {T3702}༄༅༅། །ནོར་རྒྱུན་མའི་སྨོན་ལམ་བཞུགས།། ༄༅༅། །སངས་རྒྱས་ལ་གུས་རང་བཞིན་གཡོ་སྒྱུ་མེད། །སེམས་ཅན་ཀུན་ལ་བྱམས་ཤིང་སྟོང་པར་གོམས། །རྣམ་གྲོལ་
[336a.6]འབྲས་བུར་ལྡན་ལ་ཀུན་ནས་ཆགས། །བྱང་ཆུབ་སེམས་དཔའི་ཤེས་རབ་རྣོ་བ་ཅན། །ཤིན་ཏུ་ཆེ་བའི་རིགས་སྐྱེས་གཟུགས་མཛེས་པ། །བདག་ནི་སྐྱེ་བ་སྐྱེ་བར་བདེ་གཤེགས་ཀྱི། །སྙན་དངགས་མཁན་པོ་མཉམ་མེད་རྒྱ་ཆེན་དང་། །ཚེ་རིང་རིགས་སྐྱེ་སྐྱེས་བུ་བློ་གྲོས་གསལ། །མཁས་ཤིང་བློ་གྲོས་མི་དམན་
[336a.7]བཅོམ་ལྡན་གྱི། །གསུང་རབ་ལ་མཁས་བདེ་ལྡན་སྙིང་རྗེ་ཅན། །རབ་ཏུ་དང་འགྱུར་སྙན་དངགས་མཁན་པོ་དང་། །མར་ཤེས་ཕ་མ་ལ་གུས་ཉིད་དང་ནི། །རྟག་ཏུ་སྐྱེ་བ་དྲན་ཞིང་ཚུལ་ཁྲིམས་ལྡན། །ཆོས་ཀྱི་བདག་ཉིད་ནོར་ལྡན་རབ་སྟེར་དང་། །བླ་མེད་མཁས་པའི་གྲོགས་དང་ལྡན་པ་དང་། །སྤྲོ་ལྡན་སྟོབས་
[336b]
[336b.1]ལྡན་དགའ་ཞིང་མང་པོས་བཀུར། །ནད་རྣམས་སྤངས་ཤིང་སེམས་ཅན་ཐམས་ཅད་ལ། །རྗེས་སུ་འཛིན་ཞིང་ཐོས་པ་འཛིན་པ་དང་། །བསམ་པ་དག་ཅིང་བཟོད་པ་ལྡན་པ་དེ། །ཇི་སྲིད་འཇིག་རྟེན་ཕན་པ་འབྱུང་ཆེད་དུ། །སངས་རྒྱས་བཅོམ་ལྡན་གོ་འཕང་བགྲོད་གྱུར་པ། །དེ་སྲིད་རྟག་ཏུ་ཡོན་ཏན་
[336b.2]འདི་རྣམས་ནི། །ཀུན་གྱིས་བརྒྱན་པ་བདག་གིས་ཐོབ་གྱུར་ཅིག །བཅོམ་ལྡན་འདས་མ་འཕགས་མ་ནོར་རྒྱུན་མ་ལ་ཕྱག་འཚལ་ལོ། །རྟོག་པར་གསུངས་པའི་ཆོ་གས་ཡོངས་སུ་བཀླགས་བྱས་ཤིང་། །འཛིན་ན་རྣམ་པ་སྣ་ཚོགས་རིན་ཆེན་གསེར་གྱི་རང་བཞིན་གྱིས། །ཁང་པ་སྟོང་ཕྲག་ཐམས་
[336b.3]ཅད་གང་བ་ཉིད་དུ་མཛད་པ་ཡི། །འཇིག་རྟེན་ཀུན་གྱི་ཡུམ་གྱུར་དེ་ལ་གུས་པས་ཕྱག་འཚལ་ལོ། །ལྷ་མོ་ཁྱོད་ནི་ཡོན་ཏན་རིན་ཆེན་ཀུན་གྱི་གཏེར་ཆེན་ཏེ། །སེམས་ཅན་དོན་མཛད་ནོར་དང་འབྲུ་རྣམས་ཕུན་སུམ་ཚོགས་པའི་རྒྱུ། །དོ་ཤལ་ཅོད་པན་ལྡན་ཞིང་ནོར་བུ་དཔག་བསམ་ཤིང་རྣམས་ཀྱིས། །
[336b.4]འཇིག་རྟེན་གསུམ་གྱི་མགོན་མཛད་ནོར་འཛིན་ནོར་རྒྱུན་མ་ལ་འདུད། །ནད་དང་འཇིགས་པའི་འཆི་བའི་སྐྱོན་མང་སྒྲོལ། །དབུལ་བའི་སྡུག་བསྔལ་རྨ་ཡི་འཚོ་བྱེད་སྨན། །སྐལ་བཟང་གཟུགས་ཀྱི་ཡོན་ཏན་རིགས་དང་རུས། །ཐམས་ཅད་སྦྱིན་མཛད་ཁྱོད་ཀྱི་ཞབས་ལ་འདུད། །གང་ཞིག་ཡང་
[336b.5]དག་བླ་མའི་ཆོ་གས་ཡོངས་སུ་ཀློག་བྱེད་ན། །ཕུན་ཚོགས་ཡངས་པ་བདེ་འགྲོ་ཉེ་བར་སྟེར་བྱེད་པ། །ནོར་རྒྱུན་ཞེས་པའི་མིང་ཅན་གཟུགས་དེ་ལ་ནི་དུས་རྟག་ཏུ། །མཐའ་དག་སེམས་ཅན་ཕན་པར་སེམས་པས་གུས་པས་ཕྱག་འཚལ་ལོ། །གང་ཞིག་ཡང་དག་དྲན་ལས་མི་རྣམས་ལོངས་
[336b.6]སྤྱོད་ཡུན་རིང་དུ། །རབ་ཏུ་འཕེལ་ཞིང་དབུལ་དང་ནད་དང་སྡིག་པ་སེལ་མཛད་ཅིང་། །དཔག་བསམ་ཤིང་དང་མཚུངས་པ་ནོར་རྒྱུན་མིང་ཅན་དེ་ལའོ། །འགྲོ་ལ་ཕན་པའི་ཆེད་དུ་གུས་པས་སྤྱི་བོས་ཕྱག་འཚལ་ལོ། །བཅོམ་ལྡན་འདས་མ་ནོར་རྒྱུན་མའི་སྒྲུབ་ཐབས་དང་མཚན་བརྒྱ་རྩ་བརྒྱད་པ་དང་། སྨོན་ལམ་
[336b.7]དང་བསྟོད་པ་རྣམས་རྫོགས་སོ།། །།ཚུལ་འདི་ནི་དཔང་ལོ་ཙཱ་བ་དཔལ་ལྡན་བློ་གྲོས་བརྟན་པས་ཞོལ་ཕུག་ཏུ། རྒྱ་དཔེ་ལས་བསྒྱུར་ཅིང་ཞུས་ཏེ་གཏན་ལ་ཕབ་པའི་ཡི་གེ་པ་དང་བསྐུལ་བ་པོ་ནི་དགེ་བའི་བཤེས་གཉེན་རིན་ཆེན་མཐའ་ཅན་ཡིན་ནོ།། །།
[337a]
[337a.1]{T3703}༄༅༅། །རྒྱ་གར་སྐད་དུ། སིདྡྷ་ག་རུ་ཌ་ཤཱསྟྲ། བོད་སྐད་དུ། མཁའ་ལྡིང་གྲུབ་པའི་བསྟན་བཅོས། དཔལ་རྡོ་རྗེ་མཁའ་ལྡིང་ལ་ཕྱག་འཚལ་ལོ། །ཁ་སྦྱར་མཆུ་བར་སྦྲུལ་ནི་བསྡམས་པ་ཡིས། །གདེངས་ཀའི་ནོར་བུ་མཁའ་ལྡིང་མེ་ལོང་སྟེ། །རང་བཞིན་འོད་
[337a.2]གསལ་གཉུག་མའི་གཟུགས་མཐོང་ངོ་། །ཁྲོ་བ་སྤངས་པ་དེ་ནི་རྒྱལ་གྱུར་ཅིག །མཁའ་ལྡིང་བསྟན་བཅོས་སྐྱེད་མོས་ཚལ་ནས་ནི། །མེ་ཏོག་རྩི་ཡི་སྦྲང་རྩི་དེ་ཉིད་ནི། །སེམས་ཅན་དོན་དུ་སྦྲང་རྩི་བྱེད་པ་ཡི། །དཔལ་ལྡན་ཤང་ཀུ་བདག་གིས་འདིར་དེ་བསྡུ། །གང་ཞིག་བརྟན་པའི་
[337a.3]སེམས་ཀྱིས་བླ་མ་ཡི། །རྗེས་འཇུག་དག་པའི་ལམ་ལ་ཡང་དག་གནས། །མི་དེ་ཕྲིན་ལས་མ་ལུས་པ་ཡི་ནི། །དངོས་གྲུབ་ཐམས་ཅད་ཀྱི་ནི་སྣོད་དུ་འགྱུར། །བཟོད་དཀའི་དུག་ལས་བྱུང་བའི་ཚོར་བ་ཡིས། །འཁྲུགས་པའི་འགྲོ་བའི་སྲོག་ནི་འཛིན་བྱེད་ཅིང་། །ཆོས་
[337a.4]དང་ནོར་དང་འདོད་དང་ཐར་པ་ནི། །བསོད་ནམས་བྱས་པའི་འགྲོ་བ་དེ་ཡིས་འཐོབ། །འགྲོ་བའི་དོན་ཕྱིར་མཁའ་ལྡིང་བསྟན་བཅོས་ནི། །དམ་པའི་སྐྱེ་བོ་དེ་ཡིས་བསྔགས་པར་བྱེད། །འདོད་པ་ཅན་ནི་ནོར་གྱིས་དགའ་བ་ལྟར། །སྔགས་པས་སྦྲུལ་གདུག་མི་བཟད་པ་ཡིས་
[337a.5]སོ། །དེ་ནས་གདེངས་ཀ་ཅན་དང་ཙི་ཏི་རྣམས། །རཱ་ཡི་དཀྱིལ་འཁོར་ཅན་དང་འདྲེན་གཟུགས་སོགས། །རླུང་གི་ཡོན་ཏན་དུས་དང་དུས་མིན་དང་། །ཨ་མ་རཏྟ་སྦྱོར་རླུང་བུས་པའོ། །མཁའ་ལྡིང་གིས་བཤད་སྨན་གྱི་ནུས་པ་དང་། །ཇི་ལྟར་དུག་འཇོམས་པ་ཡི་རིམ་པ་དག །གུས་པས་དེ་
[337a.6]ནི་རྩེ་གཅིག་སེམས་ཀྱིས་ཉོན། །གཞན་དག་ཀྱང་ནི་ཐོས་པ་ལས་བྱུང་བའི། །མཚོན་པས་སོ། །ཏྲི་ན་ཨིནྡྲ་ནཱི་ལ་ལྟ་བུའི་ལུས། །འདབ་བརྒྱ་རྒྱས་འདྲའི་མཚན་པ་ལྷག་མ་ཅན། །ནོར་རྒྱས་ལུས་ནི་ཁ་དོག་དཀར་པོ་ལ། །མཚན་པ་པདྨ་རྒྱས་འདྲ་སྔོན་པོ་ཡིན། །ཤར་ཐོགས་ཉི་
[337a.7]མའི་འོད་ཟེར་ལྟ་བུ་ལ། །མགོ་ལ་གཡུང་དྲུང་དུང་ཆེན་འཇོག་པའོ། །ཀརྐོ་ཊ་ནི་མུན་པ་ལྟ་བུ་ཡི། །རི་མོ་གསུམ་ནི་མགྲིན་པར་ཡོད་པ་ཡིན། །པདྨའི་ལུས་ནི་ཁ་དོག་ལྗང་གུ་ལ། །སྐར་ཚོགས་ལྟ་བུའི་ཐིག་ལེས་གདེངས་ཀ་མཛེས། །པད་ཆེན་ཟླ་འོད་བསྐུས་པ་ལྟ་བུ་ལ། །མདུང་རྩེ་
[337b]
[337b.1]གསུམ་པ་ལྟ་བུ་གདེངས་ཀ་ཡིན། །དུང་སྐྱོང་ཀ་ནི་ཡ་རའི་མེ་ཏོག་འདྲ། །མགྲིན་པར་ཟླ་བའི་ཆ་ཡིས་མཚན་པ་ཡིན། །རིགས་ལྡན་གྱི་ནི་སྤྱི་བོའི་གདེངས་ཀ་དག །དུ་བ་ལྟ་བུའི་ཟླ་བ་ཕྱེད་པ་ཡིན། །དབྱིག་པ་ཡིས་ནི་བརྡེགས་པ་མཆོག་ཡིན་ཏེ། །ཀླུ་རྣམས་
[337b.2]བཟུང་ནས་སྐྲོད་པ་དེ་ལྟར་མིན། །སྡང་བས་གླགས་ནི་ཚོལ་བར་བྱེད་པ་ན། །སྔགས་པ་དག་ནི་གང་གིས་ཐར་བར་བྱེད། །ས་འོག་གནས་ན་ཡོངས་སུ་གནས་པ་ཡི། །དབང་ཆེན་འོག་ནི་ཀླུ་རྣམས་ཤིན་ཏུ་དཀོན། །གདེངས་ཀའི་ནོར་བུས་མཛེས་པར་བྱས་པ་ཡི། །ཁོལ་པོ་ཡང་
[337b.3]ནི་གློག་གི་ཟེར་མ་འདྲ། །ལྕེ་གཉིས་གདེངས་ཅན་ཕུད་ཅེས་འཇིགས་པའི་སྒྲ། །རིན་པོ་ཆེ་ནི་མེད་པར་གྱུར་པ་སྟེ། །ཁོལ་པོ་ཡི་ཡང་ཁོལ་པོའི་གནས་སུ་ནི། །གུས་པ་མེད་པའི་ལྟོ་འཕྱེ་དག་ཡིན་ནོ། །ཨ་ཀུ་བ་སཾ་གཉིས་གཉིས་བྲམ་ཟེ་རྒྱལ། །མེ་ཏོག་དང་ནི་སཱ་ལའི་དྲི་ཡིན་ནོ། །
[337b.4]དེ་བཞིན་སྟ་མ་ཀ་པ་རྗེའུ་དང་དམངས། །མར་དང་ཉ་ཡི་དྲི་ནི་བྲོ་བ་ཡིན། །དུང་འཆང་མཆེ་བའི་རྩ་ན་ལེགས་གནས་པ། །སྦྲང་རྩིའི་མེ་ཏོག་ཕྲེང་བ་ལྟ་བུ་ཡིན། །དེ་ནི་འགྲོ་བ་རྣམས་ཀྱི་རྨོངས་བྱེད་ཀྱི། །དུག་སྟེ་ཡོངས་སུ་འཛག་པར་གྱུར་པས་སོ། །གདེངས་ཀ་ཅན་ནི་རང་གི་ངོ་བོའོ། །
[337b.5]གནྡ་ཡ་ནའི་ཡིན་པར་གྱུར་ན་ནི། །མགོ་མཇུག་ལུས་ལ་རི་མོ་ཀྱོག་པོ་ཡོད། །གདེངས་ཀས་དམན་ནོ་འཇིག་རྟེན་གནྡ་ཡ། །ཙི་ཏི་ཞེས་ནི་ཡོངས་སུ་གྲགས་པ་ཡིན། །དེ་ཡིས་བཟུང་ན་གཡོ་མེད་སྐད་ཅིག་གིས། །དེ་ནི་འགྱུར་བ་མེད་པའི་རང་བཞིན་ཡིན། །དེ་ཉིད་གྲུབ་པ་ཐོབ་པས་
[337b.6]གལ་ཏེ་ན། །སད་པར་བྱེད་ན་དྲན་པ་འབྱུང་བར་འགྱུར། །ཙི་ཏིའི་རང་བཞིན་ནོ། །ཐིག་བཏབ་ལྟ་བུའི་རི་མོ་རིང་མོ་ཅན། །བནྡ་ཡ་རུ་རྣམ་པར་ཤེས་པར་བྱ། །ཤིང་དང་ལྕུག་འཁྱིལ་རྩས་གཏུགས་ཡོད་པར་ནི། །ངེས་པར་ཤིན་ཏུ་ལེགས་གནས་རཱ་ཡིལ་ལ། །ཁ་སྐོམ་
[337b.7]མིག་དམར་ཟས་དང་སྟན་མི་འདོད། །ཚ་དང་འཁྲུ་བ་ཡི་ནི་རྗེས་ལ་བརྒྱལ། །དཀར་དང་དམར་དང་ནག་དང་ལྗང་གུ་ཡི། །རི་མོ་མེད་པ་ཡིན་ནོ་རཱ་ཡིལ་ལ། །བཙོ་མའི་གསེར་འདྲའི་ལུས་ལྡན་དེ་ཡིས་ནི། །འགྲོ་བ་རྣམས་ཀྱི་སྲོག་ནི་འཕྲོག་བྱེད་ཡིན། །རཱ་ཡིལ་གྱིས་ནི་བཟུང་ན་ངེས་པར་ནི། །རིལ་གྱིས་
[338a]
[338a.1]ཁྱབ་པར་སྐྲངས་པ་ཁོ་ནར་འགྱུར། །གསེར་མདོག་ལུས་དེ་རྒྱུ་བའི་ཚེ་ན་ནི། །འབར་བའི་མེ་ལྕེ་ཆད་པས་འོད་མ་བསྲེག །འོད་མའི་རང་བཞིན་ཡང་ནི་དེས་བསྲེག་ན། །དེ་ཡིས་བཟུང་ན་ཇི་ལྟར་འཚོ་བར་འགྱུར། །རཱ་ཡིལ་ལའི་རང་བཞིན་ནོ།། །།ཆུ་དང་རླུང་མེ་ས་
[338a.2]ཡི་རང་བཞིན་གྱི། །ཀོ་ཊ་རྣམས་ཀྱི་གང་ཞིག་མཚན་པ་ནི། །གོ་མེད་ས་རྣམས་སུ་ནི་ཤེས་པར་བྱ། །དུག་ཆེན་སྐྲངས་འབུར་ཡང་དག་སྐྱེད་པ་པོ། །ཆུ་ཡི་དཀྱིལ་འཁོར་ཅན་ནི་དུག་འཛིན་གྱིས། །ཟིན་པའི་མཚན་ཉིད་ལུས་ནི་འདྲུལ་བ་ཡིན། །ཚ་དང་འདར་དང་སྐམ་དང་
[338a.3]སྐྲང་བ་ནི། །རླུང་གི་ལུས་ཅན་གྱིས་ནི་སྐྱེད་པར་བྱེད། །ལུས་ཀུན་གྱི་ནི་སྤུ་ཡི་རྩ་བ་ནས། །སེ་བ་གནག་འདྲའི་བྲག་གི་ཐིགས་པ་འབྱུང་། །མེ་ཡིས་རེག་པས་ཀུན་ནས་སྐྱེད་པ་ནི། །ཐོས་དང་གཟུགས་དང་མཐོང་བས་ཉམས་པ་ཡིན། །ས་ཡི་དཀྱིལ་འཁོར་ཅན་གྱིས་སྨྲས་པ་ན། །
[338a.4]སྐྲང་དང་ཚ་བའི་རེག་པས་གདུངས་པ་ཡིན། །གཉིད་དང་སྟན་དག་ལ་ནི་སྡང་བར་འགྱུར། །སྐྱེས་བུ་སེམས་ལ་ཟུག་གཟེར་དག་གིས་ཉེན། །ཕུང་པོ་ལ་ནི་མྱུར་དུ་སྣང་གྱུར་པ། །རིང་པོ་ཡི་ནི་རིང་པོར་སྐྲང་པ་སྟེ། །ངེས་པ་ཉིད་དུ་མང་པོས་མང་པོའོ། །ཐལ་བ་དང་ནི་རུས་པ་བཤང་བའམ། །
[338a.5]གཞན་ཡང་ལུས་ལས་གང་ཞིག་བྱུང་བ་ཡིས། །གོ་མེད་ས་རྣམས་ཀྱིས་ནི་མྱུར་ཉིད་དུ། །འགྲོ་བ་རྣམས་ཀྱི་ལུས་ནི་ཉམས་པར་བྱེད། །གང་ཞིག་སྟོབས་ཅན་ཡང་ནི་ལ་ལ་དག །མགོ་མཇུག་ཏུ་ཡང་མེས་མཚན་མེད་པ་དང་། །ཡུད་ཙམ་གྱིས་ནི་འཆི་བ་དེ་ཡིས་འཛིན། །དེས་ནི་འགྲོ་
[338a.6]བ་འཆི་བར་ཐེ་ཚོམ་མེད། །འདིར་ནི་མང་དུ་སྨྲས་པ་ཅི་ཞིག་དགོས། །དེས་ན་སྙིང་པོ་དང་དུ་བླང་བར་བགྱི། །སྔགས་དང་སྨན་དང་སྦྱོར་བ་གང་ཡིན་པ། །ཇི་སྲིད་དབུགས་རྒྱུའི་བར་དུ་བྱ་བ་ཡིན། །དཀྱིལ་འཁོར་ཅན་གྱི་རང་བཞིན་ནོ།། །།གང་ཞིག་དྲན་པའི་དུག་གིས་ཕྱེ་བ་ན། །བྲམ་ཟེ་
[338a.7]ཡིན་པར་གྱུར་ན་དེ་ནི་དཀར། །དམར་པོ་རྒྱལ་རིགས་སེར་པོ་རྗེའུ་རིགས་ཡིན། །དམངས་རིགས་ནག་པོ་འདི་དེ་རྣམས་ལའོ། །གང་ཞིག་བྱ་རོག་རྐང་འདྲའི་མདུད་པ་དང་། །ཕྱེ་ན་རི་མོ་འཁྱོག་པོ་སྣང་བ་ལ། །མི་མཉམ་ཐིག་ལེས་རྣམ་པར་སྤྲས་པ་ནི། །ངེས་པར་ནག་པོ་
[338b]
[338b.1]བརྩེགས་པ་དག་དང་མཚུངས། །གཞན་དུ་བཅུད་ཀྱིས་ལེན་ནི་བསྒྲུབ་པ་ལ། །བྲམ་ཟེ་འམ་ནི་དེ་བཞིན་རྒྱལ་རིགས་ཀྱིས། །རྗེའུ་རིགས་ཀྱི་ནི་མཛེ་ནད་གཞོམ་པ་ལ། །གསོད་པ་ལ་ནི་དམངས་རིགས་རུང་བར་བྱ། །འདྲེན་པའི་མཚན་ཉིད་དོ། །སྨད་འཚོང་སེམས་ཀྱིས་དོར་
[338b.2]ཐབས་ཀྱིས་སེམས་བཞིན། །བདག་རྒྱུན་མི་འཆད་རྣལ་འབྱོར་ཡང་དག་འགྲུབ། །མཁས་པས་དེ་བཞིན་རླུང་གི་ཡོན་ཏན་གྱིས། །དུས་ནི་ངེས་པར་ཤེས་པ་ཁོ་ན་ཡིན། །སྲོག་ཆགས་རྣམས་ནི་གང་གིས་འཚོ་བ་དང་། །ཁྱད་ཅན་གང་ཞིག་ཉམས་པས་སྲོག་འགྲོའོ། །དོན་དམ་
[338b.3]ཞིང་བརྩོན་དེ་ལ་སེམས་དང་ནི། །བདག་དང་མཆོག་དང་དེ་ཉིད་དུ་ནི་འདོད། །འཇུག་པའི་རང་བཞིན་སྲོག་ནི་ཁ་བ་ཡི། །འོད་ལ་བརྟེན་པས་གསལ་པོར་སྐྱེད་པར་བྱེད། །བདག་དང་སྐྱེས་བུའི་རང་བཞིན་དེ་ཉིད་ནི། །ཉི་མའི་ཞིང་ལ་བརྟེན་ན་སྡུད་པར་བྱེད། །སྙིང་སྟོབས་རྡུལ་དང་མུན་
[338b.4]པར་བབས་པ་ན། །དུག་བརྒྱལ་དགེ་དང་ཐེ་ཚོམ་མི་དགེ་ཡི། །སྟོན་པར་བྱེད་དེ་རླུང་གི་དབྱེ་བ་དག། །འཇུག་དང་གནས་དང་འབྱུང་བ་ཉིད་ནའོ། །གཙོ་བོར་ཆོས་སེམས་པ་ན་སྙིང་སྟོབས་ཏེ། །ཡུལ་ལ་ཆགས་ན་དེ་བཞིན་རྡུལ་ལ་སྲོག །རྨོངས་པ་ལ་ཞེན་མུན་པས་འགོག་པ་ཡིས། །
[338b.5]གསལ་པོར་ཆ་ནི་ཤེས་པར་གྱུར་པ་ཡིན། །འབྱུང་བ་ན་ནི་འབྱུང་བ་ཁོ་ན་སྟེ། །འཇུག་པ་ན་ནི་འཇུག་པ་སྟོན་པར་བྱེད། །རང་གི་གཉུག་མའི་ལུས་ལ་དེ་བཞིན་དུ། །ཀུན་དུ་གྲོང་ཁྱེར་གཞན་ལའང་དེ་བཞིན་ནོ། །ཟླ་བ་དང་ནི་ཉི་མའི་ཞིང་དུ་རླུང་། །རྒྱུ་བའི་ཕྱོགས་སུ་ཕོ་ཉ་གནས་ན་ནི། །དུག་
[338b.6]གིས་བརྒྱལ་བ་དེ་ནི་འཚོ་བར་འགྱུར། །དེ་བཞིན་སྟོང་པའི་ཁྱིམ་ལ་འཆི་བར་འགྱུར། །ཉི་མའི་ཞིང་ལ་རླུང་ནི་གནས་པ་ན། །གསལ་པོར་ཕོ་ཉས་ཐད་ཀར་བལྟས་པ་དང་། །སྐྱེས་བུ་རྒྱབ་ནས་འདུག་སྟེ་ཡིན་ན་ནི། །ངེས་པར་ཟླ་བའི་ཁྱིམ་ལ་བཟང་པོར་གཟུང་། །དུག་ཞིར་འགྲོ་དང་བྱ་བ་གང་ལ་
[338b.7]ཡང་། །ཟླ་བའི་སྲོག་གི་ཟས་འཁྲིག་འཐབ་མོ་ལ། །ཉི་མའི་སྲོག་ནི་མཛེས་སོ་བི་སུ་ལ། །བབ་ན་རྡུལ་གྱིས་ཆར་ནི་གཟུང་བར་བྱ། །གྲུབ་པ་གཞན་དག་གསུངས་པ་གཉིས་ཀ་ཡང་། །ཞིང་དུ་སྲོག་གི་རླུང་ནི་ལེགས་པར་གནས། །དབྱེ་བ་རྣམ་པ་བཞིར་ནི་ཡོད་པ་ལ། །དེ་ལ་སེམས་ཅན་ངོ་
[339a]
[339a.1]མཚར་ཡོད་པ་ལ། །ཁྱབ་དང་སྟེང་འོག་དབུས་སུ་རླུང་དང་ནི། །ཡོན་ཏན་ཞི་དང་ལྷ་ཡི་བདག་པོ་ན། །དོན་མེད་འཁྱམ་དང་འཐབ་དང་འཆི་བ་ནི། །དྲི་ཁུར་དེ་ཡིས་དེ་རྣམས་བྱེད་པ་ཡིན། །སྐོམ་དང་བཀྲེས་དང་སྐྱོ་བ་དག་དང་ནི། །འདོད་པའི་དགོས་པ་ཉམས་པ་རྩེ་གསུམ་གྱི། །
[339a.2]འགྲོ་བ་རྣམས་ལ་རྒྱལ་བའི་དགེ་བསྐྱེད་པ། །མི་འཆི་མེད་ན་དེ་བྱེད་ཡིན་མ་ཡིན། །གཞན་དོན་བྱེད་ན་དཀའ་བ་མེད་པར་ནི། །བདེར་གནས་བདེ་སྐྱེད་ཡིད་ནི་ཚིམ་པར་བྱེད། །དྲི་མེད་དྲི་ཞིམ་ལ་ནི་མངོན་འདོད་བཞིན། །གཟུགས་བཟང་ལྷ་ཡི་བདག་པོ་དེ་ཡིས་བྱེད། །ཡི་དྭགས་མི་དང་རིག་འཛིན་
[339a.3]སྒོ་དང་ནི། །གནོད་སྦྱིན་སྒོ་གང་ལག་པ་གཉིས་ཀྱིས་སྡོམ། །དོན་དམ་ཐིག་ལེ་གང་ཡིན་དེ་དག་ནི། །ཟླ་ཆ་རྩེ་སྤྲོད་དབུས་གནས་མཚོན་པར་བྱེད། །ནག་དང་ལི་ཁྲི་དུང་དང་གསེར་སྦྱངས་མདོག། །དོན་གང་ཡིན་པ་དེ་ནི་ཐོབ་པར་འགྱུར། །གང་དག་བརྗོད་པས་དྲི་ཁུར་རབ་དབྱེ་ལས། །མཉན་པ་
[339a.4]དེ་དག་རབ་ཏུ་ཐོབ་པར་བྱེད། །མིག་དང་ཁ་སྦྱོར་ཇི་ལྟ་བཞིན་དུ་སྨྲ། །དབུགས་འཇུག་འབྱུང་བ་ཀུན་ནས་མ་ཉམས་ན། །སྙིང་སྟོབས་ལ་ནི་བབ་པའི་མཚན་ཉིད་དེ། །རྣམ་འགྱུར་མེད་པས་འཚོ་བར་འགྱུར་བ་ཡིན། །མིག་གི་སྦུབས་ནི་ཅུང་ཟད་ཕྱེ་བ་དང་། །རྨ་ཅན་ཅུང་ཟད་སོ་ཡི་ཕྲེང་བ་
[339a.5]རྣམས། །རྨི་ལམ་བཞིན་དུ་དུག་གི་རེག་པ་ཡིས། །གཡེངས་པས་འགགས་པ་དེ་ནི་རྡུལ་ལ་ཡིན། །རྨ་ཅན་གྱི་ནི་ཁ་གདངས་མིག་ཀྱང་བགྲད། །གསུས་པ་འཇིགས་སུ་རུང་བ་སྦོས་པ་དང་། །སེན་མོ་སོ་དང་མིག་རྣམས་མདོག་འགྱུར་བ། །གསར་པོ་ར་ཏི་མི་ཡི་མདོག་གི་ཉལ། །གང་
[339a.6]དག་ལ་ནི་ལག་པས་དྲངས་ཙམ་གྱིས། །རྩ་ནས་བུད་དོ་མགོ་ལ་སྐྱེས་པའི་དགྲ། །འབྱུང་པོའི་ཕ་ནི་གང་ཡིན་དེ་སོང་ལ། །དེ་ལ་ཐེ་ཚོམ་ཡང་ནི་དགོས་སམ་ཅི། །འཐུངས་པ་དེ་ཡི་མོད་ལ་ལྡོག་བྱེད་དེ། །སྨན་དང་ཆུ་ནི་མིང་དག་གང་ཡིན་ལ། །སྲོག་དེའི་མདུན་དུ་རྒྱུག་པར་བྱེད་པ་སྟེ། །
[339a.7]གཡོག་འཁོར་གྱི་ནི་སྐྱེས་བུ་ཇི་བཞིན་ནོ། །སོ་རྩའི་བདུད་རྩི་ཞིམ་པོ་མ་ཡིན་དང་། །རྣ་བའི་སྒྲ་མེད་མིག་གི་གློག་ཀྱང་མེད། །སྐྱེས་བུ་གང་གི་སྤྱི་བོའི་དུ་བ་ནི། །མི་མཐོང་བ་ནི་དེ་ནས་བསྐྱོད་པ་ཡིན། །ཉིན་མཚན་མཚམས་ཀྱི་རྟགས་ནི་གོ་བྱ་བ། །ཚིས་པོར་བྱས་ནས་བོར་བ་དེ་ཡི་ནི། །
[339b]
[339b.1]དཀར་ནག་དང་ནི་གསེར་གྱི་མདོག་ཅན་ཏེ། །རྨན་ཅན་གྱི་ནི་ཟླ་དང་ཉི་མིག་གོ། །ཟླ་དང་ཉི་མའི་མིག་གི་སྙིང་པོར་ནི། །གོ་བུའི་གཟུགས་བརྙན་སྣང་བར་མི་འགྱུར་ཞིང་། །སོ་རྩའི་བདུད་རྩི་དག་ནི་མི་འཛག་ན། །ཕུང་པོའི་ཞིང་ལས་རླུང་དེ་བསྐྱོད་པ་ཡིན། །སྣ་ནི་རང་གི་གནས་ནས་
[339b.2]གཡོགས་པ་དང་། །མིག་ནི་མཆི་མས་དཀྲུགས་དང་ཤེས་པ་གཡེངས། །ཁ་ཡི་རླུང་ནི་ཆུ་ལ་བབ་པ་དང་། །སྣ་སྐད་དུ་ནི་སྨྲ་བ་གང་ཡིན་པའོ། །རླུང་གི་ཡོན་ཏན་གྱི་རབ་ཏུ་དབྱེ་བའོ། །ལུས་ཀྱི་ཆ་ནི་གང་ལ་རྨ་མཐོང་བ། །དེ་འདྲ་དེ་རུ་འཕོ་བར་བྱེད་པ་སྟེ། །མི་བཟད་དུས་ཀྱི་དབང་
[339b.3]དུ་བྱས་པ་ཡིན། །རྣ་བའི་རྒྱབ་ཏུ་རི་མོ་དམའ་བ་སྣང་། །རྨས་པའི་ས་རུ་སྦལ་རྒྱབ་ལྟར་མཐོ་ཡིས། །དུག་གིས་ཟིན་པ་དེ་ནི་མི་འཚོའོ། །ཁྲག་ནི་སྣ་ཚོགས་མདོག་ཏུ་འཛག་བྱེད་ཅིང་། །དེ་ནི་བྱ་རོག་རྐང་འདྲའི་གཟུགས་སུ་སྣང་། །མགྲིན་པ་འཕོངས་ཚོས་གསང་བ་དང་ནི་
[339b.4]གནད། །མིག་དང་རྣ་བ་ལག་སོར་རྣམས་ཀྱི་རྩེ། །ལྟེ་བ་བཤང་ལམ་ཕྲག་པ་རྐེད་པར་ནི། །ཟིན་པ་བསོད་ནམས་ཀྱིས་ནི་འཚོ་བ་ཡིན། །རྨའི་མཚན་ཉིད་དོ། །གང་གི་ཁྱིམ་གྱི་ཐ་སྙད་མ་ཧེ་དང་། །བོང་བུ་དང་ནི་རྔ་མོ་ཞོན་པ་ཡི། །ཕོ་ཉ་ལྟས་ངན་ཡིན་ཞེས་སུ་ཞིག་སྨྲ། །སུ་ལའང་དེ་
[339b.5]ཡིས་ལྟས་ངན་བསྐྱེད་མ་ཡིན། །ལྟས་ངན་བདེན་པར་བརྗོད་པ་འདི་དག་སྟེ། །ཡུན་རིངས་ཤུགས་ནི་འབྱིན་པར་བྱེད་པ་དང་། །དེ་བཞིན་དུ་ནི་རྡུལ་དག་འབྱུང་བ་དང་། །ཕོ་ཉ་རིགས་གཞན་དག་ནི་ཡིན་པ་དག །ཕལ་ཆེར་བསྔགས་པ་མ་ཡིན་ཁོ་ན་སྟེ། །ཡན་ལག་ཉམས་དང་ཐོད་པ་ཅན་
[339b.6]གྱི་གཟུགས། །གོས་ནག་ངུར་སྨྲིག་གྱོན་པ་ཉེ་བར་ན། །ཕོ་ཉའི་མགོ་ལ་མར་ནག་བྱུགས་པའམ། །ཡིན་ན་རྡུལ་གྱི་སྐབས་ལ་བབས་པ་ཡིན། །རྐང་པ་གཡས་བརྐྱང་པ་ན་འཚོ་བ་སྟེ། །ཕལ་ཆེར་བུད་མེད་ལ་ནི་མཚོན་པའོ། །རྐང་པ་གཡོན་པ་བརྐྱང་བས་སྐྱེས་པ་དག། །སྲོག་
[339b.7]ནི་འགྲོ་བ་ཡིན་པར་མཚོན་པ་ཡིན། །རྗེས་ཀྱི་དབྱངས་མེད་དེ་དང་སྦྱར་བའམ། །ཡི་གེ་ཕན་ཚུན་སྦྱར་དང་དང་པོ་ཀ། །དྲིས་ཚེ་ཉོན་མོངས་ཚིག་ནི་བརྗོད་པ་ན། །རྨ་ཅན་དེ་ནི་ཐེ་ཚོམ་མེད་པར་འཆི། །ཉི་མས་རང་གི་གནས་ཞིག་བསྲེགས་ནས་ནི། །འོད་ཟེར་རྣོན་པོས་བསྲེག་བཞིན་པ་ཡིས་
[340a]
[340a.1]གནས། །དེ་བཞིན་མདུན་ན་མོ་ལ་དུད་པར་འཐུལ། །ལྟག་མ་རྣམས་ནི་དགེ་བའི་རྣམ་པ་ཡིན། །དགོས་པ་ལ་ནི་འགྲོ་ཆེད་ཉམས་པ་དང་། །ཉམས་བཞིན་པ་དང་ཉམས་པར་འགྱུར་བ་ཡི། །ཕྱོགས་གསུམ་མ་ཡིན་ཕྱོགས་གཞན་རྣམས་སུ་འགྲུབ། །སྦྲིད་པ་བྱ་རོག་ཀཱ་རཱ་
[340a.2]ཡི་དང་ཅེ་སྤྱང་གཉིས། །ཟངས་དུང་ལ་སོགས་སྒྲ་ཡི་དུས་དང་འཛོམ་པ་ན། །ཉོན་མོངས་སྲོག་ནི་འགྲོ་ཚེ་ཕྱོགས་ནས་སྒྲོགས། །དྲི་ཁུར་རྗེས་འབྲང་རྟོག་མཁས་ཕོ་ཉ་ཡི། །གཉིས་ནི་བཟང་ངན་དགེ་དང་མི་དགེ་དག །དུག་འཇོམས་ཐེ་ཚོམ་ཉོན་མོངས་འགྲོ་བ་ཡི། །བདེན་པ་འདི་ནི་ངེས་པར་མཁྱེན་པ་
[340a.3]ཡིན། །ཕོ་ཉའི་མཚན་ཉིད་དོ། །མ་མོའི་ཁྱིམ་མམ་པདྨ་ཅན་གྱི་མཚོ། །ཤིང་འཛེག་ཕུག་པ་གྲོག་མཁར་དག་ནས་སམ། །ཁང་རུལ་དུར་ཁྲོད་ཀྱི་ནི་ལྟོ་འཕྱེ་རྣམས། །ཆུའམ་བཞི་མདོ་ཡི་ནི་གདུག་པ་ཅན། །དྲག་པོའི་གཟའ་ལ་ལྟོ་འཕྱེའི་དུག་གིས་ནི། །འཛིན་ན་བཞིའམ་བཅུ་བཞི་
[340a.4]ཡིན་ན་འཇིག། །དེ་བཞིན་ཆ་ནི་རབ་ཉམས་གནམ་སྟོང་དང་། །ཚེས་བརྒྱད་ལ་ནི་བབས་པར་གྱུར་ནའོ། །ཀརྟི་ཀ་དང་མརྒྷ་ཨ་ཏྲ་དང་། །བཱ་ར་ཎི་དང་མཱུ་ལ་བི་སཱ་ཁ། །སླེ་ཤ་འཕུར་གསུམ་གལ་ཏེ་ཚེས་དང་གཟའ། །རྒྱུ་སྐར་ལ་ཟིན་ངེས་པར་བརླག་པར་འགྱུར། །བད་མཁྲིས་རླུང་ནི་གཙོ་བོ་མི་
[340a.5]དང་ནི། །ལྟོ་འཕྱེའི་ཁམས་ནི་འདྲ་བར་གྱུར་པ་ན། །དེ་ལྟར་ཤེས་ན་ཆོས་མི་མཐུན་པ་དང་། །ཆོས་མཐུན་པ་ཡི་དཀའ་བ་མེད་ལའང་ཡོད། །གནས་དང་ཚེས་གྲངས་དང་གཟའ་དང་རྒྱུ་སྐར་དང་ཆོས་མཐུན་པ་དང་མི་མཐུན་པའོ། །ཉིན་མཚན་ཐུན་ཕྱེད་དག་ལ་ཀླུ་རྣམས་ནི། །གཟའ་ཡི་དབང་
[340a.6]གྱུར་དག་ནི་ལོངས་སྤྱོད་དེ། །ཉིན་མོ་གང་ལ་དེ་ཡི་དུས་ཉིད་དེ། །མཚན་མོ་སྒོ་ནི་རྣམ་པ་གཞན་དུ་འགྱུར། །འབྱུང་པོ་ཕྱོགས་དུས་མེ་དང་རི་བོ་དང་། །དུས་དང་ཐར་པ་ཉིན་མོའི་དུས་སུ་བསྒྲེང་། །རོ་དུས་མིག་དང་ཐུབ་པ་དང་ནི་མདའ། །མེ་དང་ཟླ་བ་མཚན་མོ་དག་ཏུ་ཤེས། །སྤེན་པའི་དུས་
[340a.7]ཕྱེད་སྔ་མ་བླ་མ་ཡི། །དང་པོ་འདས་པར་དགོས་པའི་ས་ཡིན་ཏེ། །ཉིན་མཚན་འཕོ་བའི་མཚམས་ནི་གང་ཡིན་པ། །བཅུ་དྲུག་པོ་དེ་རིགས་ལྡན་དུས་ཡིན་ནོ། །གཉུག་མའི་ལུས་ལ་ལྟ་ན་ཉི་ཟླ་སྟེ། །ལག་པ་རྣ་བ་ལ་རེག་ས་སྐྱེས་ཡིན། །སྣ་ལ་ལག་པས་རེག་ན་གཟའ་ལག་གོ། །མགྲིན་པ་ལ་རེག་ལྷའི་
[340b]
[340b.1]བླ་མའོ། །དབུགས་ནི་དྲུག་ཏུ་འབྱིན་པ་བསངས། །དགོད་པ་ན་ཡང་སྦེན་པ་རུ་ནི་ཤེས། །ས་ལ་སྟན་སྒྲ་གཅན་ཉིད་ཡིན་ནོ། །དུས་དང་དགོས་པའི་དབྱེ་བ་དང་རགས་པ་དང་སྟོང་པ་སྟེ། དུག་ཟིན་གྱི་མཚོན་བྱེད་དོ། །ཉི་ཟླ་ས་སྲས་གཟའ་ལག་ཕུར་བུ་དང་། །བ་བ་སངས་དང་སྦེན་པས་བསྐྱེད་པ་
[340b.2]ན། །ཚོགས་མིག་རྒྱ་མཚོ་རོ་དང་བཅུ་དྲུག་དང་། །སུམ་ཅུ་གཉིས་དང་ལྔ་བཅུ་ཐམ་པ་སྟེ། །འགྲོ་བས་རང་དབང་ཅན་གྱི་ལྟོ་འཕྱེའོ། །ཐེ་ཚོམ་མེད་པ་དེ་ཡང་ཤེས་པར་བྱ། །དགོས་པ་དང་ནི་བཅས་པའི་དུག་དག་ཀྱང་། །སྟོང་དང་སྟོང་པ་མ་ཡིན་དབུས་སུ་ཡང་། །སྲོག་རྡུལ་སྙིང་གི་དབུས་སུ་དལ་བ་ཡིས།
[340b.3]རྣམ་པར་གསལ་བ་ཡིས་ནི་ལེགས་གནས་ན། །གནས་ན་གནས་པས་དེ་མ་ཐག་ཏུ་ནི། །ཡུན་རིང་བརྒྱལ་བ་ལ་ཡང་མཚོན་པར་བྱ། །གཉིས་པའི་ཕྱོགས་རྩ་བསྟན་པའོ། །སྤྱི་བོ་དག་ནི་ནག་པོ་རླུང་ཡིན་ཏེ། །མགྲིན་པ་ལྟེ་བར་མེ་ཡི་འབར་བས་དཀྲིགས། །དེ་ནས་དབང་ཆེན་སོར་མོ་མཁའ་ལྡིང་གི། །
[340b.4]པུས་མོ་ནས་བརྩམས་ཆུ་ནི་དཀར་པོ་ཡིན། །བརྒྱ་བྱིན་གྱིས་ནི་བདུད་རྩི་ཕྲོགས་ནས་ཀྱང་། །རྡོ་རྗེའི་མཚོན་ཆས་དགྲ་མེད་དགའ་བ་ཡིས། །མཁའ་ལྡིང་དགྲ་ནི་རེང་པར་འགྱུར་བ་དང་། །ཡིད་འཕྲོག་ཐོབ་པ་དེ་ནི་རྒྱལ་གྱུར་ཅིག། །གར་གྱི་དཔལ་བརྗིད་གཤོག་པས་བསྐྱོད་པ་ཡི། །རླུང་གི་རིགས་ཀྱི་རི་རྣམས་
[340b.5]བསྐྱོད་བྱེད་པ། །མཁའ་ལྡིང་དུ་ནི་ཡོངས་སུ་བསྒོམ་བྱ་སྟེ། །མ་ལུས་དུག་རྣམས་ཞི་དོན་གཉེར་བས་སོ། །རླུང་དུ་བསྟན་པས་སེམས་ནི་ཕུར་བུས་འདེབས། །འབར་བ་ཡིས་ནི་སྤེལ་བར་བྱེད་པ་ཡིན། །བརྒྱ་བྱིན་གྱིས་ནི་གསལ་པོར་རེངས་པར་བྱེད། །ཆུ་ཟིལ་འབབ་པས་དུག་ནི་བརླག་པར་བྱེད། །
[340b.6]མཁའ་ལྡིང་བྱེ་བྲག་རེ་རེ་ཡིས་ཀྱང་ནི། །སེལ་ལ་ངེས་པར་བསྒོམ་པ་དང་ལྡན་ན། །བི་མེད་ང་ཡི་ས་བཞིན་གནས་སུ་ན། །མ་ལུས་དུག་ནི་ཚར་གཅོད་བྱེད་པ་ཡིན། །ཨ་སྟི་བི་ཥཾ་བརྗོད་ན་དུག་ཡོད་དེ། །ན་ཨ་སྟི་བི་ཥཾ་ས་སྟེངས་ཀུན་ན་མེད། །བསོད་ནམས་ཡང་དག་བསགས་ལ་མཆོག་གི་ནི། །དེ་ཉིད་
[340b.7]འདི་དེ་སྐྱེ་བ་ཁོ་ནར་འགྱུར། །ལྟ་བྱེད་མིག་གསུམ་འབར་བས་བསྟན་པ་ཡི། །དུག་མཆོག་ཐལ་བ་རུ་ནི་བརླག་ནས་ཀྱང་། །ལ་ལ་དག་ལ་གལ་ཏེ་འདི་སྐད་དུ། །མགྲིན་སྔོན་ཁྱེད་བརྗོད་བྱིན་པར་གྱུར་ན་ནི། །སྐྱེས་བུ་དེ་ཡི་ལུས་ལ་ཇི་སྲིད་ནི། །འཚོ་བའི་བར་དུ་དུག་ནི་མི་འཕོ་སྟེ། །རི་བོང་མགོ་
[341a]
[341a.1]ལ་རྭ་ནི་སྐྱེ་བ་དག། །ནམ་དུ་ཡང་ནི་སྲིད་པར་འགྱུར་རམ་ཅི། །གལ་ཏེ་འཕྲོག་བྱེད་ཁ་སྣ་བཀག་གོ་མྱུར་བར་ནི། །དགའ་བའི་མཐར་ཞུགས་སྲོག་ལུང་འགྲོ་བཞིན་པ། །རེ་ཞིག་གསལ་བར་འགུལ་བར་གྱུར་ན་ནི། །རྨས་པ་དེ་ནི་འཚོ་བར་ཤེས་པར་བྱ། །འབྱུང་
[341a.2]བའི་རླུང་ནི་ནང་དུ་རྔུབས་ནས་སུ། །འཕྲོག་བྱེད་ཀྱི་ནི་ཁ་དྲུང་ཇི་བཞིན་ལྟ། །སྐྱེ་བོའི་དགྲ་ནི་དབེན་པའི་གནས་སུ་ནི། །སྦས་པའི་ཡུལ་ལ་ཡང་ནི་ཤེས་པར་བྱ། །ཐེ་ཚོམ་མམ་ནི་དགེ་དང་མི་དགེ་བ། །འདྲི་མི་འདྲ་ལྷག་དུག་གིས་བརྒྱལ་བ་ལ། །ཕྱིས་ན་ཕོ་ཉའི་གོས་ནི་ཕྲོགས་བྱེད་ནི། །
[341a.3]ཁྲུ་ཡིས་བཅལ་བ་ལ་ནི་སྣང་བར་འགྱུར། །མཁའ་ལྡིང་གཤོག་ཚོགས་གར་དང་ལྡན་པ་ཡིས། །ཀླུ་གཟུགས་དེ་ལ་རྣམ་པར་གནོན་པ་ན། །དེ་ལྟར་གང་གསོན་སྐད་ཅིག་ཙམ་གྱིས་ནི། །གསལ་པོར་སྨྲ་བ་དང་ནི་བསྐྱོད་པར་འགྱུར། །ཁ་དང་སྣ་རླུང་རྒྱུ་བ་བཀག་ནས་ནི། །སྐད་ཅིག་ཙམ་གྱིས་དེ་ནི་ཁྱད་པར་དུ། །
[341a.4]གདེངས་ཀ་ཅན་གྱིས་བཟུང་ནས་བརྒྱལ་བ་ནི། །ངེས་པ་ཉིད་དུ་ཚོར་བ་དང་བཅས་འགྱུར། །དུག་འཇོམས་བྱེད་པ་པདྨ་རྒྱས་པར་ཡང་། །སྲོག་གི་རླུང་གིས་ཀྱང་ནི་བྱེད་པ་སྟེ། །ཡང་དག་འགག་པའི་འགྲོ་བའི་སྙིང་པོ་ནི། །སློབ་དཔོན་གྱིས་ནི་སྒོམ་པར་བྱེད་པ་ཡིན། །དུག་གི་སྐྱོན་ནི་མེད་པ་ཁོ་ནར་ཡང་། །
[341a.5]གང་དག་གིས་ནི་རྒྱུ་མཚན་འགའ་ཞིག་གིས། །བརྒྱལ་བར་བྱས་ལ་མཁས་པས་སེན་མཚམས་སུ། །སེན་མོ་ཡིས་ནི་སོང་བར་བྱེད་པ་ཡིན། །དུག་ཟིན་གྱིས་ནི་བསོད་ནམས་སྦྱོར་བ་ཡི། །གང་ལ་ཐིག་ལེ་དཀར་པོ་བྱུང་གྱུར་ན། །དེ་ལ་གང་དང་གང་གིས་བརྗོད་བྱས་པ། །དེ་དང་དེ་
[341a.6]ནི་སྔགས་སུ་འགྱུར་བ་ཡིན། །ལུས་ཀྱི་ཡན་ལག་དག་ནི་དཀར་པོ་ལ། །གང་གི་གནས་དེར་མེ་ནི་འབར་བ་དག །དྲག་པོ་ཡི་ནི་རླུང་གིས་བསྐྱོད་པ་ན། །རྨས་པ་དེ་མ་ཐག་ཏུ་འགྱེལ་བར་འགྱུར། །ལྷག་མ་ནོར་བུའི་གདེངས་ཀའི་འདབ་མའི་རྩར། །སྲེད་མེད་བུ་བཞིན་རྨ་ཅན་བདེ་བར་ཉལ། །
[341a.7]འོ་མའི་མཚོ་ཡི་བདུད་རྩི་དཀར་པོ་ཡིས། །བསྒོས་པས་དུག་ནི་འཇོམས་པར་འགྱུར་བ་ཡིན། །གང་གི་ལུས་ནི་དཀར་པོར་སྒྱུར་བྱེད་པའི། །ཐིག་ལེ་དཀར་པོ་དག་ནི་ལྟ་བྱེད་ན། །སྟོང་པ་དེ་ཡི་དུག་ནི་སྟོང་པར་ནི། །བསྒོམ་པས་ཀྱང་ནི་ཞི་བར་ཤེས་པར་བྱ། །འཕྲོག་བྱེད་མིག་གི་མེ་ནི་འབར་བ་དག །རང་གིས་
[341b]
[341b.1]བསྐྱོད་པ་གང་གི་སྙིང་ལ་ནི། །རབ་ཏུ་འབར་བས་རྨ་ནི་རྙིང་པ་ལ། །ཡུད་ཙམ་གྱིས་ནི་དེ་ལ་རྒྱས་པར་བསྐྱེད། །རིགས་ལྡན་ནོར་གྱིས་འབྱོར་དང་ཡོན་ཏན་ཅན། །དཀའ་ཐུབ་སྙིང་སྟོབས་ཅན་དང་རྒན་པོ་དང་། །བུད་མེད་མངལ་ནི་རབ་ཏུ་རྒྱས་པ་དང་། །བྲམ་ཟེ་དང་ནི་བྱིས་ལ་བསྐྱེད་མི་བྱ། །མཁའ་
[341b.2]ལྡིང་སེར་པོས་དུག་ཟིན་དག་ལ་ནི། །ཐིག་ལེ་ཡིས་ནི་གལ་ཏེ་མནན་པ་དང་། །བུམ་པ་ཅན་གྱི་ཉིན་ཞག་མང་པོར་ཡང་། །རི་རབ་ཀྱིས་ནི་མནན་བཞིན་གཡོ་བ་མེད། །དུག་གིས་ཟིན་པ་ནོར་རྒྱས་དཀར་པོ་ཡིས། །མཇུག་མས་མགུལ་བར་བཅིངས་ཏེ་མི་ལྷུང་བ། །དེ་ཡི་མགོ་ལས་
[341b.3]གལ་ཏེ་བཟུང་ན་ནི། །ཤང་ཤང་ནམ་མཁའ་ལ་ནི་འགྲོ་ན་ཡང་། །ཟླ་བའི་ཞིང་དུ་སོན་པའི་ནུས་པ་ནི། །སྙིང་གའི་པདྨ་ཕུག་ནས་པད་སྐུད་འདྲའི། །འཛག་པ་གང་ལ་ཟག་མེད་བལྟས་ནས་ནི། །དེ་ཡི་ལུས་ལ་དུག་ནི་གང་ལ་སྟེ། །གང་ཕྱིར་ག་མའི་ལུས་ལས་ནུས་པ་ནི། །
[341b.4]འཛགས་པ་ཡིས་ནི་རྒྱང་རིང་གནས་པ་ཡིས། །མ་ལུས་དུག་ཀྱང་ཕིག་ནས་ངེས་པར་ནི། །ཞི་བར་བྱེད་པ་ཁོ་ན་ཡིན་པའོ། །སྦྱོར་བའོ།། །།འདབ་མ་དཀར་པོ་རབ་རྒྱས་རབ་འཛག་པའི། །ཁ་བའི་འོད་འདྲ་ཆུ་ཤེལ་ནོར་བུའི་གཟུགས། །མི་བཟད་དུག་ཀྱང་དང་པོའི་དབྱངས་
[341b.5]ཀྱིས་ནི། །བསྒོམས་པས་ཡང་དང་ཡང་དུ་འཇོམས་པར་བྱེད་པ་ཡིན། །ལག་པ་གཡོན་དུ་དབང་ཕྱུག་སྤྱི་བོའི་རྒྱན། །དབུས་གནས་དྲུག་པ་ལ་ནི་ཐིག་ལེས་བརྒྱན། །དབྱངས་ནི་དུག་རྣམས་སྡུད་པར་བྱེད་པ་སྟེ། །འཕྲོག་བྱེད་དཀར་པོའི་ཁུ་ཚུར་བཅངས་པས་སོ། །ས་འོག་སྤྱི་བོར་ཟླ་བའི་དུམ་
[341b.6]བུ་ནི། །ཐིག་ལེ་དང་བཅས་སྐྲ་རིས་སྤྱི་ནག་སྟོང་། །ཨུ་ཡིག་གི་ནི་དབྱངས་ལ་ཞོན་པ་སྟེ། །འཕྲོག་བྱེད་དཀར་པོ་དུག་མཐར་བྱེད་པ་ཡིན། །སྤོང་བ་དང་ནི་གོས་དག་འཕྲོག་པ་དང་། །དུག་བཅིངས་ཆོ་ལོ་སྟོན་མོ་ས་ཡི་འོག །ཇི་ལྟར་ངེས་པར་བསྒོམས་པས་བྱེད་པ་ན། །དེ་ལྟར་དགོད་པ་ཡང་ནི་
[341b.7]ཤེས་པར་གྱིས། །འགྲོ་བ་དུག་གིས་བརྒྱལ་བ་དག་ལ་ཡང་། །སྙིང་གར་ཡང་ནི་མགོ་མེད་དཀར་པོ་སྟེ། །གཞན་དག་ཀྱང་ནི་བརྒྱལ་བར་བྱེད་པ་ན། །དྲག་པོའི་རླུང་གིས་བསྐྱོད་མེ་འབར་བས་སོ། །ས་འོག་གོས་གནས་རླུང་གིས་དྲངས་པ་ན། །སྐད་ཅིག་གིས་ནི་ཕྱེད་ཙམ་གྱིས་ཀྱང་ནི། །མྱུར་དུ་ཁྲོས་ན་
[342a]
[342a.1]འཕྲོག་པ་དེ་ལ་ནི། །གཏིང་བཞིན་འབྲངས་ནས་འདེད་པར་བྱེད་པ་ཡིན། །ཉོན་མོངས་སྙིང་གར་ཆུད་པའི་མི་ཤིགས་པས། །བཀུག་པའི་དུག་གི་གོང་བུ་ནག་པོ་ནི། །ཀུམ་པ་དཀར་བཅས་གོས་ནི་བཅིངས་པ་ཡིས། །ཉིན་ཞག་མང་པོར་ཡང་ནི་གཡོ་བ་མེད། །ཚེས་བཞི་སྤྲིན་ནག་
[342a.2]ལྷ་ཡི་བླ་མ་དང་། །ཟླ་ཉི་པ་བ་སངས་ནི་ཆོལ་ཤིང་སྟེ། །རྩིས་ཀྱི་རི་མོ་གློག་ནི་འགྱུ་བ་དང་། །གང་པོར་ཆོ་ལོར་སྐར་མའི་ཚོགས་སུ་སྟེ། །ཆོས་སྐུར་ལག་པ་དབང་ཕྱུག་བཞིན་པའི་མིག །ཆོ་ལོ་མཁན་པོ་གཉིས་སྐྱེས་མཆོག་གི་ཚོགས། །དུག་ཟིན་དུག་ལས་ཡོངས་སུ་ཐར་ནས་ནི། །ཆོལ་རེས་ལ་ནི་ལག་
[342a.3]ནས་ཡོངས་སུ་འཛིན། །དེ་ཡིས་དུག་གིས་བཟུང་བའི་སྐྱེས་བུ་ནི། །རྣམ་པར་དག་པས་སྐད་ཅིག་ཁྱད་པར་འཕགས། །བཟའ་བ་ཟོས་པའི་ལྷག་མའི་དུས་སུ་ནི། །ཆུ་སྣོད་བཟུང་ནས་ཆུ་ནི་སྟེར་བར་བྱེད། །གང་ཞིག་མཐོང་དང་ཐོས་དང་གང་ཞིག་ནི། །ཉམས་སུ་མྱོང་བའང་ཡུལ་བྱས་སྤྱོད་
[342a.4]པ་ནི། །དེ་ཀུན་སེམས་ཀྱིས་བྱེད་དོ་གུས་པར་གྱིས། །སྲིད་པའི་དངོས་པོ་མེད་པ་འབྱུང་བ་ཡིས། །དེ་བཞིན་དུ་ནི་ན་ར་ཡས་སྨྲས་པ། །ནུས་པ་གང་གིས་མྱུར་དུ་ཐར་སྐྱེད་དང་། །དེས་ནི་དུག་དང་འབྱུང་པོ་འཇོམས་བྱེད་དེ། །ཟླ་བ་དང་ནི་ཉི་མར་ཞུགས་པ་ནའོ། །འདུས་པའི་སྐྱེ་བོ་
[342a.5]ཁ་ཡི་སྦུབས་ནས་ནི། །ནུས་པ་བ་མོ་ལྟ་བུ་བབ་པ་ཡིས། །དགོད་པའི་སྒྲ་ཡིས་དུག་དག་མྱུར་དུ་ནི། །འཇོམས་པར་བྱེད་དེ་བསྒོམས་པ་བྱས་པས་སོ། །དུག་ཟིན་སྨྲ་བས་གལ་ཏེ་ཡོད་པ་ན། །རྒྱང་རིང་ན་ཡང་དུག་ནི་མྱུར་དུ་སྡུད། །སྙིང་གར་ངང་པ་དཀར་པོ་བསྒོམ་པ་ནི། །བདུད་རྩིའི་
[342a.6]སྙིང་པོས་ཡོངས་སུ་རྒྱས་པའོ། །བརྟན་པའི་དུག་ནི་ཁུར་བུ་སྟོང་ཕྲག་ཀྱང་། །རླུང་གིས་བསྡུས་པས་དུག་མེད་པར་ནི་བྱེད། །ངང་པའི་བདུད་རྩི་འབབ་པར་གྱུར་པ་ནི། །ཟླ་བའི་ཞིང་ནས་བྱུང་བས་དེར་འགྱུར་རོ། །ལྟོ་བ་སྤྱི་བོ་སྤྱི་གཙུག་གོ་ཆ་ནི། །མིག་དང་ལག་པ་ལག་སོར་སྒྲ་
[342a.7]ལྡན་པས། །རེ་རེ་བོར་བའི་རིང་པོ་ཚེག་དྲག་ཀྱང་། །དྲུག་པོ་ཡང་ནི་བླང་བར་བྱ་བ་ཡིན། །ཉི་མའི་གྲངས་ཀྱི་དབྱངས་ནི་སྦྱར་བྱ་སྟེ། །ས་མཆོག་སྲིད་པ་དམིགས་པ་མེད་པས་འགོད། །དེ་ནི་དྲག་པོ་དང་མཉམ་ཚིག་བཙན་ཞིང་། །དུག་འཇོམས་མི་བྱེད་པ་ནི་མ་ཡིན་ནོ། །ས་མཆོག་ར་ལ་བསྐྱོན་པ་གུག་རིངས་དང་།
[342b]
[342b.1]ཟླ་ཕྱེད་ཐིག་ལེ་ཡིས་ནི་མཛེས་པར་བྱས། །མར་གྱི་ཉིང་ཁུས་མཛེས་པ་བསྒོམས་ནས་ནི། །གོ་ན་ས་ཡི་དུག་ནི་སེལ་བར་བྱེད། །གང་ཞིག་འབུམ་ཕྲག་བདུན་ནི་བཟླས་པ་ཡིས། །བི་ཎ་ཡ་ཡི་བུ་བཞིན་སྦྲུལ་དུག་བཟོད། །མི་བཟློག་སྙན་དངགས་མཁན་གྱི་རྒྱལ་པོར་ནི། །དབྱངས་ཅན་གྱི་ནི་
[342b.2]ནུས་པ་བསྒོམ་པ་ནའོ། །དེ་ཉིད་ཚེག་དྲག་དང་བཅས་འཆར་ཀ་ཡི། །འོད་ཀྱིས་དཀྲིགས་པའི་སྐྱེས་བུ་གང་ཞིག་གིས། །སྒོམ་པར་བྱེད་ན་དུག་དང་མཁའ་འགྲོ་མ། །གདེངས་ཀ་ཅན་ཡང་ཁྲོ་ཞིང་འཁྲུགས་པར་བྱེད། །སྙིང་ལ་བསྒོམས་པ་ཡིས་ནི་འགུགས་པ་སྟེ། །དཔྲལ་བའི་མཐིལ་
[342b.3]དུ་གནས་པ་དབང་དུ་སྡུད། །ཡན་ལག་མཆོག་ལ་བཙུད་པས་ཆང་གི་རྒྱུན། །ཛུ་བ་ཏི་ལ་འབབ་པ་ཁོ་ནར་འགྱུར། །ཁ་ཡི་སྦུབས་སུ་འབར་བས་དཀྲིགས་པ་ཡི། །སུམ་སྡོམ་རབ་ཏུ་འབར་བས་དུག་བརྒྱལ་བ། །འཆི་བའམ་ནི་འཚོ་བ་ཡང་ནི་རུང་། །བདེ་བར་གསལ་པོ་ཉིད་དུ་དེ་ཡིས་སྨྲ། །དེ་ཉིད་དྷ་ཡི་
[342b.4]ནང་དུ་ཆུད་གྱུར་ཅིང་། །པདྨའི་ལྟེ་བར་གནས་པ་བསྒོམས་ན་ནི། །བདུད་རྩིའི་ཟིལ་པ་དལ་འབབ་ཚེག་དྲག་བཅས། །དུག་འཇོམས་པ་ཡི་ས་བོན་ཉིད་ཡིན་ནོ། །དེ་ཉིད་མེ་ཡི་ནང་དུ་བཞག་ནས་ནི། །ཉི་མ་འཆར་ཀའི་འོད་འདྲས་མངོན་གསལ་དཀྲིགས། །ངེས་པར་དུག་སེལ་རིམས་དང་འབྱུང་པོ་དང་། །དུག་
[342b.5]གི་ཁྱད་པར་ཡང་ནི་སེལ་བར་བྱེད། །ཀ་ཥ་སྦྱར་བ་དཀར་པོ་ཐིག་ལེར་བཅས། །རི་དྭགས་མཚན་མའི་དབུས་སུ་ཆུད་པ་ནི། །སྙིང་ལ་ཆུད་པར་བྱས་པས་དུག་རྣམས་ནི། །མྱུར་དུ་འཇོམས་པར་བྱེད་པ་ཁོ་ན་ཡིན། །དབྱངས་ཡིག་ཨཱུ་རིང་ཡང་དག་ལྡན་པ་ཡི། །ཡི་གེ་དེ་ཉིད་མི་ཡི་སེང་གེའི་སྟེང་། །འཇིགས་དང་སྒྲ་
[342b.6]དང་སྡིག་དང་དུག་དང་ནི། །འབྱུང་པོ་ནད་དང་དབུལ་པོ་བརླག་པར་བྱེད། །ཡི་གེ་ཧཱུཾ་ཕཊ་མེ་ཡི་རང་བཞིན་ཅན། །འབར་བའི་ཕྲེང་བས་དཀྲིགས་པས་གསལ་བྱས་པ། །གང་གིས་མགྲིན་པར་བྲིས་པ་ཡིན་ན་ནི། །དེ་ཡིས་གསལ་པོར་དོན་གྲུབ་བྱེད་པར་འགྱུར། །ལ་ཡིག་མཆོག་ནི་ཟླུམ་པོའི་ཐིག་ལེར་བཅས། །
[342b.7]གོས་གནས་བདུད་རྩི་དཀར་པོ་རྒྱུན་འཛག་པ། །དུག་གིས་ཟིན་ལ་བྱབ་ཏུ་བཅུག་ན་ནི། །ངེས་པར་དུག་ནི་འཇོམས་པར་བྱེད་པ་ཡིན། །དྲི་ཁུར་ནག་པོའི་དབུས་ཆུད་ཐ་ཡིག་ནི། །སྔགས་འདིས་དུག་ཟིན་ལ་ནི་བྱིན་བརླབས་ན། །བསྐྱོད་དང་སྨྲ་དང་གཟེར་བའི་སྒྲ་དང་ནི། །ལངས་ནས་ཀུན་དུ་ལྟ་བར་ཐེ་ཚོམ་
[343a]
[343a.1]མེད། །གསུམ་པ་ཉེ་བར་བསྟན་པའོ།། །།ཛྷཾ་ཀཱ་རི་ཎི་ཀུ་རུ་ཀུལླེ་དང་། །བེ་རུཎྞ་དང་གསེར་རི་ས་བོན་དག །གང་དུ་དུག་གིས་བརྒྱལ་ལ་བྱེད་པ་ཡི། །དབྱེ་བ་དེར་ནི་ལེགས་པར་མཉན་པར་གྱིས། །སདྡོ་བཱ་མ་གྷོ་ར་དེ་སྐྱེས་བུ། །ལྔ་པ་དེ་རུ་ཡཱ་ནི་དབང་ལྡན་དུ། །དཀར་སེར་དམར་ལྗང་
[343a.2]ནམ་མཁའ་སོར་མོར་གནས། །རྒན་ལྕུགས་གུང་མོ་གསུམ་ལ་ཛྷཾ་ཀཱ་རི། །ཡི་གེ་རྣམ་པར་སྤྲས་པ་དག་ཡིན་ནོ། །བཞི་པ་ལྷ་ནི་ཎི་ཡིག་ཅེས་བྱ་བ། །མིང་མེད་ལ་ནི་གནས་པ་ཉིད་ཡིན་ནོ། །མཁར་གནས་དྷ་དང་ཝ་སྦྱར་ཐིག་ལེར་བཅས། །དུག་ཟིན་མིང་ཡིག་དང་པོར་བར་དུ་སྟེ། །རྒན་པོའི་སྔགས་དང་སྦྱར་བ་
[343a.3]དག་གིས་ནི། །དབང་ལྡན་དེ་ནི་མཉེས་ན་མ་ལུས་པའི། །དུག་ནི་དེ་ཡི་མོད་ལ་ཞི་བར་འགྱུར། །དེ་ཡི་སྐྱེས་བུ་དང་ནི་སྦྱར་བ་ན། །འབྱུང་པོའི་གནོད་པ་ཡོད་ན་མངོན་གསལ་འགྱུར། །འཇིགས་པའི་གྷོ་རི་དང་ནི་སྦྱར་བ་ན། །དགྲ་སྦྲུལ་དམན་པ་ཡང་ནི་མོད་ལ་བསྐྱོད། །གཡོན་པ་མནན་པས་
[343a.4]རེངས་པ་ཕོངས་པ་དང་། །དགྲ་དང་ངག་དང་དུག་དང་དཔུང་དག་གོ། །ལུག་གཡོན་ཟླ་བའི་དབུས་གནས་ཐ་ཡིག་ཆུད། །ཛྷཾ་མཉེས་དཀར་པོ་འཛག་པར་བྱས་ནས་ནི། །འོད་དང་ཆ་ཀུན་རྫོགས་པ་དེ་ཡིས་ནི། །དུག་དང་ལུ་བ་རིམས་འབྲས་མཁའ་འགྲོ་མ། །གདོན་དང་འབྱུང་པོའི་གནོད་དང་ཚ་བ་དང་།
[343a.5]ངེས་པར་ཞི་བྱེད་ཡོངས་སུ་བཟླས་པའི་ཆུས། །སྔགས་པས་འགྲོ་བ་རྣམས་ལ་དེ་བྱེད་དོ། །ཁ་ལ་ཛྷཾ་ཡིག་ལྐོག་མར་ཀཱ་ཡིན་ནོ། །ལྟེ་བར་རི་ཡིག་གསང་ནི་རྐང་གཉིས་དྷྭཾ། །མདའ་དང་ཉུངས་ཀར་རྨ་བྱའི་སྒྲོ་སོགས་ཀྱིས། །འབྱུང་པོ་ལ་སོགས་གནོད་པ་འཇོམས་བྱེད་དེ། །དུང་སོགས་སྒྲ་ལའང་
[343a.6]ལན་བདུན་བཟླས་པས་སོ། །འབུམ་བཟླས་སྦྱིན་སྲེག་ཁྲི་ཡིས་མཆོད་གཏང་དང་། །ཙན་ཏིས་ཨོཾ་ཁི་ལ་ལ་ཀུ་ཡིན་ཏེ། །རུ་ནི་ལྐོག་མར་ཀུ་ནི་ནུ་བྲག་ཏུ། །ལླེ་ནི་གསང་བར་རྐང་གཉིས་སྭཱ་ཧཱའོ། །སྟོང་བཟླས་སྐུད་པར་བཏབ་པ་རྣ་བར་བཏགས། །དེ་ནི་ནགས་སུ་སྦྲུལ་གྱིས་མི་འཇིགས་སོ། །ས་གར་
[343a.7]སོགས་བྲིས་ཁྱིམ་གཞག་དེ་མི་འོང་། །བི་རི་མ་ཧཱ་སེ་ན་ཙན་ར་དང་། །ཙན་ཏིས་འབུམ་བདུན་རེ་རེས་དབང་ཀུན་འགྲུབ། །ཨོཾ་སུ་ཝརྞ་རེ་ཁེ་ཀུཀྐུ་ཏ་བི་ཀྲི་ཧ་རཱུ་པི་ཎི་སྭཱ་ཧཱ། ལག་མཐིལ་པད་དཀར་འདབ་བརྒྱད་དབུས་སུ་ནི། །ཡི་གེ་འདྲེན་པ་གཞན་ལ་གཉིས་གཉིས་བརྩེགས། །
[343b]
[343b.1]བ་མོ་འབབ་པས་སྨན་མ་ལ་བསངས་ན། །རས་བལ་འདབ་མ་རླུང་གིས་བསྐྱོད་བཞིན་ལྡང་། །ཨོ་ཨེ་ཧོ་མཱ་ཡེ། །བྷེ་རུཎྜེ་ཨཱ་ཨཱི་ཨཱུ་བཱི་ཛེ། །བྷ་རི་ཡ་ཀ་རཎྜེ། ཏཏྟ་མནྟ་ཨཱ་གྷོ་ཥེ། ཧཱུཾ་ཀ་རེ་བི་ཥ་ན་སེ་ཐཱ་བ་ར་ཛཾ་ག་མ་ཨ་ག་ཛ་ཀིཏྟ་མ་ཧཱ་ར་ཏ་ར་ཧཱུཾ་ཕཊ་སྭཱ་ཧཱ།། །།ཨོཾ་པཀྵིཾ་སྭཱ་ཧཱ།
[343b.2]ཥི་སིདྡྷ་ནཱ་ཐཱ་དི་བཱ་ཀ་རི་ཨཛྙཱ་ཤྲཱི་ཤྲཱིསྐཎྛ་ཤྲཱི་ནཱི་ལ་ཀཎྛ། ཥཱི་བི་ཥཾ་ཁ་ལ། །རི་མི་ཛཱི་མི་ཧཾ་ས། ཀྵི་པི་ཀྵི་པི་ཧཾ་ས་ཧཱུཾ་ཧཾ་ས། ཛཾ་ཧཾ་ས་ནཱཏྟི་བི་ཥི། ཏྲི་བྷ་བ་ནེ། ས་ཡ་ལེ། འབྲུམ་བུ་གཉིས་དང་དུག་ཟིན་ལ་སོགས་པ། །གསོ་དང་སྔར་གསུངས་བླ་མའི་མན་ངག་བཞིན། །
[343b.3]སྔགས་ཆབ་ཇི་ཙམ་འགྲོ་བའི་ལམ་དེ་ན། །དུག་སེལ་བྱེད་པར་ཡིད་ལ་གདོན་མི་ཟ། །པད་སྟེང་བུམ་བཅའ་སྔགས་བདུན་བཟླས་ཀླུ་མཆོད། །ཨོཾ་པཀྵིཾ་སྭཱ་ཧཱ། །ཞེས་བྱ་བ་དང་རིག་པའི་རྒྱལ་མོ་དྲུག །སྒྲ་རིས་ཟླ་དཀྱིལ་ལག་མཐིལ་བསམ་པས་ཀྱང་། །དུག་སེལ་བྱ་རྒོད་བཤད་
[343b.4]པ་མཐོང་བ་དང་། །སྐྱེ་བོའི་སྐྱིད་སྡུག་བདེ་བའི་སྒྲ་ཡིས་ཀྱང་། །ཚ་གསུམ་པོ་ལའི་ས་བོན་སྦྲང་རྩིར་སྦྱར། །སྣར་བླུགས་ལུས་སྐྱེས་སོགས་ཀྱི་ནད་འཇོམས་བྱེད། །ཚེར་ཅན་ཤིང་ཤའི་རྔ་ལ་ནི། །ཁ་གཉིས་པགས་པས་རྔ་གཡོགས་བྱས། །སྦྲུལ་དགྲའི་རྐང་གིས་བརྡུངས་ནས་ནི། །
[343b.5]ཇི་སྲིད་སྒྲས་ཁྱབ་དེ་དུག་འཇོམས། །ཕ་ནི་ཛ་དང་སུ་དཪྵ་ན་ལུས་བཏགས་ཀྱང་། །ཥེ་ཏེ་པུ་ནར་ན་བའི་ཁུ་བླུད་པས། །མ་ནིང་ཀ་ཀོ་ཏི་ཡི་ཙ། །བ་མར་དང་འཐུངས་དུག་གསུམ་སེལ། །ཀནྟ་ཤིར་ཤའི་རྩ་ཤུན་འབྲས་བཀྲུས་ཆུར། །སྦྱར་བ་ཨ་ཤ་ར་ཡི་ཉ་དག་ལ། །འཐུངས་ན་
[343b.6]ལོ་གཅིག་དུག་ནི་ཐུབ་པ་ཡིན། །ཤུ་དག་ཤིང་ཀུན་ནིམ་པའི་ཁུ་བ་དག །སྣར་བླུགས་དུག་གིས་སྐྲ་རྩེ་སླེབས་ཀྱང་སེལ། །ཀ་རཉྫ་ཡི་ཚེར་ཅན་ནིམྤའི་འདབ། །མར་སྦྲང་ཡུངས་ཀར་གོ་ནས་ཡང་སེལ། །ཁ་གཉིས་ལུས་ཆེ་ནེའུ་ལེ་ཡི་མིག། །སྦྲུལ་དགྲའི་མཁྲིས་པའི་ཆ་མཉམ་པ། །
[343b.7]ཁྱིམ་དུ་གཞག་པས་ཀྱང་ནི་སྦྲུལ་མགོ་འགེགས། ཤྲཱི་བཱ་ས། བི་རངྒ། ཨུ་ཤི་ར། སརྫ་ར་ས། ལཱཀྵ་བྷ་ལཱ་ལཱ་ཏ་ཀ། ཀུད་ཐ། ཏྲི་ཕ་ལ། ཨརྫུ་ན། ཀུ་སུ་མ། འདི་དག་ཆ་མཉམ་དུ་བ་ཡིས། །ལུས་སྐྱེས་ཙེ་རི་སྦྲང་མ་སོགས། །སྦྲུལ་ཡང་འབྲོས་ཞེས་ཀླུ་སྒྲུབ་གསུང་། །
[344a]
[344a.1]མེ་ཏོག་གྲོང་ཁྱེར་ཞེས་བྱ་བ། །བརྒྱ་བྱིན་ཕོ་བྲང་དང་མཉམ་པར། །ཟླ་ཆ་ཞེས་བྱའི་བྲམ་ཟེ་མེའི། །ལོ་རྒྱུས་ཀྱང་ནི་ལྔ་པ་ཡིན། །དཔལ་མཁའ་ལྡིང་གྲུབ་པའི་བསྟན་བཅོས་བྲམ་ཟེ་ཤང་ཀུས་མཛད་པ་རྫོགས་སོ། །
[344a.2]གུ་ཎ་སཱ་ག་ར། འདིར་ནི་བླ་མ་དམ་པའི་རྗེས་འབྲངས་ཏེ། །དཔལ་ལྡན་ཤང་ཀུ་བདག་གིས་མདོར་བསྡུས་བྲིས། །དགེ་བ་དེ་ཡིས་སྲིད་གསུམ་མ་ལུས་པ། །དུག་མེད་བདུད་རྩིའི་གོ་འཕང་བསྟེན་པར་ཤོག། །རྒྱ་གར་གྱི་མཁན་པོ་དཔལ་བྲམ་ཟེ་ཨ་
[344a.3]བ་དྷཱུ་ཏཱི་ཆེན་པོ་དཔེ་མེད་ཀྱི་ཞལ་སྔར། །ལོ་ཙཱ་བ་བནྡེ་པྲཛྙཱ་ཀཱིརྟིས་བསྒྱུར་བའོ།། །།དབང་ཕྱུག་ཆེན་པོས་མཁའ་ལྡིང་དུ་སྤྲུལ་ནས། མཁའ་ལྡིང་རྒྱ་མཚོ་བ་འབུམ་ཕྲག་བཞི་བཤད། དེ་བྲམ་ཟེ་སང་ཀུས་དབང་བསྐུར་གྱི་ཚེ་
[344a.4]ཀླུ་བདུད་ཀྱི་དུག་ཡོད་པ་ལ། འཇོག་པོའི་དུག་ཁམ་ཕོར་དུ་མར་དང་སྦྲང་རྩི་བྱིན་པ་མ་ཡོག །བདུན་པོ་ཀུན་གྱི་བུ་མོ་ནུ་མོ་བཀུག་ནས་ཆུང་མར་བྱས། འཇོག་པོའི་བུ་མོ་བཀུག་པས་མོས་ཕུ་བྱས་དུག་གིས་ཟིན་ནས་ཤི་ལ་ཐུག་པས། ཡུལ་མི་ཀུན་གྱིས་ཁྱེད་
[344a.5]གྲོངས་ན་ངེད་ཀྱི་དུག་སུས་གསོ་བྱས་པས། མཆོད་སྡོང་ཚུགས་ཤིག་ཟེར་ནས། ནམ་མཁའ་ལྡིང་གི་མཆོད་སྡོང་རྡོ་རིངས་སྟེང་དུ་བཙུགས། སྟེང་ནས་རྡོའི་གདུགས་ཕུབ་པ་ཅིག་བྱས། ཁོས་འཁྱུད་ནས་སྔགས་བཟླས་ཏེ། ཀུན་དུག་ཞི་
[344a.6]བར་བྱེད་དོ། །དེ་ལྟ་བུའི་ཤང་ཀུས་མཛད་དོ།། །།དུས་དང་དུས་མ་ཡིན་པ་ལ་ལྔ་སྟེ། རྨའི་མཚན་ཉིད་དང་། ཕོ་ཉའི་མཚན་ཉིད་དང་། གནས་དང་། ཚེས་གྲངས་དང་། གཟའ་དང་། རྒྱུ་སྐར་དང་། ཆོས་མཐུན་པ་དང་། མི་མཐུན་
[344a.7]པ་དང་། དུས་དང་། དགོས་པའི་དབྱེ་བ་དང་། རགས་པ་དང་། སྟོང་པ་སྟེ་དུག་ཟིན་གྱི་མཚན་ཉིད་དང་། དུས་མ་ཡིན་པར་མི་འཆི་བ་བསྟན་པའོ། །ཉིང་དགོས་ལ་གསུམ། ཕྲིན་ལས་ཐམས་ཅད་ཀྱི་སྣོད་དུ་འགྱུར་བའི་དགོས་པ་དང་། སེམས་
[344b]
[344b.1]ཀྱི་སྲོག་འཛིན་པ་དང་། ཕྱོགས་ཐམས་ཅད་དུ་གྲགས་པས་ཁྱབ་པའོ།། །།མཆོད་བརྗོད་དང་། དགོས་འབྲེལ་དང་། གཞུང་བཤད་པ་གསུམ་མོ། །གཞུང་ལ་གཉིས། ལུས་རྣམ་གཞག་དང་། ཡན་ལག་རྒྱས་བཤད་
[344b.2]དོ། །ཨོཾ་ཙ་ཀྲ་ར་ཧི་ཙ་ཀྲ་བྷི་ད་ནི་གྷ་ཎ་ཏི་ཀཱ་རི་ཧཾ། ས་གཞི་ལྕི་བས་མཎྜལ་གྲུ་བཞི་བྱུག །དུང་དང་བུ་ཚ་བཀྲུས་ལ་ཐུབ་པ་དང་ཁ་བྱང་དུ་བསྟན། རང་ཡང་ཁ་བྱང་དུ་བལྟས་ལ། དུང་ལ་གུ་གུལ་བདུག །གཡས་གཡོན་གང་དུ་འཁོར་འདོད་པ་དེ་ངོས་
[344b.3]སུ་དུང་བསྐོར། ལག་པ་གཉིས་ཀྱི་བར་དུ་དུང་གཟུང་། དུང་ལ་ཁ་གཏད་ལ་སྔགས་བཟླ། བུ་ཚའི་མགོ་ལ་མེ་ཏོག་གཏོར། གཙང་པ་ལོ་ཙཱ་བའི་ཕྱག་དཔེ་ལས་བྲིས་སོ།། {T3704}༄༅༅། །རྒྱ་གར་སྐད་དུ། སྭཱ་ར་སྭ་ཏཱི་
[344b.4]སྟོ་ཏྲ་ནཱ་མ། བོད་སྐད་དུ། ལྷ་མོ་དབྱངས་ཅན་གྱི་བསྟོད་པ། སྟོན་ཟླ་རབ་རྒྱས་ཀུ་མུད་དུང་དང་ཆུ་ཤེལ་གངས་རི་ལྟར་དཀར་བ། །རབ་དཀར་དཀར་གསལ་གཟི་ལྡན་ཡིད་འཕྲོག་ལྷ་མོ་དབྱངས་ཅན་ལ་ཕྱག་འཚལ། །བདག་བློའི་མི་ཤེས་གཏི་མུག་རྨོངས་པའི་ཚོགས་
[344b.5]ནི་ཀུན་ནས་འཇོམས་པ་དང་། །སྨྲ་ངན་སུན་འབྱིན་ཐོགས་མེད་ཀུན་གཟིགས་སྤོབས་པའི་གཏེར་མཆོག་རྒྱས་པར་མཛོད། །སྒྲིབ་གཉིས་སྤྲིན་བྲལ་བློ་གྲོས་འོད་ཟེར་སྟོང་ལྡན་རབ་ཏུ་འཆར་ཀ་ཡི། །ཉི་མའི་ཟེར་གྱིས་གདུལ་བྱའི་པདྨོ་རབ་དུལ་ཁ་འབྱེད་རྣམ་
[344b.6]རྒྱས་པས། །རབ་ཏུ་དྲི་ཞིམ་བསིལ་ངད་དང་ལྡན་པདྨོའི་ཟེའུ་འབྲུའི་ངོས་དག་ལ། །བདག་བློས་གུས་པས་འཐུངས་པས་བློ་གྲོས་ཆེར་རྒྱས་སྦྲང་རྩིས་འགྲོ་རྣམས་སྐྱོང་། །གསེར་གྱི་རི་དང་ཀུན་མཁྱེན་ཆུ་གཏེར་ལྟ་བུར་ཀུན་ནས་ལྷུན་ཆགས་པ། །རྩོད་པའི་ཕྱེ་མ་
[344b.7]ལེབ་དང་། བདུད་སྡེ་དུས་ཀྱི་རླུང་གིས་བསྐྱོད་མ་ཡིན། །བཅུ་དྲུག་ན་ཚོད་ལྟ་བུའི་བུ་མོ་རབ་མཛེས་སྒེག་པའི་ཉམས་དང་ལྡན། །ལྷ་ཡི་རྒྱན་རྣམས་དུ་མས་ཁྱོད་ཀྱི་ལུས་དང་ཡན་ལག་མཛེས་པ་ཡིས། །ཆུ་གཏེར་འགྲམ་གནས་མགྲིན་སྔོན་དགའ་བསྐྱེད་རྒྱ་མཚོའི་ལྷ་མོ་དབྱངས་
[345a]
[345a.1]ཅན་མ། །ཁྱོད་ལ་ཕྱག་འཚལ་བརྩེ་བས་བདག་བློའི་མི་ཤེས་མུན་པ་མྱུར་དུ་སོལ། །རབ་ཏུ་སྙན་པའི་དབྱངས་ལྡན་དྲི་ཟའི་བུ་མོ་རབ་མཛེས་ཡིད་འཕྲོག་མ། །ལག་གི་འདུ་བྱེད་རབ་ཏུ་བསྒྱུར་བས་ཚངས་པའི་གསུང་དབྱངས་རྣམ་འབྱུང་བས། །སྒྲ་
[345a.2]དང་ཚད་མ་སྙན་དངགས་མངོན་བརྗོད་སྡེབ་སྦྱོར་ལེགས་བཤད་ཆོས་རྣམས་ཀུན། །ཕ་རོལ་ཡིད་འཕྲོག་འཛིན་པར་ནུས་པ་ཅི་ཕྱིར་བདག་ལ་མི་སྩོལ་ལགས། །ཁྱོད་ཀྱི་ཐུགས་ནི་ཀུན་དུ་མི་གཡོ་རྒྱ་མཚོ་ཆེན་པོ་ལྟ་བུ་སྟེ། །ཐུགས་རྗེའི་རླབས་ཤུགས་དྲག་ཏུ་བསྐྱེད་པས་འགྲོ་
[345a.3]བའི་གདུང་བ་རབ་ཏུ་སོལ། །དབང་གི་རྒྱལ་པོའི་འབྱུང་གནས་ཡིད་བཞིན་རེ་སྐོང་དབྱངས་ཅན་རྒྱ་མཚོ་ཡིས། །རྨོངས་པའི་གདུང་བས་གདུངས་པའི་སྐྱེ་བོ་རིངས་པར་སྐྱོང་བ་དང་། །གཏི་མུག་དག་གིས་བློ་དམན་སྐྱེ་བོའི་རེ་བ་མྱུར་དུ་སྐོངས། །བདག་བློའི་ཀུ་མུ་ད་ནི་རབ་
[345a.4]ཏུ་ཁ་ཟུམས་རྣམ་པར་གནག་པ་ལ། །བསིལ་ཟེར་བྱེད་པ་རབ་ཏུ་སྤྲིན་བྲལ་དཀྱིལ་འཁོར་རྣམ་པར་རྒྱས་པ་ཡིས། །ཀུ་མུད་ཁ་བྱེ་རབ་རྒྱས་ཟེའུ་འབྲུ་ཡི་བསིལ་དངར་རྣམ་པར་སྤེལ་བར་མཛོད། །རབ་ཏུ་དྲི་བྲལ་རྐྱེན་གྱི་དྲི་མས་མ་ཕོག་མ་འགགས་ཁྱོད་ཀྱི་སྐུ། །ཀུན་
[345a.5]དུ་ཚངས་པའི་དབྱངས་ཅན་ཅ་ཅོའི་དྲི་བྲལ་ཁྱོད་ཀྱི་གསུང་། །ཤེས་བྱ་ཀུན་ལ་ཐོགས་པ་མེད་པའི་ཡེ་ཤེས་དང་ལྡན་ཁྱོད་ཀྱི་ཐུགས། །བསྟོད་པ་འདི་ཡིས་བསྟོད་ལ་དབྱངས་ཅན་མ་ཡིས་བློ་གྲོས་མཆོག་རབ་སྩོལ། །དབྱངས་ཅན་གྱི་བསྟོད་པ་འདི་ནི། ལྷོ་ཕྱོགས་
[345a.6]ཀྱི་རྒྱུད་དུ་བྱུང་བའི་མཁས་པ་ཆེན་པོ་པཎྜི་ཏ་ནག་མོའི་ཁོལ་གྱིས་དབྱངས་ཅན་མ་ཞལ་གཟིགས་པའི་དུས་སུ་དགྱེས་ཏེ་བསྟོད་པ་རྫོགས་སོ།། །།གང་ཞིག་འདི་འདོན་པ་ལ་ཤེས་རབ་སྩོལ་བར་ཁས་བླངས་
[345a.7]སོ། །རྒྱ་གར་གྱི་མཁན་པོ་པཎྚི་ཏ་ཛྙཱ་ན་ཤཱི་ལ་དང་། ལོ་ཙཱ་བ་དགེ་སློང་ཆོས་འབར་གྱིས་བསྒྱུར་བའོ།། །།